GEN 1:1 Polobadu mu, te Godigo dagalu de tǫ si gagalama nigali sogo, hasia bolo te tǫ dago megi subo tiwai gilama me ebeo. Menio.
GEN 1:2 Te olo elaluyu, te gasagi yai tedali elaluali. Tama te megi te tǫde bidibo nai dabe augwali te sogo meni yai yai. Tama te be hulia saligo te genuai wę halua sai elalubadi, tama Godigo Mobo Bidi te daidu iba peyu, eda asu yai.
GEN 1:3 Tama Godigo te po wai, “Ula pedelao!” wai. Tialima, ula pedelai.
GEN 1:4 Godigo suali, te ula wiegi yai baso, te aga dwagi yai homu pemene yai. Tama agai te be hulibo de ula yabo te si pedai.
GEN 1:5 Tama tiyu, tama be posobo nogi agai poali te “Be posobo sogo ulade.” Tama te be hulibo nogi agai poali, te “Hulide dao,” wai. Be huliama, tama be posobo ula pedaluyu elama, tama te be posali deli sogo wali, hasia sogo deli wali silali.
GEN 1:6 Nosali Godigo te po wai, “Te wę ugwaba sagolabo dąį me deli pedelama, te wę si badu elalumainao,” wali. Tama te nai pedelali.
GEN 1:7 Godigo te dąį pedalumainogo yali, te ugwadu elalubo ąį me, aiyadu elalubo wę me, te buguliyu tama tiali.
GEN 1:8 Tama te dąį nigilali nogi agai te “Dagalu da,” po wali. Te be huliama, te be posobo ula pedaluyu elama, tama te be posali si sogo wali silali.
GEN 1:9 Nosali Godigo te po wai, “Te dagalu dologode elalubo wę, te wę dologode elalubo tǫ hania ugwaba pedalumainogo eyu, te wę te deli madiba me sisinigi pelama, te bulu tǫ wa pomainao,” te po wai. Tama tiyu, tama te bulu tǫ pedelama, tama wa pali.
GEN 1:10 Tama te wa pai pedelali Godigo te nogi poali te “Tǫ dao.” Tama wę dabe te deliba sisinani, tama te nogi poali, te “Tamu ąį dao.” Te Godigo aga digi te tigidali nigila silali nai wiegi yai yai sulama, te aga homu pemene wiegi yai yai.
GEN 1:11 Te tudibadu Godigo te po wali, “Te haniani te tǫde holabo nai pedalumainao, te tubo ge walobo keba dabe me, te haniani du walobo nedu du wai pedelao,” po wai. Tama te nai dabe pedelalio.
GEN 1:12 Tama tiliama, te haniani keba dabe me, te dwanai sibi me, tama te ni dabe me, te tǫde pedelai. Te meba gasagi yai dabego te nai du waliyu, te mebago te du wai walali. Te God aga digi te nigali nai tigidali sulama, te aga wiegi yai homu pemene yai.
GEN 1:13 Tama be huliali silama, tama kigamu be posobo pedelai. Te be posobo sela wabo silali dao.
GEN 1:14 Te tudibadu Godigo te po wai, “Te be huliyu, posoyu yabo te bodolu mumainogo, te ula ebo nai dabe te dagalude pedalumainao. Tama elaluyu, augwaligo te polua dabe me, te kibu be dabe me, te kibu be yabo sogo te haniani bodolu muna muna paibao.
GEN 1:15 Te ula ebo nai dabe te dagalude pedelama, te tǫba ula mawaibao,” te po wai. Tama te dabe pedela silai.
GEN 1:16 Godigo te genuai ula si pedalumainogo ilali. Genuai da, te giliga te be posobo tonaluyu, ula mabo da, tama dwasianu da, te polua tego da, te hulide tonaluyu, ula mabo da. Tama Godigo te hǫ dabe me pedalumainu yai.
GEN 1:17 Tama agai te dagalude ula dabe muani, te tǫba ula momainogo elama,
GEN 1:18 tama te be posobo me, te be hulibo me, te si tonalumainu yali, tama te be hulibo me te be posobo te si pedai. Tama God aga digi te nigali nai tigidali sulama, te aga dwagi yai homu pemene yali.
GEN 1:19 Te be huliama, be posobo pedelali. Te be posobo me si me si wabo silai dao.
GEN 1:20 Te tudibadu Godigo te po wai, “Węde te haniani bidibo ula elalubo nai dabe geninama pedelao,” po wai. “Tama te ba hani dabe pedelama, te dagalu tomode bola bilaluao,” wali.
GEN 1:21 Tama tiyu, Godigo te tamu ąįde bidabo moni dobo dwai sųgų dabe nigilali, tama te węde bidabo haniani ąį hasa me, te haniani ba dabe me nigilai. Godigo aga digi nigali nai dabe tigidali suali wiegi yai yai baso, tama aga dwagi yai homu pemene yai.
GEN 1:22 Tama augwali bugagia bidimainogo eyu, Godigo augwalibolo dwagi yai po mobo mayu, te po wai, “Te tamu ąįde haniani nai dabe geninama mu pedelama, tama te tamu ąį pągąna sao,” po wali. “Tama te ba dabe me tǫde umabo pedelao,” wai.
GEN 1:23 Be huliama, kigamu be posobo pedelali. Te be posobo a naga wali silai dao.
GEN 1:24 Te tudibadu Godigo te po wai, “Te tǫde bidabo ula elalubo nai hauwa te tǫdu pedelimainao. Te be pąde bidabo kibu dabe me, te bulude bidabo genuai hasa dabe me, te dwasianu hasa dabe me, te pedalumainao,” te po wai. Tama augwali pedelai.
GEN 1:25 Godigo te be pąde bidabo haniani kibu dabe me, te bulude bidabo genuai hasa me, dwasianu hasa dabe te pedalumainogo nigilama, pedelai. God aga digi te nigila silali nai tigidali sulama, tama aga wiegi yai homu pemene yai.
GEN 1:26 Tama Godigo te po wai, “Megi da, dago te we bidi dena tiwai niginao,” wali. “Dago augwali te sųgų dabe me, te ba dabe me, te be pąde bidibo kibu dabe me, te bulude bidibo genuai hasa me, dwasianu hasa dabe, te tigidali nai tonaluabo bidi nigilinao,” te po wai.
GEN 1:27 Tama tialima, Godigo te we bidi nigilama, tama God aga tiwai pedelai. Godigo te augwali meba bidi nigibadi, te meba we nigibadi yali.
GEN 1:28 Tama Godigo dwagi yai po mobo augwalibolo mayu, bomonama te po wai, “Dagego wai dabe hauwa ame nenama, tama augwali pelama, te tigidali bulu tǫ usu nama bidada pelama, tama te tǫde tigidali elalubo nai dabe tonaluaibao. Tama eno dagebolo te sųgų dabe me, te ba dabe me, te bulude genuai hasa, me dwasianu hasa dabe, te tonaluabo bomo mobao,” wali.
GEN 1:29 Tama Godigo te po wai, “Eno dagebolo te haniani dwanai dabe me, te nai walobo nosa me, te haniani du walobo nedu du wai dabe mobao. Te dagego tuabo nai dabe dao.
GEN 1:30 Tiali goli, eno te gesi ni yabe tiwai ni yabe te tigidali genuai bulu hasago me, dwasianu hasa dabego me, te tigidali ba dabego tuabo nai te eno mawai dao,” te po wai. Tama te nai dabe augwaligo tuabo nai tama pedelai.
GEN 1:31 God aga digi nigali nai tigidali sulama, dwagi yai yai baso, tama aga dwagi yai homu pemene mu yai. Te be huliama, kigamu be posai. Te be posobo te nogo a naga me badu kibisa deli wali silali.
GEN 2:1 Tama tialima, Godigo te dagalu e tǫ si nigila siliyu, tama tigidali nai me nigila silai.
GEN 2:2 Godigo tigidali sę te nogo a naga olama, te nogo me badu wali kibisa nogode silama, tama nogo a naga olama, me badu nogo si wali tede aga olo bidai dao.
GEN 2:3 Godigo te a naga olama, nogo me badu si wali side te dwagi yai po weyu, tama te side te gasagi yai tedali side da wai. Magi baso meni, aga tigidali nai nigibo sę ebo silibaso, te sogo God agai sę me ebeo, aga olo bidai.
GEN 2:4 Tama tialima, Godigo te dagalu me tǫ me tigidali nai dali nigai. Te Yawe Godigo te dagalu dali tǫ dali nigali sogo,
GEN 2:5 hasiabolo te ni me, nosa me te tǫde menibadi, magi baso meni, te Godigo te kulubage te tǫba tagala palisiąbadi tiali. Tama te sogo gi sę yabo bidi meni yai.
GEN 2:6 Mu tama te kulubage menibadi, tiali goli te wę tǫdu pedelama, tama te wę pali, te tigidali bulu habu usu nai.
GEN 2:7 Tama Yawe Godigo te tǫ meba selama, tama te tǫgo bidi nigai. Tama agai bidibo ula maiabo mobo te bidigo guni tomoba ponama, tama bidi te bidibo ula pedelai.
GEN 2:8 Te Yawe Godigo gi me deli te Iden bulude nigilama, te sia ge pedalubo badu elaluali. Tama te giba God aga te nigali bidi muai.
GEN 2:9 Tama Godigo te gide haniani ni dabe pedelao obaso pedelai. Augwali te gasa wiegi yai au yai mu, tama augwaligo dwagi yai nai walai. Tama te gi tomode te we bidi bidibo ula maiabo ni me deli digi elaluali. Tama gasa ni me deli te bidigo mena kolesaga ebo dwagi yai dawe, ma mena kolesaga ebo dwai dawe, te konemainogo yabo du elalubo ni me deli elaluai.
GEN 2:10 Tama te Iden bulu tomode te pabo ąį gomo elaluali, tede te giba wę maiabo wę me deli pedelai. Te ąį ma peyu, tama te gi bulubadu te wę pepeda pelama, te ąį me si me si tama pedelai.
GEN 2:11 Te hasia wę nogi augwaligo Pison nogi yali. Te wę agai te moni tǫ Havila bagulali.
GEN 2:12 Te Havila bulude te wiegi yai kapa nogi gol elalubo. Tama ni me deli elalubo, te ni kaneme te wiegi yai denami elalubo, te nogi augwaligo te deliam nogi yai. Tama mama yai wiegi yai masigi dabe elalubo, te masigi nogi augwaligo oniks nogi yali. Te nai si te dila pai nai si mu da.
GEN 2:13 Te si wali ąį nogi me, te augwaligo Gihon nogi yai. Te agai te bulu Kus te hani bagulubo.
GEN 2:14 Te sela wali ąį nogi Taigris nogi yai. Te ąį pali, te Asiria moni tǫ te giliga pedalubo badu pabo. Te me si me si wali ąį augwaligo te nogi Yufretis nogi yai dao.
GEN 2:15 Tialima, Yawe Godigo te bidi selama, tama aga te Iden giba muani, te aga sę eyu tonalumainogo yai.
GEN 2:16 Tama Godigo bidibolo weyu, te bomo yai po wai, “Nago te gide elalubo nedu du tigidali meba tubaso, usu yaibao.
GEN 2:17 Tiali goli, nago te nedu du te bidigo mena kolesaga te dwagi yai dawe, ma mena kolesaga te dwai dawe, te ola maiabo ebo te nedu du te nago munu me tulamuo. Te nedu du nago tubo te eno nage habu mu selibao. Te nago tuali da, teda mu tama da, te sogo nage isaibao,” wali.
GEN 2:18 Tama Yawe Godigo aga digi homude te po wai, “Tiyu, te bidi agaduba deli naga bididalio, te usugobeo. Te eno te aga tau siyu bidabo abagi me deli nigilaibao,” te homu yai.
GEN 2:19 Tama tibaso, Godigo tǫ selama, tama te tǫgo agai te tigidali kibu sibi, me hasa sibi, me te ba sibi nigali. Tama Godigo te hasa me ba sibi dabe te bidi bidibo madigi selasa pelama, te agai augwali mena nogi poaibao, te konemainogo tama yai. Tialima, bidigo te hasa sibi tigidali deli delibolo nogi mena mena pali, tama augwaligo te nogi tama elaluali.
GEN 2:20 Tialima, bidigo te be pąde bidibo tigidali kibu me, te bulude bidibo tigidali hasa sibi me, te tigidali ba sibi me nogi mena silali. Tiali goli, aga dali te abagi olama tau siyu bidabo bidi me deli te meni yani.
GEN 2:21 Tialima, Yawe Godigo te bidi piao olama, isai tiwai elaluali. Tama bidi pila mubadi, Godigo te bidigo punali dili me deli selama, tama te pesagede te mi ma dąų walali.
GEN 2:22 Godigo te bidi punali dili sali tego te we me deli nigilama, tama te we te bidi bidibo madi odasa pali.
GEN 2:23 Tama bidigo te po wali, “Megi da, te usu dao. Te aga ena tiwai dao, eno abagi mu dao. Aga dili te eno diligo nigali, tama aga mi da, te eno migo nigai. Godigo aga te eno punali diligo nigai, tama tibaso eno aga nogi ‘we’ poali.”
GEN 2:24 Tama tialima, te kolesaga pedelali, te bidigo aya ida tagalama, tama aga we dali kęą pali, tama augwa si deli mu pedelali, te kolesaga da tomode megi te elalua pobao.
GEN 2:25 Bidi de we si te augwali si tigi gudubo bolu meni yai. Tiali goli, augwa si hale me ebeo.
GEN 3:1 Te Yawe Godigo te tigidali hasa hani sibi nigali, tiali goli me deligo te hasamanigo tibo po wabo kolesaga konea pai tiwai gilama eyu, te aga aiyaba me elalugobeo. Tama me sogo te hasamanigo te we pageba asama, tama te webolo hanalu wali, “Mu dawe? Te Godigo dage sibolo te gide elalubo nedu du tugi olama, tigidali habu selaliwe?” te po wai.
GEN 3:2 Tama wego po wei ponoyu, te po wai, “da sigo te gide elalubo nedu du tigidali tumainogo yali.
GEN 3:3 Tiali goli, te tomode dolalubo nedu du me deli digi da, te da si go tusiąma habu selai. Godigo te tiwai po wai, ‘Dage sigo te nedu du togola tugio, ma dage sigo nogogo diągio. Tiyu, dage si isabuo,’ wali,” wego te po wai.
GEN 3:4 Tialima, hasamanigo webolo po weyu, te tiwai po wai, “Tegobeo. Menio. Dage si munu me isigobeo.
GEN 3:5 Dage sigo te nedu du tubaso da, teda dage sigo te mena dwagi yai kolesaga me, te mena dwai kolesaga me, te koneama, tama dage si te God tiwai pedelaibao. Godigo te koneama, tama tibaso agai dage si habu selali,” wali.
GEN 3:6 Te hasamanigo te po olama, tama wego te nedu du sulama, tama te nedu du gasa wiegi yai au mu sulama, tama aga du te wiegi yai mu elaluali. Tialima, wego te tiwai homu yai, ‘Te eno te tiwai dwagi yai koneabo kolesaga siyu da, teda te dwagi yai mu yaibao,’ te homu yalio. Tama tiyu, wego te nedu du meba selama, tama tuali. Nosali agai te nedu du meba bidibolo mani, tama agai me tualio.
GEN 3:7 Tama polo mu augwa si sulama koneai, te augwali si tigi mesegelisiąma, te bolu olo elaluali. Tama augwali sigo te ni kaya yabe dabe hobolama, tama augwa si te ugwa tiwai ilama, gudali.
GEN 3:8 Te be kedau ebo sogo pio ebode, augwali sigo odali, te Yawe God te gide bilibo odama, tama augwali si te ni dabe elalubo madi tomoba duala sigi pai.
GEN 3:9 Tiali goli, Yawe Godigo bomonama bidi i wai, “Nage mena bidibawe?”
GEN 3:10 Tama bidigo po wei ponoyu, te po wai, “Eno odali, nage te gide bilibo odoyu, tama ena bolu olo elalubaso, ena nagede wi eyu, geme duala siyu yali,” te po wai.
GEN 3:11 Tama Godigo agabolo hanalu wali, “Dego nagebolo olama, nage bolu olo elalubo po waliwe? Te nago eno nagebolo habu selali nedu du te nago tuai dawe?”
GEN 3:12 Tama bidigo po wei ponai, “Te nago enabolo mani we eno abagigo, agai te nedu du enabolo mobaso, tama eno tuai dao.”
GEN 3:13 Tialima, Yawe Godigo webolo te tiwai hanalu wai, “Magi baso nago te sę yaliwe?” Tama wego te po wei ponani, “Hasamanigo ena tibo po ola mobaso, tama eno te nedu du tuali,” te po wai.
GEN 3:14 Tama Yawe Godigo te hasamanibolo te po wai, “Nago te sę ebaso da, teda nage tede sęgę salio. Te gasa hasa sibi dabe tigidali augwaligo sęgę sabeo, nago naga te sęgę sai, nage tedali dao. Tama tibaso, eno te sę ilama, tama megi me tigidali sogo nosali te nage naga tabi bulugo naga tǫde bilaibao. Tama tiyu, nago te tǫde pobele bage tueibao.
GEN 3:15 Tama eno nago te webolo boi bidi ilibo sę iliyu, tama wego nagebolo boi bidi ilibo sę ilibadi yaibao. Tama eno nago te wego nosali ame nabo hani dali boi bidi ebo sę ilaibao. Te agai nago tobolude agalama, tama nago aga sągą gabulude gąų kelaibao,” Godigo te po wai.
GEN 3:16 Tama Yawe Godigo te webolo te po wai, “Te nage haliga elalubadi, te eno nagebolo genuai sęgę mawaibao. Tama nago wai ame nabo sogo, te nage genuai dene yaibao. Tiali goli, te nago naga bidi godolo mu eyu, tama agai nage tonaluaibao,” wali.
GEN 3:17 Tama Yawe Godigo bidibolo te tiwai po wai, “Nago te naga wego po odolama, tama eno nagebolo te tugio olama habu selali nedu du te nago tualio. Nago tama tiwai yaibaso, teda eno te tǫ dolama, tama te nai dabe bugagia holomainogo me egobeo. Naga digi naga te sę dene mu sesemane sogo iduama, te tǫde nai pedalumainogo yaibao.
GEN 3:18 Tama te sesane yai ni me te dwai nosa dabe te tǫde pedelaibao. Tama nago te naga gide nai selama, tueibao.
GEN 3:19 Te nage sę dene eyu, posolo pedelama, tama te tǫde nai pedelaibao. Tama nage sę dene sesemane sogo iduama, tama nago isabo sogo usu nigi pelama, tama nage te tǫba ma paibao. Magi baso meni, eno te tǫgo nage nigali, tama nage te tǫba ma paibao,” Godigo te po wai.
GEN 3:20 Tama te bidi Adam agai aga we nogi Iv nogi yali, magi baso meni, aga te tigidali bidibo we bidigo wai auwa dalali we mosi dao.
GEN 3:21 Tama Yawe Godigo te hasa tigiwali dabego te gudubo ugwa nigilama, tama agai Adam we de bidi sibolo menama, tama augwali sigo te ugwa gudali.
GEN 3:22 Nosali Yawe Godigo te po wai, “Te bidigo mena dwagi yai kolesaga me, te mena dwai ebo me, te megi koneanio, tama aga da tiwai pedelai. Tialima, dago aga gogolama, aga te bidibo ula mabo ni pageba pomainogo me egobeo. Tiyu, agai te nedu du me togola tudu da, te aga bidibo ula sesemane sogo elaluabuo,” te po wai.
GEN 3:23 Tama tibaso, Yawe Godigo te bidi te Iden gide sela sąnama, tama aga tagala palama, te Godigo aga nigali tǫde sę emainogo yai dao.
GEN 3:24 Godigo te bidi me we me sela sąnama, tama agai te bomai mobo ensel bidi tiwai, te bage te Iden giba muani. Tama agai te gegemani yai moni hwą ge me deli munama, tama te tigidali habuba bebegeli bebegeli bilibao. Te mobo ensel tiwai dabe dali, te moni hwą ge dali sigo tonalubao, tiyu bidi me deli te bidibo ula mabo ni pageba pedalidali weyu tebo dao.
GEN 4:1 Adam aga we dali pilama, tama we haliga yai. Tama wego ogwa me deli ame nenama, tama agai te po wai, “Yawego ena tau selama, tama eno ogwa salio.” Tama tibaso, agai te ogwa nogi Kein poai.
GEN 4:2 Nosali agai Abel ame nani, te Kein aga ama dao. Tama Abel te kibu sipsip dali, meme dali si tonalubo bidi pedelai, tama Kein te gi sę ebo bidi pedelali.
GEN 4:3 Tama nosali Keingo te gide nai dabe selama, tama agai selasa asama, tama te masigigo nigai alta sai daide munama, siago te nai uduyu, tama Yawebolo olo mayu, te ofa tama ilali.
GEN 4:4 Tama Abelgo te gomunai sipsip wai dabe meba selama, tama agai augwali elali. Tama agai te meba dwagi yai ili dabe me selama, tama ofa yali. Yawego dwagi yai homu pemene te Abelbolo elama, te aga ofa dali me tiali,
GEN 4:5 tiali goli agai te Kein dali, aga ofa dali, te agai godolo me ebeo. Tama Keingo wado homu dwai mu elama, tama agai gesabidi hulia sigi pai.
GEN 4:6 Tialima, Yawego Keinbolo te po wali, “Magi baso nage dwai sębę ebawe? Tama magi baso nago gesabidi gasagi yai pedelaliwe?
GEN 4:7 Te nago dwagi yai kolesaga eyu da, teda eno nage dali dwagi yai homu yaibao. Tiali goli, nago dwai kolesaga eyu da, teda dwai sę ebo kolesaga nage pąde bidiyu, tama tego nage godolo eyu, tama nage aiyaba elaluabo sogo tonalubao, te moni nasi yai bulu hasa tiwai dao. Tiali goli, nago bomo elama, te dwai sę ebo kolesaga aiyaba elaluao,” Yawego Keinbolo te po wai.
GEN 4:8 Tama nosali Keingo aga ama Abelbolo te po wai, “Da si gasaba gana dwasianu biligi pinao,” wali. Augwali si te nosa elalubo tǫba biligi pali, tama Kein hodaluyu, tama aga ama ela muani.
GEN 4:9 Nosali Yawego Keinbolo hanalu wai, “Naga ama Abel mena bidibowe?” Tama Keingo te po wali, “Eno konebeo. Magi yaliwe? Nago homugo ena te eno ama tonalubo bidi naga bidimainogowe?”
GEN 4:10 Tialima, Yawego Keinbolo te po wai, “Nago magi baso te dwai dwai sę yaliwe? Te naga amago kaneme te tǫba gelali, tama te kaneme te bidi me deli dogoni tiwai elama, tama i wabo eno odali, ‘Boi eyu, Kein ela muao,’ te tiwai po obao.
GEN 4:11 Megi te eno nage dolabo bomai po obao. Nage te naga gi sę yabo tǫde bidibo gudulama, paibao. Magi baso meni, te naga nogogo digi te naga ama kaneme te tǫba gelalio. Tama te tǫ te penane dalalubo tiwai elama, tama te kaneme tualio.
GEN 4:12 Tama tibaso, nago nai te tǫde bulubaso da, te nai bugagia me hologobeo. Te nago page bulu mu meniama, tama nage te tǫ sibi usu nama, te bulu wau bilibo bidi tiwai bidaibao,” te po wai.
GEN 4:13 Tama Keingo Yawebolo te po wali, “Te nago enabolo mabo sęgę te genuai mu dao. Eno te sęgę tolobo usugobeo.
GEN 4:14 Te nago ena e tǫde nago gedude me te sela sąwaibao po wai. Te ena bidabo bulu meniama, tama ena subigila te tǫde bilaibao. Tama bidi me deligo te ena suali da, teda agai ena ela muaibao,” wali.
GEN 4:15 Tiali goli, Yawego te po wai, “Menio. Te nage bidi me deligo ela muyu da, mu tama te eno genuai sęgęgo wei ponaibao.” Tialima, Yawego te dąį me deli Keinde muani, tama bidi dabego aga suyu, tama te dąį ilali subaso da, teda augwaligo aga me ela mugobeo.
GEN 4:16 Tama Kein te Yawe bidibo madi tagalama, wi pelama, tama tǫ me deli teba bidigi pali, te augwaligo te tǫ nogi poali “Subigila Bilibo,” te nogi poali. Te tǫ te Iden gi elaluali madi te giliga asobo badu elaluai.
GEN 4:17 Tama nosali Kein te aga we dali pilama, tama we haliga yalima, ogwa me deli ame nani, aga nogi Enok. Nosali Keingo hanu me deli nigilama, tama aga ogwa Enok nogi te hanu nogi polali.
GEN 4:18 Nosali Enokgo ogwa ame nenama, tama Enokgo te ogwa nogi Irat nogi poai. Nosali Iratgo ogwa ame nenama, tama Iratgo aga nogi Mehujael nogi poai. Nosali Mehujaelgo ogwa ame nenama, tama Mehujaelgo aga nogi Metusael nogi poali. Tama nosali Metusaelgo ogwa ame nenama, tama Metusaelgo aga nogi Lamek poali.
GEN 4:19 Tama nosali Lamekgo we si sai. We me deli nogi Ada, tama mego nogi Sila dao.
GEN 4:20 Adago Jabal ame nani. Jabalgo nosali ame nani wąį dabe augwali da te kibu bulmakau sibi negeyu, te ugwa bede bidaluali wąį hani dao. Jabal agai te kolesaga ebo hasia bolo gagalali, te sę page bidi mu dao.
GEN 4:21 Te Jabal aga ama nogi te Jubal. Te Jubalgo wąį hani sibi da, te augwaligo tęąbi te musik gita me, genagigo ona elebo tiwai dali, te gagali yali wąį dabe dao.
GEN 4:22 Tama nosali te we Silago te Tubalkein ame nani. Tubalkein da, te bras me ain te kapa sigo te haniani sę yabo nai tul dabe te nigibo wąį hani bidi dabe hasia bolo pedelai. Te Tubalkein aga abe nogi te Nama dao.
GEN 4:23 Tama me sogo te bidi Lamek aga we sibolo te po wai, “Ada me Sila, dage sigo eno pedauwalide po wabo odiąo. Dage si da, te Lamekgo we da, dage sigo eno po bugagia odiąo. Bidi me deligo ena elibaso, tama eno aga ela muani. Te bidi aga gesi ogwa bidi bidibadi, tama agai ena subigila dodolama elibaso, te eno aga ela muani.
GEN 4:24 Augwaligo te po wabo da, ‘Te bidi mego Kein ela muyu da, teda aga moni genuai sęgę mu saibao.’ Tiali goli, eno e po obao, bidigo ena elali da, teda aga moni genuai sęgę mu sesa pidubadi geaibao,” Lamek agai te po wai.
GEN 4:25 Te nosali Adam aga we dali ma piai. Tama wego ogwa ame nobaso, tama te po wai, “Te Godigo enabolo te gasa wai te Abel bidali hasegelama mani, te Keingo aga ela muani.” Tialima, agai te wai nogi Set poai.
GEN 4:26 Te nosali Setgo wai ame nenama, tama Setgo aga nogi Enos poali. Tama te sogo te bidi dabego te Yawe nogi wabo gagalama, tama agaba lotu po weyu bidali.
GEN 5:1 Te Adamgo wąį hani dabe pedelali nogi e tama dao, Godigo bidi dali, we dali, te aga digi tiwai nigai.
GEN 5:2 Godigo bidi deli badi, we deli badi nigai. Agai augwali si nigilama, tama augwali si dali dwagi yai sę yabo po olama, tama augwali si nogi poliyu, “Bidi da” wai.
GEN 5:3 Tama Adam te kibu be 130 bidama, tama aga te ogwa me deligo aya te aga tiwai mu pedelai. Tama Adamgo aga nogi Set nogi poai.
GEN 5:4 Tama ame nenama, tama nosali te Adam agai gasa ogwa me, wegi me ame neyu bidibadi, aga te gasa kibu be 800 me bidali.
GEN 5:5 Tama Adam te kibu be umabo bidi sese hauwa 930 kibu be bidama, tama aga isai dao.
GEN 5:6 Te Set te kibu be bidi sese a naga olama, ogwadu a naga, 105 kibu be bidama, te aga ogwa me deligo aya pedelali, nogi Enos.
GEN 5:7 Set aga te kibu be 807 ma bidama, tama aga gasa ogwa dabe wegi dabe ame nai.
GEN 5:8 Tama Set te kibu be bidi sese hauwa, te 912 kibu be bidama, tama aga isai dao.
GEN 5:9 Enos te kibu be 90 bidama, aga te ogwa me deligo aya pedelali, te ogwa nogi Kenan poai.
GEN 5:10 Enos te kibu be 815 ma bidama, tama agai te gasa ogwa wegi dabe me ame nai.
GEN 5:11 Enos te kibu be 905 bidama, tama aga isai dao.
GEN 5:12 Te bidi Kenan kibu be bidi sese sela olama, nogo si bidama, tama te ogwa me deli ame nani, te ogwa nogi Mahalalel,
GEN 5:13 tama Kenan te kibu be 840 ma bidama, tama agai te gasa ogwa wegi dabe ame nani.
GEN 5:14 Kenan te kibu be 910 bidama, tama aga isali.
GEN 5:15 Mahalalel te kibu be 65 bidama, tama agai te ogwa me deli ame nani tego aya pedelali, te ogwa nogi Jaret.
GEN 5:16 Tama Mahalalel te kibu be 830 ma bidama, tama agai te gasa ogwa wegi dabe ame nai.
GEN 5:17 Tama tiyu, tama Mahalalel te kibu be 895 bidama, te aga isai dao.
GEN 5:18 Te Jaret te kibu be 162 bidama, tama aga te ogwa me deligo aya pedelai, aga nogi Enok.
GEN 5:19 Tama Jaret te kibu be 800 ma bidibadi, tama agai te gasa ogwa wegi dabe ame nai.
GEN 5:20 Tama tiyu, Jaret te kibu be tigidali 962 siliyu bidama, tama aga isali.
GEN 5:21 Tama Enok kibu be bidi sese sela, me badu nogo a naga, 65 kibu be bidama, tama aga te ogwa me deligo aya pedelali, nogi Metusela.
GEN 5:22 Tama Enok aga te God dali deli homu naga eyu bilali. Tama tiyu, aga te kibu be 300 ma bidibadi, tama aga te gasa ogwa wegi dabe me ame nai.
GEN 5:23 Enok te bidibo ula dali e tǫde bidali kibu be te 365 dao.
GEN 5:24 Aga te God dali sesemane sogo deli homu eyu bidali, tama Godigo aga selama, tama bidi dabego aga ma subeo.
GEN 5:25 Tama Metusela te 187 kibu be bidama, tama aga te ogwa me deligo aya pedelali, te ogwa nogi Lamek.
GEN 5:26 Tama Metusela te gasa kibu be 782 ma bidibadi, tama agai te gasa ogwa wegi dabe me ame nai.
GEN 5:27 Metusela te kibu be 969 bidama, tama aga isai dao.
GEN 5:28 Tama Lamek te kibu be 182 bidama, tama aga te ogwa me deligo aya pedelali.
GEN 5:29 Tama agai te po wai, “Te Yawego te tǫ dolabo bomai po muanio. Megi da, te waigo da te tǫde sę dene ebo te toma nomainogo ilaibao,” te po wai. Tama tibaso, Lamek agai te ogwa nogi Noa poai dao.
GEN 5:30 Tama nosali Lamek aga te kibu be 595 ma bidibadi, tama agai gasa wegi ogwa dabe meba ame nai.
GEN 5:31 Tama Lamek aga te kibu be 777 bidama, tama aga isali.
GEN 5:32 Tama Noa te kibu be 500 bidama, tama aga te ogwa selago aya pedelali, Siem, me Ham, me Jafet, te tama deli deli ame nanio.
GEN 6:1 Nosali te we bidi hauwa te tigidali tǫde pedelama, tama augwaligo wegi mani me hauwa elaluai.
GEN 6:2 Tama te Godigo ogwa dabego te wegi mani dabe sulama, te gasa sawi yai mu yai. Tama augwali deli deligo augwa homugo digi te we dabe anoma eyu, tama augwali selama, bidali.
GEN 6:3 Tialima, Yawego te po wai, “Eno te bidibo ula sesemane sogo bidada pomainogo sesabi gana emainu mabo mobo te momainogo me egobe, magi baso meni, augwali te osogo bidabo nai tama naga da. Megi da, te bidi bidibo ula te kibu be 120 naga usu nama bidimainu yaibao,” Godigo te po wai.
GEN 6:4 Tama te sogo me, te nosali sogo me, te moni genuai bobobage bidi dabe meba te tǫde bidaluali. Te bidi dabe augwali te Godigo ogwa dabede sali te we dabego augwaligo ame nani bidi dabe bidali. Augwali te bomai bidi mu gagalama, tama te sogo augwali nogi genuai elaluai.
GEN 6:5 Te Yawego te tigidali tǫ badu bidalubo we bidi dabego ebo kolesaga suali, te dwai dwai mu yali. Augwaligo homu te dwai sę ebode naga konealuali.
GEN 6:6 Tama Yawego te polobadu bidi de we si tǫgo nigilama, te dwagi yai homu pemene yali, te homu ma koneani. Tiali goli, agai te we bidi hani dabego homu suali, te augwaligo homu te dwai naide naga konebaso, tama tede homu dene eyu, agai te polobadu dwagi yai homu pemene yali tiwai gilama ma ebeo. Te meni.
GEN 6:7 Homu dene mu eyu, tama agai te po wali, “Te eno nigali bidi tigidali te eno ela silaibao, te augwali menade bidada pabo te mu silaibao. Te eno tigidali hasa sibi dabe tigidali me, te ba dabe me, te nai dabe me, tigidali silaibao. Magi baso meni, ena digi ena te nai dabe nigali goli, augwaligo ebo kolesagago enaba dene ilibo dao, tama wiegi yai homu pemene ma egobeo,” te po wai.
GEN 6:8 Tiali goli, Yawego te bidi Noa dali digi dwagi yai homu pemene yalio.
GEN 6:9 Te Noade po da te tiwai dao. Agai ogwa sela elaluali, Siem, Ham, me Jafet. Noa da dwagi yai bidi, te sogo bidali we bidi tomode te Noa deli digi aga bilibo kolesaga te Godigo gedude dolo mu yali. Aga te God dali deli homu naga eyu, tama Godigo abagi mu dao.
GEN 6:11 Tiali goli, gasa we bidi dabe augwali tigidali te God gedude dolama bidali, tama dwai kolesaga me, te hwįbo kolesaga me, te tigidali habuba pągąna sigi pai.
GEN 6:12 Tama Godigo tǫba tonaluama, tama agai tigidali bidigo dwai kolesaga mu ebo suali. Te bidigo bilibo kolesaga te gaga pai mu pedelama, tama dwai kugumini naga yai.
GEN 6:13 Tialima, Godigo Noabolo te po wali, “Tigidali bidi augwaligo tigidali tǫde te haniani dwai hwįbo kolesaga mu ebo. Tama tibaso, eno tede homugo konea palama, tama te homu ebao, eno augwali dolai hagede ebao. Te eno tigidali we bidi mu silaibao.
GEN 6:14 Tama nago dwagi yai ni pedai selama, tama naga moni genuai geba sip me deli nigao. Nago te tomode be habu meba nigilao, tama tomode me bulu badu mabode te agebele megego bugagia sebelao.
GEN 6:15 Nago te tiwai sip nigao. Te sip bobage usu sabo, te 133 mita, te aga genuai ilabo usu te 22 mita dao. Tama nago ugwaba bobage usu ni sabo, te 13 mita dao.
GEN 6:16 Nago te sip pedu nigilao. Tiali goli, te sip bulubadu paiabo ni name dabe augwali te pedu dologoba mu paigio. Menio. Te hap mita olo elalumainao, te ula tomoba asomainu. Te sip tomode be sela te tama tiwai sę yao, me deli aiyadu, me deli tomode, me deli ugwadu. Tama nago te me bogo badu te sip tomoba pabo sunumi me deli nigao.
GEN 6:17 Te eno te tǫde wę asobo genuai mu pedalumainu elama, te tigidali bidibo ula elalubo nai dabe dola silimainu yaibao. Te tǫde tigidali nai dabe isila silaibao.
GEN 6:18 Tiali goli, eno nage dali da, te eno bomai po dąų walaibao. Nage da, naga we dali badi, te naga ogwa dabego augwa we dabe dali, dage da te moni geba sip tomoba bula sao.
GEN 6:19 Tama nago te tigidali haniani hasa dabego si si sao, te me omai, me so tama, si sao. Tama nago augwali te duga dali hodobo te moni sip tomoba sela pobaso da, teda augwali me isigobeo.
GEN 6:20 Te tigidali haniani ba me, te genuai me, te dwasianu dabe me, te omai de so si si augwali te sip tomoba pelama, te augwali me isigobeo.
GEN 6:21 Tama nago te naga tuabo haniani nai badi, te haniani hasa dabego tubo nai me, te ba dabego tubo nai me selama, te moni sip geba tomoba muao,” te po wai.
GEN 6:22 Tialima, Noago Godigo agabolo te wali po gilama te tigidali sę ela silai.
GEN 7:1 Nosali Yawego Noabolo te po wai, “Eno nage deli naga nage te tigidali bidi tomode dolo bidibo sualio. Tama tibaso, megi nage te moni geba sip tomoba, naga we wai puluba tigidali dali tomoba bula sao.
GEN 7:2 Tama nago te tigidali haniani hasa dabe, te ofa maiabo usu eyu, meda meni yai hasa dabe naga sobadi, te omai a naga olama, me badu nogo si badi, te so me a naga olama, me badu nogo si, te augwali selama, te sip tomoba muao. Tiali goli, te eno gedude wiegi yai isąyani hasa, te ofa maiabo usu meni yai hasa dabe, te nago omai dali, tama so dali, te si naga sao.
GEN 7:3 Tama tiali goli, nago te tigidali haniani ba dabego te omai ba a naga me si sobadi, te so ba me a naga olama, me si sobadi yao. Nago tama tiyu da, teda augwali me isisąyu, tama nosali augwaligo wai dabe hauwa ma te tǫde dala pomainao,” wali.
GEN 7:4 “Tama te nogo a naga olama, me badu nogo si, te tama si silama, tama eno te tǫba kulubage tagala palama, tama te kulubage tulaludubadi, te bidi sese si ulade me, te bidi sese si hulide bidibadi yaibao. Tama te kulubagego te eno te bidibo ula elalubo tigidali ena nigali nai te tǫ daide eno sela sąna silaibao,” te po wai.
GEN 7:5 Tialima, Noago te tigidali sę te Yawego agabolo po wali gilama te sę ela silali.
GEN 7:6 Tama Noa te kibu be 600 bidai elalubadi, tama te genuai wę te tǫde pedelai dao.
GEN 7:7 Tama Noa we de bidi si dali, te aga ogwa dabe me, augwa we dabe dali, te geba sip tomoba bula sali, te wę asiyu, te augwali me dologobeo.
GEN 7:8 Tama te tigidali haniani hasa, dwagi yai me te dwagi yai isiąwani hasa dabego te omai me so deli deli sesa pobadi, tama te ba dabego me, te dwasianu hasa dabe me, te tigidali omaigo siyu, sogo siyu elama,
GEN 7:9 te sip tomoba Noa dali pali, te Godigo po wali gilama tama yalio.
GEN 7:10 Tama tiyu, te nogo a naga olama, me badu nogo si sogo silama, tama te genuai ąį asiyu, te tǫ mesegelalio.
GEN 7:11 Te Noa te kibu be hauwa mu 600 bidama, tama te si wabo polua, dei 17 nogo si olama, sągągo a naga, me badu sągągo si tama side, te tǫ dologode te tigidali genuai wę dabe te sunumi dala pela silama, tama wę ugwaba pedelali. Tama dagalude me te tigidali dedage dala pelama, tama wę aiyaba gelalio.
GEN 7:12 Tama genuai kulubage mu tuludubadi, te hauwa sogo huliyu, posoyu yali, te ulade bidi sese si 40 dei, te hulide bidi sese si 40 sogo bidibadi, tama yali.
GEN 7:13 Tama te genuai ąį asobo gagalali side naga, te Noa me aga we me, te aga ogwa sela Siem, me Ham, me Jafet dali badi, te augwa we dabe sibi dali, augwali te sip tomoba bula sali.
GEN 7:14 Tama tigidali haniani bulu hasa dabe me, te bede bidibo hasa dabe me, te dwasianu hasa me, te tigidali haniani ba sibi me, augwali te sip tomoba Noago hani dali pali.
GEN 7:15 Te tigidali bidibo ula elalubo haniani nai sibi te omai me so te deli deli naga selama, augwali Noa dali te sip tomoba pali, te Godigo wali po tiwai gilama yalio. Noa te sip tomoba bula sabode, tama Yawego te sip sunumi paliali.
GEN 7:17 Tama te moni wę pedaludubadi, te bidi sese si sogo elama, tama bo dabo ugwaba mu holama, tama te geba sip ugwanu sela holali. Tama sipgo te tǫ taga holali.
GEN 7:18 Tama wę genuai mu pedelama, tama sip te wę daide ugwadu biliduali.
GEN 7:19 Tama wę bo dabo ugwanu mu holodu genama, tama tigidali moni bobage bulu du mesegelali.
GEN 7:20 Tama pelama, tama te węgo tigidali bulu du aiyaba elalualima, tama ugwanu mu holodu geani, te usu ni sabo te 7 mita dao.
GEN 7:21 Tama tǫde bidibo ula elaluali nai dabe tigidali isa silai, te ba dabe me, te be pąde bidalubo hasa dabe me, te dwasianu hasa dabe me, tama tigidali nai me, te we bidi dali tigidali isila silai.
GEN 7:22 Te tǫde bidibo ula elaluali nai dabe tigidali isalio.
GEN 7:23 Yawego te tǫde tigidali nai dolali, te we bidi dabe me, te be pąde bidibo hasa dabe me, te dwasianu hasa dabe me, te ba sibi dabe me, te tigidali dolai. Tama te hani me deli naga augwali te węgo me dolobe, te Noa aga hani dabe me, tama augwali dali te sip tomode bidali nai dabe dali, augwali dolobeo.
GEN 7:24 Tama wę moni bage mu pedaludubadi, tama tǫ mesegelai elaludubadi, tama bidi sese a naga olama, me badu nogo si olama, te gasa bidigo nogo si sogo, 150 dei te wę elaludubadi geani.
GEN 8:1 Te Godigo Noa dali, te bulu uni hasa dabe dali me, te be pąde bidalubo hasa dabe me aga dali te sip tomode bidalubo, te Godigo homugo koneani. Tama tiyu, Godigo te wali te tǫ daide ugwadu bilimainu ilama, tama wę aiyaba kekasa dulubo gagalali.
GEN 8:2 Tama tǫ dologode elaluali tigidali węgo sunumi, me te dagalude dedage elaluali, tigidali te palia sali. Tulubage te dagalude ma tulusiąbadi,
GEN 8:3 tama wę aiyaba kekasa dulali. Te aiyaba dulubo sę idubadi, te tama polua nogo a naga, te 150 sogo teba usu nani.
GEN 8:4 Tama te polua a naga me badu si wali, te polua dei nogo si olama, a naga, me badu si, te 17, tede te moni geba sip te bulu du me deliba dąų wagi pali, te bulu du dabe nogi Ararat dao.
GEN 8:5 Tama te wę aiyaba duludubadi, tama te nogo si polua, dei deli wabode, te gasa pąde elalubo bulu du tobolu dabe pedali gulalio.
GEN 8:6 Nosali te bidi sese si wabo side silai madi, tama Noago te sip pola sali dwasianu sunumi dalama,
GEN 8:7 tama sisi yai ba me nogi kotkot, te ba tądi tiwai ba me deli tagala palali. Te ba pelama, bola bilidubadi, te tǫ wę sula sabo sogo usu nigi pai.
GEN 8:8 Tama nosali Noago ba hi me deli tagala palai, te wę aiyaba kekasa dulaliwe naga konemai hagede tialio.
GEN 8:9 Tiali goli, ąįgo te tǫ halualudubadi gebaso, tama te ba hi aga dualama, toma nabo madi meni baso, te aga ma geasa aselama, tama Noago nogo buluba dinama, tama aga sip tomoba ma sali.
GEN 8:10 Tialima, Noa te me sela, me sela, me deli, te tama sogo bidama, tama agai te ba hi ma tagala palai.
GEN 8:11 Tama te be pio mu ebode te ba higo Noa bidibo madi ma aselama, tama aga penanide te gesi ni oliv yabe me deli selasa asali. Tama tibaso, Noago koneani, te wę aiyaba kekasa dulali dao, wali.
GEN 8:12 Tama aga te a naga me si, te tama sogo tonaluama, tama te ba hi ma tagala palai. Tama te ba hi munu me asobeo.
GEN 8:13 Noago kibu be 601 elama, tama te polua deli wabo, dei deli ebode te tǫ daide elaluali wę tigidali sula sali. Tama Noago te sip haluali nai dagala sąnama, tama tonono bilali. Tama agai te tǫ wa pabo suai.
GEN 8:14 Tama bidama, tama te polua si, te dei 27, te sogode te tǫ tigidali mu wa palio.
GEN 8:15 Tama Godigo Noabolo te po wai,
GEN 8:16 “Nago te geba sip tagalama, tama nage naga we dali, me naga ogwa dabe, augwa we dabe dali, dage tǫba aiyaba dulao” po wai.
GEN 8:17 “Tama tigidali hasa sibi dage dali aiyaba sela dulao, te ba dabe me, te be pąde bidalubo hasa dabe me, te genuai bulu hasa dabe me, dwasianu hasa dabe me, te tigidali te tǫba dulao. Te augwali bilaluyu, tama wai dabe ame nenama, umabo pedaliyu, tama tigidali tǫ pedai usu ilimainao,” Godigo te po wai.
GEN 8:18 Tialima, Noago te sip tagalama, te aga we dali, te aga ogomani dali, te augwa we dabe me, augwali hodobo te tǫba dula silali.
GEN 8:19 Tama te tigidali uni hasa sibi me, te be pąde bidibo hasa sibi me, te ba dabe me, te dwasianu hasa sibi dabe, augwali te deli deliba naga hodobo sisina silama, tama te sip tagalama, tama tǫba dula silali.
GEN 8:20 Tama Noago te Yawebolo nai olo momainogo eyu, tama te ofa maiabo alta sai nigali. Tama agai te tigidali haniani hasa sibi tigidaligo te ofa maiabo usu yai hasa deli deli, me te ba dabe me sobadi elama, tama agai augwali elama, ofa yalio. Tama agai te alta sai ilali madi daide ulali.
GEN 8:21 Yawego te gasa sawi yai pusu yai ofa ulubo denami odobaso, tama agai aga homude te po wai, “Eno te we bidi dabego dwai kolesaga wei ponoyu, te tǫ dolabo po munu ma wagobeo. Eno koneani, te bidi dabe ogwa bidi bidibo sogo gagalama, tama peyu, sesemane sogo te bidi dabego homu kolesaga dwai elaluduai. Eno te bidibo ula elalubo nai tigidali te munu me ma dologobeo, te eno megi yali tiwai me egobeo.
GEN 8:22 Tama tiyu, te nai bulabo sogo me, te nai sabo sogo me elaluaibao. Tama te giliga nanobo sogo me, te tulubage sogo me elaluaibao. Te giliga me te be hulibo tama elaluaibao. Te e tǫ elalua pobadi, tama te tigidali nai me sia sogobeo,” Yawego te po wai.
GEN 9:1 Te Godigo dwagi yai po mobo Noabolo me, aga ogomani dabe dalibolo mayu, e tama po wali, “Te wai dabe hauwa mu ame nenama, te dagego hanigo te tigidali tǫ pedai pągąna sao.
GEN 9:2 Te tigidali tǫde hasa sibi me, te ba dabe me, te dwasianu hasa sibi dabe me, te sųgų dabe, te augwali dagede wi mu yaibao. Eno te augwali dagego nogoba muyu, tama dagego te augwali tonaluaibao.
GEN 9:3 Dagego te tigidali haniani hasa sibi me te haniani tǫde bilalubo hasa, te dagego tuabo nai da, te usu yaibao. Polobadu eno te we bidi dabebolo te tǫde holobo nai, te nai walobo nosa me, te haniani du walobo nedu du wai dabe, te nai dabe eno tama mayu, tama dagego tuabo nai dao wali. Tama te tiwai gilama eno megi obao, te tigidali nai te dagego tuabo nai dao.
GEN 9:4 Tiali goli, te nai me deli da dagego me tugio, te kaneme hauwa me elalubo mi, magi baso meni, te kaneme da, te bidibo ula elalubo page te dao.
GEN 9:5 Te bidi me deligo dage ela mubaso da, teda eno te bidi sula tagalogobeo, eno agabolo me wei ponaibao. Tama te hasa sibigo dage me elibaso da, teda aga me eno ela muaibao. Ma, bidigo gasa bidi ela mubaso da, teda agabolo eno wei ponaibao.
GEN 9:6 Te bidigo gasa bidi ela mubosi, aga digi te bidi dabego nogode isimainogo yaibao, magi baso meni, ena God eno bidi nigali, te ena noma bidi tiwai digi nigali.
GEN 9:7 Megi da, dagego wai dabe hauwa ame nomainao, tama dagego wai dabe hani te hauwa mu pedelama, tama tigidali tǫ pedai badu pągąna sao,” Godigo te po wai.
GEN 9:8 Tama Godigo Noa dali, me aga ogomanibolo dali po weyu, bomonama te po wai,
GEN 9:9 “Megi ena da, eno bomo yai po dage dali, me te dagego nosali ame neyu elalua pabo bulai wai dabe dali te dąų obao.
GEN 9:10 Tama eno te tigidali bidibo ula elalubo nai sibi dali me te bomo yai dwagi yai po dąų obao, te ba dabe me, te bidigo negebo hasa dabe me, tama te bulude bidalubo uni hasa sibi dabe me, tigidali te dage dali sip tomode bidaluai.
GEN 9:11 Eno dage dali e tama pogo dąų obao, eno po dąų mu weyu, te bidibo ula elalubo tigidali nai dabe te eno munu me ma te ąįgo me dologobeo. Tama wę asiyu, te e tǫ munu ma dologobeo,” Godigo te po wai.
GEN 9:12 Tama Godigo te po wali, “Eno te dagalude unigi bidi mubo, te eno dage dali, me te hasa sibi dali, sesemane sogo yali te dąį tiwai mubao. Te unigi bidi te eno tigidali tǫde bidi dali po dąų wali dąį dao, tama te dąų wali dwagi yai po munu me siligobeo.
GEN 9:14 Te eno dagalude te pǫ pedalumainogo ebo sogo da, teda te unigi bidi me pedelaibao.
GEN 9:15 Tama tiyu, eno te po dage dali, me te hasa sibi dabe dali, te dąų wali po eno homugo konealu, teda te tiwai wę asiyu, te bidibo ula elalubo tigidali nai dabe me dologobeo.
GEN 9:16 Te eno te unigi bidi te dagalude pedalubo subo sogo da, teda eno te elalua pabo gamonabo dąų wali po sesemane sogo kone palu, te megi eno te tigidali tǫde bidibo ula elalubo nai dabe dali me tiaibao.”
GEN 9:17 Tama Godigo po weyu, Noabolo te po wali, “Te e unigi bidi da, te eno dąų wabo dwagi yai po te tǫde bidibo ula elalubo tigidali nai dabe dali dąį ilibao,” te po wai.
GEN 9:18 Te e da Noago ogwa sela te sip tagalama dulali ogwa sela nogi dao, Siem, me Ham, me Jafet dao. Tama Ham te Kenango aya dao.
GEN 9:19 Te bidi Noago te ogwa dabe da, augwali te tǫde bidalubo tigidali bidi sibigo wąį monu dabe te augwali dao.
GEN 9:20 Noa aga te gi sę ebo bidi bidai, tama aga te bono du ąį wain gi bulali.
GEN 9:21 Tama nosali me sogo deli sogode agai te wain bomai ąį meba tulama, te aga tobolu gęǫ eyu, aga esela pai. Tama eyu, aga ugwa dabe pepeda pelama, tama aga bolu olo te aga ugwa be tomode pila muani.
GEN 9:22 Tama Ham, te Kenango aya, agai te aga aya bolu olo pila mubadi sulama, tama aga pelama, aga ama sibolo wagi pai.
GEN 9:23 Tialima, Siem de Jafet sigo te ugwa selama, te augwa si nageba muani. Tama augwali si te ugwa be tomoba tudibadu naga pelama, tama augwa si aya te ugwago haluali. Te augwali sigo gesabi begelama, te augwa si aya bolu olo pila mubo subeo.
GEN 9:24 Tama nosali Noa aga hodaluama, tama aga homu kolesaga ma peda pabode, agai odali, te sabi bidi ogwago te agade yali po odai.
GEN 9:25 Tama agai te po wali, “Genuai sęgę te Kenande ugwadu elaluaibao. Te aga hani dabe te aga ama dedego hani dabego nogi meni yai sę ebo olo gagalama, bidaibao,” wali.
GEN 9:26 Tama Noago te tiwai po me wali, “Dago te Yawego nogi ugwaba sinao, te Siemgo God da. Kenan da, te Siemgo olo sę ebo bidi elaluaibao.
GEN 9:27 Eno homugo Godigo Jafetgo wai puluba dabe te hauwa pedalumainu ilaibao, tama augwali te Siemgo hani dabe dali bugagia bidalumainu yaibao. Tama Kenan da, te Jafetde te olo sę ebo bidi elaluaibao,” te po wai.
GEN 9:28 Te genuai wę asali sila madi, tama Noa te kibu be hauwa 350 mu ma bidai dao.
GEN 9:29 Tama e tǫde bidali sogo te umabo kibu be 950 bidama, tama aga isai dao.
GEN 10:1 Te e dao te węgo ela silai madi te nosali Noago ogwa sela Siem, me Ham, me Jafet, te augwali selade pedelali bidi hani dabe te nogi e dao.
GEN 10:2 Te e dao te Jafetgo ogwa dabe dao, Gomer, Magok, Madai, Javan, Tubal, Mesek, me Tiras, te tama dao.
GEN 10:3 Te Gomergo ogwa dabe, te e da, Askenas, Rifat, Togarma, te tama.
GEN 10:4 Te Javango ogwa dabe da, e dao, Elisa, Tarsis, te Saiprus bidi hani me Rodan hani bidi dabe dao.
GEN 10:5 Te e hani wąį dabe da, augwali te ąį sanede ma te ąįgo bobegelali tomode bidaluali hani dao. Augwali te hani bidi te Jafet tede pedelama, tama deli deli hani te augwa bidibo pedai badu nosali bidalua pali. Tama deli deli hani augwa po tedali tedali weyu bidai.
GEN 10:6 Te e da te Hamgo ogwa dabe dao, Kus, Isip, Put, me Kenan, te tama.
GEN 10:7 Te Kusgo ogwa dabe da, te augwali e dao, Seba, Havila, Sapta, Rama, me Sapteka. Ramago ogwa si ame nani, me Siba me Dedan.
GEN 10:8 Tama Kusgo ogwa deli bidali, te nogi Nimrot. Nimrot aga te tǫde hasia polasa te boma pai tobolu bidi pedelali.
GEN 10:9 Te Yawego gesabide te Nimrot te hasa gegebo sę mu koneai bidi pedelai. Tama te bidi augwaligo te po wali, “Te bidi aga te Nimrot tiwai tama dao. Te Yawego gedude aga te hasa dabe gegabo bomai bidi mu pedelai dao.”
GEN 10:10 Te Nimrotgo hasia bolo tonaluali moni hanu me si me si elaluali, Babel, me Erek, me Akat, me Kalne. Tama te hanu dabe me si me si te Babilonia pedai badu elaluali.
GEN 10:11 Nimrotgo te Babilonia taga soyu, te genuai hanu te Asiria tǫba nigigi pali, te hanu me Ninive, me Rehobotir, me Kala,
GEN 10:12 me Resen. Resen hanu te Ninive de te genuai hanu Kala si tomode elaluali. Te hanu dabe te Asiria dabego tǫ pedai badu elaluai.
GEN 10:13 Tama Isip te Lut hani sibigo aya pedelali, te Anam hani, me Lehap, Naptu,
GEN 10:14 Patros, Kaslu, te hani dabe, me Krit. Te Filistia bidi ama sibi te Krit te bidi hanide nosali pedelai dao.
GEN 10:15 Saidon aga te Kenango gomunai ogwa da. Kenan te Hit bidi dabego aya me da,
GEN 10:16 tama Jebus bidi dabe me, Amor me, Girgas,
GEN 10:17 Hivi, Arka, Sini,
GEN 10:18 Arvat, Semar, me Hamat, tama nosali Kenango hani deli deli pelama, te bidabo pesage te hauwa tǫ pedai badu nigilama, bidali.
GEN 10:19 Tama Kenan dabe bidali tǫ dąį te Saidon tedu gagalama, tama pelama, te Gerar tǫba dąį igi pai, tama te Gasa nogi wabo tǫ te pedai badu me dąį igi pali. Tama sesegedu begelama, te Sodomba, me Gomora, me Atma, me Seboim, te hanu dabeba sabaligi palima, tama pelama, te tǫ Lasa teba sabaligi pai.
GEN 10:20 Te bidi Hamde pedelali hani dabe te e tama. Te deli deli hani dabe te augwa bulude digi bidada pali. Tama nosali deli deli hani te augwa po tedali deli deli ola pelawai.
GEN 10:21 Tama Siemgo ogomani me elaluali, tama te da te Ebergo hani wąį dabe da. Siem da, te Jafetgo amanu dao.
GEN 10:22 Te e da te Siemgo ogwa dabe nogi da, Elam, Asur, Arpaksat, Lut, me Aram da.
GEN 10:23 Te Aramgo ogwa dabe, te e dao, Us, Hul, Geter, me Mesek dao.
GEN 10:24 Arpaksat aga te Selago aya, tama Sela te Ebergo aya dao.
GEN 10:25 Tama Ebergo ogwa si ame nani. Te mego nogi Pelek. Magi baso meni, aga te tǫde bididubadi, tama te bidi hani dabe augwaligo augwa tedali tedali po wabo gagalali, tama tebogo te augwali tomode pedai dao. Tama Pelekgo ama nogi te Joktan da.
GEN 10:26 Tama Joktan da, te Almodatgo aya, me Selep, me Hasarmavet, me Jera, te augwali tama bagego aya dao,
GEN 10:27 Hadoram, me Usal, Dikla,
GEN 10:28 Obal, Abimael, Seba,
GEN 10:29 Ofir, Havila, me Jobap da. Te tigidali da, te Joktango ogwa dabe nogi dao.
GEN 10:30 Te e bidi hani dabe bidaluali pesage da, te bulu Mesade gagalama, tama pelama, te Sefar pedai badu tugi pali, tama palima, te giliga pedalubo badu te bulu du dabe elalubo pedai badu tugi palio.
GEN 10:31 Te Siemgo hani dabede pedelali bidi dabe da. Tama deli deli hani dabe te augwa bidalubo bulude digi bidalua pali. Tama nosali deli deli hani dabe te augwa po dabe tedali elalua pali.
GEN 10:32 Te e nogi dabe nogi yali da, te Noago ame nani ogwade pedelali hani dabe nogi dao, tama te augwa bidali tǫ pedai dabe me da. Te węgo bidi ela silai madi, tama te nosali te tigidali tǫ pedaide te pedelali bidi sibi dabe, te augwali Noago wai dabego hanide naga pedela silali hani te megi me bidalubo.
GEN 11:1 Polobadu mu, te moni węgo bidi ela silai madi silama, tama te tǫde bidaluali bidi sibigo te wabo po deli naga elaluai dao.
GEN 11:2 Augwali te giliga pedalubo badu kikili pelama, tama augwali te malu tǫ me deliba sabolali. Tialima, augwali te malu tǫ nogi Sina te bulu habu badu bidaluai, te bulu nogi me Babilonia.
GEN 11:3 Nosali augwa hasi po minama, augwaligo tama tiwai po wai, “Awe, abagi dedeo! Dago te dwagi yai mama yai tǫ meba begelama, te siaba ulama, te masigi tiwai pedalumainu ilinao,” wai. Tama tilama, te be sę yabo masigi meni baso augwaligo te be sę ebo nai tama nigali. Tama te masigi dąų wabo simen meni baso, augwaligo te be sę eyu, dąų walobo nai kolta me selama, elaluai.
GEN 11:4 Tialima, augwaligo te po wai, “Megi da, dago dena genuai hanu me dedeli niginao. Tama te tomode moni bobobage sigi be nigaibao. Tama te be sese holobo te bobage ugwa dagaluba mu usu nigi holaibao. Tama tialima, te we bidi dabego te sę ebo suyu da, teda augwaligo dago nogi ugwaba saibao. Tama tiyu da, da munu me tedela pelama, gasa tǫ pedai badu gasa gasaba me tedela pelama, me bidigi pogobeo,” augwaligo te po wai.
GEN 11:5 Tialima, megi da Yawego te tǫde osogo bidibo bidi dabe augwaligo te nigila silali te masigigo sę ebo moni hanu dali, te moni bobage sigi be dali si, te suagasuyu dulalio.
GEN 11:6 Tama tibadi, agai te po wai, “Megi da, te e bidalubo bidi hani te deli hani bage naga dao, tama augwaligo po te deli naga elalubao. Tama tilama, augwaligo e moni hanu nigibo sę deli naga te yabo homu eyu, tama te sę usu yaibao. Tiali goli, augwaligo tama tiyu da, teda te pąde sogo digi tama te augwa digi te augwaligo tigidali haniani sę nigibo homu eyu, tama augwaligo te sę ebo me usu yaibao, tede ususiąbo egobeo, te augwa homu naga wali peyu bidaibao.
GEN 11:7 Tama tidali weyu, da te tǫba dulama, te augwaligo po dedeli wabo te augwali dogoni hasegelama, te mebago te mego wabo po te munu me odisiąmainu, te augwali hamena begela siligi pinao,” te po wai.
GEN 11:8 Tama tiyu, Yawego te augwali gasa gasa tedali tǫ pedaiba tedela pomainu ilalima, tama augwaligo te moni hanu munu ma nigibeo.
GEN 11:9 Tama augwaligo te hanu nogi Babel poai, magi baso meni, te Yawego te tigidali hani bagego po hasegelali, tama augwali hani bugulama, tama augwali tigidali tǫ pedaiba tedali tedali tedala pela silai dao.
GEN 11:10 Te e dao te Siemgo wai hani dabe dao. Te genuai wę asali bidama, tama nosali te kibu be si bidai madi, te sogo Siem aga kibu be bidi sese a naga 100 yia elalubadi, tama aga te ogwa me deligo aya pedelali, te Arpaksat ame nani.
GEN 11:11 Tama te ogwa Arpaksat ame nenama, tama te Siem te kibu be umabo mu, te 500 yia ma bidama, te agai gasa ogwa wegi me ame nenama, aga isai dao.
GEN 11:12 Tama te Arpaksat te kibu be 35 kibu be elama, tama aga te ogwa me deli Selago aya pedelali.
GEN 11:13 Tama nosali Arpaksat te kibu be umabo, te 403 kibu be ma bidama, tama agai gasa ogwa wegi me ame nenama, tama aga isai.
GEN 11:14 Tama te Sela te kibu be bidi sese deli olama, nogo si kibu be bidalima, te aga Ebergo aya pedelali.
GEN 11:15 Tama nosali te Sela te kibu be hauwa mu, te 403 ma bidalima, te agai gasa wegi ogwa me ame nobadi elama, te aga isai dao.
GEN 11:16 Te Eber te 34 kibu be bidama, te aga ogwa me deli ame nenama, te ogwa Pelekgo aya pedelali.
GEN 11:17 Nosali te Eber te kibu be umabo te 430 ma bidama, te aga gasa wegi ogwa me ame nenama, tama aga isali.
GEN 11:18 Te Pelek aga te kibu be bidi sese olama, nogo si bidama, Reugo aya pedelali.
GEN 11:19 Nosali Pelek te kibu be hauwa, te 209 ma bidama, tama agai gasa wegi ogwa me ame nobadi elama, te aga isai dao.
GEN 11:20 Te Reu kibu be bidi sese deli olama, nogo si olama, me si, 32 bidama, tama aga ogwa me deli Serukgo aya pedelali.
GEN 11:21 Tama nosali Reu te kibu be bidi sese hauwa 207 bidama, te agai gasa wegi ogwa me ame nobadi elama, te aga isai dao.
GEN 11:22 Tama Seruk te kibu be bidi sese deli olama, nogo si bidama, tama aga ogwa me deli ame nani ogwa Nahorgo aya pedelai.
GEN 11:23 Tama nosali Seruk te kibu be umabo 200 ma bidama, te aga gasa wegi ogwa me ame nenama, tama aga isali.
GEN 11:24 Tama Nahor te 29 kibu be bidama, te aga ogwa me deli ame nani, te ogwa Terago aya pedelali.
GEN 11:25 Nosali Nahor te kibu be hauwa, 119 kibu be ma bidalima, tama aga gasa ogwa me wegi ame nenama, tama aga isalio.
GEN 11:26 Tama Tera te kibu be bidi sese sela olama, nogo si, 70 kibu be bidama, te aga Abram, me Nahor, me Haran, te tama sela ogwago aya pedelai.
GEN 11:27 Te e da te Terago hani wai dabe dao. Tera te Abram, me Nahor, me Haran, te augwaligo aya da. Tama Haran te bidi Lotgo aya da,
GEN 11:28 tama Haran te aga bulude isali, te Ur te Kaldia pedai badu, te aga aya bidibadi dao.
GEN 11:29 Tama Abramgo te we nogi Sarai sali, tama Nahorgo te Harango wegi Milka sai. Haran te gasa wegi Iskago aya me dao.
GEN 11:30 Tama Saraigo wai ame nabo usu me ebeo.
GEN 11:31 Terago te aga ogwa Abram sali, tama Lot te aga wąį da, tama Sarai te aga wąį da. Lot te Harango ogwa, tama Sarai te Abramgo we da. Tama Tera dali, te hani bidi dabe dali, augwaligo te hanu Ur tagalama, te Kaldia pedai badu tedu peyu, tama te Kenan tǫ pedaiba bidigi pai. Augwali bidada pali, tama tomode te Kenan tǫba sabalisiąbadi, te Haran tǫ teba usu nama bidaluai.
GEN 11:32 Tama Tera te kibu be hauwa 205 mu bidama, tama aga te bidali pesage Haran te bulude isai dao.
GEN 12:1 Te Yawego Abrambolo te tiwai po wai, “Nago te nago tǫ badi, te naga ayago hani me, te naga ayago bulu me, taga pao. Tama nage eno ola mabo digi gasa pedai badu me bidigi pagameo.
GEN 12:2 Te eno nago wąį hani dabe te genuai hani mu pedalumainu yaibao. Te eno nage dali dwagi yai sę mu yaibao. Eno te nago nogi genuai ilaibao. Tama gasa we bidi dabe augwaligo te tiwai po waibao, ‘Eno homugo te Godigo enabolo dwagi yai sę emainao, te agai Abram dali yali tiwai yao.’
GEN 12:3 Te nage dali wiegi yai kolesaga ebo bidi dabe, augwalibolo te eno wiegi yai mobo augwaliba mayu yaibao. Te ena digi te nago nogi aiyaba muabo dwai po wabo bidi dabe te eno augwalide te dolabo po mu waibao. Tama tigidali tǫde bidalubo bidi hani dabe te nago hanide naga te wiegi yai mobo augwaligo saibao,” Yawego Abrambolo te po wai.
GEN 12:4 Tama te po obaso, Abramgo te Yawego po wali pelama, tama Lot aga dali pali. Abram bidali kibu be te bidi sese sela olama, nogo si olama, me badu nogo a naga, te 75 kibu be bidai elalubadi, te sogo agai te Haran hanude bidali tagalama, pai.
GEN 12:5 Tama Abramgo aga we Sarai sobadi, te aga amago ogwa Lot sobadi elama, te augwali hodobo pali. Tama augwaligo augwa sę ebo bidi dabe me sobadi, tama augwaligo te Haran hanude sali doado bage me tigidali selama, tama pelama, pelama, tama augwali te Kenan moni tǫ pedaiba soali. Augwali te Kenan tǫba sabolai madi,
GEN 12:6 tama Abram te tǫ tomodu ma pelama, tama aga te gasa pesage te hanu nogi Sekem teba saboligi pai. Tama te bulude te gasa moni ni mu deli nogi More te elaluali. Tama te sogo te Kenan hani bidi dabe te bulude bidibadi dao, tama augwaligo augwa tibo god dabebolo te moni ni pagede te augwa lotu po weyu, bidaluali.
GEN 12:7 Te Yawe Abram bidiboba pedelama, tama tobo po wai, “Te e genuai tǫ da, te eno nago wąį hani wai dabebolo mawaibao,” te po wali. Tama tibaso, Abramgo te Yawe agaba pedelali madi te pesagede te Yawebolo lotu po weyu, ofa nai mayu yabo alta sai nigai.
GEN 12:8 Nosali Abramgo te More bulu tagalama, ma pelama, tama dolo nogo pedai badu, te saut wabo, te badu peyu, tama te bulu du elalubo buluba sabolali. Te bulu du dabe elalubo badu te sia ge pedalubo pedai badu, te Betel hanu pąde elalubo madi, te badu bidigi pai. Tama agai te pesage me deli te Betel de Ai hanu si tomode aga ugwa be dabe dodolama, muani. Te hanu Ai te giliga dulubo badu elaluali, te Betel hanu te giliga pedalubo pedai badu elaluali. Tama Abramgo alta sai te bulude me nigilama, te Yawe nogi weyu, agabolo lotu po wai dao.
GEN 12:9 Tama elama, bidama, tama nosali Abram te me mu pidubadi geanima, te giliga pabo bogo badu te moni tǫ pedai Negeb, te badu sabaligi pai.
GEN 12:10 Te nosali Abram te Negeb tǫ pedaide bididubadi, te nasi ebo sogo pedelama, tama te bulude nai mu meni yai. Tama tibaso, Abram te Isip moni tǫ pedai teba pelama, te pęwadage sogo naga bidigi pai.
GEN 12:11 Tama Abram te pelama, te Isip pąba sabalubo sogo, te aga we Saraibolo tama po wai. Agai te po wali, “Odao, eno koneani, nage te gasa sawi yai we mu dao.
GEN 12:12 Te Isip bidi dabego nage sulama, te po waibao, ‘Te Abramgo we da,’ po waibao. Tama augwaligo ena ela munama, tama nage saibao.
GEN 12:13 Nago augwalibolo tama tiwai po wao, ‘Abram aga te ena abe da,’ wao. Tama po obaso da, te augwaligo dwagi yai kolesaga naga ena dali eyu, tama ena ela mugobeo,” wali.
GEN 12:14 Tama Abram te Isipba mu sabolali, tama te mu tama, te Isip bidi dabego te agai we suali, te gasa sawi yai mu asobo suali.
GEN 12:15 Tama te Isip dabego genuai polasa tuni bidi tego sę tonalubo bidi dabego te Sarai sulama, augwaligo augwa tuni bidibolo te po wali, “Te we da, te gasagi yai sawi yai we mu dao.” Tialima, augwaligo aga sigi pelama, tama tuni bidigo beba odasa pai.
GEN 12:16 Tama te genuai tuni bidigo Sarai godolo mu elama, tama agai dwagi yai kolesaga Abrambolo yali. Tama agai Abrambolo te sipsip me, meme me, bulmakau me, moni kibu donki me, te hauwa mu mobadi, tama sę ebo bidi me, sę ebo we me, te moni kibu kamel me, te tama nai Abrambolo mani.
GEN 12:17 Tiali goli, Yawego te haniani dwai gasi dabe te genuai tuni bidibolo me, te aga bede bidali we bidibolo dali tagala palama, te tuni bidigo te Sarai dali emai hagede dwai sę te wei ponoyu, tama tiai dao.
GEN 12:18 Tialima, te tuni bidigo Abram i olama, agaba asobosi, te agabolo te tiwai po hanalu wai, “Magi baso nago te tiwai kolesaga enabolo yaliwe?” te po wai. “Nago enabolo Sarai te nago we da po wabeo.
GEN 12:19 Nago te naga abe da po wali, tama tibaso te eno aga selama, te eno we tiwai bidali. Magi baso nago te kolesaga yaliwe? Naga we sao! Tama duga si piąo!”
GEN 12:20 Tialima, te polasa tuni bidigo aga bidi dabebolo po olama, tama augwaligo Abram te Isipde bidali sela sąwai. Tama augwaligo aga me, aga we dali me, te aga tigidali doado bage dali me gudulama, tama te Isip tǫ pedai sesegeba augwali dali hodobo pai, te Abram gasaba pomainogo tama yai.
GEN 13:1 Te Abramgo doado bage hauwa elaluali. Agai te sipsip me, meme me, bulmakau me, te dila pai kapa silva gol dali si, te tama nai doado bage hauwa mu elaluai. Tialima, Abramgo te Isip bulu taga soyu, te moni tǫ pedai badu nogi Negeb, teba soai. Agai te aga we me te aga doado bage tigidali selama, tama Lot me aga dali hodobo soali.
GEN 13:3 Tama Abramgo te Negeb tǫ nosali taga peyu, tama me pidubadi geanima, te aga te Betel hanu pedai badu sabaligi pai. Aga te aga polobadu ugwa be dabe elaluali madi, te Betel de Ai te hanu si tomoba bidigi pai.
GEN 13:4 Tama tede aga te alta sai polobadu nigali madi pelama, tama aga Yawego nogi weyu, lotu po te Yawebolo wali.
GEN 13:5 Lot te Abram dali hodobo bilali. Agai te meme, me sipsip, me bulmakau te hauwa mu elaluyu, te genuai we bidi hani me elaluai dao.
GEN 13:6 Abram de Lot sigo sipsip, meme, te bulmakau bage hauwa mu elaluali, tama tiyu, te augwali si deli madi hodobo bidabo te usu meni yai.
GEN 13:7 Tama wado po te Lot de Abram augwa si hasa tonalubo sę ebo bidi dabe tomode pedelali. Te sogo te Kenan dabe me, te Peres dabe me tede bidalubadi dao.
GEN 13:8 Tialima, Abramgo Lotbolo te po wai, “Dadi si te deli kaneme si dao. Tiyu, da si wado po wabuo, tama da si go sę ebo bidi dabe augwa hasi me wado po wabuo,” Abramgo te po wai.
GEN 13:9 “Suao, te genuai tǫ pedai elalubao. Te naga pedai badu bidabo madi me deli dodolama, tama nago ena taga peyu, naga teba bidigi painu te usu da. Te nage dolo nogo pedai badu painogo da, teda ena te pobase nogo pedai badu paibao. Ma, nage te pobase nogo badu painogo eyu da, teda ena te dolo nogo badu bidigi paibao,” Abramgo te po wai. Te augwa ama nami si tama po dodolali.
GEN 13:10 Tialima, Lot dolugulama, tonono bilali. Agai te tigidali tǫ malu te wę Jordan sesegedu tonono pali, te tigidali pedaiba usu nama, te Soar te pedaiba usu nigi palio. Te tǫ tigidalide te dwagi yai wę hauwa te gasa sawi yai, te Yawego Iden gide elalubo tiwai, me tama te Isip dabe tǫde elalubo tiwai elaluali. (Tama te sogo te Yawego te Sodom de Gomora te hanu si dolisiąbadi dao.)
GEN 13:11 Tama tibaso, Lot te giliga pedalubo pedai badu pelama, tama agai te wę Jordan sese badu elalubo tǫ malu tigidali sali. Tama tibaso, te augwali si hodobo ma bidibeo.
GEN 13:12 Abram te Kenan tǫde bididuali. Tama Lot te Jordan malu elalubo hanu dabe tomoba bidigi pelama, tama aga bidabo ugwa be dabe te Sodom moni hanu pąba pidubadi geanima, tama munama, bidai.
GEN 13:13 Tama te hanude bidalubo we bidi dabe augwaligo te dwai sę genuai mu te Yawe gedude yalio. Te augwaligo agai bomai po te wali me pabeo.
GEN 13:14 Te Lot pai madi, tama Yawego Abrambolo te po wai, “Nage ede dolaluyu, te nago tigidali pedaiba tonono pao,” wali.
GEN 13:15 “Te megi nago subo tǫ tigidali, te eno nagebolo mayu, tama nago nosali ame nabo hani wai dabebolo mobadi yaibao. Tama te tǫ dagego sesemane sogo mu elalua paibao.
GEN 13:16 Te eno nago wai puluba dabe hauwa mu te masigi sane kemi tiwai pedalumainogo ilaibao. Te bidigo te masigi kemi tigidali nedebo usu yabo homu eyu da, teda agai te nago wai puluba pedalubo tigidali te nedabo usu yaibao.
GEN 13:17 Tialima, nage hogodama, tama biliyu, tama te tǫ tigidali nago susa bilao. Magi baso meni, te tigidali tǫ te eno nagebolo mawaibao,” te po wai.
GEN 13:18 Tama tibaso, Abramgo aga ugwa be dabe gudulama, tama te bidali bulu tagalama, tama pidubadi geanima, tama aga pelama, te nosali te Hebron buluba bidigi pali, tama aga bidabo pesage te bidi Mamrego genuai ni dabe elalubo pąde te pesage nigali. Tama aga ugwa be dabe tede dodolama muyu, tama agai te Yawebolo lotu po wabo alta te bulude nigali.
GEN 14:1 Te Abram aga te Hebron bulude tama bidalubadi, tama te bidi nogi Kedorlaomer aga te bulu Elam gavman tuni bidi dao. Tama Kedorlaomer gavman tuni bidigo te gasa gavman tuni bidi dabe tonaluali. Tama agai augwali tonalubadi, te kibu be nogo si olama, sągą badu si wai, tama sągą badu sela wagi soabo kibu bede augwaligo te Kedorlaomer gavman tuni bidigo po sela sąwani, te takis mone me mabeo. Te tuni bidi dabe e dao, Bera te hanu Sodom gavman tuni bidi da, tama Birsa te Gomora hanu gavman tuni bidi da, tama Sinap te Atma gavman tuni bidi, me Semeber te Seboim tuni bidi, tama te Bela pedai badu gavman tuni bidi me elaluali, te bulu Bela te gasa nogi me Soar elaluai. Tama te bage augwaligo te tuni bidi Kedorlaomer hagela homu eyu, agai po sela sąwani. Tialima, te nogo si olama, sągągo me si me si wabo kibu bede, te gavman tuni bidi Kedorlaomer tuni bidigo te aga abagi solo gavman tuni bidi sela i wali, Amrafel te Babilonia moni tǫ gavman bidi badi, te Ariok te Elesar tǫ gavman bidi, me Tidal te Goim tǫ gavman bidi dao. Te gavman tuni bidi dabe me si me si te augwa ami hwįbo bidi dabe palima, tama augwaligo te hasia bolo te Refaim hani bage dali, te Asterot Karnaim tede boi hwįnama, tama augwali aiyaba elaluali. Te tudibadu augwaligo te Sus hani te Ham tǫde aiyaba elalubadi, te Emgo ami hani bidi dabe te Kiriataim bulu du elalubo tǫde aiyaba elaluali. Tama te Hor dabe tego ami hani augwali te Seir bulu dude elaluama, tama augwali pobasa pidubadi, te Elparan bulu dolo te bidi meni yai buluba tagaligi palio. Nosali augwali begasa peyu, te Kades tǫba pali. Te Kadesgo poloba nogi da te e tama Enmispat wai. Tama augwaligo boi hwįani, te Amalek dabego tigidali tǫ pedai badu te boi hwįnama, te Amalek dabe aiyaba elaluali. Tama augwaligo te Amor hani dabe dali te bulu Hasason Tamar tede hwįnama, tama augwali aiyaba elaluai dao. Te boi hwįani silama da, teda te Kedorlaomer gavman tuni bidi dali, te aga abagi gavman bidi dabe dali, augwaligo te a naga bulu gavman bidi dabe augwali dali hwįgi pali, te hanu dabe nogi e tama da, Sodom, me Gomora, me Atma, me Seboim, me Bela. Te a naga hanu gavman tuni bidi augwa ami bidi dabe dali, augwali te Sidim tǫ malu odogode deliba sisinani. Tama augwaligo te Kedorlaomer dali, te aga gavman tuni bidi sela bage augwali dali boi hwįainu sisi elaluai. Tama te a naga gavman bidi dabego ami bidi dabego te gavman tuni bidi me si me sigo ami bidi dabe dali boi hwįani.
GEN 14:10 Tama te Sidim odogo tǫde te kolta sabo tǫ dedage hauwa elaluai. Tama te Sodom de Gomora gavman tuni bidi si augwa bidi dabe dali te boi hwįbaso, wi painogo homu yali, tiali goli augwali meba te kolta sabo tǫ dedage dabeba tulaluali, tama isali. Te augwaligo ami bidi dabe meba te bulu du bageba wi pai.
GEN 14:11 Tama Kedorlaomer aga abagi dabe dali, augwaligo te boi bidi dabe augwali aiyaba elaluai. Tama augwaligo te Sodomde me Gomora te hanu side te tigidali doado bage sobadi, tama augwaligo tigidali tubo nai dabe me sela pai.
GEN 14:12 Tama Lot te Abram aga amago ogwa te Sodomde me bidai, tama augwaligo aga me aga doado bage dali tigidali sela pali.
GEN 14:13 Tiali goli, bidi me deli te boi hwįbadi wi pelama, tama aga Abram bidibo madi sabolai, Abram da aga Hibru bidi me deli da, tama agabolo te po walali. Abram te bidi Mamrego genuai ni sili elalubo pąde bidali. Te bidi Mamre te Amor hani bidi me deli da, tama aga ama si elaluali, Eskol me Aner, tama te sela augwali te Abramgo abagi dao.
GEN 14:14 Abramgo po odali, te tuni bidi dabe augwaligo aga ogwa sela pali po wai. Tama agai te aga hani bomai bidi dabe naga i wali. Te augwali hwįgi pabo bidi dabe namba hauwa tama, te 318 dao. Tama augwaligo te gavman tuni bidi dabe augwa ami bidi dabe dali pobasa pali, te Dan bulu dąį igi pai.
GEN 14:15 Te bulude te Abram aga hani si bugali. Tama te hani sigo te gavman tuni bidi hani me si me si dali augwaligo hulide hwįani, tama augwali ugwaba igulama, te augwali aiyaba elaluali. Augwaligo te boi bidi dabe augwali pobasa pali, te giliga degebo bogo badu te Damaskusba sabolama, te ela solama, te Hoba te badu usu nigi pelama,
GEN 14:16 tama augwaligo wi sali doado bage tigidali ma dobola sai. Abramgo te aga ogwa Lot ma sobadi, te aga tigidali doado bage me, te we dabe me, tama te Lotgo bidi hani dabe me, tigidali ma sai dao.
GEN 14:17 Abramgo te Kedorlaomer gavman bidi dali, te aga abagi dabe dali boi hwįani silama, tama aga ma geasa asai. Tama te Sodom gavman tuni bidi aga Abram tiąba asali, te odogo tǫ elalubo teba sisinani, te nogi augwaligo koneai, me te Tuni Bidi Dabego Odogo Tǫ da wai.
GEN 14:18 Tama Melkisedek, te Salem hanu tuni bidi tama God Ugwadu Mu Bidibo Bidi ofa mabo pris bidi da, te agai giguai nai bret me wain ąį Abrambolo selasa asali.
GEN 14:19 Tama Melkisedekgo dwagi yai po e tiwai te Abrambolo wali, “Eno homugo te God Ugwadu Mu Bidibo Bidigo te dagalu dali tǫ dali nigali, agai te wiegi yai sę nage dali yao.
GEN 14:20 Dago aga nogi ugwaba sao. Magi baso meni, nago te boi bidi dabe dali hwįbadi, tama agai nage tau selama, te nago te boi bidi dabe augwali aiyaba elalualio,” te po wai. Tama Abramgo te ma dobola sali doado bage tigidali dodolama, tama nogo si badu togolama, tama Melkisedekbolo me deli pedai mani.
GEN 14:21 Tama elama, tama Sodom tuni bidigo te tiwai po Abrambolo wali, “Naga hwįyu sali nai tigidali te naga selama, tolaluao. Tiali goli, te eno hani da, te enaba ma asomainogo yao,” wali.
GEN 14:22 Tiali goli, Abramgo te po wali, “Yawe da, te Ugwadu Mu Bidibo God da, agai te dagalu dali tǫ si nigali. Tama eno nogo me deli ugwaba siyu, tama aga gedude te dąų wabo po wai, ‘Eno te Sodom bidigo doado bage me sogobeo, te dwasianunu nai me deli sogobeo. Eno tiyu da, teda Yawe nago ena ela muao,’ eno te dąų wabo bomai po wali. Magi baso meni, nage Sodom tuni bidi nago te po weyu, ‘Ena digi eno te Abram te doado bage hauwa elalubo bidi pedalumainu ilai da,’ po waidalio.
GEN 14:24 Ena digi te magi nai deli eno me sogobeo. Te eno hanigo tuali tubo nai da, te naga eno salio. Tama eno abagi sela, Aner dali, Eskol, me Mamre, augwaligo te doado bage me badu pedai somainao,” Abramgo te po wai.
GEN 15:1 Nosali Abramgo na tiwai ebaso, tama Yawego agabolo te tiwai po wai, “Abram, nage wi munu me elamuo,” wali. “Eno nage te auwago bugagia mu seselalubo tiwai gilama ebao. Eno nage dali dwagi yai sę eyu, tama nage te genuai nogi elalubo bidi pedalumainu iliyu yaibao,” te po wai.
GEN 15:2 Tiali goli, Abramgo te po wai, “Yawe, ena hobede ya, eno Genuai Bidi, ena wai meni yai bidiyu, tama nosali isaibao. Te nago magi ilama, te ena genuai nogi elalubo bidi pedelaibawe? Te ena isibosi, te bidi me deligo te eno doado bage saibao, te Damaskus bulu bidi Elieser dao.
GEN 15:3 Nago enabolo wai me mabeo. Tama tibaso, ena isibosi, te ena sę bidi Elieser agai te ena hasegelama, tama eno doado bage tigidali somainu yaibao,” wali.
GEN 15:4 Tiali goli, Yawego Abrambolo te po wai, “Te nage isibosi, te sę ebo bidigo nage hasegelama, te nago doado bage tigidali me sogobeo. Te nago ogwa wai mu te nago doado bage tigidali te nosali sabo bidi pedelaibao,” te po wai.
GEN 15:5 Tama Yawego Abram buluba odasa solama, tama agabolo po bomonama weyu, te po wai, “Nago te dagalude te hǫ dabe suao. Te nago tigidali nedebo usu yaibawe? Tialima, nago wąį dabego wai dabe augwali te hǫ tiwai umabo mu pedelaibao,” wali.
GEN 15:6 Tama Abramgo te po mu po naga dao homu eyu, tama te Yawego wali po aga homude dąų wai. Tama tibaso, Yawego aga doloba pai bidi nogi poai dao.
GEN 15:7 Tama Yawego Abrambolo te tiwai po wai, “Ena Yawe dao. Eno nage i obaso, te naga bidali bulu Ur te Kaldia tǫ pedaide bidali te taga soai. Eno tama tiali, eno e tǫ nagebolo mawainogo yali, tama e tǫ nago tǫ mu pedelaibao.”
GEN 15:8 Tiali goli, Abramgo te po wai, “Te Yaweo, eno Genuai Bidi, te mena tama eno koneama, te e tǫ te eno tǫ dao po wagowe? Nago magi ilama, tama eno te tiwai koneaibawe?”
GEN 15:9 Tama tibaso, Yawego po wei ponani, “Te e tama tiwai nai dabe te enabolo selasa asao, te tamadi dilai bulmakau so te kibu be sela yai sesebadi, te meme me deli me te kibu be sela yai sesebadi, me te sipsip omai te kibu be sela yai sela asobadi, te dwasianu ba hi si sesebadi yao,” te po wali.
GEN 15:10 Tialima, Abramgo te nai tigidali selama, te Yaweba sela pali. Tama Abramgo te kibu dabe te tomode si hwągo pedama, tama te nai dabe dedelage te si badu wasi sili pali. Tiali goli, te ba si da te agai elali goli, te togobeo, sese muani.
GEN 15:11 Tama te ba kemodage meba aselama, te kibu dabe tuainogo ebaso, te Abramgo augwali ela gudulali.
GEN 15:12 Tama elama, tama te giliga degegi painu ebode te Abram aga godege pialima, te isai tiwai mu yai. Agai pilamubadi, te agai nade subo nai tiwai te moni dwai be huli mu sulama, te aga wi dwai mu eyu bidali.
GEN 15:13 Tama edubadi, Yawego agabolo tama po wali, “Mu tama koneao, te nago wąį dabego wai dabe te augwali gasa hani bidi dabego tǫde te bulu meni yai bidi dabe te bulu wau bilibo bidi dabe pedelaibao. Te augwaligo olo sę ebo bidi dabe pedaliyu, tama gasa hanigo dolobo sę ebo dologode augwali bididubadi, te bidi sese nogo si sągą si 400 kibu be tama usu naibao.
GEN 15:14 Tiali goli, eno te kolesaga ebo hani augwalibolo te eno sęgę mawaibao. Tama nago wąį te augwaligo wai dabego te doado bage hauwa mu selama, tama te bidali bulu taga paibao.
GEN 15:15 Tiali goli, te sę esiąbadi, te nage digi te nage homu nagame bugagia elama, bidiyu elama, te nage monu dabe mu elama, te nage isibaso, tama augwaligo nage pubulaibao.
GEN 15:16 Te nago wąį dabe augwali te e tǫba polo ma asogobeo. Te megi ede bidalubo Amor hani augwaligo te dwai kolesaga hauwa me isiąbadi. Te nosali mu te Amor hani augwaligo dwai sę ela silai digi, teda eno augwali dolobo sę elama, tama augwali ela gudulaibao. Tama te sogo, nosali mu, te nago wąį hani dabe augwaligo wąį hani dabe tama pedalubode, te sogo augwali ma begasa aselama, e tǫde bugagia bidaibao,” Yawego te po wai.
GEN 15:17 Te giliga dega sigi pelama, tama be hulia sali, tialima polo tama te baket tiwai nai me deli pedelali, tama tede hano eyu, sia bogoli eyu yai. Tama te nai aga digi tama te Abramgo dodolali hasa hani si tomodu bilibo suali.
GEN 15:18 Te side digi tama te Yawego tau sabo bomai po Abram dali dąų weyu, tama agai tama po wali, “Te eno te e tǫ tigidali te nago nosali ame nabo bulai wai, te hani dabe augwalibolo mawaibao. Tama te tǫ dąį te wę sesedu te Isip dabe tǫ pedai badu gagalasa, te genuai wę Yufretis teba saboligi paibao, moni tǫ mu.
GEN 15:19 Te augwaligo te Kin dabego me, te Kenis dabe me, te Katmon, te augwaligo tǫ sobadi,
GEN 15:20 tama Hit dabe me, te Peres dabe me, Refaim dabe,
GEN 15:21 te Amor dabe me, te Kenan me, te Girgas me Jebus, te tama hani bidi dabe augwali tǫ saibao. Eno tama po mu dąų obao,” Yawego Abrambolo te po wai.
GEN 16:1 Te Sarai, Abramgo we, agai wai meni yai. Tiali goli, agai sę ebo Isip we me deli bidali, aga nogi Hagar.
GEN 16:2 Tama Saraigo Abrambolo tama po walali, “Nago koneani, Yawego eno tabi paliama, tama eno wai me ame nogobeo. Nage eno sę ebo we dali pigi pao. Te agai eno wai me deli ame naibao,” wali. Tialima, Abramgo aga we Saraigo wabo po odai, usu da wai.
GEN 16:3 Tama Saraigo sę ebo te Isip we Hagar selama, tama aga te Abram aga we tiwai selama, bidali. Abram te Kenande kibu be nogo si bidai elalubadi, tama te sę pedelali.
GEN 16:4 Tialima, Abram te Hagar dali pilama, tama Hagar haliga yali. Te Hagar aga haliga elalubo konebo sogo, agai te Sarai dali hagoma yali.
GEN 16:5 Tama Saraigo Abrambolo po bomo elama weyu, te po wali, “Hagargo ena dali hagoma ebao. Te tiabo page naga digi yali. Mu tama, ena digi te ena sę ebo we te nagebolo mani. Tiali goli, megi aga koneani, te aga haliga ebaso, te agai ena dali hagoma ebao. Yawego digi te da si dagalumainu yaibao,” wali.
GEN 16:6 Abramgo po wei ponani, “Odao. Hagar te naga sę ebo we dao. Te nago aga tonalubao. Te nago mena sę agabolo yainu, te homugo tiao,” wali. Tama Saraigo te Hagar dali boi bidi elama dwai sę ebaso, tama Hagar wi palio.
GEN 16:7 Hagar te bidi meni yai pedai badu te Sur pabo sunumidu pai. Aga te wę ulu tubo madi dulalubadi, te Yawego Ensel Mobo Bidi te agaba pedelali.
GEN 16:8 Tama Mobo Bidi Enselgo agabolo tama tiwai po wali, “Hagar, te Saraigo sę ebo we, nage menadu aselama, tama nage menaba painogo ebawe?” Tama Hagargo po wei ponoyu, te po wali, “Sarai aga da, te ena tonalubo we dao, tama eno te Sarai taga soyu, ena wi sobao,” wali.
GEN 16:9 Tama Mobo Bidi Enselgo te po wai, “Nage Sarai pageba ma geasa pelama, tama agai po tigidali wali pao.”
GEN 16:10 Nosali agai po ma weyu, te po wai, “Te eno nago hani wąį te wai dabe hauwa umabo pedelama, tama bidi dabe augwaligo nedainogo ebo usu me egobeo.”
GEN 16:11 Tama Mobo Bidi Enselgo po ma wali, “Te dwasianu sogo pąde tama nago te wai ogwa ame naibao. Tama nago aga nogi Ismael poao. Magi baso meni, nage sęgę elalubadi, tama Yawego nago gela wabo odai.
GEN 16:12 Tiali goli, nago wai da, te uni yowi tiwai bidaibao. Te agai tigidali bidi dali boi bidi eyu, tama tigidali bidigo agabolo boi bidi eyu yaibao. Te aga deli kaneme dabe dali te bugagia homu nagame elama, me bidigobeo,” wali.
GEN 16:13 Hagargo te homu yai, ‘Sesemane sogo Godigo ena sudu geyu, tama megi eno aga suali, tiali goli, te ena bidibo ula me elaluba, isibeo,’ te homu yali. Tama agai te agabolo po wali Yawe nogi gasa me wali, “Nage da, te ena subo God dao.”
GEN 16:14 Tama te tialigo naga, te bidi dabego te wę ulu asobo te Kades de Beret tǫ si tomode suali, augwaligo te nogi poali, “Te ena subo Bidibo Ula Elalubo Bidigo wę ulu dao,” tama nogi poali.
GEN 16:15 Tama nosali Hagargo te Abramgo wai ogwa ame nani, tama Abramgo aga nogi Ismael poai.
