MAT 1:1 Egiteu la maratatila aleie, egiteu la hilile Iesus Kraist, egite veipalea te la maratatila te Devit, eia e tubule Abraham isasa sesele:
MAT 1:2 E Abraham, e latula e Aisak, e Aisak, e latula e Iakob, e Iakob, e latula e Iuda, egiteu vitau me taitari.
MAT 1:3 E Iuda, e latula ilua e Pares me Sera, e tila girua e Tamar. E Pares, e latula e Hesron, e Hesron, e latula e Ram,
MAT 1:4 e Ram, e latula e Aminadab, e Aminadab, e latula e Nahason e Nahason, e latula e Salmon,
MAT 1:5 e Salmon, e latula e Boas, me tilale Boas ele, la isala e Rahab. E Boas, e latula e Obed, me tilale Obed ele, la isala e Rut. E Obed, e latula e Iesi,
MAT 1:6 e Iesi, e latula e Devit, eia la mulugaluga tegiteu e Iuda alaura. E Devit, e latula e Solomon, me tilale Solomon ele, eia puli muga e Uria.
MAT 1:7 E Solomon, e latula e Rehoboam, e Rehoboam, e latula e Abaisa, e Abaisa, e latula e Asa,
MAT 1:8 e Asa, e latula e Iehosapat, e Iehosapat, e latula e Iorim, e Iorim, e latula e Usia,
MAT 1:9 e Usia, e latula e Iotam, e Iotam, e latula e Ahas, e Ahas, e latula e Hesekaia,
MAT 1:10 e Hesekaia, e latula e Manasa, e Manasa, e latula e Amon, e Amon, e latula e Iosaia,
MAT 1:11 e Iosaia, e latula e Iekonaia. Te la imamala te Iekonaia me egiteu e taitarila, egite Asiria lapu taro egiteu e Iuda soio te la kilisi oio la mautu e Babilon.
MAT 1:12 Mulimuli te la imamala la viligila alele, e Iekonaia eia goio savu e latula e Salatiel, e Salatiel, e latula e Serababel,
MAT 1:13 e Serababel, e latula e Abiuda, e Abiuda, e latula e Eliakim, e Eliakim, e latula e Asor,
MAT 1:14 e Asor, e latula e Sadok, e Sadok, e latula e Akim, e Akim, e latula e Liuda,
MAT 1:15 e Liuda, e latula e Lieser, e Lieser, e latula e Matan, e Matan, e latula e Iakob,
MAT 1:16 e Iakob, e latula e Iosep, e rutula e Maria ale e tilale Iesus, egite toila e Kraist.
MAT 1:17 Egiteu la karakara te Abraham, kara tegiteu la karakara te Devit, egite la tuvu savulusa gete vaa. Goio, sokoa te Devit, kara te la imamala ale egite Iuda goilo te la pulolou la kilisi oio e Babilon, egite tai la tuvu savulusa gete vaa. Soko loua te la imamala la viligila oio e Babilon, kara te Kraist, egite tai la tuvu savulusa gete vaa.
MAT 1:18 La veimulipolola ale te la piligole Iesus Kraist, eia maie: La vei robola oio pouti ale e Iosep ge puli e Maria, egira ge taulai, eala moli egira souka vipou tomi, e Maria savuti mai la vibalavala te La Kalulu La Marokala.
MAT 1:19 E Iosep, eia la tahalo sesele, eia kama koramulia veia eia ge mahela taro e rutula e Maria, eia gabutatalea veia eia ge tou kokovu molia, la vuhula eia savuti.
MAT 1:20 E Iosep so gabutatala molia mai ele veia egira me Maria ge vipou baa, eia goio mavuta te la logo, e angelo isasa loata te La Uru eia goio sibitala tavua, eia veiala maie mago “Iosep, eme e tubule Devit isasa sesele. Eme umala ge mahelale e rutumu, eme ge puli molia, eia ge e rutumu sesele. Eme ge loloa, ale e rutumu savu, la tahalo isasa kama la vuhula, ouka, ale la vuhula te La Kalulu La Marokala, eia pigi robotia, eia vibalavala e latulale.
MAT 1:21 E rutumu eia ge taposa e latula, eia ge hatamale, eme ge toi la isala e Iesus, la masova la isa aleie eia maie: eia ge vimahuli egiteu la valalua tetala, eia ge vimavulaha egiteu taro la vulovulo la iruru ale egite igigoa.”
MAT 1:22 La vikararala te angelo soio te Iosep ale mai ele, eia vipuru moliti la merera te la bilalaha te La Uru ale pala, ale eia veia maie
MAT 1:23 “La sobe isa bisi ge savu, eia ge pigo e latula ge hatamale, egite ge toi la isala e Manuel.” Me la masova la isa aleie eia maie: La Tahalo Uru eia vipou tomiti letatou.
MAT 1:24 Tio e Iosep goio hagolo, eia goio tilimulia mai ale e angelo te La Tahalo Uru veitiala, eia goio puli e rutula e Maria,
MAT 1:25 eala moli egira kama vipou tomi kara ale eia pigo e latula. La imamala te Maria goio sibitala, eia goio taposa e latula e hatamale, e Iosep goio toi la isala e Iesus.
MAT 2:1 E Iesus, e tilala taposea oio la mautu e Betlehem, oio la gale e Iudea, te la imamala ale e Herod pou la mulugaluga te la gale alele. E Iesus sibitala kaluvu, egiteu la tahalo la mari isahari loio te la gale isa malau ale la haro porosile ovola, egite hiliti, egite goio goale e Ierusalem veia ge hari lalai e Iesus ele veia egite ge hiloa. Egite goio guvi oio e Ierusalem,
MAT 2:2 egite goio tahi egiteu la valalua mago “La pepeso ale e tilala so tapaposea, eia ge la mulugaluga tegiteu la valalua e Iuda, eia oiove? Amite hiloti la irovilala tetala, la matatabu uru, eia porosile, amite gomaie veia ge sagege roboa ge vaisalea.”
MAT 2:3 Eala moli la mulugaluga e Herod, eia tai lolo la tilahi tegiteu ele, la gabutatalala tetala marapa, me egiteu tai la valalua e Ierusalem, egite marapa.
MAT 2:4 Tio, e Herod goio baha tavu egiteu la mulugaluga tegiteu e pris, egite la valalua la mari tai ale mari tataho la viputumulila tegite Iuda, egite goio pou vikapopo, e Herod goio tahi egiteu mago “Mave, egite ururu vikara mave te la guluvi te Kraist, e tilala ge taposea oiove?”
MAT 2:5 Egite loloa mai ele, egite goio veiala mago “E Kraist, eia ge sibitala oio la mautu e Betlehem te la gale e Iudea, mai la merera te la bilalaha te La Uru eia kekesia maie:
MAT 2:6 Maura Betlehem ele te la gale e Iudea, la valalua veia eme la mautu bulalahu moli isasa, eala moli eme la kalia la mautu sesele, la vuhula la mulugaluga ale uru sesele, e tilala ge taposea oio taume. La tahalo ale, eia ge vibaumuli la maratatila taku sesele, la valalua me hatavivile e Israel.”
MAT 2:7 Eala moli e Herod eia lolo la merera tegiteu ele, eia goio tahi keke moli egiteu la valalua la mari ale loio la mautu malau mago “La matatabu ale amuto hiloa, amuto mulimulia somai, eia sibitala alisa?”
MAT 2:8 Goio, egite koli la tilahi tetalale, eia goio baha taro egiteu veia egite ge goio e Betlehem, eia veia giteu mago “Amuto goio paa mulia, mai amuto sivutitia, amuto ge gomai, amuto ge veiagu, la vuhula eau tai ge goio ge lotu tavua.”
MAT 2:9 Tio egite loloti la merera te Herod mai ele, egite goio tuga, egite tilimulimuli molia la matatabu ale egite hilotia lomuli la porosesile la mata la haro te la gale tegiteuo, la matatabu ele eia mamuga egiteu, eia goio magiri matata moli oio la varu la luma soatao, ale la pepeso e tilala taposea oio volale.
MAT 2:10 Ale egite hiloa la matatabu eia vituria giteu la gauru mai ele, egite sagege pepeho seseleti.
MAT 2:11 Egite goio guvi, egite goio tiroro soilo la luma, egite goio hiloa la pepeso, egira me tilala e Maria, egite goio toto tulu otalo, egite togoa, egite lotu tavua. Egite goio lao la palo tegiteu, egite goio abia la pepeso la vaabila tegiteu, egite abiale tilala, egite abiala la gold, la paura ale malia tataho, me la bululu la obu ale mali vivili tataho tai.
MAT 2:12 Tio, egite goio mavuta, egite taga, te la logo La Tahalo Uru mera taro egiteu veia egite umala ge beu rivua veia ge veiale Herod te la pepeso ale e tilala taposatia. Eala egite kati roromuli e Herod, egite goio polo te la gauru isapolo, egite goio beu rivu loua te la mautu tegiteu.
MAT 2:13 Mulimuli, egite la valalua la mari goio tuga, e Iosep goio mavuta, eia hilo e angelo isasa eia sibitala tavua, eia veiala mago “Amula me rutumu hiliti, bokoa e latu muluale, amuto ge tuga, amuto hele soio e Gipto. Amuto ge pou oio la gale e Giptole kara te ale eau ge veiamu, la vuhula e Herod veia ge paa muli la pepeso aleiele, eia ge bilia eia ge peho.”
MAT 2:14 Tio, e Iosep goio hiliti moli te la logo ale, eia puli molia e rutula e Mariale, e latu girua, egite hiliti, tuga, goio e Gipto.
MAT 2:15 E Iosep me rutula, e latu girua, egite pou oio e Gipto kara ale e Herod peho. Mai ele, la merera te la bilalaha te La Uru ale pala eia puru sesele, la mererale eia veia maie “Eau tola tavu e latugu loio e Gipto eia ge gomai.”
MAT 2:16 Tio, e Herod ga pou taitali egiteu la tahalo la mari veia egite ge beua ge veiala la pepeso ale e tilala taposea, egite kamati beua soio tetala. La hatela mamasi, eia igo totolo, eia goio baha la valalua isahari soio e Betlehem me soio te la maututula ale hagagavi oio e Betlehem veia egite ge bili taro egiteu la pepeso ale hatamalemale, egiteu ale la leavala tegiteu souka ilua, mai la vikararala tegiteu la tahalo la mari egite veiala pala te la imamala ale la matatabu ale virovi la piligole Kraist eia sibitala ovola.
MAT 2:17 Eia mai sesele la merera te La Uru eia veipalea te la bilalaha tetala e Ieremaia, la merera aleiele eia puru seseleti, eia maie:
MAT 2:18 Oio e Rama egite lolo la tilali, la kilaku, e Rakel eia taitali legiteu e latatula, la valalua me hatavivile egite kama koramulia veia egite ge vimalu e Rakel, ouka viruru, la vuhula eia kamati hilo la mata giteu e latatulale.
MAT 2:19 Tio, e Herod goio peho, me mulimuli te la pileho tetalale e Iosep goio mavuta, e angelo isasa sibitala tavua,
MAT 2:20 eia goio veiala mago “Eme ge hiliti, pulia e rutumu me latumu, amuto ge beua soio la gale e Israel, la vuhula la tahalo ale eia veia ge bili e latumu, eia pehoti.”
MAT 2:21 Tio e Iosep loloa mai ele, eia goio hiliti, eia pulia e rutula, e latula, egite beua soio e Israel.
MAT 2:22 Eala moli e Iosep goio lolo la valolo maie e Arkelas e latule Herod eia koliti e tamala, eia la mulugaluga oio e Iudea, eala e Iosep eia taga la goiola te la gale alele. Eala moli la tilaga te Iosep isasa, eia mavuta, eia tagea La Tahalo Uru veiala eia ge polo gale ge goio e Galilea.
MAT 2:23 Tio, egite me rutula me latu girua, egite tuga, egite goio pou oio e Nasaret. Eia puru muli sesele la merera tegiteu la bilalaha te La Uru ale pala, egite veitia maie “Egite ge toia veia e Kraist eia la tau Nasaret.”
MAT 3:1 Te la leavala alele, e Ioanes la tahalo la vuluhi, eia guvi, eia valolo oata te la rorobo oio la gale e Iudea,
MAT 3:2 la valolo tetala eia maie “Eia taritigi amuto ge vulo la gabutatalala tamutou, amuto ge piligi taro la iruru tamutou, amuto ge vuvulo, la vuhula la pulolou la matagaga te La Uru eia hagagavi moliti.”
MAT 3:3 E Ioanes, eia la tahalo ale la bilalaha ale pala, e Aisaia, eia veipalati la merera ovola maie “La golu la tahalo isasa eia tatola loio la hohoi, eia vei maie: Amuto ge ili paa la gauru te La Uru, amuto ge vimatata tomi la gauru tetala.”
MAT 3:4 La kairobola te Ioanes la kulikuli la kamel, la kisipou tetala la kulikuli la kau, la ilali tetala moli e pogo, eia liliu moli la magu oio te la tia la hohoi.
MAT 3:5 Eia la tahalo ale isapolo sesele, la valalua usu te la mautu e Ierusalem, te la gale e Iudea, me te la maututula ale hagagavi la lalu e Iordan, egite goio te Ioanes, egite lolo la valolo tetala.
MAT 3:6 Egite goio veipala la iruru tegiteu, e Ioanes goio vuhi egiteu oio la lalu e Iordan.
MAT 3:7 La haro isasa e Ioanes hilo egiteu e pariseo usu, egiteu e sadiusi tai usu, egite guvi vikapopo veia ge lolo la valolo tetala, eia goio veia giteu “Amuto la valalua me hatavivile, la vulovulo mutou kama kokora sesele, amuto veia ge hele taro la igototolola ale tivura pepeho te La Uru ale ge sibitala robo amutou. Amuto veia ge hele taroa mai e taive eia hele taro la hohoi ale tululu, veia amuto ge gomai ge vuhi maroka!
MAT 3:8 Amuto ge vulo pala muga la vulovulo mutou, la vulo mutou ge taritigi te la mata La Uru, tio amuto ge koramulia mai ele ge abi la vuluhi mai ale amuto mavulahati te la iruru tamutou.
MAT 3:9 Amuto umala ge gabutatala marapa te la gabutatalala tamutou veia e tubu mutou e Abraham, eala La Tahalo Uru eia lege sisigi le amutou! Eau vei seselea mutou, La Tahalo Uru eia koramulia ge vikara soio tegiteu la uatati ale tabuli otalo te la magasale, eia ge visibitala egiteu mai e tutubule Abraham, ale eme veia eme e tubule Abraham, ale la golu bulalahu moli.
MAT 3:10 Eala moli amuto ge matagagati veia La Tahalo Uru eia mai ale tau lalahatia la pemu tetala soio te la vuhu la obobu tomi, mai la obobu ale la vavua giteu kama taritigi, eia ge tolo taro egiteu ge pigi egiteu sotalo te la havi, eia ge goho ge kaluvu.
MAT 3:11 Eia sesele, la vuluhi taku eia kama tikumu, eau vuhi moli le amutou la lalu moli veia ge vimavulaha taro la iruru tamutou, eala moli ale mulimuli taku, la vagagarila tetala muga taku, eau togo pepehoa, eau kama koramulia ge tuga hagagavi soio te la balila. Eia ge abia mutou La Kalulu La Marokala, amuto ge gabu seselea oilo te la ilo mutou tomi isasasa eia ge tivura mai la havi.
MAT 3:12 La Uru ele, eia raragiti veia ge hilovi la vulovulo la valalua me hatavivile tomi, isa kama ge hele, eia ge hilovi la vulovulo gatou, veia egiteu ale taritigi eia ge puli egiteu hagagavi soio te la balila, eala moli egiteu ale kama kokora, eia ge pigi egiteu sotalo te la havi ale karerere, la kaluvula ge ouka.”
MAT 3:13 Goio, te la imamala moli aleie, e Iesus hiliti loio e Galilea, eia goio la lalu e Iordan veia e Ioanes ge vuhia.
MAT 3:14 Eala moli e Ioanes veia ge mera taroa, eia veiale Iesus mago “Eia koramulia eme ge vuhi eau, eau kama koramulia veia eau ge vuhime, ouka. Eala moli eme gomai taku veia ge vuhi omai taku e!”
MAT 3:15 E Iesus goio koli la merera te Ioanes mago “Korati, eme ge igoa mai ale eau veitiamu, etala ge vipuru la masasagala tomi te La Tahalo Uru ale eia veia eau ge mulimuli la vulovulo tomi ale matata koramulia la igogolu taku.” Tio e Ioanes loloa mai ele, eia goio mulimuli la masasagala te Iesus, eia goio vuhia.
MAT 3:16 E Ioanes vuhi e Iesus kaluvu, e Iesus goio hiliti, magiri, eia taga soata, eia hilo la mori eia kopeti, eia hilo La Kalulu La Tahalo Uru eia mai la malu la uku, eia gotalo tetala.
MAT 3:17 Goio la golu La Tahalo Uru tola loata te la mori maie mago “Ale e Latugu la riau, eau sagege pepeho sesele leia.”
MAT 4:1 Goio, La Kalulu La Marokala eia baha taro e Iesus soata la hohoi veia eia ge pou muga ovola, e Satan ge tovo lalaia.
MAT 4:2 Tio e Iesus pou mai alele, eia kama ali, eia kama liu, eia peremu moli maie, la logo savulu vaato, eia vitolo sesele.
MAT 4:3 Goio e Satan sibitala tavua, eia veiala mago “Mai eme e Latu La Tahalo Uru sesele, eme ge vulo egiteu la uatati aleie, eia ge sibitala mai la bret.”
MAT 4:4 Eala moli e Iesus goio ule baoliala mago “Eala moli La Buk Tabu eia toia maie ‘La ilali ale etato ali bibibia, eia kama koramulia ge vimahuli la kalulu gatou, eala moli la valalua ge mahuli moli te la vikararala tomi te La Tahalo Uru, ale egite loloa te la harela, egite goio taua te la ilo giteu.’”
MAT 4:5 E Iesus veiale Satan mai ele kaluvu, goio e Satan pulia soio e Ierusalem, egira goio goata te la varu la luma la lotu oata pepeho, egira magiri oata ovola.
MAT 4:6 Tio e Satan goio veiala mago “Mai eme e Latu La Tahalo Uru sesele, taritigi eme ge raga sotalo, la vuhula La Buk Tabu eia veia maie ‘La Tahalo Uru ge baha taro egiteu la angelo tetala soio taume, egite ge sakoli sae molime soata te la lima giteu, la vahamu kama ge putua te la uati.’”
MAT 4:7 Goma, e Iesus koli lou la vikararala te Satan mago “Eia sesele, La Buk Tabu eia veia mai ele, eala moli la vikararala te La Buk Tabu isa tai eia toi loua maie ‘Eme umala ge tovo lalai La Tahalo Uru, eia La Uru taume.’”
MAT 4:8 Tio, e Satan goio puli loua soio, egira goio tuga goata te la gove isa uru, la varula goata pepeho, egira magiri oata, egira mata sotalo te la maututula. e Satan goio turiala la maututula me la galegale, eia marasa pepeho.
MAT 4:9 Tio eia goio veiale Iesus mago “Mai eme ge toto tulu otalole, eme ge lotu tavuau, tio la papaga tomi ale eme hilotia, eau ge abiamu, eme ge taholea.”
MAT 4:10 Eala moli e Iesus putu oli louala mago “Satan, eme ge hele taroau, la vuhula La Buk Tabu eia toia maie ‘Amuto ge lotu tavu moli La Tahalo Uru sekela, eia La Uru mutou, amuto ge togo moli eia sekela.’”
MAT 4:11 Tio, e Satan goio hiliti taro e Iesus, eia tuga. Goma egiteu la angelo goio sibitala tavu e Iesus ele, egite vitahoala.
MAT 4:12 Goio, e Iesus loloti la rerele Ioanes veia e Herod vagoilotia te la luma la kilisi, tio eia hiliti veia ge goio la gale e Galilea.
MAT 4:13 Eia goio hiliti taro la mautu e Nasaret ale eia mou ovola, eia goio pou oio e Kapernaum, eia la mautu isasa eia hagagavi moli la magolilo e Galilea, oio te la gale la magasa ilua, isa te Sebulon, isa te Naptali.
MAT 4:14 Me ale eia goio pou mai ele, eia vipuru sesele la merera te Aisaia ale eia veipalea te La Buk Tabu Ale Pala maie:
MAT 4:15 Taritigi pepeho soio te la gale ilua e Sebulon, e Naptali, oio te la gauru ale golau la mago, te la hararele Iordan loio, la gale moli e Galilea ale la valalua la maligoma usu pou ovola.
MAT 4:16 La valalua me hatavivile ale pou te la maligoma, la matagaga uru sibitalati tegiteu, egite hilotia. Egiteu tomi ale pouti te la mautu la maligoma oio moli te la miau la lulu la pileho, la matagaga uru eia paga veiti egiteu, egite pouti te la matagaga.
MAT 4:17 Te la leavala moli alele, e Iesus soko la valolo, eia veia giteu la valalua me hatavivile tomi maie “La pulolou la matagagala te La Tahalo Uru eia hagagaviti ge sibitala, taritigi amuto ge piligi taro la iruru tamutou, amuto ge vuvulo.”
MAT 4:18 Goma, la haro isasa, e Iesus tatuga te la parava oio la magolilo e Galilea, eia hilo egirua e tau me tari ilua, e Saimon, ale egite toila e Pita, e tabarala tai e Andrew. Egira vovuo oio la magolilo, ale la igogolu moli tegirua ale egira ababi la uati ovola.
MAT 4:19 Goio e Iesus hilo egirua mai ele, eia goio veia girua mago “Amula gomai, amulua ge tilimuli eau. Eau ge vimari le amulua te la pululi la valalua me hatavivile soio te la matagaga.”
MAT 4:20 Tio oio moli ovola egira hiliti taro molia la vuo tegirua, egira goio tilimulia.
MAT 4:21 E Iesus goio tuga lou soio, eia goio poga lou egira e tau me tari ilua, e Iakob me Ioanes, e tama girua e Sebedi, egite me tama girua oio poupou te la uaga, egite holoholo la vuo tegiteu, e Iesus goio tola egirua.
MAT 4:22 Oio moli ovola egira hiliti taro molia la uaga tegiruale, hiliti taro tai e tama girua, egira goio tilimuli e Iesus.
MAT 4:23 E Iesus goio valolo tatuga te la maututula te la gale e Galilea, eia vimari la valalua me hatavivile oio te la luma la lotu te la maututula isasasa, eia valolo egiteu te la valolo ale taritigi te la guluvi la pulolou la matagagala te La Tahalo Uru, eia vimahuli tai egiteu te la mata la ilea tomi ale igo barabara egiteu.
MAT 4:24 Tio e Iesus igogolu mai ele, la rerela taliti soio te la maututula tomi oio la gale e Siria, egite lolo la rerela mai ele, egite bolea egiteu tomi ale lea barabara, la vovo giteu ligiligi, egiteu tai ale la hitu ale kama kokora pou tegiteu, egiteu ale e dododo igoa, egiteu tai ale la tuha giteu maubati, eia goio vimahuli tomi egiteu.
MAT 4:25 Tio la valalua tomi me hatavivile e Galilea, egiteu tai ale loio la gale e Dekapolis, egiteu tai ale loio e Ierusalem, egiteu tai ale loio e Iudea, egiteu tai ale loio la galele Iordan loio, egiteu tomi la valalua me hatavivile mapaiti ele goio hiliti, egite tilimuli e Iesus.
MAT 5:1 E Iesus hilo la valalua me hatavivile mapaiti tilimulia, eia goio tie soata te la gove, eia goio pou otalo. Goio egiteu la valalua la vimari tetala tilimulia soio, egite goio tetala, pou,
MAT 5:2 eia goio soko la vimari soio tegiteu maie:
MAT 5:3 “La valalua me hatavivile ale rovitia veia egite pou la savelela te la kalulu giteu, egite balava seseleti, la vuhula egite sau tolati la pulolou la matagagala te La Tahalo Uru.
MAT 5:4 “Egiteu ale igoie egite pou moli la iloburukola te la pulolou tegiteu omai te la maututula, egite balava seseleti, la vuhula La Tahalo Uru ge vitahoa giteu.
MAT 5:5 “Egiteu ale vibisi la isa giteu veia egiteu la bilalaha moli te La Uru, egite balava seseleti, la vuhula La Tahalo Uru ge sugu taro la maututula tomi me la magasa tomi soio tegiteu.
MAT 5:6 “Egiteu ale vagari tavu la vulovulo ale matata, mai la tahalo ale vitolo eia masaga la ilali, me la tahalo ale malehu eia masaga la lalu, egiteu aleie balava seseleti, la vuhula mulimuli egite ge maru tataho.
MAT 5:7 “Egiteu ale egite rovi sesele la vulovulo la gilogo, egite balava seseleti, la vuhula La Tahalo Uru ge gogo tai egiteu.
MAT 5:8 “Egiteu ale la gabutatalala tegiteu maroka sesele, egite balava seseleti, la vuhula egite ge hilo sesele La Tahalo Uru.
MAT 5:9 “Egiteu ale egite vimalu tataho la valalua me hatavivile veia egite tomi ge vipuhi tigi tataho, egiteu aleie balava seseleti, la vuhula La Tahalo Uru ge toi legiteu e latatula sesele.
MAT 5:10 “Egiteu ale poga la iligiligi oio te la vulovulo giteu ale matata, ale la valalua gima egiteu ovola, egiteu aleie balava seseleti, la vuhula egite sau tolati la pulolou la matagagala te La Tahalo Uru.
MAT 5:11 “Mai la valalua me hatavivile hilo amutou, egite viligi tai amuto, egite vikara barea mutou te la vulovulo mutou ale taritigi, ale egite ge igoa mutou maie, amuto balava seseleti.
MAT 5:12 Taritigi amuto ge sagege moli, amuto ge lege sisigi, la vuhula amuto sau tolati la mapa ale uru sesele eia tabuli taitali amutou oata te la ilo la lage, la vuhula egite viligi tai egiteu la bilalaha te La Uru, egite igo gegeru tai egiteu mai ele te la imamala ale pala.”
MAT 5:13 Tio e Iesus goio vei taia giteu la vikarara la tilovo isa te la vulovulo la vipuhi tigila maie “Amutou ale taku, amuto mai la mimila ale igo malama la ilali. Amuto ge veipala la vulovulogu soio te la valalua me hatavivile, me oio vola la pulolou te la valalua me hatavivile te la maututula eia ge taritigi. Eala moli mai la mimila ale etato lotoa eia kati mamasi tigi, la gauru ouka oio ale etato koramulia ge igo mamasi loua ovola. Eia kati koramulia ge vimalama la ilali, eala egite ge tigitaroa, la valalua me hatavivile ge soa kuru molila la vaha giteu.
MAT 5:14 “Amutou ale taku, amuto la matagaga te la maututula. Mai la mautu isasa egite mou oata te la varu la gove, eia kama koramulia veia la mautu ale eia ge tabuli kokovu te la mata la valalua, ouka. La mata giteu ge tolo tatolea ovola. Mai tai amutou ale taku, la valalua ge hilo amutou, egite ge matagaga.
MAT 5:15 Mai tai la valalua ge vitagu la lam tegiteu, egite kama ge tau robo loua veia la luma ge maligoma lou, ouka. Egite vitagua, egite haratili saea oata, me oio vola egiteu ale pou oio te la lumale, egite ge matagaga.
MAT 5:16 Tio mai tai ele, eia taritigi pepeho veia amuto ge pou mai la matagaga taku soio te la valalua me hatavivile, la vulovulo mutou ale taritigi eia ge mai ale paga vei la valalua me hatavivile tomi, egite ge hilo la vulovulo mutou ale taritigi ele, egite ge vaisale pepeho e Tama mutou oata te la ilo la lage.
MAT 5:17 “Amuto umala gabutatalea veia eau sibitala omai veia eau ge vali boru la viputumulila te Moses me la vimari tai tegiteu la bilalaha ale pala, ouka. Eau sibitala moli veia ge vipuru la merera te ururu tomi ele.
MAT 5:18 Eau vei seselea mutou, kara te la mori me la magasa ge kokovu, la merera isa oilo te la kekesi te ururu kama ge kokovu. La mata la pen isa bisi oio vola, la mata la buk isa tai, kama ge kokovu, ouka viruru. Eia ge tabuli moli kara ale La Tahalo Uru ge igo seselea, eia ge pusese muli tomia ge kaluvu.
MAT 5:19 Eala eia matagaga tai mai ele veia mai la tahalo isasa eia ge polo la merera isa bisi oilo te la viputumulila te ururu, me eia tovo tai la valalua ovola veia egite tai ge poloa, eia ge la tahalo bulalahu moli oio te la pulolou la matagagala te La Tahalo Uru. Eala moli la tahalo ale ge tilimuli tomi la viputumulila te ururu me eia tovo tataho tai la valalua ovola, veia egite ge roromuli tataho la merera te La Uru, la tahalo alele la isala ge uru pepeho te la pulolou la matagagala te La Tahalo Uru.
MAT 5:20 Ale eau vei seselea mutou, mai la vulovulo mutou eia kama ge muga tegiteu e pariseo me tegiteu la mulugaluga tamutou, amuto kama koramulia ge goilo te la pulolou la matagagala te La Tahalo Uru.
MAT 5:21 “Amuto rovitia veia la merera te Moses alaurati te ururu veia maie ‘Amuto umala ge bilibili la tahalo veia eia ge peho, mai isasa ge bili isa la tahalo, amuto ge vimagiria te la vigagiala.’
MAT 5:22 Eala moli eau ge veia mutou maie: Mai la tahalo isasa la hatela mamasiale tabarala, eia tai ge magiri te la vigagiala. Mai isasa ge vile mamago sesele e tabarala mago ‘Eme paua viruru’, taritigi la tahalo ale ge rovia veia eia hagagaviti ge vilua te la havi ale uru la kaluvula ge ouka.
MAT 5:23 “Mai eme ge abi la vaabila taume soio te La Tahalo Uru oio te la luma la lotu, me eme gabutala rivu la iruru taume ale magiriti kabili tamulua me tabaramu,
MAT 5:24 taritigi eme ge piligi muga la vaabila taume, eme ge goio te tabaramu, amula ge vimatata muga la iruru ale magiri kabili tamulua, tio mulimuli eme ge goio abia la vaabila taume soio te la luma la lotu, eme ge abia La Tahalo Uru.
MAT 5:25 “Mai la tahalo isasa veia ge veipalame te la luma la vigagiala, taritigi eme ge igo harari moli, ale amula so vitilimuli te la gauru, taritigi amula ge lapu matagaga muga la merera tamulua. La vuhula la tahalo alele eia souka ge vagoilome te la tahalo la ilolo la vigagiala, eia ge bahame soio te la luma la kilisi, egite ge kapi robome oilo vola, eme ge koratio.
MAT 5:26 Ale eau vei seselea mutou, eme kama ge vulo taro la igototolola te La Tahalo Uru kara ale eme ge vimatata la iruru tomi taume ale vipou baa amulua me eia ale veipalatime soio te la viputumulila.
MAT 5:27 “Amuto rovitia veia la merera te Moses eia pouti palati kara igoie, eia maie ‘Amuto umala ge igo gegeru la taulaila.’
MAT 5:28 Eala moli eau veia mutou maie veia mai eme ge hilo isasa la tavile, la hatemu raga tavua, eme mai ale igoti la iruru vikapopo leia oilo te la gabutatalala taume.
MAT 5:29 Mai la matamu te la galemu e gata eia ge virurume, taritigi eme ge suba taroa, ge pigia, la vuhula eia taritigi veia la vovomu bakisi moli ge vilua, la vovomu tomi souka ge vilua te la havi ale uru la kaluvula ge ouka, ale La Uru ge pigi egiteu la tahalo la iruru sotalo vola.
MAT 5:30 Mai tai la limamu e gata ge virurume, taritigi eme ge barautu taroa, ge pigia, la vuhula eia taritigi veia la limamu moli isasa ge vilua, la vovomu tomi souka ge vilua te la havi ale uru la kaluvula ge ouka, ale La Uru ge pigi egiteu la tahalo la iruru sotalo vola.
MAT 5:31 “La merera te Moses isa lou soio te ururu, eia pouti palati kara igoie, eia maie ‘Mai ge la tahalo isasa eia masagea veia ge tou e rutula, taritigi eia ge vimatata muga la vipou baala tegirua me rutula oio te la vigagiala, eia ge matagaga mai ele veia la tavilele eia pala taulai, e haruala toutia.’
MAT 5:32 Eala moli la merera taku te la taulaila eia isapolo te aleie, eia maie: Mai la tahalo isasa eia ge tou bulalahu moli e rutula, eala moli e rutula kama ruru te la tahalo isasa, la tahalo alele eia viruru taiti e rutula, la vuhula mulimuli e rutula ge taulai polo lou, ale eia mai ale ruruti soio te la tahalo isapolo ale kama e haruala, la vuhula la taulaila eia tikumu. Mai tai la tahalo isasa eia ge puli la tavile ale e haruala toutia, eia tai poloti la viputumulila te La Tahalo Uru te la taulaila.
MAT 5:33 “La merera isa lou te Moses eia pouti palati te tutubu mutou kara igoie, eia maie ‘Amuto umala ge vituri bulalahu moli la lima mutou soata veia amuto ge giriri vagari la visigolola tamutou. Mai amuto vituri la lima mutou soata, amuto ge vikara sesele, amuto umala ge visigolo lou te la merera ale sesele amuto veitia te la mata La Tahalo Uru, eia tikumu.’
MAT 5:34 Eala moli la merera taku te la vituri la lima soata, eia maie: Amuto umala ge vituri la lima mutou soata te la mori veia la merera tamutou eia sesele oata te la ilo la lage, umala viruru, la vuhula la ilo la lage ale la pulolou la uru te La Tahalo Uru, amuto umala ge toi tatavua.
MAT 5:35 Amuto umala tai ge turi sotalo te la magasa veia la merera tamutou eia sesele, umala viruru, la vuhula la magasa eia la muli la vaha La Tahalo Uru ale eia vitahobo la vahala ovola. Umala tai veia amuto ge vituri la lima mutou soio la mautu uru e Ierusalem, umala viruru, la vuhula eia la mautu la marokala te La Uru gatou ale vagari.
MAT 5:36 Umala tai veia amuto ge turi soata te la gama mutoue, umala viruru, la vuhula eme la tahalo bulalahu moli, mai eme sisiti, eme kama koramulia veia ge vulo la ivumu isa veia eia ge parakukuru lou, me mai tai la ivumu soukama sisi, eme kama koramulia veia ge vulo la ivumu isa veia eia ge kea, eala la merera taume ale eme toi seselea oata te la gamamu, eia mai la merera bulalahu moli, eia kama tikumu.
MAT 5:37 Eala moli la merera la vitikumula tamutou soio tegiteu e tabarabara mutou ge matata moli maie: Mai eme ge vei mago ‘Elo’ tio eme ge vitikumu la merera taume maie mago ‘Ee, eia sesele.’ Me mai eme ge vei mago ‘Ouka’ tio la vitikumu la merera taume ge maie mago ‘Ouka, eia ouka viruru.’ Mai la merera isasa eme ge toia eia ge tovosele solagu te aleie, ale la visigolola ale loio te Satan.
MAT 5:38 “La merera isa lou te Moses soio te ururu, eia tabuli moli kara igoie, eia maie ‘Amuto ge koli la mataliso la tahalo isasa me la matalisole isasa, amuto ge koli la livo la tahalo isasa me la livole isasa.’
MAT 5:39 Eala moli la vimari taku ovola eia isapolo te aleie. Ale eau veia mutou te la kolibara la iruru maie: Mai egite ge sabala la galemu e gata, eme ge vulo lou, egite ge sabala tai la galemu e meru.
MAT 5:40 Mai la tahalo isasa eia ge veipalame te la luma la vigagiala veia ge vikaluvu la golugolu tomi taume, veia ge lagi taro tai leme la lavalava ale eme kisia te la kabilimu, taritigi eme ge abiala la golugolu tomi taumele, la lavalava, la kairobola tai taume, eia ge vitugea, korati ele.
MAT 5:41 Mai isa ge totolo tavume veia amula ge vitilimuli te la gauru veia eme ge boleala la tabule tetala ale tikumu veia amula ge tuga mai ele la baa malau bakisi, tio eia taritigi veia amula ge vitilimuli moli, eme ge boleala la tabule tetala la baa malau kara polo la baa ale eia totolo tavume ovola veia eme ge kolia.
MAT 5:42 Mai la tahalo isasa eia ge kakame la paga isasa taume veia eme ge abiala, eme umala vitoutouala, taritigi eme ge abi moliala. Mai la tahalo isasa eia masagea veia ge abi muga la golu isa taume, me la uati ilua tai taume, veia ge abi rivuamu mulimuli, eme umala ge kisu taroa, eme ge abi moliala mai ale eia masagea.
MAT 5:43 “La merera te Moses palati te tubu mutou kara igoie eia maie ‘Amuto ge gogo e tabara mutou, me amuto ge vile egiteu la gima tamutou.’
MAT 5:44 Eala moli la merera taku soio tamutou eia kama mai aleie. La merera taku eia maie, veia taritigi amuto ge gogo egiteu ale gima amutou, amuto ge kaka tavu La Tahalo Uru veia eia ge suli egiteu ale igo gegeru amutou.
MAT 5:45 Mai amuto ge tilimulia maie, amuto ge e latatu La Tahalo Uru, e Tama mutou ale pou oata te la ilo la lage, eia baha la haro, eia paga vei la valalua ale kama kokora, egiteu la valalua ale taritigi tai. Eia visibitala tai la hura, eia pu sotalo tavu egiteu la valalua ale matata eia suli egiteu, me eia pu sotalo, eia suli tai egiteu la valalua ale kama matata.
MAT 5:46 Mai amuto ge gogo moli egiteu ale gogo amutou, La Tahalo Uru kama ge abia mutou la mapa te la vulo mutou aleie, la vuhula egiteu la tahalo la iruru tai igigoa mai ele, mai egiteu la valalua la ilabi la takes.
MAT 5:47 Eia mai tai aleie, mai amuto ge la haro molia giteu e tabarabara mutou, la vulo mutou aleie eia isapolo mave? Egiteu la valalua la maligoma igigo tai la vulo giteu mai ele. Eala moli eau masagea veia amuto ge maroka viviu te la vulovulo mutou, mai e Tama mutou oata te la ilo la lage, eia maroka viviu.
MAT 6:1 “Amuto ge baumuli amutou, amuto umala ge igo la vulovulo mutou ale taritigi soio te la mata giteu la valalua me hatavivile veia egite ge hiloa, veia egite ge vei tataho amutou veia amutou la tahalo me la tavile la lotu sesele. Mai amuto ge igoa mai ele, amuto kama ge sau tola la mapa la vulovulo mutou ale taritigi ele oata te La Tahalo Uru.
MAT 6:2 “Mai amuto ge suli egiteu ale pou la savelela la vaabila tamutou, amuto umala ge veipalea mai la tahalo ale pusu la vaivai, veia la rere mutou ge tali. Mai egiteu la valalua la visigologolola, egite igoa oilo te la luma la lotu, oio tai te la mata vasosole la gauru, veia la valalua me hatavivile ge vaisale egiteu. Ale eau vei seselea mutou, la mapa giteu eiala moli ele, mai la vei tatahola, egite sau tola kaluvutia. Oata te La Tahalo Uru egiteu la mapa ge ouka.
MAT 6:3 Eala moli mai amuto ge suli egiteu ale pou la savelela, umala virere taitali la isamu ovola veia ge veipala la vulomu ale eme igoa giteu, taritigi eme ge igo kokovu molia.
MAT 6:4 Eala eia matagaga mai ele veia eau masagea veia la visuli tamutou eia ge tabuli kokovu tataho mai ele, isa kama ge rovia. Mai ge mai ele, La Tahalo Uru eia rovia la igogolu tomi ale amuto igo kokovua, eia ge kolia soio tamutou mai la vulo mutou ale taritigi ele.
MAT 6:5 “Mai amuto masagea veia amuto ge kaka, amuto umala ge igoa mai egite la valalua la visigologolola, egite magiri oilo te la luma la lotu, oio tai te la mata vasosole la gauru, veia la valalua me hatavivile ge hilo egiteu, eala moli eau vei seselea mutou, la mapa giteu eiala moli ele, mai la vei tatahola, egite sau tola kaluvutia, la mapa giteu isa lou ge ouka,
MAT 6:6 Eala moli mai amuto masagea veia amuto ge kaka, amuto ge goilo te la luma tamutou isasasa, amuto ge goilo te la kapiutu ale soililo kililili, amuto ge kapi robo la mata, amuto ge pou kokovu mai ele ge kaka tavu e Tama mutou, ale etato kama hililoa. Me e Tama mutou eia hilohilo la igogolu tomi ale etato igo kokovua, eia ge hilome, eia ge vibalavame.
MAT 6:7 Mai amuto ge kaka, amuto umala ge vikara bulalahu mai egite la valalua ale egite kama rovi la lotu, la vuhula egite gabutalea veia la kilaka tegiteu ale malau pepeho, La Tahalo Uru ge lolo egiteu.
MAT 6:8 Amuto umala mulimuli la vulovulo giteu ele, la vuhula e Tama mutou eia rovitia la golugolu tomi me la visuli tomi ale amuto savelea. Amuto souka kaka, eala moli eia rovitia veia ge suli amutou oio vola.
MAT 6:9 “Mai amuto ge pou te la kilaka, amuto ge kaka maie: Tama miteu, eme pou oata te la ilo la lage, taritigi amite ge togo la isamu,
MAT 6:10 taritigi veia la valalua me hatavivile tomi ge roromuli la masasagala taume, mai tai egiteu la angelo oata te la ilo la lage egite roromuli tatahome.
MAT 6:11 Taritigi eme ge abia miteu la ilali ale koramuli amiteu te la haro ale igoie.
MAT 6:12 Eme ge vimavulaha amiteu te la iruru tamiteu mai sesele amiteu vimavulaha egiteu ale igoti la iruru soio tamiteu.
MAT 6:13 Eme umala ge sugu taro amiteu soio te la gima tamiteu, eia soukama ge tovo lalai la tautaulailo tamite. Eala moli eme ge vimahuli amiteu taro la limale Satan. (La Viputumulila taume, la vagagarila taume, la matagagala taume, eme sekela moli sau tolea, la tapasila ge ouka. Amen.)
MAT 6:14 “Mai sesele amuto ge vimavulaha taro la iruru tegiteu la valalua me hatavivile ale egite igotia soio tamutou, e Tama mutou oata te la ilo la lage eia ge vimavulaha taro tai la iruru tamutou ale amuto igotia.
MAT 6:15 Eala moli mai amuto kama ge vimavulaha taro la iruru te la valalua me hatavivile, e Tama mutou tai kama ge vimavulaha taro tai la iruru tamutou.
MAT 6:16 “Mai amuto ge peremu veia ge vitikumu lou la kilaka me la lotu tamutou soio te La Tahalo Uru mai ele, amuto umala ge mata miale mai egiteu la tahalo la visigologolola. Egite mata miale veia la valalua me hatavivile ge hilo egiteu veia egite peremu, egite vei tataho egiteu ovola veia egite la tahalo la lotu sesele. Eala moli eau vei seselea mutou, la mapa giteu eiala moli ele, egite sau tolatia, mai la vei tatahola te la valalua me hatavivile, egite kati ge sau tola lou la mapa te la peremula tegiteu, oukati.
MAT 6:17 Eala moli la vimari taku ovola, eia maie: Mai eme ge peremu veia eme ge vitikumu la kilaka taume, taritigi eme ge litu la lagumu, eme ge abiri la ivumu, sibili,
MAT 6:18 eme ge mata kaseka mai ele veia egite ge hilome veia eme kama peremu, eala moli e Tama mutou oata, ale etato kama hililoa, eia ge hiloa, eia rovia. La Tahalo Uru ale hililo la igogolu tomi ale etato igo kokovua, eia moli ge kolia soio taume mai la vulomu ale taritigi ele.
MAT 6:19 “Amuto umala ge vagari veia ge tau vikapopo la golugolu ale taritigi te la mahulila tamutou ale igoie omai te la maututula veia ge suli la mahulila tamutou mai ele. La vuhula la iraragila tamutou ale maie ge kaleso, la sasabe me kososuke tai ge koroa, egite la tahalo la pakalila tai ge sile soilo la luma ge pakali taia, eme kati ge sau tolea.
MAT 6:20 Eala moli eia taritigi pepeho veia amuto ge tau vikapopo la iraragila ale koramuli la pulolou tamutou oata te la ilo la lage, la vuhula la tilalau te la kalulu mutou mai ele, eia sesele, eia kama ge kaleso, e kososuke me la sasabe tai kama ge koroa, la tahalo la pakalila tai kama ge sile la luma ge goilo ge pakalia, la vuhula eia la tilalau ale tabuli talime oata te la ilo la lage, eia kama ge kaluvu.
MAT 6:21 Eala moli la gabutatalala taume eia ge tivura moli soio te la mautu ale la iraragila taume tabuli oio vola.
MAT 6:22 “La mata gatou, eia la matagaga te la vovo gatou, mai la mata gatou eia matagaga tigi, eia maiti la vovo gatou tomi eia matagaga tataho, etato maroka tigi.
MAT 6:23 Eala moli mai la mata gatou eia kama matagaga, eia mai ale igo maligoma la vovo gatou tomi, etato kama koramulia ge maroka. Me mai tai ele, mai la mari taume oilo te la gabutatalala taume eia kama la mari ale sesele, mai la matagaga te la kalulu, ale la matamu mai ale masosori moli, eme pou te la maligoma. Tio me la maligoma taume ele eia ge uru pepeho!
MAT 6:24 “Eia kama koramulia veia la tahalo isasa eia ge la bilalaha te la mulugaluga ilua. La vuhula eia ge roromuli isasa, me isasa eia ge muku pilea. Me eia ge suli tataho la igogolu te isasa, me isasa eia ge igo silaha taroa. Mai tai ele, amuto kama koramulia veia amuto ge la bilalaha te La Tahalo Uru, eala moli la gabutatalala tamutou ge uru te la ilabi la uati.
MAT 6:25 “Eala, la vimari taku soio tamutou eia maie: Umala amuto ge gabutala papai te la pulolou tamutou te la mahulila ale amuto sau tolea omai te la maututula, veia amuto ge vei mago ‘Etato ge abi la ilali ove? Etato ge liu la rova?’ Eala moli amuto umala gabutatala papapai te la mahulila te la vovo mutou veia amuto la kairobola ouka. La mahulila moli ale amuto sau tolatia eia taritigi, la gabutala papaila tamutou te la paa muli la ilali, eia ge vailo buruko lou amutou, amuto kamati ge pou la sagegela te la mahulila ale taritigi La Tahalo Uru abitia mutou. La kulikuli tai ale etato kisia te la kabili gatou, eia mai la golu bulalahu moli. La vovo gatou moli ale etato vagari veia ge tovo roboa, eia la paga ale sesele, eia taritigi, eala moli la kulikuli ale ge kisia me la kairobola tai, eia la golu bulalahu.
MAT 6:26 Mai amuto ge hilo egiteu la malumalu, egite kama galugalu la ilali, egite kama ababi la ilali veia ge tau raragia veia egite ge alia te la imamala la vitolo. Eala moli e Tama mutou oata eia ababia giteu la ilali, me amuto gabutala mave, La Tahalo Uru eia kama ge gabu vauru amutou kara polo la vibaumulila tetala soio tegiteu la malumalu, ia?
MAT 6:27 Ere tamutou eia koramulia veia ge gabutatala la mahulila tetala veia eia ge solo loua veia eia ge mahuli malau lou bakisi? Ouka gologolo. Etato mahuli moli oio te la masasagala te Tama gatou.
MAT 6:28 “Me ilava amuto gabutala vagarito la kairobola tamutou ale amuto ge kaia veia amuto ge abi la kairobola ale taritigi oiove veia ge tokoromo la vovo mutou ovola e? Mai amuto ge gabutala la sese la obobu ale oio te la tia la hohoi, egite kama igo isa la igogolu, egite kusi bulalahu moli,
MAT 6:29 eala moli eau veia mutou, la tokoromola tegiteu eia marasa pepeho kara polo la marasa la tokoromola te la uru e Solomon alaurati.
MAT 6:30 Eia sesele, igoie la obu eia sese, mai galigeli la sesela ge talulu, egite ge pigia sotalo te la havi. Me amuto gabutala mave, amuto soioge veia La Tahalo Uru eia kama ge abia mutou la tokoromola me la kairobola ale koramuli la mahulila tamutou, veia la vibaumulila tetala soio tamutou eia kama ge kara polo la vibaumulila tetala soio te la sese la obobu, ia? La vuhula amuto kama la golu bulalahu mai egiteu la sese la obobu ale sese moli bakisi goio talulu lou. Amuto kama tahola la tautaulailo ale uru te la gabutatalala tamutou, ouka gologolo, la tautaulailo tamutou eia bisi agi!
MAT 6:31 Eala eau kama masagea veia amuto ge gabutala papai mago ‘Etato ge abi la ilali ove? Etato ge liu la rova? Etato ge abi tai la kairobola oiove?’.
MAT 6:32 Eia kama koramulia veia amuto ge gabutala papai mai ele, la vuhula egiteu la valalua la maligoma moli egite gabu tikumu la ilali, la lalu me la tokoromola tegiteu maie. Eala moli e Tama mutou oata, eia rovitia la savelela tamutou, me la golu ale mave amuto gege ovola.
MAT 6:33 Eala moli la golu isa moli sekela eia tikumu kara polo egiteu la golugolu tomi aleie, veia amuto ge paa muli vagari seselea veia amuto ge taholea, eia maie: Taritigi amuto ge rovi pala muga la pulolou la matagagala te La Tahalo Uru, me la vulovulola tai ale matata, tiele eia ge abia mutou la ilali, la lalu, la kulikuli tai, ale koramuli la pulolou tamutou.
MAT 6:34 Eala amuto umala ge gabutala papai la haro ale galigeli veia amuto ge mahuli mave ovola, la vuhula amuto soukama ge bole la iloburukola ale uru pepeho, la vuhula la gabutala papaila te la haro isasa eia koramuliti la haro moli aleie, ale galigeli ge la gabutala papaila ale isapolo lou ge sibitala koramuli la haro ale galigeli. Eala amuto ge pou moli la sagegela te la haroharo tomi, umala ge gabutala papai.
MAT 7:1 “Amuto umala tomu sasasae la vulovulo giteu e tabarabara mutou ale amuto muku pilea.
MAT 7:2 La vuhula la merera moli ale amuto ubiti la valalua oio vola, la merera moli alele La Tahalo Uru ge putu oli loua soio tamutou, eia ge ubi lou le amutou oio vola. La gabutatalala taume ale eme tomu sasae la vulovulole tabaramu ovola, La Tahalo Uru ge tomu sasae rivu lou la vulovulomu tai te la gabutatalala taume lou ele ale eme veia eme taritigi ovola.
MAT 7:3 Ilava eme hilo la moromoro isa bisi oio te la matalisole tabaramu, me eme kama hilo vutia la moromoro ale uru mai la bautu la obu, ale oio te la matalisomu ele, ia?
MAT 7:4 La matamu oiole paho la moromoro ale uru pepeho, ilava eme ge hiliti ge veiale tabaramu mago ‘Tabaragu, eme gomai, eau ge rauvei la moromoro oio te la matamu ele’?
MAT 7:5 Eme la tahalo la visigolola sesele, taritigi eme ge rauvei pala muga la moromoro uru oio la matamu ele, tio la matamu ge matagaga tataho koramulia eme ge hilo tigia la moromoro ale bakisi oio te la matale tabaramu ele.
MAT 7:6 “Umala amuto ge abia giteu la paia la ilali ale taritigi, mai la tahalo ale veia ge suli legiteu la valalua ale kama kokora la merera te La Uru ale maroka viviu, egite goio vile loua. Mai tai ele amuto umala pipigia giteu la bolobolo la tuali veia egite ge tokoromola, la vuhula egite ge soa kurua. Mai tai egite la paia, egite ge vulo liliu ge tolo lou amutou ale abia giteu la paga ale marokale.
MAT 7:7 “Mai amuto ge kaka tavu La Tahalo Uru, eia ge abia mutou la paga ale amuto kakea soio tetala. Mai la tahalo isasa eia ge vagari veia ge paa muli La Tahalo Uru veia ge rovia, eia ge sivuti seselea. Mai isasa eia ge ligiligi la mata veia ge kope sesele soilo veia ge pou te la pulolou la matagagala te La Uru, ale La Tahalo Uru ge kope seseleala la mata, eia ge tiroro soilo.
MAT 7:8 La vuhula la valalua me hatavivile tomi ale egite vagari la kilaka soio te La Tahalo Uru, egite ge sau tola sesele la mapa la kilaka tegiteu. Egiteu tai ale vagari la paa muli La Tahalo Uru, egite ge sivuti seselea. Egiteu tai ale vagari la iligi la mata, La Tahalo Uru ge kope seselea giteu.
MAT 7:9 “Ere tahalo sesele kabili tamutou, mai e latula ge kakea la ilali, eia ge abi moliale latula la uati veia e latula ge ali molia la uati ele?
MAT 7:10 Mai e latumu isasa tai ge kakame e tamala veia eme ge abiala la ia, mave eme ge abiala la pase? Ouka gologolo, eia kama koramuli viruru.
MAT 7:11 Mai tai ele, mai amutou la valalua ale kama kokora, eala moli amuto ababiale latatu mutou la ilali me la vaabila ale taritigi, amuto ge rovi tigi taia veia e Tama mutou oata te la ilo la lage, eia ge abi taia mutou la visuli me la vaabila ale taritigi pepeho, mai amuto ge kakea tetala.
MAT 7:12 La vulovulo tomi ale amuto masagea veia la valalua me hatavivile tomi egite ge igoa soio tamutou, tiele la vulovulo moli alele amuto ge igo taia giteu, ale la vuhu la viputumulila sesele te Moses alaura, me la vuhu la merera tomi tegiteu la bilalaha ale pala eia pala eia mai tai ele.
MAT 7:13 “Igo tigi amutou, amuto ge tiroro moli te la mata ale kapilikia, la vuhula la mata ale gotalo te la havi ale uru la kaluvula ge ouka, la mata ale eia uru, me la gauru oio vola eia matata, la valalua me hatavivile mapaiti oio polopolo ovola.
MAT 7:14 Eala moli la gauru ale goio la mautu la mahulila, eia bisi moli, la mata tai ale tirororo soilo vola, eia kapilikia, la valalua me hatavivile isasasa moli egite ge sivutia ge tiroro soilo vola.
MAT 7:15 “Amuto ge baumuli tigi amutou tegiteu la tahalo la visigologolola, egite gomai visigolo amutou la vulovulo giteu isahari ale taritigi, egite vipuhi tataho la valalua me hatavivile tomi, eala moli te la gabutatalala tegiteu oilo egite mororosi mai la paia hou, egite masagea veia ge igo gegeru amutou.
MAT 7:16 Amuto ge rovi tigi egiteu te la vulovulo giteu ale egite veipalea. Mave, etato ge lulu la vavua la vaen te la mota ale ororoa e dahe, ia? Ouka, etato tai ge lulu la keme oio te la kaluga, ia? Ouka gologolo.
MAT 7:17 Mai tai ele, la obu ale tubu tataho, mai eia ge vua, la vavuala eia taritigi tataho, eala moli la obu ale posa rama eia ge vua, la vavuala kama taritigi.
MAT 7:18 La obu ale taritigi eia kama koramulia veia eia ge vua la vavuala kama ge kokora. Mai la obu tai ale kama kokora, mai eia ge vua, la vavuala tai kama koramulia veia ge taritigi, ouka viruru.
MAT 7:19 La obobu tomi ale egite kama vua tigi, la vavua giteu kama taritigi, La Tahalo Uru ge tolo taro egite, eia ge pigi egiteu sotalo te la havi.
MAT 7:20 Eala eia matagaga mai ele veia mai amuto ge hilo tigi la vavua la igogolu tegiteu la tahalo la visigologolola ale vimari gegeru amutou te la gauru ale kama sesele, tiele oio moli te la vavua giteu amuto ge rovi tataho egiteu te la vulovulo giteu ale egite veipalea te la mahulila tegiteu, me te la vavua la igogolu tai tegiteu ele.
MAT 7:21 “La valalua me hatavivile usu egite toi tataho la isagu maie mago ‘Eme La Uru taku sesele!’ Eala moli usu tegiteu ele ge galo te la tirorola soilo te la pulolou la matagagala te La Tahalo Uru. Eala moli egiteu la valalua me hatavivile tomi ale egite tilimuli sesele la masasagala te Tete, ale pou oata te la ilo la lage, egiteu moli alele ge goilo te la pulolou la matagagala tetala.
MAT 7:22 Te la haro la viputumulila te La Tahalo Uru, la valalua usu me egite hatavivile tai usu, egite ge hiliti, egite ge tahiau mago ‘Tahalo Uru, mave, eme kama hilo la igogolu tamiteu palae? Amite veipala la merera taume soio te la valalua me hatavivile, amite kumuli taro tai egiteu la hituhitu ale kama korakora te la vagagari la isamu, amite igo tai la golu la karutula usu tai lou ale isapolo sesele. Mave, eme kama gabutala amiteu, ia?’
MAT 7:23 Eala moli te la haro alele eau ge sile pala molia soio tegiteu mago ‘Eau kama rovi gologolo amutou bakisi, ouka virurue, amutou la valalua me hatavivile la iruru, taritigi amuto ge hele taro eau gageie!’
MAT 7:24 “Eala moli la tahalo ale ge lolo la merera taku tomi aleie, me eia ge roromulia veia ge tilimuli sesele tomia, eia mai ale vimagiriti la mahulila tetala oio te la uati. Mai la tahalo isasa, eia gabutatalea veia ge tigi la luma, eia goio vimagiri la luma tetala oata te la hate la uati.
MAT 7:25 La hura uru pu, la lalalu tomi hae, visogo tatavu, la lolovi tai sibitala vagari veia ge umu tavuvu la lumale, eala moli ouka, la luma kama tagogoro, la vuhula la tahalo ale tigia, eia vimagiritia oata te la hate la uati isa uru, la uati uru ele eia igo vagari la vuhu la sosole la luma tetala otalo te la magasa.
MAT 7:26 Eala moli mai la tahalo ale eia lolo la merera taku, eala moli eia kama gabu tikumua veia ge roromulia, eia mai sesele la tahalo ale paua, eia tigi la luma tetala oio te la magasa la mago.
MAT 7:27 La hura pu, la lalalu tomi tai hae, visogo tatavu, la lolovi uru tai sibitala veia ge umu tavuvu la luma, tiele la lumale tagogorotio, eia tagogoro sesele moli gotalo la magasa.”
MAT 7:28 Tio, e Iesus goio vikaluvu la merera tetala soio te la valalua me hatavivile, egiteu tomi loloa mai ele, egite karutu sesele te la merera tetala,
MAT 7:29 la vuhula eia kama tovo bulalahu egiteu mai egiteu la tahalo la mari ale mamuga egiteu, ouka, eia tovo egiteu mai la tahalo ale sau tola la mari ale tikumu sesele.
MAT 8:1 E Iesus purusu loata te la gove ale eia valolo la valalua me hatavivile ovola, eia gotalo, la valalua me hatavivile mapaiti sesele egite tilimulia soio.
MAT 8:2 Tio la tahalo isasa, la vovola sereka gegeru, eia loio tegiteu la valalua me hatavivilele, eia tuga loio goio magiri te la lagule Iesus ele, eia goio toto tulu otalo, eia lagu tugu, togoa. Eia veiale Iesus mago “Tahalo Uru, mai eme masagea, eme koramulia ge vimaroka la vovogu.”
MAT 8:3 Goio, e Iesus sau te la vovo la tahalo ale serekale, eia veiala mago “Eau masagea, la vovomu ge maroka lou.” Tio oio moli ovola la serekale kokovu, la vovo la tahalole marokatio.
MAT 8:4 Goio e Iesus tutu toleala mago “Eme ge baumulime, eme umala ge veveiale isasa ale eau vimarokati lou la vovomu, umala. Eme ge goio moli te pris, eme ge vahilo leia la vovomu ele. Eme ge vahari la vaabila mai te la tahalo ale la vovola marokati lou, mai la merera te Moses veia, eme ge vaharia soio te la luma la lotu, eme ge igo la vaabila taume soio te La Tahalo Uru, la valalua me hatavivile tomi ge rovia veia la sereka taume kaluvuti, la vovomu marokati.”
MAT 8:5 Tio, e Iesus goio la mautu e Kapernaum, la mulugaluga te la tala la tahalo la vaubi salatu sasa eia goio sibitala oio te Iesus veia ge kaka la visuli oio tetala, eia veiala mago
MAT 8:6 “Tahalo Uru, la bilalaha taku isasa eia lea, eia tabuli oio te la luma, la tatuhala mauba tomiti, la iligiligi tai uru pepeho.”
MAT 8:7 Goio, e Iesus goio veiala mago “Eau ge goio ge vimahulia.”
MAT 8:8 Eala moli la mulugalugale goio veiale Iesus mago “Tahalo Uru, eau kama la tahalo ale taritigi veia eme ge goilo te la luma taku, taritigi eme ge toi moli la merera soio te la bilalaha taku, eia ge mahuli.
MAT 8:9 Ale eau veia mai ele la vuhula eau rovi la vulovulo la iroromulila, eau la bilalaha tegiteu la uru taku, me eau tai babaha egiteu la tahalo la vaubi ale otalo taku. Mai eau ge baha isasa, eia ge tuga moli, eia kama ge tou, mai tai eau ge tola isasa veia eia ge gomai taku, eia ge roromuli moli, eia ge gomai taku, tio me mai eau ge vei taiale isasa mago ‘Eme ge igo la igogolu aleie’, eia ge igo molia.”
MAT 8:10 Tio, e Iesus goio lolo la merera tetala maie, eia karutu sesele, eia goio veia giteu la valalua me hatavivile egite tilimuliale, mago “Eau vei seselea mutou, eau souka sivuti la tau Israel isasa la tautaulailo tetala ge uru mai la tautaulailo te la tahalo aleie.
MAT 8:11 Ale eau veia mutou, mulimuli la valalua usu ge lomuli, usu tai ge loale malau, egite ge vikapopo me Aisak, me Iakob te la pou vikapopola oata te la pulolou la matagagala te La Tahalo Uru.
MAT 8:12 Eala moli la valalua me hatavivile e Israel ale te La Tahalo Uru sesele, egite lolo palati la merera tetala, egite rovi tomitia, usu tegiteu ele kama tilimuli tigi la masasagala te La Uru, eala eia ge pitaro egiteu sogala, egite ge pou te la maligoma ale uru, me oio vola egite ge tali pepeho, egite ge koro magegege, ge melimeli la togo giteu.”
MAT 8:13 Goio, e Iesus vikara kaluvu soio tegiteu mai ele, eia goio veia la mulugalugale mago “Eme ge tuga, La Tahalo Uru ge igoa mai sesele ale eme tautaulailoti ovola.” Tio oio moli ovola te la mata la haro moli alele, la bilalaha tetala eia mahuli.
MAT 8:14 Tio, e Iesus goilo te la luma te Pita, eia hilo e loale Pita oilo mamavuta moli oio te la mulila, la vovola tivura pepeho.
MAT 8:15 E Iesus hiloa mai ele, eia goio sau moli te la limala, tio la ilea tetala goio kaluvu, la vovola maigi lou, eia goio hiliti, eia raragiale Iesus la ilali.
MAT 8:16 Goio, la paga maulaviti, egite la valalua isahari goio guvi, egite vahari egiteu e tabarabara giteu isahari ale la hituhitu ale kama kokora pou oio tegiteu, egite vahari egiteu usu ale lea mai ele. e Iesus goio kumuli taro molia egiteu la hituhitu ale egite igo barati la mahulila tegiteu ele, eia ge vikara vakasa moli maie soio tegiteu, oio moli ovola egiteu la hituhitu ge hele. Eia goio vimahuli tai egiteu tomi ale lea.
MAT 8:17 Me la igogolu ale e Iesus igoa mai ele, eia vipuru sesele la merera te la bilalaha e Aisaia ale eia veipalea pala maie: La Uru vimahuliti etatou, eia bole taroti la ilea tegatou tomi.
MAT 8:18 E Iesus hilo la lolo la valalua me hatavivile uru egite magiri galilia, tio eia goio veia giteu la valalua la vimari tetala veia egite ge goio te la gale la magolilo loio.
MAT 8:19 Tio la tahalo la mari isasa eia goio te Iesus, eia veiala mago “Tahalo La Vimari, eau ge mulimulime soio te la maututula tomi ale eme ge goio vola.”
MAT 8:20 Eala moli e Iesus baoliala soio mago “Egiteu la paia hou, la hova giteu isasasa otalo te la magasa, egite momou oio vola, me egiteu la malumalu tai oata te la baa, la loa giteu tai isasasa oata te la obobu egite mamavuta oio vola, eala moli eau e Latu La Tahalo, eau la muligu ouka ale eau ge mavuta oio vola, ouka sesele.”
MAT 8:21 Goio, la tahalo isa tegiteu la valalua la vimari te Iesus ele, eia goio te Iesus, eia kaka e Iesus mago “Tahalo Uru, eau ge tilimulime, eala moli eau kakame veia eau ge pou tali muga e tete ge peho, tio eau ge mulimulime.”
MAT 8:22 Eala moli e Iesus goio veiala mago “Korale, egiteu ale so popou te la maligoma, egite mai ale pehoti, egiteu moli ele ge ulai la pileleho giteu ele. Taritigi eme ge gomai, eme ge tilimuli eau.”
MAT 8:23 Tio, goma, e Iesus vikapopo me egiteu la valalua la vimari tetala, egite hiliti, egite goio sae te la uaga veia ge polo soio te la gale la magolilo loio.
MAT 8:24 Egite goio soko la tuluga mai ele, egite so kabili posa moli, egite karutu la ave uru sesele eia sibitala, la mago tai gasi pepeho, eia hagagaviti ge pigi robo la uagale, eala moli e Iesus kama gabua, eia oio mavuta moli.
MAT 8:25 Eala moli egiteu la valalua tetala goio paloa, egite veiala mago “Tahalo Uru, eme ge suli etatou, etato ge sululu gageie!”
MAT 8:26 Goio, e Iesus kolia soio tegiteu mago “Amuto tataga la rova e? La tautaulailo tamuto bakisi ouka e?” Tio eia vikara soio tegiteu mai ele, eia goio hiliti, eia mera taro la lolovi me la mago, me oio moli ovola la lolovi goio tabou, la mago goio malilo.
MAT 8:27 Tio, egite la valalua tetala hiloa, la gabutatalala tegiteu marapa, egite goio vitahi baololi lou egiteu mago “La tahalo aleie, eia mave? Ere tahalo maito, la lolovi me la mago egira roromulito la vikararala tetala e?”
MAT 8:28 Tio, e Iesus mite goio guvi oio te gale la magolilo e Galilea loio, oio te la gale sesele tegiteu e Gadarea. Egite so guguvi moli ele, egira la tahalo ilua ale la hituhitu ale kama kokora pou tegirua, egira loio te la liba, egira gomai poga tavu e Iesus. Eala moli egira taho luale, egira hate vuraga sesele, la valalua me hatavivile kamati tilimuli la gauru aleiele, egite souka ge poga egirua.
MAT 8:29 Eala moli egira goio tola agagi oata maie mago “Eme e Latu La Tahalo Uru, eme masagea ge igo amilua mave? Eia soukama la imamala la viputumulila, eala moli eme guviti veia ge viligi hari amilua, ia?”
MAT 8:30 Eala moli la karakara la bolo isa uru soio malau bakisi, egite la bolobolo magirigiri, egite alali.
MAT 8:31 Goio egite la hituhitu goio kaka gogogo e Iesus mago “Mai eme ge kumuli taro amiteu gageie, taritigi eme ge baha taro moli amiteu soio, amite ge goilo tegiteu la karakara la bolobolo aleie.”
MAT 8:32 Goma, e Iesus lolo la kilaka tegiteu mai ele, eia goio kumuli taro egiteu mago “Tuga!” Tio egiteu la hituhitu ale kama kokorale, egite goio hele taro egira taho luale, egite goio goilo tegiteu la bolobolole. Tio egiteu la bolobolole goio hele mata veveiti, egite goio hele bura sotalo te la vai, egite goio tilomu tomi olau la mago, egite peho tomitio.
MAT 8:33 Goma, egite la valalua ale vibaumuli la bolobolole, egite goio hele, egite goluma te la mautu. Egite goio valolo egiteu la valalua me hatavivile, egite gilemuli taia giteu te la igogolu ale e Iesus igotia soio tegirua taho lua ale la hituhitu pou tegira, ale eia vimahuli egirua.
MAT 8:34 Tio egiteu tomi la valalua me hatavivile te la mautu ale uru ele, egite hiliti, egite goio paa muli e Iesus veia ge hiloa. Egite goio poga e Iesus soio, egite kaka gogogo vagaria veia eia ge hiliti taro la gale tegiteu, eia ge goio te la gale isapolo.
MAT 9:1 Tio, goio, e Iesus me egiteu la valalua tetala goio sae lou te la uaga tegiteu, egite goio beu rivua soio te la gale la magolilo loio te la mautu tetala sesele.
MAT 9:2 Eia gomai la mautu tetala sesele mai ele, goio la valalua isahari gomai, egite bole la tahalo isasa soio te Iesus, eia lea, la vovola mauba tomi moli, egite vitabulia te la mulila. Eala moli e Iesus hilo egiteu la valaluale, la tautaulailo tegiteu soio tetala uru sesele, tio eia goio veia la tahalo ale leale mago “Latugu, eme ge sagege pepeho, la vuhula la iruru tomi taume eia mavulaha taroti eme!”
MAT 9:3 Eala moli egite la tahalo la mari isahari ale egite vimari la valalua la merera te Moses, egite oio magirigiri, egite loloa e Iesus eia vikara mai ele egite goio vei loua giteu mago “A ge, la tahalo aleie eia vikara gegerua La Tahalo Uru!”
MAT 9:4 Eala moli e Iesus rovitia la gabutatalala tegiteu ele eia goio veia giteu mago “Ilava amuto gabutatala la gabutatalala ale kama kokora mai ele oilo te la tia mutou?
MAT 9:5 Amuto veia la igogolu ale mave eia tikumu, veia eau ge veia la tahalo ale lea maie mago ‘La iruru tomi taume eia mavulaha taroti eme!’ Uka mai eau ge veiala mago ‘Eme ge hiliti, eme ge tuga’? Oilo te la vikararala iluale, amuto veia la merera ale mave sesele ge tikumu, veia eia ge vagari tai veia isa ge igoa?
MAT 9:6 Ale eia kama vagari veia eme ge toia soio te isasa veia la iruru tetala mavulaha taroti eia, eala moli eau masagea veia amuto ge rovia veia eau e Latu La Tahalo, eau sau tola la vagagarila omai te la maututula koramulia veia eau ge vimavulaha la iruru, eala eau veia ge vahilo le amutou gageie la vagagarila taku ele.” Tio eia veia giteu la merera tetala mai ele kaluvu, eia goio veia la tahalo ale leale mago “Eme ge hiliti, eme ge abi la mulimu, eme ge goio te la luma taume.”
MAT 9:7 Tio oio moli ovola la tahalole eia goio hiliti, tuga, eia goio te la luma tetala.
MAT 9:8 Eala moli la valalua me hatavivile tomi egite hiloa mai ele, egite taga, egite goio vaisale pepeho La Tahalo Uru ale eia sugu tarotia la tahalo la vovo isasa la vagagarila tetala ale uru sesele mai ele.
MAT 9:9 Goio, e Iesus hiliti taro la mautu tetalale, eia tatuga te la gauru, eia goio poga la tahalo isasa eia poupou oio te la luma ale la valalua pipigi la takes oio vola, la isala e Matiu. Tio e Iesus hiloa eia oio popou, eia goio veiala mago “Eme gomai, eme ge tilimuli eau.” Tio oio moli ovola e Matiu goio hiliti, eia tilimuli e Iesus.
MAT 9:10 Goio, egira vitilimuli soio te la luma te Matiu, egira pou. Tio egira alali oio te la luma te Matiu ele, egiteu la tahalo la ilabi la takes, me egiteu la valalua la iruru tai, egite loio sibitala, egite pou vikapopo me Iesus me egiteu la valalua la vimari tetala, egite ali vikapopo.
MAT 9:11 Goma, egiteu e pariseo isahari goio hiloa mai ele, egite goio veia giteu la valalua la vimari te Iesus mago “Ilava la tahalo la vimari tamutou eia ali vikapopo legiteu la valalua ale kama kokora, mai egiteu la tahalo la ilabi la takes, me egiteu la valalua la iruru tai, e?”
MAT 9:12 Tio, e Iesus goio lolo la vikararala tegiteu ele, eia goio veia giteu mago “Eau ali vikapopo me egiteu ele, la vuhula egiteu la tahalo la savelela, mai la tahalo ale mahuli tigi moli, eia kama lea, eia kama ge goio te dokta, egiteu moli ale lea, egite ge goio te la tahalo ale ge vimahuli egiteu.
MAT 9:13 Eala moli amutou e pariseole, amuto kama rovi bakisi la gilogo. Mai amuto ge goio ge vimari tigi lou te la merera te La Buk Tabu Ale Pala ale veia maie ‘Eau masaga moli la gilogo, eau kama masaga la vaabila ale amutou gutua oata te la poro.’ Eau gomai moli veia eau ge tola egiteu la valalua me hatavivile la iruru somai taku, ge vimahuli egiteu, eau kama gomai veia ge tola egiteu ale la vulovulo giteu matatata.”
MAT 9:14 Goio, la valalua la vimari te Ioanes la tahalo la vuluhi, egite isahari tegiteu ele goio te Iesus, egite tahia mago “Ilava amiteu ale mulimuli e Ioanes, me egiteu e pariseo tai, amite vitikumu lou la lotu tamiteu soio te La Tahalo Uru me la vulovulo la peremula, eala moli egiteu la valalua la vimari taume egite kama peremu?”
MAT 9:15 Goio, e Iesus baolia giteu mago “Mai la tahalo isasa eia raragati ge taulai, eala moli eia so pou vikapopo me egiteu e tabarabarala, mave egite ge sagege roboa, uka egite ge ilo buruko? Ouka, egite kama ge ilo buruko, la vuhula la riau tegiteu la taulai halaba soloio pou vikapopo me egiteu ele, eala egite ge sagege moli. Eala moli mai mulimuli la valalua ge puli taro legiteu la tahalo tegiteu ele, eia kati ge pou vikapopo me egiteu e tabarabarala, te la haro moli alele egite ge ilo buruko, egite ge peremu, vigumu.”
MAT 9:16 Tio, e Iesus vikara kaluvu mai ele, eia goio vei loua giteu la vikarara la tilovo isa lou, te la valolo ale taritigi te la pulolou la matagagala te La Tahalo Uru eia sibitalati, eia tovoa soio te la kulikuli ale halaba maie mago “La tavile isasa eia kama ge abi la gale la kulikuli isa ale halaba, veia ge sahi robo la kulikuli ale mumugu, ouka, la vuhula ale halaba souka ge lapu botoa, me la kulikuli ale mumugu eia ge masile uru lou. Mai tai ele la valolo taku ale halaba eia kama koramulia veia ge vikapopo la valolo ale pala, eia mumugu.
MAT 9:17 Mai tai la tahalo isasa eia kama ge sigili la vaen ale halaba eia vagari, eia saesae, eia kama ge sahoa te la kulikuli la mee ale palati, eia kamati vagari. Mai eia ge sigilia ovola, la vaen ale halabale ge sae, la kulikuli la mee ge masile, la vaen ge pagegele, la kulikuli me la vaen tai ge kama kokora. Taritigi pepeho veia la vaen ale halaba, egite ge sigilia te la kulikuli la mee ale halaba, tio la vaen me la kulikuli tai ge taritigi tomi moli mai ele, mai la tahalo ale ge vulo halaba eia ge koramulia mai ele ge sau tola la merera taku ale halaba.”
MAT 9:18 Tio, e Iesus so vikarakara soio tegiteu ele, la tahalo la baumuli la luma la lotu tegiteu e Iuda eia sibitala, eia goio te Iesus, eia toto tulu otalo, lagu tugu, togo e Iesus mai ele, eia veiala mago “E latugu bisi hatavile oio lea bara sesele, eia hagagaviti ge peho, eala moli mai eme ge gomai, eme ge sau te la vovola, eia ge mahuli.”
MAT 9:19 Tio e Iesus loloa mai ele, eia goio hiliti, egira me la tahalole goio vitilimuli, egite la valalua la vimari tetala tai egite tilimuli egirua.
MAT 9:20 Goio, egira so tatuga moli ele, la tavile isa oio, la ilea la taio sibitala bibibi moli soio tetala palati, eia kama kaluvu la leavala savulusati gete lua. La tavilele tuga moli goio hagagavi moli te la pokele Iesus, eia goio pilau keke molia la gilesu la lavalava te Iesus ele.
MAT 9:21 Eala moli oilo te la gabutatalala tetala, la tavilele eia gabutalea maie “Mai eau ge pilau moli la gilesu la lavalava tetala, la ilea taku ge kaluvu.”
MAT 9:22 Eala moli e Iesus goio vulo gele rivu sotilu la pokela, eia hilo la tavilele, eia goio veiala mago “Latugu, eme umalati gabutatala papapai te la ilea taume uru ele, eme ge vagari moli, la vuhula la tautaulailo taume ale uru pepeho somai taku, eia vimahulitime.” Tio me oio moli ovola la tavilele goio mahuli.
MAT 9:23 Goma, e Iesus mira me la tau Iuda uru ele, egira goio vitilimuli soio la luma tetale, eia goio goilo te la luma tetalale, eia hilo la valalua me hatavivile mapaiti oio, egite pipigi la tilali mai la vulovulo giteu e Iuda lou, isahari pupusu e vigogo, isahari taitali, egite igo galololole.
MAT 9:24 Goio e Iesus mera taro egiteu mago “Amuto magiri ogala, la tavile bisi ele eia kama peho sesele, ale eia mavuta moli.” Eala moli egite lolo la vikararala te Iesus mai ele, egite goio lege vahi seselea.
MAT 9:25 Goio egite baha taro tomia la valalua me hatavivile kaluvu, tio e Iesus goio goilo te la ilo la luma ale la tavile bisi tabuli oilo vola, eia goio sau te la limala, la tavile bisi ele goio hilititio.
MAT 9:26 Tio me oio volale la rerele Iesus tali lahuti soio te la maututula tomi te la gale alele.
MAT 9:27 Goio, e Iesus hiliti taro la mautu alele, eia tuga, la mata kea ilua goio tilimulia, egira goio tolea e Iesus mago “Emei e tubule Devit uru ele, eme ge gogo amilua!”
MAT 9:28 E Iesus goio goilo te la luma, egira la mata kea iluale tilimulia goilo tetala, e Iesus goio veia girua mago “Amula tautaulailo sesele taku veia eau koramulia ge vimatagaga la mata mulua, ka ouka?” Goio, egira koliala mago “Meie, Tahalo Uru!”
MAT 9:29 Tio, e Iesus goio sau te la mata girua, eia veia girua mago “La Tahalo Uru ge vimatagaga la mata mulua mai sesele la tautaulailo tamuluale!”
MAT 9:30 Tio oio moli ovola la mata girua goio matagaga, e Iesus goio tutu tolea girua mago “Amula ge baumuli tigi amulua, amula umala ge veipala la paga ale eau igotia soio tamulua igoie.”
MAT 9:31 Eala moli egira gali sogala, egira goio veipalea giteu la valalua me hatavivile tomi, la rerele Iesus taliti soio te la maututula tomi te la gale alele.
MAT 9:32 E Iesus miteu goio gali sogala, la valalua isahari goio puli lou la tahalo isasa soio te Iesus, la hitu ale kama kokora pou tetala, la harela vikamu robo, eia kama vigagia.
MAT 9:33 E Iesus goio kumuli taro la hitu ale igo paueale, la tahalole goio vikaratio, tio la valalua me hatavivile goio hiloa, egite karutu pepeho, egite vei mago “A ge, alaurati kara igoie, etato kama hilo la paga isasa sibitala maie omai e Israel, ouka gologolo.”
MAT 9:34 Eala moli egiteu e pariseo isahari hiloa mai ele, egite goio vikara maie mago “Ale eia koramulia mai ele ge kumuli taro la hituhitu, la vuhula la mulugaluga tegiteu la hituhitu ale kama korakora eia pou tetala, eia abiala la vagagarila tetalale.”
MAT 9:35 E Iesus goio valolo tatuga te la maututula tomi, eia goilo te la mautu tegiteu isasasa, eia valolo la valalua me hatavivile oilo te la lumaluma la lotu tegiteu, eia valolo egiteu te la valolo ale taritigi te la pulolou la matagagala te La Tahalo Uru, eia vimahuli egiteu la mata la ilea tomi me la mata la iligiligi tomi ale igo bara la vovo giteu.
MAT 9:36 Eia goio hilo la lolo la valalua me hatavivile uru pepepeho, eia gogo sesele egiteu, la vuhula la gabutatalala tegiteu marapa, la pulolou tegiteu kama taritigi viruru, egite mai moliti egiteu la sip ale la tahalo la vibaumuli tegiteu ouka, egite paua vulovulo moli, egite tuga marapa lalahu.
MAT 9:37 Tio eia hilo egiteu mai ele, eia gogo pepeho egiteu la valalua la vimari tetala mago “Eia sesele, la ilali orivo te la mahuma matuhati, eia usu pepeho, eala moli la valalua ale igogolu orivo te la mahuma, egite kama usu.
MAT 9:38 Taritigi amuto ge kaka vagari e Taho La Mahuma eia ge baha taro la valalua me hatavivile usu lou ale ge luku la ilali tetala ale matuhati orivo te la mahuma tetala, egite ge vagari veia ge vagoilo la valalua me hatavivile mapaiti te la pulolou la matagagala tetala.”
MAT 10:1 Goma, e Iesus goio tola vikapopo egiteu la valalua tetala ale savulusa gete lua, eia abia giteu la vagagarila tetala veia egite ge kumuli taro la hituhitu ale kama korakora, egite ge vimahuli tai egiteu ale lea te la mata la ilea tomi me te la mata la iligiligi tomi tai ale usu.
MAT 10:2 Eala moli la isaisa giteu la valalua la vimari te Iesus ale savulusa gete luale, egite maie: La mulugala, e Saimon, la isala isa lou e Pita, egira me tabarala e Andrew; e Iakob mira me tabarala e Ioanes, e tama girua e Sebedi;
MAT 10:3 e Pilip mira me Batolomeas; e Tomas mira me Matiu, ale ababi la uati la takes; e Iakob ale e tamala e Alpias, egira me Tadeas;
MAT 10:4 e Saimon ale egite veia eia la tahalo la hate paririla; e Iudas Iskariot tai, ale mulimuli sugu taro e Iesus soio tegiteu la gima.
MAT 10:5 Goio, e Iesus baha taro egiteu la valalua la vimari tetala ale savulusa gete lua soio te la igogolu, eia viteteli egiteu, eia veia giteu mago “Amuto umala ge goio tegiteu la valalua ale isapolo, mai egiteu ale kama e Iuda, me egiteu e Sameria tai ele.
MAT 10:6 Taritigi amuto ge goio moli tegiteu la valalua e Israel, egite mai la sip ale ruruti soio la hohoi, amuto ge valolo muga egiteu ele.
MAT 10:7 Amuto ge goio tegiteu, amuto ge valolo egiteu maie ‘La pulolou la matagagala te La Tahalo Uru oata, eia hagagaviti ge sibitala.’
MAT 10:8 Tiele amuto ge vimahuli egiteu ale lea, amuto ge vimahuli tai egiteu ale pehoti, egiteu tai ale sereka gegeru, amuto ge vimaroka egiteu, amuto ge kumuli taro tai egiteu la hituhitu ale kama korakora. Eala moli la vagagarila ale amuto sau tolea, eau abi molia mutou, eala eia taritigi veia amuto tai ge suli bulalahu moli la valalua me hatavivile tomi oio vola.
MAT 10:9 Amuto umala ababi la uati veia amuto ge tamamasia te la tuluga tamutou.
MAT 10:10 Amuto umala palavavai la palo te la tuluga tamutou, la kairobola ilua tai ge umala, la silipa te la tulugaluga umala, la toho tai ge umala. Amuto umala ge gabutala papai la vibaumulila tamutou, la vuhula amuto igogolu, me egiteu ale abi la visuli tamutou ge abia mutou la ilali ale eia mai la mapa mutou.
MAT 10:11 “Mai amuto ge goilo te la mautu isasa, taritigi amuto ge mata tigi, veia mai amuto ge rovi tigi la tahalo isasa te la mautu alele eia taritigi, eia la tahalo sesele, tio amuto ge pou oio te la luma tetala, amuto ge mou oio tetala kara te la haro ale amuto ge bula taro la mautu alele.
MAT 10:12 Mai amuto ge tiroro soilo te la luma isasa, taritigi amuto ge toi pala muga la vibalavala te La Uru soio te la lumale,
MAT 10:13 eala moli mai egite la valalua la luma alele egite kama taritigia mutou, tio amuto ge abi rivu lou la merera la vibalavala tamutou ele.
MAT 10:14 Mai tai la tahalo isasa eia kama puli amutou soilo te la luma tetala, veia eia kama ge lolo tai la merera tamutou, taritigi amuto ge hiliti taroa la luma alele me la mautu tai alele, amuto ge kuvali taro la magasa la mautu alele otalo te la vaha mutou, ale amuto ge hiliti taro la mautu tegiteu ele.
MAT 10:15 Eau vei seselea mutou, te la haro la viputumulila te La Uru la kolibarala soio te la mautu alele eia ge uru sesele, eia ge kara polo la iligiligi te la mautu ale kama kokora ilua e Sodom me Gomora.
MAT 10:16 “Taritigi amuto ge lolo tigi la merera taku. Eau baha taro amutou mai egiteu la sip ale egite ge pou kabili tegiteu la karakara la paia hou. Taritigi amuto ge baumuli tigi amutou, la gabutatalala tamutou tai ge taritigi pepeho, la vulovulo ale kama kokora isa umala ge oio tamutou.
MAT 10:17 Amuto ge baumuli tigi amutou tegiteu la valalua la gima, la vuhula egite ge tuha tavu amutou veia ge veipala amutou soio te la luma la vigagiala, egite ge vagari tai veia ge kumamasi vulo amutou oilo te la luma la lotu tegiteu.
MAT 10:18 Egite ge lao tola amutou, ge lapu amutou soio tegiteu la mulugaluga, soio tegiteu la uru tomi tai, amuto ge magiri te la vigagiala oio te la lagu giteu ele, la vuhula amuto valolo te la isagu. Eala moli oio vola la valolo taku eia ge vavava soio tegiteu la uru tomi, egite ge loloa, egiteu la valalua la maligoma ge rovi eau.
MAT 10:19 Eala moli mai egite ge lapu amutou soio te la luma la vigagiala, amuto umala tataga veia ge makuku mago ‘Etato ge vikara mave? Etato ge vei lava e?’
MAT 10:20 La vuhula te la haro moli alele eia kama ge amutou moli ale ge vigagia, ouka, La Kalulule Tama mutou eia ge vikarakara oio tamutou ele.
MAT 10:21 “Te la imamala la viligila, mai la tahalo ale kama rovi eau, eia ge veipala e tabarala soio te la vigagiala, egite ge bilia eia ge peho, la vuhula eia la tahalo taku. Mai tai ele egiteu la valalua isahari ge sugu taro tai e latatu giteu, veia egite la gima ge bili egiteu. Mai tai ele egiteu la valalua me hatavivile ale kama kokora, egite ge hiliti, egite ge sugu taro e tama giteu me tila giteu soio te la pileho.
MAT 10:22 “Mai tai ele la valalua me hatavivile tomi, egite ge vile sesele amutou, la vuhula egite rovia veia amuto sau tola la isagu, eala moli egiteu ale magiri vagari kara te la tapasi la maututula, La Tahalo Uru ge vimahuli egiteu.
MAT 10:23 Mai amuto ge goio te la mautu isasa, eala moli egite viligi amutou, amuto ge hele soio la mautu isapolo. Ale eau vei seselea mutou, amuto kama ge vikaluvu la valolo tamutou te la maututula tomi omai e Israel pala muga te la guluvi te Latu La Tahalo.
MAT 10:24 “E guliliki la vimari eia kama uru te la tahalo la vimari tetala, la bilalaha tai eia kama oata te la mulugaluga tetala.
MAT 10:25 Eia koramuli molia veia e guliliki la vimari eia ge sovei la tahalo la vimari tetala, mai tai la bilalaha eia ge sovei la vulovulo la mulugaluga tetala. Mai eau, eau la mapala tamutou, egite la gima toiti leau e Bielsebul, mai la mulugaluga tegiteu la hituhitu ale kama korakora, tio eia matagaga tai mai ele veia mai egite ge vileau mai ele, la vilile tegiteu soio tamutou ale taku eia ge kara polo lou la vilile ale egite vileau oio vola, la vuhula amutou la bilalaha taku.
MAT 10:26 “Amuto umala ge tataga egiteu la valalua la gima taku, la vuhula la gabutatalala tomi ale egite tau kokovua, eia kama pala te la mahulila ale igoie, mulimuli eia ge magiri palala, eia ge matagaga tomi. La gabutatalala tomi ale egite tau kokovua, mulimuli eia ge magiri palala.
MAT 10:27 La merera ale eau mai ale veia mutou te la logo, amuto ge veipalea te la haro, la merera tai ale eau mai ale sigilia mutou, amuto ge veipala molia te la tia la mautu.
MAT 10:28 Amuto umala ge tataga egiteu ale egite ge bili la mahulila te la vovo mutou, la vuhula egite kama koramulia ge bili tai la kalulu mutou, ouka. Amuto ge taga moli La Tahalo Uru sekela, la vuhula eia koramulia veia ge bili la mahulila tamutou te la vovo, vikapopo tai la mahulila te la kalulu tai, eia koramulia ge pigi amutou sotalo te la havi ale uru, la kaluvula ge ouka.
MAT 10:29 La Tahalo Uru eia ge baumuli amutou te la gima. Mai la valalua egite ge masagea ge loto la malu ilua bisisi, egite kama ge pigi la uati uru, egite ge pigi la uati ilua moli. La mapa giteu la malumalu kama uru, eala moli La Tahalo Uru eia gabutatala egiteu la malumalu tomi, isa bisi kama ge boru sotalo la magasa, mai eia kama ge la masasagala te Tama mutou mai ele.
MAT 10:30 Mai amutou tai, eia gabu tikumu seseleti amutou ale tetala, kara polo la gabutatalala tetala soio tegiteu la malumalu, mai eia gigi tomiti la ivu mutou bisisi tomi isasasa oata te la gama mutou ele kaluvu.
MAT 10:31 Eala moli ele, amuto umala ge tataga, la vuhula eia gabu tikumu amutou, kara polo la gabutatalala tetala soio tegiteu la malumalu bisisi ale eia vibaumuli tataho soio tegite.
MAT 10:32 “Mai isa kabili tamutou la valalua me hatavivile taku eia ge vagari, veia eia kama ge mahela taro eau, veia eia ge veipala molia soio te la valalua me hatavivile veia eia taku sesele, tio eau tai ge veipala la isala oata te la lagule Tete veia eia taku seseleti.
MAT 10:33 Eala moli mai isa ge mahela taroau veia eia kama taku, tio eau tai ge mahela taro tai eia oata te la lagule Tete veia eau kama rovi eia.
MAT 10:34 “Amuto umala ge gabutalea veia eau sibitala omai te la maututula veia eau ge vikaluvu la vulovulo la vaubila me la vigagimala omai te la magasa, ouka. Eau sibitala moli mai la tahalo ale ababi la gata te la vaubila.
MAT 10:35 Eau sibitala veia ge veipala la valolo ale isapolo viruru eia ge vipou gagima la valalua me hatavivile maie: Mai la tahalo isa ge roromuliau, e latula ge hiliti ge gima lou e tamala mai ele. Mai la tavile isa tai ge roromuliau, e latula ge hiliti ge gima rivu lou e tilala. Mai tai la tavile ale taulaiti, eia ge gima lou e uala ale hatavile mai eia ge taku.
MAT 10:36 Egiteu e valalua mutou lou, egite ge sibitala mai la gima sesele tamutou ale taku.
MAT 10:37 “Mai la tahalo me la tavile ale masagea veia ge tilimuliau, eala moli eia gabutala papai te la merera taku ale vagari ele, eia goio hate tola lou, me oio vola eia vagari veia ge vitotoko lou me tamala me tilala ale kama roviau, eia goio poke taroau, ale eia kama koramulia ge taku. Mai tai ele, la tahalo ale ge gabu vauru e latula, me oio vola eia ge poke taroau, ale tai ele eia kama koramulia ge taku.
MAT 10:38 Mai sesele tai la tahalo isasa eia veia ge taku, eala moli eia kama masagea veia ge bole la tauvalautu tetala, veia ge mai ale bole la iligiligi ale uru mai tai eau, ale tai ele eia kama koramulia veia ge taku.
MAT 10:39 Mai la tahalo isasa eia gabutalea veia ge tilimuliau, eala moli eia sigirobo lou eia, veia eia ge hate robo lou la mahulila tetala, tio mai eia ge vagari veia ge sau tola la mahulila tetala lou mai alele, eia ge peho, eala moli la tahalo ale ge sugu taro moli la mahulila tetala soio te la igogolu taku, la tahalo alele ge sau tola la mahulila ale sesele.
MAT 10:40 “Mai la tahalo isasa eia ge rara tavu amutou ale valolo te la isagu, eia ge suli amutou mai ele, eia mai ale suli eau, me mai isasa ge suli eau, eia mai ale suli tai e Tete ale baheau somai.
MAT 10:41 Mai isasa eia ge hilo la bilalaha te La Uru eia ge sibitala te la mautu tetala, me la tahalole ge rara tavua ge pulia soio te la luma tetala ge sulia, la tahalo alele eia ge abi la mapa ale taritigi te Tete mai la mapa la bilalaha sesele. Mai isasa eia ge hilo la tahalo isasa ale la vulovulola matata, eia ge guvi te la mautu tetala, me la tahalole ge rara tavua ge pulia soio te la luma tetala ge sulia, tio la tahalo tai alele ge abi tai la mapa te Tete mai la mapa la tahalo ale matata.
MAT 10:42 Mai tai isasa ge gogo e maura miteu bisisi ale eau babaha egiteu soio te la igogolu taku, me eia ge hilo isasa eia guvi te la mautu tetala, eia malehu, me eia ge gogoa la vuhula eia la tahalo taku isale, me oio vola eia ge abi moliala la lalu maigi veia eia ge liua, tio eau vei seselea mutou, la tahalo alele eia ge sau tola sesele la vibalavala te La Tahalo Uru mai la mapa la vulovulola ale taritigi ele.”
MAT 11:1 Tio, e Iesus viteteli kaluvu la valalua la vimari tetala ale savulusa gete lua te la igogolu, tio eia hiliti taro la mautu alele, eia goio tuga, eia valolo tatuga oio te la gale e Galilea, eia vimari la valalua me hatavivile te la maututula oio te la gale alele, eia valolo egiteu te la valolo ale taritigi te la pulolou la matagagala te La Tahalo Uru.
MAT 11:2 Eala moli te la imamala alele, e Ioanes la tahalo la vuluhi, eia pou te la luma la kilisi, eia lolo la rere la igogolu te Iesus ale eia igoa soio te la valalua me hatavivile, eia goio baha isahari la valalua la vimari tetala soio te Iesus.
MAT 11:3 Egite goio tahi e Iesus mago “Soioge eme e Kraist, la bilalaha ale uru, La Tahalo Uru veia ge bahea, e Ioanes vikara matagagati ovola veia eia ge guvi. Soioge eme eiala guvitie, ia? Uka amite ge pou tali la tahalo isapolo eia souka guvi, ia?”
MAT 11:4 Tio, e Iesus lolo la tilahi tegiteu mai ele, eia goio koli la vikararala soio tegiteu mago “Taritigi amuto ge tuga, amuto ge beu rivu loua soio te Ioanes, amuto ge veiala te la merera taku tomi ale amuto lolotia, la igogolu taku tomi tai ale amuto hilotia.
MAT 11:5 Egiteu la mata kea, la mata giteu mata pulalati, egiteu ale la vaha giteu mauba, egite tuga tigiti, egiteu tai ale la vovo giteu sereka, egite marokati, egiteu ale la gavusa giteu vou, egite loloti, egiteu ale pehoti, egite mahuliti lou, me la valalua me hatavivile la morivava, egite loloti la valolo ale taritigi.
MAT 11:6 Mai la tahalo isasa la tautaulailo tetala eia salala moli soio taku, eiale balava seseleti, la vuhula eia kama hate tola lou veia ge tahi taroau.”
MAT 11:7 Goio, egite la valalua la vimari te Ioanes lolo la merera te Iesus kaluvu, egite goio tuga, tio egite so tatugati ele, e Iesus goio soko la vikararala soio te la lolo la valalua me hatavivile ale magirigiri ele, eia lapu matagaga la gabutatalala tegiteu te Ioanes ele, eia veia giteu mago “Pala amuto goata la hohoi veia ge lolo la valolo te Ioanes, amuto soioge gabutalea veia amuto ge hilo lava? Amuto gabutalea veia e Ioanes ge la tahalo bulalahu, la tiala viviu mai la viro ale la lolovi tubu ovola eia tavu lele, ia?
MAT 11:8 Mai ge ouka, amuto soioge goata la hohoi veia ge hilo la rova sesele? Amuto soioge veia ge hilo la tahalo isasa ale eia kairobola la kairobola ale marasa pepeho, ia? Ouka gologolo, e Ioanes kama mai ele, egiteu ale kairobola la kairobola ale marasa pepeho, egite kama pou oio la hohoi, egite pou te la luma te la uru.
MAT 11:9 Ioge, amuto pala goata la hohoi veia ge malelei e Ioanes, amuto soioge gabutalea veia ge hilo la rova sesele, e? Amuto soioge gabutala seselea veia ge hilo la bilalaha te La Uru isa uru, ia? Meie, e Ioanes eia la bilalaha isasa, ale eau ge veia mutou, eia uru sesele tegiteu la bilalaha tomi.
MAT 11:10 La tahalo moli ale, La Buk Tabu eia valolotila pala maie: Eiau La Tahalo Uru, eau baha taroti la bilalaha taku, eia ge mamuga, eia ge raragi la gauru te La Uru.
MAT 11:11 Ale eau vei seselea mutou, egite tomi la valalua la vovo ale e tatila giteu pigo egite omai te la maututula, egiteu tomi bisi te Ioanes la tahalo la vuluhi. Eala moli te la pulolou la matagagala te La Tahalo Uru, mai la tahalo bulalahu moli ale ge tiroro soilo vola, eia ge uru te Ioanes.
MAT 11:12 Sokoa pala te la imamala la valolo te Ioanes, kara igoie, la valalua me hatavivile mapaiti egite vagari veia ge toa pepe tavua soilo te la pulolou la matagagala te La Tahalo Uru veia egite ge sau tolea, me egiteu ale vagari pepeho sau tola seseletia mai ele.
MAT 11:13 Egiteu la bilalaha tomi vikarati ovola, me la merera la viputumulila tai te Moses eia vikarati ovola, veia ge veipala la masasagala te La Uru somai tamutou la valalua me hatavivile, kara ale e Ioanes sibitala.
MAT 11:14 Mai amuto ge matagaga sesele te la merera taku te la vuhu la guluvi te Ioanes ele, eia mai sesele la bilalaha uru e Lias ale La Buk Tabu veia eia ge sibitala rivu lou.
MAT 11:15 Mai ere la gavusala ge oio te la ilolo la merera, taritigi eia ge lolo la merera taku alele.
MAT 11:16 “Amutou la tuvu la valalua me hatavivile te la imamala ale igoie, eau ge tovo amutou soio te la rova, veia amuto ge matagaga te la vulovulo mutou ale amuto igigoa e? Amuto soioge mai sesele egiteu e gulikiliki ale egite pou te la tia la mautu, egite tatola egiteu e tabarabara giteu mago
MAT 11:17 ‘Amite katu la mabu, amuto kama masaga ge tilia! Amite pipigi la tilali, amuto kama taitali!’
MAT 11:18 Tiele e Ioanes eia sibitala omai, eia vigumu, eia kama liliu la vaen, me amuto hiloa mai ele, amuto ubila la merera mago ‘A ge, la hitu ale kama kokora pouti oio taume!’
MAT 11:19 Mai mulimuli tai e Latu La Tahalo goio sibitala, eia ali marumaru moli, eia liliu la vaen, eala moli amuto goio vikara maie mago ‘A ge, la tahalo ale eia kali sogomu pasi, me eia la tahalo la iliu la vaen tai, eia e vikilipi tegiteu la valalua la ilabi la takes, me egiteu la tahalo la iruru tai.’ Eala moli amuto kalamea papapai mai ele, amuto soioge la tahalo la mari, ia? La merera te La Uru eia soioge tabuli matagaga tamutou la valalua tetala, ia?”
MAT 11:20 Goma, e Iesus soko lou la vigagiala tetala, eia goio vile egiteu la maututula ale eia igo usuti la golu la karutula tetala oilo vola, eala moli egite kama gabutatala rivu lou la iruru tegiteu veia ge vuvulo, ouka viruru.
MAT 11:21 Tiele e Iesus goio veia maie mago “Maura miteu la mautu ilua e Korasin, e Betsaida. Mai eau ge igoti la golu la karutula te la mautu ilua e Saidon me Taia mai ale eau igo palatia kabili tamutou, egite la valalua me hatavivile te la mautu ale kama kokora iluale, egite soioge ge vuvulo seseleti, egite ge baharuti la iloburukola, egite ge vuloti la gabutatalala tegiteu.
MAT 11:22 Eala moli eau veia mutou, te la haro la viputumulila te La Uru, la mautu ilua e Saidon me Taia kama ge ligi pepeho mai amutou ele.
MAT 11:23 Mai amutou tai la valalua me hatavivile la mautu e Kapernaum, amuto soioge veia La Uru ge puli amutou soata tetala, ia? Ge ouka gologolo, eia ge pigi moli amutou sotalo te la havi ale uru, la kaluvula ge ouka. Mai eau ge igoti la golu la karutula oilo te la mautu e Sodom mai eau igo palatia kabili tamutou e Kapernaum ele, la valalua e Sodom soioge ge vuvulo seseleti.
MAT 11:24 Ale eau vei seselea mutou, te la haro la viputumulila te La Uru, e Sodom ge mavulaha bakisi, eala moli amuto ge bukeke seselea, maura miteu!”
MAT 11:25 Goio, e Iesus soko la kilaka soata te La Tahalo Uru, eia vaisalea mago “Tete, eau vaisale sesele eme, la vuhula eme La Uru oata te la mori, eme La Uru tai otalo te la magasa. La mari taume uru sesele, eme tau kokovua legiteu la tahalo la mari me egiteu la tahalo la pakakasala, eme veipala molia soio tegiteu e latatumu bisisi ale mulimuli seseleme.
MAT 11:26 Ale la masasagala taume sesele, Tete.
MAT 11:27 “E Tete sugu tarotiagu la golugolu tomi veia eau ge vibaumuli ovola. Isa kama ge rovi sesele la vulovulole Latula, e Tete moli. Me isa tai kama ge rovi e Tete, eau moli e Latula, me egiteu tai ale eau masagea veia ge veipala e Tete soio tegiteu.
MAT 11:28 “Amutou tomi la valalua me hatavivile ale amuto bolebole, amuto huguhugu, la iruru tamutou eia tikumu mai la tabule me la tabala ale uru pepeho, amuto ge gomai taku, eau ge vimaila amutou.
MAT 11:29 Amuto ge roromuli eau mai la bilalaha taku sesele, amuto ge vimari omai taku sekela, la vuhula la gabutatalala taku eia malilo tataho, me eau vibisi tai eau soio te la valalua, tiele omai taku amuto ge sivuti la mailala ale uru sesele te la kalulu mutou isasasa.
MAT 11:30 La vuhula la tabule taku eia taritigi, eia mavulaha moli.”
MAT 12:1 Tio, mulimuli, te la haro tabu isasa, e Iesus mite me la valalua la vimari tetala, egite tatuga te la tia la mahuma la kon, egite la valalua la vimari tetala goio vitolo, egite goio putu isahari la balepa la kon veia ge alia.
MAT 12:2 Eala moli egiteu e pariseo isahari goio hilo egite la valalua la vimari te Iesus ele, egite goio veiale Iesus mago “Ae, la vulovulo ale, egite la valalua la vimari taume egite igo popoti la haro tabu.”
MAT 12:3 Tio, e Iesus goio veia giteu mago “Mave, amuto souka gigi vuti la veimulipolola te Devit, te La Buk Tabu Ale Pala, ia? Te la imamalale, e Devit mite me la valalua tetala, egite vitolo.
MAT 12:4 Egite goilo te la luma la lotu, egite kaka e pris la ilali, eia abia giteu la bret la vahililola te La Tahalo Uru ale tabuli oilo te la luma la lotu. La bret alele, eia tikumu sesele veia la tahalo bulalahu ge alia, egiteu moli e pris, egite alalia.
MAT 12:5 Me amuto soioge soukama gigi taia te la viputumulila te ururu, egite abia giteu e pris la igogolu te la haro tabu veia egite ge vahari la vaabila soilo te la luma la lotu, ge gutua oata la poro. Te la viputumulila tamutou egite mai ale ruruti, eala moli te la gabutatalala te La Tahalo Uru egiteu la iruru ouka.
MAT 12:6 Eia taritigi eau ge veia mutou, eau guviti omai, me la igogolu taku eia muga te la igogolu tegiteu e pris oilo la luma la lotu.
MAT 12:7 Eala moli mai amuto ge rovi tigi la masova la merera te La Buk Tabu Ale Pala ale veia maie: Eiau La Uru, eau kama masaga la vaabila, eau masaga moli la vulovulo la gilogo. Mai amuto ge rovi tigi la masova la mererale, amuto kamati ge kaua giteu la valalua taku veia egite igo la iruru, ouka.
MAT 12:8 Eau e Latu La Tahalo, eau la mulugaluga te la haro tabu.”
MAT 12:9 Tio, e Iesus hiliti taro la mahumale, eia goio goluma, eia goilo te la luma la lotu te la mautu alele.
MAT 12:10 Eia hilo la tahalo isasa oio, la limala pakuku. Eala moli egiteu e pariseo so papaa la gauru ale egite ge vitilo e Iesus ovola, egite goio tahi gologoloa la tilahi isa maie mago “Mave, te la viputumulila te ururu, eia taritigi moli veia etato ge vimahuli egiteu la ilea te la haro tabu, ia, uka mave?”
MAT 12:11 Eala moli e Iesus goio tahi rivu lou egiteu mago “Mai la tahalo isasa kabili tamutou ele, eia tahola isasa la sip, mai la sip tetala ge raga sotalo te la lulu te la haro tabu, amuto kama ge lapu rivua soata te la haro tabu moli, ia?
MAT 12:12 La sip eia la golu bulalahu, la tahalo eia uru te la sip, eala eia taritigi moli veia te la haro tabu etato ge vimahuli egiteu ale lea.”
MAT 12:13 Tio, eia veia giteu la merera tetala mai ele kaluvu, eia goio vulo soio te la tahalo ale la limala pakukuo, eia veiala mago “Eme ge limarara.” Tio la tahalole goio limarara, la limala taritigiti maiti la lima ale isao.
MAT 12:14 Tio egite pariseo hiloa, egite hiliti moli gogala, egite goio pou vikapopo, egite viputumulimuli e Iesus veia egite ge bilia.
MAT 12:15 Eala moli e Iesus rovitia veia egiteu e pariseo masagea veia ge bilia, eia goio hiliti taroa la mautu alele, eia tuga. La valalua me hatavivile usu goio tilimulia, e Iesus goio vimahuli egiteu tomi ale lea kabili tegiteu ele.
MAT 12:16 Eia tutu tolea giteu veia egite umala ge veipalala eia,
MAT 12:17 eia vipuru seseletia mai ele la merera isasa te La Tahalo Uru ale e Aisaia veipalea te La Buk Tabu Ale Pala maie:
MAT 12:18 Male ge, la tahalo ale, eia la bilalaha taku sesele, eau hilo vutia, eau masaga pasia, eau sagege pepeho sesele leia. Eau ge pigi robola la kalulugu, eia ge veipala la vulovulo ale matata soio tegiteu la valalua me hatavivile ale pou te la maligoma.
MAT 12:19 Eia ge la tahalo la tia madidila sesele, eia kama ge vaigigo, eia kama ge kahararea giteu la valalua me hatavivile te la tia la mautu.
MAT 12:20 Eala moli eia ge veipala tai la gilogo, mai la tahalo me la tavile ale kama magiri vagari taku, egite mai la viro ale tavulele, hagagaviti eia ge putua, eala moli la bilalaha taku eia kama ge igo gegeru egiteu ale mai ele veia egite ge boru, ouka, eia ge suli moli egite. La tahalo me la tavile ale kama magiri vagari taku, eia mai la havi ale mamateti, eala moli la bilalaha taku eia kama ge vai mate la tautaulailo tegiteu, ouka, eia ge suli moli egiteu kara te la imamala ale la valolo ale taritigi eia ge puru te la igogolu tetala, eia ge bolehoho la vulovulo ale kama kokora, la valalua me hatavivile tomi tetala ge magiri vagari.
MAT 12:21 Egiteu ale igoie kama rovi la matagaga, egite mulimuli ge roromuli la merera te La Uru, egite ge rovia veia la bilalaha taku eia koramulia ge vimahuli sesele egiteu.
MAT 12:22 Goma, egite la valalua me hatavivile isahari goio puli la tahalo isasa soio te Iesus, la hitu ale kama kokora pou tetala, eia mata kea, la harela tikumu, eia kama vigagia. Tio e Iesus goio vimahulia, la matala ilua goio matagaga, eia goio vikara.
MAT 12:23 Tio la valalua me hatavivile usu egite hiloa mai ele, egite karutu, egite goio vei mago “La tahalo aleie, eia soioge e tubule Devit sesele ale ge guvi ge vimahuli etatou la valalua me hatavivile tetala, ia, uka eia soioge ere?”
MAT 12:24 Eala moli egiteu e pariseo loloa mai ele, egite vei mago “Oio moli te la vagagarila te la mulugaluga tegiteu la hituhitu, e Bielsebul moli sekela, la tahalo ale eia kumuli tataro egiteu la hituhitu ele.”
MAT 12:25 Eala moli e Iesus rovitia la gabutatalala tegiteu ele, eia goio veia giteu la vikarara la tilovo isa oio vola mago “Mai la valalua la vaubi te la uru isasa ge vaubi rivu lou megiteu lou, egite ge kaluvu. Mai tai la mautu isasa, mai la karakara tai isa, mai egite ge vaubi baoli lou, la valalua alele ge marapa, egite ge sululu.
MAT 12:26 Eia mai tai aleie, e Satan, mai eia ge kumuli taro e Satan lou, eia mai ale vaubi rivu lou me eia, la vagagarila tetala ge kaluvu.
MAT 12:27 Eala moli amuto tai veiagu veia eau kumuli taro la hituhitu te la vagagarila te Bielsebul, eala moli eau ge tahi amutou, mai la valalua tamutou la haro isahari egite tai kumuli taro egiteu la hituhitu, mave, egite igoa te la vagagari lere? Tiele, la vulovulo giteu la valalua tamutou lou eia tomu sasaeti la vulovulo mutou ele.
MAT 12:28 Eala moli La Kalulu La Tahalo Uru eia pouti taku, me te la vagagarila tetalale eau kumuli taro la hituhitu. Eala eia koramulia mai ele veia amuto ge matagaga veia la pulolou la matagagala te La Tahalo Uru eia sibitalati omai tamutoue.
MAT 12:29 “Mai tai eau ge tovoa soio te Satan mai la tahalo isa eia vagari sesele. Igo mave isa ge goilo la luma tetala veia ge seri taro la golugolu tetala e? Ge ouka viruru, taritigi veia mai isa masagea veia ge bolehoho e Satan, eia ge kisi tola mugea, mulimuli eia ge goilo la luma tetala ge seri taro la golugolu oilo vola. Mai eau, eau lagi taro le Satan e maura miteu la valalua me hatavivile ale la hituhitu ale kama korakora igo gegeruti egiteu, eau mai ale saeti soata la luma te Satan, eau seri taroti la golugolu tetala.
MAT 12:30 “Mai la tahalo isa eia kama tao loio taku, alele eia mai ale gima eau. La tahalo ale kama visuli soio te la valalua me hatavivile taku, eia mai ale igo gegeru moli egiteu.
MAT 12:31 Taritigi eau ge veia mutou la merera ale tikumu maie: La mata la iruru tomi ale la valalua me hatavivile igigoa, La Tahalo Uru eia koramulia ge vimavulaha taro legiteu. Eala moli mai isasa eia ge vikara barea La Kalulu La Marokala, la iruru tetala ale tikumu viruru ele, La Tahalo Uru kama ge vimavulaha taro leia, mai te la mahulila omai te la maututula, me te la mahulila oata te la ilo la lage, la iruru uru tetalale ge tabuli moli, eia ge vure ovola.
MAT 12:32 Mai isasa ge vile e Latu La Tahalo, la iruru tetalale La Tahalo Uru ge koramulia ge vimavulaha taro leia, eala moli mai isasa ge tahi vile La Kalulu La Marokala, La Tahalo Uru kama ge vimavulaha la iruru aleiele, ouka viruru, eia tikumu, eia kama ge vimavulaha taroa te la mahulila omai te la maututula, me te la mahulila tai ale ge mulimuli oata te la ilo la lage.
MAT 12:33 “Mai la obu isasa eia tubu tigi tataho, eia ge vua, la vavuala ge taritigi tataho, mai la obu isasa eia kama tubu tigi, eia ge vua, la vavuala tai kama ge taritigi. La valalua me hatavivile tomi egite rovi la obobu tomi oio te la vavua giteu, mai la obu ale taritigi, la obu ale kama kokora tai.
MAT 12:34 Amutou la valalua me hatavivile te la tuvu ale igoie, la vulovulo mutou kama kokora sesele, amuto mai la pase ale vuraga, ale totolo, egite bilibili la valalua, la vuhula la vulovulo mutou lou eia igo gegeru la valalua me hatavivile taku. Amuto koramulia ge veipala la merera ale taritigi mave e? Ouka gologolo, la vuhula amuto kama kokora. La gabutatalala ale tabuli kokovu oilo te la tilalau tamutou oilo, ale amuto ge veipalea te la hare mutou mai la irovilala sesele te la vulovulo mutou.
MAT 12:35 La tahalo ale taritigi, la gabutatalala tetala oilo te la tiala eia volu te la gabutatalala ale taritigi, eia veipala la vulovulo ale taritigi. La tahalo ale kama kokora, la gabutatalala tetala oilo te la tiala eia volu te la gabutatalala ale kama kokora, eia veipala la vulovulo ale kama kokora.
MAT 12:36 Eala moli eau ge veia mutou, te la haro la viputumulila te La Uru, La Tahalo Uru ge tahi muli lou la bautu la merera tomi isasasa ale amuto veipala bulalahua te la mahulila tamutou igoie.
MAT 12:37 La merera ale amuto veipalea te la mahulila ale igoie, eia mai ale veipala la pulolou tamutou ale ge mulimuli: Oio moli te la merera tamutou lou La Tahalo Uru ge rovia veia amuto veipala la vulovulo ale maroka, veia amuto ge vulo taro la igototolola tetala, uka amuto veipala la vulovulo ale kama kokora veia amuto ge vure.”
MAT 12:38 Goma, egite la tahalo la vimari te la merera te Moses, vikapopo tai me egiteu e pariseo isahari, egite goio veiale Iesus mago “Tahalo la vimari, amite masagea veia eme ge igo isasa la irovilala te la vagagarila taume, amite ge hiloa.”
MAT 12:39 Goio, e Iesus koli la vikararala tegiteu mago “Amutou la valalua me hatavivile la vareagila. Amutou tomi la tuvu ale igoie, amutou la valalua me hatavivile la iruru, amuto ge hilo la irovilala, eala moli eau kama ge virovi le amutou, eala moli La Tahalo Uru ge vahilo le amutou la irovilala isa moli sekela mai la irovilala te la bilalaha e Iona.
MAT 12:40 Alaura e Iona la ia isa uru sogomua, eia pou oilo la ilo la ia la logo itolu, me eau tai e Latu La Tahalo, eau ge tabuli te la lulu la pileho la logo itolu.
MAT 12:41 Eala moli eau veia mutou, te la haro la viputumulila te La Uru, la vareagila tegiteu la valalua me hatavivile e Nineva, eia kama ge mata mai ale tikumu mai la vareagila tamutou la valalua me hatavivile te la tuvu ale igoie. Egiteu e Nineva ge mai ale mata muli tai la iruru tamutou, la vuhula egite lolo la merera te La Uru ale e Iona valolo egiteu ovola, egite vuvulo, eala moli amutou la valalua me hatavivile ale igoie, amuto hiloti la bilalaha isa ale uru te Iona eala moli amuto kama masaga ge loloa, mai eiaue.
MAT 12:42 Sesele, te la haro la viputumulila te La Uru, la tavile uru, la mulugaluga te la gale e Siba, eia ge hiliti loio la mautu tetala ale malau otalo e Aprika, eia ge gomai, la vulovulola ale taritigi eia ge mai ale tomu sasae la vulovulo mutou igoie, ale amutou vareagagi, la vuhula la tavile uru alele eia pala tuga malau veia ge lolo la mari te Solomon, eala moli amutou, amuto hilotiau, eau uru te Solomon, eala moli amuto kama loloau.
MAT 12:43 “Mai la hitu ale kama kokora eia hele taroti la tahalo isasa, eia tuga goio te la hohoi, la lalu ouka ovola, eia papaa la mulila veia eia ge pou oio vola. Eala moli mai eia kama ge koramulia mai ele veia ge sivuti la baa ale taritigi ale ge igo la mulila ovola, eia goio vikara maie mago
MAT 12:44 ‘Kora, eau ge beu rivu loua soio te la muligu ale eau hele tarotia.’ Tio eia hiliti tuga goio eia sivuti lou la mulila eia kavelevele moli, egite sapa tatahotia, egite vimatatatia, eia taritigi pepeho.
MAT 12:45 Tio eia hiloa mai ele, eia sagege pepeho, eia tuga goio puli lou egiteu e tabarabarala taho vitu la hitu ale kama korakora lou, la vulovulo giteu taho vitu ele eia muga tetala te la igo bara giteu la valalua, egite vitilimuli gomai, egite goilo te la tahalo alele, mai la muli la hitu ale pou muga ovolae. Tio la tapasi la tahalo ale, eia kama kokora sesele, pala eia taritigi bakisi, eala moli eia goio vilua seseleti. Me eia ge mai tai aleie tamutou la valalua me hatavivile igoie, ale amuto vulo gologolo bakisi veia ge vulo halaba, amuto ge gotigu rivu lou, la tapasi mutou ge kama kokora sesele.”
MAT 12:46 E Iesus so vikarakara soio te la valalua me hatavivile, eala moli e tilala me egiteu e tabarabarala sibitalati, egite ogala magiri taitalia veia egite ge vikara soio tetala.
MAT 12:47 Tio la tahalo isasa goio veiale Iesus mago “Ale e tilamu me egiteu e tabarabaramu egite ogala, egite magiri taitalime, egite masagea veia amutou ge vikara.”
MAT 12:48 Eala moli e Iesus goio veia la tahalole mago “Amuto veia e tila ere? Amuto veia egiteu e tabarabaragu ere?”
MAT 12:49 E Iesus vikara soio tegiteu mai ele kaluvu, eia goio turi la limala soio tegiteu la valalua la vimari tetala, eia goio veia giteu la valalua me hatavivile ale magirigiri ele mago “Male ge, egiteu aleie e tatilagu, e tabarabaragu.
MAT 12:50 La vuhula la tahalo me la tavile ale ge roromuli tataho la masasagala te Tete oata te la ilo la lage, alele eia e tabaragu, eia e hatavilegu, eia e tilagu.”
MAT 13:1 E Iesus vikaluvu la vimari tetala soio tegiteu la valalua me hatavivile, eia goio gali taroa la lumale, eia gogala, eia goio pou olau la parava.
MAT 13:2 Eala moli la valalua me hatavivile usu pepeho goio sibitala roboa oio volao, e Iesus goio sae te la uaga, la uaga pati lala moli mai lolauo, e Iesus pou ovola, la valalua me hatavivile egite magiri loilo la parava.
MAT 13:3 E Iesus vikara soilo tegiteu, eia vimari legiteu la vikararala usu, eia goio veia giteu la vikarara la tilovo, mago “La tahalo isasa eia gorivo, eia pigi bura la vavua la vit orivo te la mahuma,
MAT 13:4 eia pigi burea mai ele, la vavua la vit ele isahari paru sotalo te la tia la gauru, la malumalu isahari egite lovo loio gotalo alia.
MAT 13:5 Isahari egite paru sotalo la magasa ale oata te la hate la uatati, la magasa alele kama usu, la vavua la vit ele kusi hari moli, kama tabaa.
MAT 13:6 Eala moli la haro porosile goata eia agia la vit ele, eia magolu, la vuhula la uala kama hari malau sotalo, eia magolu, peho.
MAT 13:7 Tio la vavua la vit isahari lou egite paru sotalo te la vuhule dahe ale ororoa, eia kusi goata, eala moli e dahe viri roboa, eia kama kusi tigi soata.
MAT 13:8 Eala moli la vavua la vit isahari lou paru sotalo te la magasa ale taritigi tataho, la vit ale eia goio kusi tataho sesele, eia goata, eia goio vua tataho, la balepa la vit ale, isahari uru bakisi, isahari uru sesele lou ovola, isahari lou uru makapipila pepeho.
MAT 13:9 La tahalo me la tavile ale la gavusala oiole te la ilolo la merera, taritigi eia ge lolo la vikarara la tilovo alele veia eia ge vimari ovola.”
MAT 13:10 Goma, egiteu la valalua la vimari te Iesus goio tetala, egite tahia mago “Ilava eme veia giteu la vimari te la vikarara la tilovo moli e?”
MAT 13:11 E Iesus goio koli la tilahi tegiteu mago “Amutou, amuto pou te la baligu, eau veipalatia mutou la mari te la pulolou la matagagala te La Tahalo Uru, ale tabuli kokovu, eala moli egiteu la valalua me hatavivile kama rovia.
MAT 13:12 Mai la tahalo isasa eia tautaulailo te La Tahalo Uru, la mari bakisi ale eia sau tolea La Tahalo Uru ge vauru loua. Eala moli la tahalo ale kama tautaulailo, eia kama sau tola la mari uru, La Tahalo Uru ge abi taro lou leia ale bakisi eia sau tolea.
MAT 13:13 Tiele eau vimari egiteu ale so popou te la maligoma la vikarara la tilovo moli veia egiteu moli ale matagaga bakisi te la kalulu giteu ge loloa, egite ge abi tigi la masovala, eia ge suli egiteu, eala moli egiteu ale vareagi kama ge abi tigia. Mai La Buk Tabu Ale Pala eia veia maie: Egite hilo la paga isahari, eala moli egite kama hilo tigia. Egite lolo tai la merera bakisi, eala moli egite kama rovi tigi la masovala.
MAT 13:14 Tiele, oio vola la merera te la bilalaha e Aisaia te la Buk Tabu Ale Pala eia puru seseleti tegiteu, ale eia veia maie: Amuto ge lolo bibibi la merera taku, eala moli amuto kama ge rovi la masovala. Amuto ge hilo bibibi la igogolu te la limagu, eala moli amuto kama ge gabu tikumua.
MAT 13:15 La vuhula la gabutatalala tamutou la valalua me hatavivile taku, eia tagarati, la gavusa mutou vouti, amuto mata bubuu moliti.
MAT 13:16 Mai eia kama ge maie, amuto ge matagaga leau, amuto ge lolo tataho tai la merera taku, la gabutatalala tai tamutou ge taritigi somai taku, veia eau ge vimahuli amutou. Eia sesele, la merera te Aisaia, eia mai moli ele, eala moli amutou ale taku, amuto balava seseleti, la vuhula la mata mutou matagagati, la gavusa mutou tai kopeti, koramulia amuto ge lolo la merera.
MAT 13:17 Eau vei seselea mutou, amuto balava sesele viruru, la vuhula egiteu la bilalaha ale pala, me egiteu e ururu tai mapaiti alaura, ale la vulovulo giteu matata sesele, egite tali tavu La Tahalo Uru veia egite ge hilo sesele e Kraist, veia egite ge lolo tai la golula, eala moli ouka, amutou moli ale igoie pouti te la vibalavala ale uru sesele oio volale.
MAT 13:18 “Amuto ge loloa, eau ge lubea mutou la masova la vikarara la tilovo te la tahalo la gilalu.
MAT 13:19 Mai la valalua me hatavivile ale egite lolo la merera ale veipala la pulolou la matagagala te La Tahalo Uru, eala moli egite kama abi tigi la masovala, la vuhula e Satan goilo tegiteu, eia igo gegeru la gabutatalala tegiteu, eia abi taroa la merera te La Tahalo Uru ale eia galutia te la tia giteu ele. Alele egite mai la vavua la vit ale paru te la pepe la gauru.
MAT 13:20 Eala moli la vavua la vit isahari paru te la magasa ale rumorumoa, alele eia mai la tahalo ale eia lolo moli la merera, eia sagege pepeho ovola,
MAT 13:21 eala moli la uala ouka, eia kusi goata, eia kama mahuli tabaa. Mai la valalua la gima ge taho talu la merera te La Tahalo Uru, egite ge vailo buruko la tahalo alele, egite ge igo tai la iruru soio tetala, kama tabaa la tahalo alele la tautaulailo tetala boruti.
MAT 13:22 La vavua la vit isahari tai paru te la vuhule dahe, eia mai la tahalo ale eia lolo la merera te La Tahalo Uru, eala moli la mari papaila te la mahulila ale igoie omai te la maututula, me la lulu golola tai te la masasagala tavu la uati, eia viri robo la merera te La Tahalo Uru ale so kukusi moli te la tiala, eia kati kusi tigi, la vavuala ouka, eia kama vua.
MAT 13:23 Eala moli la vavua la vit ale paru te la magasa ale taritigi, eia kusi tataho sesele, eia mai egiteu ale lolo la merera te La Tahalo Uru, egite matagaga moli te la masovala, egite roromuli tatahoa. Te la mahulila tegiteu isasasa egite ge veipala la vavuala, isahari vua uru makapipila pepeho, isahari vua uru pepeho sesele, isahari lou vua uru moli bakisi.”
MAT 13:24 Goma, e Iesus goio vei loua giteu la vikarara la tilovo isa lou mago “La pulolou la matagagala te La Tahalo Uru eia mai la tahalo isasa ale pigi bura la vavua la vit ale taritigi orivo te la mahuma tetala.
MAT 13:25 La igogolu tetala kaluvu, eia goluma, pou, la paga logo eia goio mavuta, tio te la logo la gima te la tahalo alele goio sibitala, eia goio pigi bura la vavua la obu ale kama kokora oio te la mahuma la vit tetalale, eia goio tuga.
MAT 13:26 Tio mulimuli la vit goio kusi goata eia vua, tio egite goio hilo vutia la obu ale kama kokora egira vimagiri tomi la vit ele.
MAT 13:27 Mulimuli egite la valalua la igogolu egite goio veia la tahalo la mahumale mago ‘Tahalo uru, amite rovia eme galu la vavua la vit ale taritigi oio la mahuma taume, igo mave la obu ale kama kokora egira vikusi vikapopoti lou e?’
MAT 13:28 “Tio eia lolo la vikararala tegiteu mai ele, eia goio veia giteu mago ‘La gima taku isasa oio ge galutia mai ele.’ “Tio, egite la valalua la igogolu tetala goio tahia mago ‘Mave, eme masagea amite ge lipu lulu taroa la obu ale kama kokora, ia?’
MAT 13:29 “Eia goio veia giteu mago ‘Umala, la vuhula amuto souka ge lipu lulu la vit vikapopo la obu ale kama kokorale.
MAT 13:30 Korale, egira ge vikusi tomi kara mulimuli la vit ge matuha. Tio mulimuli mai la vit ge matuha, eau ge baha amutou la valalua la igogolu, amuto ge lipu lulu taro mugea la obu ale kama kokorale, amuto ge tau olua ge kisi tolea, la tabalala ge selua te la havi. Amuto ge selua mai ele kaluvu, amuto ge goio ge abi la vavua la vit ale taritigi, amuto ge tau vikapopoa oio te la luma taku.’”
MAT 13:31 Goma, e Iesus goio vei loua giteu la vikarara la tilovo isasa lou maie mago “La pulolou la matagagala te La Tahalo Uru eia mai la vavua la obu ale bisi kokori moli, la tahalo isasa abia eia galua oio te la mahuma tetala.
MAT 13:32 La vavua la obu ale eia galutiale, eia kama uru mai la vavua la obobu isahari, ouka, eia bisi kokori moli, eala moli eia kusi uru goata, eia muga tomi te la ilali tomi ale oilo la tia la mahumale, eia uru goata pigi borebore, la malumalu usu popou oio vola, igo la tiloa giteu.”
MAT 13:33 Goma, eia goio veia giteu la vikarara la tilovo isa lou mago “La pulolou la matagagala te La Tahalo Uru eia mai tai la is ale visogo la palava. La tavile isasa eia abi bakisi la is, eia goio vivulo tomila la palava usu sesele, la palavale goio sogo tataho sesele koramulia veia la tavilele ge igo la bret ale usu pepeho oio vola.”
MAT 13:34 Eala moli la merera tomi ale e Iesus valolo egiteu la valalua me hatavivile ovolae, eia vei molia giteu la vikarara la tilovo. Eia kama veia giteu la merera ale isapolo, ouka, eia veipala molia giteu la merera la tovomulila moli.
MAT 13:35 Eala moli la merera te la bilalaha te La Tahalo Uru isasa alaura, eia puru seseleti te la vulovulole Iesus ale eia valolo egiteu te la vikarara la tilovo moli. La merera alele eia maie: Eiau La Uru, eau mulimuli ge soko la vikararala, eau ge veipala isahari la vikarara la tilovo, eau ge veipala la merera ale tabuli kokovu alaurati te la vipoupoula karati igoie.
MAT 13:36 Goio, e Iesus hiliti taro la valalua me hatavivile usu ale lolo la vikararala tetalale, eia goio la luma, pou. Eala moli egite la valalua la vimari tetala goio tetala, egite tahia mago “Taritigi eme ge lubea miteu la masova la vikarara la tilovo te la obu ale kama kokora eia kusi robo la mahuma.”
MAT 13:37 Goio, e Iesus veia giteu mago “La tahalo ale pigi bura la vavua la vit eia mai e Latu La Tahalo.
MAT 13:38 La mahuma, eia mai la maututula omai te la magasa, me la vavua la vit, alele la valalua me hatavivile ale e latatu La Tahalo Uru sesele, egite pouti te la maututula. La obu ale kama kokora, alele la valalua me hatavivile te Satan.
MAT 13:39 La gima ale pigi bura la vavua la obu ale kama kokora te la tia la mahuma, alele e Satan. Tio la haro ale egite la valalua la igogolu goio abi la ilali ovolae, ge tau vikapopoa, alele la tapasi la maututula. Egiteu la tahalo la igogolu ale ge abi la ilali orivo, egiteu la angelo.
MAT 13:40 Me la haro ale egite ge tau vikapopo la obu ale kama kokora ge selua te la havi, tio eia mai moli te la tapasi la maututulale.
MAT 13:41 La vuhula te la haro moli ale, e Latu La Tahalo ge baha taro egiteu la angelo tetala loata, egite ge lipu lulu la vuhu la iruru tomi, vikapopo tai la valalua me hatavivile ale pou te la iruru,
MAT 13:42 egiteu la angelo ge pigi egiteu sotalo te la havi ale uru, me oio vola egite ge kaukaku, egite ge koro magegege, ge melimeli la togo giteu.
MAT 13:43 Eala moli te la haro alele egiteu la valalua me hatavivile la marokala, egite ge matagaga pepeho mai la mata la haro, oio te la bali La Tahalo Uru. Mai ere la gavusala ge oio te la ilolo la merera, taritigi eia ge lolo la vikararala alele.
MAT 13:44 “La pulolou la matagagala te La Tahalo Uru, eia mai sesele la mani ale tabuli kokovu, taritigi amuto ge vagari tavua mai la tahalo ale vagari la paa muli la mani. Mai la tahalo isa ge ulai kokovu la mani, eala moli la tahalo isapolo ge sivutia, la tahalo ale sivutia ge igo mave? Eia ge ulai kokovu polo loua, eia ge vahari la papaga tomi tetala soio tegiteu la valalua la iloto, egite ge lotoa, eia ge abi la mani uru mai ele, ge vaharia soio te taho la magasale, eia ge loto poloa, me oio vola eia ge sagege pepeho, la vuhula eia balavati la mani uru pepeho ale tabuli kokovu te la magasa ale eia lototiale. Mai tai ele, amuto ge vagari tavu la matagagala te La Tahalo Uru mai la tahalo ale vagari tavu la paa muli la mani.
MAT 13:45 “La pulolou la matagagala te La Tahalo Uru, eia mai la tahalo ale la igogolu tetala la paa muli la mata la vuliti tomi mai la tuali, eia vilotolotoa.
MAT 13:46 La haro isasa la tahalo ale eia goio hilo isasa la hatotolu la tuali ale marasa pepeho. Tio eia goio vahari tomi la golugolu tetala soio tegiteu la valalua la iloto, egite loto tomia, eia goio abi la uati ale egite lotolao, eia goio loto la hatotolu la tuali ale marasa pepehole, la mapala uru sesele. La vuhula eia masaga pepeho seselea veia eia moli sekela ge taholea, mulimuli isa ge loto poloa tetala, eia ge poga la uati uru sesele oio vola. Taritigi tai veia amuto ge vagari tavu la matagagala te La Tahalo Uru mai la tahalo ale vagari tavu la paa muli la vuliti.
MAT 13:47 “La pulolou la matagagala te La Tahalo Uru eia mai la vuo ale la valalua rarea, la mata la ia tomi goio tilo ovola.
MAT 13:48 Egite goio lapu la vuole, eia volu sesele la ia, egite goio lapua soilo la parava, egite goio pou, egite hilovi tavu molia la ia ale taritigi, egite tau vikapopoa, ale kama kokorao egite pigia.
MAT 13:49 Tio te la tapasi la maututula, eia ge mai seselele, egiteu la angelo loata ge sibitala, egite ge hilovi taro egiteu la valalua me hatavivile la iruru ale kabili tegiteu ale maroka.
MAT 13:50 Egite ge hilovi taro egiteu la valalua la iruru vikapopo egiteu ale taritigi ele, ge pigi egiteu sotalo te la havi ale uru, me oio vola egite ge kaukaku, egite ge koro magegege, ge melimeli la togo giteu.”
MAT 13:51 Goma, e Iesus goio tahi egiteu la valalua la vimari tetala mago “Mave, amuto abi tigitia la masova la vikararala tomi aleie, ka ouka?” Egite goio koliala mago “Meie, amite matagagati ovola.”
MAT 13:52 Tio, e Iesus loloa veia egite rovitia mai ele, eia goio veia giteu mago “Egiteu la tahalo la mari te la viputumulila te Moses, mai egite ge vimari tigiti te la pulolou la matagagala te La Tahalo Uru, egite mai la tahalo uru isasa ale tahola la vuliti usu. Eia ge vagogala la golugolu tetala ale taritigi ele loilo te la luma tetala, eia vibulea sogala, isahari la vuliti ale halaba, mai la merera taku ale halaba, isahari tai la vuliti ale palati, mai la merera te Buk Tabu Ale Pala. Mai amutou la tahalo la mari te la pulolou la matagagala te La Tahalo Uru sesele, amuto ge valolo la merera tetala tomi.”
MAT 13:53 Goma, e Iesus vikara kaluvu soio tegiteu la valalua la vimari tetala, la vikarara la tilovo tetala kaluvu tomiti, eia goio hiliti taro la mautu alele, eia tuga,
MAT 13:54 eia goio beu loua soio te la mautu tetala sesele e Nasaret. Eia goio valolo egiteu la valalua me hatavivile te la merera te La Tahalo Uru oilo te la luma la lotu tegiteu. Egite lolo la vimari tetala mai ele, egite karutu, egite goio vei mago “La mari ale, la golu la karutula tai ale veipala la vagagarila te La Tahalo Uru, eia abia love?
MAT 13:55 La tahalo ale, e tamala e Iosep moli la tahalo la kilatulatu. E tilala e Maria moli, la tavile tegatou isale. Egiteu e tabarabarala e Iakob, e Iosep, e Saimon, e Iudas, etato rovi tomiti egiteu.
MAT 13:56 Egiteu e hatavilevilela tai omai tegatoue. Eala moli la tahalo ale eia mata mai ale isapolo sesele, la vagagarila tetalale, la mari tai uru, eia soioge abia love?”
MAT 13:57 Egite vikara mai ele, eala moli egite muku pilea, egite vikara kukumuala. Eala moli e Iesus goio veia giteu mago “Mai la bilalaha te La Tahalo Uru ge sibitala, la valalua me hatavivile te la mautu ale sogala egite ge togo seselea, eala moli oio te la mautu tetala sesele ouka, e valaluala ge muku pilea.”
MAT 13:58 Tiele e Iesus kama igo usu la golu la karutula ale isapolo kabili tegiteu ele, la vuhula egite kama tautaulailo tetala.
MAT 14:1 Te la imamalale, e Herod, eia la mulugaluga te la gale e Galilea, eia lolo la rere la igogolu te Iesus,
MAT 14:2 eia lolo la rerele Iesus mai ele, eia karutu, eia veia giteu la bilalaha tetala mago “Ale soioge e Ioanes la tahalo la vuluhi, eiala mahuli rivuti, eala eia igoti la igogolu ale vagari eia isapolo sesele mai ele, ia?”
MAT 14:3 Eia veia giteu la bilalaha tetala mai ele, la vuhula eia taga, la vuhula pala eia vagoilo e Ioanes te la luma la kilisi, me mulimuli ovola eia bili taroa, eala eia lolo la rerele Iesus, eia veia e Ioanes moli ele mahuli rivuti lou, eia taga pepeho. Eala moli la vuhu la iruru te Herod ale eia igotiale Ioanes, eia maie: Pala e Herod eia ovo e tarila e Pilip, eia puli e rutula la isala e Herodias.
MAT 14:4 Me oio vola e Ioanes eia kahare bibibiale Herod mago “Eia kama taritigi veia eme ovo e tarimu, eme puli lou e rutula, la iruru aleie eia tikumu sesele, eme poloti la merera te Moses oio te la iruru taumele.”
MAT 14:5 Tiele e Herod masaga pepehoa veia ge bili e Ioanes, eala moli eia taga la valalua me hatavivile, la vuhula egite gabu tikumu e Ioanes veia eia la bilalaha te La Tahalo Uru isasa.
MAT 14:6 Goma, te la haro isasa egiteu la valalua isahari pou vikapopo me Herod, egite igo la ilali la piligo tetala ale virovi la logo ale e tilala taposea oio vola. Te la haro alele e latule Herodias la sobe, eia tilia te la lagu giteu, e Herod hiloa, eia isu pepehoa.
MAT 14:7 Eia goio toi la merera ale tikumu soio tetala veia la golugolu tomi ale mave mave eia ge kakea oio tetala, eia ge abi seseleala.
MAT 14:8 Goio la tavile bisi ele tahi matagaga e tilala te la merera te Herod ele, e tilala karasukua veia eia ge kaka la gamale Ioanes. Tio eia goilo rivu lou te Herod, eia veiala mago “Gageie eme ge abi moliagu la gamale Ioanes, eme ge taua te la tia, eme ge abiagu.”
MAT 14:9 Tio e Herod loloa mai ele, la ilola ruru, la vuhula eia gabutala la merera tetala ale eia toi seseletia soata, eia mahela legiteu la valalua tomi ale egite pou vikapopo te la ilali, eia kama koramulia ge putu lulu lou la tiloiloi te la sobele.
MAT 14:10 Tio e Herod goio baha egiteu la bilalaha tetala, egite goio te la luma la kilisi, egite vali utu la lohole Ioanes,
MAT 14:11 egite goio abia la gamalale, taua te la tia, vaharia soio te la sobele, eia goio hugua, eia vaharia soio te tilala.
MAT 14:12 Mulimuli egite la valalua la vimari te Ioanes goio bole taroa la maule Ioanes soio te la liba, egite goio ulaia, egite ulai kaluvua, egite goio beu rivua soio, egite goio veiale Iesus.
MAT 14:13 E Iesus loloti la rerele Ioanes mai ele veia e Herod bilitia, eia goio sae la uaga, eia tuga goio te la tasi ale tabou, la valalua ouka oio vola. Eala moli la valalua me hatavivile te la maututula te la gale ale, egite hilo la tuluga tetala mai ele, egite goio tilimulia soio, egite visale moli la parava veia ge poga tavua oio te la gale la magolilo loio.
MAT 14:14 E Iesus goio poru, eia hilo egiteu mapaiti pou taitalia, eia gogo pepeho egiteu, eia goio vimahuli egiteu la ilalea tegiteu.
MAT 14:15 Tio, la paga goio maulavi, egite la valalua la vimari tetala goio tetala, egite veiala mago “Ale la baa bulalahu moli, la paga tai maulaviti, taritigi eme ge baha taro egiteu, egite ge tuga soio te la maututula, egite ge lotoa giteu bakisi la ilali.
MAT 14:16 Eala moli e Iesus goio veia giteu mago “Egiteu ge tuga ge igo lava e? Amuto ge abia giteu la ilali.”
MAT 14:17 Eala moli egite koli la merera tetala mago “Amite la ilali kama usu, la bret ilima moli, la ia ilua moli oioe.”
MAT 14:18 Goma, e Iesus goio veia giteu mago “Amuto abiagu somai la bret ilimale, la ia tai iluale.”
MAT 14:19 Tio eia goio veia giteu la valalua me hatavivile veia egite ge pou otalo, eia goio abi la bret ilimao, la ia ilua, eia goio taga soata la mori, eia vei tataho La Tahalo Uru te la ilali ale, eia goio tovia la bret ilimale, eia goio abia giteu la valalua la vimari tetala, egite goio vitabari la valalua me hatavivile ovola.
MAT 14:20 Egiteu tomi ele ali maru, egite ali kaluvu, egite goio tau vikapopo la makarakara giteu ale egite ali piligia, egite tovoa te la kelakela makapilapila savulusa gete lua, eia volu sesele.
MAT 14:21 Eala moli la giligi giteu la valalua ale e Iesus vaali egiteu, la giligi giteu mai salatu savulu lima, eala moli egiteu e hatavivile me egite gulikiliki mapaiti tai oio.
MAT 14:22 Goma, e Iesus veia giteu la valalua la vimari tetala veia egite ge sae la uaga, egite ge mamuga soio la gale la magolilo loio, veia eia ge pou muga, eia ge baha taro egiteu la valalua me hatavivile.
MAT 14:23 Tio egite goio tuga, e Iesus goio baha taro la valalua me hatavivile, egite tugatio, e Iesus goio tuga soata te la popoiti veia eia ge pou muga oata ovola, ge kaka. La paga mata roroviti, e Iesus sekela oio popou,
MAT 14:24 eala moli la valalua la vimari tetala egite olau seseleti la tia la mago, la gasi uru pigi robo la uaga, la vuhula la lolovi uru sesele tali lolagu.
MAT 14:25 Goma, eia hagagaviti la paga ge utupola, e Iesus sibitala tavu egiteu, eia tuga moli oata te la kulikuli la mago.
MAT 14:26 Goio la valalua la vimari tetala egite hilo e Iesus eia tatuga mai ele, egite taga pepeho, egite vei mago “A ge, la hitu isale!” Tiele egite hiloa mai ele, egite kakuraha gegeru.
MAT 14:27 Eala moli e Iesus goio vikara pala soio tegiteu mago “Amuto ge vagari, ale eau molie, amuto umala ge taga.”
MAT 14:28 Goma, e Pita loloa eia vikara mai ele, eia goio veiala soio mago “Tahalo Uru, mai eme e Iesus sesele, eme ge veiagu veia eau tai ge tuga oata te la kulikuli la mago, ge goio taumele.”
MAT 14:29 Goma, e Iesus veiala mago “Gomai.”
MAT 14:30 Tio, e Pita goio purusu sotalo la mago, eia soko la tuluga soio te Iesus. Eala moli eia goio hiloa veia la lolovi vagari pepeho, eia ga tilomulomuti, eia goio tali tavu e Iesus mago “Tahalo Uru, eme ge vimahuliaue!”
MAT 14:31 Tio, oio moli ovola e Iesus goio lapu rivu loua soata, eia veiala mago “Eme la tautaulailo kama uru, ilava eme kama gabu tikumu la vagagarila taku veia eau ge sau tolame, ia?”
MAT 14:32 Goio, egira goio sae soata la uaga, la lolovi goio taboutio.
MAT 14:33 Goio egite la valalua la vimari te Iesus tomi ele egite goio lotu tavua, egite veiala mago “Eme e Latu La Tahalo Uru sesele!”
MAT 14:34 Goma, e Iesus mite me la valalua la vimari tetala, egite vore utu la magolilo, egite goio poru oio te la galele Genesaret.
MAT 14:35 Eala moli egite la valalua me hatavivile tomi te la maututula ale hagagavi te la gale ale, egite rovitia veia e Iesus guviti ele, egite goio baha la vikararala soio te la maututula tomi te la gale alele, egite goio bolea egiteu ale lea soio te Iesus.
MAT 14:36 Egite goio kaka gogogo vagari e Iesus veia egite la ilalea ge pilau moli la gilesu la lavalava tetala, egite ge mahuli. Me egiteu tomi ale pilau la lavalava tetalale, egite goio mahuli tataho sesele mai ele.
MAT 15:1 Goma, egiteu e pariseo isahari, egiteu tai la tahalo la mari te la merera te Moses, egite hiliti loio e Ierusalem, egite goio te Iesus, egite tahia mago
MAT 15:2 “Igo mave egite la valalua la vimari taume egite kama tilimuli la vulovulo giteu e ururu? Mai egite ge ali, egite kama litu pala muga la lima giteu mai la irovilala veia la ilali tegiteu eia maroka moli, egite kama igoa mai ele, egite poloti la merera te ururu.”
MAT 15:3 Eala moli e Iesus putu oli lou la merera tegiteu mago “Amutou tai, amuto tilimuli moli la vulovulo giteu e ururu tamutou alaura, amuto tau loua oata te la merera te La Tahalo Uru.
MAT 15:4 Mai la merera te La Tahalo Uru eia veia maie: Amuto ge togo e tila mutou, e tama mutou tai, mai e guliliki ale eia gilo e tilala me tamala, amuto ge bilia.
MAT 15:5 Eala moli amuto goio vuloti loua, amuto veia mai la tahalo isasa eia tahola la uati koramulia, eia ge suli e tilala me tamala oio vola. Eala moli te la merera tamutou, amuto veia mai eia ge veiale tilala me tamala mago ‘Ale eau veia ge abia mulua veia ge suli le amulua, eau abitia La Uru’, tio amuto veia mai eia ge toi la merera ale mai ele soio tegirua,
MAT 15:6 tio eia kamati ge suli egirua te la iraragila tetalale. Ale amuto tao taluti la merera te La Tahalo Uru sotalo, amuto vagoatati la vulovulo giteu e ururu tamutou, la vulovulo giteu soatati.
MAT 15:7 Maura miteu la tahalo la visigologolola amutoue! La bilalaha e Aisaia eia rovi tigi sesele amutou ale eia vei pala la merera maie:
MAT 15:8 Egiteu la valalua aleie veia egite togo eau, eala moli egite togo moliau te la hare giteu moli ogala, la gabutatalala tegiteu oilo te la tia giteu, eia malau taro eau.
MAT 15:9 Egite veia egite lotu tavu sesele eau, eala moli la lotu tegiteu somai taku eia la golu bulalahu moli, la merera tai tegiteu ale egite vimari la valalua me hatavivile ovola, eia la merera la vovo moli, eia la golu bulalahu.”
MAT 15:10 Goma, e Iesus goio tola egiteu la valalua me hatavivile soio tetala, eia veia giteu mago “Amuto tomi ge lolo la merera taku, ge gabutala muli la masovala.
MAT 15:11 Mai la ilali ale egiteu e pariseo magiri robo etatou ovola veia eia la rivu gatou, mai etato ge alia, eia kama viruru etatou veia la vulovulo gatou kati ge maroka. Eala moli la gabutatalala ale kama kokora, eia tabuli oilo la tia gatou, eia ge gogala, ale moli ele visibitala la iruru ale igo mumugu la vulovulo gatou.”
MAT 15:12 Tio, e Iesus vimari egiteu mai ele kaluvu, egiteu la valalua la vimari goio tetala, egite veiala mago “Eme kama rovia veia oio te la vimari taume bakisi ele, egiteu e pariseo isahari loloa, egite mahela, egite igo totolo?”
MAT 15:13 Eala moli e Iesus goio kolia soio tegiteu mago “Egiteu la obobu tomi ale kusi bulalahu, e Tete kama galu egiteu, eia ge lipu lulu taro lou egiteu.
MAT 15:14 Egiteu e pariseo korale! Egiteu mata keati! Umala lololo egiteu, egite souka viruru amuto! Mai la mata kea isa ge tata e tabarala la mata kea isa lou soio la gauru, egira tomi ge boru sotalo la lulu!”
MAT 15:15 Eala moli e Pita lolo la vikararala te Iesus ele, eia goio veiala mago “Eme ge lubea miteu la masova la vikarara la tilovo alele!”
MAT 15:16 Goio, e Iesus koli la merera tetala mago “Ia, la mari taume so boto, eia soukama uru te la mari tegiteu e tabarabaramu ele!
MAT 15:17 Male, la ilali ale etato alalia, eia goilo moli la tia gatou, mulimuli eia goio kokovu lou.
MAT 15:18 Eala moli la merera ale sibitala te la hare gatou, eia veipala la gabutatalala tegatou ale tabuli oilo la tia gatou. Ale moli ele igo gegeru amutou veia amuto kama maroka.
MAT 15:19 Egiteu la vulovulo ale kama kokora ale sibitala loilo te la tia mutou, egiteu la mata la iruru tomi ale maie: la bilili la tahalo; la igo gegeru la taulaila; la mata bulakalakala; la ilosa; la pakalila; la visigologolola; la mera kukumula.
MAT 15:20 Egiteu la iruru tomi alele igo mumugu amutou veia amuto kama maroka. La magiri robola ale mave mave tegiteu e pariseo eia la golu bulalahu moli. Mai egite veia mai etato ge ali, etato ge litu pala muga bakisi la lima gatou mai la irovilala, veia la ilali ge maroka moli ge goilo te la tia gatou veia etato souka ge mumugu, ale egite vimari amutou mai ele, egite visigolo pasi. La gabutatalala tamutou moli oilo ale kama kokora, eia ge gogala, ale moli ele ge igo mumugu la vulovulo mutou.”
MAT 15:21 Goma, e Iesus goio hiliti taro la mautu ale, eia goio la gale la mautu ilua, e Taia me Saidon.
MAT 15:22 Goio la tavile Kenan isasa ale mou oio vola eia tuga tavu e Iesus, eia tatola soio tetala maie mago “Tahalo Uru, emei e tubule Devit ele, eme ge gogo eaue! e latugu oio kati kokora, la hitu saeti tetala, igo gegerutiae!”
MAT 15:23 Eala moli e Iesus makovu moli, eia kama koli la vikararala te la tavilele. Goio egite la valalua la vimari te Iesus tutu toleala mago “Amite silahati leia, eia tali muli moliti etatoue. Mai eme ge suli mugea, ge baha taro loua!”
MAT 15:24 Eala moli e Iesus veia giteu mago “E Tete baheau veia eau ge suli muga egiteu e Israel, ale egite mai la sip ale ruruti soio la hohoi.”
MAT 15:25 Eala moli la tavile goio toto tulu otalo oio te la lagule Iesus, eia tali tavua mago “Tahalo Uru, eme ge suliaue!”
MAT 15:26 Tio, e Iesus loloa mai ele, eia goio veiala mago “La tahalo ale vaalali e latatula, eia kama ge lagi taro lou legiteu la ilali ale eia vaali egiteu ovola, veia ge pigia la paia. Mai la visuli taku eia koramuli moli egiteu e Israel, eia kama tamutou ale logala!”
MAT 15:27 Eala moli la tavile koli tataho la merera tetala mago “Eia sesele, Tahalo Uru, eala moli amite la paia ge pou otalo la uluva la poro la ilali tamutou e Israel, amite ge ali la makara mutoue.”
MAT 15:28 Tio, e Iesus loloa mai ele, eia veiala mago “Tavile kokora, eme la tavile la tautaulailo sesele! Eia ge sibitala moli mai ale eme masagea.” Tio oio moli ovolale la hitu hele taro e latula, eia taritigitio.
MAT 15:29 Tio, e Iesus goio hiliti taro la mautu alele, eia goio hagagavi la magolilo e Galilea, eia goio tie soata te la varu la gove isa oio volae, eia pou oata ovolao.
MAT 15:30 Goma la valalua me hatavivile mapaiti egite goio sibitala tavua oata te la govele, egite vahari egiteu la ilalea soio te Iesus, egiteu ale vaha gegeru, egiteu ale mata kea, egiteu ale gulugulu, egiteu ale paua, la ilalea usu tai mai ele. Egite bole egiteu soio te Iesus, egite goio vitabuli egiteu hagagavi te la balile Iesus, eia goio vimahuli egiteuo.
MAT 15:31 Tio egiteu la valalua me hatavivilele, egite hilo la igogolu te Iesus ale eia vimahuli egiteu ale lea, egite karutu sesele, la vuhula egiteu ale paua, egite vikarati lou, egiteu ale la vaha giteu makoko, egite tuga matatati, egiteu ale vaha gegeru, egite tuga tigiti, egiteu ale mata kea, la mata giteu matagagati. Tio egite hiloa mai ele, egite goio vaisaleti la isa La Tahalo Uru, La Uru tegiteu e Israel.
MAT 15:32 Goma, e Iesus tola egiteu la valalua la vimari soio tetala, eia goio veia giteu mago “Eau gogo pasi egiteu la valalua me hatavivile aleie, la vuhula la haro itoluti egite pouti omai taku, egite kama ali bakisi. Eau kama masagea ge baha taro egiteu soio te la maututula tegiteu, la vuhula la mata giteu souka ge maligoma la vitolola te la gauru, egite ge peho parava la vitolola te la gauru.”
MAT 15:33 Eala moli egiteu la valalua la vimari tetala goio veiala mago “Ale la baa bulalahu moli, la mautu isa ouka. Etato ge loto la ilali oiove veia etato ge abia giteu la valalua me hatavivile ale usuto e?”
MAT 15:34 Goma, e Iesus goio tahi egiteu mago “La bret iriva oio?” Tio egite veiala mago “La bret ivitu moli, la ia ilua bisisi tai, kama usu.”
MAT 15:35 Eala moli e Iesus goio veia giteu la valalua me hatavivile veia egite ge pou.
MAT 15:36 Eia goio abia la bret ale ivitu ele, la ia ilua bisisio, eia goio kaka tavu La Tahalo Uru, eia vei tatahoa te la ilali ele, eia goio tovi momomo la ilali tegiteu ele, eia abia giteu la valalua tetala, egite goio vitabari legiteu la valalua me hatavivile ovola.
MAT 15:37 Egiteu tomi ali, egite maru taroa, goio egite la valalua la vimari te Iesus goio tau vikapopo la makara giteu la valalua me hatavivilele, egite tovoa te la kela ivitu ale ururu makapilapila.
MAT 15:38 Eala moli la giligi giteu la valaluale eia mai salatu savulu vaa, me egiteu e hatavivile, egiteu e gulikiliki tai usu oio tai tegiteu ele.
MAT 15:39 Tio e Iesus goio baha taro egiteu tomi ele, egite goio tuga. E Iesus mite me la valalua la vimari tetala egite goio sae te la uaga, egite tuga goio la gale e Magadan.
MAT 16:1 Goma, egiteu e pariseo, egiteu e sadiusi tai isahari, egite goio te Iesus, egite masagea veia egite ge tovo lalaia, egite goio tetala, egite veiala veia eia ge vahilo legiteu la irovilala isasa ale loata sesele te la mori, mai la igogolu isasa te la limala ale isapolo sesele.
MAT 16:2 Eala moli e Iesus veia giteu mago “La irovilala mapaiti oio veia amuto ge mata kilala ovola veia eau e Kraist, eau sibitalati. Hiloa, mai la paga ge maulavi, la mori sala tataho, e gusi magegese, amuto ge vei mago ‘Hilage, la maulavi isa taritigi pepeho, la hura ka ge pu.’
MAT 16:3 Mai tai amuto hagolo te la kavikoki, la haro goio porosile, amuto hilo la mori eia parakukuru, tio amuto vei mago ‘La hura ge pu gageie, la lolovi tai soioge ge vagari.’ Ealale, amuto hilo la irovilala oata te la mori, amuto mata kilala tavutia, amuto rovi tataho la masovala. Me ilava amuto kama rovi tigi tai la imamala ale igoie, me la irovilala tomi tai oio vola, veia amuto ge mata kilala tavua, ia?
MAT 16:4 Amutou la tuvu la valalua me hatavivile ale igoie, amuto kama kokora, amutou la valalua me hatavivile la iruru. Amuto karasuku eau veia eau ge vahilo le amutou la golu la karutula, eala moli ouka, eau kama ge igo isa la irovilala te la vagagarila taku veia amuto ge hiloa. Eala moli mulimuli amuto ge hilo la irovilala isasa mai la irovilala ale sibitala te Iona, eia tabuli kokovu la logo itolu, eau tai ge igo tai mai ele, eau ge mahuli rivu lou. Amuto ge hilo la irovilala alele, isa lou ouka.” Tio eia veia giteu la vikararala ale tivura sesele mai ele kaluvu, eia goio hiliti taro egiteu, eia tuga.
MAT 16:5 Goma, e Iesus sae muli egiteu la valalua la vimari tetala, egite vore polo soio te la gale la magolilo loio, eala moli egiteu la valalua tetala kama gabutala la ilali, egite tamamasi la bret isa moli te la tuluga tegiteu ele.
MAT 16:6 E Iesus goio veia giteu mago “Amuto ge baumuli tigi amutou te la is tegiteu e pariseo, tegiteu e sadiusi tai.”
MAT 16:7 Eala moli egiteu la valalua la vimari tetala vipigi vulo lou la merera tetalale kabili tegiteu lou, egite vikara mago “Eia soioge veia gatou maie la vuhula etato kama abi la bret.”
MAT 16:8 Eala moli e Iesus roviti la vikara kukumula tegiteu, eia goio veia giteu mago “Amutou la valalua aleie, la tautaulailo tamutou kama uru. Ilava amuto vikara kukumu veia amuto kama abi la bret?
MAT 16:9 Amuto soukama rovi tigi la vibaumulila taku veia eia taritigi sesele, ia? Amuto kamati gabutatala la bret ale ilima moli pala, egite la valalua salatu savulu lima alia? Amuto vikapopo la makarakara giteu, eia usu pepeho sesele.
MAT 16:10 Oio tai te la bret ale ivituo, amuto kamati gabutatala egiteu la valalua salatu savulu vaa eau vaali egiteu ovola, egite maru taro loua, la makarakara giteu tai usu?
MAT 16:11 Ale eau veia mutou te la is tegiteu e pariseo, me tegiteu e sadiusi tai, ale eau kama tovo amutou te la bret veia ge igo totolo lou amutou ale amuto vaula la ilali te la tuluga tegatou. Ilava amuto kama gabutala tigia la vikararala taku e? Ale eau tovo moli amutou te la is ale visogo la palava, mai la visigologolola tegiteu e pariseo me tegiteu e sadiusi, eia vali sogo la valalua me hatavivile mapaiti.”
MAT 16:12 Tio, eia lubea giteu la masova la merera tetala mai ele, egite matagagati veia eia kama mera taro egiteu te la is sesele ale egite vivuloa vikapopo la palava, eala moli eia mera taro egiteu veia egite umala ge lolo la vimari tegiteu e pariseo me tegiteu e sadiusi tai ele.
MAT 16:13 Tio, e Iesus mite me la valalua la vimari tetala, egite goio tuga lou soio, egite goio guvi te la gale e Sisaria Pilipai. Egite goio guvi ovolae, e Iesus goio tahi egiteu la valalua tetala mago “La valalua, egite veia eau ere?”
MAT 16:14 Tio, egite goio koli la tilahi tetala mago “Isahari, egite veia eme e Ioanes la tahalo la vuluhi. Isahari egite veia eme e Lias. Isahari lou veia eme e Ieremaia. Isahari tai kama rovia, egite vei molia veia eme la bilalaha te La Tahalo Uru isasa.”
MAT 16:15 Tio, e Iesus goio tahi rivu lou egiteu mago “Me amutou, amuto veia eau erei e?”
MAT 16:16 Tio, e Saimon Pita goio koli la tilahi tetala mago “Eme e Kraist, e Latu La Tahalo Uru, eia moli sekela mahuli.”
MAT 16:17 Tio, e Iesus loloa mai ele, eia goio vei tataho e Pita mago “Saimon, e latule Iona, eme balava seseleti, la vuhula la tahalo la vovo isasa kama sile palea soio taume mai ele, e Tete moli oata te la ilo la lage eia veipalea te la gabutatalala taume.
MAT 16:18 Eau veiamu, eau ge toi la isamu sesele e Pita, la masovala mai ‘la uati ale uru’ me eau ge vahiliti la lotu taku loata te la hate la uati urue, eala moli la vagagarila te Satan kama ge koramulia veia ge bolehohoa.
MAT 16:19 Eau ge abiamu la ki ale eme ge kopea giteu la valalua me hatavivile mapaiti la mata ale goilo te la balile Tete, eme ge sau tolea, veia la merera ale eme ge kisia omai te la maututula, e Tete tai ge kisia oata tetala, me la merera ale eme ge lubea omai te la maututula, e Tete tai ge lube taia oata te la ilo la lage.”
MAT 16:20 Tio eia vikara matagaga soio tegiteu mai ele kaluvu, eala moli eia tutu tola taia giteu veia egite umala muga ge veipaleale isasa veia eia e Kraist.
MAT 16:21 Goio, soko molia te la haro ale, e Iesus goio lube tatahoa giteu la valalua la vimari tetala veia la masasagala te Tamala soio tetala eia maie veia eia ge goio muga e Ierusalem, me oio vola egiteu la mulugaluga tegiteu e pris, egiteu e ururu tegiteu e Iuda tai, vikapopo me egiteu la tahalo la mari te la merera te Moses, egiteu tomi la mulugaluga alele, egite ge viligi pepehoa, egite ge bilia, eia ge peho, la haro itolu ge polo, eia ge mahuli rivu lou.
MAT 16:22 Tio e Iesus vikara matagagea giteu mai ele kaluvu, e Pita goio pulia soio, egira magiri gale, e Pita goio igo totolo e Iesuso, eia veiala mago “La vikararala tomi ale eme veitiae, La Tahalo Uru ge magiri robo loua, eia kama koramulia egite ge igo gegerume mai ele!”
MAT 16:23 Eala moli e Iesus goio magiri, eia vulo gele tavu e Pita, eia veiala mago “Emei e Satan! Taritigi eme ge hele taro eau. Eme souka ge igo marapa la gabutatalala taku gageie, la vuhula eme kama gabutatala la masasagala te La Tahalo Uru, ouka viruru, eme gabutatala moli la vulovulo te la maututula.”
MAT 16:24 Tio, eia veiale Pita la vikararala ale tivura sesele mai ele kaluvu, eia goio vei loua giteu la valalua la vimari tetala mago “Mai la tahalo isasa eia masagea veia ge mulimuliau, eia umala ge mulimuli la masasagala tetala. Eau ge ligi oata te la tauvalautu, tiele eia taritigi veia la tahalo me la tavile ale taku, eia ge raragi tai veia eia tai ge ligi mai eau.
MAT 16:25 La vuhula mai la tahalo isasa eia ge hate robo la mahulila tetala veia eia kama ge sugu taroa somai taku, la mahulila tetala ge kokovu taro leia. Mai tai la tahalo taku sesele eia ge sugu taro la mahulila tetala somai te la igogolu taku, la tahalo ale ge sivuti la mahulila ale sesele, la kaluvula ge ouka.
MAT 16:26 Tiele, mai la tahalo isasa eia ge sau tola moli la golugolu mapaiti, la uati tai uru omai te la mahulila ale igoie, eala moli la kalulula ge vilua, la golugolu tetala, la uati uru tetala tai ele, eia kama ge vimahulia. La golugolu tetala ale eia taholeale, eia ge sulia mave? Etato ge loto rivu lou la kalulu gatou la rova e?
MAT 16:27 Amuto ge magiri vagari, la vuhula eau e Latu La Tahalo, eau ge guvi vikapopo la matagaga uru loata te Tete, vikapopo tai me egiteu la angelo tetala. Te la haro alele eau ge koli la vulovulo la valalua me hatavivile tomi te la vulovulo giteu ale egite igotia.
MAT 16:28 La merera taku soio tamutou eia sesele viruru, isahari oio tamutou ele, egite kama ge peho hari, egite ge hilo e Latu La Tahalo, eau ge sibitala, eau ge visibitala la pulolou la matagagala te Tete.”
MAT 17:1 Tio, la haro iuolo polo, e Iesus goio puli e Pita, e Iakob, mira me tabarala e Ioanes, egite tie soata te la varu la gove isasa, la varu la govele eia tovosele, eia goata pepeho. Egite tie soata ovola mai ele, egite goio pou.
MAT 17:2 Tio egite pou oata te la govele, la vovole Iesus eia vulotio, eia mata sapolotio te la hililo te Pita miteu, la tirarola matagaga pepeho mai sesele la mata la haro, la kulikuli tetala eia sasima pepeho, eia kea lovolovo sesele viruru.
MAT 17:3 Goio e Moses mira me Lias egira sibitala, goio egite me Iesus vikarakara.
MAT 17:4 Tio, e Pita goio veiale Iesus mago “Tahalo Uru, etato pou omaie, amite hiloti la paga ale isapolo seseleti ele, eia taritigi pepeho, tiele mai eme ge masagea eau ge tigi la kale itolu omaie, isasa taume, isasa ge te Moses, isasa ge te Lias.”
MAT 17:5 Tio, e Pita so vikarakara mai ele, la tuluvu la mori isa gotalo pigi robo egiteu ele, la magala uru pepeho. Goio la golu La Tahalo Uru tatola loilo te la tuluvu la mori ele mago “Ale e Latugu la riau, eau sagege pepeho sesele leia, taritigi amuto ge roromuli molia!”
MAT 17:6 Eala moli egite la valalua la vimari te Iesus taho tolue, egite lolo la golu La Tahalo Uru mai ele, egite goio boru sotalo la magasa, la vuhula egite taga pepeho.
MAT 17:7 Eala moli e Iesus goio tegiteu, eia sau te la vovo giteu, eia veia giteu mago “Amuto hiliti, amuto umala tataga.”
MAT 17:8 Tio egite goio hiliti, egite ga mata galilili, egite kama hilo isasa la tahalo, ouka, egite hilo moli e Iesus sekela moli oio popou.
MAT 17:9 Goma, egite goio hiliti, egite purusu loata gotalo, e Iesus tutu tolea giteu mago “La paga ale amuto hilotia, amuto umala ge veipalea la tahalo isasa, eia ge kora moli mai ele, kara te la haro ale e Latu La Tahalo ge mahuli rivu taro la lulu la pileho.”
MAT 17:10 Eala moli egite goio tahi loua mago “Igo mave egite la tahalo la mari te la merera te Moses, egite veia e Lias eia ge sibitala rivu muga, me e Kraist ge mulimuli?”
MAT 17:11 E Iesus goio koli la tilahi tegiteu mago “La tilahi tamutou eia sesele, e Lias eia ge sibitala pala muga, eia ge vimatata pala muga la gabutatalala te la valalua me hatavivile e Israel.
MAT 17:12 Eala moli eau ge veia mutou, e Lias eia sibitalati, eala moli la valalua kama mata kilala tavua, egite mulimuli moli la gabutatalala tegiteu soio tetala, egite igo gegeruao. Eia ge mai tai ele te Latu La Tahalo, eia ge gabu la iligiligi me la tahi vilela tegiteu la valalua me hatavivile ale gimeau.”
MAT 17:13 Tiele e Iesus veia giteu mai ele, egite la valalua la vimari tetala egite rovitia veia eia veia giteu te Ioanes la tahalo la vuluhi.
MAT 17:14 Tio, goio, e Iesus me egiteu taho tolu e Pita, e Iakob, e Ioanes, egite goio beu rivu loua sotalo tegiteu la valalua me hatavivile mapaiti ale egite pou tali e Iesus ele. Goio la tahalo isasa goio te Iesus, eia toto tulu otalo te la lagule Iesus, eia veiala mago
MAT 17:15 “Tahalo Uru, taritigi eme ge gogo e latugu bisi hatamale, e dododo igigoa, eia ligi pepeho, la ilea tetalale ge sibitala tavua, eia ge bili mumugu la vovola otalo te la magasa, eia boru vaka usu sotalo te la havi, sotalo tai te la lalu.
MAT 17:16 Eau vaharitia soio tegiteu la valalua taume, eala moli egite kama igo seselea veia egite ge vimahulia, egite kama koramulia.”
MAT 17:17 Tio, e Iesus lolo la vikararala tetalale, eia hate mamasi, eia goio igo totolo egiteu la valalua me hatavivilele mago “Ko, amuto la tuvu ale igoie, amuto ouka pasi, eau silaha pepeho seseleti la pulolou taku omai kabili tamutoue! La leavala iriva lou eau ge pou omai tamutou veia eau ge bukeke la tikumu la vulovulo mutou e? Amuto ge puliagu somai e guliliki ele!”
MAT 17:18 Tio egite goio puli e guliliki ele soio te Iesus, e Iesus gusia la hitu ale pou te maura, eia goio hele taroa e guliliki ele, me oio moli ovola la ilea tetala kaluvutio.
MAT 17:19 Goio, egite la valalua la vimari te Iesus goio tetala, egite tahia mago “La vuhula la rova sesele ale amite kama koramuli la kumuli taro la hitu ale pou te guliliki ele?”
MAT 17:20 Tio e Iesus goio koli la tilahi tegiteu mago “La vuhula amuto kama tautaulailo sesele te La Tahalo Uru, la tautaulailo tamutou eia bisi moli, kama uru. Eau vei seselea mutou, mai amuto ge tahola la tautaulailo ale bakisi moli mai la vavua la obu ale bisi kokori moli, amuto ge koramuli la igogolu tomi ale vagari, eia isapolo. Amuto ge koramulia ge vikara soio te la gove veia eia ge hiliti taro la mulila eia ge tasuku soio la baa ale isapolo, tio eia ge sibitala mai sesele ale amuto veitia, la gove uru ele ge tasuku, la vuhula amutou kaka te la tautaulailo sesele. [
MAT 17:21 Eala moli la hitu ale vagari sesele mai ale eau so kumuli tataro moliao, eia isapolo, la gauru isa lou ouka veia etato ge kumuli taro la hitu ale kama kokora sesele mai ele, la kilaka moli sekela, vikapopo la peremula tai ale ge vitikumu la kilaka tegatou.]”
MAT 17:22 Goma, e Iesus miteu me la valalua la vimari tetala, egite so popou oio la gale e Galilea, la haro isasa e Iesus goio veia giteu la valalua tetala mago “Isa ge sugu taro e Latu La Tahalo soio tegiteu la valalua la gima,
MAT 17:23 egite ge biliau, eau ge peho, la haro itolu ge polo, eau ge mahuli rivu lou.” Tiele egite la valalua tetala lolo la merera tetala mai ele, egite ilo burukotio, la ilo giteu ruru seseleti.
MAT 17:24 Mulimuli e Iesus miteu me la valalua la vimari tetala egite goio guvi oio e Kapernaum, egiteu la valalua la ilabi la uati te la luma la lotu egite goio te Pita, egite tahia mago “Mave, la tahalo la vimari taume eia soioge kama lotoloto la takes te la luma la lotu, ia, uka mave?”
MAT 17:25 Tio, e Pita loloa mai ele, eia goio veia giteu mago “Ouka, La Uru miteu eia lotoloto tai la takes te la luma la lotu.” Eala moli e Pita goio beu rivu loua soilo te Iesus, e Iesus goio vikara pala muga soio tetala, eia tahia mago “Pita, eau ge tahime la gabutatalala taume. Mave, egiteu la mulugaluga omai te maututula, egite ge vibukeke e valalua giteu lou la piligi la takes soio tegiteu, uka egite ge kaka la uati tegiteu moli ale logala?”
MAT 17:26 Tio, e Pita goio koliala mago “Egite ge abi la uati tegiteu moli ale logala, kama te valalua giteu lou, ouka.” Goio, e Iesus sile pala la merera soio tetala mago “Tiele, mai moli ele eau tai e Latu La Uru, eau kama ge ligi la piligi la takes soio te la luma la lotu te Tete.
MAT 17:27 Eala moli egiteu ale kaka etala la uati soukama ge igo totolo, eala eau ge bahame, eme ge abi la string taume, eme ge magiri olau la parava, eme ge pigi la string taumele, mai la ia isasa ale eme lapu palea, eme lapu mamugea, eme ge kiki tola la kasasala, eia ge hare palala, eme ge sivuti la uati isa oilo la ilola koramulia veia eme ge abia giteu te la iloto la takes tegalua tomi.”
MAT 18:1 Goio, e Iesus me Pita so vikarakarale, egiteu la valalua la vimari te Iesus goio tetala, egite tahia mago “Amite veia ge rovia, ere isasa eia ge uru te la pulolou la matagagala te La Tahalo Uru?”
MAT 18:2 Tio, e Iesus lolo la tilahi tegiteu mai ele, eia goio tolea e guliliki isa bisi, eia vimagiri posea kabili tegiteu.
MAT 18:3 Eia goio veia giteu mago “Ale eau vei seselea mutou, mai amuto kama ge vulo la vulovulo mutou, me la gabutatalala tamutou ge sibitala maroka mai e guliliki bisi ele, amuto kama koramulia ge goilo te la pulolou la matagagala te La Tahalo Uru, ge ouka viruru.
MAT 18:4 Mai la tahalo isasa eia ge vibisi lou eia mai e guliliki bisi ele, eia moli ele koramuli sesele la tiroro soilo te la pulolou la matagagala te La Tahalo Uru.
MAT 18:5 Mai la tahalo me la tavile tai ale taku, eia ge suli tigi tai isa e guliliki bisi mai e guliliki aleie, veia ge mulimuli tataho la vulovulogu mai ele, tiele eia mai tai ale eia suli eaue.
MAT 18:6 “Mai la tahalo isasa ge viruru isasa tegiteu e gulikiliki bisisi ale roromuliau, eia ge vilua te la igototolola te La Tahalo Uru. Eia ge taritigi tetala veia mai eia soukama igo la iruru tetalale, mai egiteu e tabarabarala ge lao tola mugea, egite ge pitotoia la lohola la uati isa uru, ge pigia olau te la tia la utu, la vuhula eia souka ge igo la iruru tetala ale uru pepehole. Ale la vovola moli ge vilua, la kalulula ge mahuli.
MAT 18:7 Maura miteu la valalua me hatavivile omai te la maututula, la vuhula egite volu la vulovulo tomi ale kama kokora eia ge vitilo egiteu ale taku. Eia sesele la iruru tomi ge sibitala, kama ge kaluvu, eala moli egiteu ale viruru egiteu e latatugu ge vilua sesele.
MAT 18:8 Mai la limamu me la vahamu eia ge virurume, eia taritigi eme ge barautu taroa ge pigia, la vuhula eme ge vulo taro la viluala mai ele, la limamu me la vahamu isa moliti, eala moli la vovomu mahuliti. Kama taritigi veia la vovomu tomi ge vilua te la havi ale uru, la kaluvula ge ouka.
MAT 18:9 Mai tai la matamu isasa eia ge virurume, taritigi eme ge suba taroa ge pigia, eia taritigi moli veia eme ge mata kea galesa moli, eme ge tiroro soilo te la mahulila ale sesele la tapasila ge ouka. Eala moli eia kama taritigi mai la matamu ilua tomi soloio, eme so popou te la iruru, tiele la vovomu tomi ge gotalo te la havi ale uru, la kaluvula ge ouka.
MAT 18:10 “Amuto ge baumuli tigi amutou, amuto souka ge vile isa tegiteu bisisi ale roromuliau veia egite la golu bulalahu moli te la mata mutou. Eau veia mutou, egiteu tahola e angelo tegiteu te la vibaumulila tegiteu isasasa me egiteu la angelo la vibaumulilale, egite pou sesele te la balile Tete oata te la ilo la lage.[
MAT 18:11 Eia sesele moli veia e Latu La Tahalo eia gomai te la maututula veia ge vimahuli la valalua me hatavivile ale ruruti soio te la vulovulo ale kama kokora.]
MAT 18:12 “Amuto gabua mave? Mai la tahalo isasa eia tahola la sip salatu sasa, me isasa eia ge ruru, la tahalo alele eia kama ge paa mulia, ia? Ouka, eia ge piligi egiteu la sip ale savulu ualasiu gete ualasiu ele, eia ge paa muli ale isa moli sekela eia ruruo.
MAT 18:13 Ale eau veia mutou, mai e tahola ge sivutia la sip ale isasa moli ruruo, eia ge sagege pepeho ale isa moli eia sivutiale. La sagegela tetala ge uru kara polo la sagegela tetala tegiteu la sip ale savulu ualasiu gete ualasiu, ale egite kama ruru ele.
MAT 18:14 Tiele eia mai tai e Tama mutou ale oata te la ilo la lage, eia kama masagea veia isasa tegiteu e guliliki bisisi ale roromuliau veia eia ge ruru, ouka, eia ge paa muli vagari egiteu, eia kama masaga viruru veia isasa ge vilua.
MAT 18:15 “Mai e tabaramu isasa eia ge igo la iruru isasa soio taume, taritigi eme ge tuga tavua soio, amula sekela moli ge pou, eme ge vikara gogomeala la merera ale taritigi, eme ge veiala la iruru tetala mai ele. Tiele mai eia ge lolome, alele eme puli rivuti e tabaramu ele loio te la iruru, amula ge vipuhi tigi tataho lou.
MAT 18:16 Eala moli mai e tabaramu kama roromuli la merera taume, eme ge puli la tahalo isa lou, uka ilua, amuto ge goio tetala, amutou tomi ge vipigi vulo mugea la iruru tetala, veia egira ale taho lua lou ele ge koramulia ge sivuti sesele la vuhu la iruru tetala veia eia igo seseletia ka ouka. La vuhula La Buk Tabu Ale Pala eia veia maie veia taho lua uka taho tolu tomi ge vitikumu lou la merera tegiteu ale puli e tabara giteu isasa soio te la vigagiala.
MAT 18:17 Eala moli mai e tabaramu ale igo la iruru soio taume ele, eia kama masagea veia ge lolo la merera tamutou taho tolu mai ele, amuto ge veipala la iruru tetala soio te la valalua me hatavivile la lotu te la pou vikapopola tegiteu, egite tomi ge loloa. Tiele mai eia kama ge roromuli la viputumulila tegiteu tomi maie, taritigi amuto ge kisu taro molia mai la tahalo ale kama rovi la lotu. Mai tai la tahalo ale egiteu e Rom bahea te la ilabi la takes tamutou, eia ge la tahalo ale kama kokora te la milatalata tamutou mai ele, la vuhula eia vareagi.
MAT 18:18 “Eau ge veia mutou, la iruru tomi ale amuto la valalua me hatavivile ale taku ge pou vikapopo ge viputumulia veia eia la iruru sesele ale egite isa igo seseletia, tio La Tahalo Uru tai oata te la ilo la lage ge kisi tai la merera tamutou ele. Mai tai la iruru tomi ale amutou ale taku ge viputumulia veia eia kama sesele, tio La Tahalo uru tai oata te la ilo la lage eia ge vimavulaha taro la iruru alele, la vuhula eia kama sesele.
MAT 18:19 “Me eau ge vei taia mutou lou la merera ale taritigi maie veia mai ge taho lua tamutou ale taku omai te la maututula, mai amula taho lua moli ge kisi la merera, la gabutatalala tamulua isa moliti mai ele, tiele amula goio kaka vagari tavuau ovolao, tio e Tete oata te la ilo la lage ge igo seselea soio tamulua mai la kilaka tamulua, ale amula kisitiale.
MAT 18:20 La vuhula, eia sesele viruru mai taho lua uka taho tolu ale taku, mai egite ge pou vikapopo te la isagu, eau tai ge pou vikapopo me egiteu ele.”
MAT 18:21 Goma, e Pita goio te Iesus, eia tahia mago “Tahalo Uru, mai e tabaragu eia ge igo la iruru somai taku, me eia ge igoa vaka usu mai ele, tiele eau ge hilo taro la iruru tetala vaka riva seseleti veia eau kama ge gabutalea? Soioge vaka vitu moli mai ele, ia, mulimuli eau ge goio ge koli bara loua soio tetala e?”
MAT 18:22 Eala moli e Iesus goio koli la tilahi tetala mago “Ouka, eia kama mai ele. Eme kama ge hilo taro la iruru te tabaramu soio taume veia ge vaka vitu moli, eala moli la iruru tetala soio taume koramulia savulu vitu gete vitu eme ge hilo taro molia.
MAT 18:23 “Tiele, eia matagaga tai mai ele veia la pulolou la matagagala te La Tahalo Uru, eau ge tovoa soio te la mulugaluga isasa ale eia veia ge karasuku egiteu la bilalaha tetala ale egite dinau soio tetala, veia egite ge koli hari la uati tetalale.
MAT 18:24 Tio la bilalaha tetala isa oio, e maura la dinau tetala uru pepeho sesele koramuli e kina la milion savulu sasa, egite goio lapua soilo te la uru tetala, egite vimagiria te la vigagiala te la dinau ale uru tetalale.
MAT 18:25 “Eala moli la tahalo alele eia la uati ouka veia eia ge koli la dinau tetala. Tiele la uru goio veia giteu la valalua tetala mago ‘Amuto ge seri taro la golugolu tomi tetala, ge vipou tai egiteu me rutula me egiteu e latatula te la igogolu la bilalaha, veia eia ge koli la dinau tetala mai ele.’
MAT 18:26 “Tio e maura la tahalo alele eia loloa mai ele, eia goio toto tulu sotalo te la lagu la uru ele, eia tali tavua mago ‘Tahalo Uru, eme ge gogo eau, eme ge abiagu la baa bakisi, eau ge koli tomi la dinau taku soio taume.’
MAT 18:27 Tio la uru tetala loloa mai ele, eia goio gogoa, eia goio piligia, eia goio piligi tai la dinau tetala, eia mavulahati.
MAT 18:28 “Eala moli la bilalahale goio gali sogala, eia goio hilo e tabarala isasa la bilalaha tai ele, eia la dinau isa tai soio te la tahalo ale so mavulaha moliti ele. Tio eia goio lao tola mata bukiki la lohola, eia veiala mago ‘Eme ge koli tomi la uati ale eme pala abia taku.’
MAT 18:29 “Tiele e tabarala loloa mai ele, eia goio toto tulu sotalo, eia kaka gogogo vagaria mago ‘Eme ge abiagu bakisi la baa, eau ge kolia soio taume la dinau taku ele.’
MAT 18:30 “Eala moli la bilalahale kama masaga, ouka, eia goio veipala e tabaralale, egite vagoiloa te la luma la kilisi kara te ale eia ge koli kaluvu la dinau tetala.
MAT 18:31 “Tio, egiteu e tabarabara girua la valalua la bilalaha te la uru, egite hiloa mai ele, egite igo totolo sesele, egite tuga goio veipala tomia la mulugaluga tegiteu ale tomi eia igotia soio te tabara giteu ele.
MAT 18:32 “Tio, la mulugaluga tegiteu goio tolea la bilalaha tetalale, eia veiala mago ‘Eme la tahalo isasa, la vulovulomu kama kokora sesele. Pala eme tali tavuau, eau vimavulaha taro leme la dinau taume uruo,
MAT 18:33 eau gogome, me ilava eme kama masaga ge gogo tai e tabaramu mai ale eau gogotimei ele!’
MAT 18:34 Tiele eia igo totolo pepeho mai ele, eia goio sugu taroa soio tegiteu ale vibaumuli te la luma la kilisi, egite vagoiloa ovola, eia ge pou kara te ale eia ge koli kaluvu la dinau tetala.
MAT 18:35 “Tiele, mai amuto kama ge hilo taro sesele la iruru te tabara mutou ale egite igoa soio tamutou, veia ge vimavulaha sesele egiteu oilo te la gabutatalala tamutou sesele, e Tete ge koli bara seselea mutou la iruru tomi ale amuto igotia.”
MAT 19:1 E Iesus vikara kaluvu soio tegiteu la valalua la vimari tetala, eia goio hiliti taro la gale e Galilea, eia goio beua soio te la gale e Iudea te la gale la lalu e Iordan loio.
MAT 19:2 Goio, la valalua me hatavivile mapaiti egite tilimuli e Iesus soio vola, eia goio vimahuli egiteu la ilalea kabili tegiteu ele.
MAT 19:3 Eala moli egiteu e pariseo isahari goio te Iesus, veia egite ge tovo lalai la mari tetala veia ge vitiloa. Tiele egite goio tahia mago “Te la viputumulila te ururu tegatou e Iuda, eia koramulia veia la tahalo ge tou e rutula, uka ge ouka?”
MAT 19:4 E Iesus goio koli la tilahi tegiteu mago “Soioge amuto soukama gigi la merera te La Buk Tabu Ale Pala, ia, ale eia veia maie veia te la siloko la vipoupoula, La Tahalo Uru ‘vipou la muluga la tahalo, la muluga la tavile tai’,
MAT 19:5 eia vipou egirua mai ele kaluvu, eia goio vikara lou mago ‘Eia koramulia veia la tahalo ge hiliti taro e tamala me tilala, egira me rutula ge vipou tomi moli, egira ge isa moli.’
MAT 19:6 Tiele egira kamati mai ale ilua, ouka, egira isa moliti. Eala eia matagaga mai ele veia la taulaila ale La Tahalo Uru kisitia, eia kama koramulia veia la tahalo la vovo isasa ge lube loua, ouka viruru.”
MAT 19:7 Tio, egite lolo la vikararala te Iesus mai ele, egite goio tahi suku loua mago “Me igo mave e Moses veia eia taritigi mai egiteu ge masagea ge tou e rutu giteu, egite ge kekesi la galalau la vipou baala te la taulaila, ge abiale rutu giteu, ge baha taroa mai ele, eia ge tuga?”
MAT 19:8 Goio, e Iesus goio putu oli rivu loua soio tegiteu mago “E Moses abia mutou la gauru mai ele, la vuhula egiteu e tutubu mutou la tahalo la vareagila. Eia silahati la vulovulo giteu, eia goio kekesia giteu la tururi alele. Eala moli alaura seseleti te tubu mutou seseleti te la vuhu, la vulovulo ale maie veia amuto ge tou e rutu mutou maie, eia ouka viruru sesele.
MAT 19:9 Ale eau ge veia mutou, mai e rutu la tahalo isasa eia kama igo isasa la iruru soio te la tahalo isapolo, eala moli e haruala tou bulalahu molia, eia goio puli polo isasa la tavile, la tahalo alele eia igo gegeruti la taulaila tegira me rutula, eia ruruti.”
MAT 19:10 Tio, egiteu la valalua la vimari tetala lolo la vikararala te Iesus mai ele, egite karutu, egite goio veiala mago “A ge, mai la viputumulila te la taulaila eia vagari pepeho mai ele, eia soioge taritigi veia la visau limala te la taulaila ge umala, etato ge samura moli, etato souka ruru.”
MAT 19:11 Eala moli e Iesus goio kolia giteu mago “Eia sesele, eala moli la vimari tomi ale, eia kama koramuli la valalua tomi. Eia ge koramuli moli egiteu ale La Tahalo Uru vimari sesele egiteu ovola.
MAT 19:12 La valalua isahari kama koramuli la taulaila, palati te la bibisi giteu ale e tila giteu pigo egiteu, egite maiti ele. Eala moli la valalua isahari lou, egite igotia giteu mai ele, veia egite umala ge taulai. Me isahari tai egite tou la taulaila veia ge gabu tikumu La Tahalo Uru moli sekela, veia egite ge vagari tavu la igogolu te la pulolou la matagagala te La Tahalo Uru. Mai isasa ge vagari koramulia eia ge roromuli la viputumulila ale vagari mai ele te la taulaila, taritigi eia ge sau tolea, eia ge igo seselea mai ale eau veitiae.”
MAT 19:13 Goma, egiteu e hatavivile isahari goio puli egiteu e latatu gite soio te Iesus veia eia ge tau la limala oata te la gama giteu e guliliki bisisi ele, veia eia ge kaka La Tahalo Uru la vibalavala soio tegiteu, eala moli egite la valalua la vimari tetala, egite igo totolo egiteu e hatavivilele veia ge umala.
MAT 19:14 Eala moli e Iesus hiloa mai ele, eia goio veia giteu mago “Amuto umala ge mera taro egiteu e guliliki bisisi ele, egite korale, egite ge gomai moli taku, la vuhula la vulovulo giteu maroka koramuli sesele la pulolou la matagagala te La Tahalo Uru, egiteu ale mamaie egite sau tola seseleti la pulolou la matagagala te Tete.”
MAT 19:15 Tio eia goio tau la limala ilua oata te la gama giteu, eia toi la vibalavala soio tegiteu, eia goio hiliti taro lou la mautu alele, eia goio tuga.
MAT 19:16 Goma, la tahalo isasa goio te Iesus, eia tahia mago “Tahalo La Vimari, eau ge igo la rova veia eau ge sau tola la mahulila sesele, ale la kaluvula ge ouka?”
MAT 19:17 E Iesus goio veiala mago “Ilava eme tahi eau la vulovulo ale taritigi e? Isasa moli sekela oio ale la vulovulola taritigi, La Tahalo Uru moli sekela. Mai eme masagea veia ge sau tola la mahulila sesele, ale la kaluvula ge ouka, taritigi eme ge roromuli la tururi tomi te La Tahalo Uru.”
MAT 19:18 Eala moli la tahalole goio tahi rivu lou e Iesus mago “Eala moli eme soioge veia la tururi ale mave sesele?”
MAT 19:19 Tio, e Iesus goio koliala mago “La viputumulila tomi maie: Umala bili peho la tahalo; umala igo gegeru la taulaila; umala pakalikali; umala pipigi la merera la visigologolola; gogo e tamamu me tilamu, roromuli tataho egirua; eme ge gogo egiteu e tabarabaramu mai sesele ale eme gogo rivu lou emei.”
MAT 19:20 Tio, la hatamalelabale goio veiale Iesus mago “La tururi tomi alele eau tilimulitia, ale mave soloio eau souka rovia, eau so savelea e?”
MAT 19:21 E Iesus koliala mago “Mai eme masagea veia la vulovulomu ge maroka tataho seseleti te la milatalata te la Tahalo Uru, taritigi eme ge abi tomi la golugolu taume, eme ge vaharia soio tegiteu la valalua la iloto, veia egite ge lotoa, mulimuli eme ge abi la uati tomi alele, eme ge suli legiteu la valalua me hatavivile ale egite pou la savelela. Tiele eme ge sau tola la vuliti te la kalulu oata te la bali La Tahalo Uru. La golugolu tomi taumele ge kaluvu, eme ge gomai ge tilimuli eau.”
MAT 19:22 Tio, la hatamalelabale eia lolo la merera te Iesus mai ele, eia ilo buruko sesele, la vuhula eia la tahalo la vuliti, la golugolu tetala ale eia taholea eia usu sesele.
MAT 19:23 Goio, e Iesus goio veia giteu la valalua la vimari tetala mago “Eau ge veia mutou, eia ge vagari pasi veia la tahalo la vuliti ge tiroro soilo te la pulolou te la bali La Tahalo Uru.
MAT 19:24 Eia sesele, mai la kamel isasa eia veia ge tovo lalai veia ge polo te la mata la lili la silahi, ale ge vagari tetala. Eala moli mai la tahalo la vuliti veia ge tiroro soilo te la pulolou la matagagala te La Tahalo Uru, ale ge vagari pepeho sesele tetala.”
MAT 19:25 Tio, egite la valalua la vimari tetalale, egite lolo la vimari te Iesus alele, egite karutu, egite gabutala papapai, egite goio tahi rivu loua mago “Mai ge mai ele, ere tahalo sesele ge koramulia ge sau tola la mahulila sesele oata te La Tahalo Uru?”
MAT 19:26 Eala moli e Iesus goio mata tavu egiteu, eia veia giteu mago “Eia sesele, la tahalo la vovo eia kama koramulia veia ge sau tola la mahulila ale sesele mai te la vagagarila tetala lou. Eala moli La Tahalo Uru eia koramulia ge igo sesele la papaga tomi, eia ge vimahuli amutou.”
MAT 19:27 Tio, e Pita loloa mai ele, eia goio veiala mago “Hiloa, amite hiliti taro moliti la papaga tamiteu tomi, amite mulimulitime, eme ge abia miteu la rova sesele veia amite ge taholea?”
MAT 19:28 Tio, e Iesus lolo la tilahi te Pita mai ele, eia goio veia giteu la valalua la vimari tetala tomi ele mago “Eau vei seselea mutou, mulimuli e Latu La Tahalo ge pou te la pulolou la uru tetala, eia ge visibitala maroka lou la mori me la magasa, te la imamala alele amuto la valalua savulusa gete lua ale taku sesele, amuto tai ge pou te la pulolou la uru, amuto ge vipou la maratatilale Israel ale savulusa gete lua te la viputumulila, ge mata muli la vulovulo giteu veia egite maroka ka ouka.
MAT 19:29 Mai egiteu la valalua me hatavivile tomi ale egite gabu tikumu la igogolu la valolo te la isagu, egite hiliti taroti la luma tegiteu, e tabarabara giteu, e hatavilevile giteu, e tatama giteu, e tatila giteu, e latatu giteu, la magasa tai tegiteu ale egite taholea, La Tahalo Uru ge kolia soio tegiteu, la golugolu tegiteu ge usu pepeho, eia ge abi taia giteu la mahulila ale sesele, la kaluvula ge ouka.
MAT 19:30 La valalua me hatavivile usu ale igoie egite pou la balavala, mulimuli egite ge pou la mahelala, me la valalua me hatavivile taku usu ale igoie egite pou moli la savelela, mulimuli egite ge pou sesele te la balavala.
MAT 20:1 “La pulolou la matagagala te La Tahalo Uru eia mai sesele la tahalo isasa, eia tahola la mahuma la vaen isa uru, te la kavikoki bisi eia hiliti goio puli isahari la valalua veia egite ge igogolu te la mahuma la vaen tetala.
MAT 20:2 Eia goio veia giteu veia eia ge loto legiteu la mapa ale taritigi, koramuli la igogolu te la haro isasa, eia goio baha taro egiteu soio te la mahuma la vaen tetalae.
MAT 20:3 “Goma, te la mata la haro ualasiu te la kavikoki, eia goio kavovou soio la tia la mautu, eia hilo egiteu la valalua isahari, egite pou bulalahu moli, la igogolu ouka,
MAT 20:4 eia goio veia giteu mago ‘Amuto tai ge gorivo la mahuma taku, amuto ge igogolu, eau ge abia mutou la mapa ale koramuli amutou te la igogolu tamutoue.’
MAT 20:5 Tio egite loloa mai ele, egite goio tuga. “Goio te la mata la haro savulusa gete lua te la haro, te la mata la haro tai itolu te la maulavi, eia goio kavovou lou soio la tia la mautu, eia igo loua mai ele, veia ge baha egiteu isahari soio te la igogolu, veia eia ge loto tigi tai egiteu ele.
MAT 20:6 Goio, te la mata la haro ilima lou te la maulavi, eia goio gogala lou, eia hilo vuti lou egiteu isahari oio, egite magiri bulalahu moli, la igogolu ouka. Tio e taho la mahumale goio tahi egiteu mago ‘Amuto igo mave, la haro isa uru igoie, amuto kama igogolu bakisi, amuto pou bulalahu moli, amuto igo mave?’
MAT 20:7 “Tio, egite koliala soio mago ‘La vuhula la tahalo isasa kama abia miteu la igogolu.’ “Goio, e taho la mahumale eia loloa mai ele, eia goio veia giteu mago ‘Ioge, amutou tai ge gorivo ge igogolu te la mahuma la vaen taku.’
MAT 20:8 “Tio, la paga logologoti, e taho la mahuma goio tolea la tahalo ale baumuli egiteu la valalua la igogolu ele, eia veiala mago ‘Eme ge tola egiteu la valalua la igogolu, eme ge abia giteu la mapa giteu, tio mai eme ge abia giteu la mapa, eme ge sokoa tegiteu ale guvi mulimuli kililili, kara tegiteu ale egite guvi pala, egite guvi mamuga.’
MAT 20:9 Tio egiteu la valalua ale egite soko la igogolu te la maulavi, mai te la mata la haro ilima moli ele, egite sibitala, egite goio abi la mapa giteu, egite abi la mapa ale taritigi koramuli la igogolu mai te la haro isasa.
MAT 20:10 Eala moli egite la valalua la igogolu ale egite guvi pala, egite soko sesele la igogolu te la kavikoki bisi, egite goio sibitala, egite gabutalea veia egite ge abi la mapa giteu eia ge uru bakisi tegiteu ale guvi mulimuli, eala moli ouka, egite abi la mapa ale visauru moli.
MAT 20:11 Egite hilo la mapa giteu eia visauru moli me egiteu ale egite guvi mulimuli, egite igo totolotia e taho la mahumao.
MAT 20:12 Egite goio tahia mago ‘Egiteu ale guvi moli te la maulavi, egite kama igogolu tabaa, egite igogolu moli la mata la haro isa moli, me ilava la mapa giteu visauru moli tamiteu e? Amiteu, amite soko sesele la igogolu te la kavikoki sesele, la igogolu tamiteu vagari pepeho, la haro kue vavaga amite, la maholo mite pusi.’
MAT 20:13 “Tio, egite tahia maie, eia goio koli la tilahi tegiteu soio, eia vikara soio te la tahalo tegiteu isale, mago ‘Tabaragu, eau kama igo gegerume, ouka, etala vigia igoiti veia la mapa ge koramuli la haro isasa.
MAT 20:14 Taritigi eme ge abi moli la mapamu mai ale etala veitia, eme ge tuga. Eau masaga molia veia ge loto tai la tahalo ale guvi mulimuli kililili la mapa ale taritigi mai tai emei ele, la mapa mulua ge visauru moli.
MAT 20:15 Igo mave, eme soioge veia eau umala ge mulimuli la masasagala taku te la uati taku lou, ia? Ale amuto soioge maisu totolo la vuhula eau igoa mai la gilogo soio tamutou tomi, eala amuto mera kukukumu ele.’
MAT 20:16 “Tiele, eia ge mai seseleti aleie, egiteu ale goilo mulimuli te la pulolou la matagagala te La Tahalo Uru, eia ge vauru egiteu, egite ge muga. Egiteu ale vimuga soilo vola, La Tahalo Uru ge vibisi lou egiteu, egite ge sotigu kililili.”
MAT 20:17 Tio, e Iesus mite me la valalua la vimari tetala, egite tatuga te la gauru veia ge goata e Ierusalem, e Iesus puli egiteu ale savulusa gete lua tetala soio veia ge vikara moli soio tegiteu sekela, egite so tatugale, eia goio veia giteu mago
MAT 20:18 “Hiloa, etato ge goata e Ierusalem, egite la gima taku ge sugu taro e Latu La Tahalo soio tegiteu la mulugaluga tegiteu e pris, me egiteu la tahalo la mari te la merera te Moses, egite ge vimagiriau te la vigagiala, egite ge kisi la merera veia ge bili taroau,
MAT 20:19 egite ge sugu taro eau soio tegiteu la valalua isapolo ale kama la maratatila e Iuda, egite ge tahi vileau, egite ge kumamasiau, egite ge biliau, eau ge peho, eala moli la haro itolu ge polo, eau ge mahuli rivu lou.”
MAT 20:20 Goio, e Iesus vikara kaluvu soio tegiteu mai ele, e rutule Sebedi goio pulia e latula ilua e Iakob mira me Ioanes soio te Iesus, eia goio toto tulu te la lagule Iesus veia ge veipala la kilaka tetala soio tetala.
MAT 20:21 Goio, e Iesus tahia mago “Eme masaga lava?” Eia goio veiale Iesus mago “Mai mulimuli eme ge pou la pulolou la uru taume, eme ge vauru egirua e latugu iluale, isa ge pou te galemu e gata, isa ge pou te la galemu e meru.”
MAT 20:22 Tio, eia veiale Iesus la merera tetala mai ele, e Iesus goio koli la kilaka tegiteu mago “Amuto kama rovi tigi la paga ale amuto kaka tavua. Mave, amula koramulia ge liu tai te la kap la iligiligi ale eau tai ge liu ovola, ia?” Goio, egira kolia soio te Iesus mago “Ee, amila koramulia.”
MAT 20:23 Tio, e Iesus goio veia girua mago “Eia sesele, amula ge liu tai te la kap la iligiligi ale eau ge liu ovola, eala moli ere ge pou te la galegu e gata, ere ge pou te la galegu e meru, la viputumulila aleie kama taku, ouka, la paga te Tete, la pulolou alele eia raragitia tegiteu ale eia hiloviti egiteu veia egite ge pou sesele ovola.”
MAT 20:24 Goio, egiteu ale savulusa lou la valalua te Iesus ele, egite lolo vuti la kilaka tegira tau me tario, egite igo totolo egirua.
MAT 20:25 Eala moli e Iesus goio tola vikapopo egiteu soio tetala, eia goio veia giteu mago “Amuto rovia egite la mulugaluga tegiteu la valalua la maligoma, egite vipou la valalua me hatavivile tegiteu te la viputumulila ale vagari pepeho, me egiteu la ururu tegiteu vauru sesele egiteu lou, egite vibisi lou la valalua me hatavivile tegiteu mai ele.
MAT 20:26 Eala moli la vulovulo ale mai ele amuto kama ge tilimulia, ouka, mai isasa tamutou masagea veia eia ge la mulugaluga tamutou, taritigi eia ge suli amutou tomi mai la bilalaha ale bisi sesele tamutou tomi.
MAT 20:27 Mai isasa masagea veia ge urua mutou, taritigi veia eia ge mai moli la bilalaha tamutou tomi.
MAT 20:28 E Latu La Tahalo eia mai tai moli alele, eia kama sibitala veia la valalua me hatavivile ge sulia, eia guvi moli veia ge suli amutou tomi, veia ge sugu taro tai la mahulila tetala veia ge rou rivu lou la valalua me hatavivile mapaiti ale egite pou te la kilisi te Satan.”
MAT 20:29 Goio, e Iesus miteu me la valalua la vimari tetala, egite hiliti taro e Ieriko, la lolo la valalua me hatavivile uru egite tilimulia.
MAT 20:30 Tio egira taho lua la mata girua mata kea, egira pou hagagavi te la pepe la gauru, egira goio loloa veia e Iesus loio tatuga, egira goio tola agi oata mago “Tahalo Uru, emei e tubule Devit ele, taritigi eme ge gogo amilua!”
MAT 20:31 Eala moli la valalua me hatavivile ale usu ele, egite mera taro egirua veia egira ge makovu, eala moli egira tola agi lou oata mago “Tahalo Uru, eme e tubule Devit ele, taritigi eme ge gogo amilua!”
MAT 20:32 Tio, e Iesus lolo egirua, eia goio magiri, eia tola egirua soio tetala, eia goio tahi egirua mago “Amula masagea veia eau ge suli amulua mave?”
MAT 20:33 Egira goio veiala mago “Tahalo Uru, amila masagea veia la mata milua ge matagaga.”
MAT 20:34 Tio e Iesus goio gogo pepeho egirua, eia goio sau la mata girua, oio moli ovola la mata girua matagaga, egira goio tilimuli e Iesus soio.
MAT 21:1 Tio, e Iesus mite me la valalua la vimari tetala, egite tuga goio hagagavi te la mautu uru e Ierusalem, egite goio sibitala te la mautu e Betpage, hagagavi moli te la vai la gove bisi e Oliva. E Iesus goio baha taro la tahalo tetala ilua,
MAT 21:2 eia veia girua mago “Amulua goio te la mautu ale bisi mamugale, amula ge goilo vola, amula ge sivuti isasa e donki, egira me latula, egite vuvu tolati egirua, egira oiole magirigiri, amula ge lube egirua ge tata egirua somai taku.
MAT 21:3 Mai isa ge tahi amulua mago ‘Amula ge vagoveia?’ amula ge veiala mago ‘La Uru masaga egirua’, tio eia ge loloa mai ele, eia ge veia mulua veia amula ge tata molia somai taku.”
MAT 21:4 Eala moli la merera tomi alele, eia Iesus toia veia ge vipuru sesele la merera te la bilalaha ale pala, ale eia veia maie:
MAT 21:5 Amuto la valalua me hatavivile e Ierusalem, male ge, La Uru mutou eia loiole, eia vibisi lou eia, eia pou oata te la pogale donki isasa, e donki ale so tutubu moli.
MAT 21:6 Goio, egira taho lua ale e Iesus baha egirua, egira goio tilimuli seselea mai ale e Iesus veitia giruao,
MAT 21:7 egira goio sivuti sesele e donki iluale, egira goio tata e donki ele vikapopo me latula, egira goio rara la kairobola tegirua oata te la pogala, e Iesus goio pagi sae soata ovola, eia soko la tuluga veia ge goilo e Ierusalem.
MAT 21:8 Goio la valalua me hatavivile usu oio magirigiri, egite hiloa e Iesus loiole, egite goio ava la kairobola tegiteu otalo te la gauru, usu tai egite goio vali la halala la obobu, egite taua otalo te la gauru.
MAT 21:9 Tio la valalua me hatavivile, isahari mamuga, isahari mulimuli, egite mimimi, kakusa, egite tatola maie: La tahalo la vimahuli tegatou guviti, e tubule Devit uru ele! La Tahalo Uru abitiala la vagagarila tetala, eia bahatia somai veia eia ge vimahuli etatou, La Tahalo Uru ge vibalavea, taritigi pepeho soata tetala!
MAT 21:10 Goio, e Iesus goio sibitala oilo te la mautu e Ierusalem, la valalua me hatavivile tomi karutu pepeho, egite goio tahi egiteu mago “La tahalo ale guvi mai la mulugaluga isa urue, eia ere tahalo sesele e?”
MAT 21:11 Eala moli la valalua me hatavivile ale so guguvi vikapopo me Iesus ele, egite goio veia giteu mago “Ale e Iesus, la bilalaha te La Uru ale loio la mautu e Nasaret oio la gale e Galilea.”
MAT 21:12 Goio, e Iesus mite me la valalua la vimari tetala goio goilo la luma la lotu, e Iesus hilo egiteu la valalua ale egite vilotoloto oilo volale, eia goio kumuli taro egiteu. Eia goio vulo tugu la poroporo la iloto tegiteu la tahalo la giligi la uati, eia vulo tugu tai la pulolou tegiteu ale vipou la malumalu veia la valalua me hatavivile ge lotoa.
MAT 21:13 Eia goio veia giteu mago “La Buk Tabu eia veia maie ‘La luma taku eia la luma la kilaka te la valalua me hatavivile tomi’, eala moli amuto vulotia eia mai la luma tegiteu la valalua la pakalila.”
MAT 21:14 Tiele, e Iesus goilo te la luma la lotu mai ele, eia goio pou, tio egiteu ale mata kea, egite tai ale la vaha giteu kamati kokora, egite tuga kikihi, egiteu tomi ele goio tetala, eia vimahuli egiteu, egite posa tahalo lou.
MAT 21:15 Eala moli egiteu e pariseo, me egiteu la valalua la mari tai, egite hiloa la igogolu ale isapolo mai ele eia igoa oilo te la luma la lotu, egite lolo tai egiteu e gulikiliki egite tatola oilo te la luma la lotu mago “Taritigi soio te tubule Devit!” tio egite loloa mai ele, egite igo totolo.
MAT 21:16 Goio, egite goio tahia mago “Ae, eme loloti la merera ale egite veia, ia?” Goio, e Iesus kolia soio tegiteu mago “Ee, eau lolotia. Mave, amuto soioge souka gigia te La Buk Tabu Ale Pala ale eia veia maie ‘Tahalo Uru, eme vahiliti tatahoti la isamu oio te la hare giteu e gulikiliki bisisi!’ La merera alele amuto soioge kama rovia, ia?”
MAT 21:17 Tiele eia putu oli la merera tegiteu mai ele, eia goio hiliti, eia goio gali taro egiteu sogala te la mautu, eia goio tuga goio te la mautu e Betani, eia goio pou ovola, mavutao.
MAT 21:18 Mai galigeli te la kavikoki bisi, e Iesus mite me la valalua la vimari tetala, egite beua loio e Betani, egite tatuga te la gauru, e Iesus goio vitolo.
MAT 21:19 Tio egite tatuga te la gauru mai ele, eia goio hilo isa la obu ale mai la keme, goio, egite tuga goio e Iesus masagea veia ge logoala isa la vavuala, veia ge alia, eala moli ouka, la galagalala moli usu, la vavuala ouka. Tio e Iesus hiloa mai ele, eia igo totolo, eia mera tavua mago “Kara igoie, eme kamati ge vua lou, ouka viruruti.” Tio e Iesus vikara tavu la obu mai ele, oio moli ovola eia goio magolu.
MAT 21:20 Tio, egite la valalua tetala hiloa mai ele, la vule giteu paru, egite goio tahia mago “Igo mave la obue eia magolu hari moli maie?”
MAT 21:21 E Iesus goio koli la tilahi tegiteu mago “Eau vei seselea mutou, mai amuto ge tautaulailo vagari te La Tahalo Uru, mai la gabutatalala tamuto kama ge ilua, amuto tai ge koramulia ge igoa mai ale eau igotia soio te la obu ele, me la igogolu usu tai ale kara polo la igogolu alele, amuto ge igo taia, mai amuto ge vikara soio te la gove mago ‘Eme ge tasuku ge magiri olau te la tia la mago’, tio La Tahalo Uru ge visibitala seselea mai ale amuto toitia.
MAT 21:22 Eia sesele viruru veia mai amuto ge tautaulailo vagari, la vavua la kilaka tamutou amuto ge sau tola seselea.”
MAT 21:23 E Iesus mite me la valalua la vimari tetala, egite guvi lou oio e Ierusalem, egite goilo te la luma la lotu, e Iesus goio vimari la valalua me hatavivile oilo vola. Tio egite la mulugaluga tegiteu e pris, vikapopo tai me egiteu e ururu tegite Iuda, egite tomi goio te Iesus, egite tahia mago “La igogolu tomi ale eme igigoa, ere veiamu veia eme ge igoa e?”
MAT 21:24 Goio, e Iesus kolia soio tegiteu mago “Eau tai ge tahi amutou la tilahi isasa. Mai amuto ge koli la tilahi taku, eau tai ge veia mutou la vuhu la viputumulila taku ale eau igogolu ovola. Tio la tilahi taku eia maie: Ere sesele baha e Ioanes veia eia ge vuhi la valalua me hatavivile? La Tahalo Uru bahea, uka la tahalo la vovo isasa bahea?”
MAT 21:25 Tio, egite loloa mai ele, egite goio vipigi vulo loua kabili tegiteu maie mago “Mai etato ge kolia veia La Tahalo Uru bahea, eia soioge ge tahi rivu lou etatou veia ilava etato kama lolo vulai tavua.
MAT 21:26 Eala moli mai etato ge koliala veia la tahalo la vovo moli isasa soioge baha e Ioanes, la kilolilale eia kama ge taritigi, la vuhula la valalua me hatavivile tomi veia e Ioanes eia la bilalaha te La Uru, eala egite ge igo totolo mai etato ge tahi taro loua.”
MAT 21:27 Tio, la gabutatalala tegiteu marapa mai ele, egite goio koli la merera te Iesus mago “Amite kama rovia.” Tiele, e Iesus goio koli tataho loua giteu soio mago “Eau tai kama ge veipalea mutou te la vuhu la viputumulila taku ale eau igogolugolu ovola.”
MAT 21:28 Goio, e Iesus goio veia giteu mago “Eau ge veia mutou la vikarara la tilovo isasa, me amuto soioge ge gabutala mave ovola? La tahalo isasa e latula ale hatamale ilua, eia goio te latula isasa, eia veiala mago ‘Latugu, eau masagea veia eme ge gorivo, eme ge vulalaiagu.’
MAT 21:29 Tio e latula goio veiala mago ‘Eau kama masaga.’ Eala moli mulimuli eia goio gabutatala rivu lou, eia tuga.
MAT 21:30 Goio e tama girua goio veiale tarila veia eia ge gorivo ge vulalaiala, me tarila goio veiale tamala mago ‘Ioge tete, eau ge tuga’, eala moli eia visigolo, eia kama gorivo.
MAT 21:31 Tiele la tilahi taku soio tamutou eia maie veia ere tegirua e guliliki taho luale tilimuli la masasagala te tamala e?” Egite goio veiale Iesus mago “Ale la mulugale, la vuhula eia tou muga e tamala, eala moli eia goio gabutala rivu lou, eia roromuli e tamala, eia gorivo.” Goio, e Iesus veia giteu mago “Tiele, eau vei seselea mutou, omai egiteu la valalua ale vibukeke le amutou la piligi la takes soio te Rom, me egiteu la tavile la gauru tai ale kama korakora, egiteu usu roromulitiau, egite pepeti amutou soilo te la pulolou la matagagala te La Tahalo Uru.
MAT 21:32 Mai e Ioanes la tahalo la vuluhi eia pala guvi veia ge vahilo le amutou la gauru ale matata, amuto kama masaga ge loloa, amuto veia eia la tahalo la visigologolola, eala moli egiteu la valalua la ilabi la takes, me egiteu la tavile la gauru, egite gabu tikumu la valolo te Ioanes, egite goio roromulia. Eala moli amuto hilo egiteu usu vuvulo, amuto kama sovei egiteu veia amuto tai ge vuvulo veia ge roromuli e Ioanes mai egiteu.”
MAT 21:33 Goio, e Iesus goio vei loua giteu mago “La vikarara la tilovo isa lou amuto ge loloa, eia maie: La tahalo isasa eia tahola la gale la magasa isa uru. La haro isasa eia goio lamoa, mulimuli eia toloa, mulimuli eia goio galu la vavua la vaen oio vola. Eia galu la vavua la vaen kaluvu, mulimuli eia goio bigomu robo la mahuma tetala, eia goio gula tai la muli la vaen la uati, veia mai mulimuli la vaen tetala ge vua, eia ge toa perepere la vavua la vaen oilo vola, eia ge sigili la bulula. Eia tigi tai la kale la pahutula oata veia ge lago robo la mahuma tetalale, mulimuli eia goio tola taro egiteu la valalua isahari veia egite ge baumuli la mahuma tetalale, veia mulimuli eia ge suli egiteu bakisi la vavuala. Eia tola taro egiteu mai ele, eia goio hiliti, eia tuga goio te la gale isa malau, eia poutio.
MAT 21:34 Tio mulimuli, te la imamala la vulua la vaen, eia baha la bilalaha isahari tetala soio te la valalua ale baumuli la mahuma veia eia ge abi bakisi la mapa la mahuma tetalale.
MAT 21:35 “Eala moli egiteu la valalua ale baumuli la mahumale, egite goio lao tola egiteu la bilalaha, egite goio kue isasa, isa lou egite bilia eia peho, isasa egite dumula la uati.
MAT 21:36 Tio e taho la mahuma loloa mai ele, eia goio baha taro egiteu la bilalaha usu lou, kama ilua moli mai ale eia bahatia palao. Eala moli egiteu la valalua ale baumuli la mahuma tetala goio igo gegeru tai egiteu ele.
MAT 21:37 Tio mulimuli kililili e taho la mahumale eia baha taro e latula. Eia e latula isa lou ouka, ale isa moli ele, la riau. Eia gabutalea maie mago ‘Soioge egite ge togo e latugu.’
MAT 21:38 “Eala moli egiteu ale baumuli la mahumale, egite kisiti la merera veia ge bili e latula, egite vei maie ‘Soioge e latulale mulimuli ge abi la golugolu te tamala tomi, ia? Ioge etato ge bilia, mulimuli etato ge balava la mahuma te tamalale.’
MAT 21:39 Tiele egite kisiti la merera ale kama kokora mai ele, egite goio lao tola e latula, egite bili pehoa, egite pigia sogala la poke la bigomu, tabulio, korao.”
MAT 21:40 Tio, e Iesus gilemulia giteu kaluvu mai ele, eia goio tahi egiteu mago “Mave, mai mulimuli e taho la mahuma ge sibitala oio tegiteu ale biliti e latulale, eia ge kolia giteu mave?”
MAT 21:41 Goio, egite koliale Iesus soio mago “Maura mite, eia ge sulu tomi egiteu. Eia ge abia giteu la valalua ale isapolo la mahumale, egite ge baumulia. Te la imamala la vaen eia ge vua, egite ge abiala la mapala.”
MAT 21:42 Tio, e Iesus loloa mai ele, eia goio vei loua giteu mago “Eia sesele, amuto matagagati te la masova la vikarara la tilovole, eala moli amuto kama gigia te La Buk Tabu Ale Pala la vikarara la tilovo te Kraist, ale mulimuli eia ge guvi, egite ge muku pilea, ia? La merera ale, eia veia maie: La sosole ale egite la tahalo la tiligi la luma piligitia, egite hilovi tarotia, igoie la sosole ale eia magiriti maiti la sosole magiri isa uru, ale sau tola la tikukumu la luma tomi. La Uru eia igoti la pagale, etato hiloa veia eia taritigi pepeho sesele.
MAT 21:43 “Ale eau vei seselea mutou, La Tahalo Uru eia abitia mutou la baa koramulia veia amuto ge tiroro soilo te la pulolou la matagagala tetala, eala moli eia ge kapi robo lou amutou, eia ge vagoilo moli egiteu ale koramulia ge visibitala la vavua la tautaulailo ale sesele te la vulovulo giteu ale taritigi.[
MAT 21:44 Eia sesele e Kraist eia maiti la sosole magiri isa uru, me mai isa ge boru talu la sosole te La Tahalo Uru, la tatuhala ge putua lahu. Mai tai la sosole te La Tahalo Uru eia ge hiliti tavu la tahalo isasa veia ge kuea, eia ge kue pere seselea.]”
MAT 21:45 Tio, egiteu la mulugaluga tegiteu e pris, me egite tai e pariseo, egite lolo la vikarara la tilovo isahari te Iesus mai ele, egite rovitia veia eia ubi legiteu la merera tetalale.
MAT 21:46 Eala egite masagea veia egite ge lao tola e Iesus, eala moli egite taga la valalua me hatavivile, la vuhula egiteu tomi usu gabutalea veia e Iesus eia la bilalaha sesele te La Tahalo Uru.
MAT 22:1 Goma, e Iesus goio vikara lou soio tegiteu la valalua me hatavivile, eia vimari lou legiteu la vikarara la tilovo isahari lou, eia veia giteu mago
MAT 22:2 “La pulolou la matagagala te La Tahalo Uru eia mai sesele la tahalo isa uru, e latula ale hatamale eia taulai, e tamalale igo isa uru la ilali la taulaila tetala.
MAT 22:3 Eia goio baha taro egiteu la bilalaha tetala veia egite ge vikara matagaga soio tegiteu la valalua me hatavivile ale eia masaga egiteu veia egite ge guvi te la ilali la taulaila te latulale. Tio egite la bilalaha igo seselea mai la uru tegiteu baha egiteu ovola, eala moli egiteu ale eia baha tavu egiteu kama guvi.
MAT 22:4 “Goio, la tahalo uru ele goio baha lou egiteu la bilalaha isahari lou, eia veia giteu mago ‘Amuto ge veia giteu la valalua me hatavivile ale eau baha tavu egiteu veia eau raragiti la ilali ale uru sesele, mago: Eau laoti la kau usu pasi, la ilali tomi amite raragitia oio, taritigi amuto ge gomai te la ilali la vitirorola.’
MAT 22:5 “Tio, egite la bilalaha goio veia giteu maie, eala moli egite silaha, egite kama masaga ge guvi, egite goio paroatio, egite isahari gorivo te la mahuma, egite isahari goio tuga tavu la igogolu tegiteu isahari.
MAT 22:6 Eala moli isahari lou goio sau tola molia egiteu la bilalaha te la tahalo uru ele, egite kue egite, egite bili peho egiteu.
MAT 22:7 Goio la tahalo uru ele eia igo totolotio, eia goio baha taro egiteu la valalua la vaubi tetala, egite goio sulu tomi egiteu la tahalo la bilili ele, egite sulu egiteu kaluvu, egite selua la mautu tegiteu ele.
MAT 22:8 “Goio, la tahalo uru ele goio vei loua giteu la bilalaha tetala mago ‘La ilali la vitirorola eia oio raragiti, eala moli la valalua ale eau baha tavu egiteu, la vulo giteu kama taritigi, egite tou la gomaila, egite kama koramulia la pulolou omai taku.
MAT 22:9 Eala eau veia ge baha lou amutou, amuto ge goio te la mata la gauru tomi, amuto ge hilo isahari la valalua, amuto ge tola egiteu, ge puli egite somai te la ilali taku.’
MAT 22:10 Tio eia veia giteu mai ele, egite la bilalaha tetala goio tuga lahutio, soio te la gauru tomio, egite hilo egiteu la valalua me hatavivile, isahari taritigi, isahari kama kokora, egite goio puli egiteu tomi somai te la luma ale egite igo la ilali la taulaila oio vola.
MAT 22:11 “Tio, egite la valalua me hatavivile goio pou, la tahalo uru ele eia goio goilo, eia hilo egiteu, eia goio hilo isasa la tahalo, eia kama kai la kairobola ale egiteu ale pou te la ilali la vitirorola ge kaia.
MAT 22:12 Tiele la tahalo uru ele goio tahia mago ‘Tabaragu, eme la kairobola ouka ale koramuli la pulolou te la ilali la vitirorola. Eme soioge goilo mave, egite kama magiri robome e?’ Eala moli e maura kama koli la merera tetala.
MAT 22:13 “Tio, la tahalo uru ele goio veia giteu la bilalaha tetala mago ‘Amuto ge lao tolea, amuto ge kisi la limala ilua, la vahala iluao, amuto ge bolea soio, pigia sogala, eia ge tabuli oio te la maligoma uru ale egiteu ale pou ovola egite ge koro magegege, ge melimeli la togo giteu.’
MAT 22:14 “Tiele me eia matagaga tai mai ele veia La Tahalo Uru eia tola tavu la valalua me hatavivile usu mapaiti, eala moli isahari moli vuvulo veia egite ge lolo vulai tavua, me La Tahalo Uru hiloviti egiteu, veia egite ge tiroro soilo te la pulolou la matagagala tetala.”
MAT 22:15 Goio, egiteu e pariseo lolo la vikarara la tilovo tomi te Iesus mai ele kaluvu, egite igo totolo, egite goio gali sogala, egite goio pou, egite viputumuli la gauru ale egite ge vitilo e Iesus te la merera tetala lou veia egite ge lao tolea.
MAT 22:16 Tio egite viputumulia mai ele veia egite ge baha isahari la tahalo la vimari tegiteu, vikapopo me egiteu la bilalaha isahari te Herod, veia ge tahi e Iesus isahari la tilahi ale egite ge vitiloa oio vola. Tio egite goio tahia mago “Tahalo la vimari, amite rovia eme la tahalo sesele, eme kama makovu taitali egiteu la mulugaluga isasa. Eme vimari sesele egiteu la valalua mai la merera te La Tahalo Uru sesele. La merera taume eia isa moli somai tamiteu tomi.
MAT 22:17 Tiele amite masagea veia eme ge veipalea miteu la gabutatalala taume sesele te la piligi la takes soio te Sisa. Mave, eia koramuli taia veia etato e Iuda ge pigi la uati la takes soio te Sisa, ka ge ouka?”
MAT 22:18 Tio, egite tahia mai ele, eala moli e Iesus rovi palatia la visigolola tegiteu soio tetala, eia goio veia giteu mago “Maura miteu, amutou la tahalo la visigologolola sesele! Ilava amuto veia ge tovo lalai veia ge vitiloau mai ele, ia?
MAT 22:19 Abiagu isa la uati oiole ale amuto lololoto la takes ovola.” Tio egite goio abiala isa la uati tegiteu e Rom ele,
MAT 22:20 eia goio tahi egiteu mago “Ale la halulule ereie, me la kekesi tai oio vola tere?”
MAT 22:21 Tio, egite goio koliala mago “Ale la halulule Sisa, la kekesi tai te Sisa oio volale.” Goio, e Iesus koli tataho la merera soio tegiteu maie mago “Taritigi mai la paga te Sisa amuto ge abi rivuale Sisa, me la paga te La Tahalo Uru, amuto ge abia La Tahalo Uru.”
MAT 22:22 Tio egite loloa mai ele, egite karutu pepeho, egite tomi goio hiliti, tuga taroa.
MAT 22:23 Goio, te la haro moli lou ale, egiteu e sadiusi tai isahari goio te Iesus. La vimari tegiteu la valaluale, egite tahi taro la mahuli rivula veia etato ge peho, etato kati ge mahuli rivu lou. Tio egite gomai te Iesus veia ge tahi lalaia isa la tilahi te la vimari tegiteu ele.
MAT 22:24 Egite goio tahia mago “Tahalo la vimari, e Moses eia kekesi la merera maie veia mai la tahalo isasa eia ge peho taro e rutula, eia kama savu isa e latula, e tarila ge puli e rutule tuala ale eia peho taroa, eia ge savu isa e latula ge igo la kilolile tuala ale pehoti.
MAT 22:25 Tio, pala egiteu e tau me taitari egite taho vitu pou oio tamiteu. E tua giteu eia taulai, eia kama savu isa e latula, eia peho, e tarila ale bali tavua eia goio puli e rutule tualale.
MAT 22:26 Tio e tarila goio igo lou maio, eia peho e latula ouka. La itolula tai igo maio, egite tomi mai molio, egite peho tomi kara te tari giteu la bilaruru la ivitula, e latu giteu isa ouka.
MAT 22:27 Goio, egite tomi goio peho, mulimuli la tavilele tai goio peho,
MAT 22:28 Tiele la tilahi tamiteu oio volale, eia maie veia mai te la mahulila ale mulimuli, la tavilele ge rutule ere tegiteu sesele? La vuhula egiteu taho vitu tomi ele, egite pulitia.”
MAT 22:29 Tio, e Iesus lolo la tilahi tegiteu mai ele, eia goio veia giteu mago “Amuto ruruti, la vuhula amuto kama rovi bakisi la merera te La Buk Tabu. Amuto kama rovi bakisi tai la vagagarila te La Tahalo Uru tai. Eala amuto vikara bulalahu mai ele.
MAT 22:30 Te la mahuli rivula ale mulimuli, la taulaila ge oukati. Egite ge pou moli mai egiteu la angelo ale oata te la ilo la lage.
MAT 22:31 Eala moli la merera tamutou ale amuto tahi taro la mahuli rivula veia etato ge peho, etato kama ge mahuli rivu lou, eau ge vikara bakisi te ale. Soioge amuto souka gigi la merera te La Tahalo Uru te La Buk Tabu ale eia vimari amutou maie:
MAT 22:32 Eau La Uru te Abraham, eau La Uru te Aisak, eau La Uru te Iakob. Eala, te la merera alele eia matagaga moli veia egiteu tomi ele kama peho, la kalulu giteu mahulihuli. La Tahalo Uru eia kama La Uru giteu moli ale pehoti, eia La Uru giteu ale mahulihuli.”
MAT 22:33 Goio, egiteu la valalua me hatavivile ale usu egite oio magirigiri, egite lolo la vimari te Iesus ale tikumu mai alele, egite karutu pepeho.
MAT 22:34 Goma, egiteu e pariseo lolo vutitia veia e Iesus putu olitia la merera tegiteu e sadiusi, egite goio pou vikapopo, egite tabari isasa tegiteu veia ge tovo lalai la mari te Iesus la tilahi tegiteu isasa.
MAT 22:35 Tio la tahalo tegiteu ele eia la tahalo la mari sesele te la merera te Moses, eia goio tahi lalai e Iesus mago
MAT 22:36 “Tahalo la mari, la merera te La Tahalo Uru ale mave eia muga sesele te la merera tomi ale eia bahatia somai tegatou e?”
MAT 22:37 Goio, e Iesus koli la tilahi tetala mago “La merera ale muga sesele eia maie: Etato ge masaga tavu sesele La Tahalo Uru, La Uru gatou, etato ge masaga tavu seselea te la kalulu gatou tomi, te la gabutatalala tomi tegatou, te la ilo gatou tomi tai.
MAT 22:38 Tio la merera te La Tahalo Uru aleie eia uru sesele, eia muga tegiteu la merera tomi.
MAT 22:39 Me la iluala eia ga mai tai lou ele, egira vitotoko moli, eia maie: Etato ge gogo egiteu e tabarabara gatou la valalua me hatavivile tomi mai sesele ale etato gogo rivu lou etatou isasasa.
MAT 22:40 Tiele la merera ale iluae, egira mai la vuhu la merera tomi te Moses, me la vuhu la merera tomi tegiteu la bilalaha tai.”
MAT 22:41 Tio, egiteu e pariseo so popou vikapopole, e Iesus goio tahi egiteu mago
MAT 22:42 “La gabutatalala tamutou soio te Kraist, eia mave? e Kraist ge sibitala te la maratatila ale mave tegatou e Iuda, e tubula ge ere sesele?” Tio, egite goio koli la merera tetala mago “E Kraist, eia e tubule Devit.”
MAT 22:43 Goio, e Iesus tahi rivu lou egiteu mago “Me mai e Devit ge uru me Kraist ge bisi, ilava sesele etato gigia te La Buk Tabu te la merera te Devit, La Kalulu La Marokala suli la merera tetala, eia goio vikara soio te Kraist, eia toile Kraist veia eia La Uru tetala. La merera te Devit ele etato gigia, eia maie:
MAT 22:44 La Tahalo Uru eia vikara soio te La Uru taku mago ‘Eme ge pou omai te la baligu, te la galegu e gata, kara te ale eau ge vipou egiteu la gima taume otalo te la uluva la vahamu, eme ge soa kuru egiteu.’
MAT 22:45 Oio te la mererale, e Devit moli eia toila e Kraist ‘La Uru taku’, eala moli mai e Devit ge e tubule Kraist mai amuto veia, mave sesele eia ge gabutalea veia eia bisi moli me Kraist eia uru tetala?”
MAT 22:46 Tio, e Iesus tahi egiteu la tilahi ale viri pasi mai ele, eala moli isa tegiteu kama koramulia veia ge koli la vikararala te Iesus, ouka viruru. Sokoa te la haro alele, egite tagatia e Iesus, egite kamati tahi loua la tilahi isa lou, oukati.
MAT 23:1 Goio, e Iesus goio valolo la valalua me hatavivile usu ale magirigiri vikapopo me egiteu la valalua la vimari tetala, eia veia giteu mago
MAT 23:2 “Egiteu la tahalo la mari, vikapopo me egiteu e pariseo, egite abiti la mulile Moses,
MAT 23:3 eala eia taritigi veia amuto ge lolo vulai tavu la merera tegite, eala moli la vulovulo giteu ale egite igigoa, amuto umala tilimulimulia, la vuhula egite kama mulimuli seselea mai la merera ale egite vimari amutou ovola.
MAT 23:4 Egite vibole la valalua me hatavivile la tabule ale tikumu pepeho, mai la imoimo la merera usu ale egite veia etato ge tilimulia, eala moli egite kama masaga veia ge koli egiteu, veia egite ge lube tataho la merera te La Tahalo Uru, veia ge bole suli la valalua me hatavivile bakisi te la bulole la tikumu la merera ale usu egite vipou egiteu oio vola.
MAT 23:5 “La vulovulo giteu tomi ale egite igigoa, egite igoa veia la valalua me hatavivile ge hiloa veia egiteu la tahalo sesele. Egite abi la kekesi la merera te Moses, egite pilu tatahoa, egite kisia oata te la varu giteu, egite kaia te la lima giteu tai mai la sasa veia eia ge suli egiteu. La krobola tegiteu ale egite kaia te la kilaka, eia malalau sotalo la magasa.
MAT 23:6 Egite masagea veia egite ge pou mamuga te la mata la valalua te la ilali ale uru, egite masaga taia veia egite ge pou mamuga te la mata la valalua me hatavivile oilo te la luma la lotu.
MAT 23:7 Egite masagea veia la valalua me hatavivile ge laharoa giteu oluma te la tia la mautu, me egite masaga taia veia la valalua me hatavivile ge togo tataho egiteu, ge toi legiteu ‘Tahalo la vimari’.
MAT 23:8 Eala moli amutou la valalua umala ge toitoi le amutou maie ‘Tahalo la vimari’ la vuhula la tahalo isa moli sekela eia la tahalo la vimari tamutou, me amutou tomi amuto vitau me tabara moli.
MAT 23:9 Me amuto umala tai ge toi bububu moli la tahalo isasa omai te mahulila te la vovo veia ‘e tete’, la vuhula e Tama mutou isa moli sekela, La Tahalo Uru oata te la ilo la lage.
MAT 23:10 Me egite umala ge toile amutou ‘tahalo uru’, la vuhula la uru mutou isa moli sekela, e Kraist.
MAT 23:11 Mai isasa eia la mulugaluga tamutou, alele eia mai la bilalaha moli tamutou.
MAT 23:12 Mai la tahalo isasa, eia ge vauru lou eia, la isala vavava, La Tahalo Uru ge vibisi loua. Eala moli mai la tahalo isasa eia vibisi lou eia, La Tahalo Uru ge vauru loua.”
MAT 23:13 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola. Amuto magiri robo legiteu la valalua me hatavivile la gauru ale egite ga goilo vola veia ge pou te la pulolou la matagagala te La Tahalo Uru. Amuto kama masagea veia ge tiroro soilo vola, ilava amuto magiri robo lou egiteu ale masagea ge goilo, ia? [
MAT 23:14 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amuto pakalikali la luma me la magasa tegiteu e hatavivile la baharu, amuto goio lotu, amuto visigolo la kilaka ale malau veia amuto ge tau robo lou la iruru tamutou. Tiele mulimuli La Tahalo Uru ge vilai sesele amutou, la iligiligi tamutou ge kara polo la iligiligi tegiteu la valalua me hatavivile bulalahu.]
MAT 23:15 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologoloa! Amuto polo soio la gale ale malau sesele veia ge puli isahari la valalua soilo te la lotu e Iuda, egite isahari goio tilimuli amutou mai ele, egite muga sesele amutou te la vulovulo ale kama kokora ale amuto vimari legiteu ovola.
MAT 23:16 “E maura miteu, amutou mai la mata kea, amuto vituri gegerua giteu la valalua me hatavivile la gauru. Te la vimari tamutou, amuto veia mai la tahalo isasa eia ge vikara sesele oata, mai eia ge toi la luma la lotu veia ge vitikumu lou la merera tetala mai ele, amuto veia la vikararala tetalale eia kama tikumu. Eala moli amuto goio vimari papai lou egiteu veia mai isasa ge vikara, mai eia ge toi la vuliti ale oilo la luma la lotu, tio te la vimari tamutou ele, amuto veia la merera moli alele tikumu, eia mai ale kisi roboti la merera tetala tomi.
MAT 23:17 E maura miteu, amuto paua, amuto mata kea! Mave, amuto soioge veia la luma la lotu eia la golu bulalahu moli, me la vuliti ale egite taua oilo vola veia eia ge suli la lotu tegiteu, ale moli ele tikumu, ia? Ouka gologolo. La luma la lotu moli, eia vitikumu la vuliti ale egite taua oilo vola.
MAT 23:18 “Me la merera tamutou isa lou, veia mai la tahalo isasa eia ge vikara sesele oata, eia ge toi la poro oilo la luma la lotu ale egiteu gugutu la vaabila soio te La Tahalo Uru oio vola, amuto veia la merera alele eia kama tikumu. Eala moli mai isasa ge vikara sesele oata, eia ge toi la vaabila ale tabuli oata la poro, amuto veia la merera moli alele eia tikumu, eia mai ale kisi roboti la merera tetala tomi.
MAT 23:19 Amuto veia mai ele, amuto mata kea sesele! Mave, amuto veia la poro ale egite gugutu la vaabila soio te La Tahalo Uru oio vola, eia la golu bulalahu moli, me la vaabila ale egite taua oata ovola, ale moli ele tikumu, ia?
MAT 23:20 “Mai ale, mai amuto ge vikara sesele oata, amuto toi la poro oilo la luma la lotu, ale amuto mai ale toi vikapopoti la vaabila ale tabuli te la porobe, veia eia ge vitikumu la merera tamutoue.
MAT 23:21 Mai tai amuto ge vikara sesele oata, amuto toi la luma la lotu, ale amuto mai ale toi vikapopoti la isa La Uru tai, veia eia ge vitikumu la merera tamutou, la vuhula ale la luma tetala ale eme toitiale.
MAT 23:22 Mai tai amuto ge vikara sesele oata te la ilo la lage, ale amuto mai ale toiti la pulolou te La Uru, vikapopo sesele me La Tahalo Uru ale eia popou oio vola, eala la vikararala tamutou mai ele, eia tikumu bara sesele, eala moli amuto toi bulalahu molia.
MAT 23:23 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola. La ilali ale bisi kokori moli amuto ge tabaria, la bautula ge savulu sasa, isa amuto ge abia La Tahalo Uru, ualasiu ge tamutou. Amuto igigoa mai ele, amuto mulimuli seselea mai la imoimo la merera tomi te Moses, taritigi pepeho, eala moli la merera usu lou ale tikumu pepeho, La Tahalo Uru eia veitia gatou oio vola, amuto piligitia, mai la merera te la vulovulo ale taritigi, la gilogo, la iroromulila. Taritigi amuto ge tilimuli tomi la merera te La Tahalo Uru, ale tikumu, ale kama tikumu tai, la merera tomi.
MAT 23:24 Amutou maiti la mata kea. Amuto vituri gegerua giteu la valalua me hatavivile la gauru. Ale amuto gabutatala vagari la imoimo la merera tomi ale bisisi, eala moli amuto piligi lou la merera ale tikumu, ale amutou mai sesele la tahalo ale abi taro la pakeso la lamo ale bisi kokori moli oilo te la lalu ale eia veia ge liua, eala moli eia goio liu, eia viliu tomi la pupuso uru vikapopo la lalu. La vuhula amuto vagari moli veia ge roromuli la imoimo la merera te La Tahalo Uru tomi ale bisisi, eala moli amuto mata sosoli lou la merera tetala ale tikumu.
MAT 23:25 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Te la vulovulo mutou, amuto hihi tataho la kulikuli la kap tamutou, la plet, veia eia ge maroka sesele, eala moli la rova amuto taua oilo vola veia amuto ge alia? Amuto igo volu molila la vavua la iruru tamutou, mai la pakalila me la ilisu tavu la golugolu te la tahalo isapolo.
MAT 23:26 Amutou e pariseo, amuto mata kea sesele! Taritigi amuto ge igo maroka muga la ilo la kap oilo, mai la tahalo ale la ilola maroka. Mulimuli la kulikuli la kap ale logala, amutou ge igo marokea, mai la tahalo ale tilimuli sesele la imoimo la viputumulila tomi.
MAT 23:27 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amutou mai sesele la liba ale egiteu e hatavivile sapa bibibia, eia maroka. Eala moli la rova sesele tabuli oilo vola? Eia volu la tatuha giteu ale pehoti, la papaga ale mavulu.
MAT 23:28 Tio eia mai sesele eau veitia, la valalua me hatavivile hilo amutou, egiteu veia amutou taritigi, eala moli oilo te la tilalau te la tia mutou oilo, eia volu sesele la visigologolola me la vareagila.
MAT 23:29 “Amutou la tahalo la mari te la merera te Moses, amutou tai e pariseo, e maura miteu, amuto ge vilua, la vuhula amutou la tahalo la visigologolola! Amuto igo la simen te la liba giteu la bilalaha te La Tahalo Uru ale pala, veia ge vitokoromo tataho tai la liba giteu la valalua la marokala te La Tahalo Uru.
MAT 23:30 Amuto vikara maie mago ‘Mai ge amite ge mahuli pala te la imamala tegiteu e tutubu miteu, amite kama ge suli egiteu veia amite ge bili egiteu la bilalaha.’
MAT 23:31 Tiele amuto veipalea mai ele veia amutou e tutubu giteu sesele la valalua ale bili egiteu la bilalaha te La Tahalo Uru.
MAT 23:32 Ioge, taritigi amuto ge vikaluvu pasi la igogolu ale kama kokora egiteu e tutubu mutou sokotia.
MAT 23:33 “Hilage, amutou la valalua ale kama kokora sesele, amuto mai e taive ale vuraga, eia pou kokovu te la pepe la gauru, veia ge totolo la valalua ale polopolo, eia igo gegeru egiteu. Amuto kama ge vulo taro la igototolola te La Tahalo Uru, ouka viruru, eia ge pigi amutou sotalo te la havi ale uru, la kaluvula ge ouka.
MAT 23:34 Eau veia mutou, eau ge baha taro isahari la bilalaha, isahari la valalua la mari tai te la merera taku, egite tai isahari ale ge vimari tataho le amutou te La Buk Tabu, egite ge goio tamutou, eala moli amuto ge lao tola egite, isahari amuto ge bili egiteu, isahari lou amuto ge katu egiteu oata te la tauvalautu, isahari lou amuto ge kumamasi vulo egiteu oilo te la luma la lotu, amuto ge basimuli egiteu, egite ge hele marapa, amuto ge paa muli vagari lou egiteu oio te la maututula tomi veia ge lao tola egiteu.
MAT 23:35 Tiele la iruru tamutou eia uru pepehoti, la kasoso giteu la valalua me hatavivile la marokala, ale la valalua ale kama kokora bili taroti egiteu, eia ge pagegele volu amutou, sokoa alaurati ale egite bili e Abel, eia la tahalo la marokala taku, kara alalavi, ale egiteu e valalua mutou egite bili e Sekaraia ale e latule Berakaia, oilo moli te la luma la lotu ale eia magiri te la poro la gulutu la vaabila. La tikumu la iruru tomi aleie eia ge tabuli tamutou.
MAT 23:36 Eau vei seselea mutou, la mapa la iligiligi te la iruru tomi aleie, eia ge puru sesele tamutou la tuvu ale igoie, la vuhula amuto raragiti veia ge igo la iruru soio te la bilalaha te La Tahalo Uru, eia ge kara polo la iruru tomi ale egiteu e tutubu mutou igoa soio tegiteu la bilalaha tomi ale pala.
MAT 23:37 “Maura, Ierusalem, amutou la valalua me hatavivile e Ierusalem, amuto bili taro moli egiteu la bilalaha te La Uru, amuto dumu legiteu la uati, ale La Tahalo Uru baha egiteu somai tamutou. Vaka usuti eau ilo buruko le amutou, eau gabutalea veia eau ge tola tavu egiteu e latatumu veia eau ge sigirobo egiteu mai e kukureko eia rara robo legiteu e latatula la palapalala. Eala moli amuto kama masaga.
MAT 23:38 Hiloa, ale la mautu tamutou ge sululu sapa, eia ge kavelevele moli,
MAT 23:39 amuto kamati ge hilo lou la matagu kara te la haro ale eau ge guvi loata, me amuto ge tola maie ‘La Uru ge vibalava la bilalaha tetala!’”
MAT 24:1 Goma, e Iesus mite me la valalua la vimari tetala, egite hiliti, egite goio tuga taro la luma la lotu, egite so gogalagala molie, egiteu la valalua la vimari tetala veia eia ge kavovou muga bakisi ge hilo egiteu la lumaluma ale marasa oilo te la bigomu te la luma la lotu ele.
MAT 24:2 Eala moli e Iesus goio veia giteu mago “Amuto hilo egiteu la lumaluma tomi ururuo? Eau vei seselea mutou, mulimuli la valalua la gima tegatou e Iuda ge sibitala, egite ge loke momomo taroa, me la uatati ale ururu ovola, egite kati ge vitabuli tatalu lou, egite ge tabuli marapa tomi.”
MAT 24:3 Mulimuli, e Iesus oio popou oata te la gove bisi e Oliva, egiteu moli la valalua la vimari tetala goio tetala, egite tahi kokovua mago “Eme ge vei matagagea miteu la leavala ale mave sesele eia ge sibitala mai eme veitia, veia la gima ge loke taro la luma la lotu. La irovilala tai ale mave ge sibitala veia amite ge rovia veia eme hagagaviti ge sibitala rivu lou omai, te la tapasi la maututula?”
MAT 24:4 Tio, e Iesus goio koli la tilahi tegiteu mago “Amuto ge vibaumuli amutou, isasa souka ge visigolo amutou.
MAT 24:5 La vuhula la valalua usu ge sibitala, egite ge toi la isagu soio tamutou veia egiteu e Kraist sesele, eala moli ouka, egiteu alele egite ge visigolo la valalua me hatavivile mapaiti.
MAT 24:6 “Mai mulimuli amuto ge lolo la tilali la ruruga me la rere la ruruga tai ge tali soio te la maututula, amuto umala ge karutula, la papaga tomi ale mai ele egite ge sibitala pala muga, eala moli la tapasi la maututula eia souka.
MAT 24:7 La maratatila isahari ge hiliti tavu la maratatila isapolo, egite ge vaubi. La gale isasa ge hiliti tavu la gale isapolo, egite ge vaubi tai mai ele. Te la baa isahari la vitolo uru ge sibitala, e malugulugu tai ge umu oio te la gale isahari.
MAT 24:8 Eala moli alele eia mai moli la siloko la iligi la piligo, eia kama ge kaluvu hari.
MAT 24:9 “Te la imamala alele, egite la valalua ge viligi pepeho amutou, egite ge sugu taro amutou soio tegiteu la gima ale ge bili amutou. Te la galegale tomi la valalua me hatavivile te la maratatila tomi, egite ge vile amutou, la vuhula amuto roromuli eau.
MAT 24:10 Te la imamala moli alele, la valalua me hatavivile usu la tautaulailo tegiteu ge boru, egite ge sugu taro e tabarabara giteu soio tegiteu la gima taku, egite ge vitahi taro baololi tai egiteu.
MAT 24:11 Egiteu la tahalo la visigologolola tai usu ge sibitala veia ge valolo gegeru la valalua me hatavivile te la merera te La Tahalo Uru, eala moli egite kama ge loio sesele tetala, egite la tahalo la visigologolola moli, egite ge visigolo la valalua me hatavivile mapaiti.
MAT 24:12 La vulovulo la vareagila eia ge sibitala uru pepeho, eala la valalua me hatavivile usu kati ge rovi la gilogo.
MAT 24:13 Eala moli ere tahalo, ere tavile eia ge magiri vagari moli kara te la tapasi la maututula, tio La Tahalo Uru ge vibalavala la mahulila ale sesele, la kaluvula ge ouka.
MAT 24:14 Me la valolo ale taritigi te la pulolou la matagagala te La Tahalo Uru eia ge polo galili la maututula tomi, la valalua me hatavivile tomi ge lolo pala mugea mai ele, tio mulimuli ovolale la tapasi la maututula ge sibitala.
MAT 24:15 “Te la imamala ale hagagavi te la tapasi la maututula, amuto ge hilo la puigolo isa uru ale kama kokora, mai la halulu la tahalo, la bilalaha ale pala e Daniel eia kekesi matagaga ovola. Tio egite la valalua la gima ge vimagiria oilo te la luma la lotu oio e Ierusalem. Ale egite igo mumugu la luma la lotu mai ele, la iruru ale eia tikumu sesele. La puigolole, eia kama kokora viruru. Mai amuto ge hiloa mai ele, amuto ge rovia veia eia kama ge tabaa, la mautu e Ierusalem ge sululu.” (Mai isa ge gigi la mererale, taritigi eia ge rovi tigi la masovala.)
MAT 24:16 “Te la haro moli alele, eia taritigi veia egiteu ale pou oio la gale e Iudea, egite ge hele soata te la goegove.
MAT 24:17 Mai la tahalo isasa eia ge pou ogala te la matabala la luma, eia umalati ge tiroro soilo te la luma tetala veia eia ge abi muga la golugolu tetala, taritigi veia eia ge hele moli.
MAT 24:18 Mai tai la tahalo isa ge orivo, taritigi veia eia umala ge beu tavu lou la kulikuli tetala ale eia tau taroa te la baa isasa, eia soukama ge igo madidi mai ele, eia ge vilua.
MAT 24:19 E maura miteu e hatavivile ale savulatu te la haro alele, me egiteu tai e hatavivile ale visususu e latu giteu la pepeso, egite kama koramulia ge hele.
MAT 24:20 Eala moli eia taritigi tai veia amuto ge kaka vagari La Tahalo Uru veia eia ge gogo amutou, veia la viligila ale, eia kama ge sibitala tavu amutou te la leavala la maigi,
MAT 24:21 La vuhula la imamala ale, eia ge vagari pepeho, pala te la siloko la vipoupoula, karati igoie, la iligiligi kama sibitala vagari sesele mai eia ge sibitala te la tapasila. Mulimuli tai la viligila kama ge vagari sesele mai tai ale.
MAT 24:22 Eia sesele, mai La Tahalo Uru kama ge barautu boto la viligila ale, la tahalo isa kama ge mahuli utu. Eala moli eia hiloviti isahari la valalua me hatavivile tetala sesele veia egite ge mahuli utu, eia ge barautu boto la viligila ale, la vuhula eia gogo rivu egiteu ale tetalale, veia ge vimahuli egiteu.
MAT 24:23 Mai te la imamala ale, la tahalo isa eia ge veia mutou mago ‘Male, ale e Kraist sibitalatie!’ Uka isa ge vei mago ‘Hiloa, e Kraist oiole!’ umala amuto ge lolo egiteu ele,
MAT 24:24 la vuhula egiteu la tahalo la visigologolola isahari ge guvi veia egiteu e Kraist. Isahari tai ge sibitala, egite ge veia egiteu la bilalaha te La Tahalo Uru, egite ge igo la irovilala me la golu la karutula tai isahari ale isapolo sesele veia ge visigolo amutou veia la vagagarila te La Tahalo Uru eia pou tegiteu, la vuhula egite masaga ge tutugolo amutou ale te La Tahalo Uru sesele, eala moli egite kama ge koramulia.
MAT 24:25 Tiele, amuto matagagati, la vuhula eau vei matagaga palatia mutou ele.
MAT 24:26 “Eala moli mai egiteu isahari ge veia mutou mago ‘Male, e Kraist sibitalati oata la hohoi!’ amuto umala goio vola. Mai tai egite ge veia mutou mago ‘Hiloa, e Kraist omaie, amite sivutitia oilo la lumae!’ amuto umala tautaulailo te la merera tegiteu ele.
MAT 24:27 La guluvi te Latu La Tahalo, eia ge isapolo te aleie, eia ge sibitala mai la sima ale eia ge sima lomuli te la porosile la haro eia ge karigaga te la iroro la haro loale, la guluvi te Latu La Tahalo ge mai seselele.
MAT 24:28 Amuto ge rovi tigi la irovilala tomi, mai la pileleho ge tabuli te la baa isasa, eia mavulu, e loauru ge sibitala ovola veia ge alia, eia mai la irovilala veia la pileleho oio tabulibuli ele.
MAT 24:29 “Mulimuli la viligila tomi alele ge kaluvu, la mata la haro me la taio ge kuma, egite la matatabu oata te la mori ge paru sotalo, la mori oata eia ge malugu bebebe moli.
MAT 24:30 Goio la irovilala te Latu La Tahalo ge sibitala oata te la mori, la valalua me hatavivile te la maratatila tomi otalo te la maututula, egite ge hiloa, egite ge tali, goio egite ge hilo e Latu La Tahalo eia ge sibitala loata te la tuluvu la mori eia ge gotalo, vikapopo la vagagarila tetala ale uru pepeho, me la matagaga tai ale uru sesele.
MAT 24:31 La vaivai ge tali, eia ge baha egiteu la angelo tetala soio te la igaga la magasa tomi, egite ge puli vikapopo la valalua me hatavivile tomi ale eia hiloviti egiteu veia egite ge tetala, egite ge loio la igaga la magasa tomi ge goio vikapopo tetala.
MAT 24:32 “Amuto ge abi la vimari bakisi te la obu ale taro. Mai eia taroti, eia ge tutuvu rivu lou, tio amuto ge rovia veia eia mahatiti, la leavala kaluvuti.
MAT 24:33 Tio mai moli ele amuto ge hilo la irovilala tomi ale eau veitia mutou ovola, egite ge sibitala, tio amuto ge rovia veia La Uru eia hagagaviti, ogala moli te la matapiro.
MAT 24:34 Eau vei seselea mutou, egite la tuvu ale igoie, isahari tegiteu soukama ge peho, la papaga tomi aleie ge sibitala.
MAT 24:35 La mori me la magasa egira mulimuli ge kokovu, eala moli la merera taku kama ge kokovu.
MAT 24:36 “Eala moli te la haro alele, eia la haro la karutula sesele, isasa kama ge rovi la haro aleiele, me la mata la haro tai oio vola. Egiteu la angelo tai oata te la ilo la lage, egite tai kama rovia. Eau tai kama rovia, La Tahalo Uru moli sekela eia rovia.
MAT 24:37 La vulovulo ale kama kokora ale egite igoa te la imamala te Noa, la vulovulo giteu la valalua me hatavivile ge mai tai lou ele te la imamala ale e Latu La Tahalo ge guvi rivu lou ovola.
MAT 24:38 Palati te la imamala te Noale, la lalalu souka tutupusi te la maututula, la valalua alali, egite liliu, egite taulalai, kara sesele te la haro ale e Noa eia tiroro soilo te la uaga uru makapipila tetala, eia kapi robo.
MAT 24:39 La valalua me hatavivile kama rovi la viluala ale hagagaviti ge sibitala tavu egiteu, egite kavovou bulalahu moli, egite karutu la lalalu tutupusi te la maututula tomi, la lalalu sogo robo la valalua me hatavivile me gulikiliki tomi, egite sululu sapa tomi moli. Tiele eia ge mai tai aleiele te la guluvi te Kraist, eia ge guvi karutu sesele.
MAT 24:40 Mai la tahalo ilua egira ge gorivo la mahuma, egiteu la angelo ge puli isa, e tabarala ge korao.
MAT 24:41 Mai tai la tavile ilua egira ge pou vikapopo la ilisile bau, egiteu la angelo ge puli isa, e tabarala ge korao.
MAT 24:42 “Eia taritigi pepeho veia amuto tomi ge raragi tigi, amuto ge lago tataho, la vuhula amuto kama rovia veia La Uru mutou eia ge sibitala te la haro ale mave.
MAT 24:43 Taritigi amuto ge gabutala tigi la merera aleie, mai e taho la luma, eia kama rovia veia la tahalo la pakalila eia ge sibitala te la mata la haro ale mave sesele veia ge sae soata la luma ge pakali, eala moli e taho la luma eia pahutu tataho veia la tahalo la pakalila souka ge sibitala ge sile tavu la luma ge pakali la golugolu tetala.
MAT 24:44 Tiele amuto ge raragi tataho mai ele te la guluvi te Kraist, la vuhula eia ge sibitala karutu te la mata la haro ale amuto kama raragi ovola.
MAT 24:45 “Mai amuto ge pou tataho mai la bilalaha ale taritigi, eia gabutala tigi, eia baumuli tataho la igogolu tetala ale la uru tetala tabariala veia eia ge tabaria giteu la bilalaha tomi la ilali tegiteu te la haroharo tomi.
MAT 24:46 Mai la uru tetala ge guvi, eia ge hiloa veia eia igo sesele la igogolu mai ale eia veitia pala, eia ge vibalava seselea.
MAT 24:47 Ale eau vei seselea mutou, la uru tetala ge sugu taro tomiala la golugolu tetala tomi veia eia ge baumuli tomia.
MAT 24:48 Eala moli mai la tahalo la igogolu ale kama kokora eia ge gabutalea maie mago ‘La uru taku eia kama koramulia ge sibitala hari, eia ge tabaa muga’,
MAT 24:49 tiele eia ge pou tavu moli la kulue giteu la bilalaha tomi ale egite otalo tetala, eia ge alali, liliu vikapopo me egiteu la valalua ale liu galololo.
MAT 24:50 Eala moli la uru tetala goio guvi karutu, eia ge sivuti la iruru tetala mai ele,
MAT 24:51 eia ge lubi vulo gegeru seselea, eia ge pitaroa sotalo te mautu la iligiligi veia eia ge pou vikapopo legiteu la tahalo la visigologolola ovola, eia ge gabu la iligiligi ale uru pepeho, egite ge koro magegege, ge melimeli la togo giteu.
MAT 25:1 “Te la haro ale la pulolou la matagagala te La Tahalo Uru ge sibitala, amuto ge hiloa eia ge mai sesele la sobe ale savulusa, egite abi la lam tegiteu isasasa te la logo veia egite ge pololaha la taulai halaba.
MAT 25:2 Eala moli egite la sobe ale savulu sasale, egite ilima kama gabutatala tigi, egite ilima lou la tavile la mari.
MAT 25:3 Egiteu ale ilima la gabutatalala tegiteu boto, egite hiliti abi la lam tegiteu, eala moli egite kama abi la karasin veia egite ge sigilia te la lam tegiteu mai eia ge mate.
MAT 25:4 Eala moli egiteu ale ilima egite la tavile la mari, la gabutatalala tegiteu malau, egite abi la lam tegiteu, egite abi tai la karasin ale egite ge sigilia ovola.
MAT 25:5 Tio egite tomi hiliti tuga, egite goio la luma ale egite ge pou tali la taulai halaba ovola, egite goio vola, egite pou. Egite pou, pou, pou, eala moli la taulai halaba eia kama guvi hari, egite hatavivile ale savulu sasale egite pou, egite mata tutulu, egite goio mavuta.
MAT 25:6 “Tio, goio te la logo uru valiposa, la tahalo isa loio tatola, eia vei mago ‘Mutou, hiliti, la taulai halaba eia loiotie, amuto ge hagolo ge polo utua soio la gauruo, amuto ge pulia soluma.’
MAT 25:7 “Tio, egite tomi e hatavivilele goio hagolo, egite hiliti, raragia la lam tegiteu isasasa.
MAT 25:8 Eala moli egiteu ale ilima la gabutatalala tegiteu boto, egite karutu ale la karasin tegiteu kaluvuti, egite goio tali tavu egiteu ale ilima la tavile la mario, mago ‘Amuto ge sigilia miteu bakisi la karasin somai la lam tamiteue, eia mamateti, la karasin ouka!’
MAT 25:9 “Eala moli egite hatavivile ale ilima la tavile la mario, egite goio koli la merera tegiteu mago ‘Eala moli ouka, la karasin bakisie eia kama ge koramuli etatou tomi, taritigi amuto ge goio ge loto mugea mutou bakisi la karasin ale ge koramulia la lam tamutou.’
MAT 25:10 “Tio, egite hatavivile ale ilima la gabutatalala tegiteu boto, egite goio tuga goio veia ge loto, eala moli egite karutu, la tahalo ale taulai halabale goio guvi sesele oluma. Egiteu ale ilima la tavile la mario, egite goio raragi la lam tegiteu, egite goio tiroro soilo la luma vikapopo me la taulai halaba, egite goilo tomi te la ilali la taulaila, la mulugaluga goio kapi la mata.
MAT 25:11 “Mulimuli egite hatavivile ale ilima, la gabutatalala tegiteu boto, egite goio guvi, egite tutu la mata, egite tola soilo mago ‘Tahalo uru, eme ge kope amiteu.’
MAT 25:12 “Eala moli eia goio veia giteu mago ‘Eau kama rovi sesele amutou, amuto tuga.’
MAT 25:13 “Tiele, la guluvi te la pulolou la matagagala te La Tahalo Uru eia mai tai ele, amuto ge raragi tigi, amuto ge lago tataho, la vuhula amuto kama rovi la haro alele, me la mata la haro tai, ale eia ge guvi oio vola.
MAT 25:14 “La guluvi te la pulolou la matagagala te La Tahalo Uru eia ge mai sesele tai la tahalo isasa, eia raragi veia ge tuga soio te la mautu isasa malau, eia goio tola egiteu la bilalaha tetala, eia goio visaua la lima giteu la golugolu tetala tomi, la magasa tai, la lumaluma, la igogolu tetala tomi, egite sau tolea.
MAT 25:15 Eia vitabari legiteu la uati tetala: la mulugala eia abiala la mani ale uru sesele mai e kina salatu savulu lima, la iluala eia abiala la mani ale uru tai mai e kina salatu savulu lua, la itolula eia abiala e kina salatu savulusa moli. Eia tabari tatahoa giteu mai ele, veia egite ge igogolu muga oio vola, ge paa muli la uati isahari lou tetala ovola, la vuhula eia rovi la vagagari giteu taho tolu ele. Goio eia vitabari legiteu kaluvu, mulimuli eia goio hiliti tuga.
MAT 25:16 “Eia tuga, la bilalaha ale eia abiala e kina salatu savulu limao, eia tuga goio igogolu vagari te la uati ale eia sau toleao, eia sivuti lou e kina salatu savulu lima oata ovola, eia vitau tomi.
MAT 25:17 Me la tahalo tai ale sau tola e kina salatu savulu luao, eia tai igogolu maio, eia sivuti lou e kina salatu savulu lua, eia vitau tomi lou.
MAT 25:18 Eala moli ale sau tola e kina salatu savulu sasa molio, eia tuga goio oli la lulu sotalo te la magasa, eia goio tau kokovu la uati te la mulugaluga tetala otalo te la luluo.
MAT 25:19 “Tio, la tasi goio tabaa pepehoti, la mulugaluga tegiteu la bilalaha taho tolu alele eia goio sibitala, eia masagea veia eia ge vimatata la uati ale eia abia giteu la bilalaha tetala.
MAT 25:20 La tahalo ale eia abi e kina salatu savulu lima, eia goio te la mulugaluga tetala, eia veiala mago ‘Tahalo uru, eme abiagu e kina salatu savulu lima, eau igogolutila, eau sivuti lou e kina salatu savulu lima oata ovola, eala eau vaharia somai taume.’
MAT 25:21 “Tio, la mulugaluga tetala loloa mai ele, eia sagege pepeho, eia goio veiala mago ‘La igogolu taume taritigi pasi, eme la tahalo sesele, eme baumuli tataho la igogolu taume, eme igo sesele la igogolu ale bisi, ale eau ge vaurume gageie, eme ge baumuli la igogolu ale uru, eme gomai pou te la baligue, etala ge vipou tomi la sagegela ale uru pepeho.’
MAT 25:22 “Goio, la tahalo tai ale eia abi e kina salatu savulu lua, eia goio tai te la mulugaluga tetala, eia veiala mago ‘Tahalo uru, eme abiagu e kina salatu savulu lua, eau igogolutila, eau sivuti lou e kina salatu savulu luati loue, eialae.’
MAT 25:23 “Tio, la mulugaluga tetala loloa mai ele, eia sagege pepeho, eia goio veiala mago ‘La igogolu taume taritigi pasi, eme la tahalo sesele, eme baumuli tataho la igogolu taume, eme igo sesele la igogolu ale bisi, ale eau ge vaurume gageie, eme ge baumuli la igogolu ale uru, eme gomai pou te la baligue, etala ge vipou tomi la sagegela ale uru pepeho.’
MAT 25:24 “Goio, mulimuli e maura la tahalo ale eia abi moli e kina salatu savulu sasa molio, eia tai goio sibitala oio te la mulugaluga tetala, eia veiala mago ‘Tahalo uru, eau rovitia veia eme la tahalo isa ale hate tuu, eme kama igogolu, eme baha moli amiteu, amite lamolamo, galugalu, eala moli eme abi tomi la vavua la igogolu tamiteu, eme abi la uati uru taume ovola.
MAT 25:25 Tiele eau rovi la vulovulomu mai ele, eau makuku sesele lemei, eau ulai kokovu la uati taume ale e kina salatu savulu sasale, eia souka kokovu. Ale eme guvitie, eau isitia, eau abitia, eala eau ge abi rivuamu la uati taume, male tiele, eme ge abia.’
MAT 25:26 “Eala moli la mulugaluga tetala loloa mai ele, la hatela mamasi sesele, eia goio veiala mago ‘Eme la tahalo isa kama kokora sesele, la igogolu taume kama taritigi, eme tuha malulu pasi, eia sesele eme rovi la vulovulogu veia eau la tahalo isa ale hate tuu, eau kama igogolu, eau baha moli amutou, amuto lamolamo, galugalu, eala moli eau abi tomi la vavua la igogolu tamutou, eau abi la uati uru taku ovola.
MAT 25:27 Eme rovia la vulovulogu mai ele, ilava sesele eme kama vahari la uati taku soio tegiteu la valalua ale vibaumuli la uati, veia eau ge beua, eau ge abi rivu loua vikapopo la uati ilua ale ge sibitala loata ovola?’
MAT 25:28 “Tiele, la mulugaluga tetala igo totolo pepeho mai ele, eia goio veia giteu la bilalaha tetala mago ‘Amuto ge abi taro leia la uati ale e kina salatu savulu sasale, ge abiale tabarala ale sau tolati e kina salatu salatu sasae.
MAT 25:29 La vuhula la tahalo ale sau tolati la golu ale taritigi, eau ge vauru lou la vibalavala soio tetala, eia ge balava pepeho sesele. Eala moli la tahalo ale kama sau tola isa la paga, ale bakisi e maura taholea, eau ge abi taro lou leia.
MAT 25:30 Eala moli amuto ge lao tola la tahalo ale kama kokorale, amuto ge kumuli taro seselea sogala te la maligoma ale uru sesele, ale egiteu ale pou ovola egite koro magegege, egite melimeli la togo giteu.’
MAT 25:31 “Mulimuli e Latu La Tahalo eia ge sibitala vikapopo la matagaga ale uru pepeho, vikapopo tai me egiteu la angelo tetala, eia ge pou te la pulolou la uru tetala.
MAT 25:32 Egiteu la maratatila la valalua me hatavivile tomi te la maututula te la galegale tomi, egite ge sibitala vikapopo oio te la lagula, eia ge tabari egiteu la malosu ge ilua, mai sesele la tahalo la vibaumuli la sip eia tabari egiteu la sip isapolo me la mee isapolo.
MAT 25:33 E Kraist ge vipou egiteu la sip oio te la galela e gata, me egiteu la me e soio te la galela e meru.
MAT 25:34 “La Uru ge veia giteu ale pou oio te la galela e gata maie ‘Amutou ge gomai, e Tete vibalavati amutou, amuto ge pou te la mautu la marokala ale e Tete raragitia palati te la siloko la maututula veia eia ge tamutou.
MAT 25:35 La vuhula pala eau vitolo, amuto vituha toro eau, amuto abiagu la ilali. Pala eau malehu, amuto sahoagu la lalu, eau liua. Pala eau pou la mosi, amuto puliau soilo te la luma tamutou.
MAT 25:36 Pala eau savelea la kulikuli, amuto goio abiagu la kulikuli, eau lea, amuto baumuliau, eau pou oilo te la luma la kilisi, amuto goio hari lalai eau.’
MAT 25:37 “Eala moli egiteu la valalua me hatavivile ale taritigi ele, egite ge tahia mago ‘Tahalo Uru, te la haro ale mave sesele, amite hilome eme vitolo, amite vituha torome, amite abiamu la ilali e? Te la haro tai ale mave eme malehu, amite sahoamu la lalu, eme liua e?
MAT 25:38 Te la haro tai ale mave eme pou la mosi, amite pulime soilo te la luma tamiteu e? Me te la haro ale mave eme la kulikuli ouka, amite abiamu la kulikuli e?
MAT 25:39 Te la haro ale mave eme lea, uka eme pou oilo te la luma la kilisi, amite hari lalaime?’
MAT 25:40 “Tio, La Uru ge koli la vikararala tegiteu maie ‘Ale eau vei seselea mutou, la visuli ale eme suli e tabaragu isa ovola, mai la tahalo bulalahu moli ale kama posa tahalo, amuto goio sulia, ale amuto kama suli moli eia, amuto mai ale igo seselea somai taku.’
MAT 25:41 “Eala moli La Uru ge vikara soio tegiteu ale pou oio te la limala e meru, eia ge veia giteu maie ‘Amutou la valalua me hatavivile ale kama kokora, La Tahalo Uru ge vilai sesele amutou! Amuto ge hele taroau gageie, amuto ge gotalo te la havi ale uru, la kaluvula ge ouka, ale La Tahalo Uru raragitia veia ge vilai e Satan vikapopo me egiteu la angelo tetala oio vola.
MAT 25:42 La vuhula pala eau vitolo, amuto kama abiagu bakisi la ilali veia eau ge tuha torola. Eau malehu, amuto kama sahoagu la lalu veia eau ge liua.
MAT 25:43 Pala eau pou la mosi, amuto kama puliau soilo te la luma tamutou. La kulikuli taku ouka, amuto kama abiagu la kulikuli. Eau lea, eau pou oilo te la luma la kilisi, amuto kama hari lalaiau bakisi veia amuto ge tiloho lalai eau bakisi, ouka viruru.’
MAT 25:44 “Tio, egiteu la valalua me hatavivile ale kama kokorale, egite ge koli la merera tetala, egite ge tahia maie ‘Tahalo Uru, te la haro ale mave sesele amite hilome eme vitolo, eme malehu, me eme la mosi, eme la kulikuli tai ouka, eme lea, me eme pou oilo te la luma la kilisi, veia amite kama sulime bakisi e?’
MAT 25:45 “Tio, La Uru ge koli lou la merera tegiteu maie ‘Ale eau vei seselea mutou, la visuli ale eme vitoua, eme kama suli e tabaragu isa ovola, mai la tahalo bulalahu moli ale kama posa tahalo, amuto kama sulia, ale amuto kama suli tai eau, amuto mai ale tou sesele eau!’
MAT 25:46 “Tiele, eia ge sile palea giteu kaluvu mai ele, me egiteu ale kama kokorale eia ge baha taro egiteu soio te la viligila ale uru, la kaluvula ge ouka, eala moli egiteu ale taritigi, la vulovulo giteu maroka tomi moli, eia ge vimahuli sesele egiteu, egite ge sau tola la mahulila ale kama ge kaluvu.”
MAT 26:1 E Iesus vimari egiteu la valalua me hatavivile kaluvu, eia goio veia giteu la valalua la vimari tetala mago
MAT 26:2 “Amuto rovia, la haro ilua moliti soloio te La Ilali La Poloselela, te la haro ale egite la valalua la gima ge lao tola e Latu La Tahalo ge katu tolea oata te la tauvalautu.”
MAT 26:3 Goio, egiteu la mulugaluga tegiteu e pris, vikapopo me egiteu la mulugaluga tegiteu la valalua e Israel, egite goio pou vikapopo oio te la luma te Kaiapas, eia la mulugaluga tegiteu e pris.
MAT 26:4 Goio, egite pou vikapopo mai ele, egite viputumuli la gauru isa veia egite ge lao tola kokovu e Iesus ovola veia egite ge bilia eia ge peho.
MAT 26:5 Eala moli isahari tegiteu goio vikara maie mago “Etato umala ge lao tolea te la haro La Ilali La Poloselela, la vuhula egiteu la valalua me hatavivile ge usu omai e Ierusalem, egite masaga pepeho e Iesus ele, egite soukama ge soko la vikuela, la mautu ge masua.”
MAT 26:6 Goio, e Iesus oio popou te la luma te Saimon oio la mautu e Betani. Me la tahalo ale e Saimon, la vovola pala sereka gegeru.
MAT 26:7 Tio e Iesus oio popou, la tavile isa loio, eia vahari la botol la bulu la obu isasa. La lalu aleie eia mali vivili tataho pasi, la mapala tai uru sesele. Eala moli la tavilele goio voropola molia la botol bisi ele, eia abia goio tigitaroa oata te la gamale Iesus ale eia popou te la ilali.
MAT 26:8 Tio egiteu la valalua la vimari tetala, egite hiloa, egite igo totolo, egite goio vitahi baololi lou egiteu mago “Ilava eia tigitaro bulalahu molia la lalu ale?
MAT 26:9 La lalu alele la mapala uru pasi, koramulia veia etato ge abi la uati uru ovola ge suli legiteu la valalua ale pou la savelela.”
MAT 26:10 Eala moli e Iesus rovitia veia egite vikara kukukumu mai ele, eia goio tahi egiteu mago “Ilava amuto igo totolo la tavilele? Eia igoti la irovilala ale taritigi pepeho somai taku.
MAT 26:11 La valalua me hatavivile ale pou la savelela, egite ge omai tamutou la leavala tomi, eala moli eau kama ge pou tabaa lou omai tamutoue.
MAT 26:12 Ale eia tigitaro la lalu ale mali vivilie oata te la gamague, eia mai ale raragi mugati la vovogu te la pileho taku.
MAT 26:13 Eau vei seselea mutou, oio te la galegale tomi ale egite ge veipala la valolo ale taritigi, tio te la galegale tomi ele egite ge veipala tai la irovilala ale la tavilele eia igotiagu. La visuli uru tetala somai taku ge mahuli moli mai ele.”
MAT 26:14 Goio, isa tegiteu la valalua te Iesus ale savulusa gete lua, eia moli ale egite toila e Iudas Iskariot, eia goio hiliti taro egiteu, eia goio tegiteu la mulugaluga tegiteu e pris,
MAT 26:15 eia goio tahi egiteu mago “Mai eau ge sugu taro e Iesus soio tamutou, amuto ge lotoau la uati iriva sesele?” Tio egite loloa mai ele, egite goio abiala e kina savulu tolu.
MAT 26:16 Goio sokoa te la haro moli alele e Iudas goio sokoa veia ge sivuti isa la gauru ale eia ge sugu taro e Iesus soio tegiteu.
MAT 26:17 Tio, ale la siloko la haro te La Ilali La Poloselela, egite la valalua la vimari te Iesus goio tetala, egite tahia mago “Mave, eme masagea veia amite ge raragiamu La Ilali La Poloselela oiove?”
MAT 26:18 E Iesus lolo la tilahi tegiteu mai ele, eia goio kolia mago “Amuto ge goilo la mautu uru e Ierusalem, amuto ge goio te la tahalo ale amuto ge hiloa eia oio pou taitali amutou, amuto ge veiala maie ‘La Tahalo La Vimari baha la merera maie mago: La haro la pileho taku eia hagagaviti, eau masagea veia amiteu me la valalua la vimari taku ge ali La Ilali La Poloselela oio te la luma taume.’”
MAT 26:19 Tio egite la valalua la vimari tetala goio igo seselea mai e Iesus veia giteu ele, egite goio raragi La Ilali La Poloselela.
MAT 26:20 La paga maulavi, e Iesus me egiteu la valalua tetala ale savulusa gete lua, egite goio pou raragi te la ilali.
MAT 26:21 Egite goio alali, e Iesus goio veia giteu mago “Eau vei seselea mutou, isa oio kabili tamutou ele ge sugu taroau soio tegiteu la gima taku.”
MAT 26:22 Tio, egite loloa mai ele, egite tomi ilo buruko, egite isasa goio tahia mago “Tahalo Uru, eme soioge kama veia eau ia? Eau ale ouka!”
MAT 26:23 Tio, e Iesus goio veia giteu mago “Eiala moli ele amilua vitivu vikapopo, eia moli eiala ge sugu taro eaue.
MAT 26:24 E Latu La Tahalo eia ge poga tavu la pileho mai sesele La Buk Tabu veipalea. Eala moli e maura la tahalo ale ge sugu taro e Latu La Tahalo, eia ge taritigi pepeho tetala mai e tilala kama ge pigoa.”
MAT 26:25 Tio, e Iudas ale ge sugu taroa, eia goio tahia mago “Tahalo La Vimari, eme soioge kama veia eau, ia?” E Iesus goio kolia soio tetala mago “Eme molie, eiala eme veitiale.”
MAT 26:26 Egite oio alali, e Iesus goio abi la bret isa, eia vaisale La Tahalo uru ovola, eia goio tovia giteu la valalua la vimari tetala. Eia veia giteu mago “Amuto abia, amuto ge alia, ale la mailigu.”
