﻿गन्‍ती.
26.
महामारी दी धुंकाः परमप्रभुं मोशा व हारून पुजाहारीया काय् एलाजारयात थथे धयादिल, 
“इस्राएलया फुक्‍क खलःपाखें निइदँ व वस्‍वयां च्‍वय्‌यापिं लडाइँलय् वनेफुपिं मनूतय्‌त इमि थथःपिनि परिवारकथं ल्‍याःखा।” 
अले मोशा व एलाजार पुजाहारीं यरीहो शहरया उखे यर्दन खुसि सिथय् मोआबया ख्‍यलय् इमित मुंकाः थथे धाल, 
“परमेश्‍वरं मोशायात उजं बियादी थें निइदँ व वस्‍वयां च्‍वय्‌यापिं मनूत ल्‍याःखा!” मिश्रं पिहांवःपिं इस्राएलीतय् सन्‍तान थुपिं हे खः। 
इस्राएलया तःधिकःम्‍ह काय् रूबेनया सन्‍तान – हानोकपाखें हानोकीतय् वंश, पल्‍लुपाखें पल्‍लुईतय् वंश, 
हेस्रोनपाखें हेस्रोनीतय् वंश, कर्मीपाखें कर्मीतय् वंश दत। 
रूबेनीया वंश थुपिं हे खः – इमि ल्‍याःखाःपिं मनूत ४३,७३० म्‍ह दु। 
पल्‍लुया काय् एलीआब खः। 
एलीआबया काय्‌पिं नमूएल, दातान व अबीराम खः। दातान व अबीराम कोरहया पुचःनापं मिलय् जुयाः, मोशा व हारूनलिसे परमप्रभुया विरोध याःबलय् हाः वःपिं खलःया ल्‍ययातःपिं नायःत खः। 
पृथ्‍वीं थःगु म्‍हुतु चाय्‌काः इमित कोरह नापं हे नुनाछ्वःगु खः। कोरहया पुचःयापिं २५० म्‍ह मनूतय्‌त नं मिं नाश यात। अथे जुयाः इपिं छगू छुमां जुल। 
कोरहया काय्‌पिं धाःसा मसी। 
शिमियोनया सन्‍तान इमिगु वंशकथं थथे दु – नमूएलपाखें नमूएलीया वंश, यामीनपाखें यामीनीतय् वंश, याकीनपाखें याकीनीतय् वंश, 
जेरहपाखें जेरहातीतय् वंश, शौलपाखें शौलीतय् वंश, 
शिमियोनया वंश थुपिं हे खः। इमि ल्‍याःखाःपिं मनूत २२,२०० म्‍ह दु। 
गादया सन्‍तान इमि वंशकथं थथे दु – सेफोनपाखें सेफोनीतय् वंश, हाग्‍यीपाखें हाग्‍यीतय् वंश, शूनीपाखें शूनीतय् वंश, 
ओजनीपाखें ओजनीतय् वंश, एरीपाखें एरीतय् वंश, 
अरोदीपाखें अरोदीतय् वंश, अरेलीपाखें अरेलीतय् वंश दत। 
गादया वंश थुपिं हे खः। इमि ल्‍याःखाःपिं मनूत ४०,५०० म्‍ह दु। 
एर् व ओनान यहूदाया काय्‌पिं खः। तर इपिं कनान देशय् दुबलय् हे सित। 
यहूदाया सन्‍तान वंशकथं थथे दु – शेलाहपाखें शेलानीतय् वंश, फारेसपाखें फारेसीतय् वंश, जेरहपाखें जेरहातीतय् वंश दत। 
फारेसया सन्‍तान थथे दु – हेस्रोनपाखें हेस्रोनीतय् वंश, हामूलपाखें हामूलीतय् वंश दत। 
यहूदाया वंश थुपिं हे खः। इमि ल्‍याःखाःपिं मनूत ७६,५०० म्‍ह दु। 