GEN 16:16 Tama te sogo Abramgo kibu be te 86, te tama kibu be elalubadi dao.
GEN 17:1 Te Abram te kibu be bidi sese a naga wabo pąde, te kibu be 99 elalubadi, tama Yawe agaba pedelama, tama te po wai, “Ena te Tigidali Bomo Elalubo Bomai God dao. Eno po sesemane sogo wali piduao. Tama nage dolasa bugagia bidiyu, tama nagede po me meni yai elalumainu eyu, bididuao.
GEN 17:2 Te nage dali eno dwagi yai tau sabo bomai po dąų wali po, tede eno megi usu da po weyu, tama nagebolo menama, tama eno nago hani wai dabe te umabo hauwa pedalumainu ilaibao,” wali.
GEN 17:3 Tialima, Abram aga basi giluama, tama aga gesabidi tǫba pubaligiluali. Tama Godigo agabolo tama tiwai po wai,
GEN 17:4 “Te enade da, te eno nage dali te tama tiwai dwagi yai tau sabo bomo yai po dąų waibao, te nage umabo hauwa we bidi hanigo wąį monu pedelaibao.
GEN 17:5 Nago nogi megi te Abram ma wagobeo. Megi nago nogi te Abraham waibao. Magi baso meni, eno nage te umabo hauwa we bidi hanigo wąį monu pedalumainogo ilali. Tama tibaso, eno te nogi nagebolo mobao.
GEN 17:6 Te eno nago wai hani dabe te hauwa pedalumainu elama, tama meba te gavman tuni bidi pedelaibao. Te nago hani wai dabe te umabo hauwa hani mu pedelaibao.
GEN 17:7 Te eno nage dali me, te augwali nosali pedalubo hani dabe dali me, te eno dwagi yai tau sabo bomai po dąų walobao. Ena da, nago God me, te ena nago nosali pedelabo hani wai dabe augwaligo God me dao. Te dąų wali bomai po da, te sesemane bidada pabo sogo elalua piduaibao.
GEN 17:8 Te nage megi e bulu wau biliyu, te e bidibo tǫ da, te eno nagebolo, me te nago hani wai dabe nosali pedalabo bage augwalibolo maiabo tǫ dao. Tigidali te Kenan tǫ dabe da, te sesemane sogo dagego tǫ elaluaibao, tama ena da, ena te nago wai puluba hani dabego God bidaibao,” wali.
GEN 17:9 Tama Godigo Abrahambolo te tiwai po wai, “Te nagede, nage badi, te nago hani wąį dabe augwali badi, te dage tigidaligo eno dwagi yai tau sabo bomai po dąų wali te wali piąo.
GEN 17:10 Dagego eno te dąį ilali bomai po wali pao. Dagego te duga hani bidi tigidali te tigiwali togoiąo.
GEN 17:11 Dagego te duga ame nabo ogwa wai dabe tigidali tigiwali togobo sę te a naga olama, me badu sela wabo side silibo si, te tigiwali togwao. Tama dagego te duga sę ebo bidi dabe augwaligo tigiwali me togwao, te tigidali sę ebo bidi, te augwa ida duga bede ame nani sę bidi, me te digibulu bulude abelali sę ebo bidi dabe tigidali, te augwali tigiwali me togwao, te nosali pedalubo ogwa wai dabe augwalide me tama eyu, bidada piduao. Te dąį ebo da, te eno dage dali dąų wabo bomai po te dao. Mu tama dao. Dagego duga bidi dabe tigidali te tigiwali togoiąo. Tama te dąį ilali te duga tigide elalubo, te bidi dabe augwaligo koneama, te eno dwagi yai tau sabo dąų walali po te bomo sesemane sogo elaluaibao.
GEN 17:14 Te bidi me deligo hagela homu eyu, tama augwaligo aga tigiwali togosiąbaso da, te agai eno bomai dąų wali po sela sąbao. Tama tibaso, te bidi aga te aga hani dali hodobo me bidilamuo,” wali.
GEN 17:15 Tama Godigo Abrahambolo te po wai, “Nago naga we nogi Sarai nosali me nogigio. Megi agai nogi Sara dao.
GEN 17:16 Te eno Sara wiegi yai tau sabo po menama, tama agai nago ogwa me deli ame naibao. Te eno Sarabolo wiegi yai homu elama, dwagi yai tau sabo po mayu, tama aga te we bidi hauwa hanigo auwa mosi pedelama, tama meba te gavman tuni bidi pedelama, bidaibao,” wali.
GEN 17:17 Te Abrahamgo God genuai nogi mabo eyu, tama Abraham basi giluama, tama aga gesabi te tǫba mu pogulali. Tama aga gisugu weyu, tama homu yali, ‘Te bidigo kibu be te bidi sese a naga, te 100 kibu be yai elalubadi da, te aga wai ame nabo usu dawe? Tama Sarago kibu be bidi sese me si me si olama, nogo si, te 90 kibu be yai madi, te agai wai ame nabo usu egowe?’
GEN 17:18 Tama Abrahamgo Godibolo te po wai, “Eno homugo nago te Ismael me bugagia tonalumainu ebao. Tiyu, aga bugagia bidaibao.” Te po wai.
GEN 17:19 Tiali goli, Godigo te po wai, “Awe. Tiali goli, nago we Sarago te wai ogwa me deli ame naibao, tama nago aga nogi Aisak poao. Te eno aga dali, me te aga hani wai dabe dali, te dwagi yai tau sabo bomai po dąų waibao. Te dąų wabo bomai po te sesemane sogo bomo elaluaibao.
GEN 17:20 Nago enabolo te Ismael me bugagia tonaluao wali. Teda eno tama tiaibao. Te eno agabolo wiegi yai tau sabo po mawaibao. Tama tiyu, eno agabolo te wai puluba hauwa menama, tama eno agai wai puluba hani te umabo mu pedalumainu ilaibao. Te aga te nogo si olama, sągągo si tobolu bidigo aya pedaliyu, tama eno agai hani wai dabe te genuai mu pedalumainu yaibao.
GEN 17:21 Tiali goli, e tobage sogo te nosali kibu bede te Sarago nago wai ogwa te Aisak ame naibao, tama eno aga dali naga te dwagi yai tau sabo bomai po dąų walaibao.” Te po wai.
GEN 17:22 Godigo te tama po Abraham dali ola silama, tama aga ugwaba holoyu, tama pai.
GEN 17:23 Tialima, te sogo digi polo tama Abrahamgo Godigo po wali pelama, tama agai hanide tigidali bidi te gasa tigiwali togwali. Agai aga ogwa Ismael tigiwali togobadi, tama aga sę ebo bidi dabego tigiwali me togwai. Te sę ebo bidi meba augwa idago te Abrahamgo bede ame nani, tama meba agai te gasa bulude abelai bidi te augwali tigiwali togwai dao.
GEN 17:24 Abrahamgo kibu be te bidi sese a naga wabo pąde deli, te 99 kibu be elalubadi, te aga ogwa Ismaelgo kibu be te nogo si olama, sągą badu sela kibu be yai madi, tama augwaligo augwali si tigiwali togwai dao.
GEN 17:26 Augwaligo te augwali si tigiwali te deli sogode naga togwai.
GEN 17:27 Tama augwaligo Abrahamgo tigidali sę ebo bidi dali tigiwali togwalio, te Abraham me Ismael hodobo, te meba augwa idago te Abrahamgo bede ame nani, tama meba agai te gasa bulude abelai bidi dabe dao.
GEN 18:1 Nosali Yawe te Abraham bidibo madi, te bidi Mamrego genuai ni dabe elalubo digi, teba pedelali. Te giliga sesane mu ebaso, tama Abraham te aga ugwa be sunumi mabode dulaludai.
GEN 18:2 Agai tonono pobadi, tama bidi sela dolalubo suali. Agai augwali sulama, tama aga ugwa be tagalama, tama udada pelama, augwali pageba sabolali. Aga kidu sugunu gulama, tama aga gesabi te tǫba mu pogiluama,
GEN 18:3 tama agai te po wai, “Genuai bidi dedeo, dagego usu da wida, eno dage tau saio. Dagego eno be ela solamuo. Ena dagego sę ebo bidi dao.
GEN 18:4 Te eno bidi me deli i olama, te wę sela asama, dage sągą wę telamainu yaibao. Dage te ni pagede toma tuyu, dulaluiagameo.
GEN 18:5 Te eno dage bomo ilabo nai meba sela menama, tama nosali duga ma piagameo. Dage eno beba aselama, tama eno dage tau saio,” wali. Tama augwaligo te po wali, “Te wiegi yai dao, nago tama tiwai te po wabo gilama yao.”
GEN 18:6 Tama Abraham te ugwa beba polo pelama, tama Sarabolo wagi pali, “Nago te wiegi yai plaua hauwa selama, tama taluama, polo begelama, tama bret ulao,” wali.
GEN 18:7 Tialima, Abraham udulama, te bulmakau bidalubo oboba pelama, tama te ogwa bidi te nisali bulmakau me deli sali. Agai te bulmakau te sę bidi me delibolo menama, tama sę bidigo elama, sisi elama, tama ulali.
GEN 18:8 Te kibu mi delama, te Abrahamgo te kibu mi, me te ili, me ame pę, me ame pęgo nigali nai sis meba me selama, tama agai te bidi selabolo mani. Augwaligo te nai tudubadi, tama Abraham te ni dologode te augwali pąde dolaluali.
GEN 18:9 Augwaligo nai tula silama, tialima augwaligo Abrahambolo hanalu wali, “Nago we Sara menade bidibowe?” Tama Abrahamgo tobo wali, “Aga te ugwa be tomode bidibao,” wali.
GEN 18:10 Tialima, augwali me deligo te po wali, “Nosali te kibu be me deli silama, tama naga we Sarago wai ogwa me deli ame naibao, tama mu tama ena ma asaibao,” wali. Sara te bidi tudibadu te ugwa be sunumi pąde bidai, tama agai te po wabo odali.
GEN 18:11 Abraham de Sara augwali si te monu dabe, mosi dabe yai, tama Sarago te wai ame nabo usu egobeo.
GEN 18:12 Tama aga homude digi te homu elama, gisugu weyu, tama po wali, ‘Ena da, mosi dabe yalima, tama eno da, wai ame nabo usugobeo. Tama eno bidi me monu dabe yalio. Magi ilama, te eno te wai ame neyu, tama tede wiegi yai homu pemene yaibawe?’ Te homude po wai.
GEN 18:13 Tama Yawego Abrahambolo hanalu wali, “Magi baso Sarago gisugu weyu, tama po wali, ‘Te ena mosi dabe yai madi, te magi ilama eno te wai ame naibawe?’
GEN 18:14 Te eno magi sę me ebo usugobewe? Nosali kibu bede, te mani bodolude, te sogo asama, te Sarago wai ogwa ame nai madi, tama ena ma asaibao,” wali.
GEN 18:15 Tama Sara wi ebaso, tama agai tibo po weyu, te po wai, “Eno gisugu me wabeo,” wali. Tiali goli, Yawego te po wai, “Menio! Nago gisugu walio.” Te po wali.
GEN 18:16 Tama te bidi sela hogodama, palio. Tama Abrahamgo te augwali pabo sunumidu dwasianu tama aga augwali dali pai. Tama augwali pelama, meba me sabaligi pelama, tama augwali doligi pelama, tama Sodom hanuba aba tonononaluali.
GEN 18:17 Tama Yawego tama homu yali, ‘Te genuai sę eno yainogo ebo, te eno Abrahambolo geme dualubo te usugobe da,’ te po wali.
GEN 18:18 ‘Te agai hani wai dabe te augwali genuai bomai hani pedelaibao. Tama tigidali tǫde bidalubo we bidi augwaligo enabolo hanaluyu, te eno wiegi yai sę augwalibolo eyu, tama dwagi yai po augwali dali wao po waibao, te eno Abraham dali wiegi yai sę elama, dwagi yai po wali gilama tiaibao.
GEN 18:19 Eno aga sa muani, te agai aga wai pulubabolo me te aga wąį dabe augwalibolo olama, te augwaligo eno po wali pomainogo yaibao. Tama tiyu, augwaligo wiegi yai doloba pai kolesaga wali paibao. Tama tiyu, te eno agabolo te tigidali sę agabolo eno wali po gilama yaibao.’
GEN 18:20 Tialima, Yawego te po wali, ‘Te haniani dwai sę mu dabe te Sodom de Gomora hanu side pedalubo walio.
GEN 18:21 Te ena aiyaba dulama, te augwaligo mena sę ebowe naga sugulaibao. Te eno odali po, te mu po yaliwe naga, tama eno sugi pelama, koneaibao,’ te homu yali.
GEN 18:22 Nosali te bidi si hogodama, tama Sodom hanu pali. Tiali goli, Yawe te Abraham dali bidai.
GEN 18:23 Tama Abraham te Yawe pąba pelama, tama agai Yawebolo tama po hanalu wai, “Te mu tama, nago te dwagi yai bidi dabe te dwai sę yali bidi dabe dali si, augwali dolomainu yaibawe?
GEN 18:24 Te wiegi yai bidi dabe 50 te genuai hanude bidibadi yaibaso da, te nago augwali me te gasa bage dali dololaibawe? Nago te genuai hanude te wiegi yai bidi dabe te 50 bidi bidibaso, augwali tobade hanu elalumainu sula tagalubo usugowe?
GEN 18:25 Nago te wiegi yai bidi dabe augwali te dwai bidi dabe augwali dali elainu ebo. Te wiegi yai egobeo. Nago tama tiwai me elamuo. Tiyu, te wiegi yai bidi dabe te dwai bidi dabe augwali dali dolabuo. Te dwai mu dao. Nage da, te tigidali tǫ pedaide po tų odobo bidi dao. Nago te doloba pai kolesaga wali pomainogo egobewe?” Abrahamgo te po hanalu wali.
GEN 18:26 Tama Yawego te tiwai po wei ponai, “Te eno te 50 wiegi yai bidi te Sodom hanude bidibo subaso da, teda augwali tobade eno te tigidali we bidi bidimainu sula tagaliyu, tama te wiegi yai bidi dabe hagaidali weyu tama tiaibao.”
GEN 18:27 Tialima, Abrahamgo po ma wali, “Genuai Bidio, nago eno te po hauwa wabode wado po wabo homu me elamuo. Ena olo bidi naga dao. Eno magi nai po deli me wagobeo.
GEN 18:28 Tama te 50 doloba pai bidi meniyu, tama 45 bidi naga elalubaso da, teda nago te hanu tigidali dolaibawe, ma meniwe?” Tama Yawego te po wai, “Te eno 45 naga doloba pai bidi elalubo subaso da, teda eno te hanu me dologobeo.”
GEN 18:29 Tama Abrahamgo po ma wai, “Te doloba pai bidi te 40 naga bidibaso da, te tama magi yaibawe?” Tama Yawego te po wali, “Te eno wiegi yai bidi te bidi sese si subaso da, teda augwali tobade eno te hanu me dologobeo.”
GEN 18:30 Tama Abrahamgo te po wali, “Genuai Bidio, nago wado po olamuo. Eno po ma wainogo ebao. Te tobage bidi te bidi sese deli olama, nogo si naga elalubaso da, magi yaibawe?” Tama Yawego te po wali, “Te eno wiegi yai bidi te bidi deli olama, nogo si bidibo subaso da, teda eno te hanu me dologobeo.”
GEN 18:31 Tama Abrahamgo po ma weyu, te po wali, “Genuai Bidio, nago wado po eno te po hauwa obaso wagio. Te bidi sese deli wiegi yai bidi elalubaso da, magi yaibawe?” Tama Yawego te po wali, “Te eno bidi sese deli te doloba pai bidi subaso da, teda augwali tobade eno te hanu me dologobeo.”
GEN 18:32 Tama Abrahamgo te po wali, “Genuai Bidio, nago wado po olamuo. Eno po me deli ma simaniyu obao. Te nogo si doloba pai bidi naga bidibaso da, magi yaibawe?” Tama Yawego te po wai, “Te doloba pai nogo si bidi bidibaso da, teda augwali tobade eno te hanu me dologobeo.”
GEN 18:33 Yawego te Abraham dali po ola silama, tama aga palio. Tama Abraham aga beba ma geasa pai.
GEN 19:1 Te bidi Lot te we bidi sisinibo pesagede te Sodom hanu genuai sunumi elalubo madigi bididuai, tama piode te mobo bidi ensel si teba pedelai. Lotgo te bidi si asobo sulama, tama aga hogodama, augwali si pąba pai. Aga te bogoli sugunu pogiluama, tama aga gesabidi te tǫba mu pogulama,
GEN 19:2 tama agai te po wai, “Abagi, dage si aselama, duayagasu bolo yao,” te po wali. “Dage si eno beba asiąo. Dage si sągą bolo wę tedelama, tama dage si megi hulide ede piagameo. Tama kigamu duga si hogodama, pagameo.” Tiali goli, augwali sigo po wei ponoyu, te tiwai po wali, “Menio. Da si te bede me pigobeo. Te da si e bidi sisinibo pesagede piaibao,” wali.
GEN 19:3 Tiali goli, Lotgo augwali si dali anoma mu idubadi genama, tama nosali augwali si aga dali beba pali. Tama Lotgo te bo disiąwai te yis meni yai bret ulubadi, te augwali si wiegi yai nai sisi ilama, mani. Tama augwali sigo te nai tuali.
GEN 19:4 Te Lot aga abagi si pisąbadi, tama te Sodom bidi dabego te be bobogela sagasali. Te hanude bidaluali tigidali bidi dabe asali, te gesi bidi dali, te monu dabe dali asai.
GEN 19:5 Augwaligo Lotbolo i olama, tama tiwai wali, “Te bidi si aselama, te nage dali te hulide bidibo, te bidi si mena bidibawe? Te augwali si buluba dinao. Te dago augwali tąwaibao,” wali.
GEN 19:6 Tama Lot te buluba teda solama, tama aga sobadi sunumi paliali.
GEN 19:7 Tama agai te po wai, “Abagi dede, dagego odiąo. Dagego te dwai kolesaga igimio.
GEN 19:8 Eno wegi si bidibao, tama augwali si te bidi dali me pisąbadi dao. Eno augwali si dageba odasa buluba asaibao, tama duga magi homu ebo te augwali side siliagameo. Tiali goli, te bidi si da, te eno abagi si, tama augwali si eno bede bididubadi, tama eno augwali si bugagia te ena tonaluaibao. Tama tibaso, dagego dwai sę augwali side me igimio,” wali.
GEN 19:9 Tiali goli, augwaligo te po wali, “Nage bulu wau bilibo bidi, nage gedao! Nago dago ebo kolesaga dagaligio. Te nage geda sisąwani da, teda dago augwali side dwai sę eyu, tama nage me te gisiga mu yaibao.” Tama augwaligo Lot te be tomoba edaba pogoliyu, tama augwaligo te be sunumi aluainu yali.
GEN 19:10 Tiali goli, te be tomode bidali bidi sigo te be tų dalama, tama nogo buluba dįnama, tama Lot be tomoba kegali, tama augwali sigo te be sunumi paliali.
GEN 19:11 Nosali augwali sigo te tigidali bulubadu bidaluali bidi dabe augwali gedu paliali. Tama gedu widai bage tiwai osogo bidiyu, tama augwaligo te be sunumi gegabo usu me isiąwai dao.
GEN 19:12 Tialima, te bidi sigo Lotbolo hanalu wali, “Te nago hani meba te hanude bidalubawe? Nago te naga ogwa dabe dali, wegi dabe dali, te wegi sabo wąį dabe me, te tigidali badi, te nago ede bidalubo gasa hani dali tigidali selama, tama dagego te hanu taga piąo.
GEN 19:13 Te da si go te hanu dolaibao. Yawego te bidi dabego dwai kolesaga ebo po odama, tama augwali dolomainu agai da si tagala palai dao,” wali.
GEN 19:14 Tialima, Lot te aga wegi si noma sali bidi aga wąį si bidibo madi pai. Tama agai te po augwali sibolo wagi pali, “Dage si hogodama, te hanu polo taga soao,” wali. “Yawego te bulu dolainogo ebao.” Tiali goli, augwali sigo homugo agai te gagali po wabo homu naga yai.
GEN 19:15 Te be posai madi, tama te mobo bidi ensel sigo te Lot seliyu, tama po wali, “Asesa yao! Te naga we dali, naga ede bidibo wegi si dali selama, tama e hanu taga piąo. Tiyu, dage te gasa we bidi dabe dali haga yabuo.”
GEN 19:16 Augwali sigo po wabode, tama Lot polo asesa me pabe. Tiali goli, Yawego Lot homu dene eyu tau sainogo yali. Tama tibaso, te bidi sigo te Lot aga me, te aga we me, aga wegi si dali, augwali nogo tulama, tama augwali sigo augwali odasa te hanu buluba dilanio.
GEN 19:17 Te mobo bidi ensel sigo te augwali bulubadu dilama, tama mego te po wai, “Dage wi piąo. Tiyu, dage isabuo! Dagego tudiba begelama, ma tonogio. Tama dage te malu elalubo madi toma me nenamuo. Te dage udada pelama, te bulu duba ugwa holali da, teda dage me isigobeo,” wali.
GEN 19:18 Tiali goli, Lotgo te po wali, “Genuai Bidio, eno homugo hagela homu ebao.
GEN 19:19 Odao! Nago ena homu dene mu elama, tama nago ena tau siyu, wiegi yai sę yai. Tiali goli, te bulu du digibulu mu elalubao. Te ena polo sabalogobeo. Tiyu, te hanu doliyu, te ena dali hagawaibao.
GEN 19:20 Nago ude te elalubo dwasianu hanu suao. Te pąde elalubo, tama ena teba polo sabalubo usu yaibao. Te dwasianu bulu naga dao. Nago ena teba pomainogo eyu da, te ena me isigobeo,” wali.
GEN 19:21 Tama mobo bidi enselgo te po wali, “Te me usu dao. Teda te hanu eno me dologobeo.
GEN 19:22 Te polo pao! Asesa yao! Eno magi sę deli isiąbadi, dage te hanuba sabolaibao,” wali. Lotgo te po wai, te hanu da te dwasianu hanu da, tama tibaso augwaligo te hanu nogi Soar poai dao.
GEN 19:23 Te giliga aselama pedalubo sogo, Lot te dwasianu hanu Soar teba sabaligi palio.
GEN 19:24 Tama Yawego digi te posolo yai masigi, me te sia dali te Sodom de Gomora hanu siba te dagaludu aiyaba tula palali.
GEN 19:25 Tama Yawego te hanu si dali, te malu tǫ me, te hanu side bidali we bidi tigidali badi, tama te tǫde pedelali nai tigidali te siago delama, mu dolalio.
GEN 19:26 Tiali goli, Lotgo we te Lot tudibadu wali asudu, tama agai tudiba ma begelama tonani, tama aga tede isalima, tama aga tigi te gelali ni page tiwai elalualio, tama te tamugo aga mu mesegelali.
GEN 19:27 Te kigamu digi mu Abraham te Yawe dali dolalu polobadu te po miani pesageba palio.
GEN 19:28 Abrahamgo te Sodom me, Gomora me, te tigidali tǫ odogo maluba aba tonono bilalio. Tama agai te hano pedalubo suali, te genuai sia hano tiwai pedalubo sualio.
GEN 19:29 Godigo te tigidali malu tǫde elaluali hanu dolali. Tiali goli, agai te Abrahamba homu kone palama, tama agai te Lot dali, te aga bidali hanu dali, te me dolobeo. Te dolobo sę ebogo te Lot polobadu bidali hanu dabe mu dola silalio.
GEN 19:30 Te Lot te Soarde me bidibo wi yai. Tama tibaso, aga te bulu duba te aga wegi si dali holali. Tama augwali te ola be me delide bidai.
GEN 19:31 Tama gomunai wegigo tomo wegibolo te tiwai po wai, “Te da sigo aya monu dabe megi ebao,” wali. “Tama te tigidali tǫ pedaide te da si sabo bidi menio. Te da sigo wai magi ilama ame naibawe?
GEN 19:32 Te dena ayago hani te silidali weyu, te tama tinao! Te da sigo dena si aya te bomai ąį wain tumainu menama, tama aga tobolu gęǫ ilaibao. Tialima, da si aga dali pagela pilama, tama agade wai ame naibao,” wali.
GEN 19:33 Tama hulide augwali sigo te wain wę augwa ayabolo menama, tama aga tobolu gęǫ yali. Tama gomunai wegi aga dali piali. Tiali goli, waingo te aya gęǫ mu ilama, tama agai te tiali sę me konebeo.
GEN 19:34 Te me sogo side gomunai wegigo tomo wegibolo te po wali, “Te do hulide ena aya dali piali. Te e sogo hulide da sigo te aya tobolu gęǫ yabo sę ma ilaibao,” wali. “Tama nage aga dali te eno yali gilama piagameo. Tama tilama, da sigo agade wai ame naibao,” wali.
GEN 19:35 Tialima, te sogo hulide te augwa si aya te wain menama, gęǫ ma ilali, tama tomo wegi aga dali pialio. Augwa si aya te tobolu mu gęǫ page elama, te polobadu yali tiwai ma yali, tama te sę yali te agai me konebeo.
GEN 19:36 Te tama tiali kolesagade te wegi si augwa si aya Lotde digi, te augwali haliga yalio.
GEN 19:37 Tama gomunai wegigo te ogwa ame nani, te ogwa nogi Moap poai. Te we bidi hanigo wai nogi Moap nogi poai dao.
GEN 19:38 Tama tomo wegigo me te ogwa ame nani, te ogwa nogi Benami poali. Te bidi da, te Amon we bidi hani dabego wąį monu dao.
GEN 20:1 Te Abraham te Mamre tede bidali taga peyu, te Negeb moni tǫ pedai te badu pelama, tama aga te bulu si Kades me Sur, te bulu si tomode bidali. Aga te Gerar hanude te aga we Sara dali bidai.
GEN 20:2 Tama te we bidi augwalibolo te tiwai po wai, “Sara te eno abe dao.” Tama Abimelek, te Gerar hanu tonalubo genuai bidi, agai te sę bidi meba tagala palama, tama augwaligo Sara agaba odasa asai.
GEN 20:3 Tiali goli, hulide God te Abimelekba nade pedelama, tama te po wai, “Sara te Abrahamgo sai we dao. Tama nage isaibao,” wali.
GEN 20:4 Tiali goli, Abimelek te Sara pąba pisąbadi tialio. Tama agai te po wai, “Genuai Bidio, te bidi deligo dwai sę me isiąbadi da, teda nago aga ela muaibawe? Nago eno hani bage me ela muaibawe?
GEN 20:5 Abraham aga digi te tiwai po enabolo wai, ‘Te aga eno abe dao,’ wali. Tama we aga digi me te po wai, ‘Aga eno abe dao,’ wali. Te eno homude dolo da homu ebaso, tama tialio. Eno dwai sę ebeo,” wali.
GEN 20:6 Te nade Godigo te tiwai po wei ponani, “Awe, eno koneani, te nago homude dolo homu ebaso, nago tama tiali. Tama koneabaso, eno nage te we pąba pigi pisąma emainu elama, tama enabolo dwai sę idali homu yai.
GEN 20:7 Tiali goli, megi nago te we aga bidiba ma tagala palao. Te bidi aga te eno po pusubo bidi profet dao, te agai gedu haluasa po weyu da, te nage me isigobeo. Te nago te we ma tagala palisiąwani da, teda nage me, te naga bidalubo tigidali we bidi dali, mu isila paibao,” Godigo te po wai.
GEN 20:8 Te sogo kigamu digi mu Abimelekgo aga sę ebo bidi tigidali i olama, tama augwalibolo te sę yali po tigidali augwalibolo pusali. Tama augwali wi dwai mu yalio.
GEN 20:9 Tama Abimelekgo Abraham i olama, aga aselama, tama agai agabolo hanalu wali, “Nago mena tiwai kolesaga dabolo yaliwe? Nago te tibo po dabolo weyu, tama ena badi, te eno tonalubo we bidi augwali badi, da tigidaligo nago wede moni sęgę sali. Eno nagede mena dwai sę hasia bolo ebaso, tama nago te sę wei ponoyu, da dali tama tialiwe? Waa? Nago te yali kolesaga te dolo ebeo.
GEN 20:10 Magi baso nago tama tialiwe?” wali.
GEN 20:11 Tama Abrahamgo po wei ponoyu, te po wai, “Polobadu eno te tama homu yai, ‘Te e bulu bidi dabe augwali te Godide wi isiąbowe,’ te homu yai. ‘Tiyu, augwaligo ena ela munama, tama eno we saiba,’ homu yalio.
GEN 20:12 Tama mu tama, Sara te ena abe dao. Te da si go aya deli, tiali goli te aga ida tedali. Tama eno aga sai dao.
GEN 20:13 Polobadu te ena ayago bede bidibadi, tama Godigo ena tagala palobaso, te ena gasa buluba pali. Tama eno Sarabolo te tiwai po wai, ‘Nago te tiwai wiegi yai kolesaga naga enade yao,’ wai, ‘Te da si pabo madi tigidali pedaide nago te tama weyu, “Abraham te ena abe da,” po wao,’ te po wai dao,” Abrahamgo te po wali.
GEN 20:14 Tialima, Abimelekgo Sara te Abrahambolo ma mawai. Tama agai te sipsip meba badi, bulmakau me, sę ebo bidi me, sę ebo we me, te Abrahambolo manio.
GEN 20:15 Tama agai Abrahambolo tama po wai, “Suao. Te tigidali tǫ te eno dao. Te nage me badu pedai badu bidabo homu ebaso da, te nago sę dao.”
GEN 20:16 Tama agai Sarabolo te po wali, “Eno te mone umabo, te mone 1,000 mone silva, te nago abebolo mani. Te tialigo te po isilalio. Te augwaligo mu koneama, te nago dwai sę ebeo po waibao,” Abimelekgo te po wai.
GEN 20:17 Yawego te Abimelekgo hanide te tigidali we sibi haliga palia silama, te augwaligo wai ame nabo usu isiąwani. Agai tama tiali, te Abimelekgo te Abrahamgo we Sarabolo yali, te kolesaga wei ponoyu, tama tialio. Tama Abrahamgo Godibolo gedu haluasa po olama, tama Godigo Abimelek usu ma ilali. Tama Godigo Abimelekgo we me usu ilibadi, te aga sę ebo we dabe dali usu ilama, tama augwaligo wai ame nabo usu ma yai dao.
GEN 21:1 Te Yawego agai polobadu dąų walali po wali peyu, tama agai wiegi yai olo tau sabo kolesagago te Sara dali dwagi yai sę yali.
GEN 21:2 Tama tiyu, Sara haliga elama, ogwa ame nani, te sogo Abraham monu dabe yai madi dao. Sarago te wai te polobadu Godigo agabolo te bodolu mani sogo tama naga ame nanio.
GEN 21:3 Tama Abrahamgo te Sarago ame nani ogwa nogi Aisak poalio.
GEN 21:4 Nosali te a naga olama, me badu sela sogo wali bidama siligi pabode, tama Abrahamgo Godigo po wali peyu, tama te ogwa Aisakgo gasa tigiwali bo togwalio.
GEN 21:5 Abrahamgo digi kibu be bidi sese a naga, te 100 yia elalubadi, tama Sarago te Aisak ame nai.
GEN 21:6 Tama Sarago te po wai, “Godigo wiegi yai kolesaga enabolo ebaso, tama ena wiegi yai homu pemene eyu, tama ena gisugu obao. Tama tigidali bidigo te tiali po odobaso, te augwaligo wiegi yai homu pemene ena dali hodobo yaibao,” wali.
GEN 21:7 Tama Sarago po ma wai, “Polobadu bidi mego e tiwai po Abrahambolo wabo usu meni yai, ‘Nago we Sarago te wai ame nenama, tama agabolo ame mawaibao,’ wabo usu meni yai. Tiali goli, megi Abraham monu dabe yai digi, tama eno agai wai ogwa te ame nanio,” Sarago te po wai.
GEN 21:8 Tama te wai Aisak genuai igulali. Tama aga te ame tubo tagalubo sogode Abrahamgo genuai nai ulalio.
GEN 21:9 Hagar te Isip bulu we, agai te Abrahamgo ogwa me deli polobadu ame nani, te Ismael dao. Tama te genuai nai tuali sogode Sarago suali, te ogwa Ismaelgo agai waibolo dwai gisugu mabo suai.
GEN 21:10 Tama agai Abrahambolo te po wai, “Nago te sę ebo we aga ogwa dali si sela sąyao. Te olo sę ebo wego waigo te nago doado bage bugulama, me badu me sogobeo. Te doado bage tigidali te eno wai Aisakgo nosali saibao,” wali.
GEN 21:11 Ismael mu te Abrahamgo wai, tama tibaso te pogo Abraham homu sęgę mu ilali.
GEN 21:12 Tiali goli, Godigo Abrahambolo walali, “Nago homu sęgę te sę ebo we Hagar aga ogwa dali tede igio. Nago te Sarago po wali pao. Te Aisakde naga te nago wąį hani wai dabe nosali pedelaibao.
GEN 21:13 Tama eno te sę ebo we Hagargo waigo wąį hani wai dabe, augwali me te genuai hani pedalumainu ilaibao. Magi baso meni, aga me nago wai dao,” wali.
GEN 21:14 Do kigamu mu te Abrahamgo te nai dali, te wę botol dali sisi elama, tama Hagarbolo mani. Abrahamgo te nai dabe te Hagar nageba anugulama, tama aga dali aga ogwa dali si ibaba olo tagala palali, gasaba. Tialima, Hagar palima, te Berseba tǫ pedai badu subigila te bidi bidisiąwai madi biliduai.
GEN 21:15 Nosali te botolde wę sia sobaso, tama agai te ogwa te dwasianu ni dologode bididubadi taga soali.
GEN 21:16 Tama aga digibulu gana duagi pelama, homu kone palali, ‘Eno te wai isibo subo te ena hagelabo,’ te homu yai. Aga tede dulaludubadi, tama ogwa gela walio.
GEN 21:17 Godigo te ogwa gela wabo odali. Tama Godigo mobo bidi ensel te dagalude bidiyu, tama i olama, Hagarbolo te po wai, “Magi yaliwe, Hagar? Nage wi me elamuo. Godigo te ogwa aga bidibo madide gela wabo odalio.
GEN 21:18 Nage hogodasa pelama, te ogwa auwa sigi pao, tama nago pagea sao. Magi baso meni, eno te agai wai hani dabe te genuai hani pedalumainu yaibao,” wali.
GEN 21:19 Tama Godigo Hagar gedu pedelali, tama agai te wę ulu me deli pedalubo suai. Tama aga pelama, te wę botolde tugi pai. Tama te wę agai te ogwabolo mani, tama agai tuali.
GEN 21:20 Tama nosali God te ogwa Ismael dali bidibaso, tama aga genuai yai. Aga te Paran pedai badu te bidi dabe bidisiąwai madi bidali. Tama aga te bulu hasa gegebo konebo bidi mu pedelalio, te enesigi enebo sę agai mu konea pali.
GEN 21:21 Tama aga idago aga we me deli te Isip bulu we selama, aga ogwa mani.
GEN 21:22 Te sogo Abimelek te aga ami bidi tonalubo polalubo bidi Fikol dali, augwali si te Abraham bidibo madi pelama, tama po wai, “Te tigidali sę nago ebode te God nage dali bidibo dao.
GEN 21:23 Tialima, nago te God gedude po dąų walao, te nago enabolo me, te eno wai puluba dali me, te eno wąį hani dabe dali me, te tibo po wabo kolesaga me egobeo, te po wao. Eno wiegi yai kolesaga nagebolo yai. Tama tiwai naga nago te tibo sę isiąbo wiegi yai homu kęą pali kolesaga enaba ebadi, te nage megi bidibo tǫde bidibo we bidi me te tiwai kolesaga yao,” wali.
GEN 21:24 Tama Abrahamgo te po wali, “Eno tama tiwai po dąų walobao.”
GEN 21:25 Tama Abrahamgo Abimelek dali te aga sę ebo bidi dabe augwaligo agai ulu wę anoma bomonama sali po elalualio.
GEN 21:26 Tama Abimelekgo tobo wali, “Te tama tiali eno konebeo. Nago enabolo polobadu me wabeo. Megi naga eno te po odobao,” te po wai.
GEN 21:27 Tama tibaso, Abrahamgo te sipsip me bulmakau meba te Abimelek mawai, tama augwa si tomode po dąų walai.
GEN 21:28 Tama Abrahamgo aga sipsip hani tomode te a naga olama, me badu si, tama sipsip sou wai selama, tama me badu tedali dagalama, muani.
GEN 21:29 Tama Abimelekgo agabolo hanalu wali, “Magi baso nago tama tebawe?”
GEN 21:30 Tama Abrahamgo po wei ponoyu, te po wai, “Nago te sipsip wai a naga olama, me badu si, te nago sao. Te tebo kolesagade nago hanilama, te ena digi eno te wę ulu nigai da po omainogo ebao,” wali.
GEN 21:31 Augwa si te bulude po minama, dąų wai. Tama tibaso, te bulu nogi augwaligo Berseba nogi poai dao.
GEN 21:32 Augwa si te Bersebade po minama dąų olama, tama Abimelek aga ami tonalubo polalubo bidi Fikol dali, te augwali si te Filistia tǫba ma geasa pai dao.
GEN 21:33 Tama Abrahamgo te Bersebade te polo isisąbo ni me deli bulama, tama agai Yawego nogi weyu, gedu haluasa po wai, te aga sesemane sogo bidada peyu, bidada pabo God dao.
GEN 21:34 Tama Abraham te Filistia dabego tǫde sesabi gana elama bidalio.
GEN 22:1 Nosali Godigo Abraham usu sali. Agai Abraham agabolo i olama, te tiwai po wai, “Abraham o!” Tama Abrahamgo te po wai, “Ena e bidibao.”
GEN 22:2 Tialima, Godigo te po wali, “Nago ogwa deli digi te elalubao, Aisak, tama nago aga godolo mu ebao. Nago te wai odasa, nage te Moria te pedai badu pao. Te eno bulu du me deli nagebolo ola mawaibao. Tama te bulu dude nago te Aisak enabolo ofa mayu, te augwaligo ofa eyu, te siago domainu ulubo tiwai yao,” wali.
GEN 22:3 Tialima, kigamu digi mu Abrahamgo te moni kibu donki me sisi elama, te Aisak sobadi, te aga sę bidi me si dali sali. Agai te ofa yabo bagawai isi meba sobadi elama, tama agabolo te Godigo po wali pesageba palio.
GEN 22:4 Tama digibulu palima, te sela wabode Abrahamgo suali, te bulu du digibulu me elalualio.
GEN 22:5 Tama agai te sę bidi sibolo te po wai, “Dage si ede te kibu donki dali bididuao,” wai. “Te ena u badu te wai dali pelama, tama da si tede lotu wagi paibao. Tama nosali da si ma asaibao,” wali.
GEN 22:6 Tama Abrahamgo te ofa yabo sia te Aisakbolo menama, tama agai tolai. Tama Abrahamgo sia dage dali, hwą ge dali tolali. Tama augwa si palio.
GEN 22:7 Te augwali si pelama gana, tama Aisakgo te po wai, “Ayao!” Tama Abrahamgo te po wali, “Magi yaliwe, ogwao?” Tama Aisakgo agabolo hanalu wali, “Ayao, eno te sia dage me te ulabo sia da sigo sela soabo subao, tiali goli te ofa yabo sipsip te mena bidibowe?”
GEN 22:8 Tama Abrahamgo po wei ponoyu, te po wai, “Ogwa, te Godigo digi te sipsip gegela mawaibao.” Te po olama, tama augwali si palio.
GEN 22:9 Augwali si te Godigo po wali pesageba sabolama, tama Abrahamgo te alta sai masigigo nigilama, tama sia ugwadu daide dodolama muani. Tama agai aga ogwa Aisak te bonogo nogo sągą duanio. Tama agai aga te alta te isi daiba muai.
GEN 22:10 Tialima, Abrahamgo te hwą ge selama, tama aga ogwa elainu yali.
GEN 22:11 Tiali goli, Yawego Mobo Bidi Ensel te dagalude bidiyu, tama i wali, “Abraham! Abraham!” Tama Abrahamgo te po wai, “Ena e bidibao,” wai.
GEN 22:12 Tama Mobo Bidi Enselgo te po wali, “Nago te wai elamuo. Nago magi sę me deli aga dali me igio. Nago ogwa deli naga elalubadi, tama nago aga yogo eyu, dąų me wabeo. Tama tibaso, eno koneani, nage te Godigo po odobo bidi dao,” Yawego Ensel Mobo Bidigo te po wai.
GEN 22:13 Tama Abrahamgo tonono bilibadi, tama sipsip omai me deli suali, te aga gąų te dwasianu ni nologo abe sai ni nologode habela sai elaluali. Aga pelama, tama te sipsip sigi pai. Agai elama, tama tigidali siaba ulalio. Tama tiyu, agai te ofa Godibolo mawai. Tama te sipsipgo te Aisakgo pesage hasegelai dao.
GEN 22:14 Tialima, Abrahamgo te bulu nogi poali “Yawego mawaibao.” Tama bidi dabego megi tama me te po wabo, “Yawego aga bulu dude te sǫą pabo nai mawaibao.”
GEN 22:15 Tialima, Yawego Mobo Bidi Enselgo te Abraham si sogo i bomonama weyu, te po wai,
GEN 22:16 “Yawego te tiwai wali, ‘Te ena nogide digi eno mu dąų walai bomai po obao. Nago naga te deli naga elalubo ogwa me yoga sabeo. Tama tibaso, mu tama, eno nage dali wiegi yai sę mu yaibao.
GEN 22:17 Eno te tiwai po obao, te eno nago hani wąį dabe te wai puluba hauwa mu, te dagalude hǫ, me te tamu ąį sanede masigi kemi tiwai hauwa mu pedelaibao. Tama nago wąį hani wai dabe augwaligo te boi bidi dabe augwali aiyaba mu elaluama, tama augwaligo doado bage mu saibao.
GEN 22:18 Tama tigidali tǫde bidalubo bidi hanigo ena hanalu, te augwali dali dwagi yai sę yao po weyu, te nago wąį hani dabe dali dwagi yai sę yali te tiwai yao po waibao. Magi baso meni, nago eno po wali palio,’ Yawego te po wali,” Mobo Bidi Enselgo te po wai.
GEN 22:19 Tama Abraham dali, Aisak dali si aga sę bidi si bididuali madi ma pelama, tama augwali te Berseba teba ma pali. Tama Abraham te Bersebade bidali.
GEN 22:20 Nosali Abrahamgo te tiwai po odali, “Milkago te wai meba ame nani po wai.” Milka te Nahorgo we, tama Nahor te Abrahamgo ama dao.
GEN 22:21 Te e da te wai dabe augwali nogi e dao, Us te gomunai bidi, tama Bus, me Kemuel, aga te Aramgo aya dao,
GEN 22:22 tama Keset, me Haso, me Pildas, me Jitlap, me Betuel.
GEN 22:23 Betuel te aga te we Rebekago aya dao. Milkago te Nahor tego ogwa te a naga olama, me sela ame nani, te Nahor te Abrahamgo ama dao.
GEN 22:24 Te Nahor aga dali bidali gasa we me nogi da, te Reuma, agai ame nani ogwa te Teba, me Gaham, me Tahas, me Maka, te tama ame nai.
GEN 23:1 Te Sarago kibu be te 127 kibu be bidama,
GEN 23:2 tama aga te Kiriat Arba, te gasa nogi Hebron, te Kenan pedai badu tede isai. Tama Abrahamgo te Sarade homu dene mu ebaso, aga tigi osogo muani madiba hogonigi peyu, tama agai aga we hagede gela wai.
GEN 23:3 Te gela uduama, nosali Abrahamgo aga te we Sara tigi munalubadi osogo taga peyu, tama aga pelama, te Hit hani we bidi dali po migi peyu, te hanu sunumiba pai. Agai te po wali,
GEN 23:4 “Ena te bulu wau bilibo bidi ede bidibaso, tama eno be tede me elalubeo. Eno te dage tomode te gų page nigabo tǫ pedai me badu mu abelama, tama eno we tede muainogo obao,” wali.
GEN 23:5 Tama Hit hani bidi dabego te po wai,
GEN 23:6 “Woo, genuai bidio, nago dago po odao. Nage te da tomode bidibo genuai tobolu bidi deli dao. Nago we te dago wiegi yai gų pagede pubulao,” wali. “Te da me deli te dago te nago we pubulainu te gų page sainu ebaso, te dago me yogo eyu, dąų me wagobeo. Menio.” Te po wai.
GEN 23:7 Tama Abraham dolalu, tama aga tobolu te bulu page we bidi gesabiba aga tobolu aiyaba basi gulai.
GEN 23:8 Tama agai te po wai, “Te dagego eno we te badu pubula po weyu, usu da po obaso da, teda dagego te bidi mebolo waiąo, Efron te Sohargo ogwabolo hanalu wao.
GEN 23:9 Eno te ola be augwaligo te nogi weyu, te Makpela nogi yali, te eno abelaibao. Te Efrongo tǫ sesege pedai badu elalubao. Te dagego agabolo olama, te dage tigidali gedude te ola be agai enabolo momainu yaibao. Te eno agabolo te mone dolo bugagia mayu, tama dagego tǫ tomode te gų page eno gų page mu elaluaibao,” Abrahamgo te po wai.
GEN 23:10 Efron aga me te Hit bidi dabe bidalubo tomode te hanu sunumi elalubo pąde te po mibo pesagede augwali dali bididuai. Te Hit bidi dabe tigidali bidalubadi, tama augwaligo odali, te Efrongo Abraham dali te tiwai po wei ponani,
GEN 23:11 “Mu menio, genuai bidi. Eno po odao. Te eno te tǫ pedai tigidali me, te ola be gų page dali elalubo, te eno nage olo mu mawaibao,” po wai. “Te ena hani gedude te megi eno nagebolo menama, te nago we tede pubulagameo.” Te po wai.
GEN 23:12 Tama Abrahamgo aga tobolu te bulu page we bidi augwaliba basi gulai.
GEN 23:13 Tama augwaligo odali, agai Efronbolo te tiwai po wai, “Nago po wali dao. Teda eno te tǫ pedai tigidali abelaibao. Nago eno mone sao, tama eno ena we te tǫde pubulaibao,” wali.
GEN 23:14 Tama Efrongo te tiwai po Abrahambolo wei ponani,
GEN 23:15 “Genuai bidio, nago odao. Te tǫde mone te 400 mone silva masigi dabe dao. Tiali goli, tagala, te da si tomode olo bage tiwai elalubao. Te nago we tede pubulao,” wali.
GEN 23:16 Abrahamgo te usu da olama, tama aga mone te bisnis bidi dabego ebo kolesaga tiwai elama, bugula muani. Te Hit bidi dabe augwaligo te Efrongo te tǫde mone te 400 mone silva masigi nogi yali po wabo odali. Tama Abrahamgo te dobolama, tama Efron agabolo manio.
GEN 23:17 Te kolesagade Abrahamgo te Efrongo tǫ te Makpela te badu elaluali tǫ mu sai dao. Te tǫ pedai te giliga asobo badu te Mamrede elaluali, tama Abrahamgo te ola be dali, te tǫde elaluali tigidali ni dabe dali abelai dao.
GEN 23:18 Te Hit bidi dabe tigidali te po mibo madi bidali bidi dabego koneani, te tǫ megi da te Abrahamgo tǫ mu da walio.
GEN 23:19 Nosali Abrahamgo aga we Sara te ola be gų page te Makpela tǫde pubulai dao. Te tǫ bulu Mamre pąde dao, te augwaligo megi gasa nogi wabo Hebron, te Kenan tǫ pedai badu tomode elalubao.
GEN 23:20 Te tama tiyu, tama Hit bidi hani dabego tǫ, te gų page ola be elaluali dali, te Abrahamgo gų page tǫ mu gagawai dao.
GEN 24:1 Te Abraham te monu dabe mu yalio. Tama Yawego agai tigidali yali sęde te wiegi yai tau sabo sę eyu, tama Abraham bugagia mu bidali.
GEN 24:2 Tama Abrahamgo aga sę yali monu dabe bidi i wali. Te bidigo te Abrahamgo doado bage tigidali tonalubo bidi da. Abrahamgo agabolo te po wali, “Naga nogo guni sisu muyu, nago dila pai po ena dali dąų walao.
GEN 24:3 Nago te Yawego nogide te po bomo yai po dąų wao, te dagalu de tǫ dali sigo God dao, te tama tibaso, nago eno ogwago we te Kenan tomode we dabe me te noma sigio, te ena e bidibo tǫde.
GEN 24:4 Nage te eno page buluba ma begasa pelama, tama ena hani tomode digi te we me deli gegelama, tama aga noma selama, tama eno ogwa Aisakgo somainu yao,” wali.
GEN 24:5 Tiali goli, te sę bidigo te po wai, “Te wego te aga bulu taga soabo hagela homu eyu, te ena dali e buluba asabo homu isiąbaso da, teda magi yaibawe? Ma, te eno nago ogwa te naga page buluba tagala palagawe?”
GEN 24:6 Tama Abrahamgo po wei ponoyu, te po wai, “Woo, nago te eno ogwa te eno page buluba munu me tagala palamuo!
GEN 24:7 Yawe, te dagalude bidibo Godigo ena te eno ayago bede, me te ena hani dabego tǫde selama, asali. Tama agai bomai dąų wabo po wali, te agai e elalubo tǫ te eno hani wąį dabebolo mawaibao wai. Yawego digi te aga mobo bidi ensel te nage pabodu polasa tagala palaibao. Tama tibaso, nago tede te eno ogwago we gegela sueibao.
GEN 24:8 Tiali goli, te we nage dali asisąbaso da, teda nago enabolo te dąų wali po te pogo nage dali munu me kęalugobeo. Tiali goli, nago eno ogwa te eno page buluba me odasa pelamuo.” Te po wai.
GEN 24:9 Tialima, sę ebo bidigo nogo guni sisu muyu, aga genuai bidi dali bomo yai po dąų wai. Agai po dąų waliyu, te Abrahamgo agabolo ya wali sę tigidali agai mu yaibao po walio.
GEN 24:10 Tama sę ebo bidigo te Abrahamgo te nogo si kibu kamel me te maiabo wiegi yai nai hauwa sali. Tama agai te tigidali doado bage sisi ilama, tama te Nahor bidibo bulu te Mesopotemia teba palio.
GEN 24:11 Aga digibulu pelama, teba sabolama, tama agai te kamel dabe te wę ulu pąde te bulu sesege badu pila mumainu yalio. Agai tama tiali, te we dabe augwaligo te wę tuagasobo sogo te be pio ebadi dao.
GEN 24:12 Agai tama tiwai gedu haluasa po wali, “Yaweo, eno genuai bidi Abrahamgo God, nago eno sę megi wiegi yai ilao,” wai. “Nago te eno genuai bidi dali megi dwagi yai tau sabo sę emainogo eyu, tama ena tau mao.
GEN 24:13 Ena e ulu ąį tubo pąde bidibadi, tama e bulu page wegi mani te augwali asama, wę tuagasaibao.
GEN 24:14 Te eno wegi ogwa me deli dali te tiwai po waibao, ‘Ae, nago genuai botol aiyaba munama, te ena wę dwasianu tuaio,’ po waibao. Tama agai te po olama, ‘Nage te wę tuao, tama te eno nago kamel dabe me te wę mawaibao,’ tama obaso da, teda eno homugo nago sę bidi Aisakgo sabo we te tama da po waibao. Tama te tiwai pedalubaso da, teda eno koneyu, nago te eno genuai bidi dali dąų wali tau sabo po te mu tama usu nubao po waibao,” te tiwai gedu haluasa po wai.
GEN 24:15 Sę bidigo te tiwai gedu haluasa po odubadi, tama Rebeka sabolalio. Agai te wę sabo botol aga nagede tolasa asali. Rebeka te Betuelgo wegi dao. Tama Betuel te Milkago ogwa dao, aga te Nahor tego we, te Abrahamgo ama dao.
GEN 24:16 Te wegi ogwa we te gasa sawi yai mu tonani, tama aga te bidi dali me pisąwai. Tialima, aga te wę ulu tugi soyu, aiyaba dulama, tama edaba ma holalio.
GEN 24:17 Tama te sę bidi aga pageba udulama, tama te po wai, “Ae, nago te botol węgo enanu dwasianu tuaio,” wali.
GEN 24:18 Tama Rebekago te po wai, “Genuai bidi, nage tuao.” Tama polo agai te botol wę aiyaba mugulama, tama nogogo tolalubadi, tama aga tumainu yalio.
GEN 24:19 Agai te wę tula silibo si, tama Rebekago po ma wai, “Te eno nago kamel dabe me wę menama, te augwali tulama, usu elama, pągąmainu yaibao,” wali.
GEN 24:20 Tama polo agai te botol ąį habuge te masigi ąį gamia te kibu kamel dabego ąį tubo madi gelali. Tama aga ma udulama, te wę geninama sigi pedu geani, te tigidali kamel usu elama, mu pągąmainogo yai.
GEN 24:21 Tama te sę bidigo po me wabeo. Agai tonalu naga yalio. Agai koneainu, Yawego te agai sę wiegi yai ilibowe naga koneainogo, tama tialio.
GEN 24:22 Te kamel dabego wę tula silibo si, tama Abrahamgo sę bidigo agai te ring gol te gasa sawi yai mu selama, tama te Rebekago guniba muanio. Tama agai te golgo nigai nogo mo si te Rebeka nogoba holali.
GEN 24:23 Tama agai te po wai, “Ae, nago enabolo walao. Nage te dego wegi dawe? Tama magi yaliwe? Te nago ayago be habu te usu yabo elalubawe, te ena eno hani dali bidabo madi te po obao.”
GEN 24:24 Tama Rebekago te tiwai po wei ponani, “Ena te Betuelgo wegi da, aga te Nahor me Milka te bidi de we sigo ogwa dao.
GEN 24:25 Awe, te kamel dabe pibo pesage wiegi yai elalubo, tama augwali tuabo nai me elalubao. Tama be dąį togwali habu me elalubo, tama dage tede bidiagameo,” wali.
GEN 24:26 Tialima, Abrahamgo sę bidigo aga kidu sugunama, tama Yawebolo lotu po walio.
GEN 24:27 Tama agai te po wai, “Dago Yawe nogi ugwaba sao, te eno genuai bidi Abrahamgo God dao. Agai te eno genuai bidibolo dąų wali po te mu usu nanio, te aga dwagi yai tau sabo kolesaga ebo me, te Abraham dali homu kolesaga kęą pai bidi kolesaga ebo me, te Yawego tagalobeo. Yawego te eno genuai bidi aga amago hanigo beba dolo ena sela asama, tagalagasali dao,” tama wali.
GEN 24:28 Tialima, te wegi ogwa we aga udulama, te aga idago beba palima, tama tede bidali bage augwalibolo te tigidali sę yali po wai.
GEN 24:29 Tama Laban, te Rebekago abe, agai te ring gol me, te golgo nigai nogo mo si me, te aga gunide walali me, te nogode holali suali. Tama agai odali, te bidigo yali sę po tigidali Rebekago pusali. Tama aga udayu, te bedu buluba teda solama, tama aga te Abrahamgo sę bidi me bididubo madi saboligi pai, aga te aga kamel dabe dali te ulu wę tubo pąde dolaludai.
GEN 24:31 Tama Labango te po wali, “Abagio, Yawego te wiegi yai sę te nage dali yalio. Magi baso nage te bulude dolaludubawe? Da si beba pinao. Eno nage bidabo pesage dodolalio. Tama te kamel dabe me bidabo pesage usu yai elalubao,” wali.
GEN 24:32 Tialima, te sę bidi aga dali pelama, te be tomoba pai. Tama Labango po aga sę bidibolo obaso, augwaligo te kamel dabego tudide munasa asali walu dabe sela munama, tama augwaligo te nosai me nai te augwali mani. Tama augwaligo wę te Abrahamgo sę bidi aga hani dali teba selasa pelama, te augwali sągą wę telamainu yalio.
GEN 24:33 Augwaligo nai sela asali, tiali goli sę bidigo te po wali, “Eno nai asena polo tugobeo. Eno hasiabolo po pusaibao.” Tama Labango te po wai, “Te usu dao. Nago po weyu bolo yao.”
GEN 24:34 Tialima, sę bidigo te po wali, “Ena te Abrahamgo sę bidi dao.
GEN 24:35 Yawego eno genuai bidibolo wiegi yai mobo menama, tama aga genuai bidi nigilali. Yawego agabolo nai hauwa mani, te e nai dabe dao, sipsip, meme, bulmakau, silva me gol, sę bidi me, sę ebo we me, kamel me donki, te tama doado bage hauwa mawai dao.
GEN 24:36 Tama aga we Sara aga te mosi dabe yai madi te aga ogwa ame nai. Tama eno genuai bidigo tigidali doado bage aga te ogwabolo mawai dao.
GEN 24:37 Agai enabolo po bomo elama weyu, te po wai, ‘Nago eno ogwa we te Kenan dabe augwali tomode te we munu me gegelamuo. Menio. Nage pelama, tama eno hani, te eno ayago hani tomode digi, tede te we me deli gegelama, tama eno ogwa Aisakgo somainu yao,’ wai. Agai tama po obaso, tama eno te po wali peyu, tama ena aga dali po dąų wai.
GEN 24:39 Tama eno ena genuai bidibolo tama tiwai po wai, ‘Tama te we ena dali ma asobo hagela homu ebaso da, teda magi yagawe?’
GEN 24:40 Tama agai te po wai, ‘Ena te Yawego po wali pabo bidi dao. Te agai aga mobo bidi ensel te nage dali tagala palama, tama nago sę wiegi yai bugagia ilaibao. Te nago eno ogwago we me deli te eno ayago hani tomode sesaibao.
GEN 24:41 Te nago tama tibaso da, teda te dąų wali pogo te nage me kęalugobeo. Te nage eno haniba pelama, tama augwaligo nago po obadi usu da po wasiąyu da, teda te tiwai naga eyu, te dąų wali pogo nage me kęalugobeo,’ Abrahamgo enabolo te po wai.”
GEN 24:42 “Megi e tama side, te bubugade ena te wę ulu elalubo madi pedelama, dolaludu, tama eno te tiwai gedu haluasa po oduali, ‘Yawe, te eno genuai bidi Abrahamgo God, nago eno sę te wiegi yai ilao,’ po wali.
GEN 24:43 ‘Megi ena te wę ulu tubo pąde bidibao. Tama te wegi ogwa we me deli te wę tuagasu asobode, teda eno te tiwai po agabolo waibao, “Ae, nago te botolde wę enanu dwasianu menama, ena tuaio.”
GEN 24:44 Tama agai te po wabosi, “Nage tuao,” olama, “tama eno nago kamel dabe me wę mawaibao,” obaso da, teda eno homugo te we naga te nago sa muani we dao, te eno genuai bidigo ogwago we da homu yaibao.’
GEN 24:45 Eno gedu haluasa po udubadi, tama Rebeka sabolali. Agai te wę tubo botol te aga nagede tolasa, tama aga te wę ulu tugi soyu, aiyaba dulalio. Tama agabolo eno te po wali, ‘Ae, nago węgo enanu dwasianu menama, ena tuaio,’ te po wali.”
GEN 24:46 “Tama polo agai te botol wę aiyaba mugulama, tama nogogo tolaluyu, tama po wai, ‘Genuai bidi, nage tuao,’ wai. ‘Tama eno nago kamel dabe me wę mawaibao,’ wai. Tama ena wę tuali silibo si, tama agai te kamel dabe me wę mani.
GEN 24:47 Tama eno aga hanalu wali, ‘Nage dego wegi dawe?’ Tama agai te po wai, ‘Ena te Betuelgo wegi dao, aga te Nahor tego ogwa, aga ida Milka dao,’ te wegigo te po wai. Tama eno aga gunide te ring waliyu, te nogo side mo holiyu yai.
GEN 24:48 Tama eno kidu sugunama, te eno Yawebolo lotu po wali. Tama eno Yawe nogi ugwaba sali, te eno genuai bidi Abrahamgo God. Agai te ena genuai bidi aga amago hanigo beba dolo ena odasa asai. Tama eno te wegi ogwa we gegali, te eno genuai bidigo ogwago sabo we sualio, te eno genuai bidi aga amago ogwago wegi dao.
GEN 24:49 Megi te dagego te dwagi yai tau sabo kolesaga me, te homugo kęą pai kolesaga me, te eno genuai bidibolo yainogo homu eyu da, teda dagego po waiąo. Tama dagego homugo hagela homu ebaso da, teda dagego enabolo olama, tama ena homugo digi te mena sę yainu te ena tiaibao,” Abrahamgo sę bidigo te po wai.
GEN 24:50 Laban me Betuel augwali sigo po wei ponoyu, te po wai, “Yawe aga digi te sę pedalumainu yali. Te dago po meni.
GEN 24:51 Rebeka te bidibao. Nago aga selasa, tama naga pao. Aga te nago genuai bidigo ogwago somainao, te Yawego wali po tiwai gilama emainao,” te po wai.
GEN 24:52 Te Abrahamgo sę bidigo te augwaligo wabo po odama, tama aga tobolu te tǫba basi gulama, tama aga Yawebolo lotu po wai.
GEN 24:53 Tama tilama, nosali aga te haniani au dobage te silva me gol me, te gasa sawi yai gudubo ugwa me sobadi elama, te Rebekabolo mawai. Agai te haniani gasagi yai sawi yai dila pai nai dabe te Rebeka aga abebolo mobadi, te aga idabolo me mayu yai.
GEN 24:54 Tama te po ola siminama, tama Abraham aga sę bidi aga hani dali te augwali nai tuyu, wę tuyu elama, tama augwali piali. Tama kigamu digi augwali hodaluama, tama Abrahamgo sę bidigo tama po wai, “Ena te ena genuai bidi bidiboba ma paibao,” wai.
GEN 24:55 Tiali goli, Rebeka aga ida de aga abe sigo te po wai, “Te wegi ogwa we da dali te nogo si sogo bidimainu elama, tama nosali aga pomainu yaibao.” Te po wai.
GEN 24:56 Tama Abrahamgo sę bidigo te tiwai po wei ponai, “Dagego ena dąų ola sigimio. Yawego eno sę wiegi yai ilama pedelai. Ae, te ena genuai bidi bidibo madi ma painu ebao.”
GEN 24:57 Tama augwaligo te tiwai po wai, “Dago te wegi ogwa we i olama, tama agabolo te aga homu kolesaga hanaluinao,” wai.
GEN 24:58 Tialima, augwaligo Rebeka i olama, asobosi, tama augwaligo aga hanalu wai, “Nage te bidi dali paibawe?” Tama agai te po wai, “Awe, te ena paibao,” wali.
GEN 24:59 Tama tibaso, augwaligo augwa abe Rebeka aga tonalubo we dali augwali si te Abrahamgo sę bidi aga hani dali pomainu tama tagala palai.
GEN 24:60 Tama Rebekabolo wiegi yai sę pedalumainu eyu, augwaligo te tiwai wai, “Abe, dena homugo te nage umabo bidi mugo ida pedelaibao. Te nago wąį hani augwaligo te augwa boi bidi aiyaba elaluama, tama augwaligo hanu dabe somainao” te po wai.
GEN 24:61 Tama Rebeka dali, aga sę ebo wegi ogwa we dabe dali, augwali hogodama, tama augwali te kamelba duagulama, tama augwali te Abrahamgo sę bidi wali pai. Tama sę bidigo Rebeka oda selama, tama augwali te digibulu buluba pabo gagalali.
GEN 24:62 Te Abrahamgo sę bidi agai te we gegeyu, tama digibulu mu peyu, digibulu ma asu, tama tibadi, te Aisak agai te bidi dabe augwali bidisiąwani badu taga soali, augwaligo te bulu nogi poali ‘Te ena subo Bidibo Ula Elalubo Bidigo wę ulu.’ Te nogi poai. Tama aga pelama, te Negeb pedai badu bidigi pai.
GEN 24:63 Te nosali me sogo be pio ebode aga te nosai elalubo digi pebeli dilide biliduai, tama agai te kamel meba aselabo suali.
GEN 24:64 Tama Rebekago Aisak sulama, tama aga te kamel daide dulaluali tagalama, aiyaba dulai.
GEN 24:65 Tama agai te Abrahamgo sę bidibolo hanalu wai, “Te mena bidi da tiąba asobawe?” Tama sę bidigo te po wai, “Te eno genuai bidi dao.” Tama tibaso, Rebeka aga tobolude elaluali ugwa namego te aga gesabidi au palia sai.
GEN 24:66 Tama ma sabolama, tama te sę bidigo agai yali sę po tigidali te Aisakbolo pusali.
GEN 24:67 Tama Aisakgo Rebeka te aga ugwa beba odasa pelama, tama agai aga salio. Aisakgo te Rebeka godolo mu elama, tama aga homu wiegi yai ma yali. Polobadu te aga ida isibaso, tama aga homu dene eyu, homu sęgę elaluai dao.
GEN 25:1 Abrahamgo gasa we me sali nogi te Ketura dao.
GEN 25:2 Te wego ame nani ogwa wai dabe te Simran, Joksan, Medan, Midian, Isbak me Sua, tama dao.
GEN 25:3 Joksan te Seba de Dedan sigo aya pedelai. Tama te Dedango wai dabe te augwali hani wąį dabe te Asur hani, te Letus hani, me Leum hani, te augwa aya Dedango wąį dabe te tama dao.
GEN 25:4 Tama te Midiango ogwa dabe te e tama elaluai, Efa, Efer, Hanok, me Abida, me Elda. Te tigidali hani sibi wąį augwa auwa mosi te Ketura dao.
GEN 25:5 Abraham aga isabode, te aga nai me tigidali doado bage te Aisakbolo naga mena silai.
GEN 25:6 Tiali goli, aga bidibo sogo digi, te agai doado bage meba te aga gasa wego wai puluba augwaliba olo mani. Tama agai augwali te giliga pedalubo pedai badu tagala palama, te aga ogwa Aisak bidibo digi te augwali digibulu bidigi pomainu yali. Tama augwali pelama, te giliga pedalubo bulu te badu bidigi pai dao.
GEN 25:7 Abraham te kibu be umabo te 175 kibu be bidai.
GEN 25:8 Aga te monu dabe mu elama isibaso, tama augwaligo aga pubulali. Tama aga te aga polobadu isali wąį dabe augwali dali ma sisinanio, tama wabo.
GEN 25:9 Aga ogwa si te Aisak me Ismael sigo aga pubulali, te gų page dedage page te Mamre, te badu te Makpela ola be gų page te giliga pedalubo badu muani. Polobadu te tǫ pedai te Sohargo ogwa Efrongo tǫ, aga te Hit bidi hani me deli dao.
GEN 25:10 Abrahamgo te tǫ te Hit bidi dabe dali abelai. Augwaligo Abraham te aga we Sara polobadu pubulali madide, te tǫ pedai badu pubulai.
GEN 25:11 Abraham isai digi, tama Godigo aga ogwa Aisak dali dwagi yai tau sabo sę yai. Aisak te wę ulu me deli pedalubo madi pąde bidali, te augwaligo nogi yali ‘Ena subo Bidibo Ula Elalubo Bidigo wę ulu.’
GEN 25:12 Te e da, te Ismaelgo wąį hani dabe e dao. Ismael te Abrahamgo ogwa te Hagargo ame nani. Hagar te Isip we me deli, te aga Sarago olo sę iduai we me deli bidai dao.
GEN 25:13 Tama Ismaelgo wai dabe nogi te gomunai waide gagalama, te ogwa bidi wai dabeba siminigi paibao, Nebaiot te Ismaelgo gomunai ogwa nogi, nosali te Kedar ame nani, Atbel, me Mipsam,
GEN 25:14 Misma, Duma, Masa,
GEN 25:15 Hadat, Tema, Jetur, Nafis, me Kedema.
GEN 25:16 Te augwali Ismaelgo ogwa dabe tama te augwali nogi dabe dali, te bulu dabe te tǫ pedai me te augwaligo pesage nigilama bidali, te nogi dali dao. Tama augwaligo tobolu bidi dabe te nogo si olama, sągągo si elaluali, tama nogo si olama, sągą si hani bidi dabe bidali.
GEN 25:17 Ismael te kibu be hauwa 137 kibu be bidama isibaso, tama augwaligo aga pubulali. Tama aga te aga polobadu isali wąį nǫų dabe dali deliba sisinama, bidigi pai dao, tama wabo.
GEN 25:18 Te Ismaelgo hani wąį dabe augwali te tǫ pedai Havila me Sur te tomo agebele side bidaluali. Te bulu te Isip pąde te Asur teba pabo sunumi te giliga pedalubo pedai badu elaluai. Te Ismaelgo hani augwaligo te haniani hani dali boi bidi homu ebaso, tama augwali digibulu bidigi pai dao.
GEN 25:19 Te e po da te Abrahamgo ogwa Aisak aga te tama bidali wabo po dao.
GEN 25:20 Aisakgo te Rebeka sali sogo te aga kibu be bidi sese si 40 elaluai. Rebeka te Betuelgo wegi da, aga te Aram bulu bidi me deli, te Mesopotemia pedai badu elaluai. Tama Rebeka te Labango abe, aga te Aram bidi me deli dao.
GEN 25:21 Te Aisakgo wego wai me ame nabeo. Tama tibaso, Aisakgo aga tobade gedu haluasa po weyu, te Yawego aga we tau somainu yai. Yawego te Aisakgo gedu haluasa po wabo odama, tama Rebeka haliga yalio.
GEN 25:22 Te Rebekago haligade te wai si elalu, tama augwa si tomode usu siyu begelali. Tibaso, Rebekago te po wali, “Te ebo kolesaga magi baso enaba pedelaliwe?” Agai te sę ebo page koneainu, teda agai Yawebolo gedu haluasa po hanalu wali.
GEN 25:23 Tama Yawego te tiwai po Rebekabolo wai, “Te bidi hani si te nago haliga tomode bidibao. Te hani bidi si nago ame nainu ebaso, te augwali si dali si ususu si yainu ebao, tama nosali hani si bugulama, tedali bidaibao. Te me hani deligo gasa hani me dali bomo mu yaibao. Tama polasa te ame nabo wai aga te nosali ame nabo waigo sę ebo bidi pedelaibao,” Yawego Rebekabolo te po wei ponani.
GEN 25:24 Tama te tiabo sogo bodolu pedelama, tama mu tama Rebekago te wai ogwa si ame nani.
GEN 25:25 Te polasa ame nani waigo tigi da, te mama mu elama, tama tigi tu nisi hauwa elaluali, te hasa nisi tiwai yai. Tama tibaso, augwaligo aga nogi Iso poali.
GEN 25:26 Te nosali pedelali wai ogwa aga ame nobadi tama aga nogogo te Iso sągą gabulude tolalubadi, tama ame nani. Tama augwaligo aga nogi Jekop poai. Te sogo Aisakgo kibu be te 60 kibu be elalubo sogo Rebekago te wai si ame nani.
GEN 25:27 Te ogwa si genuai elama, tama Iso te bulu hasa gegebo koneai bidi mu bidali. Aga te bulu hasaba naga pabo sę ebo bidi bidai. Tiali goli, Jekop te subigila me bilisiąbo bidi dao. Aga te augwaligo ugwa be dabede naga bididuai.
GEN 25:28 Aisakgo te Iso godolo elaluai, magi baso meni, agai te Isogo elebo bulu hasa tuyu, wiegi yai homu pemene iduali. Tiali goli, Rebekago Jekop agai godolo homu yali.
GEN 25:29 Me sogo side Jekopgo te nai tegabi sup uludubadi, tama Iso te bulu hasa gegegi pelama, ugwa beba ma sabolali.
GEN 25:30 Aga moni nasi ebaso, tama agai Jekopbolo te po wai, “Ena nasigo mu dwalio. Te ulali mama yai naigo ena dwasianu mao, tuaio,” wai. (Tama tibaso, nosali augwaligo aga nogi Idom poali.)
GEN 25:31 Tiali goli, Jekopgo te tiwai po wei ponani, “Da si dobu si inao. Hasia bolo nago enabolo te nage gomunai ogwa da nogi wabo po te enabolo mobaso da, teda nosali eno te ulali sup nai nagebolo mawaibao,” wali.
GEN 25:32 Tama Iso te po wai, “Te usu dao. Nasi baso te pąde ena isabo homu ebo, tama ena te gomunai bidi elalubo nogigo te enabolo magi nai magowe?”
GEN 25:33 Tama Jekopgo te po wali, “Tiali goli, nago hasia bolo te nago po dąų weyu, tama po wao, ‘Eno te enade elalubo gomunai bidi nogi te Jekopbolo mu mobao. Tede eno tibo po obaso da, teda eno homugo te Godigo ena ela muao,’ tama po hasia bolo wao,” Jekopgo te po wai. Isogo te mu po naga da dąų wabo po ola silibo si, tama aga te gomunai ogwa nogi elaluali te nogi Jekopba mawai.
GEN 25:34 Nosali Jekopgo te bret meba dali, te sup me mawai. Iso aga te nai polo tuyu, wę tuyu yai. Nosali aga hogodama, palio. Agai te aga gomunai bidi da, tama aga aya isibosi da, teda aga doado bage hauwa sabo bidi dao, tede te olo nai naga dao homu elama, tama tagalalio.
GEN 26:1 Gasa sogo te nasi ebo si te buluba pedelali, te polobadu Abraham bidali sogo pedelali nasi tiwai ma pedelali. Tialima, Aisak te Filistia dabego tuni bidi Abimelek bidibo bulu te Gerarba pali.
GEN 26:2 Yawe te Aisakba pedelama, tama agabolo te tiwai po wai, “Nage te Isipba munu me pelamuo. Nage te eno nagebolo bida wabo bulude bidagameo,” wai.
GEN 26:3 “Nage te bulude bolo bidao, tama ena nage dali bidiyu, tama dwagi yai tau sabo sę nage dali yaibao. Te e elalubo tǫ pedai tigidali te eno nagebolo mayu, te nago hani wąį dabe augwalibolo me mawaibao wai. Tama eno te nago aya Abraham dali dąų wali po te eno homude me gegeda palogobeo.
GEN 26:4 Te nago wąį hani augwali te umabo mu pedalumainu yaibao, te dagalude elalubo hǫ dabe tiwai gilama yaibao. Tama eno e tǫ pedai te tigidali eno augwalibolo mawaibao. Tama te tǫde tigidali bidi dabego te augwali da dali dwagi yai sę yao wabo po enabolo hanalu, te eno nago hani wąį dabe dwagi yai sę yali tiwai gilama yao po waibao.
GEN 26:5 Abrahamgo eno haniani te kolesaga yao po odama, tama agai eno bomai po tigidali wali pai. Tama tibaso, eno nage dali dwagi yai sę yaibao,” Yawego te po wai.
GEN 26:6 Tialima, Aisak te bulu Gerar tede bididualio.
GEN 26:7 Tama te bulu bidi dabego te aga we po agabolo hanalubo sogo agai te tiwai po wali, “Aga te ena abe dao.” Aga wi ebaso, tama agai te po me wabe, “Aga te eno we da,” wabeo. Aisak wi elama, tama tiwai homu yali tiyu, te bidi dabego Rebeka sainu te aga ela muidali homu yali. Magi baso meni, Rebeka te gasagi yai sawi yai we bidai.
GEN 26:8 Aisak te badu bidali sogo sesabi gana elama bidai, tama te Filistia tǫ tonalubo tuni bidi Abimelek te be tomodu te winduadu tonobadi dolaluyu, tama agai suali, Aisak aga we Rebeka tigiba nono tubo sę ebo suai.
GEN 26:9 Tialima, Abimelekgo Aisak i olama, agabolo te po wai, “Odao. Te nago we dao! Tiali goli, magi baso nago te naga abe da po waliwe?” Tama Aisakgo te po wei ponoyu, te po wali, “Eno e tama tiwai homu yai, ‘Te eno po weyu, te ena we da po obaso da, teda augwaligo ena ela mugowe?’ te homu yai dao.”
GEN 26:10 Tialima, Abimelekgo te po ma wai, “Magi baso nago da dolainogo yaliwe? Suao, te eno hani bidi hauwa te elalubao, te dua digi mu te bidi me deli nago we dali olo pigi pigi dao. Te bidi me deligo tama tigi sogo da, te naga digi te dwai sęgę daba pedelabo page yalio,” wali.
GEN 26:11 Tama tibaso, nosali Abimelekgo te e tiwai po bomo elama, te tigidali bidi dabebolo walio, “Te bidi me deligo dwai sę te e bidi dali, ma we dali me ebaso da, teda te bidi aga mu isimainao.”
GEN 26:12 Aisakgo te tǫde nai wai dabe bulama, tama te kibu bede nai umabo mu pedelama, tama agai nai te hauwa sogo mu bulu dali tiwai gilama yali. Yawego aga tau siyu, tama dwagi yai sę aga dali yai,
GEN 26:13 tama agai nai hauwa mu sidu geani, tama aga genuai bidi mu pedelai.
GEN 26:14 Agai kibu sipsip me, bulmakau me, sę ebo bidi me hauwa mu elalubaso, tama te Filistia bidi dabego te sulama, tama augwali pesą yali.
GEN 26:15 Te Abraham tede bidali sogo, agai sę bidi dabe augwaligo te wę ulu dabe nigali. Megi te Filistia dabe augwaligo te Aisak dali dwai homu ebaso, augwaligo te tǫde ulu wę pedalubo te ma dąų olama, te tǫgo ma paliali.
GEN 26:16 Tama nosali Abimelekgo Aisakbolo te tiwai po wai, “Nago da taga peyu, pao. Megi nage bomo mu ebao. Da nage dali usu me egobeo,” wali.
GEN 26:17 Tialima, Aisak tede bidali taga peyu, tama aga pelama, te bidabo pesage me deli te bulu du si elalubo madi tomode, te tǫ me badu tede bidali, te odogo tǫ nogi te augwaligo Gerar poai.
GEN 26:18 Abrahamgo te wę ulu tǫde meba polobadu nigai. Tiali goli, te aga isali sogo te Filistia bidi dabego te wę ulu dabe paliali. Tama Aisakgo te wę ulu dabe ma dalama, tama aga ayago polobadu deli delibolo poali nogi tiwai ma poalio.
GEN 26:19 Te Aisakgo sę bidi dabe augwaligo te bulude tǫ diganama, tama te wę ulu me deli nigainu te augwaligo dwasianu wę ulu tǫde pedalubo gegalio.
GEN 26:20 Tiali goli, te Gerar tede te kibu bulmakau tonalubo bidi dabego te Aisakgo kibu tonalubo sę ebo bidi dabe dali wado po weyu, te po wai, “Te e wę dago wę dao,” po wai. Tama Aisakgo te wę ulu nogi e tiwai nogi poai “Wado po wai.” Magi baso meni, te bidi dabego wado po tede wai.
GEN 26:21 Tama Aisakgo sę bidi dabego gasa wę me ma nigali, tama tede me augwaligo wado po wai. Tialima, Aisakgo te wę ulu nogi e tiwai nogi poai “Genuai wado po wai.”
GEN 26:22 Agai te pedai badu tagalama, te aga gasa badu me te wę ulu ma nigai. Tiali goli, te sę ebo bidigo tede te wado po me wabeo. Tialima, Aisakgo te e tiwai nogi poali “Te pesagede po ma wasiąwai,” tama agai te po wali, “Megi da, Yawego da e tǫde te genuai bidabo pesage mayu, tama te da bugagia homu nagame elama bidimainu yalio. Tama dago te bulude doado bage hauwa elaluaibao,” te po wai.
GEN 26:23 Aisak aga tede bidali taga peyu, te aga te Berseba teba sabolali.
GEN 26:24 Te sogo hulide Yawe te agaba pedelama, tama te po wai, “Ena naga aya Abrahamgo God dao. Nage wi me elamuo. Ena nage dali bidibao. Te eno nage tau siyu, nage dali dwagi yai sę elama, tama nago wąįgo wai dabe hauwa pedalumainu yaibao, magi baso meni, eno te ena sę bidi Abraham godolo mu yali dao, tama aga tobade eno tama tiaibao,” wali.
GEN 26:25 Aisakgo te ofa maiabo alta me deli te bulude dodolama, tama agai Yawebolo lotu wai. Nosali agai te bidabo pesage tede nigilama, tama aga sę bidi dabego tede tǫ diganama, tama te wę ulu me deli nigali.
GEN 26:26 Abimelek te aga bulu Gerar taga soyu, asama, Aisak suagasali. Ahusat, te bidigo Abimelekbolo te wiegi yai homu kolesaga mabo bidi, me Fikol, aga te aga ami bidi dabe tonalubo polalubo bidi, augwali si te Abimelek dali asai.
GEN 26:27 Tialima, Aisakgo augwalibolo hanalu wali, “Polobadu dagego ena dali wado po olama, tama ena dagego bulude bidibadi gudulai. Tama magi baso megi da, duga digi dage ena bidibo digi asaliwe?” wali.
GEN 26:28 Tama augwaligo te tiwai po wei ponani, “Megi dago koneani, te Yawe nage dali bidibao. Tama dago homugo te dago dage dali te mu po naga dao weyu, te boi homu ebo silabo po me deli dąų waibao. Dago nagebolo dwai sę me ilibeo. Tama dago homugo te nago bomo yai po dąų weyu,
GEN 26:29 te nago da me dolamu dao. Dago wiegi yai kolesaga nagebolo yali, te nago dago bulu taga soali sogo te dago nage dali me hwįbeo, te nage homu nagame dali dua digi soai dao. Magi baso meni, te hania pedelalio, te Yawego te dwagi yai sę te megi nage dali ebo dao.” Augwaligo te po wali.
GEN 26:30 Aisakgo te augwali nai genuai me ulama, tama augwali nai me wę tuai.
GEN 26:31 Te kigamu digi mu augwali hogodaluama, tama augwali dali, Aisak dali, augwaligo augwa nogo guni sisu muyu, augwa hasi e tiwai po dąų wali, “Te dago dage dali sesemane sogo te wiegi yai homu deli naga elama, bidaibao.” Aisakgo augwaliba dage tao olama, tama augwali nogo menama, tama augwali pali.
GEN 26:32 Te sogo digi te Aisakgo sę bidi dabe sabolama, tama augwaligo agabolo te augwaligo wę ulu nigali po wagasai. Augwaligo te po wai, “Dago wę gegalio.”
GEN 26:33 Tialima, Aisakgo te wę ulu nogi Seba nogi poai. Tama megi tebode augwaligo te hanu nogi Berseba wabo dao.
GEN 26:34 Iso aga kibu be te bidi sese si olama, 40 wabode, tama agai te we Judit sali, te Berigo wegi, te Hit bidi hani me deli da. Isogo te Basemat te we me sali, te Elongo wegi, te me Hit hani bidi me deli dao.
GEN 26:35 Aisak de Rebeka si te we sigo ebo kolesaga hagela homu eyu, tama haliga dene mu iduai.
GEN 27:1 Aisak monu dabe mu elama, tama aga gedu halua selama, tama te nai dabe me, bulu ula me ma bugagia suabo ąǫ isąwai. Tialima, agai aga gomunai ogwa Iso i olama, tama agabolo te po wali, “Ogwao!” Tama Isogo po wei ponani, “Awe, ena e bidibao,” wali.
GEN 27:2 Tama Aisakgo te po wai, “Ena monu dabe elama, tama ena pąde isainu ebao, te ena isabo sogo eno konebeo.
GEN 27:3 Tama nago naga enesigi me ene dali selama, tama nage busiba pelama, tama eno hasa me deli gegegi pao.
GEN 27:4 Te nago gegelama, subosi da, teda nage pelama, te eno godolo ebo nai ulama, tama nago enaba selasa asao. Te eno te nai tulama da, tama eno nagebolo te Yawego nage dali dwagi yai tau sabo sę emainao po menama, tama nosali ena isaibao.” Aisakgo te po Iso dali wali.
GEN 27:5 Tiali goli, Rebeka agai odali, te Aisakgo aga ogwa Iso dali po mibo odali. Tialima, Iso te aga ayago tuabo hasa me deli te busiba gegegi peyu pai madi,
GEN 27:6 Rebekago aga ogwa Jekopbolo te tiwai po wali, “Megi tama eno odali, te naga ayago te po nago ama Isobolo mabo po eno odali,
GEN 27:7 ‘Te hasa me deli selasa asama, tama ena habi nai meba ula magasao,’ po walio. ‘Tama tialima, te nai eno tulama da, tama eno te Yawego nage dali dwagi yai tau sabo sę emainao po te nagebolo Yawe gedude mawaibao,’ wai, ‘tama nosali ena isaibao,’ naga ayago Isobolo te po wai.
GEN 27:8 Te megi da, te ogwa, te nago eno po bugagia odama, tama eno nagebolo po wabo gilama te sę yao.
GEN 27:9 Nage te kibu sibi bidalubo obo elalubo teba pelama, tama te wiegi yai nisai meme wai si te enaba selasa asao. Tama eno te nago ayago godolo ebo te tobage wiegi yai nai ulaibao.
GEN 27:10 Tama nago te naga ayabolo magi pagameo, te agai tuaibao. Tama nosali agai isisąbadi, agai te Yawego nage dali dwagi yai sę emainao po nagebolo mawaibao, tama nosali aga isaibao,” wali.
GEN 27:11 Tiali goli, Jekopgo te tiwai po aga idabolo wei ponani, “Nago koneani, Iso tigide te tigi tu nisi hauwa elalubao. Tiali goli, ena tigide te menio.
GEN 27:12 Tama tiyu, ayago eno tigi nogo diąnama, tama agai homugo te eno aga usu suyu, tama tibo po ola mabowe te homu idalio. Tiyu, agai wado po weyu, te aga God i olama, ena dolidalio, tama eno te Yawego ena dali dwagi yai sę emainao po me sigi pogobeo,” wali.
GEN 27:13 Tiali goli, aga idago te po wai, “Ogwao, tagalao, enade digi te dolobo sę pedalumainao. Tiali goli, nago da, te eno nagebolo wabo po gilama te sę yao, tama nage pelama, te meme si sela asa,” wali.
GEN 27:14 Tialima, Jekopgo te meme si sigi pelama, te aga idabolo magasali. Tama Rebekago te Jekop aga ayago godolo mu ebo nai te ulai.
GEN 27:15 Tama Rebekago te Isogo gudubo ugwa dabe te augwa bidibo bede munaluali. Tama agai te Isogo ugwa wiegi yai sawi ugwa mu selama, tama Jekop te ugwa gudulama, au ilai.
GEN 27:16 Tama agai te Jekop nogo dali, aga nage me, te meme tigiwaligo mesegelai.
GEN 27:17 Tama Rebekago te ulali pusu yai nai me, te agai ulali te bret meba me selama, te Jekopbolo mani.
GEN 27:18 Tialima, Jekopgo te nai dabe te aga ayabolo selasa pelama, te po wali, “Ayao!” Tama Aisakgo te po wali, “Awe, ogwao. Nage de dawe?”
GEN 27:19 Tama Jekopgo te po wai, “Ena Iso, te nago gomunai ogwa dao. Eno nago enabolo te po wali nai sisi elasa asalio. Nage megi da hodaluama, tama eno e selasa asali nai mi meba tugulao, tama nago te Yawego ena dali dwagi yai sę emainao po enabolo magameo,” wali.
GEN 27:20 Tiali goli, Aisakgo te tiwai po ma wai, “Ogwao, magi ilama, tama nago te hasa polo gegaliwe?” Tama Jekopgo e tiwai po wei ponani, “Yawe te nago Godigo ena tau selama, tama tibaso, eno te hasa polo gegai dao.”
GEN 27:21 Tialima, Aisakgo tama po Jekopbolo wai, “Te nage pąba edaba gana dwasianu asama, te eno nage diąna suaio,” wali, “nage te eno gomunai ogwa Iso yaliwe, ma meni yaliwe, te eno sueio,” wali.
GEN 27:22 Jekop te aga aya pąba pelama, tama ayago aga tigi diąnama, tama bugagia koneama, te po wai, “Nago po wabo te Jekopgo po wabo tiwai obao. Tiali goli, eno nago nogo diąyani, te nago nogo te Isogo nogo tigi tu nisi tiwai yalio,” wali.
GEN 27:23 Aisakgo te Jekop bugagia me konebeo, magi baso meni, te meme tigi nisigo te aga nogo halualigo te nogo Isogo nogo tiwai yai. Aisakgo te Yawego aga dali dwagi yai sę eyu, tau sabo po agabolo mawainu yali,
GEN 27:24 tiali goli hasia agai hanaluyu bolo ma yai, “Te mu tama, nage te eno ogwa Iso dawe?” Tama Jekopgo te po wali, “Awe.”
GEN 27:25 Tialima, Aisakgo te po wai, “Te ulali nai mi te enaba magasao. Te ena nai tulama da, te eno dwagi yai po nagebolo mawaibao.” Tialima, Jekopgo te nai me te wain wę me sela pelama, te Aisakbolo magi pelama, tama Aisakgo te nai me wę tuali.
GEN 27:26 Nosali Jekop aga ayago te po wai, “Ogwao, eno homugo te nage ena pąba asama, te eno gesabidiba nono nagasao,” wali.
GEN 27:27 Tama Jekop te pąba pelama, tama aga dali gesabidi sebedi usuyu, nono nani, tama Aisakgo Jekopgo gudali ugwa denami odama, tama agai te Yawego aga dali dwagi yai tau sabo sę emainogo eyu wabo po agabolo mani. Agai te po wali, “Te eno ogwago wiegi yai denami te Yawego dwagi yai tau sabo po mani, te gi me deli denami tiwai gilama ebao.
GEN 27:28 Te eno homugo te Godigo hulide te siginibo wę tagala palomainu elama, tama nago tigidali gide nai hauwa holomainu yaibao. Te agai nagebolo te wit hauwa me, wain wę me hauwa momainu yaibao.
GEN 27:29 Te tigidali bulude bidi dabe te augwali nagede sę ebo bidi pedelama, tama te bidi dabe nage dologode bidaibao. Te nago te naga ama dabe tonaluaibao. Tama nago idago hani wąį dabe augwali te nage dologode bidaibao. Te Godibolo nage dolomainu i wabo bidi dabe, te augwa digi deli deli augwa ma dolomainu yaibao. Tiali goli, te bidi dabego Godiba i olama, te agai nage dali dwagi yai tau sabo sę emainu i wabo bidi dabe, augwali deli deli dali me te agai dwagi yai sę yaibao, te eno homugo te tama elalumainao,” Aisakgo te po wai.
GEN 27:30 Aisakgo dwagi yai po te Jekopbolo menama, tama Jekopgo aga aya taga pali. Tama te sogo naga te aga ama Iso te busidu ma beba sabolali.
GEN 27:31 Agai me te wiegi yai pusu ebo nai ulasa, te aga aya bidibo digi sela palio. Tama agai te po wai, “Ayao, nage hodaluama, te eno selasa asali nai mi meba tugulao, tama nago te Yawego ena dali dwagi yai sę yabo po enabolo magameo.”
GEN 27:32 Aisak agai te po wai, “Nage de dawe?” Tama Isogo e tiwai po wei ponani, “Ena Iso, te nago gomunai ogwa dao.”
GEN 27:33 Aisak aga dwai midigi mu selama, didibili elama, tama agabolo hanalu wali, “Tiali goli, dego hasia te hasa elama, te mi selasa, enabolo magasali bidi de dawe? Nage sabolisiąbadi, te nai eno tualio. Tama eno te Yawego aga dali dwagi yai sę yabo po te bidibolo mena silai, tama te dwagi yai po agade sesemane sogo elalua pidu, mu elalua paibao,” wali.
GEN 27:34 Te sogo Isogo te tiwai po wabo odobaso, polo aga dwai homu mu eyu, aga dwai gela mu wali. Tama agai te po wai, “Ayao, te nago gasa dwagi yai po te enaba me mao,” wali.
GEN 27:35 Tiali goli, Aisakgo te po wai, “Naga amago ena tibo po ola menama, tama agai te nagebolo maiabo dwagi yai tau sabo po sai dao.”
GEN 27:36 Tialima, Isogo te po wai, “Te megi e da, te agai si sogo megi ena guni tǫba ilali. Tama tiyu, te nogi Jekop te nogi page te ‘polobo bidi’ tama dao, te agade dolo mu yali. Te idago hasia ena bolo ame nani, tiali goli Jekopgo te enade elaluali te gomunai ogwa wali, te nogi agai wi sai. Tama megi me te agai te enabolo maiabo dwagi yai po wi salio. Magi yaliwe, aya, te nago enabolo maiabo po te gasa me deli sisi yai elalubewe?”
GEN 27:37 Tama Aisakgo Isogo po wei ponani, “Eno aga te nage tonaluabo bidi ilama, tama eno te aga deli kaneme te tigidali agai sę bidi pedelaibao. Tama eno te nosali pedelabo tubo nai wit me wain te agabolo mani. Megi te mena nai gasa me elalubo weyu, te eno nage momainu te ogwa nago te po obawe?”
GEN 27:38 Tiali goli, Isogo bomonama, aga ayabolo hanaludubadi geani, “Aya, nago te dwagi yai po deli naga elaluai dawe? Aya, nage enabolo me te Yawego ena dali dwagi yai sę emainao po mao,” wali. Isogo te po olama, tama aga moni genuai gela ma wai.
GEN 27:39 Tialima, Aisakgo agabolo te po wai, “Te nago bulu dwai tǫ te wiegi yai ili yai tǫ digibulu elaluaibao. Tama hulide te siginibo wę te nago giba me tulalugobeo.
GEN 27:40 Tama nage te bugagia bidiyu, te nai tuabo pesage gegeyu, te nago bainat hwą gego hwįyu, tama yaibao. Tama nage te nago amago sę ebo bidi bidaibao. Tiali goli, nosali nago hagela homu eyu, tama agai po sela sąbaso, tama agai nage ma tola sogobeo,” wali.
GEN 27:41 Isogo homugo te ayago te dwagi yai sę pedelabo po te Jekop te bolo mani, te agai homude wado ebo homu dwai mu te Jekop dali yai. Tialima, Isogo e tama homu elama, te po wai, “Te pąde dwasianu sogo naga te aya isibaso, tama dago aga homu dene yaibao. Te homu dene yali sogo sia sabo si da, teda eno te Jekop ela muaibao.” Isogo te tama homu elalualio.
GEN 27:42 Rebekago te aga gomunai ogwa Isogo te homu ebo po odai. Tialima, agai te aga sabi bidi ogwa Jekop i olama, te po agabolo wali, “Nago e po bugagia odao. Te naga ama Isogo te nago agabolo yali te sęde te agai nageba wei ponoyu, ela muainu te homu ebao.
GEN 27:43 Tialima, megi da, ogwa, te nago eno po wabo gilama te sę yao. Nage sisi elama, tama wi pelama, te eno abe Laban dali te Haran teba osogo bidigi pao.
GEN 27:44 Nage te eno abe aga dali bidibadi, te nago amago homu sębę yali te homu kedau elama,
GEN 27:45 tama agai te nago yali sęde te boi bidi homu gegeda palomainu emainao. Tama nosali eno te bidi me deli te po nagebolo wagasomainu tagala palama, tama nage eba ma odasa asomainu yaibao. Da si go tama tinao. Magi baso meni, te eno wai dage si te deli sogo hagabo, te eno homugo hagela idalio,” Rebekago te po wai.
