﻿गन्‍ती.
30.
मोशां इस्राएली कुलनायःतय्‌त थथे धाल, “परमप्रभुं थ्‍व उजं बियादीगु दु – 
सुं मनुखं परमप्रभुलिसें भाकल यात धाःसा वा बचं बियाः पाफल धाःसा वं थःगु बचं पूवंकेमाः। वं थःगु वचन त्‍वःथुले मज्‍यू। वयागु म्‍हुतुं छु बचं पिहां वःगु खः वं व याये हे माः। 
“थः बौया छेँय् च्‍वनाच्‍वंबलय् हे सुं ल्‍यासेम्‍ह मिसां परमप्रभुलिसें भाकल यात वा बचं बियाः पाफल धाःसा, 
अले व भाकल वा बचं ब्‍यूगु न्‍यनाः नं वया बौ सुम्‍क च्‍वन धाःसा पाफःगु व बचं ब्‍यूगु दया हे च्‍वनी। 
अय्‌नं वया बौनं न्‍यंगु दिनय् हे वयात पन धाःसा वं याःगु भाकल व थःत ब्‍यूगु बचं छगू नं दयाच्‍वनी मखु। वया बौनं वयात पंगु जुयाः परमप्रभुं वयात क्षमा यानादी। 
“भाकल याये धुंकाः वा बिचाः मयासें बचं बीधुंकाः वयागु ब्‍याहा जुल धाःसा, 
अले वया भाःतं व खँ न्‍यनाः उखुन्‍हु वयात छुं मधाल धाःसा वयागु भाकल वा बचं ब्‍यूगु दया हे च्‍वनी। 
अय्‌नं वया भाःतं व खँ न्‍यनाः व हे दिनय् वयात पन धाःसा वयागु भाकल वा वं ब्‍यूगु बचं ज्‍यालगय् जुइ मखु। परमप्रभुं व मिसायात क्षमा यानादी। 
“भाःत सी धुंकूम्‍ह वा भाःतनापं बिस्‍कं च्‍वने धुंकूम्‍ह मिसां याःगु भाकल वा ब्‍यूगु बचं धाःसा दया हे च्‍वनी। 
“भाःतया छेँय् च्‍वनाच्‍वंम्‍ह सुं मिसां भाकल याःसा वा बचं बियाः पाफःसा 
अले व भाकल वा ब्‍यूगु बचं न्‍यनाः नं वया भाःत सुम्‍क च्‍वनाः मपन धाःसा व भाकल वा ब्‍यूगु बचं दया हे च्‍वनी। 
अय्‌नं वया भाःतं व न्‍यंगु दिनय् वयागु भाकल वा ब्‍यूगु बचंयात पन धाःसा वयागु म्‍हुतुं पिहां वःगु बचं ज्‍यालगे जुइ मखु। परमप्रभुं व मिसायात क्षमा यानादी। 
व मिसां थःगु जीवनयात दुःख बीगु भाकल वा बचं ब्‍यूगु दुसा वया भाःतं यःसा तयातये फइ, मयःसा तये फइ मखु। 
तर वया भाःतं न्‍हियान्‍हिथं छुं मधासें सुम्‍क च्‍वन धाःसा वयागु फुक्‍क भाकल वा ब्‍यूगु बचं दया हे च्‍वनी। न्‍यनाः नं व सुम्‍क च्‍वंगुलिं ज्‍यू धाःगु थें हे खः। 
तर वं थ्‍व न्‍यनाः छुं ई लिपा त्‍वाल्‍हात धाःसा थः कलाःया द्वं वं हे फयेमाः।” 
कलाः भाःतया दथुइ अले बौ व वया छेँय् च्‍वनीम्‍ह ब्‍याहा मजूम्‍ह म्‍ह्याय्‌या दथुइ मोशायात परमप्रभुं बियादीगु नियम थुपिं हे खः। 