इस्‍साखारया सन्‍तान वंशकथं थथे दु – तोलापाखें तोलाहीतय् वंश, पुवापाखें पुवातीतय् वंश, 
याशूबपाखें याशूबीतय् वंश, शिम्रोनपाखें शिम्रोनीतय् वंश दत। 
इस्‍साखारया वंश थुपिं हे खः। इमि ल्‍याःखाःपिं मनूत ६४,३०० म्‍ह दु। 
जबूलूनया सन्‍तान वंशकथं थथे दु – सेरेदपाखें सेरेदीतय् वंश, एलोनपाखें एलोनीतय् वंश, यहलेलपाखें यहलेलीतय् वंश दत। 
जबूलूनया वंश थुपिं हे खः। इमि ल्‍याःखाःपिं मनूत ६०,५०० म्‍ह दु। 
योसेफया सन्‍तान, मनश्‍शे व एफ्राइमया सन्‍तान वंशकथं थथे दु – 
मनश्‍शेया सन्‍तान – माकीरपाखें माकीरीतय् वंश। माकीरया काय् गिलादपाखें गिलादीतय् वंश। 
गिलादया सन्‍तान थुपिं हे खः ईएजेरपाखें ईएजेरीतय् वंश, हेलेकपाखें हेलेकीतय् वंश दत। 
अस्रीएलपाखें अस्रीएलीतय् वंश, शकेमपाखें शकेमीतय् वंश, 
शमीदापाखें शमीदीतय् वंश, हेपेरपाखें हेपेरीतय् वंश दत। 
हेपेरया काय् सलोफादया सुं काय् मदु, म्‍ह्याय्‌पिं जक दु। सलोफादया म्‍ह्याय्‌पिनिगु नां महला, नोअहा, होग्‍ला, मिल्‍का व तिर्सा खः। 
मनश्‍शेया वंश थुपिं हे खः। इमि ल्‍याःखाःपिं मनूत ५२,७०० म्‍ह दु। 
एफ्राइमया सन्‍तान वंशकथं थथे दु – शूतेलहपाखें शूतेलहीतय् वंश, बेकेरपाखें बेकेरीतय् वंश, तहनपाखें तहनीतय् वंश दत। 
शूतेलहया सन्‍तान थथे दु – एरानपाखें एरानीतय् वंश दत। 
एफ्राइमया वंश थुपिं हे खः। इमि ल्‍याःखाःपिं मिजंत ३२,५०० म्‍ह दु। योसेफया सन्‍तान वंशकथं थुपिं हे खः। 
बेन्‍यामीनया सन्‍तान वंशकथं थथे दु – बेलापाखें बेलाहीतय् वंश, अश्‍बेलपाखें अश्‍बेलीतय् वंश, अहीरामपाखें अहीरामीतय् वंश दत। 
शूपामपाखें शूपामीतय् वंश, हूपामपाखें हूपामीतय् वंश दत। 
बेलाया सन्‍तान थथे दु – आर्दपाखें आर्दीतय् वंश, नामानपाखें नामानीतय् वंश दत। 
बेन्‍यामीनया वंश थुपिं हे खः। इमि ल्‍याःखाःपिं मनूत ४५,६०० म्‍ह दु। 
दानया सन्‍तान वंशकथं थथे दु – शूहामपाखें शूहामीतय् वंश दत। दानया वंश थुपिं हे खः। 
थुपिं सकल शूहामीतय् वंश खः। इमि ल्‍याःखाःपिं मनूत ६४,४०० म्‍ह दु। 
आशेरया सन्‍तान वंशकथं थथे दु – यिम्‍नापाखें यिम्‍नीतय् वंश, यिश्‍वीपाखें यिश्‍वीतय् वंश, बरीआपाखें बरीअतीतय् वंश दत। 
अले बरीआया सन्‍तान थथे दु – हेबेरपाखें हेबेरीतय् वंश, मल्‍कीएलपाखें मल्‍कीएलीतय् वंश दत। 