MAT 26:27 Goio, eia abi isa la kap la vaen, eia vaisale La Tahalo Uru ovola, eia goio abia giteu, eia veia gite mago “Amuto tomi ge liu ovola.
MAT 26:28 Ale la kasosogu ale mai la irovilala ale amuto ge rovia veia la merera te La Tahalo Uru me la igogolu taku, eia sesele. La kasosogu ge pagegele, eia ge vimahuli la valalua me hatavivile usu, la vuhula oio te la pileho taku eau ge vimavulaha egiteu te la iruru tegite.
MAT 26:29 Eau vei seselea mutou, eau kati ge liu lou la vaen kara te ale eau ge liu la vaen ale halaba vikapopo le amutou, oata te la balile Tete.”
MAT 26:30 Tio, e Iesus goio veia giteu mai ele, egite goio bau isa la bilau la vaisalela. Egite bau kaluvu, egite hiliti, tuga. Egite tuga, egite goio la gove bisi e Oliva, egite pouo.
MAT 26:31 Goio, e Iesus veia giteu la valalua la vimari tetala mago “Galogo moli, amuto tomi ge taga taroau, mai la merera te La Buk Tabu eia veia La Tahalo Uru vikara maie: La tahalo la vibaumuli la sip taku, eau ge bilia eia ge peho, egiteu la sip tomi ge hele bura.
MAT 26:32 Egite ge biliau, eala moli eau ge mahuli rivu lou, eau ge mamuga soio e Galilea, amuto ge mulimuli.”
MAT 26:33 Tio, e Pita goio hiliti, eia veiale Iesus mago “Egiteu tomi ele ge taga tarome, eau moli ge ouka.”
MAT 26:34 Eala moli e Iesus goio koliala mago “Eau vei seseleamu, galogo e kukureko souka ge tali, eme ge tahi taroau vaka tolu.”
MAT 26:35 Eala moli e Pita giriri vagari mago “Mai egite ge bilime, egite ge bili tai eau, egite ge bili tomi etalua, eau kama ge tahi tarome.” Tio egite tomi la valalua la vimari tetala, egite vei taiale Iesus mai ele.
MAT 26:36 Goio, e Iesus mite me la valalua la vimari tetala, egite goio la malilo ale egite toila e Getesemane. Tio e Iesus goio veia giteu la valalua tetalale mago “Amuto ge poue, eau ge pou soiole, ge kaka muga bakisi.”
MAT 26:37 Eia puli egiteu ale taho tolu e Pita, e Iakob, e Ioanes egite tomi ele goio tilimulia, eala moli e Iesus eia ilo buruko seseleti, la gabutatalala tetala marapa viruru.
MAT 26:38 Eia goio veia giteu mago “Eau ilo buruko pepeho pasi mai ale eau ge peho. Amuto ge pou omaie, eau ge goio ge kaka, amuto ge lagolago omaie.”
MAT 26:39 Tio, e Iesus tuga moli bakisi soio, eia gotalo mavuta lagu tugu, eia kaka maie “Tete, mave, eia kama koramulia veia eme ge abi taro leau la iloburukola ale pogeaue? Eala moli umala ge tilimuli la masasagala taku, ge tilimuli moli la masasagala taume.”
MAT 26:40 Tio, eia kaka mai ele, eia goio beua soio tegiteu taho tolu, eia hilo egiteu oio mavutati. Eia goio veiale Pita mago “Mave, amuto kama koramulia ge pou taliau la mata la haro isa moli, ia?
MAT 26:41 Taritigi amuto ge pahutu tataho, amuto ge vagari tai la kilaka, e Satan souka ge tovo lalai amutou. Soioge la kalulu mutou oilo eia vagari, eala moli la vovo mutou kama vagari.”
MAT 26:42 Tio, eia goio hiliti taro lou egiteu, eia goio kaka lou, mago “Tete, mai eia kama koramulia veia eme ge abi taro leau la iligiligi ale eme vipouau ovola, eala moli eau ge bole molia, eau ge tilimuli molia mai la masasagala taume.”
MAT 26:43 Tio, eia goio beu loua soio tegiteu taho tolu, eia sivuti egiteu oio mavutati lou, la vuhula egite mata tutulu pepeho.
MAT 26:44 Tio eia hiloa veia egite mavutale, eia goio beua, eia kaka lou la vakatolula, eia kaka lou mai ale igoitio.
MAT 26:45 Tio, mulimuli eia beu loua soio tegiteu taho tolu, egite so mamavuta, eia ilo buruko, eia goio palo egiteu, eia veia giteu mago “Amuto mavutati lou, ia? Ko, amuto maila tataho ele, la mata la haro guviti ale la gima ge sugu taro e Latu La Tahalo soio tegiteu la valalua ale kama kokora.
MAT 26:46 Hiliti, etato ge tuga! Hiloa, la tahalo ale ge veipaleau gageie eia loio sibitalati ele!”
MAT 26:47 E Iesus so vikarakara soio tegiteu la valalua la vimari tetala taho tolue, e Iuda sibitala robo egiteu, e Iudas moli ale isa tegiteu la valalua te Iesus ale savulusa gete lua. Eia sibitala vikapopo la valalua usu ale egiteu la mulugaluga tegiteu e pris me egiteu la ururu baha egiteu ele. Egite ababi la voviso, la obobu.
MAT 26:48 Eala moli e Iudas vei loho mugatia giteu mago “Amuto ge hilo la tahalo ale amila ge vigau, me eiala moli ele. Amuto ge lao tolea, amuto ge sau tola tigia ge pulia soio.”
MAT 26:49 Tio e Iudas goio sele tavu moli e Iesus, eia veiala mago “La logo sesele, tahalo uru!” Tio eia goio vigaua.
MAT 26:50 Eala moli e Iesus goio veiale Iudas mago “Tabaragu, taritigi eme ge igo hari molia mai la gabutatalala taume ale eme gomai veia ge igoa.” Tio, egite hiloa e Iudas vigau e Iesus mai ele, egite goio lao tolea.
MAT 26:51 Eala moli la tahalo isa te Iesus ale magiri hagagavi ele, eia kamu tavu molia la viso tetala, eia goio barautu taro la gavusa la bilalaha te la mulugaluga tegiteu e pris isasa.
MAT 26:52 Tio, e Iesus hiloa mai ele, eia goio veiala mago “Eme ge sugu rivu lou la viso taume soio te la mulila. Egiteu tomi ale vaubi me la viso, egite ge poga tavu la pileho te la viso lou.
MAT 26:53 Mave, eme kama rovia veia eau koramulia ge kaka e Tete, eia ge baha taro egiteu la angelo usu pepeho sesele, egite ge gomai ge taho loio taku.
MAT 26:54 Eala moli mai eau ge vulo taro la viluala mai ele, la merera te La Buk Tabu somai taku eia kati ge puru tigi ale eia veia egite ge lao toleau, ge biliau, eau ge peho.”
MAT 26:55 Tio, e Iesus goio vulo soio tegiteu la valalua ale gomai veia ge lao tolea, eia veia giteu mago “Eau la tahalo isa, eau vahiliti la vaubila, ia? Ale amuto gomai, amuto ababi la voviso, la obobu, veia ge lao toleau. La haroharo tomi eau pou oio te la luma la lotu, eala moli amuto kama lao toleau.
MAT 26:56 Eala moli la iruru ale amuto igotiale, eia vipuru seseleti la merera tegiteu la bilalaha ale pala, ale egite kekesia te La Buk Tabu.” Tio eia veia giteu la merera tetala mai ele, egite la valalua la vimari tetala tomi egite hiliti, hele taroa.
MAT 26:57 Goio, egiteu ale lao tola e Iesus ele, egite goio lapua soio te la luma te Kepas, eia la mulugaluga tegiteu e pris. Eala moli oio te la luma tetalale egiteu la valalua la mari te la merera te Moses, vikapopo tai me egiteu e ururu, egite vikapopoti oio poupou.
MAT 26:58 Eala moli egite lapu e Iesus soilo volale, e Pita tauale Iesus ebikoka. Eia tiroro moli te la mata la bigomu ale goilo te la luma te Kepas ele, eia goio pou vikapopo legiteu la valalua la vagari robo la luma, egite pou vikapopo mai ele, e Pita veia ge pou muga ge rovia veia la rova egite ge igoa soio te Iesus.
MAT 26:59 Tio, egiteu la mulugaluga tegiteu e pris, vikapopo tai me egiteu e ururu tomi, egite paa la tahalo isahari ale ge kauale Iesus isahari la merera te la vulovulola ale eia igigoa, veia ge visigolo mai ele veia eia la tahalo la iruru, egite ge koramulia mai ele veia ge bilia. Tio la valalua usu sibitala veia ge ubi le Iesus la vikarara la visigolola isahari,
MAT 26:60 eala moli egiteu la mulugaluga kama sivuti isa la tahalo ale eia koramulia ge veipala la merera ale tikumu sesele veia egite ge bilia ovola. Tio, egite paa muli la tahalo isahari mai ele goio egira taho lua hiliti,
MAT 26:61 egira vei mago “La tahalo ale pala amila loloa eia veia maie ‘Eau ge lobe la luma la lotu te La Tahalo Uru, la haro itolu ge polo, eau ge vimagiri loua.’”
MAT 26:62 Tio, la mulugaluga tegiteu e pris eia hiliti, eia goio tahi e Iesus mago “Mave, eme la kiloli la merera isa soio tegirua, ka ouka? La vuhu la merera tegirua ale egira virere taliti leme ovola eia soioge mave?”
MAT 26:63 Eala moli e Iesus makovu moli, eia kama koli la merera tetala. Tio, la mulugaluga tegiteu e pris goio tahi loua mago “Ale eau tahi seseleme, veia eme ge vikara sesele te la isa La Tahalo Uru ale eia sekela moli mahuli, eme e Kraist e Latu La Tahalo Uru, ka ouka, ia?”
MAT 26:64 E Iesus goio veiala mago “Meie, eiala moli ele eme veitiale. Ale eau veia mutou tomi ele, mulimuli amuto ge hilo e Latu La Tahalo eia ge pou te la gale La Tahalo Uru e gata, eia ge loata la tuluvu la mori, eia ge gomai.”
MAT 26:65 Tio, la mulugaluga tegiteu e pris eia lolo la vikararala te Iesus mai ele, la hatela mamasi sesele, eia sile la kairobola tetala mai la irovilala soio tegiteu veia eia igo totolo pepeho pasi. Eia goio veia giteu mago “Etato kama ge tola lou isa lou la tahalo ale ge veipala la iruru tetala. Hiloa, amuto lolo seseletia, eia toi bulalahu la isa La Tahalo Uru, eia veia eia sesele e latulae, eia tikumu pasi.
MAT 26:66 Tio amuto gabutatala mave sesele ovolale?” Tio, egiteu e ururu tomi kolia soio tetala mago “Eia tikumu. Eia koramulia veia etato ge bilia eia ge peho.”
MAT 26:67 Tio, isahari tegiteu goio kavurasi volu la lagula, egite kuea. Egite isahari goio sabala la galela,
MAT 26:68 egite goio tahia mago “Eme e Kraist, ioge eme ge vikara matagaga ere kueti emei ele?”
MAT 26:69 Tio, e Pita so popou ogala, la tavile isa bisi, eia la bilalaha te la mulugaluga tegiteu e pris, eia goio veia giteu ale popou ele mago “Eia tai pala eia vikapopo le Iesus la tau Galilea.”
MAT 26:70 Eala moli e Pita tahi taroa te la mata giteu la valalua tomi, eia vei mago “Ouka, eau kama rovi la merera ale eme veveiale.”
MAT 26:71 Eia veiala mai ele, eia goio gali sogala te la mata la bigomu ale goilo te la lumale, tio la tavile isa lou hiloa, eia goio veia giteu la valalua me hatavivile ale egite magiri hagagavi ele, mago “La tahalo aleie, eia pala vikapopo le Iesus la tau Nasaret.”
MAT 26:72 Eala moli e Pita goio tahi taro lou, eia vei mago “Sesele oata, eau kama rovi la tahalo alele!”
MAT 26:73 Tio, kama tabaa, la valalua isahari, ale egite magiri hagagavi te Pitale, egite goio tetala, egite veiala mago “Eia sesele, eme ge isa tegiteu la valalua te Iesus ele, eme vikarakara mai sesele egiteu la valalua e Galilea, eala amite rovitia veia eme isa tegiteu ele.”
MAT 26:74 Tio, e Pita goio giriri, veia mai la merera tetala eia kama sesele La Tahalo Uru ge bilia, eia vei mago “Sesele oata, eau ale kama rovi la tahalo ale amuto veveiale, ouka viruru.” Tio eia vikara mai ele kaluvu, e kukureko goio tali.
MAT 26:75 Tio, e Pita goio loloa e kukureko eia taliti ele, eia gabutala rivu lou la merera ale e Iesus veitiala, ale eia veitiala mago “E kukureko souka ge tali, eme ge tahi taro eau vaka tolu veia eme kama rovi eau.” Tio e Pita gabutala rivu la merera ale e Iesus veiala mai ele, eia ilo buruko pepeho, eia goio gali sogala, eia tali pepehotio.
MAT 27:1 Tio, hagolo mamaga mai galigeli te la kavikoki bisi, egiteu la mulugaluga tegiteu e pris, vikapopo me egiteu e ururu tegiteu e Iuda, egite viputumuli la gauru ale egite ge ali la ilo giteu e Rom ale baumuli egiteu ele, veia egite ge bili e Iesus eia ge peho.
MAT 27:2 Tio egite viputumulia kaluvu mai ele, egite goio kisi tolea, egite goio lapua soio, egite goio tutua soio te Pailat.
MAT 27:3 Ale e Iudas hiloa veia egite vimagiriti e Iesus te la vigagiala ale tivura pepeho, eia gabutala rivu lou la iruru tetala ale eia sugu taro e Iesus soio tegiteu la gimale, eia ilo burukotio. Eia goio vibeu rivua e kina ale savulu tolu egite loto leia, eia abia giteu la mulugaluga tegiteu e pris me egiteu e ururu, eia veia giteu mago
MAT 27:4 “Eau ruruti, eau veipalati la tahalo la marokala soio te la pileho, eia la iruru ouka.” Eala moli egite goio koliala soio mago “Ale eme veia miteu mai ele ilava? Aleie kama la iruru tamiteu, ouka, aleie la iruru sesele taume.”
MAT 27:5 Tio, e Iudas goio abi la uati ele, eia pigia sotalo, oilo la luma la lotu moli ele, eia tuga. Eia goio gali sogala, abi la mota, eia goio hou rivu lou eia, eia goio peho.
MAT 27:6 Eala moli egiteu la mulugaluga tegiteu e pris, egite goio abi la uati ale eia pigitia oilo la luma la lotu, egite vei mago “La uati aleie la mapa la tahalo ale egite ge bilia. Etato kama koramulia ge tau vikapopoa te la uati la luma la lotu.”
MAT 27:7 Goio egite viputumuli la uati alele, egite veia ge loto la gale la magasa isasa ovola, ale egite toila la magasa la kuvo, veia ge igo la liba tegiteu la mosi mai egite ge peho oio e Ierusalem.
MAT 27:8 Eala, kara igoie, egite toi la isa la gale la magasale “La magasa la kasoso” la vuhula egite lotola la uati te Iudas ele.
MAT 27:9 Tiele eia vipuru seseleti la merera te Ieremaia, la bilalaha ale pala, ale eia veipalea te La Buk Tabu Ale Pala maie: Egite abi la uati ale savulu toluo, la vuhula la valalua e Israel toitia mai ele veia la mapa la riau tegiteu ge mai moli ele,
MAT 27:10 egite abi la uati alele, egite loto la magasa la kuvo ovolae, mai La Uru eia veitiagu la bilalaha tetala ovolale.
MAT 27:11 Goio, egite vimagiri e Iesus te la lagule Pailat, e Pailat goio tahia mago “Mave, eme sesele la mulugaluga tegiteu e Iuda, ia?” Tio, e Iesus koliala mago “Eia mai moli ale eme veitiale.”
MAT 27:12 Tio, egite la mulugaluga tegiteu e pris, me egiteu e ururu tai, egite hiliti, egite ubi le Iesus la merera usu, eala moli eia kama koli la merera tegiteu.
MAT 27:13 Tio e Pailat goio tahi loua mago “Eme kama lolo la merera usu ale egite ubi leme ovola? Mave, eme la kiloli la merera tegiteu ouka?”
MAT 27:14 Eala moli e Iesus kamati koli lou isa la merera veia eia ge giriri veia eia la iruru ouka. Tio e Pailat hiloa veia eia vagari mai ele, eia karutu sesele.
MAT 27:15 Eala moli te La Ilali La Poloselela, te la leavalavala tomi, la mulugaluga tegiteu e Rom ale baumuli egiteu e Iudale, mai e Pailat moli ele, eia ge lube isa la tahalo ale egiteu e Rom kapi roboa, mai la masasagala moli te la valalua me hatavivile, egite ge toi isa la tahalo, tio eia ge goio lubea giteu ge igo bakisi la sagegela te la pougolula tegiteu e Iuda mai ele.
MAT 27:16 Eala moli te la imamala alele, la tahalo isasa ale kama kokora sesele, la rerela taliti soio te la maututula tomi, eia pou te la luma la kilisi, la isala e Barabas.
MAT 27:17 Tio la valalua me hatavivile egite goio pou vikapopo, e Pailat goio tahi egiteu mago “Amuto masagea veia eau ge lubea mutou ere? Eau ge lubea mutou e Barabas, uka eau ge lubea mutou e Iesus ale egite toila e Kraist?”
MAT 27:18 Eala moli eia tahi egiteu mai ele, la vuhula eia gabutalea veia soioge egiteu la mulugaluga moli igo totolo e Iesus, la valalua me hatavivile ouka. Eia veia ale la valalua me hatavivile masaga pepeho e Iesus, egite kati masaga egiteu la mulugaluga, tio egiteu la mulugaluga goio veipalatia te la viputumulila. Eala moli e Pailat gabutalea veia la valalua me hatavivile ge masagea veia eia ge lubea giteu e Iesus ele.
MAT 27:19 E Pailat goio pou te la pulolou la viputumulila tetala, e rutula baha la merera soio tetala maie “Eme umala ge igo la paga isasa soio te la tahalo aleie, la vuhula eia la iruru ouka. Alalogo eau mavuta, eau tagea, eau hiloa, la ilogu ruru seseleti leia.” La vikararala te rutule Pailat soio te haruala eia mai ele.
MAT 27:20 Eala moli egite la mulugaluga tegiteu e pris, me egiteu e ururu, egite vahiliti la gabutatalala tegiteu la valalua me hatavivile veia egite ge kaka e Pailat veia eia ge lube e Barabas, veia egite ge karasuku tai e Pailat veia eia ge baha taro e Iesus soio te la pileho.
MAT 27:21 Tio, oio volale, e Pailat goio tahi egiteu mago “Amuto masagea veia eau ge lubea mutou ere tegirua taho luale?” Goio, la valalua me hatavivile koliala soio mago “E Barabas.”
MAT 27:22 Tio, e Pailat loloa mai ele, eia goio tahi lou egiteu mago “Me e Iesus ale egite toila e Kraist, eau ge igo la rova soio tetala?” Tio, egite koliala soio mago “Katua oata te la tauvalautu!”
MAT 27:23 Tio, e Pailat goio tahi egiteu mago “Ilava, eia igo la iruru ale mave?” Eala moli egite goio tola agi pepeho lou, egite karasukua mago “Katu molia te la tauvalautu!”
MAT 27:24 Tio, e Pailat hiloa mai ele veia egite kati koramulia ge loloa, eia taga veia la mautu soukama ge mata dadua, mai la valalua ge hiliti ge sokoa la masuala, tio eia hiloa mai ele, eia goio litu la limala oio te la mata la valalua me hatavivile tomi mai la irovilala soio tegiteu veia mai eia ge baha e Iesus soio te la pileho, eia kama la iruru tetala, eia la iruru moli tegiteu lou. Eia litu la limala mai ele, eia goio veia giteu mago “Eau ge baha la tahalo aleie soio te la pileho, ale la paga tamutou, amuto sesele igoa, eau la iruru ouka ovola.”
MAT 27:25 Egiteu la valalua me hatavivile loloa mai ele, egite goio koli la merera te Pailat mago “Bili molia, mai eia ge la iruru sesele, taritigi veia la kilolila ge puru tamiteu me te latatu miteu tai mulimuli.”
MAT 27:26 Tio, e Pailat goio lube e Barabas soio tegiteu, eia baha e Iesus soio tegiteu e soldia, egite kumamasi vuloa. Egite kumamasi vuloa kaluvu, e Pailat goio sugu taroa soio te la lima giteu e soldia ale ge vaharia soio ge katua te la tauvalautu.
MAT 27:27 Tio, egite la valalua la vaubi te Pailat ele, egite goio vagoilo e Iesus te la luma te gavman, tio egite la valalua la vaubi egite tomi goio vikapopo oio tetala.
MAT 27:28 Egite goio kai taro leia la kairobola tetala, egite goio vikaila la kairobola isasa ale magesegese, mai la irovilala te la mulugaluga,
MAT 27:29 egite goio viri e dahe, igo la kisivaru tetala ovola, taua oata te la gamala. Egite abi tai la viro, egite goio taua te la limala e gata, egite goio toto tulu otalo te la lagula, egite vaisale gologolo molia mago “Taritigi sesele, eme uru ele, eme la mulugaluga tegiteu e Iudale!”
MAT 27:30 Egite goio kavurasi volua, egite goio abi lou la virole, egite kumamasi la gamala ovola.
MAT 27:31 Tio egite lege vahia kaluvu mai ele, egite goio kai taro leia la kairobola ale magesegeseo, egite goio vikai leia la kairobola tetala sesele, tio egite goio tatea sogala, egite lapua soio veia ge katu tolea te la tauvalautu.
MAT 27:32 Tio, egiteu la valalua la vaubi goio lapua soio te la pileho mai ele, egite tatuga te la gauru, egite goio poga la tahalo isasa loio la mautu e Sairini, la isala e Saimon. Egite goio tolo tavua veia eia ge bole la tauvalautu te Iesus.
MAT 27:33 Egite tuga mai ele, egite goio sibitala oio la popoiti isa bisi ale egite toila e Golgota, la masovala maie “la gama la tahalo”.
MAT 27:34 Tio oio volale egite goio abiale Iesus la lalu la vaen ale egite vulo tomila la marasin bakisi eia ama pasi, eia ge suli la iligiligi tetala, tio eia goio liu lalaia, eala moli eia goio tou loua.
MAT 27:35 Egite goio katu tolatia oata te la tauvalautuo, egite goio vipigi vulovulola la satu veia egite ge vitabari legiteu la kairoborobola tetala.
MAT 27:36 Tio egite goio pou otalo, egite goio lagu tugu tavu roboa mai ele.
MAT 27:37 Eala moli oata te la gama la tauvalautu egite kekesi la iruru ale egite veia eia igoa, egite kekesia maie: ALE LA MULUGALUGA TEGITEU E IUDA.
MAT 27:38 Tio oio te balile Iesus egite vagoata la tahalo ilua, egira la tahalo la pakalila, isa te galela e gata, isa te la galela e meru.
MAT 27:39 Tio egite la valalua me hatavivile ale egite tatuga te la gauru, egite timu rororo, egite lugulugu la gama giteu,
MAT 27:40 egite vilea mago “Olo, eme ale eme veia ge lobe la luma la lotu urue, eme veia ge vimagiri moli loua la haro itolue, ioge eme ge suli lou emei, mai eme e Latu La Tahalo Uru sesele, eme ge hele taro la tauvalautu ele, eme ge sivo sotalo!”
MAT 27:41 Tio, mai tai ele, egiteu la mulugaluga tegiteu e pris, vikapopo me egiteu la tahalo la mari te la merera te Moses, me egiteu e ururu tai, egite vikara paliliala egite vei mago
MAT 27:42 “Eia suli egiteu ale isapolo, eala moli eia kama koramulia veia ge suli rivu lou eia. Eia la mulugaluga tegatou e Israel, ia? Ioge, taritigi veia eia ge sivo taro la tauvalautu, etato ge hiloa mai ele, etato ge tautaulailo tetala veia eia e Kraist sesele.
MAT 27:43 Eia tautaulailo te La Uru veia eia e Latu La Tahalo Uru sesele, ioge etato ge hilo gabutoa veia e tamala ge masagea veia ge vimahulia gageie ka ouka!”
MAT 27:44 Tio mai tai ele egirua ale taho lua la tahalo la pakalila, egite vagoata egirua vikapopo me Iesus, egira tai tahi vile e Iesus mai ele.
MAT 27:45 Goio, la haro hugutolatia oata, eala moli la mata la haro goio kokovu, la maligoma uru sibitala, eia goio pigi roboti la babaa tomi, kara te la mata la haro itolu te la maulavi.
MAT 27:46 Tio te la mata la haro alele, e Iesus robe vagari oata mago “Eloi, eloi, lama sabaktani?” La masova la merera aleie eia maie “La Uru taku, La Uru taku, ilava eme hele taroau?”
MAT 27:47 Tio, egite isahari ale oio magirigiri, egite loloa eia tatola mai ele, egite vei mago “Eia tatola e Lias.”
MAT 27:48 Oio moli ovolale, la tahalo isa hari loio, eia abi la pagolu, eia saho la vaen ale ama, eia goio vituria soata te la harele Iesus veia eia ge liua.
MAT 27:49 Eala moli egiteu ale magirigiri ele mera taroa, egite vei mago “Mala, etato ge pou muga ge hilo gabutoa veia e Lias ge guvi ge sulia, ka ouka.”
MAT 27:50 Goma, e Iesus goio tovosugu, eia paru pasitio.
MAT 27:51 Tio, oio moli ovolale, la kulikuli ale uru oilo la luma la lotu ale uru oio e Ierusalem, egite Iuda rara valautu robo la ilo la luma la lotu oio vola, eia goio masile loata kara otalo, la galela iluati, goio e malugulugu isa uru tai umu, la uatati isahari ale ururu egite goio mapola tomi.
MAT 27:52 Me la liba giteu la valalua me hatavivile sesele te La Tahalo Uru ale egite peho palati, la liba giteu usu ele goio hare palala, egite goio mahuli rivu lou.
MAT 27:53 Egite hiliti loio la liba, tuga lalahu, me mulimuli ale e Iesus goio mahuli rivu lou, egite goluma la mautu uru e Ierusalem, la valalua me hatavivile usu hilo egiteu mai ele.
MAT 27:54 Goio, la mulugaluga tegiteu la valalua la vaubi, vikapopo me egiteu la valalua tetalale, ale egite magiri lago roborobo e Iesus, egite hilo e malugulugu umu, egite hilo la golu la karutula usu sibitala mai ele, egite makuku, egite taga pepeho, egite vei mago “Meie, eia sesele, la tahalo aleie eia e Latu La Tahalo Uru ge!”
MAT 27:55 Eala moli egiteu e hatavivile usu tai oio, egite pala tilimuli e Iesus loio e Galilea, egite susulia, egite magiri malau bakisi loio, egite maleleleia.
MAT 27:56 La isa giteu isahari ele maie: e Maria Magdala, mira me taola tai e tilale Iakob me Iosep, me isa lou e tilale Iakob me Ioanes, egirua e latule Sebedi ele.
MAT 27:57 La paga maulaviti, la tahalo isa uru goio guvi, la isala e Iosep, la mautu tetala e Arimatea, eia la tahalo la vuliti isasa, eala moli eia la tahalo isa tai ale roromulimuli sesele la valolo te Iesus.
MAT 27:58 Tio e Iosep ele goio guvi, eia goio te Pailat, eia kaka e Pailat la pilelehole Iesus veia ge ulaia, e Pailat goio baha egiteu la bilalaha tetala, egite goio bole la pilelehole Iesus, egite abiale Iosep.
MAT 27:59 Tio e Iosep goio bolea soio, eia goio avu tatahola la kulikuli ale kakea, eia halaba tataho,
MAT 27:60 eia avua kaluvu, goio eia vagoilo la pilelehole Iesus ele te la liba ale egite olitia te la vai la maitete. La liba alele eia so halaba moli, e Iosep eia so raragi molia veia eia ge la liba tetala sesele, eala moli eia goio vagoilo la pilelehole Iesus ovolao. Eia vagoilo kaluvua mai ele, eia goio baha egiteu la valalua tetala, egite goio buli robo la mata la libale la uati isa uru. Tio eia igoa mai ele kaluvu, eia goio tuga.
MAT 27:61 Eala moli e Maria Magdala egira me taola ale e tilale Iakob, egira popou, lago roboa la libale Iesus ele.
MAT 27:62 Tio, mai galigeli, la siloko la haro te La Ilali La Poloselela eia kaluvuti ele, egiteu la mulugaluga tegiteu e pris, vikapopo tai me egiteu e pariseo, egite goio te Pailat, egite goio veiala mago
MAT 27:63 “Tahalo uru, amite gabutala la merera te la tahalo la visigololale, ale eia so mahulihuli eia veia maie ‘Eau ge tabuli te la liba la haro itolu, mulimuli eau ge mahuli rivu lou.’
MAT 27:64 Eala amite veia eia taritigi veia eme ge baha egiteu la valalua taume, egite ge igo vagari la mata la liba, kara te la haro itolu ge polo, la vuhula egiteu la valalua te Iesus souka gomai ge bole pakali la pilelehola, egite ge visigolo lou la valalua me hatavivile veia eia mahuli rivuti lou lotalo la liba. La visigolola aleie, eia souka igo marapa la valalua me hatavivile, la marapala ge uru kara polo la marapala ale sibitala te la merera la visigolola te Iesus ale eia valolo pala muga la valalua me hatavivile ovola.”
MAT 27:65 Tio, e Pailat gabu tikumu la merera tegiteu ele, eia goio veia giteu mago “Ioge, amuto ge abi isahari la valalua taku, amuto ge vagari robo la mata la libale Iesus ele, amuto ge igo seselea.”
MAT 27:66 Tiele egite goio igo vagari la mata la libale, egite vimagiri egiteu la valalua la vaubi isahari tai ovola veia egite ge vagari roboa.
MAT 28:1 Tio, la haro tabu tegiteu e Iuda kaluvuti, mai galigeli te la kavikoki bisi, te la muluga la haro te la vik aleie, e Maria Magdala mira me taola e tilale Iakob, egira goio sulaga tavu la libale Iesus veia ge hiloa.
MAT 28:2 Egira goio guvi, e malugulugu isa uru umu, e angelo te La Uru loata te la mori, sivo sotalo, gotalo te la libale, eia buli taro molia la uati ele, eia goio pou oata ovolao.
MAT 28:3 Egira hiloa, la tirarola sasima, la kairobola tetala kea lovolovo sesele.
MAT 28:4 Egite la valalua ale vagari robo la libale, egite tai hiloa, egite taga pepeho, la vovo giteu paririri, malugulugu, egite boru sotalo, egite mavuta mai ale peho.
MAT 28:5 Tio, e angelo goio veia girua la tavile iluale maie mago “Amula umala tataga, eau rovia amula paa mulimuli e Iesus, ale egite katu tolea oata te la tauvalautu.
MAT 28:6 Amula hiloa, eia kati omaie, eia mahuli rivuti lou, mai ale eia veitia giteu la valalua tetala pala, taritigi amula ge gomai amula ge hilo la mulila ale egite vitabulia ovola.
MAT 28:7 Taritigi tai veia amula ge tuga hari, amula ge veia giteu la valalua tetala maie ‘Eia mahuli rivuti lou taro la liba, eia mamugati soio la gale e Galilea, amuto ge mulimuli, amuto ge hiloa oio te la gale alele.’ Tiele eau veitia mulua mai ele, amula lolotia.”
MAT 28:8 Tio, la tavile iluale, egira hari moli veia ge beua soluma veia ge veipalea giteu la valalua te Iesus ele, egira taga, eala moli egira sagege tai, egira sele molia goluma.
MAT 28:9 Egira tatuga te la gauru, e Iesus goio pala tavu egirua, eia veia girua mago “Kavikoki!” Egira goio boru lagu tugu, egira sau te la vahala, lotu tavua.
MAT 28:10 Goio e Iesus veia girua mago “Amula umala tataga. Amula ge goio ge veia giteu e tabarabaragu veia egite ge goio e Galilea, egite ge hiloau oio te la gale alele.”
MAT 28:11 Egira la tavile iluale tatuga, egite la valalua la vaubi ale egite vagari robo la libale Iesus, egite goluma te la mautu uru, egite goio veia giteu la mulugaluga tegiteu e pris la veipalala tegiteu.
MAT 28:12 Tio egiteu la mulugaluga tegiteu e pris loloa mai ele, egite goio pou vikapopo me egiteu e ururu, egite viputumuli la gauru tegiteu isasa, egite goio abia giteu la valalua la vaubi la uati uru,
MAT 28:13 egite goio tutu tola vagaria giteu mago “Amuto ge vigia maie ‘Alalogo amite mata tutulu, amite mavuta, egite la valalua la vimari tetala gomai, egite bole pakalitia.
MAT 28:14 Mai e Pailat ge loloa mai ele, amite ge mera gogomeala, eia kama ge igo totolo amutou.’”
MAT 28:15 Tio egite la valalua la vaubi goio abia la uati ele, egite goio tilimulia mai la vikararala tegiteu ele, goio la rerela taliti soio tegiteu e Iuda, me la vikararala aleie palati karati igoie eia soloio moli tegiteu e Iuda.
MAT 28:16 Goio, egite la valalua la vimari te Iesus ale savulusa gete sasa, egite tuga goio e Galilea, egite goio guvi oio te la gove bisi ale e Iesus veia giteu veia egite ge goio vola.
MAT 28:17 Egite goio hilo e Iesus, egite lotu tavua, eala moli isahari tegiteu ele kama tautaulailo sesele veia ale e Iesus sesele ale egite hiloale.
MAT 28:18 Eala moli e Iesus goio tuga tavu egiteu soio, eia goio vikara soio tegiteu maie “La Tahalo Uru eia sugu taroti la vagagarila tetala tomi somai taku, ale loata te la mori, ale otalo tai te la maututula.
MAT 28:19 Eala, eia taritigi veia amuto ge tuga, amuto ge valolo la valalua me hatavivile te la maratatila tomi te la galegale tomi veia egite ge roromuliau, amuto ge vuhi egiteu te la isale Tete, me Latula me La Kalulu La Marokala.
MAT 28:20 Amuto ge tovo tigi tai egiteu veia egite ge roromuli tomi la merera ale eau veitia mutou ovola. Eau ge pou sesele tamutou te la haroharo tomi, kara te la tapasi la maututula.”
MAR 1:1 Ale la valolo ale taritigi te Iesus Kraist e Latu La Tahalo Uru.
MAR 1:2 La silokola eia maie: Alaurati la bilalaha te La Tahalo Uru, eia veipalati la merera te La Tahalo Uru, eia veia eia vikara soio te Iesus maie: Eau ge baha la bilalaha taku, eia ge mamuga. Eia ge raragi la gauru ale eme ge polo ovola.
MAR 1:3 La golu la tahalo isasa eia tatola loio la hohoi, eia veia maie: Amuto ge ili paa la gauru te La Uru. Amuto ge vimatata tomi la gauru tetala.
MAR 1:4 Tio, mai moli ale e Aisaia kekesitia, e Ioanes la tahalo la vuluhi eia sibitala oata la hohoi. Eia goio veipalea giteu la valalua me hatavivile la merera te La Tahalo Uru veia eia taritigi egite ge vulo la gabutatalala tegiteu, ge piligi taro tai la iruru tegiteu. E Ioanes veia eia ge vuhi egiteu, La Tahalo Uru ge vimavulaha legiteu te la iruru tegiteu tomi.
MAR 1:5 Egiteu ale loio la gale e Iudea vikapopo tai me egiteu ale loio la mautu uru e Ierusalem, usu tegiteu goio lolo la valolo te Ioanes. Egite veipala la iruru tegiteu, e Ioanes goio vuhi egiteu oio la lalu e Iordan.
MAR 1:6 E Ioanes, eia la tahalo isa eia isapolo sesele. Eia malo moli, kisipou. Eia tatuga te la hohoi, eia alali moli e pogo, eia liliu la magu.
MAR 1:7 Goio, e Ioanes eia veia giteu mago “La tahalo ale ge mulimuli taku, la vagagarila tetala muga taku. Eau togo pepehoa, eau kama koramulia ge tuga hagagavi soio te la balila.
MAR 1:8 La vuluhi taku eia kama tikumu, eau vuhi le amutou la lalu moli. Eala moli ale ge mulimuli taku, eia ge abia mutou La Kalulu La Marokala, la ilo mutou oilo ge gabu seselea.”
MAR 1:9 E Iesus hiliti taro e Nasaret loio la gale e Galilea, eia goio te Ioanes, e Ioanes vuhia oio la lalu e Iordan.
MAR 1:10 Eia goio vuhi kaluvuti e Iesus, e Iesus goio hiliti, magiri. Eia goio taga soata, eia hilo la mori eia kopeti.
MAR 1:11 Tio La Kalulu La Tahalo Uru eia goio sivo loata, eia gotalo te Iesus, eia mai la malu la uku. Goio la golu La Tahalo Uru tola loata te la mori maie mago “Eme e Latugu la riau. Eau sagege pepeho sesele leme.”
MAR 1:12 Oio moli ovola, La Kalulu La Tahalo Uru eia baha taro e Iesus soio la hohoi. E Iesus eia popou oio te la baa ale la logo savulu vaa, e Satan goio tovo lalaia.
MAR 1:13 Te la baa ale e Iesus pou ovolale, e taiveive me la bolo vuvuhu tai oio. Eala moli egiteu la angelo te La Uru, egite goio vitahoale Iesus.
MAR 1:14 Te la imamala ale e Herod vagoilo e Ioanes te la luma la kilisi, e Iesus goio guvi oio e Galilea, eia veipala la valolo ale taritigi te La Uru soio tegiteu ale pou te la gale alele.
MAR 1:15 Eia veia giteu mago “La leavala koramuliti ale la pulolou la matagagala te La Tahalo Uru ge guvi. Amuto ge piligi taro tomi la iruru tamutou, amuto ge roromuli la valolo ale taritigi.”
MAR 1:16 Mulimuli, e Iesus tatuga te la gale la magolilo e Galilea, eia hilo e Saimon egira me tabarala e Andrew, egira popou oio la uaga tegirua, egira vovuo. Egira igigo la igogolu alele, egira ababi la mani ovola.
MAR 1:17 Goio e Iesus tola egirua mago “Amulua gomai, amula ge tilimuliau. Eau ge vimari le amulua te la pululi la valalua me hatavivile soio te la matagaga.”
MAR 1:18 Tio egira goio piligi taro molia la vuo tegirua, egira goio mulimuli e Iesus.
MAR 1:19 E Iesus goio tuga lou soio, eia hilo e Iakob ale e latule Sebedi, egira me tabarala e Ioanes. Egira tai popou oio la uaga tegirua, egira holoholo la vuo.
MAR 1:20 Goio e Iesus tola hari moli egiruale, egira goio hiliti taro e tama girua e Sebedi. E tama giruale pou te la uaga, vikapopo me la valalua la igogolu tetala. E latula ale iluale tuga tarotia, egira goio mulimuliti e Iesus.
MAR 1:21 Tio, e Iesus mite me la valalua la vimari tetala, egite tuga goio e Kapernaum. Te la haro tabu e Iesus goilo te la luma la lotu, eia vimari egiteu ale oio lotulotu.
MAR 1:22 Egite lolo la merera tetala, egite karutu sesele. Eia kama vimari egiteu mai egiteu la tahalo la mari te la merera te Moses. Eia vimari egiteu mai la tahalo ale mari sesele.
MAR 1:23 Tio la tahalo isasa ale la hitu ale kama kokora popou tetala, eia goilo la luma la lotu. Eia tola karutu e Iesus mago
MAR 1:24 “Eme e Iesus la tau Nasaret ele! Eme gomaiti veia eme ge igo la rova tamiteu, e? Eme gomai veia ge igo gegeru amiteu, ia? Eau rovitime, eme la riau ale loata te La Tahalo Uru!”
MAR 1:25 Tio, e Iesus goio mera taro la hitu alele, eia veiala mago “Eme ge makovu! Eme ge hele taro la tahalo ale!”
MAR 1:26 Tio la hitu lugu taro molia. La hitu kakuraha bara sesele, eia goio hele taroa.
MAR 1:27 La valalua me hatavivile tomi karutu sesele la pagale, egite marapa sesele. Egite vitahi baololi moliti egiteu mago “Ale la rova e? Ale la vimari isa halaba? La tahalole, eia vagari pasi! Eia koramulia ge kumuli taro la hituhitu, egite ge roromuli molia!”
MAR 1:28 Tio la rerele Iesus taliti soio te la gale Galilea tomitio.
MAR 1:29 E Iesus mite pagegele loilo te la luma la lotu, egiteu me la valalua la vimari tetala goio muga te la luma te Saimon me Andrew. E Iakob me Ioanes, egira tai tilimuli egiteu.
MAR 1:30 E loale Saimon lea, la vovola tivura pepeho sesele, eia mamavuta moli. Tio e Iesus guvi, egite goio vei mugeala la ilea te loale Saimon.
MAR 1:31 E Iesus goio tetala, eia sau tola la limala, eia vahilitia. La ilea tetala goio kaluvu, eia goio raragia giteu la ilali.
MAR 1:32 Te la mata sosobula la valalua isahari vahari egiteu la ilea soio te Iesus. Egite vahari tai la valalua me hatavivile isahari ale la hituhitu ale kama kokora popou tegiteu.
MAR 1:33 Tio egiteu la valalua me hatavivile tomi ele oio la mautu alele, egite goio pou vikapopo te la mata la luma ale e Iesus pou oio vola.
MAR 1:34 Tio e Iesus goio vimahuli la valalua me hatavivile ale la ilea usu abi egiteu. Eia kumuli taro tai la hituhitu ale kama kokora, eia veia giteu mago “Amutou umalati vikarakara, amuto ge makovu.” Eia mera taro egiteu mai ele, la vuhula eia kama masagea veia egiteu ge veipala haria veia eia e Latu La Tahalo Uru.
MAR 1:35 Tio, mai galigeli lou, e Iesus gua kavikoki sesele, eia goio tuga soio te la gale la hohoi bakisi ale la tahalo isasa ouka ovola.
MAR 1:36 Eia goio pou oio vola, eia kaka. Eia kaka, e Saimon mite me la valalua la vimari tetala goio paa mulia.
MAR 1:37 Egite goio sivutia, egite veiala mago “Egiteu la valalua me hatavivile tomi oio, egite paa mulimulime.”
MAR 1:38 Tio e Iesus goio veia giteu mago “Korati ele, etato ge tuga ge goio te la maututula isahari ale hagagavi moli. Eau masagea ge valolo matagaga mugea giteu. Ale la igogolu taku moli ale eau gomai veia eau ge igoa.”
MAR 1:39 Goio eia tuga goio te la gale tomi ale oio e Galilea. Eia goio te la luma la lotu te la maututula tomi, eia valolo egiteu, eia goio kumuli taro tomi la hituhitu ale oio popou tegiteu ele.
MAR 1:40 La tahalo isasa la vovola sereka gegeru, eia goio tuga tavu e Iesus. Eia goio toto tulu, lagu tugu, togo e Iesus. Eia kakea mago “Iesus, mai eme ge masagea, eme koramulia ge vimaroka la vovogu.”
MAR 1:41 Goio e Iesus gogo pepehoa, eia sau te la vovola, eia veiala mago “Eau masagea, la vovomu ge maroka lou.”
MAR 1:42 Tio oio moli ovolale la sereka kokovu taro la vovola, la vovola maroka seseleti lou.
MAR 1:43 E Iesus goio tutu tola vagaria la tahalole,
MAR 1:44 eia veiala mago “Eme umala ge veveiale isasa ale eau vimarokati lou la vovomu ele. Eala moli eme ge tuga, eme ge sele molia soio la luma la lotu, eme ge vahilole pris la vovomu. Eme ge abia La Tahalo Uru la vaabila ale maroka mai la vovo la tahalo ale marokati, mai ale e Moses kekesitia. La vuhula la valalua me hatavivile tomi, egite ge rovia veia la sereka taume eia kaluvuti.”
MAR 1:45 Eala moli la tahalole, eia goio mera lalahu, eia goio veipala la merera usu. Tio e Iesus goio loloa, eia kamati goio te la maututula. Eia goio pou moliti oio te la baa bulalahu moli isasa. Goio la valalua me hatavivile usu hiliti loio la maututula tegite, egite goio sibitala tavu e Iesus oio la baa aleio.
MAR 2:1 La haro isahari poloti, mulimuli e Iesus beua soio la mautu e Kapernaum. Tio la valalua me hatavivile lolotia veia eia pouti oio la luma isasa, egite goio vikapopo te la luma alele.
MAR 2:2 Egite goio pou vikapopo oio la luma aleie, la luma volu pepeho sesele, la baa te la goililola oukati. Tio e Iesus goio veipala la merera soio tegiteu.
MAR 2:3 Goio la valalua isahari loio vahari isa la ilea soio te Iesus. La tahalole, la vovola mauba tomi moliti, eia kama tatuga, egiteu taho vaa bolea.
MAR 2:4 La luma volu sesele legiteu la valalua me hatavivile, la baa ouka sesele ale egite ge vagoilo la tahalole soio te Iesus. Tio egite goio sile utu la varu la luma loata te la baa ale e Iesus pou oio vola. Egite goio kisi la mota soio te la muli la ileale, egite goio visariria loata, vagotaloa te Iesus.
MAR 2:5 E Iesus rovitia veia egite veia eia koramuli seselea ge vimahuli lou la tahalo aleie. Eia goio veia la ileale mago “Latugu, la iruru taume mavulaha tarotime.”
MAR 2:6 Tio, egiteu la tahalo la mari isahari oio popou, eala moli oilo te la tia giteu egite gabutatala maie
MAR 2:7 “Ilava la tahalole eia vigia maie? Eia kama togo La Tahalo Uru. Ere tahalo koramulia ge vimavulaha la iruru mai alele? La Tahalo Uru sekela moli.”
MAR 2:8 Tio, e Iesus roviti la gabutatalala tegiteu, eia hiliti, eia goio tahi egiteu mago “Igo mave amuto gabutatala oilo te la tia mutou mai ele?” Eia goio tahi lou egiteu mago
MAR 2:9 “Eia vagari mave, veia eau ge vimavulaha la tahalole te la iruru tetala, uka eau ge vimahulia?
MAR 2:10 Eia sesele, eau pouti omai la maututula, eala moli la masasagala taku veia amuto ge rovia, eiau e Latu La Tahalo, eau koramulia ge vimavulaha la iruru te la valalua me hatavivile.”
MAR 2:11 E Iesus vikara mai ele, eia goio veia la tahalo ale leale mago “Eau veiamu, eme ge hiliti, abi la mulimu, eme ge goio la luma taume.”
MAR 2:12 Tio eia goio hiliti, eia abi la mulila, tugatio. Egite tomi hiloa, egite karutu seselela. Egite goio vei tataho La Tahalo Uru, egite vikara maie mago “Alaurati karati igoie, etato kama hilo isasa la paga mai aleie.”
MAR 2:13 E Iesus beu rivua goio lou la magolilo e Galilea, la valalua me hatavivile usu guvi tavu loua, eia vimari egiteu.
MAR 2:14 Eia tatuga soio, eia hilo e Levi e latule Alpias, eia popou te la luma ale egite pipigi la takes ovola. E Iesus veiala mago “Eme ge tilimuliau.” Tio la tahalole hiliti, eia goio tilimuli e Iesus.
MAR 2:15 Mulimuli e Iesus pou te la luma te Levi, eia ali vikapopo la valalua la giligi la takes me la valalua la iruru tai isahari. La vuhula la valalua usu ale kama kokora mai ele, egite isu la merera te Iesus, egite goio bibibi tetala. Egiteu la valalua la vimari te Iesus tai isahari oio.
MAR 2:16 Tio, egiteu e pariseo, ale la valalua ale egite sau tola la vulovulo giteu e Iuda ale pala, egite hilo e Iesus eia popou, me eia ali vikapopo la valalua la giligi la takes me la valalua la iruru. Egite goio tahi la valalua la vimari te Iesus mago “Igo mave e Iesus ali vikapopo la valalua la ilabi la takes me la valalua la iruru tomi maie?”
MAR 2:17 Tio, e Iesus loloa mai ele, eia veia giteu mago “E dokta kama koramulia ge vimahuli egiteu ale mahuli tigi, ouka. Eia koramuli molia ge vimahuli lou egiteu ale lea. Eau kama guvi moli omai veia eau ge tola tavu egiteu ale taritigi, eau guvi moli omai veia eau ge suli egiteu la valalua me hatavivile ale igigo la iruru.”
MAR 2:18 La haro isasa la valalua la vimari te Ioanes la tahalo la vuluhi, me egiteu e pariseo, egite peremu. La valalua isahari goio tahi e Iesus mago “Omai la valalua la vimari te Ioanes, me egiteu e pariseo tai, egite peremu. Mai ale, egite tilimuli la vulovulo te ururu. Igo mave la valalua la vimari taume ouka?”
MAR 2:19 Tio, e Iesus koli la tilahi tegiteu mago “Mai egiteu la valalua me hatavivile ge goio la ilali la vitirorola, egite ge ali uka egite ge peremu? Ouka, egite kama koramulia ge peremu. Mai la taulai halaba soloio, egite ge ali moli, kama ge peremu.
MAR 2:20 Sesele, la haro mulimuli ge guvi la taulai halaba ge kokovu taro egiteu. Tio te la logo ale, egite ge peremu te la iloburukola tegiteu.”
MAR 2:21 Goio, eia goio tovo muli loua giteu te la valolo ale taritigi, mago “Mai la kulikuli isasa ale mumugu eia ge masile, umala sasahi robola la bautu la kulikuli isasa ale halaba, eia souka ge lapu masile lou la kulikuli ele.
MAR 2:22 “Mai la tahalo isasa ge saho la vaen ale halaba, eia vagari, eia umala ge sasahola la kulikuli la mee ale palati, eia mumuguti. La vuhula eia souka ge masile, la vaen ge pagegele bulalahu. Eia taritigi pepeho veia la tahalole ge saho moli la vaen la kulikuli la mee ale halaba, eia vagari.”
MAR 2:23 Te la haro tabu isasa, e Iesus mite me la valalua la vimari tetala, egite tatuga te la tia la mahuma la kon. La valalua tetala, egite lelele la gauru oilo la tia la mahumale, egite puputu la balepa la kon veia ge alia.
MAR 2:24 Goio, egiteu e pariseo isahari goio veiale Iesus mago “Ae, eme hilo la valalua taume! Igo mave egite ababi la ilali te la haro tabu?”
MAR 2:25 Goio, e Iesus veia giteu mago “Soioge amuto soukama gigi la veimulipolola te La Buk Tabu Ale Pala, te la paga isasa la uru gatou e Devit igoa? Alaurati, e Abiata, eia la mulugaluga tegiteu e pris ale baumuli la luma la lotu. Te la imamalale, te la haro isasa, e Devit me la valalua tetala, egite vitolo, egite la ilali ouka.
MAR 2:26 E Devit goilo la luma la lotu, eia ali la bret la vahililola te La Tahalo Uru, eia maroka sesele. La bret alele, La Tahalo Uru mera roboa veia egiteu e pris moli ge alalia. Eala moli la mulugaluga tegiteu e pris, eia goio abiale Devit la bret alele, e Devit abia, alia, eia goio abi taia giteu la valalua tetala, egite tomi alia.”
MAR 2:27 Goio, e Iesus vei loua giteu e pariseo mago “La Tahalo Uru kama vipou etatou veia etato ge suli la haro tabu, ouka, eia vipou la haro tabu veia la haro tabu ge suli etatou.
MAR 2:28 Eau e Latu La Tahalo, eau la mulugaluga te la haro tabu.”
MAR 3:1 Mulimuli e Iesus goilo lou te la luma la lotu, eia hilo la tahalo isasa la limala pakuku, eia pipi.
MAR 3:2 Egiteu e pariseo isahari oio, egite aliale Iesus e rovi, eala moli egite masagea ge rovia veia e Iesus ge igo tigi lou la lima la tahalole ka ouka. La vuhula la igogolu ale, egite magiri roboa te la haro tabu. Mai e Iesus ge ruru, egite masagea ge hiloa ge veipalea.
MAR 3:3 Tio, e Iesus goio veia la tahalo ale la limala pakuku mago “Eme gomai ge magiri kabili.”
MAR 3:4 Eia veiala mai ele, eia goio tahi egiteu mago “Etato ge igigo mave te la haro tabu? Etatou ge vimahulihuli, uka etato ge bilibili?” Egite pou makovu moli, egite kama vikara.
MAR 3:5 E Iesus mata galilili, la hatela mamasi seselea giteu. Eia ilo buruko sesele, la vuhula egite kama rovi la gilogo. Tio, e Iesus veia la tahalo ale la limala pakuku mago “Eme ge limarara.” Eia goio limarara, la limala ale pakuku eia goio taritigi lou.
MAR 3:6 Tio, oio moli ovola, egiteu e pariseo hiliti, goio tuga. Egite goio pou vikapopo me la valalua te Herod, egiteu tomi ele viputumuli la gauru veia egiteu ge bili e Iesus ovola.
MAR 3:7 E Iesus mite me la valalua la vimari tetala, egite hiliti taro la gale ale, egite goio la magolilo e Galilea. La valalua me hatavivile usu pepeho, egite mulimuli e Iesus.
MAR 3:8 Isahari loio e Galilea, isahari loio e Iudea, isahari lotalo e Ierusalem, isahari tai lotalo e Idumea. Isahari loilo te la gale ale soilo te la lalu e Iordan. Isahari lolau la mautu ilua e Taia me Saidon.
MAR 3:9 Eala moli e Iesus goio veia giteu la valalua la vimari tetala mago “Eau masaga isa bisi la uaga. Mai la valalua me hatavivile ge vulo roboau, eau ge sae ovola.”
MAR 3:10 E Iesus pala vimahuli usu egiteu la ilea, tiele egiteu la ilea usu lou vagari veia egiteu ge sau tetala.
MAR 3:11 Mai tai egiteu la hitu ale kama kokora ge hilo e Iesus, egite tomi moli ge toto tulu, egite ge togoa. Egite ge veiala mago “Eme e Latu La Tahalo Uru!”
MAR 3:12 Eala moli e Iesus mera taro vagari egiteu veia egite umala ge veipalea veia eia e Latu La Tahalo Uru.
MAR 3:13 E Iesus mite me la valalua la vimari tetala, egite goata la gove isasa, veia eia ge hilovi isahari oilo tegiteu.
MAR 3:14 Eia goio hilovi savulusa gete lua oilo tegiteu ale tilimulia, eia veia egite ge tetala sesele, veia eia ge baha egiteu te la igogolu la valolo.
MAR 3:15 E Iesus masaga taia veia ge abia giteu la vagagarila, koramulia egite ge kumuli taro la hituhitu ale kama korakora.
MAR 3:16 Tio, eia hilovi savulusa gete lua oilo tegiteu. Eia toi vulo la isale Saimon veia e Pita.
MAR 3:17 E latule Sebedi ilua, e Iakob me Ioanes, e Iesus toi halaba la isa girua veia e Boanerges, me la masova la isa giruale eia maie: egira la tahalo la vuragala ale mai la mori kuraraba.
MAR 3:18 Tio, e Iesus goio toi lou egiteu ale ualasiu maie: e Andrew, e Pilip, e Batolomeas, e Matiu, e Tomas, e Iakob ale e latule Alpias, e Tadeas, e Saimon la tahalo la hate paririla, me Iudas Iskariot.
MAR 3:19 Me etato rovia veia mulimuli e Iudas vulo lou la gabutatalala tetala, eia sugu taro e Iesus soio tegiteu la valalua la gima.
MAR 3:20 E Iesus goluma eia goio te la luma isasa. Egiteu me la valalua la vimari tetala egite kama ali, la vuhula la valalua me hatavivile usu vivi robo egiteu.
MAR 3:21 Tio, egiteu e tabarabarale Iesus loloa veia e Iesus guviti ele, egite goio vola veia egite ge lao tolea, la vuhula egite veia e Iesus paua.
MAR 3:22 Egiteu la valalua la mari isahari, egite lotalo e Ierusalem, egite vei mago “E Bielsebul, eia susuli e Iesus.” Me la vikararala tegiteu isa lou, veia “Eia kumuli taro egiteu la hituhitu ale kama kokora te la vagagarila te la mulugaluga tegiteu la hitu moli lou.”
MAR 3:23 Tio, e Iesus tola egiteu soio tetala, eia tovo mulia giteu maie “Igo mave, e Satan koramulia ge kumuli taro lou e Satan?
MAR 3:24 Mai la valalua te la mautu isasa ale vagari ge vikue rivu lou me egiteu, mai ge mulimuli lou la mautu isapolo ge vaubi soio tegite, egiteu ge maveve moli.
MAR 3:25 Mai tai egite vitau me taitari ge vikue rivu lou me egiteu, egite tomi ge kaluvu.
MAR 3:26 Mai egiteu ale te Satan, egite ge vikue rivu lou me egiteu lou ale te Satan, egiteu kamati ge vagari, egite ge kaluvu sapa tomi.
MAR 3:27 Mai tai la tahalo isasa masagea veia ge seri taro la golugolu te la tahalo ale vagari, taritigi veia eia ge kisi pala muga e taho la lumale, mulimuli eia ge goilo ge seri taro la golugolu tetala tomitio.”
MAR 3:28 Tio, e Iesus goio vei loua giteu mago “Eau vei seselea mutou, eia koramulia La Tahalo Uru ge vimavulaha taro tomi la iruru te la valalua me hatavivile. Mai egiteu tai ge virere taitali La Tahalo Uru, la iruru alele tai, La Tahalo Uru koramulia ge vimavulaha taroa legiteu.
MAR 3:29 Eala moli mai isasa ge virere taitali La Kalulu La Marokala, La Tahalo Uru kama ge vimavulaha taro la iruru alele. La iruru alele, eia ge tabuli moli, kama ge kokovu.”
MAR 3:30 La vuhu la vikararala te Iesus aleie, eia gabutatala la merera ale egite ubi leia ovola, egite veia la hitu ale kama kokora pou tetala.
MAR 3:31 Mulimuli e tilale Iesus me egiteu e tabarabarala, egite guvi oio tetala. Egite magiri moli ogala la mata la luma, egite baha tavua veia eia ge gogala muga tegiteu.
MAR 3:32 La malosu la valalua me hatavivile isa uru, egite vivi robo e Iesus. Egite veiala mago “Male, e tilamu me egiteu e tabarabaramu, egite ogala magiri taitalime.”
MAR 3:33 E Iesus goio koli la vikararala tegiteu mago “Amuto veia e tila ere? Amuto veia e tabarabaragu ere?”
MAR 3:34 Eia goio mata tatavu egiteu la valalua me hatavivile ale egite pou galilia, eia veia giteu mago “Hiloa, amutou ale popou ele, amutou lou e tatilagu me tabarabaragu. Egiteu ale tilimuli la masasagala te La Tahalo Uru, egite tomi moli aleie, egiteu e tabarabaragu, e hatavilevilegu, me tatilagu.”
MAR 4:1 La haro isasa e Iesus goio beu loua soio te la magolilo e Galilea, eia goio vimari lou la valalua me hatavivile, me egiteu usu pepeho oio vivi roboa. Egite vivi roboa mai ele, eia goio sae la uaga, eia pati lala moli olau, egiteu la valalua me hatavivile oio magirigiri oilo te la parava.
MAR 4:2 E Iesus goio tovo muli loua giteu la merera usu. Eia goio vimari egiteu maie
MAR 4:3 “Amuto ge loloa, la tahalo isasa gorivo la mahuma tetala veia ge galu la vit. Eia goio valibura la vavua la vit tetalale,
MAR 4:4 eia valibura isahari, eia goio paru te la pepe la gauru, egiteu la malumalu goio ali taroa.
MAR 4:5 La vavua la vit isahari lou goio paru te la magasa ale rumorumoa. La vit ale, eia kusi harari moli,
MAR 4:6 mulimuli la haro goio pagea, eia magolu tomi moli, la vuhula la uala kama gotalo sesele.
MAR 4:7 Goio, la vavua la vit isahari lou paru te la vuhule dahe. E dahele eia goio viri lotoa, eia peho, la vavuala ouka.
MAR 4:8 Goio la vavua la vit isahari lou eia tabuli te la magasa ale taritigi, eia kusi tigi, eia goio vua tataho. La balepa la vit ale, isahari uru bakisi, isahari lou uru sesele, isahari lou uru makapipila pepeho.”
MAR 4:9 Tio e Iesus gilemulia giteu mai ele kaluvu, me oio moli ovola eia goio tutu tolea giteu mago “Mai ere la gavusala ge oio te la ilolo la merera, taritigi eia ge lolo vulai tavu la merera taku ele.”
MAR 4:10 Mulimuli e Iesus sekela moli pou, la valalua la vimari tetala vikapopo tai me la valalua isahari lou, egite goio tetala. Egite goio tahi e Iesus te la masova la merera ale eia tovo mulitia giteu ovola.
MAR 4:11 Tio e Iesus goio veia giteu mago “La Tahalo Uru vei matagagatia mutou la vuhu la viputumulila tetala, ale pala tabuli kokovu. Eala moli egiteu ale pou malau taroau, egite lolo moli la merera ale eau tovo mulia giteu, egite kama rovi la masovala.
MAR 4:12 Ale eia mai moli la merera ale La Buk Tabu Ale Pala eia veia maie: Egite hilo la papaga isahari, egite kama hilo tigia. Egite lolo la merera bakisi, egite kama rovi tigi la masovala. Eala egite kama ge vulo la gabutatalala tegiteu tavu La Tahalo Uru. La Tahalo Uru tai kama ge vimavulaha taro la iruru tegiteu.”
MAR 4:13 E Iesus veia giteu mago “Amuto kama rovi tigi la masova la merera te la tahalo la gilalu, ia? Me amuto ge rovi la masova la vikarara la tilovo taku tomi mave?
MAR 4:14 Hiloa, la tahalo la gilalu, eia galu moli la merera la valolo te La Tahalo Uru.
MAR 4:15 Mai la vavua la vit ale paru te la pepe la gauru, eia mai la valalua me hatavivile ale egite lolo la merera te La Tahalo Uru, eala moli e Satan guvi hari, eia goio abi taro gale la merera ale tabuli te la tia giteu.
MAR 4:16 Mai tai la vavua la vit ale paru te la magasa ale rumorumoa, eia mai egiteu ale lolo hari la merera, egite sagege hari ovola,
MAR 4:17 eala moli la uala ouka te la tia giteu, egite kama mahuli tabaa. Mulimuli la iligiligi me la iloburukola ge sibitala, egite ge tutuloku hari moli.
MAR 4:18 La vavua la vit isahari tai, eia paru te la vuhule dahe, eia mai la valalua me hatavivile ale lolo muga la merera,
MAR 4:19 eala moli la mari papaila te la papaga te la magasa eia sibitala tavu egiteu, la vuliti tai eia lulu golo egiteu, egite isu tavua, egite goio isu tavu pepeho tai la golugolu tomi te la vovo. La papaga tomi mai ele ge sibitala ge viri peho la merera te La Tahalo Uru, eia kati ge kusi te la tia giteu.
MAR 4:20 La valalua me hatavivile isahari, egite mai la vavua la vit ale paru sotalo te la magasa ale taritigi. Egite lolo la merera, gabu tikumua, egite roromuli taia, mai egite vuati. La balepa la vit alele, isahari vua uru bakisi, isahari lou vua uru sesele, isahari lou egite vua uru makapipila pepeho.”
MAR 4:21 E Iesus tahi egiteu mago “Mai la tahalo isasa eia tahola isa la lam, mave, amuto veia eia ge tau kokovua, veia eia ge sugu kokovua otalo te la uluva la poro? Ouka, eia ge haratilia oata, eia ge matagaga tataho.
MAR 4:22 Mai la merera ale sesele ale etato souka rovi tigi la seselela, mulimuli etato ge matagaga ovola. Etato kama koramulia ge tau robo la veipalala aleiele.
MAR 4:23 Mai ere la gavusala ge oio te la ilolo la merera, taritigi eia ge lolo vulai tavu la merera taku.”
MAR 4:24 Tio, e Iesus goio vei loua giteu mago “Amuto ge gabutatala tigi la merera ale eau veia mutou. La merera ale amuto ge ubi legiteu e tabarabara mutou ovola, la merera moli alele La Tahalo Uru mulimuli ge ubi rivu lou le amutou oio vola.
MAR 4:25 Mai isasa ge sau tola bakisi la merera te La Tahalo Uru ale eia lolotia, La Uru ge vibalava lou leia la merera lou ele, la mari tetala ge uru. Eala moli mai isasa kama ge sau tola tigi la merera te La Tahalo Uru, La Uru kamati ge abi louala la merera lou. Ale bakisi eia taholatia, La Uru ge abi taro lou leia.”
MAR 4:26 Mulimuli e Iesus goio vei loua giteu mago “La pulolou la matagagala te La Tahalo Uru, eia mai la tahalo isasa ale galu la vavua la obu isasa otalo la magasa.
MAR 4:27 Eia galua, eia goio goluma. Eia mamavuta, eia igogolugolu, tio mulimuli eia hilo la vavua la obu ele, eia kusiti. Eia kusi mave? La tahalo ale galua, eia kama rovi la vuhu la kulusila.
MAR 4:28 La magasa moli vikusia mai ele. La vavua la obu ele, eia kusi goata, eia tau muga la halalala, mulimuli la galagalala kusi. Mulimuli eia vua, la vavuala goio maosa.
MAR 4:29 Tio la tahalo ale galua, eia ge goio ge lulua, eia ge alia.”
MAR 4:30 E Iesus goio vei loua giteu mago “Mutou, eau ge lube loua mutou la masova la merera taku te la pulolou la matagagala te La Tahalo Uru.
MAR 4:31 La pulolou la matagagala te Tahalo Uru, eia mai la vavua la obu ale bisi kokori moli, la vavualale eia goio pu sotalo la magasa, eia bisi kokori moli, la vavua la obobu tomi uru tetala.
MAR 4:32 Eala moli mai mulimuli eia ge kusi, eia ge uru goata, eia ge muga te la obobu tomi ale pigi borebore, la malumalu tomi ge isu pepehoa, eia ge mai la tiloa giteu, la vuhula la miaula eia taritigi pepeho sesele.”
MAR 4:33 E Iesus valolo egiteu la valalua me hatavivile la vikarara la tilovo mai moli ele. Eia tovo mulia giteu te la valolo te La Tahalo Uru ale koramuli la mari tegiteu.
MAR 4:34 Eia tovo muli molia giteu, eala moli mai la valalua la vimari tetala, egite sekela moli ge pou vikapopo leia, e Iesus ge vei matagagea giteu la vuhu la merera tomi tetala.
MAR 4:35 Te la mata sosobula te la haro ale, e Iesus veia giteu la valalua la vimari tetala mago “Etato ge goio te la gale la magolilo loio.”
MAR 4:36 Tio egite hiliti taro egiteu la valalua me hatavivile, egite goio sae te la uaga. E Iesus goio pou, egiteu la valalua la vimari tetala goio vore. La uaga tai isahari, egite vitilimuli vikapopo me la uaga ale e Iesus pou ovola.
MAR 4:37 Goio la lolovi uru me la magola tai hiliti vagari, eia rau la uagale, hagagavi eia ge tilomu.
MAR 4:38 E Iesus mavuta otigu la mori la uaga, eia tagala. La valalua la vimari tetala palo rutua, egite tahia mago “Tahalo La Vimari, hagagaviti etato ge tilomu, eme kama gabutatala amiteu, ia?”
MAR 4:39 Tio, e Iesus hiliti, eia mera taro la lolovi me la mago, eia gusiala mago “Eme umalati! Eme ge tabou, eme ge malilo!” Tio la lolovi goio tabou me la mago tai goio malilo.
MAR 4:40 E Iesus goio tahi la valalua tetala mago “Amuto taga lava? Amuto soukama tautaulailo bakisi taku, ia?”
MAR 4:41 Eala moli egite taga pepeho, egite goio vitahi baoli egiteu mago “Ere tahalo ale? La lolovi me la mago, egira tomi roromulitoa!”
MAR 5:1 E Iesus mite me la valalua la vimari tetala egite guvi te la gale la magolilo loio, te la gale tegiteu e Gerasena.
MAR 5:2 E Iesus sivo te la uaga, la tahalo isasa loilo te la liba eia gomai poga tavu e Iesus. La tahalo ale, la hitu ale kama kokora popou tetala,
MAR 5:3 eia momou moli te la liba. La valalua kama koramulia veia egite ge kisi tolea,
MAR 5:4 mai egite ge tovo lalaia veia ge kisila la sen, ale tai kama koramuli. Egite ge kisi la limala me la vahala, eala moli eia ge sagi mautu molia la sen te la limala, eia ge katu mautu la sen te la vahala tai ele. La tahalo isasa kama koramulia ge lao tolea ge vimalu la tahalo alele.
MAR 5:5 La haroharo tomi, la logo tai, eia popou te la liba, eia goatata tai la goegove, eia kakuraha gerugeru pasi, eia ababi la uati ale vorivoria, ubi la vovola.
MAR 5:6 Tio, eia hilo e Iesus soloio malau, eia hari tavua, eia goio toto tulu lagu tugu,
MAR 5:7 eia tola soata maie mago “Iesus, eme e Latu La Tahalo Uru oata te la mori. Eme gomai ge igoau mave? Eau kaka vagarime veia eme umala ge igo gegeruau. Umala visigologoloau, eme ge vei seseleagu oata te La Tahalo Uru.”
MAR 5:8 La paua vikara mai ele la vuhula eia karutu seseleti la vikararala te Iesus ale eia veia la hitu mago “Ae, hitu, eme ge gali taro la tahalole!”
MAR 5:9 Goio, e Iesus tahi la tahalole mago “La isamu ere?” Eia koliala mago “La isagu e Ami, la vuhula amiteu la tala, amite usu.”
MAR 5:10 Goio eia kaka vagari e Iesus veia eia ge umala baha taro galegale egiteu la hituhitu soio te la gale isapolo.
MAR 5:11 Tio, la karakara la bolobolo uru egite alali oio la vai la popoiti hagagavi ele.
MAR 5:12 Egiteu la hituhitu kaka vagari e Iesus mago “Eme ge baha taro moli amiteu soilo te la bolobolo alele.”
MAR 5:13 E Iesus veia eia taritigi, tio egite la hituhitu goio gali sogala, egite goilo te la bolobolo. La bolobolo tomi ele, la giligi giteu eia ga mai salatu savulu lua, egite goio hele sotalo te la vai, egite raga sotalo, egite tilomu olau la mago, egite tomi goio pehotio.
MAR 5:14 Tio, egiteu la valalua ale baumuli la bolobolole, egite hele goio veia giteu ale oluma la mautu me egiteu tai ale oio la gale tomi ale. La valalua me hatavivile tomi, egite goio mata lalai la paga ale e Iesus igotiale.
MAR 5:15 Egite goio guvi oio te Iesus, egite hilo la tahalo ale pala la hituhitu popou tetala, eia oio pou tolatia, eia kisiti la kulikuli tetala, la gabutatalala tetala sibitalati. Tio egite goio hiloa, egite taga sesele la paga ale e Iesus igotia.
MAR 5:16 Tio egiteu ale hilo e Iesus kumuli taroti la hituhitu, egite goio gilemulia giteu la valalua me hatavivile la paga ale e Iesus igotia te la tahalo alele, egite gilemuli taia giteu la bolobolo ale tilomuti.
MAR 5:17 Tio egiteu ale te la gale ale, egite loloa, egite goio kaka vagari e Iesus veia eia ge hiliti taro la gale tegiteu.
MAR 5:18 Tio, e Iesus goio sae la uaga. Eala moli la tahalo ale pala la hituhitu popou tetala, eia kaka vagari e Iesus mago “Eau masaga ge tilimulime.”
MAR 5:19 Eala moli e Iesus kama masaga eia ge tilimulia. Eia veiala mago “Eme ge beua soio la luma taume, eme ge valolo egiteu la karakara taume, eme ge valolo egiteu te la visuli ale La Uru taume eia igotiamu. Eme ge valolo tai egiteu te la gilogo tetala tavume.”
MAR 5:20 Tio la tahalo ale eia goio tuga, eia goio veipala la valolole oio la gale e Dekapolis. Eia valolo egiteu te la visuli te Iesus tavua. La valalua me hatavivile tomi loloa, la vule giteu paru.
MAR 5:21 Tio, e Iesus mite me la valalua la vimari tetala, egite sae la uaga, egite vore goio beu rivu loua soio te la gale la magolilo loio. Eala moli la valalua me hatavivile mapaiti goio vivi robo e Iesus olau la parava.
MAR 5:22 La tahalo isasa goio te Iesus, la isala e Iairas, eia la mulugaluga la lotu. Eia hilo e Iesus, eia goio toto tulu otalo, lagu tugu,
MAR 5:23 eia goio kaka gogomeala mago “E latugu isa bisi oio, hatavile, eia hagagaviti ge peho. Mai eme ge goio ge sau tetala, eia ge mahuli rivu lou.”
MAR 5:24 E Iesus loloa mai ele, eia hiliti, goio tilimulia. La valalua me hatavivile usu pepeho goio tilimulia soio, egite vivi roboa.
MAR 5:25 Eala moli la tavile isasa oio, la ilea la taio poga bibibi molia kama kaluvu, kara la leavala savulusa gete lua.
MAR 5:26 Eia goio bibibi tegiteu e dokta, eia vikaluvu tomiti la mani tetala, eala moli la iligiligi tetala kama kaluvu, la ilea alele, eia guvi ururu moli lou tetala.
MAR 5:27 Tio la tavilele eia loloti la rere la igogolu te Iesus, eia tai goio sulai posa egiteu la valalua me hatavivile. E maura goio magiri mulimuli te la pokele Iesus, eia pilau kokovu moli la kairobola te Iesus ele.
MAR 5:28 E maura gabutatalea veia “Mai eau ge pilau keke moli la kairobola te Iesus, eau ge mahuli rivu lou.”
MAR 5:29 Tio, eia pilau la kairobola te Iesus mai ele, me oio moli ovolale la ilea tetala kaluvu, eia gabu la vovola eia mavulahati.
MAR 5:30 Mai ale, e Iesus gabua veia la bautu la vagagarila tetala eia lovoti. Tio eia goio vulo gele kabili posa te la valalua me hatavivile, eia vei mago “Ere pilauti eau e?”
MAR 5:31 La valalua la vimari tetala goio tahia mago “Mave, egiteu usu vivi robome me eme vei mago ‘ere pilautiau?’”
MAR 5:32 Goio, e Iesus mata galilili, eia vulo gele tavu egiteu veia eia masaga ge rovi seselea ere pilaua.
MAR 5:33 La tavilele gabu la vimahuli ale e Iesus igotiala, eia taga pepeho sesele, eia pariri. Eia goio toto tulu te la lagule Iesus, eia goio veipaleala la ilea tetala.
MAR 5:34 E Iesus goio veiala mago “Latugu, eme mahuliti, la vuhula eme rovi seseletiau veia eau koramulia ge vimahulime. Eme ge tuga, la tiamu oilo ge malilo tataho te la gilogo te La Tahalo Uru. La ilea taume, eia kaluvu seseleti.”
MAR 5:35 Goio, e Iesus so vigagia, la valalua isahari sibitala loio la luma te la mulugaluga la lotu, egite vei mago “E latumu peho seseleti. Korati, umalati vimata papai la tahalo uru ele.”
MAR 5:36 Eala moli e Iesus kama lolo egiteu. Eia goio veia la mulugaluga la lotu mago “Eme umala ge ilo buruko, eme ge tautaulailo moli te la vagagarila te La Tahalo Uru.”
MAR 5:37 E Iesus goio mera taro la valalua me hatavivile veia egite umala ge tilimulia soio. E Pita, e Iakob me tabarala e Ioanes, egite taho tolu moli ele tilimulia.
MAR 5:38 Egite goio guvi te la luma, e Iesus lolo la marerego giteu, isahari taitali, isahari kaukaku.
MAR 5:39 E Iesus goilo moli te la luma, eia tahi egiteu mago “Amuto maregorego lava? E guliliki alele eia kama peho sesele, eia mavuta moli.”
MAR 5:40 Goio egite loloa mai ele, egite lege vahi seselea. Eala moli e Iesus baha taro egiteu sogala, eia goio vikapopo me tamala me tilale guliliki ele, vikapopo tai me la valalua tetala ale taho tolu, egite goilo te la mulile guliliki ele.
MAR 5:41 E Iesus goio sau la limala, eia veiala mago “Talita kumi.” La masova la merera ale eia maie “Tavile bisi, eme ge hiliti.”
MAR 5:42 Goio la tavile bisi ele hiliti moli, eia tuga lahutio. Egiteu ale hiloa, egite karutu sesele. Me la tavile bisi ele, la leavala tetala savulusa gete lua.
MAR 5:43 Eala moli e Iesus mera taro vagari egiteu veia egite umala ge veipala la paga ale eia igotia. Eia goio veia giteu mago “Amuto ge abia la tavile bisi ele bakisi la ilali, eia ge alia.”
MAR 6:1 E Iesus mite me la valalua la vimari tetala, egite hiliti taro la mautu alele, egite tuga goio te la mautu tetala sesele.
MAR 6:2 Tio te la haro tabu, e Iesus soko la vimari tetala oilo te la luma la lotu. Egite usu oio laba gele tavua, egite karutu sesele la vimari tetala ale egite loloa, egite vitahi baololi legiteu mago “Ere vimari leia la mari uru ele? La mari uru tetalale, eia love? Me eia igo tai la golugolu la karutula te la vagagarila ale mave?
MAR 6:3 Eia la tahalo la kilatulatu moli, eia e latule Maria. Eia ge sesele egiteu e taitarila tai omai tegatou, mai e Iakob, e Ioanes, e Iudas, e Saimon, egiteu tomi, egiteu e hatavilevilela tai popou omai tegatou.” Egite vikara mai ele, la gabutatalala tegiteu tai kama taritigiale Iesus.
MAR 6:4 E Iesus goio veia giteu mago “Mai la bilalaha te La Uru isasa ge sibitala, la maututula tomi ale sogala ge togoa, eala moli oilo te la mautu tetala sesele me te la maratatila tetala sesele, egite ge muku pilea.”
MAR 6:5 Tio e Iesus kama koramulia ge igo la golu la karutula usu oio la mautu tetala. Eia sau moli tegiteu la ilea lolosa, eia vimahuli lou egiteu.
MAR 6:6 E Iesus karutu pepeho legiteu la valalua la mautu tetala, la vuhula egite kama gabu tikumua bakisi.
MAR 6:7 E Iesus hiliti taro la mautu tetala, eia goio valolo tatuga te la maututula, eia vimari legiteu la merera te La Tahalo Uru. Mulimuli eia tola vikapopo la valalua la vimari tetala ale savulusa gete lua, eia goio baha taro egiteu taho lalua, eia abia giteu la vagagarila tetala veia egite ge kumuli taro la hituhitu ale kama kokora.
MAR 6:8 Eia mera taro egiteu maie “Mai amuto ge tuga, amuto umala ge ababi la paga isasa veia amuto ge tamamasia te la tuluga tamutou. Eia taritigi amuto ge abi moli la toho tamutou, eala moli umala amuto ge tamamasi la ilali. Amuto ge umala ge palavavai la kela tamutou, la mani tai umala amuto ge taua te la kela tamutou.
MAR 6:9 Eia taritigi veia amuto ge tau moli la silipa te la vaha mutou, me amuto ge kai la kairobola isa moli.
MAR 6:10 Mai amuto ge tuga soio te la maututula, me amuto ge guvi te la mautu isasa, amuto ge tiroro soilo te la luma isasa moli, amuto ge pou tola moli ovola kara te ale amuto ge bula taro la mautu alele.
MAR 6:11 Mai la valalua me hatavivile te la mautu isahari, egite kama ge rara tavu amutou, egite kama ge lolo tai la merera tamutou, taritigi veia amuto ge hiliti taro la mautu aleiele. Amuto ge kuvali taro la magasa la mautu tegiteu ale otalo te la vaha mutou, eia ge mai la irovilala soio tegiteu.”
MAR 6:12 Tio, egiteu la bilalaha ale savulusa gete luale, egite tuga, egite goio valolo la valalua me hatavivile, egite veia giteu maie “Taritigi pepeho veia amuto ge vulo la gabutatalala tamutou, amuto ge piligi taro tai la iruru tamutou.”
MAR 6:13 Egite kumuli taro egiteu la hituhitu ale kama kokora, egite bubu taia la gama giteu la ilea me la bulu la obu ale mali vivili, la abirila ale eia suli la kilaka tegiteu, egite vimahuli la ilea usu ovola.
MAR 6:14 E Herod, eia la mulugaluga te la gale ale, eia lolo la rere la igogolu ale egiteu la valalua la vimari te Iesus igoa, la vuhula la rerele Iesus taliti, la isala vavavati te la galegale tomi. Egiteu isahari veia e Iesus eia e Ioanes la tahalo la vuluhi, egite veia eia mahuli taroti la pileho, eia igigo la golugolu la karutula.
MAR 6:15 La valalua isahari lou, egite vei mago “Ale e Lias.” Isahari lou vei mago “Ouka, eia la bilalaha isasa te La Tahalo Uru, eia mai moli egiteu la bilalaha ale pala sibitala tegiteu e ururu alaurati.”
MAR 6:16 Goio e Herod eia loloa mai ele, eia vei mago “Ale e Ioanes ale palati eau baha egiteu, egite barautu taro la lohola, eiala, eia mahuliti rivuti lou!”
MAR 6:17 La vuhula e Herod eia puli e rutule tarila, la isala e Herodias, e tarila puli pala mugea, eala moli e Herod goio ovo loua te tarila.
MAR 6:18 Tio e Ioanes veiale Herod mago “Eia kama taritigi eme ge puli lou e rutule tarimu, eia tikumu.” Tio e Herod loloa mai ele, eia baha egiteu veia egite ge lao tola e Ioanes, ge vagoiloa te la luma la kilisi.
MAR 6:19 E rutule Herod eia loloa mai ele, eia igo totolo, eia veia ge bili e Ioanes, eala moli eia kama koramuli,
MAR 6:20 la vuhula e haruala taga e Ioanes. E Herod rovi e Ioanes veia eia la tahalo ale matata, la vulovulola eia maroka tomi moli. Eia baumuli e Ioanes, eia sagege pepeho veia eia ge lolo bibibi la merera tetala, eala moli la gabutatalala te Herod eia marapa te la vikararala te Ioanes, la ilola ruru me eia ilo buruko sesele ovola.
MAR 6:21 Goio, la haro isasa mulimuli, e Herodias sivuti la gauru ale eia ge bili e Ioanes ovola. E haruala igo isa uru la ilali la irovilala te la logo la piligo tetala, eia baha tavu la valalua tetala usu: egiteu la mulugaluga te la valalua la igogolu tetala, egiteu la mulugaluga tegite soldia, me egiteu la tahalo la vuliti te la gale e Galilea.
MAR 6:22 Goio, e latule Herodias la sobe eia guvi, eia goio tilia veia eia ge visagege e Herod mite tomi ale pou te la ilali ele. Eia tilia kaluvu e Herod goio veiala mago “Eme ge veiagu la golu ale eme masagea, eau ge abi seseleamu.
MAR 6:23 Mai la golugolu tomi ale mave mave eme ge kakeau, ale eau ge abi seseleamu, eia sesele oata. Eau ge sugu taro moliamu mai eme ge veiagu, ge vilele lua letalua la magasa taku, taume ge la galela isasa, taku ge la galela isasa, ale eau ge igo seselea, eau ge abi moliamu.”
MAR 6:24 Goio la sobele goio gali moli sogala, eia goio tahi e tilala mago “Tila, eau ge kaka la rova veia eia ge abiagu?” Goio e tilala veiala mago “Eme ge veiala eia ge abi moliamu la gamale Ioanes.”
MAR 6:25 Goio, la sobele beu hari molia soilo te Herod, eia goio veiala mago “Gageie moli eme ge abiagu la gamale Ioanes, eme ge taua la tia, eme ge abiagu.”
MAR 6:26 Goio, e Herod loloa mai ele, la ilola buruko seseleti, la vuhula eia kama masaga ge bili e Ioanes. Eala moli eia gabutatala rivu lou la merera tetala ale eia veitia la sobe ovola, veia eia sesele oata te La Tahalo Uru. Eia gabutatala la valalua ale pou vikapopo leia te la ilali, egite loloti la merera tetalale, eia kamati koramulia veia eia ge putu lulu lou la tiloiloi te la sobe ele.
MAR 6:27 Tio oio moli ovola e Herod baha taro isasa la tahalo la vaubila veia eia ge abia somai tetala la gamale Ioanes. Tio la bilalahale goilo te la luma la kilisi, eia vali utu la lohole Ioanes,
MAR 6:28 eia goio abi la gamala, eia taua te la tia, eia goio vaharia soio te la sobe ele. Tio la sobele eia goio abiale tilala, veia e tilala ge rovia veia e Ioanes eia peho seseleti.
MAR 6:29 Tio egiteu la valalua la vimari te Ioanes, egite lolotia mai ele, egite goio bole la maula soio te la liba, egite goio ulaitiao.
MAR 6:30 Mulimuli egiteu la valalua ale e Iesus pala baha egiteu soio te la igogolu la valolo, egite beua, egite goio pou vikapopo le Iesus. Egite gilemuliale Iesus te la igogolu ale egite igotia, me te la vikarakarala ale egite valoloti la valalua me hatavivile ovola.
MAR 6:31 Goio e Iesus veia giteu mago “Amuto gomai, etato ge pou kokovu oio la baa isasa ge maila bakisi.” E Iesus veia mai ele, la vuhula la valalua me hatavivile usu guvi rororo moli soio tegiteu, e Iesus mite la baa ouka veia egite ge tuha toro bakisi.
MAR 6:32 Goio, egite sekela moli goio vore polo la uaga tegiteu, egite goio te la parava ale tabou.
MAR 6:33 Eala moli egiteu isahari hilo lagoti e Iesus mite, me oio vola la valalua me hatavivile te la maututula egite goio hiliti, sele molia goio te la baa ale e Iesus ga goio vola, egite hari muga soio, egite goio guvi pala muga tetala.
MAR 6:34 Goio e Iesus mite me la valalua la vimari tetala egite vore soio goio poru, e Iesus ga mata mai soio, la matala soro la valalua me hatavivile, egiteu voluti. Eia mata tavu egiteu soio, eia gogo pepeho sesele egiteu, egite mai moli la sip ale la tahalo isasa kama baumuli egiteu. Tio eia goio soko lou la vimari tetala, eia vimari pepeho egiteu te la merera te La Tahalo Uru.
MAR 6:35 Tio, la paga maulaviti, la haro ga paru sivo, egite la valalua la vimari tetala goio tahia mago “La haro roroti, etato omai moli la baa bulalahu moli,
MAR 6:36 eia taritigi eme ge baha taro egiteu, egite ge tuga ge goio te la maututula, ge lotoa giteu bakisi la ilali.”
MAR 6:37 Eala moli e Iesus goio veia giteu mago “Amutou moli ge abia giteu la ilali.” Egite koli la vikararala tetala mago “Ko, eme masaga amite ge goio ge lotoa giteu la ilali ge koramuli e kina salatu lua, uka ge mave?”
MAR 6:38 Goio, e Iesus tahi egiteu mago “La bret tamutou iriva oiole? Amuto goio hilo gabutoa.” Egite goio hiloa, egite goio beu loua, egite veiala mago “La bret tamiteu ilima moli oio, la ia tai ilua.”
MAR 6:39 Goio, e Iesus veia giteu la valalua la vimari tetala veia egite ge veia giteu la valalua me hatavivile, veia egite ge pou otalo.
MAR 6:40 Tio egite goio igoa mai ale e Iesus veia giteu, egite goio pou, la malosu tegiteu isahari salatu sasa, isahari savulu lima moli.
MAR 6:41 Goio e Iesus abi la bret ale ilima vikapopo me la ia ale ilua, eia taga soata te la mori, eia kaka tavu La Tahalo Uru veia eia ge vibalava la ilali alele. Goio e Iesus abi la bret ale ilimale, eia vitoitovi legiteu la valalua la vimari tetala, goio egite vitabari legiteu la valalua me hatavivile tomi ovola. La ia ilua tai mai ele, eia vipolapola momomo legiteu la valalua me hatavivile.
MAR 6:42 Egite tomi goio ali, egite maru taroa.
MAR 6:43 La makarakara la bret me la ia ale egite maru taroa, egite goio tau vikapopoa, goio tovoa te la kela savulusa gete lua.
MAR 6:44 Egiteu la valalua ale ali la ilali aleie, la giligi giteu salatu savulu lima.
MAR 6:45 Goio, e Iesus veia giteu la valalua la vimari tetala mago “Amuto ge sae la uaga, amuto ge mamuga soio te la galele Betsaida loio.” E Iesus masagea veia eia moli ge pou muga, eia ge baha taro muga la valalua me hatavivile ale popou oio tetala lololoa, veia egite ge tuga muga.
MAR 6:46 Tio eia goio baha taro la valalua me hatavivile, egite goio tugatio. E Iesus goio tie soata te la goegove veia ge kaka.
MAR 6:47 La paga mata roroviti, la valalua la vimari te Iesus olau seseleti la tia la utu, e Iesus sekela moli oilo.
MAR 6:48 Eia goio hilo egiteu solau, la tuha giteu pututia la vurore, la vuhula la kavara tali lolagu. La paga so maligagoma, eia hagagaviti la paga ge utupola, tio e Iesus goio tuga soio tegiteu, eia tuga moli oata te la tia la mago, eia ga polo pepe egiteu.
MAR 6:49 Eala moli la valalua la vimari tetala hiloa eia tatuga mai ele, egite veia eia la hitu isasa, egite kakuraha gegeru,
MAR 6:50 la vuhula egite tomi hiloa mai ele, egite taga pepeho. Eala moli e Iesus goio vikara soio tegiteu, eia veia giteu mago “Umala amuto ge taga, amuto ge vagari, ale eau molie.”
MAR 6:51 Eia goio sae te la uaga, egite vipou tomi, la lolovi taboutio. La valalua la vimari te Iesus hiloa mai ele, egite karutu sesele.
MAR 6:52 Pala muga egite kama rovi tigi la vagagarila te Iesus ale eia vitabari legiteu la valalua me hatavivile la ilali, la tia giteu souka matagaga tigi te la vagagarila tetala.
MAR 6:53 E Iesus mite me la valalua la vimari tetala, egite goio la gale la magolilo loio, egite poru oio la gale loio e Genesaret, egite goio susu tolea la uaga.
MAR 6:54 Egite goio sivo, la valalua me hatavivile te la gale ale egite hilo e Iesus, egite rovia veia ale e Iesus sesele eia guviti tegiteu ele.
MAR 6:55 Tio egite goio hari lahuti te la maututula te la gale ale, egite veipala la guluvi tetala. Eala moli mai egite ge loloa veia e Iesus eia oio la mautu isasa, tio egite ge bole egiteu la ilea te la muli giteu, ge vahari egiteu soio tetala.
MAR 6:56 Mai la maututula tomi ale e Iesus ge goio vola, egite ge bole egiteu la ilea ge vimavuta egiteu te la tia la mautu, egite ge kaka vagari e Iesus veia eia ge pou, me egiteu la ilea ge sau moli te la gilesu la lavalava tetala. Tio mai isasa ge pilau moli la kulikuli te Iesus, la ilea tetala ge kaluvu, eia ge mahuli tigi lou.
MAR 7:1 La haro isasa egiteu e pariseo isahari me egiteu la tahalo la mari isahari tai, egite goio guvi, egite tomi loio e Ierusalem, egite goio vikapopo te Iesus.
MAR 7:2 Eala moli egite hilo la valalua la vimari te Iesus isahari egite ali bulalahu moli, egite kama litu pala muga la lima giteu. Egite ali bulalahu moli mai ele, la lima gite kama maroka.
MAR 7:3 Etato rovia, ale la vulovulole ururu tegiteu e Iuda mai ele. Mai egite ge litu pala muga la lima giteu eia ge maroka, tio egite ge ali. Mai egite kama ge igoa mai ele, isa tegiteu kama ge ali.
MAR 7:4 Mai tai egite ge loio la maket, me egite masagea ge ali, egite ge vuhi pala muga la ilali. La valalua e Iuda me egiteu e pariseo tomi oilo vola, egite tomi tilimuli la vulovulole ururu tegiteu ale alaurati mai aleie. La vulovulo ale, egite igo taia te la vimaroka la sospen, la kap, la dis.
MAR 7:5 Tio, egiteu e pariseo mite me la tahalo la mari isahari tai, egite tahi e Iesus mago “Igo mave la valalua la vimari taume egite kama tilimulimuli la vulovulo giteu e ururu ale alaurati? Egite kama litu pala muga la lima giteu, egite ali bulalahu moli, la lima giteu mumugu moli.”
MAR 7:6 Tio, e Iesus hiliti, eia veia giteu mago “La bilalaha te La Tahalo Uru alaura, e Aisaia, eia rovi tigi amutou, veia amutou la tahalo la visigologolola, eia kekesi la merera te La Tahalo Uru maie: La valalua aleie, egiteu togoau te la hare giteu moli, eala moli oilo te la tia giteu eia malau taro pasiau.
MAR 7:7 La lotu tegiteu soio taku eia la golu bulalahu moli, la vuhula egite vimari la valalua me hatavivile te la vimari te la vovo. Egite visigologolo moli veia ale la merera te La Tahalo Uru.”
MAR 7:8 Goio e Iesus vei loua giteu mago “Amuto piligi taroti la merera te La Tahalo Uru, amuto sau tola moli la imoimo la merera tomi tegiteu la mulugaluga tamutou.
MAR 7:9 Amuto veia amutou la tahalo la mari, eala moli amuto mari lava? Amuto mari moli la piligi taro la merera te La Tahalo Uru, veia amuto ge sau tola moli la vulovulo giteu e ururu.
MAR 7:10 Mai e Moses eia veia giteu e ururu tegatou mago ‘Amutou ge togo e tila mutou me tama mutou.’ Me ‘Mai isasa ge gilo e tilala me tamala, taritigi amuto ge bili taro la tahalo alele.’
MAR 7:11 Eala moli la vimari tamutou eia kama mai ele, eia isapolo. Tamutou eia maie: Mai la tahalo isasa veia eia ge suli e tilala me tamala bakisi la mani me la ilali, eala moli eia hate tola lou, tio te la vimari tamutou, amuto veia eia koramulia la tahalole ge veiale tilala me tamala mago ‘La visuli bakisi ale eau ga suli amulua ovola, eau kati ge abia mulua, la vuhula eau tau raragitia veia eau ge abia La Tahalo Uru ge suli la lotu ovola.’
MAR 7:12 Tio amuto veia eia taritigi mai ele veia la tahalo ale, eia kamati ge suli lou e tilala me tamala.
MAR 7:13 Sesele, amuto tilimuli la vulovulo giteu e ururu ale alaurati, eala moli oilo vola amuto vibisi la merera te La Tahalo Uru. La vulovulo mutou usu pasi mai alele amuto igigoa.”
MAR 7:14 E Iesus goio tola lou egiteu la valalua me hatavivile soio tetala, eia goio veia giteu mago “Amuto tomi ge lolo la merera taku, amuto ge gabutatala tigi la masovala.
MAR 7:15 Mai la ilali ale la lelea gatou, mai etato ge alia, eia kama ge igo gegeru la ilo gatou. Eala moli la tilalau ale oilo la tia gatou, mai etato ge veipalea, ale moli ele eia ge igo gegeru etatou.
MAR 7:16 Mai ere la gavusala ge oio te la ilolo la merera, taritigi eia ge lolo vulai tavu la merera taku.”
MAR 7:17 Tio, e Iesus goio tuga taro egiteu ale popou lololo la merera tetala, eia tuga goio te la luma isasa. Eia pou te la lumale, la valalua la vimari tetala goio tetala, egite tahia te la masova la merera la tovomulila tetala ale eia veia giteu e pariseo ovola.
MAR 7:18 E Iesus koli la merera tegiteu mago “Amutou tai, la gabutatalala tamutou boto ia? Amuto kama rovia mai la golu ale ogala la vovo gatou ge goilo, eia kama ge igo gegeru la ilo gatou?
MAR 7:19 La vuhula, la ilali ale goilo la tia gatou, eia goilo, eia tabuli, eala moli eia kama ge tabuli sesele, mulimuli eia ge kokovu lou.” Tio te la mererale, e Iesus eia veia la ilali tomi taritigi, eia koramulia etato ge ali la mata la ilali tomi.
MAR 7:20 Goio, e Iesus vei loua giteu mago “Mai la golu isasa ale oilo la tia gatou eia ge gogala, tio la pagale ge igo gegeru etatou.
MAR 7:21 La vulovulo tomi ale ge sibitala loilo la tia mutou ge gogala eia maie: la gabutatalala ale kama kokora; la mata bulakalakala; la pakalila; la bilili; la iligo gegeru la taulaila;
MAR 7:22 la ilisu tavu la paga te la tahalo ale isapolo; la vulovulo ale kama kokora; la visigologolola; la vareagila; la vikara kukumula; la pakakasala; la igo galolola.
MAR 7:23 Egiteu tomi la vulovulo ale kama kokorale, egite ge sibitala loilo la tia mutou ge gogala, ge igo gegeru amutou.”
MAR 7:24 Goio, e Iesus goio hiliti taro la mautu ale, eia goio la gale e Taia. Eia goio pou te la luma isasa, eia kama masagea veia la tahalo isasa ge rovia veia eia oio te la lumale. Eala moli eia kama koramulia ge pou kokovu.
MAR 7:25 La tavile isasa loloa e Iesus oio popou te la lumale, la tavilele, la hitu ale kama kokora pou te latula. Eia loloa veia Iesus oio, eia goio hiliti, eia sele molia soio te Iesus, eia goio toto tulu, eia togo e Iesus.
MAR 7:26 Eala moli la tavilele eia kama la tavile Iuda, eia la tavile Grik, eia loio la mautu e Ponisia, oio la gale e Siria. Eia goio kaka e Iesus veia eia ge kumuli taro la hitu ale kama kokora eia pou te latula.
MAR 7:27 Eala moli e Iesus hiloa veia eia kama la tavile Iuda, eala eia kama koli tigi la kilaka tetala, eia vei moliala la vikarara la tilovo maie “Eia taritigi pepeho veia etato ge abi mugea giteu e latatu gatou sesele la ilali, egite ge ali pala muga, mulimuli egite la paia ge ali. La vuhula etato souka ge abi la ilali tegiteu e latatu gatou, ge pigia la paia, e latatu gatou ge vitolo.”
MAR 7:28 Eala moli la tavilele koli la merera te Iesus mago “Tahalo Uru, la merera taume eia sesele, eala moli la paia otalo la uluva la poro, egite tai alali la makara giteu e gulikiliki.”
MAR 7:29 E Iesus lolo la merera te la tavilele, eia veiala mago “Taritigi pepeho ale eme rovi tigi la merera taku veia eia sesele. Eme ge beu rivua, la hitu ale kama kokora eia hele taroti e latumu.”
MAR 7:30 Tio, la tavilele eia goio beu rivu loua soio te la luma tetala, eia hilo e latula oio mamavuta te la mulila, eia rovitia veia e latula taritigiti lou, la hitu ale kama kokora eia hele tarotia.
MAR 7:31 E Iesus hiliti lou, eia tuga taro la gale e Taia, eia polo kabili te la baale Taia me Saidon. Goio, eia tuga lou soio te la baale Saidon me Dekapolis, eia guvi oio la gale e Galilea.
MAR 7:32 La valalua isahari oio la gale ale, egite vahariale Iesus isa la tahalo la gavusala vou, eia kama vikara titigi. Egite kaka gogomeale Iesus veia eia ge sau tetala ge vimahulia.
MAR 7:33 Tio, e Iesus goio pulia soio, egira sekela moli pou gale. E Iesus goio sugu la kukula soilo te la gavusa la tahalole, eia goio kapute la kukula, eia pilau la kalameala.
MAR 7:34 Eia pilau la kalameala mai ele, eia taga soata te la mori, eia lalahate vagari, eia tali te la tiala, eia goio veia la tahalole mago “Epata!” La merera ale “Epata” eia la bautu la merera tegiteu e Israel, la masovala eia maie “Tapulaka!”
MAR 7:35 Tio la gavusa la tahalole matalatio, la kalameala eia talube tai, eia goio vikara titigitio.
MAR 7:36 E Iesus mera taro vagari egiteu te la pagale veia egite ge umala ge vei lalahua, eala moli ouka, egite vagari veia ge veipala molia,
MAR 7:37 la vuhula egite karutu sesele. Egite vei mago “La igogolu tomi ale eia igigoa, eia taritigi tomi moli. Eia vimahuli egiteu ale la gavusa giteu vou, egite lololo lou, me egiteu ale harebuu, egite vikarakara lou.”
MAR 8:1 La haro isasa la valalua me hatavivile usu goio pou vikapopo lou me Iesus, egiteu la ilali ouka. E Iesus tola vikapopo la valalua la vimari tetala mago
MAR 8:2 “Eau gogo pepeho egiteu, la vuhula la logo itoluti egite pouti omai, egiteu la ilali ouka veia egite ge alia.
MAR 8:3 Mai ge eau ge baha taro egiteu soio te la maututula tegite, isahari ge peho parava sesele la vitolola te la gauru, la vuhula isahari tegiteu loio la maututula ale malau.”
MAR 8:4 Tio, la valalua la vimari te Iesus egite veiala mago “Ale la hohoi bulalahu moli, etato ge abi la ilali oiove ge abia giteu?”
MAR 8:5 Eala moli e Iesus goio tahi egiteu mago “Amutou la bret iriva oiole?” Egite veiala mago “La bret ivitu moli.”
MAR 8:6 E Iesus goio veia giteu la valalua me hatavivile mago “Amuto ge pou otalo.” Tio egite goio pou otalo, e Iesus abi la bret ale ivitu ele, eia kaka tavu La Tahalo Uru veia eia ge vibalava la ilali ele. Goio e Iesus vitoitovi legiteu la bret ale ivitu ele, eia goio abia giteu la valalua la vimari tetala veia egite ge vitabari lou legiteu la valalua me hatavivile tomi ovola.
MAR 8:7 Eia goio abi tai la ia ilua bisisi ale egite taholea, eia goio kaka tavu lou La Tahalo Uru, eia goio vei loua giteu la valalua la vimari tetala veia egite ge vitabari lou legiteu la valalua me hatavivile la iale.
MAR 8:8 Tio egite tomi ali, egite maru taroa. La valalua la vimari te Iesus goio tau vikapopo la makara la ilali ale egite maru tarotia, egite tovoa te la kela ivitu.
MAR 8:9 Egiteu tomi la valalua me hatavivile alele, la giligi giteu mai salatu savulu vaa. Egite ali kaluvu, e Iesus goio baha taro egiteu.
MAR 8:10 Goio e Iesus mite me la valalua la vimari tetala goio sae la uaga, egite goio te la gale e Dalmanuta.
MAR 8:11 Egiteu e pariseo isahari goio te Iesus, egite tahi susukua la tilahi usu pepeho. Egite veia ge tovo lalai la vagagarila tetala, eala egite karasukua veia eia ge vahilo legiteu la irovilala te la vagagarila te La Tahalo Uru.
MAR 8:12 Eala moli e Iesus goio lalahate, eia goio veia giteu mago “Ilava amutou la tuvu la valalua me hatavivile ale igoie, amuto masagea ge hilo la irovilala la karutula? Eau vei seselea mutou, eau kama ge igo isa la irovilala soio tamutou la valalua me hatavivile ale igoie.”
MAR 8:13 Tio e Iesus hiliti taro egiteu e pariseo, eia goio sae lou te la uaga, egite me la valalua la vimari tetala sele molia goio te la gale la magolilo loio.
MAR 8:14 Egiteu la valalua la vimari te Iesus, egite vaula la ilabi la ilali, egite tamamasi la bret isa moli te la tuluga tegiteu oio te la uaga.
MAR 8:15 Goio e Iesus viteteli egiteu mago “Amuto baumuli tigi amutou, la vulovulo giteu e pariseo me la vulovulole Herod tai, eia soukama ge poloa mutou mai la is ale visogo la palava.”
MAR 8:16 Goio, egite goio vipigi vulo la merera te Iesus ele, egite vei mago “Eia vikara mai ele, la vuhula etatou la bret ouka.”
MAR 8:17 Eala moli e Iesus roviti la gabutatalala tegiteu, eia veia giteu mago “Ilava amutou vikara bububu mai ele veia ‘etatou la bret ouka’? La gabutatalala tamutou ouka, ia? Me la mari tamutou tai eia boto? La gabutatalala tamutou soioge kama malau?
MAR 8:18 La mata mutou oio, eala moli amuto kama matagaga. La gavusa mutou tai oio, eala moli amuto kama lolo tigi la merera. Amuto soioge vautila, te la haro ale eau vituha toro egiteu la valalua ale salatu savulu lima la bret ale ilima moli, amuto tau vikapopo la makara la bret la kela iriva?” Egite koli la merera te Iesus mago “La kela savulusa gete lua.”
MAR 8:20 Goio, e Iesus tahi lou egiteu mago “Te la haro ale eau vituha toro egiteu la valalua me hatavivile ale salatu savulu vaa la bret ivitu, amuto tau vikapopo la makara la bret la kela iriva?” Egite koli la merera tetala mago “La kela ivitu.”
MAR 8:21 Tio e Iesus goio veia giteu mago “Eala moli amuto soukama rovi tigi la vuhu la igogolu taku ale eau igigoa, ia?”
MAR 8:22 E Iesus mite me la valalua la vimari tetala, egite goio guvi oio la mautu e Betsaida. La valalua te la mautu ale, egite vahari la tahalo isasa soio te Iesus, la matala mata kea. Egite toto suku tavu e Iesus, veia eia ge tau la limala oio te la tahalo alele.
MAR 8:23 Tio e Iesus goio sau la limala, eia tatea sogala te la matapiro. Eia kapute soio te la mata la tahalole, eia goio sau tetala, eia tahia mago “Eme mamatati?”
MAR 8:24 Tio, la tahalole eia goio mata lalahu, eia goio veiale Iesus mago “Eau hilo isahari la valalua mai moli la obobu, egite tatuga.”
MAR 8:25 Goio, e Iesus goio sau lou te la matala, la tahalole eia goio mata toroti, la matala mata tatahoti lou, eia hilo tigiti la golugolu tomi.
MAR 8:26 Tio e Iesus baha taroa soio te la luma tetala, eia veiala mago “Eme umala ge goluma la mautu.”
MAR 8:27 E Iesus mite me la valalua la vimari tetala, egite tuga goio te la maututula te la gale e Sisaria Pilipai. Egite tatuga, e Iesus tahi egiteu mago “La valalua veia eau ere?”
MAR 8:28 Egite koli la tilahi tetala mago “Egiteu isahari veia eme e Ioanes, la tahalo la vuluhi. Isahari tai veia eme e Lias. Me isahari egite veia eme la bilalaha isasa te La Uru.”
MAR 8:29 Tio, e Iesus goio tahi lou egiteu mago “Me amutou tai, amuto veia eau ere?” Goio, e Pita koli la tilahi tetala mago “Eme e Kraist, la tahalo ale La Tahalo Uru hilovitime veia eme ge vimahuli la valalua me hatavivile.”
MAR 8:30 Goio, e Iesus loloa mai ele, eia goio mera taro vagari egiteu veia egite umala ge veipala la mererale soio te la valalua me hatavivile.
MAR 8:31 Goio, e Iesus goio soko lou la vimari soio tegiteu la valalua la vimari tetala, eia goio veia giteu mago “E Latu La Tahalo ge gabu la iligiligi ale uru. Egiteu e ururu vikapopo me egiteu la mulugaluga tegiteu e pris, vikapopo tai egiteu la tahalo la mari, egite tomi ele ge piagale eau, egite ge biliau, eau ge peho, la haro itolu ge polo, eau ge mahuli rivu lou.”
MAR 8:32 Goio e Iesus vikara matagaga tatahoa giteu mai ele, e Pita pulia soio, egira me Iesus magiri gale, eia igo totolo e Iesus.
MAR 8:33 Eala moli e Iesus goio vulo gele, eia hilo egiteu la valalua la vimari tetala, eia goio igo totolo rivu lou e Pita mago “Satan, eme ge hele taroau, eau kama masagea ge hilome. Eme kama gabutatala la vulovulo La Tahalo Uru, eme gabutatala moli la vulovulo la vovo.”
MAR 8:34 Tio, e Iesus tola la valalua me hatavivile, vikapopo tai me egiteu la valalua la vimari tetala, eia vimari egiteu maie “Mai isasa masagea veia eia ge mulimuliau, eia umalati ge mulimuli la masasagala tetala. Eau ge ligi te la tauvalautu, eala eia taritigi veia la tahalo me la tavile ale masagea ge tilimuliau, eia tai ge raragi te la iligiligi.
MAR 8:35 La vuhula mai isasa masagea ge hate robo la mahulila tetala, la mahulila tetala ge kokovu taro leia. Eala moli mai isasa ge sugu taro la mahulila tetala somai taku, me soio te la valolo ale taritigi, eia moli ge sau tola la mahulila ale sesele.
MAR 8:36 Mai la tahalo me la tavile isasa, eia ge tahola la golugolu mapaiti, eala moli la kalulula ge vilua, la golugolu tetala kama ge vimahulia. La golugolu tetala ge koramulia ge sulia mave?
MAR 8:37 Etato ge loto rivu lou la kalulu gatou mave ge? Ouka gologolo.
MAR 8:38 Egiteu la tuvu la valalua me hatavivile ale igoie, egite kama kokora pasi, egite kama togo la taulaila, mai tai ale egite kama togo La Tahalo Uru. Mai isasa ge pou tavu la vulovulo giteu ale kama kokora mai ele, me eia ge mahela taroau, veia eia ge mahela taro tai la merera taku, tio eau mulimuli ge mahela taro tai eia. Eau ge mahela taroa te la haro ale amite me egiteu la angelo ale loata te La Tahalo Uru ge guvi, vikapopo tai la matagaga ale uru te Tete ale loata te la mori.”
MAR 9:1 E Iesus vei loua giteu mago “Eau vei seselea mutou, amutou ale popou ele, amuto lololo la merera taku, isahari tamutou ele kama ge peho hari, amuto isahari ge hilo pala muga la pulolou la matagagala te La Tahalo Uru eia ge sibitala vikapopo la vagagarila tetala ale uru.”
MAR 9:2 Tio, la haro iuolo poloti, e Iesus goio puli e Pita, e Iakob, me Ioanes, egite goio tie soata te la varu la gove isasa, egite sekela moli popouo. Egite popou oata te la gove ele, la vovole Iesus eia vuloti, eia mata sapolo te la hililo te Pita mite.
MAR 9:3 La lavalava tetala eia sasima pepeho, eia kea lovolovo sesele viruru, eia kama koramulia veia etatou la tahalo la vovo isa ge igo maroka la kulikuli isasa mai ele, ge ouka viruru.
MAR 9:4 Goio e Lias, mira me Moses sibitala tavu e Iesus, egite goio pou, egite vikarakara.
MAR 9:5 E Pita hiloa, eia goio hiliti eia veiale Iesus mago “Tahalo La Vimari, etato pouti omai, eia taritigi pepeho. Soioge amite ge tigi la kale itolu omai, isa ge taume, isa ge te Moses, isa ge te Lias.”
MAR 9:6 Eala moli e Pita vikara mai ele, la vuhula egiteu taho tolu ele taga pepehoti, me maura ge vei lou lava?
MAR 9:7 Goio, la tuluvu la mori isa uru loio, la miaula pigi robo e Iesus mite tomi. Goio La Tahalo Uru tola loata te la tuluvu la mori ele mago “Ale e Latugu la riau, taritigi amuto ge lolo eia.”
MAR 9:8 Goio, egiteu taho tolu ele, e Pita mite, egite ga mata galili, eala moli egite kamati hilo isa la tahalo, e Iesus moli oio, egite popou.
MAR 9:9 Tio, e Iesus mite me la valalua la vimari tetala itolu ele, egite purusu rivu lou loata te la gove, gotalo. E Iesus goio tutu tolea giteu veia egite umala ge veipala la paga ale egite hilotia, kara te ale e Latu La Tahalo ge mahuli rivu lou taro la lulu la pileho.
MAR 9:10 Tio e Pita mite goio sau tola molia la merera te Iesus ele, isa tegiteu kama veipala la paga ale egite hilotia. Goio egite vitahi baoli legiteu te la masova la merera te Iesus ale eia veia eia ge mahuli rivu lou taro la lulu la pileho.
MAR 9:11 Goio, egite tahi e Iesus mago “Igo mave egiteu la tahalo la mari egite veia e Lias ge sibitala rivu muga, e Kraist ge mulimuli?”
MAR 9:12 Goio, e Iesus kolia giteu mago “Eia sesele, e Lias ge guvi pala muga, eia ge vimatata tomi muga lou la pulolou te la valalua me hatavivile tomi, mulimuli e Kraist ge sibitala. Eala moli eau ge tahi amutou, igo mave la merera te La Buk Tabu Ale Pala eia veia e Latu La Tahalo ge gabu pala muga la iligiligi, veia la valalua me hatavivile ge piagale taia?
MAR 9:13 Eala moli, eau veia mutou, e Lias eia guviti, eala moli egiteu la gima igo gegerutia mai la masasagala moli tegiteu, mai moli ale La Buk Tabu Ale Pala eia veipala mugea.”
MAR 9:14 Goio, e Iesus, e Pita, e Iakob, me Ioanes, egite goio beu loua soio tegiteu e tabarabara giteu, la valalua la vimari te Iesus. Egite hilo la valalua me hatavivile mapaiti oio magirigiri me egiteu la tahalo la mari isahari tai oio, egite vitahi vilevile legiteu la valalua la vimari te Iesus.
MAR 9:15 Goio e Iesus sibitala robo egiteu, egite hiloa, egite karutu, usu tegiteu goio hari tavua, laharoala.
MAR 9:16 E Iesus tahi la valalua la vimari tetala mago “Amuto vitahi vilevile legiteu la rova?”
MAR 9:17 La tahalo isasa oio tegiteu ale popou ele, eia goio koli la vikararala te Iesus mago “Tahalo la vimari, eau vahariamu somai e latugu hatamale, eia lea. La hitu isasa oio pou tetala, eia igo paua molia, eia kamati vigagia.
MAR 9:18 La hitu ale, eia lao bulalahu molia, eia bilibili la vovola sotalo la magasa, la kaputela papara te la harela, la togola visiki robo, me la vovola matata robo. Eau kakati egiteu la valalua la vimari taume veia egite ge kumuli taro la hitu ele, eala moli egite kama koramulia.”
MAR 9:19 Goio, e Iesus veia giteu mago “Ko, amutou la tuvu la valalua me hatavivile ale igoie, amuto kama tautaulailo bakisi te la merera te La Tahalo Uru, la vuhula amutou la tahalo la vareagila. Eau silaha seseleti le amutou. La leavala ge iriva lou eau ge ligi lou la vulovulo mutou e? Puliagu somai e guliliki ele!”
MAR 9:20 Tio, egite goio pulia soio te Iesus, goio la hitu hilo e Iesus, eia goio lao loua e guliliki ele, e maura boru sotalo la magasa, eia bubuli, la kaputela paparatio.
MAR 9:21 Tio, e Iesus tahi e tamala mago “La ileale eia guvi alisati?” E tamale guliliki ele eia goio koliala mago “La ileale sokotia palati te la bibisila.
MAR 9:22 La haro usu la hitu ele lalaoa, pipigia sotalo te la havi, eia ge laoa ge pigia sotalo tai te la lalu. Eia masagea ge bilia, eia ge peho sesele, eala moli mai eme ge gogo amilua, eme ge suli amilua mai eme ge koramuli.”
MAR 9:23 Goio, e Iesus koliala mago “Ilava eme tahiau mai ele? Mai etato ge tautaulailo sesele te la merera te La Uru, eia koramuli etatou ge igo la papaga tomi.”
MAR 9:24 Goio, e tamale guliliki ele eia goio koli louale Iesus mago “Eau tautaulailo bakisi, eala moli eme ge suliau, la vuhula la tautaulailo taku eia soukama vagari sesele.”
MAR 9:25 Goio, e Iesus hilo egiteu la valalua me hatavivile mapaiti, egite hari tavua veia ge hiloa, eia goio igo totolo la hitu ele, eia veiala mago “Ae, eme la hitu la igo pauala, eme ge hele taro e guliliki ele! Eme umalati popou lou oio tetala!”
MAR 9:26 Goio, la hitu kakuraha gegeru, eia lugu pariri la vovole guliliki ele, eia goio hele taroa. La hitu eia hele taroa, e guliliki ele eia mata mai ale pehoti. La valalua me hatavivile ale hiloa, usu tegiteu veia eia peho seseleti,
MAR 9:27 eala moli e Iesus goio sau la limala, eia vahilitia, tio e guliliki ele goio magiritio.
MAR 9:28 Goio, e Iesus mite me la valalua la vimari tetala, egite goio te la luma isasa, egite popou, egite tahi kokovu e Iesus mago “Igo mave amite kama koramulia ge kumuli taro la hitu ale?”
MAR 9:29 Goio, e Iesus kolia giteu mago “La kilaka moli sekela eia koramulia ge kumuli taro la hitu ale mamai ele.”
MAR 9:30 E Iesus mite me la valalua la vimari tetala, egite hiliti taro la mautu ale egite pou ovola, egite goio tuga polo lou oio te la gauru te la gale e Galilea. E Iesus kama masagea veia isasa ge rovi la baa ale eia pou ovola,
MAR 9:31 la vuhula eia vimarimari egiteu la valalua la vimari tetala. Eia goio veia giteu mago “Egite ge lao tola e Latu La Tahalo, egite ge sugu taroau soio tegiteu la valalua la gima, egite ge bili pehoau, la haro itolu ge polo, eau ge mahuli rivu lou.”
MAR 9:32 Eala moli egiteu la valalua la vimari te Iesus kama rovi tigi la masova la merera tetalale, eala moli egite kama tahia ovola, la vuhula egite mahela.
MAR 9:33 Goio, e Iesus mite me la valalua la vimari tetala, egite goio guvi oio la mautu e Kapernaum. Egite gite goio te la luma isasa, e Iesus goio tahi la valalua tetala mago “Etato tatuga te la gauru, amuto vikara mulimuli la rova?”
MAR 9:34 Eala moli egite kama koli la tilahi tetala, la vuhula oio la gauru egite vikara maie “Ere ge muga etatou?”
MAR 9:35 Tio, e Iesus goio pou otalo, eia tola vikapopo egiteu, eia goio veia giteu mago “Mai isasa tamutou eia ge masagea veia ge mamuga, taritigi veia eia ge vibisi moli eia, eia ge mai moli la bilalaha tamutou tomi.”
MAR 9:36 Goio, e Iesus goio tata e guliliki isa bisi soio, eia vimagiri posea kabili tegiteu, eia goio lao roboa, eia veia giteu mago
MAR 9:37 “Egiteu tomi ale masagea veia ge pou mai e tabaragu sesele, taritigi veia egite ge suli egiteu e gulikiliki mai e guliliki bisi ele. Me la tahalo me la tavile ale igo seselea mai ele, eia mai ale suli tai eau. Eala moli eia kama suli moliau, eia suli tai La Tahalo Uru ale baheau somaie.”
MAR 9:38 E Ioanes goio veiale Iesus mago “Tahalo la vimari, amite hilo la tahalo isasa, eia abi la vagagari la isamu, eia kumuli tataro la hituhitu ale kama kokora ovola. Eala moli amite mera taroa, la vuhula eia kama tegatou.”
MAR 9:39 Tio, e Iesus koliala mago “Amuto umala mera tataroa. Mai la tahalo isasa ge abi la vagagari la isagu, eia ge igo la golugolu la karutula ovola, la tahalo ale kama ge vulo lou, veia eia ge vikara bareagu,
MAR 9:40 la vuhula la tahalo ale kama gima etatou, eia ge suli moli etato.
MAR 9:41 Eau vei seselea mutou, mai la tahalo isasa ge rovia veia amutou taku, me oio vola eia ge suli amutou bakisi, mai eia ge hiloa veia amuto malehu, me eia ge abia mutou la lalu veia amuto ge liua, tio La Tahalo Uru kama ge vaula leia. Mulimuli eia ge koliala.
MAR 9:42 “Eia kama taritigi veia la tahalo isasa ge viruru isasa tegiteu bisisi ale roromuliau. Mai isasa ge viruru egiteu bisisi mai ele, eia taritigi veia amuto ge abi isa uru la uati, ge abi la mota, ge kisia, ge pitotoia te la loho la tahalole, amuto ge pigia olau te la tia la utu, eia ge tilomu, la vuhula eia souka ge igo lou la iruru.
MAR 9:43 “Mai la limamu isa ge virurume, eia taritigi veia eme ge koro taroa ge pigia. Eia taritigi veia mai ge la limamu isa ge batu, eala moli eme ge sau tola la mahulila ale sesele, la kaluvula ge ouka. La vuhula, eia kama taritigi veia mai ge la limamu ilua tomi ge taritigi, eala moli eme ge vilua te La Havi Ale Uru la kaluvula ge ouka.[
MAR 9:44 Oio la mautu ale la kirere la liba la kaluvu giteu ge ouka, la kaluvu la havi tai ge ouka.]
MAR 9:45 “Mai la vahamu isa ge virurume, eia taritigi veia eme ge koro taroa ge pigia. Eia taritigi veia mai ge la vahamu isa ge batu, eala moli eme ge sau tola la mahulila ale sesele la kaluvula ge ouka. La vuhula, eia kama taritigi veia mai ge la vahamu ilua tomi ge taritigi, eala moli egite ge pigime sotalo te La Havi Ale Uru la kaluvula ge ouka.[
MAR 9:46 Oio la mautu ale la kirere la liba la kaluvu giteu ge ouka, la kaluvu la havi tai ge ouka.]
MAR 9:47 “Mai la matamu isa ge virurume, eia taritigi veia eme ge suba taroa ge pigia. Eia taritigi veia mai eme ge mata kea galesa, eala moli eme mulimuli ge goio ge pou tigi te la bali La Tahalo Uru. La vuhula, eia kama taritigi veia mai ge la matamu ge ilua tomi, eala moli egite ge pigime sotalo te La Havi Ale Uru la kaluvula ge ouka.
MAR 9:48 Oio la mautu ale la kirere la liba la kaluvu giteu ge ouka, la kaluvu la havi tai ge ouka.
MAR 9:49 “La Tahalo Uru ge tovo lalai la ilo la valalua me hatavivile tomi, veia la ilo giteu ge taritigi mai la ilali ale la mago vimalamatia.
MAR 9:50 La mimila eia la paga ale taritigi te la gulutu la ilali, eala moli mai eia kati mamasi tigi, isa kati koramulia ge igo mamasi loua. Eia taritigi veia la vulovulo mutou ge taritigi mai la ilali ale la mimila vimalamea, amuto ge vipuhi tigi, la pulolou tamutou ge taritigi te la milatalata te La Tahalo Uru.”
MAR 10:1 E Iesus hiliti taro la gale ale eia popou ovola, eia goio te la gale e Iudea, eia taro polo la lalu e Iordan, eia goio te la gale ale loilo. Goio egiteu la valalua me hatavivile usu egite gomai vikapopo oio te Iesus, eia valolo egiteu la merera te La Tahalo Uru. Ale la vulovulole Iesus mai ele, eia vimarimari la valalua me hatavivile te la galegale tomi.
MAR 10:2 Goio, egiteu e pariseo isahari goio te Iesus, egite tovo lalai la mari tetala, egite goio tahia mago “Te la vulovulo gatou e Iuda, eia koramulia veia etato ge tou e rutu gatou ka ouka?”
MAR 10:3 E Iesus koli la vikararala tegiteu mago “E Moses eia veia gatou la merera ale mave ovolale?”
MAR 10:4 Egite goio koli la tilahi tetala mago “E Moses veia eia taritigi mai egite masagea veia ge tou e rutu giteu, egite ge kekesi la leta la vipou baala te la taulaila.”
MAR 10:5 Eala moli e Iesus hiliti lou, eia goio vikara lou soio tegiteu mago “La vuhula e Moses silahati la vareagila tamutou, eia goio kekesi la merera alele.
MAR 10:6 Mai moli ale La Buk Tabu Ale Pala eia veitia veia alaurati te la silokola, ‘La Tahalo Uru vipou la golugolu tomi. Eia vipou egite hatamalemale me egite hatavivile tai.
MAR 10:7 Eala, palati kara igoie la tahalo me la tavile ge hele taro e tila girua me tama girua, egira ge goio ge vipou tomi.
MAR 10:8 La pulolou te tau me rutula ge isa moli.’ Egira kati mai ale ilua, egira isa moliti.
MAR 10:9 La taulaila tomi La Tahalo Uru kisitia, isa kamati koramulia ge lube loua.”
MAR 10:10 Goio, e Iesus mite me la valalua la vimari tetala, egite goio te la luma isasa, goio egite tahi muli loua la vuhu la vimari tetala te la taulaila.
MAR 10:11 E Iesus veia giteu mago “Mai la tahalo isasa eia ge tou e rutula, ge puli polo la tavile isasa, tio la tahalo ale, eia igo gegeruti la taulaila tegira me rutula. La tahalo ale, eia ruruti.
MAR 10:12 Mai ge la tavile tai isasa, eia ge tou e haruala, eia ge taulai polo soio te la tahalo isasa, tio la tavile ale, eia igo gegeruti la taulaila tegira me haruala. La tavile ale, eia ruru taiti.”
MAR 10:13 Egiteu e hatavivile isahari vahari e latatu giteu soio te Iesus veia e Iesus ge tau la limala oata te la gama giteu ge vibalava egiteu la sagegela tetala. Eala moli la valalua la vimari te Iesus hiliti, egite goio mera taro egiteu e hatavivile alele.
MAR 10:14 Tio e Iesus hiloa mai ele, la gabutatalala tetala kama taritigi soio tegiteu la valalua tetala, eia goio veia giteu mago “Egiteu korale, eia taritigi egite bisisi ge gomai taku. Amuto umala mera tataro egiteu, la vuhula la pulolou la matagagala te La Tahalo Uru eia koramuli sesele la valalua me hatavivile ale mai egiteu e gulikiliki ele.
MAR 10:15 Eau vei seselea mutou, mai la tahalo isasa eia kama ge laba gele tavu la merera te La Tahalo Uru mai egite bisisi ale laba gele tavuau, la tahalo ale mai ele kama ge goilo te la pulolou la sagegela oio te la bali La Tahalo Uru.”
MAR 10:16 E Iesus vikara mai ele, eia goio lao robo egiteu e gulikiliki ele, eia tau la limala oata te la gama giteu isasasa, eia veia giteu mago “La Tahalo Uru ge vibalava amutou.”
MAR 10:17 E Iesus hiliti taro la mautu ale eia pou ovola, eia so sosoko moli la tuluga tetala, la tahalo isasa hari soio tetala, eia toto tulu sotalo, eia veiale Iesus mago “Tahalo kokora, la rova sesele eau ge igoa veia eau ge sau tola la mahulila ale sesele, ale la kaluvula ge ouka?”
MAR 10:18 Goio, e Iesus koli la tilahi tetala mago “Umala eme totoi eau ‘Tahalo kokora’, la vuhula La Tahalo Uru moli sekela taritigi.
MAR 10:19 Eme roviti la merera te La Tahalo Uru: Umala bilibili; umala igo gegegeru la taulaila; umala pakalikali; umala eme ge veipala la merera la visigologolola te la tahalo isasa; umala tutugologolo la valalua me hatavivile te la ilabi la golugolu tegiteu; eme ge togo e tilamu me tamamu.”
MAR 10:20 Goio, la tahalo ale eia veiale Iesus mago “Tahalo la vimari, la merera tomi alele eau roromuli tomitia palati te la bibisigu karati igoie.”
MAR 10:21 Tio e Iesus loloa mai ele, eia goio mata tavu loua, eia gogoa, eia veiala mago “Eala moli la paga isa moli eme so savelea. Taritigi veia eme ge abi la golugolu taume tomi, ge vaharia soio tegiteu la valalua la iloto veia egite ge lotoa, eme ge abi la mani tomi alele, eme ge suli egiteu la tahalo la savelela ovola. Mai eme ge igo seselea mai ele, tio taume ge la tilalau ale taritigi oata te la ilo la lage. Eme ge suli kaluvu egiteu, eme ge gomai tilimuliau.”
MAR 10:22 Eala moli la tahalo ale, eia loloa mai ele, eia ilo buruko sesele, eia abia goio tuga taro e Iesus, la vuhula eia la tahalo la vuliti.
MAR 10:23 Tio, e Iesus goio mata tavu egiteu la valalua la vimari tetala, eia veia giteu mago “Egiteu la tahalo la vuliti, egite ge vavala pepeho pasi te la goilola te la pulolou la matagagala te La Tahalo Uru.”
MAR 10:24 Tio egiteu la valalua la vimari tetala, egite karutu la merera tetalale. Eala moli e Iesus goio vei loua giteu mago “Amuto latatugu, eia vagari pasi veia etato ge goilo te la pulolou la matagagala te La Tahalo Uru.
MAR 10:25 Mai la kamel isasa eia veia ge tovo lalai veia ge polo te la mata la lili la silahi, ale ge vagari tetala. Eala moli mai la tahalo la vuliti ge veia ge tiroro soilo te la pulolou la matagagala te La Tahalo Uru, ale ge vagari pepeho sesele tetala.”
MAR 10:26 Eala moli la valalua la vimari tetala, egite karutu sesele la merera tetalale, egite goio tahia mago “Mai ge mai ele, ere ge koramulia ge sau tola la mahulila ale sesele?”
MAR 10:27 Tio, e Iesus goio mata tavu egiteu, eia veia giteu mago “Eia sesele, la valalua me hatavivile tomi egite kama koramulia ge sau tola la mahulila ale sesele te la vagagarila moli tegiteu lou, eala moli La Tahalo Uru eia koramulia ge igo la papaga tomi, eia moli ge vimahuli egiteu.”
MAR 10:28 Eala moli e Pita goio hiliti, eia veiale Iesus mago “Hiloa, amite hiliti taro moliti la papaga tomi tamiteu tomi, amite mulimulitime!”
MAR 10:29 Eala moli e Iesus goio baoli louala mago “Eau vei seselea mutou, mai isasa masagea ge suliau veia eia ge veipala la valolo ale taritigi, me oio moli ovola eia ge tuga taro la luma tetala, ge tuga taro tai egiteu e tabarabarala, e hatavilevilela, e tatilala, e tatamala, e latatula, la mahuma tetala tai,
MAR 10:30 La Tahalo Uru ge koliala la golugolu usu pepeho. Mai la luma, e tabarabarala, e hatavilevilela, e tatilala, e tatamala, e latatula, la mahuma tai. Eia ge koliala te la imamala moli aleie. Eala moli egiteu ale igogolu mai ele, egite ge gabu tai la iligiligi ale uru, eala moli te la imamala ale mulimuli, egite ge sau tola la mahulila ale sesele, la kaluvula ge ouka.
MAR 10:31 La vuhula la valalua me hatavivile usu, egite pou la balavala igoie, egite mulimuli ge pou la mahelala. Me usu tegiteu ale pou moli te la savelela igoie, egite mulimuli ge pou la balavala.”
MAR 10:32 E Iesus mite me la valalua la vimari tetala tatuga te la gauru, egite veia ge goio e Ierusalem, e Iesus mamuga egiteu. Eala moli la gabutatalala tegiteu la valalua la vimari tetala marapa, me egiteu la valalua me hatavivile ale tilimuli egiteu, egite taga, la vuhula egite veia la valalua la gima soukama ge bili e Iesus oio e Ierusalem. E Iesus puli egiteu la valalua la vimari tetala soio, egite sekela moli pou gale, eia goio veipalea giteu la iligiligi ale ge guvi tetala.
MAR 10:33 Eia veia giteu mago “Hiloa, igoie etato ge goata e Ierusalem tegiteu la gima taku, egite ge lao tola e Latu La Tahalo, egite ge sugu taroau soio tegiteu la mulugaluga tegiteu e pris mite me la tahalo la mari, egite ge vimagiriau te la vigagiala, egite ge viputumulia veia ge biliau.
MAR 10:34 Egite ge sugu taroau soio tegiteu la valalua ale kama la maratatila e Iuda, egite ge mera bareagu, egite ge kavurasi voluau, ge kumamasiau, egite ge bili pehoau, la haro itolu ge polo, eau ge mahuli rivu lou.”
MAR 10:35 Goio, e latule Sebedi ilua, e Iakob me Ioanes, egira goio te Iesus, egira veiala mago “Tahalo la vimari, amila veia ge kakame isa la paga, eme kama ge vitoua milua.”
MAR 10:36 Tio e Iesus tahi egirua mago “Amula masagea veia eau ge suli amulua mave?”
MAR 10:37 Egira goio veiala mago “Mulimuli mai eme ge pou te la vagagarila taume, eia taritigi veia eme ge vauru amilua veia isa tamilua ge pou te la galemu e gata, me isa ge pou te la galemu e meru, eme ge vauru amilua mai ele.”
MAR 10:38 Goio, e Iesus koli la merera tegirua, eia tovo mulia girua veia eia ge lapu la gabutatalala tegirua te la iligiligi tetala me la pileho tetala. Eia goio veia girua mago “Amulua kama rovi tigi la paga ale amula kakea. Mave, amula ge koramulia ge liu tai te la kap la iligiligi ale eau ge liu ovola? Amula koramuli tai la iligiligi ale eau ge ligi ovola? Amula koramuli tai la vuluhi ale egite ge vuhiau ovola?”
MAR 10:39 Eala moli, egira kama abi tigi la masova la merera te Iesus, egira goio koli bulalahu la tilahi tetala mago “Ee, amila koramulia.” Goio, e Iesus veia girua mago “Ioge, la kap ale eau ge liula, amula tai ge liu ovola, me la vuluhi tai ale egite ge vuhiau ovola, egite ge vuhi tai amulua ovola, amula ge gabu la iligiligi ale uru pepeho.
MAR 10:40 Eala moli eia kama la paga taku veia eau ge toi isasa veia eia ge pou te la galegu e gata, veia isa lou ge pou te la galegu e meru, ouka. La Tahalo Uru moli ge hilovi amutou veia ge vibalava amutou te la pulolou ale uru mai ele.”
MAR 10:41 Goio, egiteu e tabarabara girua ale savulu sasa, egite loloa mai ele, egite igo totolo e tau me tari ele, e Iakob me Ioanes.
MAR 10:42 Eala moli e Iesus tola vikapopo egiteu soio tetala, eia veia giteu mago “Amuto rovia la vulovulo giteu ale pou te la maligoma, egiteu la mulugaluga tegiteu vipou egiteu te la viputumulila ale vagari pepeho, me egiteu la uru giteu tai viligiligi tai egiteu la valalua me hatavivile tegite.
MAR 10:43 Eala moli la vulovulo mutou eia kama ge mai ele. Mai isasa ge masagea veia eia ge urua mutou, taritigi veia eia ge mai moli la bilalaha tamutou tomi.
MAR 10:44 Mai isasa ge masagea veia eia ge la mulugaluga tamutou, taritigi veia eia ge mai moli la bilalaha ale bisi sesele tamutou tomi.
MAR 10:45 Amuto ge vibisi amutou mai ele, la vuhula eau la uru mutou, eau la bilalaha moli tamutou ele. Eau e Latu La Tahalo, eau kama guvi omai te la maututula veia la valalua me hatavivile ge suli eau, eau gomai moli veia ge suli egiteu, veia ge sugu taro la mahulila taku veia ge rou rivu lou egiteu usu ale pou te la uluvale Satan.”
MAR 10:46 Mulimuli e Iesus mite me la valalua la vimari tetala goio guvi oio la mautu e Ieriko. La valalua me hatavivile usu pepeho tai vitilimuli vikapopo legiteu te la gauru. Egite hiliti taro e Ieriko, egite goio poga la tahalo isasa, la isala e Batimeas, e tamala e Timeas, eia popou te la pepe la gauru. E Batimeas ele, eia la mata kea, eia kama igogolugolu, eia kakaka moli la valalua veia egite ge sulia te la pulolou la mata keala tetala.
MAR 10:47 Eala moli e Batimeas loloa veia e Iesus la tau Nasaret eia loio, eia goio tolea, mago “Iesus, eme tubule Devit ele! Eme ge gogoau!”
MAR 10:48 Goio, egite usu ga mera taroa veia eia ge pou makovu, eala moli eia tola susuku moli mago “Eme tubule Devit ele, eia taritigi veia eme ge gogoau!”
MAR 10:49 Tio, e Iesus goio magiri, eia veia giteu mago “Amuto tolea somai la tahalole.” Tio egite tola la mata keale mago “Eme balavati! Hiliti, e Iesus tolatime!”
MAR 10:50 Tio, eia hiliti harari moli, eia piligi taro la kairobola tetala, eia goio te Iesus.
MAR 10:51 Tio, e Iesus goio tahia mago “Eme masagea veia eau ge sulime mave?” Goio, la mata keale veiala mago “Tahalo uru, eau masagea veia ge la matagu ilua ge mata pulala.”
MAR 10:52 Tio, e Iesus goio veiala mago “Ioge, eme mahuliti, la vuhula eme tautaulailo seseleti taku veia eau koramulia ge vimahulime. Eme ge tuga.” Tio oio moli ovolale la matala ilua mata pulalatio, la tahalole eia goio mulimuli lou e Iesus te la gauru.
MAR 11:1 E Iesus mite me la valalua la vimari tetala, egite tuga goio hagagaviti la mautu uru e Ierusalem, egite sibitala oio la mautu ilau e Betpage me Betani, hagagavi moli te la vai la gove e Oliva. E Iesus baha taho lua la valalua la vimari tetala,
MAR 11:2 eia veia girua mago “Amulua ge goio te la mautu ale hagagavi moli ele, ge sivuti isasa e donki ale so tutubu, egite vuvu tolatia, eia oiole magirigiri, eala moli e donki ele, isasa souka pou lalai ovola. Amula ge goio ge lubea, amula ge tateagu somai.
MAR 11:3 Mai isasa ge tahi amulua mago ‘Amula ge vagoveia?’, amula ge veiala mago ‘La Uru e Iesus masagea, eia ge sae muga ovola, kama ge tabaa eia ge baha rivu lou amilua, amila ge tata rivu loua somai taume.’”
MAR 11:4 Goio, egira tuga goio hilo e donki ele, eia oio magirigiri hagagavi te la gauru, egite vuvu tolatia oio te la sosole la luma. Egira tuga goio lubea.
MAR 11:5 Egiteu ale oio magirigiri, egite tahi egirua mago “Amula ge lubea ge vagoveia?”
MAR 11:6 Tio egira goio veia giteu la vikararala ale e Iesus veitia girua. Goio egite loloa mai ele, egite veia girua mago “Taritigi.”
MAR 11:7 Egira goio lube molia e donki ele, egira tatea soio te Iesus. Egira goio rara la kairobola tegirua oata la pogala, e Iesus goio pagi sae soata ovola.
MAR 11:8 Tio la valalua me hatavivile usu goio avatia la kairobola tegiteu otalo te la gauru, isahari tai goio vali moli la halala la obu, egite avea otalo te la gauru veia e Iesus ge polo tataho ovola.
MAR 11:9 Goio, la valalua me hatavivile isahari mamuga, isahari mulimuli, egite kakusa, mimimi, egite tatola maie: Taritigi pepeho! La tahalo ale, eia guvi te la igogolu te La Tahalo Uru. La Uru ge vibalavea!
MAR 11:10 Eia ge la uru gatou mai e tubu gatou e Devit pala. Taritigi pepeho soata te La Tahalo Uru!
MAR 11:11 Goio, e Iesus mite me la valalua la vimari tetala, egite goio guvi oio e Ierusalem, egite goilo te la luma la lotu. E Iesus mata galilili, eia hilo la golugolu tomi oilo vola. Eala moli la paga maulaviti, egite goio hiliti taro lou la mautu e Ierusalem ele, egite goio te la mautu bisi e Betani.
MAR 11:12 Mai galigeli e Iesus mite me la valalua la vimari tetala, egite loio la mautu e Betani, e Iesus vitolo.
MAR 11:13 Eia goio hilo isa la obu ale mai la keme, eia masagea veia ge logoala isa la vavuala veia ge alia, eala moli ouka, la galagalala moli usu, la vavuala ouka, teale la imamala la vuluala souka.
MAR 11:14 Tio e Iesus goio igo totolo la obu ele mago “Kara igoie kara mulimuli eme kati ge vavua lou, ge ouka viruruti!” Tio eia vikara mai ele, me egiteu la valalua la vimari tetala loloa.
MAR 11:15 E Iesus mite me la valalua la vimari tetala egite guvi oio e Ierusalem, egite goilo la luma la lotu. E Iesus goilo, eia kumuli taro la valalua ale vilotoloto oilole. Eia goio vulo tugu la poro la iloto tegiteu ale gigigi la mani, eia vulo tugu tai la pulolou tegiteu ale vilotoloto la malumalu.
MAR 11:16 Eia goio mera taro egiteu veia egite umalati ge bolebole la golugolu tomi soilo la lumale.
MAR 11:17 Eia veia giteu mago “La merera te La Tahalo Uru eia maie ‘La luma taku eia la luma la kilaka te la valalua me hatavivile tomi.’ Eala moli amuto igotia mai la luma tegiteu la valalua la pakalila.”
MAR 11:18 Goio, egiteu la mulugaluga tegiteu e pris, vikapopo legiteu la tahalo la mari, egite loloa, egite papaa la gauru ale mave veia egite ge bili e Iesus ovola. La vuhula egite ilo ruru, teale la valalua me hatavivile usu karutu te la vimari te Iesus.
MAR 11:19 Goio la paga maulaviti, e Iesus mite me la valalua la vimari tetala, egite tuga taro muga e Ierusalem, egite goio la mautu isasa, egite mavutao.
MAR 11:20 Mai galigeli te la kavikoki bisi, e Iesus mite me la valalua la vimari tetala, egite beu loua soio e Ierusalem. Egite hilo lou la obu ale alalavi e Iesus igo totoloa. La obu ale eia kali sululuti.
MAR 11:21 Tio e Pita hiloa eia gabutatala rivu lou la merera te Iesus alalavi, eia goio veiale Iesus mago “Tahalo uru, male la obu ale alalavi eme mera taroa, eia kali sululuti!”
MAR 11:22 Goio, e Iesus veiala mago “Eia taritigi amuto ge tautaulailo sesele te La Tahalo Uru.
MAR 11:23 Sesele, mai la tahalo isa eia ge mera tavu la gove aleie, eia ge veiala mago ‘Eme ge hiliti, eme ge magiri olau la mago’, tio La Tahalo Uru ge suli sesele la pagale. Eala moli la tahalo ale, eia umala ge ilo lalua. Mai eia ge tautaulailo sesele te La Tahalo Uru, la masasagala tetalale eia ge puru sesele.
MAR 11:24 Eau vei seselea mutou, mai la paga isa ale amuto ge kaka La Tahalo Uru ovola, me amuto ge tau seselea la ilo mutou, tio amuto ge sau tola sesele la mapa la kilaka tamutou.
MAR 11:25 Mai amuto ge magiri te la kilaka me la tahalo isa eia igoti la iruru isa soio taume, eia taritigi veia eme ge vimavulaha taro muga leia la iruru tetala ale eia igotiamu. Mai ge mai ele, e Tama mutou tai ale oata la ilo la lage, eia ge mavulaha taro la iruru tamutou.[
MAR 11:26 Mai amuto kama ge vimavulaha egiteu e tabarabara mutou mai ele, e Tama mutou tai oata la ilo la lage, eia kama ge mavulaha taro la iruru tamutou.]”
MAR 11:27 E Iesus mite me la valalua la vimari tetala egite guvi lou oio e Ierusalem, egite goilo la luma la lotu. Tio egiteu la mulugaluga tegiteu e pris vikapopo legiteu la tahalo la mari, vikapopo tai legiteu e ururu, egite tomi goio te Iesus.
MAR 11:28 Egite tahia mago “La igogolu tomi ale eme igoa, ere veiamu ge igoa? Eme soioge veia eme ere?”
MAR 11:29 Goio, e Iesus veia giteu mago “Eau tai ge tahi amutou la tilahi isasa. Mai amuto ge koli la tilahi taku, eau tai ge veia mutou te la vuhu la viputumulila taku ale eau igogolugolu ovola.
MAR 11:30 La tilahi taku eia maie: Ere baha e Ioanes veia eia ge vuhi la valalua me hatavivile? La Tahalo Uru bahea uka la tahalo la vovo moli bahea? Amuto ge koliagu somai.”
MAR 11:31 Goio, egite goio vitahi baololi legiteu maie “Mai etato ge koliala mago ‘La Tahalo Uru baha e Ioanes’, tio eia ge tahi rivu lou etatou mago ‘Me ilava amuto kama lolo vulai tavua?’
MAR 11:32 Eala moli mai etato ge koliala veia la vuluhi e Ioanes eia la paga te la vovo moli, la kilolila ale eia kama ge taritigi.” Egite veia mai ele la vuhula egite taga la valalua, teale la valalua usu gabu tikumuti e Ioanes, egite veia eia la bilalaha sesele te La Tahalo Uru.
MAR 11:33 Tio egite goio koliale Iesus mago “Amite kama rovia.” Tio, e Iesus goio vei rivu loua giteu mago “Ealale, eau tai kama ge veipalea mutou la vuhu la viputumulila taku ale eau igogolu ovola.”
MAR 12:1 Goio, e Iesus tovo mulia giteu la valalua me hatavivile, eia veia giteu mago “La tahalo isasa eia galu la mahuma la vaen, eia goio bigomu roboa. Eia gula tai la muli la vaen la uati, veia eia ge toa perepere la vavua la vaen oilo vola, veia mulimuli eia ge sigili la bulula. Eia goio tigi tai isa la kale la pahutula oata veia ge lago robo la mahumale. Tio eia goio loto la valalua ale egite ge baumuli la mahuma tetalale, mulimuli eia tuga goio te la gale isa malau.
MAR 12:2 Goio te la imamala la vulua la vaen, eia goio baha isa la bilalaha tetala soio tegiteu la valalua ale baumuli la mahuma tetala, eia masagea veia eia ge abi bakisi la mapa la mahumale.
MAR 12:3 Eala moli egite lao tola la bilalahale, egite kue gegerua, egite goio baha taro molia, eia kavelevele moli.
MAR 12:4 Goio mulimuli e taho la mahuma eia baha taro lou isa lou soio, eala moli egite gali la gamala, egite kulumai vuloa.
MAR 12:5 Goio, mulimuli e taho la mahuma baha taro lou isa, eala moli egite bili pehoa. Tio mulimuli eia baha taro lou egiteu la bilalaha tetala usu, eala moli egite goio kue isahari, isahari tai egite bili peho egite.
MAR 12:6 “Eala moli la bilalaha isa lou soloio, ale e latule taho la mahuma, la riau. Goio mulimulito e taho la mahuma baha e latulale soio tegiteu, eia vikara maie mago ‘Soioge egite ge togo e latugu.’
MAR 12:7 “Eala moli egiteu ale baumuli la mahuma, egite goio viputumulia maie ‘Soioge la tahalole ge abi la golugolu tomi te tamala, ia? Taritigi etato ge bilia, mulimuli etato ge balava la mahuma te tamala.’
MAR 12:8 Tio egite goio sau tolea, egite bili pehoa, egite goio pigia sogala la poke la bigomu, eia tabulitio, koratio.”
MAR 12:9 Goio, e Iesus goio tahi rivu lou egiteu mago “Mave, e taho la mahumale, eia ge kolia giteu mave? Eia ge goio ge sulu tomi egiteu, me la mahumale eia ge abia giteu la valalua ale isapolo.
MAR 12:10 Amuto kama gigi lalai bakisi la merera te La Buk Tabu Ale Pala, ale eia veia maie: La sosole ale la valalua la tiligi la luma piletia, egite hilovi tarotia, igoie la sosole ale, eia maiti la sosole magiri ale sau tola la tikumu la luma tomi.
MAR 12:11 La Uru igoti la pagale, etato hiloa veia eia taritigi pepeho sesele.”
MAR 12:12 Goio, egiteu la mulugaluga tegiteu e pris mite me egiteu la tahalo la mari, egite lolo la merera ale, egite masagea veia ge lao tola e Iesus, la vuhula egite rovia veia eia ubi seseleti legiteu la vikarara la tilovo alele. Eala moli egite taga la valalua me hatavivile, egite goio hiliti taro moliti e Iesus, egite goio tuga.
MAR 12:13 Mulimuli egiteu la mulugaluga baha egiteu e pariseo isahari vikapopo me egiteu la valalua te Herod isahari soio te Iesus veia egite ge rara la merera tegiteu mai la vuo veia egite ge vitilo e Iesus oio vola.
MAR 12:14 Tio, egite goio rara la merera soio tetala mago “Tahalo la vimari, amite rovia veia eme la tahalo ale sesele, eme kama makovu taitali amiteu la mulugaluga isasa. La vikararala taume eia isa moli somai tamiteu la valalua tomi. La vikararala taume isa moliti, eme veipala sekela moli la merera te La Tahalo Uru ale sesele. Tio amite masagea veia ge tahi lalaime la tilahi isa maie: Eia koramuli taia veia etatou e Iudea ge pigi la mani soio te Sisa, ka ouka?”
MAR 12:15 Goio, e Iesus rovia veia egite masagea veia ge vitiloa, eia goio veia giteu mago “Ilava amuto tovo lalai eau mai ele? Abiagu isa e kina oiole, eau ge hiloa.”
MAR 12:16 Goio, egite goio abi isa e kina soio tetala, eia goio tahi egiteu mago “Ale la halulu lere me la kekesi tai oio vola tere?” Goio, egite koliala mago “Ale la halulule Sisa, la mulugaluga tegatou.”
MAR 12:17 Tio, e Iesus goio veia giteu mago “La paga ale te Sisa, taritigi amutou ge abi rivuale Sisa, me la paga ale te La Tahalo Uru, taritigi amuto ge abi rivua La Tahalo Uru.” Goio, egite loloa mai ele, egite karutu, egite isa kati vikara.
MAR 12:18 La haro isasa egiteu e sadiusi isahari goio te Iesus. La vimari isa tegite la valaluale, egite veia mai la tahalo ge peho, eia kamati ge mahuli rivu lou. Egite goio tahi e Iesus mago
MAR 12:19 “Tahalo la vimari, alaurati e Moses kekesi la merera isa maie ‘Mai la tahalo isa ge peho taro e rutula, e latu girua ouka, tio e tarila ge puli loua, ge savu e latu girua, ge igo la kilolile tuala ale pehoti.’
MAR 12:20 Tio e tau me tari taho vitu oio, e tua giteu puli muga la tavile isa, goio eia peho taroa, egira kama savu isa e latu girua.
MAR 12:21 Tio mulimuli la iluala puli lou la tavilele, goio eia tai peho taroa, e latu girua ouka. Tio la itolula igo loua mai ele.
MAR 12:22 Tio mai moli ele egiteu tomi ale taho vitu ele, egite peho taro tomi la tavilele, e latatu giteu tomi ouka. Mulimulito vola la tavile tai peho.
MAR 12:23 Ioge, amite ge tahime, mulimuli mai egiteu ele ge mahuli rivu lou, la tavilele eia ge e rutu lere sesele? La vuhula egite taho vitu tomi ele pulitia.”
MAR 12:24 Tio, e Iesus goio kolia giteu soio mago “Amuto kama rovi bakisi la merera te La Buk Tabu, amuto kama rovi bakisi la vagagarila te La Tahalo Uru tai, eala amuto vikara bulalahu mai ele.
MAR 12:25 Te la mahuli rivula ale mulimuli, la taulaila ge oukati. Egite ge pou moli mai egiteu la angelo ale oata te la ilo la lage.
MAR 12:26 Eala moli la vimari tamutou ale amuto veia egiteu ale pehoti kamati ge mahuli rivu lou, eau ge vikara bakisi te ale. Soioge amuto soukama gigi la merera te La Buk Tabu ale e Moses kekesia, la veimulipolola te la popopo la obu ale kaha, ia? Te la veimulipololale, La Tahalo Uru veiale Moses maie ‘Eau La Uru te Abraham, eau La Uru te Isak, eau La Uru te Iakob.’
MAR 12:27 Egiteu ele kama peho, ouka, la kalulu giteu oio mahulihuli moli. La Tahalo Uru eia La Uru giteu ale la kalulu giteu mahuli, eala amuto visigolo sesele pasi te la vimari tamutou!”
MAR 12:28 Tio, la tahalo la mari isasa, eia goio loloa e Iesus mite me la valalua alele, egite oio visusukula la merera. Eia loloa e Iesus eia koli tataho la merera tegiteu e sadiusi, eia goio tahi e Iesus mago “Mave, la merera te La Tahalo Uru ale mave eia muga sesele te la merera tomi ale eia veitia gatou ovola?”
MAR 12:29 E Iesus koli la tilahi tetala mago “La merera ale muga sesele eia maie ‘Amutou la valalua me hatavivile e Israel, amuto ge loloa somai! La Tahalo Uru, La Uru gatou, eia sekela moli uru.
MAR 12:30 Etato ge masaga tavu sesele La Tahalo Uru, La Uru gatou, etato ge masaga tavu seselea te la tia gatou tomi, te la kalulu gatou tomi, te la gabutatalala tomi tegatou, te la vagagarila tomi tegatou isasasa tai.’
MAR 12:31 Me la ilua la merera te La Tahalo Uru tavu etatou, eia maie ‘Etato ge gogo egiteu e tabarabara gatou tomi mai moli etato ge gogo rivu lou etatou.’ La merera isa oukati lou ge uru te la merera ale iluale.”
MAR 12:32 Goio, la tahalo la mari ele goio veiale Iesus mago “Tahalo la vimari, la merera taume ele eia sesele, La Tahalo Uru sekela moli eia uru, isa oukati lou uru mai eia.
MAR 12:33 Eia sesele, etato ge masaga tavu seselea, te la tia gatou tomi, te la gabutatalala tomi tegatou, te la vagagarila tomi tegatou isasasa tai. Etato ge gogo tai egiteu e tabarabara gatou, mai etato ge gogo rivu lou etatou. Mai etato ge mulimuli la merera ale iluale, ale la vulovulo ale taritigi pepeho, eia muga te la vaabila tomi ale etatou e Iuda vitikumu la lotu tegatou ovola.”
MAR 12:34 Goio, e Iesus loloa veia eia koli tataho la merera tetala mai la tahalo la mari sesele, eia goio veiala mago “Hagagavi moliti eme ge goilo te la pulolou la matagagala te La Tahalo Uru.” Tio egiteu tomi ale oiole, egite taga taroti e Iesus, egite kamati tahi loua isa la tilahi.
MAR 12:35 E Iesus popou oilo la luma la lotu, eia vimari la valalua me hatavivile tomi, eia goio tahi giteu mago “Ilava sesele egiteu la tahalo la mari egite veia e Kraist eia bisi me e Devit uru, veia e Kraist ge toila ‘pupu’?
MAR 12:36 La vuhula alaurati La Kalulu La Marokala eia pou te Devit, me oio vola e Devit goio kekesi la merera ale maie: La Tahalo Uru eia vikara soio te La Uru taku mago ‘Eme ge pou omai te la baligu, te la galegu e gata, kara te ale eau ge vipou egiteu la gima taume otalo te la uluva la vahamu, eme ge soa kuru egiteu.’
MAR 12:37 Oio te la mererale, e Devit moli eia toila e Kraist ‘La Uru taku’, eala moli mai e Devit ge e tubule Kraist mai amuto veia, mave sesele eia ge gabutalea veia eia bisi moli me e Kraist eia uru tetala?” La valalua me hatavivile usu lolo la merera te Iesus, egiteu sagege sesele ovola.
MAR 12:38 E Iesus goio vimari egiteu maie “Amuto ge vibaumuli amutou tegiteu la tahalo la mari te la viputumulila te Moses. Egiteu masaga pasi ge lavalava malalau sotalo, egite masaga pasi la valalua me hatavivile ge laharoa giteu te la tia la mautu.
MAR 12:39 Egite masaga pasi tai veia ge pou mamuga te la mata la valalua oilo la luma la lotu, egiteu masaga tai la pulolou la uru mamuga te la mata giteu la valalua ale pou te la ilali.
MAR 12:40 Egite masaga tai ge vikaluvu pasi la golugolu tegiteu e hatavivile la baharu. Egite lapu malalau la kilaka tegiteu, eala moli la kilaka tegiteu la golu bulalahu moli. La Tahalo Uru ge vilai sesele egiteu.”
MAR 12:41 Goio, e Iesus goio pou oilo la luma la lotu hagagavi moli te la tilalau la mani, eia hilo egiteu la valalua me hatavivile, egite pipigi la mani soio te la tilalau ele. Egiteu la tahalo la vuliti, usu tegiteu pigi la mani ale uru sesele.
MAR 12:42 Eala moli e maura la baharu isa gomai, eia pigi la uati ilua moli tegiteu e Iudea, mai moli e toea isasa.
MAR 12:43 Goio e Iesus hiloa mai ele, eia goio tola vikapopo egiteu la valalua la vimari tetala, eia veia giteu mago “Eau veia seselea mutou, la baharu ele, eia pigiti la mani ale uru pepeho, la vaabila tetala eia uru te la vaabila tegiteu la valalua me hatavivile tomi ale egite pigia.
MAR 12:44 La vuhula egiteu ale tahola la mani uru, egite pigi moli la gege la mani tegiteu bakisi, eala moli e maura la baharu ele, eia savele sesele la mani, eia pigi tomitia ale bakisi eia taholea, me maura la mani bakisi oukati lou te la iloto la ilali tetala.”
MAR 13:1 Goio, e Iesus mite me la valalua la vimari tetala, egite tuga taro la luma la lotu, la tahalo la vimari tetala isasa, eia goio veiala mago “Tahalo La Vimari, hilage, eme hilo la lumaluma ururu ale egite tigila la uatati ale marasa! Egiteu taritigi pasi!”
MAR 13:2 Eala moli e Iesus goio koli la merera tetala mago “Egiteu la lumaluma ururu alele, mulimuli egiteu la valalua la gima ge lobe taro tomi molia, la uatati oio vola kamati ge vitabuli tatalu lou.”
MAR 13:3 Mulimuli e Iesus goio pou oata la gove e Oliva, eia mata sotalo te la luma la lotu ale uru, goio e Pita, e Iakob, e Ioanes, me Andrew, egite goio tetala, egite tahi kokovua la tilahi isasa mago
MAR 13:4 “Eme ge veia miteu, la paga ale eme veitia miteu ovola, eia ge sibitala gaisa? Amite ge rovia mave?”
MAR 13:5 Tio, e Iesus veia giteu mago “Amuto ge vibaumuli amutou tegiteu la tahalo la visigologolola, egite souka ge viruru amutou.
MAR 13:6 La valalua usu ge guvi, egite ge toi la isagu soio tamutou veia egiteu e Kraist, la bilalaha te La Tahalo Uru, me egite ge viruru la valalua me hatavivile usu mai ele.
MAR 13:7 Mai mulimuli amuto ge lolo la tilali la ruruga me la rere la ruruga tai ge tali, amuto umala ge karutula, la papaga tomi mai alele, egite ge sibitala pala muga, eala moli la tapasi la maututula eia ge souka.
MAR 13:8 La maratatila isahari ge hiliti tavu la maratatila isapolo, egite ge vaubi. La gale isa ge hiliti tavu la gale isa lou, egite ge vaubi. Te la baa isahari e malugulugu ge umu, la vitolola tai ge uru, eala moli alele eia ge mai moli la siloko la iligiligi la piligo, eia kama ge kaluvu hari.
MAR 13:9 “Amuto ge baumuli tigi amutou, egiteu la gima taku ge sugu taro amutou soio te la viputumulila, egite ge kue amutou oilo la luma la lotu, egite ge vimagiri amutou te la mata giteu la mulugaluga, teale amutou taku. Ge mai moli ele, amuto ge veipala la valolo ale taritigi soio tegiteu.
MAR 13:10 La maratatila tomi egite ge lolo pala muga la valolo ale taritigi, tio mulimuli ge la tapasi la maututula.
MAR 13:11 Mai egite ge lao tola amutou, ge vimagiri amutou te la vigagiala, amuto umala ge ilo rururu, veia amutou la merera ouka ale amuto ge veia giteu. Amuto ge veipala moli la merera ale La Tahalo Uru ge abia mutou. La vuhula, kama ge amutou ale ge vikara, La Kalulu La Marokala eia moli ge vikara.
MAR 13:12 “La valalua me hatavivile isahari, egite ge sugu taro egiteu e tabarabara giteu, veia egiteu la gima taku ge bili egite. Isahari tai ge sugu taro e latatu giteu veia egiteu la gima ge bili egite. E latatu giteu ge hiliti ge sugu taro e tatama giteu me tatila giteu tai, veia egiteu la gima ge bili peho egiteu.
MAR 13:13 La valalua me hatavivile usu ge gima amutou, la vuhula amutou taku, eala moli mai isasa ge magiri vagari moli kara te la tapasi la maututula, tio La Tahalo Uru ge vibalavala la mahulila ale sesele, la kaluvula ge ouka.
MAR 13:14 “Mulimuli amuto ge hilo la puigolo isa uru ale kama kokora, mai la tahalo, egite ge vimagiria oilo te la luma la lotu. La iruru ale, eia tikumu sesele, la pagale, eia kama kokora viruru. Mai amuto ge hiloa mai ele, amuto ge rovia veia eia kama ge tabaa, la maututula tomi ge sululu.” (Mai isa ge gigi la merera aleie, taritigi eia ge rovi tigi la masovala.) “Tio te la haro ale egite ge igo la pagale, eia taritigi egiteu ale oio la gale e Iudea, egite ge hiliti ge hele soata la goegove.
MAR 13:15 Mai la tahalo isasa ge pou ogala la matabala la luma tetala te la haro alele, eia umala ge tiroro soilo veia ge abi la golugolu tetala, eia ge hele moli.
MAR 13:16 Mai tai la tahalo isasa eia orivo vulalai, eia umala ge beu tavu loua la kairobola tetala ale eia tau taroa.
MAR 13:17 E maura miteu e hatavivile ale savulatu te la haro alele, me egiteu e hatavivile tai ale visususu e latatu giteu la pepeso, egite kama koramulia ge hele.
MAR 13:18 Taritigi amuto ge kaka veia la viligilale eia kama ge sibitala tavu amutou te la leavala la maigi.
MAR 13:19 La vuhula la imamalale ge kama kokora sesele, pala te la siloko la vipoupoula te La Tahalo Uru karati igoie, la valalua me hatavivile kama ligi mai ele, mulimuli tai la iligiligi isa kama ge uru mai la iligiligi alele.
MAR 13:20 Mai La Uru kama ge barautu botoa la viligilale, isa kama ge mahuli utu. Eala moli La Uru eia hiloviti isahari oio tegiteu veia eia ge suli egiteu, eia ge barautu boto la iligiligi ele, la vuhula eia gogo egiteu.
MAR 13:21 Mai te la haro alele la tahalo isa eia ge veia mutou mago ‘Male ge, ale e Kraist!’ me ‘Hiloa, e Kraist oiole!’ tio amuto ge rovia veia egite visigolo.
MAR 13:22 Egiteu la tahalo la visigologolola isahari ge guvi ge veia egiteu e Kraist, me isahari tai ge guvi ge veia egiteu la bilalaha te La Uru. Egite ge igo la irovilala me la golu la karutula isahari tai, la vuhula egite masagea veia ge tutugolo egiteu ale La Uru hiloviti egite, egite veia ge viruru egiteu la valalua te Kraist mai ele.
MAR 13:23 Tio amuto ge baumuli tigi amutou, la vuhula eau vei matagagatia mutou pala muga te la tovolalaila tomi ale ge sibitala.
MAR 13:24 “Mulimuli la iligiligi alele ge kaluvu, la mata la haro me la taio ge kuma,
MAR 13:25 egiteu la matatabu ale oata te la mori ge paru sotalo, la mori oata ge malugu bebebe.
MAR 13:26 Tio te la haro alele egite ge hilo e Latu La Tahalo eia ge sibitala loata te la tuluvu la mori, eia ge vagari sesele, eia ge marasa pepeho.
MAR 13:27 Tio eia ge baha egiteu e angelo veia egite ge puli vikapopo la valalua me hatavivile ale eia hiloviti egiteu. Egiteu ale lomuli, loale, loilo, lolau, egiteu tomi ale loio te la igaga la magasa tomi, eia ge puli egiteu soio tetala.
MAR 13:28 “Etato ge vimari bakisi te la obu ale ge taro. Mai eia ge taroti eia ge tututuvu rivu lou, tio amuto ge rovia veia eia mahatiti, la leavala kaluvuti.
MAR 13:29 Tio mai moli ele amuto ge hilo la papaga ale eau veitia mutou ovola eia ge sibitala, tio amuto ge rovia veia e Latu La Tahalo, eia hagagaviti, eia ogala moli la matapiro.
MAR 13:30 Eau vei seselea mutou, amutou la tuvu ale igoie, isahari tamutou soukama ge peho, la papagale ge sibitala.
MAR 13:31 La mori me la magasa ge kokovu, eala moli la merera taku kama ge kokovu.
MAR 13:32 “La tahalo isa kama ge rovi la haro ale eau ge guvi ovola, me la mata la haro tai ovola. Egiteu la angelo tai oata te la ilo la lage, egite tai kama ge rovia. E Latu La Tahalo Uru tai kama ge rovia, e Tete moli sekela eia rovia.
MAR 13:33 Amuto ge vibaumuli, amuto ge lago tataho, la vuhula amuto kama rovi la guluvi te Latu La Tahalo.
MAR 13:34 Ale eia ge mai la tahalo isa ale eia tuga taro la mautu tetala ge goio la gale isapolo, eia veia giteu la valalua tetala veia egite ge vibaumuli tigi la golugolu tetala tomi ale oio la mautu. Eia goio tabari legiteu la igogolu tegiteu isasasa, eia goio tola taroa la tahalo isa veia eia ge vibaumuli la luma tetala.
MAR 13:35 “Tiele, eau vimari amutou mai ele veia amuto ge lago tataho, la vuhula amuto kama rovia veia gaisa e taho la luma ge guvi. Eia ge guvi te la maulavi, uka te la logo uru, uka te kou, uka ale la paga mamagati eia ge guvi?
MAR 13:36 Tio amuto ge pahutu tigi, eia kama taritigi veia e taho la luma ge guvi, eia ge vikarutu robo amutou, eia ge hilo vuti amutou oio mamavuta moli.
MAR 13:37 Tio la merera alele, eia koramuli la valalua me hatavivile tomi. Taritigi amuto tomi ge raragi tigi te la guluvi taku.”
MAR 14:1 La haro ilua moliti soloio, egiteu e Iuda ge pou te La Ilali La Poloselela. Te la ilali alele, egiteu ali la bret ale la is kama visogoa, ale la vulovulo giteu isale. Eala moli egiteu la mulugaluga tegiteu e pris vikapopo legiteu la tahalo la mari, egite paa muli la gauru isasa veia egite ge lao tola kokovu e Iesus veia egite ge bili pehoa.
MAR 14:2 Egite vikara mago “Etato umala ge lao tolea te la haro La Ilali La Poloselela, la valalua souka ge vahiliti la vikokuela.”
MAR 14:3 E Iesus pou oio la mautu e Betani oio te la luma te Saimon. La tahalo ale, la vovola pala sereka gegegeru. E Iesus pou alali, tio la tavile isa loio, eia vahari la botol la bulu la obu ale mali vivili, la mapa la lalu alele eia uru pasi. La tavilele goio voropola la botol bisi ele, eia abia goio tigitaro la lalula oata te la gamale Iesus.
MAR 14:4 Eala moli la valalua isahari oio hiloa, egite goio vikara ovola maie “Ilava eia tigitaro bulalahu moliti la lalu ele?
MAR 14:5 Mai etato ge vaharia soio tegiteu la valalua la iloto, eia koramulia etato ge abi e kina salatu tolu ovola, veia ge suli egiteu ale pou la savelela.” Tio egite goio igo totolo la tavilele.
MAR 14:6 Eala moli e Iesus veia giteu mago “Korati ele. Ilava amutou igo totoloa mai ele? Eia igoti la paga ale taritigi pepeho somai taku.
MAR 14:7 La valalua me hatavivile ale pou la savelela, egite ge pou tamutou la haroharo tomi, egite kama ge hiliti taro amutou. Mai isa masagea veia eia ge suli egiteu, eia ge igoa, eala moli hagagaviti eau kamati ge pou vikapopo le amutou.
MAR 14:8 La visuli bakisi ale eia koramulia, la tavile alele eia sulitiau ovola. Eia igoti la pagale, eia mai ale raragi mugati la vovogu te la pileho taku.
MAR 14:9 Eau vei seselea mutou, oio te la maututula tomi ale egite ge veipala la valolo ale taritigi ovola, egite ge veipala tai la paga ale la tavile alele igotiagu, la igogolu tetala ge mahuli moli mai ele.”
MAR 14:10 Goio, e Iudas Iskariot, eia isa tegiteu ale savulusa gete lua la valalua la vimari te Iesus, eia goio tegiteu la mulugaluga tegiteu e pris veia eia ge sugu taro e Iesus soio tegite.
MAR 14:11 Tio egiteu e pris loloa mai ele, egite sagegetio, egite goio vei seseleala veia egite ge lotoa. E Iudas goio paa muli la gauru ale eia ge sugu taro e Iesus soio tegiteu.
MAR 14:12 Tio, ale la siloko la haro ale egiteu e Iuda ge ali la bret ale kama sogo. Te la haro ale, egiteu e Iuda bilibili e latu la sip te La Ilali La Poloselela. Tio egiteu la valalua la vimari te Iesus goio tahia mago “Mave, eme masagea veia amite ge raragiamu La Ilali La Poloselela oiove?”
MAR 14:13 Goio, e Iesus goio baha taro taho lua tegiteu, eia goio veia girua mago “Amulua ge goio te la mautu uru. La tahalo isasa ale ababi la baket la lalu, eia ge poga amulua, amula ge tilimulia.
MAR 14:14 Eia ge goio te la luma isasa, me amula ge tahi lalaia e taho la lumale maie ‘La Tahalo La Vimari tamilua baha amilua somai taume. eia veia amilua ge tahime mago: La baa bakisi oio te la luma taume ale koramuli amiteu la mosi ge pou ovola, eia oiove? Amite veia ge ali La Ilali La Poloselela oio vola.’
MAR 14:15 Tio la tahalole ge vahilo le amulua la kapiutu ale uru oata la luma, la poro la ilali oio, la pulolou oio, koramulia etato ge pou te la ilali tegatou ovola. Tio amula ge raragia gatou la ilali oio volao.”
MAR 14:16 Tio, egira tuga goio la mautu uru, egira sivuti la luma ale e Iesus veitia girua ovola, egira goio raragi La Ilali La Poloselela oio volao.
MAR 14:17 Tio, la paga logoti, e Iesus mite me la valalua la vimari tetala ale savulusa gete lua, egite guvi.
MAR 14:18 Egite goio pou, egite alali. E Iesus goio veia giteu mago “Eau vei seselea mutou, isa oio kabili tamutou ele ge sugu taroau soio tegiteu la valalua la gima. Amila me la tahalo ale, amila vitivu vikapopo.”
MAR 14:19 Egite tomi loloa mai ele, egite ilo buruko sesele, egiteu isasasa goio tahia mago “Eme soioge veia eau, ia? Eau ale ouka!”
MAR 14:20 Goio, e Iesus kolia giteu mago “Isa moli tamutou ale savulusa gete luale, eiala moli ele amilua vitivu vikapopo.
MAR 14:21 Mai moli ale la Buk Tabu Ale Pala eia veitia, e Latu La Tahalo ge vilua, eala moli e maura la tahalo ale ge sugu taroau mai ele, eia taritigi mai e tilala kama ge pigoa.”
MAR 14:22 Egite goio pou vikapopo te La Ilali La Poloselela, e Iesus abi la bret isa, eia vaisale La Tahalo Uru ovola, eia goio tovia giteu la valalua la vimari tetala, eia veia giteu mago “Amuto ge abia, alia, ale la mailigu.”
MAR 14:23 Goio eia abi isa la kap la vaen, eia vaisale La Tahalo Uru ovola, eia goio abia giteu, egite tomi liua.
MAR 14:24 Eia goio veia giteu mago “Aleie la kasosogu ale mai la irovilala ale halaba, ale amuto ge rovia veia la merera te La Tahalo Uru me la igogolu taku soio tamutou, eia seseleti. La kasosogu ge pagegele, eia ge vimahuli la valalua me hatavivile usu.
MAR 14:25 Eau vei seselea mutou, eau kati ge liu lou la vaen kara te ale eau ge liu la vaen ale halaba oio te la bali La Tahalo Uru.”
MAR 14:26 Tio e Iesus veia giteu mai ele, egite goio bau isa la bilau la vaisalela, egiteu bau kaluvu, egite hiliti goio tuga. Egite tuga, egite goio te la gove e Oliva, egite pouo.
MAR 14:27 Tio, e Iesus veia giteu la valalua la vimari tetala mago “Amuto mulimuli ge taga taroau, mai ale egiteu kekesitia te La Buk Tabu Ale Pala maie: Eau La Tahalo Uru, eau ge bili la tahalo la vibaumuli la sip, la sip tomi ge hele bura.
MAR 14:28 Eala moli eau ge mahuli rivu lou, eau ge mamuga soio e Galilea, amuto ge mulimuli.”
MAR 14:29 Eala moli e Pita goio hiliti, eia veiale Iesus mago “Egiteu tomi ele ge taga tarome, eau moli ge ouka.”
MAR 14:30 Goio, e Iesus baoli louala mago “Eau vei seseleamu, galogo e kukureko souka ge tali la vaka luala, eme ge tahi taroau vaka tolu.”
MAR 14:31 Eala moli e Pita giriri vagari mago “Mai egite ge bilime, egite ge bili tai eau, egite ge bili tomi etalua, eau kama ge tahi tarome.” Goio, egiteu tomi la valalua la vimari tetalale, egite goio vei taiale Iesus mai ele.
MAR 14:32 Goio, e Iesus mite me la valalua la vimari tetala, egite goio la malilo ale egite toila e Getesemane, e Iesus goio veia giteu mago “Amuto ge pou muga bakisi omaie, eau ge pou soiole ge kaka.”
MAR 14:33 Eia goio puli egiteu ale taho tolu, e Pita, e Iakob, e Ioanes, egiteu tomi ele goio tilimulia soio. Eala moli e Iesus eia ilo buruko sesele, la gabutatalala tetala marapa viruru.
MAR 14:34 Tio eia goio veia giteu mago “Eau ilo buruko pepeho pasi mai ale ge peho. Amuto ge pou omai, ge pou taliau.”
MAR 14:35 Tio, e Iesus goio tuga moli bakisi soio, eia gotalo mavuta lagu tugu. Eia kaka veia mai La Tahalo Uru ge masagea, eia taritigi veia la iloburukola tetala te la mata la haro alele ge hele taroa.
MAR 14:36 Eia kaka e Tamala mago “Tete, eme koramulia ge igo la papaga tomi, eia taritigi eme ge abi taro la iloburukola ale pogati eaue. Eala moli umala ge tilimuli la masasagala taku, ge tilimuli moliti la masasagala taume.”
MAR 14:37 Goio, eia goio beua soio tegiteu la valalua la vimari tetala, eia hilo egiteu, egite oio mavutati. Eia goio veiale Pita mago “Saimon, eme mavuta, ia? Mave, eme kama koramulia ge pou taliau la mata la haro isa moli, ia?
MAR 14:38 Amuto ge pou ge raragi tigi, amuto ge kaka, la vuhula e Satan souka ge tovo lalai amutou. Soioge la kalulu mutou vagari, eala moli la vovo mutou kati vagari.”
MAR 14:39 Tio, eia goio kaka lou mai ale igoitio.
MAR 14:40 Mulimuli eia goio beu loua soio tegiteu la valalua la vimari tetala, egite mavutati lou, egite mata tutulu pepeho. E Iesus goio palo egiteu, egite mahela pasi, egite isa kama vikara.
MAR 14:41 Goio, e Iesus goio kaka lou, mulimuli eia goio beu loua soio tegiteu la vaka tolula, egiteu oio mavutati lou. Tio eia goio veia giteu mago “Amuto mavutati lou, ia? Korati ele, la mata la haro guviti ale egite ge sugu taro e Latu La Tahalo soio tegiteu la valalua ale kama kokora.
MAR 14:42 Muga, etato ge tuga. Hiloa, la tahalo ale ge veipala eau eia loio sibitalati ele!”
MAR 14:43 E Iesus so vikarakara soio tegiteu la valalua la vimari tetalale, e Iudas sibitala robo egiteu. Ale e Iudas eia isa tegiteu la valalua te Iesus ale savulusa gete lua. Eala moli la tala la valalua, egite guvi vikapopo le Iudas ele, egite ababi la voviso me la obobu. Eala moli egite kama guvi bulalahu, egiteu la gima tomi tetala, mai egiteu la mulugaluga tegiteu e pris, me egiteu la tahalo la mari, me egiteu e ururu tai, egiteu alele baha egiteu somai veia egite ge lao tolea.
MAR 14:44 Tio e Iudas vei loho mugatia giteu mago “Amuto ge hilo la tahalo ale eau ge lao roboao, me eiala moli ele. Amuto ge lao tolea, amutou ge sau tola tigia, ge pulia soioe.”
MAR 14:45 Goio e Iudas goio sele tavu moli e Iesus, eia veiala mago “Eme la uru taku!” Tio eia goio lao robo e Iesus.
MAR 14:46 La valalua hiloa eia lao robotia mai ele, egite goio lao tolea.
MAR 14:47 Eala moli la tahalo isa ale magiri hagagavi te Iesus, eia kamu tavu la viso tetala, eia goio barautu taro la gavusa la bilalaha tegiteu e pris isasa.
MAR 14:48 Eala moli e Iesus goio veia giteu mago “Amuto guviti ele, amuto ababi la voviso, la obobu veia amuto ge lao toleau mai la tahalo ale vahiliti la vaubila soio te gavman, ia?
MAR 14:49 La haroharo usu etato pou vikapopo oio la luma la lotu, eau vimarimari amutou, amuto kama lao toleau. Eala moli amuto igoa mai ele, me oio vola la merera te La Buk Tabu Ale Pala eia puru seseleti.”
MAR 14:50 Eia veia giteu mai ele, egite la valalua la vimari tetala tomi hiliti, egite hele taroa.
MAR 14:51 Eala moli la hatamalelaba isa eia ga tilimuli e Iesus soio, eia kisi la lavalava ale kakea te la kabilila. Goio egiteu la bilalaha tegite pris sau tolea,
MAR 14:52 eia goio hele taro la lavalava tetala, eia hele bulalahu moli.
MAR 14:53 Goio, egite vahari e Iesus soio te la mulugaluga tegiteu e pris. Egiteu la mulugaluga tegiteu e pris, vikapopo me egiteu e ururu, vikapopo tai me egiteu la tahalo la mari, egite tomi ele oio vipou vikapopo.
MAR 14:54 Eala moli e Pita tahoale Iesus ebikoka, eia goilo te la bigomu la luma te la mulugaluga tegiteu e pris, eia pou vikapopo me egiteu la valalua la vagari robola tegiteu e pris, eia malulu la havi.
MAR 14:55 Egiteu e pris vikapopo tai me egiteu e ururu tomi ele, egite paa muli la valalua isahari ale ge veipala la iruru ale e Iesus igotia, veia egite ge bilia oio vola. Eala moli egite kama sivuti isa la tahalo ale koramulia ge veipala la merera isa mai ele.
MAR 14:56 La valalua usu virere taitali moli e Iesus, eala moli la merera tegiteu kama visauru.
MAR 14:57 La valalua isahari kakau moliala la visigologolola maie
MAR 14:58 “Pala amite loloa eia vikara mago ‘Eau ge lobe la luma la lotu ale uru ale egite vimagiria, la haro itolu ge polo, eau ge vimagiri lou isa, eala moli eau kama ge vimagirila la limagu.’”
MAR 14:59 Eala moli la merera ale egite veia mai ele, eia tai kama visauru.
MAR 14:60 Tio, la mulugaluga tegiteu e pris, eia goio magiri te la lagu giteu, eia tahi e Iesus mago “Eme la kiloli la merera isa ouka soio tegiteu, ia? La vuhu la merera ale egite virere talitime ovola, eia soioge mave?”
MAR 14:61 Eala moli e Iesus makovu moli, eia kama koli la tilahi tetala. Tio, eia goio tahi lou e Iesus mago “Eme e Kraist sesele? Eme e Latu La Uru Ale Taritigi, e?”
MAR 14:62 E Iesus goio koliala mago “Meie, eiau molie. Mulimuli amuto ge hilo e Latu La Tahalo, eau ge pou te la bali La Tahalo Uru oio te la galela e gata, eau ge guvi loata te la tuluvu la mori, eau ge gomai.”
MAR 14:63 Goio, la mulugaluga tegiteu e pris eia loloa mai ele, eia goio sile lou la kairobola tetala lou, la vuhula eia igo totolo sesele. Eia goio veia giteu mago “Etato kama ge tola isa lou la tahalo ale ge veipala la iruru tetala.
MAR 14:64 Amuto lolotia eia mera popopoti La Tahalo Uru. Amuto gabutatala mave?” Goio, egiteu e ururu tomi loloa mai ele, egite goio veia la iruru tetala oio, koramulia egite ge bilia ovola eia ge peho.
MAR 14:65 Isahari tegiteu goio kavurasi volua. Egite avu robo la matala, egite goio kuea, egite tahia mago “Ioge, eme ge vikara matagaga, ere kuetime ele?” Tio egiteu la tahalo la vagari robola te la luma la lotu, egite goio pulia soio, egite lubi vuloa.
MAR 14:66 Eala moli, e Pita pou ogala te la ilo la bigomu la luma. La tavile isasa, la bilalaha te la mulugaluga tegiteu e pris, eia goiole,
MAR 14:67 eia hilo e Pita eia malulu la havi. Goio la tavilele mata tavua, eia veiala mago “Eme tai, pala eme pou vikapopo le Iesus la tau Nasaret.”
MAR 14:68 Eala moli e Pita goio tahi taro, eia vei mago “Ouka, eau kama rovi la tahalo ale eme veveiale.” Eia veiala mai ele, eia goio gali sogala, eia goio magiri te la mata la bigomu la luma, goio e kukureko tali la mulugala.
MAR 14:69 La tavilele goio hilo lou e Pita, eia susukuala, eia goio veia giteu la valalua ale magiri hagagavi ele mago “Eia sesele, la tahalo aleie, eia oilo moli tegiteu ele.”
MAR 14:70 Eala moli e Pita loloa mai ele, eia goio tahi taro lou. Goio, tabaa bakisi, la valalua isahari ale magiri hagagavi te Pitale, egite goio veiala mago “Eia sesele, eme la tahalo isa tegiteu ele, la mautu taume e Galilea.”
MAR 14:71 Tio e Pita loloa mai ele, eia goio vikara vagari sesele, eia veia giteu mago “Sesele oata, eau kama rovi la tahalo ale amuto veveiagu ele. Mai eau ge visigolo amutou, La Tahalo Uru ge biliau.”
MAR 14:72 Eala moli eia so giririri mai ele, e kukureko goio tali lou la vaka luala. Tio e Pita loloa mai ele, eia goio gabutatala rivu lou la merera ale e Iesus pala veiala, ale eia veia maie mago “E kukureko souka ge tali la vaka luala, eme ge tahi taroau vaka tolu veia eme kama rovi eau.” Tio e Pita goio gabutatala rivu lou la merera te Iesus aleie, eia ilo buruko pepeho sesele, eia talitio.
MAR 15:1 Tio hagolo mamaga mai galigeli te la kavikoki bisi, egiteu la mulugaluga tegiteu e pris, vikapopo legiteu e ururu, me egiteu tai la tahalo la mari, me egiteu a kansel tegiteu e Iuda tai, egite tomi ele goio viputumuli muga e Iesus, veia ge vimagiria te la vigagiala oio te Pailat. Tio egite goio kisia, egite tatea soio, egite goio tutua soio te Pailat.
MAR 15:2 E Pailat goio tahia mago “Mave, eme la uru giteu e Iuda, ia?” Goio, e Iesus koliala mago “Ee, eia mai moli ale eme veitiale.”
MAR 15:3 Tio, egite la mulugaluga tegiteu e pris hiliti, egite ubi le Iesus la merera usu.
MAR 15:4 Tiele e Pailat goio tahi loua mago “Eme la kiloli la merera isa ouka, ia? Hiloa, egite ubibi leme la merera usu!”
MAR 15:5 Eala moli e Iesus kamati koli lou isa la merera, me e Pailat eia gabutatala papai lou ovolale.
MAR 15:6 Tio, te la pougolu La Ilali La Poloselela, te la leavalavala tomi, e Pailat ge lube isasa la tahalo ale egiteu e Rom kapi roboa. La valalua ge toi isa la tahalo ale egite masagea, tio e Pailat ge lubea giteu.
MAR 15:7 Tio te la leavala alele, la tahalo isasa pou te la luma la kilisi, la isala e Barabas. E Barabas mite me la valalua isahari, egite pala vahiliti la vaubila soio te gavman, egite bili peho isahari la valalua, e gavman kapi robo egiteu.
MAR 15:8 Tio la valalua me hatavivile usu, egite hiliti tavu e Pailat, egite kakea veia eia ge igo loua mai ale pala eia igigoa, veia eia ge lubea giteu isasa la tahalo ale pou te la luma la kilisi.
MAR 15:9 Goio, e Pailat koli la merera tegiteu mago “Soioge amuto masagea veia eau ge lubea mutou la uru mutou e Iuda, ia?”
MAR 15:10 La vuhula eia rovia veia egiteu la mulugaluga tegiteu e pris, la tia giteu kamati taritigiale Iesus, me oio vola egite tutuala somai tetala.
MAR 15:11 Eala moli egite la mulugaluga tegiteu e pris karasuku la valalua me hatavivile veia egite ge kaka e Pailat veia eia ge lubea giteu e Barabas.
MAR 15:12 Tio, e Pailat goio vei rivu loua giteu mago “Me mave te la tahalo ale amuto toia veia eia la uru mutou e Iuda?”
MAR 15:13 Goio, egite tola vagari soata mago “Katu tolea te la tauvalautu.”
MAR 15:14 E Pailat loloa mai ele, eia goio tahi egiteu mago “Ilava? Eia igo la iruru ale mave?” Eala moli egite goio tola vagari sesele lou soata, egite karasuku pepehoa mago “Katu tolea te la tauvalautu.”
MAR 15:15 Goio, e Pailat masagea veia ge igo gogoma moli egiteu, eia kama masaga egite ge igo totoloa, eala eia goio lubea giteu e Barabas ele. Tio eia goio piligi e Iesus soio tegiteu la valalua la vaubila veia egite ge kumamasi vulo mugea, veia egite ge katu tolea oata te la tauvalautu.
MAR 15:16 La tete la valalua la vaubila, egite goio puli e Iesus soilo te la bigomu te gavman, egite baha tavu muga e tabarabara giteu tomi veia egite ge goio ge lege vahi e Iesus.
MAR 15:17 Egite goio vikai le Iesus la kairobola ale magesegese, egite viri e dahe, egite igo isa e vevea ovola, egite goio taua oata te la gamala.
MAR 15:18 Egite vaisale gologolo molia mago “Taritigi sesele! Eme la uru giteu e Iuda!”
MAR 15:19 Goio egite kumamasi la gamala la viro, egite kavurasi volu taia. Egite goio toto tulu otalo, egite togo golo molia mai ele.
MAR 15:20 Egite lege vahia kaluvu, egite goio kai taro leia la kairobola ale magesegese, egite goio vikai lou leia la kairobola tetala, egite goio tatea sogala veia egite ge goio ge katu tolea oata te la tauvalautu.
MAR 15:21 La tahalo isasa, la isala e Saimon, eia loio tatuga veia ge goluma e Ierusalem. La tahalole eia loio la mautu e Kirene, eia e tamale Aleksanda me Rupas. Goma egite la valalua la vaubila goio veiale Saimon ele mago “Eme ge bole la tauvalautu te Iesus.”
MAR 15:22 Egite goio puli e Iesus soio te la popoiti isa bisi, egite toila e Golgota. Me la masova la mererale eia maie: La gama la tahalo.
MAR 15:23 Egiteu isahari ale malelei ele, egite veia ge abiale Iesus la lalu la vaen bakisi ale egite vuloa vikapopo me la marasin ale ge suli la iligiligi tetala, eala moli e Iesus toua.
MAR 15:24 Goio egite katu tolea oata te la tauvalautu. Egite la valalua la vaubila abi la kairobola me la lavalava tomi tetala, egite goio vipigi vulo la satu veia ere ge balava la kulikuli ale mave ale mave.
MAR 15:25 Tio, ale la mata la haro ualasiu te la kavikoki ale egite vagoata e Iesus ovola.
MAR 15:26 Oata te la gama la tauvalautu, egite kekesi la iruru ale egite veia eia igoa, egite kekesi la merera maie: ALE LA MULUGALUGA TEGITEU E IUDA.
MAR 15:27 Oio la balile Iesus egite vagoata tai egirua taho lua la tahalo la pakalila, isa te gata, me isa lou te meru.[
MAR 15:28 Me oio volale la merera te La Buk Tabu Ale Pala eia puru seseleti, ale eia veia maie: Egite ge veia eia la tahalo la iruru.]
MAR 15:29 Me egiteu ale polo te la gauru, egite goio timuroro, egite lugu la gama giteu, egite vilea mago “Eme veia eme ge lobe la luma la lotu ale uru, veia ge tigi halaba loua la haro ge itolu moli,
MAR 15:30 ioge, taritigi pepeho veia eme ge suli rivu lou eme gageie, eme ge gotalo taro la tauvalautu ele!”
MAR 15:31 Goio, egite la mulugaluga tegiteu e pris vikapopo legiteu la tahalo la mari, egite lege vahia, egite vitahi baololi legiteu mago “Eia suli egiteu ale isapolo, eala moli eia kama koramulia ge suli rivu lou eia!
MAR 15:32 Taritigi veia la uru gatou e Iuda ge gotalo taro la tauvalautu ele. Mai eia ge igo mai ele, etato ge rovia veia eia e Kraist sesele, la bilalaha te La Uru.” Me egira taho lua ale egite vagoata egirua vikapopo le Iesus, egira vile gegeru taia.
MAR 15:33 La haro hugutolatia, la maligoma uru goio sibitala, eia pigi robo la babaa tomi, kara te la mata la haro itolu te la maulavi.
MAR 15:34 Tio te la mata la haro itolu ele, e Iesus goio robe vagari oata mago “Eloi Eloi lama sabaktani?” La masova la mererale eia maie: La Uru taku, La Uru taku, ilava eme hele taroau?
MAR 15:35 Tio egiteu isahari ale oio magirigiri, egite goio vei mago “Hiloa ge! Eia tatola e Lias!”
MAR 15:36 Goio, la tahalo isa hari loio, eia abi la pagolu, eia saho la vaen ale ama ovola, eia goio vituria soata te la harele Iesus veia eia ge liua. Goio la tahalole vei mago “Mala, etato ge pou muga, etato ge hilo gabutoa veia e Lias ge guvi ge abi taroa sotalo, ka ouka.”
MAR 15:37 Eala moli e Iesus goio tovosugu, eia goio peho.
MAR 15:38 Tio, la kulikuli ale uru, ale egiteu e Iuda rara valautu robo la ilo la luma la lotu uru ovola, eia masile loata kara otalo.
MAR 15:39 Tio la mulugaluga tegiteu la tete la valalua la vaubila, eia magiri lago roborobo e Iesus, eia hilo e Iesus pehoti, eia goio vei mago “Sesele viruru, la tahalo ale, eia e Latu La Tahalo Uru.”
MAR 15:40 Egiteu e hatavivile isahari tai oio magiri malau bakisi loio, egite maleleia. Egiteulae e Salome, e Maria Magdala, me taola tai e Maria ale tilale Ioses me Iakob ale bisi, isahari lou tai oio tegiteu.
MAR 15:41 Ale pala e Iesus soloio e Galilea, egiteu e hatavivile alele tilimulimulia, egite susulia. Egiteu e hatavivile usu tai oio, ale pala egite me Iesus vitilimuli somai e Ierusalem.
MAR 15:42 La paga maulaviti, e Iosep la tau Arimatea eia goio te Pailat. E Iosep ele, eia e kansel isa uru tegiteu e Iuda, eia la tahalo isasa la valalua me hatavivile togoa, me eia tai pou tali la haro ale la pulolou la matagagala te La Tahalo Uru ge guvi. Tio e Iosep goilo te Pailat, eia kama gabutatala la tilaga, eia goio kaka e Pailat la pilehole Iesus. La vuhula galigeli la haro tabu, me eia kama taritigi te la gabutatalala tegiteu e Iuda veia la pileho la tahalo ge tili oata te la tauvalautu te la haro tabu.
MAR 15:44 E Pailat loloa mai ele veia e Iesus pehoti, eia karutu, la vuhula eia kama tabaa. Goma eia baha tavu la mulugaluga tegiteu la valalua la vaubila, eia goio tahia mago “E Iesus peho seseleti, ka souka?”
MAR 15:45 Tio la mulugaluga goio veiala veia e Iesus peho seseleti, e Pailat loloa mai ele, eia goio veiale Iosep mago “Taritigi, eme ge abi la pilehole Iesus.”
MAR 15:46 Tio e Iosep goio loto la kulikuli ale kakea, eia goio vagotalo la pilehole Iesus, eia avula la kulikuli ele, eia goio vagoiloa te la lulu isa uru ale egite oli raragitia te la vai la maitete veia ge ulai la pileho oilo vola. La valalua te Iosep goio buli la uati isa uru makapipila, egite goio tau robo la mata la liba ovola.
MAR 15:47 Eala moli e Maria Magdala, egira me taola ale e tilale Ioses, egira oio magirigiri, egira lago robo la liba tetalao.
MAR 16:1 Tio, la haro tabu kaluvuti, mai galigeli e Maria Magdala, me taola ale e tilale Iakob, vikapopo le Salome, egite tomi goio loto la bulu la obu ale mali vivili, egite veia ge abiri la vovole Iesus ovola.
MAR 16:2 Tio la paga mamaga te la kavikoki bisi, egite goio te la liba.
MAR 16:3 Egite vitahi baoli legiteu mago “Ere ge buli taro la uati te la mata la liba?”
MAR 16:4 Egite vikara mai ele, eala moli egite ga mata soio, egite hilo la uati ele, eia uru makapipila sesele, eia kati tabuli robo lou la mata la liba, eia tabuli galeti.
MAR 16:5 Tio egite goilo te la liba, egite hilo la hatamalelaba isasa eia popou te la gale giteu e gata, la kairobola tetala kea lovolovo sesele. Tio egiteu e hatavivilele karutu sesele, egite taga.
MAR 16:6 Eala moli la tahalole veia giteu mago “Amuto umala ge karutu. Eau rovia, amuto paa mulimuli e Iesus la tau Nasaret, ale egite katu tolea oata te la tauvalautu. Eia mahuli rivuti lou! Eia oukati omai. Hiloa, ale la mulila moli ale egite vitabulia ovola.
MAR 16:7 Taritigi amuto ge tuga ge veia giteu la valalua la vimari tetala, e Pita tai, veia e Iesus eia mamugati soio la gale e Galilea, mulimuli egite ge hiloa oio e Galilea, mai ale pala eia veitia giteu.”
MAR 16:8 Tiele, egite hatavivilele goio gali sogala, egite hele. Egite karutu, la vovo giteu pariri, egite goio makovu moli, la vuhula egite taga sesele. [
MAR 16:9 E Iesus mahuli rivu lou te la kavikoki bisi te la Sade, eia goio sibitala pala muga te Maria Magdala. La tavilele, e Iesus pala kumuli taro la hitu ivitu ale kama kokora loilo tetala.
MAR 16:10 Eia goio veia giteu la valalua me hatavivile ale pala egite vitilimulimuli me Iesus, eia veia giteu veia e Iesus sibitalati tetala. Egite tomi oio pou la iloburukola, egite taitali moli.
MAR 16:11 Eala moli ale e Maria veia giteu veia eia hiloti e Iesus eia mahuli rivuti lou, egite veia eia visigolo.
MAR 16:12 Mulimuli la valalua la vimari te Iesus ilua, egira hiliti taro la mautu uru veia ge goio la mautu isasa. Egira tatuga te la gauru, e Iesus sibitala tavu egiruale, la tirarola isapoloti lou.
MAR 16:13 Egira goio beu rivu loua soio e Ierusalem, egira goio veia giteu e tabarabara girua, eala moli egite veia egira visigolo.
MAR 16:14 Mulimuli lou e Iesus sibitala lou tegiteu la valalua tetala ale savulusa gete sasa. Egite goio pou vikapopo te la ilali, e Iesus goio sibitala tavu egiteu. Eia igo totolo egiteu, la vuhula egiteu kama tautaulailo bakisi te la merera tegiteu ale hilo pala mugea, ale egite veia eia mahuli rivuti lou.
MAR 16:15 Eia goio veia giteu mago “Amuto ge goio te la maututula tomi ge veipala la valolo ale taritigi soio tegiteu la valalua me hatavivile tomi.
MAR 16:16 Mai isasa ge tautaulailo te la merera tamutou, amuto ge vuhia, me La Tahalo Uru ge vimahuli seselea. Eala moli mai egite kama ge tautaulailo te la merera tamutou, egite ge vilua te la haro la viputumulila te La Uru.
MAR 16:17 Mulimuli la vagagarila taku ge pou tegiteu ale roromuli la merera taku. Egite ge igo la golugolu la karutula ale ge mai la irovilala te la vagagarila te La Tahalo Uru. Egite ge kumuli tataro la hituhitu ale kama kokora, egite ge vikarakara tai te la mererera isapolo ale halaba.
MAR 16:18 Egite ge sau tatola e taive ale bilibili te la lima giteu. Mai tai egite ge liu la lalu la bilili ale mai la bulu la matagu, egite kama ge pehola. Mai egite ge sau tegiteu ale lea, egite ge mahuli lou.”
MAR 16:19 E Iesus, La Uru gatou, eia veia giteu la merera tomi alele kaluvu, goio La Tahalo Uru pulia soata te la ilo la lage, eia goio pou sesele te la gale La Tahalo Uru e gata.
MAR 16:20 Tio egiteu la valalua la vimari te Iesus, egite tuga goio te la galegale tomi, egite valolo la valalua me hatavivile. La Uru igogolu vikapopo legiteu, eia vitikumu la merera tegiteu la golu la karutula usu, la valalua me hatavivile hiloa.]
LUK 1:1 Tavu e tabaragu e Teopilas, Egiteu la valalua isahari pala tovo lalaitia veia ge kekesi tola la merera oio te la veimulipolola te la igogolu te Iesus, ale pala La Uru visibitalea kabili tegatou.
LUK 1:2 Egiteu lolo muli polo molia tegiteu ale hilo la igogolu te Iesus ale eia igoa, sokoa te la silokola, egiteu goio valolo tai oio vola.
LUK 1:3 Me eau gabutatalea veia eia taritigi veia eau tai ge kekesi la merera tomi tegiteu ale eau lolotia palati kara igoie, veia eau ge kekesi matagaga seselea veia eme ge rovia.
LUK 1:4 Eala eme ge rovia mai ele veia la merera tomi moli ale egiteu veiamu ovola te la igogolu te Iesus, eia sesele tomi moli.
LUK 1:5 Te la imamala ale e Herod eia pou la mulugaluga tegiteu e Iuda, e pris isa oio, la isala e Sekaraia, eia te la karakara tegite pris ale egite toila veia e Abaisa. E rutula la isala e Lisabet, eia te la maratatila te Aron.
LUK 1:6 Egira e tau me rutu iluale, egira maroka sesele te la milatalata te La Uru, egira mulimuli tataho la merera tomi moli te La Uru, egira kama ruru.
LUK 1:7 Eala moli e Lisabet, eia varirobo, egira uru pepehoti, e latu girua ouka.
LUK 1:8 Tio goio, la haro isasa la tabarila sibitala ale la karakara tegite pris te Sekaraiale ge vahari la vaabila te La Uru soilo te la luma la lotu.
LUK 1:9 Egite tabari e Sekaraia veia eia ge goilo sesele la baa te La Uru ale kabili posa sesele, ge selu la silali la obu veia la maliala ge goata te La Uru, mai la vulovulo giteu e Iuda.
LUK 1:10 La valalua me hatavivile tomi ge magiri ogala te la kilaka robo la iruru tegiteu, e pris ge selu la pagale oilo la luma la lotu.
LUK 1:11 Goio, e Sekaraia magiri te la kilaka mai ele, e angelo te La Uru sibitala, eia magiri te la gale la poro e gata, ale eia selu la silali la obu ovola,
LUK 1:12 e Sekaraia karutu sesele, eia taga pepeho.
LUK 1:13 Eala moli e angelo goio veiala mago “Sekaraia, eme umala tataga, La Uru loloti la kilaka taume, e rutumu uru e Lisabet eia ge savu, eia ge pigo la kilolimu, eme ge toi la isala e Ioanes.
LUK 1:14 Eme ge sagege pepeho, me la valalua usu tai ge lege sisigi la guluvi tetala.
LUK 1:15 Eia ge la tahalo sesele te La Uru, eia kama ge liliu la lalu ale vagarigari, La Kalulu La Marokala ge volu tetala kara ale tilala ge taposea, kara ale eia ge uru.
LUK 1:16 Me oio te la valolo tetala, la valalua me hatavivile e Iuda usu ge vulo la gabutatalala tegiteu soio te La Uru tegiteu.
LUK 1:17 La Uru ge mamuga e latumu, eia ge vagari mai la bilalaha e Lisa alaura, La Kalulu La Uru ge oio tai tetala mai e Lisale, veia la valolo tetala ge tikumu, egite ururu ge loloa, egite kati ge vipou baa taro legiteu me latatu giteu. La valalua la vareagila tai ge loloa, egite ge vulo rivu soio te la gauru ale matata. Eia ge raragi la valalua me hatavivile mai ele veia egite ge lolo tataho La Uru tegiteu ale eia ge guvi.”
LUK 1:18 Tio, e angelo vikara kaluvu mai ele, goio, e Sekaraiale veiala mago “Eau ge rovia mave veia la merera taume eia sesele, la vuhula amila me rutugu tomi ururuti.”
LUK 1:19 Goio, e angelo kolia soio tetala mago “Eiau, la isagu e Gabriel, eau la bilalaha te La Uru. Eia baheau la merera ale taritigi mai ale eau veitiamu.
LUK 1:20 Me eme kamati ge vikara lou kara ale la merera tomi ale eau veiamu ovola ge puru, la vuhula eme tahi taro la merera taku, eala moli la merera taku eia sesele moli, eia ge puru, La Uru ge kisi robo la haremu.”
LUK 1:21 Tio, e angelo vikara kaluvu mai ele, eala moli egiteu la valalua me hatavivile ale egite magiri ogala egite pou taitalia, egite gabutatala papai, la vuhula e Sekaraia kama gogala hari, eia pou tabaa oilo.
LUK 1:22 Tio e Sekaraia goio gali sogala, eia kati vikara, egite goio rovia mai ele veia eia hiloti e angelo oilo la luma la lotu. Goio, e maura tuturi molitila la limala, eia kati vikarakara.
LUK 1:23 Mulimuli la imamala te la tilau ale te la karakara tetala oio te la luma la lotu, eia goio kaluvu, e Sekaraia beua soio la luma tetala, eia goio poutio.
LUK 1:24 Goio, tabaa bakisi, e rutula e Lisabet eia goio savu, la taio ilima polo, eia vei mago
LUK 1:25 “La Uru gogotiau, eia suliau, eau kati ge mahela veia eau varirobo, la vuhula eau savulatuti.”
LUK 1:26 E Lisabet, eia savu la taio iuolo poloti, La Uru goio baha e angelo tetala e Gabriel soio la mautu e Nasaret oio la gale e Galilea,
LUK 1:27 veia ge sibitala tavu la sobe isasa, la isala e Maria, eia puli e haruala, ale la isala e Iosep, eia te la hilile Devit, la uru tegiteu e Iuda.
LUK 1:28 Goio, e angelo sibitala tavu e Maria, eia veiala mago “Tavile Uru, eme balava seseleti, La Uru eia pouti taume!”
LUK 1:29 Eala moli e Maria loloa mai ele, eia pou varumu moli veia la masovala soioge mave.
LUK 1:30 Eala moli e angelo goio veiala mago “Maria, eme umala tataga, La Uru eia pigi roboti leme la gilogo tetala.
LUK 1:31 Eme ge savu, mulimuli eme ge taposa e latumu, eia ge hatamale, eme ge toi la isala e Iesus.
LUK 1:32 Eia ge uru, la valalua ge toila e Latu La Tahalo Uru oata. La Tahalo Uru ge vipoua te la mulile tubula e Devit,
LUK 1:33 eia ge la mulugaluga tegiteu la hilile Iakob, eia ge mahuli moli, la viputumulila tetala kama ge kaluvu.”
LUK 1:34 Tio, e Maria loloa mai ele, eia goio tahi e angelo maie mago “Ale ge sibitala mave? La vuhula e haruagu soukama laha roboau.”
LUK 1:35 Goio, e angelo kolia soio tetala mago “La Kalulu La Marokala eia ge pou taume, la vagagarila te La Uru ge pigi robome, eala e latumu egite ge toila veia eia maroka, veia eia e Latu La Tahalo Uru.
LUK 1:36 Loloa, e isamu e Lisabet, eia uru pepehoti, eala moli eia oio savulatu isa e latula, eia ge hatamale. Egite pala veia eia varirobo, eala moli eia oio savulatu, eia vipolotia la taio iuoloti.
LUK 1:37 La vuhula la papaga tomi, La Uru koramulia ge igoa.”
LUK 1:38 Tio, e Maria goio loloa mai ele, eia goio veiala mago “Ioge, eau la tavile moli te La Uru taku. Eia ge mai moli ale eia veitiale.” Eia veiale angelo mai ele, tio e angelo goio hiliti taroa, eia tuga.
LUK 1:39 Tio, te la imamala moli alele, e Maria hiliti, eia goata la hohoi, eia hari lalai e isala e Lisabet oio la mautu tetala te la gale e Iudea,
LUK 1:40 eia goio te la luma te Sekaraia, eia laharoale isala.
LUK 1:41 Tio e Lisabet loloa eia laharoala mai ele, e latula soarope oilo la tiala, La Kalulu La Marokala eia goio volu sesele te Lisabet,
LUK 1:42 eia goio tola oata maie mago “La vibalavala te La Uru eia pou taume Maria, eme muga sesele tegite hatavivile tomi. E latumu tai la vibalavala te La Uru pouti tetala.
LUK 1:43 Eala moli ilava La Uru ge vibalava pepehoau mai ele veia e tila La Uru taku ge hari lalaiau?
LUK 1:44 Ale eme laharoagu, e latugu sagege, eia soarope oilo la tiagu.
LUK 1:45 Eme balavati, la vuhula eme toro kikiti te la merera te La Uru soio taume, veia eia ge puru sesele.”
LUK 1:46 Tio, e Lisabet vikara kaluvu soio te Maria, e Maria goio soko la bilau maie: Oilo te la tiagu eau ge vaisale La Uru.
LUK 1:47 La kalulugu eia sagege pepeho te La Uru, La Tahalo La Vimahuli taku.
LUK 1:48 Eau la tavile la bilalaha tetala, eau la golu bulalahu, eala moli eia gogotiau. Kara igoie, kara mulimuli, la valalua me hatavivile tomi ge toi leau veia eau pou la balavala.
LUK 1:49 La vuhula La Uru taku ale vagari, eia visibitala la visuli ale vagari sesele somai taku, la isala maroka.
LUK 1:50 La gilogo tetala eia ge pou tegiteu tomi ale togoa, eia kama ge kaluvu.
LUK 1:51 Eia vahiloti letatou la vagagari la limala, eia igo marapati egiteu ale egite veia egiteu taritigi.
LUK 1:52 Eia vibisi egiteu la mulugaluga, eia vahiliti egiteu la valalua bulalahu.
LUK 1:53 Eia vaali egiteu ale pou la vitolola, eia baha taro egiteu la tahalo la vuliti egite ge kavelevele moli.
LUK 1:54 Te la gilogo tetala ale uru eia suliti egiteu la valalua tetala e Iuda,
LUK 1:55 mai la merera tetala ale eia veia giteu e ururu, veia la vibalavala tetala ge puru soio te Abraham, me tegiteu e tutubula ale ge mulimuli.
LUK 1:56 Goio, e Maria pou vikapopo le Lisabet la taio itolu, mulimuli eia goio beu rivu loua soio la mautu tetala.
LUK 1:57 Goio, la imamala pou ale e Lisabet ge pigo, eia goio taposa e latula ale hatamale.
LUK 1:58 Egiteu e valaluala lolotia mai ele, egite hilotia veia La Uru eia gogo pepeho la tavile tegiteu, egite sagege vikapopo leia.
LUK 1:59 Tio, la logo ivitu polo, egira me haruala vahari e latu girua soio te pris veia ge koro la vovola mai la vulovulo giteu e Iuda. Egiteu e valalua girua veia ge tola leia e tamala veia la isala ge Sekaraia,
LUK 1:60 eala moli e tilala kama masaga, eia veia giteu mago “Ouka, eia kama ge mai ele, la isala ge Ioanes.”
LUK 1:61 Eala moli egite goio kolia soio tetala mago “Egiteu e valalua mulua isa, la isala kama e Ioanes veia amula ge tola leia.”
LUK 1:62 Tio, egite goio turi soio te tamala veia ge rovi la masasagala tetala,
LUK 1:63 eia baha isasa veia ge abiala la buk, eia goio kekesia maie “La isala ge Ioanes.” Tio egite hiloa mai ele, egite karutu.
LUK 1:64 Me oio moli ovola la kalameale Sekaraia eia goio tapulaka, eia goio soko la vaisalela soata te La Uru.
LUK 1:65 Me egiteu e valalua girua, egite hiloa mai ele, egite taga sesele, me la rerela eia taliti soio te la maututula tomi soata la rorobo ale te la gale e Iudea.
LUK 1:66 Me egiteu tomi ale loloa, egite sau tolea, egite gabutatala mulimulia, egite gabutatala maie mago “E guliliki ale soioge mave?” La vuhula egite hilotia veia la gilogo te La Uru eia oioti tetala.
LUK 1:67 Tio, e tamale Ioanes, e Sekaraia, La Kalulu La Marokala, eia goio volu te la tiala, eia goio veipala la merera te La Uru maie:
LUK 1:68 Etato ge vaisale La Uru, eia La Uru gatou e Iuda. Eia gomai veia ge rou rivu lou la valalua me hatavivile tetala taro la limale Satan.
LUK 1:69 Eia vahiliti e suara tegatou oio te la hilile Devit, eia ge sigirobo etatou,
LUK 1:70 mai la merera usu tegiteu la bilalaha tetala te La Buk Tabu Ale Pala, eia veitia.
LUK 1:71 Eia suli etatou veia ge vimahuli etatou taro egiteu la gima ale vile etatou,
LUK 1:72 veia ge visibitala sesele la visuli uru somai tegatou, mai la merera tetala soio tegiteu e tutubu gatou alaura, veia la merera tetala ge puru mai sesele ale eia veia.
LUK 1:73 Mai la merera ale tikumu, eia taua soio te tubu gatou e Abraham,
LUK 1:74 veia eia ge vimahuli etatou taro la lima giteu la gima tegatou, veia etato ge koramulia ge lotu tavua, etato kati ge taga,
LUK 1:75 Etato ge pou la marokala oio te la lagula, la vulovulo gatou ge matata tomi moli, kara ale etato ge peho.
LUK 1:76 Me eme, e latugu e Ioanes, egite ge toime veia eme la bilalaha te La Tahalo Uru oata, eme ge mamuga, eme ge raragi la gauru te La Uru.
LUK 1:77 Eme ge vahilo legiteu e valaluamu la gauru ale La Uru ge vimahuli egiteu ovola, ale eia ge vimavulaha egiteu taro la iruru tegiteu, ale egite igigoa.
LUK 1:78 Mai te la gilogo tetala ale taritigi pepeho, veia la haro ge sibitala ale la matagaga te La Uru ge pigi robo etatou,
LUK 1:79 veia la valalua la maligoma ale poga tavu la pileho, egite ge matagaga veia eia ge tata etatou soio te la gauru ale taritigi, la vaubila ouka oio ovola.
LUK 1:80 Tio, e Sekaraia vikara kaluvu mai ele, goio, la leavala usu polo, e latula e Ioanes eia tubu tahalo sesele, eia la tahalo isa ale vagari tai te la kalulula, eia mou moli oata la hohoi kara ale eia goio sibitala tavu egiteu e Iuda.
LUK 2:1 Te la imamala ale e Sisa Ogastas eia pou la mulugaluga ovola, eia baha la merera soio te la gale tomi veia egite ge soko la muluga la giligi giteu la valalua te la maututula tomi ale e Rom vibaumuli ovola.
LUK 2:2 Te la imamala alele, e Sirinias eia pou la mulugaluga oio la gale e Siria.
LUK 2:3 Me egiteu e Rom masagea mai ele veia la valalua me hatavivile tomi ge goio te la mautu la vuhu tegiteu tomi isasasa, ge kekesi la isa giteu.
LUK 2:4 Tio, e Iosep loata la mautu e Nasaret oio la gale e Galilea veia ge goio la gale e Iudea, la vuhula eia te la hilile Devit. Eala eia goio la mautu sesele te Devit ale pala, e Betlehem.
LUK 2:5 Eia veia ge kekesi la isala me la isale Maria, la vuhula eia veia ge puli e Mariale, eia soukama laha roboa. Eala moli e Maria savulatuti.
LUK 2:6 Goio, egira pou oio e Betlehem, la imamala tetala eia koramuliti,
LUK 2:7 eia goio taposa e latula ale hatamale, la posolagu tetala. Eia goio avu robola la kulikuli ale egite sile malalaua mai la vulovulo giteu e Iuda, eia goio vitabulia te la muli la ilali tegiteu la kau, la vuhula la valalua me hatavivile vulo roboti egiteu te la luma la mosi.
LUK 2:8 Hagagavi te la mautu alele, egiteu la tahalo la vibaumuli la sip, egite mavuta utu, egite pou robo la sip tegiteu te la logo.
LUK 2:9 Goio, e angelo isasa guvi tavu egiteu, la matagaga tai te La Uru sibitala robo egiteu egite taga pepeho,
LUK 2:10 eala moli e angelo goio veia giteu mago “Umala amuto ge tataga, eau vahari la valolo ale taritigi ale ge te la valalua tomi.
LUK 2:11 Igoie oio te la mautu e Betlehem ale la mautu sesele te la uru e Devit alaurati, la tavile pigoti La Tahalo La Vimahuli ale e Kraist, eia la mapala te la hilile Devit.
LUK 2:12 Tio amuto ge rovilalea maie: Mai ge amuto ge sivuti la pepesole, eia mamavuta, e tilala pigi robola la kulikuli tegiteu la pepeso, eia mamavuta te la muli la ilali tegiteu la kau.”
LUK 2:13 Oio moli ovolale, egiteu la angelo mapaiti ale loata te la ilo la lage, egite goio guvi vikapopo me angelo ale, egite vaisale La Tahalo Uru, egite veia maie:
LUK 2:14 La vaisalela soata tavume La Uru. la vimalumalu taume ge pou tegiteu la valalua te la maututula tomi ale eia visati legiteu veia ge suli egite.
LUK 2:15 Tio, egiteu la angelo tugati, goio egiteu la tahalo la vibaumuli la sip, egite veia maie mago “Ale etato ge goio e Betlehem, etato ge paa muli la pepeso ale La Uru veitia gatou ovola.”
LUK 2:16 Tiele, egite hiliti hari moli mai ele, egite tuga, egite goio sivuti e Maria mira me Iosep, me la pepeso bisi tai ele, eia mavuta oio te la muli la ilali tegiteu la kau.
LUK 2:17 Egite hiloa mai ele, egite goio veipala la merera te angelo ale eia veia giteu la vuhu la piligo la pepesole.
LUK 2:18 Tio la valalua tomi ale loloa mai ele, egite karutu la merera tegiteu la tahalo la vibaumuli la sip.
LUK 2:19 Eala moli e Maria varumurumu moli la vuhu la piligole latulale, eia veia eia taritigi pepeho sesele, eia gabutala mulia te la haroharo tomi.
LUK 2:20 Goio, egiteu la tahalo la vibaumuli la sip goio beua, egite vaisale La Tahalo Uru, egite vauru sesele la isala te la papaga tomi ale egite lolotia, me egite hilo taitiale, eia sibitala tomi mai sesele la merera te angelo ale veipalea giteu ovola.
LUK 2:21 Tio, la logo ivitu poloti, la imamala koramuliti, e tilala me tamala vahari e Iesus soio te la luma la lotu veia ge koro la vovola mai la vulovulo giteu e Iuda. Egira tola la isala e Iesus, mai ale e angelo toi palatia soio te Maria, ale eia soukama savu.
LUK 2:22 Goio, la imamala koramuliti ale e Iosep ge igo la vulovulo la vimarokala soio te Iesus me tilala mai la merera te Moses, ale eia veia egiteu e Iuda ge igoa mulimuli te la piligo. Egira goio boko e Iesus soata e Ierusalem, egira me Maria veia ge abi e latu girua soio te La Uru,
LUK 2:23 mai la merera te La Uru te La Buk Tabu veia tegiteu e guliliki hatamalemale tomi, maie “Egiteu la posolagu tomi ale hatamalemale, amuto ge abia soio te La Uru.”
LUK 2:24 Egira veia ge igo tai la vaabila mai la merera te La Uru ale eia veia te La Buk Tabu maie “Amuto ge vaabi leau, la vaabila ge koramulia mai la uku ge ilua, uka e latu la kuru ilua.”
LUK 2:25 La tahalo isasa pou oata e Ierusalem ele, la isala e Simion, eia la tahalo isa la vulovulola matata, me eia tai la tahalo la lotu sesele, eia pou taitali la imamala la vimahuli tegiteu e Iuda, La Kalulu La Marokala eia pou tetala.
LUK 2:26 La Kalulu La Marokala, eia tautiala la tilau maie veia eia kama ge peho hari muga, kara ale eia ge hilo muga e Kraist, ale La Uru ge bahea.
LUK 2:27 La haro isasa, La Kalulu La Marokala, eia bahea soio te la luma la lotu, goio e tamale Iesus me tilala egira loio, egira vaharitia somai e Ierusalem e latu giruale, veia ge igo la vulovulo la vimarokala soio tetala mai la merera te La Uru veia.
LUK 2:28 E Simion goio bokoa, eia vaisale La Uru ovola, eia goio vikara maie mago:
LUK 2:29 La Uru taku, eme igo seseletia mai ale eme veitiagu. Taritigi eme ge baha taroau, la bilalaha taume, eau ge peho tataho,
LUK 2:30 la vuhula la matagu hiloti la tahalo la vimahuli
LUK 2:31 ale eme raragitia veia ge suli la maututula tomi.
LUK 2:32 Eia la matagaga ale ge vahilo legiteu la valalua la maligoma la gauru, egite ge vaisale la maratatila taume e Israel ovola.
LUK 2:33 Tio, e tamale Iesus mira me tilalale, egira karutu sesele la merera te Simion ele.
LUK 2:34 Goio, e Simion toi la vibalavala soio tegirua, eia goio veiale tilala, e Maria, mago “La Uru vipouti e guliliki ale, veia la valalua e Iuda usu pepeho, egite ge vilua te la viputumulila tetala, me usu tai eia ge vimahuli egiteu. Eia ge magiri mai la irovilala te La Uru, eala moli la valalua usu ge mera kukumuala, ge muku pilea,
LUK 2:35 egite ge veipala la gabutatalala ale kama kokora oilo te la tia giteu mai ele. La iloburukola ale uru tai, eia ge ubi la hatemu mai la gata.”
LUK 2:36 La tavile tai isa uru oio, la isala e Ana, eia e latule Panuel, eia te la hilile Aser, eia la tavile isa ale veipala sesele la merera te La Uru. E maura la tavile uru ale, eia pala taulai, kara la leavala ivitu,
LUK 2:37 mulimuli e haruala peho taroa, eia pou la baharu kara la leavala tetala savulu ualu gete vaa. Eia pou moli te la luma la lotu, eia lotulotu, eia peremuremu, me eia poupou te la kilaka te la haroharo me la logologo tomi.
LUK 2:38 Ale e Simion vikara kaluvuti ele, la tavilele eia goio tuga tavu e Iosep miteu oio te la luma la lotu ele, eia vaisale La Uru, eia goio valolo la valalua me hatavivile ale oio lotulotu, veia la pepesole eia la tahalo la vimahuli sesele tegiteu e Iuda ale egite pou taitalia.
LUK 2:39 Tio, e Iosep mira me Maria, egira igo sesele tomiti la vulovulo la vimarokala tegiteu e Iuda mai te la merera te La Uru veia egite ge igoa mulimuli te la piligo, goio egite beu loua soio la gale e Galilea, soio la mautu tegiteu sesele e Nasaret.
LUK 2:40 La leavala usu polo, e Iesus sagaiti seseleti, la mari tetala uru, me la gilogo te La Tahalo Uru eia pou tai tetala.
LUK 2:41 Te la leavalavala tomi, e tamale Iesus mira me tilala goatata e Ierusalem te la iligo La Ilali La Poloselela, mai la vulovulo giteu e Iudale.
LUK 2:42 Tio la leavala te Iesus savulusa gete luati, egite goata lou e Ierusalem veia ge igo la ilali mai ale egite igigoa te la leavalavala tomi.
LUK 2:43 Egite pouti la logo isahari oata e Ierusalem mai ele, goio La Ilali La Poloselela kaluvuti, e tamala me tilala veia ge beu rivua soio e Nasaret, eala moli e Iesus moliti pouo, egirua kama rovia, egira hiliti moli tuga.
LUK 2:44 Tio la haro isa poloti mai ele, egira gabua veia e Iesus oio vitilimulimuli vikapopo me egiteu la valalua ale egite usu oio tatuga vikapopo te la gauru ele. Goio egira paa mulimulia oio te ereire giteu ele, eala moli eia oio ouka.
LUK 2:45 Egira papaa mai ele, oukati, egira goio beua, egira paa muli loua soio e Ierusalem.
LUK 2:46 La haro itolu poloti ele, egira goio pogea oio e Ierusalem, eia oio pou vikapopo legiteu la tahalo la vimari, eia lololo egiteu, eia goio tahitahi egiteu la tilahi tai isahari.
LUK 2:47 Egiteu la valalua tomi ale popou ele, egite karutu sesele leia.
LUK 2:48 Tio e tamala me tilala goio mata pogatia, egira karutu seselela, e tilala goio veiala mago “Ko, latugu, ale eme igoa milua me tamamu mave, e? Ale amila me tamamu paa mulimulime, amila ilo ruru sesele leme.”
LUK 2:49 Tio, e Iesus loloa mai ele, eia goio koliala mago “Amulua gomai paa mulimuliau te lava? Amula kama rovia veia eau ge pou te la luma te Tete?”
LUK 2:50 Tio eia vikara mai ele, eala moli egira kama rovi tigi la masova la vikararala tetala aleie soio tegirua.
LUK 2:51 Goio, egite hiliti taro lou e Ierusalem ele, egite abia goio beu loua soio e Nasaret, pou. La leavala usu polo, eia roromuli tataho e tamala me tilala, eala moli e tilala gabutala tomi la vikararala tetala te la tiala.
LUK 2:52 Goio la mari te Iesus ururuti, eia hatamalelabati, la vulovulola tai eia taritigi pepeho te la mata La Uru me te la mata giteu la valalua tomi moli.
LUK 3:1 E Taibirias, eia pou la mulugaluga tegiteu e Rom la leavala savulusa gete lima, te la imamala moli alele, e Pontias Pailat eia mamuga te la gale e Iudea, me e Herod eia pou la mulugaluga oio e Galilea. E tabarala tai e Pilip, eia mamuga te la gale isahari mai e Ituria me Trekonaitis, me e Laisenias eia la mulugaluga te la gale e Abilini.
LUK 3:2 Te la imamala alele, e Anas mira me Kepas, egira pou la mulugaluga tegiteu e pris. Tio te la imamala ale, la vikararala te La Uru eia guvi tavu e Ioanes, e latule Sekaraia, oio te la tia la hohoi.
LUK 3:3 Eia goio hiliti, eia tuga goio te la maututula tomi hagagavi la lalu e Iordan, eia valolo la valalua me hatavivile veia egite ge vulo la gabutatalala tegiteu tavu La Uru, eia ge vuhi egiteu veia La Uru ge vimavulaha egiteu te la iruru tegite mai ele.
LUK 3:4 Mai la merera te la bilalaha e Aisaia te La Buk Tabu Ale Pala, eia kekesia maie: La golu la tahalo isasa tatola te la hohoi, eia tatola maie: Amuto ge ili paa la gauru te La Uru, amuto ge vimatata tomi la gauru tetala.
LUK 3:5 Oli robo la malululu tomi, ge oli taro tai la popoiti tomi. Ale tomi ale makoko, vimatatea. La gauru ale popopo, ge lamo paea.
LUK 3:6 La valalua te la maututula tomi, egite ge hilo la vimahuli te La Uru soio tegiteu.
LUK 3:7 Goio, la valalua me hatavivile usu pepeho gomai te Ioanes veia eia ge vuhi egiteu. Eala moli eia ge veia giteu maie “Amutou la valalua me hatavivile, la vulovulo mutou kama kokora sesele, amuto veia ge hele taro la igototolola ale tivura pepeho te La Uru ale ge sibitala robo amutou, amuto veia ge hele taroa mai e taive eia hele taro la hohoi ale tululu.
LUK 3:8 Amuto veia ge kai taro la iruru, ge vulo halaba, ia? Ioge, taritigi amuto ge tau la vavua mutou ge koramuli la tahalo ale vulo halabati. Umala amuto ge gabua te la tia mutou maie veia ‘Amiteu e tutubule Abraham’, la vuhula eau vei seselea mutou, ale eme e tubule Abraham, eia kama ge sulime, La Tahalo Uru eia koramulia ge visibitala e tutubule Abraham isahari tegiteu la uatati aleie, otalo te la magasale!
LUK 3:9 La Uru eia tau lalahatia la pemu soio te la vuhu la obobu tomi, mai egite kama ge vua tigi, eia ge tolo taro tomi egiteu, ge pigi egiteu soio te la havi.”
LUK 3:10 Tio, la valalua me hatavivilele, egite karutu sesele la merera te Ioanes ele, egite goio tahia mago “Amite ge igo sesele la rova, veia La Uru ge vimahuli amiteu e?”
LUK 3:11 Goio, e Ioanes kolia giteu mago “Mai isasa tamutou tahola ilua la kulikuli, taritigi veia eia ge abiale tabarala ale savelea isa, mai tai la ilali, ge igoa mai tai ele.”
LUK 3:12 Goio, isahari tegiteu la tahalo la giligi la takes, egite guvi te Ioanes veia ge vuhi, egite goio veiala mago “Tahalo uru, amite ge igo sesele la rova gageie?”
LUK 3:13 Tio, e Ioanes goio kolia soio tegiteu mago “Umala amuto ge vikara suku egiteu la valalua la piligi la takes ale uru, amuto ge tau molia mai ale egiteu e Rom toitia mutou.”
LUK 3:14 Goio, egiteu la valalua la vaubi tai isahari, egite goio tahi e Ioanes mago “Me amiteu, amite ge igo mave?” Goio, e Ioanes goio kolia soio tegiteu mago “Umala amuto ge vagari tavu egiteu la valalua me hatavivile, veia ge pakali la uati tegiteu mai ele. Umala tai veia amuto ge kaua giteu la iruru ale egite kama igoa, veia ge viligi egiteu kara ale egite ge pigi la uati soio tamutou. Taritigi veia amuto ge sagege moli te la mapa mutou.”
LUK 3:15 Tio, e Ioanes valolo egiteu mai ele, la valalua me hatavivile gabutatala papai veia e Ioanes soioge e Kraist.
LUK 3:16 Eala moli e Ioanes goio putu olia giteu la vikararala maie “Ale eau vuvuhi moli le amutou la lalu, eala moli ale ge mulimuli taku, la vagagarila tetala muga taku. Eau togo pepehoa, eau kama koramulia ge tuga hagagavi soio te la balila. Eia ge vuvuhi le amutou La Kalulu La Marokala, la kalulu mutou ge tivura mai la havi.
LUK 3:17 Eia raragiti veia ge hilovi la vulovulo la valalua me hatavivile tomi, veia egiteu ale taritigi, eia ge puli egiteu hagagavi soio te la balila, eala moli egiteu ale kama kokora, eia ge pigi egiteu sotalo te la havi ale la kaluvula ge ouka.”
LUK 3:18 Tio, e Ioanes valolo legiteu la vikararala usu lou mai tai ele, veia ge valolo raragi legiteu te la guluvi te Kraist.
LUK 3:19 Eala moli e Ioanes igo totolo e Herod te la iruru ale eia igoa soio te Herodias, e rutule tabarala, me te la iruru tomi ale eia igigoa.
LUK 3:20 Tio e Herod goio tau polo lou la iruru tetala isa lou, ale eia vagoilo e Ioanes te la luma la kilisi.
LUK 3:21 Te la imamala ale, la valalua me hatavivile usu egiteu goio te Ioanes, veia eia ge vuhi egiteu, me e Iesus tai goio ge vuhi. Eia vuhi kaluvuti, eia goio kaka, la ilo la lage goio kope,
LUK 3:22 La Kalulu La Marokala goio lovo sotalo tetala mai sesele la malu la uku. Tio la golu La Tahalo Uru tola loata te la mori maie mago “Eme e Latugu la riau, eau sagege pepeho sesele leme.”
LUK 3:23 E Iesus soko la igogolu la valolo tetala, la leavala tetala soioge savulu tolu, la valalua me hatavivile gabutatala mai ele veia eia e latule Iosep. Me la hilile Iesus ale egite gabutatala mai ele veia eia loio te la hilile Iosep, etato rovia maie: E Iosep, e tamala e Heli;
LUK 3:24 e Heli, e tamala e Matat; e Matat, e tamala e Levi; e Levi, e tamala e Melkai; e Melkai, e tamala e Ianai; e Ianai, e tamala e Iosep;
LUK 3:25 e Iosep, e tamala e Matataias; e Matataias, e tamala e Amos; e Amos, e tamala e Nahum; e Nahum, e tamala e Eslai; e Eslai, e tamala e Nagai;
LUK 3:26 e Nagai, e tamala e Meat; e Meat, e tamala e Matataias; e Matataias, e tamala e Semen; e Semen, e tamala e Iosek; e Iosek, e tamala e Ioda;
LUK 3:27 e Ioda, e tamala e Ioanan; e Ioanan, e tamala e Resa; e Resa, e tamala e Serababel; e Serababel, e tamala e Sialtiel; e Sialtiel, e tamala e Nerai;
LUK 3:28 e Nerai, e tamala e Melkai; e Melkai, e tamala e Adai; e Adai, e tamala e Kosam; e Kosam, e tamala e Elmadam; e Elmadam, e tamala e Ero;
LUK 3:29 e Ero, e tamala e Iosua; e Iosua, e tamala e Lieser; e Lieser, e tamala e Iorim; e Iorim, e tamala e Matat; e Matat, e tamala e Levi;
LUK 3:30 e Levi, e tamala e Simion; e Simion, e tamala e Iuda; e Iuda, e tamala e Iosep; e Iosep, e tamala e Ionam; e Ionam, e tamala e Liakim;
LUK 3:31 e Liakim, e tamala e Melea; e Melea, e tamala e Mena; e Mena, e tamala e Matata; e Matata, e tamala e Netan; e Netan, e tamala e Devit;
LUK 3:32 e Devit, e tamala e Iesi; e Iesi, e tamala e Obed; e Obed, e tamala e Boas; e Boas, e tamala e Salmon; e Salmon, e tamala e Nason;
LUK 3:33 e Nason, e tamala e Aminadab; e Aminadab, e tamala e Admin; e Admin, e tamala e Anai; e Anai, e tamala e Hesron; e Hesron, e tamala e Peres; e Peres, e tamala e Iuda;
LUK 3:34 e Iuda, e tamala e Iakob; e Iakob, e tamala e Isak; e Isak, e tamala e Abraham; e Abraham, e tamala e Tera; e Tera, e tamala e Nehor;
LUK 3:35 e Nehor, e tamala e Serak; e Serak, e tamala e Reu; e Reu, e tamala e Pelek; e Pelek, e tamala e Bera; e Bera, e tamala e Sela;
LUK 3:36 e Sela, e tamala e Kenan; e Kenan, e tamala e Arpaksat; e Arpaksat, e tamala e Sem; e Sem, e tamala e Noa; e Noa, e tamala e Lemek;
LUK 3:37 e Lemek, e tamala e Metusala; e Metusala, e tamala e Enok; e Enok, e tamala e Iared; e Iared, e tamala e Mahalil; e Mahalil, e tamala e Kenan;
LUK 3:38 e Kenan, e tamala e Nos; e Nos, e tamala e Set; e Set, e tamala e Adam; e Adam, eia e latu La Tahalo Uru.
LUK 4:1 E Iesus beua loio la gale Iordan, eia volu sesele me La Kalulu La Marokala. Tio La Kalulu La Marokala eia goio bahea soio te la hohoi.
LUK 4:2 Eia goio pou te la hohoi la logo savulu vaa, e Satan sibitala tavua, eia tovo lalaia. E Iesus popou mai ele la logo savulu vaa, eia kama ali, eia peho sesele la vitolola.
LUK 4:3 Tio, e Satan goio sibitala tavua, eia turiala isa la uati, mago “Mai eme e Latu La Tahalo Uru sesele, eme ge veia giteu la uati aleie veia egite ge vulo mai la bret.”
LUK 4:4 Eala moli e Iesus goio baoli louala soio mago “La Buk Tabu veia maie ‘La valalua kama ge mahuli te la ilali moli.’”
LUK 4:5 Tio, e Satan goio vahari e Iesus soata te la gove, eia goio vahilo harari moli leia la maututula tomi.
LUK 4:6 Eia veiala mago “La maututula tomi me la magasale, eau ge sugu taro tomiamu, me la vuliti tomi tai ale oilo vola, eme ge taholea. Eau ge abiamu, la vuhula eau e tahola, eau ge tabaria mai la masasagala taku.
LUK 4:7 Mai eme ge lotu tavuau, eau ge abiamu.”
LUK 4:8 Eala moli e Iesus goio kolia soio tetala mago “La Buk Tabu veia maie ‘Amuto ge lotu tavu moli La Tahalo Uru sekela, amuto ge togo moli eia sekela, eia La Uru mutou.’”
LUK 4:9 Goio, e Satan puli e Iesus soio e Ierusalem, eia goio vahari malaua soata te la varu la luma la lotu, eia goio veiala mago “Mai eme e Latu La Tahalo Uru sesele, eme ge raga sotalo, eme kama ge vilua,
LUK 4:10 la vuhula La Buk Tabu veia maie ‘La Tahalo Uru ge baha taro egiteu la angelo tetala soio taume, egite ge baumuli tigime,
LUK 4:11 egite ge sakoli sae molime soata te la lima giteu, la vahamu souka putua te la uati.’”
LUK 4:12 Eala moli e Iesus goio putu oliala mago “La Buk Tabu veia maie ‘Eme umala ge tovo lalai La Tahalo Uru, eia La Uru taume.’”
LUK 4:13 Tio, e Satan tovo lalai e Iesus la gauru usu mai ele kaluvu, eia goio hiliti taro mugea veia ge beu tavu loua te la haro isasa.
LUK 4:14 La Kalulu La Marokala eia volu te Iesus, eia baha taro rivu loua soio e Galilea. La isala vavava soio te la maututula tomi te la gale alele.
LUK 4:15 Eia vimari egiteu oio te la luma la lotu te la maututula isasasa, me egiteu tomi vaisalea.
LUK 4:16 E Iesus goio beua soio la mautu tetala sesele e Nasaret, la mautu ale eia sagaiti oio vola. Te la haro tabu eia goio lotu, eia goio hiliti veia ge gigi La Buk Tabu,
LUK 4:17 egite goio abiala la buk ale e Aisaia kekesia, eia goio kopea, eia sivuti la merera ale eia masagea veia ge valolo ovola, eia goio soko la giligi ale e Aisaia kekesia maie:
LUK 4:18 La Kalulu La Uru pouti taku. Eia visati leau veia eau ge valolo egiteu la valalua la morivava la merera ale taritigi. Eia baheau veia eau ge vagogala egiteu ale pou te la kilisi te Satan, veia eau ge vimatagaga tai egiteu la mata kea. La valalua tai ale egiteu la gima vibukeketi legiteu la igogolu, eia baheau veia eau ge lube egiteu te la kilisi,
LUK 4:19 veia eau ge veipalea veia la leavala sibitalati ale La Uru ge vimahuli la valalua tetala.
LUK 4:20 E Iesus gigi kaluvu la merera te Aisaia mai ele, eia goio pilu robo lou la buk, eia abi rivua la tahalo la vibaumuli la lotu, eia goio pou. La valalua me hatavivile tomi ale oio te la luma la lotu, egite pou moli, mata soli kiki tavua.
LUK 4:21 Tio eia goio soko la vikararala soio tegiteu mago “Igoie, amuto hiloti la merera te La Tahalo Uru ele, eia puruti.”
LUK 4:22 La vikararala tetala tomi ale eia veveia giteu, eia malama sesele soio tegiteu, egite karutu seselela, egite vei tatahoa. Eala moli egite goio vitahi baololi legiteu mago “Ale soioge ere? Ale e latule Iosep moli, ia?”
LUK 4:23 Tio, e Iesus goio baoli loua giteu ele mago “Amuto soioge ge vauleagu veia mai e dokta ge lea, taritigi mai eia ge dokta sesele, eia ge tovo lalaia veia ge vimahuli rivu lou eia. Amuto soioge veia eia taritigi veia eau ge igo la golu la karutula omai tai la mautu taku mai ale amuto lolotia veia eau igoa oio e Kapernaum.
LUK 4:24 Eala moli eau vei seselea mutou, mai la bilalaha te La Uru, eia ge goio te la mautu tetala sesele, egiteu e valaluala kama ge lololo tetala.
LUK 4:25 Eia mai sesele te la imamala te Lias pala, egiteu e hatavivile la baharu mapaiti oio e Israel, me te la imamalale la vitolo uru pepeho sibitala. La leavala itolu, la taio iuolo polo, la hura kama pu, egiteu la ilali ouka.
LUK 4:26 Eala moli La Uru kama baha e Lias soio te la baharu isa tegiteu e Israel veia ge suli leia la ilali, ouka. Eia baha polo molia soio te la tavile te la mautu e Sarepat, oio la gale e Saidon.
LUK 4:27 Eia mai tai la imamala ale pala te Lisa, eia la bilalaha te La Uru. Te la imamalale, la sereka tubu te la vovo giteu la valalua e Israel mapaiti, eala moli La Uru kama vimahuli isa tegiteu, ouka. E Neaman sekela moli la tau Siria, La Uru vimahulia te la limale Lisale.”
LUK 4:28 Tio, la valalua me hatavivile tomi ale pou te la luma la lotu, egiteu loloa e Iesus vikara mai ele, egite igo totolo pepeho.
LUK 4:29 Egite hiliti, egite lao tolea, egite lapua sogala te la matapiro, egite pulia soata te la vai la gove veia ge pigia sotalo te la vai ele.
LUK 4:30 Eala moli eia goio polo moli kabili te la babaa giteu, eia tugatio.
LUK 4:31 Tio, e Iesus gotalo e Kapernaum, oio la gale e Galilea, eia pou. Te la haro tabu, eia goio vimari la valalua me hatavivile.
LUK 4:32 Egite tomi karutu la merera tetala, la vuhula la vikararala tetala eia tikumu sesele, eia tovo tataho egiteu.
LUK 4:33 La tahalo isa oio lotu vikapopo legiteu ele, la hitu ale kama kokora pou tetala. Eia goio tola vagari oata mago
LUK 4:34 “A ge, eme Iesus la tau Nasaret, eme gomai veia ge igo amiteu mave? Eme gomaiti veia ge sulu amiteu, ia? Eau rovime, eme La Tahalo La Marokala te La Uru.”
LUK 4:35 Eala moli e Iesus goio gusiala, eia mera taroa mago “Eme makovu! Eme ge hele taro la tahalo ale.” Tio la hitu goio pigi la tahalo ale sotalo la magasa kabili te la mata giteu tomi ele. Eia goio hele taro molia, eia kama igo gegerua.
LUK 4:36 Tio, la valalua hiloa mai ele, egite karutu, egite goio vitahi baololi moliti legiteu ele mago “La vikararala ale eia mave? Eia kumuli taro vagari egiteu la hituhitu, egite roromulia!”
LUK 4:37 Tio la rerela tali soio te la maututula tomi te la gale alele.
LUK 4:38 E Iesus eia hiliti taro la luma la lotu, eia goio te la luma te Saimon. E loale Saimon oio lalea, la vovola tivura, egite kaka e Iesus veia eia ge sulia.
LUK 4:39 Eia goio tabatitiroa sotalo la mulila, eia vikara vagari soio te la ileale, la ilea goio kaluvu taroa. Tio eia goio hiliti, eia raragia giteu la ilali, eia goio abia giteu.
LUK 4:40 La paga maulaviti, egiteu ale ereire giteu lalea, egite vahari egiteu soio te Iesus, egiteu la mata la ilea ale papapai tomi ele. E Iesus goio tau la limala oata te la gama giteu isasasa, egite tomi goio mahulitio.
LUK 4:41 Me egiteu la hituhitu ale kama kokora tai, egite hele taro la valalua me hatavivile ale egite pou tegiteu. Egite tola maie mago “Eme e Latu La Tahalo Uru!” Eala moli e Iesus mera taro egiteu veia egite umala ge vikarakara, la vuhula egite rovi seselea, veia eia e Kraist, egite souka veipala haria.
LUK 4:42 Te la kavikoki sasaha, e Iesus hiliti taro la mautu alele, eia goio tuga soio te la baa bulalahu moli, la tahalo isa ouka oio vola. Eala moli egiteu la valalua me hatavivile goio paa mulia soio, egite goio vikapopo soio tetala veia ge sau tolea veia eia umala ge tuga tataro egiteu.
LUK 4:43 Eala moli eia goio veia giteu mago “Eau ge veipala la valolo ale taritigi te la pulolou la matagagala te La Tahalo Uru soio te la maututula tomi tai. Ale la igogolu taku moli ale La Uru baheau ovola.”
LUK 4:44 Tio eia goio valolo tatuga oio te la luma la lotu te la maututula tomi isasasa oio la gale e Iudeale.
LUK 5:1 La haro isasa, e Iesus magirigiri oio te la parava te la magolilo e Genesaret, la valalua me hatavivile usu egite goio gevi roboa veia ge lolo la vikararala te La Uru oio tetala.
LUK 5:2 E Iesus goio ga mata soio, eia hilo la uaga ilua oio te la paravale, egite la valalua ale vovuo tuga taroti la uaga la vuo tegiteu iluale, egite oio vuvuhi la vuo tegiteu.
LUK 5:3 E Iesus goio sae la uaga ale te Saimon, eia tala egiteu veia egite ge sugu taroa bakisi solau. Egite goio sugu taroa bakisi solau mai ele, eia popou vimarimari egiteu soilo te la paravale.
LUK 5:4 Eia vimari egiteu kaluvu, eia goio veiale Saimon mago “Amuto ge vore bakisi solau la malulu, amuto ge visivo la vuo tamutou ge lapu ilua la ia.”
LUK 5:5 Eala moli e Saimon goio koliale Iesus mago “Tahalo uru, amite la vuluo isa alalogoti, amite maru seseleti, amite kama abi gologolo ilua. Eala moli mai eme veitia miteu ele, amite ge tovo lalai loua.”
LUK 5:6 Tio egite goio visivo la vuo, egite lapu pepeho, la vuo tegiteu hagagavi ge masile sesele.
LUK 5:7 Egite goio tave egiteu e tabarabara giteu te la uaga ale isale veia egite ge vore somai ge suli egiteu. Tio egite goio lapu la vuo soata te la uaga ilua ururu tegiteu ele, la uaga iluale eia hagagaviti ge tilomu la ia.
LUK 5:8 E Saimon Pita hiloa mai ele veia la ia mapaiti egite lapua, eia goio toto tulu te la lagule Iesus, eia veiala maie mago “Tahalo Uru, eme tuga taroau, eau la tahalo la iruru.”
LUK 5:9 E Saimon me egiteu la valalua tetala, egite karutu pepeho sesele te la ia ale mapaiti egite laputia.
LUK 5:10 E Iakob me Ioanes, egirua e latatule Sebedi, egira susuli e Saimon te la igogolu tetalale, egira tai karutu sesele. Goio e Iesus veiale Saimon mago “Eme umala tataga. Kara igoie, kara mulimuli, eme ge la tahalo la ilapu la valalua.”
LUK 5:11 Tio egite goio vore soilo la parava, egite lapu la uaga soilo, la uaga me la vuo me la golugolu tomi tegiteu tabuli moliti ele, egite goio mulimuli e Iesus.
LUK 5:12 E Iesus pou oio te la mautu isasa, la tahalo isa oio la mautu ele, la sereka igo gegeru la vovola tomi moli. Eia hilo e Iesus, eia goio boru lagu tugu te la lagula, eia tali tavua maie mago “Tahalo Uru, mai eme ge masagea, eme koramulia ge vimaroka la vovogu.”
LUK 5:13 Goio, e Iesus limarara soio tetala, eia sau te la vovola, eia veiala mago “Ale eau masagea. Gageie la vovomu ge maroka lou!” Tio oio moli ovolale, la vovola goio maroka tatahotio.
LUK 5:14 Eala moli e Iesus goio mera taroa mago “Eme goio, eme umala ge vei lalahuale isasa. Eme ge sele molia soio te pris, eia ge hilo la vovomu ele. Eme ge abi tai la vaabila soio te la luma la lotu, mai la merera te Moses eia veia mai la vovo la tahalo ge maroka lou. La valalua ge hiloa maie veia eme kati sereka lou.”
LUK 5:15 Eala moli la rerele Iesus taliti soio te la maututula usu, la valalua me hatavivile mapaiti goio tetala veia ge lolo la merera tetala, veia eia ge vimahuli tai egiteu.
LUK 5:16 Eala moli e Iesus, la haro usu eia hele taro egiteu soio te la hohoi, eia ge pou tavu la kilaka.
LUK 5:17 La haro isa e Iesus eia pou, eia vimarimari egiteu la valalua me hatavivile, egiteu e pariseo isahari, me egiteu la tahalo la mari tai isahari, egite oio popou. Egite loio la maututula tomi te la gale e Galilea, te la gale e Iudea me la mautu uru e Ierusalem tai. La vagagari La Uru eia oio pouti te Iesus, eia vimahuli egiteu la ilea usu.
LUK 5:18 La valalua isahari loio, egite bolebole la tahalo isa te la mulila, eia lea, la vovola mauba tomi moli. Egite veia ge vagoiloa te la luma ale e Iesus pou ovola veia ge vitabulia oio te la lagule Iesus.
LUK 5:19 Eala moli la valalua me hatavivile mapaiti gevi robo e Iesus te la lumale, la baa bakisi ouka oio veia egite ge vagoilo e tabara giteu ale laleale. Tio egite goio visaea soata te la varu la luma, egite koro pepe la barema, egite visariria la ileale sotalo, eia gotalo tabuli kabili te la lagule Iesus me la valaluale.
LUK 5:20 E Iesus hiloa mai ele veia egite gabu tikumu la vagagarila, eia goio veia la ileale mago “Tabaragu, eau abi taro tomiti la iruru taume ale eme igigoa, eme mavulahati.”
LUK 5:21 Eala moli egiteu la tahalo la mari me egiteu e pariseo, egite hiloa mai ele, egite goio vitahi baoli legiteu maie mago “Eia veia eia ere tahalo veia eia ge vikara gegerua La Tahalo Uru mai ele? Etato la tahalo la vovo isa kama koramulia ge abi taro la iruru, La Tahalo Uru sekela moli!”
LUK 5:22 Eala moli e Iesus roviti la gabutatalala tegiteu ele, eia goio tahi egiteu mago “Ilava amuto gabutatala papapai mai ele?
LUK 5:23 La igogolu ale mave eia vagari taku, ale eau ge vimavulaha taro leia la iruru, uka ale eau ge vimahulia?
LUK 5:24 Gageie amuto ge hilo la vagagarigu, me amuto ge rovia mai ele veia La Tahalo Uru masagea veia e Latu La Tahalo eia ge abi taro la iruru omai te la maututula.” Tio eia veia giteu mai ele kaluvu, eia goio vulo gele soio te la tahalo ale la vovola mauba tomi molio, mago “Eau veiamu, eme ge hiliti, eme ge pilu la mulimu, eme ge goio la luma taume!”
LUK 5:25 Tio, oio moli ovola, la tahalole goio hiliti te la mata giteu la valalua tomi, eia pilu la mulila, bolea, eia tatuga soio la luma tetala, vaisasale La Uru.
LUK 5:26 Egiteu tomi ale hiloa, egite karutu sesele, egite taga pepeho tai, egite goio vaisale La Uru, egite veia maie “Etato igoie hiloti la igogolu tomi ale isapolo seseleti, te la vagagari La Uru.”
LUK 5:27 E Iesus vimahuli kaluvuti la tahalo ale la vovola maubaubae, eia goio tuga soio, eia hilo la tahalo la ilabi la takes isa, la isala e Levi, eia oio popou te la luma la igogolu tetala. E Iesus goio veiala mago “Eme ge tilimuliau.”
LUK 5:28 Oio moli ovola, e Levi hiliti taro tomi la golugolu tetalale, eia goio mulimuli e Iesus.
LUK 5:29 Goio, e Levi igo la ilali isa uru te Iesus mite oio te la luma tetala. Egiteu la valalua la ilabi la takes, me egiteu la valalua isahari tai goio ali vikapopo me Levi me la valalua te Iesus ele.
LUK 5:30 Eala moli egiteu e pariseo isahari me egiteu la tahalo la mari isahari tai, egite tahi vile egiteu la valalua la vimari te Iesus mago “Ilava amuto ali vikapopo, liu vikapopo tai legiteu la valalua la ilabi la takes, me vikapopo tai legiteu la valalua la iruru?”
LUK 5:31 Goio, e Iesus koli la merera soio tegiteu mago “Egiteu ale egite mahuli tigi, egite kama masaga ge goio te dokta, egiteu moli ale egite lea, egite masaga e dokta.
LUK 5:32 Eau kama gomai veia ge tola egiteu ale taritigi veia egite ge vuvulo, ouka. Eau gomai moli veia ge tola tavu egiteu la valalua la iruru.”
LUK 5:33 Egite goio tahi vulo lou e Iesus la tilahi isa lou maie mago “Egiteu la valalua la vimari te Ioanes, me egiteu la valalua la vimari tai isahari tamiteu e pariseo, egite peremuremu, egite pou tavu tai la kilaka. Eala moli egiteu la valalua la vimari taume, egite pou tavu moli la ilali me la iliu. La vuhula mave?”
LUK 5:34 Eala moli e Iesus goio ule rivu loua giteu la merera la tilovo isa maie mago “Mave, mai la taulai halaba ge pou, egiteu e valaluala ge vigumu? Ouka.
LUK 5:35 Eala moli mai egite ge bili taro legiteu la taulai halaba, tiele egiteu e valaluala kati ge masaga la ilali, egite ge vigumu leia.”
LUK 5:36 E Iesus veitia giteu la vikarara la tilovo isa mai ele, eia goio solo lou la merera la tilovo tetala isa lou soio tegiteu te la valolo tetala veia eia halaba sesele, eia veia giteu maie “La tavile isa kama ge sile la gale la kulikuli ale halaba veia ge visahi tavu me la mumugu la kulikuli ale masile. Mai eia ge igoa mai ele, la kulikuli ale halaba, mai la gauru ale halaba taku, eia kamati ge taritigi, la vuhula eia siletia. Me ale mumugu tai, mai la merera te Moses ale pala, eia ge mata gegeru tai, la vuhula la kulikuli iluale kama vitotoko.”
LUK 5:37 Tio, eia veitia giteu la merera la tilovo mai ele, eia goio tovo loua giteu la tilovo isa lou te la valolo tetala ale halaba maie “La tahalo isa eia kama ge sigili la vaen ale halaba te la kulikuli la mee ale mumugu, la vaen soukama ge sae, la kulikuli ge masile, la vaen ge pagegele. Mai ge igoa mai ele, la vaen ale halaba ge kama kokora, la kulikuli tai ale mumugu, eia ge kama kokora tai.
LUK 5:38 Taritigi pepeho veia la vaen ale halaba, egite ge sigilia te la kulikuli la mee ale halaba,
LUK 5:39 eala moli mai isa tahai te la iliu la vaen ale tabuli tabaati, eia ge tou la vaen ale halaba, eia ge vei mago ‘Korale, eau masaga moli ale palati.’ Me la merera taku ale halaba, amuto goio tou taia, amuto masaga moli ale pala te Moses.”
LUK 6:1 Te la haro tabu isasa, e Iesus mite me la valalua la vimari tetala, egite tatuga kabili te la mahuma la kon. Egite la valalua te Iesus vitolo, egite goio putu ilua la balepa la kon, egite giu taro la tavala, egite alia.
LUK 6:2 Eala moli egiteu e pariseo isahari oio magirigiri, egite hiloa mai ele, egite tahi egiteu mago “Amuto ruruti, ere veia mutou ge abi la ilali te la haro tabu?”
LUK 6:3 Eala moli e Iesus goio koli rivu loua giteu mago “Ia, amuto soioge soukama gigi la veimulipolola te la uru gatou e Devit alaura te La Buk Tabu Ale Pala? E Devit me la valalua tetala, egiteu peho la vitolola,
LUK 6:4 egite goilo la luma la lotu veia ge abi la bret ale tabuli te la lagu La Uru oilo vola. E Devit goio kaka e pris la bret alele, eia goio alia, eia abi taia giteu la valalua tetala la bret ale, egite tai alia. Eala moli la bret ale, egite magiri roboa veia tegiteu e pris, egite moli sekela ge alalia, eala moli e Devit, La Uru toitia veia eia la mulugaluga tegiteu e Iuda.
LUK 6:5 Me mai moli ele, eau masagea veia amuto ge matagaga tai veia e Latu La Tahalo, eia la mulugaluga te la haro tabu.”
LUK 6:6 Tio, mulimuli lou, te la haro tabu isa lou, e Iesus goilo la luma la lotu, eia soko la vimari soio tegiteu la valalua me hatavivile. La tahalo isa oio, la limala e gata pakuku, eia pipi.
LUK 6:7 Eala moli egiteu e pariseo me egiteu la tahalo la mari tegiteu e Iuda tai isahari, egite oio mata mulimuli e Iesus, egite veia ge hiloa veia eia ge vimahuli isasa te la haro tabu, uka ge ouka.
LUK 6:8 Eala moli e Iesus roviti la gabutatalala tegiteu, eia goio veia la tahalo ale la limala kama kokorale mago “Eme ge hiliti, eme gomai ge magiri kabili la mata miteue.” Tio la tahalo goio igoa mai ale e Iesus veiala.
LUK 6:9 Tio, e Iesus goio tahi egiteu mago “Oio te la merera te Moses te La Buk Tabu, eia veia gatou mave te la igogolu te la haro tabu? Etato ge igo la igogolu ale taritigi, uka ale kama kokora? Etato ge vimahulihuli te la haro tabu, uka etato ge bilibili?”
LUK 6:10 Eia goio mata soli kiki egiteu tomi, eia goio veia la tahalo ale la limala kama kokorale mago “Eme ge limarara!” Tio eia goio limarara, la limala goio taritigi tataho lou.
LUK 6:11 Eala moli egiteu e pariseole, la hate giteu mamasi pepeho, egite goio vitahi baoli lou egiteu mago “Etato ge vilaia mave?”
LUK 6:12 Te la haro isasa, e Iesus puli la valalua la vimari tetala soata la hohoi veia eia ge kaka. Eia pou tavu la kilaka soio te La Tahalo Uru te la logo alele kara la paga mamaga.
LUK 6:13 La paga mamagati, eia goio tola egiteu la valalua la vimari soio tetala, eia hilovi tavu savulusa gete lua oio tegiteu veia egite tai ge la tahalo la valolo tetala.
LUK 6:14 Egiteu savulusa gete luale, la isaisa giteulae: e Saimon, ale eia toi lovu leia veia e Pita; e tabarale Saimon, e Andrew; e Iakob, e Ioanes, e Pilip, e Batolomeas,
LUK 6:15 e Matiu, e Tomas, e Iakob ale e latule Alpias, e Saimon, la tahalo la hate paririla,
LUK 6:16 e Iudas ale e tamala la isala e Iakob, me Iudas Iskariot, ale mulimuli ge sugu taro e Iesus soio tegiteu la gima.
LUK 6:17 E Iesus me egiteu la valalua la vimari tetala, egite beu rivu loua loata la hohoi. Goio egite me la valalua la vimari tetala usu, egite magiri oio te la maratia isasa ale bobore tataho. Egiteu la valalua me hatavivile loio la gale tomi e Iudea, loio tai e Ierusalem, me egiteu ale lolau tai la mautu uru ilua e Taia me Saidon,
LUK 6:18 egite vikapopo soio te Iesus veia ge lolo la vimari tetala, veia eia ge vimahuli tai egiteu ale lalea. Egiteu ale la hituhitu ale kama kokora pou tegiteu, egite goio tai te Iesus, eia vimahuli tai egiteu.
LUK 6:19 La valalua me hatavivile tomi vagari veia ge sau la vovole Iesus, la vuhula la vagagarila oio raga polopolo soio tegiteu la ilea, eia vimahulihuli egiteu tomi.
LUK 6:20 E Iesus goio mata tavu egiteu la valalua la vimari tetala, eia goio tovo egiteu maie: Amutou la morivava, amuto ge sagege, la vuhula amuto sau tolati la pulolou la matagagala te La Uru.
LUK 6:21 Amutou ale pou la vitolola, La Uru ge vaali maru amutou. Amutou ale pou la iloburukola, amuto kati ge tali, amuto ge sagege moli la vibalavala te La Uru.
LUK 6:22 Mai la valalua ge vile amutou, mai egite ge pitaro amutou, ge gilo amutou, ge saupupu amutou, la vuhula amuto gabu tikumu e Kraist, e Latu La Tahalo,
LUK 6:23 amuto ge sagege te la imamala la tahivilela ale mai ele, la vuhula amuto sau tolati la mapa ale uru sesele, eia tabuli taitali amutou oata te la ilo la lage. La vuhula pala tai, egite vile egiteu la bilalaha te La Uru.
LUK 6:24 Eala moli maura miteu ale la tahalo la vuliti, la papaga bulalahu ale visagegeti amutou igoie, eiala moli amuto sau tolatiale.
LUK 6:25 Me amutou ale ali marumaru igoie, mulimuli amuto ge pou la vitolola. Me amutou tai ale pou la sagegela igoie, amuto mulimuli ge pou la iloburukola, la masali mutou ge pagegele lalahu.
LUK 6:26 Maura miteu, mai la valalua me hatavivile ge vei tataho amutou, alele kama taritigi, la vuhula egite pala vei tataho tai egiteu ale veipala la visigologolola moli veia eia la merera te La Uru.
LUK 6:27 E Iesus goio soko lou la vimari tetala soio te la valalua maie “Amutou ale koramulia ge abi la merera taku, eau vei seselea mutou maie: Amuto ge puhi tigi egiteu la valalua la gima tamutou.
LUK 6:28 Amuto ge toi la sagegela soio tegiteu ale tola savei amutou veia La Uru ge igo gegeru amutou. Amuto ge kaka moli veia La Uru ge suli egiteu ale igo gegeru amutou.
LUK 6:29 Mai isa ge sabala la galemu isa, eme ge vulo louala la galemu isale. Mai isa ge abi la kairobola taume, eme ge mata soli molia veia eia ge abi tai la lavalava taume, eme umala ge magiri roboa veia eia kama ge abi taro leme.
LUK 6:30 Egiteu ale kakaka la golugolu oio tamutou, amuto ge abi molia giteu mai ale egite masagea. Eala moli mai isa ge abi taro leme la paga isa ale eme taholea, umala kaka rivurivu loua.
LUK 6:31 La vulovulomu ale eme igoa soio tegiteu e tabarabaramu, eia ge mai sesele la vulovulo ale eme masagea veia egite ge igo taia soio taume.
LUK 6:32 “Mai eme ge puhi tigi moli egiteu ale taritigiamu, la vulovulomu ale, eia ge taritigi mave? Egiteu la tahalo la iruru tai puhi tigi moli egiteu ale taritigia giteu.
LUK 6:33 Mai eme ge suli moli tai egiteu ale sulime, la vulovulomu ale, eia ge taritigi mave? Ale egiteu la tahalo la iruru tai igigoa.
LUK 6:34 Me mai eme ge visuli la uati soio tegiteu moli ale eme veia egite ge suli tai emei, la vulovulomu ale, eme ge balava mave oio vola? Egiteu la tahalo la iruru, egite igigo taia mai emei ele, veia la uati tegiteu, egite ge abi rivu moli loua.
LUK 6:35 Eala moli amuto ge puhi tigi egiteu la valalua la gima tamutou. Amuto ge suli egiteu, ge abia giteu la uati, umala amuto ge gabutatala lou la kilolila. Mai ge mai ele, la kiloli la vulovulo mutou ge uru sesele, amuto ge e latatu La Tahalo Uru oata. Eia susuli la tahalo la iruru me la tahalo ale kama kokora tai.
LUK 6:36 Amuto ge la tahalo la gilogo mai tai e Tama mutou uru oata, eia la tahalo la gilogo.
LUK 6:37 “Umala amuto ge tomu sasae la vulovulo giteu e tabarabara mutou. Mai tai La Uru kama ge tomu sasae la vulovulo mutou. Taritigi veia amuto ge vimavulaha taro legiteu e tabarabara mutou la iruru tegiteu ale egite igigoa soio tamutou. Mai ge mai ele, La Uru ge gabu taro tai la iruru tamutou ale amuto igigoa.
LUK 6:38 Eme ge la tahalo la mutelela. Mai ge mai ele, La Uru ge vibalava tai emei. Eia ge vauru polo louamu la visuli tetala. La vuhula La Uru ge koliamu mai ale eme abitia giteu e tabarabaramu ovola.”
LUK 6:39 E Iesus toi tai la merera la tilovo itolu lou soio tegiteu maie mago “Mave, la mata kea koramulia ge tata lou la mata kea? Ouka. Egira tomi soukama ge boru sotalo te la lulu.
LUK 6:40 “E guliliki la vimari, eia kama uru te la tahalo la vimari tetala. Eala moli mai eia ge abi tomiti la vimari tetala kaluvuti, tio eia ge visauru mai la tahalo la vimari tetala.
LUK 6:41 “Ilava eme hilo moli la moromoro oio te la matale tabaramu, eme kama gabutatala la bautu la obu uru oio te la matamu lou ele?
LUK 6:42 Ilava eme ge veiale tabaramu mai ele mago ‘Tabaragu, eme gomai, eau ge rauvei taro la moromoro oio te la matamu ele.’ Eme ge veiale tabaramu mai ele, me mave eme kama gabutatala la bautu la obu uru oio tabuli robo la matamu ele? Eme la tahalo la visigolola sesele! Eme ge abi taro pala muga la obu ale uru eia tabuli robo la matamu ele, mai la iruru ale mapaiti eme igigoa, tio eme ge matagaga pala muga mai ele, eia koramulia veia eme ge rauvei taro la moromoro ale bakisi eia tabuli te la matale tabaramu ele.
LUK 6:43 “La obu ale taritigi, eia kama ge vua la vavuala ale kama kokora. Mai tai la obu ale kama kokora, eia kama ge vua la vavuala ale taritigi.
LUK 6:44 Etato ge rovilala muli la obu oio te la vavua giteu. Etato kama koramulia ge lulu la keme oio te la kaluga. Etato kama ge lulu la vavuala ale taritigi te la obu ale kama kokora.
LUK 6:45 Mai la tahalo ale taritigi, eia ge veipala la vulovulola ale taritigi ale tabuli te la tilalau oilo te la tiala. Mai la tahalo ale kama kokora tai, eia ge veipala la vulovulola ale kama kokorale, eia tabuli te la tilalau oilo te la tia la. Mai la merera tegatou ale sibitala te la hare gatou, eia veipala moli la vulovulo gatou ale volu oilo te la tia gatou isasasa.
LUK 6:46 “Ilava amuto tola leau ‘Tahalo Uru’, eala moli amuto kama lololo eau?
LUK 6:47 Mai isa ge mulimuliau, me eia ge roromuli tomi la vikararala taku,
LUK 6:48 eia ge mai la tahalo isasa ale tigi la luma tetala, eia goio oli malau la lulu sotalo, eia pigi la uati usu sotalo vola, eia goio vimagiri sae la luma tetala loata te la uati ele, eia magiri vagari sesele. La lalalu tomi ale oio te la gale alele goio sogo, egite visali tavu, la silali uru pepeho sibitala, eala moli la luma magiri moli, eia kama tagogoro, la vuhula eia tigi vagaria.
LUK 6:49 Eala moli mai isa ge lolo la merera taku, me eia kama ge mulimulia, eia mai la tahalo ale vimagiri bulalahu moli la luma tetala otalo te la magasa. La lalalu goio sogo tomi, la silali uru sibitala, la luma tetala goio tagogoro, egite karutu sesele te la tali tagogorola.”
LUK 7:1 E Iesus vimari kaluvuti egiteu la valalua me hatavivile, eia hiliti goio e Kapernaum.
LUK 7:2 Oio e Kapernaum, la tau Rom isa uru oio, eia la mulugaluga tegiteu e soldia salatu sasa. Eala moli la bilalaha tetala isasa, eia masaga pepehoa, eia la tahalo tetala sesele, eia oio lea bara, hagagaviti eia ge peho.
LUK 7:3 La tau Rom ale, eia lolo palati la igogolu te Iesus. Eia goio baha egiteu la ururu isahari tegiteu e Iuda veia egite ge tahi lalai e Iesus veia eia ge goio tetala ge vimahuli la bilalaha tetala ale lea gegeru ele.
LUK 7:4 Egite guvi oio te Iesus, egite kaka vagaria mago “Eme ge gogo la kilaka te la tau Rom uru ele, eme ge gomai ge vimahuli la bilalaha tetala,
LUK 7:5 la vuhula la vulovulola taritigi pepehoa gatou e Iuda, eia tigitia miteu isa la luma la lotu tai omai.”
LUK 7:6 Tio e Iesus loloa mai ele, eia goio tilimuliti egiteu soio. E Iesus goio ga guvi oio te la luma te la tau Rom ele, eala moli eia baha lou isahari egiteu e vikilipi tetala, egite goio vipoga tavu moli me Iesus oio te la gauru. Eia baha egiteu veia egite ge veiala maie “Tahalo Uru, eme umala vituharokome la gomaila te la luma taku. Eau kama taritigi veia eme ge pou taku.
LUK 7:7 Eala eau kama rara tavume, la vuhula eau la mumugu la tahalo. Eala moli eme ge vikara moli soio, la bilalaha taku ge mahuli lou, eau rovia, la vuhula eme la uru miteu tomi.
LUK 7:8 Me eau matagaga mai ele, la vuhula eau pou otalo te la uluva giteu la uru taku, me eau tai babaha egiteu e soldia taku. Mai eau ge baha isa soio, eia ge tuga moli. Eau ge tola isa somai taku, eia ge gomai moli. Eau ge baha la bilalaha taku soio te la igogolu, eia ge igo moli la igogolu mai ale eau veiala.”
LUK 7:9 Tio, e Iesus lolo la vikararala te la tau Rom uru mai ele, eia karutu sesele, eia goio magiri, eia vulo gele tavu egiteu la valalua me hatavivile ale mulimulia, eia goio veia giteu mago “Eau veia mutou, eau soukama sivuti sesele isa la tahalo ale gabu tikumuau mai ele, omai tai tamiteu la valalua e Israel, eau soukama hilo vuti tai isasa mai ele.”
LUK 7:10 Eia veia giteu mai ele, la valalua ale la uru giteu la tau Rom baha egiteu, egite goio beua, egite goio hilo vuti e maura la bilalaha ale lea barale, eia mahuliti.
LUK 7:11 Mulimuli lou ovola, e Iesus goio guvi oio la mautu bisi e Nain. Egiteu la valalua la vimari tetala, me egiteu la valalua me hatavivile usu tai, egite vitilimulimuli leia.
LUK 7:12 Egite goio ga guvi oio la matapiro la mautu ele, egite hilo la valalua isahari, egite bole la pileleho isa veia ge ulaia. La tahalo ale pehoti ele, eia e latu la baharu isasa, e maura e latula isa moli ele. Egiteu la valalua me hatavivile usu te la mautu vitilimuli me la baharu ele soio te la liba.
LUK 7:13 La Uru e Iesus goio hiloa mai ele, eia gogo pepeho pasia, eia veiala mago “Umala eme ge taitali.”
LUK 7:14 Tio, eia goio tau la limala soio te la pileleho ele, egite ale bolebolea goio magiri. E Iesus goio veia la tahalo ale pehoti ele mago “Hatamalelaba, gageie eme ge hiliti.”
LUK 7:15 Tio oio moli ovolale, la hatamalelabale eia goio hiliti, eia pou oata, eia goio soko la vigagiala soio tegiteu, tio e Iesus goio puli rivuale tilala.
LUK 7:16 Tio, egiteu la valalua me hatavivile goio hiloa mai ele, egite taga pepeho, egite vaisale La Tahalo Uru, egite veia maie “La bilalaha te La Tahalo Uru isa uru sibitalati omai tegatou veia ge vimahuli etatou la valalua tetala.”
LUK 7:17 Tio oio moli ovolale, la rerele Iesus eia taliti soio te la maututula tomi te la gale e Iudea, me te la maututula tomi ale hagagavi ovola.
LUK 7:18 La igogolu tomi te Iesus ele, egiteu la valalua la vimari te Ioanes tai loloa, egite goio veiale Ioanes.
LUK 7:19 Tio e Ioanes goio baha egira taho lua tegiteu soio te La Uru veia egira ge tahi matagagea maie “Mave, eme moli la bilalaha ale amite pou taitalia, uka amite ge pou tali ale isapolo soloio?”
LUK 7:20 Goio, egira goio sesele te Iesus, egira goio tahi molia la tilahi ale e Ioanes bahati legirua ovolale.
LUK 7:21 Tio, la haro moli ale, e Iesus vimahuli egiteu la ilea mapaiti, eia kumuli taro tai la hituhitu ale kama kokora ale pou tegiteu, me eia vimatagaga egiteu ale mata kea.
LUK 7:22 Eala eia goio koli la merera tegirua taho lua ale e Ioanes baha egirua, eia veia girua mago “Amula ge beu rivu loua soio te Ioanes, amula ge veiala la igogolu tomi taku ale amula hilotiale, la merera tai ale amula lolotia. Amula ge veiala veia egiteu ale mata kea, egite matagaga rivuti lou; egiteu ale gulugulu, egite tatugati lou; egiteu ale serekareka, la vovo giteu sibitala halabati lou; egiteu ale la gavusa giteu vou, egite lololo rivuti lou; egiteu ale pehoti, egite mahuli rivuti lou; me egiteu ale pou la savelela, egite igoie loloti la valolo ale taritigi taku.
LUK 7:23 Amula ge vei taiala veia mai isa ge toro taku, eia kama ge piligiau, eia ge pou la balavala.”
LUK 7:24 Tio, egira taho lua la bilalaha te Ioanes, egira tugatio, e Iesus goio vikara matagaga soio tegiteu la valalua me hatavivile te la valolo te Ioanes ele maie “Amuto pala muga goata la hohoi veia ge lolo e Ioanes, amuto veia ge hilo la rova? Amuto soioge gabutatalea veia amuto ge hilo la gauku ale kama magiri vagari, ale la lolovi vai lalahua?
LUK 7:25 Uka amuto soioge veia amuto ge hilo la rova? Amuto soioge veia ge hilo e Ioanes, eia kai la kairobola ale taritigi pepeho, ia? Ouka, amuto ge hilo moli la tahalo ale pou tataho moli mai ele oio la luma tegiteu la mulugaluga.
LUK 7:26 Eala moli amuto pala goata la hohoi veia ge hilo sesele la rova? Soioge la bilalaha isa te La Tahalo Uru amuto veia ge hiloa, ia? Eia sesele, eala moli eau veia mutou, eia kama la bilalaha bulalahu moli,
LUK 7:27 eia la tahalo ale La Tahalo Uru vikara matagaga palati leia, te La Buk Tabu Ale Pala mai te la guluvi te Kraist, eia veia maie: Eau ge baha mamuga la bilalaha taku, eia ge guvi mamuga pala taume, eia ge raragi la gauru taume ale eme ge polo ovola.
LUK 7:28 Eau veia mutou, e Ioanes, eia muga sesele te la valalua la vovo tomi. Eala moli te la pulolou la matagagala te La Tahalo Uru, la tahalo bulalahu moli ale goilo vola, eia ge uru te Ioanes ele.”
LUK 7:29 E Iesus vimari egiteu mai ele, egiteu la valalua me hatavivile usu me egiteu la valalua la ilabi la takes tai, egite gabu tikumu la merera tetala. La vuhula egite pala abi la vuluhi te Ioanes, me oio te la ilabi la vuluhi tetalale, egite veipalatia mai ele veia egite matagagati veia la gauru te La Tahalo Uru, eia sesele.
LUK 7:30 Eala moli egiteu la tahalo la mari, me egiteu e pariseo tai, egite tou la vuluhi te Ioanes, eala egite veipalea mai ele veia egite touti la gauru te La Tahalo Uru ale eia raragitia giteu veia egite ge vulo halaba oio vola.
LUK 7:31 Goio, e Iesus visolo lou la valolo tetala soio tegiteu la valalua me hatavivile, eia veia giteu maie “Eala moli egiteu la valalua me hatavivile te la imamala ale igoie, eau ge tovo muli egiteu soio te lava?
LUK 7:32 Egite mai moli egiteu e gulikiliki ale pou te la tia la mautu. Egiteu la karakara isa, egite tolea giteu e tabarabara giteu soio mago ‘Amite pipigi la tilali, amuto kama taitali!’
LUK 7:33 Mai e Ioanes la tahalo la vuluhi, eia guvi omai tegatou, eia vigumu, eia kama liliu la vaen, me amuto hiloa mai ele, amuto ubila la merera mago ‘Emei, la hitu ale kama kokora pouti oio taume ele!’
LUK 7:34 Mai mulimuli tai e Latu La Tahalo goio sibitala, eia ali marumaru moli, eia liliu la vaen, eala moli amuto vikara maie mago ‘A ge, la tahalo ale, eia kali sogomu pasi, me eia la tahalo la iliu la vaen tai, eia e vikilipi tegiteu la valalua la ilabi la takes me egiteu la tahalo la iruru!’
LUK 7:35 Eala moli amuto kalamea papapai mai ele, amuto soioge la tahalo la mari ia? La merera te La Uru eia soioge tabuli matagaga tamutou la valalua tetala, ia?”
LUK 7:36 La tahalo isa tegiteu e pariseo, eia tau la merera soio te Iesus veia egira ge ali vikapopo oio la luma tetala. E Iesus goio pou oio la luma tetala, eia raragi moli veia ge ali,
LUK 7:37 eala moli la tavile la gauru isa oio te la mautu alele, eia loio sibitala, eia vahari la lalu ale mali vivili, la mapala uru.
LUK 7:38 Eia goio magiri te la pokele Iesus, hagagavi te la vahala, eia tali, la masalila puri volu la vahale Iesus, eia goio savula tagarala la ivula ale malalau ele. Eia goio piupiu la vahale Iesus, eia abiri tai la vahala la lalu ale mali vivili.
LUK 7:39 Eala moli e pariseo ale baha tavuti e Iesus ele, eia hiloa mai ele, eia goio gabutatala lou maie mago “Mai e Iesus ge la bilalaha te La Uru sesele, eia ge rovia veia la tavile ale pilau la vovola, eia la tavile la iruru.”