GEN 27:46 Nosali Rebekago e tiwai po Aisakbolo wai, “Eno te Hit hani we dabe te eno mu hagela idubao. Te Jekopgo me, te Hit hani we dabego me, te e bidibo we si tiwai kolesaga ebo we sobaso da, teda ena isimainu yaibao,” Rebekago te tiwai po Aisak dali wai.
GEN 28:1 Te Aisakgo Jekop i olama, tama te dwagi yai sę agabolo pedelabo po agabolo mawai. Tama Aisakgo agabolo e tiwai bomo yai po mani, “Nago te e bulu Kenan tǫ we me deli munu me selamuo.
GEN 28:2 Nage sisi elama, tama nage te Mesopotemia tǫ, te Betuel tego buluba pao, aga te nago idago aya da. Tama nago te naga idago abe Labango wegi me deli sao.
GEN 28:3 Te eno homugo te Tigidali Bomo Mu Elalubo Godigo nage dali wiegi yai sę elama, tama nago wai hauwa ame naibao. Tama tibaso, te nage bidi hani hauwago aya monu pedelaibao.
GEN 28:4 Tama eno homugo te Godigo nage dali dwagi yai sę eyu, te nago wąį te wai dabe me tiyu, te Abraham dali dwagi yai tau sabo sę yali tiwai gilama yaibao. Tama tiyu, tama nago megi naga te bidibo tǫ sobadi yaibao, magi basowe, Godigo e tǫ te naga wąį Abrahambolo maiabo po wai dao,” wali.
GEN 28:5 Aisakgo te tiwai po olama, tama agai te Jekop te Mesopotemia buluba te Laban bidibo digi tagala palai, te Betuelgo ogwa, te Aram bulu bidi me deli. Laban te Rebekago abe, te aga Jekop de Iso augwa si ida dao.
GEN 28:6 Isogo te Aisakgo Jekop dwagi yai tau sabo po menama, tagala palu, te Mesopotemia tǫ te pedai badu we me deli sigi pomainu tagala palali po odali. Aga me koneani, te Aisakgo Jekop dwagi yai tau sabo po mayu, agai Jekopbolo te po weyu, nago te Kenan bulu we me selamu da po wai.
GEN 28:7 Tama agai koneani, Jekopgo te aga aya idago po wabo odama, tama aga te Mesopotemia buluba pai.
GEN 28:8 Tama te sogo naga Isogo koneani, te aga Aisakgo te Kenan tǫ we sabo te agai hagela homu yai.
GEN 28:9 Tama tibaso, aga te Ismaelgo haniba pali, aga te Abrahamgo ogwa, tama agai gasa we me sali, aga nogi te Mahalat. Te we te Ismaelgo wegi, tama aga te bidi Nebaiotgo abe dao.
GEN 28:10 Jekop te Bersebade bidali taga peyu, tama aga hogodama, te Haran teba painu pali.
GEN 28:11 Tama digibulu pelama, tama tomode me sogo aga te bulu me deliba sabolama, tama aga tede bididuai, magi baso meni, te be pio eyu, giliga dega sigi pali. Tama tibaso, agai tede munaluali masigi me deli selama, te aga tobolu muabo dologo badu tobolo ni tiwai munama, tama aga godege piali.
GEN 28:12 Te aga piali sogo te aga na ebadi suali, te togobili me deli page te tǫde elalu, te aga tobolu te dagalude ugwaba ilama elaluai. Tama te Godigo mobo bidi ensel dabe te togobilidu ugwaba holoyu, aiyaba duluyu ebo, te agai suali.
GEN 28:13 Tama Jekopgo suali, te Yawe aga pąde dolalu tama po wai, “Ena Yawe, te nago wąį Abrahamgo God, me Aisakgo God dali dao. Te megi nage e pilamubo tǫ te eno nagebolo mayu, te nago ame nabo waigo wai dabebolo me mawaibao.
GEN 28:14 Te nago ogwa dabego ame nabo wai dabe augwali te tǫ hogomu tiwai hauwa umabo mu pedelaibao. Tama augwaligo te augwa tǫ sese pedai tigidali pedaiba usu elama, bidaluaibao. Tama tigidali tǫde bidalubo bidi dabe augwaligo enabolo te augwali dali dwagi yai sę yao po hanalu, te eno nage me, te nago ame nani waigo wai dabe augwali dali dwagi yai sę yali tiwai gilama dwagi yai sę yao po hanalu waibao.
GEN 28:15 Odiąo. Ena nage dali bidiyu, tama nage paboba te tigidali habu te eno tonalua bilaibao. Tama nage eno e tǫba ma odasa asaibao. Tama eno nage munu me tagalisiąbadi, te eno nagebolo po wabo sę tigidali usu nama, pedela silaibao,” Yawego te po wai.
GEN 28:16 Jekop te pila muani hodalu, tama po wai, “Eno Yawe te e bulude bidibo me konesiąwai. Tiali goli, mu tama aga bidibao.”
GEN 28:17 Aga wi elama te po wali, “Ena e bulude wi mu ebao! Te e da, Godigo be mu dao. Awe, te dagalugo sunumi dao,” te po wali.
GEN 28:18 Tialima, Jekop te kigamu digi mu hodaluali. Tama agai te tobolo ni tiwai te aga tobolu dologode munama piali masigi sawali selama, tama agai te masigi tǫde dualali, te aga homu hodolomainu ebo sę tiwai ilali. Tama agai te wel te masigi daide ugwadu gelali, te tǫ Godigo gasagi yai nai tedali da olama, te sa muani.
GEN 28:19 Agai te bulu nogi te Betel nogi poai. Polobadu te bidi dabego te bulu pąde elalubo hanu nogi Lus nogi yai.
GEN 28:20 Tama Jekopgo te tiwai po God dali dąų wali, “Te nage ena dali bidiyu, tama nago ena e bobobage sunumidu pobadi tonaluyu, tama nago ena te nai me, ugwa me menama,
GEN 28:21 tama ena te ena ayago buluba bugagia ma sabolubaso da, teda nage eno God mu bidaibao.
GEN 28:22 Te e masigi eno ugwaba dualali, te e da nago be elalubo bulu da olama, sa muani. Tama tigidali ena mani nai, te eno nogo si badu togolama, te eno me deli pedai te nagebolo mawaibao,” Jekopgo te po wai.
GEN 29:1 Tialima, Jekop te sunumidu palio. Aga pelama, pelama, tama nosali te giliga pedalubo badu bidali bidi hani dabe bidalubo pedai badu sabolai.
GEN 29:2 Aga doligi pelama, tonono bilibadi, tama te nosai elalubo moni tǫde agai te kibu sipsip hani sela te wę ulu me deli tubo madi pąde pila mubo hania suali. Te sipsip kibu hani augwaligo te ulu wę tubo da, tama te ulu wę dedage palibo genuai masigi elaluali.
GEN 29:3 Tama te tigidali kibu sipsip hani sisinagasa silai madi, tama te kibu tonalubo bidi dabego te ulu wę panialuali genuai masigi dagala sąnama, tama augwaligo te sipsip dabe wę mayu yai. Tama te kibu sipsip dabego wę tula silibo si, tama te kibu sipsip tonalubo bidi dabego te wę ulu palibo madi teba ma paliyu yai.
GEN 29:4 Te Jekopgo augwalibolo hanalu wali, “Abagi dede, dage mena badu bidi dabe dawe?” Tama augwaligo te po wai, “Da te Haran bulu bidi dabe dao,” wali.
GEN 29:5 Tialima, agai augwalibolo hanalu wali, “Dagego te Laban, te Nahor tego wąį ogwa koneaniwe?” Tama augwaligo te po wai, “Awe, dago aga koneanio.”
GEN 29:6 Tama Jekopgo augwalibolo hanalu wai, “Laban bugagia bidibowe?” Tama augwaligo te po wai, “Aga bugagia bidibao. Nago suao. Resel, te agai wegi, te Labango kibu sipsip hani dali megi te asobao,” wali.
GEN 29:7 Jekopgo te po wali, “Magi yaliwe? Te giliga genuai nanalubadi, tama te sipsip dabe te obo tomoba muabo me elalubadi dao. Tagala, te augwali wę menama, tama augwali te nosa dabe tumainu ma selasa pao,” wai.
GEN 29:8 Tama kibu tonalubo bidi dabego te po wai, “Menio. Dago tama me tegobeo. Te tigidali sipsip hani sisiniyu bolo elama, tama nosali dago te wę ulu dedage paliali masigi dagala munama, tama te sipsip dabe wę mabo dao.”
GEN 29:9 Jekopgo te kibu tonalubo bidi dabe dali po midubadi, tama Resel te aga ayago kibu sipsip hani kegasa asobo suali, magi baso meni, te agai augwali tonalubo sę yai.
GEN 29:10 Jekopgo te Resel te aga hai te Labango kibu sipsip hani dali subaso, tama aga te wę ulu elalubo madi pelama, tama te mesegalubo masigi sela munama, tama te sipsip dabe wę mawai.
GEN 29:11 Tama Jekopgo te Resel dali nono nenama, tama gela wai.
GEN 29:12 Tama agai agabolo wali, “Te ena da, te nago ayago deli hani bidi dao, te aga abe Rebeka te eno ida dao.” Tama Resel udulama, te aga ayabolo wagi palio.
GEN 29:13 Labango te aga abego wai asali po odama, tama aga udulama, aga bidibo madi pai. Labango Jekop aga pagea selama, tama aga nono nenama, tama aga beba odasa pali. Tialima, Jekopgo agade yali sę po tigidali pusali.
GEN 29:14 Tama Labango agabolo te po wai, “Awe, te mu tama, da si te deli kaneme mu dao.” Tama Jekop aga dali bidibadi, te polua deli bidai.
GEN 29:15 Te polua deli bidama, tama nosali Labango Jekopbolo te po wai, “Nage te eno abego ogwa mu dao, tama nago te sę olo ebo da, te eno homugo usu meni yaibao. Nago te nisu naga nai te sęde nago saibawe?”
GEN 29:16 Labango wegi si bidali, te gomunai wegi Lea, te tomo wegi Resel.
GEN 29:17 Te gomunai wegi Leago gesabidi te wiegi yai mu meni, tiali goli te tomo wegi Resel te gesabi sawi yai mu bidai.
GEN 29:18 Jekopgo te Resel godolo mu yali, tama tibaso, agai te po wai, “Eno te kibu be nogo a naga olama, me badu si te nagede sę yaibao, te nago gesi wegi Resel sainogo tama tiaibao,” wali.
GEN 29:19 Tialima, Labango te po wali, “Te mu tama, eno te gasa bidiba mabo te usu dao, tiali goli te eno aga nagebolo mobaso da, te dwagi yai mu dao. Nage te ena dali bidao,” wali.
GEN 29:20 Tama tibaso, Jekopgo te Resel sainu, te kibu be a naga me badu si, te tama sę iduai. Tama Jekopgo te kibu be a naga me badu si te agai homu kone palali te yadela pali, magi baso meni, agai te Resel godolo mu yai.
GEN 29:21 Tialima, megi da, Jekopgo Labanbolo te po wai, “Te bodolu silalio. Te nago wegi ena menama, tama eno aga saibao,” wai.
GEN 29:22 Tialima, Labango te genuai nai te wegi sabo sogode ulainu, tama agai te bulude bidalubo tigidali we bidi dabe i olama, tama augwali te nai tuagasali.
GEN 29:23 Tiali goli, te sogo hulide Labango te wegi Resel mawainu yali hasegelama, te Jekopbolo Lea menama, tama Jekopgo te konesiąbaso, te Lea aga dali piai.
GEN 29:24 Tama Labango te Leabolo sę ebo we me deli mawai dao, te aga nogi Silpa.
GEN 29:25 Tama kigamu, tegoba! Jekopgo Lea sulama koneyu, tama agai Labanbolo te po wai, “Magi baso nago te tiwai kolesaga enabolo yaliwe? Eno te Resel sainu nagede sę dene ebo sę yai. Magi baso nago ena ili po ola maniwe?” wali.
GEN 29:26 Tialima, Labango te po wai, “Dago kolesaga te tiwai ede elalubo dao. Te gomunai wegi bolo hasia bidigo selama, tama nosali tomo wegi te me bidigo somainu ebo dao.
GEN 29:27 Nago tonaluyu elama, te we sabo sogo nai tuali te Sarere siligi pabode, tama eno te Resel me te nagebolo mawaibao. Tiali goli, te nago enade te sę kibu be a naga, me badu nogo si te nago sę ma yagameo,” wali.
GEN 29:28 Jekopgo te pode usu da po olama, tama te we sabo sogo te nai ulali Sarere deli silibode, Labango Resel te Jekopbolo menama, tama Resel te aga we mu pedelama bidali.
GEN 29:29 Labango Reselbolo te sę ebo we me deli mani, te aga nogi Bilha dao.
GEN 29:30 Tialima, Jekop te Resel dali pagelama piali. Tama agai te Resel godolo mu eyu, tiali goli agai te Lea godolo te kuna me ebeo. Tama Jekop te kibu be a naga me si te Labande sę ma iduai.
GEN 29:31 Te Yawego suali, te Jekopgo Lea te godolo kuna me isąwai. Tama agai te Lea haliga emainu tau sai. Tiali goli, Reselgo wai meni yai.
GEN 29:32 Nosali Lea haliga elama, tama ogwa me deli ame nani. Tama Leago te po wali, “Yawego te eno homu sęgę ebo sulama, tama megi da te eno bidigo ena godolo emainogo yaibao,” wali. Tialima, agai te wai nogi Ruben poai.
GEN 29:33 Nosali te Lea haliga ma elama, tama gasa ogwa me ame nani. Tama agai te po wai, “Yawego te gasa ogwa te wai enabolo mani, magi baso meni, agai odali, Jekopgo ena kuna godolo me isąwai.” Tialima, agai te ogwa nogi Simeon poali.
GEN 29:34 Tama Lea te haliga ma elama, tama ogwa gasa me ame nani. Tama agai te po wai, “Megi da, te eno bidigo ena godolo mu elama, tama ena dali dąų olama, bugagia bidaibao, magi baso meni, te eno agai wai te ogwa sela ame nani.” Te po wai. Tama agai te wai nogi Livai poai.
GEN 29:35 Tama Lea te tabi ma elama, tama gasa wai te ogwa ame nani. Tama agai te po wai, “Te sogo eno te Yawe nogi ugwaba saibao,” wali. Tama Leago te ogwa nogi Juda poali. Tama nosali te Leago wai ma ame nabeo.
GEN 30:1 Te Reselgo wai me ame nisąbadi te sogo, agai te aga ama Lea dali haliga sębę elama, tama Jekopbolo te po wai, “Nago enabolo wai mao. Te menisiąyu da, teda ena isaibao,” wali.
GEN 30:2 Jekopgo wado po Resel dali weyu, te po wai, “Eno te Godigo yali sę hasegelibo usu me iligobeo. Aga digi te nago tabi paliama, tama nago te wai me ame nabe dao,” wali.
GEN 30:3 Tialima, Reselgo te po wai, “Nago te eno sę ebo we Bilha sao. Nago aga dali pilama, tama agai eno wai ame nomainu yaibao. Tama ena te wai dabego ida pedalaibao,” wali.
GEN 30:4 Tialima, Reselgo te aga sę ebo we Bilha te Jekopbolo tagala palama, tama Jekop aga dali piali.
GEN 30:5 Tama Bilha tabi elama, tama Jekopgo ogwa me deli ame nani.
GEN 30:6 Tama Reselgo te po wai, “Godigo ena dagala sulama, tama agai eno gedu haluasa po wabo odama, tama agai ogwa wai me deli enabolo manio,” wali. Tialima, Reselgo te wai nogi Dan poai.
GEN 30:7 Tama Bilha te Reselgo sę ebo we te aga tabi ma elama, tama Jekopgo ogwa tomo bidi ame nani.
GEN 30:8 Tama Reselgo te po wai, “Eno te ena ama dali bomonama mu hwįanigo tama megi eno nogi ugwa sali.” Tama agai te wai nogi Naptali poai.
GEN 30:9 Leago suali, agai te wai ma ame nabo homu isąbaso, tama agai aga sę ebo we Silpa te Jekopbolo mawai. Tama Silpa te Jekopgo we tiwai pedelai.
GEN 30:10 Nosali Silpago te Jekopgo ogwa me deli ame nai.
GEN 30:11 Tama Leago te po wai, “Ena nogi ugwaba mu igulalio.” Tama tibaso, agai te wai nogi te Gat poali.
GEN 30:12 Tama nosali Silpa, te Leago sę ebo wego, te Jekopgo tomo ogwa ame nani.
GEN 30:13 Tama Leago te po wai, “Megi ena wiegi yai homu pemene mu yali, tama tigidali we dabe sibigo enabolo te po weyu, te eno homu pemene wiegi yai mu ebo da po wai dao,” wali. Tama agai te ogwa nogi Aser poai.
GEN 30:14 Tialima, te tubo nai wit togobo sogo pedalubode, tama te ogwa Ruben te wit togobo madiba pelama, tama agai te wego wai sainu tau sabo nai te dwasianu nide sai. Tama agai te aga ida Leabolo sela asali. Tama Reselgo te naide koneama, tama Leabolo te po wali, “Nago te wai sainu tau sabo nai meba te enabolo mao,” wali.
GEN 30:15 Tiali goli, Leago po wei ponoyu, te po wai, “Nago eno bidi sai dao, tama nago te olo nai da te homu ebawe? Tama megi nago te eno ogwago sali nai nago godoloyu sainogo obawe?” wali. Tama Reselgo te po wai, “Te nago ogwago gegali nai te ena mobaso da, teda nage Jekop dali megi hulide piagameo,” Reselgo te po wai.
GEN 30:16 Te pio Jekop te giba pali beba ma asobadi, tama Lea te sunumidu aga tiąba pelama, tama te po wai, “Nage megi hulide ena dali piagameo, magi baso meni, te eno ogwago gegali naigo nage abelalio.” Tialima, te sogo hulide Jekop aga dali piali.
GEN 30:17 Tama Godigo te Leago gedu haluasa po wabo odama, tama Lea tabi yai. Tama agai wai te a naga wabo ame nani.
GEN 30:18 Tama Leago te po wali, “Eno sę ebo we te ena bidibolo menama, tama Godigo dwagi yai sęgo ena abelali.” Tama agai te wai nogi Isakar poai.
GEN 30:19 Nosali Lea aga tabi ma elama, tama agai wai te nogo a naga olama, me badu deli wabo wai ame nai.
GEN 30:20 Tama agai te po wai, “Godigo te dwagi yai sę me deli enabolo yai. Megi da, te ena bidigo te ena godolo mu yaibao, magi baso meni, eno agai wai te nogo a naga, me badu deli, te tama wai eno ame nani,” wali. Tama agai te wai nogi Sebulun poali.
GEN 30:21 Tama nosali Leago wegi me deli digi ame nani, tama agai te aga nogi Daina poai.
GEN 30:22 Tama Godigo Resel homu kone ma palalio. Tama agai Reselgo gedu haluasa po wabo odama, tama aga te wai ame nomainu ilalio.
GEN 30:23 Tama Resel aga tabi elama, tama ogwa me deli ame nai. Tama agai te po wai, “Godigo eno hale elaluali te dagala sąwai.
GEN 30:24 Eno homugo te Yawego te gasa wai enabolo momainu homu ebao,” olama, tama agai aga nogi Josep poai.
GEN 30:25 Reselgo te Josep ame nai digi, tama Jekopgo Labanbolo te po walali, “Eno te we dabe dali, te wai dabe dali abelibo sę dene ela silalio. Tialima, megi ena tagala palama, tama ena te ena buluba ma paio,” wali. “Nago koneani, eno nagede bugagia mu sę yalio,” wali.
GEN 30:27 Labango Jekopbolo te po wali, “Odao! Eno nage dali po elalubao. Eno te enade pedelali sęde konea selama, tama megi da, eno konebao, te Yawego wiegi yai sę enabolo yali, magi baso meni, te nage ena dali bidibo dao.
GEN 30:28 Nago te nisu naga nai sabo homu ebaso, te nago dolo enabolo wao. Tama eno te nai nagebolo mawaibao,” wali.
GEN 30:29 Tama Jekopgo agabolo te po wali, “Naga digi nago te eno yali sę nago koneani. Tama nago koneani, eno nago kibu sipsip hani te bugagia tonaluai.
GEN 30:30 Polobadu te nago sipsip hauwa meni yai, te dwasianu hani elaluali. Tama megi te ena nage dali bidiyu, tama nago sipsip kibu dabe geninama, hauwa pedelali, magi baso meni, te nago ena haniani sęba muani goli, te Yawego wiegi yai sę nagebolo yali. Tiali goli, te eno ena hani bage tau sabo sę nisu egowe?”
GEN 30:31 Labango hanalu wali, “Te eno nage magi naigo abelagawe?” Tama Jekopgo te po wali, “Eno te mone po olama, i me wabeo. Te nago eno po wabo godolo ebaso da, teda nago sipsip hani dabe te eno ma tonaluaibao.
GEN 30:32 Megi da, te eno nago sipsip me meme dabe bugagia osola sueibao. Tama eno te tigidali husugu yai sipsip wai, me te tigidali meme dali, tigidali sipsip te husugu yai elalubo, me te dodobolo pai bage, teda eno sa muaibao. Te dabe da te eno saibao, te eno sę ebode sabo nai dao.
GEN 30:33 Tama eyu bidaluama, nosali nago osola sulama, te eno doloba pai kolesaga yali, ma nago suagameo. Te nago eno ena maiabo nai dodolobo sogo, tama te meme me deli, ma te sipsip me deli te dodobolo pai ma husugu yai elalusiąbaso da, teda nago koneyu, te eno wi sali da po wagameo,” wali.
GEN 30:34 Tama Labango te po wali, “Te wiegi yai dao! Dago te nago wabo po gilama tiwai yaibao,” wali.
GEN 30:35 Tiali goli, te sogo digi Labango digi te tigidali meme omai me, te tigidali meme so me, te dodobolo pai naga salio. Tama agai te husugu yai sipsip wai tigidali sali. Tialima, aga ogwa dabego te sipsip me meme dabe tonalumainu tedali muani.
GEN 30:36 Tama polo Labango Jekop taga soyu, tama aga dodobolo pai sipsip me meme dabe dali sela sogo tomoba pigi solama, tama augwali gasa pedai me badu bidai. Tama Jekopgo te Labango gasa hani dodobolo pisąwai sipsip me meme hani naga tonaluai.
GEN 30:37 Tama nosali Jekopgo te gesi ni nologo haniani selama, tama agai augwali husugu yai tigi wali me badu dagalama, tama te me badu tedela yai ilali.
GEN 30:38 Agai te tiwai dodobolo pai ni nologo tigidali te sipsip hani dabe augwali gesabidide te wę tubo pesagede dodolali. Agai koneani, te sipsip dabe me meme dabe augwali te wę tuagasobo sogo, te sipsip omai me te meme omai augwaligo te kibu so dabe penani yaibao, te homu yali.
GEN 30:39 Tama te meme omai dabego te ni nologo dabe sulama, tama penani emainu yali, tama nosali te so kibu dabego te ame nabo wai te dodobolo pai dabe ame nomainu yalio.
GEN 30:40 Tama Jekopgo te dodobolo pai sipsip wai hani tigidali te gasaba tedali muani. Tama agai te Labango tedela yai sipsip omai dabe te so dabe me selama, tama augwaligo Jekopgo dodobolo pai sipsip tonalubadi augwaligo penani yali. Agai te tiwai tama tilama, te aga digi sipsip me meme dabe pedalumainu ilali, tama agai te Labango sipsip me meme dabe dali deliba me sisinibeo.
GEN 30:41 Tama te wiegi yai bomai sipsip me meme dabe penani ebaso da, teda Jekopgo te ni nologo dabe te wę tubo madi te augwali gesabidide muani, tama augwaligo te ni nologo dabe sulama, tama penani yai.
GEN 30:42 Tiali goli, agai te bomo meni yai sipsip me meme dabe augwali gesabidide te ni nologo dabe me mubeo. Tama tibaso, te sipsip me meme dabe te bomo meni yai dabe augwali te Labango da, tama te wiegi yai, te boma pai, te dabe te Jekopgo sali.
GEN 30:43 Tama tibaso, Jekopgo doado bage geninama, umabo mu elaluali. Agai te sipsip me meme hani genuai mu elaluali, tama sę ebo bidi me sę ebo we hauwa bidai, tama te kibu kamel dabe me donki dabe hauwa bidaluali.
GEN 31:1 Jekopgo te Labango ogomanigo te po wabo odali, “Jekopgo te dago ayago doado bage dabe tigidali salio,” te po wali. “Tama megi da, agai doado bage hauwa elalubao, tiali goli te wiegi yai nai dabe agai te dago ayade naga sai dao,” te po wai.
GEN 31:2 Tama Jekopgo suali, Labango kolesaga hasegelama, tama Labango aga te polobadu godolo yai gilama tiwai me ebeo.
GEN 31:3 Tama nosali Yawego Jekopbolo te po wai, “Nage te naga ayago buluba, me te naga haniba ma pao,” wali. “Tama ena nage dali bidaibao,” wai.
GEN 31:4 Tama tibaso, Jekopgo po te Resel dali Lea sibolo po ola tolama, te augwali si aselama, aga te sipsip hani dabe dali bidalubo pesageba suagasao po wali.
GEN 31:5 Te augwali si sabalubode, tama Jekopgo augwali sibolo te po wai, “Eno suali, te dage sigo ayago te enade polobadu yali kolesaga tiwai isiąyu, tama agai kolesaga hasegelali. Tiali goli, eno ayago God te ena dali bidibao.
GEN 31:6 Dage sigo koneani, eno te dage sigo aya dali sę bomo yali,
GEN 31:7 tiali goli agai ena tibo po ola menama, tama eno sęde sabo nai te nogo si sogo hasegelali. Tiali goli, Godigo agai ena dolomainu me gogolobeo.
GEN 31:8 Tama tiyu, e tiwai pedelali. Labango te po wali, ‘Te meme dabe te dodobolo pali naga te nago,’ obaso, teda te meme hani dabego te dodobolo pabo te tobage yai naga te wai dabe ame nani. Ma, agai te po wali, “Te husugu yai sipsip me meme te nago da,” po obaso, teda augwaligo te tobage wai dabe ame nai dao.
GEN 31:9 Tama tiyu, tama Godigo te dage sigo ayago meme ma sipsip hani selama, te enabolo mawai dao,” wali.
GEN 31:10 “Tama te meme omai dabego penani ebo sogo, eno te tiwai na yai, eno te meme omai kibu augwaligo tigide dodobolo pali haniani elalubo suali, te augwaligo naga te meme so kibu dabe penani ebo dao.
GEN 31:11 Tama eno nade Godigo ensel mobo bidigo ena i olama, tama enabolo te po wali, ‘Jekop.’ Tama eno te po wai, ‘Ena e bidibao.’
GEN 31:12 Tama agai po ma wali, ‘Suao. Te omai kibu meme te tigide haniani dodobolo pali, augwaligo naga te meme kibu so dabe penani ebao. Ena digi eno te tiwai ilibao, magi baso meni, eno suali, te Labango nagebolo ebo sę tigidali eno sualio.
GEN 31:13 Te God nageba te Betel buluba pedelali, te ena tama dao. Te Betel bulude nago te homu hodolubo masigi me deli dodolali, tama te wel ugwadu daiba gelali. Tama nago bomo yai dąų wali po me deli ena dali dąų walai. Tialima, megi da, te nago doado bage sisi ilao, tama nago te bulu taga peyu, tama naga page buluba ma pagameo,’ agai enabolo te po wali,” Jekopgo aga we sibolo te po wai.
GEN 31:14 Resel de Lea sigo te po wali, “Te gasa nai me deli te da si go ayade nosali sabo, te menio.
GEN 31:15 Tama ayago da si te digibulu we si pedalumainu ilali. Agai da side nai polo sai dao. Tiali goli, agai te nai tigidali dobola silai dao.
GEN 31:16 Tigidali nai Godigo da sigo ayade selama, tama nagebolo mani, te nai te da sigo, me te da sigo wai pulubago nai dabe mu dao. Tama tibaso, nago te Godigo nagebolo wali po gilama tama tiao,” te we sigo te po wai.
GEN 31:17 Tialima, Jekop hogodama, tama aga we wai te kamelba duamainu elama, tama agai te sipsip hani me meme hani polasa, te aga dali te gasa nai sibi te Mesopotemiade sali nai sibi dali, te tigidali polasa tagala palai. Augwali te aga aya Aisak bidibo madi te Kenan tǫba ma painu, te bulu taga soai.
GEN 31:19 Te augwali pisiąbadi, tama Laban te sipsip dabe nisi togogi peyu, digibulu gana pai digi, tama Reselgo te aga ayago be tonalubo tibo god te bede wi salio.
GEN 31:20 Jekopgo te Aram bidi Labanbolo te aga pobao po me wabeo, te aga geme soai. Tama tiyu, agai te aga ili po ola maduali tiwai yali.
GEN 31:21 Tama eyu, te aga doado bage tigidali selama, tama aga wi soali. Agai te Labango bulu tagalama, tama te wę Yufretis nogolama, tama aga te Gileat bulu du dabe elalubo tǫba painu soali.
GEN 31:22 Si sogo bidai digi, tama te bidi dabego te Jekop wi pali po Labanbolo wali.
GEN 31:23 Tialima, Labango te aga bidi dabe meba selama, tama augwaligo te Jekop pali wali pidubadi, te a naga olama, nogo si, tama sogo wabode sabolali. Tama augwaligo Jekop te Gileat bulu du pedai te badu bidibo suai.
GEN 31:24 Tama hulide, Aram bidi Labango na yali, tama God agaba pedelama, te po wali, “Nago te Jekop dali magi po me deli, ma aga wi ilibo sę me elamu dao,” te po wai.
GEN 31:25 Jekopgo te aga osogo bidabo pesage te dwasianu bulu dude nigai, tama Labango aga gegelama suali. Labango me aga bidabo pesage te Gileat bulu du elalubo madide nigai, te Jekop bidibo pesage pąde nigali.
GEN 31:26 Tialima, Labango Jekopbolo te po wai, “Magi baso nago ena ili po ola menama, tama nago eno wegi si te boide sali we si tiwai sela soaliwe?
GEN 31:27 Magi baso nago ena tibo po ola menama, tama nage geme naga wi soyu, tama nago enabolo pobao po wabewe? Te hasia nago enabolo wagi sogo da, teda eno nage te wiegi yai homu pemene dali tagala palu, te habidi me gita tęąbi wagi dao.” Labango te po wai.
GEN 31:28 “Tiali goli, nago ena bolo te eno wegi sibolo, me te eno wąį, eno wegigo wai dabebolo te dage tao po omainogo me ebeo. Nago kolesaga te dwai mu yalio.” Te po wai.
GEN 31:29 “Eno te nage dolabo bomo elaluali, tiali goli hulide nago ayago Godigo enabolo te po wali, ‘Nago te Jekop wi ilibo sę deli me elamuo,’ po wali.
GEN 31:30 Eno koneani, nage te naga page buluba ma pabo homu godolo mu ebaso, tama nago ena taga pali. Tiali goli, magi baso nago eno be tonalubo god dabe wi selasa soaliwe?” wali.
GEN 31:31 Tama Jekopgo te po wei ponani, “Eno wi yali. Te nago bomonama, naga wegi si ma oda sidali weyu, te ena geme pai.
GEN 31:32 Tiali goli, te da tomode me deligo te nago god wi sela soai yaibaso da, teda nago aga ela muagameo. Te da e bidalubo bidi dabe gedude te nage aselama, tama dago tigidali sulama, tama dago doado bage osola suao, tama nago naga nai me deli subaso da, teda nago sao,” wali. Tiali goli, Jekopgo konebe, te Reselgo aga ayago god dabe wi sela soali.
GEN 31:33 Tialima, Laban te Jekopgo ugwa be tomoba pelama, tama agai doado bage dabe susa bilali. Tama nosali aga te Leago ugwa be tomoba pelama, te me susa bilali. Tama aga te sę ebo we sigo ugwa be tomoba me pelama, susa bilali, tiali goli agai god dabe te agai me subeo. Tama aga te Reselgo ugwa be tomoba pali.
GEN 31:34 Reselgo te aga ayago god dabe wi selama, tama agai te kamel dabe beg tomoba geme dualama, tama aga te beg daide ugwa dualaluali. Labango te ugwa be tomode te tigidali doado bage susa bilali, tiali goli agai te god dabe me subeo.
GEN 31:35 Tama Reselgo aga ayabolo te po wali, “Aya, nago ena dali wado po me olamuo. Te da we dabe sibigo gasi te ena sobaso, tama ena hodalugobeo.” Labango te tigidali doado bage susa bilali, tiali goli agai god dabe te agai me subeo.
GEN 31:36 Tialima, Jekop te sębę elama, tama Laban dali te tiwai wado po wai, “Eno mena dwai sę, me eno mena bomo yai po bolai baso, tama nago bomonama, tama ena te tiwai megi pobeasa asaliwe?
GEN 31:37 Nago eno doado bage tigidali susa bilama, tama nago bede elaluali naide te mena nai sualiwe? Waa? Te nago suaibaso da, teda nago hanilama, te nago hani me, eno hani me, te augwali gedude hania muao, tama da si tomode te augwa hasi po mia somainao. Tama dago te dego po te dolo mu yabowe nago sueibao.
GEN 31:38 Ena nage dali bidibadi, te kibu be bidi sese deli yai dao. Tama sesemane sogo te nago sipsip me meme hani tigidali te augwaligo wai ame nabo te me hagawai meni. Tama eno nago sipsip omai me ela tubeo.
GEN 31:39 Tama te uni hasago nago sipsip me deli ela mubo sogo, eno nagebolo sela asiyu, tama nagebolo me waselagasobeo. Menio. Ena digi eno te haga yali nai wei ponani. Nago sesemane sogo enabolo po bomonama weyu, te be bubugade me hulide te gasa bidi dabego wi sali sipsip meme tigidali wei ponao po oduai dao, tama te tigidali ena digi eno wei ponani.
GEN 31:40 Ena e tama bididuali, hauwa sogo te giliga posologo ena mu dolali. Tama hauwa sogo hulide me te kedaugo ena dolali, tama ena bugagia godege me pibeo.
GEN 31:41 Ena nage dali bidiyu sę ebadi, te kibu be bidi sese deli bidali. Ena te kibu be 14 te nago wegi si sainu sę yali, tama te kibu be a naga me deli te nago sipsip hani meba sainu te sę yai. Tiali goli, nago eno sabo mone sę te nago nogo si sogo te hasegelai.
GEN 31:42 Tama eno ayago aya Abrahamgo God, te Bidi Wi Ilibo Godibolo te Aisakgo lotu po wabo God, te ena dali me bidigi menigi sogo da, teda nago ena olo ma tagala paligi dao. Tiali goli, Godigo eno homu sęgę ebo, me te eno ebo sę dabe suali, tama tiyu, hulide te aga digi te po bomonama, nage dali te po wali,” Jekopgo te po Labanbolo wai.
GEN 31:43 Tialima, Labango te po wei ponani, “Te wegi si badi, te augwali sigo wai dabe me, te eno naga dao, tama te sipsip me meme hani dabe te eno da. Te tigidali nai nago suali, te eno nai dabe dao. Tiali goli, eno magi sę te wegi si dali, me te wai dabe dali egowe?
GEN 31:44 Tialima, da si te bomai po dąų waibao. Tama dago te masigi dabe pesage holama, tama te pesage ede elalubaso, da sigo te dąų wali po homude konealuaibao,” wali.
GEN 31:45 Tialima, Jekopgo te bobage masigi me deli selama, tama te dąį tiwai ilama, tama dodolai,
GEN 31:46 tama agai aga hani dabebolo walama, tama augwaligo te masigi dabe meba pesage holao po wai. Augwaligo te sę ela silama, tama augwali te masigi pesage holali pąde te nai be pio tuali.
GEN 31:47 Te Aram pode Labango te bulu nogi te Jegar Sahaduta poali, tama te Hibru pode Jekopgo te bulu nogi Galet poali.
GEN 31:48 Labango te po wali, “Te e masigi pesage holali te da sigo te bomai po dąų wali, te homugo gegeda palidali weyu, te dąį tiwai muani.” Tama tibaso, augwaligo te bulu nogi te Galet poai.
GEN 31:49 Tama Labango te po ma wai, “Megi da, te da si tomode te dwai kolesaga idali homu eyu, te da si talua si ma bidigobeo. Nage me badu tedali bidiyu, te ena gasa badu tedali bidaibao. Tama eno homugo Yawego da si tonaluaibao,” wali. Tama tibaso, te bulu nogi augwaligo Mispa poai.
GEN 31:50 Tama Labango po ma wadolama, wali, “Te nago eno wegi si dali dwai sę eyu, tama te nago gasa we me sobaso, tama eno konesiąbaso da, teda eno homugo nago te Godigo da si tonaluba te homu yao,” wali.
GEN 31:51 Nosali Labango te Jekopbolo te po wai, “Nago te da si tomode te masigi pesage holali sulama, tama eno te bobage masigi muani, te po dąų wali te homugo konealumainu ebao.
GEN 31:52 Te masigi pesage holali, me te homugo konealumainu muani bobage masigi, te augwali side da sigo homu konealumainu tama tiwai, eno te bolama, nage dali hwįagasogobeo, tama nago me te bolama, ena dali me hwįgobeo.
GEN 31:53 Eno homugo te Abrahamgo God me Nahorgo God, agai te da sigo ebo kolesaga dagalaibao,” Labango te po wai. Tialima, Jekopgo te Godigo nogide bomai po dąų wali, te aga aya Aisakgo lotu wabo Bidi Wi Ilibo God dao.
GEN 31:54 Agai te kibu sipsip me deli elama, te bulu dude Godibolo ofa mani. Tama agai aga hani dabe aselama, te nai be piode tuagasomainu i wai. Augwaligo te nai tula silama, tama hulide augwali te bulu dude piai.
GEN 31:55 Te kigamu digi mu, Labango te aga wegi sibolo, me te aga wegi sigo wai puluba dabe, augwalibolo te dage dali dwagi yai sę naga pedalumainao po weyu, tama dage tao po olama, tama agai augwali taga peyu, tama aga buluba ma geasa palio. Jekopgo Iso suainu sisi yai
GEN 32:1 Te Laban aga buluba ma geasa pelama, tama Jekop aga page buluba painu eyu, ma pali. Tama aga pidubadi, tama Godigo ensel mobo bidi dabe te sunumide aga pageba pedelai.
GEN 32:2 Agai augwali sulama, tama agai te po wai, “Te augwali Godigo ami bidi hani dao.” Tialima, agai te bulu nogi Mahanaim poai.
GEN 32:3 Tama Jekopgo bidi meba te polasa te Seir tǫ te Idom hanu tǫ pedaiba te aga ama Iso bidibo digi te po sela pomainogo tagala palai.
GEN 32:4 Tama agai augwalibolo te po sela pomainu ola mani, “Ena Jekop dao, ena te nago sę bidi dao. Eno ama Iso, nage da eno genuai bidi dao, te ena Laban dali osogo bidigi pai goli, tama ena bobage sogo tede bidama, tama megi ena ma asainogo ebao.
GEN 32:5 Eno hani sibi te hauwa elalubo, te kibu bulmakau, me donki, me sipsip, me meme, me sę bidi dabe, me sę ebo we dabe, te elalubao. Tama eno te po nageba ola tolobao, eno genuai bidi, tama eno homugo nago wiegi yai homu ena dali emainogo ebao, tama nago ena ma asomainu usu da po omainogo obao,” agai te po ola tolali.
GEN 32:6 Nosali te po sela pali bidi dabe augwali ma begasa asiyu, Jekopbolo te po wagasali, “Da te nago ama Iso bidibo digi sabolalio, tama agai nage te sunumi tiąba asainu sisi iduali. Aga dali asabo bidi dabe te hauwa, 400 bidi elaluali,” wali.
GEN 32:7 Jekopgo te po odama, tama aga wi genuai mu elama, tama aga homu sęgę elama, tama homu hauwa yali. Tialima, agai te aga we bidi hani bugulali, te sipsip hani dabe, me te meme, me bulmakau, me kamel dali, tama hani si pedelali.
GEN 32:8 Agai te tiwai homu yali, ‘Te Iso asiyu, tama te polali hani dali wąbi hwįnama, tama augwali dolobaso da, teda te nosali yali hani te sana pelama, wi paibao,’ te homu yai.
GEN 32:9 Tama Jekopgo gedu haluasa po wali, “Te eno wąį Abrahamgo God, te nage eno aya Aisakgo God, nago eno po odao! O Yawe, nago enabolo te tiwai po wai, ‘Nage te naga tǫba ma peyu, tama naga deli kaneme bidibo digi pao,’ wali, ‘tama eno nage bugagia tonaluaibao, wai dao.
GEN 32:10 Ena nago sę bidi da. Ena wiegi yai bidi meni goli, tiali goli nago wiegi yai kolesagago ena olo tau sali, tama nago ena dali homugo kęą pai kolesaga eyu, tama enade wiegi yai sę mu yai. Te polobadu ena te wę Jordan nogeali sogo, te eno nogode magi nai me elalubeo. Eno peyu tolasa pabo dono naga elaluali. Tiali goli, megi ena te e hani si dali ma asobao.
GEN 32:11 Eno nageba gedu haluasa po obao, nago ena tau selama, te eno ama Isogo bomo aiyaba tamunao. Magi baso meni, ena wi ebo, tiyu agai da dali wąbi hwįagasiyu, tama da tigidali silama, te we wai dabe dali silaibao.
GEN 32:12 Ena tau mao. Nago naga dąų wali bomai po te ma homugo koneao. Polobadu nago te po wali, ‘Te eno nage bugagia tonaluaibao,’ wai. ‘Tama eno te nago wąį te wai dabe hauwa menama, tama te bidi dabego augwali nedebo usu me egobeo. Te augwali te węde te masigi sane tiwai pedelaibao,’ nago te po wali,” Jekopgo te po wai.
GEN 32:13 Jekop te hulide bididu, tama aga ama Iso homu nagame iliyu maiabo nai te kibu dabe meba dodola muai.
GEN 32:14 Agai e tama tiwai sa muani, 200 meme so kibu, te omai kibu bidi sese deli te 20, te 200 sipsip so, me te omai kibu bidi sese deli 20,
GEN 32:15 te 30 kamel so augwa wai elalubadi, te 40 bulmakau so, te omai bulmakau nogo si, te donki 20 so kibu, te omai kibu donki nogo si dao.
GEN 32:16 Agai te kibu dabe tonalubo sę bidi dabe deli deli nidigili pali, tama augwalibolo agai te po wali, “Dage polasa peyu, ena nosali ilao. Tama me kibu hani te gasa kibu hani pabo digibulu bidaluao,” wali.
GEN 32:17 Tama Jekopgo te polalubo sę bidibolo te po wali, “Te eno ama Isogo te nage sunumide sulama, tama nagebolo hanalu, ‘Nage dego sę bidi dawe? Tama nage mena sobawe? Tama e te kibu hani dabe dego dawe?’ te po hanalu waibao.
GEN 32:18 Teda nago e tiwai po wei ponao, ‘Te e kibu hani dabe te nago sę bidi Jekopgo dao,’ te po wao. ‘Genuai bidi, te Jekopgo te olo maiabo dwagi yai nai te nageba tagala palai. Tama Jekop digi aga te nosali asobao,’ nago te po Isobolo wao,” Jekopgo te po wai.
GEN 32:19 Tama Jekopgo te po naga te tomo me sę bidibolo wali, tama te sela wali sę bidibolo me, tama te kibu dabe tonalubo tigidali sę bidi dabebolo te po naga wai. Agai te po wali, “Te dagego aga subo sogo, te po naga agabolo wao.
GEN 32:20 Tama dagego te tiwai po ma naga weyu yao, ‘Awe, nago sę bidi Jekop te da tudibadu nosali asobao,’ po waiyąo.” Jekopgo te tiwai homu yai, ‘Eno te ena ama homu nagame ilibo nai te polasa tagala palaibao,’ te homu yali, ‘tama eno aga gesabi subo side, teda agai eno aga dali polobadu yali sę te agai homu gegeda palaibao,’ te homu yali.
GEN 32:21 Agai te maiabo nai dabe polasa tagala palama, tama aga bidali pesagede te sogo hulide bidai.
GEN 32:22 Tama te sogo hulide Jekop hogodama, tama aga we si selama, tama augwali sigo sę ebo we si me sobadi, te aga wai dabe nogo si olama, sągągo deli selama, tama agai te wę Jabok nogelama pali.
GEN 32:23 Agai augwali tagala palama, tama agai aga doado bage me tigidali sela pela silai.
GEN 32:24 Tama agaduba deli naga bididuai. Tialima, hulide bidi me deli pedelama, tama aga dali nogogo pelegebo hwįdubadi, be posobo siba usu nani.
GEN 32:25 Augwali si tama tiwai hwįdubadi, tama te bidigo koneani, agai aga aiyaba elalugobeo, te homu yai. Tama agai Jekop te sili dili dali, te tudi dili dali si ununani si tede elali. Tama te sili dili ununani te guda pali. Te augwali si usu siyu hwįdubadi,
GEN 32:26 tama te bidigo Jekopbolo te po wai, “Nago ena tagala palama, ena paio,” wai. “Te pąde be posainogo ebao,” wali. Tiali goli, Jekopgo agabolo te po wai, “Eno nage me tagala palogobeo. Nago te dwagi yai tau sabo po enabolo mayu bolo yao.”
GEN 32:27 Tama te bidigo Jekopbolo hanalu wali, “Nago nogi de dawe?” Tama Jekop po wei ponani, “Ena nogi te Jekop dao.”
GEN 32:28 Tialima, te bidigo te po wai, “Megi da, nago nogi te Jekop ma wagobeo. Nago te God dali hwįani, tama bidi dali me hwįai, tama nago nogi ugwaba sali. Tialima, nago gesi nogi te Israel dao.”
GEN 32:29 Tama Jekopgo te po wai, “Ae, nago nogi po enabolo wao,” te po wai. Tiali goli, agai te po wei ponani, “Magi baso nago enabolo eno nogi po hanalubawe?” Tama agai Jekopbolo te aga dali dwagi yai sę pedelabo po mawai.
GEN 32:30 Tama nosali aga noma sobaso, Jekopgo te po wai, “Eno God sualio, tiali goli ena me isibeo.” Tama tibaso, agai te bulu nogi Peniel poai.
GEN 32:31 Te giliga pedelama, tama Jekopgo te Peniel bulu taga soai. Tiali goli, aga dolo bugagia me soabeo, aga te haiagalu ela soali, magi baso meni, te sili si wadolali te guda palio.
GEN 32:32 Tama te sogo dąį elama, megi tama bidada asobo sogo, te Israel dabe augwaligo te kibu sipsip, meme, bulmakau, te bage sili dilide daganalubo mi te me tubeo, magi baso meni, polobadu te bidigo Jekop te sili dilide elali dąį elama, tama tiai dao.
GEN 33:1 Te Jekop aga hani dali tama pobadi, tama agai digibulu gana tonoyu, tama Iso te aga hani bidi dabe te 400 dali asobo suali. Tama aga hani tigidali wai dabe bugulama, tama te Leaba, me Reselba, me te sę ebo we sibolo te dobaba pali.
GEN 33:2 Agai te sę ebo we si augwa wai dabe dali augwali te podolali. Tama Lea aga ogomani dali augwali wali pomainu ilali. Tama agai te Resel te Josep dali nosali mu ilama, pali.
GEN 33:3 Jekop digi aga hani asobadi, te aga polasa pali. Tama agai kidu tǫba susugunu pidubadi geani, te nogo a naga olama, me badu si sogo te usu nigi peyu, te aga ama pageba pedelali.
GEN 33:4 Tiali goli, Iso udada aselama, tama aga ama pagea sagaselama, tama aga dali nono nai. Tama aga si talua si gela wali.
GEN 33:5 Tama Isogo tonono bilama, suali, te we dabe me, wai puluba dali sulama, tama agai Jekopbolo hanalu wali, “Te e mena we wai nage dali bidibawe?” Jekopgo po wei ponoyu, te po wai, “Godigo wiegi yai kolesaga nago sę bidi enabolo elama, tama agai te wai dabe enabolo mawai dao.”
GEN 33:6 Tialima, te sę ebo we si augwa wai dabe dali aselama, tama augwali te Iso gedude te tǫba kidu sugunagasali.
GEN 33:7 Tama Lea me aga wai dabe dali, augwaligo me te tǫba kidu sugunagasali. Tama simaniyu mu, Josep dali Resel si aselama, tama te tǫba kidu sugunagasai.
GEN 33:8 Tama Isogo te po wai, “Eno te gasa hani polasa sobadi sisinama suai. Te magi basowe?” Tama Jekopgo te po wali, “O genuai bidio, te nago homu wiegi yai ena dali emainu yai dao!”
GEN 33:9 Tiali goli, Isogo te po wai, “Eno ama, ena doado bage usu yai elalubo. Nago naga nai dabe ma sao,” wai.
GEN 33:10 Tama Jekopgo te po wai, “Woo, te nago ena dali dwagi yai homu eba wida, teda nago eno te mabo nai sao,” wali. “Eno nage gesabidi sulama, tama eno te God gesabidi subo tiwai yali, magi baso meni, te nago ena dali dwagi yai homu yai.
GEN 33:11 Megi eno homugo nago te eno nage mabo te nai nago sao, Godigo dwagi yai kolesaga ena dali elama, tama agai tigidali nai ena menama, tama ena usu mu yai,” wali. Agai Isogo te nai somainogo bomo mu ebaso, tama Isogo te nai sai.
GEN 33:12 Tama nosali Isogo te po wai, “Tialima, megi da, da sisi elama, paibao. Tama ena te polasa pobadi, te dage nosali asiagameo.”
GEN 33:13 Tiali goli, Jekopgo agabolo te po wai, “Genuai bidi, nago koneani, te wai dabe augwali te bomo elama me pabeo. Tama eno homu hauwa te sipsip me, te bulmakau hani dali, te augwali tamadi holobo wai dabede te homu yai. Te augwali deli sogo bubugade bomonama pobaso da, tiyu te tigidali kibu sibi dabe te isila pidalio.
GEN 33:14 Genuai bidi, nage te ena asobadi te polasa polo pagameo, te ena dua dua nosali asiduaibao, te eno kibu sibi dali te eno wai dabe asaibao. Tama nosali nage eno te Seirde da si te deliba gesabi yaibao,” wali.
GEN 33:15 Tama Isogo te po wai, “Te eno hani bage meba nagebolo mawaibao,” wali. “Augwali te nage dali bidiyu, tama dage odasa asomainu yaibao.” Tiali goli, Jekopgo te po wei ponai, “Genuai bidi, eno homugo te nago wiegi yai homu ena dali emainao. Tiali goli, nago bidi dabe ede bidao homu, te tagalao, te eno sę ebo augwali te usu yaibao.”
GEN 33:16 Tama te po obaso, te sogo bubugade digi Iso te Seirba ma painu soai.
GEN 33:17 Tiali goli, Jekop te Sukot teba pai. Tama aga be sę ebadi, te kibu sibi dabe osogo piabo dwasianu be me sę yani. Tama tibaso, augwaligo te bulu nogi Sukot poai dao.
GEN 33:18 Jekop te Mesopotemiadu ma begasa asali, tama aga Sekemgo hanuba, te Kenan tǫ pedaiba bugagia nosali sabolai. Tama aga ugwa be dabe te hanu pąde sę yani.
GEN 33:19 Tama agai te tǫ te Hamor hani bage dali mu abelali, te Hamor Sekem aga aya da. Te tǫ abelali mone te 100 silva masigi tamago abelai.
GEN 33:20 Tama agai te alta me deli tede dodolali. Tama agai te alta nogi te tiwai poali, “Te Israelgo God da, te bomo yai God mu dao,” te nogi poali.
GEN 34:1 Te Daina te Jekop de Lea sigo wegi, tama me sogo agai te bulu page we dabe meba bidibo sugi pai.
GEN 34:2 Hamor, aga te Hivi hani bidi me deli, aga tede tobolu bidi nigilama bidai. Agai ogwa, te Sekem, agai te Daina sulama, tama agai aga nogo tulama, tama aga dali dwai sę yali.
GEN 34:3 Tiali goli, Sekemgo te Jekopgo wegi Daina te wei mu ebaso, tama agai te aga homu wiegi yai ilibo po dua digi wai.
GEN 34:4 Tama nosali Sekemgo aga ayabolo hanalu wali, “Ayao, te we selama, te eno we bidaibao.”
GEN 34:5 Jekopgo odali, te Sekemgo dwai sę te Daina dali yali po, te aga wegi dao. Tiali goli, agai ogomani te augwali te kibu sipsip meme sibi dabe tonalugi peyu pai. Tama Jekopgo po me wabeo. Agai ogomani te sęba pali ma asobo tonaluali.
GEN 34:6 Tama Hamor te Sekem aga ayago te Jekop dali po miainu asai.
GEN 34:7 Augwali te po midubadi, tama aga ogomani te sęba pali, ma beba asali. Magi baso meni, augwaligo odali, te Sekemgo augwaligo abe penani yali po, tama augwali homu dene eyu, sębę mu elama, tama wado po wai. Te sę te Sekemgo te Jekopgo wegi wi sali, te hale ilibo kolesaga mu te Israel dabego gedude yai. Te Israel dabe augwaligo homude, te tobage kolesaga ebo te habu mu sai elaluai.
GEN 34:8 Tama Hamorgo augwalibolo te po wai, “Sekem te ogwago te dagego wegi wei mu ebao. Tama eno dagebolo hanalubao, te augwali si sabo, usu egowe?
GEN 34:9 Teda da abagi olama, te dago dagego wegi dabe siyu, tama dagego dago wegi dabe siyu inao.
GEN 34:10 Tama dage da dali te e tǫ pedaide bidagameo. Tama duga te bidainu yali, te tǫ pedaide bidagameo. Tama dagego dabolo nai dabe abeliyu, tama dago dageba nai abeliyu yaibao. Tama dagego te duga sainu wei yali nai te sagameo,” wali.
GEN 34:11 Tialima, Sekemgo te Daina aga ayabolo me aga abe dabebolo te po wai, “Te dagego enabolo usu obaso da, teda eno dagebolo te mena nai dagego sainu homugo wei ebo nai, te dagebolo eno mawaibao.
GEN 34:12 Tama dagego te duga sabo wei ebo wiegi yai nai po enabolo po wao. Te wegide mone nisu naga dagego muabo homu ebaso da, te usu da, te eno dage mawaibao. Tiali goli, eno homugo dagego te we enabolo menama, tama eno aga saibao,” te bidi Sekemgo te po wai.
GEN 34:13 Te Jekopgo ogwa dabego te augwa abe Dainade te Sekemgo dwai penani sę yali, tede homu kone palali. Tama augwaligo te Sekem dali, aga aya dali sibolo te tibo po ola mabo po wei ponani.
GEN 34:14 Augwaligo te po wali, “Dago abe te aga tigiwali togosiąwai bidi dali pomainogo me egobeo. Te dago tama tiyu da, teda da hale dwai mu yaibao.
GEN 34:15 Tiali goli, dagego e tiwai sę me deli bolo hasia yao. Dagego te duga bage bidi te tigiwali togolama, te augwali da tiwai pedaliąo, tama nosali te dago usu da po dage dali waibao.
GEN 34:16 Te dagego te tiwai tama tibaso da, teda dago dagebolo usu da olama, tama dagego te dago wegi dabe siyu, te dago me dagego wegi dabe siyu yaibao. Tama da dage dali hodobo bidiyu, tama da deli hani pedelaibao.
GEN 34:17 Tiali goli, dagego dago po wali pisąma, tama tigiwali togosiąbaso da, teda dago te dena abe ma selama, tama dago e bulu taga paibao,” wali.
GEN 34:18 Tama Hamor me, aga ogwa dali, augwali sigo te po godolo yai.
GEN 34:19 Tama Sekemgo augwaligo te po polo wali pali, magi baso meni, agai te Jekopgo wegi godolo yali. Sekem te aga deli hani bagego aga te polalubo bidi da te yai.
GEN 34:20 Tialima, Hamor dali aga ogwa Sekem augwali si te bidi sisinibo pesage te hanu sunumi pąde teba pelama, tama augwali sigo te hanude bidalubo gasa bidi dabe dali po miani. Augwali sigo te po wali,
GEN 34:21 “Te Jekop aga hani bidi augwali wiegi yai bidi hani, tama augwali da dali abagi wainogo homu ebo. Tama dago tǫ te genuai tǫ elalubao. Dago augwali te dago tǫde bidimainu emainao, tama augwa homugo bilalumainao. Dago augwaligo wegi dabe siyu, tama dago wegi dabe augwaligo siyu, tama emainu yaibao.
GEN 34:22 Tiali goli, augwaligo te sęde bomo mu yai, dago te dena bidi dabe augwali tigiwali togolama, tama augwali tiwai pedalinao. Te dago tama tiyu da, teda te bidi hani te da dali bidainu usu da olama, tama da dali deli hani pedelaibao.
GEN 34:23 Tama te sipsip meme dabe me, te walu dabe, tama augwaligo bulmakau dabe me, te augwali dago nai pedelaibao. Tiali goli, dago te sę me deli inao, te augwali da dali usu da olama bidaibao,” te Hamor de Sekem sigo te po wai.
GEN 34:24 Te tigidali hanude bidaluali we bidi augwaligo te Hamor de Sekem sigo po usu da olama, tama augwaligo te tigidali bidi dabego tigiwali togwa silai.
GEN 34:25 Te sela sogo bidama, tama te bidi dabe tigiwali togwali te dene mu iduali. Tama Jekopgo ogwa si, Simeon me Livai, te augwali si te Daina aga abe si mu dao. Te augwali sigo te moni bainat hwą ge selama, tama tibo te hanuba biligi pai. Tiali goli, augwali sigo te bidi dabe augwali ela muabo te augwaligo konebeo. Megi da, te augwali sigo te hanude bidali bidi dabe tigidali ela silai.
GEN 34:26 Augwali sigo te Hamor dali, aga ogwa dali si ela mubadi elama, tama augwa si abe Daina te Sekemgo bede oda selama, tama augwali pali.
GEN 34:27 Tama te Jekopgo gasa ogwa dabe augwali asama, tama te ela muani bidi dabe tede suali. Tama augwaligo te hanude wiegi yai nai tigidali selama, tama pali, magi baso meni, Sekemgo te hanude te kolesaga Dainade yali, te Israelgo gedude te wiegi yai me ebeo, dwai mu dao.
GEN 34:28 Augwaligo te sipsip hani me, te bulmakau hani me, te donki hani sobadi yali, tama augwaligo te hanude me te gide elaluai nai dabe tigidali mu sela silai.
GEN 34:29 Augwaligo te tigidali wiegi yai nai me, te augwaligo tigidali we wai me sali, tama augwaligo te be tomode munaluali tigidali doado bage me, te tigidali sela silama, tama augwali pai.
GEN 34:30 Jekopgo Simeon de Livai augwali sibolo te po wai, “Dage sigo ena te dwai ilalio. Te tigidali we bidi tede bidalubo, augwali te Kenan hani me Peres hani, augwaligo te ena godolo ma egobeo. Eno bidi dabe te hauwa me elalube, tama te bidi dabe augwa hasi te deliba sisiniyu da, teda augwaligo ena dali, te eno we wai dabe dali tigidali ela silaibao,” te po wai.
GEN 34:31 Tiali goli, augwali sigo te po wai, “Dago te bidi me deligo dago abe te penani we nogi sidali weyu, te dago me gogologobeo,” wali.
GEN 35:1 Tama nosali Godigo Jekopbolo te po wai, “Nage hogodama, tama nage te Betelba pelama, tama nage teba osogo bidigi pao,” wali. “Tama nago te Godibolo ofa yabo te alta sai me deli nigao, te God nageba pedelali, te naga ama Iso dali wi ebaso soali sogo, te God nageba pedelai,” wali.
GEN 35:2 Tialima, Jekopgo te aga we waibolo, me te augwali dali bidaluali we bidi tigidalibolo wai, “Dagego duga tibo god dabe tigidali te sela sąyao. Dage te wę bugagia paluama, tama meda meni yai ugwa naga muao,” wai.
GEN 35:3 “Te dago te bulu taga peyu, te da Betel teba holoyu, tama paibao. Tama eno te Godibolo te alta me deli nigaibao. Agai ena te sęgę elalubo sogo tau sali, tama ena menaba pali, teba aga ena dali bidali,” wali.
GEN 35:4 Tialima, augwaligo te augwa tibo god dabe tigidali te Jekopbolo mawai. Tama te odode walali ring dabe me te augwaligo agabolo mani. Tama Jekopgo te nai dabe tigidali te Sekem pąde te genuai ni page dologode pubulali.
GEN 35:5 Jekop dali aga ogomani augwali pepela wali. Tama Godigo te Sekem hanu pąde bidalubo we bidi augwaliba te genuai wi pedalumainu ilama, tama augwaligo te Jekop dali me boi hwįabo homu eyu, pobeasa pabeo.
GEN 35:6 Tama Jekop aga hani dali augwali tigidali te bulu Lusba pali, te bulu gasa nogi me Betel wabo, te Kenan tǫ pedai badu elalubo buluba tama pali.
GEN 35:7 Tama agai te alta sai me deli nigilama, tama te bulu nogi poali, te Betel God da wali, magi baso meni, God aga digi aga te Jekopbolo waselai, te aga amade wi elama soali, te sogo aga ola mani.
GEN 35:8 Tama Debora, te Rebekago sę polobadu yali we, aga isai, tama augwaligo aga te Betelde te genuai ni dologode pubulai. Tama augwaligo te ni nogi poali, ‘Tede gela wali ni dao,’ te po wai.
GEN 35:9 Te Jekop te Mesopotemiade bidali ma asobo sogode, God te agaba ma pedelama, tama agaba dwagi yai sę pedelabo po te agabolo mawai.
GEN 35:10 Tama tiyu, Godigo agabolo te po wai, “Nago nogi Jekop dao. Tiali goli, megi da, te augwaligo nago nogi te Jekop ma nogi me wagobeo. Augwaligo nago nogi te Israel nogi yaibao,” wali. Tama Godigo aga nogi te Israel poali.
GEN 35:11 Tama Godigo agabolo te po wali, “Ena da, te Tigidali Bomo Mu Elalubo God dao. Nago te wai hauwa pedalumainu yao. Te nage hauwa we bidigo wąį hani pedelama, tama te bidi dabe meba augwali te gavman tuni bidi pedelaibao.
GEN 35:12 Te tǫ eno polobadu te Abrahambolo me Aisakbolo mani tǫ, te megi eno nagebolo mobao. Tama eno nago hani wąį dabebolo me mawaibao.”
GEN 35:13 Godigo po miani silama, tama agai Jekop taga peyu, aga te dagaluba ma pai.
GEN 35:14 Tialima, Jekopgo te Godigo aga dali po miani pesagede te bobage masigi me deli selama, te ugwaba dodolama, muani. Tama agai te masigi daiba ugwadu te wain wę me, wel dali si te ofa tiwai elama gelali.
GEN 35:15 Tama tiyu, te bulu agai te nogi Betel ma poali.
GEN 35:16 Augwaligo te Betel taga peyu, tama augwali te Efrata teba painu yali. Augwali pedubadi, tama te Reselgo wai tega pabo sogo te pedelali. Tama aga dene genuai mu sai.
GEN 35:17 Te aga te tiwai genuai dene sabo sogo, te aga tau sabo wego agabolo te po wali, “Nage wi me elamuo. Te gasa ogwa wai me dao,” wali.
GEN 35:18 Tama pąde Resel mu isainu ebode, tama agai te wai nogi Benoni poali. Tiali goli, aga ayago aga nogi Benjamin poai.
GEN 35:19 Resel isibaso, tama augwaligo aga te Efrataba pabo sunumide pubulali, te Betlehem hanu pąde dao.
GEN 35:20 Tama Jekopgo aga pubulali gų page homugo konealumainu tama masigi me deli dodolali. Tama te Reselgo dąį ilali te megi me elalubo dao.
GEN 35:21 Tama Israel pelama, tama te gasa bagego augwa sipsip tonalumainu eyu, bobage masigi be sęwai madi, te bulu taga soyu, tama dwasianu pelama gana tama aga bidabo pesage nigai.
GEN 35:22 Israel tede bididubadi, tama Rubengo te aga ayago sę ebo we Bilha dali pagela piali. Tama Israelgo te tiali po odali. Te Jekopgo ogwa dabe te nogo si olama, sągągo si elaluai.
GEN 35:23 Te Leago wai dabe e dao, Ruben, te Jekopgo gomunai ogwa da, tama Simeon, me Livai, me Juda, me Isakar, me Sebulun.
GEN 35:24 Reselgo wai si elaluali, Josep me Benjamin.
GEN 35:25 Bilha te Reselgo sę ebo wego te wai si elaluali, Dan me Naptali.
GEN 35:26 Silpa, te Leago sę ebo wego te wai si elaluali, Gat me Aser. Jekop te Mesopotemia tǫde bidiyu, tama agai te wai dabe augwali ame nai.
GEN 35:27 Jekop te aga aya Aisak bidibo digi, te moni ni sili nogi Mamre, teba sabolali. Te bidi mebago te bulu nogi te Kiriat Arba nogiyu, tama nosali te gasa nogi me elaluali, te Hebron nogi yali. Te bulu te Abraham me Aisak te polobadu bidai bulu dao.
GEN 35:28 Te Jekop aga Aisak dali nosali bidada peyu, tama Aisak te kibu be 180 bida silama, tama aga isai dao.
GEN 35:29 Aga te monu dabe mu elama, tama mobo kegebo silama, tama aga isali hani bage dali bidigi pai. Tama aga ogwa si, Iso me Jekop, augwali sigo aga pubulai dao.
GEN 36:1 Te e da, te Isogo hani wai dabe, te augwaligo Idom nogi me poali.
GEN 36:2 Isogo te Kenan we dabe sela sai, Ada te Elongo wegi, te Hit hani bidi me deli, tama Oholibama te Anago wegi, te Ana aga aya te Sibeon, te Hivi hani bidi me deli da,
GEN 36:3 tama Basemat te Ismaelgo wegi, te Nebaiotgo abe da.
GEN 36:4 Adago te Elifas ame nani, te Isogo wai, tama Basematgo te Ruel ame nai.
GEN 36:5 Tama Oholibamago te Jeus, me Jalom, me Kora, te tama ame nai. Isogo te wai dabe te Kenan tǫ tede bidibadi ame nani.
GEN 36:6 Nosali Isogo aga ama taga peyu, tama aga hogodama, gasa buluba me pali. Agai te aga we wai me, te aga we wai dali bidali we bidi dabe dali sobadi, tama tigidali kibu hani sibi te agai Kenande sali nai dabe tigidali selama, tama augwali pali.
GEN 36:7 Te Jekop de Iso augwali si bidali tǫ te augwali sigo kibu dabe pągąna selama, tama augwali si talua bidabo te usu me ebeo. Tama tibaso, Isogo Jekop taga peyu,
GEN 36:8 tama aga te Seir dabego bulu du dabe elalubo tǫba bidigi pali. Idom te Isogo gasa nogi me dao.
GEN 36:9 Te Isogo nosali pedelali hani bage augwaligo aga gasa nogi Idom sali, tama augwali te Seir bulu du dabe elalubo bulude bidaluai. Augwali e tama pedelali po megi obao.
GEN 36:10 Te Isogo ogwa dabe, te augwali e dao, Elifas te Isogo we te Adago ogwa da, tama Ruel te Isogo we Basematgo ogwa dao.
GEN 36:11 Te Elifasgo ogwa dabe, te augwali e dao, Teman, me Omar, me Sefo, me Gatam, me Kenas.
GEN 36:12 Timna te Isogo ogwa Elifasgo nosali sali we, tama Timnago te Amalek ame nani. Te hani ogwa dabe augwali te Isogo we Adago wąį dabe da.
GEN 36:13 Te Ruelgo ogwa dabe, te augwali e dao, Nahat, me Sera, me Sama, me Misa. Te e dabe te Isogo we Basematgo ogwago hani ogwa dabe da.
GEN 36:14 Te Isogo we Oholibama agai ogwa Jeus, me Jalam, me Kora, te tama ame nani. Te e da te Oholibamago hani ogomani dabe, te bidi Anago wegigo wai dabe. Tama Ana aga aya te Sibeon dao.
GEN 36:15 Te e da, te Isogo wai hani dabe augwali te tobolu bidi dabe bidali. Te Isogo gomunai ogwa te Elifasgo ogwa dabe, te augwali e dao, te tobolu bidi dabe te Teman, Omar, Sefo, Kenas,
GEN 36:16 Kora, Gatam, Amalek. Te augwali te Elifasgo tobolu bidi hani dabe te Idom dabe da. Augwali te we Adago hani wai puluba te wąį dabe dao.
GEN 36:17 Te Isogo ogwa Ruel aga wai dabe te augwali e dao, te tobolu bidi dabe augwali Nahat, Sera, Sama, Misa. Augwali te Ruelgo tobolu bidi hani te Idom dabe da. Augwali te Isogo we Basemat tego wąį te wai dabe dao.
GEN 36:18 Te Isogo we Oholibamago ogwa dabe te augwali e dao, te tobolu bidi te Jeus, Jalam, Kora. Oholibama te bidi Anago wegi, tama Isogo we agai te tobolu bidi dabe ame nai.
GEN 36:19 Te e da, te Isogo hani wai dabe, tama gasa nogi Idom, te augwaligo tobolu bidi dabe dao.
GEN 36:20 Te e da, te bidi nogi Seir aga ogwa dabe, aga te Hor hani me deli da. Tama te Hor hani bage augwali te Seirgo tǫ pedaide bidai. Tama Seirgo ogwa dabe te augwali e dao, Lotan, me Sobal, me Sibeon, me Ana,
GEN 36:21 tama me Dison, me Eser, me Disan. Te bidi dabe augwali te Hor hanigo tobolu bidi hani dabe da, tama augwali te Seirgo wai dabe te Idom pedai badu dao.
GEN 36:22 Lotango ogwa si elaluali, Hori me Homam. Tama te wegi Timna te Lotango abe da.
GEN 36:23 Te Sobalgo ogwa dabe, augwali te e dao, Alvan, me Manahat, me Ebal, me Sefo, me Onam.
GEN 36:24 Te Sibeongo ogwa dabe, te augwali e dao, Aia me Ana. Te bidi Anago te talua ge wę pedalubo te bidi meni yai madi pedalubo te aga aya Sibeongo kibu donki tonaluali sogo gegai dao.
GEN 36:25 Te Anago wai dabe, te augwali e dao, te bidi Dison, me Oholibama, te Anago wegi dao.
GEN 36:26 Te Disongo ogwa dabe, te augwali e dao, Hemdan, me Esban, me Itran, me Keron.
GEN 36:27 Te Esergo ogwa dabe, te e dao, Bilhan, me Savan, me Akan.
GEN 36:28 Disango ogwa si yali, Us me Aran.
GEN 36:29 Te e da te Hor hanigo tobolu bidi hani dabe da, Lotan, Sobal, Sibeon, Ana,
GEN 36:30 Dison, Eser, Disan. Augwali te Seir tǫ pedai badu te Hor hani deli deligo tobolu bidi hani dabe dao.
GEN 36:31 Te Israel dabe augwa hani tuni bidi king menibadi, tama te Idom bagego gavman tuni bidi king dabego te Idom pedai badu tonaluai. Augwali e tiwai pedelali.
GEN 36:32 Bela te Beorgo ogwago te Idom tonaluali. Te aga king sę eyu bidali hanu nogi da, te Dinhaba.
GEN 36:33 Te Bela isibaso, tama te Jobap, te bidi Serago ogwago, te aga te Bela tuni bidi sęde hasegelama, bidali. Bosra te bulu te Jobapgo page bulu dao.
GEN 36:34 Tama nosali Jobap isibaso, tama Husamgo te aga hasegelama, tama tuni bidi pedelali. Husam te Teman pedai badu bidi dao.
GEN 36:35 Husam isibaso, tama Hadat, te Bedatgo ogwa, te aga tuni bidi pedelali. Hadatgo te Midian hani dali te Moap tǫde boi hwįnama, tama te Midian dabe aiyaba elaluali. Avit hanu te Hadatgo king sę eyu bidali hanu dao.
GEN 36:36 Te Hadat isibaso, tama Samlago te agai sę hasegelama sali. Samla aga te Masreka bulu bidi.
GEN 36:37 Tama Samla isibaso, tama Saulgo te agai tuni bidi sę sali. Saul aga te Rehobot hanu bidi, te hanu te wę nogi Yufretis sesegede elalubo hanude bidali.
GEN 36:38 Saul isibaso, tama Balhanan, te Akbor tego ogwa, agai te tuni bidi sę sai.
GEN 36:39 Tama Balhanan te Akborgo ogwa isibaso, tama Hadatgo agai te sę selama, bidai. Pau te aga te king sę eyu bidali bulu da, tama agai te we Mehetabel sali, te we nogi Matretgo wegi da. Tama Matret te Mesahapgo wegi dao.
GEN 36:40 Te e da, te Iso hani dabe tobolu bidi dabe da, Timna, Alva, Jetet, Oholibama, Ela, Pinon, Kenas, Teman, Mipsar, Makdiel, Iram. Te augwali te Idom tobolu bidi hani dabe da. Idom te Isogo gasa nogi me, tama Iso te Idom hani nogi aga aya dao. Te augwali tigidali deli deli te augwa bulu elalubao, tama augwa hanide te augwali tobolu bidi dabe dao.
GEN 37:1 Jekop te aga aya polobadu biliyu bidali bulu, te Kenan tǫde bididuai. Te Jekop aga ogomani dali augwali bidibadi, tama e tobage kolesaga augwalide pedelali. Odao.
GEN 37:2 Josep te gesi ogwa bidi, te agai kibu be te 17 kibu be elaluali. Tama aga ama dede meba augwaligo te kibu sipsip me meme tonaluali, tama Josepgo augwali tau sali. Te aga ama dede augwali te sę ebo we Bilha me Silpa sigo ogomani, te augwali si aga ayago we si da, te aga paba si dao. Tama agai te aga ayabolo te aga ama dedego dwai kolesaga ebo po weyu yai.
GEN 37:3 Israelgo te Josepde wiegi yai homu pemene mu ebo tiwai te aga gasa ogomani dali wiegi yai homu ebo tiwai me ebeo, magi baso meni, idago te Israel monu dabe ebo sogo Josep ame nani. Tama agai te wiegi yai au yai ugwa nigilama, tama agai te Josepbolo mawai.
GEN 37:4 Te aga ama dedego suali, te ayago Josep dali wiegi yai homu pemene mu eyu, tama augwali te godolo kuna me ebe. Tama tibaso, augwaligo dwai homu mu te Josep dali elama, tama augwaligo abagi homu eyu, wiegi yai po aga dali me wabeo.
GEN 37:5 Tama me sogo deli te Josepgo na elama, tama agai te na yali te aga ama dede dali pusali. Tama augwaligo odama, tama augwaligo homu dwai mu elaluali. Magi baso meni,
GEN 37:6 Josepgo te na yali pusuyu, te po wai, “Dagego eno na yali po odao,” wali.
GEN 37:7 “Da tigidali te wit gide bidaluyu, tama te wit dunu pali. Tama eno duani te hogodama, tama dolo dolugulali. Tama dagego duani nai dabe dolaluyu, te eno duani nai te bagulama, tama teba kidu sugunani,” wali.
GEN 37:8 Te aga ama dedego agabolo te po wali, “Nago homugo te nage dago tuni bidi pedelama, tama da tonaluainogo ebawe?” Tama aga ama dede augwaligo te na yali po odama, tama augwaligo aga dali sębę mu yai.
GEN 37:9 Tama nosali Josepgo na ma elama, tama agai te po aga ama dabe dali pusali. Agai te po wali, “Odiąo, eno gasa na ma ebo suali, tama eno te giliga de polua si, me te nogo si olama, sągągo deli te hǫ dabe, augwali te enaba basi gulama, kidu sugunidu geai,” wali.
GEN 37:10 Agai te na yali po te aga aya dali, me te aga ama dede dali pusubadi yali. Tama aga ayago aga dali wado po olama, te po wali, “Te magi yai na dawe? Nago homugo ena, naga ida dali, me te naga ama dede dali, te da aselama, te nage gesabidiba kidu sugunama, basia gulagasomainu ebawe?”
GEN 37:11 Tama Josep aga ama dedego aga dali haliga husugu yali, tiali goli aga ayago te po tigidali aga homude munalualio.
GEN 37:12 Nosali te Josepgo ama dede augwali te augwa ayago kibu sipsip tonalugi peyu, te Sekemba pali.
GEN 37:13 Tama Israelgo Josepbolo te po wai, “Naga ama dede augwali te Sekem bulu pąde te kibu sipsip tonalu bidibao. Nage sisi elama, eno nage te augwali bidalubo digi tagala palaibao,” wali. Josepgo te tiwai po wei ponani, “Ena sisi yai dao.”
GEN 37:14 Tama ayago te po wali, “Nage te naga ama dede bidiboba pelama, tama augwali sugi pao, te augwali bugagia bidibowe, ma meniwe? Tama nago te sipsip dabe me suyu, te augwali usu elalubowe, ma meniwe? Te augwali sulama, teda nage ma ena bidibo madi asiyu, tama enabolo wagameo,” wali. Te aga aya Jekop te Hebron hanu odogo tǫde bidiyu, tama te Josep tagala palali. Josep digibulu pelama, tama te Sekem tǫba sabolama,
GEN 37:15 tama aga tede augwali gegeyu, bagula biliduali. Tama bidi me deligo aga subaso, tama agabolo hanalu wali, “Nago magi nai gegebawe?”
GEN 37:16 Tama Josepgo te po wali, “Eno te ena ama dede gegebo sę ebao. Nago enabolo te augwali mena badu te sipsip tonalubo po waibawe?”
GEN 37:17 Te bidigo agabolo te po wai, “Augwaligo e bulude bidali taga pai dao. Te augwali te Dotanba paiba po wabo eno odali.” Tama Josep te aga ama dede pali wali nosali digibulu ma pelama, tama augwali te Dotande bidibo suali.
GEN 37:18 Aga te digibulu digi asobadi, tama aga ama dede augwaligo aga suali. Aga te pąba asisąbadi, tama aga ama dedego aga elabo po minama, dąų wali.
GEN 37:19 Augwaligo te augwa hasi tomode po minama, tama te po wai, “Te na ebo koneai bidi te asobao,” wali.
GEN 37:20 “Polo tama, dago aga ela munama, tama aga tigi te ulu sigi ąį elaluai madigi dedage me deli teba sąwaibao. Te nosali dago te po waibao, ‘Te genuai uni hasa me deligo aga elama, tuali,’ po waibao. Tama agai na yali sę mu pedelaibawe, ma meniwe, te dago koneaibao,” augwaligo tama po wali.
GEN 37:21 Rubengo te po dabe augwaligo mibo po odama, tama agai Josep tau sainu yali. Tama agai te po wali, “Dago te aga me ela mugobeo. Menio.
GEN 37:22 Te dagego aga kaneme me geligobeo. Te aga te e bidi meni yai bulude elalubo tǫ dedageba sąyagameo. Tiyu, dagego aga dolamuo,” wali. Rubengo homugo te Josep tau sabo homu elama, tama aga te aga aya bidibo madi nosali ma tagala palainu, tama agai te po wai dao.
GEN 37:23 Tama Josep te aga ama dede bidibo madi teba sabalubadi, tama polo augwaligo aga pageabi elama, tama augwaligo bomonama, te wiegi yai au yai bobage ugwa te dia sąwani.
GEN 37:24 Tama augwaligo aga sela pelama, te wę sula sai tǫ dedage me deli elalubo madi teba tula palai.
GEN 37:25 Tama nosali augwali dugulama, tama toma neyu, nai tuali. Te augwali nai tuyu bidalubadi, tama augwaligo te Ismael bidi hani aselabo suali, te gasa nogi me elalubo te Midian bage dao. Augwali te Gileat tedu aselama, tama te Isipba painu soali. Tama augwaligo kamelgo te gasagi yai denami ebo ni kaneme, me te haniani sanda dabe, te sela soali, magi baso meni, augwali te Isipba pelama, tama tede te augwa dobu si ebo bisnis sę yaibao.
GEN 37:26 Tama Judago aga ama dedebolo weyu, te po wali, “Te dago dena ama elama, tama dago geme dualubo sę eyu da, te dago mena dwagi yai nai agade sogowe?
GEN 37:27 Te dago aga e Ismael hanibolo menama, tama dago mone sinao. Te kolesaga eyu da, te dago aga me dologobe. Aga te dago ama, tama dago deli kaneme mu dao.” Tama te ama dedego te po usu da po wali.
GEN 37:28 Te Midian bisnis bidi meba teba asobaso, tama augwaligo Josep te tǫ dedagede selama, tama aga te Ismael dabebolo mani. Te Ismael dabe augwaligo Josep te mone ge bidi sese deli, te 20 silva monego abelama, tama augwaligo aga te Isipba selasa pali.
GEN 37:29 Nosali te gomunai ama Ruben te ma aselama, te tǫ dedageba tonani, tiali goli Josep tede me bidibeo. Aga te homu dene elama, tama aga gudali ugwa pisą yali.
GEN 37:30 Aga te ama dede bidibo madi pelama, tama te po wali, “Te ogwa Josep tede bidibeo! Te eno magi sę megi yaibawe?”
GEN 37:31 Nosali te aga ama dedego te meme me deli elama, tama augwaligo te Josepgo gudali ugwaba te kaneme muai.
GEN 37:32 Tama augwaligo te ugwa te augwa ayaba sela pelama, tama augwaligo te po wali, “Dago e ugwa gegali. Nago suao. Te ugwa te nago ogwago ugwa dawe, ma meniwe?”
GEN 37:33 Ayago te ugwa sulama, koneyu, tama te po wai, “Awe. Te ugwa te Josepgo ugwa dao. Te dwai uni hasa me deligo aga elama, tama aga tigidali tula silai sualio,” wali.
GEN 37:34 Tama Jekopgo aga ugwa pisilama, tama agai te dwai olo ugwa te aga ogwade homu dene ebo te ola mayu ebo, te ugwa gudali. Tama agai te wai hagede gela wabo te sesabi elama, mu wai.
GEN 37:35 Te tigidali ogomani, wegi mani me aselama, tama augwaligo te aga homu te wiegi yai ma ilabo po wagasali. Tiali goli, agai te wei mu isiąma, tama te po wai, “Eno aga hagede gela udubadi, te ena aga dali te isali bidi dabego gų pageba bidigi peyu, usu naibao,” wali. Tama aga ogwa Josep hagede te gela naga udu bididualio.
GEN 37:36 Tama tidubadi, te Isipde te Midian dabego Josep te Isip tuni bidigo ofisa bidi me deli, te Potifarbolo mani, tama agai Josep te monego mu abelai. Potifar te Isip tuni bidigo genuai be tonalubo ami bidi dabe augwali tonalubo bidi dao.
GEN 38:1 Tama te sogo Juda te aga ama dede taga peyu, tama te Hira dali bidigi pali, te Adulam bidi me deli da.
GEN 38:2 Tama Judago te we me deli suali, te aga bidi me deli Kenan bidi Suago wegi dao. Agai te we selama, tama aga dali pagela piali.
GEN 38:3 Tama te we tabi elama, tama ogwa me deli ame nani. Tama Judago aga nogi Er poai.
GEN 38:4 Nosali te wego tabi ma elama, tama gasa ogwa me ame nani, tama agai aga nogi Onan poai.
GEN 38:5 Tialima, nosali te wego ogwa me deli ma ame nenama, tama aga nogi Sela poai. Juda te Kesipde bidibadi, tama aga wego te Sela ame nani.
GEN 38:6 Nosali Judago te aga gomunai ogwa Ergo we me deli gegali. Aga nogi te Tamar dao.
GEN 38:7 Tama Ergo kolesaga te Yawe gedude dwai ebaso, tama Yawego aga isilali.
GEN 38:8 Tialima, Judago Onanbolo te po wai, “Nago te naga amago we dali piao. Te nago ama isali, tama agai wai meni. Te dago kolesaga te tiwai nago te naga amago we selama, tama aga nogide te wai ame nao. Tama te naga amago wai hani elaluaibao,” wali.
GEN 38:9 Tiali goli, Onango koneani, te wai dabe te agai wai dabe meni, te homu yali. Tama aga te we dali piali sogo, agai wę te tǫba olo madi gelali. Tama aga amago hani wai dabe me elalubeo.
GEN 38:10 Te kolesaga Onango te Yawe gedude dwai ebaso, tama Yawego aga me isilali.
GEN 38:11 Tama nosali Judago te aga wąį we Tamarbolo te po wai, “Nago bidi isalio. Tama nage te nago ayago beba ma pelama, tama nage wilawe we bidigi pelama, te eno ogwa Sela genuai ebo teba usu naibao.” Aga wi elama, tama po wali. Tiyu, te Sela me te aga ama si isali tiwai gilama idalio. Tialima, Tamar te aga ayago beba ma pelama, tama bididuali.
GEN 38:12 Tama me sogo nosali te Judago we isali, te aga Suago wegi da, aga me te isali. Judago te homu dene ebo sogo silama, tama aga te Timna buluba peyu te bidi dabego aga sipsip nisi togobo pesageba pali. Te aga abagi Hira te Adulam bulu bidi aga dali pali.
GEN 38:13 Te bidi me deligo te we Tamarbolo wali, “Te nago bidigo aya, nago wąį, te Timna buluba peyu, te sipsip nisi togogi soyu, soali,” te po wai.
GEN 38:14 Tialima, Tamargo te aga bidi isali te konemainu te muani ugwa te peda sąnama, te gasa ugwa hasegelama muani. Tama agai gesabidi te sesela selama, te dwasianu ugwa name munama, tama te Enaim hanu soabo sunumi tunu si age tede dulaluali, te Timna sunumi teba pabo pesage elaluali. Agai koneai, te Sela te genuai yali, tiali goli augwaligo te Selago te Tamar sabo po te dodolisiąwai.
GEN 38:15 Judago te sipsip nisi togobo sę sula silama, tama beba ma pobadi, agai te we sulama, tama agai homugo te penani ebo we da, te homu yali, magi baso meni, te wego gesabidi te dwasianu ugwa namego halua sai elaluali.
GEN 38:16 Aga te we te sunumi sesegede bidibo madi pelama, tama agabolo te po wali, “Ae, polo tama, ena nage dali piabo homu ebao.” Tiali goli, Judago te aga wąį we da, te homu isiąyu, tama agai me konebe. Tama te wego te po wali, “Te nago magi nai hasia te enabolo mawaibawe?”
GEN 38:17 Judago te po wali, “Eno te meme elalubo, tama te ogwa bidi me deli eno te nageba tolaibao.” Wego te po wali, “Te usu da, tiali goli nago te meme enaba tolabo te po dąų walobo dąį ilibo nai me deli te enabolo mao,” te po wai.
GEN 38:18 Tialima, Judago te po wali, “Te eno magi nai te po dąų waliyu, eno nagebolo magawe?” Tama wego te po wali, “Te naga te nogi asębo nai me, aga naga dogonide walobo bono me, te megi nago tolalubo te tolasa bilibo au yai dono me, te enabolo mao,” wai. Tialima, Judago te nai dabe te webolo mani. Te augwa si te sogo pagela pilama, tama nosali te we tabi yali.
GEN 38:19 Tialima, Tamar hogodama, tama palio. Tama agai te aga gesabidi halualuali te dwasianu ugwa name peda sąnama, tama te aga bidi isai da olama, te bidigo konemainu mubo ugwa te ma muani.
GEN 38:20 Judago te ogwa bidi meme te aga abagi Adulambolo menama, tama aga tagala palama, agai te webolo mani doado bage te ma sigi pelama, sesemainu yali. Tiali goli, agai te we gegali, te me subeo.
GEN 38:21 Tama agai te bulu bidi dabebolo hanalu wali, “Te Enaim te sunumi tųnu age side te penani we bidali, te menade bidibawe?” Tama augwaligo te po wali, “Te penani we me deli te badu me bidibo menio.”
GEN 38:22 Aga te Juda bidibo madi ma geasa pelama, te po wai, “Eno te we me gegebeo. Tama te bulu bidi dabego te po wali, ‘Te penani we deli te badu me bidibo menio,’ te po wali.”
GEN 38:23 Tialima, Judago te po wai, “Tagalao. Te nai aga tolasa bilimainao. Nago te ma gegelamuo. Tiyu, te bidi dabego da si gisugu mayabuo. Eno te meme ogwa bidi te weba tolali. Tama nago gegali, tiali goli te nago me subeo,” wali.
GEN 38:24 Tama te polua sela bidai digi, tama augwaligo Judabolo te po wali, “Te nago wąį Tamar te penani wego ebo sę elama, tama megi te aga tabi elalubao,” wai. Tama Judago te tiwai po bomo yali, “Te aga buluba sela solama, tama aga te siaba ulama, te aga isimainao,” wali.
GEN 38:25 Te augwaligo aga sela pabo sogo, agai te aga wąį wali ayabolo po ola tolai. “Ena te tobage doado bage tolalubo bidide te ena tabi yali. Te e nai dabe te bugagia osolama yao, te dąį ilibo nai, me te bono, me te tolasa bilibo au yai dono, te tama nai elalubao. Te tama doado bage te dego dawe?”
GEN 38:26 Judago te nai dabe sulama, koneyu, tama agai te po wai, “Eno tama te dwai sę yali. Te wego dwai sę meni yani. Aga te eno ogwa Selago saiba wai. Tiali goli, eno te augwali si sabo po dodolisiąwai.” Tama tibaso, Juda te aga dali me pibeo.
GEN 38:27 Tama nosali te Tamargo wai ame nainogo ebo sogo, augwaligo koneani, te aga tabide wai si elaluali.
GEN 38:28 Te ame nabo sogo, te wai me deligo nogo te polasa teda soali. Tama te tonalubo wego te nogo tola selama, tama te mama ugwa pedai dwasianu te nogode kęnani. Tama agai te po wali, “Te wai bolo hasia pedelai dao,” wali.
GEN 38:29 Tiali goli, te waigo nogo te ugwaba ma kega selama, tama aga ama me bolo te hasia ame nani. Tialima, te tonaluali wego te po wai, “Magi yaliwe? Nago te hani si pedelama, tama bomonama, nage bolo te hasia ame nani dawe?” Tama tibaso, augwaligo aga nogi te Peres poai.
GEN 38:30 Nosali te aga ama te mama ugwa pedai nogode kęnani, te me ame nani. Tama augwaligo aga nogi te Sera poali.
GEN 39:1 Te Ismael dabego te Josep Isipba odasa pelama, tama te bidi me deli aga nogi Potifar, tego aga abelai. Potifar te Isip bidi me deli, tama te Isip tuni bidigo sę ebo ofisa bidi me deli da. Agai te ami bidi dabe te Isip tuni bidigo genuai bede tonaluali.
GEN 39:2 Yawe te Josep dali bidibaso, tama agai yali sę tigidali te wiegi yai naga pedelali. Josep te Potifargo bede sę eyu bidali.
GEN 39:3 Tama Potifargo sulama, koneani, Yawe te Josep dali bidiyu, tama tigidali sę Josepgo yali te dwagi yai naga pedelali.
GEN 39:4 Tama agai te Josep dali wiegi yai homu pemene mu elama, tama agai te Josep te aga digi pąde bidibo tau sabo bidi nigilali. Tama tibaso, Potifargo Josep te agai bede tigidali doado bage tonalumainu muani.
GEN 39:5 Tama te sogo Yawego te Isip bidi Potifargo hani dabe dali dwagi yai sę ebo gagalali, magi baso meni, te Josep augwali dali bidali. Yawego te tigidali doado bage, me tigidali we bidi te Potifargo bede bidalubo, me te tigidali gide elalubo nai dabe, te hauwa mu pedalumainu te dwagi yai tau sabo sę yali.
GEN 39:6 Tialima, Potifargo te agai doado bage tigidali tonalumainu Josep te tonalubo bidi nigilali. Tama aga digi te magi nai me deli tede te agai homu me ebeo. Menio. Agai te aga tubo naide naga homu yali. Tialima, Josepgo tigi te wiegi yai mu elama, tama gasagi yai sawi yai bidi mu pedelali.
GEN 39:7 Tama pąde digi tama Potifargo wego te Josep gedu eyu, tama pesą yalima, tama agabolo te po wai, “Nage ena dali pagela piagasao,” wali.
GEN 39:8 Tiali goli, Josepgo te hagela elama, tama agabolo te po wali, “Te ena tonalubo genuai bidigo ena te bede te tigidali doado bage tonalubo bidi nigilali, tama agai te magi nai me delide te homu me ebo menio.
GEN 39:9 Eno te bede te aga bomo tiwai digi te eno elalubao. Tama agai te magi nai me deli te enabolo me habu selibeo, nage deli naga, te nage agai we da. Magi baso eno te tiwai dwai kolesaga yaibawe? Te eno tama tiwai dwai sę ebaso da, teda eno God gedude dwai sęgę saibao,” wali.
GEN 39:10 Tama tigidali bidibo sogode te wego Josep te aga dali piagasa wabo po hanalubo sę iduali. Tiali goli, Josepgo te agai wabo po me odama, tama aga dali me pisąma, tama aga te aga pąba me pabeo.
GEN 39:11 Te me sogo deli Josep te be tomoba aga sę yainu pali, tama te sę ebo bidi me deli tede me bidisiąwai.
GEN 39:12 Tialima, Potifargo wego te Josepgo ugwa tola selama, tama agai te po wai, “Nage ena dali piagasao,” wai. Tiali goli, agai holobo ugwa te wego nogode tolalubadi taga peyu, tama aga wi soyu, te bedu buluba soali.
GEN 39:13 Te wego te Josepgo aga ugwa taga peyu, tama wi pabo suali,
GEN 39:14 tialima agai te bede sę ebo bidi dabeba i weyu, tama te po wai, “Dagego suiąo! Eno bidigo te Hibru bidi te dago beba odasa bidali bidigo tama megi agai dwai kolesaga te dabolo yainogo yali. Aga te ena pibo be habu badu asama, tama agai te ena nogo tulama, dwai sę yainu yali. Tiali goli, eno bomo elama, po daga walio.
GEN 39:15 Tialima, agai te eno hai wabo odama, tama agai ugwa te eno pagede taga peyu, tama aga te bedu buluba wi pai,” te wego te po wai.
GEN 39:16 Tama te sogo pio Potifargo wego te Josepgo ugwa tolalubadi, te aga tonalubo bidi te beba sabolali.
GEN 39:17 Nosali agai te po aga bidibolo pusuyu, te deli tobage po naga wali. Agai te po wai, “Te Hibru bidi, te olo sę ebo bidi, te nago dago beba odasa bidali bidi, agai te ena pibo be habuba asama, tama agai dwai sę ena dali yainogo yai.
GEN 39:18 Tiali goli, eno hai obaso, tama aga ugwa ena pagede taga peyu, tama buluba wi pai,” wali.
