﻿प्रस्‍थान.
17.
परमप्रभुया आज्ञा कथं इस्राएलीतय् फुक्‍क खलः सीन धयागु मरुभूमिं वनाः थाय् थासय् जुयाः रपीदीमय् थ्‍यंकाः पाल ग्‍वयाः बाय् च्‍वन। अन धाःसा त्‍वनेत लः हे मदु। 
अथे जुयाः मनूतय्‌सं मोशायात कचकच यानाः धाल, “जिमित त्‍वनेगु लः बियादिसँ।” अले वं इमित धाल, “छिपिं जिलिसें छाय् कचकच याः वयागु? छिमिसं छाय् परमप्रभुयागु मन स्‍वयागु?” 
मनूतय्‌सं प्‍याः चाःगुलिं मोशालिसे कचकच याना तुं च्‍वन। इमिसं धाल, “छिं जिमित छाय् मिश्रं पित हयादियागु? जिमित जिमि मचाखाचा व पशुनापं लः त्‍वने मखंकाः स्‍यायेत ला?” 
अले मोशां परमप्रभुयात थथे धकाः इनाप यात, “जिं थुपिं मनूतय्‌त छु यायेगु? थुमिसं ला जितः ल्‍वहँतं कय्‌के त्‍यंगु दु।” 
परमप्रभुं मोशायात धयादिल, “इस्राएलीतय् छम्‍हनिम्‍ह थकालितय्‌त ज्‍वनाः मनूतय् न्‍ह्यः न्‍ह्यः हुँ। छं थःनापं नील खुसिया लखय् दाःगु कथि नं ज्‍वनाः हुँ। 
जि होरेबया ल्‍वहँतय् छंगु न्‍ह्यःने दंवये। छं ल्‍वहँतय् कथिं दा, अले अनं मनूतय्‌सं त्‍वनेगु लः पिहां वइ।” अले मोशां थकालितय्‌गु न्‍ह्यःने अथे हे यात। 
परमप्रभु जिमिगु दथुइ दी कि मदी धकाः इस्राएलीतय्‌सं परमप्रभुयात जाँचय् याःगु व कचकच याःगुलिं मोशां व थाय्‌या नां “मस्‍साह” व “मेरीबा” तल। 
रपीदीमय् च्‍वनाच्‍वंबलय् अमालेकीतय्‌सं वयाः इस्राएलीतय्‌त हमला यात। 
मोशां यहोशूयात धाल, “कन्‍हय् वनाः अमालेकीतलिसें ल्‍वायेत छं मनूत ल्‍य। परमप्रभुं जितः बियादीगु कथि ज्‍वनाः जि गुँच्‍वकाय् दने।” 
मोशां धाःथें यहोशू अमालेकीतलिसें ल्‍वाः वन। अले मोशा, हारून व हूर गुँच्‍वकाय् वन। 
मोशां थःगु ल्‍हाः ल्‍ह्वनाततले इस्राएलीत त्‍याइगु, वं ल्‍हाः क्‍वकाल कि अमालेकीत त्‍याइगु। 
मोशाया ल्‍हाः त्‍यानुयावसेंलि हारून व हूरं ल्‍वहं छगः हयाः उकी फ्‍यतुकल। अले निभाः मब्‍युतले हारूनं छखे व हूरं मेखे वयागु ल्‍हाः बल्‍लाःक ज्‍वनाः ल्‍ह्वनातल। 
थुकथं यहोशूं तरवारं अमालेकीतय्‌त बुकल। 
अमालेकीतय्‌त बुके धकाः परमप्रभुं मोशायात धयादिल, “थ्‍व खँयात लुमंका तयेत छगू सफुलिइ च्‍व। अले जिं अमालेकीतय्‌त पृथ्‍वीं भज्‍यंक नाश यानाबी धकाः यहोशूयात धा।” 
मोशां अन छगू वेदी दय्‌काः उकिया नां “परमप्रभु जिगु ध्‍वाँय्” धकाः तल। 
वं धाल, “परमप्रभुं पुस्‍तां पुस्‍ता तक अमालेकीतलिसें ल्‍वानादी धकाः वय्‌कलं पाफयादीगु दु।” 