LUK 7:40 Eala moli e Iesus goio veiala mago “Saimon, eau la merera isasa oio ale eau ge veiamu ovola.” Tio e Saimon goio veiala mago “Tahalo Uru, eme ge vei moliagu, eau ge loloa.”
LUK 7:41 Tio e Iesus goio veiala mago “La tahalo la vuliti isasa, la tahalo ilua dinau oio tetala. Isa dinau e kina savulu salatusa, isa dinau e kina salatusa moli.
LUK 7:42 Egira tomi kama koramulia veia ge kolia, eala moli la tahalo la vuliti gogo egirua, eia vimavulaha taro legirua la dinau tegiruale. Tio oio tegiruale, ere tegira ge sagege pepeho sesele?”
LUK 7:43 Tio, e Saimon goio koli la tilahi te Iesus mago “La tahalo ale dinau la uati uru sesele mai savulu salatusale.” Tio e Iesus goio koliala mago “Eia sesele, eia mai ale eme veia.”
LUK 7:44 Goio eia vulo soio te la tavile, eia vei louale Saimon mago “Saimon, eme hilo la tavilele? Eau goilo la luma taume, eme kama vuhi la vahagu. Eala moli eia vuhi la vahagu la masalila, eia savula tagarala la ivula.
LUK 7:45 Eme kama piuau, eala moli eia kama maila la piliu la vahagu karati ale eau guvi omai taume.
LUK 7:46 Eme kama abiri la varugu la lalu ale mali vivili, eala moli eia vuhi la vahagu la lalu ale la mapala uru.
LUK 7:47 Eala, eau veiamu, la iruru tetala ale usu, La Tahalo Uru ge vimavulaha taro leia, la vuhula mai ge ouka, eia kama ge sagege pepeho sesele mai ele. Mai isa ge gabua veia La Tahalo Uru vimavulaha taroti leia la iruru tomi tetala ale usu, eia ge sagege pepeho mai ele, mai la merera la tilovo taku igoie.”
LUK 7:48 Goio, e Iesus vikara kaluvu soio te Saimon mai ele, eia goio veia la tavile mago “La iruru tomi taume kaluvuti.”
LUK 7:49 Tio, egiteu ale popou ali vikapopo le Iesus ele, egite lolo la vikararala tetala mai ele, egite goio vitahi baoli legiteu mago “A ge, ale la tahalo ale mave sesele, veia ge vimavulaha taro tai la iruru, ia?”
LUK 7:50 Eala moli eia goio vei loua la tavilele mago “Ale eme gabu vauruau, la tautaulailo taume ele, eia vimahulitime. Eme ge tuga, la tiamu oilo ge malilo tataho te la isa La Uru.”
LUK 8:1 Tio, goio mulimuli moli ovolale, e Iesus goio valolo tatuga te la maututula, eia valolo egiteu la valalua me hatavivile la valolo ale taritigi te la pulolou la matagagala te La Tahalo Uru. Egiteu tai la valalua la vimari tetala savulusa gete lua, egite mulimulia,
LUK 8:2 me egiteu e hatavivile tai isahari ale e Iesus kumuli taroti la hitu ale kama kokora loilo tegiteu, me egiteu tai ale eia vimahuliti egiteu te la ilea tegiteu. Egiteula tie: e Maria Magdala, ale e Iesus kumuli taroti la hitu ivitu loilo tetala;
LUK 8:3 e Ioana tai, ale e rutu la bilalaha te Herod, e Susa; me e Susana tai; me egite hatavivile tai isahari. Egiteu tomi e hatavivile aleie, egite visusuli soio te Iesus mite la uati.
LUK 8:4 La valalua me hatavivile usu pepeho loio te la maututula tomi, egite goio guvi vikapopo oio te Iesus, egite usu pepeho sesele. Tio e Iesus goio hilo egiteu mai ele, eia goio veia giteu la vikarara la tilovo isa maie:
LUK 8:5 “La tahalo isasa gorivo veia ge galugalu. Eia goio valibura la vavua la vit tetalale, la vavuala isahari paruparu te la tia la gauru, egiteu la valalua tatuga toa mapolapolea, la malumalu tai egite lovo sotalo, egite goio ali taroa.
LUK 8:6 Isahari, egite paruparu soio te la magasa la uatati, eia goio kusi golo moli bakisi, eia peho lou, la vuhula la magasale kama beta.
LUK 8:7 La vavuala isahari egite paruparu kabili te dahe, egite goio kusi vikapopo e dahe ele, e dahe viri robo egiteu, egite peho.
LUK 8:8 Eala moli la vavua la vit isahari paru te la magasa ale taritigi, egite kusi tataho, egite goio balepa, la balepa giteu uru sesele.” Tio e Iesus vikara kaluvu mai ele, eia goio vitapasi la merera tetala soio tegiteu mago “Mai la tahalo isasa la gavusala oio, taritigi veia eia ge lolo la merera taku.”
LUK 8:9 Egiteu la valalua la vimari te Iesus goio tahia la masova la vikarara la tilovo te la tahalo la gilalu,
LUK 8:10 tio e Iesus goio koli la tilahi tegiteu ele mago “Eau veipalatia mutou la mari te la pulolou la matagagala te La Tahalo Uru, ale tabuli kokovu, eala moli tegiteu la valalua me hatavivile ale so popou te la maligoma, eau vikara soio tegiteu te la vikarara la tilovo moli, me oio vola, ‘Egite hilo la igogolu taku, eala moli egite kama matagaga ovola. Egite lolo tai la merera taku, eala moli egite kama rovi tigi la masovala.’
LUK 8:11 “Tio, la vikarara la tilovo taku te la tahalo la gilalu, la masovala eia maie: La vavua la vit, eia la merera te La Tahalo Uru.
LUK 8:12 La vavuala ale paru te la gauru, eia mai egiteu la valalua me hatavivile ale lolo la merera te La Uru, eala moli e Satan pakali taro loua loilo te la tia giteu, veia egite soukama ge roromulia, egite ge mahuli.
LUK 8:13 La vavuala ale paru te la magasa la uati, eia mai egiteu la valalua me hatavivile ale lege sisigi la merera te La Tahalo Uru, eala moli egite kama sau tola seselea, eia la uala ouka te la tia giteu. Egite sau tola mugea bakisi, goio mai la imamala la tovolalaila ge sibitala, egite ge boru.
LUK 8:14 La vavuala ale paru kabili te dahe, eia mai egiteu la valalua me hatavivile ale lolo la merera te La Tahalo Uru, eala moli la mari papaila te la vulovulo la maututula, eia viri robo lou egiteu, eala egite kama magiri vagari, la merera te La Uru kama kusi tigi te la tia giteu, egite kama vua.
LUK 8:15 Eala moli la vavua la vit ale paru te la magasa ale taritigi, eia mai egiteu la valalua me hatavivile ale la tia giteu maroka, egite lolo la merera te La Tahalo Uru, egite sau tolea, egite goio magiri vagari mai ele, egite mai ale vua pepeho sesele.
LUK 8:16 “La tahalo isa kama ge viroko la lam veia ge tau robo loula la baket, uka veia ge tau kokovua otalo la uluva la poro. Ouka, etato ge viroko la lam, etato ge tau saea oata, la valalua ge goata la luma, egite ge matagaga tataho.
LUK 8:17 La paga isa kama koramulia ge tabuli kokovu, la merera tomi mulimuli ge sibitala matagaga. La merera ale igoie la masovala tabuli kokovu, eia ge pala.
LUK 8:18 Eala, eia taritigi veia amuto ge laba gele tataho tavu la merera te La Tahalo Uru. Mai la merera tetala bakisi oiole ale eme sau tolea, eia ge vauru louamu. Eala moli mai eme kama tahola bakisi la merera te La Tahalo Uru, La Uru ge abi taro lou leme la merera bakisi ale eme veia eme sau tolea.”
LUK 8:19 Tio, e tilale Iesus me egiteu e tabarabarala, egite loio veia ge hari lalai e Iesus, eala moli egite kama koramulia ge goio hagagavi tetala, la vuhula la valalua me hatavivile usu egite vivi roboa.
LUK 8:20 Isa tegiteu veiala mago “Male, e tilamu, egiteu e tabarabaramu, egite otalo magiri taitalime veia egite ge hilome.”
LUK 8:21 Eala moli e Iesus veia giteu tomi ele mago “Egiteu ale lolo sesele la merera te La Tahalo Uru, me egite goio roromulia, egiteu moli ele e tatilagu, e tabarabaragu.”
LUK 8:22 La haro isasa, e Iesus miteu me la valalua la vimari tetala, egite goio sae la uaga, eia veia giteu mago “Etato ge polo soio te la gale la magolilo loio.” Tio egite goio soko la tuluga mai ele,
LUK 8:23 e Iesus goio mavuta. La ave uru sibitala tavu egiteu olau la tia la utu, eia vahiliti la mago, eia sae soata te la uaga, eia hagagavi ge tilomu, egite hagagavi ge vilua.
LUK 8:24 Egite goio palo e Iesus mago “Tahalo Uru, etato ga vilaluati!” Tio e Iesus goio hiliti, eia igo totolo la lolovi me la gasi, la gasi goio tamea, la lolovi tabou, la mago malilo tatahotio.
LUK 8:25 Eia goio veia giteu mago “Amuto soioge kama gabu tikumu la vagagari La Tahalo Uru veia eia ge vimahuli amutou taro la viluala, ia?” Egite loloa mai ele, egite karutu, egite taga, egite goio vitahi baololi moliti legiteu mago “Ale soioge ere? Eia mera taro la lolovi me la gasi, egira goio roromuli molia.”
LUK 8:26 E Iesus miteu me la valalua la vimari tetala, egite hiliti loio la gale la magolilo loio e Galilea, egite avai soio la gale tegiteu e Gerasena, te la gale la magolilo loio.
LUK 8:27 E Iesus goio poru, la tahalo isa te la mautu ale, egiteu la hituhitu ale kama kokora pou tetala, eia goio poga tavua. La tahalo ale, eia kavovou bububu moli, eia kama lavalava, eia la luma tai ouka, eia mavuta moli oio la liba, eia popou mai ele la leavala usuti.
LUK 8:28 Eia goio hilo e Iesus sibitala tavua, eia kakuraha bara sesele, eia boru lagu tugu te la lagule Iesus, eia tola soata maie mago “Eme guviti veia ge igoau mave? Eme e Iesus, e Latu La Tahalo Uru Oata. Eau kaka gogogome veia eme umalati ge viligiligiau!”
LUK 8:29 Me eia vikara mai ele, la vuhula e Iesus veitia la hitu ale la mulugaluga tegiteu ele veia eia ge hele taroa. Eia saeti tetala vaka usuti, egite la valalua ge kisi la vahala me la limala la sen, eala moli e maura ge sagi mautu loua, la hitu ge vitugea soio la hohoi.
LUK 8:30 Goio, e Iesus tahia mago “La isamu ere?” Tio, eia goio veiale Iesus mago “La isagu e Ami.” Me eia veia mai ele, la vuhula egite la hituhitu usu saeti tetala.
LUK 8:31 Eala moli egite rovi e Iesus oio, egite kaka gogogoa veia eia umala ge pitaro egiteu sotalo te la mautu la maligoma.
LUK 8:32 Eala moli egiteu la karakara la bolobolo mapaiti, egite gogue oio te la vai la popoiti te la gale alele. Egite la hituhitu kaka gogogo e Iesus veia eia ge baha taro egiteu soilo tegiteu la bolobolole. Tio e Iesus veia eia taritigi,
LUK 8:33 egite goio gali taro la tahalo ale pauale, egite goilo tegiteu la bolobolole, goio egite la bolobolo hele bura sotalo te la vai ele, egite goio tilomu tomi olau la mago.
LUK 8:34 Egiteu la valalua la vibaumuli la bolo, egite hiloa mai ele, egite hele soluma, egite gilemulia giteu la valalua me hatavivile tomi te la gale alele.
LUK 8:35 Tio egite goio veia ge hiloa, egite guvi oio te Iesus, egite hilo la tahalo ale la hituhitu hele taroa, eia pou te la lagule Iesus, eia lavalavati, la gabutatalala tetala sibitala rivuti lou. Tio egite hiloa mai ele, egite taga.
LUK 8:36 Me egiteu ale hilo seseletia, egite gilemulia giteu ale so guguvi ele, veia e Iesus eia kumuli taroti egiteu la hituhitu loilo te la tahalo ale.
LUK 8:37 Tio egite loloa mai ele, egite tomi la valalua e Gerasenale goio kaka vagari e Iesus veia eia ge hiliti taro egiteu, la vuhula egiteu tagati e paa. Tio e Iesus goio sae te la uaga, eia tugatio.
LUK 8:38 Eala moli la tahalo ale egite la hituhitu hele taroa, eia kaka gogogo e Iesus veia eia ge sae mulia, eala moli e Iesus baha taroa mago
LUK 8:39 “Eme ge goluma, eme ge gilemulia giteu la visuli te La Tahalo Uru soio taume.” Tio e maura loloa mai ele, eia goio goluma, eia veipalea giteu la papaga tomi ale e Iesus igotiala.
LUK 8:40 E Iesus miteu me la valalua la vimari tetala, egite goio beua soio e Galilea, la valalua me hatavivile mapaiti oio pou taitalia, egite hiloa eia guvi, egite sagege roboa.
LUK 8:41 Eala moli la tahalo isa oio, la isala e Iairas, eia la tahalo la vibaumulila isa te la luma la lotu tegiteu e Iuda te la mautu ale. Eia goio boru lagu tugu te la lagule Iesus, eia kaka gogogo e Iesus veia eia ge goio la luma tetala,
LUK 8:42 la vuhula e latula ale hatavile eia lea bara, hagagaviti ge peho. Eia e latula ouka isa lou ale hatavile, me la leavala te maura mai savulusa gete lua. E Iesus loloa mai ele, eia goio soko la tuluga veia ge goio la luma te Iairas, eala moli la valalua me hatavivile vivi roboa, eia kama abi tigi la lolovi.
LUK 8:43 Eala moli la tavile isa oio, la ilea mai la ilea la taio sibitala bibibi tetala la leavala savulusa gete luati, la uati tomi tetala kaluvuti soio tegiteu e dokta, isa kama koramulia ge vimahuli lou e maura.
LUK 8:44 Eala moli eia goio tuga mulimuli moli la pokele Iesus, eia goio pilau la gilesu la lavalava tetala, tio oio moli ovolale la kasosola tagaratio.
LUK 8:45 Goio, e Iesus tahi egiteu mago “Ere pilauti eau?” Egiteu tomi tahi taro veia egite isa kama pilaua, me Pita goio veiala mago “Tahalo Uru eme tatahi lou ilava?” Egite usu pasi oiole vivi robome ele.
LUK 8:46 Eala moli e Iesus vei louala mago “Isa pilautiau, la vuhula eau gabutia veia la vagagarigu tugati.”
LUK 8:47 Tio, la tavile lolotia mai ele veia e Iesus rovitia, la vovola pariri, eia goio boru lagu tugu te la vahale Iesus. Oio te la mata giteu tomi, eia veipalea veia eia pilau la lavalava te Iesus veia eia ge vimahulia, me eia veipala taia mai ele veia eia mahuli seseleti, eia posa tavileti lou.
LUK 8:48 Goio, e Iesus loloa mai ele, eia veiala mago “Latugu, eme gabu tikumu seseleti la vagagarigu, eala eme mahuliti ele. Eme ge tuga moli, la gilogo te La Uru ge pou taume.”
LUK 8:49 Tio, e Iesus so vikarakara, la tahalo isa loio te la luma te Iairas, eia goio veiala mago “Umalati toto susuku tavu la tahalo la vimari ele, e latumu oio pehoti.”
LUK 8:50 Eala moli e Iesus loloa mai ele, eia veiale Iairas mago “Umala eme ge ilo buruko. Eme ge gabu tikumu moli la vagagari La Uru, e latumu ge mahuli lou.”
LUK 8:51 Egite goio guvi oio la mata la luma te Iairas, e Iesus mera taro egiteu veia isa umala ge goilo vikapopo leia, eala moli eia puli moli egiteu taho tolu, e Pita, e Ioanes, e Iakob vikapopo me tamala me tilala, egite tomi ele goilo.
LUK 8:52 La valalua me hatavivile tomi magiri ogala, egite pipigi la tilali. E Iesus veia giteu mago “Amutou umala taitali, eia kama peho, ale eia mavuta moli.”
LUK 8:53 Egite loloa mai ele, egite lege vahi sesele e Iesus, la vuhula egite rovitia veia eia peho seseleti.
LUK 8:54 Eala moli e Iesus goio sau la limala, eia veiala mago “Latugu, eme hiliti.”
LUK 8:55 Tio oio moli ovolale, la kalulu la tavile bisi ele beu loua, eia goio hiliti. E Iesus goio veia giteu veia egite ge abiala bakisi la ilali veia eia ge alia.
LUK 8:56 E tilala me tamala karutu seselela, eala moli eia mera taro egirua veia egira umala ge veiale isasa te la paga ale eia igotia.
LUK 9:1 E Iesus goio tola vikapopo egiteu la valalua la vimari tetala ale savulusa gete lua, eia abia giteu la vagagarila tetala veia egite ge koramulia ge kumuli taro la hituhitu, ge vimahuli tai egiteu ale lalea.
LUK 9:2 Eia viteteli egiteu mai ele kaluvu, eia goio baha egiteu soio veia egite ge valolo oio te la maututula te la pulolou la matagagala te La Tahalo Uru, veia egite ge vimahuli tai egiteu ale lalea.
LUK 9:3 Eia veia giteu mago “Te la tuluga tamutou, amuto umala ge tamamasi isasa la paga. La toho umala, la kela umala, la ilali umala, la uati umala, la lavalava ilua tai ge umala.
LUK 9:4 Mai amuto ge pou te la luma isasa, amuto ge pou tola moli kara ale amuto ge tuga lou.
LUK 9:5 Mai la valalua me hatavivile kama ge rara tavu amutou, mai amuto ge tatugati, amuto ge kuvali taro la magasa te la vaha mutou, eia ge mai la irovilala soio tegiteu veia egite touti la merera te La Uru.”
LUK 9:6 Tio, egite lolo la merera te Iesus mai ele kaluvu, egite goio valolo tatuga te la maututula tomi, egite vimahuli tai egiteu ale lalea.
LUK 9:7 E Herod, la mulugaluga tegiteu e Galilea, eia lolo la igogolu tomi ale e Iesus igigoa, eia marapa ovola, la vuhula la valalua isahari toi e Iesus veia eia e Ioanes, la tahalo la vuluhi, eia mahuli rivuti lou,
LUK 9:8 me egiteu isahari lou, egite veia la bilalaha ale uru e Lias eia sibitalati, me isahari egite veia la bilalaha isasa tegite ururu eia mahuli rivuti lou.
LUK 9:9 Eala moli e Herod eia vikara mago “E Ioanes, eau barautu taroti la lohola, eia pehoti. Ale ere tahaloti lou ele?” Tio eia gabutatala papai mai ele, eia vagari veia ge baha tavu e Iesus veia ge hiloa.
LUK 9:10 Egiteu la bilalaha te Iesus valolo tatuga soio la maututula kaluvu, egite goio beu loua soio te Iesus, egite gilemuliala la igogolu tegiteu. Eia goio puli moli egiteu sekela soio, egite goio pou hagagavi la mautu bisi e Betsaida.
LUK 9:11 Eala moli egite la valalua me hatavivile loloa mai ele veia e Iesus oio, egite goio mulimulia soio la mautu ele. Eia goio laharoa giteu, eia valolo egiteu te la pulolou la matagagala te La Tahalo Uru, eia vimahuli tai egiteu ale lalea.
LUK 9:12 La paga mata roroviti, egiteu la valalua la vimari te Iesus ale savulusa gete lua, egite goio tetala, egite veiala mago “Eme ge baha taro egiteu, egite ge paa mulia giteu la ilali oio te la maututula, egite ge paa muli taia giteu la luma ale egite ge mavuta ovola, la vuhula egite mulimuliti etatou somai la gale ale la valalua ouka ovola.”
LUK 9:13 Eala moli e Iesus veia giteu mago “Amuto ge abia giteu la ilali.” Eala moli egite koliala mago “Amite la bret ilima moli, me la ia ilua. Eme masagea veia amite ge goio ge loto la ilali ale koramuli egite tomi?”
LUK 9:14 Egite veiala mai ele, me la giligi giteu la valalua tomi mai salatu savulu lima. Goio, e Iesus veia giteu la valalua la vimari tetala mago “Amuto ge vipou egiteu, la malosu giteu ge mai ale savulu limalima.”
LUK 9:15 Tio, egite goio igo molia mai ale e Iesus veia giteu, la valalua goio pou.
LUK 9:16 E Iesus abi la bret ale ilimale, me la ia ale iluale, eia goio taga soata la mori, eia vei tataho La Uru te la ilali ale, eia goio tovia giteu, eia abia giteu la valalua tetala veia egite ge barere legiteu la valalua me hatavivile.
LUK 9:17 Egite tomi ali maru, egite la valalua la vimari te Iesus goio tau vikapopo la makarakara giteu ale egite ali piligia, la kelakela makapipila ale egite tau vikapopo la makarakara giteu ovola, eia savulusa gete lua.
LUK 9:18 La haro isa, e Iesus pou sekela moli te la kilaka, egiteu la valalua la vimari tetala goio tetala, eia tahi egiteu mago “La valalua me hatavivile, egite veia eau ere?”
LUK 9:19 Tio, egite goio koli la tilahi tetala mago “Isahari veia eme e Ioanes, la tahalo la vuluhi, isahari lou veia eme e Lias, isahari tai egite veia eme la bilalaha isa tegite ururu ale mahuli rivuti lou.”
LUK 9:20 Eala moli e Iesus goio tahi rivu lou egiteu mago “Me amutou tai, amuto veia eau ere?” Tio, e Pita goio kolia soio tetala mago “Eme e Kraist, la tahalo ale La Tahalo Uru bahea veia ge vimahuli amiteu!”
LUK 9:21 Eala moli e Iesus mera taro vagari egiteu veia egite umala ge veiale isa veia eia e Kraist.
LUK 9:22 Eia goio veia giteu mago “E Latu La Tahalo, eia ge gabu muga la iligiligi, egiteu la ururu me egiteu la mulugaluga tegite pris me egiteu la tahalo la mari, egite tomi ele ge tahi taro eau, egite ge biliau, la haro itolu ge polo, La Tahalo Uru ge vimahuli rivu lou eau taro la pileho.”
LUK 9:23 E Iesus veia giteu mai ele kaluvu, eia goio toi la vikarara la tilovo soio tegiteu te la tauvalautu tetala ale eia ge bolea, veia etato ge bole la iligiligi mai tai eia. Eia veia giteu mago “Mai isa masagea veia ge mulimuliau, eia ge piligi taro la mahulila tetala, eia ge bole la tauvalautu tetala mai eau, eia ge mulimuliau mai ele.
LUK 9:24 Mai isa gabutatalea veia ge sau tola la mahulila tetala, tio la mahulila tetala ge kokovu taro leia. Eala moli mai isa veia eia ge piligi la mahulila tetala te la isagu, eau ge vimahulia.
LUK 9:25 Mai eme ge tahola la vuliti tomi moli, eala moli la kalulumu sesele ge vilua, ale ge sulime mave?
LUK 9:26 Mai isa ge mahela leau, eia ge mahela tai la merera taku, e Latu La Tahalo tai ge mahela tai leia te la tapasi la haro ale eia ge sibitala loata te la mori vikapopo me la matagaga tetala ale uru me vikapopo tai me la matagaga te Tamala ale uru me tegiteu la angelo ale maroka.
LUK 9:27 Eau vei seselea mutou, isahari tamutou ale omai magirigiri, amuto kama ge peho hari, amuto ge hilo pala muga la merera te La Tahalo Uru te la pulolou la matagagala tetala, eia ge puru omai te la maututula.”
LUK 9:28 E Iesus vimari egiteu kaluvu, soioge la haro iualu poloti, eia goio puli e Pita, e Ioanes, e Iakob soata te la gove veia eia ge pou, ge kaka.
LUK 9:29 Eia goio pou te la kilaka, la tirarola vulo sapolo, la lavalava tetala eia sasima pepeho sesele.
LUK 9:30 Oio moli ovola egira taho lua sibitala, e Moses mira me Lias, egiteu vikara me Iesus,
LUK 9:31 egira visibitala vikapopo me la matagaga te La Uru. Egite vikara muli la pileho te Iesus ale egite ge bilia
LUK 9:32 oio e Ierusalem, mai la tilau te La Uru soio tetala. E Pita miteu pehoti la mavutala, eala moli egite goio hagolo, egite hilo la matagaga uru tetala, egite hilo tai egirua taho lua magirigiri te la balila.
LUK 9:33 Egira goio hiliti tataroti e Iesus, e Pita veiala mago “Tahalo Uru taritigi pepeho etala omai pouti. Taritigi amite ge tigi itolu la kale, isa ge taume, isa ge te Moses, isa ge te Lias.” (Eala moli e maura vikara bulalahu moli, eia kama rovi la masova la merera ale eia veveiale.)
LUK 9:34 E Pita so vikarakara, la tuluvu la mori loio pigi robo egiteu, egite taga.
LUK 9:35 La golule isa loata te la mori, eia veia maie “Ale e Latugu la riau eau bahatia somai, amuto ge loloa.”
LUK 9:36 Eia vikara kaluvu mai ele, egite goio hiloa veia e Iesus sekela moliti oio popou. Egite kamati vikara, egite makovu moli, kara mulimulito egite kama veipala egiteu ale taho tolu ele, ale egite hilo egiteu.
LUK 9:37 Mai galigeli, e Iesus me egiteu taho tolu e Pita, e Iakob, e Ioanes egite hiliti loata la gove ale egite popou oata ovola, egite gotalo, la valalua me hatavivile mapaiti oio, egite goio polo lalaha e Iesus.
LUK 9:38 La tahalo isasa hiliti kabili tegiteu la valalua me hatavivile, eia goio tola e Iesus mago “Tahalo Uru, eme ge gomai hilo e latugu. Eme ge gogoau, eau e latugu isa moli sekela, isa oukati lou.
LUK 9:39 La hitu ale kama kokora eia lao bibibia. Mai eia ge laoa, la vovola ge malugu lalahu, eia ge vikarutu moli la kakurahala, la kaputela ge papara. La haroharo usu eia igigo molia mai ele, eia igo gegeru seselea.
LUK 9:40 Eau kaka egiteu la valalua taume veia egite ge kumuli taroa, egite kama koramulia.”
LUK 9:41 Goio, e Iesus loloa mai ele, eia vei rivu louala mago “A ka, amutou la tuvu la valalua ale igoie, amuto kama gabu tikumu bakisi la vagagari La Uru, amuto kama kokora gologolo. Eau pou tabaa agi seseleti omai tamutou. Gaisa eau ge tuga taro amutou? Eme puli e latumu somai taku.”
LUK 9:42 Tio la tahalo goio ga puli e latula soio te Iesus, eala moli la hitu goio lao loua, eia pigia sotalo la magasa, eia padedeko. Eala moli e Iesus igo totolo pepeho la hitu ele, eia goio hele taro e guliliki ele, eia goio posa tahalotio, e Iesus goio puli rivu louale tamala.
LUK 9:43 Egiteu la valalua me hatavivile tomi hiloa, egite karutu sesele la vagagarila ale isapolo te La Tahalo Uru e Iesus veipalatia.
LUK 9:44 La valalua me hatavivile, egite so gabutala papapai legiteu la golu la karutula e Iesus igotia kabili tegiteu ele, eia goio veia giteu la valalua la vimari tetala mago “Amuto ge laba gele tavu tigi la merera taku ale eau ge veia mutou. Egite la valalua la gima ge lao tola e Latu La Tahalo, egite ge lapuau soio te la vigagiala, eau ge magiri te la viputumulila tegiteu la valalua la vovo.”
LUK 9:45 Eia veia giteu mai ele, eala moli egite kama rovi tigi la masova la merera tetala, la masovala eia goio kokovu taro legiteu, eala egite kama koramulia ge rovia. Eala moli egite mahela le Iesus, egite kama masagea veia ge tahi rivu loua ovola.
LUK 9:46 Egiteu la valalua la vimari te Iesus, egite vaigo totolo rivu legiteu veia ere tegiteu ge muga egite.
LUK 9:47 Eala moli e Iesus, eia roviti la gabutatalala tegiteu, eia goio puli e guliliki isa bisi, eia vimagiria te la balila,
LUK 9:48 eia goio veia giteu mago “Mai la tahalo uka la tavile eia ge suli e guliliki isa bisi mai ale, eia mai ale suli tai eau, me mai isa ge suliau, eia mai ale suli tai La Uru ale baheau somai. La tahalo ale bisi tamutou tomi, eia ge uru sesele tamutou.
LUK 9:49 Eala moli e Ioanes goio koli la merera soio te Iesus maie mago “Tahalo Uru, amite hilo la tahalo isasa, eia kumuli tataro la hituhitu me la isamu, eala moli eia kama oilo tegatou, eala amite magiri roboa.”
LUK 9:50 Goio, e Iesus baoli rivuala soio mago “Umala amuto ge magiri roboa mai ele. Mai isasa kama gima etatou, eia mai ale suli moli etato.”
LUK 9:51 La imamala hagagaviti ale La Tahalo Uru ge puli rivu e Iesus soata tetala, e Iesus vagari veia eia ge goata pala muga e Ierusalem, eia goio sokoti la tulugao.
LUK 9:52 Eia goio baha pala mamuga egiteu la bilalaha tetala isahari veia egite ge mamuga tetala te la gauru, egite ge raragi pala muga leia la luma ale eia ge mavuta paposa oio vola te la tuluga tetala. Egite polo te la gale e Sameria, egiteu la bilalaha mamuga soio te la mautu isasa veia egite ge raragi tali e Iesus oio vola.
LUK 9:53 Eala moli la valalua la mautu alele, egite kama masagea veia e Iesus ge pou tegiteu, la vuhula eia matagagati tegiteu veia e Iesus ge goio e Ierusalem, me egiteu e Sameria touti la lotu tegite Iuda sesele oio e Ierusalem.
LUK 9:54 Goio, e Iakob me Ioanes, egira loloa mai ele veia egite touti e Iesus, egira goio tahi e Iesus mago “Tahalo Uru, mave, eme masagea veia amila ge tola La Uru veia eia ge pigi la havi loata te la mori, ge selu taro egiteu, ia?”
LUK 9:55 Eala moli e Iesus vulo gele soio tegirua, eia igo totoloti egiruao.
LUK 9:56 Tio egite tomi goio hiliti polo, egite goio la mautu isapolo, egite goio pouti ovolao.
LUK 9:57 E Iesus me la valalua la vimari tetala, egite tatuga te la gauru, la tahalo isa loio, eia veiale Iesus mago “Eau ge mulimulime soio te la galegale tomi ale eme ge goio vola.”
LUK 9:58 Eala moli e Iesus goio baoli rivu louala mago “Egiteu la paia hou, la muli giteu oio te la hova la obobu. Egiteu la malumalu tai, la loa giteu isasasa oio, eala moli eau e Latu La Tahalo, eau la muligu ouka ale eau ge mavuta oio vola.”
LUK 9:59 Goio, la tahalo isa lou loio, e Iesus veiala mago “Eme ge mulimuliau.” Eala moli eia veiale Iesus mago “Eau ge pou tali muga e tete ge peho, eau ge ulai mugea, tio eau ge mulimulime.”
LUK 9:60 Eala moli e Iesus goio koli rivuala soio mago “Korati ele. Egiteu ale so popou la maligoma, egite mai ale pehoti. Egiteu ele ge mai ale ulai rivu lou la pileleho giteu ele. Taritigi eme ge veipala moli la valolo ale taritigi te la pulolou la matagagala te La Tahalo Uru.”
LUK 9:61 Goio, la tahalo isa lou loio mago “Tahalo Uru, eau ge mulimulime, eala moli eme ge abiagu la baa veia eau ge goio muga tegiteu e valaluagu, eau ge tataro pala muga egiteu.”
LUK 9:62 Eala moli e Iesus veiala mago “Mai isa sauti la igogolu te La Uru, eala moli eia gabutatala rivurivu lou, eia kamati koramulia veia ge pou te la pulolou la matagagala te La Tahalo Uru.”
LUK 10:1 Tio, mulimuli ovolale, La Uru e Iesus eia hilovi egiteu la valalua ale savulu vitu lou, eia goio baha egiteu ilalua veia egite ge muga soio te la maututula ale eia tai ge goio vola.
LUK 10:2 Eia veia giteu la merera la tilovo veia la valalua me hatavivile te la maututula egite pou raragi tomiti veia egite ge lolo la valolo tetala, eala eia goio veia giteu la bilalaha tetala savulu vitu ele la vikararala maie mago “La ilali orivo matuha tomiti, eala moli la valalua la igogolu ovola kama usu. Taritigi amuto ge kaka e taho la mahuma veia eia ge baha lou la bilalaha usu sorivo ge suli lou amutou te la igogolu tetala.
LUK 10:3 Amuto ge tuga, eau baha amutou soio mai e latu la sip ale ge pou kabili tegiteu la karakara la paia hou.
LUK 10:4 Umala amuto ge tamamasi la uati me la kela soio te la tuluga tamutou, la silipa tai ge ouka te la vaha mutou, amuto ge igo harari moli, umala ge laharoale isasa te la gauru, eia soukama sau tola amutou, amuto kama ge igo tigi la igogolu tamutou.
LUK 10:5 “Mai amuto ge guvi oio te la luma te la tahalo isasa, amuto ge toi pala muga la vibalavala te La Uru soio te la tahalo ale me la karakara tetala.
LUK 10:6 Mai la tahalo ale taritigi ge pou te la lumale, la vibalavala tamutou eia ge pou tetala. Mai ge ouka, amuto ge abi rivu lou la merera la vibalavala tamutou ele.
LUK 10:7 Mai amuto ge pou te la luma isa, amuto ge pou tola moli ovola, umala bula vulovulo. Amuto ge ali moli la ilali, ge liu tai la lalu ale egite abia mutou, la vuhula amuto igogolu, la ilali me la lalu ale, eia mai la mapa mutou.
LUK 10:8 “Mai oio la mautu ale amuto ge guvi oio vola egite ge rara tavu amutou, amuto ge ali moli la ilali ale egite ge abia mutou.
LUK 10:9 Amuto ge vimahuli moli egiteu la ilea te la mautu alele, amuto ge veia giteu mago ‘La pulolou la matagagala te La Tahalo Uru eia tasuku hagagaviti somai tamutou.’
LUK 10:10 Eala moli mai amuto ge guvi oio te la mautu isasa, me egite kama ge rara tavu amutou, amuto ge magiri oio te la tia la mautu tegiteu, amuto ge veia giteu mago
LUK 10:11 ‘Male ge, la magasa pupupusi te la mautu tamutou omai te la vaha miteu, amite kuvali tarotia, eia mai la irovilala soio tamutou veia amuto touti la merera te La Uru.’
LUK 10:12 Me eau veia mutou, te la tapasi la maututula, la iligiligi te la mautu ale, eia ge kara polo la iligiligi te la mautu e Sodom.
LUK 10:13 “Maura miteu la mautu ilua e Korasin, e Betsaida! Mai eau ge igoti la golu la karutula te la mautu ilua e Saidon me Taia mai ale eau igo palatia kabili tamutoue, la valalua te la mautu ale kama kokora iluale, egite soioge ge vuvulo seseleti.
LUK 10:14 Eala moli mai ge te la tapasi la maututula, la mautu iluale e Saidon me Taia, egira kama ge ligi pepeho mai amutou ele.
LUK 10:15 Mai amuto tai la valalua la mautu e Kapernaum, amuto soioge veia La Uru ge puli amutou soata tetala, ia? Ge ouka gologolo, eia ge pigi moli amutou sotalo te la havi ale uru la kaluvula ge ouka.
LUK 10:16 “Mai isasa ge lolo amutou la bilalaha taku, eia mai ale lolo tai eau. Eala moli mai isasa ge tou amutou, eia mai ale tou tai eau, me mai ele eia tou taiti La Tahalo Uru ale baheau somai.”
LUK 10:17 Mulimuli moli ovolale, egiteu la bilalaha ale savulu vitu e Iesus baha palati egiteu, egite goio beu rivua, la sagegela uru oio te la tia giteu. Egiteu veiale Iesus mago “Tahalo Uru, mai amite ge toi la isamu, egite la hituhitu ale kama kokora ge roromuli moli amiteu.”
LUK 10:18 Goio, e Iesus veia giteu mago “Eau mata soio, eau hilo e Satan eia boru loata te la mori, eia boru sotalo mai la sima.
LUK 10:19 Eia sesele, eau abitia mutou la vagagarigu ale koramuli amuto ge soa kuru egiteu e taiveive, egiteu e komakilu tai, amuto ge soa kuru egiteu, egite kama ge ubi amutou, mai ale amuto ge bolehoho sesele la vagagarile Satan. La paga isa kama koramulia ge igo gegeru amutou.
LUK 10:20 Eala moli umala amuto ge sagegege tegiteu la hituhitu ale egiteu roromuliti amutou ele. Eala moli amuto ge sagege pepeho te la isaisa mutou, La Tahalo Uru kekesi tolatia oata te la mori.”
LUK 10:21 E Iesus, eia volu sesele La Kalulu La Marokala, eia gabu la sagegela uru sesele te la tiala, eia goio kaka mago “Eau vei tataho pasime Tete, eme La Uru oata te la mori, eme La Uru tai otalo te la magasa. La mari taume eia uru sesele, eme tau kokovua legiteu la tahalo la mari me egiteu la tahalo la pakakasala, eme veipala molia soio tegiteu e latatumu bisisi ale mulimuli seseleme. Ale la masasagala taume sesele, Tete.
LUK 10:22 La golugolu tomi eme sugu tarotiagu veia eau ge vibaumuli ovola. Isa kama ge rovi sesele la vulovulole Latumu, eme moli, Tete. Me isa kama ge rovi eme Tete, eau moli e Latumu, me egiteu tai ale eau masagea veia ge veipalame soio tegiteu.”
LUK 10:23 Tio, e Iesus kaka kaluvu mai ele, eia goio vulo tavu egiteu la valalua la vimari tetala, eia vei kekea giteu mago “Mutou, amuto balavati ale amuto hiloti la igogolu isahari omai taku.
LUK 10:24 Ale eau vei seselea mutou, egiteu la bilalaha te La Uru usu pepeho, me egiteu la mulugaluga tai ale usu, egite masagea veia ge hilo la igogolu ale amuto hilotiae, veia ge lolo tai la merera ale amuto lolotiae, eala moli la igogolu ale, egite kama hiloa, me la merera tai ale, egite kama loloa, amutou moli.”
LUK 10:25 La haro isasa la tahalo la mari isasa, eia goio hiliti veia ge tovo lalai la mari te Iesus, eia goio tahia mago “Tahalo Uru, la rova sesele eau ge igoa veia taku ge la mahulila ale sesele, la kaluvula ge ouka?”
LUK 10:26 Tio, e Iesus goio tahi rivu loua mago “La merera te Moses me tegite ururu, eia veia gatou mave? La giligi taume eia mave ovola?”
LUK 10:27 La tahalo la mari eia loloa mai ele, eia goio veiale Iesus mago “Eme ge gabu tikumu La Uru taume te la gilogo taume tomi, te la masasagala taume tomi, te la vagagarimu tomi, me te la gabutatalala taume tomi tai. Eme ge puhi tataho tai e tabaramu mai lou ale eme puhi tigi rivu loume.”
LUK 10:28 Tio, eia veiale Iesus kaluvu mai ele, e Iesus veiala mago “La vikararala tomi taume alele eia sesele, eme kama ruru, mai eme ge igo molia mai ale eme veitiale, taume ge la mahulila.”
LUK 10:29 Eala moli la tahalo la mari ele, eia mahela la mari ale uru te Iesus, eia veia ge tasuku lou la merera tetala soio tetala, eia goio tahi rivu loua mago “Eala moli e tabaragu ale eau ge puhi tataho seselea, eia ere?”
LUK 10:30 Tio e Iesus goio koli rivu louala mago “La tahalo isasa loatata e Ierusalem veia ge gotalo e Ieriko, eala moli eia goio poga egiteu la tahalo la pakalila isahari oio te la gauru. Egite seri taro la lavalava tetala, egite goio kue gegeru seselea, eia goio peho, eia tabulitio, egite goio tuga taroa.
LUK 10:31 “Goio, e pris isasa eia tatuga te la gauru ele, eia hilo e maura otalo tabulibuli, eia goio polo pepe taroa.
LUK 10:32 Goio la tau Levi isa loio sibitala tavua, eia tai goio polo pepe taro taia.
LUK 10:33 Eala moli la tau Sameria isa loio sibitala, eia hiloa otalo tabulibuli ele, eia goio gogo pepeho seselea.
LUK 10:34 Eia goio vuhi tataho la mata la kulue, eia avu roboa. Eia goio visaea soata la pokele donki tetala, eia vaharia soio te la luma la mosi, eia goio baumulia oio vola.
LUK 10:35 Mai galigeli lou, eia goio abia la tahalo la luma ilua la uati, eia veiala mago ‘Eme ge baumuli mugea, eau ge beu rivu loua somai, mai la uati ilua ale eau abitiamu ele, eia kama ge koramulia, eau ge vimatata rivu loua somai taume.’”
LUK 10:36 Tio, e Iesus gilemulimuli kaluvutiala mai ele, eia goio tahia mago “Ere tegiteu ale itolu ele, eia puhi tataho la tahalo alele mai e tabarala sesele?”
LUK 10:37 Tio, la tahalo la mari goio veiala mago “La tahalo moli ale gogoa, eia e tabarala sesele.” Tio, e Iesus goio veiala mago “Ioge, eme ge tuga moli, me eme ge mulimuli moli la vulomu ale mai ele.”
LUK 10:38 E Iesus me egiteu la valalua la vimari tetala, egite tatuga te la gauru ale goata e Ierusalem, egite goio guvi oio la mautu isasa, la tavile isasa, la isala e Mata, eia kaka tavu e Iesus veia eia ge pou muga oio tetala.
LUK 10:39 E Mata, e tabarala tai e Maria oio, e Iesus goio pou tegirua, e Maria pou la lagule Iesus, eia lololo la merera tetala.
LUK 10:40 Eala moli e Mata vavala pasi la iraragi la ilali tegiteu, eia goio te Iesus, eia veiala mago “Tahalo Uru, eme kama gabutatala eau, e tabaragu oio popou ele, eau sekela moli omai lagu papai la iligo la ilali gatou? Eme ge veiala veia eia ge gomai ge koliau!”
LUK 10:41 Eala moli La Uru veiala mago “Mata, Mata, emei ele gabutatala papai pasi.
LUK 10:42 Eala moli la paga isa oiole eme so savelea, mai la merera taku. E Maria moli hiloviti la gauru ale taritigi sesele, la vuhula eia pou hagagavi la baligu, eia loloau, me la vibalavala ale eia sau tolatiale, eia kati ge kokovu taro lou leia.”
LUK 11:1 La haro isasa, e Iesus pou te la kilaka, eia goio kaka kaluvu, isa tegiteu la valalua la vimari tetala goio tahia mago “Tahalo Uru, taritigi veia eme ge lube tigia miteu la gauru la kilaka, mai tai e Ioanes la tahalo la vuluhi eia tovoti legiteu la valalua la vimari tetala.”
LUK 11:2 Tio, e Iesus loloa mai ele, eia goio veia giteu mago “Mai amuto ge pou te la kilaka amuto ge kaka maie: Tama miteu, Taritigi pepeho veia la maututula tomi ge gabu tikumu la isamu. Taritigi veia la pulolou la matagagala taume eia ge sibitala.
LUK 11:3 Eme ge abia miteu la ilali te la haro tomi isasasa ale koramuli la pulolou tamiteu.
LUK 11:4 Eme ge vimavulaha taro le amiteu la iruru tomi ale amite igotia, mai amite igigoa giteu ale egite igoa miteu la iruru. Umala eme ge mata sosoli amiteu veia e Satan ge tovo lalai amite.”
LUK 11:5 E Iesus goio solo lou la vikararala soio tegiteu mago “Mai la tahalo isasa tuga tavu e tabarala te la logo posa, me eia veiala mago ‘Tabaragu, abiagu la ilali ale koramuli egiteu la mosi ale guviti taku, eau ouka la ilali oio ale ge abia giteu.’
LUK 11:7 “Me e tabarala koliala mago ‘Eme ge tuga, amite me latatugu omai mavutati, amite kapiti. Eau kama ge hiliti tavume veia ge abiamu isa la paga.’
LUK 11:8 Eia ge veiala mai ele, eala moli mai eia kama ge gogo e tabarala, eala moli e tabarala ge toto susuku tavu molia, eia ge silaha leia, eia ge hiliti, eia ge abiala la ilali ale ge koramuli egiteu.
LUK 11:9 “Tio, me oio volale, eau vei seselea mutou, mai eme ge kaka la visuli te La Uru, eia ge sulimei.
LUK 11:10 Mai eme ge paa muli vagari la merera tetala, eme ge sivutia. Mai eme ge ligiligi moli la mata, La Uru ge kopemei.
LUK 11:11 “Ere tahalo, mai e latula ge kakea la ia, eia ge abi moliala e taive?
LUK 11:12 Uka, mai e latumu ge kaka la hatotolu, eme ge abiala e komakilu?
LUK 11:13 Soioge ouka ge, eala moli mai amuto la tahalo la vovo ale kama kokora, amuto matagaga moliti te la gauru la visuli ale taritigi soio tegiteu e latatu mutou, e Tama mutou tai oata la mori, eia ge visivo La Kalulu La Marokala mai la vaabila sesele soio tamutou ale ge kakea.”
LUK 11:14 La haro isasa, e Iesus kumuli taro la hitu te la tahalo isasa, la hitu ale la harela vikamu robo. E Iesus kumuli taro la hitu te la tahalo ale, eia goio soko la vikararala, la valalua me hatavivile, egite hiloa mai ele, egite karutu seselela.
LUK 11:15 Eala moli isahari goio hiliti, egite vei mago “Oio moli te la vagagari la mulugaluga tegiteu la hituhitu, e Bielsebul moli sekela, eia kumuli tataro egiteu la hituhitu ele.”
LUK 11:16 La valalua isahari tai lou, egite veia ge tovo lalai lou e Iesus, egite kakea veia eia ge igo isa la golu la karutula ale loata te la mori soio tegiteu veia egite ge hiloa.
LUK 11:17 Eala moli e Iesus eia roviti la gabutatalala tegiteu, eia veia giteu mago “Mai la valalua la mautu isasa ge vaubi rivu lou megiteu, egite tomi ge vilua, la mautu tegite ge kaluvu.
LUK 11:18 Mai tai lou ele, mai e Satan ge vikue rivu lou me Satan, eia kati ge magiri vagari, eala moli eau veia amutou mai ele, la vuhula amuto ubi leau la merera veia eau kumuli taro egiteu la hituhitu te la vagagarila te la mulugaluga tegiteu lou, ale e Bielsebul.
LUK 11:19 Mai eau ge kumuli taro sesele egiteu te la vagagarile Bielsebul moli, eau veia ge tahi tai amutou veia egiteu la valalua ale mulimuli amutou, mai egite ge kumuli taro egiteu la hituhitu, egite kumuli taro legiteu la isa lere? Egiteu la valalua tamutou tai, egite kumuli tataro egiteu la hituhitu, amuto ge veia egiteu tai la bilalaha te Satan, ia?
LUK 11:20 Eala moli mai eia ge sesele moli veia eau kumuli tataro egiteu la hituhitu te la vagagari La Tahalo Uru, amuto ge matagaga mai ele veia la pulolou la matagagala te La Tahalo Uru eia tasuku hagagaviti somai tamutou.
LUK 11:21 “Mai la tahalo la vuliti isa ge vagari robo la luma tetala la gata, isa kama ge pakali la golugolu tetala.
LUK 11:22 Eala moli mai la tahalo ale vagari sesele ge loio, eia ge bolehoho la tahalo la vuliti, eia ge abi taro leia la torola, eia ge seri taro tomi leia la golugolu tetala.
LUK 11:23 Mai isa kama ge suli eau, eia mai ale gima eau. Mai isa kama vibaumuli la sip vikapopo leau, eia mai ale basimuli bura egiteu la sip taku.
LUK 11:24 “Mai la hitu ale kama kokora ge hele taro la tahalo ale eia pala pou tetala, eia ge luu soio la hohoi, eia ge tuga vulovulo veia ge maila, eala moli ouka. Tio eia ge vei mago ‘Eau ge beu rivu loua soio la muligu ale eau tuga tarotia.’
LUK 11:25 Tio eia goio beu rivu loua, eia goio hilo la luma tetala oio taritigi moli, egite sapa tatahotia, la paga isa kama tabuli marapa oilo vola.
LUK 11:26 Tio eia goio baha tavu egiteu la hitu ale taho vitu lou ele, veia egite ge goilo ge mou vikapopo leia. Me maura la tahalo ale, eia ge paua viruru sesele, la pauala tetala eia kama mai ale pala, eia ge uru pepeho lou, la vuhula la hituhitu usu pepehoti pouti tetala.”
LUK 11:27 E Iesus vikara kaluvuti soio tegiteu mai ele, goio la tavile isasa magiri kabili tegiteu la valalua me hatavivile, eia tola soio te Iesus mago “La tavile ale pigome, eia visusume, eia balava seseleti.”
LUK 11:28 Eala moli e Iesus goio koliala mago “Egiteu ale lolo la merera te la Tahalo Uru, me egite roromuli taia, egiteu moli alele, egite balavati.”
LUK 11:29 Egiteu la valalua me hatavivile usu oio vikapopoti te Iesus, egite usu goio guguvi lou. E Iesus goio vikara lou soio tegiteu mago “Amutou la tuvu la valalua ale igoie, amuto kama kokora viruru. Amuto masagea veia ge hilo la irovilala te la vagagari La Tahalo Uru, eala moli ge ouka viruruti, La Uru igotia pala oio te Iona.
LUK 11:30 Mai alaura e Iona magiri matagagati mai la irovilala soio tegiteu la valalua e Nineva. Mai lou e Ionale, e Latu La Tahalo eia magiri matagagati mai la irovilala kabili tamutou la tuvu la valalua ale igoie.
LUK 11:31 Te la tapasi la haro, la tavile uru ale pou la mulugaluga otalo la gale e Siba, eia ge hiliti vikapopo le amutou la tuvu la valalua ale igoie, eia ge vitomu sasae la vulovulo mutou, La vuhula alaura eia hiliti loio te la igaga la maututula veia ge hari tavu e Solomon, ge lolo la tikumu la merera tetala. Me igoie la tahalo ale uruale Solomon, eiala guvitie.
LUK 11:32 Me te la tapasi la haro tai ele, egite la valaluale Nineva ge hiliti vikapopo le amutou la tuvu la valalua ale igoie, egite ge tomu sasae la vulovulo mutou, la vuhula e Iona valolo egiteu, egite vuvulo, eala moli igoie la tahalo ale uruale Iona eiala guvitie, eala moli amuto touti lou eaue.
LUK 11:33 “Etato isasa kama koramulia ge viroko la lam veia ge sugu kokovu loua, veia ge tau robola la baket, ouka, etato ge viroko la lam, etato ge haratili saea oata veia egite tomi ale goilo ge matagagala.
LUK 11:34 La mata mutou, eia mai la matagaga te la vovo mutou tomi. Mai la mata mutou ge taritigi, la vovo mutou tomi ge matagaga. Eala moli mai la mata mutou kati ge taritigi, la vovo mutou tomi ge maligoma.
LUK 11:35 Amuto ge vibaumuli tigi lou amutou, veia la matagaga ale amuto sau tolatia eia ge mai moliti ele, eia umalati ge maligoma lou.
LUK 11:36 Mai la vulo mutou ge volu tomi la matagaga, la maligoma bakisi ouka oio vola, tio la matagaga tamutou ele ge vimatagaga tomi amutou, mai la lam ale uru, etato pou la matagagala.”
LUK 11:37 E Iesus vikara kaluvu soio tegiteu la valalua me hatavivile mai ele, goio e pariseo isa tuga tavu e Iesus, eia kakea veia eia ge ali vikapopo leia oio te la luma tetala. Tio e Iesus goio goilo la luma tetala, eia goio pou veia ge ali.
LUK 11:38 E pariseo ele hiloa veia eia kama litu pala muga la limala mai la vulovulo giteu e Iuda, eia karutu sesele,
LUK 11:39 eala moli La Uru veiala mago “Amuto pariseo, la vulovulo mutou mai moli ele! Amuto vuhi la poke la kap me la plet ale logala, eala moli oilo la ilola amuto kama vuhi vei tigia. Mai tai amutou ele, amuto litu la lima mutou, eala moli oilo te la tia mutou eia volu me la vulovulo ale kama kokora!
LUK 11:40 Maura miteu! La Tahalo Uru vipou la vovomu ale logala, me la tiamu oilo tai eia vipoua, eia rovi tomi la vulovulo mutou.
LUK 11:41 Eala moli mai la ilali ale tabuli te la plet taume, eme ge abia giteu la valalua la morivava, ale la vulovulo mutou ge sibitala maroka tomi mai ele.
LUK 11:42 “Maura miteu pariseo! Amuto tabari tataho la ilali bisi kokokori mai la lobo, la onion, veia ge mai la galela ge savulu sasa amuto ge abi taro isasasa oio vola ge abia La Uru, eala moli la vulovulo mutou soio tegiteu e tabarabara mutou kama matatata, me amuto kama gabu tikumu tai La Uru. Mai amuto ge puhi tigi La Uru me egiteu e tabarabara mutou, tio amuto ge lagu tavu la imoimo la vulovulo mutou tai ele.
LUK 11:43 “Maura miteu pariseo! Amuto goilo lotu, amuto masagea veia ge pou mamuga te la mata giteu la valalua. Amuto tatuga tai te la tia la mautu veia la valalua ge gabu tikumu amutou, ge laharoa mutou.
LUK 11:44 “Maura miteu, amuto mai la liba ale la valalua tatuga toa sasae oata ovola, egite kama rovia veia la magasa ale la liba, la paga ale mavulu otalo kua moli ovola, eia mai tai la vulovulo mutou e pariseo tai ale tabuli kokokovu ele.”
LUK 11:45 La tahalo la mari isa, eia hiliti, eia goio veiale Iesus mago “Tahalo La Vimari, eme vile egiteu e pariseo mai ele, eme mai ale vile tai amiteu la tahalo la mari.”
LUK 11:46 Eala moli e Iesus goio koliala mago “Meie, maura miteu, amutou tai la tahalo la mari ele! Oio te la merera papaila ale usu tamutou ele, amuto mai ale vauru la tabule ale tikumu soio te la beho giteu la valalua veia egite ge bolea. Eala moli amuto kama masagea veia ge suli legiteu la mari tamutou ele, veia ge bole la tikumu la tabule ale amuto abitia giteu ele.
LUK 11:47 “Maura miteu, amutou ale igo la simen te la liba giteu la bilalaha te La Uru ale pala, eala moli ere bili egiteu? Egiteu moli e tutubu mutou lou ele!
LUK 11:48 Eala, oio te la gabutatalala tamutou, amuto soioge veia la vulovulo giteu e tutubu mutou eia taritigi, la vuhula egite pala bili egiteu la bilalaha, me igoie amuto simen la liba giteu ele!
LUK 11:49 Eia mai tai la merera te La Uru soio tegiteu la valalua me hatavivile e Iuda ale pala, ale eia veia giteu mago ‘Eau ge baha egiteu la bilalaha taku soio tegiteu la valalua me hatavivile taku, egite ge bili isahari tegiteu, ge viligi pepeho tai egiteu usu.’
LUK 11:50 Eala amutou la tuvu la valalua ale igoie, amuto ge bole la tikumu la kasoso giteu la bilalaha tomi ale la valalua biliti egiteu pala,
LUK 11:51 sokotia te la pilehole Abel, karati omai la pilehole Sekaraia, egite bilia kabili te la baa la poro me la kapiutu ale maroka oilo la luma la lotu. Eau vei seselea mutou, la tuvu la valalua ale igoie, egite ge bole la tikumu la pileho giteu tomi ele.
LUK 11:52 “Maura miteu la tahalo la mari! Amuto abi taroti legiteu la valalua la ki te la mari te La Uru. Amuto kama kope rivu lou amutou soilo, amuto mai ale magiri robo lou egiteu e tabarabara mutou tai ale masagea veia ge goilo ge rovi la pulolou la matagagala te La Uru.”
LUK 11:53 Tio, e Iesus vikara soio tegiteu mai ele kaluvu, eia hiliti taro la luma, egiteu la tahalo la mari me egiteu e pariseo goio mulimulia, egite vile seselea, egite tahi susukua la tilahi usu sesele, egite vagari tavua veia eia ge koli rivu loua giteu,
LUK 11:54 egite veia ge vitilo loua mai ele te la merera tetala lou.
LUK 12:1 La valalua me hatavivile mapaiti sesele guvi vikapopoti, egite vitoa talu baololi moliti legiteu, eala moli e Iesus goio vikara pala muga soio tegiteu la valalua la vimari tetala, eia tutu tolea giteu mago “Amuto ge mata rara tigi, la merera la visigologolola tegiteu e pariseo soukama vitilo tai amutou, la merera tegiteu bakisi moli eia koramulia ge igo gegeru la valalua usu.
LUK 12:2 La merera tomi ale igoie tabuli kokovu, eia mulimuli ge sibitala matagaga tomi lou, me la iruru ale egite vei roboa, eia kamati ge tabuli kokovu, eia mulimuli ge tabuli palala tomi lou,
LUK 12:3 me la merera ale eme sigili kokovua le tabaramu, La Uru ge veipalea, la valalua tomi ge rovia.”
LUK 12:4 Tio, e Iesus goio visolo lou la merera soio tegiteu la valalua la vimari tetala mago “Amutou tabarabaragu, umala amuto ge taga egiteu la valalua la gima ale ge bili la vovo mutou, egite kati ge koramulia ge igo lou la iruru isa soio tamutou.
LUK 12:5 Eala moli eau ge vei matagaga pala mugea mutou te la tahalo ale isa moli sekela ale amuto ge tagea. Amuto ge taga moli La Tahalo Uru, eia koramulia ge bili amutou, eia ge pigi tai la kalulu mutou sotalo la havi. Taritigi amuto ge taga seselea.
LUK 12:6 “Etato tomi matagagati veia mai etatou e Iuda ge loto la malu, etato ge pigi moli e toea ilima, ge abi la malu ilima, la mapa giteu bisisi moli mai ele, egite la golu bulalahu moli, eala moli La Tahalo Uru eia rovi tomiti egiteu.
LUK 12:7 Mai la ivivu mutou tai ele, La Uru gigitia, eia rovi tomiti la giligila te la gama mutou tomi isasasa. Eala, amuto umala ge taga egiteu la gima, la vuhula amuto kama la golu bulalahu te la mata La Uru, eia ge gabu tikumu amutou kara polo la vibaumulila tetala soio tegiteu la malumalu bisisi.
LUK 12:8 “Eau veia mutou, mai isasa ge magiri te la mata giteu la valalua, eia ge veipalea veia eia taku, tio eau e Latu La Tahalo, eau ge mulimuli tai ge veipalea te la mata giteu la angelo te La Tahalo Uru veia la tahalo ale, eia taku sesele.
LUK 12:9 Eala moli mai isasa ge tahi taroau, mulimuli tai eau ge tahi taroa oio te la mata giteu la angelo te La Tahalo Uru.
LUK 12:10 Mai isa ge vikara gegeruale Latu La Tahalo, la iruru ale, La Uru koramuli ge vimavulaha taro loua, eala moli mai isasa ge vikara gegerua La Kalulu La Marokala, tiele ale ge tabuli moli, kama ge sabubu loua.
LUK 12:11 “Egite ge lao tola amutou, ge vimagiri amutou te la vigagiala oio te la lagu giteu la mulugaluga la lotu, oio te la lagu giteu tai la mulugaluga te gavman. Te la haro ale, umala amuto ge gabutatala papapai la merera ale mave veia amuto ge toro robo le amutou ovola, uka la merera ale mave amuto ge valolo ovola.
LUK 12:12 La vuhula te la haro moli ale, La Kalulu La Marokala ge tovo tataho amutou la merera tetala tomi ale amuto ge veipalea soio tegiteu.”
LUK 12:13 Tio, la tahalo isa magiri kabili tegiteu la valalua me hatavivile, eia goio tahi e Iesus mago “Tahalo Uru, eme ge veiale tuagu veia eia ge lele luea milua la magasa te tama milua.”
LUK 12:14 Eala moli e Iesus veiala mago “Tabaragu, ere vipouau veia eau ge mata muli la vaigigola tamutou la valalua?”
LUK 12:15 Eia veiala mai ele kaluvu, eia goio veia giteu la valalua me hatavivile ale magirigiri ele mago “Amuto ge mata rara, la vulovulo giteu ale hari ololu la golugolu eia souka vitilo amutou. La mahulila ale sesele, eia kama oio te la golugolu ale etato taholea.”
LUK 12:16 Goio, eia veia giteu la vikarara la tilovo isa lou mago “La tahalo la vuliti isa uru, la ilali oio la mahuma tetala matuha usu pepeho sesele,
LUK 12:17 eia goio gabutalea maie mago ‘Eau ge igo mave? Eau la luma ouka ale ge tau ololu la ilali taku oio vola, veia eau ge maketila.’
LUK 12:18 “Tio, eia goio gabutatala papai mai ele, eia goio sivutia mai ele mago ‘Eau ge igo maie: Eau ge lobe taro la lumaluma la tilalau la ilali taku, eau ge tigi halaba isahari ale ururu makapilapila lou. La ilali tomi taku, la golugolu taku tomi tai eau ge vagoiloa ovola,
LUK 12:19 eau ge vei rivu louagu maie: La golugolu tomi ele ge vibaumuliau te la leavalavala usu, eau ge kavovou tataho, eau ge alali, eau ge liliu, eau ge maru, eau ge sagege pepeho seseletio.’
LUK 12:20 “Eala moli La Tahalo Uru, eia sibitala tavua, eia veiala mago ‘Maura emei! Galogo moli, eau ge abi taro leme la kalulumu, eme ge peho. Tio, tere ge la golugolu taume ele, ale eme raragitia veia eme ge pou la balavala oio ovola?’”
LUK 12:21 Tio e Iesus goio vikaluvu la vikarara la tilovo alele soio tegiteu ele, eia goio veia giteu mago “Me eia ge mai moli ele tegiteu tomi ale ge tau ololu la vuliti, eala moli oilo te la kalulu giteu, egite savelea la vuliti te La Tahalo Uru.”
LUK 12:22 Goio, e Iesus tovo lou egiteu la valalua la vimari tetala mago “Tio, eau veia mutou, umala amuto ge gabutatala papai la mahulila te la vovo, veia la rova amuto ge kaia, uka la rova amuto ge alia.
LUK 12:23 La mahulila ale sesele, eia uru tegirua me la ilali, me la vovo gatou tai, eia muga tegirua me la lavalava.
LUK 12:24 Mai amuto ge gabutatala egiteu e kaokao. Egite kama gorivorivo, egite kama galugalu, egite kama lukuluku, me la tilalau la ilali tegiteu tai ouka, eala moli La Tahalo Uru moli eia valivali egiteu. Me amutou, La Uru ge gabu tikumu amutou, amuto kama la golu bulalahu mai la malu.
LUK 12:25 Mai isa tamutou eia ge pou varumurumu moli, eia koramulia ge lapu malau lou la mahulila tetala? Ge ouka gologolo.
LUK 12:26 Mai la igogolu ale kama vagari mai ele, amuto boto seseleti ovola, ilava amuto ge gabutatala papai la papaga isahari lou mai la ilali me la lavalava?
LUK 12:27 “Gabutatala tai egiteu la sese la gelegele. Egite kama rovi la igogolu, egite kama sasahi la kulikuli, eala moli la tokoromola tegiteu, eia muga te la vitokoromola te Solomon ale marasa pepeho.
LUK 12:28 Mai La Uru ge visibitala tataho la vitokoromola soio tegiteu la obobu te la hohoi, mai la sese la obobu ale kama tabuli tabaa eia paru lou, egite parara, tio eia ge vauru tai la vitokoromola soio tamutou. Amutou ele, amuto kama gabu tikumu tigi La Uru!
LUK 12:29 “Umala tai veia amuto ge gabu tikumu la ilali ale amuto ge alia, uka la lalu ale amuto ge liua. Umala amuto ge ilo buruko tai te la paga isasa.
LUK 12:30 Egiteu la valalua la maligoma moli, egite gabu tikumu la golu bulalahu mai ele.
LUK 12:31 Eala moli mai amuto ge gabu tikumu pala muga la pulolou la matagagala te La Tahalo Uru, mulimuli eia ge vauru la golugolu tomi mai ele soio tamutou.
LUK 12:32 “Amutou la karakara la sip ale bisi taku, amuto umala ge taga. E tama mutou masagatia veia amuto ge pou te la pulolou la balavala tetala.
LUK 12:33 Amuto ge abi tomia giteu la valalua la ilotoloto la golugolu tamutou ele, egite ge lotoa, la uati ale amuto ge abia oio vola, amuto ge vaabila soio tegiteu la morivava. Amuto ge abi la tilalau la uati tamutou ale eia kama ge masile lou, la vuliti tomi tamutou, amuto ge tau ololu egiteu oata te la ilo la lage, eia kama ge kaluvu, la tahalo la pakalila kama ge abi taro le amutou, me e kusuke tai kama ge koroa. Mai la vuliti tamutou tomi ge tau raragitia oata, ale eia ge taritigi pepeho tamutou,
LUK 12:34 la vuhula la gabutatalala tamutou eia ge magiri tola moli oio te la vuliti tamutou ele.
LUK 12:35 “Amuto ge raragi tigi te la bileula te La Uru mutou. Amuto ge kisi tola vagari la lavalava tamutou, amuto ge kisipou tai, amuto ge viroko tai la lam tamutou.
LUK 12:36 Mai ge mai ele, amuto ge raragi tataho mai egiteu la bilalaha te la uru isasa, egite pou talia veia eia ge beua loio te la ilali la taulaila. Mai eia ge guvi, egite ge kope haria.
LUK 12:37 Mai ge mai ele, egite ge pou la balavala, la vuhula egite hagoloti, egite pou raragi tatahoti te la guluvi te la uru giteu. Eia ge goio ge kisi vagari muga la lavalava tetala, goio eia vipouti egiteu te la ilali, eia ge koli la vulovulo giteu ale egite igotia soio tetala.
LUK 12:38 Mai eia ge guvi te la logo posa, uka te la logo uru seseleti, la golu isa ouka, mai egite ge raragi tataho leia, egite ge pou la balavala.
LUK 12:39 Gabutatala tigi muga tai la vikararalale: Mai e taho la luma isasa, eia ge rovi la mata la haro ale la tahalo la pakalila ge sile tavu la luma tetala, eia kama ge mata sosolia mai ele, eia ge pahutu robo tigi la tahalo la pakalilale.
LUK 12:40 Mai tai amutou lou ele, amuto ge raragi tigi tataho, la vuhula e Latu La Tahalo eia ge guvi te la mata la haro ale amuto veia eia kama ge guvi oio vola.”
LUK 12:41 E Iesus vikara soio tegiteu mai ele kaluvu, e Pita goio hiliti, eia tahia mago “Tahalo Uru, mave, la vikarara la tilovo alele, eme vei molia miteu la valalua la vimari taume, uka eme veia giteu la valalua tomi?”
LUK 12:42 Eala moli e Iesus goio koli louala mago “La merera taku ele, eia koramuli egiteu la bilalaha taku tomi ale egiteu taritigi, mai la bilalaha ale la uru tetala eia vipoua veia eia ge la mulugaluga te la luma tetala, veia eia ge vaali tai egiteu la bilalaha tomi.
LUK 12:43 La bilalaha ale taritigi sesele mai ele, mai la uru tetala ge guvi, eia ge sivutia oio te la igogolu tetala, eia igogolu tataho, tio eia ge pou la balavala.
LUK 12:44 Eau veia mutou, la uru tetala ge vauru polo loua, eia ge vipoua veia eia ge baumuli la golugolu tomi, me la magasa tomi tetala.
LUK 12:45 “Eala moli mai la bilalaha ge gabutatala maie ‘La uru taku eia ge pou tabaa’, tio me oio moli ovola eia ge kue egiteu la bilalaha ale bisisi, eia ge ali maru, eia ge liu paua.
LUK 12:46 Tio la haro isasa, la uru tetala ge beua, la bilalaha tetala kama rovia, me eia kama raragi tigi leia te la guluvi tetala. La uru ge vilai e maura, eia ge barautu gegerua, eia ge baha taroa sogala tegiteu ale egiteu kama sau tola tigi la igogolu.
LUK 12:47 “Mai la bilalaha ale rovi la gabutatalala te la uru tetala, eala moli eia kama raragi tigi, me eia kama tilimuli la masasagala tetala, la uru tetala ge vilai seselea, eia ge kumamasi vulo pepehoa.
LUK 12:48 Eala moli mai la bilalaha ale kama rovi la gabutatalala te la uru tetala, eia goio ruru, eia kama ge ligi sesele, la uru ge kumamasi molia bakisi. La vuhula mai isa ge rovi pepeho la merera te La Uru, La Uru ge masagea veia eia ge igogolu tataho oio tetala. Mai egiteu ale La Uru vauruti egiteu veia egite ge vibaumuli la igogolu tetala, eia ge mata muli vagari la igogolu tegiteu.”
LUK 12:49 E Iesus vei loua giteu mago “Eau gomai veia ge visibitala la havi omai te la maututula tomi, eau masaga pepehotia veia la havi ge karere, eala moli soukato.
LUK 12:50 Pala muga eau ge gabu la iligiligi, eau ge ilo buruko moli kara la iligiligi taku ele ge kaluvu.
LUK 12:51 Amuto soioge gabutatalea veia eau guvi omai veia eau ge vipou vitau me tabara tataho la valalua, ia? Ouka, eau guvi moli veia ge vipou gagima la valalua.
LUK 12:52 Kara igoie, kara mulimuli, mai e tau me latatu taho lima, ale taho tolu ge vikue me ale taho lua, me ale taho lua ge vikue me ale taho tolu.
LUK 12:53 Egite ge vipou gima, mai la tahalo isa me latula, egira ge vikue rivu lou, mai la tavile isa me latula, egira ge vikue rivu tai lou, la tavile isa me uala, egira tai ge vikue rivu lou.”
LUK 12:54 E Iesus goio vei loua giteu la valalua me hatavivile mago “Mai amuto ge hilo la hura magiri lotalo, amuto ge vei mago ‘Male, la hura ge pu sesele gageie’, tio me eia ge goio ge pu mai ale amuto veitia.
LUK 12:55 Mai tai amuto ge gabu la hipu ale vaivaia, amuto ge vei mago ‘Male, la haro ge ali vagari pepeho sesele’, me eia ge sesele moli mai ale amuto veitia.
LUK 12:56 Maura miteu, amuto la tahalo la visigologolola sesele. Amuto koramuli tatahoa ge hilo tigi la irovilala mai la hura me la hipu omai te la magasa me ale loata tai te la mori, amuto ge rovi tataho la masovala ovola, ilava amuto kama koramulia ge mata kilala tigi la masova giteu la irovilala te la imamala ale igoie?
LUK 12:57 “Amuto kama masagea veia ge hilovi la gauru ale taritigi, ia?
LUK 12:58 Mai la tahalo isa ge vagari tavume veia ge vimagirime te la vigagiala, ale amula so tatuga me eia, taritigi eme ge vagari veia ge vikara gogomeala, eia souka ge pulime soilo, eme ge poga la vigagiala ale vagari, mai e mesistret ge baha tarome soio tegiteu e polis, egite ge vagoilome te la luma la kilisi, eme ge popou moli kara eme ge koli tomi la uati ale eme dinau ovola.”
LUK 13:1 Egiteu la valalua isahari goio guvi te Iesus, egite gilemuliala ale egiteu e Galilea isahari oio lotulotu, e Pailat baha egite soldia, egite bili taro egiteu.
LUK 13:2 Tio e Iesus loloa mai ele, eia goio veia giteu mago “Amuto soioge gabutatalea mai ele veia egiteu la tahalo la iruru sesele, ia? Amuto soioge gabutatala veia la iruru tegiteu ge uru agi tegiteu e tabarabara giteu tomi, eala egite goio vilua mulitiale?
LUK 13:3 Eala moli ouka. Mai amuto tai kama ge vuvulo, amuto tomi ge vilua.
LUK 13:4 Mai la valalua tai isahari, la luma ale egite tigia malau soata oio e Siloam, eia goio tagogoro robo egiteu, la uatati gotalo bili egiteu, amuto soioge gabutatalea veia egiteu la tahalo la iruru sesele, ia? Amuto soioge ge veia la iruru tegiteu uru agi tegiteu la valalua e Ierusalem tomi, eala egite goio vilua mulitiale?
LUK 13:5 Eala moli ouka. Mai amuto tai kama ge vuvulo, amuto tomi ge vilua.”
LUK 13:6 E Iesus goio veia giteu la vikarara la tilovo isa lou maie “La tahalo isasa, eia tahola la mahuma la vaen, la keme isa uru magiri kabili ovola. La haro isasa, e tahola goio veia ge lulu ilua la vavuala oio te la obu ale, eala moli eia oio kama vua.
LUK 13:7 Tio eia goio veia la tahalo la vibaumuli la mahuma tetala mago ‘La leavala itolu poloti, eau soukato ali lalai bakisi la vavua la keme aleie. Eia oio kama vavua, taritigi eme ge tolo taroa, eia magiri bulalahu moli oio te la magasa ale taritigi.’
LUK 13:8 “Eala moli la bilalaha goio koliala mago ‘Kora mugale, eia ge magiri lalai gabu lou la leavala isa lou, eau ge baumuli tataho gabu mugea,
LUK 13:9 mai ge eia ge vua la leavala ale mulimulie, taritigi, mai ge ouka, eau ge toloa.’”
LUK 13:10 Te la haro tabu isasa, e Iesus pou oio te la luma la lotu oio la mautu isasa, eia vimari egiteu la valalua me hatavivile.
LUK 13:11 La tavile isa oio, la hitu ale kama kokora pou tetala, eia lea la leavala savulusa gete ualu, la vovola maviviru tomiti.
LUK 13:12 E Iesus hiloa mai ele, eia tolea mago “Tavile uru, eme mahuli taroti la ilea taume ele!”
LUK 13:13 Eia goio sau la vovola, me oio moli ovolale la tavile goio hiliti, eia magiri matata, eia vaisale La Tahalo Uru.
LUK 13:14 Eala moli la tahalo la vibaumuli te la luma la lotu, eia igo totolo, la vuhula e Iesus vimahuli la tavile te la haro tabu. Eia veia giteu la valalua me hatavivile mago “Etato la haro iuolo oio ale etato ge igogolu oio vola, amuto ge gomai ovolale veia eia ge vimahuli amutou. La haro tabu umala!”
LUK 13:15 Eala moli La Uru goio koliala mago “Maura miteu, amuto la tahalo la visigologolola! Mave, amuto kama ge lube taro la mota loio te la loho la kau me donki tamutou te la haro tabu, veia amuto ge tata egiteu soio te la lalu veia egite ge liu?
LUK 13:16 Eala moli e hatavile mutou ele, e tubule Abraham isale, amuto kama gogoa? E Satan kisi tolatia la leavala savulusa gete ualu, amuto veia eia kama taritigi veia oio te la haro tabu moli, eau ge lube taro la mota ale e Satan kisi tolati le maura?”
LUK 13:17 Tio, eia vikara mai ele, la valalua ale igo totoloa, egite mahela pepeho, eala moli la valalua me hatavivile, egite sagege pepeho pasi la golu la karutula tomi ale eia igotia te la mata giteu.
LUK 13:18 E Iesus goio tahi egiteu mago “La pulolou la matagagala te La Tahalo Uru, egira ge visauru sesele me la rova? Eau ge vei loua mutou la vikarara la tilovo ale mave veia amuto ge matagaga ovola?
LUK 13:19 Eia ge mai la vavua la obu isa bisi kokori moli, la tahalo isa goio galua oio la mahuma tetala, eia goio kusi, eia tubu uru pepeho, la halalala goio pigi borebore tataho sesele, egite la malumalu lovolovo loio, egite igo la tiloa giteu oio vola.”
LUK 13:20 Tio, me la vikarara la tilovo isa lou, e Iesus goio vei loua giteu maie “La pulolou la matagagala te La Tahalo Uru, egira ge visauru sesele me la rova?
LUK 13:21 Eia ge mai la is, ale la tavile vivulo tomi la palava te la gulutu la bret, tio la palava tomi moli ele goio sogo, eia visibitala la bret ale taritigi tataho oio te la igogolu te la is oilo vola.”
LUK 13:22 E Iesus valolo tatuga oio te la maututula, eia vimari egiteu la valalua me hatavivile mai ele te la tuluga tetala soata e Ierusalem.
LUK 13:23 Isa goio tahia mago “Tahalo Uru, mave, La Uru soioge ge vimahuli la valalua me hatavivile isahari moli, kama ge usu, ia?” E Iesus loloa mai ele, eia goio veia giteu mago
LUK 13:24 “Amuto ge vagari veia ge tiroro soilo te la pulolou la matagagala te La Uru, la mata tetala eia kapilikia, la valalua ge vimaholo tatola oio vola, usu ge galo te la goilola.
LUK 13:25 E taho la luma soukama ge hiliti ge kapi robo la mata, amuto ge tututu la matale, ge tola gogogo soilo mago ‘Tahalo Uru, kope amite!’ “Eala moli eia kama ge lolo amutou, eia ge veia mutou mago ‘Eau kama rovi amutou, amuto loio la mautu ale mave?’
LUK 13:26 “Me amuto ge koliala mago ‘Amite ali vikapopo leme, viliu vikapopo tai leme, eme vimari la valalua oio te la tia la mautu tamiteu.’
LUK 13:27 “Eala moli eia ge baoli loua mutou mago ‘Eau kama rovi amutou, me la mautu tamutou tai eau kama rovia. Amuto tuga, amutou la tahalo la iruru!’
LUK 13:28 “Tio, amuto ge loloa mai ele, la tilali ge uru sesele, amuto ge koro magegege, ge melimeli la togo mutou, ale amuto ge hilo e Abraham, e Isak, e Iakob, vikapopo tai egiteu la bilalaha ale pala, egite ge pou tataho te la pulolou la matagagala te La Tahalo Uru, eala moli amutou ogalati, La Uru piagale taroti amutou.
LUK 13:29 La valalua me hatavivile ge lomuli, loale, loilo, lolau, egite ge loio la igaga la maututula tomi, egite ge goilo, ge pou te la pulolou la matagagala te La Tahalo Uru.
LUK 13:30 Sesele, isahari ale igoie pou la morivava, egite mulimuli ge goilo ge pou la balavala. Me isahari tai ale igoie egite pou la balavala, egite mulimuli ge galo, egite ge pou la mahelala.”
LUK 13:31 E Iesus vikara kaluvuti soio tegiteu mai ele, oio moli ovola egiteu e pariseo isahari loio, egite veiale Iesus mago “Eme ge hele, e Herod masagea veia ge bilime.”
LUK 13:32 Eala moli e Iesus goio veia giteu mago “Eia la tahalo la tutugologolola, eia la tahalo la vuragala mai la paia hou. Amuto ge goio ge veiala mago ‘E Iesus veiamu maie: Eau ge kumuli taro egiteu la hituhitu ale kama kokora, eau ge vimahuli tai egiteu ale lalea, eau ge igogolu mai ele la logo ilua moliti lou, eala moli uaisa eau ge guvi sesele te la mautu ale eau goio vola, eau ge vitapasi sesele la igogolu taku oio volao.’
LUK 13:33 Eau kama ge hele, la haro ilua moliti eau ge tuga, eau ge goata sesele e Ierusalem, la vuhula eau la bilalaha te La Uru, eia koramuli eau ge peho moli oio e Ierusalem, kama ge te la mautu isapolo.
LUK 13:34 “Maura, Ierusalem, eme bilibili egiteu la bilalaha te La Uru, eme dudumu legiteu la uatati. Eau vaka usu gabutatalea veia ge tola tavu egiteu e latatumu veia eau ge sigirobo egiteu mai e kukureko eia rara robo legiteu e latatula la palapalala. Eala moli amutou la valalua me hatavivile e Ierusalem kama masaga!
LUK 13:35 Hiloa, ale la mautu tamuto ge sululu sapa, eia ge kavelevele moli. Amuto kati ge hilo louau, kara te la haro ale eau ge guvi loata, me amuto ge tola maie ‘La Uru ge vibalava la bilalaha tetala!’”
LUK 14:1 Te la haro tabu isasa, e Iesus veia ge goio ge ali oio te la luma te la mulugaluga tegiteu e pariseo isasa, egiteu e pariseo oio mata muli seselea veia ge hiloa, veia eia ge igo isa la paga te la haro tabu ka ouka.
LUK 14:2 La tahalo isa loio, la limala me la vahala sogo lahu.
LUK 14:3 E Iesus hiloa mai ele, egiteu e pariseo me egiteu la tahalo la mari, egite oio, e Iesus goio tahi egiteu mago “Mave, te la merera te Moses, eia taritigi ka ouka veia etato ge vimahuli egiteu la ilea te la haro tabu?”
LUK 14:4 Eala moli isa tegiteu kama vikara. Goio, e Iesus sau te la tahalole, eia vimahulia, eia baha tarotiao.
LUK 14:5 Tio, eia goio tahi egiteu mago “Mai e latu mutou isasa eia ge boru sotalo la lulu te la haro tabu, uka la kau tamutou isasa eia ge boru sotalo te la lulu, mave, amuto kama ge utu lulu tavua, ge lapu rivu loua soata, te la haro tabu lou ele?”
LUK 14:6 Tio eia tahi egiteu mai ele, eala moli egite isa kama koramulia ge koli la merera tetala.
LUK 14:7 E Iesus goio guvi oio te la ilali ale egite baha tavua oio vola, eia hilo egiteu isahari oio hilovi la pulolou la uru veia ge pou tataho oio vola. Tio, eia goio veia giteu tomi la vikarara la tilovo isasa maie, mago
LUK 14:8 “Mai isa ge baha tavume veia eme ge goio la ilali la taulaila, umala eme ge vaurume veia eme ge pou te la pulolou la uru. La tahalo ale uru sesele soukama guvi,
LUK 14:9 e tama la ilali ge vipoua te la mulimu ele, eme ge mahela sesele, eme ge pou gale.
LUK 14:10 Taritigi veia mai egite ge baha tavume te la ilali, eme ge pou gale muga soio, egite ge hilome popou mai ele, e tama la ilali ge goio taume, eia ge veiamu mago ‘Tabaragu, eme gomai, eme ge pou la pulolou la uru.’ Mai ge mai ele, eme ge pou tataho te la lagu giteu la valalua tomi ale guvi te la ilali.
LUK 14:11 Mai isa ge vauru lou eia, eia ge pou la mahelala, eala moli mai isa ge vibisi rivu lou eia, eia ge pou la balavala.”
LUK 14:12 Goio, e Iesus veiale pariseo ale baha tavutia te la ilali ale egite pou oio vola, eia veiala mago “Mai eme ge igo la ilali, eme umala ge baha tavu egiteu e tabarabaramu, me egiteu e valaluamu, me egiteu la tahalo la vuliti. Mai eme ge baha tavu moli egiteu ale mai ele, egite mulimuli ge baha tavu rivu loume, egite ge koli la ilali ale me igotia giteu.
LUK 14:13 Eala moli mai eme ge igo la ilali, eme ge baha tavu moli egiteu la morivava, egiteu ale tuga kikihi, egiteu ale gulugulu, egiteu ale mata kea.
LUK 14:14 Mai ge mai ele, eme ge poga la vibalavala ale uru sesele te La Uru. Egiteu ale, egite kama koramulia ge koli la ilali taume, eala moli La Tahalo Uru ge koli la gilogo taume te la imamala la mahuli rivula tegiteu la tahalo la marokala.”
LUK 14:15 Tio, e Iesus vikara kaluvu soio tegiteu, isa tegiteu ale pou te la ilali ale, eia veiala mago “Egiteu ale ge pou te la ilali te la pulolou la matagagala te La Tahalo Uru, egite pou la balavala.”
LUK 14:16 E Iesus loloa mai ele, eia goio veiala mago “La tahalo isa igo la pougolu la ilali ale uru, eia baha tavu egiteu la valalua usu veia egite ge guvi te la ilali ele.
LUK 14:17 La ilali raragi tomiti, eia baha la bilalaha tetala veia eia ge hari tavu la valalua, ge veia giteu mago ‘Amuto gomai, la ilali oio raragiti.’
LUK 14:18 “Eala moli egite tomi goio soko la vikara papaila. Isa goio veia la bilalaha mago ‘Eau lototi la gale la magasa isa, eau ge goio ge hilo mugea, eau soioge kama ge goiole, eme ge veia la uru taume.’
LUK 14:19 “Isa lou goio veia la bilalaha mago ‘Eau lototi la kau ilima, eau ge goio ge tovo lalai muga egiteu te la igogolu veia egite vagari ka ouka. Eau soioge kama ge goio la ilali te la uru taume, eme ge veiala.’
LUK 14:20 “Goio, isa lou vikara maie mago ‘Amila me rutugu so taulai halaba moli, eau ge pou.’
LUK 14:21 “Tio, la bilalaha goio beua soio te la uru tetala, eia veiala, la uru igo totolo pepeho, eia goio baha loua mago ‘Eme tuga, eme ge goio la gilesu la mautu tomi ale bisisi, eme ge puli egiteu la morivava, egiteu ale gulugulu, egiteu ale mata kea, egiteu ale tuga kikihi, eme ge puli egiteu tomi ale somai te la ilali taku.’
LUK 14:22 “Tio la bilalaha goio igo seselea mai la uru tetala eia veitiala, eia goio veiala mago ‘Tahalo uru, eau igo seseletia mai ale eme veitia, egite oio guviti, eala moli la baa bakisi soloio.’
LUK 14:23 “Tio la uru loloa mai ele, eia goio baha taro lou la bilalaha tetala mago ‘Eme ge vagari veia ge puli egiteu ale pou bububu, egiteu ale tuga vulovulo, veia egite ge gomai ge ali. Eau masagea veia la luma taku ge volu sesele.
LUK 14:24 Eala moli eau veiamu, egiteu ale eau baha tavu pala muga egiteu, isa tegiteu kama ge ali bakisi la ilali taku.’”
LUK 14:25 La valalua me hatavivile usu tatuga te la gauru vikapopo le Iesus, eala moli e Iesus goio vulo gele tavu egiteu, eia veia giteu mago
LUK 14:26 “Mai la tahalo isa, uka la tavile, eia masagea veia ge mulimuliau, taritigi eia ge piligi taro muga e tamala, e tilala, e rutula, egiteu e latatula, egiteu e tabarabarala, egiteu e hatavilevilela tai, eia ge tou tomi egiteu, eia ge sugu taro tai la mahulila tetala. Mai ge ouka, eia kama koramulia ge mulimuliau.
LUK 14:27 Mai tai isa kama ge bole la iligiligi te la isagu, mai la tauvalautu taku ale tikumu eau ge bolea, eia ge bole tai la tauvalautu tetala, eia ge mulimuliau mai ele, mai ge ouka, eia kama koramulia ge mulimuliau.
LUK 14:28 “Mai isasa masagea veia ge tigi malau la luma soata, taritigi veia eia ge mata muli muga la mapa la luma ale uru mai ele, veia la iraragila tetala ge koramulia, ka ouka.
LUK 14:29 Mai eia ge igo moli la simen, me la mani tetala goio kaluvu posa moli mai ele, la valalua ge hiloa, egite ge lege vahia,
LUK 14:30 egite ge vei mago ‘E maura ga soko la luma tetala, eia kamati vikaluvua.’
LUK 14:31 “Mai tai la mulugaluga te la gale isasa, eia raragiti veia ge vahiliti la ruruga soio te la gale isapolo, taritigi veia eia ge pou muga, eia ge gabutatala tigi muga veia egiteu e soldia tetala la salatu salatu sasa, egite koramulia ge bolehoho egiteu e soldia salatu salatu lua ale loio, ka ouka.
LUK 14:32 Mai egite kama koramulia, taritigi eia ge baha muga egiteu la bilalaha tetala, egite ge tovo lalaia veia ge mera gogomea la mulugaluga ale loio, eia soukama gali tavua.
LUK 14:33 Mai tai moli ele, mai isa tamutou masagea veia eia ge mulimuliau, taritigi eia ge piligi taro la golugolu tomi tetala ale eia taholea.
LUK 14:34 “La mimila, eia la paga ale taritigi te la gulutu la ilali, eala moli mai la mamasila ge kaluvuti, mai la tahalo ale la tiala maigi taroti eau, eia kati ge malama lou.
LUK 14:35 Eia kati ge koramuli la igogolu isasa, etato ge abi molitia, ge tigitaroa soio. Mai ere la gavusala ge oio te la ilolo la merera, taritigi eia ge lolo vulai tavu la merera taku.”
LUK 15:1 Te la haro isasa, egiteu la tahalo la ilabi la takes, me egiteu la tahalo la iruru isahari tai, egite goio te Iesus veia ge lolo la merera tetala.
LUK 15:2 Egiteu e pariseo, me egiteu la tahalo la mari, egite hiloa mai ele, egite vikara kukumuala mago “La tahalo ale e Iesus, soioge eia ge e vikilipi tegiteu la tahalo la iruru, eia alali vikapopo legiteu ele!”
LUK 15:3 Tio, e Iesus rovi la gabutatalala tegiteu mai ele, eia goio veia giteu la vikarara la tilovo isa maie
LUK 15:4 “Mai isa tamutou eia ge tahola la sip salatusa, me isa ge ruru soio la hohoi, e tahola ge igoa mave? Eia ge hiliti taro egiteu la sip tetala tomi ale savulu ualasiu gete ualasiu, egite pou tola moli te la muli giteu, eia ge paa muli vagari la sip ale isa kokovuo, kara ale eia ge sivutia.
LUK 15:5 Mai eia ge sivutitia, eia ge sagege pepeho, eia ge tilo saea soata la behola,
LUK 15:6 eia ge bolea soluma. Eia ge tola vikapopo egiteu e vikilipilipila, egiteu e tabarabarala, eia ge veia giteu mago ‘Eau sagege pepeho pasi, la vuhula eau sivutiti la sip taku ale ruruti soio la hohoi. Etato ge sagege, etato ge igo la ilalila.’
LUK 15:7 Mai tai moli ele, eau vei seselea mutou, la sagegela ge uru pepeho oata la lage mai la tahalo la iruru isa ge vuvulo. La sagegela te ale isa moli sekela, eia kara polo la sagegela ale soio tegiteu ale savulu ualasiu gete ualasiu, ale egiteu veia egite la tahalo la maroka, la vuhula egiteu la savelela ouka, eala La Uru kama ge sagege agi legiteu.
LUK 15:8 “La tavile isasa, eia sau tola la uati savulu sasa, mai e kina ale savulusa sesele. Eala moli isa goio paru kokovu. Tio la tavile alele goio eia ge igo lava? Eia ge viroko la lam tetala, eia goio ge papaa oilo la ilo la luma tetala tomi ele, kara ale eia ge sivuti loua.
LUK 15:9 Mai eia ge sivutia, eia ge tola vikapopo egiteu e varagagala, egiteu e tabarabarala, eia ge veia giteu mago ‘Eau sagege pepeho pasi la vuhula eau sivutiti e kina taku isa ale paru kokovu. Etato ge sagege, etato ge igo la ilalila!’
LUK 15:10 Mai tai moli ele, egiteu la angelo te La Tahalo Uru, egite ge sagege sesele pasi la tahalo la iruru isa sekela moli, mai eia ge vuvulo.”
LUK 15:11 E Iesus goio visolo lou la merera tetala soio tegiteu mago “La tahalo isasa oio, e latula ilua e hatamalelaba.
LUK 15:12 Ale bisi tegirua, eia goio veiale tama girua mago ‘Tete, taritigi eme ge lele luea milua me tuagu la uati me la magasa taume.’ Tio e tama girua goio igo molia mai ale bisi veitiale,
LUK 15:13 la haro isahari goio polo, ale bisi goio sugu taro la magasa tetala, eia abi la uati ovola, eia goio hiliti taro e tamala, eia goio tuga. Eia goio tuga soio la mautu isa malau, eia goio vikaluvu tomi la uati tetala te la vareagila tetala ale uru pepeho.
LUK 15:14 Eia ali tomiti la uati tetala mai ele, la vitolo uru pepeho sibitala te la gale alele, eia goio pouti la savelela, eia la ilali ouka.
LUK 15:15 Eia goio paa muli la igogolu oio te la tahalo uru isasa te la gale alele, eia bahea soio veia eia ge baumuli egiteu la bolobolo tetala.
LUK 15:16 Eia vitolo sesele, eia masaga taia veia ge ali suli egiteu la bolobolo te la vaga ale eia valivali legiteu ele. Eala moli la tahalo isa kama gogoa veia ge abiala bakisi la makara la ilali.
LUK 15:17 “Eia pou mai ele, la gabutatalala tetala goio beu rivu tataho loua, eia goio veia maie ‘Egiteu la bilalaha te tete, egite ali marumaru tataho, me eau omai pepeho moli la vitolola.
LUK 15:18 Eau ge hiliti, eau ge beu rivua soio te tete, eau ge veiala mago: Tete, eau igoti la iruru soio te La Uru me soio taume tai.
LUK 15:19 Eau kati koramulia veia eme ge toi lou leau veia eau e latumu. Eme ge vagoilo rivu louau, eau ge mai moli la bilalaha taume isasa.’
LUK 15:20 Tio eia gabutatalea mai ele, eia goio hiliti, eia beu rivua soio te tamala. “Eia so tatuga te la gauru, eia soukama guvi hagagavi te la mautu, e tamala goio hiloa soio, eia goio mata kaseka tavua. Eia hari tavua soio, eia goio lao robotia, sagege roboa.
LUK 15:21 “E latula goio veiala mago ‘Tete, eau igoti la iruru soio te La Uru me soio tai taume, eau kati koramulia veia eme ge toi leau veia eau e latumu.’
LUK 15:22 “Eala moli e tamala goio baha egiteu la bilalaha tetala mago ‘Amuto tuga, abi somai la lavalava ale taritigi pepeho, la tuali, la silipa, etato ge vitokoromo e latugu ale beutia.
LUK 15:23 Amuto ge lao isa uru la bolo, eau ge vaoge e latugu, la vuhula eia mai ale pehoti, eia mahuliti lou, eia pala kokovu, eia sibitalati lou.’ Tio egite tomi goio igo la ilali uru pepeho mai ale e tamala veitiale.
LUK 15:25 “Eala moli e tuala popou orivo, eia igogolu kaluvu, eia veia ge goluma, eia goio sibitala oluma, eia lolo la mareregola uru oluma te la mautu, eia lolo la tilali la galamo me la kude, egite baubau, tilalia.
LUK 15:26 Tio eia goio baha tavu la bilalaha te tamala isasa, eia tahia mago ‘A ge, la tilali la papaga ale soluma mai moliti ele, mave?’
LUK 15:27 “Goio la bilalahale koliala mago ‘Ale e tarimu beutia, e tamamu eia laoti la bolo isa uru ge vaogela, la vuhula eia sagege pepehoti leia, eia beu rivuti loua, eia kama vilua oio te la mautu isasa.’
LUK 15:28 “Tio, e tuala loloa mai ele, eia igo totolo pepeho seseletio, eia kamati goluma. Goio, e tamala loloa veia eia ogala popou moli, eia goio hari tavua, eia kaka gogogoa veia eia ge goluma ge hilo la ilali tegiteu.
LUK 15:29 Eala moli eia veiale tamala mago ‘Eme hiloa, la leavala usuti eau pou taume, eme babaheau, eau kama toutoumei. Eala moli eme kama abiagu isa bisi e latu la mee ge vaoge leau veia amiteu me egiteu e vikilipilipigu ge pou vikapopo ge alia.
LUK 15:30 Eala moli e latumu ale kama kokorale beutia, eia ale vikaluvuti la uati taume uru soio tegiteu e hatavivile la gauru, eia goio beua, eme mata kaseka tavua, eme laoti isa uru la bolo, eme vaogeti leia?’
LUK 15:31 “Tio, eia veiale tamala mai ele, eala moli e tamala goio veiala mago ‘Latugu, eme pou tataho omai taku la leavalavala tomi, la papaga tomi ale taku, eia taume tomi moli.
LUK 15:32 Ale etato igoti la ilalila, la vuhula e tarimu ale pala eia mai ale pehoti, eia mahuliti lou, eia kokovu, ale eia sibitalati loue.’”
LUK 16:1 E Iesus goio soko lou la vikararala tetala soio tegiteu la valalua la vimari tetala, eia veia giteu mago “La tahalo la vuliti isasa, eia vipou la bilalaha tetala isa uru veia eia ge vibaumuli tomi la igogolu tetala. Eala moli la uru lolo vutitia veia la bilalaha tetalale, eia kama igogolu tigi sesele, eia vikaluvu bulalahu moli la papaga te la uru tetala.
LUK 16:2 Tio eia goio baha tavua, eia goio tahia mago ‘Ale la rova eau lolotia soio taume ele? Eme ge tau vikapopo la kekesi la uati taku tomi ale eme baumulia, eau ge mata muli la igogolu taume ele. Eau ge vikaluvume gageie.’
LUK 16:3 “Tio, la uru veiala mai ele, la bilalaha goio gabutatala maie ‘A ge, la uru taku ge abi taroau, eau ge sivuti lou la igogolu mave? Eau kama la tahalo ale vagari veia eau ge ololi la lulu, eau mahela tai veia eau ge kakaka egiteu la valalua la uati veia egite ge suli leau.
LUK 16:4 Eau rovitia, eau ge mulimuli isa la gabutatalala taku, veia mai eau ge kaluvu, egiteu la valalua ge vikilipi tatahoau, egite ge suliau.’
LUK 16:5 “Tio, eia goio sokoa veia ge igoa mai ale eia gabutatalatia, eia baha tavu egiteu la tahalo ale dinau te la uru tetala. Isa loio guvi, eia goio tahia, mago ‘Eme la dinau iriva soio te la uru taku?’
LUK 16:6 “Tio, eia goio koliala, mago ‘Eau la dinau taku soio tetala, la dram la bulu la oliv ale ururu savulusa gete ualu, la mapala uru pasi.’ “Tio, la bilalaha goio veiala mago ‘Korale, eme ge kekesi moli la dram ualasiu moli veia ge kolia.’
LUK 16:7 “Tio eia goio igo molia mai ele, goio isa lou loio sibitala, eia goio tahia, mago ‘Tahalo uru, eme la dinau iriva soio te la uru taku?’ “Tio, eia goio veiala mago ‘Eau la dinau taku la bek la vit salatu sasa.’ “Tio, la bilalaha loloa mai ele, eia goio veiala mago ‘Ioge, eme ge kekesi moli la bek savulu ualu, eme ge koli boto molia mai ele.’
LUK 16:8 “Tio, la uru tetala eia lolotia veia la bilalaha tetala eia igoala mai ele, eia vei tatahoa, la vuhula la garagi veipalatia mai ele veia la gabutatalala tetala eia malau sesele. Tio me mai moli ele, eia matagagati veia egiteu la valalua ale gabutatala moli la mahulila te la vovo, egite vagari pepeho sesele tavu la igogolu te la ilabi la uati, eala moli egite pepeti amutou la valalua ale pou palati te la matagaga, amuto kama vagari sesele tavu la ilabi la merera te La Uru.
LUK 16:9 Eau veia mutou, taritigi amuto ge tovo lalai vagaria veia ge abi ilua la uati mai tai egiteu la valalua ale gabutatala sekela moli la mahulila te la vovo. Eala moli la uati ilua tamutou ele, amuto ge suli la igogolu ale taritigi veia mai mulimuli la uati taume ge kaluvu tomiti, tio La Uru ge vagoilome te la mautu tetala oata te la ilo la lage.
LUK 16:10 La tahalo ale baumuli tataho la uati ale bisi moli, mulimuli eia ge koramulia ge vibaumuli la uati ale uru, me la tahalo ale viruru la uati ale bisi, eia ge viruru tai la uati ale uru.
LUK 16:11 Mai la vulovulomu eia veipalatia veia eme pakalikali la vuliti omai te la mahulila te la vovo, ere ge gabu tikumu loume veia ge abiamu la vuliti sesele te la mahulila te la kalulu? Ouka gologolo.
LUK 16:12 Mai eme kama baumuli tigi la uati te la tahalo ale isapolo, ere ge masagea veia ge abi louamu la uati taume sesele veia eme ge taholea?
LUK 16:13 “La bilalaha isasa kama koramulia ge roromuli la uru ilua. Mai eia ge tou ale isasa, eia ge roromuli ale isa. Uka eia ge roromuli ale isa, eia ge tou ale isa. Amuto kama koramulia ge gabu tikumu La Tahalo Uru vikapopo tai la ilabi la uati.”
LUK 16:14 Tio, egiteu e pariseo oio magirigiri, egite lolo la vimari te Iesus te la ilisu la uati, egite lege vahia, la vuhula egite tai la tahalo la ilisu la uati.
LUK 16:15 Eala moli eia veia giteu mago “Amutou ale pakakasa veia la valalua ge gabu tikumu amutou, veia amuto la tahalo la maroka, La Uru rovilala sesele la tia mutou oilo. La vulovulo mutou ale la valalua egite gabu tikumua, eia mavulu sesele oio te la mata La Uru.
LUK 16:16 “La merera te Moses me tegiteu la bilalaha, eia magiri palati kara la imamala so alalavi, e Ioanes la tahalo la vuluhi sibitala. Eala moli oio moli te la pokele Ioanes ele, igoie la valolo te la pulolou la matagagala te La Tahalo Uru eia sibitalati, me la valalua vagari veia egite ge toa pepe tavua soilo veia egite ge sau tolea.
LUK 16:17 Eala moli la merera te Moses soloio! La magasa me la mori ge magiri, la merera te Moses tai ge magiri, kama ge kaluvu. La mata la buk isa bisi tai oio vola, eia kama ge kokovu.
LUK 16:18 “Mai isa ge tou e rutula, me eia goio puli polo isa la tavile lou, eia mai ale igo gegeruti la pulolou la taulaila, eia poloti la merera te La Uru. Me mai tai isa ge puli la tavile ale e haruala toutia, eia tai igo ruruti, eia poloti la merera te La Uru.
LUK 16:19 “La tahalo la vuliti isasa, eia pou la balavala, eia kisi la lavalava magegese tataho, la mapala uru sesele, mai la lavalava tegiteu la mulugaluga. La ilali tetala tomi eia taritigi pepeho.
LUK 16:20 Eala moli la tahalo la savelela isasa oio, la isala e Lasaras, eia tabulibuli te la mulila oio te la mata la luma te la tahalo la vuliti, la vovola kakalikali tomi moli. Egiteu e tabarabarala ge bolea mai soiole, ge vitabulia mai ele veia eia ge kakaka la uati soio tegiteu la valalua.
LUK 16:21 E maura popou, eia alame tatavu la ilali ale tarititigi, egite vahararia la tahalo la vuliti, eia masaga pepeho seselea veia eia ge alali tai bakisi la makarala. Egite la paia ge gomai ge game vevei la kakalile maura sotalo te la mulila.
LUK 16:22 “Tio, mulimuli e Lasaras goio peho, egiteu la angelo bolea soata te Abraham, eia goio pou tataho tigi sesele oio tetala, eia goio tahobo la magorole tubula e Abraham. Goio la tahalo la vuliti tai peho, egite ulaia, eia gotalo la mautu la iligiligi.
LUK 16:23 Eia pou te la iligiligi uru pepeho mai ele, eia ga mata soio, eia hilo e Abraham soio malau, e tubula e Lasaras eia oio pou tataho oio tetala.
LUK 16:24 Eia hiloa mai ele, eia goio tola soio mago ‘Pupu, Abraham, eme ge gogoau. Eme ge baha e Lasaras, eia ge vuhi moli bakisi la mapala kukula sotalo la lalu, eia ge gomai ge vuhi maigi la kalameagu oio vola, la vuhula eau ligi seseleti la havi uru omaie.
LUK 16:25 “Eala moli e Abraham goio koli la merera tetala mago ‘Tubugu, eme so mahulihuli, eme pou la balavala, me Lasaras eia pou la savelela. Ale igoie, eia pouti la balavala, me eme pouti la savelela.
LUK 16:26 Me la baa uru tai tabuli kabili tegalua, isa kama koramulia ge saga polo ovola.’
LUK 16:27 “Tio, la tahalo ale, eia loloa mai ele, eia goio veiale Abraham mago ‘Eau kaka gogome veia eme ge baha e Lasaras soio te la mautu te tete,
LUK 16:28 la vuhula eau e tabaragu ilima lou oio, eme ge bahea veia eia ge mera taro egiteu, egite soukama vilua mai eau.’
LUK 16:29 “Eala moli e Abraham goio vei louala mago ‘Egite ge lolo moli la merera tomi ale egite taholea, mai te Moses me tegiteu la bilalaha te La Uru tai.’
LUK 16:30 “Eala moli eia goio baoli rivu louale Abraham mago ‘Ouka, pupu. Mai egite ge hilo isasa eia ge mahuli taro la pileho, egite ge loloa, egite ge vuvulo.’
LUK 16:31 “Eala moli e Abraham veiala mago ‘Ouka. Mai egite kama ge lolo e Moses me egiteu la bilalaha, egite kama koramuli taia veia egite ge gabu tikumu la tahalo ale ge mahuli rivu taro lou la pileho.’”
LUK 17:1 E Iesus goio veia giteu la valalua la vimari tetala mago “La vulovulo mutou usu koramulia ge vitilo amutou, eala moli la tahalo ale ge vitilo e tabarala, e maura ge vure sesele.
LUK 17:2 Eia taritigi mai egiteu ge kisi pala muga la mota te la lohola, goio ge kisia soio te la uati la baga, egite ge vivorea solau ge pigia sotalo la tia la utu, eia ge tilomu. Mai ge igoa soio tetala mai ele, eia balavati, la vuhula eia soukama ge igo la iruru ale uru mai eia ge vitilo isa bisi la tahalo uka la tavile ale mulimuliau.
LUK 17:3 Taritigi amuto ge vibaumuli tigi lou le amutou. “Mai e tabaramu ge igo la iruru isa soio taume, eme ge viteteli pala mugea, mai eia ge gabutatala rivu lou, eme ge vimavulaha taro leia la iruru tetala ale eia igotia soio taume.
LUK 17:4 Mai eia ge goio ge igo loua soio taume vaka vitu lou te la haro isa moli, me eia ge gomai lou taume, eia ge veiamu mago ‘Eau ruruti’, tio eme ge vimavulaha taro lou leia vaka usu lou mai ele.”
LUK 17:5 Egiteu la valalua la vimari te La Uru tahia mago “Eme ge suli amiteu veia amite ge gabu tikumu sesele la merera te La Tahalo Uru.”
LUK 17:6 Tio, La Uru goio veia giteu mago “Mai eme ge sau tola bakisi la merera te La Tahalo uru mai la vavua la balele kakea isa bisi moli, la gabutatalala taume ale taritigi ele, eia ge kusi, eia ge uru. Eme ge koramulia ge vikara soio te la obu ale uru mai la keme mago ‘Eme ge hiliti taro la mulimu lomaie, eme ge golau magiri olau la mago’, tio eia ge igo molia mai ale eme veitiala.”
LUK 17:7 E Iesus vei loua giteu la vikarara la tilovo isa lou maie “Mai isasa tamutou ge tahola isa la bilalaha, me eia ge bahea te la haro veia eia ge gorivo, mai eia ge guvi lorivo te la maulavi, eia kama ge vipoua veia ge vaalia.
LUK 17:8 Ouka, eia ge baha loua mago ‘Eme goio pupuru pala muga, eme ge goio ge raragi la ilali taku, vahariagu somai, mulimuli eme ge alaliti.’
LUK 17:9 Me mave, eia ge vei tatahoa mai eia ge igo la igogolu tomi tetalale? Ouka, la vuhula eia la bilalaha moli,
LUK 17:10 mai tai amutou, amuto ge igogolu vagari te La Tahalo Uru mai la masasagala tomi tetala, mulimuli ovola amuto ge veia maie mago ‘Etato la bilalaha moli. Etato igogolu moli mai la masasagala te La Uru gatou.’”
LUK 17:11 E Iesus miteu me la valalua la vimari tetala, egite tatuga ge goata e Ierusalem, egite polo te la igaga la gale ilua e Sameria, e Galilea.
LUK 17:12 Egite goio guvi te la mautu isasa te la gale ale, e Iesus veia ge goluma, eala moli egite la tahalo la sereka savulu sasa goio sibitala tavua.
LUK 17:13 Egite magiri loio malau bakisi, egite tola soio te Iesus mago “Iesus, Tahalo Uru, taritigi eme ge gogo amiteu!”
LUK 17:14 E Iesus hilo egiteu mai ele, eia veia giteu mago “Amuto tuga, amuto ge vahilo le pris la vovo mutou ele.” Tio egite goio tuga, egite so tatuga moli ele, egite karutu la vovo giteu marokati.
LUK 17:15 Isa tegiteu ele, eia la tau Sameria, eia hilotia mai ele veia la vovola marokati lou, eia goio beu loua soio te Iesus, eia vaisale La Tahalo Uru, eia vikara boboboe oata.
LUK 17:16 Eia goio boru lagu tugu te la vahale Iesus, eia vei tataho seselea. Eala moli la tahalo ale kama la tau Iuda, eia la tau Sameria moli.
LUK 17:17 Eala moli e Iesus goio tahia mago “Eau vimaroka egiteu savulu sasa. Egiteu ale taho ualasiu oiove?
LUK 17:18 Ilava e maura la mosi la tau Sameria, eia sekela moli beu rivu loua somai taku veia ge vaisale La Tahalo Uru?”
LUK 17:19 Tio e Iesus vikara kaluvu mai ele, eia goio veiala mago “Eme hiliti, eme ge tuga, la vuhula eme gabu tikumuau, eala la vovomu marokati ele.”
LUK 17:20 Egiteu e pariseo isahari goio tahi e Iesus veia la pulolou la matagagala te La Tahalo Uru ge sibitala gaisa, tio e Iesus goio kolia giteu mago “La guluvi te la pulolou la matagagala te La Tahalo Uru, eia kama la paga ale etato ge hiloa me la mata gatou.
LUK 17:21 Isa kama koramulia ge veia maie ovola mago ‘Male, eia omaie,’ uka ‘Male, eia soiole.’ La vuhula la pulolou la matagagala eia omaiti, eia magiriti kabili tamutou.”
LUK 17:22 Mulimuli eia goio vikara lou soio tegiteu la valalua la vimari tetala oio volale, eia veia giteu mago “Mulimuli amuto ge gabutatala louau, amuto ge ilo liliu tavu louau, amuto ge masagea veia ge hilo lou eau, eala moli eau kati ge omai lou tamutou.
LUK 17:23 Egite la valalua ge vikara mago ‘Male ge, eia soiole!’ uka ‘Male, eia omaitie!’ Eala moli ouka. Umala amuto ge mulimuli egiteu ele.
LUK 17:24 La guluvi te Latu La Tahalo, eia ge mai la sima ale uru pepeho sesele, eia ge guvi karutu moli lomuli, gotalo la igaga la maututula, la matagagala abi la babaa tomi.
LUK 17:25 Eala moli eia ge gabu pala muga la iligiligi ale uru, la tuvu la valalua ale igoie, egite ge pile pala mugea.
LUK 17:26 “La imamala ale e Latu La Tahalo ge guvi ovola, eia ge mai sesele la imamala te Noa tai.
LUK 17:27 Te la imamala te Noa, egite la valalua tomi oio popou, egite alali, egite taulalai, kara la haro ale e Noa sae te la uaga uru tetala ale eia pahea. Tio oio moli ovola, la silali uru sibitala robo egiteu, egite sululu tomi.
LUK 17:28 “La imamala ale e Latu La Tahalo ge guvi ovola, eia ge mai tai la imamala te Lot. Te la imamala te Lot ele, egite la valalua tomi oio alali, liliu, egite taulalai, egite lotoloto, makeketi, egite galugalu, egite titigi tai la luma.
LUK 17:29 Egite tuha tavu molia la vulovulo giteu mai ele kara ale e Lot hiliti taro e Sodom, tio la havi uru sibitala robo egiteu loata la mori, egite sululu tomi.
LUK 17:30 Me la haro ale e Latu La Tahalo ge magiri matagaga ovola, eia ge mai tai ele.
LUK 17:31 “Te la haro moli ale, mai isa ge pou te la mata la luma tetala, eia umalati ge goililo lou veia ge abi isahari la golugolu tetala. Mai tai isa ge pou orivo, eia umalati ge golumaluma veia ge abi isa la paga tetala, taritigi eia ge hele moli.
LUK 17:32 Amuto ge gabutatala rivu lou e rutule Lot, eia vulo liliu tavu la mautu e Sodom, e maura viluatio.
LUK 17:33 Mai isa ge vagari veia ge sau tola la mahulila tetala, ale eia ge vilua. Mai isa ge sugu taro la mahulila tetala, ale eia ge mahuli.
LUK 17:34 Te la logo moli ale e Latu La Tahalo ge sibitala, mai e tau me rutu ilua ge vimavuta tomi, egite ge abi isa, isa kora.
LUK 17:35 Mai la tavile ilua egira pou vikapopo la ilisile bau, egite ge abi isa, isa kora.[
LUK 17:36 Mai taho lua pou orivo, egite ge abi isa, isa kora.]”
LUK 17:37 Tio, e Iesus vei kaluvua giteu mai ele, egite la valalua la vimari tetala goio tahia mago “Egite ge abi egiteu, egite ge vahari egiteu sove?” Tio, e Iesus kolia giteu mago “Amuto rovia, mai la vovo la pileleho ge tabuli te la baa isasa, eia mavulu, e loauru ge sibitala ovola veia ge alia, eia mai la irovilala veia la pileleho oio tabulibuli ele.”
LUK 18:1 E Iesus goio vei loua giteu la valalua la vimari tetala la vikarara la tilovo isa lou veia egite ge pou tavu moli la kilaka, umala egite ge silaha tataroa.
LUK 18:2 Eia veia giteu maie “E mesistret isa uru eia pou te la mautu isasa, eia kama togo La Tahalo Uru, eia tai kama gabu tikumu isa la tahalo.
LUK 18:3 Oio te la mautu alele, la tavile isa uru tai oio, e haruala peho tarotia. Egite isasa tutugoloti e maura pala, me eia ge goio bibibi te mesistret, eia ge tahi susukua, mago ‘Gaisa sesele eme ge vimatata la iruru ale egite igoa somai taku?’
LUK 18:4 E mesistret toutou moli e maura, eala moli la haroharo usu eia toto susuku tavu molia veia eia ge vimatata la iruru tetala. E mesistret goio silahati, eia gabutatala maie mago ‘Eia sesele, eau kama togo La Tahalo Uru, me eau kama gabu tikumu tai isa la tahalo.
LUK 18:5 Eala moli la baharu ele, eia toto susuku tavu pasiau, eau silaha seseleti leia. Eau ge vimatata taro la iloburukola tetala, la vuhula eau soukama silaha leia.’”
LUK 18:6 Tio, La Uru gilemulitia giteu mai ele kaluvu, eia goio vei loua giteu mago “Amuto ge lolo la merera te mesistret ale kama kokorale.
LUK 18:7 Me mai tai ele, amuto rovitia, La Uru, eia matata sesele moli, eia ge vimatata la iruru tomi ale egite ge igoa soio tamutou, mai amuto ge tali susuku tatavua, la vuhula amuto tetala seseleti. Amuto veia eia ge vikara papaia mutou? Ge ouka gologolo.
LUK 18:8 Eau veia mutou, eia ge vimatata harari moli la iruru tomi ale egite ge igoa soio tamutou. Eala moli eau la tilahi isa moli oio volale. Ale e Latu La Tahalo ge beu loua somai, eau ge hilo vutia veia amuto soloiole ge gabu tikumuau, ka ge oukati?”
LUK 18:9 Eala moli isahari tegiteu la valaluale, egite veia egite isasa, egite tomu sasae la vulovulo giteu e tabarabara giteu veia egite la vulovulo giteu boto. E Iesus goio toi la vikarara la tilovo isasa soio tegiteu maie
LUK 18:10 “La tahalo ilua goata la luma la lotu veia ge kaka, e pariseo isa me la tahalo la ilabi la takes tai isa.
LUK 18:11 E pariseo, eia vimuga soilo, eia magiri te la kilaka, eia goio kaka maie mago ‘Tahalo Uru, eau vei tataho seseleme ale eme vimatateau, eau kama la tahalo la iruru. La valalua tomi, egite pakalikali, egite visigologolo, egite pakakakasa, eau moli ouka, eau kama mai la tahalo la ilabi la takes ale magirigiri la baligu ele.
LUK 18:12 Eau peremuremu te la haro ivavaa. Eau gigi tatataho la uati tomi taku veia la lolola ale taume eau ge abi seseleamu La Uru taku.’
LUK 18:13 “Eala moli e maura la tahalo la ilabi la takes, eia magiri malau loio, eia lagu tugu moli, eia mahela pepeho veia ge taga soata la mori. Eia goio sabala la magorola te la iloburukola tetala, eia veia mago ‘Tahalo Uru, eme ge gogoau, eau la tahalo la iruru.’”
LUK 18:14 Goio, e Iesus vitapasi la merera tetalale soio tegiteu mago “Eau veia mutou, la tahalo la iruru alele, eia beua soluma, me oio tegirua, eia moli sekela marokati te la mata La Tahalo Uru. La vuhula, mai isa ge vauru lou eia, La Uru ge vibisia. Mai isa ge vibisi lou eia, La Uru ge vaurua.”
LUK 18:15 Egiteu isahari vahari e latatu giteu soio te Iesus veia eia ge sau la vovo giteu, eia ge vibalava egiteu mai ele. Eala moli egiteu la valalua la vimari tetala hiloa mai ele, egite mera taro egiteu veia egite umala ge igo tasi vavau e Iesus.
LUK 18:16 Eala moli eia goio tola e maura miteu bisisi soio tetala, eia veia giteu la valalua la vimari tetala mago “Umala amuto ge magiri robo egiteu. La vuhula la pulolou la matagagala te La Tahalo uru, eia tegite sesele.
LUK 18:17 Eau vei seselea mutou, mai isa kama ge mata kaseka tavu la pulolou la matagagala te La Tahalo Uru, mai e guliliki isa bisi, eia kamati ge koramulia ge tiroro soilo te la pulolou la balavalale.”
LUK 18:18 La mulugaluga isasa tegite Iuda, eia tuga tavu e Iesus, eia goio tahia la tilahi isa maie mago “Tahalo kokora, la rova sesele eau ge igoa veia taku ge la mahulila ale sesele, la kaluvula ge ouka?”
LUK 18:19 Eala moli e Iesus goio koliala mago “Ilava eme toi leau veia eau taritigi? Isa moli taritigi, La Tahalo Uru sekela moli.
LUK 18:20 Eme rovi egiteu la tururi tomi te La Uru tavu etatou e Iuda, umala igo maraparapa la taulaila, umala bilibili, umala pakalikali, umala visigologolo, togo e tama mutou, e tila mutou.”
LUK 18:21 Tio, la tahalo ale, eia loloa mai ele, eia goio vei louale Iesus mago “La merera tomi alele, eau mulimuli tomitia, sokoa la bibisigu, karati igoie.”
LUK 18:22 Tio, e Iesus loloa mai ele, eia goio veiala mago “La paga isa moliti eme gege oio vola. Eme ge tuga, eme ge sugu taro tomi la golugolu taume soio tegiteu la valalua la iloto, eme ge abi la uati alele, eme ge vitabari legiteu ale egite pou la savelela. Mai ge mai ele, taume ge la vuliti ale uru oata te la ilo la lage, ale La Uru ge abiamu. Mai eme ge igo tomitia mai ele, eme ge gomai, eme ge mulimuliau.”
LUK 18:23 Tio, e Iesus veiala mai ele kaluvu, la tahalo ale, eia ilo buruko pepeho, la vuhula eia la tahalo la vuliti sesele.
LUK 18:24 Goio e Iesus mata tavu vagaria mai ele, eia veiala mago “Eia vagari pepeho sesele veia la tahalo la vuliti isasa ge tiroro soilo te la pulolou la matagagala te La Tahalo Uru.
LUK 18:25 Mai la kamel isasa eia veia ge tovo lalai veia ge polo te la mata la lili la silahi, ale ge vagari tetala. Eala moli mai la tahalo la vuliti ge veia ge tiroro soilo te la pulolou la matagagala te La Tahalo Uru, ale ge vagari pepeho sesele tetala.”
LUK 18:26 Tio, egite la valalua loloa mai ele, egite goio tahia mago “Mai ge mai ele, ere sesele koramulia ge mahuli?”
LUK 18:27 Eala moli e Iesus goio kolia giteu mago “La igogolu ale amutou la valalua la vovo kama koramulia ge igoa, La Tahalo Uru sekela moli koramulia ge igoa.”
LUK 18:28 Goio, e Pita loloa mai ele, eia goio veiala mago “Hiloa! Amite hiliti taroti la maututula tamiteu tomi isasasa, amite mulimulitime!”
LUK 18:29 Goio, e Iesus baoli rivu loua giteu mago “Eia sesele, mai isa ge hiliti taro la mautu tetala ge tuga taro e rutula, egiteu e tabarabarala, egiteu e latatula tai veia ge goilo sesele te la pulolou la matagagala te La Tahalo Uru,
LUK 18:30 tio eia ge sau tola sesele la vibalavala ale uru pepeho te la imamala ale igoie, me te la imamala ale mulimuli tai, eia ge sau tola la mahulila ale sesele, la kaluvula ge ouka.”
LUK 18:31 E Iesus goio puli gale egiteu la valalua tetala ale savulusa gete luale, eia vei matagagea giteu la vuhu la tuluga tegiteu sesele mago “Etato goatati e Ierusalem, me oio la mautu alele, la merera tomi tegiteu la bilalaha, ale egite kekesia te La Buk Tabu Ale Pala te la pilehole Latu La Tahalo, eia ge puru tomi.
LUK 18:32 La vuhula, egiteu la valalua la gima ge sugu taroau soio tegiteu la valalua la maligoma, egite ge lege vahiau, egite ge vileau, egite ge kavurasi voluau.
LUK 18:33 Egite ge kumamasi vuloau, ge biliau, eau ge peho, eala moli la haro itolu ge polo, eau ge mahuli rivu lou.”
LUK 18:34 Eia vikarara mai ele soio tegiteu la valalua la vimari tetala, eala moli egite kama abi tigi bakisi la merera te Iesus ele, la masova la vikararala tetala eia kokovu taro egiteu, egite kama matagaga bakisi oio vola.
LUK 18:35 E Iesus miteu, egite goio guvi hagagavi la mautu e Ieriko, la mata kea isasa oio popou te la pepe la gauru, eia kakaka egiteu la valalua la uati.
LUK 18:36 Eia lolo egiteu la valalua me hatavivile mapaiti polopolo te la gauru, eia goio tahi egiteu soio,
LUK 18:37 veia eia ge rovi la vuhula, egite goio veiala mago “E Iesus, la tau Nasaret, eiala oio polopolole.”
LUK 18:38 Tio, eia loloa mai ele, eia goio tola vagari soio mago “Iesus, tubule Devit, taritigi eme ge gogoau!”
LUK 18:39 Eala moli egiteu ale mamuga, egite mera taroa veia eia ge makovu, eala moli eia goio tola vagari pepeho lou mago “Eme tubule Devit ele, taritigi eme ge gogoau!”
LUK 18:40 Tio, e Iesus loloa mai ele, eia goio magiri, eia veia giteu veia egite ge tata la mata keale soio tetala. Egite goio tatea soio tetala, eia goio magiri hagagavi soio te Iesus mai ele, e Iesus goio tahia mago
LUK 18:41 “La rova sesele eme masagea veia eau ge igoamu gageie?” Tio, eia goio veiale Iesus mago “Tahalo Uru, eau masaga seselea veia la matagu ge mata pulala, eau ge matagaga!”
LUK 18:42 Goio, e Iesus veiala mago “Eme ge matagaga, la vuhula eme gabu tikumutiau, eala eme matagagati ele.”
LUK 18:43 Tio oio moli ovolale, la matala goio mata pulala, eia matagagatio, eia goio mulimuli e Iesus, eia vaisasale La Tahalo Uru. Egite la valalua me hatavivile hiloa mai ele, egite tomi tai ele goio vaisale La Tahalo Uru.
LUK 19:1 E Iesus miteu guvi oio e Ieriko, eia veia ge polo moli la mautu ale, veia ge sele molia.
LUK 19:2 Tio la tahalo isa oio te la mautu ele, la isala e Sakias, eia la mulugaluga isa tegiteu la tahalo la ilabi la takes, eia la tahalo la vuliti tai.
LUK 19:3 Eia masaga pepehoa veia ge hilo e Iesus, eala moli la valalua me hatavivile vivi robo e Iesus, me e maurale, eia la tahalo isa boto agi, eia kama koramulia ge hilo e Iesus.
LUK 19:4 Tio eia goio hari mamuga, eia goio sae te la obu isa uru veia ge hilo e Iesus ale eia ge polo.
LUK 19:5 E Iesus tatuga goio karati la vuhu la obu ele, eia magiri goio taga soata, eia hiloa, eia goio veiala mago “Sakias, eme ge sivo muga, eau ge pou oio la luma taume gageie.”
LUK 19:6 Tio e Sakias loloa mai ele, eia goio sivo hari moli sotalo, eia goio rara tavu e Iesus, eia sagege pepeho.
LUK 19:7 Eala moli egite la valalua goio hiloa mai ele, egite goio vikara kukumuale Iesus maie mago “Ge, la tahalo ale ge vipou tomi me la tahalo la iruru, ia?”
LUK 19:8 Eala moli e Sakias goio magiri, eia veiale Iesus mago “Tahalo Uru, hiloa, gageie eau ge lele lua la golugolu tomi taku, la uati tomi taku tai, la galela isale eau ge sugu taroa giteu la valalua ale pou la savelela. Mai la tahalo isa ge oio ale eau pala tutugoloa te la ilabi la takes, eau ge koli rivua soio tetala ge vaka vaa la uati tetalale.”
LUK 19:9 Tio, e Iesus goio lolotia mai ele, eia goio vikara maie mago “Gageie moli La Tahalo Uru ge vimahuli egiteu la karakara tomi te Sakias. La vuhula, la tahalo ale, eia tai isa e tubule Abraham.
LUK 19:10 Eau, e Latu La Tahalo, la igogolu taku moli veia eau ge gomai veia ge paa muli egiteu ale ruruti, ge vimahuli rivu lou egiteu.”
LUK 19:11 Egite la valalua me hatavivile lolo la vikararala te Iesus, egite hiloa veia eia hagagaviti oio la mautu e Ierusalem, egite veia eia ge guvi oio vola, la pulolou la matagagala te La Tahalo Uru ge sibitala.
LUK 19:12 E Iesus hiloa veia egite kama matagaga mai ele, eia goio vei loua giteu la vikarara la tilovo isa maie “La tahalo isa uru, eia masusulu veia ge goio la mautu isa malau, egite ge vaogea oio vola.
LUK 19:13 Eia abia giteu la bilalaha tetala la uati mai la bari savulusa tegiteu isasasa, eia veia giteu mago ‘La uati ale, amuto ge igogolula kara te ale eau ge beu rivu loua somai, amuto ge vaurua.’ Tio eia goio tutu tolatia giteu mai ele, eia goio tuga.
LUK 19:14 “Eala moli egiteu la valalua tetala vile seselea, egite baha la bilalaha isa mulimuli te la pokela veia ge veiala maie mago ‘Amite kamati masaga seseleme veia eme ge muga amiteu.’
LUK 19:15 “Eala moli la uru goio moli te la mautu ale egite ge vaogea oio vola, egite vaoge seselea, egiteu la uru vaurua veia eia ge pou la mulugaluga sesele te la gale tetala. Mulimuli ovola, eia goio beua soio tegiteu la valalua tetala, eia goio baha tavu egiteu la bilalaha tetala veia egite ge veiala la igogolu tegiteu ale egite igogolula te la uati tetalale.
LUK 19:16 “Isa goio tetala, eia veiala mago ‘Tahalo uru, la bari la uati savulusa taume, eau visibitalatia mai la bari salatu sasa.’
LUK 19:17 “Tio, eia veiala mago ‘Taritigi pepeho, eme la tahalo sesele. Eme baumuli tigiti la bari savulusati lou ele, tio eau ge vaurume, eme ge muga la mautu savulu sasa.’
LUK 19:18 “Goio, ale isa lou goilo tetala, eia veiala mago ‘Tahalo uru, la bari la uati savulusa taume, eia sibitalati mai la bari savulu lima.’
LUK 19:19 “Tio, la uru loloa mai ele, eia goio veiala mago ‘Taritigi, eme tai, eme ge baumuli la mautu ilima.’
LUK 19:20 “Tio, goio la bilalaha isa lou goilo tetala, eia veiala mago ‘Tahalo uru, male, la bari la uati savulusa taume eialati loue, eau baumuli tatahoa, eau avu robola la kulikuli, eau sugu kokovu tatahoa.
LUK 19:21 Eau tagame, la vuhula eau rovitia veia eme la tahalo isa ale hate tuu, eme kama igogolu, eme baha moli amiteu, amite lamolamo, galugalu, eala moli eme abi tomi la vavua la igogolu tamiteu, eme abi la uati uru taume ovola.’
LUK 19:22 “Tio, la uru loloa mai ele, eia veiala mago ‘Eme la tahalo isa ale kama kokora pasi. La merera taume moli ge vitilo loume gageie. Eme matagagati veia eau la tahalo isa ale hate tuu, eau kama igogolu, eau baha moli amutou, amuto lamolamo, galugalu, eala moli eau abi tomi la vavua la igogolu tamutou, eau abi la uati uru taku ovola.
LUK 19:23 Eme matagagati la vulovulogu mai ele, ilava sesele eme kama vahari la uati taku soio tegiteu la valalua la vibaumuli la uati, veia eau ge beua, eau ge abi rivu loua vikapopo la uati ilua ale ge sibitala loata ovola?’
LUK 19:24 “Tio, eia veiala mai ele kaluvu, eia goio vulo gele tavu egiteu ale soio magirigiri ele, eia veia giteu mago ‘La bari savulusa tetalale, amuto ge abi taro leia, amuto ge abia la bilalaha ale sau tola la bari salatusa, eia ge taholea.’
LUK 19:25 “Tio, egite goio koliala mago ‘Tahalo uru, la tahalo ale, eia taholati la uati ale uru, eme abi uru louala!’
LUK 19:26 “Eala moli eia goio vei loua giteu mago ‘La tahalo ale tahola usu la vuliti taku, eau ge vauru loua soio tetala. Eala moli ale tahola moli ilua, eia ge tahola moli ale bakisi ele, me ale bakisi moli eia taholea, eau ge abi taro leia.
LUK 19:27 Me egiteu ale gimeau veia eau umala ge la uru giteu, amuto ge puli egiteu somai taku, amuto ge bili egiteu omai te la lagugue.’”
LUK 19:28 E Iesus gilemulia giteu la valalua me hatavivile mai ele kaluvu, eia goio tuga lou, goata e Ierusalem.
LUK 19:29 Eia goio hagagavi la mautu ilua e Betpage me Betani, oio te la galele Ierusalem sesele, la mautu iluale oio hagagavi te la vai la gove ale egite toila e Oliva. Eia goio guvi te la mautu ilua bisisi ele, eia baha pala muga ilua tegite la valalua la vimari tetala,
LUK 19:30 eia tutu tolea girua mago “Amula ge goio la mautu ale soiole, amula ge hilo isa e latule donki oiole, egite vuvu tolea soio te la obu, la tahalo isa souka pou lalai ovola. Amula ge lulu taroa ge tatea somai taku.
LUK 19:31 Mai isa ge tahi amulua mago ‘Amula lulua veia ge vagovea?’ amula ge veia giteu mago ‘La Uru masagea.’”
LUK 19:32 Tio, egira goio tuga moli, egira goio goluma la mautu, egira sivutia mai moli ale e Iesus veitia girua.
LUK 19:33 Egira goio lulu e latule donki ele, egiteu ale taholea goio tahi egirua mago “Amula ge vagovea e donki bisi ele?”
LUK 19:34 Tio, egira goio veia giteu mago “La Uru masagea.”
LUK 19:35 Goio egira goio tuga moli, egira tata e latule donki ele soio te Iesus. Egite ava la lavalava tegiteu loata la pogala, egite goio vahiliti e Iesus, eia goio pagi sae soata ovola.
LUK 19:36 E donki vituga molia mai ele, la valalua me hatavivile goio ava la lavalava tegiteu otalo te la gauru veia e Iesus ge polo tataho oata ovola.
LUK 19:37 Egite goio guvi hagagavi seseleti la mautu e Ierusalem, egite goio te la gauru ale gotalo te la gove e Oliva, egiteu la valalua la vimari tetala, egite goio soko la vaisalela soata te La Tahalo Uru, egite sagege roboa te la igogolu tomi ale e Iesus igotia eia isapolo sesele, egite hilotia.
LUK 19:38 Egite tola vagari maie mago “La Tahalo Uru ge vibalava La Uru gatou ale guvi omai mai la vagagari la isala.” “Egiteu la angelo oata la mori ge vipuhi tigi tataho, etato ge vaisale sesele La Tahalo Uru!”
LUK 19:39 Eala moli egiteu e pariseo isahari ale magiri kabili tegiteu, egite veiale Iesus mago “Tahalo La Vimari! Eme ge mera taro egiteu la valalua la vimari taume ele, egite umala ge vigagia mai ele.”
LUK 19:40 Eala moli e Iesus baoli rivua giteu mago “Eau veia mutou, mai egite ge makovu, egiteu la uatati ale otalo tabulibuli ele, egite ge koli egiteu, egite ge vaisale La Tahalo Uru, egite ge tola!”
LUK 19:41 E Iesus goio guvi loata la varu la gove ale la gauru polo loata ovola gotalo e Ierusalem, eia goio pou, eia goio mata sotalo te la mautu e Ierusalem ele, eia tali vuraia,
LUK 19:42 eia gabutatala rivu lou egiteu la valalua me hatavivile e Ierusalem ele, eia goio veia maie mago “Maura miteu, mai amuto ge matagaga, amuto ge sau tola tataho la vikara matagagala te La Uru ale ge vipou tataho amutou, amuto kamati ge hilo la ruruga. Eala moli amuto poke tarotia.
LUK 19:43 La imamala mulimuli ge sibitala ale egite la gima tamutou ge tala tavu amutou, egite ge magiri robo la matapiro tomi, egite ge vaubi soio tamutou.
LUK 19:44 Egite ge sulu sapa tomi amutou ele, isa tamutou kama ge mahuli utu. La uatati tomi tamutou ele la lumaluma tamutou ele ge vali loke taro tomi egiteu, egite ge pigi marapea. La vuhula amuto kama mata kilala tigi tavu la tilau te La Tahalo Uru, ale eia tautia veia ge vimahuli amutou ovola!”
LUK 19:45 E Iesus goio goluma la mautu uru e Ierusalem, eia goilo la luma la lotu, eia goio kumuli taro egiteu la valalua ale lotoloto oilo vola.
LUK 19:46 Eia igo totolo egiteu mago “La Buk Tabu Ale Pala eia veipalatia maie ‘La luma taku, eia la luma la kilaka.’ Eala moli amuto vulotia, eia maiti la luma tegiteu la tahalo la pakalila ale egite pou kokokovu oilo vola.”
LUK 19:47 E Iesus pou oio e Ierusalem, eia vimari egiteu la valalua me hatavivile oio te la luma la lotu te la haroharo tomi. Egiteu la mulugaluga tegiteu e pris, egiteu tai la tahalo la mari, egiteu tai la ururu tomi tegiteu e Iuda, egite hate mamasi tavua, egite masaga seselea veia egite ge bilia,
LUK 19:48 eala moli la gauru giteu ouka, la vuhula la valalua me hatavivile usu, egite laba gele tataho la vikararala tomi tetala, egite masaga pepehoa.
LUK 20:1 Te la haro isasa, e Iesus pou oio la luma la lotu, eia vimari egiteu la valalua me hatavivile tomi, eia valolo tai egiteu te la valolo ale taritigi te la pulolou la matagagala te La Tahalo Uru. Goio egiteu la mulugaluga tegiteu e pris, egiteu la tahalo la mari, me egiteu la ururu isahari tai tegiteu e Iuda, egite goio tuga tavu e Iesus,
LUK 20:2 egite tahia mago “Ere sesele veiamu veia eme ge igo la igogolu taume mai ele? Eme igoa oio te la isale ere sesele?”
LUK 20:3 E Iesus goio kolia giteu mago “Eau tai ge tahia mutou isa la tilahi. Amuto ge veiagu,
LUK 20:4 e Ioanes la tahalo la vuluhi, la vuluhi tetala, eia loata te La Uru uka eia la paga te la vovo moli?”
LUK 20:5 Tio, eia goio tahi egiteu mai ele kaluvu, egite goio vipigi vulo baoli legiteu, egite veia maie mago “Mai etato ge toia veia la vuluhi te Ioanes eia loata te La Uru, eia ge tahi rivu lou etatou mago ‘Me mai ele, ilava amuto kama taua la ilo mutou soio tetala?’
LUK 20:6 Eala moli mai etato ge tahi taro e Ioanes mago ‘La vuluhi tetala eia la paga moli te la vovo’, tio la valalua ge igo totolo, egite ge hiliti, egite ge dumu vulo letatou la uati, la vuhula egite tomi gabu tikumu e Ioanes veia eia isa la bilalaha sesele loata te La Uru.”
LUK 20:7 Tio, egite goio marapa seseleti mai ele, egite goio veiale Iesus mago “Amite kama rovi seselea veia la vuluhi te Ioanes, eia loio sesele tere.”
LUK 20:8 Tio, e Iesus goio veia giteu mago “Olo, eau tai kama ge vei matagagea mutou veia ere sesele baheau veia eau ge igo la igogolu taku.”
LUK 20:9 E Iesus goio vei loua giteu la valalua me hatavivile isa lou la vikarara la tilovo maie mago “La tahalo isasa, eia galu la mahuma la vaen tetala, eia goio sugu taroa giteu la valalua isahari ale egite kama tahola la magasa, veia egite ge tau la uati soio tetala, egite ge igogolu muga oio te la mahuma tetalale, veia mai la vaen ge vua, egite ge lele luea giteu la mapa ovola. Eia sugu taroa giteu la magasa tetala mai ele kaluvu, eia goio hiliti taro egiteu, eia tuga soio te la mautu isa ale malau, eia goio pouti ovolae.
LUK 20:10 Mulimuli la imamala guvi ale la vavua la vaen ge maosa oio vola, eia goio baha la bilalaha tetala isasa veia eia ge goio tegiteu, eia ge abi tomi la uati ale tetala sesele, te la vavua la vaen te la mahuma tetalale. Eala moli egite kue gegeru la bilalaha tetala, egite goio baha taro rivua, e maura kavelevele viruru sesele moli.
LUK 20:11 Goio eia baha lou isa la bilalaha tetala soio tegiteu, eala moli egite goio kue gegeru sesele loua, egite igo mahela sesele e maura, egite goio baha taro rivu loua, eia tai kavelevele moli.
LUK 20:12 Goio, e taho la mahuma, eia baha lou la vaitolu la bilalaha tetala, egite goio ubia, egite bolea, pigia sogala.
LUK 20:13 “Goio, e taho la mahuma eia gabutatala maie mago ‘Eau ge igo la rova sesele soio tegiteu la valalua alele? Ale eau ge baha e latugu la riau, egite ge togoa, la vuhula eia e latugu sesele.’
LUK 20:14 “Eala moli egiteu hiloa mai ele veia e latula loioti, egite goio viputumulia maie mago ‘Ale e latula seseleti loiole, la magasa tomi ale te tamala, eia ge mulimuli ge taholea. Etato ge bili taroa, la magasa tomi ale tetalale, etato ge taholea.’
LUK 20:15 Tio egite goio igo seselea mai ale egite veitia, egite goio lao tolea, egite bolea soio, egite pigia sogala, goio egite bili seseletiao. “Tio, mave, e taho la mahuma ge loio, eia ge igo egiteu la valalua la gima tetala mave?
LUK 20:16 Eia ge guvi, eia ge bili taro tomi egiteu la valalua alele, la mahuma tetala, eia ge abi poloa giteu ale isapolo.” Tio, egite la valalua me hatavivile loloa mai ele, egite goio veiala mago “Umala seseleti.”
LUK 20:17 Eala moli e Iesus goio mata totoro tavu egiteu, eia veia giteu mago “Me La Buk Tabu Ale Pala, la masovala soioge mave sesele ale e Devit kekesia maie: ‘La sosole magiri ale kabili, ale egite la valalua la tiligi la luma muku pile tarotia veia eia magoluti, eiala moli ale igoie eia magiri, eia sau tola la tikumu la luma tomi.’
LUK 20:18 Eala moli eau vei seselea mutou, mai isasa eia ge boru talu la sosole la luma aleie, la tatuhala ge putua momomo sesele.”
LUK 20:19 Egiteu la tahalo la mari, me egiteu la mulugaluga tegiteu e pris, egite rovitia veia e Iesus eia ubiti legiteu la vikarara la tilovo tetalale, eala egite masaga pepehoa veia ge lao tola mugea, eala moli egite taga la valalua me hatavivile.
LUK 20:20 Tio egite goio mata mulimulia, egite baha taro isahari tai la valalua veia egite ge tutugoloa, egite ge tahia la tilahi isahari veia egite masaga seselea veia egite ge rovi la kilolila. Eala moli egite masaga molia veia ge lolo bakisi la merera tetala ale mave, egite ge vulo gegeru la masova la vikararala te Iesus ele, ge veipalea soio tegiteu la uru tegiteu e Rom, veia egite ge vilaia.
LUK 20:21 Goio egite goio tutugoloa la tilahi isa maie “Tahalo La Vimari, amite rovitia veia la vikarakarala tomi taume, eia matata moli, eme kama taho bebebe loio te isasa, eme tovo tataho sesele la gauru te La Uru.
LUK 20:22 Eala amite veia ge tahi matagagame maie ‘Mai etatou e Iuda ge pigi la takes soio te Sisa, etato poloti la merera te Moses, ka ouka?’”
LUK 20:23 Eala moli e Iesus rovitia veia egite masagea veia tutugoloa, tio eia goio veia giteu mago
LUK 20:24 “Abiagu isa somai e kina, eau ge hiloa.” Egite goio abiale Iesus e kina isasa mai ale eia masagea, tio eia goio tahiti egiteu mago “Omai te kinae, amuto hilo la halulule ere, me la isale ere tai egite kekesia omai ovolale?”
LUK 20:25 Egite goio koliala mago “Ale la halulule Sisa, me la isale Sisa tai egite kekesia oio vola.” Tio, eia goio veia giteu mago “Ioge, amuto ge abiale Sisa la papaga ale te Sisa sesele, me amuto ge abia La Tahalo Uru la papaga ale tetala sesele tai.”
LUK 20:26 Tio oio vola, egite hiloa veia egite kama koramulia ge vitiloa te la merera ale eia veitia giteu ele te la mata giteu la valalua me hatavivile tomi. Egite karutu sesele tai te la merera tetalale, egite goio pou makovu tomitio.
LUK 20:27 Egiteu e Sadiusi isahari, egite goio tuga tavu e Iesus veia ge tahi lalaia isa la tilahi. Egiteu la valalua alele, te la viputumulila tegiteu, egite veia mai la tahalo isa ge pehoti, eia kamati ge mahuli rivu lou.
LUK 20:28 Goio, egite tahi e Iesus mago “Tahalo La Vimari, oio te la kekesi te Moses, eia matagagati veia mai la tahalo isa ge peho taro e rutula, e latu girua ge ouka, tio e tarila ge puli loua, ge savu e latu girua, ge igo la kilolile tuala ale pehoti.
LUK 20:29 Tio egiteu e tau me tari taho vitu oio. E tua giteu puli pala muga la tavile isa, goio eia peho taroa, egira kama savu isa e latu girua.
LUK 20:30 Tio mulimuli, la iluala puli lou la tavilele. Goio eia tai peho taroa, e latu girua ouka.
LUK 20:31 Goio, la itolula tai goio igo loua mai moli lou ele. Tio mai moli ele, egiteu tomi ale taho vitu ele, egite peho taro tomi la tavilele, egite isa kama savu isa e latu giteu.
LUK 20:32 Mulimulito vola, la tavile tai goio peho.
LUK 20:33 Ale, amite ge tahime, mulimuli mai egiteu tomi ele ge mahuli rivu lou, la tavilele, eia ge rutule ere sesele? La vuhula egiteu taho vitu tomi ele pulitia.”
LUK 20:34 Goio, e Iesus koli la tilahi tegiteu maie mago “La valalua me hatavivile te la vovo, egite vipulipuli,
LUK 20:35 eala moli egiteu ale maroka, ale La Uru mulimuli ge vimahuli rivu lou egiteu te la imamala la mahuli rivula, egite kamati ge vipulipuli.
LUK 20:36 Me egite kamati ge rovi tai la pileho. La vuhula egite ge maiti egiteu la angelo. Egite ge mai e latatu La Tahalo Uru, egite mai la vavua la mahuli rivula sesele.
LUK 20:37 Eala moli eia matagagati tegatou veia egiteu ale pehoti, egite ge mahuli rivu lou, mai La Buk Tabu Ale Pala eia veipalatia te la veimulipolola te Moses, ale eia hilo la popopo la obu, la havi gutua, eia kama goho. Oio te la merera te Moses ale ovolale, eia goio toi La Tahalo Uru veia eia ‘La Urule Abraham, La Urule Isak, me La Urule Iakob.’ Ale, eia matagagati mai ele veia eia toi legiteu ale pehoti mai ale egite so mahulihuli.
LUK 20:38 La Uru, eia kama La Uru giteu ale pehoti, ouka, eia La Uru giteu ale la kalulu giteu oio mahuli. Oio te la matala, la valalua me hatavivile tomi ale pehoti, egite mai ale so mahulihuli.”
LUK 20:39 Egiteu la tahalo la mari isahari, egite oio popou ele, egite lolo la merera te Iesus mai ele,
LUK 20:40 egite goio veiala mago “Tahalo La Vimari, taritigi pepeho sesele la merera taume ele, eia kama galo!” Me oio moli ovolale, egite isa kamati tahi loua isa la tilahi, egite tomi tagatia.
LUK 20:41 Goio, e Iesus goio tahi egiteu e pariseo isa la tilahi mago “Ilava sesele egiteu usu kauale Kraist veia eia e latule Devit?
LUK 20:42 La vuhula e Devit sesele te La Buk Tabu Ale Pala, oio te la buk la bilau, oilo vola eia veia maie: La Tahalo uru, eia veitia La Uru taku mago ‘Eme ge pou la pulolou la uru omai te la baligu e gata,
LUK 20:43 eau ge pigi egiteu la gima taume sotalo la uluva la vahamu, eme ge soa kurukuru egiteu!’
LUK 20:44 Tio oio volale, eau ge tahi amutou, mai e Devit ge toi le Kraist veia eia La Uru tetala, ilava sesele amuto ge vulo loua veia e Kraist eia e tubule Devit?”
LUK 20:45 Egiteu la valalua me hatavivile usu pepeho oio magirigiri, laba gelegele la merera te Iesus, eia goio vulo gele tavu egiteu la valalua la vimari tetala, eia veia giteu mago
LUK 20:46 “Amuto ge vibaumuli tigi tegiteu la tahalo la mari. Egite lavalava malalau sotalo, egite tatuga te la tia la mautu veia la valalua ge laharoa giteu, veia egite ge pou te la ilali, veia mai egite ge lotu tai, egite masaga molia veia ge pou te la pulolou tegiteu la ururu.
LUK 20:47 Egite tutugolo e maura miteu la tavile la baharu, egite pakali la uati me la magasa tegiteu, eala moli egite ge goio ge pou tabaa pepeho lou te la kilaka te la mata giteu la valalua tomi, veia la valalua ge isu egiteu, egite vei tataho egiteu. Mulimuli egite ge poga tavu la kiloli la iruru tegiteu ale vagari sesele, ale ge koramuli sesele la vulovulo giteu ale kama kokorale.”
LUK 21:1 Goio, e Iesus ga mata soio, eia hilo egiteu la tahalo la vuliti, egite pipigi la vaabila tegiteu soilo te la tilalau la uati ale tabuli te la mata la luma la lotu.
LUK 21:2 Eala moli eia goio hilo vuti la tavile la baharu isa uru, e maura morivava sesele, eia pigi la uati ilua moli.
LUK 21:3 Tio e Iesus hiloa mai ele, eia goio veia maie mago “Eau vei seselea mutou, la tavile la morivava aleie, la vaabila tetala eia muga tegiteu la vaabila tomi ale egite pigitia,
LUK 21:4 la vuhula egiteu la tahalo la vuliti, egite pigi moli la piligi la uati ale tegiteu, eala moli e maura la baharu ele, eia pigi tomiti la uati ilua tetala ale ge koramuli eia te la iloto la ilali tetala.”
LUK 21:5 Egiteu la valalua la vimari te Iesus isahari, egite hilo la luma la lotu, eia marasa pepeho, egite karutu sesele. Egite veia la uati ale ururu egite tigitila, egite taritigi pepeho, me egiteu la vaabila tai ale la valalua vaababi La Uru oio vola, egite taritigi sesele. Eala moli e Iesus goio veia giteu mago
LUK 21:6 “La luma ale uru amuto hilotia igoie, ge mulimuli egiteu la valalua la gima ge gomai ge loke momomo taroa, me la uatati ale ururu ovola, egite kati ge vitabuli tatalu lou, egite ge tabuli marapa tomi.”
LUK 21:7 Tio, egiteu la valalua la vimari te Iesus, egite goio tahia mago “Tahalo La Vimari, gaisa sesele la merera taume tomi ele ge puru? Me la irovilala ale mave sesele ge sibitala pala muga, eia ge veipalea veia la imamala ale, eia hagagaviti?”
LUK 21:8 Goio, e Iesus kolia giteu maie mago “Amuto ge mata rara tigi, egiteu isahari ale kama kokora soukama gomai ge tutugolo amutou, amuto ge tilo te la merera tegiteu ele. La valalua usu ge guvi seseke tavu amutou, egite ge veia mutou mago ‘Eau e Kraist’, uka egite ge veia maie mago ‘La imamala koramuliti ale la tapasi la haro ge sibitala, e Kraist ge guvi rivu lou loata.’ Eala moli amutou umala ge mulimuli egiteu ele.
LUK 21:9 Umala amuto ge taga, mai amuto ge lolo la rere la vaubila me la vikokuela eia sibitalati. La marapala tomi mai ele ge sibitala pala muga, mulimuli ovola la tapasi la haro ge sibitala.”
LUK 21:10 Tio, e Iesus vei kaluvutia giteu la merera tetala mai ele, eia goio solo lou la vikararala tetala soio tegiteu, mago “La gale isa, eia ge hiliti tavu la gale isapolo, egiteu la galegale tomi ge vaubi rivu lou legiteu mai ele.
LUK 21:11 E malugulugu usu ge umu, la vitololola uru tai ge sibitala, ge pigi robo la maututula tomi.
LUK 21:12 Eala moli pala muga tegiteu la irovilala tomi ele, egiteu la valalua la gima ge hiliti, egite ge lao tola pala muga amutou, egite ge viligi sesele amutou, egite ge vimagiri amutou te la vigagiala te la lumaluma la lotu tomi te la maututula, egite ge lapu amutou soio te la luma la kilisi. Egite ge loloa veia amuto valolo te la isagu, egite ge lapu amutou soio te la vigagiala tegiteu la mulugaluga.
LUK 21:13 Ale taritigi moli, la vuhula amuto ge valolo egiteu te la valolo ale taritigi te la isagu.
LUK 21:14 Eala moli umala amuto ge gabutatala papapai te la merera ale amuto ge tao robo le amutou ovola.
LUK 21:15 Eau ge abia mutou la merera ale taritigi me la mari ale sesele, egiteu la gima tamutou kama koramulia ge tahi taroa.
LUK 21:16 Egiteu e tatama mutou, e tatila mutou, egiteu tai e tabarabara mutou, egite tomi ele ge veipala amutou soio tegiteu la gima, egiteu e valalua mutou tomi, egiteu e vikilipilipi mutou tai, egite tomi ele ge igo moli amutou tomi mai ele. Egite ge bili taro tai isahari tamutou ele.
LUK 21:17 La valalua tomi ge gima amutou te la isagu,
LUK 21:18 eala moli isa tamutou kama ge vilua,
LUK 21:19 la vuhula mai amuto ge magiri vagari, eia koramulia mai ele veia eau ge vimahuli la kalulu mutou.
LUK 21:20 “Mai mulimuli amuto ge hilo e Ierusalem, egiteu la valalua la vaubi ge gali roboa, amuto ge matagaga tigi tataho mai ele veia eia kamati ge tabaa, la mautu e Ierusalem ge sululu.
LUK 21:21 Te la imamala ale, eia taritigi pepeho veia egiteu la valalua me hatavivilele Iudea, egite ge hele soata la goegove. Taritigi egiteu ale pou oluma, egite ge hele. Egiteu tai ale pou orivo, taritigi veia egite ge hele moli, egite umalati ge golumaluma.
LUK 21:22 La vuhula la imamala ale, eia la imamala la kiloli la iruru, ale La Uru ge vipuru sesele la merera tetala tomi ovola.
LUK 21:23 E maura miteu e hatavivile ale so visususu e latatu giteu te la imamala alele, egiteu tai ale savulatu, egite ge hele mave? La tilali ge uru sesele te la gale e Iudea, me la igototolola te La Tahalo Uru ge pigi robo la valalua me hatavivile tomi tetala.
LUK 21:24 Isahari tegiteu ge peho te la vaubila, isahari tegiteu lou, egite la gima ge lao tola egiteu, egite ge lapu egiteu soio te la mautu ale malau. Egiteu la valalua la maligoma ge soa kuru la mautu e Ierusalem, kara ale la imamala tegiteu ge kaluvu.
LUK 21:25 “La irovilala isahari ge sibitala tai oata te la haro, te la taio, me tegiteu la matatabu. La valalua me hatavivile tomi te la gale isahari, egite ge ilo buruko sesele, la mago ge gasi gegeru lahu, la sualo ge uru sesele.
LUK 21:26 La valalua me hatavivile ge taga pepeho sesele, egite ge pou tali la rova sesele ale ge sibitala, eia ge pigi robo la maututula tomi. La vagagarila ale sau tola la mori oata, eia ge malugu tomi.
LUK 21:27 Te la imamala moli ale, e Latu La Tahalo ge sibitala loata te la tuluvu la mori isa uru, vikapopo me la vitokoromola me la vagagarila ale uru pepeho.
LUK 21:28 Mai egiteu la papaga tomi alele ge sibitala, amuto ge hiliti, ge taga soata la mori, la vuhula la imamala hagagavi moliti ale La Tahalo Uru ge vimahuli amutou ovola.”
LUK 21:29 E Iesus veia giteu la vikarara la tilovo isa lou maie “Amuto ge gabutatala egiteu la obobu tomi ale vavua, mai la keme.
LUK 21:30 Amuto ge hiloa veia mai egite taroti, me egite goio tututuvu rivu lou, tio amuto ge rovi matagagea mai ele veia eia mahatiti, la leavala kaluvuti.
LUK 21:31 Tio ge mai tai ele, mai amuto ge hilo tomi la merera tomi taku eia ge puruti, tio amuto ge rovia veia la guluvi te la pulolou la matagagala te La Tahalo Uru eia hagagaviti.
LUK 21:32 La merera tomi taku ge puru harari moli soio, amutou la tuvu la valalua ale igoie, amuto soukama ge peho, amuto ge hilo pala mugatia.
LUK 21:33 La mori me la magasa ge kokovu, eala moli la merera taku ge tabuli moli mai ele, eia kama ge kokovu.”
LUK 21:34 E Iesus goio solo lou la vikararala tetala soio tegiteu la valalua la vimari tetala, mago “Amuto ge mata rara tigi. La kalulu mutou soukama tilo te la vulovulo ale kama kokora mai la iliu pauala, la alipeila, me la gabutatala papaila te la vovo. Kama taritigi veia e Latu La Tahalo ge guvi, eia ge hilo vuti amutou oio tegiteu la vulovulo ale mai ele.
LUK 21:35 Eau vei matagagea mutou mai ele, la vuhula la haro ale, eia ge sibitala karutu moli, eia ge vitilo la valalua me hatavivile te la maututula tomi mai la mai.
LUK 21:36 Amuto ge mata rara te la haroharo tomi. Amuto ge pou tavu la kilaka veia La Tahalo Uru ge abia mutou la vagagarila veia amuto ge koramulia ge vulo taro tomi la viluala te la imamala ale kama kokorale, eia hagagaviti, veia amuto ge maroka moli te la lagule Latu La Tahalo te la haro alele.”
LUK 21:37 Tio, e Iesus eia goio pou tabaa bakisi oio e Ierusalem mai ele. Te la haroharo tomi alele, eia vimarimari egiteu la valalua me hatavivile oio te la luma la lotu, me te la logologo tomi alele eia ge bebeua soio te la gove e Oliva, eia goio mamavuta ovola.
LUK 21:38 Me te la kavikokoki tomi, la valalua me hatavivile, egite gua kavikoki tatavu loua soio te la luma la lotu veia egite ge lolo lou la vimari tetala oio volao.
LUK 22:1 La haro la pougolula hagagaviti, ale egiteu e Iuda ge igo la ilali ale uru mai la vulovulo giteu, ale egite alali la bret ale kama sogo ovola, mai egite toila La Ilali La Poloselela.
LUK 22:2 Goio, egiteu la mulugaluga tegiteu e pris, me egiteu la tahalo la mari, egite viputumuli la gauru ale egite ge bili e Iesus oio vola, eala moli egite taga lou, la vuhula la valalua me hatavivile, egite masaga pepeho la merera te Iesus, la mautu soukama ge marapa mai egite ge lao tolea.
LUK 22:3 Goio, e Satan goio pou te la gabutatalala te Iudas Iskariot, ale isa tegiteu la valalua la vimari te Iesus ale savulusa gete lua.
LUK 22:4 Eia goio tuga tavu egiteu la mulugaluga tegiteu e pris, me egiteu la mulugaluga tegiteu la tahalo la ilago robola la luma la lotu, eia goio tahi egiteu la gauru ale eia ge sugu taro e Iesus soio tegiteu ovola.
LUK 22:5 Egite goio loloa mai ele, egite sagege pepeho, egite veiala veia egite ge loloa.
LUK 22:6 Tio e Iudas masaga molia, eia goio hiliti taro egiteu, eia goio beua soio te Iesus veia eia ge sivuti isa la gauru ale koramuli seselea veia eia ge sugu taro kokovu molia soio tegiteu la mulugaluga.
LUK 22:7 Te la imamala sesele te la pougolula tegiteu e Iuda te La Ilali La Poloselela, la haro isa ale kabili oio vola ale egite ge bili egiteu e latatu la sip, egite ge alia, mai la vulovulo giteu lou ele.
LUK 22:8 Te la haro moli alele, e Iesus baha e Pita mira me Ioanes soio, eia veia girua mago “Amula tuga, amula ge goio ge raragi La Ilali La Poloselela tegatou.”
LUK 22:9 Tio, egira goio tahi rivu loua mago “Eme masagea amila ge raragi la ilali tegatou oiove?”
LUK 22:10 Tio, eia goio veia girua mago “Amula ge polo te la matapiro la mautu e Ierusalem, la tahalo isasa eia ababi la sospen la lalu, eia ge poga amulua. Amula ge mulimulia, ge goio te la luma ale eia goio vola,
LUK 22:11 amula ge veiale taho la lumale maie ‘La Tahalo La Vimari eia tahime mago: La baa bakisi oiove, ale koramuli amiteu la valalua la mosi ge pou ovola, ge ali La Ilali La Poloselela?’
LUK 22:12 Tio eia ge vahilo le amulua la kapiutu isa uru ale oata te la lumale, la poroporo me la kuritiriti ovola, amula ge raragi la ilali tegatou oio te la baa alele.”
LUK 22:13 Tio, egira goio tuga, egira sivuti molia mai ale e Iesus veitia girua, egira goio raragi tataho La Ilali La Poloselela tegiteu ele.
LUK 22:14 La mata la haro sibitalati te la ilali, e Iesus miteu me la valalua la vimari tetala, egite goio pou,
LUK 22:15 eia veia giteu mago “Eau hate raga tavu sesele la ilali ale gageie veia eau ge pou vikapopo le amutou pala muga te la viluala taku.
LUK 22:16 Eau vei seselea mutou, eau kati ge pou vikapopo lou le amutou te la ilali, kara ale etato ge pou vikapopo tataho tomi te la ilali ale sesele te la pulolou la matagagala te La Tahalo Uru.”
LUK 22:17 Goio, e Iesus abi la kap la bulu la vaen, eia goio vaisale pala muga La Uru oio vola, eia goio veia giteu mago “Amuto ge abi la kap alele, amuto tomi ge liu ovola.
LUK 22:18 Eala moli eau kati ge liu lou la bulu la vaen, kara ale la pulolou la matagagala te La Tahalo Uru ge sibitala.”
LUK 22:19 Goio, eia abi la bret, eia goio vaisale pala muga La Uru oio vola, eia goio tovia giteu, eia veia giteu mago “Ale la mailigu! [Eau ge sugu taro la mahulila taku soio tamutou. Amuto ge alia, amuto ge gabutatala mulimuliau oio vola.”
LUK 22:20 Me mai tai lou ele, egite ali kaluvuti, eia goio abia giteu la kap la vaen, egite tomi liua, eia veia giteu mago “Aleie la kasosogu, ale mai la irovilala ale halaba, ale amuto ge rovia veia la merera te La Tahalo Uru, me la igogolu taku soio tamutou, eia seseleti. La kasosogu ge pagegele, eia ge vimahuli la valalua me hatavivile usu.]
LUK 22:21 Male ge, ale ge sugu taroau, eiala omai amila vaali totomie.
LUK 22:22 E Latu La Tahalo, eia ge peho sesele mai la tabarila te La Tahalo Uru soio tetala, eala moli la tahalo ale ge sugu taroa, e maura ge mulimuli ge vilua gegeru sesele.”
LUK 22:23 Tio, egiteu goio vitahi baololi lou legiteu veia ge ere sesele tegiteu ge sugu taro e Iesus mai ale eia so vevei molia giteu ele.
LUK 22:24 Egiteu la valalua la vimari te Iesus, egite goio soko la vaigigola veia ere ge urua giteu.
LUK 22:25 E Iesus goio veia giteu mago “Egiteu la mulugaluga omai te la magasa, egite vipou la valalua me hatavivile tegiteu te la viputumulila ale tivura, me la valalua ge vei tataho lou egiteu, veia egiteu taritigi.
LUK 22:26 Eala moli amuto umala ge igigoa mai ele. Mai ale eia ge urua mutou, taritigi eia ge vibisi loua. Me eia ale pou la mulugaluga, taritigi eia ge mai moli la bilalaha tamutou e tabarabarala tomi.
LUK 22:27 Mave, la tahalo isa pou te la ilali, isa goio vahariala la ilali, ere ge urua girua? Soioge ale moli popou ele, eia ge urua girua. Eala moli eau ale urua mutou, eau mai la bilalaha tamutou tomi.
LUK 22:28 “Amutou ele, amuto vikapopo moliti leau te la iligiligi tomi taku.
LUK 22:29 Eala eau ge vauru amutou, mai tai e Tete pala vauru eau.
LUK 22:30 Amuto ge ali tomi leau, ge liu tomi tai leau oio te la ilali ale uru oio te la pulolou la matagagala te La Tahalo Uru, amuto ge pou te la pulolou la uru, egiteu la hili giteu la valalua me hatavivile e Israel ale savulusa gete lua, eau ge vipou egiteu lotalo te la uluva la viputumulila tamutou.
LUK 22:31 “Saimon, Saimon. E Satan masagea veia ge vipou amutou te la tovolalaila veia amuto ge magiri vagari ka ouka, me La Uru kama ge magiri roboa, eia ge igo molia mai ele.
LUK 22:32 Eala moli eme Saimon ele, eau sau tola vagariti leme la kilaka veia la tautaulailo taume kama ge boru sesele taroau. Mulimuli eme ge ilo liliu tavu louau, eme ge magiri mai la sosole tegiteu e tabarabaramu.”
LUK 22:33 Tio, e Pita loloa mai ele, eia goio veiala mago “Tahalo Uru, eau raragiti veia mai egite ge vagoilome te la luma la kilisi, eiau ge etalua tomi! Eau ge peho vikapopo leme!”
LUK 22:34 Eala moli e Iesus goio baoli rivuala mago “Pita, eau vei seseleamu, e kukureko galogo soukama ge tali, tio eme ge tahi taro eau vaka tolu veia eme kama rovi eau.”
LUK 22:35 Goio, e Iesus veia giteu mago “Pala mugati, eau baha taro amutou, eau mera taro amutou te la ilabi la uati, me la kela me la silipa te la tuluga tamutou. Mave, te la imamalale, amuto savele isa la paga?” Tio, egite goio veiala mago “Ouka.”
LUK 22:36 Goio, eia solo lou la vikararala tetala soio tegiteu mago “Eala moli te la imamala ale igoie, mai eme tahola la uati ilua, eme ge abia te la tuluga taume. Mai tai lou ele, la kela. Mai eme la viso ouka, eme ge sugu taro la lavalava taume, eme ge abiamu ilua la uati ovola, ge loto hari moliamu la viso ge igo la toromu.
LUK 22:37 Ale eau tutu tatolea mutou mai ele, la vuhula la merera te Aisaia te La Buk Tabu Ale Pala, eia ge puru somai taku, ale eia veia maie: La Riau te La Tahalo Uru, egite kakauala veia eia la tahalo la pakalila. La merera tomi te La Buk Tabu Ale Pala ale koramuliau, eia hagagaviti ge puru.”
LUK 22:38 Tio, egite loloa mai ele, egite goio veiala mago “Tahalo Uru, male, la viso ilua omaie!” Eala moli e Iesus goio baoli rivua giteu mago “Eia korati ele!”
LUK 22:39 Goio, e Iesus miteu me la valalua la vimari tetala, egite hiliti taro e Ierusalem te la maulavi, egite goio la gove e Oliva mai la vulovulo giteu ele.
LUK 22:40 Egite goio guvi ovola, eia veia giteu mago “Taritigi amuto ge kaka gogogo La Tahalo Uru veia amuto ge vulo taro tomi egiteu la tovolalaila ale ge sibitala tavu amutou.”
LUK 22:41 Goio, eia goio tasuku gale taro egiteu bakisi soio, eia goio toto tulu, eia goio kaka maie
LUK 22:42 “Tete, mai eme masagea, eme ge abi taro leau la igogolu taku ele. Eala moli eau kama ge tilimuli la masasagala taku, eau ge tilimuli moli la masasagala taume sekela.” [
LUK 22:43 Goio e angelo isasa sibitala tavua, eia guvi loata mai ele veia ge siobua.
LUK 22:44 Eala moli e Iesus goio ilo buruko sesele, eia goio kaka vagari lou, la maholola pusi soa tola, eia saisali sotalo la magasa mai la silali la kasoso sesele.]
LUK 22:45 Eia goio kaka kaluvu, eia hiliti, eia goio beua soio tegiteu la valalua la vimari tetala, eia hilo egiteu oio mamavuta moli, la mata giteu tabibi la iloburukola tegiteu soio tetala.
LUK 22:46 Eia goio palo egiteu, eia goio tahi egiteu mago “Amuto mavuta ilava? Amuto hiliti! Amuto ge kaka vagari veia amuto ge vulo taro la tovolalaila ale ge sibitala tavu amutou gageie!”
LUK 22:47 E Iesus so vikarakara soio tegiteu la valalua la vimari tetala, la valalua la gima usu sibitala tavua, e Iudas eia muga egiteu. Ale e Iudas moli, ale isa tegiteu la valalua te Iesus ale savulusa gete lua. Goio, eia hari tavu e Iesus veia ge lao roboa,
LUK 22:48 eala moli e Iesus goio tahia mago “Iudas, eme veia ge lao robo golo moliau veia eme ge sugu taro e Latu La Tahalo soio tegiteu la valalua la gima, ia!”
LUK 22:49 Tio, egiteu la valalua la vimari tetala, egite hiloa mai ele veia egite ge lao tola e Iesus, egite goio tahia mago “Mave, Tahalo Uru, eme masagea veia amite ge kolime, ge vaubi robomei?”
LUK 22:50 Goio, isa tegiteu hiliti, eia goio barautu la gavusa la tahalo isasa oio te la galela e gata, eia la bilalaha te la mulugaluga tegiteu e pris.
LUK 22:51 Eala moli e Iesus hiloa mai ele, eia veia giteu mago “Umalati!” Eia goio sau te la gavusa la tahalole, la gavusala goio taritigi tataho lou.
LUK 22:52 Goio, e Iesus vulo gele tavu egiteu la mulugaluga tegiteu e pris, me egiteu la mulugaluga tegiteu la valalua ale tala robo la luma la lotu, me egiteu la ururu, egite tomi ele ale guvi veia ge lao tolea, eia goio tahi egiteu mago “Mave, amuto soioge veia eau la tahalo la pakalila, ia, ale amuto guviti omai la lima mutou la voviso me la obobu veia ge kue leau?
LUK 22:53 Eau pou kabili tamutou oio te la luma la lotu la haroharo tomi, amuto kama masaga ge lao toleau. Eala moli ale la paga logoti, eia koramuli amuto ge lao toleau ovola, la vuhula la maligoma sibitala vagariti.”
LUK 22:54 Egiteu goio lao tolea, lapua soio te la luma te la mulugaluga tegiteu e pris. E Pita mulimuli tatau moliale Iesus miteu ebikoka.
LUK 22:55 La valalua isahari, egite isuti la havi isa uru oio te la mata la luma, egite pou malululu, e Pita goio vipou tomi legiteu.
LUK 22:56 La sobe isa bisi, eia la bilalaha, eia hiloa popou ele, eia goio tabatitiroa, eia goio veia giteu mago “La tahalo tai aleie ge, eia tai tilimulimuli e Iesus!”
LUK 22:57 Eala moli e Pita goio giriri, eia veiala mago “Eme la tavile bisi ele, eme makovu, eau kama rovi la tahalo alele!”
LUK 22:58 Goio, eia kama tabaa, isa lou loio goio hilo loua, eia veiala mago “Eme tai ele, amuto me Iesus.” Eala moli e Pita veiala mago “Ae, emei ele, eau ouka sesele oio te Iesus ele.”
LUK 22:59 Goio, tabaa moli bakisi, la tahalo isa lou loio, eia goio vei vagaria giteu ale popou ele, mago “La tahalo ale, eia isa sesele tegiteu ele. Hiloa, eia la tau Galilea.”
LUK 22:60 Eala moli e Pita goio baoli rivuala soio mago “Ko, tabaragu, eau kama rovi gologolo la paga ale eme veveiale.” Tio oio moli ovolale, eia so vikarakara, e kukureko goio tali,
LUK 22:61 e Iesus goio vulo gele tavua loio, eia mata tavu vagari molia mai ele. Tio e Pita goio gabutatala rivu loua mai ele la vikararala ale La Uru veitiala mago “Gageie, e kukureko soukama ge tali, eme ge tahi tarotiau vaka tolu.”
LUK 22:62 Tio eia gabutatala mai ele, eia goio hele sogala, e maura goio tali pepeho seseletio.
LUK 22:63 Goio, egiteu la valalua ale tala tavu e Iesus, egite pigi malikiala, egite lubi vulo taia.
LUK 22:64 Egite kisi robo la matala la lavalava, egite goio tahia mago “Ioge, eme la bilalaha te La Uru, eme ge veia miteu veia ere tahalo sesele ale kuetimei ele?”
LUK 22:65 Tio egite goio vikara bara seseleala mai ele.
LUK 22:66 Goio, la haro porosileti, egiteu la ururu tegiteu e Iuda goio pou vikapopo legiteu la mulugaluga tegiteu e pris me egiteu la tahalo la mari. Egiteu la valalua ale tala tavuti e Iesus ele, egite goio lapua soilo tegiteu la mulugaluga la lotu tomi ele,
LUK 22:67 egiteu la uru goio tahia mago “Ioge, mai eme veia eme e Kraist sesele, taritigi eme ge veia miteu gageie.” Tio, e Iesus goio kolia giteu mago “Mai eau ge veia mutou, amuto kama ge gabu tikumua,
LUK 22:68 me mai tai eau ge tahi amutou la tilahi, amuto kama ge kolia.
LUK 22:69 Eala moli kara igoie, kara mulimuli, e Latu La Tahalo ge pou te la pulolou la uru oio te la bali La Tahalo Uru te la limala e gata.”
LUK 22:70 Tio, egite loloa mai ele, egite goio tahia mago “Ioge, eme soioge e Latu La Tahalo Uru sesele, ka ouka?” Tio, e Iesus goio baoli rivua giteu mago “Eia mai moli ale amuto veitiale, eau eia sesele.”
LUK 22:71 Tio, egite loloa mai ele, egite goio vei loua giteu mago “Etato ge pou tali la merera ale mave lou? La iruru tetala, etato lolo seseletia te la harela lou ele.”
LUK 23:1 Egiteu la ururu tomi goio hiliti, egite vahari e Iesus soio te Pailat.
LUK 23:2 Egite goio ubila la merera usu, mago “La tahalo ale, amite sivutitia veia eia mera taro la valalua tamiteu e Iuda veia egite umalati ge pipigi la takes soio te Sisa. Eia vauru rivu lou eia veia eia e Kraist, la mulugaluga tamiteu.”
LUK 23:3 Tio, e Pailat loloa mai ele, eia goio tahia mago “Eme la uru tegiteu e Iuda, ia?” Tio, e Iesus koliala mago “Eia mai moli ale eme veitiale.”
LUK 23:4 Goio, e Pailat veia giteu la mulugaluga tegiteu e pris, me egiteu la valalua tomi ale magirigiri ele, eia veia giteu mago “Eau kama sivuti sesele isa la iruru oio te la tahalo aleie, veia eau ge vilaia ovola.”
LUK 23:5 Eala moli egite vagari, egite goio karasukua mago “Eia igo marapa sesele la pulolou te la valalua te la valolo tetala te la galele Iudea tomi, sokoa oata e Galilea, kara omai e Ierusalem.”
LUK 23:6 Tio, e Pailat loloa mai ele, eia tahi egiteu veia e Iesus eia la tau Galilea sesele, ka ouka.
LUK 23:7 Tio eia goio sivutia veia eia pou otalo la uluva la viputumulila te Herod sesele oio e Galilea, tio eia goio baha taroa soio te Herod, la vuhula e Herod pou oio e Ierusalem te la imamala alele.
LUK 23:8 Goio, egite goio vaharia soio te Herod, e Herod sagege pepeho, la vuhula eia lolo palati la isala, me eia masaga pepehoa veia ge hilo seselea. Eia masagea veia ge hilo la golu la karutula isasa mai e Iesus ge igoa.
LUK 23:9 Goio e Herod tahi susukua la tilahi usu, eala moli e Iesus kama koliala bakisi.
LUK 23:10 Egiteu la mulugaluga tegiteu e pris, me egiteu la tahalo la mari, egite tomi ele magiri ubi vagari le Iesus la merera.
LUK 23:11 E Herod miteu me la valalua la vaubila tetala, egite lege vahia, egite pigi maliki taiala, egite vilavalava leia la lavalava ale taritigi tataho sesele, egite goio baha rivu loua soio te Pailat.
LUK 23:12 Me te la haro moli alele, e Herod me Pailat egira sokoa veia egira ge vikilipi sesele te la igogolu tegirua. Pala muga te ale, egira pou la vigimala.
LUK 23:13 Goio, e Pailat tola vikapopo egiteu la mulugaluga tegiteu e pris, me egiteu la ururu tai, me egiteu tai la valalua,
LUK 23:14 eia goio veia giteu mago “Amuto lapu la tahalo ale somai taku veia eia vipou marapa la valalua. Eala moli eau mata muli tomiti la vulovulola omai te la mata mutou, me eau kama sivuti isa la iruru oio tetala ale amuto ubi leia ovola.
LUK 23:15 Me e Herod tai, eia kama sivuti isa la iruru oio tetala, eala eia baha rivutia somai tegatou. La tahalo ale, la iruru ouka oio tetala ale koramuli eau ge bilia oio vola.
LUK 23:16 Eau ge baha egite soldia, egite ge kumamasi vulo molia, mulimuli eau ge lube taroa, eia ge tuga.” [
LUK 23:17 E Pailat veia giteu mai ele, me eia matagaga tai mai ele veia te la leavalavala tomi, te La Ilali La Poloselela, e Pailat ge lube la tahalo la kilisi isasa veia ge visagege legiteu la valalua e Iuda mai ele.]
LUK 23:18 Goio, la valalua tomi tola soio mago “Ge bili taroa! Eme ge lubea miteu somai e Barabas ele!”
LUK 23:19 Me e Barabas, egiteu e Rom pala vagoiloa te la luma la kilisi, la vuhula eia vahiliti la ruruga soio tegiteu, me eia bili tai isahari egiteu la valalua.
LUK 23:20 Eala moli e Pailat masaga molia veia ge lube e Iesus, tio eia goio tovo lalai lou egiteu la valalua,
LUK 23:21 eala moli egite loio tola susuku moliti mago “Katu tola molia soata la tauvalautu, eia ge peho!”
LUK 23:22 Goio, e Pailat goio tovo lalai lou egiteu la vaka tolula, eia goio tahi egiteu mago “Ilava, eia igoti la iruru ale mave sesele? Eau kama sivuti isa la iruru oio tetala veia eau ge bilia ovola. Eala, eau ge baha egite soldia, egite ge kumamasi vuloa, mulimuli eau ge lube taroa, eia ge tuga.”
LUK 23:23 Eala moli egite goio tola vagari pepeho sesele lou, egite goio karasuku vagari molia, veia eia ge sugu taroa soio te la pileho veia egite ge katua soata te la tauvalautu, tio eia goio roromuli la tilola tegiteu ele.
LUK 23:24 Tio e Pailat goio vitapasi la viputumulila tetala veia ge igo sesele molia mai ale egite masagatiale.
LUK 23:25 Eia goio lube taro e Barabas soio tegiteu, ale pala egite vagoiloa te la luma la kilisi te la iruru tetala mai la vaubila me la bilili ale eia igotia, la vuhula la valalua masaga molia e Barabas ele. Eala moli e Iesus, eia sugu taroa soio tegiteu veia egite ge igo molia soio tetala mai la masasagala tegiteu sesele.
LUK 23:26 Tio, egite goio lapu e Iesus soio, egite tatugale, egite poga la tahalo isasa, la isala e Saimon, eia la tau Sairini. Eia loio la gale malau, eia sibitala tavu moli egiteu te la mautu e Ierusalem veia ge goilo, eala moli egite soldia sau tolea, egite vibole leia la tauvalautu, egite veiala veia eia ge bole la tauvulautu te Iesus mai ele, veia eia ge mulimuli e Iesus te la gauru.
LUK 23:27 Egiteu la valalua me hatavivile usu tai, egite goio mulimuli e Iesus, egite tatuga, tali roboroboa.
LUK 23:28 E Iesus goio vulo gele tavu egiteu, eia veia giteu mago “Amutou hatavivilele Ierusalem, amuto umala taitali leau, taritigi veia amuto ge tali rivu lou le amutou me egiteu e latatu mutou tai.
LUK 23:29 La vuhula, la imamala ale kama kokora ge sibitala ale amuto ge vikara maie mago ‘Egiteu ale varirobo, egite balavati, egiteu tai ale kama popigo, me egiteu ale kama visususu!’
LUK 23:30 Te la imamala ale, egite ge tola soata tegiteu la goegove maie mago ‘Amuto ge tarobi loata, ge gotalo ge pigi robo amiteu.’
LUK 23:31 Eia mulimuli ge kama kokora sesele mai ele, la vuhula mai egite ge igo gegeruau la obu mutou mai ele, ale eau so kasaseka, la rova sesele egiteu la gima ge igoa mutou mulimuli ovola, mai eau la obu mutou ale ge magoluti?”
LUK 23:32 Egite vahari tai taho lua veia ge katu egirua oata te la tauvalautu vikapopo le Iesus. Egira la tahalo la iruru.
LUK 23:33 Egite goio guvi oio te la popoiti ale egite toila veia eia mai la gama la tahalo, egite goio vahiliti la tauvalautu tegiteu taho tolu ele oio vola, egite katu tola e Iesus oata ovola kabili tegirua la tahalo la iruru iluale, isa oio te la galela e gata, isa te meru.
LUK 23:34 E Iesus kaka maie mago “Tete, eme ge vimavulaha taro legiteu la iruru ale egite igotiagu, la vuhula egite kama rovi la paga ale egite igotia.” Egite goio vipigi vulo la satu veia oio te la pilai alele, egite ge vitabaribari legiteu la kairoborobola tetala.
LUK 23:35 La valalua me hatavivile isahari oio malelei, egiteu la mulugaluga tegiteu e Iuda goio pigi malikiala, egite vikara maie mago “Eia vimahuli egiteu la valalua me hatavivile isahari, taritigi mai eia ge Kraist sesele ale La Tahalo Uru hilovitia, eia ge vimahuli rivu lou eia.”
LUK 23:36 Egiteu e soldia tai pigi malikiala, egite goio tuga tavua, egite vituriala soata la kap la vaen ale ama, veia eia ge liua.
LUK 23:37 Egite veiala mago “Mai eme ge la uru giteu e Iuda sesele, taritigi eme ge vimahuli rivu lou eme gageie.”
LUK 23:38 Eala moli la merera ale egite kekesi tolatia oata te la gama la tauvalautu, egite kekesia maie “Ale la uru giteu e Iuda.”
LUK 23:39 Isa tegirua taho lua la tahalo la iruru ale tili vikapopo leia, eia vile pepeho e Iesus, eia veiala mago “Mave, eme veia eme e Kraist, taritigi eme ge vimahuli eme, amilua tai.”
LUK 23:40 Eala moli ale la tahalo la iruru isa lou ele, eia goio igo totolo e tabarala, eia veiala mago “Mave, eme kama taga La Tahalo Uru? Etato tomi ge peho gageie.
LUK 23:41 Etalua abi la kiloli la iruru sesele tegala ale etala igotia, eia moli ele ouka, eia la iruru ouka.”
LUK 23:42 Goio, eia vulo soio te Iesus, eia veiala mago “Iesus, eme ge goilo te la pulolou la uru taume, eme ge gabutatala eau.”
LUK 23:43 Goio, e Iesus koliala mago “Eau vei seseleamu, gageie eme ge pou vikapopo leau te la pulolou la balavala.”
LUK 23:44 Tio, la haro hugutolatia oata, eala moli la mata la haro goio kokovu, la maututula tomi maligoma kara la mata la haro itolu te la maulavi.
LUK 23:45 Oio te la luma la lotu ale uru oio e Ierusalem, la kulikuli ale uru egite rara robo la baa ale oilo volao, eia goio masile posa kabili, sokoa loata kara otalo.
LUK 23:46 E Iesus goio tola vagari oata mago “Tete, eau sugu taro la kalulugu soio taume.” Tio eia goio paru pasitio.
LUK 23:47 La mulugaluga tegiteu e soldia, eia hiloa mai ele, eia vaisale La Uru mago “La tahalo ale, eia matata sesele!”
LUK 23:48 Egiteu la valalua me hatavivile ale magirigiri ele, egite hiloa veia eia pehoti, egite sabala la magoro giteu mai la irovilala tegiteu te la iloburukola, egite goio tuga, goluma.
LUK 23:49 Eala moli egiteu e tabarabarala me hatavilevilela ale rovi seselea, mai egite hatavivile tai ale tilimulia loata e Galilea, egite magiri malau bakisi loio, egite mata mulimulia.
LUK 23:50 La tahalo isa oio, la isala e Iosep, eia la uru isa tegiteu e Iuda, eia loio la mautu e Arimatea, oio la gale e Iudea. Eia la tahalo te La Uru sesele, la vulovulola maroka tomi moli, me eia pou taitali tai la guluvi te Kraist, eia kama visauru megiteu la mulugaluga ale egite veia ge bili e Iesus. E Iosep goio tuga tavu e Pailat, eia kakea la pilehole Iesus, e Pailat goio veiala veia eia ge abia.
LUK 23:53 Tio eia goio bole taro la pilehole Iesus loata la tauvalautu, eia goio viri robo tatahola la kulikuli ale malalau, eia goio vagoiloa te la lulu ale egite olia oio te la vai la maitete.
LUK 23:54 Ale la maulavi te la haro lima, galigeli ge la haro tabu tegiteu e Iuda.
LUK 23:55 Egiteu e hatavivile ale tilimuli e Iesus loata e Galilea, egite mulimuli e Iosep soio, egite hilo la lulu ale egite vagoilo la pilehole Iesus ovola.
LUK 23:56 Tio egite goio beua soluma, egite raragi la bulu la obu ale mali vivili veia ge bubua te la vovole Iesus, eala moli ale la haro tabu, egite roromuli la merera te Moses mai ele, egite kamati goio tetala.
LUK 24:1 Goio, hagolo mamaga te la haro tabu, te la kavikoki bisi sasaha, egite hatavivile goio sulaga tavutia la libale Iesus ele, egite ababi la bulu la obu ale mali vivili, egite raragitia veia ge bubua te la vovola.
LUK 24:2 Egite goio guvi te la liba, egite hilo vuti la uati uru ale egite buli robo la mata la liba oio vola, eia oio tabuli galeti.
LUK 24:3 Tio egite goio tiroro soilo te la lulu, egite hiloa veia la pilehole Iesus, eia kati oio.
LUK 24:4 Egite goio magirigiri, egite gabutatala papapai, egite karutu la tahalo ilua goio sibitala tavu egiteu, egira goio magiri hagagavi te la bali giteu ele, la lavalava tegira sima tataro moliti.
LUK 24:5 Egite hatavivile tagati e paa, egite goio boru lagu tugu, eala moli egira taho lua goio tahi egiteu mago “Ilava amuto papaa la tahalo ale mahuliti somai tegiteu ale pehoti?
LUK 24:6 E Iesus omai oukati, eia mahuli rivuti lou. Mai amuto ge gabutatala muli lou la merera tetala, ale eia veipalatia mutou pala oio e Galilea maie mago
LUK 24:7 ‘La Uru ge mata sosoli taro muga egiteu la valalua la gima veia egite ge lao tola muga e Latu La Tahalo, egite ge katu toleau oata te la tauvalautu, eau ge peho, eau ge tabuli la logo ilua te la liba, te la itolu la haro eau ge mahuli rivu lou.’”
LUK 24:8 Tio, egira veia giteu e hatavivile mai ele, egite goio gabutatala rivu lou la merera te Iesus ele.
LUK 24:9 Egite goio beu rivu loua soluma, egite goio veia giteu la valalua la vimari te Iesus ale savulusa gete sale la merera tomi alele, me egite tomi tai ale te Iesus, egite lolo taia.
LUK 24:10 Egiteu e hatavivile alele, e Maria Magdala, e Ioana, e Maria ale tilale Iakob, egite tomi ele me egite hatavivile isahari ale vikapopo legiteu ele, egite gilemulia giteu la valalua la vimari te Iesus egiteu la irovilala tomi ale egite hilotia oio te la liba.
LUK 24:11 Eala moli egiteu la bilalaha, egite loloti la merera tegiteu ele, egite veia eia la golu bububu moli, egite kama gabu tikumua.
LUK 24:12 Eala moli e Pita goio hiliti, eia hari soio te la liba, eia goio tabatitiro soilo vola, eia hilo vuti moli la kulikuli ale egite viri robo le Iesus ovola, eia tabuli marapa tomiti, eia goio beua soluma, eia gabutatala papapai sesele moliti te la pagale.
LUK 24:13 Te la haro moli lou alele, egira la tahalo ilua te Iesus, egira tatuga veia ge goio la mautu isasa, egite toi la isala e Meas, la baa la mautu alele me la mautu e Ierusalem, eia mai la kilomita savulu sasa.
LUK 24:14 Egira tatuga, egira vipigi vulovulo la merera tomi ale egira lolotia te la pilehole Iesus me la mahuli rivula tai tetala.
LUK 24:15 Egira tatuga, vikarakara mai ele, e Iesus goio sibitala tavu egirua, egite goio vitilimulitio.
LUK 24:16 Egira hiloa, eala moli egira kama mata kilala tigi tavu eia, la mata girua kama matagaga tigi tavua, egira veia eia la tahalo isasa.
LUK 24:17 Eia goio tahi egirua mago “Amula tatugale, amula vipigi vulovulo la rova?” Egira goio magiri lagu tugu.
LUK 24:18 Goio, isa tegiruale, la isala e Kliopas, eia goio tahia mago “La valalua me hatavivile tomi ale omai e Ierusalem, egite rovitia, eme moli sekela, eme kama lolo egiteu la irovilala tomi ale sibitala alalavi moli ovola, karati igoie?”
LUK 24:19 Tio, eia goio loloa mai ele, eia goio tahi egirua mago “Erese merera sesele?” Egira goio veiala mago “La merera tomi te Iesus la tau Nasaret, eia la bilalaha isasa te La Uru, la igogolu tetala tomi me la valolo tetala tai, eia tikumu te la mata La Uru me te la mata giteu la valalua tomi tai.
LUK 24:20 Eala moli egiteu la mulugaluga tegiteu e pris, me egiteu la ururu gatou e Iuda, egite sugu taroa soio tegiteu e Rom, egite baha taroa soio te la pileho, egite katu tolea oata te la tauvalautu.
LUK 24:21 Eala moli amite pala gabu tikumu seselea veia eia ge vimahuli etatou la valalua e Israel. Eala moli igoie la logo ilua poloti, eia oio tabuli moli mai ele otalo te la lulu la pileho,
LUK 24:22 kara igoie, egite hatavivile isahari tamiteu, egite loio te la libala te la kavikoki bisi, egite vikarutu amiteu,
LUK 24:23 egite veia la pilehola kokovuti. Egite goio tamiteu, egite veia egite hilo moli ilua e angelo oio popou te la libala, egira veia giteu veia eia mahuli rivuti lou.
LUK 24:24 Me mulimuli ovola, egiteu e tabarabara milua isahari, egite goio te la libala, egite hiloa eia mai moli sesele ale egiteu e hatavivile veitia miteu oio vola, me eia sesele amite kama hiloa, eia oio ouka.”
LUK 24:25 Goio, e Iesus loloa mai ele, eia goio veia girua mago “Amutou la valalua, la gabutatalala tamutou boto, amuto kama igo harari veia ge tau vagaria te la ilo mutou la merera tomi tegiteu la bilalaha te La Uru, ale egite veipalatia te La Buk Tabu Ale Pala.
LUK 24:26 Mave, eia kama matagaga tamutou veia e Kraist ge gabu pala muga la iligiligi, mulimuli eia ge goilo te la pulolou la uru tetala?”
LUK 24:27 Tio eia goio veia girua la merera tetala mai ele kaluvu, eia goio lube loua girua la masova la merera La Buk Tabu Ale Pala, sokoa te Moses, goio tegiteu la bilalaha tomi, eia vei matagagea girua la merera La Buk Tabu tomi ale puruti oio tetala.
LUK 24:28 Tio, egiteu goio hagagavi te la mautu ale egira masagea ge goio vola, e Iesus eia tutugolo egirua veia eia ge sele molia,
LUK 24:29 eala moli egira goio mera taro vagaria mago “Etato ge pou muga bakisi, la paga maulaviti, la haro otaloti.” Tio eia goio roromuli egirua, eia goio pou muga oio tegirua.
LUK 24:30 Egite goio pou veia ge ali, eia abi la bret, eia vaisale pala muga La Uru oio vola, eia goio tovia girua.
LUK 24:31 Tio oio moli ovola, la mata girua goio matagagatio, egira goio mata kilala tavua, eala moli eia goio kokovu taro moli egirua.
LUK 24:32 Tio, egira goio vitahi rivu lou egirua mago “Ale etato me Iesus vitilimulimuli te la gauru, eia lube matagagea galua la merera tomi te La Buk Tabu, eia sesele viruru la tia galua tivura pepeho, ia?”
LUK 24:33 Tio, oio moli ovola, egira goio hiliti harari moli mai ele, egira goio beu rivu loua soata e Ierusalem, egira goio sivuti egiteu la valalua la vimari te Iesus ale savulusa gete sale, me egiteu la valalua tai te Iesus isahari lou, egite oio pou vikapopo,
LUK 24:34 egite veveia maie mago “La Uru, eia mahuli rivu seseleti, eia sibitala tavuti e Saimon!”
LUK 24:35 Goio, egira vei matagagea giteu la merera tomi ale egite poga e Iesus te la gauru, me egite goio pou, eia tovia girua la bret, tio egira matagagati leia veia alele La Uru moli ele.
LUK 24:36 Egira so vikarakara mai ele soio tegiteu, egite karutu, La Uru e Iesus sibitala, eia goio magiri kabili tegiteu, eia veia giteu mago “La tia mutou ge malilo tataho.”
LUK 24:37 Tio, egite hiloa mai ele, egite karutu sesele, egite taga pepeho, egite kau leia veia eia la hitu.
LUK 24:38 Eala moli eia goio tahi egiteu mago “Ilava amuto marapa mai ele? Ilava amuto kau leau veia eau la hitu?
LUK 24:39 Amuto ge hilo la mata la lili oio te la limagu me la vahagu. Amuto gomai ge sau te la vovogu. Hiloa, la hitu, la vovola ouka mai eau.”
LUK 24:40 Tio, eia goio vahilo legiteu la limala me la vahala,
LUK 24:41 egite hiloa, eala moli la hate giteu raga, egite kama koramulia ge gabu tikumu haria. Tio eia goio tahi egiteu mago “La ilali bakisi ouka oiole veia eau ge alia?”
LUK 24:42 Goio egite abiala bakisi la ia ale egite gututia,
LUK 24:43 eia goio alia te la mata giteu ele.
LUK 24:44 Eia goio veia giteu mago “Pala, eau pou kabili tamutou, eau veia mutou maie ‘La merera tomi egite kekesitia te La Buk Tabu Ale Pala, mai la viputumulila te Moses me la veipalala tegiteu la bilalaha, me la merera te Devit te la bilalau, egite la merera tomi alele ge puru sesele somai taku.’ Eala, igoie eia puru seseletie.”
LUK 24:45 Tio, eia goio kope la gabutatalala tegiteu veia egite ge koramulia ge rovi la masova La Buk Tabu Ale Pala,
LUK 24:46 eia goio veia giteu mago “La kekesi te La Buk Tabu Ale Pala, eia maie ‘E Kraist ge gabu pala muga la iligiligi, mulimuli eia ge mahuli rivu lou te la itolu la haro.
LUK 24:47 Egiteu la valalua tetala ge valolo oio te la maututula tomi, sokoa omai e Ierusalem, veia oio moli te la isala, la valalua me hatavivile usu, egite ge vulo halaba, La Tahalo Uru ge vimavulaha taro legiteu la iruru tegiteu.’
LUK 24:48 Me amutou ale la valalua taku, amuto hilo tomitia la igogolu taku, eala eia koramuli seselea veia amuto ge la tahalo la valolo oio vola.
LUK 24:49 Me eau ge baha taro amutou sotalo La Kalulu La Marokala, mai ale e Tete visati le amutou ovola. Eala moli amuto ge pou muga bakisi omai e Ierusalem, kara ale e Tete ge vibalava le amutou la vagagarila tetala ale loata.”
LUK 24:50 Goio, e Iesus puli egiteu soio la mautu bisi e Betani, eia goio sugu taro la limala ilua soata, eia toi la vibalavala soio tegiteu.
LUK 24:51 Tio eia so kakaka moli, eia goio hiliti taro egiteu, La Tahalo Uru goio lapu hilitia taro legiteu soata te la ilo la lage.
LUK 24:52 Egite goio lotu tavua, egite goio beua soio e Ierusalem, egite sagege pepeho sesele pasi.
LUK 24:53 Me te la haroharo tomi, egite pou vikapopo tomi oio te la luma la lotu, egite kama maila te la vaisalela tavu La Tahalo Uru.
JOH 1:1 Alaura te baruata, te la silokola sesele, La Vikarara La Mahulila eia pouti, me La Vikarara La Mahulila egira vipou tomi me La Tahalo Uru, eala moli egira me La Tahalo Uru visauru sesele.
JOH 1:2 Te la silokola egira vipou tomi me La Tahalo Uru.
JOH 1:3 Eia sesele vipou la papaga tomi, la paga isa kama gege veia eia kama vipoua, ouka.
JOH 1:4 Me la mahuli eia pou tetala, la mahulila aleie, eia la matagaga te la valalua me hatavivile tomi.
JOH 1:5 Eala moli la matagaga eia paga vei la maligoma, me la maligoma kama koramulia ge pigi roboa.
JOH 1:6 Tio, la tahalo isasa, eia guvi, ale e Ioanes la tahalo la vuluhi. La Tahalo Uru sesele baha taroa somai.
JOH 1:7 Ale eia guvi veia ge valolo te la matagaga veia la valalua tomi ge roromulia.
JOH 1:8 Eala moli eia kama la matagaga, eia guvi moli veia ge valolo te la matagaga.
JOH 1:9 La Vikarara La Mahulila, eia la matagaga sesele veia ge vimatagaga la valalua me hatavivile tomi isasasa te la maututula.
JOH 1:10 Sesele, eia vipou tomiti la golugolu tomi, mulimuli eia gomai pouti otalo te la maututulae, eala moli egite la valalua me hatavivile tomi te la maututula kama mata kilala tetala veia eia ere tahalo.
JOH 1:11 Ale eia gomai tavuti egiteu e valaluala sesele e Iuda, eala moli egiteu e valaluala igo piagale molia.
JOH 1:12 Eala moli egiteu la valalua me hatavivile tomi te la maututula tomi ale taho tavu eia, me ale egite toro sesele te la isala, eia ge puhi tigi egiteu veia egite ge goilo mai e latatu La Tahalo Uru sesele.
JOH 1:13 La vuhula egite kama sibitala mai e latatu La Tahalo Uru te la gabutatalala me la masasagala te la vovo, ouka. La Tahalo Uru sesele barivei egiteu veia egite ge e latatula sesele.
JOH 1:14 Tio, La Vikarara La Mahulila eia sibitala mai la tahalo, me eia mahuli vikapopoti etatoue. Me ale amite hilo la marasala mai e Latu La Tahalo Uru sesele. La gilogo me la merera ale sesele, eia volu oio tetala.
JOH 1:15 Eala e Ioanes valolo boboboe ovola mago “Male, la tahalo ale pala eau veia mutou tetala maie ‘La tahalo ale ge mulimuli taku, eia uru tamilua, la vuhula eia mahuli palati, eau souka sibitala.’”
JOH 1:16 Oio tetala etato tomi sau tolati la vibalavala te La Uru. La gilogo ale, eia la gilogo ale kara polo sesele te la gilogo ale pala.
JOH 1:17 La vuhula maie: E Moses eia la vuhu la vikarara la viputumulila, eala moli e Iesus Kraist eia la vuhu la gilogo me la vikarara la seselela.
JOH 1:18 Eala moli la tahalo isa souka hilo gologolo La Tahalo Uru, ouka sesele. E Latula sekela moli ale vipou tomi le Tamala, eia veipala tigi seselea gatou La Tahalo Uru veia etato ge rovia.
JOH 1:19 Tio, la haro isasa, egiteu la mulugaluga tegite Iuda baha taro isahari tegiteu e pris vikapopo me la karakara te Levi isahari loio e Ierusalem veia egite ge tahi tigi e Ioanes mago “Eme ere tahalo sesele?”
JOH 1:20 Goio, e Ioanes kama hare robo, eia sile pala seselea giteu maie “Eau kama e Kraist ale La Uru bahea.”
JOH 1:21 Goma, egite tahi vulo loua mago “Me eme ere sesele? Soioge eme e Lias, ia?” E Ioanes vei mago “Ouka.”
JOH 1:22 Tio, egite veiala mago “Me eme ere sesele? La vuhula amite goio ge vei tigia giteu ale bahati amiteu somaie. Eme ge veia miteu mave taume?”
JOH 1:23 Goma, e Ioanes vei mulia giteu te la merera te Aisaia, la bilalaha ale pala, mago “Eau la golu la tahalo isasa eia tatola loio te la hohoi mago ‘Ili paa la gauru te La Uru.’”
JOH 1:24 Goio, egiteu e pariseo isahari ale egiteu la mulugaluga baha egiteu soio te Ioanes,
JOH 1:25 egite goio tahia mago “Mai eme kama e Kraist, me eme kama e Lias, me eme kama la bilalaha te La Uru ale amite pou taitalia, ilava eme vuvuhi la valalua, e?”
JOH 1:26 Tio, e Ioanes goio vei matagaga seselea giteu mago “Ale eau vuvuhi moli le amutou la lalu, eala moli isasa oio kabili tamutou la valalua, amuto kama rovia,
JOH 1:27 eia ge mulimuli taku, me eau kama koramulia ge tuga hagagavi soio la balila.”
JOH 1:28 La vikararala tomi aleie, egite veveia oio la mautu e Betani, te la hararele Iordan loio. Te la baa ale, e Ioanes eia vuvuhi la valalua ovolao.
JOH 1:29 Goio, mai galigeli maie, e Ioanes hilo e Iesus tatuga somai tetala, eia turitia giteu ele mago “Malele, amuto ge hilo e Latu La Sip te La Tahalo Uru, ale ge abi taro la iruru tomi te la valalua me hatavivile te la maututula tomi.
JOH 1:30 Eia moli ale eau vei matagagea mutou tetala mago ‘Isasa ge mulimuli taku, eia uru tamilua, la vuhula eia mahuli pala taku.’
JOH 1:31 Eau vuvuhi moli le amutou la lalu, veia eau ge vei matagagea mutou e Iuda tetala. Kara igoie, eau kama rovi la tahalo alele, tio eau hilotiae.”
JOH 1:32 Tio, e Ioanes eia vei matagagea giteu maie mago “Eau hilo sesele La Kalulu La Marokala eia sivo loata te la mori mai la malu la uku, eia goio pou tetala.
JOH 1:33 Sesele, eau pala kama rovia, eala moli La Tahalo Uru ale baha eau, eia veiagu mago ‘Mai eme ge hilo La Kalulu La Marokala eia ge lovo sotalo, eia ge toa tetalao, eiala moli ele, eia ge vuhi le amutou La Kalulu La Marokala.’
JOH 1:34 Ale eau hilotia, me eau valoloti leia veia eia e Latu La Tahalo Uru.”
JOH 1:35 Goio, mai galigeli lou, egite me la valalua la vimari te Ioanes ilua magirigiri,
JOH 1:36 e Ioanes hilo lou e Iesus loio tatuga, eia vei lou mago “Male go, amula ge hilo e Latu La Sip te La Tahalo Uru!”
JOH 1:37 Tio, egira la tahalo la vimari tetala lolo la vikararala ale eia veitia mai ele, egira goio tilimuli moliti e Iesus ele.
JOH 1:38 Goio, e Iesus ga vulo gele, eia hilo egirua mulimuli tetala, eia tahiti egirua mago “Amula paa mulimuli la rova?” Egira koliala mago “Rabai.” (La masova la isa ale Rabai, eia mai Tahalo La Vimari.) Mago “La luma taume oiove?”
JOH 1:39 Tio, e Iesus veia girua mago “Amula gomai ge hiloa.” Tiele egira tilimulitia soio te la luma ale eia popou ovolao, egira pou muga ovolale, la vuhula la paga maulaviti mai la mata la haro ivaati.
JOH 1:40 Oilo tegirua ale taho lua egira lolo la vikararala te Ioanes me egira tilimuli e Iesus, isa tegira la isala e Andrew, eia e tabarale Saimon Pita.
JOH 1:41 Tio e Andrew hari, eia goio paa muli muga e tabarala e Saimon, eia goio veiala mago “Amite hiloti e Mesaia.” (La masova la isa ale mai e Kraist.)
JOH 1:42 Goio, e Andrew pulia soio te Iesus. Ale e Iesus hilo molia mai ele, eia varutu moliala mago “Emei, eme Saimon, e latule Ioanes, eau ge toi lou lemei e Kepas.” (Me te la merera e Grik, la isa ale e Kepas, eia mai “e Pita” me la masovala eia maie “Eme vagari mai la uati”.)
JOH 1:43 Goio, mai galigeli, e Iesus masagea ge goio e Galilea, eia mata vuti e Pilip, eia tolatiao mago “Eme ge tilimuliau.”
JOH 1:44 E Pilip, eia la tahalo ale loio e Betsaida, te la mautu te Andrew me tabarala e Pita.
JOH 1:45 Tio e Pilip goio hilo vuti e Nataniel, eia varutu moliala mago “Amite hiloti la tahalo ale e Moses kekesiti leia oilo te La Buk Tabu Ale Pala, mai tai la kekesi tegiteu la bilalaha ale pala vikara ovola. La isala e Iesus, eia la tau Nasaret, eia e latule Iosep.”
JOH 1:46 Eala moli e Nataniel ule rivu louala mago “La paga ale taritigi isa ge loio la mumugu la mautu e Nasaret, ia?” Eala moli e Pilip horo suku tavu molia mago “Eme gomai, eme ge hiloa.”
JOH 1:47 Goma, e Iesus ga pigi la matala soio, eia hilo moliti e Nataniel tatuga soio tetala, eia varututiala mago “Ale la tau Iuda sesele, eia kama rovi la visigologolola.”
JOH 1:48 Tiele e Nataniel karutu sesele, eia goio tahi rivu e Iesus mago “Eme rovi hariau mave?” Goma e Iesus tala paleala mago “Ale e Pilip souka tolamei, eau hilome eme pou te la miau la obu uruo.”
JOH 1:49 Tio, e Nataniel koliale Iesus mago “Tahalo La Vimari, eme e Latu La Tahalo Uru sesele, eme la uru tamiteu e Israel!”
JOH 1:50 Goio, e Iesus vei louala mago “Ale eme rovitia mai ele, la vuhula eau veitiamu veia eau hilotime eme popou te la vuhu la obu, ia? Ale ge mulimuli eme ge hilo la vagagarigu ale kara polo agi te aleie.”
JOH 1:51 Goma e Iesus vei louala mago “Ale eau vei seseleamu maie veia mulimuli amuto ge hilo la ilo la lage eia ge kope, tio egiteu la angelo te La Tahalo Uru ge saesae soata, ge sosivo lou, gotalo te Latu La Tahalo.”
JOH 2:1 Goio, la haro itolu polo, egiteu la mautu e Kena igo la pougolu la taulaila isa oio te la mautu tegiteu, te la gale Galilea. E tilale Iesus tai goio te la ilali la taulailale.
JOH 2:2 Egite tola tai e Iesus me la valalua la vimari tetala veia egite ge goio tai te la pougolula aleiele.
JOH 2:3 Goma, la vaen tegiteu kaluvuti, e tilale Iesus goio veiale Iesus mago “A ge, la vaen tegite kaluvuti.”
JOH 2:4 Eala moli e Iesus vei rivuale tilala mago “Tila, ilava eme karasukuau e? La imamala la igogolu taku souka pou.”
JOH 2:5 Goio, e tilala veia giteu la bilalaha mago “Amuto ge igo tomi la rovarova ale eia ge veia mutou ovola.”
JOH 2:6 Tio, la sospen la simen iuolo ururu sesele oio tabuli hagagavi. La sospen ale tegiteu e Iuda te la pupurula mai la vulovulo giteu, egite uru mai la galon savulu lua uka savulu tolu te isasasa tegiteu.
JOH 2:7 Goio, e Iesus baha egiteu la bilalaha mago “Amuto ge sigili la lalu soio te la sospen iuolole.” Tio egite goio sahoa, eia volu tutui sesele.
JOH 2:8 Tio, goio e Iesus veia giteu la bilalaha mago “Ioge, amuto saho la lalu, abia soio te la mulugaluga tegiteu la bilalaha.” Goma, egite vagoioa tetala,
JOH 2:9 eia ga liu lalai la lalu ele, eia vuloti mai la vaen, eia kama rovia veia egite abia love. Eala moli egiteu la bilalaha, egite rovia. Goma la mulugaluga tegiteu ele, eia tola la tahalo ale taulaio,
JOH 2:10 eia goio veiala mago “Male ge, la valalua tomi, mai egite ge igo la ilali, egite vimamuga la vaen ale taritigi soio te la valalua, veia egite ge liu pala mugea, ale kama taritigi agi eia ge mulimuli. Eala moli la gahome, eme tau tola molia la vaen ale taritigi karati ale eme abi talatiae.”
JOH 2:11 Tio, ale la siloko la golu la karutula e Iesus igo sokoa. Eia igoa oio e Kena te la gale Galilea. Eia veipala la vagagarila tetala soio tegiteu. Tio egiteu la valalua la vimari tetala, egite tautau tola molia te la gabutatalala tegiteu, te la paga ale e Iesus igotiale.
JOH 2:12 Goma, ale kaluvuti, mulimuli ovola e Iesus mite me tilala me tabarabarala vikapopo me egiteu la valalua la vimari tetala, egite golau e Kapernaum. Goio egite pou muga bakisi ovolao.
JOH 2:13 Goio, mulimuli la ilali la pougolula tegiteu e Iuda egite toia veia La Ilali La Poloselela, eia hagagaviti, e Iesus goata e Ierusalem.
JOH 2:14 Eia goilo te la luma la lotu, eia sivuti moliti egiteu la valalua la vagago la kau me la sip me la malu tai. Eia goio hilo lou egiteu ale vagago la mani, egite popou te la poroporo tegiteuo.
JOH 2:15 Goma e Iesus kamu tavu molia la mota, eia basimuli tomiti la valalua oilo te la luma la lotu vikapopo la sipsip me la kau tegiteu ele sogalao. Eia hugu tavu tai molia la valalua ale vago tataro la mani ele, eia pigi lahu la mani me eia buli hatataga lahua la poroporo tegiteu ele.
JOH 2:16 Tiele eia goio vei taia giteu la valalua ale vilotoloto la malumalu mago “A ge, amuto ge abi taro lahu la malumalu ale sogala. Ilava amuto masagea ge vulo la luma te Tete veia eia ge mai la luma la iloto?”
JOH 2:17 Tio, oio moli ovolale, la valalua la vimari tetala, egite gabutala la vikararala te La Buk Tabu Ale Pala, eia veia maie: “Eau vagari sesele veia la luma taume eia ge maroka!”
JOH 2:18 Eala moli egiteu e Iuda hiloa mai ele, egite veiala mago “Eme ere veia eme ge basimuli amiteu maie? Mai eme la tahalo isapolo isasa, eme ge vahilo le amiteu la golu la karutula, amite ge hiloa.”
JOH 2:19 Tio, e Iesus koli molia giteu mago “Mai amuto ge lobe taro la luma la lotu aleie, la haro itolu moli eau ge vimagiri rivu loua.”
JOH 2:20 Tiele, egiteu e Iuda hate mamasi sesele, egite vauleala mago “Ko, la luma ale egite tigila la leavala savulu vaa gete uolo, ale eme veia ge vimagiri rivu moli loua te la haro itolu moli, ia?”
JOH 2:21 Eala moli la luma la lotu ale e Iesus veia mai ele, eia tovo mulia te la vovola.
JOH 2:22 La vuhula ge mulimuli La Tahalo Uru ge vahiliti loua te la lulu la pileho, me te la imamala alele, egiteu la valalua la vimari tetala, egite gabutala rivu lou la vikararala tetalale, me oio vola egite tautaulailo vagari sesele te la vikararala te La Tahalo Uru te La Buk Tabu Ale Pala eia mai ale Iesus veitiale.
JOH 2:23 Goio, e Iesus popou oio e Ierusalem te la haro La Ilali La Poloselelao, egite la valalua me hatavivile usu tautaulailo tetala, la vuhula egite hiloti la golugolu la karutula tomi ale eia igotia.
JOH 2:24 Eala moli e Iesus kama sugu taro eia soio te la lima giteu, la vuhula eia roviti la tia giteu tomi ele.
JOH 2:25 Eia kama koramulia veia isasa ge vei muli louala te la vulovulo la valalua isasasa, la vuhula la gabutatalala te la valalua tomi eia magiri matagaga tetala.
JOH 3:1 La tahalo isasa tegiteu e pariseo, eia la mulugaluga isa tai tegiteu e Iuda, la isala e Nikodimas.
JOH 3:2 Eia goio te Iesus te la logo, eia goio veiala mago “Tahalo La Vimari, amite rovime veia eme la tahalo la vimari loata te La Tahalo Uru. La tahalo isa ouka koramulia ge igo egiteu la golu la karutula ale eme igigo egiteue, mai La Tahalo Uru kama ge sulia.”
JOH 3:3 Goio, e Iesus koli la vikararala tetala mago “Ale eau vei seseleamu, mai isasa kama ge sibitala halaba sesele mai ale e tilala pigo halabea, eia kama koramulia ge rovi la pulolou la matagagala te La Tahalo Uru.”
JOH 3:4 Tio, e Nikodimas karutu, eia tahi rivu e Iesus mago “Alele ge mave mai la tahalo uruti? Eia ge goilo rivu lou te la ilole tilala, ge pigo loua?”
JOH 3:5 Goma, e Iesus koli rivuala mago “Male, eia mai sesele ge: Mai isasa masagea veia ge sibitala halaba, eia ge gabutala rivu lou la iruru tetala, eia ge abi la vuluhi te la lalu, eia ge abi la vuluhi tai te La Kalulu La Marokala. Mai ge ouka, eia kama koramulia ge goilo te la pulolou la matagagala te La Tahalo Uru.
JOH 3:6 Mai etato sibitala halaba te la vovo, ale etato te la vovo moli, eala moli mai etato ge sibitala halaba te La Kalulu La Marokala, ale etato sibitala halaba sesele te la kalulu gatou.
JOH 3:7 Nikodimas, umala eme ge karutu te la vikararala ale eau vei mugatiamu ovola mago ‘Ge visibitala halaba tomi lou amutou ele.’
JOH 3:8 Eia mai sesele la lolovi ale tilimuli la masasagala tetala soio te la baa ale eia vavaia sovolao. Eme ge lolo moli la tilalila, eme kama rovia veia eia vavaia love, me eia vavaia sovei ele. Tiele eia mai tai moli egiteu ale La Kalulu La Marokala eia visibitala halaba egiteu ele.”
JOH 3:9 Eala moli e Nikodimas tahi tigi lou e Iesus mago “Etato ge igo sesele la paga alele mave?”
JOH 3:10 Tio, goma e Iesus ule baolitialao mago “A ge, eme la mulugaluga tegite Iuda, eala moli eme kama ababi la masova la vikarakarala tomi aleie, ia?
JOH 3:11 Male, eau ge vei louamu la seselela maie: Amite la bilalaha, amite valololo te la papaga ale amite rovia, me amite hilo taitia, eala moli amuto kama gabu tikumua veia la merera tamiteu eia sesele, amuto kisu taro molia.
JOH 3:12 Ale eau vikarakara la tilovo tavu amutou te la papaga moli ale lotalo te la magasa, amuto kama rovirovi la masovala. Me mai ge eau ge sele tavu molia mutou te la papaga loata te la ilo la lage, amuto ge rovi la seselela mave? Ge ouka gologolo.
JOH 3:13 Eala moli la tahalo isa souka toa oata la mautu la marokala, e Latu La Tahalo moli eia pou mugati ovolao, me ale eia bula tarotia sotalo la magasae.
JOH 3:14 Eia ge mai ale e Moses vituriti la puigolole taive soata oio te la hohoio, veia egiteu ale pepeho, mai egite ge mata tavua, egite ge mahuli, tio e Latu La Tahalo tai ge mai moli ele, egite ge vahilitia soata veia eia ge vimahuli amutou.
JOH 3:15 Tio mai la valalua me hatavivile ge tautaulailo tetala, egite ge sau tola la mahulila ale la kaluvula ge ouka.
JOH 3:16 “La Tahalo Uru eia gogo sesele pasi la valalua me hatavivile te la maututula tomi, mai ele eia sugu taro moliti e Latula La Riau veia egiteu tomi ale ge tautaulailo tetala, egite kama ge vilua te la kalulu giteu me te la vovo giteu tai, egite ge sau tola moli la mahulila ale la kaluvula ge ouka.
JOH 3:17 Teale La Tahalo Uru kama baha taro e Latula sotalo te la maututula veia ge igo gegeru la valalua me hatavivile te la kiloli la iruru, ouka. Eia igoa veia ge vimahuli tomi egiteu.
JOH 3:18 Tiele, mai isasa ge tautaulailo soio tetala, eia kama ge magiri te la viputumulila, ge ouka. Eala moli mai isasa kama tautaulailo te Latula La Riau, eia mai ale tiloti te la igototolola te La Uru te la kiloli la iruru, ale eia ge visibitalea te la viputumulila tetala mulimuli.
JOH 3:19 Male, la vuhu la viputumulila eia maie: La matagaga eia paga veiti la maligoma, eala moli la valalua me hatavivile so masaga moli la maligoma, la vuhula, la matagaga soukama ge veipala la vulovulo giteu ale kama kokorale.
JOH 3:20 La vuhula egiteu tomi ale igo la vulovulo ale kama kokora, egite gima la matagaga. Eala egite kama masagea veia ge magiri soio te la matagaga te La Uru.
JOH 3:21 Eala moli egiteu la valalua me hatavivile ale la vulovulo giteu eia taritigi, egiteu moli ge masaga la matagaga, la vulovulo giteu ge magiri matagaga maie veia La Tahalo Uru vimagiri tomiti legiteu te la igogolu ale egite igigoa.”
JOH 3:22 Goio, mulimuli e Iesus me la valalua la vimari tetala, egite hiliti soio te la gale e Iudea, egite pou muga oio tegiteu ele, e Iesus vuvuhi egiteu la valalua me hatavivile ovolao.
JOH 3:23 Eala moli e Ioanes tai vuvuhi la valalua me hatavivile oio la mautu isapolo loale, e Inon, hagagavi moli e Selim, la vuhula la lalalu usu ovolale. Tio la valalua me hatavivile goio guvi bibibi tavua, eia ge vuvuhi egiteu ovolale.
JOH 3:24 Te la imamala aleiele, e Herod souka vagoilo e Ioanes te la luma la kilisi.
JOH 3:25 Te la haro isasa, egiteu la valalua la vimari te Ioanes, me la tau Iuda isasa, egite goio vigiriri mulimuli la masova la vuluhi.
JOH 3:26 Goio egite la valalua la vimari te Ioanes goio rivu lou tetala, egite valoloa mago “Tahalo La Vimari, la tahalo ale amula vipou tomi muga oio te la hararele Iordan loio, eme valolo matagaga taiti leia, amite hiloti la valalua me hatavivile oio tala tautavua, eia oio vuvuhi tai egiteuo.”
JOH 3:27 Eala moli e Ioanes goio putu rivu loua giteu mago “Isasa kama koramulia ge igo bulalahu isa la igogolu mai ele, mai La Tahalo Uru kama sugu taroala loata la ilo la lage.
JOH 3:28 Mai ale amuto lolotia eau vei pala mugatia mutou ovola mago ‘Eau kama e Kraist, eala moli eau ge valolo mamuga moli tetalale.’
JOH 3:29 Male, eau ge tovo mulia mutou te la gabutatalala taku soio tetala maie: Mai la tahalo isa taulai halaba, goio e vikilipi tetala eia loloa, eia sagege pepeho ovolale. Mai tai igoie, la valalua me hatavivile tomi ititia soio te Iesuso, eia mai ale puli halabati egiteu ele, male la tiagu eia volu seseleti la sagegela.
JOH 3:30 Eia gomai, la isala ge vavava, eau ge siroro rivurivu sotalo.
JOH 3:31 “La tahalo ale loata, eia muga sesele. Me la tahalo ale lotalo te la magasa, eia la tahalo lotalo te la magasa moli, eia tai vevei moli la papaga ale te la magasa molie. La tahalo ale loata te la ilo la lage eia muga sesele.
JOH 3:32 Tiele me eia valolo te la papaga ale eia hililoa, me te la papaga ale eia lololo taia. Eala moli isa kama roromuli la valolo tetalale.
JOH 3:33 Tio mai isasa ge sau tola sesele la vikararala tetala, tio eia veipalea mai ele veia la vikarakarala te La Tahalo Uru eia sesele pasi.
JOH 3:34 Eia sesele, la tahalo ale La Tahalo Uru baha tarotia somaie, eia valolo te la vikararala te La Tahalo Uru, la vuhula La Kalulu La Uru eia oio volu tetala, La Tahalo Uru abi seseleala.
JOH 3:35 La vuhula e Tamala masaga sesele e Latula, mai ele eia piligi taroti la golugolu tomi soio te la barabara la limalale.
JOH 3:36 La tahalo me la tavile ale tautaulailo sesele te Latu La Tahalo Uru, tetala la mahuli ale la kaluvula ge ouka. Eala moli mai isa kama ge roromuli la golule Latu La Uru, e maura ge galo sesele, la igototolola te La Tahalo Uru ge pou tetala, la kaluvula ge ouka.”
JOH 4:1 Goio, mulimuli egite pariseo lolo la vikararala isa maie veia la valalua me hatavivile tomi tala tavuti e Iesus veia eia ge vuhi egiteu, me Ioanes oukati. Me eia sesele, egiteu ale veia ge abi la vuluhi oio te Ioanes kati usu, la valalua me hatavivile usu goio mulimuliti e Iesus.
JOH 4:2 Eala moli e Iesus sesele kama vuvuhi egiteu, la valalua la vimari moli tetala vuvuhi egiteu mai ele.
JOH 4:3 Goma e Iesus rovitia veia egite pariseo loloti la rerela mai ele veia la valalua mapaiti mulimulitia, eia hiliti taro e Iudea, me eia goio beu rivu loua soio e Galilea.
JOH 4:4 Eala moli la gauru ale eia polo ovola, eia polo posa oio e Sameria.
JOH 4:5 Tio eia goio mulimuli la gauru alele, eia goio sibitala te la mautu isa te la gale Sameria, la isala e Saika. La mautu ale, eia hagagavi te la bautu la magasa ale e Iakob visati le latula e Iosep,
JOH 4:6 me la mata la lalu la vilelo te Iakob eia ovolale. Goma e Iesus la vahala obati bakisi te la tuluga la gauru, eia masagea ge maila muga oio te la harare la vilelole, la vuhula la haro hugu tola taitia.
JOH 4:7 Goio, la tavile Sameria isa guvi veia ge saho la lalu ele, goma e Iesus veiala mago “A ge, eau omai malehu pasi!”
JOH 4:8 Eala moli egite la valalua la vimari tetala golumati te la mautu veia ge lotoa giteu bakisi la ilali.
JOH 4:9 Tio, la tavile Sameriale karutu, eia goio koli rivuale Iesus mago “A ge, ilava eme kakeau la lalu veia eme ge liu, emeiele la tau Iuda, me eau lomai e Sameriae.” La vuhula egiteu e Iuda vitau gagima megiteu e Sameriale.
JOH 4:10 Eala moli e Iesus baoli rivu moliala mago “Mai eme ge roviti la vaabila te La Tahalo Uru, me la tahalo tai ale kakakame la lalue, tiele eme ge kaka taiau la lalu la mahulila, eau ge sugu taro seseleamu!”
JOH 4:11 Goio, la tavile koli rivu louale Iesus mago “Tahalo Uru, eme la baket la silalaho ouka, me la lalu tai eia otalo malau, la lalu la mahulila alele, eme ge abia love, e?
JOH 4:12 Mave, eme soioge gabutatalea veia eme uru te tubu gatou e Iakob ale olia miteu la vilelo aleie, me eia tai liliua alaurati, me egiteu la kau, la sip me la mee tetala tomi tai liliu ovola. Eme soioge uru tetala, ia?”
JOH 4:13 Goma, e Iesus koli rivu tataho loua la tavilele mago “Eala moli egite tomi ale liliu la lalu alele, egite ge malehu lou.
JOH 4:14 Me egiteu moli ale ge liu te la lalu ale eau ge abia giteu, egite kamati ge malehu lou, oukati. La lalu ale eau ge abia giteu, eia ge sogo uraura sesele, eia ge velo te la tia giteu ge pagegele, mai la mahulila ale sesele, la kaluvula ge ouka lou.”
JOH 4:15 Tiele, la tavile goio kaka gogoti e Iesus mago “Tahalo uru, eau masagea eme ge abiagu la lalu alele, eau ge liua, eau kati ge malelehu lou, me eau umalati ge tuga malalau lou somai ge sasaho la lalu aleie.”
JOH 4:16 Goma, e Iesus veia loua la tavilele mago “Taritigi eme ge goio tola muga e haruamu, amula ge gomai loue.”
JOH 4:17 Tiele, la tavilele ga visigoloa mago “Eau ale e haruagu ouka.” Eala moli e Iesus sile pala molitia te la matala mago “Eme vikara sesele veia e haruamu ouka,
JOH 4:18 la vuhula e haruamu ilimati, me ale amula vipou totomi igoiele kama e haruamu sesele, eala la vikararala taume eia sesele ale eme giriri veia e haruamu ouka.”
JOH 4:19 Tio, e maura la tavilele alatototo moliti ele, eia goio varutu molitiale Iesus mago “Tahalo uru, ale eau rovitia veia eme la bilalaha te La Tahalo Uru.
JOH 4:20 Ale alaura egiteu e tutubu gatou e Iuda me Sameria tomi lotulotu moli omai te la gove aleie, eala moli amutou e Iuda vuloti lou la merera veia ge lotulotu moliti oata e Ierusalem.”
JOH 4:21 Goma, e Iesus ava tatahotiala la vikararala mago “Tavile kokora, taritigi eme ge matagaga tigi te la masova la vikararala takue, la vuhula la imamala ge sibitala, amuto kati ge lotu tavu e Tama gatou omai te la gove aleie, me oata e Ierusalem ge ouka taiti.
JOH 4:22 La vuhula amutou e Sameria lotu tavu La Tahalo Uru, eala moli amuto kama rovi tigi la vulovulola. Me amiteu e Iuda, amite lotu tavu La Tahalo Uru ale amite rovi seselea, la vulovulola eia matagagati tamiteu, la vuhula la vimahuli te La Tahalo Uru eia ge loio seseleti tamiteu e Iuda.
JOH 4:23 Tio la imamala ale etato tomi ge lotu moli me la seselela, egite veia eia hagagaviti ge guvi, eiala eau veiamu eia guvi seseletie, veia la valalua me hatavivile la lotu sesele, egite ge lotu tavu e Tama giteu, la kalulu giteu ge tivura, la lotu tegiteu eia ge sesele.
JOH 4:24 La vuhula, La Tahalo Uru eia la kalulu, eala mai la valalua ge lotu tavua, taritigi egite ge lotu sesele te la kalulu giteu, me te la vulovulo ale seseleto.”
JOH 4:25 Tiele, la tavilele vei moliti mago “Eau rovitia veia La Riau te La Tahalo Uru ge sibitala, ale egite toi taia veia e Kraist, mai eia ge guvitio, eia ge valolo etatou te la merera ale sesele tomi.”
JOH 4:26 Goma, e Iesus vei tataho molitia la tavilele mago “Me eau moli ale eau etala omai vikarakarae.”
JOH 4:27 Tio, ale eia vikara pasi moli mai ele, egite la valalua la vimari tetala loio guvi moliti ele, egite karutu sesele, la vuhula egira vikarati me la tavilele, eala moli isa kama tahia mago “Eme masaga la rova te la tavile ale?” uka mago “Ilava amula vikarakara me la tavile alele?”
JOH 4:28 Goma, la tavilele hiliti taro moliti la baket tetalao, eia hari soio te la tia la mautu ele, eia vei lahutia giteu la valalua me hatavivile mago
JOH 4:29 “Mutou, amuto gomai muga, amuto ge hilo la tahalo isasa, eia veipala tomiti la vulovulogu ale eau igigoa alauratio, kara igoie, eia rovi tomitia, soioge e Kraist moli ge eialae, ia?”
JOH 4:30 Tio egite lolo molia mai ele, egite hiliti, gogala, egite tugati soio te Iesus veia ge hiloa.
JOH 4:31 Goma, egite la valalua la vimari tetala veiala mago “Tahalo La Vimari, taritigi eme ge ali muga.”
JOH 4:32 Eala moli eia ule rivu loua giteu mago “La ilali taku ale eau ge alia, amuto kama rovia.”
JOH 4:33 Goio, egite la valalua la vimari tetalale vitahi baololi moliti egiteu mago “Soioge isa ge abitiala la ilali, ia?”
JOH 4:34 Goma, e Iesus tala palatia giteu ele mago “Male, la ilali taku eiala molie ge, veia eau ge tilimuli moli la gabutatalala te ale bahatiau somaie, me eau ge igo sesele tomi moli la igogolu tetalale, mai la tabarila taku sesele.
JOH 4:35 Mai moli ale amuto veveia mago ‘La taio ge ivaa lou, tio etato ge lukuluku.’ Male go, amuto ge mata muga soio te la mahuma, la ilali oio vola matuha tomiti ele.
JOH 4:36 La tahalo la ilukulukula eia ge sau tola la mapala, eia mai la tahalo ale ruku ololu la ilali ale ge tabuli tola, la kaluvula ge uka lou. Tiele, la tahalo la gilalu me la tahalo la ilukulukula, egira tomi ge sagege vikapopo ovolale.
JOH 4:37 Ale eia ge mai la sesele la vikararala ale maie ‘La tahalo isasa galugalu, me isasa lukuluku.’
JOH 4:38 Mai eau bahati amutou la valalua taku soio te la ilabi la valalua ale amuto kama valolo egiteu pala, amuto mai ale luku la mavo ale amuto kama galua, egite isapolo vuragaragea, tamuto moli ge la vavua la igogolu tegiteu la bilalaha taku ale palao.”
JOH 4:39 Tio, egiteu e Sameria usu, egite loloti la vikararala te la tavile ale eia veitia giteu maie “Eia sile pala tomitiagu la vulovulogu ale eau igigoa sokoa alauratio,” egite loloa mai ele, egite usu goio tautaulailo tetala.
JOH 4:40 Tiele egiteu la valalua e Sameriale usu goio kaka e Iesus veia eia ge pou muga oio tegiteu bakisi. Tio e Iesus vipou tomi legiteu la haro ilua oio te la mautu aleiele.
JOH 4:41 Egite la valalua usu lolo la vikararala te Iesus ele, egite goio tau la ilo giteu soio tetala.
JOH 4:42 Egite goio veia la tavilele mago “Ale amite tautaulailotie, kama la vuhula moli te la vikararala moli taumele, ouka, la vuhula amite lolo sesele taiti la vikararala te la harela, me amite rovi seseletia veia la tahalo moli aleie, eia La Tahalo La Vimahuli te la valalua me hatavivile te la maututula tomie.”
JOH 4:43 Goio, la haro ilua e Iesus poutia oio e Sameria eia goma hiliti polo lou soata e Galilea.
JOH 4:44 Me la gale aleie, e Iesus sesele vikara matagagati ovola pala veia la bilalaha te La Tahalo Uru, la valalua te la mautu tetala sesele kama ge gabu tikumua. Me la mautu tetala sesele oio la gale Galileale.
JOH 4:45 Eala moli e Iesus goio sibitala oio e Galilea, la valalua te la gale alele, egite sagege robo seselea, la vuhula egite hiloti la igogolu tetala tomi ale eia igotia oata e Ierusalem, te La Ilali La Poloselelao, la vuhula egite tai pou oio vola.
JOH 4:46 Goma, eia goio lou e Kena te la gale Galilea, te la mautu ale eia vuloti la lalu mai la vaen ovolao. Tio la tahalo isa oio, eia la bilalaha te gavman, e latula isa hatamale eia lea pasi oio la mautu e Kapernaum.
JOH 4:47 Goio la bilalaha te gavman ele, eia loloti la rerele Iesus veia eia hiliti taroti e Iudea, me eia guviti oio e Galilea. Tio eia goio kaka e Iesus veia eia ge goio ge vimahuli e latula, ale hagagavi pepehotio.
JOH 4:48 Goio, e Iesus veiala mago “Mai amutou la valaluale kama ge hilo la golugolu la karutulao, amuto kama masaga ge tautaulailo te La Tahalo Uru.”
JOH 4:49 Eala moli la bilalaha toto suku tavu moli e Iesus ele mago “Tahalo uru, eme ge igo hari, la vuhula e maura e latugu bisi soukama ge peho.”
JOH 4:50 Goma, e Iesus vei molitialale mago “Eme ge tuga, e latumu bisi ele mahuliti lou.” Tio, la tahalole roromuli la vikararala te Iesus ele, eia tugatio.
JOH 4:51 Eala moli mai galigeli, eia so tatuga te la gauru, eia goio poga molitia egiteu la valalua la igogolu tetala, me egite veitiala mago “E latumu oio mahuliti.”
JOH 4:52 Goma, eia tahi tigi lou egiteu ele mago “Eia soko la mahulila te la mata la haro ale mave sesele?” Egite goio veiala mago “Alalavi te la mata la haro isasa, la ilea eia kaluvu taroa.”
JOH 4:53 Tio, e tamale eia bisi ele rovi molia mago “Me alalavi sesele te la mata la haro moli alele e Iesus veiagu mago ‘E latumu eia mahuliti lou.’” Goio, eia tauti la ilola te Iesus, vikapopo me egiteu la valalua la igogolu tetalale.
JOH 4:54 Tiele, ale la ilua la golu la karutula e Iesus igoa oio e Galilea, me alele eia igoa ale eia so guguvi rivu lou loio e Iudea.
JOH 5:1 Tio, e Iesus igogolu tapasi mugati mai ele oio e Galilea, eia goata lou e Ierusalem, te la haro la pougolula isasa tegiteu e Iuda.
JOH 5:2 Eala moli oio e Ierusalemo, la vilelo la purupurula isa bisi eia tivura bakisi, eia tabuli hagagavi moli te la mata tegiteu la sipsip, egite goililo la mautu e Ierusalem ovola, me te la merera e Hibru egite toia maie “Betesda”. Me oio te la harare la vilelole, la matabala ilima ovolale.
JOH 5:3 Eala moli la matabala ilimale, egite volu sesele me egiteu la ilalea vikapopo me egite ale matakakea, me egite tai ale gulugulu, [egite mavuta taitali moli la vilelole mai eia ge bolebole soata.
JOH 5:4 La vuhula te la imamala isahari e angelo te La Uru eia sosivo sotalo te la vilelo, eia ge visasuea la vilelole. Tiele mai la vilelole ge so bolebole mai ele, egite ale lalea ge vipepe lagi sotalo ovolale, tio ale ge loso pala sotalo volao, eia ge mahuli. Eala moli mai erese ilea ale mave, eia ge mahuli moli ele.]
JOH 5:5 Eala moli e maura la tahalo isa oio mamavuta te la matabalale, eia lea tabaa seseleti koramuli la leavala savulu tolu gete ualu.
JOH 5:6 Goio e Iesus hilo vuti e maura la tahalo eia mamavuta molitio, eia rovitia veia eia lea tabaa seseleti. Goma e Iesus tahia mago “Soioge eme masagea ge mahuli taro lou la ilea taumele, ia?”
JOH 5:7 Tio, la tahalo ale leale koli molitiale Iesus mago “Tahalo uru, mai la vilelo ge bole, la tahalo taku isa ouka ale ge bokoau sotalo vola veia ge vitagu loso eau ovolale. Sesele, eau ga tovo lalai la tuluga sotalole, isa ge supepe moliau, ge tagu loso pala, eau ele oukatio.”
JOH 5:8 Goio, e Iesus vei molialale mago “Eme ge hiliti, eme ge pilu la mulimu ele, eme ge tuga,”
JOH 5:9 Tiele oio moli ovolale la vovola eia taritigi lou, eia goio hiliti moli, eia abi la mulila, eia tugatio. Eala moli la haro alele eia la haro tabu.
JOH 5:10 Tio egite Iuda isahari hiloa mai ele, egite goio veia la tahalo ale mahuliti ele mago “Eme kama rovia veia igoie la haro tabu, ia? Eia kama koramulia veia eme ge ababi la mulimu mai ele te la haro tabu.”
JOH 5:11 Eala moli la tahalole koli rivu loua giteu ele mago “Me la tahalo ale vimahuliaue, eia veiagu maie ‘Abi la mulimu ele, eme ge tuga.’”
JOH 5:12 Tio, egite tahi rivu lou la tahalole mago “Ere tahalo veiamu la vikararala aleiele?”
JOH 5:13 Eala moli la tahalo ale mahuli taroti la ileale, eia kama rovi e Iesus ele, la vuhula la valalua me hatavivile usu sesele oio te la baa aleio, me e Iesus tai tugati.
JOH 5:14 Goio, mulimuli e Iesus poga lou la tahalole oio te la luma la lotuo, eia goma vei tigiala maie “Loloa, ale eme mahulitie, umalati eme ge igo lou la iruru. La vuhula la iligiligi ale kama kokora isa uru souka ge poga loumei ele.”
JOH 5:15 Tio, la tahalole tugatio, eia goio veia giteu e Iuda mago “Ale e Iesus moli ale vimahuliti eaue.”
JOH 5:16 Ealati egiteu e Iuda sokoti la gilimale Iesus ovolale, la vuhula veia e Iesus igo popoti la haro tabu ele.
JOH 5:17 Eala moli e Iesus ule rivu loua giteu ele mago “E Tete eia igogolu moli palati kara igoie, eia kama maila, eau tai ge igogolu moli mai eia.”
JOH 5:18 Tio egite Iuda loloa mai ele, la hate giteu mamasiti, egite vagari pepehotio veia ge bili peho e Iesus. Kama la vuhula moli ale eia igo popo moli la haro tabu ele, la vuhula eia vei taia veia eia e Latu La Tahalo Uru seseleto. Te la vikararala aleie, egite veia eia mai ale vauru sesele eia mai egira visauru sesele me La Tahalo Uru.
JOH 5:19 Tio, goio e Iesus koli la vikararala tegiteu ele, eia veipala seselea veia eia e Latu La Tahalo Uru mago “Ale eau veia seselea mutou, e Latu La Tahalo Uru, eia kama igo bulalahu la paga isa te la gabutatalala tetala moli. Ouka, la igogolu ale e Tamala igigoao, eia tai igigoa mai ele.
JOH 5:20 E Tamala masaga sesele e Latula, eia sugu taro tomiti la igogolu soio tetalale. Eala moli eia ge sugu taro louala la papaga ale ge kara polo te ale eia igotiale. Tio la gabutatalala tamutou ge marapa ovolale.
JOH 5:21 Eia mai moli ale e Tete vahiliti lou egiteu ale pepehole, me e Latula tai ge abia la valalua la mahulila te la masasagala tetalatole.
JOH 5:22 Eala moli e Tete kama ge vimagiri isasa te la vigagiala, la vuhula eia sugu taroti la viputumulila tomi soio te Latula,
JOH 5:23 veia la valalua tomi ge togo e Latulale, mai moli ale egite togoti e Tamalao. Mai isa kama togo e Latulao, eia veipalea mai ele veia eia kama togo tai e Tamala, ale baha tarotia somaie.
JOH 5:24 “Eala moli eau vei seselea mutou maie veia mai isasa eia lolo la vikararala taku, me eia roromuli tai La Tahalo Uru ale baha tarotiau somaie, ale eia sau tolati la mahulila ale kama ge kaluvu, me eia kama ge magiri lou te la viputumulilao, oukati, eia mahuli taroti la pilehole.
JOH 5:25 Male, eia vei seselea mutou, la imamala hagagaviti ge sibitala, eala moli eia sibitala seseletie, veia egiteu ale pehoti, egite ge lolo lou la golule Latu La Tahalo Uru. Tiele egiteu ale ge roromuliao, egite ge sau tola la mahulila ale sesele.
JOH 5:26 La vuhula la mahulila eia oio te Tamalao. Eala moli eia sugu taroti la vagagarila soio te Latulale, tio e Latula abiti la mahulilale, eia sovei viruruti e Tamalao.
JOH 5:27 Sesele, la isala e Latu La Tahalo, eala e Tamala sugu tarotiala la viputumulila veia eia ge vimagiri la valalua tomi te la vigagiala, la vuhula eia la tahalo la vovo eala moli la iruru ouka oio tetala, eala moli eia rovi la mata la iruru tomi ale etato la tahalo la vovo igigoa, eia koramulia mai ele veia ge mata muli la iruru tomi.
JOH 5:28 “Eala moli umala amuto ge karuturutu te la merera aleie. Mai la imamala ge sibitalao, egiteu tomi ale pehoti, egite ge lolo la golule Latu La Uru, tio egite ge hiliti taro la lulu la pileho.
JOH 5:29 Tiele egiteu ale la vulovulo gite eia taritigi, egite ge goio te la mautu la mahulila, eala moli egiteu ale la vulovulo gite eia kama kokorao, egite ge hiliti moli ele, egite ge magiri te la viputumulila.
JOH 5:30 “Eala moli eau kama igigo la paga isa te la gabutatalala taku moli. Eau lololo moli soio te Tete, tio eau igo tai la viputumulila mai ele soio te la valalua. Eala moli la viputumulila taku eia matata sesele. La vuhula eau kama igogolu te la gabutatalala taku moli. Eau tilimuli sesele la gabutatalala te ale baha taroau somaie.
JOH 5:31 “Eala moli mai eau ge valolo rivu lou leau, la valolo taku eia kama ge mata mai ale tali tikumu.
JOH 5:32 Eala moli la tahalo isapolo oio ale ge valololo leiaue, eau rovia veia la valolo tetala eia sesele.
JOH 5:33 Eia mai ale pala amuto baha tavu e Ioanes la tahalo la vuluhi me eia gomai veipalati la merera ale sesele veia eau e Kraist, me la merera tetalale amuto tomi lolotia.
JOH 5:34 Eala moli eau kama gabutala agi isasa mai eia valolo matagaga leau mai ele, ouka, la vuhula la merera te la tahalo la vovo isasa eia kama tikumu mai la merera te La Tahalo Uru. Eau masaga molia veia La Tahalo Uru eia ge abi rivu lou amutou soio tetala, eia ge vimahuli amutou, eala eau karasuku amutou mai ele veia amuto ge gabu tikumu la merera te Ioanes ale eia vei matagagea mutou veia eau e Kraist sesele.
JOH 5:35 E Ioanes, eia mai la lam ale vimatagaga la valalua tomi, ale amuto loloa bakisi la valolo tetalale, amuto sagege ovola, ale amuto masagea veia amuto ge sagege taro moli bakisi te la matagaga tetalale.
JOH 5:36 Eala moli la merera ale kara polo la merera te Ioanes, la valologu ale igoie. La vuhula la igogolu tomi ale e Tete abitiagu veia eau ge igo tomiao, eiala omai eau igigoae. Tiele la igogolu tomi ale eau igigoae, eia vei matagagea la valalua maie veia e Tete baha taroau somaie.
JOH 5:37 Eia sesele, e Tete bahatiau somaie, me eia valolo matagaga taiti leau. Eala moli amuto kama roromuli gologoloa bakisi. Ouka sesele molie. La vuhula amuto kama rovi e Tete, me amuto kama mata kilala tavu eia.
JOH 5:38 Me la vikararala tetala tai eia kama pou tamutou ele. La vuhula amuto kama roromuli la vikararala te la tahalo ale La Tahalo Uru bahatia somaie, eala amuto veipalea mai ele veia amuto kama rovi e Tete.
JOH 5:39 Amuto gigigi moli La Buk Tabu, me amuto veia la vikararala ovola eia ge abia mutou la mahulila ale la kaluvula ge ouka louo. Eala moli la vikarakarala tomi oilo te La Buk Tabu ele, eia valolo matagaga sesele leau.
JOH 5:40 Eala moli amuto kama masaga ge gomai taku veia amuto ge abi la mahulila omai takue.
JOH 5:41 “Eala moli la veitatahola te la valalua eau kama masagea.
JOH 5:42 La vuhula eau roviti amutou ele, veia la gilogo te La Tahalo Uru eia kama pou oilo tamutou.
JOH 5:43 Mai ge la tahalo isapolo ge visibitala la isalato maie, amuto ge karutu la vikararala tetala, amuto ge roromuli molia. Eala moli eau ga veipala la isale Tete, amuto kama roromuli gologoloa bakisie.
JOH 5:44 Sesele, amuto vitogo baololi amutou, eala moli la sagegela ale loio te La Tahalo Uruo, amuto so gege ovola, goio amuto ge koramulia mave veia ge visagege eia?
JOH 5:45 “Umala amuto ge gabua veia eau ge veipala amutou soio te Tete, ge ouka. Me la tahalo ale ge veipala la vulovulo mutou e Moses moli ele, la tahalo moli ale amuto tatau la ilo mutou soio te la merera tetala veia eia ge vimahuli amutou. Eala moli la merera te Moses lou eia ge tomu sasae la vulovulo mutou ale kama kokorale.
JOH 5:46 Tio mai amuto ge roromuliti la merera te Moses, mai amuto ge roromuli la vikararala taku taie. La vuhula eia kekesi tola moli la merera ale puru seseleti omai taku, te la guluvi taku omai me la igogolu ale eau igigoa.
JOH 5:47 Eala moli ale amuto kama roromuli la kekesi la merera tetalao, amuto ge roromuli tai la vikarakarala taku mave e?”
JOH 6:1 Tio, mulimuli ovolale, e Iesus goio hiliti polo soio te la gale la magolilo e Galilea loio, ale egite toi taila veia la magolilo e Taibirias.
JOH 6:2 Goio la valalua me hatavivile usu tilimulitia, la vuhula egite hiloti la golu la karutula usu ale eia igotia soio tegiteu ale laleao.
JOH 6:3 Eala moli e Iesus me egiteu la valalua la vimari tetalale, egite goata muga la gove isasa, egite pou muga oata ovolao.
JOH 6:4 Tio La Ilali La Poloselela tegiteu e Iuda eia hagagavi taiti te la imamala aleiele.
JOH 6:5 Goma, e Iesus ga pigi la matala soio mai ele, eia hilo moliti la valalua me hatavivile ale ititia soio tetalao, eia goma veiale Pilip mago “Etato ge loto la ilali ove ge abia giteu, egite ge alia e?”
JOH 6:6 E Iesus vei moli mai ele veia ge tovo lalai moli e Pilip ele, eala moli eia rovi la gauru ale eia ge igoa soio te la valalua me hatavivilele.
JOH 6:7 Goma, e Pilip vei molitiale Iesus mago “Eala moli la ilali ale veia etato ge lotola e kina salatu savulu lua, eia kama ge koramuli la valalua me hatavivile ale maito la moromoro ge alia.”
JOH 6:8 Goio, la tahalo la vimari te Iesus isasa, e Andrew, eia e tabarale Saimon Pita, eia goma vei moliale Iesus ele mago
JOH 6:9 “E guliliki isa omaie, eia sau tola la bret ilima me la ia ilua, eala moli eia kama ge koramuli egiteu ale usuto maie.”
JOH 6:10 Goma, e Iesus veia giteu la valalua tetalale mago “Amuto ge veia giteu la valalua me hatavivile tomi ge pou otalo”, la vuhula la baa alele eia taritigi tataho, me egite goio pou otalo, la giligi giteu la valalua tomi ele koramuli salatu savulu limato.
JOH 6:11 Tio goma egite pou tomiti otalole, e Iesus abiti la bret ale ilima te gulilikio, eia goio toi moli la visalela kaluvu, eia goio barere legiteu la valalua me hatavivileo. Eia goio igo taia mai ele te la ia iluao. Eia barere tomiti legiteu ele mai la masasagala tegiteu isasasa.
JOH 6:12 Egite tomi ali maru tataho sesele, goio e Iesus veia giteu la valalua la vimari tetala mago “Amuto goio abi vikapopo tomi la makarakara giteuo, eia souka ge kama kokora bulalahu moli.”
JOH 6:13 Tio egite goio vikapopo tomia, me egite tovo loua te la kela savulusa gete lua ale ururu makapilapila, egite volu.
JOH 6:14 Tiele, la valalua me hatavivile hiloti la golu la karutula aleie, egite goio vikara maie mago “Ale eia soioge la bilalaha te La Tahalo Uru, eia uru sesele, ale La Buk Tabu Ale Pala veipala la guluvi tetala veia eia ge gomai te la maututula!”
JOH 6:15 Tio egite vikara mai ele, eala moli e Iesus roviti la gabutatalala giteu la valalua mai ele, veia egite masagea veia ge sau tolea ge vimagiria veia eia ge la uru giteu. Ale eia rovi la gabutatalala tegiteu mai ele, eia goio hiliti taro egiteu, eia goata lou la rorobo, eia goio pou sekela te la baa bulalahu moli isasa.
JOH 6:16 Goio, te la maulavi, egiteu la valalua la vimari te Iesus gotalo lou la magolilo e Galilea,
JOH 6:17 egite goio sae te la uaga, veia egite ge goio te la gale loio, la mautu e Kapernaum ovola. Eala moli la paga logologoti, e Iesus soukato goio tegiteu ele, tio egite goio soko la tuluga tegiteuo.
JOH 6:18 Eala moli la lolovi uru sibitalati, me la mago hiliti taiti.
JOH 6:19 Goio egite voreti mai la kilomita ivaati uka ilimati maio, goma egite hilo moliti e Iesus tatuga loata te la kulikuli la magole soio hagagavi te la uaga tegiteu ele. Tiele egite tagatio.
JOH 6:20 Eala moli e Iesus veia giteu soio mago “Ale eau molie ge. Amuto umala ge tataga.”
JOH 6:21 Goio egite ga visaea te la uagale, eala moli egite ga karutu maie, egite oilo porutio te la mautu ale egite veia ge goio ovolale.
JOH 6:22 Tio, mai galigeli ovolale, la valalua me hatavivileo, egite soloio te la gale la magolilo loio. Egite rovitia veia alalavi la uaga isa moli tabuli oiole, isa oukati lou, eala moli e Iesus tai kama visae tomi me egiteu la valalua la vimari tetala tai ele, egite sekela moli tuga mai ele.
JOH 6:23 Eala moli la uaga isahari tai tegiteu loio e Taibirias, egite goio hagagavi te la baa ale e Iesus vaali maru la valalua me hatavivile ovolao.
JOH 6:24 Goma egite la valalua me hatavivile mapaiti paa mulimuli e Iesus me la valalua la vimari tetala oio te la baa alele. Tio egite goio sae tegiteu la uagaga ale so guguvie, egite abia tugati soio e Kapernaum, ge paa muli e Iesus soio volao.
JOH 6:25 Goio, egite sivutiti e Iesus oio te la gale loio, egite goma tahia mago “Tahalo La Vimari, eme gomaiti alisa e?”
JOH 6:26 Goma, e Iesus baolia giteu soio mago “Ale eau vei seselea mutou maie, amuto kama gabutatala moli la golu la karutula ale amuto hilotia te la limagu, veia amuto ge gomai ge hiloaue, ouka. La vuhula amuto maru sesele te la ilali ale eau abitia mutouo, eala amuto gomai paa mulimuliaue.
JOH 6:27 Umala amuto ge vagari tatavu la ilali ale parara bulalahu moli. Taritigi amuto ge vagari tavu moli la ilali ale ge tabuli tola sesele, eia mai la ilali te la kalulu mutou, la vuhula eia la ilali te la mahulila ale la kaluvula ge ouka lou. La vuhula la ilali aleie, e Latu La Tahalo moli koramulia ge abia mutou ovola. Mai e Tete, eia La Tahalo Uru sesele, eia abitiagu la vagagarila tetala tomi mai ele veia eau ge vimahuli amutou.”
JOH 6:28 Goio, egite veiala mago “Ila, amite ge igo lava, veia amite ge igo la igogolu te La Tahalo Uru sesele e?”
JOH 6:29 Goma, e Iesus ule baoli loua giteu ele mago “La igogolu te La Tahalo Uru eia maie, veia amuto ge roromuli la bilalaha ale La Tahalo Uru bahatia somai tamutoue, amuto ge taua la ilo mutou soio tetala.”
JOH 6:30 Tiele, egite goio tahi vulo loua mago “Ere golu la karutula eme ge igoa veia amite ge hiloa me amite ge roromuli la vikararala taumele veia eia sesele, e?
JOH 6:31 Ale pala egite tutubu miteu aliti la ilali ale egite toila la mana oio te la hohoi, mai La Buk Tabu veitia, veia ‘Eia abitia giteu la ilali ale loata la ilo la lage, veia egite la valalua tetala ge alia.’”
JOH 6:32 Goma, e Iesus vei loua giteu ele mago “Eala moli eau vei seselea mutoue, kama e Moses abia mutou la ilali ale loata la ilo la lagele, ouka. E Tete sesele abia mutou la ilali aleiele loata la ilo la lage.
JOH 6:33 Male, la ilali ale e Tete abiao, eia purusuti loata la ilo la lage, eia gotaloti, me eia abia giteu la valalua me hatavivile te la maututula la mahulila.”
JOH 6:34 Tiele, egite goma kaka gogogoti e Iesus mago “Tahalo uru, taritigi eme ge abi bibibi molia miteu la ilali aleiele.”
JOH 6:35 Goma, e Iesus vei loua giteu ele mago “Male ge, eau sesele la ilali la mahuli ele. Mai isa ge gomai takue, eia kama ge vitolo lou. Mai tai la tahalo ale tautaulailo sesele taku, eia kama ge malehu lou.
JOH 6:36 Eala moli mai eau veipala mugatia mutou veia amuto hilotiau, eala moli amuto kama tautaulailo bakisi takue.
JOH 6:37 Tio egiteu tomi ale e Tete sugu tarotiagu egiteuo, me egite ge gomai takue, tiele eau kama ge piligi lou egiteu, ge oukati.
JOH 6:38 La vuhula eau kama sivo sotalo te la maututula veia eau ge tilimuli la gabutatalala taku moli, ouka. Eau sivo sotaloe veia eau ge tilimuli moli la gabutatalala te Tete ale baha tarotiau somaie.
JOH 6:39 Male ge, la gabutatalala te ale bahatiau sotalo eia maie veia egiteu tomi la valalua me hatavivile ale eia sugu taroti egiteu somai takue, eau kama ge piligi taro isasa, ouka. Eau ge vahiliti tomi egiteu te la tapasi la haro te la tapasi la maututulao.
JOH 6:40 Eala moli la gabutatalala te Tete eia maie veia mai egiteu ale hilo e Latula me egiteu roromuliao, egite ge sau tola la mahulila ale la kaluvula ge ouka lou. Eau ge vahiliti egiteu te la tapasi la maututula tomi ele.”
JOH 6:41 Eala moli ale e Iesus veia giteu mago “Eau sesele la ilali ale hiliti loata la ilo la lage, me eia gotalotie,” ale eia veitia mai ele, egiteu e Iuda igo totolotio, me egite vikara galolotialao.
JOH 6:42 Egite goma vitahi baololi egiteu mago “Mave, ale e Iesus, e latule Iosep moli. Etato rovi moli e tamala me tilalae. Ale ilava eia vei lou maie ‘Eau hiliti taroti la ilo la lage, me eau guviti otalo la maututula e?’”
JOH 6:43 Goio, e Iesus ule baoli loua giteu ele mago “Umala amuto ge vigavusa gere rivu lou amutou mai ele.
JOH 6:44 La vuhula la tahalo isa kama koramulia ge gomai bububu moli takue, ouka. Ale e Tete sesele baha taroau somaie, mai eia ge lapu rivu isa la tahalo, eia ge gomai taku, tiele me eau ge vahiliti la tahalo alele te la tapasi la maututula.
JOH 6:45 Eia mai la vikararala oio te la buk tegiteu la bilalaha te La Uru ale pala, La Tahalo Uru eia ge vimari la valalua me hatavivile tomi. Tiele me egiteu tomi ale matagaga te la vikararala te Tete, me egite roromuliao, tio me egite ge gomai tavu eau.
JOH 6:46 Eala moli la tahalo isa souka hilo e Tete. La tahalo moli ale vipou tomi muga La Tahalo Uruo, me eia hiliti taroa somaie, eia moli hiloti e tama gatouo, mai eau sekela molie.
JOH 6:47 Male eau vei seselea mutou maie veia la tahalo ale roromuliaue, eia ge sau tola la mahulila ale sesele, la kaluvula ge ouka lou.
JOH 6:48 Eau sesele la ilali la mahulila.
JOH 6:49 Ale palao, e tutubu mutou egite aliti la mana oio te la hohoi, goio egite peho taro tomitia.
JOH 6:50 Eala moli la ilali aleie, eia loata sesele te la ilo la lage, me eia gotalotie. Mai ge la tahalo ale ali la ilali aleie, eia kama ge peho lou.
JOH 6:51 Eau la ilali la mahulila ale sivo loata te la ilo la lage sotalo la maututulae. Mai isasa ge ali la ilali aleie, eia ge sau tola la mahulila ale seselele. Male ge, la ilali ale eau ge abia giteu ale roromuliau, eia la vovogu. Eau sugu taroa veia la valalua me hatavivile te la maututula egite ge abi la mahulilale.”
JOH 6:52 Tio, egite Iudale viputugere baololi lou egiteu ele mago “La tahalo ale ge abia gatou mave la mailila veia etato ge alia e?”
JOH 6:53 Goio, e Iesus veia loua giteu ele mago “Ale eau ge vei seselea mutoue, mai amuto kama ge ali la vovole Latu La Tahalo, me amuto kama ge liu tai la kasosogue, amuto ge galo sesele te la mahulila ale sesele.
JOH 6:54 La tahalo ale ge ali la mailigu, me eia ge liu tai la kasosogue, eia ge sau tola la mahulila ale kama ge kaluvu lou, eau ge vahiliti loua te la tapasi la maututula tomi ele.
JOH 6:55 La vuhula maie, la mailigu eia la ilali sesele, me la kasosogu eia la lalu la ililiu sesele tai.
JOH 6:56 Tio mai la tahalo ge ali la mailigu, me eia ge liu tai la kasosogu, eia pouti taku, me eau ge pou tai tetalale.
JOH 6:57 E Tete sau tola la mahulila, me eia baha tarotiau somaie, me ale eau vimahuli te la vagagarile Tete. Eia ge mai tai ele te la tahalo ale ge ali la mailigu, eia ge sau tola la mahulila, me la vagagarila omai takue.
JOH 6:58 Eau la ilali ale loata la ilo la lage, eia kama mai la ilali ale egite tutubu mutou alitia me egiteu pehoti lou, la vuhula la ilali tegiteu eia kama koramuli la vimahuli. Mai ge isa ge ali la ilali aleie, eia ge sau tola la mahulila ale la kaluvula ge ouka lou.”
JOH 6:59 Me la vimari tomi aleie, e Iesus vimari egiteu oilo te la luma la lotu oio e Kapernaum.
JOH 6:60 Goio, egiteu la valalua usu ale egite tilimulimuli e Iesus, egite loloti la vikararala aleie, egite goio vikara maie mago “La vikararala ale, eia vagari pasi, ere koramulia ge loloa e?”
JOH 6:61 Eala moli oilo te la tiale Iesus eia roviti egiteu la valalua tetala, egite oio vikara kukukumu te la vikararala aleiele. Eia goma veia giteu ele mago “Mave, la vikararala ale eia igo gegeruti la gabutatalala tamutou, ia?
JOH 6:62 Eia ge mave mai amuto ge hilo e Latu La Tahalo ge goata rivu lou te la mautu ale eia hiliti taro mugea palao, e?
JOH 6:63 Eala moli La Kalulu La Marokala moli, eia vimahulihuli, la vagagari gatou te la vovo eia kama koramulia ge vimahuli etatou bakisi. Male la vikararala ale eau abitia mutoue, eia la merera te La Kalulu me te La Mahulila.
JOH 6:64 Eala moli amuto isahari kama roromulia.” E Iesus veia giteu mai ele, la vuhula eia rovi palati ere tegiteu ele kama roromuli seselea, me eia rovi taiti la tahalo ale ge sugu taroa soio te la lima giteu la gima tai.
JOH 6:65 Goma eia vei loua giteu mago “La vuhu la vikararala ale eau veitia mutou maie, mai e Tete kama abia la tahalo isasa la vagagarila, eia kama koramulia veia ge gomai lou takue.”
JOH 6:66 Tio, te la vikararala aleie, egiteu la valalua la vimari tetala usu, egite igo sulupu ovolale, egite kamati tilimuli loua.
JOH 6:67 Goma, e Iesus veia giteu la valalua tetala ale savulusa gete lua mago “Soioge amuto tai masagea ge hele taroau, ia?”
JOH 6:68 Goio, e Saimon Pita koli rivuala mago “Tahalo Uru, amite ge goio lou tere? Me taume moli la vikarara la mahulila ale la kaluvula ge ouka.
JOH 6:69 La vuhula amite matagaga seseleti, me amite rovitia veia eme moli La Tahalo La Maroka te La Tahalo Uru ele.”
JOH 6:70 Goma, e Iesus ule baoli loua giteu ele mago “Eia sesele, eau hiloviti amutou ale savulusa gete lua veia amuto ge taku, eala moli isa oilo tamutou ele, eia la tahalo te Satan seseleti.”
JOH 6:71 Me ale eia vikara mai ele, e Iesus pigi vevei maie te Iudas, e latule Saimon Iskariot, eia isa kabili tegiteu la valalua la vimari ale savulusa gete lua, eia moli ele ale ge sugu taro e Iesus soio te la valalua la gima veia egite ge biliale.
JOH 7:1 Goio, mulimuli ovolale, e Iesus hiliti polo soio te la gale e Galileao, la vuhula egiteu e Iuda masagea ge bili pehoa. Eala eia kama masagea ge tatuga lou oio te la gale e Iudeale.
JOH 7:2 Tio la haro la pougolula tegiteu e Iuda isasa ale egite toila veia la haro uru te la luma la sel, eia hagagaviti. Ale la haro ale egite virovilala la imamala ovola ale egiteu e tutubu giteu bula taroti e Gipto, egite mavuta ututu oio te la hohoi. Tio la haro la pougolulale eia hagagaviti, e Iesus eia goio te la mautu tetala.
JOH 7:3 Goma egiteu e tabarabarale Iesus veiala mago “Taritigi eme ge hiliti taro la mautu aleie, me eme ge goio la mautu e Iudea, eme ge igo la igogolu taume oio e Ierusalem te la ilali la pougolula, la valalua usu taume ge hilo la golu la karutula isahari ale eme ge igoa, egite ge togome.
JOH 7:4 Mai eme masagea veia la reremu ge tali, eme umala ge igo kokovu la igogolu taumele, eme ge igoa te la mata la valalua tomi me hatavivile, egite ge hiloa.”
JOH 7:5 Egite tabarabarala pigi malikiala mai ele, la vuhula egite kama tautaulailo soio tetalale.
JOH 7:6 Goma, e Iesus koli baoli loua giteu mago “Eala moli la imamala taku eia souka sibitala. Ale igoie eia so la imamala tomi tamutou eia koramulia amuto ge goata e Ierusalem ovola, mai la masasagala moli tamutou isasasa, la vuhula ale amuto ge goata e Ierusalem, amuto kama ge gabutatala isa la paga ovola,
JOH 7:7 la vuhula la valalua kama gima amutou. Egite gima moliau, la vuhula eau tatuga te la mata giteu ale la vulovulo giteu ale egite igigoa eia kama taritigio.
JOH 7:8 Amuto moli goio hilo la pougolula tamutou ele, eau kama ge goio muga ovolale. La imamala taku souka sibitala.”
JOH 7:9 E Iesus veia giteu la vikararala aleie, eia goio pou oio e Galileale, eia kati goata muga e Ierusalem.
JOH 7:10 Tio, egite tabarabarale Iesus tugati soio te la pougolulao, mulimuli eia tai hiliti, tuga. Eala moli eia kama polo palala, eia polo kokovu moli soio volale.
JOH 7:11 Goio, egiteu e Iuda paa mulimulia oio te la pougolulale, egite goio tahi la valalua mago “La tahalo ale e Iesus, eia oiove?”
JOH 7:12 Tiele, egite la valalua me hatavivile viputugere mulitiao, goma isahari egite vevei mago “Eia la tahalo ale taritigi.” Eala moli isahari egite vevei mago “Ouka, eia la tahalo la visigolo giteu la valalua me hatavivile.”
JOH 7:13 Eala moli egite taga egiteu la mulugaluga tegiteu e Iudale, eala egite isa kama tagu pala la vikararale Iesus ele te la mata la valalua tomi.
JOH 7:14 Eala moli oio kabili posa sesele te la imamala te la pougolulale, e Iesus goilo te la luma la lotu, eia vimari egiteu la valalua me hatavivile.
JOH 7:15 Tio egiteu la mulugaluga karutu seselela, goma egite vitahi baoli lou egiteu mago “La tahalo ale, eia mata mai la tahalo la mari, eala moli eia abi la mari aleie oiove?”
JOH 7:16 Goma, e Iesus ule baoli loua giteu ele mago “La vikararala ale eau vimarile amutoue, eia kama la vikararala taku, ouka. Ale la vikararala te La Tahalo Uru sesele, eia bahatiau somaie.
JOH 7:17 Mai ge la tahalo isasa eia masagea ge roromuli la golu La Tahalo Uru ele, tio eia ge matagaga sesele te la vikararala ale eau veitia mutoue, veia la vikararala aleie eia te La Tahalo Uru, kama te la gabutatalala moli taku. Eia ge koramulia ge hilovi tigi la merera taku mai ele, veia eia sesele ka ouka.
JOH 7:18 Mai isasa eia vevei la vikararala te la gabutatalala tetala moli, eia masagea ge vauru rivu lou eiale. Eala moli la tahalo ale masagea ge vahiliti la isa la tahalo ale bahea somaie, mai eau, La Tahalo Uru baha sesele eau somaie, la vikararala te la bilalaha ale maie, eia ge sesele tomi moli, la iruru isa ouka oio tetalale.
JOH 7:19 Ale pala, e Moses abitia mutou la vikarara la viputumulila te La Uru, eala moli amuto kama tilimuli la merera tetalale. Ilava sesele amuto ale poloti la merera ale amuto masagea veia ge bili pehoau ale mulimuli seselea?”
JOH 7:20 Goio, egite la valalua me hatavivile koli louale Iesus mago “Soioge la hitu ale kama kokora oio pouti taume. Amite isa kama masagea veia ge bilime.”
JOH 7:21 Goma, e Iesus vei loua giteu ele mago “Eau igoti la golu la karutula isa moli sekela pala, eala moli la gabutatalala tamuto eia marapa lahuti ovolale, ale eau vimahuli la tahalo te la haro tabu.
JOH 7:22 Ale pala e Moses eia abitia mutou la irovilala te la kiroro la vovo, eala moli alele kama la gabutatalala moli te Moses ele, alele eia loio sesele te tutubu mutou ale alaura seseleti pala muga te Moses. Goio amuto gabu tikumu la merera te Moses ele te la kiroro la vovo, amuto goio korokoro lou la vovo giteu e latatu mutou ale hatamalemale te la haro tabu moli lou.
JOH 7:23 Me oio vola amuto gabua veia amuto togo tigi sesele la viputumulila te Moses mai ele veia amuto umala ge polo la baa mulimuli te la piligo te latu mutou ale hatamalemale, mai la merera te Moses veia, amuto ge goio ge koro moli la vovola te la haro tabu. Ale eau igo tigi la vovo la tahalo isasa te la haro tabu, amuto goma igo totoloau ilava e?
JOH 7:24 Umala amuto ge mata muli la vulovulogu mai te la gabutatalala moli tamutou te la vovo. Taritigi amuto ge mata muli tigi la vulovulogu mai te la gabutatalala ale loio te La Uru, amuto ge matagaga tataho te la igogolu taku mai ele.”
JOH 7:25 Goio, la valalua me hatavivile e Ierusalem isahari vitahi baoli lou egiteu mago “Ale ere? Soioge la tahalo ale egite la mulugaluga masagea ge bili pehoa, ia?
JOH 7:26 Male, hiloa, eia sile palala moliti la vikararala tetalale, egite kama tolo ololi la vikararala tetala bakisi ele. Soioge egite la mulugaluga oio rovia veia eia e Kraist, La Riau te La Uru, ia?
JOH 7:27 Eala moli etato rovi sesele la mautu te la tahalo aleie. Ale mai ge Kraist ge sibitala, la tahalo isasa kama ge rovi la mautu tetalale, ale eia soioge kama e Kraist sesele.”
JOH 7:28 Eala moli e Iesus goio soko lou la vimari soio tegiteu la valalua me hatavivile, eia vikara vagari sesele, eia vei boboboea giteu mago “Amuto veia amuto rovi eau, ia? Me la mautu tai takuo, amuto veia amuto rovia, ia? Eala moli kama la gabutatalala moli taku ale eau ge gomaie, e Tete sesele ale la vulovulola eia sesele, eia baheau somaie. Eala moli amuto kama rovi e Tete.
JOH 7:29 Eau moli rovi eiale, la vuhula amila vipou tomi, me eia baha taroau somaie.”
JOH 7:30 Tiele, egite lolo la vikararala tetala mai ele, egite igo totolo, egite masagea veia ge lao tolea, eala moli isa kama sau tavua. La vuhula la imamala tetala souka sibitala.
JOH 7:31 Eala moli la valalua me hatavivile usu roromulitiao, egite goio vikara maie mago “Mai ge e Kraist ge guvi, eia soioge ge igo la golu la karutula isahari ge kara polo te ale e Iesus igigotia e? Ge ouka gologolo. E Iesus eia ge Kraist sesele ge!”
JOH 7:32 Tio, egiteu e pariseo loloti egiteu la valalua vei lahuti la vikarakarala te Iesus mai ele, goma egite la mulugaluga tegiteu e pris me egiteu e pariseo tai goio baha isahari egiteu la tahalo la vagari robola te la luma la lotu veia egite ge goio ge lao tola e Iesus ele.
JOH 7:33 Goma e Iesus veia giteu mago “Eau kama ge pou tabaa lou omai tamutoue, eau ge beu rivu loua soio te ale baha taroau somaie.
JOH 7:34 Goma amuto ge paa mulimuliau, eala moli amuto kama ge sivutiau. Amuto kama koramuli taia ge hilo la mautu ale eau ge goio volao.”
JOH 7:35 Tio, egiteu e Iuda ale magirigiri ele, egite loloa eia vikara mai ele, egite vitahi baoliti egiteu ele mago “Eia ge gove sesele veia etato kama ge sivutiale? Soioge eia ge goio tegiteu e Iuda isahari ale mou oio te la maututula tegiteu e Grik, ia, me eia ge vimari egiteu e Grik oio vola, ia?
JOH 7:36 Ale eia veitia mai ele ‘Amuto kama koramulia ge sivutiau’, ale la masovala soioge mave? Me ale tai eia vikara maie mago ‘La mautu ale eau ge goio vola amuto kama rovia’, tio la vikararala ale eia mave sesele, e?”
JOH 7:37 Goio, la tapasi la haro la pougolula guvi, ale eia la haro ale uru sesele tegiteu la haroharo tomi te la pougolulale, e Iesus goio magiri, eia goio tatola mago “Mai la tahalo isasa eia pepeho la malehula, eia gomai ge liu omai takue.
JOH 7:38 Eia ge mai la vikararala te La Buk Tabu Ale Pala eia veitia maie ‘La tahalo ale roromuliau, la mata la lalu la mahuli usu ge saisali loio te la ilolale.’”
JOH 7:39 Tio me ale e Iesus vikara mai ele, eia la vikarara la tilovo te La Kalulu La Marokala ale la valalua ale tautaulailo tetala, egite mulimuli ge sau tolea, la vuhula eia soukama beua soata te la pulolou la matagagala tetala, eala eia soukama vibalava legiteu La Kalulu La Marokala.
JOH 7:40 Goio, la valalua me hatavivile isahari lolo la vikararala aleie, egite vei mago “Sesele, ale la bilalaha ale uru sesele ale La Buk Tabu Ale Pala veia ge sibitala pala muga te Kraist.”
JOH 7:41 Eala moli isahari tai, egite vei mago “Ale e Kraist sesele ge!” Eala moli isahari goio tahi taro egiteu mago “Mave, amuto veia e Kraist ge sibitala loio e Galilea, ia?
JOH 7:42 Mave, La Buk Tabu kama veia gatou veia e Kraist la hilile Devit, me eia ge sibitala oio la mautu e Betlehem, te la mautu ale e Devit pou mugati ovola alaurati te ururu?”
JOH 7:43 Tio me egiteu la valaluale, la gabutatalala tegiteu kamati visauru oio te Iesus ele, isahari veia eia e Kraist sesele, isahari ouka.
JOH 7:44 Egite isahari masagea ge lao tolea, eala moli isa kama sau tavua.
JOH 7:45 Tio, goio, egiteu la tahalo la vagari robola te la luma la lotu ale egiteu la mulugaluga bahati egiteu veia ge lao tola e Iesus, egite goio beu rivu loua soio tegiteu la mulugaluga tegiteu e pris. Egiteu e pris goio tahi egiteu mago “Mave, amuto kama lao tolea, ge lapua somai tamiteu e?”
JOH 7:46 Eala moli egite koli la vikararala tegiteu e pris maie mago “Alaurati kara igoie, la tahalo isa souka vevei la vikararala ale taritigi sesele mai la tahalo aleie.”
JOH 7:47 Goio, egiteu e pariseo ule baoli loua giteu ele mago “Soioge eia ge visigolo taiti amutou, ia?
JOH 7:48 Mave, amuto hiloti isasa oilo tamiteu la mulugaluga, oilo kabili tai tamiteu e pariseo, isasa tamiteu roromuliti la tahalo alele, ia? Ouka sesele,
JOH 7:49 eala moli egiteu la valalua me hatavivile bulalahu moli ale kama rovi la merera te Moses, egiteu ale kama kokora sesele te la mata La Tahalo Uru.”
JOH 7:50 Goma, e Nikodimas ale pala eia goio te Iesus te la logo veia ge tahi kokovua la tilahi tetala, eia isasa tegiteu e pariseo ele, eia veia giteu mago
JOH 7:51 “Mave, la vikarara la viputumulila tegatou e Iuda eia veia eia koramulia veia etato ge vilai la tahalo ale soukama magiri te la vigagiala veia ge veipala muga la vuhu la iruru tetala veia eia ruru sesele ka ouka?”
JOH 7:52 Eala moli egite goio koli rivuale Nikodimas ele mago “Soioge eme tai goiloti tegiteu la valalua e Galilea, ia, eme soioge vuloti mai la tau rorobo, veia eme ge taho loio te Iesus ele, ia? Taritigi eme ge gigi tigi la merera te La Buk Tabu, me eme ge matagagati veia la bilalaha te La Uru kama ge sibitala loio e Galileale.” Tio egite igo totolo e Nikodimas mai ele. [
JOH 7:53 Goio, egiteu la valalua ale gomai e Ierusalem te la ilali la pougolula, egite hiliti goio tuga beu rivu loua soio te la maututula tegiteu tomi.
JOH 8:1 Tio, egiteu la valalua tomi tugati, eala moli e Iesus goio muga te la gove bisi e Oliva.
JOH 8:2 Goio mai galigeli te la kavikoki sasaha, eia goio beua soio e Ierusalem, eia goilo lou te la luma la lotu. Goma egite la valalua me hatavivile tomi ititia soio tetalao. Tiele eia pou me eia vimari egiteuo.
JOH 8:3 Tio egiteu la tahalo la mari me egiteu e pariseo goio laputi isa la tavile soio te Iesus, egite vimagiri posatia kabili tegiteu la valalua tomi. La tavile ale, egite hilo vutitia, eia taulaiti, eala moli eia igoti la iruru vikapopo la tahalo isasa.
JOH 8:4 Goma egite veiale Iesus mago “Tahalo La Vimari, la tavile ale, egite sivutitia, eia taulai, eala moli eia mavuta tomi la tahalo isapolo kama e haruala.
JOH 8:5 Oilo te la merera la viputumulila, e Moses veia gatou veia mai isa ge igoa maie, etato ge dumu pehoa me la uati. Eme ge vei la rova ovola e?”
JOH 8:6 Eala moli egite tahia maie veia ge tovo lalai e Iesus ovolale veia ge vitiloa veia mai eia ge toi isa la merera ale polo la merera te Moses, egite ge kotiala. Eala moli e Iesus pou lagu tugu moli me eia kekekesi otalo te la magasa me la kuku la limala.
