﻿Dalaana.
15.
Filoon fi baaha, di filiɓ yodaɗ, Koo-Yahwee won Abraam tih⁠ ⁠: «⁠ ⁠Ngana néekíñëꞌ yin Abraam⁠ ⁠! Daa mi níirëhú te waafu ay gaan.⁠ ⁠» 
Abraam tahte won tih⁠ ⁠: «⁠ ⁠A may pagee waaf yi kan Yahwee-Yíkëe te fu otte biti mi lahay koy⁠ ⁠? Íníh ee fu teeɓay soꞌ koy níi lamohi soꞌ ac Eliyeseer fi ɓëy Damaas, ow di súrgë yí sëꞌ ë⁠ ⁠?⁠ ⁠» 
Tígí daaha Yahwee won Abraam tih⁠ ⁠: «⁠ ⁠Ëe-ëeꞌ⁠ ⁠! Súrgúu nay roo lame neh, koy ka nay fuu límé rë daa nay hene lamohu.⁠ ⁠» 
Yahwee antee ɗúhíɗ Abraam ëssín, won ɗi tih⁠ ⁠: «⁠ ⁠Yeele sun fu olsoh hulla, hém fu mín wëe kín⁠ ⁠!⁠ ⁠» Ɗi ɓaatte won tih⁠ ⁠: «⁠ ⁠Ɗee teyu wa ra, séttú ay caakee ɗaaha.⁠ ⁠» 
Abraam gémpé Yahwee, te ngémí baa daa tah Yahwee habaꞌte ri ɓëyí júɓpé. 
Kéy fín fë, Yahwee won ɗi tih⁠ ⁠: «⁠ ⁠Daa mi Yahwee fa këlíɗ ɗë Úur di Kalde ra, oni ro gina hom fu bee ra, fu lahaꞌ ri.⁠ ⁠» 
Ndaa Abraam won ɗi tih⁠ ⁠: «⁠ ⁠May yúhée biti may rii lahaꞌ ɗíh, Yahwee-Yíkëe⁠ ⁠?⁠ ⁠» 
Yahwee won ɗi tih⁠ ⁠: «⁠ ⁠Saame téngë fana, peꞌ ɓeleɓ a kuuy har, ƴi lahuu kíil éeyë, bëdú mbetle a hëtë, fu kom soꞌ wa.⁠ ⁠» 
Abraam saamiɗte ri raɓɓi ƴaaha ɓéeɓ, happe wa⁠ ⁠; henay ƴakka, ɗi lecce raɓɓa tas ra ɓéeɓ leelaa, antee yef hatin fi hatin ɓéeɓ fíi moroomi, hanndalaꞌte wa. 
I suul yeɗɗuute sun fi boꞌ fa, ndaa Abraam líkké wë. 
Na haal naꞌ ra, pëní fí misikke haalte Abraam. Ɗee a ɗeh, gina ñúussé túɗ afi, ɗi tíitté níi tíit. 
Yahwee won ɗi tih⁠ ⁠: «⁠ ⁠Yúhé biti séttú ay dék gini henay bi wa⁠ ⁠; wa ay naa habu ñaam, wa moklu lool níi hen kíil tíméer iniil (400)⁠ ⁠; daa mi won ɗo ri ee. 
Ndaa tíl níi mi keen sun fi gina nay waa ñaamlee ra raa, wa ay naa koloh, sayaꞌ a alal caak. 
Te ɗo fi beh, fay ɗeefree caaccu a jaamma, ɗeefa fu ɓaha níi fu paangaaw. 
Jamanu iniil fíi, séttú ay nimlaat deh⁠ ⁠; ndée ɓosi Amoorra lahay tígë nay mi waa líkée rë doom.⁠ ⁠» 
Haalaꞌ naꞌa níi Koo ñúussé túɗ rë, ɗee a ɗee rek anndii na ɗúuk a kocom ki na ñah ñeyute hanndal ki hatinni raɓɓa. 
Yahwee pokaꞌ yee pok ri a Abraam ra ɗaaha yiin fa, won ɗi tih⁠ ⁠: «⁠ ⁠Mi onte séttú gini beh, dalaꞌte laahi Ésíp níi lahte laahi gaana na wonuu Efarat ra⁠ ⁠: 
daa ri feey fi Kenna, Kéníssë, Katmonna, 
Hetta, Péríssë, Refa ya, 
Amoorra, Girgassa, ɓëy Kanaan a ɓëy Yébús.⁠ ⁠» 
