﻿तोहचीतव पोल्‍लोङ.
4.
इव पोल्‍लोङ आतापया, ऊळाट, पोग़ोन देवुळदीपतगा अग़ तेग़यिस मतदिन, नना योहननन ऊळतन. मुने बेरा अकुम नेकतप लेह्‌का, नावा संगे वळ्ह्‌कतद लेङु, इंजेके नाक इद्रम इता: “इगा पोग़ोन देवुळदीपतगा वय. इंजेक मुनेह आयनव पोल्‍लोन, नीक तोहतह्‌नन,” इता. 
अद अद्रम इतस्केन, देवुळता जीवाता दळ्म नयगा अरता. अस्के नना ऊळतन: उंद राजकुर्सि देवुळदीपतगा मता. अद राजकुर्सतगा बेदो उदिस मता. 
राजकुर्सतगा उदिस मतदु, मिळ्स्कनव हीरा ओसो मानिक इनदनव बंडाना लेह्‌कान मिळ्स्किंदु. अद राजकुर्सता सर्ने, मरकत इनदनद बंडाता लेह्‌कान मिळ्स्कनद देवुळविल मता. 
राजकुर्सता सर्ने वीसा नालुङ कुर्सिङ मताङ. अव कुर्सिनगा वीसा नालवुर पेदल्क उदिस मतोर. ओर पांड्रि गेंदेङ केग़्स मतोर; ओसो तमाङ तलानगा, राजालोर केग़यना लेह्‌काडाङ बंगरताङ राजटोपिङ केग़्स मतोर. 
अद राजकुर्सतगा मिळ्स्कसोर, गुळ्न्जसोर मंदु. ओसो राजकुर्सता मुनेह, एळुङ चिमलिङ पोतसोर मताङ. अव चिमलिङ देवुळतग्डाङ एळुङ जीवाङ आंदुङ. 
अद राजकुर्सता मुनेह, अदमलेह्‌का पङ्ने दिसनद सम्दुरलेह्‌कान मता. राजकुर्सता नडुमि ओसो ताना सर्ने, नालुङ जीवात मनदनव दिंचिङ मताङ. अविस्किह्‌क पेग़्केह-मुनेह वेट कोंडाङे मताङ. 
मुनेता दिंचि सिङपुललेह्‌का मता. दुस्रा दिंचि बार कोंदा पियोलेह्‌का मता. ओसो उंद दिंचता तोडि बार मन्कना तोडलेह्‌का मता. उंद दिंचि बार पग़यनद गंदालता लेह्‌का मता. 
इव नालुङ आस दिंचिह्‌कु, आरुङ-आरुङ मारेङ मताङ. अविस्कना पूरा मेंदुलमेंडु, ओसो मारेना इळ्न वने, वेट कोंडाङे मताङ. अवु नग़्का पिळ्‍विळ, पियल-पोळ्‍द रोमवा, इद्रम इनजोर मन्ह्‌ताङ: “ए सामि देवुळतिन, निमान पवित्र, पवित्र, पवित्रतोनिन! निमा बेरा लावता देवुळतिन! निमान मुनेताह जीवात मतोनिन, इंजेके वने जीवात मनवानिन, ओसोवने वावानिन,” इनजोर इन्ह्‌ताङ. 
अव जीवात मनदनव दिंचिङ राजकुर्सतगा उदतदिन, अमेसा-अमेसातुह्‌क जीवात मनदनदिन, कदर, मान, जोहर आयि इनदह्‌पा, 
वेर वीसा नालवुर पेदल्क वने, राजकुर्सतगा उदतदिनाङ काल्क अर्सि, अमेसा-अमेसातुह्‌क जीवात मनदनदिन मोळ्किह्‌तोर. ओसो तमाङ राजटोपिन, राजकुर्सता मुनेह तासिसि, इद्रम इन्ह्‌तोर: 
“ए मावा सामिनिन, मावा देवुळतिन! निमान सबेटविन पुटिह कीतिन. अव नीवाय विचरते मन्ह्‌ताङ. नीवाय विचरते अव पुटटाङ. अदिनेनाह्‌क निमान डीसाता, मानता, बेरा लावता लायकतोनिन आंदिन,” इनजोर इन्ह्‌तोर. 
