﻿Ɗerewel ana Pol sə vinden ayak anà ɗo sə Korintu ahay mama'am awan.
1.
Sə vindek ikwen ayak ɗerewel a anan nà, nen Pol. Kà zlak anan à nga à Mbərom sə ngumo aday nə̂ təra ɗo maslan ana Yesu Almasihu. Ma jak ikwen ayak 'am, manay tə Sostenes, winen ɗo sa ɗaf nga pə Yesu Almasihu kawa mənuko a re. 
Mə vindek ikwen ayak anà kwanay ɗo a Yesu ahay à wulen su doh sə Korintu. Kə təren ɗo a Mbərom ahay anga Yesu Almasihu. Mbərom a ngamak ikwen nà, anga aday kə̂ təren ɗo mə japay aya tə winen awan. Kə̀ ngamak anan anà ɗo sə dukwen gərmec ù vo anà Yesu Almasihu kwa aha ataya fok, anga aday tə̂ təra ɗo mə japay aya tə winen a re. Yesu nà, winen Bahay a mənuko a fok. 
Mbərom Bəbay a mənuko tə Yesu Almasihu Bahay a mənuko tâ gak ikwen sumor, aday tə̂ varak ikwen zay a tinen. 
Hwiya nə ngəran anà Mbərom jiya nà, anga sumor anahan sa gak ikwen ta sə japay kwanay tə Yesu Almasihu ata awan. 
Anga Mbərom ɗo sə japay kwanay tə Yesu Almasihu ata nà, kə̀ varak ikwen məgala ahay cara cara. Kə̀ tərak kwanay ɗo sa san way ahay, aday kə̀ varak ikwen məgala sə ɗakay anan 'am anahan anà ɗo ahay coy. 
Kə njiɗen anan way ataya awan. Bina, à alay a manay sə ɗakak ikwen anan ləbara a Yesu Almasihu ata ɗukwen nà, kə təmihen a nə tə ɗiɗek a à mivel a kwanay inde. 
Anga nan kutok, kwanay ɗo sa ba amay ana Yesu Almasihu Bahay a mənuko ataya nà, kə njiɗen anan məgala ahay fok coy. Awan a inde a kəcak ikwen nà, inde sabay. 
Mbərom ɗukwen i təra kwanay ɗo njənnjan aya hus à andav ana daliyugo inde, anga aday ɗowan â sa njaɗ pikwen alay sa 'am sə slahay kwanay à sariya a Mbərom inde pə luvon ana Bahay a mənuko Yesu Almasihu saa may ahay ata bay. 
Matanan, kə̂ jəjiren awan bay, anga Mbərom a sə ngamak ikwen aday sə japay kwanay tə wan anahan Yesu Almasihu Bahay a mənuko ata nà, winen nə ɗo ɗiɗek awan, a ga anan way anahan a sa ja ataya hwiya. 
Matanan, mərak uno ahay, na gak ikwen ayak amboh tə sləmay ana Yesu Almasihu, Bahay a mənuko. Kem, 'am â zlak ikwen pi zek, aday kə̂ gəzlen zek ahay à wulen a kwanay ahay inde bay re. Təren ɗo mə japay aya awan, mivel a kwanay â ga nə kərtek aday abayak nga a kwanay ahay ɗukwen â ga nə kərtek a re. 
Bina ɓa ɗo ahay inde ta nak ahay àga Kuluwe wa pə cakay uno, tə ɗakak uno anan atəre inde à wulen a kwanay. 
U no sa ja nà, azar su ɗo a kwanay aya ta wa: «Manay nà, ɗo ana Pol ahay.» Azar aya ite ta wa: «Manay ɗukwen ɗo ana Apolos ahay.» Azar su ɗo əngal aya asa ta wa: «Manay nà, ɗo ana Piyer ahay.» Aday azar su ɗo aya ite kutok ta wa: «Manay nà, ɗo ana Almasihu ahay.» 
Ki jen matanan ata nà, ɓa Almasihu a nà, kə̀ gəzlak anan zek anahan a ɗaw? Kabay kwanay kə jilen nə tə darak ayak pə dədom mə zləlngaɗ a anga kwanay nà, nen Pol a ɗaw? Kabay ki gen baptisma nà, tə sləmay uno, nen Pol a ite ɗaw? 
Nə ngəran anà Mbərom tətibay aɗəka, anga nen na gak anan baptisma anà ɗowan bay, əna si atə Kərispus tə Gayus ɗəkɗek. 
Natiya ɗowan inde i mba apan sa jəka a ga baptisma nə tə sləmay uno nen Pol nà, ibay. 
Ayaw, cəkəbay nə mbəɗəkek anan à nga wa aɗəka re, ɓa na gak anan baptisma anà Sitifanas, winen tu ɗo su doh anahan ahay re. Pə dəɓa anahan a wa, na gak anan baptisma anà ɗowan a inde nà, na san sabay. 
