﻿Joŋ.
5.
Ajiŋ ayu ŋka wu Bajuu wumu gɛ̀ bee Yɛlusalɛm, Jiso bɛɛŋ yo. 
Kintuge ki joo kimi gɛ̀ bee yo ba tɛŋe a jɛ́ yi Ibulu le lɛ Bɛseda, ki le mbebe Jwe wu Kitaŋ ki Shóŋ le. Ba nyu ba jooŋ baŋgaa fo batɛŋ, 
bamii ba binchɛŋ gɛ̀ shee bo loone lo fo, binfeeŋ bɛ bantɛŋelase mo ba kwe wa kimbe kimimia. Bo gɛ̀ shee bo gime fo bo chiɛɛne sege joo le yi ja yi shiŋshɛ. 
Nchɛndaa Tada wumu gɛ̀ too kife le kife le, wu leese wu shiŋshi joo yiyu. Muh wù fwe wù ya wu lee yo sege Nchɛndaa wuyu shiŋshɛ joo yiyu, tu wu lé wu tɛ̂mɛ yi kinchɛŋ ke le mo nyu ki nɛɛ lɛ. 
Muh mu gɛ̀ bee fo wu gɛ̀ chɛŋ wa biluŋ mbaanshɛ ncho nyaaŋ. 
Jiso doo wu to fo wu yɛŋ wu le, wu kɛɛ lɛ wu gɛ̀ giiŋ wa fo ntaŋ wù ndefɛ le, wu biih wu le lɛ, “Wo koŋe ki wo tɛ̂mɛ?” 
Muh wu kinchɛŋ wɛɛ chvuu lɛ, “Chii, gɛ ŋkɛme muh wù taŋlo wu fih wu leesɛ mɛ a joo yinɛ le sege yi shiŋshi gɛ. Sege yi shiŋshɛ, ndoo ŋgɛɛne ki nlee, nto muh mu nyu wu lee wa a mɛne.” 
Jiso jɛmɛ wu le lɛ, “Jâ we, wo jô kijinɛ kuŋ, wo gɛ̂ɛne.” 
Kimimia, muh wɛɛ mo wu tɛmɛ, wu jo kijinɛ ke wu mo wu gɛɛne. Abvu gɛ̀ bee juu chi yuuŋ. 
Bajuu mo bo jɛmɛ muh wù ba gɛ̀ fɛ wɛɛ le lɛ, “Abɛŋ le juu chi yuuŋ nchi baaŋ bɛɛŋ gɛ lɛ wo tuu kijinɛ kuŋ gɛ.” 
Wu chvuu bo le lɛ, muh wu be fɛ mɛ ntɛmɛ be wu jɛmɛ mɛne lɛ, “Jôo kijinɛ kuŋ wo gɛ̂ɛne.” 
Bo biih wu le lɛ, “Le yɛɛŋ wuyu wù be jɛmɛ wo le lɛ wo jo kijinɛ kuŋ wo gɛɛne?” 
Gɛ muh wu ba gɛ̀ fɛ wɛɛ gɛ̀ kee mo muh wù fɛ wu gɛ, nje Jiso gɛ̀ ja wa wu lee wu gɛɛŋ antɛnɛɛ a kinchvu ki bamii kì gɛ̀ bee fo. 
Lɛ nyu ajiŋ ayu, Jiso yɛŋ wu le fɛ yeh yi kintanyɛ le, wu jɛmɛ wu le lɛ, “Bîjɛ yɛ̂ŋ no wo le wo tɛmɛ wa. Keefɛ wo ka wo gêe bimbefɛ gɛ. Wo ka ge lo, fiɛɛ lé fi gê fi gwê ye yo le fì kuufe ye fi fede finɛ.” 
Muh wɛɛ ja wu gɛɛŋ wu sɛɛŋ Bajuu le lɛ le Jiso wù be fɛ wu. 
Bajuu mo bo kɛ bo tu bo boone bikaa a Jiso jiŋ, nje wu gɛ̀ fɛ muh wunɛ nyu juu chi yuuŋ. 
Jiso jɛmɛ bo le lɛ, “Chii to wu lɛne segechii, mɛ tɛ nlɛne noo.” 