JOH 8:7 Goio egite tahi suku loua, tiele e Iesus hiliti moli ele, eia magiri, eia goio veia giteu mago “Mai la tahalo isa kabili tamutou ele eia souka igo isa la iruru, eia ge soko la ulubi la tavile ale me la uati.”
JOH 8:8 Goma e Iesus pou lagu tugu lou, me eia kekesi lou me la kuku la limala otalo la magasao.
JOH 8:9 Tio, egite loloa mai ele, egite gali seseke moliti ele. Egite la mulugaluga sokoa giteu, mulimuli egiteu ale isahario, kara te ale mulimuli kililili tegiteu ele. Egite hele taro moliti e Iesus oiole me la tavile oio magirigiri te la lagulao.
JOH 8:10 Goma, e Iesus magiri, eia goio veia la tavilele mago “Tavile kokora, egite govei tomiti ele? Mave, isa kamati vimagirime te la vigagiala, ia?”
JOH 8:11 Goma, la tavile veiale Iesus mago “Tahalo uru, isa oukati oio ale ge ubi leau la merera.” Goio, e Iesus veiala mago “Eau tai kama ge vimagiri eme te la vigagiala. Eme ge tuga, eala moli eme umalati ge igigo lou isa la iruru.”]
JOH 8:12 La haro isa lou e Iesus goio vimari lou egiteu la valalua me hatavivile maie mago “Eau, eau la matagaga te la maututula. La tahalo ale ge tilimuliau, eia kama ge tatuga te la maligoma, ouka, eia ge sau tola la matagaga la mahulilale.”
JOH 8:13 Tiele, egiteu e pariseo loloa mai ele, egite goio veiala mago “Eme valolo rivurivu lou lemei ele, eala la valolo taume eia kama sesele, la merera taume eia kama tikumu.”
JOH 8:14 Goio, e Iesus ule baoli loua giteu ele mago “Eia sesele, eau valolo rivu lou leau me la vikararala takue, eala moli la vikararala taku eia sesele. La vuhula maie: Eau rovi la mautu ale eau hiliti tarotia somaie, me eau rovi tai la mautu ale eau masagea ge goio volao. Eala moli amuto kama rovi la mautu sesele taku. Ale eau ge gove, amuto kama rovi taia.
JOH 8:15 Amuto veia amutou la tahalo la mari, eala moli la vuhu la viputumulila tamutou la mari te la vovo moli. Eau, eau kama igigo isa la viputumulila te la tahalo isasa.
JOH 8:16 Eala moli mai eau ge vimagiri isasa te la vigagiala, la viputumulila taku soio tetala eia ge matata moli, la vuhula kama eau moli, ouka, e Tete ale bahatiau somaie, eia igogolu vikapopo me eaue.
JOH 8:17 La vikararala ale amuto veia te la mari tamutou, eia magiri te la viputumulila tamutou maie, mai taho lua egira ge veipala la vikararala, me la vikararala tegirua eia visauru moli, amuto veia mai ele veia la vikararala tegirua eia sesele.
JOH 8:18 Ioge, me eau, eau valolo lou leau, goma e Tete ale bahatiau somaie, eia tai valolo leaue, eala amilua taho lua tomiti la vikararala tamilua isa moliti, eala moli amuto kama gabu tikumua veia eia sesele!”
JOH 8:19 Tio, egite lolo la vikararala tetala mai ele, egite goio tahi rivu loua mago “Me e tamamu ove, e?” Goma, e Iesus ule baoli loua giteu ele mago “Mai amuto kama roviau, eala amuto kama rovi e Tetele. Mai ge amuto ge rovitiau, tiele me amuto ge rovi tai e Teteo.”
JOH 8:20 Tio e Iesus veia la vikararala ale oilo te la luma la lotu, oio hagagavi moli la baa ale egite Iuda pipigi la uati tegiteu te la visuli te la lotu, la vuhula eia pou oio vola, eia vimari egiteu la valalua me hatavivile. Eala moli isasa tegiteu la mulugaluga kama lao tolea, la vuhula la imamala tetala soukama sibitala.
JOH 8:21 Goio, e Iesus hiliti, eia soko lou la vikararala soio tegiteu la valalua me hatavivile me egiteu la mulugaluga tai, eia veia giteu mago “Male, eau ge tuga, amuto kamati ge hilo louau, la iruru tamutou ale amuto igigoa, eia soloio. Tio amuto ge peho, la iruru tamutou soloio kisi tola vagari amutou. Amuto kama koramulia ge goio te la mautu ale eau ge goio volao.”
JOH 8:22 Tiele, egiteu e Iuda goio vitahi baoli lou egiteu mago “Ilava sesele eia veia maie ‘Amuto kama koramulia ge goio te la mautu ale eau ge goio volao’? Soioge eia ge bili rivu lou eia, ia?”
JOH 8:23 Goma, eia veia giteu mago “Amuto la tahalo moli la magasa, eau ouka, eau loata te la mori, eau kama la tahalo la magasa mai amutou.
JOH 8:24 Mai ale eau vei mugatia mutou veia amuto ge vilua te la iruru tamutou ele, mai ge amuto kama ge tautaulailo taku sekela, tiele amuto ge peho, la iruru tamutou soloio kisi tatola amutou ele.”
JOH 8:25 Tio, egite lolo la vikararala te Iesus mai ele, egite goio tahi rivu loua mago “Eme ere tahalo, e?” Goma, e Iesus ule baoli loua giteu mago “Eau moli la tahalo mai ale eau vei mugatia mutouo.
JOH 8:26 Male, la vikarakarala usu eau masagea ge veia mutou te la vulovulo mutou ale amuto igigoa. Eau mulimuli ge mata muli la vulovulo mutou tomi mai la tahalo la viputumulila sesele. Eala moli eia ale baheau somai, la vulovulola eia sesele. Tiele la vikararala tomi ale eau loloa tetalao, eiala eau valolo egiteu la valalua me hatavivile te la maututula.”
JOH 8:27 Eia veia giteu mai ele, eala moli egite kama matagaga veia eia veveia giteu ele te Tamalao.
JOH 8:28 Tio goio e Iesus veitia giteu mago “Mulimuli amuto ge bili tarotiau e Latu La Tahalo, tiele te la imamala alele amuto ge mata kilalati veia eau e Kraist, me amuto ge rovi taia veia eau kama igo bulalahu la paga isa te la gabutatalala taku moli, ouka. La vikarakarala tomi ale eau veveia mutou ele, e Tete moli vei mulimuliagu mai ele.
JOH 8:29 E Tete sesele baha taroau somaie, me eia pou takue. Eia kama hele tataroau, veia eau sekela moli ge igogolu, ouka. La igogolu tomi ale eau igigoae, eia sagege sesele ovolale.”
JOH 8:30 Tiele ale eia veitia maie, la valalua me hatavivile usu goio tautaulailo tetalao.
JOH 8:31 Goio, e Iesus veia giteu e Iuda ale tautia la ilo giteu soio tetala veia la merera tetala eia sesele, eia veia giteu mago “Mai ge amuto ge pou sesele te la vikararala takue, amuto ge la valalua la vimari taku seselele.
JOH 8:32 Tiele amuto ge rovi la merera la mahuli ale sesele, me la merera ale seselele eia ge lube amutou taro la kilisi ale kisi tola amutou, amuto ge mavulaha sesele.”
JOH 8:33 E Iesus veia giteu mai ele, eala moli egite goio veiala mago “Amiteu la hilile Abraham. Amite souka pou mai la bilalaha oio te la tahalo isasa veia eia ge kisi tola amiteu mai te la iligo la masasagala tetala. Ilava eme vei maie veia ‘Amuto ge pou sauba, la kilisi ge ouka’?”
JOH 8:34 Goma, e Iesus koli la vikararala tegiteu ele mago “Ale eau ge vei seselea mutoue ge, egiteu la valalua me hatavivile tomi ale egite igigo la iruru, egite pouti te la kilisi te la vulovulo ale kama kokorale.
JOH 8:35 La bilalaha, eia kama pou tatola te la uluva la luma te la uru tetala. Eala moli eau e Latule Tete, eau ge pou tola te la uluva la luma te Tete sesele,
JOH 8:36 tiele mai eau e Latula ge vagoilo amutou taku, ale amuto ge sauba seselele, amuto ge pou mai e latatu La Uru sesele, la vuhula eau lubeti amutou te la kilisi.
JOH 8:37 Eau roviti amutou veia amuto la hilile Abraham. Eala moli amuto masagea ge bili pehoau, la vuhula la vikarakarala taku eia kama pou sesele te la ilo mutou ele.
JOH 8:38 Eau valolo te la papaga ale eau hiloa oio te Tete. Mai amutou tai, amuto mulimuli la merera tomi te tama mutou e Satan ale kama kokorale.”
JOH 8:39 Goio, egite koli la vikararala te Iesus mago “E tama miteu e Abraham.” Eala moli e Iesus vei loua giteu mago “Mai amutou e latatule Abraham sesele, tiele me amuto ge abi la vulovulole Abrahamo, eala moli ouka.
JOH 8:40 Male, eau vimarimari le amutou te la vikarakarala ale sesele, eau loloa te La Tahalo Uruo, eala moli amuto masagea ge bili pehoaue. Eala moli e Abraham kama igigoa mai ele.
JOH 8:41 Ale amuto igigo mai la vulovulole tama mutou ale kama kokora.” Goio, egite vei louala mago “Ko, e tatila miteu kama savu amiteu te la gauru. Amiteu e tama miteu isa moli, La Tahalo Uru.”
JOH 8:42 Goma, e Iesus vei loua giteu mago “Mai ge amutou e latatu La Tahalo Uru seseleo, amuto ge masageau, la vuhula eau loio seseleti te Tete, eau gomai tamutoue. Eau kama gomai te la masasagala taku moli, ouka. Eia sesele baha taroau somaie.
JOH 8:43 Ilava amuto kama matagaga tigi te la vikarakarala taku e? La vuhu la vareagila tamutou ele eia loio te Satan moli, eia sugu roboti la hova la gavusa mutou, eala amuto kama matagaga tigi te la merera taku.
JOH 8:44 Amutou e latatule tama mutou e Satan. Eala amuto vagari sesele veia ge tilimuli la masasagala te la tiale tama mutou ele. Alaurati eia la tahalo la bili peho la valalua, me eia kama tilimuli la vulovulo ale matata, la vuhula la vulovulo la visigologolola moli eia oio volu tetala. Eia la tahalo la visigolola sesele, me eia e tama la vulovulo la visigologololale.
JOH 8:45 Eala moli eau veipalala la vikararala ale sesele, eala moli amuto kama roromuli la vikararala takue.
JOH 8:46 Ere tahalo isa kabili tamutou ele eia koramulia ge toi pala isasa la iruru omai taku, e? Eala moli mai eau valolo me la vikararala ale sesele, ilava amuto kama roromuli la vikararala taku, e?
JOH 8:47 Egiteu e latatu La Tahalo Uru sesele, egite roromuli la vikarakarala te La Tahalo Uru ele. Amuto kama tetala, eala amuto kama roromulimuli la vikarakarala tetalale.”
JOH 8:48 Goio, egiteu e Iuda koli la vikararala tetala mago “A ge, amite veia eme la mumugu la tau Sameria moli ge! La hitu ale kama kokora isa oio pou taumele. Eala la vikararala tamiteu palati taumele eia sesele moli, eme la tahalo la pauala moli.”
JOH 8:49 Goma, e Iesus koli lou la vikararala tegiteu ele mago “Eau la hitu ale kama kokora isa kama pou takue, ouka. Eau togo e Tete, eala moli amuto kama togoau, amuto vile pasiau.
JOH 8:50 Eau kama vaisale rivurivu lou eau. La Tahalo isasa moli sekela masagea ge vauruau, La Uru moli ale la vuhu la viputumulila tomi. Eia ge mata muli la gabutatalala tamutou somai taku,
JOH 8:51 me eau vei seselea mutou maie veia mai ge la tahalo isasa eia ge roromuli tigi la vikararala taku, tetala ge la mahulila ale sesele, eia kama ge peho lou.”
JOH 8:52 Tiele, egiteu e Iuda loloa mai ele, egite goio vei louala mago “Ale amite rovi seseletimei ele, la hitu ale kama kokora isa pouti taumele. E tama miteu e Abraham pehoti, me egiteu la bilalaha te La Uru ale pala tai peho tomitio. Ale eme veitia maie ‘Mai la tahalo isasa ge roromuli la vikarakarala taku, eia kama ge peho lou!’
JOH 8:53 Ale mave, e? Soioge eme uru te tubu gatou e Abraham, ia? Eia pehoti, me egiteu la bilalaha ale pala tai peho tomitio. Eme soioge veia eme ere?”
JOH 8:54 Goio, e Iesus koli loua giteu mago “Mai eau ge vaisale rivu lou la isagu, la isagu ge la golu bulalahu moli. Eala moli e Tete sesele vahiliti la isagu. Ale moli amuto totoia veia eia La Tahalo Uru tamutouo, eala moli amuto kama rovi eia.
JOH 8:55 Eau moli rovi tigia. Mai eau ge veia maie veia eau kama rovi e Tete, eau tai ge la tahalo la visigolola mai amutou ele. Eala moli eau rovi seselea, me eau roromuli tigi sesele la vikararala tetalale.
JOH 8:56 E tubu mutou e Abraham, eia sagege seseleeia eia ge hilo la guluvi taku. Goma eia hilotia, me eia sagege pepeho seseleti ovolale.”
JOH 8:57 Goio, egiteu e Iuda veiala mago “Mave, la leavala taume souka savulu lima, soioge eme hiloti e Abraham, ia?”
JOH 8:58 Goma, e Iesus veia giteu mago “Ale eau vei seselea mutou, ale alaura te baruata e Abraham souka sibitala, te la imamala alele eau pouti.”
JOH 8:59 Tiele, egite lolo la vikararala tetala mai ele, egite goio abi la uati veia ge ubi leia. Eala moli e Iesus eia paru keke taro moli egiteu ele, eia galiti sogalao.
JOH 9:1 Tio, goio, e Iesus tatugale, eia goma hilo la tahalo isasa, eia mata kea, e tilala pigoa la matala mata kea moli mai ele.
JOH 9:2 Goma egite la valalua la vimari te Iesus goio tahia mago “Tahalo La Vimari, ere igo la iruru, la tahalo ale, uka e tamala me tilala, la vuhula e tilala taposea la matala mata keati mai ele?”
JOH 9:3 Goma, e Iesus koli la tilahi tegiteu ele mago “Ale veia la tahalo aleie, uka e tamala me tilala igo la iruru, ouka, eia mai moli ele veia ge sile pala la igogolu te La Tahalo Uru oio te la tahalole.
JOH 9:4 Ale igoie la matagaga taku bakisi soloio, etato ge igigo la igogolu te La Tahalo Uru, la vuhula sesela ale eia baheau somai eialale. Hagagaviti la maligoma ge sibitala lou, me etato tomi rovia veia mai la paga ge logoti, la valalua me hatavivile kati tuga tavu la igogolu.
JOH 9:5 Mai ale eau so popou omai te la maututula, eau la matagaga te la maututula tomi ele.”
JOH 9:6 Tio, eia vikara kaluvu moli mai ele, goma eia abi la magasa, goio eia kavurasi soio volao, eia bubutia te la mata la tahalole.
JOH 9:7 Goio eia baha taro la tahalole mago “Hari, eme goio pupuru oio la vilelo la pupurula e Siloam.” Me la isa la lalu aleie, te la merera tegiteu la masovala maie “egite bahatime”. Tio eia goio pupurutio, ale eia ga beu rivua mai ele, la matala mata pulalatio.
JOH 9:8 Tiele, egiteu la valalua la mautu tetala, me egiteu ale hililoa palao, ale eia kakaka egiteu la uatio, egite goio vitahi baololi moliti egiteu ele mago “Mave, ale soioge la tahalo moli ale popou kakaka la valalua me hatavivile la uati, ia?”
JOH 9:9 Goma, egite vikau vulotilao, isahari tegiteu veveia maie mago “Meie, la tahalola moli ele.” Eala moli isahari tegiteu mata pupupuhi louale, egite vei mago “Ouka, kama ge eiale, soioge isapolo, eala moli la taba la lagu girua ge isa moli ele.” Eala moli la tahalo loio varutu molitia giteu ele mago “Me eau molie.”
JOH 9:10 Goma, egite tahia mago “Me la matamu mata pulalati lou ele mave e?”
JOH 9:11 Eia goio veia mulia giteu ele mago “Me la tahalo ale egite totoila e Iesuso, eia ato la magasa, me eia vivulo tomila la kaputela, eia goma bubua te la matague. Goio eia baheau soio la vilelo la pupurula, e Siloam, veia eau ge pupuru ovola, tio eau tuga soio, eau goio pupuru, eala la matagu mata pulalati loue, me eau rovi tomiti la golugolu tomi ale etato ale matagaga hililoa.”
JOH 9:12 Goio, egite tahia mago “Me la tahalola oveiti?” Eia koli loua giteu mago “Eau kama rovia.”
JOH 9:13 Tio, egite puli e maura soio tegiteu e pariseo.
JOH 9:14 Eala moli la haro alele, eia la haro tabu, ale e Iesus abi la pilika goio igo mata pulala la mata la tahalo ovolale.
JOH 9:15 Goma egiteu e pariseo tahi loua mago “Me la matamu mata pulala mave e?” Goio, eia vei muli loua giteu ele mago “Eia bubu la magasa la pilika oio te la matagu, eau goio vuhi taroa, eala la matagu mata pulalatie.”
JOH 9:16 Tiele, egiteu e pariseo isahari loloa mai ele, egite goio vikara maie mago “La tahalo ale, La Tahalo Uru kama bahea somaie, la vuhula eia oio kama togo la haro tabu ge, ale eia vimahuli egiteu oio vola.” Eala moli isahari tegiteu vei mago “Mave, eia koramuli la tahalo la iruru isa ge igoto la golu la karutula ale maie?” Tiele, la gabutatalala tegiteu kamati visauru ele, egite vaubiti la merera mai ele, egiteu la malosu ilua.
JOH 9:17 Goio, egite tahi vulo lou la tahalo ale pala mata keale, mago “Eme ge vei mave te la tahalo ale vimatagagati la matamu ele?” Eia goma veia giteu mago “Ale eia isa tegiteu la bilalaha te La Uru.”
JOH 9:18 Eia sesele, la tahalo ale pala mata kea, eala moli la matala oio mata pulalati ele, eala moli egiteu e Iuda veia eia kama sesele, kara ale egite tolati e tamala me tilala soio tegiteu, me egira vikara matagaga soio tegiteu.
JOH 9:19 Goma egite tahi egirua mago “Ale e latu mulua, ia? Soioge eme e tilala taposea eia mata kea moli maio, me ale amula ge vei mave oio tetalale? Me eia igo mave ale eia mata pulalati lou ele?”
JOH 9:20 Goio, e tamala me tilala koli loua giteu ele mago “Eia sesele, la tahalo ale eia e latu milua sesele, me amila rovi taia veia te la piligo tetala kara igoie eia mata kea mai ele.
JOH 9:21 Eala moli ale igoie eia mata pulalati, amila kama rovi la vuhula, me la tahalo ale igoa, amila kama rovi taia. Eia uruti, taritigi amuto ge tahia, eia ge vei mulia mutou ovola.”
JOH 9:22 Me egira vikara moli mai ele, la vuhula egira taga egiteu e Iudao, la vuhula egiteu la mulugaluga tauti la vigagiala maie veia mai ge la tahalo isasa ge veia e Iesus eia e Kraist, egite ge pitaroa veia eia kati ge lotulotu tomi legiteu e Iuda lou.
JOH 9:23 Tiele la vuhula eiala e tamala me tilala vei molitia giteu mai ele mago “Eia uruti, amuto ge tahia.”
JOH 9:24 Tio, egiteu e pariseo goio tola lou la tahalo ale la matala mata kea palale, goma egite tutu toleala mago “Eme ge vei tataho moli la isa La Tahalo Uruo, la vuhula la tahalo ale e Iesus, amite rovia veia eia la tahalo ale kama kokora isale, eala eme umalati ge vaisalea te la paga ale eme veia eia igotiamu.”
JOH 9:25 Eala moli la tahalole eia goma ule baoli molia giteu ele mago “Mai ge eia la tahalo la iruru ka ouka, alele eau kama rovia. La paga isasa moli eau rovitia eia maie, pala la matagu mata kea, me ale igoie la matagu mata pulalati loue.”
JOH 9:26 Goio, egite tahi vulo loua mago “Eia igo sesele lava oio taume ele, goma la matamu mata pulalati mai ele, e?”
JOH 9:27 Goma, eia koli totolo rivu loua giteu mago “Eau veitia mutoue, amuto kama masagea ge loloa. Ilava amuto masagea ge lolo loua e? Soioge amuto tai masagea veia amuto ge la valalua tetala, ia, eala amuto tahi susukuaue?”
JOH 9:28 Goio, egite gilotiao, egite veiala mago “Me eme moli la tahalo tetalale. Amite ale la valalua la vimari te Moses moli.
JOH 9:29 Amite rovi seselea veia La Tahalo Uru eia abi moliale Moses la vikarakarala, isa lou ouka, me la tahalo ale eia love, amite kama rovia.”
JOH 9:30 Goma, la tahalole koli loua giteu mago “La paga ale eia isapolo sesele! Amuto kama rovia veia eia sibitala love, eala moli eia igo mata pulalati la matague.
JOH 9:31 Etato tomi rovitia veia La Tahalo Uru eia kama ge lolo la vikararala te la tahalo la iruru isasa. Eala moli mai la tahalo isa ge lotu sesele tavu La Tahalo Uruo, me eia tilimuli tigi la gabutatalala tetalao, tio La Tahalo Uru ge lolo la vikarakarala tetalale.
JOH 9:32 Ale sokoa alaurati karati igoie, etato souka lolo la rere la tahalo isasa veia e tilala taposea me eia mata keati maie, goio la tahalo isasa ge igo mata pulala lou la matala mai ele.
JOH 9:33 Mai ge La Tahalo Uru kama ge baha la tahalo ale somaie, soioge eia kama ge igo la igogolu isa ale uru mai aleie.”
JOH 9:34 Tio, egite lolo la vikararala tetala mai ele, la hate giteu mamasi seseleala, egite goio koli louala mago “A ge, e tilamu savume te la gauru, me eme tai la tahalo la iruru sesele! Ale eme masagea ge vimari amiteue, ia?” Goma egite gusi kaluvu moliala mai ele, egite goio kumuli tarotiao.
JOH 9:35 Goio, e Iesus lolotia veia egite pitaroti la tahalole sogalao, eia goio pogea, me eia veiala mago “Mave, eme tautaulailoti te Latu La Tahalo, ka ouka?”
JOH 9:36 Goma, eia veiale Iesus mago “Tahalo uru, e Latu La Tahalole ere? Eme ge veipaleagu tio eau ge tautaulailo tetalao.”
JOH 9:37 Goio, e Iesus veiala mago “Me male eme hilotiae. La tahalo moli male amula vikarakara ge!”
JOH 9:38 Tio, la tahalole goio veiale Iesus mago “Tahalo Uru, eau tautaulailo taumele.” Goma eia toto tulu sotalo, eia lagu tugu moliti me eia lotu tavu moliti e Iesuso.
JOH 9:39 Goma e Iesus veiala “Eau gomai te la maututula veia ge vimatagaga la valalua me hatavivile. Tiele mai egiteu ale kama mamatao, mai egiteu ale la maligoma eia pigi robo la kalulu giteu, eau ge vimatagaga egite, me egiteu ale veia egite mamatao, eau ge vahilo legiteu la maligoma uru ale pigi robo egiteu, egite ge rovia veia egiteu la mata kea moli.”
JOH 9:40 Eala moli egiteu e pariseo isahari oio hagagavi moli ele, egite lolo tai la vikararala aleie, egite goma tahitia mago “Mave, soioge eme veia amiteu tai mata kea, ia?”
JOH 9:41 Goio, e Iesus veia giteu mago “Mai amuto ge mata keale, amuto la iruru ge ouka. Eala moli amuto vei tataho lou la mari tamutou veia la mata mutou oio mamatale, amuto rovi tataho la gauru, tiele amuto veitia mai ele, la merera tamutou lou eia tomu sasae la vulovulo mutou ale amuto igigoa, la vuhula amuto matagagati te la merera te La Tahalo Uru. Amutou la iruru uru oio, amutou souka mavulaha.”
JOH 10:1 Goio, e Iesus toi isa la vikarara la tilovo maie “Ale eau vei seselea mutou, mai la tahalo isa eia kama tiroro logala te la mata la bigomu, eia goio sae utu moli la bigomu ele, me eia goilo, la tahalo ale mai ele, eia la tahalo la pakalila, me la tahalo la paruutula tai ele.
JOH 10:2 Eala moli la tahalo ale tiroro sesele logala te la mata giteu la sipuo, eia la tahalo la vibaumuli tegiteu la sip seselele.
JOH 10:3 La tahalo la vibaumuli la mata, eia kokopea la tahalole la mata. Me egiteu la sip, egite rovi sesele la golulale. Eia tatola sesele la isa giteu la sip tetalale, eia goio pulipuli egiteu sogalao.
JOH 10:4 Mai eia tola tomiti egiteu la sip ale tetala sogalao, tio eia goio mamuga egiteu, tiele me egiteu la sip tai ele, egite rovi sesele la golulale, eala egite tilimulimulia mai ele.
JOH 10:5 Egite kama ge tilimuli la tahalo isapolo, ouka. Egite helehele moli leia, la vuhula egite lolo kosi la golu la tahalo ale isapolo.”
JOH 10:6 Eala moli e Iesus veia giteu la vikarara la tilovo aleie, me egite kama matagaga te la masova la merera ale eia veitia giteu ovolale.
JOH 10:7 Tio, egite kama matagaga te la masova la merera la tilovo te la vibaumuli la sip, goio e Iesus lubea giteu la masovala maie mago “Ale eau vei seselea mutou, eau sesele, eau la mata tegiteu la sip ele.
JOH 10:8 Mai egite tomi ale vimuga takuo, egite visigolo moli amutou te la merera ale egite vimari le amutou ovolao, egite mai la tahalo la pakalila sesele. Eala moli egiteu la sip taku kama lololo egiteu ele.
JOH 10:9 Eau sesele la mata la goililola. Mai ge isa ge gomai muga taku, me eia ge goilo la ilo la bigomu taku, La Tahalo Uru ge vimahulia me eia ge sigiroboa. Eia ge goililo, me eia ge gogalagala, tio eia ge sivuti la ilali, eia ge pou tataho seseletio.
JOH 10:10 La tahalo la pakalila eia kama guvi bulalahu, eia guguvi moli te la pakali giteu la sip me la bili peho giteu, me te la igo marapa giteu ele. Eala moli eau, eau guvi veia egiteu la sip taku ge sau tola la mahulila, me la mahulila alele eia ge volu sesele te la tia giteu.
JOH 10:11 “Eau la kalia la tahalo la vibaumuli la sip. La tahalo la vibaumuli la sip ale taritigi, eia sugu taro la mahulila tetala veia ge vimahuli egiteu la sip tetala.
JOH 10:12 La tahalo ale igogolu moli te la mapa, me eia kama la tahalo la vibaumuli la sip tetala sesele, eia kama e taho giteu la sip seselele, eia ge hilo la paia hou ale mororosi sesele eia ge gali tavu egiteu la sip ele, eia ge hele taro moli egiteu. Tiele me la paia hou ge barautu lahu egiteu la sip ele, eia ge kumuli bura lahuti egiteuo.
JOH 10:13 La vuhula maie la tahalo alele eia igogolu moli te la mapa, eia kama gabutatala egiteu la sip ele.
JOH 10:14 “Eau, eau moli la kalia la tahalo la vibaumuli giteu la sip. Eau rovi egiteu la sip ale taku, me egiteu la sip ale taku tai rovi eaue,
JOH 10:15 mai moli e Tete roviau, me eau rovi tai e Tete. Eau ge sugu taro la mahulila taku veia ge vimahuli egiteu la sip taku.
JOH 10:16 Eala moli egiteu la sip taku isahari souka goilo te la bigomu. Eau ge vagoilo tai egiteu, me egite ge lolo la golugu. Tio egiteu ge la karakara la sip ale ge isa moliti, me la tahalo la vibaumuli giteu tai ge isa moliti.
JOH 10:17 Me la vuhula sesele ale e Tete gogoau eia maie: Eau sugu taro la mahulila taku, eala moli eau ge mahuli lou.
JOH 10:18 La tahalo isa kama abi taro la mahulila taku, ouka. Te la masasagala taku moli, eau sugu taro la mahulila taku ele. La vuhula eau sau tola la vagagarila veia eau ge sugu taro la mahulila takue, me eau ge mahuli rivu tai lou. La vikararala ale, eau abi seselea loio te Tete.”
JOH 10:19 Tio, egiteu e Iuda loloa e Iesus eia vikara mai ele, la gabutatalala tegite kamati isa moli oio vola, egiteu la malosu iluati, isahari veia la merera tetala eia taritigi, isahari veia eia kama kokora.
JOH 10:20 Tiele la valalua usu egite goio veia maie “Ale la hitu ale kama kokora isa oio pouti tetalale, eala eia pauati mai ele. Ilava amuto roromulia, e?”
JOH 10:21 Eala moli isahari lou egite vei mago “La tahalo ale la hitu ge pou tetala, eia kama koramulia ge vevei la vikarakarala ale tikukumu mai aleie. Mave, la hitu koramuli tai eia ge igo mata pulala la mata giteu ale mata kea, ia?”
JOH 10:22 Mulimuli la haro goio sibitala ale egiteu e Iuda ge igo isa la pougolula oata e Ierusalem, la haro alele egite virovilala muli lou la haro ale pala egite kope lou la mata la luma la lotu uruo. Ale la leavala, la maigi uru pepeho oio vola.
JOH 10:23 E Iesus eia pou oio e Ierusalem, eia tatuga oilo la matabala te Solomon oio te la luma la lotu ale uruo.
JOH 10:24 Tiele egite Iuda goio magiri galilitiao, me egite tahia mago “Mave, eme masagea ge igo maraparapa moli la gabutatalala tamiteu te la tau robomu, ia? Mai eme e Kraist, taritigi eme ge vei matagagea miteu ovola.”
JOH 10:25 Goio, e Iesus veia giteu mago “Me eau veitia mutoue, eala moli amuto kama tautaulailo ovola. La igogolu tomi ale eau igigoa te la isale Teteo, eia veipala la isagu ele veia eau e Kraist sesele.
JOH 10:26 Eala moli amuto kama la karakara la sip taku, eala amuto kama roromulimuli la merera taku ele.
JOH 10:27 Egiteu la sip taku, egite lololo la golugu, me eau rovi egiteu, me egite tilimulimuli eaue.
JOH 10:28 Tio eau ge abia giteu la mahulila ale sesele, la kaluvula ge ouka. Egite kama ge peho lou, me isa kama ge lapu taro lou egiteu lomai te la limague.
JOH 10:29 E Tete ale sugu taroti egiteu somai takue, la vagagarila tetala eia uru sesele, me eia kama koramulia isasa ge lagi taro lou egiteu loio te la limale Tete.
JOH 10:30 Amila me Tete isa moli.”
JOH 10:31 Goio, egiteu e Iuda loloa eia vikara mai ele, egite goio abi la uatati veia ge ubi leia.
JOH 10:32 Goma e Iesus veia giteu mago “Eau sile palati la igogolu te Tete ale taritigie, eala moli amuto gabutatala ere igogolu lou male amuto masagea ge ubi leau la uati e?”
JOH 10:33 Goio, egiteu e Iuda koli louala mago “Amite kama ge ubi eme te la igogolu ale taritigi, ouka. Te la vikara barala soio te La Tahalo Uru moli. Eme la tahalo bulalahu moli, eala moli eme veia eme La Tahalo Uru.”
JOH 10:34 Goma, e Iesus koli rivu loua giteu mago “Eia mave? La kekesi oilo te la merera tamutou, te ururu tamutou tai, eia maie ‘Amuto la uru mai taiau.’
JOH 10:35 Ale egiteu la valalua ale la merera te La Tahalo Uru goioti tegiteu palao, eia toi legiteu la uru veia egite la uru mai tai eia. La vikararala te La Buk Tabu eia kama galo gologoloe.
JOH 10:36 Eala moli e Tete sesele raragitiau me eia baha tarotiau somai te la maututula. Male, eau ge veia mutou maie ‘Eau e Latu La Tahalo Uru’ me ilava amuto ule papai louagu la merera veia eau vikara baratia La Tahalo Uru e?
JOH 10:37 Amuto kama ge gabu tikumu bulalahu eau, eala moli eau igoti isahari la golu la karutula, eala eia koramulia veia amuto ge roromuliau.
JOH 10:38 Eala moli mai amuto kama masaga ge roromuli la merera taku, taritigi amuto ge gabu tikumu la igogolu ale isapolo ale eau igoa te la limagu, veia amuto ge rovia mai ele veia e Tete pou taku, me eau vikapopoti le Tete.”
JOH 10:39 Goio, egite loloa la vikararala tetala mai ele, egite igo totolo pepeho ovola, egite ga lao tolea, eala moli eia paru keke taro moli egiteu ele, eia tugatio.
JOH 10:40 Tio, e Iesus goio beu rivu loua soio te la galele Iordan loio, eia goio tulu polo la lalu e Iordan ele, me eia goio sibitala te la baa ale e Ioanes vuvuhi la valalua ovolao. Tiele eia goio pou te la gale alele.
JOH 10:41 Goio la valalua me hatavivile usu goio tetala, me egite vikara maie mago “Sesele e Ioanes kama igo isa la golu la karutula, eala moli la vikarakarala tomi ale e Ioanes totoia te la tahalo aleie, eia sesele tomi moli.”
JOH 10:42 Me ale e Iesus pou oio te la gale alele, la valalua usu egite tautaulailoti oio tetalale veia egite ge tilimulia.
JOH 11:1 La tahalo isasa ale e Iesus rovia, la isala e Lasaras, eia lea. Me la mautu tetala e Betani, ale la mautu te Maria me tabarala e Marta.
JOH 11:2 Ale e Maria moli ale vipupuru la vaha La Uru e Iesus me la lalu ale mali vivili tataho, la mapala uru sesele, me eia sorobi tagara la vahala me la ivula ale malalauo. Me e Maria moli aleie, eiala e hatamalela e Lasaras eia leao.
JOH 11:3 Goma egirua e hatavilevilela iluale baha la vikararala soio te Iesus mago “Tahalo Uru, la tahalo ale eme puhi titigiae, eia omaie lalea.”
JOH 11:4 Goio, e Iesus loloa mai ele, eia goio vei mago “Ale La Tahalo Uru visibitala la ileale soio te Lasaras, la vuhula kama te la pileho veia e Lasaras ge pehola, ouka. La vuhula veia eia ge veipala la vagagari La Tahalo Uru ele, me la valalua tai ge vaisale e Latu La Tahalo Uru oio vola.”
JOH 11:5 E Iesus eia masaga sesele e maura e Marta mira me tabarala e Maria, me hatamale girua tai e Lasaras ele.
JOH 11:6 Goma e Iesus loloti e Lasaras oio leati mai ele, eala moli eia pou muga lou la haro ilua oio te la mautu ale eia popou ovolao.
JOH 11:7 Mulimuli eia goio veia giteu la valalua la vimari tetala mago “Etato ge beu rivua soio e Iudea.”
JOH 11:8 Goio, egite la valalua la vimari tetala veiala mago “Tahalo La Vimari, umala ge, la paga souka tabaa, egiteu e Iuda ga ubi mugati leme la uatio. Ale eme masagea ge goio lou te la baa aleio, ia?”
JOH 11:9 Goma, e Iesus ule baoli loua giteu ele mago “Mave, la mata la haro eia paga vei la babaa tomi la mata la haro savulusa gete lua te la haroharo tomi. Eala la baa ale malau eia koramulia etato ge tuga tataho ovola, kama ge tutuaki.
JOH 11:10 Eala moli mai la paga ge logo, etato kamati ge tuga tigi, la vuhula la paga maligomati.”
JOH 11:11 Tio eia veia giteu la merera la tilovo kaluvu mai ele, eia goio vei loua giteu mago “E tabara gatou e Lasaras, eia oio mavutati, eala moli eau ge goio ge paloa.”
JOH 11:12 Goio, egite la valalua la vimari te Iesus veiala mago “Tahalo Uru, mai eia ge mavuta, eia soioge mahuli tataho lou.”
JOH 11:13 La vuhula egite veia e Iesus vevei la mavutala mai ale te la logo, eala moli ale e Iesus toi la mavutala, la masovala maie veia e Lasaras oio pehoti.
JOH 11:14 Goma, e Iesus hiloa veia egite kama abi tigi la masova la merera tetalae, eia goio sile palatia giteu mago “E Lasaras oio pehoti,
JOH 11:15 me eau sagege pepeho ale eau kama goio hari tetala, la vuhula eau gabutatala amutou veia mai amuto ge hilo la igogolu taku isa ale uru sesele, la tautaulailo tamutou ge magiri vagari sesele. Gomai, etato ge goio tetala.”
JOH 11:16 Goio, e Tomas ale egite totoi taila e Didimas, eia veitia giteu la valalua la vimari te Iesus tomi ele mago “Ioge, etato ge tuga, etato ge peho vikapopo me eia oio e Iudeao!”
JOH 11:17 Goio, e Iesus hiliti, eia tuga goio e Iudea. Eia goio sibitala oio, eia rovitia veia e Lasaras tabuliti la logo ivaati te la lulu la pileho.
JOH 11:18 Eala moli la mautu e Betani ele, eia hagagavi moli soio e Ierusalem, mai la kilomita ilua moli.
JOH 11:19 Me te la pilehole Lasaras ele, egiteu la valalua me hatavivile Iuda mapaiti goio te Marta me Maria veia egite ge lolohugu egirua te hatamale gira ale pehoti ele.
JOH 11:20 Goma e Marta lolotia veia e Iesus loio tatuga te la gauru, eia goio polo lahea soio te la gauru ele. E Maria moli oio popou te la lumao.
JOH 11:21 Goma, e Marta veiale Iesus mago “Tahalo Uru, mai eme ge pou omaie, soioge e hatamalegu kama ge peho maie.
JOH 11:22 Eala moli ale gageie taie, eau rovia veia mai eme ge kaka tavu La Tahalo Uru te la paga isasa ale eme masagea veia eia ge igoamu, eia ge abi moliamu.”
JOH 11:23 Goio, e Iesus veiala mago “E hatamalemu ge mahuli rivu lou.”
JOH 11:24 Goma, e Marta veiala mago “Eau rovia veia eia ge mahuli lou te la tapasi la maututula, te la imamala ale la valalua me hatavivile tomi ge hiliti lou ovolao.”
JOH 11:25 Goio, e Iesus vei louala mago “Eau la vuhu la mahuli rivula, me la vuhu la mahulila tai ale sesele, eau molie. La tahalo ale ge tautaulailo takue, mai eia ge peho, eiala moli eia ge mahuli rivu lou.
JOH 11:26 Egite tomi ale mahulihuli, me egite tautaulailo takue, egite kama ge peho, ouka. Egite ge mahuli mai la tori. Mave, eme matagaga te la vikararala taku, e?”
JOH 11:27 Goma, e Marta veiale Iesus mago “Eia sesele Tahalo Uru, eau matagaga sesele veia eme e Kraist, eme e Latu La Tahalo Uru. Eme la tahalo ale La Tahalo Uru veitia veia eia ge bahea somai te la maututula.”
JOH 11:28 Goio, e Marta vei kaluvu moliale Iesus la vikararala tetala mai ele, eia goio tolati e tabarala e Mariao. Eia goio puli gale e Maria, me eia vei keke moliala mago “Male, La Tahalo La Vimari oio popouo, eia tatola emei.”
JOH 11:29 Goma e Maria lolo molia mai ele, eia hiliti harari moli, eia goioti te Iesuso.
JOH 11:30 Eala moli e Iesus souka goluma la mautu, eia soloio moli la baa ale e Marta goio mugati tetala ovolao.
JOH 11:31 Tiele egiteu e Iuda ale vipou totomi e Maria oilo te la luma ale egiteu lolohugu ele, egite hilo moli e Maria hiliti paripari moliti, eia gali sogalao, egite tilimulitiao. Egite gabua veia eia ge goio ge taitali oio te la liba.
JOH 11:32 E Maria goio sibitala te la baa ale e Iesus popou ovolale, eia hilo moliti e Iesus ele. Eia goio toto tulu, eia veiala mago “Tahalo Uru, mai eme ge omaie, e hatamalegu eia kama ge peho.”
JOH 11:33 Goio, e Iesus hiloa eia taitali, me egiteu e Iuda tai ale tilimuli egiteu tali tai ele, eia tai goio talitio. Eia gabu sesele la iloburukola te la ilola, eia gogo sesele e Lasaras ale pehoti ele,
JOH 11:34 eia goio tahi egiteu mago “Amuto ulaia oiove, e?” Egite goio veiala mago “Tahalo Uru, eme gomai ge hiloa.”
JOH 11:35 Goio, e Iesus loloa mai ele, eia goio tali.
JOH 11:36 Tiele, egiteu e Iuda hiloa mai ele, egite vei mago “Hiloa, eia gogo sesele e Lasaras ele.”
JOH 11:37 Goma, isahari tegiteu goio vikara lou mago “Me la tahalo ale eia igo mata pulala la mata la tahalo ale mata keao, me ilava eia kama masagea ge gomai hari ge vimahuli la tahalo ale, eia umala ge pepeho, e?”
JOH 11:38 E Iesus gabu lou la iloburukola ale uru pepeho, eia goio la lulu la pileho. Eala moli la lulu aleie, egite olia te la vai la maitete, me la uati isa uru egite buli robo la mata la lulu ele.
JOH 11:39 Goio e Iesus veia giteu mago “Amuto buli taroa la uati ele!” Eala moli e Marta, ale e hatavile la tahalo ale pehole, eia veiale Iesus mago “Tahalo Uru, la haro ivaa poloti, soioge eia ge maliati.”
JOH 11:40 Goio, e Iesus veiala mago “Mave, eau vei mugatiamu ovola maie, mai eme ge tautaulailo taku, eme ge hilo la vagagarila te La Tahalo Uruo.”
JOH 11:41 Tio, egite goio buli taro la uatio, goma e Iesus eia taga soata, me eia vei mago “Tete, eau vei tataho emei, la vuhula eme loloti la kilaka taku.
JOH 11:42 Eau rovia veia eme lolo bibibi la kilaka taku. Eala moli eau gabutatala la valalua me hatavivile omai magiri hagagavi, me egite loloti la vikararala aleie. La vuhula egite ge rovi seselea veia eme baheau somaie.”
JOH 11:43 Eia vikara kaluvu mai ele, eia goio tola vagari mago “Lasaras, eme gogala!”
JOH 11:44 Tio la tahalo ale pehole, eia hiliti me eia gali sogala. La vahala ilua me la limala, egite viri robola la kulikuli, la lagula tai egite avu roboa. Goio, e Iesus veia giteu mago “Amuto ge lubea, eia ge tuga tataho lou.”
JOH 11:45 Tio, egiteu la valalua e Iuda usu, ale egite goio lolohugu e Mariao, egite hilo la paga ale e Iesus igotia, eia vimahuli rivuti lou e Lasaras taro la pileho, egite goio tautaulailo seseleti tetalao.
JOH 11:46 Eala moli egite isahari goio tegiteu e pariseole, goio veia giteu la paga ale e Iesus igotiale.
JOH 11:47 Tiele egite la mulugaluga tegiteu e pris, me egiteu e pariseo tai, egite goio pou vikapopo, me egite vei mago “Etato ge igo mave sesele, e? La tahalo ale e Iesus eia igo usuti la golu la karutula,
JOH 11:48 mai ge etato ge mata soli molia veia eia ge igigo molia mai ele, la valalua tomi ge tilimuli tomia. Me egiteu e Rom ge gomai ge igo gegeru la luma la lotu tegatou urue, vikapopo me egiteu la valalua tai tegatoue.”
JOH 11:49 Eala moli isa tegiteu ele, la isala e Kaiapas, eia la mulugaluga tegiteu e pris te la leavala alele, eia goio hiliti, eia veia giteu mago “A ge, amuto kama rovi isa la paga.
JOH 11:50 Ilava amuto gabutatala papai te la tahalo ale? Eia taritigi moli veia la tahalo isa moli ge peho, me la valalua me hatavivile tomi ge mahuli. Eia kama taritigi veia etato e Iuda tomi ge vilua te la lima giteu e Rom.”
JOH 11:51 Eala moli eia kama veia maie te la gabutatalala tetala moli, ouka. Eia la mulugaluga tegiteu e pris te la leavala aleiele, me eia goio toi laha la vikararala mai ele te Iesus veia eia ge peho ge vimahuli egiteu e Iudale. La Tahalo Uru sesele visibitala la mererale te la harele Kaiapas ele, veia e Iesus ge peho robo la valalua e Iuda.
JOH 11:52 Eala moli kama egiteu e Iuda moli ele, ouka, ale eia ge peho veia ge vikapopo tomi e latatu La Tahalo Uru ale pou lalahu te la maututula tomi, ge vagoilo egiteu te Tamala, veia egiteu ge isa moli.
JOH 11:53 Goio e Kaiapas vikara vagari, goio egite sokoti la vikarara la bili pehole Iesus te la haro moli aleiele.
JOH 11:54 Tiele, e Iesus kati pou palala lou te la mata giteu e Iudale, eia goio hele soata la hohoi te la mautu la rorobo isa egite toila e Praim. Tio me eia goio pou muga ovola vikapopo megiteu la valalua la vimari tetala.
JOH 11:55 Goio, la imamala La Ilali La Poloselela tegiteu e Iuda eia hagagaviti. Eala moli la haro la pougolulale souka sibitala, egite la valalua usu te la maututula ge muga soata e Ierusalem, ge igo la vulovulo isahari tegiteu e Iuda te la vimaroka la tahalo, pala muga te la imamala la Poloselela.
JOH 11:56 Tiele egite masagea ge paa muli e Iesus oio e Ierusalem ele. Egite goio magiri oilo te la luma la lotu, me egite vitahi baololi egiteu ele mago “Amuto gabutatala mave? Eia ge gomai te la pougolula, ka ge ouka?”
JOH 11:57 Eala moli egiteu la mulugaluga tegiteu e pris, me egiteu e pariseo tai, egite tutu tolatia giteu la valalua veia mai isa ge hilo vuti e Iesus te la baa ale mave, eia ge goio ge veipalea giteu veia egite ge goio ge lao tolea ge lapua soio te la vigagiala.
JOH 12:1 Goio, la haro iuolo soloio veia egiteu e Iuda ge igo la pougolula te La Ilali La Poloselelale, e Iesus mite me la valalua la vimari tetala, egite goio e Betani. Eia la mautu te Lasaras, la tahalo ale e Iesus vahiliti taroa la lulu la pileho.
JOH 12:2 Goio egite igoale Iesus la ilali oio te la mautu alele. Goma e Maria ubibi la ilali ele, e Lasaras oio vipou tomi legiteu la valalua ale ali vikapopo le Iesus te la ilali ele.
JOH 12:3 Goio e Maria abi isasa la botol la bulu la obu ale mali vivili tataho, la mapala uru, eia goio tigitaro tomia soio te la vahale Iesus, eia goio vipupuru la vahale Iesus ele, eia vipupurua kaluvu, eia goio sorobi tagarala me la ivula ale malau pepehole. Me la malia la bulu la obu ale eia tigi tarotiale, eia mali vivili sesele oilo te la ilo la lumale.
JOH 12:4 Goma, isasa tegiteu la valalua la vimari te Iesus, e Iudas moli ale mulimuli ge sugu taro e Iesus soio te la lima giteu la gima, eia hiliti, eia goio tahi egiteu mago
JOH 12:5 “Ilava etato kama abi la bulu la obu ale la mapala uru pepehole, ge vaharia soio tegiteu la valalua la ilotoloto, veia egite ge lotoa? La lalu ale la mapala uru sesele, koramulia etato ge abi e kina salatu vitu ovola, etato ge suli egiteu la valalua ale pou la savelela te la uati ale uru ele.”
JOH 12:6 E Iudas vikara mai ele, eala moli eia kama gabutatala egiteu la morivava, ouka, eia gabutatala moli veia ge pakalia, la vuhula eia baumuli la tilalau la uati tegiteu ele, me eia pakalikali tai ovolale.
JOH 12:7 Goma, e Iesus veia giteu la valalua la vimari tetala mago “Amuto ge mata soli la tavile aleie, ale eia mai ale mulimuli seseleti la vulovulo la abiri la tahalo ale pehoti, eia raragiti la vovogu te la haro ale egite ge ulaiau te la lulu la pileho.
JOH 12:8 Egiteu la valalua la morivava, egite ge pou omai tamutou la leavalavala tomi, eala moli eau kama ge pou tabaa lou omai tamutoue.”
JOH 12:9 Tio, egiteu la valalua e Iuda usu, egite lolotia veia e Iesus sibitalati oio la mautu e Betani, tio egite goio tetala ovola, egite veia ge hiloa, ge hilo tai e Lasaras ale egite loloti la rerela veia e Iesus vahilititia taro la lulu la pileho.
JOH 12:10 Egiteu la mulugaluga tegiteu e pris, egite hiloa veia la valalua ititia soio te Iesus me Lasaras, la hate giteu mamasi, egite goio kisi la merera veia ge bili e Lasaras, mai tai egite viputumulitia veia ge bili e Iesus tai ele.
JOH 12:11 La vuhula egiteu e Iuda usu gabu tikumuti la igogolu ale uru e Iesus igigoa, egite kati roromuli egiteu e pris ale mamuga egiteu te la lotu tegiteu.
JOH 12:12 La valalua me hatavivile usu, egite guviti veia egite ge hilo la pougolu La Poloselela, egite oio pou tomitio. Goio mai galigeli egite loloa veia e Iesus masaga taia veia ge goio tai e Ierusalem ele.
JOH 12:13 Tiele egite goio abi la veveve la liliu, me egite goio polo lahea soio te la gauruo. Goio egite tatola mago “Hosana! Etato ge vaisale la isa la tahalo ale visibitala la merera te La Uru! La Tahalo Uru ge balava sesele la mulugaluga tegatou e Israel!”
JOH 12:14 Goio, e Iesus goio paa muli isa e donki, me eia goio pou ovolale. Eia mai La Buk Tabu Ale Pala eia veitia maie:
JOH 12:15 Amuto la valalua e Israel, umala amuto ge tataga La Uru mutou; Hiloa eia loiole, eia pouti oata te latule donki, eialati loiole.
JOH 12:16 Eala moli egiteu la valalua la vimari tetala, egite kama rovia veia La Buk Tabu eia vikarati te Iesus ele, ale eia ge guvi oio e Ierusalem mai La Tahalo La Vimahuli sesele tegiteu. Eala moli mulimuli e Iesus beutia soata te Tamala, eia sau tolati la tokoromola tetala, tio te la imamala alele egite gabutala lou la vikararala te La Buk Tabu ale veitia tetalale. Me egite ge gabutala muli lou la vaisalela te la valalua soio tetala ale eia goilo e Ierusalem ele, veia la merera te La Buk Tabu eia puru seseleti ovola.
JOH 12:17 Eala moli la valalua usu virere taliti e Iesus ale eia vimahuli e Lasaras taro la lulu la pileho,
JOH 12:18 tio la valalua me hatavivile usu lolo lahuti la golu la karutula ale eia igotiao, egite goio paa mulia soio te la gauru ele.
JOH 12:19 Tio egiteu e pariseo hiloa mai ele, egite goio vikara mulia kabili tegiteu lou mago “Ealale, etato tovo lalaitia la gauru usu ale ge magiri robo la tahalo ale, eala moli amite kama koramulia. La valalua me hatavivile tomi iti sapatia soio tetala, egite tilimulitiao.”
JOH 12:20 La valalua me hatavivile tomi usu egite goatati e Ierusalem ge igo la lotu tavu La Tahalo Uru te la haro la pougolula te La Ilali La Poloselela. Egite Grik tai isahari tilimuli egiteu soata e Ierusalem ele.
JOH 12:21 Goma egiteu e Grik goio te Pilip, egite veiala mago “Tahalo uru, amite masagea ge hilo e Iesus.”
JOH 12:22 Tio e Pilip goio veiale Andrew la kilaka tegiteu ele, goma e Andrew me Pilip goio veitiale Iesuso.
JOH 12:23 Goio, e Iesus koli la vikararala tegirua mago “La imamala sibitalati ale e Latu La Tahalo ge beua soata la ilo la lage, eia ge sau tola la tokoromola tetala oata.
JOH 12:24 Ale eau vei seselea mutou, mai la vavua la kon eia kama ge paru sotalo la magasa, ge parara, eia kama ge kusi, eia ge tabuli sekela moli mai ele, eala moli mai eia ge paru sesele soio te la magasa ale taritigi, ge parara, tiele eia ge koramulia mai ele veia ge kusi, eia ge vua pepeho seselele.
JOH 12:25 Mai isasa ge gabu vauru moli la mahulila tetalao, la mahulila tetala ge kokovu taroa. Eala moli la tahalo ale poke taro moli la mahulila tetala omai te la magasa, eia ge sau tola la mahulila tetalale, eia ge abi la mahulila ale kama ge kaluvu lou.
JOH 12:26 Tiele mai isasa ge bole la igogolu takue, eia ge tilimuli eau. Me la bilalaha taku eia ge vikapopo eau te la mautu ale eau ge pou ovolao. Mai la tahalo ge la tahalo la igogolu sesele taku, e Tete ge vibalavea.
JOH 12:27 “Ale igoie, eau taga, la vovogu pariri, eala moli eau ge kaka mave, eia koramulia veia eau ge kaka maie mago ‘Tete, eme ge vimahuli eau te la paga ale ge sibitala taku gageie’? Ouka, la vuhula eau kama masagea ge posa maveve taro la igogolu aleie, la vuhula la igogolu taku sesele ale eau gomai tavua eiala eau poga tavutiae igoie.
JOH 12:28 Tete, eia taritigi veia gageie moli eme ge vauru la isamu omai te la igogolu ale eau ge igoa taume!” Goio, e Iesus vikara mai ele kaluvu, me oio moli ovolale la golule isasa eia vikara loata te la ilo la lage mago “Eau vauruti la isagu kaluvuti, me eau ge igo loua gageie.”
JOH 12:29 Goma la valalua me hatavivile ale magiri hagagavi oio tetalale, egite loloa mai ele, egite vei mago “Ge, la mori kumuti.” Eala moli isahari egite vei mago “Ouka, e angelo isasa vikarakara soio tetala.”
JOH 12:30 Goio, e Iesus eia koli la vikararala tegiteu mago “La vikararala ale kama sibitala veia ge suliau, ouka. Eia sibitala veia ge suli la gabutatalala tamutou ele.
JOH 12:31 Gageie La Tahalo Uru ge soko la siloko la viputumulila tetala veia ge mata muli la vulovulo la valalua me hatavivile te la maututula. Me gageie tai eia ge kumuli taro e Satan ale eia pou la mulugaluga te la maututula.
JOH 12:32 Ale igoie eau so popou omai te la maututula, eala moli mulimuli egite ge lao toleau, egite ge vahilitiau te la tauvalautu, egite ge bili pehoau. Me oio vola eau ge puli la valalua me hatavivile tomi somai takue.”
JOH 12:33 Ale e Iesus vikara maie veia ge vei matagagea giteu te la pileho tetalale.
JOH 12:34 Goio, la valalua me hatavivile koli la vikararala tetalale, egite vei mago “Amite rovi la vikararala te ururu tamiteu eia veia e Kraist ge pou, la kaluvula ge ouka. Me ale mave eme veia eme e Kraist eala moli eme goio vikara lou maie ‘Egite ge vahiliti e Latu La Tahalo, ge katua soata te la tauvalautu’? Eme soioge vikara te Kraist ale mave, eme veia eia ere?”
JOH 12:35 Goma, e Iesus veia giteu mago “La matagaga kama ge pou tabaa omai tamutoue. Me ale igoie amuto so sau tatola la matagaga, goio amuto ge tatuga te la matagaga. La vuhula la maligoma souka ge pigi robo amutou. Mai la tahalo tatuga te la maligoma, eia kama hilo tigi la gauru.
JOH 12:36 Ale igoie amuto so sau tatola la matagaga, taritigi amuto ge tautaulailo te la matagagale, tiele amuto ge posa tahalo sesele mai e latatu la matagaga.” Tio e Iesus vikara kaluvu moli ele, eia goio paru keke taro moli egiteu ele, eia polo kokovuti legiteuo.
JOH 12:37 Sesele, e Iesus igoti la golu la karutula usu te la mata giteu, eala moli egite kama tautaulailo soio tetalale.
JOH 12:38 Tiele eia mai sesele la vikararala te la bilalaha ale pala e Aisaia, eia puruti ele, ale eia veia maie: Tahalo Uru, ere roromuliti la merera taume ale amite la bilalaha veitia giteu ovola? Egite ge hilo la igogolu ale vagari te la limamu, eala moli egite kama masaga ge gabu tikumu la bilalaha taume.
JOH 12:39 Goio, la vikararala te Aisaia eia matagaga pepeho mai ele veia egite ge tou e Kraist, mai la merera tetala isa lou eia veia maie:
JOH 12:40 La Tahalo Uru eia avu roboti la mata giteu, eia vivagariti la tia giteu mai la uati. Eala egite kama koramulia ge matagaga te la mata giteu, Me egite kama ge gabutala tigi tai te la tia giteu ele, veia egite ge gabutala rivu la iruru tegiteu, veia eau ge vimahuli egiteu.
JOH 12:41 Me la merera te Aisaia eia matagaga tataho mai ele la vuhula e Aisaia hiloti la marasala te Kraist, eala eia goio veipala la merera tetala mai ele.
JOH 12:42 Sesele, egite la mulugaluga usu tautaulailo tetala, eala moli egite taga egiteu e pariseo, egite kama veipala la tautaulailo tegiteu ele. La vuhula egite gabutatala maie veia egiteu la mulugaluga soukama ge pitaro egiteu loilo te la luma la lotu veia egite umalati ge lotulotu.
JOH 12:43 Eala egite gabu vauru moli la veitatahola te la valalua, egite kama gabu tikumu la veitatahola te La Tahalo Uru veia mai egite ge vaisale e Latula, eia ge vaisale tai egite.
JOH 12:44 Goio, e Iesus tola vagari oata, veia egite tomi ge loloa, eia veia giteu mago “La tahalo ale tautaulailo taku, eia mai ale tautaulailo tamilua me La Tahalo Uru ale bahatiau somaie.
JOH 12:45 La tahalo ale hilotiau, eia hilo taiti e Tete ale bahati eau somaie.
JOH 12:46 Ale eau gomaie, eau mai la matagaga te la maututula veia la valalua tomi ge roromuli eau, egite kamati ge pou te la maligoma.
JOH 12:47 “Mai la tahalo isasa eia lolo la vikarakarala taku me eia kama tilimuliao, eau kama ge veiala isasa la merera, la vuhula eau kama gomai veia eau ge magiri mai la tahalo la viputumulila te la valalua otalo te la magasae, ouka. Eau gomai veia ge vimahuli moli egiteu.
JOH 12:48 La tahalo ale eia poke taro eau, me eia kama roromuli la vikararala takue, isa oio pou talia ale ge vimagiria te la viputumulila. La vikarara la mahulila moli ale eau valoloti le amutou ovola, eia ge tomu sasae la vulovulo la tahalo ale touti la merera taku, te la tapasi la haro ale la vigagiala te La Tahalo Uru ge magiri ovola.
JOH 12:49 La vikarakarala ale kama te la gabutatalala taku moli, ouka. E Tete sesele ale baha taroti eau somaie, eia sesele veveiagu la vikarakarala tomi ale eau ge veveia, me eau ge valolololale.
JOH 12:50 Male eau rovi seselea veia la vikarakarala te Tete ele eia visibitala la mahulila ale la kaluvula ge ouka lou. Mai tai la vikarakarala tomi ale eau veveiae, eau tilimulimulia mai ale e Tete vei mulimuliagu ovolale.”
JOH 13:1 Goio, la haro la pougolula te La Ilali La Poloselela eia hagagaviti, veia mai galigeli egite ge pou sesele ovola, e Iesus rovitia veia la imamala eia guviti veia eia ge hiliti taro la maututula, eia ge goata lou te Tamala. Eala moli eia gogo sesele la valalua me hatavivile ale tetala seseleti omai te la maututula, eia gogo sesele egiteu kara ale eia pehole, eala eia masagea veia ge igo isa uru la irovilala soio tegiteu.
JOH 13:2 Goma, te la maulavi e Iesus me egiteu la valalua la vimari tetala vipou kapopo te la ilali. Eala moli e Satan vagoilo kaluvutia la gabutatalala tetala ale kama kokora te la tiale Iudas Iskariot, e latule Saimon, veia eia ge sugu taro e Iesus soio te la lima giteu la gimao.
JOH 13:3 Eala moli e Iesus rovitia veia e Tamala sugu taro tomitiala la vagagarila tetala tomi soio te la limala. Me eia rovi taitia maie veia La Tahalo Uru sesele bahatia sotaloe, me eia ge beu rivu loua soata te La Tahalo Uruo.
JOH 13:4 Goma e Iesus hiliti taro la ilali ele, eia kai taro la kairobola tetalale, eia goio abi isa la lavalava, eia kisia te la kabilila.
JOH 13:5 Eia igoa mai ele, eia goio abi isasa la dis, eia sigili la lalu sovolale, tio eia sokoti la vuluhi la vaha giteu la valalua la vimari tetala, me eia sorobi tagarala me la lavalava ale eia kisia te la kabililao.
JOH 13:6 Eia igigoa mai ele kara oio te Saimon Pita, goma e Pita veiala mago “Tahalo Uru, mave, eme ge vuhi tai la vahague, ia?”
JOH 13:7 Goio, e Iesus koli la vikararala tetalale mago “La paga ale eau igotia igoie, eme kama rovia, eala moli eme ge rovia mulimulito.”
JOH 13:8 Tiele, e Pita goio vei louala mago “Eme kama ge vuhi la vahague. Umala sesele.” Goma, e Iesus ule baoli louala mago “Mai eau kama ge vuhi emei, eme kamati ge taku.”
JOH 13:9 Tio, e Pita loloa mai ele, eia goio veiale Iesus mago “Ioge, Tahalo Uru, taritigi eme kama ge vuhi moli la vahagu ele, eme ge vuhi la limagu me la gamagu taie.”
JOH 13:10 Eala moli e Iesus vei louala mago “Amuto marokati. La tahalo ale pupuruti, eia maroka moli, eala moli taritigi eau ge vuhi moli la vaha mutou, amuto ge maroka sapa viruruti. Sesele, amuto marokati, eala moli kama amuto tomi ele.”
JOH 13:11 Me ale eia vikara mai ele, la vuhula eia rovi palati la tahalo ale ge veipalea soio tegiteu la gima. Eala eia vei la vikararala aleie “Kama amuto tomi marokale.”
JOH 13:12 Tio, e Iesus vuhi kaluvuti la vaha giteu ele, eia goio kai lou la kairobola tetalao, eia goio pou rivu lou, eia goma tahi egiteu ele mago “Soioge amuto ge matagagati te la paga ale eau igotia soio tamutoue, ia?
JOH 13:13 Sesele, amuto totoi leau veia Tahalo La Vimari, me Tahalo Uru, me eia taritigi ale amuto totoiau mai ele, la vuhula eau La Uru mutou sesele ale vimari le amutou la gauru la matagaga.
JOH 13:14 Tiele amuto matagagati veia eau La Tahalo La Vimari tamutou, La Uru mutou sesele, eau vuhiti la vaha mutou ele mai la igogolu te la bilalaha bulalahu moli. Eia taritigi tai veia amuto ge vuhi tai la vaha giteu e tabarabara mutouo.
JOH 13:15 Eau vimariti le amutou la vulovulo aleie, goma amuto tai ge igigo la vulovulo ale maie soio te la valalua me hatavivile taku, amuto ge mai la bilalaha moli tegiteu.
JOH 13:16 Ale eau vei seselea mutou, la bilalaha eia kama oata te la uru tetala ale babahea. La tahalo ale tuga te la igogoluo, eia kama uru te la tahalo ale bahea.
JOH 13:17 Mai amuto ge rovi tigi la masova la merera taku aleie, me amuto ge igo seselea veia ge vibisi lou amutou mai ale eau vibisiti eau te la mata mutou igoie, tio amuto ge pou la balavala ovola, la vuhula amuto roromuliti La Uru mutou mai ele.
JOH 13:18 “Eala moli la vimari aleie, eau kama veveia mai ele tamutou tomi. Eau rovi amutou ale eau hiloviti amutou veia ge taku sesele. Eala moli eia ale kama taku, eia igogolu moli mai ele veia ge vipuru sesele la merera te La Buk Tabu Ale Pala eia veia maie: La tahalo ale vaali tomi leauo, eia tao taluti eau me la vahalale.
JOH 13:19 Ale eia soukama igoa, eala moli eau veipala mugatia mutou ovolae. Tiele mai eia ge sibitala mai eau veitiae, tio amuto ge taua la ilo mutou takue veia eau moli la tahalo ale loio seseleti te La Tahalo Uru veia ge vimahuli amutou.
JOH 13:20 Ale eau vei seselea mutou, mai isasa eia roromuli la tahalo ale eau bahea te la valolo ale taritigi, eia mai ale roromuli seseleti eaue, me eia roromuli taiti La Tahalo Uru ale bahatiau somai te la maututula.”
JOH 13:21 Ale e Iesus veiti la merera aleie la vuhula la kalulula eia gabuti la tikumula ale uru pepeho. Eia goma tala pala molitia, eia goio veia giteu la valalua tetalale mago “Ale eau ge veipalea mutoue veia isasa moli oilo tamutou ele, eia ge veipala eau soio tegiteu la gima veia egite ge sivuti eau.”
JOH 13:22 Tiele, ale eia veitia maie, egiteu la valalua la vimari tetalale vimata tatavu moliti, egite kama rovia veia eia vevei ere tegiteu ele.
JOH 13:23 La tahalo la vimari isasa, e Iesus masaga seselea, eia pou hagagavi sesele te Iesus,
JOH 13:24 goma e Saimon Pita tuhu mapatiale, eia goio veiala mago “Eme ge tahia mago ‘Ale eme vevei ere mai ele?’”
JOH 13:25 Goma, la tahalo la vimari ele eia tasuku hagagavi sesele soio te Iesus, eia goio tahia mago “Ale eme vevei ere mai ele?”
JOH 13:26 Goma, e Iesus koli rivuala mago “Ale eau ge bubu la bautu la bret te la bulu la ilali, me eau ge abialao, la tahalo moli ele.” Tio eia goio abi la bautu la breto, me eia vuhia te la bulu la ilalio, eia goio abiale Iudas Iskariot e latule Saimon ele.
JOH 13:27 Tio ale e Iudas abiti la bautu la ilali alele, e Satan goilo tetala. Goma e Iesus veiala mago “La igogolu ale eme masagea ge igoa, eme ge igo hari molia.”
JOH 13:28 Eala moli egite tomi ale pou te la ilali ele, isa kama rovi la masova la vikararala ale e Iesus veiale Iudas mai ele.
JOH 13:29 Isahari, egite gabutalea veia e Iudas eia baumuli la tilalau la uati tegiteu, egite gabua veia e Iesus soioge veveiala eia ge loto isahari la ilali ale egite ge alia te la pougolula uka eia veveiala veia ge abia giteu la morivava bakisi la uati.
JOH 13:30 Goio, e Iudas ali kaluvu moli la bautu la ilali ele, eia goio igo harari moli, eia galiti sogalao. La paga tai logoti.
JOH 13:31 Goio, e Iudas galiti sogalao, e Iesus goma vei mago “Ale gageie e Latu La Tahalo ge abi la tokoromola tetala mai la matagaga te Tamala sesele. La valalua usu ge vaisale La Tahalo Uru te la igogolu ale eau ge igoa gageie.
JOH 13:32 Ale La Tahalo Uru ge abiagu gageie la tokoromola ale tetala sesele.
JOH 13:33 Amutou e latatugu, eau ge vipou tomi le amutou bakisi moli, kamati ge tabaa, mulimuli amuto ge papaa eau. Mai pala eau veitia giteu la mulugalugao, mai ale igoie eau vei taitia mutou ovola maie veia amuto kama koramulia ge goio la mautu ale eau ge goio vola.
JOH 13:34 “Male ge, eau ge abia mutou la merera isa ale halaba sesele maie: Amuto ge vipuhi tigi legiteu e tabarabara mutou, ge gogo sesele egite. Mai ale eau puhi tatahoti amutou, eau gogo amutou, amuto ge gogo tai egiteu e tabarabara mutou ele.
JOH 13:35 Tiele mai amuto ge igo seselea mai ale eau veitia mutou ele, la valalua tomi ge rovia maie veia amutou la valalua la vimari taku sesele, la vuhula amuto vipuhi tigi tataho seseleti.”
JOH 13:36 Goio, e Saimon Pita tahi e Iesus mago “Tahalo Uru, eme ge gove?” Goma e Iesus ule baoliala mago “Eala moli la mautu ale eau ge govolao, eme kama koramulia ge tilimuliau sovolao. Sesele, eala moli eme ge tilimuliau soio vola mulimuli.”
JOH 13:37 Goio, e Pita vei louale Iesus mago “Tahalo Uru, ilava eau kama koramulia ge tilimulime gageie? Eau ge sugu taro la mahulila taku tai veia ge taho loio taume!”
JOH 13:38 Goma, e Iesus koli rivu louala mago “Eme ge sugu taro la mahulila taume veia ge suliau, ia? Ale eau vei seseleamu, e kukureko souka ge tali, eme ge tahi taroti eau vaka tolu veia eme kama roviau.”
JOH 14:1 Goio, e Iesus veia ge viteteli lou egiteu la valalua tetala, eia goio veia giteu mago “Amuto umala ge ilo buruko, amuto ge taua la ilo mutou te La Tahalo Uru me amuto ge tautaulailo tai takue.
JOH 14:2 Oio te la luma te Tete la kapiututula usu, mai eia kama ge mai ele, eau ge veipalatia mutou ovola maio.
JOH 14:3 Ale eau ge goio ge raragi la muli mutou. Tio mai eau ge raragi kaluvuti la muli mutouo, eau ge beu loua somai ge puli amutou soio taku veia amuto ge pou vikapopo leau oio vola. Eia ge mai ele, la mautu ale eau ge pou ovolao, amuto tai ge vikapopo leau ovolao.
JOH 14:4 Amuto roviti la gauru la mautu ale eau ge govolao.”
JOH 14:5 Tio, eia vikara kaluvu mai ele, e Tomas goio tahia mago “Tahalo Uru, eme ge gove? Amite kama rovia. Me amite ge rovi la gaurula mave?”
JOH 14:6 Goma, e Iesus vei mulitialale mago “Eau sesele la gauru, me eau tai la merera ale sesele, me eau la vuhu la mahulila. Isasa kama koramulia ge sibitala oio te Tete te la gauru isapolo, ouka. Omai moli taku sekelae.
JOH 14:7 Eala moli mai amuto rovitiaue, tio amuto ge rovi tai e Teteo. Ale sokotia igoie amuto rovitia, me amuto hilo taitiae.”
JOH 14:8 Goio, e Pilip veiala mago “Tahalo Uru, eme ge veipala e Tamamu somai tamiteu, tio amite ge sagege moli mai ele, amite ge la kilaka isa lou ge ouka.”
JOH 14:9 Goma, e Iesus veiala mago “Mave, Pilip, eau pou tabaa seseleti vikapopo le amutoue, eme soukato roviau, ia? Mai isa hiloti eaue, eia hilo taiti e Tete. Ilava eme vei lou maie ‘Veipalea miteu e Tamamu’?
JOH 14:10 Soioge eme souka matagaga leau veia eau pou te Tete, me e Tete pou taku e? La vikarakarala ale eau ababia mutou ele, kama te la gabutatalala taku moli. E Tete pou taku, me eia igigo la igogolu tetalale.
JOH 14:11 Taritigi amuto ge tautaulailo te la vikararala ale maie: Eau pou te Tete, me e Tete pou takue. Mai eia ge vagari tamutou veia amuto ge tautaulailo te aleie, eia koramuli molia veia amuto ge gabutala la igogolu tomi ale eau igotiao, ale moli ele amuto ge tautaulailo taku ovola.
JOH 14:12 Ale eau vei seselea mutoue, mai isasa ge tautaulailo takue, tiele la igogolu tomi ale eau igigoae, eia tai koramulia ge igoa. Eala moli eia ge igo lou isahari ale uru, eia ge kara polo te ale eau igotiae, la vuhula eau ge goio te Tete,
JOH 14:13 me la golugolu tomi ale amuto ge kaka tavua oilo te la isagu, eau ge igoa mai ele, me amuto tomi ge vaisale sesele e Tete oio te la visuli taku ale uru soio tamutou.
JOH 14:14 Mai te la isagu, amuto ge kaka tavu eau veia ge igo la golu isasa, eau ge igo molia mai ele.
JOH 14:15 “Mai amuto ge gogo seseleau, amuto ge tilimuli tigi la viputumulila taku ele.
JOH 14:16 Tio eau ge kaka soio te Tete, eia ge sugu taroa mutou la tahalo la visuli ale isapolo veia eia ge vivagari amutou, me eia ge vipou tomi le amutou la kaluvula ge ouka.
JOH 14:17 Ale eia La Kalulu La Marokala sesele, eia ge puli amutou soio te la gauru ale sesele. Egite la valalua me hatavivile te la maututula ale kama rovi eau, egite kama koramulia ge sau tola La Kalulu La Marokala. Egite kama koramulia ge hiloa, me egite kama rovi taia. Eala moli amuto ale taku rovia. Eia ge vipou tomi le amutou, me eia ge goilo tamutou, eia ge mahuli oilo tamutou ele.
JOH 14:18 “Ale eau ge hiliti taro amutoue, amuto kama ge la tulagola mai e guliliki ale e tamala me tilala ouka. Eau ge gomai lou tamutou.
JOH 14:19 Male bakisi moliti, la valalua me hatavivile kati ge hilo louau, eala moli amutou ale taku ge hilo louau, la vuhula eau pou te la mahulila, me amuto ge pou tai te la mahulila ale eau ge abia mutou.
JOH 14:20 Te la imamala alele, ale eau ge mahuli rivu lou ovolao, amuto ge rovi seselea veia eau pou te Tete, me amuto ge pou taku, me eau ge pou tamutou.
JOH 14:21 Mai la tahalo ale sau tola la merera taku me eia roromuli seseleao, la tahalo alele eia veipalea oio te la vulovulola ale taritigi veia eia gogo seseleau. Me la tahalo ale gogo eauo, e Tete ge gogo taia. Me eau tai ge gogoa, eau ge pala tavua, eia ge hilo seseleau.”
JOH 14:22 Ale e Iesus veitia maie, goio e Iudas (kama e Iudas Iskariot) eia veiale Iesus mago “Tahalo Uru, ilava eme ge magiri pala te la mata miteu, me eme kama masagea ge magiri pala te la mata giteu la valalua me hatavivile ale kama taume?”
JOH 14:23 Goio, e Iesus koli la vikararala tetala mago “Mai la tahalo isa eia ge gogoau, eia ge roromuli sesele la vikararala taku, tiele e Tete ge gogo tai la tahalo alele, me amila ge goio tetala, amila ge pou moli tetalao, kamati ge hele taro loua.
JOH 14:24 Eala moli la tahalo ale kama gogoau, eia kama ge tilimuli titigi la vikararala taku veia eia ge roromulia. Eala moli la vikararala ale amuto loloa taku, eia kama taku moli, la vikararalale eia loio seseleti te Tete ale bahatiau somaie.
JOH 14:25 “Ale eau so vipou tomi le amutou, me eau veitia mutou la vimari tomi aleie veia amuto ge rovia.
JOH 14:26 Eala moli La Tahalo La Visuli sesele tamutou, eia La Kalulu La Marokala. Eia ge abi la muligu, e Tete ge bahea somai tamutou. Tiele eia ge vimari le amutou te la mari te la kalulu mutou, me la vimari tetalale eia ge usu sesele. Me eia ge vimatagaga tai la gabutatalala tamutou, tio amuto ge gabutala lou la vikararala tomi taku ale eau veveia mutou ovolale.
JOH 14:27 Ale eau ge tuga taro amutou, La Kalulu La Marokala eia ge vitahoa mutou, la tia mutou oilo ge malilo tataho. Mai la tia mutou ge malilo tataho omai taku, amuto kamati ge rovi la iloburukola. Ale eau kama toi bulalahua soio tamutou mai la toi tigila te la valalua ale omai te la maututula, ouka sesele. Ale taku eia la merera ale sesele viruru moli, taritigi veia la ilo mutou umala ge buruko veia amuto ge taga.
JOH 14:28 Amuto loloti la vikararala ale eau veitia mutou ovola maie ‘Eau ge tuga taro amutou, eau ge beu loua somai tamutou’. Mai ge amuto ge gogoau, tiele amuto ge sagege te la tuluga taku soio te Tete, la vuhula e Tete uru me eia muga taku, eala mai amuto ge taku sesele amuto ge matagaga veia eau ge beu loua soio te Tete ale baha tavutiau, eala eia taritigi veia amuto ge sagege moli.
JOH 14:29 La merera tomi ale, eia soukama sibitala mai ale eau veitia, eiala moli ale eau veipala mugea mutou ovola, tio mai mulimuli eia ge sibitalao, amuto ge matagaga sesele.
JOH 14:30 “Eau kati koramulia ge veia mutou la merera usu lou, la vuhula e Satan ale la mulugaluga te la maututula, eia loiole, la imamala taku eia hagagaviti. Eala moli eia kama koramulia ge vipolo galeau te la igogolu ale eau ge igoa gageie.
JOH 14:31 Eala moli eau vagari moli veia la valalua me hatavivile te la maututula tomi ge rovia veia eau gogo e Tete, me eau igo la igogolu sesele mai ale e Tete veitiagu ovola. Ioge, amuto ge hiliti, etato ge tuga.”
JOH 15:1 Goio, e Iesus vei lou isasa la vikarara la tilovo te la obu la vaen maie “Eiau, eau la kabili la obu sesele, me e Tete, eia e taho la mahuma la obu ele.
JOH 15:2 Egite la halalagu ale kama tau la vavua giteuo, e Tete ge vali taro egiteu, eala moli egiteu la halalagu ale tau la vavua giteu, eia rauvevei egiteu veia egite ge vua pepeho lou.
JOH 15:3 Me amutou ale taku, amuto marokati te la vikarakarala ale eau veitia mutou ovolale.
JOH 15:4 Ioge, amuto ge pou taku, me eau ge pou tamutou. La vuhula, mai la halala la obu eia kama ogitola oio te la kabili la obulao, eia kama koramulia ge tau la vavuala. Eia mai tai ele soio tamutou, mai amuto kama ge pou taku.
JOH 15:5 “Eau la kabili la obu, me amuto la halalagu. Ale pou taku, me eau tai pou tetalao, eia ge vua pepeho. La vuhula mai etato ge vipou baa taro, amuto kama koramulia ge igo sesele la paga isasa.
JOH 15:6 Mai isasa eia kama pou takue, tiele e Tete ge pigi galea mai la halala la obu ale egite vali tarotia, eia ge tabuli moli ge magolu, e Tete ge tau vikapopoa ge pigia soio te la havi, eia ge karere.
JOH 15:7 Mai amuto ge pou takue, me la vikararala taku eia ge pou tai tamutou ele, tio amuto ge kaka tavu la paga ale amuto masageao, e Tete ge sugu taro molia mutou.
JOH 15:8 Mai amuto ge tau usu la vavua mutou, tiele, la isale Tete ge vavava ovolale. Tio amuto ge pou mai la valalua la vimari taku.
JOH 15:9 “E Tete gogotiau, mai tai eau gogoti amutoue. Me amuto ge pou moliti oio te la gilogo taku ele.
JOH 15:10 Mai amuto ge roromuli sesele la merera takue, amuto ge pou oio te la uluva la gilogo taku. Eia mai moli eiaue, eau roromuli sesele la merera tomi te Teteo, eala eau pou seseleti oilo te la gilogo tetalae.
JOH 15:11 La vikararala ale, eau veitia mutou ovolae, veia la sagegela taku eia ge pou sesele tamutou ele, veia la sagegela taku tai eia ge volu sesele oilo te la tia mutou la valalua taku.
JOH 15:12 Male, la merera taku ale tikumu sesele eia maie veia amuto ge vipuhi tigi sesele, amuto ge vigogo baoli mai ale eau gogoti amutou, eau puhi tataho sesele amutoue.
JOH 15:13 Eala moli mai la tahalo isasa eia ge sugu taroti la mahulila tetala veia ge suli e tabarabaralao, la vulovulo la gilogo isa oukati lou veia ge kara polo ovolale.
JOH 15:14 Amuto ge e tabarabaragu sesele, mai amuto ge igo sesele la igogolu tomi ale eau bahati amutou ovolale.
JOH 15:15 Tiele eau kamati ge toi lou amutou veia amutou la bilalaha moli taku, la vuhula la bilalaha, eia kama rovi la gabutatalala te la mulugaluga tetala ale eia babahea oio volae, tetala la igogolu la bilalaha moli veia ge igo moli la masasagala te la mulugaluga tetala. Eala moli sokoa igoie, kara ale mulimuli, eau toiti le amutou e tabarabaragu, la vuhula la merera tomi ale eau loloa te Tete, eau veitia mutou ovolale, amuto rovi tomitia.
JOH 15:16 Amuto kama hilovi tavuau, ouka. Eau moli, eau hilovi tavuti amutou, veia amutou ge taku. Me eau tabariti amutou soio te la igogolu la valolo taku veia amuto ge tuga, amuto ge tau la vavua mutou, me la vavua mutou eia ge tai tola. Tiele mai amuto ge kaka la paga isa te la isagu, e Tete ge abia mutou.
JOH 15:17 La viputumulila taku eau abi loua mutou, eia maie veia amuto ge vipuhi tigi tataho me egiteu e tabarabara mutou, amuto ge pou tataho te la vigogo baolila sesele.”
JOH 15:18 Goio, e Iesus veia giteu mago “Mai la valalua te la maututula, ale egite kama roviau, mai egite ge gima amutou ale taku, taritigi amuto ge rovia veia egite gima pala taiti eaue.
JOH 15:19 Sesele mai amuto ge la tahalo bulalahu moli ale kama roviau, tiele egite la valalua me hatavivile te la maututula ale tilimuli moli la gabutatalala te la vovo, egite ge masaga pepeho amutou ele. Eala moli amuto kama mai egiteu, ouka, eala la valalua me hatavivile te la maututula ge gima sesele amutou, la vuhula amutou isapolo, amutou taku, eau hiloviti amutou taro la vulovulo te la maututula ale kama kokora.
JOH 15:20 Eala moli amuto ge gabutala tigi la vikararala ale eau veitia mutou ovola maie veia la bilalaha eia kama oata te la uru tetala. Eau La Uru mutou me egite vileau, eala eia matagaga tai mai ele veia egite ge vile tai amutou ale bisisi taku. Mai egite ge loloti la vikararala takue, egite ge lolo tai la vikararala tamutou. Eala moli ouka.
JOH 15:21 Egite ge viligi sesele amutou, ge vile amuto, la vuhula egite kama rovi e Tete veia eia baha eau somaie. Tiele egite ge gima sesele amutou, la vuhula amutou taku.
JOH 15:22 Sesele, mai eau kama ge guvi omai veia ge vikara matagaga soio tegiteuo, tio la iruru kama ge pou tegiteu, la vuhula egite vava bububu moli, la matagaga ouka. Eala moli ale igoie egite loloti la valolo taku, la matagaga eia sibitalati tegiteu, eala moli egite kama masaga ge sau tolea, eala egiteu la iruru ale uru pepeho pouti oio tegiteuo. La gauru isa oukati lou veia ge tau robo la iruru tegiteu.
JOH 15:23 La tahalo ale gima eaue, eia gima taiti e Tete.
JOH 15:24 Sesele, mai eau kama ge igo la igogolu tomi ale pala egite kama hilo isasa eia igoa oio tegiteu, mai la golu la karutula ale uru sesele, mai egite kama ge hilo la igogolu taku kabili tegiteu mai ele, egite la iruru ge ouka. Ale egite hilotia, eala moli egite kama gabu tikumua, egite goio gima moli amila tomi me Tete.
JOH 15:25 Te la vulovulo ale egite igotiae, eia igo puruti la vikararala te ururu tegiteu la valalua e Iuda lou, te la merera la viputumulila tegiteu ale pala, eia vikara matagaga te la pulolou te Kraist omai te la maututula maie: La valalua gima bulalahu moli eau, la vuhula ouka.
JOH 15:26 “Eala moli la tahalo ale ge vivagari amutou, eia oio so vipou toitomi me Tete, tio eau ge goio ge bahea somai tamutou. Eia La Kalulu La Marokala, eia la vuhu la visuli tamutou, eia la vuhu la merera tomi ale sesele. Eia ge gomai tamutou, eia loio seseleti te Tete. Eia ge lapu matagaga la gabutatalala tamutou te la vuhu la igogolu tomi ale eau igotia.
JOH 15:27 Eala moli amuto tai ge vikara matagaga te la vuhu la igogolu taku, amuto ge valolo la valalua me hatavivile veia amutou taku, la vuhula amuto pouti taku palati ale eau soko la igogolu ovolao, karati igoie.”
JOH 16:1 Goio, e Iesus vei loua giteu la valalua tetala mago “La vikarakarala ale eau veitia mutoue, eia ge vivagari amutou veia amuto umala ge tutuloku.
JOH 16:2 Mulimuli egiteu e Iuda ge pitaro amutou loilo te la lumaluma la lotu oio te la maututula. Goio, la imamala alele ge sibitala, egiteu ale ge bili peho amutouo, egite ge gabua veia egite igo titigi la igogolu te La Tahalo Uru mai ele, eala moli oukae.
JOH 16:3 Egite ge igo la viligila ale mai ele soio tamutou, la vuhula egite kama rovi amila me Tete.
JOH 16:4 Eala moli eau vei matagagatia mutou ovolae. Mulimuli mai ge la imamala alele ge sibitala, amuto ge loho molitia solagu, la vuhula eau vei palatia mutoue. “Ale pala eau kama veia mutou la iligiligi tomi ale, veia amuto ge ligi ovola, la vuhula eau so pou vikapopo amutoue.
JOH 16:5 Eala moli ale eau ge goio te Tete ale bahati eau somaie, amuto kama ge gabutatala papai veia amuto ge rovi la vuhu la tuluga taku veia amuto ge tahiau mago ‘Eme ge gove?’
JOH 16:6 Amuto oiole ilo buruko moliti te la vikarakarala ale eau veitia mutou ovolae.
JOH 16:7 Eala moli ale eau vei seselea mutoue, mai ge eau ge tuga taro amutou, ale eia ge taritigi sesele tamutou, la vuhula mai eau kama ge tuga, la tahalo ale ge vivagari amutouo, mai La Kalulu La Marokala ale eau veitia mutou ovolao, eia kama ge gomai tamutoue. Tio mai eau ge tuga, tiele eau ge baha taroa somai tamutoue.
JOH 16:8 Mai eia ge gomai, eia ge sile pala seselea la mata giteu la valalua te la maututula ale egiteu kama tetala, veia egite ge rovi tigi la iruru tegiteu, egite ge rovi tigi tai la vulovulo ale matata, me egite ge matagaga tai veia la haro la viputumulila te La Tahalo Uru, eia ge guvi.
JOH 16:9 Ale eau toitia la iruru tegiteu, eia mai la vareagila tegiteu ale egite kama masagea ge roromuliau.
JOH 16:10 Omai taku amuto hilo seseleti la vulovulo ale matata, la vuhula eau ge beu loua soata te Tete, amuto kati ge hilo louau, eala moli e Tete ge vagoiloau mai la tahalo la marokala tetala sesele.
JOH 16:11 Me ale eau veitia te la viputumulila, eau veia mai ele la vuhula e Satan eia mai ale viluati te la viputumulila te La Tahalo Uru ale ge puru te la pileho taku, eia la mulugaluga te la maututula, eala moli eia la vagagarila oukati.
JOH 16:12 “Eau la vikararala omai usu veia eau ge veia mutou ovola, eala moli amuto kama koramulia ge gabutala tomia gageie.
JOH 16:13 Mulimuli mai La Kalulu La Marokala ale la vuhu la merera tomi ale sesele, eia ge gomai tamutou, eia ge tata amutou soio te la merera tomi ale sesele, eia kama ge veia mutou la vikarakarala ale tetala moli, ouka. Eia ge veipala moli la vikarakarala ale eia loloa te Tete, eia ge veipalea mutou la papaga ale ge sibitala mulimulio.
JOH 16:14 Eia ge ababi la vikararala taku, eia ge tovo tataho amutou ovola, tiele me eia ge vitokoromo eau ovolale.
JOH 16:15 La papaga tomi te Tete eia sugu tarotiagu. Eala eau veitia mutou veia La Kalulu La Marokala eia ge abi la vikarakarala taku, eia ge veveia mutou ovolale.
JOH 16:16 “Bakisi moliti amuto kamati ge hilo lou eau, eala moli eia kama ge tabaa, amuto ge hilo lou eaue.”
JOH 16:17 Goio, egite la valalua la vimari tetala lolo la vikararala tetala mai ele, egite isahari goio vitahi baololi lou egiteu mago “Mave, la masova la vikararala ale eia veitia gatoue, eia soioge mave? Ale eia vei maie ‘Bakisi moliti amuto kamati ge hilo lou eau, eala moli eia kama ge tabaa amuto ge hilo lou eau’ me eia vei taitia maie ‘Eau ge goio te Tete’,
JOH 16:18 mave, la masova la merera tetalale, eia mave sesele? Etato oio kama rovi la masova la vikararala ale eia veitia mai ele.”
JOH 16:19 Goio, e Iesus rovitia veia egite masagea ge tahiale, eia goio veia giteu mago “Amuto vitahi baololi amutou te la vikararala ale eau veia maie veia ‘Bakisi moliti amuto kamati ge hilo eau, eala moli eia kama ge tabaa, amuto ge hilo lou eau’?
JOH 16:20 Ale eau ge vei seselea mutou maie veia amuto ge tali pepeho, amuto ge ilo buruko sesele, eala moli la valalua me hatavivile te la maututula, ale egite kama taku, egite ge sagege pepeho ale eau ge vilua. Eala moli la iloburukola ale amuto ale taku ge gabua, eia ge vulo, la sagegela ge uru sesele tamutou ele.
JOH 16:21 Mai la tavile ale ga tapaposati, eia rovi la haro la piligo tetala eia sibitalati ele, eia ilo buruko te la iligiligi la piligole. Eala moli mai eia taposati e latulao, eia kamati gabutala lou la iligiligi ele. Oukati. Eia sagege seseleti te latula ale eia visibitalatia.
JOH 16:22 Tio la merera aleie, eia mai tai tamutoue. Ale igoie la ilo mutou eia buruko, eala moli eau ge hilo lou amutou, la tia mutou eia ge sagege lou, isa kamati ge abi taro le amutou la sagegela ale amuto ge gabuale.
JOH 16:23 Tiele te la imamala alele, amuto kama ge tahi louau te la paga isasa. Ale eau vei seselea mutoue, mai amuto ge kaka e Tete la paga isasa, eia ge abia mutou, la vuhula amuto kakati te la isagu.
JOH 16:24 Ale pala amuto souka kaka isa la paga te la isague, la vuhula eau souka goata rivu lou te Tete. Ale igoie amuto matagagati, taritigi veia amuto ge kaka, me e Tete ge abia mutou la paga ale amuto masagea, veia eia ge visibitala sesele la sagegela ale uru oio te la tia mutou.
JOH 16:25 “Ale eau vikarakarati soio tamutou te la vikarara la tilovo molie, eala moli mulimuli eau kamati ge vimari lou amutou te la vikarara la tilovo, eau ge sile pala molia mutou la vulovulole Tetele.
JOH 16:26 Te la imamala alele, amuto ge kaka te la isagu, me Tete ge suli amutou, la vuhula amutou taku. Eala moli eau kama veia mutou veia eau moli ge kaka e Tete veia eia ge suli amutou.
JOH 16:27 E Tete ge gabu tikumu la kilaka tamutou, la vuhula eia gogo tai amutou ale taku, eia masagea veia ge suli amutou, la vuhula amuto gogoau me amuto rovi taia veia eia sesele baha eau.
JOH 16:28 Mai ale pala eau vipou tomi le Tete, me eau hiliti taroa somai la maututulae, tio eau ge hiliti taro lou la maututulae, eau ge beu loua soio te Teteo.”
JOH 16:29 Goio, la valalua la vimari tetala veiala mago “Ale eme kamati vikara la tilovo lou, eme sile pala sesele molitiae.
JOH 16:30 Ale igoie amite rovi seseletia veia eme la vuhu la mari tomi, me eme kama koramulia veia ge pou tali la tilahi te la tahalo isasa, me amite rovi sesele taia veia eme sibitala loio te La Tahalo Uru, me eme gomaie.”
JOH 16:31 Goma, e Iesus goio koli baoli loua giteu ele mago “Ale amuto matagaga seseleti, ia? Amuto tautaulailo seseleti taku.
JOH 16:32 Ale la imamala alele eia hagagaviti ge sibitala, male eia sibitalatie, me amuto ge hele bura taro eau soio te la mautu tamutou isasasao, eau sekela moliti ge poue. Eala moli eau kama ge pou sekela, e Tete ge vipou tomi leaue.
JOH 16:33 Eau masagea veia amuto ge pou taku, me amuto ge sau tola la vimalumalu takue. La valalua ale kama roviau, egite ge viligi amutou, la ilo mutou kama ge buruko, la vuhula eau bolehohoti egiteu.”
JOH 17:1 Tio, e Iesus vei kaluvu tomiti la vikarakarala alele, eia goio taga soata la mori, eia kaka maie “Tete, la mata la haro taku eia sibitalati. Taritigi eme ge vitokoromo eau, e Latumu, veia eau ge vitokoromo rivu lou emei te la pileho taku.
JOH 17:2 La vuhula eme abitiagu eau e Latumu la merera ale taritigi veia eau ge baumuli la valalua me hatavivile tomi ale tautaulailo, veia eau ge vimahuli egiteu ale eme hiloviti egiteu veia egite ge taku.
JOH 17:3 Me la mahulila ale seselele, ale la kaluvula ge ouka, eia maie veia egiteu ale taku ge rovi seseleme veia eme sekela moli La Tahalo Uru ale sesele, me egite ge rovi tataho tai eau mai ele veia eau e Kraist ale eme baha tarotiau somaie.
JOH 17:4 Male, eau vitokoromoti la isamu ale uru makapipila omai te la maututula. La igogolu ale eme abitiagu veia eau ge igoa, eau igo sesele tomitiae.
JOH 17:5 Tete, eau masagea veia eme ge vitokoromo tai lou leau la vitokoromola ale eme visati leau alaurati te baruatao, ale la maututula souka sibitala.
JOH 17:6 “Eau veipalati la isamu soio tegiteu la valalua te la maututula ale eme sugu taroti egiteu somai taku veia egite ge taku. Egiteu taume, eala moli eme sugu taro moli egiteu somai takue, me egite roromuliti la vikarakarala taume.
JOH 17:7 Ale igoie egite rovitia veia la vagagarila tomi taku eia loio moli taume sekela.
JOH 17:8 La vuhula eau veitia giteu la vikarakarala taume ale eme abitiaguo, egite roromulitia, me egite rovi seselea mai ele veia eau sibitala loio taumele, me eme baha taro seseleti eau somaie.
JOH 17:9 Ale eau kakame tegiteu aleie, eau kama kakame tegiteu la valalua me hatavivile te la maututula, ale egite kama rovi eau. Eau kakame tegiteu moli ale eme sugu taroti egiteu somai takue, la vuhula egiteu aleie taume sesele.
JOH 17:10 La vagagarila taku tomi eia loio taume. Me la vagagarila tomi taumele eia taku, me eia veipalea veia eau e Latumu sesele ale marasa.
JOH 17:11 Ale eau kamati ge pou lou omai te la maututulae, eala moli egiteu ale taku so popoue, me eau ge goio taumele, egite ge savelea la visuli taume. Tete, eme La Tahalo La Marokala, eme ge baumuli tigi egiteu ale eme abitiagu egiteue, egite ge magiri vagari te la isagu ale eme visati leau, me egite ge sovei etalua ale etala isa molie.
JOH 17:12 Ale eau pou omai tegiteue, eau baumuli tigiti egiteu, la vuhula eme sugu taroti egiteu somai taku, taritigi eme ge baumuli egiteu te la vagagarila te la isamu ale eme vauru eau ovola. Eau sigirobo egiteu veia egite isasa kama ge vilua, eala moli ale isa moli sekela viluati, alele eia vipuru seseleti la merera te La Buk Tabu Ale Pala ale veia la tahalo ale ge sugu taroau eia ge vilua. Eia e latule Satan moli.
JOH 17:13 “Ale eau ge goio taumele, la vikarakarala ale eau veveia omai te la maututulae, veia egiteu ale taku ge loloa, egite ge sau tola la sagegela taku ale uru sesele te la tia giteue.
JOH 17:14 Eau veitia giteu la vikarakarala taume, eala moli la valalua ale kama roviau, egite ge gima egiteu ale taku, la vuhula egiteu ale taku kama mai egiteu ale kama roviau. Mai tai eau, la vulovulogu eia kama mai la vulovulo giteu la valalua ale kama kokora, egiteu ale te la maututula egite kama rovi eau.
JOH 17:15 Ale eau kama kakame veia eme ge abi taro egiteu lotalo te la maututulae, ouka, eau kaka moli veia eme ge sigirobo egiteu te la igo gegerula te Satan.
JOH 17:16 La vuhula egiteu me la valalua ale kama roviau, egite kama visauru, mai tai eau, eau kama visauru megiteu la valalua ale kama taku.
JOH 17:17 Taritigi eme ge vimaroka egiteu te la merera taume ale sesele, la vuhula la merera taume eia sesele tomi moli.
JOH 17:18 Mai ale eme bahatiau somai te la maututulao, mai eau tai bahati egiteu soio te la maututula te la igogolu la valolo ale taritigi.
JOH 17:19 Eau sugu taro la mahulila taku soio taume veia oio vola egite ge magiri vagari te la marokala, me egite ge la valalua taume sesele mai tai eau.
JOH 17:20 “Eau kama kaka moli eme tegiteue, eau kaka tai eme tegiteu ale ge lolo la valolo tegiteu me egite ge roromuliau ovola.
JOH 17:21 Eau masagea veia egite tomi ge isa moli, mai ale eme pou taku, me eau pou taume, tiele egite ge mai tai ele veia egite ge pou tegalua, veia la valalua me hatavivile te la maututula ge rovia veia eme bahatiau somaie.
JOH 17:22 Me la vibalavala ale uru seselele, ale eme abiagu veia etala ge isa moli, tio eau abitia giteu ale taku veia egite tai ge isa moli mai etalua isa moli.
JOH 17:23 Eau pou tegiteu, eme pou taku, ale eau masagea veia ge puhi tigi egiteu veia egite ge isa moli veia oio vola la valalua te la maututula ge rovia veia eme baha eau somaie, me eme gogo egiteu, mai ale eme gogo taiti eau.
JOH 17:24 “Tete, egiteu ale eme sugu taroti egite somai takue, eau masaga egite ge vipou tomi eau oata te la mautu ale eau ge pou ovolale, veia egite ge hilo la tokoromola taku ale eme abitiaguo, ale eme gogotiau alaurati ale eme souka vipou la magasa me la mori.
JOH 17:25 Tete, eme sekela moli matata, la maututula tomi kama rovime, eala moli eau rovime, me egite aleie, mai egiteu ale taku sesele, egite rovia veia eme bahati eau somaie.
JOH 17:26 Eau veipalatia giteu la isamu, eala moli eau ge vei loua giteu veia la gilogo ale eme gogoti leaue, eia ge pou tai tegiteu, me eau tai, eau ge pou sesele tegiteu ele.”
JOH 18:1 Goio, e Iesus kaka kaluvu moli mai ele, egiteu me la valalua la vimari tetala goio tuga, egite tulu polo la lalu isa la isala e Kidron, la malilo isa oiole, egite me la valalua tetala goilo vola.
JOH 18:2 Eala moli e Iudas, ale ge sugu taro e Iesus soio tegiteu la gima, eia rovi tai la malilo alele, la vuhula la haro usu e Iesus me la valalua tetala goio volale.
JOH 18:3 Tio e Iudas goio puli egiteu la valalua la vaubi isahari, me egiteu la bilalaha tai isahari tegiteu la mulugaluga tegiteu e pris, me tegiteu e pariseo, me egite goio te la baa alele. Egite ababi la lam, la selu, me la papaga isahari te la vaubila tai mai la viso me la gata.
JOH 18:4 Eala moli e Iesus rovi tomiti la igo barala ale egiteu la valalua la gima ge igoa soio tetala te la haro alele, eia goio hagagavi tegiteuo, eia tahi egiteu mago “Amuto ga paa mulimuli ere?”
JOH 18:5 Goma, egite koliala mago “Amite paa mulimuli e Iesus la tau Nasaretio.” Goio, e Iesus veia molitia giteu ele mago “Me eiau molie.” Tiele e Iudas tai ale veipalatia soio tegiteu la gimale, eia oio vimagiri tomi legiteu ele.
JOH 18:6 Eala moli ale e Iesus veitia giteu mago “Me eiau molie” tio egite buru sosouti sotigu ele, egite boruti sotalo la magasao.
JOH 18:7 Tio, eia goio tahi rivu lou egiteu mago “Amuto ga paa mulimuli sesele ere?” Goio, egite vei louala mago “E Iesus la tau Nasaret.”
JOH 18:8 Goio, e Iesus vei moli loua giteu ele mago “Me eau veitia mutou veia eiau molie. Mai amuto paa mulimuli eaue, amuto ge mata taro moli la valalua takue, egite ge tuga.”
JOH 18:9 Ale eia vei maie veia la merera tetala ale pala ge puru sesele oio vola, ale eia vei mugatia pala mago “Egiteu ale eme sugu taroti egiteu somai takue, egite isasa kamati ge kokovu.”
JOH 18:10 Goio, e Saimon Pita eia sau tavu moli la viso la vaubila tetalao, eia goma barautu taro moli la gavusa la bilalaha te la mulugaluga tegiteu e pris, te la galela e gatao. La isa la bilalahale, e Malkas.
JOH 18:11 Goma e Iesus veiale Pita mago “Eme ge sugu rivu lou la viso taume te la mulilale. Mave, eme veia ge taho loio taku veia egite kama ge lao toleau, ia? Eme soioge veia eau kama ge igoa gageie la igogolu ale uru e Tete bahati eau ovola, e?”
JOH 18:12 Tio, egite la valalua la vaubi ele, me la mapala tegiteuo, vikapopo me egiteu la bilalahale, egite laoti e Iesus, goio egite kisi tola la limala la mota.
JOH 18:13 Goio egite lapu mugea soio te Anas, eia e loale Kepas ale la mulugaluga tegiteu e pris te la leavala aleiele.
JOH 18:14 Me e Kepas ele, eia la tahalo ale vei mugatia giteu e Iuda pala veia eia taritigi veia la tahalo isa moli sekela ge peho robo la valalua me hatavivile tomi ele.
JOH 18:15 Goma, e Saimon Pita mira me la tahalo la vimari te Iesus isa lou, egira mulimuli e Iesus. Eala moli la mulugaluga tegiteu e pris, eia rovitia la tahalo la vimari te Iesus ele, me eia koramulia ge tiroro vikapopo me Iesus soilo te la mautu te la mulugaluga uru tegiteu e pris ele.
JOH 18:16 Eala moli e Pitale magirigiri moli oio te la mata la bigomu ale goilo te la mautu ele. Eala moli la tahalo la vimari te Iesus ale la mulugaluga tegiteu e pris roviao, eia gogala lou, eia goio veia la tavile ale baumuli la matao veia e Pita ge goilo, tio eia goio pulia soilo.
JOH 18:17 Tiele, la tavile ale baumuli la matale, eia mata kosi e Pitale, eia goma tahia mago “Eme tai soioge isasa lou la tahalo la vimari te la tahalo ale e Iesus, ia?” Eala moli eia tahi taro mago “Eiau ouka.”
JOH 18:18 Goio, egiteu la bilalaha tegiteu e pris isu la havi, la vuhula la maigi uru pasi, me egite magiri galili la havi ele, egite malululu, me e Pita tai oio tegiteu, malululu ele.
JOH 18:19 Tio, goio e Anas ale la mulugaluga tegiteu e pris, eia goio tahiti e Iesus tegiteu la valalua la vimari tetalale, me la vuhu la valolo tetala ale eia vimarimari legiteu la valalua ovolao.
JOH 18:20 Goma, e Iesus veiala mago “Eau vikarakara matagaga sesele oio te la lumaluma la lotu tomi te la maututula te la mata giteu la valalua tomi. Me eau vimarimari bibibi la valalua me hatavivile te la luma la lotu uru tai oio e Ierusalem, ale amutou e Iuda tomi goio vikapopo tai ovolao, eau kama vei kokovu la vikararala isasa.
JOH 18:21 Ilava eme tahiau? Eme ge tahi egiteu ale lolo la vikararala taku ale eau veveia giteu ovolao, egite rovi la valolo taku ale eau veitia giteu ovola.”
JOH 18:22 Tiele, ale eia veitia maie, la tahalo la vagari robola tegiteu e pris isasa, eia sabala la galele Iesus, eia goio veiala mago “Ilava eme koli la vikararala te la mulugaluga uru tegiteu e pris mai ele, e?”
JOH 18:23 Goma, e Iesus veiala mago “Mai eau ruruti te la vikararala takue, taritigi eme ge veipala la iruru taku. Eala moli mai la vikararala taku eia sesele moli, ilava eme sabala la galegu e?”
JOH 18:24 E Iesus magirigiri ele, la limala kisia, goio e Anas baha taroa soio te loala e Kepas, ale la mulugaluga sesele tegiteu e pris.
JOH 18:25 Goma, e Pita magirigiri, eia malululu la havi, egite goio tahia mago “Soioge eme tai isa tegiteu la valalua la vimari te la tahalo ale e Iesus, ia?” Eala moli e Pita goio tahi taro mago “Eau ale ouka.”
JOH 18:26 Goio, kama tabaa la bilalaha te la mulugaluga tegiteu e pris isasa, eia la karakara te la bilalaha ale e Pita barautu taroti la gavusalao, eia vei mago “Eia sesele, eau hilo tai emei, eme vikapopo me la tahalo aleie oio te la malilo ale amite lao tolea oio volao.”
JOH 18:27 Goma, e Pita tahi taro lou mago “Ouka.” Tio e kukureko talitio.
JOH 18:28 Tio, goio te la kavikoki sasaha, egite puli e Iesus loio te Kepas ele, soio te la luma te gavman tegiteu e Rom ale uru. Eala moli egiteu e Iuda kama goilo te la lumale, la vuhula egiteu e Rom kama tegiteu e Iuda, me egiteu e Iuda gabutatalea veia mai egite ge hagagavi tegiteu e Rom, egite ge mata mai ale mumugu la haro La Ilali La Poloselela ale tikumu sesele. Mai la vulovulo giteu ge mumugu mai ele, egite kama koramulia ge ali La Ilali La Poloselela vikapopo legiteu e tabarabara giteu.
JOH 18:29 Eala egite kama goilo la luma te gavman, egite magiri moli ogalao, e Pailat gali tavu egiteu sogala, eia tahi egiteu mago “Amuto masagea ge vimagiri la tahalo ale te la vigagiala te la rova?”
JOH 18:30 Goma, egite koliala mago “Mai ge la tahalo ale eia kama ge la tahalo la iligo la iruru, amite kama ge vaharia somai taume maie.”
JOH 18:31 Goma, e Pailat veia giteu mago “Amuto pulia soio, me amuto ge igo la viputumulila soio tetala mai te la merera te ururu tamutou e Iuda lou.” Eala moli egiteu e Iuda vei louala mago “Amutou e Rom magiri roboti amiteu e Iuda veia amite umala ge bili peho la tahalo.”
JOH 18:32 Tiele me la merera tegiteu aleie, eia vipuru seseleti la vikararala ale e Iesus vei mugatia te la pileho tetala veia egite la gima ge katua oata te la tauvalautu.
JOH 18:33 Goio, e Pailat goilo lou te la luma te gavman, eia tola e Iesus soilo tetala, eia goio tahia mago “Eme la uru tegiteu e Iuda, ia?”
JOH 18:34 Eala moli e Iesus koliala mago “Soioge alele la gabutatalala taume sesele, uka egiteu ale isapolo vei mulitiamu ovola?”
JOH 18:35 Goma, e Pailat ule baoli louala mago “Mave, eau la tau Iuda, ia, veia eau ge gabutala muli la merera la vigiriri tautavula tamutou lou? Egiteu e valaluamu lou, me egiteu e pris te la lotu tamutou e Iuda lou, egite kisime, me egite vaharime somai takue. Eme igoti la iruru ale mave sesele ale egite igo totolome ovola e?”
JOH 18:36 Goio, e Iesus ule baoli louala mago “La viputumulila taku ale eau ge mamuga la valalua taku, eia kama la viputumulila ale ge puru omai te la magasa. Hiloa, mai eau ge te la vahiliti la vaubi veia eau ge pou la mulugaluga te la maututula, eau kama ge mata sosoli egiteu e Iuda veia egite ge lao tola eau. Eau ge baha moli egiteu la valalua taku veia egite ge vaubi roboau. La viputumulila taku, eia kama lotaloo la magasa veia eme ge hiloa omai te la maututula mai la pulolou te la mulugaluga isasa, ouka gologolo.”
JOH 18:37 Tiele, e Pailat loloa mai ele, eia goio vei louale Iesus mago “Eala moli eme vikara maie veia eme la uru isasa, ia?”
JOH 18:38 Goma, e Pailat goio tahi loua mago “Eala moli la merera ale sesele eia mave?” Tio, e Pailat vikara kaluvu moli ele, eia gogala lou tegiteu e Iudale, eia goio veia giteu mago “Eau kama tahi vuti isasa la iruru oio tetalao.
JOH 18:39 Eala moli la vulovulo mutou isasa maie veia eau ge lube taroa mutou isasa la tahalo la kilisi te La Ilali La Poloselela. Mave, soioge amuto masagea veia eau ge lube la uru mutou e Iuda soio tamutou ele, ia?”
JOH 18:40 Eala moli egite lolo la vikararala te Pailat mai ele, egite goio tola vagari rivu lou soio tetala mago “Alele ouka! Eme ge lube e Barabas!” Me etato rovia veia e Barabas eia la tahalo isasa eia pala vahiliti la vaubila soio te gavman.
JOH 19:1 Goio, e Pailat puli e Iesus soio, goma la valalua tetala goio kumamasi vulotiao.
JOH 19:2 Tio egite la valalua la vaubi goio viri e dahe, veia ge igo la kisivaru tetala, egite goio taua te la gamalao, me egite goio vikai leia la kairobola ale magesegese mai la irovilala te la mulugaluga.
JOH 19:3 Egite ge goio ge magiri moli oio te la lagulale, egite ge pigi malikiala mago “Tahalo kokora, eme la uru tegiteu e Iuda!” Tio egite goio sabalea la galelale.
JOH 19:4 Goio, e Pailat gogala lou tegiteu, eia veia giteu mago “Ale eau pulia mutou sogalae, veia amuto ge rovia veia eau kama tahi vuti isasa la iruru oio tetalae.”
JOH 19:5 Goma e Iesus gali sogala, la kisivarule dahe oata te la gamala, la kairobola ale magesegese oio te la pokela. Goio e Pailat vei mago “Male, amuto ge hilo la tahalo aleie!”
JOH 19:6 Tio, egiteu la mulugaluga tegiteu e pris, me egiteu la tahalo la vagari robola tegiteu, egite hiloale, egite tatola mago “Katu tolea te la tauvalautu, katu tolea te la tauvalautu!” Eala moli e Pailat goio veia giteu mago “Amuto moli ge tatea soio, amuto ge katu tolea te la tauvalautu. Eau kama sivuti isasa la iruru oio tetalale.”
JOH 19:7 Goma, egiteu e Iuda koli la vikararala tetala mago “Amite omai la viputumulila isasa tabuliti, me la viputumulilale eia maie veia mai isasa ge toia veia eia e Latu La Tahalo Uru, la valalua ge bilia eia ge peho.”
JOH 19:8 Goio, e Pailat loloa mai ele, eia taga pepeho seseleti.
JOH 19:9 Eia goio puli rivu lou e Iesus soilo te la luma te gavman, goma eia tahi matagaga e Iesus mago “Eme love sesele?” Eala moli e Iesus kama koli la vikararala tetalale.
JOH 19:10 Goio e Pailat veiala mago “Mave, eme kama kolikoli la vikararala takue? Eme kama rovia veia egite abitiagu la viputumulila, eau koramulia ge lubemei, me eau koramuli taia veia ge baha eme soio, egite ge katu tolame te la tauvalautu? Soioge eme souka rovi aleie, ia?”
JOH 19:11 Goio, e Iesus ule baoliala soio mago “Mai La Tahalo Uru oata kama ge abiamu la vagagarila, eme kama koramulia ge bolehoho eau. Eau magiri moli omai te la lagumu te la masasagala moli te La Tahalo Uru, la vuhula la tahalo taku isasa eia sugu tarotiau somai te la limamu, me la iruru tetala eia kara polo sesele te la iruru taumele.”
JOH 19:12 Goma, e Pailat lolotia mai ele, eia ga gabutala vulovuloti veia ge lube e Iesus, eala moli egiteu e Iuda loio tatola moli mago “Mai eme ge lubea, ale eme veipalea mai ele veia eme kama la tahalo te Sisa, la vuhula mai isasa veia eia la uru, eiala moli eia la gima te Sisa!”
JOH 19:13 Tio, e Pailat lolotia mai ele, eia goio puliti e Iesus sogalao. Me eia goio pou te la pulolou la ilololo la merera, egite tigi saea oata, me la baale egite igo robo tatahola la uatati ale bolabola, me la isa la baale te la merera e Hibru egite toila “e Gabata”.
JOH 19:14 Tiele la haro aleiele la haro la iraragi la ilali te La Ilali La Poloselela, tio la haro hugutolatia, goma e Pailat goio veia giteu e Iudale mago “Male, ale la uru tamutou.”
JOH 19:15 Eala moli egite lolotia mai ele, goio egite tola lahutio mago “Lapua soio, lapua soio, katu tolea te la tauvalautu!” Goma, e Pailat veia giteu mago “Me eau ge katu tola moli la uru mutou oata te la tauvalautu e?” Goio, egite la mulugaluga tegiteu e pris ule baoliala mago “Amiteu la uru miteu isa moli e Sisa, isa oukati lou.”
JOH 19:16 Tiele, e Pailat goio sugu tarotia giteu e Iesus ele, veia egite ge katu tolea te la tauvalautu. Tio, egiteu la tahalo la vaubila tegiteu e Rom goio puli e Iesus soio.
JOH 19:17 Eia gali sogala la mautu e Ierusalem, eia bole la tauvalautu tetala loio la mautu ele, soio te la popoiti isasa egite toila veia La Gama La Tahalo, la isala te la merera e Hibru egite toila “e Golgota.”
JOH 19:18 Me oio moli te la baa aleiele, egite katu tola e Iesus te tauvalautu, me egite katu tola tai taho lua oio te la galela iluao, me e Iesus kabili.
JOH 19:19 Goio, e Pailat kekesi isa la vikararala tai veia ge taua oata te la gama la tauvalautu ele, eia kekesi la vikararala maie:
JOH 19:20 Eala moli la baa ale egite katu tola e Iesus te la tauvalautuo, eia hagagavi moli te la mautu. Tiele egiteu e Iuda usu goio gigigi la vikararala alele. La vuhula e Pailat kekesi la vikararala alele te la merera tegiteu e Hibru, tegiteu e Rom tai, me la vikarakarala tai e Grik.
JOH 19:21 Goma egite la mulugaluga tegiteu e pris ale tegiteu e Iuda goio veiale Pailat mago “A ge, eme umala ge kekesia mai ele veia ‘La Uru tegiteu e Iuda’ umala. Eme ge kekesi molia maie ge ‘La tahalo ale eia veia maie: Eau La Uru giteu e Iuda.’”
JOH 19:22 Goio, e Pailat ule baolia giteu ele mago “La vikararala ale eau kekesitia, eau kekesitia, kama ge vulo loua.”
JOH 19:23 Tio, egiteu e soldia katu tolati e Iesus te la tauvalautuo, egite goio abi la lavalava me la papaga tomi tetala, egite tau mulila la tilalau ivaao, egite goio barerele giteu. Egite goio abi tai la kairobola tetala, eala moli eia la silahi ouka ovola veia egite ge silea ovola, eia viruru moli loata abia gotalo la gilesulao.
JOH 19:24 Tio, egite la valalua la vaubi ele hiloa mai ele veia eia la silahi ouka ovola, egite vei mago “Etato kama ge silea, etato ge pigi la satu, etato ge rovirovi gabu molia veia ale ge tere.” Tiele egite igoa mai ele veia la vikarara te La Buk Tabu Ale Pala eia ge puru sesele ale veitia maie: Egite barereti la lavalava taku, me egite vipigi vulovulo moliti la kairobola takuo. Tiele me egite la valalua la vaubi igo sesele taia mai ele.
JOH 19:25 Eala moli e tilale Iesus me tabarala, e Maria ale rutule Klopas, vikapopo me e taola, e Maria Magdala, egite oio magirigiri hagagavi te la tauvalautu te Iesus ele.
JOH 19:26 Goma e Iesus hiloti e tilalale vikapopo me la tahalo la vimari ale eia masaga seseleao, e Iesus goio veiale tilala mago “Tavile uru, male ale magirigiri ele e latumu molie.”
JOH 19:27 Tio eia goio vulo tavu lou la tahalo la vimari tetalale, mago “Male, alele e tilamu.” Tiele la tahalo la vimari ele pulia soio te la luma tetalao, eia soko la baumulila.
JOH 19:28 E Iesus rovitia veia la igogolu tomi tetala eia kaluvuti, tio eia goio vipuru isa lou la merera te La Buk Tabu mago “Eau malehu pasie.”
JOH 19:29 Goma la botol isa oio tabulibuli ele, eia volu la bulu la vaen ale ama. Tiele egite goio sigilia soio te la pagolu, egite goio vituria soata te la harelao.
JOH 19:30 Goio e Iesus liua, eia goma vei mago “Eia kaluvuti.” Tiele la gamala mapakulitio, eia goio pehotio.
JOH 19:31 Tiele, ale la haro la iraragila te La Ilali La Poloselela. Ale la haro lima, mai galigeli eia la haro tabu ale uru sesele tegiteu e Iuda, eala egiteu e Iuda kama masaga veia la vovo giteu taho tolu ele ge titili lou oata la tauvalautu ele. Tio egite goio veiale Pailat veia eia ge baha la merera soio tegiteu e soldia veia egite ge putu loto la vaha giteuo, veia egite ge peho hari mai ele, veia ge visivo taro egiteu loata la tauvalautu ele.
JOH 19:32 Tio egite la valalua la vaubi goio putu loto la vaha girua ale taho lua, egite katu tola egirua te la tauvalautu oio te la galele Iesus iluale.
JOH 19:33 Eala moli egite goio te Iesuso, egite ga hiloao, eia pehoti, tio egite kamati putu loto la vahalale.
JOH 19:34 Eala moli la tahalo la vaubi isasa goio ubi la karusurusule Iesus ele la gata, goio la kasosola me la lalu salitio.
JOH 19:35 Me ale egite ubia mai ele, eau ale hilo seselea, me eau valololae, veia amutou ale ge loloa mulimuli ge tautaulailo ovola. Me eau rovia veia la vikararala tomi taku eia sesele, la vuhula eau hilo seseletila la matagu.
JOH 19:36 Me egite kama putu loto la vahala, egite ubi moli la karusurusula, ale egite igo molia mai ele veia la merera tomi te La Buk Tabu Ale Pala eia ge puru sesele ale eia veia maie: Egite kama ge putu loto isa la tuhala.
JOH 19:37 Me isa lou la merera oio vola eia veia maie: Egite siroga muliti la tahalo ale egite ubiao.
JOH 19:38 Tio, goio mulimuli bakisi e Iosep la tau Arimatea, eia la tahalo la vimari te Iesus isasa, eia tilimuli kokovu e Iesus, la vuhula eia taga egiteu e Iudao, eia goio te Pailat, eia kaka la pilelehole Iesus oio te Pailatio. Goma e Pailat veia eia taritigi moli mai ele veia e Iosep ge abia, tio e Iosep loloa mai ele, eia goio bole taroa.
JOH 19:39 Tiele e Nikodimas, ale pala eia goio te Iesus te la logo, eia tai vikapopo le Iosep, eia abi la bulu la obu ale mali vivili tataho, la mapala uru, eia abi usu la bulu la obu ele veia ge abiri la vovole Iesus ovola mai la vulovulo giteu e Iuda ale egite igoa soio te la tahalo ale pehoti.
JOH 19:40 Goio e Iosep mira me Nikodimas ele, egira goio bole la pilelehole Iesus soio, egira abiri la vovola la bulu la obu ele, egira goio avu robola la kulikuli isahari ale egite sile malalaua, mai la vulovulo giteu e Iuda lou te la ulalai giteu ale pehoti.
JOH 19:41 Ale oio tai te la baa ale egite katu tola e Iesus te la tauvalautuo, la malilo isa ovolale, me la lulu la pileho isa uru ovolale, egite olia te la vai la maitete, egite souka ulai la tahalo isasa ovola.
JOH 19:42 Tio egira goio bole la pilelehole Iesus soio, egite vitabulia oilo vola, la vuhula eia hagagavi moli, me ale la paga maulaviti, egira gabutatalea veia la pilelehole Iesus souka ge tabuli bulalahu te la haro tabu ale ge sokoa te la logo moli aleie.
JOH 20:1 Goio, te la haro ale mulimuli te la haro tabu, e Maria Magdala goio sibitala oio te la lulu la pileho te Iesus, te la utupolapolala, eia souka matagaga sesele, eia hilo la uati eia kati tabuli robo lou la mata la lulu la pilehole.
JOH 20:2 Tiele eia hari soio te Saimon Pitao, egira me la tahalo la vimari ale e Iesus masaga seselea, eia goio veia girua mago “Egite bole taroti la pileleho La Uru loio te la lulu la pilehole, amite kama rovia veia egite tautia oiove.”
JOH 20:3 Tio, e Pita me la tahalo la vimari ale isasao, egira hiliti taro moli la mautu ele, egira tugati soio te la lulu la pileho.
JOH 20:4 Egira harari vikapopo tomi, eala moli la tahalo la vimari isao, eia hari mamuga, eia goio guvi pala te la lulu la pilehole.
JOH 20:5 Eia goio tiloho soilole, eia hilo moli la kulikuli oio tabulibulio, eia kama goilo.
JOH 20:6 Eala moli e Saimon Pita, eia guvi mulimuli ele, eia goio luu soilo te la lulu la pilehole, eia hilo isahari la kulikuli oio tabulibulio.
JOH 20:7 Eala moli la kulikuli ale egite avu robo la lagule Iesus ovola, eia oio tabuli tataho moli mai ale isa pilutia, eia tabuli sapolo.
JOH 20:8 Tio la tahalo la vimari ale vimugao, eia tai goilo hilo taia me eia tautaulailo ovola veia e Iesus mahuliti lou.
JOH 20:9 Eala moli egira soukama matagaga te la vikararala te La Buk Tabu ale veia e Iesus eia ge mahuli taro la lulu la pileho.
JOH 20:10 Goio, egira la tahalo la vimari te Iesus iluale goio beu rivu loua soio te la luma tegiruao.
JOH 20:11 Eala moli e Maria ogala magirigiri te la mata la lulu la pilehole, eia taitali. Ale eia taitali mai ele, eia tiloho soilo te la lulu la pilehole.
JOH 20:12 Eia goio hilo e angelo ilua, egira kai la kairobola ale kakea, egira pou te la mulile Iesus ale e Iosep alalavio vitabuli la pilelehole Iesus ovolao. Isa pou loata la gamala, isa lotalo la kupahala.
JOH 20:13 Goio egira veiale Mariale mago “Tavile kokora, eme taitali ilava?” Tio, eia goio kolia girua mago “La vuhula egite bole taroti la pileleho La Uru taku, me eau kama rovia veia egite vitabulitia oiove.”
JOH 20:14 Tiele ale eia vei molia mai ele, eia ga vulo gelele, eia hilo moliti e Iesus magirigiri, eia kama rovia veia e Iesus ele.
JOH 20:15 Goma, e Iesus veiala mago “Tavile kokora, eme taitali ilava? Eme paa mulimuli ere?” E Maria loloa mai ele, eia gabu molia veia eia la tahalo la vibaumuli la malilole, eia goio veiala mago “Tahalo uru, mai eme boletia, eme ge veiagu veia eme vitabulitia oiove, ila eau ge goio ge abi la pilelehola soio te la mautu tetalao.”
JOH 20:16 Goma, e Iesus tolea mago “Maria!” Goio, e Maria vuvulo me eia tola te la vikararala e Hibru mago “Rabonai.” Me la merera ale, la masovala maie “Tahalo La Vimari.”
JOH 20:17 Goio, e Iesus veiala mago “Eme umala ge sasau taku, la vuhula eau souka goata te Tete, eme ge goio tegiteu e tabarabaragu, eme ge veia giteu la merera taku mago ‘Eau ge goata te Tete, me te Tama mutou tai, eau ge goio te La Tahalo Uru taku, me La Tahalo Uru tamutou tai.’”
JOH 20:18 Goio, e Maria tuga goio veia giteu la valalua la vimari mago “Eau hiloti La Uru.” Eia goio veia giteu te la vikarakarala ale e Iesus veitiala ovolao.
JOH 20:19 Goio, te la maulavi, te la haro moli lou ale mulimuli te la haro tabu, egite la valalua la vimari te Iesus tagati egiteu e Iudao, egite kapi robo tomi la mata la luma ale egite popou ovolale. Goma e Iesus sibitala tavu lou egiteu, eia veia giteu mago “La vimalumalu ge pou tamutou.”
JOH 20:20 Tiele eia vei molia giteu mai ele, eia goio vahilo legiteu la limala me la karusurusulao, tio egite la valalua la vimari hiloti La Uru ele, egite sagegetio.
JOH 20:21 Goma, e Iesus vei loua giteu mago “La vimalumalu ge pou tamutou. Mai ale e Tete bahati eau somaie, ale eau tai ge baha tai amutoue.”
JOH 20:22 Tio, eia vei molia giteu mai ele, eia goio pusu la galala soio tegiteu ele, me eia veia giteu mago “Amuto ge sau tola La Kalulu La Marokala.
JOH 20:23 Mai ge amuto ge vimavulaha la iruru te isasa, ale eia ge mavulaha seseleti te la iruru tetalale. Eala moli mai amuto ge magiri robo isasa veia kama ge vimavulaha taro leia la iruru, tiele la iruru tetala eia ge tabuli moli mai ele.”
JOH 20:24 Tio, e Tomas, ale egite totoi taila e Didimas, eia isa tegiteu la valalua la vimari te Iesus ale savulusa gete lua, eia kama pou vikapopo me egiteu ele, ale e Iesus sibitala tavuti egiteu ele.
JOH 20:25 Goma eia goio guvi tegiteu ele, egite veiala mago “Amite hiloti La Uru.” Eala moli e Tomas veia giteu mago “Mai ge eau kama ge hilo la mata la nil ilua te la limalao, mai tai eau kama ge sugu la kukugu soilo volao, me eau kama ge masese la limagu te la mata la gata oio te la karusurusula, eau kama ge tautaulailo veia eia mahuliti lou veia amuto hilotiale.”
JOH 20:26 Goio, mulimuli la haro iuolo poloti ele, egiteu la valalua la vimari te Iesus vipou kapopo lou oio te la luma ale egite pou muga ovolao, me e Tomas tai oio vipou tomiti legiteu ele. Egite kapi robo tomiti la mata la lumale, goio e Iesus sibitala tavuti egiteuo, eia magiri kabili tegiteu, eia vei mago “La vimalumalu eia ge pou tamutou.”
JOH 20:27 Tio eia goio veiale Tomas mago “Eme ge sugu la kuku la limamu ele somai, eme ge hilo la limague, la mataa nil ovola. Me eme ge sugu la limamu somaie, eme ge masesea te la karusurusugue. Eme umalati ge tahi tataro, taritigi eme ge tautaulailo moli veia ale eau sesele, eau mahuliti lou.”
JOH 20:28 Goma, e Tomas koli molitiale Iesus ele mago “Eme La Uru taku! Eme La Tahalo Uru taku sesele!”
JOH 20:29 Goio, e Iesus ule baoliala mago “Ale eme hiloti eaue, eme tautaulailoti veia ale eau sesele, eala moli egiteu ale kama hiloau, me egite tautaulailo moli veia eau mahuliti lou, egiteu alele ge balava sesele te la tautaulailo tegiteu ale uru mai ele.”
JOH 20:30 Sesele, e Iesus igo la igogolu la karutula usu te la mata giteu la valalua la vimari tetalale, eala moli eau kama kekesi tomia omai te la buk aleie.
JOH 20:31 Eala moli egite ale eau kekesitiae, veia amuto ge matagaga sesele te Iesus veia eia e Kraist, e Latu La Tahalo Uru. Tiele mai amuto ge tautaulailo sesele tetala, eia ge vimahuli amutou te la vagagarila, te la isala ale uru seselele.
JOH 21:1 Goio, mulimuli lou, e Iesus sibitala tavu lou egiteu la valalua la vimari tetala oio te la magolilo e Taibirias, ale egite toi taila e Galilea. Ale eia sibitala tavu egiteu mai aleie:
JOH 21:2 La haro isasa egiteu la valalua la vimari taho vitu oio popou, egiteu ele la isaisa giteulae: e Saimon Pita; e Tomas ale egite totoi taila e Didimas; e Nataniel, la tau Galilea, eia loio sesele la mautu e Kena; e latule Sebedi iluao; me la tahalo la vimari taho lua lou.
JOH 21:3 Egiteu alele pou vikapopo, e Saimon Pita goio hiliti, eia veia giteu mago “Eau goio ge lapu la ia.” Goma, egite veiala mago “Muga, etato tomi.” Tio egite tuga, egite goio sae te la uaga tegiteuo, egite goio vuo, eala moli te la logo alele, egite kama abi gologolo isa la ia.
JOH 21:4 Tio, egite oio vovuo, goma la paga ga utupolapolati ele, e Iesus goio magirigiri oilo la paravao, eala moli egite la valalua la vimari tetala kama rovia veia e Iesus ele.
JOH 21:5 Goma, e Iesus tola soio tegiteu mago “Amutou bisisi ele, amuto abiti isahari la ia?” Eala moli egite koliala mago “Ouka.”
JOH 21:6 Goma, eia goio ule baoli loua giteu ele mago “Amuto ge tau la vuo te la gale la uagale, loio te la lima e gatao, tio amuto ge lapu isahari la ia.” Goma egite goio igo molia mai ale eia veitia giteuo, egite tau la vuo sotalo, egite abi pepehoti la iao, egite visikakala la ilapu la vuo soata, eia tikumu pepeho.
JOH 21:7 Goma, la tahalo la vimari ale e Iesus masaga seseleao, eia veiale Pita mago “Ale La Uru ele!” Tio e Saimon Pita loloa mai ele ale egite veia “La Uru ele”, tio eia goio kai la kairobola tetala ale eia kai tarotiale, la vuhula eia igogolu bulalahu moli, eia goio raga purusu sotalo la magole, eia puru soilo.
JOH 21:8 Tiele egite la valalua la vimari taho uolo, egite vore moli soilo, egite lapu molia la vuole, la vuhula egite kama malau taro la parava, la baala eia koramuli molia la lovala savulu lima.
JOH 21:9 Goma egite goiloti la paravale, egite goio hilo vuti moliti la havi oio, la ia oio volao, me la bret tai oio tabulibuli ele.
JOH 21:10 Goma, e Iesus veia giteu mago “Amuto ge abi isahari la ia ale amuto so lapulapuale somai.”
JOH 21:11 Goio, e Saimon Pita pagi raga moli soata te la uagale, eia goio lapu pasiti la vuo soilo la paravao. La vuo eia volu me la ia ale ururu usu, la giligila eia koramuli mai salatusa savulu lima gete tolu, eala moli la vuo kama masile.
JOH 21:12 Goma e Iesus veia giteu mago “Amuto gomai ali.” Eala moli egite la valalua la vimari ele isa kama tahia mago “Eme ere?” La vuhula egite rovitia veia ale La Uru moli ele.
JOH 21:13 Goma e Iesus abi isahari la ia, eia tabari legiteule, vikapopo me la bret taio.
JOH 21:14 Ale e Iesus mahuli taroti la pileho, eia sibitala tavu la valalua la vimari tetala la vaka tolula aleie.
JOH 21:15 Egite ali kaluvutio, goma e Iesus veiale Saimon Pita mago “Saimon, latule Ioanes, soioge eme moli ge la gilogo taume somai taku, eia kara polo te la gilogo tegiteu ale isahari ele, ia?” Goio, e Pita veiala mago “Meie, Tahalo Uru, eme rovia veia eau e tabaramu sesele.” Goma, e Iesus veiala mago “Eme ge valivali egiteu e latatu la sip taku.”
JOH 21:16 Goio, la vaka luala, e Iesus goio tahi loua mago “Saimon, latule Ioanes, eme soioge gogo seseleau, ia?” Goio, e Pita vei rivu louala mago “Meie, Tahalo Uru, eme rovia veia eau e tabaramu sesele.” Goma, e Iesus vei louala mago “Eme ge baumuli egiteu la sip taku.”
JOH 21:17 Goio, la vaka tolula lou eia tahi loua mago “Saimon, latule Ioanes, mave, eme soioge e tabaragu sesele, ka ouka?” Goma, la ilole Pita eia burukoti, la vuhula e Iesus tahitia vaka toluti, me ale la vaka tolula eia toi molia maie mago “Mave, eme soioge e tabaragu sesele, ka ouka?” Tiele eia goma veiale Iesus mago “Tahalo Uru, eme rovi la papaga tomi, me eme rovia veia eau e tabaramu sesele.” Goma, e Iesus veiala mago “Eme ge valivali egiteu la sip taku.
JOH 21:18 Eau vei seseleamu, alaura eme so hatamalelabao, eme sesele kisi la lavalava te la kabilimu, eme tatuga te la baa ale eme masagea ge goio volao. Eala moli mulimuli eme ge uru, la limamu ge rara palapala, la tahalo isapolo ge kisi la lavalava soio taume, eia ge pulime soio te la baa ale eme kama masagea ge goio volao.”
JOH 21:19 Eala moli ale e Iesus veiala mai ele, eia mai ale pigi vei soio te Pita veia eia ge rovi la pileho tetala ale ge mulimuli, veia egiteu la valalua la gima ge bilia, eia ge sugu taro la mahulila tetala mai la vaabila soio te La Uru mai la vaisalela ale uru sesele. Goio, e Iesus vei kaluvutiala la merera la tilovo mai ele, eia goio vei louale Pita mago “Eme ge tilimuli eau.”
JOH 21:20 Goio, e Pita vulo gelele, eia goio hilo la tahalo la vimari ale e Iesus masaga seselea, eia tilimulimuli egirua. La tahalo moli ale pala, egite alalio, me eia pou tahobo te la magorole Iesuso, eia goio vei mago “Tahalo Uru, ere ge sugu taro eme te la lima giteu la gimao?” Tiele la tahalo la vimari moli aleie eia mulimuli e Iesus mira me Pita soiole.
JOH 21:21 Goio e Pita hiloa eia loiole, eia goio tahi e Iesus mago “Tahalo Uru, la tahalo ale, la pileho tetala tai ge mave?”
JOH 21:22 Goma, e Iesus koliala mago “Mai eau masagea veia eia ge mahuli moli kara ale eau ge beua somai, ale kama la paga taume. Taritigi eme ge mulimuli moliau mai ale eau veitiamu.”
JOH 21:23 Tio, mulimuli, la vikararala te Iesus aleie, eia para piraramoti soio tegiteu la valalua tomi ale tilimuli eia, veia la tahalo la vimari ale, eia kama ge peho. Eala moli e Iesus kama veia maie veia eia kama ge peho, ale la vikararala tetala oio vola eia vei molia maie mago “Mai eau masagea veia eia ge mahuli moli kara ale eau ge beu loua somai, ale kama la paga taume.”
JOH 21:24 Sesele, la tahalo la vimari moli ale valoloti la papaga aleie, eia moli eiala kekesi taia, me etato rovia veia la valolo tetalae, eia sesele viruru.
JOH 21:25 Sesele, la igogolu usu tai lou e Iesus igotiao, mai ge kekesi tola egiteu tomi isasasao, eau gabua veia la maututula tomi eia kama koramuli la bubuku ale ge kekesi tola la veimuli polola tomi te la igogolu te Iesus ele veia ge taua ovola.
ACT 1:1 Tavu e tabaragu e Teopilas, Eiau e Luk, eau guviti lou omai taume la kekesi taku bakisi. Te la muluga la valolo taku ale eau pala kekesiamu, eau vei matagageamu la igogolu tomi te Iesus ale eia sokoa omai te la maututula,
ACT 1:2 kara te la haro ale La Tahalo Uru puli rivua soata tetala te la ilo la lage. Te la haro alele, e Iesus tutu tolea giteu la valalua la bilalaha tetala te la igogolu ale egite ge igoa, veia eia hiloviti egiteu pala, veia La Kalulu La Marokala eia ge pou tegiteu, ge suli la igogolu tegiteu ele.
ACT 1:3 Etato rovitia, e Iesus eia gabuti la iligiligi, eia peho, mulimuli eia goio mahuli rivu lou, eia goio sibitala lou tegiteu la valalua la bilalaha tetala. Eia goio veipalea giteu la merera usu te la pulolou la matagagala te La Tahalo Uru. Eia igoa mai ele veia egite ge rovi seselea veia eia mahuli talati lou. Eia vimari egiteu mai ele kara te la haro savulu vaa, tio eia beua soata te La Tahalo Uru.
ACT 1:4 Ale e Iesus so pou vikapopo legiteu la valalua tetala, eia goio veia giteu mago “Amuto umala ge hiliti taro muga e Ierusalem. Amuto ge pou tali muga la vaabila ale e Tete veia eia ge abia mutou, ale pala eau veitia mutou ovola.
ACT 1:5 Eia sesele, pala amuto balava bakisi la matagaga te Ioanes, ale eia vuhi la valalua la lalu. Eala moli eau veia mutou, eia hagagaviti La Tahalo Uru ge vibalava le amutou La Kalulu La Marokala, amuto ge matagaga sesele.”
ACT 1:6 Tio, te la haro isa lou ale egite la bilalaha te Iesus egite pou vikapopo, egite tahia mago “Tahalo Uru, eme soioge guviti lou omai tamiteu veia eme ge karasuku lou amite Israel veia ge bolehoho egite Rom, ia?”
ACT 1:7 Eala moli e Iesus loloa mai ele, eia goio veia giteu mago “Ouka, kama mai ele. Eia kama la paga tamutou veia amuto ge rovi la leavala ka la haro ale e Tete ge veipala la masasagala tetala! Ale la tilau tetala moli. Eia sekela moli rovia, isa lou ouka.
ACT 1:8 Eala moli mulimuli La Kalulu La Marokala, eia ge sivo loata, gotalo tamutou, ge pou tamutou, eia ge vivagari amutou. Amuto ge valolo la valalua te la valolo ale taritigi te la igogolu taku ale eau igotia. Amuto ge sokoa omai e Ierusalem, goio te la maututula tomi te la gale Iudea, goio lou tegiteu la valalua e Sameria, goio lou polo galili te la maututula tomi kaluvu.”
ACT 1:9 E Iesus vikara soio tegiteu la valalua tetala mai ele, eia so vikarakara, egite karutu La Tahalo Uru lapu hilitia soata. Eia hiliti te la mata giteu, eia goata moli te la baa. Egite goio taga mulimulia soata. Goio, la tuluvu la mori isasa tuga roboa, egite kati hiloa.
ACT 1:10 Tio, la valalua egite magirigiri, egite taga mulimulia e Iesus soata, goio la tahalo ilua sibitala, magiri te la bali giteu ele, la kulikuli tegirua kea lovolovo.
ACT 1:11 Egira goio veia giteu mago “Amutou la valalua e Galilea, amuto taga mulimuli lava soata te la mori? Taritigi amuto ge rovia veia La Tahalo Uru puli taroti le amutou e Iesus ele. Eala moli mulimuli amuto ge hilo loua, eia ge beu rivu loua loata, gotalo lou mai ale amuto hiloa eia goatati igoie.”
ACT 1:12 Tio, mulimuli egite hiliti taro la gove e Oliva, egite goio beu rivua soio e Ierusalem. La gove e Oliva, la mautu e Ierusalem, la baa girua kama malau, hagagavi moli.
ACT 1:13 Tio egite goio guvi oio la mautu ale uru, egite goilo te la luma ale egite popou ovolao. Egite goilo te la kapiutu ale soatata, egite goio pou. Egiteu ele, la isaisa giteu maie: E Pita, e Ioanes, e Iakob, e Andrew; e Pilip, egira me Tomas; e Batolomeas, egira me Mataias; e Iakob ale latule Alpias, e Saimon Selot, e Iudas ale latule Iakob.
ACT 1:14 Egite tomi ge pou vikapopo mai ele, egite hatavivile tai, e tilale Iesus, e Maria, egite taitarile Iesus, egite tomi ele ge pou tavu moli la kilaka, la gabutatalala tegite isa moli.
ACT 1:15 Tio, te la haro isasa e Pita magiri te la mata gite la valalua me hatavivile, eia valolo egiteu. La giligi giteu ele salatusa savulu lua.
ACT 1:16 E Pita valolo egiteu, eia veia giteu maie “Amuto e tabarabaragu, la valolo isasa pala La Kalulu La Marokala eia visibitalea te la harele Devit, e suara uru tegatou pala. La merera alele goio te Iudas, eia ale sugu taro e Iesus soio tegiteu ale lao tolea. La merera alele ge puru, igoie eia puruti.
ACT 1:17 E Iudas pala amite igogolu vikapopo, eia abi tai la igogolu te Iesus ele.”
ACT 1:18 (La tahalo ale e Iudas, eia loto la gale la magasa isasa. La mani ale eia loto la magasale ovola, la mani alele la mapa la iruru tetala. Eala moli eia sae soata te la obu oata te la gove, eia boru sotalo te la uatati, la tiala mapola, la tamusila poro, eia pehotio.
ACT 1:19 Tio la valalua tomi e Ierusalem, egite lolo la rerela mai ele, egite goio toi la isa la gale ale e Akeldama. Me la masovala te la merera tegiteu maie: La magasa la kasoso.)
ACT 1:20 Tio, oio moli ovola, e Pita goio valolo lou egiteu mago “Oio te la Buk Tabu Ale Pala, te la merera te Devit, eia vikara matagaga maie: Taritigi la luma te la tahalo ale ge kavelevele moli, isasa umala ge pou oio vola. Tio me la merera isa tai lou eia veia maie: Taritigi la tahalo isapolo eia ge sau tola la igogolu te la tahalo alele.
ACT 1:21 “Tio, taritigi etato ge hilovi isa tegatou ale tilimuli e Iesus,
ACT 1:22 pala te la silokola ale e Ioanes vuhi la valalua, kara te igoie ale La Tahalo Uru puli taroti letatou e Iesus soata. Mai ge la tahalo isa maie, eia ge veipala tigi ale e Iesus mahuli rivuti lou.”
ACT 1:23 E Pita vikara kaluvu mai ele, egite goio toi taho lua tegiteu ele, isasa e Iosep Basabas, la isala isa lou e Iastas, tio isasa lou e Mataias.
ACT 1:24 Goio, egite kaka tavu La Tahalo Uru, egite veia maie “Eme La Uru, eme rovi la tia miteu tomi. Eme ge vahilo le amiteu isasa tegirua ale taho lua ale eme masagea,
ACT 1:25 eia ge magiri la mulile Iudas te la igogolu ale eia paru keke tarotia, eia goio te la pulolou tegiteu ale kama kokora. Eme ge vahilo le amiteu isasa, la tahalo ale ge la bilalaha taume.”
ACT 1:26 Tio oio moli ovola, egite kekesi la isa girua, egite goio vipigi vulola, la isale Mataias eia paru mamuga. Tio egite goio vigigia vikapopo legiteu ale savulusa gete sale e Mataias ele, egiteu savulusa gete luati louo.
ACT 2:1 Te la haro la pougolula ale egite Iuda toila te la vikararala tegiteu veia e Pentikos, te la haro alele, egite ale oilo te la lotu te Iesus, egite goio pou vikapopo te la luma isasa.
ACT 2:2 Goio, egite lolo la tilali la paga isa uru, eia sibitala loata te la mori, eia tali magugulu, la tilalila mai la tilali la hipu isa uru. Egite loloa, egite karutu. Eia goio vulo oilo te la luma ale egite pou vikapopo oilo volale.
ACT 2:3 Goio, egite hilo la paga mai la kalamamea la havi ale karerere, egite la kalameala alele goio tubu tegiteu tomi isasasa.
ACT 2:4 Eia goio pou tegiteu isasasa mai ele, La Kalulu La Marokala goio pou oio tegiteu tomi la bilalaha te Iesus ele, la tia giteu tomi tivura. Tio egite goio soko la vikararala, eala moli la vikararala tegiteu kama visauru, eia isapolopoloti, la vuhula La Kalulu La Marokala eia veipalatia te la hare giteu. Egite, la vikararala tegiteu isapolo, la vikararala tegiteu kati isa moli, la vikararala tegiteu isapolopolotio.
ACT 2:5 Tio egite Iuda isahari, egite la valalua la lotu tai tegite Iuda ale loio te la igaga la maututula, egite gomai te la ilali la pougolula, egite pou la mosi oio e Ierusalem,
ACT 2:6 egite tomi usu lolo la vikarakarala tegiteu mai ele, egite usu hari vikapopotio, egite goio lolotia la vikararala tegiteu la bilalaha te Iesus ele. La vikararala tegiteu kamati visauru, la valalua loloa mai ele, egite lolo kositia, la vuhula egite vikarakarati te la merera te la galegale tomi.
ACT 2:7 Egite karutu pepeho, la gabutatalala tegiteu marapatio. Egite vitahi baoli egiteu mago “Mave, egite ale vikarakara, egite la valalua e Galilea tomi moli, ia?
ACT 2:8 Ere vimari legiteu la vikararala tegatoue, ale egite vikarakarati ovola, etato lolotia?
ACT 2:9 Etatou la valalua e Patia, la valalua e Midia, me la valalua e Ilam. Etato isahari loio la gale Mesopotemia, la gale Iudea, la gale Kapadosia, la gale Pontas, me la gale Esia tai.
ACT 2:10 Etato isahari tai loio la gale Prisia, la gale Pampilia, la gale Gipto, la gale Libia hagagavi e Sairini. Etato la valalua la mosi tai isahari loio la mautu uru e Rom.
ACT 2:11 Etato la valalua e Iuda vikapopo tai isahari la valalua tomi ale lotu la lotu e Iuda. Isahari tegatou, egite loio la gale Krit, la gale Arabia. Etato tomi lolotia, egite valoloti letatou la golu la karutula ale La Tahalo Uru igotia. Egite vikaratila la merera tegatou tomi isasasa. Eala moli egite rovia mave?”
ACT 2:12 Tio, egite tomi karutu sesele mai ele, egite vitahi baoli egiteu mago “Ere visibitala la mererale te la gabutatalala tegiteu veia egite ge veipalea mai ele?”
ACT 2:13 Eala moli la valalua isahari, egite muku pile egiteu, egite veia mago “La valaluale, egite pauati, la vuhula egite liu, eala egite vikara bububu moliti ele!”
ACT 2:14 Mulimuli egite la bilalaha te Iesus ale savulusa gete lua, egite goio magiri vikapopo, e Pita goio hiliti, eia soko la valolo soio tegiteu la valalua me hatavivile tomi maie “Amutou tomi la valalua e Iuda, me amutou tomi la valalua ale amuto pou la mosi omai e Ierusalem, amuto tomi ge laba gele somai taku, la vuhula eau la merera isa koramuli amutou, amuto ge rovia.
ACT 2:15 Amuto veia egite la valalua aleie, egite liu, egite paua. Eala moli ouka. Ale la paga so kavikoki moli.
ACT 2:16 Eala moli taritigi amuto ge rovia veia la bilalaha ale pala, la isala e Ioel, eia valolo matagagatila alaura, eia veipala la merera te La Tahalo Uru maie:
ACT 2:17 Eau ge baha pala muga la riau taku soio te la maututula. Mulimuli eau ge baha taro La Kalulugu sotalo te la valalua, mai te la imamala ale hagagavi te la tapasi la maututula. La Kalulugue ge pou tamutou tomi. Eia ge pou te latatu mutou, egite ge veipala la vikararala te La Tahalo Uru. E latatu mutou ale hatamalelaba, eau ge vahilo legiteu la vulovulo ale taritigi. Egite ururu tamutou tai, egite ge mavuta te la logo, egite ge hilo la tilaga, eau ge veipalea giteu la gabutatalala taku.
ACT 2:18 Te la haro alele, eau ge baha La Kalulugu, eia ge pou tai tegiteu la valalua me hatavivile ale egite roromulimuliau, la ilo giteu ge tivura La Kalulugu, egite ge veipala la merera taku.
ACT 2:19 La golu la karutula isahari, egite ge sibitala oata te la mori te la haro alele. La irovilala tai te la vagagari La Tahalo Uru, eia ge sibitala otalo te la maututula, mai la kasoso, la havi, me la sosobu.
ACT 2:20 La mata la haro ge maligoma, e logoharo ge sibitala. La mata la taio ge magegese. La vuhula, la haro ale la viputumulila te La Uru ge sibitala oio vola, eia hagagaviti. La haro ale, eia ge kama kokora, la valalua tomi ge karutula,
ACT 2:21 eala moli te la haro alele, egite ale lotu tavu seselea, La Tahalo Uru ge toro robo egiteu.” La vikararala te la bilalaha te La Tahalo Uru ale pala e Ioel, eia veia mai ele, e Pita veia.
ACT 2:22 Tio, e Pita goio soko lou la valolo tetala soio tegiteu, eia veia maie “Taritigi amutou la valalua e Israel, amuto ge lolo tigia la vikararala taku. E Iesus, la tau Nasaret, La Tahalo Uru bahea. Ale etato rovia, la vuhula la igogolu ale ururu eia igotia. Mai la golu la karutula, la golu la irovilala te la vagagari La Tahalo Uru tai. Amuto rovitia, la igogolu ale, eia igoa te la vagagari La Tahalo Uru. Eia vahilo le amutou, veia amuto ge rovia veia e Iesus, La Tahalo Uru bahea.
ACT 2:23 Eala moli alele, La Tahalo Uru veitia pala te la masasagala tetala, eala eia mata soli moli la tahalo ale sugu taro e Iesus soio tegiteu la valalua ale kama kokora veia egite ge bilia. La iruru alele, amuto tai igoa, la vuhula amuto tai hiloa, amuto mai ale tutu tolea giteu veia egite ge bili e Iesus ele. La iruru aleie, eia tamutou tai.
ACT 2:24 Eala moli La Tahalo Uru vahiliti lou e Iesus lotalo te la liba, eia mahuli rivu lou. La Tahalo Uru vahiliti tarotia lotalo te la iligiligi ale uru ele. Oio vola, etato rovitia, la pileho kama bolehoho e Iesus, ouka. E Iesus bolehoho la pileho.
ACT 2:25 “Sesele, mai la merera e suara uru tegatou e Devit, eia kekesia pala, eia valolo matagagati le Iesus ele, eia veia maie: Eau hilo bibibi La Tahalo Uru te la gabutatalala taku, eia mamugeau te la haroharo tomi. Eia pou taku, eia susuliau, eala la golu isasa kama ge igo gegeruau veia eau ge taga, ouka.
ACT 2:26 La ilogu sagege moli, eau vikarakara moli la sagegela, la gabutatalala taku oilo malilo tataho, eau ge pou tali la vimahulila te La Tahalo Uru ale eia ge abiagu mulimuli.
ACT 2:27 La vuhula eme kama ge mata soli moli la kalulugu veia eia ge pou otalo tegite ale pehoti. Eme kama ge sigolo taro moli la tahalo la maroka taume veia la vovogu ge parara otalo te la liba.
ACT 2:28 Eme vituri muliti leau la gauru ale eau ge tilimulia veia eau ge sau tola la pulolou ale taritigi. Etala ge vipou tomi, alele eau ge sagege pepeho.”
ACT 2:29 Tio e Pita gigi kaluvu la merera te Devit mai ele, eia goio soko lou la valolo tetala mago “Amuto e tabarabaragu, amuto ge pou laba gele somai, eau ge vei matagagea mutou te tubu gatou e Devit. Eia pehoti alaurati, egite ulaitia. La libala tabuliti alaurati karati igoie, etato hilotia. La libala omai tegatoue.
ACT 2:30 Eala moli e Devit, eia isasa la bilalaha te La Tahalo Uru, eia rovitia veia La Tahalo Uru toiti la merera ale sesele, veia mulimuli e tubula isasa ge kolia, veia eia ge pou la mulila, eia ge mamuga.
ACT 2:31 E Devit rovitia pala veia mulimuli e Kraist ge peho, eia ge mahuli rivu lou, la vovola kama ge parara otalo te la lulu la pileleho, ouka.
ACT 2:32 La Tahalo Uru vahiliti e latula lotalo te la lulu, eia mahuli rivu lou. Amite tomi hilotia, eala amite valolola.
ACT 2:33 Eia mahuli lou, eia goatati, La Tahalo Uru vaurua, eia vipoua te la balila e gata. La Tahalo Uru vipoua mai ele kaluvu, eia abiale Iesus La Kalulu La Marokala ale eia pala vei seseleala veia eia ge abiala. E tamala abi kaluvuala, e Iesus goio veipala la golu la karutula sotalo te la valalua, mai ale amuto hilotia, amuto lolotia.
ACT 2:34 Etato matagagati mai ele, la vuhula etato rovitia veia e Devit, eia kama goata te La Tahalo Uru. Eala moli eia veia maie: La Tahalo Uru veia la uru taku mago ‘Taritigi eme ge abi la pulolou te la uru omai te la baligu e gata,
ACT 2:35 kara ale eau ge bolehoho egite la gima taume, eme ge toa mumugu egiteu.’
ACT 2:36 E Devit veia maie, eala eia taritigi veia etato tomi la valalua e Israel ge matagagati veia la riau ale La Tahalo Uru hilovitia veia ge vaurua, la tahalo ale e Iesus moli, ale amuto katu tolea oata te la tauvalautu!”
ACT 2:37 Tio, egite lolo la valolo te Pita mai ele, egite ilo burukotio, egite goio tahi e Pita mite me la bilalaha mago “Amite lolo la valolo ale, la gabutatalala tamite oilo vulo sesele. Amite ge igo la rova gageie?”
ACT 2:38 Tio e Pita goio veia giteu mago “Amuto tomi ge gabutatala rivu la iruru tamutou, amuto ge vuvulo ge isapolo, ge vuhi amutou te la isale Iesus Kraist, La Tahalo Uru ge gabu taro la iruru tamutou, eia ge vibalava le amutou La Kalulu La Marokala.
ACT 2:39 La vuhula, pala La Tahalo Uru veitia veia eia ge lova le amutou me latatu mutou megite la valalua me hatavivile lobali tai, egite tomi ale La Tahalo Uru visati legite veia egite ge tetala.”
ACT 2:40 E Pita valolo kaluvu egiteu mai ele, eia goio viteteli lou legiteu la vikararala usu, eia tutu tolea giteu mago “Amutou ge igo tigi, amuto souka ge vilua te la kolibarala te La Tahalo Uru ale eia ge vilai la tuvu ale igoie, la vulovulo giteu kama kokora!”
ACT 2:41 Tio egite gabu tikumua la merera te Pitale, egite roromulia, e Pita mite goio vuhi egiteu. Tio me egite ale goilo halaba te la lotu te la haro ale, la giligi gite savulu salatu tolu.
ACT 2:42 Egiteu la valalua halaba te la lotu, egite sau tola sesele la merera tegite la bilalaha, egite vipuhi tigi, egite visuli baoli te la ilali me la kilaka.
ACT 2:43 La Tahalo Uru igo la golu la karutula, la irovilala tai isahari, oio te la lima giteu tomi ele, tio la valalua egite hiloa, la vule giteu paru.
ACT 2:44 Egiteu la valalua la lotu, egite vimou tomi moliti, egite tahola vikapopo la golugolu tegiteu tomi. La vulovulo giteu maie:
ACT 2:45 Egite ge sugu taro la golugolu tomi tegiteu soio tegiteu la valalua la ilotoloto, ge lotoa, la uati ele egite ge tabaria soio tegiteu isasasa mai la savelela tegiteu, ge vimavulaha egiteu mai ele.
ACT 2:46 Te la haroharo tomi moli egite ge goio vikapopo te la luma la lotu ale uru, ge lotu. Eala moli te la ilali, egite moli ge vibolemuli, goio alali la lumaluma tegiteu isasasa. Egite ali moli, la sagegela uru volu te la tia giteu.
ACT 2:47 Egite ge bole vauru la isa La Tahalo Uru, me te la milatalata te la valalua, la vulovulo giteu taritigi moli. Te la haroharo tomi La Tahalo Uru ge vagoilo halaba lou la valalua me hatavivile isahari ale eia ge lapu rivurivu legiteu te la limale Satan.
ACT 3:1 Goio, mulimuli te la haro isasa, e Pita me Ioanes egira goio te la luma la lotu, te la mata la haro itolu, ale egite Iuda lotulotu ovola.
ACT 3:2 Egira goio sibitala oio te la luma la lotu ele, egira goio hilotia la tahalo isa eia gulugulu, eia popou te la mata la luma la lotu ale egite toia “E Marasa”. E tilala taposea, eia mai moli ele, eia gulugulu. Te la haroharo tomi egite tabarabarala ge bolebolea soio, egite ge vipopoua oio te la mata la luma la lotu ele, veia eia ge kaka la uati tegiteu la valalua me hatavivile tomi ale egite goilo te la luma la lotu.
ACT 3:3 Tio e maura la gulugulu ele goio hilotia e Pita me Ioanes, egira ga tiroro soilo te la luma la lotu, eia goio kaka egirua bakisi la uati.
ACT 3:4 E Pita me Ioanes mata tavutiao, e Pita goio veiala mago “Eme mata somai!”
ACT 3:5 E maura goio vulo gele, eia mata tavu egirua, veia egira ge abiala ilua la uati.
ACT 3:6 Eala moli e Pita goio veiala mago “Amila la uati ouka. Eala moli la paga isa amila taholea, amila ge abiamu gageie. Te la isale Iesus la tau Nasaret, eme ge magiri oata, eme soko la tuluga.”
ACT 3:7 Goio, e Pita sau te la limala e labalaba, vahilitia. Tio oio moli ovola, la tumolakeme tetala ilua tali paga, la paalaobula vagaritio,
ACT 3:8 eia goio hiliti, magiri, eia sokoti la tulugao. Eia goio tilimuli egirua, egite goilo te la luma la lotu. Egite tatuga, eia ragaraga, eia soatototo, eia vaisale La Tahalo Uru.
ACT 3:9 La valalua tomi hiloa eia tatuga, eia vaisasale La Tahalo Uru.
ACT 3:10 Egite hiloa eia tatugale, egite rovitia veia eia moli ale poupou oio te la mata la luma la lotu ale egite toia “E Marasa” kakaka la valalua. La gulugulue, egite hiloa eia posa tahaloti, egite karutu sesele, la vule giteu paru.
ACT 3:11 La gulugulu ele, eia so sau tatola e Pita me Ioanes, egite oio la matabala la luma la lotu ale egite toia veia La Matabala Te Solomon. La valalua me hatavivile tomi hari vikapopo soio tegiteu, egite karutu sesele.
ACT 3:12 E Pita hilo egiteu mai ele, eia veia giteu la valalua me hatavivile mago “Amuto la valalua e Israel, ilava la gabutatalala tamutou marapa te aleie? Amuto mata sosoli amila ia? Amuto soioge veia amila vahilititi la tahalo ale te la vagagari milua, me te la vulovulo milua ale taritigi, ia? Eala moli ouka.
ACT 3:13 Amuto tomi la valalua e Israel. Amuto ge rovia veia La Tahalo Uru te Abraham me Aisak me Iakob, La Tahalo Uru te tutubu gatou, eia igoa veia eia ge vauru la isa la bilalaha tetala e Iesus, ale amuto sugu tarotia giteu la gima. E Pailat ga lubea, eala moli amuto kama masaga, amuto pile molia.
ACT 3:14 Amuto tahi taro moli La Riau te La Tahalo Uru ele, La Tahalo La Maroka, amuto masaga e Pailat ge lubea mutou la tahalo la bilili.
ACT 3:15 La Riau ale ge puli etatou soio te la gauru la mahulila, amuto bilitia. Eala moli La Tahalo Uru vahilititia taro la pileho, ale amila la tahalo la valolo te la paga ale amila hilo seseletia.
ACT 3:16 Amila roromuliti e Iesus, mai ale te la isale Iesus, la gulugulu ele, amuto hilotia igoie, eia mahuli tatahoti. La tahalo ale amuto tomi rovia. Amila gabu tikumu moli la isale Iesus, eala igoie amuto hiloa la gulugulu, eia posa tahalotie.
ACT 3:17 Tabarabaragu, eau rovia maie veia amuto me egite la ururu tamutou kama matagaga tigi, eala amuto igo gegeru e Iesus mai ele.
ACT 3:18 Alaura La Tahalo Uru vikara matagagati te la hare gite la tahalo la veipalala la merera tetala, veia la bilalaha La Riau tetala ge gabu la iligiligi. Me te la vulovulo ale amuto igotia, eala la merera tetala eia puruti igoie.
ACT 3:19 Amuto ge vulo la gabutatalala tamutou, La Tahalo Uru ge sabubu taro tomi la iruru tamutou, La Uru ge pou tamutou ge abia mutou la sagegela, amuto ge maila tataho te la isala.
ACT 3:20 Me eia ge baha e Kraist somai tamutou, ale e Iesus moli ale La Tahalo Uru visati le amutou pala, veia ge vimahuli amutou.
ACT 3:21 Ale eia ge pou muga oata la ilo la lage, kara te la haro ale La Tahalo Uru ge igo halaba lou la golugolu tomi, mai pala eia veipalatia te la hare giteu la bilalaha ale maroka egite veipala la vikararala tetala.
ACT 3:22 Mai la uru tegatou e Moses pala eia veia: La Tahalo Uru ge vahiliti isa la tahalo kabili tamutou, eia ge mai louau, eia ge veipalea mutou la merera te La Tahalo Uru, taritigi amuto ge loloa.
ACT 3:23 Mai la tahalo isasa ge tou la merera tetala, taritigi la valalua ge bili taro molia, eia kati ge pou tegiteu, eia ge pou gale.”
ACT 3:24 E Pita toi kaluvu la merera te Moses uru mai ele, eia goio valolo lou mago “Sesele, egiteu la bilalaha tomi ale veipala la merera te La Tahalo uru, la mulugala e Samuel Uru, me egite tai ale mulimuli tetala, egite tomi vikarakarati te la imamala ale igoie ale la tahalo la vimahulila tegatou ge sibitala.”
ACT 3:25 Tio, e Pita goio vikara kaluvu mai ele, eia goio vei matagaga moli loua giteu maie “Amutou moli ele e tutubu giteu la bilalaha ale palale, amuto sau tolati la vavua la merera te La Tahalo Uru ale tikumu eia tautia soio te ururu gatou ale eia veipala mugeale Abraham maie: La hilimu mulimuli, egite ge usu. Oilo vola isa ge sibitala ale ge vibalava la maututula tomi.”
ACT 3:26 E Pita vikara mai ele kaluvu, eia goio vikaluvu pasi la valolo tetala mago “Ale La Tahalo Uru vimahuli la bilalaha tetala e Iesus uru ele, eia gabutatala etatou la valalua e Iuda, pala muga eia veia eia ge lapu rivu lou etatou te la iruru tegatou isasasa, etato ge pou la balavala te la matagaga tetala ale taritigi.” Tio oio volale, la merera bakisi te Pita kaluvu tiele.
ACT 4:1 Ale e Pita me Ioanes so valololo egiteu la valalua me hatavivile oio te la luma la lotu ele, la valolo tegirua souka kaluvu, tio egite pris, me la mulugaluga tegiteu ale vagari robo la luma la lotu, me egiteu e Sadiusi tai isahari, egite goio sibitala robo egirua.
ACT 4:2 Egite goio igo totoloti egiruao, la vuhula egira valololo legiteu la valalua la merera ale isapolo, ale e Iesus peho, eia mahuli rivu lou.
ACT 4:3 Goio, egite lao tola egirua, veia ge kotia girua, eala moli la paga maulaviti, egite kisi tola egirua veia galigeli egira ge magiri te la vigagiala.
ACT 4:4 Egite pris kisi tola egirua mai ele, eala moli la valalua lolo kaluvutia la merera tegiruale, egite usu gabu tikumuti la masovala, egite vulo la tia giteu, me oio moli ovola la giligi giteu la valalua te Iesus kara te salatu savulu lima.
ACT 4:5 Tio, goio mai galigeli ele, egiteu la mulugaluga te la lotu tegite Iuda, egite ururu tai me egiteu la tahalo la vimari te la viputumulila te Moses, egite tauti la mata veia egite ge pou te la viputumulila tegiteu oio e Ierusalem.
ACT 4:6 Egite ge pou vikapopo me Anas, eia la mulugaluga ale pala, me Kepas eia la mulugaluga tegite sesele, e Ioanes, me Aleksanda, egira rovi sesele la viputumulila te Moses, me egite ururu tomi te la karakara tegiteu ele.
ACT 4:7 Goio, egite pris vimagiri e Pita me Ioanes kabili posa te la lagu giteu la mulugalugale, tio egite goio tahi egirua mago “Amula alalavi vahilititi la gulugulu. Ale amulua igoa te la vagagari la isale ere? Ere veia mulua ge igogolu mai ele?”
ACT 4:8 Eala moli la tiale Pita eia tivura te La Kalulu La Marokala, eia veia giteu mago “Amuto ururu tomi ele ge loloau.
ACT 4:9 Igoie amuto veia ge tahi amilua te la igogolu la gilogo ale amila vahilititi la gulugulu ele, veia amila igoa mave.
ACT 4:10 Taritigi pepeho, eau ge lubea mutou, amuto ge loloa, la vuhula eau masagea veia la valalua e Israel tomi ge rovia veia la pagale, amila igotia te la isale Iesus, la tau Nasaret, ale amuto katutia oata te la tauvalautu, eia peho, La Tahalo Uru vimahuli loua. Eala te la vagagarile Iesus moli ele la tahalo ale eia posa tahaloti, eia magiriti te la lagu mutoue.
ACT 4:11 Ale la vagagarile Iesus ele, eia mai La Buk Tabu Ale Pala eia vikara pala muga te Iesus moli maie: La sosole la luma ale amuto la valalua la tiligi la luma veia eia pusati, eia igoie magiri kabili, eia sau tola tomi moli la tikumu la luma te La Tahalo Uru ale eia tigia.
ACT 4:12 Isa ouka lou ge vimahuli etatou. Etato ge polo galili te la maututula tomi, etato kama ge sivuti isa lou la tahalo ale La Tahalo Uru toi la isala soio tegatou veia ge vimahuli etatou, ouka sesele, e Iesus moli.”
ACT 4:13 Tio, e Pita valolo egiteu mai ele, la gabutatalala tegiteu marapa, la vuhula egira la tahalo bulalahu moli, egira kama pou te la vimari, eala moli egira kama makuku legite ururu. Oio moli ovola, egite rovia veia egira la tahalo te Iesus.
ACT 4:14 Me egite hilo tai la gulugulu ele, eia oio magiri vikapopo legirua, egite kamati vikara, egite makovu molitio.
ACT 4:15 Goio, egite baha taro egiteu taho tolu ele sogala veia egite moli ge viputumuli tigi mugea.
ACT 4:16 Egite vitahi baoli egiteu mago “Etato ge igo egirua mave? La vuhula igoie moli la valalua tomi e Ierusalem lolotia veia egira igoti la golu la karutula te la vagagari La Tahalo Uru, me etato ge tahi taro lou mave?
ACT 4:17 Eala moli umala la rere girua ge tali te la maututula tomi. Etato ge mera taro vagari egirua veia egira ge umala alali lou la ilo la valalua isahari lou.”
ACT 4:18 Tio, egite viputumulia mai ele, egite baha tavu lou e Pita me Ioanes soilo. Egite mera taro vagari egirua veia umalati egira ge valololo lou la isale Iesus soio te la valalua tomi.
ACT 4:19 Eala moli e Pita me Ioanes hiliti, egira goio koli la merera tegiteu maie “Amutouto, amutou ge rovia veia te la gabutatalala te La Tahalo Uru, eia taritigi veia amila ge roromuli amutou, uka amila ge roromuli moli eia?
ACT 4:20 Amila kama ge piligia la golugolu tomi ale amila hilotia, lolotia, amila kama koramulia ge maila taroa.”
ACT 4:21 Egira vikara kaluvu, egite ururu goio mera taro lou egirua, vagogala egirua. Egite ka koramuli veia ge viligi lou egirua, la vuhula la valalua tomi vaisale La Tahalo Uru te la igogolu tegiruale.
ACT 4:22 Me la gulugulu ale egira vahilitia, eia kati bisi, eia uruti. Etato ge rovia la leavala tetala savulu vaati gegete.
ACT 4:23 Tio, e Pita me Ioanes gogala, egira sele molia goio pou vikapopo le tabarabara girua, egira gilemulia giteu la merera tomi ale egite ururu tutu tolatia girua ovola.
ACT 4:24 Egite loloa mai ele, egite tomi goio soko la kilaka soata te La Tahalo Uru maie “Eme La Uru. Eme vipou la mori, la magasa, la mago, me la golugolu tomi oilo vola.
ACT 4:25 Te La Kalulumu La Marokala eme pala veipala la merera te la harele tubu miteu e Devit, la bilalaha taume, ale eia veia maie: Igo mave la maratatila tomi ale logala tamite Israel, egite vaubibi moli, la pulolou tegite la valalua maraparapa?
ACT 4:26 Ilava egite suarara tomi tegiteu karasuku la valalua la ruruga veia egite ge vikapopo ge vaubi somai taume La Uru me somai te la bilalaha taume?
ACT 4:27 La merera alele, igoie eia puruti. Omai moli e Ierusalem e Herod egira me Pontias Pailat, egira viputumulitia vikapopo me egiteu ale logala tegatou e Israel me la valalua e Israel tai isahari, veia ge vaubi soio te la riau taume, e Iesus, ale eme bahea veia ge vimahuli amiteu.
ACT 4:28 Eala moli egite igoa mai ele, me oio vola la merera taume ale tikumu, eme rovitia pala, eia ge puru.
ACT 4:29 Eme La Uru ele, taritigi eme ge hilo la igototolola tegiteu ele, eme ge suli amiteu, la tia mite ge tivura, amite ge vagari moli te la valolo taume.
ACT 4:30 Me te la vagagarimu moli eme ge vimahuli egiteu la ilea, eme ge igo la golu la karutula, me la irovilala te la isa la bilalaha taume ale maroka, e Iesus.”
ACT 4:31 Tio, egite so kakaka mai ele, la luma goio malugu, La Kalulu La Marokala eia sivo robo egiteu, la ilo giteu tivuratio. Egite vagari pepeho lou te la veipalala la merera te La Tahalo Uru, egite kamati taga.
ACT 4:32 Egiteu tomi la valalua la lotu te Iesus, la gabutatalala tegiteu isa moli, egite vipuhi tigi. Mai isasa eia pala ge tahola isa la paga, eia kamati ge veia mago “La paga ale taku sesele.” Ouka. Egite tomi ge hiloa, egite ge veia mago “Ale tegatou tomi.”
ACT 4:33 Egiteu la bilalaha te Iesus, la igogolu tegiteu la valolo te la isale Iesus moli, ale eia peho, eia goio mahuli rivu lou. La valolo tegiteu tivura. Egite tomi gabu sesele la gilogo uru te La Tahalo Uru.
ACT 4:34 Egite isa ka gege, la vuhula egite ale la golugolu tegiteu oio, egite sugu taro molia soio te la tahalo la iloto, mai la magasa tegiteu ka la rova, egite ge abi la uati alele, vaharia soio te Pita miteu,
ACT 4:35 taua te la lagu giteuo, egite tabaribari legiteu ale pou la savelela.
ACT 4:36 Tio la tahalo isa oio tegiteu, la isala e Iosep, eala moli egite toi vulo la isala veia e Banabas, la masova la isa aleie eia maie: La Tahalo la Vitetelila, la vuhula eia viteteteli egiteu te la vulovulo ale taritigi. Eia la tau Iuda, eia isa tegiteu la hilile Levi, la mautu tetala sesele olau e Saipras.
ACT 4:37 La tahalo ale, eia sugu taro la gale la magasa tetala, eia abi la uati ovola, goio taua te la lagule Pita miteuo.
ACT 5:1 La tahalo la lotu isasa, la isala e Ananaias, me rutula e Sapaira,
ACT 5:2 te la haro isa egira sugu taro la gale la magasa tegirua soio te la tahalo la iloto, eia lotoa, egira abi la uati ovola. Egira abi la uati alele, egira gigia, egira goio lele luea, la galela isasa tegirua, la galela isasa e Ananaias goio taua te la lagule Pita miteu, eia veia giteu mago “Male la mapa tomi la magasa tamila me rutugu.”
ACT 5:3 Goio, e Pita veiala mago “Ananaias, mave, e Satan puli rurutime, ia, eala eme visigoloti La Kalulu La Marokala, ia?
ACT 5:4 La magasale taume, la mapala tai taume, ere tutugolotime la visigolola alele? Eme kama visigolo la valalua, eme visigoloti La Tahalo Uru.”
ACT 5:5 E maura e Ananaias, eia lolo la vikararala te Pita mai ele, eia goio boru moli sotalo, eia peho, eia paru pasitio. Egiteu ale hiloa, la vule giteu tomi paru sesele, egite taga pepeho.
ACT 5:6 Egite maure bisisi goio avua, egite bolea sogala, goio ulaitiao.
ACT 5:7 Tio, goio tabaa bakisi mai gai, e rutula goio sibitala, eia kama rovia e haruala pehoti.
ACT 5:8 Goio, e Pita turiala la uati, mago “La uati la magasa tomi alatie?” Tio la tavile goio kolia mago “Meie, eala tomi ele.”
ACT 5:9 Eala moli e Pita goio veiala mago “La vuhula lava amula me haruamu viputumulitia veia ge tovo lalai La Kalulu La Marokala? Malele, egite ale so ulalai e haruamu, egite logalagalale. Egite ge bole taime gageie!”
ACT 5:10 Tio, oio moli ovola la tavile boru moli otalo te la lagule Pita, eia peho, vali sele molia. Tio egite goio bole loua, goio ulaia te la balile haruala.
ACT 5:11 Me oio moli ovola, egiteu la valalua la lotu tomi, egiteu la valalua bulalahu tai ale loloa, egite tomi makuku, egite taga pepehotio.
ACT 5:12 Egiteu la bilalaha, egite igo la golu la karutula, me la irovilala tai te la vagagari La Tahalo Uru, egite igo pepehoa kabili te la valalua. Me egiteu la valalua me hatavivile la lotu tomi, egite pou vikapopo te la matabala la luma la lotu ale egite Iuda toia veia la matabala te Solomon. Egite masaga ge lotu, egite ge goio ge pou vikapopo ovola.
ACT 5:13 Egite la valalua hiloa mai ele, egite taga, eala moli egite pou moli la tilogo soio tegiteu, vei tataho moli egite.
ACT 5:14 Me la valalua usu pepeho, egite roromuliti la merera te La Uru, egite goilo, egite pouti la uluva giteu la valalua tetala.
ACT 5:15 Egite la bilalaha igo la golu la karutula usu, eala la valalua goio bolea egite ale lea, vitabuli egiteu oio te la pepe la gauru, egite veia mai la haro ge paga, e Pita ge tatuga te la gauru ele, la halulula ge pigi robo egiteu, egite ge mahuli.
ACT 5:16 La valalua tai isahari, te la maututula ale hagagavi e Ierusalem, egite vahari tai la ilea isahari, egite tai isahari la hituhitu igo paua egiteu, goio egite la bilalaha vimahuli egiteu, egite mahuli tatahotio.
ACT 5:17 Tio, la mulugaluga tegite pris, egiteu la valalua tetala tomi, vikapopo me egiteu e Sadiusi, egite gabutatala barea giteu la bilalaha te Iesus.
ACT 5:18 Goio, egite lao tola egiteu, egite tau egiteu te la kilisi ale vagari, vikapopo me egiteu la valalua la iruru.
ACT 5:19 Eala moli te la logo, La Tahalo Uru baha isa e angelo tetala soio, eia goio kope taro egiteu te la luma la kilisi, me eia karasuku lou egiteu, mago
ACT 5:20 “Taritigi amuto ge goilo te la luma la lotu ale uru, veia amuto ge vei matagagea la valalua me hatavivile te la vulovulo la mahulila ale halaba.”
ACT 5:21 Ale egite la bilalaha abiti lou la vigagiala mai ele, egite gua moli te la kavikoki sasaha, soio te la luma la lotu ale uru, me egite valolo la valalua me hatavivile oio vola. Mulimuli, la mulugaluga tegite pris me egiteu la valalua tetala, egite goio tola vikapopo egiteu tomi la mulugaluga tegiteu la valalua e Israel, egite goio vikara vikapopo. Tio egite baha soio te la luma la kilisi, mago “Amuto ge vahari egiteu somai.”
ACT 5:22 Eala moli egite la valalua la vagari robola goilo te la luma la kilisi, egite taga moliti e paa, la vuhula egite la bilalaha te Iesus oukati oio. Tio egite tete rivu, egite valolo mago
ACT 5:23 “Amite hilo la mamata tomi kapi robo, me egite la tahalo la pahutu robola oio magirigiri, eala moli amite kope, egite la bilalaha te Iesus isa kamati oilo!”
ACT 5:24 Goio, la mulugaluga tegite soldia ale pahutuhutu la luma la lotu me la mulugaluga tai tegite pris, egite marapa sesele, egite gabutatala papai ovola.
ACT 5:25 Goio, la tahalo isa eia sibitala tavu egiteu, eia veia giteu mago “A ge, mutou, egite la valalua ale alalavi amuto vagoilo egite te la luma la kilisi, egite oio te la luma la lotu. Egite oio valololo la valalua me hatavivile!”
ACT 5:26 Tio goio, la mulugaluga tegite soldia te la luma la lotu me egiteu la valalua tetala, egite goio puli rivu lou egiteu la bilalahale. Eala moli egite kamati kisi lou egiteu, oukati, la vuhula egite taga, la valalua me hatavivile souka ge ubi legiteu la uati.
ACT 5:27 Tio, egite goio lapu e Pita miteu ele, egite goio vimagiri egiteu oio te la mata giteu la mulugaluga. La mulugaluga isa uru goio tahi egiteu
ACT 5:28 mago “Amite mera taro vagariti amutou, veia amuto umalati ge valololo lou la valalua te la isa la tahalo ale, e Iesus ele. Eala moli ouka, amuto kama lolo, amuto igotia la valolo tamutoue, la mautu uru e Ierusalem eia voluti la merera tamutou ele. Eala moli amuto ubi le amiteu la merera, veia amite bili la tahalo tamutou ele.”
ACT 5:29 Tio, e Pita miteu goio koli la merera tegiteu mago “Eala moli amite ge tilimuli moli la merera te La Tahalo Uru. Amite kama koramulia veia ge roromuli amutou la tahalo la vovo.
ACT 5:30 Amuto katuti e Iesus oata te la tauvalautu, amuto bilitia, eia pehoti, eala moli La Tahalo Uru tegatou, ale sau tola etatou e Iuda palati te tutubu gatou kara te igoie, eia vahilititi loua taro la lulu la pileho.
ACT 5:31 Eiala, La Tahalo Uru pulitia soata, eia vipoutia oata te la balila, eia ge mamuga, veia eia ge suli etatou, veia etato la valalua e Israel ge gabutatala rivu lou la iruru tegatou, ge vuvulo, eia ge vimavulaha etatou te la iruru tegatou.
ACT 5:32 La igogolu tamiteu, amite ge pou tavu moli la valolo te la merera aleie. La Kalulu La Marokala eia ge vitikumu tai la merera tamiteu. La Kalulu, eia la vaabila te La Tahalo Uru tavu egiteu ale roromulia.” E Pita veia giteu mai ele.
ACT 5:33 Egite ururu loloa mai ele, la hate giteu mamasi pepeho, egite vagari veia ge bili egiteu ele.
ACT 5:34 Eala moli e Pariseo isa uru oio, la isala e Gamaliel, eia la tahalo isa ale vimarimari legiteu te la viputumulila te Moses, la valalua tomi togo molia. La tahalo ale, eia goio magiri te la lagu gite ururu, eia baha taro egiteu la bilalaha te Iesus veia egite ge pou muga bakisi ogala.
ACT 5:35 Egite gogala, e Gamaliel goio vikara soio tegite ururu maie “Amutou la tau Israel ele, gabutatala tigi muga ale amuto ge igo egiteu mave.
ACT 5:36 Gabutatala e Teudas ale pala vauru lou eia, la valalua salatu vaa tilimulia. Eala moli ale egite isahari bilia, la valalua tetala valiburea, la karakara tetala oukati.
ACT 5:37 Tio mulimuli te alele, la tau Galilea isa, la isala e Iudas, eia sibitala pala te la imamala ale egite Rom gigi la valalua. Eia pala la valalua tetala tai oio, eala moli la gima tetala bilia, eia peho, egite la malosu tetala valiburatiao.
ACT 5:38 Me mai tai ele, egite te Iesus korale, la vuhula mai la merera tegite ge la visigolola moli, eia ge kaluvu.
ACT 5:39 Eala moli mai la merera tegite eia ge loio seseleti te La Tahalo Uru, ere ge magiri robo egiteu? Igo tigi, la vuhula amuto souka ge vahiliti la vikuela soio te La Tahalo Uru!”
ACT 5:40 Tio, egite ururu goio roromuli la merera te Gamaliel uru ele, egite baha tavu egite la bilalahale, egite baha tavu egite soldia veia ge kumamasi vulo egiteu. Egite kumamasi vulo egiteu kaluvu, egite tutu tola vagaria giteu mago “Amuto umalati ge valolo te la isale Iesus”, goio egite vagogala egiteu ele.
ACT 5:41 Egite gogala, la tia giteu volu la sagegela, ale La Tahalo Uru vipou egiteu te la iligiligi, eia vauru egiteu veia egite koramuli ge gabu la mahelala te la isale Iesus.
ACT 5:42 Me te la haroharo tomi oio te la luma la lotu me oio te la lumaluma tegite la valalua la lotu te Iesus, egite kamati maila te la vimari me la valolo te la merera ale taritigi, ale La Tahalo Uru baha taroti e Iesus somai veia eia ge vimahuli etatou la valalua me hatavivile.
ACT 6:1 Te la imamala ale, la valalua halaba usu egite goiloti te la lotu te Iesus. Eala moli egiteu e Iuda ale rovi tai la merera e Grik, egite igo totolo egite Iuda ale rovi moli la merera tegiteu lou e Hibru. Egite igo totolo egiteu mai ele, la vuhula ale egite suli egiteu ale pou la savelela la ilali, egite veia ge egite Hibru kama ge suli egite hatavivile tegite Grik ale e harua giteu pehoti.
ACT 6:2 Goio mai ele, egiteu la bilalaha ale savulusa gete lua, egite baha tavu tomia la valalua te Iesus ele, egite veia giteu mago “Mai amite ge piligi taro la igogolu tamiteu te la valolo te la isa La Tahalo Uru, amite ge pou tavu moli la tabari la ilali soio te la valalua, ale kama ge taritigi.
ACT 6:3 Amutou e tabarabara miteu, taritigi amuto ge hilovi lou la tahalo ivitu oio moli tamutou, ale egite taritigia giteu la valalua tomi, la tia giteu tivura te La Kalulu La Marokala, egite la tahalo la mari. Egiteu moli la valalua alele ge susuli la valalua te la savelela tegiteu, amite ge mavulaha te la igogolu alele.
ACT 6:4 Eia ge maie, amiteu aleie la igogolu tamite la kilaka moli, la valolo tai te la merera te La Tahalo Uru tavu la valalua tomi.”
ACT 6:5 Tio, la valalua tomi, egite masagea la merera ale, oio moli ovola egite hilovi e Stiven, eia la tahalo ale vagari, eia la tahalo la iroromuli la merera te La Tahalo Uru, me la ilola tai eia tivura te La Kalulu La Marokala. Egiteu isahari tai, la isa giteu maie: e Pilip, e Prokoras, e Naikena, e Taimon, e Pamenas, e Nikolas. E Nikolas ele, la mautu tetala e Antiok, eia goiloti te la lotu tegite Iuda.
ACT 6:6 Goio, egite puli egite la valalua aleiele soio tegite la bilalaha, egite pou vikapopo, egite lotu, egite toi la vibalavala te La Tahalo Uru soio tegiteu.
ACT 6:7 La merera te La Tahalo Uru, la rerela tali soio te la maututula, me la valalua me hatavivile tomi usu oio la mautu uru e Ierusalem, egite goiloti te la lotu te Iesus. Egite pris tai usu roromuli la merera te La Tahalo Uru, egite vulo la gabutatalala tegiteu soio te Iesus.
ACT 6:8 E Stiven, eia la tahalo la gilogo, me eia tai la tahalo ale vagari, La Tahalo Uru pou tetala. Eia igigo tai la golu la karutula ale ururu kabili te la valalua.
ACT 6:9 Eala moli la valalua isahari, egite vahiliti la igototolola soio te Stiven. Egiteu alele, la valalua ale logala moli, egite lotuti te la lotu tegite Iuda, egite toi la luma la lotu tegite veia “La luma la lotu tegite ale pala egite pou te la bilalaha te la valalua.” Egite alele loio te la gale Sairini, e Aleksandria, e Silisia, e Esia.
ACT 6:10 Eala moli La Kalulu La Marokala, eia pou te Stiven, eia sulia, abiala la gabutatalala ale taritigi. Oio vola, la valaluale, egite kama koramulia veia egite ge bolehoho la merera tetalale.
ACT 6:11 Tio mai ele, egite goio vei kokovua giteu la valalua isahari, egite ali la ilo giteu, la valalua alele goio ubi le Stiven la merera usu, veia eia vikara papai, eia tahi taro la merera te Moses, la isa La Tahalo Uru tai.
ACT 6:12 Tio la valalua tomi lolo la merera aleie, la gabutatalala tegiteu marapatio, egiteu la mulugaluga tai, egiteu tai la tahalo la mari, egite igo totolo, egite goio lao tolea e Stiven ele, egite lapua soio tegiteu la mulugalugao.
ACT 6:13 Egiteu ale logala goio tahi la valalua isahari veia egite ge ubi leia la merera la visigolola. Tio goio, egite la valalua alele goio visigoloti egiteu la mulugaluga mago “Te la haroharo tomi, amite lolo bibibi molia te la harela, eia vikara gegeru soio te la luma la lotu ale maroka, soio tai te la merera te La Tahalo Uru ale Moses kekesi tolea.
ACT 6:14 Me amite lolo taia eia veia mago ‘La tahalo ale e Iesus, la tau Nasaret, eia moli ge sulu la luma la lotu ale uru tegatoue, veia eia ge koli taro tai la viputumulila ale Moses abia gatoue.’”
ACT 6:15 Tio, la valalua tomi ale egite pou vikapopo oio tegiteu la mulugaluga, egite goio mata tavu vagaritia e Stiven ele, egite goio hilo la lagula, eia lagu sapoloti, la tirarola mai te angelo isasa.
ACT 7:1 Tio, goio, la mulugaluga tegite pris, eia goio tahi e Stiven mago “Eme lolotia la merera tegiteu ele, eia sesele ka ouka?”
ACT 7:2 Tio e Stiven goio kolia mago “Amutou e tabarabaragu, amutou e ururu tomi tai ele, taritigi amuto ge laba gele somai taku. Alaura sesele, La Tahalo Uru tegatou, eia la vuhu la matagaga, eia sibitala tavu e tubu gatou e Abraham, ale eia soloio te la mautu tetala oio la gale Mesopotemia, eia soukama bula solau e Haran.
ACT 7:3 La Tahalo Uru, eia veiale Abraham mago ‘Eme ge hiliti taro la mautu taume, e valaluamu ele, ge bula soio la gale isapolo ale eau ge vahilo leme ovola.’
ACT 7:4 Tio oio moli ovola, e Abraham uru ele, eia hiliti taro la gale tegite Kaldea e Mesopotemiale, eia bula veia ge goio la mautu ale La Tahalo Uru ge toiala, eia goio eia mou posa muga oio e Haran. Goio, e tamala peho, La Tahalo Uru baha taro loua solau lou kara omai la magasa tegatou ale La Tahalo Uru toitiala, amuto igoie pouti ovola, taholatiao.
ACT 7:5 La Tahalo Uru kama abiala bakisi la gale la magasa omai veia ge tetala me te latatula, ouka. Eala moli La Tahalo Uru tauti la merera ale tikumu soio tetala veia egiteu la hilila ale ge mulimuli tetala, egite ge tahola tomi moli la magasale, eia kama gabutatala ale e Abraham e latula ouka ale ge kolia, eia goio vei moliala mai ele.
ACT 7:6 La Tahalo Uru goio vei louala mago ‘La hilimu ge pou la mosi oio te la gale isapolo, la valalua ale logala ge toa mumugu egiteu, ge baha moli egiteu te la igogolu ale tivura. Egite ge pou la kilisi mai ele la leavala salatu vaa.
ACT 7:7 Eala moli eau ge koli la iruru alele soio tegiteu ale viligi la valalua taku, eau ge lube taro egiteu te la kilisi, egite ge gali somai te la magasa tegiteu, ge lotu tavuau ovolao.’
ACT 7:8 La Tahalo Uru vikara mai ele kaluvu, eia goio vitikumu la merera tetala soio te Abraham, te la irovilala bakisi ale egite la valalua e Iuda ge koro bakisi la vovo giteu. Goio, mulimuli e rutule Abraham pigo e latu girua e Aisak, la logo iualu polo, e tamala goio koro la vovola, mai la irovilala. Mulimuli e Aisak tai uru, eia goio savu e latula e Iakob. Goio, mulimuli e Iakob tai uru, eia goio savu e latula ale savulusa gete lua, egite ale tubu gatou tomi la valalua e Israel.
ACT 7:9 Egiteu vitau me taitari alele, egite maisu totoloale tari giteu e Iosep, egite sugu taroa soio tegite Midian ale vaharia soio la gale Gipto, eia pou te la bilalaha tegite Giptole, egite tatuala abi la uati te la paga ale egite igoale. Eala moli La Tahalo Uru pou tetala, sulia,
ACT 7:10 eia lapu rivua taro la iloburukola tetala. Eia abiala la mari ale uru, eia sulia veia la mulugaluga tegite Gipto, e Parao, eia ge isu la igogolu tetala. E Parao goio hilo la igogolu tetala, eia vauru molia e Iosep ele, eia vipoua veia eia ge mamuga la valalua e Gipto, eia baumuli tai la luma uru te Paraole.
ACT 7:11 “Tio, mulimuli ovola, la vitolo uru sibitala tavu egiteu la valalua tomi e Giptole, me egiteu tomi tai la valalua ale mou te la gale Kenan. Egite tomi pou la savelela te la ilali, la vitolo uru. Me egiteu e tutubu gatou, egite kama koramulia ge poga la ilali.
ACT 7:12 Goio, e Iakob lolo la rere giteu la valalua e Gipto veia egite la ilali oio, e Iakob goio baha taro e latatulale soio veia egite ge lotoa giteu bakisi la ilali, ale la siloko la tuluga tegiteu soio e Giptole.
ACT 7:13 Goio, te la vailua la tuluga tegiteu lou soio e Gipto, e Iosep goio veipalatia giteu e tabarabarala mago ‘Eiau moli e Iosep, e tari mutoue.’ Tio oio moli ovola e Parao goio rovitia egiteu e tatuale Iosep ele.
ACT 7:14 E Iosep goio baha tavutia e tamala e Iakob ele soio tetala, vikapopo tai egiteu e valaluala tomi, egiteu tomi ele la giligi giteu savulu vitu gete lima.
ACT 7:15 Mulimuli goio, e Iakob miteu me valaluala hiliti, egite goio bula soio e Gipto, egite momou mai ele, e Iakob goio peho, egiteu e tutubu gatou tai, egite peho oio la gale alele.
ACT 7:16 Mulimuli, egite la hili giteu ele bole rivu loua la tatuha giteu ele soio la mautu e Sikem, goio ulaia te la liba oio te la magasa ale pala e Abraham lototia tegiteu e valaluale Hemo.
ACT 7:17 Ale pala La Tahalo Uru toitiale Abraham la merera ale tikumu, ale eia veia la hilila ge usu, te la imamala ale, la merera tetalale eia ga purupuruti. La hili giteu la valalua e Israel, egite siliti oio la gale Gipto.
ACT 7:18 “Tio, goio, mulimulito vola, egite vipou halaba isa e Parao, la mulugaluga tegite Giptole, eala moli e Parao alele, eia kama rovi e Iosep, eia goio muku pile moli egiteu la hilihilila.
ACT 7:19 La mulugaluga aleie eia vibukeke pasi e maura e tutubu gatou ele la igogolu.” E Stiven veia. “Me eia igo tai la vulovulo ale kama taritigi soio tegiteu. Eia tali silaha taro tai e latatu giteu, eia sulu taro egiteu isahari.
ACT 7:20 Goio te la tahu alele, e Moses, e tilala taposea. La pepeso bisi ele posa tahalo sesele, La Tahalo Uru masaga pasia, goio, e tilala me tamala baumuli tatahoa oio te la luma tegiteu la taio itolu.
ACT 7:21 Egite goio sugu kokovua la pepeso bisi ele, e latule Parao la sobe goio sivutia, eia bokoa, eia goio baumulia, igole latula.
ACT 7:22 E Moses goio uru, eia mari sesele mai egiteu la valalua e Gipto, eia la tahalo la merera, eia la tahalo vagari tai te la igogolu tetala.
ACT 7:23 “Tio, mulimuli e Moses uruti, la leavala tetala savulu vaati, eia goio gabutatala rivu lou soio tegiteu e valaluala, egite la valalua e Israel.
ACT 7:24 Goio, te la haro isasa, e Moses goio hilo isa la tau Gipto eia igo totolo bulalahu la tau Israel isasa, e Moses goio taho loio te la tau Israel ele, eia goio kuea la tau Gipto, eia bili pehoa.
ACT 7:25 E Moses masagea veia egiteu e valaluala ge matagaga veia La Tahalo Uru pouti tetala, me eia ge lube taro egiteu te la kilisi ale vagari, eala moli egiteu e valalualale kama matagaga.
ACT 7:26 Goio, mai galigeli, eia hilo la tau Israel ilua, egira vikokue, eia goio magiri veia eia ge lele robo egirua, eia veia mago ‘Gauligu, amula isa moli, ilava amula ge vikue lou?’
ACT 7:27 Eala moli la tahalo ale kue pala muga e tabarala, eia goio sogi taro e Moses ele, mago ‘Eme ere, veia eme ge tomu sasae amiteu, e?
ACT 7:28 Eme soioge masagea veia ge bili taiau mai ale alalavi eme biliti la tau Gipto, ia?’
ACT 7:29 Tio e Moses loloa mai ele, eia taga, la vuhula eia rovitia veia la rere la iruru tetala taliti, eia goio heletio. Eia goio mou oio la gale Midian, eia savu e latula ilua hatamale oio te la gale ale.
ACT 7:30 “Tio, la leavala savulu vaa poloti, e angelo isasa sibitala oio tetala oio te la tia la hohoi, hagagavi te la vai la olu e Sinai. E angelo ale, eia pala tavua mai la havi, oilo la popopole dahe.
ACT 7:31 Goio, e Moses hiloa mai ele, eia gabutatala papai ovola, veia ale la rova. Eia goio tasuku hagagavi, veia eia ge hilo tigi seselea, tio la golu La Uru eia veia mago
ACT 7:32 ‘Eau La Tahalo Uru te tutubumu. Eau La Tahalo Uru te Abraham me Aisak me Iakob.’ E Moses loloa mai ele, goio, la vulela paru, eia taga pepeho, eia kati mata tavu la pagale.
ACT 7:33 Tiele La Uru veiala mago ‘Eme umala ge toa bububu la magasale, la vuhula eau oioti ovola, la magasale maroka sesele.
ACT 7:34 Eau hilo tomiti la viligila usu egite igotia giteu la valalua me hatavivile taku oio e Gipto. Eau loloti la masua giteu te la tilali, ale igoie eau purusu sotalo veia ge suli egiteu, veia ge vimavulaha egiteu. Ioge, eme ge hiliti. Eau ge bahame soio e Gipto.’
ACT 7:35 La Tahalo Uru vikara kaluvu mai ele, me oio moli ovola e Moses moli ale pala egite sogi tarotia mago ‘Ere vipoume veia eme ge mamugea miteu?’, eia moli ele La Tahalo Uru vimagiritia veia eia ge muga la valalua ale La Tahalo Uru ge puli rivu egiteu loio e Gipto. Tio La Tahalo Uru vivagaria mai ele te la merera te angelo ale sibitala tetala te la popopo la obu mai ele.
ACT 7:36 “Tio, e Moses moli ele, eia goio puli rivu egiteu ele, eia igo la golu la karutula usu oio e Gipto, me oio tai la mago ale egite toia Magegese, oio tai te la tuluga tegiteu te la tibulu la leavala savulu vaa, ale eia mamugea giteu ovola.
ACT 7:37 Me e Moses moli ele eia veia la valalua e Israel ‘La Tahalo Uru ge hilovi isa la tahalo oilo tamutou veia eia ge veipala la merera tetala mai lou eau.’
ACT 7:38 Tio ale mulimuli egite goio guvi vikapopo oio la vai la gove e Sinai, e Moses moli, egite me tutubu gatou ele, eia moli tai ale oata la gove e Sinai eia vipou tomi me angelo ale ababiala la vigagiala. Eia lolo sesele La Merera La Mahulila, eia goio veipalea giteu, eia tabuli tegatou e Iuda kara igoie.
ACT 7:39 Eala moli egite tutubu gatou kama masagea ge roromuli tigi la vigagiala tetala. Ouka moli. Egite kisu taro molia, goio egite gabu rivu moliti soio te la mautu e Giptole.
ACT 7:40 Tio egite goio veiale Aron mago ‘Eme ge puia miteu isahari la puigolo veia egite ge mai La Tahalo Uru tamiteu veia egite ge mamuga amiteu. La vuhula e Moses ale puliti etatou somai, eia ge oveiti, amite kati rovia.’
ACT 7:41 Tiele e Aron eia roromuli moliti egiteu, egite goio igo isa la puigolo mai e latu la kau. Egite goio lotu tavu moliti la puigolole. Egite igo la mage soio te la puigolo ale egite igo molila la lima giteu lou.
ACT 7:42 Tio La Tahalo Uru hilo egiteu mai ele, eia kisu taro muga egiteu veia egite ge lotu tavu muga la mata la haro me la taio me egite la matatabu, mai La Buk Tabu Ale Pala veitia te la kekesi tegiteu la tahalo la veipalala, eia veia maie: A ge, amuto la valalua e Israel, pala amuto pou te la tia la hohoi la leavala savulu vaa, amuto lotu tatavu ere, ale amuto rourou moli egite la taua, ale amuto masagea ge igo loua somai taku, ia? Ge ouka.
ACT 7:43 La vuhula la luma la lotu ale amuto lotulotu ovola, amuto kama lotu tatavu eau, amuto lotu tavu moli la taua e Molok, me la puigolo la matatabu, la vitokoromola uru, amuto totogoa, ale te la taua e Repan. Alele egiteu la puigolo moli amuto puhi egiteu veia amuto ge lotu tavu egiteu. Ale eau ge kumuli taro amutou soio la galele Babilon loio, tasuku malau lou soio.”
ACT 7:44 E Stiven toi la merera te La Buk Tabu Ale Pala soio tegiteu mai ele kaluvu, eia goio lapu lou la gabutatalala tegiteu mago “E tutubu gatou ele, egite popou oio te la hohoi, egite taholatia la luma la sel uru, La Tahalo Uru popou ovola, egite igo molia mai ale La Tahalo Uru turi mulitiale Moses ovola.
ACT 7:45 Egite tahola moli la luma alele, mulimuli egite ururu goio peho, e latatu giteu ge taholea, igo molia maie kara te la imamala ale e Iosua bolea somai te la gale tegatou, ale e tutubu gatou bolehohoti egiteu la valalua e Kenan ovola, La Tahalo Uru basimuli taroti egiteu veia la magasale ge tegatou. Tio la luma la sel magiri moli mai ele, kara te la imamala te Devit.
ACT 7:46 La Tahalo Uru sagege seselele Devit la vulovulola ale taritigi, e Devit tahi lalaia veia eia ge tigia La Tahalo Uru isa uru la luma ale koramuli egite ge lotu tavua ovola, eia La Uru tegite me tubu giteu e Iakob.
ACT 7:47 Eala moli kama e Devit ale tigi la lumale, e latula e Solomon tigia La Tahalo Uru la luma tetala uru ele.
ACT 7:48 Eala moli La Tahalo Uru Ale Oata, eia kama la tahalo la vovo veia eia ge mavuta oio te la luma ale Solomon tigiale, ouka. Eia mai moli ale egite la bilalaha ale pala veipalati la merera te La Tahalo Uru maie:
ACT 7:49 La pulolou la uru taku la ilo la lage. La magasa tomi otalo la tilaloagu. Amuto la tahalo la vovo ge tigiagu la luma ale mave? Amuto ge ili la malilo ale mave eia ge koramuli eau?
ACT 7:50 La golugolu papai tomi ele, eau vipoua.”
ACT 7:51 Tio, e Stiven toi kaluvu la merera te La Buk Tabu Ale Pala mai ele, eia goio gere vulo lou egite ururu ele la merera ale tivura sesele, mago “Amuto tomi ele la tahalo la vareagila! Amuto kama lolo vulai tavu bakisi la merera te La Tahalo Uru, amuto so popou te la maligoma! Mai moli e tutubu mutou lou, amuto tou paipasi la visuli te La Kalulu La Marokala.
ACT 7:52 Eau masaga amuto ge toi la isa la bilalaha te La Tahalo Uru isasa pala ale e tutubu mutou kama gimea. Ge ouka viruru, egite sulu tomi moliti egiteu, isa kama mahuli utu. Egite bili tomi egiteu la bilalaha te La Tahalo Uru ale veipala la guluvi te La Tahalo La Marokala, karati igoie amuto biliti La Riau te La Tahalo Uru, ale amuto sugu tarotia soio tegite Rom, egite bilitia.
ACT 7:53 La merera te La Tahalo Uru, e angelo sesele vaharitia somai tamutou, eala moli amuto kama masagea veia ge roromulia.”
ACT 7:54 Tio e Stiven vikara kaluvua giteu mai ele, egite loloa, la hate giteu mamasi sesele, la togo giteu visikirobo.
ACT 7:55 Egite ururu igo totolo pepeho e Stiven mai ele, eala moli la ilole Stiven eia tivura La Kalulu La Marokala, eia taga soata la ilo la lage, eia hilo la matagaga uru te La Tahalo Uru, e Iesus tai oio magirigiri te la bali La Tahalo Uru.
ACT 7:56 Eia hiloa mai ele, eia veia mago “Eau hilo la ilo la lage eia kope seseleti te la matagu. Eau hilo tai eia ale egite toila e Latu La Tahalo, eia magiri te la bali La Tahalo Uru.”
ACT 7:57 Tio egite ururu loloa eia vikara mai ele, egite koho, egite tagu robo la gavusa giteu, egite goio hugu tavua soio, lao tolea, lapua sogala te la matapiro, goio dumu vulotila la uatio.
ACT 7:58 Egiteu ale veipala la merera la visigolola soio tetala, egite soko pala mugea. Egite tau la kairobola tegiteu te la bali la tahalo isasa, la isala e Sol.
ACT 7:59 Egite goio dumutia mai ele, e Stiven goio kaka vagari tavu e Iesus mago “Tahalo Uru, eme ge sau tola la kalulugu.” Eia goio boru sotalo la tulula, eia tola vagari mago “La Uru, eme umala ge viligi egiteu te la iruru ale egite igigoale.”
ACT 7:60 Eia vikara kaluvu mai ele, e maura goio paru pasitio.
ACT 8:1 Tio, ale egite bili pehoti e Stiven, e Sol hiloa, eia veia eia taritigi moli. Goio, te la haro moli aleie, la valalua isahari vahiliti la viligila ale uru soio te la lotu te Iesus oio e Ierusalem. Egite tomi ele hele bura soio la galegale tomi oio e Iudea, e Sameria, eala moli egite la bilalaha pou moli oio e Ierusalem.
ACT 8:2 Eala moli egiteu la valalua isahari ale lotu tavu sesele La Tahalo Uru, egite ulai e Stiven, goio lou leia, ali la bakela.
ACT 8:3 Goio, e Sol sokoa veia eia ge sulu tomi egiteu la valalua la lotu. Eia goio te la lumaluma tomi, lao tola la valalua me hatavivile la lotu, lapu egiteu soio te la luma la kilisi.
ACT 8:4 Egiteu la valalua la lotu ale helele Sol, egite vituga la valolo ale taritigi soio te la maututula.
ACT 8:5 Isa tegiteu ele, la isala e Pilip. Eia goio la mautu isa oio la gale Sameria, eia valolo legiteu la merera te Kraist.
ACT 8:6 La valalua me hatavivile tomi loloa, egite hilo tai la golu la karutula isahari eia igoa, egite laba gele muli tataho la merera tetalale.
ACT 8:7 La valalua me hatavivile usu, la hituhitu pou tegiteu, la hituhitu kakuraha bara, gali taro egiteu. Egiteu la gulugulu tai usu, egiteu ale vahabarabara, egite goio posa tahalo lou.
ACT 8:8 Me oio moli ovola la valalua me hatavivile tomi te la mautu alele, egite sagege pepeho.
ACT 8:9 Eala moli la tahalo isa oio te la mautu alele, la isala e Saimon, eia la tahalo la irasi, me la iligo la maholo tai. Egite tomi karutu leia, egite gabu tikumua, eia tai vauru rivu lou eia.
ACT 8:10 E ururu, e gulikiliki tomi, egite lololo sesele la vikararala tetala, egite veia maie “La tahalo alele, la vagagari la hitu isa uru oio tetala.”
ACT 8:11 Egite goio roromulimuli molia, la vuhula egite karutu ale eia igigo la golu la karutula.
ACT 8:12 Egite lolo la valolo ale taritigi e Pilip valolo egiteu ovola, te la pulolou la matagagala te La Tahalo Uru, te la isale Iesus Kraist. Egite loloa, egite goio roromulia, egiteu la valalua me egite hatavivile tai, egite tomi goio vuhi.
ACT 8:13 E Saimon tai roromulia, eia vuhi tai. Eia vikilipi moliti e Pilip, eia karuturutu moliti ale eia hiloa la golu la karutula ale ururu e Pilip igigoa.
ACT 8:14 Egiteu la bilalaha oio e Ierusalem, egite lolo la rere giteu la mautu e Sameria ale egite roromuli la merera te La Tahalo Uru, egite goio baha taro e Pita mira me Ioanes soio tegiteu.
ACT 8:15 Egira goio tegiteu ele, egira kaka tavu La Tahalo Uru veia eia ge visivo La Kalulu La Marokala sotalo tegiteu,
ACT 8:16 la vuhula egite souka sau tolea, egite so abi moli la vuluhi te la isale Iesus.
ACT 8:17 Egira goio tau la lima girua oata la gama giteu, tio egite gabu sesele la tivura La Kalulu La Marokala te la tia giteu.
ACT 8:18 Eala moli e Saimon hilo e Pita me Ioanes, egira tau la lima girua oata te la gama giteu, La Kalulu La Marokala sibitala, eia karutu. Eia hiloa mai ele, eia ga vituria girua la uati,
ACT 8:19 eia veia mago “Amula ge abiagu la vagagarila aleiele mai eau tai ge tau la limagu te la tahalo isasa, eia ge sau tola tai La Kalulu La Marokala.”
ACT 8:20 Eala moli e Pita goio baoliala mago “Ouka, kama la paga la iloto. Taritigi amula me la uati taume ge vilua, la vuhula eme veia ge loto la vaabila te La Tahalo Uru.
ACT 8:21 Maura, eme ka ge taholea, la vuhula eme la tahalo la iruru te la mata La Tahalo Uru.
ACT 8:22 Taritigi eme ge vuvulo, eme ge kaka tavu La Tahalo Uru veia eia ge vimavulaha taro leme la iruru taume ele.
ACT 8:23 La vuhula eau hilotime eme la tahalo la vareagila sesele, la vulovulo ale kama kokora kisi seseletime.”
ACT 8:24 Tio e Saimon goio lolotia mai ele, eia makuku, eia goio veia girua mago “Amula ge kaka La Uru ge suliau, eau soukama ge vilua te la viligila tomi ale amula toitiagu ele.”
ACT 8:25 Tio e Pita me Ioanes valolo egiteu te la merera te La Tahalo Uru, te la papaga ale egira hilotia, mulimuli egira goio beu rivua soio e Ierusalem, egira valolo tatuga te la maututula isahari te la bileula tegiruale.
ACT 8:26 Tio, mulimuli e angelo te La Uru baha taro e Pilip mago “Eme ge polo olau la mautu e Gesa, eme ge tilimuli la gauru ale sibu, la valalua ouka tatuga ovola.”
ACT 8:27 Tio oio moli ovola e Pilip hiliti, tuga. Eia goio poga la tau Itiopia isasa oio la gauru. La tahalo ale la bilalaha isa uru tegiteu, eia baumuli la uati te la tavile uru ale mamugea gite Itiopiale la isala e Kandis.
ACT 8:28 Eia bebeua loio e Ierusalem te la lotu. Eia pou te la karis, la hos lapulapua. Eia harari mai ele, gigigi la buk te la bilalaha uru ale pala, e Aisaia.
ACT 8:29 Tio La Kalulu La Marokala baha e Pilip soio mago “Eme goio sae oio tetala.”
ACT 8:30 Tio e Pilip hari soio, eia loloa eia gigigi la buk te Aisaiale, eia tahia mago “Eme rovi la masova la merera ale eme gigigiale?”
ACT 8:31 Eala moli la tahalo ale veiale Pilip mago “Eau ge rovia mave mai isa kama ge vei muliagu ovola?” Tio eia vikara mai ele, eia goio veiale Pilip mago “Gomai sae, etala ge vipou tomi.”
ACT 8:32 Tio e Pilip goio sae, egira tomi hilo la buk. Oilo te la merera eia gigigia, eia maie: La tahalo taku, egite tatea mai la sip soio te la bilili, Mai tai e latu la sip ale egite barautu la ivula, eia malome tataho, Mai tai la tahalo taku eia makovu tataho.
ACT 8:33 Egite igo mahela seselea, isa kama magiri sulia. E latula ouka ge magiri la pokela, eia kokovu posa molitie.
ACT 8:34 Tio, la tau Itiopiale goio tahi e Pilip mago “Ale e Aisaia gilemulimuli ere maie - eia, ka isapolo?”
ACT 8:35 Tio e Pilip goio vei muliala la merera tomi te la valolo ale taritigi te Iesus, sokoa te la merera La Buk Tabu ale eia gigigiale.
ACT 8:36 Egira so harari mai ele, egira sibitala te la lalu isa bisi, la tau Itiopia veiala mago “Male, la lalue, ka koramuli eme ge vuhiau?”
ACT 8:37 E Pilip veiala mago “Mai eme roromuli seseleti la merera te La Tahalo Uru, eia ge koramuli mai ele.” La tau Itiopia koli rivu louala mago “Meie, eau rovitia, e Iesus Kraist, eia e latu La Tahalo Uru.”
ACT 8:38 Tio la karis goio magiri, egira goio sivo, gotalo te la lalu, e Pilip goio vuhia.
ACT 8:39 Vuhia kaluvu, egira goata lou, La Kalulu La Marokala puli taro e Pilip, la tau Itiopia mata paa molitia. Eia goio soko lou la tuluga, la tiala volu sesele la sagegela.
ACT 8:40 Tio eala moli e Pilip, eia karutu moliti ale eia sibitalati oio la mautu e Asdot. Eia goio polo galili te la maututula tomi, eia valolo legiteu la valolo ale taritigi. Mulimuli eia goio sibitala oio e Sisaria.
ACT 9:1 Eala moli e Sol, eia viligi sesele pasi egite la valalua te Iesus, eia masagea ge bili taro egiteu. Eia goio tahi la mulugaluga tegite pris,
ACT 9:2 veia eia ge kekesia giteu la valalua e Iuda oio la mautu uru e Damaskas, veia ale e Sol ge guvi tegiteu, mai ge eia ge poga isahari la valalua me hatavivile ale egite tilimuli e Iesus, tio eia ge kisi egiteu me eia ge lapu egiteu soio e Ierusalem.
ACT 9:3 Tio, e Sol goio tuga, eala moli eia hagagaviti soio la mautu e Damaskas, e maura karutu sesele te la matagaga uru loata la mori, eia paga vei seselea, e Sol magiri, vavava moliti.
ACT 9:4 Goio, e Sol boru moli sotalo la magasa, eia lolo la golule isa lovo tala mago “Sol, Sol, ilava eme viligi moliti eau maie?”
ACT 9:5 Goio, e Sol karutu sesele, eia veia mago “Tahalo Uru, eme erei ele?” Tio e Iesus goio baoli molitiala soio mago “Eau moli e Iesus, ale eme viligiligi eaue!
ACT 9:6 Eala moli eme hiliti, eme ge goluma la mautu. La tahalo isasa olumale eia ge veiamu la paga ale eme ge igoa.”
ACT 9:7 Tiele, egiteu la valalua ale tilimuli e Sol, egite loloa mai ele, tio la havu tubati egiteu. Sesele, egite lolo la golula, eala moli egite kama hilo la tahalola.
ACT 9:8 Eala moli e maura e Sol ga mata pulala maie, oukati, eia matabuu moliti. Egite goio baa molitia soluma la mautu e Damaskas.
ACT 9:9 E Sol mata kea mai ele la haro itolu, eia peremu moliti, me mai ele eia kati abi la ilali, eia kati liu bakisi.
ACT 9:10 Eala moli la tahalo te Iesus isasa oio, la isala e Ananaias, eia la tau Damaskas. Eia mavuta, eia tagea maie: La Uru tolea mago “Ananaias!” Goio e Ananaias mago “Tahalo Uru, eau omaie.”
ACT 9:11 Goio La Tahalo Uru veiala mago “Eme ge hiliti, me eme ge tilimuli la gauru ale egite toia veia e Gauru Matata. Oio te la luma te la tahalo isasa, la isala e Iudas, eme ge tahi muli la tau Tasas isasa, la isala e Sol. Eia oiole kakaka,
ACT 9:12 la vuhula eia taga taitia veia la tahalo isasa, la isala e Ananaias, eia guvi oio tetala, eia goio sau oata te la gamala, tio eia mata pulala lou.” Tio la merera te La Tahalo Uru soio te Ananaias eia mai ele.
ACT 9:13 Goio, e Ananaias koli rivu loua La Tahalo Uru mago “A ge, eau loloti la rere la tahalo alele, eia gima sesele la valalua taume oio e Ierusalem.
ACT 9:14 Igoie eia abiti la irovilala loio tegiteu la mulugaluga tegite pris veia eia ge lao tola egiteu la valalua me hatavivile tomi ale lotulotu te la isale Iesus.”
ACT 9:15 E Ananaias vikara maie, eala moli La Tahalo Uru veiala mago “Ouka, eme ge tuga moli. La tahalo alele, eia la bilalaha takuti. Eau bahatia veia eia ge vituga la isagu soio te la valalua ale pou te la maligoma, vikapopo me la mulugaluga tegiteu, me soio tamutou la valalua e Israel tai.
ACT 9:16 Ale eau ge vimari leia te la iligiligi tomi ale eia ge pogea te la valolo te la isagu mai ele.”
ACT 9:17 Tio goio, e Ananaias tuga moliti. Eia goilo te la luma, eia goio pilau e Sol, eia veiala mago “Tabaragu Sol. Ale e Iesus Uru moli pala tavutime oio te la gauru ele, male, eia baha taroti eau somaie veia eme ge mata pulala lou, me La Kalulu La Marokala ge volu taume.”
ACT 9:18 Tiele, oio moli ovolao, la paga ale tabuli robo la matala ilua, eia mai bakisi la gagasi la ia, eia paru taroa, eia goio matagaga rivu lou. Tio oio moli ovola eia hiliti, eia goio abi la vuluhi te la isale Iesus.
ACT 9:19 Goio, eia ali, la tuhala torotio. Tio, e Sol goio pou vikapopo me egiteu la valalua la lotu te Iesus oio e Damaskas, goio egite pou mai ele,
ACT 9:20 kama tabaa e Sol goio soko la valolo, eia goio te la lumaluma la lotu tomi tegite Iuda. Eia goio valolo egiteu mai ele, veia e Iesus, eia e latu La Tahalo Uru.
ACT 9:21 Goio, la valalua tomi lolo la valolo tetala mai ele, egite karutu pepeho, egite vitahi baoli egiteu mago “Ko, ale la tahalo moli ale gagima egiteu ale lotu tavu e Iesus oio e Ierusalem! Mave, eia gomai veia eia ge lapu la valalua la lotu te Iesus soio tegiteu la mulugaluga tegite pris, ka ouka ge!”
ACT 9:22 Eala moli la valolo te Sol eia tivura sesele te la harela. Me egiteu tomi la valalua e Iuda ale pou oio la mautu alele, egite lolo la valolo tetala, egite karutu pepeho, la vuhula eia tala palea giteu la merera tomi ale egite ge rovi e Iesus, veia eia e Kraist, la tahalo ale La Tahalo Uru hilovitia veia eia ge La Riau tegite Iuda.
ACT 9:23 Tio, mulimuli, la haro isahari polo, egite la valalua e Iuda goio pou vikapopo, egite viputumulia la gauru ale egite ge bili e Sol ovola.
ACT 9:24 Eala moli e Sol goio lolo vutitia la viputumulila tegiteu ele. Egite Iuda hiliti, egite goio pahutu roboa la matapiro tomi te la mautu alele te la logo me te la haro tai, veia egite ge lao tolea, ge bilia.
ACT 9:25 Eala moli egiteu la valalua te Iesus, egite vahari seselea soata te la hate la bigomu ale egite bigomu robo la mautu ovola, egite tigila la uati, goio, egite vagotoloa, egite vipoua te la kela isa uru, visariria sotalo, eia goio heletio.
ACT 9:26 Tio, mulimuli, e Sol goio e Ierusalem, eia masagea veia eia ge pou vikapopo me egiteu la valalua te Iesus, eala moli egite tomi taga, la vuhula egite veia eia visigologolo egiteu, egite veia eia kama la tahalo te Iesus sesele.
ACT 9:27 Goio, e Banabas pulia e Sol soio tegiteu la bilalaha, eia goio gilemulia giteu ale e Sol me La Tahalo Uru vipogati oio te la gauru, ale La Tahalo Uru vikara tavua. E Banabas vei taia giteu ale La Tahalo Uru veiala eia ge vagari tavu la valolo ale taritigi te la isale Iesus oio e Damaskas.
ACT 9:28 Goio, e Sol vikapopo me egiteu la bilalahale, egite goilo tegiteu la valalua e Ierusalem, eia vagari la valolo te la isa La Tahalo Uru soio tegiteu, eia kamati taga.
ACT 9:29 E Sol goio veia eia ge vipigi vulo la gauru te Iesus kabili tegite Iuda ale rovi la merera e Grik, eala moli egite goio vigiriri tavu, egite paa la gauru ale egite ge bili peho e Sol ele.
ACT 9:30 Tio mulimuli, egiteu la valalua la lotu, egite loloa mai ele veia egite Iuda ge bilia, egite goio pulia soio, vaharia sotalo e Sisaria, egite goio baha taro loua soio e Tasas.
ACT 9:31 Goio, mulimuli ovola, te la galegale tomi e Iudea, la gale Galilea, me Sameria tai, la lotu eia tuga tigi, la viligiligila oukati, la paga isasa ouka, la lotu eia vagari moli, la valalua tomi egite pou moli te la uluva La Tahalo Uru. La Kalulu La Marokala eia vivagari moli egiteu, me la valalua me hatavivile usu, egite goiloti te la lotu te Iesus.
ACT 9:32 Mulimuli ovola, e Pita tuga, goio te la galegale tomi, eia goio la mautu e Lida, eia pou vikapopo me egiteu la valalua te Iesus oio la mautu uru ele.
ACT 9:33 Me oio te la mautu alele, e Sol sivuti la tahalo isasa, la isala e Inias, eia lea, la vovola mauba tomiti, eia kati tatuga lalahu la leavala iualuti.
ACT 9:34 Goio, e Pita hiloa mai ele, eia veiala mago “Inias, gageie e Iesus Kraist eia ge vimahulime, eme ge hiliti, pilua la mulimu ele.” Tio oio moli ovola, e maura goio hiliti, la vovola vagaritio.
ACT 9:35 Tio me egiteu la valalua me hatavivile tomi te la mautu ale ilua, e Lida me Seron, egite hiloa mai ele, egite tomi vulo la gabutatalala tegiteu soio te La Tahalo Uru.
ACT 9:36 Oio te la mautu e Iopa, la tavile la lotu isa uru oio, eia isa la bilalaha te Iesus, la isala e Tabita, te la vikararala tegite Grik egite toila e Dokas. La tavile aleie, eia igo la igogolu usu eia taritigi pepeho, eia suli pepeho la valalua usu ale egite pou la savelela.
ACT 9:37 Eala moli te la haro isasa eia goio soko la ilea, eia goio peho. Egiteu e valaluala goio vipupuru la vovola, egite bolea, vitabuli mugea soata te la luma, veia egite ge ulaia gai.
ACT 9:38 Eala moli e Pita eia oioti la mautu e Lida, me la baa la mautu iluale, e Iopa, e Lida, eia ka malau. Egite loloa veia e Pita omaiti e Lida, egite baha taho lua soio tetala, egira karasukua mago “Eme ge gomai harari. La tavile kokora tamiteu pehoti.”
ACT 9:39 E Pita loloa la merera tegiruale, eia sele molia beua vikapopo legirua. Eia guvi, egite vaharia soata te la luma, eia hilo la luma eia volu sesele tegite hatavivile ale bahararu, e Dokas pala suli egiteu, egite pigi la tilali, egite goio vahilole Pitale la kulikuli isahari e Dokas pala sahia giteu ale eia so mahulihuli.
ACT 9:40 Eala moli e Pita goio baha taro egiteu sogala, eia goio toto tulu sotalo, eia kaka. Eia kaka kaluvu, eia goio mata tavu la tavile ale pehoti ele, eia veiala mago “Tabita, eme ge hiliti!” Tio oio moli ovola la tavile goio mata pulala, eia mata tavu e Pita, eia goio hiliti, eia pou.
ACT 9:41 E Pita goio vahilitia, eia goio magiritio. Magiri kaluvu, e Pita goio tola tavu egite la valalua la lotu, egite la bahararu tai, veia egite ge hiloa veia eia mahuliti ele.
ACT 9:42 Goio, la valalua tomi, egite hatavivile tai te la mautu uru e Iopale, egite tomi lolo la rere la pagale, usu tegite gabu tikumu la merera te La Tahalo Uru, egite goiloti te la lotu.
ACT 9:43 Goio, e Pita mou muga tabaa bakisi oio la mautu e Iopa, eia mavuta te la luma te la tahalo isasa, la isala e Saimon, la igogolu tetala, eia ababi la kulikuli la kau, tatau la marasin ovola igoa mai la gumi tegiteue.
ACT 10:1 La tahalo isasa, eia pou oio la mautu uru e Sisaria, la isala e Konilias, eia la mulugaluga tegite soldia salatu sasa oilo te la tala la valalua la vaubi isa uru loio e Rom.
ACT 10:2 E Konilias, e rutula, e latatula, egiteu la bilalaha tetala, egite tomi lotu tavu moli La Tahalo Uru. Egite la valalua la morivava tegite Iuda, e Konilias suli pepeho egiteu la ilali, la uati. Eia la tahalo la kilaka tai, la vulovulola taritigi moli mai ele.
ACT 10:3 Goio, la haro isasa te la maulavi, eia hilo mai la tilaga e angelo isasa te La Tahalo Uru eia sibitala tavua, eia veia mago “Konilias!”
ACT 10:4 E Konilias hiloa, eia taga pepeho, eia goio tahia mago “Tahalo uru, mave?” Tio e angelo goio koliala mago “La Tahalo Uru lolotia la kilaka taume, la vulovulomu tai taritigi, eia hilotia, eia rovitimei, La Tahalo Uru eia isu pepeho la vulovulomu.
ACT 10:5 Taritigi eme ge baha soio la mautu e Iopa, ge baha tavu la tahalo isasa, la isala e Saimon Pita,
ACT 10:6 eia oio mavuta te la luma te taola e Saimon, ale igogolu te la kulikuli la kau, la luma tetala olau la parava.”
ACT 10:7 Tio e angelo vikara soio tetala mai ele kaluvu, e Konilias goio baha tavu la bilalaha tetala ilua, e soldia tetala tai isasa, eia taritigi, eia la tahalo la lotu.
ACT 10:8 E Konilias goio veimulia giteu taho tolu ele la sibitalala te angelo, eia goio baha taro egiteu, egite tuga, goio e Iopa.
ACT 10:9 Tio, mai galigeli, egite la valalua te Konilias hagagaviti soio e Iopa, egite souka guvi, la haro hugutolatia, e Pita goio pou oata te la varu la luma te taola, igo la kilaka.
ACT 10:10 Eia goio vitolo, eia masagea veia ge ali, eala moli egite so raragi la ilali tetala, eia goio matabuu bakisi,
ACT 10:11 eia mai ale hilo la paga isa mai la lavalava,
ACT 10:12 eia mai egite isahari sau tola la gilesula ivaa, visariria loata te la mori, gotalo te la magasa. Oilo te la lavalavale, e Pita hilo la kalalia tomi mai la bolo hou, la vareki, la malumalu.
ACT 10:13 Tio eia hiloa mai ele, eia goio lolo la golu La Tahalo Uru eia veiala maie “Pita, eme ge hiliti, bili isahari la kalia ale eme hilotiale, eme ge alia.”
ACT 10:14 Eala moli e Pita goio veiala mago “Tahalo Uru, ge ouka! Eau kama ge ali la kalia ale eme veitia mite Iuda veia la lelea miteu.”
ACT 10:15 Eala moli la golu La Tahalo Uru goio vei louala mago “Pita, la ilali ale eau toitia veia eia kamati la lelea mutou, eia kama taritigi eme ge vile loua.”
ACT 10:16 La pagale, La Tahalo Uru vahilo le Pita vakatolu kaluvu, la kulikuli alele eia goata lou te la mori, kokovutio.
ACT 10:17 La gabutatalala te Pita marapa sesele, eia masagea veia ge rovi la masova la paga ale eia mai ale hilotia. Eia so pou gabutatala, egite la bilalaha te Konilias goio sibitala oio te la matapiro. Egite tahi la valalua te la luma te Saimon, egite goio guvi ovola.
ACT 10:18 Egite goio tahi soilo mago “E Saimon Pita kama mavuta omai?” Egite oio tatahi maie, eala moli e Pita so gabutatala la paga ale eia mai ale hilotia.
ACT 10:19 Tio La Kalulu La Marokala goio veiala mago “Egite taho tolu guviti, tahi mulimulime!
ACT 10:20 Eme ge gotalo, amuto ge tuga, amuto ge vitilimuli. Eme umala ge gabutatala papai, la vuhula eau baha egiteu somai.”
ACT 10:21 Tio e Pita goio gali sogala tegiteu, eia veia giteu mago “Eau moli e Pita ale amuto paa mulimuliau! Amuto masaga lava?”
ACT 10:22 Egite goio kolia mago “La uru tamiteu, eia la mulugaluga tegite soldia te Rom, eia la tahalo isasa taritigi pepeho, eia togo La Tahalo Uru, la valalua e Iuda tomi masaga molia. E angelo sibitala tetala, veiala eia ge baha tavume, veia amite ge pulime soio te la luma tetala, eia ge lolo la merera taume.”
ACT 10:23 Tio e Pita goio puli egiteu, egite ali, egite mavuta la luma tetalale. Mai galigeli, egite me Pita hiliti, egite la valalua la lotu isahari tai te la mautu e Iopale, egite vitilimuli.
ACT 10:24 Mai galigeli lou egite goio guvi oio e Sisaria, e Konilias oio pou taitali egiteu. Egiteu e valaluala, egiteu e vikilipilipi tetala tai, egite tomi pou vikapopo oio te Konilias, pou taitali egiteu.
ACT 10:25 Ale e Pita goilo la luma, e Konilias goio rara tavua, eia goio boru lagu tugu te la lagule Pitale, togoa.
ACT 10:26 Eala moli e Pita goio vahilitia, veiala mago “Konilias, eme hiliti, eme kama ge togoau, eau la tahalo la vovo moli.”
ACT 10:27 Eia so veveiala mai ele, egira goilo te la luma, veia e Pita ge hilo egiteu ale pou taitaliale.
ACT 10:28 E Pita goio veia giteu mago “Amuto rovitia veia eia kama koramuli veia amite Iuda ge pou vikapopo le amutou ale logala, eia tikumu. Eala moli La Tahalo Uru so vei matagageagu veia eau umala ge ule mumugu la tahalo isasa. Eala amuto baha tavuau, eau kama tou, eau gomaitie.
ACT 10:29 Eala moli amuto baha tavuau somai veia eau ge igo lava?” Tio e Konilias goio koliala mago “Alalaviti ovola eau pou tavu moli la kilaka te la maulavi oio te la luma taku, eau karutu moli la tahalo isasa oio magiriti te la lagugu, la lavalava tetala mai ale sasima.
ACT 10:31 La tahalo alele, eia goio veiagu mago ‘Konilias, la kilaka taume, la igogolu taume tomi te la gilogo, La Tahalo Uru hilotia, eia rovitime!
ACT 10:32 Taritigi eme ge baha tavu e Saimon Pita oio la mautu e Iopa, eia oio mavuta te la luma te Saimon olau la parava, eia ge gomai taume.’
ACT 10:33 E angelo vikara kaluvu mai ele, tio oio moli ovola eau baha egite soio taume ele. Taritigi pepeho eme guviti. Amite tomi omaiti, amite pou vikapopoti te la isa La Tahalo Uru veia amite ge lolo la merera ale La Tahalo Uru veitiamu ovola.” E Konilias, eia veiale Pita mai ele.
ACT 10:34 Tio, e Pita goio soko la vikararala soio tegiteu mago “Eau hilotia, eia sesele viruru La Tahalo Uru kama hilovi tavu la maratatila la valalua, veia eia masaga tavu isahari, me isahari eia poke taro moli egiteu, ouka.
ACT 10:35 Oilo te la maratatila tomi La Tahalo Uru hilovi egiteu ale roromulia, ale togoa, eia sau tola tomi moli egiteu.
ACT 10:36 Eia baha la merera soio te la valalua e Israel, eia veia giteu la valolo ale taritigi ale e Iesus Kraist eia La Uru tegatou tomi, eia vilua roboti la valalua veia egite me La Tahalo Uru ge vipuhi tigi lou.
ACT 10:37 Amuto soioge lolo taitia la igogolu ale uru tomi te Iesus la tau Nasaret ale eia igotia oio la gale Iudea. Eia sokoa te la imamala ale e Ioanes valolo la valalua veia egite ge vuhi. E Ioanes vuhi kaluvua, e Iesus goio soko la igogolu tetala oio la gale Galilea.
ACT 10:38 Amuto rovitia veia e Iesus ele, La Tahalo Uru visivo La Kalulu La Marokala sotalo tetala, eia abiala la vagagarila ale uru. La Tahalo Uru igogolu vikapopo leia, eia goio te la maututula tomi, eia suli la valalua me hatavivile, eia vimahuli rivu lou egiteu ale pou te la kilisi te Satan.
ACT 10:39 Eala moli amiteu, amite la tahalo la valolo te la igogolu ale Iesus igotiale, oio te la maututula te la gale Iudea, oio la mautu uru tai e Ierusalem, amite hilo seseletia te la mata miteu. Ale egite katu tolea oata te la tauvalautu, eia peho, amite valolo tai te alele.
ACT 10:40 Eala moli eia tabuli otalo la lulu la pileho, la haro itolu polo, La Tahalo Uru goio vimahuli rivu loua, veia la valalua me hatavivile isahari ge hilo loua, kama etatou tomi, amite moli ale La Tahalo Uru hiloviti amiteu veia amite ge valolola,
ACT 10:41 amite ale pou vikapopo, ali tomi leia.
ACT 10:42 Eia toitia miteu veia amite ge la bilalaha tetala, veia La Tahalo Uru vipoutia veia eia mulimuli ge hilovi la vulovulo la valalua tomi, egite ale pehoti, egite ale mahulihuli tai.
ACT 10:43 La tahalo moli aleie, egite la bilalaha ale pala valolotila veia egite ale roromuli la tahalo la vimahuli ele, La Tahalo Uru ge hilo egiteu, eia ge vimavulaha taro legiteu la iruru tomi ale egite igoa.”
ACT 10:44 Tio, e Pita so vikarakara mai ele, oio moli ovola La Kalulu La Marokala goio sivo robo egiteu la valalua me hatavivile tomi ale egite oio laba gelegeleale.
ACT 10:45 Egite Iuda isahari, la valalua la lotu ale gomai vikapopo le Pita, egite hiloa, egite karutu ale la vaabila te La Tahalo Uru ale La Kalulu La Marokala, eia visivo taitia tegiteu la valalua ale logala.
ACT 10:46 Egite rovitia mai ele veia La Kalulu eia sibitalati tegiteu, la vuhula egite lolo egiteu, egite vikarakarati te la merera isapolopolo, egite vaisale pepeho La Tahalo Uru. Tio e Pita goio hiliti, eia veia giteu la valalua la lotu ale tilimulia mago
ACT 10:47 “La tahalo isasa soioge kama koramulia ge magiri robo egiteu veia egite kama ge vuhi, ouka. La vuhula egite gabutia La Kalulu La Marokala mai ale eia pou taiti tegatoue.”
ACT 10:48 Tio e Pita goio veia giteu mago “Taritigi amuto ge vuhi te la isale Iesus Kraist.” Goio, egite vuhi kaluvu mai ele, egite kaka vagari e Pita veia eia ge pou muga lou tegiteu la haro isahari.
ACT 11:1 Egiteu la bilalaha me egiteu la valalua la lotu tai isahari oio la gale Iudea, egite lolo la rere giteu la valalua ale logala veia egite isahari roromulitia la merera te La Tahalo Uru, egite goiloti te la lotu te Iesus.
ACT 11:2 Egite loloa mai ele, e Pita goio goata e Ierusalem, egiteu ale vagari tavu la vulovulo ale egite tau la irovilala te la vovo giteu, egite goio igo totoloa.
ACT 11:3 Egite goio veiala mago “Mave, eme goio tegiteu la valalua ale egite kama tau la irovilala te la vovo giteu mai la merera tegite ururu gatou e Abraham miteu, eme goio tegiteu me eme polo moli la viputumulila tegatou ale eme vaali tomi legiteu, ia?”
ACT 11:4 Eala moli e Pita goio veipalea giteu la papaga tomi ale La Tahalo Uru visibitalea oio tetala.
ACT 11:5 Eia veia giteu mago “Ale eau pou oio la mautu uru e Iopa, eau pou tavu moli la kilaka, oio moli ovola la ilogu oilo vuvulo, eau goio hilo la paga isasa sibitala loata te la mori mai la lavalava isasa, egite mai ale sau tola la gilesula ivaa, egite vagotaloa te la lagugu.
ACT 11:6 Oio moli ovola eau masagea veia eau ge rovi tigi la paga alele, eau goio mata tavu tigia, eau goio hilotia la kalia isahari oilo vola, mai la bolo hou, la kalia ale oio te la hohoi, me la malumalu tai isahari oilo volale.
ACT 11:7 “Tio, eau goio lolotia la golu la tahalo isasa, eia toleau mago ‘Pita, eme ge bili isahari la kaliale, eme ge alia.’
ACT 11:8 Eala moli eau goio koli la golu la tahalole mago ‘Tahalo uru, eau ka koramuli veia eau ge ali la kalia ale La Tahalo Uru toitia veia la lelea mite Iuda, ouka viruru. Kara te la bibisigu, kara te igoie, eau kama alalia.’
ACT 11:9 Eala moli la tahalole goio vei louagu la vakaluala mago ‘Pita, la kalia tomi ale La Tahalo Uru vipoutia veia eme ge alia, eme umala ge vile loua veia la leleamu.’
ACT 11:10 Goio, la pagale sibitala tavuau mai ele vakatolu kaluvu, egite goio vagoata rivu loua te la mori.
ACT 11:11 Kama tabaa, oio moli ovola, la tahalo itolu sibitala tavuau te la luma ale eau popou oio volale. La tahalo isasa oio e Sisaria eia baha egiteu somai taku.
ACT 11:12 Goio, La Kalulu La Marokala veiagu mago ‘Eme ge hiliti, eme ge tilimuli egiteu, eme umala ge gabutatala papai.’ “Tio, amite goio vitilimuli somuli e Sisaria. Egite tabarabara gatou tai ale taho uoloe, egite tai tilimuliau, amite goio te la luma te la tahalo ale baha tavuau.
ACT 11:13 Tio la tahalo alele, eia veia miteu ale e angelo sibitala tavua oilo te la luma tetalale,
ACT 11:14 e angelo veiala veia eia ge baha tavu e Saimon Pita oio la mautu e Iopale, eia ge veiamu la merera ale taritigi ale La Tahalo Uru ge puli rivume me egiteu e valaluamu tai te la iruru tamutou, eia ge vimahuli amutou.
ACT 11:15 Eau goio soko moli la valolo maie, kama tabaa La Kalulu La Marokala sivo robo egiteu, mai sesele ale pala te la silokola eia sivo robo etatou.
ACT 11:16 Oio moli ovola eau goio gabutatala rivu lou la merera te Iesus pala maie: e Ioanes vuhi le amutou la lalu moli, eala moli La Tahalo Uru ge vuhi le amutou La Kalulu La Marokala, eia ge pou tamutou tomi isasasa.
ACT 11:17 La vuhula pala etatou roromuliti e Iesus Kraist, La Tahalo Uru sugu tarotia la vibalavala ale taritigi somai tegatou, eala igoie eia abitia giteu tai ele ale pou te la maligoma, me eau ere veia eau ge vei robo la masasagala te La Tahalo Uru?”
ACT 11:18 Tio, egite lolo la merera te Pita mai ele kaluvu, egite goio piligi taroa la merera tegiteu ele, egite goio vaisale La Tahalo Uru. Egite veia mago “La Tahalo Uru moli, eia masaga tai egiteu la valalua ale pou te la maligoma, veia eia ge abia giteu la matagaga koramuli egite ge vulo la tia giteu, egite ge mahuli.”
ACT 11:19 Pala te la imamala ale e Stiven peho, la viligila uru sibitala tavu egiteu la valalua la lotu te Iesus. Egite usu hele marapa soio te la maututula ale malau, isahari gomuli la gale Pinisia, isahari hele solau la olu uru e Saipras, isahari gomuli la mautu malau e Antiok. Egite helele maie, egite valololo soio te la maututula, eala moli egite kama valolo la valalua tomi, ouka, egite Iuda moli.
ACT 11:20 Eala moli la valalua e Saipras me Sairini isahari, egite gomuli e Antiok, egite veipala la valolo ale taritigi te Iesus soio tegiteu la valalua e Grik tai.
ACT 11:21 La Tahalo Uru suli egiteu, eia abia giteu la vagagarila, la valalua me hatavivile usu, la gabutatalala tegiteu vuvulo, egite roromuli la merera te La Tahalo Uru.
ACT 11:22 Tio mulimuli, egite la valalua la lotu ale loio e Ierusalem, egite lolo la rere giteu mai ele, egite goio baha taro la tahalo isasa, la isala e Banabas, soio te la mautu e Antiok, veia eia ge hilo egiteu ele.
ACT 11:23 Tio, e Banabas goio guvi oio e Antiok, eia hilo la valalua tomi mai la gilogo te La Tahalo Uru eia pou tegiteu. Eia hiloa mai ele, eia sagege pepeho, eia goio viteteli vagari lou egiteu, eia karasuku lou egiteu tomi veia egite ge gabutatala moli La Tahalo Uru, ge sau tola moli la merera tetala.
ACT 11:24 E Banabas ele, eia isa la tahalo ale taritigi, La Kalulu La Marokala eia pou tetala, me eia roromuli sesele la merera te La Tahalo Uru. Ale eia pou tomi legiteu te la lotu oio e Antiok, la valalua me hatavivile usu roromuli La Tahalo Uru, egite goilo te la lotu te Iesus.
ACT 11:25 Mulimuli, e Banabas goio hiliti, eia goio paa muli e Sol soio la mautu e Tasas.
ACT 11:26 Eia pogatia, eia goio pulia e Sol ele, egira goio pou vikapopo oio e Antiok la leavala isasa, vikapopo me egite la valalua la lotu. Egira viteteli egiteu la valalua usu te la merera te La Tahalo Uru. Me oio moli te la mautu e Antiok ele, la valalua sokotia la tiloila soio tegiteu la valalua la lotu te Iesus veia egiteu “E Kristen”, me la masovala eia maie “La valalua te Kraist”.
ACT 11:27 Te la imamala moli alele, egite isahari ale rovi la veipala la gabutatalala te La Tahalo Uru, egite hiliti taro e Ierusalem, egite goio hari lalai la lotu oio e Antiok.
ACT 11:28 Oio vola la tahalo isasa oio tegiteu ele, la isala e Agabas, la vagagari La Kalulu La Marokala eia pou tetala, eia hiliti, eia veipala la merera isasa, eia veia giteu veia la valalua tomi te la maututula, egite ge pou la savelela te la ilali, la vitolola uru ge sibitala, La Kalulu La Marokala eia veitiala. (Me etato ge rovi tigi taia la merera tetala eia ge puru sesele, la vitolola uru ge sibitala te la imamala ale e Klodias eia pou la mulugaluga tegiteu e Rom.)
ACT 11:29 Tio, ale mulimuli la valalua la lotu lolo la rere la vitolola uru sibitala oio e Iudea mai ele, egite goio viputumulia veia egite ge sovea giteu bakisi la uati veia ge suli legiteu ele, egite tomi isasasa ge abi la uati tegiteu sesele, ge galipolea la galela isasa ge tegiteu, la galela isasa ge egite ge suli le tabarabara giteu ele ovola.
ACT 11:30 Egite tabaria mai ele kaluvu, egite goio vibaha le Banabas mira me Sol, egira goio vaharia soio tegiteu la mulugaluga tegiteu la valalua la lotu oio e Iudea, egite goio tabari la valalua me hatavivile, suli legiteu te la vitololale.
ACT 12:1 Te la imamala alele, e Herod, eia la mulugaluga isa tegite Rom ale baumulimuli egite Iuda, eia soko la viligila soio tegiteu la valalua la lotu te Iesus.
ACT 12:2 Eia gima egiteu mai ele, eia baha egite soldia, egite barautu la lohole Iakob ale tarile Ioanes, la gamala paru, eia peho.
ACT 12:3 Tio e Herod hilotia ale egite Iuda sagege la pilehole Iakob ele, eia goio lapu loua e Pitale, vagoilo loua te la luma la kilisi. Eia vagoiloa te la luma la kilisi te la tilau tegite Iuda ale egite igo la vulovulo giteu ale egite ali la bret ale kama sogo.
ACT 12:4 E Herod kapi robo e Pita mai ele, eia goio tutu tolea giteu la valalua la vaubi taho vaa veia egite ge baumulia, kara te la pougolula tegite Iuda ge kaluvu, eia ge vagogalea veia eia ge magiri te la vigagiala.
ACT 12:5 Te la pulolou te Pita oilo te la luma la kilisi ele, egite la valalua la vaubi, egite pahutu roboa, eala moli egite la valalua la lotu, egite vagari moli la kilaka soio te La Tahalo Uru veia eia ge sulia.
ACT 12:6 E Herod veia mai galigeli eia ge lube taro e Pita loilo te la luma la kilisi, veia eia ge magiri te la vigagiala, eala moli te la logo e angelo goilo te la luma la kilisi, e Pita oio mavuta kabili te la baale soldia ilua. Egite kisi la limala me la vahala la sen ilua, ogala te la matale, egite soldia tai isahari lou oio magirigiri, egite pahutu roboroboa la luma la kilisi ele.
ACT 12:7 Goio, e angelo te La Tahalo Uru isasa goio goilo te la luma la kilisi ele, la matagaga uru sibitala oilo te la ilo la lumale. E angelo goio sau la limale Pitale, eia paloa, eia veiala mago “Eme hiliti hari.” Oio moli ovola la sen ale egite kisi la limala me la vahalale talube moli, paru, gotalo tabuli.
ACT 12:8 Tio e angelo goio veiale Pita mago “Eme ge hiliti, lavalava, tau la silipa taume iluale.” Tio e Pita goio lavalavale, kaluvu, e angelo goio vei louala mago “Eme ge kai la kairobola taume ele, eme ge tilimuliau.”
ACT 12:9 Tio, e Pita hiliti, eia goio tilimulia e angelole, eala moli e Pita kama rovi tigia veia eia sesele ka ouka, eia kau molia veia eia mavuta tagea.
ACT 12:10 Egira goio tuga gogala, egira polo tomia egiteu la valalua la pahutulale, ale te la mulugala, goio te la iluala, goio egira guvi te la mata la tirorola eia uru sesele, egite igola la aen, eia karutu ale eia oio kope bulalahu moli. Egira gali sogala goio te la mautu ale uru, egira tilimuli la gauru isasa, goio, kama tabaa e Pita taga paa molitia e angelole, eia kamati hiloa.
ACT 12:11 Tio, oio moli ovola, la gabutatalala te Pita tapulakatio, eia goio mata kilala tavutiao, mago “Ale eau rovi seseletia, La Tahalo Uru bahati e angelo tetala somaie, eala eia puli taroti eau loilo la luma la kilisie, me te la gabutatala kukumula tai tegite la valalua e Iuda somai taku veia egite ge biliau.”
ACT 12:12 E Pita goio rovi matagagatia mai ele, eia sele molia goio te la luma te tilale Ioanes Mark, la isala e Maria, la vuhula eia rovia veia la valalua la lotu oio te la lumale, egite pou tavu moli la kilaka.
ACT 12:13 Eia goio magiri moli logala te la mata la lumale, eia goio ligiligi soilo, la bilalaha isasa, la sobe isa bisi, la isala e Roda, eia goio hiliti, kope la mata, tahi sogala.
ACT 12:14 Eia goio lolo vutitia la golule Pitale, eia goio sagege pepehotio, eia goilo rivu lou, kati kopeale Pitale, eia veia giteu mago “E Pita ogala la mata magirigirie!”
ACT 12:15 Egite goio veiala mago “Eme visigolo, eme paua.” Eala moli eia vagari moli mago “Ouka sesele, eia ogala magirigirie!” Egite goio veiala mago “Ale soioge la kalulula molie!”
ACT 12:16 Eala moli e Pita so magirigiri ogala ligi la mata. Tio egite tomi goio hiliti, kope la matale, egite karutu. Egite taga, egite hare palala moliti le Pita ogala magirigiri ele.
ACT 12:17 Eia goio tave tola moli egiteu mago “Amuto umala vikarakara,” eia goio gilemulitia giteu ale e angelo pulitia loilo te la luma la kilisi ele, eia gilemulia giteu kaluvu, eia veia giteu mago “Amuto ge goio ge veimuliale Iakob mite me egite tabarabara gatou tomi te la paga aleie.” Eia veia giteu mai ele kaluvu, eia goio tugatio.
ACT 12:18 Tio, goio mai galigeli, la paga mamaga, egite la valalua la pahutula karutu, egite mata paa molitia e Pitale.
ACT 12:19 E Herod goio loloa mai ele, eia goio paa mulitia e Pitale, eia kamati sivutia, eia goio tahi vagari egite la valalua la pahutulale. Eala moli egite kama koli tigi la tilahi tetalale, tio eia goio kisi la mata ge bili egiteu. Goio, te la imamala alele, e Herod bula taro e Iudea, eia goio pou muga oio e Sisaria.
ACT 12:20 Eia pou mai ele, eala moli la igototolola tetala uru soio tegiteu la valalua te la mautu ilua, e Taia, e Saidon. Tio la valalua tomi te la mautu ale iluale, egite hiliti vikapopo soio tetala, egite goio vikapopo muga oio te la tahalo isasa, la isala e Blastas, la tahalo ale eia mamuga oilo la luma te Herod. Egite la valalua tali tavua veia ge valimae la igototolola te Herod veia ge kaluvu. Egite masagea veia ge vipuhi tigi lou, la vuhula egite ababi la ilali tegite oio moli te la mautu te Herod ele.
ACT 12:21 Tio e Herod goio kisi la mata te la haro isasa veia egite ge vimatata la merera tegiteu ele ovola. Te la haro alele, e Herod goio tokoromo la tokoromola te la uru, eia goio pou te la pulolou te la uru, tio eia goio soko la vikararala, eia vikara vagari soio te la valalua.
ACT 12:22 Tio egite la valalua goio lolo la vikararala te Herod maie, egite koho tavua, egite veia mago “La vikararala aleie, eia mai la vikararala te la uru isasa ale pou oata la mori, eia kama mai la vikararala te la tahalo.”
ACT 12:23 Eala moli e Herod, eia gabu vauru moli lou eia, eala e angelo te La Tahalo Uru goio kuea, la vuhula eia kama vaisale bakisi la isa La Tahalo Uru. Egite la pakeso bisisi goio ali lilo la vovole Herod uru ele, eia pehotio.
ACT 12:24 Eala moli la valolo te la merera te La Tahalo Uru eia kama peho, eia goio sibitala vagari soio te la maututula tomi usu.
ACT 12:25 Goio, mulimuli ovola, e Banabas me Sol vahari kaluvu la uati soio tegiteu ale pou la vitolola, egira hiliti taro e Ierusalem. Egira goio beu rivua somuli e Antiok, egira puli la tahalo isa bisi, e Ioanes Mark, eia tilimuli egirua.
ACT 13:1 Oio te la mautu e Antiok, egite la tahalo la valolo oio, me egite tai la tahalo la vimari, la isa giteu maie: e Banabas; e Simion Naisa; e Lusias, eia loio la gale Sairini; e Maneien, egira me la uru e Herod Tetrak te la bibisi girua egira visuu la luma; e Sol tai oio tegiteu la tahalo la vimari oio e Antiok ele.
ACT 13:2 Egiteu ale roromuli sesele La Tahalo Uru, egite goio lotu tavua, egite goio vakamae egiteu la ilali. La Kalulu La Marokala goio veia giteu mago “Amuto ge toi e Banabas me Sol, egira ge bole la igogolu la lotu, eau hiloviti egirua pala te la igogolu aleie.”
ACT 13:3 Egite vakamae egiteu mai ele, kama ali, egite goio kaka tavu moli La Tahalo Uru, egite sau la gama girua, ale mai la irovilala ale la vagagari La Tahalo Uru pou tegirua, egite baha taro egirua, egira goio tugatio.
ACT 13:4 Tio, La Kalulu La Marokala goio baha taro egirua solau te la mautu e Selusia. Golau te la mautu e Selusiale, egira goio sae lou te sipi, e sipi vahari egirua solau te la olu uru e Saipras.
ACT 13:5 Egite goio sibitala mai ele, egira goio la mautu e Salamis, egira goio goilo te la luma la lotu tegite Iuda, egira goio veipala la merera te La Tahalo Uru. E Ioanes oio tegirua, eia susuli tai egirua.
ACT 13:6 Te la tuluga tegirua mai ele, egira polo kabili te la olu uru e Saipras ele, egira goio guvi oio e Pepos. Oio e Pepos ele, egira hilo la tahalo isasa, eia la tau Iuda, la isala e Baiesas, eia la tahalo la irasi, la iligo la maholo me la papaga isahari lou mai ele, eia veia eia veipala la merera te La Tahalo Uru eala moli eia la tahalo la visigolola.
ACT 13:7 Eala moli eia la bilalaha isasa te la mulugaluga la olu alele, la isala e Segius Paulus. La mulugalugale, la gabutatalala tetala taritigi pepeho, eia baha tavu e Banabas me Sol ele, egira goio tetala, la vuhula eia masagea ge lolo la merera te La Tahalo Uru.
ACT 13:8 Eala moli e Limas, la tahalo moli ale rasirasi, eia igigo la maholoe, egite vulo lou la isala te la merera e Grik, egite toila e Limas, eia masagea veia ge tao talu e Banabas me Sol, veia e Paulus kama ge gabu tikumu la merera tegirua, eia kama ge vulo la gabutatalala tetala tavu e Iesus.
ACT 13:9 Eala moli e Sol, egite toi loula e Pol, la vagagari La Kalulu La Marokala eia pou sesele tetala. Eia goio mata tototiale Limas ele,
ACT 13:10 eia goio veitialao mago “Eme la tahalo la visigolola sesele. Eme e latule Satan, la vulovulo ale taritigi eme gima molia. La merera te La Tahalo Uru ale taritigi, eme pile molia. Gaisa eme ge piligi taro la vulovulomu aleie?
ACT 13:11 Male, gageie La Tahalo Uru ge kuemei, eme ge mata kea, la matamu kamati ge matagaga kara te la haro isahari ge polo.” Tio e Pol veiala mai ele, goio, kama tabaa, oio moli ovola te la milatalata tetala la paga isa uru mai la tuluvu la mori, eia parakukuru, eia mai ale pigi robo molia, la matala savu robotio, e maurale goio vava bubu moliti, sasala bububu moliti mai ele, veia eia ge pilau isa la tahalo, la tahalole eia ge sau la limala, ge tata e maura soio te la gauru.
ACT 13:12 Tio la mulugaluga uru, e Paulus, eia hiloa mai ele, eia karutu sesele la vimari tomi halaba te La Tahalo Uru, eia goio vulo la tiala tavu e Iesus.
ACT 13:13 E Pol me egiteu ale tilimulia, egite hiliti taro e Pepos, e sipi vahari egiteu, egite goio la mautu e Perga oio la gale Pampilia. Eala moli e Ioanes goio lou taro egiteu, eia beu rivua soio e Ierusalem.
ACT 13:14 Egira hiliti taro e Perga, egira goio la mautu e Antiok oio la gale Pisidia. Te la haro tabu egira goilo te la luma la lotu tegite Iuda, egira goio pou.
ACT 13:15 Tio e Pol me Banabas goio pou mai ele kaluvu, egite la mulugaluga te la lotu goio gigitia La Buk Tabu Ale Pala, la merera te Moses me egite la bilalaha, egite gigi kaluvua mai ele, egite goio tahi e Pol mirale mago “Amulua e tabara miteu, mai la gabutatalala tamulua isasa oiole, veia amula ge suli le amiteu, taritigi amula ge veipala molia, amula ge vikara.”
ACT 13:16 Tio, e Pol goio tave tola egiteu, eia goio hiliti, eia vikara mago “Amuto la valalua e Israel, me amuto tai la valalua logala ale amuto lotu tavu La Tahalo Uru, amuto ge laba gele somai, amuto ge lolo la merera taku.
ACT 13:17 La Tahalo Uru tamiteu la valalua e Israel, eia hiloviti egiteu e tutubu miteu, ale pala egite pou la mosi oio la gale Gipto, eia hilovi egiteu veia eia ge La Uru tegiteu. Eia suli egiteu, egite goio sili usu pepeho, mulimuli te la vagagarila ale uru eia goio lapu taro egiteu sogala te la mautu la viligilale.
ACT 13:18 Egite pou la mosi oio te la hohoi la leavala savulu vaa, eala moli La Tahalo Uru baumuli moli egiteu.
ACT 13:19 Oio te la gale Kenan, la karakara ivitu, egite luliti, La Tahalo Uru sulu tomiti egiteu, la magasa tegiteu ele, eia sugu tarotia giteu e Israel, egite mouti ovola la leavala salatu vaa savulu lima.
ACT 13:20 Mulimuli La Tahalo Uru abia giteu la mulugaluga isahari ale baumuli egiteu la merera ale taritigi tetala, igo moli maie kara te la imamala te Samuel.
ACT 13:21 Goio, mulimuli ovola, egite veiale Samuel veia eia ge toia giteu isasa la mulugaluga mai e king, goio, egite kaka tavu La Tahalo Uru, La Tahalo Uru goio sugu taroa giteu e latule Kis, la isala e Sol, eia loio tegiteu la karakara te Beniamin, eia mamugea giteu.
ACT 13:22 La leavala savulu vaa polo, La Tahalo Uru goio barautu la viputumulila te Sol ele, eia goio vipou loua e Devit ele, eia ge la mulugaluga tegiteu. La Tahalo Uru goio vei mulia giteu la valalua e Devit ele, mago ‘Eau hiloviti la tahalo ale e Devit, e tamala e Iesi, eau masaga pasia. La vuhula eau rovitia, eia ge tilimuli sesele la igogolu taku tomi.’
ACT 13:23 Ale La Tahalo Uru veia giteu mai ele, la vuhula eia toi palatia alaurati veia La Riau tetala eia ge sibitala loio tegiteu la hilile Devit. Eala, igoie, La Tahalo Uru vahilititi e Iesus, eia ge vimahuli la valalua e Israel, mai sesele ale pala eia veitia.
ACT 13:24 Ale pala e Iesus souka sibitala, te la tahu moli alele, e Ioanes moli valolo la valalua e Israel te la merera te La Tahalo Uru, egite loloa la valolo te Ioanes mai ele, la tia giteu goio vuvulo, e Ioanes vuhi egiteu.
ACT 13:25 Tio ale eia hagagaviti veia e Ioanes ge vikaluvu la igogolu tetala, eia goio veia giteu mago ‘Amuto veia eiau ere? Eau kama la tahalo ale amuto pou taitaliale. Amuto ge loloa, la tahalo isasa, eia ge mulimuli taku, eia uru, te la milatalata tetala eau soioge la tahalo bulalahu moli.’”
ACT 13:26 Tio, e Pol goio vikara lou soio te la valalua mago “Amuto e tabarabaragu, amuto e tutubule Abraham ele, me amuto tai la valalua logala ale amuto lotu tavu La Tahalo Uru, etato ge rovia, la valolo ale taritigi ele, eia koramuli etatou tomi.
ACT 13:27 Egiteu tomi la valalua e Israel, me egiteu tai la mulugaluga tegiteu, egite tomi rovi tigia la tahalo aleie. Eala moli egite kama gabutatala tigia la merera tegiteu la bilalaha ale pala ale etato lolo bibibia te la luma la lotu. Egite tilimuli seselea la vulovulo ale kama kokora, mai ale egite la bilalaha valolotila alaura.
ACT 13:28 La tahalo ale e Iesus, eia kama igo isasa la iruru, eala moli la valalua gimea. Egite lapu bubu molia soio te Pailat, veia e Pailat ge bili taroa, eala moli eia la iruru ouka.
ACT 13:29 “Tio, goio, la valolo tomi ale egite la bilalaha veipalatia alaurao, kara igoie, e Iesus goio pogatia, la vikararala tomi ele puruti, ale egite katu tolea oata te la tauvalautu, eia peho. Goio egite visivoa loata te la tauvalautu, egite goio ulaia.
ACT 13:30 Eala moli La Tahalo Uru goio vahiliti loua e Iesus ele lotalo la lulu la pileho.
ACT 13:31 Goio, egite la valalua ale tilimulimulia loio e Galilea, goio e Ierusalem, egite la valalua tetalale, la haro usu egite hilo e Iesus, ale eia mahuli rivuti lou, me kara te igoie egite valololo amiteu la valalua e Iuda ovola.”
ACT 13:32 E Pol valolo egiteu mai ele, eia goio lapu lou la merera tetala soio tegiteu mago “Eala, igoie, amila guviti omai tamutou veia ge vei matagagea mutou la valolo ale taritigi. La Tahalo Uru tauti la tilau tetalale soio te tutubu miteu,
ACT 13:33 eala moli igoie la merera tetala eia puruti tegatou la tuvu ale mulimuli, ale amite hilotia La Tahalo Uru vahiliti e Iesus taro la lulu la pileho, mai La Buk Tabu Ale Pala, la bilau te Devit, eia toitia maie ‘Eme e latugu, igoie eau vauru la isamu.’
ACT 13:34 La Tahalo Uru toia mai ele, la vuhula eia vahilitia lotalo la lulu la pileho, eia kamati ge peho lou ge parara otalo la lulu. Ale tai La Tahalo Uru toitia pala mago ‘La vibalavala ale eau veia ge abiale Devit, eia ge puru omai taume, e tubula.’
ACT 13:35 Me la merera isa lou tai te La Buk Tabu Ale Pala, eia veia maie ‘Eme kama ge taro molia La Riau taume veia la vovola ge parara otalo te la lulu la pileho.’
ACT 13:36 Tio me oilo vola etato rovia, e Devit, eia sau tola la igogolu te La Tahalo Uru, eia tilimuli sesele la masasagala te La Tahalo Uru, kabili te la valalua, te la imamala tetalale. Mai mulimuli la vitabarila te la igogolu te La Tahalo Uru soio te Devit kaluvuti, la leavala koramuliti eia ge peho, eia goio peho seseleti, egite goio ulaia te la balile tamala me tutubula, la vovola parara seseleti otalo la magasa.
ACT 13:37 Eala moli la tahalo ale e Iesus, La Tahalo Uru vahilitia lotalo la lulu la pileho, la vovola kama parara.
ACT 13:38 Taritigi amuto e tabarabaragu, etato ge rovi tigia, amite valolo matagagati le amutou te la pilehole Iesus, eia moli visibitala la valolo ale taritigi ale La Tahalo Uru ge sabubu taro la iruru tamutou. La viputumulila te Moses, eia kama koramulia ge vimahuli amutou, veia amuto ge maroka, ouka sesele. Eala moli la pilehole Iesus moli, eia koramulia ge sabubu taro la iruru te la valalua tomi ale egite roromulia, egite ge maroka.
ACT 13:40 Taritigi amuto ge vibaumuli, la vuhula la vulovulo aleie, eia souka ge sibitala omai tamutou, la vuhula egite la bilalaha veitia pala, egite kekesia maie:
ACT 13:41 Amutou la valalua aleie, amuto la valalua la tahitarola, amuto ge karutu, amuto ge vilua, la vuhula eau igoti la igogolu isasa kabili te la mata mutoue, eia isapolo sesele. Eala moli mai isasa ge valolo le amutou ovola amuto ge veia eia visigolo.”
ACT 13:42 Tio, e Pol valolo kaluvu mai ele, goio, egira me Banabas veia ge gali sogala, eala moli egite la valalua goio veia girua veia te la haro tabu ale mulimulio egira ge gomai lou, ge valolo lou legiteu la valolo aleie. Egite veiale Pol me Banabas mai ele, egite goio pagegele sogala.
ACT 13:43 Egite tomi la valalua e Iuda usu, me egite tai la valalua logala tai isahari ale egite lotu mai e Iuda, egite goio tilimuli e Pol me Banabas, egira goio viteteli lou egiteu, vahiliti lou la gabutatalala tegiteu, egira tutu tolea giteu veia egite ge sau tola vagari te la gilogo te La Tahalo Uru.
ACT 13:44 Tio goio te haro tabu ale mulimuli ovola, la valalua tomi te la mautu ale uru ele, hagagavi veia ge egite tomi, egite sibitala veia ge lolo la merera te La Tahalo Uru.
ACT 13:45 Eala moli egite la valalua e Iuda, egite hilo la valalua me hatavivile tomi, egite pou vikapopo mai ele, la gabutatalala tegiteu marapa, egite igo totolo, egite pile la vikararala tegirua, egite vikara kukumua girua, tahi taro, gilogilo.
ACT 13:46 Eala moli e Pol me Banabas, egira goio vikara vagari soio tegiteu mago “Eia sesele ale amila ge valolo muga le amutou e Iuda la merera te La Tahalo Uru, eala moli amuto muku pilea, eia mai sesele ale amuto toitia, amuto veia mago ‘Amite kama koramulia ge sau tola la mahulila ale sesele.’ Eala amuto lolotia, me amila ge vuloa soio tegiteu ale pou te la maligoma.
ACT 13:47 La vuhula, La Tahalo Uru veiagu maie: Eau bahame veia eme ge mai la matagaga te la valalua ale isapolo, egite la valalua logala, eme ge suli egiteu la valalua me hatavivile tomi te la maututula tomi polo galili veia La Tahalo Uru ge puli rivu egiteu.”
ACT 13:48 Tio, egiteu la valalua me hatavivile tomi ale logala te la lotu tegite Iuda, egite lolo la merera aleie, egite sagege pepeho, egite vei tataho La Tahalo Uru la merera tetalale. Me egiteu tomi ale La Tahalo Uru hiloviti egiteu veia egite ge sau tola la mahuli ale la kaluvula ge ouka, egite goio sau tola la merera alele, egite roromulitia la valolo ale taritigi.
ACT 13:49 Goio, la merera te La Tahalo Uru goio vavati soio te la maututula tomi te la gale aleiele.
ACT 13:50 Eala moli egite Iuda, egite karasuku egiteu la mulugaluga te la mautu ale uru ele, egite karasuku tai egiteu la tavile la vuliti isahari ale egite kama la tavile Iuda, egite lotu tavu La Tahalo Uru. Egite karasuku egiteu tomi mai ele veia egite ge vile e Pol me Banabas ele. Tio mai ele, egite goio pitaro egirua taro la mautu tegiteu ele.
ACT 13:51 Tio egira goio kuvali taro la magasa pusi ale oio te la vaha giruale, ale la irovilala te la iruru tegiteu, tio egira tuga goio la mautu e Aikoniam.
ACT 13:52 Me egiteu la valalua tomi ale egite roromuli sesele La Tahalo Uru, egite sagege pepeho, la ilo giteu volu La Kalulu La Marokala.
ACT 14:1 Tio, e Pol me Banabas, egira goio la mautu e Aikoniam, egira igogolu lou mai ale egira igotia oio e Antiok. Egira goilo te la luma la lotu tegite Iuda, egira valolo. Egira valolo mai ele, la valolo tegira tivura pepeho, me egite la valalua e Iuda me egite la valalua e Grik, egite tomi usu vulo la gabutatalala tegiteu, egite roromuli sesele La Tahalo Uru.
ACT 14:2 Eala moli egiteu la valalua e Iuda isahari, egite kama masaga ge lolo la merera tegirua. Egite goio ali la ilo la valalua ale kama e Iuda veia egite ge gima la valalua te Iesus.
ACT 14:3 Eala moli e Pol me Banabas, egira mou tabaa oio la mautu ale, egira vagari moli la valolo te la merera te La Tahalo Uru soio te la valalua. Tio La Tahalo Uru vitikumu la merera tegirua, egira goio igo isahari la golu la karutula soio te la valalua me hatavivile tomi, ale la irovilala ale egite ge rovia la valolo tegira te la gilogo te La Tahalo Uru eia kama visigolo, eia sesele viruru.
ACT 14:4 Eala moli la valalua me hatavivile tomi te la mautu uru ele, egite la malosu ilua. La malosu isa, egite roromuli egite Iuda, la malosu isasa egite roromuli egira la bilalaha iluale, e Pol me Banabas.
ACT 14:5 Tio, mulimuli ovola, egiteu la valalua logala, vikapopo me egiteu la valalua e Iuda, me egiteu la mulugaluga tegiteu tomi, egite viputumulia veia egite ge gima e Pol me Banabas, egite ge dumu legirua la uati, ge bili peho egiruale.
ACT 14:6 Eala moli egira rovitia la gabutatalala tegiteu ele, egira goio hele soio te la mautu ilua ururu te la gale Likionia, e Listra, e Derbe. Egira goio te la maututula ale hagagavi oio la mautu ilua ururu ele,
ACT 14:7 egira goio veipala la valolo ale taritigi oio tegiteu la maututula alele.
ACT 14:8 La tahalo isasa oio e Listra, la vahala kama vagari, palati te la pepesola ale e tilala taposea, eia mai moli ele, e maura kama koramulia ge tatuga bakisi.
ACT 14:9 Tio te la haro isasa, eia popou loloa e Pol ale vikarakarale, eia mata tavu molia, e Pol goio hilotia. E Pol goio rovitia veia e maura gabu sesele la merera te La Tahalo Uru koramulia La Tahalo Uru ge vimahuli loua.
ACT 14:10 Tio e Pol goio karasukutiao mago “Eme ge hiliti, lapu matatea la vahamu iluale, eme ge magiri oata.” Tio e maura goio hiliti, magiri, eia goio tugatio.
ACT 14:11 Tio egite la valalua me hatavivile tomi hiloa mai ele, egite karutu, egite goio tolatio te la merera e Likionia mago “Hilage, la uru ilua ale loata te la mori sibitalati mai la tahalo, egira guviti otalo tegatoue.”
ACT 14:12 Egite goio toi lou la isale Banabas veia e Seus, tio e Pol, eia mamuga la vigagiala tegirua, eala egite goio toila e Hermes, mai la isa la uru tegiteu ele ale egite lotu tatavua.
ACT 14:13 Me oio la mautu alele, la luma la lotu te Seus eia magiri oio la gilesu la mautu, me egiteu ale vibaumuli te la luma alele, egite tokoromo isahari la kau la purupuru, vahari egiteu sogala la matapiro, veia ge bilia, ge gutua, la sosobu ge goata la mori mai la vulovulo giteu te la tilogo la uru tegiteu te la lotu tegiteu.
ACT 14:14 Eala moli egira la bilalaha iluale, e Pol me Banabas, egira goio lolotia la merera aleie, la hate girua mamasi, egira goio silea la kairobola tegiruale, egira hari soio te la lolo la valalua me hatavivile, egira koho tavu egiteu mago
ACT 14:15 “Amuto la valalua, ilava amuto gabutatala maie te la tia mutou ele? Amilua la tahalo moli, mai moli amutoue, etato isauru molie, eala moli la igogolu tamilua te la veipala la valolo ale taritigi te La Tahalo Uru soio tamutou veia amuto ge loloa, amuto ge vulo la gabutatalala tamutou, ge piligi taro la iruru tamutou, veia amuto ge rovi sesele La Tahalo Uru, amuto ge pou hagagavi tetala. Amuto oukati ge lotu te la lotu la visigolola. Amuto ge rovi La Tahalo Uru Ale Sesele, eia vipou la mori oata, la magasa otalo, me la mago olau, me la papaga tomi ovola.”
ACT 14:16 Egira goio vei loua giteu la valalua mago “Eia sesele, pala La Tahalo Uru mata sosoli moli la maratatila la valalua me hatavivile tomi mai ele, egite tilimuli moli la gabutatalala tegiteu te la vulovulo giteu isapolopolo te la galegale tomi, eala moli La Tahalo Uru kama pou kokovu sesele veia amuto kama ge rovia, ouka.
ACT 14:17 La Tahalo Uru, eia suli etatou tomi, eia pou oata te la ilo la lage, eia sugu taro la hura sotalo te la valalua tomi, me la ilali tomi ale kusi otalo te la magasa, egite tau la vavua giteu, La Tahalo Uru moli eia la vuhula, me la ilali tomi egite vua, la valalua egite olia, alia, egite sagege ovola.”
ACT 14:18 E Pol me Banabas, egira veia giteu la valalua maie, eala moli egira geho sesele la mera taro la valalua veia egite umala ge rou la kau tegiteu soio tegirua.
ACT 14:19 Eala moli egiteu e Iuda isahari ale loio e Antiok me Aikoniam, egite goio sibitala, egite ali la ilo la valalua tomi, tio la valalua goio dumu le Pol la uati, eia goio peho. Egite goio lave molia la pileleholale, lapua sogala la matapiro, egite veia eia peho seseleti.
ACT 14:20 Goio, egiteu la valalua la lotu te Iesus, egite goio sibitala, magiri, egite goio malele roboa, eia goio mahuli rivu lou, eia goio goluma lou te la mautu, tio goio mai galigeli, egira me Banabas, egira gomuli la mautu uru e Derbe.
ACT 14:21 Egira valolo la valalua te la valolo ale taritigi oio te la mautu ale uru ele, egira goio puli la valalua usu, egite goilo te la lotu te Iesus. Tio, mulimuli, egira goio beu rivua soale la mautu uru e Listra, goilo e Aikoniam, goale lou e Antiok.
ACT 14:22 Ale egira guvi rivu lou oale e Antiok, egira goio tutu tola vagari loua giteu la valalua la lotu te Iesus. Mai ele egira viteteli vagari lou egiteu mago “Etato tomi masagea ge goilo la mautu la marokala te La Tahalo Uru, eala moli etato ge poga pala muga la iligiligi ale usu pepeho.”
ACT 14:23 Oilo tegiteu la valalua la lotu te la mautu itolu ele, egira hilovi la tahalo isahari veia egite ge la mulugaluga, egira goio peremu, egira kama ali, egira pou tavu moli la kilaka, egira sugu taro la gabutatalala tegirua soio te La Tahalo Uru, veia eia ge sau tola egiteu la mulugaluga la lotu alele, veia egite ge vagari, la vuhula egite so vuvulo moli la tia giteu tavu e Iesus, egite soukama vagari sesele.
ACT 14:24 Tio, egira goio tuga, goio polo posa te la gale Pisidia, egira goio guvi oio la gale Pampilia.
ACT 14:25 Egira goio guvi, egira goio veipalea giteu la valalua oio la mautu e Perga la valolo ale taritigi te La Tahalo Uru. Egira valolo kaluvu, egira goio hiliti goale lou la mautu uru e Atelia.
ACT 14:26 Oio e Atelia egira sae te sipi, e sipi vahari egirua somuli lou e Antiok, la mautu ale pala la valalua la lotu egite sugu taro egirua soio te La Tahalo Uru veia eia ge gogo egirua, egira ge bole tataho la igogolu tetala, karati igoie egira beu rivutia somai te la mautu aleie.
ACT 14:27 Egira sibitala oio e Antiok, egira tola vikapopo la valalua me hatavivile tomi te la lotu, egira gilemulia giteu la visuli uru te La Tahalo Uru soio tegirua. Egira vei mulia giteu ale La Tahalo Uru sesele eia kopetia la mata giteu la valalua tomi ale pou te la maligoma.
ACT 14:28 Egite lolo kaluvua la merera tegiruale kaluvu, egira goio mou tabaa lou oio tegiteu, egite vipou tomi lou.
ACT 15:1 Tio, te la haro isasa, egite Iuda isahari sibitala olau e Antiok, egite goio vikara soio tegiteu la valalua la lotu te Iesus mago “Mai amuto kama ge tilimuli la viputumulila te Moses, veia ge tau la irovilala te la vovo mutou, La Tahalo Uru kama ge vimahuli amutou.”
ACT 15:2 Tio e Pol me Banabas lolo la merera tegiteu mai ele, egira goio hate mamasi pepehoa giteu ele, egite goio vaigotio. Goio, egite la valalua la lotu hilovitia e Pol me Banabas, me egite isahari lou, egite ge goata e Ierusalem, egite ge vikara vikapopo me egiteu la mulugaluga la lotu te Iesus veia egite ge lapu matata la merera ale.
ACT 15:3 Goio, egite baha taro egiteu soio, egite tuga goio kabili te la baale Pinisia me Sameria, egite veia giteu la valalua la lotu te la gale alele ale La Tahalo Uru vimahuliti egiteu la valalua mapaiti ale pou te la maligoma. Egite la valalua la lotu loloa mai ele, egite sagege.
