﻿Téerëe bíníyú unna yuloh ébrë yë në rë.
1.
Filoon, Koope húmú ñeyaꞌ yonente ya na, di pagaɗɗi bokaay wonte a caacci yen waal caak. 
Ndaa woteh, di jamanaa míllëꞌ bee ra, ɗi ñeyaꞌ Koohi na wonte a yen. Ɗi ñeyaꞌ Koy ki baa na sakke ëldúnë, ɗi tanisse ɗi fi Koy ki baaha lahaꞌte iña ɓéeɓ. 
Koy ki baa daa niiñi ndami Koope, te ɓani Koope if a ɓëlgís, daa ri teeɓaꞌ ɗee man Koope kah-kah ra. Daa ri ñeyaꞌ doolii uni, tahte iña ëldúnë ɓéeɓ hom woteh. Te filoon fi bee yeraꞌ ri ñíiní hosse bakaaɗɗa ra, ɗi ín tookke sunaa-sun, hëbís Koope fa gaan doole ra, hompe yaꞌi ñamaa fi. 
Di paaꞌ ri malaaka ya ɓéeɓ sun, tiya lah ri fíi Koo ra, lukaꞌ bi wa ɗaaha fap. 
Ndah nagajek, Koope wënɗëy malaaka yínë sah unni ƴeh⁠ ⁠: «⁠ ⁠Daa fu Koy soꞌ, dalaꞌte woteh mi Boffu.⁠ ⁠» Ɗi wënɗëy malaaka biti ɓal⁠ ⁠: «⁠ ⁠May hen baap ɗii na, ɗi hen koy soo na.⁠ ⁠» 
Te wolaꞌ rí koy ki saawi ëldúnë rë, ɗi won tih⁠ ⁠: «⁠ ⁠Malaaka yi Koope ɓéeɓ ƴekun fíyí, sígímíɗ ɗí.⁠ ⁠» 
Di yii leŋke malaaka yi ƴaa na Koope wonte bitih⁠ ⁠: «⁠ ⁠Ɗi paŋke níi malaaka ya madu ngilaaw nen, ɗi paŋke níi wa fi súrgë yí madu njaar-kíi nen.⁠ ⁠» 
Ndaa di yii leŋ Koohi na, ɗi won tih⁠ ⁠: «⁠ ⁠Nguur ku ɗo fi Koope ay home na níi kiri fi kirih. Fu kúɗté ɓëewú kúrí júɓpé, 
fu fahaꞌ yii hente júɓ kep, te fu wonay dara tooñ. Yii baa daa tah soꞌ mi Koope fu mi tanis ro, mi on ɗo sos-keeñ, mi túm rë díw heeñ af, ndah fu génëꞌ sëꞌ ɓëewë ɗoni wa homu ra.⁠ ⁠» 
Ɗi wonte ri ɓal tih⁠ ⁠: «⁠ ⁠Dalaana, ɗo fi Yíkëe daa fu sak feey fa, daa fu sak sun-Koo a yaꞌu. 
Iñƴaa ɓéeɓ ay muuy, ndaa ɗo fay home na faraah. Wa ay yah ti di na húlëꞌ búuɓ nen. 
Fay waa túlëñsëꞌ ti ɓëyí túlëñsëꞌ búuɓ nen, wa lofu ti di na lofuu yéré nen, ndaa ɗo fi na lofiseeh te fay pese peso níi kiri fi kirih.⁠ ⁠» 
Koope wënɗëy malaaka bitih⁠ ⁠: «⁠ ⁠Tooke hëbís sëꞌ, yaꞌi ñamaa fi soꞌ dee níi bín nëy míi yíssée kaaꞌoh yu hen tíkëe yí kottu ra.⁠ ⁠» 
Wa fi malaaka ya, wa mbínéeffí lahuy boꞌ faan. Koope hom wolaꞌ wa habraꞌi ɓëewë nay múcé rë. 
