﻿व्‍यवस्‍था.
14.
छिपिं परमप्रभु छिमि परमेश्‍वरया मनूत खः। सिनावंम्‍ह मनूया लागि दुखं च्‍वनीबलय् छिमिसं थःगु म्‍हय् घाः याये मते अथवा मेपिंन्‍सं याःथें छ्यंया न्‍ह्यःने च्‍वंगु सँ खाये मते। 
छाय्‌धाःसा छिपिं परमप्रभु छिमि परमेश्‍वरया लागिं छगू पवित्र जाति खः। परमप्रभुं पृथ्‍वीइ दुपिं जातितपाखें छिमित थः विशेष मनूत, मू वंगु सम्‍पत्ति जुइत ल्‍ययादीगु दु। 
छिमिसं घच्‍चाइपुगु छुं नये मते। 
छिमिसं नये ज्‍यूपिं पशुत थुपिं हे खः – द्वहं, फै, दुगु, 
चल्‍ला, धलयसा, हरिण, चिधिकःपिं चल्‍ला, गुँ दुगुचा, साबर दुगुचा, याःसा व गुँफै। 
पशुत मध्‍ये तुतिख्‍वः बाःपिं व लिन्‍ह्ययाः नइपिनिगु ला छिमिसं नये ज्‍यू। 
अय्‌नं तुतिख्‍वः मबाःसां लिन्‍ह्ययाः नइपिं थुपिं नये मते – ऊँट, खराचा व शापान। थुपिं लिन्‍ह्यया नइपिं खःसां, थुपिं छिमिगु लागि अशुद्ध खः। 
फा नं अशुद्ध खः, छाय्‌धाःसा वयागु तुतिख्‍वः ला बाः अय्‌सां वं लिन्‍ह्ययाः मनः। छिमिसं इमिगु ला नये मते, इमिगु सीम्‍ह नं थी मते। 
लखय् च्‍वनिपिं पपू व बिखू दुपिं जन्‍तुत धाक्‍व छिमिसं नये ज्‍यू। 
पपू व बिखू मदुपिं छिमिसं नये मते। उपिं छिमिगु लागिं अशुद्धपिं खः। 
छिमिसं शुद्धपिं झंगःत नये ज्‍यू। 
अय्‌नं छिमिसं थुपिं नये मते – तःधिकःम्‍ह इमा, गिद्ध, हाकुम्‍ह गिद्ध, 
ह्याउँम्‍ह बाय्‌चा, हाकुम्‍ह बाय्‌चा, थीथी कथंयापिं सतांचा, 
फुक्‍क कथंयापिं सँक्‍वः, 
तसक्‍कं हालिम्‍ह न्‍हिकांझंगः, हुचिल, समुद्री झंगः, फुक्‍क कथंयापिं बाज 
चिधिकःम्‍ह न्‍हिकांझंगः, तःधिकःम्‍ह न्‍हिकांझंगः व तुयुम्‍ह न्‍हिकांझंगः 
सीम्‍ह नइम्‍ह गिद्ध, हाडगील, लः क्‍वः, 
सारस, फुक्‍क कथंयापिं ब्‍वह झंगः, कल्‍कि झंगः व चिकंलापा। 
अले पपू दुपिं फुक्‍क कीचात छिमिगु लागि अशुद्धपिं खः उपिं नये मते। 
अय्‌नं पपू दुपिं दक्‍व शुद्धपिं छिमिसं नये ज्‍यू। 
थःगु कालं सीम्‍ह पशुयात छिमिसं नये मते, छिमिसं छिमिगु शहरय् च्‍वंम्‍ह सुं परदेशीयात व नयेत बी ज्‍यू वा सुं मेपिं परदेशीतय्‌गु ल्‍हातय् मी फु। छिपिं धाःसा परमप्रभु छिमि परमेश्‍वरया लागिं छगू पवित्र जाति खः। च्‍वलय्‌या मचायात वया मांया दुरुइ दय्‌के मते। 
दँय्‌दसं बुँइ सःगु फलया झिब्‍वय् छब्‍व अलग तयाति। 
परमप्रभुं थःगु नां तयेत ल्‍ययादीगु थासय् जक थःगु अन्‍न, दाखमद्य, जैतून चिकंया झिब्‍वय् छब्‍व व थः सा द्वहं व फैच्‍वलय्‌या न्‍हापां बूपिं मस्‍तय्‌त वय्‌कःया न्‍ह्यःने नयेगु या। छिमिसं वय्‌कःयात न्‍ह्याबलें हनाबना तयेगु सय्‌केत थथे यायेगु या। 
परमप्रभु छिमि परमेश्‍वरं थःगु नां तयेत ल्‍ययादीगु थाय् छिमिगु थासं तापानाः छिमिसं वय्‌कलं सुवाः बियादीबलय् झिब्‍वय् छब्‍व यंके मफुत धाःसा 
थःगु झिब्‍वय् छब्‍व वहः कयाः म्‍यु, अले व वहः थःगु ल्‍हातय् ज्‍वनाः परमप्रभु छिमि परमेश्‍वरं ल्‍ययादीगु थासय् हुँ। 
थःत यःकथं सा द्वहं, फैच्‍वलय्, दाखमद्य वा थ्‍वँ, न्‍ह्यागु हे जूसां व हे वहलं न्‍यानाः थः छेँजःपिं नापं छिमिसं परमप्रभु छिमि परमेश्‍वरया न्‍ह्यःने नयाः लसता हँ। 
छिमिगु शहरय् च्‍वनिपिं लेवीया सन्‍तानतय्‌त बांलाक बिचाः या, छाय्‌धाःसा इमिके थःगु ब्‍वः व सर्बय मदु। 
स्‍वदँ स्‍वदँ फुइबलय् छिमिसं व दँया बालियागु फुक्‍क झिब्‍वय् छब्‍व शहरया धुकुतिइ तयाब्‍यु। 
अले छुं ब्‍व व सर्बय मदुपिं लेवीया सन्‍तानत, परदेशीत, मांबौ मदुपिं वा भाःत सी धुंकूपिं वयाः प्‍वाजाय्‌क नयेमा, अले परमप्रभु छिमि परमेश्‍वरं छिमिगु फुक्‍क ज्‍याय् छिमित सुवाः बियादीमा। 