GEN 39:19 Te wego te po pusuyu, tama tiwai po wali, “Te nago sę bidigo ena dali tama tiali.” Tialima, Josep tonalubo bidigo odama, tama agai sębę dwai mu yali.
GEN 39:20 Agai po obaso, tama te ami bidi dabego Josep nogo dunama, tama aga kalabusiba muani. Augwaligo aga te gavman tuni bidigo te dwai sę yali bidi dabe kalabus ilama bidibo madi, te Josep teba kalabus ilama muani. Tama aga tede bidaluali.
GEN 39:21 Tiali goli, Yawe te Josep dali bidiyu, tama agai aga dali dwagi yai sę yali. Tama tiyu, Yawego te kalabus tonalubo bidigo Josep dali wiegi yai homu pemene emainogo yali.
GEN 39:22 Tama tibaso, agai te Josep te tigidali kalabus bidi tonalubo bidi nigilali. Tama Josepgo te tigidali kalabus bidi dabego ebo sę tonalubo sę yali.
GEN 39:23 Yawe te Josep dali bidiyu, tama aga tau sobaso, tama agai tigidali sę yali te dwagi yai naga pedelali. Tama te kalabus tonalubo bidigo te Josepgo tonalubo sęde te agai homu si me ebeo.
GEN 40:1 Tama bidali sogo dwasianu sesabi gana elama, tama te bomai ąį wain tonalubo tobolu bidi, me te bret nigibo be tonalubo tobolu bidi, augwali sigo te Isip tuni bidi Fero dali dwai sę me deli yali, aga te augwali sigo genuai bidi dao.
GEN 40:2 Fero te sę tonalubo bidi si dali sębę elama,
GEN 40:3 tama agai augwali si te ami bidi dabe tonalubo bidigo be teba muani. Augwali si te Josep augwaligo kalabusiba muani madi te kalabus beba naga muai.
GEN 40:4 Tama te ami bidi dabe tonalubo bidigo te Josepgo te tobolu bidi si tau mabo bidi nigilali. Augwali si te sesabi elama gana te kalabuside bidama,
GEN 40:5 tama me sogo hulide, te wain sę tonaluali tobolu bidigo, me te bret nigibo sę tonaluali tobolu bidi, te Isip tuni bidigo sę yali bidi sigo na yai. Te deli deligo na yali te na page me elaluali.
GEN 40:6 Tama Josep te augwali si bidibo madi kigamu sabolali, tama agai te augwali si te homu sęgę elalubo suali.
GEN 40:7 Tama agai augwali sibolo hanalu wali, “Magi baso te dage si homu sęgę elalubawe?”
GEN 40:8 Augwali sigo te po wai, “Da sigo te na yai. Tama ede te bidibo bidi mego te na yali po page da sibolo pusabo te meni yani,” wali. Tama Josepgo augwalibolo te po wai, “Godigo naga te na yali page dabolo ola mabo usu dao. Tialima, dage sigo te na yali po enabolo waiąo,” wali.
GEN 40:9 Tama tibaso, te wain tonalubo tobolu bidigo te na yali po pusali. Agai te po wai, “Te eno nade, eno te wain nigabo du walobo bono me deli suali.
GEN 40:10 Tede te nologo sela elaluali. Te yabe dabe pedelama, tama polo te dudili pedelama, tama te ni wain du walama, tama tigidali tau ela silai.
GEN 40:11 Eno te Ferogo kap tuali. Tialima, eno te wain du dabe selama, tama eno nogogo pegelama, tama aga wę te kapba tabilama, tama eno te Ferobolo mani,” wali.
GEN 40:12 Josepgo te po wali, “Te na page e tiwai dao, te wain nologo sela wali, te sela sogo bodolu mani.
GEN 40:13 Te sela sogo wali silisiąbadi, tama Ferogo nage ma sagasaibao. Tama agai nage, te naga yali sęba ma muaibao. Te nago hasia polobadu te wain sę tonalubo tobolu bidi bidiyu, te nago wain tuabo kap te Ferobolo mani tiwai gilama, te nago te wain wę kap te Ferobolo mawaibao,” Josepgo te po wali.
GEN 40:14 “Te nage bugagia bidibo sogo, nago ena homugo konea palao. Nago ena homu dene elama, tama eno nogi Ferobolo olama, ena e kalabuside bidibo tagalumainao.
GEN 40:15 Magi baso meni, te hasia mu te bidi dabego ena te Hibru dabego bulude te olo sę ebo bidi tiwai elama, wi sela asali. Te megi e tǫde me, te eno magi sę me deli isiąbadi, te ena augwaligo e kalabusiba muani,” te po wai.
GEN 40:16 Te bret nigibo be tonalubo tobolu bidigo te na page odali te wiegi yai ebaso, tama agai Josepbolo te po wali, “Eno me eno na yali. Te na tama tiwai yali, te eno tobolude te basket sela tolali, tama te tobage te plaua dabe nigali bret te pągąwai.
GEN 40:17 Te ugwadu polaluali basketde te tobage tigidali te bret me bisket te pągąnaluali, te Ferogo wei ebo nai dao. Tiali goli, te ba dabego te bret dabe tubo sę yai,” te bidigo te po wai.
GEN 40:18 Tama Josepgo te po wali, “Te na yali page te e tiwai dao, te sela wali basket te sela sogo bodolu mani.
GEN 40:19 Te sela sogo bidali silisiąbadi, tama Fero agai nage te kalabus bedu dogoni mage togwaibao. Tama agai nage tigi te ni me deli walama, tama te ba dabego nago tigi mi tuagasaibao,” Josepgo te po wai.
GEN 40:20 Te sela sogo wali pedelama, tama Ferogo te tigidali sę ebo bidi dali te aga idago aga ame nani bodolu side te genuai nai da ulama, tuainu yali. Tama agai te wain tonaluali tobolu bidi, me te bret ulubo be tonalubo bidi me, te augwali si oda selama, tama augwali si te aga sę ebo bidi dabego geduba dolaluagasali.
GEN 40:21 Agai te wain sę tonalubo tobolu bidi te aga sęba ma tagala palali.
GEN 40:22 Tiali goli, Ferogo te bret ulubo sę yali tobolu bidi te niba walali. Te sę dabe pedelali, te Josepgo augwali sigo te na yali po page pusali sogo te wali po tiwai gilama yali.
GEN 40:23 Tiali goli, te wain sę tonalubo bidigo te Josep homugo kone me ebeo. Agai homugo te aga homu dene mu gegeda palali.
GEN 41:1 Te kibu be si bidama, tama Ferogo na yai. Agai te tiwai na yai, aga te moni pabo wę Nail pąde dolaluali.
GEN 41:2 Tama te a naga olama, me badu si te nisai kibu bulmakau te węde pedelama, tama augwali te wę pąde nosai tudali.
GEN 41:3 Nosali te gasa nogo a naga, me badu nogo si bulmakau te węde pedelai. Augwali te nomona selama, tama augwali tonobo te usu meni yani. Augwali aselama, tama te gasa bulmakau hani bidibo madi te wę sesege pąba dolaluagasali.
GEN 41:4 Nosali te nomona sali bulmakau dabego te nisali bulmakau te a naga olama, me si te ela tuali. Tama tiwai na ebaso, tama Fero aga pila muani tagalama, te hodaluai.
GEN 41:5 Tama nosali te aga ma pilama, te agai na ma yali. Te me na yalide te agai suali, te yuyu a naga olama, me si, te yuyu deli dilide pedelali. Augwali te genuai elama, tama ina yani.
GEN 41:6 Nosali te gasa a naga olama, me badu si yuyu te pedelali. Augwali te dwasianu ebaso, tama te bulude posolo yai waligo te augwali ulali.
GEN 41:7 Te nomonasi sia dabego te nisali yuyu a naga olama, me badu si te sia gego pągąwai te nomonasi yuyu dabego augwali dalali. Tialima, megi da, te Fero hodaluama, tama agai te na yalide homu elama, agai koneani.
GEN 41:8 Tama kigamu aga moni homu elama, tama agai te Isip dabe te kolesaga konea pai bidi dabe, me te geme dualali nai dabe subo bidi dabe me, augwali i wali. Agai te na si yali po te augwalibolo wali, tiali goli te na yali page pusabo bidi me deli te usu meni yai.
GEN 41:9 Nosali te wain tonalubo tobolu bidigo Ferobolo te po wali, “Te megi e sogo tama te eno dwai sę yali po me pusubao.
GEN 41:10 Polobadu nago te naga sę bidi dabe dali wado po olama, tama nago ena dali, te bret ulubo sę tonaluali tobolu bidi, da si te kalabus bidi tonalubo bidi dabego beba da si kalabus muani.
GEN 41:11 Tama me sogo hulide te da si piai digi te na yai. Tama da sigo na deli deli yali te aga page tedali elaluali.
GEN 41:12 Tama te Hibru gesi bidi me deli te da si dali bidai. Aga te ami bidi dabe tonalubo bidigo olo sę ebo bidi bidai. Tama da sigo te na yali po dabe agabolo wali. Tialima, agai te da sigo na yali po page hanilama, tama agai te da sigo na yali po page pusai.
GEN 41:13 Tama agai te po wali tiwai gilama, te sę dabe pedelali. Ena te ena yali sęba ma asiyu, tama te bret ulubo tonalubo tobolu bidi te augwaligo aga te nide walali,” wali.
GEN 41:14 Ferogo te Josep i obaso, tama polo augwali te kalabus beba pelama, tama aga oda sigi pai. Josep te penane nisi poalama, tama aga ugwa hasegelama, gasa ugwa gudama, tama aga te Fero bidibo digi pali.
GEN 41:15 Tialima, Ferogo Josepbolo te po wali, “Eno na yai, tama te na yali po page pusabo bidi meni yai. Te bidi dabe augwaligo te po wai, te nago na yali po odobaso da, nago te na yali po page pusubo usu ebo da po wai.”
GEN 41:16 Tiali goli, Josepgo te po wai, “Ena digi eno usugobe, tiali goli Godigo da nage dali dwagi yai sę eyu, agai nagebolo te na yali po page ola mabo usu yaibao,” wai.
GEN 41:17 Tama Ferogo te po wali, “Eno na ebadi, ena te wę Nail sanede dolaluali,
GEN 41:18 tama eno te nisai bulmakau te a naga olama, me si te węde pedelama, tama augwali te wę pąde nosai tubo gagalubo suali.
GEN 41:19 Nosali te gasa a naga olama, me si bulmakau te pedelali. Augwaligo tigi pobea sai, tama augwali te nomona selama, tama tonani mu dwalio. Eno te tobage tiwai bulmakau dabe te Isip badu te dwai me sube.
GEN 41:20 Te nomonasi bulmakau dabego te nisali bulmakau dabe ela tuali.
GEN 41:21 Augwaligo tuali, tiali goli augwaligo te tuali ąǫ me ebeo. Menio. Augwali te polobadu tonani tiwai gilama, te dwai mu elaluali. Tama nosali ena pila muani tagalama, hodaluai.”
GEN 41:22 “Tama nosali ena ma pilama, tama ma na yali. Eno te deli yuyu pagede te a naga olama, me si yuyu te pedalubo suali. Augwali te genuai holama, tama ininama, tau yali.
GEN 41:23 Nosali te gasa a naga olama, me si te yuyu sia pedelali. Augwali te dwasianu holama, tama te bulude posolo yai waligo augwali ulama, tama sasia pali.
GEN 41:24 Te pua pai bugagia holisiąwani te yuyu sia dabe augwaligo te pua pai bugagia holali yuyu sia dabe, te ge pągąwani sia te augwaligo augwali dalali. Eno te na te dualali nai subo konebo bidi dabebolo pusali, tiali goli niwai bidi deli mego te na page pusabo te usu meni yai,” Ferogo te po wai.
GEN 41:25 Tialima, Josepgo Ferobolo te po wali, “Te na si page te deli tiwai tobage naga yali. Godigo nagebolo te agai tamadi yabo sę ola mani.
GEN 41:26 Te nisali bulmakau a naga olama, me si, te kibu be a naga olama, me si dao, tama te wiegi yai yuyu sia dabe me te tiwai, te kibu be a naga te me si tama. Augwali te page deli tiwai elaluali.
GEN 41:27 Tama te nomona sai bulmakau nosali pedalubadi, tama te hagana wai yuyu sia me te pedelama, tama te posolo yai waligo te hagana wai yuyu sasia ilali, te tiwai augwali te kibu be a naga olama, me badu si te nasi yabo kibu be pedelaibao,” wali.
GEN 41:28 “Te tiwai eno nagebolo te po walio, Godigo te agai tamadi yabo sę te nagebolo ola mani.
GEN 41:29 Te kibu be a naga olama, me badu si, te kibu be tomode te nai umabo hauwa te Isipde elaluaibao.
GEN 41:30 Tiali goli, nosali te kibu be a naga me badu si, te tama kibu bede te nasi elalu, tama te Isip bidi dabego te wiegi yai kibu bede yali homu kolesaga te ma kone me palugobeo. Te e tǫ pedai hanu tigidalide te nai nasigo dolaibao.
GEN 41:31 Tama te bulu bidi dabego te polobadu nai hauwa tuali sogo te homugo mu gegeda paibao, magi baso meni, te sogo nosali te dwai nasi mu asabo elaluaibao.
GEN 41:32 Godigo te sę yabo te homugo konea selama, tama mu dąų walali. Tama agai nago aga dąų walali homu konemainogo iliyu, nago na si sogo emainu yali. Tama te sesabi elama bidisiąbadi, te pąde sogo tama Godigo te sę pedalumainu yaibao,” wali.
GEN 41:33 “Tialima, megi da, nago te wiegi yai kolesaga koneai bidi te nigilama, tama agai te Isip tigidali tǫ pedai badu tonalumainao.
GEN 41:34 Tama nago te hanu tǫ tonaluabo te tobolu bidi meba nigilibadi yao. Tama te kibu be a naga me si, tede te nai hauwa elalubadi, te tobolu bidi dabego te a naga pedai badu bugulama, te we bidi dabego gide elalubo nai me deli te gavmanigo te takis sabo tiwai gilama sao.
GEN 41:35 Augwaligo te wiegi yai kibu bede te nai dabe tigidali selama, sisinao. Augwaligo te nage dologode sę eyu, tama augwaligo te wit, me yuyu, me te hanu tomode elalubo nai dabe me, te tigidali deliba sisinao. Tama augwaligo te nai dabe tigidali te bugagia tonaluao.
GEN 41:36 Tama te kibu be a naga olama, me si, te sogode te nasi Isipba pedalubode, te Isip hani dabe we bidigo te augwaligo sisinama muani nai te augwa sela tumainu yaibao. Tama eyu, te we bidi dabe augwali te nasigo me isigobeo,” Josepgo te po wali.
GEN 41:37 Tama Fero dali aga tobolu bidi dabe dali, augwaligo te po usu da po wali.
GEN 41:38 Tama tibaso, agai te po augwalibolo wai, “Te e bidide te Godigo Mobo Bidi elalubao. Dago te tobage bidi tiwai te menade suai dawe?”
GEN 41:39 Tialima, Ferogo te po Josepbolo wali, “Godigo digi nagebolo te sę dabe ola manio. Tama tibaso, mena bidi me deligo te nago te homu kolesaga dagalabo kolesaga tiwai me elalugobeo, te nago koneani homu kolesaga tiwai me elalubeo.
GEN 41:40 Te tama tialima, eno nage te eno hanu tǫde te polalubo gavman bidi nigilama, tama eno hani we bidi Isip dabe tigidali augwaligo nago po wali pomainu yaibao. Ena te gavman tuni bidi te eno nogi deli naga te nago nogi aiyaba elaluaibao,” wali.
GEN 41:41 Tialima, Ferogo Josepbolo te po wai, “Nago odao, megi eno nage te Isip tǫ pedai tigidali badu te gavman genuai bidi nigilibao,” te po wali.
GEN 41:42 Ferogo te tuni bidigo mubo ring me deli elaluali. Tama agai te ring aga nogode munaluali pedelama, tama agai te Josepgo nogoba muani. Ferogo te gasagi yai sawi yai mu ugwa dabe te Josep tigiba gudulama, tama aga magede te golgo nigai sen me deli domonai.
GEN 41:43 Agai Josep te me tuni bidi wiegi yai duabo karisde dualasa bilimainu yali. Tama te kibu hos tego te karis kegasa peyu, tama te ami bidi dabe te polasa peyu, tama te tiwai i ola pali, “Te sunumide gedao,” wali. Te kolesaga Ferogo yali, te Josep te Isip tǫ pedai tigidalide te gavman bidi pedalumainogo ilali.
GEN 41:44 Tama Ferogo agabolo te po wai, “Ena tuni bidi gavman dao. Tama eno te po obao, te Isip bidi me deligo te aga homugo magi sę me egobeo. Menio. Agai te nagebolo hasia hanalu wao,” wali.
GEN 41:45 Tama Ferogo te nogi Safenat Panea te Josepbolo mani. Tama agai te Josepbolo we me deli mani. Te we nogi te Asenat. Aga te Potiferago wegi da, te hanu me deli nogi augwaligo Heliopolis wabo, tede aga pris bidi dao. Tialima, Josep te Isip tǫ tigidali pedai badu bilali.
GEN 41:46 Josepgo kibu be te 30 kibu be elalubadi, tama aga te Isip tuni bidi Ferogo sę gagalama yali. Tama Josepgo te Fero taga peyu, aga te Isip tǫ pedai sesede usu nama bilali.
GEN 41:47 Te wiegi yai kibu be a naga olama, me si, te kibu bede te nai hauwa mu pedelali.
GEN 41:48 Tialima, te a naga olama, me si te kibu bede te Isipde nai hauwa mu elaluali, Josepgo te nai hauwa sisinani. Agai te deli deli hanude elalubo nai sisini bilama, tama agai te tigidali hanu bakstuade te nai muani.
GEN 41:49 Agai te wit umabo mu te wę sane masigi kemi tiwai sisinama, tama Josepgo te ma nedebo te usu meni baso, tagalali.
GEN 41:50 Tama te nasi yabo kibu be dabe te pedalisiąbadi, tama Asenat, te Josepgo wego, te ogwa si ame nani. Asenat te Potifera te Heliopolis hanu pris bidigo wegi dao.
GEN 41:51 Tialima, Josepgo te po wai, “Godigo ena tau selama, tama te eno sali sęgę, me te eno aya ida, ama dede, augwalide homu dene ebo, te eno homugo gegeda palai.” Tama tibaso, agai te aga gomunai ogwa nogi te Manase nogi poai.
GEN 41:52 Agai te tiwai po me wali, “Godigo te ena e sęgę sali bulude tau siyu, tama te agai enabolo te gasa wai me mani.” Tama tibaso, agai te aga tomo ogwa nogi te Efraim poali.
GEN 41:53 Te a naga olama, nogo me si wali, te wiegi yai kibu be bidali te silama,
GEN 41:54 megi da, te Josepgo wali po gilama te a naga olama, me si wali te nasi yabo kibu be pedelai. Te genuai nasi ebo te tigidali gasa tǫ pedaide me pedelali. Tiali goli, te Isip tǫ pedai tigidalide te nai usu elaluai.
GEN 41:55 Nosali te Isip tǫ pedai tigidalide te nasi pedelali, tama te we bidi dabego te Feroba gela weyu, te augwali nai mao wali. Tialima, Ferogo te Isipde bidalubo we bidi augwalibolo wali, “Dage te Josepba pelama, tama agai po odigi pao,” wai.
GEN 41:56 Te dwai nasi mu te Isip tǫ pedai tigidali badu pedalubaso, tama Josepgo te nai muani bakstua sunumi dalama, tama te Isip hani we bidi dabe aselama, te wit abelagasai.
GEN 41:57 Te tigidali tǫ badu bidi hani we bidi augwali me te Isipba Josep bidibo madi aselama, te wit abelagasali, magi baso meni, te dwai nasi ebo si te tigidali tǫ usu nama, te nasi pedelali.
GEN 42:1 Nosali Jekopgo odali, te Isipde wit elalubo po odali. Tama agai te aga ogomanibolo weyu, bomonama, te po wai, “Magi baso dage olo bidalubawe?
GEN 42:2 Eno te po odali, augwaligo te Isipde wit elalubo po odai. Dagego te da tuabo te meba wit abeligi pao, tiyu da te nasigo isabuo,” wali.
GEN 42:3 Tialima, te Josepgo ama dede nogo si bage pelama, te Isipba wit abeligi pali.
GEN 42:4 Tiali goli, Jekopgo te Josep aga deli idago ame nani ama mu, te Benjamin, te augwali dali pomainu me tagala palubeo. Te Jekop wi eyu, tama te Benjamin te dolidali homu yai.
GEN 42:5 Genuai nasi mu te Kenan tǫde pedalubaso, tama te Jekopgo ogwa dabe augwali te wit abeligi peyu, te gasa bidi dabe dali pai.
GEN 42:6 Te Josep aga te polalubo gavman bidi te Isipde bidali, tama tigidali Isip tǫ badu bidalubo bidi dabe te aga bidibo digi pelama, tama te wit abeligi pai. Tama te Josepgo ama dede te aga bidibo madi sabolama, tama augwali te aga gedude kidu sugunama, tama augwali te gesabidi te tǫba basi gulali.
GEN 42:7 Tama Josepgo aga ama dede sulama, tama polo agai augwali sulama, konea pali. Tiali goli, agai augwali dali po miani te agai augwali konesiąwai bage dali po mibo tiwai yai. Agai augwali dali po bomonama, tama te po wai, “Dage menadu asaliwe?” Augwaligo te po wai, “Da te Kenandu aselama, tama da nai abelagasu asali,” wali.
GEN 42:8 Josepgo aga ama dede augwali sulama, konea pali, tiali goli augwaligo aga te sulama, konebe.
GEN 42:9 Agai te na yali dabe te aga ama dede dabe dali na polobadu yali te ma homugo kone palama, tama agai te po wai, “Dage te daba sa asobo bidi dabe dao. Dagego te dago tǫ pedai te mena badu mu te hwįbo bomo meniwe naga sueinu gege bilibao,” wali.
GEN 42:10 Tama augwaligo po wei ponani, “Mena, ąą, genuai bidi. Da te nago sę bidi dabe da, da te nai abelagasu asali.
GEN 42:11 Da tigidali te bidi deligo wai dabe dao. Dago te sa asobo bidi tiwai gilama me ebeo. Menio. Da te mu po wabo bidi dabe dao,” wali.
GEN 42:12 Tiali goli, Josepgo augwalibolo te po wali, “Menio! Dagego te dago tǫ hanu pedai mena badu te hwįbo bomo meniwe naga susa bilibao,” te po wai.
GEN 42:13 Tama augwaligo te po wali, “Genuai bidi, da te nogo si olama, sągągo si bidi da. Da te Kenan tǫde te bidi deligo ogwa dabe dao. Te dago ama gesi bidi mu te megi dago aya dali bidibo, tama dago ama gasa me te hagawai dao,” wali.
GEN 42:14 Tiali goli, Josepgo te po ma wali, “Te tiwai po eno wai dao. Dage te sa asobo bidi dabe dao.
GEN 42:15 Te eno dage te tiwai usu saibao, eno te Ferogo nogide mu po obao. Te dagego ama gesi bidi te asisąbaso, dage te duga buluba ma geasa me pogobeo.
GEN 42:16 Tama dage te kalabuside e bidibadi, te dage me deli tagala palama, tama duga amanu sigi pelama, odasa asao. Tama tiyu, te dago sulama koneainu, te dagego po te mu po we, ma tibo po we, te eno koneaibao. Te dagego po tigidali te mu po menibaso da, eno koneama, te dage sa asai bidi dabe da po waibao. Eno mu po mu te Ferogo nogide obao,” wali.
GEN 42:17 Agai te tiwai po tama olama, tialima agai augwali te kalabusiba munama, te sela sogo bidali.
GEN 42:18 Te sela sogo wabode Josepgo augwalibolo te po wali, “Dagego eno po wali pelama, tama dage bidibo ula elalubao, magi baso meni, eno lotu po te Godiba wabo dao.
GEN 42:19 Te dage mu po wabo bidi dabe da wida, teda dage me deli naga te dage kalabus bidali bede bidimainu yaibao. Tama dage gasa bage, te dage duga we wai dabe nasi ebaso, tau sainu abelali nai wit sela peyu, tama dage pagameo.
GEN 42:20 Tiali goli, dagego duga ama gesi bidi te enaba odasa asiąo, tama tiyu da, te eno koneama, tama dagego mu po wali homu eyu, tama dage me isimainu me egobeo.” Augwaligo te Josepgo po usu da po wai.
GEN 42:21 Tama Josep aga ama dede augwa hasi tomode po miyu, te po wali, “Mu tama, dena digi polobadu te dena ama dwai sę ilali. Dago aga gela wabo suali, tama dago aga tau somainu agai i wali, tiali goli dago agai i wabo me odobeo. Tama megi, da te tiali sęgę sobao,” wali.
GEN 42:22 Tama Rubengo te po wali, “Eno dagebolo weyu, te dagego dena ama doligio po wali, tiali goli dagego te po me odai meni. Tama megi te sęgę dago sabo, te aga isainu yali te wei ponobao,” te po wali.
GEN 42:23 Josepgo te augwa hasi tomode mibo po odoyu, te po page koneani, tiali goli te aga ama dedego te me konebe, magi baso meni, Josepgo te Isip pogo po weyu, tama te po begelebo bidigo te Josepgo wali po te augwaliba weyu yai.
GEN 42:24 Josepgo odama, tama augwali taga pelama, tama aga gela wagi pali. Aga gela wali silama, te aga ma aselama, tama augwali dali po miagasali. Tialima, agai Simeon nogo tų ilama, tama augwaligo Simeon te ama dede augwa gedude nogo tulama, bidali.
GEN 42:25 Nosali Josepgo te sę ebo bidi dabebolo olama, augwaligo te ama dedego begba te wit bulali, tama augwa beg deli deli tomoba te augwa mone ma bubulu pali, tama augwali te sunumidu peyu, tųdu pabo nai me te augwali tau siyu mawai. Tialima, augwaligo Josepgo wali po tiwai gilama yai.
GEN 42:26 Te ama dede augwaligo te augwa donki dabe daiba te wit beg dabe munama, tama augwali pai.
GEN 42:27 Te augwali pigi pali bulu te hulide te augwali pali, te ama mego te aga donki nai mawainu te begde nai tedali. Tama agai te aga mone te beg po tomode bulalubo suali.
GEN 42:28 Tama aga ama dedebolo i wali, “Suao! Augwaligo te eno mone ma te begba bulali! Te eno begde munalubo suai.” Augwaligo te po wabo odama, tama augwali dwai noma mu sali. Tama augwali wi mu elama, tama subigila po miyu, te po wali, “Godigo mena sę dabolo megi yaliwe?”
GEN 42:29 Augwali te Kenanba sabolama, tama augwaligo augwa aya Jekopbolo te augwaliba pedelali sę po tigidali pusali.
GEN 42:30 Augwaligo te tiwai po wai, “Te Isip polalubo gavman bidigo te bomai po dabolo weyu, tama dabolo te da sa asobo bidi dabe dao po wali.
GEN 42:31 Dago te tiwai po agabolo wali, ‘Da te mu po wabo bidi dabe dao,’ wali, ‘tama da te bulu sa asobo bidi dabe menio,’ wali.
GEN 42:32 ‘Da te ama dabe nogo si olama, sągągo si bidi, te bidi deligo wai dabe naga da. Te ama me deli te isai, tama dago ama gesi bidi mu te aga aya dali te Kenande bidibao.’
GEN 42:33 Tialima, te gavman polalubo bidigo te po dabolo ma wali, ‘Te dage me deli ena dali bidibaso da, tama eno koneama, te dage mu po wabo bidi dabe da wainogo. Tama dage meba gasa te dage duga we wai nasi idali weyu maiabo nai wit sela peyu, tama duga piąo,’ te po wali.
GEN 42:34 ‘Tiali goli, dagego duga ama gesi ogwa bidi te odasa asao,’ wai. ‘Tama eno koneama, te dage bulu sa asisąwai bidi dabe da waibao, te dage mu po naga wabo bidi da po wainogo. Tialima, eno duga ama te dagebolo ma menama, tama duga e bulu tǫde bisnis sę iyagameo,’ te bidigo dabolo te po wai.”
GEN 42:35 Tigidaligo te augwa wit beg gegeli pelama, tama augwaligo mone gamugi dage te augwa beg deli deli tomode munalua pabo suai. Tama augwaligo te augwa aya dali augwaligo te mone gamugi dage elalubo sulama, tama augwali tigidali wi yai.
GEN 42:36 Tama Jekopgo augwalibolo te po wai, “Dagego eno ogwa si doligi pai. Josep te hagawai. Simeon me te hagawali. Tama megi dagego te Benjamin hagaligi painu obao. Te tama tebo sęgo te ena homu sęgę mawai!” wali.
GEN 42:37 Tialima, Rubengo te po aga ayabolo wai, “Te eno Benjamin te nageba ma odasa asisąbaso da, teda nago te eno ogwa si ela muagameo. Te eno aga tonalumainu emainao, tama eno aga te nage bidibo madi ma odasa asaibao,” wali.
GEN 42:38 Tiali goli, Jekopgo te po wali, “Te eno ogwa nage dali pomainogo me egobeo. Te aga ama isai dao. Tama agaduba deli naga megi bidibao. Ena monu dabe yai, tama aga te sunumide doloyu da, teda dagego ena te moni homu denego te ela mubo tiwai yaibao,” Jekopgo te po wai.
GEN 43:1 Tialima, te Kenade nasi ebo te genuai me elaluali.
GEN 43:2 Tama Jekop aga hani we wai dabe augwaligo te Isipba sigi pali nai te sia sobaso, tama Jekopgo aga ogomani dabebolo weyu, te po wali, “Dage te Isipba ma pelama, tama dago nai dwasianu meba abeligi pao,” wali.
GEN 43:3 Tiali goli, Judago aga ayabolo te tiwai po wali, “Aya, nagebolo dago wai dao. Te Isipde bidibo gavman tobolu bidigo da dali wado yai. Agai dabolo te dage ede ma sugobeo po wali, te dago ama te da dali me asisąbaso da, te tama tiwai po wai dao.
GEN 43:4 Te nago usu da olama, dago ama te da dali pao obaso da, teda da pelama, te nago nai abeligi paibao.
GEN 43:5 Tiali goli, te nago hagela ebaso da, te da me pogobeo, magi baso meni, te Isip gavman tobolu bidigo te da ma subaso da, te hagela mu yaiba, te dago ama te da dali asisąbaso tiaibao,” wali.
GEN 43:6 Tiali goli, Israelgo te po wali, “Magi baso dagego te gavman tobolu bidibolo te dagego te gasa ama me bidibo po waliwe? Dagego te enabolo genuai sęgę mu manio.”
GEN 43:7 Augwaligo te po wali, ‘Te bidigo dabolo hauwa sogo hanalu wali. Agai te da hani sibi po hanalu wali. Agai te po wali, ‘Te dagego aya bidibowe, ma isaliwe? Te dagego ama me deli bidibowe, ma meniwe?’ Agai te tama tiwai po hanalubaso, tama dago agabolo wali. Dago konebe, agai dabolo te dago ama sela asao wabo po te dago me konebeo.”
GEN 43:8 Tama Judago aga aya Israelbolo weyu, te po wali, “Te Benjamin ena dali tagala palama, te da polo paibao. Tama tiyu, te nage me, te dago wai dabe me, tama da me, te da tigidali te nasigo me isigobeo.
GEN 43:9 Te ena digi eno aga tonaluaibao. Te eno aga nageba ma odasa asisąbaso da, teda te sę page enade elaluaibao, te ena e tǫde tigidali sogo bidibo usu nama tiaibao.
GEN 43:10 Tama nago da dąų wagi menigi sogo da, teda da pelama, tama si sogo ma asigi da,” wali.
GEN 43:11 Tialima, Israel, te augwa aya, agai augwalibolo te po wali, “Te tiwai tama pedalubaso da, teda dagego tama tiao. Te e bulude elalubo te wiegi yai nai dabe te selama, duga genuai waba munama, tama dage pelama, tama te gavman tobolu bidibolo te aga wiegi yai homu emainu magi pao. Te tobage tiwai dwasianu haniani nai tigidali sao, te ganima bunugo nigali pusu yai nai me, te mege me, tama te denami ebo ni kaneme, me te haniani sanda, tama me te meba ni haga du walobo tiwai ni du nogi pistasio, me te ni du amon, te tiwai haniani nai sela pao,” wali.
GEN 43:12 “Dagego te mone dabe dali dabulama, sela pao. Dagego te beg tomoba ma bulali te mone dabe me ma sela pao. Eno konebe, te augwaligo homugo gegeda peyu, tama tiali bogo.
GEN 43:13 Duga ama selama, tama dage te bidi bidibo digi polo pao.
GEN 43:14 Eno gedu haluasa te tiwai, te Tigidali Bomo Elalubo Godigo te bidigo homu begelibaso, te agai dage homu dene yaibao. Tama eno homugo agai te duga gasa ama Simeon me, te Benjamin badi, te si dagebolo ma mawaibao. Te eno ogomani tagalu da, eno bomogo te sę hasegelainu ebo te usu me egobeo,” Israelgo te po wai.
GEN 43:15 Tialima, te ama dede augwaligo te homu wiegi yai ilabo nai dabe selama, tama augwaligo gasa nai dabe te mone dali ugwadu daganama, tama augwali pali. Augwaligo te Benjamin me oda sali. Tialima, augwali hogodama, tama Isipba polo pali, tama augwali Josep bidiboba sabolali.
GEN 43:16 Tama Josepgo te Benjamin augwali dali asobo suali, tama agai aga be tonalubo sę bidibolo wali, “Nago te bidi dabe beba odasa pao. Te bulmakau me deli elama, ulao. Te bidi dabe augwali te ena dali te giliga tomode belo wabode nai tueibao,” te po wai.
GEN 43:17 Tialima, te sę bidigo te Josepgo po wali gilama, tama agai te bidi dabe te Josepgo beba odasa pali.
GEN 43:18 Tama te ama dede wi ebaso, tama augwaligo te tiwai homu yali, ‘Augwaligo te da hasia polasa asali sogo te dago beg tomoba te mone bulali munalubo suai. Augwaligo te homu elama, tama augwaligo da e be tomoba odasa pali,’ te homu yali. ‘Te augwaligo da polo elama, tama augwaligo da te olo sę ebo bidi tiwai nigilaibao. Tama augwaligo te dago donki dabe me saibao,’ te homu yali.
GEN 43:19 Tama tibaso, augwali te Josepgo be tonalubo sę bidi bidibo madi sabolama, tama augwaligo aga dali te be sunumi pąde po miani,
GEN 43:20 “Genuai bidi, nago te dago wabo po odao. Polobadu da eba aselama, tama nai abelagasai.
GEN 43:21 Tiali goli, te da pelama, te deli sogo pigi pali hulide, te da deli deligo dena beg po dada pali, tama da tigidaligo te dena mone te gamugi dagede dali te begde bulalubo suali. Megi dago te mone me ma sela asai dao.
GEN 43:22 Tama dago te nai abelabo mone meba dali sesali. Te dego te dago beg tomoba te mone ma bulali, te dago me konebeo,” te po wali.
GEN 43:23 Tama sę bidigo te po wali, “Dagego homu si me elama, tama dage wi me elamuo. Te duga Godigo, me duga ayago God, agai te dagego homu wiegi yai ilibo sę eyu, te dagego begba te nai ma muani. Dagego mone te eno sai dao,” wali. Tama nosali agai te Simeon augwaliba odasa asali.
GEN 43:24 Tama agai augwali Josepgo beba odasa pali. Agai augwalibolo te sągą wę telabo wę mayu, te nai meba te donkibolo mayu yai.
GEN 43:25 Augwaligo augwa sesali te wiegi yai homu ilabo nai dabe sisi ilali, magi baso meni, te augwaligo odali, te Josep augwali dali giliga tomode te belo wabode augwali dali nai tuagasaibao po wabo odali.
GEN 43:26 Augwali te bede bidaludubadi tama Josep asali. Tama augwaligo te wiegi yai homu ilibo nai dabe te agaba sela pelama, tama augwaligo agaba kidu sugunama, tama mage tǫba basi gulali.
GEN 43:27 Josepgo augwaliba hanalu wali, “Dage bugagia bidibowe, ma meniwe?” Nosali agai augwaliba hanalu wali, “Magi yaliwe, te duga aya monu, polasa dagego te aga po enabolo wali, aga te bugagia bididubowe?”
GEN 43:28 Augwaligo te po wali, “Dago aya, nago sę bidi, aga te bugagia bidibao.” Augwaligo kidu sugunama, tama agaba mage basi gulali.
GEN 43:29 Josepgo te aga ama mu Benjamin sulama, tama agai te po wali, “Te bidi aga te dagego ama gesi ogwa bidi mu yali bogo, polasa dagego te aga po dagego enabolo wali, te dawe? Ogwao, eno homugo Godigo dwagi yai olo tau sabo sęgo nage tau somainogo yao,” wali.
GEN 43:30 Tama Josepgo aga amanu homu dene mu yali. Tama pąde aga gela wainu yali. Tama polo agai augwali taga peyu, te aga be habuba pelama, tama geme naga gela wali.
GEN 43:31 Aga te gela ola silama, tama aga gesabi te węgo tedelama, tama aga ma asali. Agai te homu dene ebo te aga homu tomode dąų olama, tama aga sę bidibolo te po wai, “Te tebol saiba nai muao,” wali.
GEN 43:32 Augwaligo te Josepgo nai te gasa tebol saiba muyu, te aga ama dedego nai te gasa tebol saiba muyu yali. Te Isip dabe augwaligo te Hibru dabe dali nai deli madi tubo te hagela yai. Te augwaligo bomai pode te dolo meni da, te homu yai.
GEN 43:33 Augwaligo te Josep aga ama dede augwali te tebol saide te agai gedu te gesabidi te badu dugayali. Tama augwaligo te ama dede augwa idago ame nani usu nama, tama waselali. Augwaligo te gomunai bidide gagalama, te sabi bidi te ogwa bidiba simanigi pali. Tama te ama dede augwa digi te tiwai dualalubo suali, tama augwaba digi ma tonono pelama, tama augwa homu hauwa eyu, noma sali.
GEN 43:34 Tama te Josepgo sę ebo bidi dabego te Josepgo tebol saide nai selama, te ama dedebolo dobalama, tuali. Tama te ama dedego nai togolama, dobayali, te tuabo usu naga mani. Tiali goli, te Benjamingo nai te augwaligo genuai mu togwali, te a naga bidigo tuabo nai usu. Tialima, augwali te nai me, wę me te Josep dali hodobo tuyu, tama augwali homu pemene wiegi yai mu yali.
GEN 44:1 Augwali nai tula silama, tama Josepgo te aga be tonalubo sę bidibolo te po wali, “Te nai dabe te bidi dabe augwaligo sela pabo usu nama, tama te begba bulao, tama deli deligo mone te augwa beg poba bulao.
GEN 44:2 Tama eno silva kap te augwaligo ama te sabi bidigo beg tomoba te wit abelali mone dali bulao,” wali. Tialima, sę bidigo te Josepgo wali po tiwai gilama yali.
GEN 44:3 Tama kigamu digi mu te sę bidi dabego te Josepgo ama dede augwali te augwa donki dabe dali pomainu tagala palali.
GEN 44:4 Augwaligo te genuai hanu tagalama, tama augwali digibulu gana pisąbadi, tialima Josepgo te aga be tonaluali bidibolo weyu te po wali, “Nage hogodama, tama te bidi dabe pali wali pobeao. Te nago augwali subosi da, teda augwalibolo nago te tiwai po hanalu wao, ‘Eno genuai bidigo dage dali dwagi yai kolesaga yali dao. Magi baso dagego aga wei ponoyu, tama dwai kolesaga yaliwe?
GEN 44:5 Magi baso dagego eno genuai bidigo silva kap wi sela soaliwe? Genuai bidigo te kapde wę tuyu, tama agai te mena sę nosali pedelabo te me konebo sę ebo dao. Dagego dwai kolesaga mu yalio!’ Nago augwalibolo tama po wao,” wali.
GEN 44:6 Te Josepgo sę bidi te augwaliba sabolama, tama augwalibolo te Josepgo wali po te augwalibolo wai.
GEN 44:7 Tiali goli, augwaligo te tiwai po wei ponani, “Genuai bidi, nago mena tiwai homu elalubaso, tama nago te tiwai po obawe? Dago te tiwai kolesaga yabo te usu me egobeo.
GEN 44:8 Nago da te Kenan tǫdu ma asali, te nago suai dao. Tama dago te dena beg pode te bulali mone dabe te dago ma sesali. Tama megi magi baso nago homugo dago nago genuai bidigo bede te gol silva te dago wi sela soali homu ebawe?
GEN 44:9 Genuai bidi, nago te kap te da me deligo munalubo subaso da, teda te bidi isimainu yaibao, tama da tigidali te nago olo sę ebo bidi pedelaibao,” wali.
GEN 44:10 Tama sę bidigo te tiwai po wei ponani, “Dagego po te dolo obao. Tialima, eno te kap gasa bidi me deligo begde bulalubo subaso da, teda te bidi deli naga aga te eno sę olo ebo bidi pedelaibao. Tiali goli, dage meba gasa bage te duga piagameo,” wali.
GEN 44:11 Tama polo tama te augwali deli deligo beg te tǫba muna muna pelama, tama dayali.
GEN 44:12 Te Josepgo sę bidigo te kap gegebo sę te augwa ama gomunai bidigo begde gagalama, susa paligo te augwa ama gesi ogwa bidigo begba siminigi pali. Tama agai te kap te Benjamingo begde bulalubo suai.
GEN 44:13 Te ama dedego te tiwai elalubo sulama, te midigi dwai noma mu selama, tama augwaligo te augwa gudaluali ugwa dabe pisą yali. Tialima, augwaligo te beg dabe te augwa donki tudiba ma munama, tama augwali gelama, te hanuba ma pai.
GEN 44:14 Juda aga ama dede dali te Josepgo beba sabolama, tama augwaligo aga te bede me bidalubo suali. Tama augwali wi mu ebaso, tama augwaligo augwa digi te Josep gesabidiba gedude te tǫba degasa dulali.
GEN 44:15 Tialima, Josep hodalu, tama augwalibolo te po wali, “Dage magi yaliwe? Te dagego ena te haniani geme yai sę page koneabo bidi da, te homu ebewe?”
GEN 44:16 Tama Judago po wei ponoyu te po wai, “Genuai bidi, te dago po mena tama wei ponagawe? Godigo te dago sęgę haninani. Genuai bidi, te nago kap elalubo suali naga, aga te nago olo sę ebo bidi me pedalugobeo. Menio. Da tigidali hodobo tiaibao,” wali.
GEN 44:17 Josepgo te po wali, “Te me tegobeo! Eno tama me egobeo. Te augwaligo te kap munalubo suali bidi, te aga naga eno sę olo ebo bidi pedelaibao. Tiali goli, dage tigidali meba te duga aya bidibo digi ma piagameo. Eno dagede po menio,” wali.
GEN 44:18 Juda te Josepba pelama, te po wali, “Genuai bidi, te dago po nage dali omainogo yao. Nage genuai bidi mu te Fero aga tiwai dao. Tiali goli, eno homugo te nago ena dali wado po me olamuo.
GEN 44:19 Polobadu nago dabolo te tiwai po hanalu wali, ‘Dagego aya me ama dede bidalubowe?’ wali.
GEN 44:20 Tama dago te po wali, ‘Awe, dago aya bidibo, aga te monu dabe yai. Tama dago ama gesi ogwa bidi me bidibo,’ wai. ‘Te ida Reselgo te aya monu dabe badi ame nani,’ te po wai. ‘Tama te gesi ogwa bidi aga ama te isai da. Tama te Reselgo ame nani ogwa si te me deli naga bidibo,’ wai, ‘tama aga ayago aga godolo mu ebo dao,’ wai.
GEN 44:21 Tama genuai bidi, nago te tiwai po dabolo wai, ‘Te dagego ama odasa aselama, te eno sueibao,’ wai.
GEN 44:22 Tama dago nago po te tiwai wei ponani, ‘Te waigo aga aya me taga soagobeo,’ wai. ‘Te aga aya taga sobaso da, teda aya isaibao,’ wali.
GEN 44:23 Tama nosali nago te tiwai po me wai, ‘Te dagego ama gesi ogwa bidi te dage dali asisąbaso da, teda dage ena geduba me pedelamuo,’ wali.”
GEN 44:24 “Da te dena aya bidibo madi ma pali, te nago sę bidi, tama dago te nago dabolo wali po te agabolo wai.
GEN 44:25 Nosali ayago te po wali, ‘Dage ma pelama, tama dago nai dwasianu abeligi pao,’ wai.
GEN 44:26 Tama dago te po wali, ‘Da me pogobeo. Te ama gesi ogwa bidi te da dali pisąbaso da, teda da te bidi geduba me pedalugobeo. Menio. Tiali goli, te ama gesi ogwa bidi te da dali pali da, teda da paibao.’
GEN 44:27 Tama dago ayago dabolo te tiwai po wai, ‘Dagego koneani, eno te wego ogwa si digi ame nani.
GEN 44:28 Te me deligo ena taga pai dao. Eno aga munu ma subeo. Tama eno homugo te uni kibugo ela tuali homu yai dao.
GEN 44:29 Megi dagego te gasa gesi ogwa bidi te ena digibulu odasa painu wabo, tama aga te isibaso da, teda dagego ena homu dene dwai mu ilaibao. Ena monu dabe yai, tama te homu denego ena mu silaibao,’ dena ayago te po wai.”
GEN 44:30 “Genuai bidi, megi da, te ena olo ma pobaso, tama ayago te ogwa ena dali ma asobo susiąbaso da, teda aga isaibao, magi baso meni, agai bidibo homu kolesaga te waigo bidibo homu kolesagaba mu dąų wagi pai. Te dago aya te monu dabe dwai mu. Tama te wai da dali ma hodobo asisąbaso da, teda dago te aya aga homu dene ilibogo te aga digi ela mubo tiwai mu yaibao.
GEN 44:32 Eno te tiwai po me agabolo dąų wali, te eno te wai te ma odasa asisąbaso da, teda te sę yabo page te enade elalubadi, te ena isibo si usu naibao.
GEN 44:33 Tama tibaso, eno te waigo pesage selama, tama ena ede nago sę olo ebo bidi bidaio. Te nago aga te aga ama dede dali ma pomainogo emainao.
GEN 44:34 Tama te wai ena dali ma pisąbaso da, ena te aya pageba ma pogobeo. Eno te tiwai sęgę te eno ayaba pedalubo te eno homude hagela yaibao,” Judago te Josepbolo te po wali.
GEN 45:1 Te Josepgo aga homu dene ebo te aga sę bidi dabe gedude te ma pania sabo te usu yabo ąǫ isąbaso, tialima agai te i bomo elama wali, “Dage tigidali bidi dabe buluba bolo pebelayao.” Tama agaduba deli naga te aga ama dede dali bidali. Tama agai augwalibolo wali, “Ena da, ena te duga ama Josep, te ena tama dao,” wai.
GEN 45:2 Tama Josepgo gela genuai mu wali, tama Isip dabe odali, tama te tebo po te gavman tuni bidigo beba pedelali.
GEN 45:3 Josepgo aga ama dedebolo te tiwai po wali, “Ena Josep dao. Eno aya te bidibowe, ma isai dawe?” Tiali goli, aga ama dede agade wi mu elama, tama didibili eyu, tama augwaligo agai po wei ponabo ąǫ isiąwai.
GEN 45:4 Nosali Josepgo po ma olama, “Dage ena pąba asiąo,” wali. Augwali te aga pąba pobaso, tama agai te po wali, “Ena Josep, ena te dagego ama dao. Polobadu dagego ena te Isip dabe dali tagala palai dao.
GEN 45:5 Tiali goli, megi dage homu sęgę me isiąyu, tama dagego duga digi dwai homu te polobadu dagego ena dali dwai kolesaga yalide, te dwai homu me igio. Menio. Godigo digi eno te dage me isidali weyu, te tau somainu te ena polasa tagala palali.
GEN 45:6 Te megi e bulude nasi elalubadi, te kibu be si yalio. Tiali goli, te bidi dabego gide nai sela tusiąbadi, te nai sili bidabo kibu be te a naga me elalubao.
GEN 45:7 Tiali goli, Godigo te ena polasa tagala palali, te dage me isidali olama tama tiali. Tama Godigo bomonama, tama dage tau sobaso, dage hauwa te bidibo ula dali me bidaibao.
GEN 45:8 Tama dagego digi enade mone siyu, tama ena tagala palobaso, te ena e buluba soabeo. Menio! Godigo digi ena tagala palobaso, tama ena soali. Tama agai ena te Ferogo aya tiwai ilali. Eno agai bede me bulubadu hani tigidali tonalu, tama ena te Isip tigidali pedai badu tolalubo tobolu bidi bidibo dao,” Josepgo te po wai.
GEN 45:9 “Megi da, dage te dena aya bidiboba pelama, tama agabolo wagi piąo, ‘Te e po te naga ogwa Josepgo po da, Godigo ena te Isip pedai tigidali badu tobolu bidi nigilama bidibao. Nago me tonalugio. Nage polo asao.
GEN 45:10 Te nage ena bidibo pąde te tǫ Gosen pąde bidagameo. Nage me, naga ogomani dali, tama naga ogwa dabego wai puluba me, dage te tǫde te duga sipsip me, meme dabe me, bulmakau dabe me, duga doado bage tigidali dali, tede bidagameo.
GEN 45:11 Te nage te tǫ Gosenba bidagasobaso da, teda eno nage tonaluaibao. Te nasi yabo kibu be te a naga me elalubao, tama eno homugo nage, me nago we wai puluba, me kibu dabe dali, te nasigo dolidali homu eno hagela ebao.’ Ayabolo te po wao,” wali.
GEN 45:12 “Megi dage tigidaligo me, te eno ama Benjamingo me, dagego ena sulama, konea pali. Te ena Josep tama dao, eno te po megi dage dali obao.
GEN 45:13 Te eno ayabolo weyu, te ena genuai nogi megi te Isip tǫde genuai elalubo po obadi, tama agabolo me te tigidali nai dagego sula silali po wao. Tialima, dage polo pelama, tama aga odasa eba asao,” Josepgo te po wali.
GEN 45:14 Tama Josepgo aga ama Benjamin pagea selama, tama gela wali. Benjamingo te aga ama bomonama pagea selama, tama gela wali.
GEN 45:15 Tama Josepgo aga ama solo tigidali nono neyu, tama gela dali wai. Tama nosali augwaligo aga dali po miani.
GEN 45:16 Te gavman tuni bidi Ferogo beba te tiwai po sabalu, te Josep aga ama dede sabolali po wali. Tama Ferogo me, te sę ebo ofisa bidi dabe dali, augwaligo te pode wiegi yai homu pemene mu yali.
GEN 45:17 Ferogo te tiwai po Josepbolo wali, “Nago naga ama dedebolo olama, te augwaligo augwa donki dabe sisi elama, tama augwali te Kenanba ma pao,” wali.
GEN 45:18 “Te augwaligo augwa aya, me augwa we wai puluba oda sigi pelama, tama augwali ena pageba ma asiąo. Te ena Ferogo augwalibolo te Isipde wiegi yai tǫ me deli mawaibao. Tama augwali te bulu nai te wiegi yai mu sela tueibao.
GEN 45:19 Nago augwalibolo te Isipde te karis meba dali selama, te augwaligo augwa we wai puluba dali sela asomainu te po wao. Te augwaligo augwa aya me eba odasa asao po wao.
GEN 45:20 Te po augwaliba weyu, augwaligo te Kenan tǫde taga soabo naide homu godolo me elamuo. Te eno augwalibolo te Isip bulude te wiegi yai tǫ pedai me deli mawaibao,” te tuni bidi Ferogo Josepbolo te po wai.
GEN 45:21 Te Jekopgo ogwa dabego te Ferogo augwaliba wali po tiwai gilama yali. Tama Josepgo te kibu hosgo kegabo karis meba augwaliba mani, te meba nai augwali te sunumidu peyu tuabo nai dali mani, te Ferogo wali gilama tiali.
GEN 45:22 Tama agai ama tigidali deli delibolo te gesi gudubo ugwa mena mena pali. Tiali goli, te Benjaminbolo agai te gudubo ugwa a naga badi, te mone 300 silva mone mobadi yali.
GEN 45:23 Tama Josepgo te Isipde ebo wiegi yai doado bage hauwa te nogo si donkiba munama, tama aga ayabolo tolali. Tama agai gasa nogo si so donki dali, te wit me bret badi, tama te haniani nai te aga aya sunumidu asobadi te tau selama tųdu asabo nai me tolali.
GEN 45:24 Josepgo aga ama dede augwali tagala paliyu, augwalibolo te tiwai po wali, “Dage peyu, tama dagego duga hasi konila po olamuo,” wali.
GEN 45:25 Augwaligo te Isip tǫ kantri tagalama, te augwa aya Jekop bidibo madi te Kenanba sabolali.
GEN 45:26 Augwaligo te po wali, “Josep te isibe yalio. Menio. Aga bidali, tama megi agai te Isip tǫ pedai tigidali tonalubao,” wali. Jekop te midigi dwai mu selama, tama agai te augwaligo wabo poba te homu dąų me wabeo.
GEN 45:27 Tialima, augwaligo te Josepgo augwalibolo wali po tigidali agabolo wali. Tama Jekopgo suali, te Josepgo aga te Isip odasa asomainu tolali karis dabe. Tama aga wiegi yai homu pemene mu yai.
GEN 45:28 Tialima, Jekopgo te po wali, “Mu tama dao! Megi eno koneani, eno ogwa Josep te bidibo ula elalubao! Eno aga sugi paibao. Tama nosali ena isimainu yaibao.” Te po wai.
GEN 46:1 Te Jekopgo aga doado bage tigidali sisinama, tama aga te Berseba teba pelama, tama agai te aga aya Aisakgo Godiba ofa igi pali.
GEN 46:2 Te hulide nade God te Jekopba pedelama, tama i wali, “Jekop, Jekop.” Tama Jekopgo te po wali, “Ae, ena e bidibao.”
GEN 46:3 Tialima, Godigo te po wali, “Ena God dao. Ena te nago ayago God dao. Nage te Isipba pabo wi me elamuo. Te eno nago hani sibi wąį dabe te genuai hani mu pedelimainu ilaibao.
GEN 46:4 Te ena digi ena nage dali te Isipba pelama, tama nosali eno nago hani wąį dabe te eba ma odasa asaibao. Tama Josep nage dali bidibadi, te nage isibo siba usu naibao,” wali.
GEN 46:5 Tialima, Jekopgo Berseba taga soali. Tama aga ogomanigo aga me, te augwa we dabe me, tama te dwasianu wai te Ferogo augwali te sela asomainu te tolali karisba munama pali.
GEN 46:6 Tama augwaligo te Kenande sali te bulmakau me, te gasa nai dabe dali selasa peyu, tama augwali te Isipba pai.
GEN 46:7 Tigidali ogwa me, wegi dabe dali, te dwasianu ogwa wąį me we, augwali tigidali te Jekop dali pali.
GEN 46:8 Te Jekop dali Isipba pali hani dabe augwali nogi e dao. Te gomunai ogwa Ruben da.
GEN 46:9 Te Rubengo ogwa dabe nogi te e tiwai, Hanok, me Palu, me Hesron, me Karmi.
GEN 46:10 Tama Simeongo ogwa dabe nogi e dao, Jemuel, me Jamin, Ohat, Jakin, Sohar me Saul. Saul te Kenan wego ame nani ogwa dao.
GEN 46:11 Tama te Livaigo ogwa dabe e da, Gerson, me Kohat, me Merari.
GEN 46:12 Tama Judago ogwa dabe e tama da, Er, me Onan, me Sila, me Peres, me Sera. Tiali goli, Er de Onan si te Kenande isali. Tama te Peresgo ogwa dabe e da, Hesron me Hamul.
GEN 46:13 Tama te Isakargo ogwa dabe te e dao, Tola, Puva, me Iop, me Simron.
GEN 46:14 Tama te Sebulungo ogwa dabe e tama, Seret, me Elon, me Jalel.
GEN 46:15 Ruben me Simeon, me Livai, me Juda, me Isakar, me Sebulun te Jekopgo we Leago, te augwali Mesopotemiade bidali sogo te augwali ame nani. Agai te wegi me deli me ame nani, te wegi nogi Daina. Te we Leago ame nani wai dabe te wąį te tigidali 33 usu dao.
GEN 46:16 Te Gatgo ogwa dabe te e tama, Sifion, me Hagi, me Suni, me Esbon, me Eri, me Arodi, Areli.
GEN 46:17 Tama te Asergo ogwa dabe te e tama, Imna, me Isva, me Isvi, me Beria, tama augwa abe da Sera da. Tama te Beriago ogwa dabe te e tama, Heber me Malkiel.
GEN 46:18 Tama te 16 hani sibi augwali te Jekopgo wąį te ogwa dabe te we Silpago ame nani. Silpa te sę ebo we te Labango aga wegi Leabolo mani, te sę ebo we dao.
GEN 46:19 Te Jekopgo we Reselgo wai te e tama, Josep de Benjamin si dao.
GEN 46:20 Josepgo we Asenat te Isipde selama, tama ogwa si ame nani, Manase me Efraim. Asenat te Heliopolis bulu pris bidi Potiferago wegi dao.
GEN 46:21 Tama te Benjamingo ogwa dabe te e tama wali, Bela, me Beker, ma Asbel, me Gera, me Naman, me Ehi, me Ros, me Mupim, me Hupim, me Art, tama da.
GEN 46:22 Te 14 bage, te augwali Jekopgo ogwa dabe me wai, te Reselgo ame nani hani dao.
GEN 46:23 Dango te ogwa deli naga ame nani, te Husim dao.
GEN 46:24 Tama te Naptaligo ogwa dabe te e tama, Jasiel, me Guni, me Jeser, me Silem.
GEN 46:25 Te augwali 7 hani te we Bilhago ame nani. Bilha te sę ebo we Labango te aga wegi Reselbolo mawai.
GEN 46:26 Te Jekopgo ogwa dabe me wąį hani dabe dolo te Isipba pali, te 66 hani augwali Kenandu pali. Te nedali te Jekopgo ogwa dabego we dabe te augwali nedebe.
GEN 46:27 Te Josepgo wego ogwa si te Isipde ame nani. Tama tialima, te Jekopgo hani tigidali augwali te Isipba pali bage nedeyu, tama Josep aga we waide nedali te deliba sisinama, te namba te bidi sese sela olama, gasa bidigo nogo si, te 70 tama augwali te sogo Isip tǫba sisinama, bidai dao.
GEN 46:28 Te Jekopgo Juda polasa tagala palali, te Josepbolo hanalugi pomainu pelama, te aga aya agai te Gosen hanu tǫba tiąba asomainu yali. Tama Jekopgo hani augwali te sabolubo sogode,
GEN 46:29 tialima Josepgo te agai po ola tolama, te aga karis sela asobosi, te aga aya tiąba peyu, te Gosen tǫba pali. Aga aya bidiboba sabolama, tama polo aga pagea sigi pelama, tama gela sesabi elama mu wali.
GEN 46:30 Tialima, Jekopgo Josepbolo te po wali, “Megi da, ena isibaso, te usu dao, magi baso meni, eno nage suali, tama eno koneani, te nage bidibo ula dali bidibo te eno suali,” wali.
GEN 46:31 Tialima, Josepgo aga ama dedebolo me te aga ayago we wai sibibolo te po wai, “Megi da, te eno Ferobolo e tama po wagi paibao, ‘Eno ama dede me eno ayago hani dabe, augwali te Kenande bidali te enaba aselama, bidibao,’ po waibao.
GEN 46:32 ‘Te hani bidi dabe augwaligo te sipsip me bulmakau dabe tonalubo sę ebo da. Augwaligo sipsip me bulmakau dabe dali te tigidali doado bage sela asai,’ eno agabolo te po pusaibao.
GEN 46:33 Tama Ferogo dage i olama, tama dagebolo hanalu, te dagego magi sę ebo dawe po obaso da,
GEN 46:34 teda dagego e tiwai po agabolo waiąo, ‘Genuai bidi, dago te bulmakau me sipsip tonalubo sę te da dwasianu ogomani elalubadi gagalama, te megi e sogoba usu nagasali, te dago dena aya dede hanigo polobadu yali tiwai te dago me yai.’ Te dagego te tama tiwai po weyu da, teda dage te Gosen tǫ pedaide bida po waibao. Eno tama tiwai po wali, magi baso meni, te Isip bidi dabe augwaligo te sipsip tonalubo bidi dabe te augwaligo godolo me ebo meni, tama tedali bidimainao homu ebo dao,” Josepgo aga hani bagebolo te po wai.
GEN 47:1 Tialima, Josepgo te tiwai po Ferobolo wagi pali, “Te eno aya me, eno ama dede dali, augwali te Kenan tagalama, tama megi eba sabolalio. Augwaligo te sipsip dabe me, te bulmakau me, tama augwa doado bage tigidali selasa asai. Augwali megi te Gosen tǫde bidibao,” wali.
GEN 47:2 Tama Josepgo aga ama dede a naga sela pelama, tama agai augwali te Ferobolo ola magi pali.
GEN 47:3 Tialima, Ferogo augwalibolo hanalu wali, “Dagego magi sę ebo dawe?” Augwaligo te po wai, “Genuai bidi, dago te sipsip dabe te dena ayago polobadu yali tiwai, te dago me te sipsip dabe tonalubo sę ebo dao.
GEN 47:4 Da te e bulude bidiyu, sę yainu asali, magi baso meni, te nasi genuai te Kenan tǫde eyu, tama dago sipsip dabe te tuabo nosai meni baso, da eba asai. Tama dago homugo te nago dabolo usu da po obaso da, teda da te tǫ Gosende osogo bidaibao,” wali.
GEN 47:5 Tialima, Ferogo Josepbolo te po wali, “Te nago aya me, te nago ama dede dali, augwali te asalio.
GEN 47:6 Te Isipde wiegi yai tǫ hauwa te elalubao. Nago me deli gegelama, tama augwali teba muao. Te augwali te Gosende bidainogo ebaso da, te usu dao. Tama nago koneani, te augwali mebago te bulmakau tonalubo sę kuna koneani homu eyu da, teda nago augwali te eno bulmakau tonaluabo bidi me nigilao,” wali.
GEN 47:7 Tialima, Josepgo te aga aya Jekop te Fero pageba odasa pali. Tama Jekopgo agabolo te “Eno homugo nage bugagia bidao,” wabo po te Ferobolo mani.
GEN 47:8 Tama Ferogo agabolo hanalu wali, “Nago kibu be nisu naga megi elalubawe?”
GEN 47:9 Jekopgo te po wai, “Eno kibu be te 130 elalubadi, te ena tigidali tǫ pedaiba bilali. Tiali goli, te kibu be dabe te bobage sogo sesabi elama bidisiąbadi, tama ena sęgę hauwa gegali. Te eno kibu be yali, te eno aya dabego yali kibu be te augwali bilali kibu beba usu nubeo,” wali.
GEN 47:10 Tialima, Jekopgo Ferobolo nage tao po olama, tama aga pali.
GEN 47:11 Nosali Josepgo aga aya me, aga ama dede dali, te Isipde bidimainu tau sali. Agai augwalibolo te Rameses hanu badu elaluali tǫ te augwali mani. Te tǫ te wiegi yai mu tama, te Isipde elaluali tǫ dabe tigidali aiyaba elaluali. Josepgo te Ferogo wali po tiwai gilama yai.
GEN 47:12 Agai te aga aya me, aga ama dede me, te augwa we wai puluba usu nama, te bidabo tubo nai mani.
GEN 47:13 Te genuai nasi mu pedelama, tama tigidali tǫ pedai badu nai meni yai. Tama te Isip me Kenan tǫ bidi dabe si te augwali bomo mu meni yai.
GEN 47:14 Josepgo te Isip de Kenan bidi dabego te wit abelali mone tigidali sisinama, tama agai te Fero pageba selasa pai.
GEN 47:15 Te Isip me Kenan tǫde bidali we bidi tigidaligo mone silali. Tialima, te Isip we bidi tigidali te Josepba pelama, tama augwaligo te po wai, “Nago da nai mao! Te meniyu da, teda nasigo da isaibao. Te nago da tau sabo sunumi me deli gegao! Te dago mone tigidali silalio,” wali.
GEN 47:16 Josepgo te po wali, “Te dagego mone mu silali wida, teda dagego kibu sibi dabe enaba selasa asao, tama eno dage nai mawaibao.”
GEN 47:17 Tialima, augwaligo te hos dabe me, te sipsip me, meme dabe me, bulmakau dabe me, te donki dabe me, te augwaligo Josepba sela asobaso, tama Josepgo augwali nai mani. Josepgo te tiwai sę ela pidubadi, te kibu be siligi pali.
GEN 47:18 Tama gasa nosali kibu be mede augwali te Josep pageba ma pelama, tama augwaligo te po wali, “Genuai bidi, dago sęgę ebo te nagebolo geme me dualugobeo. Te dago mone tigidali silibadi, te tigidali sipsip me bulmakau, te doado bage te nageba mena silai elalubao. Dago nageba maiabo nai me elalubeo. Te dago tigi dali, te dago tǫ dali si naga te elalubao.
GEN 47:19 Nago da te nasigo isimainu sula tagalamuo. Te nago da tau sabo sunumi me deli gegaibawe? Nago te gasa bidi dabego dago tǫ somainogo elamuo. Nago da me, te dena tǫ dali abelama, tama da nai mao. Te da Ferogo olo sę ebo bidi selama, tama agai dago tǫ me saibao. Tiali goli, nago da bulabo nai wai mao. Meniyu da, te da tigidali nasigo isiyu, tama te bulude bidi meni yaibao,” te po wai.
GEN 47:20 Te nasi bomo mu ebaso, te Isip we bidi tigidaligo te augwa tǫ Josepba menama, tama agai te tǫ tigidali abelai. Tama te Isipde tigidali tǫ te Ferogo tǫ naga pedelama, elaluali.
GEN 47:21 Tama te Isip tǫ pedai tigidali badu we bidi tigidali augwali te Ferogo sę olo mu ebo we bidi pedelali.
GEN 47:22 Te Isip bagego lotu wabo pris dabego tǫ naga te augwaligo me abelibeo. Ferogo te pris dabebolo mone menama, tama te monego augwaligo nai abela tuyu, bidali. Tama tibaso, augwaligo tǫ te me abelimainu me ebeo.
GEN 47:23 Te Josepgo te tiwai po te tigidali we bidibolo wali, “Dagego odao, te megi e sogode eno dage me, te dagego tǫ dali abelalio. Megi da, dage te Ferogo bage elalubao. Te e da dagego bulabo nai wai dao. Tialima, dagego te giba bulugi pao,” wai.
GEN 47:24 “Nosali te gide bulali nai tau elama, sabo si, teda dagego te nai bugulama, pesage a naga holama, tama a wali pesage Ferobolo mao. Te me si me si nama pesage te dagego sao, meba te wai bulao, me badu duga we wai dali tuabo nai muao,” wali.
GEN 47:25 Tama augwaligo te po wai, “Genuai bidi, nago da tau mu saligo, tama da me deli te gų pageba me mubeo. Tialima, megi da, nago homugo usu eyu da, da tigidali te Ferogo sę olo mu ebo bidi dabe pedelaibao,” wali.
GEN 47:26 Tialima, Josepgo te tiwai bomo yai po me deli te Isipde muani. Te gide nai inabosi da, teda augwaligo gide sabo nai bugulama, pesage a naga holama, tama a wali pesage te Ferogo nai dao, te bomai po te megi me elalubao. Te prisgo tǫ naga te Ferogo me sabe.
GEN 47:27 Te Israel dabe augwali te Gosen tǫde bidaluali, tama augwaligo wai dabe umabo hauwa mu ame nani, tama augwaligo doado bage me hauwa elaluali.
GEN 47:28 Jekop te Isipde bidibadi, te kibu be nogo si olama, sągągo a naga, me badu sągą si wagi soali, tama agai kibu be deliba sisinama, te kibu be 147 mu bidai.
GEN 47:29 Te pąde Jekop isainu yali. Tama tibaso, aga ogwa Josep i olama, agabolo te po wali, “Te nago enabolo usu da po weyu da, teda nago nogo si te eno sągą si tomoba munama, tama nago bomai po dąų mu weyu, te nago ena bugagia tonaluama, tama ena isibode nago ena te Isipde munu me pubulamuo.
GEN 47:30 Eno homugo nago ena te ena aya dede pąba pubaligi pao. Te ena Isipdu ugwaba tolasa pelama, tama ena te augwali muani gų pageba pubaligi pao,” wali. Josepgo te tiwai po wei ponani, “Te eno nago po wabo gilama tama tiaibao,” wali.
GEN 47:31 Tiali goli, Jekopgo te po wali, “Megi nago te sę mu yaibao olama, tama mu dao po wao.” Josepgo te bomo yai po dąų walama, tama agabolo nage usu da po omainogo eyu, Jekopgo tobolu te aga betiba pǫgulali.
GEN 48:1 Te meba sogo bidama nosali, augwaligo Josepbolo te po wali, “Nago aya gasi elalubao,” wai. Tama Josepgo aga ogwa si, Manase me Efraim si oda sobadi, tama augwali pelama, aga aya sugi pali.
GEN 48:2 Te bidi dabego Jekopbolo te tiwai po wali, “Te nago ogwa Josepgo te nage suainu asalio.” Tialima, Israel te dwasianu bomo elama gana hodaluama, tama betiba duagulali.
GEN 48:3 Josep sabalubosi, tama Jekopgo agabolo te po wali, “God te Tigidali Bomo Elalubo te enaba te hanu Lusde te Kenande pedelali, tama agai ena wiegi yai mobo menama,
GEN 48:4 tama agai te po wali, ‘Te eno nagebolo wai hauwa mawaibao, tama nago waigo wąį dabe te bidi hani hauwa pedelaibao. Te augwalibolo te e tǫ menama, tama augwaligo tǫ gagalama, sesemane sogo bidaibao.’
GEN 48:5 Ena nage bidibo digi te Isipba asisąbadi, tama nago wego ogwa si ame nani. Te megi eno homugo te ogwa si te eno ogwa si mu tiwai bidimainogo ebao. Efraim me Manase te ena ogwa mu si, te Ruben me Simeon te tiwai si dao.
GEN 48:6 Tiali goli, te nago wego nosali ame nabo wai dabe, te augwali naga wai mu yaibao. Tama nosali te deli deli haniba tǫ dobabo sogo, te nago nosali ame nabo wai dabe te Efraim dali Manase dali sigo hanide te augwaligo tǫ sa munama, saibao.
GEN 48:7 Eno te kolesaga yali, magi baso meni, polobadu te naga ida Resel te ena te Mesopotemiadu ma asobadi, te aga isali. Tama tede ena moni homu dene genuai mu yai. Aga te Kenan tǫde isali, te da te bulu Efratade te dwasianu digibulu gana bidibadi tiali. Eno aga te Efrataba pabo sunumi sesegede pubulai,” wali. Efrata te Betlehem bulu dao.
GEN 48:8 Jekopgo te Josepgo ogwa si sulama, tialima agai te tiwai po hanalu wali, “Te e ogwa si te dego wai si dawe?”
GEN 48:9 Tama Josepgo te po wali, “Te eno ogwa si da. Godigo te Isipde augwali si te enabolo mani.” Tialima, Jekopgo te po wai, “Eno homugo te augwali si enaba odasa asama, te augwali si eno mobo mawaibao,” wali.
GEN 48:10 Jekop te monu dabe elama, tama agai gedugo te nai dabe bugagia suainu ebo te usu meni yai. Josep aga ogwa si odasa aselama, tama Jekopgo augwali si nogo tola selama, tama augwali si nono nani.
GEN 48:11 Te Jekopgo Josepbolo te po wali, “Polobadu eno homugo te eno nage ma sugobe da, te homu yali. Tiali goli, megi Godigo ena gogoliyu, sula tagalubaso, tama eno nage me, te naga ogwa si dali, te eno megi dage suali,” wali.
GEN 48:12 Tama Josepgo te aga ogwa si te Jekopgo sągą pagede bidali te ma dobola siyu, tama agai Jekop gedude te agai gesabidi te tǫba basi gulali.
GEN 48:13 Josepgo augwali si nogo tola sali. Te dolo nogo badu Josepgo te Efraim nogogo tuali, te Jekopgo aga pobase nogo badu tumainu yali. Tama pobase nogogo te Josepgo Manase nogo tuali, te aga Jekopgo dolo nogo badu tumainu yali, tama agai augwali si te Jekop pageba odasa pali.
GEN 48:14 Tiali goli, te Jekopgo nogo hasegelama, dolo nogo dali pobase nogo dali si agabe selama muyu, tama agai dolo nogo te Efraim toboluba muani, aga te sabi ogwa bidi tama. Tama agai pobase nogo te Manase toboluba muani, aga te gomunai ogwa dao.
GEN 48:15 Tialima, agai augwali si mobo te tiwai mani, “Te eno wąį Abraham, me te eno aya Aisak, augwali si te God gedude bugagia bilali. Eno homugo te Godigo te e wai si dali dwagi yai sę emainao. Te Godigo ena bugagia tonaluyu, ena odasa asali, te megi ede ena bidibao, agai te augwali mobo momainao.
GEN 48:16 Te mobo bidi enselgo tigide pedelali God, te agai ena tonaluyu, tama ena me dolobe, eno homugo aga digi mobo te augwali si momainao. Te eno homugo te eno nogi me, te eno wąį Abrahamgo nogi me, te eno aya Aisakgo nogi me, te augwali sigo hanide elaluaibao. Te augwali sigo wai hauwa mu ame nenama, tama genuai hani bage pedelaibao. Godigo augwali side tama timainao,” wali.
GEN 48:17 Te Josepgo suali, te aga ayago dolo nogo te Efraimgo toboluba mubaso, te agai hagela homu yali. Tama agai aga ayago nogo te Efraimgo toboluba mubo te sela sąnama, tama te Manasego toboluba muainu yali.
GEN 48:18 Tama agai te tiwai po aga ayabolo wali, “Aya, nago te yali sę dolo ebeo,” wali. “Te e ogwa da, aga te gomunai ogwa dao. Te nago dolo nogo aga toboluba mugi sogo da, te usu igi dao,” te po wai.
GEN 48:19 Tiali goli, aga ayago te agai po wali me pabeo. Menio. Agai te tiwai po Josepbolo wali, “Eno koneani, ogwao. Eno koneanio. Te Manasego hani wąį dabe te augwali hani me te genuai pedelaibao. Tiali goli, te aga ama sabi bidi da, te genuai bidi pedelaibao. Tama agai wąį dabe te augwaligo te Manasego hani te aiyaba elaluama, tama augwali te genuai hani bidi sibi mu pedelaibao,” wali.
GEN 48:20 Tialima, Jekopgo augwali si te sogo te mobo po mayu, te tiwai po wali, “Te augwaligo te Israel dabebolo hanalu, te dage si mobo mani tiwai emainu, te gasa bidi dabego me te Godigo augwali mobo mao po hanalu waibao. Te augwaligo te po waibao, ‘Godigo dage te Efraim de Manase te augwali sibolo yali tiwai yao,’ tama waibao,” te po wali. Jekopgo te tiwai elama, te agai Efraim te podolama, te Manase nosali ilali.
GEN 48:21 Nosali Jekopgo Josepbolo te po wali, “Odao! Te pąde ena isainu ebao. Tiali goli, God te nage dali bidama, tama agai nage te naga aya dedego tǫba ma odasa paibao.
GEN 48:22 Sekem te wiegi yai tǫ mu dao. Eno te Amor dabe dali te hwą ge bainat me enesigi sigo boi hwįnama, tama augwaligo te tǫ eno sali. Tama ena digi eno te tǫ te eno nagebolo naga megi mobao. Eno te naga ama dede augwalibolo me magobeo,” Jekopgo Josepbolo te po wali.
GEN 49:1 Te Jekopgo aga ogomani tigidali i olama, tama aga pibo sai bet sesegede duagulama, tama agai augwalibolo te po wali, “Dage hodobo sisinagaselama, tama eno dagebolo nosali pedelabo nai po waibao.
GEN 49:2 Aselama, hodobo duayagasao, dage te Jekopgo ogomani, tama bugagia odiąo. Dagego duga aya Israelgo po bugagia odao.
GEN 49:3 Ruben, eno gomunai ogwa, nagede eno bomo elalubao. Tama nage eno gomunai ogwa te ena gesi bidi elalubadi, hasia bolo ame nani. Nago nogi genuai mu, tama nage te eno tigidali ogwade nage bomai mu elalubo dao.
GEN 49:4 Te nago kolesaga te wę bomonama, subigila soabo tiwai gilama ebo. Tiali goli, nage te gomunai bidi nogi me elalugobe, magi baso meni, nago te naga ayago we dali pagela piali. Tama nago eno we sabo hwįgiani. Nago te ena pibo bet tomoba bogi soali!” wali.
GEN 49:5 “Simeon de Livai si, augwali si te ama nami si dao. Augwali sigo te hwįbo moni hwą te sabiliyu, te dwai kolesaga ebo dao.
GEN 49:6 Eno te augwali sigo geme ebo sęde te eno usu da po me wagobe. Ena te augwali si sisinama bidibo pesagede me bidigobeo, magi baso meni, te augwali sigo te wado ebo sogo te bidi dabe ela muyu yali. Tama hagoma eyu, augwali sigo te dodolama bilibo kolesagago te bulmakau sągą babi kigibili tologobo da.
GEN 49:7 Te haliga sębę ebo sęgęgo te augwali si mesegelali, magi baso meni, te augwali sigo wado po wabo te bomo mu yali. Tama haliga sębę ebo sęgęgo te augwali mesegelali, magi baso meni, te augwali sigo haliga sębę ebo te dwai mu yai. Te eno augwali si te Jekopgo bulu tedali tedali tedela pomainu yaibao. Te eno augwali si te Israel bage tomode bidada pomainu tedela palaibao.”
GEN 49:8 “Juda, te naga ama dede augwaligo te nago nogi ugwaba saibao. Nago te naga boi bidi dabe augwali te magede tola siyu yaibao. Te naga ama dede augwali mage aiyaba basi gulama, tama nage nogi ugwaba saibao.
GEN 49:9 Juda, nage te gesi ogwa bidi laion me deli tiwai. Agai te aga hasa elama, tama nosali te aga geme dualalubo pesagede geme ma duala sigi pabo tiwai yali. Juda te ogwa bidi laion me deli tiwai aga da. Agai te aga sągą dili dodolama, tama nosali aga pibo da. Tama me deligo te aga dali hagoma me eyu me egobeo.
GEN 49:10 Agai te tuni bidigo dono tulama, tama aga sągą sawali si tomoba muani. Tama tede mu elaluaibao, te gasa bidigo te bomo sogobeo. Teda agai te bomo tolaluyu, tama te bomo aga aya mu pedelama, tama te tigidali hani bidi dabe tonalubo teba mu usu naibao.
GEN 49:11 Agai te aga donki te bono ni wainde gebelaibao. Agai te ogwa bidi donki te wiegi yai ni wain nologode mu gebelaibao. Agai te aga ugwa te waingo wę telawaibao. Agai te kaneme tiwai wain te mama yai ąįgo wę telawaibao.
GEN 49:12 Te wain wę te sisi yai dao, tiali goli te nosali pedelabo tuni bidigo gedu si te husugu sisi mu yaibao. Te ame pę te tedela yai dao, tiali goli te we bidi tonalubo bidigo kele dabe te wiegi yai nala tigi poai yaibao,” wali.
GEN 49:13 “Sebulun te tamu ąį pąde bidaibao. Te aga bidibo tama wę saneba te sip dabe tuagasobo madi elaluaibao. Te agai tǫ sesege badu te dąį igi pabo te Saidon buluba usu nugi paibao.”
GEN 49:14 “Isakar te bomai donki tiwai me deli dao. Tiali goli, aga olo te walu tomo daide pila muaibao.
GEN 49:15 Agai te toma nabo dwagi yai bulu pesage sulama, tama tǫ te wiegi yai mu elaluai, tama agai te walu dabe toliyu, te dili bomo elama, tama aga te olo sę ebo bidi pedelama, tama bomai sę dene yaibao.”
GEN 49:16 “Dan te aga hani bidi dabe augwali te Israel hani me deli dao, tama agai te aga we bidi dali te po tų dodolobo sę bugagia yaibao.
GEN 49:17 Dan te sunumi sesegede te hasamani me deli tiwai elaluaibao. Te hwįbo hasamani me deli da. Aga te sunumi sesegede bidaibao, tama te posoga paliyu, te hos sągąde gąų kelaiba, tama bidi te hosde dualama udabaso da, te aga tula muaibao.”
GEN 49:18 “Yawe, nago ena tau somainu eno nage tonalubo dao.”
GEN 49:19 “Te nai wi sabo bidi dabe augwaligo te Gat dali hwįagasaibao. Tiali goli, Gatgo te augwali dali ma begelama hwįyu, tama augwali ela gudulaibao.”
GEN 49:20 “Te Asergo tǫde te wiegi yai nai mu holaibao. Te Asergo te gavman tuni bidigo wiegi yai tuabo nai pedalubo sę ilaibao.”
GEN 49:21 “Naptali te uni sulai meme te aga homu wali bilibo tiwai yaiba. Tama aga wiegi yai wai dabe ame nabo da.”
GEN 49:22 “Josep te bidigo tonalusiąbo donki me deli tiwai. Aga te wę ulu sesegede bidibo donki me deli tiwai. Aga te bulu du pedai badu bidibo, te ogwa bidi hos me deli tiwai dao.
GEN 49:23 Te boi bidi dabego moni wąbi dobo mu hwįaibao. Augwaligo enesigigo aga pobeasa paibao.
GEN 49:24 Tiali goli, augwaligo enesigi tigidali togwa pali. Tama agai enesigi balibi pedebeo. Te God, Tonalubo Bidi, agai te Israel dabe sesemane sogo tau siyu, tama te kolesaga ebo hasegelegobeo. Te agai bomo te moni genuai bulu du masigi tiwai dao. Te God agai te Josep dali boi homu ebo bage augwali aiyaba elaluaibao.
GEN 49:25 Aga te naga ayago God, tama aga bomo mu tigidali elalubo. Eno homugo agai nage mobo mayu, tama nage tau sabo. Te mobo hauwa Josepba muaibao, te kulubage ugwadu tulubo, tama tǫ dologode wę pedalubo, te idago wai hauwa ame nabo mobo mobadi,
GEN 49:26 te tubo nosai wai dabego mobo me, te plaua dabe holobo mobo me mani, te polobadu bulu du dabe te mobo me mani, te sesemane sogo elaluabo bulu du dabe mobo mawai. Eno homugo te tigidali mobo te Godigo Josep toboluba muao. Augwali te bidiba holama, te augwaligo aga te gasagi yai bidi te aga ama dede tiwai gilama me nigilibeo. Menio. Josep aga gasagi yai tedali bidi bidaibao,” wali.
GEN 49:27 “Benjamin da, te genuai uni yowi me deligo te hasa dabe elibo kolesaga konebo tiwai gilama yaibao. Te kigamu te aga te elali hasa tubo gilama yaibao. Tama pio aga te sali nai dabe dobaduaibao,” wali.
GEN 49:28 Te e da, te Israel hani nogo si olama, sągągo si, tama te dwagi yai bidabo po dabe te aga ayago augwalibolo wali. Tama agai augwali tigidali deli delibolo usu nama, te po augwa ayago augwalibolo wali.
GEN 49:29 Nosali Jekopgo te po aga ogomanibolo wai, “Enade, te pąde megi tama eno ena hani isali bage dabe sisinigi paibao. Dagego eno tigi te ena wąį dabe dali te bidi Hit hani dabego te Efrongo tǫ pedai badu te ola be tomoba mugi pao.
GEN 49:30 Te ola be te giliga ge pedalubo badu te Mamre, te Makpela bulude elaluali, te Kenan tǫ badu elaluali. Abrahamgo te tǫ te Hit bidi dabe, te Efrongo tǫde abelali. Agai te tǫ me, te ola be me, te gų page nigainu abelai dao.
GEN 49:31 Augwaligo Abraham de aga we Sara si te gų pagede pubulali. Tama augwaligo Aisak me aga we Rebeka te gų pagede pubulali. Tama eno te Lea me te gų pagede pubulali.
GEN 49:32 Abrahamgo te tǫ me, te ola be dali, te Hit bidi dabe dali polobadu abelai dao,” wali.
GEN 49:33 Jekopgo aga ogomani dali po mia silama, te aga sągą te bet sai dologo tomoba bulama, tama aga isali. Aga te aga hani bage bidalubo madi, te isali bidi dabego buluba tama pai.
GEN 50:1 Josep aga aya bauba pigiluama, tama aga gela olama, tama agai aga gesabidide nono nani.
GEN 50:2 Nosali Josepgo te aga dokta bidi dabebolo olama, te aga tigiba te tobage wel muao wali, te tigi polo me dolidali weyu tama tiali. Te dokta dabego te Josepgo wali po tiwai gilama yali.
GEN 50:3 Augwaligo te tiwai sę te bidi sese si sogo, te 40 dei, te tama sogo yali, te tama sogo augwaligo te sę yali bodolu muani. Nosali te Isip bidi dabego Jekopde gela udubadi, te 70 sogo bidali.
GEN 50:4 Te Josep aga ayade homu dene eyu, gela weyu yali te silibo side, teda agai te tiwai po te Ferogo ofisa bidi dabe dali wali, “Te dagego enade wiegi yai homu eba wida, teda eno e wabo po te dagego Ferobolo wagi pao,
GEN 50:5 ‘Te eno aya isainogo ebo sogo, agai enade po dąų walu, te eno aga te aga tigi te Kenande nigali gų pageba pubaligi pao po wai. Tama tibaso, nago ena tagala paloyu da, te eno aya bolo pubaligi pelama, tama nosali te ena ma asaibao,’ te po wao,” Josepgo te po wali.
GEN 50:6 Ferogo te tiwai po wei ponani, “Nago te naga ayago nagebolo te po dąų wali gilama tama naga aya pubaligi pao,” wali.
GEN 50:7 Tialima, Josep pelama, te aga aya pubaligi pali. Te tigidali ofisa bidi dabe, me te Ferogo bede bidalubo genuai bidi dabe, me te Isipde bidalubo tigidali tobolu bidi dabe me, augwali te Josep dali pepela wali.
GEN 50:8 Te Josepgo we wai me, te aga ama dede me, te aga ayago we wai me, tigidali te augwali pali. Te dwasianu wai dabe naga te sipsip dabe dali, te meme dabe me, tama te bulmakau dabe dali, augwali te Gosen tǫde bidaludali.
GEN 50:9 Te karis dabe me, te hos kibude bilibo bidi dabe me, augwali te Josep dali pepela wali. Tama te genuai hani dabe mu augwali pai.
GEN 50:10 Augwali tama pelama, tama te wit penibo pesage te Jordan ąį u badu, te augwali Atat teba pedelali sogo, augwaligo te bobage sesabi ebo gela genuai te bidi pubalubo gela tiwai wali. Tama Josepgo te homu dene ebo kolesaga elama, tama aga gela udubadi, te a naga olama, me badu nogo si sogo bidali.
GEN 50:11 Te Kenan bage augwaligo te Isipdu asali bage te Atat bulude gela me homu dene ebo sulama, tama augwaligo te po wai, “Te sę ebo te Isip dabego genuai gela weyu, te homu dene ebo kolesaga dao.” Tama tibaso, augwaligo te bulu nogi te Abel Misraim nogi yali. Te bulu te giliga pedalubo te Jordan badu elaluali.
GEN 50:12 Te Jekopgo ogomanigo po wali pelama, te augwalibolo wali po tiwai gilama yali.
GEN 50:13 Augwaligo aga te Kenan tǫba tolasa pelama, tama augwaligo aga te Makpela ola bede pubulali, te bulu te Mamre te giliga pedalubo badu elaluali. Abrahamgo te tǫ te Efrongo tǫ pedaide abelali, aga te Hit hani bidi me deli da. Agai te tǫ abelali, te gų page nigabo pesage abelali.
GEN 50:14 Josepgo aga aya pubulama, tialima aga te Isipba te aga ama dede dali badi, te aga dali asali bidi dabe tigidali te Isipba ma pepela wali.
GEN 50:15 Te augwa aya isalima, te Josep aga ama dedego augwa hasi te po wai, “Megi da, magi yaliwe, te Josepgo da dali te dago aga dali dwai sę yali te tigidali wei ponoyu, te da dali wado me udugowe?”
GEN 50:16 Tialima, augwaligo te po Josepba ola tolali, “Te nago aya isisąbadi, agai te po dabolo mawai,
GEN 50:17 ‘Te Josepbolo wao, “Eno nagebolo hanalu wali, te naga ama dedego te dwai sę genuai yali, te sęgę nago sela sąyao,” ’ te po wai dao. Da te nago ayago Godigo sę bidi dao. Da nagebolo dwai sę yali. Megi, nago te dago yali dwai sę sela sąyao.” Josepgo te po wali odolama, tama aga gela udali.
GEN 50:18 Nosali te Josep aga ama dede sabolama, tama augwaligo augwa tobolu aiyaba basi gulai. Tama augwaligo agabolo te tiwai po wai, “Da nageba pedelali, te nago olo sę ebo bidi bidaibao,” wali.
GEN 50:19 Tiali goli, Josepgo te po augwalibolo wai, “Dage wi munu me elamuo. Eno te God tiwai gagalama, te dagego te dwai kolesaga yali te eno wei ponogobeo.
GEN 50:20 Polobadu dagego ena dolabo homu dąų wali. Tiali goli, Godigo te dwai kolesaga begelali, tama agai te bidi hauwa bidibo ula elaluyu, tama augwali me hagaidali weyu, wiegi yai sę pedalumainu ilali. Tama tialigo da, megi te we bidi dabe bidaluali.
GEN 50:21 Tialima, megi dage wi munu me elamuo. Te eno dage me, te dagego wai dabe dali, tonalueibao.” Josepgo te tobage wiegi yai po aga ama dedebolo menama, tama te pogo augwali homu bugagia tegaluali. Tama augwali wi munu me ma ebeo.
GEN 50:22 Te Josep te Isipde aga ayago hani dabe dali bidali. Te Josepgo kibu be 110 elama, tama aga isai dao.
GEN 50:23 Aga te gedu pedalu bidibadi, tama aga ogomani me subadi, te Efraimgo ame nani wai dabe me suali. Te Makirgo wai dabe ame nani sogode, Josepgo te aga hani wai tomoba sela muani. Makir te Manasego ogwa dao.
GEN 50:24 Josepgo te tiwai po aga ama dedebolo wai, “Te sia sabode ena isaibao,” wai. “Tiali goli, te Godigo dage tonalueibao, tama agai dage e bulude bidali sela peyu, taga paibao. Tama agai dage odasa peyu, te Abrahambolo me, Aisak me Jekop, te augwalibolo mawaibao olama, te po dąų wali tǫba dage odasa tagaligi paibao,” wali.
GEN 50:25 Nosali Josepgo te Israelgo ogwa dabebolo te mu po dao po wao po me deli te hanalu wali. Agai te po wali, “Dagego enaba po dąų waliyu, te God asiyu dage tau sabo sogode, teda dagego ena pubulali pesagede te ena tigi dili hodolama, tama dage peyu, te dili sela piąo,” wali.
GEN 50:26 Josep aga kibu be te 110 elama, te aga isali. Augwaligo te bidi tigi damusiąbo te tobage wel dabe te aga tigi damudali weyu, te aga tigide muani. Augwaligo te tiwai Isipde elama, tama augwaligo aga tigi te gų page nigali halobage me deliba muani.
EXO 1:1 Te Jekop aga ogomani dali augwali hodobo Isip buluba pai. Tama te sogo augwa we wai dabe dali hodobo pai. Jekopgo ogomani nogi tama wai: Ruben, me Simeon, me Livai, me Juda,
EXO 1:3 me Isakar, me Sebulun, me Benjamin,
EXO 1:4 me Dan, me Naptali, me Gat, me Aser.
EXO 1:5 Tama agai ogwa me te Josep polasa pelama, Isip buluba polobadu bidigi pai dao. Te sogo te Israel hani, te Jekop aga hani mu, augwali te bidi sese sela olama, nogo si we bidi 70 augwali Isip buluba bidigi pai.
EXO 1:6 Tama nosali Josep aga ama dede aga hani tigidali augwali te sogo te Isip bulude bidibadi, augwali tigidali isai.
EXO 1:7 Tiali goli, augwaligo ame nani wai te Israel hani augwaligo wai hauwa ame nai, tama augwali hani hauwa mu te bomai bidi hani pedelai, tama augwaligo te Isip tǫ pedai badu Gosen te pągąna sai.
EXO 1:8 Tama nosali gesi tuni bidi me deli pedelama, agai te Isip bidi hani tonaluai. Tama te gesi tuni bidi agai te Josepgo nogi konesiąwai.
EXO 1:9 Tama te tuni bidigo aga Isip we bidi hani dali te po wai, “Suiąo, te Israel we bidi hani augwali hauwa mu yai, tama augwaligo bomogo dago bomo aiyaba elaluaibao.
EXO 1:10 Tama wąbi hwįbaso da, te augwaligo dago boi bidi dali taluama, da dali hwįyu, tama dago bulu tagalama, augwali wi paibao. Tama dago augwali hani hauwa pedalidali weyu, dąų wabo tų gegegaibao,” te Isip gavman polasa tuni bidi agai te po wai.
EXO 1:11 Tama te po olama, te Isip hanigo te Israel hanigo bomo kimi isilainogo eyu, tama augwaligo te sę tonalubo bidi dabebolo te sę mawai, tama te bidi dabe augwaligo te Israel hani sę emainogo selai, tama augwali sę dene mu yai. Tama augwaligo te Israel hanibolo genuai hanu me si niga po wai, te hanu me nogi Pitom, me Rameses. Te hanu side te Isip tuni bidigo nai sisinabo madigi te hanu nigai.
EXO 1:12 Tama te Isip hani augwaligo Israel hani dali dwai sę dene menama, tama augwali mu dolobo sę yai goli, tialima te Israel hani bidi hauwa mu pedaliyu, tama tedela peyu, tama te Isip bulu tǫ pągąna sai. Tama Isip hani augwali te Israel bidi hani sulama, tama dwai homu eyu, augwali wi mu yai.
EXO 1:13 Tama Isip hanigo Israel bidi hanibolo sę dene mawai. Tama Israel hani augwali dodolama mu bidai. Tama te Isip hanigo Israel bidi hanibolo te masigigo be sę ebo, te sę me te gi sę me ya wai, tama augwali sę dene mu yai. Tama augwaligo Israel bidi hani hobede me ebeo. Mu menio.
EXO 1:15 Tama we si bidali, te we me nogi Sifra, me we nogi Pua, tama te we augwali sigo te Israel te Hibru we dabego wai ame nabo tau sabo sę yai. Tama te Isip tuni bidi agai te we sibolo te po wai,
EXO 1:16 “Dage sigo te Hibru we me deligo wai ame nobadi tau sabo sogo, tama te wego wai te ogwa ame nobaso da, te wai dage sigo ela muao. Tama te wego wegi ame nobaso da, te wai dage sigo elisiąma tagalao,” wali.
