﻿उत्‍पत्ति.
37.
याकूब थः बौ च्‍वनाच्‍वंगु कनान देशय् हे च्‍वनाच्‍वन। 
याकूबया खँ थथे दु – योसेफ झिंन्‍हय्‌दँ दुबलय् थः दाजुपिं लिसें फै-च्‍वलय् ज्‍वःवनीगु खः, उपिं थः चिरिमांपिं बिल्‍हा व जिल्‍पाया काय्‌पिं खः। छन्‍हु वं थः दाजुपिनिगु मभिंगु बानी थः बौयात कं वल। 
बुरा जुइ धुंकाः बूम्‍ह जूगुलिं इस्राएलं मेपिं काय्‌पिन्‍त स्‍वयाः योसेफयात अप्‍वः माया याः। वं योसेफयात छपाः बांलाःगु बुत्ता दुगु भान्‍तां लं सुयाबिल। 
वया दाजुपिन्‍सं थः बौनं थःपिन्‍त स्‍वयाः अप्‍वः वयात मायायाःगुलिं वयात महिल। इमिसं वलिसे बांलाक न नं मवाः। 
छकः योसेफया म्‍हगसय् म्‍हन। वं थःम्‍हं म्‍हंगु खँ दाजुपिन्‍त कन। वया दाजुपिन्‍सं वयात झन महिल। 
वं थः दाजुपिन्‍त धाल – “जि म्‍हगसय् म्‍हंगु खँ न्‍यनादिसँ। 
झीपिं फुक्‍क बुँइ छ्वमा लयाः चिनाच्‍वनागु। जिगु छ्वमा धस्‍वानावल, अले छिकपिनिगु छ्वमा चाःतुलाः जिगु छ्वमायात भागि यात।” 
वया दाजुपिन्‍सं वयात धाल, “छ छु धात्‍थें हे जिमि जुजु जुइ धयागु ला? अले छं जिमित शासन यायेगु धयागु ला?” अनंलि इमिसं वयागु म्‍हगसय्‌या खं यानाः वयात अज्‍ज अप्‍वः महिल। 
वया हाकनं मेगु म्‍हगसय् म्‍हन। अले थः दाजुपिन्‍त कन, “स्‍व, जिं हाकनं मेगु म्‍हगसय् खना। सूर्य, तिमिला व झिंछगः नगुं जितः भागि यानाच्‍वंगु।” 
वं थः बौयात नं थ्‍व खँ कन। वया बौनं वयात तमं हक्‍काः धाल, “छं छु धायेत्‍यनागु? छु आः जि, छिमि मां व छिमि दाजुपिं वयाः छन्‍त भागि यायेमाल धयागु ला?” 
वया दाजुपिनि व खनाः नुगः मुल। वया बौया धाःसा थ्‍व खँ नुगलय् वालाच्‍वन। 
छन्‍हु योसेफया दाजुपिं थः बौया फै ज्‍वयेत शकेम वनाच्‍वंबलय् 
इस्राएलं वयात धाल, “छं दाजुपिं शकेमय् फै ज्‍वःवनाच्‍वंगु दु। छ अन हुँ।” योसेफं धाल, “ज्‍यू, जि वने।” 
इस्राएलं धाल, “वनाः छं दाजुपिं व फैत छु यानाच्‍वन स्‍व, अले जितः कंवा।” अले वं वयात हेब्रोन बेँसीं शकेमय् छ्वत। योसेफ शकेमय् थ्‍यंबलय् 
छम्‍ह मनुखं वयात उखेंथुखें जुयाच्‍वंगु खनाः न्‍यन, “छं छु माला च्‍वनागु?” 
वं धाल, “जिं जिमि दाजुपिं माला च्‍वनागु। छिं स्‍यू ला इपिं गन फै ज्‍वयाच्‍वंगु?” 