Bina, Almasihu a slan nen aday nà, saa gan baptisma anà ɗo ahay bay, əna saa ɗakay anan ləbara mugom a anà ɗo ahay. Nen apan ni ɗakay anan ləbara sa 'am anahan ata, əna tə asan way kawa su ɗo zənzen a sə bayak apan ata bay. Na ga matanan bay nà, anga aday amac a Yesu Almasihu a pə dədom mə zləlngaɗ ata â təra awan kəriya bay. 
Ləbara sə amac a Yesu Almasihu pə dədom mə zləlngaɗ ata nà, ɗo saa lize ahay ta ca apan nə kawa way sə mindel kəriya awan. Əna pə mənuko ɗo saa tam ahay ite nà, ɗa san zle wita nə məgala a Mbərom a way anahan. 
Ɗa san way ata zle nà, anga ɓa Mbərom kà jak à Deftere inde, a wa: «Ni lize anan kəlire su ɗo kəlire aya awan, aday ni jəjay anan asan way su ɗo ma san way aya fok.» 
Natiya kutok, kak Mbərom a kà jak matanan cukutok nà, ɗo a kəlire ataya ti ga inde asa ɗaw? Kabay miter sə Tawrita ahay nà, ti ga inde ɗaw? Kabay ɗo sa san sa vaɗ awiyaway ahay nà, tinen ti ga inde ɗaw? Asan way a tinen ata i man atan zek pə awan bay jiga awan. Mbərom kə̀ tərak anan asan way a tinen ata way sə mindel kəriya awan. 
Matanan ɗo sə daliyugo ahay, tə asan way a tinen ata, tə canak anan anà way a Mbərom sə ndakay tə kəlire anahan awan, əna tə sənak wa Mbərom a bay hwiya. Anga nan kutok, Mbərom a tə alay anahan a kə̀ varak anan cəveɗ sa tam anà ɗo sə sləne ləbara sa 'am a manay sə wazay anan ata awan. Əna cəkəbay, ɗo ahay ta ca pə ləbara ata nə kawa way sə mindel aɗəka. 
Yahuda ahay ite nà, ta gan may aday ti sa təma 'am ata nə, si ti canan anà masuwayan aday. Gərek ahay ite, a nan atan ti saa təma nà, si ti san tə kəlire sa nga a tinen a aday. 
Aya əna mənuko ɗə ɗakay anan nà, Yesu Almasihu nə tə darak anan pə dədom mə zləlngaɗ awan. Ata pə Yahuda ahay nà, wita way sə bənan atan mbiyeɗ. Pu ɗo sə pəra ahay ite, wita nà, ɗa ja nə 'am sə mindel kəriya awan. 
Əna pə mənuko ɗo a Mbərom mə ngamay aya kwa â ga nə à wulen sə Yahuda ahay wa, kabay à wulen su ɗo sə pəra ahay wa nà, ɗa san zle, Yesu Almasihu nà, winen məgala ana Mbərom tə kəlire anahan a təke fok. 
Way a Mbərom sa ga nà, kawa way sə mindel kəriya awan, aday cəkəbay, way ata a zalay asan way su ɗo zənzen awan. Way anahan sa ga nə kawa way bəle awan, aday cəkəbay way ata a zalan məgala à nga wa anà ɗo ahay bugol. 
Matanan, mərak uno ahay, ənga bayiken pi zek a kwanay a mə ngamay ataya aday. Pu ɗo sə daliyugo ahay nà, ɗo kəlire aya inde à wulen a kwanay gem ibay, ɗo tə məgala aya ɗukwen inde à wulen a kwanay gem ibay, aday ɗo sə ngəlaw ahay ɗukwen nà, inde à wulen a kwanay gem ibay re. 
Əna Mbərom a walay aɗəka nà, ɗo mindel aya awan, anga aday ti pəkan waray ì iɗe anà ɗo sa jəka tinen nə ta san way zle ataya awan. Aday Mbərom a walay ɗo bəle aya awan, anga aday ti pəkan waray ì iɗe anà ɗo sa jəka tinen məgala aya ata awan. 
Aday a walay ɗo kəriya aya awan, tu ɗo aday ɗo ahay tə kəɗey atan ataya awan, aday tu ɗo demdemem aya pə daliyugo wa. A ga matanan nà, anga aday sə lize anan ɗo sə mazlaɓ ahay pə daliyugo a anan wa. 
Matanan kutok, ɗowan i mba apan sə həran nga anà zek pa 'am anahan bay. 
Sə japay mənuko tə Yesu Almasihu nà, zek a Mbərom awan. Matanan həna Mbərom a təra anan Yesu Almasihu nà, dədazl sə asan way a mənuko kutok. Kawa sa ja nà, tə Yesu Almasihu ata kutok, ɗə tərak ɗo ɗiɗek aya pa 'am anahan aday ɗə tərak ɗo anahan ahay ma tam aya ì ines wa tə alay anahan. 
Anga nan kutok, kawa ana Deftere a Mbərom sa ja: «Kak ɗowan a inde a nan sa ga ti zek nà, â ga ti zek aɗəka nà, ti mer su way a Mbərom sa ga.» 