EXO 1:17 Tama te we si God dali wi elama, tama augwali sigo te tuni bidigo wali po wali pabeo. Tama te we sigo te Israel we dabego ogwa ame nabo elisiąma tagalama elaluai, te we sigo te ogwa ame nabo elebeo.
EXO 1:18 Tama te Isip tuni bidigo te we si i olama, augwali sibolo te po hanaluyu, te po wai, “Magi baso dage sigo tama tebo dawe? Magi baso dage sigo te Israel wego te ogwa ame nabo sula tagalama elalubo dawe?” wali.
EXO 1:19 Tama augwali sigo po wei ponoyu, te po wai, “Hibru we augwali te da Isip we dabe tiwai menio. Augwali te bomo yai we dabe weyu, tama augwaligo wai polo mu ame nabo dao. Tama da augwali pąba pedalisiąbadi, augwaligo wai polo ame nai digi da pabo dao,” wali.
EXO 1:20 Tama Godigo te we si dali dwagi yai sę yali. Augwali sigo God dali wi yai, tama agai te we augwali sigo me wai ame nomainogo yai. Tama Israel hani augwali hauwa mu pedaliyu, tama augwali bomo yai bidi hani pedelai.
EXO 1:22 Tama nosali tuni bidigo Isip we bidibolo te po wai, “Dagego te Hibru hanigo ame nabo wai te ogwa tigidali selama, te moni pabo ąį Nail te ąįba sąya,” wai, “tama te wegi yai baso da, tagalama bidimainao,” wai.
EXO 2:1 Tama te Israel hani tomode, bidi hani me Livai hanigo te me Livai hanigo wegi sai dao, polobadu.
EXO 2:2 Tama nosali te we haliga elama, tama wai ogwa me deli ame nai. Tama te wego te wai bǫų dwagi yai wai yai baso, geme dualama, tama te wai dualama polua sela bidai.
EXO 2:3 Tama nosali agai te wai ma dualainogo yali usu meni yai, tama agai te basket wa augwaligo te awi diligo nigai selama, tama mege me siyu, tama te megego te basket wa dedage sebelai. Tama agai te wai te basket wa tomode pilama, sela pai, tama te Nail ąį sesegede te sigi sili elalubo digi te wai dualigi pai, te sigi sili tomode, te ąį daide muai.
EXO 2:4 Tama te wai aga abe digibulu gana dulaluyu, tama te wai dali magi sę ebowe naga suainogo tonaluai.
EXO 2:5 Tama aga dolalubadi, te Isip tuni bidigo wegi aga sę we dabe dali te ąįba asai. Tama aga sę we dabe augwali te olo bilalubadi, tama te tuni bidigo wegi ąį paugi pai. Tama te wegi agai te basket wa sigi sili tomode munalubo sulama, tama agai aga sę we me deli tagala palama, tama te wa agabolo sela magasali.
EXO 2:6 Tama tuni bidigo wegi agai te basket wa dalama suali, te wai bǫų ogwa te wade munalubo suai. Tama agai te wa po dabadi, tama te wai bǫų gela wai, tama te tuni bidigo wegi agai te wai homu dene mu eyu, tama agai te po wai, “Te e wai! Te Hibru hanigo wai dao,” te wegigo te po wai.
EXO 2:7 Tama te wai aga abe pąba aselama, te tuni bidigo wegibolo hanaluyu, te po wai, “Te eno Hibru we me i wagi pelama, tama e wai ame menama, tama te e wai te wego negebo usu egowe?”
EXO 2:8 Tama tuni bidigo wegi agai te po wali, “Te usu dao, te nago tama tiao,” wai. Tama te wai aga abego aga ida mu odasa asai.
EXO 2:9 Tama te wai aga ida asai, tama te tuni bidigo wegigo te webolo te po wai, “Eno te wai nago selama, ame mayu, bugagia tonaluao,” wai, “tama eno nage masigigo abelaibao,” wai. Tama te wai aga idago selama, ame mayu, bugagia tonaluai.
EXO 2:10 Tama nosali te wai dwasianu genuai gana ebo si, aga idago te wai te tuni bidigo wegibolo magi pai. Tama tuni bidigo wegigo te wai aga wai mu tiwai yai. Tama agai te po wai, “Te eno e wai ąįde munalubadi, tama eno ugwaba sela holai, tama tebo olama. Tama tibaso, eno agai nogi Moses poai,” wali.
EXO 2:11 Tama nosali Moses genuai bidi yai, tama agai te Hibru bidi hani sugi pai, te augwali aga hani bidi, tama abagi dabe dao. Tama agai suali, te augwali Isip tuni bidigo sę ebo dene mu yai. Tama agai suali, te Isip bidi me deligo Hibru bidi me deli ela mubo suai, te Moses aga abagi te Hibru hani.
EXO 2:12 Tama Moses agai tonono bilali, te bidi me bidibo subeo. Tama agai polo mu te Isip bidi ela muai, tama te bidi te masigi kemide haluai.
EXO 2:13 Tama te sogo nosali Mosesgo suali, te Hibru bidi me aga si hwįbo suai. Tama Moses agai te wado po olama, hwįani page bidi dali te po wali, “Magi baso nago naga abagi elebawe?”
EXO 2:14 Tama te bidigo Mosesgo po wei ponoyu, te po wai, “Nage te tobolu bidi, tama dago po dodolobo bidi menio. Tama nago ena elainogo, te nago Isip bidi me ela muani tiwai yainogo obawe?” Tama Mosesgo te bidigo te po wabo odolama, aga wi yai. Tama agai te homu yai, ‘Eno te Isip bidi me elali, te we bidi augwaligo polo koneai,’ te homu yai.
EXO 2:15 Tama nosali Isip tuni bidigo Mosesgo te sę yali po odolama, tama agai Moses elainogo yai, tama tibaso Moses aga wi digibulu pelama, te Midian buluba bidigi pai. Aga te tǫba sabolama, tama aga te ąį tubo digi te sesegede dulaluai.
EXO 2:16 Tama te Midian tǫde pris bidi me deli digi bidai, tama agai nogi si, te Ruel, me Jetro. Tama te bidi agai wegi a naga olama me badu nogo si bidai. Tama Moses te ąį ulu tǫ dedagedu asobo digi pąde dulaluai, tama te bidigo wegi dabe te augwa ayago kibu sipsip meme dabe maiabo ąį tuagasu asai.
EXO 2:17 Tama tialima, gasa sipsip tonalubo bidi hani aselama, tama augwaligo te bidigo wegimani ąį tuagasu asobadi, augwali sela sąnama, “Pao,” wai. Tama Moses agai te wegi dabe tau siyu, tama te bidi dabe augwali sela sąwai. Tama nosali Moses agai te wegi dabego kibu sipsip meme dabe ąį mawai.
EXO 2:18 Tama nosali te wegi dabe augwa aya Ruel bidibo digi ma pai, tama augwa ayago augwalibolo hanaluyu, te po wali, “Magi elama, dage megi polo ma asobawe?”
EXO 2:19 Augwaligo po wei ponoyu, te po wali, “Isip bidi me deli agai da tau selama, tama te gasa kibu sipsip tonalubo bidi dabe augwaligo da ela gudulubeo. Tama te bidi agai dago kibu sipsip meme dabe me agai ąį mawai,” wali.
EXO 2:20 Tama te bidi aga wegi dabebolo hanaluyu, te po wali, “Te bidi menade bidibowe? Tama magi baso dagego aga ude taga soaliwe? Dagego te bidi aga i wagi pelama, tama aga da dali nai tuagasomainao,” wali. Tama te wegi dabe pelama, augwaligo Moses odasa asai.
EXO 2:21 Tama nosali Jetro agai homugo Moses aga dali bidimainogo yai, tama Mosesgo te usu dao te po wai. Tama Jetro agai wegi Sipora me Moses mawai, tama Mosesgo te wegi sai.
EXO 2:22 Tama nosali Sipora wai haliga elama, tama ogwa me deli ame nai. Tama Moses agade digi po weyu, te po wali, “Ena gasa bulu tǫ bidi e tǫde bidibao. Tama tibaso, eno te wai nogi Gersom dao obao,” te po wai.
EXO 2:23 Tama kibu be meba bidilama, tama nosali te Isip tuni bidi isai. Tama Isip hani augwaligo Israel hanibolo sę dene mu mawai. Tama Israel hanigo Godigo augwali tau somainogo tigidali sogo Godibolo gela weyu, i wai.
EXO 2:24 Tama Godigo augwaligo te gela wabo odoyu, tama Godigo te bomo yai po Abraham, me Aisak, me Jekop, augwali dali dąų wali, te agai koneai, tama agai te augwaligo wąįgo wai dabe augwali tau saibao te po wai, polobadu.
EXO 2:25 Tama tibaso, God agai te Israel bidi hani augwali dodolama mu bidibo suai. Tama agai augwali hobede elama, agai augwali tau sabo homu yai.
EXO 3:1 Tama nosali me sogo Moses agai te kibu sipsip dabe, me te meme dabe te aga wąį Jetro nai dabe tonaluai, te Jetro aga da te God dali te Midian bage tomode dolalubo pris bidi dao. Tama me sogo deli sogo Mosesgo te kibu sipsip me meme dabe odasa peyu, te wa pai bulu taga peyu, te tǫ pedai me nogi Horep, te bulu du Sainai tede elalubo, teba sabolali, te Godigo bulu du dao.
EXO 3:2 Tama Genuai Bidigo Ensel Mobo Bidi agaba pedelama, te sia dabo tiwai, te dwasianu ni nologo tomode sia bogoli pedelai. Tama Mosesgo sia te nide dabo suali, tiali goli te siago te ni dela dolobeo.
EXO 3:3 Tama Moses aga homu hauwa eyu, te po wali, “Te gasagi yai nai mu dao. Tama magi baso mu siago te ni dolobewe? Te ena pąba pelama, te sia dabo nai sugi paibao,” wali.
EXO 3:4 Genuai Bidi te sia dabo ni tomode bidibadi, te Moses pąba asobo suali, tama Godigo i olama, te po wali, “Moses. Moses.” Te po wali. Tama Mosesgo te po wai, “Magi yaliwe?”
EXO 3:5 Tama Godigo te po wai, “Nage pąba aselamo dao. Tama nago sągą nadoba dią muao. Magi baso meni, te megi nage dolalubo tǫ te eno tedali gasagi yai tǫ, tama te tǫ eno habu selai tǫ dao.
EXO 3:6 Tama ena te nago wąį dabego God dao. Ena te Abraham, me Aisak, me Jekop, te bagego God dao.” Mosesgo te po odolama, aga gesabi halua sali, magi basowe, agai te God subo wi ebaso, tiwai dao.
EXO 3:7 Tama Genuai Bidigo aga dali te po wali, “Eno suali, augwaligo eno we bidi Isip bulude mu dolobao. Tama eno we bidi augwali ena i wabo sę ebao, te augwali dwai tonalubo bidigo nogode ma somainogo yai. Eno te i wabo odoyu, tama eno mu koneani, te augwali dene me te sęgę mu sabo dao.
EXO 3:8 Tama ena dulai dao, tama te augwali te Isip dabego nogode ma selama, tama augwali te genuai tǫ me deli te tǫ ili hauwa elalubo, te nai bugagia dwagi yai mu holobo tǫba odasa paibao. Te tǫde megi te Kenan bidi hani me, te Hit hani me, te Amor hani me, te Peres, me Hivi, me Jebus, te tama hani augwali te tǫde megi bidibo dao.
EXO 3:9 Mu tama, eno te Israel hani we bidigo gela odolama, eno suali, te Isip dabe augwaligo dwai kolesaga mu augwali dali ebo dao.
EXO 3:10 Tama megi eno nage te Isip tuni bidi bidibo digi tagala palama, te tuni bidigo nage sula tagalama, te nago eno we bidi Israel hani augwali te Isip bulu tagalama asomainao,” wali.
EXO 3:11 Tiali goli, Mosesgo Godibolo te po wali, “Ena magi yai bidi, tama ena te Isip tuni bidiba pobaso da, eno te Israel we bidi te Isip bulu tagalama, odasa asobo usu egowe?”
EXO 3:12 Tama Godigo te po wali, “Ena nage dali bidibao. Tama megi eno magi nai me deli nagebolo waselama ola mayu, tama nago kuna koneagameo, te ena digi eno nage te Israel we bidi augwalibolo tagala palobao. Te ola mabo sę e tama dao: te nago te we bidi Isip tǫ tagalama, odasa aselama, tama dagego enabolo e bulu dude digi lotu po waibao,” wali.
EXO 3:13 Tama Mosesgo Godibolo te po wai, “Ena te Israel we bidi augwali bidibo teba pedalobo sogo, te augwalibolo eno te tiwai po waibao, ‘Dago wąį augwaligo Godigo ena tagala palobaso, ena dage bidibo digi asai.’ Tama augwaligo enabolo hanalubaso da, ‘Te aga nogi de dawe?’ obaso da, teda eno mena nogi wabogo augwali dali wei ponogowe?”
EXO 3:14 Tama Godigo te po wali, “Ena Digi Ena Tama Bidibo Dao. Nago te Israel we bidi dali te po wao, ‘Ena Digi Bidibo, te Godigo nogi dao. Tama agai ena tagala palobaso, tama ena dage bidiboba asai.’
EXO 3:15 Nago tama po te Israel we bidi dali weyu, te Yawe Genuai Bidi, aga te dagego wąį dabe augwaligo God, te Abraham, me Aisak, me Jekop, te agai nage tagala palama, tama nage augwali bidibo digi asai dao po wao.” Tama Godigo po Moses dali ma wali, “Eno nogi Genuai Bidi, te eno nogi sesemane bidada pabo sogo, tama nosali pedalobo wąį dabe augwaligo ena nogi tama nogi yaibao.”
EXO 3:16 “Nage pelama, te Israel tobolu bidi dabe augwali sisinama, te God po augwalibolo wao, ‘Te dagego wąįgo Genuai Bidi, Abraham, me Aisak, me Jekop, te bagego God enaba mu pedelama, dagebolo wabo po ena dali tama wai dao, “Eno suali, te Isip hani augwaligo tigidali dwai kolesaga mu dage dali ebaso, tama eno homu hauwa dage dali ebo dao.
EXO 3:17 Tama eno te po wali, te eno dage Isip tǫde selama, te bulu bidi dabego dwai sę mu dagebolo ebaso, tama eno dage te Kenan bagego tǫ, me te Hit hani, me te Amor me, Peres me, te Hivi, me Jebus, te hanigo tǫba eno dage odasa painogo ebao. Te dwagi yai tǫ, te ili hauwa elalubo tǫ dao.” ’
EXO 3:18 Nago te tama po augwali dali weyu da, te augwaligo nago po odolama, wali paibao. Tama nago te Israel bage tobolu bidi dabe selama, tama dage te Isip tuni bidi bidibo teba pelama, agabolo te po wao, ‘Genuai Bidi Yawe aga te da Hibru bagego God dao, te aga da dali deliba sisinai dao. Tama dago nagebolo hanalu wagasali, te nago usu da obaso, te da te bidi meni yai buluba pelama, sela sogo dago Godibolo te ofa igi painogo obao, te dago Genuai Bidi dao,’ tama po wao.
EXO 3:19 Eno koneani, te eno bomo yai nogogo aga dali bomai sę esiąyu da, teda te Isip tuni bidigo dage tagala paliyu pao, te po hasia bolo wagobeo. Tiali goli, agai dage tagala palomainogo, eno bomo yaibao.
EXO 3:20 Tama tibaso, eno bidigo isiąwai bomo yai sę haniani te Isip hani augwaligo tǫde eyu, tama eno bomogo te sę augwali dali yaibao. Tama te bomo yai sę dabe elama, nosali te Isip tuni bidi agai dage pomainao, te po waibao.”
EXO 3:21 “Eno tama ilama, tama te Isip we bidi augwaligo dage dali dwagi yai homu yaibao, tama dagego te Isip tǫ taga soainogo ebode, te dage olo me pogobeo. Menio.
EXO 3:22 Dagego we tigidali te Isip we dabe augwali bidibo pąba pelama, me te Isip we dabe dagego bede bidibo, tama dagego we dabe sibigo te Isip we dabe sibi hanaluyu, tama te ugwa, me te meba gasa au ebo doado bage gol me silva tama, te nai dabe augwaligo dage mawaibao. Tama dagego te nai duga wai dabe tigide muaibao. Tama dagego te tebo kolesagade te Isip dabego doado bage tigidali siyu, selasa paibao,” Godigo Mosesbolo te po wai.
EXO 4:1 Tama tialima, Mosesgo Genuai Bidi dali te po wai, “Te Israel hani augwaligo eno wabo po homude dąų wasiąma, tama eno pusubo po te augwali odogobeo. Tama augwaligo te po weyu, ‘Nago tibo po naga obao,’ waibao. ‘Tama Genuai Bidi nageba pedalobeo,’ te po waibao. Te augwaligo tama weyu da, teda eno magi sę egowe?”
EXO 4:2 Tama Genuai Bidigo Moses dali hanalu wai, “Nago magi nai tolalubawe?” Tama agai te po wai, “Tolasa bilibo dono tolalubo,” po wai.
EXO 4:3 Tama Genuai Bidigo te po wai, “Te dono tǫba sąyao.” Tama Mosesgo te dono tǫba sąbadi, te hasamani gagawai, tama Mosesgo te hasamani sulama, wi pai.
EXO 4:4 Tiali goli, Genuai Bidigo Mosesbolo te po wali, “Tagalama, nago nogo aiyaba munama, te danu nogogo touao.” Tama Mosesgo te hasamani nogogo danude touwai, tama te hasamani hasegelama, tama te bilibo dono ma pedelai.
EXO 4:5 Tama Genuai Bidigo te po wai, “Nage te Israel bageba pabo sogode nago tama tiao, tama augwaligo nago e sę tiwai ebo sulama, nago po homude dąų weyu, mu tama Genuai Bidi ena nageba pedelali da, te homu emainogo nago tama tiao. Tama augwaligo koneyu, te ena augwa wąį dabego God da, ena te bidi Abraham, me Aisak, me Jekop, te bagego God ena nageba pedelai dao,” wali.
EXO 4:6 Genuai Bidigo Moses dali te po ma wai, “Nago nogo naga ugwa tomoba muao.” Agai te Genuai Bidigo wali po gilama tama tiai, tama agai nogo me teda sai, tama te nogode keni dwai mu, tama te keni tigidali tedela yai.
EXO 4:7 Tama Genuai Bidigo te po ma wai, “Nago nogo naga ugwa tomoba ma muao.” Te agai tama tiali, tama agai nogo ma teda sali, tama te nogo wiegi yai yali, te aga tigi me badu elalubo tiwai yai.
EXO 4:8 Tama Genuai Bidigo te po wai, “Te augwaligo homude nago po dąų olama musiąbaso da, te nago hasia ebo bomo yai sę yali augwaligo homu teba dąų wasiąbaso da, te gasa bomo yai sę si nago ebo te augwaligo sulama, tama augwaligo homu nageba muaibao.
EXO 4:9 Tiali goli, augwaligo te bomo yai sę si ebo sulama, tama augwaligo nago po homuba dąų wasiąbaso da, teda nago te genuai wę Nail meba selama, te tǫba gelao. Tama te wę hasegelama, kaneme pedelaibao,” wali.
EXO 4:10 Tama Mosesgo Genuai Bidi dali te po wai, “Tama Genuai Bidi, tiali goli polobadu bidi hauwa gedude eno po bugagia wai menio. Tama megi nago ena dali po wali, tialima tego ena te po wabo bidi tiwai egobeo. Eno pedauwali sęgę mu yai, tama eno po bugagia wainogo ebo, te usu egobeo,” wali.
EXO 4:11 Tama Genuai Bidigo agabolo te po wali, “Niwai bidigo te we bidibolo po wabo pedauwali te mabo dawe? Niwai bidigo te bidi odo dega weyu, te pedauwali paliyu ebo dawe? Tama dego te gedugo tonono bilimainogo eyu, ma te gedu widao po wabo dawe? Ena, Genuai Bidigo naga, eno tama tiwai kolesaga ebo dao.
EXO 4:12 Megi da, nage pao. Te nago wabo po tigidali te eno tau siyu, tama te nago wabo po nagebolo ola mayu yaibao,” wali.
EXO 4:13 Tiali goli Mosesgo te po wai, “Genuai Bidi, eno usugobeo. Nago gasa bidi tagala palao.”
EXO 4:14 Tama Genuai Bidigo Moses dali wado po weyu, te po wai, “Magi basowe? Nago ama genuai bidi Aron te Livai hani bidibao. Eno koneani, te aga da, te po bugagia wabo bidi mu dao. Tama megi naga tama agai nage tiąba asobao, agai nage suyu, wiegi yai homu yaibao.
EXO 4:15 Nago agabolo te po olama, tama agai te po tigidali pusumainao. Tama eno dage sigo pedauwali tau siyu, tama dage sigo eno po bugagia naga waibao. Tama magi sę dage sigo yainogo ebaso, te sę yao po eno waibao.
EXO 4:16 Aga te nago pedauwalide po selama, te nago po te we bidibolo mawaibao. Tama agai gedude te nage te God tiwai bidiyu, te nago wabo po agai te we bidibolo pusaibao.
EXO 4:17 Tama megi da, nago te bilibo dono selama, tama nage pao. Tama nosali nago te donode te bidigo isiąwai bomai sę meba yaibao,” Genuai Bidigo te po wai.
EXO 4:18 Mosesgo po God dali ola silama, tama aga te aga wąį Jetro bidibo teba ma pelama, tama agabolo te po wai, “Eno homugo nago ena te Isip tǫba ma pelama, te eno deli hani sugi painogo ebo, te nago ena pao po wabo te usu da wao. Eno koneama, augwali bidibowe, ma augwali isaliwe, te eno augwali sugi peyu pobao,” wali. Jetro agai te usu da po aga dali wai, “Te usu da, nage pao.”
EXO 4:19 Tialima, Moses aga pisąbadi, tama Genuai Bidigo agabolo te po wai, “Megi nage te Isip tǫba ma pao, te nage elainogo yali bidi dabe, augwa digi isai dao,” wali.
EXO 4:20 Tama Moses agai te po wabo odolama, te aga we dali te aga wai si augwali te kibu donki me deliba muai. Tama agai te Godigo dono me selama, tama augwali Isip tǫba ma pabo gagalali.
EXO 4:21 Tama Genuai Bidigo Moses dali te po wai, “Nosali nage Isip tǫba pedalobode, te nago te bomai sę te Isip tuni bidi gedude yao. Eno nagebolo te bomai sę yabo bomo mobao. Tiali goli, eno te tuni bidide ilama, tama aga te aga homuba masigi sąwai bidi pedelaibao. Tama tibaso, agai te we bidi dabe augwali pao wagobeo.
EXO 4:22 Nosali nago tuni bidi dali eno po weyu, ‘Te Genuai Bidi agai tiwai po wabo dao, “Israel hani te eno hasia wai, te gomunai ogwa tiwai dao.
EXO 4:23 Tama eno nagebolo te po wai, ‘Nago te wai tagala palama, enabolo lotu po omainao.’ Tiali goli, nago hagela homu eyu da, te nago hasia wai te ogwa eno ela muaibao,” Genuai Bidigo te po wai,’ nago te po te Isip polasa tuni bidibolo wao.”
EXO 4:24 Te Moses te Isip tǫba pabo tųde pibadi, tama te toma nabo pesage tede Moses aga gasi selama, tama te gasigo aga ela muainogo yai.
EXO 4:25 Tama Sipora, te Mosesgo wego, te poa pai masigi selama, tama aga wai te ogwa te gasa tigiwali togolama, Moses sągąba muai. Tama agai te po wai, “Nage eno bidi dao, tiali goli nage kaneme tama sabo bidi dao.”
EXO 4:26 Tama Genuai Bidigo sulama tagaliyu, tama Moses bidimainogo yai, tama agai aga ela mubeo. Te we Siporago te dąį ilibo tigiwali togwabo kolesaga tede hagela homu eyu, tama agai te po wai, “Kaneme sabo bidi dao.”
EXO 4:27 Tama Genuai Bidigo Aronbolo te po wai, “Nage te masigi sane yai buluba pelama, Moses dali tede sisinaibao.” Tialima, aga pelama, Moses te Godigo bulu dude sisinama, gesabidi suyu, tama dwagi yai homu eyu, augwa si gesabidide nono nai.
EXO 4:28 Tama Mosesgo Aronbolo te Genuai Bidigo agabolo wali po tigidali wai, te Genuai Bidigo aga tagala paliyu wali, te po wai. Tama Mosesgo Aronbolo te Genuai Bidigo agabolo te bidigo isiąwai bomai sę yabo po wali, te po me Aron dali wai.
EXO 4:29 Tama nosali Moses de Aron augwali si te Isip tǫba pelama, tama augwali sigo te Israel tobolu bidi dabe deliba sisinai.
EXO 4:30 Tama Arongo te Genuai Bidigo Mosesbolo wali po tigidali augwalibolo te po wai, tama te Israel hani olo we bidi dabe me deliba sisinama, tama agai te bidigo isiąwai bomai sę te we bidi augwali gedude yai.
EXO 4:31 Tama tibaso, augwaligo homu Aronba mu dąų wai. Augwaligo te po tiwai wabo odali, Genuai Bidigo suali, te Isip hani augwaligo te Israel hani dali dwai kolesaga ebaso, agai homu hauwa augwalide ebo dao. Tama te we bidi dabe augwaligo te po odolama, tama augwa tobolu tǫba aiyaba munama, Genuai Bidibolo lotu po wai.
EXO 5:1 Tama nosali Moses de Aron si te Isip polasa tuni bidi bidibo teba pelama, tama te po wai, “Da Israel bagego Genuai Bidi Yawe Godigo te po wai, ‘Eno hani augwali te bidi meni yai bulu, te masigi saneba pelama, enabolo te genuai lotu po weyu, ena nogi ugwaba somainogo, augwali pomainao,’ wali.”
EXO 5:2 Tiali goli te tuni bidigo te po wai, “Genuai Bidi Yawe de dawe? Magi baso eno agai po odolama, te dage Israel hani pomainogo yaibawe? Eno te Genuai Bidi Yawe konebeo, tama tiyu, eno dage pagameo te po wagobeo,” wali.
EXO 5:3 Tama augwali sigo te po wali, “Da Hibru bagego God te da si bidibo digi pedelai dao. Da te masigi sane yai buluba sela sogo bidigi painogo homu yai, tama dago Godibolo te ofa mawainogo, te dago Genuai Bidi dao. Tama nago da pao wabo te usu yaibawe? Te dago tama tisąwani da, te agai da genuai gasigo, me te hwįbo sogode, te da mu dolaibao.”
EXO 5:4 Tama te Isip tuni bidigo Moses de Aron si dali te po wai, “Magi baso dage sigo eno sę ebo te we bidigo tagalomainogo te po obawe? Dage si sęba polo ma pao.
EXO 5:5 Dage Israel hani hauwa mu pedaliyu, tama da bulu page bidi aiyaba elaluai, tama megi dagego te sę ebo taga painogo obawe?”
EXO 5:6 Tama te sogo naga te tuni bidigo po me deli te Isip bage dali, te Israel augwa digi te Israel sę ebo bidi tonalubo bidi augwali dali te po wai. Agai te po wai,
EXO 5:7 “Dagego te wa pai nosa te Israel hanigo te be sę yabo dila pai nai brik nigimainogo magio, te dagego tebo dao. Augwa digi te nosa dabe sigi pomainao.
EXO 5:8 Tiali goli, augwaligo te sesemane sogo te nigibo tiwai brik naga augwaligo nigimainao. Dagego te namba te pęwadage iligio. Mu menio. Augwali sę hagela ebo we bidi dao. Tama tibaso, augwaligo te po wai, ‘Da pelama, dago Godibolo ofa igi pomainogo emainao.’
EXO 5:9 Augwalibolo sę hauwa menama, tama augwali sę dene mu yao, tama augwaligo te tiwai tibo po wabo odabo sogo te meni yaibao,” te Isip tuni bidigo te po wai.
EXO 5:10 Tama te Isip sę tonalubo tobolu bidi dabe, me te Israel sę tonalubo bidi dabe me, augwali te Israel haniba pelama, augwali dali te po wai, “Tuni bidigo te po wai, dago nosa dabe dagebolo sela magasigio wai.
EXO 5:11 Duga digi pelama, tama te nosa gegegi pao wai, tama dagego te mama tǫgo nigibo nai brik te polobadu nigali tiwai hauwa nigao, tama te nigibo brik namba te aiyaba me dulugio. Te namba te polobadu elaluali tiwai naga tama elalumainao,” te po wai.
EXO 5:12 Tama te Israel we bidi augwali te tigidali Isip teba tedela pelama, te nosa dabe tigidali sisinai.
EXO 5:13 Tama te sę tonalubo bidi dabego sę polo yao weyu, augwaligo te po wai, “Dagego deli sę tiwai naga tigidali sogo eyu, te dago nosa dagebolo mobadi yali sę tiwai sę yao.”
EXO 5:14 Tama te Isip sę tonalubo bidi dabe augwali te Israel augwa digi te sę tonalubo bidi nigilali, te bidi pageba pai. Tama augwaligo te bidi dabe augwali eliyu, te po wai, “Magi baso dagego te brik namba te polobadu nigali tiwai nigibewe?”
EXO 5:15 Tama tibaso, te Israel sę tonalubo bidi dabe augwali te Isip tuni bidi bidibo teba pelama, aga dali te po wai, “Magi baso nago te tiwai kolesaga da dali ebawe?
EXO 5:16 Augwaligo nosa dabolo magasobeo, tiali goli augwaligo dabolo te brik nigao te po wedu gebo dao. Tama megi me augwaligo da elai. Te brik namba sǫą pali kolesaga page dago menio. Te kolesaga te Isip bage duga digi te sę yai dao,” te po wai.
EXO 5:17 Tama te polasa tuni bidigo augwalibolo te po wai, “Dage sę hagela ebo bidi dabe mu dao. Tama tiyu, dagego te po wai, ‘Dago dena Genuai Bidibolo ofa magi pobaso, te dagego da sula tagalao,’ te po wedu gebo dao.
EXO 5:18 Woo! Dage duga sęba ma pao. Augwaligo nosa dagebolo magasogobeo. Tiali goli, dagego te brik namba augwaligo dagebolo po weyu, te nigao,” te polasa tuni bidigo te po wai.
EXO 5:19 Tama te Israel sę tonalubo bidi dabe augwaligo te tuni bidigo wabo po odolama, augwaligo te brik namba pęwadage ilisiąyu, tama augwaligo koneani, megi genuai sęgę augwaliba pedelali, te homu yai.
EXO 5:20 Tama augwaligo te tuni bidi taga sobadi, te sogo augwaligo te Moses de Aron si gesabidi suai. Augwali sigo augwali te be bulu badu asobo tonaluai.
EXO 5:21 Tama augwaligo te bidi si dali te po wai, “Dena homugo te Genuai Bidi Yawego dage sigo kolesaga osola suao, tama Genuai Bidi agai dage sibolo dene mawaibao, magi basowe, dage sigo te tuni bidi dali, te aga tobolu bidi dabe dali, augwaligo da te dwai nai tiwai mu, te homu ebo dage sigo ilalio. Te tuni bidigo da elemainogo dage sigo tų nigibao,” te po wai.
EXO 5:22 Tama Moses ma pelama, tama Genuai Bidibolo te po wai, “Genuai Bidi, magi baso nago naga we bidi hanibolo te dene maniwe? Tama magi baso nago ena eba tagala palai dawe?
EXO 5:23 Te nago po eno te tuni bidibolo wagi pali, tede gagalama dąį megi tama, agai dwai sę augwali Israel we bidi dali ebao. Tama nago augwali tau selama, magi sę me deli ebeo,” Mosesgo Godibolo te po wai.
EXO 6:1 Tama Genuai Bidi Yawego Moses dali te po wai, “Megi nago eno te tuni bidi dali ebo sę suaibao. Te eno bomogo yaibao, tama tibaso agai te dage Israel hani gasaba tagala palaibao. Mu tama, te eno aga selebo sę eyu, aga mu doloyu, tama agai dage agai tǫde bidibo sela sąnama, tama dage paibao,” wali.
EXO 6:2 Godigo Mosesbolo te po wai, “Ena digi ena te Genuai Bidi Yawe dao.
EXO 6:3 Polobadu kibu be hauwa ena te Abraham, Aisak, Jekop, te bageba pedelali, te augwaligo koneai, ena te Tigidali Bomo Elalubo God dao. Tiali goli, eno te tama po augwali dali wabe, Genuai Bidi Yawe te eno nogi da, te po wagi sogo da, teda te nogi page augwaligo konegi dao.
EXO 6:4 Tama eno bomo yai po augwali dali dąų weyu, te tǫ Kenan augwali mawaibao, te po wai. Augwali te bulude te tǫ page bidi hani bidisiąwai goli, eno te tǫ augwalibolo mabo homu yai.
EXO 6:5 Te me elalubo, te Isip bidi dabe augwaligo te Israel hani kalabus sę ebo tiwai sę menama yai, tama te Israel hani augwali moni gela wai. Tama megi augwali gela wabo eno odai, tama eno homugo polobadu eno te bomo yai po dąų wali, te eno ma koneai.”
EXO 6:6 “Tama tibaso, nago te po Israel hani dali wao, ‘God agai te po wai, “Ena digi ena Genuai Bidi Yawe dao. Eno dage te Isip hanigo nogode selama, tama te augwaligo sęgę dagebolo mabo tede me eno selama, tama dage olo mu bidimainogo yaibao. Tama eno bomogo augwali dene mu somainogo menama, tama dage eno genuai bomogo dobola ma saibao.
EXO 6:7 Te dage selama, tama dage ena we bidi mu pedelama, tama ena te dagego God bidaibao. Nosali dage te Isip bagego kalabus sęde bidali tagalama, tama dage olo mu bidaibao. Tama te sogo dagego mu koneyu, ena te Genuai Bidi da weyu, tama ena dagego God da, te homu yaibao.
EXO 6:8 Eno dage te tǫ Abraham, Aisak, Jekop, augwali dali bomo yai po dąų weyu, te tǫ mawaibao wai. Tama te tǫ eno dagebolo menama, tama te dagego tǫ mu elaluaibao. Ena da, te Genuai Bidi Yawe dao,” God agai te po wai,’ nago te po augwalibolo pusao,” wali.
EXO 6:9 Tama Mosesgo te po Israel hani dali wai, tiali goli augwaligo agai po odobeo. Magi basowe, te sę dene yaligo augwali homu aiyaba mu tula palai.
EXO 6:10 Nosali Genuai Bidigo Moses dali te po wai,
EXO 6:11 “Nage pelama, te Isip tuni bidibolo te po wagi pelama, te Israel hanigo agai tǫ mu taga pomainao, te po omainao.”
EXO 6:12 Tiali goli, Mosesgo te po wei ponoyu, te po wai, “Te Israel hani augwaligo eno po odobo menio. Tama tuni bidigo eno po mena tama odogowe? Eno pedauwali sęgę ebao. Eno po te tuni bidi dali bugagia dolo wainogo ebo te usu egobeo.”
EXO 6:13 Tialima, Genuai Bidigo Moses de Aron si te Israel hani bidibo, teba me, te Isip tuni bidi bidibo digi me, te tagala palali, augwali sigo te Israel hani te Isip tǫ tagalama, augwali odasa asomainogo yai.
EXO 6:14 Te bidi hani augwali te Moses de Aron sigo hasia wąį dabe te bidi hani nogi e dao. Ruben, te Jekopgo gomunai ogwago wai dabe nogi e dao. Te ogwa me si me si, me nogi Hanok, me Palu, me Hesron, me Karmi. Te Rubengo hani me si me si te hani me si me wąį si tomode te Ruben pedelai.
EXO 6:15 Simeon, te Jekopgo tomo ogwa, agai wai ogwa te a naga olama me badu nogo deli, gomunai ogwa Jemuel, me Jamin, me Ohat, me Jakin, me Sohar, me Saul. Saul aga ida te Kenan we me deli dao. Simeongo hani a naga me badu nogo deli, te hani tomode Simeon aga wąį pedelai.
EXO 6:16 Livai, te Jekopgo ogwa me, agai wai ogwa sela, gomunai ogwa Gerson, me tomo ogwa Kohat, sabi ogwa Merari. Tama Livai agai kibu be 137 bidilama, isai.
EXO 6:17 Gersongo ogwa si ame nai, me ogwa Lipni, me Simei. Te ogwa si wąį te Livaigo hani tomode elaluai.
EXO 6:18 Kohat agai wai ogwa me si me si, Amram, Ishar, Hebron, Usiel. Tama Kohat kibu be 133 bidilama, isai.
EXO 6:19 Merarigo wai si, Mali me Musi. Te bidi hani tigidali augwali te Livaigo wai hani augwali dao.
EXO 6:20 Amram agai we Jokebet sai, te aga ayago amago wegi, tama Jokebetgo Aron de Moses si ame nai. Tama Amram kibu be 137 bidilama, isai dao.
EXO 6:21 Ishargo wai sela, Kora, me Nefek, me Sikri.
EXO 6:22 Usiel agai wai sela, Misael, me Elsafan, me Sitri.
EXO 6:23 Arongo we Eliseba sai, te Aminadapgo wegi, te Nason aga abe dao. Tama Elisebago wai me si me si ame nai, Nadap, Abihu, Eleasar, me Itamar.
EXO 6:24 Korago ogwa sela, gomunai ogwa Asir, me Elkana, me Abiasap. Te bage sela augwaligo hani wąį Kora dao.
EXO 6:25 Eleasar te Arongo ogwa, agai te Putiel te bidigo wegi selama, agai wai te Finias ame nai. Te megi nogi nogi yali bidi hani augwali da te Livai hani sibi deli deli augwaligo tobolu bidi dabe dao.
EXO 6:26 Nago te bidi hani augwali tomode te Aron de Moses si nogi elalubo suai. Genuai Bidigo te bidi sibolo naga po weyu, te po wai, “Dage sigo te Israel hani dabe augwali te Isip tǫde bidibo tagalama, augwali odasa asao,” te po Genuai Bidigo augwali si dali wai.
EXO 6:27 Te bidi augwa sigo digi te Isip tuni bidi dali, te Israel hani tagala palaibao, te po wai. Tama te bidi sigo naga te sę yai.
EXO 6:28 Genuai Bidigo Moses dali Isipde po wali sogo, agai te po wai, “Ena digi ena te Genuai Bidi dao. Tigidali po eno nagebolo mabo, te po nago Isip tuni bidi dali wao.”
EXO 6:30 Tialima, Mosesgo Genuai Bidi dali te po wai, “Nago koneani, ena po wabo bidi menio. Tuni bidigo eno po odogobeo.” Mosesgo te po wai.
EXO 7:1 Tama tialima, Genuai Bidigo Moses dali te po wali, “Odao, eno nage te God tiwai te tuni bidigo gedude nigiliyu, tama nago ama Aron, te nagede po sabo bidi tiwai nigilama, tama nago po agai te tuni bidibolo waibao.
EXO 7:2 Tigidali nai po eno nagebolo wali, te po nago Aron dali wao. Tama agai te po te tuni bidi dali weyu, te agai te Israel hanigo te tuni bidigo tǫ tagalama, pomainao po waibao.
EXO 7:3 Tiali goli, eno te tuni bidide iliyu, tama aga homu tomoba masigi sąwai bidi pedelaibao, tama agai te Arongo po odogobeo. Tama tibaso, eno genuai bomai sę hauwa te Isip tǫde yaibao.
EXO 7:4 Tiali goli, te tobage bomai sę ebadi digi, tama te tuni bidi agai nago po odogobeo. Tama tibaso, eno te Isip tǫ dolama, augwali dene mu somainogo tiaibao. Tama ena polasa peyu, te Israel hani sibi dabe odasa peyu, augwali te eno we bidi hani, tama augwaligo te Isip tǫ mu taga paibao.
EXO 7:5 Tama eno te Isip hani dali haniani dwai dene mabo, te sogo tama Israel hani odasa peyu, te Isip tǫ taga paibao, tama te sogo Isip hanigo koneyu, te Genuai Bidi Yawe aga digi te Israel hani odasa pabo homu emainogo tama tiwai dao,” wali.
EXO 7:6 Tama nosali Moses de Aron augwali sigo te Genuai Bidigo wali po wali pelama, te sę tigidali yai.
EXO 7:7 Te sogo Mosesgo kibu be 80 elalubadi, tama Arongo kibu be 83 elalubadi, augwali sigo te sogo te Isip tuni bidi po miai.
EXO 7:8 Genuai Bidigo Moses de Aron si dali e tama wai,
EXO 7:9 “Tuni bidigo dage sibolo te bomai sę meba agai suainogo, te sę yao po wabo si da, te eno dage si tagala palobao, tama Moses nago Aronbolo agai te bilibo dono selama, te tuni bidigo gedude tǫba sąyao. Tama te dono hasamani gagalama pedelaibao,” wali.
EXO 7:10 Tama tibaso, Moses de Aron augwali si te Genuai Bidigo po wali pelama, te tuni bidi bidibo digi pai. Tama Arongo dono te tuni bidigo gedude, me te aga sę ebo bidi dabe gedude, Mosesgo dono tǫba sąwai, tama te dono hasamani pedelai.
EXO 7:11 Tuni bidigo te tebo sulama, tama agai te tigidali po page koneai bidi dabe, me te haniani pobi wabo bidi dabe i olama, augwaligo me te pobi po olama, tama Arongo ebo kolesaga tiwai augwaligo me yai.
EXO 7:12 Augwaligo me augwa dono sąbadi, tama hasamani gagawai, tiali goli Arongo hasamanigo augwaligo hasamani elama tuyu dalai.
EXO 7:13 Tiali goli, tuni bidi aga homu kolesaga dąų ola sali, te Genuai Bidigo po wali gilama tama tiwai, tama Moses de Aron augwali sigo po odobeo.
EXO 7:14 Tama Genuai Bidigo Mosesbolo te po wai, “Tuni bidi agai kolesaga te doyu, mu gagea pai eyu, tama agai te Israel hani pomainao te po wagobeo.
EXO 7:15 Tama kigamu aga te ąį Nail tede nago aga gesabidi deliba sisinama sueibao. Tama nago te hasamani pedelali dono selama, aga te ąį sesegeba tonalugi pao.
EXO 7:16 Tama nago tuni bidi dali te po wao, ‘God, da Hibru hanigo Genuai Bidi, agai ena tagala palali, nage te po omainogo, te agai we bidi te bidi meni yai buluba lotu po wagi pomainogo nago augwali tagala palao, te po wagasai. Tiali goli, megi nago te po odao.
EXO 7:17 Tama megi Genuai Bidigo te po wai, “Nago eno ebo sę sulama, tama nago koneyu, ena digi ena te Genuai Bidi Yawe da, te po nago waibao,” Godigo te po nagebolo obao. Suao, eno donogo te ąįba elebode te ąį kaneme pedelaibao.
EXO 7:18 Tama te sųgų dabe isilama, dwai kugumini mu yaibao. Tama Isip we bidi augwaligo te ąį tubo usugobeo,’ te po agabolo wao,” Godigo te po Mosesbolo wali.
EXO 7:19 Tama Genuai Bidigo Mosesbolo te po ma naga weyu, te po wai, “Aronbolo agai dono sao te po olama, tama agai te donogo te genuai ąį, me te tigidali ąį gamia, me te tigidali Isip tǫde elalubo sigi ąį tigidali nago te donogo sa muao. Tama te wę dabe kaneme pedelaibao, tama tigidali Isip te badu te pede poude kaneme naga elaluyu, augwaligo te kaneme ni namego me te botolgo te masigigo nigai me, te kaneme pedelaibao,” Genuai Bidigo Mosesbolo te po wai.
EXO 7:20 Tama Moses de Aron sigo te Genuai Bidigo augwa si dali wali po wali pelama, te sę yai. Tama te tuni bidi dali, aga sę ebo bage meba dali, augwaligo gedude Arongo dono selama, te Nail moni pabo ąįba elali, tama te ąį tigidali kaneme pedelai.
EXO 7:21 Tama te Nail ąįde elalubo tigidali sųgų isilama, dwai kugumini mu te ąįde yai. Tama te Isip we bidi augwaligo te wę tuabo usu egobeo. Tama kaneme te Isip tǫ tigidalide elaluai.
EXO 7:22 Tama te kolesaga page osola subo Isip bidi dabe, augwaligo pobigo te Arongo ebo kolesaga tiwai yai. Tama tuni bidigo augwali sigo po odobe. Menio. Agai kolesaga gagea pai me elaluai, te Genuai Bidigo tama tiaibao te po wai.
EXO 7:23 Tama tuni bidi aga beba ma pelama, te sogo yali sęde me agai homu midigi siyu hodalobeo.
EXO 7:24 Tama te Isip hani augwaligo te ąį tuabo usu ebeo, tibaso augwaligo te wę sesegede dedage nigai, te tuabo wę tede sainogo yai.
EXO 7:25 Tama te wę Nail dwai elalubadi, te a naga olama, me badu nogo si sogo tama bidai.
EXO 8:1 Tama nosali Genuai Bidigo Moses dali te po wai, “Nage tuni bidi pageba pelama, aga dali eno te po wao. ‘Genuai Bidi Yawe agai te po wai, “Eno we bidi augwali enaba lotu po wagasiyu asomainogo, augwali sula tagalao.
EXO 8:2 Nago augwali tagala palisiąbaso da, teda eno te gedeli dabe augwali tagala palama, augwali te dagego be tomoba aselama, tama nago tǫde bidibo we bidi augwali dolaibao.
EXO 8:3 Tama te wę Nail te gedeligo mu pągąna selama, tama augwali te wę tagalama, tama tuni bidi nago genuai be tomoba aselama, tama nago pibo be tų bet saiba asaibao. Tama te gedeli dabe te nago sę ebo bidi dabego be tomoba, me te nago we bidigo beba asaibao. Tama te nai ulubo nai stov tomoba, me te bret nigibo pou tomoba bidagasaibao.
EXO 8:4 Tama te gedeli dabe augwali posoga palama, nago tigi daiba duayagasu, te nago sę ebo bidi dabeba, me te nago we bidi augwali tigiba duayagasaibao,” Genuai Bidi Yawego te po wai.’ Te po wao,” Genuai Bidigo te po wai. Mosesgo te po tuni bidiba wagasai, tama te tuni bidigo agai po odobeo.
EXO 8:5 Tama tibaso, Genuai Bidigo Moses dali te po wai, “Aronbolo po olama, te aga nogo dodolama, tama agai dono ugwaba selama, nogogo tuao, tama te wę dabe, me ąį gamia dabe, me te sigi ąį ge, tede te gedeli dabe pedelama, tama te Isip bidi dabego tǫ pągąna somainao,” wali.
EXO 8:6 Tama Arongo nogo dodolama, tama dono ugwaba selama, tama te wę dabe dąį ilai. Tama te gedeli dabe pedelama, tama Isip bagego tǫ tigidali pągąna sai.
EXO 8:7 Tiali goli, tuni bidigo po page osola subo bidi dabe augwaligo pobigo me te gedeli ąįde bidali tagalama, hauwa te tǫba pai.
EXO 8:8 Tama tuni bidigo Moses de Aron si i olama, asobode augwali sibolo te po wai, “Dage sigo Genuai Bidibolo gedu haluasa po olama, agai te gedeli dabe da tigide bidibo sela sąmainao, tama eno nago we bidi pomainogo tagala paliyu, tama augwa Genuai Bidibolo ofa magi pomainogo yaibao,” wali.
EXO 8:9 Tama Mosesgo te tuni bidibolo po wei ponoyu, te po wali, “Te usu dao, eno gedu haluasa po nage tau siyu waibao. Naga digi te sogo bodolu mobaso, te eno gedu haluasa po nage tau siyu, te nago sę bidi dabe, me te nago we bidi dabe, augwali tau somainogo yaibao. Tama dagego bede bidibo gedeli dabe silama, tama te gedeli dabe augwali te wę Nailde naga bidaibao,” wali.
EXO 8:10 Tama tuni bidigo te po wai, “Gedu haluasa po do wagameo.” Tama Mosesgo te po wali, “Te eno nago po wabo gilama tama tiaibao, tama nago koneyu, te God tiwai Genuai Bidi Yawe me deli meni yai, te aga dago God dao.
EXO 8:11 Tama te gedeli dabego nage tagaliyu, te nago sę bidi dabe, me te nago we bidi dabe, augwali tagalama, tama augwali te wę Nailde naga bidaibao,” wali.
EXO 8:12 Tama Moses de Aron sigo te tuni bidi tagalama, pai. Tama Mosesgo gedu haluasa po Genuai Bidibolo bomonama weyu, agai te tuni bidibolo tagala palali gedeli sela sąmainogo yai.
EXO 8:13 Tama Genuai Bidigo Mosesgo hanalu wali pode tama tiwai, tama te bede bidali gedeli dabe, me obo tomode bidali, me te gide bidali, te tigidali gedeli isai.
EXO 8:14 Tama te Isip bidi dabe augwaligo te gedeli dabe deliba sisinama, pesage holai, tama te gedeli dabe damuyu, kugumini dwai mu pedelai.
EXO 8:15 Tama tuni bidi te gedeli dabe isali sulama, tama agai koneani, te dwai sogo silali. Tama tibaso, agai kolesaga ma doyu, gagea pai, te Genuai Bidigo agade po wali tiwai gilama tiwai, tama agai Moses de Aron sigo po odobeo.
EXO 8:16 Nosali Genuai Bidigo po Mosesbolo ma weyu, te po wai, “Aronbolo te po olama, agai dono tǫba elama, tama tigidali Isip tǫ hogomugo te dina dabe pedelaibao,” wali.
EXO 8:17 Tama augwali sigo tama tiwai. Arongo dono selama, tǫba elai, tama tigidali Isip tǫ hogomugo dina pedelama, tama te dina dabego te we bidi dabe, me te hasa dabe, augwali halua selama, tama augwali gąųgo kela tuai.
EXO 8:18 Tama te pobi page koneai Isip bidi dabe augwaligo te dina pedalomainogo pobi po wali, tiali goli augwaligo usu ebeo. Tama te dina dabego te hasa dabe augwali halua sai.
EXO 8:19 Tama te pobi po koneai bidi dabe augwaligo tuni bidi dali te po wai, “God aga digi te sę ebao.” Tiali goli, tuni bidigo kolesaga dolama gagea pai, te Genuai Bidigo po tama tiaibao wai, tama agai Moses de Aron sigo po wabo odobeo.
EXO 8:20 Genuai Bidigo Moses dali te po wai, “Tama kigamu mu tuni bidi węba asaibao,” wai, “tama aga asobadi nago aga sulama, tama eno po agabolo wao, ‘Genuai Bidi Yawego te po wai, “Eno we bidi lotu po enabolo omainogo pomainao.
EXO 8:21 Nago augwali tagala palisiąyu da, teda eno te bolia hauwa nageba tagala paliyu, te nago sę bidi dabebolo, me te nago we bidiba me, te bolia tagala palaibao. Tama dagego be me, te dage bidibo tǫ me, te boliago pągąna saibao.
EXO 8:22 Tiali goli, te bolia dabe pedalobo sogo te Gosen tǫ eno tonaluyu, te eno we bidi bidibo bulu, tama te bolia dabe augwali bidibo badu me pedelama bidigobeo. Te eno tama tebo sogo nago konemainogo te ena digi ena Genuai Bidi Yawe, eno te sę nago tǫde ebao.
EXO 8:23 Eno te deli tigi tiwai sę eno we bidi dali ebo tiwai te nago we bidi dali tegobeo. Odao, te gasagi yai bomai sę te do pedelaibao,” Genuai Bidi Yawego te po wai,’ tuni bidi dali te po wao,” Genuai Bidigo te po wai.
EXO 8:24 Tuni bidigo homu kolesaga hasegelebe, tama Genuai Bidi agai tama tiai, te agai po obadi, tama te genuai bolia hani hauwa te tuni bidigo genuai be tomoba asali, tama aga sę bidi dabego beba me asiyu, te Isip we bidi tigidaligo beba pai. Tama te boliago te Isip hani tigidali dolai.
EXO 8:25 Tama tuni bidigo Moses de Aron si asa olama i wai, tama agai te po wai, “Dage pelama, duga Godibolo te Isip tǫ tomode naga ofa mao.”
EXO 8:26 Tialima, Mosesgo te po wali, “Dago tama tiyu da, te dolo meni, magi basowe, Isip bage augwaligo te dago Genuai Bidi Godibolo ofa ebo hasa dabe sulama, tama augwaligo da dali dwai homu yaibao. Dago te hasa dabe elama ofa eyu da, te Isip bage augwaligo ofa isąwai nai, tama Isip bage augwaligo te tebo suyu, tama augwali sębę eyu, masigi sąnama, da ela muaibao.
EXO 8:27 Da pelama, sela sogo te bidi meni yai tǫba dago Godibolo ofa igibu paibao, dago Genuai Bidi Yawe, agai te sę dabolo yao te po wai.”
EXO 8:28 Tama tuni bidigo te po wai, “Te usu da, eno dage te duga Godibolo ofa magi pomainogo tagala paliyu, te duga Genuai Bidi Yawebolo te bidi meni yai tǫba ofa igi pomainogo, tiali goli dage digibulu gana pelamo dao. Tama dagego ena me tau somainogo gedu haluasa po wao,” wali.
EXO 8:29 Tama Mosesgo po wei ponoyu, te po wai, “Te eno nage taga pabo sogo te eno Genuai Bidibolo gedu haluasa po weyu, te do agai nago bede te bolia dabe sela sąyu, te nago sę bidigo bede me, te nago we bidi augwaligo bede me tiaibao. Tialima, nago tibo po da ma ola mayu, tama te we bidi augwali te augwa Genuai Bidibolo ofa magi pidali weyu, te tų nago ma paligio.”
EXO 8:30 Tama Mosesgo te tuni bidi taga peyu, Genuai Bidibolo gedu haluasa po wagi pai.
EXO 8:31 Tama Genuai Bidigo Mosesgo aga dali hanalu wali te sę yai. Tama tigidali bolia dabego te tuni bidi dali, te aga sę bidi me, te aga we bidi, augwali tagalama, tama te bolia me deli tede me bidibeo.
EXO 8:32 Te bolia dabe pela silai, tiali goli te tuni bidi aga homu ma hasegelisiąyu, tama agai te Israel we bidi augwali tagala palobeo.
EXO 9:1 Nosali Genuai Bidigo Mosesbolo te po wai, “Nage pelama, te tuni bidibolo te po agabolo wagi pao, ‘Da Hibru bagego God, Genuai Bidi Yawe, agai te po wai, “Eno we bidi augwaligo enaba lotu po omainogo augwali tagala palao.
EXO 9:2 Nago augwali dąų weyu, tama augwali tagala palisiąbaso da, te eno nage dali, te naga hani dabe dali dene mayu, tama eno genuai gasi te nago tigidali kibu dabeba tagala paliyu, te hos dabe me, te bidi duabo donki dabe me, te kamel, me bulmakau, me sipsip, me meme, te tama bulu badu bidibo nai dabeba eno gasi tagala palaibao.
EXO 9:4 Tialima, Genuai Bidi Yawe ena digi bugagia eno te Israel hanigo kibu dabe tonaluyu, tama augwaligo kibu dabe me deli isigobeo.” Genuai Bidi Yawego te po wai.’ Nago te po te tuni bidibolo wagi pao,” Genuai Bidigo te po Mosesbolo mawai.
EXO 9:5 Tama Genuai Bidigo te sę yabo sogo bodolu mayu, tama te po wali, “Do eno te sę yaibao.”
EXO 9:6 Tama tuni bidigo homu kolesaga hasegelebe, tama Genuai Bidi agai te po wali sę yali, tama Isip bagego bulu badu bidali kibu dabe tigidali isai. Tiali goli, Israel hanigo kibu dabe tigidali te bugagia bidali, tama me deli isibeo.
EXO 9:7 Tama tuni bidigo aga hani dali hanalu wali, “Te Israel bagego kibu dabe te bugagia bidibowe?” Tama te bidi mebago agabolo te po wai, “Awe. Tigidali bugagia bidibao. Me deli munu me isibeo.” Tiali goli, te tuni bidi homu kolesaga dwai me elaluyu, tama te we bidi augwali me tagala palobeo.
EXO 9:8 Tama Genuai Bidigo Moses de Aron si dali te po wali, “Dage si te brik ulubo be me deliba pelama, tama te sia keli meba selama, tama tuni bidi bidibo digi pao. Dage si te tuni bidi bidiboba sabolama, tama Moses nago te keli ugwaba sąyao.
EXO 9:9 Tama te keli hogomu pedelama, tama Isip tǫ tigidali usu naibao. Tama te keli hogomu bidi tigiba me, te kibu dabe tigiba me tulalubode, te dili keni tiwai pedelama, tama genuai keni pedelaibao,” wali.
EXO 9:10 Tama augwaligo te keli selama, pelama, te tuni bidi geduba doligi pali, tama Mosesgo te keli ugwaba sąwai. Tama te keligo te dili keni tiwai pedelali, tama te dili keni dabe ulu elama, tama keni te we bidi tigide, me te kibu dabe tigide pedelai.
EXO 9:11 Tama te pobi page koneai bidi dabe augwaligo te Moses ebo bomo yai sę teba pedelainogo ebo te usu ebe, magi basowe, augwali tigide te dili keni pągąna sali, te Isip we bidi tigide keni yali tiwai, augwali tigide me te keni pedelai.
EXO 9:12 Tialima, Genuai Bidigo te tuni bidigo homu kolesaga dąų walama, tama te tuni bidigo Moses de Aron sigo po wabo odobeo, te Genuai Bidigo tama po wali gilama tama tiwai.
EXO 9:13 Tama nosali ma, Genuai Bidigo Moses dali te po wali, “Kigamu digi mu nage pelama, tuni bidi agabolo te po weyu, ‘Da Hibru bagego God, Genuai Bidi Yawe, agai te po wali, “Te eno we bidi hani augwali enaba lotu po wagasomainogo tagala palao.
EXO 9:14 Tama nago te we bidi tagala palisiąbaso da, megi eno nagebolo dali, te nago sę ebo tobolu bidi dabe me, te nago we bidi dali, dageba te dene ilibo sę dabe mu mawaibao. Tama dagego te tigidali tǫ habu badu te bidi me deli, me te tibo god te ena tiwai me bidibo meni, te megi dagego mu bugagia konea saibao. Ena te God mu dao.
EXO 9:15 Te eno nage dali, naga we bidi dali, dage te eno genuai gasigo dage dolainogo homu igi sogo da, teda dage tigidali mu ela siligi da.
EXO 9:16 Tiali goli, eno nage hodolama, te tuni bidi nigiliyu, te eno genuai bomo dagebolo ola mayu, tama te we bidigo eno genuai nogi te tigidali tǫba te po pusugi pomainogo tebao.
EXO 9:17 Tiali goli, nago eno we bidi dali te boi bidi homu eyu, tama nago augwali tagala palobeo.
EXO 9:18 Tama tibaso, odao. Do e tobage tiwai sogo, te eno moni genuai tulubage, te talua ge tiwai tulubage e tǫba dulumainogo yaibao. Te tiwai tobage talua ge tulubage te Isip tǫba gesi sogo pedalisiąbadi, tama megi sogoba usu nagasai.
EXO 9:19 Tama te bidi dabe augwalibolo po olama, te kibu bulmakau dabe, me te nago nai gasa badu bidalua pabo nai dabe tigidali selama, te gasa be meba tomoba selasa pao. Meni baso, te eno genuai talua ge tulubage te bidi dabe tigiba, me te bulu badu bidibo kibu dabe tigiba tulama, tama augwali isaibao.” God Genuai Bidigo te po wai,’ dage sigo te po wao,” wali.
EXO 9:20 Tama te tuni bidigo sę bidi meba augwali te Genuai Bidigo wali pode wi elama, tama augwaligo augwa sę ebo bidi dabe, me te augwa kibu dabe, te augwa be tomoba selama muai.
EXO 9:21 Tiali goli, bidi meba augwaligo te Genuai Bidigo wali pode wi isąma, tama augwaligo augwa sę bidi, me te kibu dabe dali, augwali bulu badu olo bidai.
EXO 9:22 Tama Genuai Bidigo Mosesbolo te po wali, “Nago nogo ugwaba selama, tama nago te dagalu usu siyu, tama te talua ge tulubage te Isip tǫ tigidali habu badu tuluyu, te we bidi dali te gide elalubo tigidali naiba tulubage tulaibao.”
EXO 9:23 Tama Mosesgo dono ugwaba sali, tama Genuai Bidigo dagalu kulukulu omainogo yali, tama dagalude te be sele ebo ula te tǫba dulali, tama te talua ge tulubage tǫba tagala palai. Genuai Bidigo te talua ge tulubage te tigidali Isip tǫba tulumainogo yai.
EXO 9:24 Tama te talua ge tulubage me mu tutulu pidubadi geai, tama dagalude te be sele ebo ula te sia dabo tiwai eyu, tama te tigidali habuba pidubadi geai. Tama polobadu te Isip bage augwaligo te tiwai talua ge tulubage me subeo. Mu menio.
EXO 9:25 Tama te tulubagego te bidi dabe, me te kibu dabe, me te Isip tǫde bulu badu elaluali nai dabe tigidali dolai. Tama te talua ge tulubagego te gide elaluali nai, me te ni du dabe tigidali pedelama, tigidali mu dolai.
EXO 9:26 Tiali goli, te Gosen tǫ badu, te Israel bage bidibo digi, te bulu delide digi naga te tobage tulubage menio.
EXO 9:27 Tama tuni bidigo po ola toloyu, te Moses de Aron si asao, te po wai. Tama augwali si aselama, tama tuni bidigo augwali dali te po wali, “Megi eno dwai sęgę salio. Genuai Bidi Yawego doloba pai kolesaga yai, tiali goli ena dali, te eno we bidi dabe dali, dago dwai kolesaga yalio.
EXO 9:28 Te talua ge tulubage tulali dali, te dagalu kulukulu wali, te sigo da dolai dao. Tama nago gedu haluasa po Genuai Bidibolo olama, tama agai te nai silibo side, te eno dage pomainogo tagala palaibao. Tama dage e tǫde ma bidimainogo menio,” wali.
EXO 9:29 Tama Mosesgo te tuni bidi agabolo te po wali, “Te ena te hanu buluba pabo sogo, te eno nogo ugwaba selama, te Genuai Bidibolo gedu haluasa po waibao. Tama te be kulukulu ma wasiąma, tama te talua ge tulubage silaibao. Tama te sogo nago koneyu, te tǫ te Genuai Bidigo tǫ naga da waibao.
EXO 9:30 Tiali goli, eno koneani, nage dali, te nago sę bidi dabego te Yawe God dali wi isiąyu, te aga Genuai Bidi da te homu menio,” wali.
EXO 9:31 Te dwasianu ni dabe augwaligo tigi waligo te ugwa hobolobo hobi nigibo nai, me te rais bali dabe mu dolali, magi basowe te rais bali sabo tau sisi yai, tama te dwasianu ni dabe honu megi tama pedalobadi dao.
EXO 9:32 Te tubo nai wit te digi dolobe, magi basowe, te honu dwasianu pedelai elaluai.
EXO 9:33 Tama Mosesgo te tuni bidi taga peyu, aga te hanu sesege bulu badu pai. Tama agai nogo ugwaba selama, tama Genuai Bidibolo gedu haluasa po wai. Tama te dagalu kulukulu ma wasiąma, tama te talua ge tulubage me, te olo tulubage me, te tigidali sia sai.
EXO 9:34 Tama tuni bidigo suali, te dagalu be kulu wasiąyu, tama te talua ge tulubage me, te olo tulubage me, te me te silali, tama te tuni bidi aga dali, te gavman sę ebo bidi dali, augwaligo kolesaga hasegelisiąma, tama augwa homu dąų olama, tama augwaligo dwai sę God dali ma yai.
EXO 9:35 Mu tama, te tuni bidigo homu dąų olama, tama agai te Israel hani tagala palobe, te Genuai Bidigo te Mosesgo pedauwalide polobadu po weyu, tama tiaibao wai.
EXO 10:1 Tama nosali Genuai Bidigo Mosesbolo te po wai, “Nago te tuni bidi sugi pao. Eno digi te tuni bidigo homu me, te aga dali gavman sę ebo bidi dabego homu me, te mu dąų ilai, tama eno te bomai sę augwali tomode yaibao.
EXO 10:2 Tama eno te sę ebaso, te dagego duga wai dabebolo, me te dagego wąįgo wai dabebolo te eno te bomai sę Isip tomode yali po weyu, tama te Isip bage augwalibolo eno te bidigo isiąbo bomai sę eyu, tama augwaligo homu kolesaga aiyaba mu elaluali. Tama dage Israel dabe tigidaligo te sę ebo koneyu, tama ena digi ena te Genuai Bidi Yawe da, te me dagego mu koneaibao,” Genuai Bidigo Mosesbolo te po wai.
EXO 10:3 Tama Moses de Aron si pelama, te tuni bidi agabolo te po wagi pali, “Da Hibru bagego God, Genuai Bidi Yawe, agai te po wai, ‘Nisu naga sogo nago te po sela sąyu, tama nage ena dologode bidigobewe? Te eno we bidi hani tagala palao, te augwaligo lotu po enaba wagasomainao.
EXO 10:4 Te nago tama tisąbaso da, teda do eno te kuli mano dabe tagala palama, tama nago tǫba pągąna sagasaibao.
EXO 10:5 Te augwaligo tigidali habu badu mesega sagaselama, tama nago te tǫ me sugobeo. Tama te nai dabe, me te ni dabe, te talua ge tulubagego dolisiąwani nai, te kuli mano dabe augwaligo te tigidali mu tula silaibao.
EXO 10:6 Augwali te nago beba, me te nage dali gavman sę ebo bidigo beba me, te nago we bidigo beba me, te kuli mano dabe augwali pągąna saibao. Polobadu wąį dabe me te aya dede bidada asali, te megi tama bidibo sogo te tiwai kuli mano dabe hauwa te dagego tǫba me pedelai menio. Te dwai nai mu dao.’ Godigo te po wai.” Mosesgo te po olama, tama aga begelama, te tuni bidi tagalama, buluba pai.
EXO 10:7 Tama te tuni bidi aga dali gavman sę ebo bidi dabe augwaligo te tuni bidi dali te po wai, “Odao. Nisu naga sogo dabolo te sęgę mabo bidi da tomode me bidaibawe? Te we bidi dabe naga te augwali te augwa God Genuai Bidibolo lotu wagi peyu pomainao. Nago te Isip tǫ dolali susiąma ebawe?”
EXO 10:8 Tama augwaligo te Moses de Aron si te tuni bidiba odasa ma asai. Tama tuni bidigo augwali sibolo te po wali, “Dage te duga God Genuai Bidibolo lotu po wagi peyu piąo. Tiali goli, eno koneama te de dede naga mu dage paibawe?”
EXO 10:9 Tama Mosesgo te tuni bidigo po wei ponoyu, te po wai, “Da tigidali paibao. Te dago gesi bidi dali, te monu dabe me, te wai ogwa me, te wegi me, tama te tigidali sipsip, me te meme, me te tigidali bulmakau dabe, te tigidali sela paibao. Magi basowe, te dago genuai nai daa tuyu, lotu po genuai te dago Genuai Bidibolo weyu yaibao,” wali.
EXO 10:10 Tiali goli, tuni bidigo te po wai, “Eno te dage dali dagego we wai tigidali dali tagala paligi sogo da, teda eno homugo dagego Genuai Bidi Yawe aga me dage dali pigi da. Tiali goli, te menio, eno dagego te we wai dali tigidali sela pomainogo ebeo. Mu menio. Eno koneani, dagego dwai kolesaga dabolo yainogo ebao.
EXO 10:11 Tama eno te we wai dabe pomainogo me tagala palogobeo. Te bidi dabe augwali naga pelama, te Genuai Bidiba lotu po wagi peyu pomainao.” Tuni bidigo po ola silama, tama augwaligo Aron de Moses si buluba sela sąwai.
EXO 10:12 Tama nosali Genuai Bidigo Moses dali te po wali, “Nago nogo ugwaba selama, tama nago te Isip tǫ usu sao, tama te kuli mano dabe tigidali asomainao. Tama te kuli mano augwaligo te ni yabe dabe tigidali te genuai ais tulubagego dolisiąwani nai dabe tigidali tula silimainao,” wali.
EXO 10:13 Tama Godigo te po obaso, Mosesgo dono ugwaba sali, tama Genuai Bidigo te giliga pedalobo badu te wali te deli sogo giligade aselama, tama be hulia sai. Tama kigamu te waligo te kuli mano dabe selasa asalio.
EXO 10:14 Tama genuai genuai kuli mano dabe aselama, te Isip tǫ tigidali habu badu mesega sagasai. Polobadu Isip hani augwaligo te tiwai genuai kuli mano hani suai meni, tama nosali augwaligo ma sugobeo.
EXO 10:15 Tama te kuli mano augwali mu pągąna sagaselama, tama te tǫ tigidali mu mesega sai, tama te tǫ sisi mu yai. Tama te kuli mano augwaligo te tigidali nosa dabe, me te tigidali nedu du wai te genuai ais tulubagego dolisiąwani, te tigidali tula silai. Tama te nide te ni yabe, me te Isip tǫde nosa dabe deli digi me elalubeo. Menio. Augwaligo mu silai.
EXO 10:16 Tama tuni bidigo po polo tagala paliyu, tama Moses de Aron si asao wai. Tama augwali pali, tama agai augwali sibolo te po wai, “Eno dwai sęgę God dali yali, te dagego Genuai Bidi Yawe dali, me dage si dali me, te eno sęgę salio.
EXO 10:17 Tama dage sigo eno sęgę megi deli sogo digi ma sela sąyao. Tama dage sigo Godiba gedu haluasa po weyu, tama dagego Genuai Bidi agabolo hanaluyu, tama te dwai naigo ena dolainogo ebo te sela sąmainao.”
EXO 10:18 Tama augwali sigo te tuni bidi taga peyu, tama Mosesgo Genuai Bidiba gedu haluasa po wagi pai.
EXO 10:19 Tama Genuai Bidigo te wali hasegelama, te bomai wali te sia ge dega sabo badu asomainogo yai. Tama waligo te kuli mano tigidali te mama yai tamu ąįba selasa pai. Tama te Isipde te kuli mano tede me deli bidibeo. Menio.
EXO 10:20 Tiali goli, Genuai Bidigo te tuni bidigo homu dąų mu ilama, tama tuni bidi te Israel bage augwali tagala palobeo.
EXO 10:21 Nosali Genuai Bidigo Moses dali te po wai, “Nago nogo ugwaba sao, tama moni genuai hulia sabogo te Isip tǫ halua saibao. Te be hulia sabo te gasagi yai mu dao. Te bomai nai augwaligo nogogo tuabo usu tiwai dao,” te po wai.
EXO 10:22 Tama Mosesgo nogo ugwaba sali, tama genuai be hulia selama, tama Isip tǫ tigidali sela sogo be hulia sai elaluai.
EXO 10:23 Tama Isip we bidi augwali te augwa hasi suainogo ebo usu ebeo. Tama tigidali we bidi te sogo augwa be tomode bidai. Augwali buluba soabo usu ebeo. Tiali goli, te Israel bage augwali bidibo digi te be hulia sabeo. Menio.
EXO 10:24 Tama tuni bidigo Moses i olama, asobode agabolo te po wai, “Dage te duga Genuai Bidibolo lotu po wagi piąo. Tama te we wai augwali duga dali pomainao. Tiali goli, te bulmakau, sipsip dabe augwali te Isipde bidimainao,” te po wai.
EXO 10:25 Tama Mosesgo po wei ponoyu, te po wai, “Menio. Nago dago God Genuai Bidi Yawebolo ofa yabo nai me sela pomainogo yao.
EXO 10:26 Tama dago dena kibu dabe me tigidali selama, dago sela odasa paibao. Dago me deli bidibadi taga pogobeo. Dago kibu dabe meba te dago Genuai Bidibolo ofa yabo sa muaibao. Tiali goli, da te lotu po wabo buluba pedelama, tama dago koneama, mena kibu te ofa yainogo te saibao,” wali.
EXO 10:27 Tiali goli, Genuai Bidigo te tuni bidigo homu dąų olama, tama tuni bidigo augwali tagala palobeo.
EXO 10:28 Agai Mosesbolo te po wai, “Ao, nage pao! Nage te bulude bidigio, gedao. Nago ena ma sugobeo. Tama nago ena ma suagasiyu da, te deli sogo mu eno nage ela muaibao.”
EXO 10:29 Mosesgo te po odoyu, te po wai, “Te dolo dao. Eno nage ma sugobeo.”
EXO 11:1 Tama Moses te Isip tuni bidi sugi pesiąbadi, hasia bolo Genuai Bidigo Mosesbolo te po wai, “Eno deli sogo digi me te Isip tuni bidi, aga hani we bidi dali, augwalibolo te eno dene mu ilaibao. Tama tebo si, nosali agai dage tagala palaibao. Tama agai dage dali homu nagame elama, dage tagala palogobeo. Menio. Te agai dage polo mu pao weyu, tama dage te bulude tigidali mu sela sąwaibao.
EXO 11:2 Tama megi nago te Israel we bidi tigidalibolo te po olama, tama augwali te pąde bidibo Isip haniba pelama, tama augwalibolo te au dobage gol, me te au dobage silva te augwali momainogo hanalugi pao,” wali.
EXO 11:3 Nosali augwaligo tama tiwai, tama Genuai Bidigo te Israel bage augwalibolo te genuai nogi te Isip we bidi augwaligo gedude menama, tama augwaligo au dobage gol me silva te Israel bage augwalibolo mawai. Mu tama, te gavman sę ebo genuai bidi dabe dali, te Isip olo we bidi dali, augwaligo Moses te genuai bidi mu da, te homu yali, tama tiyu, augwaligo te sę ebo homu yai.
EXO 11:4 Tama te tuni bidigo te “Nago ena ma sugobeo,” te po olama, tama Mosesgo tuni bidibolo po wei ponoyu, te po wali, “Genuai Bidigo po odao. Agai te po wai, ‘Me sogo be huli tomode ena te Isip tǫ tigidali habuba bilaibao,’ te po wai.
EXO 11:5 ‘Tama tigidali Isip bagego gomunai ogwa isa silaibao. Tama tuni bidi, nago gomunai ogwade digi gagalaibao. Te wai agai nage hasegelama, te tuni bidi pedelainogo yali, te ogwa isaibao. Tama tigidali gomunai ogwa te isiyu, tama te olo sę ebo we dabego gomunai ogwa me tigidali isaibao, te nogi meni yai we dabe sibi augwaligo te tubo nai wit te masingo agaga pelama te bret nigibo sę ebo dao. Tama te tigidali bulmakau dabego gomunai wai dabe me isaibao.
EXO 11:6 Tama tigidali Isip tǫ badu bidibo we bidi augwali homu sęgę me elama, tama gela genuai mu waibao. Te tiwai gela te Isipde polobadu me wai meni, tama te gela ma wagobeo.
EXO 11:7 Tiali goli, eno dwai sę deli me te Israel we bidi augwali dali, me te augwaligo bulmakau nai dabe dali, dwai sę me egobeo,’ Genuai Bidi Yawego te po wai. Tama nago koneama, aga da te Genuai Bidi Yawe da, te homu emainogo yai, agai te deli tigi tiwai kolesaga te Israel bage dali ebe, te dage Isip dabe dali ebo kolesaga tiwai ebo menio.”
EXO 11:8 Tama Mosesgo te po ma wai, “Tama tuni bidi, nage dali, gavman sę ebo bidi dabe, dage tigidali aselama, tama enaba kidu sugunama, po bomonama weyu, te po waibao, ‘Nage pao. Nage naga we bidi hani dali, polo pao.’ Te sę tigidali pedela silama, tama nosali eno te Isip taga paibao.” Tama Moses sębę mu elama, tama agai te tuni bidi tagala buluba soai.
EXO 11:9 Te Moses te tuni bidi polobadu sugi pesiąbadi, tama Genuai Bidigo Mosesbolo te po wai, “Tuni bidigo nago po me odogobeo, magi baso meni, te eno bomai sę meba te Isipde ma emainogo tama yaibao,” Genuai Bidigo te po wai.
EXO 11:10 Tama Moses de Aron sigo bomai sę hauwa deli deli te tuni bidigo gedude yai, tiali goli Godigo aga homu dąų olama, tama te tuni bidigo te Israel bage augwali agai tǫ tagala palobeo.
EXO 12:1 Moses de Aron si Isipde bidibadi, Genuai Bidigo augwali sibolo te po wai,
EXO 12:2 “Te megi polua te hasia polua te dagego kalenda bukude elaluaibao.
EXO 12:3 Tama tigidali Israel we bidibolo te po wao, ‘Tama e polua dei nogo si wabode, te deli deli bidigo aga we waide te kibu sipsip wai sa muao, ma aga kibu meme wai me deli sa muao.’
EXO 12:4 Tama te we bidi wai augwali hani dwasianu eyu, tama augwaligo te nai tula silabo homu isiąbaso da, teda ayago te aga pąde bidibo we bidi wai augwali asa olama, tama te hani augwa si te nai dobola selama tuao. Augwaligo homugo te we bidi wai bidibo usu nama, tama te kibu sipsip mi augwaliba dobayao.
EXO 12:5 Tama dagego kibu sipsip omai, ma te meme omai, te kibu be deli yai sa muao. Dagego te sipsip meme te tigide keni keni yai me selamo dao.
EXO 12:6 Augwaligo te kibu dabe bugagia tonaluama, te polua dei 14 wabode, tama pio mu tigidaligo te augwa kibu dabe elao.
EXO 12:7 Tama augwaligo te kibu dabe kaneme meba selama, tama mena bede te nai tubo te be tųde elalubo ni pos side me, te ugwadu me, te kaneme pipili pao.
EXO 12:8 Tama te sogo hulide dagego sipsip meme mi dabe siade ulao. Tama dagego te kibu mi dali, te bo disiąwai bret, me te ha yai donai dali tuao.
EXO 12:9 Tama dagego te kibu mi disiąwai tugio, tama dagego sęnęde ulama tulamuo. Menio. Dagego siade naga ulao. Tama te kibu tobolu me, te nogo sągą me, te tigidali haliga dabe, te kibu sipsip wai, ma meme wai, tigi sese elalubadi tama ulama, te mi tuao.
EXO 12:10 Dagego te kibu mi meba munalubadi kigamu elamuo. Tama te kibu mi meba kigamu munalubaso da, teda te siaba ulama, tama te siago tigidali dela silimainao.
EXO 12:11 Dagego te kibu mi tuabo sogo e tama tiao. Gudubo ugwa gudama, tama sągą nadoba mubadi, bilibo dono nogode tola sao. Tama dagego polo te kibu mi tuao, magi basowe, te nai tuali bodolude ena Genuai Bidi Yawe eno dage ela soaibao.”
EXO 12:12 “Tama te sogo hulide tama, ena te Isip tǫ tigidaliba pelama, tama te Isip we bidigo tigidali te gomunai ogwa ela muyu, tama augwaligo kibu dabe me elaibao. Ena digi ena te Genuai Bidi Yawe, tama eno te Isip bage augwaligo tibo god tigidali augwali te bomo meni yai bage mu dao hanilama, ola mawaibao.
EXO 12:13 Tama dagego te be pilali kaneme te dagego dąį tiwai elaluaibao. Tama eno te Isip bage augwali dene ilibo sogo, eno te kaneme sulama, tama eno dage ela soaibao.”
EXO 12:14 “Te sę yali sogo, dagego bodolu pedalobode, te dagego genuai lotu po wabo sogo yagasaibao, tama te sogo koneama, ena Genuai Bidi eno te sę yai. Tama dage hani nosali nosali pedalobo bage, augwaligo me te Godigo dage Tagalama Ela Soali Sogo pedalobode te nai tueibao,” wali.
EXO 12:15 Genuai Bidigo po ma weyu, te po wai, “Te nosali bidada peyu, tama dagego te Pasova bret tubosi da, teda dagego te a naga olama, me badu nogo si, te tama side te bo disiąwai nai bret tuao. Te hasia mu dagego bede munalubo te bret bo dabo nai yis tigidali selama, tagalao. Magi baso meni, niwai bidi me deli agai hasia sogo te bo dabo nai yis tudu pelama, te a naga olama, me nogo si usu nigi pobaso da, teda aga dagego te Israel hanide sela sąyao.
EXO 12:16 Te hasia deli sogo, me te a naga olama, me badu si sogo, dage sisinama, lotu po wao. Dagego te si sogo gasa sę me igio. Dagego duga tubo nai dabe naga dodolao. Te sę ebo naga te usu da.”
EXO 12:17 “Te hasia deli sogo te a naga olama, me badu si sogo wabode, te sogo digi eno dage hani tigidali te Isip taga peyu odasa paibao. Tama tigidali kibu bede dagego te wali peyu, te Bo Disiąwai Nai Bret Tuali bodolu muao. Tigidali sogo nosali dagego hani augwaligo te sogo te dagego genuai side tiwai dao.
EXO 12:18 Tama dagego te bo disiąwai nai bret te polua dei 14, tede pio tubo gagalama, tama te polua dei 21, te tama te nai tuao.
EXO 12:19 Tama te 7 sogo elalubadi, te yis dagego bede me munaluamo dao. Tama dage hani bidi me deli, ma te gasa bulu bidi dage dali bidibo bidi, te niwai bidigo te yis elalubo bret te sogo tubaso da, teda te bidi aga te dage Israel hanide sela sąyao.
EXO 12:20 Odao. Te dage tedali tedali mena bidibo me, te Bo Disiąwai Nai Bret Tubo bodolu mani sogo, tede dagego te bo dabo nai yis tugio. Dagego te bo disiąwai bret naga tuao.” Genuai Bidi Godigo te po wai.
EXO 12:21 Tama Mosesgo tigidali Israel tobolu bidi dabe i olama asobode, augwalibolo te Israel hanibolo pusabo po weyu, te po wai, “Dage pelama, te ogwa bidi sipsip meme te dage dali duga we wai pulubade sa munama, tama te Godigo dage ela soabo Pasova side te sipsip meme dabe elao.
EXO 12:22 Tama kaneme te pouba gelama, tama te ni hisop dwasianu nologo selama, tama te kaneme munalubo pouba muao. Tama kaneme dwasianu me badu te be tųde elalubo ni pos side piliyu, tama te tų ugwadu podilali nide me, te kaneme pilao. Tama dage tigidali te be tomode bidiyu, tama buluba me soasiąma, tama kigamu be posaibao.
EXO 12:23 Tama nosali Genuai Bidi te Isip tǫ habu tigidali teba pelama, te Isip bagego gomunai ogwa dabe elaibao. Tama agai te kaneme dagego be tų sesegede elalubo sulama, tama agai dage ela soyu, tama te ensel mobo bidi dabe augwaligo te be tomoba pelama, dagego gomunai wai dabe elegobeo,” wali.
EXO 12:24 “Tama dage dali, tama dagego nosali ame nabo bulai wai dabe, augwaligo te tiwai kolesaga tigidali kibu bede yao.
EXO 12:25 Tama dage te Genuai Bidigo po dąų weyu, dage mawaiba wali te tǫba bidigi pabo sogo me, tama dagego te Godigo dage tagalama ela soali side te nai tuao.
EXO 12:26 Tama nosali dagego wai dabego dagebolo hanaluyu, te po waibao, ‘Magi po pagede te nai tubo dawe?’
EXO 12:27 Tama dagego augwalibolo te po wao, ‘Megi da, te Pasova sogo dao. Dago te ofa Genuai Bidibolo ebo, te agai da Israel hani tagalama ela soali bodolu side te sę ebao. Dago te Isip hani augwaligo gomunai ogwa agai elali sogo homugo koneama tiwai. Tiali goli, agai da Israel bagego be tagalama, ela soai, tama dago wai dabe sula tagalama, bugagia bidai.’” Mosesgo te po te tobolu bidi dabebolo wai. Tama nosali te we bidi augwaligo te po odoyu, tama augwali tobolu aiyaba munama, tama Godibolo lotu po wai.
EXO 12:28 Tama nosali augwali hodaloama peyu, tama augwaligo te Genuai Bidigo Moses de Aron sibolo wali po wali peyu, te sę igi pai.
EXO 12:29 Tama huli tomode mu, Genuai Bidigo te Isip dabego gomunai ogwa tigidali ela silai. Agai te tuni bidigo gomunai ogwade elebo gagalama, tama ela pelama, tama te kalabus bidi dabego gomunai ogwa dabeba me usu nigi pai. Tama agai te haniani kibu hani dabego gomunai wai dabe me elai.
EXO 12:30 Tama te sogo hulide naga, te tuni bidi aga dali, gavman sę ebo bidi dabe me, tama te Isip we bidi tigidali, augwali hodaloama, te wai dabe isai suai. Tama Isip tǫ tigidali habu badu tigidali we bidi genuai gela ola pali, magi basowe, tigidali be deli delide wai ogwa isasa pai.
EXO 12:31 Tama te sogo hulide naga tuni bidigo Moses de Aron si i olama, asobode augwali sibolo te po wai, “Dage pao! Dage si dali, te tigidali Israel we bidi, dage polo piąo! Eno hani we bidi taga pao. Dagego enabolo hanalu wali te dagego Genuai Bidi Yawebolo lotu po wagi pao.
EXO 12:32 Tama te kibu sipsip, me meme, tama te kibu bulmakau me selama, tama te Isip mu tagalama, dagego polobadu wali po tiwai eyu pao. Tama nago gedu haluasa po Godibolo obaso, agai ena dwagi yai ilimainao,” te Isip tuni bidigo augwali sibolo te po wai.
EXO 12:33 Tama Isip dabe augwaligo te Israel dabe augwaligo te Isip tǫ tagalama, polo pomainogo bomonama yai. Augwaligo te po wai, “Dagego da taga peyu, polo pesiąyu da, teda da tigidali isaibao,” wali.
EXO 12:34 Tama te Israel dabe augwaligo plaua te yis dali begelisiąbadi te pouba muai. Tama augwaligo te pou name ugwago haluama, tama augwaligo nagede tolasa pai.
EXO 12:35 Tama Israel hani augwaligo te Isip we bidibolo te gol, me silva, me ugwa dabe, te nai hanalu wai, Mosesgo te po augwalibolo polobadu wai.
EXO 12:36 Tama Genuai Bidigo te Israel hani augwalibolo genuai nogi te Isip we bidi augwaligo gedude mawai. Tama te Isip dabe augwaligo te Israel hanigo sainogo homu yali nai augwalibolo mawai. Tame te kolesagade Israel hanigo te Isip dabego nai umabo sai.
EXO 12:37 Te Israel bage augwali hogolama peyu, te Rameses hanu tagalama, tama te Sukot hanuba pai. Te sogo te Israel hani bidi te bidi sese hauwa 600,000 mu pali, tiali goli augwaligo te we wai dabe dali nedebeo.
EXO 12:38 Tama te Israel hani isiąwai we bidi hani hauwa, me te bulmakau, me sipsip, me meme dabe hauwa, te augwali dali pai.
EXO 12:39 Tama augwaligo bret te yis meni yai plaua te Isipdu sela asali tedali ulai. Augwaligo te yis te plaua dali musiąwai, magi basowe, te Isip dabego augwali polo mu sela sąyu, tama augwaligo te nai sisi yabo sogo meni yai.
EXO 12:40 Tama te Israel hani augwali Isip tǫde kibu be bidi sese hauwa 430 mu bidai.
EXO 12:41 Tama te sogo mu dolo augwali Isip tǫde bidali kibu be bidi sese hauwa 430 mu bidama, tama Genuai Bidigo Israel hani dabe we bidi augwaligo te Isip tǫ taga soai.
EXO 12:42 Tama te sogo hulide naga Genuai Bidigo te Israel hani bugagia tonaluai, tama augwali te Isipde selama odasa asai. Tama tibaso, tigidali sogo nosali kibu bede augwali te sogo hulide odasa asali sogo Genuai Bidi homugo koneama, tama bugagia tonaluyu, augwaligo agabolo lotu po wabo dao.
EXO 12:43 Genuai Bidigo Moses de Aron sibolo te po wai, “Odao, te Pasova nai dabego bomai po e dao. Te Israel hani isiąwai gasa bulu we bidigo te nai tugio.
EXO 12:44 Te augwali dage dali pęwadage sogo naga bidibaso da, ma augwali mone sabo sę eyu da, teda augwaligo te nai sela tugio. Tiali goli, dagego abelama te olo sę ebo bidi pedelali, tama dagego augwali tigiwali togwali, te bage augwaligo te nai tubo usu dao.”
EXO 12:46 “Te we bidi augwaligo te mi te nai sisi yali bede naga tuao. Augwaligo te nai meba te buluba sela pigio. Tama me te augwaligo te kibu sipsip dili dabe togogio.
EXO 12:47 Tama tigidali Israel hani augwaligo te nai tubo sę ilao.
EXO 12:48 Tiali goli, tigiwali togosiąwai bidigo te nai tugio. Tama gasa bulu bidi hani me deli te dagego bulu tǫba bidagasai yai baso da, tama te bidi agai te nai sela tuainogo yai, te Genuai Bidi Yawe eno dage tagalama ela soali sogo tubo nai, tama dagego te bidi aga bidi tigidali, me te mena bidi aga dali bidibo bidi dabe, te tigidali augwali tigiwali togwa. Tama nosali te bidi aga hani dali augwaligo te nai tumainao. Tama te bidi aga te dagego bidi me deli tiwai bidaibao.
EXO 12:49 Tama te gasa bidi hani te Israel hani augwali dali bidagasali bagego te Israel hanigo Pasova nai bomai po tiwai naga wali peyu, dage dali bidao,” wali.
EXO 12:50 Tama te Israel hani augwaligo te Genuai Bidigo te Moses de Aron sibolo po wali gilama te tiwai sę yai.
EXO 12:51 Tama te sogo naga Genuai Bidigo te Israel hani tigidali Isipde selama, tama augwali odasa asai.
EXO 13:1 Genuai Bidigo Mosesbolo te po wai,
EXO 13:2 “Dagego gomunai ogwa tigidali enabolo mao. Dage Israel hanigo gomunai ogwa tigidali, me te dagego tigidali sipsip, meme, bulmakau gomunai omai wai dabe me, te enaba naga mao. Augwali te eno tedali muani nai dao,” wali.
EXO 13:3 Mosesgo te we bidi augwalibolo te po wai, “Dage te Isipde bidali, te kalabus sę ebo bulu dao. Tama aga bomogo digi, Genuai Bidigo dage Isip bulude selama, odasa asai. Tama tibaso, tigidali kibu be dagego agai te tama tiali side homugo koneama, tama dagego te bo dai nai bret dali tugio.
EXO 13:4 Tama megi dagego te Isip taga sobao, te side e polua delide, augwaligo te nogi Abip wai.
EXO 13:5 Tama Genuai Bidigo dago wąį dabe dali po dąų olama weyu, te Kenan dabe augwaligo tǫ, me Hit bidi dabe, me te Amor dabe, me te Hivi, me te Jebus dabe, te bidi hani augwaligo tǫ dage mawaibao. Te tǫ wiegi yai mu, tama ili hauwa elalubao. Tama Genuai Bidigo dage te tǫba odasa pabo sogo, dagego te Bo Disiąwai Nai Bret tuali te genuai side tigidali kibu be e Abip nogi wabo poluade te sę wali piąo.
EXO 13:6 Tama dagego te bo disiąwai nai bret te a naga olama me badu nogo si tama side tuao. Tama a naga olama me badu si sogo, te dagego te genuai nai tuyu, Genuai Bidibolo lotu po wao.
EXO 13:7 Tama te a naga olama me badu nogo si te side te we bidi augwaligo te bo disiąwai nai bret tulama, tama dagego te yis, me bret te yis elalubadi, te bulude me te dagego tǫde munalubadi elaluamu dao.
EXO 13:8 Tama te genuai side pedalobo si, dagego duga ogwa te wai dabe augwalibolo te po haninama pusao, ‘Dago te kolesaga tigidali ebo, te Genuai Bidi agai da te Isip tǫde bidibadi, da odasa asali sogo koneagasu, te sę ebo dao.’
EXO 13:9 Tama dagego kegeda pidali weyu, te tiwai lotu po wabo kolesaga da, te dąį me deli dao, te dagego duga nogode me gesabidide elaluabo dąį ąǫ yaibao. Tama te Genuai Bidigo bomai po te dagego homu kolesaga iliyu, tama po wabo nigilaibao. Magi basowe, Genuai Bidigo bomogo sę elama, tama da Isip tǫde selama, odasa asai dao.
EXO 13:10 Tama tigidali kibu bede te tiali sogo pedalobode, te sogo dagego te nai tuao,” Mosesgo te po wai.
EXO 13:11 Te Mosesgo po ma weyu, te po wai, “Genuai Bidigo dage te Kenan dabego tǫba odasa paibao. Tama agai dagebolo me, te dagego waigo wai dabe, te dagego wąį dabe, augwalibolo me te tǫ maiabo po polobadu digi dąų wai dao.
EXO 13:12 Tama agai te tǫ dageba mabo sogo, tama dagego gomunai ogwa tigidali te dagego Genuai Bidiba mao. Tama tigidali kibu dabego gomunai wai, te me Genuai Bidigo naga dao.
EXO 13:13 Tiali goli, dagego te sipsip wai me deligo te donki gomunai wai ma dobola abelama, ofa ilao. Tiali goli, dagego te donki ma abelesiąyu da, teda dagego te donki dogoni togwao, isimainao. Tama dagego duga digi te gomunai ogwa wai dabe tigidali ma abelao.”
EXO 13:14 “Tama nosali dagego ogwa dabego dagebolo te tiwai hanaluyu, te po tiwai waibao, ‘Te kolesaga page mena tama dawe?’ Tama dagego augwalibolo te po wao, ‘Da Isip bulude kalabus sę ebadi, tama Genuai Bidigo bomai sę mu elama, tama da Isip bulude selama, da odasa asai dao.
EXO 13:15 Tama hasia sogo Isip hani tuni bidigo homu kolesaga hasegelisiąyu, tama da tagala palobeo. Tiali goli, Genuai Bidigo te Isip dabego gomunai ogwa tigidali, me te augwaligo kibu dabe gomunai wai tigidali ela muai. Tama megi dago te kibu dabego gomunai wai te Genuai Bidiba ofa ebo dao. Tama tiali goli, dago te dena gomunai wai ogwa te augwali ma abelebo dao.’ Te po duga ogwa dabebolo wei ponao.
EXO 13:16 Dago te sę ebo te dago homugo ma koneama, te Genuai Bidigo bomogo aga digi da te Isipde selama, odasa asai. Tama te dago nogode me gesabidide muai nai tiwai, tama dago homu hodolobo sę ebo dao,” Mosesgo te Israel hani we bidibolo te po wai.
EXO 13:17 Te Isip tuni bidigo te Israel we bidi hani tagala palai sogo, Godigo augwali te nabis badu te pęwadage tųdu te Filistia tǫ badu odasa pabeo. Magi basowe, Godigo te homu yai, ‘Te Israel hani augwali te pęwadage tųdu odasa peyu da, tama gasa hanigo augwali dali hwįainogo ebo suyu da, teda augwaligo homu hasegelama, te Isipba ma paibao. Tama te Israel hani augwaligo te tama tebo te eno hagela yai.’