Njɛmɛ wunɛ ge Bajuu mɛsɛ lo bo tu bo goone baaŋ ki bo yuuyɛ wu, nje gɛ gɛ̀ mɛ gɛh yuuŋ chi wu gɛ̀ ŋgode maa gɛ. Wu gɛ̀ tɛŋe tɛ Nyo lɛ Chiji, wu fege ye ye lɛ wu le yɛɛŋyɛɛŋ bɛ Nyo. 
Jiso gɛ̀ ja wu jɛmɛ bo le lɛ, “Nsɛŋe bɛŋ le nchiɛɛŋ nchiɛɛŋ lɛ gɛ mɛ wù Mwa taŋlo ŋge fiɛɛ a bvuŋga bwaŋ le gɛ. Ŋgee gɛh nyu fiɛɛ fì n'yɛde Chii gee. Fiɛɛ fì Chiji Mwa gee, le gɛh fi fi Mwa le wù gee tɛ, 
nje Chiji Mwa wɛɛ wù koŋe Mwa to wu duunyi Mwa mwɛɛ munchii mù wu wù Chiji Mwa gee. Wu baaŋ wu ka wu dunyɛ mwɛɛ mù fede munɛ wu le, wu gêe bɛŋ yɛ̂de, jwe yûne lo bɛŋ. 
No Chiji Mwa bvuuse bamii yi kwe le wu nyaa kinche bo le, le gɛh yɛɛŋyɛɛŋ no Mwa nyaa kinche mo yɛɛŋ wù wu koŋe le. 
Ki ntaa fo gɛ Chiji Mwa sage muh mu gɛ. Wu lé wu nyâ nsa wuchii nyu chiaaŋ yi Mwa ye le, 
wu lɛ taŋlo bamii bachii ŋgvûune Mwa, gɛh yɛɛŋyɛɛŋ no ba ŋgvuune tɛ Chiji. Nɛ muh le yu wu ŋgvuune gɛ Mwa gɛ, tu gɛ wu ŋgvuune Chiji wu tuŋ wu gɛ. 
Nsɛŋe bɛŋ le nchiɛɛŋ nchiɛɛŋ lɛ muh wu yu jɛ yaŋ, wu bɛɛŋ muh wù tuŋ mɛ le, wù kɛme kinche kì kage gɛ. Gɛ mwɛdɛ baaŋ wu ka wù kɛme nsa gɛ. Wuwɛɛ muh le wu bu wa chiaaŋ yi kwe le, wu lee kinche le. 
Nsɛŋe bɛŋ nchiɛɛŋ nchiɛɛŋ lɛ kife too lo, ki nyu ki to wa, kì bamii ba kweeyɛ wa lé bo yû jɛ yi Mwa Nyo, baa bò lé bo gê bo yû, lé bo kɛ̂me kinche. 
Fi le noo, nje no kinche jade yi Chiji Mwa le, le gɛh yɛɛŋyɛɛŋ no wu nya bvuŋga Mwa le lɛ kinche jâde tɛ yi ye ye le. 
Wu lé wu nyâ tɛ bvuŋga Mwa le lɛ wu sûunɛ bansa, nje wu le Mwa wu le Muh wù jee che le Mwamuh. 
Keefɛ jwe yûnɛ bɛŋ yi finɛ fiɛɛ le gɛ. Kife too lo kì bamii bachii ba le a jɛ́ŋ lé bo yû jɛ ye, 
bo bu a jɛŋ, bo gee mwɛɛ mù njoŋe, bo bu bo lee kinche kì kage gɛ le, ba gɛ̀ gee mwɛɛ mù mbefe, bo bu ba sa bo, bo gwe nsa. 
Gɛ fiɛɛ nyu yu fì ntaŋlo ŋge a bvuŋga bwaŋ le gɛ. Nsage nsa mbii no n'yuge, je yì nsuune yu le yi chaaŋ, nje gɛ ŋgoone ki ŋgee fiɛɛ fì koŋe mɛ gɛ. Ŋgee nyu fiɛɛ fì muh wù tuŋ mɛ goone. 
