﻿व्‍यवस्‍था.
10.
उबलय् परमप्रभुं जितः धयादिल, “न्‍हापायागु थें कतां कियाः निपा मेगु ल्‍वहं पौ दय्‌कि, अले पहाडय् जिथाय् थाहां वा। छगः सिँयागु सनू नं दय्‌कि। 
उपिं पौलय्‌ छं तछ्याःगु न्‍हापायागु पौलय्‌ च्‍वयातःगु खँ हे जिं च्‍वयाबी। अनंलि छं उपिं पौयात सनूइ तयाब्‍यु।” 
अथे जुयाः जिं खयःसिँयागु छगः सनू दय्‌का, अले चानाः न्‍हापायागु निपा ल्‍वहं पौ थें ल्‍वहंयागु निपा पौ दय्‌का। अले थःगु ल्‍हातय् उपिं पौ ज्‍वनाः पहाडय् थाहां वना। 
परमप्रभुं छिपिं मुनाच्‍वंबलय् पहाडय् मिया दथुं छिमित बियादीगु झिगू आज्ञा न्‍हापा थें उपिं पौलय् च्‍वयाः जितः बियादिल। 
अनंलि जि पहाडं कुहां वया, अले परमप्रभुं जितः आज्ञा बियादीगु थें जिं दय्‌कागु सनूइ उपिं पौ तयाबिया। उपिं उकी हे दु। 
(इस्राएलीत याकानीतय्‌गु तुंनिसें मोसेरा तक यात्रा यात। अन हारून सित, अले वयात अन हे थुनाबिल। वया काय् एलाजारं वयागु थासय् पुजाहारीया ज्‍या यात। 
अनं इस्राएलीत गुदगुदा तक न्‍यासि वन, अले गुदगुदां यक्‍व खुसिचात व बुँगाःचात दुगु योतबाताय् वल। 
थौं तक जुया वयाच्‍वंगु थें परमप्रभुयागु बाचाया सनू क्‍वबीत परमप्रभुया न्‍ह्यःने च्‍वनाः वय्‌कःयागु सेवा यायेत अले वय्‌कःया नामय् सुवाः बीत उबलय् परमप्रभुं लेवी कुलयात ल्‍ययादिल। 
अथे जूगुलिं परमप्रभुं लेवीया सन्‍तानतय्‌त मेगु इस्राएली कुलतय्‌त थें ब्‍व व सर्बय बियामदी। परमप्रभु छिमि परमेश्‍वरं इमित धयादीगु थें परमप्रभु हे इमिगु सर्बय खः।) 
न्‍हापा थें जि पहाडय् पिइन्‍हु व पिइचा तक च्‍वना। अले थ्‍वपालय् नं परमप्रभुं जिगु बिन्‍ति न्‍यनादिल अले छिमित नाश यायेगु इच्‍छा यानामदिल। 
परमप्रभुं जितः धयादिल, “मनूतय् न्‍ह्यलुवाः जुयाः इमित लँपु क्‍यँ। जिं इमि पुर्खालिसें बी धकाः पाफयाः बचं बियागु देशय् दुहां वनाः इमिसं अन अधिकार यायेमा।” 
हे इस्राएल, परमप्रभु छिमि परमेश्‍वरं छिमिसं छु याःगु यय्‌कादी? छिमिसं वय्‌कःया ग्‍याःभय काःगु, वय्‌कःया लँपुइ वंगु व वय्‌कःयात माया याःगु अले दुनुगलंनिसें व थःगु प्राणं वय्‌कःयागु सेवा याःगु यय्‌कादी 
अले हानं जिं थौं छिमिगु हे भिंया लागिं बियाच्‍वनागु परमप्रभुया आज्ञा व विधि मानय् या। 
आकाश व दकलय् ततःजागु स्‍वर्ग नं, पृथ्‍वी व उकी दुगु फुक्‍कं परमप्रभु छिमि परमेश्‍वरयागु हे खः। 
अय्‌नं छिमि पुर्खातय्‌त परमेश्‍वरं माया यानाः ल्‍ययादिल। अथे जुयाः मेगु फुक्‍क जातितय् दथुं वय्‌कलं छिपिं, इमि सन्‍तानतय्‌त ल्‍ययादिल। थथे छिपिं थौं तक नं वय्‌कःयागु ल्‍यःपिं मनूत खः। 
अथे जुयाः थथःगु मन हीकि, आवंलि जिराहा जुइ मते। 
परमप्रभु छिमि परमेश्‍वर हे ईश्‍वरतय्‌ परमेश्‍वर व प्रभुतय् नं प्रभु, अले दकलय् तःधंम्‍ह परमेश्‍वर खः। वय्‌कः ख्‍वाः स्‍वयाः ज्‍या यानामदीम्‍ह, घुस नयाःमदिम्‍ह, तःधंम्‍ह व भय कायेमाःम्‍ह परमेश्‍वर खः। 
वय्‌कलं मांबौ मदुपिं मस्‍त व भाःत सी धुंकूपिन्‍त रक्षा यानादी अले परदेशीतय्‌त माया यानाः नयेगु नसा व वसः बियादी। 
छिमिसं नं परदेशीतय्‌त माया यायेमाः, छाय्‌धाःसा मिश्र देशय् छिपिं नं परदेशी जुयाच्‍वंगु खः। 
थः परमप्रभु परमेश्‍वरया ग्‍याःभय का अले वय्‌कःया सेवा या। वय्‌कः नाप नापं जु, अले वय्‌कःया नामय् जक पाफयेगु या। 
वय्‌कः हे च्‍वछाये बहःम्‍ह छिमि परमेश्‍वर खः। वय्‌कलं छिमिगु निंतिं छिमिसं खंक हे तःधंगु व ग्‍यानपुसे च्‍वंगु अजू चाइपुगु ज्‍या यानादिल। 
छिमि पुर्खा ला न्‍हयेम्‍ह (७०) जक मिश्रय् वंगु खः, अय्‌नं आः परमप्रभु छिमि परमेश्‍वरं छिमित आकाशया नगु थें अल्‍याख यानादीगु दु। 
