﻿गन्‍ती.
13.
परमप्रभुं मोशायात धयादिल, 
“कनान देशया चिवा कायेत छुं मनूत छ्व। व देश जिं इस्राएलीतय्‌त बीत्‍यनागु दु। थथःपिनि कुलपाखें छम्‍ह छम्‍ह नायः छ्व।” 
अथे जुयाः परमप्रभुया उजंकथं मोशां पारानया मरुभूमिं इमित छ्वल। इपिं सकलें इस्राएलीतय् नायःत खः। 
इमिगु नां थथे दु – रूबेनया कुलपाखें जक्‍कूरया काय् शम्‍मूअ, 
शिमियोनया कुलपाखें होरीया काय् शाफात, 
यहूदाया कुलपाखें यपुन्‍नेया काय् कालेब, 
इस्‍साखारया कुलपाखें योसेफया काय् यिगाल, 
एफ्राइमया कुलपाखें नूनया काय् होशिया, 
बेन्‍यामीनया कुलपाखें रफूया काय् पलती, 
जबूलूनया कुलपाखें सोदीया काय् गद्दीएल, 
योसेफया कुल आर्थात मनश्‍शेया कुलपाखें सूसीया काय् गेद्दी, 
दानया कुलपाखें गमल्‍लीया काय् अम्‍मीएल, 
आशेरया कुलपाखें मिखाएलया काय् सतूर, 
नप्‍तालीया कुलपाखें वोफ्‍सीया काय् नहबी, 
गादया कुलपाखें माकीया काय् गूएल। 
मोशां देशया चिवा कायेत छ्वःपिं मनूत थुपिं हे खः। नूनया काय् होशियायागु नां मोशां यहोशू छुनाबिल। 
मोशां इमित कनान देशपाखे चिवा कायेत छ्वःबलय् थथे धाल, “थनं वनाः नेगेव धाःगु दच्‍छिन लागां डाँडाय् च्‍वंगु देशपाखे थाहां हुँ, 
अले देश गथे च्‍वं, अन च्‍वंपिं मनूत बल्‍लाः कि बमलाः, यक्‍व दु कि मदु धकाः सीकि। 
इपिं च्‍वनाच्‍वंगु देश भिं कि मभिं गथे च्‍वं? इपिं च्‍वनीगु शहर गथे च्‍वं? इमिगु शहरय् छचाःखेरं पखाः दु वा मदु? 
जमिन गथे च्‍वं, लखं लाःगु भिंगु जमिन वा गंगु जमिन, अन गुँ दु कि मदु, व स्‍व! साहस या, अले अनयागु छुं सिसाबुसा हजि!” उबलय् न्‍हापांगु दाख सइगु ई जुयाच्‍वन। 
अथे जुयाः इपिं अनं थहां वन, जीन धयागु मरुभूमिंनिसें लेबो-हमातया न्‍ह्यःने रहोब तक देशया चिवा काल। 
इपिं नेगेवपाखें थहां वनाः हेब्रोनय् थ्‍यंकः वन। अन अनाकया सन्‍तान अहीमन, शेशै व तल्‍मै च्‍वनाच्‍वंगु जुल। हेब्रोन मिश्रया सोअन शहर स्‍वयाः न्‍हय्‌दँ न्‍ह्यः दय्‌कूगु खः। 
अनंलि इपिं एश्‍कोलया गालय् वन। अले अनं छज्‍वाँय् दाख दुगु कचा त्‍वाःथलाः उकियात निम्‍ह मनुखं न्‍वलय् तयाः क्‍वबिया हल। इमिसं धालेसि व यःमरिसि नं हल। 
इस्राएलीतय्‌सं अनं व दाखया ज्‍वाँय्‌ त्‍वाःथूगु जुयाः व थाय्‌या नां एश्‍कोलया गाः तःगु खः। 
पिइन्‍हु लिपा व देशया चिवा काये धुंकाः इपिं लिहां वल। 
इपिं पारानया मरुभूमि दुगु कादेशय् मोशा, हारून इस्राएलीया फुक्‍क खलःयाथाय् लिहां वल। अले इमिसं थःपिन्‍सं खंगु फुक्‍क खँ इमित व फुक्‍क खलःयात कन। अले थःपिन्‍सं ज्‍वनावःगु व देशया फलफुल नं क्‍यन। 
इमिसं मोशायात कन, “छिं जिमित छ्वयादीगु देशय् जिपिं वना। धात्‍थें हे अन दुरु व कस्‍ति बाः वयाच्‍वंगु जुयाच्‍वन, अले अनयागु फलफुल थ्‍व हे खः। 
तर अन च्‍वंपिं मनूत तसकं बल्‍लाः। इमिगु शहरत ततःधं। शहरतय् पःखाः ग्‍वयातःगु दु। उलि जक मखु – जिमिसं अन अनाकया सन्‍तान नं खना। 
नेगेव धाःगु दच्‍छिन लागाय् अमालेकीत व डाँडाय् च्‍वंगु देशय् हित्ती, यबूसी व एमोरीत, अले समुद्रया लिक्‍क व यर्दन खुसिया सिथय् कनानीत च्‍वनाच्‍वंगु दु।” 
कालेबं मोशाया न्‍ह्यःने मनूतय्‌गु म्‍हुतुप्‍वाः तिकाः थथे धाल, “झीसं थत्‍थें थाहां वनाः व देशय् अधिकार यायेमाः। धात्‍थें झीसं इमित त्‍याकेफइ।” 
तर व नापं वंपिं मनूतय्‌सं धाल, “झीसं उपिं मनूतय्‌त हमला याये फइ मखु। इपिं झीपिं स्‍वयाः बल्‍लाः।” 
इमिसं झीसं चिवा काःवनागु देशया बारे इस्राएलीतय्‌त बांमलाःगु खँ कनाः थथे धाल, “झीसं चिवा काःवनागु व देशं ला थः हे मनूतय्‌त घुर्काछ्वइगु, अले अन च्‍वंपिं मनूत नं तसकं ततःधिकःपिं जुयाः ग्‍यानपुसे च्‍वं। 
जिमिसं अन नेफिलीमत नं खना। अनाकीत नेफिलीमतय्‌पाखें हे वःगु खः। इमिगु न्‍ह्यःने जिमिसं थःपिन्‍त थःगु मिखाय् क्‍वःबुइँचात थें ताल। इमिगु मिखाय् नं जिपिं अथे हे खनेदत।” 