आशेरया म्‍ह्याय्‌या नां सेरह खः। 
आशेरया वंश थुपिं हे खः। इमि ल्‍याःखाःपिं मनूत ५३,४०० म्‍ह दु। 
नप्‍तालीया सन्‍तान वंशकथं थथे दु – यहसीलपाखें यहसीलीतय् वंश, गुनीपाखें गुनीतय् वंश, 
येसेरपाखें येसेरीतय् वंश, शिल्‍लेमपाखें शिल्‍लेमीतय् वंश दत। 
नप्‍तालीया वंश थुपिं हे खः। इमि ल्‍याःखाःपिं मिजंत ४५,४०० म्‍ह दु। 
इस्राएलया मुक्‍क ल्‍याःखाःपिं मिजं मनूत ६,०१,७३० म्‍ह दु। 
परमप्रभुं मोशायात धयादिल, 
“थुपिं पुर्खातय्‌त देश सर्बयया निंतिं इमिगु नांया ल्‍याःकथं इनाब्‍यु। 
तःधंगु पुचःयात तःधंगु सर्बय अले चिधंगु पुचःयात चिधंगु सर्बय ब्‍यु। फुक्‍कसित इमिगु थःगु सर्बय धलखय् दुथ्‍याःगु ल्‍याःकथं बीमाः। 
देश गोला तयाः इनाकायेमाः। फुक्‍क पुचःतय्‌त दइगु अंश इमिगु पुर्खायागु कुलया नांकथं जुइमाः। 
तःधंगु पुचः जूसां चिधंगु पुचः जूसां इमिगु थथःगु सर्बय गोला तयाः इनाब्‍यु।” 
थथःगु वंशकथं ल्‍याःखाःपिं लेवीया सन्‍तानत थथे दु – गेर्शोनपाखें गेर्शोनीतय् वंश, कहातपाखें कहातीतय् वंश, मरारीपाखें मरारीतय् वंश दत। 
लेवीया कुलया वंशत थथे दु – लिब्‍नीतय् वंश, हेब्रोनीतय् वंश, महलीतय् वंश, मूशीतय् वंश, कोरहीतय् वंश। कहात अम्रामया पुर्खा खः। 
अम्रामया कलाःया नां लेवीया सन्‍तान योकेबेद खः। व लेवी कुलपाखें मिश्र देशय् बूम्‍ह खः। वं अम्रामपाखें हारून, मोशा व छम्‍ह म्‍ह्याय् मरियमयात बुइकल। 
नादाब, अबीहू, एलाजार व ईतामारया बौ हारून खः। 
नादाब व अबीहू धाःसा परमप्रभुया न्‍ह्यःने छाये मत्‍यःगु मि छाःबलय् सिनावन। 
लच्‍छि व लच्‍छिं च्‍वय्‌यापिं लेवी मिजंतय्‌गु ल्‍याः २३,००० म्‍ह दु। इमित मेपिं इस्राएलीतलिसें ल्‍याः मखा, छाय्‌धाःसा इमित इस्राएलीतय्‌गु दथुइ छुं सर्बय ब्‍यूगु मदु। 
मोशा व एलाजार पुजाहारीपाखें ल्‍याःखाःपिं थुपिं हे खः। इमिसं इस्राएलीतय्‌त यरीहो शहरया उखे यर्दन खुसिया सिथय् मोआबया ख्‍यलय् ल्‍याः खाःगु खः। 
मोशा व पुजाहारी हारूनं सीनैया मरुभूमिइ ल्‍याःखाःपिं छम्‍ह नं अन मदु। 
परमप्रभुं उपिं इस्राएलीतय्‌त मरुभूमिइ धात्‍थें सिनावनी धकाः धयादीगु खः। अथे जुयाः यपुन्‍नेया काय् कालेब व नूनया काय् यहोशू बाहेक उपिं मध्‍ये छम्‍ह नं मिजं म्‍वानामच्‍वं। 
