﻿लेवी.
10.
हारूनया काय्‌पिं नादाब व अबीहूं थथःगु गुँगू थनेगु मकः कयाः उकी मि थन, अले व मिइ धुपाँय्‌ तयाः परमप्रभुं उजं बियामदीगु मि तयाः वय्‌कःया न्‍ह्यःने छाल। 
उकिं परमप्रभुयापाखें मि पिहां वयाः इमित परमप्रभुया न्‍ह्यःने स्‍यानाबिल। 
अले मोशां हारूनयात धाल, “परमप्रभुं धयादीगु खँ थ्‍व हे खः, “‘जिगु न्‍ह्यःने वइपिंपाखें जिं जिगु पवित्रता क्‍यने। जिं फुक्‍क मनूतय्‌गु न्‍ह्यःने थःगु महिमा क्‍यने।’” हारून सुम्‍क च्‍वन। 
मोशां हारूनया कका उज्‍जीएलया काय्‌पिं मीशाएल व एलसाफानयात सःताः धाल, “पवित्र पालया न्‍ह्यःनं छिमि किजापिनिगु सीम्‍ह क्‍वबियाः छाउनीं पिने यंकि।” 
उकिं इमिसं मोशां आज्ञा ब्‍यू थें हे नादाब व अबीहूया सीम्‍हयात इमिगु हे लनय् प्‍वःचिनाः क्‍वबियाः छाउनी पिने यन। 
अले मोशां हारून व वया काय्‌पिं एलाजार व ईतामारयात धाल, “छिमिसं थःपिनिगु सँ भुलुसुलु दंका तये मते, अले लं खुइ मते। मखुसा छिपिं सी, अले फुक्‍क मनूतलिसे परमप्रभु तंम्‍वयादी। छिमि थःथितिपिं इस्राएलया फुक्‍क मनूत धाःसा परमप्रभुया मिं सीपिनिगु निंतिं ख्‍वयेमाली। 
छिपिं नापलायेगु पालया चुकं पिने वने मते, मखुसा छिपिं सी, छाय्‌धाःसा परमप्रभुया अभिषेकया चिकं छिमिके दु।” अथे जूगुलिं इमिसं मोशां धाःथें यात। 
अनं लिपा परमप्रभुं हारूनयात धयादिल, 
“नापलायेगु पालय् वनेबलय् छ व छिमि काय्‌पिन्‍सं दाखमद्य वा थ्‍वँ त्‍वनाः वने मते, मखुसा छिपिं सी। थ्‍व छिमि पुस्‍तौं पुस्‍तातय्‌गु निंतिं न्‍ह्याबलेंया नियम खः। 
पवित्र व साधारण अले शुद्ध व अशुद्धया दथुइ छिमिसं पाःगु म्‍हसीकेमाः। 
अले परमप्रभुं मोशापाखें इमित बियादीगु फुक्‍क शिक्षा छिमिसं इस्राएलीतय्‌त स्‍यनेमाः।” 
मोशां हारून व वया ल्‍यंदुपिं काय्‌पिं एलाजार व ईतामारयात धाल, “परमप्रभुयात विशेष देछा छाये धुंकाः ल्‍यं दुगु अन्‍नबलि यंकाः वेदी लिक्‍क सोडा ल्‍वाकमछ्यासे दय्‌काः न, छाय्‌धाःसा थ्‍व तसकं पवित्र जू। 
छिमिसं थ्‍व नापलायेगु पालया चुकय् च्‍वनाः न। छाय्‌धाःसा परमप्रभुया निंतिं छाःगु विशेष देछातपाखें थ्‍व छंगु व छिमि काय्‌पिनिगु ब्‍व खः। जितः थथे हे उजं ब्‍यूगु खः। 
संकाबीगु बलिया व ह्याकुला विशेष भेटी खम्‍पा धाःसा छ, छिमि काय्‌पिं व म्‍ह्याय्‌पिन्‍सं विधिकथं शुद्ध याःगु थासय् च्‍वनाः नयेमाः। छाय्‌धाःसा थ्‍व इस्राएलीतय्‌गु मेलबलिया पाखेंयागु छिमिगु ब्‍व खः। 
नये न्‍ह्यः धाःसा पुजाहारीं ह्याकुला व खम्‍पाया व द्यःने तयातःगु विशेष भेटीया दाः वेदी न्‍ह्यःने हयाः परमप्रभुया निंतिं संकाबीगु बलिकथं छाये हयेमाः। उबलय् जक परमप्रभुया उजंकथं थ्‍व सदांया निंतिं छ व छिमि काय् म्‍ह्याय्‌पिनिगु ब्‍व जुइ।” 
मोशां पापबलिया बारे न्‍यंनेकने याःबलय् छ्वय्‌के धुंकूगु सीकल। अले व हारूनया ल्‍यंदुपिं काय्‌पिं एलाजार व ईतामारलिसे तंम्‍वल। अले वं इमित धाल, 
“छिमिसं छाय् पापबलि नापलायेगु पालया चुकय् मनयागु? व तसकं पवित्रगु खः। परमप्रभुं थ्‍व खलःया दोष हुयाछ्वयेगु निंतिं अले मनूतय्‌त शुद्ध यायेगु निंतिं परमप्रभुया न्‍ह्यःने प्रायश्‍चित यायेत छिमित बियादीगु खः। 
दुगुचिगु हि पवित्रगु थासय् दुने महःगुलिं छिमिसं जिं धाःथें वयागु ला नापलायेगु पालया चुकय् नयेमाःगु खः।” 
अले हारूनं मोशायात धाल – “थौं हे इमिसं थःगु पापबलि व होमबलि परमप्रभुया न्‍ह्यःने छाल। अले थौं हे जितः आपत जुल! जिं थौं पापबलि नःगु जूसा छु परमप्रभु लय्‌ताइ ला?” 
थ्‍व खँ न्‍यनाः मोशाया मन च्‍वन। 