ACT 15:4 Egite tuga mai ele, egite goio guvi oio e Ierusalem. Egite guvi, egiteu la valalua la lotu, egiteu la bilalaha me egiteu la mulugaluga, egite goio rara tavu egiteu, laharoa giteue. Egite goio pou, e Pol me Banabas gilemulia giteu te la igogolu tomi ale egira igotia, La Tahalo Uru suli pepeho egirua ovola.
ACT 15:5 Eala moli egiteu la valalua la lotu isahari ale oilo te la viputumulila tegite Pariseo, egite hiliti, egite vikara mago “Taritigi amuto ge tau la irovilala te la vovo giteu, me amuto ge viteteli egiteu veia egite ge tilimuli la viputumulila te Moses.”
ACT 15:6 La vuhula eala egiteu la bilalaha, egiteu la mulugaluga, egite vikapopo, veia egite ge vimatata la merera aleie.
ACT 15:7 Egite goio viputumulimulia mai ele, la vikararala tegite tabaati, e Pita goio hiliti, eia vikara mago “Amuto e tabarabaragu, taritigi etato tomi ge rovia, pala La Tahalo Uru vitabariti letatou la igogolu tegatou tomi isasasa, eau la igogolu taku, eau ge veipala la valolo ale taritigi soio tegiteu la valalua ale logala te la karakara tegatou e Iuda, egite ge roromulia.
ACT 15:8 La Tahalo Uru, eia rovi la gabutatalala te la valalua me hatavivile tomi, etato tai rovia La Tahalo Uru masaga tai egiteu la valalua ale isapolo, eia sugu taroa giteu La Kalulu La Marokala, mai tai ale eia sugu taroa gatoue.
ACT 15:9 La Tahalo Uru masaga la valalua tomi, eia masaga etatou, me eia masaga tai egiteu la valalua ale logala, eala egite lolo la merera tetala, egite roromulia, eala eia vimaroka egiteu mai moli etatoue.
ACT 15:10 La gabutatalala tamutou ele, amuto masagea ge tovo lalai La Tahalo Uru veia eia ge igo totolo amutou, ia? Eala moli amuto umala ge kisi legiteu la merera tomi te Moses, la vuhula eia tivura tegatou tomi, eia usu, etato tomi boto moli ovola. La viputumulila aleie, alaura eia pou tegiteu e tutubu gatou, egite gabua veia eia tivura. Me etatou la tuvu ale igoie, etato tai kama koramulia ge roromuli tomi la imoimo la merera te ururu gatou ele.
ACT 15:11 Eala moli etatou la tuvu ale igoie, etato gabu tikumu la gauru isa moli maie: Te la gilogo moli te Iesus, La Tahalo Uru ge puli rivu etatou loio te la iruru tegatou, me egite la valalua isapolo tai, La Tahalo Uru ge puli rivu egiteu.”
ACT 15:12 E Pita vikara mai ele, la valalua egite pou vikapopole, la vikararala oukati, la havu tatubati egiteu. Egite laba gele molitia la miaro te la vikararala te Banabas mira me Pol ele. Egira veipalea giteu te la golu la karutula ale egite me La Tahalo Uru veipalatia te la mata giteu ale pou te la maligoma, egite hilotia.
ACT 15:13 Egira vikara kaluvu mai ele, e Iakob goio hiliti veia mago “Amuto e tabarabaragu, amuto ge lolo tai la vikararala taku bakisie.
ACT 15:14 E Saimon veitia ale La Tahalo Uru goioti tegiteu la valalua logala te la karakara tegatou e Iuda, eia ge hilovi la valalua me hatavivile tetala loio tegiteu.
ACT 15:15 Me la vikararala tegite la bilalaha alaura tai eia isauru moli te aleie, egite kekesi la merera la tilovo maie:
ACT 15:16 La Uru veia mago ‘Mulimuli eau ge beu loua somai tamutou, la luma te Devit ge tagogoroti, eau ge tigi halaba loua.
ACT 15:17 Me oio vola, oio te la maututula tomi la valalua logala ale eau hiloviti egiteu, egite ge vagari veia egite ge sivutiau.’
ACT 15:18 La merera aleie, La Tahalo Uru veipalatia alaura seseleti.”
ACT 15:19 Tio, e Iakob goio vei loua giteu mago “La gabutatalala taku mai seselele, egiteu la valalua logala, ale egite vuloti la gabutatalala tegiteu soio te La Tahalo Uru, etato umalati ge vimari papai lou egiteu, umalati.
ACT 15:20 Eala moli etato ge baha la vikararala soio tegiteu, etato ge vimari moli egiteu veia egite umala ge alali la ilali ale la valalua vaabila soio te la puigolo ale egite lotu tavua. Me egite ge sabebelu taro tai la ilovo te la taulaila. Me egite umala ge alali la kalia ale egite hou molia, egite kama olo la lohola, la kasosola soukama sali tomi, me egite umala ge liliu tai la kasoso.
ACT 15:21 La merera moli alele eia mamuga sesele, la vuhula etato rovia pala seseleti, karati igoie, oio te la maututula tomi egite veipala la merera te Moses, egite gigi bibibia oilo te la luma la lotu te la haroharo tabu tomi.”
ACT 15:22 Tio, egite goio pou vikapopo, egiteu la bilalaha, me egiteu la mulugaluga, me egiteu la valalua la lotu tomi, egite viputumulia, egite goio toi la tahalo ilua, veia egira ge tilimuli e Pol me Banabas, egite ge goio e Antiok. Egite goio toia taho lua, e Iudas Basabas, me Sailas, la vuhula egira la mulugaluga te la lotu.
ACT 15:23 Egite la bilalaha goio abia giteu la leta, eia vikara maie: Amiteu la bilalaha, amiteu la ururu tomi, amiteu tomi e tabarabara mutou, amite baha la vikararala tamiteu soio tamutou e tabarabara miteu ale logala tamite Iuda, ale pou oio la mautu e Antiok, me oio tai la gale Siria, me Silisia. La haro moli tamutou.
ACT 15:24 Amite loloti la merera isa maie, egite isahari loio tamiteu, egite gomai tamutou, egite sula pariri moli amutou te la vikararala tegiteu, me egite igo marapa tai la gabutatalala tamutou. Eala moli amite kama veia giteu mai ele.
ACT 15:25 Eala, amite lolo la vikararala mai ele, amite goio vikara vikapopo, la gabutatalala tamite isa moli, eala amite baha taro egira ale taho lua, amite masaga pasi egirua, egira tilimuli e Banabas me Pol, egite gomai tamutoue.
ACT 15:26 Egira ale taho luale, egira la tahalo sesele te Iesus Kraist, egira kama gabutatala la igogolu isapolo, eala moli la valolo te la isala moli.
ACT 15:27 Eala amite baha taro e Iudas me Sailas ele, veia egira ge vitikumu lou la merera te la letale, me amuto ge rovia veia la merera tamiteu eia sesele.
ACT 15:28 Te la pulolou vikapopola tamiteu, amite rovia La Kalulu La Marokala eia pou suli amiteu, amite kisi la vikararala alele, amite kama ge vibukeke le amutou la paga isapolo, ouka, te la vulovulo ale taritigi moli maie:
ACT 15:29 Amuto umala alali la kalia ale la valalua vaabila soio te la puigolo ale egite lotu tavua. Amuto umala liliu la kasoso. Amuto umala alali la kalia ale egite hou molia, egite kama olo la lohola, la kasosola soukama sali tomi. Amuto ge sabebelu taro tai la ilovo te la taulaila. Mai amuto ge vibaumuli tigi, me amuto ge vulo taro tomi la vulovulo aleiele, la paga isa ouka, amuto ge taritigi sesele. Eala moli ele.
ACT 15:30 Tio, goio, la valalua la lotu baha e Pol miteu ele solau e Antiok, egite goio pou vikapopo legiteu la valalua tomi te la lotu te Iesus, abia giteu la leta ale egite vaharia.
ACT 15:31 Tio egite gigia mai ele, kaluvu, egite goio sagegetio, la vuhula la vigagiala alele taritigi pepeho.
ACT 15:32 Goio, e Iudas me Sailas, egira viteteli lou egiteu la valalua la lotu la vikararala isahari, me egira tutu tolea giteu veia egite ge magiri vagari, la vuhula egira la bilalaha, la merera tegira tikumu.
ACT 15:33 Egira viteteli egiteu mai ele, egira goio mou tabaa lou bakisi oio tegiteu ele, mulimuli egira goio beu rivu loua soio tegiteu ale baha egira somai ele, egira goio tuga, egite goio tataro gogoti egiruao. [
ACT 15:34 Eala moli e Sailas kama masagea ge beu rivua, eia tilimuli moli la gabutatalala tetala, eia goio pou rivu lou oio e Antiok.]
ACT 15:35 E Pol me Banabas tai, egira kama beu rivua soio e Ierusalem, egira pou lou oio e Antiok. Egira igogolu vikapopo tai me la valalua isahari, egite tovo la valalua, me egite valolo legiteu la merera te La Uru, la valolo ale taritigi te Iesus.
ACT 15:36 Goio, mulimuli, la haro isahari polo, e Pol goio veiale Banabas mago “Banabas, etala ge beu rivua soio, etala ge hilo la valalua tegala oio te la maututula ale pala etala valoloti legiteu la valolo ale taritigi te la isale Iesus. La vuhula etala kama rovia, egite pou tigi moli, ka ouka.”
ACT 15:37 E Banabas goio lolo la merera te Pol mai ele, eia goio pulia e Ioanes Mark, veia eia ge tilimuli egirua.
ACT 15:38 Eala moli e Pol goio veiale Banabas mago “Eala moli la tahalo alele pala eia lou taro etalua oio e Pampilia, eia kama tilimuli etalua soio te la igogolu. Ale igoie eau kama masagea veia eia ge tilimuli lou etalua.”
ACT 15:39 Tio la gabutatalala tegirua vilele baa taro moli te aleie, egira goio vibalele tarotio. E Banabas goio pulia e Mark, egira tuga goio sae te sipi, e sipi vahari egira solau la olu uru e Saipras.
ACT 15:40 E Pol goio pulia e Sailas, egira goio tuga, egite la valalua la lotu goio tataro egirua, egite kaka robo egirua veia la gilogo te Iesus eia ge suli egirua.
ACT 15:41 Egira goio tuga bulalahu soio te la maututula oio la gale Siria, la gale Silisia tai, me egira viteteli vagari egiteu la valalua la lotu te la maututula tomi ele.
ACT 16:1 E Pol me Sailas, egira goio soko la tuluga, egira goio guvi oio la mautu e Derbe, egira sele polo molia goale la mautu e Listra, egira goio pogea la tahalo isasa, la isala e Timoti, eia la tahalo la lotu, e tilala la tavile Iuda, me eia tai la tavile la lotu, e tamala la tau Grik.
ACT 16:2 Goio, e Pol mira lolotia veia e Timoti ele eia la tahalo isasa la vulovulola taritigi pepeho.
ACT 16:3 Tio e Pol goio masagatia e Timoti ele, eia pulia veia eia ge tilimuli egirua. Eia pulia mai ele, eia goio tau la irovilala te la vovole Timoti ele, la vuhula eia gabutatala egite Iuda ale pou te la gale alele, egite rovitia veia e tamala eia la tau Grik, la vuhula egite souka ge muku pilea ale eia kama abi la irovilala te valaluale tilala.
ACT 16:4 Tio egite goio tuga soio la maututula tomi, egite veipalea giteu la viputumulila ale egite ururu kisitia oio e Ierusalem veia egite ge toro ovola la viputumulila alele.
ACT 16:5 Goio, egite la valalua la lotu gabutatala vagaritiao, egite usu tilimulia, la giligi gite kamati bisi, te la haroharo tomi la valalua me hatavivile usu goilo halaba lou te la lotu te Iesus.
ACT 16:6 Egiteu la bilalahale, e Pol, e Sailas, e Timoti, egite goio tuga goio kabili posa te la baa la gale ilua e Prisia me Galesia, goio, La Kalulu La Marokala mera robo egiteu veia egite ge umala valololo oio la gale Esia.
ACT 16:7 Tio egite tuga goio la gale Misia, egite ga tovo lalaia ga goilo te la gale Bitinia, eala moli La Kalulule Iesus mera taro egiteu.
ACT 16:8 Tio egite goio polo molia e Misiale, egite tuga moliti golau e Troas.
ACT 16:9 Egite goio mavuta, mai galogo e Pol goio hilo la paga isasa mai ale eia tagea, eia hilo la tau Masedonia isasa, eia magiri, eia tola e Pol mago “Pol, eme ge taro polo somai, eme ge suli amiteu la valalua e Masedonia.”
ACT 16:10 E Pol hiloa mai ele, goio, hagolo mamaga, kama tabaa, amite goio paa muli la gauru ale amite ge goio e Masedonia. La vuhula amite rovitia ale La Tahalo Uru tolati amiteu veia amite ge veipala la valolo ale taritigi soio tegiteu.
ACT 16:11 Tio, amite goio sae te sipi olau e Troas, amite toto moli solau la olu bisi e Samotres. Goio, mai galigeli, amite goio e Niapolis, sivo te sipi ovola.
ACT 16:12 Amite goio hiliti taroa la mautu alele, amite goio guvi oio e Pilipai. La mautu aleie, egite Rom vibaumuli ovola. Eia la mautu uru te la gale Masedonia, me amite mavuta ovola la logo isahari.
ACT 16:13 Goio, te la haro tabu amite gogala la matapiro te la mautu uru ele, amite tuga goio te la lalu isasa, amite rovia la baa bakisi oio te la harare la lalu ale, egite Iuda igigo la kilaka ovola. Amite goio hagagavi te la lalu ele, amite hilo egite hatavivile isahari oio popou, amite goio pou vikapopo legiteu, amite valolo egiteu.
ACT 16:14 Goio, la tavile isasa lolotia la valolo tamiteue, la isala e Lidia. Eia lotu tavu La Tahalo Uru, eia la tavile la mautu uru e Taiataira. La valalua lotoloto la lavalava magesegese oio tetala, eia ababi la uati uru ovola. Eia lolo la merera te Pol, La Tahalo Uru goio vulo la gabutatalala tetala.
ACT 16:15 La Tahalo Uru vulo la gabutatalala tetala mai ele, egite goio vuhia, eia vuhi vikapopo tai me egiteu la loa la luma tetala. Eia vuhi kaluvu, eia goio veia miteu mago “Mai amuto rovitia veia eau gabu tikumuti la merera te La Tahalo Uru, taritigi etato ge goio la luma taku, eau ge baumuli amutou.” Eia totolo suku tavu moli amiteu, amite goio roromulia, amite goio te la luma tetala, poutio.
ACT 16:16 Tio, mulimuli te la haro isasa, amite tuga goio te la muli la kilaka ale egite kaka ovola, amite goio te la gauru, la bilalaha isasa hatavile, eia poga amiteu, la tavile ale la hitu pou tetala, eia veipala la paga isahari ale ge sibitala mulimuli, la valalua lotolotoa mai ele veia eia ge veipalea giteu mai ele la merera ale ge sibitala mulimuli, egite ale baumulimulia balava sesele la uati.
ACT 16:17 La tavile aleie, eia goio tilimuli amite me Pol, eia tilimulimuli amiteu, eia tatola la valalua mago “Egiteu la valalua aleie, egite la bilalaha sesele te La Tahalo Uru ale loata. Egite veipalea gatou la masasagala te La Tahalo Uru, ale eia ge vimavulaha taro letatou la iruru tegatou, eia ge vimahuli etatou.”
ACT 16:18 Te la haroharo tomi, la tavile ale eia tatola moli mai ele, e Pol goio silahati leia, eia goio vulo gale tavua, eia veia la hitu ele mago “Eau veiamu, te la isale Iesus Kraist, eme ge hele taroa la tavilele, eme ge tuga.” Tio oio moli ovola la hitu ele hele taroa la tavilele, eia heletio.
ACT 16:19 Tio, egiteu la valalua ale baumulimuli la tavilele, egite loloa, egite igo totolo, la vuhula egite ababi la mapa oio tetalale. Egite goio lao tola molia e Pol me Sailas ele, egite lapu egira soio te la vigagiala oio te la tia la mautu.
ACT 16:20 Egite ubi legirua te la lagu la tahalo la ilolo la vigagiala, egite goio veia mago “Egira la tau Iuda iluale, egira igo marapa la mautu tegatoue.
ACT 16:21 Egira veipala isahari la merera ale polo la viputumulila tegatou e Rom.”
ACT 16:22 Tio egiteu la valalua me hatavivile tomi, egite ubi tai legirua la vikararala, egiteu la tahalo la ilolo la merera, egite loloa mai ele, egite goio sile taroa la kairobola tegirua, egite goio veia giteu la bilalaha tegiteu veia egite ge lubi vulo egirua.
ACT 16:23 Tio, egite goio lubi pepeho egirua mai ele, egite goio vagoilo egirua te la luma la kilisi. Egite goio tutu tolea la tahalo la vibaumuli la luma mago “Eme ge pahutu vagari, eme ge vagari robo la mata la lumale, egira souka ge gali.”
ACT 16:24 La tahalo la vibaumulilale, eia loloa egite vikara vagari soio tetala mai ele, eia goio pulia e Pol me Sailas, eia vipou egirua oio te la kapiutu ale soililo kililili, eia goio abi la bautu la obu ilua ururu, tikumu, eia tau la vaha girua oilo vola, eia vitabago tola tavu, kisi vagaria, koratio, kama koramulia egira ge hiliti tuga lalahu.
ACT 16:25 Tio, goio, la paga logo, te la logo uru vali posa, e Pol me Sailas goio kaka tavu La Tahalo Uru, egira baubau la bilau la lotu, goio egiteu la valalua ale oilo te la luma la kilisi ele, egite laba gelegele egirua baubau ele.
ACT 16:26 Kama tabaa, egite karutu e malugulugu uru sibitala, eia umutio. Eia umua, la sosole la luma la kilisi taumu lahu, la mata la lumale tapulaka, hare palala, la sen ale vagari egite kisi legiteu ele talube tomi, parutio.
ACT 16:27 La tahalo ale baumuli la luma la kilisi ele, eia ga mata mai soio, la mata la lumale hare palalati, eia veia egiteu la valalua tomi ale oio te la luma la kilisi ele, egite tomi heleti. La vulela paru, eia taga pepeho, eia kai taro molia la viso tetalale, eia veia ge ubi rivu lou eia, ge peho.
ACT 16:28 Eala moli e Pol goio tola karutua mago “Ae, eme ge bili rivu lou eme ilava, amite kama hele, amite tomi omaie.”
ACT 16:29 La vuhula la vulele maura paru sesele, eia vava bubu moliti, la vovola pariri moliti, malugulugu, eia goilo la luma, kaka bububu moliti la havi veia ge vitola, eia goio boru lagu tugu te la lagule Pol me Sailas, eia togo egirua.
ACT 16:30 Eia goio puli egirua sogala, eia tahi egirua mago “Amulua taho lua ururu ele, eau ge igo la rova La Tahalo Uru ge vimahuliau?”
ACT 16:31 Egira goio koli la tilahi tetala mago “Eme ge roromuli La Uru tegatou e Iesus, La Tahalo Uru ge vimahulime, eme ge tetalati, me egite la loa la luma taume tai.”
ACT 16:32 Tio egira goio veipaleala la merera te La Tahalo Uru, vikapopo tai me egite tomi la loa la luma tetala.
ACT 16:33 Oio moli ovola, te la logole, eia kama gabutatala la logo uruti, eia goio vuhi maroka la kakali girua ale egite lubi vulo egirua, la vovo girua kakali ele. Kaluvu, kama tabaa, egira goio vuhi leia te la isale Iesus, vikapopo tomi egiteu la loa la luma tetalale.
ACT 16:34 Tio eia goio puli e Pol me Sailas, egite goio te luma tetala, egite pou, eia abia girua la ilali, egite ali vikapopo, egite sagege vikapopo me egiteu la loa la luma tetala, la vuhula egite roromulitia la merera te La Tahalo Uru.
ACT 16:35 Goio, mai galigeli la paga mamaga, egite ururu ale lololo la vigagiala, egite baha soio te la luma la kilisi, veia egite ge veia la mulugaluga eia ge lube taro egirua taho luale, egira ge tuga.
ACT 16:36 Goio, la tahalo la pahutula veiale Pol mago “Egite la mulugaluga baha la vikararala somai, egite veia ge lube amulua, amula ge gali taro la luma la kilisi, amula la vigagiala oukati.”
ACT 16:37 Eala moli e Pol goio veia giteu mago “Amilua la iruru ouka, eala moli egite lubi vulo bulalahu moli amilua. Ale la iruru tegiteu, la vuhula amilua la tau Rom. Egite vagoilo bulalahu moli amilua te la luma la kilisi, ale igoie egite veia ge baha taro kokovu moli amilua sogala! Ko, ge ouka viruru! Egite sesele ge gomai, ge puli amilua sogala.”
ACT 16:38 Goio, egite la bilalahale lolo la merera tegirua mai ele, egite goio beu rivua soio, egite veia giteu la mulugaluga la merera tegiruale. Egite loloa, egite taga pepeho, la vuhula egira la tau Rom, eia tikumu veia ge igo la iruru soio tegirua.
ACT 16:39 Tio egite goio tegirua, egite vikara gogome molia girua, egite goio puli egirua, baha taro egirua sogala veia egira ge tuga taro la mautu aleie, egira goio tugatio.
ACT 16:40 Egira goio hiliti taroa la luma la kilisi ele, egira tuga goio te la luma te Lidia, egira hilo egiteu la valalua la lotu oio, egira goio viteteli lou egiteu, egira tutu tolea giteu mai ele kaluvu, egira goio tugatio.
ACT 17:1 Mulimuli e Pol me Sailas goio tuga lou, egira goio sibitala oio la mautu e Ampipolis, egira sele polo molia goale guvi oio la mautu e Tesalonaika. Oio la mautu ele la luma la lotu tegite Iuda isasa oio.
ACT 17:2 Egira goio pou, te la haro tabu itolu e Pol goilo te la luma la lotu tegite Iudale, mai la vulovulola ale palati, eia goilo la luma la lotu tegiteu ele, eia lubea giteu la masova la merera te La Buk Tabu Ale Pala,
ACT 17:3 ale La Tahalo Uru hiloviti e Kraist, eia ge gabu la iligiligi, eia ge peho, eia ge mahuli rivu lou taro la lulu la pileho. Eia veia giteu mago “E Kraist, La Riau tegatou e Iuda, ale eau valolole amutouo, eia eala moli e Iesus ele.”
ACT 17:4 Tio la valalua me hatavivile usu, me egiteu tai e Grik ale lotu la lotu tegite Iuda, me egiteu tai e rutu giteu la tahalo la vuliti, egite tomi loloa, egite roromulia, egite goio tilimulitia e Pol me Sailas ele.
ACT 17:5 Eala moli egiteu la valalua e Iuda, egite loloa, egite igo totolo, egite goio karasuku egiteu la tahalo la vareagila isahari oio te la tia la mautu veia egite ge igo marapa e Pol mira, egite goio vikapopo, sokotia la vikokuela uru, egite magiri galilia la luma te Ieson, egite paa muli egirua veia ge lapu egirua soio te la vigagiala, la mautu ele masuatio.
ACT 17:6 Egite goio ga paa muli e Pol me Sailas ele, kama sivuti egirua, egite goio lapu molitia e Ieson me egiteu la valalua la lotu isahari, egite lapu egiteu soio te la mulugaluga te la mautu uru ele, egite veiala mago “Egiteu la valalua aleie, egite moli eala igo maraparapa la valalua te la mautulula tomie. Eala igoie egite gomaiti igo marapati la mautu tegatoue.
ACT 17:7 Egira mavuta oio te la luma te Ieson. Egira vulotia la merera te la uru gatou sesele e Sisa veia e Iesus moli uru, e Sisa ouka.”
ACT 17:8 Egiteu la valalua me hatavivile tomi, me egiteu tai la mulugaluga tomi te la mautu uru ele, egite loloa mai ele, egite karutu pepeho, egite marapa.
ACT 17:9 Tio egite goio veiale Ieson mite me la valalua la lotu veia egite ge loto robo la iruru alele. Egite loto roboa kaluvu, la mulugaluga lube egirua, egira goio tuga.
ACT 17:10 Goio, oio moli ovola, te la logo moli alele, egite la valalua la lotu goio baha taroa e Pol mira me Sailas soale e Beria. Egira goio sibitala oio la mautu e Beriale, egira goio goilo te la luma la lotu tegite Iuda.
ACT 17:11 Egiteu e Iuda ale pou oio e Beria, egite la tahalo sesele, egite muga lou egiteu e Iuda ale pou oio e Tesalonaika, la vuhula egite lolo la valolo, egite sagege tavua, egite tau tolatia te la gabutatalala tegiteu. Te la haroharo tomi egite gigigi La Buk Tabu Ale Pala, la vuhula egite masagea ge rovi la masova la valolo te Pol me Sailas veia eia sesele ka ouka.
ACT 17:12 Goio, egite Iuda tomi usu roromuli sesele la merera te La Tahalo Uru, egite la valalua e Grik tai usu, me egite hatavivile Grik tai isahari ale e harua giteu la tahalo la vuliti.
ACT 17:13 Tio mulimuli egiteu e Iuda isahari ale pou oio e Tesalonaika, egite lolo la rerele Pol ale eia veipala la valolo ale taritigi oio e Beria, egite goio sibitala oio e Beriale veia ge igo marapa la valalua, ge vahiliti la vikokuela.
ACT 17:14 Tio la valalua la lotu loloa mai ele, egite goio baha taro e Pol soio, e Sailas me Timoti moli pou.
ACT 17:15 Egite isahari vahari taroa kara oio la mautu uru e Atens, egite goio tataroa oio te la mautu alele, egite goio beu rivua, eala moli e Pol tutu tolea giteu veia egite ge veiale Sailas me Timoti veia egira ge igo harari moli ge tilimuli loua soio e Atens ele.
ACT 17:16 Goio, e Pol pouti te la mautu uru tegite Grik e Atens ele, eia pou tali moli e Sailas me Timoti, eala moli eia karutu ale la mautu alele eia volu seseleti la puigolo ale egite lotu tatavua, eia hiloa, eia igo totolo pepeho.
ACT 17:17 Eia goio hilotia mai ele, te la haroharo tomi eia goilo te la luma la lotu tegite Iuda, eia vikara vikapopo legite Iuda me egiteu la valalua logala tai ale lotu tavu La Tahalo Uru. Eia goio magiri tai te la tia la mautu, eia vikara vikapopo legiteu la valalua.
ACT 17:18 Egiteu la tahalo la vimari tai isahari ale tilimuli la merera te la uru tegite Grik ilua ale pehoti, e Pikuras, e Seno, egite me Pol vipigi vulo tai la merera isahari. Isahari tegiteu goio veia mago “La tahalo ale patatata moli, la vimari tetalale mave?” Eala moli egite isahari lou mago “Eia soioge vikarakara te la uru isahari halaba isapolo, ia?” Egite kama matagaga mai ele, la vuhula e Pol valolo egiteu te la isale Iesus, ale eia mahuli rivu lou taro la lulu la pileho, egite loloa eia isapolo, la vimari alele eia halaba.
ACT 17:19 Tio, egite goio puli e Pol soio tegiteu la valalua e Atens me egiteu la valalua te la mautu isahari tai ale pou vikapopo oio la popoitile Areopagas veia egite ge loloa. Egite veiala mago “Amite masaga ge rovi tigi la vimari ale halaba eme vimariti la valalua ovola.
ACT 17:20 La vimari alele, eia isapolo tamiteu, amite masaga ge rovi tigi la masovala.”
ACT 17:21 Egite vikara maie, la vuhula ale la kavovoula tegiteu, mai la merera ale halaba, egite ge vipigi vulola.
ACT 17:22 Tio, e Pol goio magiri te la lagu giteu la valalua tomi, eia goio vikara soio tegiteu maie “Amutou la valalua e Atens ele, eau hilotia, amuto tilimuli tataho la vulovulo tomi te la lotu tamutou.
ACT 17:23 La vuhula eau kavovou te la tia la mautu tamutou, eau hilo egiteu la puigolo ale amuto vimagiria, amuto lotu tatavu egiteu. Eau hilo taia la poro isa bisi amuto labea, tokoromo tatahoa, amuto kekesi ovola maie: ‘Ale te la uru ale kokovu, amite kama rovia.’ Tio La Uru ale eau valolo le amutou ovola, eia eiala moli ele, amuto lotu tatavutia bakisi, eala moli amuto soukama rovi tigia.
ACT 17:24 La Tahalo Uru ale vipou la mori me la magasa, eia uru, eia vibaumuli la mori, la magasa, la golugolu tomi oilo vola. Eia kama mou te la luma ale la valalua tigila la lima giteu, ouka.
ACT 17:25 Eia tai kama savele la paga isasa etato ge abiala, eia moli abia gatou la mahulila, la kalulu gatou isasasa, la golugolu tomi ale koramuli etatou.
ACT 17:26 Te la tahalo isa sekela moli eia visibitala la maratatila la valalua tomi, eia vitabari egiteu te la galegale tomi. Eia toi la imamala tegiteu, la igagala tai te la magasa tegiteu ale egite ge pou oio vola.
ACT 17:27 Eia igo mai ele veia egite ge paa mulia, egite ge vava mulia, isahari ge sivutia. Eala moli La Tahalo Uru eia kua moli tegatou tomi, mai la uru tamutou isasa pala eia veitia maie:
ACT 17:28 ‘Eia moli la vuhu la mahulila tegatou, etato tomi pou te la uluvala.’ Eia mai tai ale egite la tahalo la mari tamutou pala kekesitia maie: ‘Etato tomi e latatula.’
ACT 17:29 Tio mai etatou rovia veia etato e latatu La Tahalo Uru, eia kama koramulia veia etato ge veia e tama gatou eia mai la uati ale mememe, etato puia mai la tahalo.
ACT 17:30 Pala, ale etato so popou te la maligoma, La Tahalo Uru mata sosoli moli etatou te la iruru tegatou alele. Eala moli ale igoie eia tola tavu etatou la valalua te la maututula tomi veia etato ge piligi taro la vulovulo gatou ale kama kokorale.
ACT 17:31 La vuhula eia tauti la mata ale la tahalo tetala ale eia hilovitia ge hilo muli la vulovulo la valalua tomi veia eia matata ka ouka. Ale etato ge gabu tikumua veia eia sesele, la vuhula la tahalo ale, La Tahalo Uru vahilititia lotalo te la lulu la pileho.”
ACT 17:32 Tio, e Pol vikara kaluvu soio tegiteu mai ele, eala moli ale eia veia giteu veia e Iesus mahuli rivu lou taro la pileho, egite isahari vikara malikiala. Eala moli isahari veia egite ge lolo loua bakisi la valolo tetalale.
ACT 17:33 Tio e Pol goio hiliti taro egiteu,
ACT 17:34 eala moli isahari tegiteu roromuli la merera tetala, egite goio tilimulia, isa tegiteu la mulugaluga isasa, la isala e Dionisias, isa lou la tavile, la isala e Damaris, egite isahari lou goio tilimuli taia.
ACT 18:1 E Pol hiliti taro e Atens, eia goale la mautu uru e Korin. Oio e Korin eia poga la tau Iuda isasa, la isala e Kuila, la mautu tetala sesele e Pontas. Egira me rutula e Prisila so bulabula loale la mautu e Rom, la vuhula la uru tegite Rom, la isala e Klodias, eia kumuli taro egiteu e Iuda veia egite umalati ge pou oio tegiteu e Rom.
ACT 18:3 Goio, e Pol hari lalai egirua, eia hiloa veia la igogolu tegirua la silahi la luma la sel, la igogolu tetala tai mai ele, la igogolu tegiteu isa moli. Eala eia goio mou oio te la luma tegiruale, egite visuli baololi la silahi la sel.
ACT 18:4 Te la haro tabu tegite Iuda, eia ge vikara vikapopo legite Iuda, egite Grik tai, veia egite ge vulo la gabutatalala tegiteu tavu e Iesus.
ACT 18:5 Goio, mulimuli e Sailas mira me Timoti, egira guvi loio e Masedonia, e Pol kamati gabutatala, eia lagu tavu moliti la valolo soio tegite Iuda veia egite ge rovia e Iesus eia e Kraist, la uru tegiteu.
ACT 18:6 Eala moli egite Iuda goio muku pilea, egite vikara kukumuala. Tio e Pol hiloa mai ele, eia goio kuvali taro la momora te la lavalava tetala soio tegiteu, la irovilala la igototolola alele. Eia goio veia giteu mago “Mai amuto ge vilua te la igototolola te La Tahalo Uru, ale la iruru tamutou lou, eau ouka. Eau ge sele molia goio tegiteu ale souka matagaga, amuto Iuda korale!”
ACT 18:7 Goio, e Pol hiliti taro egiteu ele, eia goio bula soio te la luma te la tau Grik isasa, la isala e Titias Iastas, eia la tahalo isasa eia lotu tavu sesele La Tahalo Uru, la luma tetala hagagavi moli te la luma la lotu tegite Iuda.
ACT 18:8 Goio, la mulugaluga te la luma la lotu tegite Iudale, la isala e Krispas, eia lolo la vikararala te Pol, egite me la karakara tetala egite roromuliti la mererale, egite tomi vuloti la tia giteu tavu e Iesus, egiteu e Korin usu tai mai ele, egite tomi goio abi la vuluhi.
ACT 18:9 Te la logo isasa, e Pol goio tabuliae moli la mulila, eia hilo la paga isasa eia mai ale tagea. La Uru sibitala tavua, eia veiala mago “Eme umala ge tataga la valolo, eme kama ge pou makovu,
ACT 18:10 la vuhula eau omaiti taume. Isa kama ge igo gegerume, la vuhula omai te la mautu ale, la valalua usu rovitiau, egite taku.”
ACT 18:11 Eala e Pol goio mouti oio e Korin la leavala isasa la taio iuolo, eia tovo egiteu la merera te La Tahalo Uru.
ACT 18:12 Eala moli goio te la leavala ale la mulugaluga te la gale Akaia ale egite Rom vipoua, la isala e Galio, eia goio guvi eia pou halaba te la igogolu tetala, te la imamalale egite Iuda goio soko vagari la vigimala soio te Pol, egite lapua soio te la vigagiala.
ACT 18:13 Egite uleala mago “La tahalo ale, eia karasuku la valalua veia egite ge lotu te la vulovulo ale polo la viputumulila tamiteu.”
ACT 18:14 Goio e Pol ga vikara, e Galio goio veia giteu la valalua e Iuda mago “Mai la iruru te la tahalo ale ge polo la viputumulila tamite Rom, ale eau ge lolo amutou.
ACT 18:15 Eala moli ale amuto vaigo mulimuli la merera isahari oilo te la vulovulo mutou lou, ale la paga tamutou, amutou lou ge vimatatea.
ACT 18:16 Eau kama ge loloa.” Tio eia vikara kaluvu mai ele, eia goio kumuli taro egiteu sogala.
ACT 18:17 Egite mahelatio, egite gali sogala lao tola la mulugaluga te la luma la lotu tegite Iuda, la isala e Sostenes, egite kuea oio te la mata la luma la vigagialale, eala moli e Galio veia la golu bububu alele.
ACT 18:18 E Pol goio mou tabaa lou bakisi oio e Korin, mulimuli eia goio tataro egiteu la valalua la lotu, eia tuga golau e Senkria, eia goio sipa taro tomi la ivula, mulimuli eia goio sae te sipi, e sipi vaharia somuli lou e Siria, e Prisila mira me Kuila tilimuli taia. Ale eia sipa taro la ivula, la vuhula eia toiti la merera ale tikumu soata te La Tahalo Uru, me ale la irovilala ovola alele.
ACT 18:19 Goio, egite guvi omuli la mautu Epesas, e Pol goio tuga taro egirua oio te la mautu alele, eia goio goilo lou te la luma la lotu tegite Iuda, eia vikara vikapopo legiteue.
ACT 18:20 Egite goio kakea veia eia ge pou tabaa bakisi oio tegiteu, eia kama masaga.
ACT 18:21 Eala moli eia tataro egiteu, eia goio veia giteu mago “Mai La Tahalo Uru ge masagea, eau ge beu loua somai tamutou.”
ACT 18:22 Goio, eia sae te sipi, eia hiliti taro la mautu Epesas ele, tugatio. E sipi goio goilo e Sisaria, eia sivo, goata e Ierusalem, eia goio laharoa giteu la valalua la lotu, eia goio pou bakisi, mulimuli eia goio sele molia soio e Antiok, poutio.
ACT 18:23 Tio, e Pol goio pou tabaa muga bakisi oio la mautu e Antiok ele, mulimuli eia goio soko la tuluga lou, polo kabili te la gale Galesia, e Prisia tai, eia viteteli egiteu la valalua la lotu tomi oio te la gale iluale.
ACT 18:24 Te la imamala alele, la tau Iuda isasa, la isala e Apolos, la mautu tetala sesele e Aleksandria, eia guvi oio Epesas. Eia la tahalo isasa la merera tetala taritigi, eia rovi tomi tai la merera La Buk Tabu Ale Pala tegite Iuda.
ACT 18:25 La valalua la lotu pala tovo tigi leia la gauru te Iesus, eia vagari tavu moli la valolo soio te la valalua me hatavivile, la igogolu tomi te Iesus eia rovi molia, eia ka ruru, eala moli eia rovi moli la vuluhi te Ioanes, la vuluhi te la isale Iesus eia ka rovia.
ACT 18:26 Eia goio valolo vagari te la luma la lotu tegite Iuda. E Prisila me Kuila goio lolo la valolo tetalale, egira goio pulia, egira goio vituriala la gauru tomi te La Tahalo Uru ale eia soukama matagaga ovola.
ACT 18:27 E Apolos loloa, eia veia eia taritigi, eia goio veia ge goio la gale tegite Grik e Akaia ge valolo te la gale alele. Tio egiteu la valalua la lotu oio Epesas, egite veia ge sulia, egite kekesi matagaga soio tegiteu e tabarabara giteu la valalua la lotu oio e Akaia veia e Apolos ge guvi, egite ge rara tavua, ge pulia soio te la luma tegiteu. Tio e Apolos goio guvi oio te la mautu tegiteu ele, egite puhi tataho molia, me eia goio suli tataho egiteu tomi la valalua ale sau tola la gilogo te La Tahalo Uru veia ge tetala.
ACT 18:28 E Apolos ele, eia suli pepeho la valalua la lotu, eia magiri te la mata la valalua me hatavivile tomi, eia pigi la merera usu ale tubu sesele tegiteu e Iuda, eia bolehoho egiteu ovola. Eia turi mulia giteu oilo te La Buk Tabu tegiteu lou ale e Iesus eia La Riau tegite Iuda, ale La Tahalo Uru hilovitia veia egite ge pou talia.
ACT 19:1 E Apolos so popou oio e Korin, e Pol goio goale rivu lou Epesas, eia polo moli oilo, eia kama sae te sipi. Ale eia guvi oio Epesas, eia poga egiteu la valalua te Iesus isahari.
ACT 19:2 Eia goio tahi egiteu mago “Ale pala amuto vulo la gabutatalala tamutou, amuto roromuli e Iesus, La Kalulu La Marokala sivo robo tai amutou, ka ouka?” Egite goio koliala mago “Ouka, La Kalulu La Marokala amite ka rovia, isa kama veia miteu ovola.”
ACT 19:3 Tio e Pol loloa mai ele, eia goio tahi egiteu mago “Mave, amuto roromuli la merera tere ale amutou abi la vuluhi?” Egite koliala mago “Amite roromuli moli la valolo te Ioanes tio amite goio vuhi.”
ACT 19:4 Goio, e Pol veia giteu mago “Ale amuto roromuli la merera te Ioanes, eia taritigi. Eala moli e Ioanes valolo pala muga ale etato ge vulo la gabutatalala tegatou soio te La Tahalo Uru, eia goio turi solagu te la tahalo ale ge guvi mulimuli tetala. E Ioanes masagea veia etato ge rovi taia, ge roromuli la merera te Iesus uru ele!”
ACT 19:5 Goio, egite loloa mai ele, egite gabu tikumua la merera te Pol ele, egite goio vuhi te la isale Iesus.
ACT 19:6 E Pol goio tau la limala oata te la gama giteu ele, La Kalulu La Marokala goio sivo robo egiteu, egite soko la vikararala, la merera sibitala te la hare giteu isasasa, eia isapolo viruruti, egite goio veipala tai la merera te La Tahalo Uru.
ACT 19:7 Egiteu savulusa gete lua la valalua alele.
ACT 19:8 Goio, e Pol goilo te la luma la lotu tegite Iuda, eia valolo la valalua, eia igo molia mai ele la taio itolu, egite pou vipigi vulo la merera usu, e Pol tovo lalaia veia eia ge virovi sesele egiteu ale la pulolou la matagagala te La Tahalo Uru ale halaba eia sibitalati.
ACT 19:9 Eala moli isahari tegite muku pile, egite kama masaga ge loloa, isahari tegiteu goio hiliti te la mata giteu tomi, egite goio vile tomi moli la gauru te La Uru ale e Pol veitia giteu ovola. Tio, e Pol goio hiliti taro egiteu, egite korale, eia goio puli egiteu la valalua te Iesus soio te la luma te la tahalo la mari isa uru, la isala e Tiranas. La tahalo ale, eia vimarimari la valalua oio te la luma tetalale. E Pol goio tetala veia egite ge vipigi vulo tigi la valolo ale taritigi te Iesus oio tegiteu ele, egite ge loloa.
ACT 19:10 Eia pou moli maie, igo seselea mai ele la leavala iluati, me oio vola la valalua me hatavivile tomi oio la gale Esiale, egite tomi loloa la merera te La Uru ele, egite Iuda, egite la valalua ale logala tegite Iuda tai.
ACT 19:11 Goio, La Tahalo Uru visibitala la golu la karutula isapolo sesele te la limale Pol oio la mautu Epesas ele.
ACT 19:12 Tiele egite ababi moliti la kulikuli tegiteu, goio tataua la vovole Pol, mulimuli egite savula la vovo giteu ale lalea, egite mahuli moliti, me egiteu ale la hituhitu pou tegiteu, la hitu ge hele taro egiteu.
ACT 19:13 Mulimuli la valalua la ilubulubu isahari tegite Iuda ale egite ababi la mapa te la kumuli taro la hituhitu, egite goio veia ge tovo lalai la tiloi la isale Iesus veia ge kumuli taro la hituhitu ovola. Tio egite tola moliti mago “Te la isale Iesus ale e Pol veipalatia, eau aba vagari seselea mutou!”
ACT 19:14 Goio, la tahalo ivitu loio e Iudea, e latatu la mulugaluga isa tegite pris, la isala e Siva, egite rovi la tiloi la isale Iesus mai tai ele. Tio egite goio veia ge tovo lalaia soio te isasa.
ACT 19:15 Eala moli la hitu vaule molia giteu mago “A ge, eau rovi e Iesus me Pol, amuto erese tahalo e?”
ACT 19:16 Tiele la tahalo ale la hitu pou tetalao, eia lao egiteu, goio eia sile kurakura la kulikuli tegiteu. Tio egite hele marapa moliti, la lavalava tegiteu kokovuti, la vovo giteu kasoso lalahu.
ACT 19:17 Tio goio mulimuli egite tomi e Iuda me Grik oio Epesas, egite lolotia mai ele, la tilaga uru sesele eia pou te la valalua me hatavivile tomi oiole. Egite gabu tikumu moliti e Iesus.
ACT 19:18 Goio, la valalua usu me hatavivile, egite gabutatala rivu lou la iruru tegiteu, egite goio vuvulo.
ACT 19:19 Tio la valalua me hatavivile tomi ale igigo la ilubulubu ele, egite pigi olu tomi la toro giteuo, goio selu taro tomitiao. Goma, egite vururu tavu lou la toro giteuo, la giligila maie, e kina salatu savulu lima, gegete lou.
ACT 19:20 Tiele la vikararala te La Tahalo Uru eia vagari seseleti, goio eia bolehoho seseleti la ilubulubu tegiteu ele, la rerela vavava soio te la maututula tomi te la gale alele.
ACT 19:21 Tio, mulimuli ovolale, La Kalulu La Marokala, eia muga la gabutatalala te Pol, goio e Pol veia ge beu loua somuli e Ierusalem, eia veia ge polo posa la gale ilua e Masedonia me Akaia, eia veia mago “Mai eau ge hiliti loio e Ierusalem, eau ge sele molia veia ge goio ge hilo la mautu uru e Rom.”
ACT 19:22 Goio e Pol baha taro mamuga la tahalo la vibaumuli tetala iluale, e Timoti me Irastas, tio egira goio vimuga soio e Masedoniao. Eala moli e Pol pou tabaa muga bakisi oio la gale Esia.
ACT 19:23 Tio, oio la mautu Epesas ele, te la haro isasa, la marapala uru sibitala, ale egite la valalua la gima te la gauru te Iesus vahilitia. Eia sibitala maie:
ACT 19:24 La tahalo isasa, la isala e Dimitrias, la igogolu tetala la gulutu la uati la silva, eia puia mai la halulu la tavile, la isala e Atemis, ale la uru tegiteu, egite gabu tikumua, totogoa. La valalua ale la igogolu tegiteu la gulutu la uati ele, egite ababi la mapa uru te la igogolu alele.
ACT 19:25 Tio goio la mulugaluga tegite te la igogolu alele, la isala e Dimitrias, eia goio tola vikapopoa egiteu la valalua la igogolu tetala, me egiteu tai isahari ale igogolu mai ele, egite goio tetala, eia goio vikara soio tegiteu mago “Etato tomi rovitia, etato bole moli la mapa uru te la igogolu moli aleie, la igogolu isasa oukati lou veia etato ge abi la mapa ovola!
ACT 19:26 La tahalo moli ale e Pol, eia moli eala igo marapati la gabutatalala te la valalua tomi usu. Etato tomi rovitia, etato hilo taia. Eia veitia la valalua tomi maie mago ‘La uru ale amuto lotu tatavuale, eia kama sesele, ale la valalua egite pui molila la lima giteu.’ La merera aleie, eia kama vei molia omai Epesas, ouka. La merera aleie, eia vavavati te la galegale tomi e Esia. Eia veia la uru ale etato pui molila la lima gatou, eia kama sesele.”
ACT 19:27 E Dimitrias veia giteu mai ele, eia goio tutu tola loua giteu mago “La merera te Pol aleie, eia moli ge magiri robo la igogolu la paa muli la uati tegatoue. Me eia kama igo molia gatoue, ouka, eia igo taia mai ele la valalua tomi tai, egite kama ge gabu tikumu lou la tavile uru e Atemis. Eia la uru te la valalua me hatavivile tomi, te la galegale tomi. Egite kamati ge gabu tikumu loua. La vikararala te Pol moli eala ge vipou gegeru etatoue.”
ACT 19:28 Tio, goio, la valalua tomi lolo la merera te Dimitrias mai ele, la hate giteu mamasi, egite igo totolotio, egite vikara mago “Etato tomi la valalua Epesas, la uru isa oukati lou, eala moli e Atemis.”
ACT 19:29 Tio la valalua me hatavivile tomi loloa mai ele, la mautu ele mata daduatio, la valalua tomi koho bilabilatio, egite hari vikapopo soio te la tia la mautu, egite goio koho tavua la tau Masedonia ilua, e Gaias mira me Aristakas, egite lapu egirua, vagoilo egirua te la luma la vigagiala, la vuhula egite me Pol vitilimuli loio e Masedonia.
ACT 19:30 Mulimuli e Pol ga goio tegiteu la valalua, eala moli egiteu la valalua la lotu, egite mera taro vagaria veia eia umala ge goio tegiteu.
ACT 19:31 Egiteu la mulugaluga te la gale ale, egite isahari egite vikilipi e Pol. Egite tai baha la merera soio te Pol, egite tutu tola vagaria mai ele, veia eia umala ge goio tegiteu.
ACT 19:32 Tio, egiteu la valalua tomi usu mapaiti ele, la gabutatalala tegiteu marapa sesele, egite vitola marapatio, egite polo sabeleutu moliti te la tia la mautu, la vuhula usu tegiteu kama rovi la paga ale la mautu marapatila.
ACT 19:33 Goio, egite Iuda goio tututia solagu la mulugaluga isa, la isala e Aleksanda. Egite isahari goio karasukua, eia goio tave tola egiteu, eia masagea veia eia ge koli la merera te la valalua me hatavivilele.
ACT 19:34 Eala moli egite rovitia e Aleksandale, eia la tau Iuda, la lotu tetala isapolo, tio egite goio vipapagati la tilola mago “Etatou la valalua Epesas, la uru tegatou isa moli e Atemis.” Egite tatola mai ele tabaa pepeho, kama maila.
ACT 19:35 Tio, goio mulimuli ovola, la tahalo la kekesi tegiteu Epesas, eia hiliti, eia goio mera taro vagari egiteu la valalua me hatavivile mago “Mutou la valalua la mautu Epesas, etato tomi rovia, etato la mautu aleie, etato sesele baumuli la luma la lotu te la uru tegatou e Atemis, me la uati uru tai ale pala paruti loata te la ilo la lageo, etato baumulia, lotu tavua.
ACT 19:36 Etato tomi rovia, isasa kama koramulia ge tahi taro, amuto tomi ge makovu. Isasa umala ge hate pariri veia eia ge hate mamasi, veia eia ge vahiliti la igototolola. Ale amuto lao tola egirua taho luae, amuto laputi egirua somai te la vigagiala, eala moli egirua kama igo marapa la lotu tegatou.
ACT 19:37 Eala moli egirua kama pakali la paga isasa oilo te la luma la lotu, me egira kama pigi maliki taia la tavile uru ale etato lotu tavua.”
ACT 19:38 Tio eia goio vei muli loua giteu mago “Mai e Dimitrias mite, egite la vigagiala isa oio te la tahalo isasa, la haro la vigagiala oio, me egiteu tai la tahalo la ilolo la vigagiala oio, egite koramulia ge vimatata la merera tegiteu ele.
ACT 19:39 Me amutou tai, mai la gabutatalala tamuto tai isahari oiole, taritigi amuto ge pou tali la haro la vigagiala, amuto ge vimatatea ovola.
ACT 19:40 Ale igoie etato ge vimatata moli la paga ale etato vahilititi la vikokuela te la haro aleie. La sesele la marapala aleie ouka, eia sibitala bulalahu moli. Egite la mulugaluga ge tahi etatou, etato ge vei mave, e?”
ACT 19:41 La tahalo la kekesi vigia mai ele, eia goio baha taro egiteu, egite beu rivua, la vigagiala ouka, egite goio tugatio.
ACT 20:1 Tio, la marapala oio la mautu Epesas kaluvuti ele, mulimuli e Pol goio tola vikapopo egiteu la valalua la lotu te Iesus, eia viteteli egiteu, eia goio tataro egiteu, eia hiliti goale e Masedonia.
ACT 20:2 Eia polo te la gale alele, eia valolo tatuga oio te la maututula, eia viteteli la valalua te Iesus oio te la gale tomi alele. Eia goio guvi oale la gale Grik,
ACT 20:3 eia goio pou te la gale alele la taio itolu. Kaluvu, eia goio masusulu veia ge beua somuli e Siria, veia ge goio e Ierusalem, eala moli eia lolo vutitia veia egiteu e Iuda oio la gale Siria, egite oio raragiti veia ge bilia. Eala eia veia ge polo moli oilo lou te la gale Masedonia.
ACT 20:4 Egite isahari tilimulimulia, egiteulatie maie: E Sopater, la mautu tetala e Beria, a tamala e Piras; e Aristakas me Sekundas, egira tomi ele la mautu tegira e Tesalonaika; e Gaias, la mautu tetala e Derbe; e Timoti; e Tisikas me Tropimas, egira tomi loio la gale Esia.
ACT 20:5 Goio, egite tomi ele beu mugea somuli e Troas, egite pou tali amiteu. Amite goio pou muga bakisi kara te la pougolula kaluvuti, ale mai te la vulovulo gite Iuda egite ali la bret ale kama sogo.
ACT 20:6 Tio goio mulimuli te la poke la ilali alele, amite golau e Pilipai, amite goio sae te sipi, e sipi vahari amiteu la logo ilima, amite goio guvi omuli e Troas, amite me egite ale vimugati ele goio vipoga lou. Amite goio pou oio la mautu e Troas ele la logo ivitu.
ACT 20:7 Tio, te la sarere la logo, amite goio veia ge ali vikapopo te la isale Iesus, mai la vulovulo miteu la valalua tetalale. E Pol raragiti veia ge mai galigeli eia ge tuga lou, eala eia goio valolo pasi amiteu, eia valolo tabaa, kara te la logo posa,
ACT 20:8 amite viroko la lam usu oata te la luma ale amite pou ovolale.
ACT 20:9 Eala moli la tahalo isa bisi, la isala e Iutikas, eia pou oio te la matautu. E Pol valolo tabaale, e maura pou mai ele, eia goio mata tutulu, mavutatio. Eia mavuta maie, eia goio boru sogala, eala moli la lumale oata pepeho, e maura boru sotalo la magasa, pehotio.
ACT 20:10 Tio, amite tomi me Pol goio sivo sotalo, eia goio toto tulu, lao robo la tahalo bisi ele, eia goio veia miteu mago “Amuto umalati taitali, eia oio so mahulihuli bakisi.”
ACT 20:11 Goma, amite goio vahilititia, amite goio goata lou la luma, amite me Pol goio ali tomi lou, vikarakara. Amite vikara moli maie kara la paga mamaga, e Pol goio hiliti taro amiteu, eia goio tugatio.
ACT 20:12 Egiteu e valalua la tahalo bisi ale pehoti, egite hiloa eia oio taritigi moli, egite vaharia soio la luma tetala, egite sagege pepeho, egite oukati ilo buruko.
ACT 20:13 Tio, amite goio vimuga solau te sipi, sae, e sipi goio vahari amiteu sotalo la mautu e Asos, eala moli e Pol polo moli oilo veia ge pou tali amiteu oio la mautu uru alele.
ACT 20:14 Tio eia goio poga tavu amiteu mai ale eia veitia, eia saeti, amite tomi goio toto solau la mautu e Mitilin.
ACT 20:15 Amite goio toto polo lou solau, mai galigeli amite guvi olau la olu bisi e Kios. Mai galigeli lou, amite goio guvi omuli la olu e Samos, hari polo lou, amite goio poru la mautu uru e Miletas.
ACT 20:16 Amite polo moliti la mautu Epesas la vuhula e Pol veia amite umala ge igo makikiru oio la gale Esiale, eia masagea veia ge igo harari ge tovo lalai veia ge guvi somuli e Ierusalem pala te la haro ‘E Pentikos’ uru ele.
ACT 20:17 Amite goio sibitala oio e Miletas, e Pol goio baha la vikararala soio Epesas, eia baha tavu egiteu la mulugaluga te la lotu veia egite ge goio tetala.
ACT 20:18 Egite goio sibitala oio tetala, eia veia giteu mago “Amuto roviti la vulovulogu pala te la siloko la igogolu taku kabili tamutou omai e Esia.
ACT 20:19 Me amuto rovitia te la haroharo usuti egiteu la valalua e Iuda, egite muku pile la igogolu taku, me egite vikara kukumuagu, me la tovolalaila tai isahari, egite sibitala tavuau, me egite tomi la vulovulo aleie, la haro usu eau ilo buruko sesele, eau vibisi moliau te la mata giteu, eala moli eau vagari tavu moli la igogolu te la isale Iesus.
ACT 20:20 Me te la igogolu taku, eau kama bare taroa te la veipala la merera ale ge suli amutou veia amuto ge pou tigi. Eau veipalea mutou, te la pouvikapopola tamutou me oio tai te la lumaluma tomi tamutou isasasa. Me la valolo ale eau veipalatia soio tamutou, amuto rovitia.
ACT 20:21 Me te la haroharo usu eau veipala la valolo soio tegiteu la valalua e Iuda me la valalua e Grik tai, veia etato tomi ge vulo la gabutatalala tegatou soio te La Tahalo Uru, veia etato ge tilimuli moli e Iesus.”
ACT 20:22 Tio, e Pol goio vei loua giteu mago “Ale etato ge rovia, La Kalulu La Marokala, eia baha taro sukuti eau soio e Ierusalem, me eau ge goio, eau kama rovia la rova ge pogeau oio e Ierusalem ele.
ACT 20:23 Eala moli eau rovitia maie, te la maututula tomi ale eau igogoluti oio tegiteu, La Kalulu La Marokala eia vei matagagatiagu maie: Egite ge kisi toleau, la iloburukola uru ge poga tavuau.”
ACT 20:24 Tio, e Pol goio veipala lou la mahulila tetala mago “Eau kama gabutatala la mahulila te la vovogu veia eau ge hate roboa, ouka. Eau sugu taro moli la mahulila taku soio te La Tahalo Uru, eia abi tigiagu la igogolu veia eau ge la tahalo la veipala la valolo ale taritigi te la gilogo tetala.”
ACT 20:25 Tio, e Pol goio vikara matagaga lou soio tegiteu mago “Pala eau goiloti te la maututula tamutou, eau veipalati la valolo ale taritigi te la pulolou la matagagala te La Tahalo Uru, eala moli eau rovitia, galigeli eau ge tuga, mulimuli amuto kamati ge hilo lou la matagu.
ACT 20:26 Ale igoie eau magiriti te la mata mutoue, eau valolo maiti amutoue. Mai isahari oio tamutou ele, egite kama ge sau tolea, egite ge vure sesele, eau la paga isasa ouka.
ACT 20:27 La vuhula, te la igogolu taku eau kama tuha malulu taro la igogolu la veipalala la masasagala tomi te La Tahalo Uru soio tamutou, ouka.”
ACT 20:28 Goio, eia vei loua giteu la vikara la tilovo mago “Amuto ge baumuli amutou, amuto ge baumuli tai egiteu la sip te La Tahalo Uru ale La Kalulu La Marokala eia sugu tarotia mutou ele veia amuto ge baumuli egiteu, la vuhula eia loto roboti legiteu la kasosola sesele.
ACT 20:29 La vuhula mai eau ge tuga taro amutou omaie, e Satan ge gali tavu amutou mai la paia hou isa uru, eia ge sulu amutou la sip te La Tahalo Uru.
ACT 20:30 Tio oilo lou tamutou la valalua la lotu, la valalua la visigolola isahari ge sibitala, egite ge vulo gegeru lou la merera te La Tahalo Uru, veia egite ge lapu ruru isahari tamutou ele soio tegiteuo.
ACT 20:31 Ioge, taritigi amuto ge pahutu vagari moli, amuto umala ge kababa bububu. Amuto ge gabutatalea ale te la haroharo tomi eau tutu tatolea mutou, eau kama maila, oilo la ilo la leavala ale itolu ale eau pouti omai tamutoue. Eau kama silaha taro amutou, la haro usu la masaligu pagegele le amutou tomi isasasa.
ACT 20:32 Ale gageie eau ge sugu taro amutou soio te La Tahalo Uru, la gilogo tetala sesele ge baumuli amutou, eia ge vivagari pepeho amutouo. E Iesus ge vibalava le amutou la vibalavala ale eia visati le amutou la valalua tetala.
ACT 20:33 Ale eau pou tamutoue, eau kama hate saga tavu la uati me la vitokoromola te la tahalo isasa.
ACT 20:34 Amuto hiloti la igogolu taku omai tamutoue, eau igogolu, eau ali, me egite la bilalaha taku tai, amite ali moli la igogolu la lima miteu.”
ACT 20:35 Tio, eia goio vei loua giteu mago “Te la vuragaragala taku mai ele, eau masagea veia ge vimari le amutou veia amuto ge suli egiteu la valalua ale gege. Tiele etato ge tilimuli sesele la vigagiala te La Uru tegatou e Iesus ale eia veia mago ‘La tahalo ale mutele, la sagegela tetala uru, la vuhula eia ababiale tabarala la ilali, la uati. Me tabarala ale eia abiala, la sagegela tetala kama uru agi mai la sagegela te tabarala ale sulitia.’”
ACT 20:36 Goio, e Pol vikara pasiti mai ele, egite gomai toto tulu sotalo, kaka tavuti La Tahalo Uru.
ACT 20:37 Tio, oio moli ovolale, egite vigau moliti e Pol ele, egite goio tali roboa, egite mai moliti e ulotaro la tilali.
ACT 20:38 Goio e Pol tola taro egiteu mago “Ale amuto hilo taroti la matague.” Tio egite lolotia mai ele, la iloburukola eia uru pepeho lou te la ilo giteu ele, gomai egite vahari tarotiao.
ACT 21:1 Amite goio hiliti, sae te sipi, amite toto moli solau la olu bisi e Kos. Goio, mai galigeli, amite goio guvi oio la olu uru e Ros. Goio, amite hari lou goio guvi oio la mautu e Patara.
ACT 21:2 Oio la mautu alele, amite poga lou isa e sipi, eia raragiti ge goio e Pinisia, amite goio sae muli egiteu, amite tuga.
ACT 21:3 Amite tuga mai ele, amite hari soio, amite hiloa soio la olu e Saipras, amite poloa, amite hiloa soio te la lima miteu e meru. Amite sele polo molia soio la gale Siria, amite goio poru oio la mautu e Taia, la vuhula eia ge visivo la golugolu oio te la mautu alele.
ACT 21:4 Amite goio te la mautu alele, amite poga egiteu la valalua te Iesus isahari, egite goio puli amiteu soio, amite pou oio tegiteu la haro ivitu. La Kalulu La Marokala vei matagagati la gabutatalala tegiteu, egite goio mera taroa e Pol veia eia ge umala ge goio e Ierusalem, eia soukama ge vilua.
ACT 21:5 Eala moli amite goio pou lou tegiteu la logo isahari, mulimuli amite goio hiliti taroa la mautu alele, amite goio tuga. Goio, egiteu la valalua te Iesus ele, vikapopo me ruturutu giteu, me latatu giteu, egite goio vahari taro amiteu loluma te la mautu, golau la parava, amite tomi goio toto tulu otalo, amite kaka tavu La Tahalo Uru.
ACT 21:6 Tio amite goio kaka kaluvu, egite goio tataro amiteu, amite goio tataro tai egiteu, amite goio vitataro gogogo mai ele, amite goio tuga, egite goio beu rivua soluma la mautu tegiteu.
ACT 21:7 Amite sae te sipi mai ele, amite hari moli loio e Taia, amite sele polo molia goio guvi oio la mautu e Tolemes. Amite goio laharoa giteu la valalua la lotu oio la mautu alele, amite goio pou oio tegiteu la haro isasa.
ACT 21:8 Tio, goio, mai galigeli, amite hiliti taroa la mautu e Tolemes ele, amite goio guvi oio la mautu uru e Sisaria. Amite goio pou te la tahalo la valolo isasa, la isala e Pilip, eia isasa tegiteu ale taho vitu ale egite vimagiriti egiteu pala veia egite ge la tahalo la visuli te la lotu.
ACT 21:9 La tahalo alele, e latula la sobe ivaa, egite souka taulai, eala moli egite veipala la merera te La Tahalo Uru tai mai egiteu la bilalaha.
ACT 21:10 Tio amite goio pou oio e Sisaria, la haro usu polo, goio la bilalaha isasa, la isala e Agabas, eia lotalo e Iudea.
ACT 21:11 E Agabas ele goio tamiteu, eia abi la kisipou te Pol ele, eia goio tovo muli la kilisi la limala me la vahala iluale, eia goio veia miteu mago “La Kalulu La Marokala, eia veipalatia maie ‘Egite la valalua e Iuda oio e Ierusalem, egite ge kisi e taho la kisipou aleie mai ale eau tovo mulitia mutoue. Me egite ge lapua soio tegiteu la valalua isapolo ale kama e Iuda.’”
ACT 21:12 Tio, amite me la valalua tomi me hatavivile te la mautu aleie, amite loloa, amite makuku, amite goio mera taro vagaria e Pol ele veia eia umala ge goio e Ierusalem.
ACT 21:13 Eala moli e Pol goio koli la merera tamiteu mago “Amuto umala ge vailo ruru leau la tilali veia amuto ge igo marapa la gabutatalala taku. Eau raragiti veia egite ge vagoiloau te la kilisi. Mai egite masagea ge biliau, eia taritigi tai moli, veia eau ge peho tai oio e Ierusalem, ge peho robo la igogolu te La Uru tegatou, e Iesus.”
ACT 21:14 E Pol goio vikara mai ele, eala moli amite kamati koramulia ge putu oli lou la vikararala tetala, la havu tatubatuba moliti amiteu, amite goio vei moliti mago “Korati ele, eme ge tilimuli moliti la masasagala te La Uru.”
ACT 21:15 Amite goio pou tabaa lou bakisi oio la mautu uru e Sisariale, mulimuli amite goio masusulu, amite hiliti goio e Ierusalem.
ACT 21:16 Egiteu la valalua te Iesus tai isahari ale loio e Sisariale, amite vitilimuli, egite goio vahari amiteu soio te la luma te la tahalo ale veia ge baumuli amiteu, la isala e Nason, eia la tau Saipras, eia palati te la lotu te Iesus, sokoa te la silokola sesele.
ACT 21:17 Tio, ale amite guviti oio e Ierusalem ele, egite la valalua te Iesus rara tavu sesele amiteu.
ACT 21:18 Mai galigeli amite me Pol goio hari lalai e Iakob me egiteu e ururu tomi te la lotu, egite tomi oio popou.
ACT 21:19 E Pol goio laharoa giteu, eia vei mulia giteu la igogolu tomi oio tegiteu la valalua ale pou te la maligoma, ale La Tahalo Uru puli rivu sesele egiteu te la limale Pol ele.
ACT 21:20 Egite lolo e Pol kaluvu, egite sagege pepeho la merera tetala, egite vei tataho La Tahalo Uru. Eala moli egite goio veiala mago “Eme rovia, la valalua e Iuda mapaiti goiloti te la lotu te Iesus, egite tomi ele togo pepeho la viputumulila te ururu gatou.
ACT 21:21 Egite lolotia veia eme vimari la valalua e Iuda ale popou oio te la maututula veia egite umalati ge tilimuli la merera te Moses, veia la irovilala te la vovo la tahalo, egite umalati ge igigo loua, la vulovulo gatou tomi maie tai, umalati.
ACT 21:22 Ale egite ge loloa veia eme guviti, egite ge gomai, etato ge pou vikapopo. Taritigi etato ge raragi tigi tegiteu ele, la merera ale taritigi isahari.
ACT 21:23 Taritigi eme ge lolo amiteu, eme ge igo molia mai ale amite viputumulitia, eme ge igo maie: Egiteu taho vaa omai, egite tauti la merera ale tikumu soio te La Tahalo Uru veia egite ge la tahalo la maroka tetala, eala moli egite raragiti veia ge goio la luma la lotu, egite ge gutu la vaabila soata te La Tahalo Uru, mai la vulovulo la vimarokala.
ACT 21:24 Taritigi eme ge vikapopo me egiteu ale taho vaale, e pris ge vimaroka tai eme, eme ge suli tai egiteu, ge loto e pris te la igogolu tetalale, egite ge sala taro la ivu giteu ele ale egite baharuti la tiloi la merera soio te La Tahalo Uru ale egite toitiale. Mai eme ge igo mai ele, egite Iuda tomi ge matagagati veia eme gabu tikumuti la merera tomi te Moses, me la merera ale egite isahari ubi leme ovola veia eme kamati la tau Iuda sesele, egite ge rovia veia la visigolola alele.
ACT 21:25 Eala moli eme umala ge gabutatala egiteu la valalua ale logala, ale kama e Iuda, egite goiloti la lotu te Iesus. Amite kekesitia giteu veia egite umalati ge ali la ilali ale la valalua vaabila soio te la puigolo, egite umala tai ge liu la kasoso, ge umala ge alali tai la kalia ale egite hou molia, egite kama olo la lohola, la kasosola soukama sali tomi, ge umalati ge igigo tai la iruru kabili tegiteu, mai la ilovo, ka mave.”
ACT 21:26 Tio, e Pol goio roromuli molitia la merera tegiteu tomi mai ele, mai galigeli eia vahari egiteu taho vaa soio te pris, egite goio igo la vulovulo giteu e Iuda mai te la vimaroka la tahalo. Kaluvu, e Pol goilo la luma la lotu, eia goio tau la mata soio te pris te la giligi la logo la vimaroka tegiteu ele, ale egite ge gomai lou ge gutu la vaabila tegiteu soata te La Tahalo Uru, ge vikaluvu pasi la vulovulo la vimarokale.
ACT 21:27 Tio, goio, la giligi la logo ivitu mai te la vulovulo giteu e Iuda te la vimaroka la tahalo, la giligi la logo ivitu alele eia hagagaviti ge kaluvu, egiteu e Iuda isahari ale loio la gale Esia, egite goio hilo vuti e Pol oilo te la luma la lotu. Egite goio vahate pariri la valalua me hatavivile tomi, goio lao tolea,
ACT 21:28 egite tola tavu la valalua mago “Muto la valalua e Israel, maurala ge, la tahalo ale tuga lalahu te la maututula veveia la valalua veia egite ge vile etatou e Iuda, ge gima la merera te Moses, ge vile tai la luma la lotu, la tahalola eiala ge! Hiloa, egite ale kama e Iuda eia puliti egiteu soilo te la luma la lotue, la luma la maroka tegatou eia mumuguti go!
ACT 21:29 (Egite veia maie, la vuhula mai alalavi egite hilo e Pol mira me Tropimas, la tau Epesas, egira kavovou te la tia la mautu, egite kau moliale Pol veia eia pulitia la tahalo alele soilo te la luma la lotu ele, eala moli ouka, eia kama igoa mai ale egite veitia, eia kama pulia soilo te la luma la lotu, eia tikumu, la vuhula kama la tau Iuda e Tropimas ele.)
ACT 21:30 Goio, la valalua loloa la tilola tegiteu e Iuda ale loio e Esiale, la mautu goio marapatio. Egite hari vikapopo, lao tola e Pol, lavea sogala, egite goio kapi robo la mata la luma la lotu ele.
ACT 21:31 Egite vagari veia ge bili e Pol, eala moli la merera te la marapala alele eia sibitalati soio te la mulugaluga tegite soldia veia la mautu e Ierusalem mata daduati.
ACT 21:32 Tio, egite me soldia isahari goio hari sotalo tegiteu, la valalua hilo egite guviti ele, egite kati kuea e maura e Pol ele.
ACT 21:33 Goio, la mulugaluga, eia hari tavu e Pol, lao tolea, eia goio veia giteu la bilalaha tetala veia ge kisila la sen ilua. Goio, eia tahi egiteu mago “Ale ere tahalo? Eia igo la rova?”
ACT 21:34 Tio eia tahi egiteu maie, egite soko la tilola, egite isahari la merera isa, egite isahari la merera isa, la merera tegite isapolopolo moliti ele. Egite marapa mai ele, la tau Rom uru ele eia kati gabutatala tigi. Tio eia goio baha taro e Pol soio te la luma uru tetala, egite soldia goio vaharia.
ACT 21:35 Goio, egite vaharia kara moli la tilaloa ale goata te la luma tegiteu ele, la valalua egite goio igo totolo pepeho, egite igo sulupu lalahutio, tio egite soldia bole sae moli e Pol soata te la beho giteu.
ACT 21:36 La valalua hari tatavu moli egiteu ele, egite karasusuku moli lou egiteu veia ge bilia.
ACT 21:37 Goio, egite ga vahari e Pol soata mai ele, veia ge goilo te la lumale, e Pol goio tahi la tau Rom uru ele mago “Ae, eia kama koramuli etala ge vikara muga?” Tio la tau Rom goio tahia mago “Ia, eme rovi la vikararala e Grik, ia?
ACT 21:38 Eme soioge kama la tau Gipto ale amite paa mulimulia, eia vahiliti la ruruga, la valalua la salatu savulu vaa abi la gata tegiteu, gali mulia soio te la hohoi pala.”
ACT 21:39 Goio, e Pol kolia soio tetala mago “Ouka, eau la tau Iuda, la mautu taku sesele e Tasas oio la gale Silisia, la mautu taku eia ka bisi. Mave, eia kama koramulia eau ge vikara soio tegiteu la valalua aleie?”
ACT 21:40 Goio, la tau Rom uru ele lolo la vikararala tetala, eia veiala eia taritigi, tio e Pol goio magiri oata te la tilaloa, eia tave tola egiteu. Egite goio makovu, eia goio vikara soio tegiteu la merera tegite Iuda lou.
ACT 22:1 E Pol vikara soio tegiteu, eia veia giteu maie “Amutou tomi e tabarabaragu, amutou e ururu tai, amuto ge laba gele somai, eau ge tovo lalai veia ge tau robo la merera ale amuto ubiti leau!”
ACT 22:2 Tio, egite loloa ale eia vikara te la merera tegite Iuda lou, egite goio makovu, isa kati vikara, egite tomi goio laba gele tataho.
ACT 22:3 Tio e Pol goio vikara soio tegiteu maie “Eau la tau Iuda, e tila pigoau oio la mautu e Tasas oio la gale Silisia, eala moli eau abi la vimari omai e Ierusalem. E Gamaliel uru vimariau, eia turi muliagu la merera tomi te ururu tegatou e Iuda, eau roromuli tomia.
ACT 22:4 Amuto gabu tikumu la merera te La Tahalo Uru, me eau gabu tikumu taia mai lou amutou ele. Amuto rovia, eau pala viligi la valalua ale tilimuli la gauru te Iesus, eau bili isahari tegiteu ele, isahari eau lapu egiteu soio te la kilisi, egite hatavivile tai.
ACT 22:5 Amuto ge tahi egiteu la uru tegatou, la mulugaluga tegiteu e pris tai, la vuhula egite pala abiagu la kekesi tegiteu te la igogolu alele veia eau ge vahilo le tabarabara giteu oio e Damaskas, veia eau ge gima la valalua te Iesus. Eau igo seselea, eau tuga moli te la bilaha tegiteu e ururu ele veia ge lapu egiteu somai e Ierusalem, egite ge magiri te la vigagiala.
ACT 22:6 “Eala moli eau tatuga te la gauru, goio hagagaviti soio la mautu e Damaskas, te la haro hugutolea eau karutu la matagaga isa uru eia sima loata te la mori, sivo roboau, la matagu maligoma.
ACT 22:7 Eau goio boru sotalo la magasa, eau lolo la golu la tahalo isa uru, eia toleau mago ‘Sol, Sol, ilava eme viligi molitiaue?’
ACT 22:8 Goio, eau loloa mai ele, eau goio tahia mago ‘Tahalo Uru, eme ere ele?’ Mago ‘Eau e Iesus, la tau Nasaret, ale eme viligiligi eaue!’
ACT 22:9 Me egiteu ale vikapopo leau, egite tai hilo la matagaga uru ele, eala moli egite kama lolo la golu la tahalo uru ele, eau sekela moli loloa.
ACT 22:10 Goio, eau goio tahia mago ‘La Uru, eme masagea veia eau ge igo la rova?’ Goio La Uru veiagu mago ‘Eme ge hiliti, goluma la mautu e Damaskas ele. Eme ge golumale, la tahalo taku isasa eia ge vei matagageamu la papaga tomi ale eau toitia veia eme ge igoa.’
ACT 22:11 Tio eia vei kaluvuagu mai ele, eala moli eau mata keati la matagaga uru ele, eau vava bububu moli, egite goio tateau soluma e Damaskas ele.
ACT 22:12 “Tio, la tahalo isasa oio e Damaskas, la isala e Ananaias, eia la tahalo la iroromulila sesele te la merera te La Tahalo Uru. Egiteu tomi e Iuda ale egiteu pou oio e Damaskas, egite rovia eia la tahalo sesele.
ACT 22:13 E Ananaias gomai taku, eia goio magiri te la lagugu, eia goio veiagu mago ‘Tabaragu, Sol, la matamu ge mata pulala lou!’ Tio oio moli ovola la matagu ilua mata pulala, eau hiloa e Ananaias ele.
ACT 22:14 Eia goio vei louagu mago ‘La Tahalo Uru tegite tutubu gatou, eia hiloviti emei veia eme ge rovi sesele la masasagala tetala veia eme ge rovi tataho La Tahalo La Marokala tetala tai, e Iesus, eme ge lolo sesele la merera tetala,
ACT 22:15 veia eme ge la tahalo la valolo te la merera te La Tahalo Uru. Eme ge veipalea la valalua tomi te la paga ale eme hiloa, ale eme lolo taia.’
ACT 22:16 Tio eia goio vei louagu mago ‘Eme pou tali lava? Taritigi eme ge hiliti, eme ge abi la vuluhi te la isale Iesus, eme ge kaka tavua veia eia ge vimavulaha taro leme la iruru tomi taume.’
ACT 22:17 “Tio, mulimuli eau beu rivu loua soio e Ierusalem, eau goilo te la luma la lotu, eau goio kaka tavu La Tahalo Uru, eia sibitala tavuau, eau hiloa mai ale tagea.
ACT 22:18 Eia veiagu mago ‘Eme ge igo hari, eme ge hiliti taro haria e Ierusalem ele. Mai eme ge veipala la isagu omai te la mautu aleie, eau veiamu egite kama ge lolome.’
ACT 22:19 Tio eau goio koli la merera te La Tahalo Uru, eau veiala mago ‘Tahalo Uru, la valalua tomi egite rovi tatahoau, alaura eau goililo te la luma la lotu tegiteu, eau lapulapu la valalua me hatavivile tomi ale egite lotu tatavu e latumu e Iesus, eau ge lubi egiteu, lapu egiteu, vagoilo egiteu te la luma la kilisi.
ACT 22:20 Pala egite bili tai e Stiven ale la tahalo la valolo te la isale Iesus, me eau tai oio magiri vikapopo legiteu, eau sugu taro taia veia egite ge bilia, me eau sesele baumuli la kairobola tegiteu la valalua alele. Ale alaura eau igo la papaga tomi alele, eala egite tomi roviau.’
ACT 22:21 Tio eau goio veia La Tahalo Uru mai ele, eala moli eia goio baheau mago ‘Eme ge tuga, eau ge bahame sobali, eme ge goio te la valalua me hatavivile tomi ale egite souka matagaga, egite la valalua ale logala ale kama e Iuda.’”
ACT 22:22 Tio, goio, egite Iuda lolo mulimuli la vikararala te Pol mai ele, kara eia veia mago “Eme ge tuga, eau ge bahame soio tegiteu la valalua ale logala, ale kama e Iuda,” tiele egite tola kahare pepeho moliti mago “A ge, bili peho taroa la mumugu la tahalo aleiele. Etato umalati ge hililo lou la matala omaie!”
ACT 22:23 Goio, egite viputugere lahu moliti ele, gomai egite kai taro tomia la kairobola tegiteuo, goio egite ato moliti la magasa pupusi, valibura lahutia soatao.
ACT 22:24 Tio, gomai la mulugaluga tegite soldia baha taro moliti egiteu la valalua tetala mago “Amuto ge vahele la tahalo ale soilo la luma uru tegatouo.” Eia abia goio vei loua giteu e soldia ge kumamasi muga e Pol ele, tio egite ge tahi tigia te la vuhu la iruru ale la valalua toiti le Pol ovolale.
ACT 22:25 Tio egite goio kisi tola e Pol veia ge kumamasia. Eala moli la mulugaluga tegite soldia eia magiri hagagavi soio te Pol, gomai e Pol veiala mago “Mave, eia kama tikumu veia amuto ge lubi bulalahu moli isa la tau Rom ale eia soukama magiri te la vigagiala?”
ACT 22:26 Tio, gomai, la mulugaluga tegite soldia lolo vutiti e Pol veia mai ele, eia makuku sesele, eia goio te la uru tetala, veiala mago “Tahalo uru, eme ge igoa mave la tahalo ale, la vuhula eia la tau Rom seselele.”
ACT 22:27 Tio, la mulugaluga tegite soldiale, eia tuga tavuti e Pol soio, eia goio tahitia mago “Ia, eme ge vei tigiagu, eme la tau Rom sesele, ka ouka?”
ACT 22:28 Tio e Pol goio veiala mago “Eau la tau Rom sesele.” Tio la mulugaluga tegite soldia eia goio veia louala mago “Eau moli pigiti la mapa uru sesele veia eau ge goilo sesele mai la tau Rom isasa.” Eala moli e Pol goio vei tigi louala mago “Eala moli eau, e tila me tete, egira la tau Rom.”
ACT 22:29 Goio, egiteu la valalua ale ga visuu taroale Pol la vikararala, egite taga tarotia. Me ale la uru tegite soldia, eia rovitia veia e Pol eia la tau Rom sesele eala moli egite kisi tolatila la sen, eia tai makuku pepeho, la vuhula la iruru alele eia tikumu pasi.
ACT 22:30 Tio, gomai, la uru tegite soldia, eia masagea ge rovi tigia oio tegite Iuda veia erese iruru sesele e Pol igotiale. Goio, mai galigeli, eia lube taro e Pol ele, eia baha la vigagiala soio tegiteu la mulugaluga te la lotu e Iuda me egiteu la uru tai veia egite ge pou vikapopo. Tio goio eia puli e Pol soio tegiteu ele, eia goio vimagiria te la lagu giteuo.
ACT 23:1 Tio, e Pol goio magiri, eia lagu tavu moli egiteu la uru tomi ele, eia veia giteu maie “Amuto e tabarabaragu, eau kama gabutatala isa la paga oilo la tiagu te la igogolu taku tomi ale eau igotia. La Tahalo Uru hiloa eia taritigi tomi moli, la vulovulogu eia matata moli.”
ACT 23:2 Tio eia vikara mai ele, eala moli la mulugaluga tegite pris eia loloa, eia karutu, eia goio veia giteu ale magiri hagagavi te Pol ele veia egite ge sabala la galela.
ACT 23:3 Tio e Pol goio veiala mago “La Tahalo Uru ge kue tai emei! Maura emei, eme mata mai ale marokale, egite soioge peli robo tomi la mumugu la vulovulomu ele, ia? Eme magiri te la vigagiala veia ge tovo lalai la vulovulogu veia eau poloti la merera te Moses ka ouka, eala moli ale eme veia giteu veia egite ge sabala la galegue, ale eme poloti la merera ale tikumu te Moses lou ele!”
ACT 23:4 Eala moli egiteu ale magiri hagagavi te Pol, egite veiala mago “Mave, eme veia ge giloti la mulugaluga tegite pris ale La Tahalo Uru vipoua, ia?”
ACT 23:5 Tio e Pol loloa mai ele, eia karutu, eia goio veia giteu mago “Eia sesele ia? Eau kama rovia veia eia la mulugaluga isale, eau veia la tahalo isasa. Eau ruru, la vuhula La Buk Tabu Ale Pala eia veia maie ‘Umala isasa ge vikara barea la uru te la valalua te La Tahalo Uru.’” Ale e Pol veia giteu mai ele.
ACT 23:6 Eala moli e Pol hilotia egiteu la uru tomi ale popou ele, egite kama mai ale la gabutatalala visauru, isahari tegiteu e Sadiusi, isahari tegiteu e Pariseo, tio eia hiloa mai ele, eia goio vikara oata mago “Tabarabaragu, eau e Pariseo, e tete tai pala e Pariseo isasa. Eau magiri te la vigagiala, la vuhula eau gabu tikumu la merera La Buk Tabu Ale Pala, ale eia veia egiteu ale pehoti ge mahuli rivu lou.”
ACT 23:7 Tio, ale e Pol veia giteu mai ele, egite la karakara iluale goio vaigotio, la gabutatalala tegiteu ele eia mai ale iluati.
ACT 23:8 La vuhula egiteu e Sadiusi, la vimari tegiteu eia veia maie veia la kalulu la tahalo ouka, e angelo tai ouka, me la mahulirivula tai ale mulimuli ge ouka. Eala moli egiteu e Pariseo, egite vagari tavu la vimari itolu tomi aleie, egite veia eia sesele.
ACT 23:9 Goio, egite tola kahare lou soata, goio egiteu la tahalo la mari isahari oilo tegiteu e Pariseo, egite goio hiliti, egite giriri mago “Amite kama sivuti isa la iruru oio te la tahalo alele! Soioge eia sesele veia e angelo isasa ka ere eia vikarati soio tetala oio la gauru ale goio e Damaskas ele!”
ACT 23:10 Eala moli ale egite vikara mai ele, egite goio vaigo pepeho lou. La mulugaluga tegite soldia eia makuku ale egite souka ge vilagi gole momomo e Pol ele. Eala eia goio baha egite soldia tetala veia egite ge hari soio ge lapu taro legiteu e Pol ele, veia ge tatea soio la luma uru tegiteuo.
ACT 23:11 Tio, egite goio igoa mai ele, e Pol goilo te la luma la kilisio. Goio te la logo eia hilo La Uru gomai magiri te la balila, eia veiala mago “Pol, eme ge vagari. Eme veipalati la isagu omai e Ierusalem, eia taritigi eme ge veipala taia oio la mautu uru e Rom!”
ACT 23:12 Mai galigeli te la kavikoki, egite Iuda isahari goio pou vikapopo veia egite ge viputumuli la gauru isasa. Egite tauti la merera ale vagari sesele soata te La Tahalo Uru veia egite umala ge alali, ge umala ge liliu, kara ale egite ge bili peho taroti e Pol ele.
ACT 23:13 Egiteu la valalua alele, la giligi giteu eia mai ale savulu vaa gegete.
ACT 23:14 Egite goio tegiteu la mulugaluga tegite pris, vikapopo tai egiteu la uru tomi, egite vei matagagea giteu la vigiala tegiteu ale mago “Amite tauti la merera ale tikumu sesele soata te La Tahalo Uru veia amite umala ge ali kara te ale amite ge bili taro e Pol.
ACT 23:15 Taritigi amuto ge baha tavu egiteu e soldia ge visigolo egiteu veia egite ge vahari e Pol somai tamutou veia amuto ge tahi tigi loua la tilahi isahari lou. Eala moli amite ge kemi, ge pou talia, ale egite ge loio, amite ge gali tavu egiteu, ge lao tolea e Pol uru ele, ge bili taroa.”
ACT 23:16 Egite goio vikara mai ele, eala moli e halale Pol isa bisi eia loloa, eia goilo la luma uru tegiteu e soldia, eia goio sigiliale Pol.
ACT 23:17 Goio e Pol baha tavu la uru isasa tegite soldiale, eia veiala mago “Eme ge vahari la tahalo bisi ele soio te la mulugaluga, eia la merera isasa oio tetalale.”
ACT 23:18 Tio, e soldia loloa mai ele, eia goio vahari ale bisi ele soio te la mulugaluga, eia veiala mago “E Pol ale pou te la kilisi, eia veia eme ge lolo la tahalo bisi ele, eia la merera isasa veia ge veiamu ovola.”
ACT 23:19 Goio, la mulugaluga loloa mai ele, eia goio tata e halale Pol bisi ele soio, egira moli pou gale bakisi soio, eia goio tahia mago “Eme masaga ge veiagu la rova e?”
ACT 23:20 Goio, e guliliki ele kolia soio tetala mago “Egite la mulugaluga tegite Iuda viputumulitia veia galigeli egite ge baha somai taume, veia eme ge vahari e Pol sotalo tegiteu, veia egite ge tahi tigi loua isahari la tilahi lou.
ACT 23:21 Eala moli eme umala ge lolo egiteu ele, la vuhula egite la valalua savulu vaa gegete ge lago te la gauru. Egite tauti la merera ale tikumu soata te La Tahalo Uru veia egite umala ge ali, umala tai ge liu, kara ale egite ge bili taro e Pol ele. Egite oio raragi moliti veia ge igo sesele molia mai alele, egite pou tali moli eme veia eme ge roromuli la kilaka tegiteu mai ele veia eia taritigi moli.”
ACT 23:22 Tio, eia veia la uru mai ele, me ale uru goio kolia soio tetala mago “Taritigi, eala moli eme umala ge veiale isasa ale eme veipalatiagu la gabutatalala tegiteu ele.” Tio eia vei kaluvutiala mai ele, eia goio baha taro la tahalo bisi ele, eia tugao.
ACT 23:23 Goio, la mulugaluga tegiteu e soldiale Rom ele, eia goio veia la bilalaha tetala ilua ururu mago “Amula ge raragi egiteu e soldia salatu lua veia egite ge goio e Sisaria, ge raragi tai la valalua ale savulu vitu ale sae te la hos, me la valalua la gata salatu lua tai. Ale galogo te la mata la haro ualasiu amuto ge tuga.
ACT 23:24 Ge abi taiale Pol la hos isahari, eia ge sae polopolo tegiteu, eia ge guvi tigi moli soio te la uru e Pelis oio e Sisariale.”
ACT 23:25 Tio eia veia girua mai ele, eia goio kekesi tai la merera la veimatagagala maie:
ACT 23:26 “Eiau e Klaudias Laisias, eau kekesiamu la uru e Pelis, eau veiamu la kavikoki.
ACT 23:27 Eau masagea eme ge rovia veia egite Iuda lao tolati la tahalo ale e Pol ele veia ge bilia, eala moli eau loloa veia eia la tau Rom isasa, amite me egiteu e soldia taku goio hari tavua, lapu rivutia te la lima giteu alele.
ACT 23:28 Eau veia eau ge matagaga te la iruru ale egite veia eia igoa, eala eau vaharia soio te la ururu tegiteu e Iuda,
ACT 23:29 eau sivutia oio tegiteu veia eia la iruru ouka ale koramulia eia ge peho mulia, veia eia ge pou tai te la kilisi. Ale egite ubi leia ovola, la paga oilo te la merera tegiteu e Iuda lou.
ACT 23:30 Goio, ale eau loloa veia egite isahari viputumulitia veia ge bilia, eau gabutatala veia ge bahea somai taume, me eau vei taia giteu la valalua ale kauala la merera, veia egite ge gomai ge magiri te la lagumu ele, eme ge lolo la merera tegiteu ale egite ubiti la tahalo ale e Pol ovola.”
ACT 23:31 Goio, e Laisias kekesi maie, egite soldia goio igo seselea mai ale eia veitia giteu, egite goio vahari e Pol te la logo moli alele soio te Antipatris, egite goio guvi oio la mautu alele, egite mavuta.
ACT 23:32 Mai galigeli la kavikoki, egiteu e soldia ale polo moli otalo, egite goio beu rivua. Eala moli egiteu ale sae te la hos, egite goio vahari lou e Pol solau e Sisariale.
ACT 23:33 Egite goio guvi olau e Sisaria, egite abia la uru oio la mautu alele la kekesi te la mulugaluga tegiteu ele, goio, egite sugu taro e Pol soio tegiteuo.
ACT 23:34 La uru, eia goio gigi la kekesi alele, eia goio tahi e Pol la mautu tetala. Ale e Pol veiala eia la tau Tasas loio la gale Silisia,
ACT 23:35 la uru goio veiala mago “Tio, ale egite ale ubi leme la merera ge guvi, eau ge lolo lou la merera taume.” Eia vei kaluvutiala mai ele, eia goio vei giteu veia egite ge vagari robo e Pol oio te la luma ale uru e Herod tigitia pala.
ACT 24:1 Tio, mulimuli la haro ilima poloti, goio la mulugaluga tegite pris, la isala e Ananaias, eia puli egiteu e ururu isahari, egite vitilimuli soio te Pelis, eala moli egite toi tolati isasa tegiteu, la isala e Tetalas, veia eia ge vigagia tegiteu soio te la uru ele.
ACT 24:2 Goio, egite magiri vikapopoti te la matale Pelis ele, gomai la uru tolatia e Pol soio tegiteuo. Tio e Pol gomai magiriti mai ele, e Tetalas goio sokoti la vikararala mago “Tahalo uru Pelis, amite sagege sesele te la vibaumulila taume, ale igoie amite hilotia maie veia la vaubila me la pulolou marapala oukati. La vuhula la papaga tomi ale vimaraparapa la pulolou te la maututula palao, eia kokovu tomitio.
ACT 24:3 Tio la tia miteu eia malilo tatahoti, amite vei tataho sesele pasiti eme ovolale.
ACT 24:4 Eala moli eau kama ge lapu malau la vigiala soio taume. Amite masagea eme ge gogo moli amiteu, veia eme ge lolo muga la vigiala tamiteu bautusa molie.
ACT 24:5 Male ge, la tahalo moli ale e Pol ele, eia moli la vuhu la marapala tomi ale sibitala te la maututula oio te la galegale tomi ele. Eia mugati la gale la valalua ale egite vahiliti poloti la lotu isasa ale egite totoia veia te Iesus la tau Nasaretio.
ACT 24:6 Tio eia ga igo bara tai lou la luma la lotu tamiteu uru ele, eala amite lao tolea veia ge hilo muli la iruru tomi tetala mai la vulovulo te ururu tamite Iuda.
ACT 24:7 Eala moli la mulugaluga uru, e Laisias, eia gomai lapu totolo taro le amiteu e Pol ele. Eia veia mai ge amite masagea ge ubi le Pol la vigiala, taritigi amite ge gomai sesele taume.
ACT 24:8 Eala moli mai eme sesele ge tahia veia eme ge lolo tataho la merera tetala te la harela sesele, te la papaga ale amite veitiamu ovolale.”
ACT 24:9 Tio la tahalo uru tegiteu, e Tetalas ele, eia vikara kaluvu mai ele, egite la valalua e Iuda tai tahoa la vikararala tetalale, egite ubi tai le Pol la vigiala, egite veia la vikararala tomi te Tetalas ele, eia sesele.
ACT 24:10 Goio, e Tetalas vikara kaluvu mai ele, e Pelis goio tuhu mapeale Pol veia eia ge vikara, e Pol goio vikara maie “Ale eme pouti la mulugaluga tamite Iuda la leavala usu eau rovitia, eala eau sagege pepeho veia eau ge magiri omai te la lagumu ge koli la merera tegiteu ele.
ACT 24:11 Eme hiloa, eia souka tabaa ale eau beua loata e Ierusalem, soioge la logo so savulusa moli gete lua. Mai eme masaga ge rovia veia eia sesele, eme ge tahi la valalua.
ACT 24:12 Eala moli ale eau pou oio e Ierusalem ele, egite Iuda isa kama sivutiau oio la luma la lotu veia eau ge vaubi soio te isasa la merera usu, ouka. Ale tai egite isa kama hilo vutiau oio te la lumaluma la lotu tegiteu, oio tai te la tia la mautu veia eau ge igo marapa la valalua.
ACT 24:13 Egite tai kama koramulia ge toi isa la merera ale sesele ge vitikumu la merera tegiteu soio taume ale egite kauagu ovolale.
ACT 24:14 Eala moli la paga isasa eme ge loloa te la haregu eia sesele, la lotu taku, eau lotu tavu moli La Tahalo Uru te ururu tamiteu ale eau tilimuli la gauru te Iesus, ale egite veia la gauru la visigololale. Eala la merera tomi te Moses, me la merera tegiteu la bilalaha, eau roromuli tomi taia.
ACT 24:15 La gabutatalala taku, eia mai moli tegiteu ele, ale eau veia la valalua tomi, egiteu ale taritigi, egiteu ale kama kokora, egite ge peho, egite ge mahuli rivu lou.
ACT 24:16 Eala eau valololo moli mai ele, eau kama gabutatala la paga isasa oilo la tiagu veia La Tahalo Uru me la valalua tai ge sivuti la iruru omai taku.
ACT 24:17 “Sesele, eau sisiuti te la galegale tomi, la leavala usu poloti, eau gomaiti lou la gale taku sesele veia ge vahari la uati somai te la valalua ale pou la savelela veia ge gutu tai la vaabila oata te la poro oilo la luma la lotu, mai la vulovulo miteu e Iuda.
ACT 24:18 Eau igo taiti la vulovulo la vimaroka la tahalo mai te la vulovulo mite Iuda lou, eau goio lotu, eala moli egite goio lao toleau. Eau pou sekela, la marapala ouka,
ACT 24:19 eala moli egite Iuda isahari ale loio la gale Esia, egite goio soko la vimarapala. Taritigi egite ge gomai, mai egite la merera isa somai taku, taritigi egite ge veipalea omai te la matamu.
ACT 24:20 Ka, mai egite masagea veia ge veiamu la iruru ale mai egite sivuti seseletia omai taku, ale eau magiri pala te la vigagiala tamite Iuda oio e Ierusalem, taritigi moli.
ACT 24:21 Sesele, eau la iruru ouka, eala moli ale bakisi eau tola vagari soio tegiteu e ururu mai la tilogo ouka, ale eau veia giteu ‘Ale amuto tovo lalai la vulovulogu igoie, la vuhula eau gabu tikumu la merera te La Buk Tabu Ale Pala ale etato ge peho, etato ge mahuli rivu lou,’ ale eau kaharea giteu mai ele, eau ruru.”
ACT 24:22 Tio, e Pol vikara kaluvu mai ele, e Pelis loloa, me la tahalo ale, eia kama paua te la gauru te Iesus, ouka, eia rovi palatia. Eala moli eia goio barautu la merera tomi tegiteu ele, mago “Ale la uru e Laisias ge guvi loio e Ierusalem, eau ge vikaluvu pasi la merera tomi alele.”
ACT 24:23 Eia vikara kaluvu mai ele, eia goio baha la tahalo ale pahutu robo e Pol ele, veia eia ge lubea bakisi, koramuli veia eia ge kavovou, me egite tabarabarala ge vahariala bakisi la ilali.
ACT 24:24 Tio, mulimulito, la logo usu poloti, e Pelis me rutula e Darusila, egira veia ge hilo lalai e Pol. E Darusila, eia la tavile Iuda. Goio, e Pelis tola e Pol soio tegirua veia ge lolo isahari la vikararala tetalale.
ACT 24:25 Goma, e Pol vei mulitiala te la gauru te Kraist Iesus. Eala moli e Pol vei mulimuli moli la vulovulo ale matata, me eia vei taia veia etato tomi ge vibaumuli tigi, mulimuli la viputumulila te La Tahalo Uru ge sibitala tavu etatou tomi. Tio e Pol vitovo molia mai ele, gomai, e Pelis taga moliti, eia baha taro moliti e Pol mago “A ge, eme hiliti taro harari eau. Mai mulimuli eau ge gabutatala loume, tio eau ge tola lou emei somai.”
ACT 24:26 E Pelis vikara mai ele, eala moli eia masagea veia e Pol ge abiala isahari la uati. Tio te la gabutatalala te Pelis mai ele, eia tola bibibi moli e Pol veia egira ge vikarakara moli.
ACT 24:27 Goio, mulimulito, la leavala ilua poloti, la mulugaluga isa koli e Pelis, la isala e Posias Pestas. Eala moli e Pelis alali moli la ilo giteu e Iudale, eala eia sau tatola moli e Pol te la luma la kilisi ele.
ACT 25:1 Goio, la uru e Pestas, eia ago taroti e Pelis oio te la gale alele, eia so pou moli la haro itolu, eia hiliti taro e Sisaria goio e Ierusalem.
ACT 25:2 Tio egite la mulugaluga tegite pris tegite Iuda goio tetala, egite ubi vagari le Pol la vigagiala mago
ACT 25:3 “Taritigi eme ge suli amiteu, eme ge baha taro e Pol somai e Ierusalem.” Egite vikara mai ele, la vuhula egite veia ge lago talia te la gauru ge bili peho taroa.
ACT 25:4 Eala moli e Pestas kolia giteu mago “E Pol soloio la luma la kilisi oio e Sisaria. Eia hagagaviti veia eau sesele ge goio e Sisariale.
ACT 25:5 Tio egite ururu tamuto ge tilimuliau sotalo. Ge goio mai la iruru te Pol isa ge oio, egite ge veipaleagu ovolale.”
ACT 25:6 Eala moli e Pestas pou muga lou oio tegiteu la haro iualu, uka savulu, eia abia gotalo e Sisariale. Tio mai galigeli eia pou te la luma la vigagiala, eia goio baha tavu e Pol veia egite ge lapua soio tetala.
ACT 25:7 Eala moli e Pol goio magiriti, egite Iuda ale loata e Ierusalem goio magiri hagagavi soio tetalale, egite kauala la merera usu pepeho eia kama sesele.
ACT 25:8 Tio, goio, e Pol koli la vigagiala tegiteu ele mago “Eau kama igo isa la iruru soio te la viputumulila tegatou e Iuda. Ale te la luma la lotu tai, eau kama igo la iruru ovola, me soio tai te la uru e Sisa, ouka tai.”
ACT 25:9 Eala moli e Pestas masagea ge ali la ilo gite Iudale. Eia goio tahi e Pol mago “Eme masagea ge goio e Ierusalem, ia? Tio mai ge mai ele, eau ge lolo la vigagiala taume oio e Ierusalem ele.”
ACT 25:10 Eala moli e Pol goio koli la merera tetala mago “Aleie, eau magiriti te la luma la vigagiala te la uru e Sisa omai moli la luma la vigagiala moli aleie, eme ge lolo la vigagiala taku. La vuhula eme rovitia, eau la iruru isasa ouka soio tegiteu e Iuda.
ACT 25:11 Mai eau igoti isasa la iruru ale tikumu sesele ale koramuli egite ge biliau ovola, eia taritigi moli egite ge biliau, eau ge peho, la golu isa ouka. Eala moli mai la merera tegiteu ele kama ge sesele, eia kama koramulia veia isa ge sugu taroau soio tegiteu e Iudale, ouka sesele. Eau masaga molia la uru e Sisa ge lolo tigi la vigagiala tomi alele. Eme ge baheau soio la mautu uru e Rom.”
ACT 25:12 Tio, goio, e Pestas mite me la valalua la mari tetala, egite viputumuli pala mugea, eia goio veiale Pol mago “Ale eme veitia la uru e Sisa ge lolo la vigagiala taume, tio taritigi eau ge bahame soio tetala.”
ACT 25:13 Goio, mulimuli, la haro isahari polo, la uru isa tegite Iuda, ale egite Rom vipoua, la isala e Agripa, e rutula e Benais, egira guvi oio e Sisaria. Egira lolotia la guluvi halaba te Pestas ele, egira goio e Sisaria veia ge hari lalaia, egira goio mata kilalati tetalao.
ACT 25:14 Egira pou oio e Sisariale, la haro isahari polo, e Pestas goio vei matagageale Agripale la merera te Pol ele mago “La tahalo isasa pala e Pelis eia vagoilotia te la luma la kilisi.
ACT 25:15 Pala muga eau goio e Ierusalem, egiteu la mulugaluga tegite pris, vikapopo tai me egiteu la uru tegite Iuda, egite ubi leia la merera, egite goio veiagu veia eau ge viligi taia.
ACT 25:16 Eala moli eau goio koli la merera tegiteu, eau veia giteu maie ‘Amiteu la valalua e Rom, amite kama koramulia veia ge viligi bulalahu moli la tahalo isasa, ouka, mai la tahalo isasa egite veia la iruru oio tetala, taritigi eia ge magiri te la vigagiala veia eia ge koli muga la merera tegiteu ale veipaleale.’
ACT 25:17 Tio ale egite goio tilimuliau somai, eau kama igo makikiru, mai galigeli moli eau goilo te la luma la vigagiala, eau baha tavu e Pol somai taku.
ACT 25:18 Egite goio pulia somai taku, me egiteu tai la valalua ale egite veipaleale, egite oio magirigiri, eala moli egite kama ubi leia la vikararala isasa ale kama kokora, ouka.
ACT 25:19 Egite vaigo muli moli la lotu tegiteu lou, me la tahalo isasa la isala e Iesus, eia pehoti, eala moli e Pol veia eia mahuli rivuti lou.
ACT 25:20 Tio me ale eau lolotia veia la pagale eia la paga te la vulovulo giteu lou, eau marapa, eau kama rovia la gauru ale eau ge rovi la tikumula, eala eau tahi e Pol veia eia ge masagea ge goio e Ierusalem veia eau ge lolo la vigagiala tetala oio vola mai te la vulovulo gite Iuda sesele, ka ouka.
ACT 25:21 Eala moli e Pol vagari veia eia ge goio e Rom, veia la uru e Sisa ge loloa. Eia masagea veia egite soldia ge pahutu roboa kara te ale eia ge tuga. Eala eau baha egiteu isahari veia egite ge vagari roboa, kara ale eia ge goio ge hilo e Sisa.”
ACT 25:22 Goio, e Agripa loloa la merera te Pestas mai ele, eia goio veiala mago “Taritigi eau tai ge lolo la vikararala te la tahalo alele.” Goio e Pestas koliala mago “Ioge, galigeli eme ge lolo gabutoa.”
ACT 25:23 Tio, goio, mai galigeli, e Agripa mira me Benais goio guvi te la luma la vigagiala. Egira tokoromo tataho, la valalua togo pepeho egiruale, egira goio tiroro soilo te la luma la vigagiala, vikapopo me egite la mulugaluga tomi tegite soldia, me egite la uru tai te la mautu. Egite goilo tomiti mai ele, e Pestas goio baha tavu e Pol, egite goio tatea soilo tegiteu ele.
ACT 25:24 E Pestas goio vikara mago “Eme la uru e Agripale, amutou ururu tomi tai ale popou ele, la tahalola moli eiala, ale egite la valalua e Iuda tomi oio Ierusalem, omai tai, egite ubi leia la merera usu somai taku. Egite tola kahare veia eia umala ge mahuli lou.
ACT 25:25 Eala moli eau kama sivuti isasa la iruru oio tetala, ale koramuli amite ge bilia ovola. Eala moli eia lou toitia veia eia masagea veia ge goio e Rom veia e Sisa ge lolo la vigiala alele, me oilo vola eau veia ge baha sesele e maura soio e Rom.
ACT 25:26 Eala moli eau kama rovi seselea la paga ale eau ge kekesi matagageale Sisa ovola. Eala eau pulitia somai tamutou, me somai tai taume la uru e Agripale, veia amuto ge tahi matagagea la merera isahari tetala, eau ge loloa, me eau ge kekesi tigiale Sisa ovola.
ACT 25:27 La vuhula eau gabutatalea veia eia kama taritigi veia eau ge baha taro la tahalo isa egite kisia, ge vagoioa e Rom, mai la merera ale egite ubi leia ovola eia soukama matagaga. La vulovulo alele eia kama matata.”
ACT 26:1 E Agripa veiale Pol mago “Ioge, eme ge vikara.” Tio e Pol goio soko la vigiala tetala maie
ACT 26:2 “Tahalo uru, Agripa, eau sagege sesele veia eau ge vikara matagaga omai te la lagumu gageie. Eau masagea ge vei muli tigiamu te la vuhu la kilau bububula tegite Iuda somai taku.
ACT 26:3 Eala moli eme rovi tigi sesele la vulovulo mite Iuda, la merera ale polo viri eme koramulia ge lubea. Ale eau masagea veia eme umala ge silaha harari te la ilolo la vigagiala taku gageie.
ACT 26:4 Male, eia maie: Palati te la bibisigu kara igoie, eau mou moli la uluva giteu e valaluagu, ale eau mou tai oio e Ierusalem, egite Iuda rovi tigi tomi la vulovulogu.
ACT 26:5 Tio egite rovi tigi seseletiau mai ele, ioge mai egite masagea ge veipaleamu la paga isa te la vulovulogu, eia taritigi moli. La vuhula pala eau isa tegite Pariseo sesele. Eau roromuli tomi la viputumulila ale tikumu pepeho oata te la vulovulo la lotu tamiteu ele.
ACT 26:6 Ale igoie egite masagea ge tahi taroau omai te la lagumue, male, la vuhu la saupupula tegiteu somai taku eia mai molie: La vuhula eau gabu tikumu la vikararala te La Tahalo Uru soio te tutubu mite Iuda palao, veia la merera tetala eia sesele.
ACT 26:7 Ale alaura tegite la karakara tamite Iuda savulusa gete lua, egite lotu bibibi tavu La Tahalo Uru te la haroharo me la logologo, la vuhula egite gabu tikumu sesele la vikararala aleie, veia La Tahalo Uru ge vimahuli egiteu. Me eau tai mai moli ele. Eala egite Iuda tahi tataroau ovolale.”
ACT 26:8 Eia goio vikara soio tegite Iuda mago “Me mave, amuto e Iuda veia eia kama koramuli veia La Tahalo Uru ge vahiliti lou egiteu ale pehoti?
ACT 26:9 Sesele, eau pala vagari veia ge tau robo la gauru te Iesus, la tau Nasaret.
ACT 26:10 Ale eau igoa oio e Ierusalem. Egite la mulugaluga tegite pris baheau, eau lapu la valalua me hatavivile te Iesus usu soilo la luma la kilisi. Ale egite veia ge bili peho egiteu, eau tai masagea.
ACT 26:11 Tiele vakausu eau vimarapa egiteu oilo te la lumaluma la lotu, la vuhula eau masagea veia egite ge tahi taro La Uru tegiteu. Eau bebetola sesele egiteu, eau goio basimuli taro egiteu soio la maututula ale sogalao.”
ACT 26:12 Goio, e Pol lapu malau lou la merera tetala soio te Agripa mago “Tio, ale eau igo totolo egiteu la valalua te Iesus mai ele, egiteu la mulugaluga tegite pris baheau soio e Damaskas veia eau ge lao tola la valalua te Iesus ovola.
ACT 26:13 Tahalo uru, eau tatuga te la gauru, la haro hugutolatia, eau hilo la matagaga isa uru eia matagaga tavua la haro. Eia paga vei amiteu tomi oio te la gauru ele.
ACT 26:14 Amite tomi goio boru sotalo la magasa, eau lolo la golu la tahalo isasa eia vikara te la merera e Iuda, eia veia mago ‘Sol, Sol, ilava eme viligi moliau e? Eme mai sesele la paia, ale e tahomu karasusukume, eme vulo liliu tavua veia eme ge toloa, eia bebeligime.’
ACT 26:15 “Tio, la golu la tahalo vikara mai ele, eau goio tahia mago ‘Tahalo Uru, eme ere ele?’ Tio La Uru goio kolia soio taku mago ‘Eau moli e Iesus, ale eme viligiligi moliaue.
ACT 26:16 Taritigi eme ge hiliti. Eau sibitala tavutime veia eau ge vipoume veia eme ge la bilalaha taku ale ge valolo la valalua me hatavivile te la vagagarigu ale eme hilotia igoie, eme ge vei taia giteu la igogolu tomi taku ale eau mulimuli ge vahilo leme ovola.
ACT 26:17 La valalua e Iuda ge gimame, egiteu tai ale logala ale kama e Iuda, eala moli eau ge taho robome tegiteu ale eau baha tavume soio tegiteu ele.
ACT 26:18 Eme ge valolo egiteu, egite ge matagaga, egite kati ge pou te la maligoma, eme ge vulo egiteu soio te la matagaga, eme ge lapu taro tai egiteu loio te la vagagarile Satan tavu moli La Tahalo Uru, veia egite ge roromuli la merera taku. Mai ele, eau ge vimavulaha taro legiteu la iruru tegiteu tomi, egite ge goilo ge pou te la muli giteu sesele oio te la bali La Tahalo Uru, egite tai ge vikapopo la valalua me hatavivile tomi ale La Tahalo Uru hiloviti egiteu.’”
ACT 26:19 Tio, e Pol vikara lou soio te Agripa mago “Eala moli taritigi eme la uru e Agripale, eme ge rovia veia eau loloti la merera te La Tahalo Uru mai ele, ale eia vahiloti leau la matagaga uru loata te la mori, tio eau kama tou la bilaha tetalale.
ACT 26:20 Eala eau hiliti, eau vimuga soio e Damaskas, soko la valolo ovola, mulimuli eau goio e Ierusalem, goio lou te la galegale tomi omai e Iudea, goio tai tegiteu ale logala, eau kama maila te la valolo la isale Iesus. Eau veia giteu veia egite ge gabutatala rivu la iruru tegiteu, egite ge vulo la gabutatalala tegiteu tavu La Tahalo Uru, egite ge tilimuli tai la vulovulo ale maroka, eia ge veipalea veia egite la valalua te La Tahalo Uru.
ACT 26:21 “Tio, eau valolo egiteu mai ele, eau pou oilo la luma la lotu, egite Iuda lao toleau veia ge biliau.
ACT 26:22 Eala moli kara igoie La Tahalo Uru suli pepehotiau, eau mahuli moli maie, me igoie eau valolo matagagati soio te la valalua me hatavivile oio la galegale tomi. La merera taku eia pusese muliti la merera ale e Moses mite me la bilalaha ale pala, egite kekesia veia
ACT 26:23 La Riau te La Tahalo Uru ale eia hilovitia veia ge vimahuli la valalua tetala, eia ge gabu la iligiligi uru, egite ge bilia, eia ge mahuli rivu lou, la siloko la mahulirivula te la valalua tomi mai ele. Me oio vola eia ge veipala la matagaga soio te la valalua e Iuda me egiteu ale logala tai, egite kama e Iuda, veia egite tomi ge mahuli.”
ACT 26:24 E Pol goio soko lou la vikararala mai ele, e Pestas goio lolo la vikararala tetalale, e Pestas ele koho bilabilatio, eia goio veitiala mago “Pol, eme pouti te la luma la vimari ale uru, eme isa la tahalo la mari sesele, me la mari taume uru ele soioge igo pauati lou emei!”
ACT 26:25 E Pol goio koli la merera tetala mago “Tahalo uru, Pestas, eme veiagu veia eau paua, eala moli ouka, eau kama paua, la gabutatalala taku soloio, la vikararala taku tomi sesele.
ACT 26:26 Tahalo uru, Agripa, eau ge tutu toleamu la merera, la vuhula la gauru te Iesus ele eme rovitia. La merera tomi alele eme soioge lolotia, la vuhula amite kama vei kokovua, eau tala palatia te la valalua tomi.
ACT 26:27 Eme rovi la vulovulo mite Iuda, mave, eme gabu tikumu la merera tegiteu la bilalaha ale pala, ka ouka? Eau rovia, eme gabu tikumu la merera tegiteu tomi ele.”
ACT 26:28 Goio, e Agripa goio veiale Pol mago “A ge, la vikararala bakisi moli, eme veia ge vagoilo hari moliau te la lotu te Kraist, ia?”
ACT 26:29 E Pol goio koli louala mago “Ale eme lolo palatia, uka eme so lololo molia, la golu bulalahu, eala moli la kilaka taku tavu La Tahalo Uru eia maie veia eme uru ele, vikapopo me amutou tomi la valalua ale amuto magiri lolo la merera takue, eau masagea veia amuto ge soveiau, eala moli la kilisi taku eia ka ge goio tamutou.”
ACT 26:30 E Pol vikara kaluvu mai ele, egiteu la ururu tomi ele hiliti, egite tuga.
ACT 26:31 Egite goio gali sogala, egite goio vei mulimuli loua mago “La tahalo aleie, eia la iruru ale tikumu sesele isasa ouka veia etato ge vagoiloa te la luma la kilisi, etato ge bili taia, ouka sesele.”
ACT 26:32 Tio, e Agripa goio veiale Pestas mago “Mai la tahalo ale eia kama ge kaka la uru e Sisa veia eia ge lolo la vigagiala tetala, eia koramuli veia eme ge lube taroa te la kilisi ele, eia ge mavulaha.”
ACT 27:1 Tio, e Pestas mite ururu viputumuli kaluvutia mai ele, veia ge baha e Pol soio e Rom, egite goio abi e Pol mite me egiteu la valalua isahari ale pou tai te la kilisi, egite sugu taro egiteu ele soio te Iulias. La tahalo ale, eia la uru isasa oilo te la tala la valalua la vaubi tegite Rom ale te Sisa sesele.
ACT 27:2 Goio, amite sae te sipi la sel isa uru ale te la mautu e Adramitiam, e sipi ale, eia raragiti veia ge hari vulovulo soio te la lokuloku tomi oio la gale Esia. Amite goio sae, e sipi vahari amiteu solauo. La tau Masedonia isa tai oio tamiteu ele, la isala e Aristakas, la mautu tetala e Tesalonaika.
ACT 27:3 Mai galigeli, amite goilo e Saidon, e Iulias gogo e Pol, eia lubea bakisi veia eia ge goio ge hari lalai egiteu e tabarabarala oio te la mautu alele, egite ge abiala la ilali me la golu ilua mai ele ale eia savelea.
ACT 27:4 Amite goio ga toto lou solau, e kavara tali robo amiteu lolagu, amite goio polo vaivai moli te la olu e Saipras ale la lolovi ouka ovola.
ACT 27:5 Amite goio toto lolau la gale Silisia, lolau tai te la gale Pampilia, amite hari polo soio la mautu e Maira oio la gale Lisia.
ACT 27:6 Amite goio sivo te sipi, la uru tamite goio poga tavu e sipi isa lou ale loio la mautu uru e Aleksandria, eia ge goale Rom, tio eia goio visae amiteu te sipi alele.
ACT 27:7 Amite goio ga hari mai solau ele, amite vavala pepeho, kama hari tigi. Amite hari koko moli mai ele, amite goio guvi oio la mautu e Naidas. E kavara tali vagari pepeho lolagu, tio amite kati selea, amite vulo bakisi sotalo, amite hari kokovu moli, tilimuli la parava te la poke la olu uru e Krit, amite goio toto mai ele lolau la maisule Salmon.
ACT 27:8 Amite hari moli oilo maie, vavala moli la hirari, kara la loku isa uru la isala e Magomalilo, eia hagagavi moli la mautu e Lasea.
ACT 27:9 Amite goio maila te la parava alele, amite pou la logo usu ovola, kara ale amite hilotia veia la mago eia kati koramuli la availa, la gasi uru, la vuhula eia leavalati. La logo la ilali ale uru tegite Iuda ale egite igoa te la siloko la leavala, ale egite gabutatala La Tahalo Uru veia eia vimavulaha la iruru tegiteu, la ilali uru tegiteu ele, egite igotia, eia leavalati.
ACT 27:10 Egite hilotia veia la mago kati taritigi, e Pol goio suli egiteu la vikararala isahari mago “Mutou, la hirari tegatou ale solagu, eia kati ge taritigi, etato ge sululu. Etato ge vilua, la golugolu tomi ale etato vahararia, eia ge kokovu, la vuhula e sipi ge tilomu.”
ACT 27:11 Eala moli la tau Rom tegiteu uru ele, eia lolo moli la mulugaluga te sipi, egira me tahole sipi ele, egira veia ge tovo lalai bakisi la availa. La tau Rom uru ele, eia kama masaga ge lolo la merera te Pol.
ACT 27:12 La loku alele, eia kama taritigi agi, eia kama koramuli sesele la tarikokovula te la leavala. Eala egite usu masagea veia ge hari lou, ge tovo lalaia veia ge goale e Piniks. La mautu e Piniks ele, eia la kalia la mautu sesele oio la olu e Krit, la loku ovola taritigi pepeho, la maisula iluale sugu soale, la baha ilua oio te la vaila iluale, e sipi goilo tatataho ovola. Eia koramuli sesele amite ge pou la taio ilua ovola kara ale la gasi ge tamea lou.
ACT 27:13 Goio, la hipu ga tarotatolati bakisi, egite gabua veia eia koramuliti la hirari te la tia la utu ale egite veveiale. Tio egite lapu la poutatolale sipi ele, amite hari paravarava moliti te la paravale Krit ele.
ACT 27:14 Eala moli egite so hari golo moli bakisi mai ele, la ave uru sibitala loio e Krit.
ACT 27:15 Tiele la lolovi uru ele poratia lolagu, e sipi ka keke suku lou, tio amite paipati molitio.
ACT 27:16 Goio amite hari kokovu moliti loio la poke la olu pati bisi e Koda. Eala moli amite vagari tavu moli e ugugule sipi bisio veia amite ge kisi tolea.
ACT 27:17 Goio egite lapu tola e ugugu ele, egite kisi tola vagaria soio te sipio. Egite makuku pasi, la vuhula amite souka kaka te la rede uru oio hagagavi la gale Aprika. Goma, egite laga lulu taro la sel sotalo, amite pati bububu molitio.
ACT 27:18 Tiele la lolovi me la gasi pigi loke vulo sesele amiteu, goio mai galigeli egite sokoti la piligi la golugolu sotalo te la mago.
ACT 27:19 Tio te la vaitolu la haro egite soko la sireri la golugolule sipi ele.
ACT 27:20 Eala moli la haro me la logo usuti, la lolovi uru pigi vulovulo amiteu, amite kamati hilo la haro me la matatabu tai, la ilo miteu polotia la utu, veia amite isa oukati ge mahuli utu lou.
ACT 27:21 Goio e Pol hilo egiteu tomi oata te sipi ele kamati alali, eia magiri veia giteu mago “Mai ge amuto ge roromuliau veia etato ge umala muga hiliti tataro e Krit, la marapala maie ge ouka, la golugolu kama ge parava tai.
ACT 27:22 Eala moli eau veia mutou ge hate tola moli, umala tataga, etato isa ouka ge vilua, e sipi molie ge vilua.
ACT 27:23 Eau veia mutou, alalogo e angelo isasa gomai taku, eia magiri oio te la baligu, La Tahalo Uru sesele bahea, la vuhula eau tetala, me eau la bilalaha tetala.
ACT 27:24 E angelole, eia vikara maie mago ‘Pol, eme umala tataga. Eme kama ge vilua, la masasagala te La Tahalo Uru tavu emei eia maie: Eme ge goio e Rom, eme ge magiri te la vikararala oio te la lagule Sisa, me oio volale La Tahalo Uru eia ge vimahuli amutou tomi gageie, eme ge mahuli utu vikapopo me egiteu tomi ale sae vikapopome te sipi.’ E angelo eia vikara somai taku mai ele.
ACT 27:25 Tiele, amuto tabarabaragu, eia taritigi veia etato tomi ge vagari. Eau sau tola seseleti la merera te La Tahalo Uru ale eia veia etato tomi ge mahuli utu, mai sesele e angelo eia veitia.
ACT 27:26 Eala moli eau rovia veia etato savereti, me e sipi tegatou eia ge kaka muga oio te la sakalu oio te la vai la olu isasa te la gale isasa ale etato kama rovia.” E Pol viteteli egiteu mai ele.
ACT 27:27 Tio, te la logo savulusa gete vaa, amite pati tala oio la gale la mago e Edriao. Goio, te la logo posa sesele, egite la valalua ale igogolu te sipi ele, egite hilotia veia e sipi hagagaviti soilo te la olu isasa.
ACT 27:28 Goma, egite lova lalai la malulu la magole, so savulu lua robo, goio amite hari suku lou bakisi soilo, egite lova lalai loua, la lovala savulusa moliti gete lima.
ACT 27:29 Goio, egite makukuti veia e sipi souka ge kaka te la sakalu, tio egite vipigi tomi la poutatola ivaa te la morile sipi ele. Eala moli egite kahare tavu moliti la paga ge mamaga harari.
ACT 27:30 Tio, egiteu la valalua ale igogolugolu te sipi, egite tutu vulotio veia egite ge hele taro e sipi uru ele. Egite vagotalo moli e ugugu, egite tutugolo veia ge kisi tola isa lou la poutatola te la maisule sipi.
ACT 27:31 Eala moli e Pol goio veia la tau Rom uru me egite soldia tetalale mago “Mai la valalua ale ge hele taro e sipi gageie, tio amuto tomi ge tilomu.”
ACT 27:32 Tio egite soldia loloa mai ele, egite goio barautu taroti e ugugule sipi sotalo.
ACT 27:33 La paga ga utupolapolati, e Pol goio karasuku egiteu veia egite ge ali, mago “Etato pou moli maie, amuto kati ali la logo savulusa gete vaati,
ACT 27:34 taritigi amuto ge tuha toro muga, amuto ge mahuli lou, amuto isa kama ge tilomu, ouka, etato tomi ge mahuli utu.”
ACT 27:35 E Pol veia giteu mai ele kaluvu, eia goio abi isa la bret, eia vei tataho La Tahalo Uru te la ilali ale, eia tovia giteu, eia goio soko la ilalila.
ACT 27:36 Egite hiloa mai ele, egite kati taga lou, egite tomi goio tuha toro taitio.
ACT 27:37 La giligi miteu ale sae te sipi alele, salatu lua savulu vitu gete uolo.
ACT 27:38 Goio, amite tomi ali kaluvu mai ele, egite goio vimavulaha lou e sipi, egite pigi tomi la beibeki la vit ale e sipi pala visaea, egite pigi lahua sotalo la mago.
ACT 27:39 La paga mamagati, egite la valalua te sipi mata kosi la parava ale amite magiri olau ovola, eala moli egite hilo vuti la loku isa bisi la parava ale taritigi pepeho ovola, tio egite goio veia ge tovo lalai veia ge vagoilo moliti e sipi ovola.
ACT 27:40 Tio mai ele egite koro taro tomi la mamota la poutatola, egite lube tai la mota ale egite pala kisi tolati la vore la ilau iluale, goio egite rara la sel oio te la maisule sipi ele, veia la lolovi ge vai taro amite soilo tio amite goio hari moliti soilole.
ACT 27:41 Eala moli e sipi goio kaka te la rede, la maisula kaka tola moliti maie, la morila pigi vulovulo moli, la gasi uru vali pola momomo molia, eia mapola geregeretio.
ACT 27:42 Ale e sipi ga mapola maie, egite soldia viputumulia veia ge bili egiteu la valalua ale pou te la kilisi, egite soukama ge puru soilo, ge hele.
ACT 27:43 Eala moli la uru tegiteu ele, eia vagari veia ge sigirobo e Pol, eala eia mera taro egiteu te la gabutatalala tegiteu ele. Eala moli eia veia miteu veia egite ale rovi la pururu ge raga sotalo, ge puru muga soilo,
ACT 27:44 me egiteu ale kama rovia la pururu ge mulimuli, egite ge purula la mapolale sipi ele, ge pati moli soilo. Tio amite goio igo molia mai ele, amite tomi guvi tigi moli oilo la parava mai ele, kaluvu.
ACT 28:1 Amite tomi moli puru soilo kaluvu, amite goio tahi la valalua te la baa ale, egite veia miteu veia la magasa ale la olu e Molta.
ACT 28:2 Egite taritigia miteu, egite hiloa veia la hura puti, amite maigi, egite isu la havi uru pepeho, amite goio malulu, egite abia miteu la ilali.
ACT 28:3 Eala moli e Pol goio tubi la obu ilua, eia ga taua te la havi, la pase ale bilibili eia taga la havi, eia hele, eia goio tolo la limale Pol, eia tilikokotio.
ACT 28:4 La valalua te la gale alele, egite hiloa eia tilikoko moli maie egite vei loua giteu mago “La tahalo ale, eia soioge la tahalo la bilili. La vuhula eia huli taro la gasi, eala moli La Tahalo Uru kama masagea veia eia ge mahuli lou.”
ACT 28:5 Eala moli e Pol, eia goio lugu taroa la pasele, eia paru sotalo la havi. Eia lugu taro kaluvua mai ele, eia goio pou, eia taritigi moli.
ACT 28:6 Egite pou talia veia eia ge sogo, uka veia eia ge peho, eala moli egite ga popou maie, la tasi tabaa, eia kama peho. Egite hiloa, egite karutu, egite kati mera kukumuale Pol ele, egite vulotia la gabutatalala tegiteu, egite goio veia eia la uru isa ale loata la mori.
ACT 28:7 Tio, ale hagagavi moli te la baa ale, la magasa te la uru isasa, la isala e Pablias, eia oio, eia la mulugaluga te la olu e Moltale, la luma tetala uru magiri kabili te la magasa tetalale. Eia rara tavu amiteu, eia baumuli amiteu la logo itolu.
ACT 28:8 Eala moli e tamale Pablias ele, la ilea bebetolea, la vovola tivura, la hatela viu. E Pol goio tetala, eia kaka, eia goio tau la limala oata te la gamala, eia vimahuli molia mai ele.
ACT 28:9 Tio, goio, egite hiloa ale e Pol vimahulia, egite la ilea tomi gomai te Pol, eia goio vimahuli tomi moli egiteu.
ACT 28:10 La valalua sagege pepeho, egite vararapu pepeho amiteu. Ale mulimuli amite veia giteu veia amite ge tuga lou, egite abia miteu la ilali uru pepeho, visaea te sipi tamiteuo.
ACT 28:11 Amite pou oio e Molta la taio itolu, mulimuli amite sivuti e sipi isasa ale ge visae amiteu. Eia e sipi te la mautu e Aleksandria, eia pou kokovu la leavala te la olu uru e Moltale. Oio te la maisule sipi ale, egite tauti la puigolo ilua te latu la uru tegiteu, e Seus, ale egira viboge.
ACT 28:12 Goio, amite sae te sipi alele, amite goio hariti solauo, amite goio guvi oale la mautu e Sairakius, amite mavuta ovola la logo itolu. Amite hiliti taro e Sairakius ele, amite hari vaivai moli oilo la parava kara la mautu e Risiam, amite goio pou muga.
ACT 28:13 Mai galigeli, la hipu sibitala tataho, amite goio hari lou, amite harari te la tia la mago la logo isasa, mai galigeli amite goio guvi oio la mautu e Piuteoli, la loku taritigi ovola, amite sivo taro e sipi oio te la mautu aleie.
ACT 28:14 Oio te la mautu alele amite poga egiteu e tabarabara miteu la valalua la lotu te Iesus isahari. Amite pou oio tegiteu la logo ivitu, eia taritigi pepeho. Mulimuli amite hiliti taro egiteu, amite tuga lou veia ge goio e Rom.
ACT 28:15 Eala moli ale egiteu la valalua la lotu te Iesus oio e Rom, egite lolotia veia amite guviti, egite rara tavu amiteu soio te la gauru. Isahari poga tavu amiteu oio e Apias, isahari oio te la luma la iloto itolu ogala la mautu e Rom ele. E Pol hilo egiteu pogea mai ele, eia sagege pepeho, la gabutatalala tetala vagaritio.
ACT 28:16 Amite goio guvi oio e Rom, egite la ururu veia eia koramuli e Pol ge mavuta oio te la luma isasa, vikapopo tai la tahalo la pahutula ale vibaumuli tetala.
ACT 28:17 La logo itolu poloti, e Pol goio tola vikapopo egiteu la mulugaluga tegite Iuda oio la mautu e Rom ele. Egite tomi guvi, e Pol goio veia giteu mago “Tabarabaragu, eau kama igo isa la iruru soio te tabaragu isa, eau kama polo tai isasa la merera tegite ururu tegatou e Iuda. Eala moli egite Iuda oio e Ierusalem lao toleau, sugu taroau soio tegiteu e Rom!
ACT 28:18 Egite Rom tahiau la tilahi, egite ka sivuti isa la iruru omai taku ale koramuli egite ge biliau ovola, tio egite goio veia ge lubeau,
ACT 28:19 eala moli egite Iuda kama masaga, egite vagari lou la merera, eala eau veia giteu e Rom veia eau ge gomai veia e Sisa ge lolo la vigagiala alele. Eala moli eau la paga isa ouka soio tamutou e tabarabaragu e Iuda.
ACT 28:20 Eala igoie eau baha tavu amutou veia etato ge vikara muli tigi la pagale. Amuto hiloa ale egite kisiti leau la sen? La vuhula eau valololo te la isa La Riau te La Tahalo Uru ale etato e Iuda pou talia.”
ACT 28:21 Egite Iuda lolo la vikararala te Pol mai ele, egite goio veiala mago “Eala moli la merera isasa kama sibitala omai ale ge veipala la pagale. Isa kama loio e Iuda veia ge vikara bareamu, ouka.
ACT 28:22 Eala moli amite masagea veia ge lolo muga la vigagiala taume, la vuhula la valalua tomi volu sesele la vikararala te la lotu halaba taume ele.”
ACT 28:23 Egite veiale Pol mai ele, egite goio tau la mata soio tetala, me te la haro alele, egite usu goio guvi oio te la luma tetala ale eia mavuta ovola. E Pol sokoa la valolo te la kavikoki, eia valolo moli maie kara la paga logo. Eia lubea giteu la pulolou la matagagala te La Tahalo Uru ale halaba eia sibitalati, eia vei matagagea giteu mai ele, la vikararala tetala usu. Eia totoia giteu la merera te Moses, la kekesi tegite tai la bilalaha te La Tahalo Uru ale pala, veia egite ge gabu tikumua la merera tetalale.
ACT 28:24 Eala moli isahari veia eia sesele, isahari ouka.
ACT 28:25 Egite hiliti taroa, gogala, egite vipigi vulotila maie. Eala moli la tapasi la merera te Pol soio tegiteu, eia tikumu sesele, eia veia giteu maie mago “Ale pala La Kalulu La Marokala eia vikara te la hare la bilalaha uru te La Tahalo Uru, e Aisaia, eia vikara tikumu,
ACT 28:26 eia veia maie: Eme ge goio tegiteu la valalua me hatavivile taku. Eme ge veia giteu la merera taku maie: Amuto ge lolo bibibi la merera taku, eala moli amuto kama ge rovi la masovala. Amuto ge hilo bibibi la igogolu te la limagu, eala moli amuto kama ge gabu tikumua.
ACT 28:27 La vuhula la gabutatalala tamutou la valalua me hatavivile taku eia tagarati, la gavusa mutou vouti, amuto mata bubuu moliti. Mai eia kama ge maie, amuto ge matagaga leau, amuto ge lolo tataho tai la merera taku, la gabutatalala tai tamutou ge taritigi somai taku, veia eau ge vimahuli amutou!”
ACT 28:28 E Pol veia giteu la merera te Aisaia mai ele, eia goio valolo pasi egiteu mago “Eala, taritigi pepeho amuto ge matagaga veia La Tahalo Uru bahati la merera tetala soio tegiteu la valalua ale pou te la maligoma, ale kama e Iuda, eia ge vimahuli egiteu, la vuhula egite ge loloa!”[
ACT 28:29 E Pol veia giteu mai ele kaluvu, egite Iuda hiliti veia ge tuga, egite gogala vaigo muli pepeho la merera te Pol ale eia veia giteu mai ele.]
ACT 28:30 E Pol goio pou oio e Rom la leavala ilua. Eia lotoloto la luma la taio tomi, mavuta ovola, me egiteu tomi ale goio hari lalaia, eia rara tatavu egiteu, vararapu egiteu.
ACT 28:31 Eia pou mai ele, eia valololo egiteu tomi te la pulolou la matagagala te La Tahalo Uru ale halaba eia sibitalati, eia vimari tai egiteu te la isale Iesus Kraist, eia kama maila, eia kama taga, eia kama mahela.
ROM 1:1 Eiau e Pol, eau kekesia mutou la valalua me hatavivile te Kraist, amuto pou oio la mautu uru e Rom. Eau la bilalaha te Kraist Iesus, La Tahalo Uru hilovi seseletiau, eia toleau soio te la valolo ale taritigi te la isale Latula.
ROM 1:2 La valolo ale, La Tahalo Uru eia veipalatia soio tegiteu la bilalaha ale pala, egite kekesi tolea te La Buk Tabu Ale Pala, igoie etato rovitia.
ROM 1:3 Eia la valolo ale taritigi te la guluvi te Latula e Iesus Kraist, La Uru gatou. Eia la tahalo la vovo sesele mai etatou, e tilala taposea te la hilile Devit, e suara uru tamite Iuda sesele alaura.
ROM 1:4 Eala La Tahalo Uru tai visati le Iesus ele veia eia e Latula sesele, ale eia vimahulia taro la lulu la pileho, eala etato rovitia oio moli ovola veia eia vagari, eia maroka.
ROM 1:5 Me oilo moli te la vagagari la isale Kraist, La Tahalo Uru vimahuli tai etatou taroti la kilisi te Satan, eia abia gatou la igogolu te la valolo te la isale Latula, veia etato ge tola egiteu la valalua la maligoma te la maratatila tomi somai te la matagaga veia egite tai ge roromuli la merera te La Tahalo Uru. Mai la valolo ale taritigi te Iesus Kraist egite ge toro moli ovola, egite ge balava sesele,
ROM 1:6 mai tai amutou la valalua me hatavivile tetala oio e Rom, ale eia tola tavuti amutou veia amutou tetala seseleti.
ROM 1:7 Eala eau kekesia mutou ale te Kraist, amuto mou oio la mautu uru e Rom, La Tahalo Uru tolati amutou veia amuto ge goilo te la maratatila tetala sesele, eia masaga seseleti amutou, amuto tetala seseleti. La gilogo te La Tahalo Uru e Tama gatou me te Iesus Kraist ge pou tamutou, la tia mutou oilo ge malilo tataho te la isala.
ROM 1:8 La muluga la merera taku soio tamutou eia maie: Eau vei tataho sesele La Tahalo Uru teale amuto magiri vagari. La rere mutou, ale amuto tivura sesele te la isale Kraist, eia taliti te la maututula tomi kaluvu.
ROM 1:9 La Tahalo Uru moli ale eau igogolu tetala, ge vitikumu la merera taku, eia moli ale eau igogolu vagari tetala te la igogolu la valolo. La vikararala taku eia sesele moli maie veia te la haroharo tomi,
ROM 1:10 ale eau ge pou te la kilaka, eau ge vagari robo le amutou la kilaka taku. Eau kaka tai La Tahalo Uru veia mai eia ge masagea, eia ge vimatata la gauru veia eau ge hari lalai amutou, mai la masasagala taku palati kara igoie.
ROM 1:11 La vuhula eau masaga pepehoa veia ge hilo la mata mutou, eau ge suli le amutou la merera ale tivura, La Tahalo Uru sesele abiagu veia ge vibalava amutou, me oio vola, amuto ge magiri vagari.
ROM 1:12 Mai etato tomi ge visuli baololi te la merera te Kraist, etato tomi ge magiri vagari pepeho mai ele.
ROM 1:13 Eau masagea veia amuto ge matagaga, vaka usu pasi eau gabutatalea veia ge hari lalai amutou, eala moli la igogolu tabuli robo louau. Eau masaga pepeho taia veia ge valolo oio tamutou tai veia la valalua isahari ge goilo halaba lou te Kraist, mai ale eau valolo oio tegiteu la maututula la maligoma tomi moli palati kara igoie.
ROM 1:14 Eia tikumu sesele taku veia eau ge valolo oio te la maututula tomi, ge tola la valalua me hatavivile tomi soio te Kraist: Egiteu e Iuda, egiteu tai ale pou te la maligoma egite kama rovi La Tahalo Uru, egiteu la tahalo la mari, me egiteu la valalua bulalahu tai, egite tomi ge lolo la isale Kraist te la haregu.
ROM 1:15 Mai alele, eau tivura sesele veia ge valolo tai kabili tamutou la valalua e Rom, amuto ge lolo la valolo ale taritigi oio te la haregu sesele.
ROM 1:16 La valolo te la isale Kraist, eau kama koramulia ge mahela mulia, ouka, eau sagege sesele oio vola, la vuhula eia veipala la vagagari La Tahalo Uru ale eia ge vimahuli la valalua me hatavivile tomi ale toro ovola, mai amite Iuda ale lolo palatia, me amutou la valalua la maligoma tai, ale so lololo molia.
ROM 1:17 La valolo te Kraist, eia ge vimahuli etatou te la viluala te la iruru tegatou, la vuhula mai etato ge roromulia, eia ge igo maroka etatou te la vulovulo gatou. Ale etato kama igoa mai te la vagagari gatou, ouka. La Tahalo Uru sekela igo tivura la kalulu gatou oilo veia etato ge sau tola la merera tetala, etato ge maroka, etato ge mahuli, eiala moli ele. Mai la merera te La Buk Tabu Ale Pala eia veitia: La tahalo me la tavile ale sau tola la merera te La Tahalo Uru, la vulovulola ge maroka, eia ge mahuli.
ROM 1:18 Sesele, la tahalo me la tavile ale La Tahalo Uru toitia veia eia maroka, eia ge mahuli taro la pileho, eia kama ge ligi te la vilaila te La Tahalo Uru ale eia ge vilai etatou te la iruru ale etato igotia. Taritigi etato ge matagaga te aleie, la vuhula omai etato ge hilo la igototolola te La Tahalo Uru ale egiteu la tahalo la iruru ge vilua sesele ovola, egiteu ale magiri robo la matagaga te Kraist veia eia umala ge vimatagaga la maututula.
ROM 1:19 La Tahalo Uru ge vilai egiteu, egite kama koramulia veia ge tahi taro, la vuhula mai egite ge mata lalahu, egite ge hilo la vagagari La Tahalo Uru igoie te la papaga tomi etato hiloa, eia vipoua. Eala moli egite kama masaga ge hiloa. Egite koramulia ge rovi La Tahalo Uru, eala moli egite kama masaga.
ROM 1:20 Palati te la siloko la vipoupoula kara igoie, la vagagari La Tahalo Uru me la gabutatalala tai tetala ale isapolo seseleti te la gabutatalala tegatou, eia oio hagagaviti, koramulia etato ge hiloa, ge rovia. La Tahalo Uru, etato kama hiloa, eala moli etato rovi la vulovulola ale etato hilo la golugolu eia vipoua te la limala. Ealale, ale la valalua masagea veia ge pou tavu la vulovulo la maligoma veia ge igo loua, ale la pauala tegiteu lou. Mulimuli egite ge magiri te la vigagiala, egite ge vei lava lou? Eia matagaga tomiti tegatou veia etatou tomi la tahalo la iruru.
ROM 1:21 Egite rovia mai ele veia La Tahalo Uru eia oio, eala moli egite kama togoa bakisi, egite kama sagege roboa mai La Tahalo Uru sesele tegiteu, ouka. Eala moli la gabutatalala tegiteu eia marapati, la maligoma uru eia pigi roboti egiteu, la paga isa oukati oilo te la varu giteu.
ROM 1:22 Egite veia egiteu la tahalo la mari, eala moli ouka, egite paua viruru.
ROM 1:23 Egite kama masagea veia ge lotu tavu La Tahalo Uru ale mahuli moli la kaluvula ge ouka. Egite masagea veia ge lotu tavu la puigolo ale egite lou puia mai la halulu la tahalo, uka egite puia mai la bolo, la malu me e bogea.
ROM 1:24 La valalua me hatavivile, egite kama kokora mai ele, me alele La Tahalo Uru eia piligi taroti egiteu veia egite ge tilimuli la masasagala tegiteu, mai te la gabutatalala ale kama taritigi. Eala egite goio vaigo baoli lou legiteu ele.
ROM 1:25 Egite kama masaga la matagaga, egite masaga moli la merera la visigolola. Egite kama masagea veia ge lotu tavu La Tahalo Uru, ouka. Egite lotu tatavu moli egiteu la papaga isahari ale eia vipoua. Eala moli eia La Uru gatou ale etato vaisalea kama ge maila, eialale, eia sesele.
ROM 1:26 La valalua me hatavivile, egite tilimuli la vulovulo giteu te la maligoma mai ele, me alele La Tahalo Uru eia sigolo taro egiteu, eia piligi egiteu soio te la vulovulo giteu ale kama kokora mai ele. Mai egiteu e hatavivile tai, egite ge vimavuta tomi, egite kama ge gabutatala tigi veia ge puli sesele e harua giteu.
ROM 1:27 Me la valalua, egite kati masaga tatavu egiteu e hatavivile, egite masaga tavu moli egiteu e tabarabara giteu veia ge igo gegeru egiteu. Egite goio vaigo baoli lou megiteu mai ele, me alele egite poga tavu la igototolola te La Tahalo Uru, eia ge kolia soio tegiteu, egite kamati ge mai la tahalo sesele, oukati.
ROM 1:28 Mai alele, egite kisu taroti la merera te La Tahalo Uru, me oio moli ovola eia piligi egiteu, veia la gabutatalala tegiteu ge marapa viruru, egite pauati, egite pou tavu moli la vulovulo ale kama kokora.
ROM 1:29 La tia giteu volu moli te la vulovulo tomi ale maie: Egite vaigo malagolago; egite pou tatavu la vulovulo ale kama kokora; egite hate ololu; egite gabutatala gegegeru; egite bilibili; egite vitao gagima; egite visigolo baololi lou egiteu; egite koli barabara la iruru;
ROM 1:30 egite vikara kukukumu; egite vitahi tataro; egite gagima La Tahalo Uru; egite muku pilepile la gauru ale taritigi; egite pakakasa; egite vaururu lou egiteu; egite gabutatala moli la iruru; egite vareagagi, kama lololo e tatama giteu, e tatila giteu;
ROM 1:31 egite kama matagaga bakisi te la gauru ale taritigi; egite vikara bulalahu; egite hate tutuu; egite kama rovi tai la gilogo.
ROM 1:32 Eala moli egite rovi la merera te La Tahalo Uru ale eia veia ge kolia soio tegiteu la vulovulo giteu ele, egite ge peho. Eala moli egite kama lololo, egite vagari tavu loua, me egite vagari tai veia ge karasusuku lou egiteu e tabarabara giteu veia egite tai ge goilo te la vulovulo giteu ele.
ROM 2:1 Eala moli amutou e Iuda tai, amuto pou tavu egiteu la iruru ale kama kokora. Eala eia kama koramulia veia amuto ge tomu sasae la vulovulo giteu la valalua me hatavivile ale so popou te la maligoma. Amuto la vikararala ge ouka, la vuhula ale La Tahalo Uru ge kolia soio tamutou mai la mapa la iruru tamutou, eia igo seselea mai la vulovulola sesele ale amuto rovitia. Etatou tomi, etato matagagati veia La Tahalo Uru, eia ge koli bara la vulovulo gatou ale kama kokora mai la viputumulila tetala eia kama ruru.
ROM 2:2 Mave, amutou e Iuda soioge gabutatalea veia amuto kama ge vilua te la igototolola te La Tahalo Uru, ia? La vuhula eia visati le amutou?
ROM 2:3 Ouka, La Tahalo Uru ge vilai amutou, la vuhula amuto tomu sasae la vulovulo giteu e tabarabara mutou ale lobali, eala moli amuto tai, amuto pou tavu la iruru tomi tai ale egiteu igigoa!
ROM 2:4 Soioge amuto kama gabu tikumu La Tahalo Uru veia eia la tahalo la gilogo, eia kama koli harari la iruru tegatou, eia tai kama igo totolo harari. Amuto kama matagaga te aleie, ia? La Tahalo Uru masaga pepehoa veia ge abia mutou la baa bakisi koramulia amuto ge gabutatala rivu lou la iruru tamutou ovola, amuto ge piligi taro la vulovulo mutou ale kama kokora, ge vulo halaba la tia mutou soio tetala.
ROM 2:5 Eala moli amuto kama lolo vulai. Me alele la mapa la vulovulo mutou ale kama kokorale, La Tahalo Uru ge vaurua soio tamutou te la tapasi la haro ale etato tomi ge magiri te la matagaga tetala oio vola.
ROM 2:6 La Tahalo Uru ge kolia somai tegatou tomi isasasa mai la vulovulo gatou ale etato igigoa.
ROM 2:7 Egiteu isahari vagari tavu la vulovulo ale taritigi, egite masagea veia la matagaga ale uru, me la pulolou tomi leia, me la mahulila tai te La Tahalo Uru ale sesele, eia ge pigi robo egiteu. Me La Tahalo Uru ge vibalava legiteu la mahulila ale sesele, la kaluvula ge ouka.
ROM 2:8 Eala moli egiteu isahari masaga tavu la vulovulo ale kama kokora. Egite pile la gauru ale matata, egite gabutatala moli egiteu, egite tilimuli moli la gauru la iruru. La Tahalo Uru ge bebetola egiteu te la igototolola.
ROM 2:9 Egiteu la valalua me hatavivile ale kama kokora, egite ge vure te la igototolola te La Tahalo Uru, egiteu e Iuda muga, goio egiteu ale lobali. Egite tomi ge hilo la viputumulila te La Tahalo Uru eia ge puru soio tegiteu.
ROM 2:10 Eala moli La Tahalo Uru, eia ge vibalava etatou ale pou tavu la vulovulo ale taritigi, eia ge vipou etatou oio te la balila, etato ge pou te la matagaga tetala, la tia gatou oilo ge malilo tataho. Etatou e Iuda, egiteu ale lobali tai, eia ge vibalava etatou tomi mai etato ge tetala, etato tomi ge visauru moli te la matala,
ROM 2:11 la vuhula la gabutatalala tetala ge isa moli somai tegatou la valalua me hatavivile tomi, eia kama ge toi tabaribari etatou.
ROM 2:12 La valalua la maligoma, la vulovulo giteu kama kokora, me egite paua sesele te la merera te La Tahalo Uru. Eala, mai egite ge peho, egite ge magiri te la mata La Tahalo Uru te la vigagiala. Eia kama ge igo totolo sesele egiteu mai egite ge boto te la merera te Moses, la vuhula egite kama rovia. Egite ge peho bulalahu moli. Eala moli etatou la valalua ale pou te la matagaga, La Tahalo Uru ge mata muli la vulovulo gatou mai te la merera tetala sesele veia etato mulimulia ka ouka.
ROM 2:13 La vuhula La Tahalo Uru, eia kama veia etato taritigi ale etato rovi la merera tetala, ouka. Eia ge masaga moli etatou mai etato ge roromuli tomi molia. Me mai moli ele eia ge toia somai tegatou veia etatou maroka.
ROM 2:14 La valalua la maligoma kama rovi la merera te La Tahalo Uru, eala moli mai egite ge gabutatala tigi, me ge poga tavu sesele la merera tetala, tio egite koramulia ge tuga matata moli mai ele, la vulovulo giteu ge veipalea veia La Tahalo Uru vipou egite, egiteu la kalulu giteu oio, eala moli egite so popou te la maligoma.
ROM 2:15 Eala moli mai egite ge pou tataho moli, la vulovulo giteu ale taritigi eia veipalea mai ele veia La Tahalo Uru eia vipou egiteu, la matagaga tetala tai bakisi eia oio tegite. Mai egite ge ruru, egite ge gabutatalea, egite kama koramulia veia ge ruru bulalahu, ouka, egite ge gabua. Me mai egite ge pou tigi tai, la tia giteu oilo ge malilo tataho, egite kama ge gabutatala papai.
ROM 2:16 Me La Tahalo Uru eia ge mata mulimuli la vulovulo giteu mai ele te la tapasi la haro ale eia ge baha e Latula e Iesus Kraist, veia eia ge mata mulimuli la vulovulo gatou, me etato ge magiri te la vigagiala tetala. Eia sesele, mai la valolo taku eau veitia mutou ovola.
ROM 2:17 Eala moli amutou e Iuda, amuto ge vei lou lava? Amuto vei mago “Eau la tahalo la lotu, la merera te La Tahalo Uru eia suliau, eau isasa, eau tetalati.”
ROM 2:18 Me eia sesele, la merera te La Tahalo Uru eia tovo tataho amutou, amuto matagagati te la gauru ale taritigi.
ROM 2:19 Amuto magiri veia amuto ge tata egiteu la mata kea soio te la gauru ale matata. Amuto magiri tai veia amuto vimatagaga egiteu ale pou te la maligoma.
ROM 2:20 Amuto veia amuto tovo egiteu ale paua, amuto vei taia veia ge suli legiteu bisisi la merera ale taritigi. Amuto magiri moli veia amuto rovi tomi la mari me la merera te La Tahalo Uru tomi kaluvu.
ROM 2:21 Ioge, amuto tovo egiteu la valalua me hatavivile, ilava amuto kama tilimulia mai la merera tamutou lou? Amuto valolo mago “Umala pakalikali.” Me amuto soioge kama pakalikali, ia?
ROM 2:22 Amuto vei mago “Umala igo gegegeru la taulaila.” Me mave, amuto isahari soioge kama ovovo egiteu e tabarabara mutou te ruturutu giteu, ia? Amuto gima pasi la vulovulo la lotu la visigolola ale egite lotu tavu la puigolo, eala moli amuto kama togo sesele la luma la lotu te La Tahalo Uru ale etato lotu tatavua.
ROM 2:23 Amuto pakakasa veia amuto pou otaloti te la uluva La Tahalo Uru, eala moli amuto igo mahela lou eia, ale amuto polo bibibi la merera tetala.
ROM 2:24 Mai La Buk Tabu Ale Pala eia veia maie: Egiteu la valalua la maligoma, egite hilo la vareagila tamutou e Iuda, eia uru pepeho, me oio moli ovola egite vikara bara soio te la isa La Tahalo Uru.
ROM 2:25 Amutou e Iuda la valalua te La Tahalo Uru sesele, teale la irovilala tetala eia oioti te la vovo mutou ale egite koroa. Mai amuto tilimuli sesele la merera te La Tahalo Uru, amuto la tau Iuda sesele. Eala moli mai amuto polo la merera tetala, tiele alele eia maiti la golu bulalahu ale egite koroti la vovo mutou.
ROM 2:26 Egiteu la valalua la maligoma ale kama e Iuda, egite kama koro la vovo giteu, eala moli mai egite ge tilimuli sesele la merera te La Tahalo Uru, eia ge vagoilo egiteu te la balila mai ale tetala seseleti. La irovilala tetala eia oio te la vulovulo giteu, eia kama oio te la vovo giteu.
ROM 2:27 Me alele, la vulovulo giteu la valalua la maligoma ale vulo halaba, eia ge tomu sasae la vulovulo mutou e Iuda ale amuto polopolo la merera te La Uru. La merera ale tetalae, eia oioti te La Buk Tabu Ale Pala amuto gigigia. Me la irovilala ale tetala, eia oioti te la vovo mutou ele. Eala moli amuto polo moli la merera tetala, me egiteu la valalua la maligoma moli egite tilimulia, eala moli egite kama tahola la irovilala te La Uru oio te la vovo giteu mai amutou.
ROM 2:28 Amuto veia amuto la tau Iuda sesele, la vuhula la irovilala oioti te la vovo mutou, eala moli ouka. La tahalo ale te La Uru sesele, ale moli ele ale roromuli la merera tetala tomi. La irovilala tetala, La Kalulu La Tahalo Uru ge virovilalea soio te la kalulu mutou, kama te la vovo mutou moli ale e Moses kekesia veia amuto ge koroa, ouka. Ale moli ele La Uru ge gabu tikumua. La valalua soioge kama ge gabu tikumua, eala moli ale la golu bulalahu, La Uru moli ge gabu tikumua ale amuto taholati la irovilala tetala oio te la kalulu mutou tomi isasasa.
ROM 3:1 La irovilala te La Tahalo Uru eia oio moli te la kalulu gatou. Me mave, amuto la tau Iuda, amuto abiti la irovilala oio te la vovo mutou ale egite koroa, eia kama ge suli amutou?
ROM 3:2 Ouka, eme la tau Iuda, eme balava seseleti, la vuhula eme pou oilo te la maratatila ale La Tahalo Uru hilovitia veia amuto ge sau tola la merera tetala.
ROM 3:3 Me eia sesele la valalua e Iuda isahari egite kama toro tigi te la merera tetala, egite poke taro La Tahalo Uru, eala moli La Tahalo Uru kama ge piligi taro la valalua e Iuda tomi te la iruru tegiteu isahari moli,
ROM 3:4 ouka. Etatou tomi la valalua la vovo, etato la tahalo la visigolola tomi moli, eala moli La Tahalo Uru, eia kama visigologolo eia vikara sesesele. Mai la merera te La Buk Tabu Ale Pala eia veia gatou te la merera te La Tahalo Uru maie: La merera taume tomi ge puru sesele. Mai isa ge tahi tarome, la merera taume ge bolehohoa, la vuhula eme vikara sesele. Eala moli eia matagagati mai ele veia La Tahalo Uru eia kama ge piligi egiteu e Iuda.
ROM 3:5 Eala moli etatou la valalua la vovo, etato ragautu la merera tetala. Me etato kama koramulia veia ge tahi taro veia eia umala ge tomu sasae la vulovulo gatou. Ale la vikararala te la vovo moli. La vareagila tegatou eia mai ale karasuku La Tahalo Uru veia eia ge veipala la igototolola tetala somai tegatou, me oio moli ovola etato ge hiloa veia la vulovulola eia maroka.
ROM 3:6 Mai eia kama ge koli la iruru tegiteu la valalua me hatavivile, mai te la vulovulola ale matata, tio la vulovulo ale kama kokora etato ge igo bulalahu molia, etato kama ge hilo la mapala ale La Tahalo Uru ge koli barea somai tegatou.
ROM 3:7 Me ale kama taritigi veia etato ge ruru moli, veia La Tahalo Uru kama ge kolia. Eala moli etato ge vei mave? Mai etato ge magiri ge veia la iruru tegatou eia suli La Tahalo Uru, la vuhula etato abiala mai ele la gauru ale eia ge veipala la vulovulola ale matata somai tegatou. Uka mai etato ge vei mago “Ioge, la vulovulogu ale kama kokora eia sulitia mai ele, veia eia umalati ge viligiau.”
ROM 3:8 Uka mai etato ge vausu lou la iruru veia la gilogo me la matagaga te La Uru ge uru somai tegatou. Umala, la merera tomi alele eia kama koramuli la valolo te Kraist. Sesele, isahari vikara kukumuagu veia la valolo taku eia mai ele. Eala moli La Uru ge kolia soio tegiteu la mapa la iruru tegiteu ale egite visigolo mai ele, eia sesele viruru.
ROM 3:9 Me eau tai la tau Iuda, me mave, amite ge veia amite balavati, La Uru masaga moli amiteu, eia kama masaga egiteu la valalua ale isapolo, etato ge veia maie, ia? Ouka. Etatou la tahalo la vovo tomi, la vulovulo la iruru eia kisi roboti etatou, isa kama maroka.
ROM 3:10 Mai La Buk Tabu Ale Pala eia veia: La tahalo la marokala isa kama oio.
ROM 3:11 La tahalo isa ouka oio ale rovi la vulovulo La Tahalo Uru. La tahalo isa ouka oio tai ale paa muli vagari la gauru tetala.
ROM 3:12 La valalua tomi poke taroti La Tahalo Uru; egiteu tomi ruruti; isa kama lagu tavu la matagaga, ouka gologolo.
ROM 3:13 Oio te la merera la visigologolola ale loio te la hare giteu, la valalua ge poga la pileho. La merera tegiteu eia viruru la valalua, eia bilibili egiteu ale mulimulia.
ROM 3:14 La gililo moli eia oio voluti te la hare giteu.
ROM 3:15 Egite vagari tavu moli la bilili.
ROM 3:16 La gauru tegiteu ale egite poloti ovola, la gauru la pileho me la iloburukola moli.
ROM 3:17 Egite kama vikara tigi veia la valalua ge vipuhi tigi, egite visibitala moli la marapala me la vaubila.
ROM 3:18 Egite kama gabutatalea veia ge togo bakisi La Tahalo Uru, veia ge taga la vagagarila tetala ale uru, ouka viruru.
ROM 3:19 Eala moli etato matagagati veia la merera te La Tahalo Uru eia veipalea somai tamiteu e Iuda. Eala isa tamiteu umala ge vikara papai lou. La merera te La Tahalo Uru eia matagagati, eia koramulia veia eia ge veipala la vulovulola soio te la maututula tomi, la valalua me hatavivile kamati ge ruru bulalahu mai egiteu ale pala.
ROM 3:20 Me isasa kama koramulia veia ge toia soio te La Uru veia eia tilimuli tomiti la merera tetala, veia eia marokati mai ele, ouka. La igogolu te la merera tetala eia maie, eia ge vahilo letatou la iruru tomi ale etato igigoa.
ROM 3:21 La merera te La Tahalo Uru eia vimatagaga etatou veia etato boto, eala moli te la imamala ale igoie La Tahalo Uru eia veipalati la gauru ale eia ge igo maroka lou etatou oio vola, me eia kama mai la gauru ale pala, ale etato boruti ovola, ale etato tovo lalaia veia ge tilimuli la imoimo la merera tetala tomi, ouka. La gauru ale igoie eia veipalatia, eia isapolo te aleie, eala moli la merera te Moses me la merera tegiteu la bilalaha ale pala, eia turitia gatou.
ROM 3:22 La Tahalo Uru eia ge igo maroka lou etatou, mai etato ge sau tola e Kraist, veia ge toro moli tetala. La gauru ale, etato tomi ge polo ovola, eia kama ge toi tabaribari la maratatila la valalua, ouka.
ROM 3:23 Etato la valalua me hatavivile tomi ruruti, etato tomi boto, etato tomi kama koramuli la matagaga tetala.
ROM 3:24 Eala moli La Tahalo Uru eia gogoti etatou, eia sugu taro e Latula soio te la valalua la gima veia mai etato ge gabu tikumu la pileho tetala, ale eia lube etatou taro la kilisi te Satan oio vola, tio eia ge igo maroka lou la vulovulo gatou mai ele. La gilogo tetalale, eia abi bulalahu molia gatou.
ROM 3:25 La Tahalo Uru, eia rou roboti letatou e Latula, veia eia ge peho robo etatou, veia ge vimavulaha taro letatou mai ele la iruru tegatou tomi isasasa, mai etato ge tautaulailo tetala. Eia igoa mai ele veia ge veipala la vulovulola ale eia taritigi tomi moli. Ale pala, eia kama koli harari la iruru tegatou,
ROM 3:26 eala moli te la imamala ale igoie, eia igoti la gauru ale etato ge goilo tetala, mai etato ge gabu tikumu la pileho te Latula. Me oio moli ovolale eia veia ge vahilo letatou la vulovulola ale eia matata sesele tomi moli.
ROM 3:27 Mai alele, etato igoie gogalati te la kilisi te Satan, etato mai ale marokati. Me mave, eia koramulia veia eau ge veia eau isasa ale eau sibitala marokati? Ouka. La vuhula eau kama sibitala maroka mai ale te la igogolu taku lou, ale eau tilimuli la imoimo la merera tetala tomi. Eau maroka moli, teale eau tautaulailo te la pileho te Kraist oata te la tauvalautu.
ROM 3:28 Me eia matagagati mai ele veia etato kama ge magiri mahela te la lagu La Tahalo Uru, mai etato ge gabu tikumu sesele la pileho te Latula ale vimahuli etatou. Etato kama ge sibitala maroka te la vagagari gatou lou, ale etato tilimuli la imoimo la merera tetala tomi, ouka gologolo.
ROM 3:29 Me la viputumulila tetala ale halabale, eia kama tamiteu e Iuda moli, la vuhula La Tahalo Uru eia La Uru giteu la valalua me hatavivile tomi tai ale isapolo, eia sesele.
ROM 3:30 La Tahalo Uru eia isa sekela moli, me eia moli ge igo maroka amiteu e Iuda, me amutou la valalua me hatavivile tomi tai, mai etato ge gabu tikumu la igogolu te Latula ale eia peho robo etatou.
ROM 3:31 Me mave, la merera taku alele, isa soioge ge veia eau veipalea veia la pileho te Iesus eia abi taroti la merera te La Tahalo Uru? Ouka moli. La viputumulila tetala ale halabale, mai etato ge tilimuli seselea, etato mai ale vipuruti la masovala sesele te la merera tomi te La Uru ale etato taholea alaurati te ururu ale pala kara igoie. Ale etato sau tolati la valolo ale taritigi te Kraist, etato mai ale vitikumu seseleti la merera tomi moli te La Tahalo Uru.
ROM 4:1 Etato kama sibitala maroka te la vagagari gatou lou, eala moli te la gilogo te La Tahalo Uru eia vimaroka etatou. Eala moli te la vimari ale, etato ge hiloa te la veimulipolola te la uru miteu e Iuda ale alaura, mai la tilovo te Abraham.
ROM 4:2 E Abraham, eia isa la tahalo ale La Tahalo Uru toitia veia eia maroka. Mai e Abraham ge maroka te la vagagarila lou, eia ge vei tataho pasia. Eala moli ouka, eia kama koramulia veia e Abraham ge vauru lou eia.
ROM 4:3 La vuhula, La Buk Tabu eia veia maie “E Abraham, eia tautaulailo te La Tahalo Uru, me oio moli ovolale La Tahalo Uru veia eia maroka, eia tetala seseleti.”
ROM 4:4 Mai la tahalo isa ge igogolu, eia ge abi la mapa oio vola. La mapala, eia kama la vaabila, la vuhula eia abia te la igogolu tetala.
ROM 4:5 Eala moli mai etato roromuli La Uru me eia ge masaga etatou mai ele, ale etato kama balava oio te la igogolu tegatou ale etato igoa, ouka. La Uru moli, eia ale vimaroka etatou te la iruru, eia ge hiloa mai ele veia etato tautaulailo tetala, me oio moli ovolale eia ge vagoilo etatou veia etato ge magiri maroka te la lagula, eia kati ge gabutatala la iruru tegatou.
ROM 4:6 Mai la merera te suara uru tamiteu e Iuda tai, e Devit, etato ge gabutatalea. La merera tetala, eia veia mai la tahalo ale La Tahalo Uru veia eia maroka, eia ge pou la balavala, eala moli eia kama la mapa la igogolu tetala. Me la merera te Devit aleie, eia kekesia te La Buk Tabu, eia maie:
ROM 4:7 Egiteu ale La Uru vimavulaha taro legiteu la iruru, egite pou te la sagegela, egiteu moli ale La Uru tau roboti la vulovulo giteu ale kama kokora.
ROM 4:8 Egiteu ale La Uru kamati ge kekesi tola la iruru tegiteu, egite sagegeti.
ROM 4:9 Tio, la merera te Devit te La Buk Tabu Ale Pala, eia mai ele, me mave eia ge puru somai moli tamiteu e Iuda moli? Ouka. La merera ale, eia tegatou tomi. Mai la merera te La Buk Tabu lou ale eau toi mugatia, mai e Abraham, eia tautaulailo te La Uru, me oio moli ovolale La Uru toi leia veia eia maroka.
ROM 4:10 Me ale La Uru vimaroka e Abraham mai ele, eia soukama veiala la vulovulola veia eia ge koro la vovola mai la irovilala mai eia la tahalo tetala.
ROM 4:11 Mulimuli e Abraham igoa mai ale La Uru veiala, eia goio koro la vovola mai la irovilala veia eia ge matagaga mai ele veia La Uru eia hilotia veia eia toro tetala, me oio vola eia toitia veia eia maroka. Me eia matagaga mai ele veia la iroromulila tetala moli eia vimarokea, kama la irovilala oio te la vovola. Me oio moli ovola, kara igoie, e Abraham eia magiri mai e tubu gatou tomi ale tautaulailo te La Uru, etato ale La Uru toitia veia etato maroka. La irovilalale, eia oio moli te la kalulu gatou, eia kama oio te la vovo gatou.
ROM 4:12 E Abraham, eia mai e tubu miteu e Iuda tai, mai amite ge roromulimuli La Uru mai eia, mai eia soukama abi la irovilala te La Uru, eala moli eia tautaulailo tetala. Mai amiteu e Iuda tai, amite kama ge abi bulalahu la irovilala te La Uru te la vovo miteu moli, ouka. Taritigi la irovilala tetala ge tabuli te la kalulu miteu e Iuda tai, amite ge tautaulailo tetala.
ROM 4:13 La Uru, eia tau la merera ale tikumu soio te Abraham me egiteu la hilila veia eia ge pigi la maututula tomi sotalo te la uluva giteu. Me La Uru eia kama toia mai ele veia ge koli la vulovulole Abraham ale taritigi ale eia tilimuli tomi moli la imoimo la merera tetala, ouka. La Uru vaurua mai ele, teale e Abraham tautaulailo tetala, me oio moli ovolale La Uru toi leia veia eia maroka.
ROM 4:14 La vuhula mai La Uru ge vibalava egiteu ale roromuli la imoimo la merera tetala tomi, mai ge mai ele, soioge eia ge mata mai la golu bulalahu ale etato tautaulailo tetala. Uka, ale eia toiti la merera la vibalavala tetala somai tegatou, ale tai ge mata mai la golu bulalahu. Umala etato ge veia la vagagari gatou lou eia vimaroka etatou.
ROM 4:15 Oio te la merera te La Uru, etato ge poga tavu la viluala, la vuhula la vulovulo gatou boto. Eala moli ale eia abi taroti la merera tetala veia eia kati ge tomu sasae la vulovulo gatou, ale etato kati koramulia ge poloa, etato mai ale maroka moli, etato la iruru oukati.
ROM 4:16 Eala, eia matagagati mai ele veia mai etato ge toro te La Uru, eia ge vibalava etatou tomi mai sesele la merera tetala soio te Abraham: Mai egiteu e Iuda, me egiteu ale kama e Iuda tai, etato tomi. La vuhula e Abraham, eia e tubu gatou tomi ale etato tautaulailo te La Uru,
ROM 4:17 mai La Buk Tabu eia veia La Uru vikara soio te Abraham maie mago “Eau tauti la merera ale tikumu veia oio te la maututula tomi la valalua me hatavivile usu ge veia eme e tubu giteu.” Me la merera tetalale eia ge puru somai tegatou tomi, mai la masasagala te La Uru ale la merera tetala eia vagari, eia vimahuli etatou, me te la vagagari la harela moli, eia vikara, la papaga tomi sibitala.
ROM 4:18 E Abraham, eia sau tola moli la merera te La Uru. La Uru tau la merera soio tetala ale eia mata mai ale kama ge puru, eala moli e Abraham kama piligia. Eala eia puru seseleti soio tetala mai La Uru veiala pala mago “Egiteu e tutubumu ge usu pepeho.”
ROM 4:19 La giligi la leavala tetala hagagavi ge salatu, La Uru vikara soio tetala mai ele, eala moli eia kama gabutala papai ale eia uruti, la vovola maviviruti, eia kati koramulia ge savu e latula. Eia kama gabutala papai tai ale e rutula eia variroboti.
ROM 4:20 Eia sau tola vagari sesele la merera te La Uru, eia kama piligia, eia vaisale sesele la isa La Uru mai ele.
ROM 4:21 Eia sau tola moli la merera te La Uru veia eia ge koramulia ge vipurua soio tetala mai la merera ale eia toitia.
ROM 4:22 Eala, oio moli te la vulovulolale, ale eia toro te La Uru, La Uru toi le Abraham veia eia maroka, eia tetala seseleti.
ROM 4:23 Me la merera ale “La Uru toi leia veia eia maroka”, eia kama soio te Abraham moli, ouka.
ROM 4:24 La merera ale, eia mai ale toia somai tai tegatou tomi ale etato la tahalo la marokala tetala, teale etato gabu tikumu La Tahalo Uru ale eia vimahuli e Iesus taro la pileho, eia vipoua veia eia La Uru gatou.
ROM 4:25 E Tamala sugu taroa veia eia ge goio te la pileho, la vuhula eia igo la gauru mai ele veia e Iesus ge vilua robo la iruru tegatou, veia eia ge vimahuli loua taro la lulu la pileho, veia mai etato ge tautaulailo te la pileho tetala etato ge maroka, etato ge pou la sagegela oio te la lagula.
ROM 5:1 Etato igoie koramulia ge magiri maroka oio te la lagu La Tahalo Uru mai etato ge tautaulailo tetala. Me oio vola, etato me La Tahalo Uru kati vipou gima. La vuhula, e Iesus peho roboti etatou,
ROM 5:2 eia igo la gauru mai ele veia mai etato ge tautaulailo tetala, etato ge koramulia ge goilo ge magiri maroka te la lagule Tamala. Mai alele, igoie etato sagege, la vuhula etato rovitia veia etato mulimuli ge pou la balavala oio te la matagaga te La Tahalo Uru.
ROM 5:3 Me etato rovitia veia la iloburukola ale sibitatala posa, etato ge sagege tai ovola, la vuhula etato matagagati veia mai etato ge ligi, ale la vimari te La Uru veia etato ge magiri vagari.
ROM 5:4 Me mai etato ge magiri vagari, etato ge la tahalo sesele te la kalulu gatou. Me mai etato ge sagaiti mai ele, etato ge veia ge sau tola vagari sesele la merera te La Uru, kama ge piligi loua, me oio vola La Uru tai eia ge sau tola etatou.
ROM 5:5 Me la vulovulo ale, etato kama galo ovola, la vuhula etato gabu seseletia la gilogo te La Tahalo Uru eia pigi roboti la kalulu gatou tomi isasasa ovola, ale la igogolu te La Kalulu La Marokala ale eia igogolu oilo tegatou, La Tahalo Uru eia bahea somai tegatou veia eia ge toro tegato.
ROM 5:6 Etato kama koramulia ge vimahuli rivu etatou, eala moli la imamala eia puruti ale e Kraist guviti somai veia ge peho robo etatou la valalua la vareagila.
ROM 5:7 Mai etato ge hilo la kalia la tahalo isa eia hagagavi ge vilua, etato kama koramulia ge tomo tavua, la vuhula etato taga la pileho. Eala moli mai la tahalo ale taritigi sesele, la riau, mai etato ge hiloa eia ge vilua, mave, isasasa moli tegatou mai la tahalo sesele, eia soioge ge tomo tavua, ka ouka? Eia ge ouka ge, la vuhula etato taga la pileho.
ROM 5:8 Eala moli La Tahalo Uru eia kama mai etatou, eia veipalatia la gilogo tetala somai tegatou, ale eia sugu taro e Latula veia eia ge vilua robo etatou la valalua me hatavivile la vareagila.
ROM 5:9 La kasosole Kraist eia vimarokati etatou, eala etato matagagati mai ele veia la kasosola ge vimahuli tai etatou taro la viluala te la igototolola te Tamala.
ROM 5:10 Mai etato so popou te la maligoma, etato so gagima La Tahalo Uru, goio e Iesus peho robo etatou, eala eia matagagati mai ele e Kraist mahuliti oilo te la kalulu gatou, eia ge vimahuli etatou mai ele.
ROM 5:11 Eala moli etato kama ge gabutatala moli la vimahulila tetala, ouka. Etato ge sagege pepeho tai ale etato me La Tahalo Uru kati vigima, etato me eia vikapopo seseleti lou oio te la pileho te Latula.
ROM 5:12 Etato ge abi la merera la tilovo te Adam. Oio te Adam sekela moli la iruru sibitala omai te la maututula, me oio vola etato la valalua me hatavivile tomi boru, etato poga tavu la pileho mai ele.
ROM 5:13 Ale La Uru soukama visibitala la merera tetala somai tegatou, etato oiloti te la iruru, eala moli La Uru kama kekesi tolea, la vuhula eia soukama toi la merera tetala somai te la maututula.
ROM 5:14 Sesele, alaura te la imamala te Adam kara ale la merera te La Uru sibitala oio te Moses, egiteu gabu la pileho, eala moli ale la kiloli la iruru te Adam moli, La Tahalo Uru kolia soio tegiteu tomi, egiteu ale vareagi pepeho mai e Adam, me egiteu ale vareagi moli bakisi tai, la vuhula egite tomi la tahalo la iruru.
ROM 5:15 Me oio te Adam sekela moli, la iruru sibitala, eala moli oio te Kraist sekela moli tai la vaabila te La Tahalo Uru somai tegatou eia sibitala, mai la gilogo tetala ale vimahuli etatou usu tomi.
ROM 5:16 Me la mapa la iruru te Adam eia uru, eia tikumu, eala moli la mapa la gilogo te La Tahalo Uru tai eia uru, eia bolehoho la vagagari la pileho ale sibitala oio te Adam. Oio te la iruru te la tahalo isa sekela moli, La Tahalo Uru tomu sasae la vulovulo gatou tomi veia etato poloti la merera tetala, eala moli La Uru pigiti la iruru tegatou tomi otalo te la uluva la gilogo tetala, eia vimaroka etatou mai ele.
ROM 5:17 Eia sesele, oio te la iruru te Adam sekela moli la pileho guvi te la maututula, me etato tomi mulimuliti la vulovulo la maligoma. Eala moli la gilogo te La Tahalo Uru eia kama bisi, ouka. Eia sugu taro e Latula somai tegatou, me oio moli te la pileho te Iesus Kraist sekela moli, etato ge sau tola la mahulila ale sesele.
ROM 5:18 La muluga la iruru te Adam sekela eia vitilo etatou tomi te la iruru. Eala moli la vulovulo ale taritigi te Kraist, ale eia roromuli e Tamala goio te la pileho, eia lube etatou taro la kilisi te Satan, eia vimahuli etatou.
ROM 5:19 La vareagila te la tahalo isa sekela visibitala la iruru somai tegatou tomi, eala moli oio te la vulovulole Kraist sekela ale taritigi, ale eia roromuli tataho e Tamala goio te la pileho, etato tomi usu ge sibitala maroka.
ROM 5:20 Sesele, oio te la imamala te Moses, La Tahalo Uru visibitala la merera tetala, eia igo molia mai ele veia etato ge matagaga veia la vulovulo gatou kama kokora. Eala moli la valalua hiloa veia la vulovulo la iruru eia malama tegiteu, egite goio vausu lou la iruru tegite. Eala moli etato ge matagaga tai veia la gilogo te La Tahalo Uru, eia kama bisi, eia uru sesele.
ROM 5:21 Mai pala la vulovulo ale kama kokora eia mamuga etatou, eia puli etatou soio te la pileho, igoie la vulovulo ale taritigi eia mamugati etatou. La gilogo te La Tahalo Uru eia vimaroka etatou, la pileho te Iesus Kraist La Uru gatou, eia puli etatou soio te la mahulila ale sesele, la kaluvula ge ouka.
ROM 6:1 La Tahalo Uru vauru seseleti la gilogo tetala somai tegatou, eala moli etato umala ge gabutatala gegeru veia etato ge vauru lou la iruru veia La Tahalo Uru ge vauru lou la gilogo tetala ale ge sabubu taroa,
ROM 6:2 ouka viruru. Etato mai ale pehoti vikapopo le Kraist, etato kati gabu la iruru. Eala, eia kama koramuli etato ge pou te la vulovulo ale kama kokora lou.
ROM 6:3 La vuhula, etato matagagati veia ale etato abiti la vuluhi te la isale Kraist Iesus, etato mai ale vikapopo le Kraist te la pileho tetala, etato poke taroti la iruru, etato pouti te la matagaga tetala.
ROM 6:4 Ale egite vuhi letatou la lalu te la isale Kraist, la vovo gatou gotalo tomi te la lalu, ale mai la tilovo te la pileho, egite pigi purusu etatou sotalo te la lalu mai ale e Kraist tai tabuli otalo te la lulu, veia e Tamala ge vahiliti loua te la vagagarila tetala ale taritigi veia etato tomi tai ge mahuli halaba lou, me la vuluhi eia la tilovo te la vimari tomi aleie.
ROM 6:5 Mai etato peho vikapopoti le Kraist, eia matagaga tai mai ele veia La Tahalo Uru ge vimahuli tai etatou mai eia.
ROM 6:6 Me etato rovi taia veia la vulovulo gatou ale kama kokora, etato mai ale katu tarotia oata te la tauvalautu te Kraist veia la vagagarile Satan ale pala kisi tola etatou eia ge kaluvu.
ROM 6:7 Eia ga mai sesele ale etato tai peho oata te la tauvalautu, la vuhula la tilovo aleie, eia te la pileho. Mai isa ge peho, la vulovulo ale kama kokora te la vovo eia kati kisia.
ROM 6:8 Eala moli mai etato ge peho vikapopo le Kraist, etato ge gabu tikumu taia veia etato ge mahuli rivu lou vikapopo leia.
ROM 6:9 La vuhula etato matagagati veia e Kraist eia hiliti taroti la pileho, eia kati ge peho lou, la vagagari la pileho eia kaluvuti oio tetala.
ROM 6:10 Eia peho vakasa moli me oio vola eia bolehoho e Satan te la vagagarila tetala, me oio te la pileho tetala eia lube etatou tomi taro la vulovulo la iruru, me ale eia goio mahuli lou, eia goio pou te la balile Tamala.
ROM 6:11 Me eia taritigi tai mai ele veia etato ge toi etatou tai veia etato peho taroti la iruru mai e Kraist, me etato pouti otalo te la uluvale Tamala vikapopo leia.
ROM 6:12 Tio, me oio moli ovola etato umalati ge roromuli la vulovulo te la vovo ale kama kokora, veia la masasagala te la vovo ge puli etatou soio te la iruru.
ROM 6:13 Umala tai veia etato ge mata sosoli La Gima veia eia ge lapu la lima gatou soio te la iruru, veia etato ge mulimuli la vulovulo ale kama kokora. Eala moli etato ge sugu taro la mahulila tegatou tomi isasasa soio te La Tahalo Uru veia eia ge mamuga etatou, la vuhula eia vimahuliti etato. Taritigi etato ge mata mai la tahalo ale hele taroti la pileho, etato ge vipou etatou otalo te la uluva La Tahalo Uru veia etato ge roromuli eia moli sekela, me etato ge pou tavu la vulovulo ale taritigi mai te la igogolu tetala.
ROM 6:14 Eia kama koramuli la iruru ge mamuga amutou, oukati. Amuto kati pou mai ale pala ale la merera te La Tahalo Uru tomu sasae la vulovulo mutou veia amuto boto. Ale igoie amuto pou otalo te la uluva La Tahalo Uru mai te la gilogo tetala.
ROM 6:15 Tio, ale igoie la merera te La Uru eia kati tomu sasae la vulovulo gatou, etato ge vei mave lou, etato ge veia ge pou tavu la iruru lou? Umala!
ROM 6:16 Amuto soioge kama rovia veia la tahalo ale eme tuga te la bilaha tetala, eia la mulugaluga taume. Mai eme ge mulimuli la iruru, eme ge poga tavu la pileho. Mai eme ge mulimuli La Tahalo Uru, eme ge poga tavu la vulovulo ale maroka.
ROM 6:17 Eala moli eau toi taritigi soata te La Tahalo Uru, la vuhula amuto kati gabutatala la vulovulo ale kama kokora, eia pala kisi tola amutou, me igoie amuto mulimuli tigi tatahoti la merera ale amiteu la bilalaha te Kraist tovo amutou ovola.
ROM 6:18 La vulovulo la iruru eia kati kisi tola amutou, me igoie amuto pou mai la bilalaha te La Tahalo Uru moli sekela.
ROM 6:19 Ale eau vikara la tilovo soio tamutou veia la mata mutou ge kope, veia amuto umalati ge la bilalaha te Satan, amuto ge la bilalaha te La Tahalo Uru, eau tovo matagaga amutou mai ele veia ge suli amutou, la vuhula la vulovulo ale kama kokora te la vovo eia soukama piligi amutou, amuto soukama tilo lou. Pala, amuto pou mai la bilalaha te Satan sekela, amuto tau la lima mutou soio te la vulovulo ale kama kokora, amuto kama gabutatala papai, amuto igo molia veia ge igo la iruru tomi moli. Eala moli igoie eia taritigi amuto ge pou mai la bilalaha te La Tahalo Uru, veia la vulovulo mutou ge maroka, amuto ge tau la lima mutou soio te la vulovulo tomi ale taritigi pepeho soio te la igogolu te La Tahalo Uru.
ROM 6:20 Ale pala la iruru kisi tola amutou, amuto kama gabutatala la vulovulo ale taritigi veia eia ge tomu sasae la vulovulo mutou.
ROM 6:21 Eala moli la vulovulo ale kama kokora, ale igoie amuto mahelati ovola, eia pala kama abia mutou isa la paga veia ge suli la pulolou tamutou, ouka gologolo. Oio vola amuto poga tavu moli la pileho.
ROM 6:22 Eala moli igoie, la iruru kati kisi tola amutou, amutou la bilalaha te La Tahalo Uru sekela moli. Me oio vola amuto sau tolati la vulovulo ale maroka ale amuto pou tavua, me la mahulila tai ale sesele, amuto sau tolea, kama ge kaluvu.
ROM 6:23 La mapa la iruru, eia la pileho moli, eala moli la vaabila te La Tahalo Uru ale eia abi bulalahua gatou, eia la mahulila ale sesele vikapopo le Kraist, la kaluvula ge ouka.
ROM 7:1 Amuto tabarabaragu ale amuto pou oio e Rom, mave, amuto soioge kama rovia veia la merera te Moses etato ge peho taroa, eia kati kisi etatou?
ROM 7:2 Me la vimari ale, eau veia ge tovo mulia soio te la taulaila. Mai la tavile isasa ge puli e haruala, eia ge pou te la uluvale haruala kara ale eia ge peho. Me mai e haruala ge peho taroa, la tavile eia kati taulai.
ROM 7:3 Eala moli mai e haruala ge soloio, me e rutula goio puli polo isasa, eia ruruti. Eala moli mai e haruala ge peho, mai eia goio puli polo isasa, eia kama ruru.
ROM 7:4 Tio la merera ale, eau ge tovoa somai tegatou. Amuto tabarabaragu, e Kraist goio te la pileho veia eia ge peho robo etatou. Etato gabu tikumu la pileho tetala, me oio vola etato mai ale peho vikapopo leia veia la merera te La Uru kamati ge viri robo etatou. Ale amuto peho mai ele, amuto ge taulai soio te Kraist, la vuhula eia mahuli taro la pileho, veia oio moli te la vulovulo gatou ale halaba etato ge veipala la vulovulo La Tahalo Uru.
ROM 7:5 Pala etato pou te la iruru, la vulovulo ale kama kokora oilo te la gabutatalala tegatou, eia lapu etatou soio te Satan veia ge veipala la vulovulo ale ge lapu etatou soio te la pileho.
ROM 7:6 Eala moli e Kraist eia peho robo la iruru ale kisi tola etatou, etato kati pou lou te la kilisi ovola, etato mavulaha tatahoti veia ge suli la igogolu te La Uru mai te la gauru te La Kalulu La Marokala, kama la gauru ale pala ale etato vibaumuli etatou te la imoimo la merera tomi te Moses.
ROM 7:7 Mave, amuto soioge gabutatala veia eau tovo amutou veia la merera te Moses ale La Tahalo Uru abiala, veia la mererale eia kama kokora, ia? Ouka viruru. Mai la merera ge ouka, etato kama ge matagaga te la iruru. Eau ge tovo mulia soio te la vulovulo gatou mai etato hate saga tavu la golu te tabara gatou isasa. La vulovulo ale, la merera te La Tahalo Uru eia mera taro etatou ovola.
ROM 7:8 Eala moli la gabutatalala taku te la iruru, eia karasukuau mai ele veia eau ge isu tavu lou la golugolu tegiteu e tabarabaragu. Mai alele, eia matagagati veia mai la merera ge ouka, la vagagari la iruru tai ge ouka.
ROM 7:9 Etato pala pou tataho moli, etato kama gabutatala papai, kara ale etato matagagati te la merera te La Uru. Tio me oio volale la vulovulo la iruru eia goio sokoa veia ge lapu vagari etatou soio te la gauru ale kama kokora,
ROM 7:10 me etato goio poga tavu la pileho ovola. Me etato sivutia mai ele veia la merera te La Uru ale eia bahea veia ge vimahuli etatou, eia visibitala moli la pileho.
ROM 7:11 La vuhula, la vulovulo la iruru, etato hiloa mai ele veia la merera te La Uru eia abiala la gauru ale eia ge bili etatou ovola, tio eia goio tutugolo etato, me oio moli te la merera te La Uru, la vulovulo la iruru eia goio bili taro etatou.
ROM 7:12 Tio, me eia matagagati veia la merera te La Uru, eia maroka, eia matata, eia taritigi tomi moli.
ROM 7:13 Me etato ge veia mave, la paga ale taritigi, eia lapu etatou soio te la pileho? Ouka viruru. La vulovulo la iruru moli, eia bili etatou, kama la merera te La Uru. La iruru abi la merera ale taritigi te La Uru, me oio moli ovola eia visibitala la pileho somai tegatou veia etato ge matagaga te la vulovulo gatou ale etato ruru ovola. Eala, la merera te La Uru eia vimatagaga lou etatou mai ele veia etato ge rovia veia la vulovulo la iruru, eia la iruru sesele, eia kama kokora viruru.
ROM 7:14 Etato matagagati veia la merera te La Uru eia la paga te la kalulu gatou, eala moli etato la tahalo la vovo kama gabu tikumu la kalulu gatou, La Gima mai ale taholati etatou.
ROM 7:15 Me eau, e Pol, eau mai ale kama rovi tigi la vuhu la vulovulogu sesele ale kama kokora, ale eau igigoa! La vulovulo ale taritigi eau masagea veia ge igoa, eau kama igoa. Me la vulovulo ale kama kokora, eau veia eau umala ge igoa, eau goio igo molia!
ROM 7:16 Eau gima la gauru la iruru, eala moli eau goio mulimulia, eala eau rovia mai ele veia la kalulugu eia matagagati veia la merera te La Uru eia taritigi.
ROM 7:17 Me eia matagagati tai mai ele veia eia kama la kalulugu ale visibitala la iruru, ouka. La tilalau taku moli ale oilo te la tiagu, la iruru usu oilo vola, eia vitiloau.
ROM 7:18 Eau matagagati veia oilo te la tilalau taku mai te la masasagala te la vovo, la paga isa ale taritigi kama oio. La vuhula eau masaga tavu la vulovulo ale taritigi, eala moli eau kama koramulia ge mulimulia.
ROM 7:19 Ale eau mulimulia, kama la vulovulo ale taritigi ale eau masagea, ouka. Eau mulimuli moli la vulovulo la iruru ale eau kama masagea.
ROM 7:20 Tio me eia matagagati mai ele veia ale eau mulimuli la vulovulo ale eau kama masagea, ale kama te la kalulugu sesele ale vitiloau, ouka. La tilalau moli ale oilo te la tiagu, la iruru usu tabuli ovola, eia visibitala la iruru oio te la limagu.
ROM 7:21 Tio, me oio vola, eau sivutitia veia mai eau ge gabutatala veia ge igo isa la vulovulo ale taritigi, la iruru eia magiri hagagavi moli, eia raragiti veia ge vitiloau.
ROM 7:22 Mai te la gabutatalala taku sesele, eau masaga pepeho la merera te La Tahalo Uru.
ROM 7:23 Eala moli la limagu kama roromuli la gabutatalala taku, la vovogu eia mai ale vaubi soio te la gabutatalala taku, me la masasagala te la vovo eia kisi toleau, eia baheau soio te la iruru.
ROM 7:24 E maura eau! Ere ge vimahuliau taro la masasagala te la vovo ale lapuau soio te la pileho?
ROM 7:25 Taritigi pepeho soata te La Tahalo Uru, teale eia vimahulitiau te la pileho te Latula e Iesus Kraist, La Uru gatou. Tio, me eau matagagati mai ele veia te la pulolou taku igoie, te la gabutatalala taku, eau la bilalaha te la merera te La Tahalo Uru, eala moli te la masasagala taku te la vovo, la vulovulo la iruru eia soloio kisi toleau.
ROM 8:1 Taritigi etato ge matagaga veia igoie, la merera te La Tahalo Uru eia kati koramulia ge tomu sasae la vulovulo gatou ale tautaulailo te Kraist Iesus, me eia mahuli vikapopo letatou.
ROM 8:2 La vuhula, la gauru ale halaba te La Kalulu La Marokala, eia vimahuliti etatou soio te la pulolou la marokala vikapopo le Kraist Iesus, me oio vola etato pou la balavala, la merera te La Tahalo Uru ale pala tomu sasae la vulovulo gatou, eia kati kisi tola etatou veia ge lapu etatou soio te la pileho, oukati.
ROM 8:3 La merera te La Tahalo Uru ale eia abiale Moses eia kama koramulia ge suli etatou, la vuhula oio te la vulovulo ale kama kokora te la vovo, etatou la valalua me hatavivile kama magiri vagari. Eala moli igoie, La Tahalo Uru eia ili paati la gauru tegatou, eia baha e Latula, eia sibitala mai la tahalo la vovo mai sesele etatou, veia eia ge rou rivu lou etatou taro la limale Satan. Me oio vola, La Tahalo Uru bolehoho la vulovulo la iruru ale mahuli oilo tegatou,
ROM 8:4 veia etato ge magiri maroka oio te la lagula, etato kati ge boto te la merera tetala. La vuhula, etato igoie kati mulimuli la vulovulo la iruru, etato mulimuli la vulovulo La Kalulu La Marokala.
ROM 8:5 Mai etato ge mulimuli la vulovulo la iruru, etato gabutatala moli la masasagala te la vovo. Eala moli mai etato ge mulimuli la vulovulo La Kalulu La Marokala, etato mulimuli seseleti la masasagala te La Kalulu La Uru.
ROM 8:6 Mai etato ge mulimuli la masasagala te la vovo, etato ge poga tavu la pileho. Eala moli mai etato ge mulimuli la masasagala te La Kalulu La Uru, etato ge mahuli, la tia gatou oilo eia ge malilo tataho.
ROM 8:7 La vuhula, mai etato ge mulimuli la masasagala te la vovo, etato mai ale gima La Tahalo Uru. La vuhula etato vareagagi, me etato kama koramuli tai ge mulimuli tomi la masasagala te La Tahalo Uru.
ROM 8:8 Eia sesele, mai la masasagala te la vovo ge mamuga etatou, La Tahalo Uru, eia kama ge sagege sesele te la vulovulo gatou, ale etato igigoa te la matala.
ROM 8:9 Eala moli etatou ale te Kraist, la vulovulo te la vovo ale kama kokora, eia kati koramulia ge mamuga etatou. Mai La Kalulu La Tahalo Uru eia tabuli sesele oilo la tia mutou, amuto ge roromuli moli eia sekela. Mai La Kalulule Kraist eia kama oio taume, eme kama tetala.
ROM 8:10 Mai e Kraist ge pou vikapopo leme, la vovomu ge poga tavu la pileho mai la mapa la iruru taume, eala moli la kalulumu ge mahuli, la vuhula e Kraist vimarokatime.
ROM 8:11 Eia sesele, La Kalulu La Uru eia vagari, eia vimahuli e Iesus taro la lulu la pileho. Me eia sesele mai ele veia mai eia ge pou taume, la vagagarila ale uru eia ge vimahuli la vovomu tai taro la pileho, la vuhula la kalulula oioti taume, eia tabuli sesele oilo te la tiamu.
ROM 8:12 Amuto tabarabaragu, eia sesele veia mai La Kalulu La Marokala eia pou sesele oilo te la tia gatou, etatou mai la bilalaha te La Uru, etato kamati la bilalaha te la vulovulo la vovo ale kama kokora.
ROM 8:13 Mai etato ge roromuli la vulovulo la iruru, etato ge poga tavu la pileho. Eala moli mai te la vagagari La Kalulu La Marokala etato ge bili peho la vulovulo la iruru ale so mahulihuli oilo tegatou, etato ge mahuli.
ROM 8:14 Etatou ale roromuli La Kalulu La Tahalo Uru, etato e latatu La Tahalo Uru sesele, e Satan kati koramulia ge lapu etato soio te la iruru veia La Tahalo Uru ge vilai etatou.
ROM 8:15 Eala, etato umalati ge mai e guliliki isa bisi ale tataga egite ururu. La Kalulu La Marokala eia visibitala etatou mai e latatu La Tahalo Uru sesele, me oio moli te la isala etato ge tola maie “Tete, tete!”
ROM 8:16 Etato rovitia mai ele veia eia e Tama gatou, la vuhula La Kalulula me la kalulu gatou isasasa eia vipou vikapopoti, eia veia gatou mai ele.
ROM 8:17 Me mai eia ge mai ale eau veitia, etato mai ale e latatu La Tahalo Uru sesele, etato ge tahola sesele la vibalavala tetala ale eia ge abia giteu ale tetala seseleti, etato ge mai e taitarile Kraist sesele. Eala moli etato ge poga tai la iloburukola mai tai e Kraist veia mulimuli etato ge pou te la matagaga tetala, vikapopo leia.
ROM 8:18 Eala moli eau, e Pol, eau gabutatalea veia mai etato ge ilo buruko vikapopo le Kraist, eia mai la golu bulalahu, la vuhula la kilolila ale La Uru ge abia gatou ovola, ale eia ge vipou etatou oio te la matagaga tetala, la vibalavala alele eia la paga ale isapolo sesele.
ROM 8:19 La vuhula, la maututula tomi, la pileho kisi tola egiteu, me eala etato tomi la valalua me hatavivile hate saga tavu la tapasi la haro, ale La Tahalo Uru ge vimahuli lou etatou e latatula ovola.
ROM 8:20 La vuhula, la vulovulo la pileho eia kama la masasagala sesele te La Tahalo Uru. Eia vipou moli etatou ovola veia etato ge gabua, eia viteteli etatou mai ele veia etato ge hiloa veia la vulovulo la iruru eia igo gegeruti la papaga tomi ale La Tahalo Uru vipoua.
ROM 8:21 Me eia igoa veia ge mulimuli eia ge abia gatou la gauru veia etato ge gali taro la kilisi te la iruru, etato kati ge rovi la pileho, etato ge pou tataho mai e latatula sesele.
ROM 8:22 Mai etato matagagati veia la iligiligi palati kara igoie, la maututula tomi egiteu gabu la iligi ovola mai la tavile ale gabu la iligi la piligo, la vuhula la ilea me la pileho soloio.
ROM 8:23 Me etatou tai ale te Kraist, etato sau tola La Kalulula mai la muluga la vaabila tetala somai tegatou, etatou tai, etato roberobe la iligi ale etato so pou taitali La Uru veia eia ge vagoilo etatou mai e latatula sesele, veia eia ge lube la vovo gatou taro la pileho mai la mapa la iruru, etato kati ge gabu la iligiligi.
ROM 8:24 La mererale, mai etato ge sau tolea, La Uru ge vimahuli lou etatou taro la pileho. Eala moli mai etato ge sau tola la merera ale etato soukama hilo la vavuala, etato veipalea mai ele veia etato pou tali tataho moli La Uru veia eia ge vimahuli etatou mai sesele ale eia veitia gatou ovola.
ROM 8:26 Me eau ge tovo muli loua mai tai ele te la visuli te La Kalulu La Marokala tai, veia oio te la vulovulo gatou ale etato sau tola la merera ale etato soukama hilo la vavuala, etato ge abi la vagagarila sesele te La Uru, etato kama koramulia ge maveve. Etato kama rovi tigi la gauru la kilaka, eala moli La Kalulu La Marokala eia magiriti te la muli gatou oio te la lagu La Uru, eia tali tavua, eia robe sesele, la merera ouka, la vuhula eia gogo etatou.
ROM 8:27 Me La Uru eia rovi la masova la tilali te La Kalulu La Marokala, la vuhula eia rovi la tilalau tegatou oilo la tia gatou, me eia kaka moli te la savelela tegatou veia La Uru ge suli etato mai la masasagala tetala sesele.
ROM 8:28 Me etato matagagati veia la rova ge sibitala, La Tahalo Uru eia rovitia, me eia ge igogolu vikapopo letatou mai etato tetala seseleti, mai etato ge pou te la uluvala.
ROM 8:29 Egiteu ale La Tahalo Uru visati legiteu veia egite ge tetala, eia hilovi tataho egiteu veia egite ge mai sesele e Latula veia e Kraist la posolagu, me etato usu ge goilo ge pou vitau me tabara vikapopo leia mai e taitarila sesele.
ROM 8:30 Eala, etato rovia mai ele veia La Tahalo Uru tolati etatou soio tetala, la valalua me hatavivile ale eia hiloviti etatou pala. Eia vimaroka tai etatou mai ele veia etato ge koramuli la pulolou la matagagala oio te la balila.
ROM 8:31 Tio, me oio te la vimari taku tomi ale eau veitia mutou oata, etato ge vei mave te la gilogo te La Tahalo Uru? Mai La Tahalo Uru ge toto obu etatou, ere ge magiri robo lou la gauru tegatou? Ouka, la gilogo tetala eia kama bisi.
ROM 8:32 Eia kama sigirobo e Latula la riau veia eia umala ge peho robo etatou, ouka, eia sugu taro molia veia eia ge rou rivu lou etatou tomi. Mai eia abia gatou e Latula, mave, isa ge veia eia kama ge abi loua gatou la visuli tomi? Ouka, la gilogo tetala eia uru sesele.
ROM 8:33 Isa kati ge tomu sasae la vulovulo gatou la valalua me hatavivile tetala. La vuhula La Tahalo Uru sekela eia toitia veia la iruru tegatou kaluvuti, etato marokati.
ROM 8:34 Eala, eia matagagati mai ele veia isa kati ge tomu sasae la vulovulo gatou. Mai isa ge vikara, e Iesus Kraist tai oio te la balile Tamala, eia taho loio tegatou. Eia peho, e Tamala vimahuli loua, eia igoie magiriti te la balile Tamala, eia taho tavu etatou mai ele.
ROM 8:35 Eala, eia matagagati veia isa kama koramulia ge vipou baa etatou taro la gilogo te La Tahalo Uru. La vagagari giteu la paga aleie ouka: La iloburukola, la savelela, la viligiligila, la vitolo, la viluala, la pileho tai. La vagagari giteu oiove? Egiteu tomi alele la golu bulalahu! Egite kama koramulia ge vipou baa etatou me La Tahalo Uru.
ROM 8:36 Mai La Buk Tabu Ale Pala eia veia maie: Te la haroharo tomi, amiteu ale la valalua taume, amite hagagavi ge poga la viluala oio te la lima giteu la gima. Egiteu la gima taume igo amiteu mai la bolo ale egite suguti la tabulela veia ge bilia.
ROM 8:37 Eala moli ouka, etatou ale tetala ge bolehoho la iloburukola tomi oio moli te la vagagarile Kraist, la vuhula eia peho robo etatou.
ROM 8:38 La vuhula, eau e Pol, eau rovitia veia la paga isa kama oio, ale koramulia ge vipou baa etatou taro la gilogo tetala: Mai la tilaga te la pileho kama koramulia ge abi taro etatou. Mai la gabutatalala te la vovo tai ale etato so mahulihuli, eia tai kama koramulia ge abi taro etatou. Mai egiteu la angelo tai kama ge abi taro etatou. Mai egiteu la bilalaha tomi te Satan tai kama koramulia ge abi taro etatou. Mai la merera isa ge sibitala gageie uka la merera tai ge sibitala mulimuli, eia kama koramulia ge ali la ilo gatou veia ge abi taro etatou.
ROM 8:39 Mai egiteu la kalulu ale kama kokora oata, me egiteu la valalua la vovo tai ale otalo te la magasa, egite isasa kama koramulia ge vipou baa etatou taro la gilogo tetala. La golu isa oukati lou oio, ale La Tahalo Uru vipoua, veia ge koramulia ge vipou baa etatou taro la gilogo te La Tahalo Uru tavu etatou ale etato sau tolea oio te Iesus Kraist, La Uru gatou.
ROM 9:1 Me eau, e Pol, eau veia ge veipalea maie veia eau ilo buruko sesele legiteu e Iuda, e valaluagu sesele. Me la vikararala taku eia sesele oata te Kraist, eau kama visigolo. La Kalulu La Marokala tai ale oilo la tiagu, eia vitikumu taia somai taku veia la merera taku eia sesele, me eau kama gabutatala papai ovola. Te la haroharo tomi, eau ligi sesele te la vulovulo giteu la valalua e Iuda.
ROM 9:3 Mai La Tahalo Uru ge abiagu la gauru, eau ge piligi la mahulila te la kalulugu veia e Kraist kati ge masaga eau, eau ge igo molia, mai eia ge lapu rivu la valalua taku soilo lou te La Uru.
ROM 9:4 Egiteu la valaluale, egite la valalua sesele tetala, eia hilovi egiteu, eia vipou egiteu te la matagaga tetala. Eia tau la merera tetala ale tikumu, ale sesele, soio tegiteu. Eia vahilo legiteu la gauru la lotu, eia veia giteu veia eia ge sau tola egiteu.
ROM 9:5 Eia visibitala egiteu te la hilile Abraham mite, e tutubu miteu ale pala, me oio te la hililale e Kraist tai sibitala oio vola. Taritigi pepeho soata te La Tahalo Uru, la visuli tetala eia uru, eia La Uru la maututula tomi, etato ge vaisalea, kara igoie, kara mulimuli, la tapasila ge ouka, eia sesele.
ROM 9:6 La Tahalo Uru hilovi egiteu e Iuda, eala moli ale igoie etato hiloa veia egiteu galoti, etato kama ge veia mai ele veia La Tahalo Uru visigolo egiteu. La vuhula, eia kama veia la valalua e Israel tomi ge tetala, ouka, eia visati legiteu isahari moli.
ROM 9:7 Mai tai ele, eia kama koramulia veia egiteu la hilile Abraham tomi ge toia veia egite e latatu La Uru sesele. La vuhula, La Uru toitia pala soio te Abraham maie mago “Oio moli tegiteu e tutubule latumu e Isak sekela la hilimu ale taku sesele ge sibitala.”
ROM 9:8 Me eia matagaga mai ele veia la merera te La Tahalo Uru kama ge puru soio tegiteu e tutubule Abraham tomi ale eia visibitala egiteu, ouka. La merera te La Tahalo Uru ge puru soio tegiteu isahari moli ale eia visati legiteu, egite sekela ge pou mai e tutubule Abraham sesele.
ROM 9:9 La vuhula, egite kama sibitala bulalahu, mai La Tahalo Uru moli eia toia soio te Abraham mago “Mai la imamala ge puruti, eau ge gomai lou taume, e rutumu uru e Sera ge savu, eia ge taposa e latu mulua, eia ge hatamale.”
ROM 9:10 Me la vimari ale, eau veia ge lapua soio te latule Abraham tai, e Isak. E rutula e Rebeka, e latula egira viboge, eala moli e tama girua isa moli, mai e tubu miteu e Iuda, e Isak uru.
ROM 9:11 Eala moli La Tahalo Uru viputumulitia veia ge visa le isa moli oio tegirua e latula iluale, veia ge tetala sesele. Eala, ale e Rebeka soukama pigo egirua, La Tahalo Uru veiala mago “Ale ge vimuga tegirua, eia ge la bilalaha e tarila.” Eala, eia matagaga veia La Tahalo Uru, eia igo molia mai ele te la masasagala tetala sekela moli, la vuhula e tila girua soukama pigo egirua, La Tahalo Uru goio veia mai ele veia e Iakob eia ge vulo uru te tuala. Eia kama pou muga veia ge mata muli muga la vulovulo girua veia eia taritigi, ka ouka. La Tahalo Uru visa le isa tegirua te la masasagala tetala sekela.
ROM 9:13 Mai La Buk Tabu eia vei matagagatia maie te la merera te La Uru, eia veia mago “Eau ge lagu tavu moli e Iakob, eala moli e Sau, eau kisu taroa.”
ROM 9:14 Me mave, etato ge veia mago “La Tahalo Uru eia kama gabutatala tigi”? Ouka.
ROM 9:15 La vuhula eia veiale Moses maie mago: Mai isa ge oio ale eau veia ge gogoa, tio eau ge gogoa, eau ge sulia, mai la masasagala taku sekela.
ROM 9:16 Eala, te la vimari tomi te Abraham, e Iakob me Sau, etato hiloa veia eia matagagati mai ele veia la gilogo te La Tahalo Uru eia kama sibitala mai te la masasagala tegatou, mai te la vulovulo gatou tai ale taritigi, ouka. Eia ge gogo etatou mai te la masasagala tetala sekela.
ROM 9:17 Mai oio tai te La Buk Tabu Ale Pala lou, La Tahalo Uru vei matagageale Parao ale eia vahilitia te la masasagala tetala sekela, eia veiala maie mago “Eau vahilitime mai la mulugaluga tegiteu e Gipto veia oio moli taume eau ge vahilo la maututula tomi la vagagarila taku, veia oio te la maututula tomi egite ge rovi la isagu.”
ROM 9:18 Me oio te la merera te La Buk Tabu aleie, eia matagaga veia La Tahalo Uru, eia ge gogo etatou mai te la masasagala tetala sekela, me mai eia ge masaga tai veia ge igo gegeru tai etatou veia etato kama ge loloa, ale tai eia ge igoa mai te la masasagala tetala moli.
ROM 9:19 Mave, soioge isa tamutou eia veia ge hiliti, eia ge vei mago “Tiele, La Tahalo Uru umalati ge tomu sasae la vulovulo gatou, la vuhula te la vulovulo gatou isasasa etato mulimuli moli la masasagala tetala sekela ale eia hilovi etatou veia isahari ge taritigi, isahari ge ouka.”
ROM 9:20 Eala moli tabaragu, eau ge tahi rivu lou eme maie mago “Eme ere, veia eme ge tahi taro La Tahalo Uru?” Mai la tahalo isasa ge pui la obu, mave, la obu ge hiliti ge tahi loua mago “Ilava eme puiau maie?” Ouka, eia kama koramuli, la vuhula la tahalo ge pui la obu mai te la masasagala tetala.
ROM 9:21 Me eia matagaga tai mai ele veia mai La Tahalo Uru eia pui etatou, me eia tabari etatou te la masasagala tetala, mai tai etatou la valalua mai isa ge pui la obu, eia koramulia ge pui la paga ale marasa mai la tokoromola, me eia ge pui tai la paga ale kama marasa.
ROM 9:22 La Tahalo Uru pui tabaribari etatou tai mai ele. Eia vipou etatou isahari, etato kama taritigi agi, eia raragi veia ge mata muli la iruru tegatou, eia pigi lou etatou mai la paga ale kama kokora. Me eia koramuli seselea mai ele veia eia ge veipala la vagagarila me la igototolola tetala somai tegatou, eala moli eia kama silaha taro hari etatou, eia abia gatou la baa mai etato ge vulo la vulovulo gatou.
ROM 9:23 La vuhula eia masagea veia ge vahilo letatou la gilogo tetala mai la matagaga tetala ale uru eia ge paga vei la kalulu gatou veia etato ale tetala ge rovi la gilogo tetala. Eia ge vagoilo tataho etatou te la matagaga tetala,
ROM 9:24 la vuhula eia tola etatou soilo tetala, kama amiteu e Iuda moli, eia tola tai egiteu la valalua isapolo tai ale logala.
ROM 9:25 Mai La Buk Tabu Ale Pala eia veia te la merera te Hosea, eia veia maie: Egiteu ale logala eau ge toia veia egite taku. La maratatila ale eau pala veia eau kama isua, eau ge toia veia eau isu egiteu. Me
ROM 9:26 Oio te la mautu ale pala eau pileti amutou, amuto ge lolo loua veia eau toiti lou amutou veia amutou e latatugu sesele, eau La Uru mutou ale eau mahuli.
ROM 9:27 Me oio te la merera te Aisaia tai soio tegiteu e Israel, eia veia maie mago: La valalua e Israel ge usu mai la magasa la mago, eala moli isahari moli ge mahuli utu,
ROM 9:28 la vuhula La Uru eia raragiti la mapa te la vulovulo la iruru veia ge koli haria soio te la maututula tomi.
ROM 9:29 Mai la merera te Aisaia tai eia vei mago: Mai La Uru kama ge piligi isahari e latatu gatou veia egite ge mahuli utu, etato ge sululu sapa mai la mautu ilua ale pala e Sodom, e Gomora.
ROM 9:30 Tio, oio te la vimari taku tomi ale eau so veveia mutou oatae, etato ge vei lou mave ovola e? Mai egiteu la valalua la maligoma, egite pala pou bububu moli, egite kama gabutatala papai ale egite poloti la merera te La Uru, la vuhula egite kama rovia. Eala moli igoie egite balavati ale egite mata kilalati veia mai egite ge sau tola La Uru, eia ge vimaroka egiteu, egite ge tetala.
ROM 9:31 Eala moli egiteu e Iuda ale vavala sesele veia ge visagege La Uru te la vulovulo giteu, egite boto sesele, egite kama maroka.
ROM 9:32 Me ilava La Uru veia egite boto mai ele? La vuhula egite gabutatala veia egite ge visagege La Uru mai te la vagagarila tegiteu lou. Egite kama mulimuli la gauru ale eia abia giteu veia egite ge gabu tikumu la pileho te Latula, veia eia ge vimaroka lou egiteu ovola. E Iesus eia magiri mai la obu ale tabuli robo la gauru tegiteu, egite goio tutuaki ovola.
ROM 9:33 Mai La Buk Tabu Ale Pala eia veia maie: Hiloa, eau ge baha la sosole taku, eia ge tabuli kabili te la valalua taku e Iuda, egite usu ge tutuaki ovola, egite ge boru. Eala moli mai isa ge tautaulailo te la riau taku ele, eia kama ge boru, eia kama ge mahela veia la vulovulola mumugu, eia ge maroka moli.
ROM 10:1 Amuto tabarabaragu, eau masaga pepehoa veia egite Iuda ge beu loua soio te La Uru veia eia ge vimahuli egiteu. Me la kilaka taku tavu La Tahalo Uru eia mai tai ele veia eia ge vimahuli egiteu e Iuda.
ROM 10:2 Eau rovi la vulovulo giteu, egite vagari tavu sesele la merera te La Tahalo Uru, eala moli egite vagari bulalahu moli, egite kama rovi sesele la masova la merera tetala.
ROM 10:3 Egite kama masagea veia ge gabu tikumu la gauru ale La Tahalo Uru raragitia veia etato ge sibitala maroka lou te la isale Kraist, etato ge goilo lou tetala. Egite goio tovo lalai veia ge ili paa la gauru tegiteu lou, eala egite kama roromuli la merera te La Tahalo Uru ale eia veia gatou veia etato ge maroka lou ovola.
ROM 10:4 La pileho te Kraist eia vikaluvu la vagagari la merera te La Tahalo Uru ale eia abiale Moses, veia eia kati ge tomu sasae la vulovulo gatou. Etato tomi ale gabu tikumu e Kraist, e Tamala ge toia veia etato maroka.
ROM 10:5 La merera te Moses eia veipalatia veia mai isa ge mulimuli la imoimo la merera tomi te La Tahalo Uru, La Uru ge toia veia eia maroka, eia ge vimahulia.
ROM 10:6 Eala moli la gauru ale igoie etato ge sibitala maroka ovola, eia oio matagaga moliti, la vuhula La Tahalo Uru eia sugu taroti e Kraist somai tegatou. Mai te la kekesi te Moses eia veia umala etato ge gabutatala maie veia etato ge paa soata la mori. Mai ale eia veia mai ele, eia mai ale veia etato kama ge vavala veia ge puli e Kraist sotalo te la maututula.
ROM 10:7 Me la merera te Moses isa lou maie veia umala etato ge gabutatalea veia ge paa sotalo tavu tegiteu ale pehoti. Mai ale eia veia mai ele, eia mai ale veia etato kama ge vavala veia ge tovo lalai veia ge vimahuli lou e Kraist taro la pileho.
ROM 10:8 Me la merera tomi ale, la masovala eia maie “La merera te La Tahalo Uru eia oio hagagaviti, eia tabuliti te la hare mutou ele, oilo tai te la tia mutou.” Me oio te la merera te Moses ale, eia matagaga veia la merera te La Tahalo Uru eia valolo matagagati etatou te Kraist, mai ale igoie etato tai valolo oio vola veia la valalua me hatavivile ge sau tolea. Mai eia matagagati mai ele veia la gauru la vimahulila tegatou eia oio kopeti.
ROM 10:9 Mai isa ge veipalea te la harela mago “E Iesus, eia La Uru taku” me mai eia ge gabu tikumu taia mai ele oilo te la tiala veia eia sesele, tio La Tahalo Uru ge vimahulia.
ROM 10:10 La vuhula, la merera te La Tahalo Uru, mai eia ge tabuli sesele oilo la tia gatou, eia matagaga mai ele veia etato tetalati, etato marokati. Me oio tai te la merera tegatou ale etato ge toia veia e Iesus eia La Uru tegatou, tio la merera ale etato toia mai ele te la hare gatou eia mai ale vimahuliti etatou.
ROM 10:11 Mai la merera te Aisaia eia veipalatia te La Buk Tabu Ale Pala maie “La tahalo ale sau tola La Riau te La Tahalo Uru, eia kama ge mahela, eia kama ge galo.”
ROM 10:12 Me la mererale, eia pigi robo etatou tomi, amiteu e Iuda, me amutou ale logala, etato visauru moli. La Uru, eia La Uru tegatou tomi, eia ge vibalava etatou tomi ale tali tavua.
ROM 10:13 Mai La Buk Tabu lou eia veitia maie “Egite tomi ale tali tavu La Uru, eia ge vimahuli egiteu.”
ROM 10:14 Eala moli la valalua me hatavivile ale soukama lolo la isala, egite ge tali tavua mave? La vuhula egite kama lolo la valolo tetala, eala egite kama koramulia ge sau tolea veia ge tali tavua.
ROM 10:15 Mai egite la tahalo la valolo kama ge goio tegiteu, egite ge paua moli, mai La Buk Tabu eia veia maie “La guluvi tegiteu ale vahari la valolo ale taritigi, eia taritigi pepeho pasi!”
ROM 10:16 Me eia sesele, amite la tahalo la bilalaha te La Tahalo Uru valoloti egiteu e Iuda, eala moli egite usu kama masagea veia ge loloa. Mai e Aisaia eia veia te La Buk Tabu Ale Pala maie mago “Tahalo Uru, ere ge lolo la merera taume veia eia sesele?”
ROM 10:17 Eala moli etato rovia veia la gauru isa moli sekela oio veia etato ge sau tola e Kraist oio vola, mai egite ge valolo etatou, me etato ge loloa, veia la merera te Kraist sekela moli eia ge vimahuli etatou.
ROM 10:18 Eala moli eau veia ge tahi amutou maie: Mai egiteu e Iuda ge veia egite soukama lolo la valolo te Kraist, eia sesele ka ouka? Ouka, eia kama sesele, la merera te La Buk Tabu Ale Pala eia veia maie: La hare giteu la bilalaha te La Uru, eia tugati soio te la maututula tomi, la merera tegiteu la bilalaha eia vavavati soio te la igaga la magasa tomi.
ROM 10:19 Me eau veia ge tahi lou amutou veia la mererale eia matagaga tegiteu e Iuda, ka ouka? Eia matagaga, mai la merera te Moses te La Buk Tabu Ale Pala eia veia maie: Amuto la valalua taku ge maisu totoloa giteu ale logala, egiteu ale so popou la paua moli, la vuhula eau ge vagoilo egiteu taku, egite ge pepe amutou, egite ge pigi amutou sotigu.
ROM 10:20 Me e Aisaia tai, eia kama taga, eia goio suli vagari lou la valolo alele soio tegiteu, eia veia maie: La valalua ale kama paa muliau, egite sivutiau. Egiteu ale kama tali tavuau, eau veipalatiau soio tegiteu.
ROM 10:21 Eala moli tegiteu e Iuda, e Aisaia toi la merera soio tegiteu maie: Palati, kara igoie, eau sugu la limagu soio tavu egiteu la valalua me hatavivile la vareagila ale kama lolo vulai, veia ge puli rivu egiteu somai taku, eala moli egite tou eau.
ROM 11:1 Tio, me eau veia ge tahi amutou la tilahi isa lou maie: La Tahalo Uru, eia pileti la valalua tetala tomi, ka ouka? Ouka viruru. Hiloa, eau e Pol, eau la tau Iuda, te la hilile Beniamin, e tubugu e Abraham.
ROM 11:2 Eala eia matagagati veia La Tahalo Uru kama pile la valalua me hatavivile ale eia visati legiteu veia egiteu tetala. Mai La Buk Tabu eia veia te la bilalaha ale pala, e Lisa, eia tali tavu La Tahalo Uru veia egiteu e Israel kama togo la lotu,
ROM 11:3 eia veia maie mago “Tahalo Uru, egite bili taro tomiti egiteu la bilalaha taume. Egite igo gegeruti la lotu taume. Eau sekela moli mahuli utu, me egite veia ge lao tola taiau veia ge biliau.”
ROM 11:4 Tio eia vikara soio te La Tahalo Uru mai ele, me La Uru goio kolia mave? Eia veiala mago “Eau hilovi legiteu la valalua me hatavivile taku salatu savulu vitu, egite soukama lotu tavu la taua e Baal.”
ROM 11:5 Me mai tai ele, igoie, la gale la valalua soloio kabili tegiteu e Iuda ale so sau tola moli La Tahalo Uru, eia gogo egiteu, eia visati legiteu mai la masasagala tetala.
ROM 11:6 Me taritigi eia ge matagaga mai ele veia oio te la gilogo tetala moli eia ge vimahuli egiteu. Kama te la vulovulo giteu ale taritigi veia La Tahalo Uru ge hiloa veia ge kolia, veia ge vimahuli egiteu, ouka. Mai ge mai ele, kama la vavua la gilogo te La Tahalo Uru ale vimahuli egiteu.
ROM 11:7 Tio, me oio volale, etato ge vei mave lou? La valalua e Iuda, egite kama sivuti la gilogo te La Tahalo Uru, mai egite paa muli vagaria oio te la vulovulo giteu tomi ale egite mulimulia. La gale giteu bakisi moli, kama usu, egite sivuti la gilogo te La Tahalo Uru. Eala moli usu tegiteu, la tia giteu vagari mai la uati, egite kati lolo la merera te La Tahalo Uru.
ROM 11:8 Mai La Buk Tabu lou eia veia maie: La Tahalo Uru igo maigi la tia giteu, eia igo maligoma la mata giteu, eia tagu robo tai la gavusa giteu, eala kara igoie egite kati matagaga.
ROM 11:9 Mai la vikarara la tilovo te Devit tai te La Buk Tabu Ale Pala, eia vile la vulovulo giteu ale egite lolo bibibi la merera te Moses, mai la tahalo ale ali maru, eala moli egite kama roromulia. Eala e Devit igo totolo egiteu maie mago: Egite ge ali maru, egite ge veia egite pou tataho, eala moli egite tiloti, egite ge boru, La Uru ge vilai egiteu.
ROM 11:10 La mata giteu ge maligoma, egite kati ge matagaga. Egite ge bole la tabule ale tikumu bara te la vulovulo giteu, egite ge vigala makoko molia.
ROM 11:11 Tio, eau veia ge tahi lou amutou la tilahi isa lou maie: Ale egite Iuda boru, egite kamati ge hiliti lou? Ouka, egite ge hiliti lou. Ale egite boru, la iruru tegiteu eia visibitala la vimahulila soio tamutou la valalua la maligoma, me egite Iuda ge hiloa, egite ge maisu totolo sesele teale amutou abiti la muli giteu.
ROM 11:12 La iruru tegite Iuda, eia vibalava la maututula tomi. Mai ale egite boru, la valalua me hatavivile tomi balavati. Eala, eia matagaga pepeho mai ele veia mai mulimuli egite Iuda ge vulo halaba lou la gabutatalala tegiteu soio te Kraist, etato tomi ge balava pepeho te la sagegela te La Tahalo Uru ale eia ge hiloa.
ROM 11:13 Me eau veia ge vei matagagea mutou la valalua ale pala pou te la maligoma, eau ge veia mutou maie: Eau la bilalaha te La Tahalo Uru, eia baheau somai tamutou te la igogolu taku ele, eau veia ge veipalea soio te la maututula tomi,
ROM 11:14 veia mai egite Iuda ge loloa veia amuto sau tolati la merera te La Tahalo Uru, egite ge maisu totolo, egite tai isahari soioge ge goilo tai te la mahulila te Kraist.
ROM 11:15 Ale La Tahalo Uru pileti egite Iuda, eia veia ge abia mutou la baa veia amuto ge goilo. Mai egite Iuda ge vulo halaba, me La Tahalo Uru ge masaga lou egiteu, eia ge mai la paga ale isapolo sesele, mai la tahalo ale mahuli taro la pileho, la vuhula egiteu igoie mai ale pehoti.
ROM 11:16 Ale amutou ale logala amutou kama e Iuda, amuto igoie sibitala maroka, la vuhula oio moli tegiteu e Iuda lou, la vuhula e ururu tegite Iuda e Abraham mite, La Tahalo Uru veia egiteu tetala seseleti, egite mai la ua la obu, la kabili la obu, me etato mai la halalala. Mai eau ge tovo muli taia soio te la ilali: Etato sau tola la galevi la ilali isa moli, etato kaka, La Tahalo Uru goio vibalava la ilali tomi veia eia maroka. Eala, mai la kabili la obu ge taritigi, etato la halalala tomi tai ge taritigi.
ROM 11:17 Me eia sesele, La Tahalo Uru eia vali tarotia la halala la obu sesele tetala, me eia vagoilo halabati amutou veia eia ge kisi amutou soio te la obu veia amuto ge visivisia tola soio vola. Eala, igoie, amuto kamati kusi bulalahu mai la obu la hohoi, amuto tubu kaseka tataho oio te la obu te La Tahalo Uru maiti egiteu e Iuda sesele.
ROM 11:18 Eala moli umala amuto ge vei tataho rivu lou amutou veia amuto taritigi, me egiteu la halalala ale La Tahalo Uru vali tarotia eia kama kokora. Amuto ge gabutatala tigi, la obu eia kama mahuli oio tamutou, ouka, amuto mahuli oio te la obu.
ROM 11:19 Amuto souka ge hiliti ge vei loua maie mago “La Tahalo Uru vali taro la halala la obu sesele veia ge abia miteu la baa veia amite ge goilo.”
ROM 11:20 Me la mererale eia sesele, eala moli La Tahalo Uru vali taro egiteu te la vareagila tegiteu ale egite kama sau tola la merera tetala. Mai ale amuto so sau tatola moli e Kraist, La Tahalo Uru kama ge vali taro amutou. Eala moli eia kama vagari veia amuto ge hate tola lou, ge piligi e Kraist, me La Tahalo Uru ge vali taro tai amutou. Umala pakakasa te la pulolou tamutou ale amuto sau tola halabea te Kraist. Amuto ge pou makovu tataho mai la tilogo.
ROM 11:21 La Tahalo Uru kama gogo egiteu e Iuda ale mai te la halala la obu tetala sesele. Me oio volale taritigi amuto ge matagaga veia La Tahalo Uru kama ge mata soli amutou ale goilo halaba mai amuto ge vareagi, ouka gologolo.
ROM 11:22 La Tahalo Uru, eia la tahalo la mutelela, eia la tahalo la igototolola tai. Egiteu ale boru, eia vilai egiteu. Eala moli eia suli pepeho amutou mai amuto ge sau tola la gilogo tetala, eala moli mai amuto ge vareagi lou, ge piligi la merera tetala, eia ge vali taro tai amutou.
ROM 11:23 Me mai egiteu e Iuda tai ge piligi la vulovulo giteu te la vareagila, ale egite kama gabu tikumu e Kraist, La Tahalo Uru ge vagoilo lou egiteu te la muli giteu oio tetala, La Uru ge koramulia ge igoa mai ele.
ROM 11:24 Amutou la valalua la maligoma, amuto mai la obu ale kusi bulalahu te la hohoi, eala moli igoie La Tahalo Uru vagoiloti amutou te la obu tetala ale taritigi, veia amuto ge magiri mai la halalala sesele, amuto ge tubu tataho, ge vua pepeho. Egiteu e Iuda, egite kama la obu ale kusi bulalahu, egite mai la obu te La Tahalo Uru sesele. Eala eia kama vagari veia La Tahalo Uru ge abi rivu lou egiteu veia ge vagoilo lou egiteu te la obu tetala, egite ge tubu lou oio vola.
ROM 11:25 Amuto tabarabaragu, la merera ale, pala eia tabuli kokovu, gageie eau ge veipalea mutou. Mai amuto ge loloa, amuto kama ge pakakasa te la gilogo te La Tahalo Uru ale amuto igoie balavatila. Me la mererale, eia maie: La vareagila tegiteu e Iuda, eia mulimuli ge kaluvu, La Tahalo Uru tau moli la baa ale amuto la valalua ale logala ge goilo pala tetala, kara la giligi mutou ge poga la masasagala tetala.
ROM 11:26 Eala, eia matagaga veia la valalua e Iuda tomi, La Tahalo Uru ge vimahuli egiteu, mai e Aisaia veia te La Buk Tabu Ale Pala eia veipala la merera te La Uru soio tegiteu e Iuda maie: La tahalo la vimahuli, eia ge sibitala oilo te la hilile Iakob moli, eia ge abi taro la vulovulo la iruru tegiteu e valaluala.
ROM 11:27 Eau ge vimavulaha taro la valalua taku la iruru tegiteu, mai la merera taku ale pala eau veitiale Iakob.
ROM 11:28 Eala moli te la valolo ale taritigi alele, egiteu e Iuda goio gima La Tahalo Uru oio vola, me igoie amuto ale logala balavati, la vuhula amuto abiti la muli giteu. Eala moli la masasagala te La Tahalo Uru tavu egiteu, ale eia hiloviti egiteu, eia soloio, la vuhula eia tauti la merera tetala soio tegiteu e ururu mai e Abraham mite veia egite ge tetala.
ROM 11:29 La vuhula, La Tahalo Uru kama koramulia veia ge vulo la gabutatalala tetala veia mai la tahalo ale eia hilovia, me eia tola tavutia, veia eia ge piligi loua, ouka.
ROM 11:30 Amuto pala tou la merera te La Tahalo Uru, eala moli egiteu e Iuda goio vareagiala, La Uru goio gogo amutou, eia abia mutou la baa ale amuto ge goilo tetala, amuto abi la muli giteu e Iuda.
ROM 11:31 Eala moli te la imamala ale igoie, egite Iuda magiri logala, egite kati tetala. Eala moli mulimuli egite ge goilo lou vikapopo le amutou, etato tomi ge pou la balavala te la gilogo tetala.
ROM 11:32 Pala, La Tahalo Uru eia piligi etatou soio te la vulovulo la iruru ale etato vagari tavua, eala moli eia gabutatalatia veia mulimuli eia ge kisi vikapopo la valalua tomi, egiteu e Iuda, egiteu tai ale kama e Iuda, veia etato tomi vikapopo ge pou la balavala te la gilogo tetala ale uru.
ROM 11:33 Hiloa, ale la vuliti uru te La Tahalo Uru ale eia vibalava la kalulu gatou oio vola, eia uru pasi. La viputumulila tetala eia tikumu pepeho, etato la tahalo la vovo kama koramulia ge rovia. La vulovulola isapolo, etato kama koramulia ge rovi la vuhula. Mai La Buk Tabu Ale Pala eia veia maie:
ROM 11:34 Ere ge rovi la gabutatalala te La Uru? Ere ge koramulia ge suli la gabutatalala tetala?
ROM 11:35 Ere tahalo ge sulia veia La Uru ge kolia?
ROM 11:36 La Uru, eia vipou la golugolu tomi. Tio oio moli te la vagagarila tetala, la golugolu tomi eia mahuli, egite pou mai la vitokoromola tetala. Etato ge vaisale La Uru te la matagaga tetala, eia uru. Etato ge bole sae la isa La Uru oata, etato ge vaisalea, la tapasila ge ouka, eala moli ele.
ROM 12:1 Amuto tabarabaragu, La Tahalo Uru, eia gogo etatou, eia sugu taro e Kraist somai tegatou. Eala eau kaka amutou tomi isasasa veia amuto ge sugu taro la mahulila tamutou soio te La Tahalo Uru mai la vaabila ale maroka, eia ge lege sisigi le amutou. Mai amuto ge igoa mai ele, ale amuto lotu tavu seselea.
ROM 12:2 Umalati mulimuli la vulovulo ale kama kokora te la vovo. Eala moli amuto ge sugu taro la mahulila tamutou soio tetala veia La Tahalo Uru ge vulo halaba sesele la vulo mutou veia la kalulu mutou tomi isasasa ge sibitala maroka, amuto ge rovi tataho la gauru tetala, eia ge lege sisigi le amutou.
ROM 12:3 La Tahalo Uru hilovitiau te la gilogo tetala veia eau ge la bilalaha tetala. Tio me oio vola eau karasuku amutou te la merera tetala maie: Umala eme ge vauru loume veia eme isasa. Gabutatala tigi, umala eme ge vauru bulalahu eme, eme ge hilovi tigi muga la mari ale La Uru abiamu veia eme la tahalo te Kraist sesele ka ouka.
ROM 12:4 Etatou ale te Kraist, etato igoie pou mai la vovole Kraist sesele. Mai etato tomi la lima gatou, la vaha gatou, la kuku gatou oio, me la igogolu tai oio te la baututu la vovo gatou isasasa, La Tahalo Uru tabaritia mai ele. La lima gatou eia te la igogolu isa, la vaha gatou eia te la igogolu isapolo, eala moli la vovo gatou eia isa moli.
ROM 12:5 Eala, eia matagaga tai mai ele veia etato tomi mai la vovole Kraist.
ROM 12:6 Te la gilogo tetala, La Tahalo Uru tabariti letatou la vaabila tetala ale koramuli la igogolu tetala ale etato ge igoa. Mai la vaabila tetala soio taume eia te la veipalala la gabutatalala te La Tahalo Uru soio te la valalua, tio eme ge igo molia mai la vagagarila taume ale eia abiamu te la gilogo tetala.
ROM 12:7 Mai la vaabila tetala soio taume eia te la igogolu la visuli, eme ge suli la valalua me hatavivile tomi te la lotu. Mai eia toiti leme te la vimari, tio taritigi eme ge vimari la valalua me hatavivile.
ROM 12:8 Mai eia toiti leme veia eme ge viteteli la valalua me hatavivile tetala, tio la igogolu alele eme ge igo seselea. Mai eia vibalavati leme la vuliti, taritigi eme ge suli pepeho egiteu e tabarabaramu te la lotu. Mai eia toiti leme veia eme ge la mulugaluga, tio eme ge mamuga tataho egiteu te la lotu. Mai eia toiti leme veia eme ge pou te la vulovulo la mutelela, la igogolu taume ele eme ge igoa, eme ge sagege moli ovola.
ROM 12:9 Taritigi amuto ge puhi tigi sesele egiteu e tabarabara mutou, amuto umala ge tau moli la marasala veia amuto ge puhi bulalahu moli egiteu. Amuto ge gima sesele la vulovulo ale kama kokora, amuto ge sau tola moli la vulovulo ale taritigi.
ROM 12:10 Amuto ge vipuhi tigi, amuto ge vitogo baoli sesele le amutou, amuto ge vauru la isale tabarabara mutou.
ROM 12:11 Umala amuto ge tuha malulu te la igogolu te La Uru. Taritigi la kalulu mutou oilo ge tivura sesele, amuto ge igogolu tataho.
ROM 12:12 Ale amuto pou tali la guluvi te Kraist ale eia ge vimahuli amutou, amuto ge pou la sagegela. Mai amuto ge poga la iligiligi te la isale Kraist, amuto ge vagari moli, kama ge gabutatala papai. Ale amuto ge kaka, kaka bibibi moli, umala piligi la vulovulo la kilaka.
ROM 12:13 Mai isa tegatou ale te Kraist ge pou la savelela, amuto ge sulia. Mai egiteu la mosi ge guvi, amuto ge puli egiteu soio te la uluva la luma tamutou.
ROM 12:14 Egiteu ale gilo amutou veia amuto la valalua me hatavivile te Kraist kama kokora, amuto ge kaka veia La Uru ge vibalava egiteu, umala amuto ge gilo rivu egite.
ROM 12:15 Mai e tabaramu isa pou la sagegela, amuto ge sagege vikapopo leia. Mai isa pou te la iloburukola, amuto ge ilo buruko vikapopo leia.
ROM 12:16 Vipuhi tigi tataho le amutou. Umala eme ge vauru loume, eme ge vibisi eme veia ge visuli te la igogolu tomi te la bilaha te la valalua. Umala eme ge gabutatala vaurume veia eme isasa, umala.
ROM 12:17 Mai isa igo gegerume, eme umala ge koli la vulovulolale soio tetala. Eme ge pou tataho mai te la vulovulo ale taritigi ale etato tomi rovia.
ROM 12:18 Eme umala tai ge vahiliti la igototolola soio tegiteu la valalua me hatavivile. Mai amuto ge vaigo, eme ge paa muli la gauru ale ge lele robo lou le amutou.
ROM 12:19 Amuto tabarabaragu, umala amuto ge koli tai la iruru. Amuto ge abia La Tahalo Uru la baa ale eia ge kolia, mai la merera te La Tahalo Uru te La Buk Tabu Ale Pala eia veia maie “La kiloli la iruru, eia la igogolu taku.”
ROM 12:20 Eala moli taritigi amuto ge igo maie: Mai la gima taume ge vitolo, eme ge vaalia. Mai eia ge malehu, eme ge viliua. Mai eme ge igoa mai ele, eia ge gabua, eia ge mahela.
ROM 12:21 Umala eme ge maveve veia la vulovulo la iruru ge bolehohome. Eme ge vagari, eme ge bolehoho la vulovulo la iruru te la vulovulo ale taritigi.
ROM 13:1 Taritigi veia la valalua me hatavivile tomi ge togo e gavman, ge roromulia, la vuhula La Tahalo Uru vipou egiteu e gavman tomi, eia vipou egiteu la mulugaluga tamutou tai.
ROM 13:2 Eala, mai amuto ge vaubi soio te gavman, ale amuto vaubi soio te la viputumulila ale La Tahalo Uru vipoua, me oio vola amuto ge poga la kiloli la vulovulo alele.
ROM 13:3 Egiteu ale taritigi kama taga egiteu la mulugaluga, eala moli la valalua la vareagila, egite taga pepeho e gavman. Mave, eme masagea eme ge pou tigi moli, egiteu la mulugaluga kama ge gali tavume? Mai eme ge roromuli tataho e gavman, egiteu la mulugaluga ge vei tatahome.
ROM 13:4 La vuhula egiteu la mulugaluga, egite la bilalaha te La Tahalo Uru ale eia baha egiteu veia egite ge baumuli amutou. Eala moli mai eme ge igo la iruru, eme ge taga, la vuhula egiteu la mulugaluga, e gavman abia giteu la vagagarila. Egiteu la mulugaluga, egite la bilalaha te La Tahalo Uru, ale eia bahati egiteu veia egite ge vahari la kiloli la iruru soio tegiteu la valalua la iruru.
ROM 13:5 Eala, eia taritigi veia amuto ge togo e gavman, ge roromulia. Eala moli amuto kama ge igoa te la tilaga moli. Amuto ge mulimuli e gavman te la masasagala sesele tamutou isasasa, amuto ge kavovou tataho.
ROM 13:6 Taritigi tai mai ele veia amuto ge pigi la takes soio te gavman, la vuhula te la mani ale amuto pigia, e gavman eia loto legiteu la bilalaha ale egiteu baumuli amutou.
ROM 13:7 Umala amuto ge tou la takes ale e gavman kakea. Mai egite veia eme ge loto la takes, eme ge loto molia. Mai egite veia eme ge loto la laisen, eme ge loto molia. Mai eme ge vikara soio tegiteu la mulugaluga, eme ge vikara moli la tilogo.
ROM 13:8 Umala amuto ge dinau soio te isasa la uati, eala moli amuto ge dinau mai la gilogo soio te tabaramu veia amuto ge suli rivu lou eia. Mai amuto ge koli la gilogo soio tegiteu, amuto mai ale vipuruti la merera tomi te La Uru te la mahulila tamutou.
ROM 13:9 La vuhula, la tururi tomi te La Uru, mai umala ovovo e tabaramu te rutula, umala bilibili, umala pakalikali, umala ilo maliki tavu la golu te tabaramu, egiteu la tururi te La Uru tomi, eia oilo tomiti te la merera isa moli maie: Eme ge gogo e tabaramu mai ale eme gogo rivu lou eme.
ROM 13:10 Mai eme ge la tahalo la gilogo, eme kama ge igo gegeru e tabaramu, eala la gilogo, eia vipuru la merera tomi te La Uru.
ROM 13:11 La haro ale igoie, eia kama la imamala bulalahu, ouka. La leavala koramuliti ale la vimahuli te La Uru ge tasuku somai tegatou. Ale pala amuto vulo halaba soio te La Uru, eala moli la imamala soukama hagagavi ale eia ge sibitala. Eala moli igoie, eia hagagaviti. Taritigi etato ge mata kaseka, isa ge umalati mamavuta.
ROM 13:12 Hiloa, la pokele tamale ava eia vaharitia, hagagaviti eia ge utupola, la paga ge mamaga, mai e Iesus ge guvi seseleti. Etato ge piligi taro la vulovulo la maligoma, etato ge magiri vagari te la vaubila te la isa La Uru, ale eia ge sibitala te la matagaga.
ROM 13:13 Taritigi la vulovulo gatou ge taritigi mai te la matagaga. Etato umalati ge pou te la ililiu, te la vareagila, te la iligo galolola, te la vaigigola me te la maisu totolola.
ROM 13:14 Eala moli eme ge kisi la vulovulole Kraist oio te la vovomu mai la lavalava ale maroka sesele. Umalati amuto ge viputumuli la gauru la iruru veia eme ge igoa, mai te la masasagala te la vovo.
ROM 14:1 Mai e tabaramu isa, eia kama magiri vagari te la mahulila ale halaba te Kraist, amuto ge suli molia, umala vaigo muli la gabutatalala tetalale ale kama koramuli la lotu.
ROM 14:2 La vimari ale, eau ge tovo mulia soio te la ilali ale egite vaabila soio te la puigolo, ale egite lotu tavua. Etatou ale magiri vagari, etato ge ali la ilali tomi. Eala moli egiteu ale kama vagari, egite taga pepeho la kalia ale la valalua vaabila te la lotu la visigologolola, eala isahari tegiteu kamati ali la kalia, egite veia egite soukama ali ruru, egite veia la kalia la lelea giteu, egite ali moli la mavo, la kalia egite toua.
ROM 14:3 Eala moli etatou ale magiri vagari, etato umala ge muku pile egiteu ale veia la kalia eia la lelea giteu. Me egiteu tai ale taga la kalia, egite umala ge tomu sasae la gabutatalala tegiteu ale alalia, la vuhula La Tahalo Uru eia toiti egiteu veia egite maroka moli, egite kama ruru ale egite ali la ilali ale la rivu giteu e tabarabara giteu isahari.
ROM 14:4 Egiteu e tabarabara mutou ele, ale amuto veia egite ali ruru, egite la bilalaha te La Tahalo Uru. Ilava amuto goio tomu sasae lou la vulovulo giteu? Egite kama la bilalaha tamutou! La Tahalo Uru moli, eia ge rovia maie veia egite igogolu tigi ka ouka. Eala moli egite taritigi moli te La Uru, la vuhula La Uru suli egiteu, egite kama boru.
ROM 14:5 Tio, eau ge lapu la vimari taku lou ele soio te la haro tabu tai, veia ge tovo muli amutou oio vola. Egite isahari veia la haroharo tomi egiteu tomi tikumu, etato ge vaisale La Uru oio vola. Eala moli la valalua isahari, egite veia la haro tabu sekela eia tikumu, mai la haro isahari tai, egite lou oio vola, veia la logologo isahari egite tikumu mai ele. Tio eia taritigi veia amuto ge tilimuli la gabutatalala tamuto isasasa, umala amuto isasa ge gabutatala papai, veia eia ruru.
ROM 14:6 Mai isa ge gabu tikumu egiteu la haro la ilou isahari veia La Uru toiti egiteu veia egite tikumu, te la vulovulolale eia togo La Uru, eia tai lotu tavua. Oio te la ilali la kalia tai, mai isa alali la kalia, eia ali moli, eia vaisale La Uru oio vola. Eala moli la tahalo me la tavile ale tou la kalia, eia igoa veia ge suli la lotu tetala tavu La Uru mai ele, eia vaisale moli La Uru te la tilogo tetala soio tetala mai ele.
ROM 14:7 Etato kama ge mahuli bulalahu, mai la masasagala tegatou sekela. Etato kama peho bulalahu tai, mai la masasagala tegatou sekela.
ROM 14:8 La vuhula, etatou tomi te Kraist. Etato ge mahuli, etatou tetala moli, etato ge vaisalea. Mai tai etato ge peho, etatou tetala moli, etato ge vaisale molia.
ROM 14:9 E Kraist sibitala pala, eia mahuli kabili te la valalua, eia goio peho, eia mahuli rivu lou veia eia ge la mulugaluga tegatou tomi mai egiteu ale pehoti, me etatou tai ale mahuli.
ROM 14:10 Eala, eme umala ge tomu sasae la vulovulole tabaramu, eme umala ge muku pile la vulola. Etato tomi mulimuli ge magiri vikapopo te la lagu La Tahalo Uru te la tapasi la haro, eia ge hilovi etatou isasasa mai la vulovulo gatou tomi.
ROM 14:11 Mai la merera te Aisaia te La Buk Tabu Ale Pala, eia veia maie: Eau La Uru, eau mahuli. La valalua me hatavivile tomi ge toto tulu tavuau, ge togoau, egite tomi ge veipalea veia eau La Uru.
ROM 14:12 Eala, eia matagaga mai ele veia etato tomi ge magiri te la vigagiala oio te la lagula.
ROM 14:13 Eala, eia taritigi veia etato umalati ge tomu sasae la vulovulo giteu a tabarabara gatou. Eala moli eme ge vagari veia eme umala ge tau robo la gauru te tabaramu, eia soukama ge piligi la lotu tetala tavu e Kraist.
ROM 14:14 Sesele, eau la tahalo te Kraist, me eau matagagati mai ele veia la ilali tomi eia koramulia etato ge alia. Eala moli mai isa ge toi la ilali isahari veia egite kama kokora, tio alele eia kati kokora tetala.
ROM 14:15 Tio ale la vikarara la tilovo te la ilali la kalia, ale eau tovo muli la vulovulo isahari ale egiteu isahari veia eia kama kokora, eau veia ge vei matagaga loua mutou oio vola maie: La ilali la kalia eia tovo muli la vulovulo gatou tomi ale egite isahari muku pilea. Mai egite ge karutu leme, ale eme ali la ilali tomi, eme kama taga la kalia, ale eme kati gogo e tabaramu mai eme ge ali bulalahu mai ele. La ilali ale la leleale tabaramu, eme umala alalia, eme souka vitiloa veia eia ge ruru. E Kraist eia peho robo amutou tomi. Umala pou tatavu la vulovulo ale ge igo gegeru la isale Kraist.
ROM 14:16 La vulovulo isahari taritigi, eala moli la valalua isahari veia eia kama kokora, tio umalati igigoa.
ROM 14:17 La Pulolou La Matagagala te La Tahalo Uru, eia kama mavulaha mai la viputumulila te la ilali ale etato umala ge alia, mai la lalu tai ale etato umala ge liua. La Pulolou La Matagagala tetala, eia te la vulovulo la marokala, la vipuhi tigila, me la sagegela te La Kalulu La Marokala.
ROM 14:18 Mai eme ge mulimuli la merera te Kraist mai ele, La Tahalo Uru ge lege sisigi leme, me la valalua me hatavivile tai ge isu la vulovulomu.
ROM 14:19 Tio, oio volale, eia taritigi pepeho veia etato ge mulimuli moli la vulovulo ale maroka, eia ge puhi tigi etatou, etato tomi ge magiri vagari.
ROM 14:20 Umala amuto ge vaigo totolo muli la lelea mutou isahari, mai ale egite veia etato umala ge ali la kalia. Amuto soukama igo gegeru la igogolu te La Tahalo Uru mai amuto ge vaigo totolo muli la ilali me la golu bulalahu isahari mai ele. La ilali tomi eia maroka, koramulia veia etato tomi ge alia, eala moli mai la vulogu isasa ale eau igoa eia ge igo boru e tabaragu, ale eau ruruti.
ROM 14:21 Umala alali la kalia, umala liliu la lalu vagarigari, umala igo isa la vulomu mai eia ge igo boru e tabaramu.
ROM 14:22 La gabutatalala taume te la ililiu me te la ilali, ale la paga tamulua me La Tahalo Uru, umala veipalea. Mai eme ge mulimuli sekela la vulomu ale eme rovitia veia taritigi, tio eme kama ge gabutatala papai, la tiamu oilo ge malilo tataho moli, eme ge sagege.
ROM 14:23 Eala moli mai eme ge mulimuli la vulovulo isasa ale eme gabua veia eia kama maroka, tio la gabutatalala taume eia ge tomu sasae la vulomu ele, la vuhula eme kama igoa te la masasagala te La Tahalo Uru. La vuhula egiteu la vulovulo tomi ale etato kama igoa te la masasagala te La Uru, mai etato ge igoa, ale etato ruruti ovola.
ROM 15:1 Etato ale magiri vagari te Kraist, taritigi etato ge suli la gabutatalala tegiteu e tabarabara gatou ale kama magiri vagari, etato umala ge silaha legiteu. Etato umala tai ge lolo tataro egite, mai etato ge pou te la vulovulo ale egite veia eia kama taritigi.
ROM 15:2 Etato tomi isasasa ge tovo lalai vagari veia ge visagege e tabarabara gatou, veia egite ge sagaiti te la lotu te Kraist.
ROM 15:3 Mai e Kraist, eia kama tilimuli la masasagala tetala, La Buk Tabu Ale Pala eia veia maie “Eia gomai te la maututula veia egiteu ale vile La Tahalo Uru ge vile tai eia.”
ROM 15:4 Me la merera te La Buk Tabu Ale Pala eia magiri moli veia ge vimari etatou, veia etato ge magiri vagari ge pou tali la guluvi te Kraist, kama ge piligia.
ROM 15:5 La Tahalo Uru, eia sau tola etatou veia etato ge magiri vagari, etato ge sau tola sesele la merera tetala. Taritigi eia ge vikisi tavu tataho amutou, amuto ge mulimuli tataho e Kraist, la gabutatalala tamutou ge isa moli te la isala.
ROM 15:6 Me oio vola, amuto tomi ge magiri vikapopo ge vaisale La Tahalo Uru, e Tamale Iesus Kraist, La Uru gatou.
ROM 15:7 Amuto ge vitau me tabara tataho, la vuhula e Kraist, eia vagoilo etatou tomi isasasa mai e tabarala sesele. Mai etato ge vipuhi tigi mai ele, la valalua ge hiloa, egite ge vaisale La Tahalo Uru oio vola.
ROM 15:8 Eau vei matagagea mutou veia e Kraist, eia guvi mai la bilalaha tegiteu e Iuda veia la merera te La Tahalo Uru soio te Abraham mite, eia ge puru oio tetala, mai alele egiteu e Iuda ge matagaga veia La Tahalo Uru, eia vikara sesele.
ROM 15:9 Eala moli eia vipuru la merera te La Tahalo Uru somai tai tamutou ale logala, ale kama e Iuda, veia amuto tai ge vaisalea te la gilogo tetala ale uru. Mai la merera te Devit te La Buk Tabu Ale Pala eia veia maie: Eau ge vaisaleme kabili tegiteu la valalua la maligoma, Eau ge bau la bilalau te la isamu.
ROM 15:10 Oio te la merera te La Buk Tabu isa lou tai, eia veia maie: La valalua la maligoma ge sagege vikapopo le amiteu e Iuda.
ROM 15:11 Me la merera isa lou tai eia veia maie: Vaisale La Uru, amutou la valalua la maligoma, Vaisalea, amutou la maratatila tomi.
ROM 15:12 Mai tai e Aisaia toia te La Buk Tabu Ale Pala maie: Oio moli te la hilile Iesi, isa ge sibitala, La Uru ge vahilitia, eia ge pou la mulugaluga tegiteu la maratatila tomi. Egiteu ale kama e Iuda ge sau tolea veia eia ge vimahuli egiteu.
ROM 15:13 La Tahalo Uru, etato tautaulailo tetala veia eia ge vimahuli sesele etatou, eia la vuhu la tautaulailo tegatou sesele. Mai amuto ge sau tola sesele e Iesus, eia ge visagege pepeho amutou, la tia mutou eia ge malilo tataho. Taritigi La Tahalo Uru ge visivo la vagagari La Kalulu La Marokala sotalo tamutou, amuto ge magiri vagari te Kraist, kara ale eia ge vimahuli sesele amutou.
ROM 15:14 Amuto tabarabaragu, eau rovitia veia amuto volu sesele te la vulovulo ale taritigi, me la mari tai tamutou eia uru, koramulia amuto ge vitovo baoli amutou.
ROM 15:15 Eala moli eau vikara vagari soio tamutou te la papaga usu, veia ge vahiliti lou la gabutatalala tamutou oio vola. Eau kama mahela, la vuhula eau igogolu moli te la gilogo te La Tahalo Uru ale eia abiagu
ROM 15:16 veia eau ge la bilalaha te Kraist Iesus soio tamutou la valalua la maligoma. Te la igogolu la valolo taku, eau magiri mai e pris, veia eau ge vahari amutou soilo te La Tahalo Uru mai la vaabila ale La Kalulu La Marokala vimarokati amutou.
ROM 15:17 Eala, eau sagege pepeho te la igogolu la valolo ale amila me Kraist Iesus igotia, eau suli La Tahalo Uru oio vola.
ROM 15:18 Eau kama ge mahela, eau ge veipala la igogolu uru ale e Kraist igotia te la valolo taku, eia vagoilo egiteu la valalua la maligoma usu veia egite ge roromuli La Tahalo Uru. Egite lolo la valolo taku,
ROM 15:19 egite hilo la golu la karutula me la irovilala te la vagagarila te La Tahalo Uru, La Kalulu La Marokala eia igoa te la limagu. Eala, sokoa oio e Ierusalem, goale malau e Ilirikam, oio te la maututula tomi kabili te la baa ale uru ele, eau valoloti la valalua me hatavivile tomi usu te la isale Kraist.
ROM 15:20 Oio te la masasagala taku sesele, eau masagea veia eau ge vituga halaba la valolo soio tegiteu la maututula la maligoma ale soukama lolo la isale Kraist, eau kama ge vulalai la baa ale la tahalo isapolo lamoa.
ROM 15:21 Mai La Buk Tabu eia veia maie: Egiteu ale soukama rovi La Uru, egite ge hiloa, Egiteu ale soukama lolo la isala, egite ge matagaga.
ROM 15:22 Eau bole la igogolu uru te la valolo taku, eala eau kama hari lalai amutou pala, la igogolu roboau.
ROM 15:23 Eala moli eau masaga pepehoa veia ge hilo amutou. Ale igoie la igogolu taku omai te la valalua la maligoma eia kaluvuluvuti,
ROM 15:24 tio eau veia ge hari lalai amutou oio e Rom, veia eau ge pou muga bakisi veia etato ge visagege baoli. Amuto ge suliau te la tuluga taku, eau ge hiliti lou ge tuga polo lou ge goio e Spen.
ROM 15:25 Eala moli eau ge hari lalai muga egiteu la valalua me hatavivile te Kraist oio e Ierusalem, eau kama ge goio muga tamutou veia ge suli muga amutou, ouka.
ROM 15:26 Eau ge vaharia giteu la uati ale egiteu e Masedonia me egiteu e Akaia vaabila soio tegiteu e Ierusalem veia ge suli egiteu ale pou la savelela.
ROM 15:27 Ale egiteu lou veia ge igoa, isa kama veia giteu, eala moli egite kolia mai ele la balavala tegiteu e Iuda ale igoie eia goioti tegiteu la maratatila ale logala. Eala eia taritigi pepeho mai ele veia egite ge suli lou legiteu e Iuda la golugolu isahari ale ge suli la pulolou tegiteu. La vuhula, oio tegiteu e Iuda, La Uru visibitala la vuliti mai la visuli te Kraist somai tegatou, mai la vibalavala tetala, eia vimatagaga etatou tomi oio vola.
ROM 15:28 Ioge, eia kora muga mai ele veia eau ge vahari muga la vaabila soio tegiteu e Ierusalem, egite ge abi kaluvua, tio eau ge sae te sipi ale ge vahariau soale e Spen, eala moli eau kama ge sele molia, eau ge gomai muga tamutou.
ROM 15:29 Ale eau ge goiole, e Kraist ge abiagu la merera ale taritigi ale eau ge suli le amutou oio vola, etato ge pou tataho.
ROM 15:30 Amuto tabarabaragu, eau kaka vagari amutou, te la isale Kraist, La Uru gatou, me te la gilogo te La Kalulu La Marokala, amuto ge siobuau te la kilaka tamutou. Amuto ge kaka vagari.
ROM 15:31 Amuto ge kaka veia eau kama ge vilua tegiteu la gima te La Tahalo Uru mai eau ge guvi oio e Iudea. Amuto ge kaka tai veia egiteu ale te Kraist oio e Ierusalem ge masaga la vaabila ale eau ge vaharia, veia eau ge suli tigi legiteu.
ROM 15:32 Tio me mai eia ge te la masasagala te La Tahalo Uru sesele, eau ge gomai tamutou me la sagegela, eau ge kavovou tataho oio tamutou.
ROM 15:33 La Tahalo Uru, ale vimalilo tataho la tia gatou, eia ge pou tamutou. Eala moli ele.
ROM 16:1 Eau masaga amuto ge veiale hatavile gatou uru e Pibi la haro sesele taku soio tetala ale eia ge guvi tamutou ele. Eia igogolu vagari sesele te la visuli soio te la lotu oio la mautu e Senkria.
ROM 16:2 Eia ge guvi tamutou, amuto ge rara tavu seselea te la isa La Uru, mai la vulovulo gatou ale te Kraist, amuto ge suli tigi tatahoa, la vuhula eia suli pepehoau me la valalua me hatavivile usu tai.
ROM 16:3 Amuto ge veiale Priska mira me Kuila la haro taku soio tegirua, egira vaigogolu vikapopo leau te la valolo te Kraist Iesus.
ROM 16:4 Egira pala tomo tavuau, ale pala egite la valalua la gima lao toleau. La valalua la maligoma usu tai la dinau uru tegirua, la vuhula egira suli pepeho egiteu te la valolo te Kraist.
ROM 16:5 Eau laharo taia giteu la valalua me hatavivile la lotu ale lotulotu oio te la luma tegirua. Amuto ge veiale Pinitas la haro sesele taku soio tetala tai, eia e vikilipi taku sesele. Eia la muluga la tahalo sesele oio la gale Esia ale vulo halaba soio te Kraist, ale eau valolo egiteu pala.
ROM 16:6 Amuto ge toi la haro tai soio te Maria, eia la tavile isasa, eia igogolu vagari tamutou ele.
ROM 16:7 Amuto ge veiale Adronaikas mira me Iunias la haro sesele taku soio tegirua. Amiteu la maratatila isa moli, amite pala pou vikapopo te la luma la kilisi. Egira muga sesele tamiteu la bilalaha te Kraist te la vulovulo giruale, egira vulo halaba pala, eau mulimuli tegirua.
ROM 16:8 Amuto ge vei taiale Amplietas la haro sesele taku soio tetala. Eau masaga pepeho eia, eia isasa e tabaragu sesele te La Uru.
ROM 16:9 Amuto ge vei taiale Banas la haro taku soio tetala. Eia vikapopo letatou te la valolo te Kraist, egira me tabaragu uru e Stekis, amuto ge laharoa girua.
ROM 16:10 Amuto ge veiale Pelis tai la haro sesele taku soio tetala. Eia la tahalo sesele te Kraist, etato tomi rovitia la vulovulola. Laharo taia giteu la karakara te Aristobulas.
ROM 16:11 Amuto ge veiale Herodion la haro taku soio tetala. Eia la tau Iuda mai eau. Amuto ge laharo taia giteu la karakara te Nasisas, egiteu ale tautaulailo te La Uru.
ROM 16:12 Amuto ge laharoale Traipina mira me Traiposa, egirua la tavile iluale, egira igogolu vagari tai te La Uru. Amuto ge laharo taiale Pesis, eia la tavile la igogolu tai isale te La Uru, eia e hatavilegu sesele.
ROM 16:13 Amuto ge veiale Rupas la haro taku soio tetala, eia la tahalo sesele te la igogolu te Kraist. Amuto ge laharoa girua me tilala, eia mai e tila milua sesele.
ROM 16:14 Amuto ge toi la haro sesele taku soio tegiteu aleie: e Asinkritas, e Pligon, e Hermes, e Patrobas, e Hemas, me egiteu e tabarabara gatou tomi ale pou vikapopo legiteu ele.
ROM 16:15 Amuto ge vei taiale Pilologas la haro taku, egite me Iulia, me Nerias, egira me hatavilela, me Olimpas, me egiteu la valalua me hatavivile tomi te Kraist ale oio tegiteu ele.
ROM 16:16 Amuto tomi ge visagege baoli mai la vulovulo gatou ale te Kraist. Egiteu la lotu tomi te Kraist te la gale ale omai, egite veia mutou e Rom la haro sesele.
ROM 16:17 Eau kaka vagari amutou e tabarabaragu veia amuto ge mata rara tegiteu la valalua ale ge vipou marapa amutou veia amuto kamati ge mulimuli tigi la merera te Kraist ale amite tovo le amutou oio vola. Umala amuto ge hagagavi tegiteu ele.
ROM 16:18 Egiteu ale maie, egite kama vauru e Iesus Kraist, egite vauru moli egiteu. La vikararala tegiteu ale malama, eia tutugolo egiteu la valalua me hatavivile ale kama gabutatala tigi.
ROM 16:19 La maututula tomi lolotia veia amutou omai la mautu e Rom tilimuli tatahoti la merera te Kraist, eala eau sagege pepeho le amutou. Eala moli eau karasuku amutou veia amuto ge rovi tataho la gauru ale taritigi, eala moli umala la vulovulo ale kama kokora eia ge oio bakisi tamutou.
ROM 16:20 Mai ge mai ele, eia kama ge tabaa, La Tahalo Uru ge pigi e Satan sotalo te la vaha mutou, amuto ge soa kurua. Amuto ge igoa te la vagagarila te La Tahalo Uru ale vimalilo la tia gatou. La gilogo uru te Iesus, La Uru gatou, eia ge pou tamutou.
ROM 16:21 E Timoti, ale igogolu vikapopo leau, eia toi la haro soio tamutou. Tio e Lusias, e Ieson, e Sosipata, egiteu e tabarabaragu la tau Iuda tomi omai, egite tai laharoa mutou.
ROM 16:22 Me eau, e Tetias, eau ale kekesi la merera te Pol te la letale, eau toi la haro sesele soio tamutou te la isa La Uru.
ROM 16:23 E Gaias tai veia mutou la haro. Eia vibaumuliau oio te la luma tetala, me amite lotu tai oio tetala. E Rastas, ale vibaumuli la uati te gavman omai, egira me tabara gatou e Kuotas, egira veia mutou la haro. [
ROM 16:24 La gilogo te Iesus Kraist, La Uru gatou, eia ge pou tamutou, eala moli ele.]
ROM 16:25 Etato ge vaisale La Tahalo Uru maie: Eia vagari, eia koramulia ge vimagiri vagari amutou, mai te la valolo taku ale eau valoloti le amutou ovola, mai la valolo te Iesus Kraist. Mai ale igoie eia veipalatia la merera ale tabuli kokovu, alaurati te baruata kara igoie,
ROM 16:26 me igoie etato matagagati ovola, mai la merera tegiteu la bilalaha tetala, egite kekesia te La Buk Tabu Ale Pala. Mai ale igoie, te la masasagala moli te La Tahalo Uru ale mahuli moli, la tapasila ouka, la merera te Kraist eia vavavati soio te la maututula tomi veia la maratatila tomi ge sau tolea, ge roromulia.
ROM 16:27 La Tahalo Uru isasa sekela moli, eia magiri. Me la mari uru tai tetala sekela moli. Etato ge vaisale molia te la isale Iesus Kraist, kara igoie, kara mulimuli, la kaluvula ge ouka. Eala moli ele. Eau e Pol.
1CO 1:1 Eiau e Pol, eau kekesia mutou la valalua me hatavivile la lotu te La Tahalo Uru oio te la mautu uru e Korin. Amila me tabara gatou te la igogolu te Kraist, e Sostenes, amila toi la haro sesele soio tamutou. La Tahalo Uru, te la masasagala tetala moli, eia toleau soio te la igogolu te la valolo te Kraist Iesus veia eau ge la bilalaha tetala.
1CO 1:2 Eau kekesia mutou ale te Kraist oio e Korin, La Tahalo Uru eia hiloviti amutou, eia vimaroka amutou, la vuhula amuto tomi te Kraist. Amutou la valalua me hatavivile te La Tahalo Uru sesele, la vuhula eia visati le amutou. Mai la valalua me hatavivile tai te la maututula tomi ale egite lotu tavu La Uru gatou e Iesus Kraist, etatou tomi la valalua me hatavivile tetala ale maroka.
1CO 1:3 La Tahalo Uru, eia e Tama gatou tomi, egira me La Uru gatou e Iesus Kraist, egira ge vibalava le amutou la gilogo ale uru, la tia mutou tomi oilo ge malilo tataho.
1CO 1:4 Eau kama ge maila te la kilaka, eau ge vaisale moli La Tahalo Uru te la vaabila tomi tetala ale eia vaurua soio tamutou ale sau tola e Kraist Iesus.
1CO 1:5 Amuto taholati la vuliti mai te la merera te La Tahalo Uru, me la mari tetala ale uru tai, e Kraist abitia mutou.
1CO 1:6 Amuto sau tola sesele la merera te Kraist ale amite pala valoloti amutou ovola,
1CO 1:7 eala igoie amuto kama galo bakisi te la vibalavala tomi te Kraist soio tegatou ale tetala. Amuto pou tataho moli, amuto pou tali la haro ale La Uru gatou e Iesus Kraist eia ge sibitala lou.
1CO 1:8 Eia ge sau tola sesele amutou, eia kama ge maila te la igogolu tetalale. Me te la tapasi la haro, ale La Uru gatou e Iesus Kraist ge beu loua somai ovola, amuto ge magiri moli la marokala, amuto kamati ge gabu la igototolola te La Tahalo Uru.
1CO 1:9 La merera tomi alele, amuto ge sau tolea, La Tahalo Uru eia vikara sesele. Eia tolati amutou veia amuto ge pou moli la sagegela vikapopo le Latula, e Iesus Kraist, La Uru gatou.
1CO 1:10 Amuto tabarabaragu te la isale Kraist, eau kaka gogogo amutou veia amuto umalati ge vaigo. Taritigi la merera tamutou ge isa moli, amuto ge vipuhi tigi sesele, la gabutatalala tamutou ge isa moli, la marapala ouka.
1CO 1:11 Amuto tabarabaragu, eau rovitia veia amuto oio vaigo, la vuhula egiteu la karakara te Kloe isahari, egite loio la mautu tamutou, egite gomai Epesas, egite pogeau, egite veipaleagu veia la vaigigola sibitalati kabili tamutou.
1CO 1:12 Mai la merera tamutou eia kamati visauru, la merera tamutou isapolopoloti. Isa ge veia maie “Eau tilimuli e Pol.” Isa lou ge hiliti, eia ge putu olia, eia ge veia maie “Eau tilimuli e Apolos.” Goio, isa lou ge hiliti, eia ge veia maie “Eau tilimuli e Pita.” Goio, isa lou ge goio ge vikara maie “Eau tilimuli moli e Kraist.”
1CO 1:13 Mave, amuto soioge vilagilagi le Kraist veia ge vitabari letatou ale tetala mai ele, ia? Mave, soioge eau e Pol, eau peho robo amutou oata te la tauvalautu, ia? Mave, egite soioge vuhi le amutou te la isagu veia amuto ge taku moli, kama ge te Kraist, ia?
1CO 1:14 Ale amuto vikara papai mai ele, eau sagege pepeho ale eau kama vuhi isahari tamutou, isa kati ge koramulia ge kau loua mutou veia amuto isahari abi la vuluhi te la isagu. e Krispas mira me Gaias moli, eau vuhi egirua,
1CO 1:16 me eia sesele, eau vuhi tai e Stepanas me egite la karakara tetala, eala moli eau soioge kama vuhi isahari lou, eau kamati gabutatala tigia.
1CO 1:17 E Kraist kama baheau te la vuluhi, ouka, eia baheau veia eau ge valolo la valalua me hatavivile tomi te la maututula la valolo ale taritigi te Kraist. Oio te la merera tetalale, eia kama baheau veia eau ge valolo ovola vikapopo me la mari te la vovo. Mai la merera te la pileho te Latula oata te la tauvalautu, eau soukama ge igoa mai la merera bulalahu ale kama vagari, mai eau ge valolo ovola mai la mari te la vovo.
1CO 1:18 La valolo te la pileho te Kraist, egiteu ale poga tavu la pileho, egite loloa mai la merera bulalahu moli, la vuhula egite kama rovi la mahulila tetala. Eala moli tegatou ale eia vimahuliti etatou, la merera te la pileho te Kraist, eia la vagagari La Tahalo Uru somai tegatou.
1CO 1:19 Mai te la merera te La Buk Tabu Ale Pala, La Uru eia veia maie: La merera tegiteu la valalua la mari, eau ge barautua. Eau ge igo marapa la mari tegiteu la tahalo la mari.
1CO 1:20 Mai ge mai ele, la tahalo la mari, eia ge vikara mave? Me egiteu ale gigi bibibi la merera ale mave ale mave veia ge rovi la vuhu la papaga tomi, egite ge vei lou lava e? Egiteu tai ale lapu malalau la merera veia ge vikara muli la vuvuhu la papaga tomi, egite ge vei mave? La Tahalo Uru eia veipalatia veia la mari tegiteu tomi ele, eia la golu bulalahu.
1CO 1:21 La valolo te la pileho te Kraist, ale amite la bilalaha tetala valolo ovola, eia mata mai sesele la merera bulalahu tegiteu la tahalo la vovo. La Tahalo uru, te la mari tetala moli, eia viputumulitia veia etato la valalua kama ge rovi eia te la mari tegatou lou te la vovo. Ouka, eia toitia veia ge vimahuli la valalua te la merera te la pileho te Latula, eia mata mai la merera bulalahu moli tegiteu la tahalo la mari.
1CO 1:22 Egiteu e Iuda, egite gabu tikumu sekela la irovilala loata te La Uru. Egiteu e Grik, egite gabu tikumu sekela la mari te la vovo.
1CO 1:23 Eala moli amiteu la bilalaha te Kraist, amite veipala moli la pileho te Kraist oata te la tauvalautu, me la mererale egiteu e Iuda vilea, me egiteu e Grik lege vahia.
1CO 1:24 Eala moli tegatou la valalua e Iuda me la valalua e Grik tomi ale La Tahalo Uru tolati etatou soio tetala, la mererale eia tikumu, eia la merera la mahuli moli te Kraist, eia veipala la vagagari La Tahalo Uru, eia veipala tai la mari tetala ale uru.
1CO 1:25 Mai la merera ale la valalua veia la merera bulalahu moli ale La Tahalo Uru toitia, eia muga sesele te la merera la mari tomi te la valalua. Mai la merera tai te La Tahalo Uru ale mata mai la merera bulalahu ale kama vagari, la vagagari la merera tetalale, eia muga sesele te la vagagari giteu la valalua.
1CO 1:26 Amuto tabarabaragu, eau masagea veia amuto ge gabutatala muga bakisi sotigu te la pulolou tamutou ale pala, te la imamala ale La Tahalo Uru so baha tatavu amutou. Pala, amuto mai ale so goilo halaba te Kraist, amuto kama vauru lou amutou, amuto kama vei tataho amutou veia amutou la tahalo la mari, veia la valalua tomi tai ge togo amutou.
1CO 1:27 La Tahalo Uru, te la masasagala tetala moli, eia hilovi amutou ale la valalua veia amuto la golu bulalahu, eia hilovi amutou veia ge vauru amutou, veia amuto ge veipala la merera tetala me la vulovulola tai ale taritigi. Eia gabutatalea mai ele veia amutou ale la golu bulalahu ge vibisi egiteu la tahalo la mari, veia amutou tai ale kama vagari ge vibisi egiteu ale vagari, egite ge gabu la mahelala ale uru pepeho.
1CO 1:28 Eia hilovi amutou la tahalo me la tavile bulalahu moli, ale la valalua vile amutou, eia igoa veia la vulovulo mutou ge vikaluvu tomiti la viputumulila tegiteu ale veia egiteu sekela magiri.
1CO 1:29 La Tahalo Uru viputumulitia veia ge igoa mai ele, veia la tahalo la vovo isasa kama ge magiri te la lagula te la vagagarila lou, veia ge vei tataho rivu lou la vulovulola soio te La Uru.
1CO 1:30 Eala moli amutou, La Tahalo Uru eia puliti amutou soio tetala veia amuto ge pou vikapopo tomi me Iesus Kraist. Eia vipou e Latula veia eia sekela ge vahilo letatou la gauru te La Tahalo Uru, veia oio moli te la pileho te Kraist etato ge sau tola la mari ale sesele te La Tahalo Uru, mai la vulovulo ale matata, la pulolou la marokala, me la mahuli ale sesele tai.
1CO 1:31 Mai la merera te La Uru te La Buk Tabu Ale Pala, eia veia maie: Mai isa masagea veia ge vei tataho rivu loua, Taritigi eia ge veipala moli la igogolu ale La Uru igotia oilo te la kalulula.
1CO 2:1 Amuto tabarabaragu, eau kama guvi pala tamutou veia ge ali la ilo mutou la merera usu ale malama, me la mari ale uru tai te la vovo, eau kama valolo amutou oio vola. Eau veipala molia mutou la merera ale sesele te La Tahalo Uru.
1CO 2:2 Eau guvi tavu amutou pala, eau gabutatalea veia ge vei molia mutou la mari isa moli sekela, mai te Kraist, me la pileho tetala.
1CO 2:3 Ale eau sibitala omai tamutou e Korin pala, la vovogu pariri, eau taga,
1CO 2:4 eau kama valolo le amutou la vikarara la mari ale tikumu. Eala moli La Kalulu La Marokala, eia goio vitikumu la merera taku soio tamutou
1CO 2:5 veia la tautaulailo tamutou eia ge magiri te la sosole ale sesele mai te la vagagari La Tahalo Uru, kama la mari te la vovo.
1CO 2:6 Mai eau ge valolo la valalua ale la gabutatalala tegiteu te Kraist eia matuhati, eau ge valolo legiteu la merera ale tikumu. Eala moli eia kama la mari te la vovo ale eau valolola, eia kama la mari tai tegiteu e ururu ale vibaumuli la maututula te la imamala ale igoie. Egite mulimuli ge kaluvu, la vagagari giteu ge ouka.
1CO 2:7 La mari ale eau valolo ovola, eia la mari te La Tahalo Uru sesele, eia pala tabuli kokovu, eia tau kokovua veia la valalua kama ge hiloa, kara la imamala ale igoie. La merera ale, eia raragitia pala seseleti te la silokola, eia soukama vipou la maututula.
1CO 2:8 Egiteu la mulugaluga isa omai te la maututula, egite kama rovi la masova la merera tetala aleie. Mai egite ge matagaga ovola, egite kati ge katu tola La Uru gatou La Riau oata te la tauvalautu.
1CO 2:9 Mai La Buk Tabu Ale Pala eia veia maie: La vibalavala ale la valalua la vovo kama koramulia ge hiloa te la mata giteu, kama ge lolo taia te la gavusa giteu, la vibalavala ale isapolo viruru mai ele, isa kama koramulia ge gabutatalea, La Tahalo Uru eia raragitia tegiteu ale gogoa, egite sulia.
1CO 2:10 Eala moli la valolo ale taritigi, La Tahalo Uru eia veipalatia somai tegatou te la vimatagagala te La Kalulu La Marokala. La Kalulu La Marokala, eia mata muli la vuhu la merera tomi, la gabutatalala tai te La Tahalo Uru ale tikumu, eia tabuli kokovu, La Kalulu La Marokala eia mata mulimuli taia, eia veipalatia somai tegatou.
1CO 2:11 Mai etato la valalua la vovo, la kalulu gatou moli isasasa sekela eia rovi tomi la tilalau tegatou isasasa oilo, mai tai ele La Kalulu La Marokala moli sekela eia rovi la gabutatalala te La Tahalo Uru.
1CO 2:12 Etato igoie kama tahola la matagaga te la vovo moli, etato tahola tai la matagaga te La Kalulu La Marokala, ale La Tahalo Uru bahea somai veia etato ge matagaga tomi la vibalavala tetala somai tegatou.
1CO 2:13 Eala, etatou ale te Kraist, etato kama vikara bulalahu mai te la vimari te la vovo moli. La Kalulu La Marokala moli eia vimari letatou la merera tetala ale sesele, etato goio tovo lou egiteu ale La Kalulu La Marokala eia pou tegiteu.
1CO 2:14 Eala moli la tahalo ale kama pou te la matagaga te La Kalulu La Marokala, eia kama koramulia ge mata kilala tigi tegiteu la vibalavala ale La Kalulu La Marokala eia abia gatou. Eia kama rovi tigia, eia veia eia la golu bulalahu moli, la vuhula la mari ale, eia matagaga moli tegiteu ale La Kalulu La Marokala eia vimatagagati egiteu.
1CO 2:15 La tahalo ale La Kalulu La Marokala eia pou tetala, eia koramulia ge mata muli la vulovulo la valalua tomi, eala moli la tahalo ale kama te Kraist, eia kama ge koramulia ge mata muli la vulovulo la tahalo te La Uru veia ge matagaga ovola, la vuhula etatou ale te La Uru, etato pouti te la matagaga.
1CO 2:16 Mai La Buk Tabu Ale Pala eia veia maie: Ere ge koramulia ge rovi la gabutatalala te La Uru? Ere ge koramulia ge suli leia la merera? Eala moli etatou ale tetala, etato sau tolati la gabutatalala te Kraist, eala egiteu ale pou te la maligoma, egite kama rovi la vuhu la vulovulo miteu, la vuhula egite kama rovi e Kraist.
1CO 3:1 Amuto tabarabaragu, amuto pala kama mata mai la tahalo ale La Kalulu La Marokala eia pou tetala. Eau kama koramulia veia ge vimari sesele amutou te la merera te La Uru ale tikumu. Eau vimari moli amutou mai la tahalo la vovo moli, mai e guliliki ale soukama sagaiti sesele te la merera te Kraist.
1CO 3:2 Eau mai ale abi molia mutou la susu, kama la ilali ale vagari, la vuhula amuto kama koramuli la merera ale vagari. Kara igoie tai, amuto soukama raragi tigi veia ge lolo la merera ale vagari,
1CO 3:3 la vuhula amuto so mulimuli la vulovulo te la vovo ale kama kokora. Mai amuto ge maisu totolo, amuto goio vaigo mai ele, la vulovulo mutou ele eia veipalea veia amutou la tahalo la vovo moli, amuto mai ale mulimuli moliti la vulovulo te la vovo ale kama kokora.
