﻿1 Joŋ.
2.
Booŋ baŋ, nsaŋe fiɛɛ finɛ fɛ bɛŋ le lɛ keefɛ bɛŋ jâ bɛŋ gê kimbefɛ gɛ. Geenɛ, nɛ muh ja lo wu ge kimbefɛ, tu bee kɛme muh wù kude chiaaŋ fɛ Chii le fɛ besabɛŋ le, muh wunɛ le Jiso Kletu wù le muh wù chaaŋ. 
Le wu wù le kimaaŋ kì lɛɛshi bimbefɛ biɛsa besabɛŋ. Gɛ kimaaŋ kinɛ nyu gɛh fɛ bimbefɛ biɛsa besabɛŋ le maa gɛ, ki le tɛ fɛ bi bamii bachii ba yi woŋ kfunɛ le. 
Nɛ besabɛŋ gɛɛde fiɛɛ fì Nyo duu, finɛ mo fi fɛ besabɛŋ gɛ ka be maŋe lɛ besabɛŋ kee wu gɛ. 
Muh wù duu lɛ wu kee Nyo, geenɛ wu gɛɛde gɛ fiɛɛ fì wu duu gɛ, tu le muh wu chimbiaŋ, kinchiɛɛŋ nyume gɛ yi ye ye le gɛ. 
Geenɛ, muh wù gɛɛde njɛmɛ we wuwɛɛ le muh wù koŋe Nyo nchiɛɛŋ wu gɛɛne wu mɛɛse. Fiɛɛ fì taŋlo fi chûnyɛ maŋe sɛŋ lɛ besabɛŋ le be taashɛ bɛ Nyo le finɛ fì le lɛ: 
Nɛ muh jɛme lɛ wu le segechii yi Nyo le tu wu kɛme ki wu chêe gɛh yɛɛŋyɛɛŋ a je yì Kletu gɛ̀ chee yi le. 
Nsáa yaŋ yi shɛ́ŋ, gɛ nchi wù ŋgoone ki nsâŋ fɛ bɛŋ le nyu nchi wù fwɛŋ gɛ. Le nchi wù kege wù bɛŋ gɛ̀ kɛme kɛge fɛŋkɛɛ. Nchi wù kege wunɛ le saaka wù bɛŋ le bɛŋ yu wa. 
Geenɛ nchi wù nsaŋe fɛ bɛŋ le, le gɛh nchi wù fwɛŋ. Nchiɛɛŋ wu nchi wunɛ gɛ̀ bee wu chunyɛ yi Kletu le, wu chuunyi tɛ yi ye yene le. Nchi wuyu yɛne wù fwɛŋ nje kijibɛ kage ka ki gɛɛne, n'yuu wù nchiɛɛŋ kɛ wa wu baaŋ. 
Nɛ muh jɛme lɛ wu le yi n'yuu le wu ka banɛ mwa bwee, tu wu baaŋ gɛ yi kijibɛ le. 
Muh wù koŋe mwa bwee le segechii yi n'yuu le, gɛ fiɛɛ nyu yi ye ye le fì taŋlo fi ge wu jiɛnyi wu baŋse gɛ. 
Geenɛ, muh wù banɛ mwa bwee le yi kijibɛ le wu jiɛnyi wu kee gɛ fɛ wu gɛɛne fo gɛ, nje kijibɛ kiyu le ki ge wa wu feeŋ. 
Booŋ baŋ, nsaŋe fɛ bɛŋ le nje ba le ba lɛɛshɛ wa bimbefɛ biɛna nje Kletu. 
Bachii, nsaŋe fɛ bɛŋ le nje bɛŋ le bɛŋ kɛɛ wa wu wuyu wɛɛ wù gɛ̀ bee fɛŋkɛɛ. Chu yi bamii, nsaŋe fɛ bɛŋ le nje bɛŋ le bɛŋ so wa muh wu kimbefɛ wɛɛ. Booŋ baŋ, nsaŋe fɛ bɛŋ le nje bɛŋ kee Chii. 
Bachii, nsaŋe fɛ bɛŋ le nje bɛŋ kee wa wu wuyu wù gɛ̀ bee fɛŋkɛɛ. Chu yi bamii, nsaŋe fɛ bɛŋ le nje bɛŋ tɛɛme lo, jɛ yi Nyo nyu yi bɛŋ le segechii, bɛŋ so wa muh wu kimbefɛ wɛɛ. 
Mɛ mo nteefe bɛŋ lɛ, keefɛ bɛŋ kôŋe woŋ kfunɛ kɛnɛ mwɛɛ mu yi woŋ kfunɛ le gɛ. Nɛ muh koŋe woŋ kfunɛ, wu gɛ ka wu koŋe Chii gɛ. 
