﻿गन्‍ती.
6.
परमप्रभुं मोशायात धयादिल, 
“इस्राएलीतय्‌त धा, ‘सुं नं मिसां वा मिजंनं थःत परमप्रभुया निंतिं फ्‍यायेत व नाजिरी जुइत भाकल याःगु दुसा 
वं थःत दाखमद्य, अय्‌लाः थ्‍वँपाखें तापाक तयेमाः। वं छुं कथंयागु दाखमद्य वा थ्‍वँ त्‍वने मज्‍यू, अले गंगु व प्‍याःगु छुं नं कथंयागु दाख नये मज्‍यू। 
नाजिरी जुयाः च्‍वंतले वं दाखं दय्‌कातःगु छुं नं नये मज्‍यू, अज्‍ज दाखया पु व ख्‍वला तकं नये मज्‍यू। 
“‘वं ग्‍वःन्‍हु तक अलग जुइगु भाकल याःगु खः वन्‍हु तक वं थःगु छेनय् ख्‍वःचा मछ्यलेमाः, गुबलय् तक परमप्रभुया निंतिं थःत अलग तइ, व ई पूमवंतले व शुद्ध जुयाच्‍वनेमाः। वं थःगु सँ ताहाकः जुइके बीमाः। 
“‘ग्‍वःन्‍हु तक व परमप्रभुया निंतिं अलग च्‍वनी, वन्‍हु तक व गुगुं सीम्‍हया न्‍ह्यःने मवनेमाः। 
वया मां, वा बौ, वा दाजु, वा किजा, वा तता, वा केहेँ सीसां तबि इमिगु निंतिं वं थःत अशुद्ध मयायेमाः, छाय्‌धाःसा थः परमेश्‍वरया निंतिं अलग जूगु चिं वयागु छेनय् दु। 
नाजिरी जुयाच्‍वंतले व परमप्रभुयात देछानातःम्‍ह जुइ। 
“‘सुं मनू वयागु न्‍ह्यःने हे आकाझाकां सिनाः वं अर्पण याःगु सँ अशुद्ध जुल धाःसा वं न्‍हय्‌न्‍हु दय्‌काः सँ खानाः थःत शुद्ध यायेमाः। 
च्‍यान्‍हु खुन्‍हु वं निम्‍ह सुकुभत्तु जूसां निम्‍ह बखुं जूसां नापलायेगु पालया ध्‍वाखाय् पुजाहारीया न्‍ह्यःने हयेमाः। 
सीम्‍ह मनूया न्‍ह्यःने दुगु जुयाः दोष लाःगुलिं पुजाहारीं वयागु निंतिं प्रायश्‍चित यायेत छम्‍ह पापबलि व छम्‍ह होमबलिकथं छायेमाः। उखुन्‍हु हे वं थःगु छ्यं नं शुद्ध यायेमाः। 
नाजिरीया लागि थः अलग जुइगु ई दतले वं परमप्रभुया निंतिं थःत छायेमाः, अले दोषबलिया निंतिं वं दच्‍छि दुम्‍ह चिधिकःम्‍ह भ्‍याःचा छम्‍ह नं छाये हयेमाः। न्‍हापायागु दिं अशुद्ध जूगुलिं उकियागु ल्‍याः तइ मखु। 
“‘नाजिरी जुयाः फ्‍यानातःगु ई पूवने धुंकाः यायेमाःगु ज्‍याखँ थथे दु। व नापलायेगु पालया ध्‍वाखाय् वनेमाः। 
अन वं होमबलिया निंतिं खू मदुम्‍ह दच्‍छि दुम्‍ह चिधिकःम्‍ह भ्‍याःचा छम्‍ह, पापबलिया निंतिं खू मदुम्‍ह दच्‍छि दुम्‍ह मिसाम्‍ह फैचा छम्‍ह, व मेलबलिया निंतिं खू मदुम्‍ह भ्‍याःचा छम्‍ह, 
सोडा मतःगु ग्‍वारमरि व चिकं ल्‍वाकछ्यानातःगु सालुगु मरि छ दाला, माःकथंयागु अन्‍नबलि व त्‍वँसाबलि नं हयेमाः। 
“‘पुजाहारीं परमप्रभुया न्‍ह्यःने न्‍हापां पापबलि व होमबलि छायेमाः। 
वं परमप्रभुया निंतिं मेलबलिकथं भ्‍याःचानापं दालाय् दुगु सोडा मतःगु मरि, उकियागु अन्‍नबलि व त्‍वँसाबलि नं छायेमाः। 
“‘अनंलि नाजिरीं नापलायेगु पालया ध्‍वाखाया न्‍ह्यःने च्‍वनाः थःम्‍हं छाःगु सँ खायेमाः, अले उकियात मेलबलिया क्‍वय् मिइ तयाबीमाः। 
“‘नाजिरीं थःगु सँ खाये धुंकाः पुजाहारीं भ्‍याःचायागु दय्‌कातःगु लां ब्‍वहयागु ला व दालां सोडा मतःगु ग्‍वारमरि व चिकं बुलातःगु सालुगु मरि छपा छपा कयाः वयागु ल्‍हातिइ तयाबी। 
अले पुजाहारीं उमित विशेष देछाकथं परमप्रभुया न्‍ह्यःने संकी, पुजाहारीया निंतिं विशेष देछाया छाति व परमप्रभुया न्‍ह्यःने संकूगु पवित्र देछाया खम्‍पानापं थुपिं पवित्र ब्‍व खः। थ्‍व ज्‍याखँ क्‍वचाय् धुंकाः नाजिरीं दाखमद्य त्‍वने फइ। 
“‘भाकल यानाः परमप्रभुया निंतिं अर्पण याःपिं मनूतय्‌गु बारे यायेमाःगु विधि थ्‍व हे खः। उगु इलय् परमप्रभुयात थथे याना हे देछा छायेमाः। इमिसं मेगु देछा तनेफुसा इमिसं थथे यायेफु, इमिसं छु भाकल याःगु खः व नाजिरीया नियमकथं पूवंकेमाः।’” 
परमप्रभुं मोशायात धयादिल, 
“हारून व वया काय्‌पिन्‍त धा, ‘छिमिसं इस्राएलीतय्‌त सुवाः बीबलय् थथे धा, 
“‘“परमप्रभुं छन्‍त सुवाः बियादीमा अले छंगु बिचाः यानादीमा, 
परमप्रभुं छंके थःगु ख्‍वाःया जः थीकादीमा, अले छन्‍त दया माया यानादीमा 
परमप्रभुं थःगु ख्‍वाः छपाखे हीकादीमा अले छन्‍त शान्‍ति बियादीमा।”’ 
“हारून व वया काय्‌पिन्‍सं इस्राएलीतय्‌त सुवाः बियाः जिगु नां काइबलय् जिं इमित सुवाः बी।” 
