﻿गन्‍ती.
33.
मोशा व हारूनया न्‍ह्यलुवालय् मिश्रं इस्राएलीत पुचः पुचः जुयाः यात्रा याःबलय् इपिं थ्‍व थ्‍व थासय् बाय् च्‍वन। 
मोशां परमप्रभुया उजंकथं यात्राबलय् बाय् च्‍वंगु थाय्‌या धलः दय्‌कल। 
न्‍हापांगु लाया झिंन्‍यान्‍हु खुन्‍हु इपिं रामसेसं न्‍ह्याः वन। छुत्‍काराया नखःया कन्‍हय् खुन्‍हु इपिं फुक्‍क मिश्रीतय्‌सं खंक हे धूमधामं पिहां वन। 
उखुन्‍हु मिश्रीत परमप्रभुं स्‍यानादीपिं इमि न्‍हापां बूपिं काय्‌पिन्‍त ल्‍हाकाच्‍वंगु जुल। थथे यानाः परमप्रभुं इमि द्यःतय्‌त सजाँय बियादीगु खः। 
इस्राएलीत रामसेसं वनाः सुक्‍कोतय् बाय् च्‍वन। 
इपिं सुक्‍कोतं वनाः मरुभूमिया सिथय् एथामय् बाय् च्‍वन। 
एथामं वनाः इपिं बाल-सेफोनया चुलिंचू लाःगु पी-हहीरोतपाखे लिहां वल। अले मिग्‍दोलया न्‍ह्यःने पाल ग्‍वयाः च्‍वन। 
इपिं पी-हहीरोतं वनाः लाल समुद्र छिनाः मरुभूमिइ दुहां वन। इपिं एथामया मरुभूमिइ स्‍वन्‍हु तक वनाः माराय् बाय् च्‍वन। 
अले मारां वनाः एलीमय् थ्‍यंकः वल। अन झिंनिगू बुँगाःचा व न्‍हयेमा ताय्‌गः सिमा दु। इपिं अन हेबाय् च्‍वन। 
इपिं एलीमं वनाः लाल समुद्र लिक्‍क बाय् च्‍वन। 
इपिं लाल समुद्रं वनाः सीनया मरुभूमिइ बाय् च्‍वन। 
इपिं सीनया मरुभूमिं वनाः दोफकाय् बाय् च्‍वन। 
इपिं दोफकां वनाः आलूशय् बाय् च्‍वन। 
इपिं आलूशं वनाः रपीदीमय् बाय् च्‍वन, अन मनूतय्‌त त्‍वनेत लः मदु। 
इपिं रपीदीमं वनाः सीनैया मरुभूमिइ बाय् च्‍वन। 
इपिं सीनैया मरुभूमिं वनाः किब्रोथ-हत्तावाय् बाय् च्‍वन। 
इपिं किब्रोथ-हत्तावां वनाः हसेरोतय् बाय् च्‍वन। 
इपिं हसेरोतं वनाः रित्‍माय् बाय् च्‍वन। 
इपिं रित्‍मां वनाः रिम्‍मोन-फारेसय् बाय् च्‍वन। 
इपिं रिम्‍मोन-फारेसं वनाः लिब्‍नाय् बाय् च्‍वन। 
लिब्‍नां वनाः रिस्‍साय् बाय् च्‍वन। 
इपिं रिस्‍सां वनाः केहेलाताय् बाय् च्‍वन। 
इपिं केहेलातां वनाः शेपेर पर्वतय् बाय् च्‍वन। 
इपिं शेपेर पर्वतं वनाः हरादाय् बाय् च्‍वन। 
इपिं हरादां वनाः मखेलोतय् बाय् च्‍वन। 
मखेलोतं वनाः तहतय् बाय् च्‍वन। 
इपिं तहतं वनाः तेरहय् बाय् च्‍वन। 
इपिं तेरहं वनाः मित्‍काय् बाय् च्‍वन। 
इपिं मित्‍कां वनाः हशमोनाय् बाय् च्‍वन। 
इपिं हशमोनां वनाः मसेरोतय् बाय् च्‍वन। 
इपिं मसेरोतं वनाः बने-याकानय् बाय् च्‍वन। 
इपिं बने-याकानं वनाः होर-हगिदगादय् बाय् च्‍वन। 
इपिं होर-हगिदगादं वनाः योतबाताय् बाय् च्‍वन। 