व मनुखं धाल, “इपिं थनं वने धुंकल। जिं इमित दोतानपाखे वनेगु धकाः हालाच्‍वंगु तायागु खः।” योसेफ नं थः दाजुपिन्‍त मामां दोतानय् वन। वं अन इमित लुइकल। 
इमिसं वयात तापाकंनिसें खन। अले इमिसं वयात स्‍यायेगु ग्‍वसाः ग्‍वल। 
इमिसं थःथवय् खँ ल्‍हात, “वल का, म्‍हगसय् म्‍हंका जुइम्‍ह। 
वयात स्‍यानाः थन छगः तुंथिइ कुर्काथके। अले जंगली पशुं स्‍यानाः नल धाये। अले स्‍वये का वयागु म्‍हगस छु जुइ थें।” 
थ्‍व न्‍यनाः रूबेनं वयात इमिगु ल्‍हातिं बचय् यायेत स्‍वल। वं धाल, “स्‍याये हे ला मज्‍यू। 
हि हाय्‌केगु खँ ल्‍हाये मते। बरु वयात थन हे मरुभूमिइ लः मदुगु तुंथिइ कुर्काथके। ल्‍हाः छता वाये मते।” रूबेनं वयात इमिगु ल्‍हातिं बचय् यानाः लिपा थः बौयाथाय् यंकेगु मतिइ तयाः थथे धाःगु खः। 
योसेफ इमिथाय् थ्‍यनेवं इमिसं वयात ज्‍वनाः वं फिनातःगु तःजिगु भान्‍तां लं त्‍वकाः काल। 
अले वयात लः मदुगु तुंथिइ वांछ्वयाबिल। 
इपिं नयेत फ्‍यतूबलय् तापाक गिलादं वयाच्‍वंपिं इश्‍माएलीतय्‌त खन। इमिगु ऊँटं नस्‍वाः वःगु मसला, पाय्‌गु वासः व मूर्र क्‍वबियातःगु दु। इपिं मिश्रपाखे वनेत्‍यंपिं खः। 
अले यहूदां थः दाजुकिजापिन्‍त धाल, “झीसं थः किजायात स्‍यानाः अले वयागु हि त्‍वपुयां झीत छु दइ धकाः? 
बरु वयात इश्‍माएलीतय्‌गु ल्‍हातिइ मियाछ्वये। वयात ल्‍हाः धाःसा मवाये। न्‍ह्यागु जूसां व झी किजा खः, झीगु हे ला हि खः।” फुक्‍कसिनं वयागु खँ न्‍यन। 
उकिं इमिसं व व्‍यापारीत व लँ जुयाः थ्‍यंकः वसेंलि योसेफयात तुंथिं थकाल। अले वयात इमिगु ल्‍हातिइ निइकू वहलं मियाछ्वत। इमिसं वयात मिश्र यंकल। 
रूबेनं लिहां वयाः तुंथिइ स्‍वःबलय् योसेफयात अन मखनाः वं थःगु लं खुत। 
वं थः किजापिन्‍थाय् वनाः धाल, “मचा ला अन मदुनि। आः जिं छु यायेगु?” 
इमिसं छम्‍ह भ्‍याःचा स्‍यानाः वयागु हि योसेफया भान्‍तां लनय् बुलाबिल। 
अले इमिसं व भान्‍तां लं थः बौयाथाय् यंकाः धाल, “जिमिसं थ्‍व लुइका। थ्‍व छि काय्‌यागु खः ला कि मखु?” 
वं व लं म्‍हसीकल, अले धाल, “थ्‍व जिमि काय्‌यागु लं खः। जंगली पशुतय्‌सं वयात स्‍यानाः कुचा कुचा यानाः नल जुइमाः।” 
वं थःगु लं खुत। वं थःगु म्‍हय् भांग्रां भुन। व थः काय्‌या लागि थुकथं तःन्‍हु तक दुःखं च्‍वन। 
वया फुक्‍क काय् म्‍ह्याय्‌पिन्‍सं वयाः वयात ह्यय्‌केत स्‍वत, व मानय् मजू। वं धाल, “जि थः काय्‌या दुःखं च्‍वँच्‍वं हे जिमि काय्‌या थासय् वने।” थुकथं वं थः काय्‌या लागि तसकं नुगः मछिंकल। 
थ्‍व हे इलय् योसेफयात न्‍याना यंकूपिं व्‍यापारीतय्‌सं वयात फारोया दरबारया पिवाःतय् नायः पोतीफरया ल्‍हातिइ मियाबिल। 