Bɛŋ kêe lɛ mwɛɛ munchii mu yi woŋ kfunɛ le mù nyaŋ yi ye kɛme kiŋkoŋɛ yu bɛ mù ajii jiiŋe wo koŋe, mo mù bamii bɛɛŋse ye yi mu le yi kinche kinɛ le, gɛ nyu mù jade fɛ Nyo wù Chii le gɛ. Le mu yi woŋ kfunɛ le. 
Woŋ kfunɛ le wu ge wu ka, mwɛɛ mu yi woŋ kfunɛ le mù bamii kɛme kiŋkoŋɛ yi mu le ka tɛ. Geenɛ, muh wù gee nyu fiɛɛ fì Nyo goone le wu mɛ gɛh wu nyu yu segechii. 
Booŋ baŋ, kife kinɛ le wa kì fɛkimɛsɛ. No bɛŋ gɛ̀ yu lɛ muh wu kimbanɛ wu Kletu lé wu gê wu tô, mo mɛɛse bamii ba kimbanɛ ba Kletu le bo to wa wesee. Le fiɛɛ fì ge besabɛŋ mo be kɛɛ lɛ kinɛ le wa kife kì fɛkimɛsɛ. 
Bamii bayu banɛ gɛ̀ bu a besabɛŋ ntɛnɛɛ, geenɛ gɛ bo gɛ̀ bee bamii besa besabɛŋ gɛ. Nɛ bo gɛ̀ bee bamii besa besabɛŋ, tu bo gɛ̀ bee bo mɛ gɛh bo nyu besa bo. Noo bo mo bo bu wu lɛ fi chûnyɛ andaŋandaŋ lɛ gɛ bo bachii gɛ̀ bee bamii besa besabɛŋ gɛ. 
Bɛŋ le fiena wu wù Yuude nyu wu yefɛ wa bɛŋ, bɛŋ bachii kee mwɛɛ mù nchiɛɛŋ. 
Gɛ nsaŋe fɛ bɛŋ le nje bɛŋ maŋe nchiɛɛŋ gɛ. Nsaŋe nje bɛŋ kee kinchiɛɛŋ, bɛŋ kee tɛ lɛ gɛ taŋlo chimbiaŋ bude antɛnɛɛ a nchiɛɛŋ gɛ. 
Muh wu chimbiaŋ le wù la? Gɛ nyu wɛɛ wù faŋe lɛ gɛ Jiso nyu Mbvusɛ wù Nyo gɛ̀ ka gɛ? Muh wù faŋe Nyo wù Chii bɛ Mwa ye le wɛɛ wù le muh wu kimbanɛ wu Kletu. 
Gɛ muh wù faŋe Mwa kɛme kintaashɛ bɛ Chiji Mwa wuyu gɛ. Muh wù jɛme bɛ jwe we lɛ wu le wu bɛɛŋ Mwa le, le wù kɛme kintaashɛ bɛ Chiji Mwa tɛ. 
Bɛŋ gɛ̂ɛ fiɛɛ fì bɛŋ gɛ̀ yu wa fɛŋkɛɛ fi nyu segechii yi ye yene le. Nɛ bɛŋ gɛle fiɛɛ fì bɛŋ gɛ̀ yu wa fɛŋkɛɛ fi nyu segechii yi ye yene le, bɛŋ tɛ mo bɛŋ nyu segechii yi Mwa bɛ Chiji le. 
Fiɛɛ fì Kletu ka besabɛŋ yu le kinche kì kage gɛ. 
Nsaŋe mwɛɛ munɛ fɛ bɛŋ le nyu kune bamii ba goone ki bo lɛɛde bɛ bɛŋ. 
Geenɛ, n'yefɛ wù bɛŋ gɛ̀ kɛme fɛ Kletu le, le segechii yi ye yene le, gɛ bɛŋ ka goone muh mu wù yɛyi bɛŋ gɛ. No n'yefɛ we wunɛ yɛyi wa bɛŋ kune mwɛɛ munchii, n'yefɛ wuyu nyume wu nchiɛɛŋ, ya nyume gɛ wu chimbiaŋ gɛ, bɛŋ mo bɛŋ nyûme segechii yi Kletu le gɛh yɛɛŋyɛɛŋ no n'yefɛ wunɛ le wu yɛyɛ bɛŋ. 
Mɛɛse booŋ baŋ, bɛŋ mo bɛŋ mɛ̂ gɛh bɛŋ nyûme segechii yi ye ye le wu lɛ sege wu gê wu bunɛ, besabɛŋ kɛmɛ fitele ki bee yɛ̂ŋ wu le fede ki bee nyîile lo nyilɛ le a bvuya antɛnɛɛ. 
Nɛ bɛŋ kee lɛ wu le muh wù gee mwɛɛ mù chaaŋ, tu bɛŋ kɛme ki bɛŋ kêe tɛ lɛ muh wuchii wù gee fiɛɛ fì chaaŋ le mboyɛ we. 