1CO 3:4 Mai isa ge vei mago “Eau mulimuli e Pol”, goio isa lou goio hiliti mago “Eau mulimuli e Apolos”, tio la vulovulo mutou ele eia veipalea veia la vulovulo mutou eia maiti la vulovulo te la vovo ale kama kokora.
1CO 3:5 Amiteu la uru tomi te la lotu te Kraist, amite la bilalaha moli te La Tahalo Uru. E Apolos, eia ere? Eia isapolo mave? Eau, e Pol, eau tai, eau isapolo mave? Amite la bilalaha tomi moli te Kraist, ale pala amite vahiliti la gabutatalala tamutou, amuto goio tau la ilo mutou soio te Kraist. Amiteu la bilalaha tomi isasasa, amite igo la igogolu ale La Tahalo Uru tabaria somai tamiteu.
1CO 3:6 Eau mamuga galugalu la vavuala, mai la merera te Kraist eau valolo amutou ovola, e Apolos mulimuli tigi tataro la lalu oio vola, eala moli La Tahalo Uru sekela moli vibalavea, eia kusi mai la obu sesele, kama eau, kama e Apolos.
1CO 3:7 Ere galugalu, ere vibaumulimuli, ale la golu bulalahu moli, etato umala ge toi tabaribari egiteu mai ele, egiteu ale igogolu te Kraist. Etato ge gabu tikumu La Tahalo Uru sekela, la vuhula eia moli vikusi la merera ale etato galua.
1CO 3:8 La tahalo ale galugalu, la tahalo ale vibaumulimuli, egira visauru moli, La Tahalo Uru ge kolia soio tegirua mai te la igogolu ale egira igotia.
1CO 3:9 La vuhula, amiteu la bilalaha tomi, amite vaigogolu vikapopo moli te la igogolu te La Tahalo Uru, me amutou la valalua me hatavivile te Kraist, amuto mai la mahuma te La Tahalo Uru, ale amite vulalai ovola. Amutou mai tai la luma te La Tahalo Uru.
1CO 3:10 Te la gilogo tetala, eau mai ale soko la tiligi la luma tetala oio tamutou, ale eau valolo amutou. Eau mai ale oli taro moli la sosolela, goio igoie la tahalo isa lou tigi la luma soata ovola. Eala moli etato tomi ge vibaumuli tigi, etato soukama tigi gegeru la luma te La Uru, mai ale etato vimari gegeru la valalua me hatavivile.
1CO 3:11 La vuhula la luma tetala, la sosolela e Iesus Kraist moli sekela, La Tahalo Uru vipoua mai ele, la sosolela isa lou ouka.
1CO 3:12 Tio la sosole la luma oioti, etato ge tigi la luma ale mave loata ovola? Mai isa ge tigi la luma me la papaga ale vagari, veia mai isa tai ge tigi la luma me la obu bulalahu moli ale kama vagari,
1CO 3:13 tio la igogolu alele eia ge magiri matagaga te la tapasi la haro ale e Kraist ge gomai lou ovola. e Kraist ge mata muli la igogolu tegatou tomi soio te la lotu tetala, la viputumulila tetalale eia ge tululu mai la havi, eia ge selu taro la igogolu tomi tegatou ale kama sesele.
1CO 3:14 Mai la tahalo ge tigi la luma la papaga ale vagari, eia kama ge tululu. Tio e Kraist ge hiloa mai ele veia eia sesele, eia ge vibalava la tahalo ale la igogolu tetala eia taritigi mai ele.
1CO 3:15 Eala moli la igogolu ale kama sesele, la havi ge alia, eia ge kaluvu, la tahalo la igogolu alele, eia ge mahuli utu, eala moli mai la gilogo te Kraist ge ouka, bakisi moliti eia ge mai ale peho kabili te la havi.
1CO 3:16 Amutou la valalua me hatavivile la lotu te Kraist, la tia mutou eia mai la luma la lotu ale maroka te La Tahalo Uru. La Kalulu La Marokala te La Tahalo Uru, eia mou oilo te la kalulu mutou isasasa. La vimari tomi alele, amuto soioge soukama matagaga ovola, ia?
1CO 3:17 Mai la tahalo isasa ge vimumugu la tia mutou la valalua me hatavivile te Kraist, me amuto goio marapa, amuto vaigo, tio La Tahalo Uru ge igo gegeru tai eia, eia ge vure. La luma la lotu te La Tahalo Uru, eia la paga ale maroka sesele, me amutou ale tetala, amuto magiri mai la irovilala moli mai la luma la lotu tetala sesele. Eala, eia tikumu viruru veia isa ge tovo lalaia veia ge igo gegeru la pulolou ale taritigi tamutou ale te Kraist.
1CO 3:18 Taritigi amuto ge gabutatala tigi, amuto soukama tutugolo rivu lou amutou veia la mari tamutou eia la paga ale sesele. Mai isa ge gabutatalea veia eia la tahalo la mari, mai te la mari te la vovo moli, tio taritigi eia ge vulo la gabutatalala tetala, eia ge vulo mai la tahalo ale la valalua te la vovo veia eia la mari ouka, tio eia ge sau tola sesele mai ele la mari ale uru te La Tahalo Uru.
1CO 3:19 La vuhula, la mari te la vovo, eia la golu bulalahu te la mata La Tahalo Uru. Mai La Buk Tabu Ale Pala eia veia maie “La Uru vititilo egiteu la tahalo la mari te la mari papaila tegiteu lou.”
1CO 3:20 Me la merera te La Buk Tabu isa lou eia veia maie “La Uru, eia rovia veia la gabutatalala tegiteu la tahalo la mari, eia la golu bulalahu moli.”
1CO 3:21 Tio, taritigi pepeho mai ele veia isa tamutou umalati ge vei tataho la mari te la tahalo la vovo isasa. Amuto kama ge ligi la paa muli la mari, la merera, me la papaga tomi, la vuhula amuto taholatia.
1CO 3:22 Eau, e Pol, e Apolos tai, me Pita, La Uru abitia mutou amiteu taho tolu ele veia amite ge suli amutou. La magasa tomi, la maututula tomi, eia sugu taro tomitia mutou veia amuto ge taholea. La mahulila ale amuto taholea, eia la mahulila moli te Kraist. Mai tai amuto ge peho, la pileho eia kope moli la mata ale amuto ge goio tetala. La imamala ale pala, la imamala ale mulimuli, amuto mamuga ovola, la vuhula amuto pou la mulugaluga vikapopo me Kraist.
1CO 3:23 Amuto te Kraist tomi moliti, me Kraist, La Tahalo Uru sesele sau tolea, eia tetalati.
1CO 4:1 La Uru moli sekela ge mata muli la igogolu tamilua me Apolos, amutou e Korin ge ouka! Taritigi amuto ge gabutatala amilua veia amila la bilalaha moli te Kraist, amila veipala la merera tetala ale pala tabuli kokovu, amila veipalea soio tamutou, igoie amuto matagagati.
1CO 4:2 Mai la bilalaha, la gabutatalala isa uru moli oio ale etato ge mata muli la vulovulola oio vola, veia eia roromuli la uru tetala, ka ouka?
1CO 4:3 Mai eau, e Pol, amutou e Korin, amuto gabutatalea veia eau igogolu tigi, ka ouka? Eau kama gabu tikumu la gabutatalala tamutou, me la gabutatalala tai tegiteu la valalua la vovo isahari lou te la igogolu taku, ouka gologolo. Eau tai kama ge mata muli rivu lou la igogolu taku veia ge vei tataho eau, ouka.
1CO 4:4 Sesele, eau kama gabutatala papai te la igogolu te Kraist ale eau igoa, eala moli la gabutatalala taku tai ele, eia la gabutatalala bulalahu moli mai la gabutatalala tomi te la vovo. La Uru sekela ge mata muli la igogolu taku veia eia taritigi, ka ouka.
1CO 4:5 Taritigi pepeho veia amuto ge vibaumuli tigi, amuto umala ge tomu sasae la igogolu te la tahalo te Kraist. Amuto ge pou tali moli la haro ale La Uru ge gomai lou, la vuhula la matagaga tetala ge veipala la gabutatalala tegatou tomi ale etato tau kokovua, me la vulovulo gatou tomi tai. Te la haro moli alele, mai isa ge la bilalaha ale sesele, La Tahalo Uru ge vaisalea.
1CO 4:6 Amuto tabarabaragu, la merera taku tomi ele, eau mai ale toitia somai tamilua me Apolos veia amuto ge matagaga tigi, la vuhula amuto vaigo muli amilua. Amuto umalati ge toi tabaribari amiteu la bilalaha te Kraist. Amuto ge gabutatala tigi, amuto kamati ge vei tataho la tahalo la valolo isa veia ge vaurua mai ele, veia e tabarala isa lou te la valolo te Kraist amuto ge vilea.
1CO 4:7 Ere veia mutou veia amuto ge tomu sasae la igogolu tamiteu la bilalaha? Mai amuto la mari ge oio, ere abia mutou la mari ale? Amuto kama ge tahola isa la paga mai La Tahalo Uru eia kama ge abia mutou. Mai ge mai ele, mave sesele amuto vauru rivu lou amutou, veia amuto vulo uru te la mari me la vagagari mutou lou?
1CO 4:8 Amuto Korin ele, amutou kama savele isa la paga, ia? Amuto soioge la tahalo la vuliti te la kalulu mutou, ia? Amuto pouti la pulolou la uru, amiteu la bilalaha te Kraist ouka, ia? Eau masaga seselea veia amutou ge la uru sesele mai ale amuto veia. La vuhula amiteu la bilalaha, La Tahalo Uru eia vauruti amiteu, me amite masagea veia amuto tai ge pou tomi sesele le amiteu te la pulolou la vibalavala tetala.
1CO 4:9 Mai amiteu la bilalaha ge uru mai amutou! La Tahalo Uru eia soioge sugu taroti amiteu sotigu kililili mai la tahalo la kilisi ale egite ge lapua soio te la pileho. Egiteu la valalua ale vagari robo amiteu, egite mai ale mamuga, egite lapulapu amiteu la bilalaha mai la maroa, la valalua tomi me egiteu la angelo tai, egite malelei amiteu te la mahelala tamiteu ele.
1CO 4:10 La valalua ubi le amiteu la bilalaha te Kraist la merera veia amite kama gabutatala vauru isa la paga lou, e Kraist moli, eala amite mata mai la paua. Eala moli amutou, amuto mata mai la tahalo la mari sesele te Kraist! Amite maveve, amuto vagari! La valalua togo amutou, eala moli egite vile amite.
1CO 4:11 Kara igoie, amite gabu moli la vitolola, amite la ilali ouka, la lalu tai ouka, la lavalava tai ouka, egite kue gegeru amiteu, amite tuga vulovulo, la luma ouka, la mautu tai tamiteu ouka.
1CO 4:12 Amite igogolu vagari, amite ali moli te la vagagari miteu lou, isa kama suli amiteu. Egite ge gilo amiteu, amite ge toi rivu moli la vibalavala soio tegiteu. Egite vile amiteu, eala moli amite magiri vagari moli, amite kama piligi la igogolu te Kraist veia la valalua ge masaga lou amite.
1CO 4:13 Egite vikara kukumua miteu, amite koli molila la merera ale taritigi. Kara igoie, amite mai seseleti la maroa, ale egite sapa taroa.
1CO 4:14 Eau kama kekesia mutou veia ge igo mahela amutou, eala moli eau masagea veia ge viteteli tigi amutou mai e latatugu sesele
1CO 4:15 Eau valolo amutou pala te la valolo ale taritigi te Kraist, eau vagoilo amutou te la lotu te Kraist mai la tahalo eia visibitala e latula. Egiteu ale ge vimari le amutou la gauru te Kraist soioge mapaiti, eala moli e tama mutou te Kraist Iesus isa moli sekela, eiau.
1CO 4:16 Oio vola, eala eau karasuku amutou veia amuto ge abi tavu la vulovulogu.
1CO 4:17 Eala eau bahati e latugu e Timoti soio tamutou, eia la tahalo sesele te La Uru, eau isu pepehoa. Eia ge vahiliti lou la gabutatalala tamutou te la gauru te Kraist Iesus ale eau mulimulia, eia visauru moli me la vimari taku tomi soio tegiteu la valalua me hatavivile la lotu tomi te Kraist, oio te la galegale tomi, ale eau valolo egiteu ovola.
1CO 4:18 Isahari tamutou ge hiloa veia eau bahati e Timoti, amuto ge vareagi lou veia eau kamati ge goiole.
1CO 4:19 Eala moli eia kama ge tabaa, eau tai ge gomai tamutou, mai La Uru ge masagea. Ale eau ge guvi, eau kama ge lolo la merera tegiteu ale vareagi, eau ge hilo moli la vulovulo giteu veia egite magiri te la igogolu ale vagari te La Uru mai la tahalo te Kraist sesele, uka egite soioge la golu bulalahu moli.
1CO 4:20 La vuhula la pulolou la marokala te La Tahalo Uru, eia kama la merera moli, eia la pulolou la matagaga tetala, me oilo vola etato veipala la vagagarila te La Uru sesele oio te la vulovulo gatou.
1CO 4:21 Amuto masaga ale mave, veia eau ge gomai ge vilai amutou, uka amuto masagea veia eau ge gomai tamutou vikapopo me la merera ale taritigi, la sagegela moli oio te la tiagu?
1CO 5:1 Eau loloti la vikararala isa tamutou veia oio tamutou la iruru soio te la tavile eia magiri, me la mata la iruru alele egiteu la valalua la maligoma magiri roboa, eala moli amuto mata sosoli molia. Egite veiagu veia isa tamutou eia lolo susu tavu e rutule tamala, eia vimavuta tomi leia.
1CO 5:2 La iruru oio magiriti, eala moli amuto veia ge vei tataho rivu lou amutou veia amuto taritigi, ia? Mai la tia mutou ge volu moli la iloburukola me la tilali! Mai amuto ge pitaro gale la tahalo ale igoti la iruru alele, eia kati ge pou vikapopo le amutou te la lotu te Kraist.
1CO 5:3 Eia sesele, eau kama oio tamutou ele, eala moli te la kalulugu eau mai ale pou vikapopoti le amutou, me te la isale Iesus, La Uru gatou, eau mai ale veipalatia la iruru te la tahalo ale, eau toitia veia la iruru tetala eia tikumu.
1CO 5:4 Mai amuto ge pou vikapopo, eau tai la kalulugu ge pou tomi le amutou. Tio eau tutu tolea mutou veia te la vagagarile Iesus Kraist, La Uru gatou, eia pou vikapopo letatou,
1CO 5:5 amuto ge pitaro gale la tahalo la iruru alele, eia ge pou malau, eia ge goio ge pou lou te la pulolou la maligoma te Satan. Amuto ge vilaia mai ele veia eia ge gabua, eia ge piligi taro la vulovulola ale kama kokora te la vovo, veia eia ge vuvulo me la kalulula ge mahuli te la haro ale La Uru ge guvi lou ovola.
1CO 5:6 Eia kama taritigi veia amuto ge vei tataho rivu lou amutou veia la vulovulo mutou taritigi. Mai amuto mata sosoli la iruru kabili tamutou, eia kama ge tabaa, eia ge poloa mutou tomi. Eau ge tovoa soio te la marasin ale visogo la palava. La marasin bakisi moli, eia goio visogo la bret ale uru.
1CO 5:7 Taritigi amuto ge pigi la paga la visogo la palava ale malipiriti, eia kamati taritigi, mai la vulovulo mutou ale kama kokora. Amuto ge piligia, amuto ge sibitala halaba mai la ilali ale taritigi sesele, la vulovulo mutou ale kama kokora, egite igo gegeru amutou pala, ge oukati. Amuto ge sibitala maroka mai la irovilala te la mahulila ale halaba te La Tahalo Uru, amuto ge maroka mai la bret ale La Uru vibalavea, eia kama sogo, egiteu e Iuda alalia te La Ilali La Poloselela vikapopo e latu la sip ale egite kaoa. e Kraist, eia mai e latu la sip ale peho robo etatou, egite katu tolatia oata te la tauvalautu, eia rou rivuti etatou te la iruru tegatou. Eala igoie etato marokati.
1CO 5:8 Eala, eia taritigi pepeho veia etato ge pou la sagegela, mai egiteu e Iuda pou la sagegela te La Ilali La Poloselela. La vulovulo gatou ale pala mai la vulovulo la iligo barala me la kolibara la iruru, eia ge kokovu. La vulovulo gatou ale palale, egite igo gegeru etatou, eala moli etato pou te la matagaga te la merera ale sesele, la paga isa kati igo mumugu etatou, etato mata mai la ilali ale taritigi, la vulovulo gatou kamati kama kokora mai la ilali ale mavulu.
1CO 5:9 Ale eau pala kekesia mutou veia amuto umala ge vikapopo legiteu la tahalo la iruru. La masova la merera taku alele eia mai ale eau mera taro amutou tegiteu ale veia egiteu e tabara mutou te Kraist, eala moli egite la iruru soloio. Egiteu pou te la iruru tomi maie: Egite igigo la iruru soio te la tavile; egite hate ololu la golugolu tegiteu; egite lotu tatavu la puigolo; egite mera kukukumu; egite liu galololo; egite tutugologolo la valalua, pakali la uati tegiteu. Te la merera taku ale eau pala kekesia mutou, eau kama gabutatalea veia amuto umala ge vikapopo legiteu la valalua bulalahu moli ale igigo egiteu la iruru alele. Mai ge mai ele, amuto kamati ge koramulia ge pou lou omai te la maututula, la vuhula egiteu la iruru tomi alele, eia volu sesele. Eau mera taro moli amutou tegiteu la tahalo la iruru ale kaua giteu veia egiteu te Kraist. Umala amuto ge hagagavi tegiteu, umalati alali tai tomi legiteu ele.
1CO 5:12 Ale kama la igogolu taku veia eau ge tomu sasae la vulovulo giteu ale logala te la lotu te Kraist. La Tahalo Uru moli ge mata muli la vulovulo giteu ale kama kokora. Eala moli eia koramuli seselea veia amuto ge mata muli la vulovulo giteu ale goiloti te la lotu. Mai La Buk Tabu Ale Pala eia veia maie “Pitaro gale la tahalo la iruru, eia umalati ge pou vikapopo le amutou.”
1CO 6:1 Mai isa tamutou la vikararala isa eia magiri kabili tegirua me tabarala isa te la lotu te Kraist, umala eme ge kotiala soio te gavman veia la tahalo ale kama rovi La Tahalo Uru eia ge mata muli la iruru te la tahalo te Kraist. Taritigi amuto ge vimatata la iruru tetala kabili tamutou la valalua la lotu moli.
1CO 6:2 Mave, amuto kama rovia La Uru eia viputumulitia veia mulimuli etatou la valalua te La Tahalo Uru, etato ge mata muli la vulovulo giteu la valalua tomi? La vimari alele, amuto kama rovia, ia? Mai amuto ge koramuli la igogolu ale tikumu mai ele, mave, amuto kama ge koramulia ge mata muli egiteu la iruru bisisi ale sibitala kabili tamutou te la imamala ale igoie?
1CO 6:3 Etatou ale te Kraist, etato mulimuli ge mata muli tai la vulovulo giteu tai la angelo te La Uru, me amuto kama rovia, ia? Eala, eia matagaga mai ele veia eia kama vagari tamutou veia amuto ge mata muli la iruru te la tahalo la vovo.
1CO 6:4 Mave, mai la igototolola eia ge sibitala kabili tamutou, amuto ge vahari egiteu ale vaigo soio te la tahalo ale kama gabu tikumu e Kraist? Amuto soioge veia ge vahari egiteu soio te la tahalo ale etato la valalua te Kraist kama gabu tikumu seselea, eia kama lotulotu?
1CO 6:5 Eau karasuku amutou mai ele veia amuto ge gabua, amuto ge mahela te la vulo mutou alele. Mave, isa tamutou kama oiole, ale la mari tetala eia taritigi, koramulia veia eia ge vimatata la iruru bakikisi oilo kabili tamutou la valalua te Kraist?
1CO 6:6 Eala moli oio tamutou ele, la tahalo te Kraist isa, eia ge hiliti, eia ge kotiale tabarala soio te gavman, veia la tahalo ale kama tautaulailo te La Uru, eia ge mata muli la vulovulo mutou ale te Kraist. Eala, amuto kama igo tigi.
1CO 6:7 Ale eau hiloa amuto vilapulapu le amutou soio te la vigagiala, la vulo mutou alele eia veipalatia mai ele veia amuto kamati kokora. Mai amuto ge pou makovu moli, egiteu ale igo la iruru soio tamutou ge korale.
1CO 6:8 Eala moli amuto tutugolo egiteu e tabarabara mutou lou te la lotu te Kraist, amuto igo la iruru soio tegiteu.
1CO 6:9 Mave, amuto soioge kama rovia veia egiteu la tahalo la iruru, La Tahalo Uru eia kama ge puli egiteu soio tetala veia egite ge pou te la balila? La viputumulila ale amuto soioge vautila, ia? Gabutatala tigia, amuto soukama ge ruru. La tahalo la iruru, eia ge galo te la pulolou la balavala te La Uru. Egiteu la tahalo la iruru, egite moli igigo la vulovulo giteu maie: Egite igo valalololo la iruru; egite lotu tavu la puigolo; egite igo gegeru la taulaila; egite vaigo baololi legiteu;
1CO 6:10 egite pakalikali; egite tau ololu la vuliti tegiteu; egite liu paua; egite gilogilo; egite bilibili. Egiteu tomi la valalua me hatavivile ale igigo la mata la iruru tomi mai ele, La Tahalo Uru eia kama ge puli egiteu soio tetala te la pulolou la balavala oio te la balila.
1CO 6:11 Isahari tamutou e Korin ele, amuto pala pou tegiteu la iruru ale tikukumu mai eau toitia. Eala moli igoie amuto marokati, la vuhula La Kalulu La Marokala eia vuhi halabati la vulovulo mutou, eia toitia veia amuto maroka, la vuhula amuto tautaulailoti te Iesus Kraist, La Uru gatou.
1CO 6:12 Isahari tamutou e Korin ele, amuto vikara maie mago “Eia koramulia veia etatou ale te Kraist ge tilimuli la masasagala tegatou isasasa te la vulovulo tomi ale taritigi te la vovo, la magiri robola ouka.” Me la vikararala tamuto alele, eia sesele, eala moli la vulovulo gatou isahari te la vovo, eia kama suli tigi etatou te la pulolou tegatou te la lotu te Kraist. Eia koramulia veia eau e Pol, eau tai ge vikara maie mago “Eau koramulia ge mulimuli la vulovulo tomi te la vovo”, eala moli eau kama masagea veia la masasagala isa te la vovo ge kisiau.
1CO 6:13 Isahari tamutou soioge ge koli lou la vikararala taku ele veia La Tahalo Uru vipou la ilali veia etato ge alia, me eia vipou tai la tamusi gatou veia la ilali ge tabuli oilo vola, eala la masasagala tomi te la vovo, etato ge mulimuli molia. Me eia sesele la merera tamutou ele, eala moli La Tahalo Uru mulimuli ge vikaluvu la ilali, me la tamusi gatou tai, eia ge kokovu. La masasagala te la vovo tomi, eia ge kaluvu, ale etato ge peho. Eala, eau tutu tolea mutou veia amuto umala ge gabutatalea veia La Uru vipou etatou veia la tahalo ge abi valalololo egiteu e hatavivile mai te la masasagala moli tetala. Me eia kama vipou egiteu e hatavivile veia egite ge puli valalololo egiteu la valalua. Eala moli eau masagea veia amuto ge matagaga tigi veia La Uru, eia vipou la vovo gatou veia etato ge suli la igogolu tetala, me eia tai ge suli la pulolou tegatou te la mahuli la vovo.
1CO 6:14 Te la vagagarila ale uru, La Tahalo Uru eia vimahuli rivu lou e Kraist taro la pileho, me eia mulimuli ge vimahuli rivu lou tai etatou tomi.
1CO 6:15 Mave, amuto kama rovia veia la vovo mutou eia mai la vovole Kraist sesele? Me mave, eau ge abi la vovole Kraist, veia amila me la tavile la gauru ge vimavuta tomi, ia? Ouka gologolo.
1CO 6:16 Mai isa ge vimavuta tomi la tavile, ale la vovo girua eia visauru moliti, mai La Buk Tabu Ale Pala eia veia maie “Egira ge isa moli.”
1CO 6:17 Eala moli mai isa ge vikapopo La Uru, la kalulu girua me La Uru ge isa moliti tai.
1CO 6:18 Eala, eau veia ge viteteli vagari amutou maie: Taritigi amuto ge hele taro la vulovulo la iruru tomi ale eau vimatagagati amutou ovola. Amuto umala ge abi valalololo egiteu e hatavivile, ge umala ge igo gegeru tai la taulaila, la para osaosala me la mata bulakalakala tai ge umala. Egiteu la iruru tomi mai la pakalila, eia mai ale igo marapa moli la pulolou te la valalua, eala moli egiteu la iruru ale eau so totoi egiteu, egiteu mai ale igo gegeru la vovo mutou lou me la kalulu mutou tai oilo, la vuhula kama eme sekela ale igoa, amulua me la tavile tomi.
1CO 6:19 Mave, amuto soioge kama rovia veia la vovo mutou eia mai la luma la lotu te La Kalulu La Marokala? La Kalulu La Marokala, La Tahalo Uru moli abia mutou, eia pouti tamutou. Amuto kama tahola la vovo mutou veia amuto ge mamuga ovola.
1CO 6:20 E Iesus, eia peho robo amutou, eia loto rivu lou amutou mai ele taro la limale Satan, eia piligi la mahulila tetala, la mapa mutou eia kama bisi. Eala eia taritigi pepeho veia amuto tomi isasasa ge vibaumuli la vulovulo mutou te la vovo, veia la vulovulo mutou tomi ale amuto igigoa eia ge maroka, la tilogo me la sagegela ale uru sesele ge goata te La Tahalo Uru mai ele.
1CO 7:1 Amuto pala kekesiagu, amuto tahiau la tilahi isahari, tio eau veia ge kolia. Amuto tahiau te la vulovulo la taulaila. Eau veia eia taritigi veia amuto ge samura moli,
1CO 7:2 eala moli la vulovulo usu ale kama kokora oio te la mautu tamutou, eala eau veia eia taritigi veia amuto la valalua tomi isasasa ge taulai, me amuto hatavivile tomi tai ge taulai.
1CO 7:3 Amutou la valalua, amuto ge pou mai la vulole tau me rutu vikapopo me rutu mutou, me amutou e hatavivile tai, amuto ge igo sesele la vulo la taulaila vikapopo me harua mutou, kama ge vitoua giteu.
1CO 7:4 Amutou e hatavivile, la vovo mutou kama tamutou sekela, eia te harua mutou tai. Me amutou la valalua, la vovo mutou kama tamutou sekela, eia te rutu mutou tai.
1CO 7:5 Amuto ge igo sesele la vulole tau me rutu, kama ge tou, eala moli mai la tahalo me rutula ge viputumulia veia ge mavuta baa la logo isahari veia ge gabu sekela la kilaka, ale tai taritigi. Mulimuli ovola, amuto ge vimavuta tomi lou, e Satan soukama ge vitilo lou amutou, la vuhula amuto kama magiri vagari te la tovolalaila, mai la gabutatala papaila soio te la tavile isapolo.
1CO 7:6 La merera tomi ale, eau vei molia mutou ovola veia ge suli amutou, eau kama ge kisi amutou ovola veia amuto tomi ge mulimuli sesele tomia, eia te la masasagala moli tamutou isasasa.
1CO 7:7 La gauru ale taritigi sesele ale eau masaga seselea eia kama mai ele, veia amuto ge vipulipuli. Eau masagea veia amuto tomi ge samura mai eau. Eala moli eia la paga te La Tahalo Uru, eia tabari la masasagala tetala mai la vaabila somai tegatou la valalua me hatavivile, eia isapolopolo, isahari La Uru veia egite ge puli e rutu giteu me harua giteu, isahari ouka.
1CO 7:8 Isahari tamutou e Korin ele, amuto samura, isahari baharu, e harua mutou pehoti. Eau veia mutou maie: Eia taritigi veia amuto ge pou sekelakela mai ele, mai tai eau.
1CO 7:9 Eala moli mai la gabutatalala tamutou eia kama magiri vagari, me amuto gabu pepeho lou la vulole tau me rutu mai ele, ioge, eia koramuli taia veia amuto ge taulai. Amuto soukama hate saga tavu e hatavivile me la valalua veia ge puli egiteu, eala eia koramuli taia veia amuto ge taulai, amuto ge pou tigi.
1CO 7:10 Amutou isahari taulaiti, amuto tomi me rutu mutou rovi e Kraist. Tio eau ge toi la merera isasa te La Tahalo Uru soio tamutou, amuto ge loloa. Eia kama la gabutatalala taku moli ale eau ge veipalea, ouka. La vikararala alele, eia maie: La tavile umala ge tou e haruala veia egira ge vipou baa.
1CO 7:11 Mai eia ge tou sesele e haruala mai ele, eia ge samura moli, eia umala ge taulai lou, eala moli taritigi tai mai eia ge puli rivu lou e haruala. La tahalo umala tai ge tou e rutula veia egira ge vipou baa.
1CO 7:12 Me amutou isahari lou, amuto taulai pala muga, mulimuli la lotu te Kraist sibitala, tio eau ge toi la merera isa soio tamutou, amuto ge loloa, eia kama la merera te La Tahalo Uru, eia la gabutatalala taku moli ale eau veipalea. Tio la vikararala alele eia maie: Mai eme la tahalo te kraist, eala moli e rutumu kama tautaulailo, me eia masaga molime mai ele, eme umala ge tou e rutumu ele.
1CO 7:13 Mai eme la tavile te Kraist, eala moli e haruamu eia kama tautaulailo, me eia masaga molime mai ele, eme umala ge tou e haruamu ele.
1CO 7:14 La vuhula e haruamu ale eme pulitiale, me e rutu la tahalo te Kraist tai ale eia soukama rovi la lotu, eia mai ale sibitala maroka oio te la tautaulailo taume soio te Kraist. Ale e Kraist toitime veia eme tetalati, tio ale amulua tomi me haruamu me rutumu tomi sibitala marokatio. Mai la viputumulila te la lotu kama ge mai ele, egiteu e latatu mulua ge pou te la maligoma, eala moli ouka, egite maroka te la tautaulailo te tama giteu me tila giteu sekela soio te Kraist.
1CO 7:15 Eala moli mai eme la tahalo te Kraist, me rutumu ale kama rovi e Kraist eia ge toume, eia ge tuga, ale korati ele. Mai tai la tavile te Kraist tai, mai e haruala ale kama rovi e Kraist, eia ge toua, ge tuga, ale tai taritigi pepeho tai mai ele. La merera la magiri robola te la vipou baala te la taulaila eia kama pou tamutou ele, la vuhula La Tahalo Uru masagea veia etato ge pou tigi moli, la vaigo totolola ge ouka.
1CO 7:16 La tavile, eia kama koramulia ge rovia veia mai eia ge sau tola e haruala ale kama rovi e Kraist, tio mulimuli la tahalo ale ge vulo la gabutatalala tetala soio te Kraist, eia ge mahuli. Me la tahalo tai, eia kama koramulia ge rovia veia mai eia ge sau tola e rutula ale kama rovi e Kraist, tio mulimuli e rutula tai ge vulo halaba, eia ge mahuli. Eala, mai e haruala me e rutula ale kama rovi e Kraist eia masagea veia ge tuga, korati ele, eia ge tuga moli.
1CO 7:17 Eala moli eau masagea veia amuto tomi isasasa ge pou tola moli te la pulolou tamutou ale La Uru vipouti amutou ovola mai la tabarila tetala soio tamutou, ale amuto pou ovola te la imamala ale eia tola tavu amutou. La viputumulila alele, eau toia soio tegiteu la valalua me hatavivile te la lotu te la maututula tomi.
1CO 7:18 Mai la tahalo te Kraist isa, egite koroti la vovola mai la irovilala tegiteu e Iuda, taritigi pepeho, eia ge mai moli ele. Mai la tahalo te Kraist isa, egite kama koro la vovola, taritigi pepeho tai, eia ge kora moli mai ele.
1CO 7:19 Mai egite koroti la vovomu, uka eme la vovomu kama koroa, ale la golu bulalahu. La paga isa moli tikumu, veia etato ge roromuli moli la merera te La Tahalo Uru.
1CO 7:20 Amuto tomi isasasa ge pou tola moli te la pulolou ale eme pou ovola te la imamala ale La Tahalo Uru tolame soio tetala.
1CO 7:21 Mai eme la bilalaha te la tahalo isasa, eme umala ge gabutatala papai la kilisi taume ele veia la igogolu taume eia vagari, eia kama kokora, la vuhula oio te la mata La Uru eme la tahalo sesele. Mai eme la tahalo la vuliti, te la mata La Uru eme la bilalaha moli tetala. Eala moli mai eme la tahalo la igogolu, me eme ge hilo la gauru ale koramuli eme ge gogala te la pulolou la kilisi taume, eia taritigi tai veia eme ge gogala.
1CO 7:23 E Kraist peho robo amutou, eia piligi la mahulila tetala, la mapa ale eia lototi amutou ovola eia kama bisi, eala eia taritigi veia amuto umala ge pou la kilisi lou te la gabutatalala te la vovo lou.
1CO 7:24 Amuto tabarabaragu, amuto ge vipou tomi me La Tahalo Uru, mai te la pulolou tamutou sesele ale amuto pou ovola te la imamala ale eia tola amutou soio tetala.
1CO 7:25 Amuto tahitiau tegiteu la soesobe me tegiteu hatamale halaba ale e latatu mutou veia eia taritigi egite ge taulai ka ouka? Me eau la merera ouka ale loio sesele te La Tahalo Uru te la kiloli la tilahi tamutou ele. Eala moli La Uru eia gogoau, eia abitiagu la mari tetala, eala eau veia eia koramuli seselea veia amuto ge lolo la merera taku te la vulovulo la taulaila.
1CO 7:26 Te la imamala ale igoie, la iloburukola uru guviti, teale la valalua la gima vile etatou ale te Kraist. Eala eau veia mai eme la samura, eia taritigi veia eme umala ge taulai.
1CO 7:27 Sesele mai eme taulaiti, eme kama ge tou e rutumu, eala moli mai eme soukama taulai, taritigi eme ge samura moli mai ele, umala eme ge paa muli muga e rutumu veia ge pulia.
1CO 7:28 Eala moli mai eme vagari veia ge taulai, me eme ge puli e rutumu, ale la golu isa ouka. Me la sobe tai, mai eia ge vagari veia ge puli e haruala, eia taritigi tai ele. Eala moli egiteu ale taulai, egite ge poga tavu la iloburukola ale uru pepeho te la imamala ale igoie, la vuhula egite la vibaumulila uru soio te latatu giteu. Me eau kama masaga amuto ge ligi pepeho te la vulovulo giteu ale gima e Kraist, mai egite ge viligi amutou.
1CO 7:29 Amuto tabarabaragu, la masova la merera taku alele, eia maie: La leavala kati usu, La Uru gatou ge beu loua, eala moli la igogolu ale uru soloio. Mai eme taulaiti, taritigi eme ge gabutatala sekela e Kraist, te la gabutatalala taume eme ge mai la tahalo ale kama taulai, eme ge gabu tikumu la igogolu te Kraist.
1CO 7:30 Mai la pileho tai, umala gabu tikumua. Mai la paga la sagegela, umala gabu tikumu taia. Mai eme ge loto isa la paga, eme kama ge sau tolea mai ale taume sesele.
1CO 7:31 Mai eme la tahalo ale pou te la igogolu ale uru, la merauala te la igogolu taume, eia umala ge lapu la gabutatalala taume taro e Kraist. La vuhula la pulolou ale etato rovia igoie, eia mai ale kaluvuluvuti.
1CO 7:32 Eau masaga pepehoa veia amuto kama ge gabutatala papai. La tahalo ale kama taulai, eia ge gabutatala sekela la igogolu te La Uru veia ge visagege eia.
1CO 7:33 Eala moli la tahalo ale taulaiti, la gabutatalala tetala usu, veia eia ge baumuli e rutula,
1CO 7:34 eala eia gabutatala papai la igogolu uru, kama te La Uru sekela. Mai la tavile tai ale kama taulai, eia ge gabutatala sekela la igogolu te La Uru veia eia ge la tavile te Kraist sesele, mai te la vulovulola te la vovo, me te la kalulula tai. Eala moli la tavile ale taulaiti, la gabutatalala tetala usu, veia eia ge vibaumuli soio te haruala, eala eia gabutatala papai la igogolu uru, kama ale te Kraist sekela.
1CO 7:35 Eau vei matagaga molia mutou mai ele veia ge suli amutou, la merera taku ele eia kama ge magiri robo amutou te la taulaila. Eau masaga molia veia amuto ge pou tigi moli, la gabutatalala tamutou ge te La Uru sekela moli.
1CO 7:36 Mai la tahalo isasa, egite abi robotiala e rutula, eala moli eia soukama puli seselea, me eia vagari veia egira me rutula ge vipou tomi, taritigi veia eia ge laha robo pasia, egira ge vimavuta tomi.
1CO 7:37 Eala moli mai eme gabutatala sekela e Kraist, me eme vagari sesele veia eme kamati gabutatala egiteu e hatavivile, tio eme umalati ge puli e rutumu ele, la gabutatalala taume tai ele eia taritigi pepeho.
1CO 7:38 Eala, eia matagagati veia mai isa ge masaga ge taulai, eia taritigi, eala moli mai isa ge pou moli la samura, kati ge taulai, tio la vulolale eia taritigi pepeho pasi.
1CO 7:39 La tavile ale taulai, eia te haruala moli, mai e haruala ge soloio. Mai e haruala ge peho, eia koramulia veia eia ge taulai lou, eala moli eia ge puli moli la tahalo te Kraist.
1CO 7:40 Eala moli la gabutatalala taku te alele, eau veia la tavilele eia ge sagege pepeho mai eia ge pou la samura. Eia tikumu taku mai ele, me eau gabutatalea veia la gabutatalala taku ele eia la vimari te La Kalulu La Uru soio tamutou.
1CO 8:1 La tilahi isa lou amuto tahiau ovola veia eia koramulia veia etato ale te Kraist ge ali la kalia ale egite vaabila te la lotu la visigologolola, ka umala. Eia sesele viruru ale amuto veia maie “Etato tomi la tahalo la mari”, eala moli la mari ale uru mai ele, eia vitilo etatou veia etato ge vareagi. Eala moli mai etato ge pou te la gilogo, la vulovulo alele eia sau tola vagari la valalua me hatavivile te Kraist.
1CO 8:2 Mai isa veia eia la tahalo la mari, eia veipalea mai ele veia eia kama rovi sesele isa la paga.
1CO 8:3 Eala moli la tahalo ale masaga sesele La Tahalo Uru, la kalulula eia ge mai ale matagagati veia La Uru eia rovi seseletia la tahalo ale, eia tetala.
1CO 8:4 Ioge, la merera taku te la kalia ale egite vaabila te la lotu la visigologolola, eia maie: Etato tomi rovia veia egiteu la puigolo te la lotu la visigologolola, egite kama sesele. La Uru isa sekela oio, La Tahalo Uru moli ale etato lotu tavua, isa lou ouka.
1CO 8:5 Eala moli egiteu la valalua la maligoma, egite lotu tavu la uru usu ale egite puia. Etato rovia veia egiteu la puigolo mapaiti oio ale egite la valalua la maligoma lotu tavua, egite veia isahari pou oata la mori, isahari sau tola otalo tai te la maututula la magasa, egite vausu la mari papaila tegiteu mai ele. Eala moli etatou ale te Kraist, etato rovitia veia La Uru isa sekela oio, eia la vuhu la golu tomi, eia vipou etatou veia etato ge suli la igogolu tetala.
1CO 8:6 La Uru isa sekela oio, e Iesus Kraist, eia vipou la golugolu tomi, eia vimahuli etatou ale tetala.
1CO 8:7 Eala moli la valalua isahari te Kraist, egite so gabu tikukumu egiteu la uru tomi te la lotu la visigologolola, eala egite gabutatalea veia la kalia ale egite vaabila te la lotu la visigologolola, eia mumugu. La vuhula egite veia la puigolo ale egite abi la ilali soio tetala, egite veia eia sesele. Mai egite ge alia, egite vimumugu la tia giteu, la vuhula la gabutatalala tegiteu kama magiri vagari soio te Kraist sekela.
1CO 8:8 Eala moli taritigi pepeho veia etato ge matagaga veia mai la vulovulo la magiri robola tomi, mai etato ge mulimulia, eia kama koramulia ge lapu etatou soio te la matagaga. Mai etato ge ali la kalia, uka etato kama ge alia, eia la golu bulalahu moli, eia kama ge vimaroka etatou, me eia kama ge vimumugu tai etatou, eia la golu bulalahu moli.
1CO 8:9 Eala moli taritigi etato ge gabutatala tigi, la vuhula etato soukama ge alia, me e tabara gatou isa ale eia kama magiri vagari, eia ge boru,
1CO 8:10 la vuhula eia soukama ge hilo etalua alali la ilali te la lotu la visigologolola ale eia so gabu tikukumua bakisi, eia ge goio ge ali taia. Eala moli ale eia igo gegeruti la tiala mai ele, la vuhula eia so gabu tikukumu la lotu ale egite vaabi la ilali ale oio vola.
1CO 8:11 Eala, e tabaramu te Kraist ele, ale eia kama magiri vagari, la mari uru taume eia viruruti e tabaramu ale taritigi, e Kraist peho roboa, eia kati taritigi, eia viluati te la kalulula, la vuhula emei.
1CO 8:12 Mai eme ge igo la iruru soio tegiteu e tabarabara mutou mai ele, me egite ge gabutatala papai te la ilali ale eme alia, eme mai ale viligi egiteu ele, eme mai ale igoti la iruru soio te Kraist.
1CO 8:13 Mai la ilali ale eau alalia eia ge igo gegeru egiteu e tabarabaragu veia egite ge tilo te la iruru, tio eau kati ge ali la kalia lou, egite soukama ge hiloau, egite ge boru mai ele.
1CO 9:1 Isa kama koramulia ge tahi taroau veia eau kama la bilalaha sesele te Kraist. La mari papaila te la tahalo isasa eia kama koramulia ge sau toleau, eau la bilalaha te Kraist sekela, eau hiloti e Iesus te la matagu sesele, me ale igoie amuto pouti te la matagaga, amuto la vavua la igogolu taku sekela, ale eau valolo amutou te La Uru.
1CO 9:2 Soioge egiteu ale isapolo ge tahi taroau, eala moli amuto ge ouka ge. La vuhula amuto lolo la valolo taku, amuto vulo la gabutatalala tamutou soio te Kraist, eala amuto magiri mai la irovilala veia eau la bilalaha sesele tetala.
1CO 9:3 Mai egite isahari ge vikara kukumuagu, eau ge veia giteu maie:
1CO 9:4 Mave, eau kama la tahalo sesele, veia amuto ge abiagu la ilali me la lalu mai la mapagu te la igogolu taku ale vagari soio tamutou, ia?
1CO 9:5 Hiloa, eau samura, eala moli mai eau ge taulai, mave, amuto soioge ge veia eau umala ge puli e rutugu tai soio te la maututula ale eau valolo ovola, ia? Egiteu la bilalaha isahari, egite igoa mai ele, egiteu e taitarile Iesus tai, me Pita, egiteu tomi, eala moli eau ge umala, ia?
1CO 9:6 Soioge amilua me Banabas sekela moli ge paa muli la uati me la ilali tamilua lou te la igogolu, egiteu la bilalaha tomi ouka, amila moli, ia?
1CO 9:7 Ale kama taritigi mai ele. Mave, la tahalo la vaubila, eia ge loto rivu lou eia te la igogolu tetala te la vaubila? Ouka. Mai la bilalaha tai ale baumuli la mahuma, eia kama ge ali bakisi la ilali ovola? Ouka, eia ge ali moli, la vuhula ale la igogolu te la limalale. Mai ge la bilalaha isa tai eia ge baumuli egiteu la sip me la mee te la tahalo isasa, mave, eia kama ge liu bakisi la susu tegiteu la sip me la mee ale eia baumulimuli egiteu, ia? Ouka, eia ge abi bakisi la mapala te la igogolu tetalale, mai la susu bakisi ale egite me latatula ge liua.
1CO 9:8 Me la merera ale, eia kama la gabutatalala taku moli te la vovo, la merera te Moses tai alaura te ururu tamiteu e Iuda,
1CO 9:9 eia veia maie “Umala kisi roborobo la hare la kau ale amuto kisia veia ge suli amutou te la igogolu la mahuma, eia ge ali moli te la mahuma tamutou.” Mave, la merera ale, amuto veia La Tahalo Uru tovo muli etatou la vibaumuli la kau ovola, ia?
1CO 9:10 Ouka, la merera ale, La Uru eia toia mai la tilovo somai tegatou. La kau, eia la irovilala tamiteu ale igogolu te La Uru. Ale amuto vitoua miteu la mapa, amite mai la kau ale egite kisi robo la harela. Eala, oio vola etato ge matagaga veia amiteu tomi ale igogolu te la mahuma te La Uru, amiteu ale valolo, egiteu tai ale vibaumuli, amite tomi ge abi la mapa miteu te la igogolu ale amite igoa soio tamutou, mai la vavua la mahuma te La Tahalo Uru.
1CO 9:11 Amite suliti la kalulu mutou, mave, eia kama koramulia veia amite ge pou tali amutou veia amuto ge suli rivu lou amiteu te la savelela tamiteu te la vovo?
1CO 9:12 Egite isahari oiole ababi la visuli tamutou mai ele, mave, amiteu ale valolo pala muga amutou te la gauru te Kraist, la igogolu tamiteu soioge kama uru tegiteu alele veia amuto ge suli pala muga amiteu, ia? Eala moli korale, pala amite kama abi bakisi la visuli tamutou, me amite kama ge pou tali lou amutou veia amuto ge soko halaba la visuli somai tamiteu mai ele. Amite pou moli la savelela, la vuhula isa soukama ge vile la valolo ale taritigi te Kraist veia amite paa muli moli la uati ovola.
1CO 9:13 Eia sesele, egiteu ale igogolu te la luma la lotu ale uru oio e Ierusalem, egite alali la ilali ale la valalua vaabila soio te la lotu. Egiteu e pris tai ale vahari egiteu la vaabila soilo te la luma la lotu ge vaabila soio te La Tahalo Uru ovola, egite ge tau gale muga la gale la ilali alele, ale koramuli egiteu, veia ge alia.
1CO 9:14 Mai tai amiteu te la igogolu la valolo te Kraist, La Uru eia toitia veia amiteu ge abi la visuli tamutou ale amite valolo amutou, koramuli la mahulila tamite.
1CO 9:15 Eala moli eau kama vauru eau mai ele veia amuto ge suli leau la uati me la ilali. Eau kama kekesia mutou veia amuto ge soko la vulovulo alele somai taku. Isa pala kama suliau, me eau vagari pepeho veia ge pou moli mai ele, la visuli ouka. Mai eau ge peho la vitolola, eala moli eau ge valolo moli amutou te la pulolou la matagagala te Kraist, la visuli ouka.
1CO 9:16 Eala moli la igogolu alele, eau kama ge vauru lou eau ovola, la vuhula eia la tabarila te La Uru somai taku. Mai eau kama ge igoa, eau ge ilo buruko sesele.
1CO 9:17 Mai eau ge valolo te la masasagala moli taku, me la valolo taku eia taritigi tamutou, soioge amuto ge lotoau, eala moli eau kama valolo te la masasagala moli taku, eau valolo mai la tabarila te La Uru somai taku, eau la bilalaha moli tetala, la iloto ouka.
1CO 9:18 La mapagu la sagegela moli, ale eau ge valolo la valalua me hatavivile te la valolo ale taritigi te Kraist. Oio vola la sagegela taku eia uru pepeho, la vuhula mai eau valolo, eau kama igo la igogolu alele veia isa ge suliau te la igogolu te Kraist. Eia koramulia veia eau ge kaka la visuli tamutou te la igogolu alele, eala moli la mapagu la sagegela moli te La Uru taku e Kraist.
1CO 9:19 Eia sesele, isa kama mamugeau, eala moli eau vibisi louau veia ge puli la valalua me hatavivile usu soio te Kraist, eau igogolu mai la bilalaha tegiteu tomi.
1CO 9:20 Mai eau ge pou vikapopo legiteu e Iuda, tio te la masasagala taku eau ge mulimuli la vulovulo giteu e Iudale veia ge puli egiteu e Iuda soio te Kraist. Mai la valalua ale logala, ale kama e Iuda, eala moli egite mulimuli la vulovulo giteu e Iuda, mai la merera te Moses tomi, tio mai eau ge pou vikapopo tai legiteu, eau igo mai egiteu ele, veia ge puli egiteu tai soio te Kraist. Eala moli la merera te Moses eia kama kisi toleau, eau pou otalo te la uluva la merera te Kraist sekela.
1CO 9:21 Mai tai eau ge pou vikapopo legiteu la valalua la maligoma ale kama rovi la merera te Moses, eau ge igo mai egiteu ele te la vulovulo giteu, veia ge puli egiteu soio te Kraist, eala moli oilo vola eau kama ge poke taro la merera te La Uru, la vuhula eau mulimuli la merera te Kraist, eala eau kama ruru te la vulovulo giteu isahari ale kama taritigi.
1CO 9:22 Mai eau pou tegiteu ale kama magiri vagari te Kraist, tio eau ge gabu tikumu la magiri robola usu te la lotu la visigologolola, mai tai egiteu, veia eau ge suli egiteu tai ale kama vagari, eau ge vivagari lou la tautaulailo tegiteu te Kraist. Eau mulimuli la vulovulo la maratatila la valalua tomi veia egite ge lolo la merera taku, veia eau ge vimahuli isahari mai ele.
1CO 9:23 Me la vulovulogu alele, eau igigoa veia ge vahiliti la igogolu te la valolo ale taritigi te Kraist, veia eau tai ge pou la balavala oio vola.
1CO 9:24 Mai eau ge tovoa te la vipepepela. Mai te la vipepepela, egiteu ale vipepepe ge usu, eala moli isa moli sekela ge muga, eia ge sau tola la vaabila ovola. Eala, eia matagaga mai ele veia eia taritigi eme ge vagari te la vipepepela, eme ge igogolu tigi te Kraist, veia eme tai ge sau tola la vaabila tetala.
1CO 9:25 Mai isa ge gabutatalea veia la haro la pilai eia hagagaviti, tio eia ge goio ge tovo bibibi la hirari veia te la haro la vipepepela eia ge hari tataho, veia ge sau tola la vaabila te la tahalo ale mamuga. La vaabila alele, eia la paga moli ale ge kaluvu lou, eala moli la vaabila te la igogolu te Kraist, eia kama ge kaluvu.
1CO 9:26 Mai eau e Pol, eau sele tavu la igogolu te Kraist mai la tahalo ale vipepe vagari sesele. Eau vagari te la vikokuela te la isale Kraist, eau kama mai la tahalo ale vikue bulalahu.
1CO 9:27 Eau vagari veia la kalulugu ge vagari pepeho koramuli la igogolu taku te Kraist ge hari tataho. Eau sau tola vagari la gabutatalala taku, la masasagala te la vovo eia kama mamugeau. La vuhula eau kama masagea veia mai eau ge valolo amutou, eala moli mulimuli eau ge boru posa, me eau kati ge sau tola lou la vaabila te Kraist, eau ge galo.
1CO 10:1 Amuto tabarabaragu, eau masagea veia ge vahiliti lou la gabutatalala tamutou tegiteu e ururu tamite Iuda alaura te la imamala te Moses, la vuhula egite ururu ele, egiteu mai e tutubu gatou tomi ale te Kraist. Egite gali taro la kilisi oio e Gipto, egite kama rovi la gauru, La Uru goio visibitala la tuluvu la mori isa uru ale ge muga egiteu, egite goio mulimulia mai ele, egite taro polo la mago, egite tugatio.
1CO 10:2 Egite gabu tikumu sesele la mulugaluga tegiteu, e Moses, la irovilala ilua tai te la vibaumulila te La Tahalo Uru soio tegiteu, mai la tuluvu la mori, me la mago ale mamara, egite tomi hilo la irovilala iluale.
1CO 10:3 Goio, egite tuga vulovulo te la hohoi, egiteu la ilali ouka, La Uru goio visibitala la ilali tetala soio tegiteu, egite tomi alia.
1CO 10:4 Egite pehoti la malehula, La Uru visibitala la lalu soio tegiteu, la vuhula la toro giteu oio, eia vikapopo legiteu ele, la kalulule Kraist moli.
1CO 10:5 Eala moli egite kama masaga ge roromuli tigi La Tahalo Uru, eala eia goio vilai egiteu, egite peho paa tomi moli oio te la hohoi, kaluvu.
1CO 10:6 La veimulipololale, eia magiri mai la tilovo, veia etato umala ge vagari tavu la vulovulo ale kama kokora mai egiteu la valalua te la imamala te Moses ele.
1CO 10:7 Umala amuto ge lotu tavu la puigolo mai egiteu. Mai La Buk Tabu Ale Pala eia veia maie “La valalua e Israel, me egite hatavivile tai, egite goio pou te la ilali me la iliu veia ge igo galolo mai egiteu la valalua la maligoma.”
1CO 10:8 Etato la valalua umala ge igo la iruru soio te la tavile, me amutou e hatavivile tai, amuto umala ge igo la iruru vikapopo la tahalo mai egite Israel isahari igoa te la haro alele. La iruru alele. la kilolila oio, mai te la haro isa moli egite la valalua me hatavivile mapaiti sesele peho.
1CO 10:9 Etato umala tai ge vareagia La Tahalo Uru, veia eia kama vikara sesele, mai egite Israel isahari alaura, egite igoa soio te La Uru mai ele, eia silahati legiteu, eia goio visibitala egiteu e taive mapaiti ale bilibili soio tegite, egiteu e taivele goio tolo egiteu, egite pehotio.
1CO 10:10 Umala tai veia etato ge vikara kukumua giteu la mulugaluga tegatou mai egite Israel tai isahari igotia pala soio te Moses. Egite igoa mai ele, La Uru goio baha e angelo uru tetala ale eia babahea soio te la bilili, eia goio bili taro egiteu ale kama kokorale.
1CO 10:11 La veimulipolola alele, eia magiri mai la tilovo veia etato ge gigia, veia etatou ale mahuli te la imamala ale igoie, la tapasi la maututula eia hagagaviti, etato ge matagaga tigi, etato kama ge ruru mai egite Israel alaura.
1CO 10:12 Mai eme la tahalo me la tavile te Kraist sesele, mai eme veia eme magiri vagari mai ele, taritigi eme ge vibaumuli tigi la vulovulomu, eme soukama boru.
1CO 10:13 Taritigi eme ge matagaga veia egiteu la tovolalaila ale eme gabua, egite kama isapolo. La valalua tomi rovi taia, egite tomi gabutia veia la tovolalailale, eia vagari. Eala moli La Tahalo Uru eia kama ge piligi etatou, eia kama ge sigolo tarome veia la tovolalaila ge vagari agi koramuli eme ge boru, ouka. Mai eme ge gabu la tovolalaila, eia ge vahilo leme la gauru ale eme ge bolehohoa e Satan ovola, eme ge magiri vagari.
1CO 10:14 Amuto tabarabaragu, etato rovitia veia la gilogo te La Uru, eia ge sau tola etatou, eala eau karasuku amutou veia amuto umala ge pou te la lotu la visigologolola, veia ge ali la ilali ale egite vaabila soio te la puigolo, umala. Amuto ge kisu taro sesele la vulovulo alele.
1CO 10:15 Eau vikara soio tamutou mai la tahalo me la tavile sesele ale koramulia ge lolo tataho la merera taku. Amuto ge mata muli la merera taku, me amuto ge rovi molia mai ele veia eia sesele, eau kama vikara bulalahu.
1CO 10:16 La ilali te la lotu sesele tegatou ale te Kraist, eia oio, mai la vaen, me la bret tai, ale etato rovilala la pilehole Kraist ovola. La vaen ale etato liliua, eia la irovilala te la pilehole Kraist, mai la kasosola ale pagegele. Etato ge liua, la sagegela ge uru te la tia gatou soata te La Tahalo Uru, la vuhula oio te la kasosole Latula eia vibalavati etatou tomi. La vaen ele, eia mai la irovilala tegatou, veia etato mai ale vitau me taitari me Kraist. Mai la bret tai, ale etato vitovi letatou te la ilali la irovilala te Kraist, etato alia, etato rovia mai ele veia oio te la pilehole Kraist, eia vimahuli etatou vikapopo me eia.
1CO 10:17 Mai la bret ale etato vitovila, eia isa moli, tio etatou tai ale te Kraist, etato tomi usu, eala moli etato mai ale vikapopo sesele, la vuhula etato tomi visuu la ilali la bret isa sekela, eala etato isa moliti oio te la isala.
1CO 10:18 Mai tai la vaabila soio te La Tahalo Uru te la lotu tegiteu e Iuda, egiteu ale ali la piligi la ilali ale la valalua vaabila soio te La Tahalo Uru, egite mai ale vikapopoti te la lotu te La Tahalo Uru mai ele, la vuhula egite tomi aliti la ilali tetala.
1CO 10:19 Eau gabutatala amutou e Korin ale pou te la ilali te la lotu la visigologolola, amuto soukama ge gabutatalea veia eau gabu tikumu la lotu la visigologolola veia eia sesele. Ouka gologolo. Eau kama gabu tikumu egiteu la puigolo ale egite lotu tavua, veia eia sesele, me eau kama gabu tikumu tai la ilali la irou ale la valalua vaabila tegiteu la puigolo ovola.
1CO 10:20 Eala moli la paga isa eau gabua ovola maie: Egite la valalua la maligoma, te la lotu la visigologolola tegiteu, la ilali ale egite vaabi legiteu la puigolo ovola, egite mai ale rouroua soio tegiteu la hituhitu, kama soio te La Tahalo Uru, me eau kama masaga amuto ge mai ale vikapopo egiteu la hituhitu te la lotu la visigologolola mai ele.
1CO 10:21 Eia kama koramulia veia amuto ge liu la vaen te la lotu te Kraist, me amuto ge goio ge ali tai te la ilali te la lotu soio tegiteu la hituhitu. Eia kama koramulia veia isa ge ali la ilali la irovilala te la lotu te Kraist, veia ge goio ge ali tai la ilali te la lotu soio tegiteu la hituhitu.
1CO 10:22 Etato masagea veia etato ge vahiliti la igototolola te La Uru somai tegatou, ale etato ge mulimuli la lotu te la maligoma mai ele, ia? Mave, etato ge vahiliti la igototolola tetala mai ele, etato koramuli eia?
1CO 10:23 Eia sesele moli, la merera ale amuto totoia veia eia koramuli etato ale te Kraist ge mulimuli la vulovulo tomi. Eala moli la vulovulo isahari, mai amuto ge mulimuli egiteu, eia kama ge suli la pulolou tegiteu e tabarabara mutou te la lotu te Kraist veia egite ge magiri vagari.
1CO 10:24 Taritigi etato umala ge gabutatala moli etatou, eala moli etato ge gabutatala muga egiteu e tabarabara gatou veia la vulovulo gatou ale egite hiloa etato mulimulia, eia soukama ge viruru egiteu. Taritigi veia la vulovulo gatou tomi eia ge suli moli egiteu e tabarabara gatou.
1CO 10:25 Eia koramulia veia amuto ge loto la kalia tomi, amuto kama ge gabutatala papai ovola veia egite soioge vaabila la kaliale soio te la puigolo.
1CO 10:26 Amuto ge loto molia, ge alia, la vuhula La Buk Tabu Ale Pala, eia veia maie “La papaga tomi ale La Uru vipoua, eia tetala tomi moliti.”
1CO 10:27 Eala, eia taritigi moli veia mai la tahalo ale kama rovi e Kraist ge baha tavume veia eme ge ali vikapopo leia, eme ge ali la ilali tomi ale eia ge abiamu, eme umala ge gabutatala papai veia la kalia ale eia abiamu eia soioge la irou te la lotu la visigologolola.
1CO 10:28 Eala moli, mai e tabaramu isa te Kraist ge oio, eia rovitia veia la ilali tamuluale egite rou seseletia soio te la puigolo me eia ge mera tarome ovola, tio eme umalati ge alia, la vuhula e tabaramu alele eia soukama ge gabutatala papai ovola veia amula ruruti te la ilalila, me la vulomu alele eia suliti e tabaramu ovola. Eala moli mai isa soioge ge hiliti, veia ge koli la merera taku maie mago “Ale eia gabutatala papai mai ele, ilava eau ge gabu tikumua veia la vulovulola ge kisi toleau?
1CO 10:30 Mai eau ge vaisale La Tahalo Uru te la ilali taku, ilava egite ge vileau mai eau ge alia?”
1CO 10:31 Ouka, eia taritigi pepeho veia la vulovulo mutou tomi ge vaisale La Tahalo Uru.
1CO 10:32 Eala moli umala amuto isa ge viboru isa la tahalo me la tavile te la lotu, mai la tau Iuda, me la tau Grik, me la valalua me hatavivile te la lotu tomi te La Tahalo Uru, amuto umala ge viboru egiteu veia isa ge gabu la iloburukola oio te la vulovulomu.
1CO 10:33 Ale la vulogu seselele, ale eau igigoa, veia ge suli la valalua tomi te la vulovulogu tomi veia egite ge magiri vagari. La vuhula eau kama gabutatala moliau, eau gabutatala la valalua me hatavivile tomi, veia egite usu ge sau tola la mahulila ale sesele te Kraist.
1CO 11:1 Eala, eia taritigi veia amuto ge mulimuli la vulogu, mai eiau, eau mulimuli la vulole Kraist.
1CO 11:2 Eau vei tataho sesele amutou e Korin ele, ale amuto sau tola la vulovulo la lotu te Kraist tomi, me la merera tomi ale eau pala vimari le amutou ovola.
1CO 11:3 Eala moli eau masagea veia amuto ge matagaga veia egite hatavivile ge pigi robo la gama giteu te la pulolou tegiteu oilo la luma la lotu. Mai la viputumulila te la lotu te aleie, eau masagea veia amuto ge matagaga ovola, eia maie: La tahalo, eia mamuga e rutula; me e Kraist, eia mamuga egiteu la valalua; me La Tahalo Uru, eia mamuga e Kraist.
1CO 11:4 Mai la tahalo ge magiri te la kilaka me la valolo, eala moli eia pigi robo la gamala, tio eia veipalea mai ele veia eia la tilogo ouka soio te la gamala, mai e Kraist ele, la vuhula eia pigi robo la gamala lou.
1CO 11:5 Mai tai ele, mai la tavile ge magiri te la kilaka me la valolo, me eia kama pigi robo la gamala, ale eia veipalea mai ele veia eia kama togo la gamala, mai egiteu la valalua ale mamuga eia. Ale la paga la mahelala sesele, la mahelala uru oio vola mai la mahelala te la tavile la gauru ale egite sipa taro la ivula, eia la pigi robola te la gamala ouka.
1CO 11:6 Mai egite hatavivile kama masaga ge pigi robo la gama giteu ale egite pou oilo la luma la lotu, taritigi egite ge sipa taro la ivu giteu ele, egite kamati ge rava. Taritigi egite hatavivile tomi ge pigi robo la gama giteu, la vuhula la mahelala uru pepeho oio vola veia la tavile la pigi robola ge ouka oio te la gamala, mai la tavile tai ale sipa taro tomiti la ivula, eia gabu la mahelala uru pepeho.
1CO 11:7 Eala moli egiteu la valalua, taritigi egite umala ge pigi robo la gama giteu te la pulolou tegiteu oio la luma la lotu. La vuhula La Tahalo Uru vipou la tahalo veia eia ge mai moli lou eia, veia eia mai la bilalaha tetala. Eala moli la tavile, eia mai la bilalaha te haruala.
1CO 11:8 Mai etato rovia veia oio te la siloko la vipoupoula, La Tahalo Uru eia kama visibitala la muluga la tahalo loio te la tavile, ouka, eia visibitala la muluga la tavile loio te la tahalo.
1CO 11:9 Eia kama vipoua veia la tahalo ge suli la tavile, eia vipou la tavile veia eia ge la visuli soio te la tahalo.
1CO 11:10 Eala, eia matagagati mai ele veia eia koramulia veia la tavile ge pigi robo la gamala mai la irovilala te la vulovulo gatou veia la valalua, egite mamuga eia. Eia tikumu, la vuhula mai etato pou te la lotu, egiteu la angelo oio lago robo etatou. Mai la iroromulila ge ouka te la lotu tegatou, etato ge mahela pepeho legiteu la angelole.
1CO 11:11 Eala moli la viputumulila te la pulolou te la tahalo me la tavile, eia isapolo lou tegatou ale te Kraist. Mai etatou ale te Kraist, eia taritigi etato ge matagaga veia la tahalo me rutula, egira mai ale visuli baoli, egira kama pou seseke. Etato kama mai egiteu ale kama rovi e Kraist, egite kama totoro te rutu giteu.
1CO 11:12 Mai la muluga la tavile, eia loio te la tahalo, eia matagaga tai mai ele veia egite hatavivile, egite veipala tai egiteu la valalua mai te la piligo. Eala moli la vuhu gatou tomi, La Tahalo Uru moli, eala eia taritigi pepeho veia la tahalo me la tavile ge visuli baoli.
1CO 11:13 Taritigi amuto lou ge gabutatala muli la merera taku. Mave, amuto veia eia taritigi moli veia mai la tavile ge magiri te la kilaka me te la valolo, eia kama ge pigi robo la gamala?
1CO 11:14 La valalua me hatavivile tomi rovia veia la ivu la tavile, eia mai la tokoromola ale La Tahalo Uru abiala. Eala moli mai la ivu la tahalo ge tau urua, ale la paga la mahelala sesele. Eala moli eia matagaga tai veia eia taritigi veia la tavile ge pigi robo la gamala mai te la vulovulo miteu.
1CO 11:16 Eala moli mai isa tamutou ge masagea veia ge putu oli lou la merera taku, eau ge veiala maie veia amite la bilalaha te Kraist isa kama rovi la viputumulila ale isapolo te alele, veia la tavile kama ge pigi robo la gamala te la pulolou tetala oio la luma la lotu. Me egiteu la lotu tomi te Kraist ale oio te la maututula tomi, egite mai tai ele.
1CO 11:17 Tio, eau la vikararala isa lou soio tamutou, eala moli eau kama ge vei tataho amutou oio vola, la vuhula mai amuto ge pou te la lotu, amuto igo gegeru moli la pulolou tamutou ele.
1CO 11:18 La muluga la merera ale eau loloa tamutou ele, mai amuto pou vikapopo te la lotu, amuto vaigo. Me la merera alele eau veia eia soioge sesele bakisi.
1CO 11:19 Eia soioge koramuli moli mai ele, la vuhula egiteu la tahalo la mari tamutou ele ge vipepe te la vikararala veia mai egite ge vagari te la hare giteu, eia ge veipalea mai ele veia La Tahalo Uru suli egiteu veia egite ge mamuga amutou.
1CO 11:20 Mai amuto ge pou vikapopo te la ilali la irovilala te la pilehole Kraist, amuto kama igo seselea mai la ilali le Kraist.
1CO 11:21 Mai amuto ali, amuto ali sele moli, kama gabutatala egiteu e tabara mutou. Amuto ali kaluvu, amuto isahari so vitotolo, eala moli amuto isahari maruti, amuto paua moli tai te la iliu.
1CO 11:22 Mai amuto ge ali oio te la luma tamutou isasasa! Amuto soioge vile la valalua la lotu te La Tahalo Uru, veia ge igo mahela egiteu e tabara mutou te Kraist ale pou la savelela, ale egite ge hilo la ilali uru amuto alia te la lotu. Me oio vola, eau ge veia mutou mave? Eau kama ge vei tataho amutou, ouka gologolo!
1CO 11:23 La masova la ilali la irovilala te la pilehole Kraist, La Uru veipalatia somai tamiteu la bilalaha tetala, me eau pala vei mulitia mutou ovola, eia maie: e Iesus, La Uru gatou, te la logo moli ale e Iudas sugu taroa soio tegiteu la gima, eia abi la bret,
1CO 11:24 eia vei tataho La Tahalo Uru ovola, eia goio tovi luea, eia goio veia giteu la valalua la vimari tetala mago “La bret ale, eia la mailigu moli ale eau sugu taroa veia ge peho robo amutou. Amuto ge igo moli la ilali la bret mai la irovilala te la pileho taku.”
1CO 11:25 Tio, mai tai ele, egite ali kaluvu, e Iesus goio abi la kap la vaen, eia goio veia giteu mago “Ale la kasosogu, eia la irovilala ale amuto ge rovia veia la merera te La Tahalo Uru ale halaba, eia sesele moli veia la kasosogu ge pagegele, eia ge vimahuli amutou ale taku. Te la pulolou tomi te la lotu tamutou, ale amuto ge liu la vaen ovola, amuto ge igo molia mai la irovilala sesele te la pulolou taku omai tamutou.”
1CO 11:26 Me eia veia giteu mai ele, la vuhula la ilali la bret me la iliu la vaen, eia mai ale veipalea veia La Uru, eia peho robo etatou. Etato ge igigo molia mai ele kara ale eia ge beu loua somai.
1CO 11:27 Mai isa ge ali bulalahu la bret te La Uru, veia mai isa ge liu bulalahu tai la vaen te La Uru, ale eia mai ale igoti la iruru soio te la maili La Uru me soio te la kasoso La Uru tai.
1CO 11:28 Mai isasa ge pou te la ilali la irovilala te la pilehole Kraist, taritigi pepeho veia eia ge mata muli muga la gabutatalala tomi tetala oilo, veia eia koramulia ge liu vikapopo la tilogo me la gabutatalala ale taritigi, ka ouka.
1CO 11:29 Mai isa ge ali bulalahu moli, veia ge liu bulalahu moli tai, me eia kama gabu tikumu la maili La Uru me la kasoso La Uru, eia mai ale visibitala la igototolola te La Tahalo Uru soio tetala.
1CO 11:30 Eala, igoie usu tamutou lalea, me isahari pepeho.
1CO 11:31 Mai etato ge gabutatala tigi muga, kama ge ali bulalahu, kama ge liu bulalahu, tio etato kati ge poga la kiloli la iruru te La Tahalo Uru somai tegatou.
1CO 11:32 La Uru, eia viteteli vagari tai etatou, eia ge vimatata la vulovulo gatou veia mulimuli etato soukama ge vilua vikapopo egiteu la valalua la maligoma tomi.
1CO 11:33 Tio, mai moli ele, amuto tabarabaragu, mai amuto ge pou vikapopo te la ilali la irovilala te la pilehole Kraist, taritigi amuto ge pou muga kara ale amuto tomi sibitalati, tio amuto ge ali vikapopo mai ele, isa kama ge hateka.
1CO 11:34 Mai isa ge vitolo, taritigi veia eia ge ali muga oio te la luma tetala, eia soukama ge igo gegeru la ilali te La Uru, amuto tomi ge poga la kilolila ovola. Me la merera isahari lou, mai eau ge guvi sesele tamutou, eau ge vimatatea soio tamutou ele.
1CO 12:1 Amuto tabarabaragu, eau masagea veia amuto ge matagaga tigi tegiteu la vaabila te La Kalulu La Marokala mai la tabarila tetala somai tegatou ale te Kraist.
1CO 12:2 Amuto rovia, ale pala, amuto so popou te la maligoma, egiteu la tahalo la visigologolola te la lotu ale kama sesele, egite lapu bulalahu la gabutatalala tamutou soio tegiteu la puigolo ale kama mahuli, la kalulu giteu ouka, egite viruru amutou.
1CO 12:3 Amuto kama rovi tigi la gauru te Kraist, eala eau veia ge vei matagagea mutou veia la tahalo ale veipala la merera te La Kalulu La Marokala, amuto ge hilovi tigi la merera tetala maie: Mai eia ge vikara te la vagagari La Kalulu La Marokala sesele, eia kama ge koramulia ge vikara bareale Iesus. Eala moli mai La Kalulu La Marokala kama ge oio tetala, eia kama ge koramulia ge vikara maie veia “E Iesus La Uru taku!” Amuto ge hilovi la merera tegiteu mai ele.
1CO 12:4 Egiteu la vaabila te La Kalulu La Marokala, ale eia tabaria somai tegatou ale te Kraist, egite isapolopolo, eala moli La Kalulu La Marokala ale la vuhu giteu la visuli tomi ele, eia isa moli sekela.
1CO 12:5 La igogolu ale etato ge igoa veia ge suli la lotu te La Tahalo Uru, eia isapolopolo, eala moli oilo vola etato la bilalaha te La Uru isa moli sekela.
1CO 12:6 La visuli somai tegatou ale La Kalulu La Marokala eia abitia gatou ovola veia la vagagari gato ge koramuli la igogolu tetala, la visuli tomi alele eia isapolopolo omai tegatou isasasa, eala moli La Tahalo Uru ale visibitala egiteu la vaabila tomi alele, eia isa moli sekela.
1CO 12:7 Etatou tomi isasasa, etato sau tola bakikisi la vagagari La Kalulu La Marokala, koramuli la tabarila te La Tahalo Uru somai tegatou veia etato ge suli la valalua me hatavivile tetala ovola.
1CO 12:8 Mai soio te isasa, La Kalulu La Marokala eia ge abiala la tabarila veia eia ge viteteli tataho la valalua me hatavivile te Kraist. Tio, soio te isa lou La Kalulu La Marokala eia ge tabaria veia eia ge la tahalo la vimari.
1CO 12:9 Tio, ale isa lou, eia ge abiala la tautaulailo ale uru. Soio te isa lou, eia ge tabaria la vagagarila ale koramulia ge vimahuli egiteu ale lalea.
1CO 12:10 Tio ale isa lou, eia ge tabaria soio tetala veia eia ge igo la golu la karutula ale ge veipala la vagagarila te La Uru soio te la valalua me hatavivile tomi. Tio soio te isa lou, eia ge visibitala la merera tetala veia eia ge veipalea soio te la valalua me hatavivile te Kraist. Tio isa lou, eia ge tabaria soio tetala veia eia ge la tahalo ale ge hilovi tigi la merera tegiteu ale magiri veia ge veipala la merera te La Uru. Tio soio te isa lou eia ge tabaria la kilaka ale isapolo, eia tululu, la masovala kama tabuli palala, la vuhula eia tivura. Eala moli soio te isa lou eia ge visibitala la mari tetala koramulia eia ge lube la masova la kilaka ale isapolo, eia kama matagaga.
1CO 12:11 Egiteu la vaabila tomi alele, egite isapolopolo, eala moli egite tomi La Kalulu La Marokala isa moli sekela abia gatou ovola. Eia tabari egiteu la vaabila tomi alele somai tegatou la valalua me hatavivile tetala, mai te la masasagala tetala sekela.
1CO 12:12 La vovo gatou tomi isasasa, eia mai ale vitoto sosolo tataho moli, la lima gatou oio, la vaha gatou, la gama gatou, eala moli la vovo gatou isa moli sekela. Tio la vimari alele, eau ge tovoa somai te la pulolou tegatou, ale etato vipuhi tigi tataho, mai ale vikapopo te Kraist.
1CO 12:13 Egite vuhi etatou te la isale Kraist, etato tomi abi La Kalulu La Marokala, eia vagoilo etatou mai ele te la pulolou ale taritigi te la valalua me hatavivile tetala. Etato kama visauru, isahari la tau Iuda, isahari la tau Grik, isahari la tahalo la vuliti, isahari la tahalo bulalahu moli. Eala moli oio te Kraist etatou visauru moli, etato mai ale vikapopoti oio tetala.
1CO 12:14 Tio, la tilovo te la vovo gatou veia eia isa moli, eau veia ge lapu matagaga loua te la vimari te la igogolu te la lotu, eia isapolopolo. Mai ale eau veitia, la vovo gatou, la baututula oio vola eia ga mata mai ale usu, eia isapolopolo, eala moli ouka, la vovo gatou isasasa eia vitoto sosolo tataho moli, la vovo gatou eia isa moli.
1CO 12:15 Mai la vahamu ge hiliti, eia ge mai ale vikara mago “Eau la igogolu kama taritigi, mai eau ge la lima, kora, eau kati oio te la vovole tahogu.” Ale mai la vahamu ge vikara mai ele, eia kama ge paru taro la vovomu, eia soloio, la vuhula eia la vahamu seselele.
1CO 12:16 Mai tai la gavusamu ge hiliti, eia ge vei mago “Mai la igogolu taku ge taritigi mai la mata, eau la gavusa moli, korale eau kamati oio te la vovole tahogu.” Ale la gavusamu ge vikara mai ele, eia kama ge kaluvu, eia soloio te la vovomu ele, la vuhula la vovomu tomi eia vitoto sosolo tataho, eia isasa moli.
1CO 12:17 Mai la vovomu tomi ge la mata te la milatalata, eme ge lololo mave? Mai la vovomu tomi ge la gavusa te la ilolo, eme ge asoa mave la malia la paga?
1CO 12:18 Eala moli la vovo gatou eia kama mai ele, La Tahalo Uru eia pui etatou, eia tabari tataho la igogolu te la baututu la vovo gatou tomi mai te la masasagala tetala sesele.
1CO 12:19 Mai la igogolu tegiteu ge isa moli, la vovo gatou eia kamati mata mai la tahalo!
1CO 12:20 Eala moli etato rovitia veia la vovo gatou, la baututula usu, eala moli la vovo gatou isa moli.
1CO 12:21 Eala, eia matagagati mai ele veia la mata gatou eia kama koramulia ge hiliti tavu la lima gatou veia ge kauala maie mago “Eau moli taritigi, eme ouka.” Mai tai la gama gatou, eia kama koramulia ge hiliti tavu la vaha gatou veia ge tahi taroa veia la igogolu tetala eia isapolo, eala eia kama kokora.
1CO 12:22 Eala moli etato rovia veia la baututu la vovo gatou ale kama vagari, mai la taraga tegatou, egite muga sesele, la vuhula egite sau tola la mahulila tegatou.
1CO 12:23 Eia sesele viruru tai veia la baututu la vovo gatou ale kama rava, mai la vuhu gatou la valalua me egite hatavivile tai, etato tau robo tataho legiteu la lavalava, etato mai ale togo egiteu, etato vibaumuli tataho egite.
1CO 12:24 Eala moli la vovo gatou ale taritigi, mai la lagu gatou, etato kama vibaumuli vagari ovola. Eala eia matagaga mai ele veia La Tahalo Uru eia tabariti egiteu la baututu la vovo gatou veia egite ge vitoto sosolo tataho, me eia vahiliti tai la gabutatalala tegatou veia etato ge togo tataho la vovo gatou ale kama rava.
1CO 12:25 Eala moli, la vovo gatou tomi isasasa eia mai ale isa moliti, la baututula kama vipou gagima, egite vipuhi tataho moli.
1CO 12:26 Mai isa ge ilo buruko, egite tomi ge ilo buruko vikapopo leia. Mai isa ge tokoromoti, egite tomi ge sagege vikapopo leia.
1CO 12:27 Me amutou tomi ele, amuto mai la vovole Kraist, me amuto tomi isasasa la igogolu tamutou oio, te la lotu tetala.
1CO 12:28 Mai eau veitia veia amutou tomi vikapopo, amuto mai la vovole Kraist, La Tahalo Uru eia visati letatou tomi te la lotu tetala, eia tabaria gatou la igogolu tomi tegatou isahari maie: La mulugala: isahari, egite la bilalaha, egite valolo la valalua me hatavivile la merera te Kraist; la vailuala: isahari, egite veipala la merera te La Uru soio te la valalua me hatavivile te Kraist; la vaitolula: isahari, egite vimari la valalua me hatavivile la gauru te Kraist. Goio, isahari, egite igigo la golu la karutula ale veipala la vagagari La Tahalo Uru soio te la valalua me hatavivile. Goio, isahari, egite vimahulihuli egiteu ale lalea. Goio, isahari, egite visusuli soio te la valalua me hatavivile te Kraist ale pou la savelela. Goio, isahari, egiteu la tahalo ale vimatatata la lotu te Kraist, egite vibaumuli ovola. Goio, isahari, egite veipala la merera la kilaka ale isapolo.
1CO 12:29 La Tahalo Uru, eia kama tabaria veia etato tomi ge la bilalaha tetala ale ge valolo. Eia kama veia etato tomi ge veipala la merera tetala. Eia kama tabaria veia etato tomi ge vimarimari la valalua me hatavivile te la lotu. Etato tomi tai kama igigo la golu la karutula ale veipala la vagagarila tetala.
1CO 12:30 Etato tomi kama vimahulihuli egiteu ale lalea. Etato tomi kama vikara te la merera la kilaka ale isapolo, eia tivura. Etato tomi tai kama ge lube la merera tegiteu alele.
1CO 12:31 La Tahalo Uru eia tabari tataho egiteu la vaabila tetala mai ele somai tegatou isasasa, me eia taritigi pepeho veia etato ge vagari ge sau tola egiteu la vaabila ale taritigi tegiteu la vaabila tomi, mai egiteu la vaabila ale vahiliti la valalua me hatavivile tomi. Eala moli omai eau ge vei matagagea mutou la gauru isa ale taritigi pepeho sesele, mai la vulovulo la gilogo.
1CO 13:1 La gauru ale taritigi pepeho sesele, eia maie: Taritigi pepeho veia etato tomi ge rovi la gilogo te la pulolou tegatou isasasa. Mai eau ge koramulia ge kaka te la mererera ale isapolopolo, mai te la merera tegiteu la angelo tai, eala moli la gilogo ouka oio te la tiagu, eau mai moliti e belo ale tali bububu, la igogolu isa ale taritigi eia kama sibitala te la limagu.
1CO 13:2 Mai La Tahalo Uru abitiagu la merera tetala veia eau ge veipalea, veia eau ge rovi tai la vuhu la merera tomi tetala me la masovala tai oio vola, veia la tautaulailo taku tai ge uru koramuli eau ge veia la gove veia eia ge tasuku, eala moli eau la gilogo ouka te la tiagu, tio eau la golu bububu moli.
1CO 13:3 Mai eau sugu taro la golugolu tomi taku soio tegiteu ale pou la savelela, mai eau ge sugu taro tai la vovogu veia egite la gima ge biliau, eala moli eau la gilogo ouka te la tiagu, la vulovulogu ale taritigi ale eau igotiale, eia kama ge suliau bakisi.
1CO 13:4 Mai eme la tahalo la gilogo, eme kama ge hate pariri veia ge koli la iruru, eme ge rovi moli la vulovulo la mutelela. La tahalo la gilogo, eia kama rovi la maisu totolola, eia tai kama vei tataho rivu lou eia. La tahalo la gilogo eia kama gabu vauru lou eia.
1CO 13:5 La tahalo la gilogo eia kama igo lalahu, eia kama vareagagi tai, eia kama igo totolo harari, me eia kama gabutatala mulimuli la iruru ale egiteu e tabarabarala igotia soio tetala.
1CO 13:6 La tahalo la gilogo eia kama sagege mai la iruru ge sibitala, eia masaga moli la vulovulo ale matata.
1CO 13:7 La tahalo la gilogo, eia kama ge gabu tikumu la iruru te tabarala soio tetala, eia ge mata sosoli taro molia, eia ge lolo moli la merera ale taritigi te tabarala, eia ge magiri vagari mai ele, kama ge silaha, eia ge vagari robo tataho e tabarala.
1CO 13:8 La gilogo, eia kama ge kaluvu. Mai isa ge veipala la merera te La Tahalo Uru, eia ge kaluvu lou. Mai isa ge kaka te la merera ale isapolo, eia ge maila lou. Mai isa ge rovi la masova la merera te La Tahalo Uru, la mari tetalale ge kokovu lou.
1CO 13:9 La vuhula etatou la valalua la vovo, la mari tegatou tomi boto. Ale bakisi moli etato rovia, etato veipalea.
1CO 13:10 Eala moli mai mulimuli e Kraist ge gomai lou, eia ge vimaroka etatou, la mari tegatou kati ge boto, etato kati ge gabu tikumu la mari me la visuli ale igoie etato abia, etato karuturutula veia eia isapolo, ge oukati.
1CO 13:11 Eau ge tovo mulia somai taku. Mai te la bibisigu, eau la vikararala taku, la gabutatalala taku, la mari taku, eia mai moli e guliliki isa bisi. Eala moli eau goio sagaiti, eau pigia sotigu egiteu la vulovulogu tomi alele, veia eau ge gabutatala mai la tahalo.
1CO 13:12 Etato igoie pou mai e guliliki, la sesele la merera te La Tahalo Uru, etato hilo molia bakisi mai la halulu gatou ale etato hililoa te la titiro, mai la glas, eala moli etato mulimuli ge matagaga tataho ovola. La mari taku ale eau sau tolea te la vovo, eia boto. La Tahalo Uru, eia rovi la vulovulogu tomi. Eala moli eau mulimuli ge rovi tigi tomi tai la sesele la merera tetala, mai ale igoie eia rovitiau.
1CO 13:13 La vulovulo itolu moli ale tikumu ge magiri, kama ge kaluvu, egiteu maie: -etato ge tau la ilo gatou soio te La Tahalo Uru; -etato ge pou tali la pulolou la matagagala tetala; -etato ge toro moli te la vulovulo la gilogo. Eala moli te la vulovulo la merera ale itolu ele, la gilogo moli sekela eia uru tegiteu tomi.
1CO 14:1 Taritigi amuto ge vagari tavu la vulovulo la gilogo. Eala moli amuto ge masaga tavu tai egiteu la vaabila ale loio te La Kalulu La Marokala, mai la veipala la merera te La Tahalo Uru.
1CO 14:2 La vaabila alele, eia muga tegiteu la vaabila tomi, mai la kilaka te la merera ale isapolo. La vuhula, mai isa ge veipala la merera te La Tahalo Uru, eia ge karasuku la valalua me hatavivile te Kraist oio vola veia egite ge magiri vagari, la iloburukola ouka. Eala moli mai isa ge kaka te la kilaka ale isapolo, eia tululu, la merera oio vola eia isapolo, ale eia kama vikara soio te la valalua me hatavivile, eia vikara moli soio te La Tahalo Uru, eia veipala moli la merera ale kama matagaga, la vuhula la kilaka tetala eia tivura. Eia sesele, la masovala oio, eala moli eia vagari veia etato ge rovia.
1CO 14:4 Eala, la tahalo ale kaka mai ele, eia suli moli eia, eala moli la tahalo ale veipala la merera te La Tahalo Uru, eia suli la valalua me hatavivile tomi te la lotu.
1CO 14:5 Eau masagea veia amuto tomi ge rovi la kilaka te la merera ale isapolo, eala moli eau vagari veia amuto ge rovi pala muga la veipala la merera te La Tahalo Uru. La tahalo ale igoa mai ele, eia suli pepeho la lotu, eala moli la tahalo ale kaka te la merera ale isapolo, eia kama suli la lotu, eala moli mai isa ge oio ale ge koramulia ge lube la masova la merera tetala, eia ge taritigi bakisi mai ele, eia ge vei matagagea giteu la valalua me hatavivile te Kraist oio vola, eia ge suli egiteu tomi te la lotu mai ele.
1CO 14:6 Amuto tabarabaragu, mai eau ge gomai tamutou, me eau ge vikara soio tamutou te la merera ale isapolo moli, amuto kama rovi la masovala, ale kama ge suli amutou bakisi. Eala moli mai eau ge veipala la merera te La Tahalo Uru soio tamutou, ale ge taritigi tamutou. Mai tai eau ge lubea mutou la masova la merera tetala, ale ge taritigi tai ele. Mai la vimari me la vikara matagagala tai te la gauru te Kraist, eia ge suli tai amutou. Eala moli la vikara bulalahula te la merera ale isapolo, eia kama ge suli amutou.
1CO 14:7 La vimari alele, eau ge tovoa soio te e vigogo. Mai etato ge pusu e vigogo, taritigi etato ge pusu tatahoa. Mai ge ouka, la bilau ale etato pusua, eia kama ge tali tigi te la gavusa giteu ale loloa.
1CO 14:8 Mai tai la vaivai, mai la mulugaluga isa masagea veia ge tola vikapopo egiteu la valalua tetala, taritigi eia ge pusu tataho la vaivai tetala. Mai ge ouka, egite kama ge lolo tigia, egite kama ge guvi tigi, egite kama ge raragi tigi te la igogolu.
1CO 14:9 Tio la vikara la tilovo iluale, eia goio tamutou. Mai amuto ge vikara, taritigi amuto ge vikara matagaga. Mai amuto ge kaka te la merera ale isapolo, me mai moli ele la kalamea mutou eia kama ge toi tigi la merera ale la valalua rovi la masovala, egite ge rovi la masova la vikararala tamutou mave? Eme mai ale vikara bulalahu soio te la baa.
1CO 14:10 Omai te la maututula, la merera usu oio, eala moli egiteu tomi la masova giteu oio, koramuli egiteu ale vikarakara ovola ge rovia.
1CO 14:11 Eala moli mai eau ge la mosi, eau kama ge rovi la masova la merera tegiteu ele. Amila me la tahalo ale vikarakara, amila vipou baa mai la mosi sesele.
1CO 14:12 Tio mai tai amutou ele, mai amuto ge kaka te la merera ale isapolo, isa kama ge rovi la masovala. Eala moli eau hilotia veia amuto vagari veia ge sau tola egiteu la vaabila isahari te La Kalulu La Marokala. Ioge, eia taritigi pepeho veia amuto ge vagari tavu egiteu la vaabila ale ge karasuku la valalua me hatavivile te la lotu te Kraist, ge suli egiteu mai ele veia egite ge magiri vagari.
1CO 14:13 Eala, eau veia eia taritigi pepeho veia mai isa ge kaka te la merera ale isapolo, eia ge kaka tai La Tahalo Uru veia eia ge lubeala la masovala, veia eia ge koramulia ge lube loua giteu la valalua me hatavivile ale loloa.
1CO 14:14 La vuhula, mai eau ge kaka te la merera ale isapolo, la kalulugu moli eia ge toitoi la kilaka alele, eala moli la gabutatalala taku kama oio vola.
1CO 14:15 Tio mai ge mai ele, eau ge igo la rova sesele ovola? Taritigi la kilaka taku ge ilua, isa te la kalulugu, isa te la gabutatalala taku. La bilau taku tai ge ilua, eau ge bau te la kalulugu, eau ge bau tai te la gabutatalala taku me la merera ale matagaga.
1CO 14:16 Mai eme ge vaisale La Tahalo Uru te la kalulumu moli, mai te la merera ale isapolo, mai egite isahari ale kama rovi la masovala ge oio, egite ge vaisale tai La Uru vikapopo leme mave? Ge ouka ge! La vuhula egite kama rovi la masova la merera taume.
1CO 14:17 Eme soioge vaisale tataho La Uru, eala moli la kilaka taume eia kama suli la lotu tegiteu ale lotu vikapopo leme.
1CO 14:18 Eau tai rovi la kilaka te la merera ale isapolo, eau muga sesele amutou tomi te la kilaka bibibila mai ele. Me oio vola eau vaisale sesele La Tahalo Uru, la vuhula eau masagea.
1CO 14:19 Eala moli mai ge te la pou vikapopola te la lotu, eau masagea veia ge veipala la merera isahari moli ale ge suli egiteu a tabarabaragu, kama la merera mapaiti ale la masovala ouka.
1CO 14:20 Amuto tabarabaragu, umalati amuto ge gabutatala mai egiteu e gulikiliki. Sesele, mai te la vulovulo ale kama kokora, la gabutatalala tamutou ovola ge mai la gabutatalala te la pepeso, amuto kama ge rovi la iruru, eala moli te la gabutatalala tamutou te la pulolou tamutou te la lotu, eau masagea veia amuto ge sagaiti sesele.
1CO 14:21 Mai la merera te La Uru soio te Moses, eia veiala maie: Eau ge baha la merera soio tegiteu la valalua me hatavivile taku, loio tegiteu la maratatila ale la merera tegiteu isapolo. Oio te la hare giteu la mosi eau ge vikara soio tegiteu la valalua me hatavivile taku, eala moli egite kama ge hate saga tavua, egite kama ge loloa.
1CO 14:22 Tio, me eia matagagati mai ele veia la kilaka te la merera ale isapolo, eia la irovilala moli soio tegiteu ale kama rovi e Kraist, kama tegatou ale tetalati. Eala moli la veipala la merera te La Uru, ale la visuli sesele somai tegatou, kama tegiteu ale so popou te la maligoma.
1CO 14:23 Eala, mai amuto ge lotu, me amuto tomi ge kaka galolo te la merera ale isapolo, la masovala kama matagaga, mai egiteu ale kama rovi la lotu te Kraist, egiteu ale logala, egite ge goilo ge lolo amuto kaka galololo mai ele, egite ge veia amuto paua sesele.
1CO 14:24 Eala moli mai amuto ge lotu, me amuto tomi ge igo seselea veia ge veipala tataho la merera te La Uru, mai isa ale logala ge goilo ge lolo la merera tamutou, tio la merera tamuto tomi ele, eia ge ubi la tiala. Eia ge gabutatala rivu lou la iruru tetala,
1CO 14:25 la vulovulola ale kama kokora eia ge veipala tomia. Eia ge boru lagu tugu, eia ge lotu tavu La Tahalo Uru, eia ge veipala la merera maie mago “La Tahalo Uru, eia omai seseleti kabili tamutou!”
1CO 14:26 Amuto tabarabaragu, amuto ge pou te la lotu, la pulolou tamutou eia ge taritigi mave? Mai amuto ge pou vikapopo, la lotu tamutou ge taritigi maie: Isahari ge bau; isahari ge vimari; isahari ge veipala la merera te La Uru; isahari ge kaka te la merera ale isapolo; isahari ge lube la merera tegiteu ele. La lotu tamutou eia ge hari mai ele, me la igogolu tomi ele eia ge te la vahiliti la valalua me hatavivile te la lotu te Kraist veia egite ge magiri vagari te la tautaulailo tegiteu soio tetala.
1CO 14:27 Mai isahari ge kaka te la merera ale isapolo, taritigi taho lua uka taho tolu moli ge vikara, isa pala muga, goio isa, goio isa lou mai ele, la marapala ouka. Taritigi pepeho tai veia isa ge lube la merera tegiteu ele.
1CO 14:28 Mai la tahalo la ilube la merera tegiteu ge ouka, taritigi egite ge makovu muga, egite ge kaka moli te la gabutatalala tegiteu isasasa, La Tahalo Uru ge loloa mai ele.
1CO 14:29 Mai te la veipalala la merera te La Tahalo Uru, taritigi taho lua uka taho tolu moli ge vikara, la valalua me hatavivile tomi ge laba gele tavua mai ele veia egite ge mata muli la masovala veia eia la vikararala te La Uru ka ouka.
1CO 14:30 Mai isa sokoti la vikararala, me isa lou eia gabu tivurati la merera te La Uru oio tetala, taritigi pepeho veia ale magiri ge pou muga, me ale so popou ge hiliti ge abi la mulila.
1CO 14:31 Amuto tomi ge koramulia ge veipala tataho la merera te La Uru mai ele, la marapala ge ouka, la valalua me hatavivile tomi ge balava te la vimari me la vitetelila tamutou.
1CO 14:32 Amuto ge vikara tataho mai ele, la vuhula la tahalo ale ge veipala sesele la merera te La Uru, taritigi eia ge baumuli tataho sesele la vulovulola te la pulolou tetala oilo te la luma la lotu.
1CO 14:33 La vuhula La Tahalo Uru eia kama visibitala la marapala, ouka, eia masaga moli la pulolou ale taritigi, la marapala ouka. Mai te la pulolou tegiteu la valalua me hatavivile te la lotu te la maututula tomi,
1CO 14:34 taritigi pepeho veia oio tai tamutou e Korin ele, egite hatavivile ge pou makovu te la lotu, egite umala ge vikara. Egite ge lolo moli la viputumulila tegiteu la valalua, mai la merera te Moses eia veia.
1CO 14:35 Mai egite la tilahi isa ge oio, taritigi egite ge tahi matagaga e harua giteu oio te la luma tegiteu isasasa. Eia la paga la mahelala ale uru sesele veia la tavile tai ge vipigi vulo la merera oilo la luma la lotu.
1CO 14:36 Eala moli amuto isahari veia eau visigolo, ia? Mave, la merera te La Tahalo Uru eia loio seseleti tamutou e Korin ele, ia? Amuto moli e Korin lolotia, la maututula isahari lou souka, ia?
1CO 14:37 Mai isahari tamutou ge la tahalo ale rovi sesele la merera te La Tahalo Uru, egite ge matagaga moli mai ele veia la merera taku eia tikumu, eia loio seseleti te La Uru.
1CO 14:38 Mai isa kama ge matagaga mai ele, amuto umala ge gabu tikumua veia eia vikara sesele.
1CO 14:39 Amuto tabarabaragu, la tapasi la merera taku soio tamutou te la vimari tomi alele, eia maie: Taritigi pepeho veia amuto ge vagari veia ge veipala la merera te La Uru, me umala tai veia amuto ge magiri robo egiteu ale kaka te la merera ale isapolo.
1CO 14:40 Eala moli eia taritigi pepeho veia la lotu tamutou ge hari tataho moli, la marapala ge ouka.
1CO 15:1 Amuto tabarabaragu, eau veia ge vei matagaga loua mutou la valolo ale taritigi te Kraist, ale amuto lolotia, amuto magiri vagari ovola.
1CO 15:2 La valolo ale taritigi te Kraist moli sekela ge vimahuli amutou, mai amuto ge sau tola seselea mai ale eau valoloti amutou ovola. Mai amuto ge polo la merera ale, amuto veipalea mai ele veia amuto lolo bulalahu molia, amuto soioge tautaulailo bulalahu.
1CO 15:3 Eala moli la merera ale eau valolo amutou ovola, La Uru eia vimari leau ovola, eau goio veipalea mutou la merera tetalale ale tikumu sesele, me la vuhu la mererale eia maie: e Kraist, eia peho robo etatou te la iruru tegatou, mai La Buk Tabu Ale Pala eia veia.
1CO 15:4 Egite ulaia, eala moli te la itolu la haro, La Tahalo Uru vimahuli rivu loua taro la pileho, mai tai La Buk Tabu eia veia.
1CO 15:5 Eia mahuli rivu lou, eia goio sibitala tavu muga e Pita, mulimuli eia goio sibitala tavu egiteu la valalua la vimari tetala savulusa gete lua.
1CO 15:6 Mulimuli ovola, te la haro isa moli eia goio sibitala tavu egiteu e tabara gatou te Kraist usu, la giligi giteu salatu lima, gegete lou. Igoie egite usu soloio mahuli, eala moli isahari pehoti.
1CO 15:7 Goio, mulimuli te ale, e Iesus goio sibitala tavu e Iakob, goio eia sibitala tai tavu egiteu la bilalaha tomi tetala,
1CO 15:8 goio mulimuli ovola eia sibitala tavu tai eau, eala eau mai la bilaruru tegiteu la bilalaha tomi.
1CO 15:9 Eau bisi tegiteu la bilalaha tomi, eau kama taritigi, kama koramulia veia egite ge toi leau la bilalaha, la vuhula eau pala viligi la valalua me hatavivile te la lotu te Kraist.
1CO 15:10 Te la gilogo moli te La Tahalo Uru, eia igo halaba eau mai la tahalo tetala sesele. La gilogo tetala alele, eia puruti, la vuhula eau bebetolati la igogolu taku, egite la bilalaha isa kama igogolu vagari mai eau, eala moli eia kama la vagagarigu alele, eia la vagagari la gilogo te La Tahalo Uru moli.
1CO 15:11 Mai la merera taku, me la merera tegiteu la bilalaha tomi, la valolo tamiteu eia visauru moli, mai te la pilehole Kraist, me la mahuli rivula tetala. La valolo ale amuto toroti ovola, eiala moli ele.
1CO 15:12 La valolo tamiteu la bilalaha te Kraist, eia maie: e Kraist peho, La Tahalo Uru vimahuli rivu loua taro la pileho. La merera tomi alele amuto rovitia, tio eau veia ge tahi lou amutou, ilava sesele isahari tamutou veia egiteu ale pehoti kamati ge mahuli rivu lou?
1CO 15:13 Mai etato kama koramulia ge mahuli lou, e Kraist tai kama ge mahuli taro la pileho.
1CO 15:14 Mai eia ge sesele veia e Kraist kama mahuli taro lou la pileho, amite soioge valolo bububu amutou, me amuto tautaulailo bulalahu te la merera tamiteu ele.
1CO 15:15 Mai ge mai ele, amiteu la bilalaha, amite mai la tahalo la visigologolola sesele, la vuhula amite valoloti amutou veia La Tahalo Uru vimahuli rivu lou e Kraist taro la pileho. Mai ge la merera tamutou isahari ele ge sesele veia egiteu ale pehoti, egite kati ge mahuli rivu lou, tio amite la bilalaha soioge visigolo seseleti amutou.
1CO 15:16 La vuhula mai egiteu ale pehoti kamati ge mahuli rivu lou, tio e Kraist tai kama ge mahuli rivu lou.
1CO 15:17 Mai e Kraist so tabulibuli te la pileho, la tautaulailo tamutou soio tetala eia la golu bulalahu. Amuto mai ale so pou moli te la maligoma, la vuhula la iruru tamutou soloio, e Kraist kama abi taroa, la vuhula amuto veia la mahuli rivula ouka, mai ele e Kraist tai soioge kama mahuli rivu.
1CO 15:18 Mai eia ge sesele veia egite ale pehoti kati ge mahuli lou, tio egiteu tai ale te Kraist, egite pehoti, egite mai ale peho moli te la maligoma.
1CO 15:19 Mai la vimahuli te Kraist eia suli moli etatou te la mahulila moli te la vovo, ale la mahuli rivula ouka, tiele etatou la tahalo me la tavile la tautaulailo, etato galo seseleti, la vuhula etato mai ale sau tola la merera bulalahu moli ale mata mai la vimari te la vovo moli.
1CO 15:20 Eala moli eia sesele viruru veia La Tahalo Uru eia vimahuli seseleti e Kraist taro la pileho, eia vimugati ele, egiteu ale peho ge mulimuli.
1CO 15:21 Oio te la vareagila te la tahalo isa sekela, e Adam, etato tomi la tahalo la vovo ge ligi te la pileho. Eala moli oio te la tahalo isa sekela tai, e Iesus, la mahulila ale sesele eia sibitala tegatou veia etato ge mahuli taro la pileho.
1CO 15:22 Mai e Adam, eia visibitala la iruru, me oio vola etato tomi pogati la kilolila mai la pileho. La vuhula etatou tomi la tahalo la vovo mai tai e Adam. Eala moli e Kraist, eia peho robo etatou veia ge vimahuli tomi etatou, mai etato ge tetalati.
1CO 15:23 Eala moli la vimari tomi alele, la imamala oio vola La Tahalo Uru tabari tatahotia. Pala muga e Kraist mahuli rivu lou. Goio, mai mulimuli eia ge beu rivu loua somai te la maututula, tio etato ale tetala ge mahuli rivu lou mai tai eia.
1CO 15:24 Eia ge vimahuli kaluvuti etatou mai ele, tio la tapasi la maututula ge sibitala, e Kraist ge sulu sasapa egiteu la gima tomi ale vagari, mai egiteu la valalua me egiteu la angelo tomi tai ale te Satan. Eia ge sugu taro rivuale Tamala la viputumulila tetala ale eia sau tola la maututula ovola, mai la pulolou la matagagala te La Tahalo Uru omai te la magasa.
1CO 15:25 La vuhula, la imamala ale igoie kara mulimuli la tapasi la maututula, ale la viputumulila te Kraist, eia ge mamuga ovola kara ale eia ge bolehoho egiteu la gima tomi te Tamala.
1CO 15:26 Me la tapasi la gima ale eia ge bolehohoa, eia ge la pileho moli ale kisi tola etatou, e Kraist ge vikaluvua.
1CO 15:27 La vuhula La Tahalo Uru veitia veia e Kraist ge soa kuru egiteu la gima tomi veia eia ge sau tola la viputumulila tomi omai te la maututula. Eala moli eia matagagati veia e Kraist kama ge mamuga te Tamala, la vuhula La Tahalo Uru moli pigi la papaga tomi sotalo te la vahale Kraist ele.
1CO 15:28 Goio, e Kraist ge sau tola la viputumulila tomi mai ele, e Tamala ge abiala la vagagarila tetala, eia ge vagoilo e Latula te la uluvala veia oio moli ovola La Tahalo Uru ge sau tola la maututula me la magasa me la viputumulila tomi moli kaluvu.
1CO 15:29 Mai eia ge sesele veia egiteu ale pehoti, egite kati ge mahuli rivu lou, ilava tai egiteu la valalua isahari abi la vuluhi te la isa giteu e tabarabara giteu ale pehoti? Egite veia ge vimahuli egiteu mai ele. Ilava tai egite ge vavala mai ele, mai la mahuli rivula ge ouka?
1CO 15:30 Tio, eau veia ge tahi amutou tai te la igogolu tamiteu la bilalaha. Mai eau ge valolo, eia kama vagari veia egiteu la valalua la gima ge bili taroau, eala moli eau kama taga. Eala moli mai la mahuli rivula ge ouka, tio eau ge taga pepeho egiteu la gima te Kraist ele.
1CO 15:31 Amuto tabarabaragu, te la igogolu la valolo te Kraist, eau hagagavi ge peho te la haroharo tomi. Eau kama koramulia ge visigolo amutou e latatugu te la isale Kraist Iesus, La Uru gatou. Eia sesele viruru, eau poga tavu la pileho te la haroharo tomi.
1CO 15:32 Oio Epesas egiteu la valalua la gima vilagilagi leau mai la paia hou ale ge barautu momomo la vovogu. Ilava sesele eau ge gabu la iligi tegiteu ale kama kokora mai ele, mai la valolo taku eia ge la paga te la vovo moli? Mai la mahuli rivula ge ouka, eia koramuli seselea veia etato ge mulimuli la merera tegiteu ale vei mago “Taritigi etato ge ali maru, ge liu tai, la vuhula galigeli etato ge poga tavu la pileho.”
1CO 15:33 Amuto soukama ge tilo te la merera tegiteu ale vikara mai ele. Taritigi amuto ge gabutatala tai la merera isa lou ale la valalua isahari veveia maie “Mai eme ge vikilipi egiteu la tahalo ale kama kokora, egite ge virurume.”
1CO 15:34 Taritigi amuto ge gabutatala tigi lou, umalati amuto ge igo la iruru. Amuto isahari ele kama rovi bakisi La Tahalo Uru. Eau ubiti le amutou la mererale veia amuto ge mahela ovola, amuto ge gabua.
1CO 15:35 Isahari tamutou soioge ge hiliti veia ge tahiau maie “Egiteu ale pehoti ge mahuli lou mave? La vovo giteu ge mai la rova?”
1CO 15:36 Eala moli amuto tahi paua moli. La kilolila, eau ge tovoa soio te la vavua la obu ale etato galua. La paga ale etato galua, eia ge peho muga, eia ge parara, mulimuli eia goio vali pola, eia goio kusi lou. Mai ge ouka, eia kama ge mahuli lou.
1CO 15:37 La paga ale etato galua, eia soukama mata mai la obu ale ge kusi. Ale eme galua, la vavuala moli.
1CO 15:38 Eme galua, eia goio kusi, tio La Tahalo Uru abiala la tokoromola mai te la masasagala tetala sesele, mai la tabarila tetala soio tegiteu la maratatila la obobu tomi.
1CO 15:39 Mai la vovo giteu la maratatila la kalia tomi tai, eia isapolopolo. La tahalo, la vovola isa, la bolo la vovola isapolo, la malu tai isapolo tegirua, me la vovo giteu la ia isapolo tegiteu tomi.
1CO 15:40 Mai egiteu la matatabu ale kusi oata te la ilo la lage, egite kama mai la paga ale omai te la magasa. La matagaga giteu isa, me la tokoromola te la paga omai te la magasa, eia isapolo.
1CO 15:41 La haro, eia la tokoromola isa, la taio isapolo, egiteu la matatabu isapolo tegirua lou. Me egiteu la matatabu tai ele, egite isapolopolo, la matagaga giteu kama visauru.
1CO 15:42 Tio, te la mahuli rivula eia ge mai moli ele. La vovo gatou ale egite ulaia, eia ge parara mai la vavua la obu ale tabuli otalo la magasa. Eala moli mai eia ge mahuli rivu lou, eia kati ge rovi la pileho.
1CO 15:43 Egite ulai la vovo gatou, etato kama rava, etato kama vagari. Eala moli mai etato ge mahuli rivu lou, la vovo gatou eia ge marasa, eia ge vagari.
1CO 15:44 Ale egiteu mai ale galua, eia la vovo gatou te la magasa moli. Ale La Tahalo Uru ge vimahuli rivu etatou, la vovo gatou ge isapolo, eia ge koramuli sesele la mahulila tegatou te la kalulu. Mai etato tahola seseleti la vovo gatou te la pulolou omai te la magasa, tio eia matagaga tai mai ele veia etato ge tahola tai la vovo gatou ale isapolo, eia ge koramuli la pulolou tegatou ale ge mulimuli, te la mahulila te la kalulu.
1CO 15:45 Mai La Buk Tabu Ale Pala eia veia maie “E Adam, eia la muluga la tahalo la vovo, La Tahalo Uru eia vimahulia.” Eala moli e Kraist, eia la kalulu, eia vimahuli etatou.
1CO 15:46 Tio eia matagaga mai ele veia la mahulila te la kalulu eia kama vimuga, ouka. La mahulila te la tahalo la vovo vimuga, mulimuli la tahalo la vimahuli te la kalulu sibitala, mai e Kraist.
1CO 15:47 Ale guvi pala muga, La Tahalo Uru puila la magasa moli. Ale mulimuli tetala, eia loata te la ilo la lage, eia la kalulu sesele.
1CO 15:48 Mai egiteu ale te la vovo moli, egite mai sesele e Adam, la vovo giteu ge vulo mai la magasa lou. Eala moli egiteu ale La Tahalo Uru puliti egiteu, egite mai sesele e Kraist ale loata tetala, egite ge mahuli moli te la kalulu, egite kama ge tabuli te la pileho.
1CO 15:49 Etato igoie taholati la vovo gatou mai la vovole Adam, eala moli mulimuli etato ge tahola la vovo gatou mai sesele la vovole Kraist.
1CO 15:50 Amuto tabarabaragu, eau vei seselea mutou, la vovo gatou te la mahulila ale igoie, eia kama koramuli la pulolou la matagagala te La Tahalo Uru. La paga ale ge parara, eia kama koramulia ge sau tola la mahulila ale la kaluvula ge ouka.
1CO 15:51 Loloa, eau ge lubea mutou la merera ale tikumu, eia taritigi pepeho, eia isapolo sesele. La mererale, eia maie: Isahari tegatou kama ge poga la pileho, eala moli La Uru eia ge beu mugea, eia ge vulo etatou, la vovo gatou ge isapolo koramuli la pulolou la marokala oio tetala.
1CO 15:52 Eia ge vikarutu molia, mai la sima. La vaivai ale ge veipala la guluvi te Kraist, eia ge tali, egiteu te Kraist ale pehoti ge hiliti taro la lulu, la vovo giteu ge isapolo, etatou tomi ale tetala ge vulo sapolotio.
1CO 15:53 Mai ele, la vovo gatou ale kama vagari, eia ge kaluvu, La Tahalo Uru ge kolila la vovo gatou ale te la pulolou te la kalulu, eia ge koramuli la mahulila ale sesele, la kaluvula ge ouka.
1CO 15:54 Tio ale la vovo te la pileho ge vulo mai la vovo ale kama ge peho, oio vola la merera te La Buk Tabu Ale Pala eia ge puru tomi ale eia veia maie: La Tahalo Uru, eia bolehohoti la pileho, eia vikaluvuti la vagagarila.
1CO 15:55 La pileho, eia kama ge bolehoho etatou, etato kama ge ligi sesele ovola.
1CO 15:56 Tio eia matagaga veia la iligiligi te la pileho, eia la iloto la iruru tegatou. Me eia vagari mai ele, la vuhula La Tahalo Uru eia veitia veia la tahalo la iruru eia ge peho.
1CO 15:57 Eala moli e Iesus Kraist, La Uru gatou, eia peho robo etatou, eia bolehoho la vagagari la iruru ale kisi tola etatou. Taritigi pepeho soata te La Tahalo Uru!
1CO 15:58 Tio, eau karasuku amutou e tabarabaragu veia amuto ge magiri vagari, amuto ge sau tola sesele la merera te Kraist. Magiri vagari te la igogolu te La Uru, umala mailaila. La vuhula amuto rovitia veia la igogolu tetala, eia la igogolu ale sesele, la igogolu tetala, eia kama la igogolu bulalahu.
1CO 16:1 Eau veia ge vikara matagaga soio tamutou te la tilau vikapopo la uati ale ge suli la valalua me hatavivile te La Tahalo Uru oio la gale e Iudea, egite pou la savelela. Amuto ge igo molia mai eau veitia giteu la lotu tomi oio la gale e Galesia veia egite ge igoa.
1CO 16:2 Te la haro tabu tomi, amuto ge tau raragi la galevi la uati bakisi tamutou isasasa, mai isa pogati la uati uru, eia ge tau raragi la uati ale uru, mai ge ouka, eia ge tau raragi la uati ilua moli. Amuto ge tau raragia mai ele, mai eau ge guvi, amuto kamati ge marapa te la tilau vikapopo la uati.
1CO 16:3 Ale eau ge gomai tamutou, eau ge kekesi bakisi la vikara matagagala, ge abia giteu la bilalaha ale amuto hiloviti egiteu, eau ge baha egiteu soio e Ierusalem, egite ge vahari tomi la uati tamutou.
1CO 16:4 Mai la igogolu taku tai bakisi ge oio e Ierusalem koramuli eau tai ge goio vola, egite soioge ge tilimuliau soio e Ierusalem ele.
1CO 16:5 Eau ge goio muga e Masedonia, mulimuli eau ge goio tamutou ele.
1CO 16:6 Eau soioge ge pou tabaa bakisi tamutou, kara la leavala ge kaluvu, te la mahati eau ge hiliti taro lou amutou, amuto ge tataro tigiau soio te la tuluga taku lou soio te la gale isahari.
1CO 16:7 Eau kama masaga ge pariri, ge gomai hari tamutou veia ge pou golo moli, ge tuga lou. Eau veia ge igo seselea mai ale eau veitia, ge pou tabaa sesele, mai La Uru ge masagea.
1CO 16:8 Eala moli eau veia ge pou tabaa muga omai Epesas, kara te la haro La Pentikos,
1CO 16:9 la vuhula la gauru omai kopeti ale eau ge vauru la igogolu te Kraist. La igogolu uru omai, egiteu tai ale vigima soio te la igogolu te Kraist, egite tai usu. Eala eau veia ge pou muga omai Epesas ge igogolu vagari muga lou omai.
1CO 16:10 Mai e Timoti ge hari lalai amutou, amuto ge baumuli tigia, la vuhula eia tai la bilalaha te La Uru mai eau.
1CO 16:11 Isa umala ge vile e maura. Amuto ge suli tatahoa, amuto ge baha taro tataho taia, veia eia ge gomai rivu lou taku, la vuhula eau pou tali e Timoti miteu me tabarabara gatou te la igogolu te Kraist isahari lou ele, veia egite ge beu loua somai taku.
1CO 16:12 Tio, la merera isa lou, eia te tabara gatou e Apolos. Eau tutu tola vagariale Apolos ele veia eia ge vikapopo legiteu e tabarabarala te Kraist ale gomai tamutou, eala moli eia kama masaga. Mai eia ge raragi tigi veia ge tuga, eia tai ge gomai tamutou.
1CO 16:13 Taritigi amuto ge mata rara, amuto ge magiri vagari te la tautaulailo tamutou soio te Kraist. Amuto ge vagari moli, amuto umala ge taga.
1CO 16:14 Me amuto ge vipuhi tigi tataho te la isale Kraist, la vulovulo la gilogo ge volu oio tamutou ele.
1CO 16:15 Amuto rovia veia e Stepanas megiteu la karakara tetala, pala muga te la valalua tomi oio la gale e Akaia, egiteu ele vulo halaba soio te Kraist. Egite suli pepeho la valalua me hatavivile te La Tahalo Uru, egite kama gabutatala isa lou la paga. Eala, eau tutu tola vagaria mutou e tabarabaragu ele,
1CO 16:16 veia amuto ge roromuli la valalua ale taritigi mai egiteu ele, me egiteu tomi ale visuli baoli legiteu te la igogolu te Kraist.
1CO 16:17 Ale e Stepanas, e Portunatas me Akaikas gomai hari lalaiau, eau sagege pepeho, la vuhula amuto e Korin kama koramulia ge gomai, eala moli egite taho tolu gilemulitiagu la pulolou tamutou veia la mahulila tamutou eia taritigi moli.
1CO 16:18 Egite vimata kaseka lou eau, me egite ge beu loua soio tamutou, egite soioge ge vimata kaseka tai amutou. Taritigi etato ge matagaga veia egiteu la tahalo sesele te Kraist, etato ge togo egite.
1CO 16:19 Egiteu la valalua me hatavivile te la lotu tomi te la gale Esia, egite toi la haro sesele soio tamutou ele. e Kuila mira me Prisila tai, egira veia mutou la haro sesele te la isa La Uru gatou, me egiteu la valalua me hatavivile tomi tai ale lotu vikapopo oio la luma tegirua.
1CO 16:20 Egiteu tomi e tabarabara mutou te Kraist ale omai Epesas, egite tai toi la haro sesele soio tamutou e Korin. Taritigi amuto ge vilapu lima te la isale Kraist mai la vulovulo gatou ale tetala.
1CO 16:21 Eau, e Pol, eau kekesi la merera alele me la limagu sesele.
1CO 16:22 Mai isa kama ge rovi sesele La Uru veia ge pou la tilogo me la gilogo soio tetala, eia ge vilua! La Uru e Iesus, taritigi eme ge gomai hari!
1CO 16:23 Taritigi la gilogo te La Uru gatou e Iesus, eia ge pou tamutou tomi.
1CO 16:24 Te la isale Kraist Iesus, eau e Pol tai baha la merera la gilogo taku somai tamutou. Eala moli ele. Eau e Pol.
2CO 1:1 Eiau e Pol, amila me tabara gatou e Timoti, amila kekesia mutou la valalua me hatavivile te La Tahalo Uru ale oio la mautu e Korin, amila kekesi taia mutou la valalua me hatavivile tetala ale pou oio la gale e Akaia. Te la masasagala moli te La Tahalo Uru, eau la bilalaha te Kraist Iesus.
2CO 1:2 Taritigi pepeho veia La Tahalo Uru, e Tama gatou, egira me Iesus Kraist, La Uru gatou, eia ge baha la gilogo tetala soio tamutou, la tia mutou oilo ge malilo tataho.
2CO 1:3 Taritigi etato ge vaisale La Tahalo Uru, eia e Tamale Iesus Kraist, La Uru gatou. Eia la vuhu la gilogo, eia suli tataho etatou te la savelela tomi tegatou.
2CO 1:4 Mai etato ge poga la iloburukola, eia ge vimalu etatou, veia etato ge suli tai egiteu ale pou la iloburukola, etato ge suli legiteu la gilogo ale taritigi, La Tahalo Uru vagoilotia te la tia gatou.
2CO 1:5 Mai eau ge gabu la iloburukola mai sesele e Kraist, e Kraist ge hiloa mai ele, eia ge vimaluau te la gilogo tetala ale uru. Mai la iloburukola taku ge uru, la visuli te Kraist tai ge uru somai taku.
2CO 1:6 Mai eau ge gabu la iligiligi, ale eau ligi moli te la igogolu la valolo ale suli amutou, eia vimahuli amuto. Mai eau ge gabu la visuli te Kraist ale uru, ale eia suli moliau mai ele veia eau ge vagari, veia eau ge suli lou amutou, amuto ge koramulia ge magiri vagari te la iligiligi te la isale Kraist mai tai eau.
2CO 1:7 Eala moli eau sagege moli ale eau rovia veia amuto ge sau tola vagari e Kraist, la vuhula amuto gabu la iligiligi mai tai eau, eala moli amuto gabu tai la visuli te Kraist ale uru sesele, vikapopo tai leau.
2CO 1:8 Eau masagea veia amutou e tabarabaragu ele, amuto ge mata kilala tigi te la iligiligi ale uru pepeho eau pogatia, ale eau valolo pala oio la gale Esia. Bakisi moliti la iloburukola ge bolehohoau, eau veia ge peho, la vuhula egite la gima te Kraist vagari pasi.
2CO 1:9 La tiagu oilo tikumu sesele mai la iloburukola te la tahalo ale egite lao tolea veia ge bilia. Oio vola, La Tahalo Uru eia mata sosoli taro moliau mai ele veia ge viteteliau veia eau ge sau tola sekela eia, veia eau umala ge tovo lalai veia ge magiri moli te la vagagarila taku lou, eala moli eia masagea veia eau ge toro moli tetala sekela, eia ale ge vimahuli etatou taro la pileho.
2CO 1:10 Goio, La Tahalo Uru eia vimahuli seseleau taro la pileho, eia ge igo molia mai ele, kama ge maila,
2CO 1:11 mai amuto ge sau tola seseleau te la kilaka. La valalua me hatavivile usu ge hiloa veia la kilaka tamutou eia puru seseleti somai taku, tio egite usu ge vaisale pepeho La Tahalo Uru oio vola, ale eia vibalava sesele la igogolu tamiteu ale valolo te la isala, amite kama vilua.
2CO 1:12 La paga isasa eau sagege moli ovola maie: La vulovulogu matata moli, eau kama gabutatala papai te la pulolou taku kabili te la valalua. Eau tai kama igo isa la iruru soio tamutou e Korin. Eau kama gabu tikumu la mari taku, eau tautaulailo te la gilogo te La Tahalo Uru sekela, eau rovi moli la merera ale sesele me la pulolou tetala ale maroka, ale eau valoloti le amutou pala.
2CO 1:13 Te la merera tomi ale eau kekesitia mutou ovola, eau vikara matagaga moli, eau kama pigi veivei la masovala isahari ale kama matagaga.
2CO 1:14 Ale igoie amuto mai ale rovi tigitiau bakisi, eala moli eau masagea veia amuto mulimuli ge rovi tataho la vulovulogu tomi, amuto ge lege sisigi leau, mai tai eau, eau ge lege sisigi tai le amutou te la tapasi la haro ale La Uru e Iesus ge beu loua ovola.
2CO 1:15 Eau kama gabutatala papai soio tamutou. Pala, eau gabutatalea veia amutou e tabarabaragu sesele, eala eau raragi veia ge hari lalai muga amutou, veia amuto ge hiloau vaka lua, amuto ge gabu la sagegela te la guluvi taku soio tamutou, amuto ge gabu la sagegela vaka lua mai ele.
2CO 1:16 La mulugala, eau gabutatalea veia ale eau ge goio e Masedonia eau ge hilo amutou, me la vaka luala, eau veia ge hilo lou amutou te la bileula taku loio e Masedoniale, veia amuto ge suli la tuluga taku lou soio e Iudea.
2CO 1:17 Ale eau tovo lalaia veia ge vimatata tataho la tuluga taku mai ele, mave, amuto veia eau gabutatala bulalahu? Amuto ubi leau la merera veia eau visigolo amutou ale eau kati goio tamutou, mave, amuto soioge veia eau tilimuli la masasagala taku moli mai la tahalo bulalahu veia eau ge vei mugea mutou isa la merera, veia mulimuli eau ge vulo loua?
2CO 1:18 Eau vei seselea mutou oata te La Tahalo Uru veia mai la merera isa ale eau ge veia mutou ovola, eia ge sesele moli mai ale eau veitia mutou pala.
2CO 1:19 Amite la bilalaha tomi, la vikararala tamiteu eia sesele. Amite me Sailas me Timoti, amite valolo le amutou la merera te Iesus Kraist, eia e Latu La Tahalo Uru, eia kama rovi la visigologolola.
2CO 1:20 La merera ale mave ale mave La Tahalo Uru ge vei seselea gatou ovola, e Kraist vipuru tomitia, eia sesele tomi moli. Oio moli teale, mai etato ge vaisale La Uru, etato ge kaka moli te isale Kraist, eia ge vitikumu la kilaka tegatou.
2CO 1:21 La Tahalo Uru sekela eia kisi vagari la tautaulailo tegatou tomi soio te Kraist, veia etato ge magiri vagari. Eia visati le amiteu veia amiteu ge la bilalaha tetala,
2CO 1:22 eia tauti la irovilala tetala somai tegatou tomi veia etato tetala seseleti, mai eia vibalavati letatou La Kalulu La Marokala, eia volu sesele te la tia gatou, eia abia gatou veia etato ge rovia mai ele veia la vibalavala tetala ale uru sesele eia soloio, etato mulimuli ge sau tolea.
2CO 1:23 La Tahalo Uru ge rovia veia la vikararala taku eia sesele moli. Ale eau kama guvi hari oio tamutou e Korin, eau gabutatala la vareagila tamutou, eau veia ge abia mutou bakisi la baa veia amuto ge vimatatea, amuto soukama mahela leau.
2CO 1:24 Eau kama vauruau veia eau sekela ge vahilo le amutou la gauru la tautaulailo te Kraist, la vuhula amuto matuhati. Eala moli eau masaga molia veia etato ge vaigogolu vikapopo, veia amuto ge gabu la sagegela uru te la visuli taku soio tamutou.
2CO 2:1 Eala, eau hate tola lou, eau veia eau kati ge hari lalai lou amutou veia ge vailo buruko lou amutou mai ale pala.
2CO 2:2 Mai eau ge vailo buruko amutou, amuto kamati ge koramulia ge visagegeau, eau ge pou moli la iloburukola.
2CO 2:3 Ale eau pala kekesia mutou la merera la igototolola, eau viteteli moli amutou veia amuto ge piligi la vulovulo mutou ale kama kokora veia eau kati ge ilo buruko le amutou ele. La vuhula eia koramuli seselea veia amutou ale la vavua la valolo taku, amuto ge visagege moliau, amuto kama ge vailo buruko eau te la vulovulo mutou ele. Eau gabutatalea veia mai eau kama ge guvi te la sagegela, amuto tai kama ge koramulia ge sagege. Eala moli eau tai kama koramulia ge sagege mai amuto kama ge sagege vikapopo leau.
2CO 2:4 Ale eau pala kekesia mutou, la masaligu puri, eau ilo buruko sesele. Eau kama gabutatalea veia ge vailo buruko amutou, eau gabutatala molia veia ge vei matagagea mutou la gilogo taku ale uru soio tamutou.
2CO 2:5 Sesele, isa tamutou ele eia vailo buruko etatou. Eau kama masaga veia ge igo mahela eia te la merera taku, eala moli amuto tomi ligi te la vulovulola ale eia igigoa.
2CO 2:6 Amuto usu muku piletia, eia gabutia, eia koramuliti mai ele.
2CO 2:7 Taritigi amuto ge vimavulaha taro leia la iruru tetala, ge vikara tataho lou soio tetala, eia soukama peho la mahelala.
2CO 2:8 Amuto ge vagoiloa mai e tabara mutou lou, ge puhi tataho loua.
2CO 2:9 Eau pala kekesia mutou veia amuto ge kisu taroa, eau masaga molia veia ge rovia mai ele veia amuto vagari, veia amuto koramulia ge roromuli la merera taku, ka ouka.
2CO 2:10 Mai amuto ge vimavulaha isasa te la iruru, eau tai ge vimavulahea. Mai la iruru sesele ge magiri, eau ge vimavulaha taro leia la iruru alele, eau kati ge gabutatalea, la vuhula eau la bilalaha te Kraist, me eau masagea veia amuto ge rovi tataho la gilogo tetala,
2CO 2:11 e Satan soukama ge vitilo etatou. Etato kama paua leia, eia oio raragiti veia ge igo gegeru etatou. Mai amutou la gilogo ge ouka soio te tabara mutou ale ruruti ele, e Satan ge lapu hari amutou taro la gilogo te Kraist.
2CO 2:12 Ale pala eau guvi olau e Troas, veia ge valolo la valalua me hatavivile te la valolo ale taritigi te Kraist oio la mautu uru alele, eau hiloa veia La Uru eia kopeti la gauru veia la igogolu tetala ge hari tataho te la mautu e Troas ele.
2CO 2:13 Eala moli eau ilo buruko sesele, la vuhula e tabara gatou e Taitas, eia kama pogeau oio la mautu ale, mai amila vitautila, eau la visuli ouka te la igogolu. Eala eau goio tuga, eau tataro egiteu, eau tuga polo lou goio la gale e Masedonia.
2CO 2:14 Taritigi pepeho soata te La Tahalo Uru! Eia suli bibibi amiteu la bilalaha tetala, amite bolehoho la gima te la vagagarile Kraist moli. Oio te la merera tamiteu la isale Kraist eia sulubula soio te la maututula tomi, mai la malia la malalia, eia mali vivili tataho.
2CO 2:15 La Tahalo Uru eia hilo la igogolu tamiteu eia mai la malia la sese la obu ale taritigi, la vuhula amite valolo te Kraist soio tegiteu ale e Kraist ge vimahuli egiteu, soio tai tegiteu ale tou la merera tetala, egite goio poga tavu moli la pileho.
2CO 2:16 Tegiteu ale poga tavu la pileho, la merera te Kraist eia mai la malia la pileho. Eala moli tegiteu ale mahuli, la merera te Kraist eia mali vivili sesele mai la malia la mahulila ale sesele. Ere ge koramuli la igogolu ale uru mai ele, veia ge valolo la merera la mahulila te Kraist?
2CO 2:17 Egiteu moli ale igogolu sesele mai amiteu la bilalaha. Amite kama valolo bulalahu veia la merera la mahulila te Kraist eia ge mata mai la golu bulalahu moli. La Tahalo Uru sesele baha amiteu, eala amite valolo moli la merera ale sesele, vikapopo la tilogo ale uru, la vuhula amite gabu tikumua veia eia oio lololo amiteu, amite la bilalaha sesele te Kraist.
2CO 3:1 Mave, amuto isahari soioge gabutatalea veia eau vauru lou eau te la merera taku, ia? Mave, eau soioge ge guvi vikapopo la merera ale egiteu la mulugaluga isahari te la lotu ge kekesitia veia ge vei tatahoau soio tamutou ovola, ia? Amutou e Korin soioge veia ge suliau te la kekesi la vei tatahola tamutou lou, ale eau ge hiliti taro amutou te la igogolu la valolo, ia? Ouka viruru!
2CO 3:2 Amite la irovilala isa moli sekela ale ge vei tataho amite, mai amutou lou, mai amutou e Korin ge veipala la vulovulole Kraist, tio la valalua te la maututula tomi ge rovia veia la valolo tamiteu eia sesele.
2CO 3:3 La irovilala taku ale ge vei tataho la igogolu taku, eia isa moli sekela, mai la irovilala te Kraist ale La Kalulu La Marokala eia taua te la kalulu mutou ale amuto vulo halaba tetala.
2CO 3:4 Eau kama koramulia ge vikara mai ele mai e Kraist kama ge pou taku. La Tahalo Uru moli eia la vuhu la vagagarila taku te la igogolu tetala.
2CO 3:5 Eau kama isapolo veia ge koramuli la igogolu ale vagari. La vagagarila taku eia loio seseleti te La Tahalo Uru.
2CO 3:6 Eia suliau, eau koramulia mai ele veia ge la bilalaha te la merera tetala ale halaba, eia kama la kekesi te la lima, eia la merera moli te La Kalulu La Marokala. Oio te la kekesi la merera te La Tahalo Uru ale e Moses kekesia, etato poga tavu moli la pileho, la vuhula etato tomi boto. Eala moli La Kalulule Kraist eia vimahuli etatou.
2CO 3:7 Eia sesele, la merera te La Tahalo Uru, e Moses kekesi tolea soio te la hate la uati ale uru. La Tahalo Uru eia sibitala tavu e Moses mai la matagaga ale uru sesele, eia veiala la merera tetalale, e Moses goio kekesia. La lagule Moses tai ele, eia sima te la matagaga La Tahalo Uru. Eia goio purusu loata la gove, la lagula kati sasima sesele, eala moli la valalua e Israel kama koramulia ge mata tola tavua. Mai la merera ale lapu etatou soio te la pileho eia ge guvi te la matagaga ale uru mai ele, mave,
2CO 3:8 la matagaga te La Kalulu La Marokala eia kama ge uru tavu la matagaga te la merera te Moses ale pala?
2CO 3:9 La merera te La Tahalo Uru ale pala, etato boru ovola, eia lapu etatou soio te la pileho, la merera alele eia la matagaga, eala moli la merera te Kraist ale vimaroka etatou, eia la matagaga ale uru sesele!
2CO 3:10 La merera te La Tahalo Uru ale pala, igoie eia mata mai ale mumugu, ale halaba moli eia mata mai ale marasa sesele, eia la matagaga ale uru!
2CO 3:11 La merera te Moses ale pala, La Tahalo Uru eia viputumulitia veia eia kama ge magiri tabaa, eala moli la matagaga eia oio sesele ovola, la vuhula eia la merera te La Uru. Eala moli la merera ale halaba, eia kama ge kaluvu, eia la matagaga ale uru pepeho sesele te ale pala.
2CO 3:12 Tio, ale eau sau tola sesele la matagaga te La Tahalo Uru mai ele, eau vagari moli, eau kama rovi la tilaga.
2CO 3:13 Amite la bilalaha kama mai e Moses, ale eia pigi robo la gamala veia la valalua e Iuda soukama ge hilo la matagagala ale eia kokovuti.
2CO 3:14 Egiteu e Iudale, kara igoie, egite kama matagaga veia egite ge gabutatala tigi la valolo te Kraist. Mai egite ge lolo la merera te La Tahalo Uru ale pala, egite kama abi tigi la masovala, eia mai la lavalava eia pigi robo la mata giteu. Eala moli la lavalava alele, eia soloio, la vuhula egite kama tautaulailo te Kraist, me Kraist sekela moli ge koramulia ge vimatagaga egiteu.
2CO 3:15 Mai egite ge lolo la merera te Moses, la lavalava eia mai ale pigi robo la gabutatalala tegiteu.
2CO 3:16 Eala moli mai isa ge vulo la gabutatalala tetala soio te La Uru, e Kraist ge abi taro la lavalava ale pigi robo la matala.
2CO 3:17 La Uru, eia La Kalulu La Marokala, mai eia ge pou tegatou, la paga isasa kati kisi tola etatou.
2CO 3:18 La mata gatou eia matagagati, la maligoma eia kati pigi robo la lagu gatou mai la lavalava. Oio te la lagu gatou la matagaga uru sima tataro mai la matagaga te La Uru. Eia ge pui halaba etatou, etato ge mai sesele eia, vikapopo la matagaga ale uru, eia loio sesele te La Uru, eia La Kalulu La Marokala.
2CO 4:1 La igogolu la valolo tamiteu la bilalaha, La Tahalo Uru eia abi seselea miteu vikapopo la gilogo me la visuli tetala ale uru pepeho, eala amite kama maveve taroa veia ge piligia.
2CO 4:2 Amite kama visigolo la valalua veia ge puli egiteu soio te Kraist, mai egite kama masaga. La vulovulo alele eia kama taritigi. Amite kama tutugolo amutou, amite kama vulo tai la merera te La Tahalo Uru veia eia ge sibitala isapolo. Amite pou tataho moli, valolo tataho moli, veia la valalua tomi ge rovia mai ele veia amite igo sesele la igogolu te La Tahalo Uru, eia hilo la igogolu tamiteu, eia rovia eia taritigi moli.
2CO 4:3 Mai isahari kama ge matagaga te la merera tamiteu, egite kama matagaga mai ele la vuhula egite kama rovi e Kraist, egite mata mai ale ge peho.
2CO 4:4 E Satan ale sau tola la maututula te la limala, eia pigi robo la gabutatalala tegiteu, egite kati koramulia ge hilo la matagaga te la valolo ale taritigi te Kraist ale la vuhu la mahulila, la vulovulo girua me La Tahalo Uru eia visauru moli.
2CO 4:5 Mai amite ge valolo, amite kama valolo te la isa miteu veia ge vauru amiteu lou mai ele. Amite valolo moli te la isale Iesus Kraist, eia La Uru gatou, amite valolo moli mai ele, amiteu la bilalaha moli tamutou veia ge puli amutou soio te Iesus veia amuto ge rovi sesele eia.
2CO 4:6 La Tahalo Uru, eia la vuhu la matagaga, mai la merera tetala te la silokola eia veia maie “Taritigi la matagaga ge vulo robo la maligoma.” Eia vimatagagati la tia gatou oilo veia etato ge hilo sesele la matagaga te La Tahalo Uru oio te la lagule Kraist, veia amite ge matagaga mai ele te la merera tetala ale sesele.
2CO 4:7 La matagaga tetalale, eia taritigi pepeho mai la vuliti. Eau ge tovo mulia soio te la vuliti ale etato balepa robola la moe. Amiteu ale baumuli la merera te La Uru, amite la tahalo la vovo moli, amite kama vagari. Mai la vuliti, egite balepa robola la moe ale kama vagari, la vuliti te La Tahalo Uru eia tabuli tamiteu ale kama vagari, veia la vagagarila ale uru ge pou tamiteu, la valalua ge matagaga mai ele veia ale la vagagarila te La Tahalo Uru sesele.
2CO 4:8 Amite vavala, eala moli amite kama peho posa. Amite ilo buruko, eala moli amite kama hele.
2CO 4:9 Egite la valalua te Satan gima pasi amiteu, eala moli La Tahalo Uru kama sigolo taro amite. Egite bili amiteu, eala moli amite kama peho, amite goio mahuli utu lou.
2CO 4:10 Te la igogolu la valolo, amite poga tavu la pileho mai tai e Kraist, eala eia matagagati tegiteu la valalua tomi veia la vagagarila te Kraist sekela moli eia sigirobo amiteu.
2CO 4:11 Te la igogolu la valolo te La Uru, amite poga tavu la pileho te la haroharo tomi, eala la vagagarila te Iesus Kraist eia ge matagaga tegiteu la valalua tomi, mai egite ge mata muli la vulovulo miteu.
2CO 4:12 Te la igogolu la valolo te Kraist, amite hagagavi ge peho, eala moli oilo vola amuto sau tolatia la mahulila ale sesele.
2CO 4:13 Mai La Buk Tabu Ale Pala eia veipala la merera te Devit maie “Eau veipala la merera te La Uru, la vuhula eau tautaulailo tetala.” Amiteu la bilalaha tai, amite tautaulailo vagari mai tai e Devit ele, eala amite veipala la merera te La Uru.
2CO 4:14 Etato matagaga moli veia La Tahalo Uru ale vimahuli La Uru e Iesus taro la pileho, eia ge vimahuli tai etatou vikapopo leia, eia ge puli etatou tomi soilo tetala, etato ge pou la balavala oio te la balila.
2CO 4:15 La iligiligi ale igoie amite la bilalaha gabua, eia ge suli amutou ale pou te la maligoma, veia mai la gilogo tetala eia ge pigi robo la valalua me hatavivile usu, la vaisalela ge uru pepeho soata te La Tahalo Uru.
2CO 4:16 Eala, amite kama piligi la igogolu te Kraist. La imiteu eia mai ale paruti, eala moli te la kalulu miteu, La Uru eia vagoilo halaba la sagegela me la vagagarila oilo vola te la haroharo tomi.
2CO 4:17 La iloburukola bakisi moli ale amite gabua te la imamala ale igoie, La Uru ge kolia somai tamiteu mai la matagaga tetala ale uru, eia kama ge kaluvu. La vibalavala moli tetalale, eia uru, la iloburukola bakisi ale amite gabua igoie, eia mai la golu bulalahu moli.
2CO 4:18 Amite kama vagari tavu la paga la vovo ale etato la valalua hiloa me la mata gatou, eia ge kaluvu lou. Amite sugu moli solagu veia ge sau tola la sagegela ale sesele. La balavala alele, la mata gatou kama koramulia ge hiloa, eia la paga la kalulu, eia ge mahuli moli mai ele, la kaluvula ge ouka.
2CO 5:1 Etato rovia veia mai etato ge peho, etato ge tuga taro la vovo gatou, La Tahalo Uru eia ge abia gatou la vovo ale halaba oata tetala, eia kama ge kaluvu.
2CO 5:2 Ale igoie etato so mahulihuli, etato gabu la silahala te la vovo gatou, etato gabutatala solagu veia taritigi pepeho etato ge kai hari la vovo gatou ale maroka, oata te la ilo la lage.
2CO 5:3 Etato kama ge la kalulu bulalahu moli, la vovo gatou tai ale halaba ge oio.
2CO 5:4 Etato gabu la iligiligi te la vovo gatou ale mumugu, etato robe, etato kama mavulaha, eala moli etato kama masaga la pileho. Eala moli etato vagari moli veia ge hele taro la vovo gatou ale etato taholea igoie, eia ge kokovu te la magasa. Etato vagari moli veia ge kai hari la vovo gatou ale halaba. La vovo gatou ale igoie, eia ge kaluvu te la pileho, la mahulila ale sesele ge koli molia, etato ge kai la vovo gatou ale maroka.
2CO 5:5 La Tahalo Uru eia raragitia la vovo gatou ale halaba mai ele, etato kama ge balavea te la mapa la igogolu tegatou lou, ouka. La Tahalo Uru sekela ge vibalava letatou ovola me etato rovia eia sesele, la vuhula eia abitia gatou La Kalulu La Marokala, eala etato rovia mai ele veia mulimuli etato ge sau tola la mahulila ale sesele, la kaluvula ge ouka.
2CO 5:6 Eala, etato sau tola vagari moli la merera te La Uru, ale eia veia ge abia gatou la vovo gatou ale halaba. Etato rovia veia mai etato ge mahuli tabaa te la vovo gatou ale etato taholea te la imamala ale igoie, etato kama ge sau tola hari la pulolou la matagagala oata te La Uru.
2CO 5:7 Ale, etato rovia te la tautaulailo tegatou. Eia kama la paga ale etato hilotia me la mata gatou, etato gabu tikumua mai ele. Ouka, eia te la tautaulailo moli, etato rovitia te la kalulu gatou.
2CO 5:8 Etato kama taga la pileho, etato masaga molia veia ge hiliti taro la vovo gatou ale igoie etato taholea, veia ge goio ge pou la sagegela oio te la bali La Uru.
2CO 5:9 Eala, etato vagari moli veia La Uru ge lege sisigi letatou. Mai etato so mahulihuli, uka etato ge peho, etato la gabutatalala isa moli sekela veia etato ge igo sesele la masasagala te La Uru gatou ge visagegea mai ele.
2CO 5:10 La vuhula etato matagagati veia etato tomi ge peho, etato tomi ge magiri te la vigagiala oio te la lagule Kraist, eia ge kolia somai tegatou isasasa mai la vulovulo gatou. Egiteu ale taritigi, egite ge pou la balavala. Egiteu ale kama kokora, egite ge pou te la iligiligi. Eala, mai etato so mahulihuli, etato vagari pepeho veia ge igo sesele la masasagala te Kraist veia eia ge lege sisigi letatou.
2CO 5:11 Amiteu la bilalaha, amite taga La Tahalo Uru, amite togo seselea, eala amite igogolu vagari veia ge puli la valalua usu soio tetala. La vuhu la igogolu tamiteu eala moli ele. La Tahalo Uru, eia rovi la gabutatalala tamiteu oilo. Taritigi amutou e Korin tai, te la tia mutou isasasa, amuto ge matagaga moli veia amiteu la bilalaha, amite igogolu sesele tetala, amite kama vauru lou amiteu te la igogolu la valolo te Kraist ele.
2CO 5:12 Amite kama masagea veia ge tovo lalaia veia ge ali la ilo mutou veia amuto ge vei tataho lou amiteu. Ouka, eau lube molia mutou la vuhu la igogolu tamiteu sesele te Kraist, veia amuto ge koramulia ge putu oli lou la merera tegiteu ale vauru lou egiteu te la valolo la visigologolola.
2CO 5:13 Mai amuto ge ubi le amiteu la merera veia amite la bilalaha vikara mai la paua, ale amite vagari tavu sekela e Kraist, ioge eia korati mai ele, amite paua moli la sagegela te La Tahalo Uru. Mai tai amite ge vikara mai la tahalo ale gabutatala tigi, ale tai ele amite igoa te Kraist, veia ge vei matagagea mutou la merera tetala.
2CO 5:14 La paga isa moli eia uru te la gabutatalala tamiteu, mai la gilogo te Kraist somai tegatou. La vuhula, amite matagaga tigi veia la tahalo isa sekela eia peho roboti etatou tomi, e Kraist moli ele. Eala, eia matagaga tai mai ele veia mai etato ge te Kraist, etato mai ale peho taroti la vulovulo gatou ale pala, etato sibitala halabati te la mahulila ale halaba e Kraist abitia gatou.
2CO 5:15 Etatou ale mahuli halaba tetala, etato umalati ge gabutatala moli la masasagala tegatou te la vovo. Etato ge vagari moli veia ge vahiliti la igogolu te Kraist, la vuhula eia peho robo etatou, eia goio mahuli rivu lou te la vagagari La Tahalo Uru.
2CO 5:16 Sesele, amite pala gabutatalea veia e Kraist eia la tahalo la vovo moli, eala moli oukati, amite matagagati veia eia isapolo seseleti! Eala amite tutu tolea mutou veia umalati etato ge gabu vauru la vulovulo la valalua mai te la gabutatalala te la vovo moli.
2CO 5:17 Mai isa ge vulo halaba te Kraist, la vulovulola ge halaba sesele, eia kati ge mai ale pala, La Uru eia mai ale pui halaba seseletia.
2CO 5:18 Ale la igogolu te La Tahalo Uru sesele. Eia baha e Kraist, e Kraist goio peho robo etatou veia etato kati ge ligi te la kiloli la iruru tegatou, veia etato kati ge vipou baa me La Tahalo Uru, veia etato ge veipala tai la valolo tetala ale taritigi soio te la valalua me hatavivile tomi.
2CO 5:19 Eia veia la valalua me hatavivile tomi ge matagaga mai ele, veia oio te la pileho te Kraist, etato me La Tahalo Uru ge koramulia ge vipuhi tigi lou, eia kati ge gabutatala la iruru tegatou ale etato igotia. La vikara matagagala alele, La Tahalo Uru eia abi seselea miteu la bilalaha tetala veia amite ge veipalea soio tamutou la valalua me hatavivile te la maututula tomi.
2CO 5:20 Eia sesele, amite la bilalaha moli tetala, mai amite valolo amutou, La Tahalo Uru eia mai ale vikara gogogo soio tamutou te la hare miteu sesele veia amuto ge vulo halaba te Kraist. Eala, mai amite kaka gogogo amutou veia gageie amuto ge tau sesele la ilo mutou soio te Kraist, amuto me La Tahalo Uru ge vipuhi tigi lou, amuto kati ge vipou baa leia.
2CO 5:21 Eia sesele, e Kraist, eia la iruru ouka, eala moli La Tahalo Uru eia vimagiria veia eia ge abi la muli gatou, eia vauru la iligiligi soio tetala veia eia sekela ge bole la kiloli la iruru tegatou, veia mai etato ge tautaulailo tetala, la vulovulo La Tahalo Uru ale maroka sesele, eia ge volu sesele tegatou, etato ge sibitala maroka mai eia.
2CO 6:1 Amiteu la bilalaha, amite vikapopo La Tahalo Uru te la igogolu la valolo te Kraist. Ale amite karasuku amutou veia umala amuto ge gabutatalea veia la gilogo te Kraist soio tamutou veia eia la golu bulalahu.
2CO 6:2 Mai la merera te La Tahalo Uru te La Buk Tabu Ale Pala, eia veia maie: Amuto tali tavuau te la imamala moli ale eau tautia veia eau ge lolo amutou ovola, me te la imamala ale eau gogoti amutou, eau vimahuliti amutou. Tio, eau veia mutou e Korin maie: Gageie moli, eia la haro ale La Tahalo Uru ge gogo amutou, taritigi amuto ge sau tola haria, eia ge vimahuli amutou.
2CO 6:3 Amiteu la bilalaha te Kraist, amite kama masaga ge igo gegeru la tautaulailo tamutou, ouka viruru. Amite vagari veia ge pou tataho moli, la valalua soukama ge hilo la vulovulo miteu isahari ale kama taritigi, egite ge vile la igogolu tamiteu te la valolo te la isale Kraist.
2CO 6:4 Te la vulovulo miteu tomi, amite vagari veia ge veipalea veia amite la bilalaha sesele te La Tahalo Uru. Amite gabu la iligiligi me la iloburukola ale uru sesele, amite gabutatala marapa te la tahi vilela te la valalua la gima, egite ge vulo robo amiteu, la gauru miteu ouka te la hilele.
2CO 6:5 Egite kumamasi vulo amiteu, egite kapi robo amiteu oilo te la luma la kilisi. Amite ge valolo, la masua uru ge sibitala. Amite igogolu vagari, amite kama abi tigi la mavutala, amite vitolo tai.
2CO 6:6 Eala moli te la iloburukola tomi alele, amite pou tataho moli, amite maroka moli, la mari tamiteu eia koramuli tai, amite kama igo totolo harari. La Kalulu La Marokala eia suli amiteu, amite pou moli te la vulovulo la mutelela me la gilogo ale sesele veia ge suli la valalua me hatavivile tomi. Eala, egite hiloa mai ele veia amiteu la bilalaha te La Tahalo Uru sesele.
2CO 6:7 Egite hilo taia veia la merera tamiteu eia sesele tomi moli, la vagagarila te La Tahalo Uru eia oio tai tamiteu. Amite magiri te la vaubila te la isale Kraist, la gata ale oio te la lima miteu la paga isa moli sekela, la vulovulo ale maroka, eia suli amiteu te la vaubila, eia galiau robo tai amiteu.
2CO 6:8 Mai egite la valalua ge bole vauru la isa miteu, eia taritigi moli. Mai egite ge vile amiteu, veia amite la tahalo la iruru, ale taritigi moli tai. Egite oso lulu la merera tamiteu veia amite visigolo la valalua me hatavivile, eala moli amite valolo moli la sesele la merera te La Uru.
2CO 6:9 Egite veia amite la golu bulalahu moli, eala moli La Tahalo Uru eia rovi amiteu veia amiteu la tahalo sesele tetala. Amite viluati, eala moli amite mahuli utu lou. Egite bili amiteu, eala moli amite kama peho.
2CO 6:10 Amite pou la iloburukola, eala moli amite mai ale sagege moli te la haroharo tomi. Amite mata mai la morivava, eala moli la vuliti tamiteu ale sesele, eia oio. Amite mata mai ale kama tahola isa la paga, eala moli la paga isa uru sesele amite taholea, mai la mahulila me la vibalavala ale uru sesele te Kraist.
2CO 6:11 Amiteu la bilalaha, amite vikara soio tamutou e Korin, amite kama vei kokovu isa la merera, amite kope moli la tia miteu soio tamutou veia amuto ge rovi sesele amite.
2CO 6:12 Amite kama tou amutou, eala moli amuto muku pile amiteu veia amite kama koramulia ge pou mai e tabara mutou.
2CO 6:13 Amuto e latatugu, amuto ge koli tigi la vulovulogu ale taritigi ale eau igoa soio tamutou, amuto ge gogoau, eau ge hagagavi lou tamutou.
2CO 6:14 Umala amutou ale te Kraist ge vitau me tabara vikapopo legiteu ale kama tautaulailo tetala. Mave, la vulovulo la marokala, me la vulovulo la iruru, egira visauru, ia? Ouka. La matagaga tai, me la maligoma, amuto soioge veia egira koramulia ge vaigogolu vikapopo, ia? Ouka.
2CO 6:15 Tio e Kraist tai, amuto soioge veia eia ge vitau me tabara tataho vikapopo me Satan, ia? Ouka.
2CO 6:16 Eala, amuto umala ge tovo lalaia veia ge vikapopo legiteu ale kama rovi e Kraist, la vuhula etatou ale te Kraist, etato mai la luma la lotu te La Tahalo Uru, eia sekela moli mahuli, me la lotu tetala me la lotu te la maligoma, egira kama visauru, egira isapolopolo sesele! Mai La Tahalo Uru eia veitia te La Buk Tabu Ale Pala, eia veia maie: Eau ge mou kabili tegiteu la valalua taku, eau ge tuga vikapopo legiteu, eau ge La Uru tegiteu, egite ge pou mai la valalua me hatavivile taku sesele.
2CO 6:17 Mai la merera isa lou tai te La Tahalo Uru te La Buk Tabu Ale Pala, eia veia giteu la valalua e Iuda maie: Amuto ge hele taro egiteu ale kama kokora, amuto ge pou gale taro egite! Umala amuto ge pou te la vulovulo giteu ale mumugu. Mai amuto ge maroka mai ele, eau ge vagoilo sesele amutou taku, amuto ge pou te la baligu,
2CO 6:18 eau ge e Tama mutou sesele, amuto ge e latatugu. Eau La Uru mutou ale oata, eau moli vagari, mai ale eau veitia mutou.
2CO 7:1 Amuto tabarabaragu, etato sau tolati la merera ale tikumu te La Tahalo Uru sesele mai alele. Eala, eia koramuli seselea veia etato ge vulo halaba, la vulovulo ale kama kokora umalati ge vimumugu la vulo gatou me la kalulu gatou oilo. Etato ge vagari veia ge pou moli la marokala, mai la pulolou la tilaga me la tilogo ale uru sesele soata te La Tahalo Uru.
2CO 7:2 Taritigi amuto ge vagoilo lou eau mai e tabara mutou lou. Eau kama visigolo amutou. Eau kama tutugolo amutou te la vulovulogu ale eau igoa. Eau kama igo gegeru tai isasa.
2CO 7:3 Eau kama ubi le amutou la merera alele veia amuto ge mahela. Mai eau ge mahuli, uka eau ge peho, amuto magiri vagari te la gabutatalala taku, amutou e tabarabaragu sesele.
2CO 7:4 Ale amutou e Korin ele vulo maroka lou te Kraist, eau sagege sesele le amutou, eau mata kaseka, eau hiliti vagari lou te la igogolu, la vuhula eau rovitia veia amutou la tahalo me la tavile te Kraist sesele, la iligiligi ale eau pogea omai, eia la golu bulalahu moli, la tiagu volu sesele la sagegela tamutou ele.
2CO 7:5 Ale pala eau guvi oio e Masedonia, la vovogu bare sesele, la vuhula la marapala uru sibitala, egite vaigo somai taku, eau kamati vagari sesele tai te la igogolu, eau taga.
2CO 7:6 Eala moli La Tahalo Uru, eia la toro giteu ale pou la iloburukola, eia gogoau, eia suli pepehoau, la vuhula eia baha e Taitas, eia poga tavuau oio la gale e Masedoniale, taritigi pepeho sesele.
2CO 7:7 La guluvi tetala eia taritigi sesele, la merera tetala tai eia taritigi pepeho pasi, la vuhula eia gilemuliagu la visuli uru tamutou soio tetala. Eia veiagu ale amuto gogoa, veia amuto ilo buruko tai la vulovulo mutou ale kama kokora, veia amuto vagari moli ge taho loio taku, tio eau lolotia mai ele, eau sagege pepeho sesele.
2CO 7:8 Eia sesele, eau pala kekesia mutou, eau mera gurusi seselea mutou, amuto ilo buruko pepeho. Eala moli eau kama ilo buruko ovola, eia la vitetelila moli. Sesele, pala, eau ilo buruko ale eau veia amuto gabuti la mahelala uru te la merera taku,
2CO 7:9 eala moli eau loloa veia la merera taku eia tubu, amuto goio gabutatala rivu lou la vulovulo mutou ale kama kokora, amuto goio vulo halaba, tio eau loloa mai ele, eau sagege pepeho. Eau kama sagege ale amuto ilo buruko la merera taku, eau sagege moli ale amuto vulo halaba lou. Amuto ilo buruko, la vuhula La Tahalo Uru eia ubi la tia mutou la merera taku, eala la merera taku ele eia kama vipou marapa amutou.
2CO 7:10 Ale La Tahalo Uru ge vailo buruko etatou mai ele, alele la gauru la vimahulila tetala somai tegatou ale te Kraist, etato umala ge mahela ovola. Eala moli mai la tahalo ale kama rovi e Kraist, eia ge ilo buruko la iruru tetala veia ge vulo la vulovulola, ale eia ilo buruko bulalahu moli. La iloburukola tetala eia kama koramulia ge vimahulia, eia ge visibitala moli la pileho.
2CO 7:11 Sesele, amuto gabutia la iloburukola, eala moli eia suli moli amutou, ale la igogolu te La Tahalo Uru moli oilo te la tia mutou ele. Ale igoie amuto vulo halaba seseleti. Amuto vagari veia ge pou tigi lou, amuto vagari veia ge piligi taro la iruru. Amuto karutu sesele, amuto taga, amuto gabutatala papai, amuto vagari sesele veia ge vimatata la iruru. Ealale, amuto sibitala marokati lou.
2CO 7:12 Sesele, eau kekesia mutou, eau vile la tahalo ale igo la iruru kabili tamutou, me la tahalo tai ale eia igo la iruru soio tetala. Eala moli la vuhu la kekesi taku sesele kama oio te la vimatata la pagale. La masasagala taku sesele te la merera taku ale eau pala kekesia mutou, eau veia La Tahalo Uru ge vahilo le amutou veia etato vitau me tabara sesele, amuto puhi tatahoau.
2CO 7:13 Eala, eau loloa veia amuto vulo marokati lou, eau sagege pepeho pasi, la vuhula etato vitau me tabara tatahoti lou. Eia sesele, eau sagege pepeho te la merera ale loio tamutou ele, eala moli e tabara gatou e Taitas tai, eia sagege sesele, tio eau hiloa mai ele, eau lege sisigi pasi. Amuto veiala la merera ale taritigi, e maura kati gabutatala papai tamutou ele.
2CO 7:14 Eau pala veiala la merera usu tamutou veia amutou e tabaragu sesele te Kraist, tio igoie eia hilotia veia la merera taku eia sesele tomi moli, eala eau kamati mahela lou leia tamutou ele. La merera taku soio tamutou eia sesele tomi moli, mai tai ele la merera tomi taku soio te Taitas ele, ale eau vei tataho amutou soio tetala, eia sesele tomi moli tai.
2CO 7:15 E maura e Taitas, eia gabutatala rivu lou ale eia pala guvi tamutou ele, amuto roromuli molia, amuto lolo vulai tataho, amuto togo molia, amuto gabu tikumu moli la merera tetala, tio ale igoie eia ge gabutatala rivu lou la vulovulo mutou ale taritigi pepeho soio tetalale, eia lege sisigi sesele le amutou.
2CO 7:16 Ale igoie eau gabutatala la pulolou tamutou e Korin veia eia matata seseleti, eau sagege pepeho pasi, la vuhula eau rovia veia amutou kati ge ruru lou.
2CO 8:1 Amuto tabarabaragu, eau masagea veia amuto ge rovia veia egiteu la valalua la lotu oio e Masedonia, La Tahalo Uru eia suli legiteu la gilogo ale uru.
2CO 8:2 Egite ligi, e Satan eia tovo lalai vagari egiteu, eala moli egite kama gabutatalea, la tia giteu volu moli la sagegela, egite pou la savelela sesele, eala moli igoie egite la tahalo la mutelela sesele.
2CO 8:3 Mai la tilau vikapopo la uati etato rararagia veia ge sovea giteu e tabarabara gatou te Kraist oio e Iudea, tio, eau vei seselea mutou, egite Masedonia pou la savelela, eala moli egite pigi uru sesele la vaabila, koramuli la uati bakisi ale egite taholea. Egite kama gabutatala la savelela tegiteu, egite suli pepeho moli e tabarabara giteu te la tilau vikapopo la uati. Isa kama karasuku egiteu,
2CO 8:4 eala moli egite kaka gogogo amiteu veia amite ge masaga molia veia egite tai ge suli egiteu e tabarabara giteu, mai te la tilau vikapopo la uati.
2CO 8:5 Amite karutu tai ale egite sugu taro la mahulila tegiteu soio te La Uru, egite goio vulo halaba lou mai ele, eala moli egite goio sugu taro lou egiteu somai tamiteu la bilalaha tai veia la merera ale mave te La Tahalo Uru ale amite ge baha egiteu ovola, egite veia ge igo molia, kama ge tou.
2CO 8:6 Egite vagari moli mai ele, tio amite goio baha taro e Taitas somai tamutou veia ge kaka lalai tai amutou la uati, la vuhula eia pala soko la igogolu alele soio tamutou. Amite bahea mai ele veia eia ge vikaluvu sesele la igogolu tetalale veia ge vitapasi sesele la gilogo tamutou te la tilau vikapopo la uati.
2CO 8:7 Amutou la tahalo me la tavile la tautaulailo sesele, la merera me la mari tamutou eia taritigi pepeho moli. Amuto vagari tavu la igogolu te Kraist, me amuto vipuhi tigi tai amiteu la bilalaha tetala. Tio, oio volale, amite kaka gogogo amutou veia amuto ge vagari tai te la gilogo mai la piligi la uati ale ge suli egiteu e tabarabara mutou ale pou la savelela.
2CO 8:8 Ale eau kama sugu taro amutou ovola. Eau kaka moli amutou veia eau ge hiloa veia amutou la tahalo me la tavile sesele te Kraist mai egiteu e Masedonia, ka ouka?
2CO 8:9 Amuto rovitia veia la gilogo te Iesus Kraist, La Uru gatou, la gilogo tetala soio tamutou eia uru sesele. Eia pou la balavala sesele oata te Tamala, eala moli eia vibisi lou eia, eia gomai te la maututula, eia pou mai la morivava, veia ge suli amutou mai ele veia ge vauru amutou, veia ge vibalava sesele la kalulu mutou, veia amuto ge pou la balavala sesele.
2CO 8:10 Tio, la gabutatalala taku soio tamutou te la tilau vikapopo la uati, eia maie: Te la leavala ale kaluvuti ale amuto lolo vuti la savelela tegiteu oio e Iudea, la merera alele eia ubi pala muga la tia mutou e Korin, amuto raga tavu la visuli, egiteu la valalua te Kraist te la maututula isapolo, egite mulimuli sesele tamutou, amuto vimuga sesele te la tilau vikapopo la uati.
2CO 8:11 Taritigi veia amuto ge vagari tavu loua, amuto ge vikaluvu sesele la tilau vikapopo la uati ale amuto sokotia. La igogolu tamutou oio vola eia ge taritigi mai la vulovulo mutou ale pala, amuto isasasa ge pigi la uati, mai eme la uati uru, eme ge pigi la uati uru, mai eme tahola la uati ale bakisi moli, eme ge pigi moli ilua.
2CO 8:12 Mai la masasagala tamutou isasasa ge oio sesele ovola, La Uru eia ge lege sisigi moli la vaabila tamutou. Eia kama masaga veia isa ge vavala veia ge pigi la uati uru mai eia la uati ouka. Taritigi amuto isasasa ge vaabila soio tegiteu mai la uati moli bakisi ale amuto taholea.
2CO 8:13 Eau kama masaga veia egite la valalua te Kraist oio e Iudea ge mavulaha bulalahu, eala moli amutou ale suli egiteu ge vavala. Eau masaga molia veia etatou ale te Kraist ge visauru tomi moli.
2CO 8:14 Igoie, amuto pou la balavala, eala eia taritigi veia amuto ge suli egiteu ale te Kraist oio e Iudea. Mai mulimuli egite ge pou la balavala, me amuto ge pou la savelela, egite ge suli rivu lou amutou, ge koli la vulovulo mutou ale taritigi soio tegiteu. Eala, etato tomi ge visauru moli mai ele.
2CO 8:15 Mai la merera te La Buk Tabu Ale Pala te la tabari la ilali tegiteu e Israel eia visauru moli, la merera ale eia veia maie: Eia ale abi la ilali ale uru, eia abi moli la ilali ale koramuli eia. Eala moli mai isa tai abi la ilali ale bakisi moli, eia kama savele, ale bakisi eia abia, eia koramuli sesele eia.
2CO 8:16 Eau vei tataho sesele La Tahalo Uru ale eia vitivura la gabutatalala te Taitas, eia gogo amutou e Korin mai sesele eau tai gogo amutou.
2CO 8:17 Eau tahia veia eia ge goio tamutou, eia sagege moli, eia masaga pepehoa. Mai eau kama ge tahia, soioge eia sekela ge vahiliti la gabutatalala alele veia eia ge hari lalai amutou.
2CO 8:18 La tahalo isasa ale taritigi pepeho sesele, eia ge vikapopo tai le Taitas soio tamutou. Eia e tabara gatou isasa ale la valalua la lotu tomi vaisale seselea veia eia bole la igogolu ale uru te la valolo ale taritigi te Kraist.
2CO 8:19 Egite hilovi la tahalo alele veia eia ge vikapopo le amiteu la bilalaha, ale amite ge vahari soio e Ierusalem la uati ale amite vitau kapopotia. La uati alele, amite baumulia veia ge vaisale La Uru oio vola veia ge veipalea tai mai ele veia amite masaga molia veia ge suli egiteu ale pou la savelela.
2CO 8:20 Amuto pigiti la uati uru, eia taritigi pepeho, eala moli amite masaga molia veia ge vibaumuli tataho ovola, egite soukama ge kaua miteu veia amite virurua.
2CO 8:21 Amite masagea veia ge vibaumuli tataho ovola, veia La Uru me amuto la valalua tai ge hiloa veia amite igo seselea, la iruru ouka.
2CO 8:22 E tabara gatou uru te Kraist tai ge vitilimuli le Taitas mira soio tamutou ele, eau bahea. Eia veipalatia te la vulovulola veia eia la tahalo te Kraist sesele. Igoie tai eia mai ale veipalatia veia eia gabu tikumu amutou e Korin tai veia amuto sau tola seseleti e Kraist.
2CO 8:23 E Taitas tai ele, eia e tabaragu sesele te la igogolu te Kraist kabili tamutou. Me egira taho lua tai ale eau veitia mutou ovola, egira la bilalaha sesele ale loio te la valalua me hatavivile tomi te Kraist omai e Masedonia. Egite hilovi seseleti egirua, la vulovulo girua ale taritigi eia veipala la vaisalela ale uru soata te Kraist.
2CO 8:24 Taritigi amuto ge baumuli tataho egiteu taho tolu e Taitas miteu ele. Mai la vibaumulila ale taritigi amuto ge igoa soio tegiteu, egite ge matagaga sesele te la vuhu la merera taku ale eau vei tataho amutou soio tegite. Mai ge mai ele, la valalua me hatavivile te Kraist te la maututula tomi ge rovia veia eia sesele moli ale eau veia amutou e Korin la valalua te Kraist ale taritigi.
2CO 9:1 Amuto rovitia veia la tilau vikapopo la uati eia ge suli egiteu la valalua te La Tahalo Uru ale pou la savelela oio e Iudea. Ale amuto rovitia, eau kama ge lapu malau lou la merera oio vola.
2CO 9:2 Eau rovia, amuto masaga seselea veia ge pigi la uati veia amuto tai ge suli la vaabila alele. Mai alele eau veitia giteu e Masedonia veia amutou e Korin la tahalo la mutelela sesele. Eau veia giteu maie mago “Egiteu la valalua te Kraist oio e Akaia, me te la mautu e Korin ele, egite raragiti veia ge visuli soio tegiteu e Iuda, la leavala isasa kaluvuti egite pou raragi mai ele.” Eau veia giteu e Masedonia mai ele, egite loloa, egite vagari veia egite tai ge visuli.
2CO 9:3 Eala moli igoie egite boleti la igogolu alele, me amuto piligiti loua. Igo tigi, egiteu e Masedonia isahari soukama ge mulimuliau soio tamutou, egite soukama ge sivutia veia amuto la iraragi la uati ouka, etato tomi ge mahela, la vuhula eau vei tatahoti amutou soio tegite. Eala eau bahati egiteu e tabarabara gatou taho tolu e Taitas miteu, veia egite ge gomai muga tamutou veia ge karasuku amutou te la iraragi la uati, amuto ge raragi tigi, la vuhula eau vei tatahoti amutou soio tegiteu e Masedonia veia amutou la valalua la mutelela sesele, veia la vaabila ale uru ge raragi oio tamutou. Taritigi amuto ge raragi tigi la uati, eau soukama visigolo egiteu te la vei tatahola taku soio tegite, ale eau vei tataho la vulovulo mutou e Korin ele.
2CO 9:5 Eala, eau baha pala muga egiteu e tabara gatou te Kraist taho tolu, e Taitas mite, veia egite ge muga somai tamutou, ge vahiliti lou la gabutatalala tamutou te la tilau vikapopo la uati veia ge viboru tigi la vipigi vulola oio vola ale pala amuto veia amuto ge pigi la uati ale uru sesele te la visuli tegiteu ale pou la savelela. Eala la iraragila tamutou eia ge pou tataho vikapopo la sagegela ale uru sesele tai. Eala eau veia ge baha pala muga egiteu taho tolu soio tamutou, amuto soukama ge karutu la kilaka la uati taku mulimuli, veia amuto ge igo totolo, ge mahela, la vuhula eau baha mamugati la merera somai.
2CO 9:6 Gabutatala tigi, la tahalo ale galu la ilali ale usu, eia ge balava la ilali ale usu. Eala moli la tahalo ale galu moli bakisi, eia la ilali kama ge usu. Mai tai ele, mai amuto ge mutele, la kilolila ale uru ge oio, mai ge ouka, amuto kama ge sau tola la kilolila ale taritigi.
2CO 9:7 Amuto isasasa ge gabutatala tigi muga oilo te la gabutatalala tamutou veia amuto ge vaabila la uati iriva. Kama ge veia amite la bilalaha karasuku amutou ovola. Eia kama la paga tai te la maisu totolola. Eala moli eia taritigi pepeho veia amuto ge pigi la uati la visuli mai te la masasagala moli, la sagegela uru te la tia mutou, La Tahalo Uru ge isu sesele la vulovulo mutou ale taritigi mai ele.
2CO 9:8 La Tahalo Uru eia koramuli taia ge vauru la gilogo tetala soio tamutou veia amuto ge pou moli la balavala, la savelela ge ouka, la uati uru tai ge oio koramulia veia amuto ge suli la igogolu tomi ale taritigi oio vola.
2CO 9:9 Mai La Buk Tabu Ale Pala eia veia maie “La Uru eia suli pepeho egiteu ale pou la savelela, la gilogo tetala eia kama ge kaluvu.”
2CO 9:10 La Tahalo Uru eia visibitala somai tegatou la ilali ale etato galugalua, eia vitubu tai la ilali tegatou te la mahuma, eala eia matagaga moli mai ele veia te la gilogo tetala ale uru eia ge vauru tataho la papaga tomi ale amuto galua, la vulovulo mutou tai te la mutelela eia ge vaurua mai ele. Oio vola amuto ge koramulia ge suli pepeho lou la valalua mapaiti te la merera te La Uru, la vuhula amuto pouti la balavala.
2CO 9:11 Eia ge vibalava pepeho amutou te la leavalavala tomi, amuto ge koramulia mai ele veia ge suli bibibi la valalua me hatavivile tomi ale pou la savelela, egite usu ge vei tataho sesele La Tahalo Uru te la vaabila tamutou ale amite ge vaharia soio tegiteu.
2CO 9:12 La vuhula, la visuli tamutou ele, eia kama ge suli moli egiteu ale pou la savelela, eia ge veipala tai la vaisalela soata te La Tahalo Uru, ale egite ge vei tatahoa te la gilogo tamutou ale taritigi sesele.
2CO 9:13 La valalua usu ge hiloa veia amuto rovi la vulovulo la gilogo, tio egite ge rovia mai ele veia amuto te Kraist sesele, egite ge goio ge vaisale sesele La Tahalo Uru mai ele, la vuhula egite hilotia veia amuto kama veipala bulalahu la valolo ale taritigi te Kraist, amuto roromuli sesele la masovala, amuto rovi sesele la vulovulo la gilogo me la mutelela ale amuto kama vitouale isasa la visuli te la pulolou la balavala tamutou.
2CO 9:14 Egiteu ale pou la savelela ge pou te la kilaka, egite ge gogo sesele amutou, la vuhula amuto volu sesele la gilogo te La Tahalo Uru.
2CO 9:15 Taritigi pepeho soata te La Tahalo Uru te la vaabila tetala tavu etatou, ale eia abia gatou e Latula e Kraist. La vaabilala alele, eia uru sesele. Etato la tahalo la vovo isa kama koramulia ge veipala tomi la vuhula, teale eia isapolo viruru. Taritigi pepeho soata tetala te la vaabila tetala ale uru ele.
2CO 10:1 Eau, e Pol, eau kaka gogogo amutou e Korin ele veia amuto ge hele taro la vulovulo la vareagila. Ale eau kaka gogogo amutou te la gilogo te Kraist sesele, eau kama gusia mutou. Eala moli isahari tamutou ele, amuto ubi leau la merera veia mai eau ge oio tamutou, eau vikara gauma amutou, eala moli mai eau ge pou malau, eau ge vikara papai amutou, eau ge vagari la merera. Amutou kauagu mai ele.
2CO 10:2 Eau kaka gogogo sesele amutou veia mai eau ge guvi tamutou, amuto umala ge karasukuau te la vareagila tamutou veia eau ge vikara vagari, la vuhula eau rovia la valalua isahari tamutou ele, egite gabutatala eau veia eau la golu bulalahu veia eau igogolu moli te la masasagala moli te la vovo. Eau ge guvi, eau ge mera gere sesele egiteu ale kauagu mai ele.
2CO 10:3 Eia sesele, eau la tahalo la vovo moli, eala moli eau vaubi soio te Satan te la vagagarila te Kraist, kama te la vagagarila taku moli te la vovo. La vagagarila te La Tahalo Uru, eia uru sesele, eia koramulia ge bolehoho la vagagarila te Satan. Mai isa ge magiri veia ge oso lulu la merera te Kraist, eau koramulia ge putu oli lou eia.
2CO 10:5 Mai isa ge vauru lou eia veia eia kama ge lolo la merera te La Tahalo Uru, tio eau ge igo mahela loua te la merera taku. Mai isa ge vareagi, eau ge magiri robo loua, eau ge lapu rivu loua soio te La Tahalo Uru, eia ge vulo halaba lou, eia ge roromuli lou la merera te Kraist. La igogolu tomi alele, eau igo molia te la vagagarila te La Tahalo Uru.
2CO 10:6 Te la vagagarila te La Tahalo Uru moli eau ge vikaluvu la vareagila tamutou e Korin, amuto ge piligi la vulovulo mutou ale kama kokora, amuto ge goilo halaba lou te Kraist. Eala moli eau raragi moliti veia ge bolehoho lou egiteu la tahalo la vareagila oio tamutou mai egite ge hiliti lou.
2CO 10:7 Eau masagea veia amuto ge matagaga tigi. Mai isa veia eia te Kraist, taritigi eia ge rovia veia eau e Pol, eau tai te Kraist. Amuto veia eau la golu bulalahu, eala moli la vagagarila te Kraist eia oio sesele taku.
2CO 10:8 Eau muga sesele amutou. Ale eau vikara mai ele, eau kama vauru lou eau, la vuhula eau la mulugaluga sesele tamutou ele. Ale eau muga amutou, eau te la visuli moli, kama te la viligila veia ge igo gegeru amutou. Eau kama mahela te la pulolou la mulugaluga,
2CO 10:9 eala eia taritigi amuto ge rovia veia eau kama vikara bulalahu te la merera taku ale eau pala kekesia mutou.
2CO 10:10 Isahari tamutou egite vikara maie “Eia kekesia gatou, eia la vikararala tikumu mai la merera te la tahalo sesele, eala moli mai eia ge guvi, amuto ge hiloa veia eia la golu bulalahu, la merera tetala tai eia mavulaha.”
2CO 10:11 Ioge, taritigi egite ge matagaga veia la igototolola taku ale egite gigia te la merera ale eau pala kekesia mutou, egite ge lolo seselea te la haregu mai eau ge guvi tamutou ele.
2CO 10:12 Eau kama ge vei tataho rivu lou eau veia eau la tahalo sesele mai egiteu la tahalo la visigologolola oio tamutou ale vauru lou egiteu veia egite taritigi. Egite mata muli lou egiteu, eala egite veia egiteu la tahalo sesele. Egite vei tataho rivu lou egiteu mai ele, egite paua viruru!
2CO 10:13 Eau kama te la vulovulo giteu ale mai ele. Mai eau ge vei tataho rivu lou eau, eau ge vikara sesele mai te la igogolu taku moli ale eau igoa, La Tahalo Uru eia tabaria somai taku, mai tai la vibaumulila soio tamutou e Korin.
2CO 10:14 Ale la tabarila taku sesele, eau kama visigolo veia ge vei tatahoau te la igogolu tegiteu la bilalaha ale isapolo. La vuhula eau vimuga sesele soio tamutou te la valolo ale taritigi te Iesus Kraist, amuto oilo seseleti te la merauala taku ale La Tahalo Uru eia tabaria somai taku. Eia sesele, egite isahari lou igogolu kabili tamutou te la isale Kraist, eia taritigi pepeho moli, eala moli egite kama koramulia ge kau tavua gite veia amutou e Korin kama la valalua taku, la vuhula eau vimuga soio tamutou te la valolo te Kraist. Eala moli eau masaga pepehoa veia la tautaulailo tamutou ge tubu uru, veia eau ge koramulia ge vauru lou la igogolu te Kraist kabili tamutou, mai la tabarila tetala somai taku.
2CO 10:16 Mai ge mai ele, eau ge koramulia ge vahari la merera te Kraist soio tegiteu la maututula lou ale malau loio tamutou ele, egite soukama loloa. Eala, isa kamati ge koramulia ge uleagu veia eau valolo te la baa tegiteu la bilalaha ale isapolo, veia eau poloti la igagala te la tabarila te La Tahalo Uru somai taku te la igogolu la valolo te Kraist. Eau kama masagea veia ge vei tataho louau te la igogolu te la tahalo isapolo.
2CO 10:17 Eala moli eau kama gabutatala la vei tatahola. Mai la merera te La Buk Tabu Ale Pala eia veia maie “Mai isa masagea veia ge ababa la isala, taritigi eia ge ababa moli la isa La Uru.”
2CO 10:18 Etato kama ge sibitala maroka te la vei tatahola tegatou lou, ouka, eala moli mai La Uru ge vei tataho etatou, la valalua ge rovia mai ele veia etatou la tahalo me la tavile te Kraist sesele.
2CO 11:1 Te la merera taku ale eau so veveia mutou ovola, ale eau vei tataho lou eau, eau vikara mai la paua. Eala moli eau masagea veia amuto umala ge silaha harari la merera taku kara eau ge veipala tomi la gabutatalala taku.
2CO 11:2 Eau gabu sesele amutou te la gilabu ale uru mai la gilabu me la iloburukola te La Tahalo Uru sesele. Eau masagea veia amuto ge tau la ilo mutou soio te la tahalo isa sekela, e Kraist moli, mai la sobe eia ge tau la ilola soio te haruala sekela, eia kamati ge osaosa.
2CO 11:3 Eala moli eau taga, egite la tahalo la visigologolola soukama ge viruru la gabutatalala tamutou, veia amuto kati ge sau tola tigi sesele e Kraist. Amuto soukama ge ruru mai e Eva, e taive visigoloa, eia virurua.
2CO 11:4 Mai isa ge guvi tamutou, eia ge veia mutou la valolo ale kama sesele te la isale Iesus, amuto masaga harari molia. Mai egite ge vahilo le amutou la igogolu te Satan ale marasa, kama la igogolu te La Kalulu La Marokala, tio amuto gabu tikumu harari molia. Mai egite ge valolo amutou la merera ale isapolo, eia kama la valolo te Kraist sesele mai eau valolo amutou ovola, amuto goio sagege moliti la merera tegiteu ele!
2CO 11:5 Egiteu ale valolo amutou mai ele, egite veia egiteu la bilalaha te Kraist ale isapolo sesele, eala moli eau kama mahela legiteu.
2CO 11:6 Eia sesele, la valolo taku eia kama sibitala tataho te la haregu. Mai eau ge valolo, eau mera vavala moli le amutou, eala moli la seselela oio, amuto rovia, la vuhula amuto loloti la valolo taku vaka usu, eau vimariti amutou te la vuhu la merera tomi te La Uru.
2CO 11:7 Eau valolo amutou pala, eau kama kaka la uati. Mave, amuto soioge veia eau la golu bulalahu, teale amuto kama lotoau te la valolo taku? Tiele, eau soioge ruru ale eau vibisi louau mai ele veia ge vauru amutou te la valolo taku ale taritigi.
2CO 11:8 Hilage, eau mai ale pakali la uati te la valalua te Kraist oio e Masedonia, la vuhula egite lotoau, eala moli eau kama suli egiteu, eau goio suli moli amutou e Korin la valolo taku.
2CO 11:9 Eau pou tamutou, eau kama abi bakisi la uati, egiteu e tabarabaragu te Kraist ale loio e Masedonia, egite moli suli leau la uati. Amuto soukama silaha la pulolou taku oio tamutou, eau kama ge kaka la uati veia amuto ge suliau ovola, amuto kama ge vavala leau.
2CO 11:10 La merera taku tai ele, eau ge veipalea soio te la lotu tomi oio la gale e Akaia, egite tomi ge loloa, egite ge rovia mai ele veia amutou e Korin la tahalo la visigologolola. Sesele oata te Kraist, eau kama ge makovu bakisi ovola.
2CO 11:11 Eala moli eau kama ge igoa mai ele veia ge gima amutou, ouka. La Tahalo Uru rovia veia eau gogo sesele amutou ele.
2CO 11:12 Eala moli eau veia ge veipalea veia amuto kama suli leau la uati te la valolo taku, eala eau veia ge barautu taro haria mai ele la merera tegiteu la bilalaha la visigologolola ale ababi la uati te la valolo tegiteu. Eau ge barautu taroa, la vuhula egite veia la igogolu tegiteu eia visauru me la igogolu taku, eala moli eau kama ababi la uati te la valolo taku, ouka sesele.
2CO 11:13 Egiteu alele, egite la bilalaha la visigologolola sesele, egite tutugolo amutou veia e Kraist baha egiteu, eala moli la igogolu tegiteu eia kama sesele.
2CO 11:14 Etato umala ge karutu la vulovulo giteu ale kama kokorale, la vuhula etato mata kilalati veia e Satan, eia la tahalo la tutugologolola, eia veia eia e angelo isa te la matagaga.
2CO 11:15 Eala, eia taritigi pepeho tai mai ele veia etato ge rovia veia egite la bilalaha te Satan tai ge tutugolo etatou veia egiteu la bilalaha te la vulovulo ale maroka. Egite ge poga la kilolila sesele, koramuli la iloto la iruru tegiteu ale tikumu.
2CO 11:16 Tio, eau vei matagaga loua mutou veia la merera la vei tatahola tomi alele, eia mai le merera la tilovo taku soio tamutou. Eala amuto isa umala ge veia eau paua te la vikararala taku ale eau vei tataho rivu lou eau. Eala moli mai amuto ge vagari veia ge ubi leau la merera veia eau paua, ioge, taritigi amuto ge pou tali mugeau, amuto ge lolo la merera la pauala taku lou, ale eau ge veia mutou gageie, mai la vei tatahola taku ale eau ge vauru louau te la igogolu te Kraist ale eau igoa.
2CO 11:17 Ale eau kama ge vikara mai te la masasagala te Kraist, eau vikara paua moliau,
2CO 11:18 la vuhula la valalua usu tamutou ele vei tataho lou egiteu, egite tilimuli la vulovulo ale kama kokora te la vovo mai ele. Tio eau veia eau tai ge vei tataho louau, eau ge tovo lalaia veia ge pepe egiteu, eau soioge ge muga.
2CO 11:19 Amutou e Korin, amuto soioge la tahalo me la tavile la mari, ia? Mai egiteu la valalua la visigologolola ale vikara paua ge valolo amutou la merera ale usu, amuto kama gabutatala papai ovola. La vuhula amuto la mari uru oio, eala amuto kama koramulia ge gabutatala papai te la mari papaila tegiteu ele, ia?
2CO 11:20 Mai egite masagea veia ge kisi tola le amutou la merera la visigologolola, amuto sagege moli. Mai tai egite masagea veia ge tutugolo amutou, amuto kama gabutatala papai. Mai egite veia ge abi la uati tamutou, amuto mata sosoli moli egiteu, amuto goio abi molia giteu! Mai egite masagea veia ge vauru lou egiteu, amuto veia eia taritigi moli. Mai isa masagea veia ge vile amutou veia amuto kama rovi sesele isa la paga, amuto sagege moli ovola!
2CO 11:21 Eau mahela pasi, la vuhula eau kama la tahalo sesele mai egiteu alele! Mai eau ge valolo vagari soio tamutou pala, soioge igoie amuto ge togoau mai amuto togo egiteu ele! Ioge, la vikararala taku ale pauale, eau ge tasuku loua. Mai isa ge vei tataho loua veia eia la tahalo sesele, eau tai ge koramulia ge vei tataho lou eau mai alele.
2CO 11:22 Mai egite ge hiliti ge veia egite la tau Hibru, tio eau tai la tau Hibru. Mai egite ge veia egiteu la tau Israel, tio eau tai la tau Israel. Mai egite ge veia egiteu e tutubule Abraham, eau tai e tubule Abraham isa.
2CO 11:23 Egiteu veia egite la bilalaha te Kraist, ia? Eau tai la bilalaha te Kraist, eala moli eau muga tegiteu te la igogolu taku soio tetala. Hilage, amuto karasukuau mai ele, eau vikara mai ale paua! La igogolu taku, eia vagari sesele te la igogolu tegiteu ele! Egiteu la valalua la gima vagoiloau te la luma la kilisi vaka usu, eala moli egiteu la bilalaha la visigologolola, egite kama kapi robo bibibi egiteu mai eau. Egite lubi vuloau, eala moli egiteu la bilalaha la visigologolola kama ligi pepeho mai ale. Vaka usu eau hagagaviti ge peho, eala moli egiteu la bilalaha la visigologolola ouka.
2CO 11:24 Vaka lima egiteu e Iuda kumamasiau. Egite lubiau mai ele vaka savulu tolu gete ualasiu mai te la vulovulo giteu ale egite vilai la tahalo la iruru sesele ovola.
2CO 11:25 Vaka tolu egiteu la valalua e Rom kue leau la obu, vakasa egite dumu leau la uati, vaka tolu eau vilua te sipi olau la tia la mago. Eau tabulibuli molila la obu te la tia la utu la logo isasa.
2CO 11:26 Eau tuga vulovulo moli, hagagavi eau ge tilomu te la lalu ale hae, hagagavi tai eau ge poga la viluala tegiteu la tahalo la pakalila. Egiteu e valaluagu e Iuda, egite masagea veia ge bili taroau, mulimuli tai egiteu la valalua la maligoma! Mai eau ge valolo oluma, egite masagea veia ge biliau. Mai eau ge tatuga te la tia la hohoi, vaka usu eau hagagaviti ge vilua ovola. Mai eau ge sae tai te sipi, vaka usu eau hagagavi ge vilua. Egiteu la valalua ale goilo gologolo moli te Kraist, egite tai masagea veia ge vibisi lou la igogolu taku.
2CO 11:27 Eau igogolu vagari, eau kama abi tigi la mavutala. Vaka usu eau peho la vitolola me la malehula. Eau gabu la maigi ale uru, la kairobola ouka, la luma tai ale ge mavuta ovola ouka.
2CO 11:28 Eala moli la paga isa uru tai te la gabutatalala taku, eau gabu tikumu amutou la valalua me hatavivile te la lotu te Kraist oio te la maututula tomi.
2CO 11:29 Mai isa ge marapa, eia kamati magiri vagari, eau tai la gabutatalala taku marapa. Mai isa ge tilo te la iruru, eau tai gabu la iloburukola ovola.
2CO 11:30 Mai eau ge masagea veia ge vei tataho lou eau, taritigi eau ge veipala molia veia eau la tahalo isa ale kama vagari.
2CO 11:31 Etato ge vaisale La Tahalo Uru, eia e Tamale Iesus Kraist, La Uru gatou, etato ge vaisale molia te la haroharo tomi, la kaluvula ge ouka. Eia moli ge vitikumu la merera taku veia eia sesele tomi moli, eau kama visigolo amutou ale eau ge gilemulia mutou veia
2CO 11:32 oio e Damaskas, la bilalaha te la uru e Aretas, eia baha la valalua tetala, egite vagari robo la matapiro tomi te la mautu veia ge lao toleau.
2CO 11:33 Eala moli la valalua te Kraist abi isa uru la kela, eau goilo ovola, egite goio visaririau sotalo loata te la mata la luma ale oio te la igaga la mautu, eau hele.
2CO 12:1 Ioge, la vikarara la vei tatahola, ale eau vei tataho rivu lou eau mai la vulovulo mutou e Korin ele, eau veia ge lapu malau loua bakisi. La vikara bulalahula mai alele, eia kama ge suli isa la tahalo, eala moli eau ge vei molia, eau ge vei matagagea mutou tegiteu la hililo me la veipalala ale La Uru veipalatiagu.
2CO 12:2 La Uru eia abiau soata te la ilo la lage, ale eia igoa palati, la leavala savulusa gete vaa poloti. Eia soioge la vovogu tomi moli goata hiloa, uka la kalulugu moli, eau kama rovia, La Tahalo Uru moli rovia.
2CO 12:4 Eia abiau soata te la mautu la marokala, eau lolo la merera oio vola, eia isapolo sesele, eia kama koramuli etato la tahalo la vovo isa ge veipalea.
2CO 12:5 Eau koramulia ge vei tataho lou eau te la pagale, eala moli ouka, eau ge veipala molia veia eau la tahalo la vovo moli, eau kama vagari.
2CO 12:6 Sesele, mai eau ge vei tataho louau te la hililo taku ale eau hiloa oata te la ilo la lage, ale eau kama ge vikara mai la paua, la vuhula eau hilo seselea. Eala moli ouka, eau masaga molia veia amuto ge hilo la pulolou taku ale taritigi, la merera taku tai, amuto ge matagaga moli mai ele veia eau la tahalo te Kraist.
2CO 12:7 La Tahalo Uru, eia vahiloau kaluvu la hililo tetala ale uru, eia goio gabutatala lou veia eau soukama ge igo tataho eau ovola, eala eia goio visibitala isa la ilea somai taku, eia mai ale tatagu la vovogu mai la iri la vihilo, eia sibitala tatavuau te la imamala tomi mai la bilalaha te Satan, eia igo bare seseleau. Eia la ilea sesele, eau kama pigi vevei.
2CO 12:8 Vaka tolu eau tali tavu La Uru veia eia ge abi taro leau la pagale,
2CO 12:9 eala moli eia goio veiagu mago “Korale, la gilogo taku soio taume, eia koramulime. Mai eme ge gabua veia eme kama vagagari, ale eme ge koramulia ge gabu tataho la vagagarila taku sesele oio taume.” La Uru eia veiagu mai ele, eala eau ge sagege moli te la ilea ale igo bareau, la vuhula eau ge gabu la vagagarila te Kraist ale pou taku.
2CO 12:10 Eala, mai eau ge pou te la igogolu te Kraist, eau ge sagege moli ale eau ge gabua veia eau kama vagari. Eau ge sagege moli mai egite la valalua la gima ge vikara bareagu, ge tahi vile taiau. Eau ge sagege moli tai mai eau ge ligi, mai eau ge vavala tai te la igogolu taku te Kraist. La vuhula mai eau ge gabua veia eau kama vagari, tio eau ge koramulia mai ele veia ge magiri vagari moli te la vagagarila te Kraist.
2CO 12:11 Eia sesele, ale eau vei tataho lou eau, eau vikara mai la paua, eala moli la vulovulo mutou e Korin lou eia karasukuau ovola, ale amuto vei tataho amutou veia amutou la tahalo la mari. Eia koramuli molia veia amutou ge vei tatahoau, la vuhula eau suli pepeho amutou. Eia sesele, eau la tahalo bulalahu moli, eala moli la igogolu taku eia kama bisi te la igogolu tegiteu la bilalaha la visigologolola ale amuto gabu tikumu egiteu.
2CO 12:12 La irovilala tomi te la bilalaha te Kraist, eau igotia kabili tamutou, amuto hiloa, mai la golu la karutula, la igogolu tai ale vagari, eia isapolo sesele, amuto hilotia te la limagu, eau kama silaha, eau igo molia, kama maila.
2CO 12:13 Eau kama suli moli la valalua la lotu te la maututula ale isapolo, veia oio tamutou eau ge tau moli la marasala, ouka sesele. Eau kaka la uati oio te la maututula, eala moli omai tamutou ouka. Soioge te la vulovulogu alele amuto ge veia eau vibisi amutou mai la tahalo la morivava, ia? Hilage, amuto soioge veia eau ge ruruti ale eau kama abi la uati oio tamutou! Taritigi amuto ge vimavulaha eau te la iruru taku alele!
2CO 12:14 Eau raragiti veia ge hari lalai lou amutou la vaka tolula. Eala moli amuto kama ge silaha la pulolou taku oio tamutou, la vuhula eau kama masaga la uati tamutou, eau masaga molia veia amuto ge hagagavi lou taku, etato ge vipuhi tigi lou, amuto ge la valalua me hatavivile taku lou. Amuto rovia, e guliliki isa kama koramulia veia ge baumuli e tamala, e tilala la uati. Eala moli e tamala me tilala moli ge baumuli e latu girua.
2CO 12:15 Eau tai mai ele, eau kama ge pou tali amutou veia amuto ge suli leau la uati, eau moli ge pigi la uati taku tomi, la vagagarila taku tomi tai, veia ge suli amutou. Mai eau ge gogo pepeho amutou mai ele, mave amuto kama ge koramulia ge koli tigi la vulovulogu bakisi ale taritigi ele, veia amuto ge gogo rivu lou eau?
2CO 12:16 Eala moli isahari tamutou soioge ge vikara maie mago “Eia sesele, e Pol kama kaka la uati veia etato ge ligi la pulolou tetala omai tegatou, eala moli eia tutugolo etatou, eia masaga molia veia etato ge tau vikapopo la uati, eala moli la uati alele, eia tetala moli.”
2CO 12:17 Ioge, eau veia ge tahi amutou maie: Mave, isa tegiteu ale eau baha egite, eia tutugolo amutou?
2CO 12:18 Ale pala eau baha e Taitas, eau baha tai e tabara gatou isa lou veia ge tilimulia, mave, e Taitas pakali la uati tamutou? Amila me Taitas tomi roromuli La Kalulu La Marokala, amila tomi rovi la gauru isa moli sekela, ale te Kraist, amila kama koramulia ge pakali.
2CO 12:19 Eala moli amuto soioge gabutatalea veia eau giriri, ia? Ouka sesele! La Tahalo Uru moli lolo la merera taku veia eia sesele, la vikararala taku tomi la vikararala te la tahalo te Kraist, eau kama vikara veia ge giriri, veia ge suliau, eau vikara moli veia ge viteteli amutou.
2CO 12:20 Eau gabutatala papai tamutou ele, la vuhula eau gabutatalea veia eau soukama ge guvi, amuto ge soloio te la vulovulo la vareagila, tio amuto ge hilo la vulovulogu tai ale kama kokora mai eau ge igo totolo amutou. Eau makuku, la vuhula eau soukama ge poga la vaigigola, la maisu totolola, la igototolola, la vigagimala, la mera kukumula, la veia mulimulila, la vareagila me la marapala oio tamutou ele.
2CO 12:21 Eau taga sesele, la vuhula La Tahalo Uru eia soukama ge mata sosoliau veia eau ge poga tavu amutou kabili te la vulovulo mutou ale kama kokorale, eau ge mahela pepeho le amutou, La Tahalo Uru soukama ge vibisiau mai ele. Eau ge guvi, eau soioge ge ilo buruko le amutou la tahalo me la tavile la iruru usu, ale amuto soukama gabutatala rivu lou la iruru tamutou veia ge veipalea soio te La Uru veia amuto ge maroka lou. Amuto usu soioge ge soloio te la iruru tomi ale kama kokora, mai la iligo la iruru soio te la tavile, me la tahalo, la ilosa, la mata bulakalaka, me la vareagila tai.
2CO 13:1 Ale eau ge gomai lou tamutou e Korin, eia ge la vaitolu la tuluga taku somai tamutou. Me eau veia ge vei matagagea mutou veia “mai isa masagea veia ge ubi la tahalo la iruru la merera, taritigi egiteu taho lua uka taho tolu ale egite hilo seseleti la iruru tetala, egite ge veipalea, amuto ge rovia veia eia sesele moli mai ele veia eia ruru seseleti.” Ioge, ale ge la vaitolu la mera tarola taku soio tamutou.
2CO 13:2 Ale pala eau goio tamutou la vaka luala, eau mera taro amutou te la vareagila. Tio, eau soukama goiole, eau veia ge mera taro amutou vakasa lou maie: Mai eau ge guvi tamutou, eau kama ge gogo isa la tahalo me la tavile ale ruru pala, me egiteu tai ale so rururu moli, eau ge igo totolo amutou tomi.
2CO 13:3 Amuto ge gabu seselea veia la merera te Kraist eia oio sesele taku, isa kati ge tahi taroau. Amuto rovia veia e Kraist eia kama la tahalo bulalahu, eala moli eia igogolu vagari moli kabili tamutou.
2CO 13:4 Eia sesele, egite katu tolea oata te la tauvalautu, eia mata mai ale kama vagari, eala moli eia igoie mahuliti te la vagagarila te La Tahalo Uru sesele. Eau tai, eau kama vagari, eau la tahalo la vovo moli, eau la tahalo bulalahu, eala moli eau sau tola tomi la vagagarila te La Tahalo Uru koramuli eau ge vimatata la vulovulo mutou e Korin ele.
2CO 13:5 Taritigi amuto isasasa ge mata muli tigi la vulovulo mutou lou veia amuto soloio te Kraist, ka oukati. Tovo lalai la tautaulailo tamutou isasasa te Kraist ele. Mave, eme mata kilalati veia e Iesus Kraist eia mahuli vikapopo lemeie, eme gabua veia eme tetala? Mai ge ouka, eme soioge boruti!
2CO 13:6 Eala moli taritigi veia mai eau ge guvi tamutou ele, amuto ge matagaga veia eau, e Pol, eau kama boru, e Kraist eia mahuli moli oio taku.
2CO 13:7 Eau kaka vagari La Tahalo Uru veia amuto umala ge ruru. Eau kama gabutatala eau veia la valalua ge vei tatahoau ale eau pala valolo amutou, veia igoie amuto pou tataho ovola, ouka. Eau ge sagege moli mai amuto moli ge pou tigi, eala moli eau ge mata mai ale boruti, ale eau ge sagege pepeho moli mai ele.
2CO 13:8 Eau masaga molia veia la vitetelila taku ge te la vahiliti la vulovulo ale matata, eau kama masaga seselea veia la valolo taku ge vagari mai la igototolola te la tahalo ale vagari veia eau ge mata muli moli la vulovulo mutou tomi ale kama matata.
2CO 13:9 Eia taritigi pepeho taku veia amuto ge vulo pala muga te la guluvi taku, eau ge guvi, la valolo taku ge mai la valolo ale kama vagari agi tamutou. Eala moli amutou, amuto ge magiri vagari, eala eau kaka La Uru veia amuto ge vulo, amuto ge sibitala maroka lou.
2CO 13:10 Eau kekesi pala muga soio tamutou veia amuto ge lolo haria, veia amuto ge vuvulo, veia mai eau ge guvi, eau kamati ge tivura lou te la vimatata la iruru. La vuhula La Uru eia kama abiagu la vagagarila me la igogolu tetalale veia eau ge igo gegeru amutou, eala moli eia masaga molia veia eau ge vagari moli, veia ge vivagari la tautaulailo tamutou, amuto ge pou tigi lou.
2CO 13:11 Te la tapasi la merera taku tavu amutou e tabarabaragu ele, eau veia mutou la merera ale taritigi maie: Taritigi amuto ge pou la sagegela; taritigi tai veia amuto ge tovo lalai vagari veia ge maroka mai e Kraist; amuto ge lolo tomi la merera taku, ge roromulia; amuto ge vipuhi tigi tataho. La Tahalo Uru, eia la vuhu la gilogo, eia ge pou tamutou, la tia mutou oilo ge malilo tataho.
2CO 13:12 Taritigi pepeho veia amuto ge sagege robo tavu egiteu e tabarabara mutou tomi te la isale Kraist.
2CO 13:13 Egiteu la valalua me hatavivile tomi te La Tahalo Uru ale omai, egite laharo seselea mutou. Taritigi pepeho veia la gilogo te Iesus Kraist, La Uru gatou, eia ge pou tamutou. La visuli uru tai te La Tahalo Uru, amuto ge sau tolea. Taritigi amuto ge gabua veia La Kalulu La Marokala, eia ge pou te la tia mutou tomi. Eala moli ele. Eau e Pol.
GAL 1:1 Eiau e Pol, eau kekesia mutou la valalua me hatavivile te la lotu tomi te Iesus Kraist ale oio la gale e Galesia. Amite me egiteu e tabarabara gatou ale omai takue, amite toi la haro sesele soio tamutou la valalua me hatavivile sesele te Kraist. E Iesus Uru ele, eia hiloviau veia eau ge la bilalaha tetala. La tahalo la vovo isasa kama baheau, ouka. E Iesus Kraist moli, egira me La Tahalo Uru e Tamala, eia vimahuli taro loua lotalo te la lulu la pileho.
GAL 1:3 Oio te la isa girua eau toi la vibalavala te La Tahalo Uru soio tamutou veia amuto tomi ge gabu tikumu la gilogo tetala ale uru, la tia mutou oilo ge malilo tataho.
GAL 1:4 E Iesus Uru eia tomo bururuti letatou, eia piligiti la mahulila tetala veia eia ge sabubu taro la iruru tegatou, eia ge lube taro etatou te la mari papaila ale viri roboti etatou te la imamala la vareagila tegatou ale etato mahulihuli ovola igoie. La vuhula la masasagala te Tamala veia e Latula ge suli etatou,
GAL 1:5 eala etato vauruti la isala, sokotia alaura, eia ge kara mulimulito, kama ge kaluvu, amen.
GAL 1:6 Eau karutu sesele le amutou, la vuhula amuto poke taro hari moli La Tahalo Uru ale tola palati amutou soio te la matagaga te la gilogo uru te Iesus, igoie amuto lagu tavu moliti la valolo ale isapoloti.
GAL 1:7 Eia sesele, la valolo la mahulila eia isa moliti, eala moli egiteu la tahalo la visigologolola isahari oio kabili tamutou, egite masagea veia egite ge vulo gegeru loua la merera te Kraist Iesus ele.
GAL 1:8 Eala moli mai isa ge valolo le amutou la merera ale isapolo, kama la valolo ale amite valolo mugati le amutou ovola, eia ge vilua. Mai ge e angelo isasa ge valolo ruruti amutou, veia mai amiteu la bilalaha isasa tai ge valolo ruruti amutou, eia ge vilua moli. Amuto ge taua la varu mutou!
GAL 1:10 Me amuto gabutatala mave la merera taku? Amuto isahari soioge so gabutatala veia eau mera gogomea mutou la merera ale malama? Ouka gologolo, eau vikara, eau gabutatala moli La Tahalo Uru sekela. Mai eau ge masagea veia la valalua ge lege sisigi leau, eau ge pou tavu la igogolu isapolo ale kama la igogolu la bilalaha te Kraist Iesus, eala moli ge ouka.
GAL 1:11 Eala moli amuto tabarabaragu, taritigi pepeho amuto ge rovia veia la valolo ale taritigi, ale eau valolo palati amutou ovola, eia kama la merera bulalahu veia eau loloa te la tahalo la vovo, eia tai kama la vimari te la vovo ale isasa ge tovo leau ovola. Ouka, e Iesus Kraist sekela moli veipalatiagu la merera la mahulila tetalale, eia tikumu sesele.
GAL 1:13 Amuto soioge lolotia la vulovulogu ale pala. Eau la tau Iuda sesele. Eau viligi pepeho egiteu la valalua la lotu te La Tahalo Uru, eau vagari veia ge sulu egiteu, veia ge barautu la valolo te Iesus veia eia ge kaluvu.
GAL 1:14 La vulovulo la lotu tamite Iuda, eau lagu tavu tomitia, eau mugati egiteu tomi la tuvu taku, eau tilimuli vagari la vulovulo giteu e ururu tamiteu e Iuda.
GAL 1:15 Eala moli e tila souka taposa eau, La Tahalo Uru hiloviti eau, eia tola tavuau te la gilogo tetala ale uru, eia masagea
GAL 1:16 veia te la mahulila taku eia ge veipala la vulovulole Latula, veia eau ge valolo egiteu la valalua me hatavivile ale pou te la maligoma, egite ge rovia la merera la mahulila tetala ale uru ele. Eau loloa eia tola tavuau mai ele, eau kama magiri lou veia amila me la tahalo isasa ge vipigi vulo mugala, ouka.
GAL 1:17 Eau tai kama goata e Ierusalem veia ge veipalea soio tegiteu ale pou palati te la igogolu la bilalaha. Eala moli eau sele molia goilo te la gale tegiteu e Arab, eau pouo, mulimuli eau sele polo loua, beu rivu loua soio la mautu e Damaskas lou.
GAL 1:18 Me ale la leavala itolu poloti eau goata e Ierusalem veia ge hari lalai e Pita, eau mavuta oio tetala la logo savulusa gete lima,
GAL 1:19 eau kama hilo lou isahari egiteu la bilalaha, eala moli e Iakob moli ale e tarile Iesus La Uru gatou.
GAL 1:20 Me la merera tomi taku alele eau vei seselea mutou, eau kama visigolo, eia sesele oata te La Tahalo Uru.
GAL 1:21 Me mulimuli ovola eau goio valolo oio te la gale ilua, e Siria, e Silisia,
GAL 1:22 eala moli egiteu la valalua la lotu te Kraist oio la gale e Iudea, egite soukato rovi sesele la tirarogu.
GAL 1:23 Eala moli egite lolo molia veia la tahalo la gima tegiteu eia vulo sapoloti, eia oio valololoti la merera la mahulila ale eia pala veia ge barautu taroa. Egite lolo moli la vulovulogu ale halabati ele, egite bole vauru moli la isa La Tahalo Uru ovola.
GAL 2:1 Tio, eau pou te la igogolu la valolo mai ele la leavala savulusa gete vaa, eau goata lou e Ierusalem, amite me Banabas, e Taitas tai.
GAL 2:2 Eau goata tegiteu ele, la vuhula La Tahalo Uru veipalatiagu veia eau ge goiole. Amite me egite la mulugaluga la lotu goio pou vikapopo, eau vei matagagea giteu la valolo ale taritigi ale eau valolo egiteu la valalua la maligoma ale kama e Iuda ovola. Eau vei matagagea giteu e ururu ele la valolo taku mai ele, la vuhula eau makuku, egite soukama ge barautu la valolo taku veia eia la valolo ale isapolo, la valolo taku uru eau kebo seseleti ovola, egite soukama ge pileau veia eau valolo bububu. Egite soukama veia eau kama tilimuli la merera tomi tamiteu e Iuda. Egite soioge masagea veia ge la tahalo te Kraist eia ge koro tai la vovola mai la merera te Moses alaura somai tamiteu la valalua e Iuda.
GAL 2:3 Eala moli e tarigu bisi e Taitas, eia tai oio, eia la tau Grik, eala moli egite la mulugalugale kama lapua veia eia ge koro la vovola mai la irovilala tamite Iuda, ouka.
GAL 2:4 Sesele, egite la tahalo isapolo isahari goilo tamiteu veia egiteu e tabarabara gatou la valalua te Iesus, eala moli ouka. Egite vagari veia ge koro la vovole Taitas ele. Egite goilo keke moliti te la kivung la lotu veia ge lolo vutia la merera ale taritigi, ale etato pou mai e taitarile Kraist, etato kati pou te la kilisi te la mari papaila te la merera tegiteu e ururu. Egite masagea veia ge lapu rivu lou etatou soio te la kilisi ale tikumu ale, ia?
GAL 2:5 Eala moli eau vagari pepeho veia ge sau tolea mutou la merera la mahulila te Iesus ale sesele, eala eau kama mera gogomea giteu bakisi veia ge egite ge koro lalai la vovole maura e tabara gatou bisi e Taitas ele.
GAL 2:6 Me oilo vola, egite la mulugaluga te la lotu kama tau isahari lou la merera loata te la valolo taku ale eau valololola. Eala moli eau kama gabu tikumua veia egite uru, ouka. La vuhula La Tahalo Uru kama puhi tigi moli la valalua isahari mai alele veia ge vauru egiteu. Eala moli egite la uru te la lotu vitikumu loua la valolo taku veia eia koramuli.
GAL 2:7 Egite hilo vuti seselea veia La Tahalo Uru turiau veia eau ge valolo egiteu la valalua ale kama koro la vovo giteu, mai sesele lou eia turi e Pita veia eia ge valolo egiteu e Iuda, egiteu ale koro sesele la vovo giteuo.
GAL 2:8 La Tahalo Uru moli ale baha e Pita veia eia ge valolo egiteu ele, eia baha tai eau veia eau ge valolo egiteu ale pou te la maligoma.
GAL 2:9 Tio, me oio moli ovolale egite taho tolu, e Iakob, e Pita, e Ioanes, egite la sosole la lotu itolu seselele, amila me Banabas vilapu lima tegiteu ele, veia la merera tamiteu ge pou mai alele, egite masaga molia veia amite ge visuli baoli te la igogolu la valolo. Amila ge valolo egiteu ale kama e Iuda, egite pou te la maligoma, me egiteu taho tolu veia ge valolo egiteu la valalua e Iuda, egite ale abiti la irovilala te la vovo giteu.
GAL 2:10 Eala moli egiteu taho tolu ele vagari moliti la paga isasa veia amite ge gabutatala egiteu ale pou la savelela, ge susuli egiteu. Me ale tai ele eau masaga pepehoa veia ge visuli tai soio tegiteu mai ele.
GAL 2:11 Eala moli ale e Pita gotalo la mautu e Antiok, eau vitetelia, la vuhula eia ruru,
GAL 2:12 la vuhula eia pou palati tamiteu, eia ali vikapopo la valalua tomi. Eala moli egite la valalua isahari te Iakob guvi, ale gabu tikumu la vulovulo la kiroro la vovo la tahalo, me oio vola egite kama vaali vikapopo legiteu ale kama koro la vovo giteu. Ale egite guvi maie, e Pita kati vaali tomi legiteu ale kama e Iuda, egite kama koro la vovo giteu, la vuhula eia mahela legiteu la valalua te Iakob ele, veia egite souka ge igo totoloa.
GAL 2:13 Goio egite Iuda tomi ale oilo te la lotu te Iesus, egite tilimuli la vulovulo ale halaba te la visigologolola te Pitale, me oilo vola egite viruruti e Banabas tai ele.
GAL 2:14 Eala moli ale eau hiloa veia egite kati tilimuli la gauru ale sesele te la valolo ale taritigi te Iesus, eau goio magiri te la lagu giteu tomi, eau veiale Pita mago “Eme la tau Iuda, eala moli eme palati kamati tilimuli la vulovulole ururu tegatou e Iuda, eme la vulovulomu maiti la tahalo ale logala, eme kamati mai la tau Iuda. Me igo mave eme kama vaali tomi legiteu ale logala veia ge lapu lou egiteu soilo te la vulovulo le ururu tegatou?”
GAL 2:15 Amiteu, e tila miteu visibitala amiteu oilo te la maratatila e Iuda, kama la maratatila ale isapolo logala, tegiteu la valalua la iruru.
GAL 2:16 Eala moli amite rovitia veia etatou la tahalo la vovo, etato kama sibitala maroka mai te la vagagari gatou ale etato tilimuli sesele la merera tomi me la vulovulo le ururu tomi, ouka. Eala moli etato ge gabu tikumu la merera te Iesus Kraist, ge sau tola molia, ale moli ele etato ge vulo marokala. Etato tomi pala kama rovia e Iesus, amite tai vulo la gabutatalala tamiteu tavua mai amutou ele. Eala igoie etato tomi sau tola vagari la merera tetalale, ale moli ele ge igo maroka etatou, la tilimuli la merera te ururu tai kama ge vimahuli isasa, me la vagagari gatou tai kama ge koramulia ge igo maroka lou etatou.
GAL 2:17 Mai etato gabu tikumu la merera te Kraist veia eia ge vimahuli sesele etatou, eala moli etato ge goio ge vulo liliu lou veia la gauru ale eia kama sesele la vuhula etato kama koro pala muga la vovo gatou, ale etato gabutatala maie, etato soioge veipalatia mai alele veia etato ruruti, eia mai ale la valolo te Iesus eia vitiloti etatoue! Eala moli ale la pauala alele!
GAL 2:18 Mai eau ge toi halaba lou la merera ale eau tau tarotia, eau veipalatia mai alele veia eau la tahalo la iruru sesele.
GAL 2:19 La merera te Moses eia turitiagu la gauru ale pala te La Tahalo Uru, me la gauru alele eia viri. Eala eau poke tarotia, eia kati mahuli oilo la gabutatalala taku.
GAL 2:20 Ale e Iesus peho robo eau te la tauvalautu, eia abi taroti la vulovulogu ale pala. La paga isa oukati lou, e Iesus moli oilo te la gabutatalala taku. Eau sau tola moli la merera te Iesus, eau gabu tikumu molia veia eia e Latu La Tahalo Uru sesele, eia gogoau, eia peho roboau veia ge vimahuliau.
GAL 2:21 Eau kama koramulia ge igo marapa lou la gilogo tetala ale uru ele somai taku. Mai la merera te ururu ge koramulia ge vimahuli etatou, igo mave e Iesus ge peho bulalahu moli letatou?
GAL 3:1 E maura miteu e Galesiale! Isa soioge igo pauati le amutou la ilubulubu isasa, ia? Amutou moli ele ale pala amite vei matagaga tataho molia mutou la pilehole Iesus oata te la tauvalautu, eala moli amuto poke taro hari loua!
GAL 3:2 Eau veia ge tahi moli le amutou la tilahi isa sekela maie: Pala La Tahalo Uru sugu tarotia mutou La Kalulu La Marokala, mave, eia abia mutou la vaabila tetala uru ele la vuhula amuto lagu tavu la imoimo la merera tomi te Moses, ia? Ouka. Eia visagege moli le amutou ale amuto roromuli la merera te Iesus ale amite valoloti le amutou ovola.
GAL 3:3 Me igo mave amuto igo paua moliti maie veia la paga ale amuto galutia te la kalulu, amuto veia ge lusi taro loua te la vulovulo la vovo?
GAL 3:4 Mave, la visuli te La Tahalo Uru ale amuto hilotia ale amuto vulo halaba te Kraist pala, kara igoie, la visuli tetala ale uru ele amuto soioge kama gabu tikumua, ia? Ouka, ale eau viteteli moli amutou, eau rovia amuto soioge gabu tikumu seselea.
GAL 3:5 Mave, amuto veia La Tahalo Uru vibalavalava le amutou La Kalulu La Marokala, eia igigo tai la golu la karutula kabili tamutou, la vuhula eia sagege ale amuto tilimuli tataho la merera tomi te Moses, ia? Ouka, ale eia suliti le amutou mai ele, la vuhula amuto tautaulailoti te la valolo ale pala amite valoloti le amutou ovola.
GAL 3:6 Eia mai moli ale la Buk Tabu Ale Pala eia veitia te Abraham maie “Eia gabu tikumu la merera te La Tahalo Uru, La Uru hilotia, eia veia eia maroka, eia tetalati.”
GAL 3:7 Taritigi amuto ge matagaga veia egite ale gabu tikumu la merera te La Tahalo Uru, egiteu ele e tutubule Abraham moli.
GAL 3:8 Egite ururu ale kekesi La Buk Tabu Ale Pala, egite hilo pala mugatia veia La Tahalo Uru mulimuli ge vimaroka lou la vulovulo la valalua la maligoma te la merera tetala moli. Me mai moli ale La Tahalo Uru vikara pala mugati soio te Abraham mago “Oilo te la hilimu eau ge hilovi isasa ale ge suli la valalua tomi ale kama e Iuda, egite pou te la maligoma.”
GAL 3:9 Ale, etato ge rovia veia egiteu ale gabu tikumu la merera tomi te La Tahalo Uru veia eia sesele, egite ge poga la vibalavala ale uru mai tai e Abraham ele, la tahalo la tautaulailo.
GAL 3:10 Eala moli egiteu ale tovo lalaia veia ge visagege La Tahalo Uru oilo te la tilimuli la imoimo la merera tomi te Moses, La Uru ge vilai egiteu, la vuhula La Buk Tabu Ale Pala eia toi tai loua maie mago “La Tahalo Uru ge vilai egiteu ale kama tilimuli tomi la imoimo la merera tomi te Moses.” Me etato ge boto.
GAL 3:11 Ouka, la merera te Moses kama ge vimahuli etatou veia etato ge maroka, la vuhula La Buk Tabu Ale Pala eia toi loua veia “La tahalo la maroka eia sivuti la mahulila ale eia gabu tikumu la merera te La Uru veia eia sesele.”
GAL 3:12 Eala moli la merera te Moses eia kama la paga ale vahilo letatou La Tahalo Uru veia etato ge gabu tikumua, ouka, la vuhula La Buk Tabu Ale Pala eia toi loua veia “La tahalo ale ge tilimuli tomi moli la merera te Moses, eia ge sivuti la mahulila oilo te la tautaulailo tetala mai alele.”
GAL 3:13 Eala moli e Kraist rou rivu lou etatou taroti la igototolola te La Tahalo Uru ale eia veia ge vilai etatou ale boto te la iroromuli la imoimo la merera tomi te Moses. La vuhula e Kraist, eia abi la muli gatou, La Tahalo Uru vilaitia te la iruru tegatou ale egite katua oata te la tauvalautu, la vuhula La Buk Tabu Ale Pala eia vei tai maie veia “La Tahalo Uru ge vile la tahalo ale egite ge vahilitia oata.”
GAL 3:14 La Tahalo Uru igoti la la gauru mai alele, ale e Iesus peho robo la valalua me hatavivile tomi, la vuhula la masasagala tetala veia oio moli te Kraist Iesus la merera ale taritigi, eia toitia alaura soio te Abraham, eia ge puru somai tai tamutou la valalua me hatavivile ale pou te la maligoma. Eia igoa mai ele veia etato tomi ge koramulia ge sau tola la merera tetala, eia ge visibitala La Kalulu La Marokala somai tegatou mai ale eia veitia pala.
GAL 3:15 Amuto tabarabaragu, eau ge tovo mulia mutou te la vulovulo isasa ale etato rovitia mai te la tilau. La tahalo ge tau la tilau soio te tabarala, egira umala ge polo loua.
GAL 3:16 La Tahalo Uru, eia lova le Abraham la merera tetala ale tikumu veia la vibalavala tetala ale uru ge sibitala tetala me oilo tai te la hilila. Me mai moli ele eia koramulia veia etato ge rovia veia la merera te La Tahalo Uru alele eia puru seseleti somai te Iesus, eia kama tegite la karakara tetala tomi mai ale eia veitia veia oilo te la hilila, isa ge sibitala ale ge vibalava la valalua me hatavivile te la maututula tomi.
GAL 3:17 Eala moli eau masagea veia amuto ge matagaga veia la merera te La Tahalo Uru alele, eia tabuli pala mugati, me la merera te Moses eia sibitala mulimuli moli te la pokela, mai la leavala salatu vaa savulu tolu poloti eia sibitala.
GAL 3:18 Me ale La Tahalo Uru lovatiale Abraham, la merera ale sibitala mulimuli te la pokelale eia kama koramulia ge tabuli loata ovola veia etato ge balava te la merera te Moses, ouka. La merera ale tikumu la merera moli ale La Tahalo Uru lova pala mugatiale Abraham veia etato tomi ge balava oio vola.
GAL 3:19 Tio, mai la merera ale sibitala pala mugati, eia moli tikumu, la vuhula lava La Tahalo Uru tau lou la merera lou te Moses veia ge vikapopo la merera ale pala? La Tahalo Uru gabutatalea veia la leavala usu ge polo muga kabili te la imamala tegite ururu kara te ale la merera tetala ge puru, eia veia ge suli la valalua me hatavivile veia ge toi palea giteu la vuhu la iruru tomi, veia egiteu kama ge paua ovola. La mererale, La Tahalo Uru abia giteu la angelo tetala, egite sigiliale Moses, eia goio abia giteu la valalua me hatavivile e Israel.
GAL 3:20 Eala moli ale La Tahalo Uru lova le Abraham la merera tetala, la tahalo isa lou me e angelo isasa tai kama oio.
GAL 3:21 Mai alele etato koramulia veia ge sivutia veia la merera te Moses eia bisi? Ouka. La merera te Moses eia tikumu, eia loio seseleti te La Uru, eala moli La Tahalo Uru kama vipoua veia eia ge vimahuli etatou.
GAL 3:22 Eala moli taritigi etato ge rovia veia la vulovulo la iruru eia kisiti etatou tomi, mai La Buk Ale Pala eia veitia. Mai alele etato kama koramulia ge suli lou etatou, ouka. La vibalavala te La Tahalo Uru ale eia lovatiale Abraham pala, eia ge puru moli somai tegatou ale e Kraist igo maroka etatou, ale tautaulailo tetala.
GAL 3:23 La imoimo la merera te Moses tomi eia kisiti etatou, kara la matagaga la valolo te Kraist eia sibitalati.
GAL 3:24 La Tahalo Uru vipou la merera te Moses veia eia ge turia gatou la gauru soio te Kraist, veia mai etato ge tautaulailo ovola, etato ge vulo maroka te la isale Kraist ele.
GAL 3:25 Eala ale la matagaga sibitalati, la merera te Moses eia kati kisi robo etatou.
GAL 3:26 Ale etato tautaulailo te Iesus, etato sibitalati mai e latatu La Tahalo Uru sesele.
GAL 3:27 Amuto abiti la vuluhi tetala, eala amuto mai ale kai halabati la vulovulole Iesus ale taritigi ele.
GAL 3:28 Eala amuto umalati ge toi tabaribari amutou veia ale la tau Iuda, ale la tau Grik, me ale la tahalo la vuliti, ale la morivava, me ale la tahalo, eau ge lolo molia, veia egite hatavivile eau kama ge lolo egiteu. Etato visauru moli oilo te la maratatila te Kraist Iesus.
GAL 3:29 Mai eme ge tetala, eme maiti e tubule Abraham ale ge abi sesele la vibalavala te La Tahalo Uru ale eia lovatiala pala.
GAL 4:1 Me la masova la merera tomi taku eia maie: Etato pou seseleti mai e latatu La Tahalo Uru, la vibalavala te Tama gatou uru ele, etato tomi taholatia. Eala moli mai etato so popou otalo la uluva la merera te Moses, eia so lago roborobo etatou, ale etato so mai moli e guliliki ale soukama uru, eia soukama abi la mulile tamala, eia la bilalaha moli tegite ururu.
GAL 4:2 Egite ururu ge vibaumuli e guliliki ale so bisi mai ele, kara ale eia ge sagaiti sesele.
GAL 4:3 Me etato tai mai moli ele, ale etato soukama sagaiti te la merera te La Tahalo Uru, etato so tilimulimuli moli la masasagala te la vovo mai la vitolola, la malehula.
GAL 4:4 Eala moli ale la imamala puruti ale La Tahalo Uru veia ge visibitala e Latula, eia baha e Kraist veia la sobe e Maria ge taposea, eia tai la tahalo la vovo mai etatou, eia pou otalo te la uluva la merera te ururu mai tai lou etatou.
GAL 4:5 Eala moli eia sibitala veia ge rou rivu lou etatou ale etato so popou te la uluva la merera tomi te ururu ale turi etatou veia etatou la tahalo la iruru. E Iesus sibitala mai alele veia ge puhi tigi etatou mai e tabarabarala sesele, etato tomi ge e latatu La Tahalo Uru sesele.
GAL 4:6 Me etato ge rovi molia mai ele veia etatou e latatu La Tahalo Uru sesele, la vuhula eia sigilitia gatou La Kalulule Latula eia voluti te la gabutatalala tegatou, eia veipalea te la hare gatou, etato toia maie soio tetala mago “Tete, Tete!”
GAL 4:7 Eala etato rovitia veia etatou e latatula, etato kamati pou la kilisi te la vulovulo la vovo ale kama kokora. Me ale eia vagoiloti etatou veia etatou e latatula seseleti, eala etato rovi taia veia eia ge gigi tai etatou oilo te la tabarila te latatula tomi.
GAL 4:8 Amuto pala kama rovi sesele La Tahalo Uru, amuto gabutatala moli egiteu la papaga mai la taua me la hitu, me egiteu ale kama vagari, egite la golu bububu.
GAL 4:9 Eala moli ale igoie amuto sivuti La Tahalo Uru, mai ale eia gogo amutou, eia lagu tavuti amutoue, igo mave amuto veia ge gotigu rivu lou ge gabu tikumu lou egiteu la golu bububu ale pou bulalahu kama susuli amutou e? Amuto soioge veia ge goilo rivu lou te la kilisi te la vulovulo ale kama kokora te la vovo lou, ia?
GAL 4:10 Amuto gabu tikumu la taio ale halaba, me la poke la leavala ale halaba, veia amuto ge hate saga te la lotu la visigologolola te la imamala tomi ale tikumu tamutou mai alele. Amuto ouka pasi!
GAL 4:11 Eau soioge valolo bulalahu moli amutou, ia?
GAL 4:12 Amuto tabarabaragu, eau kaka gogogo amutou veia amuto ge sovei eau. Amuto pala kama pou la kilisi te la vulovulo miteu e Iuda, me eau la tau Iuda, eau piligi taitia, ale igoie eau mai lou amutoue! Taritigi amuto ge sovei eau, amuto ge pou gale te la kilisi te la vulovulole ururu tamite Iuda, amuto umala ge goilo lou la bigomu aleiele veia ge pou la kilisi lou. Pala eau pou tamutou, amuto baumuli tatahoau, eala eau veia amuto soioge ge gabu tikumu la merera taku.
GAL 4:13 Ale eau valolo pala muga amutou, eau pou tamutou la vuhula la ilea uru bebetoleau.
GAL 4:14 Eau lea, amuto kebo la vibaumulila soio taku. Eau vorati, eala moli amuto kama malago leau, amuto rara tavu moliau mai e angelo isasa ale loata te La Tahalo Uru. Amuto vararapuau mai eau e Kraist Iesus loue!
GAL 4:15 Me ale igoie amuto mai ale bareti lou, amuto kati sagege mai ale pala! Mai ale eau veia, la vulovulo mutou ale pala, ale amuto ge hiloau eau posa vorati, amuto ge vagari veia ge baumuli tatahoau, kara ale amuto ge igo posa tahalo louau.
GAL 4:16 Eala moli igoie amuto vulo sapoloti. Mave, amuto soioge kati masageau, teale eau valolo le amutou la merera ale sesele te Kraist, ia?
GAL 4:17 Egiteu la tahalo la visigologolola, egite vagari veia ge ali la ilo mutou, eala moli egite kama igigoa veia ge suli amutou, ouka. Egite masaga molia veia amuto ge pileau.
GAL 4:18 Ale etato ge gabu tikumu la valolo te la tahalo halaba, mai la valolo tetala ge sesele, eia taritigi moli mai alele. Mai eau tai kama ge oio tamutou, la golu isa ouka, amuto ge laba gele tataho la valolo tomi. Eala moli taritigi amuto ge gabutatala tigi muga la vuhu la vikararala tomi ale amuto ge loloa.
GAL 4:19 Amuto latatugu, eau pala valolo amutou, eau mai ale veipala halaba amutou soilo te la mahulila te Iesus ale halaba. Ale amuto gotigu rivuti lou, eau ge mai ale ge ligi lou ale eau ge veipala halaba lou amutou mai la piligo halaba. Me oio vola, eau soioge ge gabu la iligiligi ale uru oio te la igogolu alele, kara ale la vulovulo mutou ge poga sesele la vulovulole Kraist.
GAL 4:20 Mai eau ge oio tamutou ele! Mai eau ge oiole, eau kamati ge gusia mutou. Mai eau ge oiole, eau ge mera gogoma tataho molia mutou taro la vareagila tamutou ele! Eau ilo buruko sesele le amutou ele.
GAL 4:21 Ioge, amuto isahari ele masagea veia ge beu loua ge pou lou te la uluva la merera te ururu, tio eau veia ge tahi lalai amutou veia amuto rovia tataho la masova la merera tomi te ururu, ka ouka?
GAL 4:22 La masovala eia maie: E tubu miteu e Iuda, e Abraham, e latula ale hatamale ilua, isa eia savua te la bilalaha tetala e Hagar, isa eia savua te rutula sesele e Sera.
GAL 4:23 Ale sibitala bulalahu e latule Hagar moli. Eala moli ale e latule Sera, eia savua, la vuhula La Tahalo Uru toiti la merera ale tikumu soio te Abraham, veia e rutula ge savu e latula.
GAL 4:24 Me ale la tilovo tegatou, etato ge rovia maie: Egirua la tavile iluale e Abraham savua giruale, egira la tilovo te la tilau la mata te La Uru ilua. Mai la merera ale La Tahalo Uru veiale Moses oio la gove uru e Sinai, oio la gale tegite Arab, ale mai la tavile la bilalaha, eia pou te la kilisi te Abraham. Me e latula tai ale eia savua, me egiteu e tutubula ale mulimuli, egite tomi ge mai e Hagar ale pou te la kilisi.
GAL 4:25 Mai e Hagar ele, eia tovoa gatou la gove uru e Sinai, mai tai lou la valalua e Iuda, egite mai ale pou te la kilisi te la merera te Moses.
GAL 4:26 Eala moli egiteu ale tautaulailo te Iesus, la pulolou tegiteu eia isapolo te aleie, la pulolou tegiteu eia mavulaha sesele, eia kama la pulolou la kilisi, ouka. Ale eia tovoa gatou mai e rutule Abraham sesele, e Sera ale visibitala amiteu tomi e tutubula, mai tai lou etatou tomi ale goiloti te Iesus.
GAL 4:27 Mai la merera te La Buk Tabu Ale Pala eia veia maie: Eme ale varirobo ele, ale e latumu ouka, eme ge sagege! Kakusa la sagegela, eme ale soukama gabu la iligi la piligo, la vuhula eme ge pigo. Eme ale varirobo, eme ge pigo pepeho, la giligi giteu e latatumu ge usu, me la tavile ale e haruamu oiole, e latatumu kama ge usu.
GAL 4:28 Me mai moli ele, amutou e tabarabaragu ele, mai e Aisak e latule Abraham eia sibitala moli oilo te la merera ale La Tahalo Uru toiale tamala, mai lou amutou ale balava la merera te La Tahalo Uru ale eia toi taitia soio tamutou ele.
GAL 4:29 Me etato rovia veia e latule Hagar eia vile e maura e latule Abraham sesele, me mai moli ale igoie egiteu ale vagari tavu la merera te Moses, egite vilevile etatou ale tilimuli e Iesus, etato ale sau tolati La Kalulu La Marokala.
GAL 4:30 Me mai La Buk Tabu Ale Pala eia veipala taitia maie “Pitaro la tavile la bilalahale, vikapopo me egira me latula, e latula bisi ele umala ge abi la mulile tamala mai e latula sesele, ale e rutula sesele taposea!”
GAL 4:31 Me oilo vola etato ge rovia veia etato kama abi la mulile latule Hagar, la bilalaha ale pou te la kilisi, veia etato tai ge pou te la kilisi, ouka. Etato mai moli e latule Sera, ale e rutule Abraham sesele, etato pou la balavala, mai e latu La Tahalo Uru sesele.
GAL 5:1 Ale e Kraist lubeti etatou taro la kilisi, eia kama veia etato ge gotigu rivu lou ge pou lou te la kilisi ele. Amuto ge magiri vagari, egite umalati ge kisi amutou mai la paia ale egite vuvu la gogo te la lohola!
GAL 5:2 Eau e Pol, eau veia mutou maie: Amuto umala ge pou varumurumu veia egite ge koro la vovo mutou, veia la gauru ale ge vimahuli amutou. Mai amuto ge varumu tali egiteu veia ge igo seselea mai ale egite veia, la pilehole Kraist kati ge suli amutou.
GAL 5:3 Tio me eau veia ge mera taro vagari lou amutou. Mai egite ge koro la vovo mutou, amuto mai ale goiloti lou veia amuto ge pou te la kilisi te la merera tomi tegite ururu. Mai amuto ge hilovi la merera isasa veia ge igoa, tio amuto oilo tomiti ovolale.
GAL 5:4 Eala moli mai amuto ge igo mai ele, veia la merera te ururu ge vimaroka lou amutou veia eia ge vimahuli amutou, amuto mai ale vipou baati lou me Kraist, amuto boruti.
GAL 5:5 Eala moli etato ale te Kraist, etato abiti la vimarokala te La Kalulula, me etato sau tola vagariti la merera tetala ale eia veia ge vimaroka etatou.
GAL 5:6 Ale etato goiloti te Kraist, etato tetalati. Eia kama gabu tikumua veia ale koroti la vovola, ale isa ouka. La golu isa moli eia uru te la gabutatalala tetala: ale etato gabu tikumu la merera tetala, veia te la vulovulo gatou etato ge veipala la gilogo tetala.
GAL 5:7 Ale pala amuto soko la tuluga tamutou soio te Kraist, amuto mata kaseka pasi te la tuluga. Me ale igoie eau hiloa amuto mai ale tutuakiti lou, amuto kati tilimuli tataho la gauru ale sesele. Ere sogi amutou?
GAL 5:8 Eala moli eau rovia la tahalo ale viruru amutou kama La Tahalo Uru ale tola pala muga amutou soio tetala, ouka!
GAL 5:9 La visigolola eia mai ale ubi tatubati amutou tomie!
GAL 5:10 Eala moli etato isa moli te la isale Iesus, me oio vola eau rovia veia amuto ge beu loua te la gauru ale matata, me la tahalo ale viruru amutou ele, La Tahalo Uru ge vilai taia.
GAL 5:11 Amuto tabarabaragu, amuto ge lolo somai taku, egiteu la tahalo la visigologolola, egite saupupupu eau veia la haro isahari eau soloio te la valolo mai te la kiroro la vovo la tahalo! Me mai ge mai ale, la vuhula lava egite Iuda oio gagima moliaue, mai eau ge soloio moli te la vimari ale egite masagea! Eala moli eau te la valolo moli te la tauvalautu, ale egite malagotila.
GAL 5:12 Mai amuto ge veia giteu la tahalo la visigologolola ale igo gegeru amutou ele veia ge egite ge barautu rivu bakisi la vovo giteu loue! La vovo gatou ale egite veia ge koro taroale, egite ge koro rivu lou tegiteu, eia ge paru tomi molitio!
GAL 5:13 Amuto tabarabaragu, La Tahalo Uru tolati amutou veia ge vagoilo amutou te la pulolou la mavulahala, amuto kamati ge pou lou te la kilisi. Eala moli isasa umala ge toia maie veia “Taritigi pepeho, eau ge tilimuli moli la masasagala taku te la vovo, la vuhula La Tahalo Uru kama kisi leau la merera usu.” Ouka, etato umala ge gabutatala mai aleiele. Eala moli taritigi amuto ge visuli baololi te la igogolu tomi, ge vipuhi tigi moli te la gilogo te La Tahalo Uru.
GAL 5:14 La vuhula, la merera te Moses tomi, la masovala isa moli maie veia “Amuto ge gogo tavu moli egiteu e tabarabara mutou mai lou ale amuto gogo rivu lou amutou ele.”
GAL 5:15 Eala moli mai amuto ge vaigo totolo, amuto ge igo marapa lou la pulolou tamutou ale taritigi ele, amuto mai ale ge sulu rivu lou amutou ele!
GAL 5:16 Tiele, eau ge tutu tola loua mutou maie: Mai La Kalulu La Marokala ge magiri mamuga te la lagu mutou, amuto kamati ge vulo gele tavu la vulovulo la vovo ale kama kokora.
GAL 5:17 La vulovulo la vovo ale kama kokorale, me la vulovulo La Kalulu, egira kama visauru, egira isapolo seseleti, egira vaubi bibibi moli. Me oio volale amuto ge matagaga tigi veia la haro usu etato kama tilimuli sesele la gabutatalala tegatou ale taritigi, la vuhula oio moli te la vulovulo la vovo ale kama kokora, eia soloio mahulihuli oilo tegatou.
GAL 5:18 Eala moli mai La Kalulu La Marokala eia ge mamugame, eme kati ge pou lou te la uluva la merera te Moses.
GAL 5:19 Eala moli mai amuto ge tilimuli la vulovulo la vovo isahari ale kama kokora, la iruru ge sibitala, eia ge tabuli matagaga te la valalua me hatavivile tomi maie: la iligo la iruru soio te la tavile, la para osaosala, la mata bulakalakala, la gililo,
GAL 5:20 la lotu tavu la puigolo, la savula, la vikokuela, la vaigigola, la ilo maliki tavu la golu te tabaramu, la igototolola, la vareagila, la vigiriri tatavula, la vipou baala,
GAL 5:21 la ilo lago la paga te tabaramu, la iliu pauala, me la iligo galolola. Eala moli eau mera taro vagari lou amutou tegiteu la iruru tomi alele. Egiteu ale vagari tavu egiteu la vulovulo alele, egite kama koramulia ge sau tola la pulolou la matagagala te La Tahalo Uru, ouka viruru.
GAL 5:22 Eala moli la vavua La Kalulu La Marokala ale eia visibitalea te la mahulila tegatou, eia maie: La gilogo, la sagegela, la vipuhi tigila, la tilogo, la mutelela, la vulovulo ale taritigi, la vikara seselela,
GAL 5:23 la vaigo tigila, la vulo taro la vulovulo la vovo ale kama kokora. Isa kama koramulia veia ge magiri robo egiteu la vulovulo alele!
GAL 5:24 La vulovulo mutou te la vovo ale kama kokora, mai amuto kama ge sugu taroa soata te la tauvalautu te Iesus, ge poke taroa, amuto kama koramulia ge veia amutou te Kraist, ouka.
GAL 5:25 La Kalulu La Marokala, eia vimahuli etatou tomi, eala eia taritigi etato ge pou te la uluvala veia eia ge mamuga etatou.
GAL 5:26 Etato umalati ge pou tavu lou la vulovulo la vareagila, veia ge etato ge karasusuku la valalua me hatavivile veia ge la masasagala tegatou ge tabuli loata te la masasagala tegiteu e tabarabara gatou ele, umalati.
GAL 6:1 Amuto tabarabaragu, mai isa tamutou ge boru te la iruru, taritigi veia amutou ale rovi La Kalulu La Marokala oilo te la gabutatalala tamutou, amuto ge vahiliti gogogo loua, la vuhula amuto kama rovia gaisa e Satan ge tovo lalai amutou me amuto tai ge boru.
GAL 6:2 Taritigi amuto ge vigogo baoli moli le amutou, me oilo vola amuto roromuliti la merera te Kraist soio tamutou.
GAL 6:3 Mai isa tamutou ele eia vei tataho sesele lou eia, eia visigolo, la vuhula egiteu ale gabutatala mai ele, egiteu la golu bububu.
GAL 6:4 Mai amuto tomi isasasa ge mata muli la vulovulo mutou lou, me mai eme hilo la vulovulomu isa eia taritigi, tio ale eme ge veipalea. Eme umala ge vei muli la vulovulole tabaramu veia eme ge vikara kukumuala,
GAL 6:5 la vuhula etato tomi ge bole la tikumu la vibaumulila te la vulovulo gatou lou.
GAL 6:6 Mai amuto pou te la uluva la vimari te la tahalo isasa, amuto ge suli leia la ilali me la uati, la vuhula eia suli le amutou la merera te Kraist.
GAL 6:7 Umala amuto ge visigolo lou amutou veia eia koramulia veia etato la tahalo la vovo ge visigolo La Tahalo Uru. Mai etato ge galu la ilali ale kama kokora, la vavuala tai ge kama kokora. Me mai etato ge galu la ilali ale taritigi, la vavuala tai ge taritigi.
GAL 6:8 Mai eme ge vagari tavu la vulovulo la vovo ale kama kokora, eme ge poga sesele lou la viluala te la kalulumu. Eala moli mai eme ge vagari tavu la vulovulo La Kalulu La Marokala, eme ge poga sesele la mahulila ale sesele, la kaluvula ge ouka.
GAL 6:9 Eala etato umala ge bare taro la vulovulo ale taritigi, la vuhula mai etato ge vagari tavua, etato ge sau tola lou la mapa la vulovulo gatou ale taritigi ele.
GAL 6:10 Mai alele eia taritigi veia etato ge pou raragi veia ge suli egiteu e tabarabara gatou ale rovi e Kraist, me egiteu ale logala tai.
GAL 6:11 Male, la tapasi la merera taku, amuto ge laba gele tavua, eau sesele kekesila la limagu, la mata la buk eia ururu.
GAL 6:12 Egiteu ale vagari veia ge koro la vovo mutou mai la irovilala te la tau Iuda, egite gabutatala rivu lou egiteu, veia egite Iuda ge vei tataho egiteu. Egite veia ge vulo taro mai ele la iligiligi me la vilile ale egiteu la gima ge viligi egiteu ale tilimuli sesele la gauru te Kraist ovola, mai egiteu tomi ale rovia veia la pileho tetala sekela moli oata te la tauvalautu, eia ge vimahuli etatou.
GAL 6:13 Egite hilovi la kiroro la vovo veia ge gabu tikumua, eala moli la merera te Moses ale usu lou egite kama gabutatalea, egite polo molia. Egite masagea veia amuto usu ge goilo tegiteu, egite ge vauru lou la isa giteu ovola.
GAL 6:14 Eala moli eau, eau kama ge vei tataho rivu lou eau, eala moli la paga isa moli eau ge vei tataho molia, la tauvalautu te Iesus Kraist, La Uru gatou. La vuhula, ale eau rovi tatahoti la pileho tetala, eau kamati gabutatala la vulovulo la vovo ale kama kokora. Me la vulovulo la vovo tai eia kamati mai ale puliau soio te la iruru.
GAL 6:15 La kiroro la vovo, ale la golu bulalahu moli. La golu isa sekela moli eia tikumu, la mahulila ale halaba te Kraist.
GAL 6:16 Amutou ale tilimuli la valolo te Kraist, taritigi La Tahalo Uru ge igo malilo tataho la gabutatalala tamutou, amuto ge gabu la gilogo tetala ale uru, mai tai egiteu la valalua me hatavivile tomi ale tetala sesele.
GAL 6:17 Me mulimuli te la poke la kekesi taku aleie, eau kama masaga viruru veia la vareagila ge sibitala lou. Amuto umalati ge vailo buruko eau mai ele. Eau viluati, eau vora moliti la igogolu te la valolo te la isale Iesus.
GAL 6:18 Amutou tabarabaragu, la gilogo te Iesus Kraist, La Uru gatou ge pou te la kalulu mutou tomi isasasa. Eala moli ele. Eau e Pol.
EPH 1:1 Eiau e Pol, eau kekesia mutou la valalua me hatavivile te La Tahalo Uru ale oio la mautu Epesas, amutou ale sau tola la merera te Kraist Iesus. Eau la bilalaha tetala, me la igogolu alele, La Tahalo Uru hilovitiau ovola te la masasagala tetala sesele.
EPH 1:2 Taritigi veia la gilogo te Tama gatou, tegirua me Latula e Iesus, La Uru gatou, eia ge pou tamutou, la tia mutou oilo ge malilo tataho.
EPH 1:3 Etato ge vaisale La Tahalo Uru, e Tamale Iesus Kraist, La Uru gatou, la vuhula e Kraist eia vimatagagati etatou, etato sau tola tomiti la vibalavala tetala mai la vulovulo ale maroka loata tetala, me oio vola etato kati pou te la maligoma.
EPH 1:4 La Tahalo Uru, eia souka vipou la mori me la magasa, eia hilovi pala muga etatou veia etato ge te Kraist sesele, veia e Kraist ge puli etatou soilo tetala, veia la vulovulo gatou tai eia ge maroka.
EPH 1:5 Ale La Tahalo Uru gogo etatou, eia toi pala mugatia te la siloko la maututula veia la vuhula ge te Iesus Kraist, veia eia ge patu etatou mai e latatula sesele, la vuhula ale la masasagala tetala ale taritigi.
EPH 1:6 La Tahalo Uru sugu taro bulalahu molia gatou la matagaga ale eia piligia gatou e Latula la riau, eia vilua robo etatou. Etato ge rovia mai ele veia la visuli tetalale eia taritigi sesele me oio vola etato ge vaisale pepehoa.
EPH 1:7 Te la pileho te latulale, La Tahalo Uru vimavulahati letatou te la iruru tegatou ale etato igigoa. Eala etato kati ge ligi te la igototolola tetala, me eia lube taiti etatou taro la kilisi te Satan. Me la gilogo tetala ale uru eia mai moli ele,
EPH 1:8 ale eia bebetolatia somai tegatou, me oio vola etato pouti te la matagaga.
EPH 1:9 Me te la masasagala tetala sekela moli ale taritigi pepehole, eia veipalatia gatou la gabutatalala tetala ale tabuli kokovu, ale eia veitia ge baha taro e Kraist somai tegatou.
EPH 1:10 Eia veipalatia mai ele veia mulimuli la imamala ge puru ale eia ge vipou la maututula, la magasa, la mori me la papaga tomi ale oio vola, eia ge vipoua otalo te la uluvale Kraist, me ale e Kraist eia ge pou la uru te la golugolu tomi.
EPH 1:11 Etato rovia, la papaga tomi moli ale sibitala, egite sibitala te la masasagala te La Tahalo Uru sekela. Me mai moli ele etato rovi taia veia La Tahalo Uru visati letatou pala te la silokola veia etato ge la maratatila tetala sesele, te la isale Kraist, mai te la masasagala tetala moli,
EPH 1:12 veia omai tegatou la valalua me hatavivile ale sau tola pala mugati la merera tetala, la isa La Tahalo Uru ge vavava, la valalua me hatavivile tomi ge hiloa mai ele veia eia vimahuli etatou, egite ge vaisale seselea ovola.
EPH 1:13 Me amutou la valalua me hatavivile te la mautu Epesas tai ele, amuto pala lolo vutiti la merera la vimahulila te Kraist, me amuto gabu tikumutia veia eia sesele. La Tahalo Uru goio visivoti La Kalulu La Marokala sotalo tamutou mai ale eia toi seseletia pala vei eia ge sugu taroa gatou ovola. Me oio vola etato rovitia veia ale la irovilala tetala soio tamutou ele veia amutou tetalati, ale eia abitia mutou La Kalulu La Marokalale.
EPH 1:14 Te la Kalululale, La Tahalo Uru eia mai ale vavu roboti etatou, veia etatou tetalati. Eia mai la irovilala ale etato ge rovia veia la merera te La Tahalo Uru eia sesele, ale eia toitia veia e Kraist eia loto rivu lou etatou taro la limale Satan. Me La Kalulula eia mai la irovilala ale etato ge rovia veia etato ge sau tola sesele la vibalavala te La Tahalo Uru tavu egiteu ale pou te la uluvala. La papaga tomi ele, La Tahalo Uru vibalavati letatou ovola veia etato ge vaisale seselea.
EPH 1:15 Eau loloa ale amuto sau tola seseleti la merera te Iesus, La Uru gatou, me amuto vipuhi tigiti megiteu la valalua me hatavivile tomi tetala,
EPH 1:16 tio me oio volale eau kama maila, eau lagu tavu moli amutou te la kilaka taku. Me eau kama maila tai te la vaisalela tavu La Tahalo Uru, sokotia pala karati igoie, la vuhula amuto lolo vulai tatahoti.
EPH 1:17 La Tahalo Uru, eia La Uru te Iesus Kraist, eia la vuhu la matagaga tomi. Eau kakea veia eia ge vivolu le amutou la mari tetala ale uru, me la matagaga tai tetala ale uru, veia amuto ge rovi la vulovulola, amuto kama ge paua leia.
EPH 1:18 Eau masagea veia La Tahalo Uru ge vimatagaga sesele la mata mutou veia amuto ge rovia veia amutou tetalati, amuto ge rovi seselea veia amutou e latatula. Me mai moli ele amuto ge rovia veia amuto sau tolati la vibalavala tetala ale uru, amuto ge vagari tavu la pulolou ale taritigi mulimuli.
EPH 1:19 Me amuto ge rovi tai la vagagarila te La Tahalo Uru, ale eia baha e Kraist veia eia ge vimahuli etatou.
EPH 1:20 Egite bilia, eala moli eia vimahulia taro la pileho, eia pulitia soata tetala, eia vipoutia te la pulolou la uru tetala oio te la galela e gata.
EPH 1:21 Me etato ge rovi taia mai ele veia la isa la tahalo isasa kama ge uru mai la isale Iesus, kara igoie, kara mulimuli te la imamala la marokala te La Uru, e angelo me la tahalo isa lou kama ge uru mai e Iesus, ouka viruru.
EPH 1:22 La Tahalo Uru sugu taroti la maututula tomi sotalo te la uluvale Iesus ele, veia la hohoi tai, la magasa, eia ge tetala tomi moli, eia ge mamuga ovola. Me e Kraist ele, La Tahalo Uru veia eia ge mamuga, eia ge la mapa la lotu tetala.
EPH 1:23 E Kraist, eia mai la vuhu la valalua me hatavivile tomi te la lotu. Eia la obula me etatou mai la halalala ale mahuli oio tetala. Etato la halalala ge vikaluvu pasi la igogolu te la obula e Iesus, eia La Uru gatou ale oio tetala la gabutatalala tomi te Tamala eia puruti.
EPH 2:1 Ale pala, amuto pou mai ale pehoti, la kalulu mutou kama matagaga, la vuhula la vareagila ale uru me la vulovulo tai ale kama kokora eia oio volu tamutou.
EPH 2:2 Amuto pala tilimuli moli la vulovulo la vovo ale kama kokora. Amuto roromuli moli e Satan, eia la mulugaluga tegiteu ale kama lolo La Tahalo Uru, eia la mulugaluga tegiteu la hituhitu tomi tai ale kama korakora.
EPH 2:3 Me etato tai pala oilo tegiteu la tahalo la vareagila mai ele, etato tomi pala tilimuli moli la masasagala tegatou isasasa, mai te la vulovulo la vovo ale kama kokora. Mai alele eia koramuli taia veia etato pala ge poga la igototolola te La Tahalo Uru.
EPH 2:4 Eala moli La Tahalo Uru masaga pepeho etatou, eia gogo pepeho etatou, ale etato pou te la maligoma,
EPH 2:5 eia hilotia veia la vareagila tegatou eia mai ale biliti la mahulila te la kalulu gatou, me oio vola eia baha e Kraist veia eia ge vimahuli lou etatou. Ale e Kraist lapu rivu lou etatou taro la limale Satan, la gilogo te La Tahalo Uru moli baha tarotia somai tegatou, eala etato mahuli ututie.
EPH 2:6 Ale La Tahalo Uru vimahuli e Kraist taro la pileho, eia mai ale vimahuli tai etatou, veia etato me Kraist mai ale pou vikapopoti te la pulolou la uru oata tetala.
EPH 2:7 Eia igoa mai ele veia te la imamala ale mulimuli te la guluvi te Kraist, la maututula tomi ge hiloa, egite ge rovia veia la gilogo tetala eia uru sesele, ale eia bahatia somai e Latula e Kraist Iesus, eia puhi tatahoti etatou.
EPH 2:8 Ale amuto gabu tikumu la pileho te Iesus me la mahuli rivula tetala veia eia sesele, mai ale La Tahalo Uru hiloa, eia gogo amutou, eia vimahuliti amutou ovola.
EPH 2:9 Amuto isa kama koramulia ge igo isa la paga ale ge vimahuli rivu lou amutou, ouka! La Tahalo Uru sekela igoa, la vaabila tetala soio tamutou, eia kama bisi, eia uru sesele. Ale amuto kama koramulia ge vei tataho rivu lou amutou oio vola, la vuhula amuto kama igoa, La Tahalo Uru moli igoa.
EPH 2:10 La Tahalo Uru pui etatou, eia visibitala halaba etatou veia etato ge sovei sesele e Kraist, veia etato ge pou tavu moli la vulovulo ale taritigi mai eia. La gauru ale, La Tahalo Uru lamotia pala veia etato ge polo tataho ovola, etato ge tuga tavu la igogolu tetala ale uru, mai la igogolu la visuli soio tegiteu e tabarabara gatou.
EPH 2:11 Amutou Epesas ele, e tila mutou taposa amutou, amuto kama la tau Iuda veia amuto ge pou te la maratatila te La Tahalo Uru, ouka. Egite Iuda vilevile amutou veia amuto kama koro la vovo mutou mai egiteu. (Ale egite gabu tikumua, veia la paga ale egite igo loula la lima giteu lou, eia ge suli egiteu.) Eala moli taritigi amuto la valalua ale logala, amuto ge gabutatala rivu lou la pulolou tamutou ale pala,
EPH 2:12 ale amuto vipou baa taroti le Kraist. Amuto pala pou la mosi moli, La Tahalo Uru kama gigi amutou oilo te la valalua tetala, ale eia hiloviti egiteu veia egite ge tetala. La merera te La Tahalo Uru ale tikumu, eia pouti tegiteu la valalua tetala, eala moli ale pala eia kama la paga tamutou veia amuto ge balava oio vola. Pala amuto mahuli bulalahu moli, amuto kama rovi La Tahalo Uru, amuto rovi moli la vulovulo la maligoma.
EPH 2:13 Eala moli igoie amuto goiloti te La Tahalo Uru, amuto pouti te la balila, amuto tomi me Iesus ele. La vuhula la pileho te Iesus eia puliti amutou, ale pala amuto pou malau, eia puliti amutou soilo te la maratatila te La Tahalo Uru.
EPH 2:14 E Kraist moli, eia la vuhu la vipuhi tigila tegatou la valalua e Iuda, me tamutou ale kama la tau Iuda tai, veia etato ge isa moli, mai la valalua te Tamala sesele. Etato kamati ge vipou baa, kati ge vaubi, etato isa moliti, la vuhula e Iesus, eia peho roboti etatou tomi, la pileho tetala eia barautu taroti la merera te Moses ale magiri robo amutou ale logala, ale etato pala vigagima ovola. E Iesus peho robo etatou tomi mai ele veia ge visibitala la maratatila ale halaba mai lou eia, veia la valalua kati ge vipou baa, veia la imamala ale taritigi ge sibitala ale la valalua me La Tahalo Uru ge vipuhi tataho.
EPH 2:16 Mai alele la valalua me hatavivile kati ge pou malau taro La Tahalo Uru, etato ge isa moli, la vuhula e Latula peho roboti etatou tomi oata te la tauvalautu, veia la gauru soio tetala ge isa moli, e Kraist, isa oukati lou.
EPH 2:17 Mai moli ele e Iesus eia sibitala omai tegatou veia ge veipalea gatou la valolo ale taritigi, la valalua me hatavivile ale pou hagagavi te Tamala, me egiteu ale pou malau taroa, egiteu tomi ge vipuhi tigi lou oio te la bali La Tahalo Uru.
EPH 2:18 E Iesus peho veia La Kalulula sekela moli ge puli etatou tomi soio te la gauru ale goio te Tamala.
EPH 2:19 Mai ale, amuto kati pou mai la mosi, amuto pou seseleti mai la valalua me hatavivile te La Tahalo Uru, amuto goiloti te la mautu tetala.
EPH 2:20 Amutou mai la tatuha la luma, me la lumale, amite la bilalaha te Iesus, me egiteu ale veipala la gabutatalala te La Tahalo Uru tai, amite magiri mai la sosolela, amite sau tolea. Me la sosole magirila ale kabili posa, ale e Kraist Iesus moli,
EPH 2:21 eia sau tola la tikumu la luma tomi, eia moli vimagiri etatou mai la luma la lotu te La Tahalo Uru, la luma tetalale eia maroka sesele.
EPH 2:22 Eia ge vagoilo tai amutou, amuto ge magiri vikapopo mai la tura la luma te la La Tahalo Uru, la vuhula La Kalulula eia oioti tamutou.
EPH 3:1 Eau e Pol, eau pou te la luma la kilisi, la vuhula eau valolo le amutou la valalua me hatavivile ale logala kama e Iuda la merera te Kraist, eala eau pou te la kilisi te la igogolu te la isale Iesus.
EPH 3:2 Amuto soioge lolotia ale La Tahalo Uru abitiagu la merera tetala te la gilogo tetala ale uru soio tamutou la valalua me hatavivile ale logala, eia abiagu veia eau ge sau tola la merera tetalale.
EPH 3:3 La merera alele, eia tabuli kokovu, La Tahalo Uru moli veipaleagu, me eau kekesia mutou, eau veitia mutou ovola, eau lubetia mutoue.
EPH 3:4 Mai amuto ge gigi la merera taku alele, amuto ge rovi la vuhula ale eau roviti la sesele la merera te Kraist.
EPH 3:5 La merera alele, eia tabuli kokovu alaurati kara igoie, egite ururu pala kama rovia, eala moli La Kalulu La Marokala eia veipalatia somai tamiteu la bilalaha tetala ale maroka, soio tai tegiteu la bilalaha ale pala.
EPH 3:6 La masova la merera tetalale, eia maie, veia amite Iuda, amutou la valalua me hatavivile ale logala, etatou tomi e Tama gatou isa moli. Me la vibalavala te Kraist eia ge puru somai tegatou tomi. La vuhu la lotu tegatou tomi eia isa moli, La Uru gatou e Iesus sekela, mai sesele la valolo tetala eia veitia.
EPH 3:7 Me la merera la mahulila te Kraist, La Tahalo Uru vipoutiau ovola veia eau ge la tahalo la valolola. Ale eau gabu la vagagarila tetala, eau rovitia mai ele ale eia abitiagu la gilogo tetala, veia eau ge koramuli la igogolu tetala ale tikumu ele.
EPH 3:8 Oilo te la valalua te La Tahalo Uru, eau mai la golu bububu, eala moli La Tahalo Uru, te la gilogo moli tetala, eia vauru eau, eia vipouau veia eau ge valolo la valalua me hatavivile ale pou te la maligoma, eau ge valolo egiteu te la merera tetala ale taritigi te la gilogo me la mari te Kraist, ale etato la valalua la vovo kama koramulia ge sivuti la vuhula.
EPH 3:9 La Tahalo Uru ale vipou la papaga tomi, eia masagea veia eau ge valolo egiteu mai ele veia egite ge rovi la gabutatalala tetala ale pala eia tabuli kokovu.
EPH 3:10 Me la merera tetala alele, eia masagea veia egiteu la angelo tai ale pou la uru oata tetala, egite ge hiloa veia la gabutatalala tetala eia malau, ale eia puruti soio te la valalua me hatavivile tetala ale egite isa moliti, egite vipuhi tigiti.
EPH 3:11 Me ale la masasagala te La Tahalo Uru ale tabuli palati te la silokola, eia igoie puru seseleti oio te La Uru gatou e Iesus Kraist.
EPH 3:12 Ale etato gabu tikumuti la pileho tetala, eia koramulia veia etato ge magiri te la lagu La Tahalo Uru, etato kama ge taga.
EPH 3:13 Ale tomi ele eau valoloti le amutou ovola, me alele eau kaka vagari amutou veia amuto umala ge ilo buruko la iligiligi taku ale eau pogatia te la kilisi. Eau gabu la iligiligi ele, la vuhula eau valolo amutou, me amuto balava te la ilolo la merera la mahulila te Kraist.
EPH 3:14 Tio, eau toto tulu te la lagule Tama gatou.
EPH 3:15 Eia La Uru, me eia toi la isa giteu e ururu tomi ale egiteu la vuhu la maratatila te la maututula tomi. Eia visibitala tai egiteu la angelo ale oata tetala.
EPH 3:16 Eau kaka tavu e Tama gatou maie veia oio te la tilalau tetala ale taritigi, eia ge abi isahari la vibalavala, me la vibalavala tetalale, eia ge sugu taroa mutou mai la vagagarila tetala. Me mai moli ele La Kalulula ge igo tivura la kalulu mutou, amuto ge rovi sesele la vagagarila te La Tahalo Uru veia eia uru. Tio me oio vola e Kraist ge mou sesele oilo tamutou, la vuhula amuto sau tolati la merera tetala.
EPH 3:17 Eau kaka vagari tavu e Kraist veia eia ge mahuli sesele oilo tamutou ale tautaulailo tetala. Mai ele, la gilogo tetala eia ge kusi tataho oio tamutou, amuto ge puhi tataho la valalua me hatavivile tomi, amuto ge sau tola vagari tai e Kraist, la tautaulailo tamutou eia ge mai la ua la obu ale otaloti te la magasa ale taritigi.
EPH 3:18 Oio vola amutou me egiteu la valalua me hatavivile tomi te La Tahalo Uru ge rovia veia la gilogo te Kraist tavu amutou eia uru, eia tikumu, eia taritigi pepeho sesele.
EPH 3:19 Me eau kaka tavu tai e Tama gatou veia la gilogo tetala ge volu oilo tamutou, amutou ge la tahalo me la tavile la gilogo sesele mai e Iesus, me la gilogo tetala ale uru ele, etato la tahalo la vovo kama koramulia ge rovi la vuhula.
EPH 3:20 La vagagarila te La Tahalo Uru eia pouti tegatou, eia visibitala la igogolu ale uru, ale etato la tahalo la vovo kama koramulia ge rovi tomi la vuhula, teale eia malulu, eia tikumu tai.
EPH 3:21 Taritigi soata te La Tahalo Uru, la valalua me hatavivile te la lotu ge vaisale molia, la vuhula eia vikapopoti letatou, etato ge vaisale molia, kara ale mulimuli, la kaluvula ge ouka.
EPH 4:1 Eau pou te la luma la kilisi, la vuhula eau valolo amutou te la isa La Uru gatou. Eala moli eau kaka vagari amutou veia ale La Tahalo Uru tolati amutou soio te la vulovulo ale maroka, taritigi amuto ge pou tataho moli mai ele.
EPH 4:2 Mai amuto ge gogo e tabarabara mutou, tio amuto ge vipuhi tigi tataho megiteu, amuto umala ge pou tavu moli la vareagila, amuto ge gabu tikumu egiteu e tabarabara mutou ele.
EPH 4:3 Oio te La Kalulu La Marokala, amuto isa moli, me alele amuto ge vagari veia la merera isasa umala ge barautu lua lou amutou, eala moli amuto ge isa moli, la tia mutou oilo ge malilo tataho.
EPH 4:4 La vuhula te la lotu te Iesus, etato isa moli, me La Kalulu La Marokala omai tegatou eia isa moli. La Tahalo Uru hiloviti amutou te la paga isa moli, ale etatou tomi mulimuli ge goio tetala.
EPH 4:5 La Uru gatou e Iesus tai eia isa moli sekela, la merera tetala etato ge sau tolea, eia isa moli, me la vuluhi te la isale Kraist tai eia isa moli.
EPH 4:6 Me La Tahalo Uru tai ale e Tama gatou tomi, eia tai isa moli sekela, eia mou oilo tegatou, eia mamuga etatou tomi mai alele.
EPH 4:7 Eala moli La Tahalo Uru sigilitia gatou tomi isasasa la gilogo tetala mai ale e Kraist veia ge vitabari letatou ovola.
EPH 4:8 Mai La Buk Tabu Ale Pala eia veia te Kraist, e Latu La Tahalo Uru maie: Eia vaubi kaluvuti, eia goata lou te Tamala, eia puli tai egiteu la gima ale eia lao tola egiteu, me la golugolu tai ale eia seri taroa te la mautu la gima, eia tabaritia soio tegiteu la valalua me hatavivile.
EPH 4:9 (La Buk Tabu eia veia mai ele, me la merera ale “goata”, la masovala eia mai ale te Kraist eia gotalo pala muga, eia peho, egite ulaia, eia mahuli rivu lou.
EPH 4:10 Eia goata lou te Tamala, oata te la ilo la lage, veia ge vipuru la gabutatalala tomi te Tamala. Me ale e Iesus moli ele ale gotalo pala muga, eia vibisi lou eia.)
EPH 4:11 Me La Tahalo Uru vaabi soio tegatou la valalua me hatavivile tetala La Kalulu La Marokala, veia ge vivagari etatou te la tabarila tetala maie, veia isahari ge la bilalaha tetala, isahari ge veipala la gabutatalala tetala, isahari ge valolo la valalua me hatavivile la merera tetala, isahari ge vibaumuli soio te la valalua me hatavivile te la lotu, veia isahari lou ge vimari la valalua me hatavivile te la merera tetala.
EPH 4:12 Me oio volale la valalua me hatavivile te La Tahalo Uru ge vikapopo ge raragi tataho veia ge vahiliti la igogolu te Kraist, veia la maratatila te Kraist eia ge magiri vagari.
EPH 4:13 Me mai moli ele etato ge sagaiti tataho mai e Kraist, etato ge isa moli teale etato sau tola la merera te La Tahalo Uru me etato rovi tataho e Latula e Iesus Kraist.
EPH 4:14 Etato kati ge mai egiteu e gulikiliki veia la merera ale mave ale mave ge sibitala, veia eia ge pigi lokeloke la uaga tegatou mai la gasi. Umala tai veia la visigologolola ge vai visavere etatou. La vuhula la valalua me hatavivile usu oiole masagea veia ge rara la merera la visigologolola mai la vuo, ge vitilo amutou oio vola.
EPH 4:15 Eala moli etato ge pahutu tigi, me la merera ale etato totoia te la hare gatou ge la merera ale sesele moli, me etato ge toi gogogo taia soio tegiteu e tabarabara gatou. Mai etato ge igoa mai ele, etato ge sagaiti sesele te la vulovulole Kraist, eia la gama gatou la valalua me hatavivile tetala.
EPH 4:16 Oio te la gamalale, la vovola tomi moli eia vitagu solo tavu tataho moliti, la limala, la vahala, la matala me la baututu la vovola tomi mai ele, egite ge vaigogolu tataho tomi moli. Me mai tai ele etato la valalua me hatavivile tetala ge visuli baoli, etato mai ale isa moliti, mai alele la vovole Kraist eia sibitala vagariti, mai te la vulovulo gatou ale vagari te la gilogo tetala ale uru.
EPH 4:17 Eau tutu tola vagaria mutou te la isa La Uru gatou veia amuto umalati ge igo bububu mai egiteu la valalua la maligoma.
EPH 4:18 La gabutatalala tegiteu eia la golu bulalahu, me la maligoma uru eia pigi robo egiteu. Egite kama rovi la mahulila te La Tahalo Uru, la vuhula egite vareagi, egite poke tarotia la merera tetala.
EPH 4:19 Egite kati rovi la gauru ale taritigi, eala egite goiloti te la vulovulo tomi ale kama kokora, mai te la mata bulakalakala, la para osaosala, egiteu la iruru tomi aleie egite goilo hariti ovola.
EPH 4:20 Eala moli amutou, e Kraist kama tovo le amutou te la gauru alele, ouka.
EPH 4:21 Ale amuto lolotia tamiteu, la merera moli tetala, mai la gauru sesele te Iesus.
EPH 4:22 Amite vimari tatahoti amutou veia amuto isasasa ge kai taro la vulovulo mutou ale pala, la vuhula la masasagala te la vovo eia igo gegeruti amutou.
EPH 4:23 La kalulu mutou isasasa oilo eia ge vulo halaba tataho.
EPH 4:24 Amuto ge vulo halaba, la vulovulo mutou isasasa ge sibitala maroka, mai la vulovulo La Tahalo Uru sesele. La vulovulo mutou ge matata sesele, eia ge maroka, mai la vulovulo La Tahalo Uru.
EPH 4:25 Mai ge mai ele, amuto umalati ge pou tavu la visigologolola, eme ge vikara sesele soio tegiteu e tabarabaramu, umalati visigologolo! La vuhula amuto isa moliti.
EPH 4:26 Mai eme ge igo totolo, eme ge piligia, eme soukama tilo te la iruru. Mai eme igo totoloti e tabaramu, umala la mata la haro ge roro me la igototolola taume ge soloio te la hatemu ele.
EPH 4:27 E Satan eia soukama goilo te la tiamu veia ge vulome mai la mautu tetala loue!
EPH 4:28 Mai eme la tahalo la pakalila, eme umalati pakalikali. Taritigi eme ge pou tavu moli la igogolu isa ale taritigi, me la vavua la igogolu taume ele ge suli egiteu e tabarabaramu ale pou la savelela.
EPH 4:29 Umalati gilogilo, umalati vikara bububu. La merera tamutou eia ge viteteli tataho moli egiteu e tabarabara mutou, egite ge loloa, egite ge vagari lou, egite mai ale pogati la visuli oio te la merera tamutou ale taritigi ele.
EPH 4:30 Umala tai amuto ge vailo buruko La Kalulu La Tahalo Uru Ale Maroka, la vuhula eia la irovilala te La Tahalo Uru, eia pouti tamutou veia te la tapasi la haro, La Uru ge hilovi tataho amutou veia amutou tetalati.
EPH 4:31 Umala eme ge hate mamasi, umala eme ge igo totolo, umala eme ge vaigo, umala eme ge virere taitali la isa giteu e tabarabaramu, me umala tai veia eme ge igo gerugeru isasa, veia eme ge vikara kukukumu tai, umalati.
EPH 4:32 Eala moli amuto ge vipuhi tigi moli. Mai e tabaramu isa igo la iruru soio taume, eme ge vimavulaha taroa la iruru ale eia igotia soio taumele, la vuhula La Tahalo Uru vimavulahati amutou te la iruru tamutou isasasa.
EPH 5:1 La Tahalo Uru masaga sesele amutou, eia puliti amutou soio tetala veia amutou ge e latatula. Mai alele eia taritigi pepeho veia amuto ge abi tavu la vulovulole Tama mutou.
EPH 5:2 Me amuto ge tilimuli e Kraist mai ele veia amuto ge gogo la valalua me hatavivile tomi mai ale e Kraist eia gogoti amutou, ale eia peho robo amutou, eia rouale Tamala la pileho tetala.
EPH 5:3 Eala moli kabili tamutou la valalua me hatavivile te La Tahalo Uru, eia kama taritigi veia la rere mutou ge tali te la vulovulo ale kama kokora veia isahari tamutou veia ge mata bulakalaka, isahari veia ge para osaosa, me isahari veia ge igo vilagilagila la golugolu tegiteu e tabarabara gite.
EPH 5:4 Amuto umala ge gilogilo, umala ge vikara bububu, umala tai ge veimulimuli isasa, la vuhula eia kama koramulia veia la valalua me hatavivile te Kraist ge toi la merera alele, eala moli la vikararala tamutou ge te la vaisalela moli tavu La Tahalo Uru.
EPH 5:5 Taritigi amuto ge matagaga mai ele veia la tahalo la iligo barala eia kama ge sau tola viruru la vibalavala te La Tahalo Uru mulimuli, ale eme ge lagu tavu la vulovulo la mata bulakalakala, la para osaosala, me la igo vilagilagila tai. La vuhula eme mai ale kau tavutiamu la golugolu tegiteu e tabarabaramu, eme mai ale vuloti, eme lotu tavutia la paga ale eme kau tavutiamu tegiteu e tabarabaramu, mai alele La Tahalo Uru kati ge vibalavame.
EPH 5:6 Umala tai amuto ge roromuli egiteu ale masagea veia ge visigolo le amutou la merera bulalahu veia la vulovulo la iruru eia taritigi. Umala amuto ge goio hagagavi tegiteu la tahalo la iruru ale tou la merera te La Tahalo Uru, la vuhula La Uru ge baha taro la igototolola tetala ale tivura sotalo tegiteu ele.
EPH 5:8 Amuto pala pou te la maligoma, eala moli ale amuto goiloti te La Tahalo Uru, amuto mai ale pouti te la matagaga, eala la vulovulo mutou ge poga tavu sesele la vulovulo la matagaga lou.
EPH 5:9 La vuhula, la matagaga eia visibitala la vulovulo ale taritigi, la vulovulo ale maroka te la tia mutou ele.
EPH 5:10 Amuto ge tovo lalai veia ge matagaga tataho te la masasagala te La Tahalo Uru, mai amuto ge tilimulia, eia ge lege sisigi le amutou.
EPH 5:11 Amuto ge poke taro la vulovulo la maligoma, amuto ge vagari pepeho veia ge veipala la iruru tomi mai ele, egite ge tabuli palala, isa kama ge tabuli kokovu.
EPH 5:12 Me la iruru isahari ale kama kokora viruru, egiteu ale pou te la maligoma igo kokokovu taia, me etato mahela pepeho te la tiloiloila.
EPH 5:13 Eala moli amuto ge visibitala la matagaga soio tegiteu ele, la valalua me hatavivile ge matagaga ovola veia la vulovulo giteu ale kama kokorale eia kama maroka mai la vulovulo La Tahalo Uru. Mai ale la merera isa te la valalua me hatavivile te La Tahalo Uru, egite veia tegiteu ale pou te la maligoma maie: Eme ale mamavutale, taritigi eme ge hagolo, Eme umalati peho totomu la mavutala mai ale peho, La matagaga te Kraist ge paga veime.
EPH 5:15 Tio, mai alele, eia taritigi pepeho veia amuto ge baumuli tigi amutou te la vulovulo mutou, amuto umala ge pou mai ale paua, eala moli amuto ge pou tataho, teale amuto pouti te la matagaga.
EPH 5:16 Amuto ge raragi tataho veia ge vituria giteu la valalua me hatavivile la gauru te La Tahalo Uru ale taritigi, la vuhula la imamala ale igoie eia kama kokora, la matagaga bakisi ouka, amutou moli.
EPH 5:17 Umala amuto ge pou paua, amuto ge gabutatala tigi la masasagala te La Tahalo Uru soio tamutou, veia amuto ge tilimulia.
EPH 5:18 Umala tai amuto ge liu paua, la vuhula amuto souka igo galolo, eala moli la tia mutou ge volu moli La Kalulu La Marokala.
EPH 5:19 Me la merera ale taritigi oio te la bilau la lotu, amuto ge toi bibibia soio tegiteu e tabarabara mutou, me amuto ge bau bibibi taia veia amuto ge vaisale La Uru mai ele, la tia mutou ge volu sesele la sagegela tavu La Tahalo Uru.
EPH 5:20 Me amuto umala tai ge maila te la tiloiloi la sagegela soata te La Tahalo Uru e Tama gatou, te la isale Iesus Kraist La Uru gatou, veia la gilabu ale mave La Tahalo Uru ge visibitalea soio tamutou, amuto ge vaisale molia ovola.
EPH 5:21 Mai amuto roromuliti e Kraist, eia taritigi pepeho veia amuto ge viroromuli baololi tai le amutou lou.
EPH 5:22 Mai amutou e hatavivile roromuliti e Kraist, taritigi pepeho veia amuto ge roromuli tai egiteu e haruarua mutou.
EPH 5:23 La vuhula e Kraist eia mai la obu la lotu, etatou la halalala, eia vimahuli etatou tomi la valalua me hatavivile tetala, me mai tai alele la tahalo eia mamuga e rutula.
EPH 5:24 Me mai tai la valalua la lotu egite roromuli e Kraist, taritigi egite hatavivile tai ge roromuli e haruarua giteu te la merera tomi.
EPH 5:25 Amuto la valalua ge masaga tatavu sesele egiteu e ruturutu mutou ele, mai sesele ale e Kraist masaga tavu sesele la valalua me hatavivile tetala, eia peho robo etatou,
EPH 5:26 veia ge igo maroka la valalua me hatavivile te la lotu tetala mai ele. La merera tetala eia mai la lalu e Kraist vipupuru tataho la lotu tetala ovola,
EPH 5:27 veia ge pulia soio tetala, mai la tahalo eia puli e rutula, eia marasa, eia maroka.
EPH 5:28 Mai ele, eia taritigi pepeho veia amuto la valalua ge gogo pepeho egiteu e ruturutu mutou mai ale amuto gogo rivu lou amutou. La vuhula ale eme baumuli e rutumu, eme mai ale baumuli rivu lou eme.
EPH 5:29 Etato kama koramulia ge gima rivu lou la vovo gatou, eala moli etato vibaumuli tataho lou la vovo gatou. Mai alele e Kraist baumuli tai la lotu tetala.
EPH 5:30 La vuhula eia la obula me etatou la halalala, etato mahuli moli oio tetala.
