﻿Ŋwa wù ba gɛ̀ saŋ fɛ Ba'ibulu le.
1.
Gɛ̀ shee nyume fweele Nyo jɛme bachiji chiji besa le de yi bamii be ba ntuŋ le chikɛ le wesee yi jé le yeye yeye. 
Geenɛ, doo tu aju kanɛ a kimɛsɛ le, wu jɛme besabɛŋ le nyume yi jwe wu Mwa ye le. Le Mwa ye wunɛ wù wu le wu baa lɛ wu le wu nyûme nji bvushɛ wu fiɛɛ fichii. Le wu wù Nyo gɛ̀ fɛ woŋ bɛ fiɛɛ fichii fede chiaaŋ ye le. 
N'yulɛ wu Nyo lale yi ye ye le, nyume wu wù le bvushi bvu Nyo kibɛɛ. Le wu wù gɛ̀ ge kibvulɛ bɛ nshɛŋ fɛ mu nyume yu. Wu gɛ̀ ge nyume bɛ jɛ ye yì kɛme bvuŋga. Wu gɛ̀ maaŋ bimbefɛ biɛsa besabɛŋ. No wu gɛ̀ manɛ noo wu mo wu bɛɛŋ we wu shii a kibo kinchiɛɛŋ ki Nyo wu Bvukugɛ le. 
Fi mo fi nyume lɛ Nyo gɛ̀ fɛ Mwa ye wu kuge baaŋ wu fede banchɛndaa ba Nyo, gɛh yɛɛŋyɛɛŋ no jee chi Nyo gɛ̀ nya wu le kuge tɛ baaŋ chi fede chiboo. 
Besabɛŋ kee lɛ wu kuge lo nje gɛ nchɛndaa wu Nyo wumu nyume yu wù Nyo gɛ̀ yu wa wu jɛme wu le lɛ, “Wo le Mwa yaŋ, abɛŋ nle Chijo.” Gɛ muh nyume yu wù wu gɛ̀ yu wa wu jɛme kune wu lɛ, “Nlé ŋgê nyûme Chijo, wo nyûme Mwa yaŋ.” 
Gɛ̀ bee kife kì Nyo gɛ̀ bee ki wu tûŋ Mwa ye wù ŋkuse wunɛ yi woŋ kfunɛ le, wu jɛmɛ lɛ, “Banchɛndaa be bachii ŋgvûune wu.” 
Fiɛɛ fì Nyo gɛ̀ jɛme kune banchɛndaa be le finɛ fì lɛ, “Wu gee bo nyume njɛ fii, wu gee tɛ bo bò nyu bamii be ba lɛme bo nyume njɛ lɛmɛ chi ŋgu.” 
Doo tu fɛ Mwa ye le, wu du lɛ, “O Nyo, wo lé wo gê wo shîi yi kala wo le wo sâge segechii, kage gɛ. Kinche kì chaaŋ lé ki gê ki nyûme kitoome ki bvunfoŋ bwuŋ. 
Wo koŋe nyume fiɛɛ fì chaaŋ, wo bane fì befe. Noo mɛ wù Nyo wù nle Nyo wo, mɛ mo mbɛɛŋsɛ wo nfe ŋgoo yo, no nle n'yefɛ wo bɛ bee wu bvunfoŋ wù le wu bvujoŋɛ le.” 
Wu ka wu jɛmɛ tɛ Mwa ye le lɛ, “Tada, le wo wù gɛ̀ fɛ nshɛŋ fɛŋkɛɛ, mwɛɛ munchii mù le fɛwe le lɛme chi kibo kuŋ. 
Mwɛɛ munɛ lé mu gê mu kâ, geenɛ shɛ̂ɛ gɛh wo. Mu lé mu gê mu chvûufe njɛ nju. 
Wo lé wo gê wo kɛ̂bɛ mu njɛ kiŋkuŋ. Wo lé wo kûsɛ mu njɛ nju sege yi juŋ. Geenɛ wo lé wo gê wo mɛ̂ gɛh wo nyûme no wo le. Gɛ biluŋ biuŋ nyume bi yu bi kâ gɛ.” 
Le nchɛndaa wu Nyo wù la wù Nyo gɛ̀ yu wa wu du wu le lɛ, “Shîlɛ a kibo kaŋ kinchiɛɛŋ le, gɛ̂ɛŋ bû kife kì nlé ŋgê ŋgîiŋsɛ bamii buŋ ba kimbanɛ a wo jii njɛ kitege ki bikaa, wo tômɛ bikaa biuŋ yi bo le?” 
Gɛ Banchɛndaa ba Nyo banɛ nyume gɛh lo biyo bì lɛne Nyo le, wu tune bi jiɛnyi bi fiih bamii ba lé bo gê bo kɛ̂me mbvusɛ gɛ? 
