﻿गन्‍ती.
17.
परमप्रभुं मोशायात धयादिल, 
“इस्राएलीतलिसें खँ ल्‍हाः, अले इमि छगू छगू कुलया नायःपाखें छपु छपु यानाः झिंनिपु कथि का, अले छं इपिं फुक्‍कसिगु नां थथःगु कथिइ च्‍व। 
लेवीया कुलयागु कथिइ छं हारूनया नां च्‍व। छगू छगू कुलया नायःया निंतिं छपु छपु कथि दयेमाः। 
जिं छनापं नापलायेगु महा-पवित्र थासय् बाचाया सनूया न्‍ह्यःने उपिं तयाब्‍यु। 
जिं ल्‍ययातःम्‍हय्‌सिगु कथिं चुलि पिहां वइ। थथे इस्राएलीतय्‌सं छंगु विरोधय् याना हे च्‍वनीगु कचकच मदय्‌काछ्वये।” 
अले मोशां इस्राएलीतय्‌त थ्‍व खँ न्‍यंकल। इमि नायःतय्‌सं थथःपिनि कुलकथं छम्‍ह छम्‍ह नायःया निंतिं छपु छपु यानाः झिंनिपु कथि वयात बिल। हारूनया कथि नं इमिगु कथिया दथुइ दु। 
मोशां उपिं कथि कयाः महा-पवित्र थासय् बाचाया सनूया न्‍ह्यःने तयाबिल। 
कन्‍हय् खुन्‍हु मोशा महा-पवित्र थासय् दुहां वन। अले लेवीया कुलया निंतिं तयातःगु हारूनया कथिं चुलि पिहां वःगु खन। उलि जक मखु, मुखू पिहां वयाः स्‍वां ह्वयाच्‍वंगु अले मर्स्‍याबरां नं सःगु जुल। 
अनंलि मोशां उपिं कथि परमप्रभुया न्‍ह्यःनं कयाः इस्राएलीतय्‌थाय् हल। अले इमिसं स्‍वयाः थथःगु कथि काल। 
परमप्रभुं मोशायात धयादिल, “विरोध याःपिनिगु निंतिं चिं थहरय् जुइत हारूनया कथियात बाचा चिनातःगु सनूया न्‍ह्यःने हानं यंका ति। अले जिगु विरोधय् याःगु इमिगु कचकचयात छं दिकाब्‍यु, मखुसा इपिं सिनावनी।” 
परमप्रभुं उजं बियादीगु थें मोशां फुक्‍क यात। 
इस्राएलीतय्‌सं मोशायात धाल, “स्‍वयादिसँ, जिपिं सिनावनी, जिपिं स्‍यन, जिपिं स्‍यन। 
परमप्रभुया नापलायेगु पालया सतिक वइम्‍ह न्‍ह्याम्‍ह नं सिनावनी। छु जिपिं फुक्‍क सिनावनी ला?” 
