﻿Lum.
10.
Booŋ ba bwɛɛŋ, fiɛɛ fì ŋgoone bɛ fitele fiaŋ fichii, mo buunɛ chaŋ fɛ Nyo le, le lɛ mbvusɛ bamii baŋ ba Ishwala banɛ bo ge bo bonɛ. 
Fiɛɛ fì ŋkee, fi taŋlo njɛmɛ le lɛ, bo kɛmɛ kiŋkoŋɛ baaŋ fɛ Nyo le. Geenɛ gɛ bo kee je yì kooji yì bo bîi yi le gɛ. 
No bo baaŋ a kɛɛ gɛ je yì Nyo jode lɛ muh to wu nyume chaaŋ a wu jii yu gɛ, bo mo bo tu bo goone wa ki bo gɛ̂ɛŋ yiboo je le, bo faŋ ki bo nya bikwɛɛ biboo ki bo bii yi yɛɛ je yì Nyo jode lɛ muh le chaaŋ a wu jii yu. 
No Kletu gɛ̀ to wa, je yì banchi yì bamii gɛ̀ bii yu le ki bo nyume chaaŋ a Nyo jii mo yi ka, wu lɛ ki bo nyume chaaŋ a Nyo jii mɛɛse le lɛ bo leesɛ fitele yi Kletu le. 
Musɛ gɛ̀ saŋ kune je yì muh nyume chaaŋ a Nyo jii yu bii nyume banchi le lɛ, “Muh wù gee no banchi duu le wu to wu chêe nje wu gɛɛde banchi bayu.” 
Geenɛ fi kune je yì le no muh nyûme chaaŋ a Nyo jii bii nyu fitele fì wu leese yi ye ye le ba nyu ba saŋ lɛ, “Keefɛ wo bîide a fitele fiuŋ le laa le yɛɛŋ wù lé wu bɛ̂ɛŋ fɛwe la?” (Fì le laa lé bɛ̂ɛŋ yɛɛŋ wu tô bɛ Kletu lɛ.) 
Kɛnɛ lɛ, “Keefɛ wo bîide lɛ laa le yɛɛŋ wù lé wu bôh woŋ baŋkfu le la?” (Fì le laa le yɛɛŋ wù lé wu bôh woŋ baŋkfu le wu bvusɛ Kletu yi kwe la.) 
Geenɛ fi jɛme lɛ la? Fi njɛme lɛ, “Jɛ yi Nyo le mbebe yo le. Yi le jwe wo le, mo a fitele fiuŋ le.” Nyume yi yì bee feeji kune ki bo leese fitele yi Jiso le. 
Nɛ wo jɛme bɛ jwe wo lɛ Jiso le Tada, wo bɛɛŋ fɛ fitele fiuŋ le lɛ Nyo gɛ̀ bvusɛ wu yi kwe le, wo ge wo bonɛ. 
Fi le lɛ muh bɛmɛ nyu bɛ fitele fie fɛ Nyo jô wu lɛ wu le jialɛ sɛŋ. Muh jɛme nyu bɛ jwe we fɛ Nyo bvûsɛ wu. 
Ŋwa wu Nyo jɛme lɛ, “Gɛ muh wù le wu bɛɛŋ wu le, to wu kɛmɛ bvuya gɛ.” 
Bɛŋ kêe lɛ gɛ yeye nyu yu antɛnɛɛ a muh wu Bajuu bɛ muh wù le gɛ muh wu Bajuu gɛ. Tada wù le Tada wu bamii bachii le gɛ wu mumwaa. Wu to wu gweenyi chiaaŋ ye wu nyaa bvukugɛ muh le wuchii wù beede fɛ wu le. 
Fi le no ba gɛ̀ saŋ a Ŋwa wu Nyo le lɛ, “Muh wuchii wù beede wu tɛŋe jee chi Tada, wu lé wu gê wu bvûsɛ wu.” 
Geenɛ taŋlo bamii jiɛnyɛ nɛɛ ki bo tɛŋe wu njɛ bo le bo leesɛ fitele yi ye ye le sɛŋ? Taŋlo bo jiɛnyɛ nɛɛ ki bo leesɛ fitele yi ye ye le njɛ bo le bo yu wa kune wu sɛŋ? Bo taŋlo bo jiɛnyɛ nɛɛ ki bo yu njɛ muh le wu fejɛ kune wu bo le sɛŋ. 
Taŋlo bamii ge nɛɛ ki bo gɛɛŋ bo feeji njɛ ba tuŋ bo sɛŋ? Fi le ba saŋ lɛ, “Bikaa bi bamii ba too bɛ saaka wù joŋe, to bi joŋe baaŋ.” 
Geenɛ, gɛ bamii ba Ishwala bachii bɛɛŋ wa saaka wù joŋe wunɛ le gɛ. Gɛh yɛɛŋyɛɛŋ no Yosaya wù muh wu ntuŋ wu Nyo gɛ̀ jɛmɛ lɛ, “Tada, le yɛɛŋ wu le wu bɛɛŋ saaka wù bee feeji le?” 
Fi mo fi nyu lɛ ki muh lêesɛ fitele yi Kletu le jade yi fiɛɛ fì muh yuge le. Fiɛɛ fì muh yuge jade fɛ fì ba feeji kune Kletu le. 
Mɛ mo mbiide laa bo gɛ̀ baaŋ yu gɛ? Nchiɛɛŋ bo gɛ̀ yu. Ŋwa wu Nyo duu lɛ, “Jɛ yiboo le yi gɛɛŋ yi kikwɛɛ ki nshɛŋ le kichii, banjɛmɛ baboo gɛɛŋ bo bu yi abu a woŋ le achii.” 
Ŋka mbiide laa fi le lɛ bamii ba Ishwala gɛ̀ doo bo yu, bo gɛ yu chuule gɛ? Musɛ gɛ̀ bee wu ya wu jɛmɛ lɛ, Nyo duu lɛ, “Nlé ŋgê kindoŋ bɛ̂ɛne bɛŋ bɛ kituŋ ki bamii ba achiji, ŋge shɛ́ŋ tôonyi bɛŋ bɛ kituŋ ki bamii ba le biyuŋ.” 
Yosaya ka wu jɛme lo wu ya faane gɛ lɛ Nyo duu lɛ, “Bamii ba chi goone gɛ mɛ gɛ le bo yɛŋ mɛne. Nle ndunyɛ kikwɛɛ kaŋ bamii ba gɛ̀ biide gɛ mɛ gɛ.” 
Geenɛ fi kune bamii ba Ishwala Nyo gɛ̀ jɛmɛ lɛ, “Aju achii le gɛ no nshee nɛɛse chiaaŋ ki nfi bamii, geenɛ bo tɛɛme gɛh nyu bikwɛɛ bo gɛɛne yiboo je le.” 