इपिं योतबातां वनाः अब्रोनाय् बाय् च्‍वन। 
इपिं अब्रोनां वनाः एस्‍योन-गेबेरय् बाय् च्‍वन। 
इपिं एस्‍योन-गेबेरं वनाः जीनयागु मरुभूमिइ दुगु कादेशय् बाय् च्‍वन। 
इपिं कादेशं वनाः एदोम देशया लागाय् दुगु होर पर्वतय् पाल ग्‍वयाः च्‍वन। 
इस्राएलीत मिश्रं पिहां वःगु पिइदँया न्‍यागूगु लाया न्‍हापां खुन्‍हु परमप्रभुया उजंकथं हारून पुजाहारी होर पर्वतय् थहां वनाः अन हे सित। 
हारून होर पर्वतय् स्‍यूबलय् व सछि व निइस्‍वदँ दुम्‍ह जुयाच्‍वन। 
कनान देशया नेगेवय् च्‍वनीम्‍ह आरादया कनानी जुजुं इस्राएलीत वयाच्‍वंगु दु धयागु खँ न्‍यन। 
इपिं होर पर्वतं वनाः सलमोनाय् बाय् च्‍वन। 
इपिं सलमोनां वनाः पूनोनय् बाय् च्‍वन। 
इपिं पूनोनं वनाः ओबोतय् पाल ग्‍वयाः च्‍वन। 
इपिं ओबोतं वनाः मोआबया सिमानाय् दुगु इये-अबारीमय् पाल ग्‍वयाः च्‍वन। 
इपिं इयीमं वनाः दीबोन-गादय् बाय् च्‍वन। 
इपिं दीबोन-गादं वनाः आल्‍मोन-दिब्‍लातैमय् बाय् च्‍वन। 
इपिं अल्‍मोन-दिब्‍लातैमं वनाः नेबो पर्वतया लिक्‍क अबारीमया डाँडाय् पालग्‍वया च्‍वन। 
इपिं अबारीमं वनाः यरीहो शहरया उखे यर्दन खुसिया सिथय् च्‍वंगु मोआबया ख्‍यलय् पाल ग्‍वयाः च्‍वन। 
यर्दन खुसिया सिथय् मोआबया ख्‍यलय् बेथ-यशीमोतंनिसें कयाः हाबिल-शित्तिम तक हे इपिं पाल ग्‍वयाः च्‍वन। 
अले यरीहो शहरया उखे यर्दन खुसि सिथय् मोआबया ख्‍यलय् परमप्रभुं मोशायात धयादिल, 
“इस्राएलीतय्‌त धा, ‘छिपिं यर्दन खुसि छिनाः कनान देशय् थ्‍यनीबलय् 
व देशयापिं मनूतय्‌त इमिगु देशं पितिनाछ्व। अले इमिगु कियातःगु झ्‍वाता व नाय्‌कातःगु मूर्ति फुक्‍कयात नाश यानाब्‍यु। इमिसं पुजा याइगु देगःचात नं स्‍यंकाब्‍यु। 
व देशयात त्‍याकाकयाः छिपिं अन हे च्‍वँ, छाय्‌धाःसा जिं व देश छिमित अधिकार यायेत बियागु दु। 
छिमिसं थथःगु सर्बयकथं व देशय् गोला तयाः जमिन इनाब्‍यु। अप्‍वः छेँजः दुगु कुलयात अप्‍वः अले कम छेँजः दुगु कुलयात छिमिसं कम सर्बय ब्‍यु। सुयागु गोला गन लाइ व वयागु हे जुइ। छिमिगु पुर्खाया कुलकथं थ्‍व इनाब्‍यु। 
“‘अय्‌नं छिमिसं व देशयापिं मनूतय्‌त लिनामछ्वसे, छिमिसं अन च्‍वने ब्‍यूपिं मनूत छिमिगु मिखाय् च्‍वंगु कं व म्‍हय् कँथं कयेगु थें जुइ। छिपिं व देशय् न्‍ह्याथाय् च्‍वंसां इमिसं छिमित दुःख बी। 
अले जिं इमित छु याये धकाः मनय् तयागु खः व हे जिं छिमित यानाबी।’” 
