﻿व्‍यवस्‍था.
12.
परमप्रभु छिमि पुर्खातय् परमेश्‍वरं छिमित अधिकार यायेत बियादीगु देशय् छिपिं म्‍वानाच्‍वंतले बांलाक मानय् यायेमाःगु विधि व नियम थुपिं हे खः। 
छिमिसं व देश त्‍याकाकाइबलय् अनयापिं मनूतय्‌सं तःजाःगु डाँडाय्‌, ततःमागु सिमा क्‍वय् व पर्वत पर्वतय् थः द्यःतय्‌त पुजा याइगु थाय् छिमिसं भज्‍यंक स्‍यंकाब्‍यु। 
इमिगु वेदी थुनाब्‍यु अले पुजा याइगु ल्‍वहं तछ्यानाब्‍यु। इमि अशेरा द्यःमय्‌जुयागु थां मिइ छ्वयेकाछ्व। इमि द्यःतय् मूर्ति क्‍वथलाब्‍यु अले पुजा याइगु थासं इमिगु नां हे मदय्‌काछ्व। 
छिमिसं परमप्रभु छिमि परमेश्‍वरयागु आराधना इमिसं इमि द्यःयात आराधना याःथें याये मते। 
तर परमप्रभु छिमि परमेश्‍वरं थःगु नां तयेत छिमि खलःतय् दथुं गुगु थाय् ल्‍ययादी व थाय्‌यात मा। व थासय् हे छिपिं वनेगु या। 
अन हे छिमिसं थःगु होमबलि, बलित, झिब्‍वय् छब्‍व, अले पवित्रगु देछा, भाकलया देछा व थः यःछि बलि अले सा द्वहं, फैच्‍वलय्‌या न्‍हापां बूम्‍ह मचा यंकेगु या। 
अले अन हे छिमिसं व छिमि छेँजःपिन्‍सं परमप्रभु छिमि परमेश्‍वरया न्‍ह्यःने नयेत्‍वनेगु याइ। छिमिसं यायेगु फुक्‍क ज्‍याय् लसता हनी, छाय्‌धाःसा परमप्रभु छिमि परमेश्‍वरं छिमित सुवाः बियादीगु दु। 
व ई वइबलय् छिमिसं याना वयाच्‍वंगु थें याये मते, आः तक छिमिसं थः यःथें याना वयाच्‍वंगु खः, 
छाय्‌धाःसा छिपिं याउँक च्‍वनेगु थाय् व परमप्रभु परमेश्‍वरं छिमित बियादीत्‍यंगु सर्बयलय् आः तक नं मथ्‍यंनि। 
छिपिं यर्दन छिनाः परमप्रभु छिमि परमेश्‍वरं छिमित सर्बयकथं बियादीगु देशयात त्‍याकाः अन न्‍ह्याबलेंया निंतिं च्‍वनी। अले वय्‌कलं छिमित प्‍यखेरं च्‍वंपिं शत्रुतपाखें बचय् यानाः आराम बियादी। 
अन हे परमप्रभु छिमि परमेश्‍वरं थःगु नां तयेत ल्‍ययादीगु थासय् छिमित जिं आज्ञा बियागु छिमिगु होमबलि, मेमेगु बलित, झिब्‍वय् छब्‍व, थः यःछि बलि अले छिमिसं परमेश्‍वरयात बी धकाः भाकल याःगु भिंगु भिंगु देछा हजि। 
अन हे छिमि काय् म्‍ह्याय्‌पिन्‍सं, च्‍यःभ्‍वातिंत व छिमि शहरय् च्‍वनाच्‍वंपिं थःगु ब्‍व व सर्बय मदुपिं लेवीया सन्‍तानतय्‌सं परमप्रभु छिमि परमेश्‍वरयागु न्‍ह्यःने लसता हँ। 
होश यानाच्‍वँ! छिमिसं थःगु होमबलि छिमिसं खंगु न्‍ह्याथाय् नं छाये मते। 
परमप्रभुं छिमि कुलतपाखें ल्‍ययादीगु थासय् जक छा, अले जिं छिमित आज्ञा बियागु फुक्‍क ज्‍या अन हे या। 
अथेसां छिमिसं थथःगु शहरय् थःत यःछि व परमप्रभु थः परमेश्‍वरं बियादीगु सुवाःकथं हरिण व चल्‍ला थें थः पशु नं स्‍यानाः नयेफु। शुद्ध व अशुद्ध न्‍ह्याम्‍हय्‌सिनं नयेफु। 
हि धाःसा छिमिसं नये मते। उकियात लः थें बँय् प्‍वंकाब्‍यु। 