EXO 13:18 Tama tibaso, Godigo augwali te ni meni yai te tǫ wa pai bulu, te badu bagulama soyu, tama augwali te mama yai tamu ąįba pedelai. Augwaligo te boi bidi dali hwįbo nai me tolama pai.
EXO 13:19 Polobadu Josepgo te Israel hanibolo te po wai, “Nosali ena isama, tama Godigo dage Isipdu te Kenan tǫba ma oda sagasobode, tama dagego eno dili dabe dali selasa pao.” Tama Israel dabe augwaligo bomai po dąų weyu, tama tiaibao wai. Tama Mosesgo te Josepgo dili dabe selama, tolasa pai.
EXO 13:20 Tama Israel hani augwaligo te Sukot hanu tagalama, te masigi sane yai bulu Etam sesegeba pedelai.
EXO 13:21 Tama siade te Genuai Bidi te genuai bobage pǫ tomode bidali, tama aga polasa peyu, augwali pabo tų ola mawai. Tama hulide aga te genuai bobage sia dabe tomode bidiyu, tama aga polasa peyu, tama augwalibolo te sia ula ilai. Tama tibaso, augwali te siade me, hulide me pabo usu yaibao.
EXO 13:22 Tama sesemane sogo siade te pǫ te we bidi augwali pobadi te pǫ polasa pali, tama hulide me te sia polasa peyu, ula ela pai.
EXO 14:1 Te Genuai Bidigo Mosesbolo te po wai,
EXO 14:2 “Te Israel dabe augwalibolo te po olama, tama augwali ma geasa peyu pelama, tama te tamu ąį sesegede te bulu Pihahirot, tede te bidabo pesage nigao. Te bulu te Mikdol dali, te mama tamu ąį dali, te si tomode elalubao, te Balsefon bulu dolo si dao.
EXO 14:3 Tama augwali tama tibaso da, teda te Isip tuni bidigo augwali soali gegelama suyu, te po waibao, ‘Te Israel hani augwali te pabo tų susiąma gegede biliyu, te masigi sane yai bulude olo bilama, tama augwaligo te badu tų taga pabo menio,’ tuni bidigo te homu yaibao.
EXO 14:4 Tama eno te tuni bidigo homu hasegelama, tama agai dage pobeasa asomainogo yaibao. Tiali goli, eno aga te agai ami bidi dabe aiyaba elaluama, tama eno genuai nogi te sę ebode saibao. Tama Isip dabe augwaligo koneama, ena digi ena Genuai Bidi Yawe dao,” Genuai Bidigo te po wai. Tama po obaso, te Israel dabe augwaligo te Genuai Bidigo po odolama, augwali ma geasa pai.
EXO 14:5 Tama te Isip we bidi dabego te Israel bage augwali wi pali po te tuni bidibolo wai, tama aga dali, te gavman sę ebo ofisa bidi dabe dali, augwaligo homu hasegelama, tama augwaligo te po wai, “Magi baso dago te Israel hani augwali tagala palaliwe? Tama megi da, augwaligo dago sę egobeo. Dago dwai geda mu muai dao,” te po wai.
EXO 14:6 Augwaligo te po olama, tama tuni bidigo aga kibu hosgo kegela pabo hwįbo nai karis dali, te aga ami dabe augwali sai.
EXO 14:7 Tama agai te bidi sese hauwa 600 te wiegi yai polasa peyu hwįbo nai karis dabe dali, te ami bagego gasa karis tigidali me, te agai karis tonalubo ofisa dabe augwali me selama, pai.
EXO 14:8 Tama Israel hani augwaligo koneani, te Isip dabe augwali aiyaba elaluama, tama augwali dwagi yai homu dali pai. Tiali goli, Genuai Bidigo te tuni bidigo homu hasegelama, tama tuni bidigo augwali nosali polo pobeasa asai.
EXO 14:9 Te Isip ami bidi dabego karis elaluai, tama te ami bidi dabe augwali te hosde duayu, tama ami bidi dabe meba tǫdu pali, tama augwali tigidaligo te Israel hani augwali pobeasa peyu, pai. Tama augwali te Israel bage bidibo pąba pedelai, te mama tamu ąį sesegede, te Pihahirot bulu pąde, te Balsefon bulu dolo si elaluali, tede pedelai.
EXO 14:10 Tama te Isip tuni bidi aga ami dabe dali, augwali pąba polo asobo te Israel hani augwaligo suai. Tama augwali wi mu eyu, tama Genuai Bidigo augwali tau somainogo i wai.
EXO 14:11 Tama augwaligo Mosesbolo te po wai, “Magi baso nago da e masigi yai kemi tǫ buluba olo odasa asaliwe? Nago da e olo bulude isimainogo yaliwe? Tama da te Isip tǫde bidibadi isigi sogo da, te usu igi dao. Te Isip bulude elalubo gų page te da usu igi dao.
EXO 14:12 Dago te Isip taga soasiąbadi, tama dago nagebolo te tiwai sę pedelaiba, te po walio. Tama dago te po wai, ‘Da tagalama, da ede bidimainao, tama da te Isip dabego olo sę bidi bidimainao,’ te po wai. Tama da sę olo mu naga igi dao. Tama tiyu, da e olo masigi naga yai bulude isibo dwaibao.” Augwaligo te po wai.
EXO 14:13 Tama Mosesgo augwalibolo te po wei ponoyu, te po wai, “Wibo tagalao. Bomonama dolaluyu, tama megi Genuai Bidigo dage tau selama, tigidali sę ebo suaibao. Tama megi dagego te Isip dabe subo, tiali goli nosali dagego augwali munu ma sugobeo.
EXO 14:14 Odao, Genuai Bidigo dage tau siyu, hwįaibao. Tiali goli, duga digi magi sę me elamuo. Dagego pedauwali dąų naga wao,” wali.
EXO 14:15 Tama Genuai Bidigo Mosesbolo te po wai, “Magi baso nago ena i wabo sę ebawe? Te Israel dabe augwalibolo te po weyu, augwali pomainao,” te po wai.
EXO 14:16 “Tama nago dono ugwaba selama, tama te tamu ąį usu sao. Tama te wę si badu peda pelama, tama wa pai tǫ pedelama, tama Israel dabe augwali te tomodu pelama, te u badu pedalomainao.
EXO 14:17 Tama eno te Isip bage augwaligo homu kolesaga te homu tomoba masigi sąwai bidigo homu tiwai ilama, tama augwaligo dage Israel dabe wali pobasa asaibao. Tama eno te tuni bidi aga karis dabe dali, me te hosde duawali ami bidi dabe tigidali, augwali aiyaba elaluama, tama eno te sę yalide te eno genuai nogi saibao.
EXO 14:18 Tama eno te Isip dabe aiyaba elalubaso, tama augwaligo homugo ena digi te ena Genuai Bidi Yawe dao,” agai te po wai.
EXO 14:19 Te Godigo Ensel Mobo Bidi te Israel hani dabe polasa pabo bidi, tama augwali tede tagalama, aga augwali nosali pai. Tama te Israel dabe pabo tedu polasa pabo pǫ, te me geasa te augwali tudi badu ma doligi sai.
EXO 14:20 Tama te sogo hulide te pǫ te Isip dabe dali, te Israel dabe dali, augwali tomode dąį tiwai elaluai. Tama te pǫgo te Isip dabe augwali bidibo badu te be hulia sai mu elaluai. Tiali goli, te pǫgo te Israel dabe bidibo digi, te badu te ula elaluai. Tama tibaso, te sogo hulide te Isip dabe augwali te Israel hani pąba pabo te usu ebeo.
EXO 14:21 Tama Mosesgo nogo ugwaba selama, tama tamu ąį hulide usu sai, tama Genuai Bidigo bomai wali te sia ge pedalobo badu asiyu pedelali, tama te waligo te tamu ąį te sia ponobo tiwai edubadi, tama be posai. Tama waligo te tamu ąį ma sela sąbode, tama tamu ąį tomode si peda pai.
EXO 14:22 Tama tomode tǫ tigidali wa pai, tama Israel dabe augwali tedu uba pai. Tama te tamu ąį si dali si badu te be daga tiwai dolaluai.
EXO 14:23 Tama tigidali Isip ami bidi dabe augwaligo te Israel dabe elainogo wali pobasa peyu, augwali me te tamu ąį tomodu pai. Te hos dabe, me te karis, me te hosde dua yali ami bidi dabe, tigidali hodobo pai.
EXO 14:24 Tama Genuai Bidi te bobage pǫde me te siade bidiyu, tama te be posobo pąde agai te Isip ami bidi aiyaba tonono bilama, tama agai augwaligo homugo kolesaga te polobo bidigo homu tiwai ilama, tama augwali midigi dwai mu yai.
EXO 14:25 Genuai Bidigo te augwaligo karis nadoba te tǫde dąų ilali, tama te karis dabe bomonama uda wainogo yali usu ebeo. Tama te Isip dabego te po wai, “Odiąo. Te Genuai Bidi Yawe aga hani Israel augwali tau siyu, da dali hwįbao. Da polo wi pinao. Dago augwali polo taga pinao,” wali.
EXO 14:26 Tama tibaso, Genuai Bidigo Mosesbolo te po wai, “Nago nogo ugwaba selama, te tamu ąį usu sao, tama te ąį ma asiyu, te Isip ami bidi dabe dali, me te karis, me hos dabe me, augwali te ąįgo mesega sagasaibao,” wali.
EXO 14:27 Tama Mosesgo nogo ugwaba selama, te tamu ąį usu sali, tama be posobode te ąį ma asiyu, tama te polobadu elaluali tiwai ma yai. Tama te Isip dabe augwali wi pabo usu sali, tiali goli augwali usu meni yai, magi basowe, Genuai Bidigo augwali tigidali te tamu wę tomoba popogolo pai.
EXO 14:28 Tama te Isip tuni bidigo ami bidi dabe augwali te Israel hani wali peyu, te tamu wę tomoba pali bage, te wę ma asiyu, te Isip ami bidi dabe augwali mesega sai. Tama agai te ami dabe tigidali, me te hos, me karis dabe, augwali dali agai te węgo mesegelali, tama deli me bidibeo. Tigidali isai.
EXO 14:29 Tiali goli, te sę pedalisiąbadi, te Israel dabe augwali te tǫ wai digi pali, tama te wę te be daga u badu me e badu elalubo tiwai yai, tama augwali pelama, te wę u badu hasia sabolai dao.
EXO 14:30 Tama te sogo Genuai Bidigo te Israel dabe te Isip dabego nogode ma dobola sai, tama Israel dabe augwaligo te Isip isai bidi dabe te wę sesegede munalua pai suai.
EXO 14:31 Augwaligo te genuai sę Genuai Bidigo eyu, te Isip dabe aiyaba elalubo suai. Tama Israel we bidi augwali wi elama, Genuai Bidi dologode bidiyu, tama augwaligo bomo yai homu agade dąų weyu, tama aga sę bidi Moses dali tiwai.
EXO 15:1 Tama te sogo Moses dali te Israel dabe augwaligo tęąbi po me deli te Genuai Bidibolo e tiwai tęąbi wali, “Megi te eno Genuai Bidi Yawebolo tęąbi waibao, magi basowe, agai te genuai wąbi mu hwįnama, tama tede genuai wiegi yai nogi sai dao. Agai te hosde duawali bidi dabe dali, te hos dali, augwali te tamu ąį tomoba sąwai.
EXO 15:2 Genuai Bidigo digi ena bomo ilali, tama eno tęąbigo aga nogi ugwaba saibao. Agai ena ma dobola sali, aga da te eno God mu dao, tama eno aga nogi ugwaba sobao. Tama aga te eno ayago God, tama agai genuai nogide eno tęąbi po waibao.
EXO 15:3 Tama Genuai Bidi aga te boma pai ami bidi mu dao. Genuai Bidi Yawe naga te aga nogi dao.
EXO 15:4 Agai te Isip tuni bidigo ami bidi dabe dali, te hwįbo nai karis dabe dali, augwali te tamu ąįba sąwai. Tama te tuni bidigo ami bidi dabego polasa pabo bidi kapten te wę tulama, tama te mama tamu węde isai dao.
EXO 15:5 Genuai węgo augwali mesegai, tama augwali aiyaba mu dulama, te kemi masigi tiwai yai.”
EXO 15:6 “Genuai Bidi, nago dolo nogogo bomo genuai elalubao, tama agai te boi bidi ągąlama, tama augwali mu mia sąwai.
EXO 15:7 Te nago genuai bomogo digi nago naga boi bidi augwali aiyaba elaluai. Nago sębę te sia tiwai pedaliyu, tama augwali te wa pai nosa tiwai siago ulai.
EXO 15:8 Nago te bomai wali hodolai. Tama waligo te wę bo ugwadu ilali, tama wę te obo tiwai dolo dolaluai. Tama aiyadu mu elaluali tamu wę dila pai pedelai.”
EXO 15:9 “Te boi bidi dabe augwaligo te po wai, ‘Dago augwali pobelama, tama augwali dąų waibao. Tama dago augwaligo wiegi wiegi yai nai dena hanibolo dobola saibao. Tama tigidali nai dago sainogo yali nai te dago siyu naga yaibao. Tama dago augwali dali te poapi ge hwągo hwįnama, tama dena bomogo digi te dago augwali dolaibao.’”
EXO 15:10 “Tiali goli nago mobo deli sogo naga ponani, tama tamu ąįgo Isip dabe mesega sai. Tama augwali aiyaba tomoba mu te tamu wę tomoba masigi dulubo tiwai yai.”
EXO 15:11 “Genuai Bidi Yawe, mena gasa god bidibo te nago bomo tiwai dawe? Me deli menio. Nage te polalubo tuni bidi te nage ugwadu tama tigidali wiegi yai tedali mu dao. Tama niwai bidi te nage dali usu tiwai dawe? Me menio. Nago te bidigo isąwai bomai sę eyu, tama genuai sę ebaso, te we bidi augwali nagede wi mu ebo dao.
EXO 15:12 Nago dolo nogo dodolobode tama tǫ dedage elama, tama te boi bidi dabe augwali te tǫ dedagego dalai.”
EXO 15:13 “Tama nago da homu dene eyu, tau sabo silisiąbo kolesaga eyu, tama nago da ma selama, tama nage polasa peyu, da odasa pai. Tama nago bomogo digi da pabo dodolama, tama nago da te naga digi bidainogo yali wiegi yai buluba odasa pai.
EXO 15:14 Tama meba tǫde bidibo bage augwaligo te sę yali po odolama, tama augwali wi mu eyu, tama augwali noma saibao. Tama te Filistia bage augwaligo me te po odolama, wi mu yaibao.
EXO 15:15 Tama Idom tǫde bidibo genuai bidi augwali wi mu yaibao. Tama Moap bomai bidi dabe augwali didibili mu yaibao. Tama Kenan dabe augwaligo bomo te olo wę ayana pabo tiwai yaibao.
EXO 15:16 Genuai Bidi, nago genuai bomo augwaligo sulama, tama genuai wigo augwali mesegelama, tama augwaligo magi sę me deli yabo usugobeo. Augwali te ni tigi tiwai, olo naga dolalubadi, tama naga we bidi da ela soala silibo usu yaibao. Genuai Bidi, nago da Isipde ma sela asaligo tama da olo bugagia bidaibao.
EXO 15:17 Tama nago da odasa asiyu, te da naga bulu dude bugagia dualama bidimainogo yaibao. Tede te naga digi naga be sęwai dao, te bulu nago nogogo digi bugagia dodolama muai dao.
EXO 15:18 Tama Genuai Bidi nage tuni bidi sesemane sogo bidada paibao.” Moses agai te Genuai Bidi Yawebolo te tęąbi po wai.
EXO 15:19 Te mama tamu ąį te tǫ wa tiwai pedelai tiwaidu tama te Israel dabe pelama, u badu pedelalio. Tiali goli, Isip tuni bidigo ami bidi dabe dali, te hos dali, te karis me, augwali te Israel dabe augwali wali asai, tama Genuai Bidigo te tamu ąį ma asomainogo ilama, tama augwali te węgo mesega sai.
EXO 15:20 Tama nosali, Genuai Bidigo po pusubo we Miriam, te Aron aga abe, agai te dwasianu kilikili wabo habili tiwai nai musik sali, te tigidali we dabego me te tobage habili tiwai nai musik selama, te Miriam pabo wali pai. Tama augwaligo te musik dabe eliyu, tęąbi eyu, tigi bebege eyu, danis me yai.
EXO 15:21 Tama Miriamgo tęąbi e tiwai augwalibolo wali, “Genuai Bidibolo tęąbi wao, magi basowe, agai genuai wąbi mu hwįani aiyaba elaluai. Agai te hos dabe dali, te hosde duayali bidi dali, augwali te tamu ąį tomoba sąwai dao.”
EXO 15:22 Nosali Mosesgo Israel dabe augwali te mama tamu wę tagalama odasa pali, tama augwali te wa pai ni meni yai bulu Sur tedu pai. Tama augwali sela sogo te wa pai nai meni yai buludu pai, tama augwaligo wę me subeo.
EXO 15:23 Tama nosali augwali te ąį me elalubo bulu me Mara teba pedelali, tiali goli te wę dwai ha pedauwalide ebo wę, tama augwaligo te wę tuabo usugobeo. Te Mara nogi page e tiwai, te pedauwalide ha ebo nai dao.
EXO 15:24 Tama te we bidi augwaligo wado po weyu, tama po hauwa Moses dali weyu, tama augwaligo agabolo te tiwai po hanalu wai, “Te dago magi nai tuguwe?”
EXO 15:25 Tama tibaso, Mosesgo gedu haluasa po bomonama, Genuai Bidibolo wali, tama Genuai Bidigo aga ni me deli ola mani. Tama Mosesgo selama, te węba sąwai, tama te wę wiegi yai pedelai, tama augwaligo tuabo usu yai. Te bulude Godigo te Israel bagebolo bomo yai po meba augwaligo te po wali pomainogo mawai, tama me agai augwali usu sela suali, te augwaligo aga wali asobowe naga suainogo yai.
EXO 15:26 Tama Godigo augwalibolo te po wai, “Dagego eno po bugagia odao, te dagego God Genuai Bidi, tama te sę dabe ena digi te dwagi yai sę da homu ebo, tama dagego eno bomo yai po tigidali wali piąo. Dagego tama tibaso da, teda eno dagebolo te haniani dwai gasi te Isip we bidi augwalibolo yali te tiwai dagebolo me magobeo. Ena digi ena te Genuai Bidi dao. Tama eno naga te dagego gasi dabe usu ma ilibo dao,” wali.
EXO 15:27 Tama nosali Israel dabe augwali te Elim buluba pedelai. Tama Elimde wę ulu pedalobo dedage nogo si olama sągągo si, tama ni bidi sese sela olama nogo si, 70 ni det elaluai. Tama Israel dabe augwaligo augwa name ugwa be dabe te wę ulu dedage pąde dodolama, bidai.
EXO 16:1 Te Israel hani te Isip taga soalama, tama pelama, tama te bulu Elim tede osogo bidali. Tama te Isip taga soalama, tama polua deli silama, te polua dei 15, te side tigidali Israel hani we bidigo te Elim bulu tagalama, tama te tǫ wa pai nai meni yai bulu nogi Sen tomoba pai. Te bulu te Elim de Sainai te bulu si tomode elaluai.
EXO 16:2 Tama augwaligo wado po, me te po hauwa te Moses de Aron si dali te bulude wai.
EXO 16:3 Augwaligo te bidi si dali te po wai, “Dago homugo Genuai Bidigo da Isipde eligi sogo da, usu igi dao. Polobadu da Isipde bidibadi, mena tiwai nai dabe, me hasa mi me, te dago homugo digi sai dao. Tiali goli, dage sigo da e nai meni yai wa pai buluba odasa asai, tama dage sigo homugo da nai sili bidilama, tama da tigidali isimainogo homu yai. Tama da Isipde bidibadi isigi sogo da, te wiegi yai mu igi dao,” wali.
EXO 16:4 Tama Genuai Bidigo te po Mosesbolo wai, “Eno te bret dagalude tulalubode te dagego siąo. Tama tigidali deli deli side te we bidi augwali pelama, te side tuabo te nai sigi pao. Te eno augwali te kolesagade usu selama, tama augwaligo eno po wali pogowe, te eno koneainogo tiaibao.
EXO 16:5 Tama te nogo a olama me badu deli te side augwaligo si sogo tuabo nai sisilama, sela muao,” te po wai.
EXO 16:6 Tama Moses dali Aron sigo te Israel we bidi hani tigidalibolo te po wai, “Tama pio te dagego bugagia koneagameo, Genuai Bidi aga digi dage Isipdu odasa asai dao.
EXO 16:7 Dagego wado po weyu, po hauwa aga dali wali, te agai odalio. Tama tibaso, kigamu te Genuai Bidigo digi aga bomo de ula dali si dagego sueibao. Da si te olo bidi naga dao. Tama magi pode dagego wado po da si dali obawe?”
EXO 16:8 Tama Mosesgo po ma wai, “Genuai Bidi aga digi dage te nai mi pio mabode te dagego tuagameo. Tama agai te nai bret kigamu te dagego homugo somainogo mawaibao. Magi basowe, dagego po hauwa aga dali wabo odai. Tiali goli, da si te olo nai tiwai dao. Dagego wado po te Genuai Bidi dali naga obao.”
EXO 16:9 Tama Mosesgo Aronbolo te po wai, “Augwalibolo e po pusao, ‘Genuai Bidigo te dage tigidali we bidigo wado po wabo odalio. Tama tibaso, dage tigidali aselama, te Genuai Bidi pąba dolagasao,’ te po wao.”
EXO 16:10 Tama Arongo te po augwalibolo wali, tama te sogo agai po odubadi, augwaligo te masigi kemi yai buluba tonono pai, tama polo tama Godigo genuai ula de bomo dali si, te augwali polasa pabo bobage pǫ tedu pedelai.
EXO 16:11 Tama Genuai Bidigo Mosesbolo te po wai,
EXO 16:12 “Eno te Israel dabe augwaligo wado po wali po odalio. Tama te po augwalibolo wao, te pio mu augwaligo te nai mi tuyu, tama kigamu augwaligo te bret te augwa homugo sela tuao. Augwaligo te nai sela tuyu, tama augwaligo te tiwai koneyu, ena Genuai Bidi Yawe, ena digi ena te augwaligo God da, te augwaligo konemainao,” wali.
EXO 16:13 Tama pio dwasianu ba hani hauwa augwali bidibo pesageba pągąna sagasai. Tama me te kigamu te hulide tulubage segeni yali ąį te augwali bidibo pesage nosa pąde elaluai.
EXO 16:14 Tama te wę wa paide, augwaligo suali, te dwasianu nai hauwa te tǫde munaluali, te ni yabe dabe pepeda pabo tiwai yai.
EXO 16:15 Tama Israel dabe augwaligo te nai suali, tama augwaligo konebeo. Tama augwaligo augwa hasibolo digi hanaluyu, te tiwai po wai, “Te magi nai dawe?” Tama Mosesgo augwalibolo te po wai, “Te bret Genuai Bidigo digi dagego tuabo nai mobao.
EXO 16:16 Tama Genuai Bidigo tama po wai, ‘Dage deli deligo duga we wai dabe dali usu sisinao. Dagego te lita si sabo sene deli delide te duga ugwa bede bidibo we bidi wai puluba usu nama sao,’ wali.”
EXO 16:17 Tama Israel dabe augwaligo tama tiwai, tiali goli mebago hauwa sali, tama mebago dwasianu naga sai.
EXO 16:18 Tama augwaligo te nai dagala subo sogo, te nai hauwa sali bidi dabego, te sene usu menio. Tama te dwasianu naga sali bidi dabego, te augwaligo nai habuge ebeo. Tama tigidaligo te nai tulama, tama augwali tabi pągąnama, tama augwali nasi me ebeo.
EXO 16:19 Tama Mosesgo augwalibolo te po wai, “Dagego nai meba te do tuaiba olama, me munamo dao.”
EXO 16:20 Tiali goli, mebago Mosesgo po odisiąma, wali pabe, tama augwaligo nai meba nosali side tuainogo muai. Tiali goli, kigamu dwasianu kigi dabe te naiba pągąna selama, tama kugumini dwai pedelai. Tama Mosesgo augwali dali wado yai.
EXO 16:21 Tama te we bidi augwaligo tigidali sogo kigamu te nai augwa sabo usu tama sai. Tama giliga nanobo sogode, te sisąma tǫde munaluali nai, te wę tiwai pedelama, odolali sia sai.
EXO 16:22 Tama te namba 6 dei augwaligo nai si sogo tuabo usu siyu, te dwasianu sene si te deli deli bidi usu nama sai. Tama Israel tobolu bidi dabe aselama, Mosesbolo te sę yali po wagasai.
EXO 16:23 Tama Mosesgo augwalibolo te po wai, “Genuai Bidigo te po wai, do te olo bidibo side dao. Te Sabat side, tama te Genuai Bidigo olo bidibo side. Tama megi te dagego nai meba siade ulai wida, teda dagego uluiąo, tama meba te dagego sene ulainogo wida, teda te sene ulao. Tama te me badu munalubaso da, teda te do ulabo munalumainao,” te po wai.
EXO 16:24 Tama augwaligo Mosesgo po wali pelama, te sogo nai meba ula tuali, tama augwaligo ulusiąwani nai meba te nosali side ulainogo muai. Tama do kigamu augwaligo suai, te nai damua pisąma, tama dwasianu kigi dabe me pedalobeo.
EXO 16:25 Tama te side Mosesgo te po wai, “Megi te Sabat side, te side olo bidiyu, genuai nogi Genuai Bidibolo mabode, tama megi dagego nai te dage bidibo pesage tǫde me gegegobeo. Tama dagego te do munaluali tubo nai megi tuagameo.
EXO 16:26 Tama te tigidali Sarere te a naga olama me deli tede, dagego te nai saibao. Tama a naga olama me badu nogo si, te side te olo bidibo side, tama te side te tǫde nai me munalugobeo,” wali.
EXO 16:27 Tama agai te po wai goli, te nogo a olama me badu si te olo bidibo Sabat side te we bidi meba nai sigi peyu pai, tiali goli augwali odolali gegai. Nai me munalubeo.
EXO 16:28 Tama Genuai Bidigo Mosesbolo te po wai, “Nisu sogo dagego te dwai kolesaga ebo tagalama, tama dagego eno bomo yai po wali paibawe?
EXO 16:29 Bugagia odao, Genuai Bidi eno dagebolo te olo bidabo side te mobao. Tama tibaso, te dwasianu Sarere eno dagebolo eno te deli sogode te si sogo tuabo nai mawaibao. Tama, te nogo a naga olama nogo me si wabo side tigidali we bidi te ugwa bede bidiąo. Te bidi me deligo me, te wego me, te aga bidibo obo bolama, te buluba me pelamo dao.”
EXO 16:30 Tama te po obaso, nosali augwali te a naga olama me badu nogo si te side olo bidai.
EXO 16:31 Tama Israel we bidi augwaligo te tǫ daide sali nai nogi mana wai. Te nai mana dwasianu ge tedela yai, te nedu du me deli tiwai. Tama te nai pusu, te bisket hani mege dali gelama nigai tubo pusu tiwai yai.
EXO 16:32 Tama Mosesgo augwalibolo te po wai, “Genuai Bidigo te po wai, dago te tǫgo nigai dwasianu sene selama, te nai mana tede munama, te dago wąį te wai dabe augwalide muao. Nosali augwaligo te Genuai Bidigo da te nai meni yai bulude mani nai sumainu, te agai da Isip tagalama odasa asai dao,” wali.
EXO 16:33 Tama Mosesgo te po Aronbolo wai, “Te tǫgo nigai sene me deli selama, tede te nai mana pągąnama, tama te sene te Genuai Bidigo gedude muao, tama te nosali ame nabo hani wai dabe augwaligo te sulama, konemainao.”
EXO 16:34 Tama Arongo te mana muani sene te bomo yai po munalubo halobage eda badu muani, te Genuai Bidigo Mosesbolo wali po gilama tama tiwai.
EXO 16:35 Tama Israel dabe augwaligo te nai mana te kibu be bidi sese side 40 tuai. Tama te kibu be bidi sese si silama, tama nosali augwali te bulu tǫ Kenan teba pedelama, tama augwali te tǫde bidiyu, gi sę yai.
EXO 16:36 (Tama te mana nai senede muani sogo, augwaligo sene gasa tobage tiwai si elaluai. Te me sene deli te dwasianu usu tama, tama gasa te dwasianu sene nogo si usu yabo tiwai elaluai. Tama Arongo te tobage dwasianu sene te nai mana pągąnama, te Genuai Bidigo gedude muani.)
EXO 17:1 Tigidali Israel we bidigo te wa pai bulu Sen tagalai. Genuai Bidigo te po obaso da, teda augwaligo te bidali bulu me tagalama, tama gasa buluba pelama, bidigi pidu geai. Tama nosali augwali te bulu Refidim teba pedelama, tede te bidabo pesage nigai, tiali goli te bulude te tuabo wę menio.
EXO 17:2 Tama tibaso, te we bidi augwaligo wado po Moses dali wai. Tama augwaligo te po wai, “Da wę mao. Da tuaibao.” Tama Mosesgo augwaligo po wei ponoyu, te po wai, “Magi baso dagego wado po ena dali obawe? Dagego homugo aga usu siyu, Genuai Bidigo bomo dagebolo ma ola momainogo ebawe?”
EXO 17:3 Tiali goli, te we bidi augwali te wę nogonego mu isabo ąǫ ebaso, tama augwaligo po hauwa Moses dali wai. Augwaligo te po wali, “Magi baso nago da Isipde selama, da odasa asai dawe? Nago homugo da dali, te dago wai dabe me, te dago kibu dabe me, da wę menia selama, tama da isimainogo ebawe?”
EXO 17:4 Tama tibaso, Mosesgo gedu haluasa po bomonama Genuai Bidiba te tiwai wai, “Te we bidi augwaligo masigi sąnama, tama ena ela muainogo ebao. Tama eno magi sę augwalibolo egowe?”
EXO 17:5 Tama Genuai Bidigo Mosesbolo te po wai, “Te Israel tobolu bidi dabe meba selama, tama dage polasa peyu, te we bidi augwali nosali asomainao. Tama dage pabo sogo, te dono polobadu nago te wę Nailba elali, te dono me sela pao.
EXO 17:6 Tama ena te moni genuai masigi me deli daide ugwadu te bulu du Horep, tede ena dolaluaibao. Tama nage pąba aselama, te donogo te masigiba elama, tama wę te masigide pedelama, tama te we bidi dabego tumainao,” te po wai. (Te bulu du nogi Horep te gasa nogi me elalubao, te Sainai bulu du dao.) Tama te Israel tobolu bidi dabe augwaligo Mosesgo te tiwai sę ebadi, tama te masigide wę pedelama asobo suai.
EXO 17:7 Tama te bulu nogi augwaligo Masa wai, te nogi page “Usu sai,” tama me nogi Meriba, te nogi page “Wado po wai.” Magi basowe, Israel augwaligo wado eyu, tama augwaligo te po wai, “Genuai Bidi da dali bidibowe, ma meniwe?” Tama te dwai kolesagade augwaligo te Genuai Bidigo bomogo ebo sę usu sai.
EXO 17:8 Tama nosali Amalek hani bidi dabe aselama, Israel dabe te Refidim bulude bidibadi hwįagasai.
EXO 17:9 Tama Mosesgo bidi me deli Josuabolo po weyu, te po wai, “Nago dago bidi meba usu selama, tama do dagego te Amalek dabe dali hwįgi pao. Tiali goli, ena da, te dwasianu bulu du bagede dolaluyu, tama Godigo enabolo te sela bilao wali dono te eno nogogo tolaluaibao,” wali.
EXO 17:10 Tama Josuago te bidi dabe meba selama, te Amalek hani bidi dabe dali hwįgi pali, te Mosesgo agabolo te po wali gilama tama tiwai. Tama Moses dali, te Aron, me te Hur, augwali sela te dwasianu bulu duba holai.
EXO 17:11 Tama Mosesgo nogo ugwaba sabo sogo, te Israel ami dabego te Amalek dabe aiyaba elaluai. Tiali goli, agai nogo aiyaba elalubo sogo, te Amalek dabego te Israel ami dabe aiyaba elaluyu yai.
EXO 17:12 Tama nosali Mosesgo nogo dene eyu, boma pobaso, tama agai nogo ugwaba ma sabo usugobeo. Tama Aron de Hur sigo masigi me deli selama, tǫba munama, tama Moses te masigide dulaluai. Tama augwali si Moses pąde u badu, me e badu dolaluyu, tama augwali sigo te Mosesgo nogo ugwaba selama, tolaluai. Augwali sigo tolalubadi, sia ge dega sigi pai.
EXO 17:13 Tama Josua dali Israel dabe augwaligo te Amalek dabe augwali aiyaba elaluama, tama augwali mu dolai.
EXO 17:14 Tama nosali Genuai Bidigo Mosesbolo te po wai, “Te po te buku me delide asęnama, te we bidi augwaligo homude konealumainao. Te po e tiwai, ‘Genuai Bidi eno te Amalek dabe mu silaibao silama, tama te we bidi dabego homugo augwali munu me ma konegobeo.’ Tama nago te po Josuabolo me mao,” te po wali.
EXO 17:15 Genuai Bidigo po wai digi, tama Mosesgo te Genuai Bidibolo nai ula maiabo alta sai me deli nigilama, tama te alta sai yali nogi e tiwai wai, “Genuai Bidi aga eno te nide walama, ugwaba sabo plak ugwa tiwai dao.”
EXO 17:16 Tama Mosesgo te poali nogide te po wai, “Te ugwaba sagalobo plak ugwa tiwai eyu, tama eno ena nogo si ugwaba selama, tama Genuai Bidi aga bidibo digi teba gedu haluasa po te hwįbode wai dao. Magi basowe, Genuai Bidi agai sesemane sogo te Amalek hani bidi dabe dali hwįaibao,” Mosesgo te po wai.
EXO 18:1 Jetro aga te Midian dabego pris bidi, tama Mosesgo wąį, aga we aga aya. Tama agai Godigo tigidali sę Moses dali, me te Israel dabe dali me yali po odai. Tama me agai te Genuai Bidigo aga we bidi Israel dabe te Isipde bidibadi dobolama, odasa soainogo yali kolesaga, te po me odai.
EXO 18:2 Tama Jetro aselama, Moses suagasai. Polobadu Mosesgo we Sipora te aga aya pageba ma osogo tagala palai. Tama megi da, Jetrogo te Moses we Sipora dali, aga ogwa si badi, augwali odasa aselama, aga bidibo digi pedelai. Te wai sigo nogi e tiwai, Gersom, me Elieser. Polobadu Mosesgo te po wai dao, “Ena gasa badu bidi, tama ena gasa tǫde bidibao.” Tama agai gomunai ogwa nogi e tiwai nogi yai, Gersom dao.
EXO 18:4 Tama nosali agai te po wai, “Eno ayago God agai ena tau selama, tama Isip tuni bidigo ena ela mubeo.” Tama tiyu, agai tomo ogwa nogi Elieser po wai.
EXO 18:5 Tama Jetro te Mosesgo we dali, te aga ogwa si me, augwali aselama, te masigi kemi bulu te Godigo bulu du pąba sabolali, te Mosesgo pesage nigilama bidibo digi dao.
EXO 18:6 Tama Jetrogo po Mosesbolo ola toloyu, te po wai, “Ena Jetro, te naga wąį dali, te naga we me, te naga ogwa si me, da asobao.”
EXO 18:7 Tama Mosesgo te po odama, tama agai Jetro tiąba tųdu pai. Tama Mosesgo mage basi gulama, tama nosali agai aga sebedi usai. Tama augwa si bidabo po dabe olama, tama nosali augwali Mosesgo ugwa be tomoba pai.
EXO 18:8 Tama Mosesgo Jetro dali te Genuai Bidigo Isip tuni bidi dali yali sę po tigidali wali, me te Isip we bidi dabe dali me, te Israel dabe tau selama tiai. Tama agai Jetro dali me te dwai sogo te sęgę te tųde augwaliba pedelali po wali, tama Genuai Bidigo augwali tau selama bugagia bidai.
EXO 18:9 Tama Jetrogo te wiegi yai sę Genuai Bidigo te Israel dabe augwali te Isip dabego nogode ma sainogo yali po odolama, tama aga wiegi yai homu mu yai.
EXO 18:10 Tama agai te po wai, “Genuai Bidi Yawego nogi ugwaba sao. Agai dage te tuni bidigo nogode me, te Isip we bidi dabe augwaligo nogode me, te dage ma sai. Agai aga we bidi dage tau selama, tama dage te dwai kalabus sęde bidali tagalai dao.
EXO 18:11 Tama megi eno koneani, Genuai Bidigo te gasa god dabe tigidali aiyaba elaluali, magi basowe, te Isip dabe augwaligo hagoma homu eyu, tama augwaligo dwai sę dagebolo yai baso, tama Genuai Bidi agai dage augwaligo nogode ma dobola sali.” Te po wai.
EXO 18:12 Tama Jetrogo ofa yabo nai me deli sela asali, te siaba tigidali ulama, tama Godibolo mawai. Tama agai meba gasa ofa me te Godibolo yai. Tama Aron dali, te tigidali Israel genuai bidi dabe me aselama, tama Moses aga wąį dali te Godigo gedude nai tuai.
EXO 18:13 Te nai tula silama, tama te sogo nosali Moses dualama, te Israel we bidi augwaligo po tų odai. Tama we bidi hauwa Moses bidibo digi kigamu aselama, tama bidada pidubadi, pio mu igi pai.
EXO 18:14 Jetrogo Mosesgo te sę dabe eyu, te we bidi dabe augwali tau sabo sulama, tama agai Mosesbolo te tiwai po wai, “Tegoba. Nago te we bidi tau sabo sę hauwa mu ebao. Magi baso nagaduba deligo naga nago te po tų odobo sę dabe ebo dawe? Suao, tigidali we bidi kigamu nage dali po wainogo asali, tama augwali dolayu, tonalubadi, be pio ebao. Magi baso nago tama tibawe?” wali.
EXO 18:15 Tama Mosesgo agabolo te po wai, “Te we bidi dabe augwaligo te mena sę te Godigo augwaligo emainogo ebo sę te koneainogo tiwai. Tama tiyu, augwali ena bidibo digi asobo dao.
EXO 18:16 Tama me sogo bidi me aga si magi nai me delide wado ebo sogo, te bidi si ena bidiboba aselama, tama eno augwali sigo po dagalama, tama te po isilaibao. Tama augwaligo wado ebo page tede eno augwalibolo te Godigo bomai po ola mabo dao,” wali.
EXO 18:17 Tama Jetrogo agabolo te po wai, “Moses, nago te sę ebo te wiegi yai tų wali pabeo.
EXO 18:18 Te sę genuai mu dao. Nagaduba deligo naga ebo usugobeo. Nago naga te sę eyu da, teda nago tigi hagela mu eyu, tama te we bidi augwali me hagela yaibao.
EXO 18:19 Eno po megi odao. Eno wiegi yai tų me deli te nago sę yabo po nagebolo eno te po waibao. Nago te po odoyu da, te God nage dali bidaibao. Tama nage te we bidi augwaligo polalubo bidi te Godigo gedude te augwaligo hwįabo po weyu, wado po wabo dabe, te po nago agaba sela pabo bidi bidiyu da, teda usu yaibao.
EXO 18:20 Tama nago augwalibolo te Godigo bomai po tigidali ola mayu, tama augwaligo wali pabo tų me, te sesemane sogo te sę yabo kolesaga, te po augwalibolo wao.
EXO 18:21 Tiali goli, me nago te po page koneai bidi meba sa munama, tama augwaligo te we bidi tonaluabo bidi bidimainao. Tama mebago te we bidi bidi sese hauwa 1,000 mu tonaluyu, tama meba bidigo te bidi sese a naga 100 we bidi tonaluyu, tama mebago te 50 we bidi tonaluyu, tama mebago te nogo si we bidi naga tonalumainao. Nago te God dologode bidibo bidi dabe augwali sa munama, tama te tiwai bidi dago homu augwaliba dąų olama, tama meba bidi dabego dwai sę yali te monego augwali abelainogo ebo usugobeo.
EXO 18:22 Tama te bidi dabe augwali te we bidigo po dodolobo bidi pedelemainao. Augwa digi te dwasianu po dabe te po tųde dodolomainao. Tiali goli, augwaligo genuai sę yali po tų te nageba sela aselama, te nago te po dodolomainogo yaibao. Tama augwaligo nage tau siyu, tama te sęgę ebo sę toloyu, tama nago sę dene kuna egobeo.
EXO 18:23 Te sę dabe eno nagebolo yao olama po wali, te Godigo digi te sę nago emainogo homu yai. Tama nago eno po wali peyu da, teda te sęgę nage tigi hagela iligobeo. Tama dagego te we bidigo yali sę, me te we bidigo po dodolama, tama augwali homu dua nagame elama, tama augwa buluba ma pelawaibao,” Moses aga wąįgo te po wai.
EXO 18:24 Tialima Mosesgo te wiegi yai po Jetrogo wabo po odolama, tama tiwai.
EXO 18:25 Tama agai te Israel dabe augwali tomode te po page koneai bidi dabe augwali sa munama, tama augwaligo te bidi sese hauwa 1,000 we bidi, me te we bidi 100, we te 50, we te 10 we bidi meba tama tonaluabo bidi nigilai.
EXO 18:26 Tama sesemane sogo augwaligo te po tų odobo sę tonaluai. Augwa digi te dwasianu sę yali sęgę dabe dodolali, tiali goli augwaligo genuai sęgę yai sę yali te Moses pageba pelama, tama aga digi te sęgę dabe dodolai.
EXO 18:27 Te po dabe dodolobo sę tama dodolama, tama nosali Mosesgo aga wąį nogo menama, tama Jetro aga bulu tǫ pedaiba ma pai.
EXO 19:1 Te Israel dabe augwaligo te bulu Refidim tagalama, ma soali. Tama solama, tama augwaligo te bulu Isip taga soali sogo gagalama nedeyu, tama polua si mu silama, te polua sela wabo te dei delide, te sogo naga augwali te nai meni yai wa pai bulu Sainaiba sabolai. Tama augwali bidabo pesage te bulu du Sainai pąde nigai.
EXO 19:3 Tama Moses te bulu duba God dali po miainogo holai. Tama Genuai Bidi bulu dude bidiyu, Moses i olama, agabolo te Israel dabe augwalibolo maiabo po meba wali, te hani dabe te Jekopgo wąį dabe dao.
EXO 19:4 Genuai Bidigo te po wai, “Dagego eno yali sę te Isipde suai dao. Tama eno dage te ba kemodagego te aga gesi noma gǫų te bogo ugwadu daide sela soabo tiwai elama, tama dage eno e buluba odasa aselama, tama megi dage ena dali bidibao.
EXO 19:5 Tama dagego megi eno bomai po dąų olama, tama eno po mu wali peyu da, teda dage eno gasagi yai tedali we bidi hani pedelaibao. Tigidali tǫ me, tigidali we bidi me, te eno naga, tiali goli eno dage sa munama, hagea siyu, tama dage ena we bidi mu bidaibao.
EXO 19:6 Tama dage eno te pris sę ebo tuni we bidi hani bidibo tiwai yaibao. Tama dage te eno tedali we bidi mu bidaibao.” Genuai Bidigo Mosesbolo te po te we bidi dabe augwalibolo mao wai.
EXO 19:7 Tama Mosesgo te bulu du tagalama, tama pelama, te Israel dabe genuai bidi nigilali bage augwali sisinama, tama Genuai Bidigo agabolo te bulu dude wali po tigidali augwalibolo wai.
EXO 19:8 Tama tigidali we bidigo te po wai, “Dago te sę dabe tigidali te Genuai Bidigo po wali gilama te sę yaibao.” Tama Mosesgo te we bidigo po te Genuai Bidibolo wagi pai.
EXO 19:9 Tama Genuai Bidigo Mosesbolo te po wai, “Odao, te genuai husugu yai pǫde bidilama, tama ena nageba asiyu, tama te we bidi augwaligo te eno nage dali po mibo odolama, tama sesemane sogo augwaligo nago poba homu dąų omainao.” Tama Mosesgo Genuai Bidibolo te we bidi augwaligo wali po wai.
EXO 19:10 Tama Genuai Bidigo Mosesbolo te po wai, “Nago te we bidi augwalibolo te po wagi pelama, megi de do si te augwaligo homu kolesaga me dodolama, tama ugwa wę tedelama, tama augwaligo enaba lotu po wainogo sisilaluao.
EXO 19:11 Augwaligo do digi sisi yao. Te duba sogo ena dulama, tama ena te Sainai bulu dude bidibadi, tama te we bidi augwaligo ena sumainogo yaibao.
EXO 19:12 Nago dąį mubogo te bulu du bagulama, tama te we bidi augwali te dąį tomoba pigimio. Tama augwalibolo te po olama, tama augwali bugagia dua bidiyu, tama augwaligo te dąį bolama, tomoba pelama, te bulu duba hologio. Tama augwali te bulu du pąba pigio. Tama niwai bidi me deligo te dąį bolobaso da, augwaligo aga ela muao.
EXO 19:13 Tialima, augwaligo aga elebo sogo augwaligo nogogo aga eligio. Te augwaligo masigi sąnama eliyu, me te enigo aga enao. Te bidigo, me ma te kibugo te dąį bolobaso da, teda dagego aga te kolesaga elama elao. Te dage deli sogo te bulu duba holabo sogo elalubao. Tama te sogo dagego te bu wabo nai nogi biugel te bu wai da obaso da, teda dage piąo,” Genuai Bidigo te po wali.
EXO 19:14 Tama Mosesgo te bulu du tagalama, dulama, tama te we bidi augwalibolo te lotu po wabo sisi iyąo te po wai. Tama augwaligo agai po wali pelama, augwa ugwa dabe wę telawai.
EXO 19:15 Tama Mosesgo augwalibolo te po wali, “Dagego do digi sisi ela muao. Tama megi e side gagalama, do tama te sogo dage we dabe dali me pilamo dao,” wali.
EXO 19:16 Tama bidama, te sela sogo wabo side kigamu, te genuai pǫ te bulu dude pedelali, tama te pǫ kulukulu olama, tama be sele ula pepeda pelama, tama bu wabo nai biugel gela genuai mu wai. Tama te bulu du sesegede pesage nigali we bidi dabe tigidali wi mu elama, tama augwali tigi didibili yai.
EXO 19:17 Tama Mosesgo augwali odasa te be mesalo buluba pelama, tama augwali te bulu du sesegede God dali deliba sisinai hagede dolalugi pai.
EXO 19:18 Tama Genuai Bidi te sia tomode bidilama dulali, tama te Sainai bulu duba bidagasali, tama genuai hanogo te bulu du tigidali mu mesega sai. Tama ugwaba holali hano te genuai sia mu dabo hano holobo tiwai mu yai, tama tǫ mali genuai mu te bulu dude pedelai.
EXO 19:19 Tama te bu wabo nai biugel gela wabo genuai eyu, tama genuai mu pedelai. Tama Mosesgo po Godibolo olama, tama Godigo pedauwalidu agai po wei ponobo odainogo yai.
EXO 19:20 Tama Genuai Bidi dulama, te Sainai bulu du bagede bidiyu, tama agai Moses te bulu duba ugwa holomainogo aga i wai. Tama Moses te bulu duba ugwa holai.
EXO 19:21 Tama Genuai Bidigo te po agabolo wai, “Nage aiyaba dulama, tama te bomo yai po tigidali we bidibolo magi pao, tama augwaligo te dąį bolama, tama ena me suagasigio. Augwaligo te dąį boloyu da, teda we bidi hauwa isaibao.
EXO 19:22 Te pris dabe augwali ena pąba asobo bage, augwali me te augwaligo homu kolesaga dwai meda elalubo dabe geselama, tama augwali eno gedude wiegi yai pedelao. Ma, te kolesaga isąyu da, teda eno augwali dene ilaibao,” wali.
EXO 19:23 Tama Mosesgo te po Genuai Bidibolo wai, “Te we bidi dabe augwali edaba me hologobeo, magi basowe, naga digi nago bomai po dabolo mawai. Tama da te bulu du sesegede bobegelama, tama dąį muai, tama dago te bulu du habu selebao,” te po wai.
EXO 19:24 Tama tialima, Genuai Bidigo agabolo te po wai, “Te usu da, nage aba dulama, tama Aron aga selama, tama nage dali edaba holao. Tiali goli, te pris dabe, me te we bidi dali, augwaligo te dąį muani bolama, ena pąba me edaba holamo da po wao. Ma, augwaligo te dąį boloyu da, teda augwali eno dene ilaibao,” wali.
EXO 19:25 Tama Mosesgo te po wabo odama, tama aga te we bidi dabe bidibo digi dulama, tama Genuai Bidigo agabolo mani po tigidali augwalibolo pusai.
EXO 20:1 Godigo te po wai,
EXO 20:2 “Ena digi ena Genuai Bidi Yawe, ena dagego God dao. Eno dage Isipde sali, te bulude kalabus sę ebadi, tama eno dage selama, odasa asai.”
EXO 20:3 “Nago ena deli naga wali asao. Nago te tibo god me wali pelamo dao.”
EXO 20:4 “Nago tibo god me nigigio, tama nago te dagalude me, te tǫde me, ma te wę tomode elalubo naigo me, te tǫ dologode elalubo naigo te gasa nai piksa noma me deli munu me nigilamo dao.
EXO 20:5 Nago te tibo godiba, me te noma bidiba kidu sugunama, lotu me wagimio, magi basowe, ena Genuai Bidi Yawe te ena nago God, tama ena te tibo godigo hasegelemainogo ebo usu me egobeo. Mu menio. Tede eno hagela homu mu ebo dao. Tama ena hagela mu homu ebo we bidi dabe, augwaligo te naide magi sę yai elalubaso, te eno augwali dene iliyu, tama augwaligo wai hani sela, me me si me si nosali pedelabo hani, augwalibolo me te mabo dene tiwai ilaibao.
EXO 20:6 Tiali goli, ena godolo homu elama, tama eno bomai po tigidali wali pabo we bidi bidibaso, teda eno augwali me godolo eyu, te augwaligo wai dabe hauwa 1,000 mu nosali pedalobo hani me, te eno augwali dali wiegi yai homu eyu, augwali eno godolo mu yaibao, tama te kolesaga ebo siligobeo.”
EXO 20:7 “Nago eno nogi God dwai odolali nogi egio, te nago Genuai Bidi dao. Magi baso meni, ena nogi olo nogi ebo we bidi te eno augwali dene ilaibao.”
EXO 20:8 “Nago te Sabat side bugagia homugo koneama, te eno bodolu muani side dao. Te side te gasagi yai tedali elalumainao.
EXO 20:9 Nago te Sarere deli tomode te sę ebo side te nogo a naga olama me badu nogo kibisa deli, te tama sogo sę ebo si elalubao.
EXO 20:10 Tialima, te a naga olama me badu nogo si wali, te me deli sogo te nago Genuai Bidi, God eno side dao. Te olo bidibo Sabat side nago sę me igio, tama nago ogwa dabe me, wegi dabe me, sę ebo we bidi dabe me, te nago sę ebo kibu dabe me, te nage dali bidibo gasa bulu tǫ bidi dabe me, dage tigidaligo te side sę me igimio.
EXO 20:11 Nago te tama tiao, te magi baso meni, te a naga olama me badu nogo kibisa deli sogo naga Genuai Bidi eno te tǫ dagalu, me te tamu ąį, me te tigidali elalubo nai nigai. Tiali goli, te a naga olama me badu nogo si wali, te me deli sogo eno olo bidiyu, toma tuai dao. Tama tibaso, Genuai Bidi eno te Sabat side te gasagi yai side te me tedali mu ilai. Tama te side te eno bodolu dolo mu dao.”
EXO 20:12 “Nago naga aya ida dologode bidama, tama augwaligo po wali pao. Nago tama tiyu da, te nage polo me isigobeo. Menio, te nage hauwa sogo te tǫde bidimainogo te God eno nago Genuai Bidi eno nage mawainogo homu ebo tǫde bidagameo.”
EXO 20:13 “Nago we bidi ela mugio.”
EXO 20:14 “Nago bidigo sai we dali, me ma te we sai bidi dali, me dwai sę me igio.”
EXO 20:15 “Nago nai wi sigio.”
EXO 20:16 “Nago tibo po olama, tama gasa we bidi olo po tų ela magio.”
EXO 20:17 “Nago gasa bidigo be sulama, pesą eyu, godolo igio. Tama nago gasa bidigo we dali gedu igio. Tama aga sę ebo bidi, me te sę ebo we, me te bulmakau, me bidi duabo donki, me te agai tigidali gasa nai dabe me, te nago godolo eyu, sabo homu me igio.”
EXO 20:18 Te we bidi augwaligo te pǫ kulukulu wabo, me te bu wabo nai biugel gela wabo me odai. Tama augwaligo te be sele te pǫ ula ebo ugwaba peyu, eda asiyu eyu, tama genuai hano te bulu dude pedalobo sulama, tama augwali wi mu yai. Tama augwali kilasa ma pelama, te bulu du digibulu gana dolalugi pai.
EXO 20:19 Tama augwaligo Mosesbolo te po wai, “Nago digi te po dabolo wabo, te dago te po odaibao. Tiyu Godigo po dabolo wabo si, te da isidalio,” wali.
EXO 20:20 Tama Mosesgo augwalibolo te po wai, “Dage wibo, tagalao. Godigo dage usu naga sagasiyu asali, te dage aga dologoba pelama bidiyu, tama dagego dwai sę ma idali weyu, tiwai sę yai.”
EXO 20:21 Tiali goli, te we bidi dabe augwali digibulu digi dolalubadi, Moses agaduba deli naga te genuai husugu yai pǫ pąba, te God bidibo digi pai.
EXO 20:22 Tama Genuai Bidigo po Mosesbolo olama, tama agai te Israel dabe augwalibolo te po omainogo yai. Tama Genuai Bidigo te po wai, “Dagego koneani te tiwai, te ena dagalude bidiyu, te eno po dage dali miai dao.
EXO 20:23 Odiąo, dagego te tibo god dabe te gol me silvago nigilama, tama te nai dabeba lotu po me wagio. Dagego ena delibolo naga lotu po wao.
EXO 20:24 Tama dagego tǫ meba selama, tama eno alta nigao. Tama te altade dagego te sipsip dabe me, bulmakau me, te tigidali siaba ulama, siago dabo te ofa dali, te we bidi augwaligo ena dali dedeli homu yabo te ofa me yao. Tama dagego te tigidali bulude te dagego enabolo lotu omainogo, eno te sa mubo bulude dagego tama tibaso da, te ena aselama, dage bugagia wiegi yai mu ilaibao.
EXO 20:25 Dagego masigigo te alta me deli nigiyu da, teda dagego te bidigo togwali masigi sigio. Magi baso meni, dagego te sę yai ain tulgo te masigi togoyu da, tama te tiwai masigigo eno sę ebo te dolo egobeo.
EXO 20:26 Tama dagego te ugwadu daide te alta nigigio, te dagego ofa yainogo ugwaba holabo togobili nigigio. Tiyu yaide, dage te togobilidu ugwaba holobadi, tama augwaligo dagego hale hanialubo suidalio,” te po wai.
EXO 21:1 Tama Genuai Bidigo po me wadolama weyu, te po wai, “Nago te po tų dodolabo bomai po te Israel we bidi augwalibolo mao.
EXO 21:2 Bidi me deligo te olo sę yabo bidi me deli te duga Israel hanide me abelebaso da, teda agai te bidigo sę te kibu be 6 kibu bede te sę yaibao. Tama te kibu be 7 wabo, te kibu be delide te aga pomainogo tagala palao. Tama hasia agai mone meba mobaso, te sigio. Mu menio. Aga olo mu pomainao.
EXO 21:3 Tama aga te we sisąbadi te sę ebo bidi pedelai baso da, teda agaduba deli naga pomainao. Tiali goli, hasia aga we bolo selama asai yai baso da, teda agai te sę ebo taga pabo sogo, te aga we dali sela pomainao.
EXO 21:4 Tama te bidi aga dali sę yali bidigo we menama, tama te wego wai dabe ame nai baso da, tama te we me, te wai dabe dali, augwali te aga sę yali bidi dali bidaibao. Tama bidi naga aga te sę yali tagalaibao.
EXO 21:5 Tiali goli, te sę bidigo te po weyu, ‘Eno ena genuai bidi godolo mu yali, tama ena we me wai dabe godolo elama, tama eno augwali taga pabo hagela homu ebao,’ te po obaso da, teda aga genuai bidigo aga te po tų dodolabo beba selasa pao. Tama te sę ebo bidi te be tųde elalubo pos nide dolalubadi, tama aga genuai bidigo te nel selama, te sę bidigo olo podolama, dedage nigilao. Tama aga te genuai bidigo sę olo ebo bidi bidada pelama, tama aga isiyu, te sę tagalaibao.”
EXO 21:7 “Tama bidi me deligo masigi dabe sabo homu eyu, tama aga wegi muyu, Israel hani gasa bidigo te wegi abelebaso da, tama te kibu be 7 wabo kibu bede te genuai bidigo te we tagala palagio, tama agai te sę bidi dali hasia yali tiwai kolesaga naga yai.
EXO 21:8 Tama te bidigo te we te olo sę yabo we tiwai abelebaso da, tama hasia agai homugo te we sainogo yai, tiali goli nosali agai te we sabo homu isąyu da, teda te we aga ayago ma abelama, somainao. Te bidigo te we dali te doloba pai kolesaga ebe, tama agai te we te gasa bulu bidigo abelemainogo elamo dao.
EXO 21:9 Tama agai te we aga ogwabolo mawainogo homu eyu da, teda agai wiegi yai sę aga dali ilama, te aga wegi dali ebo kolesaga tiwai gilama te we dali me tama tiao.
EXO 21:10 Tama te genuai bidigo gasa we siyu da, teda agai te hasia sali te olo sę ebo we te bugagia tonaluao. Agai te we nai mayu, te ugwa me mayu elama, tama aga te we dali piyu, te agai polobadu yali tiwai gilama yao.
EXO 21:11 Tama agai te tobage sę sela te we dali isąyu da, teda agai te we pomainogo tagala palama, tama te wego agabolo te mone meba magio,” wali.
EXO 21:12 “Bidi me deligo gasa bidi bomonama elai digi, tama te bidi isai baso da, teda dagego te bidi elali te bidi aga me ela muao.
EXO 21:13 Tiali goli, agai homugo te bidi mu ela muabo homu isąyu da, tiali goli agai geda muyu naga te bidi elama, nosali aga isimainogo yai, tama te bidi elali bidi aga wi pomainao, te bidigi wi pabo buluba, te eno dagebolo sa muaibao, tama tede aga bugagia bidaibao.
EXO 21:14 Tiali goli, bidi me deli agai gasa bidi dali sębę eyu, aga ela muabo homu ebaso da, tama nosali agai tama tiyu da, teda dagego aga digi ela muao. Te aga eno nai ulubo alta teba aselama, bugagia bidabo homu ebo tagaliyu, te dagego aga selasa pelama, aga ela muao.”
EXO 21:15 “Mena bidigo aga aya, ma aga ida si elebaso da, teda dagego te bidi aga ela muao.”
EXO 21:16 “Tama bidi me deligo aga abagi me deli wi selama, tama aga sę ebo bidi bidimainogo yai, ma agai gasa bidigo te bidi abelemainogo eyu da, teda dagego te tiwai kolesaga ebo bidi ma suyu, dąų olama eyu, tama aga ela muao.”
EXO 21:17 “Niwai bidigo aga aya de ida si dali wado po weyu, dwai dolabo bomai po wabo bidi, teda te bidi aga dagego ela muao.”
EXO 21:18 “Bidi me aga si wado po olama, tama bidi me deligo nogo sugunama, tama gasa bidi me elali, me ma masigi selama elali, tiali goli agai te bidi aga mu ela musiąyu da, teda dagego te bidigo yali dwai sę wei ponogio. Tama elama, tigi dolai bidi aga te betide pila munama, tama nosali aga dono tulama, be bulu badu bilibaso, teda te elali bidigo te mone wei agabolo mao. Te monego agai sę te tigidali sogo isąwani te usu nao. Tama te bidi elali bidi aga te bidi bugagia tonaluama tama, tama aga tigi usu ma ebo si te usu dao.”
EXO 21:20 “Tama bidi me deligo wąbi selama, tama aga sę ebo bidi me, te aga sę ebo we me elama, tama aga te elali sogo dolo isibaso da, teda dagego te genuai bidi agabolo te dene mu ilao.
EXO 21:21 Tialima, te bidi ma te we te deli sogo, me ma si sogo bidilama, tama nosali aga isibaso da, teda dagego te aga genuai bidibolo dene iligio. Magi basowe, sę ebo bidi, ma te sę ebo we, te bidigo digi te aga sę dao, te abelai mone te olo hagawai baso, te aga sęgę dao.”
EXO 21:22 “Tama bidi meba wąbi hwįyu, tama bidi me deligo te wai tabi elalubo we elali, tama te wai dolama, te wego te wai polo ame nani, tiali goli te wai ame nani ida te dolisiąbaso da, teda te we elali bidigo te we page bidigo wabo po odama, tama agai te dwai sę yali dodoluyu wei begelama, te mone mao. Tiali goli, po tų ebode te mone sabo po usu da po weyu bolo elama, tama nosali te we aga bidigo te mone sao.
EXO 21:23 Tiali goli, we ma aga wai tigi dolai baso da, teda dagego te bidibolo me te tiwai kolesaga naga wei ponao. Ma, te we isai yai baso da, teda dagego te we elali bidi aga ela muao.
EXO 21:24 Tama te gedu, me ma te kele, me te nogo sągą dolai baso da, teda te tiwai kolesaga naga te aga dali wei ponao.
EXO 21:25 Tama me ma, agai te we siago, me ma te we tigi dolama, te keni me te keloago elai baso da, teda dagego te bidibolo te tiwai sę naga yao.”
EXO 21:26 “Tama bidi me deligo aga sę ebo bidi ma te aga sę ebo we te geduba elama, tama te gedu dolobaso da, teda aga te bidigo sę bidi ma, te sę ebo we ma, te sęde bidigio. Te bidigo te genuai bidi taga pao, te aga gedu dolali dali wei si ponao.
EXO 21:27 Tama agai te sę ebo bidi me te sę ebo we me te elali digi, tama aga kele degebaso da, teda agai te sę ebo aga tagalao, te aga kele degali dali wei si yao.”
EXO 21:28 “Tama bulmakaugo te bidi me deli, ma te we me, te agai gąųgo ela mubaso da, teda te bulmakau dagego ela muao. Tiali goli, dagego te bulmakaugo mi tugio. Tama dagego te bulmakau aga aya po tų ela magio.
EXO 21:29 Tiali goli, te bulmakaugo te we bidi augwali te gąųgo eniyu ebaso, tama te we bidi augwaligo po bomonama te bulmakau page bidi dali wali digi, tama te bulmakau page bidigo te obo isąbaso da, teda dagego te tiwai kolesaga yao. Tama te bulmakaugo bidi me deli, ma te we me, ela mubaso da, teda dagego te bulmakau ela muyu, tama te bulmakau page bidi me ela muao.
EXO 21:30 Tiali goli, po tų ebode te po obaso da, agai te isali bidi ma te we te aga hanibolo te bulmakaugo dwai sę yali me te aga dali te si ma abelama, tama te mone aga hanibolo mao. Tama tibo si, te aga isigobeo. Agai aga digi bidibo ula ma abelemainao.
EXO 21:31 Tama te bulmakaugo te wai puluba, te ogwa me, te wegi me, elebaso da, teda te tiwai bomo yai po naga dagego wali piąo.
EXO 21:32 Tama te bulmakaugo te sę ebo bidi ma te sę ebo we elebaso da, teda te kibu page bidigo te monego K300, te sę bidi ma te sę we te aga genuai bidibolo te mone menama, tama dagego masigi sąnama te bulmakau ela muao.”
EXO 21:33 “Tama bidi me deligo te tǫ dedage haluali nai sela sąwani, ma agai genuai tǫ dedage nigilama halusiąwai, tama bulmakau me deli, ma te bidi duabo donki, te dedageba tulaluama isibaso da,
EXO 21:34 teda te tǫ dedage nigali bidigo te kibu page bidi abelao. Tama te isali kibu aga somainao.”
EXO 21:35 “Tama bidi me deligo bulmakaugo te gasa bidigo bulmakau ela mubaso da, teda te bidi si me bidigo te bidibo bulmakau te gasa bidigo abelemainogo elama, tama te bidi augwa si te mone selama, tama te isali bulmakau mi, te augwa si dobola sao.
EXO 21:36 Tiali goli, te bulmakaugo hwįbo bulmakau yai baso, te kibu page bidigo obo bugagia isąwai yai baso da, teda agai gasa bulmakau te isali bulmakau page bidibolo wei ponao. Tiali goli, agai te isali bulmakau te bidi aga somainao,” wali.
EXO 22:1 Tama Genuai Bidigo po dage wadolama weyu, te po wai, “Tama bidi me deligo te bulmakau, me ma te sipsip me te wi selama ela muyu, me ma agai te gasa bidigo abelemainogo yai baso da, teda dagego te kibu page bidibolo te nai wi sali bidi agai te bulmakau a naga sobadi, te sipsip me si me si sobadi elama, wei ponomainao.
EXO 22:2 Tama agai dolo ponomainao. Tiali goli, agai wei ponabo bulmakau me sipsip te meni baso da, te aga dagego te olo sę ebo bidi tiwai te gasa bidigo abelemainogo elama, tama te mone dagego selama, agai te wi sali kibu wei ponao. Tama agai te wi sali bulmakau, me sipsip, ma te bidi duabo donki, te nai dabe te agade elalubaso da, teda agai te nai si te aga te dwai sę yali wei ponao.” “Tama nai wi sabo bidi me deligo be hulide te be daga aluama, tama gasa bidigo aga dąų olama, tama aga ela mubaso da, teda te nai wi sali bidi ela muani bidi aga te sęgę menio. Tiali goli, agai aga te siade ela muyu da, te agai bidi ela mubo sęgę elalubao.”
EXO 22:5 “Tama bidi me deligo aga bulmakau dabe tedela pelama, tama aga tǫde, ma te aga wain bono du gide nai tumainogo yai, tama augwaligo agai dąį bolama, tama gasa bidigo giba nai tugi pai yai baso da, teda te bulmakau page bidigo te aga gide wiegi yai nai me, te wain bono du me, te gi page bidibolo wei ponao.”
EXO 22:6 “Tama bidigo aga tǫde te kala siago ulai digi, tama te sia genuai pedelama, tama te dąį bolama, gasa bidigo gide elalubo te tubo nai wit, me ma te wit augwaligo togolama tama pesage holai elaluai, tama te siago dobaso da, teda te sia ulali bidigo te siago dali nai tigidali wei ponao.”
EXO 22:7 “Tama bidi me deligo aga doado bage meba, ma aga mone dabe te aga abagibolo menama, tama agai bugagia munalumainogo homu yai. Tama nai wi sabo bidi me deli asiyu, te nai dabe wi sai, tama nosali augwaligo aga gegelama subaso da, te nai wi sali bidigo te nai si si naga tigidali te mone sali wei ponao.
EXO 22:8 Tiali goli, augwaligo te nai wi sali bidi gegabo usu isąbaso da, teda te nai tonaluali bidi dagego selama, te eno geduba te po tų dodolobo bidi dabe bidibo digi pao. Tama agai te po weyu, ‘Mu tama, eno te nai wi me sabeo,’ te po wao.
EXO 22:9 Tama tigidali sogo bidigo po aga abagi dali te nai bulmakau, me te bidi duabo donki, me ma te sipsip, me te ugwa dabe, me gasa nai dabe hagawali po elaluai, tama te bidi augwali sigo te po weyu, ‘Te nai ena naga da,’ obaso da, teda te bidi si eno geduba te po tų dodolobo bidi dabe bidibo digi selasa pao. Tama te tibo po wabo bidi te eno aga sa mubaso da, teda te bidigo te nai si si naga te aga abagibolo wei ponaibao.”
EXO 22:10 “Tama bidi me deligo te bidi duabo donki, me te bulmakau, me ma te sipsip, ma gasa kibu dabe meba te aga abagibolo menama, tama agai tolalumainogo yai, tama te kibu dabe me dolo baso, me ma isiyu, me ma boi bidigo hwįyu selasa peyu da, tama bidigo te nai me susiąyu da,
EXO 22:11 teda te bidi augwali si te po tų dodolobo digi pelama, tama Genuai Bidi eno gedude te abagigo te po wao, ‘Mu tama, eno agai nai doliyu, ma te kibu me te eno wi me sabeo.’ Tama kibu page bidigo agai te po wabo usu da weyu, tama te abagigo agai te hagawali kibu dabe wei ponogobeo.
EXO 22:12 Tiali goli, meba bidigo te abagigo tolalubo nai kibu dabe wi sobaso da, teda te kibu page bidibolo te abagigo te monego wei ponao.
EXO 22:13 Tama te uni hasago elai baso da, teda te abagigo te kibu elama tuali, te me badu dage te aga abagibolo waselainogo sela pao. Tama agai te uni hasago elali bulmakau wei te monego ponogobeo.”
EXO 22:14 “Tama bidi me deligo aga abagigo te sę yabo bulmakau me deli osogo abelama, sę emainogo yai, tama te bulmakau page bidi te sogo tede bidisiąbadi, tama te bulmakau doliyu, ma isiyu me ebaso da, teda te abagigo te kibu page bidi abelao.
EXO 22:15 Tiali goli, te bulmakau page bidi aga te abagi dali bidibadi, tama te bulmakau dolobaso da, teda abagigo te abelegio. Tama abagi agai hasia nagebolo mone menama, tama te bulmakau sę yainogo sai digi, tama te bulmakau dolobaso da, teda agai abelegio, magi basowe, agai te hasia mani mone te usu dao,” wali.
EXO 22:16 “Tama bidi me deligo te gesi wegi te bidibolo noma po wasiąwai wegi, tama te bidi dali pisąbadi, tama bidigo te wegi nogo tubaso da, teda agai te we abeleyu, aga ayabolo mone menama, tama agai te we sao.
EXO 22:17 Tama te we aga ayago te bidigo te we sabo hagela homu ebaso da, te usu dao. Tiali goli, agai te we aga aya te augwaligo bidi dali pisąwai we abelebo mone usugo abelao.”
EXO 22:18 “Dagego te pobi nigibo we dabe ela muao.”
EXO 22:19 “Dagego te bulmakau so kibu tąbo bidi ela mubadi, tama omai kibugo te we aga tąmainogo ebo te we ela muao.”
EXO 22:20 “Tama te we bidi augwaligo ena Genuai Bidiba naga ofa yao. Tama me deligo te tibo godiba ofa ebaso da, te dagego aga ela muao.”
EXO 22:21 “Dagego te gasa bulu tǫ bidi aselama, dage dali bidibo bidi aga dali haniani dwai kolesaga eyu, ma te sęgę agaba mugimio. Magi basowe, polobadu dage te aga tiwai te Isip tǫde bidai dao.”
EXO 22:22 “Dagego te aga bidi isai we dali te dwai kolesaga eyu, ma te wai puluba, augwa aya ida isai tiana wai dabe dali me te kolesaga igio.
EXO 22:23 Tama dagego augwali dolobaso, tama eno augwali tau somainogo tama augwaligo gela enabolo obaso da, te eno augwaligo gela wabo mu odaibao.
EXO 22:24 Tama eno sębę eyu, tama te boi bidi dabego dage dali hwįmainogo ilama, tama dage elemainogo yaibao. Tama dagego we dabe te bidi meni eyu, tama te dagego wai dabe augwaligo aya meni yaibao.”
EXO 22:25 “Tama eno we bidi augwali mone mu menia sobaso, tama augwaligo dage dali negeli sobaso da, teda dagego te mone sabo bisnis sę ebo bidigo negeli mabo tiwai igio. Tama augwaligo te negeli sali wei ponobo sogo, te dagego gasa mone dali daganama, sigio. Mu menio.
EXO 22:26 Tama dage dali te negeli sabo bidigo agai te negeli sali wei begelainogo te agai holobo ugwa te sa mubo tiwai eyu, dagebolo mubaso da, teda dagego te sia ge dega sisąbadi, te sogo naga te ugwa agabolo ma mao.
EXO 22:27 Magi basowe, agai te ugwa deli naga elaluali, te aga hulide kedau idali weyu, tigi bea sabo ugwa dao. Te ugwa nago tolalubaso da, te aga tigi magi naigo halua selama pigowe? Te eno aga tau somainogo, agai gedu haluasa po enabolo obaso da, te eno agai gedu haluasa po wabo odaibao, magi basowe, eno tigidali we bidi olo tau sabo homu kolesaga mabo dao.”
EXO 22:28 “Tama dagego dwai po God enabolo me wasiąma, tama dagego te dwai po te we bidi augwaligo tobolu bidibolo dagego te Godigo aga dolomainogo, te dwai po me wagio.”
EXO 22:29 “Tama hasia dagego te gide pedalobo te wit, me bono du wain, me tubo wel, me te oliv ni du dabe me, te selama, enabolo te ofa tiwai mabo te hagela igio.” “Tama dagego gomunai wai te ogwa te dagego enabolo mao.
EXO 22:30 Tama dagego te bulmakau de sipsip sigo gomunai wai te enabolo ofa yao. Tama te bulmakaugo wai, me te sipsipgo wai ame nenama, te nogo a naga olama me badu si sogo te aga ida dali hasia bidimainogo elama, tama te nogo a naga olama me badu sela wali, te me deli sogode dagego te kibu wai elama, enabolo ofa ilao.”
EXO 22:31 “Dage te eno tedali gasagi yai we bidi hani dao, tama tibaso, dagego te uni hasa dabe augwaligo te bulude ela muai kibu te nai mi dagego me tugio. Dagego te nai te yowi dabego naga tumainogo mao,” te po wai.
EXO 23:1 Tama Mosesgo Genuai Bidigo po pusuyu, te tiwai po wai, “Tama dagego te magi nai po me deli pedelali te po odoyu, tama te mu po meni homu eyu da, teda dagego te sę yali po subigila ola biligio. Tama bidigo te dwai kolesaga ebaso da, teda dagego aga tau siyu, te po tų ebode tibo po wagio.
EXO 23:2 Tama bidi hauwa augwaligo te dwai kolesaga ebaso da, teda augwaligo te ebo kolesaga wali pigio. Ma, augwaligo te po tų ebode augwaligo tibo po weyu, te po tų dodolobo sę doloyu eyu da, teda augwali dali deli homu eyu, augwaligo te ebo kolesaga me wali pigimio.
EXO 23:3 Tama bidi mebago te magi nai meni yai bidi po tų ela mainogo, tama augwaligo dage te sę ebo suali tiwai po omainogo dage i obaso da, dagego te magi nai meni yai bidi tau siyu, te po mesegelama tibo po wagio.”
EXO 23:4 “Tama dagego duga boi bidigo te bidi dualasa pabo donki, ma bulmakau te obo tagalama wi pai yai subaso da, teda dagego selama, te bidi agabolo ma magibao.
EXO 23:5 Tama dagego boi bidigo te donki, ma te bulmakau te walu dali tula muai elalubaso da, dagego te boi bidi tau selama, aga ma hodolao. Dagego aga te tǫde pila mumainogo tagaligio.”
EXO 23:6 “Tama te magi nai meni yai bidigo magi nai me delide po tų yagasobaso da, dagego agai po tų ebo mesegelama, aiyaba elalugio.
EXO 23:7 Dagego gasa bidi tibo pode po tų ela magio. Tama doloba pai bidi agai dwai kolesaga me isąbadi, tama augwaligo aga po tų olo mu ilibaso da, teda dagego aga ela mugio. Magi basowe, te tiwai dwai kolesaga ebo bidi eno aga po tų ilama, tama aga hagawaibao.”
EXO 23:8 “Tama bidigo dage homu bega siyu, te po tų ebode tibo po omainogo te mone mobaso da, dagego te mone sigio. Magi basowe, te tiwai kolesagago te wiegi yai bidigo homu te tibo po wabo bidi tiwai pedelama, tama te dwai kolesaga isąwai bidigo po tų ebo aiyaba mesegelaibao.”
EXO 23:9 “Dagego bulude bidibo gasa bulu bidi dali dagego dwai kolesaga me igio, magi basowe, polobadu dage te Isipde bidibadi, te aga tǫ mude bidisąbo we bidi ebo kolesaga te dagego bugagia koneai dao.”
EXO 23:10 “Dagego gide nai bulama tuyu, tama te kibu be a naga olama nogo me badu deli, te kibu bede te nai bulama siyu, beba sisinao.
EXO 23:11 Tiali goli, te kibu be 7 wabo, te kibu be me delide dagego nai bulisąma, te tǫ toma tuyu, olo elalumainao, tama dagego te tǫde olo pedalobo nai sigio. Tama te wain gide me, te ni du oliv gide me, dagego te tiwai kolesaga naga yao. Tama te magi nai meni yai bidi dabe augwaligo naga te gide olo holobo nai siyu, tama te magi nai meni yai bidi dabego sisąma tagalali nai me badu, te uni hasa dabego tula silimainao.”
EXO 23:12 “Tama tigidali Sarere dagego sę te nogo a naga olama me deli, te tama sogo dagego sę eyu, tama te a naga olama nogo me badu si wali, te me deli sogo dagego sę igio. Tama tiyu da, te donki dabe, me te bulmakau, me te sę ebo bidi dabe, me te sę ebo we dabe, me te dage dali bidibo gasa bulu bidi augwali me, te toma tuyu, tama bomo ma saibao.”
EXO 23:13 “Tama dagego eno te mabo po tigidali bugagia odolama, wali pao. Tama dagego tibo godibolo te gedu haluasa po me wagio. Tama dagego augwaligo nogi me wagio. Habu mu dao,” te po wali.
EXO 23:14 “Tama deli deli kibu bede sela sogo dagego genuai lotu enaba wabo bodolu muao.
EXO 23:15 Tama dagego te Bo Disiąwai Nai Bret te genuai side te me bodolu munama, tama sisinama, lotu po wainogo, te eno wali po gilama tiwai yao. Tama dagego te bo disiąwai nai bret te a naga olama nogo me badu si, te tama sogo polua nogi Abip, te sogode te nai tuabo bodolu muai dao. Magi basowe, te poluade naga dagego te bulu Isip taga soai. Tama dagego enaba lotu po wagasainogo da, dagego te ofa yabo nai deli me selasa asiąo.”
EXO 23:16 “Tama dagego te wit tau yali gagalama hasia bolo nai sabo sogo, tama dagego enabolo usu da po weyu, tama wiegi yai homu te nai tuyu yabo, te sogo genuai bodolu muao.” “Tama dagego te genuai side te poluade te nedu du tau ebo sogo, te me bodolu muiąo. Tama te sogo dagego te wain gide te wain du siyu, osogo bidabo dwasianu be sęnama, tama te bede bidiyu, te wain me, oliv ni du dabe me, te gide siąo.”
EXO 23:17 “Ena God, dagego Genuai Bidi, tama eno te kibu be deli delide sela sogo lotu wabo bodolu muani, tama te tigidali bidi dage aselama, enaba lotu po te sogo wagasiąo.”
EXO 23:18 “Dagego te kibu sipsip me bulmakau enaba ofa ebo sogo, dagego te bo dai yis elalubo bret dali ofa igio. Tama dagego te ofa ebo kibu ili dabe tigidali te siaba ulama, tama dagego te nosali kigamu ofa yabo me tagalama elalumainogo igio.”
EXO 23:19 “Tama dagego te polasa mu tau yali wiegi yai nai mu te gasa nai elalubadi, te nai dagego Genuai Bidi God eno beba sela pao.” “Dagego te meme ame pę te seneba munama, tama te memego digi wai elama, aga tigi mi te seneba munama, ulama tugio.”
EXO 23:20 “Odiąo, te eno sę ebo Ensel Mobo Bidi tagala palama, polasa peyu, tama dage tųdu pabode tonalua paibao. Tama agai te dage eno mawainogo sisi yai elaluali te bulu tǫba odasa peyu, teba sabolaibao.
EXO 23:21 Tama dua dao, dagego agai po bugagia odolama wali pao. Dagego agai po sela sągio, magi basowe, ena digi ena aga dali mu bidiyu, tama agai te po sela sąbo we bidigo dwai kolesaga te sela sągobeo.
EXO 23:22 Tialima, dagego agai po wali pelama, tama eno te po wali sę tiwai tigidali ebaso da, te eno dagego boi bidi dabe augwali dali hwįnama, tama te dage dene mabo homu ebo bage me, te eno augwali aiyaba elaluaibao.
EXO 23:23 Eno sę ebo Ensel Mobo Bidi agai te dagego polasa pabo bidi pedelama, tama dage te Amor dabe, me te Hit dabe, me Peres, me te Kenan dabe, me te Hivi dabe, me te Jebus dabe, te hani augwaligo tǫba dage odasa pelama, tama eno augwali hani mu ela silaibao.
EXO 23:24 Dagego augwaligo tibo godiba kidu sugunama, lotu wagio. Tama dagego augwaligo lotu wabo te kolesaga sigio. Dagego augwaligo te tibo god dolama, tama augwaligo te lotu wabo masigi dabe pepedela sąyao.
EXO 23:25 Tama dagego lotu po enaba naga wao. Ena God, dagego Genuai Bidi dao. Dagego tama tiyu da, te eno dage wiegi yai iliyu, tama dage nai me te wę me mayu, tama dage gasi dabe me tigidali sela sąwaibao.
EXO 23:26 Tama eno te wai haliga elalubo we dabego wai bugagia ame nomainogo yaibao. Tama eno te bidigo sai wego tabi dąų me walogobeo, te tigidaligo wai ame nomainogo yaibao. Tama dage polo me isigobeo. Menio. Te eno dage tigidali e tǫde bobobage sogo bida waibao.”
EXO 23:27 “Tama ena dage pabo digi polasa peyu, tama eno te boi bidi dabe augwaliba wi genuai ilama, tama eno augwali homu didibili ilaibao. Tama eno augwali dagede wi ilama pomainogo yaibao.
EXO 23:28 Tama eno te bidi gąų kelebo nai nenemo dabe polasa tagala palama, dage nosali asobadi, tama augwaligo te Hivi dabe me, te Kenan dabe me, te Hit dabe me, te hani augwali sela sąmainogo yaibao.
EXO 23:29 Tiali goli, eno augwali te kibu be delide naga sela sągobeo. Eno tama tiyu da, te tǫ olo elalubo digi te bulu uni hasa dabe hauwa tede pedelama, tama dage dolidalio.
EXO 23:30 Te eno boi bidi dabe augwali dua dua digi sela sąyu, tama dage hauwa pedelama, tama dagego te tǫ tigidali usu na silao.”
EXO 23:31 “Tama eno dagego tǫ dąį e tiwai ilaibao, te wę sanede, te mama tamu ąį badu, te Akaba tǫ te badu pelama, te tǫ tomode elalubo genuai tamu ąį Mediterenian teba sabolama, tama genuai wę Yufretis te badu peyu, te masigi kemi elalubo badu teba te dąį sabolaibao. Tama eno bomo dageba menama, tama te tǫde bidibo hani augwali aiyaba elaluama, tama dage te tǫ tomoba peyu, augwali sela sąwaibao.
EXO 23:32 Tama dagego augwali dali po dąų weyu, me ma augwaligo tibo god dali me te tiwai kolesaga igio.
EXO 23:33 Dagego augwali te dagego tǫde bidimainogo sula tagaligio. Tama tiyu, augwaligo dage dwai kolesaga tomoba kegeyu, tama enabolo sęgę ilidalio. Tama dagego augwaligo tibo godiba lotu weyu da, te dage tulaluama, tama mu dolaibao,” wali.
EXO 24:1 Genuai Bidigo Mosesbolo te po wai, “Eno homugo nage dali, te Aron, me Nadap, me Abihu, me te Israel dabe genuai bidi, te bidi sese sela olama nogo si bidi dabe, dage ena bidibo te bulu duba ugwa holomainogo yaibao. Tama dage digibulu gana dolaluyu, tama tǫba basi gulama, tama enaba lotu wagameo.
EXO 24:2 Tama Moses, nage deli naga ena pąba asagameo. Tama gasa te Israel genuai bidi dabe augwali te pąba me asisąma, tama te olo we bidi augwali me te nage dali aselamo dao,” wali.
EXO 24:3 Tama Moses pelama, te Genuai Bidigo bomai po tigidali te we bidi augwalibolo pusigi pai. Tama tigidaligo te po odolama, tama augwaligo pedauwali deliba munama, tama te po wai, “Dago te Genuai Bidigo po wali te sę tigidali yaibao.”
EXO 24:4 Tama Mosesgo Genuai Bidigo bomai po tigidali asęai. Tama nosali side aga kigamu mu hodaluama, tama alta me deli te bulu du sesegede nigilama, tama te alta pąde agai te masigi nogo si olama sągągo si dodaluali, te Israel hani nogo si olama sągągo si te dąį ilai.
EXO 24:5 Tama nosali agai gesi bidi meba tagala palama, tama augwaligo te ofa dabe te Genuai Bidibolo igi pomainogo tagala palai. Augwaligo te siago tigidali dabo ofa eyu, tama te bulmakau dabe elama, tama God dali deli homu elama bidabo ofa dabe yai.
EXO 24:6 Tama augwaligo te ofa ebadi, tama Mosesgo te ofa yai bulmakau dabego kaneme selama, tama dobolama, meba te pouba muyu, tama te kaneme meba munalubo te agai selama, te altaba sąwai.
EXO 24:7 Tama agai te bomo yai po dąų wai elalubo buku selama, te Genuai Bidigo po te bukude elalubo te we bidi augwalibolo nedai. Augwaligo odolama, tama augwaligo te po wai, “Dago te Genuai Bidigo po tigidali odoyu, dolo wali paibao,” wali.
EXO 24:8 Tama Mosesgo te poude muani kaneme selama, te we bidi dabeba te kaneme segeni sąsąga pali. Tama agai te po wai, “Te kanemego Genuai Bidi agai dage dali dąų wali bomo yai po dąų walai dao. Tama te bomo yai po dabe te dąų wali po page dao.”
EXO 24:9 Tama nosali Moses, me Aron, me Nadap, me Abihu, me te Israel dabe genuai bidi, te bidi sese sela olama nogo si tama, augwali te bulu duba holai.
EXO 24:10 Tama augwaligo Israel dabego God suai. Tama agai sągą dologode genuai sisi yai nai me deli, te be sai tiwai nai elaluai, tama te dagalu ula tiwai mu elaluai.
EXO 24:11 Mu tama, augwaligo God suai, tiali goli agai augwali dolobeo. Tama nosali augwaligo nai te bulude tuai.
EXO 24:12 Nosali Genuai Bidigo Mosesbolo te po wai, “Nage bulu duba ma holama, tama ena pąba bidagasao. Eno bomo yai po meba te masigi sawali side asęaibao. Tama eno te masigi si nagebolo menama, tama nago te bomo yai po te we bidibolo ola magameo,” wali.
EXO 24:13 Tama tibaso, Moses aga sę bidi Josua dali, augwali si sisi elama, te Godigo bulu duba holainogo yai.
EXO 24:14 Tama hasia sogo Mosesgo te Israel dabe genuai bidi augwalibolo te po wai, “Dage te be sęnama, bidibo pesagede bidiyu, tama da si ma asobo tonaluyu bidao. Aron de Hur si dage dali bidaibao. Tama bidi mebago po gasa bidi dali wabo elalubaso da, teda augwali te bidi si pageba pelama, tama te bidi sigo te po dodolomainao.” Te po wai.
EXO 24:15 Mosesgo te po ola silama, tama aga te Sainai bulu duba holali, tama pǫgo te bulu du halua sai.
EXO 24:16 Tama Godigo genuai ula te bulu duba dulai. Tama Israel dabe augwaligo te Genuai Bidigo te ula te bulu dude te genuai sia ula ebo tiwai suai. Tama pǫgo te bulu du halualubadi, te nogo a naga olama me badu nogo deli sogo yai. Tama te a naga olama me badu si wali, te me deli sogo te Genuai Bidi te pǫ tomode bidiyu, Moses asomainogo i wai.
EXO 24:18 Tama Moses te pǫ tomoba pelama, tama te bulu du ugwaba mu holai. Tama aga te bulu dude te bidi sese si 40 te tama sogo bidai.
EXO 25:1 Tama Genuai Bidigo Mosesbolo te po wai,
EXO 25:2 “Te Israel dabe augwalibolo po olama, tama augwaligo nai dabe selama, enabolo ofa momainao. Te we bidi augwaligo mena ofa nai mawainogo homu ebaso, te usu da, te nago sao.
EXO 25:3 Nago e tobage tiwai nai dabe augwali dali sao, te kapa gol, me silva, me bras,
EXO 25:4 me te sipsip nisigo nigai hobi dabe, meba sisi yai, meba mama yai, tama te wiegi yai au yai name ugwa me, te gasa ugwa augwaligo meme nisigo nigai me,
EXO 25:5 te sipsip omaigo wali te augwaligo mama pengo pilai me, tama wiegi yai hasa sikau wali tamu ąįde elalubo me, te me badu ni akas, te tama nai dabe sao.
EXO 25:6 Tama te lam sole udulabo oliv ni du wel me, te wel dali begelabo pauda me, te eno nai dabe dąį ilabo nai, tama te pauda wiegi yai denami elalubo te hano dali yabo nai me sao.
EXO 25:7 Tama haniani bomai masigi, te mone hauwago abelabo masigi tiwai, te pris dabe tobolu bidi aga ugwade belabo ugwa, me te aga bobobage gudubo ugwade te hagawia badu muabo, te sao.
EXO 25:8 Tama te we bidi augwalibolo te po olama, tama te ofa mani naigo augwaligo te eno ugwa be me deli sęnama, te wiegi yai tedali bede ena augwali dali tomode bidaibao.
EXO 25:9 Tama dagego te ugwa be me, te be tomode munalubo nai tigidali me, te dolo bugagia nigimainogo eyu, tama eno te piksa noma nagebolo hasia ola mawaibao.”
EXO 25:10 “Tama dagego halobage me deli te akas ni namego nigao, tama te halobage bobobage nigabo usu ni te 110 sentamita, te genuai te 66 sentamita, tama ugwadu usu ni te 66 sentamita, te tama tiwai nigao.
EXO 25:11 Tama dagego wiegi yai kapa gol te augwaligo siade ulama, pobele bage sela sąwai selama, tama golgo te halobage bulu badu me, tomode me haluama, tama bobobage gol dage me deli te halobage sesegede bagulama kęąo.
EXO 25:12 Tama te halobage tolabo ring me si me si te golgo nigilama, tama te dwasianu halobage dolalubo sągąde kęąo. Tama me si me sągą side kęyu, me si me sągą side kęyu yao.
EXO 25:13 Tama dagego te ni akas pedai si dulama, te halobage tolabo te ni pedai si te golgo haluao.
EXO 25:14 Tama te ni pedai si te ring tomoba te me badu muyu, me badu muyu elama, te halobage tolasa pomainogo eyu, tama tiao.
EXO 25:15 Tama te ni dage si sesemane sogo te ringde elalumainao. Tama dagego te gudulamo dao.
EXO 25:16 Tama nosali eno nage te bomo yai po elalubo masigi sawali si mawaibao, tama nago te masigi si te halobage tomoba muao,” wali.
EXO 25:17 “Tama dagego te halobage po paliabo nai te wiegi yai kapa golgo nigao, te bobobage nigabo usu ni te 110 sentamita, tama te genuai usu ni te 66 sentamita dao. Te halobage da, te we bidigo dwai sęgę sali sela sąbo digi dao.
EXO 25:18 Tama dagego te gol meba selama, tama te hamago elama, tama te ensel mobo bidi noma si te golgo nigao.
EXO 25:19 Tama me deli te halobage dolo nogo badu te halobage po paliabo nai elalubo digi te dolalumainogo eyu, tama me deli te pobase nogo badu dolalumainogo muao. Dagego te gol dage me deli selama, te halobage paliabo nai nigilama, tama aga te mobo bidi si me nigao. Tiali goli, dagego te nai sela nigilamuo, menio. Tigidali nigibo nai te deli nai tiwai naga nigao.
EXO 25:20 Tama te mobo bidi si te we bidi dabego dwai sę yali sęgę sela sąbo digi dolaluyu, tama mego gesabidigo me gesabidiba tiwai tonaluyu, tama augwali sigo aba te halobageba me tonalumainao. Tama augwali sigo bogo dinigina pai elaluyu, tama te halobage te tama dualumainao.
EXO 25:21 Tama nagebolo eno te bomo yai po elalubo masigi sawali si menama, tama nago te masigi si te halobage tomoba munama, tama te halobage po paliao.
EXO 25:22 Tama ena nage dali te dwai sęgę sela sąbo buluba sisinaibao. Tama ena te mobo bidi si daidu tomode ugwadu bidiyu, tama nage dali da si deliba sisinama, tama eno te bomo yai po tigidali nagebolo pusaibao. Tama nago te bomo yai po te Israel we bidi dabe augwalibolo menama, tama augwaligo wali pomainao,” wali.
EXO 25:23 “Tama dagego te ni akasgo te tebol sai me deli nigao, te bobobage usu ni te 88 sentamita, te genuai usu ni te 44 sentamita, tama te ugwadu daidu te usu ni 66 sentamita dao.
EXO 25:24 Tama te tebol sai te wiegi yai golgo haluama, tama bobobage golgo te tebol sesege badu bagulama, dąų wao.
EXO 25:25 Tama dagego te gol genuai ilibo te 8 sentamita ilama, tama dwasianu gol dagego te tebol sesege badu tigidali te obo bogegelao.
EXO 25:26 Tama dagego te tebol tolabo nai ring me si me si te golgo nigilama, tama te tebol sągą me si me si te badu kęąo.
EXO 25:27 Tama te ring dabe te tebol pąde ugwadu daide munaluaibao.
EXO 25:28 Tama dagego te ni akas si te tebol tolabo ni dulama, tama te ni si te golgo haluao.
EXO 25:29 Tama te wain ofa yabo genuai pou dabe, me te dwasianu pou dabe, me kap, me te botol me nigao. Dagego te nai dabe te wiegi yai golgo naga nigao.
EXO 25:30 Tama sesemane sogo dagego enabolo maiabo bret te tebolba naga munama, tama eno gedude munaluaibao,” wali.
EXO 25:31 “Dagego te lam sole dabe muabo nai me deli te wiegi yai golgo nigao. Tama te gol hamago elama, te lam dabe tolalubo nai dolaluabo pesage nigilama, tama dono nigilama, te lam nogo dabe muabo digi nigao. Tama te golgo naga aga au yabo ni duduli noma meba nigao. Tama te tigidali nigibo te deli tigi tiwai naga nigao.
EXO 25:32 Te lam donogo nogo te a naga olama nogo me badu deli elalubo, te me sela te me badu muyu, te me sela te me badu muyu yao.
