﻿Jɛm.
3.
Booŋ ba bwɛɛŋ, keefɛ bɛŋ ba duude gôone ki bɛŋ nyûme bamii ba n'yɛyɛ gɛ. Bɛŋ kêe lɛ bamii ba n'yɛyɛ, wuboo nsa lé ba nyû ba tâa chuule. 
Le nchiɛɛŋ lɛ besabɛŋ bachii gee jialɛ wesee. Geenɛ, muh nɛ le yu wù gee gɛ jialɛ yi njɛmɛ le gɛ, tu le muh wù kojɛ wu gɛɛŋ wu mɛsɛ, wu ka kee tɛ ki wu shêe bɛ ye ye yichii. 
Besabɛŋ jode ncha bee leesɛ a nyambala mu ki bee ge lɛ yi yûge besabɛŋ le. Bee mo be fiise nyaŋ yiyu yi gɛɛne a besabɛŋ koŋe yo. 
Bɛŋ yɛ̂ŋ tɛ no fitima fi a joo le. Fi kuge nɛ chuule, fii yi tɛɛme to yi doone fi. Geenɛ, fiɛɛ fì muh wù chiide fitima fiise yu fi gɛɛne a wu koŋe yo, le gɛh nɛ shige. 
Le gɛh yɛɛŋyɛɛŋ no lɛmɛ le. Chi nyume gɛh lo fiɛɛ fì shige yi muh le. Geenɛ, chi jɛme mwɛɛ mu kinchiaasɛ ye baaŋ. Gɛ bɛŋ kee no taŋlo ŋgu ta nɛ kwayy, wu koo, wu fieesɛ kikoo kichii gɛ? 
Lɛmɛ le tɛ njɛ ŋgu. Lɛmɛ le kimbe ki ye yi muh antɛnɛɛ a bimbe bichii ki mwɛɛ mù mbefe mù fɛkuu fɛnɛ le mu taashɛ yi chi le, mu laaŋ mu chɛŋe bɛ ye yi muh yichii. Lɛmɛ to chi fwɛɛ ŋgu wu chɛŋe bɛ kinche ki muh kichii. Ŋgu kfunɛ, lɛmɛ jode nyume fɛ ŋgu wù baaŋ le. 
Bamii taŋlo bo yɛ̂yɛ chikfuu chi nyáŋ yichii yi yûge bo le. Bo le bo yɛyɛ wa nyáŋ yi nchvuuŋ bɛ munyii mo nyáŋ yi ŋaane bɛ yi a joo. 
Geenɛ, gɛ muh nyume lo yu wù taŋlo wu yɛyɛ lɛmɛ gɛ. Lɛmɛ to chi wɛse gɛh lo ki chi jɛ̂me mwɛɛ mù mbefe mu taŋlo mu yuuyɛ muh njɛ nlo. 
Le lɛmɛ chinɛ chì besabɛŋ bɛɛŋse Tada wù Chiji wese besabɛŋ yu, ka nyume gɛh chi chì besabɛŋ to be nooŋe loŋ bamii le, bamii banɛ nyume Nyo wù fɛ bo, bo fiɛɛnɛ wu. 
Jwe wu mumwaa tu wu bvuuse mbɛɛŋsɛ wu ka nooŋe loŋ. Booŋ ba bwɛɛŋ, gɛ fi kɛme ki fi nyûme noo gɛ. 
Taŋlo joo yì yuude bɛ kinduudu bûde jwe wu mumwaa? 
Booŋ ba bwɛɛŋ, taŋlo fimbi yûŋ yi kifelɛ le? Noo, lɛ taŋlo ntulu yûŋ yi fimbi le la? Gɛ taŋlo tɛ jwe wu joo yi ŋka bvûuse joo yì joŋe gɛ. 
Le yɛɛŋ a bɛŋ ntɛnɛɛ wù duu lɛ wu feefe wu ka kee fiɛɛ? Mwɛdɛ dûunyi kikwɛɛ ke yi kinche ke kì joŋe le bɛ gee che chi chuule chi wù gee, wu ya chiaase gɛ ye gɛ, no muh wù feefe to wu nyume. 
Geenɛ, nɛ muh fuuge bɛ kiŋghɛ mo n'yɛlɛ ajii fɛ fitele le, keefɛ wu chîaase ye bɛ fifiɛɛ gɛ. Nɛ wu ge noo, tu wu mbiane kune kinchiɛɛŋ. 
Gɛ kfuu chi bwɛɛ bvufee nyu bvù fɛwe gɛ. Le bvu yi nshɛŋ le, nyume bvu muh wu wuŋ, ka nyume bvu debele. 
Bɛŋ kêe lɛ mo faaŋ fɛ bamii kɛme kiŋghɛ fo bɛ n'yɛlɛ ajii, le mwɛɛ to mu saayi gɛh lo fo, bo tu bo gee chikfuu chi mwɛɛ mù mbefe munchii. 
Geenɛ, muh wù kɛme bvufee bvù jade fɛwe, to wu yuude lo, wu koŋe nyiɛgee wu ka nyume wɛɛ, wu nyaa tɛ bintuŋ muh mu le, wu yisɛ bɛ yii mo gee chì joŋe, wu duunyi gɛ yeye yeye gɛ, wu kɛme gɛ jɛ́ yifiɛɛ gɛ. 
Noo, bamii ba gɛɛde nyiɛgee, bo boone ŋgo yì le nyiɛgee, ŋgweji nyûme kinche ki chaaŋ. 