Nɛ mbɛɛyi jiŋ yi nsa wu kikwɛɛ kaŋ, tu gɛ fiɛɛ fì njɛme kooji gɛ. 
Geenɛ, muh mu le yu wù bɛɛyi jiŋ yi nsa waŋ, ŋkee lo lɛ fiɛɛ fì wu jɛme kune mɛ le nchiɛɛŋ. 
Bɛŋ gɛ̀ tuŋ bamii fɛ Joŋ le, wu gɛɛŋ wu bɛɛ jiŋ yi nsa kune nchiɛɛŋ. 
Gɛ nyu lɛ ŋkoŋe lɛ jɛ̂me muh wu wuŋ kune muh wù le mɛ gɛ. Geenɛ, njɛme nɛ wu lɛ bɛŋ taŋlo bɛŋ bonɛ. 
Joŋ gɛ̀ bee njɛ kin'yesɛ kì ba chu ki bɛɛde ki nyaa n'yulɛ, bɛŋ koŋe ki bɛŋ nyûme yi n'yulɛ we le yi kife ki shige le, bɛŋ laŋeye. 
Fiɛɛ fimi le yu fì duunyi muh wu le mɛ fì fede Joŋ. Fi le lɛ, lɛme chi Chii nya lɛ nlɛŋ mmɛsɛ, chi le mwɛɛ mu ŋgee munɛ, mu duunyi lɛ tuŋ Chii mɛ. 
Chii, wu tuŋ mɛ wù kibɛɛ le wu bɛɛ tɛ jiŋ yi nsa waŋ. Bɛŋ gɛ̀ baaŋ a yu gɛ jɛ ye gɛ, bɛŋ gɛ̀ baaŋ a yɛŋ gɛ wu le gɛ. 
Gɛ bɛŋ kɛme tɛ jɛ ye a muntele mwɛna le gɛ, nje bɛŋ baaŋ lee gɛ muntele yi muh wu wù tuŋ le gɛ. 
Bɛŋ taade a Ŋwa wu Nyo le nje bɛŋ kwaji lɛ le yo a bɛŋ lé bɛŋ kɛme fiɛɛ fì lé fi gê bɛŋ kɛ̂me kinche kì kage gɛ. Fiɛɛ fì le a Ŋwa wuyu wunɛ le jɛme nyu kune mɛ. 
Geenɛ, bɛŋ ka faŋe ki bɛŋ tô fɛ mɛne lɛ bɛŋ kɛme kinche. 
Gɛ ŋgoone mbɛɛŋsɛ nyu wù jade fɛ muh wu wuŋ le gɛ. 
Geenɛ ŋkee bɛŋ. Ŋkee lɛ gɛ bɛŋ kɛme kiŋkoŋɛ ki Nyo a muntele mwɛna le gɛ. 
Nto a jee chi Chii le, bɛŋ baaŋ mɛ fi gɛ. Nɛ be to muh mu a jee che le, tu wuwɛɛ muh bɛŋ bee bɛŋ mo bɛŋ fi lo wu. 
Taŋlo bɛŋ ge nɛɛ fɛ bɛŋ bɛɛŋ mɛne, bɛŋ nyu bamii ba goone mbɛɛŋsɛ nyu wu jade fɛ bikwɛɛ biɛna le, bɛŋ goone gɛ mbɛɛŋsɛ wu jade nyu fɛ Nyo wù mɛ gɛh wu le gɛ. 
Keefɛ bɛŋ kwâji lɛ le mɛ wù nle ndunyɛ gee chena chì befe Chii le gɛ. Le Musɛ wu bɛŋ gɛle bvufee ye ye le, le wu wù lé wu dunyɛ gee chena Chii le. 
Nɛ bɛŋ gɛ̀ bɛɛŋ wa Musɛ le nchiɛɛŋ, tu bɛŋ be bɛŋ bɛɛŋ mɛne nje wu gɛ̀ saŋ kune mɛ. 
Geenɛ no bɛŋ gɛ̀ baaŋ bɛɛŋ gɛ mo mwɛɛ mù wu gɛ̀ saŋ le gɛ, taŋlo bɛŋ ge nɛɛ fɛ bɛŋ bɛɛŋ fiɛɛ fì njɛme le?” 