छिमिसं छिमिगु अन्‍न, न्‍हूगु दाखमद्य, जैतूनया चिकंया झिब्‍वय् छब्‍व वा सा द्वहं, फैच्‍वलय्‌या न्‍हापां बूम्‍ह पशु वा भाकलयागु न्‍ह्यागु नं देछा, थः यःछिं बलि वा मेगु देछा छिमिगु थथःगु शहर दुने नये मते। 
बरु छिपिं, छिमि काय्‌म्‍ह्याय्‌पिं, छिमि च्‍यःभ्‍वातिंत अले छिमिगु शहरय् च्‍वनाच्‍वंपिं लेवीया सन्‍तानत नापं वय्‌कलं ल्‍ययादीगु थासय् नयेगु या। परमप्रभु छिमि परमेश्‍वरया न्‍ह्यःने छिमिसं याइगु थःपिनिगु फुक्‍क ज्‍याय् लसता हँ। 
थःगु देशय् छिपिं म्‍वातले लेवीया सन्‍तानतय्‌त बांलाक बिचाः या। 
परमप्रभु छिमि परमेश्‍वरं थःगु बचंकथं छिमिगु देश तःकू यानाबी धुंकाः छिमित ला नये मास्‍ति वःसा थःत गुलि नये मास्‍ति व उलि न। 
परमप्रभु छिमि परमेश्‍वरं थःगु नां तयेत ल्‍ययादीगु थाय् छिमिगु छेँनं तापाः जूसा, परमप्रभु परमेश्‍वरं छिमित बियादीगु सा द्वहं वा फैच्‍वलय् जिं बियागु आज्ञाकथं स्‍यानाः थःगु शहरय् थःत गुलि यः उलि नयेफु। 
छिमिसं हरिण व चल्‍लाया ला न थें हे उपिं न। शुद्ध व अशुद्ध न्‍ह्याम्‍हय्‌सिनं व नयेफु। 
तर हि गुबलें नये मते छाय्‌धाःसा हि जीवन खः, अले छिमिसं ला नापं जीवन नये मते। 
छिमिसं हि नये मते। उकियात लःयात थें बँय् प्‍वंकाब्‍यु। 
छिमिसं उकियात नये मते, अले छिमिसं परमप्रभुया मिखाय् भिं ताःगु ज्‍या याःगुलिं छिपिं व छिमि लिपायापिं सन्‍तानतय्‌गु भिं जुइमा। 
अय्‌नं छिमिसं देछा व भाकलयागु देछा कयाः परमप्रभुं ल्‍ययादीगु थासय् हुँ। 
छिमिसं थःगु होमबलिया ला व हि परमप्रभु छिमि परमेश्‍वरयागु वेदीइ छा। बां ब्‍यूगुया हि परमप्रभु छिमि परमेश्‍वरयागु वेदीया लिकसं प्‍वंकाबीमाः, ला धाःसा छिमिसं नयेफु। 
जिं छिमित बियागु आज्ञा बांलाक न्‍यँ, अले छिमिसं परमप्रभु छिमि परमेश्‍वरयात यःगु ज्‍या याःगुलिं छिमिगु व छिमि सन्‍तानतय्‌गु भिं जुइ। 
छिमिसं लिनाछ्वये त्‍यंपिं जातितय्‌त परमप्रभु छिमि परमेश्‍वरं छिमिगु न्‍ह्यःनेनं नाश यानादी। अथे जूसां छिपिं इमिगु देशय् च्‍वनीबलय् 
होश यानाच्‍वँ! मखुसा इपिं नाश जुइ धुंकाः छिपिं नं इपिं थें जालय् तक्‍यनी। “इमिसं थः द्यःतय्‌त पुजा याःगु थें जिमिसं नं याये धकाः धयाः इमि द्यःतय्‌गु बारे न्‍यनेकने याये मते।” 
छिमिसं परमप्रभु थः परमेश्‍वरया आराधना इमिसं इमि द्यःयात आराधना याःथें याये मते, छाय्‌धाःसा इमि द्यःतय्‌त पुजा याइबलय् इमिसं परमप्रभुयात मयःगु फुक्‍क कथंयागु घच्‍चाइपुसे च्‍वंगु ज्‍या याइ। इमिसं थःकाय् म्‍ह्याय्‌पिन्‍त तक नं थः द्यःतय् लागिं मिइ तयेगु याः। 
जिं छु छु आज्ञा बियागु दु उपिं फुक्‍क बांलाक मानय् या। उकी छुं तने नं मते लिकाये नं मते। 