EPH 5:31 Mai La Buk Tabu Ale Pala eia veia maie “Mai alele la tahalo ge hiliti taro e tamala me tilala, eia ge puli e rutula, egira ge isa moli.”
EPH 5:32 Ale la merera isa eia tikumu sesele, eala moli eia soioge puru seseleti somai te Kraist mai ale eia puli la lotu tetala mai la tahalo eia puli e rutula.
EPH 5:33 Eala moli eia puru somai tegatou tai veia eme la tahalo eme ge togo sesele e rutumu, eme ge gogo molia, baumuli tatahoa, me eme la tavile tai, taritigi eme tai ge togo e haruamu, ge roromuli tataho molia mai ele.
EPH 6:1 Amutou e gulikiliki, amuto ge roromuli tataho egiteu e tatama mutou, e tatila mutou, ale la tabarila te Kraist soio tamutou veia amuto ge igoa, la vuhula la gauru ale, eia taritigi, eia matata.
EPH 6:2 Me te la tururi te La Tahalo Uru ale pala, eia veia maie “Eme ge togo e tamamu, e tilamu.” Me ale la muluga la tururi te La Tahalo Uru ale eia tauti la vibalavala ovola mai isa ge igo seselea.
EPH 6:3 Me la vibalavala ale eia toia oio vola eia maie “Eme ge pou moli la sagegela, eme ge mahuli tabaa te la mautu taume.”
EPH 6:4 Eala moli amutou la valalua me hatavivile, taritigi amuto umala ge kahareharea giteu e latatu mutou, egite soukama ge igo tototolo. Amuto ge vibaumuli tataho egiteu, ge tovo tataho egiteu, ge vimari tai legiteu la gauru te La Uru.
EPH 6:5 Amuto ge roromuli egiteu e ururu tamutou, ge togo tataho egiteu, amuto ge lolo vulai mai ale amuto loloti e Kraist ele.
EPH 6:6 Amuto kama ge roromuli bulalahu mai ale egite hilome, veia egite ge vei tatahome, ouka. Amuto ge gabutatala veia amutou la bilalaha te Kraist, mai alele amuto ge lolo vulai tataho, ge tilimulia mai ele la masasagala te La Tahalo Uru.
EPH 6:7 Mai isa ge bahame, eme ge tuga moli me la sagegela mai e Kraist moli bahame.
EPH 6:8 Etato ge gabutatala tigia veia La Tahalo Uru ge vibalava etatou tomi te la igogolu ale etato ge igoa, eia kama gabu tikumu isa veia eia uru, me isa lou veia eia bisi.
EPH 6:9 Eala moli amutou e ururu ale babaha egiteu, taritigi amuto ge togo tai egiteu la bilalaha tamutou, amuto umala baha kahareharea giteu veia egite ge taga amutou. La vuhula La Uru mutou tomi eia oio, eia pou oata te la ilo la lage, me eia kama tabari amutou veia isa eia uru, me isa lou eia bisi.
EPH 6:10 La tapasi la merera taku soio tamutou eia maie: Amuto ge magiri vagari vikapopo le Kraist, ge vipoke taro te la vaubila te La Tahalo Uru. E Kraist ge la toro mutou te la vaubilale, amuto ge magiri vagari sesele, la vuhula amuto magiri vikapopo me Kraist.
EPH 6:11 Amuto ge sau tola la galiau te La Tahalo Uru, amuto ge magiri vagari, amuto kama ge paririri ale la gima ge kedi tavu amutou te la vaubila.
EPH 6:12 Etato kama vaubi soio te la tahalo la vovo, ouka, etato vaubi soio tegiteu la bilalaha te Satan ale vagari sesele, la karakara tetala, isahari ururu isahari bisisi, egite mou oata te la ilo la lage. Egite visibitala la maligoma omai te la maututula, egite vaubi tai oata veia ge vipou tai la maligoma oata te la ilo la lage.
EPH 6:13 Eala eia taritigi veia amuto ge sau tola la galiau te La Tahalo Uru, eia ge galiau robo amutou, veia mai la haro la vaubila ge sibitala, amuto ge vaubi vagari, isasa kama ge hele.
EPH 6:14 Mai alele amuto ge raragi tataho te la vaubila. Amuto ge kisipou tataho. Mai alele amuto ge lagu tavu moli la vulovulo ale matata, amuto ge raragi tataho te la vaubila soio te Satan. Mai la galiau ge tau robo la magoro mutou, eia mai la vulovulo ale maroka ale tau robo le amutou te la vaubila te Satan.
EPH 6:15 Me la vaha mutou tai ge vagari mai ale amuto ge raragi tataho veia ge hari soio te la vaubila, mai ale amuto raragi veia ge valolo la merera te Kraist ale taritigi, ale etato me La Tahalo Uru kati vipou baa.
EPH 6:16 Eala moli te la haroharo tomi amuto ge tamamasi moli la galiau te La Tahalo Uru, mai la merera tetala ale etato gabu tikumu tomia veia eia sesele. La galiau tetala uru ele, eia ge tau robo la vovo mutou, egiteu la gata ale mata kalulusa la gima labea, eia kama ge tubu te la kabili mutou.
EPH 6:17 Amuto ge gabutatala moli e Kraist, ale eia peho robo amutou, eia rou rivu amutou taro la limale Satan. Mai alele La Tahalo Uru ge tau robo la gama mutou te la vaubila, la paga isa kama ge tubu ovola. Me la merera te La Tahalo Uru ale La Kalulu La Marokala eia veipalatia mutou, amuto ge kamu tavua mai la gata, amuto ge vaubila.
EPH 6:18 Me amuto kama ge maila te la kilaka te la isa La Kalulu La Marokala veia la rova amuto ge savelea eia ge abia mutou. Amuto ge mata kaseka, ge kaka bibibi la visuli te La Tahalo Uru soio tegiteu tomi la valalua me hatavivile tetala.
EPH 6:19 Amuto ge suli tai leau la kilaka te la haro ale La Tahalo Uru ge abiagu la gauru ale omai veia eau ge veipala tataho la valolo ale taritigi te La Tahalo Uru eia tikumu. Amuto ge kaka veia la haro ale ge sibitala, eau kama ge taga, eau ge koramulia ge veipala la merera te Kraist ale tikumu sesele, eia ge tubu.
EPH 6:20 La vuhula eau la bilalaha te Kraist te la igogolu la valolo te la merera tetalale, eala moli eau pou te la luma la kilisi, la sen oioti te la limagu me la vahagu. Mai alele eia taritigi veia amuto ge kaka veia eau ge igo seselea, veia eau ge valolo vagari, veia eau kama ge taga.
EPH 6:21 Amuto soioge masagea veia ge rovi la pulolou taku omai veia eia mave, me egite viligiau mave. Mai alele eau bahati e tabara gatou uru e Titikas, eia isa la bilalaha te La Uru ale taritigi pepeho sesele,
EPH 6:22 me eau bahatia veia eia ge vei matagagea mutou la pulolou tamite me tabarabara gatou ale omai, veia eia ge viteteli lou amutou mai ele, amuto ge mata kaseka lou.
EPH 6:23 Taritigi La Tahalo Uru, e Tama gatou, egira me Iesus Kraist La Uru gatou ge abia mutou la sagegela tetala ale uru. Me oio vola la tia mutou e tabarabaragu tomi oiole ge malilo tataho te Kraist, amuto ge sau tola sesele la merera tetala tomi.
EPH 6:24 Taritigi pepeho tai veia amutou ale rovi La Uru gatou e Iesus Kraist, me amuto masaga seselea, la gilogo te La Tahalo Uru ge pou tamutou tomi, amuto tomi ge tautaulailo vagari tetala, kama ge maila, la kaluvula ge ouka. Kaluvuti. Eau e Pol.
PHI 1:1 Eiau e Pol, amilua me Timoti, amila la bilalaha moli te Iesus Kraist, amila kekesia mutou la valalua me hatavivile te La Tahalo Uru oio la mautu e Pilipai ale amuto rovi tataho e Iesus Kraist. Amutou e ururu, me amutou la tahalo la visuli tai te la lotu ele, amila kekesi taia mutoue.
PHI 1:2 Amila toi taritigi pepeho soio tamutou veia la gilogo te La Tahalo Uru e Tama gatou, eia ge pou tamutou, la tia mutou oilo ge malilo tataho te la isale Iesus Kraist, La Uru gatou.
PHI 1:3 Ale eau gabutala bibibi moli amutou, eau toia taritigi pepeho soata te La Tahalo Uru.
PHI 1:4 Me ale eau ge kaka veia La Tahalo Uru eia ge suli amutou, eau kaka moli te la sagegela,
PHI 1:5 la vuhula eau gabutatala rivu lou ale amutou vikapopo leau te la valolo la merera la mahulila, sokoa pala amuto lolo vutia, karati igoie.
PHI 1:6 Me eau rovitia veia La Tahalo Uru, eia tau sokoti la gilogo tetala oilo te la tia mutou, me eia kama ge maila kara te la haro la bileula te Kraist, ale eia ge vikaluvu tataho la igogolu tetalale oio tamutou ele.
PHI 1:7 Eia koramuli seselea veia eau ge gabutatala pepeho amutou mai ele, la vuhula eau e tabara mutou sesele. Mai eau ge pou te la luma la kilisi, mai tai eau ge magiri te la vigagiala veia ge toro robo la valolo taku, alele amuto mai ale magiri tomi leau. Etato tomi rovi la gilogo te la Tahalo Uru, ale eia suli etatou.
PHI 1:8 La Tahalo Uru rovia ale eau gabu pepeho amutou ele, la gilabu taku eia uru sesele mai la gilogo te Iesus Kraist lou.
PHI 1:9 Mai alele, eau kaka gogogo La Tahalo Uru veia amuto ge vagari veia la gilogo tamutou ge sagaiti, eia ge uru pepeho, veia la merera ale sesele me la mari tai ale tikumu amuto ge hilovi tataho tomi molia,
PHI 1:10 veia amuto ge rovi tataho la vulovulo ale taritigi. Mai ge mai ele, eia ge suli amutou, la vulovulo mutou ge maroka, amuto ge raragi tataho te la bileula te Kraist,
PHI 1:11 ale la vavua la vulovulole Kraist ge sibitala tomiti soio tamutou veia la valalua me hatavivile ge hiloa, egite ge vaisale La Tahalo Uru ovola.
PHI 1:12 Me amuto tabarabaragu ele, eau masagea veia amuto ge rovia veia la pulolou taku omai te la kilisi, eia suli pepehoti la vahiliti la valolo te Kraist.
PHI 1:13 Ale egite kisiti la limagu ilua la sen veia ge vilai leau te la valolo te Kraist, egiteu e soldia tomi te Sisa ale pahutu roboroboau, egite rovia, me egite soldia tai ale e tabarabara giteu ele lolo taitia, la valalua tomi usu.
PHI 1:14 Me oio te la kilisi taku tai ele, egiteu la valalua me hatavivile te la lotu, egite mata kasekati lou, egite vagari tavu moli la valolo la merera te La Tahalo Uru, egite kati taga.
PHI 1:15 Sesele, eau rovitia veia isahari tegiteu ele valolo bulalahu veia ge vagoata la vikararala tegiteu oata te la valolo taku veia ge tao taluau, egite veia ge mugeau mai ele. Eala moli egite tai usu valolo sesesele moli veia la isale Iesus moli ge vavava,
PHI 1:16 la vuhula egite gogo pepehoau, eala egite valolo moli mai lou eaue. Egite rovia veia eau pou te la kilisi veia ge sau tola la valolo te Iesus oio te la lagu giteu ale egite masagea veia ge tao talu la valolo tetala.
PHI 1:17 Eala moli egiteu ale valolo veia egite ge pepeau, egite masaga molia veia ge vauru lou la isa giteu, egite veia ge vailo buruko lou leau te la kilisi taku.
PHI 1:18 Eala moli eia taritigi pepeho alele! Mai isa ge valolo, la gabutatalala tetala taritigi, me isa lou ge valolo, la gabutatalala tetala kama kokora, ale la golu isa ouka, la vuhula la isale Iesus Kraist eia mai ale vavavati ovola! Mai alele eau ge sagege moli,
PHI 1:19 la vuhula eau rovia veia mulimuli, oio te la vagagari La Kalulu La Marokala, la kilaka tamutou ge lubeau taro la kilisi.
PHI 1:20 Eala moli eau masaga pepehoa veia eau umala ge taga bububu, veia la pileho soukama ge bolehoho eau. Eau so magiri vagari, me eau masagea veia mai eau ge peho, uka mai eau ge mahuli, eau ge vagari moli me oilo vola la valalua me hatavivile ge hiloa, egite ge bole vauru la isale Kraist.
PHI 1:21 La vuhula, te la gabutatalala taku, ale eau so mahulihuli, la torogu moli e Kraist sekela. Eala moli mai eau ge peho, eau balava seseleti, la vuhula eau mai ale hiloti e Kraist ele.
PHI 1:22 Ale eau ge mahuli tabaa lou, eau ge igogolu lou te la valolo. Eala moli ale mave eau ge masaga tavua, la mahulila uka la pileho? La gabutatalala taku mai ale iluati.
PHI 1:23 Isasa, eau masagea veia ge sele molia ge goio ge pou te la balile Kraist, me la gabutatalala alele eia vagari seseleti,
PHI 1:24 eala moli la gabutatalala taku isa lou, eia tikumuti taku, veia eau ge sau tola lou la mahulila te la vovo veia eau ge suli lou amutou e tabarabaragu ele!
PHI 1:25 Ale eau gabu tikumu sekelea, me oio vola eau rovitia veia eau soioge kama ge peho hari, eau ge mahuli tabaa lou vikapopo me amutou ele, eau ge puli lou amutou soio te la sagegela ale uru pepeho lou te Iesus.
PHI 1:26 Mai amuto ge hiloa veia La Tahalo Uru ge lapu rivu louau taro la pileho, amuto ge vaisale pepeho e Kraist Iesus oio vola, ale eau ge pou tomi lou le amutou ele.
PHI 1:27 Amuto ge lagu tavu moli la vulovulo ale taritigi veia la valalua me hatavivile ge hilo amutou, egite ge rovia veia amutou te Kraist. Mai alele, mai eau ge gomai tamutou, uka mai eau ge lolo moli la rere mutou ele, eau ge rovia veia amuto magiri vagariti, la gabutatalala tamutou eia isa moliti te la valolo te Kraist, veia amuto vipoke taro tataho moliti te la vaubila te la valolo tetalale.
PHI 1:28 Amuto kama ge taga egiteu la gima, me oio vola egite ge rovi seselea veia amuto ge sulu egiteu, me La Tahalo Uru ge vimahuli amutou. Ale la irovilala te La Tahalo Uru tavu amutou,
PHI 1:29 ale eia veia amuto kama ge tautaulailo bulalahu soio tetala, eala moli amuto ge ligi tai, la vuhula amutou te Kraist,
PHI 1:30 me amuto goiloti te la vaubila te la isala, ale amuto hilotia pala eau vagari tavua, me ale amuto so lololo loua veia eau souka maila taroa.
PHI 2:1 Mave, isa koramulia ge veia etato kama vitotoko? Ouka. Etato vitau me tabara seseleti, teale etatou tomi te Kraist, eala etato koramulia mai ele ge karasuku baoli etatou te la pou tigila te la isale Iesus. La vuhula etato roviti la gilogo ale uru tetala, etato tomi tai taholati La Kalulu La Marokala, eia suli etatou, me oio vola etato gabutia la gilogo me la mutelela tetala ale uru sesele tavu etatou.
PHI 2:2 Mai alele, eia taritigi pepeho veia amuto ge visauru moli, amuto ge visuli baololi le amutou, amuto ge vipuhi tigi, veia mai eau ge loloa veia amuto igo seselea mai alele, eau ge sagege pepeho ovola.
PHI 2:3 Ale te la pulolou tamutou, amuto umala ge vaigigo, amuto umala ge pakakasa.
PHI 2:4 Eme ge la tahalo la mahelala, eme ge vauru moli e tabaramu, veia eia uru taume. Eme kama ge suli molime, eme ge suli tai egiteu e tabarabaramu.
PHI 2:5 La gabutatalala tamutou ge mai te Kraist Iesus, me la gabutatalala tetala, eia maie:
PHI 2:6 Egira me Tamala mahuliti palati, egira mai ale isa moli. Eala moli eia kama masaga ge pou moli oio te Tamala mai la uru.
PHI 2:7 Eala eia vibisi moli lou eia, veia eia ge la tahalo bulalahu. Eia sibitala omai tegatou, eia mai la bilalaha moli, eia vulo mai la tahalo la vovo.
PHI 2:8 Me ale eia vulo mai la tahalo la vovo mai ele, eia vibisi moli lou eia veia eia ge poga tavu la pileho, mai la masasagala te Tamala, veia eia ge peho moli oata te la tauvalautu mai la tahalo la iruru.
PHI 2:9 Me oio moli ovola e Tamala sagege leia, eia pulia soata veia eia ge pou te la balila. La Tahalo Uru vauru sesele la isala
PHI 2:10 veia la valalua me hatavivile te la maututula tomi, egiteu tai ale pou oata te la bali La Tahalo Uru, me egiteu tai ale pou otalo te Satan,
PHI 2:11 egite tomi ge bole vauru la isale Iesus Kraist veia eia sekela moli uru, veia oio volale la isa La Tahalo Uru sekela moli ge vavava.
PHI 2:12 Amuto tabarabaragu, ale pala eau pou oio tamutou ele, amuto roromuli moliau. Me ale igoie eau kati oio tamutou, taritigi amuto ge vagari tavu sesele la vulovulo La Tahalo Uru, ale eia vimahuliti le amutou ovola. Amuto ge igo tigi, etatou la tahalo la vovo moli, etato souka ge gotigu rivu lou.
PHI 2:13 Etato ge vagari tavu la vulovulo ale taritigi mai ele, la vuhula La Tahalo Uru mahuliti oilo te la tia gatou. Eia igogolu oilo tegatou veia la masasagala tegatou ge poga sesele la masasagala tetala.
PHI 2:14 Amuto ge vaigogolu tomi, la vikara silalahala ge umala, la tahi tarola tai ge umala.
PHI 2:15 Mai ge mai ele, egite isa kama koramulia ge veia amutou la tahalo la iruru, me amutou ge e latatu La Tahalo Uru ale maroka, amuto pou kabili tegiteu ale la vulovulo giteu kama matata.
PHI 2:16 Amuto ge magiri kabili tegiteu mai la matagaga, ale la valalua me hatavivile ge tuga tavua mai ale amuto vituria giteu la merera la mahulila. Mai ge amuto ge igoa mai ele, eau ge lege sisigi le amutou oio te la mata La Tahalo Uru te la haro te Kraist, ale eia ge beu rivu loua, la vuhula oio te la vulovulo mutou mai ele, amuto ge veipalea veia eau kama valolo bulalahu amutou.
PHI 2:17 Eau kama rovia veia egite ge biliau ka ouka. Soioge la kasosogu ge pagegele, mai ale egite tigi taro la lalu veia ge igo tigi la vaabila ale egite gutua oata te la poro veia la sosobula ge goata te La Tahalo Uru. Amuto tautaulailo seseleti te La Tahalo Uru, me oio volale eau veia la vaabila tamutou soio te La Tahalo Uru, eia la vulovulo mutou ale taritigi ele. Mai eau ge peho, la pileho taku eia ge mai la lalu ale igo tigi la vaabila te la vulovulo mutou, me oio vola eau ge sagege vikapopo le amutou.
PHI 2:18 Me oio tai ovolale, amuto ge sagege vikapopo tai leau, ale La Tahalo Uru hiloviau veia eau ge piligi la mahulila taku soio tamutou.
PHI 2:19 Mai La Uru e Iesus ge masagea, eau ge baha hari moli e Timoti soio tamutou ele, eia ge beua somai taku ge gilemuliagu la pulolou tamutou, eau ge mata kaseka lou.
PHI 2:20 Isa lou omai ouka ale gabu pepeho amutou mai eau, eala moli e maura moli e Timoti ele.
PHI 2:21 Egite usu gabutatala pepeho moli egiteu lou, isa kama gabu tikumu la igogolu te Kraist.
PHI 2:22 Eala moli e Timoti ele, amuto rovitia eia sagaiti tavu moli la visuli taku, amila valolo la merera te Kraist, amila vaigogolu tomi mai e tau me latu sesele.
PHI 2:23 Eala eau masagea veia ge bahea soio tamutou ele, eala moli eau ge pou muga ge hiloa veia egiteu e Rom ge igo la rova somai taku.
PHI 2:24 Eala moli eau rovia veia soioge kama ge tabaa veia egite ge lubeau me eau sesele ge goiole ge hari lalai amutou, mai la masasagala moli te La Uru, etato ge hilo mugea.
PHI 2:25 Me e tabara gatou e Paprodaitas tai ele, eia tikumu taku veia eau ge baha rivu taia soio tamutou. Eia la tahalo taku sesele. Amila vaigogolu tomi, amila vipoke tataro moli te la vaubila te Kraist, eia la bilalaha tamutou ale amuto bahea somai veia eia ge suliau.
PHI 2:26 Eau veia ge baha rivua, la vuhula eia gabu pepeho amutou, me eia ilo buruko ale amuto so gabutatalea veia eia lea, mai ale amuto loloa pala.
PHI 2:27 Sesele, eia pala lea, hagagaviti eia ge peho, eala moli La Tahalo Uru gogoa, eia vimahulia. Me oio volale La Tahalo Uru eia gogo pepeho tai eau, la vuhula eau kama koramulia veia ge bole la iloburukola isa lou mai e Paprodaitas ge peho taroau.
PHI 2:28 Eala eau vagari pepeho veia ge baha rivua, veia amuto ge hilo loua, amuto ge sagege pepeho, me oilo vola tai eau kati ge ilo buruko le amutou ele.
PHI 2:29 Ale eia ge guvi tamutou, amuto ge rara tavua, ge vararapu pepehoa, oilo te la isale Iesus, La Uru gatou. Amuto ge togo sesele egiteu ale mamai e Paprodaitas ele,
PHI 2:30 la vuhula eia sugu taro la mahulila tetala soio te la igogolu te Kraist veia ge magiri te la muli mutou ale amuto kama koramulia ge gomai, eia suli moliau, eia kama gabutatala eia.
PHI 3:1 La merera taku isa lou soio tamutou e tabarabaragu ele, eau masagea veia amuto ge sagege bibibi moli te la isa La Tahalo Uru. Eau kama gabutatalea veia la merera ale eau so kekekesi molia mutou oatae, veia umala eau ge vei loua mutou vakasa lou ovola, ouka. La mererale, eia ge lago robo tataho amutou, eia maie:
PHI 3:2 Amuto ge vibaumuli tigi tegiteu la tahalo la vareagila ale la vulovulo giteu kama kokora. Egiteu moli la tau Iuda ale veia amuto ge koro la vovo mutoue, amuto ge vibaumuli tigi tegiteu ele.
PHI 3:3 Ale La Tahalo Uru vimaroka etatou, etato abiti la irovilala tetala oio te la vulovulo gatou, kama te la vovo gatou, la vuhula etato lotu tavu seselea oio te la matagaga te La Kalulu La Marokala. Etato sagege moli la matagagala te Kraist Iesus, etato kati gabu tikumu la mari papaila te la vovo.
PHI 3:4 Mai eau ge masagea veia ge gabu tikumu la merera tegiteu e ururu mai ele, eau kama ge boto. Mai la tau Iuda isahari oiole ale tilimuli sesele la vulovulo giteu e ururu veia ge visagege La Tahalo Uru ovola, eau mamuga sesele tegiteu tomi.
PHI 3:5 E tila taposeau, eau la tau Iuda sesele, te la hilile Beniamin, hiloa, e tila me tete tai loio la mautu sesele tamite Iuda. La logo iualu polo, egite koro la vovogu mai la irovilala tamite Iuda loue. Me te la imoimo la merera tomi te Moses tai ele, eau mari tomi molia, eau lagu tavua, la vuhula eau e pariseo isasa.
PHI 3:6 Eala eau pala vagari tavu sesele la viligiligi la valalua me hatavivile te la lotu te Iesus. Eau la vulovulogu taritigi moli te la merera te ururu, eau la iruru isa ouka.
PHI 3:7 Eala moli oio te la tautaulailo taku ale halaba soio te Iesus, eau poke taro tomitia la pakakasala taku alele, eau kati gabu tikumua veia eau la tahalo isasa, oukati.
PHI 3:8 Eia sesele moli, la golu isa lou kama ge uru te la gabutatalala taku, eala moli ale eau rovitia veia e Iesus Kraist, eia La Uru taku. Ale eau valolo te la isala, eau kama ilo buruko ale eau kati tahola isa la paga. Eau sibitalati mai la morivava sesele, eala moli eau kama gabutatala papai, teale la paga ale eau taholea eia mai la golu bulalahu moli te la gabutatalala taku, la vuhula eau masaga molia veia eau ge balava sesele oio te Kraist,
PHI 3:9 veia amila me Iesus ge isa moli. Eau kamati ge toi eau veia eau taritigi, veia oio moli te la vagagarila taku lou eau sibitala maroka, ale eau lagu tavu la merera te ururu. Eala moli ale eau gabu tikumu la merera te Kraist sekela moli, alele La Tahalo Uru ge koramulia ge igo maroka la vulovulogu.
PHI 3:10 Me la golu isa sekela moli eau masagea, veia eau ge rovi sesele e Kraist. Me la vagagarila te La Tahalo Uru ale eia vimahuli rivu e Kraist te la pileho tetala, eia ge vivagari tai leau. Ale e Kraist pala gabu la iligiligi te la pileho tetala, eia tubu tai te la vovogu, la vuhula eau tai gabuti la iligiligi ale eau valolo la merera tetala. Me ale e Kraist piligi la mahulila tetala, eau mai tai ele ale eau piligiti la vulovulogu ale pala,
PHI 3:11 veia eau ge hilo tai la mahuli rivula ale La Tahalo Uru ge vimahuli tai eau taro la pileho.
PHI 3:12 Eala moli eau kama gabutatalea veia eau mai ale sau tolati la vibalavala tomi te Kraist, ouka. Me la igogolu te La Tahalo Uru ale eia ge vimaroka eau, eia souka kaluvu. Eala moli eau mai ale so harari veia ge poga sesele la vibalavala te Kraist, veia eau ge sau tolea mai ale eia sau tola taiti eau.
PHI 3:13 Amuto tabarabaragu, taritigi amuto ge rovia veia eau kama gabutatalea veia la vibalavala te La Tahalo Uru, eau mai ale abitia. Eala moli eau kati ge gotigu rivu lou, eau vagari moli veia ge hari moli solagu veia ge sau tola la vibalavala ale oio te La Tahalo Uru.
PHI 3:14 La vuhula eau masaga pepehoa veia la hirari taku ge kaluvu, eau ge sau tola moli la vibalavala te La Tahalo Uru ale eia tola etatou soata tetala veia etato ge sau tola la mahulila ale sesele, e Kraist visibitalea te la pileho tetala oata te la tauvalautu.
PHI 3:15 Me oio volale, eia koramuli seselea veia etato tomi ale sagaititi te la merera te Kraist ge gabutatala tigi mai ale eau veitia mutou ovola, ale eau tovo mulia mutou te la vipepepela mai ele. Eala moli mai amuto isahari ge tahi taro la merera taku ele, ale la golu isa ouka, la vuhula La Tahalo Uru ge vimatagaga lou amutou ovola.
PHI 3:16 Mai etato tomi ge hari moli solagu loue, la vulovulo gatou ge maroka moli mai ale etato matagagati ovola, sokoa pala, kara ale igoie.
PHI 3:17 Amuto tabarabaragu, taritigi amuto ge sovei eau te la vulovulogu ale taritigi. Amuto ge hilovi tigi la valalua me hatavivile ale la vulovulo giteu eia mai seseleti la vulovulogu, amuto ge mai tai egiteu.
PHI 3:18 La vuhula la vikararala isasa eau veitia mutou vaka usuti pala, me eau ge vei loua mutou gageie, la masaligu pagegeleti lou ovola. Egiteu la valalua me hatavivile isahari te Iesus, la vulovulo giteu eia vuloti mai la vulovulo giteu ale gima e Kraist me la pileho tetala oata te la tauvalautu.
PHI 3:19 La Tahalo Uru ge vilai egiteu ele, egite ge sululu. Egite gabu tikumu moliti la vulovulo ale kama kokora te la vovo, egite la tahalo la ali pepeila, egite pakakasa, me egite goio vei tataho rivu lou egiteu ovola, egite kama mahelala.
PHI 3:20 Eala moli etatou ale te Iesus sesele, la mautu tegatou eia oata moli te la mori. Me la tahalo la vimahuli tegatou, eia ge sibitala lou loata, eia e Iesus Kraist moli, La Uru gatou, ale etato pou taitalia.
PHI 3:21 Eia ge vulo halaba lou la vovo gatou ale kama kokorale, veia etato tomi ge la riau sesele mai lou eia. Ale eia kama vagari tetala, la vuhula eia sau tola la mori me la magasa tomi te la limala.
PHI 4:1 Tiele, eia taritigi pepeho veia amuto tabarabaragu ale eau gogo amutou, eau gabu pepeho amutou, taritigi amuto ge magiri vagari te Iesus, La Uru gatou.
PHI 4:2 Eau kaka vagari amulua la tavile uru iluale, e Vodia, e Sintiki, amula ge vipuhi tigi lou te la isale Iesus, La Uru gatou.
PHI 4:3 Me eau kaka tai eme, e vikilipi taku sesele ale pou oio e Pilipai ele, eme ge suli egirua veia egira kati ge vaigo, la vuhula egira pala vaigogolu vagari vikapopo le amiteu te la valolo te Iesus, mai amiteu me Klement, me egiteu la tahalo la visuli tomi ale la isaisa giteu La Tahalo Uru kekesi tolatia te la buk la mahulila.
PHI 4:4 Taritigi pepeho veia te la haroharo tomi amuto ge sagegege moli te la isale Iesus, La Uru gatou. Me eau ge vei loua mutou vakasa lou maie veia amuto ge sagege!
PHI 4:5 Eala moli amuto ge la tahalo la pou makokovula, la tahalo la mutelela tai. Hagagaviti La Uru gatou ge beu rivua.
PHI 4:6 Amuto umala ge gabutatala papapai te la mahulila tamutou te la paga isasa mai la ilali me la lavalava. Amuto ge vaisale moli La Tahalo Uru, me la paga ale amuto savelea, amuto ge kaka molia tetala.
PHI 4:7 Me oio moli ovola, La Tahalo Uru ge igo malilo tataho la tia mutou oilo, veia la gabutatalala tamutou ge magiri vagari oio te Iesus Kraist moli sekela, amuto kama ge marapa. La visuli uru ele, etato la tahalo la vovo kama koramulia ge igoa, La Tahalo Uru moli sekela koramulia.
PHI 4:8 Eala moli la tapasi la merera taku tavu amutou e tabarabaragu ele, eia maie: Amuto ge igo volu la gabutatalala tamutou me la vulovulo ale maroka maie: La vulovulo ale taritigi, la merera ale sesele, me la gauru ale matata. La valalua me hatavivile ge hiloa, egite ge rovia veia la pulolou tamutou eia maroka, eia marasa, egite ge vei tataho amutou te la vulovulo mutou mai ele, me La Tahalo Uru tai ge sagege le amutou.
PHI 4:9 Amuto ge igo seselea mai ale eau vahiloti le amutou ovola, te la merera taku te la valolo, me te la vulovulogu tai ale eau pala pou oio tamutou. Mai amuto ge igo seselea mai ele, La Tahalo Uru ale igo malilo tataho la tia gatou, eia ge pou tamutou.
PHI 4:10 Eau sagege pepeho, eau vaisale sesele e Kraist, La Uru gatou, teale igoie amuto gabutalati lou eau. Sesele amuto kama vaula leau, eala moli la gauru ouka veia amuto ge suliau ovola.
PHI 4:11 Eala moli eau kama ge hateka, la vuhula mai eau ge savele la uati, la pulolou la savelela eau tahaiti ovola, veia mai la uati taku ilua moli eau ge taholea eia ge koramuli moli eau.
PHI 4:12 Eau sagaititi, eala mai eau ge pou la savelela, veia mai eau ge pou tai la balavala, ale la golu bulalahu. Mai tai eau ge vitolo, uka eau ge maru, ale tai eau kama gabutatalea.
PHI 4:13 La iloburukola tomi ale eau ge pogea, eau ge bolehohola la vagagirila te Iesus Kraist, eia la tuha magirigu.
PHI 4:14 Eala moli ale eau pou la savelela, amuto loloa, amuto suliau, taritigi pepeho te alele.
PHI 4:15 Ale pala, eau so sosoko moli la igogolu la valolo te Kraist, amutou la valalua me hatavivile e Pilipai rovia, la lotu isa lou kama suli leau la vaabila ale eau hiliti taro la gale e Masedonia, amutou moli.
PHI 4:16 Me mulimuli te la pulolou taku oio e Tesalonaika, kara igoie, amuto sulitiau vaka luati.
PHI 4:17 Eala moli la vaabila tamutou ele, eau kama gabu tikumua, eau gabu tikumu moli la tilalau ale La Tahalo Uru rararagia veia ge koli la vulovulo mutou alele.
PHI 4:18 Me igoie eau popou, eau kama savele, la vuhula eau abiti la vaabila tamutou ale e Paprodaitas vahariagu, me eau lege sisigi seseletila. Amuto sugu tarotiagu la vaabila alele, La Tahalo Uru hilotia, eia mai ale amuto vaabi tai soio tetala me eia lege sisigi taila.
PHI 4:19 Me La Tahalo Uru ge koli pepehoa soio tamutou, la vuhula eia tahola usu pepeho la vuliti, eia ge abi uru loua mutou, teale amutou te Kraist Iesus, me mai amuto ge savele la paga isasa, eia ge abia mutou.
PHI 4:20 Etato ge toi taritigi pepeho soata te La Tahalo Uru e Tama gatou, kara igoie, kara mulimuli, la kaluvula ge ouka. Amen.
PHI 4:21 Amutou tomi la riau te Iesus ele, amiteu me egiteu e tabarabara mutou ale omai egite taku, amite veia mutou la haro.
PHI 4:22 Egiteu tomi la riau te Iesus ale omai, egite veia mutou la haro sesele, egite tomi tai la valalua me hatavivile te Iesus omai ale igogolu te la luma te la mulugaluga tegiteu e Rom, egite vei taia mutou la haro.
PHI 4:23 La gilogo te Iesus Kraist, La Uru gatou, eia ge pou te la kalulu mutou tomi isasasa. Eau e Pol.
COL 1:1 Eiau e Pol, La Tahalo Uru hiloviau veia eau ge la bilalaha te Iesus Kraist. Amila me tabara gatou e Timoti, amila kekesia mutou tomi la valalua me hatavivile te La Tahalo Uru ale oio te la mautu e Kolose. Amutou e tabarabara milua te la isale Iesus Kraist, amuto sau tola tatahoti la merera te La Tahalo Uru. La Tahalo Uru, e Tama gatou, eia ge vibalava le amutou la gilogo tetala, la tia mutou oilo ge malilo tataho.
COL 1:3 Eau kama maila te la gabutatalala taku soio tamutou, te la kilaka tavu La Tahalo Uru, e Tamale Iesus Kraist La Uru gatou, veia eau ge toi taritigi pepeho soata tetala
COL 1:4 ale eau lolotia veia amuto sau tola tomiti la merera te La Uru gatou e Iesus Kraist, me amuto puhi tigiti egiteu la valalua me hatavivile tomi te La Tahalo Uru.
COL 1:5 Amuto igo seselea mai ele, la vuhula amuto gabu tikumuti la merera te La Tahalo Uru ale eia ge vibalava amutou te la pulolou la sagegela ale oata tetala. Alele amuto lolotia pala, ale amuto lolo la valolo ale taritigi te la merera te Kraist ale sesele.
COL 1:6 Me la merera ale amuto lolotiale, la rerela taliti, eia vavavati soio te la maututula tomi. Igoie, eia mai ale vuati soio tegiteu la valalua me hatavivile tomi, maiti ale pala eia vua oio tamutou, amuto lolo vutitia me amuto matagagati te la masova la gilogo te La Tahalo Uru ele.
COL 1:7 Me e Papras, ale valolo matagaga amutou, eia la tahalo isa taritigi pepeho, eia igogolu tataho. Eia oioti tamutou ele, eia abi la muligu te la igogolu te Kraist soio tamutou, ale eau kama koramulia ge goiole.
COL 1:8 Eia gilemulitia miteu ale amuto vitau me tabara tataho te la matagaga te La Kalulu La Marokala.
COL 1:9 Mai alele, eau kamati maila te la kilaka ale eau loloti la veipalala tamutou ale taritigi ele. Eau kaka La Tahalo Uru veia eia ge vivolu la gabutatalala tamutou veia amuto ge rovi tataho la masasagala tetala. Mai alele amuto ge volu sesele la mari me la matagaga tomi te La Kalulu La Tahalo Uru.
COL 1:10 Oio volale amuto ge koramulia ge pou tataho mai la masasagala te La Tahalo Uru, amuto ge visagege La Uru mutou mai ele. La vulovulo tomi ale taritigi ge vua pepeho oio tamutou, me amuto ge sagaiti tataho te la mari te La Tahalo Uru.
COL 1:11 La vagagarila te La Tahalo Uru ge vivagari sesele tai amutou veia ale e Satan ge tovo lalai amutou, amuto ge magiri vagari moli, la vuhula la vagagarila te La Uru eia kama bisi, eia koramuli e Satan.
COL 1:12 Amuto ge vei tataho e Tama gatou te la sagegela uru, la vuhula eia vimarokati amutou, me eia koramulia mai ele veia amuto ge tahola sesele la vibalavala ale uru eia tau raragitia veia ge abia gatou la valalua me hatavivile tetala ale pouti te la matagaga.
COL 1:13 Etatou la valalua me hatavivile tetala sesele, la vuhula eia lapu rivuti etatou taro la maligoma ale pala pigi robo etatou, eia vagoiloti etatou te la pulolou la matagagala te Latula, la riau tetala.
COL 1:14 E Iesus ele, eia lube taroti etatou te la kilisi te Satan, ale eia vimavulaha taroti letatou la iruru tegatou.
COL 1:15 E Kraist, eia mai La Tahalo Uru lou ele, ale etato hiloa, etato rovia e Tamala mai moli ele, ale etato la tahalo la vovo kama koramulia ge hiloa. E Kraist, eia uru tai te la papaga tomi moli.
COL 1:16 Ale pala La Tahalo Uru vipou la magasa me la mori me la papaga tomi, e Latula tai oio igogolu vikapopo leia. Mai te la vagagarila te Kraist ele, la golugolu tomi sibitala ale etato hiloa. Egiteu la uru tai ale pou la mulugaluga oata te la mori, mai egiteu la angelo, egite sibitala te la vagagarila te Kraist moli. La Tahalo Uru vipou egiteu la golugolu tomi veia e Kraist ge tahola egiteu.
COL 1:17 La Tahalo Uru souka vipou la mori me la magasa, e Kraist oioti. Eia la vuhu la golugolu tomi.
COL 1:18 La valalua me hatavivile te la lotu tetala, egiteu mai la limala, la vahala me la matala. Me e Kraist, eia la gama giteu. Eia la vuhu la lotu sesele, eia vimahulia. Eia la siloko la mahuli rivula, pala muga tetala isa kama mahuli rivu lou. Me mai ele, La Tahalo Uru vipoua veia eia ge la mulugaluga te la golugolu tomi.
COL 1:19 La vuhula La Tahalo Uru masagea veia e Latula ge mai sesele eia, eia ge abi la gabutatalala te Tamala tomi me la vulovulola tomi ale maroka.
COL 1:20 Eia veia la pileho te Latula ge barautu taro la maligoma, veia la golugolu tomi, me egiteu tomi tai ale omai te la maututula, me egiteu ale oata tai te la mori, egiteu me La Tahalo Uru kati ge vipou baa te la vulovulo la iruru. Me eia igo seselea mai ele, e Latula pehoti oata te la tauvalautu, la kasosola pagegeleti, me te la gilogo tetala uru ele, etato kati vaubi soio te La Tahalo Uru te la vulovulo gatou ale kama kokora.
COL 1:21 Pala, amuto pou malau taro La Tahalo Uru, amuto pou mai la gima tetala, la vulovulo mutou eia kama kokora.
COL 1:22 Eala moli igoie, ale e Latula peho roboti amutou, la vovola ligiti le amutou, amuto goilo seseleti te La Tahalo Uru. Me eia igoa mai ele veia amuto ge magiri te la lagula, la vigagiala ge ouka, la vuhula amuto marokati.
COL 1:23 Eala moli taritigi amuto ge magiri vagari moli, ge gabu tikumu sekela moli la valolo te Kraist ale amuto loloa pala veia eia sesele, veia eia ge vimahuli amutou. Me la merera te Kraist alele, eia vavavati soio te la maututula tomi, me eau e Pol, eau la bilalaha te la merera tomi alele.
COL 1:24 Eau sagege moli ale eau gabu la iligiligi oio te la igogolu la valolo te la merera te Iesus. La vuhula la iligiligi soio tamutou la valalua me hatavivile te la lotu tetala, eia visauru me la iligiligi te Kraist soio tamutou me la iligiligi taku tai ale eau gabua. Eala moli la iligiligi taku, eia souka koramuli la tabarila te La Tahalo Uru somai taku.
COL 1:25 La Tahalo Uru bahatiau veia eau ge la bilalaha tamutou la valalua me hatavivile te la lotu tetala, ale eia sugu tarotiagu la igogolu la valolo soio tamutou la valalua la maligoma veia amuto ge lolo tatahoa.
COL 1:26 Me la merera tetala, alaurati kara igoie eia tabuli kokovu, eala moli igoie La Tahalo Uru veipalatia gatou la valalua me hatavivile tetala.
COL 1:27 Me ale la masasagala tetala mai alele, veia la valalua la maligoma tai ge sau tola la vibalavala tetala ale uru, eia tabuli kokovu oilo te la merera tetala. Me la merera ale tabuli kokovu ele, la masovala eia maie veia e Kraist mou oilo taume, ale moli ele eme ge sau tola la mahulila ale sesele, la kaluvula ge ouka.
COL 1:28 Me mai moli ele amite valolo la valalua me hatavivile tomi te la merera te Kraist ele. Amite karasusuku amutou, amite vimari tataho tai amutou la valalua la maligoma tomi ele, veia amuto ge sau tola la mari ale uru sesele mai alele, me oilo vola amuto tomi ge mai ale sagaiti te Kraist.
COL 1:29 Me la igogolu aleie, eau vavala pepeho ovola veia amuto tomi ge matagaga. Eau igogolu vagari mai ele, eala moli eau kama kebo, la vuhula e Kraist eia abitiagu la vagagarila tetala ale uru, amila igogolu vikapopo.
COL 2:1 Eau masagea veia amuto ge matagaga ale eau igogolu vagari veia la merera te Kraist eia ge mai ale lako tola sesele te la gabutatalala tamutou me tegiteu la valalua me hatavivile e Laodisea tai. Mai alele amutou la valalua me hatavivile tomi ale soukama roviau, amuto ge matagaga tai ale eau kebo.
COL 2:2 Eau suli amutou mai ele veia ge vivagari amutou, veia amuto ge vipuhi tigi moli, ge vigogo baoli amutou, mai ale amuto igigoa. Eau veia ge viteteli tai amutou veia amuto ge rovi sesele La Tahalo Uru, me oilo vola amuto ge balava sesele. Mai alele amuto ge rovi la merera tetala ale eia pala tabuli kokovu, ale eia baha e Kraist somai tegatou. Me e Kraist moli ele, eia ge kope la mari me la merera te La Tahalo Uru ale sesele eia pala tabuli kokovu.
COL 2:3 La mari me la merera te La Tahalo Uru ale sesele tomi ele, e Kraist moli ge abia mutou, amuto ge sau tolea mai la vuliti ale ge suli la pulolou tamutou.
COL 2:4 Me eau viteteli amutou mai ele, la vuhula eau kama masagea egiteu la valalua la visigologolola ge ali lou la ilo mutou la merera ale isapolo, amuto loloa eia malama te la gavusa mutou.
COL 2:5 Sesele, eau kama goio tamutou, eala moli oio te la gabutatalala taku eau mai ale pou tomi le amutou ele, me eau lege sisigi ale eau hilotia veia amuto pou tataho, amuto magiri vagari ale amuto sau tola la merera te Kraist, amuto kama igo papai.
COL 2:6 Ale amuto pala sau tola e Kraist Iesus mai La Uru mutou sesele, alele amuto ge mahuli vikapopo leia.
COL 2:7 La ua mutou ge gotalo sesele te la magasa ale taritigi, mai te Kraist ele. Taritigi e Kraist ge la vuhu mutou tomi isasasa. Mai alele la merera tetala ale e Papras tovo le amutou ovola, eia ge mai ale sau tola amutou, la tia mutou oilo ge volu sesele la vaisalela soio te Kraist.
COL 2:8 Eala moli eia taritigi veia amuto ge vibaumuli tigi, la vuhula la valalua la visigologolola soukama vagoilo lou amutou te la kilisi veia ge kisi tola le amutou la mari papaila tegiteu mai la merera te la vovo moli, la mari te la magasa, kama la merera te Kraist.
COL 2:9 Oilo te Kraist, La Tahalo Uru eia sibitala mai la tahalo. La vulovulo La Tahalo Uru me la gabutatalala tetala, eia oio tomiti te Kraist ele.
COL 2:10 Me amutou ale tetalati, eia abi tomitia mutou la mahulila ale sesele. E Kraist, eia uru oata tegiteu la angelo tomi.
COL 2:11 Ale amuto te Kraist, la irovilala tetala eia oioti tamutou mai moli la irovilala tegiteu e Iuda pala, ale egiteu koro la vovo giteu veia egiteu te La Tahalo Uru. Eala moli la irovilala te Kraist, la tahalo la vovo kama igoa. E Kraist moli igoa ale eia kai taroti le amutou la vulovulo la vovo ale kama kokora.
COL 2:12 Amutou ale te Kraist, ale egite vuhi le amutou te la isala, la vulovulo mutou ale kama kokora mai ale tabuli vikapopo le Kraist otalo te la lulu la pileho. Ale amuto vuhi kaluvuti, mai e Kraist hiliti taro la pileho, amuto tai hiliti taroti la vulovulo ale kama kokora. La vuhula amuto gabu tikumuti la vagagarila te La Tahalo Uru veia eia igo seseletia pala mai ele, eia vimahuli rivu e Iesus taro la pileho.
COL 2:13 Pala, amuto pou mai ale pehoti, la vuhula amutou la tahalo la iruru, me amuto tai kama abi la irovilala oio te la vovo mutou veia La Tahalo Uru hilovi amutou mai egiteu e Iuda. Eala moli La Tahalo Uru vimahuliti amutou, ale eia vimavulaha taroti letatou la iruru tomi tegatou.
COL 2:14 La merera te ururu eia baraututia veia eia kati ge kisi etatou. La kekesi te Moses tomi ale tomu sasasae la vulovulo gatou, La Tahalo Uru eia tautia otalo te la uluva la tauvalautu te Iesus.
COL 2:15 Me te la pileho te Iesus te la tauvalautu, La Tahalo Uru eia bolehoho egiteu ale te Satan eia soa kuru sesele egiteu veia la valalua me hatavivile tomi ge rovia veia egite kaluvuti.
COL 2:16 E Kraist, eia baraututi la merera te ururu. Eala eia kama koramulia veia amuto ge roromuli egiteu ale tou la ilali isahari veia eia la lelea mutou, umala alalia, veia la vulovulo alele ge vimahuli amutou. Umala tai amuto ge roromuli egiteu ale vauru bububu la papaga isahari mai la tilogo te la haro tabu, uka egite gabu tikumu la taio ale halaba eia rere tala, veia ge la golu bulalahu mai alele ge vimahuli amutou mai amuto ge lotu tavua, ouka gologolo. Umala roromulimuli la merera tegiteu.
COL 2:17 Egiteu la paga bulalahu mai alele, egite kama matagaga, eala moli etato rovitia veia la matagaga ale sesele, eia e Kraist moli sekela, kama la merera la visigologolola.
COL 2:18 Egite isahari oio tamutou ele gabu tikumu pasi egiteu la angelo, egite vilelele egiteu, veia isahari uru, isahari kama uru, egite lotu tatavu egiteu mai aleie. Egite ge veia mutou mago “Mai amuto kama ge roromuli la merera tamiteu, amuto kama ge sau tola la vibalavala te La Tahalo Uru.” Alele egite visigolo amutou, umala lololo egiteu. Egite pakakasa te la vulovulo giteu isahari, mai la peremula, veia egiteu la tahalo sesele. Umala lololo egiteu. Egite vitikumu lou la merera tegiteu la hililo tegiteu veia La Tahalo Uru visibitalea tavu egiteu, eala moli umala lololo egiteu. Egite pakakasa moli, egite tilimuliti la vulovulo la vovo ale kama kokora,
COL 2:19 egite kati sau tola e Kraist. E Kraist, eia la obu la lotu, eala moli egite mai ale kusi sekelati. Eala moli la obula eia sau tola la halala tomi, eia vimahulia, eia tubu tataho mai la masasagala te La Tahalo Uru sesele.
COL 2:20 Amuto mai ale peho tomiti le Kraist, la vulovulo la vovo ale kama kokora eia kati kisi tola amutou. Tio mai ge mai ele, igo mave amuto gotigu rivuti lou veia ge gabu tikumu la merera tegiteu ale vei mago
COL 2:21 “Umala alali la pagale, umala liliu la pagale, umala tai ge pilau la papaga ale mamaie!”
COL 2:22 La papaga tomi alele ge kokovu lou. Me la merera tomi ovola, eia la vimari me la magiri robola te la vovo moli.
COL 2:23 Sesele, etato hiloa, eia mata mai la paga ale sesele, la merera alele. La vuhula mai egite ge igoa, egite ge igoa me la tilogo, ge vibisi tai egiteu, ge peremu galolo tai mai ele. Eala moli egite vagari gologolo moli, kara ale la gabutatalala la iruru ge sibitala ge tovo lalai egiteu, tio egite boru moliti.
COL 3:1 Ale La Tahalo Uru vimahuli seseleti amutou vikapopo me Kraist, taritigi amuto ge gabutatala vagari moli la vulovulo te la mautu la marokala, ale e Kraist eia goatati ovola, eia pouti la pulolou la uru oio te la bali La Tahalo Uru te la galela e gata.
COL 3:2 Gabutatala sekela moli la tilalau tetala oata, kama ale omai te la magasa,
COL 3:3 la vuhula amuto mai ale pehoti, amuto kati koramulia ge tilimuli la vulovulo ale omai. Me La Tahalo Uru, eia sigiroboti amutou veia amuto ge mahuli sesele oata tetala vikapopo me Kraist.
COL 3:4 E Kraist ele, eia la vuhu la mahulila tamutou. Eia ge beu rivu loua loata, eia ge puli amutou soio tetala, amuto ge pou tomi leia te la matagaga tetala ale uru.
COL 3:5 Eia taritigi amuto ge piligi taro la vulovulo la vovo ale kama kokora, eia so mahulihuli oilo tamutou, la vuhula amuto mulimuli ge goata ge pou tomi le Kraist te la matagaga. Egite la vulovulo la vovo ale kama kokorale, egiteu maie: la para osaosala, la mata bulakalakala, me la ilisu tavu la golu te tabaramu tai. La vuhula mai eme ge pou tegiteu la mata la iruru alele, eme mai ale lotu tavutia la paga ale eme isu tavua.
COL 3:6 Egiteu tomi la vulovulo alele ge vahiliti la igototolola te La Tahalo Uru.
COL 3:7 Ale pala amuto pou te la maligoma, amuto tilimuli bulalahu la vulovulo tomi alele, la vuhula la valalua me hatavivile tomi igigoa.
COL 3:8 Eala moli amuto ge piligi taro la vulovulo ale kama kokora, mai la mata la iruru tomi mai la igototolola, la hate mamasila, la iligo marapala, la vikara kukumula, me la gililo tai.
COL 3:9 Umala tai veia amuto ge visigolo egiteu e tabarabara mutou. Ale amuto peho taro la vulovulo mutou ale pala, amuto mai ale kai taroti egiteu la iruru tomi ele.
COL 3:10 Amuto mai ale kai halabati la vulovulo ale taritigi, eme la tahalo me la tavile ale halaba seseleti, La Tahalo Uru puitime mai lou eia, veia eme ge rovi sesele eia.
COL 3:11 Mai alele eia kama koramulia veia amuto ge vilelele amutou veia isa eia la tau Grik, eia la tahalo la mari mai ele, veia isa lou ge veia eia la tau Iuda, La Tahalo Uru hilovi seselea. Me eia kama koramuli taia veia isa ge toia mai ele veia isa egite koroti la vovola, me isa egite kama koro la vovola, veia isa lou eia la tau rorobo, me isa eia la tahalo la maligoma, veia ge veia mai ele veia isa eia la bilalaha moli, me isa eia uru. Etato umalati ge vilelele etatou mai ele, la vuhula e Kraist eia isa moli sekela, eia la vuhu la golugolu tomi, la papaga tomi eia sau tola tomi moli egiteu.
COL 3:12 Amutou la valalua me hatavivile te La Tahalo Uru. Eia gogo amutou, eia hilovi amutou veia amutou tetala. Eala, eia taritigi amuto ge soveia. Amuto ge kai la vulovulo la marokala maie: Eme ge suli egiteu e tabarabaramu. Eme ge vibaumuli tataho soio tegiteu la valalua me hatavivile. Eme ge togo tai egiteu. Eme ge vipuhi tigi egiteu e tabarabaramu tomi. Eme ge kimoso taro la iruru ale egite igoa soio taume.
COL 3:13 Amuto ge vibaumuli baoli tataho amutou. Mai isa eia igoti la iruru soio taume, eme ge vimavulaha taro leia la iruru tetalale. Amuto ge igo sesele molia mai ele, mai lou e Iesus eia vimavulaha eme te la iruru taume.
COL 3:14 Eala moli la vulovulo isa moli eia uru, eia ge sau tola egiteu la vulovulo tomi ale taritigi ele, mai la gilogo moli. La vuhula, la gilogo, eia ge vipuru tataho la vulovulo la marokala tomi ele.
COL 3:15 Mai eme ge gabua veia la tiamu oilo eia malilo tataho te la gilogo te Kraist, eala eme ge rovia veia la vulovulomu eia matata. La vuhula La Tahalo Uru eia tola vikapopoti amutou veia amuto ge vipuhi tigi, la tia mutou tomi ge malilo tataho. Me taritigi pepeho tai veia amuto ge pou tavu moli la vaisalela soata te La Tahalo Uru.
COL 3:16 La merera la valolo te Kraist ge mahuli oilo te la tia mutou, amuto ge sau tolea mai la vuliti. Amuto ge vimari baololi le amutou la mari te Kraist ale tikumu, ge vitovo baololi tai le amutou mai ele la merera tetala ale sesele. Taritigi pepeho tai veia amuto ge bau bibibi la bilalau la lotu, ge vaisale La Tahalo Uru ovola, la sagegela uru ge oio te la tia mutou mai ele.
COL 3:17 La igogolu tomi ale amuto igoa, taritigi amuto ge igo molia te la vagagarila te Iesus, La Uru gatou, me oio moli ovola amuto ge toi taritigi pepeho soata te La Tahalo Uru, e Tama gatou.
COL 3:18 Amutou e hatavivile, taritigi amuto ge roromulimuli egiteu e hararua mutou, ale la tabarila te Kraist soio tamutou mai ele.
COL 3:19 Me amutou la valalua, taritigi amuto ge vibaumuli tataho egiteu e ruturutu mutou, umala amuto ge igo tototolo egiteu.
COL 3:20 Amutou e gulikiliki, taritigi amuto ge roromulimuli egiteu e tatama mutou, e tatila mutou te la merera tomi ale egite tovo amutou ovola, la vuhula La Uru ge hiloa veia amuto roromuli tatataho, eia ge lege sisigi le amutou.
COL 3:21 Eala moli amutou la valalua me hatavivile, umala amuto ge mera kahararea giteu a latatu mutou, egite soukama ge ilo buruko.
COL 3:22 Taritigi amuto ge roromuli egiteu ale babaha amutou. Taritigi amuto ge roromuli egiteu te la papaga tomi ale egite babaha amutou ovola, amuto umala ge tau moli la marasala veia ge tuga gologolo moli, veia egite ge hilome veia eme roromuli sesele egiteu, egite ge masagame mai ele. Eala moli eia ge taritigi pepeho mai amuto ge rutu sesele, la vuhula la vulovulo la iroromulila eia veipala la tilogo soio te Kraist.
COL 3:23 Amuto ge igogolu tataho mai e Kraist moli bahame, kama la tahalo la vovo,
COL 3:24 la vuhula e Kraist ge vibalava amutou mulimuli mai la tilau tetala soio te la valalua me hatavivile tetala. La Uru mutou eia e Kraist moli, kama la tahalo la vovo isasa.
COL 3:25 Mai isa ge igo la iruru, La Tahalo Uru ge kolia soio tetala, kama ge gabu tikumu isasa veia eia uru, veia eia umala ge viligia, ouka.
COL 4:1 Amutou e ururu ge baha titigi egiteu la bilalaha tamutou. Amuto ge baumuli tataho egiteu, la vuhula La Uru mutou tomi eia oio, eia pou oata te la ilo la lage, eia hililo amutou.
COL 4:2 Amuto ge pou tavu sesele la kilaka, amuto ge mata kaseka, ge kaka moli me la sagegela te la tia mutou.
COL 4:3 Me amuto ge kaka tai La Tahalo Uru veia eia ge abia miteu la baa ale koramulia veia amite ge valolo tataho egiteu la valalua me hatavivile ale omai te la merera te Kraist ale pala tabuli kokovu. La merera moli aleie, eau palati la valolola, me eala egite vagoiloau te la luma la kilisi.
COL 4:4 Amuto ge kaka veia La Tahalo Uru ge suliau, la valolo taku ge matagaga tataho, la vuhula ale la tabarila taku.
COL 4:5 Amuto ge vibaumuli la vulovulo mutou soio tegiteu la valalua me hatavivile ale kama goilo te Kraist. Amuto ge raragi tataho veia ge vahilo legiteu la gauru te Kraist.
COL 4:6 La merera tamutou tavu egiteu ge mai ale malama, amuto ge vikara tataho, me mai egite ge tahi amutou la tilahi te la gauru te Kraist, amuto ge raragi moliti mai ele veia ge koli seselea soio tegiteu tomi isasasa.
COL 4:7 E tabara gatou sesele, e Tikikas, eia ge gilemulia mutou te la pulolou taku omai. Eia la tahalo la valolo sesele, amila vaigogolu kapopo te la bilaha te La Uru.
COL 4:8 Eala eau bahea soio tamutou ele veia eia ge gilemulia mutou te la pulolou taku omai, eia ge vivagari amutou ovola.
COL 4:9 Eau baha egirua me Onesimas, eia tai e tabara gatou sesele, eia isa tamutou ele, eia la tahalo isa taritigi pepeho. Egira me Tikikas ele ge gilemuli tatahoa mutou la pulolou taku.
COL 4:10 E Aristakas, ale pou tomi leau te la luma la kilisi, eia veia mutou la haro sesele soio tamutou, egira me Mark ale e tamisale Banabas. Me e Mark ele, amuto lolotia la merera taku pala veia mai eia ge guvi oio tamutou ele, amuto ge rara tavu seselea, ge vararapua.
COL 4:11 Me e tabara gatou uru, e Iesus Iastas, eia tai toia mutou la haro. Me tegiteu e Iuda tomi ale goiloti te Kraist, egiteu taho tolu moli ele suliau te la igogolu la valolo te la pulolou la matagagala te La Tahalo Uru ale halaba. E Aristakas, e Mark, e Iastas, egite taho tolu moli ele suli pepehoau te la igogolu taku ele.
COL 4:12 Me e Papras tai veia mutou la haro. Eia isasa tai tamiteu ale omai, la bilalaha sesele te Kraist Iesus. Eia sau tola sesele le amutou la kilaka tetala te la haroharo tomi veia La Tahalo Uru ge vivagari amutou, amuto ge rovi tataho la masasagala tetala, amuto ge sagaiti sesele ale amuto ge roromuli tomi moli la merera tetalale.
COL 4:13 Eau rovitia, la tahalo ale e Papras ele, eia igogolu vagari veia amutou la valalua me hatavivile e Kolose, la valalua me hatavivile e Laodisea, me la valalua me hatavivile e Hirapolis tai, veia amuto tomi ele ge matagaga tataho te la merera te Kraist, me eau veipalea mutou mai ele, amuto ge rovia.
COL 4:14 E maura e Luk tai, e dokta taku ale taritigi, egira me Dimas veia mutou la haro.
COL 4:15 Amuto ge laharoa giteu e tabarabaragu oio la mautu e Laodisea, amuto ge vei taia la tavile uru e Nimpa, me egiteu la valalua me hatavivile ale lotu oio te la luma tetala, veia eau e Pol toi la haro sesele soio tegiteu.
COL 4:16 Amuto ge gigi kaluvu la merera taku ele, amuto ge vaharia soio tegiteu la valalua me hatavivile te la lotu oio la mautu uru e Laodisea, egite ge gigi taia, me amuto ge gigi tai la leta ale eau kekesia giteu e Laodiseale.
COL 4:17 Amuto ge vei taiale Akipas mago “Eme ge vagari, eme ge vikaluvu sesele la igogolu ale La Tahalo Uru tabaratiamu.”
COL 4:18 Te la tapasi la merera tomi maie, eau e Pol sau tola la pen, eau kekesia mutou te la limagu sesele. Eau toia mutou la kavikoki, me la haro, me la maulavi, me la logo soio tamutou tomi. Amuto ge gabu tikumua ale eau so popou te la luma la kilisi omaie! Taritigi la gilogo te La Tahalo Uru eia ge pou tamutou tomi. Eala moli ele, kaluvuti. Eau e Pol.
1TH 1:1 Eiau e Pol, amite me Sailas me Timoti, amite kekesia mutou la valalua me hatavivile te La Tahalo Uru ale amuto pou oio la mautu uru e Tesalonaika. Amuto la valalua me hatavivile sesele te La Tahalo Uru, e Tama gatou tomi, te Latula e Iesus Kraist tai, La Uru gatou. Taritigi la gilogo tetala eia ge pou tamutou tomi, la tia mutou oilo ge malilo tataho.
1TH 1:2 Amite hilo amutou magiri vagariti te Kraist, amite kaka tavu La Tahalo Uru, amite toi taritigi pepeho soata tetala. Amite sau tola le amutou la kilaka tamiteu soio te La Tahalo Uru mai ele, amite kama maila.
1TH 1:3 Amite lagu tavu moli la kilaka soio te Tama gatou, amite gabutatala moli amutou ele, la vuhula amuto pou tigiti. Amuto sau tola seseleti e Iesus, alele amuto vahiliti seseleti la igogolu tetala. Amuto kama lotu bulalahu, amuto vagari tavu moli la visuli baolila, la vuhula amuto rovi seseletia la gilogo tetala, eia oioti tamutou ele. Amuto tai kama silaha taro e Kraist, amuto toroti te la isala. Amuto vagari pepeho mai ele veia la merera tetala eia sesele tomi moli, eia ge vimahuli amutou, taritigi pepeho.
1TH 1:4 Amuto tabarabaragu, amite toi taritigi soata te La Tahalo Uru, ale amite rovia veia eia masaga sesele amutou, me eia visati le amutou pala veia amuto ge tetala,
1TH 1:5 la vuhula ale amite valolo le amutou te la isala, amuto loloa eia kama mai la merera bulalahu, ouka. Eia tubu sesele me amuto loloa mai ele veia eia tikumu, La Kalulu La Marokala eia vitikumu seseletia soio tamutou. Me amite la bilalaha, pala ale amite mou vikapopo le amutou, amuto hilo la vulovulole Kraist omai tamiteu, amuto rovia mai ele veia la merera tamiteu eia sesele.
1TH 1:6 Amuto soveiti amiteu te la vulovulole Kraist, amuto tilimulitia mai ele. Egiteu la valalua la gima viligiti amutou, eala moli amuto sagege moli te la guluvi te la matagaga oio tamutou. Amuto sagege moli mai ele te la sagegela ale uru, La Kalulu La Marokala eia abia mutou.
1TH 1:7 Mai alele, la valalua me hatavivile tomi te la lotu oio la gale e Masedonia, oio la gale e Akaia tai, egite mata muliti la vulovulo mutou ale taritigi ele, egite soveiti amutou.
1TH 1:8 Me oio moli te la igogolu tamutou ele, la isale Kraist eia vavavati soio te la galegale tomi, mai e Masedonia, e Akaia, soio te la maututula tomi tai. Eala moli eau kati ge vikara lou soio tamutou,
1TH 1:9 la vuhula egiteu la valalua me hatavivile te la maututula, egite gilemulitia miteu la vulovulo mutou. Egite veitia miteu ale pala amuto rara tavu pepeho amiteu la bilalaha, egite tomi lolotia. Egite lolo taia ale amuto poke taroti la lotu tavu la puigolo, amuto lagu tavuti La Tahalo Uru veia ge pou otalo te la uluvala.
1TH 1:10 Amuto rovi molia mai ele veia ge pou tali e Latula, eia ge beu rivu loua loata te la mori. E Iesus ele, e Tamala vimahuli rivutia lotalo te la lulu la pileho. Eia mahuli rivuti lou mai ele, eia ge sigirobo etatou te la kiloli la igototolola te La Tahalo Uru somai tegatou.
1TH 2:1 Amuto tabarabaragu, amuto rovia ale pala amite hari lalai amutou, la igogolu tamiteu oio tamutou eia sesele, amite kama valolo bulalahu.
1TH 2:2 Amuto rovia veia oio la mautu e Pilipai, egiteu la valalua la gima, egite viligi amiteu, egite vile malago sesele amiteu, mulimuli ovola amite goio tamutou ele oio e Tesalonaika. Amite taga, eala moli La Tahalo Uru tegatou eia vivagari amiteu veia amite ge valolo moli amutou, amite kama ge taga. Amite igo seselea mai ele, amite vei matagagea mutou mai ele veia la valolo ale taritigi eia loio sesele te La Tahalo Uru. Me usu pepeho oio la mautu tamutou ele, egite vaubi somai tamiteu, eala moli amite kama taga, amite vagari tavu moli la valolo.
1TH 2:3 Me ale amite valolo amutou te la isale Kraist, amite igogolu sesele, amite kama visigolo, amite kama veia ge vauru lou amiteu, amite kama veia ge abi tai la uati tamutou. Amite tai kama galo te la masova la mererale veia la paga ale amite kama rovi la masovala amite ge veipala bulalahu molia soio tamutou, ouka.
1TH 2:4 Ale amite valolo amutou, amite vikara moli te la masasagala te La Tahalo Uru, ale eia sugu taroa miteu la merera la mahulila tetalale veia amite ge valolola. Amite kama valolo veia la valalua ge vei tataho amiteu, eala moli amite vagari veia ge visagege La Tahalo Uru te la igogolu tamiteu, eia mata muli la gabutatalala tamiteu, eia rovia eia taritigi moli.
1TH 2:5 Amuto rovi molia, me amite ge toi sesele taia soata te La Tahalo Uru, amite kama ali la ilo mutou, veia amite ge abi la uati tamutou. Eia sesele moli, La Tahalo Uru rovia.
1TH 2:6 Amite kama magiri te la valolo veia amutou me la valalua isahari lou ge bole vauru la isa miteu, ouka.
1TH 2:7 Sesele, amite la bilalaha te Kraist, me eia koramulia mai ele veia amite ge kaka amutou bakisi la ilali ale amite pala pou oio tamutou, eala moli amite kama masaga, la vuhula amuto soukama ligi le amiteu. Eala moli amite vibaumuli tataho amutou mai la tavile ale eia baumuli e latula.
1TH 2:8 Amite gogo pepeho amutou, mai alele amite kama masagea veia ge valolo moli amutou, amite masaga taia veia ge pou sesele kabili tamutou, veia amite ge suli pepeho amutou tomi isasasa.
1TH 2:9 Amuto tabarabaragu, amuto soioge so gabutatala ale pala amite igogolu vagari te la haroharo me te la logologo tomi tai veia amuto kama ge vavala le amiteu ale pala amite pou oio tamutou ele, amite valolo le amutou la merera te La Tahalo Uru.
1TH 2:10 Amuto hilotia, me La Tahalo Uru tai hilotia, ale amite pou pala oio tamutou la valalua me hatavivile te Kraist, amite pou tataho moli, la vulovulo miteu maroka tomi moli, amiteu la iruru ouka.
1TH 2:11 Amuto rovia veia etato vipou tomi, etato mai e tau me latatu sesele.
1TH 2:12 Amite suli le amutou la merera ale taritigi pepeho, amite tutu tolea mutou veia amuto ge pou tataho moli, mai la pulolou ale koramuli la tahalo sesele te Kraist. La vuhula La Tahalo Uru, eia tolati amutou soata te la pulolou te la balila veia amuto ge pou la matagaga uru tetala.
1TH 2:13 Eala amite toi bibibi la vaisalela soata te La Tahalo Uru, la vuhula ale pala amuto loloti la valolo te la isale Kraist te la hare miteu, amuto lolo seseletia veia ale kama la merera te la vovo, ouka, ale la merera sesele te La Tahalo Uru, eia igogolu oilo te la tia gatou tomi la valalua me hatavivile tetala.
1TH 2:14 Amuto tabarabaragu, la viligiligila eia sibitala tavu tai amutou, mai ale pala eia sibitala tavu egiteu la valalua me hatavivile te la lotu ale oio e Iudea. Ale igoie egiteu la valalua tamutou viligiligi amutou, mai moli egiteu la valalua e Iuda pala viligi egiteu e tabarabara giteu.
1TH 2:15 Egiteu e Iudale, egite bili tomi egiteu la bilalaha te La Tahalo Uru ale pala, egite bili taro tai e Kraist, me ale igoie egite pitaro amiteu ale valolo te la isala. Ale mai ele egite igo hate mamasi La Tahalo Uru. Me egite gima la valalua tomi,
1TH 2:16 ale egite veia ge magiri robo la merera la mahulila te La Tahalo Uru veia la valalua la maligoma ale kama e Iuda, egite kama ge loloa, La Tahalo Uru kama ge vimahuli egiteu. Mai alele, egiteu e Iuda tau vikapopo la iruru tegiteu, me la iruru tegiteu mapaiti. Alele la igototolola te La Tahalo Uru eia pigi robo seseleti egiteu.
1TH 2:17 Amuto tabarabaragu, ale pala la valalua la gima basimulitiau loio tamutou, ale igoie eau vagari veia ge hari lalai lou amutou, eala moli ouka. Eala moli la gabutatalala taku eia soloio tamutou ele. Etato vipou baati lou mai ele, eau pou mai la tulagola sesele.
1TH 2:18 Eau, e Pol, me amiteu la bilalaha tomi, amite tovo lalaia vaka usu veia ge goio tamutou, eala moli e Satan eia magiri robo pasi la gauru tamiteu.
1TH 2:19 Me amite gabu pepeho pasi amutou mai ele, la vuhula amite lege sisigi pasi le amutou, ale amuto tilimuli tatahoti e Kraist. Ale e Iesus Kraist, La Uru gatou, eia ge beu loua, amite ge sagege sesele le amutou te la haro ale etato tomi ge magiri te la lagula.
1TH 2:20 Amite ge vaabi le amutou soio tetala mai la mapa, mai la vuliti tamiteu.
1TH 3:1 Eau gabu pepeho pasi amutou, eau ilo gogori tavu sesele amutou mai ele, eala eau veia ge pou sekela oio la mautu e Atens,
1TH 3:2 eau ge baha taro e Timoti soio tamutou ele. Eia e tabara gatou, eia la bilalaha sesele te La Tahalo Uru. Eau bahea veia eia ge tutu tola loua mutou la merera ale taritigi, eia ge vivagari lou amutou veia amuto ge sau tola vagari lou la merera te Kraist.
1TH 3:3 Mai alele, amuto isasa kama ge pariri te la viligiligila tegiteu la gima soio tamutou ele. Me amuto ge rovia veia la tabarila te La Tahalo Uru soio tegatou tomi la valalua me hatavivile tetala, eia mai sesele alele. Etato ge gabu la iligiligi,
1TH 3:4 mai sesele ale pala amite la bilalaha pou oio tamutou, amite vimariti le amutou oio ovola, me igoie amuto gabutia, amuto rovitia.
1TH 3:5 Me ale eau lolotia veia amuto gabuti la iligiligi ele, eau gabutatala vagari pasi amutou, kara ale eau baha e Timoti veia eia ge hari lalai amutou. Eau rovia ale eia ge beua, eia ge gilemuliagu la pulolou tamutou oiole, veia amuto oio sau tola la merera te Kraist, ka oukati. La vuhula eau makuku le amutou veia La Gima, eia souka lapu taro amutou soio tetala, veia la igogolu tamiteu oio tamutou, eia soukama mai la golu bulalahu.
1TH 3:6 Ale e Timoti, eia beutia loio tamutou ele, eia gomai taku, eia gilemuliagu la pulolou tamutou oiole eia taritigi. Eia gilemuliagu ale amuto sau tola seseleti la merera te Kraist, me amuto vigogo baoli lou le amutou mai ele. Eia gilemulia miteu ale amuto gabu pepeho somai tamiteu la bilalaha, amuto sagege tai le amiteu veia amuto tai masaga pepehoa ge hilo amiteue.
1TH 3:7 La vulovulo mutou e tabarabara miteu ele, eia vimata kaseka lou amiteu la bilalaha ale omai, egite vipou amiteu te la iligiligi me te la iloburukola.
1TH 3:8 Me ale amuto oiole magiri vagari te la isale Kraist, amite omai gabu tai la mahulila ale taritigi pepeho.
1TH 3:9 Amite kama koramulia ge koli seselea La Tahalo Uru la sagegela ale uru amite gabutia oio tamutou ele.
1TH 3:10 Amite vagari te la kilaka soio te La Tahalo Uru te la haroharo me te la logologo tomi veia amite ge goiole ge hilo lou la mata mutou. Me amite vagari mai ele veia ge suli lou le amutou la merera te Kraist isahari ale amuto souka rovi seselea.
1TH 3:11 Taritigi pepeho mai La Tahalo Uru, e Tama gatou, me La Uru gatou e Iesus tai ge raragia miteu la gauru ale amite ge goio tamutou ele.
1TH 3:12 Taritigi La Uru ge suli amutou la valalua me hatavivile tetala, amuto ge vagari tavu la vulovulo mutou ale taritigi ele, amuto ge vipuhi tigi tataho. Me amuto ge puhi tigi tai egiteu la valalua me hatavivile te la maututula tomi, mai ale amite puhi tigi tai amutouo.
1TH 3:13 Mai ge mai ele, La Tahalo Uru eia ge vivagari amutou, amuto ge mai e latatula sesele ale amuto ge magiri te la lagula te la haro ale e Iesus Kraist ge guvi rivu lou loata te la mori vikapopo me egiteu la angelo tetala.
1TH 4:1 Amuto tabarabaragu, amite tovoti le amutou la pulolou la marokala ale La Tahalo Uru ge lege sisigi le amutou ovola. Me la gauru alele, amuto tilimuli seseletia. Me amite kaka vagari lou amutou mai ele veia la vulovulo mutou ale taritigi ele, eia ge vulo uru lou.
1TH 4:2 La vuhula la merera te Iesus Kraist ale amite veitia mutou ovola, amuto tomi rovitia.
1TH 4:3 La masasagala te La Tahalo Uru soio tamutou eia maie veia amuto ge maroka tomi moli, amuto ge vipou baa taro la iligo la iruru soio te la tavile, me la vulovulo la valalololo.
1TH 4:4 Amuto la valalua ge taulai tigi moli, amuto ge puli e rutu mutou, amuto umalati ge pakakasa lou, la vulovulo mutou ge maroka moli, amuto ge pou tataho moli mai la tahalo sesele.
1TH 4:5 Amuto umala ge mata bulakalaka mai egiteu la valalua la maligoma, ale egite kama rovia La Tahalo Uru.
1TH 4:6 Mai alele, eia kama koramulia veia la tahalo te Kraist isa ge ovo taro le tabarala e rutula. Mai ale amite tovoti le amutou pala, amite mera taroti amutou, La Uru ge vilai egiteu ale ruru mai ele.
1TH 4:7 La vuhula eia kama tola etatou soio te la vulovulo ale kama kokora, eia tola moli etatou soio te la pulolou la marokala.
1TH 4:8 Mai isa eia ge pile la vimari tamiteu alele, eia kama pile la tahalo la vovo, eia pile moli La Tahalo Uru, eia abia gatou La Kalulu La Marokala.
1TH 4:9 Ale amuto vipuhi tigiti, eau kama koramulia veia ge vimari lou amutou ovola. Ale La Tahalo Uru tovoti le amutou, amuto rovi tomitia.
1TH 4:10 Mai alele amuto vipuhi tigi seseleti legiteu la valalua me hatavivile te Kraist tomi oio la maututula tomi te la gale e Masedonia. La vulovulo alele, amuto ge vauru sesele loua oio tamutou ele. Taritigi pepeho.
1TH 4:11 Amuto ge vagari veia ge pou makovu tataho oio la mautu tamutou, amuto ge pou tola moli, umala ge igo lalahu. Amuto ge igogolu te la lima mutou sesele, mai la vulalaila, me la igogolu tomi ale mai ele, mai moli ale pala amite tovo le amutou ovola.
1TH 4:12 Mai ge mai ele, la valalua ale logala te la lotu, egiteu ge togo amutou. Amuto kama ge savele tai la ilali me la uati veia ge kakea oio te isasa.
1TH 4:13 Amuto tabarabaragu, eau kama masagea veia amuto ge paua te la pulolou ale mulimuli tegiteu ale pehoti. Amuto soukama ge ilo buruko legiteu, mai egiteu la valalua la maligoma, ale kama rovi la pulolou la balavala oio te La Tahalo Uru.
1TH 4:14 Ale e Iesus peho, eia mahuli rivu lou, etato gabu tikumua mai ele veia La Tahalo Uru ge vimahuli lou la valalua me hatavivile tomi te Kraist ale pehoti mai ele. E Iesus ge beu rivu loua somai, eia ge puli egiteu ale pehoti ele.
1TH 4:15 Me la vimari te Kraist somai tegatou, eia maie, veia te la tapasi la haro, etato ale so mahulihuli, etato kama ge vimuga soio te La Tahalo Uru, ouka.
1TH 4:16 La golule angelo isa uru ge tola, la vaivai te La Tahalo Uru ge tali, tio e Kraist ge guvi loata te la mori. Me egiteu ale tetala, egite pehoti pala, egite ge mahuli rivu lou.
1TH 4:17 Mulimuli ovola, etato ale so mahulihuli, la tuluvu la mori ge pigi robo etatou, tio etato ge goata tetala, etato ge poga tavu e Kraist mai ele oata te la baa. Tio etato ge mou tomi moli leia mai ele, la kaluvula ge ouka.
1TH 4:18 Eala eia taritigi veia amuto ge visuli baololi le amutou la merera alele, amuto ge sagege.
1TH 5:1 Eala moli amuto tabarabaragu, eau kama gabutatalea veia ge kekesi matagagea mutou te la tapasi la haro ale e Kraist ge sibitala lou ovola.
1TH 5:2 Eau kama koramulia veia ge lapu matagaga la gabutatalala tamutou mai ele, la vuhula etato tomi rovia veia la tapasi la harole, eia ge guvi karutu moli, mai la tahalo la pakalila, eia gala keke soio te la mautu te la logo veia ge pakali.
1TH 5:3 Te la imamala alele la valalua me hatavivile ge veia mago “Taritigi pepeho, la tasi malimaliti”, eala moli la viluala ge sibitala karutu soio tegiteu. Eia ge sibitala sesele, mai la tavile ale savu, la iligiligi la piligo ge sibitala tavu seselea, eia kama koramulia ge hele taroa.
1TH 5:4 Eala moli amuto tabarabaragu, amuto kama pou te la maligoma veia amuto ge karutu te la guluvi te Kraist mai egite karutu la tahalo la pakalila ale gala kekeke.
1TH 5:5 Amuto sibitala halabati te la matagaga, eala amuto masaga moliti la matagaga, mai la haro ale e Kraist ge beua. Eala, amuto kamati vagari tavu la maligoma.
1TH 5:6 Mai alele eia kama taritigi veia etato ge mavuta, etato kama ge raragi mai egiteu la valalua la maligoma. Taritigi etato ge mata kaseka, etato ge baumuli tataho la vulovulo gatou mai ele.
1TH 5:7 Te la logo, la paga maligoma, la valalua isahari mavuta, egite kama raragi te la paga ale guvi karutu, me egiteu isahari liu paua. Eala moli etato ale pou te la matagaga, eia kama koramuli etato ge tilimuli la vulovulo la maligoma mai alele.
1TH 5:8 Etato ale rovi la matagaga, taritigi etato ge pahutu moli, etato ge gabu tikumu la merera te Kraist, ge sau tola molia ale eia veia ge vimahuli etatou. Etato ge vipuhi tigi tai, me la vulovulo gatou tomi ale taritigi ele ge galiau robo etatou.
1TH 5:9 La vuhula eia kama la tilau te La Tahalo Uru veia etato ge vilua vikapopo legiteu la valalua la maligoma ale eia ge vilai egiteu, ouka. Eala moli la masasagala te La Tahalo Uru eia maie veia e Iesus Kraist ge vimahuli etatou.
1TH 5:10 La Uru gatou ele, eia peho robo etatou veia mulimuli la valalua me hatavivile tomi tetala ge pou vikapopo leia, etato ale so mahulihuli, me egiteu tomi tai ale pehoti.
1TH 5:11 Mai alele, eia taritigi veia amuto ge visuli baololi le amutou la merera ale taritigi ele, mai ale amuto ge vivagari lou amutou ele. Me eau rovitia veia te la pulolou tamutou oiole, amuto oio tilimuli seseletia mai ele.
1TH 5:12 Amuto tabarabaragu, eau kaka amutou veia amuto ge togo egiteu ale La Uru vipou egiteu veia ge la mulugaluga la lotu oio la mautu tamutou ele. Egite vavala, egite vibaumuli amutou, egite vimatata tai la vulovulo mutouo.
1TH 5:13 Amuto ge togo egiteu, ge puhi tigi tai egiteu, la vuhula egite igogolu vagari kabili tamutou. Taritigi tai veia amuto tomi ge vipuhi tigi.
1TH 5:14 Me eau tutu tolea mutou e tabarabaragu veia amuto ge viteteli egiteu ale tuha malulu, ge vivagari tai egiteu ale tataga, ge suli tai egiteu ale kama magiri vagari. Amuto ge suli tataho egiteu e tabarabara mutou tomi mai ele, kama ge igo totolo harari.
1TH 5:15 Amuto ge baumuli tigi la vulovulo mutou veia umala isa tamutou ge koli la iruru ale e tabarala igotia soio tetala. Eala moli amuto ge visuli baoli, ge suli tai egiteu ale kama rovi la lotu.
1TH 5:16 Amuto ge sagegege moli te la haroharo tomi.
1TH 5:17 Amuto ge toro moli te la kilaka soata te La Tahalo Uru, amuto ge kaka bibibi moli, kama ge maila.
1TH 5:18 Mai la paga isa ge sibitala tavu amutou, amuto ge vei tataho moli La Tahalo Uru ovola, amuto kama ge gabutatala papai. La vuhula la masasagala te La Tahalo Uru soio tamutou eia mai moli ele, veia la tia mutou ge malilo tataho te Kraist.
1TH 5:19 Amuto umala ge bili la tivura La Kalulu La Marokala, eia igogolu oilo te la tia mutou ele.
1TH 5:20 Umala amuto ge vile tai la merera tegiteu ale veipala la merera te La Tahalo Uru.
1TH 5:21 Eala moli la vulovulo tomi moli, amuto ge mata mulia veia eia taritigi ka ouka. Mai alele, la vulovulo ale taritigi, amuto ge sau tola vagari molia,
1TH 5:22 eala moli la vulovulo ale kama kokora, amuto umalati ge hagagavi tavu loua.
1TH 5:23 Taritigi La Tahalo Uru ale vimaluti etatou la valalua me hatavivile tetala, eia ge sau tola amutou, eia ge vimaroka la tia mutou oilo. Me oio te la vovo mutou, te la gabutatalala tamutou me te la kalulu mutou tai, eia ge toi amutou veia amuto maroka. Eia ge vimaroka moli amutou, kara ale e Iesus Kraist La Uru gatou eia ge beu loua.
1TH 5:24 E Kraist ale tola tavuti amutou, eia ge sau tola amutou, eia ge vimaroka moli amutou mai ele kara ale eia ge guvi, la vuhula eia veitia, eia kama visigologolo.
1TH 5:25 Amuto tabarabaragu, taritigi amuto ge sau tola tai le amiteu la kilaka tamutou.
1TH 5:26 Taritigi amuto ge toi la haro sesele soio tegiteu la valalua me hatavivile tomi te la lotu, veia eau e Pol, eau toi la haro sesele soio tegiteu.
1TH 5:27 Me eau vei vagaria mutou te la isa La Uru gatou, amuto ge gigi la kekesi taku ele soio tegiteu la valalua me hatavivile tomi te la lotu, egite tomi ge loloa.
1TH 5:28 Taritigi la gilogo te Iesus Kraist, La Uru gatou, eia ge pou tamutou. Eau e Pol.
2TH 1:1 Eiau e Pol, amiteu me egirua taho luae e Sailas mira me Timoti, amiteu kekesia mutou la valalua me hatavivile te la lotu te Kraist, amuto pou oio la mautu e Tesalonaika. Amuto la valalua me hatavivile sesele te La Tahalo Uru, tegirua me Latula e Iesus Kraist, La Uru gatou.
2TH 1:2 Taritigi La Tahalo Uru, egira me Latula e Iesus Kraist, La Uru gatou, eia ge abia mutou la gilogo tetala, la tia mutou oilo ge malilo tataho.
2TH 1:3 Eau gabutatalea veia eia koramuli seselea veia mai te la haroharo tomi amiteu ale omai ge toi taritigi pepeho soata te La Tahalo Uru, la vuhula amite hilotia veia la merera te Kraist, amuto roromuli seseletia, amuto vagari tavutia, amuto lohotia solagu, amuto vipuhi tatahoti mai ele, amuto kama gotigu rivu, ouka, eia taritigi pepeho.
2TH 1:4 Mai alele, amite vauruti la isa mutou ele soio tegiteu la valalua me hatavivile tomi te La Tahalo Uru ale oio te la maututula tomi, veia egite ge rovia mai ele veia amuto oio magiri vagari moli, me amuto sau tola seseleti la merera te Kraist, amuto kamati gabutatala la viligiligila te la isala, ale egiteu la gima tetala viligiligi amutou. Mai ale, amuto rovitia veia la vulovulo La Tahalo Uru eia matata tomi moli.
2TH 1:5 Ale amuto ligi te la viligiligila te la isale Kraist, La Tahalo Uru eia raragi amutou mai ele veia amuto ge raragi tataho te la pulolou la marokala oata tetala, ale igoie amuto ligitila veia eia ge vagoilo sesele amutou ovola.
2TH 1:6 La Tahalo Uru, la vulovulola matata tomi moli. Eia ge vilai tai egiteu ale viligi amutou.
2TH 1:7 Mai etatou ale igoie ligi, mulimuli eia ge vimavulaha etatou, amuto ale oiole, me amite tai la bilalaha tetala taho tolu omaie. Eia ge igoa mai ele te la tapasi la haro tetala ale La Uru e Iesus ge sibitala loata te la mori, vikapopo legiteu la angelo tetala, egite vagari. Eia ge guvi vikapopo la matagaga ale uru pepeho, mai la havi ale uru karerere.
2TH 1:8 Eia ge viligi egiteu ale kama rovi La Tahalo Uru, egite kama roromuli la merera la mahulila te Iesus, La Uru gatou.
2TH 1:9 Egite ge sululu sapa te la igototolola te La Tahalo Uru, eia ge vipou egiteu te la pulolou la iloburukola, la kaluvula ge ouka. La Uru ge kapi robo egiteu sogala, egite kama ge hilo bakisi la tiraro la lagula, me la vagagarila tetala eia uru, eia taritigi, egite kama ge rovia.
2TH 1:10 Mai alele, te la tapasi la haro, eia ge sibitala loata, me egiteu la tahalo la gima kama ge balava, egite ge vure sesele oio vola. Eala moli eia ge sibitala mai ele veia la valalua me hatavivile tetala ale eia vimaroka egiteu, egite ge karutu la matagaga tetala uru, egite ge vaisalea. Me alele etatou tomi, la vuhula amuto tai roromuliti la valolo tetala ale amite valoloti amutou ovola.
2TH 1:11 Me oio volale, amite kaka bibibi La Tahalo Uru veia eia ge gabu tikumu tai amutou veia amuto tai ge koramuli la pulolou la marokala oio tetala ale eia tola tavuti amutou soio tetala. La Tahalo Uru, eia tahola la vagagarila, me oio moli te la vagagarila tetala, eia taritigi pepeho veia la masasagala tamutou tavu la pulolou la marokala eia ge puru sesele. Me eia ge vivagari sesele lou la vagagarila tetala oio te la vulovulo mutou, ale amuto sau tola seseleti la merera tetala.
2TH 1:12 Mai ele amite kaka La Tahalo Uru veia oio te la gilogo tegirua me Latula e Iesus Kraist, La Uru gatou, amite kaka La Tahalo Uru mai ele veia amuto tomi ge rovia veia e Iesus Kraist, eia La Uru. Me amite masaga taia veia e Iesus ele eia ge vauru amutou, veia la matagaga tetala ale uru eia ge oio tamutou, la valalua me hatavivile ge rovia mai ele veia amuto tetalati.
2TH 2:1 Me aleie, eau masagea veia eau ge lube loua mutou la masova la merera taku ale eau veitia mutou pala veia e Iesus Kraist, La Uru gatou, eia ge guvi lou, eia ge tola vikapopo etatou tomi soio tetala.
2TH 2:2 Eau kaka vagari amutou e tabarabaragu oio te la mautu e Tesalonaikale veia amuto umala ge karutu veia amuto ge marapa harari te la merera tegiteu ale veipalea veia e Kraist eia beu rivuti loua te la tapasi la haro. Mai egite isahari ali la ilo mutou mai ele, me egite veipalea veia ale la merera te La Tahalo Uru sesele, uka egite visigolo lou veia eau veitia te la merera ale eau kekesi kokovua giteu, la merera tomi alele amuto umala lololoa,
2TH 2:3 egite souka visigolo amutou. Eia taritigi veia amutou ge matagaga tataho veia La Uru e Kraist, eia kama ge sibitala lou, kara te la vareagila ale uru ge sibitala mai te la tapasi la haro. Me oio vola tai la tahalo isa uru, La Tahalo La Vareagila eia ge sibitala, alele La Tahalo Uru ge pigia sotalo te la havi ale uru makapipila la kaluvula ouka.
2TH 2:4 La Tahalo La Vareagilale, eia ge vauru sekela lou eia, eia veia eia sekela moli uru, eia veia la valalua me hatavivile ge lotu tavu moli eia. Mai alele, eia ge goio ge pou te la luma la lotu ale uru oio e Ierusalem, eia ge veia eia La Tahalo Uru. Me la irovilala te la tapasi la haro eia mai alele.
2TH 2:5 Amuto goio karutu harari moli, amuto kati gabutatalea la merera tomi ale pala eau pou oio tamutou, eau lubetia mutou.
2TH 2:6 La merera taku, amuto vuloti loua. La Tahalo La Vareagilale eia souka sibitala, la imamala tetala tai souka guvi ale eia ge magiri palala, la limale isa eia oio so magiri roboroboa, amuto rovia.
2TH 2:7 La vulovulo la vareagila eia oio igogolu kokovuti oiole, eala moli la tahalo la magiri robola ge sau tola molia mai ele kara la haro ale eia kati ge pou te la pahutuhutula tetala.
2TH 2:8 Te la haro moli alele, La Tahalo La Vareagila, eia ge magiri palala, eala moli La Uru e Iesus Kraist ge gali tavua, la galala tivura, eia ge tubu tetala, la vagagarila tetala ge kokovu. La Tahalo La Vareagilale, eia kama koramulia ge magiri te la matagaga uru te Kraist, ale eia ge guvi loata te la mori. Eia ge vilua te la matagaga uru ele, eia tubu tetala.
2TH 2:9 Sesele, La Tahalo La Vareagilale eia ge igogolu muga, eia ge guvi vikapopo la vagagarila te Satan, eia ge igo la golu la karutula isahari, ge tau tai la irovilala isahari soio tamutou ale ge mai sesele la irovilala te la vagagarila te La Tahalo Uru, eala moli eia visigolo, eia igoa te la vagagarila te Satan moli.
2TH 2:10 Eia ge visibitala la visigologolola mapaiti soio tegiteu la valalua me hatavivile ale ge tilo tetala, egite ge vilua, la vuhula egite kama rara tavu e Kraist veia eia ge vimahuli egiteu.
2TH 2:11 Ale egite vipou baati leia mai ele, La Tahalo Uru ge igogolu te la gabutatalala tegiteu, veia egite ge gabu tikumu la visigologolola veia eia sesele, eala moli ouka, egite tiloti.
2TH 2:12 Mai alele la valalua me hatavivile tomi ale kama sau tola la merera te Kraist, egite lege sisigi moli la iruru, egite ge poga la igototolola te La Tahalo Uru, eia ge muku pile egiteu, eia ge sugu taro egiteu soio te la viluala.
2TH 2:13 Amuto tabarabaragu, La Uru gatou, e Iesus Kraist eia masaga sesele amutou, eala eia koramuli seselea veia te la haroharo tomi amiteu ale omai ge toi taritigi pepeho soata te La Tahalo Uru, la vuhula amutou tetala seseleti. La vuhula pala muga te la siloko la maututula eia visati le amutou veia La Kalulu La Marokala ge vimaroka la tia mutou oilo, me eia ge vimahuli amutou mai ele, ale amuto sau tolati la merera tetala.
2TH 2:14 La Tahalo Uru tola tavuti amutou mai ele te la valolo ale taritigi ale amite valoloti le amutou ovola, veia mulimuli amuto ge vipou tomi le Iesus Kraist, La Uru gatou te la matagaga tetala ale uru.
2TH 2:15 Mai alele, amuto tabarabaragu, taritigi amuto ge magiri vagari moli, amuto ge sau tola vagari tai la merera tomi ale amite valoloti le amutou ovola, amite kekesi taitia mutouo.
2TH 2:16 Taritigi La Uru gatou e Iesus Kraist, egira me La Tahalo Uru e Tama gatou, egira ge vimata kaseka amutou. La Tahalo Uru tegatou ele, eia gogo etatou, eia vimahuli etatou te la gilogo moli tetala ale uru, etato mata kaseka tavu la matagaga tetala, la kaluvula ge ouka. Taritigi e Kraist me Tamala ge vivagari amutou te la igogolu tomi ale taritigi, me te la pulolou la marokala.
2TH 3:1 Me la tapasi la merera taku soio tamutou e tabarabaragu, eia maie: Amuto ge sau tola le amiteu la bilalaha te La Tahalo Uru ale omaie la kilaka. Amuto ge sau tola amiteu mai ele veia la isa La Uru ge vavava harari soio te la maututula tomi, la valalua me hatavivile usu egite ge togoa. Eia ge mai lou ale pala amuto lolo vutiti la valolo tetalale, amuto vuloti soio te Kraist.
2TH 3:2 Taritigi amuto ge kaka tai La Tahalo Uru veia eia ge sigirobo amiteu veia egite la gima umala ge magiri robo amiteu te la igogolu la valolo te la isale Kraist. La vuhula la valalua isahari oio, egite kama gabu tikumu e Kraist veia la valolo tetala eia sesele. Egite gabutala gegegeru mai ele, egite viligiligi amiteue.
2TH 3:3 Eala moli La Tahalo Uru eia oio, umala amuto ge gabutatala papapai. Eia ge sigirobo amutou te La Tahalo La Gima, eia ge vivagari tai amutou. La Tahalo Uru, eia kama koramulia ge sigolo taro etatou.
2TH 3:4 Me amiteu tai ale omaie, amite gabutatala molia veia amuto oiole taritigi moli, amuto oio roromuli tomi moli la merera te La Uru ale amite veia mutou ovola, amuto kama ge maila taroa, amite rovia.
2TH 3:5 Taritigi La Uru ge vimatagaga amutou ale La Tahalo Uru eia gogo pepeho amutou, amuto ge magiri vagari mai ele te la isale Kraist.
2TH 3:6 Te la isale Iesus Kraist, La Uru gatou, amite karasuku vagari amutou veia amuto umala ge hagagavi tegiteu la valalua la lotu ale egite tuha malulu, egiteu ale kama tilimuli la merera tamiteu la bilalaha.
2TH 3:7 Mai amuto ge sovei amiteu eia ge taritigi pepeho. Amuto rovia ale amite pou oio tamutou ele, amite kama tuha malulu.
2TH 3:8 Amuto abia miteu la ilali, la vuhula amite vimari amutou te Kraist. Amite igogolu vagari sesele veia ge poga bakisi la uati tai ale ge koramulia ge vibaumuli amiteu te la iloto la ilali. Amite gabutalea mai ele veia amuto souka ligi la pulolou tamiteu oio tamutou ele.
2TH 3:9 Eala amite igogolu veia amuto ge sivuti la gauru ale taritigi oio te la vulovulo miteu la bilalaha te Kraist mai ele. Eia koramuli seselea veia amite ge kaka amutou bakisi la ilali, eala moli te la igogolu tamiteu, amite turia mutou la gauru ale amuto tai ge vagari te la igogolu.
2TH 3:10 Ale amite so popou oio tamutou ele, amite veia mutou maie mago “Mai isasa eia tuha malululu, amuto umala ababiala la ilali.”
2TH 3:11 Me amite tutu tolea mutou mai ele, la vuhula amite lolotia veia egite isahari tamutou ele, egite tuha malululu, egite pou tavu moli la vikara papaila soio tegiteu e tabarabara giteu.
2TH 3:12 Te la isale Iesus Kraist, La Uru gatou, amite mera taro egiteu ale tuha malululu veia taritigi egite ge pou tataho moli, egite ge lagu tavu moli la igogolu ale ge koramuli la pulolou tegiteu.
2TH 3:13 Eala moli amuto tabarabaragu, taritigi amuto umala ge silaha taro la vulovulo ale taritigi.
2TH 3:14 Mai isa eia oio tamutou ele, eia kama ge roromuli la merera taku ele, amuto ge rovi tigia, amuto ge kisu taroa, eia ge mahela pepehotio.
2TH 3:15 Amuto umala ge gagimea, ouka. Amuto ge mera taro tataho molia, la vuhula eia tai e tabara mutou te Kraist.
2TH 3:16 Taritigi La Uru gatou, eia sau tola la pulolou la sagegela tegatou tomi, taritigi la gilogo tetala ge pou tamutou tomi, la tia mutou oilo ge malilo tataho, te la haroharo tomi, me te la igogolu tomi ale amuto pou tavua. La Uru, eia ge pou tamutou.
2TH 3:17 Eau kekesi la isagu te la limagu sesele, male: “Eau e Pol, eau toi la haro sesele soio tamutou tomi la valalua la mautu e Tesalonaika.” Ale amuto ge rovia, ale la limagu ele, la kekesi taku eia mai moli ele. Mai la merera tomi taku ale eau kekesia giteu la valalua, eau vikaluvula la isagu mai ele.
2TH 3:18 La gilogo te Iesus Kraist, La Uru gatou, eia ge pou tamutou tomi. Eala moli ele. Eau e Pol.
1TI 1:1 Tavu e Timoti, e latugu sesele te la isale Iesus, Eiau e Pol, eau kekesiamu, eau la bilalaha te Kraist Iesus, me la igogolu taku ele, La Tahalo Uru sesele, egira me Latula e Kraist Iesus, egira vipouau ovola. La Tahalo Uru ele, eia lapu rivu etatou taro la limale Satan, me Latula e Iesus eia ge beu rivu loua somai, eia ge vibalava etatou tomi ale tetala. Taritigi pepeho Timoti veia La Tahalo Uru e Tama gatou, egira me Kraist Iesus, La Uru gatou, egira ge vivolu leme la gilogo uru tegirua, la tiamu oilo ge malilo tataho.
1TI 1:3 Eau kaka vagari loume, Timoti, mai lou ale pala eau raragi ge goio e Masedonia eau tutu toleamu, ale eau kaka loume mai ele veia eme ge pou tola oio la mautu Epesas ele, eme ge barautu la valolo tegiteu la valalua la visigologolola oio tamutou ele.
1TI 1:4 Egite gabu tikumu moli la veimulipolola te ururu tegiteu, egite gigi galolo la isa giteu e ururu veia ge vitau kapopola la valolo te Kraist. Eme ge mera taro egiteu veia egite umala ge pou tavu moli la veimulipolola te ururu tegite mai ele. La vuhula la valalua soukama ge vaigo muli la merera te ururu ele. Eia kama suli la valolo, la vuhula la gauru isa moli oio ale etato ge rovi La Tahalo Uru, mai ale etato ge gabu tikumu sekela la merera tetala.
1TI 1:5 Eau tutu tola vagaria mutou mai ele veia eau ge vahiliti la gabutatalala ale taritigi oio tamutou ele, mai la vipuhi tigila. Ale la vulovulo ale taritigi ge sibitala mai amuto sau tola seseleti la merera te Kraist, la tia mutou oilo ge maroka.
1TI 1:6 Egite isahari kati pou tigi mai ele, egite ruruti oio te la visigologolola isahari.
1TI 1:7 Egite masagea veia ge pou tavu moli la vimari veia ge vimari la valalua me hatavivile la merera te La Tahalo Uru, egite vikara, egite kama rovi la masovala. Me la merera isahari mai te la merera te Moses, egite vikara muli tatahoa, eala moli la seselela egite kama rovia, eia kokovu taro legiteu.
1TI 1:8 La merera te Moses, eia taritigi, eala moli etato ge tilimuli seselea, etato kama ge vulo la masovala.
1TI 1:9 La mererale, eia kama ubi legiteu la valalua me hatavivile ale taritigi, eala moli eia tubu tegiteu la tahalo me la tavile la iruru, egiteu ale pou tavu moli la vulovulo la vareagila. Egiteu ale maie: Egiteu ale poke taro La Tahalo Uru; egiteu ale pou tavu la iruru; egiteu ale la vulovulo giteu kama maroka; egiteu ale gilogilo; egiteu la tahalo la bilili; egiteu ale bilibili e tama giteu, e tila giteu;
1TI 1:10 egiteu ale para osaosa; egiteu la tahalo ale vaigo baoli legiteu lou; egiteu ale kisi tola la tahalo te la igogolu, egite kama lotoa; egiteu la tahalo la visigologolola; me egiteu ale magiri te la vigagiala, egite visigologolo. Me egiteu la tahalo me la tavile la iruru mai ele, la merera te Moses eia tomu sasasae la vulovulo giteu, mai te la iruru tegiteu tomi mai ele. Me la iruru tomi moli tai, egira me la merera ale taritigi viputu tatuha.
1TI 1:11 Me la vuhu la merera te Moses ale taritigi ele, eia visauru moli me la vuhu la merera te Kraist, ale La Tahalo Uru sugu taroagu veia eau ge valolola. Me la valolo te Kraist ele eia veipalea veia La Tahalo Uru eia la matagaga, eia kama masaga la maligoma, la pulolou tetala la pulolou la balavala.
1TI 1:12 Eau toia taritigi pepeho soata te La Uru gatou e Kraist Iesus, la vuhula eia kamati gabutatalea ale pala eau tahi taro la isala, eau viligi tai la valalua me hatavivile te la lotu tetala. Eala moli eia gogo moliau ale eau igo bububu moli te la iruru taku mai ele, la vuhula eau soukama lolo vulai tavu la valolo te Kraist. Me ale igoie eia vaurutiau, eia vipouau mai la bilalaha tetala, eia vivagariau te la igogolu taku ele, ale eia tabariti leau.
1TI 1:14 La Uru, eia sigili voluti leau la gilogo tetala uru. Eau puhi tigiti egiteu la valalua me hatavivile te Kraist, me eau sau tola taiti la merera te Iesus, la vuhula e Kraist oio igogoluti oilo te la tiagu.
1TI 1:15 Me mai moli ele eau rovitia veia la merera te Kraist ale egite totoia eia sesele viruru, me amuto tomi ge gabu tikumua, eia maie: E Kraist Iesus guvi otalo te la maututula veia ge lapu rivu etatou la tahalo me la tavile la iruru, me eau e Pol, eau mamuga sesele te la vulovulo la iruru mai ele.
1TI 1:16 Me oio moli ovola La Tahalo Uru suliau veia la gilogo te Kraist Iesus ge puru somai taku veia la valalua me hatavivile ge hiloa, egite ge vulo la gabutatalala tegiteu soio tetala, me eia ge vimahuli sesele lou egiteu mai ele. Me maura eiau, eau isa la tahalo ale mamuga sesele te la vulovulo la iruru, La Tahalo Uru vimahuli louau, eau toia taritigi pepeho soata tetala,
1TI 1:17 eia la mulugaluga ale uru sesele oata, la kaluvula ge ouka. Eia kama la tahalo la vovo veia etato ge hiloa, eia sekela moli uru. Etato ge vaisalea te la matagaga tetala ale uru, etato ge togo bibibi molia, la kaluvula ge ouka, eala moli ele, eia sesele.
1TI 1:18 Timoti, eme mai e latugu, eau tutu toleamu la merera tomi aleie, eia mai moli la merera tegiteu la bilalaha te La Tahalo Uru, ale egite toitiamu pala. Me la merera alele, eia mai la gata taume te la vaubila. Eia la toromu ale La Tahalo Uru abiamu veia eme ge vaubi vagari,
1TI 1:19 veia eme ge toro tai te la merera te Kraist, la vulovulomu ge salala tataho, eme kama ge gabutatala lou la paga isasa. Eia mai la golule isasa veipalea te la tiamu, eia karasukume te la vulovulo ale taritigi. Eme ge roromuli la golulale, la vuhula isahari egite kama roromulia mai ele, egite mai ale tiloti te la mai, egite kati sau tola la merera te Kraist,
1TI 1:20 mai egira taho lua e Haimenias mira me Aleksanda. Eau piligi taroti egirua soio te la limale Satan, veia egira ge lai, egira umalati ge mai ale vikara kukumu lou soio te la merera te La Tahalo Uru.
1TI 2:1 Me la muluga la gabutatalala taku ale eau ge veiamu te la vibaumuli la valalua me hatavivile oilo te la lotu, eia maie: Taritigi eme ge vagari pepeho te la kilaka soio te La Tahalo Uru veia eia ge suli egiteu la valalua me hatavivile tomi.
1TI 2:2 Eme ge kaka tai La Tahalo Uru veia eia ge suli egiteu la mulugaluga tomi, veia egite ge vibaumuli tataho somai tegatou, la pulolou tegatou ge taritigi moli, la marapala me la vikokuela ge ouka. Me la merera te La Tahalo Uru me la vulovulola ale maroka, etato ge toro moli ovola.
1TI 2:3 La gauru ale eia taritigi, etato ge igoa maie, La Tahalo Uru ale vimahuli etatou eia ge lege sisigi sesele letatou oata.
1TI 2:4 Eia masagea veia la valalua me hatavivile tomi, egite ge vulo gele tavua, eia ge vimahuli egiteu, egite ge rovi la matagaga tetala ale uru.
1TI 2:5 Me etato tai rovia La Tahalo Uru eia isa sekela moli. Me la tahalo isa sekela eia magiri kabili tegatou me La Tahalo Uru, eia la gauru tegatou soio te Tamala, ale e Kraist Iesus moli, eia la tahalo la vovo.
1TI 2:6 Eia piligiti la mahulila tetala, eia peho roboti etatou la valalua me hatavivile tomi, eia loto rivuti lou etatou mai ele taro la limale Satan. Me oio te la pileho te Iesus, La Tahalo Uru tauti la irovilala somai tegatou veia etato ge rovia veia la merera tetala eia sesele ale eia masagea veia la valalua me hatavivile tomi ge tetala, me la irovilalale eia puruti mai sesele ale La Tahalo Uru toitia.
1TI 2:7 Me la merera moli alele, La Tahalo Uru visati leau veia eau la bilalaha ovola. Eau valolola, eau vimari tai la valalua me hatavivile ovola veia egiteu ale pou te la maligoma ale kama e Iuda ge rovi la merera te La Tahalo Uru veia eia sesele. Eau kama visigolo, la merera taku eia sesele.
1TI 2:8 Me la paga isa eau masagea veia mai egiteu la valalua me hatavivile te la lotu tomi ge rovi la kilaka, eala moli eia taritigi egite ge kaka me la tilogo oio te la tia giteu. Egite ge kaka tataho moli, egite umala ge vitau tomi la kilaka tegiteu me la igototolola, me la vaigigola.
1TI 2:9 Eau masaga molia veia egite hatavivile ge tokoromo tataho moli mai la tilogo, egite kama ge pakakasa la tokoromola ale marasa, mai ale egite ge tagu la gelegele oata te la ivu giteu, ge kaukavu, veia egite ge pakakasa tai mai te la lavalava ale malalau sotalo, me la kolosi ale kauboi.
1TI 2:10 Eala moli egite ge tokoromo molila la vulovulo ale taritigi mai te la vibaumulila, mai la tabarila tegiteu e hatavivile te la lotu.
1TI 2:11 Egite ge pou tataho moli te la vimari, kama ge vikara.
1TI 2:12 Eau kama masagea veia la tavile ge vimari la valalua, veia eia ge abi tai la igogolu ale uru mai ele veia ge mamuga egiteu la valalua. Taritigi egite ge pou makovu moli.
1TI 2:13 Me la merera tomi alele, la vuhula oio te Adam mira me Eva, ale La Tahalo Uru vipou mugea e Adam la tahalo, mulimuli e Eva, la tavile.
1TI 2:14 Me ale egira boru te la iruru, e Adam kama soko la iruru, eala moli la tavile eia sokoa, eia tilo palala muga.
1TI 2:15 Mai alele La Tahalo Uru eia vipou egiteu e hatavivile te la igogolu la piligo mai la vibaumulile latu giteu. Me alele, mai la merera tomi te La Tahalo Uru egite ge toro moli ovola, egite ge vipuhi tigi moli. Mai la vulovulo giteu ge maroka tomi moli mai ele, me egite ge pou tavu sesele la vulovulo la tilogo, La Tahalo Uru ge vimahuli egiteu.
1TI 3:1 Me la merera isa eau loloa te la hare la valalua eia sesele maie: Mai isasa masagea veia ge la mulugaluga, ale eia masaga tavu la igogolu ale taritigi.
1TI 3:2 Eala moli la mulugaluga te la lotu, eia la vulovulola ge isapolo. Eia ge puli la tavile isa moli, e rutula kama ge ilua. Eia umala ge liu mai la tahalo ale paua. Eia kama ge la tahalo la igototolola. Eia ge la tahalo sesele ale la valalua me hatavivile togoa, eia ge la tahalo la vararapula, eia ge koramuli taia veia ge vimari la valalua me hatavivile te la merera te La Tahalo Uru.
1TI 3:3 Eia umala ge la tahalo ale masaga pepeho la iliu, me eia kama ge la tahalo la vikokuela. Eia umala tai ge vaigo, eia kama ge la tahalo la ilisu tavu la vuliti tai, umala.
1TI 3:4 La tahalo ale la mulugaluga la lotu, eia ge baumuli tataho e rutula, egiteu e latatula, egite togoa, egite roromuli taia mai ele.
1TI 3:5 La vuhula mai isa eia kama ge muga tigi e rutula me egiteu e latatula, mave eia ge mamuga la valalua me hatavivile te la lotu te La Tahalo Uru? Eia kama koramuli, ouka gologolo.
1TI 3:6 La mulugaluga, amuto kama ge vipou la tahalo ale so goililo moli te la lotu. La vuhula eia soukama pakakasa ale amuto vauru haria, eia ge poga la igototolola te La Tahalo Uru, mai la gima tai pogatia pala te la vareagila tetala.
1TI 3:7 La tahalo ale la mulugaluga, taritigi eia ge la tahalo sesele, ale la valalua me hatavivile ale soukama goilo sesele te la lotu, egite tai ge togoa. La vuhula mai la vulovulola isahari kama taritigi, egite ge vikara kukumuala, me la gima ge igo gegeru la lotu mai ele.
1TI 3:8 Egite tai la valalua ale masaga la igogolu la vibaumulila soio te la valalua me hatavivile la lotu, egite ge la tahalo sesele, egite kama ge rovi la visigologolola. Egite kama ge liu mai la tahalo ale paua, egite kama ge loho tavu tai la uati me la golugolu te tabarabara giteu.
1TI 3:9 La merera te Kraist eia tikumu, eia sesele, egite ge toro moli ovola, la gabutala papaila ge ouka.
1TI 3:10 Egite la mulugaluga ge tahi lalai muga egiteu te la vulovulo giteu, me mai la iruru ge ouka tegiteu, egite ge abi sesele la igogolu mai te la tahalo la vibaumulila.
1TI 3:11 Me mai moli ele, egiteu e rutu giteu tai ge la tavile sesele, kama ge igo lalahu, kama ge vikara kukukumu, kama ge visigologolo.
1TI 3:12 Eala moli la tahalo la vibaumulila, eia ge puli e rutula isa moli, eia ge mamuga tataho e rutula me egiteu e latatula.
1TI 3:13 Mai egiteu la tahalo la vibaumulila ge igogolu tataho, la valalua me hatavivile tomi ge togo egiteu, me egite koramulia ge veipala vagari la merera te Kraist Iesus ale egite toro ovola.
1TI 3:14 Eau pou kekekesiamu, eala moli eau masaga pepehoa veia eau ge goio harari lou taume ele, eau ge hari lalaime.
1TI 3:15 Eala moli mai eau ge tabaa, la kekesi bakisi ele ge vei matagageamu la vulovulo ale taritigi ale koramuli la pulolou tegatou la valalua me hatavivile te La Tahalo Uru, eia la kaluvula ouka. Etato magiri mai la luma la lotu tetala, etato la sosolela ale sau tola la merera tomi tetala eia sesele.
1TI 3:16 Me la merera alele, etato rovi seselea veia eia tikumu, eia malulu. Mai etato rovia te la riau tegatou e Kraist Iesus: Eia sibitala mai la tahalo, la valalua hilo la vovola, egite hilo la lagula. La Kalulu La Marokala eia vitikumuti la merera tetala tomi moli veia eia sesele. Egite la angelo tai hiloa. La isala vavavati soio te la valalua la maligoma. La valalua me hatavivile tomi usu te la maututula egite roromulitia, Me La Tahalo Uru puli rivua soata tetala te la ilo la lage.
1TI 4:1 La Kalulu La Marokala eia veipalatia maie veia mulimuli hagagavi te la tapasi la haro, egiteu la valalua me hatavivile te la lotu isahari ge tahi taro lou e Kraist. Egite ge roromuli lou egiteu la valalua isahari ale la hitu ale kama kokora pou tegiteu. Egiteu ele la tahalo la tutugologolola. La merera tegiteu, eia loio tegiteu la hitu ale la gima baha egiteu, eala moli la valalua me hatavivile isahari ge tilimuli la vimari tegiteu mai ele.
1TI 4:2 Eala moli la vimari alele eia kama sesele. La vuhula eia loio moli te la hare giteu la tahalo la visigologolola, egite kama gabutatala isa la paga, la kalulu giteu oilo maigi, e Satan mai ale tuluti la kalulu giteu la havi, la lelemala tabuliti te la kalulu giteu veia egiteu tetalati.
1TI 4:3 Me egiteu la valaluale magiri robo la taulaila veia mai etato kama taulai, etato maroka tomi moli. Mai tai ele egite tou pasi tai la ilali isahari veia la lelea gatou veia mai etato ge alia, etato kati ge maroka. Eala moli la ilali tomi La Tahalo Uru vipoua veia etato ale matagaga seseleti te Kraist, etato ge ali molia, ge vei tataho La Uru ovola.
1TI 4:4 Etato rovitia la ilali tomi ale La Tahalo Uru vipoutia, egite taritigi moli, etato umala ge tou la mata la ilali isahari veia la lelea gatou. Eala moli la ilali tomi, etato raragiti veia ge ali, etato ge vaisale palala muga La Tahalo Uru, goio etato ali moliti.
1TI 4:5 Etato ali moliti mai ele, la vuhula La Tahalo Uru vibalavati la ilali mai la kilaka tegatou.
1TI 4:6 Mai la merera tomi taku ele eme ge vei matagaga tatahoa giteu e tabarabara galua oilo te la lotu te Kraist mai ele, ale eme veipalatia mai ele, eme mai la bilalaha sesele te Iesus. Mai alele eme rovi tomi molitia la merera tetala, eme totoroti ovola, eme tilimuli seseletia mai ele, ealale, eme la tahalo sesele te Kraist, la vuhula eme veipalati la merera tetala.
1TI 4:7 Me mai ele, eme umala ge gabu tikumu la veimulipolopolola ale egite isahari gabutala papai ovola. Eala moli eme ge gigi bibibi la merera te La Tahalo Uru veia la vulovulomu ge maroka.
1TI 4:8 La vuhula mai egite isahari tovo bibibi te la vipepepela veia ge igo vagari la vovo giteu, me alele eia taritigi moli. Eala moli la tilovo te la merera te La Tahalo Uru eia muga sesele, la vuhula eia ge vimahuli etatou igoie me te la mahulila tai ale mulimuli oata.
1TI 4:9 Me la merera alele egite totoia, me eia sesele moli, isa kama koramulia veia ge tahi taro ovola.
1TI 4:10 Me ale etato igogolu vagari te la valolo te Kraist, etato ligi, la vuhula oio moli te la merera ale eau veitia oata, ale etato roromulitia la merera te La Tahalo Uru ale mahuli, ale sesele, etato toroti ovola veia eia ge vimatagaga la maututula, ge vimahuli tai etatou ale tautaulailo tetala.
1TI 4:11 Me la merera tomi alele, eme ge viteteli egiteu la valalua me hatavivile te la lotu ovola, eme ge vimari egiteu mai ele veia egite ge tilimuli seselea mai ale eau veitiamu.
1TI 4:12 Eme umala ge taga egiteu ale tahi tarome veia eme bisi moli, veia eme la golu bulalahu. Eala moli la pulolou taume ge taritigi, eme ge vituri mulia giteu la gauru la maroka te la vulovulomu ale taritigi maie: La merera taume ge matata, eia ge malama; eme ge togo egiteu la valalua me hatavivile tomi, eme ge puhi tigi egiteu; eme ge sau tola sesele la merera te Kraist; eme ge pou tavu la vulovulo ale maroka.
1TI 4:13 Ale eme so pou taitaliau, eme ge vagari tavu moli la igogolu taume, eme ge gigia giteu la valalua me hatavivile la merera te La Tahalo Uru, eme ge valolo legiteu, eme ge vimari tai egiteu mai ele.
1TI 4:14 Eme kama la tahalo bulalahu, la vaabila te La Kalulu La Marokala eia oioti taume, mai ale pala egite visati leme te la igogolu taume, egite la uru te la lotu sauti oata te la varumu, egite kaka, me egite la bilalaha te La Tahalo Uru toiti la merera te La Tahalo Uru ale tikumu soio taume. Mai alele, eia kama taritigi veia la vaabila te La Tahalo Uru ale oioti te la kalulumu eia ge tabuli bulalahu. Taritigi eme ge tivura.
1TI 4:15 Me la merera taku tomi ele eme ge gabutatala vagari molia, eme ge tilimuli tomi molia mai ale eau veitiamu, me oio vola la valalua me hatavivile tomi ge hilome veia eme la tahalo sesele, eme kama vulo liliu, eme golagu moli.
1TI 4:16 Eme ge vibaumuli tigime te la vulovulomu me te la merera tomi ale eme ge tovo la valalua me hatavivile ovola. Eme ge vagari moli mai ele, me oio vola eme ge vimahuli loume, eme ge vimahuli tai egiteu la valalua me hatavivile tomi usu ale lolo la merera taume.
1TI 5:1 Umala eme ge vikara totolo soio tegiteu ale uru taume, ale igoti la iruru. Eala moli amuto me egite ururu ge viputumuli tatahoa, amuto ge vipuhi tigi moli, la pulolou tamutou ge mai te tau me latatu sesele. Eme ge viteteli tataho egiteu la valalua halaba mai e tabarabaramu sesele.
1TI 5:2 Egite hatavivile ururu, eme ge vikara gogogo tatahoa giteu mai la tilogo, mai e tilamu sesele. Egite hatavivile bisisi, eme ge vikara tigi molia giteu, mai egiteu e hatavilevilemu sesele.
1TI 5:3 Taritigi egite la valalua me hatavivile te la lotu ge baumuli tataho egiteu e hatavivile la bahararu ale egite pouti la savelela.
1TI 5:4 Mai la baharu isasa oiole, eala moli egiteu e latatula me tutubula tai oio, taritigi egite ge gabu tikumu la merera te La Tahalo Uru, egite ge baumulia, egite ge koli la vibaumulila tetala pala te la bibisi giteu mai ele. Mai ge mai ele, La Tahalo Uru ge lege sisigi legiteu.
1TI 5:5 Eala moli mai la baharu isa oiole, egiteu e valaluala ouka, taritigi eia ge pou tavu moli la kilaka soio te La Tahalo Uru, veia La Tahalo Uru ge sulia la pulolou la savelela tetala, eia ge la tavile sesele te La Tahalo Uru ele.
1TI 5:6 Mai isa ge tou la kilaka, eia ge gabutatala moli la masasagala tetala, la vuhula e haruala pehoti. Alele eia mai ale peho taiti ele. Eia so mahulihuli, eala moli la kalulula oilo pehoti.
1TI 5:7 Taritigi eme ge viteteli lou egiteu mai ele, la pulolou tegiteu ge taritigi moli, la merera isasa kama ge tubu tamutou.
1TI 5:8 Eala moli eme ge matagaga tataho veia egite ge vibaumuli tigi le valalua giteu ale pou la savelela, me egiteu tai ale hagagavi sesele tegiteu, mai e tila giteu, e tama giteu. Mai isa kama baumuli tigi egiteu mai ele, eia poke taroti e Kraist. Eia ruruti, me egiteu ale logala te la lotu kama ruru mai eia. La iruru tetala tikumu.
1TI 5:9 Ale eme ge kekesi tola la isa giteu e hatavivile la bahararu ale la lotu ge suli egiteu, taritigi eme ge kekesi moli la isa giteu ale uru seseleti, mai la leavala tegiteu savulu uoloti gegete. Eme ge kekesi moli egiteu ale taulai sesele, egite kama taulai sasasaro.
1TI 5:10 Me egiteu la bahararu ale eme kekesi tola la isa giteu mai ele, taritigi egite ge la tavile ale lagu tavu moli la igogolu la visuli, ale la valalua me hatavivile egite hilotia, egite rovitia. Taritigi eme ge hilovi tataho egiteu la bahararu ale la vulovulo giteu taritigi maie: Eia baumuli tataho egiteu e latatula te la bibisi giteu. Eia suli tataho egiteu la mosi ale guvi oio tetala. Eia suli egiteu la valalua me hatavivile te La Tahalo Uru. Eia suli tai egiteu la valalua me hatavivile ale pou la savelela. Me eia pou tataho, la vulovulola taritigi tomi moli mai ele. Eme ge hilovi tataho egiteu la bahararu mai ele, kama ge kekesi bulalahu la isa giteu veia ge suli tomi egiteu.
1TI 5:11 Mai egite la bahararu ale soukama uru sesele, egite so la sobe moli, umala susuli egiteu. La vuhula mai egite ge tau la merera ale tikumu soio te La Tahalo Uru veia egite ge gabutatala vagari moli e Kraist, tio egite kama ge koramulia, egite ge masaga lou la taulaila, ge puli lou isa la tahalo.
1TI 5:12 Me ale eia taritigi, eala moli umala vagoililo hari egiteu te la visuli, egite soukama ge vulo liliu lou, me la valalua me hatavivile ge vile egiteu, ale egite vuloti.
1TI 5:13 Me maura miteu la bahararu bisisi ele, e harua giteu hatamalelaba moli peho taro egiteu, eia kama tabaa egite goio kavovou bulalahu moli. Egite goio te la mata la luma tomi, vikara galolo, me eia kama tabaa, egite tahaiti te la mera kukumula me la vikara papaila, egite kama masaga ge pou makovu bakisi.
1TI 5:14 Taritigi egite ge taulai halaba lou, egite ge savu lou e latu giteu, ge ruturutu louale harua giteu ale halaba mai ele. Mai ge mai ele, egiteu ale kama gabu tikumu la merera te La Tahalo Uru kama ge koramulia ge vile amutou la valalua me hatavivile la lotu.
1TI 5:15 Igo tigi, la vuhula egiteu la bahararu bisisi ele, egite isahari touti la lotu, egite polo pepeti soio te Satan.
1TI 5:16 Me eau ge vei louamu mai ele veia mai egite hatavivile te la lotu, mai erei giteu isa ge baharuti, egite ge vibaumuli molia, kama ge sugu taroa soio te la vibaumulila te la lotu veia la lotu ge sulia, la vuhula la uati bakisi te la lotu ge suli muga egiteu la bahararu ale savele sesele.
1TI 5:17 Egite ururu te la lotu ale igogolu tataho, taritigi la valalua me hatavivile ge suli tataho egiteu, la vuhula egite lagu tavu la valolo me la vimari te la merera te Kraist.
1TI 5:18 La vuhula te la merera te La Tahalo Uru La Buk Tabu eia veia maie: “Mai isasa eia igogolu taume, eme ge abiala la ilali.” Me la merera isa lou eia maie: “Eia koramuli seselea veia la tahalo ale igogolu taume, eme ge loto tigia.”
1TI 5:19 Mai isa ge virere taitali la isa giteu e ururu isa ale vibaumuli te la lotu, eme Timoti eme umala ge roromuli haria mai ele. Eala moli mai eia ruru seseleti me egite taho lua uka taho tolu hilo seseletia, me egite ge veipala seselea mai ele, ale eme ge roromulia.
1TI 5:20 Mai isa tamutou ele eia igo seseleti la iruru, taritigi eme ge magiri te la mata giteu la valalua me hatavivile, ge veipalea, me egite ge rovia mai ele veia egite umala taiti ge igo la iruru, egite souka ge mahela.
1TI 5:21 Eau tutu tola vagariamu veia eme ge tilimuli tomi moli la merera taku, kama ge gabu tikumu la tahalo uka la tavile isasa veia ge mata solia te la iruru tetala. Umala tai veia eme ge suli tabaribari tai egiteu e tabarabaramu. La Tahalo Uru, e Kraist Iesus, egiteu la angelo tetala tai egite rovia veia la merera taku aleie eia tikumu.
1TI 5:22 Me eme umala tai ge vagoilo rivu harari lou egiteu ale ruruti, veia eme ge sau te la varu giteu, ge kaka te la mata giteu la valalua me hatavivile mai ele veia la iruru tegiteu eia mavulaha taroti egiteu. La vuhula mai eme vimavulaha haritia mai ele, me eia goio boru lou, la iruru alele eia tamulua tomiti. Me eau tutu toleamu mai ele, Timoti, veia la vulovulomu ge maroka tomi moli.
1TI 5:23 Timoti, eme umala ge liu moli la lalu, eala moli eme ge liu tai bakisi la vaen, eia ge suli la tiamu oilo, la ilali eme alia ge vivagari tataho la vovomu mai ele, la vuhula eau rovia eme lea bibibi.
1TI 5:24 Eme rovia, la iruru te la valalua me hatavivile isahari, egite magiri palala moli, etato tomi hiloa etato rovia veia La Tahalo Uru ge abia giteu la mapa la iruru tegite. Eala moli la iruru isahari egite tabuli kokovu, kama palala harari.
1TI 5:25 Me mai tai alele, la vulovulo ale taritigi, isahari ge magiri palala, isahari ge tabuli kokovu muga, kara ale etato tomi ge hiloa. La vuhula la paga ale taritigi, isa kama koramulia ge tau kokovua.
1TI 6:1 Egiteu la tahalo la igogolu, taritigi egite ge togo la uru giteu ale babaha egiteu te la igogolu. La vuhula mai egite ge vareagi, la valalua me hatavivile ge hiloa, egite ge vile la isa La Tahalo Uru veia la lotu te Kraist eia tovo la valalua me hatavivile te la vareagila.
1TI 6:2 Egiteu la tahalo la igogolu, mai la uru giteu ge la tahalo la lotu, egite umala ge vareagiala veia egite vitau me tabara moli te la isale Kraist, veia egite kati ge roromulia. Eala moli egite ge rovia mai ele veia la uru giteu la tahalo te Kraist, egite ge roromuli tataho molia. La vuhula la igogolu te la uru giteu ele, eia ge suli lou egiteu e tabarabarala giteu te la lotu te Kraist, la vuhula eia la tahalo la lotu. La merera taku tomi ele eme ge vimari la valalua me hatavivile ovola, ge valolo tai legiteu.
1TI 6:3 La gauru la hilovi la merera eia maie: Mai la tahalo isa veia ge vimari la valalua me hatavivile, eala moli la merera tetala eia isapolo te la merera ale sesele te La Uru e Iesus Kraist, me eia isapolo te la valolo ale sesele te la isala, ale eme ge rovia mai ele veia la tahalo ale,
1TI 6:4 eia pakakasa moli, la mari tetala eia la golu bulalahu. Ale, eia masaga molia veia ge ule papai, veia ge vulo papai lou la merera tomi ale tabuli palati. Me la vulovulola ale mai ele, eia ge igo marapa la valalua me hatavivile, egite ge vaigo, egite ge vikara kukumu, egite ge mata mulimuli la vulovulo giteu e tabarabara giteu.
1TI 6:5 Me la gabutatalala te la valalua me hatavivile ge marapa mai ele, egiteu ale la gabutatalala tegiteu kama malau ge vaigo muli la merera la visigologolola tetala, egite kati ge rovi la merera ale sesele. Mai alele egite ge veia mai egite ge tilimuli la gauru te La Tahalo Uru, egite veia egite ge poga bulalahu la uati uru ovola.
1TI 6:6 Sesele, la valalua me hatavivile ale lotu sesele taholati la vuliti, ale la tia giteu malilo tatahoti te la gilogo uru te Kraist.
1TI 6:7 Me ilava etato ge masaga tavu la uati? E tila gatou taposa etatou, etato kavelevele moli, etato kama tahola isa la paga. Ale etato ge peho, etato kama ge bole isa la golu tegatou soio te la mahulila ale mulimuli.
1TI 6:8 Eala, mai etato tahola la lavalava me la ilali ale koramuli la pulolou tegatou, ale etato ge sagege moli ovola, kama ge papaa lou veia ge tau olu la uati.
1TI 6:9 La vuhula egiteu ale igo mai ele, egite tilo harari moli te la mai ale lapu etatou soio te la pileho.
1TI 6:10 La vuhula, mai etato isu tavu la uati veia eia taritigi, la iruru tomi sibitala oilo vola. Me la valalua me hatavivile isahari te la lotu te Kraist, egite hate saga tavu la uati, egite ruru soio te la hohoi, la kirikakau ubi la vovo giteu, la iloburukola uru sibitala tavu egiteu.
1TI 6:11 Eala moli eme Timoti, eme la tahalo te La Tahalo Uru sesele, eme ge poke taro moli egiteu la iruru ale eau toitiamu ele. Eme ge lagu tavu moli la vulovulo ale taritigi. La merera te La Tahalo Uru eme ge toro moli ovola. Eme ge puhi tigi egiteu la valalua me hatavivile. Eme kama ge koli la iruru soio tegiteu e tabarabaramu. Eme ge magiri vagari moli mai ele, la vulovulomu ge maroka tomi moli.
1TI 6:12 Eme ge tuaka tavu moli e Kraist veia ge sau tola la vibalavala tetala ale eia ge abiamu, mai la mahulila ale sesele, la kaluvula ge ouka. La vuhula ale pala eme magiri te la mata giteu la valalua me hatavivile, eme veipalatia giteu veia eme te Kraist, ale La Tahalo Uru sesele tola tavutime mai ele veia eme ge mahuli mai la tori oio te la balila.
1TI 6:13 Me la merera isasa lou eau veia ge tutu toleamu ovola. Eau ge toi tikumua soata te La Tahalo Uru, eia la vuhu la mahulila tegatou tomi. Me eau ge toi taia soata te Kraist, ale pala eia magiri te la lagule Pontias Pailat veia eia e Latu La Tahalo Uru. La merera taku ale tikumu ele, eia maie:
1TI 6:14 Eme ge sau tola tomi moli la igogolu te Kraist ale La Tahalo Uru bahatime ovola, eme ge maroka mai ele, kara ale e Iesus Kraist, La Uru gatou ge guvi rivu lou.
1TI 6:15 Eia ge sibitala lou mai ele mai sesele la tilau te La Tahalo Uru. Me La Uru gatou ele, eia isapolo: Eia sekela uru, eia sekela vagari, eia sekela taritigi,
1TI 6:16 eia sekela mahuli moli, eia kama rovi la pileho. Eia la vuhu la matagaga, etato kama koramulia ge magiri hagagavi tetala. Etato tai kama koramulia ge hiloa. Taritigi etato ge togoa, taritigi tai etato ge rovia veia la vagagarila tetala eia uru pepeho, kama ge kaluvu. Eala moli ele.
1TI 6:17 Timoti, eme ge tutu tola vagaria giteu la tahalo la vuliti veia egite umala ge pakakasa. La vuliti tegiteu la paga la vovo moli, eia kama ge vimahuli egiteu. Eala moli taritigi egite ge gabu tikumu sekela La Tahalo Uru, ale eia sugu taro pepehotia gatou la ilali me la obu me la lalu tomi ale koramuli la pulolou tegatou.
1TI 6:18 Egiteu la tahalo la vuliti, eme ge tutu tolea giteu veia la vuliti tegiteu ale sesele eia ge mai la vulovulo giteu, mai te la visuli, la mutelela, la vipuhi tigila
1TI 6:19 Mai egite ge igo seselea mai ele, egite mai ale tau oluti la vuliti soio te la tilalau ale sesele, ale ge sau tola egiteu te la imamala ale mulimuli. Egite ge balava sesele te la mahulila ale uru mai ele, egite ge sau tola seselea.
1TI 6:20 Timoti, eme e latugu sesele te la isale Iesus, taritigi eme ge vibaumuli tataho la igogolu tomi ale La Tahalo Uru sugu tarotiamu. Eme ge kisu taro la merera tegiteu ale veia egiteu la tahalo la mari. Egite vikara bububu, la merera tegiteu eia vahiliti moli la vaigigola. Eme kama ge sivuti la merera te La Uru oio te la merera tegiteu ele.
1TI 6:21 La mari tegiteu ele eia kama sesele, me egiteu isahari ale tilimulitia, egite ruruti soio te la hohoi, egite kati rovi la gauru te Kraist. La gilogo te Kraist eia ge pou taume. La merera taku eala moli bakisi ele. Kaluvuti. Eau e Pol.
2TI 1:1 Tavu e Timoti, e latugu sesele te la isale Iesus, Eiau e Pol, eau kekesiamu, La Tahalo Uru visati leau la igogolu la valolo te Kraist Iesus, eia baha eau veia eau ge valolo la valalua me hatavivile tomi te la mahulila ale sesele, etato sau tolea te la isale Kraist. Taritigi La Tahalo Uru, egira me Latula e Iesus Kraist, egira ge vibalava leme la gilogo ale uru, eme ge pou la sagegela, la tiamu oilo ge malilo tataho.
2TI 1:3 Eau ge pou te la kilaka, eau ge vei tataho sesele La Tahalo Uru te la vulovulomu ale taritigi pepeho ele, Timoti. La merera tomi te La Tahalo Uru, eau tilimuli tomi molia mai tai egiteu e tutubugu ale pala kara igoie. Eau kama gabutatala isa la paga oio vola, eau tilimuli tomi moli la merera tetala.
2TI 1:4 Eau so gabutatala ale etala vahele taro pala, la masalimu puruti, me alele eau masaga pepehoa veia etala ge vipou tomi lou, la tiagu ge volu sesele la sagegela.
2TI 1:5 Eau so gabutatala tai ale eme la tahalo te Kraist sesele, mai e tubumu pala e Lois, egira me tilamu e Unis, egira tomi la tavile te Kraist sesele, me eau rovia eme tai soioge sau tola vagari la merera tetala mai tai lou e tilamu me tubumu ele.
2TI 1:6 Eala eau vahiliti lou la gabutatalala taume veia eme ge mai ale pusu karere lou La Kalulu La Marokala ale La Tahalo Uru abitiamu pala te la haro ale eau sau te la varumu, eau kaka robome, eia visivo robo leme la vagagarila tetalale.
2TI 1:7 Eau masaga veia eme ge magiri vagari mai ele, la vuhula oilo te la visuli te La Kalulu La Marokala, La Tahalo Uru kama masagea veia etato ge rovi la tilaga, ouka. Eia masaga molia veia etato ge vagari, ge vipuhi tigi me egiteu la valalua tomi, ge baumuli tataho tai la vulovulo gatou tomi veia etato ge la tahalo me la tavile tetala sesele.
2TI 1:8 Mai ele, umala eme ge mahela veia eme kama ge veipala la isale Kraist. Eme ge umala tai ge mahela leau, ale eau pou te la kilisi, la vuhula la kilisi taku la kilisi moli te la isala. Eala moli eme ge suli tai eau te la igogolu la valolo te la isala, me eme ge gabu tai la iligiligi, eala moli La Tahalo Uru ge suli leme la vagagarila.
2TI 1:9 Eia vimahuli etatou, eia visati letatou veia etato ge tetala sesele. Me alele eia kama igoa mai la kiloli la vulovulo gatou ale taritigi, ouka, la vuhula etatou tomi la tahalo la iruru. Eala moli eia gogo etatou, eia vagoilo etatou mai e latatula sesele, te la gabutatalala moli tetala ale eia veia ge igoa. La gilogo tetala ale uru ele, eia tabuli raragi moli oio te la gabutatalala tetala pala mugati te la siloko la maututula,
2TI 1:10 me igoie eia tabuli matagagati ale e Kraist Iesus, la tahalo la vimahuli tegatou, eia barautu taro la vagagari la lulu la pileho, eia visibitala la valolo tetala ale taritigi, eia vimahuli etatou.
2TI 1:11 Me la valolo tetala moli ele, La Tahalo Uru eia visati leau ovola veia eau ge veipalea, mai la igogolugolu te la valolo me la vimari.
2TI 1:12 Eala la valalua la gima viligiau. Eala moli eau kama mahela, la vuhula eau matagagati veia La Tahalo La Vimahuli taku eia ge sigiroboau, eau ge taritigi moli kara la haro ale eia ge beu rivu loua loata.
2TI 1:13 Timoti, eme ge sau tola vagari la merera tomi ale eau abitiamu, umala eme ge gabu taroa, eme ge tilimuli tomia mai ale eau veitiamu ovola, mai te la tautaulailo me la gilogo ale sesele eme sau tolea oio te Kraist Iesus.
2TI 1:14 Eme ge sau tola la merera la mahuli aleie te la vagagari La Kalulu La Marokala ale mahuli oilo taume.
2TI 1:15 Eme rovia la valalua usu oio la gale Esia egite sigolo taro eau, egite kama masageau, e Pigelas me Hemogenis egira taho lua tegite ale. Egite tomi alele hele taroau, eala moli e Onesiporas me latatula puhi tigi eau, te la haro usu e Onesiporas toto obuau. Taritigi pepeho veia La Tahalo Uru ge vibalava seselea, la vuhula e Onesiporas kama mahela leau te la pulolou la kilisi taku.
2TI 1:17 Te la haro ale e Onesiporas guvi oio e Rom, eia paa muli vagariau kara eia sivutiau. Eme rovi tai la vulovulole Onesiporas ale taritigi eia igoagu oio Epesas. La Tahalo Uru moli ge koliale Onesiporas ele la vibalavala ale uru te la haro ale La Uru ge beu rivua loata.
2TI 2:1 Latugu, eme ge magiri vagari te la gilogo te Kraist Iesus,
2TI 2:2 me la merera tomi ale eme lolotia omai taku kabili te la mata giteu la valalua me hatavivile usu, eme ge totoli poloa soio tegiteu la valalua ale magiri vagari te la tautaulailo tegite te Kraist Iesus, mulimuli egite ge vimari la valalua me hatavivile isahari lou oio vola.
2TI 2:3 Eme ge bole tai la iligiligi mai la tahalo la vaubila te Kraist Iesus ale taritigi sesele, mai moli ale eau igotiao.
2TI 2:4 La tahalo ale magiri sesele te la vaubila, eia kamati ge tilimulimuli la vulovulo la valalua bulalahu te la maututula, ouka, eia masaga molia veia ge visagege moli la uru tetala ale bahea soio te la vaubila.
2TI 2:5 La tahalo ale hari te la vipepepela eia kama ge abi la vibalavala mai eia kama ge tilimuli la gauru te la hirari. Tio me mai tai ele, mai eme ge tilimuli sesele la gauru la igogolu te La Uru, mulimuli La Uru ge vibalavame.
2TI 2:6 Eia matata moli veia la tahalo ale igogolu vagari te la mahuma tetala, eia ge ali pala muga la ilali ale sibitala te la igogolu te la limala.
2TI 2:7 Mai eme ge gabutatala muli la masova la vikarara la tilovo ale itolu ale eau veitiamu, La Uru ge vimatagaga la gabutatalala taume te la merera tetala.
2TI 2:8 Te la gabutatalala taume eme ge sau tola la valolo ale taritigi te Iesus Kraist, ale ale eau valololola, eia maie: Eia sibitala te la hilile Devit, eia igogolu kabili tegatou. La igogolu tetala goio kaluvu, egite la valalua la gima bilia, eala moli eia mahuli rivu lou taro la pileho.
2TI 2:9 Te la valolo ale taritigi ele, egite la valalua ale kama kokora pigi eau soilo la luma la kilisi, egite kisi tai la limagu me la vahagu la sen mai la tahalo la pakalila, eala moli la merera tomi te La Tahalo Uru egite kama kisi tolea, ouka.
2TI 2:10 Eau kama taga la kilisi tegiteu aleie, ouka, la vuhula eau masagea veia egite tomi ale La Tahalo Uru hiloviti egiteu veia egite ge tetala, egite tomi ge sau tola la mahulila me la vibalavala oio te Kraist Iesus.
2TI 2:11 La merera isa eau ge veia mutou ovola, eia sesele viruru: Mai etato vipeho tomiti le Kraist te la mahuli te la vovo gatou, etato ge mahuli tomi tai leia;
2TI 2:12 Mai etato ge magiri vagari te la tovolalaila tomi, tio etato ge vipou tomi leia te la pulolou la mulugalugala tetala; Eala moli mai etato ge veia etato kama rovi e Kraist, eia tai ge tahi taro etatou;
2TI 2:13 Te la haro usu etato ge boru te la tautaulailo tegatou, eala moli La Uru kama koramulia veia eia ge sigolo taro etatou, ouka gologolo, la vuhula La Uru eia kama la tahalo la visigologolola, eia kama koramulia veia ge tahi taro lou la merera tetala ale eia veitia gatou ovola.
2TI 2:14 Eme ge viteteli la valalua me hatavivile taume te la isa La Uru, veia umala egite ge vaigo mulimuli la merera bulalahula ale kama ge suli egiteu isasa. La vulolo ale maie, eia ge igo gegeru la valalua ale tiloti ovola.
2TI 2:15 Eme ge mai la tahalo ale kama mahela la igogolu tetala. Eme ge sugu taro eme soio te La Tahalo Uru, eia ge hilome, eia ge vei tataho seseleme, la vuhula eme la tahalo la igogolu tetala sesele. Eme kama ge mahela, eme ge rovi tigi la ilube la masova la merera tetala ale sesele soio te la valalua me hatavivile.
2TI 2:16 Eme ge magiri gale taro la merera bulalahula te la vulovulo la maututula, la merera aleie eia vipou baa la valalua me hatavivile taro La Tahalo Uru.
2TI 2:17 La merera bulalahula ale kama taritigi ele, eia mai la kakali ale mavulu, eia kama kaluvu harari, eia ge igo gegeru la vovo gatou tomi. Egira la tahalo ilua ale igigo la vulovulo aleie, egira la isa girua e Himenais me Piletas.
2TI 2:18 Egira aleie kamati tilimulimuli la gauru ale sesele te La Uru, egira valolo veia la kalulu giteu ale pehoti, ulaitia, egite hiliti rivuti mai e Iesus Kraist, veia la mahuli rivula te la tapasi la maututula ge oukati. La visigolola tegirale, eia viboruti la tautaulailo tegiteu la valalua me hatavivile isahari.
2TI 2:19 Eala moli la merera te La Tahalo Uru eia magiri mai la tori, me oio te la tori ale, la kekesi ilua tabuli maie: “La Uru rovi tomi egiteu ale tetala” me “La tahalo uka la tavile ale veia eia te La Uru, taritigi eia umalati ge igigo la vulovulo ale kama taritigi.”
2TI 2:20 Eau ge veiamu la vikarara la tilovo isa maie: Oilo te la luma te la tahalo la vuliti, la golugolu ovola usu. Etato kama ge hilo moli la plet, la kap me la kela bulalahu moli ale la mapa giteu kama uru, etato ge hilo tai la tuali me la vuliti tai oio te la lumale, la vuhula eia la luma te la tahalo la vuliti. Tio la golugolu ale isahari, egite loto bulalahu moli egiteu te la igogolu me la ilali. Eala la golugolu isahari lou, egite mai la vuliti moli, egite puia eia marasa sesele, veia ge vitokoromo la ilo la luma, isahari te la ilali ale uru, isahari te la tilivu la ilali tegite la moimosi, eala moli isahari lou egite kama taritigi, egite te la tilau la maroa moli.
2TI 2:21 Me la masova la merera ale, eia maie: Mai eme ge baumuli tigi la vulovulomu veia ge maroka te la mata La Tahalo Uru, eme ge mai la vuliti ale taritigi, egite tau poloa te la igogolu ale tikumu, eia marasa pepeho, eia maroka viviu. La Tahalo Uru masaga moli egiteu ale maroka, ale koramuli la igogolu tetala.
2TI 2:22 Eme ge pigia sotigu la pokemu la vulovulo la hatamalelaba me la tavile halaba ale kama taritigi. Eme ge tilimuli moli la vulovulo ale te la matagaga, ale te la tautaulailo, ale te la gilogo me ale te la hate tolala me la vipuhi tigila. La vulovulomu ge mai tegiteu ale la tia gite halaba te la mata La Tahalo Uru, egiteu ale la tia gite volu la sagegela me la kilaka bibibila soata te La Tahalo Uru.
2TI 2:23 Eau ge tutu tola louamu veia eme ge sulai tomi la merera bulalahula ale la valalua vaubi baololi ovola. La merera ale maie kama taritigi, la vaigo totolola sibitatala oio vola.
2TI 2:24 La bilalaha te La Tahalo Uru eia umala ge la tahalo la igototolola. La bilalaha te La Tahalo Uru, eia ge la tahalo la gilogo, me la tahalo la visuli te la valalua me hatavivile tomi, eia ge la tahalo la tilovo la merera ale taritigi, eia ge la tahalo la tia madidila sesele.
2TI 2:25 Eia ge suli egiteu ale ruru te la gauru ale sesele, veia ge sivuti la masova la merera sesele, eia ge suli tataho egiteu ale te la vulovulo la gilogo. Mai eme ge suli egiteu ale ruru te la gauru la gilogo maie, tio La Tahalo Uru ge igogolu oilo te la tia giteu, egite ge vuvulo, ge rovi la merera la seselela.
2TI 2:26 La mata gite la valalua me hatavivile usu kamati matagaga, la vuhula e Satan lapu legiteu la vuo tetala. La visuli taume ale taritigi ge lube egiteu, la gabutatalala tegiteu ge sibitala lou, egite ge hele taro e Satan, egite kati ge roromulia.
2TI 3:1 Gabutala muli tigi aleie! Te la imamala ale hagagavi la tapasi la maututula, la vulovulo ale kama taritigi ge sibitala vagari, eia ge la haro ale vagari pepeho tegiteu la valalua ale taritigi.
2TI 3:2 La valalua me hatavivile ge vauru rivu lou egiteu, egite kama ge gogo e tabara gite, Egite ge masaga tavu moli la uati, egite ge vei tataho moli egiteu lou, egite ge pakakasa, egite ge tahi vilevile egiteu e tabarabara giteu. Egite ge tou e tama giteu me tila giteu. Mai isa ge suli egiteu, egite kama ge kolia. La tia giteu kama ge taritigi, egite kama ge masaga la lotu tavu La Tahalo Uru, la vulovulo giteu ge mavulu sesele.
2TI 3:3 Egiteu la valalua, e hatavivile me gulikiliki, la tia gite ge vagari mai la uati, isa tegite kama ge rovi la gilogo, egite ge la valalua la visigologolola sesele, la hare gite ge volu me la visigologolola.
2TI 3:4 Egite ge masaga moli la vikokuela me la vaubila. Egite ge tahi vile la vulovulo ale matata, egite ge la tahalo me la tavile la vareagila sesele, egite ge vauru rivu lou egiteu, egite ge masaga moli la kavovoula, egite kama ge masaga la mari me la visuli te La Tahalo Uru.
2TI 3:5 Egite ge lotulotu, eala moli la lotu tegite ge ogala moli la kulikulila, la lotu sesele te La Kalulu La Marokala eia kama tabuli te la tia giteu. Timoti, eia taritigi pepeho veia eme ge magiri gale taro egiteu alele.
2TI 3:6 Isahari tegiteu alali la ilo giteu e hatavivile ale kama magiri vagari, la tia giteu voluti lou te la gabutatala la iruru ale egite igotia pala te la imamala ale egite soukama rovi e Kraist. Egite kama vavala veia ge kisi tola egiteu e hatavivile aleie la merera la visigologolola tegiteu aleie, la vuhula la tia giteu eia viuviu moli, egite kama magiri vagari.
2TI 3:7 Egite kama koramuli ge sivuti la merera ale sesele, la vuhula egite tilimulimuli la merera usu pepeho tegite la valalua bulalahu moli.
2TI 3:8 Egiteu la tahalalo ale, egite mai e Ianes me Iambres, la tahalo la ule papai la merera iluale pala te la imamala te Moses. La tahalo iluale magiri robo e Moses te la tilola te La Tahalo Uru ale eia bahea veia eia ge puli taro egiteu la valalua e Israel loio e Gipto. Egiteu la tahalalo ale maie, egite muku pile la merera ale sesele, la gabutatalala tegiteu kama kokora, egite visigologolo moli la lotu tegiteu soio te La Uru.
2TI 3:9 Egite alele kama koramulia veia egite ge tau kokovu la vulovulo giteu, la valalua tomi ge hilo pupuhi sesele la iruru tegiteu. La iruru tegite ge veipala lou egiteu, mai moli la iruru te Ianes me Iambres ale eia veipala rivu lou egirua.
2TI 3:10 Eala moli eme hilo eau, la vulovulogu kama mai egiteu alele, ouka. Eme rovi la tilovo ale eau abia gite la valalua me hatavivile. Eme rovi la vulovulogu tomi, la masasagala taku tai ale vagari te la tilimuli moli la gauru te La Uru. Eme rovi la tautaulailo taku, ale eau magiri vagari te la haroharo tomi ale la gima tovo lalai eau. Eme rovi tai la gilogo taku, la vagagarila taku tai te la igogolu te La Uru.
2TI 3:11 Eme rovia veia la haro usu egite la gima igo bara eau, la vuhula eau valolo la isa La Uru, eme rovi la iligiligi ale sibitala tavuau oio e Antiok, oio e Aikoniam me oio e Listra tai. Eala moli La Uru vimahuliau taro la papaga tomi ale veia ge igo bara la mahulila taku.
2TI 3:12 Eia sesele, egite tomi ale masagea veia ge mahuli vikapopo me Iesus Kraist, egite la gima ale kama kokora ge viligi sesele egiteu.
2TI 3:13 Egiteu la valalua la gima ge hiliti vagari sesele, egite ge vauru lou la vulovulo giteu te la iruru, egite ge vitilo baoli egiteu te la merera la visigologolola tegiteu ale kama kokorale.
2TI 3:14 Eala moli eme e Timoti, taritigi eme ge sau tola vagari moli la merera te Kraist ale eme toroti ovola pala te la bibisimu kara igoie, la vuhula eme rovia veia ale la merera te Kraist sesele ale amiteu, e tilamu me tubumu tai vimari leme ovola.
2TI 3:15 Eme tai palati te la bibisimu kara igoie, eme rovi tomi moliti la merera te La Buk Tabu Ale Pala, ale koramulia ge vituriamu la gauru la mahulila ale etatou ale tautaulailo te Kraist Iesus sau tolea oio tetala. Eala eia taritigi pepeho veia eme ge sau tola moli la vimari tomi te Kraist ale eme rovitia.
2TI 3:16 La merera tomi te La Buk Ale Pala, eia loio seseleti te La Tahalo Uru, eala la merera tomi te La Buk Tabu eia ge suli etatou, mai te la vimari ale taritigi, la vitetelila, me la vimatata la iruru. La merera te La Buk Tabu tai, eia koramulia ge tovo etatou te la pulolou la marokala,
2TI 3:17 veia la tahalo ale te La Tahalo Uru sesele, eia ge magiri vagari, la savelela ouka oio te la kalulula, eia koramulia ge magiri totora sesele oio te la igogolu tomi te Kraist ale taritigi.
2TI 4:1 Timoti, eau tutu tola vagariamu veia eme ge valolo la valalua me hatavivile La Merera te La Tahalo Uru. Ale eau tutu tola vagari seselea soio taume. La Tahalo Uru rovia, egira me Kraist Iesus ale mulimuli ge sibitala lou omai, eia ge mata muli la vulovulo la valalua tomi, egiteu ale mahulihuli, me egiteu tai ale pehoti. Ale la guluvi tetala eia hagagaviti, eia ge visibitala la viputumulila tetala me la pulolou la matagagala tetala omai te la maututula, eala eau vagari veia eme ge valolo la valalua me hatavivile La Merera tetala. Eme ge vagari veia ge tao talu la vulovulo ale kama kokora oio tegiteu; la valolo taume eia ge tivura veia egite ge gabu tikumua; eme ge karasuku tai egiteu veia egite ge sau tola sesele e Kraist. La igogolu taume ale eau abiamue, eme ge igo tataho seselea, eme umala ge piligi haria mai la valalua kama ge abi tigi la valolo taume, eme ge tovo tataho egiteu. Eme kama ge pou tali la imamala ale egite raragiti ge lolome, ouka, eme ge valolo moli, te la haroharo tomi.
2TI 4:3 La vuhula la imamala mulimuli ge sibitala ale la valalua kamati ge masaga la merera ale sesele te la vimari te Kraist. Egite ge vimagiri egiteu la tahalo la valolo usu ale kama sesele veia ge lolo moli la merera tegiteu ale egite veia eia malama moli.
2TI 4:4 Egite kati ge masaga ge lolo la merera ale sesele, egite ge polo gale soio te la merera la visigologolola.
2TI 4:5 Eala moli taritigi pepeho veia eme e Timoti, eme la tahalo te Kraist sesele, eme ge hilovi tigi la merera tomi veia eia sesele ka ouka. Eme kama ge gabutatala papai maie veia eme ge gabu la iligiligi me la savelela te la igogolu taume. Eme ge la tahalo la valolo sesele, eme kama ge gabutatala isa lou la paga, la igogolu taume te la valolo te Kraist ele, eme ge igo sesele tomia.
2TI 4:6 Timoti, eau gabutatalea veia la imamala taku eia hagagaviti. Hiloa, la mahulila taku eau sugu tarotia soio te la igogolu la valolo. La kasosogu eia mai ale pagegeleti, mai sesele ale egiteu e pris te la luma la lotu egite tigi taro volu la poro la vaabila me la kasoso la sip me la kau. La imamala hagagaviti ale eau ge tuga tarome Timoti.
2TI 4:7 Eala moli eau rovia la igogolu taku eia sesele, eau vaubi vagari sesele te Kraist, eau taho loio sesele tetala, eau vagari pepeho te la igogolu ale eia visati leau ovola, eau sau tola sesele la tautaulailo taku soio te Kraist.
2TI 4:8 Eala eau pou tali moli la vibalavala te La Uru ale eia ge abiagu te la kiloli la vulovulogu ale matatale, eia ge abiagu te la tapasi la maututula, la vuhula eia la tahalo la viputumulila ale matata sesele, eia rovitia veia la igogolu taku eia sesele. Me eia kama ge eau moli sekela ale ge sau tola la vibalavala tetalale, ouka. Etato tomi ale loho tavu la guluvi tetala veia eia ge gomai harari, etato tomi ge sau tola la vibalavala tetala mulimuli.
2TI 4:9 Timoti, taritigi eme ge tovo lalai veia eme ge gomai hari,
2TI 4:10 eau la tahalo ouka omai ale ge toto obuau, ouka gologolo. La vuhula e Demas sigolo tarotiau, eia masaga moli la mari papaila te la maututula, eia heleti soio e Tesalonaika, E Kresens tai tugati, eia goio e Galesia, e Taitas tai kati pou omai, eia oioti e Dalmatia.
2TI 4:11 E Luk moli sekela pou omai taku. Taritigi eme ge puli e Mark vikapopo leme, amula ge gomai, la vuhula la tahalo ale eia suli pepehoau te la igogolu taku te la valolo.
2TI 4:12 E Tikikas tai kati pou omai, eau bahatia soio Epesas.
2TI 4:13 Ale eme ge gomai, eme ge abi tai la kairobola taku ale eau tapa taroa oio te la luma te Kapas oio e Troas, eme ge abi tai egiteu la buk tomi taku, ale tai egite kekesia te la kulikuli la kau, egite pipia, la buk tomi tai aleie eme ge abi seselea somai, eau masaga pepehoa.
2TI 4:14 La tahalo isa oiole, e Aleksanda, eia la tahalo ale pui la puigolo te la bras, eia pala igo gegeru sesele la igogolu taku, eia gima pasiau. Ale la vulovulolale, La Uru ge koli seselea soio tetala.
2TI 4:15 Eala moli eau masagea veia eme baumuli tatahome tetalale, la vuhula eia vaubi vagari sesele soio te la merera te Kraist.
2TI 4:16 Ale egiteu e Rom vahariau soilo te la vigagiala te la muluga la vigagiala ale egite vimagiriau ovola, isa kama magiri vikapopo leau veia ge vitikumu lou la merera taku veia eia sesele. Egiteu tomi e tabarabaragu te Kraist ale omaie, egite sigolo taroau, egite hele. Egite korale, taritigi La Uru umala ge gabutatala la iruru tegiteu ele.
2TI 4:17 Eala moli ale eau magiri te la vigagiala, La Uru eia magiri sesele te la baligu, eia vivagariau, veia la valolo te Kraist ge sibitala tataho te la haregu, eau kama ge taga, veia egiteu la valalua la maligoma tomi ale kama e Iuda, egite ge lolo la valolo ale taritigi te Kraist. Eala la vikararala taku eia tubuti, egite kama biliau, egite kama vilai taiau, eau mahuli utu moli, mai e Daniel pala eia mahuli taro la hare giteu la laion, egite kama toloa, tio eau tai mahuli utu mai e Daniel ele.
2TI 4:18 Eau rovia, La Uru ge vimahuliau taro la viluala tomi ale e Satan ge tovo lalaia veia ge visibitala tavuau. La Uru ge vahariau soata te la pulolou la marokala tetala oata te la ilo la lage, eau ge pou tataho ovola. Taritigi pepeho soata tetala, eia moli sekela la matagaga, etato ge vaisale molia, kama ge maila, la kaluvula ge ouka. Amen.
2TI 4:19 Taritigi amuto ge toi la haro sesele soio te Priska mira me Kuila, me egiteu tomi la karakara te Onesiporas tai.
2TI 4:20 E Rastas eia soloio e Korin, me eau tuga taro e Tropimas oio e Miletas, eia lea.
2TI 4:21 Timoti, eme ge tovo lalai vagaria veia ge gomai te la mahati, eia soukama ge leavala, eme kati ge polo tigi te la tia la utu. E tabaramu e Iubiulas tai omai eia toi la haro sesele soio taume, egite me Piudens, e Lainas, e Klodia, me egiteu e tabarabaramu tomi te Kraist ale omaie, egite tomi toi la haro sesele soio taume.
2TI 4:22 Timoti, taritigi pepeho veia La Uru ge pou taume, eia ge vivagari la kalulumu, taritigi tai veia la gilogo tetala ale uru eia ge pou tai taume. Kaluvuti. Eau e Pol.
TIT 1:1 Tavu e Taitas, Eiau e Pol, eau kekesiamu e latugu sesele te la isale Kraist, eia La Uru galua. Eau la bilalaha te La Tahalo Uru, eau la tahalo la valolo te la isale Iesus Kraist. La Tahalo Uru visati leau veia ge baheau soio te la valalua me hatavivile tetala veia eau ge valolo legiteu la merera tetala sesele, egite ge matagaga pepeho, la vulovulo giteu ge maroka tataho. Me la merera tetala, eia sesele tomi moli, La Tahalo Uru kama koramulia ge visigolo. Ale pala eia soukama vipou la mori me la magasa, eia toiti la merera veia ge vimahuli la valalua me hatavivile tetala. Me la merera tetalale, etato rovia veia mai etato ge sau tola seselea, etato ge tahola la mahulila ale mulimuli, la kaluvula ge ouka. Me te la tilau tetala moli, la mererale eia puruti soio te Iesus, ale amite valoloti te la isala. Me La Tahalo Uru sugu tarotiagu la merera tetalale veia la igogolu taku eau ge valolo molila, ale la masasagala tetala. Eia La Uru gatou, eia moli vimahuli la valalua me hatavivile tomi. Eiala moli ele Taitas, eau kekesiamu ovola. Me oio te la isale Iesus Kraist la tahalo la vimahuli tegatou, eau toi la vibalavala te La Tahalo Uru soio taume veia eia ge sugu taroamu la gilogo tetala ale uru, la tiamu oilo ge malilo tataho.
TIT 1:5 Taitas, ale pala eau hiliti tarome oio te la olu e Krit, eau tola tarotiamu te la igogolu la vibaumuli te la lotu oio la gale alele, la vuhula eau veia eme ge vulalai pasi muga la igogolu tegalua te la gilalu la lotu te Kraist, ale pala etala lamolamotia. Eau masagea veia eme ge tabari egiteu la mulugaluga la lotu isahari ale ge vibaumuli oio te la maututula tegiteu tomi isasasa. Taritigi eme ge tilimuli molia mai ale eau veitiamu pala,
TIT 1:6 mai la mulugaluga te la lotu, eia ge la tahalo sesele, veia la iruru bakisi kama ge tabuli oio tetala. E rutula ge isa moli, e latatula tai ge toro moli te la lotu, egite kama ge e guliliki la vareagila ale la valalua ge mera kukumua giteu.
TIT 1:7 Mai eme ge vauru la tahalo isa veia eia ge la mulugaluga te la lotu, ale eia sau tolati la igogolu te La Tahalo Uru. Eala eia taritigi veia la iruru bakisi kama ge tabuli oio tetala. Eia umala ge la tahalo la vareagila, eia umala tai ge rovi la igototolola. Eme umala tai ge ababi egiteu la tahalo la iliu. Umala tai ge hilovi egiteu la tahalo ale hate mamamago te la vikokuela. Umala ababi tai egiteu la valalua ale gabutatala la pakalila.
TIT 1:8 Eala moli la mulugaluga isasa te la lotu, eme ge hilovia la vulovulola ge taritigi pepeho maie: Eia ge la tahalo la vilali la mosi. Eia ge la tahalo ale la vulovulolala taritigi. Eia ge la tahalo la igogaumala, la tilogo tai. Eia ge la tahalo ale la vulovulola matata tomi moli. Eia ge la tahalo ale toro sesele te la merera te La Tahalo Uru. Eia ge la tahalo tai ale magiri vagari te la tovolalaila, kama ge boru.
TIT 1:9 Eia ge la tahalo ale matagaga sesele te la masova la merera te Kraist. La merera alele eia vimariti ovola, eia rovitia veia eia sesele. Me oio vola, eia taritigi veia eia ge vagari veia ge tutu tolea giteu la valalua me hatavivile me gulikiliki ovola, me eia ge barautu taro tai la merera tegiteu ale visigologolo.
TIT 1:10 Egiteu la mulugaluga te la lotu, eau masaga la vulovulo giteu ge vagari maie, la vuhula oio mutou ele la valalua la vareagila oio mapaititi, egite visigologolo la valalua me hatavivile te la vikara papaila tegiteu. Me ale mamuga sesele tegiteu ele te la visigologolola, eau rovia, mai egiteu la valalua ale vagari tavu la imoimo la merera tomi te Moses. Egiteu mai ale soloio te la lotu e Iuda, veia la valalua te Kraist ge tilimuli molia, ge koro la vovo giteu mai ele.
TIT 1:11 Mai amutou me la mulugaluga ge barautu harari la merera tegiteu ele. La vuhula egite oio igo marapa la pulolou tegiteu e tau me latatu isahari, ale egite vimari gegeruti egiteu maie. Eala moli egite gabutatala molia veia la valalua ge abia giteu la uati.
TIT 1:12 Mai la merera te la uru giteu e Krit isa, eia pala veipala loua giteu maie mago “Egite la valalua e Krit la tahalo la visigologolola, egite mai la paia hou. Egite tuha malulu moli, ali pepei.”
TIT 1:13 Me la merera te la tau Krit alele, eia sesele moli. Me alele Taitas, taritigi eme ge karasuku vagari egiteu la valalua me hatavivile te la lotu, veia egite ge pou tataho mai ele te la vulovulo la lotu,
TIT 1:14 egite kati ge roromuli la merera la visigologolola tegiteu e ururu le Iuda ale pala. Mai alele egite kati ge gabu tikumu tai la merera la visigologolola mai la vimari te la vovo, ale loio te la hare giteu ale tahi taroti e Kraist.
TIT 1:15 Sesele, etatou la valalua me hatavivile la lotu te Iesus, mai e Kraist ge vimaroka la tia gatou, ale etato la magiri robola ouka te la paga isasa. Eala moli egiteu ale la gabutatalala tegiteu kati kokora, me mai ele egite kati gabu tikumu e Kraist, la vulovulo tomi eia mai ale vulo sapoloti te la mata giteu, eia mai ale mumuguti, la vuhula la gabutatalala tegiteu oilo eia mumugu tomi moliti.
TIT 1:16 Egite veia egite rovi sesele La Tahalo Uru, eala moli egite kama veipalea mai ele, te la vulovulo giteu egite mai ale tahi taro loua. Egiteu la tahalo la vareagila, egiteu la maroa moli, egite kamati koramuli la igogolu isa ale taritigi.
TIT 2:1 Taitas, eia taritigi eme ge tovo egiteu la valalua me hatavivile te la lotu, te la vulovulo ale koramuli la tahalo ale roromuli sesele e Kraist.
TIT 2:2 Egiteu la ururu, la vulovulo giteu ge taritigi tomi moli maie: Egite ge la tahalo la tia madidila. Egite ge rovi la tilogo. Egite ge hate tatola moli te la vulovulo la vovo, mai ale egite ge vipuhi tigi moli la valalua me hatavivile tomi te la lotu. Mai tai ele egite ge magiri vagari moli te la tovolalaila. Eme ge vimari egiteu te la pulolou tomi ale taritigi pepeho mai ele, Taitas.
TIT 2:3 Tio, me mai tai lou ele, eme ge tovo tai egiteu e hatavivile ururu veia la pulolou tegiteu ge taritigi tataho, mai egiteu e hatavivile la lotu sesele. Egite umala ge vikara kukukumu. Egite umala tai ge pou tavu la iliu la lalu ale vagarigari. Taritigi egite ge tovo tataho legiteu la soesobe me egiteu ale taulaiti la gauru ale taritigi
TIT 2:4 veia egite ge suli pepeho egiteu e hararua giteu, e latatu giteu, egite ge vibaumuli tataho soio tegiteu mai ele.
TIT 2:5 Egite hatavivile ururu ge viteteli tai la soesobe veia egite ge pou tataho, egite ge hate tola moli, egite kama ge para osaosa. Egite ge ruturutu molia giteu e hararua giteu, la vuhula mai egite kama ge pou tataho mai ele, egiteu isahari soukama ge hiloa, me egite ge vile la merera te La Tahalo Uru ovola.
TIT 2:6 Me mai tai ele, eme ge tutu tola taia giteu e maure halabalaba veia egite ge lagu tavu moli la vulovulo ale taritigi, egite ge pou tataho moli.
TIT 2:7 Mai emei, Taitas, la vulovulomu ge taritigi te la mata giteu, me mai ele egite ge rovi la vulovulo ale taritigi. Eme ge vimari sesele egiteu, la merera taume ge tikumu tomi moli,
TIT 2:8 eme ge vikara tataho, isa kama koramulia ge tahi tarome te la merera taume. Me mai ele egiteu ale masagea veia ge vile etatou, egite ge mahela, la vuhula egite kama koramulia ge sivuti isa la iruru omai tegatou la valalua te Kraist.
TIT 2:9 Eme ge veia giteu la tahalo la igogolu veia egite ge roromuli tataho la uru giteu ale babaha egiteu soio te la igogolu. Egite ge vagari veia la igogolu tegiteu ge visagege la uru giteu mai ele. Egite umala ge putu ololi la merera te la uru giteu veia ge vulo loua.
TIT 2:10 Egite umala tai ge pakalikali. Eala moli la vulovulo giteu ge veipalea veia egite koramulia ge sau tola la igogolu tomi. Me mai ele la vulovulo giteu mai ale vitokoromo la gauru te La Tahalo Uru, la tahalo la vimahuli tegatou. La valalua me hatavivile ge hiloa veia la gauru tetala eia taritigi pepeho, egite ge isua mai ele, egite ge polo ovola, goio te Kraist.
TIT 2:11 La Tahalo Uru, eia veipalatia gatou la gilogo tetala ale uru, ale eia veia ge vimahuli la valalua me hatavivile tomi.
TIT 2:12 Me oio te la gilogo tetalale, etato rovitia mai ele veia etato ge sugu taro la vulovulo la vovo ale vaubi soio te La Tahalo Uru. Etato ge lagu tavu moli la vulovulo ale maroka, mai te la pulolou ale taritigi, eia matata tomi moli. Etato ge veipala mai ele la masasagala te La Tahalo Uru veia etatou la valalua me hatavivile te la imamala ale igoie, etato ge mata kaseka tavua.
TIT 2:13 Etato ge pou tataho moli mai ele, ale etato pou tali La Tahalo Uru tegatou, e Iesus Kraist, la tahalo la vimahuli tegatou. Eia ge beu rivu loua vikapopo la matagaga ale uru pepeho. Mai la merera te la guluvi tetala eia veipalatia, me etato ge sagege ale etato ge hiloa veia eia sesele.
TIT 2:14 La riau tegatou ele, eia sugu taro moli la mahulila tetala veia ge rou rivu lou etatou taro la kilisi te Satan. Me eia igotia mai ele veia ge vimaroka etatou, etato ge la valalua me hatavivile tetala sesele, etato ge vagari tavu moli la vulovulo la matagaga.
TIT 2:15 Tio, Taitas, la merera tomi alele, eme ge vimari egiteu la valalua me hatavivile tomi taume oio vola. Eme ge viteteli egiteu, eme ge vikara vagari tai soio tegiteu la tahalo la vareagila, egite ge gabu tikumu la merera taume. Eme umala ge mahela legiteu ale vilevileme, eme ge vikara vagari lou soio tegiteu, la vuhula eme la bilalaha te Kraist.
TIT 3:1 Taitas, eme ge vahiliti la gabutatalala tegiteu la valalua me hatavivile te la lotu, veia egite ge roromuli tataho e gavman, egite ge raragi mai ele veia egite ge lagu tavu moli la igogolu tomi ale taritigi.
TIT 3:2 Eme ge veia giteu veia egite umala ge vikara kukukumu, egite umala tai ge vaigigo. Egite ge pou tataho moli, egite ge togo la valalua me hatavivile tomi.
TIT 3:3 Taritigi etato ge gabutala rivu tai ale pala etato lagu tavu moli la vulovulo la maligoma. Etato pala pou mai la paua, etato kama rovi bakisi la merera te La Tahalo Uru veia etato ge roromulia. Pala la visigologolola eia volu pasi te la vulovulo gatou, ale etato souka rovi e Kraist. Etato pala tilimuli bububu moli la masasagala te la vovo mai ele, mai la vulovulo ale kama kokora, la maisu totolola, me la tahi vilela tai soio tegiteu la valalua.
TIT 3:4 Ale etato soloio moli te la maligoma mai ele, La Tahalo Uru, eia gogo etatou, eia vimahuli etatou la valalua me hatavivile la iruru, eia visibitala la matagaga tetala ale uru tavu etatou. Etato kama maroka veia eia ge gogo etatou te la vulovulo gatou ale taritigi mai ele, ouka. Eia gogo bulalahu moli etatou, eia suli bulalahu moli etatou mai ele. Etato vuhi te la isala, ale eia vuhi halaba la kalulu gatou oilo. Me oio vola La Kalulu La Marokala eia vimahuli sesele etatou, etato sibitala halaba lou mai la pepeso ale e tilala so tapaposa molia, eia maroka.
TIT 3:6 La Tahalo Uru eia vivoluti la tia gatou tomi la valalua me hatavivile tetala La Kalulule Iesus, eia la tahalo la vimahuli tegatou.
TIT 3:7 Me La Tahalo Uru igoa mai ele veia oio moli te la gilogo tetala etato ge vipuhi tigi tataho me eia, veia etato ge pou mai e latatu La Tahalo Uru, eia ge masaga lou etatou mai ele, etato ge sau tola la mahulila ale sesele, la kaluvula ge ouka. Eia mai la merera tetala ale eia veitia, me la merera tetalale etato toroti ovola veia etato ge mahuli mai la tori oio te la balila.
TIT 3:8 Me la merera ale, eia sesele. Taitas, eau masagea veia eme ge vikara matagaga pepeho soio tegiteu la valalua me hatavivile taume te la merera taku tomi ele. Mai alele, egiteu ale roviti La Tahalo Uru, egite ge lagu tavu moli la vulovulo ale taritigi, mai te la visuli soio te la mautu. Me la igogolu tomi ale taritigi tataho mai ele, eia ge suli la valalua me hatavivile tomi.
TIT 3:9 Eala moli Taitas, taritigi egite la valalua me hatavivile la lotu taume ge poke taro la vikara papaila ale egite isahari veia ge vulo papai lou la merera te La Tahalo Uru. Umala tai egite ge pou tavu la giligi la isaisa giteu e ururu ale pehoti. Umala tai egite ge pou bulalahu veia ge vaigo muli la masova la imoimo la merera tomi te la lotu e Iuda, umala. La vikara papaila tomi alele, eia kama ge vivagari amutou, eia la golu bulalahu moli.
TIT 3:10 Mai isasa eia pou tavu moli la vahiliti la vikara papaila, ale ge igo marapa la valalua me hatavivile, eme ge mera taroa vakasa, goio la vaka luala, veia eia umalati ge vaigo maraparapa mai ele. Mai eia kama ge lolome, korao, eme ge kisu taro molia,
TIT 3:11 eia e latu la masosori. Me la vulovulola lou eia veipalatia mai ele veia eia ruruti.
TIT 3:12 Taitas, la tahalo isasa eia ge kolime, eau ge bahea soio taumele. Eau soioge ge baha e Atemis uka e Tikikas, eau soukama rovi tigia. Ale la kilolimu ele ge guvi, eme ge tovo lalai veia etala ge vipoga oio la mautu e Nikopolis, la vuhula eau veia ge pou muga te la mautu alele te la leavala.
TIT 3:13 Eme ge tovo lalai vagari molia veia la tahalo la mari uru e Senas, egira me Apolos, eme ge baha egirua soio te la igogolu la valolo, eme ge suli egiruale, ge abia girua la golugolu tomi te la tuluga, mai la ilali me la uati.
TIT 3:14 Taritigi pepeho tai veia la valalua me hatavivile la lotu oio e Krit ele, egite ge rovi tai la vulovulo la visuli mai ele veia egite ge lagu tavu la igogolu ale taritigi veia egite ge visuli soio tegiteu ale pou la savelela ale uru. Egite umala ge pou bulalahu.
TIT 3:15 Amite tomi ale omai toi la kavikoki, la haro, la maulavi me la logo sesele soio taume. Eme ge laharoa giteu tomi e tabarabara miteu te la isale Iesus ale oio taume ele. La gilogo te La Tahalo Uru ge pou tamutou tomi. Eau e Pol.
PHM 1:1 Tavu e tabaragu e Pilimon, Eiau e Pol, amila me tabara galua e Timoti, amila kekesiamu. Eau pou te la luma la kilisi, la vuhula eau valolo la valalua me hatavivile te la isale Kraist Iesus. La igogolu tegatou isa moli te la valolo te la isala.
PHM 1:2 Eau kekesi taiale rutumu uru e Apia, eia mai e hatavile milua sesele, me e latumu e Akipas, eia taho sesele loio taku te la vaubila te la valolo te Kraist. Eau kekesi taia giteu la valalua me hatavivile te Kraist ale lotulotu oio te la luma taumele.
PHM 1:3 La gilogo te Tama gatou, tegirua me Latula e Iesus Kraist, La Uru gatou, eia ge pou tamutou, la tia mutou oilo ge malilo tataho.
PHM 1:4 Pilimon, ale eau pou te la kilaka, eau kama gabu tarome, eau kaka moli La Tahalo Uru veia eia ge sulime. Eau toi taritigi pepeho soata tetala,
PHM 1:5 la vuhula eau rovitia eme sau tola seseleti la isale Kraist, eme suliti egiteu la valalua me hatavivile tetala, me egite gilemulitiagu la vulovulomu tomi ale taritigi ele.
PHM 1:6 Pilimon, ale eme la tahalo te Kraist sesele mai ele, eau kaka La Tahalo Uru veia etala ge vitau me tabara sesele te la isala, me eme ge rovi seselea mai ele veia e Kraist, eia vibalava seseleti etatou tomi ale tetala.
PHM 1:7 Tabaragu, la vulovulomu tomi ale taritigi ele, eia visagege seseleau, ale eme puhi tataho egiteu la valalua me hatavivile te Kraist. Me la vagagarila taku eia sibitala halabati lou ale eau lolotia mai ele veia la valalua me hatavivile te la lotu egite mata muliti la vulovulomu ale taritigi ele, egite mata kaseka tatahoti lou. Taritigi pepeho tabaragu.
PHM 1:8 Sesele, tabaragu, eau la bilalaha te Kraist, eia koramulia veia eau ge karasukume te la gauru ale taritigi.
PHM 1:9 Eala moli eau kama ge vikara vagari soio taume. Ale etala vitau me tabara sesele te la isale Kraist, eau kaka gogogo moliamu veia eme ge loloau. Eau e Pol, eau uruti, la ivugu sisiti. Eau pou tai te la luma la kilisi, ale egite viligiau te la igogolu la valolo te la isale Kraist.
PHM 1:10 Mai alele eau kekesiamu te la tahalo isa bisi, la isala e Onesimas, eia mai e latugu sesele. Eau pou te la luma la kilisi, eau pogea, amila virovi tatahoti.
PHM 1:11 Eia la bilalaha taume eme rovia. Pala eia tou pasi la igogolu, eia hele tarome. Eala moli igoie eia vuloti, la vulovulola isapoloti, eia koramulitia mai ele veia ge suli pepeho etalua, eia kamati ge tou.
PHM 1:12 Pilimon, e latugu ale Onesimas ele, eau ge baha taro rivua soio taumele. Me ale eau baha taroa soio taume, eau ilo rururu sesele, la vuhula eia la tahalo taku sesele.
PHM 1:13 Mai eau ge sau tola molia, mai eia ge abi la mulimu te la visuli somai taku ale eau pou te la kilisi te la isale Kraist.
PHM 1:14 Eala moli umala, eau ge baha rivu lou e maura soio taume, la vuhula eia la tahalo taume, me eme kama vikara matagaga somai veia eau ge sau tolea. Mai eme masagea veia ge suliau mai ele, taritigi alele la gabutatalala taume sesele.
PHM 1:15 Sesele, Pilimon, amula me la bilalaha taume e Onesimas ele, amula vipou baati la leavala isahari, eala moli ale eia ge beua soio taumele, amula ge virovi baoli tataho lou mai e tau me tabara sesele te la isale Kraist, me mai ele eia kati ge hele lou.
PHM 1:16 Eme ge gabu tikumu molia, eia mai e tabaramu sesele te Kraist. Eau sagege pasi le maura, me eau rovi taia mai ele veia eme ge sagege pepeho lou leia, la vuhula eia la bilalaha taume, eala moli eia sibitala taiti mai e tabaramu sesele te la isale Kraist, eia vulo uruti mai ele.
PHM 1:17 Sesele, Pilimon, mai te la gabutatalala taume eme veia etala e tau me tabara sesele, taritigi eme ge loloau, eme ge rara tavu e Onesimas ele, eme ge vagoilo halaba loua taume, mai moli ale eme ge rara tavuau mai eau ge guvi oiole.
PHM 1:18 Mai la iruru tetala isasa eia soio taume, veia mai la dinau tetala isa tai eia soio taume, eia souka kolia, taritigi eme ge vuloa ge kekesi la isagu ovola.
PHM 1:19 Male, te la limagu sesele eau kekesia maie: “Eau, e Pol, eau ge koli la makodo te Onesimas soio taume.” Eala moli eau kama ge toi tikumu soio taume la makodo taume somai taku, ale mai eau pala kama ge goio tamutou, eme kama ge rovi e Kraist, la kalulumu ge soloio te la maligoma. La makodo alele, kora, eme kama ge kolia somai taku, eau suli moli emei.
PHM 1:20 Ioge, tabaragu, eau pou tali molime veia oio te la isa La Uru, eme ge vimata kaseka louau, ale eme ge vagoilo tataho sesele lou e Onesimas ele, la vuhula eme e tabaragu sesele te la isale Kraist.
PHM 1:21 Sesele, eau kekesiamu mai ele, la vuhula eau rovitia veia eme ge igo molia mai ale eau kakatime ovola, eme ge igo pepeho tigi seselea.
PHM 1:22 La kilaka taku isa lou, mai eme ge raragi veia eau ge guvi oio tamutou ele, ge hari lalai amutou, mai la kilaka tamutou tomi soio te La Tahalo Uru eia ge puru, veia eau ge beu rivu loua somai tamutou ele.
PHM 1:23 E Papras, ale amila vipou tomi oilo te la luma la kilisi ele, eia tai egite viligia te la igogolu la valolo te la isale Kraist, e Papras ele, eia veia mutou la haro sesele tamutou.
PHM 1:24 Mai tai egiteu ale omai taku, amite igogolu vikapopo te la valolo te la isale Kraist Iesus, mai e Mark, e Aristakas, e Dimas, e Luk, egiteu ale vei taia mutou la haro sesele tamutou.
PHM 1:25 Taritigi pepeho veia la gilogo te Iesus Kraist, La Uru gatou ge pou tamutou tomi. La merera taku bakisi eala moli ele. Kaluvuti. Eau e Pol.
HEB 1:1 Alaurati, La Tahalo Uru, eia veipala la merera tetala soio tegiteu e ururu tegatou e Iuda, eia baha taro egiteu la bilalaha tetala vaka usu, eia tovo lalai tai la gauru usu veia eia ge vei matagagea giteu la valalua tetala la gabutatalala tetala.
HEB 1:2 Eala moli te la imamala ale igoie, La Uru baha taroti e Latula, eia veipalati la merera tetala somai tegatou. Oio te la limale Latula sesele, La Tahalo Uru eia vipou la golugolu tomi. La Uru hiloviti e Latula veia eia ge tahola la golugolu tomi ale eia vipoutia.
HEB 1:3 Eia la matagaga ale uru te Tamala, la vulovulola tomi eia mai te Tamala sesele, eia sau tola la mori me la magasa mai la masasagala tetala sekela moli oio te la merera tetala ale vagari. Eia peho roboti etatou, me oio te la igogolu tetalale, eia vimaroka etatou la valalua me hatavivile tomi te la iruru. La igogolu tetala tomi alele kaluvuti, igoie eia pou oata te la pulolou la mulugaluga oio te la bali La Tahalo Uru.
HEB 1:4 Eia sesele viruru veia La Tahalo Uru eia vipou e Latula veia eia ge urua giteu la angelo. Ale eia toiti leia veia eia e Latula, eia vitikumu seseleti la isala mai ele veia eia sekela moli uru, egiteu la angelo tomi bisi tetala.
HEB 1:5 Mai la merera te La Buk Tabu Ale Pala, La Uru eia veiale Latula maie: Emei e Latugu, Eiau e Tamamu, eau veipalatimei. Me la merera ale tikumu mai ele, La Uru eia soukama veiale angelo isasa oio vola veia eia ge e Latula. Me la merera te La Buk Tabu Ale Pala isa lou, La Uru eia vikara matagaga te Latula, eia veia maie: Eiau ge e Tamala. Eia ge e Latugu. Eala moli la merera ale tikumu mai ele, La Tahalo Uru eia soukama veiale angelo isasa oio vola, ouka.
HEB 1:6 Mai la vikararala te La Tahalo Uru isa lou, eia raragiti veia ge baha taro e Latula la posolagu somai te la maututula, eia goio vikara maie: La Tahalo Uru vipou egiteu la angelo veia egite ge sele tatavu la igogolu tetala mai la lolovi.
HEB 1:7 Eala moli egiteu la angelo, egite la bilalaha tetala, me La Uru veia maie tegiteu ele: Amuto raga tatavu la igogolu te La Uru, mai la kalamea la havi ale karerere.
HEB 1:8 Eala moli mai oio te Latula, La Tahalo Uru kama vikara mai ele, eia vitikumu lou la merera tetala soio te Latula maie: La pulolou taume te la pulolou la mulugaluga, eia ge magiri moli mai ele, la kaluvula ge ouka. Eme vibaumuli matata tataho moli egiteu la valalua taume,
HEB 1:9 eme masaga la vulovulo ale matata, eme vile sesele la vulovulo ale kama kokora. Eala La Uru taume eia hilovitime, eia vaurutime veia ge vipoume te la sagegela ale uru sesele, kara polo la sagegela ale la valalua ge gabua.
HEB 1:10 Mai la merera te La Tahalo Uru isa lou soio te Latula eia veia maie: La Uru, Te la silokola eme vipou la magasa tomi, te la limamu sesele tai, eme vipou la mori.
HEB 1:11 La mori me la magasa mulimuli ge kokovu, eia ge mai la lavalava ale mumugu, eala moli eme La Uru ge magiri moli mai ele, eme kama ge kaluvu.
HEB 1:12 Eme ge pipi kurumu la mori me la magasa mai la lavalava ale eme kai taroa, eala moli eme kama ge vulo sapolo lou, la imamala taume kama ge kaluvu.
HEB 1:13 Mai La Tahalo Uru, eia soukama vikara soio te angelo isa tetala, mago: Eme gomai, eme ge pou te la pulolou la uru oio te la baligu te la galegu e gata, kara ale eau ge pigi egiteu la gima taume sotatalo te la uluva la vahamu, eme ge soa kuru egiteu.
HEB 1:14 Tio, me mave oio tegiteu la angelo? La Tahalo Uru eia soioge vipou egiteu te la igogolu ale mave? Egiteu la kalululu moli, egite susuli moli te la igogolu te La Tahalo Uru. Eia baha taro egiteu somai veia egite ge susuli etatou la valalua me hatavivile tetala, etato ale mulimuli ge pou te la mahulila tetala ale sesele.
HEB 2:1 Taritigi pepeho veia etato ge laba gele tataho tavu la merera ale sesele te La Tahalo Uru, ale etato loloa palati kara igoie, etato soukama ge mulimuli bulalahu la merera la visigologolola.
HEB 2:2 La merera te La Tahalo Uru eia veia giteu la angelo tetala, me egite veipalea somai tegatou la valalua la vovo, eia sesele tomi moli, mai isa ge poloa eia ge vure.
HEB 2:3 Mai ge mai ele, etatou la tahalo la vovo moli, etato ge hele sove mai etato ge tou la merera la vimahuli te La Uru ale taritigi seselele? La merera la vimahuli alele, La Uru veipala mugea, me egiteu ale loloa te la harela, egite vei tikumu loua, kara igoie etato tomi rovitia.
HEB 2:4 Me La Uru goio vitikumu lou la merera tegiteu la bilalaha tetala te la golu la karutula me la irovilala tai te la vagagarila. Eia abi taia giteu la vaabila te La Kalulu La Marokala, mai te la masasagala tetala, ale ge koramuli egiteu te la igogolu la valolo tetala veia la valalua me hatavivile ge gabu tikumu la merera tegiteu ale valolo te Latula.
HEB 2:5 Mai la pulolou la matagagala te La Uru, ale eia visibitalatia te Latula, ale la viputumulila ale halaba mai ale eau vei matagagatia oatale, ale eau veia e Latula ge pou la mulugaluga omai te la maututula. La Tahalo Uru eia kama vipou egiteu la angelo veia egite ge vibaumuli la pulolou la matagagala tetala, ouka, e Latula sekela moli eia vipoua veia eia ge la mulugaluga oio vola.
HEB 2:6 Mai la merera te La Buk Tabu lou, eia veia maie: Tahalo Uru, amiteu la tahalo la vovo moli, amite taritigi oiove veia eme ge gabu tikumu amiteu?
HEB 2:7 Eme vipou amiteu veia amite ge maroka bakisi mai egiteu la angelo,
HEB 2:8 eme vauru amiteu, veia amite ge vibaumuli te la golugolu tomi ale eme vipoua. Mai la vikararala alele, eia veia La Uru vipou etatou la tahalo la vovo veia etato “ge vibaumuli te la golugolu tomi”. Eala moli etato pou la marapala, etato kama mamuga la golugolu tomi mai la lolovi me la hura me la mago veia ge vibaumuli ovola.
HEB 2:9 Eala moli etato ge hilo e Iesus, eia la tahalo la vovo mai etatou, La Uru pala vibisi golo mugea bakisi veia eia ge bisi tegiteu la angelo veia eia ge pou muga mai la tahalo la vovo, veia oio moli te la gilogo te La Uru ale uru, eia ge peho robo etatou la valalua me hatavivile tomi. Eia roromuli e Tamala, eia goio poga tavu la pileho, eala igoie e Tamala vauru seseletia.
HEB 2:10 Mai eia vipouti e Latula te la iligiligi mai ele, eia matata moli, la vuhula eia moli la vuhu la golugolu tomi, me eia viputumulia veia ge vimaroka e Latula mai ele, me oio vola etato usu goiloti, igoie etato pouti mai e taitarile Iesus, eia la vuhu la vimahuli tegatou, etato pou vikapopo le Iesus te la matagaga tetala ale uru.
HEB 2:11 Etato tomi e latatu La Tahalo Uru. E Iesus eia vimaroka etatou, eala eia kama mahela veia ge toi letatou veia etato e taitarila.
HEB 2:12 Mai la merera te La Uru te La Buk Tabu Ale Pala isa lou, eia veia maie: Eau ge veipala la isamu soio tegiteu e tabarabaragu. Eau ge vaisaleme te la mata giteu la valalua me hatavivile tomi.
HEB 2:13 Mai la merera isa lou tai, eia veia maie: Eau ge tau la ilogu soio te La Uru. Me la merera isa lou, eia veia maie: La Uru, Eau omai popou, eiau, vikapopo legiteu e latatumu, ale eme vipouti egiteu te la uluvagu.
HEB 2:14 Egiteu e latatulale, egite la tahalo la vovo. E Iesus eia abi tai la vovo gatou veia oio te la pileho tetala eia ge soa kuru e Satan ale vipou etatou te la pileho.
HEB 2:15 Eia peho robo etatou, me etatou ale pala pou te la miau la lulu la pileho, eia lubeti etatou taro la kilisi alele, etato kati tagea.
HEB 2:16 Mai eia matagagati mai ele veia La Uru, eia kama visuli egiteu la angelo mai ele, ouka, la visuli alele eia puru somai tegatou la valalua la vovo, mai La Buk Tabu Ale Pala eia veia, eia suli “etatou la hilile Abraham.”
HEB 2:17 Eala e Iesus, La Tahalo Uru vipoua mai sesele etatou e tabarabarala, veia eia ge igo sesele la igogolu tetala te la gilogo, veia eia ge magiri moli kabili te la baa gatou me La Uru mai la mulugaluga tegiteu e pris, veia ge sugu taroa La Uru la iruru tomi te la valalua me hatavivile veia La Uru ge vimavulaha taroa. Me la igogolu alele, e Iesus igo seselea, la vuhula eia la tahalo la vovo mai etatou, eia la vuhu la gilogo sesele.
HEB 2:18 Eia la tahalo la vovo mai sesele etatou, eia ligi te la tovolalaila mai tai etatou, eala igoie eia koramulia ge suli etatou tegiteu la tovolalaila ale etato gaugabua.
HEB 3:1 Amuto tabarabaragu ale maroka, amutou ale La Uru tolati amutou veia amuto mulimuli ge pou oata tetala sesele, eau masagea veia la gabutatalala tamutou ge magiri vagari te Iesus, eia e pris ale uru, La Tahalo Uru baha taroa somai veia eia ge sau tola la lotu tegatou.
HEB 3:2 La igogolu tomi aleie, e Tamala hilovitia oio vola, eia igo sesele tomitia mai tai e Moses pala, ale eia vibaumuli tataho la valalua me hatavivile te La Uru.
HEB 3:3 Eala moli e Iesus, eia uru tegirua me Moses. Mai la vikarara la tilovo tegiruale, mai la tahalo isasa ge tigi la luma ale taritigi pepeho, la valalua ge hiloa, egite kama ge vei tataho la lumale, ouka, egite ge vei tataho moli la tahalo ale tigia. Mai e Iesus, eia tigi la luma te La Tahalo Uru, mai la pulolou la matagagala tegatou la valalua tetala, eala moli e Moses, eia mai la sosole moli oilo vola. Eala eia matagagati mai ele veia e Iesus moli, eia uru tegirua me Moses.
HEB 3:4 Eia sesele, La Uru vipou la papaga tomi, me la luma tetalale, eia sesele tigia.
HEB 3:5 Me oio te la luma tetalale, e Moses igogolu tataho mai la bilalaha sesele. Eia veipala muga la merera te La Uru ale mulimuli sibitala matagagati oio te Iesus.
HEB 3:6 Eala moli mai e Kraist, eia igogolu tataho pasi mai la masasagala te Tamala sesele, eia la mulugaluga tegatou la bilalaha tomi ale igogolu oio te la luma te Tamala. Mai etato ge magiri vagari veia la merera tetala eia ge puru sesele somai tegatou, ale eia veia eia ge vimahuli sesele etatou, tio eia ge sau tola etatou, etato ge magiri mai la luma tetala.
HEB 3:7 Mai la vikararala te La Kalulu La Marokala eia vei loua maie: Gageie, mai amuto ge lolo La Uru ge vikara,
HEB 3:8 amuto umala ge lolo tataroa, mai egiteu e tutubu mutou alaura, te la imamala la vareagila tegiteu. Egiteu hele taro la pulolou la kilisi oio e Gipto, egite goio lolo taro la merera te La Uru, egite bula vulovulo te la hohoi la leavala savulu vaa, eme tovo lalai egiteu mai ele.
HEB 3:9 Egite igo susuku la vareagila tegiteu mai ele somai taku, eau suli tatataho egiteu, egite kama gabu tikumu la visuli taku ale taritigi tavu egiteu.
HEB 3:10 Eala eau pala igo totolo egiteu e tutubu mutou ele, eau vikara soio tegiteu maie “Egite kama gabu tikumuau bakisi, egite kama rovi la gauru taku.”
HEB 3:11 Eala eau goio toi la merera ale tikumu maie “Egite kamati ge goilo te la pulolou la mailala taku.”
HEB 3:12 Amuto tabarabaragu, amuto ge mata rara, la gabutatalala ale kama kokora soukama ge viruru rivu lou amutou, amuto soukama ge kisu taroau, La Tahalo Uru, ale eau sekela moli magiri.
HEB 3:13 Amuto umala ge mai ele. Eala moli amuto ge viteteli baoli lou amutou te la haroharo tomi, mai la merera te La Buk Tabu Ale Pala eau toitia oata veia “gageie” amuto ge lolo La Uru. Mai amuto ge igo seselea mai ele, la vulovulo ale kama kokora eia kama ge vitilo amutou, amuto kama ge poke taroau.
HEB 3:14 Mai etato ge sau tola moli la vikararala te La Uru ale etato loloa palati mai ele, kara te la tapasila, tio etato koramulia ge pou sesele mai e taitarile Kraist.
HEB 3:15 Mai la merera te Devit te La Buk Tabu Ale Pala ale eau toi palatia oatale: Gageie, mai amuto ge lolo La Uru ge vikara, amuto umala ge lolo tataroa, mai egiteu e tutubu mutou alaura, te la imamala la vareagila tegiteu.
HEB 3:16 Me egiteu la tahalo la vareagila ale lolo taro la merera te La Uru, egiteu ere? Egiteu tomi moli ale e Moses puli taro egiteu loio e Gipto.
HEB 3:17 Me egiteu moli ele, egite vahiliti la igototolola te La Uru te la vulovulo giteu ale kama kokorale. La igototolola tetala eia tabuli oio tegiteu la leavala savulu vaa, egite pou tavu moli la iruru, egite tomi peho, la vovo giteu tomi parara bulalahu moli te la hohoi, egite kora.
HEB 3:18 Me oio moli tegiteu la valalua la vareagila alele, La Uru toiti la merera ale tikumu maie: Egite kamati ge goilo te la pulolou la mailala taku.
HEB 3:19 Eala etato matagagati mai ele veia egite kama koramulia veia ge goilo te la pulolou la balavala tetalale, la vuhula egite kama tau la ilo giteu soio tetala, egite vareagagi moli.
HEB 4:1 Amuto ge mata rara, la vuhula la merera te La Uru eia so magirigiri, ale etato ge goilo te la pulolou la mailala tetala, eala amuto ge mata rara, amuto soukama ge boru posa, amuto ge galo te la tirorola soilo vola.
HEB 4:2 La vuhula etato tai lolotia la valolo ale taritigi te la hare giteu la bilalaha tetala, mai tai egiteu e tutubu gatou alaura. Eala moli la merera te La Uru kama suli tigi egiteu, la vuhula egite kama taua te la ilo giteu.
HEB 4:3 Eala moli etatou ale tautaulailo sesele oio vola, etato ge goilo sesele te la pulolou la mailala te La Uru. Mai la merera te La Buk Tabu Ale Pala isa lou eia veia maie: Te la igototolola taku eau toiti la merera ale tikumu veia “egite kati ge goilo te la pulolou la mailala taku.” Eala eia matagagati veia etatou moli ale tautaulailo tetala, etato sekela moli ge goilo. Eia sesele, La Uru raragiti la pulolou alele palati te la vipoupoula tetala, eala moli egiteu e tutubu gatou vareagi lou.
HEB 4:4 Mai la merera te La Buk Tabu Ale Pala isa lou, La Uru vikara te la ivitu la haro la vipoupoula tetala, eia veia maie: Te la ivitu la haro, La Tahalo Uru maila taro la igogolu tomi tetala. Eala eia matagagati mai ele veia eia raragitia la pulolou la mailala tetala ale etato ge pou oio vola.
HEB 4:5 Eala moli isa tegiteu e tutubu gatou kama goilo vola, mai la merera te La Buk Tabu Ale Pala mai ale eau toitia igoiti, eau ge toi loua maie: Egite kamati ge goilo te la pulolou la mailala taku.
HEB 4:6 Egiteu alele, egite lolo la valolo ale taritigi te La Uru, eala moli egite goio vareagi lou, tio egite galoti. Eala moli eia matagaga moli tegatou igoie veia La Uru viputumulitia veia isahari ge goilo sesele tetala.
HEB 4:7 Oio moli ovolale, eia matagagati veia La Uru eia tauti la mata veia etato ge goilo tetala. Mai te la merera te La Buk Tabu Ale Pala, ale eau toitia oatale, mai eia toitia mago “gageie”. La merera ale “gageie” ele, etato pogea oio te la merera te Devit ale sibitala mulimuli seseleti te la imamala la vareagila tegiteu, eia veia maie: Gageie, mai amuto ge lolo La Uru ge vikara, amuto umala ge lolo tataroa.
HEB 4:8 La imamala ale egite soko la vareagila ovola la imamala te Moses moli. Goio, mulimuli e Iosua goio koli e Moses, eia puli egiteu soio te la gale ale La Uru abia giteu. Eala moli ale la pulolou te la vovo moli, eala eia matagagati veia e Iosua tai kama vahari sesele egiteu soio te la pulolou la mailala sesele te La Uru. Mai la tilau te La Uru te la pulolou la mailala tetala eia ge puru sesele tomiti te la tirorola tegiteu e Israel soio te la gale ale La Uru abitia giteu, mai ge mai ele, tio La Uru kamati ge koramulia ge tau loua giteu la tilau isa lou ale eia veia ge vibalava la valalua tetala te la mahulila ale mulimuli.
HEB 4:9 Eala eia matagagati veia la mailala ale taritigi mai la mailala te la haro tabu, eia soloio, eia pou taitali etatou la valalua tetala.
HEB 4:10 Mai etato ge goilo sesele oio vola, etato ge maila tataho taro la igogolu, mai tai La Tahalo Uru, eia vipou kaluvu la golugolu tomi, eia goio maila tai ovola.
HEB 4:11 Eala, eia taritigi pepeho veia etato tomi ge vagari veia ge goilo sesele ge sau tola la pulolou la mailala tetalale, etato isa umala ge sovei la vulovulo giteu e ururu gatou ale pala, veia etato ge vareagi, etato soukama ge galo te la pulolou la balavala te La Uru ale taritigi pepeho.
HEB 4:12 La merera te La Uru eia kara pepeho mai la viso ale egite meli la galela tomi ilua, eia vagari, eia mahuli. Eia kama mai la viso tegatou la valalua, eia kara pepeho pasi, eia ge barautu etatou, eia ge tagu sesele la hate gatou, la tilalau te la tia gatou, me te la gabutatalala tai tegatou oilo, eia ge veipalea. Eia ge ubi sesele la vuhu la mahulila tegatou mai ele, eia ge veipala la vulovulo gatou tomi ale tabuli kokovu, eia ge tomu sasae la vulovulo gatou oio vola.
HEB 4:13 La paga isa omai te la magasa, me oata tai te la mori, ale La Uru vipouti egiteu, eia kama ge tabuli kokovu te la milatalata te La Uru. La papaga tomi tabuli matagaga moli tetala, etato tomi ge magiri te la viputumulila oio te la lagula.
HEB 4:14 Oio moli ovolale, eia taritigi pepeho veia etato ge sau tola vagari la tautaulailo tegatou tavu La Uru ale etato magiriti ovola, la vuhula La Tahalo Uru kama mata taro etatou, ouka, eia baha taro e Latula e Iesus somai tegatou, eia vipoua mai e pris ale uru sesele, eia bole taroti la iruru tegatou tomi soio te Tamala, e Tamala goio vimavulaha etatou taro la iruru tomi ale etato igotia.
HEB 4:15 E pris ale uru tegatou ele, eia kama malau taro etatou, eia rovi tomi la pulolou tegatou me la vulovulo la iruru tomi ale etato igigoa. Eia pala muga gabu la tovolalaila tomi mai tai etatou, eala moli eia kama boru.
HEB 4:16 Eala, eia koramuli sesele veia etato kama ge taga, etato ge tuga tavu molia, soio te la pulolou la uru te Tamala, etato ge poga la gilogo oio vola. Eia ge abia gatou la visuli ale uru te la gilogo tetala, koramulia etato ge bolehoho la iloburukola tomi.
HEB 5:1 La tabari la igogolu soio te la mulugaluga tegiteu e pris, eia maie: La Tahalo Uru ge hilovi isa la tahalo, eia ge magiri kabili te La Uru me la valalua, eia ge ababi la vaabila tegiteu la valalua soilo te la luma la lotu. Eia ge rou rivu lou egiteu mai ele taro la kolibarala te La Uru te la vulovulo giteu ale kama kokora.
HEB 5:2 Me eia matagagati mai ele veia La Uru, eia vipou la tahalo la iruru mai tai etatou, te la igogolu aleie, eala e pris tai ele, eia koramulia ge gogo etatou ale paua, ale etato igigo la iruru.
HEB 5:3 Eia rou rivu lou etatou vikapopo tai leia, la vuhula eia tai la tahalo la iruru, eia kama magiri vagari.
HEB 5:4 Me eia matagaga tai veia la tahalo isasa kama ge vauru rivu lou eia veia eia ge la mulugaluga tegiteu e pris, ouka. La Tahalo Uru sekela moli eia ge hilovi tavua, mai sesele alaura te la imamala te Moses, eia tola e Aron te la igogolu alele.
HEB 5:5 Me eia matagaga tai mai ele veia e Kraist kama vauru rivu lou eia veia eia ge pou mai la mulugaluga tegiteu e pris, ouka. La Tahalo Uru moli vaurua, ale eia veiala mago: Eme e Latugu. Igoie eau veipalati eme.
HEB 5:6 Me oio te la merera isa lou tai te La Buk Tabu Ale Pala, La Uru eia veia maie: Eau vipoutime te la igogolule pris, eme ge sau tola la igogolu aleie kara mulimuli, la kaluvula ge ouka. Eme e pris ale uru sesele mai e Melkisedek alaura.
HEB 5:7 E Iesus, eia uru mai ele, eala moli etato tomi rovitia veia te la pulolou tetala pala omai te la maututula, eia tali tavu e Tamala me la kilaka ale vagari pepeho sesele veia eia ge vimahulia taro la pileho. Me e Tamala loloa, la vuhula e Iesus eia la tahalo la tilogo sesele tavu La Uru.
HEB 5:8 Eia e Latula sesele, eala moli e Tamala vipoua te la iligiligi, e Iesus goio igo seselea, eia roromuli tataho e Tamala.
HEB 5:9 E Tamala hiloa mai ele veia e Latula eia la tahalo sesele, eia goio vipoua veia eia ge la vuhu la mahulila sesele tegatou tomi ale roromulia.
HEB 5:10 Eia toitia veia eia ge e pris ale uru mai e Melkisedek, ale eia e pris ale uru alaura te la imamala te Abraham.
HEB 5:11 Eau la merera usu lou te Melkisedek mirua me Kraist ele veia ge vimari le amutou ovola, eala moli eia vagari pasi veia eau ge lubea mutou, la vuhula amuto kama abi tigi la vimari.
HEB 5:12 Amuto pou la leavala usuti te la matagaga te Kraist, eia koramuli seselea veia amuto tomi ge vimari lou egiteu ale isapolo ovola. Eala moli ouka, amuto pou moli la savelela te la kalulu mutou, koramuli isa ge vimari halaba lou le amutou la siloko la vimari te la gauru te Kraist. Amuto koramuli moli la susu, amuto kama koramuli la ilali ale vagari.
HEB 5:13 Mai eme so sususu, eia matagagati mai ele veia eme so la pepeso, eme kama koramulia ge hilovi tigi la gauru ale taritigi me la gauru ale kama kokora.
HEB 5:14 Eala moli la ilali ale vagari, mai la merera te La Uru ale tikumu, eia koramuli sesele egiteu ale sagaititi te la merera te La Uru, egiteu ale pou tavu moli la vulovulole Kraist veia egite ge koramulia ge hilovi tigi mai ele la gauru ale taritigi me la gauru ale kama kokora.
HEB 6:1 Umala amuto ge pou tola moli te la siloko la vimari te la valolo ale taritigi te Kraist. Taritigi amuto ge suku moli solagu, amuto ge sagaiti sesele te la merera tomi tetala ale tikumu. Umala amuto ge pou susuku agi te la merera tomi ale egite valolo pala muga amutou ovola veia amuto ge vulo halaba, veia amuto ge hele taro mai ele la vulovulo ale kama kokora te la pileho, veia amuto ge tautaulailo te La Tahalo Uru.
HEB 6:2 Umala amuto ge pou tabaa lou te la siloko la valolo veia amuto ge abi la vuluhi, veia egite ge sau tai te la varu mutou, ge visivo La Kalulu La Marokala sotalo tamutou mai ele. La vimari tai te la mahuli rivula lou me la kiloli la iruru tai ale La Uru ge igoa mulimuli, amuto umalati ge pou tabaa ovola. La merera tomi alele, amuto rovitia.
HEB 6:3 Taritigi amuto ge tasuku moli solagu te la merera tomi te Kraist ale tikumu. Mai La Tahalo Uru ge suli la vikararala taku, tio amuto ge hilo sesele la masova la merera te Kraist ale tikumu oio te la vimari taku tavu amutou gageie.
HEB 6:4 Eala moli la valalua me hatavivile isahari, egite pala goilo halaba te la matagaga te La Uru, igoie egite boruti. Ale pala egite hiloti la vaabila tetala, eia taritigi pepeho, egite gabu tai La Kalulu La Marokala, eia suli egiteu.
HEB 6:5 La merera tetala tai, egite loloa, eia malama, eia taritigi. La igogolu tai ale vagari te La Uru te la imamala ale solagu, egite hiloa veia eia hilititi. Egite hilo tomiti la vibalavala te La Uru mai ele, eala moli egite goio piligi loua.
HEB 6:6 Me egiteu ale boru posa mai ele, egite kamati ge koramulia ge gabutala rivu lou la iruru tegiteu, veia ge vuvulo lou la vaka luala, ouka gologolo. La vuhula, oio te la vulo giteu ale mai ele, egite mai ale katu tola rivu lou e Latu La Uru oata te la tauvalautu veia la valalua ge lege vahi loua.
HEB 6:7 Mai la vimari aleie, eau ge tovoa te la magasa la mahuma ale la hura pu tolea, eia goio visibitala la ilali ale taritigi soio tegiteu ale galugalu oio vola, tio eia matagagati mai ele veia la magasale, La Uru vibalavalavea.
HEB 6:8 Eala moli mai la magasale eia popopo moli, eia matagaga mai ele veia la magasale eia kama kokora, e tahola ge igo gegerua, eia ge selua, kati ge galugalu lou oio vola.
HEB 6:9 Amuto tabarabaragu, la merera tomi alele eia tikumu sesele, eala moli eau rovia veia amuto taritigi moli, la tahi vilela taku ele eia kama ge poga amutou, la vuhula amuto pou tola te la balavala te la vimahuli te La Uru.
HEB 6:10 La Uru, eia matata, eia kama ge vaula la igogolu tomi tamutou oio tetala. Oio te la vulovulo mutou ale taritigi, ale amuto susuli moli egiteu la valalua tetala, amuto veipalatia veia amuto masaga sesele eia.
HEB 6:11 Eau masaga pepehoa veia amuto ge vagari moli mai ele, kara la tapasila, veia la vibalavala te La Uru ale amuto pou taitalia, eia ge puru sesele tamutou.
HEB 6:12 Umala amuto ge mata silaha te la igogolu te Kraist, amuto ge sovei egiteu la tahalo la tautaulailo sesele, ale egite kama piligi taro harari la merera te Kraist. Mai ge mai ele, amuto mulimuli ge tahola vikapopo legiteu ale taritigi ele, la vibalavala te La Uru, ale eia veia ge abi seselea gatou ale etato tetalati.
HEB 6:13 Etato ge sau tola vagari la merera te La Uru, la vuhula eia sesele tomi moli, eia ge puru. Mai la merera te La Uru soio te Abraham. La Uru masagea veia ge vitikumu lou la merera tetala soio te Abraham, eala moli eia ge toi la isale ere? Ouka, isa lou kama vagari mai eia, tio eia goio toi rivu lou eia maie:
HEB 6:14 Eau ge vibalava eme, La hilimu mulimuli ge usu pepeho.
HEB 6:15 Tio eia veiale Abraham la merera ale tikumu mai ele, e Abraham goio pou, mulimuli eia hilo la siloko la vibalavala te La Uru soio tetala, mai eia veipala e latula sesele e Isak ale ge abi la mulila.
HEB 6:16 Mai etato la tahalo la vovo ge toi la merera ale tikumu, etato ge vitikumu lou la merera tegatou te la isa La Tahalo Uru, veia la merera tegatou eia sesele tomi moli, tio la tahi tarola ge oukati.
HEB 6:17 Mai La Tahalo Uru tai, eia masagea veia ge toi la merera ale tikumu sesele soio te Abraham, tio eia goio vitikumu loua veia eia sesele viruru. Tio me oio moli ovolale, igoie etato rovitia veia eia ge vibalava sesele etatou la valalua tetala, eia kati ge hate tola lou.
HEB 6:18 Eala, eia matagagati mai ele veia La Uru eia toiti la merera, me eia vitikumuti loula la isala veia eia sesele moli. Me eia kati koramuli eia ge visigolo veia ge vulo lou la merera ale eia toitia, me ale eia vitikumutila la isala. Eala, eia koramuli seselea veia etato ale hele tavutia veia eia ge vimahuli etatou, etato ge mata kaseka, etato ge vagari moli kama ge taga, la vuhula la merera la vibalavala tetala tavu etatou, eia sesele viruru.
HEB 6:19 Etato ge kisi vagari la kalulu gatou te la merera tetala, mai la tahalo ale kisi la uaga te la mota la poutatolala ale tikumu pepeho. La mota ale sau tola etatou ele, eia kisi vagari etatou soio te Iesus. E Iesus eia magiri soilo kililili sesele te la baa la marokala sesele, ale la kulikuli ale uru tili roboa, oata te Tamala.
HEB 6:20 La baale, eia vimuga soilo vola, veia ge taho robo etatou veia etato ge mavulaha. Eala eia mai seseleti e pris ale uru, mai e Melkisedek alaura, me la igogolu tetalale, la kaluvula ge oukati.
HEB 7:1 E Melkisedek, eia la mulugaluga te la mautu e Salem alaura. Me la igogolu tetala isa lou, eia e pris te La Tahalo Uru oata. Te la imamala ale, e Abraham goio bolehoho egiteu e suara ivaa te la gale ivaa vikapopo legiteu la valalua la vaubila tegiteu. E Abraham vaubi kaluvuti, eia beua loio la vaubila, e Melkisedek goio paga tavua, eia toi la vibalavala te la Uru soio te Abraham ele.
HEB 7:2 Tio e Abraham loloa, eia goio abi la golugolu tomi ale egite abi taroti legiteu la gima, eia goio tabaria, la lolola savulu sasa, eia abiale Melkisedek la lolola isa, tetala ualasiu. Me la isa ale “Melkisedek”, la masovala mai “la vulovulo ale matata”, eala etato matagagati veia e Melkisedek eia la mulugaluga isa, la vulovulola matata sesele. Me la isa la mautu e Salem, ale eia pou la mulugaluga ovola, la masovala mai “La valalua pou tigi tataho, kama gabutatala papai.”
HEB 7:3 Oio te La Buk Tabu Ale Pala etato kama hilo la isale tamale Melkisedek, la isale tilala, la isa giteu e tutubula isa tai. Etato kama hiloa veia isa taposea, veia la tahalo tai ale eia peho. Eia oio moli popou, mai e Latu La Tahalo Uru tai e Kraist, eia e pris ale uru, la kaluvula ouka.
HEB 7:4 Eia sesele viruru veia e Melkisedek, eia la tahalo isa uru pepeho: (a) Mai etato hiloa te la veimulipolola ovola veia e Abraham tabari la golugolu tetala la lolola savulu sasa, eia goio abiale Melkisedek la lolola isa mai ele, te la golugolu ale egite seri taro legiteu la valalua ale eia bolehoho egiteu te la vaubila.
HEB 7:5 Te la imamala ale mulimuli te Abraham, La Uru hilovi la maratatila isa tegiteu e Israel, mai la hilile Levi, veia egite ge pou mai e pris tegiteu e Israel tomi. Me eia vagari taia giteu e Israel veia la maratatila la valalua tomi ge susuli legiteu e pris la ilali me la vaabila isahari tai, la vuhula egiteu e tabarabara giteu moli ele.
HEB 7:6 Me e Melkisedek ele eia kama te la hilile Levi, eala moli la viputumulila tomi alele, te la imamala te Melkisedek la merera alele eia soukama pou, eala moli e Abraham abi seseleale Melkisedek la vaabila ale uru. Eala eia matagaga mai ele veia e Melkisedek eia la tahalo isa uru sesele, la vuhula e Abraham eia kama la tahalo bulalahu, eia tai la tahalo te La Tahalo Uru, ale uru sesele, eala moli eia togo sesele e Melkisedek ele. (b) Mai e Melkisedek tai, eia toi la vibalavala te La Tahalo Uru soio te la uru giteu e Israel e Abraham ele.
HEB 7:7 Me etato tomi rovia veia la tahalo ale toi la vibalavala, eia uru te la tahalo ale abi la vibalavala loio tetalale. Eala, eia matagagati mai ele veia e Melkisedek eia la tahalo isa uru sesele, la vuhula eia toi la vibalavala soio te Abraham. (c)
HEB 7:8 Mai e Melkisedek tai ele, etato hilotia te La Buk Tabu Ale Pala veia eia mahuli moli, eia kama peho. Eala moli egiteu e pris te la hilile Levi, egiteu la tahalo la vovo moli, eala moli la valalua togo egiteu, egite ababia giteu la vaabila. Mai e Melkisedek eia mahuli moli eia kama peho, eala eia matagagati veia eia uru tegiteu e pris te la hilile Levi, eia la tahalo isa uru sesele. (d)
HEB 7:9 Mai e Levi, eia e tubu giteu e pris tomi te la valalua e Israel, me e tubule Levi e Abraham. Eala oio te la vulovulole tubula e Abraham ele, e Levi eia mai ale togo e Melkisedek, eia mai ale abiala la vaabila, la vuhula e tubula sesele igoa. Eala eia matagaga veia e Melkisedek, eia uru tegirua me Levi, eia la tahalo isa uru sesele. (e)
HEB 7:11 Mai e Kraist guvi, eia e pris ale uru sesele mai e Melkisedek, eia kama e pris ale bisi mai e pris te la hilile Levi. Oio tegiteu e pris te la hilile Levi, La Tahalo Uru eia abia giteu e Israel la merera tetala. Mai etato ge koramulia ge vulo maroka oio te la merera tegiteu e pris te la hilile Levi, ilava sesele La Uru vipou e Kraist, eia e pris ale uru sesele mai e Melkisedek, veia eia ge vimahuli etatou? Ouka, egiteu e pris te la vovo moli mai e Aron, egite tomi boto, e Melkisedek sekela moli eia e pris ale uru sesele mai e Kraist.
HEB 7:12 Mai e Kraist, La Uru visibitalea veia eia ge e pris ale isapolo tegiteu e pris ale pala, eala eia koramuli moli la viputumulila ale halaba tai ge sibitala vikapopo leia.
HEB 7:13 Mai e Kraist, eia te la hilile Iuda, kama te la hilile Levi, me egiteu la hilile Iudale, isa tegiteu kama abi la igogolule pris.
HEB 7:14 La Uru, eia te la hilile Iuda sesele, me e Moses kama veia giteu bakisi veia egite ge abi la igogolule pris.
HEB 7:15 Oio te Kraist, La Tahalo Uru eia igoti la gauru ale halaba. Eia matagaga mai ele, la vuhula e Kraist, eia e pris ale uru sesele, eia guvi halaba te la igogolu tetalale vikapopo la isala ale uru sesele mai la isale Melkisedek.
HEB 7:16 Eia kama sau tola la igogolule pris oio te la viputumulila ale pala ale La Uru toia soio tegiteu e pris te la hilile Levi, veia egite te la hilile Levi moli ge sau tola la igogolule pris. Eia sau tola la igogolule pris oio te la vagagarila tetala sekela, ale eia bolehoho la pileho.
HEB 7:17 Mai La Buk Tabu Ale Pala eia veia maie: Eau vipoutime te la igogolule pris, eme ge sau tola la igogolu aleie, kara mulimuli, la kaluvula ge ouka, eme e pris ale uru sesele mai e Melkisedek alaura.
HEB 7:18 La viputumulila ale pala, La Uru kolitia, la vuhula eia boto, eia kama vagari,
HEB 7:19 la merera te Moses eia kama koramulia ge vimaroka etatou isasa, ouka gologolo. Eala moli igoie, la viputumulila ale taritigi sesele, eia sibitalati, eia muga te ale pala. La viputumulila ale halabale, mai etato la valalua la mumugu ge sau tolea, etato ge koramuli seselea ge tasuku hagagavi soio te La Uru ale maroka.
HEB 7:20 La viputumulila ale halaba te Kraist, eia kama sibitala bulalahu! La Tahalo Uru toi la merera ale tikumu sesele ale eia vipou e Kraist te la igogolule pris. Egiteu e pris te la vovo, egite goilo bulalahu moli te la igogolu tegiteu, la merera ale tikumu ouka.
HEB 7:21 Eala moli La Uru veiale Iesus maie: Eau La Uru, eau toi seseleti la merera, eau kama ge hate tola lou: “Eau vipoutime te la igogolule pris, eme ge sau tola la igogolu aleie, kara mulimuli, la kaluvula ge ouka.”
HEB 7:22 Me oio moli te la merera te La Uru ale tikumu seselele, e Kraist eia koramulia ge sau tola sesele etatou ale tetala, la vuhula la merera ale halaba eia taritigi pepeho sesele, la visuli ovola eia kara polo la visuli te la merera te Moses.
HEB 7:23 Egiteu la mulugaluga tegiteu e pris ale pala, mai isa ge peho taro la igogolu, egite ge hilovi isa ale ge abi la mulila, la igogolu tegiteu ge mahuli moli mai ele.
HEB 7:24 Mai e Iesus eia mahuli moli, eia kama ge peho, isa kama koramulia ge kolia te la igogolu tetala.
HEB 7:25 Eala eia matagagati mai ele veia e Kraist, eia koramulia ge vimahuli sesele etatou tomi ale tautaulailo tetala veia eia oio mahuli moli, veia eia ge puli etatou soio te Tamala, eia ge taho robo etatou te la merera tetala soio te La Tahalo Uru.
HEB 7:26 Eala, eia matagagati mai ele veia e Iesus eia e pris ale uru sesele me la igogolu tetalale eia koramuli sesele etatou, ale etato pou la savelela te la kalulu gatou. Eia la tahalo isa, eia maroka, eia la iruru tai ouka, eia maroka sesele tegatou tomi la valalua la iruru. E Tamala vaurua, eia pulia soata tetala te la ilo la lage.
HEB 7:27 Eia kama mai la mulugaluga tegiteu e pris te la vovo, veia ge vahari la vaabila soio te la luma la lotu te la haroharo tomi, veia ge pigi robo la iruru tetala vikapopo la iruru tegiteu la valalua tomi. Eia peho roboti etatou, veia ge vimavulaha etatou tomi taro la iruru tegatou.
HEB 7:28 La merera te Moses, eia vipou la mulugaluga tegiteu e pris mai la tahalo la vovo moli, eia kama vagari, eia rovi la iruru me la pileho. Eala moli mulimuli te la merera te Moses, La Uru eia goio toi la merera tetala ale tikumu sesele, eia vipou e Latula te la igogolule pris, ale eia hilovitia veia eia la tahalo la marokala sesele tetala, la kaluvula ge ouka.
HEB 8:1 La masova la merera tomi taku eia maie: Etato tahola seseleti e pris ale uru, eia maroka sesele, eia pou te la pulolou la uru oio te la bali La Uru e gata, oata te la ilo la lage.
HEB 8:2 Me e pris tegatou ele, eia mai ale magiri te la baa ale maroka viruru oilo sesele kabili te la luma la lotu, eia rou roborobo la iruru tegatou oilo vola. Eala moli la luma la lotu sesele aleiele, La Uru moli tigia, kama la tahalo la vovo.
HEB 8:3 La merera te Moses pala, eia vipou la mulugaluga tegiteu e pris veia eia ge vaharihari la vaabila tomi te la valalua, mai la ilali me la kalia, veia ge vituria soata te La Tahalo Uru. Eala eia koramuli tai veia e pris tegatou, e Iesus, eia tai ge vahari la vaabila, ale eia sugu taro sesele la mahulila tetala.
HEB 8:4 Mai e Iesus ge pou moli omai te la maututula, eia kama ge koramuli ge sau tola la igogolule pris mai te la maratatila te Levi. La vuhula egiteu e pris ale la merera te Moses visati legiteu te la igogolu alele, egite oio igogoluti, egite vaharihari la vaabila tomi te la valalua soilo te la luma la lotu. Eala moli la igogolu tegiteu alele, eia mai la irovilala moli te la igogolule pris ale sesele, oata te la ilo la lage.
HEB 8:5 Etato rovia veia eia la irovilala sesele mai ele, la vuhula la siloko la luma la lotu tegiteu e Iuda, e Moses kama igo bulalahua, la masovala sesele oio, mai la masova la igogolu tai te Kraist ale igoie. La Tahalo Uru veiale Moses eia ge igoa, eia la luma la sel moli, la vuhula egite so bula vulovulo. Eala moli La Uru tutu toleale Moses maie mago “Eme ge vibaumuli tigi, eme ge igo moli la luma taku mai te la imoimo la merera taku tomi ale eau turitiamu ovola, ale etala vikarakara pala oata te la varu la gove Sinai.”
HEB 8:6 Eala moli la igogolu te Kraist oata te la ilo la lage, eia muga sesele te la igogolu ale egiteu e pris te la vovo igoa oilo te la luma la lotu. Me la viputumulila ale halaba tai, ale e Kraist taho robo etatou soio te La Tahalo Uru, la merera alele eia muga te la merera ale pala, la vuhula oio vola La Uru eia toitia gatou la merera ale tikumu veia eia ge vibalava sesele letatou la mahulila ale sesele la kaluvula ge ouka.
HEB 8:7 La merera te Moses ale pala, La Uru kolitia. Mai la merera te Moses ge koramuli ge vimaroka etatou, La Tahalo uru kama ge viputumuli la merera ale halaba veia ge kolia, eala moli ouka, la merera ale pala, eia kama koramuli ge vimahuli isasa, eala La Uru eia kolitia.
HEB 8:8 La Tahalo Uru hilotia veia la valalua tomi, egite ruruti, me la merera te Moses eia kama vimaroka tigi la vulovulo giteu, tio eia hiloa mai ele, eia goio veia giteu la merera maie: Eau La Uru, eau vikara maie: La imamala mulimuli ge sibitala ale eau ge toi la merera ale halaba soio te la valalua e Israel me la valalua e Iuda.
HEB 8:9 Eau ge toi la merera ale halaba, eia kama ge mai la merera ale eau toia soio te ururu tamutou te la imamala ale eau puli egiteu taro la pulolou la iligiligi loio e Gipto. La merera ale halaba eia ge isapolo te ale pala, la vuhula la merera ale pala, egite polotia, egite kisu taroau. Eiau, La Uru, eau veia.
HEB 8:10 Me la merera ale halaba ale eau ge toia soio te la valalua e Israel eia ge maie: Te la imamala ale mulimuli, eau La Uru, eau ge vagoilo la vulovulogu ale matata soilo te la gabutatalala tegiteu, eau ge mai ale kekesi tolea oilo te la tia giteu, egite ge rovia. Eau ge La Uru giteu, egiteu ge la valalua taku.
HEB 8:11 Isa kati ge karasuku e tabarala mago “Taritigi eme ge roromuli La Uru, eme ge matagaga tetala.” Egite kati ge karasuku baoli lou legiteu mai ele, la vuhula egite tomi ge matagagati taku. Egiteu ale bisisi tomi, egiteu tomi tai ale ururu, egite tomi moli ge roviau.
HEB 8:12 Eau ge vimavulaha egiteu taro la vareagila tegiteu tomi, eau kati ge gabutatala lou la iruru tegiteu.
HEB 8:13 Mai la merera tomi alele te La Buk Tabu Ale Pala, La Uru eia toitia veia eia halaba, eala oio moli ovola la merera ale pala, la vagagarila oukati ovola. Me la paga ale mumuguti mai ele, eia kati ge tabuli tabaa lou, eia hagagaviti ge kokovu, mai la merera tetala tai ale palale, eia kaluvuluvuti, ale halaba moli eia magiriti.
HEB 9:1 La merera ale pala, La Uru toitiale Moses, la vulovulo oilo vola usu te la lotu tegiteu e Iuda. Me la luma la lotu tai oio vola, ale egite tigia, eia oio.
HEB 9:2 La luma la lotu tegiteu e Iuda alaura, egite tigila la sel, la vuhula egite so bula vulovuloa. La golugolu la lotu tegiteu usu oilo vola. Egiteula maie: (a) Oilo te la luma la lotu, la kapiutu ilua oio. (b) La kapiutu ale sogalagala, egite toila “La Baa Ale Maroka”. (c) Oilo te la baa ale maroka, la golugolu isahari oio, la magirigiri la kandel, la limala ivitu, me la poro tai, ale la bret ale egite toila la bret la vahililola te La Uru eia tabuli loata ovola. (d)
HEB 9:3 Oilo kabili sesele, la kapiutu isa lou oio, egite rara robola la kulikuli, eia tili roboa. La kapiutu ele, egite toila “La Baa Ale Maroka Viruru”. (e) Oilo te La Baa Ale Maroka Viruru ele, la golugolu isahari oio.
HEB 9:4 La poro la lotu ale mememe tataho, egite igola la gold, eia oilo vola. (f) Loata te la porole, egite vitabuli la bulu la obu ale egite virokoa, la sosobula malia tataho. (g) La bokis isa uru tai oio, egite igola la gold, la mapala uru pepeho, egite toila “La bokis ale sau tola la merera te La Uru”. (h) Oilo te la bokis ale sau tola la merera te La Uru, la golugolu isahari tai te la lotu tegiteu oio. Isa, eia la kap ale egite igola la gold, la ilali ale isapolo oilo vola, eia la ilali ale La Uru vaalali legiteu e Israel alaura ovola ale egite vibula vulovuloa oio te la hohoi. La ilali ale, egite toila “e mana”. (i) Oilo tai te la bokis ale sau tola la merera te La Uru, la toho te Aron tai oio. La toho ale, alaura e Aron mira me tuala e Moses, egira mamuga egiteu la valalua e Israel, La Uru vikusi la toho tetala, eia tututuvu mai la irovilala soio te la valalua veia egite ge gabu tikumu la merera te Aron. (j) La baga ilua tai ale bolabola tabuli oilo te la bokis ale sau tola la merera te La Uru, la tururi savulu sasa te La Uru, e Moses kekesi tolea oio vola. (k)
HEB 9:5 La mata la bokis ale sau tola la merera te La Uru eia mememe tataho, egite igola la gold, egite toila veia eia “La vuhu la gilogo te La Uru”. (l) Te la baa ale loata te la bokis ale sau tola la merera te La Uru, la halulule angelo ilua bisisi oio, egite puia, la palapala girua pigi robo la mata la bokis, egite toi legirua “e angelo ilua ale vibaumuli la tokoromola te La Uru”. Egite la vulovulo la lotu tegiteu e Israel usu pepeho mai ele, eala moli eau kama koramulia ge lube tomia, la vuhula la vimari usu lou soloio ale eau ge lubea mutou.
HEB 9:6 Mai la golugolu tomi ge raragi tatahoti mai ale eau toitia, tio egiteu e pris ge goilo te La Baa Ale Maroka eia logala moli, egite ge igogolu oilo vola.
HEB 9:7 Eala moli La Baa Ale Maroka Viruru, ale oilo kabili sesele, eia isapolo, la mulugaluga moli tegiteu e pris ge goilo vola, ge vakasa moli te leavala isasa. Eia ge abi muga la kasoso la kalia ale egite bilitia, eia ge vali mugea sotalo te la mata la bokis te la merera te La Uru. La kasoso alele eia ge mai ale pigi robo tomi la iruru tetala me tegiteu la valalua, mai egiteu la iruru ale egite gabutatalea, me egiteu la iruru tai ale egite igotia, egite kama gabutatalea.
HEB 9:8 Me oio te la lavalava ale rara robo La Baa Ale Maroka Viruru, la vimari oioti ovola. Mai La Kalulu La Marokala, eia vimari etatou oio vola veia la gauru ale goilo sesele te La Uru, la vulovulo la lotu ale pala eia so tabuli roboa, mai la merera ale halaba te Kraist eia soukama koli la merera ale pala te Moses.
HEB 9:9 La kapiutu tai ale logala, eia mai la irovilala tai ale koramuli etatou ale igoie, eia tovo etatou te la imamala ale pala kara igoie veia la vaabila tomi ale la mulugaluga tegiteu e pris ge vahararia soio te La Uru oilo te la kapiutu alele, eia kama koramulia ge vimaroka la tia giteu la valalua.
HEB 9:10 La vulovulo la lotu ale pala, eia la imoimola usu oio, egite mulimuli bulalahu molia, mai la lelea giteu, la vuluhi maroka tai, egiteu la imoimo la merera tomi te la vibaumuli moli te la vovo gatou. La merera tomi alele, eia kama tubu, eia vibaumuli gologolo moli egiteu mai ele, kara la imamala ale La Uru visibitala la gauru tetala ale halaba, oio te Kraist.
HEB 9:11 E Kraist, eia guviti omai te la maututula veia ge sau tola la igogolule pris ale uru, veia ge vibalava letatou la matagaga te Tamala, mai ale igoie etato pouti ovola. Eia goiloti te la luma la lotu ale oata te la ilo la lage. La lumale, eia uru, eia maroka, la tahalo la vovo isa kama tigia, eia kama la paga te la magasa. Me te la luma la lotu ale seselele, eia igo la igogolu tetala oilo vola.
HEB 9:12 Eia kama goilo mai e pris te la vovo, veia ge vahari la kasoso la kalia, ouka. Eia tiroro soilo sesele te la kapiutu ale maroka viruru, eia rou robo tomiti la iruru tegatou oilo vola, veia la kalulu gatou kati ge peho. Me la kasoso ale eia vaharia, eia pigi robo etatou ovola, eia la kasosola moli te la pileho tetala.
HEB 9:13 Te la vulovulo la lotu ale pala, egiteu e pris ge bili la kau ale la togo, uka la mee, egite ge abi la kasosola ge lugu volu la vovo giteu la valalua ale egite poloti la merera te La Uru veia la kasoso alele ge pigi robo la iruru tegiteu mai ele. E latu la kau tai, egite ge bilia ge gutua, egite ge abi la buburola, ge vali robo tai la vovo giteu la tahalo la iruru ovola. Me oio te la vulovulo la kasoso me la buburo mai ele, egite ge vimaroka egiteu, koramuli egite ge magiri maroka te la lotu. Eala moli egite kama ge maroka sesele, la vulovulo alele eia logala moli.
HEB 9:14 Eala moli e Kraist, La Kalulu La Uru eia vivagaria, eia sugu taro la mahulila tetala soio te La Uru mai la vaabila ale maroka sesele, eala eia matagagati veia la kasosola eia koramulia ge vuhi maroka la kalulu gatou, etato kati ge gabutatala papai la iruru ale lapu etatou soio te la pileho, etato ge mavulaha, etato ge pou mai la bilalaha ale maroka sesele te La Tahalo Uru, ale eia moli sekela mahuli.
HEB 9:15 Eala, eia matagagati veia e Kraist, eia vahariti la merera ale halaba, me la merera alele, La Uru toitia somai tegatou veia eia sesele viruru, veia eia ge tola tavu la valalua me hatavivile tomi, veia isahari ge goilo ge sau tola la mahulila ale sesele, la kaluvula ge ouka, mai egiteu ale eia hiloviti egiteu. La vuhula e Kraist, eia peho robo etatou veia ge rou rivu lou etatou taro la iruru. Etato kati poga tavu la pileho ovola, mai la viputumulila te Moses ale pala, eia veia giteu e Israel ovola te la imamala ale e Kraist soukama guvi. Te la merera ale palale, etato poga tavu moli la pileho ovola.
HEB 9:16 Tio, la vimari alele, eau ge tovo mulia te la vulovulo giteu e Israel isasa te la pileho. Mai la tahalo isa eia gabutatalea veia eia ge peho, eia ge goio ge kekesi tola muga la isaisa giteu ereireila veia mulimuli te la pileho tetala egite ge tahola la golugolu tetala. Eala moli la merera tetalale, eia kati ge puru kara ale eia ge peho sesele.
HEB 9:17 Eia ge peho, tio egiteu e valaluala ge balava la golugolu tetala mai eia kekesitia.
HEB 9:18 Me la pileho, la irovilala ovola, la kasoso moli. Me etato matagagati veia te la merera te Moses ale pala, La Uru kama vimavulaha bulalahu la valalua te la iruru tegiteu, ouka, la kasoso la kalia moli ge pigi robo egiteu, egite ge pou la balavala oio moli te la pileho giteu la kalia isahari mai ele.
HEB 9:19 Mai te la siloko la vulovulo giteu alele alaura, e Moses veipala kaluvuti la tururi tomi te La Tahalo Uru soio tegiteu la valalua e Israel, eia goio bili isahari e latu la kau me la mee isahari tai veia ge igo la irou ovola. Eia goio saho la kasoso giteu la kalia mai ele, eia goio vuloa vikapopo la lalu. Eia goio abi la obu bisi mai la malalia, eia goio palavivila la kula ale magegese, eia vuhia sotalo te lalu me kasosole. Tio eia goio lugu robo la buk la merera te La Uru, me la vovo giteu la valalua tai oio vola.
HEB 9:20 Tio eia goio veia giteu mago “La kasoso alele, eia la irovilala moli te la merera te La Uru soio tamutou ale eia veia amuto umala ge poloa.”
HEB 9:21 Goio, e Moses lugu tai la kasoso soio te la luma la lotu, me soio te la golugolu tomi tai ale tabuli oilo te la luma la lotu tegiteu.
HEB 9:22 Mai la merera te La Uru eia veia, soioge la golugolu tomi moli te la lotu tegiteu e Israel ale pala, eia koramuli la kasoso ge vuhi maroka mugea. Mai eia matagaga mai ele veia mai la kasoso kama ge pagegele, La Uru kama koramulia ge sabubu taro la iruru tegiteu la valalua me hatavivile.
HEB 9:23 La golugolu tomi te la lotu tegiteu e Israel ale pala, egiteu mai la irovilala moli te la golugolu la lotu sesele ale oata la ilo la lage. Mai la golugolu te la lotu omai te la magasa, mai la vaabila la kasoso la kalia moli, eia vimarokea. Eala moli la golugolu te la lotu sesele oata, la vaabila ale isapolo sesele eia vuhi marokea, mai la kasosole Kraist sesele.
HEB 9:24 La vuhula e Kraist, eia kama goilo te la luma la lotu ale etatou la valalua tigia, ouka, eia goata sesele te la ilo la lage, eia taho robo etatou oio te la lagu La Uru sesele.
HEB 9:25 Eia kama igo mai la mulugaluga tegiteu e pris veia ge goilo la leavalavala tomi te la kapiutu ale maroka viruru veia ge vahari la kasoso giteu la kalia. Mai ge mai ele, eia ge mata mai e Kraist ge ligi vaka usu sokoa la vipoupoula, kara igoie. Eala moli ouka, te la tapasi la imamala ale igoie, eia peho roboti etatou, eia goilo vakasa moli te Tamala, eia vahari la kasosola sesele mai la vaabila ale ge sabubu taro la iruru tomi tegatou ale lapu etatou soio te la pileho.
HEB 9:27 Etatou la valalua me hatavivile, La Uru veitia veia etato ge poga tavu la pileho vakasa moli, mulimuli ge pou te la vigagiala tetala.
HEB 9:28 Mai tai ele, e Kraist eia goio te la pileho vakasa moli veia ge peho robo la iruru te la valalua me hatavivile usu. Me eia ge sibitala rivu lou la vaka luala. Eia kama ge sibitala veia ge vahari taro lou la iruru te la valalua, ouka. La igogolu alele, eia igotia. Ale eia ge sibitala moli somai, eia ge vahari la mahulila ale sesele somai tegiteu ale pou taitali la guluvi tetala.
HEB 10:1 La vulovulo la lotu tegiteu e Israel ale pala, eia kama veipala tigi la gilogo te La Uru. La merera ale pala, eia mai la halulu la vibalavala moli te La Uru. La iraragila tetala ale taritigi pepeho, eia soloio, eia souka sibitala, la vuhula e Kraist souka. Te la viputumulila ale pala, egiteu e pris ge vaharari la kasoso giteu la kalia soilo te la luma la lotu te la leavalavala tomi, eala moli eia kama vimaroka sesele egiteu la valalua ale gomai te la lotu veia egite ge mahuli, ouka.
HEB 10:2 Mai la vaabila tegiteu soio te La Uru ge vimahuli sesele egiteu, egite kati ge vavala lou la vahari la vaabila te la leavalavala tomi. La vulovulo alele, mai eia ge sesele, la valalua la lotu tomi, egite ge sibitala maroka tomiti ovola, egite kati ge gabutatala papai la iruru tomi ale egite igotia.
HEB 10:3 Eala moli ouka, la vuhula te la leavalavala tomi, ale la mulugaluga tegiteu e pris ge vahari la kasoso giteu la kalia soilo te la luma la lotu, eia mai ale vahiliti lou la gabutatalala tegiteu la valalua te la iruru tomi ale egite igotia, egite goio gabu tikumuti loua.
HEB 10:4 La vuhula la kasoso la kalia eia kama koramulia ge sabubu taro la iruru.
HEB 10:5 Mai e Kraist, eia so guguvi moli omai te la maututula, eia goio vikara maie mago: Tahalo Uru, eme kamati masaga egiteu la vaabila mai la ilali me la kasoso giteu giteu la kalia, eala moli eme raragiti la vovogu veia eau ge tabuli sesele oata te la poro oilo la luma taume mai la kalia sesele ale egite bilia.
HEB 10:6 Sesele, la kalia ale egite gutua, me egiteu la vaabila tomi te la sabubu la iruru mai la ilali me la kasoso la kalia, la vaabila tomi alele, eme kati lege sisigila.
HEB 10:7 Eau hiloa mai ele, eau veia maie mago “Tahalo Uru, eau omai raragiti veia ge tilimuli la masasagala taume, eau ge piligi la mahulila taku, mai La Buk Tabu Ale Pala eia veitia.”
HEB 10:8 Me la merera te Kraist alele, eia mai ale ilua. La mulugala, eia veia maie “Egiteu la vaabila mai la ilali me la kasoso giteu la kalia, la kalia tai ale gutua, me egiteu la vaabila tomi te la sabubu la iruru, mai la ilali me la kasoso, eme kamati masagea, eme kati lege sisigi tai ovola.” Eala moli la vaabila tomi alele, la merera te Moses eia vagari veia egiteu e Israel ge vaharia soio te La Uru.
HEB 10:9 Goio, la ilua la merera te Kraist, eia goio veia maie: “Eau omai raragiti veia ge tilimuli la masasagala taume.” Tio me eia matagagati mai ele veia eia abi taroti la muluga la merera, eia goio kolila la ilua le merera alele, veia la pileho tetala ge magiri te la muli giteu la vaabila te la lotu ale pala.
HEB 10:10 Ale, e Iesus igo seselea veia ge tilimuli sesele la masasagala te Tamala. Me oio te la vulovulolale etato tomi sibitala maroka, la vuhula e Iesus eia magiri vagari, eia piligi la mahulila tetala. La vovola, eia maiti la vaabila ale egiteu e pris vaharia soilo te la luma la lotu, la kasosola eia pagegeleti, eia sabubu taroti la iruru tegatou tomi.
HEB 10:11 Te la haroharo tomi, egiteu e pris tomi ge magiri te la lotu, egite ge igo bibibi la igogolu tegiteu mai ele, egite ge vituri la vaabila soio te La Uru. Eala moli egiteu la vaabila te la lotu ale pala, egite kama koramulia ge sabubu taro la iruru te la valalua.
HEB 10:12 Eala moli e pris ale uru tegatou eia oio. Eia vahariti la vaabila ale tikumu sesele veia te la pileho tetala ale vakasa moli sekela, la iruru tomi te la valalua ge kaluvu. Eia igo la igogolu tetala tomi kaluvuti, La Tahalo Uru goio vaurua, eia goio pulia soata tetala, eia goio vipoua te la balila e gata.
HEB 10:13 Eia oio popou, eia pou tali la imamala ale mulimuli, ale e Tamala ge pigi egiteu la gima tetala sotalo te la vahala, eia ge soa kurukuru egiteu.
HEB 10:14 Eia maila tatahoti mai ele, la vuhula oio te la vaabila tetala isa sekela moli ale tikumu, eia vimatatati la vulovulo la valalua tomi tetala, ale igoie eia vimarokati egiteu, egite kati ge pou tavu lou la vulovulo ale kama kokora, la vuhula La Tahalo Uru eia susuli egiteu.
HEB 10:15 Me la igogolu te Kraist mai ele, La Kalulu La Marokala tai eia oio vitikukumua te la merera tetala, mai la merera tetala ale pala muga eia veia maie:
HEB 10:16 Te la imamala ale mulimuli, eau La Uru, eau ge kisi la merera ale tikumu sesele soio tegiteu e Israel. Eau ge vagoilo la vulovulogu ale matata soilo te la gabutatalala tegiteu la valalua taku, eau ge kekesi tolea oilo te la tia giteu, egite ge rovia.
HEB 10:17 Tio La Kalulu La Marokala eia vikara kaluvu mai ele, eia goio tasuku lou la merera tetala maie: Eau kati ge gabutatala lou la iruru me la vareagila tegiteu.
HEB 10:18 Me eia matagagati mai ele veia mai La Tahalo Uru ge vimavulahati la valalua me hatavivile taro la iruru tomi tegiteu, egite kati ge vahari lou la vaabila ale ge pigi robo la iruru tegiteu.
HEB 10:19 Amuto tabarabaragu, ale igoie etato mai ale goilo te la luma la lotu, la kulikuli ale pala rara robo La Baa Ale Maroka Viruru, eia kati magiri robo lou etatou. La Baa Ale Maroka viruru ele, la gauru ale halaba kopeti soilo vola, mai la pileho te Kraist eia kopetia, etato ge tiroro moli soilo, etato ge sau tola la mahulila ale sesele oilo vola. La kasosole Iesus eia pigi roboti etatou, etato ge goilo moli, etato kama ge taga.
HEB 10:21 E Iesus eia magiri mai e pris ale uru tegatou, eia vibaumuli la luma la lotu te La Tahalo Uru.
HEB 10:22 Eala igoie eia koramulia veia etato ge goilo ge magiri hagagavi soio te La Tahalo Uru. Etato kama ge gabutatala papai, etato ge tautaulailo moli te la kasosole Iesus ale La Uru pigi roboti letatou ovola, eia vuhi marokati etatou mai ele, mai la vuluhi te la lalu ale maroka sesele.
HEB 10:23 Etato ge sau tola vagari moli lou la merera tetala ale eia veia ge vimahuli etatou, la vuhula La Tahalo Uru moli toitia gatou la merera alele, eia vikara sesele, eia kama ge hate robo loua.
HEB 10:24 Etatou ale tetala, taritigi etato ge karasuku vibaoli letatou veia etato ge vipuhi tigi, veia etato ge veipala tai la vulovulo la mutelela kabili tegatou.
HEB 10:25 Etato isasa umala ge piligi la pou vikapopola te la lotu te Kraist, mai egite isahari igoie kamati pou vikapopo legiteu e tabarabara giteu te la lotu. Taritigi etato ge viteteli letatou te la merera ale taritigi te Kraist. La vulovulo alele, etato ge vagari ovola, la vuhula etato hilotia veia la haro la guluvi te La Uru eia hagagaviti.
HEB 10:26 La Tahalo Uru, eia vimatagagati etatou, eala moli mai etato ge pou tavu la iruru lou, la vaabila oukati lou oio ale ge koramulia ge rou rivu lou etatou te la iruru ale etato igigoa.
HEB 10:27 Etato ge poga tavu moli la viluala te la iruru tegatou, me la havi tai ale tivura pepeho, ale La Tahalo Uru ge selu taro egiteu la gima tetala oio vola.
HEB 10:28 Alaura, mai isa ge tou la merera te Moses, eia koramuli molia veia taho lua uka taho tolu moli ge ubi leia la merera, tio egite ge bili taro la tahalo la iruru alele, eia ge peho, egite kama ge gogoa.
HEB 10:29 La viputumulila ale pala, eia mai ele. Me mave, amuto gabutatalea veia te la viputumulila ale halaba, mai la tahalo ge tou la merera te Kraist, eia la viluala ge ouka? Mai eme ge tou la merera te Kraist, eme mai ale soa kuru e Latu La Tahalo Uru. Eme mai ale vile tai la kasosola ale vitikumu la gilogo tetala te la viputumulila ale halaba. La kasosolale eia pagegele, eia vimarokatime, eme goio vile loua. Eme igo mahela La Kalulu La Marokala, ale vahari la gilogo te La Uru somai tegatou. Etato ge igo egiteu la iruru alele, etato ge vilua.
HEB 10:30 La vuhula etato rovitia veia La Tahalo Uru moli eia vikara pala maie: La kiloli la iruru, ale la igogolu taku sekela, eau ge igo sesela. Me la merera tetala isa lou eia veia maie: La Uru ge mata muli la vulovulo giteu la valalua me hatavivile tetala.
HEB 10:31 Me eia matagagati mai ele veia eia kama kokora viruru veia eme ge poga tavu la viputumulila ale vagari te La Tahalo Uru, ale eia moli sekela mahuli.
HEB 10:32 Amuto ge gabutatala rivu lou la imamala ale pala, ale amuto so lololo halaba la merera la matagaga. Egiteu la valalua la gima te Kraist viligi pepeho amutou te la imamala alele, eala moli egite kama bolehoho amutou, amuto magiri vagari moli.
HEB 10:33 La haro isahari egite vimagiri amutou te la lagu giteu la valalua tomi, egite vile amutou, egite gima sesele amutou mai ele. Eala moli amuto toto obu tai egiteu e tabarabara mutou ale poga tavu la iligiligi mai ele.
HEB 10:34 Isahari tamutou pou te la luma la kilisi, amuto gogo egiteu, amuto suli tai egite. Egiteu la valalua la gima te Kraist, egite seri taro la golugolu tamutou, amuto sagege moli, la vuhula amuto rovia veia la vuliti ale sesele eia oio raragitia mutou.
HEB 10:35 Pala amutou la valalua me hatavivile ale magiri vagari sesele, umala amuto ge piligi lou la vulovulo mutou alele. Mai amuto ge magiri vagari, La Uru ge kolia soio tamutou la vibalavala tetala ale uru.
HEB 10:36 Mai amuto masagea veia ge sau tola sesele la vibalavala te La Tahalo Uru ale eia veitia gatou ovola veia ge abi seselea gatou, mai amuto masagea veia ge sau tola seselea, taritigi amuto ge magiri vagari, ge mulimuli sesele la masasagala tomi te La Tahalo Uru.
HEB 10:37 Taritigi pepeho veia etato tomi ge magiri vagari sesele, la vuhula eia kama ge tabaa, veia e Kraist ge guvi, mai la merera te La Tahalo Uru eia veia maie: La Uru ge guvi mai te la tilau taku. Eia ge guvi sesele, eia kama ge igo makoko.
HEB 10:38 Eala moli La Riau taku, eia ge mahuli moli te la tautaulailo tetala somai taku. Eala moli mai eia ge taga taro la iligiligi te la igogolu taku, eau kama ge lege sisigi leia.
HEB 10:39 La Buk Tabu Ale Pala eia veia mai ele, eala moli etato kama mai egiteu ale taga taro la iligiligi te la igogolu te La Tahalo Uru, egite goio poga tavu la viluala mai ele. Etato la tahalo me la tavile la tautaulailo sesele, La Uru eia ge vimahuli sesele etatou ale tetala.
HEB 11:1 La vulovulo la tautaulailo, eia mave? Mai eme la tahalo la tautaulailo, la merera ale eme veia eia ge puru, eme ge sau tola seselea, kama ge piligia. La paga ale eme veia eia sesele, eala moli eme soukama hiloa, eme ge toro moli ovola, kama ge silaha. La vulovulo la tautaulailo, eia mai moli ele.
HEB 11:2 Egiteu e ururu tegiteu e Israel alaura, egite usu pou tavu moli la vulovulo la tautaulailo, La Tahalo Uru vei tataho sesele egiteu oio vola. La vulovulo la tautaulailo, etato ge gigia te La Buk Tabu Ale Pala maie:
HEB 11:3 Mai etato ge gabutatala la siloko la vipoupoula, etato tautaulailo te La Tahalo Uru veia oio moli te la vagagari la merera tetala, eia vipou la magasa me la mori tomi. Me eia matagagati mai ele veia la golugolu tomi ale etato igoie rovia, La Uru kama puila la paga ale etato hiloa me la mata gatou, ouka, eia pui molila me la vagagarila sekela ale etato kama hiloa.
HEB 11:4 Mai etato ge gabutatala e Abel, eia la tahalo la tautaulailo sesele, la vaabila tetala soio te La Tahalo Uru eia muga te la vaabila te tuala e Kain. La Tahalo Uru hiloa mai ele veia e Abel, eia abiala la vaabila ale taritigi pepeho, veia eia tau seseleti la ilola soio tetala, tio eia goio vei tataho sesele la vaabila tetala, eia goio toia veia e Abel eia la tahalo ale matata. Me e Abel eia pehoti, eala moli la vulovulola ale taritigi te la tautaulailo tetala, etato gigia te La Buk Tabu Ale Pala, etato rovia, la vulovulola mai ale tovo etatou kara igoie.
HEB 11:5 Mai etato ge gabutatala la tautaulailo te Enok. La Uru puli mahulihuli molia soata tetala, eia kama gabu la pileho. Egite paa mulia, eia oio ouka, la vuhula La Tahalo Uru pulitia soata tetala. Me e Enok, ale eia so popou omai te la maututula, eia la tahalo la tautaulailo sesele, la vulovulolale La Tahalo Uru lege sisigi sesele ovola, eia vei tataho seselea.
HEB 11:6 Mai etato masagea veia La Uru ge lege sisigi tai letatou, taritigi etato ge gabu tikumua veia eia oio mahuli, veia eia ge vibalava egiteu ale vagari tavua. Eala, eia matagaga veia mai etato ge tasuku soio tetala vikapopo me la tautaulailo ale sesele, eia ge lege sisigi letatou.
HEB 11:7 Mai etato ge gabutatala la tautaulailo te Noa. La Uru sibitala tavua, eia vei matagageala veia eia ge sulu sapa egiteu la valalua me hatavivile te la maututula tomi. E Noa gabu tikumua, eia taga, eia goio paha la uaga ale ge vimahuli egiteu la karakara tetala. Eia kama tahi taro la merera te La Uru veia la vilualale eia soukama hiloa, eia soioge kama ge igo seselea. Ouka, eia gabu tikumua, eia roromuli moli La Uru. Me te la tautaulailo te Noa ale taritigi, La Uru hiloa veia la vulovulole Noa, eia muga sesele te la vulovulo giteu la valalua tomi, ale egite tou la merera tetala. La Tahalo Uru hiloa veia e Noa eia la tahalo la tautaulailo, eia goio vagoiloa tetala, eia vimarokea, veia eia ge la tahalo tetala sesele.
HEB 11:8 Mai etato ge gabutatala la tautaulailo te Abraham. La Uru tolea veia eia ge hiliti taro la mautu tetala, eia ge bula soio la gale malau, ale La Uru mulimuli ge abiala. E Abraham, eia la tahalo la tautaulailo sesele, eia lolo la tilola te La Uru tavua mai ele, eia roromulia, eia hiliti, tuga. Eala moli eia kama rovi la gale ale eia ge goio vola, eia tuga te la tilola te La Uru moli.
HEB 11:9 Eia goio mou mai la mosi oio te la gale isapolo ale La Uru veia ge abiala, eia kama gabutatala papai, la vuhula eia la tahalo la tautaulailo. Eia momou moli te la luma la sel, eia bula vulovulo, mai e latula tai e Isak, me tubula tai mulimuli e Iakob, egite tomi pou la mosi moli. Eala moli egite tomi ele vikapopo le Abraham, La Tahalo Uru vagoilo egiteu tetala veia ge vimaroka egiteu, veia egite tomi ge la tahalo tetala sesele.
HEB 11:10 E Abraham, eia la mautu ouka, eala moli eia taua la ilola te la mautu ale sesele, La Tahalo Uru sekela ilia, veia La Uru mulimuli ge pulia soata te la mahulila ale sesele.
HEB 11:11 Mai etato ge gabutatala la tautaulailo ale uru te rutule Abraham tai, e Sera. La Uru veiala veia eia ge savu, eala moli eia uru pepehoti, me eia varirobo tai. Eala moli eia gabu tikumu la merera te La Uru veia eia ge puru sesele, eia goio savu. Eia goio pigo e latu girua me Abraham, la isala e Isak.
HEB 11:12 Eala, eia matagagati tegatou mai ele veia loio moli te haruala e Abraham, eia uru pepehoti, hagagaviti ge peho, egiteu la hilila ale usu sesele goio sibitala. La giligi giteu e tutubula mulimuli eia usu pepeho mai la magasa la mago, mai tai egiteu la matatabu oata te la mori.
HEB 11:13 Egiteu e ururu tomi ele, egite sau tola moli la merera te La Uru, egite goio peho, la vavua la merera ale egite sau tolea, egite kamati hiloa. Egite hilo molia te la gabutatalala tegiteu, eia so malau, eia soukama sibitala, eala moli egite sagege moli oio vola. Egite matagaga tai mai ele veia egite mou la mosi moli omai te la maututula, eia kama la mautu tegiteu sesele, egite lobali, la mautu tegiteu sesele soloio.
HEB 11:14 Egiteu ale gabutatala mai ele, la vulovulo giteu eia veipalea veia egite tautaulailo te la mautu tegiteu sesele, ale egite mulimuli ge taholea.
HEB 11:15 Mai egite ge gabutatala rivu soio te la mautu ale egite hiliti tarotia, eia koramulia veia egite ge beua.
HEB 11:16 Eala moli ouka, la gabutatalala tegiteu eia vagari solagu te la mautu ale sesele, eia taritigi pepeho, eia muga tegiteu la maututula ale omai te la magasa, eia oata te la ilo la lage. La Tahalo Uru, eia hilo la vulovulo giteu ale taritigi, eia lege sisigi moli oio vola, me eia kama mahela tai veia egite ge toia soio tetala mago “Eme La Uru taku”, la vuhula eia oio raragiti la mautu tegiteu.
HEB 11:17 Mai etato ge gabutatala muga lou la tautaulailo te Abraham. La Tahalo Uru veiala veia eia ge bili e latula e Isak, ge igo la vaabila soio tetala oio vola. Tio La Uru tovo lalai la tautaulailo te Abraham mai ele, eia goio igo seselea, eia visae e latula la riau soata te la poro veia ge bilia.
HEB 11:18 Eala moli pala muga, La Tahalo Uru eia veipalatiale Abraham te latula e Isak mago “Oio te latumu moli, egiteu e tutubumu ge sibitala.” Eia lolotia mai ele, eala moli eia roromuli La Uru, eia veia ge bili e latula, veia ge vaabila soio te La Uru ovola.
HEB 11:19 Eia kama gabutatala papai, la vuhula eia gabu tikumu La Tahalo Uru veia eia koramuli seselea ge vimahuli rivu lou egiteu ale pehoti. Me etato rovia veia e Abraham so varapalapala moli la viso veia ge bili e Isak, La Uru vahilo leia la sip ale ge abi la mulile Isak oata te la poro, eia mai ale vimahuli sesele e latule Abraham taro la pileho, eia mahuli.
HEB 11:20 Mai etato ge gabutatala tai la tautaulailo te Isak. Oio moli te la tautaulailo tetala ale uru, e Isak, eia hagagaviti ge peho, eia goio toi la vibalavala soio te latula ilua, e Iakob, e Sau. Me eia matagagati mai ele veia eia gabu tikumu la merera te La Tahalo Uru, la vuhula eia kama toia soio tegirua la merera ale ge puru harari moli, ouka, eia toi la vibalavala ale ge puru mulimulito.
HEB 11:21 Mai etato ge gabutatala tai la tautaulailo te Iakob. Eia hagagaviti ge peho, eia sau la toho tetala, eia goio hiliti soata. Me oio moli te la tautaulailo tetala ale vagari sesele, eia goio lagu tugu, eia lotu tavu La Uru, eia goio toi la vibalavala soio te tubula, e latule Iosep ilua.
HEB 11:22 Mai etato ge gabutatala tai la tautaulailo te Iosep. Eia uru pepehoti, hagagaviti ge peho, eala moli eia tautaulailo vagari te la merera te La Tahalo Uru, eia goio veipala mugatia veia La Uru mulimuli ge puli la valalua e Israel taro la kilisi loio e Gipto. La gabutatalala tetala kama ilua, eia goio veia giteu la merera veia mai egite ge tuga, egite ge bole taro tai la tatuhala loio e Gipto, ge ulai polo seselea oio la mautu tegiteuo.
HEB 11:23 Mai etato ge gabutatala tai la tautaulailo te tamale Moses me tilala. E Parao toitia giteu la valalua e Israel maie veia mai egite ge pigo e latatu giteu ale hatamalemale, egiteu e Gipto ge bili taro egiteu. Eala moli e tilale Moses mira me tamala, egira hilo e latu girua veia eia posa tahalo, egira kamati taga e Parao, egira tautaulailo sesele te La Uru, egira goio tau kokovua la taio itolu, egiteu e Gipto kamati bilia.
HEB 11:24 Mai etato ge gabutatala tai la tautaulailo te Moses. Eia so la pepeso, e latule Parao la sobe patua, eia goio sagaiti, eala moli eia kama masagea veia egite ge toi leia veia eia e tubule Parao isa ale e latula la sobe patua.
HEB 11:25 Eia veia ge ligi vikapopo legiteu e tabarabarala la valalua te La Tahalo Uru, egite la valalua e Israel, eia kama masagea veia ge ruru veia ge kisu taro la valalua tetala veia ge pou tataho muga vikapopo legiteu e Gipto ale patua.
HEB 11:26 Eia veia ge gabu la mahelala mai e Kraist vikapopo la valalua te La Uru, eia kama gabu tikumu la vuliti tegiteu e Gipto, la vuhula eia gabutatala sesele solagu te la vibalavala te La Uru soio tegiteu ale tau sesele la ilo giteu soio tetala.
HEB 11:27 Oio te la tautaulailo te Moses ale uru sesele, eia hele taro e Gipto, eia kama taga la igototolola te la mulugaluga, e Parao. Eia vagari moli, la vuhula eia mai ale hilo seseleti La Uru ale la valalua la vovo kama hiloa.
HEB 11:28 Oio te la tautaulailo tetala ale uru sesele tai, e Moses tilimuli tomi la merera te La Uru, eia veia giteu e Israel veia egite ge bubu la kasosole latu la sip oata te la mata la luma tegiteu tomi isasasa. E angelo ale La Uru babahea te la bilili, eia ge polo te la logo, eia ge bili e latatu giteu e Gipto la posolagu, eala moli eia ge hilo la kasoso la sip oio te la mata la luma tegiteu e Israel, eia ge polo sele molia, eia kama ge bili e latatu giteu isa oio vola.
HEB 11:29 Egite hele taro e Gipto, egite polo te la mago ale la isala “e Magegese”, egite polo kabili te la gale la mago ale mamarati, la vuhula egite tautaulailo te La Uru. Egiteu e Gipto ga basimuli egiteu soio, la gale la mago iluale, egira goio visogo tavu lou, egiteu la valalua e Gipto tomi tilomutio.
HEB 11:30 Mai etato ge gabutatala tai la tautaulailo te la valalua e Israel te la imamala te Iosua. Egite gali tavu la valalua ale mou te la gale ale La Uru abitia giteu e Israel, egite goio polo galili la bigomu la mautu e Ieriko la haro ivitu mai La Uru veitia giteu, goio la bigomu ale uru ele, eia goio tagogoro tomitio.
HEB 11:31 Mai etato ge gabutatala tai la tautaulailo te la tavile la gauru, e Rahab, oio la mautu e Ieriko. Eia suli egirua taho lua ale e Iosua baha taro muga egirua soilo te la mautu veia egira ge kedi soio la mautu e Ieriko ele. Eia suli egirua, eala eia kama vilua vikapopo legiteu la valalua la maligoma tomi ale mou oio la mautu e Ieriko ele.
HEB 11:32 Me eau ge vei loua mutou lava te la vulovulo la tautaulailo? Eia matagaga tomi moli. Mai eau ge kekesi la veimulipolola tegiteu la tahalo me la tavile la tautaulailo tomi, la buk alele ge malau agi. Egiteu alele, la isa giteu maie: e Gideon, e Barak, e Samson, e Iepta, e Devit, e Samuel, me egiteu la bilalaha tomi te La Uru, ale pala.
HEB 11:33 Egiteu alele, te la tautaulailo moli tegiteu, egite bole la igogolu tomi ale vagari maie: Isahari, egite bolehoho la maututula isahari ale vagari te la vaubila, egite goio vibaumuli tataho la maututula ale egite bolehohoa, me La Uru eia vibalava egiteu te la igogolu tegiteu ele, mai ale eia veitia giteu ovola. Isahari, egite poga la laion, la tautaulailo tegiteu kisi la harela, eia kamati barautu egiteu.
HEB 11:34 Isahari, egiteu la valalua la gima te La Uru, egite pigi egiteu sotalo te la havi, eala moli egite kama kauko ovola, egite mai ale igo mate loua. Isahari, egite vulo taro la gata tegiteu la gima. Egite isahari ale ga posa maveve, egite goio vahiliti vagari lou la vaubila, egite goio bolehoho la valalua la vaubi mapaiti, mai egiteu la valalua la maligoma ale gali tavu egiteu.
HEB 11:35 Isahari la tahalo me la tavile la tautaulailo, egite gabutatala la iloburukola ale uru pepeho, egite pou tali moli la visuli te La Uru maie: Egite hatavivile isahari ale e latatu giteu pehoti, La Uru goio vimahuli rivu lou egiteu, abi rivua giteu e latatu giteu ele. Isahari, la valalua la gima lao tola egiteu, egite viligi gegeru la vovo giteu. Eala moli egite kama gabutatala la hilele, egite peho moli te la viligila ale uru, egite la gima igoa giteu. Egite veia La Uru ge vimahuli rivu lou egiteu te la mahuli rivula ale muga sesele, oata te la ilo la lage.
HEB 11:36 Isahari, la valalua la gima kulumai vulo egiteu, egite lubi vulo tai la vovo giteu, egite gabu la mahelala ale uru pepeho, ale la valalua magiri malelei egiteu te la iligiligi ale uru mai ele. Isahari lou, la valalua la gima lao tola egiteu, kisi la lima giteu me la vaha giteu la sen, vagoilo egiteu mai ele te la luma la kilisi, koratio.
HEB 11:37 Isahari, la valalua la gima dumu legiteu la uati. Isahari, la valalua la gima lao tola egiteu, egite abi la so, egite goio barautu lua la kabili giteu. Isahari, la valalua la gima barautu legiteu la viso la vaubi, egite peho. Isahari, egite la kulikuli ale taritigi ouka, egite tatuga, egite kisi moli la kulikuli la kau me la kulikuli la mee te la kabili giteu. Egite la uati ouka, la valalua igo gegeru egiteu, viligi pepeho egite.
HEB 11:38 Eala moli la vulovulo giteu la valalua te La Uru, eia maroka, eia muga sesele la vulovulo giteu la valalua te la maututula ale egite vile egiteu. Isahari, egite hele lahulahu te la hohoi, isahari hele soata la goegove, egite mavuta kokovu te la lulu me te la vavi la magasa.
HEB 11:39 Me egiteu tomi ele, La Uru vei tataho la tautaulailo tegiteu ale egite magiri vagari. Eala moli egite kama sau tola sesele la vavua la merera te La Uru soio tegiteu te la mahulila tegiteu, ale egite so mahulihuli, ouka.
HEB 11:40 La Tahalo Uru eia masagea veia egite ge peho muga, veia egite ge pou tali muga etatou ale ge mulimuli. Eia veia etato tomi ge vikapopo ge sibitala maroka tataho, eia ge vipuru la merera tomi tetala somai tegatou, vikapopo legiteu.
HEB 12:1 Etatou ale te Kraist, etato mai ale harari te la vipepepela. Egiteu la tahalo la tautaulailo ale alaura kara igoie, egite mapaiti, egite mai ale malelei, egite magiri galili etatou veia ge hiloa veia etato ge hari tigi, ka ouka. Taritigi etato ge kai taro la papaga ale vitikumu la kabili gatou, mai la vulovulo la iruru ale kisi tola etatou, etato ge hari tigi te la vipepepela, ale e Kraist vipou etatou ovola, etato kama ge geho.
HEB 12:2 Taritigi tai veia etato ge vagari veia ge mata moli solagu te Iesus sekela. Eia la vuhu la lotu sesele tegatou, eia visibitala la tautaulailo tegatou, me eia ge vitapasi tai la igogolu tetalale, eia ge vimaroka etatou tomi ale tetala. Eia gabutatala moli la sagegela uru ale mulimuli ge puru oio tetala, eia goio poga tavu la iligiligi oata te la tauvalautu. Eia kama gabutatala la mahelala ovola, eia gabu muga la iligiligi mai ele, mulimuli eia goio pou la pulolou la uru oio te la bali La Tahalo Uru, te la galela e gata.
HEB 12:3 Taritigi amuto ge gabutatala la tautaulailo te Iesus, ale eia magiri vagari te la tahivilela tegiteu la valalua la iruru. Mai amuto ge gabutatala vagaria mai ele, amuto kama ge maveve veia ge peho posa, amuto ge vagari moli.
HEB 12:4 Eia sesele, amuto vaubi vagariti soio te la vulovulo la iruru, eala moli la kasoso mutou souka pagegele mai e Kraist.
HEB 12:5 Mave, amuto soioge vautila la merera te La Uru te La Buk Tabu Ale Pala, ale eia karasuku amutou mai e latatula sesele? Te la merera alele, La Uru eia veia gatou maie: Latugu, eme umala ge gabutatala la vitetelila te La Uru veia eia la golu bulalahu. Umala eme ge ilo buruko mai eia ge vilaime te la iruru ale eme igotia.
HEB 12:6 La vuhula, mai La Uru ge gogome veia eme tetala seseleti, ale eia ge vilaime. Mai eia ge gabutatalea veia eme mai e latula sesele, tiele eia ge mai ale lubi vulome veia ge vitetelime mai ele.
HEB 12:7 Amuto ge magiri vagari te la iligiligi veia eia mai la vitetelila te La Tahalo Uru soio tamutou, ale eia igoti amutou mai e latatula sesele. Etato tomi te la bibisi gatou, etato gabu la vitetelila te tama gatou.
HEB 12:8 Mai eme kama gabu la iligiligi te la vitetelila, ale eia veipalea mai ele veia e tilamu mai ale savume te la gauru, eme mai e guliliki ale e tamala ouka.
HEB 12:9 Etato tomi e tama gatou te la vovo oio, egite viteteli etatou te la bibisi gatou, etato togo tai egiteu oio vola. Mai etato togo tatahoti e tama gatou te la vovo mai ele, taritigi pepeho tai veia etato ge roromuli tataho e tama gatou te la kalulu, etato ge sau tola la mahulila ale sesele.
HEB 12:10 Egiteu e tatama gatou, egite viteteli etatou te la bibisi gatou mai la gabutatalala tegiteu moli, eala moli La Tahalo Uru eia viteteli etatou te la vulovulola ale maroka, veia etato ge sibitala maroka mai eia.
HEB 12:11 La vitetelila, eia la paga isa, eia ligi pasi, etato kama sagege ovola. Eala moli mulimuli etato ge hiloa veia la vavuala ale sesele eia sibitalati, mai la gilogo me la vulovulo ale matata, eia ge kusi tataho te la mahulila tegatou isasa, ale La Uru viteteli etatou.
HEB 12:12 Taritigi la lima mutou ge sau tola vagari lou te la igogolu te Kraist. Taritigi tai veia amuto ge magiri vagari te la isala.
HEB 12:13 Mata tigi la gauru ale matata, mai la merera te Kraist moli sekela, amuto ge mulimulia. Mai amuto ge polo tataho mai ele, tio la vaha mutou ale oba, eia ge vagari lou. Tuga tigi, la vaha mutou soukama peru, amuto ge tuga suka.
HEB 12:14 Amuto ge vagari veia amuto ge vipuhi tigi me egiteu la valalua tomi. Taritigi la vulovulo mutou ge maroka tai. Mai amuto kama ge maroka, amuto kama ge hilo La Uru.
HEB 12:15 Amuto ge vibaumuli tigi amutou tomi veia isa tamutou umala ge galo te la vibalavala te la gilogo te La Tahalo Uru soio tamutou. Amuto ge vibaumuli tigi tai veia isa tamutou umala ge vulo mai la obu ale kama kokora, eia soukama ge kusi kabili tamutou, ge igo gegeru amutou usu.
HEB 12:16 Isa tamutou umala ge tilimuli la vulovulo ale kama kokora. Isa tai umala ge kisu taro La Uru mai e Sau alaura. E maura vitolo, eia goio sugu taro bububu moli la vibalavala te la pulolou la posolagu, e tarila e Iakob lotola la ilali.
HEB 12:17 La veimulipolola alele, etato tomi rovia. Mulimuli e Sau goio gabutatala rivu lou, eia tali tavu e tamala veia ge abi rivu la vibalavala tetala, eala moli oukati. Eia kama koramulia ge vulo la gabutatalala te tamala, e tamala goio kisu taroa, eia kati toi la vibalavala soio tetala, e maura galo.
HEB 12:18 Etato igoie mai ale magiri la sagegela te la vai la gove ale maroka e Saion. Etato kama mai egiteu e Israel alaura, ale egite magiri la tilaga oio te la vai la gove e Sinai. La gove e Sinai, eia la gove ale otalo te la magasa, eia kama la gove la irovilala mai te la igogolu te la kalulu, mai e Sinai. La gove e Sinai, eia karerere, egite Israel tagea. Oio vola la maligoma, la gauku, la hura, eia magiri, eia kama kokora sesele.
HEB 12:19 Oio vola, egite lolo la vaivai eia tali, egite goio lolo la golu La Uru eia vikara, egite tali tavua veia eia ge makovu,
HEB 12:20 la vuhula la merera tetala eia tikumu bara, egite kama koramulia, ale eia veia giteu maie “La gove alele, eia maroka. Mai la tahalo isasa eia ge toa ovola, veia mai la bolo isa tai ge toa ovola, amuto ge dumula la uati, eia ge peho.”
HEB 12:21 E Moses tai hiloa, eia taga pepeho, eia goio vikara maie mago “Eau taga pepeho, la vovogu pariri moliti.”
HEB 12:22 Eala moli la gove ale etato igoie mai ale magiri ovola, eia la gove e Saion. La mautu sesele te La Tahalo Uru, e Ierusalem ale maroka, eia magiri oio vola. Eia oata la ilo la lage, eia la mautu te La Tahalo Uru, ale eia moli sekela mahuli. Oio te la mautu te La Uru, amuto magiri vikapopo legiteu la angelo mapaiti sesele, egite magiri moli la sagegela oio te la lagu La Uru.
HEB 12:23 Oio te la mautu alele, la valalua la lotu te La Uru sesele egite pou vikapopo ovola, eia mai ale vauru tomi egiteu mai la posolagu, eia kekesi tola tomiti la isaisa giteu. Oio tai te la mautu alele, amuto pogati La Tahalo Uru, eia ge mata muli la vulovulo la valalua tomi. Oio tai te la mautu alele, amuto pogati la kalulu giteu la valalua tomi te La Uru, egiteu ale pehoti alaura kara igoie, La Uru eia vimarokati egiteu.
HEB 12:24 Oio tai te la mautu alele, amuto pogati e Iesus, eia ale magiri kabili tegatou me La Tahalo Uru, veia ge vahari la merera ale halaba eia ge vimahuli etatou. Oio te la mautu alele, amuto pogati la kasosole Iesus ale eia lugu robo letatou ovola, la kasosolale eia veipala la merera ale halaba te La Uru. La merera ale halabale, eia la merera la mahuli. Eia kama mai la merera ale loio te la kasosole Abel mai La Buk Tabu Ale Pala veia la kasosole Abel eia mai ale tola soio te La Uru veia eia koli la iruru te tuala ale eia bilia. La kasosole Iesus eia kama mai ele. La kasosole Abel, eia veipala moli la pileho, eala moli la kasosole Iesus eia taritigi pepeho, eia veipala la gilogo te La Tahalo Uru.