EXO 25:33 Tama tigidali nogo deli delide usu nama, te ni duduli noma sela elaluyu, te ni amongo nigai tonobo tiwai yaibao.
EXO 25:34 Tama te lam dono aga digi me te tiwai yao. Tama te ni duduli noma me si me si te amon ni aga duduli tiwai dao.
EXO 25:35 Tama te ni duduli yabe dwasianu dabe te lam dono nogo si si dologode naga nigao.
EXO 25:36 Te dagego hama selama, te gol haluama, tama te nai dabe tigidali te deli nai tiwai naga nigao.
EXO 25:37 Tama dagego te lam a naga olama me badu nogo si nigilama, tama augwali te lam tolalubo naiba muao. Tama augwali te bugagia wasilama, augwaligo ula te ugwa be tomoba pomainao.
EXO 25:38 Tama te lamde mubo hobi dodolobo nai me, te pou me, te nai dabe te wiegi yai golgo naga nigao.
EXO 25:39 Dagego te wiegi yai genuai sęgę elalubo te 35 kilogram golgo te lam tolalubo nai te nai dabe nigao.
EXO 25:40 Dagego te nai nigibo sogo, dagego dua bugagia te piksa noma eno nagebolo e bulu dude ola mani, te dolo wali pelama, te nai dabe nigao,” Genuai Bidigo te po Mosesbolo wai.
EXO 26:1 Genuai Bidigo po me ma weyu, Mosesbolo te po wai, “Dagego enabolo lotu po waiabo ugwa be te nogo si wiegi yai name ugwa te sisi yai, me te mama yai, te augwaligo hobigo au ilai ugwago nigao. Tama hobi selama, te ensel mobo bidi piksa noma dabe te name ugwade hobolama nigao. Te name ugwa te hobigo wiegi yai au ebo sę mu koneai bidi, agai te tobage au ebo sę emainao.
EXO 26:2 Tama tigidali te name ugwa te dedeli au yai tiwai naga nogo si nigao. Te ugwa dabe bobobage te 12 mita, tama te genuai usu sabo te 2 mita dao.
EXO 26:3 Tama a naga name ugwa dali bogo badu hobolama, tama te genuai moni bage kilasa pelama, tama gasa name ugwa te tiwai a naga hobolao.
EXO 26:4 Tama te genuai name ugwa side wadolabo sisi ugwade te ring meba nigao. Tama te ring dabe te genuai ugwa si sesegede kękę pao.
EXO 26:5 Tama hasia te name ugwade te ring bidi sese si olama nogo si te sesegede bebe peyu, te gasa bidi sese si olama nogo si me te si wali name ugwa sesegede kęąo.
EXO 26:6 Tama dagego te bidi sese si olama nogo si huk te genuai ugwa si dali tama te deli ugwa tiwai naga pedelemainogo, bebe pabo te golgo nigao.”
EXO 26:7 “Tama nosali dagego te genuai name ugwa deli te eno ugwa be haluabo nigao. Tama te name ugwa dage te nogo si olama sągągo deli augwaligo te kibu meme nisigo nigao.
EXO 26:8 Te tigidali badu te deli tigi tiwai naga nigao. Bobobage usu ni sabo te 13 mita tama, te genuai usu ni sabo te 2 mita dao.
EXO 26:9 Tama a naga me badu dali hobolama, te bobobage ugwa deli tiwai naga pedelama, tama me sela me sela badu dali hobolama, tama te bobobage ugwa tiwai deli pedelaibao. Tama te me sela me sela wali te ugwa sigo pedelama, te ugwa be sunumi badu haluabo, te tama walolomainao.
EXO 26:10 Tama te bidi sese si olama nogo si ring te hasia ugwa sesegede kęnama, me te bidi si olama nogo si ring te ugwa si wali ugwade kęąo.
EXO 26:11 Tama dagego te bidi sese si olama nogo si huk bras nigilama, tama te huk dabe te ringba munama, te genuai ugwa si dali si bebe pelama, te deli ugwa tiwai naga elaluaibao.
EXO 26:12 Tama te usu sabo nai 1 mita te genuai ugwa te olo munalubo digi dagego te eno ugwa be tudi badude halalumainogo sula tagalao.
EXO 26:13 Tama te bobobage halubo ugwago te ugwa be bogo badu side bobobage aiya elaluama, te 50 sentamita me badu elaluyu, te me badu elaluyu yaibao. Tama tebogo te ugwa be tigidali mu halua sabo usu yaibao.
EXO 26:14 Tama te meme nisigo nigai genuai name ugwa, te nai ugwadu muabo gasa haluabo nai me si ma nigao. Me deli te omai sipsip wali te augwaligo mama pengo pilai tego nigao. Tama me deli te tamu ąįde bidibo hasa nogi sikau, te dabego waligo te ugwadu haluabo te nigao.”
EXO 26:15 “Tama dagego te ugwa be daga dolaluabo ni name dabe te ni akasgo nigao.
EXO 26:16 Te tigidali ni name deli deligo usu sabo te 4 mita, tama te ni name genuai usu sabo te deli deli te 66 sentamita dao.
EXO 26:17 Tama dagego te ni name dabe dolaluama, tama pagede dulama, te pęwadage sągą si si dula dula pelama, tama dagego tigidali ni name te tiwai naga nigao.
EXO 26:18 Tama dagego te tobage ni name bidi sese deli usu nabo te lotu ugwa be me bogo badu dolalumainogo eyu nigao.
EXO 26:19 Tama dagego te kapa silva selama, tama te gelali ni page tiwai nai te bidi sese si te dedage elalubo te ni name sągą bulabo digi nigao. Te page nai si si te ni name deli deli dologode munaluyu, te tigidali daga ni name page dąų elalumainao.
EXO 26:20 Tama dagego te tiwai naga te be gasa bogo badu me tama tiao. Te bidi sese daga ni name nigiyu, te bidi sese si silva te ni name page dąų wabo nai dabe nigilama, te silva pedai si te ni name deli delide muao.
EXO 26:22 Tama te be daga ni name te me sela me sela te ugwa be tudi badu, te sia ge dega sigi pabo badu, teba mumainogo nigao.
EXO 26:23 Tama te badu kona side te ni name si si nigiyu, tama dabelim yao. Te tama nigao.
EXO 26:24 Tama te be dili habu badu te kona ni name si pagede wadolama, tama tigidali ugwaba wadodolo holao. Tama dagego te si dali si habu badu tama tiao.
EXO 26:25 Tama te tudi badu te daga ni name te a naga olama nogo me badu sela elaluaibao. Tama nogo si olama nogo a naga tama me badu deli te silva te ni name page dąų wabo nai si usu nama, te deli deli usu dao.”
EXO 26:26 “Tama dagego te ni akas selama, tama te ni name tuabo bobobage ni meba nigao. Tama te bobobage ni dabe te ugwa be daga dolalubo ni namede dąų omainogo eyu, tama te wiegi yai kapa golgo te genuai ring dabe nigiyu, munalubo kęąo. Tama te dolalubo ni name tigidali me, te bobobage ni name tuabo ni dabe me, te nigo nigali nai tigidali te golgo haluao. Tama elama, tama te bobobage ni a naga tego te be me bogo badu dolalubo ni name dabede te ring dabego dąų wao. Tama bobobage ni meba te ni name ugwadu muyu, meba te ni name aiya badu muyu yao. Tama meba me tomode muyu, tama te be tudi badu gagalama, tama asama, tama te be gesabi baduba sabolaibao. Tama te be u bogo badu me te bobage ni namego tama naga tiao. Tama te be tudi badu daga, te sia ge dega sigi pabo badu, tede me te bobage ni te dolalubo ni name dabego ringba bulama, tama dąų walao.”
EXO 26:30 “Tama nosali dagego te lotu wabo ugwa be nigibo nai dabe silama, tama te be dodolobadi, te eno nagebolo e bulu dude ola mani te piksa subo tiwai yao.”
EXO 26:31 “Tama dagego te ugwa be tomode walabo name ugwa gasa au wiegi yai genuai nigao. Tama te wiegi yai tedela yai hobi dabe siyu, te sipsip nisigo nigai sisi yai hobi dabe me siyu, tama te sipsip nisigo nigai mama yai hobi dabe me siyu yao, tama tego te wiegi yai name ugwa me deli nigao. Tama dagego gasa haniani wiegi yai hobi dabego te ensel mobo bidi noma bugagia mu te ugwade hobolao.
EXO 26:32 Tialima, te ni akas selama, te pos ni me si me si nigao. Tama te pos dabe te golgo haluama, tama te pos dabe te silvago nigai page me si me si tede bulao. Tama te gol huk meba nigilama, tama te ugwa dabe dąų elalumainogo te posde kękę piąo, tede walomainao.
EXO 26:33 Tialima, tama te ugwa te huk dabeba walama, te bomo yai po dąų wai po asęai masigi sawali si elalubo halobage, te nai te walobo name ugwa tudi badu muao. Tama te ugwago te lotu wabo be tomode dąį tiwai togolama, tama be habu si elaluaibao. Te sunumi pąde te polalubo be habu nogi wabo te Tedali Gasagi Yai Be Habu dao, te name ugwa dąį tudi badu te habu te Tedali Gasagi Yai Mu Be Habu dao.
EXO 26:34 Tama te bomo yai dąų wali po elalubo masigi sawali si elalubo halobage, aga te Tedali Gasagi Yai Mu Be Habu te be habu badu te halobage munama, tama te halobage po paliabo nai te halobageba muao, te dwai kolesaga yali sęgę sela sąbo madigi dao.
EXO 26:35 Tama tebol sai te gasa be habude muao, te nogi Tedali Gasagi Yai Be Habu dao, te ugwa be daga pąde, te sia ge pedalubo sesege pobase nogo badu muao. Tama ula ebo sole te gasa badu te be daga pąde muao, te tebol sai dolo si muao.”
EXO 26:36 “Tama dagego te wiegi yai genuai au yai name ugwa te ugwa be tų bagulabo nigao. Tama te wiegi yai au yai hobolama, te e tiwai hobi, te sis hobi me, te mama yai hobi me, te augwaligo sipsip nisigo nigai dao.
EXO 26:37 Tama te ni akas selama, tama a naga pos nigilama, te golgo haluao. Tama te pos dabede te huk gol kęnama, te ugwa walabode dao. Tama te page nai a naga te kapa brasgo nigao, dedage elalubo te pos dabe bulabo digi dao,” wali.
EXO 27:1 Tama Genuai Bidigo po ma naga weyu, te po wai, “Dagego te ni akas selama, te alta sai nigao, te moni halobage tiwai pąde dao. Te tigidali bogo sesege badu te deli tigi gagawai naga nigilao, te usu ni 2 mita 30 sentamita, tama te daide ugwadu usu sabo me ma te usu ni 1 mita 30 sentamita, tama usu nama nigao.
EXO 27:2 Tama te kibu bulmakau gąų tiwai nai me si me si te ni akasgo nigilama, tama deli deli dage badu dąų walama, tama te alta tigidali te brasgo mesegelao, te aga deli tigi naga elaluaibao.
EXO 27:3 Tama bras selama, te sia keli sabo pou me, te dwasianu savol me, pou me, te ofa hasa mi dodolobo age yai ną me, tama te sia dage sela pabo plet nigibadi yao.
EXO 27:4 Tama dagego te moni bras sawali selama, tama polola polola pelama, tama te tama pololai bras sawali te alta halobage tomoba muao. Magi baso meni, aga ugwadu daide augwaligo te sia nogelama, tama te ofa mabo nai te siago udubadi, tama te keli aiyaba tuloluaibao. Tama bagua si nai deli deli te bras sawali nai habu badu munama, tolabo madi muabo nai te brasgo nigao.
EXO 27:5 Tama te alta halobage tomode te tigidali habu badude te aiya badudu usu siyu, ugwaba asiyu, tama tomode mu te dwasianu sai nigiyu, tede dąų wao. Tama te moni pololai bras sawali, aga te dwasianu sai dabe ugwadu daide munaluaibao, te alta halobage tomode.
EXO 27:6 Tama dagego te ni akas dage si selama, tama dulama, tama te dono si brasgo haluao.
EXO 27:7 Tama dagego te alta tolasa painogo ebo sogo, te baguali dedageba te ni dono si munama, tama tolao.
EXO 27:8 Dagego ni name selama, te alta te halobage tiwai nigao, tiali goli dagego te ni name te halobage habu pagede musiąma, te dedage elalumainogo yao. Dagego te eno nagebolo te bulu dude ola mani piksa te tiwai nigao,” tama po wali.
EXO 27:9 “Dagego te genuai gasagi yai ugwa obo ebogo te lotu ugwa be mesalo bagulao. Bobage nigibo usu sabo te 44 mita, te wiegi yai bobage ugwago obo tiwai bagulubo te me badu bogo badu nigilao.
EXO 27:10 Tama te wiegi yai bobage obo ugwa walomainogo eyu, tama te kapa bras selama, tama pos te bidi sese deli nigao. Te pos dabe bulabo page dabe me te brasgo nigao. Tama te wiegi yai kapa silva selama, tama bobage dono dabe nigiyu, tama huk dabe hauwa nigiyu yao. Tama te pos dabe si si dolaluyu, tama pos me si tomode ugwadu te dono me deli dąų wao. Tama te donode te huk meba munama, tama te ugwa obo te huk dabede tama walao.
EXO 27:11 Tama hasia te nigali tiwai naga, te me badu bogo badu obo bagulubo te tiwai nigao.”
EXO 27:12 “Tama te sia ge dega sabo badu obo, te ugwa me deli te bobage usu sabo te 22 mita te usu nama nigao. Tama pos nogo si badi, te pos page dąų walabo bras nai, te me nogo si te pos dodolabo madi dedage elalumainogo nigilao.
EXO 27:13 Tama te sia ge pedalubo badu obo te tų elalubo madi, te usu sabo me te 22 mita dao.
EXO 27:14 Te bobage ugwa walabo madi, te aga bobage usu nama, te 6 mita 90 sentamita, te tų si dali si badu dao. Te ugwa deli delide te pos sela te bras page dolalubo madi wawalo pao.
EXO 27:16 Te tų dolo gasa wiegi yai name ugwa walao, te aga te 9 mita usu dao. Tama aga haniani te sipsip kibu nisigo nigai, husugu hobigo, me mama yai hobigo au ilama, hobolao. Tama dagego te pos me si me si te brasgo nigali pagede dodolama, tama te posde te bobage wiegi yai ugwa wawalo pao.
EXO 27:17 Tama dagego te obo pos si si te ba silva dabego tigidali dąų walao. Tama te bisigi gąų dabe te silvago nigilama, tama te pos dabe te ba silva kęnao. Tama bras selama, te pos dabe dodolabo madi nigao.
EXO 27:18 Tama te obogo bobage usu nama, te 44 mita, te aga genuai usu ni te 22 mita, tama te ugwadu usu sabo te si 2 mita me 20 sentamita dao. Tama dagego wiegi yai tedela yai ugwa te obo bagulabo selama, nigao. Tama dagego te bras selama, te obo pos dabe dodolabo madi nigilao.
EXO 27:19 Dagego te bras naga selama, te ugwa bede sę yabo tigidali nai te brasgo nigao. Te ugwa be dali, aga mesalo obo dali si tuloluidali weyu, te bono dabe te augwali side gebelama, tama bobobage nil dabe tǫba enama, tama te bono dabe te nil dabeba gebelao. Tama dagego te bobobage nil dabe te brasgo naga nigao.” Genuai Bidigo te po wai.
EXO 27:20 “Nago te Israel we bidi augwalibolo te po olama, augwaligo te wiegi yai oliv ni dude sabo wel te lamde muabo sela asa wao, tama te lamgo ula te tigidali sogo elaluaibao.
EXO 27:21 Tama Aron aga ogomani dali, augwaligo te lam sole tolalubo nai eno ugwa be tomoba sela peyu, dodolomainao, te walali ugwa e badu me bogo badu, te bomo yai po elalubo halobage te ugwa tudi badu munalubao. Te ugwa bede ena te we bidi dali sisinabo be dao. Tama tigidali sogo Aron aga hani bagego wel te lamde munama, tama te lam ula ena bidibo madi ula elaluaibao, tama pio gagalama, kigamuba usu nigi paibao. Dage Israel dabe dali, dagego te nosali pedalobo wai dabe dali, augwaligo te eno te lamde wali bomo yai po sesemane sogo tolalua peyu, bidada paibao.”
EXO 28:1 Genuai Bidigo po ma wadolama weyu, e tiwai po wai, “Moses, nosali nage ma peyu, nago naga ama Aron aga ogwa dabe dali augwali i wao, Nadap, me Abihu, me Eleasar, me Itamar, augwali asomainao. Tama nago augwali te Israel bage tomode selama, tama augwali eno pris bidi pedalomainogo yao.
EXO 28:2 Tama Aron prisgo gudabo ugwa wiegi yai tedali nigibadi, tama aga au ilama, tama gasagi yai pedelama, tama aga nogi te Israel we bidi gedude elalumainao.
EXO 28:3 Tama eno homu kolesaga menama, te ugwa me gasa haniani nai nigao wali, te bidi augwali i olama, tama augwalibolo po olama, tama augwaligo te Aron pris pedalobo sogo muabo ugwa nigimainao. Tama agai enade pris sę yaibao.
EXO 28:4 Tama augwalibolo olama, te Arongo hagawiade muabo dwasianu ugwa dage deli au ilama, hobolao po wao. Tama augwaligo au yai ugwa me deli hobolobadi, me bobage ugwa deli badi, me te au ilai holobo ugwa, me tobolude bagulabo ugwa badi, me kukulu deli tama hobolao. Augwaligo te tedali gasagi yai ugwa dabe te Aron pris dali, te aga ogwa dabe, augwaligo me te ena tiwai pris sę emainogo yabo ugwa dabe nigao.
EXO 28:5 Te sę bidi dabe augwaligo te husugu hobi, me mama yai hobi, augwaligo te kibu sipsip nisigo nigai, tama gol hobi me, tama wiegi yai name ugwago te ugwa dabe nigimainogo yao.”
EXO 28:6 “Tama augwaligo te husugu hobi, me mama hobi te augwaligo sipsip nisigo nigali, me te gol hobi selama, tama wiegi yai ugwago hobolama, bugagia au ilao. Te tobage sę ebo mu koneai bidigo naga te sę yao.
EXO 28:7 Tama augwaligo te ugwa daide ugwadu te ugwa dąų olaluabo kukulu si hobolao, tama kukulu te nagiba bolama, tama te tudiba abebolabo usu nama hobolao.
EXO 28:8 Tama augwaligo te sisi hobi, me mama hobi selama, augwaligo te sipsip nisigo nigai, tama wiegi yai ugwa dage sobadi elama, te mǫ tiwai kukulu nigao. Tama augwaligo te kukulu te ugwa sesegede kęnama, tama te ugwa dage aga tiwai elaluaibao.
EXO 28:9 Tama augwaligo nogi ebo wiegi yai masigi konilian si selama, te Jekopgo ogwa dabe nogo si olama sągągo si nogi mumainogo yao.
EXO 28:10 Tama gomunai ogwade hasia gagalama, tama te nogo si olama sągą si te sabi ogwaba te nogi mubo siminigi pao. Augwaligo te 6 nogi te me masigide mubadi, te 6 nogi te gasa masigi mede mubadi yao.
EXO 28:11 Nago te masigide asębo po togobo koneai bidi me delibolo te sę menama, tama agai Jekopgo ogwa dabe nogi te masigi side asęmainao. Tama dagego te gol selama, te masigi si dąų olama tolaluabo au ilabo dwasianu nai si nigao.
EXO 28:12 Tama te masigi si te nagide bolai elalubo kukulu siba kęnama, tama te Israel hani augwali dąį yai tiwai elaluaibao. Tama Arongo augwali nogi te aga nagide tolasa bilibaso, tama Genuai Bidi eno sulama, tama eno bidi hani te eno homugo augwali sesemane sogo kone palaibao.
EXO 28:13 Augwaligo te au yai nai dwasianu si te golgo nigibadi, tama te haliga si me golgo nigao. Augwaligo gol te dwasianu waia tiwai nigilama, tama te haliga nigibo kolesaga tiwaigo nigilama, tama te haliga si te au ilali golba kęnao.”
EXO 28:15 “Dagego te het prisgo hagawiade muabo dwasianu ugwa me deli nigao. Te nai da, te Godigo homu kolesaga koneainogo tiaibao. Tama dagego te tiwai nai naga augwaligo te het prisgo dwasianu ugwa dagede au ilali tiwai selama, nigao.
EXO 28:16 Tama dagego te dwasianu ugwa bobage ilibo usu sabo te 44 sentamita, tama aga genuai usu sabo te 22 sentamita dao. Tama bugagia tomode pobelama, te genuai agebele tiwai pobelama, tama tigidali badu me te tiwai dąį naga elaluaibao.
EXO 28:17 Tama dagego te me si me si nama hani bomai wiegi yai masigi te ugwade wasilama, kęnao. Tama hasia polalubo hani masigi augwaligo nogi wabo te rubi, me topas, me ganet, tama kęnao. Tama te hani side te masigi emeral, me sapaia, me daimon, te tama kęnao. Tama te kęnabo hani sela masigi tekois, me aget, me ametis dao. Tama te kęnabo masigi hani me si me si te beril, me konilian, me jaspa dao. Tama dagego tigidali deli deli masigide te golgo au tiwai dwasianu ilama, tama nosali te masigi dabe ugwago kęnao.
EXO 28:21 Tama te nogo si olama sągągo si wali te tigidali masigi deli delide dagego te Jekopgo ogwa nogi deli deli te duga Israel hani tigidali dąį ela siyu, nogi asęsę pao.”
EXO 28:22 “Tama dagego wiegi yai gol selama, tama haliga si te hagawiade ugwa tolaluabo haliga si nigao.
EXO 28:23 Tama te ring gol si nigilama, tama te habu si badu te hagawiade muani ugwa daide ugwadu muao,
EXO 28:24 tama te haliga si te ring side kęnao.
EXO 28:25 Tama dagego gasa te haliga gol si sesegede kęnama, te au ilali gol side tama gol au ilali te kukulugo te het prisgo ugwa tolalumainogo kęnao.
EXO 28:26 Tialima, tama dagego te ring gol me si ma nigilama, tama aiyadu habadu te ugwa elalubo madi hagawia badu te ugwa tudi pąbadu kęnao.
EXO 28:27 Tama dagego te ring gol me si ma nigilama, tama te si te kukulugo te ugwa tolalubo madi kęnao, te gasa wiegi yai kukulu te tabi mǫgo bagulali madi pąde, te nai kęnao.
EXO 28:28 Tama sisi yai string hobi selama, te hagawiade elalubo genuai ugwade ring kęnama, tama tiyu da, te hagawiade elalubo ugwa te mǫ tiwai kukulude dąų ola somainogo elama, tama te hagawiade muani ugwa te munu me peda pogobeo.”
EXO 28:29 “Tama Aron te Tedali Gasagi Yai Be Habuba pabo sogo, agai te Israel hani tigidali nogi elalubo te dwasianu ugwa te aga hagawiade munama, sela pomainao. Tama ena Genuai Bidi, eno te ena hani bidi dabe augwali sulama, tama eno augwali sesemane sogo homugo kone palaibao.
EXO 28:30 Tama te masigi si te Godigo homu kolesaga somainogo te hagawia badu muani ugwa agebele tomode munama, tama Aron te Tedali Gasagi Yai Be Habu tomoba pabo sogo, ena Genuai Bidi ena agade bidibao, aga te masigi si dali tolasa pomainogo yaibao. Sesemane sogo agai te hagawiade te muani ugwa sela asomainao, te agai eno Genuai Bidigo magi sę te Israel dabe dali yainogo ebo te agai konemai hagede yaibao,” wali.
EXO 28:31 “Te bobage ugwa te name ugwa dali kęnama, te dagego sisi hobi augwaligo te sipsip nisigo nigai naga selama, te ugwa nigao.
EXO 28:32 Dagego te tobolu muabo madi dedage nigilama, tama dwasianu ugwa dage me deligo te dedage bagulama, tama te sesegede te dedage bomo yai pedelama, tama dedage genuai peda pabuo.
EXO 28:33 Tama sisi hobi, me haniani mama yai hobi te augwaligo sipsip nisigo nigai, tama nai mebago te ni pomigranet wai tiwai nigao. Te ni wai du dabe te prisgo ugwa sese aiyadu hobolama, tama golgo nigai belo deli deli te ni pomigranet du dabe tomo tomode hobolama walalumainogo yao.
EXO 28:35 Tama Arongo te bobage ugwa munama, te pris sę emainao. Tama aga ena te bidibo pąba te Tedali Gasagi Yai Be Habuba aselama, tama te buluba ma teda pabo sogo, te we bidigo te belo gela wabo odomainao. Ma, agai te bobobage ugwa gudasiąbaso da, teda eno aga ela muidalio.”
EXO 28:36 “Tama dagego te wiegi yai gol me deli selama, te ula ilibo nai medal me deli nigilama, tama e tiwai po te naide asęao, ‘Te Genuai Bidigo Tedali Gasagi Yai Nai da,’ te po asęao.
EXO 28:37 Tama sisi hobi selama, tama te gol nai tobolude muani ugwade kęnama, tama te het prisgo gesabidide ugwadu munalumainogo yao.
EXO 28:38 Sesemane sogo Arongo te medal tobolude elalubo ugwa muao. Tama tibaso da, ena Genuai Bidi eno te Israel dabego enabolo mabo ofa ebo nai te eno saibao. Ma, augwaligo te ofa ebo kolesaga mebago geda mubaso da, teda, Arongo te tebo augwaligo dwai sę sęgę tolomainogo yaibao.”
EXO 28:39 “Dagego wiegi yai hobi selama, te holobo ugwa hobolao. Tama Arongo tobolude muabo ugwa wiegi yai nigilama, tama ugwa dage selama, tama mǫ tiwai kukulu nigilama, tama tede wiegi yai au ilama hobolao.”
EXO 28:40 “Tama dagego te holobo ugwa dabe, me te kukulu te mǫ tiwai, tama te tobolude muabo ugwa me, te Arongo ogwa dabe tigi munama, tama wiegi yai au mu ilama, tama te we bidi augwaligo gedude te Arongo ogwa dabe te nogi elaluyu, tama gasagi yai pedalomainogo tama tiao.
EXO 28:41 Tama Moses, nago te ugwa dabe te naga ama Aron dali, aga ogomani dali, augwalibolo muao. Tama te ni oliv wel augwaliba gelama, te augwali pris dabe da olama, sa munama, tama te pris sę enabolo augwaligo emainao.”
EXO 28:42 “Tama augwaligo gudabo pęwadage ugwa belibo trausis te wiegi yai ugwago hobolama mao, te augwali tigi hale te bulu ulaba hania gagolama pedabuo.
EXO 28:43 Tama Aron aga ogomani dali augwaligo te tiwai belibo trausis munama, te augwali alta pąba te Tedali Gasagi Yai Be Habu tomoba pelama, te pris sę ebo sogo, ma gasa sogo te augwali eno ugwa be tomoba painogo te ugwa belibo trausis munama, asomainao. Ma, te tobage sę augwaligo me isąma, te augwali tigi olo eno bidibo madi asobaso da, teda augwali dwai sę yali homu eyu, te eno augwali ela muaibao. Sesemane bidada pabo sogo Aron me, aga wąį dabe nosali pedalobo bage, augwaligo te bomo yai po wali pao,” Genuai Bidigo te po wai.
EXO 29:1 Genuai Bidigo po ma weyu, te po wai, “Megi eno nagebolo nago te Aron dali, aga ogomani me, augwali te pris dabe pedalomainogo yabo sę po waibao. Te kibu bulmakau omai wai me deli badi, te sipsip omai si, te keni kenigo augwali tigi dolisiąwai dabe sao.
EXO 29:2 Tama te witgo plaua hasia polali mu, te sao. Nago te plauade te yis me mugio. Tama te plaua meba selama, te bret nigibadi, tama te plaua meba selama, tama te ni oliv wel dali taluama, te bret nigao. Tama plaua meba selama, tama te bisket meba nigibadi elama, tama augwalide te oliv wel pilao.
EXO 29:3 Tama te bret, me te bisket dabe te bonou wa me deliba munama, tama nago te bulmakau omai, me te sipsip omai si te ofa ilibo sogo te enabolo mao.
EXO 29:4 Tama Aron dali, aga ogomani augwali dali, te eno lotu ugwa beba odasa aselama, augwali wę paluao.
EXO 29:5 Nago augwali wę paluama silibo si, teda te pris ugwa dabe te Aronba muao. Holobo ugwa mubadi, tama bobage gudubo ugwa me muyu, tama dwasianu hagawiade mubo ugwa me te agabolo gudulama, tama te wiegi yai kukulugo agaba kęnao.
EXO 29:6 Tama ugwa te aga tobolude bagulama, tama te po elalubo medal gol te nai sao, te Genuai Bidigo nai dao, tama te tobolude muani ugwade kęnao.
EXO 29:7 Tama wel selama, te pris nigilali bidi dabe sa muabo wel, tama aga tobolude te wel gelama, aga te sęde sa muao.
EXO 29:8 Nago Aron sa muna silibo si, teda agai ogomani odasa aselama, tama augwaliba te hobolo ugwa muao,
EXO 29:9 tama augwali tabide te kukulu bagulama, tama augwali tobolude ugwa dage dabe kęnao. Nago tama tiwai sę te Aron aga ogomani dali augwali te pris dabe nigiliyu, tama tiao. Tama te bidi dabe augwali dali, te augwa wąį ogomani nosali pedalubo bage, augwali hanigo naga te pris sę sesemane sogo ela paibao,” wali.
EXO 29:10 “Tama Moses nago te ofa yabo bulmakau te Deliba Sisinabo lotu ugwa be tų pąba sela aselama, tama Aron dali, aga ogwa dabe dali, augwaligo nogo te bulmakau toboluba mumainao.
EXO 29:11 Tama eno gedude nago te bulmakau te ugwa be tų pąde elagameo.
EXO 29:12 Tama te bulmakau kaneme meba nago nogo danigo selama, tama te alta gąų dabeba muao. Tama te tigidali kaneme elalubadi te alta pagede gelao.
EXO 29:13 Tialima, nosali te tabide ili tigidali sobadi, te wiegi yai homu, me te dwasianu dini homu si te ili dali elalubadi selama, tama te tigidali altade ulama, te enabolo ofa ebo tiwai ilao.
EXO 29:14 Tiali goli, te bulmakau mi, me wali, me te di tabi tomode elalubo, te olo madi bulu badu siago domainogo ulao. Te bulmakau da, te augwaligo dwai sę yali sela sąbo ofa yaibao.”
EXO 29:15 “Tama nago te ofa yabo sipsip omai gomunai wai sao. Tama Aron dali, aga ogomani dali, augwaligo nogo te sipsip toboluba mumainao.
EXO 29:16 Tialima, te sipsip elama, tama te kaneme selama, te alta me si me si bogo badu sąyao.
EXO 29:17 Tama nago te sipsip todogo pelama, tama te sągą si wę telabadi, te haliga dabe me tilama, tama tigidali te sipsip tobolu daiba ugwadu manao.
EXO 29:18 Tama tigidali te altaba munama, te ofa tiwai yao. Tama ena Genuai Bidi eno homu pemene wiegi yai te ofa elama, siago dabo denami ebo te eno homu pemene wiegi yai yaibao.”
EXO 29:19 “Tama nago te si wali sipsip selama, tama Aron aga ogomani dali augwaligo nogo te sipsip tobolu daiba ugwadu mumainao,” Genuai Bidigo Mosesbolo te po wai.
EXO 29:20 “Tialima nago te sipsip kibu elama, tama aga te kaneme dwasianu selama, tama Aron aga ogomani dali augwaligo dolo olo sabi badu te kaneme muao, tama augwali te kaneme dolo a nogo danide mubadi, te dolo a sągą dani badu muyu yao. Tama te poude munalubo kaneme tigidali te alta me si me si bogo badu sąsą pao.
EXO 29:21 Nosali nago te altade munalubo kaneme meba, me te pris sa muabo wel sobadi elama, tama Aronba me agai gudali ugwaba segeni sąsąyu, tama aga ogomaniba me augwaligo gudali ugwaba segeni sąsąyu yao. Nago tama tiali da, teda Aron aga ogomani dali augwaligo gudali ugwa me, te tigidali augwali eno bage deli naga dao.”
EXO 29:22 “Tama nago te sipsip me togolama, tama te sipsip ili tigidali te pris bage augwali sa munama, tama ofa ilabo nai sao. Te nisali danu, me te haliga mesegelali delegabe ili, me te wiegi yai te sipsip kibu homu sobadi, te homu me si tede ili elalubo, tama dolo sągą badu te tele mi, te me sao.
EXO 29:23 Tama te tudi badu augwaligo enabolo te bo disiąwai yis meni yai bret ofa ilali nai, nago te deli deli haniani bret dabe sao, me deli augwaligo te oliv wel dali ulali, tama gasa augwaligo te oliv wel me te bisket dali me ulubeo.
EXO 29:24 Tialima, te kibu mi, me te bret te Aron aga ogomani dali augwalibolo menama, tama augwaligo te ofa ilibo sę eyu, te ena gedude augwaligo te nai dabe ugwaba sidu geyu yaibao.
EXO 29:25 Tama augwaligo nogode munalubo te nai selama, tama te alta daiba ugwadu munama, te ofa ebo dabo siago tigidali domainao. Tama ena Genuai Bidi, eno te ofa ebo denami wiegi yai ebo te eno godolo mu yaibao.
EXO 29:26 Tama nago te Aron te pris sęde sa mumainogo elali sipsip kibu aga bau te nago nogogo tulama, tama sela bilibo, te eno gedude tama tiao. Tama te kibu bau te naga tuagameo.”
EXO 29:27 “Tama dagego te pris sa muabo sogo pedalubode, dagego te kibu bau, me te sipsip sągą tele mi selama, nago te pris sa muyu, ofa iliyu, tama nogogo tulama, eno gedude sabilao. Tama nosali te mi te pris dabe augwalibolo mao.
EXO 29:28 Tigidali sogo Israel dabe augwaligo te kibu sipsip te ena dali deli homu pedelainu enabolo ofa mao, augwaligo te kibu bau, me te dolo sągą badu tele mi selama, tama te pris dabe augwalibolo mao. Te Israel dabe augwaligo te tiwai mabo ena Genuai Bidibolo momainao.”
EXO 29:29 “Te Aron isibo side da, teda augwaligo agai te pris sę yali ugwa dabe te aga ogomanibolo mao. Tama Aron aga hani bidi augwali te pris sę emainogo sa mubo sogo, te ugwa mumainogo yao.
EXO 29:30 Tama te Arongo ogwago te aga aya Arongo het pris sę yali tiwai selama bidainogo ebo sogo, agai te a naga olama nogo me badu si sogo usu nama, te ugwa mubo usu selama, te ugwa mumainao. Tama te a naga olama me si sogo aga eno te Deliba Sisinabo ugwa be obo tomoba pelama, tama te Tedali Gasagi Yai Be Habu tomoba peyu, te sę emainogo yao.”
EXO 29:31 “Tama nago te Aron aga ogomani dali augwali te pris sę emainogo sa mubo sogo, nago te ofa ilali te sipsip mi selama, tama senede munama, tama te ugwa be obo bagulali tomode ulao.
EXO 29:32 Tama pris dabe augwaligo te mi dali, te bret me te basket wade munalubadi selama, tama eno Deliba Sisinabo Ugwa Be tųde dulaluyu, tuao.
EXO 29:33 Augwaligo augwa dwai sę yali sela sąyu ofa ilali nai te augwa ma tumainogo yao, te augwali te pris bidi dabe da olama, sa mubo sogo te tiwai yao. Te pris dabe augwaligo naga te nai tuyu, tama te we bidi augwaligo te nai me tugobeo. Menio. Te augwalide habu mu selao, te tedali mu gasagi yai nai naga dao.
EXO 29:34 Tama te kibu mi me bret meba munalubadi te kigamuba sabalobaso da, teda te nai augwaligo me tugio. Te kibu mu habu selao, te tedali gasagi yai mu dao, tama augwaligo te siaba ulama, tama siago tigidali dela silimainao.”
EXO 29:35 “Nago te Aron aga ogomani dali augwali te pris sa mubo sę iliyu, tama eno nagebolo wali po gilama te a naga me te si sogo te sę dolo yao.
EXO 29:36 Tama tigidali sogo nago te bulmakau me deli selama, te dwai sę yali sęgę sela sąyu, ofa ilao. Tama te ofa ebogo te eno alta te wiegi yai eno gedude ilao. Tama te ni oliv wel te eno altaba sa muyu gelao, te eno nai naga dao.
EXO 29:37 Nago te altaba te tiwai sę ilibo te 7 tama sogo te sę yao. Tama te alta te eno nai mu da weyu, te eno habu mu selaibao. Tama bidi me deligo nogogo me dįayu, ma magi nai me deligo te alta sai ugwadu daiba muyu da, te nai da, te tedali gasagi yai nai naga dao, te eno nai naga dao.”
EXO 29:38 “Tigidali sogo dagego te kibu sipsip wai si te kibu be deli yai elalubadi, tama te altaba munama, ofa yao.
EXO 29:39 Tama sipsip me deli te kigamu ofa eyu, tama gasa sipsip me te pio mu ofa yao.
EXO 29:40 Tama te sęgę deli yai plaua te witgo nigai dali, te sęgę deli yai oliv wel dali begelama, te hasia sipsip me deli dali ofa ilao. Tama me, dagego te sęgę deli yai wain ąį dali te ofa tiwai elama, te gelao.
EXO 29:41 Tama dagego te gasa sipsip me deli te pio ofa yao. Te deli tigi poai plaua me, te oliv wel me, te wain ąį me selama, tama te kigamu yali ofa tiwai gilama yao. Te tubo naigo ofa ebo dagego te nai ena Genuai Bidibolo mobao, tama te siago deyu, tama wiegi yai denami ebo te eno godolo ebo dao.
EXO 29:42 Te siago tigidali domainogo ulubo ofa te dagego sesemane sogo te ofa nosali yao, te eno Deliba Sisinabo Ugwa Be tų pąde tigidali sogo te ofa ebo, te eno sueibao.
EXO 29:43 Tama eno genuai ula te ugwa beba pedaliyu, tama te badu digi te eno bulu elaluyu, tama tedali gasagi yai bulu tama nigilaibao. Tede me ena te Israel we bidi dali deliba sisinaibao.”
EXO 29:44 “Tama tibaso, te Deliba Sisinabo Ugwa Bede alta si da, te eno nai da weyu, te eno sa muaibao. Tama eno te Aron aga ogomani dali augwali sa munama, augwali te pris sę tiwai emainogo yaibao.
EXO 29:45 Tama ena dage Israel dabe tomode bidiyu, tama ena dagego God bidaibao.
EXO 29:46 Tama dagego ena bugagia koneama, ena Genuai Bidi da weyu, ena duga God dao, tama eno naga dage te Isip tǫde selama, tama eba odasa asai. Tama tiyu, ena dage tomode bidaibao. Ena digi, ena God, dagego Genuai Bidi dao,” te po wai.
EXO 30:1 Tama Godigo po ma weyu, te po wai, “Dagego te ni akas selama, tama alta me deli nigilama, te denami ilabo nai pauda ulubo alta tama nigao.
EXO 30:2 Te alta bobage usu sabo te 45 sentamita, tama aga genuai te tiwai te 45 sentamita, tama te ugwadu usu sabo te 90 sentamita dao. Tama dagego te bulmakau gąų tiwai me si me si te alta dononama, ugwadu muabo te nai dulao.
EXO 30:3 Tama te me si me si habu badu mesegelama, tama ugwadu me, tama aga gąųde me, te wiegi yai golgo haluyu, tama bobage golgo te alta bobegelama, obo tiwai nigiyu, kęnao.
EXO 30:4 Tama te ni munama, te alta tolabo madi te alta me badu gaga nigiyu, me badu te gaga nigibadi yao. Tama te gaga nigali nai si te aiyadu te alta bobegelali gol pąde dagego te sesegede kęnao.
EXO 30:5 Tama te ni akas dage si selama, te alta tolabo nai dulama, tama te nai si te golgo mesegelao.
EXO 30:6 Tialima, te ugwa be tomode te genuai walobo ugwa dąį te bomo yai po dualali halobage, te dąį ugwa e badu te alta muao, te dwai sę ebo sęgę sela sąbo madi ugwadu pąde, te halobage munalubo digio. Tama te sęgę sela sąbo madi te eno dage sisinaibao.”
EXO 30:7 “Te tigidali sogo kigamu Aron aselama, te lam sole sisi yagasaibao, tama te tiagasobo sogo agai te pusu wiegi yai ebo pauda meba te altaba denami elainogo ulao.
EXO 30:8 Tama agai te tiwai naga te pio te lam sole domonagasu asobo sogo tiao. Dagego te ofa ena Genuai Bidibolo tigidali sogo nosali me te tiwai ofa elalua pao.
EXO 30:9 Dagego te gasagi yai nai dabe te altade ofa igio. Te haniani denami ilibo pauda me te eno dagebolo habu selali nai, te kibu, me wit, me wain ąį, te tama nai me e altade ofa igimio.
EXO 30:10 Tigidali kibu bede deli sogo Arongo te alta wiegi yai ilibo te sę eno gedude yao. Te tiwai sę yainogo da, dagego te sęgę sela sąyu te ofa ilali kaneme me badu sobadi, tama te nigilali alta gąų dabeba muao. Dagego te tebo sę te tigidali kibu bede yao. Tama tiyu, te alta te habu mu seliyu, tedali gasagi yai elaluaibao. Te Genuai Bidi eno nai naga da waibao.”
EXO 30:11 Nosali Genuai Bidigo po Mosesbolo weyu, te po wai,
EXO 30:12 “Nago te Israel bidi nogi selama, tama te bukude asębo sogo, tigidali bidi deli deligo mone meba enabolo mao. Ma, meni baso da, teda genuai gasi dwai mu pedelama, te sogo augwali dolaibao.
EXO 30:13 Tigidali bidi dabe augwali nogi sali bage, augwaligo te mone ge a naga te enabolo te ofa tiwai mao.
EXO 30:14 Augwaligo te tigidali bidigo kibu be te 20de gagalama, te kibu be ugwaba holali bidi dabe nogi selama, tama tigidaligo te mone enabolo mao.
EXO 30:15 Te mone bidigo te agai mone hauwa me menamuo, te magi nai meni yai bidigo te dwasianu mone me mayu me igio. Tigidaligo te mone ge a naga, te tama naga enabolo mao, te tama tiyu augwa yali sęgę abeleyu da, teda augwali me isigobeo.
EXO 30:16 Te monego da, te eno lotu ugwa bede elalubo nai te dobaso da, te nai te monego gasa abelama, dodolabo mone dao. Te augwa bidibo ula abelabo mone eno te mone sulama, tama eno homu augwaliba muyu, tama augwali tonaluaibao.”
EXO 30:17 Tama Genuai Bidigo Mosesbolo te po wai,
EXO 30:18 “Dagego te bras meba selama, tama te genuai pou me deli nigibadi, te pou muabo page me nigao. Tama te altade te ugwa be si tomode te tǫba te pou munama, tama te poude te wę pągąnao.
EXO 30:19 Tama Aron aga ogomani dali augwali nogo sągą te węde telamainogo yao.
EXO 30:20 Te augwali eno ugwa be tomoba painogo, me ma te altade te siago ulubo ofa dabe me yabo homu eyu da, teda augwaligo nogo sągą bolo hasia ąįgo tedelama, tama eno beba asobaso da, teda augwali me isigobeo.
EXO 30:21 Mu tama, augwali isidali weyu, augwa nogo sągą ąįgo tedelao. Augwali dali, augwa nosali ame nabo wai dabe dali, augwaligo te bomai po sesemane sogo wali peyu, bidimainao,” wali. Te pris dabe sa mubo wel po wali
EXO 30:22 Tama Genuai Bidigo po Mosesbolo ma weyu, te po wai,
EXO 30:23 “Megi nago te wiegi wiegi yai denami ebo nai dabe sao. Hasia bolo te denami ebo nai sanda mea sao, te nai sęgę te 6 kilo te elalubao. Tama te sinamon pauda meba te wiegi yai denami elalubo, te aga te 3 kilo, tama te tobage wiegi yai denami ebo awi dili badi, te aga sęgę me te 3 kilo dao.
EXO 30:24 Tama te ni kasia waligo nigai pauda meba sao, te aga sęgę 6 kilo dao. Tama te oliv wel sęgę 4 lita elalubo te nai dabeba gelama,
EXO 30:25 tama te sanda nigibo sę mu koneai bidigo ebo sę tiwai eyu, te nai dabe bugagia taluama, te sanda tiwai pedelemainao. Te nai dabe da, te eno nai sa muabo nai elaluaibao.”
EXO 30:26 “Tama nago te wel dwasianu selama, tama eno dage dali Deliba Sisinabo Ugwa Beba dwasianu geliyu, te bomai po munalubo halobageba gelibadi,
EXO 30:27 tama te bret muabo tebol, me te tebolde munalubo nai dabeba me gelao, tama te lam dabe tolalubo nai, me aga nai dabeba badi, tama te denami ilibo altaba me gelao,
EXO 30:28 tama te tigidali siaba uluyu ofa ebo alta me, te aga nai dabeba dali, te wę paubo pou me, te aga pageba me, te tiwai naga yao.
EXO 30:29 Nago te nai dabe te eno tedali gasagi yai nai dabe mu da olama, tama te we bidi augwalibolo habu mu selao. Ma, bidi me deligo, me ma wego, me ma magi nai dabego te naiba dįya idali weyu, te me habu seliyu, gasagi yai tedali pedelama, tama te eno nai naga dao.”
EXO 30:30 “Tialima, nosali te wel selama, tama dwasianu te Aronba, me te aga ogomani, augwaliba gelama, tama augwali pris pedelama, tama eno sę emainogo sa muao.
EXO 30:31 Tama nago te Israel we bidi augwalibolo e tiwai po wao, ‘Dage dali, te duga hani nosali nosali pedalubo bage, dagego te wel selama, tama te dago Genuai Bidigo nai naga da olama, sa muao.
EXO 30:32 Dagego te wel te olo bidi dabeba geligimio. Tama dagego te deli tigi poai wel nigigio. Te Godigo tedali gasagi yai nai naga da weyu, tama dagebolo habu selibao.
EXO 30:33 Ma, te bidi me deligo te deli tigi poai wel nigilama, te pris meni yai olo bidi mebabolo te wel gelibaso da, teda te bidi aga te Godigo we bidi hani bidibo tomode me bidigobeo,’ te po pusao,” wali.
EXO 30:34 Tialima, Genuai Bidigo Mosesbolo po ma weyu, te po wai, “Megi eno homugo dagego te wiegi yai denami yabo pauda meba nigiyąo. Te pauda te deli tigi poai dabe naga usu nama, elalumainao. Te pauda mea badi, te augwaligo te lalaigo nigai nai dabe badi, tama te bomai nai te galbanum pauda kanemego nigai me, te ni balsam kanemego nigali, te nai dabe tama sao.
EXO 30:35 Tama te nai dabe sesa pelama, tama te denami yabo nai pauda bugagia taluama nigao, te wiegi yai denami ilibo nai nigibo bidigo sę ebo tiwai yao. Tama tamu dwasianu te pauda denami wiegi yai tedali gasagi yai ilimainogo, te tamu muao.
EXO 30:36 Te nai meba te pauda tiwai mu pedelemainogo, bugagia te nai me badu haluao, tama te ugwa be tomoba eno gedude sela pelama, tama te bomai po munalubo halobage pąde muao, te ena dage dali deliba sisinabo madi. Te denami ebo nai pauda te tedali gasagi yai nai mu dao, te olo nai mu menio.
EXO 30:37 Tama dagego duga nai da, te homu elama, tama te tiwai nai munu me nigilamuo. Te Genuai Bidi eno nai naga dao, te tama homu naga yao.
EXO 30:38 Ma, bidi me deli aga homugo naga agai te denami ebo nai sanda tiwai me deli odainogo nigali da, teda te bidi aga te eno we bidi hani tomode me bidigobeo,” wali.
EXO 31:1 Tama Genuai Bidigo Mosesbolo e tiwai po wai,
EXO 31:2 “Odao, eno te bidi Besalel sa muani, te Urigo ogwa, tama te Hurgo wąįgo ogwa, te Juda hani bidi,
EXO 31:3 tama agabolo eno homu kolesaga te bomo mawai. Tama eno agabolo te wiegi wiegi yai nai gol, me silva, me bras nigabo wiegi yai homu kolesaga mawai dao.
EXO 31:5 Tama eno agabolo te gasagi yai bomai masigi dabe togolama te duliyu, tama te ni namede, me te nide, me haniani nai togolama dulumainogo te homu kolesaga mawai, tama te ugwa be au ilibo gasa tigidali haniani sę emainogo yaibao.
EXO 31:6 Tama me te Oholiap te eno sa muani, te Ahisamakgo ogwa, tama te Dango hani, tama aga te Besalel dali te sę emainogo yaibao. Tama eno genuai wiegi yai homu kolesaga te gasa bidi dabe mebabolo menama, tama augwaligo eno te po weyu nigao wali nai nigimainogo te usu yaibao.
EXO 31:7 Augwaligo te eno ugwa be sę ebadi, te bomai po muabo halobage nigibadi, te aga paliabo nai da te sęgę sela sąbo madi tiwai me, te tigidali ugwa bede muabo nai dabe nigagameo.
EXO 31:8 Tama augwaligo te tebol sai dali, tebolde muabo aga doado bage dali nigibadi, tama te lam tolalubo nai dali, te nai aga doado bage, te me nigaibao. Augwaligo te lam sole tolalubo nai te wiegi yai golgo naga nigibadi yao, te aga dali elalubo nai dabe me. Tama augwaligo te denami ilibo alta me nigagameo.
EXO 31:9 Tama augwaligo te siago tigidali domainogo te ofa eyu, te ulabo madi te alta nigiyu, tama aga doado bage me, tama te nogo sągą ąį telayabo pou nigibadi, tama te pou muabo page me nigaibao.
EXO 31:10 Tama augwaligo Aron aga ogomani dali augwaligo gudabo ugwa te wiegi yai mu hobolama, nigagameo, te bage augwaligo te ugwa gudama pris sę yaibao.
EXO 31:11 Tama augwaligo eno nai dabe sa muabo wel nigiyu, tama te Tedali Gasagi Yai Be Habu badu wiegi yai denami iliyu ulabo pauda nigaibao. Augwaligo te nai dabe te eno nagebolo wali po tiwai gilama tama te nai dabe nigimainao,” wali.
EXO 31:12 Tialima, Genuai Bidigo Mosesbolo te po olama, te Israel we bidibolo te po omainogo yai, “Te Sabat side te olo bidiyu, toma nabo side dao, tama te Sabat side sesemane sogo dage eno po odolama, olo bidiyu, toma nao. Te Sabat side eno dagebolo te sa mubo tiwai megi mayu, tama nosali me tigidali sogo tama naga tiao. Tama tebo sę dagego konemainogo, te ena digi ena dagego Genuai Bidi dao, tama eno dage te tedali gasagi yai we bidi hani pedalomainogo ebo dao.
EXO 31:14 Te toma tubo side te Genuai Bidi eno side dao, tama tiyu, dage te sogo toma tuyu, olo bidao. Ma, bidi me deli aga te sogo sę yali da, agai te eno bomo yai po sela sąbao, tama te bidi dagego aga ela muao.
EXO 31:15 Te tigidali Sarere dagego sę yabo side te 6, te tama side sę yao, tiali goli te dei 7, te me deli sogo da, te eno olo bidibo sogo, tama te olo bidiyu, toma nabo genuai side dao. Dagego te olo bidibo side sę ebo bidi dabe tigidali ela muao.
EXO 31:16 Dage Israel bage te sogo toma nao, magi baso meni, te polobadu te po dąų wai elaluai, dagego po dąų olama, te wali paibao wai dao. Tama tibaso, nosali dagego tama tidi pao.
EXO 31:17 Te side te po dąų wabo tiwai elama, te ena tomode me te dage Israel bage dali te po sesemane sogo elalua paibao. Magi baso meni, ena Genuai Bidi eno te dagalu de tǫ si nigali, te 6 te tama sogo nigilama, tama te 7 wali, te me deli sogo eno te sę tigidali tagalama, tama ena toma tuyu, olo bidai dao.”
EXO 31:18 Te Godigo po te Sainai bulu dude Moses dali wali sogo, agai te masigi name si te bomo yai po God aga digi nogogo asęai, te Mosesbolo mawai dao.
EXO 32:1 Te Moses te Sainai bulu duba holama, tama bobage sogo bidali, tama aga gesege mu yali, tama aga polo me asobeo. Tama te we bidi augwali te Aron pageba sisinigi pelama, agabolo te po wai, “Te magi nai te bidi Mosesba pedelali, te dago konebeo, te bidigo da te Isipde selama, tama da odasa eba asai. Tama nago god me deli nigilama, tama pabodu polasa peyu, tama da tųdu odasa pomainogo yaibao.” Augwaligo te po wai.
EXO 32:2 Tialima, Arongo augwalibolo te po wai, “Dagego duga we dabego olode walalubo gol, me duga wai dabego olode walalubo gol me sesa pelama, tama selasa aselama, enabolo magasao.”
EXO 32:3 Arongo te po obaso, te we bidi dabe augwa olode walaluali gol dabe pepede pelama, tama sela aselama, agabolo magasai.
EXO 32:4 Tama agai augwaligo te olode au yali gol dabe selama, tama ulama, tama te ąį tiwai pedelai. Tama agai te tǫde dedage me deli augwaligo te bulmakau noma tiwai nigilama, tama te ąį tiwai pedelai gol teba gelama, tama te bulmakau tiwai pedelai. Tama agai hwą ge selama, te golgo nigai bulmakau noma bugagia dodolai. Tama nosali te we bidi augwaligo te po wai, “Odiąo! Te nai aga da Israel bagego god dao. Agai da Isipde selama, tama da odasa eba asai dao,” wali.
EXO 32:5 Arongo te tebo sulama, tama agai te bulmakau pąde te alta sai me deli nigai. Tama agai te po wai, “Do da, dago Genuai Bidibolo genuai nogi mayu, genuai nai tueibao.”
EXO 32:6 Tialima, te sogo nosali kigamu mu, te we bidi dabe augwaligo te ofa eyu, te siaba ulabo kibu bulmakau dabe sela asali. Tama augwaligo homu kolesaga deliba naga muainogo te ofa yabo kibu sipsip dabe me sela asai. Tama augwaligo te nai tuyu, te bomai wę tuyu elama, tama nosali te bidi dabe augwali pelama, te we dabe dali gagali igi pai.
EXO 32:7 Tama Genuai Bidigo Mosesbolo te po wai, “Nage polo e bulu dude bidali tagalama, aba dulao. Te naga Isipde odasa asali we bidi dabe augwaligo dwai kolesaga hauwa megi ebao.
EXO 32:8 Tama eno po weyu, augwalibolo te wali pao wali tų polo geda munama, tama augwaligo te bulmakau wai te golgo nigilama, tama agabolo lotu po weyu, tama agabolo ofa ilibao. Tama augwaligo te po wai, ‘Odao,’ wali, ‘te aga dago god dao. Agai da Isipde selama, odasa asai dao.’ Te po megi obao.
EXO 32:9 Tama ena God eno te we bidi augwali eno koneanio. Augwali da, te hagoma mu ebo we bidi dao.
EXO 32:10 Te eno augwali dali sębę mu elama, tama eno augwali mu dolaibao. Tama nago ena me togolamuo, mu menio. Tama nosali eno nage me, te naga hani ogomani dali, augwaligo te Israel bage hasegelama, tama genuai we bidi hani mu pedelaibao.” Te po wai.
EXO 32:11 Tiali goli, Mosesgo te Genuai Bidigo homu bea sainu, agai bomonama gedu haluasa po aga Genuai Bidi Godibolo e tiwai po wai, “Genuai Bidio, tiyu nago sębęgo naga we bidi augwali dolomainogo sula tagalamuo. Nago te we bidi augwali te Isipde te nago naga genuai bomogo digi te augwali selama, odasa asai dao.
EXO 32:12 Ma, nago te tiwai kolesaga augwalibolo ebaso da, teda te Isip dabego te po waibao, ‘Godigo aga we bidi augwali dali dwai homu yai. Tama tibaso, augwali agai te Isipde selama, tama augwali odasa asali, te augwali te bulu dude mu dola silama, tama tigidali ela muani da,’ te po wabuo. Tiali goli, Genuai Bidi, tagalao. Tama nago te sębę yali homu te nago tagalama, tama nago homu kolesaga hasegelama, tama te we bidi augwali nago me dolamu dao.” Mosesgo te po wai.
EXO 32:13 “Nago naga sę bidi Abraham, me Aisak, me Jekop, te homugo koneao. Tama nago te bomo yai po augwali dali dąų wali po, te homude koneao. Nago bomo yai po dąų mu weyu, e tiwai po wai, ‘Eno mu po obao, eno te dagego wąį nǫų dabe te dagebolo hauwa mu, te hǫ tiwai dageba mawaibao. Tama eno po dąų weyu, te eno dagebolo mawaiba wali te tǫ, teda te tǫ te eno duga wąį nǫų dabe augwaliba mawaibao. Tama augwali sesemane sogo mu te tǫde bidada paibao,’ nago te po wai.”
EXO 32:14 Tama Mosesgo te tiwai gedu haluasa po obaso, tama Genuai Bidi aga homu ma hasegelama, tama aga te we bidi dolainu yali nai te aga we bidiba me tagala palobeo.
EXO 32:15 Tialima, Moses te bulu dude bidali tagalama, tama aba duliyu, te Godigo bomo yai po asęani te masigi pedai si sela dulai. Godigo po te masigi si te si dali si badu te po asęai dao.
EXO 32:16 Godigo digi te masigi si nigilama, tama te masigi side te bomo yai po asęani, te bugagia ma dodolama todogo pai.
EXO 32:17 Tama Josua te Sainai bulu dude a badu gana Moses asobo tonaluyu bidali. Tama Moses teba dulama, tama augwali si aba pidubadi, tama Josua agai te we bidi dabe augwaligo te i wabo po daga agai odai. Tama agai Mosesbolo e tiwai po wai, “Ae, Moses! Eno te we bidi bidibo madi te wąbi hwįyu kulukulu wabo odalio.”
EXO 32:18 Tiali goli, Mosesgo te po wai, “Menio. Te bidigo wąbi hwįbo te aiyaba elaluyu, i wabo te tiwai me ebeo. Ma, te wąbi hwįbode te bidi dabe aiyaba elalubaso, te gela wabo tiwai menio. Eno te tęąbi wabo dogoni naga odobao,” wali.
EXO 32:19 Tama Moses te we bidi bidibo pesage pąba sabolama suali, te bulmakau gol, me te we bidi augwali tęąbi idubo suali, tialima tama aga sębę mu yai. Tama agai te tolasa asali te masigi si, agai te bulu du pageba sąnama, tama te masigi si pepeda pai.
EXO 32:20 Tama Mosesgo augwaligo te nigali bulmakau selama, tama siaba ulai. Tama te gol ąį tiwai pedelama, tama nosali kedau elama, dila saide, agai te hamago haluama, te olo pauda tiwai pedelai. Tama agai te pauda gol te pabo ąįba sąwai. Tama sąsą bila silama, tama Mosesgo te tiwai ilama, te Israel dabe augwaligo te ąį tumainogo yalio.
EXO 32:21 Tama agai Aronbolo te po hanalu wai, “Te e we bidi augwaligo magi sę nagebolo ebaso, tama nago augwaligo te dwai kolesaga mu emainogo sula tagalaliwe?”
EXO 32:22 Tialima, Arongo po wei ponoyu, te po wai, “Genuai bidio, nago ena dali sębę igio. Nago te we bidi hani augwaligo ebo kolesaga koneai dao. Augwaligo dwai kolesaga yainogo bomo mu ebo dao.
EXO 32:23 Tama augwaligo enabolo e tiwai po wai, ‘Dago te bidi Mosesba magi nai pedelali, te dago konebeo, te bidigo da Isipde selama, tama da eba odasa asai. Tama da te pabo tųde polasa pabo god me deli nago nigao.’
EXO 32:24 Eno odolama, tama eno te gol olode elalubo we bidibolo te po olama, tama augwaligo te gol pedelama, enabolo mao wai. Tialima, augwaligo enabolo mawai, tama eno te gol te siaba ulalio. Tama polo te bulmakau wai aga digi odolali pedelalio,” Arongo te po wai.
EXO 32:25 Mosesgo koneani, te we bidi augwaligo dwai kolesaga subigila emainogo yali, tama Arongo augwali dąų wabo usu ebeo, te homu yali. Tama agai te homu yai, tiyu augwa boi bidi dabego augwali sulama, tama posobo po me gisugu maidali, te homu yai.
EXO 32:26 Tama tibaso, Moses pelama, te obo tųba doligi pelama, tama te tiwai i wai, “Te mena bidigo te Genuai Bidi wali paiba wida, teda te bage te ena bidibo madi asao.” Tialima, te Livai hani bidi tigidali augwali aselama, aga pąba dolagasai.
EXO 32:27 Tama agai augwalibolo te po wai, “God, te da Israel bagego Genuai Bidigo te po wai, ‘Dage tigidaligo te bobage ge hwą selama, tama te u bidi dabe bidibo madi te pesageba pelama, tama te tibo god wali pabo bidi dabe ela muao, te ama, me te abagi dabe, te dage dali pąde bidibo bage, te dao,” wali.
EXO 32:28 Tama te Livai dabe augwaligo te Mosesgo wali po selama, te tiwai sę yai. Tama te sogo naga augwaligo te bidi sese umabo bidi dabe, 3,000 mu ela muai dao.
EXO 32:29 Tama Mosesgo te Livai dabe augwalibolo te po wai, “Megi dagego te bidi dabe augwali ela muani, te wai dabe me, te duga ama dede dabe, augwali meba da, te duga wai dabe, ama dede dabe, tiali digi augwaligo dwai sę ebaso, dagego augwali ela muani. Tama dagego te kolesaga yaligo naga, dage te Genuai Bidigo pris dabe tau sabo bage pedelaibao. Tama tiyu, megi Genuai Bidigo wiegi yai sę dagebolo ilaibao,” wali.
EXO 32:30 Tama nosali sogo Mosesgo te we bidi augwalibolo te po wai, “Dagego te yali sęgę, te Genuai Bidi bidibo madi te bulu duba ma holama, tama eno agabolo te dagego sęgę sela sągowe naga, te eno agabolo hanalua sueibao,” wali.
EXO 32:31 Tialima, Moses te bulu duba ugwa holama, tama Genuai Bidibolo te tiwai po wai, “Homu dene mu ebao. Te e we bidi augwaligo te genuai sęgę sabo sę mu yalio. Augwaligo te tibo god me deli nigilama, tama augwaligo lotu po agaba wai dao.
EXO 32:32 Tiali goli, megi eno nagebolo hanalu obao, te nago homugo augwaligo sęgę sela sąyąbo homu ebaso da, teda nago augwaligo sęgę sela sąyao. Ma, nago hagela homu ebaso da, teda eno nagebolo te po hanalu waibao, te nago naga we bidi augwali nogi asęai elalubo bukude te eno nogi asęai elalubo, te deli naga te sela sąyagameo.” Te po wai.
EXO 32:33 Tiali goli, Genuai Bidigo Mosesbolo te po wai, “Menio. Eno te dwai sę yali we bidi augwaligo nogi naga te eno sela sąwaibao.
EXO 32:34 Tialima, megi nage pelama, tama te we bidi augwali selama, tama eno nagebolo te po wali te buluba pao. Odao, eno Ensel Mobo Bidigo dage te pabo tųdu odasa paibao. Tiali goli, nosali da, te dene mabo sogo ena asiyu, tama te dwai sę yali we bidi augwali eno dene mu ilaibao,” Genuai Bidigo te po wai.
EXO 32:35 Tialima, Genuai Bidigo nosali genuai gasi dwai me deli te bidi dabego dwai sę yali wei ponoyu, tama te gasi augwaliba tagala palai. Magi baso meni, augwaligo po bomo yai Aronbolo olama, tama agai te bulmakau wai te golgo nigai dao.
EXO 33:1 Megi da, Genuai Bidigo Mosesbolo e tiwai po wai, “Nage dali, te nago Isipde odasa asali we bidi me, dagego e bulu taga peyu, tama eno dagebolo po dąų weyu, dagebolo te mawaibao wali, te buluba piąo. Polobadu eno Abrahambolo, me Aisak dali, me Jekop dali, te tiwai po wai, ‘Tama eno te tǫ te duga hani wąį nǫų dabe augwalibolo mawaibao,’ wai dao.
EXO 33:2 Tama eno ensel mobo bidi me deli te dage pabo madi polasa tagalama, tama eno te Kenan hani, me Amor, me Hit, me Peres, me Hivi, me Jebus, te hani augwali eno sela sągi paibao.
EXO 33:3 Tama dage te wiegi wiegi yai haniani nai holobo madi, te ili elalubo wiegi yai tǫba bidigi paibao. Tiali goli, ena digi te ena dage dali me pogobeo, magi baso meni, te dage hagoma ebo we bidi dabe dao. Tiyu, te ena dage dali peyu da, te dage eno te tųde dolabuo,” wali.
EXO 33:4 Tama Mosesgo te we bidi augwalibolo te Genuai Bidigo te bomai po mobaso, tama augwaligo homu sęgę elama, tama augwaligo te wiegi yai au te tigide me mubeo.
EXO 33:5 Tama Genuai Bidigo po Mosesgo te Israel we bidi augwalibolo omainogo te po wai, “Dage te hagoma ebo we bidi dabe mu dao. Te ena dage dali pobaso da, teda eno dage dolabuo. Te ena dage dali pęwadage sogo naga bidagasali goli, te eno dage tigidali dolabuo. Tialima, odiąo, te dagego tigide elalubo ring gol te nai dabe tigidali peda sąwai madi, tama eno mena tiwai kolesaga dagebolo yabo te eno homugo bugagia konemainogo yaibao.” Te po wai.
EXO 33:6 Tama augwaligo te Sainai bulu du taga pabo sogo, augwaligo te tigide muani te au dobage te me mubeo.
EXO 33:7 Tigidali sogo te Israel dabe augwali pelama, te bidigi pabo madi, tama augwa ugwa be sę eyu yai, tama Mosesgo me ugwa be me deli selama, tama augwaligo te be sę ebo pesage te bulu badu te dwasianu digibulu gana te ugwa be sę eyu yai. Tama agai te ugwa be nogi te tiwai nogi poai, te God Dali Sisinibo Ugwa Be da wai. Tama dego te Genuai Bidigo homu kolesaga te koneainogo da, teda aga te ugwa beba paibao.
EXO 33:8 Tama Moses te ugwa beba pabo sogo da, te tigidali we bidi augwa ugwa bede bidiyu, tama augwali hodaluama, tama augwa ugwa be tųde dolaluyu, tama Moses te ugwa be tomoba pabo suai dao.
EXO 33:9 Tama Moses te ugwa be tomoba pai madigi, tama te pǫ aselama, te ugwa be tų pąba dolagasai. Tama Genuai Bidi te pǫ tomode bidiyu, tama Moses dali po miai dao.
EXO 33:10 Tama te Israel we bidi augwali te augwa ugwa be tųde dolaluyu, tama te pǫ te ugwa be pąde bidibaso da, teda augwali tobolu basi gulama, tama lotu po Godibolo wai dao.
EXO 33:11 Tama Genuai Bidigo Moses dali po miani, te bidigo aga abagi dali po mibo tiwai gilama yai. Augwa si te po ola silama, tama Moses aga te bidibo pesageba ma asiyu yai. Tiali goli, Mosesgo sę ebo ogwa bidi, te Josua, te Nungo ogwa, aga te tomode me bididuai. Agai te Sisinibo Ugwa Be munu me taga pisąwai dao.
EXO 33:12 Mosesgo e tiwai po Genuai Bidibolo wai, “Nago enabolo te e we bidi augwali te augwa tǫba odasa pao, te po wai. Tiali goli, nago enabolo te mena bidigo ena tau somainu yabo bidi te ena dali me pao wabo po, te nago me wabeo. Tama nago te po wai, ‘Eno nage bugagia koneani, tama nage eno godolo ebo da,’ wai.
EXO 33:13 Tama nago ena godolo eba wida, teda eno homugo nago enabolo te nago homu kolesaga ola menama, tama eno nage bugagia konemainu, tama sesemane sogo eno te nago godolo yabo kolesaga naga yaibao. Tama eno homugo me te naga digi sa muani we bidi te nago homugo ma konemainogo, te homu eno ebo dao.”
EXO 33:14 Tama Genuai Bidigo te po wai, “Ena digi nage dali hodobo peyu, tama nagebolo wiegi yai homu nagame ebo kolesaga mawaibao.”
EXO 33:15 Tialima, Mosesgo Genuai Bidibolo te po ma wai, “Te naga digi te da dali pisąwani da, teda nago da ede bidali te taga pomainogo te me tigio.
EXO 33:16 Ma, nage da dali pisąwani da, te gasa bidi hani augwaligo mena tama te nago ena me, te naga we bidi dabe dali, godolo ebo te koneaibawe? Tiali goli, nage da dali pobaso da, teda te gasa bidi hani augwaligo koneama, te da we bidi te gasa we bidi hani tigidali tiwai meni, da te gasagi yai bage mu da waibao,” wali.
EXO 33:17 Tialima, Genuai Bidigo Mosesbolo te po wai, “Eno te nago wali po selama, te sę yaibao. Magi baso meni, eno nage godolo eyu, tama eno nage bugagia koneai dao.”
EXO 33:18 Tama Mosesgo Genuai Bidibolo e tiwai po wai, “Eno homugo nago genuai ula ebo gesabi enabolo waselao.”
EXO 33:19 Tama Genuai Bidigo Mosesbolo po wei ponoyu, te po wai, “Eno nagebolo te eno wiegi yai ula tigidali ola mawaibao. Tama eno nogi nagebolo pusuyu, eno e tiwai po waibao, ‘Ena Genuai Bidi dao.’ Odao, te eno olo tau siyu mabo wiegi yai kolesaga eyu, tama eno bidi me delide homu dene eyu, tau sobaso da, teda eno te sę eyu naga ebo dao.
EXO 33:20 Tiali goli, nago ena gesabi me sugobeo, magi baso meni, te bidi me deligo eno gesabi subaso da, teda aga isaibao.
EXO 33:21 Suao, te genuai masigi me dedeli ena pąde elalubao. Tama nage te masigi daiba ugwadu dolugulao.
EXO 33:22 Tama eno gesabigo genuai ula te nage pąba asobo side, eno nage te masigi dudulawi me deli tomoba munama, tama nage eno nogogo mesegelama elalubadi, ena ela soaibao.
EXO 33:23 Tama nosali eno dagala sąbosi, tama nago ena tudi badu naga sumainogo yaibao. Tiali goli, nago ena gesabi me sulamuo,” te po wai.
EXO 34:1 Nosali Genuai Bidigo po Mosesbolo weyu, te po wai, “Nago te masigi dage si togolama, tama bugagia dodolama, tama nago te sąnama toga pali masigi sawali, te tiwai si ma emainao. Tama eno te hasia polobadu togolama asęani tiwai po naga ma asęaibao.
EXO 34:2 Tama nago te masigi si dodola munama, tama do kigamu nage te bulu duba holama, tama ena dali da si deliba sisinaibao.
EXO 34:3 Te bidi me deli nage dali me asomainogo menio. Eno homugo te gasa bidi te e bulu duba asela bidagasobo, te eno homu hagela ebo. Tigidali aiyade naga bidalumainao. Tama te sipsip bulmakau dabe me te bulu du pąba aselama, te nosa dabe munu me tuagaselamu dao.”
EXO 34:4 Tialima, tama Mosesgo te masigi pedai si te polasa togali te tiwai elama, tama agai te masigi sawali si te Sainai bulu duba kigamu digi mu tolasa holali, te Genuai Bidigo agabolo wali po selama, tama tiwai sę yai dao.
EXO 34:5 Tama Genuai Bidi te pǫ tomode bidama, tama dulama, tama Moses dali te bulu duba ugwadu dolagaselama, tama aga digi, aga Genuai Bidi nogi page po pusagasai.
EXO 34:6 Tama aga te Moses pąba pelama ela soali, tama i weyu, te po wai, “Ena Genuai Bidi, ena Genuai Bidi dao. Ena God, tama ena te olo tau siyu mabo wiegi yai kolesaga badi, te homu dene ebo page bidi dao. Tama eno sębę polo me egobeo. Eno tigidali we bidi godolo mu elama, tama eno ena wali po tigidali wali pabo dao.
EXO 34:7 Te eno we bidi hani hauwa godolo iduyu, tama te eno po dąų wali tiwai gilama, tama eno augwaligo hagoma ebo haniani dwai kolesaga te sela sąbo dao. Tiali goli, te dwai sę ebo bidi dabebolo eno dene ilaibao. Tama eno augwaligo wai dabebolo me, tama augwaligo nosali pedalobo wąį te wai dabebolo me, tama te sela, me te me si me si haniba te tiwai dene mabo sę naga augwaliba pedelaibao,” wali.
EXO 34:8 Tama Godigo po ola silibo si, tama polo Moses te tǫba degasa dulama, tama Godibolo lotu po wai dao.
EXO 34:9 Tama Mosesgo te po wai, “Genuai Bidi, nago ena godolo mu ebo da wida, teda eno homugo nage da dali pomainogo homu ebao. Te mu tama, te e we bidi augwaligo hagoma eyu, dwai kolesaga ebo dao, tiali goli eno homugo te dago tigidali dwai kolesaga ebo me, tama dago sęgę me, te sela sąnama, tama da selama, tama naga we bidi tiwai mu bidimainogo te homu eno ebo dao,” Mosesgo te po wai.
EXO 34:10 Tama Genuai Bidigo Mosesbolo te po wai, “Megi eno bomai po dąų dage Israel dabe dali yainogo ebao. Te nago we bidi augwali gedude te eno genuai bomai sę te eno gasa tigidali we bidi hani dali polobadu me isąwai te sę yaibao. Tama tigidali gasa we bidigo te ena Genuai Bidigo dage eno tau siyu, haniani sę ebo te augwaligo sulama, tama augwali homu hauwa elama, tama noma saibao.
EXO 34:11 Tama megi eno dagebolo te mawainogo ebo bomai po tigidali te dagego odoyu, wali piąo. Ena te dage pabo madi te ena polasa pelama, tama eno te Amor dabe badi, te Kenan dabe me, te Hit dabe me, te Peres dabe me, te Hivi dabe badi, te Jebus, te hani dabe augwali eno sela sągi paibao.
EXO 34:12 Tama dua bugagia, te dagego megi painogo ebo te bulu tǫde bidibo bidi dabe dali te abagi nami bidabo bomai po munu me dąų wagimio. Tiyu, augwaligo ebo kolesagaba dage kekelama, tama dage tulaluama, tama dage tigidali dolabuo.
EXO 34:13 Menio. Dagego augwaligo te lotu wabo nai dabe dolao. Te alta dabe, me te pos masigi dabe te pepedelama, tama augwaligo tibo god we Asera piksa te ni dagede elalubo, te togolama sąyao.”
EXO 34:14 “Ena Genuai Bidi, tama dagego ena deliba naga lotu po wao. Dagego te tibo godiba lotu po me wagimio. Magi baso meni, te tibo god me deligo ena bidibo hasegelainogo ebaso, te eno aga me gogologobeo. Tede ena sębę mu yaibao.
EXO 34:15 Dagego te bulu tǫde bidibo bage augwali dali te abagi nami bidabo bomai po dąų munu me olamuo. Augwaligo te tibo godiba lotu wabo dao. Tama dagego augwali dali te bomai po dąų obaso da, teda augwaligo dagebolo te augwali dali deliba sisinabo po hanaluama, tama dagego te augwaligo tibo godiba ofa ilali te kibu me te nai dabe tuaibao.
EXO 34:16 Tama tiyu, dage Israel gesi bidi dabego te gasa hani gesi wegi mani sabuo. Te dagego tama tiali da, teda te we dabego te augwa bidi kekelama, tama te bidi dabe augwaligo ena tagalama, tama te tibo god dabeba lotu waibao. Te eno gedude te kolesaga te penani ela bilibo kolesaga tiwai yaibao.”
EXO 34:17 “Dagego te tibo god dabe te aingo nigilama, tama augwaliba lotu po me wagimio. Te habu mu dao.”
EXO 34:18 “Dagego te Bo Disiąwai Nai Bret te tubo sogo te genuai side te homugo me gegeda pigimio. Dagego polua Abipde te Isip taga soali, tama tigidali kibu bede dagego te yis meni yai bret te poluade, te a naga olama nogo me badu si, te tama sogo naga tuyu, te eno dagebolo polobadu wali gilama tama tiao.”
EXO 34:19 “Te dagego tigidali gomunai ogwa, me te dagego bulmakau sipsip dabe te gomunai wai omai dabe me, te enabolo naga mao.
EXO 34:20 Tiali goli, dagego homugo te duga te bidi duabo donki kibu gomunai wai ma abela homu ebaso da, teda duga sipsip wai me deli selama, te donki hasegelama, tama sipsip wai ofa yao. Tama dagego ma abelesiąwani da, teda dagego te donki mage togwao. Tama me te duga gomunai ogwa tigidali te ma abelao.” “Te dagego enaba lotu po wagasabo homu ebaso da, te dagego ofa yabo nai deli digi sela asao, olo asigio.”
EXO 34:21 “Tama tigidali Sarere te dagego sę yabo side te a naga olama nogo kibisa, te tama sogo naga sę yabo sogo te elalubao, tiali goli te 7 wali, te me deli sogo te sę me egio, te habu selai. Te gide tǫ elabo sogo, ma te nai inayu tau yai nai sisinibo sogo elalubaso da, dagego te olo bidibo side te sę me igimio.”
EXO 34:22 “Dagego homu wiegi yai pemene te genuai side te inawai nai siyu, te wiegi yai homu pemene yali side te dagego homu koneama, te side te wit hasia inawai te sali side dao. Tama me te poluade te ni du inayu tau yai sali side, dage te dwasianu tolu yabe dabe bede genuai sogo bidali side, te dagego homugo ma koneao.
EXO 34:23 Tama deli kibu bede sela sogo, dage bidi tigidaligo ena Tigidali Nai Tonalubo God bidibo madi aselama, lotu po wagasao, te duga Israel duga Genuai Bidi dao.
EXO 34:24 Nosali da, eno dagego tǫde megi te bidibo we bidi hani augwali sela sąnama, tama dagego tǫ dąį genuai ilaibao. Tama dagego enabolo lotu wagasobo sogo, te tigidali kibu bede sela sogo naga te lotu po weyu, tama dagego tama tibadi, te boi bidigo dagego tǫ sainogo homu me egobeo.”
EXO 34:25 “Dagego te kibu sipsip, meme, bulmakau dabe te enabolo ofa ilibo sogo, dagego te yis elalubo bret te dali te enabolo ofa me elamuo. Tama dagego te Godigo dage Ela Soali Side te bodolu koneama, tama dagego te ofa eyu elali sipsip mi tigidali te dagego me tula silisąbaso da, teda dagego te nai dage dabe te kigamu tuaiba homu elama me mugimio.”
EXO 34:26 “Te tigidali kibu bede dagego gide te polasa ina yani wiegi yai nai te Genuai Bidi eno beba sela asao.” “Dagego te kibu meme ame pę te seneba pęgęnama, tama te meme digi wai te ąįgo me ulainogo me igimio.”
EXO 34:27 Tama Genuai Bidigo Mosesbolo e tiwai po wai, “Nago te po dabe te buku me delide asęao, magi baso meni, te tigidali po nage dali, me te Israel dabe augwali dali, te po dąų wali page e dao.”
EXO 34:28 Tama Moses te Genuai Bidi dali te bulu dude te bidi sese si, 40 sogo bidai. Tama agai nai deli me, ąį me, te me tubeo. Mu menio. Tama Genuai Bidigo te bomai po te Mosesgo te sela holali masigi side asęai. Te po te Godigo bomo yai nogo si po dabe dao.
EXO 34:29 Tama Mosesgo te bulu du tagalama dulali sogo, agai te bomai po elalubo masigi si me te sela dulali. Agai te Genuai Bidi dali po mianigo, tama Mosesgo gesabi ula mu yai. Tiali goli, aga digi te tiwai ula yali, te agai me konebeo.
EXO 34:30 Aron dali te we bidi augwaligo te Moses gesabi ula yai sulama, tama augwali wi elama, tama augwali aga pąba me pai menio.
EXO 34:31 Tiali goli, Mosesgo augwali i obaso, tama Aron dali, te Israel tobolu bidi dabe dali, augwali aga pageba pelama, tama Mosesgo augwali dali po wai dao.
EXO 34:32 Tama nosali, te gasa Israel bage meba tigidali te aga pąba pelama, tama Mosesgo augwali tigidalibolo dali te Genuai Bidigo agabolo te Sainai bulu dude mani bomai po, te augwali tigidaliba te po wai dao.
EXO 34:33 Mosesgo te po augwalibolo ola silibo si, teda aga te ugwa pedai selama, tama aga gesabi geme duala siyu yai dao.
EXO 34:34 Tiali goli, Moses te lotu ugwa be tomoba te Genuai Bidi dali po miainogo pabo sogo, agai te gesabi dualaluali te ugwa pedai sela sąnama, tama buluba ma asiyu, te gesabi halusiąma asai. Aga te bedu buluba asobo si da, teda te we bidi augwalibolo te Genuai Bidigo agabolo wali po tigidali te augwalibolo wai dao.
EXO 34:35 Tama te we bidi augwaligo te Moses gesabi ula ebo suai. Mosesgo augwalibolo te po ola silibo si da, teda aga gesabi ma haluama, tama aga te Genuai Bidi dali po ma migi painogo ebo sogo da, agai te ugwa pedai ma sela sąnama, te Genuai Bidi dali po migi pabo dao.
EXO 35:1 Mosesgo te tigidali Israel we bidi i olama, asobode augwalibolo e tiwai po wai, “Genuai Bidigo te po wali, dagego te e bomai po wali piąo, te po wai dao.
EXO 35:2 Te Sarere dagego sę yabo side te 6 sogo te sę yabo side te elalubao. Tiali goli, te 7 wali, te me deli sogo te olo bidiyu, toma naga niąo, tama te sę idali weyu, habu mu selao, magi baso meni, te Genuai Bidigo side dolo dao. Te side te bidigo, ma te wego, te sę ebaso da, teda dagego aga ela muao.
EXO 35:3 Te dwasianu sę dagego bede te sia udulabo sę elalubaso, te me habu selai dao, te olo bidiyu toma nabo side dao.” Te po wai.
EXO 35:4 Nosali Mosesgo te Israel dabe augwalibolo e tiwai po wai, “Genuai Bidigo te po wai, megi dagego nai meba agabolo mao. Te agabolo nai mawainogo ebo we bidi, augwaligo e tiwai nai dabe sela asomainogo yao, te gol, me silva, me bras,
EXO 35:6 tama te gasa au wiegi yai name ugwa badi, te sisi yai, me te mama yai sipsip nisi, tama te augwaligo te meme nisigo nigai ugwa badi, tama te nai dabe sela asa wai.
EXO 35:7 Tama augwaligo te omai sipsip wali te mama pengo pilai, te sela asomainao. Tama augwaligo te wiegi yai hasa nogi sikau wali, te tamu ąįde elalubo, te wali me, te ni akas dage dabe, te sela asobadi,
EXO 35:8 tama te lam wel me, te wel dali taluabo denami ebo haniani nai me sela asiąo. Te taluali wel da, te Godigo nai dabe sa mubo wel dao. Tama wiegi yai denami ebo pauda, te denami ilabo nai dao, te me sela asomainogo yao.
EXO 35:9 Tama augwaligo te wiegi yai masigi meba sela asiyu, te ugwa aulubo nai, tama te het pris bidi hagawiade muabo dwasianu masigi muai ugwa dage, teba muabo masigi dabe, te me sela asomainogo yao,” Mosesgo Genuai Bidigo po tama pusali.
EXO 35:10 “Dage tomode te nai dabe nigibo koneai bidi dabe augwali bidibo, tama te bage aselama, te Genuai Bidigo dagebolo niga wali nai dabe tigidali nigao.
EXO 35:11 Tama te ugwa be sę badi, tama te haluabo nai dabe me nigiyu, tama te bisigi dabe te obo ni dili me, te obo eyu te pipili pabo ni dabe me, te tigi ni pos bras dali, te pos page dąų walabo halobage, te nai dabe nigao.
EXO 35:12 Tama augwaligo te bomai po muabo halobage nigibadi, tama augwaligo te halobage tolabo ni togobadi, tama augwaligo te gol selama, te sęgę sela sąyąbo madi te pesage nigiyu, tama augwaligo te bomai po muani halobage haluabo name ugwa nigibadi yao.
EXO 35:13 Tama augwaligo te tebol nigiyu, te aga tede muabo nai dabe me nigibadi, tama te tebol tolabo ni dulubadi, tama augwaligo te God gedude te tebolde muabo bret me niga po wai.
EXO 35:14 Tama augwaligo te lam muabo nai, me te aga nai dabe dali nigao. Tama augwaligo te ula yabo lam dabe me, te wel me nigao.”
EXO 35:15 “Tama augwaligo te denami ebo nai pauda ulabo alta nigiyu, tama te alta tolabo ni me togwao. Tama augwaligo te Genuai Bidigo nai da olama, te sa muabo wel me nigiyu, tama wiegi yai denami yabo pauda me nigao. Tama te ugwa be tųde walabo name ugwa me nigao.
EXO 35:16 Tama augwaligo te ofa yabo te alta nigibadi, tama alta tomoba mubo pololai moni bras nai, te bras nai dage nigiyu, te alta tolabo ni dage si me, te altade muabo nai dabe tigidali me nigao. Tama te ąį pauabo genuai pou me, te aga muabo page me, nigibadi yao.
EXO 35:17 Tama augwaligo te ugwa be bagulali te obode muabo ugwa nigibadi, tama te obo tigi ni pos dabe nigibadi, te tigi ni pos page dąų walabo halobage me nigao. Tama augwaligo te obo bagulali madi tųde muabo name ugwa me nigao.
EXO 35:18 Tama augwaligo te ugwa be kęabo te bono dabe nigibadi, te obo kęabo me te tǫde enebo bobobage nil bras, te haliga bono bomonabo nai dabe badi, tama nigao.
EXO 35:19 Tama augwaligo te Aron aga ogomani dali augwaligo te Tedali Gasagi Yai Be Habuba augwali te pris sę igi pabo sogo muabo ugwa, te gasa wiegi yai mu nigao.”
EXO 35:20 Tialima, tama tigidali Israel we bidigo Moses tagalama, tama palio.
EXO 35:21 Tama Mosesgo wali pogo te Israel we bidi hauwa augwali homude enebaso, tama augwaligo te Mosesgo wali po tiwai gilama te sę yainogo yali. Tama augwaligo nai dabe te Genuai Bidiba sela pelama, agai ugwa be sę emainogo yai. Tama augwaligo te lotu wabo nai dabe tigidali me, tama te ugwa bede sę yabo tigidali nai dabe badi, te pris dabego gudabo ugwa nigibo nai dabe tigidali sela pai.
EXO 35:22 Tama tigidali we bidigo homugo, te augwaligo e tobage haniani au dobage dabe sela pali, gudubo ugwade walobo pin me, olode walobo ring me, nogode mubo ring me, magede domobo beli me, tama golgo haniani doado bage sela pai. Tama te we bidi dabe augwaligo te doado bage te Genuai Bidibolo te ofa tiwai elama, mu mawai dao.
EXO 35:23 Tama meba we bidigo te gasa au wiegi yai ugwa, me te sisi yai, ma te mama yai sipsip nisigo, me te meme nisigo, me te omai sipsip wali te augwaligo mama pengo pilai badi, te tamu ąįde elalubo wiegi yai hasa sikau wali badi, te tama doado bage elaluali, te augwaligo te nai dabe sela asai dao.
EXO 35:24 Tama tigidali we bidigo te silva me bras elaluali, te augwaligo sela aselama, tama Genuai Bidi magasai. Tama te ni akas elaluali bidi dabego te ugwa be sę yabo ni sela asai.
EXO 35:25 Tama te hobi gudubo koneani tigidali we, augwaligo te sisi yai me mama yai sipsip nisi selama, te hobi gudai. Tama augwaligo te wiegi yai ugwa nigabo te tedela yai hobi nigai. Tama augwaligo te hobi dabe dali, te wiegi yai tedela yai name ugwa me, selasa asai.
EXO 35:26 Tama te meme nisigo te hobi gudubo bugagia koneai we dabe mebago, te hobi augwaligo bugagia gudai dao.
EXO 35:27 Tama te tobolu bidi dabe augwaligo wiegi wiegi yai masigi te ugwaba, me te het pris bidigo hagawiade mubo ugwa, me te aga magede mubo ugwade muabo masigi dabe selasa asai.
EXO 35:28 Tama augwaligo te gasa tigi, me tedali yai pauda, me wel, me sanda te wel nigilama, te Genuai Bidigo naiba sa muyu nigabo nai, me te lam dabeba muabo nai, me te denami emainogo munama nigabo nai dabe selasa asalio.
EXO 35:29 Tigidali Israel we bidigo Genuai Bidibolo nai maiabo homu yali bage, augwaligo dwagi yai homu eyu, te Genuai Bidigo sę te Mosesbolo yao wali, te sę yainogo, te nai dabe olo sela asai.
EXO 35:30 Mosesgo te Israel dabe augwalibolo e tiwai po wai, “Genuai Bidigo te Besalel sa muani, te Urigo ogwa, tama Hur te aga wąį, te Juda hani dao.
EXO 35:31 Tama Genuai Bidi Godigo digi aga noma bidi te agabolo mani, tama agai homu kolesaga wiegi yai elaluyu, tama tigidali haniani sę ebo kolesaga wiegi yai koneai elaluai.
EXO 35:32 Tama agai homude bugagia koneama, tama te gol, me silva, me bras, te nai dabego te sę emainogo yai.
EXO 35:33 Tama agai te wiegi yai au yabo masigi togobo me, te ni dulama te todogo pabo sę me, te gasa au yabo nai meba togobo dabe me, te tigidali agai koneai.
EXO 35:34 Tama Genuai Bidigo wiegi yai kolesaga te Besalel de Oholiap, te bidi sibolo mawai, te Oholiap aga te Ahisamakgo ogwa, te Dango hani dao. Tama augwali sigo te gasa bidi dabego te sę dabe emainogo ola mabo te usu yaibao.
EXO 35:35 Genuai Bidigo te bidi si te haniani sę yabo homu kolesaga mawai dao, te masigi togobo sę, me te gasagi yai au yai piksa noma nigibo sę me, te wiegi yai gasa au yai ugwa hobolobo sę me, te hobigo au ebo sę me, te augwaligo sisi yai me mama yai sipsip nisigo augwaligo nigai. Augwali sigo te tigidali nai me, te piksa noma dabe me augwaligo nigainogo ebo, te augwali sigo te sę dabe me ebo te usu yaibao,” Mosesgo te po wai.
EXO 36:1 Te Mosesgo po ma weyu, te po me wai, “Genuai Bidigo wiegi yai homu kolesaga te Besalel de Oholiap, te bidi sibolo dali, te tigidali sę ebo koneani bidi dabebolo dali, te sę emainogo eyu mani, tama augwaligo te Godigo ugwa be sę yabo nai tigidali nigibo te usu yaibao. Tama te bidi dabego naga te tigidali nai dabe te Genuai Bidigo po wali gilama te sę yainogo yao.”
EXO 36:2 Tama nosali Mosesgo Besalel me, Oholiap badi, i weyu, tama te Genuai Bidigo wiegi yai homu kolesaga mani bidi augwali tigidali i wai. Tama te sę ebo godolo homu ebo bidi dabe augwali asali, tama Mosesgo augwalibolo te sę gagalama yao, te po wai dao.
EXO 36:3 Tama Mosesgo te bidi dabe augwalibolo te Godigo ugwa be sę emainogo te Israel dabego sisinani nai tigidali te augwalibolo mawai. Tama tigidali sogo kigamu te Israel we bidi augwaligo te Godibolo te ofa tiwai maiabo nai dabe selasa pabo sę idu geai.
EXO 36:4 Tama tibaso, te ugwa be sę ebo bidi dabe augwaligo te nai dabe sela asobo sulama, tama augwa ebo sę tagalama,
EXO 36:5 tama aselama, Mosesbolo e tiwai po wagasali, “Te we bidi augwaligo te doado bage hauwa sela asali. Te tigidali sę yabo nai dabe te usu yali, te Genuai Bidigo dabolo te sę emainogo wali po gilama. Tama te doado bage meba hauwa te olo munaluaibao,” augwaligo te po wai.
EXO 36:6 Tialima, te tiwai Mosesgo te tigidali we bidi bidibo madi po ola tolai, “Dage we bidigo te Godigo ugwa be sę yabo nai dabe me sela aselamuo.” Augwaligo te po odama, tama te nai dabe augwaligo me sela pabeo.
EXO 36:7 Te we bidi dabego sela asali tigidali nai dabego te ugwa be sę yabo te usu elama, te dąį ela pelama, tama meba olo munaluai dao.
EXO 36:8 Te tigidali sę bidigo te sę ebo mu koneama, tama augwaligo te Godigo ugwa be sę yai. Augwaligo te ugwa be sę yani, te genuai ugwa name nogo sigo sę yai. Augwaligo te gasa wiegi yai ugwa selama, tama augwaligo te mama yai, me sisi yai hobigo te name ugwa au ilai, te hobi te augwaligo sipsip nisigo nigai. Tama te sę mu koneai bidi augwaligo te mobo bidi ensel noma te tigidali ugwade hobobolo pai dao.
EXO 36:9 Te ugwa deli deli bobage usu sali, te 12 mita, te aga genuai usu nama te si tama 2 mita, tama tigidali ugwa te deli tigi poai naga dao.
EXO 36:10 Augwaligo te a naga ugwa dali te bobage iliyu, tama te gasa a naga bobage ugwa te tiwai naga elama hobolai dao.
EXO 36:11 Tama augwaligo te ring meba te husugu ugwago nigilama, tama tego te genuai bobage ugwa siba wadolainogo hobolai.
EXO 36:12 Te augwaligo 50 ring te hasia ugwa me dedeli sesegede kęnani, tama te tiwai naga augwaligo me si wali te ugwa sesegede kęnai dao.
EXO 36:13 Tama augwaligo te 50 huk gol nigilama, tama te genuai ugwa si dali te huk dabego dąų olama, tama deli ugwa poai naga pedelai dao.
EXO 36:14 Tama augwaligo te ugwa be haluabo genuai ugwa me dedeli nigai. Augwaligo te ugwa 11 nigali, te augwaligo meme nisigo nigai dao.
EXO 36:15 Te ugwa deli deli bobage usu sali, te 13 mita, tama te genuai dabe usu nama, te si tama 2 mita, te tigidali usu sali te deli tigi poai naga yai.
EXO 36:16 Augwaligo te nogo a naga ugwa dali hobolali, te bobage ugwa dedeli pedelai. Tama augwaligo te ugwa 11de te gilama tiwai naga yai dao.