HEB 12:25 La tahalo ale vikara soio tamutou, eia La Uru moli e Kraist, eala eia taritigi pepeho veia amuto ge vibaumuli tigi amutou veia amuto tomi ge roromulia. Egiteu e Israel alaura, egite tou la merera te La Uru ale e Moses veia giteu, egite peho tomi, isa kama mahuli utu. Eala moli igoie, amuto kama lolo la merera te la tahalo la vovo, mai egiteu ele. Amuto lolo seseleti la golu La Uru ale tali loata te la mori. Eala eia taritigi pepeho veia etato ge matagaga veia mai etato ge tou la merera tetala ale tikumu ele, etato tai ge peho, isa kama ge hele.
HEB 12:26 Alaura, La Uru eia vikara loata te la gove e Sinai, la golula lugu la magasa tomi. Eala moli eia veitia gatou maie “Eau mulimuli ge lugu lou la magasa, me la mori tai ale loata eau ge lugua.”
HEB 12:27 Me te la merera alele, eia mai ale toitia veia eia ge lugu taro tomi egiteu la papaga ale kama magiri vagari, mai egite la golu bulalahu moli te la maututula. Egiteu la papaga moli ale sesele, egite ge magiri.
HEB 12:28 Tio me eia matagagati mai ele veia la mautu ale eia ababia gatou, eia la paga ale sesele te la kalulu, eia kama ge taumu, eia ge magiri vagari moli. Taritigi etato ge vaisale pepeho La Tahalo Uru, etato ge lotu tavua, etato ge togo seselea.
HEB 12:29 La vuhula La Uru gatou eia mai la havi, eia ge selu taro egiteu tomi ale kama taritigi.
HEB 13:1 Taritigi amuto ge vipuhi tigi te la haroharo tomi. Amuto ge vitau me tabara sesele te la lotu te Kraist.
HEB 13:2 Taritigi amuto ge rara tavu tai egiteu la mosi ale guvi tavu amutou, umala vaula la vulovulo alele. Pala, egiteu la valalua isahari te La Tahalo Uru, egite vibaumuli egiteu la angelo isahari, egite kama rovia veia egiteu la tahalo la vovo moli.
HEB 13:3 Taritigi tai veia amuto ge gabutatala egiteu ale te Kraist, egite pou te la luma la kilisi. Egite oio ligi, taritigi amuto tai, amuto ge ligi vikapopo legiteu. Gabutatala tai egiteu ale la valalua la gima igo gegeru egiteu. Egite ligi, taritigi amutou tai ge ligi vikapopo legiteu.
HEB 13:4 Taritigi amuto ge togo la pulolou tegiteu ale tau me rutu, umala igo gegegeru la taulaila, la vuhula La Tahalo Uru eia ge vilai sesele egiteu ale egite mata bulakalaka, egiteu ale ovovo, egiteu tai ale taulai sasasaro.
HEB 13:5 Umala gabu tikumu la uati veia ge hari olu la vuliti te la mahulila tamutou te la vovo. Amuto umala ge gabutatala papai, amuto ge sagege moli la uati me la ilali bakisi ale amuto taholea. La vuhula La Tahalo Uru moli, eia ge vibaumuli amutou, mai la merera tetala ale eia veia gatou maie: Eau kama ge hele taro amutou ale taku. Eau kama ge piligi taro amutou.
HEB 13:6 Eala eia koramulia veia etato ge vagari moli, etato ge vikara maie mago: La Uru, eia susuli eau. Eau kama ge pariri. Eau kama ge taga la valalua.
HEB 13:7 Taritigi amuto ge gabutatala egiteu la mulugaluga tamutou, egiteu la bilalaha te Kraist ale pala egite veitia mutou la merera te La Tahalo Uru. Amuto ge hilo la vavua la valolo giteu ele, amuto ge sovei la vulovulo giteu ale egite tautaulailo vagari te Kraist.
HEB 13:8 La vulovulole Iesus Kraist, eia kama vuvulo. Alalavi, igoie, galigeli, kara ale mulimuli, la vulovulola eia visauru moli.
HEB 13:9 Eala amuto umala ge mata sosoli egiteu la valalua la visigologolola veia egite ge tutugolo amutou, amuto ge ruru soio te la vimari tomi ale isapolo, ale kama te Kraist sesele. Mai la vimari te la irovilala tomi te la lotu, ale egite karasuku etatou ovola veia etato ge gabu tikumua, mai la ilali isahari ale ge igo la rivu gatou ovola, mai la vimari tai ale mave ale mave, la merera tomi alele eia kama ge vimahuli la kalulu giteu ale mulimuli.
HEB 13:10 Etatou ale te Kraist, etato tahola la luma la lotu isa sekela moli ale sesele, me la poro la vaabila oilo vola tai isa sekela moli. Me la vaabila ale tabuli oata te la poro, eia pigi robo etatou moli ale te Kraist. La vaabila alele, eia kama tegiteu ale gabu tikumu la lotu tegiteu e Iuda.
HEB 13:11 Te la lotu tegiteu e Iuda, la mulugaluga tegiteu e pris, eia ge abi la kasoso giteu la kalia ale egite bilia, eia ge vaharia soilo te La Baa Ale Maroka Viruru oilo te la luma la lotu, veia la kasoso alele eia ge pigi robo la iruru tomi te la valalua. Eala moli la vovo giteu la kalia ale egiteu bilitia, egite ge bolea sogala la mautu, egite ge selu taroa.
HEB 13:12 Mai e Iesus tai, egite lao tolea, egite lapua sogala la mautu, egite bilia oio te la matapiro la mautu e Ierusalem, la valalua e Iuda toutia. Eia gabu la iligiligi ale uru sesele, veia la kasosola ge pagegele, eia ge pigi robo etatou tomi ale tetala, eia ge vimaroka etatou.
HEB 13:13 Eala eia koramuli seselea veia etatou tai ale tetala ge pou logala la mautu mai e Kraist, veia etato ale tetala ge gabu suli eia te la mahelala ale eia gabutia.
HEB 13:14 La vuhula, la mautu ale etato mou ovola, eia kama la golu sesele, eia kama ge magiri tabaa. Etato so mamata solagu te la mautu ale sesele, eia ge sibitala mulimuli.
HEB 13:15 E Iesus, eia ge suli la lotu tegatou, etato ge vaisale bibibi La Tahalo Uru, mai la vaabila tegatou ale maroka soio tetala. Etato ge vaisale bibibi molia mai ele veia eia sekela moli La Uru, me etatou la valalua me hatavivile tetala sesele.
HEB 13:16 Me la vaabila isa lou tai ale La Tahalo Uru masaga pepehoa, amuto umala ge vaula, ale amuto ge mulimuli la vulovulo la mutelela, me amuto ge suli tai egiteu la valalua ale pou la savelela.
HEB 13:17 Taritigi amuto ge mulimuli tataho la merera tegiteu la mulugaluga tamutou, amuto ge roromuli egite. Egite kama vibaumuli bulalahu amutou, La Tahalo Uru moli mata mulimuli la igogolu tegiteu, eala egite igogolu tataho. Amuto ge roromuli tataho egiteu, egite ge sagege pepeho la igogolu tegiteu mai ele, egite kama ge ligi la vulovulo mutou. Mai amuto ge vareagi, la pulolou tamutou kama ge taritigi, la vareagila eia kama ge suli amutou.
HEB 13:18 Eau kaka gogogo amutou, veia amuto ge pou te la kilaka, veia amuto ge sau tola amiteu la tahalo la vibaumuli te la lotu te Kraist oio te la kilaka tamutou ele. Amite kama gabutatala papai te la igogolu tamiteu, amite tovo lalai vagari veia ge pou tigi, la iruru ouka.
HEB 13:19 Eala, eiau tai ale kekesi la buk ale, eau kaka gogogo vagari amutou veia amuto ge kaka La Tahalo Uru veia eia ge vahari harari rivuau somai tamutou, etato ge vikapopo lou.
HEB 13:20 Taritigi pepeho tai veia La Tahalo Uru ale sau tola etatou te la pulolou ale taritigi, eia ge vauru la gabutatalala me la tautaulailo ale taritigi soio tamutou, veia etato tomi ge igogolu tataho mai la masasagala tetala sesele. La vagagari la kasosole Latula ale sau tola la merera la mahuli tetala ale kama ge kaluvu, eia vimahuli rivu lou La Uru gatou e Kraist taro la pileho veia eia ge vibaumuli tataho etatou ale tetala. Taritigi tai veia La Tahalo Uru ge igogolu oilo te la tia mutou veia ge visibitala la vulovulo tomi ale taritigi, eia ge lege sisigi le amutou oio vola. La merera tomi alele, eau kakea te la isale Iesus Kraist, tetala ge la vaisalela ale uru sesele, la kaluvula ge ouka. Amen.
HEB 13:22 Amuto tabarabaragu, taritigi amuto ge gabu tikumu la merera tomi ale eau veitia mutou te la kekesi taku ele, la vuhula la merera taku ele, eia kama malau, eia boto moli.
HEB 13:23 Taritigi amuto ge matagaga veia e tabara gatou e Timoti, eia kati pou te la luma la kilisi, egite lubetia. Mai eia ge gomai hari taku, soioge amila tomi ge hari lalai amutou.
HEB 13:24 Amuto ge laharoa giteu la mulugaluga tomi te la lotu te Kraist, me la valalua me hatavivile tomi tai ale tetala. Egiteu e tabarabara gatou te la isale Kraist ale pou oio la gale e Itali, egite tai toi la haro sesele soio tamutou.
HEB 13:25 La gilogo te La Tahalo Uru eia ge pou tamutou tomi. La vikararala taku bakisi eala moli ele, kaluvuti.
JAM 1:1 Eiau e Iakob, eau la bilalaha te La Tahalo Uru, me te Latula e Iesus Kraist tai, La Uru gatou. Eau kekesia mutou la valalua me hatavivile tomi tetala, amuto hele le egiteu la gima te Kraist, amuto hele burati soio te la galegale tomi. Eau toi la haro sesele soio tamutou tomi ele.
JAM 1:2 Amuto tabarabaragu, mai la iloburukola ge sibitala tavu amutou, taritigi amuto ge sagege moli.
JAM 1:3 Mai eme ge toro te la merera te Kraist, ale eme ge bolehoho la tovolalaila mai ele, me eme kama ge ilo buruko harari, eme ge la tahalo me la tavile ale vagari sesele.
JAM 1:4 Mai amuto ge magiri vagari mai ele, me amuto kama ge vulo liliu lou, amuto ge sibitala maroka tataho, amuto ge la tahalo me la tavile sesele te Kraist.
JAM 1:5 Mai isa tamutou eia rovia veia la mari tetala eia boto, taritigi eia ge kaka La Tahalo Uru, La Tahalo Uru ge abiala la mari ale sesele, eia kama ge hate roboa, la vuhula eia la tahalo la mutelela.
JAM 1:6 Eala moli mai eme pou te la kilaka, eme umala ge ilo lalua, eme ge kukukumu moli la kilaka taume veia La Tahalo Uru ge abi seseleamu. Mai eme ge ilo lalua, eme mai la uaga ale la mago pigi lokelokea.
JAM 1:7 Me la tahalo ale gabutala lalua mai ele, eia la tahalo la visigologolola, La Tahalo Uru kama ge vibalavea mai la kilaka tetalale, eia kama ge abiala isa la paga, ouka.
JAM 1:9 Mai la tahalo te Kraist isa eia la morivava, taritigi eia ge matagaga mai ele veia oio te la lagu La Tahalo Uru, eia la tahalo sesele, alele eia taritigi veia eia ge sagege moli te la savelela tetala.
JAM 1:10 Mai la tahalo te Kraist isa lou, eia la tahalo la vuliti, mai eia ge matagagati veia te la lagu La Tahalo Uru eia la golu bulalahu moli, taritigi eia ge sagege mai ele, la vuhula eia rovitia veia la uati tetala kama ge vimahulia. Eia ge pakuku mai la sese la obu. La lolovi ge vai taroa, eia ge paru.
JAM 1:11 La tahalo la vuliti, eia mai la sese la gelegele. La haro ge agi titili, la sese la gelegele eia ge pakuku, eia goio paru bulalahu molitio, etato kati hilo la marasala. Me taritigi etato ge matagaga sesele mai ele veia la tahalo la vuliti eia ge peho taro la igogolu tetala ale eia vagari tautavuale.
JAM 1:12 Mai la tahalo te Kraist eia ge poga la tovolalaila mai la savelela me la ilea, ale eia ge sagege, la vuhula mai eia ge bolehohoa, La Tahalo Uru ge vibalavala la mahulila ale sesele ale eia raragitia veia ge abia giteu la valalua me hatavivile tetala.
JAM 1:13 Mai isa eia gabua veia la iloburukola eia laputia soio te la iruru, ale eia umala ge veia La Tahalo Uru tovo lalaia, ouka. La vuhula La Tahalo Uru kama rovi la tovolalaila, eala eia kama tovo lalai etatoue.
JAM 1:14 Eala moli taritigi etato ge rovia veia etatou lou visibitala la tovolalaila somai tegatou, ale etato vagari moli veia ge tilimuli moli la masasagala te la vovo, me alele etato tiloti ovola.
JAM 1:15 La gabutatalala tegatou, eia mai seselele, eia ge visibitala la iruru usu somai tegatou, me la iruru, mai eia ge vulo uru, eia ge visibitala la vavuala mai la pileho somai tegatou.
JAM 1:16 Amuto tabarabaragu, amuto taritigi, umala amuto ge tilo harari moli te la visigologolola.
JAM 1:17 La paga tomi ale taritigi, eia maroka, eia loata te La Tahalo Uru. E Tama gatou, eia la vuhu la matagaga, eia visivoti egiteu la vibalavala tetala ale taritigi sotalo tegatou, eia kama koramulia ge vulo loua veia ge pigi robo lou letatou la maligoma, ouka.
JAM 1:18 Te la masasagala moli tetala eia visibitala etatou mai e latatula sesele. Eia veipala moli etatou te la merera tetala ale sesele, eia visibitala etatou mai ele, veia etato ge mamuga egiteu la papaga tomi ale eia vipoutia, etato ge pou mai e latatula sesele.
JAM 1:19 Amuto tabarabaragu, taritigi amuto ge gabutatala tigi. Amuto tomi ge vagari la ilaba gelela, eala moli amuto umala ge igo totolo harari, umala ge toi harari la merera soio tegiteu e tabarabara mutou.
JAM 1:20 La vuhula, la igototolola tegatou eia kama ge vimahuli etatou isasa veia etatou ge vulo maroka mai la masasagala te La Tahalo Uru.
JAM 1:21 Tio mai alele, eia taritigi amuto ge poke taro la vulovulo tomi ale kama kokorale, amuto umala ge gilogilo, umala ge mata bulakalaka, mai egiteu la valalua isahari. Eala moli amuto ge sau tola la merera te La Tahalo Uru ale eia galutia te la tia mutou ele, eia kusiti, la vuhula la merera tetalale eia koramulia ge vimahuli amutou.
JAM 1:22 Eala moli amuto umala ge lolo bulalahu moli la merera te Kraist. Amuto ge tovo mulia mai ale amuto lolotiale.
JAM 1:23 Mai ge ouka, amuto mai sesele la tahalo ale hilo la tirarola te la titiro,
JAM 1:24 me eia tuga soio eia goio vauti lou la tirarolale eia mave.
JAM 1:25 Eala moli amuto ge mata muli la sesele la merera te La Tahalo Uru, eia maroka sesele, eia lube etatou taro la kilisi te Satan. Amuto ge hiloa mai ele, amuto ge tovo muli seselea. Amuto umala ge vaula la tilovo alele, amuto umala tai ge silaha taroa, mai ele amuto ge poga sesele la vibalavala oio te la pulolou tamutou.
JAM 1:26 Mai isa tamutou eia veia eia la tahalo la lotu, eala moli eia la tahalo la vikara papaila, ale eia visigolo, eia kama rovi la lotu.
JAM 1:27 La vulovulo la lotu sesele ale maroka te la gabutatalala te La Tahalo Uru, eia maie: Eme ge baumuli egiteu ale pou la savelela mai egiteu e hatavivile la baharu ale e harua giteu pehoti, egiteu la tulagola tai. Eme ge baumuli eme, la vulovulo la maututula ale kama kokora eia soukama lapume soio te la iruru veia eme ge gotigu rivu lou, la vulovulomu kati ge kokora.
JAM 2:1 Amuto tabarabaragu, etatou ale gabu tikumu e Iesus Kraist, eia kama taritigi veia etato ge toi tabaribari la valalua me hatavivile veia isahari taritigi, isahari ouka.
JAM 2:2 Mai la tahalo la vuliti isasa eia ge lotu tomi le amutou, me amuto hiloa eia tokoromo tataho. Mai tai la morivava isa eia guvi veia ge lotu tomi le amutou, me amuto hiloa la lavalava tetala eia masile kurakura lalahu.
JAM 2:3 Mai amuto ge togo la tahalo la vuliti, amuto ge veiala mago “Male, eme ge pou la pulolou ale taritigi ele” me amuto goio ge vei louale maura la morivava mago “Eme ge magiri gale” uka “Eme pou otalo la magasale”,
JAM 2:4 ale amuto ruruti, la vuhula amuto toi tabariti lou la valalua mai ele, amuto mata muliti la vulovulo la valalua, eala moli la gabutatalala tamutou eia kama taritigi, eia kama kokora.
JAM 2:5 Amuto tabarabaragu, amuto ge laba gele tavuau! La Tahalo Uru visati legiteu la valalua la morivava veia egite ge tahola la vuliti mai la merera tetala. La merera tetalale, mai egite ge toro ovola, egite ge pou la balavala te la pulolou la matagagala tetala mai la merera tetala eia vei seseletia, mai etatou ale puhi tigi sesele La Tahalo Uru.
JAM 2:6 La Tahalo Uru, eia ge vauru egiteu la morivava mai ele, eala moli amuto la valalua goio vile mumugu lou egiteu! Hiloa, egiteu ale viligi amutou, egite visigolo amutou te la merera tomi tegiteu, egiteu alele la valalua la vuliti moli!
JAM 2:7 Egiteu la tahalo la vuliti moli eiala vikara barea la isa la riau tegatou e Kraist ale amuto abiti la vuluhi te la isala.
JAM 2:8 Mai amuto ge roromuli la merera te La Tahalo Uru te La Buk Tabu Ale Pala, la merera ale tikumu ale, eia veia maie “Eme ge gogo e tabaramu mai ale eme gogo rivu lou emei.” La merera alele, mai eme roromulia, ale eme la tahalo sesele, eme kama ruru.
JAM 2:9 Eala moli mai eme ge toi tabaribari la valalua me hatavivile, ale eme ruruti, eme poloti la merera te La Tahalo Uru.
JAM 2:10 Ale eme ge polo la tururi tetala isa moli mai ele, ale eme mai ale boruti, La Tahalo Uru ge vilai eme mai ale eme poloti la merera tetala tomi.
JAM 2:11 La vuhula eia toi la merera usu somai tegatou, mai umala ovo tataro le tabaramu e rutula, umala bilibili, la merera tomi moli mai ele. Mai eme ge pou tataho te la taulaila, eala moli eme bili e tabaramu, alele eme la tahalo la iruru, me la merera ale eme kama poloa eia kama ge vimahulime, ale moli eme polotia eia ge vitilome, eme ge vilua.
JAM 2:12 Taritigi la vulovulo mutou tomi, la merera tomi tai tamutou, eia ge taritigi moli mai sesele la vulovulo la tahalo ale pou te la matagaga, mai la vulovulo la tahalo ale rovitia veia mulimuli La Tahalo Uru ge mata muli la vulovulo gatou tomi oio te la matagaga tetala ale uru.
JAM 2:13 Mai eme kama rovi la gilogo, La Tahalo Uru kama ge gogo emei. Eala moli mai eme la tahalo la gilogo sesele, ale La Tahalo Uru ge gogome, eia kamati ge kolia soio taume mai la iruru tomi ale eme igotia, ale eme poloti la merera tetala.
JAM 2:14 Amuto tabarabaragu, mai isa tamutou eia veia eia tautaulailo te Kraist, eala moli eia kama suli tigi egiteu la valalua me hatavivile tomi, la lotu tetala eia la golu bulalahu moli. La merera tetala ale eia veia eia tautaulailo te Kraist, ale la golu bulalahu, eia kama ge vimahulia.
JAM 2:15 Mai egite la valalua me hatavivile te Kraist isahari oio, egite pou la savelela, la lavalava ouka, la ilali ouka,
JAM 2:16 ale eia kama koramulia veia eme ge veia giteu mago “Amuto tuga, amuto ge baumuli tigi amutou, amuto souka lea!” Mai etato ge vikara bulalahu mai ele, etato toi bulalahu la vikararala ale taritigi soio tegiteu, eala moli etato kama ge suli egiteu bakisi la ilali me la kulikuli, ale etato galo seseleti.
JAM 2:17 Mai eme veia eme la tahalo la tautaulailo, eala moli eme kama suli egiteu e tabarabaramu, tiele la tautaulailo taume te Kraist eia la golu bulalahu, eia la vavuala ouka, eia pehoti.
JAM 2:18 Eala moli isa soioge ge koli la merera taku maie, mago “Isahari, egite la tahalo la kilaka soio te La Tahalo Uru, me isahari egite la tahalo la visuli soio te la valalua me hatavivile.” Eala moli eau ge koli la merera tetalale maie, mago “Etato ge hilo la vavua la merera tegirua. Ale kaka moli me eia kama igo isa la igogolu ale taritigi, etato kama ge hilo isa la vavuala. Ale la tahalo la visuli, etato ge rovia veia eia roromuli sesele e Iesus, la vuhula la vavuala usu tetala etato ge hiloa.”
JAM 2:19 Amuto umala ge vei tatataho rivu lou amutou veia amuto togo sesele La Tahalo Uru. Egiteu la hituhitu tai ale kama kokora, egite gabu tikumu La Tahalo Uru mai ele, eala moli la vovo giteu pariri tai leia.
JAM 2:20 Mave, la masova la merera taku, amuto isahari soioge souka abi tigia, ia? Ale eau tovoa soio te la tahalo ale tautaulailo te Kraist, eala moli eia kama suli egiteu e tabarabarala, amuto masagea veia eau ge vahilo le amutou la sesele la merera alele, ia? Ioge, eau ge vituri mulia mutou la pagale.
JAM 2:21 E tubu gatou e Abraham alaura, eia kisi e latula la posolagu, e Isak, oata te la poro veia ge bilia mai la vaabila soio te La Tahalo Uru. Eia roromuli La Tahalo Uru mai ele, tio La Tahalo Uru lege sisigi leia, eia toia mai ele veia e Abraham eia la tahalo la marokala tetala.
JAM 2:22 Etato hilo taia te La Buk Tabu Ale Pala veia e Abraham, eia tautaulailo sesele te La Tahalo Uru, eia roromuli taia, la gabutatalala tetala ale iluale magiri vikapopo moli. La igogolu tomi tetala, eia mai ale vitikumu la gabutatalala tetala soio te La Tahalo Uru veia eia ge maroka.
JAM 2:23 Mai la merera te La Buk Tabu eia puru seseleti soio tetalale, ale eia veia maie “E Abraham, eia roromuli seseleti La Tahalo Uru, me La Tahalo Uru hiloa mai ele veia la tahalo ale eia maroka.” Mai alele, La Tahalo Uru vagoiloa mai la tahalo tetala seseleti.
JAM 2:24 Ale etato ge matagaga mai ele veia la visuli tegatou soio te La Tahalo Uru, mai tai ale soio te la valalua me hatavivile tomi, eia ge vimahuli etatou, etato me La Tahalo Uru kati ge vipou baa. Eia kama mai ale etato tautaulailo bulalahu te Kraist, ouka. Etato ge pou tavu tai la igogolu la visuli, me La Tahalo Uru ge masaga etatou mai ele, ale eia masaga tavu tai e Abraham alaura.
JAM 2:25 Mai tai la tavile uru te La Buk Tabu Ale Pala, e Rahab, eia la tavile la gauru, eia suli egirua taho lua ale e Iosua baha taro muga egirua soilo te la mautu e Ieriko veia egira ge kedi soio la mautu alele. La valalua la pahutuhutula veia ge lao tola egirua, eala moli e Rahab goio tau kokovu egira oio te la luma tetala, eia goio visigolo egiteu, eia baha taro egiteu soio la gale ale isapolo, koratio. Eia la tavile ale kama kokora, eala moli eia suli egira taho lua la bilalaha te La Tahalo Uru mai ele, La Tahalo Uru hiloa, eia toia veia eia la tavile la marokala.
JAM 2:26 Etato rovia veia, mai la kalulu gatou ge hele taro la vovo gatou, etato mai ale pehoti. Tio mai tai la tautaulailo tegatou, mai eia kama ge magiri vikapopo me la igogolu la visuli, mai te la gilogo te La Tahalo Uru, ale la tautaulailo tegatou eia mai ale pehoti.
JAM 3:1 Amuto tabarabaragu, taritigi amuto umala ususu ge vagari tavu la igogolu la vimari te la merera te Kraist soio te la valalua me hatavivile te la lotu, la vuhula la igogolu alele eia vagari, eia tikumu. Amiteu ale igogoluti ovola, La Tahalo Uru ge mata muli sesele la vulovulo miteu, eala moli amutou la valalua bulalahu, amuto ge mavulaha bakisi.
JAM 3:2 Etato tomi boruti te la iruru, eala moli la tahalo ale baumuli tigi la kalameala, la harela ka ruru, etato ge rovia mai ele veia eia la tahalo sesele, eia kama igo lalahu, eia la tahalo la tilogo, eia baumuli tataho la vulovulola. Mai la paga ale bisi moli, eia koramuli la igogolu isa uru.
JAM 3:3 Mai etato ge vuvu la gogo soio te la maisu la kau, etato koramulia ge tatea soio, mai te la masasagala tegatou. La kalamea gatou, eia mai tai ele, eia bisi moli, eala moli eia vagari.
JAM 3:4 Mai tai la ilau la uaga. Mai la uaga isa uru, la lolovi tai ge vagari, eala moli la vore la ilau te la lima gatou, eia kama uru, eala moli eia ge au tataho moli la uaga tegatou soio te la tasi ale etato masagea ge poru ovola.
JAM 3:5 Mai la kalamea gatou tai, eia bisi moli, eia kama uru, eala moli eia veipala la merera ale tikumu.
JAM 3:6 La kalamea gatou, eia mai tai sesele la havi. Mai la pasisiri la havi isa bisi moli, eia ge tubu soio te la obu isa, la hohoi tomi ele ge kahatio. Mai moli ele la kalamea gatou eia mai sesele la havi. La iruru tomi, egite sibitala te la hare gatou, eia ge visibitala la iruru soio tegatou mai ele, ale la kalamea gatou veipalatia, mulimuli etato goio igo seselea mai la hare gatou eia toitia. Eala eia matagaga mai ele veia la kalamea gatou eia mai sesele la havi. La havi alele, eia loio sesele te la mautu te Satan, la havi ale uru karerere oio vola. La hare gatou eia koramulia ge igo hate mamasi la hate giteu la valalua me hatavivile.
JAM 3:7 Etatou la valalua, etato koramulia ge vimalu egiteu la bolobolo me la malumalu,
JAM 3:8 eala moli etato kama koramulia ge vimalu la kalamea gatou. Eia la gima sesele, eia tilalia moli te la haroharo tomi kama maila, eia mai ale igo gegeru egiteu e tabarabara gatou te la merera la visigologolola me la veimulimulila.
JAM 3:9 Te la hare gatou, etato toitoi la vaisalela soata te Tama gatou, goio kama tabaa etato goio gilo lou egiteu e tabarabara gatou ale La Tahalo Uru pui egiteu mai sesele la tirarola.
JAM 3:10 Mai alele, etato rovitia veia la vaisalela me la gililo tomi eia sibitala vikapopo moli te la hare gatou, la kalamea gatou eia mai ale vasosoleti mai la kalameale vareki. Amuto tabarabaragu, eau veia mutou, la vulovulo gatou alele eia kama taritigi.
JAM 3:11 Mave, eia koramuli etato ge hiloa te la lalu isasa, la lalu oio vola ge ilua, ale maigi isasa, ale milamila tai ge isa, egira ge sibitala vikapopo moli? Ouka.
JAM 3:12 Amuto tabarabaragu, eau vei seselea mutou, la keme, eia kama koramulia veia la vavuala ge sibitala mai la gaiva. Me la vavua la vaen eia kama koramulia ge sibitala mai la keme. Mai alele, eia kama koramulia veia te la lalu ale milamila, etato ge pogea ovola la lalu ale maigi, etato ge liua, ouka. Mai tai ele eia matagaga moliti veia eia kama taritigi veia la merera ale taritigi me la merera ale kama kokora, eia ge sibitala vikapopo te la hare gatou.
JAM 3:13 Mai isa tamutou eia veia eia la tahalo ale taritigi, veia eia la tahalo la mari, amuto ge mata muli la vulovulola veia eia taritigi, ka ouka, veia eia la tahalo la tilogo, me eia la tahalo la mari, ka ouka.
JAM 3:14 Eala moli, mai isa tamutou eia la tahalo la igototolola, eia maisu tototolo, eia tai para muraha, eia umala ge visigolo veia eia la tahalo la mari.
JAM 3:15 La mari tetala oio te la vulovulola ale mai ele, eia kama loata te La Tahalo Uru, ouka. Alele eia la mari moli te la vulovulo la vovo, eia loio moli te Satan.
JAM 3:16 Mai la tahalo ale eme sivuti la pakakasala me la maisu totolola oio tetala, oio te la tahalo moli alele eme ge sivuti tai la vareagila me la vulovulo tai ale kama kokora oio moli tetalale.
JAM 3:17 Eala moli la mari ale loata te La Tahalo Uru, eia maroka sesele, eia visibitala la vulovulo gatou ale taritigi tataho maie: etato ge pou tataho, etato kama ge la tahalo la igototolola; etato ge mutele sesele; etato ge lolo vulai tataho; la gilogo eia ge volu sesele oio tegatou, eia ge visibitala la vavuala ale taritigi; etato ge visuli sesele soio te la valalua me hatavivile tomi, etato kama ge toi tabaribari egiteu; etato ge sau tola vagari la lotu, etato kama ge lotu bulalahu moli, ouka, etato ge lotu sesele.
JAM 3:18 Me la vavuala ale taritigi, ale la tahalo ale taritigi ge galua, eia ge kusi, eia ge vua mai la vulovulo ale maroka sesele.
JAM 4:1 Amuto oiole vaigigo, la vulovulo mutou alele la rova vahilitia? La vulovulo mutou lou eia vahilitia, ale la gabutatalala tamutou ilalua, la tia mutou oilo kama malilo, eala amuto vaigigo mai ele.
JAM 4:2 Amuto hate saga tavu la golugolu tegiteu e tabarabara mutou, amuto loho tavua mai ele, la vuhula amuto kama taholea, amuto vaigo totolo, amuto gabutatala moli la vikokuela, la bilili. La paga ale amuto masagea, amuto kama taholea, la vuhula amuto kama kaka La Tahalo Uru ovola.
JAM 4:3 Eala moli ale amuto kaka la paga isasa oio te La Tahalo Uru, me eia kama abia mutou, amuto ge matagaga mai ele veia la kilaka tamutou eia kama sesele, amuto kaka bulalahu moli la paga ale amuto isu molia, amuto kama kaka La Tahalo Uru la paga ale tikumu, eia ge suli sesele la kalulu mutou.
JAM 4:4 La Tahalo Uru puliti amutou soio tetala, eala moli amuto mai ale taulai sasasaroti lou soio te la vulovulo ale kama kokora te la vovo. Amuto kama rovia veia mai isa ge hate saga tavu moli la vulovulo ale kama kokora te la vovo, alele eia mai ale gimati La Tahalo Uru. Mai isa ge masaga tavu la vulovulo ale kama kokora te la vovo, eia vileti La Tahalo Uru mai ele, La Tahalo Uru tai ge kolia soio tetala mai la vulovulola lou.
JAM 4:5 Taritigi amuto ge matagaga tigi veia la merera te La Buk Tabu Ale Pala eia kama vikara bulalahu ale eia veia maie “La Tahalo Uru, eia vipou la kalulula oilo tegatou veia etato ge vagari tavu sesele la vulovulo ale maroka veia etato ge te Kraist moli sekela.”
JAM 4:6 La Tahalo Uru eia veipalatia la gilogo tetala somai tegatou, me oio volale eia koramuli seselea veia etato ge roromulia. Mai La Buk Tabu Ale Pala eia vei tai loua maie: La Tahalo Uru ge magiri robo la tahalo la vareagila, eala moli la tahalo la mahelala eia ge gogoa, eia ge vimahulia.
JAM 4:7 Mai alele, eia koramuli seselea veia etato ge roromuli moli La Tahalo Uru, etato ge magiri robo tai e Satan, eia ge hele taro etatou mai ele.
JAM 4:8 Etato ge pou hagagavi moli soio te La Tahalo Uru, eia ge gomai hagagavi tegatou. Taritigi tai veia amuto la tahalo la iruru, amuto ge vulo halaba la vulovulo mutou, eia ge maroka. Amuto la tahalo la visigologolola ge vulo halaba tai la gabutatalala tamutou oilo.
JAM 4:9 Taritigi amuto ge tali pepeho soata te la iloburukola te la iruru tamutou. Amutou ale lege sisigi, taritigi amuto ge tali. Amutou ale sagege, taritigi amuto ge ilo bubuli.
JAM 4:10 Taritigi pepeho veia amuto ge vibisi lou amutou te la lagu La Tahalo Uru, amuto kamati ge pakakasa. Mai ge mai ele, eia ge vauru amutou.
JAM 4:11 Amuto tabarabaragu, umala amuto ge mera kukumua mutou. Mai isa ge mera kukumuale tabarala, me eia ge vile tai egiteu la valalua mai ele, eia mai ale vikara gegeru soio te la merera tegatou e Iuda ale taritigi, e Moses kekesitia, la vuhula eia tomu sasae la vulovulole tabarala, eia vauru rivu lou eia veia eia ge abi la muli La Tahalo Uru te la igogolu tetala ale eia ge vimagiri etatou te la vigagiala. Eia matagaga moli veia la merera te Moses eia tabuli palati kara igoie te la iligo tigi la vulovulo gatou. Ale amuto vagari veia ge tomu sasae la vulovulole tabaramu, amuto kamati togo la igogolu te la merera te Moses, amuto polotia.
JAM 4:12 La Tahalo Uru sekela vipou la merera ale tikumu somai tegatou la valalua me hatavivile. Me La Tahalo Uru sekela tai eia ge mata muli la vulovulo gatou, isa lou ge ouka. La Tahalo Uru sekela moli eia ge vimahuli etatou. Me La Tahalo Uru sekela moli koramulia ge koli bara la iruru tegatou. Eme ere veia eme ge tomu sasae la vulovulole tabaramu?
JAM 4:13 Egiteu oio isahari tamutou ele vikara maie “Gai, uka galigeli, etato ge kavovou soio la mautu e tibo, etato ge mou muga oio vola la leavala isasa, etato ge galu la liu, ge poga bakisi la uati mai ele, ge paa muli la uati tegatou eia ge uru mai ele.” Eala moli eia taritigi pepeho veia amutou ale vikara mai ele, amuto ge lolo la merera taku.
JAM 4:14 Etato la tahalo la vovo kama koramulia ge rovi la mahulila tegatou ale galigeli veia eia ge mave. La mahulila tegatou eia mai la veto, eia sibitala te la kavikoki, la haro goata, eia kokovu lou, etato kamati hiloa.
JAM 4:15 Eala eia taritigi veia amuto ge vikara maie “Mai La Uru ge masagea, etato ge mahuli tabaa bakisi, etato ge vahiliti la igogolu ale maio, ale maie.”
JAM 4:16 Eala moli amuto kama gabutatala mai ele. Amuto pakakasa moli, amuto vauru lou amutou, amuto ruruti.
JAM 4:17 Mai alele, eia taritigi amuto ge matagaga veia mai la tahalo isasa eia rovi la vulovulo ale taritigi, eala moli eia kama igoa, la tahalo ale eia ruruti.
JAM 5:1 La merera taku isa lou eia goio tamutou ale tahola la uati uru. Taritigi amuto ge sokoa veia amuto ge pigi la tilali, la ilo mutou ge vaulo, la vuhula la iloburukola eia ge sibitala robo amutou, amuto ge ilo ruru sesele.
JAM 5:2 La vuliti tamutou ele, eia ge mai ale kalesoti, la lavalava tamutou kamati ge kokora, la sasabe me kusuke ge koro lahua.
JAM 5:3 La uati ale amuto tau olutiale, eia tai ge kama kokora, eia ge veipala la vulovulo mutou mai ele, eia ge vikaluvu tai la mahulila te la vovo mutou mai la havi ale gutu la obu. La imamala ale igoie, eia hagagaviti ge la tapasi la haro, eala moli amuto tau oluti la vuliti veia eia ge suli amutou.
JAM 5:4 Hiloa, amuto pala baha egiteu la valalua soio te la igogolu tamutou, eala moli amuto kamati loto tigi egiteu, egite oio taliti soata te La Tahalo Uru, ale eia moli sekela vagari, eia lolotia.
JAM 5:5 Amuto mahuli tabaati, amuto pou moli la sagegela, amuto kama savelea isa la paga, amuto pou tataho moli, eala moli amuto kama gabutatala e tabarabara mutou. Amuto pou tatahoti, amuto ali maru, la kabili mutou tubu tataho mai la bolo ale la kabilila tubu, egite raragiti veia ge laoa, ge oloa, me amuto tai ge poga tavu la viluala mai la bolole.
JAM 5:6 Amuto kama kokora, amuto laputi egiteu ale kama ruru soilo te la vigagiala, amuto kaua giteu la merera usu, amuto mai ale biliti egiteu, eala moli egite kama vagari veia ge magiri robo amutou.
JAM 5:7 Amuto tabarabaragu, taritigi amuto ge magiri vagari moli, amuto kama ge gabutatala papai, kara ale La Uru ge beu rivu loua somai, eia ge vimatata la iruru tomi. Amuto rovitia, la tahalo ale tuhakala, eia ge galu la ilali, eia ge pou tali la hura me la haro ale ge vikusi la ilali tetala orivo la mahuma. Eia pou tabaa mai ele, kara la ilali ge kusi.
JAM 5:8 Amutou tai, taritigi amuto ge vagari moli, amuto ge toro moli te Kraist, la vuhula la haro ale eia ge beu rivu loua somai te la maututula, eia hagagaviti.
JAM 5:9 Umala tai veia amuto ge silaha taro egiteu e tabarabara mutou te la vareagila tegiteu veia ge vikara kukumua giteu, la vuhula amutou tai la tahalo la iruru, me La Tahalo Uru soukama ge tomu sasae la vulovulo mutou tai. La Uru eia oioti te la matapiro, bakisi moliti eia ge goluma, eia ge mata muli la vulovulo gatou la valalua me hatavivile tomi.
JAM 5:10 Amuto tabarabaragu, etato rovitia veia la tahalo ale magiri vagari, La Tahalo Uru ge vibalavea. Mai egiteu la bilalaha te La Tahalo Uru ale alaura, egite magiri vagari, egite veipala la merera te La Tahalo Uru soio te la valalua me hatavivile. La valalua vile egiteu, eala moli egite magiri vagari moli te la isa La Uru. Mai tai la tahalo ale e Iob, la iloburukola uru eia sibitala roboa, eala moli eia magiri vagari, mulimuli La Tahalo Uru goio vibalava seselea. Etato tomi tai rovia mai ele veia La Tahalo Uru, eia la tahalo la gilogo sesele.
JAM 5:12 Amuto tabarabaragu, la merera isa ale tikumu eau masagea veia amuto ge matagaga ovola veia amuto umala ge vikara ge toi la isa La Tahalo Uru soio te la merera tamutou veia ge vitikumu loua mai ele. Amuto umala ge vitikumu la merera tamutou veia ge toi sesele soata te La Tahalo Uru, veia amuto ge toi la paga isa tai omai te la magasa. Mai amuto ge toi moli mago “Elo”, ale la masovala ge “elo” moli, kama ge vulo loua. Mai tai amuto ge toi moli mago “Ouka”, ale la masovala tai ge “ouka”, kama ge vulo loua. Mai amuto ge toi bulalahu moli la isa La Uru, me amuto ge visigolo lou, ale amuto ruruti me La Tahalo Uru ge vilai sesele amutou te la iruru tamutou ele.
JAM 5:13 Mave, isa oio kabili tamutou ele, eia bukeke la iloburukola ale uru? Taritigi eia ge kaka tavu La Tahalo Uru. Mai isa oio gabu la sagegela, taritigi veia eia ge vaisale La Uru te la bilau la sagegela.
JAM 5:14 Mave, isa oio tamutou, eia lea? Taritigi eia ge baha tavu egiteu la ururu te la lotu, egite ge goio tetala. Te la isale Kraist, egite ge bubu la abirila soio te la varula, egite ge vitikumu la kilaka tegiteu soio te La Tahalo Uru mai ele, veia eia ge vimahulia.
JAM 5:15 Mai egite ge kaka sesele, egite kama ge ilo lalua, la ilea ge mahuli lou, La Uru ge vimahulia. Me mai la iruru isa oio tetala soloio tabulibuli, ale tai La Uru ge vimavulaha taro leia.
JAM 5:16 Eala eia taritigi pepeho veia amuto ge veipala baololi la iruru tamutou, amuto ge suli baoli tai le amutou la kilaka mai ele, amuto ge mahuli lou. La kilaka te la tahalo ale matata, eia vagari, eia koramuli ge vimahuli la valalua me hatavivile tomi usu.
JAM 5:17 E Lisa, eia la tahalo la vovo mai moli etatoue. Eala moli eia kaka vagari veia la hura umalati ge pupu, eia kama pu la leavala itolu, la taio iuolo.
JAM 5:18 Mulimuli eia goio kaka lou, la hura goio pu lou, la ilali orivo goio kusi lou. Eala eia matagaga moli mai ele veia la kilaka ale sesele, eia vagari.
JAM 5:19 Amuto tabarabaragu, mai isa tamutou eia ge ruru, me e tabarala isa ge puli rivu loua soio te la gauru ale taritigi, la igogolu ale, eia taritigi pepeho.
JAM 5:20 Taritigi eia ge rovia mai ele veia eia vimahuli taroti e tabarala loio te la pileho, me la iruru tomi te tabaralale eia mavulaha tarotia. Eala moli ele. Eau e Iakob.
1PE 1:1 Eiau e Pita, eau la bilalaha te Iesus Kraist, eau kekesia mutou la valalua me hatavivile ale pou la mosi kabili tegiteu la maututula e Pontas, e Galesia, e Kapadosia, e Esia me Bitinia.
1PE 1:2 La Tahalo Uru, e Tama gatou, eia hiloviti amutou alaurati, veia amuto ge tetala, La Kalulu La Marokala eia visibitala halaba seseleti amutou, La Tahalo Uru eia vuhi amutou me la kasosole Iesus Kraist, veia amuto ge roromuli seselea. Taritigi la gilogo me la vibalavala te La Tahalo Uru eia ge volu sesele tamutou, la tia mutou oilo ge malilo tataho.
1PE 1:3 Etato ge vaisale La Tahalo Uru, la vuhula eia gogo sesele etatou, eia abia gatou la mahulila ale halaba oio te Latula e Iesus Kraist. La Tahalo Uru vahiliti rivu e Kraist te la pileho, eia vagoilo etatou te la maratatila tetala. Ale la golu la sagegela tegatou, la vuhula etato mulimuli ge sau tola la mahulila ale kama ge kaluvu.
1PE 1:4 E Tama gatou, La Tahalo Uru, eia oio sau tola la vibalavala ale la sasabe me kososuke kama koramulia ge koroa. La vaabila tetala alele, eia kama ge kaleso, me eia kama ge mata milololo. La Tahalo Uru tau tolea veia eia ge tegatou e latatula.
1PE 1:5 La vibalavala tetala alele, eia ge tamutou ale La Tahalo Uru bigomu roboti amutou te la vagagarila tetala, eia raragitia veia ge veipalea te la tapasi la haro, ale e Kraist ge beu rivua somai.
1PE 1:6 Taritigi amuto ge sagege, me la sagegela tamutou eia ge uru sesele te la vibalavala tamutou aleie. La iligiligi, la tovolalaila me la iloburukola ale amuto sau tolea igoie, eia kama ge tabaa, ouka.
1PE 1:7 La iligiligi, la tovolalaila me la iloburukola ale poga tavu amutou igoie, eia tovo lalai moli la vagagarila me la tautaulailo tamutou. Mai la gold, egite gutua te la havi, eia sali, egite goio abi taro la mumugu ovola, tio la tautaulailo tamutou tai eia mai ele. La Tahalo Uru eia mata taro moli la tovolalaila, veia eia ge viligi muga amutou, veia la tautaulailo tamutou, eia ge sibitala mai la gold ale maroka sesele, veia la tautaulailo tamutou eia ge mai la vuliti ale koramuli sesele eia. Mai la tautaulailo tamutou ge magiri vagari te la tovolalaila me la iligiligi tomi ale igoie, amuto ge sau tola la vibalavala ale uru sesele te la haro ale e Kraist ge beua somai.
1PE 1:8 Amuto soukama hilo e Iesus Kraist me la mata mutou, eala moli la tia mutou eia masaga seselea. Amuto kama hililoa, eala moli amuto tautaulailo tetala. Kara igoie la tia mutou volu me la sagegela ale isapolo sesele. La sagegela alele, eia loata te la ilo la lage.
1PE 1:9 Me oio moli ovola, amuto sokoti la sau tola la mahulila ale taritigi, eia kama ge kaluvu lou, la vuhula amuto tautaulailo te Kraist.
1PE 1:10 La vimahuli ale La Tahalo Uru eia abitia mutou, egiteu la bilalaha ale pala, egite vagari sesele veia ge sivuti la vuhula, egite vigia mulimulia, eala moli la gabutatalala tegiteu eia boto ovola.
1PE 1:11 Egite vagari veia ge rovi la imamala ale mave la vibalavala alele ge guvi, veia ge rovi tai la irovilala ale mave la pagale ge guvi ovola me eia ge tavu ereire. La Kalulu La Marokala, eia veipalea giteu la iligiligi ale e Iesus ge bolea oata te la tauvalautu, me la mahuli la sagegela tai ale e Iesus ge sau tolea mulimuli. Eala egite vagari veia ge sivuti la masovala, eala moli egite boto ovola.
1PE 1:12 Eala moli La Tahalo Uru eia veipalea soio tegiteu la bilalaha tetalale veia la vikararala tegiteu eia kama ge suli egiteu lou, eia ge suli moli amutou ale igoie. La vuhula la merera tegiteu eia kama uru te la mahulila tegiteu. La papaga tomi ale egite vikara mulimulia, eia sibitalati tamutou igoie. Amuto balava seseleti, la vuhula La Kalulu La Marokala eia vei matagagea giteu la bilalaha ale pala la merera tetala, eia igoie valolo amutou te la vagagarila te La Tahalo Uru. Egiteu la bilalaha ale pala, egiteu tai la angelo, egite masaga pepehoa veia ge rovi tai bakisi la vuhu la papaga aleie.
1PE 1:13 Ioge, amuto ge raragi tigi la gabutatalala tamutou. Amuto ge mata kaseka, la tautaulailo tamutou ge magiri vagari te la vibalavala ale amuto ge sau tolea te la haro ale e Iesus Kraist ge sibitala.
1PE 1:14 Amuto ge roromuli La Tahalo Uru, la vuhula amuto e latatula. Amuto umala ge beu tavu lou la vulovulo ale kama taritigi, amuto igigoa pala, la vuhula amuto matagagati, amuto roviti la merera te La Uru.
1PE 1:15 Amuto ge maroka viviu te la vulovulo mutou, la vuhula La Tahalo Uru ale maroka viviu, eia tolati amutou soio tetala.
1PE 1:16 Mai la merera te La Buk Tabu Ale Pala eia veia maie “La vulovulo mutou ge maroka viviu, mai eau tai maroka.”
1PE 1:17 La Tahalo Uru ale amuto tatolale Tama mutou, eia kama togo isasa la tahalo. Eia la tahalo la mata mulimuli la vulovulo la valalua me hatavivile tomi. Amuto ge togoa te la mahulila tamutou aleie.
1PE 1:18 Amuto ge gabutala tigia. La Tahalo Uru eia loto rivu lou amutou loio te la vulovulo mutou ale e tutubu mutou tilimulimulia, eala moli eia kama loto amutou me la vuliti bulalahu moli, ouka.
1PE 1:19 La Tahalo Uru, eia loto rivu lou amutou taro la limale Satan, te la kasosole Kraist moli, E Kraist, eia mai e latu la sip ale maroka, la kakali me la mumugu ouka oio tetala, eia peho robo amutou tomi.
1PE 1:20 La Tahalo Uru, eia raragiti e Kraist alaurati, mamuga te la siloko la vipoupoula, veia ge rou rivu amutou soio tetala. Igoie, amuto hiloti la vibalavala tetala aleie somai tamutou, amuto sau tolatia.
1PE 1:21 Oio te Kraist, amuto tautaulailo te la Tahalo Uru, la vuhula La Tahalo Uru vahiliti rivuti e Kraist loio te la pileho, me Kraist sau tolati la pulolou la mapala oata. La igogolu tetala ale vagari ele, eia vitikumu lou la merera tetala, veia eia koramuli seselea veia la tautaulailo tamutou ge magiri vagari soio La Tahalo Uru moli sekela.
1PE 1:22 La iroromulila tamutou me la tautaulailo tamutou soio te Kraist, eia vahalabati la kalulu mutou me la mahulila tamutou tai, la gilogo te Kraist eia mahuli seseleti te la tia mutou. Eala eia taritigi pepeho veia amuto ge vagari tavu sesele la vulovulo la gilogo, veia amuto ge visuli baoli tataho me egiteu e tabarabara mutou, veia amuto ge vigogo baoli sesele tai me egiteu tomi.
1PE 1:23 Amuto sibitala halabati te la merera la mahulila ale kama ge kokovu. La mahulila ale amuto sau tolea, e tama mutou me tila mutou kama visibitalea. La mahulila ale loata te La Tahalo Uru, eia kama ge kaluvu. Mai la merera te La Buk Tabu Ale Pala eia veia maie:
1PE 1:24 La vovo la valalua me hatavivile tomi, eia mai moli la galagala la obu ale pepeka, mulimuli eia talulu lou, me la golugolu tomi ale la valalua me hatavivile igogolu ovola, eia mai la sese la obu. La sese la obu eia marasa, eala moli kama tabaa eia talulu lou,
1PE 1:25 eala moli la merera tomi te La Tahalo Uru, eia magiri mai la tori. Mai la valolo ale taritigi, amuto lolotiao.
1PE 2:1 Taritigi amuto ge piligi taro la vulovulo la iruru tomi, umala amuto ge pou tavu la gabutatalala ale kama kokora soio tegiteu e tabarabara mutou. Umala amuto ge visigolo, umala amuto ge tutugolo veia amuto taritigi, umala amuto ge hate saga tavu la golugolu tegiteu ale isapolo, umala tai veia amuto ge veimulimuli egiteu e tabarabara mutou.
1PE 2:2 Eala moli amuto ge tuha tavu vagari moli la merera te La Tahalo Uru, mai la pepeso eia tuha tavu la susule tilala veia ge susua. Mai amuto ge liu bibibi la merera te La Tahalo Uru, amuto ge tubu tataho, la kalulu mutou ge mahuli.
1PE 2:3 La vuhula, amuto mai ale tomu lalaiti la gilogo te La Tahalo Uru veia eia malama.
1PE 2:4 Taritigi veia amuto ge tuga tavu La Uru, eia magiri mai la tori, eia mahuli. Egiteu la valalua la iruru egite muku piletia veia eia kama taritigi, eala moli La Tahalo Uru hilovitia veia eia la riau sesele tetala.
1PE 2:5 Me amutou tai ale tetala, taritigi amuto ge sugu taro la mahulila tamutou soio te La Uru, amuto ge mai la sosole la luma tetala, eia ge vimagiri amutou, amuto ge la tahalo la marokala ale ge sau tola la lotu tetala, amuto ge vaisale bibibi seselea te la isale Iesus, eia ge isu la vaisalela tamutou ele.
1PE 2:6 Mai sesele la merera te La Tahalo Uru te La Buk Tabu Ale Pala, eia tovo mulia giteu e Iuda te la guluvi te Latula mulimuli, eia veia maie: Hiloa, eau hiloviti isa la sosole ale taritigi, veia te la mautu tegiteu la valalua me hatavivile taku, eau ge tigi la luma. Mai isa ge gabu tikumu la sosole taku veia eia ge vimahulia, eia kama ge galo, la vuhula la sosole la luma taku eia vagari sesele.
1PE 2:7 La sosole te La Tahalo Uru, eia mata mai ale taritigi tamutou ale tautaulailo tetala, eala moli egiteu ale kama gabu tikumua, egite ge hilo la merera te La Tahalo Uru isa lou, eia ge puru soio tegiteu. Te La Buk Ale Pala, La Tahalo Uru viteteli egiteu e Iuda ale sau tola la igogolu tetala, eia veia giteu maie: La sosole ale amutou la valalua la tiligi la luma taku, amuto muku piletia veia eia kama kokora, eia igoie magiriti kabili, eia bole tomiti la tikumu la igogolu taku.
1PE 2:8 Eala moli egiteu ale kama lolo la merera te La Tahalo Uru, egite ge tutuaki ovola, egite ge boru. Sesele, egite kama lolo La Tahalo Uru, egite kati vahiliti tigi la igogolu tetala, la vuhula egite touti la merera tetala, eala egite viluati, la viputumulila te La Tahalo Uru ale magiri palati te la silokola eia mai ale puruti soio tegiteu.
1PE 2:9 Eala moli amutou ale tetala, amuto kama mai egiteu alele, ouka. La Tahalo Uru, eia hiloviti amutou veia amutou la maratatila tetala sesele. Amutou la tahalo me la tavile ale maroka te La Tahalo Uru, amutou la valalua me hatavivile la matagaga, amutou tetala seseleti. Eia hiloviti amutou veia amuto ge veipala la igogolu tetala ale uru, eia tola taro amutou loio te la maligoma veia amuto ge pou la balavala te la matagaga tetala ale taritigi pepeho sesele.
1PE 2:10 Pala, amuto kama la valalua me hatavivile tetala, amuto logala moli, eala moli eia tolati amutou soilo veia amuto ge tetala seseleti. Pala, amuto kama rovi la gilogo tetala, eala moli igoie amuto sau tolatia, amuto matagaga tatahoti ovola.
1PE 2:11 Amuto tabarabaragu, amuto pou la mosi moli omai te la mahulila te la vovo, eala eau kaka vagari sesele amutou veia amuto umala ge gotigu rivu lou veia ge pou tavu lou egiteu la vulovulo te la vovo ale kama kokora, la vuhula egiteu la vulovulo alele mai ale vaubi bibibi soio te la kalulu mutou veia ge bilia.
1PE 2:12 Amuto rovia, amuto pou kabili tegiteu la valalua la maligoma, eala eia taritigi pepeho veia la pulolou tamutou ge maroka tataho veia mai mulimuli egite ge saupupu amutou, egite ge mata kilala tigi te la vulovulo mutou ale taritigi, egite ge vuvulo, egite tai ge vaisale La Tahalo Uru te la haro ale eia ge beu loua.
1PE 2:13 Taritigi amuto ge pou tataho, amuto ge gabutala tigia veia amutou la valalua me hatavivile te La Uru, amuto ge roromuli tataho egiteu la valalua tomi ale oata tamutou, egiteu la mulugaluga tomi ale sau tola e gavman te la isale Sisa, eia la uru mutou omai te la maututula.
1PE 2:14 Amuto ge roromuli tai egiteu la mulugaluga tomi, mai egiteu e mesistret ale pou te la kiloli la iruru soio tegiteu ale kama kokora, egite pou tai te la vei tatahola soio tegiteu la valalua me hatavivile ale taritigi.
1PE 2:15 Amuto ge pou tataho mai ale eau veitia mutou ele, la vuhula la masasagala te La Tahalo Uru soio tamutou, eia maie: Eia masagea veia la vulovulo mutou ale taritigi eia ge taho robo la vikara bububula tegiteu la valalua me hatavivile ale gima la valolo te Kraist ale taritigi.
1PE 2:16 Amutou la valalua me hatavivile te Kraist moli sekela, eala amuto kati ligi lou te la merera te la tahalo isasa, eala moli amuto umala ge gabutatalea veia amuto ge mulimuli bulalahu la gabutatalala tamutou isasasa. Eia kama koramuli taia veia amuto ge pou kokovu te la vulovulo isahari ale kama kokora, veia amuto mavulahati te la merera te ururu, eala amuto ge mulimuli bulalahu la gabutatalala tamutou. Eala moli eia taritigi pepeho veia amuto ge pou tataho mai la bilalaha te La Tahalo Uru sesele.
1PE 2:17 Togo la valalua me hatavivile tomi, vipuhi tigi tataho me egiteu la valalua me hatavivile tomi te Kraist, gabu tikumu La Tahalo Uru, sau tola tai la tilogo ale uru soio te la mulugaluga te gavman tamutou.
1PE 2:18 Mai la igogolu taume eia la igogolu la bilalaha, eme ge roromuli tataho la merera tomi te la uru taume, eme ge togoa. Mai eia ge taritigiamu, eme ge togoa, mai eia ge kaharare taiamu eme ge togoa, eme kama ge tou.
1PE 2:19 Mai eme ge igoa maie, La Tahalo Uru ge vibalavame, la vuhula oio te la vulovulomu ale taritigi, ale eme kama vikara papai te la kaharela te la uru taume, eme veipalatia mai ele veia eme rovi la masasagala te La Tahalo Uru tavume.
1PE 2:20 Mai eme ge vareagagi moli, la uru taume ge kuemei, me eala eia kama koramulia veia eme ge vei tataho loume veia eme magiri vagari, la vuhula eia kueme te la kiloli la vareagila taume lou. Eala moli mai eme ge pou tataho, me la uru taume ge kue bulalahu molime mai te la igototolola tetala lou, ale La Tahalo Uru ge hiloa, eia ge vibalavame oio vola, la vuhula eme pou makovu moli te la iligiligi.
1PE 2:21 Ale la tilola te La Tahalo Uru tavu etatou mai ele, veia etato ge pou makovu moli te la viligiligila mai e Kraist. Eia gabu la iligiligi ale uru veia ge turia gatou la gauru ale taritigi oio vola, veia etato ge mulimuli la vulovulola ale taritigi.
1PE 2:22 Eia la iruru ouka oio tetala, eia kama rovi la vikarara la visigologolola tai.
1PE 2:23 Ale egite goio vikara bareala, eia kama koli la merera tegiteu. Eia gabu la iligiligi ale uru pepeho, eala moli eia kama igo totolo egiteu veia ge koli bara la iruru tegiteu soio tetala. Eala moli eia sugu taro moli la mahulila tetala soio te La Tahalo Uru ale matata, eia ge mata muli la vulovulo la valalua me hatavivile tomi.
1PE 2:24 E Iesus, eia bole la iruru tegatou tomi oata te la tauvalautu, eia gabu la iligiligi ale uru pepeho veia etato ge vulo taro sesele la vulovulo la iruru, veia etato ge rovi la vulovulo ale matata te la mahulila tegatou. La iligiligi ale te Iesus, me la kasosola ale pagegele, eia vimahuliti amutou.
1PE 2:25 Amuto pala ruru vulovulo moli mai egiteu la sip ale kavovou bulalahu moli, la gabutatalala tegiteu ouka, egite ruru soio la hohoi. Eala moli te la imamala ale igoie, amuto beutia soio te La Tahalo La Vibaumuli tamutou, eia La Tahalo La Vibaumulila te la kalulu mutou tomi isasasa, eia ge sau tola amutou.
1PE 3:1 Amuto hatavivile tai ale te Kraist, taritigi pepeho veia amuto ge roromuli tataho egiteu e hararua mutou. Mai isa soukama tautaulailo te la merera te La Uru, eia soioge ge hilo e rutula eia pou tataho sesele, eia ge vulo la tiala soio te Kraist. La vigagiala te rutula soio tetala ge ouka,
1PE 3:2 eia ge hilo moli e rutula, veia eia la tavile ale maroka sesele, eia volu sesele la vulovulo la tilogo, tio eia ge hiloa mai ele, eia ge vulo la gabutatalala tetala soio te Kraist.
1PE 3:3 La tokoromola tamutou e hatavivile umala ge la tokoromola te la vovo veia amuto ge mali la ivu mutou, veia amuto ge kai tai la mamako, veia amuto ge kisi la lavalava ale marasa tai, umala.
1PE 3:4 Eala moli la kalulu mutou oilo ge veipala la tokoromola te La Uru, mai la vulovulo ale taritigi, eia kama ge kaluvu, amuto ge pou makovu tataho, La Tahalo Uru ge sau tolame mai la vuliti tetala sesele.
1PE 3:5 La tokoromola ale maie, mai la tokoromola te la vulovulo ale taritigi, egiteu e hatavivile la marokala alaura te ururu, egite sau tola sesele la merera te La Tahalo Uru, egite vitokoromo lou egiteu te la vulovulo ale taritigi mai ele. Egite roromuli tataho e hararua giteu,
1PE 3:6 mai e Sera, eia roromuli tataho e Abraham, eia toia veia eia la uru tetala. Tio mai amuto hatavivile ge pou tataho mai tai e Serale, amuto ge mai e tutubule Sera sesele, mai amuto ge pou tigi, la gabutala papaila ge ouka oio tamutou.
1PE 3:7 Amutou la valalua tai, taritigi amuto ge pou tataho moli vikapopo me egiteu e ruturutu mutou. Amuto ge toro tegiteu, amuto ge gabutatala tigia veia egite kama vagari mai amutou la valalua. Amuto ge togo egiteu, la vuhula egite tai ge sau tola la mahulila te Kraist ale halaba. Mai amuto ge togo egiteu mai ele, la paga isa kama ge koramulia ge magiri robo la gauru la kilaka tamutou.
1PE 3:8 La tapasi la merera taku soio tamutou te la pulolou tamutou ale te Kraist, eia maie: Amuto ge vipuhi tigi tataho, amuto ge vigogo baoli le amutou, amuto ge vitau me tabara sesele te Kraist. Amuto ge volu moli te la vulovulo la mutelela me la tilogo veia ge pou tataho mai ele.
1PE 3:9 Mai isa ge igo la iruru soio taume, eme umala ge kolia soio tetala. Mai isa ge vikara bareamu, eme umala ge vikara gegeru rivu louala. Eme ge toi moli la merera la vibalavala te La Uru soio tetala, la vuhula La Tahalo Uru eia tolati amutou la tahalo me la tavile la iruru soio tetala veia amuto ge sau tola la vibalavala, eala eia koramuli taia mai ele veia eme ge toi la vibalavala soio tegiteu e tabarabara mutou ale igo la iruru soio tamutou.
1PE 3:10 Mai la merera te la Buk Tabu Ale Pala eia veia maie: Mai isa ge masaga la pulolou ale taritigi veia la mahulila tetala ge malau, taritigi eia ge vibaumuli la harela veia la merera la visigologolola me la vikararala ale kama kokora ge ouka oio tetala.
1PE 3:11 Taritigi eia ge poke taro la vulovulo ale kama kokora, veia eia ge pou moli te la vulovulo ale taritigi. Taritigi tai veia eia ge pou makovu tataho, eia ge vagari veia eia ge vimalu la pulolou tegiteu me tabarabarala tomi.
1PE 3:12 La vuhula la mata La Uru eia oio moli tegiteu ale taritigi, veia eia ge suli egiteu. La gavusa La Uru eia oio kope moli soio te la kilaka tegiteu ale matata. Eala moli eia ge poke taro egiteu ale pou te la vulovulo ale kama kokora.
1PE 3:13 Mai amuto ge vagari tavu la vulovulo ale taritigi, ere ge igo bara amutou? Ge ouka ge,
1PE 3:14 eala moli mai amuto ge poga la iligiligi tegiteu ale vile la gauru ale taritigi, ale La Uru ge hiloa, eia ge vibalava sesele amutou oio vola. Umala amuto ge taga egiteu la valalua, umala amuto ge gabutatala papai tegiteu ale gima la gauru te Kraist.
1PE 3:15 Eala moli te la kalulu mutou tomi isasasa, amuto ge togo La Uru mutou, e Kraist, veia mai isa ge tahime te la vuhu la sagegela taume me la mahulila sesele ale eme sau tolea, eme ge raragi tataho mai ele veia ge lubeala la gauru.
1PE 3:16 Eala moli la vikararala tamutou ale mai ele, eia ge vikapopo me la tilogo me la vulovulo la mutelela, amuto umala ge gabutatala papai. Mai amuto ge igo seselea mai ele, mai la valalua me hatavivile ge vikara kukumua mutou te la pulolou tamutou te Kraist veia eia kama taritigi, egite ge hilo la vulovulo mutou ale taritigi, egite ge mahela pepeho te la vikara kukumula tegiteu ele soio tamutou.
1PE 3:17 Mai la masasagala te La Uru soio tamutou veia amuto isahari ge ligi te la vulovulo ale taritigi ale la valalua me hatavivile isahari ge vilea, eia koramuli seselea veia amuto ge tilimuli molia mai la masasagala tetalale. Eala moli eia kama taritigi veia etatou ale te Kraist ge gabu la iligiligi te la kiloli la vulovulo gatou ale kama kokora, mai etato ge ruru sesele. Umala etato ge pou te la iruru mai ele.
1PE 3:18 E Kraist, eia peho roboti etatou veia ge vimavulaha etatou taro la iruru. La pileho tetala, eia koramuli etatou tomi, me la iruru tomi tai tegatou. Eia la tahalo ale maroka, eala moli eia peho robo etatou la tahalo la iruru, veia ge puli rivu etatou soio te La Tahalo Uru. Egite bili la vovola, eala moli La Tahalo Uru vimahuli la kalulula.
1PE 3:19 Te la vagagarila te La Kalulu La Marokala eia goio valolo la kalulu giteu ale pou te la kilisi otalo te la mautu la pileho,
1PE 3:20 egiteu ale tou la merera te La Tahalo Uru alaurati te la imamala te Noa. La Tahalo Uru eia pou tali egiteu veia ge vulo la gabutatalala tegiteu soio tetala, eia abia giteu la baa malau ale e Noa paha la uaga oio vola, eala moli egite kama lololo, la silogo uru goio sibitala, me egiteu taho ualu moli, mai la karakara te Noa moli, egite sekela moli mahuli utu kabili te la lalu ale sogole.
1PE 3:21 Me la lalu ale, eia magiri mai la irovilala te la lalu la vuluhi te la isale Kraist, ale egite vuhi amutou oio vola veia amuto ge mahuli. Kama la lalu la pupurula ale ge vuhi maroka la vovo gatou, eala moli eia la irovilala te la lalu sesele ale vuhi halaba la vulovulo gatou me la kalulu gatou veia etato ge magiri maroka te la lagu La Tahalo Uru. Ale egite vuhi amutou te la isale Kraist, la lalu ale eia kopea mutou la gauru soio te la mahulila ale halaba, mai tai ale e Kraist, eia pala mahuli rivu lou taro la pileho, eia kopea gatou tomi la gauru soio te Tamala veia etato tai ge mahuli rivu lou.
1PE 3:22 E Kraist ele, eia goatati te la ilo la lage, eia oio pouti te la gale La Tahalo Uru e gata, me egiteu la angelo tomi me egiteu tomi tai ale sau tola la viputumulila oata te la ilo la lage, egiteu tomi pouti otalo te la uluvala, egite oio roromulimulia.
1PE 4:1 E Kraist, eia gabu la iligiligi ale uru pepeho, mai ele amuto tai ge mai e Kraist, amuto ge magiri vagari te la iligiligi, la vuhula mai amuto ge bolehoho la iligiligi, amuto ge koramuli taia mai ele veia amuto ge bolehoho la vulovulo la iruru.
1PE 4:2 Kara ale amuto ge peho, amuto ge tilimuli moli la masasagala te La Tahalo Uru sekela, amuto kati ge mulimuli la masasagala te la vovo ale kama kokorale.
1PE 4:3 Pala muga amuto pou te la vulovulo la iruru, me ale igoie eia koramulitia veia amuto umalati ge gotigu rivurivu lou ovola, veia amuto ge igo lou egiteu la vulovulo alele, mai egiteu ale pou te la maligoma. Egite igo la iruru tomi mai ele: egite valalololo egiteu e hatavivile, egite vaosa tatavu mai ele; la gabutatalala tegiteu eia volu sesele te la vulovulo ale kama kokora; egite liu paua; egite igo galololo; egite mulimuli la vulovulo tomi ale kama kokora viruru; egite lotu tatavu la puigolo.
1PE 4:4 Egite la valalua la maligoma, egite hilo amutou mai ele veia amuto kati vikapopo legiteu te la vulovulo tomi ale kama kokorale, egite karutu sesele, egite goio vile amutou.
1PE 4:5 Eala moli la imamala ge sibitala ale egite ge pou te la vigagiala te la lagu La Uru, eia pou raragiti veia ge mata muli la vulovulo la valalua me hatavivile tomi, egiteu ale mahulihuli me egiteu tai ale pehoti.
1PE 4:6 Eia sesele, egite tai ale pehoti, egite loloti la valolo te Kraist ale eia gotalo tegiteu te la mautu la pileho, eia valolo egite. La Uru valolo egiteu mai ele veia egite tai ge koramulia ge mahuli rivu lou. La vovo giteu eia ule magasati te la kiloli la iruru ale egite igigoa omai te la mahulila tegiteu te la vovo, eala moli mai egite ge lolo la merera te La Tahalo Uru, me egite ge roromulia, la kalulu giteu ge mahuli rivu lou.
1PE 4:7 La tapasi la maututula eia hagagaviti, eala eia taritigi pepeho veia amuto ge pou tataho, la gabutatalala tamutou ge matagaga moli, veia amuto ge koramuli sesele la kilaka.
1PE 4:8 Amuto ge vipuhi tigi tataho, la vuhula la vulovulo la gilogo eia koramulia ge pigi robo la iruru usu oio kabili tamutou ele.
1PE 4:9 Amuto ge baumuli tataho egiteu e tabarabara mutou ale pou vikapopo le amutou, umala amuto ge mata taro egiteu me umala tai ge totou egiteu, veia amuto ge gabutatala gegeru soio tegiteu, umala.
1PE 4:10 La Tahalo Uru, eia abitia mutou tomi isasasa la vaabila te la kalulu mutou, ale koramuli la visuli soio te la igogolu te la lotu, eala eia taritigi veia amuto tomi ge igo seselea mai la tabarila tetala soio tamutou isasasa. Amuto tomi ge vahiliti la igogolu te la gilogo tetala.
1PE 4:11 Mai isa ge rovi la vikararala, eia ge valolo amutou te la merera te La Uru. Mai isa ge rovi la visuli, eia ge visuli soio tegiteu e tabarabarala ale te Kraist mai te la vagagarila te La Tahalo Uru sesele, veia la valalua me hatavivile ge hiloa, egite ge vaisale La Tahalo Uru te la isale Iesus Kraist. Etato ge vaisale moli e Kraist te la matagaga tetala me la vagagarila tetala tai ale uru, kama ge maila, la kaluvula ge ouka. Amen.
1PE 4:12 Amuto tabarabaragu, umala amuto ge karutu te la tovolalaila ale vagari, eia sibitala tavuti amutou te la imamala ale igoie, amuto ligi pepeho oio vola. Amuto umala karuturutu veia la tovolalaila alele eia la paga ale isapolo sesele.
1PE 4:13 Eala moli amuto ge sagege moli, la vuhula amutou e tabarabarale Kraist sesele te la gilabu la iligiligi ale uru mai ele. Mai amuto ge ligi mai eia, mulimuli amuto ge pou vikapopo tai leia te la matagaga ale uru, te la haro ale eia ge sibitala ovola.
1PE 4:14 Mai egiteu la gima ge vikara gegerua mutou, ale eia taritigi pepeho, la vuhula eia matagagati mai ele veia La Kalulu La Matagaga te La Tahalo Uru eia pouti oio tamutou.
1PE 4:15 Eia kama taritigi veia amutou ale te Kraist ge gabu la iligiligi me la mahelala te la vareagila tamutou lou. Mai amuto ge igo egiteu la mata la iruru tomi ale mai la bilili, me la pakalila, amuto ge poga la mahelala me la iligiligi ovola. Mai tai amuto ge gabu vauru amutou, amuto ge poga la mahelala ovola. Eala moli etatou ale te Kraist umala ge mai ele.
1PE 4:16 Mai amuto ge gabu la iligiligi me la mahelala, taritigi eia ge la iligiligi me la mahelala te la isale Kraist moli, kama te la kiloli la iruru ale amuto igoa. Mai amuto ge ligi te la isale Kraist, umala amuto ge mahela, amuto ge vaisale moli La Tahalo Uru, ale eia abitia mutou la isale Latula veia amuto ge koramulia mai ele veia amuto ge gabu la iligiligi ovola.
1PE 4:17 La imamala eia koramuliti ale la haro la viputumulila te La Tahalo Uru eia ge guvi, me etatou ale tetala ge vimuga soio te la vigagiala. Me eia ge vagari muga bakisi tegatou ale marokati, me la viputumulila tetala tai eia soioge ge vagari pepeho pasi soio tegiteu ale tou la valolo te Kraist.
1PE 4:18 Mai la merera te La Buk Tabu Ale Pala eia veia maie: Eia koramulia veia la tahalo ale maroka eia ge mahuli utu te la gilogo te La Tahalo Uru. Eala moli egiteu la tahalo la maligoma ale pou oio te la iruru, egite ge hele sove?
1PE 4:19 Eala, eau veia mutou maie veia eia koramuli seselea veia amutou ale igoie gabu la iligiligi mai la tabarila te La Tahalo Uru soio tamutou, amuto ge tautaulailo vagari, amuto ge sau tola vagari la vulovulo ale taritigi. La Tahalo Uru eia ge hiloa mai ele, eia ge vimahuli sesele amutou, la vuhula eia vagari, eia la vuhu la golugolu tomi me la vikarakarala tetala tai eia sesele tomi moli kaluvu.
1PE 5:1 Eau kaka gogogo amutou e ururu ale vibaumuli te la lotu te Kraist, amuto ge vibaumuli tataho egiteu la sip te La Tahalo Uru. Amuto ge loloau, eau tai la uru te la lotu tetala, eau hilo seseleti la iligiligi te Kraist te la matagu sesele, eau tai mulimuli ge pou vikapopo le amutou oio te la matagaga tetala ale uruo, ale eia ge veipalea somai tegatou ale tetala. Amuto ge vibaumuli tataho egiteu la sip te La Tahalo Uru, mai egiteu la valalua me hatavivile me egiteu e gulikiliki ale pou te la uluva mutou te la lotu te Kraist, amuto ge vibaumuli sesele egiteu ele. Kama la igogolu la iloburukola veia La Uru vibukeketi le amutou oio vola, eala moli amuto ge igoa te la bilaha moli te La Uru, eia ge lege sisigi le amutou oio vola. Kama la igogolu te la mapa veia eme ge masaga pepeho la uati ale egite ge loto le amutou oio vola, eala moli amuto ge vagari tavu moli la igogolu la visuli soio tegiteu la sip tetala.
1PE 5:3 Amuto umala ge kahare tavu egiteu veia amuto sekela ge vikara, veia egite ge makovu moli. Eala moli amuto ge pou tataho te la mata giteu, egite ge sovei amutou te la vulovulo mutou ale taritigi ele.
1PE 5:4 Mai mulimuli La Tahalo La Vibaumuli Sesele, eia ge sibitala, mai e Kraist ele, tio eia ge abia mutou la vuliti ale sesele, eia kama ge kaluvu lou, mai la mapa la igogolu tamutou soio tegiteu la sip tetala.
1PE 5:5 Taritigi amutou e maure bisisi, amuto ge roromuli tataho la merera tegiteu e ururu. Taritigi tai veia amutou la valalua te Kraist tomi ge pou makovu tataho moli veia amuto ge volu sesele me la vulovulo ale taritigi, mai la visuli baolila kabili tamutou lou, la vuhula La Tahalo Uru eia kama masaga la tahalo la vareagila, eala moli eia gogo sesele la tahalo la iroromulila.
1PE 5:6 Amutou tomi, amuto pou moli te la lima La Uru, eia mamuga amutou, eala eia koramuli seselea veia amuto tomi isasasa ge vibisi lou amutou te la lagula veia eia ge gogo amutou, eia ge vahiliti lou amutou mai te la masasagala tetala sesele.
1PE 5:7 La iloburukola me la gabutala papaila tomi, amuto ge sugu taro tomiala, eia ge bolea, la vuhula eia vibaumuli tataho amutou ale tetala.
1PE 5:8 Amuto ge mata kaseka, amuto ge mata rara, la vuhula la gima tamutou, eia oio tuga vulovulo mai la laion ale mororosi pepeho, eia mata galilili veia ge sivuti isa la tahalo te Kraist veia ge toloa ge alia.
1PE 5:9 Taritigi amuto ge magiri vagari, amuto ge matagaga moli veia egiteu e tabarabara mutou tomi te Kraist te la maututula tomi, egite tai ligi mai amutou ele.
1PE 5:10 Eala moli la iligiligi ale amuto gabua igoie, eia kama ge tabaa, La Tahalo Uru, eia la vuhu la gilogo, eia ge vahiliti lou amutou, amuto ge magiri vagari sesele te la isale Kraist, la vuhula eia tolati amutou soilo te la pulolou la matagaga tetala, vikapopo le Latula.
1PE 5:11 Me La Tahalo Uru, eia ge igo seselea mai ele, la vuhula eia moli sekela sau tola la maututula, la magasa, la valalua me hatavivile tomi. La vagagarila tetala eia kama ge kaluvu, eia sesele.
1PE 5:12 La merera taku bakisi ele, eau toitoia, e tabaragu uru e Silvanus, eia kekesia mutou ovola, veia amuto ge gigi tatahoa. Me te la merera taku alele, eau gabutatalea veia ge karasuku amutou, veia amuto ge sau tola sesele la gilogo te La Tahalo Uru, ale eau valoloti le amutou ovola, eia ge vimahuli sesele amutou. Taritigi amuto ge magiri vagari sesele te la merera alele.
1PE 5:13 Egiteu e tabarabara mutou te Kraist ale pou oio la mautu e Babilon, egite veia mutou la haro. Amutou tomi la valalua me hatavivile te La Tahalo Uru. Eia visati le amutou ale pou te la maututula vikapopo tai legiteu ale omai veia amuto tomi ge tetala sesele. E latugu tai, e Mark, eia veia mutou la haro.
1PE 5:14 Taritigi amuto ge vilapu lima te la isale Kraist, mai la vulovulo gatou ale rovi la gilogo tetala. La vibalavala tetala ale uru sesele, eia ge pou tamutou tomi ale tetala, la tia mutou tomi oilo ge malilo tigi tataho. Eau e Pita.
2PE 1:1 Eiau e Saimon Pita, eau la bilalaha sesele te Iesus Kraist, eau kekesia mutou la valalua me hatavivile ale tautaulailo tetala. La tautaulailo tegatou, La Tahalo Uru mira me Iesus Kraist, la tahalo la vimahuli, egira abia gatou, etato ge sau tolea. Me etato rovia mai ele veia eia la tahalo ale matata sesele, la vuhula eia abitia gatou tomi la tautaulailo tetala, mai la vuliti tegatou sesele.
2PE 1:2 Etato ge pou tataho sesele te la gilogo tetala, mai etato ge rovi La Tahalo Uru egira me Iesus, La Uru gatou.
2PE 1:3 Te la vagagarila tetala moli, La Tahalo Uru eia abitia gatou la mahulila ale maroka sesele. La Riau tetala e Kraist, eia tola tavuti etatou veia etato ge pou vikapopo leia te la matagaga me le marokala tetala. Mai etato ge rovi tataho e Kraist mai ele, etato ge sau tola la vagagarila tomi, etato ge koramuli seselea mai ele veia ge sau tola la mahulila tetala.
2PE 1:4 Oio moli te la vagagarila tetala ale eia abitia gatou, etato ge koramulia ge pou vikapopo leia te la mahulila ale sesele, etato koramuli taia ge vulo taro la viluala te la vulovulo ale kama kokora omai te la maututula.
2PE 1:5 Eala moli mai amuto ge tahola la tautaulailo soio tetala, me la vagagarila tetala ge ouka oio tamutou, la tautaulailo alele eia kama ge vimahuli amutou. Taritigi amuto ge vagari veia ge pou tai te la vulovulo ale taritigi, eala moli ale tai kama koramuli. Taritigi pepeho veia amuto ge vagari tai veia ge rovi tataho la vulovulo La Tahalo Uru.
2PE 1:6 Taritigi veia amuto ge vibaumuli tataho tai te la pulolou tamutou, veia amuto ge toro moli te Kraist, kama ge maila, veia amuto ge rovi tataho tai La Tahalo Uru.
2PE 1:7 Oata tai tegiteu la vulovulo ale taritigi ele, etato ge vagari tai veia ge rovi la vulovulo la vipuhi tigila me la gilogo.
2PE 1:8 La vuhula, mai amuto ge rovi tataho sesele egiteu la vulovulo tomi alele, la vavua la merera te Kraist eia ge vua sesele tamutou. Amuto kama ge pou bulalahu, veia la igogolu tamutou ge ouka me la vagagarila tamutou tai ge ouka te la pulolou tamutou. Mai amuto ge rovi la vipuhi tigila me la gilogo, alele amuto ge rovi seseleti e Iesus Kraist, La Uru gatou.
2PE 1:9 Eala moli mai isa kama ge rovi egiteu la vulovulo tomi ale taritigi mai ele, eia ge mai la mata kea, eia soioge kati matagaga tigi ale e Kraist sabubu taroti leia la iruru tomi tetala ale eia pala igigoa, ale la kasosola eia vipupuru veiti amutouo.
2PE 1:10 Oio moli ovolale, eau kaka vagari amutou e tabarabaragu veia amuto ge sau tola vagari sesele e Kraist, veia la tilola tetala tavu amutou, ale eia visati le amutou veia amuto ge tetala, eia ge puru sesele omai tamutou, amuto kamati ge boru lou,
2PE 1:11 amuto ge vagari moli kara la tapasila, me oio vola, amuto ge tiroro tataho moli soilo te la pulolou la marokala oata te la bali La Tahalo Uru.
2PE 1:12 Eau vagari pepeho veia amuto tomi ge hilo sesele la vibalavala te La Uru, eala eau ge vahiliti bibibi la gabutatalala tamutou soio tetala. Eia sesele, la vimari tomi te Kraist, amuto rovitia, la gabutatalala tamutou eia vagari moliti soio te la merera tetala tomi ale sesele, egite pala valolo amutou ovola.
2PE 1:13 Eala moli mai eau so mahulihuli, eau ge vahiliti la gabutatalala tamutou soio te Kraist.
2PE 1:14 Eau rovia, eia kama ge tabaa, eau ge kai taro la vovogu alele, La Uru e Iesus Kraist, eia vei matagagatiagu mai ele.
2PE 1:15 Eala moli eau ge valolo vagari amutou veia mulimuli te la pileho taku, amuto ge sau tola moli la merera te Kraist.
2PE 1:16 Ale amite la bilalaha te Kraist valolo amutou pala, amite kama veipala la merera bulalahu moli, mai la vigilemulimulila ale kama sesele. Amite vei matagagea mutou te la guluvi te Kraist, ale eia ge gomai lou vikapopo la vagagarila ale uru sesele. Me amite rovi molia veia eia la tahalo ale vagari viruru, la vuhula amite hilo seselea ale La Tahalo Uru vaurua pala.
2PE 1:17 Te la haro moli ale e Tamala, La Tahalo Uru, eia pigi robola la matagaga me la tilogo ale uru sesele, amite oio popou. La golule Tamala eia tola loata te la pulolou la uru tetala, mago “Ale e Latugu La Riau, eau sagege pepeho sesele leia!”
2PE 1:18 Amite oio popou, amite loloa ale eia tatola mai ele loata te la ilo la lage, ale amite tomi pou vikapopo le Iesus oata te la gove ale maroka.
2PE 1:19 Tio, me oio volale, amite matagagati te la merera tegiteu la bilalaha ale pala veia eia sesele. Taritigi amuto ge laba gele tavua, la vuhula la merera tegiteu eia mai la matagaga ale paga vei la tasi ale maligoma kara la paga mamaga, mai la matagaga te Kraist eia ge reretala mai la matatabu uru e Toko te la gabutatalala tamutou tomi isasasa.
2PE 1:20 Eala moli eau masagea veia la paga isa lou amuto ge matagaga sesele ovola, eia maie, veia la merera tegiteu la bilalaha te la Tahalo Uru ale etato gigia te La Buk Tabu Ale Pala, eia kama la vikararala te la vovo veia isa moli sekela tegatou ge rovi tomi la masovala. La Kalulu La Marokala moli eia igo tivura la gabutatalala tegiteu la bilalaha tetala veia egite ge veipala la merera tetala sesele.
2PE 1:21 Etato rovia veia la merera te La Tahalo Uru eia kama sibitala bulalahu te la hare la tahalo mai te la masasagala tetala lou.
2PE 2:1 Etato rovia veia pala egiteu la bilalaha la visigologolola isahari sibitala kabili tegiteu la valalua e Iuda. Mai tai lou ele, egite la valalua la vimari isahari ale ge visigolo amutou, egite mulimuli ge sibitala. Egite ge ali la ilo mutou, egite ge tutugolo amutou te la vimari tegiteu veia eia te Kraist, eala moli la merera tegiteu eia kama te Kraist sesele. Egite ge tahi taro La Uru ale rou rivu lou egiteu taro la limale Satan, eala egite ge vitilo rivu lou egiteu mai ele, egite ge vilua.
2PE 2:2 Eala moli la valalua me hatavivile usu ge tilimuli la gauru tegiteu ale kama kokorale, egite ge igo gegeru la gauru te Kraist, la valalua la maligoma ge vilea.
2PE 2:3 Egiteu la bilalaha la visigologolola, egite masaga moli la uati, eala egite ge ali la ilo mutou la merera ale egiteu lou gabutatalea. Eala moli La Uru eia pou raragiti palati, eia oio mata kaseka moli veia ge vilai egiteu.
2PE 2:4 Mai alaura, egiteu la angelo isahari ruru, La Tahalo Uru eia kama gogo egiteu, eia pigi egiteu sotalo te la kilisi te la mautu la maligoma, veia egite ge pou ovola kara la haro la viputumulila tetala ge sibitala.
2PE 2:5 Mai eia kama gogo tai egiteu la valalua la iruru alaura, eia goio visibitala la silogo la lalu uru, egite sululu ovola, eala moli eia vimahuli e Noa vikapopo legiteu la karakara tetala taho vitu lou, la vuhula e Noa eia valololo te la gauru ale maroka.
2PE 2:6 Mai etato rovi taia veia La Tahalo Uru, eia kama gogo egiteu la valalua e Sodom me egiteu e Gomora tai, eala moli eia visivo la havi uru loata sotalo tegiteu. La mautu iluale tululu tomi, eia veia ge vahilo letatou la mapa giteu la tahalo la iruru mai ele.
2PE 2:7 Eala moli La Tahalo Uru, eia vimahuli e Lot moli sekela kabili tegiteu ale vilua, la vuhula e Lot eia la tahalo ale matata, eia ilo buruko sesele la vulovulo ale kama kokora tegiteu la valalua me hatavivile la vareagila.
2PE 2:8 La tahalo ale, eia pou kabili tegiteu, eia la tahalo la maroka, eala moli eia ilo buruko sesele te la vulovulo giteu ale kama kokorale, egite igigoa te la matala te la haroharo tomi.
2PE 2:9 Etato hiloa veia mai La Tahalo Uru eia vimahuli sesele e Lot, eia koramuli taia mai ele veia eia ge lapu la valalua me hatavivile ale taritigi taro la iligiligi me la tovolalaila te Satan. Eia ge kisi tola egiteu la tahalo me la tavile la iruru, eia ge viligi egiteu kara la haro la viputumulila tetala ge sibitala.
2PE 2:10 Mai egiteu tomi ale mulimuli la gabutatalala ale kama kokora mai la masasagala te la vovo, egite tou tai la merera te La Tahalo Uru. Egiteu la valalua alele, egite la tahalo la vareagila sesele, egite kama taga, egite vikara barea giteu ale pou te la pulolou la uru oata te la ilo la lage. Egite la tilogo ouka soio tegiteu la mulugalugale.
2PE 2:11 Egiteu la angelo, la vagagari giteu eia kara polo la vagagari giteu la tahalo la vareagila. Eala moli egiteu la angelo, egite volu sesele me la tilogo, egite kama koramulia ge vikara barea giteu la tahalo la visigologolola oio te la lagu La Tahalo Uru, la vuhula egite togoa.
2PE 2:12 Eala moli egite la tahalo la vareagilale, egite kama taga, la vuhula egite mahuli bububu moli mai la bolo vuhu ale mahuli bulalahu moli kara la haro ale la valalua ge laoa. Egite pigi malikia la viputumulila te La Tahalo Uru ale egite kama rovi la vuhula. Egite ge tilo sesele te la vareagila tegiteu lou, egite ge poga la viluala mai la bolo vuhu ale tilo la mai.
2PE 2:13 Egiteu la tahalo la visigologololale, La Tahalo Uru ge igo gegeru egiteu, la vuhula egite igo gegeru la valalua me hatavivile tetala. Te la gabutatalala tegiteu, egite veia eia la kavovoula ale taritigi pepeho veia egite ge igo galolo te la mata la valalua me hatavivile tomi. Egite guvi vikapopo me amutou te haro tabu ale amuto pou te la ilali veia ge gabutatala rivu lou la pileho te Kraist ovola. Eala moli egite kama pou tigi, egite vimarapa la pulolou tamutou, egite igo galololo moli.
2PE 2:14 Egite mata bulakalaka, egite kama maila te la iruru. Egite vitilo la tahalo me la tavile bulalahu ale kama magiri vagari te Kraist. La gabutatalala tegiteu eia te la uati moli veia egite ge tau ololu la golugolu tegiteu. Eala moli egite ge vilua sesele te la viputumulila te La Tahalo Uru.
2PE 2:15 Egite kati tilimuli la gauru ale matata, egite ruruti soio te la gauru la iruru. Egite soveiti la vulovulole Balam, e latule Beor. La tahalo ale, etato gigia te La Buk Tabu Ale Pala, eia la tahalo isa eia masaga pepeho la vulovulo la iruru veia ge abi la uati uru oio vola.
2PE 2:16 Eala moli eia sae te donki tetala veia ge goio te la mautu isa veia ge igo la iruru ovola, e donki tetala goio vikara mai la tahalo, eia goio visibitala la merera te La Tahalo Uru soio te Balam ele, eia magiri roboa, e Balam loloa, eia kati tilimuli la gabutatalala tetala ale igo pauea.
2PE 2:17 Egiteu la tahalo la visigologololale, la merera tegiteu eia mai la lalu ale mamarati, etato kati koramulia ge liu ovola veia etato ge mahuli. Egite visibitala la maligoma mai la gauku ale pigi robo la goegove. La Tahalo Uru eia raragiti veia ge pigi egiteu sotalo te la mautu la maligoma.
2PE 2:18 La hare giteu eia volu me la merera la pakakasala, egite patatata moli. Egite vitilo lou egiteu ale masagea veia ge tovo lalai veia ge hele taro la valalua me hatavivile ale pou te la vulovulo la iruru.
2PE 2:19 Egite veia giteu ge vahilo legiteu la gauru ale taritigi, egite ge mavulaha ovola, eala moli egite ale vimari la valalua me hatavivile mai ele, egite kama mavulaha te la iruru, egite so tikumu moli te la pulolou te la kilisi te Satan, la vuhula etatou la bilalaha moli te la gabutatalala tegatou isasasa ale kisi tola etatou.
2PE 2:20 Etato tautaulailoti te La Uru e Kraist, la tahalo la vimahuli tegatou, me oio vola etato vulo taroti la vulovulo la iruru ale lapulapu etatou soio te pileho. Eala moli mai isahari ge tilo lou te la vulovulo la iruru, veia ge pou lou te la kilisi oio vola, egite ge beu rivu loua sotigu, egite ge gotigu rivu sesele, la maligoma tegiteu eia ge uru pepeho kara polo la maligoma ale pala egite popou ovola.
2PE 2:21 Eia soioge taritigi tegiteu mai egite kama ge rovi muga la gauru ale matata. La vuhula eia kama kokora viruru veia pala muga etato ge mulimuli la gauru ale sesele, eala moli etato goio hate tola lou, etato polo taro la merera ale maroka, La Tahalo Uru eia abitia gatou.
2PE 2:22 Egiteu ale igigo la iruru tomi mai ele, la merera te La Buk Tabu Ale Pala, eia ge puru sesele soio tegiteu maie: La paia ale lua taroti la ilali, eia ge beu tavu loua, eia ge ali loua. Me la merera isa lou tai te La Buk Tabu Ale Pala, eia veia maie: La bolo, mai eia ge pupuru tatahoti, eia kama ge gabutalea, eia ge beua goio ge gagae mumugu lou la vovola te la pita.
2PE 3:1 Amuto tabarabaragu, ale la ilua la merera taku ale eau kekesia mutou. Me oio te la merera tomi taku alele, eau tovo lalai vagaria veia ge vahiliti la gabutatalala ale maroka oio tamutou.
2PE 3:2 Eau masagea veia amuto ge gabutala rivu lou la merera tegiteu la bilalaha ale maroka, me la merera ale La Uru gatou, la tahalo la vimahuli, eia abia miteu la bilalaha tetala ovola, eiala amite vei polo loua mutou ovolae.
2PE 3:3 La merera taku isasa eau masagea veia la gabutatalala tamutou eia ge magiri ovola maie: Te la imamala ale hagagavi te la tapasi la maututula, egiteu la valalua ale ge tahi taro e Kraist ge sibitala, egite ge pigi malikia mutou, egite ge la tahalo la vareagila sesele.
2PE 3:4 Egite ge vikara maie mago “La Uru mutou eia tauti la tilau veia ge beu loua ovola, eiala oiove? Alaurati te ururu, la pulolou tegatou eia mai moli ale etato igoie rovia, eia kama koramulia ge kaluvu, eia mai moli ele kara la siloko la vipoupoula karati igoie.”
2PE 3:5 La vikararala tegiteu eia mai ele, eala moli egite soioge kati gabutatala la vagagarila te La Tahalo Uru. Eia vipou la mori me la magasa te la masasagala tetala moli sesele. Eia vikara, la mago goio tasuku soio, la magasa sibitala,
2PE 3:6 eala moli mulimuli, te la imamala la vareagila, eia goio vikara lou, la lalalu tomi goio visogo tavu, la maututula tomi te la haro alele, egite sululu sapa, egite goio kokovutio.
2PE 3:7 Tio eia matagaga tai mai ele veia la mori me la magasa tomi ale etato rovia te la imamala ale igoie, La Tahalo Uru eia sau tola molia mai la masasagala moli tetala sekela. La papaga tomi moli ge pou tali muga la havi ale uru eia ge visibitalea vikapopo la viputumulila tetala soio tegiteu la valalua me hatavivile la vareagila te la tapasi la maututula ale eia ge sulu egiteu la gima ovola.
2PE 3:8 Amuto tabarabaragu, la merera isasa eau masagea veia eia ge magiri moli te la gabutatalala tamutou tomi, amuto umala ge gabu taroa. La mererale eia maie: Te la gabutatalala te La Uru, mai la logo isa ge polo, ale mai la leavala salatu savulu sasa. Me mai tai la leavala salatu savulusa ge polo, ale mai la logo isa moli te la gabutatalala te La Uru.
2PE 3:9 Etato pou tali moli la guluvi tetala, eala moli etato umala ge gabutatalea veia eia igo makokoko, veia eia kama ge vipuru hari la merera tetala. La gabutatalala tetala eia kama mai la gabutatalala tegatou. Eia igo madididi moli veia ge abia mutou la baa ale koramuli amuto ge vulo la gabutatalala tamutou soio tetala, veia isa umala ge vilua te la viputumulila tetala.
2PE 3:10 Eala moli la guluvi te La Uru eia ge maie, eia ge guvi tuga kedi moli mai la tahalo la pakalila eia sae te la luma, etato kama rovia veia eia oioti, etato karutu moli leia. La mori ge tali kuraraba vagari, eia ge kokovu. Egiteu la matatabu tomi, la haro me la taio tai oata, la havi uru ge pigi robo egiteu, egite ge tululu sapa, ge kaluvu. La maututula tomi, la hohoi me la magasa tomi tai ge kokovu.
2PE 3:11 Mai eia matagagati tamutou veia la papaga tomi ge tululu sapa, amuto gabutatala mave veia eia taritigi veia la pulolou tegatou la valalua me hatavivile te Kraist ge mave? Eau veia mutou, eia koramuli seselea veia amuto ge pou moli te la vulovulo ale maroka, amuto ge gabu tikumu sekela moli La Tahalo Uru,
2PE 3:12 amuto ge kahare tavu la haro la guluvi tetala veia eia ge sibitala harari. Te la haro moli alele, la mori ge volu sesele la havi, egiteu la matatabu tomi, la haro me la taio tai oata, egite ge tululu sapa.
2PE 3:13 Eala moli etato ge gabu tikumu moli la tilau te La Tahalo Uru ale eia veia eia ge vipou la mori me la magasa ale halaba, la vulovulo ale matata eia ge volu sesele oilo vola, me etato ge kahare tavu la merera tetalale veia eia ge puru harari.
2PE 3:14 Ioge, amuto tabarabaragu, te la merera taku alele amuto matagagati ovola, amuto pou tali moli la haro la guluvi te La Uru veia eia ge sibitala harari. Eala eia taritigi pepeho tai mai ele veia amuto ge vagari veia ge pou tataho moli, La Tahalo Uru ge hilo vuti la vulovulo ale taritigi moli oio tamutou, amuto ge magiri sauba tataho moli te la lagula, la vareagila soio tetala ge ouka gologolo oio tamutou.
2PE 3:15 Gabutala tigia, mai La Uru eia solo igo makokoko, eia kama guvi harari, la vulovulola alele eia ge vimahuli amutou. Mai la merera te tabara gatou uru e Pol tai pala eia kekesi matagagea mutou oio vola, mai te la mari ale La Tahalo Uru abiala veia amuto ge matagaga moli veia La Uru eia abia gatou la baa ale etato ge vulo halaba oio vola.
2PE 3:16 La vikararala tomi te Pol aleie, eia visauru moli, ale eia lubetia gatou la merera tomi te la guluvi te La Uru me la pulolou tegatou ale tetala. La merera te Pol isahari eia viri, me egiteu la valalua bulalahu, egite goio vulo sapolo loua, mai egite vulo gegeru la masova la merera tomi te La Buk Tabu Ale Pala. Egiteu alele la tahalo la vareagila sesele, oio te la vulovulo giteu lou egite visibitala la viputumulila te La Uru soio tegiteu, egite ge vilua.
2PE 3:17 Eala moli ele, amuto tabarabaragu, amuto matagagati tegiteu la tahalo la visigologolola, taritigi amuto ge vibaumuli tigi tegiteu ele, amuto soukama ge tilo te la merera la visigologolola tegite la tahalo la vareagila, amuto soukama ge piligi la tautaulailo tamutou, ale igoie amuto magiri vagari tataho ovola.
2PE 3:18 Eala moli amuto ge tubu tataho sesele te la gilogo me la mari ale sesele te La Uru e Iesus Kraist, eia la tahalo la vimahuli tegatou. Etato ge vaisale molia, kara igoie, kara mulimuli, la kaluvula ge ouka! Amen. Eau e Pita.
1JO 1:1 La tahalo ale eau veia mutou ovola, eia La Merera te La Tahalo Uru, eia vimahuli etatou. Palati te la siloko la maututula, kara igoie, eia oio mahuli. La tahalo ale, pala amila vikavovou tomi, eau hilo seselea, eau rovi seseleti la vulovulola, pala amila tai vaali vikapopo te la haroharo tomi.
1JO 1:2 La tahalo alele eia sibitala palati, amiteu la valalua tetala hilo seselea, me amite veipalea mutou igoie veia amuto tai ge rovia. Eia te la silokola eia vipou tomi le Tamala. Eia goio hiliti taro lou e Tamala, eia gomai te la maututula, amite hilo seselea. La tahalo ale, eia mahuli mai la tori, eia kama rovi la pileho.
1JO 1:3 Eau e Ioanes, eau hilo seselea, eau lolo tai la merera tetala, me ale igoie eau ge veipalea mutou la papaga tomi ale eia vimari le amiteu ovola, veia etato tomi ge rovia. Eau pou otalo te la uluva La Tahalo Uru, eia e Tamagu, me Latula e Iesus Kraist, eia e tabaragu, eia vagoilo etatou te Tamala veia etato tomi ge vitau me tabara sesele.
1JO 1:4 La merera tetala eia taritigi, ale igoie eau abi taia mutou veia etato tomi ge sau tolea, veia oio vola etato tomi ge sagege tavua, la sagegela tegatou ge uru sesele.
1JO 1:5 La merera ale eau lolotia te Kraist, eau goio vei loua mutou ovola, eia maie: La Tahalo Uru, eia la matagaga, etato kama koramulia ge sivuti bakisi la maligoma oio tetala.
1JO 1:6 Eala mai etato veia etatou tetala, eala moli etato soloio te la maligoma, etato visigolo, la vuhula la vulovulo gatou me la merera tegatou ale etato veveia, eia kama visauru.
1JO 1:7 Eala moli mai la matagaga te La Tahalo Uru ale uru sesele ge volu oio tegatou, ale etato ge vipuhi tigi tataho sesele, etato ge la maratatila tetala, etato ge tetalati, me la kasosole Iesus e Latula eia ge vuhi taro la iruru tegatou, etato ge maroka.
1JO 1:8 Eala moli mai etato veia etato la iruru ouka, ale etato visigolo pepeho pasi, etatou tomi la tahalo la iruru.
1JO 1:9 Eala moli mai la iruru tegatou eia oio tabuli te la tia gatou isasasa, etato ge veipalea soio te La Tahalo Uru, eia ge vimavulaha taro letatou la iruru tegatou ele, eia ge vimaroka la tia gatou oilo. Ale La Tahalo Uru ge igo seselea, eia kama rovi la visigologolola.
1JO 1:10 Mai etato veia etatou la iruru ouka, etato mai ale veia La Tahalo Uru, veia eia la tahalo la visigologolola, la vuhula eia toitia veia etatou tomi la tahalo la iruru. Eala moli mai etato veia etatou la iruru ouka, la valalua ge rovia mai ele veia etato kama rovi la merera te Kraist.
1JO 2:1 Amuto latatugu te la lotu te Kraist, eau mera taro amutou veia amuto umalati ge igigo la iruru. Eala moli mai isasa tegatou ge boru, la riau e Iesus Kraist, eia oio te la balile Tamala, eia ge taho robo etatou, veia e Tamala kama ge koli la iruru somai tegatou.
1JO 2:2 Eia peho roboti etatou, e Tamala sugu taroa veia la kasosola ge pagegele, eia ge vuhi taro la iruru tegatou la valalua me hatavivile te la maututula tomi.
1JO 2:3 Mai etato ge roromuli la merera tomi te La Tahalo Uru, ale etato ge matagaga mai ele veia etatou tetalati.
1JO 2:4 Mai isasa eia ge vei mago “Eau te La Tahalo Uru” eala moli oilo te la vulovulola etato ge rovia veia eia kama tilimuli la merera tetala, ale etato ge matagaga mai ele veia la tahalo ale eia visigolo, la merera ale sesele eia kama rovia.
1JO 2:5 Eala moli mai etato ge roromuli tomi la merera te La Tahalo Uru, etato ge tahai sesele ovola, me etato ge hagagavi sesele tetala mai ele.
1JO 2:6 Mai etato veia etato pou seseleti te la uluva La Tahalo Uru, taritigi etato ge sovei sesele la vulovulole Kraist. Mai ge mai ele, etato ge rovia veia etatou la tahalo me la tavile sesele te Kraist.
1JO 2:7 Amuto tabarabaragu, eau kama ge vei loua mutou la merera isasa ale halaba, ouka. La merera taku moli ale palati, amuto rovitia, sokotia pala te la siloko la lotu te Kraist, kara igoie, amite valolo moli le amutou la merera isasa moli, ale etato ge sovei e Kraist, etato ge vipuhi tigi tataho moli.
1JO 2:8 Eala moli ale pala etato kama matagaga sesele, eala igoie amuto lolo la merera taku, eia mai ale halaba sesele. La paga mai ale utupolati, la matagaga te La Tahalo Uru ale sesele eia mai ale pagati, la vuhula etato hiloti e Kraist, etato kai vuvulo seseleti.
1JO 2:9 Mai etato veia etato pouti te la matagaga, eala moli etato oio so gagima moli egiteu e tabarabara gatou, ale etato oio so popou moli te la maligoma.
1JO 2:10 Eala moli mai etato ge puhi tigi tataho egiteu e tabarabara gatou, ale etato ge rovia mai ele veia etato pouti te la matagaga. Mai alele, la iruru isasa kama koramulia ge tabuli lou oio tegatou veia ge igo boru e tabara gatou isasa, umala.
1JO 2:11 Eala moli mai etato oio so gagima moli egiteu e tabarabara gatou, ale etato soloio te la maligoma. Mai etato ge tatuga te la maligoma, etato ge vava bububu moli, la vuhula la maligoma eia igo mata keati la mata gatou, etato vava bububu moliti mai ele.
1JO 2:12 Amutou e taitarigu te la lotu te Kraist, La Tahalo Uru eia vimavulaha taroti le amutou la iruru tamutou te la isale Kraist, eala eau kekesi matagagea mutoue.
1JO 2:13 Amutou e ururu, amuto rovi e Kraist, amuto matagagati veia alaurati te la silokola, kara igoie, eia oio. Eala eau kekesia mutoue, la vuhula amuto lolo vulai tataho. Eau vei tataho sesele tai amutou la valalua halaba, la vuhula amuto bolehohoti e Satan, eala eau kekesi taia mutoue, veia ge karasuku lou amutou veia amuto ge magiri vagari moli. E maura miteu bisisi, amuto rovi tatahoti e Tama mutou, eala eau kekesi taitia mutou ele.
1JO 2:14 Amutou ururu, amuto rovi e Kraist, amuto matagagati veia alaurati te la silokola, kara igoie, eia oio, eala eau kekesia mutou ele. Amutou la valalua halaba, amuto vagari, la vuhula la merera te La Tahalo Uru amuto sau tolatia, amuto bolehohoti e Satan. Eala eau kekesia mutou la merera takue veia amuto ge pou tataho ovola.
1JO 2:15 Amuto umala ge isu tautavu moli la vulovulo te la vovo, me la mari papaila tai umala amuto ge vagari tatavua. Mai amuto ge isu tatavu moli la vulovulo te la vovo, eia matagagati mai ele veia amuto kama rovi la gilogo te Tama gatou.
1JO 2:16 La vuhula, la vulovulo ale kama kokora te la vovo eia kama loio te Tama gatou, eia loio moli te Satan, la mulugaluga te la maututula. Egiteu la vulovulo te la vovo, egiteu maie: Etato hate saga tavu la golu ale etato masagea ge abia; etato mata bulakalaka, osaosa; etato vareagagi tai, kama lololo.
1JO 2:17 Eala moli la masasagala tomi ale etato gabutatala tomia me etato vagari tatavua omai te la mahulila tegatou ale igoie, eia ge kaluvu, mai la golugolu tomi tai ale igoie etato rovia omai te la magasae, eia mulimuli ge kaluvu, eala moli la tahalo ale roromuli la merera te La Tahalo Uru, eia ge mahuli mai la tori, la kaluvula ge ouka.
1JO 2:18 Amuto taitarigu te la lotu te Kraist, la tapasi la maututula eia hagagaviti, eala amuto matagagati veia la tahalo ale ge gima e Kraist, eia ge sibitala, eala moli eia sesele, egiteu la valalua la gima te Kraist, egite isahari sibitala kaluvuti. Eala eau rovitia mai ele veia la tapasi la maututula eia hagagaviti.
1JO 2:19 Egiteu la gima te Kraist isahari loioti tegatou la valalua me hatavivile te Kraist, eala moli ale pala egite pou tomi letatoue, egite lotu bulalahu moli, egite kama te Kraist sesele. Mai egite ge te Kraist sesele, egite kama ge hele taro etatou ale tetala. Ale egite kama pou tola tegatou, etato matagagati mai ele veia egite kama tegatou sesele, egite isapolo.
1JO 2:20 Eala moli amutou, La Tahalo Uru vimatagagati la kalulu mutou, me igoie eau kekesia mutou mai la tahalo ale roviti la gauru ale sesele.
1JO 2:21 Amuto matagagati, amuto kamati paua, amuto koramulia ge mata muli la vuhu la merera tomi ale amuto loloa veia eia sesele ka ouka.
1JO 2:22 Me la tahalo la visigologolola sesele, eia ere? Eia la tahalo ale tahi taro e Iesus veia eia kama e Kraist, veia eia kama La Riau ale loata te La Tahalo Uru. La tahalo ale visigolo mai ele, eia tahi taro La Tahalo Uru, e Tama gatou.
1JO 2:23 Mai etato ge rovi sesele La Tahalo Uru, etato kama koramulia ge tahi taro e Latula. Mai etato ge rovi sesele e Latula, ale etato rovi tai e Tamala.
1JO 2:24 Taritigi amuto ge sau tola la merera ale amite la bilalaha valoloti le amutou ovola te la siloko la lotu oio tamutou. Umala amuto ge piligi posea. Mai la merera alele eia so mahulihuli oio tamutou, ale amuto so mahulihuli vikapopo me La Tahalo Uru me Latula,
1JO 2:25 eia ge vimahuli amutou mai la merera tetala ale eia vei seseletia mutou ovola.
1JO 2:26 Eau kekesi matagagea mutou te la vulovulo giteu ale egite masagea veia ge viruru amutou,
1JO 2:27 eala moli La Kalulu La Marokala eia soloio tamutou, la tahalo la vovo isa kama ge vimari le amutou la merera ale isapolo, ouka. La Kalulu La Tahalo Uru eia vimariti le amutou la merera tomi ale sesele, eia kama visigolo, eia vikara sesele, me amuto ge sau tola sesele e Kraist, mai La Kalulu La Tahalo Uru eia vimariti le amutou ovola.
1JO 2:28 Ioge, amuto latatugu te la lotu te Kraist, taritigi amuto ge sau tola sesele La Uru, eia ge guvi rivu lou, me omai te la maututula etato kama ge mahela lou leia.
1JO 2:29 E Kraist, eia maroka sesele, eala eia taritigi pepeho mai ele veia etato ge matagaga veia la tahalo ale la vulovulola maroka sesele mai te Kraist, eia e latu La Tahalo Uru sesele.
1JO 3:1 Hilage, e Tama gatou isu seseleti etatou ale tetala, eia toi moliti letatou veia etatou e latatula. Me eia sesele tai mai ele, etatou ale te Kraist, etatou e latatu La Tahalo Uru. La valalua me hatavivile ale logala, egite kama rovia, eala egite kama matagaga veia etatou e latatu La Tahalo Uru, la vuhula egite muku pile etatou mai tai pala egite muku pile e Kraist.
1JO 3:2 Amuto tabarabaragu, etatou e latatu La Tahalo Uru sesele, etato balavati, eala moli la vibalavala te La Tahalo Uru ale mulimuli, etato soukama rovia, ale eia ge vagoilo etatou te la pulolou la sagegela oio te la balila. E Kraist ge gomai lou, etato ge hilo seselea, etato ge vulo sesele mai eia.
1JO 3:3 Mai etato ge sau tola la merera alele, etato ge maroka mai sesele e Kraist.
1JO 3:4 Mai etato ge ruruti, etato poloti la merera te La Tahalo Uru. La iruru, eia sibitala te la vulovulo la vareagila ale etato kama lololo la merera te La Uru.
1JO 3:5 Eala moli e Kraist gomai veia ge vimavulaha taro letatou la iruru tegatou ale etato igigoa. Me eia la iruru isa ouka oio tetala, eia maroka viviu.
1JO 3:6 Mai ele, mai etato ge sau tolati e Kraist, etato kati ge pou tavu lou la iruru. Eala moli mai etato ge lagu tavu moli la iruru, ale eia matagaga moli veia etato kama rovi e Kraist, etato soukama hilo seselea.
1JO 3:7 Amuto taitarigu te la lotu te Kraist, igo tigi, egite la tahalo la visigologolola souka viruru amutou. Mai la vulovulo mutou ge maroka, amuto tai ge maroka mai e Kraist.
1JO 3:8 Mai eme ge lagu tavu moli la iruru, eia ge matagaga moli mai ele veia eme te Satan, la vuhula sokoa la silokola, kara igoie, e Satan eia pou tavu moli la iruru. Me la vuhu la guluvi te Latu La Tahalo Uru eia maie, veia eia ge vikaluvu sesele la vulovulole Satan omai te la maututula.
1JO 3:9 Mai eme la tahalo isa veia eme e latu La Tahalo Uru sesele, eme kamati ge lagu tavu la iruru, la vuhula la vulovulomu eia maiti la vulovulo La Tahalo Uru. Mai La Tahalo Uru ge e Tamamu sesele, eme kamati koramulia ge lagu tavu lou la iruru.
1JO 3:10 Egiteu ale e latatu La Tahalo Uru, me egiteu ale latatule Satan, etato hilovi tigi egiteu maie: Mai egiteu kama ge pou tavu la vulovulo ale maroka, eia matagagati mai ele veia egiteu kama e latatu La Tahalo Uru, egiteu e latatule Satan moli. Mai tai la tahalo ale kama puhi tigi e tabarala, eia tai veipalea mai ele veia eia kama e latu La Tahalo Uru.
1JO 3:11 La merera te Kraist ale pala te la siloko la lotu kara igoie eia maie: Etatou ale tetala, eia taritigi veia etato ge vipuhi tigi tataho.
1JO 3:12 Etato umala ge mai e Kain ale e latule Adam, eia la tahalo te Satan sesele, eia bili e tarila e Abel. Me ilava eia bili taro e tarila e? La vuhula e tarila la tahalo isa la vulovulola taritigi, eala moli e Kain, eia la tahalo la iruru.
1JO 3:13 Amuto tabarabaragu, ale egiteu la valalua me hatavivile ale kama te Kraist, egite ge vile amutou, amuto umala ge karutu.
1JO 3:14 Etatou ale te Kraist, etato mai ale saga poloti soio te la mautu la mahulila, etato kati pou te la mautu la pileho. Etato rovitia mai ele veia etato pouti te la matagaga, la vuhula etato puhi tigiti egiteu e tabarabara gatou. Mai isasa eia kama vipuhi tigi mai ele, ale eia soloio te la mautu la pileho me la maligoma.
1JO 3:15 Mai isa ge gima e tabarala, ale eia mai ale bilitia, me amuto rovia veia la tahalo la bilili, eia kama sau tola gologolo la mahulila ale sesele, la kaluvula ge ouka.
1JO 3:16 E Iesus Kraist, eia sugu tarotia gatou la mahulila tetala, eia peho roboti etatou, eala etato matagagati te la vulovulo la gilogo me la vipuhi tigila tai mai ele. Taritigi pepeho veia etato tai ge sugu taro la mahulila tegatou veia ge lapu rivu egiteu e tabarabara gatou taro la limale Satan.
1JO 3:17 Mai la tahalo te Kraist isasa eia tahola ilua la uati, me eia hilo e tabarala isa ale pou la savelela, eala moli eia hate tuu robo molia, eia kama gogoa, la tahalo ale, eia kama koramulia ge vei mago “La gilogo te La Tahalo Uru, eau sau tolatia.” Ouka, eia kama ge koramulia ge vikara mai ele, la vuhula eia la gilogo ouka.
1JO 3:18 Amuto taitarigu te la lotu te Kraist, la gilogo ale etato sau tolea te Kraist, eia umala ge la vikararala bulalahu moli. Mai etato veia etato rovi sesele la gilogo te La Tahalo Uru, taritigi etato ge gogo sesele egiteu e tabarabara gatou, egite ge hilo la visuli tegatou, egite ge gabu tikumu la vulovulo gatou veia eia sesele.
1JO 3:19 Mai la igogolu tegatou ge taritigi mai te la igogolu la gilogo, me etato ge vagari mai ele te la visuli soio tegiteu e tabarabara gatou, ale etato ge rovia veia etato pouti te la matagaga, la vuhula la vulovulo gatou matata tomi moli. Eala etato kamati ge taga La Tahalo Uru, mulimuli etato ge magiri te la lagula, etato kama ge pariri, ouka.
1JO 3:20 La Tahalo Uru rovi tomi moli la gabutatalala tegatou. Mai etatou ge la tahalo tetala sesele, etato kama ge mahela leia.
1JO 3:21 Etato ge magiri te la lagula, etato ge sagege tai la igogolu isahari ale taritigi, etato igotia, etato kama ge taga La Tahalo Uru.
1JO 3:22 Etato ale roromulimulia ge abi la visuli tetala ale uru tai mai la vavua la kilaka, la vuhula la igogolu tegatou eia visagegetia.
1JO 3:23 Me la merera ale tikumu eia tautia somai tegatou, eia maie: Etato ge sau tola sesele la isale Latula, e Iesus Kraist, etato ge vipuhi tigi tai, mai la merera te Kraist ale eia veitia gatou ovola.
1JO 3:24 Mai etato ge roromuli sesele la merera te La Tahalo Uru, etatou ge tetala seseleti, eia ge pou oio tegatou. Etato ge matagaga tai veia La Tahalo Uru eia oioti tegatou, mai etato ge gabu la tivura La Kalulu La Marokala ale eia abitia gatou.
1JO 4:1 Amuto tabarabaragu, amuto umala ge gabu tikumu egiteu tomi ale veia La Kalulu La Marokala eia oio tegiteu. Egite ge valolo mai ele, eala moli amuto ge hilovi tigi la merera tegiteu veia eia loio te La Tahalo Uru ka ouka. La vuhula te la imamala ale igoie, la valalua la visigologolola, egite oioti te la maututula tomi.
1JO 4:2 La merera tegiteu, amuto ge hilovia maie: Mai isa ge veia e Iesus Kraist eia sibitala mai la tahalo la vovo, ale amuto ge matagaga mai ele veia la tahalo ale eia rovi La Kalulu La Tahalo Uru.
1JO 4:3 Eala moli mai isa ge tahi taro veia e Iesus Kraist, eia kama loio te La Tahalo Uru, la tahalo ale valolo mai ele, eia kama rovi La Kalulu La Tahalo Uru. Ale la kalulule Satan moli eiala vikarakarale, eia gima e Kraist. Amuto lolotia pala veia la gabutatalala la gima te Kraist ale uru sesele ge sibitala, me hiloa eia sibitalati.
1JO 4:4 Amuto taitarigu te la lotu te Kraist, amuto matagagati, amuto bolehohoti egiteu la gima te Kraist ele. Amuto roviti La Tahalo Uru, eia pouti tamutou, me La Kalulula eia vagari, egiteu la tahalo la visigologolola, egite kama koramulia.
1JO 4:5 La vikarakarala tegiteu, eia la mari papaila moli mai la mari te la magasa, me la valalua egite gabu tikumu la merera tegiteu, la vuhula la valalua tai, egite te la magasa moli.
1JO 4:6 Eala moli etatou, etato te Kraist. Mai isa ge rovi La Tahalo Uru, eia ge gabu tikumu la merera tegatou. Egiteu ale kama te La Tahalo Uru, egite kama koramulia ge lolo etato. Me mai moli ele etato koramulia ge hilovi la valolo tomi, ge rovia la merera ale sesele, eia loio te La Kalulu La Marokala, ge rovi tai la merera la visigologolola ale loio te Satan.
1JO 4:7 Amuto tabarabaragu ele, taritigi etato ge vipuhi tigi moli, la vuhula la vulovulo ale taritigi, eia loio seseleti te La Tahalo Uru. Mai eme la tahalo la gilogo, eia matagaga mai ele veia eme rovi La Tahalo Uru, eme e latula sesele.
1JO 4:8 Mai isa kama rovi la gilogo, eia veipalea mai ele veia eia kama rovi La Tahalo Uru, la vuhula La Tahalo Uru eia la vuhu la gilogo.
1JO 4:9 Eia veipala la gilogo tetala ale uru sesele mai aleie, eia baha taro e Latula La Riau somai tegatoue veia etato ge sau tola la mahulila ale sesele oio tetala.
1JO 4:10 Mai etato masaga tavuti La Tahalo Uru, eala moli la gabutatalala tegatou tavu eia, eia kama tikumu sesele, etato veipalea mai ele veia la tautaulailo tegatou eia la golu bulalahu moli. Eala moli La Tahalo Uru, eia gogo pala mugati etatou, eia sugu taro e Latula veia eia ge peho robo etatou, veia eia ge vimavulaha taro letatou la iruru tegatou.
1JO 4:11 Amuto tabarabaragu, La Tahalo Uru eia gogo pepehoti etatou mai ele, eala eia koramulia veia etato ge vipuhi tigi tai mai la gilogo tetala ale uru ele.
1JO 4:12 Etato isa soukama hilo La Tahalo Uru, eala moli mai etato ge vipuhi tigi, ale La Tahalo Uru ge pou tegatou, me etato ge maroka tataho mai eia, la valalua me hatavivile ge hilo la vulovulo La Tahalo Uru sesele omai tegatou ale tetala.
1JO 4:13 Etato matagagati veia etatou tetalati, veia eia pouti tegatou, la vuhula eia abitia gatou La Kalulu La Marokala.
1JO 4:14 Amiteu la bilalaha, amite hilo seseleti e Kraist ele, eala amite valolo seseleti leia veia La Tahalo Uru eia baha taro seseleti e Latula somai te la maututula veia eia ge vimahuli etatou la valalua me hatavivile tomi.
1JO 4:15 Mai isasa ge veipala la isale Iesus veia eia La Tahalo Uru sesele, tio La Tahalo Uru eia oio pouti te la tahalo alele, me eia la tahalo te La Tahalo Uru seseleti.
1JO 4:16 Mai moli ele, etatou ale igoie, etato roviti la gilogo te La Tahalo Uru veia eia uru sesele, etato gabu tikumua. La Tahalo Uru eia la vuhu la gilogo tomi. Mai etato ge puhi tigi egiteu la valalua me hatavivile, eia ge matagaga mai ele veia etatou te La Tahalo Uru, me La Tahalo Uru eia tegatou.
1JO 4:17 Mai la vulovulo la gilogo ale taritigi mai ele, eia vulo uru oio tegatou, tio te la tapasi la maututula etato ge maroka sesele, me etato ge magiri ge la lagu La Tahalo Uru, etato kama ge mahela, kama ge taga, la vuhula la vulovulo gatou eia maroka tomi moli, mai te Kraist.
1JO 4:18 La vulovulo la gilogo eia kama rovi tai la tilaga. La gilogo te Kraist ale sesele eia ge kumuli taro la tilaga, etato kati ge tataga, la vuhula La Tahalo Uru gogoti etatou ale tetala, eia kati ge vilai etatou. Mai etato so tataga La Tahalo Uru, eia matagagati mai ele veia etato soukama rovi tigi la gilogo tetala ale eia ge igo maroka letatou.
1JO 4:19 Ale igoie etato rovi la gilogo, la vuhula La Tahalo Uru gogo pala mugati etatou.
1JO 4:20 Mai isa eia veia eia rovi La Tahalo Uru, eala moli eia oio gagima moli egiteu e tabarabarala, eia la tahalo la visigologolola. La vuhula, mai etato kama koramulia ge masaga egiteu e tabarabara gatou ale etato hiloti egiteu, etato ge masagea mave La Tahalo Uru ale etato soukama hiloa?
1JO 4:21 Me la merera tetala isa ale tikumu sesele eia abitia gatou, eia maie: Mai eme la tahalo me la tavile sesele te La Tahalo Uru, taritigi eme ge puhi tigi egiteu e tabarabaramu, me eme ge puhi tataho egiteu tomi.
1JO 5:1 Mai isa ge gabu tikumu e Iesus, me eia ge rovia mai ele veia e Iesus eia e Kraist, eia la tahalo la vimahuli sesele tegatou, tio la tahalo alele, eia e latu La Tahalo Uru sesele. Eala eia koramuli taia veia etatou ale masaga La Tahalo Uru ge masaga tai egiteu tomi e latatula, mai egiteu e tabarabara gatou tomi te Kraist.
1JO 5:2 Ale etato ge masaga La Tahalo Uru, me etato ge roromuli tai la merera tetala, eia ge matagaga mai ele veia etato ge puhi tigi egiteu e latatula.
1JO 5:3 Mai eme masaga La Tahalo Uru, eme ge roromuli tomi moli la merera tetala. Eala moli la merera tetala, eia kama tikumu veia etato ge bolebolea,
1JO 5:4 la vuhula etatou ale e latatula sesele, etato bolehohoti la vulovulo ale kama kokora te la vovo. Etato sau tolati e Kraist, etato ge bolehoho la vulovulo ale kama kokora mai ele.
1JO 5:5 Me ere sesele la tahalo me la tavile te Kraist ale ge vagari? Egiteu moli ale matagagati veia e Iesus, eia e Latu La Tahalo Uru.
1JO 5:6 E Iesus Kraist, eia guvi seseleti otalo, me la irovilala tetala ilua: Isasa, eia abi la vuluhi te la lalu, me isasa te la kasosola tai eia pagegele. Mai la vuluhi moli, eia kama tikumu, eala moli ale la kasosola tai pagegele, La Kalulu La Marokala eia veipala matagagea te la gabutatalala tegatou mai ele veia la igogolu te Kraist eia sesele, me La Kalulu La Tahalo Uru eia vikara sesele tai ovola.
1JO 5:7 La irovilala itolu oio ale veipalea veia e Iesus e Latu La Tahalo Uru, egiteula maie:
1JO 5:8 La Kalulu La Marokala, la lalu la vuluhi, me la kasosola ale pagegele oata te la tauvalautu. Me la masova giteu la irovilala itolu ele eia visauru moli.
1JO 5:9 Mai la tahalo la vovo ge vikara, etato ge lolo molia, kama ge gabu tikumua. Eala moli mai La Tahalo Uru ge vikara, ale etato ge gabu tikumu pepehoa. La Tahalo Uru eia veipalati la vuhu la igogolu te Latula, veia eia la tahalo la vimahuli tegatou la valalua me hatavivile tomi.
1JO 5:10 Mai isasa eia ge gabu tikumu e Iesus veia eia e Latu La Tahalo Uru sesele, tio la vavua la merera te La Tahalo Uru alele, eia ge tabuli oio tetala. Eala moli mai isasa eia ge tahi taro la merera te La Tahalo Uru aleie, eia mai ale tahi taro La Tahalo Uru veia eia la tahalo la visigologolola.
1JO 5:11 Me la merera te La Tahalo Uru oio te Latula eia maie, veia La Tahalo Uru eia abitia gatou la mahulila ale sesele, la kaluvula ge ouka, la vuhula e Latula vimahuliti etatou.
1JO 5:12 Mai etato ge te Latula sesele, ale etato sau tolatia mai ele la mahulila ale sesele. Mai etato kama rovi e Latula, etato kama rovi la mahulila ale sesele, etato mai ale pehoti.
1JO 5:13 La merera taku tomie, eau kekesia mutou la valalua me hatavivile ale amuto toroti te la isale Kraist veia eia e Latu La Tahalo Uru sesele. Eau kekesia mutou la veimatagagala tomi mai ele veia amuto ge rovi seselea veia amuto sau tolati la mahulila ale la kaluvula ge ouka.
1JO 5:14 Etato ge magiri moli te la lagu La Tahalo Uru, etato ge kaka la papaga tomi ale etato savelea, etato ge magiri moli, etato kama ge mahela, la vuhula etato rovitia veia la visuli ale mave ale mave etato ge kakea tetala, eia ge sugu taro molia gatou, mai la kilaka tegatou eia ge poga sesele la masasagala tetala. Eia ge lolo moli etatou, me la paga ale etato savelea, etato ge rovia veia eia abi seseletia gatou, etato mai ale sau tolati la vavua la kilaka tegatou, etato soukama hiloa, eala moli etato tautaulailoti oio vola veia etato sau tolatia.
1JO 5:16 Mai isa tegatou eia ge hilo e tabarala isasa eia igoti la iruru bakisi, mai la iruru moli ale eia kama ge koramulia ge vilua mulia, taritigi eia ge kaka La Tahalo Uru veia eia ge vimahuli la tahalo ale ruruti ele, La Tahalo Uru ge igo seselea, eia ge vimahulia. Sesele, la iruru isa ale tikumu bara eia oio, mai la tilou soio te La Tahalo Uru, etato kama ge koramulia ge kaka robo la iruru alele, ouka.
1JO 5:17 Egiteu la iruru tomi tikukumu, eala moli isahari kama bilibili etatou, me eia koramulia veia etato ge kaka roborobo egiteu la mata la iruru tomi alele.
1JO 5:18 Mai etatou e latu La Tahalo Uru sesele, etato kati ge lagu tavu lou la iruru, la vuhula e Latu La Tahalo Uru, La Riau e Iesus, eia ge sigirobo etatou, e Satan kama ge igo gegeru etatou.
1JO 5:19 Etato matagagati veia etato e latatu La Tahalo Uru sesele, eala moli la maututula tomi e Satan voluti ovola, eia kisi tola la valalua me hatavivile.
1JO 5:20 Eala moli etato rovi taitia veia e Latu La Tahalo Uru eia guviti omai, eia vimatagagati etatou veia etato ge rovi sesele La Tahalo Uru, etato kama ge tilo te la visigologolola te Satan. Etatou ale tetalati, me te Latula tai e Iesus Kraist, etato rovia veia eia La Tahalo Uru tegatou sesele, la tahalo la vimahuli tegatou tomi isasasa.
1JO 5:21 Amuto taitarigu te la lotu te Kraist, taritigi amuto ge kisu taro egiteu la lotu ale kama sesele! Eau e Ioanes.
2JO 1:1 Eiau e Ioanes, eau kekesi loua mutou la valalua me hatavivile te Kraist la merera taku bakisie, amuto ge loloau, eau uruti. Emei la tavile uru ele te Kraist, eau kekesia mutou me latatumu, eau isu pepeho sesele la vulovulo mutou ele. La Tahalo Uru hilovi seseletime, amiteu me la valalua me hatavivile tomi te Kraist, amite isu la vulovulo mutou me latatumu tomi ele, amutou tetalati.
2JO 1:2 Etato tomi rovi e Kraist, la merera tetala eia mahuliti oio tegatou, eia kama ge kokovu.
2JO 1:3 La gilogo te Tama gatou ge pigi robo etatou, etato ge gabu la visuli mai alele, eia uru, la tia gatou oilo ge malilo tataho te la isale Latula e Iesus Kraist, eia sesele.
2JO 1:4 Tavile uru, eau lolotia veia egiteu e latatumu isahari oiole, egite tilimuli tataho la merera te Kraist, mai la masasagala te Tama gatou. Eau loloa mai ele, eau sagege pepeho.
2JO 1:5 Eau veia ge tutu tola loua mutou bakisi la merera, kama la merera ale halaba, la merera moli te Kraist ale eia tabuliti kara igoie. Eau kaka gogogo amutou veia etato la valalua me hatavivile te Kraist ge vipuhi tigi moli.
2JO 1:6 Mai ge mai ele, etato ge roromuli sesele la merera tomi te Kraist. Me te la siloko la lotu oio tamutou ele, kara igoie, amuto lolo molia veia la masasagala tetala eia maie, veia amuto ge pou tataho moli, amuto ge vipuhi tigi moli.
2JO 1:7 Egiteu la tahalo la visigologolola usu, egite polo galilili te la maututula veia ge visigolo la valalua me hatavivile te Kraist, egite tahi taro e Kraist veia e Iesus eia kama la tahalo la vovo sesele, egite veia e Iesus eia la kalulu moli, eala moli egite visigolo. Ale egite valolo mai ele, egite gima seseleti e Kraist.
2JO 1:8 Igo tigi, egite soukama igo marapa amutou. Mai amuto ge roromuli egiteu, la vibalavala te Kraist ale amuto igogolu vagari veia ge sau tolea, eia ge kokovu taro lou amutou. Taritigi amuto ge vagari tavu moli la merera te Kraist, mulimuli amuto ge sau tola la vibalavala tetala sesele.
2JO 1:9 Mai isa ge roromuli la merera ale isapolo kama te Kraist, ale eia ruruti, La Tahalo Uru kamati ge sau tolea. Eala moli mai etala ge pou moli te la uluva la merera te Kraist, etala ge rovi tataho e Tama gatou uru, egira me Latula e Iesus Kraist.
2JO 1:10 Mai isa ge gomai veia ge valolo amutou te la isale Kraist eala moli la merera tetala eia isapolo, eia kama mai la merera te Kraist, amuto umala ge sulia veia ge abiala la ilali me la luma ale eia ge mavuta ovola.
2JO 1:11 Mai etala ge suli la tahalo la visigologolola, etala mai ale suli taiti lou la igogolu tetala ale kama kokorale.
2JO 1:12 Eau la merera usu ale eau masagea veia ge kekesia mutou ovola, eala moli eau kati ge lapu malau lou la merera taku ele, la vuhula eau vagari veia ge gomai tamutou ge hilo sesele la mata mutou, etato ge vipou tomi, etato ge visagege baoli lou, etato ge vikara tataho sesele. Eme la tavile uru ele, egiteu e latatule tabaramu omaie, eia tai la tavile te Kraist, egite toi la haro sesele soio tamutou me latatumu ele. Eala moli ele, la merera taku bakisi kaluvuti. Eau e Ioanes.
3JO 1:1 Tavu e Gaias, Eiau e Ioanes, eau kekesiamu, eme e tabaragu sesele te Kraist. Eau la uru sesele te la lotu tetala, eau kekesiamu veia eau ge veiamu la haro sesele, la vuhula eme la tahalo sesele te Kraist.
3JO 1:2 Tabaragu, eme oiole soioge sau tola la mahulila ale taritigi, la paga isa ouka, ia? Taritigi pepeho. Me eau rovi taia veia eme so sau tatola la mahulila ale sesele te Kraist oio te la kalulumu ele, taritigi pepeho.
3JO 1:3 Eau matagagati te la pulolou taume ale taritigi ele, la vuhula egiteu e tabarabara galua isahari te la lotu, egite gomai taku, egite veipaleagu la pulolou tamutou ele veia la merera te Kraist, amuto so torotoro moli ovola, amuto magiri vagari, kama piligiligia, taritigi pepeho.
3JO 1:4 Me la paga isa lou kama ge visagegeau, eiala moli mai eau ge loloa veia amuto e latatugu te Kraist pou tataho moli otalo te la uluvala.
3JO 1:5 Tabaragu, eau lolotia veia mai egiteu la tahalo la valolo ge guvi taume ele, eme ge rara tavu egiteu, eme ge suli pepeho egiteu. Egiteu kama e valaluamu, eala moli eme igo seselea, eme suli egiteu, taritigi pepeho.
3JO 1:6 Egite hilotia la vulovulomu mai ele, egite veipalatia somai tamiteu, amite rovitia. Ale mulimuli egite ge hiliti taro amutou, taritigi eme ge suli pepeho lou egiteu, ge tataro tataho egiteu ele.
3JO 1:7 Egite kama igogolu bulalahu. Ale egite valolo tatuga mai ele, egite igoa te la valolo te Kraist, egite kama abi la visuli oio tegiteu la valalua la maligoma, ouka.
3JO 1:8 Eala eia taritigi pepeho veia etato ge suli egiteu ge abia giteu la ilali me la uati, etato tomi ge visuli baololi te la igogolu te Kraist mai ele.
3JO 1:9 Eau pala kekesia la valalua me hatavivile te la lotu tamutou ele la merera isahari ale taritigi, eala moli amuto kama loloau, la vuhula la tahalo ale Daiotrepis eia masaga molia veia ge vauru lou eia, eia ali la ilo mutou veia amuto ge lolo moli eia.
3JO 1:10 Eala moli ale eau ge gomai tamutou, eau ge veipala la vulovulola ale kama kokorale, ale eia vikara kukumua miteu, eia ule papai tai la merera la visigologolola mapaiti. La tahalo ale, eia kama masagea veia ge suli egiteu la tahalo la valolo ale gomai tamutou ele, eia veia ge magiri robo tai amutou ale masagea veia ge suli egiteuo, eia veia ge pitaro egiteu ale la vulovulo giteu taritigi mai ele.
3JO 1:11 Amuto tabarabaragu, umala amuto ge sovei la vulovulo ale kama kokora mai ele. Amuto ge tilimuli moli la vulovulo ale taritigi. La tahalo me la tavile ale taritigi, etato ge rovia maie veia eia la tahalo me la tavile te La Tahalo Uru. Mai isa ge lagu tavu la vulovulo ale kama kokora, ale etato ge matagaga ovola veia eia kama rovi sesele La Tahalo Uru.
3JO 1:12 La valalua me hatavivile tomi masaga e Dimitrias, eia la tahalo isa la vulovulola taritigi tomi moli, eia kama rovi la visigologolola. Ale la vulovulola taritigi ele, eia veipalea veia eia la tahalo te Kraist sesele. Eau e Ioanes tai vaisalea, me amuto rovia la merera taku eia sesele tomi moli.
3JO 1:13 Eau la vikararala usu ale eau veia ge veia mutou ovola, eala moli eau ge gomai muga tamutou, etato ge vikara tataho, eau kama masagea veia la merera ale tikumu eau ge veipalea te la kekesi moli, eia kama koramuli.
3JO 1:15 La gilogo te Kraist ale uru sesele eia ge pou tamutou, la tia mutou oilo ge malilo tataho tetala. Egiteu e tabarabara mutou omai toi la haro sesele soio tamutou. Eau tai toi la haro sesele soio tegiteu e tabarabara galua te Kraist ale oio taumele, taritigi eme ge veia giteu tomi isasasa veia eiau e Ioanes, eau laharo seselea giteu. Eala moli ele, la merera taku bakisi ele kaluvuti. Eau e Ioanes.
JUD 1:1 Eiau e Iuda, eau kekesia mutou la merera taku bakisie. Eau la bilalaha te Iesus Kraist, e tuagu e Iakob. Eau kekesia mutou la valalua me hatavivile te Iesus. La Tahalo Uru, e Tama gatou, eia tola tavuti amutou, eia sau tola amutou, e Iesus Kraist ge sigirobo amutou tomi.
JUD 1:2 Taritigi amuto ge gabu sesele la gilogo tetala ale uruo, me la gabutatalala tamutou eia ge malilo tataho.
JUD 1:3 Amuto tabarabaragu, eau masagea veia ge kekesia mutou ge lube loua mutou la merera isahari lou ale taritigi ale La Tahalo Uru susuli etatou, eala moli oukati, eau kati ge kekesi loua mutou mai ele. La vuhula la iloburukola isa uru sibitalati, me eau veia ge kekesia mutou ovolale, veia ge karasuku amutou, amuto ge sau tola vagari la merera tomi te La Tahalo Uru ale eia abitia gatou la valalua me hatavivile tetala.
JUD 1:4 Eau veia ge kekesi mai ele, la vuhula egite la tahalo la visigologolola isahari sibitalati oilo tegatou la valalua me hatavivile te la lotu te Iesus. Egite polo keke moli soilo, amuto veia egite taritigi moli, eala moli ouka, egite oio vulo gegerutia la merera te Iesus veia la vulovulo giteu ale kama kokora eia taritigi tomi moli. Eala egite pileti e Iesus Kraist, ale eia sekela La Uru gatoue, isa lou ouka. Egiteu la valalua ale mai ele, etato rovitia veia egite ge vilua, mai la merera La Buk Tabu toitia palao.
JUD 1:5 Taritigi amuto ge lolo loua, amuto ge gabu tikumu la vimari ale bakisie tegiteu ale pou la kilisi oio e Gipto alaura. La Tahalo Uru lapu rivu egiteu, eala moli egite goio sokoti la vareagila, La Tahalo Uru goio bebetola la igototolola soio tegiteu, veia egite ale kama roromuli la merera tetala, eia ge bili peho egiteu.
JUD 1:6 Amuto ge gabutala tai egiteu la angelo. La Tahalo Uru vipou egiteu veia egite ge pou la pulolou la uru oata tetala. Eala moli egite goio ragautu la merera te La Tahalo Uru ele, egite veia ge vauru lou egiteu otalo te la maututula. Eala La Tahalo Uru vipouti egiteu otalo te la mautu la maligoma, eia kisi roboti egiteu veia egite ge pou tali la tapasi la haro ale eia ge vilai egiteu oio vola.
JUD 1:7 Amuto ge gabutatala tai la valalua me hatavivile te la mautu ilua palao e Sodom, e Gomora. Mai tai lou egiteu la angelo, egite goio igo la iruru, egite babaka, me egite vaigo barabara tai ale egite vaigo baololi lou egiteu. Me oio vola La Tahalo Uru viligi egiteu te la havi ale uru la kaluvula ge ouka.
JUD 1:8 Mai la vulovulo tomi ale kama kokora mai ele, egite la tahalo la visigologolola igo taitia omai kabili tamutou ele. Egite vaigo baololi lou egiteu, egite vareagagi, egite gilogilo soata tegiteu la angelo, me egite toi bara pepeho lou egiteu.
JUD 1:9 Mai la veimulila tegatou e Iuda ale e angelo uru e Maikel, egira me La Gima vaigo muli la pilelehole Moses veia ere tegira ge abia, e Maikel igo totolo pepeho, eala moli eia kama koramulia veia ge gilo bara La Gima, la vuhula La Gima eia e angelo isasa, e Maikel togoa. Eala e Maikel makuku lou, eia goio igo totolo molia bakisi maie mago “La Tahalo Uru ge vilaimei!”
JUD 1:10 Ale la vulole angelo uru ele, eala moli egiteu la tahalo la visigologolola ale pou tamutou ele, egite gilo bulalahu moli, mai la paga isasa ale egite kama rovi tigi la masovala. Eala moli mai la masasagala tegite ale egite veia ge igoa, la masovala kama tikumu, eia mai la mari te la vovo moli. Egite igo seselea, egite ge tilo ovola, egite ge peho.
JUD 1:11 Maura miteu, te la tapasila tegiteu eia ge kama kokora gologolo! Egite mai ale tilimuliti la gauru te Kain ale pala eia bili e tarila. Mai lou e Balam, egite masaga tavu moliti la uati. Mai tai lou e Kora, egite vaubiti soio te La Tahalo Uru, egite ge vilua tai mai la tahalo alele.
JUD 1:12 Ale amuto ge pou vikapopo oio te la ilali te la isale Kraist, egiteu la valalua la vareagila tai goio guvi. Ale kama taritigi, egite soukama ge viruru amutou. Egite liu bububu moli la vaen te la kasosole Kraist, la tilogo ouka. Egite gabutatala moli egiteu lou. Egite mai sesele la tuluvu la mori ale sibitala bulalahu moli, la lolovi goio vai tataro loua, la hura kama pu sesele, la ilali orivo kama kusi tigi. Egite mai tai la tutu la obu ale la lolovi vaia, eia tavuvu.
JUD 1:13 Egite mai tai lou la gasi la mago, etato hilo la vulovulo giteu ale kama kokorale eia palala moli mai la papara la gasi ele, etato tomi hiloa. Egite mai tai lou e visu ale pigi moli bakisi, eia goio kokovuti lou te la maligoma, etato kati ge hilo loua. La Tahalo Uru eia raragiti la mautu la maligoma veia ge pigi egiteu sotalo vola.
JUD 1:14 Mai moli tai ale e tubu gatou uru e Enok, eia e tubule gavurevurele Adam alaura te la silokola, eia gabutatala egite la tahalo la visigologolola mai egiteu ele, eia veipala la golu ale ge sibitala mulimuli, eia veia maie: “Hiloa, La Uru ge sibitala vikapopo me la angelo tetala mapaiti sesele,
JUD 1:15 egite ge lapu la valalua me hatavivile tomi soio te la vigagiala, veia ge toi la iligi ale uru makapipila sesele soio tegiteu la tahalo me la tavile la iruru, me egite ge lai te la vulovulo giteu tomi ale kama kokorale, me te la vareagila tegiteu tai ale egite vilevile La Uru ele.”
JUD 1:16 Egiteu la valalua la visigologolola alele, egiteu la tahalo la tahi tarola, egiteu la tahalo la vikara kukumula. Egite tilimulimuli moli la masasagala tegiteu lou. Egite vauru rivurivu tai la isa giteu lou. Egite vei tataho la valalua ale egite veia egite ge koramulia ge suli egiteu, egite mera gogomea giteu mai ele.
JUD 1:17 Amuto tabarabaragu, eau masagea veia amuto ge gabutatala titigi la merera tegiteu la bilalaha te La Uru e Iesus Kraist ale egite veitia mutou ovola palao, veia amuto ge rovia la paga ale ge sibitala mulimuli, egite veia maie:
JUD 1:18 Ale te la imamala ale hagagavi te la tapasi la haro, la valalua me hatavivile usu ge muku pile la lotu, egite ge tilimuli moli la masasagala tegiteu isasasa te la vulovulo ale kama kokora.
JUD 1:19 Egiteu ale maie, egite gabutatala moli te la vovo, egite kama rovi La Kalulu La Marokala, egite ge igo marapa amutoue.
JUD 1:20 Eala moli taritigi pepeho veia amutou e tabarabaragu ele, amuto ge magiri vagari te la isale Iesus, eia ge mai la sosole tamutou. Taritigi tai amuto ge kakaka te la vagagarila te La Kalulu La Marokala.
JUD 1:21 Amuto ge sau tola vagari la gilogo ale uru te La Tahalo Uru, me amuto ge pou tali moli la haro ale La Uru e Iesus ge abia mutou la mahulila ale sesele, la kaluvula ge ouka.
JUD 1:22 Mai isahari kabili tamutou ele ge gabutala papai, taritigi pepeho veia amutou alele ge vagari la viteteli giteu,
JUD 1:23 ge lapu rivu egiteu te la harare la havi ale uru, la kaluvula ge ouka, egite soukama vilua ovola. Eala moli mai amuto ge suli egiteu ale kama kokora, taritigi amuto ge baumuli tigi amutou. Amuto ge gogo egiteu, eala moli taritigi amuto ge makuku la vulovulo giteu, eia kama koramuli gologolo veia amuto ge hagagavi bakisi tegiteu ale kama kokora mai ele.
JUD 1:24 Taritigi etato tomi ge vaisale La Tahalo Uru, eia la tahalo la vimahuli tegatou. Eia ge sau tola etatou, etato kama ge boru. Eia ge lapu etatou soio tetala, etato ge magiri te la matagaga ale uru te la lagula, etato ge maroka, etato ge sagege. Eia moli matagaga, eia sekela moli uru, eia sekela moli vagari, eia sekela moli sau tola la viputumulila, isa lou ouka, sokoa te la silokola, karati igoie, me ge kara lou mulimuli, la kaluvula ge ouka! Eala moli ele. Eau e Iuda.
REV 1:1 Ale la veipalala ale La Tahalo Uru veipalea soio te Iesus Kraist, veia eia ge vei matagagea giteu la valalua me hatavivile tetala la pulolou tegiteu ale ge mulimuli. E Kraist baha e angelo tetala soio te Ioanes, eia veipala soio tetala la veipalala te La Tahalo Uru.
REV 1:2 E Ioanes, eia igo seselea, eia kekesi tola la papaga tomi eia hiloa. E Ioanes, eia la bilalaha te Iesus sesele, eia valolo la valalua me hatavivile la merera te La Tahalo Uru, la igogolu tomi tai te Iesus ale eia igoa, veia etato ge rovi tataho La Tahalo Uru mai ele.
REV 1:3 La buk ale, mai etato ge gigia, ge gabu tikumua, etato ge sagege, la vuhula la tapasi la haro, eia hagagaviti, etato kamati ge karutula, la vuhula etato loloti la merera alele.
REV 1:4 Eau e Ioanes, eau kekesia mutou la valalua me hatavivile te ekelesia ivitu ale oio la gale Esia: Taritigi pepeho veia La Tahalo Uru ale mahuli alaura te la silokola kara ale mulimuli, eia ge sigirobo le amutou la gilogo tetala, la tia mutou oilo ge malilo tataho. E angelo ivitu tai ale magiri te la lagula, egite ge baumuli le amutou la gilogo tetala.
REV 1:5 E Iesus Kraist tai, eia ale turi etatou soio te La Tahalo Uru, eia ale la muluga la tahalo ale mahuli taro la pileho, eia ale mamuga te la mulugaluga tomi omai te la maututula, eia tai ele ge baumuli le amutou la gilogo te La Tahalo Uru.
REV 1:6 E Iesus, eia suli tataho etatou, eia gogo etato, eia sugu taro la mahulila tetala veia la iruru ale etato igigoa eia kati ge kisi tola etatou. Eia vagoilo etatou te la maratatila tetala veia etato ge lotu tavu bibibi moli e Tamala, La Tahalo Uru. Tio eia koramulia veia la valalua me hatavivile tomi ge rovia veia e Iesus sekela moli vagari, egite ge sagege robo molia, kara igoie, kara ale mulimuli, la vaisalela tegatou tavua eia kama ge kaluvu. Eia sesele.
REV 1:7 Eia ge sibitala loata te la mori, etato tomi ge hiloa. Egiteu ale ubia pala, egite ge hilo tai loua. La valalua me hatavivile te la galegale tomi ge hiloa, egite ge taga pepeho, la vovo giteu ge pariri, egite ge tali. Ealale, eia sesele moliti.
REV 1:8 La Tahalo Uru tegatou, eia veia maie “Eau la silokola me la tapasi la golugolu tomi. Eau La Tahalo Uru, eau oio. Kara alaura la silokola, kara igoie, kara mulimuli, eau oio. Eau sekela moli vagari.”
REV 1:9 Eau e Ioanes, eau e tabara mutou, etatou tomi la valalua me hatavivile te Kraist. Egiteu la gima tetala tahi vile etatou, eala moli etato oiloti te la uluvala, eia vauruti etatou, etato kati taga, etato vagari moliti. La merera te La Tahalo Uru te la igogolu ale e Iesus igotia, eau valolo la valalua me hatavivile oio vola. Egiteu e Rom hiloa mai ele, egite igo totoloau ovola, egite baha taroau solau la olu e Patmos, egite vilai seseleau te la pulolou la kilisi ovola.
REV 1:10 Tio eau pou oio e Patmos, La Kalulu La Tahalo Uru goio pou taku te la haro tabu isasa, eau loloa la golu la tahalo isasa oio te la pokegu. Eia vikara boboboe, la harela taitali mai la golu la vaivai ale egite pupusua.
REV 1:11 Eia veiagu mago “Eme ge kekesi tola la papaga tomi ale eme ge hiloa gageie. Eme ge kekesi tola mugea mai ele, mulimuli eme ge sovea soio tegiteu e ekelesia ivitu ale oio la galegale isahari, egite ge gigia. La maututula ivitu alele, eia maie: Epesas, e Smirna, e Pergamum, e Taiataira, e Sardis, e Piladelpia, e Laodisea.”
REV 1:12 Tio, eau vulo gele veia eau ge hilo la tahalo ale vikarakara. Eau vulo gele mai ele, eau hiloa la selu ivitu, eia karere pepeho pasi.
REV 1:13 Oio kabili te la selu ivitu ele, isa oio magiri, eia mai sesele la tahalo. Eia lavalava malalau sotalo. La kisipou tetala, eia mememe, eia kisia oio te la magorola.
REV 1:14 La ivula oata te la gahola, eia kea lovolovo sesele. La matala ilua karerere mai la havi.
REV 1:15 La vahala ilua mememe moli, la vuhula eia la bras ale halaba sesele. Eia vikara boboboe, la harela taitali mai la lalu ale sali loata, pagegele sotalo te la gove.
REV 1:16 Eia sau tola la matatabu ivitu te la limala e gata. La gata isasa, eia mata kalulusa sesele, eia alapaua te la harela, eia magiri totoge. La tiraro la tahalole eia kea mai la haro ale hugutolatia oata.
REV 1:17 Tio, eau hiloa mai ele, eau boru oio te la vahala mai ale peho. Eia goio sau te la vovogu la limala e gata, eia veiagu mago “Umalati tataga. La golugolu tomi, eau moli la vuhula, eau lou ge la vitapasila.
REV 1:18 Eau mahulihuli! Eau pala pehoti, eau mahuliti lou. Eau ge mahulihuli moli, la kaluvugu ge ouka. Eau baumuli la pileho, la mautu tai tegiteu ale pehoti eau baumulia.
REV 1:19 Taritigi eme ge kekesi tola la golugolu ale eme hilotia, me la golugolu tomi tai ale eme ge hiloa gageie.
REV 1:20 Hiloa, mai la matatabu ale ivitu ele, ale eau sau tolala la limagu e gata, la masova la pagale, eia pala kokovu. Me la masova la selu ivitu ale karerere, la masova la pagale, eia tai pala kokovu. Eala moli la masova la paga iluale, eau ge veipaleamu gageie, eme ge rovia. La matatabu ale ivitu ele, la masovalale, eia mai e angelo ale ivitu ale baumuli egiteu e ekelesia ale ivitu, eau toi palatiamu la isa giteu igoie. Me la masova la selu ale ivituo, eia mai moli lou egiteu e ekelesia ale ivitu ele.
REV 2:1 “Eme ge kekesiale angelo ale baumuli e ekelesia oio la mautu Epesas, eme ge kekesia maie: Ale la merera ale loio tetala ale sau tola la matatabu ivitu te la limala e gata, eia tatuga kabili te la selu ivitu. Eia veia mutou la merera maie:
REV 2:2 La igogolu tomi tamutou, eau rovitia. Eau rovitia amuto magiri vagari, amuto kama piligi la igogolu la lotu. Eau rovi taia veia egiteu ale kama kokora, amuto kama mata soli taro egiteu veia egite ge igo gegeru amutou. Egiteu tai ale visigolo veia egiteu la tahalo te Kraist sesele, amuto hilo vutitia la visigolola tegiteu, taritigi pepeho.
REV 2:3 La merera ale taritigi, amuto sau tola molia. Egiteu la gima taku, egite viligiligi amutou, eala moli amuto vagari, amuto kama silaha. Taritigi pepeho.
REV 2:4 Eala moli la iruru tamutou isahari, ale eau hilotia, eau ge vei matagagea mutou oio vola: Pala, la lotu guvi halaba oio tamutou, amuto lagu tavuau, amuto sagege pepeho leau, igoie oukati. La vulovulo mutou ale taritigi, amuto pala igoa, amuto piligitia. Amuto boruti.
REV 2:5 Taritigi amuto ge gabutala rivu la vulovulo mutou ale pala, amuto ge piligi taro la iruru tamutou, amuto ge gabutala rivu louau. La vulovulo mutou ge mai lou ale pala. Mai ge ouka, eau ge guvi tavu lou amutou, eau ge abi taro le amutou la selu tamutou, amuto kati ge pou lou te la matagaga.
REV 2:6 Eala moli la vulo mutou isa lou, eau hilo vutitia, eia taritigi. Amutou putu galeti la visigolola tegiteu ale tilimuli la merera te Nikolas. Taritigi pepeho, la vuhula eau tai vile la gabutatalala tegiteu ele.
REV 2:7 Mai ere la gavusala ge oio te la ilolo la merera, taritigi eia ge lolo la merera alele, La Kalulu La Tahalo Uru eia veipalea soio te la valalua me hatavivile te la lotu, taritigi eia ge gabu tikumua. Mai amuto ge bolehoho la gima, eau ge veia mutou maie mago ‘Taritigi amuto ge ge goilo ge ali la vavua la obu la mahulila ale oio te la mautu te La Tahalo Uru.’
REV 2:8 “Eme ge kekesiale angelo ale baumuli e ekelesia oio la mautu e Smirna, eme ge kekesia maie: Ale la merera ale loio tetala ale la vuhula me la vitapasila te la golugolu tomi, eia ale pehoti me eia mahuli rivu lou.
REV 2:9 La valalua viligi amutou, me amuto pou la savelela. La iloburukola tamutou ele, eau rovitia. Eala moli amuto tahola la vuliti. La vuliti ele, eia la tilalau ale taritigi oata te La Tahalo Uru. Egiteu e Iuda ale rovi la merera te Moses eala moli egite kama mulimulia, egite ubi le amutou la merera ale kama kokora, eau rovitia. Eala moli egiteu tomi ele, egite oiloti te la lotu te Satan, egite kamati mai la tau Iuda.
REV 2:10 Amuto umala ge taga la iligiligi ale ge sibitala tavu amutou. E Satan ge tovo lalai amutou, la valalua la gima ge kapi robo isahari tamutou oilo la luma la kilisi veia ge tovo lalai la vagagari mutou. Eala moli la iligiligi alele, eia kama ge tabaa agi, eia ge kaluvu lou. Eala moli mai amuto ge vagari kara amuto ge peho, eau ge vibalava le amutou la mahulila ale la kaluvula ge ouka.
REV 2:11 Mai ere la gavusala ge oio te la ilolo la merera, taritigi eia ge lolo la merera alele, La Kalulu La Tahalo Uru eia veipalea soio te la valalua me hatavivile te la lotu, eia ge gabu tikumua. Mai amuto ge bolehoho la gima, la kalulu mutou mulimuli kama ge vilua te la ilua la pileho.
REV 2:12 “Eme ge kekesiale angelo ale baumuli e ekelesia oio la mautu e Pergamum. Eme ge kekesia maie: Ale la merera ale loio tetala ale tahola la gata ale mata kalulusa sesele.
REV 2:13 La mautu uru tamutou, ale amuto momou oio vola, eau rovitia. E Satan moli la mapa la mautu alele. Eala moli amuto kama visauru megiteu, la vuhula amuto veipala la isagu, amuto kama vei kokovua. E tabara mutou e Antipas, ale valolo sesele la valalua me hatavivile la merera taku, egite bilia kabili tamutou, oilo te la mautu uru tamutou, e Satan oio vola, eala moli amuto kama taga, amuto vagari moli.
REV 2:14 Eala moli la merera isahari eau ge veia mutou oio vola. Isahari oilo tamutou sau tola la merera te Balam, eia ale pala vahilo le Balak la gauru ale eia viruru la valalua me hatavivile te La Tahalo Uru oio vola, veia egite ge ali la ilali la vaabila ale egite vaabila la taua oio vola me egite ge igo tai la vulovulo giteu ale kama kokora, egite mata bulakalaka, osaosa.
REV 2:15 Mai moli alele, isahari tamutou tai amuto vagari tavu sesele la merera ale kama kokora tegite la valalua te Nikolas.
REV 2:16 Eala, eia taritigi amuto ge vulo la gabutatalala tamutou. Mai ge ouka, eau ge gomai tamutou, eau ge ubi legiteu la tahalo la iruru la gata ale mata kalulusa oio te la haregu.
REV 2:17 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru eia veipalea soio tegiteu la valalua me hatavivile te la lotu. Mai amuto ge bolehoho la gima, tio eau ge vibalava le amutou la golu ilua ale taritigi: Eau ge abia mutou la ilali te la kalulu mutou, ale tabuli kokovu oio te La Tahalo Uru. Eau ge abi taia mutou isasasa la uati isa bisi ale kakea, la isa mutou isasasa halaba oio vola. La uati alele ge sigirobo amutou, e tahola moli rovi la isala ale La Tahalo Uru kekesia oio vola.
REV 2:18 “Eme ge kekesiale angelo ale baumuli e ekelesia oio la mautu e Taiataira. Eme ge kekesia maie: Ale la merera ale loio te Latu La Tahalo Uru, eia ale la matala karerere mai la havi, la vahala vagari mai la aen ale egite vuloa vikapopo la gold, eia mememe.
REV 2:19 Eau rovi la igogolu tamutou: Amuto suli pepeho e tabarabara mutou; amuto vagari; amuto sau tola la merera taku; amuto igogolu moli, kama silaha. Amuto kama gotigu rivu, amuto golagu moli, amuto vahiliti la lotu. Taritigi pepeho.
REV 2:20 Eala moli la paga isa uru eau hilo vutitia oilo te la pulolou tamutou, eau igo totolo amutou oio vola: e Iesebel, la tavile ale kama kokora, eia oio tamutou, me amuto mata sosolia. Eia veia eia veipala la merera te La Tahalo Uru, eala moli eia visigolo. Eia vimari moli le amutou la gauru ale kama kokora; eia karasuku amutou veia amuto ge mata bulakalaka, osaosa, veia tai amuto ge ali la ilali ale egite vaabila la taua oio vola.
REV 2:21 Sesele, la tavilele, eau kama vilai haria, eala moli eia kama masaga ge gabutatala rivu lou la iruru tetala.
REV 2:22 Tio eau ge bebetolea la ilea soio tetala, eia ge tabuli moli te la mulila. Me amutou ale mai ale mavuta vikapopo leia, eau ge igo totolo amutou, mai amuto kama ge piligi taro la vulovulo la tavile ale kama kokorale.
REV 2:23 E latatula, eau ge bili taro egite. Me oilo vola, la valalua me hatavivile te la lotu, egite ge matagaga veia eau ge mata mulimuli la vulovulovulo mutou me la tia mutou oilo isasasa. Eau rovitia la tilalau tamutou tomi, me eau ge abia mutou la mapa: La vulovulo mutou ale kama kokora, eau ge sivutia, eau ge kolia soio tamutou, ge vilai amutou oio vola.
REV 2:24 Eala moli eau la merera isapolo soio tavu amutou ale kama oilo te la valalua alele. Amutou la valalua e Taiataira ale kama tilimuli la merera tegiteu ele, ale kama vimari te la merera ale tikumu te Satan, eau kama ge vibukeke le amutou la merera ale usu lou, eala moli la paga isa moli eau ge vagari oio vola:
REV 2:25 Amuto ge sau tola vagari moli la merera taku kara eau ge guvi.
REV 2:26 Mai amuto ge bolehoho la gima, amuto ge vagari te la igogolu taku kara ale amuto ge pepeho, eau ge vauru amutou, amuto ge la mulugaluga te la maututula.
REV 2:27 Oio te la lima mutou, amuto ge vagari mai eau, ale e tete vipouau te la igogolu la mulugaluga. Egiteu la valalua ge la golu bulalahu, la vuhula la gata ale eau ge abia mutou, amuto ge kue perepere legiteu oio vola, mai la paga ale kama vagari.
REV 2:28 Eau ge abi taia mutou la matatabu uru e Toko, ale kokovu te la haro, eia goio reretala lou te la maulavi, amuto ge mahuli lou mai ele.
REV 2:29 Mai ere la gavusala ge oio te la ilolo la merera, taritigi eia ge lolo la merera ale la Kalulu La Tahalo Uru veipalea soio te la valalua me hatavivile te la lotu.
REV 3:1 “Eme ge kekesiale angelo ale baumuli e ekelesia oio la mautu e Sardis. Eme ge kekesia maie: Ale la merera ale loio tetala ale sau tola la kalulu La Tahalo Uru ivitu, me la matatabu tai te La Tahalo Uru ivitu. Eau rovi amutou. La valalua veia amuto oio igogolu, egite veia amutou oio mahulihuli, eala moli eau rovia, amuto mai ale pehoti.
REV 3:2 Amuto ge hagolo. Amuto ge baumuli la vagagari mutou bakisi ale soloio, amuto ge vauru loua, amuto souka peho seseleti. Igo tigi, la vuhula eau hiloti la igogolu tamutou, eia kama taritigi agi te la milatalata te La Tahalo Uru.
REV 3:3 Gabutatala rivu lou la merera ale amuto pala lolotia, amuto lagu tavua. Sau tola moli alele, amuto ge vulo la gabutatalala tamutou, amuto ge gabutatala rivu lou tavu La Tahalo Uru. Mai amuto kama masaga ge hagolo, eau ge vilai amutou, eau ge guvi tavu amutou mai la tahalo la pakalila, amuto kama ge rovi la mata la haro ale eau ge guvi oio vola.
REV 3:4 Eala moli isahari soloio tamutou, ale souka igo mumugu la kairobola tegiteu la vulovulo ale kama kokora. Taritigi pepeho, egiteu alele ge kavovou vikapopo leau, la kairobola tegiteu ge kea tataho moli, la vuhula la vulovulo giteu alele, eia koramuli seseleau.
REV 3:5 Sesele, amutou ale bolehoho la gima, eau ge abia mutou la kairobola ale kea lovolovo pepeho, amuto ge kaia. La isa mutou ge tabuli oilo te la buk ale eau kekesiti la isaisa giteu ale ge mahuli oio vola, kama ge sabubu taro loua. Mulimuli, eau ge veipalea soio te La Tahalo Uru me egiteu la angelo tetala, veia amutou taku sesele.
REV 3:6 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru veipalea soio te la valalua me hatavivile te la lotu.
REV 3:7 “Eme ge kekesiale angelo ale baumuli e ekelesia oio la mautu e Piladelpia. Eme ge kekesia maie: Ale la merera ale loio te la tahalo ale maroka sesele. La merera taku, eia sesele. Eau la mulugaluga tamutou, mai moli e suara uru e Devit, ale mamuga tegite tutubu giteu e Iuda alaura. Mai la gauru ale eau ge kopea mutou, isa kama koramulia ge kapi robo loua. Mai tai la gauru ale eau ge kapi roboa, isa kama koramulia ge kope loua.
REV 3:8 Eau rovi la vulovulo mutou. Amuto kama magiri vagari, eala moli amuto so tilimulimuli la vimari taku, amuto sau tola moli la merera taku kara igoie. Eala moli, taritigi amuto ge rovia, eau mai ale kopetia mutou la mata, veia amuto ge tiroro soilo ge abi la vagagarila taku. La mata alele, isa kama koramulia ge kapi robo loua ge magiri robo amutou ovola.
REV 3:9 Egiteu ale oilo te la lotu te Satan, egiteu e Iuda ale rovi la merera te Moses, eala moli egite kama mulimulia, eau ge tao talu egiteu sotalo te la vaha mutou, egite ge togo amutou, egite ge veia amutou la valalua me hatavivile taku, ale eau gogo amutou.
REV 3:10 Amuto mulimuli tigi la tutu tolala taku tavu amutou, ale eau veia amuto umala ge gabutatala egiteu ale viligi amutou. Eala eau ge sigirobo amutou te la imamala ale la iligiligi ge pigi robo la maututula tomi, eia ge tovo lalai la vagagari la valalua me hatavivile tomi.
REV 3:11 Eia kama ge tabaa, eau ge beua soio tamutou. Sau tola la merera ale amuto rovia eia sesele, isa souka visigolo amutou, me amuto ge galo la mapa ale taritigi ale La Tahalo Uru ge loto amutou mai la iroromulila tamutou tavu eia.
REV 3:12 Mai amuto ge bolehoho la gima, eau ge vahiliti amutou mai la sosole la luma te La Tahalo Uru, ale egite igola la uati, amuto ge sau tola la mahulila ale taritigi, vikapopo sesele La Tahalo Uru, amuto ge tetalati. Eau ge kekesi la isa La Tahalo Uru oio te la vovo mutou, eau ge kekesi tai la isa la mautu te La Tahalo Uru, e Ierusalem ale halaba, eia ge loata te la ilo la lage ale La Tahalo Uru popou oio vola. Eau ge kekesi tai soio te la vovo mutou la isa mutou isasasa ale halaba, eau ge toi le amutou.
REV 3:13 Mai ere la gavusala ge oio te la ilolo la merera, taritigi eia ge lolo la merera ale La Kalulu La Tahalo Uru veipalea soio te la valalua me hatavivile te la lotu.
REV 3:14 “Eme ge kekesiale angelo ale baumuli e ekelesia oio la mautu e Laodisea. Eme ge kekesia maie: Ale la merera ale loio tetala ale la vuhu la merera tomi ale sesele. La merera ale sesele moli, eau veipalea. Eau sau tola la golugolu tomi ale La Tahalo Uru vipou egiteu.
REV 3:15 Eau rovi tomiti la igogolu tamutou. Amuto vimarasa moli la igogolu taku, amuto kama piligia veia ge mai ale maigi, eala moli amuto tai kama tivura. Eau masagea veia amuto ge hilovi la gabutatalala tamutou veia amuto ge maigi, uka amuto ge tivura te la igogolu taku.
REV 3:16 Mai alele, amuto kama maigi, amuto kama tivura, eau kamati masaga amutou, eau ge kisu taro sesele amutou.
REV 3:17 La vuhula amuto veia maie ‘Amite tahola la vuliti, amite kama morivava la paga isasa.’ E maura miteu, amuto kama rovia, amuto pou la iloburukola, amuto pou la savelela, amuto kama matagaga, amuto kama mai ale tokoromo, amuto tuga bulalahu moli.
REV 3:18 Tio, mai ale, eau ge suli amutou la gabutatalala taku: Taritigi veia amuto ge mai ale lotoa omai taku la vuliti te la kalulu mutou, ale maroka tataho, mai la gold ale egite gutua, eia mememe. Amuto ge lotoa, amuto ge pou la balavala. Taritigi amuto ge mai ale loto tai omai taku la lavalava ale kea lovolovo, la valalua souka ge hilo amutou ale tuga bulalahu, amuto ge mahela. Amuto ge loto tai la marasin te la mata mutou veia amuto ge matagaga lou, kati ge mata kea.
REV 3:19 Egiteu ale eau gogo egite, eau viteteli egiteu, eau vilai egiteu, mai la vulovulogu. Tio, oio vola, taritigi amuto ge gabutatala rivu lou la vulovulo mutou, amuto ge ilo buruko, amuto ge vuvulo, amuto ge lolo vulai tavuau.
REV 3:20 Hiloa, eau magiri ogala la mata, eau valolohoka amutou veia ge goilo. Mai isa ge lolo la golugu, ge kopeau, eau ge goilo tetala, amila ge pou vikapopo, amila ge vaali tomi.
REV 3:21 Mai amuto ge bolehoho la gima, eau ge veia taritigi amuto ge pou vikapopo leau te la pulolou la mulugaluga, mai sesele lou ale eau pala bolehoho la gima, eau pou vikapopo me tete.
REV 3:22 Mai ere la gavusala ge oio te la ilolo la merera, taritigi eia ge lolo la merera alele, ale La Kalulu La Tahalo Uru veipalea soio te la valalua me hatavivile te la lotu, eia ge gabu tikumua.”
REV 4:1 E Kraist vikara kaluvuti mai ele, eau karutu, eau hilo la mata la ilo la lage, eia oio kopeti. Tio la muluga la golu la tahalo ale eau loloa eia vikarakara, la golula tali mai la vaivai. Eia veia mago “Eme ge goata tavuau, eau ge vahilo leme la pulolou tegiteu la valalua, ale ge sibitala mulimuli.”
REV 4:2 Tio, oio moli ovola, La Kalulu La Tahalo Uru vitivura la tiagu, eau karutu, eau hilo la pulolou te la uru isasa oata te la ilo la lage, la tahalo pou ovola.
REV 4:3 Eau hiloa eia mai la matagaga isa uru. La matagaga uru ele sasima, eia mememe, eia magesegese. La malai la hura, eia grin tataho, eia sivo galili la pulolou uru ele.
REV 4:4 La pulolou te la uru ale savulu lua gete vaa, egite pou galili la pulolou te la uru. Egite ururu ale savulu lua gete vaa, egiteu oio popou oio vola, egite kai la kairobola ale kakea, oata la gama giteu egite tau e vevea ale mememe.
REV 4:5 La sima, eia sibitala loio te la pulolou te la uru. La mori kuraraba, la golu la valalua isahari vikara boboboe. Egiteu la selu ale ivitu, egite magiri mamuga te la lagu La Tahalo Uru. Egiteu la selu ale ivitu ele, egite mai La Kalulu La Tahalo Uru.
REV 4:6 Oio la lagu La Tahalo Uru, eau hilo la mago uru, eia matagaga tataho, eia sasima. Egite la vagari robola te La Tahalo Uru tai ivaa, egite isapolo sesele, egite magiri galili la pulolou te La Tahalo Uru. La mata giteu mapaiti oio te la lagu giteu, oio te la poke giteu tai.
REV 4:7 La muluga la vagari robola eia mai la laion. La vailuala, eia mai la kau ale la togo. La vaitolula, la lagula mai la lagu la tahalo. La vaivaala, eia mai e loauru isasa ale lovolovo.
REV 4:8 Egiteu la vagari robola ale ivaa, la palapala giteu iuolouolo, la mata giteu usu. Egite kama maila te la bilau te la haro me la logo, egite bau maie: La Tahalo Uru, La Uru miteu, eme sekela moli la vagagarila. Taritigi, taritigi, taritigi pepeho soata taume, Tahalo La Marokala! Eme mahuli moli, la kaluvumu ge ouka.
REV 4:9 Egiteu la vagari robola ale ivaale, egite ge bau la bilau la vaisalela soio te La Tahalo Uru, eia ale pou te la pulolou te La Uru, eia ge mahuli moli, la kaluvula ge ouka. Egite ge togoa, egite ge vei tatahoa mai ele.
REV 4:10 Egite ururu ale savulu lua gete vaa, egite ge boru lagu tugu te la lagu La Tahalo Uru, egite ge lotu tavua, la vuhula eia uru, eia mahuli moli, la tapasila ge ouka. Egite ge lotu tavua, egite ge pigi e vevea tegiteu sotalo la lagu La Tahalo Uru, egite ge bau maie:
REV 4:11 Hilage, eme La Tahalo Uru tamiteu, eia koramulia veia amite ge veipala la vaisalela me la tilogo soio taume, la vuhula eme sekela vagari. La vuhula, eme vipou la golugolu tomi. Te la masasagala moli taume, eme visibitala egiteu, egite poutio. Tio la bilau la vaisalela tegite ururu tavu La Tahalo Uru, eia mai alele.
REV 5:1 Eau mata soio, eau hilo La Tahalo Uru eia popou te la pulolou la uru, oio te la limala e gata eia sau tola la pilipi la buk, la kekesi oio te la lagula me la pokela, egite kisi tolea vaka vitu veia umala isa ge lubea ge hiloa.
REV 5:2 Goio, eau hilo isa e angelo ale vagari, eia vikara boboboe maie mago “Ere tahalo ale taritigi veia eia koramulia eia ge loke la buk ale egite kisi tolea, veia eia ge lubea?”
REV 5:3 Eala moli oilo vola isa ouka oata la mori, isa ouka otalo la magasa ge koramulia ge lube la buk alele. Otalo tegiteu ale pehoti, ouka tai.
REV 5:4 Tio, mai alele, eau tali pepeho oio vola, la vuhula isa kama maroka veia ge koramulia ge lube la buk ale egite pipia, ge hilo la kekesi te La Tahalo Uru.
REV 5:5 Eala moli isa tegite ururu ale oio te La Tahalo Uru, eia veiagu mago “Umalati taitali! Male ge, la tahalo isa te la hilile Iuda, eia oio, eia vagari mai la laion, eia ge koramulia gageie! Eia e tubule suara uru e Devit ale pehoti. La uala ale tabuli te la magasa, eia tutuvu halaba lou. Eia sekela moli, eia bolehohoti la gima, eia moli ge loke la buk, ge lubea, ge gigia.”
REV 5:6 Tio, la tahalo ale, eia vikara kaluvu mai ele, eau mata soio, oio kabili tegite la vagari robola ivaa ale magiri galili la pulolou te la uru, te la baa kabili tegiteu ele me egite ururu ale pou galili te La Tahalo Uru, eau hilo la tahalo isa, eia mai sesele e latu la sip, eia kasososo mai ale egite so ubibia. Eia oio magirigiri. Oio te la gamala, la komola ivitu, la irovilala la sip ale la togo, eia vagari. La matala tai ivitu. Me la paga iluale, eia mai sesele la kalulu La Tahalo Uru ivitu, ale eia bahea soio te la maututula veia ge igo la igogolu tetala.
REV 5:7 Tio, e Latu La Sip, eia goio abi la buk loio te la lima La Tahalo Uru e gata.
REV 5:8 Eia abi kaluvua, egite la vagari robola ivaa ale magiri galili La Tahalo Uru, me egite ururu ale savulu lua gete vaa, egite goio boru lagu tugu te la lagule Latu La Sip ale uru ele. Egite ururu tomi isasasa, egite sau tola la paga la bilau ale egite kokuea mai la gita, eia ge tali tataho. Egite ababi tai isasasa la dis ale egite igola la gold, eia mememe, la tita oio vola. Egite ge vitagua, eia ge mali vivili pasi, la sosobula ge pavu mai sesele moli la kilaka te la valalua me hatavivile te La Tahalo Uru, ale goata tetala.
REV 5:9 Tio, egiteu tomi ele boru lagu tugu, egite bau la bilau isa halaba sesele maie: Eme koramulia ge abi la buk ge lubea, la vuhula egite bilitime, la kasosomu puriti, eia loto roboti la valalua me hatavivile, eia rou rivu la valalua me hatavivile te la galegale tomi, te la maratatila tomi, te la merera tomi.
REV 5:10 Eme vagoiloti egiteu la valalua me hatavivile taume te la maratatila te La Tahalo Uru, veia egite ge lotu bibibi tavua, egite ge pou la mulugaluga te la maututula.
REV 5:11 Egite bau kaluvuti, eau mata soio, eau hilo egiteu la angelo, egite magiri galili la pulolou te La Uru ale la vagari robola ivaa me egite ururu magiri galilia, egite baubau. La giligi giteu la taosan salatu savulu robo, egite mapaiti sesele.
REV 5:12 Egiteu la angelo vikara boboboe maie mago: Taritigi amite ge vaisale E Latu La Sip ale egite bilitia. La vagagarila tomi, eia taume. La papaga tomi, eia taume. La mari tomi, eia taume. Eme moli sekela, eme uru. Eme moli sekela, eme maroka. Taume moli la vibalavalavala ale loio te La Tahalo Uru.
REV 5:13 Egite vikara kaluvu mai ele, eau lolo la papaga tomi ale La Tahalo Uru vipou egiteu, egite soko la vikararala. Egiteu ale lovolovo oata te la baa; egiteu ale momou otalo te la magasa; egiteu ale olau la mago; egiteu tai ale pehoti, egite tabuli lotalo te la magasa; egiteu tomi ele vikara maie mago: Etato ge vaisale eia ale pou te la pulolou te la uru, etato ge vaisale tai e Latu La Sip. Tegirua la vibalavala, la marokala, la vagagarila, kara alaura, kara igoie, kara mulimuli, la kaluvula ge ouka!
REV 5:14 Tio, oio moli ovola, la vagari robola ivaa ale magiri galili La Tahalo Uru, egite vikara mago “Eia sesele!” Tio egite ururu goio boru lagu tugu lou, egite lotu tavu La Tahalo Uru.
REV 6:1 Tio eau hilo e Latu La Tahalo Uru ale egite toi lovua veia e Latu La Sip, eia loke la muluga la mota ale kisi robo la buk te La Tahalo Uru. Goio, eau lolo isa tegite la vagari robola ivaa ale magiri galili La Tahalo Uru, la golula tali mai la mori ale kuraraba, eia veiagu mago “Eme gomai!”
REV 6:2 Eia vikara mai ele, eau hilo isa la hos ale kakea, la tahalo ale sae oio vola ababi la gata. La Tahalo Uru abiala e vevea te la uru, tio eia gali soio te la vaubila veia ge sulu la maututula.
REV 6:3 Goio, eau hilo e Latu La Sip, eia loke la ilua la mota ale kisi robo la buk te La Tahalo Uru. Goio, la vailua la vagari robola ale magiri oio te La Tahalo Uru, eia vei mago “Eme gomai!”
REV 6:4 Tio, oio moli ovola, la hos isa lou sibitala, eia magesegese. La Tahalo Uru mata sosoli la tahalo ale sae oio vola veia eia ge igo paua la valalua, egite ge vaubi gegeru sesele. La Tahalo Uru abiala la viso ale uru sesele te la vaubila.
REV 6:5 Tio, e Latu La Sip goio loke lou la itolu la mota ale kisi robo la buk te La Tahalo Uru, eau lolo la vaitolu la vagari robola ale magiri oio te La Tahalo Uru, eia veiagu mago “Eme gomai!”
REV 6:6 Tio, oio moli ovola, eau hilo isa la hos, eia parakurukuru, la tahalo ale sae oio vola eia ababi la skel oio te la limala. Goio, eau lolo la paga isa, eia tali mai la golu la tahalo, eia loio kabili te la vagari robola ivaa ale magiri galili La Tahalo Uru, eia vikara te la vitolola ale ge sibitala, eia veia maie “La ilali amuto marula, la mapala ge tivura, mai la kilisi la mavo isasa, koramuli e kina savulu sasa. Eala moli la mapa la ilali isahari ale malama, eia kama ge goata. Amuto ge lotoa, ge alia, amuto kama ge maru!”
REV 6:7 Goio, e Latu La Sip goio loke la ivaa la mota ale kisi robo la buk te La Tahalo Uru, eau lolo la vaivaa la vagari robola ale magiri galili La Tahalo Uru, eia veiagu mago “Eme gomai!”
REV 6:8 Tio, eau mata soio, eau hilo isa la hos, la vovola tatataroa. La tahalo ale sae oio vola, la isala La Pileho. Mulimuli te la pokela eia mata mai la mautu tegiteu ale pehoti. La tahalo la pileho, eia goio tabari lou egiteu veia egite ge la malosu ivaa ale uru. Tio La Tahalo Uru mata sosoli la tahalo la pileho, veia eia ge sulu la malosu isa uru tegiteu ele. Isahari egite peho la vaubila, isahari, egite peho la ilea, isahari, la laion sulu kokobo egiteu.
REV 6:9 Tio, e Latu La Sip goio loke la ilima la mota ale kisi robo la buk te La Tahalo Uru. La poro ale egite kaoa la kalia ale egite vaabila La Tahalo Uru oio vola, eia oio, me lotalo vola eau hilo la kalulu giteu ale la valalua bili egite. Egite pogati la pileho, la vuhula egite baumuli la merera te Kraist, egite veipala sesele la valolo ale taritigi.
REV 6:10 Egite vikara vagari oata sesele mago “Hilage, La Uru miteu, eme moli matata, eme maroka. Gaisa eme ge koli la kasoso miteu ale sali galeti, eme ge kolia soio tegiteu ale otalo te la maututula. La paga tabaati, eme ge koli amiteu gaisa?”
REV 6:11 Eala moli La Tahalo Uru eia goio abia giteu isasasa la kairobola ale kakea. Eia veia giteu veia egite ge maila muga lou bakisi, kara te e tabarabara giteu isahari lou, la valalua ale kama kokora ge bili egiteu. La giligi giteu tomi ele ge koramuli la giligi giteu ale La Tahalo Uru masagea, eia ge koramuli La Tahalo Uru ge koli egite.
REV 6:12 Goio, e Latu La Tahalo Uru goio loke la iuolo la mota ale kisi robo la buk te La Tahalo Uru. Eau mata soio, eau hilo e malugulugu uru eia umu. La mata la haro, eia vulo parakukuru mai la kamilato. La mata la taio vulo magegese mai la kasoso.
REV 6:13 Egiteu la matatabu oata te la lage paruparu sotalo mai la keme ale talulu la hipu.
REV 6:14 Eau ga mata soata, la mori kokovuti mai la kuriti ale egite pipia. Egite la oluolu me la goegove, egite tasuku vulovulo.
REV 6:15 Tio egiteu la ururu tomi goio taga pepeho, egiteu la mulugaluga, egiteu la tahalo la vuliti, egiteu la mulugaluga tegite ami, la valalua ale ururu, egiteu la valalua bulalahu tai, egite tomi ele hele kokovu soata la goegove.
REV 6:16 Egite tola soata te la goegove mago “Tarobi sotalo, pigi robo amiteu te la lagu La Tahalo Uru ale pou la pulolou te la uru. Pigi robo tai amiteu te la igototolola te Latu La Sip tetala.
REV 6:17 La vuhula, la haro sibitalati ale egira ge vahiliti la igototolola tegirua, egira ge koli la iruru somai tamiteu. Ere ge koramulia ge magiri robo la lagu girua?”
REV 7:1 Goio, eau hilo egiteu la angelo ivaa, egite magiri te la igaga la maututula, isa te la igagala isa, isa te la igagala isa, goio te la igaga la maututula tomi ivaa mai ele. Egite magiri robo la mata la lolovi tomi, la galagala la obobu kati tali karese bakisi, la mago malilo tataho, la babaa tomi tabou moliti, la lolovi ouka.
REV 7:2 Eala moli eau goio hilo e angelo isa lou eia lomulimuli, eia ababi la gome te la limala veia ge tau la irovilala soio tegiteu ale maroka, mai la irovilala te La Tahalo Uru, eia sekela moli mahuli. Eia goio tola soio tegiteu e angelo ivaa ale magiri robo la lolovi, La Uru eia tabariti egiteu veia egite ge igo gegeru la maututula te la lolovi ale uru, ge igo gegeru tai la mago, eia goio tola soio tegiteu, eia veia giteu mago
REV 7:3 “Amuto umala muga ge igo gegeru harari la magasa, la mago me la hohoi te la lolovi uru tamutou, amuto magiri robo mugea! Amite ge tau muga la irovilala soio te la varu giteu ale egiteu te La Tahalo Uru sesele.”
REV 7:4 Goio, eau loloa eia veipala la giligi giteu ale egite ge abi la irovilalale, egite 144,000, egite loio te la hilile Israel tomi.
REV 7:5 Ale loio te la hilile Iuda, la valalua me hatavivile 12,000 egite abi la irovilala; ale loio te la hilile Rupen, la valalua me hatavivile 12,000 egite abi la irovilala; ale loio te la hilile Gad, la valalua me hatavivile 12,000 egite abi la irovilala;
REV 7:6 ale loio te la hilile Aser, la valalua me hatavivile 12,000 egite abi la irovilala; ale loio te la hilile Naptali, la valalua me hatavivile 12,000 egite abi la irovilala; ale loio te la hilile Manasa, la valalua me hatavivile 12,000 egite abi la irovilala;
REV 7:7 ale loio te la hilile Simion, la valalua me hatavivile 12,000 abi la irovilala; ale loio te la hilile Levi, la valalua me hatavivile 12,000 egite abi la irovilala; ale loio te la hilile Isakar, la valalua me hatavivile 12,000 egite abi la irovilala;
REV 7:8 ale loio te la hilile Sebulon, la valalua me hatavivile 12,000 egite la irovilala; ale loio te la hilile Iosep, la valalua me hatavivile 12,000 egite abi la irovilala; ale loio te la hilile Beniamin, la valalua me hatavivile 12,000 egite abi la irovilala.
REV 7:9 Tio, eau lolo kaluvuti la merera te angelo mai ele, eau ga mata soio, eau hilo egiteu la valalua me hatavivile mapaiti egite magiri te la lagule Latu La Sip, te la lagu La Tahalo Uru tai, eia oio popou te la pulolou la uru. Isa kama koramulia ge gigi tomi egiteu ele. Egiteu te la maututula tomi, te la maratatila tomi, te la merera tomi tai omai te la magasa. Egite kisi la lavalava ale kea tataho, egite vitilalia la veveve la liu.
REV 7:10 Egite goio tatola oata maie: La Tahalo Uru tegatou, eia moli ge vimahuli etatou, egira me Latu La Sip tetala. La Tahalo Uru moli sekela eia pouti te la pulolou la uru.
REV 7:11 Goio, egiteu la angelo ale oio magiri galili la pulolou la uru tetala, egiteu la mulugaluga tai, la vagari robola ivaa tai ale magiri oio te la pulolou te La Tahalo Uru, egite tomi ele goio boru lagu tugu, togoa, egite lotu tavua.
REV 7:12 Egite tatola maie: Amen! Taritigi pepeho soata te La Uru! Etato vaisalea, eia sekela la vuhu la mari. Etato vei tatahoa, etato togoa, eia sekela vagari. Etato ge vaisale molia, la kaluvula ge ouka. Amen!
REV 7:13 Goio, la mulugaluga isa goio tahiau mago “Mave, eme rovi egiteu ale lavalavala la kulikuli ale keakea? Egiteu ere? Egite love?”
REV 7:14 Goio eau koliala mago “Tahalo uru, eau ale kama rovia, eala moli eme soioge rovia.” Goio, eia vei matagageagu mago “Egiteu alele la valalua me hatavivile ale mahuli utu te la viligila ale uru. Egite vuhi marokati la lavalava tegiteu, oio te la kasosole Latu La Sip, egite pouti te la mautu la matagaga tetala.
REV 7:15 Egite magiri moli te la lagu La Tahalo Uru, eia popou la pulolou la uru tetala. Egite lotu tavua te la haroharo me la logologo tomi oio te la luma la lotu tetala. Eia ge sigirobo egiteu.
REV 7:16 Egite kati ge gabu la vitolola, la malehula tai ge ouka. Egite kati ge ligi la haro ale uru, eia paga titili pepeho.
REV 7:17 La vuhula e Latu La Sip, eia magiri te la mata la pulolou la uru te Tamala, eia ge vibaumuli egiteu. Eia ge tata egiteu soio te la babaa ale rorovi tataho, la lalalu oio vola, La Tahalo Uru eia ge sabubu la masasali giteu mai egite ge tali la iloburukola.”
REV 8:1 Goio, eau hilo e Latu La Sip eia lube la ivitu la mota ale kisi tola la buk te La Tahalo Uru. Eia lube kaluvua, isa kati vikara oata te la ilo la lage, goio tabaa bakisi la mautu tabou moliti.
REV 8:2 Tio eau mata soio, eau hilo egiteu la angelo ivitu ale magiri te la lagu La Tahalo Uru, egite ababi la vaivai te la lima giteu.
REV 8:3 E angelo isa lou eia ababi la plet ale mememe, eia goio magiri te la mata la poro ale egite selu la bulu la obu ale mali vivili ovola, isa goio sigili usuala la bulu la obu, veia eia ge magiri te la poro la lotu, eia ge selua, la sosobula ge pavu soata vikapopo la kilaka tegiteu la valalua me hatavivile te La Tahalo Uru.
REV 8:4 Goio la sosobu goata vikapopo la kilaka tegiteu ele, loio te la plet ale e angelole eia ababia te la limala, eia selu la bulu la obu ovola.
REV 8:5 Goio eia abi la plet tetala, eia tau la kavisosoko la havi ovola, eia goio pigia sotalo te la maututula. La havi goio paru moli sotalo la magasa, la mori goio kuraraba, la sima sima, e malugulugu uru umu.
REV 8:6 Goio, egiteu la angelo ivitu goio raragi veia ge pusu la vaivai tegiteu.
REV 8:7 Goio la mulugala pusu la vaivai tetala, la hura la uatati eia pu vagari loata. La havi me la kasoso tai goio sibitala loata te la mori, gotalo te la magasa. La gale la magasa isa uru sesele, eia tululu, la gale la hohoi tai ale uru pepeho, la gaeke tai la galela isa uru kaha.
REV 8:8 Goio, la iluale angelo pusu la vaivai tetala, la gale la magasa isa uru ale mata mai la olu pati ale uru makapipila sesele, eia karerere, La Tahalo Uru pigia sotalo la mago. La gale la mago isa uru eia goio vulo mai la kasoso.
REV 8:9 La iaia me egiteu la golugolu tomi ale mahuli olau la mago, egite usu peho, egiteu e sipi tai ale polopolo olau te la tia la utu, egite usu vilua.
REV 8:10 Goio, la itolule angelo pusu la vaivai tetala, tio La matatabu isa uru, eia karerere mai la selu, eia goio paru loata te la ilo la lage, eia gotalo la magasa, eia igo gegeru la lalalu usu.
REV 8:11 La isa la matatabu alele, e Ama, eia igo gegeru la lalalu usu, egite kati maigi egite mamasiti. Egite la valalua me hatavivile mapaiti liua, la vuhula egite la lalu oukati, egite goio peho, la vuhula la lalu kati taritigi, eia ama.
REV 8:12 Goio, la ivaale angelo pusu la vaivai tetala, La Tahalo Uru goio bili mate la mata la haro, la galela isa mate, eia bili mate tai la gale la mata la taio isa, egite la matatatabu tai usu eia bili mate egiteu. Te la haro, la paga maligoma, eia tabaa sesele, te la logo tai la taio kamati paga tabaa.
REV 8:13 Goio, eau ga mata soio, eau lolo isa uru e loauru eia lovolovo oata, eia tatola maie “Iauo, iauo, maura miteu la valalua me hatavivile, egite ge vilua ge! La vuhula egiteu la angelo taho tolu soloio, egite raragiti veia ge pusu la vaivai tegiteu, la viligila ovola ge kama kokora viruru!”
REV 9:1 Goio, la ilimale angelo, eia pusu la vaivai tetala. Eau hilo isa e angelo mai la matatabu, eia boru loata te la ilo la lage, eia gotalo te la magasa, La Tahalo Uru eia abiala la ki ale ge kope la mata la lulu ale gotalo te la ilo la magasa, la igagala ouka.
REV 9:2 E angelo goio kope soilo, la sosobu la havi uru goio sibitala loilo vola, eia pavu soata, eia pigi robo la mata la haro, la mori eia maligoma.
REV 9:3 Egiteu e komareburu mapaiti lovo loata te la sosobu uru ele, egite gotalo pigi robo la magasa, La Tahalo Uru visibitala egiteu, egite mai e komakilu, egite ge ligiligi la valalua me hatavivile.
REV 9:4 Eia veia giteu veia egite umala ge ali taro la gaekeke me la galagala la obobu, eala moli egite ge ligi moli egiteu ale kama tahola la irovilala te La Tahalo Uru oio te la varu giteu.
REV 9:5 La Tahalo Uru kama abia giteu la vagagarila koramuli egite ge bilibili, ouka, eia baha moli egiteu veia egite ge viligi la valalua me hatavivile la taio ilima, ge kaluvu lou. Eala moli la iligiligi tegiteu, eia uru mai la iligiligile komakilu.
REV 9:6 Te la taio ilimale, la valalua me hatavivile ge tali tavu La Tahalo Uru veia egite ge peho taro la iligiligi alele. Egite ge masagea veia egite ge peho, eala moli ouka, egite ge mahuli moli.
REV 9:7 Egiteu e komareburu, egite mata mai la hos ale egite galiau robola la kulikuli la aen te la vaubila, egite lagu maua gegeru pasi. E vevea oio te la gama giteu isasasa, eia mememe. La lagu giteu eia mai moli la lagu la tahalo.
REV 9:8 La ivu giteu eia malau mai la ivu la tavile ale vovo kakea. La togo giteu eia siki mai la togo la laion.
REV 9:9 La gale la aen oio tegiteu isasasa, eia tabuli robo la magoro giteu. Egite lovo, la tilali la palapala giteu eia tali magugulu mai la tilali la vaha giteu la valalua la vaubi, egite gali te la mautu isasa.
REV 9:10 La kiu giteu tai oio, la iririla oio vola, eia mai sesele la kiule komakilu, koramuli egite ge ligiligi la valalua me hatavivile oio vola, la taio ge ilima.
REV 9:11 La mulugaluga tegiteu, e angelo moli te la lulu ale gotalo te la ilo la magasa, la igagala ouka. E angelole, la isala te la merera e Hibru, e Abidon, me te la merera e Grik la isala e Apolion, la masovala “la tahalo la bilili”.
REV 9:12 Tio, la muluga la iloburukola eala kaluvuti ele, ilua lou soloio.
REV 9:13 Goio, la iuolole angelo eia pusu la vaivai tetala. Eau lolo la golule isa eia loio tegiteu la silalau la poro ivaa ale egite tokoromo tatahoa, egite oio te la vai la poro te La Tahalo Uru, eia mememe, egite gutu la vaabila oio vola, eia magiri moli te la lagula.
REV 9:14 La golulale eia goio vikara soio te la iuolole angelo ale ababi la vaivai, mago “Baha taro egiteu la angelo ivaa ale eau magiri robo egiteu oio te la harare la lalu uru e Iupretis.”
REV 9:15 Tio oio moli ovola, egiteu la angelo ivaa La Tahalo Uru raragiti egiteu veia te la haro moli alele egite ge igo gegeru la maututula, egite goio gali soio veia egite ge bili la valalua me hatavivile mapaiti. E ami ale uru sesele loio sibitala, egiteu tomi sae te la hos tegiteu isasasa,
REV 9:16 la giligi giteu la milion salatu lua, egite toi la giligi giteu mai ele, eau loloa.
REV 9:17 Te la hililo taku alele eau hiloa veia egiteu ale sae te la hos, egite mata maie: La gale la aen, egite kisia te la beho giteu, eia tabuli robo la magoro giteu isasasa. La aen tegiteu ele eia halala mai la havi, eia kakisa, eia ialalo tai. La gama giteu la hos tegiteu ele, eia mai la gama la laion. La havi, la sosobu me la malia la tivura, eia sibitala loilo la hare giteu.
REV 9:18 La irovilala itolu ele, eia bili taro egiteu la valalua me hatavivile usu pepeho bakisi, mai la havi, la sosobu me la malia la tivura ale loio la hare giteu la hos tomi.
REV 9:19 La vagagari giteu eia oio te la gala giteu ale loio te la hare giteu ele, oio te la kiu giteu tai, la vuhula la kiu giteu oio, eia mai e taive, la gamala oio, koramuli egite ge totolo veia ge igo gegeru la valalua me hatavivile.
REV 9:20 Tio, egiteu la viluala tomi alele sibitala, eala moli la valalua me hatavivile ale mahuli utu, egite kama masaga ge gabutatala rivu lou la iruru tegiteu, mai la lotu tavu la taua, egite kama masaga tai ge piligi la lotu tavu la puigolo ale egite puila la lima giteu, te la golu tomi mai la gold, la silva, la obu, me la uati. Egiteu la papagale kama mahuli veia egite ge mamata, ge lololo, ge tatuga, ouka.
REV 9:21 Eala moli egite la valalua me hatavivile kama masaga tai veia ge piligi la vulovulo giteu mai la bilili, la savula, la maholo, la mata bulakalakala, me la pakalila tai.
REV 10:1 Tio, mulimuli ovola, eau hilo e angelo isa uru lou, eia vagari pepeho, eia sivo loata la mori. La lavalavala tetala la tuluvu la mori, e vevea tetala la malai la hura moli. La tirarola sima tataro mai la haro. La vahala ilua magiri mai la sosole ilua, eia karerere.
REV 10:2 Oio te la limala isasa eia ababi la buk isa bisi. Eia goio tau la vahala e gata soio, eia toa olau la mago. Goio, eia tau la vahala e meru soio, eia toa oilo la magasa.
REV 10:3 Eia goio tola boboboe, la golula tali mai la laion ale girerere. Eia goio vikara kaluvuti mai ele, la mori goio tali kuraraba vaka vitu,
REV 10:4 eia kama tali kuraraba bulalahu, la masovala oio. Tio eau veia ge kekesi tola la merera alele, eala moli la golu La Uru eia tali loata te la mori, eia veiagu maie “Eme umala ge veipala la merera te la mori eia tali kuraraba vaka vituti ele, umalati kekekesia.”
REV 10:5 Goio, e angelo ale eau hiloa eia magiri la vahala isa olau la mago, la vahala isa oilo la magasa, eia goio vituri la limala e gata soata te la mori, eia goio vikara.
REV 10:6 Eia toi la merera ale tikumu sesele oata te La Tahalo Uru, eia moli sekela mahuli, la tapasila ouka. Eia moli sekela vipou la mori, la magasa me la mago, vikapopo la golugolu tomi oilo vola, eia moli sekela vipou egiteu. Te la isa La Uru moli mai ele, e angelo goio vikara, eia toi la merera ale tikumu, mago “La imamala koramuliti, umalati pou tali lou isa la paga.
REV 10:7 Mai la ivitule angelo ge pusu la vaivai tetala, tio la masova la gabutatalala tomi te La Tahalo Uru eia pala tabuli kokovu, eia kama matagaga sesele, eia ge palala, la merera tomi tetala ge puru, mai eia veipalatia oio tegiteu la bilalaha tomi tetala.”
REV 10:8 Goio, eau lolo lou la golu La Uru eia tola loata te la mori, eia veiagu mago “Eme tuga soio, eme ge abi la buk ale oio te la limale angelo ale magiri te la mago me la magasale, la buk ale eia oio kopeti, eme goio abia.”
REV 10:9 Tio eau goio tuga soio, eau goio tahi e angelo veia eia ge abiagu la buk bisi ele, eia goio koli la merera taku mago “Eme abia, eme ge alia. Eia ge tabuli gegeru oilo la tiamu mai ale malipiriti, eala moli eia ge malama sesele te la haremu, eia ge malama pepeho mai la magu.”
REV 10:10 Goio eau loloa mai ele, eau abi la buk loio te la limale angelo, eau sogomua, eia malama pepeho, mai sesele la magu, eala moli eia gotalo tabuli oilo te la tiagu, eia malagegeru.
REV 10:11 Tio eau goio ali kaluvua mai ele, e angelo goio veiagu mago “La Tahalo Uru ge abiamu isa lou la vikararala tetala, te la viluala ale ge sibitala tavu egiteu la valalua me hatavivile te la maratatila tomi oio te la galegale tomi, soio tai tegiteu la mulugaluga tegiteu ele. Eia ge veiamu la merera tetala ovola, eme ge veipalea soio te la valalua me hatavivile tomi, egite ge loloa, eme kama ge tou.”
REV 11:1 Goio, mulimuli ovola, La Tahalo Uru eia abiagu la viro isa te la ilova la malau la luma, eia veiagu mago “Eme ge tuga soio, eme ge lova la malau la luma taku, la malau la poro la gulutu la kalia tai oilo vola, gigi tai egiteu ale oilo lotulotu ovola.
REV 11:2 Eala moli umala eme ge lova la malaula me la bola la baa ale logala te la luma taku ale loilo te la sesega ale sesega roboa, la vuhula la baa alele, egite la valalua la maligoma taholatia, eia kamati taku. Egite oio volu te la mautu la marokala taku, e Ierusalem. Egite ge toa mumugu la mautu taku la taio ge savulu vaa gete lua.
REV 11:3 Eala moli eau ge vipou la bilalaha taku taho lua, egira ge baharu te la iloburukola, egira ge veipala la merera taku oio te la mautu taku ele, kara la logo ge salatu savulusa gete lua, savulu uolo lou.”
REV 11:4 Egira taho luale, egirua mai la obu la oliv ilua me la selu ilua ale magiri te la lagu La Tahalo Uru, eia La Uru te la maututula tomi.
REV 11:5 Mai isa ge tovo lalaia veia ge igo gegeru egirua, la havi ge raga loio te la hare girua, eia ge selu taro egiteu ale gima egira. Mai isa ge masagea veia ge igo gegeru egirua, eia ge peho te la vagagari la havi ele.
REV 11:6 La vagagari girua eia koramulia ge magiri robo la mori, la hura kati ge pu te la imamala ale egira ge veipala la merera te La Tahalo Uru ovola. Egira koramuli taia veia ge vulo la lalu eia ge sibitala mai la kasoso, egira ge visibitala tai la ilea me la iligiligi tomi mai te la masasagala moli tegirua.
REV 11:7 Mai mulimuli la veipalala tegirua ge kaluvuti, la bolo isa uru ale kama kokora sesele, eia ge hiliti lotalo te la lulu ale la igagala ouka, la bolo alele egite toia La Bolo Ale Uru. Eia ge vaubi soio tegirua la bilalaha te La Uru, eia ge bolehoho egira, eia ge bili taro egirua.
REV 11:8 La vovo girua ge tabuli bulalahu moli te la tia la mautu uru ale etato toi lovua veia “e Sodom” me “e Gipto”, eia la mautu la vareagila. Oio tai te la mautu alele, egite pala bili La Uru girua, egite katua oata te la tauvalautu, eia peho.
REV 11:9 La vovo girua ge tabuli te la tia la mautu la logo ivaa. Eala moli egiteu ale loio te la igaga la magasa tomi, mai la valalua te la maututula tomi, te la merera tomi me te la maratatila tomi tai, egite sibitala oio, egite mata soli taro moli la vovo girua, egite kama masaga ge ulai tigi egirua.
REV 11:10 La valalua me hatavivile tomi usu te la maututula, egite ge sagege, egite ge vararapu baololi egiteu, la vuhula egite pala ligi te la karasusukula tegira te la merera te La Tahalo Uru, eala egite sagege pepeho te la pileho girua, la vuhula egira kati ge kaharea loua giteu.
REV 11:11 Eala moli eau hiloa egira tabuli mai ele la logo ivaa, goio la lolovi la hare La Tahalo Uru goilo tegirua, egira goio mahuli lou, hiliti, tio egite la valalua taga gegeru lalahu.
REV 11:12 Egira goio lolo la golule isasa eia tola vagari sesele loata te la mori, eia veia girua mago “Amula ge gomai, amula ge goata!” Goio, la tuluvu la mori isa uru goio pigi robo egirua, egira goata la mori oilo vola, egite la gima tegirua magiri hare palala moliti.
REV 11:13 Oio moli ovola, e malugulugu isa uru goio sibitala, eia umu la mautu alele, la lumaluma usu pepeho tagogoro, la valalua me hatavivile salatu savulu vitu peho, egiteu ale mahuli utu, egite taga pepeho sesele, egite goio vaisale La Tahalo Uru oata la mori.
REV 11:14 Tio, ale la ilua la iloburukola eia kaluvuti ele, la itolula eia oio hagagaviti.
REV 11:15 Goio, la ivitule angelo eia pusu la vaivai tetala, la golu giteu la angelo isahari tola loata te la ilo la lage, egite tola vagari maie mago “La maututula kati te Satan, La Uru taholati egiteu, egira me Latula e Kraist La Uru, eia ge mamuga la maututula, la vibaumulila tetala ovola eia kama ge kaluvu.”
REV 11:16 Goio, egite la uru savulu lua gete vaa, egite oio pou te la pulolou la uru tegiteu oio te la lagu La Tahalo Uru, egite loloa mai ele, egite boru lagu tugu, egite lotu tavua.
REV 11:17 Egite vikara maie mago: Amite vei tataho seseleme, La Tahalo Uru, eme sekela vagari. Eme mahuli palati, eme mahuli igoie, la kaluvumu ge ouka. Amite vei tatahome, la vuhula eme hilititi, eme sokotia veia ge mamuga sesele la maututula.
REV 11:18 La valalua la maligoma, egite igo totolome, eala moli ale igoie la imamala la igototolola taume eia guviti. Ale la imamala sibitalati ale eme ge vimahuli rivu lou egiteu ale pehoti, eme ge mata muli la vulovulo giteu. Ale la imamala sibitalati ale eme ge vibalava egiteu la bilalaha taume, vikapopo legiteu la valalua me hatavivile tomi ale togo la isamu. Egiteu ale la tahalo bulalahu, egiteu tai ale ururu, eme ge vibalava tomi egiteu. Ale la imamala ale eme ge igo gegeru egiteu ale igo gegeruti la vipoupoula taume ale eme vipoua.
REV 11:19 Goio, egite la uru vikara kaluvu mai ele, eau goio hiloa veia la mata la luma la lotu te La Tahalo Uru oata te la ilo la lage, eia oio kope moli, oilo vola eau hilo la tilalau la golugolu ale maroka te la lotu tetala. Goio la sima sima vevei la baa, la mori tali kuraraba, e malugulugu umu, me la hura la uati eia pu vagari loata.
REV 12:1 Goio, la irovilala isa uru goio sibitala oata te la mori, eau hilo la tavile isa uru, la lavalava tetala eia la matagaga la haro moli, eia magiri loata te la taio, la matatabu savulusa gete lua tabuli oata te la gamala mai e vevea tetala.
REV 12:2 Eia savulatu, eia oio kasisisia, roberobe.
REV 12:3 Tio, goio, la irovilala isa uru lou sibitala oata te la mori, eau hilo isa uru e bogea, eia magegese, la gahola ivitu, la komola tai savulu sasa oio, e vevea tai ivitu mai la irovilala te la mulugaluga, egite oio te la gamala tomi isasasa.
REV 12:4 La kiula, eia malau. Eia goio valia soio, eia vali taro egiteu la matatabu usu, egite paru loata te la ilo la lage, gotalo te la magasa. Eia goio magiri te la lagu la tavile uru, veia mai eia ge pigo, eia ge sogomu e latula, eia kama ge mahuli tabaa.
REV 12:5 Goio, la tavile goio pigo e latula hatamale, eia ge muga la maututula te la galegale tomi, eia ge sau tola la irovilala te la mulugaluga oio te la limala, mai la gata isa uru. Eala moli egiteu la angelo guvi, egite goio abi taro le bogea e latula bisi ele, egite goio bokoa soata te La Tahalo Uru eia oio popou te la pulolou la uru tetala.
REV 12:6 Eala moli la tavile uru, eia goio hele soata la hohoi, eia goio tari kokovu oio te la baa isa La Tahalo Uru eia raragitiala, veia egiteu la angelo ge baumulia la logo ge salatu savulusa gete lua, savulu uolo lou.
REV 12:7 Goio, la vaubila uru sibitala oata la ilo la lage. E Maikel vikapopo legiteu la angelo tetala, egite vaubi soio te bogea, eia vaubi rivu lou soio tegiteu vikapopo legiteu la angelo tetala ale kama kokora,
REV 12:8 eala moli egiteu ale te Maikel egite bolehoho egiteu ale te bogeale, egite basimuli taro egiteu loata te la ilo la lage.
REV 12:9 E bogeale, eia e Satan moli, etato rovia eia koramulia ge sibitala mai e taive tai. E Satan ele, eia palati te la silokola eia la tahalo la visigologolola ale visigolo la valalua me hatavivile te la maututula tomi. Goio, egite lao tolea, egite pigia sotalo te la maututula, vikapopo legiteu la angelo tetala, egite koratio.
REV 12:10 Goio, eau lolo la golu la tahalo isa uru, eia tali loata te la mori, eia vikara maie mago “Igoie, la vimahuli, la viputumulila, me la vagagarila te La Tahalo Uru tegatou eia sibitalati. Igoie eia veipalatia la vagagarila te La Riau tetala e Kraist. La vuhula, la tahalo la visigologolola ale magiri te la lagu La Tahalo Uru tegatou, eia kakaua giteu e tabarabara gatou te la haroharo tomi, la logologo tomi, kama maila, e Satan ele, egite pigitia sotalo, eia kaluvuti.
REV 12:11 Egiteu e tabarabara gatou, egite bolehohotia, la vuhula la vagagari la kasosole Latu La Sip eia oio tegiteu, la merera tai te La Uru ale sesele tomi moli eia oio tegiteu ele, egite veipala molia. Egite raragi moli veia ge sugu taro la mahulila tegiteu, egite kama taga la pileho.
REV 12:12 Taritigi la mautu ale oata la ilo la lage eia ge volu sesele la sagegela, eala moli maura miteu ale pou otalo te la maututula, la vuhula La Gima eia gotaloti tamutou! La tiala volu sesele la igototolola ale uru, eia oio hate mamasi pepeho, la vuhula eia rovitia veia la imamala tetala eia hagagaviti ge kaluvu.”
REV 12:13 Goio, la merera alele eia kaluvu, eala moli e Satan eia hilotia veia egite pigitia sotalo la magasa, eia goio basimuli la tavile ale pigoti e latula hatamalele.
REV 12:14 Eala moli La Tahalo Uru goio tau la palapala la tavile ilua ururu sesele, mai la palapalale loauru, veia eia ge lovo soio te la baa ale eia raragitiala soata la hohoi, veia eia ge baumuli molia oio vola, la leavala ge itolu, la taio isahari lou, e bogea kama ge sivutia.
REV 12:15 Goio, e Satan, eia lua taro la lalu uru, eia sali mai la silali, eia veia ge sali taro la tavilele.
REV 12:16 Eala moli la magasa eia suli la tavile, eia goio mapola eia sogomu la lalu ale e bogea lua taroa.
REV 12:17 Goio, e bogea igo totolo pepeho sesele la tavile, eia goio gali soio veia ge vaubi soio tegiteu e latatula isahari lou, mai egiteu ale roromuli la merera te La Tahalo Uru, egite sau tola la vimari te Iesus.
REV 12:18 E bogea veia eia ge vaubi moli soio tegiteu ele, eia goio magiri olau la parava, eia mamata.
REV 13:1 Goio, eau ga mata soio, eau hilo la bolo isa uru eia hiliti lotalo te la mago. La komola savulu sasa oio, la gahola ivitu, e vevea savulu sasa mai la irovilala te la mulugaluga, egite oio te la komola isasasa. Oio te la gahola ivitu ele, egiteu la valalua te Satan egite kekesiti la isaisa La Tahalo Uru isahari, La Bolo eia veia ge abi la isa La Tahalo Uru veia ge vauru rivu lou eia ovola.
REV 13:2 Eala moli la bolo alele, eau hiloa eia mai sesele e pusi ale uru, eia vuraga, egite toila e lepat. La pulila ivaale, eia mai la pulile bear. La harela, eia mai sesele la hare la laion. E bogea ale eau so hililoa, eia goio sugu taroa la bolo ale kama kokorale la vagagarila tomi, veia eia ge muga la maututula.
REV 13:3 La gamala isa eia kakali, eia ga mata mai egite isa barautu gegerutila la viso, eala moli eia mahuli utu, la kakalila uru ele eia mavuti. La valalua me hatavivile te la maututula tomi, egite hiloa mai ele, egite karutu sesele, egite togoa, egite goio mulimulia.
REV 13:4 Egite goio lotu tavu e bogea, la vuhula eia abitia La Bolo la vagagarila ale uru seselele. Egite lotu tavu tai La Bolo, egite vitahi baoli legiteu mago “Ere ge vagari mai La Bolo, ere ge koramulia ge vaubi soio tetala? Ge ouka ge!”
REV 13:5 Tio, La Tahalo Uru eia abia La Bolo la baa mai la taio savulu vaa gete lua veia eia ge pou la mulugaluga ovola, veia eia ge kau tavuala la isa La Tahalo Uru veia eia ge vitahobo la isa La Tahalo Uru soio tetala.
REV 13:6 Tio mai ele, eia goio soko la gililo soio te La Uru, eia vikara bara tai soio te la mautu tetala, vikapopo tai legiteu ale mou ovola.
REV 13:7 Eia la vagagarila oio ale ge vaubi soio tegiteu la valalua me hatavivile te La Tahalo Uru, veia eia ge bolehoho egiteu. Eia muga la maututula tomi, la galegale tomi, la maratatila tomi, me la mererera tomi tai, eia muga ovola.
REV 13:8 Egite tomi ge lotu tavu La Bolo, mai egite tomi ale la isaisa giteu kama tabuli oilo te La Buk La Mahuli te Latu La Sip, mai eia kekesi tolati la isa giteu tomi ale tetala, palati te la vipoupoula, eia tabuli te La Buk tetala, karati igoie. Egiteu ale la isaisa giteu kama oilo te La Buk, mai egiteu tomi ale kama rovi e Kraist, egite ge lotu tavu La Bolo.
REV 13:9 Mai ere la gavusala ge oio te la ilolo la merera, taritigi eia ge lolo la merera te La Tahalo Uru te La Buk Tabu Ale Pala, eia veia maie
REV 13:10 “Mai la valalua me hatavivile te La Tahalo Uru ale eia visati legiteu veia la valalua la gima ge vagoilo egiteu te la luma la kilisi, koramuli egite ge goilo moli ge pou te la kilisi. Mai egiteu tai ale La Tahalo Uru eia visati legiteu veia egite ge peho te la gata, egite ge poga tavu sesele la viluala te la gata, egite ge peho.” Eala, mai la valalua me hatavivile te La Tahalo Uru ge hiloa veia la iligiligi me la vaubila eia sibitalati, mai la merera alele eia veitia, tio taritigi egite ge magiri vagari, egite ge tau moli la ilo giteu soio te Kraist.
REV 13:11 Goio, eau ga mata lou soio, eau hilo la bolo isa lou, eia hiliti lotalo la magasa. La komola ilua oio te la gamala, mai la komole latu la sip isasa, eala moli eia ababa lou la isala.
REV 13:12 Eala moli la bolo alele, la muluga la bolo eia sugu taro soio tetala la vagagarila tomi veia eia ge magiri te la mulila, eia ge muga la maututula mai ele, veia eia ge vagari tavu moli la valalua me hatavivile tomi veia egite ge lotu tavu La Bolo Ale Uru, eia pala viluati, eia mahuliti lou.
REV 13:13 La ilua la bolo eia goio igo la irovilala isahari, mai la golu la karutula, eia visibitala la havi loata te la mori, eia gotalo te la magasa, egite la valalua hiloa.
REV 13:14 Tio egite hiloa mai ele veia eia igoti la golu la karutula, mai te la vagagari La Bolo Ale Uru, tio eia tutugolo egiteu la valalua me hatavivile tomi otalo te la magasa mai ele, eia veia giteu veia egite ge vahiliti isa uru la puigolo mai la halulu La Bolo Ale Uru, eia pala vilua, eia mahuli utu. Eia veia egite ge pui la puigolo aleie, ge vahilitia, egite ge vaisale La Bolo ovola.
REV 13:15 Goio, egite igo molia mai eia veitia giteu ele, La Tahalo Uru eia mata sosolia veia la ilua la bolo ge vimahuli la puigolo, eia goio igoa mai ele, la puigolo la bolo eia goio hiliti, eia soko la vikararala. Egiteu ale kama lotu tavua, eia goio kapi robo egiteu veia la valalua tetala ge bili taro egite.
REV 13:16 Eia baha egiteu la bilalaha tetala veia egite ge tutulu la irovilala tetala soio te la valalua me hatavivile tomi, mai egiteu ale uru, egiteu ale la tahalo bulalahu, egiteu la tahalo la vuliti, egiteu la bilalaha bulalahu moli tai. Eia veia egite ge tau la irovilala tetala soio te la lima giteu la valalua me hatavivile tomi e gata, mai ge ouka, egite ge taua soio te la varu giteu.
REV 13:17 Tio egite usu tahola la irovilala te La Bolo oio te la vovo giteu, mai la irovilala tetala, mai ge ouka, ge la isala sesele. Mai isa la irovilala ge ouka oio te la vovola, eia kama koramulia ge lotoloto la papaga.
REV 13:18 Eala moli la irovilala te la isala eia isa la pigiveila veia mai egiteu la valalua la mari usu ge koramulia ge gigi tigi la masova la irovilala te La Bolo, la vuhula eia magiri mai la isa la tahalo isasa. Eala moli la irovilala tetala eia maie: 666.
REV 14:1 Tio, goio, eau ga mata lou soio, eau hilo e Latu La Sip eia magiri oata te la varu la gove e Saion, vikapopo la valalua me hatavivile 144,000, la isale Kraist me Tamala oioti te la varu giteu.
REV 14:2 Goio, eau lolo la bilau isa uru loata la mori, mai la tilali la lalu uru eia raga loata te la varu la gove, gotalo. Eia ga tali tai mai la mori ale tali kuraraba, eau loloa eia ga mai egite gumu te la galamo.
REV 14:3 Egite magiri te la mata la pulolou la uru te La Tahalo Uru, egite magiri tai te la lagu giteu e ururu, te la lagu giteu tai la vagari robola ivaa ale magiri te la pulolou te La Uru, egite bau la bilau isa ale so halaba, eia isapolo sesele. Eala moli egiteu ale 144,000, egite rovitia, egite babaua. Isa lou kama ge rovi la bilau alele, egiteu moli ale la kasosole Kraist eia pala loto rivu lou egiteu taro la limale Satan te la imamala ale egite so popou te la pulolou la mahulila omai te la maututula.
REV 14:4 Egite maroka sesele, mai egiteu ale kama mavuta tomi la tavile. Egite mulimuli e Latu La Sip veia ge vikapopo leia soio te la babaa tomi ale eia ge goio vola. E Kraist eia loto robo egiteu me la kasosola, eia puli egiteu taro la pulolou kabili te la valalua me hatavivile oio te la maututula, veia egiteu moli sesele ge mahuli. Egite ge magiri te la lagu La Tahalo Uru, egite ge mai la siloko la vaabila soio tetala, veia la valalua me hatavivile usu lou ale maroka ge goilo mulimuli tegiteu ele.
REV 14:5 Egiteu la tahalo me la tavile ale maroka sesele, egite kama rovi bakisi la visigologolola, egiteu la iruru tai ouka oio tegiteu veia isa ge kaua giteu oio vola, ouka viruru.
REV 14:6 Tio, goio, eau ga mata soio, eau hilo isa lou e angelo eia lovo oata te la baa, eia sau tola la valolo ale taritigi eia kama ge kaluvu, veia eia ge veipalea soio te la maututula tomi, te la maratatila tomi, te la galegale tomi, te la mererera tomi tai.
REV 14:7 E angelole, eia oio tatola maie “Taritigi amuto ge togo La Tahalo Uru, ge vaisalea, la vuhula la imamala la viputumulila tetala eia sibitalati. Taritigi amuto ge lotu tavu eia ale vipou la mori, la magasa, la mago, me la lalalu tomi tai.”
REV 14:8 Goio, e angelo isa lou sibitala, eia mulimuli la mulugale angelole, eia tatola maie “La mautu uru e Babilon, eia sululu sapati. La mautu ale eia kama kokora, eia pala viliu paua la valalua me hatavivile tomi te la lalu la pauala tetala mai la vulovulola te la iruru tomi tetala. Hiloa, eia sululu sapati.”
REV 14:9 Goio, e angelo isa lou sibitala, eia mulimuli la iluale angelole, eia tatola maie “Mai amuto ge abi la irovilala te La Bolo Ale Uru oio te la varu mutou, uka oio te la lima mutou e gata, veia amuto ge lotu tavu tai La Bolo me la puigolo tetala,
REV 14:10 tio amuto ge ligi te la igototolola te La Tahalo Uru, eia kama bisi, eia ge koli seselea soio tamutou la mapa la iruru tamutou ele. La Tahalo Uru ge vimagiri amutou te la lagu giteu la angelo tetala ale maroka, vikapopo le Latu La Sip tetala, eia ge tulu le amutou la havi, amuto ge lai.
REV 14:11 La sosobu la havi la viligila tamutou ele, eia ge paupuvu moli soata, kama ge kaluvu. La mailala ge ouka, la vuhula amuto lotu tavu La Bolo Ale Uru, vikapopo la puigolo tetala, amuto abi tai la irovilala tetala mai la isala, oio te la vovo mutou.”
REV 14:12 Eala, eia koramuli seselea mai ele veia egiteu la valalua me hatavivile te La Tahalo Uru, egiteu ale roromuli la merera la viputumulila tomi tetala, egiteu ale magiri vagari tai te Iesus, eia koramulia veia egite ge magiri vagari, egite ge tau sesele la ilo giteu soio te Kraist, la vuhula e angelo veitia veia egiteu ale lotu tavu La Bolo ge vilua, eala eia taritigi veia etatou ale te Kraist ge magiri vagari moli.
REV 14:13 Goio, eau lolo la golu la tahalo isasa eia tatola loata la mori, eia veia maie “Eme ge kekesi tola la merera taku maie: Egiteu ale peho te la igogolu te La Uru, egite balavati, sokoa igoie, kara mulimuli, egiteu alele ge pou sesele la balavala. La Kalulu La Marokala eia veia maie tegiteu ele mago ‘Egite ge maila taro tataho la igogolu ale vagari tegiteu, la mapa la visuli tegiteu soio te La Uru eia ge puru tegiteu, eia ge mulimuli egiteu soata te la ilo la lage, eia ge vipou egiteu te la pulolou la balavala oata ovola.’”
REV 14:14 Tio, eau ga mata lou soio, la tuluvu la mori isa uru eia loio sibitala, eia kakea. La tahalo isa popou oio vola, eia la tahalo la kalulu, eala moli eia mata mai la tahalo la vovo, mai egite toia veia “e latu la tahalo.” E vevea mai la irovilala te la mulugaluga eia oata te la gamala, eia mememe tataho. Eia ababi la viso te la limala, eia kara sesele.
REV 14:15 Goio, e angelo isa lou loilo te la luma la lotu, gogala, eia tola soio tetala ale pou te la tuluvu la mori, mago “La ilali otalo te la maututula eia matuhati, eme ge abi la viso taume ele, eme ge gorivo, eme ge ababia.”
REV 14:16 Goio, eia ale pou te la tuluvu la mori, eia abi la viso tetala, eia goio visibitala la viputumulila te la Tahalo Uru otalo te la maututula.
REV 14:17 Goio, eau hilo e angelo isa lou eia loilo te la luma la lotu, gogala, eia tai ababi la viso oio te la limala, eia kara pepeho.
REV 14:18 Goio, e angelo isa lou goio sibitala, eia e angelo la vibaumuli la havi oilo la luma la lotu, oio te la poro la vaabila, eia hiliti taro la igogolu tetalale, gogala, eia veiale angelo ale ababi la viso ale karale, mago “Eme ge abi la viso taumele, eme ge koro la vavua la vaen otalo te la maututula, la vuhula eia oio maosati.”
REV 14:19 Tio e angelo loloa mai ele, eia goio vali la viso tetala loata te la tia la mahuma, eia koro la vavua la vaen mai ele, goio pigi egite sotalo te la vaha La Tahalo Uru oio te la muli la bilebe la vaen, veia eia ge toa perepere egiteu, mai te la igototolola tetala ale uru sesele, te la kiloli la iruru.
REV 14:20 Eia bebe egiteu mai ele logala te la mautu tetala, la kasoso giteu eia sali soio la baa malau sesele, la malulula sotalo eia ga mai e lovasa, la silali ale eia sogo sesele.
REV 15:1 Tio, eau so popou oata te la ilo la lagele, eau goio hilo isa lou la irovilala uru, eau karutu seselela. Egiteu la angelo ivitu loio sibitala, egite ge visibitala la iligiligi ivitu, eia ge la tapasi la viligila te La Tahalo Uru somai te la maututula, la vuhula eia ge vikaluvu la igototolola tetala.
REV 15:2 Goio, eau ga mata lou soio, eau hilo la gale la mago eia malilo tataho, eia sima tataro mai la havi. Oio te la parava, eau hilo la valalua me hatavivile mapaiti magiri, egiteu moli ale bolehohoti la vagagarila te La Bolo Ale Uru, egite kama lotu tavu la puigolo tetala, egite kama abi la irovilala tetala oio te la vovo giteu. Egite magirigiri oilo, egite baubau.
REV 15:3 Egite bau la bilau te Moses, eia la bilalaha sesele te La Tahalo Uru, egite bau la bilau tegirua me e Latu La Sip, la bilau alele eia maie: Tahalo Uru, eme sekela vagari, La igogolu te la limamu eia uru, eia isapolo viruru. La vulovulomu matata tomi moli. Eme pou la mulugaluga te la maratatila tomi.
REV 15:4 Mave, isa ge veia eia kama ge togome, La Uru? Ouka gologolo. Egite tomi ge vaisaleme. La vuhula eme moli sekela maroka. La maratatila tomi te la galegale tomi, egite ge goio taume, egite ge lotu tavume. La vuhula, la igogolu taume ale matata tomi moli, egite hilotia, eia magiri palalati.
REV 15:5 Tio, egite bau kaluvuti mai ele, eau goio mata soata te la mori, eau hilo la muli La Tahalo Uru, mai la luma la lotu tetala, eia maroka viruru, eia tikumu veia etato la tahalo la vovo ge tiroro soilo vola, eala moli eau hiloa, eia oio kopeti.
REV 15:6 Goio, egiteu la angelo ivitu loilo te la luma la lotu gogala, egite visibitala la iligiligi ivitu. La lavalava tegiteu eia maroka sesele, eia sasima, egite kisipoula la kisipou ale ialalo tataho, kara oata la magoro giteu.
REV 15:7 Goio, isa tegiteu la vagari robola ivaa ale magiri te la pulolou te La Tahalo Uru, eia goio abia giteu la angelo ivitu la keibulu la vaen ivitu ale mememe tataho, oilo vola la bulu la vaen ale egite ge viliu la valalua me hatavivile ovola, eia ama pasi, mai la igototolola te La Tahalo Uru eia moli sekela mahuli, la kaluvula ge ouka.
REV 15:8 Goio, la luma la lotu eia volu sesele la sosobu, la vuhula la marasala me la vagagarila te La Tahalo Uru eia tivura mai la havi. Isa kama koramulia ge tiroro soilo vola kara ale egiteu la iligiligi tegiteu la angelo ivitu ge kaluvu sapa tomi.
REV 16:1 Tio, eau goio lolo lou la golu la tahalo isasa loilo la luma la lotu, eia tola soio tegiteu la angelo ivitu, mago “Amuto tuga, amuto tigitaro la vaen ale oilo tegiteu la kei ivitu tamutou ele, eia ge gotalo te la maututula mai la igototolola te La Tahalo Uru.”
REV 16:2 Goio, la mulugale angelo eia goio tigitaro volu la maututula la vaen ale oilo te la kei tetala. Oio vola, goio la vovo giteu la valalua me hatavivile tomi ale egite abiti la irovilala te La Bolo Ale Uru oio te la vovo giteu, egite lotu tavua, la vovo giteu tomi ele eia goio sereka.
REV 16:3 Goio, la iluale angelo eia goio tigitaro la vaen ale oilo te la kei tetala sotalo te la mago. Tio, la mago goio vulo mai la kasoso, eala moli eia kama rava, eia mai la kasoso la tahalo ale pehoti. Tio goio la iaia me egiteu la golu tomi ale mahuli olau la tia la mago, egite peho.
REV 16:4 Goio, la itolule angelo eia goio tigitaro la vaen ale oilo la kei tetala sotalo tegiteu la lalalu, egite vulo mai la kasoso.
REV 16:5 Oio moli ovola, eau lolo e angelo ale vibaumuli la lalalu tomi otalo te la maututula, eia vikara maie mago “La viputumulila taume ele eia matata tomi moli. La vulovulomu tomi moli eia maroka. Alaurati te la silokola eme oio, kara igoie eme oio.
REV 16:6 Egite biliti egiteu la valalua taume, egiteu la bilalaha taume tai, la kasoso giteu puriti, eala eme viliuti legiteu la gima taume la kasosole, ale la mapa giteu!”
REV 16:7 Goio, eau lolo la golule angelo isa lou, eia magiri te la mata la poro la vaabila oilo la luma la lotu, eia koli la mererale mago “Eia sesele, eme La Tahalo Uru, eme moli vagari, la viputumulila taume eia matata tomi moli.”
REV 16:8 Goio, la ivaale angelo eia tigitaro volu la mata la haro la vaen ale oilo te la kei tetala, la haro goio agi titili gegeru la vovo giteu la valalua me hatavivile otalo te la magasa.
REV 16:9 La tivura la harole, eia igo gegeru egiteu mai ele, eala moli egite goio gilo moli La Tahalo Uru ale babaha la iligiligi tomi alele. Egite kama masagea veia ge gabutatala rivu la iruru tegiteu, ge vuvulo, veia egite ge vaisalea mai ele, ouka, egite tou.
REV 16:10 Goio, la ilimale angelo tigitaro la vaen loio te la kei tetala sotalo te la pulolou la mulugaluga te La Bolo Ale Uru, tio la maligoma uru goio sibitala, eia pigi robo la maututula tomi tetalale. La valalua, la togo giteu visiki tatavu,
REV 16:11 egite gilo tai la isa La Uru, la vuhula egite gabu la iligiligi te la kakali ale uru te la vovo giteu, eia ligi gegeru sesele, eala moli egite kama masaga ge piligi la iruru, ge vuvulo.
REV 16:12 Goio, la iuolole angelo tigitaro la vaen tetala sotalo te la lalu uru e Iupretis. La lalula tomi goio sali tomi, eia mamara. Eala, eia koramulia mai ele veia egiteu la mulugaluga te la gale ale lomuli egite ge polo tigi, la valalua la vaubi tegiteu ge polo tataho soale te la vaubila.
REV 16:13 Eala moli eau ga mata lou soio, eau hilo la hitu itolu, egite mata mai e pere. Isa loio la harele Bogea, isa loio te la hare La Bolo Ale Uru, me isa lou eia loio te la hare la bilalaha la visigologolola te La Bolo Ale Uru.
REV 16:14 Egiteu e pere ale itolu ele, egiteu la hitu ale kama kokora, la vagagarila te Satan oio tegiteu, egite igigo la irovilala te la vagagarila mai ele, mai la golu la karutula isahari, egite igoa. La igogolu tegiteu veia egite ge tuga soio tegiteu la mulugaluga tomi te la galegale tomi otalo te la maututula veia egite ge tola vikapopo egiteu te la vaubila ale ge sibitala te la tapasi la haro ale La Tahalo Uru, eia moli sekela vagari, eia ge gali tavu egiteu la gima tetala oio vola.
REV 16:15 Mai la vikararala te Kraist eia veia maie “Hiloa, eau ge guvi kokovu moli mai la tahalo la pakalila. La vibalavala taku ge pou tegiteu ale pahutu tigi, mai egiteu ale lavalava moli veia ge raragi tigi. Egite kama ge karutu la viputumulila taku, egite kama ge gabu la mahelala mai la tahalo ale tuga bulalahu moli la lavalava ouka.”
REV 16:16 Goio, egiteu e pere itolu ele, egite tola vikapopo egiteu la mulugaluga soio te la gale isasa ale egite toila te la merera e Hibru mago “e Amagedon.”
REV 16:17 Goio, la ivitule angelo eia goio tigitaro la vaen ale oilo te la kei tetala, eia tigitaro molia oata te la baa. Goio, la golule isa mai la golu La Uru, eia tola loilo te la pulolou la mulugaluga tetala oilo te la luma la lotu, eia veia maie mago “Ale kaluvuti, ale la tapasila tiele!”
REV 16:18 Tio oio moli ovola la sima sima, la mori tali kuraraba, e malugulugu isa uru umu tai. Palati te la siloko la vipoupoula, la valalua kama gabu isa e malugulugu maie, kara igoie. Eia kama kokora sesele, eia muga tegiteu e malugulugu tomi.
REV 16:19 La mautu ale uru, eia galipolea la galela itolu, la maututula tomi te la galegale tomi, egite tagogoro. La Tahalo Uru eia kama vaula la iruru tomi te la valalua e Babilon, eia goio sulu sapa la mautu alele, eia viliu legiteu la vaen ale ama, mai la igototolola tetala ale uru sesele.
REV 16:20 Egiteu la olu paipati tomi kokovuti, egite siroro sotalo, egite la goegove tomi tai kokovu.
REV 16:21 Goio, la baututu la aes ale tikumu bara sesele mai la uatati, egite pu loata te la mori mai la hura, egite gotalo, egite kue egiteu la valalua me hatavivile tomi otalo te la magasa. Egite goio gilo La Tahalo Uru oio vola, la vuhula la viligila alele eia kama kokora bara sesele.
REV 17:1 Tio, goio, isa tegiteu la angelo ivitu ale igoie egite ababi la kei ivitu, eia goio veiagu mago “Gomai, eau ge vahilo leme la kiloli la iruru te la tavile la gauru ale uru. La tavile ale, eia la irovilala te la mautu ale kama kokora, egite ilia kabili te la lalu usu.
REV 17:2 Egite la mulugaluga tomi te la maututula, egite igoti la iruru oio tetala, la vulovulola eia igo paua la valalua mai la lalu ale vagarigari, egite tomi liu paua la vaen tetalale.”
REV 17:3 Goio, e angelole eia vahari taro la kalulugu soata la hohoi. Oio vola eau hilo isa uru la tavile eia oio pou sae oata te la poke la bolo isa uru eia magegese, la vovola volu seseleti la merera ale kama kokora, egite kekesia eia vikara barea La Uru. La gahola ivitu, la komola savulu sasa.
REV 17:4 La tavile alele, eia kisi la lavalava ale magegese oio te la kabilila, mai la irovilala te la mulugaluga, eia tokoromo tataho pasi mai la tokoromola tomi te la tahalo me la tavile la vuliti. Oio te la limala eia ababi la kakabi, eia volu seseleti la vaen ale kama kokora mai la vulovulola tomi tetala ale kama kokora viruru ale eia vigi la gauru.
REV 17:5 Oio te la varula la kekesi oio, la merera la pigiveila moli, egite kekesi maie: LA ISAGU E BABILON URU. EAU VISIBITALA LA IRURU TOMI MAI LA LOTU LA VISIGOLOGOLOLA TOMI OIO TE LA MAUTUTULA.
REV 17:6 Goio, eau hiloa veia eia liliu, eau pauati la iliu la kasoso giteu la valalua me hatavivile tomi te La Tahalo Uru ale egite la gima biliti egiteu, mai egiteu tomi ale sau tola vagari moli la isale Iesus, egite poga la viluala mai ele. Tio, eau hilo la tavile uru mai ele, eau karutu sesele, eau taga pepeho, eia soukama ge igo gegeru eau.
REV 17:7 Goio, e angelole, eia goio tahiau mago “Ilava eme karutu? Eau ge lubeamu la masova la irovilala iluale, mai la tavile uru alele, egira me la bolo eia pou sae oata te la pokela, la gahola ivitu, la komola savulu sasa.
REV 17:8 La bolo alele, eia pala mahuli, eia igoie kati mahuli, eala moli eia ge hiliti lou lotalo la lulu ale malau sotalo, la igagala ouka, eia ge gali soio, eia ge poga la viluala. La valalua me hatavivile te la maututula, egiteu ale la isaisa giteu kama oio te la buk la mahulila pala te la siloko la vipoupoula, kara igoie, egiteu ge hilo La Bolo, egite ge karutu sesele, la vuhula eia pehoti, eala moli eia sibitalati lou.
REV 17:9 “Goio, la merera isa lou koramulia veia la tahalo moli ale la gabutatalala tetala malau ge rovi la masovala. La gaho la bolo ale ivitu, egite tovo muli la popoiti ivitu ale la tavile eia pou ovola, mai la mautu egite ilia ovola. Eala moli egite tovo muli tai la mulugaluga ivitu.
REV 17:10 Ilima boruti, eala moli isa soloio, me isa lou tai soukama hiliti. Eia ge sibitala, eia ge pou tabaa moli bakisi.
REV 17:11 Eala moli La Bolo ale pala mahuli, eia igoie kati mahuli, eia isa tegiteu la ivitu giteu, eala moli eia ge hiliti lou mai la la iualu giteu ele, eia tai ge poga tavu la viluala.
REV 17:12 “Eala moli la komo la bolo savulu sasao, eme hiloa, egite mai la uru savulu sasa, egite soukama abi la pulolou la mulugaluga tegiteu, eala moli La Tahalo Uru ge abia giteu bakisi la baa, koramuli egite ge pou golo muga bakisi, egite ge muga la maututula vikapopo La Bolo, eala moli eia kama ge tabaa, eia ge mata mai la mata la haro isa moli egite ge pou la mulugaluga te la galegale isahari mai ele.
REV 17:13 Egiteu la igogolu isa moliti, veia egite ge sugu taro soio te La Bolo la vagagari giteu tomi ele veia egite ge vikapopo moli leia.
REV 17:14 Egite ge vaubi soio te Latu La Sip, eala moli eia ge bolehoho egiteu, la vuhula eia la mulugaluga ale uru sesele, eia muga egiteu la ururu tomi. Egiteu la valalua me hatavivile te La Uru ge vaubi vikapopo le Kraist, egiteu ale eia tola egiteu soio tetala, eia visati legiteu mai ele veia egite ge la valalua me hatavivile tetala sesele.”
REV 17:15 Goio, e angelole, eia vei taiagu la merera isa lou mago “Egiteu la lalu ale la tavile eia pou kabili tegiteu, egite la irovilala ale tovo muli egiteu la maratatila tomi, la mererera tomi, la valalua me hatavivile tomi tai te la maututula oio la galegale tomi.
REV 17:16 Eala moli La Bolo, vikapopo me egiteu la mulugaluga savulu sasa mai la komola savulu sasale, egite ge vulo la gabutatalala tegiteu, egite ge vile la tavile uru ele, egite ge sile taro la tokoromola tomi tetala, eia ge tabuli bulalahu moli la lavalava ouka, egite ge ali la mailila goio egite ge selu taro la tatuhala.
REV 17:17 La vuhula, La Tahalo Uru eia ge vagoiloa te la gabutatalala tegiteu ele la gabutatalala tetala, veia egite ge tilimuli la masasagala tetala, eala egiteu la mulugaluga tomi ge sugu taro la vagagari giteu soio te La Bolo veia eia ge muga la maututula, kara la merera tomi te La Tahalo Uru ge puru sesele.
REV 17:18 Eala moli la tavile ale eme hilotia, eia la mautu ale uru, eia muga la mulugaluga tomi otalo te la magasa.”
REV 18:1 Tio, goio, eau hilo isa lou e angelo eia loatata la mori, la vagagarila te La Uru tomi eia oio tetala, la matagagala paga vei la babaa tomi otalo te la maututula.
REV 18:2 Eia goio tola vagari soio mago “E Babilon eia sululu sapati! La mautu uru eia luliti, egiteu la hituhitu moli ale kama kokora taholatia, egiteu la malumalu mai e kukuku me kausisiri, egite igoti la tilaloa giteu ovola.
REV 18:3 La valalua me hatavivile te la maututula tomi, egite liuti la vaen tetala ale kama kokora, mai la vulovulola ale eia ruru soio te la lotu la visigologolola mai la tavile ale vigi la gauru. Egiteu la mulugaluga tomi otalo te la maututula, egite ruruti oio tetala, la valalua la ilotoloto tomi tai, egite pogati la uati uru oio te la vuliti te la tavile uru ele.”
REV 18:4 Goio, eau lolo la golu la tahalo isa lou eia vikara loata te la mori, eia veia maie mago “Amuto la valalua me hatavivile taku, taritigi amuto ge hele taro la mautu alele, amuto soukama ge ruru vikapopo leia, amuto tai soukama ge ligi vikapopo leia te la viligila.
REV 18:5 La vuhula, la iruru tetala egite volu karati oata la mori, La Tahalo Uru eia oio gabutatala egiteu la iruru tetalale.
REV 18:6 Gabutatala tigi egiteu la iruru tetala ale usu amuto ge kolia soio tetala mai egiteu la iruru tetala tai ele. Eia pala goio vauru sesele la vulovulola ale kama kokora, eala eia taritigi veia amuto ge vauru tai la kiloli la iruru soio tetala koramuli la iruru tomi ale eia igotia. Eia mai ale vuloti la vaen ale vagari gegeru sesele te la kakabi tetalale, mai la iruru tetala ale usu, eia kama kokora bara sesele. Ioge, eia taritigi pepeho veia amuto ge koli vagari sesele la iruru tomi tetala, ale eia igotia mutou la valalua taku.
REV 18:7 La mautu alele, mai la tavile uru aleie, eia pala vauru lou la isala, eia vareagi pepeho, eala eia taritigi veia amuto ge vausu la iligiligi soio tetala, koramuli la kiloli la iruru tomi tetala. Amuto ge vilaia, eia ge tali pepeho. Oio te la gabutatalala tetala eia vikara maie ‘Eau la tavile isasa, eau muga sesele la maututula, eau pou te la pulolou la uru, eau sagege moli, eau kama pou mai la baharu, eau kama koramulia ge poga la iloburukola.’
REV 18:8 Eala, te la merera la vareagila tetalale, eia ge gabu la iloburukola, la iligiligi ale uru ge pigi roboa, La Tahalo Uru ge vaharosasa moli la mautu aleie. La ilea, la pileho, la vitolo, la iligiligi tomi ge igo gegerua, la havi ale uru tai ge selua, la vuhula eia vureti te la viputumulila te La Tahalo Uru, eia vagari pepeho pasi.
REV 18:9 “Egiteu la mulugaluga tomi te la maututula te la galegale tomi, egiteu ale igoti la iruru oio te la tavile alele, egite pala pou la balavala vikapopo leia te la vuliti tetala ale uru, mai egite ge hilo la mautu ale e Babilon eia ge tululu, la sosobula uru pavuti soata la mori, egite ge hiloa mai ele, egite ge tali roboa.
REV 18:10 Egite ge taga pepeho la iligiligi ale uru sesele ale sibitalati tetala, egite ge magiri malau, egite ge mata soio, egite ge vikara maie mago ‘E maura, e maura, la mautu uru e Babilon viluati. Eme pala vagari, igoie eme vure hari moliti!’
REV 18:11 “Egiteu la valalua la ilotoloto te la maututula tomi, egite ge tali roboa, la vuhula isa kati ge loto la golugolu tegiteu,
REV 18:12 mai la mata la vuliti tomi mai la gold, la silva, la uatati ale la mapa giteu uru, la tuali, la lavalava ale la mapala uru, isahari magesegese, isahari taitavi tataho, egite toila la silika. La obu tai ale la mapala uru, eia mali vivili tataho pasi, isa kati ge lotoa oio e Babilon ele. Tio la mata la puigolo tomi tai ale egite igola la togo la elepant, ale egite igola la obu ale la mapala uru, ale egite igola la bras, eia mememe, egite igo taila la aen, me la uati tai ale vorivoria egite toila la mabel, eia vagari, la mapala uru.
REV 18:13 Isa kati ge loto la golugolu tegiteu mai alele, me la golugolu tomi tai la mapa giteu uru, mai la sinamon me la lahia te la valimuli la ilali, la paura ale egite selua, la sosobula malia tataho pasi, la bulu la obu tai ale malia tataho, la vaen, la bulu la oliv te la gulutulutu la ilali, la palava, la vit, la kau, la hos vikapopo la karis ale lapulapua, isa kati ge loto egiteu la golugolu tomi alele oio e Babilon. La valalua me hatavivile tai, ale egite pou te la kilisi te la igogolu, eia sesele, pala egite lotoloto tai isahari egiteu la valalua me hatavivile ale egite ge tahola egiteu, eala moli isa kati ge loto lou egiteu te la mautu alele.
REV 18:14 “Egiteu la tahalo la ilotoloto, egite ge vikara soio te la mautu alele mago ‘Egiteu la papaga tomi ale eme hate saga tatavua, eia hele tarotime. La vuliti me la tokoromola tomi taume eia kokovu taro tomitime, eme kati ge abi rivua.’
REV 18:15 Egiteu la tahalo la vuliti, egite pala vahari la golugolu soio taume, egite abi la uati uru oio vola, egite ge magiri malau, egite ge taga pepeho veia egite soukama ge vilua vikapopo la iligo barala oio te la mautu uru ele.
REV 18:16 Egite ge vikara maie mago ‘E maurao, eme la mautu uru ele! Eme kisiti la lavalava ale magegese, eme la tokoromola uru oio,
REV 18:17 eme kaluvu tomiti, La Tahalo Uru vitagarasati emei, la mautu uru e Babilon!’ “Goio, egiteu e kapten tomi tegiteu e sipi, vikapopo tai legiteu tomi ale igogolu te sipi, egiteu tai ale sasae ovola, vikapopo tai legiteu tomi ale la igogolu tegiteu eia oio te la igogolu la vahari la papaga te sipi egite ababi la uati ovola, egiteu tomi alele, egite ge magiri malau loio, egite ge mata soio la mautu e Babilon eia oio tululuti.
REV 18:18 Egite ge hiloa mai ele, egite ge hilo la sosobu uru eia paupavu soata, egite ge vikara maie mago ‘Palati kara igoie, la mautu isa oukati lou ale ge uru mai e Babilon!’
REV 18:19 Egite ge ato volu la vovo giteu la magasa, egite ge pigi la tilali uru maie mago ‘E maura, e maura la mautu uruo! Egite tomi ale tahola e sipi, egite pala poga la vuliti oio vola! La mautu ale, eia vure hari moliti, La Tahalo Uru vitagarasatia!’
REV 18:20 “Egite vikara mai ele, eala moli eia taritigi pepeho veia amutou la angelo tomi oata te la mori, amutou la valalua me hatavivile tomi tai te La Tahalo Uru, vikapopo le amutou la bilalaha tetala tomi, amuto ge sagege, la vuhula La Tahalo Uru eia koliti amutou soio te Babilon te la iruru tomi ale eia igotia mutou.”
REV 18:21 Goio, e angelo isa uru sibitala, eia abi la baga isa uru makapipila sesele, eia goio pigia sotalo la tia la mago, eia goio vikara mago “Mai moli ele egite ge pigi la mautu uru e Babilon sotalo, eia ge kokovu, isa kati ge hiloa.
REV 18:22 Isa kati ge lolo lou la bilalau tegiteu la valalua la bilau, egiteu ale baubau oio te la mautu alele, mai egiteu ale gumu, egiteu ale pupusu e vigogo, egiteu ale pupusu tai la vaivai. Egiteu la valalua la igogolu kati ge igogolu kabili te la mautu uru ele. La tilali la ilisi la ilali, isa kati ge loloa oilo vola.
REV 18:23 Isa kati ge hilo la mamaga la lam kabili te la mautu alele. La taulaila ge oukati veia isa ge lolo la taulai halaba, egira me rutula, egira ge vikarakara, oukati. Pala egiteu la tahalo la ilotoloto oio te la mautu alele, egite la uru te la maututula tomi. Te la merera la visigologolola te la mautu e Babilon ele, la maututula tomi ruruti, la merera tetalale eia mai la maholo ale ubi la tia la tavile, eia igo pauea.
REV 18:24 Eala moli la mautu alele eia vureti, la vuhula eia bili egiteu la valalua me hatavivile te La Tahalo Uru, egiteu la bilalaha tai tetala, la kasoso giteu tomi eia pagegeleti oio vola.”
REV 19:1 Tio, mulimuli ovola eau goio lolo la mareregola uru pepeho, la valalua me hatavivile usu pepeho, egite pou oata te la ilo la lage, egite tatola maie “Haleluia, taritigi pepeho soata te La Tahalo Uru, eia la vuhu la vimahuli, la vuhu la matagaga, la vuhu la vagagarila,
REV 19:2 la viputumulila tetala eia matata tomi moli. Eia igo gegeruti la tavile la gauru uru, e Babilon, eia pala igo gegeruti egiteu la maututula te la iligo malagola tetala, La Uru goio vilaia, la tavile uru ele eia vureti. La Uru eia koliti egiteu la bilalaha tetala ale la tavile bili egite.”
REV 19:3 Goio, egite tola lou mago “Haleluia, la sosobu la mautu uru ele, eia ge paupavu moli mai ele, eia kamati ge kaluvu.”
REV 19:4 Goio, egiteu la uru savulu lua gete vaa ale pou galili la pulolou te La Uru, vikapopo tai legiteu la vagari robola ivaa ale magiri te la pulolou tetala, egite tomi ele goio boru lagu tugu, egite lotu tavua, eia oio popou te la pulolou la uru tetala, egite tola maie mago “Amen, haleluia, etato ge vaisale moli La Uru!”
REV 19:5 Goio, eau lolo la golu la tahalo isasa, eia tali loilo te la pulolou la mulugaluga te La Tahalo Uru, mago “Vaisale La Tahalo Uru, amuto la bilalaha tetala, vaisale molia amutou tomi ale togoa, amutou ale ururu, amutou ale bisisi tai.”
REV 19:6 Tio, eia vikara kaluvu mai ele, goio, eau lolo la tilali la golu la valalua me hatavivile mapaiti, eia tali karerere mai la tilali la lalu ale hae, mai tai la mori ale tali kuraraba, egite tatola maie mago “Haleluia, etato ge vaisale La Tahalo Uru tegatou, eia moli sekela uru.
REV 19:7 Etato ge sagege pepeho, etato ge vaurua! La haro la taulaila te Latu La Sip tetala eia guviti. Male ge, e rutula oio pupuruti, eia tokoromoti,
REV 19:8 La Tahalo Uru eia abitiala la lavalava ale taritigi pepeho, eia mememe, eia halaba tataho pasi!” (Me etato ge rovi taia veia la lavalava ale halabale, la mapala uru, eia mai la vikarara la tilovo te la vulovulo giteu la valalua me hatavivile tomi te La Tahalo Uru ale maroka tomi moli.)
REV 19:9 Goio, e angelole eia goio vikara lou somai taku mago “Eme ge kekesi la merera maie: Egiteu tomi balavati, ale La Tahalo Uru eia baha tavuti egiteu veia egite ge guvi te la ilali la taulaila te Latu La Sip tetala, egite balava seseleti!” Eia vikara kaluvu mai ele, eia goio vitapasi la merera somai taku mago “Ale la merera ale sesele viruru te La Tahalo Uru.”
REV 19:10 Tio eau loloa mai ele, eau goio boru lagu tugu oio te vahala veia eau ge lotu tavua mai ele, eala moli eia goio magiri robo louau mago “Umalati, eau la bilalaha moli, vikapopo le amutou me egiteu e tabarabaramu ale amuto sau tola la merera te Iesus. Taritigi eme ge lotu tavu moli La Tahalo Uru!” Mai la valolo te la isale Iesus, eia la vagagarila oio, mai tai la merera tegiteu la bilalaha tomi ale pala, eia la merera te La Uru sesele, eia la vagagarila oio.
REV 19:11 Tio, goio, eau hilo la ilo la lage eia oio kopeti, la hos isa uru oio magirigiri, la vovola kakea, la tahalo isa eia pou ovola. La tahalo ale, etato rovia veia eia la tahalo isa eia magiri vagari te la merera te La Tahalo Uru, eia ge vipuru seselea. Eia ge vimatata la iruru tomi, eia ge taho vagari loio te la merera ale matata.
REV 19:12 La matala ilua karerere mai la havi, e vevea usu oio te la gamala mai la irovilala te la mulugaluga. Oio te la vovola la isala oio, eala moli isa kama rovi la masovala, eia moli sekela.
REV 19:13 Eia kisi la lavalava ale magegese, egite vuhitila la kasoso, la isa la tahalo ale “La Merera Te La Tahalo Uru.”
REV 19:14 Egiteu la valalua la vaubi tomi mapaiti ale loata te la mori, egite vikapopo, egite pou te la hos tegiteu isasasa, egite kisi la lavalava ale kea lovolovo sesele, eia maroka tataho, egite goio mulimuli la mulugaluga tegiteu ele.
REV 19:15 Eala moli la tahalo ale, la viso ale kara sesele eia taritotoge te la harela, veia eia ge barautu la valalua me hatavivile te la maututula tomi ovola, oio te la galegale tomi, egite ge peho. La viputumulila tetala eia ge vagari pepeho, la gata isa uru mai la irovilala te la mulugaluga eia ge oio te la limala. Eia ge soa kuru egiteu la valalua la gima veia ge visibitala la igototolola te La Tahalo Uru eia uru pepeho, eia ge vilai egiteu mai ele, eia ge mai la tahalo ale toa perepere la vavua la vaen, la bulula sali.
REV 19:16 Eala moli oio te la lavalava tetala, oio tai te la salala la isala oio, eia maie “La Uru ale uru tegiteu la uru tomi, la mulugaluga ale muga egiteu la mulugaluga tomi.”
REV 19:17 Goio, eau hilo e angelo eia magiri te la mata la haro, eia tola vagari soio tegite la malumalu ale lovo te la baa, eia tola soio tegiteu mago “Gomai, amuto ge pou te la ilali te La Tahalo Uru, la ilali uru sesele.
REV 19:18 Amuto ge ali la maili giteu la uru tomi, la maili giteu la mulugaluga tomi tai, egiteu la valalua ale vagari, egiteu la hos, me egiteu ale pou ovola, la valalua me hatavivile tomi, egite la tahalo la vuliti, egiteu la valalua bulalahu, egiteu ale uru, egiteu tai ale bisi, amuto ge ali la maili giteu, amuto ge vikaluvu sesele egiteu tomi ele.”
REV 19:19 Tio e angelole eia vikara kaluvu mai ele, goio, eau mata soio, eau hilo La Bolo vikapopo legiteu la mulugaluga tomi te la maututula tomi, egite vikapopo legiteu la valalua la vaubi tegiteu ele, egite vikapopoti veia ge vahiliti la vaubi soio te la tahalo ale pou te la hos vikapopo legiteu la valalua tetala.
REV 19:20 Tio egite goio vaubi, eala moli egiteu ale te Kraist, egite goio lao tola La Bolo, egira me la bilalaha la visigologolola tetala. La bilalaha tetalale eia pala igo la golu la karutula mai la irovilala te la vagagarila te La Bolo. La irovilala tomi alele eia viruruti la valalua tomi usu ale egite abiti la irovilala tetala, egite lotu tavu tai la puigolo tetala. Goio egite lao tola egiruale, egite goio pigi egirua sotalo te la mata la tivura uru ale tululu pepeho.
REV 19:21 Goio, e Kraist bili taro egiteu la valalua te La Bolo, eia sulu legiteu la viso ale taritotoge te la harela, mai la vagagari la merera tetala moli. Goio, e kaokao mapaiti lovo soio, egite ali maru te la maili giteu ale pehoti ele.
REV 20:1 Tio, eau ga mata lou soio, eau hilo e angelo eia loatata la ilo la lage, eia ababi la ki ale ge kope la lulu ale gotalo malau sesele, la igagala ouka, eia ababi tai la sen isa uru sesele.
REV 20:2 Eia goio gali tavu e Bogea, mai e Satan ale mai e taive ale palati te la siloko la maututula. Goio eia kisi tola le Satan la sen, veia eia ge korati mai ele la leavala salatu savulu sasa.
REV 20:3 E angelo kisila la sen kaluvu, eia goio pigia sotalo la lulu alele, eia kapi robo la mata, veia e Satan ge tabuli moli oilo vola, eia kati ge tutugolo la valalua me hatavivile te la maututula oio te la galegale tomi, kara la leavala salatu savulu sasa ge polo, mulimuli te la imamala alele, eia ge gogala lou, eala moli eia kama ge tabaa.
REV 20:4 Goio, eau hilo la pulolou la uru isahari, vikapopo legiteu la uru ale popou ovola. La Tahalo Uru eia abitia giteu la uru tomi ele la vagagarila koramuli egite ge vipou la valalua la gima otalo te la uluva la viputumulila tegiteu ele, egite ge mata muli la iruru tegiteu. Eau hilo tai la kalulu giteu la valalua me hatavivile tomi te Kraist, ale egiteu la gima barautu taro la gama giteu. La valalua te Satan bili egiteu, la vuhula egite valolo te la merera la matagaga te Kraist, te la merera tomi tai te La Tahalo Uru, egite tai kama lotu tavu La Bolo, egite kama abi la irovilala tetala oio te la varu giteu, uka oio te la lima giteu. Egiteu tomi ale pehoti ele, egite goio mahuli rivu lou, egite pou la mulugaluga vikapopo le Kraist la leavala salatu savulusa.
REV 20:5 (Eala moli egiteu ale kama rovi e Kraist, mai egiteu ale peho moli te la maligoma, egite kama mahuli rivu lou kara ale la leavala salatu savulusa poloti.) Ale egiteu ale te Kraist ge mahuli rivu lou, ale la muluga la mahuli rivula alele.
REV 20:6 Egiteu ale ge mahuli rivu lou ovola, egite balava seseleti, egite maroka. Egite kamati ge gabu la ilua la pileho ale egite la gima te Kraist ge vure ovola, eala moli egite ge pou mai la tahalo me la tavile la visuli moli te la lotu te La Tahalo Uru mira me Kraist. Egite ge pou la mulugaluga vikapopo le Kraist la leavala ge salatu savulusa.
REV 20:7 La leavala ale salatu savulusale ge polo, mulimuli ovola e angelo ge lube e Satan taro la kilisi tetala.
REV 20:8 Eia ge gali sogala, eia ge goio, eia ge tutugolo la valalua me hatavivile te la maututula tomi, oio te la galegale tomi, kara la igaga la magasa tomi. Egiteu la valalua la maligoma tomi, mai egiteu la valalua te la gale ilua ale kama kokora, e Gog mira me Magog, e Satan ge tola vikapopo egiteu tomi veia eia ge vahiliti la vaubi. La giligi giteu eia mata mai la magasa la mago.
REV 20:9 Egite gali soio, egite vulo robo la babaa tomi, egite sugu robo la mautu tegiteu la valalua te La Tahalo Uru, la mautu tetala sesele ale eia isua. Eala moli la havi uru eia paru loata te la mori, eia selu egiteu tomi ale te Satan ele.
REV 20:10 Goio, e Satan, eia ale visigoloti egiteu, e Kraist pigia sotalo la mata la tivura uru ale tululu, ale La Bolo mira me la bilalaha la visigologolola tetala egira tabuliti otalo vola. Oio te la havi uru alele, egira ge gabu moli la iligiligi ale uru sesele, te la haroharo tomi, te la logologo tomi tai, la kaluvula ge ouka.
REV 20:11 Goio, eau mata soio, eau hilo isa la pulolou la uru, eia kakea, eau hilo tai eia ale pou ovola. La magasa me la mori goio kokovu, la paga isa oukati oio.
REV 20:12 Goio, eau hilo egiteu tomi ale pehoti, egiteu ale ururu, egiteu tai ale bisisi, egite magiri oio te la mata la pulolou tetala. Egiteu la angelo te La Tahalo Uru goio kope isahari la buk veia ge gigia, isa goio kope la buk isa lou, eia la buk la mahulila. Egiteu ale pehoti, La Tahalo Uru eia mata muli la vulovulo giteu oio te la kekesi ale oilo tegiteu la buk tomi alele, ale eia kekesi tolati la vulovulo la valalua me hatavivile tomi oilo vola.
REV 20:13 La mago goio pati taro lou egiteu tomi ale tilomuti oilo vola soata. Goio, La Pileho mira me La Mautu La Viluala Te La Kalulu, egira goio visibitala rivu lou egiteu ale pehoti, egite tabuli otalo vola. Goio, La Tahalo Uru eia goio vipou egiteu tomi isasasa te la vigagiala tetala, eia goio mata muli la vulovulo giteu tomi ale egite igigoa pala te la mahulila tegiteu te la vovo.
REV 20:14 Goio, la vagagari La Pileho mira me La Mautu La Viluala Te La Kalulu, e Kraist bolehohoa, eia pigi egirua sotalo te la mata la tivura uru ale tululu. Ale la ilua la pileho, la pileho eia kati ge koramulia ge igo gegeru etatou ale te Kraist.
REV 20:15 Egiteu tomi ale la isa giteu ouka oio te la buk la mahulila, egite tomi gotalo te la mata la tivura ale uru.
REV 21:1 Tio, mulimuli ovolale, eau goio hilo la mori ale halaba, la magasa tomi tai ale halaba. La mori ale pala, la magasa tai ale pala, egira kokovuti, la mago tai oukati.
REV 21:2 Eala moli eau hilo la mautu uru ale maroka, mai e Ierusalem ale halaba, eia loatata te la mori, La Tahalo Uru eia visivoa sotalo mai ele, eia marasa mai la tavile ale raragiti ge taulai, eia tokoromo tataho veia ge goio te haruala.
REV 21:3 Goio, eau lolo la golule isasa eia tola loata te la pulolou la mulugaluga te La Tahalo Uru, mago “Eme hiloti la mautu alele? Oio vola La Tahalo Uru eia ge mou vikapopo la valalua me hatavivile. Egite ge tetala, La Tahalo Uru eia ge pou vikapopo legiteu, eia ge La Uru giteu sesele.
REV 21:4 Eia ge sabubu taro la masali giteu mai egiteu ge tali te la iloburukola. La pileho, la tilali, la iligiligi, ge oukati, la vuhula la imamala ale pala, eia kaluvuti.”
REV 21:5 Goio, eia ale pou te la pulolou la uru, eia goio vikara mago “Hiloa, eau omai vulo halabati la golugolu tomi!” Eia tagu solo lou la merera tetala mago “Eme ge kekesia maie veia la merera taku ale eau veveiale, eia sesele tomi moliti, eia ge puru.”
REV 21:6 Goio, La Uru veiagu la merera tetala maie “La igogolu taku kaluvuti. Eau la silokola me la vitapasila te la golugolu tomi. Mai isa ge malehu, eau ge viliu leia la lalu la vilelo te la mahulila, ge vibalava leia ovola.
REV 21:7 Mai isa ge bolehoho e Satan, eia ge sau tola la vibalavala tomi taku mai alele, eau ge La Uru tetala, eia ge mai e latugu sesele.
REV 21:8 Eala moli egiteu ale tataga, egite tahi taroau, egite piligiau, egite kama ge taku. Egiteu tai ale kama tautaulailo, egiteu ale kama kokora, egiteu ale bilibili, egiteu ale mata bulakalaka, egiteu ale rasirasi, egiteu ale lotu tavu la puigolo, egiteu tomi tai ale visigologolo te la merera tegiteu, egiteu tomi alele ge abi la muli giteu otalo te la mata la tivura, ale la ilua la pileho alele.”
REV 21:9 Goio, isa tegiteu la angelo ivitu ale pala ababi la kei ale la iligiligi ivitu tabuli oilo vola, isa tegiteu ele eia loio, eia goio veiagu mago “Gomai, eau ge vahilo leme la tavile ale ge taulai, e Latu La Sip eia ge pulia.”
REV 21:10 Goio eia vahari taro la kalulugu soata te la varu la gove isa uru, eia vahilo leau La Mautu Ale Maroka, e Ierusalem, eia loatata te la mori, La Tahalo Uru visivoa sotalo mai ele.
REV 21:11 Eia matagaga pepeho te la matagaga uru te La Tahalo Uru, eia sasima.
REV 21:12 Egite bigomu robo la mautu alele la uatati, la mata oio vola savulusa gete lua, egiteu la angelo tai savulusa gete lua oio vagari robo egiteu la mata tomi alele. Oio tegiteu la mata tomi alele isasasa egite kekesiti la isa giteu la hilile Israel ale savulusa gete lua, la isale isa te la mata isa.
REV 21:13 Te la gale ale lomuli, la mata itolu oio, te la gale ale lolau, la mata itolu; te la gale ale loilo, la mata itolu; te la gale ale loale, la mata itolu tai oio.
REV 21:14 La uati ale ururu ale egite igoti la bigomu uru alele oata ovola, egiteu tai savulusa gete lua, me oio vola egite kekesiti la isa giteu la valalua la vimari te Latu La Sip savulusa gete lua, la isale isa te la uati isa, la isale isa te la uati isa, egite igo tomia mai ele.
REV 21:15 E angelo ale amila vikarakara, eia ababi la viro te la limala, eia mememe, egite igola la gold, eia veia ge lova la mautu ovola, vikapopo egiteu la matala me la bigomu tai ale polo galilia.
REV 21:16 La gale la mautu ivaa, eia visauru tomi moli, la malaula me la bolala visauru. E angelo goio abi la viro tetala, eia lova la mautu ovola, eia sivutia veia la malaula, la bolala me la malaula tai ale goatata, eia visauru tomi moli, eia ga mata mai la kilomita salatu savulu lua, salatu vaa lou.
REV 21:17 Goio eia lova la malau la bigomu ale goata gotalo, la lovala ovola savulu vitu, mai eme ge lovea mai la lima la tahalo, e angelo tai eia lovea mai ele.
REV 21:18 La bigomu la mautu, La Tahalo Uru eia igola la iasper, eia sasima, eala moli la mautu alele, La Tahalo Uru eia igola la gold, eia mememe tataho, eia matagaga tai mai la glas ale maroka tataho.
REV 21:19 La bigomu, eia igola la uati ale kakesa tataho, eia mememe, eala moli la bigomu ele, La Tahalo Uru igoa loata te la uati savulusa gete lua ale egite sau tola vagaria, eia vitokoromo la uati tomi alele la uatati isahari lou ale mememe tataho, la mapa giteu uru sesele. La tokoromola alele eia maie: La muluga la uati, egite vitokoromola e iasper, eia kakesa; la ilua la uati, egite vitokoromola e sapaia, eia kakisa; la itolu la uati, egite vitokoromola e aget, eia kakea; la ivaa la uati, egite vitokoromola e meral, eia kakesa.
REV 21:20 la ilima la uati, egite vitokoromola e sardonikis; eia magesegese, kakea; la iuolo la uati, egite vitokoromola e konilian, eia magesegese; la ivitu la uati, egite vitokoromola e krisolait, eia ialalo; la iualu la uati, egite vitokoromola e beril, eia kakesa; la ualasiu la uati, egite vitokoromola e topas, eia ialalo; la savulusa la uati, egite vitokoromola e krisopres, eia ialalo, kakesa; la savulusa getesa la uati, egite vitokoromola e iasinta, eia kakisa; la savulusa gete lua la uati, egite vitokoromola e ametis, eia magesegese.
REV 21:21 Eala moli la mata la bigomu ale savulusa gete lua, egite goilo te la mautu ale marokale, egite vitokoromola la tuali ale kea tatataho, la vuliti sesele. La mata la bigomu isa, ale la tuali isa, la mata isa lou ale la tuali isa lou, la vitokoromola tegiteu la mamata tomi, La Uru eia igoa mai ele. Eala moli la gauru tai ale kabili te la mautu alele, La Tahalo Uru eia igola la gold, eia mememe tataho mai la glas ale maroka sesele.
REV 21:22 Eau kama hilo isa la luma la lotu oio te la mautu alele, la vuhula la mautu volu moli la lotu mai la lotu tavu La Tahalo Uru eia moli sekela vagari, mira me Latu La Sip tetala.
REV 21:23 Oio te la mautu alele, la haro me la taio ouka, eia kama savele la matagaga uru mai ele, la vuhula eia matagaga te la matagaga La Tahalo Uru moli, e Latu La Sip tai eia la matagaga ovola.
REV 21:24 La valalua me hatavivile te la maututula tomi ge hilo la matagaga ovola, egite ge rovi la gauru ale taritigi, egiteu la mulugaluga te la maututula te la galegale tomi, egite ge vahari la vuliti tegiteu soilo vola.
REV 21:25 La mata oio te la bigomu te la mautu alele, eia kati ge kapi robo, la vuhula la maligoma ge ouka.
REV 21:26 La vuliti te la maututula te la galegale tomi, egite ge vaharia soilo vola.
REV 21:27 Eala moli la paga isa ale mumugu umala ge goilo vola. Mai egiteu tai ale mulimuli la vulovulo ale kama kokora, egite visigologolo tai, egiteu ale mai ele, egite kama ge koramulia ge goilo vola. Eala moli egiteu moli ale la isaisa giteu oioti te la buk la mahulila te Latu La Sip, egiteu moli ele ge goilo te la pulolou la balavala oilo te la mautu alele.
REV 22:1 Tio, goio, e angelole, eia goio vahilo leau la lalu ale la lalu la mahulila, eia maroka, eia mememe tataho mai la glas, eia sali loata te la pulolou la mulugaluga te La Tahalo Uru, mira me Latu La Sip,
REV 22:2 eia sali mai ele kabili te la tia la mautu e Ierusalem ale halaba. Oio te la harare la lalu, la obu oio kukusi, la obu la mahulila, eia ge tau moli la vavuala te la taio tomi, la taio isa ge polo, eia ge vua, goio la taio isa lou, vua lou, igo molia mai ele la taio ge savulusa gete lua. Eala moli la galagala la obu alele, La Uru ge abia, eia ge bebe la bulula, eia ge viliu la valalua me hatavivile te la maututula tomi ovola te la galegale tomi, eia ge vimahuli egiteu ovola.
REV 22:3 La paga isa ale La Tahalo Uru ge vilea eia oukati oio te la mautu alele. La pulolou la uru moli te La Tahalo Uru, mira me Latu La Sip, eia ge oio te la mautu ale, me egiteu la bilalaha tomi tetala ge lotu tavua oio vola.
REV 22:4 Egite ge hilo sesele la matala, la irovilala tai tetala eia ge oio te la varu giteu ele.
REV 22:5 La maligoma ge oukati. Egite kama ge savele la matagaga, egite kamati ge tali tavu la mata la haro veia eia ge vimatagaga egiteu, oukati, la vuhula La Tahalo Uru moli eia ge vimatagaga egiteu. Egite ge pou te la pulolou la uru vikapopo leia, la kaluvula ge ouka.
REV 22:6 Tio, goio, e angelole, eia goio veiagu mago “La merera tomi alele eia sesele moli, eia koramulia veia eme ge sau tola tomia. La Tahalo Uru ale pala vahiliti egiteu la bilalaha tetala, eia bahati e angelo tetala veia eia ge vahilo legiteu la bilalaha tetala te la imamala ale igoie, la papaga tomi ale hagagaviti ge sibitala.”
REV 22:7 Eala moli e Kraist tai veia maie “Eau, La Uru, eau ge beu hari loua! Egiteu ale sau tola la merera tomi ale omai te la buk alele, egite ge balava sesele.”
REV 22:8 Eala moli eau, e Ioanes, eau lolo sesele la merera tomi alele, la papaga tomi tai oilo vola, eau hilo seseleti egiteu. Ale eau loloa mai ele, eau hilo taia mai ele, eau goio boru lagu tugu te la lagule angelo ale vahilo leau ovola, eau veia ge lotu tavua mai ele.
REV 22:9 Eala moli eia goio magiri roboau, eia veiagu mago “Umalati! Eau la bilalaha moli, vikapopo tai le amutou me egiteu e tabarabaramu la bilalaha tomi ale pala, me egiteu tomi ale sau tola la merera ale oilo te la buk alele. Taritigi eme ge lotu tavu moli La Tahalo Uru!”
REV 22:10 Goio, e angelole eia goio vei louagu la merera tetala maie mago “Umala eme ge tau roborobo la merera te la buk alele, la vuhula la imamala hagagaviti ale la merera tomi alele ge puru.
REV 22:11 Eia koramuli molia veia egiteu ale igigo la iruru, egite ge ruru moli. Egiteu tai ale igo gegegeru egite ge pou moli te la vulovulo giteu alele. Eala moli amutou ale taritigi, amuto ge sau tola vagari la vulovulo ale taritigi, egiteu la tahalo la iruru korale, egite ge igo molia mai la masasagala tegiteu. Amutou ale maroka, taritigi amuto ge pou moli te la vulovulo mutou ale maroka. La vuhula, la imamala eia hagagaviti ale La Uru ge beu loua.”
REV 22:12 Eala moli la vikararala te Iesus, eia veia maie “Eau ge beu hari loua somai. Eau ge vahari la vibalavala taku, eau ge kolia soio te la valalua me hatatavivile tomi mai la vulovulo giteu lou.
REV 22:13 Eau la silokola me la tapasila te la papaga tomi, la papaga tomi, eau vipoua, la papaga tomi tai, eau ge vikaluvua.”
REV 22:14 Egiteu ale vuhi maroka la lavalava tegiteu, egite balavati, mai egiteu ale pou la marokala te la isale Kraist. Oio vola egite ge koramulia ge ali la vavua la obu la mahulila, egite ge koramuli taia veia ge tiroro soilo te La Mautu Te La Uru.
REV 22:15 Egiteu ale ge pou ogala, egiteu la tahalo la vareagila, egite kama ge goilo, egiteu ale igo gegegeru, egiteu ale rasirasi, egiteu ale mata bulakalaka, egiteu ale bilibili, egiteu ale lotu tatavu la puigolo, egiteu tomi tai ale vagari tatavu la vulovulo la visigologolola.
REV 22:16 “Eau, e Iesus, eau bahati e angelo taku veia eia ge veia mutou la valalua me hatavivile la lotu taku la merera tomi alele. Eau te la hilile Devit, eau la matagaga ale uru mai e Toko ale reretala te la kavikoki.”
REV 22:17 La Kalulu La Marokala, egira me rutule Latu La Sip, mai egiteu ale te La Uru, egira veia maie mago “Gomai te La Uru!” Taritigi tai veia amutou ale ge lolo la merera alele, amuto tai ge vikara mai ele mago “Gomai te La Uru!” Mai isa peho la malehula, eia masagea mai ele veia ge liu, eia koramuli seselea veia eia ge goio te La Uru veia eia ge abi la vaabila ale La Uru eia sugu tarotia gatou, mai la lalu la mahulila.
REV 22:18 Eau, e Ioanes, eau mera taro vagari sesele amutou tomi ale lolo la merera ale omai te la buk alele, eia veipala la papaga tomi ale ge sibitala mulimuli, eau mera taro amutou veia mai isa ge vagoilo lou la merera isahari loata ovola, La Tahalo Uru eia ge vilaia te la iligiligi tomi ale eia veipalea te la buk aleie.
REV 22:19 Mai tai isasa eia ge abi taro isahari la merera oilo vola, La Tahalo Uru eia ge abi taro leia la tabarila tetala te la vavua la obu la mahulila, veia eia kati ge pou tai te La Mautu La Marokala, mai la balavala tomi ale eia veipalea oilo te la buk aleie.
REV 22:20 Eia ale veipalati la merera tomi ale, eia vikara maie mago “Eia sesele, eiau e Iesus, eau ge beu hari loua.” Ioge, eia taritigi pepeho veia eme ge gomai hari, Iesus, eme La Uru miteu.
REV 22:21 Taritigi tai veia la gilogo te Iesus, La Uru gatou, eia ge pou tamutou la valalua me hatavivile tetala. Amen.