EXO 36:17 Tama augwaligo te 50 ring ugwa te hasia ugwa sesegede mubadi, te me ugwade te 50 te gasa me ugwa sesegede kęnai.
EXO 36:18 Tama augwaligo te 50 te huk bras te ugwa si dali kęnabo te nigilai. Tama te ugwa si te genuai deli tiwai naga pedelai.
EXO 36:19 Nosali augwaligo te ugwa be haluabo gasa nai me te augwaligo mama yai pengo pilai te omai sipsip waligo nigai. Tama nosali me augwaligo te sela wabo te be haluabo nai te tamu ąįde elalubo hasa nogi sikau waligo nigai. Te si haluali madi ugwadu muainogo nigai.
EXO 36:20 Augwaligo te ugwa be daga ni name te ni akasgo nigai dao.
EXO 36:21 Te ni name tigidali bobage usu sali, te 4 mita, tama te ni name genuai usu sali usu ni te 66 sentamita dao.
EXO 36:22 Augwaligo te ni name dabe dwasianu bobage gana togolama, te be dili ni te page nai tomode dąų walomainogo yai. Tama augwaligo tigidali ni name te tiwai naga nigali.
EXO 36:23 Tama augwaligo te ni name dabe te bidi sese deli te tǫ sesege badu muabo nigibadi, tama te silva page halobage te bidi sese si te augwaligo te dodolabo ni name nigilama, tama te halobage si te ni name deli deli dologode te ni name page dąų walama, elalumainogo yai.
EXO 36:25 Tama augwaligo te tǫ sesege me badu te bidi sese dodolabo ni name nigali,
EXO 36:26 tama augwaligo te bidi sese si silva halobage nigilama, te ni name page dabe dąų walomainogo yai.
EXO 36:27 Tama augwaligo te dodolabo ni name me sela me sela te be tudi badu, te ugwa be te sia ge dega sigi pabo badu nigali.
EXO 36:28 Tama augwaligo te ni nami si te ugwa be tudi badu te dage badu nigali.
EXO 36:29 Augwaligo te be dage si aiyadu ugwaba digigo dąų wawalo holai. Augwaligo te tiwai sę te si dali si dage badu te tiwai yali.
EXO 36:30 Tama te be tudi badu muani ni name te 8 badi, tama te 8 ni name dabe page dąų walabo silva halobage dabe elaluali. Te silva halobage si te tigidali dodolabo ni name deli deli dologode elalua muani.
EXO 36:31 Tama augwaligo te obo tuabo bobage ni meba te ni akasgo nigai. Augwaligo te tǫ sese me badu te obo tuabo ni nogo a naga nigibadi, te obo me badu sese badu tuabo ni a naga nigiyu, te sia ge dega sigi pabo tudi badu obo tuabo ni a naga nigiyu yai.
EXO 36:33 Te ni name dabe tomode dąų walama tuabo ni dabe, augwaligo te be dolo usu nama bobage togai dao.
EXO 36:34 Tama augwaligo te be daga ni name dabe te golgo haluama, tama tigidali ni name deli delide te ring gol meba kęnama, te bobage ni dabego te be daga ni dabe kęani dąų walali. Tama augwaligo te ni name dabe me te golgo haluai dao.
EXO 36:35 Tama augwaligo te ugwa be tomode walabo dąį te gasa wiegi yai genuai ugwa me deli nigai. Tama augwaligo te sisi yai, me mama yai sipsip nisigo nigai hobigo te ugwa au ilai. Tama te sę mu koneai bidigo te mobo bidi ensel piksa noma te ugwade hobobolo pai dao.
EXO 36:36 Tama augwaligo te genuai dąį ugwa walabo pos me si me si te ni akasgo nigai. Tama augwaligo te pos dabe te golgo haluama, tama te ugwa walabo gol huk dabe te posba muai. Tama augwaligo te silva page dąų walabo halobage me si me si te pos dabe dodolabo madi nigai.
EXO 36:37 Tama augwaligo gasa wiegi yai genuai ugwa te ugwa be tųde muabo nigai. Tama augwaligo te gasagi yai hobi dabego bugagia au ilama, tama augwaligo te au yabo sisi yai hobi, me te mama yai hobi te sipsip nisigo nigai dao.
EXO 36:38 Tama augwaligo a naga pos nigilama, tama augwalide te huk dabe kęnama, tama te ugwa dabe walabo madi tama tiwai nigilai. Tama augwaligo te gol selama, te pos toboluba halubadi, tama te posba wadolabo ba dabe me tiai. Tama augwaligo a naga halobage bras, te pos dabe dodolabo madi te me nigai dao.
EXO 37:1 Te Besalel dali sę ebo bidi dabe augwaligo te bomai po muabo halobage te ni akasgo nigali, te aga bobage usu nama nedali, te 110 sentamita, tama aga genuai yali usu nama, te 66 sentamita, tama aga ugwadu me te usu nama, te tiwai naga te 66 sentamita naga tama nigalio.
EXO 37:2 Tama augwaligo te halobage te wiegi yai golgo te tomo badu me, te bulu badu me haluama, tama augwaligo bobage gol me deligo te halobage sesege badu bagulai.
EXO 37:3 Tama te ring gol me si me si te halobage tolabo nigali, tama te ring dabe te sągą me si me si tede kęnani, te me si me badu kęniyu, te me si te me badu kęniyu yai.
EXO 37:4 Tama augwaligo te bomai po muani halobage tolabo ni dage si te ni akasgo dulama, tama te ni si te golgo haluai.
EXO 37:5 Tama te ni dage si te ring dedage siba me badu me, me badu me palama muani, te halobage tolainogo tiwai.
EXO 37:6 Tama augwaligo te halobage po paliabo nai te wiegi yai golgo nigai, aga te dwai sę yali sęgę sela sąbo pesage dao. Te aga bobage usu nama usu sali, te 110 sentamita, tama aga genuai yali usu sali, te 66 sentamita tama nigai.
EXO 37:7 Tama augwaligo te gol selama, tama te hamago haluama, tama mobo bidi ensel si nigai. Te mobo bidi ensel si te halobage po paliabo nai nigali si badu dolaluai.
EXO 37:8 Tama te mobo bidi ensel si te me deli te dolo nogo badu dolaluyu, te me deli te pobase nogo badu dolaluyu yali. Augwaligo te mobo bidi ensel si nigibadi, tama te halobage po paliabo nai te deli nai tigi tiwai naga nigai.
EXO 37:9 Te mobo bidi ensel augwa siba digi ma tonononaluyu, tama aba te halobageba me tonononaluyu, tama augwali sigo bogo te dinigąluyu, tama te halobage po paliabo nai geme dualama elaluai.
EXO 37:10 Tama augwaligo tebol sai te ni akasgo nigali, tama bobage usu nama usu ni sali, te 88 sentamita, tama aga genuai usu sali, te 44 sentamita, tama ugwadu usu sali, te 66 sentamita, te tama tiai.
EXO 37:11 Tama te tebol augwaligo te wiegi yai golgo haluama, tama bobage golgo te sesege badu bagulai.
EXO 37:12 Tama te gol dage me augwaligo te ugwadu dai tigidali sesege badu kęnani, tama aga genuai usu sali, te 8 sentamita teba sabolali. Tama augwaligo te dwasianu golgo te tebol ugwadu dai sesege tigidali bagulama au yai dao.
EXO 37:13 Tama augwaligo ring gol me si me si nigilama, tama te tebol dage dabe me si me si te tebol sągą dabede kęnai dao.
EXO 37:14 Tama te ni tolaluali ring dabe te tebol tolobo nai augwaligo te sesegede pąde ugwadu daiba muai.
EXO 37:15 Tama augwaligo te tebol tolabo ni dage si te ni akasgo nigai, te si te golgo haluai.
EXO 37:16 Tama augwaligo te tebolde muabo pou me te doado bage dabe te wiegi yai golgo nigai. Te wain ąį ofa ilibo pou dabe, tama te plet dabe me, te kap dabe, me botol, te nai dabe tama te ofa yabo nai dao, tama augwaligo te nai dabe te wiegi yai golgo naga nigai.
EXO 37:17 Tialima, augwaligo te wiegi yai golgo te lam sole dabe tolaluabo nai nigai. Tama augwaligo te gol hamago haluama, tama te lam dodolabo madi te pesage nigilama, tama lam nogo dabe muabo digi te lam tolalubo nai elaluai. Tama augwaligo te ni duduli dabe te golgo nigilama, te lam tolaluabo nai au ilai. Augwaligo te deli tigi tiwai nai naga tigidali nigai dao.
EXO 37:18 Te lam tolaluabo naigo nogo ageali, te me sela me sela elaluali, te me sela me badu elaluyu, tama me sela te me badu elaluyu yai.
EXO 37:19 Augwaligo te tigidali nogo age deli deli te ni duduli sela, te ni amon duduli tiwaigo au ilai dao.
EXO 37:20 Tama augwaligo te lam tolaluabo nai au ilali, te ni duduli me si me sigo au ilai, tama te ni amon ni duduli tiwai tonobo ąǫ yalio.
EXO 37:21 Tama augwaligo te dwasianu ni duduli yabe dabe te lam ageali si si dologode nidigili pai dao.
EXO 37:22 Augwaligo te wiegi yai gol naga me dedeli selama, tama augwaligo te dabe nigilama, tama deli nai tiwai naga mu pedelai.
EXO 37:23 Tama augwaligo te gol nogo a naga olama me si lam genagi nigilama, tama selama, te lam tolaluabo naiba muainogo nigali, tama te lam genagi deli deliba muabo hobi, me te plet meba badi, te tama nai nigai dao.
EXO 37:24 Augwaligo te sęgę te 35 kilo elalubo te wiegi yai golgo te lam tolaluabo nai, me te aga muabo nai dabe tigidali nigai dao.
EXO 37:25 Augwaligo te ni akas selama, tama te denami ebo pauda ulabo alta nigai. Te tigidali sesege badu te deli tigi poai yali, te 45 sentamita usu naga tiwai, tama ugwadu usu sali te 90 sentamita dąį yali. Te altade te tiwai nai te bulmakau gąų me si me si augwaligo dulama, tama te deli deli te alta kele ni dagede muai.
EXO 37:26 Tama augwaligo te nai me si me si ugwadu bogo badu haluama, tama te gąų me si me si me te golgo haluai. Tama augwaligo te bobobage golgo te tigidali sesege bobegelama paliai.
EXO 37:27 Tama me badude augwaligo te ni palabo madi te ring si golgo nigali, te alta tolabo madi nigilama, tama gasa badu me tama tiali, tama augwaligo te ring me si me si te alta ugwadu sesegede muai.
EXO 37:28 Tama te alta ni palabo ni dage si augwaligo te ni akasgo nigilama, tama te ni si te golgo haluai.
EXO 37:29 Tama augwaligo te wel nigilama, te Genuai Bidigo nai dabe da olama sa muabo wel dao, tama te begelali, te sanda tiwai dolo mu yai. Tama augwaligo te wiegi yai paudago te wiegi yai denami yabo nai nigali, tama augwaligo bugagia taluai dao.
EXO 38:1 Te Besalel dali, te sę ebo bidi dabe dali, augwaligo te ni akas selama, te ofa ebo nai dabe ulabo alta sai nigai. Te alta sesegede te tigidali te deli tigi poai naga yali, te 2 mita 20 sentamita te usu tama yali, tama ugwadu usu sali, te 1 mita 30 sentamita, te tiwai usu sai dao.
EXO 38:2 Tama augwaligo te bulmakau gąų tiwai nai me si me si habu badu te ugwadu, te tiwai nai me si me si dulama, tama te gąų dabe te altade mu dąų wai. Tama te alta tigidali augwaligo te brasgo haluai dao.
EXO 38:3 Tama augwaligo te bras selama, te sia munama tolabo plet dabe badi, te dwasianu savol dabe me, te pou dabe badi, te age age yai na dabe me, tama te sia nogani keli sabo pou dabe, te tama nai dabe tigidali nigai.
EXO 38:4 Tama augwaligo te bras selama, tama te moni sawali bras nigiyu, polola polola pelama, tama te nai nigilama, tama te nai te alta halobage tomode elalumainogo eyu, muani.
EXO 38:5 Tama augwaligo te ring bras me si me si nigilama, tama te alta dage me si me si dage badu kęnai. Te ring dabe te ni munama, te alta tolabo digi nigai dao.
EXO 38:6 Tama augwaligo te alta tolabo te ni akas si dulama, tama brasgo haluai dao.
EXO 38:7 Tama augwaligo te ringba te alta si dali si badu muai. Te alta te augwaligo ni namego nigai halobage tiwai yali, tiali goli aga pagede te ni name meni yai.
EXO 38:8 Tialima, te Godigo ugwa be tų mabode sę ebo we dabe augwaligo te bras Besalelbolo mawai. Te bras te augwa gesabi subo dula dabe tiwai. Tama te sę ebo bidi dabego te bras selama, tama te wę pauabo genuai pou me deli nigibadi, te pou muabo page me deli nigibadi yai dao.
EXO 38:9 Augwaligo te Godigo ugwa be bagulabo obo ugwa nigali. Te sesege bogo badu bobobage usu sali, te 44 mita te usu tiwai.
EXO 38:10 Tama augwaligo te bras selama, te bidi sese pos nigibadi, te pos dabe page dodolabo halobage te bidi sese nigali, tama augwaligo te huk dabe, me te ba dabe te silva dabego nigai.
EXO 38:11 Tama augwaligo te deli tigi poai naga te me sesege badu nigai dao.
EXO 38:12 Tama te sia ge dulubo badu te name ugwa me deli walai elaluali, te ugwago bobage usu sali, te 22 mita elaluai, tama nogo si pos bras badi, te me nogo si te pos page dodolabo te halobage bras dabe elaluai. Tama te posde kęnabo dabe me, te ba me, te nai dabe augwaligo te silvago nigai.
EXO 38:13 Tama te giliga pedalu badu obo me te usu sali, 22 mita yai. Tų te obo badu elaluai.
EXO 38:14 Te obo me deli te sesege badu te tų sesegede te ugwa me deli walai elaluali, te ugwa aga bobage usu sali te 6 mita ma 60 sentamita usu sali tiwai yali, tama pos sela elaluali, me sela te pos dodolabo halobage nigai elaluai.
EXO 38:15 Tama augwaligo te deli tigi poai nai naga te gasa tų sesege obo badu nigai dao.
EXO 38:16 Augwaligo te gasa wiegi yai ugwa tigidali naga te obode walabo nigai.
EXO 38:17 Augwaligo te bras selama, tama te pos dabe page dodolabo halobage nigali. Tama augwaligo te silva selama, te huk dabe nigali, tama te pos dabe kęabo ba te nigai. Tama augwaligo te pos tobolude te silvago naga haluai. Tama te tigidali obo pos dabe augwaligo te ba silvago naga wadolai dao.
EXO 38:18 Tama augwaligo te obo tųde muabo ugwa wiegi yai mu nigai. Tama augwaligo te ugwade au ilibo nai hobolali, te haniani hobigo, tama te husugu sipsipgo, me te mama yai sipsip nisigo nigai hobigo hobolai. Te ugwago bobage usu sali, te 9 mita tama yali. Tama te ugwa ugwadu dai badu usu sali, te 2 mita 20 sentamita yali, te obo bagulali ugwa te tiwai nigai.
EXO 38:19 Tama augwaligo te bras halobage me si me side dolalubo te pos me si me side te ugwa walai. Tama te huk dabe me, te pos tobolu haluali nai me, te posba wadolali ba dabe me, te augwaligo silvago naga nigai.
EXO 38:20 Tama augwaligo te bras selama, tama te tǫba enebo bobage nil dabe nigai, te bomonama kekelama tama te ugwa be dolaluabo bono dąų waliyu, tama te ugwa be bobegelali obo dąų waliyu yainogo tiwai dao.
EXO 38:21 Tama augwaligo te tigidali nai nigali gol, me silva, me bras nedali, augwaligo te tobage wiegi yai kapago nigali nai te Genuai Bidigo ugwa bede muani nai dao. Te ugwa be da, te Godigo nogo si bomai po elalubo masigi pedai si elalubo be dao. Tama Mosesgo digi te Livai dabe augwalibolo te nai nedao po olama, tama augwaligo nedelama, tama nisu naga gol elaluali te augwaligo asęani. Itama, te pris Arongo ogwago te Livai dabego te sę ebo tonaluai dao.
EXO 38:22 Tama Besalel, te Urigo ogwa, tama Uri te Hurgo ogwa, te Juda hani dao. Tialima, Besalelgo te Genuai Bidigo Mosesbolo wali po gilama te tigidali nai nigibo sę yalio.
EXO 38:23 Tama Oholiap te Ahisamakgo ogwa, te Dango hani bidi dao. Te Oholiapgo te wiegi yai masigide asębo po togobo sę konebadi, tama agai te haniani gasa nai dabe nigibo sę me koneai. Tama agai te haniani gasa hobi dabego te au ilibo sę me koneyu, te sisi yai hobi, me te mama yai hobi, te tobage sipsip nisigo nigai hobigo te au dabe ilibo sę koneai dao. Agai te Besalel dologode bidiyu, aga tau sali.
EXO 38:24 Augwaligo te we bidigo te Godigo ugwa be sę emainogo sela asali nai dabe te tigidali gol nedai, tama te nai dabego aga sęgę da te e tiwai, te 1,000 kilo usu dao.
EXO 38:25 Tama augwaligo te silva nedali, tama te naigo sęgę te tiwai, te bidi sese hauwa, te 3,430 kilo sęgę yai. Te silva te bukude augwa nogi asęna elaluali bidi dabego sela asai. Te bidi dabego kibu be te bidi sese delidu ugwaba holali bage, augwali deli deligo te silva monego te mone ge a naga muani. Te bidi dabe te bidi sese hauwa mu, te 603,550, te tama bidi te mone muna muna pai dao.
EXO 38:27 Tama augwaligo te silvade sęgę 3,400 kilo yali, te Godigo ugwa be dili te dąų walabo nai nigali, tama te pos dabe page dodolabo halobage me, te Tedali Gasagi Yai Be Habu me, te Tedali Gasagi Yai Mu Be Habu me, te madi si te dualabo madi nai nigai. Te bidi sese a naga te 100 halobage elaluai. Te silva dage halobage deli deligo sęgę te 34 kilogram elaluai dao.
EXO 38:28 Tama me badu te munaluali silvago sęgę te 30 kilo usu tama elaluai. Tama te munaluali silvago augwaligo te huk nigilama, tama te pos dabede wadolama, tama te pos dabe ugwadu haluainogo tiwai sę yai dao.
EXO 38:29 Te augwaligo Genuai Bidiba mani tigidali brasgo sęgę te bidi sese hauwa mu, 2,425 kilogram igi pai dao.
EXO 38:30 Tama augwaligo te bras selama, tama te pos dabe dodolabo halobage nigali, tama te Godigo ugwa be tųde muainogo yali nai me, tama alta dali te alta tomoba muani pololai sawali bras, te nai dali elaluali, tama te altade sę yabo nai dabe tigidali nigai dao.
EXO 38:31 Tama augwaligo te ugwa be bobegelabo te pos bulabo halobage dabe, me te obo bagulali madi tų nigabo nai dabe nigai. Tama augwaligo te tǫba enabo bobage nil dabe, te ugwa be bomonama kekalumainogo dąų walobo nai nigiyu, tama te ugwa be bobegelabo nai me nigai dao.
EXO 39:1 Augwaligo te sisi yai sipsip nisi, me mama yai sipsip nisigo nigali hobi te augwaligo selama, tama te gasa wiegi yai ugwa te pris dabe augwaligo gudabo ugwa au ilama, te pris dabe augwaligo te Tedali Gasagi Yai Be Habu, te be habuba pelama, te pris sę ebo sogo te ugwa muani. Tama augwaligo te Genuai Bidigo Mosesbolo wali po gilama te Arongo pris sę eyu muabo ugwa nigai dao.
EXO 39:2 Augwaligo te wiegi yai ugwago te tobolu bidi pris gudabo wiegi yai ugwa nigilama, tama augwaligo te gol hobigo au ilama, tama te sisi sipsip nisigo, me mama sipsip nisigo nigai.
EXO 39:3 Augwaligo te gol hamago haluama, tama te pepa yabe tiwai pedelai. Tama te gol te hwą gego bugagia pedama, tama hobi tiwai te golgo nigali. Tama augwaligo te ugwa hobolo dwasianu gol hobi tiwai dali, te gasa haniani hobi dabe dali gelali, tama sisi hobigo me mama hobigo badi, tama togolama hobolai, te tobage sę mu koneai bidigo ebo sę tiwai naga tama yai.
EXO 39:4 Tama augwaligo te nagede abebolabo kukulu si te ugwago nigilama, tama ugwago digi ma hobolai.
EXO 39:5 Tama augwaligo wiegi yai ugwa pedai selama, tama te sesegedu bagulabo kukulu, te haliga tiwai kukulu te ugwago nigai. Tama augwaligo te gasa haniani hobi dabe selama, tama tede au ilali, te Genuai Bidigo Mosesbolo wali po gilama te tiwai sę yai dao.
EXO 39:6 Tama augwaligo te masigi konilian si te sisi ela munama, tama Jekopgo ogwa 12 te augwali nogi te masigi side asęnama togwali. Tama te masigi si augwaligo te dwasianu golde kęnanio.
EXO 39:7 Tama augwaligo te masigi name si te nagede muani te ugwago nigali kukulude kęnani, te Genuai Bidigo Mosesbolo wali po gilama tama tiai. Tama te masigi sigo te Israel hani 12 te hani sa muai dao, te Genuai Bidigo augwalide sesemane sogo homugo kone palomainogo eyu yali.
EXO 39:8 Tama augwaligo te hagawiade muabo ugwa te tobolu bidi prisgo gasa ugwa te tiwaigo naga nigai, te tobage sę ebo koneai bidigo ebo tiwai naga nigai. Augwaligo te ugwa te golgo nigai hobigo me, te gasa haniani hobigo me, tama au ilama, nigalio.
EXO 39:9 Tama augwaligo te ugwa bobage yali me, te genuai me, te bugagia tomode sugunama, te usususi yali te nedali, 22 sentamita teba sabolai.
EXO 39:10 Tama augwaligo te gasa wiegi yai masigi hani me si me si kęnani. Te hasia polali hani augwaligo te masigi hani rubi, me topas, me ganet, te tama masigi bolo podolama kęnai.
EXO 39:11 Tama te hani side augwaligo te masigi emeral, me sapaia, me daimon, te tama masigi dabe kęnai.
EXO 39:12 Tama te hani me sela te masigi tekois, me aget, me ametis, te tama hani masigi augwaligo kęnani.
EXO 39:13 Tama te hani me si me side te augwaligo te masigi hani beril, me konilian, me jaspa, te tama masigi augwaligo kęnani. Augwaligo te deli deli masigide te dwasianu gol au ilabo dąų walobo nai muani, tama nosali augwaligo te masigi dabe te ugwa daide, kęnai dao.
EXO 39:14 Te tigidali masigi nogo si olama sągą me badu si, te masigi deli delide augwaligo te Jekopgo ogwa nogi deli deli asęsę pali, te tigidali Israel hani sa muyu, tiai dao.
EXO 39:15 Tama augwaligo te wiegi yai golgo te sen si nigali, te hagawiade muabo ugwa dąų olama, tolalumainogo tama tiwai dao.
EXO 39:16 Tama augwaligo te au ilibo gol si nigibadi, te ring gol si me nigai. Tama te ring si te hagawiade muabo ugwa dage si badu te nai muai.
EXO 39:17 Tama augwaligo te sen gol deli deligo sabi te ring sigo kęnai dao.
EXO 39:18 Tama augwaligo sen gol deli deligo gasa sabi te au yai gol sigo kęani, tama augwaligo te au yali nai te ugwa tolalubo kukulude kęnai dao.
EXO 39:19 Tama augwaligo te ring me si ma nigilama, tama te sabi si dabe aiyadu te hagawiade dąų wali, te genuai ugwa pąde te kęnai dao.
EXO 39:20 Tama augwaligo te ring me si ma nigali, tama te kukulugo te ugwa kęalubo madi kęniyu, te gasa wiegi yai kukulugo te tabi bagulali pąde kęai.
EXO 39:21 Tama augwaligo sisi yai string bono sobadi, tama te ring si te hagawiade elalubo ugwa te ring si sobadi elama, te genuai ugwaba kęai. Tama te hagawiade muani ugwa te kukulude dąų olama, tama me tulaluidali weyu dąų wai. Augwaligo te Genuai Bidigo Mosesbolo po walali gilama wali peyu, te tiwai sę yalio.
EXO 39:22 Tama augwaligo husugu hobi selama, tama te bobage gudubo ugwa te holobo ugwa dali daganama hobolalio.
EXO 39:23 Tama augwaligo te tobolu muabo madi sesege badu te dedage dąų olama hobolali, te ugwa dedage peda pelama, genuai me idali weyu.
EXO 39:24 Tama augwaligo gasa haniani hobi dabe selama, tama nai meba te ni pomigranet du tiwai hobolai. Tama augwaligo dwasianu belo te wiegi yai golgo nigai. Tama augwaligo te ni pomigranet du me, te belo me, te tobolu bidi prisgo gudabo ugwa aiyadu sabide walama hobolai. Augwaligo te deli deli gol belo te ni pomigranet du dabe tomo tomode te walalumainogo hobolama walai. Augwaligo te tiwai sę te Genuai Bidigo Mosesbolo po wali gilama tama tiai dao.
EXO 39:27 Augwaligo te Arongo holobo ugwa me, te agai ogomanigo holobo ugwa me nigibadi, tama te tobolude bagulabo ugwa pedai dabe me, tama te pęwadage belibo trausis dabe me, tama te mǫ tiwai kukulu dabe me, te tama nai nigai. Te augwaligo wiegi yai name ugwa selama, tama te nai dabe nigai. Tama augwaligo gasa haniani hobi selama, tama te mǫ tiwai nigali kukulude hobolama, wiegi yai au ilali, te Genuai Bidigo Mosesbolo po wali gilama wali peyu, te tiwai sę yai.
EXO 39:30 Tama augwaligo te medal te wiegi yai golgo nigali, tego te het pris bidi te Genuai Bidigo bidi da olama sa muani. Augwaligo po me deli agade asęyu te tiwai po wai, “Te Genuai Bidigo Tedali Gasagi Yai Nai da.” Te po wai.
EXO 39:31 Tama augwaligo husugu yai hobi bono selama, tama augwaligo te tobolude muani ugwade te medal kęnani, te Genuai Bidigo Mosesbolo wali po tiwai gilama tama tiwai sę yai dao.
EXO 39:32 Tama te ugwa be sę yali tigidali silai. Tama te Israel dabe augwaligo te Genuai Bidigo te Mosesbolo po wali gilama te tigidali nai nigalio.
EXO 39:33 Tama augwaligo te nai dabe te Moses bidiboba sela pai. Augwaligo te ugwa be dali, te aga doado bage dabe badi, tama sela pali, tama te huk dabe me, te be daga ni name dabe me, tama te ni name tuabo ni dabe me, te pos dabe me, tama te ni name dodolabo halobage dabe, te tama nai dabe sela pali,
EXO 39:34 tama te ugwa be haluabo genuai nai augwaligo te omai sipsip waligo nigali, tama te haluabo nai me augwaligo te tamu ąįde elalubo hasa sikau waligo nigali, tama te Tedali Gasagi Yai Mu Be Habu te geme dualabo genuai ugwa walobo nigibadi yalio.
EXO 39:35 Tama augwaligo te dąų walali bomai po muani halobage me, te aga sęgę sela sąbo madi te po paliabo nai dali elalubo me sela asai. Tama te halobage tolobo ni si me sela asobadi yali,
EXO 39:36 tama te tebol me, te tebolde mubo doado bage dali, tama te God gedude te tebolde mubo te bret me, te augwaligo sela pai dao.
EXO 39:37 Tama augwaligo te wiegi yai golgo nigai te lam dabe tolalubo nai me, te aga doado bage dali me, te lamde muabo wel dabe dali, sela peyu,
EXO 39:38 te alta gol me sela pai. Tama augwaligo te Godigo nai sa muainogo te wel sela pali, tama denami ilibo pauda me, tama te ugwa be tųde mubo ugwa me sela palio.
EXO 39:39 Tama augwaligo te brasgo nigai alta me, te pololai sawali bras te alta halobage tomoba muabo nai, te dali sela pai, tama te alta tolobo ni dabe me, tama te tigidali altade nai dabe badi, tama te wę paubo pou me, te aga page dali, sela pali.
EXO 39:40 Tama augwaligo te ugwa be bobegelabo obo ugwa dabe badi, te pos dabe dali, tama te pos dodolabo halobage me, te obo tųde muabo ugwa me, te obo dąų walabo bono dabe dali, te tǫba enabo bobobage nil dabe, te bono bomonobo nai dabe badi, tama nai dabe sela pai. Augwaligo te ugwa be tomode sę yabo nai dabe tigidali sela pai.
EXO 39:41 Tama te pris dabego te Tedali Gasagi Yai Be Habu tomoba pelama, te pris sę eyu, te gudabo wiegi wiegi yai ugwa dabe, te me augwaligo sela pai. Te ugwa dabe te Godigo te pris Aron aga ogomani dabe dali augwaligo naga te ugwa gudama, te pris sę emainogo sa munama, te tedali gasagi yai ugwa dabe elalumainao wali.
EXO 39:42 Te Israel dabe augwaligo te tigidali sę yali, te Genuai Bidigo Mosesbolo wali pode naga te tiwai gilama sę yai dao.
EXO 39:43 Tialima, Mosesgo augwaligo te nigali nai tigidali bugagia tonono bilama, osola sulama, tama agai koneani, te Genuai Bidigo agabolo po weyu, te nigao wali nai te tigidali te tiwai naga nigai. Agai sulama, tama agai augwalibolo te po wai, “Genuai Bidigo wiegi yai sę bugagia mu dagego te sę yalio. Tama tibaso, eno homugo agai dage dali dwagi yai sę emainao,” Mosesgo te po wai.
EXO 40:1 Tama Genuai Bidigo Mosesbolo te po wai,
EXO 40:2 “Odao, te hasia nanobo polua, te dei deli wabode, te dagego eno ugwa be sę yao.
EXO 40:3 Tama dagego te bomo yai po nogo si elalubo te halobage selama, tama te ugwa be tomoba munama, tama te halobage dualiyu, te genuai name ugwa walao.
EXO 40:4 Tama te tebol tomoba sela pelama, tama te nai dabe ugwadu daiba manao. Tama te lam dabe tolalubo nai sela aselama, tama te lam dabe te aga nogoba muao.
EXO 40:5 Tama te denami ebo pauda ulubo alta gol te bomo yai po haluali ugwa te sesege e bulu badu pąde muao. Tama te ugwa be tųde ugwa walao.
EXO 40:6 Tama te ofa dabe yabo genuai alta te ugwa obo tų pąde muao, te mesalode.
EXO 40:7 Tama te wę pauabo genuai pou te mesalode muao, te ugwa be de te alta si tomode, te ąį pągąnama, muao.
EXO 40:8 Tama te ugwa be bagulubo obo te dodolobadi, tama te genuai ugwa te obo tųde walobadi yao.”
EXO 40:9 “Tialima, nosali te wel selama, te eno nai dabe sa muyu, tama te ugwa beba geliyu, te tomode munalubo nai dabe tigidaliba gelao. Te tiwai naga te dagego eno nai naga tigidali da sa muyu, tama tedali gasagi yai mu elalumainao.
EXO 40:10 Tama te bras altaba te wel geliyu, tama te sę yabo nai tigidaliba tiyu, tama te alta me te Genuai Bidigo nai naga dao homu eyu, tedali gasagi yai nai elalumainao.
EXO 40:11 Tama te tiwai naga te wę paubo genuai pouba me tiyu, tama aga te pageba me, tama te me te eno nai dao.”
EXO 40:12 “Nosali nago te Aron aga ogomani augwali dali te ugwa be tųba sela pelama, tama augwali tede wę paumainao.
EXO 40:13 Tama te tobolu bidi pris ugwa te Aron tigiba muyu, te wel agaba sa muyu gelibadi, tama agai te eno te pris sę tiwai emainogo tiwai yao.
EXO 40:14 Tama nosali nago aga ogomani augwali me te pąba sela aselama, tama te pris au dobage augwali tigiba muao.
EXO 40:15 Tama augwali te welgo mumuyu, te nago augwa aya sa muani gilama tiao, tama augwa enade te pris sę emainogo yao. Nago augwali te tiwai te welgo sa muao, tama nosali augwa digi, me te augwa hani dali, augwa te pris sę sesemane bidada pabo sogo te sę ela pomainao.” Genuai Bidigo te po wai dao.
EXO 40:16 Tialima, Mosesgo te po odama, tama Genuai Bidigo agabolo te po wali te tigidali sę yai dao.
EXO 40:17 Tama te hasia polua deli, te dei deli wabode, te kibu be side te augwaligo te Isip bulu taga soali, te bodolu nosali pedalobo sogo, augwaligo te Godigo ugwa be sę eyu yai dao.
EXO 40:18 Te augwaligo te ni name dabe bulabo te halobage dabe selama, te tǫba munama, tama te be daga ni name dabe te halobage tomoba bulai, tama te ni name te ni name tuabo bobobage ni dabe munama, tama te genuai ugwa walabo te pos dabe bulai.
EXO 40:19 Tama augwaligo te genuai ugwa te ugwa be pedu dili ugwadu munama, tama te halubo nai sela selago te ugwa be haluali, te Genuai Bidigo te Mosesbolo wali po gilama te tiwai sę yalio.
EXO 40:20 Tama augwaligo te Godigo bomai po asęai masigi pedai si selama, tama te masigi si te dąų wali bomai po muabo halobage tomoba muai. Tama augwaligo te ni dage si te halobage tolabo madi nigilali dedage me si me siba muani, tama te halobage po paliabo nai, te da te sęgę sela sąbo madi, te halobage daiba ugwadu muai dao.
EXO 40:21 Tama te halobage te ugwa be tomoba munama, tama te halobage aga digi be habu elalumainogo eyu, augwaligo te moni wiegi yai dąį ilibo name ugwa walama, te halobage te Tedali Gasagi Yai Mu Be Habu tama elaluali. Augwaligo te tiwai sę yali, te Genuai Bidigo Mosesbolo po wali gilama tama tiai dao.
EXO 40:22 Tama augwaligo te tebol te dąį ilibo ugwa e badu muyu, te Tedali Gasagi Yai Be Habu me badu tomoba muanio.
EXO 40:23 Tama augwaligo te bret selama, te Genuai Bidigo gedude te tebolba muai, te Genuai Bidigo Mosesbolo po wali gilama te tiwai sę yai.
EXO 40:24 Tama te lam dabe tolalubo wiegi yai nai te me badu te tebol dolo si muanio, te Tedali Gasagi Yai Be Habu tomode.
EXO 40:25 Tama augwaligo te lam dabe te lam dabe tolaluabo nai te nogo age yaliba muani, tama te lam dabe te Genuai Bidi gedude udulali. Augwaligo te tiwai sę yali, te Genuai Bidigo Mosesbolo po wali gilama te tiwai sę yai.
EXO 40:26 Tama augwaligo te alta gol te Tedali Gasagi Yai Be Habu tomoba muyu, te dąį ilibo wiegi yai name ugwa e badu muyu, tama muani.
EXO 40:27 Tama te altade augwaligo te denami ebo nai pauda ulali, te Genuai Bidigo po Mosesbolo wali gilama tama tiai.
EXO 40:28 Tama augwaligo te ugwa be tųde te genuai name ugwa walai dao.
EXO 40:29 Tama nosali augwaligo te ofa ebo moni alta te ugwa be tų pąde muani. Tama te altade augwaligo te siago domainu tigidali ulubo kibu bulmakau me, te wit me, augwaligo ofa yali, te Genuai Bidigo Moses dali po wali gilama tama tiai dao.
EXO 40:30 Tama augwaligo te wę pauabo genuai pou te alta de te ugwa be si tomode te ąį pągąnama muai dao.
EXO 40:31 Tialima, nosali Moses me, Aron me, te Aron aga ogomani me, augwali nogo sągą te ąįde telawai dao.
EXO 40:32 Te augwali te Godigo ugwa be tomoba me te altaba painogo, augwaligo hasia bolo nogo sągą ąįgo tedelama, pai. Augwaligo te Genuai Bidigo Mosesbolo po wali gilama tiai.
EXO 40:33 Tama augwaligo te ugwa be dali, te alta me, bagulabo obo dodolama, tama augwaligo te obo tųde me te ugwa walali. Tama Moses dali, te bidi dabe me, augwaligo te tigidali sę yali, tama te ugwa be sę yani te sę tigidali silai.
EXO 40:34 Tama te ugwa be sę silibo si, teda Genuai Bidigo pǫgo te ugwa be mesega sagaselama, tama aga genuai bomo yai ulago te be pągąna sai dao.
EXO 40:35 Tama tiyu, Moses te ugwa be tomoba pabo te usu me ebe, magi baso meni, te Genuai Bidigo pǫ me, te ula me, te ugwa bede elaluyu, tama te be pągąna sai dao.
EXO 40:36 Tama nosali te pǫgo te Godigo ugwa be taga pabo sogo da, teda te Israel dabe augwa tigidali doado bage selama, tama te pǫ pabo wali pai dao.
EXO 40:37 Tiali goli, te pǫ me te ugwa be ugwadu me bidibaso da, teda augwaligo te bulu me taga pabeo. Augwaligo suali, te pǫgo te ugwa be taga pabosi, teda augwali me hogodolama, tama te pǫ wali peyu yai dao.
EXO 40:38 Te Genuai Bidi bidibo pǫ te ugwa be ugwadu tigidali sogo bidai. Te siade augwaligo te pǫ suali, tama hulide te pǫde sia elalubo suai. Te ela asali sę tiwai tama me ela pidubadi, te Genuai Bidigo augwali mawainogo yali te tǫ pedaiba augwali sabolama bidigi pai dao.
LEV 1:1 Genuai Bidi aga Ugwa Be tomode bididu, te Moses asao olama i walima, te agabolo te po wai,
LEV 1:2 “Te Israel we bidiba e tiwai po wao,” wali, “‘Te dage bidi me deligo te Genuai Bidiba ofa me deli selasa asainogo ebaso da, teda agai te kibu bulmakau me deli, ma kibu sipsip me deli, ma meme kibu me deli, te sela asobo usu dao,’ tama po wao,” wali.
LEV 1:3 Tama Genuai Bidigo Mosesbolo ma walama, te Israel dabebolo e tiwai po walao po wali, “‘Te bidi me deligo te isiba tigidali ulama dabo ofa ebo bulmakau sesebaso da, teda agai te bulmakau omai wiegi yai mu sao, te aga tigide keni keni pobolo meni yai sesao. Te bidigo homugo te Genuai Bidigo agaba bugai haliga emaina homu eyu da, teda agai te tiwai ofa tama yao. Agai te Godigo Ugwa Be sunumi badu te bulmakau selasa aselama,
LEV 1:4 tama te bulmakau toboluba nogo muao, teda te bulmakau te bidi hasegelama tama te bidigo sęgę dabe sela sąyu, Godigo te ofade bugai haliga yaibao.
LEV 1:5 Tama te Genuai Bidigo gedude, te bidigo te bulmakau elao, tama te pris dabe, te Arongo hani dabego, te bulmakau kaneme Genuai Bidiba ofa yao. Augwali te Ugwa Be sunumi pąbadu elalubo alta badu pelama, te kaneme te alta sabi dage me si me si te badu sąyao,’” wali.
LEV 1:6 “‘Tama nosali te bidigo te bulmakau tigi wali dagalama, te aga mi dabe tologao.
LEV 1:7 Te kau aga haliga me sągą ąį bugagia tela yao. Te pris dabego te altaba isi dabe munama, te isi udulao. Te augwaligo te kau tobolu me, ili me tigidali mi dage te isiba muao, te isigo tigidali dela silimainogo ilama, te keli hogomu naga elalueibao. Tama Genuai Bidigo te ofa denami ebo odama, te aga godolo homu elama bugai haliga yaibao.’”
LEV 1:10 “‘Bidi me deligo te ofa yabo sipsip ma meme sesebaso, agai te omai sipsip ma omai meme wiegi yai mu sesemainao, te keni kenigo aga tigi dolisąwai sela pao.
LEV 1:11 Tama te Genuai Bidigo gedude agai te sipsip ma meme te not badu altade elao. Tama te pris dabego te sipsip ma meme kaneme selama, te alta dage me si me si pedai badu sąyao,’” po wai dao.
LEV 1:12 “‘Tialima te bidigo te kibu mi togolama, te kibu haliga me sągą bugagia ąį tedelama, te pris me deligo te tobolu me ili me te kibu pedai tigidali te alta siaba muao. Te prisgo Genuai Bidiba te ofa menama, te isigo tigidali dela silimainogo elama, te keli hogomu naga elalumainogo yao. Tama Genuai Bidigo te ofa ulubo denami ebo odama, te agai homu godolo elama, teba bugai haliga eyu yaibao.’”
LEV 1:14 “‘Te bidi me deligo te Genuai Bidiba ofa yabo ba me deli sesainogo eyu da, teda te tobage ba me deli sela asao, te ba nogi balus, ma ba hi te tobage ba prisba sela asao,’” wai dao.
LEV 1:15 “‘Tama prisgo te ba hi altaba sela pelama, te aga ba dogoni pobegelama isaibao. Te agai te ba hi tobolu togolama, te tobolu te alta saiba ulao. Te ba hi kaneme te alta bogo badu gegeli pao.
LEV 1:16 Agai te ba hi nisi poabadi, te ba dogoni nai mubo tibu me te selama, te giliga pedalu badu alta te keli mubo badu muao.
LEV 1:17 Nosali prisgo te ba hi bogode tola selama, te aga tigi togwao, tialima te bogo mu togwa sągio. Agai te isigo tigidali domainogo yao, te keli naga elalumainogo ilao. Agai te tiwai ebaso da, teda Genuai Bidigo te ba ofa yali denami ebo odama, te aga homu godolo elama, te bugai haliga eyu yaibao,’” wali.
LEV 2:1 Tama Godigo Mosesbolo walama, te Israel dabebolo e tiwai po walao po wali, “Te bidi me deligo te Genuai Bidiba te wit ofa yabo homu ebaso da, teda agai te wit wale bo sela sąnama, te aga nai ge naga selama, te wiegi yai plaua mu nigilama, te plaua sela asao. Tama agai te ni oliv wel te plauaba gelama, tama te wiegi yai denami ebo pauda me te plaua ugwadu daiba munama,
LEV 2:2 te Arongo hani dabe, te pris dabeba sela pao. Te pris me deligo nogo te plauaba munama, te plaua dali wel dali si te dwasianu pedai siyu, tama te denami pedalubo pauda tigidali me selama, te altaba ulao. Te dwasianu plauago tigidali plaua te bidigo Genuai Bidiba dąį ilibo ofa mu ebo ofa tiwai dao. Te wit ulubo ofa denami Genuai Bidigo odama, te agai godolo homu elama, bugai haliga yaibao.
LEV 2:3 Te me badu elaluali plaua te pris dabego dao. Te plaua te pris dabego witde sali te bidi dabego Genuai Bidiba ofa yali nai, tama te pris sę isąwai bidigo sabo te habu mu yai dao,” wali.
LEV 2:4 “Dagego te nai ulubo be nogi aven tede te bret ulama, te Genuai Bidiba ofa yabo bret dage saiba wida, teda te bret dagego te yis dali nigilamuo. Dagego te plaua selama, te oliv ni wel dali taluama nigao, te dagego bret nigilama ofa yao. Te dagego bret nigibo hagela homu ebaso da, teda dagego te bisket naga nigilama, te ni oliv welgo piligilao.
LEV 2:5 Dagego te ofa yabo plaua praipende praim eyu da, dagego te yis meni yai wiegi yai plaua mu siyąo. Te dagego te ni oliv wel te plaua dali talu bolo elama, te praim yao.
LEV 2:6 Te dagego te plaua dwasianu dwasianu miminama teba wel gelama, te Genuai Bidiba ofa yao,” te po wai.
LEV 2:7 “Te dagego ofa yabo bret nigilama, te genuai sospen senede dagego ulainogo da, teda dagego wiegi yai plaua mu te yis meni yai selama, te ni oliv wel dali belegelama ulao,” wali.
LEV 2:8 “Ulama, silama da, teda dagego te bret ma plaua te ofa tiwai Genuai Bidiba selasa pelama, te pris me deliba mao. Tama prisgo te altaba sela paibao,” wai.
LEV 2:9 “Nosali prisgo te dwasianu pedai bret ma plaua te dagego Genuai Bidiba ofa yali nai tigidali dąį ebo ofa mao, agai te alta siaba ulaibao. Tialima Genuai Bidigo te ofa denami ebo odama, te agai godolo eyu, bugai haliga mu yaibao,” wai dao.
LEV 2:10 “Te bret ma plaua me, badu elaluali da, te pris dabe augwa nai dao. Te bret ma plaua te pris dabe augwa tueinu saibao, te Genuai Bidiba ofa yali nai. Tialima, te pris sę isąwai olo bidi dabede te habu mu selai dao.”
LEV 2:11 “Dagego ofa ebo bret ma plauaba te yis munama, te Genuai Bidiba me selasa pigio, magi baso meni, te yis ma hani te ofa dabeba musįama, te Genuai Bidiba ofa mayu, te siaba ulubo ofa, te habu mu selai dao,” wai.
LEV 2:12 “Dagego te yis ma hani te hasia polasa gide sabo wit dali munama, te Genuai Bidiba ofa igi peyu selasa pao. Te usu dao,” wali. “Tiali goli te yis ma hani elalubo nai yai baso da, teda dagego te Genuai Bidiba wiegi yai denami iliyu, isiba domainogo ulubo altaba me ulamo dao.
LEV 2:13 Te dagego wit ulubo ofa ebo side tigidali sogo tamu muao, magi baso meni, tamugo dagego te God dali dąų walali bomai po dąį ebo tiwai ebao. Te dagego te duga God dali dąų wali bomai po gegeda pidali weyu, te tigidali ofade dagego tamu naga mudao. Dagego te ofa me delide tamu mubo me gegeda paligio. Mu menio,” wali.
LEV 2:14 “Te dagego gide polasa ina yani wit selama, te Genuai Bidiba ofa yainogo da, teda dagego te nai ulubo madi avende bolo ulama, te mimia sanama, te dwasianu kakali ilama, nosali te Genuai Bidiba selasa pabo usu dao.
LEV 2:15 Te wit ulubo ofade dagego te oliv wel me te wiegi yai denami ebo pauda me muao,” te po wali.
LEV 2:16 “Tama prisgo te wit pedai dwasianu me wel me selama, te wiegi yai denami pedalubo pauda te tigidali selama, te dagego ofa dąį ilama te ulao. Te Genuai Bidibolo mabo ofa eyu isiba ulubo nai dao.”
LEV 3:1 Te Godigo Mosesbolo walama, te Israel dabebolo te tiwai po wao po wai, “Te bidi me deligo Genuai Bidi dali deli haliga ebo ofa yainogo, te agai kibu bulmakau ofa yainogo ebaso da, teda agai te kau kibu omai ma so kau kibu te wiegi yai mu aga tigide dwai keni kenigo dolisąwai selama, ofa ebaso, usu dao.
LEV 3:2 Te Godigo te Israel dabe dali deliba sisinibo Ugwa Be sunumiba asama, tama te bidigo nogo te kibu kau toboluba muyu bolo elama, te nosali agai te ela muao. Te pris dabe, augwali te Arongo hani dabe, augwaligo te alta bogo me si me si badu te kau kibu kaneme sąsągą bilao.
LEV 3:3 Te bidigo te kau kibu delage me badu selama te Genuai Bidiba mayu te pris dabego ofa tiwai ulumainao. Agai te haligade ili dabe sao,
LEV 3:4 tama te si wabo kibu homu dali te ili me te polalubo dini homu te wiegi yai me badu sao. Agai te namba wan homu me te namba tu homu si dali te sobadi yao.
LEV 3:5 Tama pris dabego te nai dabe te altaba siaba tigidali ulama dela silibo ofa dali ulao. Tama Genuai Bidigo te ofa ebo denami odama te aga godolo elama bugai haliga tede yaibao,” wali.
LEV 3:6 “Te bidi me deligo te sipsip kibu ma meme kibu selama, te Genuai Bidi dali deli haliga ebo ofa yabo homu ebaso da, teda agai te omai kibu sipsip ma so kibu sipsip, ma te meme kibu omai ma so kibu meme somainao. Tiali goli, agai te kibu sipsip ma kibu meme te wiegi yai mu te keni kenigo tigi me dolisąwai sobaso da, te usu dao.
LEV 3:7 Te bidigo te sipsip kibu wai me deli ofa yai hagede eyu da, teda agai Genuai Bidigo gedude selasa asao.
LEV 3:8 Tama agai nogo te sipsip kibu toboluba muyu bolo elama, tama nosali agai sipsip kibu te Godigo Ugwa Be gesabidi badu pąde ela mubaso usu dao. Tama pris dabego te kibu kaneme te alta bogo me si me si badu sąsągą bilao,” po wai dao.
LEV 3:9 “Silama da, teda te bidigo te kibu sipsip delage me badu selama, te Genuai Bidiba mao, te pris dabego te ofa tiwai ulaibao. Agai te sipsip ili tigidali me, te danu badu elalubo genuai ili me sobadi yao. Agai te danu te tudi dili pageba mu togogiluao. Tama agai te haligade ili elalubo tigidali sao.
LEV 3:10 Tama agai te si wabo hobuludu te ili dali sobadi, te sipsipgo wiegi yai te namba wan wabo homu lewa me sao. Te namba wan lewa homu, me namba tu homu lewa dali tama sabo usu dao.
LEV 3:11 Tama prisgo te nai dabe te alta sai daiba ulao, te Genuai Bidiba ofa tiwai dao.”
LEV 3:12 “Bidi me deligo te kibu meme ofa yainogo eyu da, agai te Genuai Bidigo geduba selasa pao,” wali.
LEV 3:13 “Tama agai te meme kibu toboluba nogo muyu bolo elama, tama agai te meme kibu te Genuai Bidigo Be sunumi pąde ela muao. Tialima, te pris dabego te kibu kaneme te alta bogo me si me si badu sąsągą bilao,” po wai.
LEV 3:14 “Te bidigo te kibu meme delage meba selama, te Genuai Bidiba mao, te pris dabego ofa tiwai emainao. Agai te haligade elalubo ili dabe tigidali sao,
LEV 3:15 te namba tu homu lewa dali te ili dabe me te namba wan homu lewa wiegi yai me sao. Agai te namba wan homu lewa me namba tu homu lewa dali sobaso, te usu dao.
LEV 3:16 Tialima, prisgo te nai dabe selama, te alta sia daiba munama, te ofa tiwai yao, te Genuai Bidigo homu godolo elama, bugai homu yaibao. Te ili tigidali Genuai Bidigo naga dao.
LEV 3:17 Te dage Israelgo te kibu ili ma kaneme munu me tugio. Habu mu dao. Dage me te nosali pedalubo hani wąį dabego te bomai po sesemane wali pidubadi geao. Te dage menaba bidigi pali bulude me te bomai po tagaligio, dagego te bomai po wali pao,” te po wai dao.
LEV 4:1 Genuai Bidigo Mosesbolo walali,
LEV 4:2 te Israel we bidi dabebolo te tiwai po walomainogo yali, “Te bidi me we me deligo te bugagia homu kone palisąma, te Genuai Bidigo bomai po bolobaso da, teda agai sęgę sobao. Tama tibaso, aga te sęgę sela sąbo ofa ebaso usu dao.”
LEV 4:3 Te Mosesgo po ma weyu, te tama po wali, “Te hetprisgo digi sęgę sali da, aga te tiali kolesaga dagede te tigidali we bidiba te sęgę ilibao. Tialima, aga te ogwa bidi kau kibu omai wiegi yai mu te tigide keni kenigo dolisąwai me deli sao. Te agai Genuai Bidiba ofa eyu, aga sęgę sela sąmainao.
LEV 4:4 Agai te kau kibu te Godigo Ugwa Be sunumiba sela pelama, te kau kibu toboluba nogo muyu bolo elama da, nosali agai te Genuai Bidigo gedude ela mubaso da, usu dao.
LEV 4:5 Tama nosali hetprisgo te kau kibu kaneme selama, te Godigo Ugwa Be tomoba pobaso usu dao.
LEV 4:6 Te agai nogo tų deli te kanemeba munama, te danide elalubo kaneme te Tedali Gasagi Yai Mu Be Habuba te tede walobo genuai nami ugwa pąba sągąyao, tama Genuai Bidigo te tiwai są ebo sueibao. Agai te tama tiwai sę ebo te a naga olama si sogo usu nama tama yao.
LEV 4:7 Tama aga te wiegi yai denami ebo hano holobo ofa ebo alta te Genuai Bidigo geduba Ugwa Be tomoba pao. Tama agai te kau kibu kaneme meba te kau kibu gąų kom me si me si tiwai alta me si me si dage badu teba mumainao. Te kau kibu kaneme me badu tigidali elalubaso da, te agai Ugwa Be sunumi badu alta buluba sela solama, te augwaligo ofa ulubo madi, te alta ulubo dogwa saliba te kaneme gelao,” wali.
LEV 4:8 “Nosali agai te bulmakau haligade elalubo ili delegabe tigidali sobadi yao,
LEV 4:9 te namba tu lewa dali te ili dabe me, te namba wan lewago wiegi yai te dali sao. Agai te namba wan lewa me namba tu lewa si dali sabo usu dao.
LEV 4:10 Tama prisgo te kibu ili dabe te ofa ulubo altaba ulama, te isigo tigidali dela silama, te keli hogomu naga elalueibao. Agai te bulmakau ili ulama, te deli haliga pedalumainogo ebo tiwai tobage ofa emainao,” wai.
LEV 4:11 “Tiali goli agai te bulmakau tigi wali me kibu mi badi, te tobolu, me sągą si, me nogo si, te haliga tomode ili delegabe me selama,
LEV 4:12 tama bulu badu peyu, te augwa te keli sągi soabo pesageba sela pao. Te pesage te Godigo gedude magi meda meni yai wiegi yai elalubao. Tama agai te sia nogonama, te kibu tigidali te isiba ulama, dela silama, te keli naga elalumainogo yao,” wali.
LEV 4:13 Genuai Bidigo Mosesbolo walama, te Israel dabeba te tiwai po omainogo wai, “Te Israel we bidi tigidali te homu kone bugagia me palisąma, te augwaligo Genuai Bidigo bomai po bolobaso da, teda augwaligo sęgę sali dao. Te augwaligo sęgę sali te augwaligo me konesiąwai goli, augwa te yali kolesaga augwa dagede te sęgę sai dao.
LEV 4:14 Te nosali augwa te yali sęgę konebaso da, teda augwa te ogwa bidi bulmakau me deli selama, augwa te sęgę sela sąmainogo ofa iyąo. Augwaligo te ofa te Godigo Ugwa Be sunumiba sela pomainu yao.
LEV 4:15 Tama te Genuai Bidigo gedude te Israel hetman tobolu bidi dabego nogo te bulmakau toboluba munama, te nosali augwaligo te bulmakau ela mumainao.
LEV 4:16 Tama hetprisgo te bulmakau kaneme meba te Ugwa Be tomoba sela pao.
LEV 4:17 Tama agai nogo dani deli te kanemeba munama, tama te nogo danide elalubo kaneme te pąde elalubo genuai nami ugwa te Tedali Gasagi Yai Mu Be Habu seselalubo teba sąbaso, te Genuai Bidigo sueibao. Agai te a naga olama, si sogo te tama sę ebaso, usu dao.
LEV 4:18 Tama agai te kau kibu kaneme meba te me si me si wali kom gąų te alta wiegi yai denami hano holobo te Genuai Bidigo gedu badu mubaso, usu yaibao. Te kau kibu kaneme tigidali me badu elalubadi ebaso da, agai te Ugwa Be sunumi bulu badu te augwaligo ofa ulubo badu sela solama, te alta aiyadu dogwali madiba gelao,” wali.
LEV 4:19 “Nosali agai te bulmakau ili tigidali selama, te alta siaba ulao,” po wali.
LEV 4:20 “Hetprisgo te deli tigi poąį kolesaga te bulmakaude yao, te agai aga sęgę sela sąyu ofa yali bulmakaude yali kolesaga tiwai ebaso usu yaibao. Te tiwai naga hetprisgo te tigidali we bidigo sęgę sela sąbo kolesaga eyu, tama tibaso da, teda Godigo augwaligo sęgę me sela sąwaibao,” wai dao.
LEV 4:21 “Nosali agai te kau kibu delage selama, te pesage bulu badu sela solama, te isiba ulao, te aga digi sęgę sela sąyu, te bulmakau ofa yali tiwai ebaso usu yaibao. Tigidali we bidigo te kau kibu ofa tama ebo, te augwa sęgę sela sąyu ebao,” wali.
LEV 4:22 Genuai Bidigo Mosesbolo waliyu, te Israel dabeba te tiwai po omainogo yali, “Te tobolu bidi me deligo te homu kone bugagia me palisąma, agai Genuai Bidi Godigo bomai po bolobaso da, teda sęgę saibao, te aga ebo kolesaga dagede te sęgę sobao.
LEV 4:23 Te nosali agai te sęgę konebaso da, teda agai te wiegi yai meme kibu omai me deli sao, te keni kenigo aga tigi me dolisąwai, te ofa yagasu selasa asao,” po wai dao.
LEV 4:24 “Te Genuai Bidigo gedude agai te meme toboluba bolo nogo munama, tama nosali agai te kibu dabe elama, te isiba ulama domainu ofa ebo pesagede te meme kibu elimainao. Te meme kibugo aga sęgę sela sąbo ofa ebo dao.
LEV 4:25 Tama prisgo nogo dani deli te meme kibu kanemeba munama, te alta kom me si me siba te dwasianu kaneme munana pao. Te elalubo kaneme yai baso da, agai selama, te alta aiyaba dogwa sali dedageba gealuao.
LEV 4:26 Tama agai te meme ili altaba ulao. Prisgo te meme kibu elama, te meme ili me te deli haliga pedalumainu ebo ofa tobage tiwai ebaso usu yaibao. Te tiwai naga prisgo te hetman tobolu bidigo sęgę sela sąbo kolesaga eyu, ofa yao, te Godigo agai sęgę sela sąmainao,” te po wai.
LEV 4:27 Te Genuai Bidigo Mosesbolo te po waliyu te Israel dabeba e tiwai po pusao wai, “Te we bidi augwali me deligo te bugagia homu konesiąma, te Genuai Bidigo bomai po bolobaso da, teda agai te sęgę sali, te aga dagede te kolesaga ebo dao.
LEV 4:28 Tialima, nosali aga homugo te sę koneagasu te aga sęgę sela sąbo ofa yaibao. Te aga pris ma tobolu bidi te meni baso da, teda agai te meme kibu so te dwai keni kenigo tigi me dolisąwai wiegi yai mu me deli selama, te ofa yabo sela pobaso usu dao.
LEV 4:29 Te agai meme kibu toboluba bolo nogo munama da, te nosali agai te siago tigidali dabo ofa ebo pesageba sela pelama, ela mubaso usu dao.
LEV 4:30 Tama prisgo nogo dani me deli te meme kanemeba munama, te dwasianu kaneme te alta gąų me si me si teba muao. Tama te kaneme meba elalubadi yaibaso da, te selama, te alta pagede aiyaba gealuao,” wai.
LEV 4:31 “Tama agai te meme kibu ili tigidali te altaba ulao. Prisgo te meme ilide te deli haliga pedalubo ofa ebo tobage kolesaga tiwaigo te ofa yao. Tama agai ili te altade ulao, te Genuai Bidigo te ofa ebo denami godolo yaibao. Te tiwai naga te prisgo te bidi ma wego sęgę sela sąbo ofa ebo kolesaga ebaso da, te Godigo agai sęgę sela sąwaibao.”
LEV 4:32 “Te bidi me deligo aga sęgę sela sąyabo ofa yabo sipsip kibu sela asobaso da, agai te so kibu sipsip keni kenigo tigi dolisąwai wiegi yai mu sela asiyu, te usu mu dao.
LEV 4:33 Agai te kibu sipsip toboluba bolo nogo mumainogo elama, te nosali agai te kibu sipsip elainogo da, te isigo tigidali mu dela silibo ofa ebo pesagede elama, te ofa ebo usu dao.
LEV 4:34 Nosali prisgo nogo dani deli te sipsip kanemeba munama, tama kaneme dwasianu te alta gąų me si me si elaluboba muao. Te me badu elaluali kaneme agai selama, te ofa ebo alta dedageba gelao,” wai dao.
LEV 4:35 “Tama agai te sipsip kibu ili te altaba ulao. Prisgo te deli homu naga pedalumainu te ebo tobage ofa ebo tiwai gilama, te sipsip ili ofa eyu te tiwai tama yao. Tama agai te ili altade gasa ofa dali eyu, te augwaligo isigo tigidali domainogo te ulama, Genuai Bidiba mabo ofa tiwai yao. Te tiwai naga prisgo te bidigo sęgę sela sąbo ofa ilao, te Godigo agai sęgę sela sąwaibao,” wali.
LEV 5:1 Te Genuai Bidigo Mosesbolo waliyu, te Israel dabebolo te tiwai po omainu yai, “Te augwaligo bidi me deliba hanaluyu, te po tų kotba pelama, te agai gasa bidigo sę suali po hanilabo po weyu, ma te agai gasa bidigo wabo po odali, tiali goli te bidigo te sę yali po hanilisąbaso da, teda aga te aga dagede te sę Godigo gedude geda muani dao.”
LEV 5:2 “Ma te bidi me deligo homu kone bugagia me palisąma, te Godigo te po weyu te wiegi yai meni da po wali nai me deliba nogogo diąyu ebaso da, teda te bidi te Godigo gedude meda yai pedalubao. Tama te hasa sibi te Godigo wiegi yai meni da po wali da, te aga isilama, aga tigi te tǫde munalubadi, tama te bidigo te hasa tigiba bugagia tonosiąma diąyagasobaso da, teda bidi te meda pedalubao. Te aga yali sę konebo sogo da, teda aga te yali sę dagede sęgę elalubo dao,” wali.
LEV 5:3 “Ma, te bidi me deligo te homugo bugagia konesiąma, te bidi me deli, me we me deli tigide pedelali sęde nogogo diąyu elama, te Godigo gedude meda elalubaso da, teda te bidi God gedude meda yai pedalubao. Te aga yali kolesaga aga koneagasobo sogo, aga yali sę dagede te sęgę elalubo dao.”
LEV 5:4 “Ma, bidi me deligo bugagia homu konesiąma, te nai me delide mu po dao po ugwaba obaso da, teda agai Godigo gedude dwai sę ebao. Te aga yali sę konebo sogo da, teda aga yali sę dagede te sęgę sabo dao,” wali.
LEV 5:5 “Te bidi me deligo te tobage dobo sę tiwai ebaso da, teda aga yali sę dagede geda mubaso, te sę yali po hanilama pusao.
LEV 5:6 Tama agai te sipsip so kibu deli, ma meme kibu so deli selama, te Genuai Bidiba selasa asama, te aga yali sęgę sela sąbo ofa tiwai yagasao. Tama prisgo te kibugo te bidigo sęgę sela sąyu ofa ilibaso da, Godigo agai sęgę sela sąwaibao.”
LEV 5:7 “Te bidi me aga dagede te mone sǫą pelama, agai te sipsip ma meme abelabo mone meni baso da, agai te ba hi si selama, te aga yali sę sela sąwainu Genuai Bidiba selasa asao. Te ba hi me deligo te sęgę sela sąbo ofa tiwai eyu, me deligo te siaba tigidali ulama, te dela silibo ofa eyu yao,” wai.
LEV 5:8 “Tama agai te ba hi si te prisba sela pelama, te prisgo te ba hi mego te sęgę sela sąbo ofa tiwai yao. Prisgo te ba hi mage togwa sąnama, te tobolu sela sągio.
LEV 5:9 Tama agai te kaneme dwasianu selama, te alta bogo badu sąsągą bilao, te gasa me badu kaneme te alta dogwa sali madiba gealuao. Te ba hi te sęgę sela sąbo ofa dao.
LEV 5:10 Nosali prisgo te me elalubo ba higo te isigo tigidali dela silibo ofa yao. Agai te tobage ebo ofago bomai po wali pao. Te tiwai naga prisgo te bidigo sęgę sela sąbo ofa ebaso da, teda Godigo agai sęgę sela sąwaibao,” wali.
LEV 5:11 “Te bidi me aga dagede aga te mone mu sǫą pelama, agai te ba hi si abelabo mone usu isąbaso da, teda agai te kilogram deli yai wiegi yai plaua selama, selasa asao. Tiali goli, agai te oliv wel me, te wiegi yai denami hano ilibo pauda me, te plauaba te wit ofa ebo tiwai me igio, magi baso meni, te plaua te sęgę sela sąbo ofa tiwai ebo dao.
LEV 5:12 Tama agai te plaua prisba sela pelama, te prisgo te plaua dwasianu nogode selama, te plaua tigidali te Genuai Bidiba ofa ilali dąį tiwai yaibao. Tama prisgo te dwasianu plaua te ofa ebo nai dabe dali te altaba ulao. Te plaua te sęgę sela sąbo ofa dao.
LEV 5:13 Tama tialima, prisgo te bidigo sęgę sela sąbo ofa ebaso da, teda Godigo agai sęgę sela sąbo dao. Te plaua me badu munalubadi yaibaso da, te prisgo plaua dao, te wit ulubo plaua ofa tiwai ebao,” wali.
LEV 5:14 Genuai Bidigo Mosesbolo waliyu, te Israel dabeba te tiwai po omainogo yali,
LEV 5:15 “Te bidi me deligo Genuai Bidiba te nai dabe me maiabo homu yai te agai homu kone ebo gegeda pobaso da, teda agai sęgę me elalubao. Tialima, te bidigo te Genuai Bidiba te masiąwani nai wei ponoyu, te aga yali sę silimainu ofa mao. Te prisgo agabolo walama, te wiegi yai sipsip omai kibu me deli sao, te keni kenigo aga tigi me dolisąwai, selasa asao. Tama prisgo te bidigo sela asabo sipsipde mone namba dąį ilaibao. Tama bidigo te tiwai sipsip me deli selama, te prisba selasa asao,” te po wai.
LEV 5:16 “Te mone me doado bage hasia Genuai Bidiba masiąwani nai, megi agai mayu, te agai gasa dali ugwadu daganama mao. Te agai negeli a naga elalubaso da, teda agai a naga me deli ugwadu daganama, wei ponao, te negeli elaluali dodoliyu tama tiao. Agai te prisba mao. Te prisgo te bidigo sela asali sipsip selama, tama prisgo te bidigo aga sęgę sela sąbaso da, teda Godigo agai sęgę sela sąwaibao,” wai dao.
LEV 5:17 “Te bidi me deligo bugagia homu kone palisąma, te Genuai Bidigo bomai po me deli bolobaso da, aga dagede te Godigo gedude dwai sę yali sęgę elalubao.
LEV 5:18 Tialima, agai te ofa me deli prisba sela pelama, te dwai sę yali sela sąyu isilao. Prisgo agabolo weyu, te wiegi yai sipsip omai me deli somainu yao, te keni kenigo aga tigi me dolisąwai, sela asao. Te sipsip sesali bidiba te mone namba dąį ilao. Tama te bidigo te sipsip kibu tiwai me deli selama, te prisba sesao. Tama prisgo te bidigo sęgę sela sąyu ofa elama, tama Godigo agai sęgę sela sąwaibao.
LEV 5:19 Te aga yali sę dagede, te Genuai Bidi gedude agai sęgę elalubao. Tama tibaso, te sipsip ofa ilao,” te po wai dao.
LEV 6:1 Genuai Bidigo Mosesbolo po waliyu, te tiwai po Israel dabeba omainogo yali,
LEV 6:2 “Te bidi me deligo aga abagigo doado bage bugagia tolaluainu selama, tama agai te nai doado bage ma maiabo homu isąbaso da, teda agai sęgę sobao. Te agai abagigo nai wi sobaso, ma agai augwali tibo po ola menama, te agai doado bage anoma elama sobaso me,
LEV 6:3 ma agai gasa bidigo hagawai nai sulama, te tibo po weyu, ‘Mu po obao, eno me subeo,’ obaso da, teda aga sęgę sabo dao.
LEV 6:4 Bidigo te tobage kolesaga dabe ebaso, te sęgę ebao, te agai nai wi sabo kolesaga me tibo po wabo kolesaga ebaso, te doado bage wei ponao. Te aga yali kolesaga silimainogo ofa ebo sogo da, teda agai te doado bage aga ayabolo te nai tigidali wei ponao. Te agai 5 nai saibaso da, teda agai te 6 te tama nai wei ponobaso usu dao.
LEV 6:6 Te sipsip omai me deli agai te prisba sela pelama, te aga yali kolesaga sia somainogo te Genuai Bidiba ofa eyu dola palobo sę yao. Prisgo agabolo walama, te wiegi yai sipsip mu sao po wao, te keni kenigo aga tigi me dolisąwai selama sesao. Tama hasia bolo prisgo te bidigo sesebo sipsip abelabo mone nogiyu dąį ilao. Tama bidigo te sipsip tiwai te prisba selasa asao.
LEV 6:7 Tama prisgo te bidigo sęgę sela sąyu, te Genuai Bidiba ofa ebaso, tama Godigo agai sęgę sela sąwaibao,” po wai dao.
LEV 6:8 Genuai Bidigo Mosesbolo te tiwai po wali,
LEV 6:9 “Nago te siaba tigidali ulubo ofa ebo bomai po te Aron aga ogomani dabe daliba te po walao. Augwaligo te ofa ebo nai te altaba ulama, te isigo dedubadi, te be posoboba usu nao. Te sia bogoli idubadi, te sula somainu me elamu dao.
LEV 6:10 Nosali prisgo te pęwadage trausis te augwa wiegi yai nami ugwago nigai trausis gudama, tama te bobage tagalalubo ugwa me munama, te aga altaba pelama, te keli sao, te ili yai ofa elalubo madi, te alta pąde tǫba gealuao,” po wai dao.
LEV 6:11 “Nosali aga gudali ugwa hasegelama, te sia dali keli selama, te pesage nigali buluba sela solama, te eno gedude meda meni yai pesage me deliba muao.
LEV 6:12 Tama te altade nogani sia sesemane didumainao, te munu me sula sągio. Tigidali side kigamu prisgo te sia nogonama, tama agai te ofa yabo kibu hasa dabe selama, te siago tigidali domainogo siaba ulaibao. Te deli haliga pedalubo ofa yabo kibu ili selama, tama te siaba uluyu yao.
LEV 6:13 Sesemane sogo te altade sia ula idumainao. Dagego te sia sula somainogo me elamu dao,” wali.
LEV 6:14 Te Genuai Bidigo Mosesbolo te po walima, te Israel dabeba te tiwai po omainu yali, “Te wit ulubo ofago bomai po e tiwai. Te Arongo hanigo pris me deligo te ena Genuai Bidiba te wit ulubo ofa mao, te alta pąde yao.
LEV 6:15 Tama prisgo te dwasianu plaua te augwaligo wel muai sobadi, te ofa wiegi yai denami ilabo pauda tigidali sao,” wali. “Tama agai te tigidali te alta siaba tigidali ulao. Te dwasianu ofago te tigidali ofa dąį ilibao, te enaba augwaligo mobao. Tama eno te ofa denami odama, eno godolo homu elama, bugai homu yaibao,” wali.
LEV 6:16 “Te plaua me badu munalubaso da, te pris dabego tuiyąo. Augwaligo te plaua selama, te yis meni yai bret nigilama, te augwaligo eno Ugwa Be mesalode tuiyąo.
LEV 6:17 Augwaligo te plaua dali te yis dali taluama te bret ulamuo. Augwali odolali ulao, magi baso meni, te plaua te eno nai mu tama, te sęgę sela sąbo ofa tiwai, me te bidigo yali dwai sę silimainogo ebo ofa tiwai ebao. Tama eno te plaua dabe te prisba dąį ilali. Te ofa ebo naigo te augwa me badu somainogo ebo dao.
LEV 6:18 Tama te Arongo hani pris bidi dabego te bret tumainao. Augwaligo te ebo ofade te Israel dabego enaba ofa ebo nai dabego somainao. Sesemane sesemane sogo nosali, te Arongo hani bidi dabego te ofa ebo nai me badu munalubo te augwaligo somainao. Tiali goli, te gasa bidigo diąwani ma te nai me deli te tuabo ofaba dagana sobaso da, teda te bidi ma te nai te habu mu selama elalueibao,” wali.
LEV 6:19 Genuai Bidigo Mosesbolo te tama po wali,
LEV 6:20 “Te Arongo hani pris dabego te augwali gesi sogo mu hasia te pris sę sabo side, augwaligo te ofa me deli yao,” po wai. “Te bidi me deli augwaligo pris pedalumainogo augwaligo te ni oliv wel aga toboluba geleyu ebo side da, teda agai ofa enabolo yao. Agai te kilogram deli yai wiegi yai plaua deli sao, te wit ulubo ofa tiwai usu nama yao, te pedai me badu kigamu ofa eyu te me badu pedai te giliga dega sigulubadi yao.
LEV 6:21 Agai te plaua dali ni oliv wel dali begelama, te praipende bugagia ulao. Nosali agai pepedama, te enabolo mao, Genuai Bidiba. Tama eno te ofa ebo denami odama, te eno godolo elama, bugai homu yaibao.
LEV 6:22 Nosali nosali te Arongo hani bidi dabe augwali te hetpris pedelaibao, teda augwaligo te tobage ofa enaba yao. Te augwaligo te siaba tigidali domainu ulubo ofa emainu elama, te keli naga elalumainao.
LEV 6:23 Te pris dabego te augwa digi sesali te wit ulubo ofa dwasianu me tugio. Augwa te siago tigidali domainu sula tagalao weyu yaibao,” wali.
LEV 6:24 Genuai Bidigo Mosesbolo te tiwai po wali,
LEV 6:25 “Nago te Aron aga ogomani dabe daliba te sęgę sela sąbo ofago bomai po walao. Te bomai po e tiwai dao. Augwaligo te sęgę sela sąyąbo ofa yabo kibu dabe te eno gedude elibaso, te usu yaibao. Augwaligo te kibu elama, te ofa eyu, tigidali siaba ulama dela pabo pesagede te kibu elao. Te eno ofa tedali mu ebao, te habu mu selibo dao.
LEV 6:26 Prisgo te sęgę sela sąbo ofa yali, agai digi te kibu mi eno Ugwa Be mesalode tumainao.
LEV 6:27 Te pris nogi elalusąbo bidigo, ma te magi nai me deligo te ofa ebo kibude diąbaso da, teda te nai me ma te bidi te eno nai mu tama pedalumainu elama, te habu selalumainao. Te kibu kaneme te name ugwa me deliba tulalubaso da, dagego te name ugwa eno Ugwa Be obo tomode ąį telayao,” wali.
LEV 6:28 “Te prisgo te meme mi te tǫgo nigali sospen senede ulubaso da, teda nosali agai te sospen sene aluao. Tialima, agai te brasgo nigai sospende ulali da, teda nosali agai te sospen ąįgo tedelama, bugagia holobo naigo brasim yao.
LEV 6:29 Mena pris hani bidi dabego homu godolu eyu, agai te ofa ebo kibu mi tuainu eyu da, te aga tumainao, magi baso meni, te tobage ofa te eno nai mu dao.
LEV 6:30 Tiali goli, te hetprisgo te ofa ebo kibu kaneme me badu selama, te eno Ugwa Be tomoba pelama, te sęgę sela sąbo sę ebaso da, teda te pris dabego te ofa ebo nai kibu mi me tulamuo. Augwaligo te isiba tigidali ulama, dela silama, te keli naga elalumainao,” te po wai dao.
LEV 7:1 Te Godigo Mosesbolo walama, te Israel dabeba e tiwai po walomainogo yali, “Te dobo sę yali silimainogo ebo ofa dabe te Godiba dolo mu ebao, te habu mu selibao. Te ofa dabe ebo bomai po e tiwai dao.
LEV 7:2 Augwaligo te ofa yabo sipsip dabe elainogo da, augwa te sipsip dabe elama, te ofa eyu, te isiba tigidali ulama, dela silibo pesagede te sę yao. Tama augwa te sipsip kaneme te alta bogo me si me si te badu sąsągą bilao,” po wali.
LEV 7:3 “Augwaligo te sipsip kibu ili selama, te altade Godiba ofa ilao. Augwaligo te kibugo nisali danu sobadi, te kibu haliga tigidali bealubo te ili delegabe me sao,” te po wai.
LEV 7:4 “Tama augwa te hobuludu si dali, tede daganalubo ili me sobadi yao, te sipsipgo polalubo dini homu me deli sao. Augwa te polalubo dini homu me deli siyu, te si wabo homu hobuludu si me sao.
LEV 7:5 Tama prisgo te kibu ili tigidali te alta siaba ulao, augwa te Genuai Bidiba mabo ofa tiwai ebao. Te sipsip ofa ebogo te augwa yali dobo kolesaga silimainu ebo dao.
LEV 7:6 Te pris hani dabe mena bidigo tuabo homu godolo ebaso, aga te ofa yali sipsip mi tumainao. Te Godiba dolo ofa tama ebao, agai te pris dabebolo dąį ilali. Tama tialima, augwa te Godigo sel Ugwa Be obo tomode tubaso usu dao,” wali.
LEV 7:7 “Te dwai sęgę sela sąbo ofago bomai po me, te dobo kolesaga silimainogo ebo ofago bomai po me, te si te augwa bomai po dedeli naga elalubao. Tibaso, prisgo te kibugo ofa ebo side te tobage ofa si yaibao, aga digi te ofa ebo bulmakau mi ma sipsip mi somainu ebo dao.
LEV 7:8 Te prisgo te isigo tigidali dela silibo ofa me deli te kibu dabego ebo sogo da, teda aga digi te kibugo tigi wali somainu yaibao.
LEV 7:9 Te tiwai tama naga te prisgo te augwa wit te moni nai ulubo be nogi aven ma sospende, me praipende ulai wit te ofa ebaso da, aga digi te sela tubo usu dao.
LEV 7:10 Te tigidali ulusiąwai witgo ofa ebaso, te augwaligo ni oliv wel dali taluali, te tigidali Arongo hani prisgo dao. Te olo plauago ofa yali nai me, te me prisgo saibao. Augwaligo te pris deli deli usu nama, tama te nai dobola sao,” te po wai.
LEV 7:11 Te Godigo Mosesbolo walama, te Israel dabebolo te tiwai po walomainogo yali, “Te God dali deli haliga pedelabo ofa ebo bomai po, e tiwai elalubo dao.
LEV 7:12 Te bidi me deligo Godiba buba hwi wabo homu eyu, agai te deli haliga pedelabo ofa yainu eyu da, agai te hasa dali te bret pedai dage agai yis meni yai plauago nigai, tego ofa yao. Agai te ni oliv wel dali taluali plauago nigai bretgo te ofa yao. Te agai te tama tiabo homu me ebaso da, aga te bisket dabe te oliv ni welgo pilai, tego ofa yao. Te meni baso da, agai te wiegi yai plaua dali, te ni oliv wel dali taluama, tama skon nigai, tego ofa ebaso usu dao.
LEV 7:13 Tama me agai te yis elalubo bret me badu pedai dage selama, tama te Genuai Bidi dali deli haliga pedalubo ofa yabo usu yaibao,” te po wali.
LEV 7:14 “Agai te ofa yabo haniani bret deli deli pedai dage me deli selama, te Genuai Bidiba mao. Te prisgo te kibugo kaneme selama, te alta bogo badu sąwai te pris bidigo te bret pedai dage dabe somainao.
LEV 7:15 Te bidigo ofa ebo side augwaligo te kibu mi me badu elaluali tigidali tuao. Augwaligo te nosali kigamude tueibao olama, te kibu mi me elalumainu sula tagalamu dao,” wali.
LEV 7:16 “Te bidi me deligo deli haliga pedelabo ofa yabo homu yai, te aga Godiba po dąų wali usu nainogo, ma te aga homu godolo ebaso, te ofa Godiba olo dali mobaso da, teda augwa te ofa yali kibu mi te bidigo ofa ebo side tubadi, te nosali me tubo usu dao.
LEV 7:17 Tama te si wali side augwa te nai tula silisąma, te sela wabo sogoba usu nubaso da, teda augwaligo te isiba ulama, te isigo tigidali dela silaibao,” wai dao.
LEV 7:18 “Augwaligo te sela wabo side te kibu mi tubaso da, teda Godigo te bidigo ofa ebo me sogobeo. Menio. Te Godigo te homu yaibao, te agai ofa te dwai kugumini yai da homu yaibao. Tama niwai bidigo te kibu mi tubaso da, te agai dagede dobo sę ebao, te sęgę elalubao,” wali.
LEV 7:19 “Te deli haliga pedalubo ofa ebo kibu mi te Godigo gedude wiegi yai isąwai naide diąnalubaso da, teda augwaligo te kibu mi munu me tulamuo. Menio. Augwaligo te nai mi dabe tigidali isiba ulama, te isigo mu dela silimainao.” “Te Godigo gedude meda meni yai wiegi yai we bidi augwaligo te deli haliga pedalubo ofa ebo kibu mi tubaso da, te usu dao.
LEV 7:20 Tiali goli, bidi me deli wiegi yai pedalisąbadi agai te ofa ebo mi tubaso da, teda aga te Genuai Bidigo we bidi hani tomode me bidigobeo,” wai dao.
LEV 7:21 “Te Godigo gedude wiegi yai me isąwani naiba nogo diąwani bidi, tagalao, agai te wiegi yai isąwai meda yai naiba nogo diąwani, ma te bidigo tigide pedalubo naiba diąwai baso, ma te wego tigide pedalubo naiba nogo diąnama, tama nosali agai te ofa yali kibu mi tubaso da, teda aga te Genuai Bidigo we bidi hani tomode me bidigobeo,” po wai dao.
LEV 7:22 Genuai Bidigo Mosesbolo walama,
LEV 7:23 te po te Israel we bidi dabeba mao wai. Genuai Bidigo e tiwai po wali, “Dagego te kibu bulmakau me sipsip meme ili me tugio,” po wai dao.
LEV 7:24 “Te bulmakau me deli aga digi odolali isaibaso, te ili dagego me tugio. Te me bulu uni hasago te kau kibu ela mueibaso me, dagego kau kibu ili me tugio. Tialima, dagego te kibu ili selama, gasa sę yao. Te usu dao.
LEV 7:25 Te augwaligo Genuai Bidiba ofa ebo kau kibu ili te bidi me deligo tubaso da, teda aga te Genuai Bidigo we bidi hani tomode me bidigobe dao,” wali.
LEV 7:26 “Dage Israel, dage te mena bulu pedaide bidibo we bidi, dagego munu me te kibu hasa me ba dabe te kaneme dali me tulamu dao. Te kolesaga ebo habu mu selibao.
LEV 7:27 Bidigo ma wego te dąų wali bomai po bolobaso da, teda aga te Genuai Bidigo hani tomode munu me bidigobeo,” wali.
LEV 7:28 Te Genuai Bidigo Mosesbolo waliyu,
LEV 7:29 te Israel we bidiba te po momainogo yali. Agai te tiwai po wai, “Bidigo te deli haliga pedelabo ofa sela aselama, agai te kibu pedai te Genuai Bidiba dolo dąį ilao, te aga ofa te dao,” wai dao.
LEV 7:30 “Te bidi aga digi te Genuai Bidiba ofa yabo nai kibu sesemainao. Te Genuai Bidiba maiabo kibu pedai dage e tiwai sesao, te kibu ili me kibu baugo mi tama dao. Tama te bidigo Genuai Bidiba ofa e tiwai ilao. Agai te kibu bau mi te nogo tolaluyu, te Genuai Bidigo gedude iba oba hogabo sę yao.
LEV 7:31 Tama nosali prisgo te alta siade te kibu ili ulao, tialima te pris augwa te kibu bau sao, te augwa tuabo nai dao.
LEV 7:32 Te kibugo dolo sągą dagego prisba mao, te olo dali maiabo nai dao. Te pedai badu te deli haliga pedelabo ofa eyu,
LEV 7:33 te prisgo te kibu kaneme me ili tego ofa ebo dao. Tama te ebo pris bidigo te dolo sągą somainao.
LEV 7:34 Genuai Bidigo digi te kibu bau me dolo sągą dage Israel we bidide selama, tama te kibu pedai dage si te pris dabeba mawai, te augwali Arongo hani dabe dao. Tama tialima, sesemane sogo nosali te pris dabego te ofa ebo nai pedai dage somainogo yao.
LEV 7:35 Te hasa pedai dage Genuai Bidigo digi sali, te dage we bidi dabego agaba ofa ebo nai dao. Te Genuai Bidigo te hasa pedai dage te Aron aga ogomani dabe daliba dąį ilama, te side agai augwali te pris sęba munama bidai dao.
LEV 7:36 Te side naga tama Genuai Bidigo te Israel augwaliba walama, augwaligo te ofa yali kibu pedai dage te pris dabe augwaliba mao po wali. Tama augwaligo te bomai po sesemane sesemane sogo wali pidubadi geąo,” te po wai dao.
LEV 7:37 Te tigidali po te siaba tigidali ulama dela silibo ofa dabego bomai po, te wit ulubo ofa dabe me, te sęgę sela sąbo ofa dabe me, te dobo kolesaga augwa dagede yali silimainu ebo ofa me, te bidi pris pedalumainogo ofa ebo me, te God dali deli haliga pedalubo ofa me, te tama ofa dabego bomai po dao.
LEV 7:38 Genuai Bidigo te bomai po dabe te Israel dabe te masigi kemi tǫ wa pai bulude bidali sogo, te bulu du Sainaide Mosesbolo te bomai po mawai. Te Godigo te Israel we bidi augwaliba te ofa yao po wali side, agai te bomai po dabe augwaliba mawai dao.
LEV 8:1 Te Genuai Bidigo Mosesbolo e tiwai po wai dao,
LEV 8:2 “Te Aron me aga ogwa dabe dali selama, te eno sel Ugwa Be sunumiba pao. Te pris dabego gudubo ugwa me, te sęde augwali dąį ilibo wel me somainu elama, tama te bulmakau omai me deli, me sipsip omai si, te sęgę sela sąyu ofa yabo nai selama, te basket wa me delide te yis meni yai bret pągąnama, tama te nai dabe me te sel Ugwa Beba selasa pao,” wali.
LEV 8:3 “Tama nosali tigidali we bidi te sel Ugwa Beba asomainu i wao,” wali.
LEV 8:4 Tialima, Mosesgo Genuai Bidigo po odama, te tama sę yali. Tama tigidali we bidi sisinagasali.
LEV 8:5 Tama Mosesgo augwaliba walali, “Eno megi e yainogo ebo sę da, te Genuai Bidigo enabolo te sę yao po polobadu obaso ebao.”
LEV 8:6 Tialima, Mosesgo Aron aga ogwa dabe dali selama, te we bidi augwali geduba dodolagaselama, tama agai augwali ąįgo paluali.
LEV 8:7 Tama agai te holobo ugwa Aronba bolo gudulali. Tama agai te bobage name ugwa te Aron tabidu belali. Tama Mosesgo bobage aiyaba tagalalubo ugwa te genuai name ugwa Aronba gudulama, te welia kukulu au yai selama, te genuai ugwago te Aron tabidu soani kekalio.
LEV 8:8 Tama agai te dwasianu name ugwa Arongo hagawiade kekelama, tama te Godigo homu kolesaga konebo masigi si muani, te ugwa agebele poketde muai elaluai dao.
LEV 8:9 Tama agai bobage ugwa me deli te Arongo tobolude bagulama kęnani. Tama agai te dwasianu nai medal gol selama, Aron te Godigo bidi mu da olama dąį ilu, te ugwa name Arongo gesabidide ugwadu daganani. Mosesgo te sę dabe te Genuai Bidigo agabolo po wali gilama yai dao.
LEV 8:10 Nosali Mosesgo te Godigo nai dabe dąį ilainogo te wel selama, te Godigo sel Ugwa Bede pilibadi, te be tomode elalubo nai tigidali me pilali. Tama te tiali kolesagade te nai doado bage dabe te Genuai Bidigo nai dolo da weyu, tama tiali dao.
LEV 8:11 Tama agai te wel habu selama, te nogo a naga olama, me badu nogo si sogo te altaba sąwani, te altade sę yabo doado bage me, te wę paubo moni genuai disba me agai tebolba tama tialio. Te tiali kolesagade agai te nai dabe te Genuai Bidigo nai mu da weyu dąį iliyu tiai dao.
LEV 8:12 Tama agai wel ąį dwasianu te Aron toboluba gelali, te tiali kolesagade te Aron te Genuai Bidigo pris mu tiwai da olama dąį ilai dao.
LEV 8:13 Nosali Mosesgo te Arongo ogwa dabe sela asama, augwaliba te holobo ugwa gudulama, tama agai te bobage name ugwa pedai te kukulu tiwai augwaliba belama, te augwali tobolude name ugwa kęnani, te Genuai Bidigo wali po tiwai gilama yai dao.
LEV 8:14 Te silama da, tialima Mosesgo te bulmakau omai te bidi augwaligo te sęgę sela sąbo ofa yainu sela asali, te Aron aga ogwa dabe daligo te bulmakau toboluba nogo mumainao wali.
LEV 8:15 Tama nosali Mosesgo te kau kibu elama, te aga kaneme salio. Agai te kaneme dwasianu te nogo dani delide selama, te alta bogo me si me si badu te komde muna muna pali. Te kolesagade agai te alta God gedude wiegi yai tedali mu pedalumainu ilai dao. Nosali te elaluali kaneme tigidali selama te alta aiyaba dogwa saliba gelali, te tama kolesagade te alta te Godigo mu da olama, habu seliyu, te dąį tiwai ebao te po wali.
LEV 8:16 Tama Mosesgo te kibu kau haliga bealubo kibu ili delegabe tigidali sobadi, te hasia polalubo dini homu te wiegi yai sobadi, te si wali homugo si siyu, te ili dali selama, tama agai te nai dabe altade ulama, te keli naga elalu yai dao.
LEV 8:17 Tama agai te kibu kau pedai dage me badu dali, te wali me, kibu mi me, te haliga me, tigidali selama, te pesage nigali buluba sela soali. Tama agai te sia nogonama, te kau kibu ulama, te siago tigidali dela silai. Agai te Genuai Bidigo agabolo wali po gilama tama sę yai dao.
LEV 8:18 Nosali Mosesgo te sipsip kibu omai si elaluali te me deli agai sela asali. Te isigo tigidali dela silabo ofa yabo sipsip dao. Tialima, Aron aga ogwa dabe daligo te sipsip toboluba nogo muai dao.
LEV 8:19 Tama nosali Mosesgo te sipsip ela munama, te sipsip kaneme selama te alta pedai me si me si badu sąsągą bilai dao.
LEV 8:20 Agai te kaneme sąsągą bila silibo si da, teda agai te sipsip kibu sikilama, te haliga bono dabe me, te kibu sipsip sągą si me ąį telawali. Te nosali agai te kibu tobolu me ili me te sipsip kibu delage tigidali selama, te altaba munama, te tigidali siaba ulama, te keli naga elalueibao. Agai te Genuai Bidigo po wali gilama yali. Te siago tigidali dabo ofa ebo sipsip te sipsip ofa ebaso, te Genuai Bidigo te denami odama, te bugai haliga eyu yai dao.
LEV 8:22 Tialima, Mosesgo gasa kibu sipsip omai sela asali, te bidi pris sę emainogo dąį eliyu ofa ebo sipsip. Te Aron aga ogwa dabe dali augwaligo te sipsip toboluba nogo muai.
LEV 8:23 Tama nosali Mosesgo te kibu sipsip elama, te dwasianu kaneme selama, te Arongo dolo olo aiyaba muani, te dolo nogode te a wabo nogo danide, me te dolo sągągo te a wabo sągą danide pilibadi yai dao.
LEV 8:24 Nosali agai te Arongo ogwa dabe sela aselama, te dwasianu kaneme te augwaligo dolo olo badu aiyaba muani, me te dolo nogo te a wabo nogo danide mubadi, te dolo sągą te a wali sągą danide muyu yali. Tama agai te me badu elaluali kaneme selama, te alta bogo me si me si badu sąsągą bilai dao.
LEV 8:25 Nosali agai te kibu sipsip ili salio. Agai te nisa pai kibu danu me sali, te haligade bealubo kibu ili delegabe sobadi, te polalubo dini homu wiegi yai sobadi, te si wabo te kibu homugo si siyu te ili dali sali, te sipsipgo dolo sągą me sai dao.
LEV 8:26 Nosali Moses te yis meni yai bret pągąnalubo basket te augwaligo Genuai Bidiba mabo bret munalubo madi pelama, tama agai augwaligo te yis dali ulisąwai bret sali, te augwa plauago nigai bret me deli te oliv wel dali begelali, me te bisket me deli sobadi yali. Tama agai te nai dabe te kibu ili me kibu dolo sągą te nai si daiba muai.
LEV 8:27 Mosesgo te nai dabe te Aron dali aga ogwa dabe daligo nogoba muani, tama augwaligo nogogo te nai tolaluyu, te Genuai Bidigo gedude te nogo edaba ugwaba hoga walio.
LEV 8:28 Tama nosali Mosesgo te nai dabe augwalide ma selama, tama te siago tigidali dabo ofa ulubo alta kibu sipsip daiba te muani, tama te nai tigidali mu te isiba ulama, dela silali. Te nai dabego te pris nigali bidi dąį ebo ofa elama, te denami ebo Genuai Bidigo odoyu, godolo eyu, bugai haliga yai dao.
LEV 8:29 Tialima, Mosesgo te ofa yabo sipsip kibu bau selama, te nogode tolaluyu, ugwa eda te Genuai Bidigo gedude tama yalio. Te sipsip pedaigo te augwa pris dąį ebo ofa yali, te kibu mi Moses aga digi tumainu yai. Mosesgo te Genuai Bidigo agabolo wali po gilama te sę tigidali ela silai.
LEV 8:30 Te Mosesgo wel habu dwasianu selama, te gesi pris dąį ilainu sali, te agai alta bogo badu sąsągą bilabo kaneme sali. Tama agai te kaneme me wel te Aron dali aga ogwa dabe daliba me augwaligo ugwaba me segene sągąwani. Te tama tiali kolesagade Mosesgo te Aron dali, aga ogwa dabeba dali te me augwa ugwaba me dąį ilama, te Genuai Bidigo mu dao wali.
LEV 8:31 Nosali Mosesgo Aron dali aga ogwa dabeba me te tama po wali, “Eno dagebolo te kibu mi te Godigo sel Ugwa Be sunumiba sela pelama, te posolo ąįde ulama, te basketde munalubo bret dali tuao wali. Te basketde te pris dąį ilibo ofa ebo bisket me bret elalubao,” po wai.
LEV 8:32 “Te dage tuali tabi baso da, teda te me badu munalubo kibu mi me bret, dagego te siaba ulama, te siago tigidali dela silimainao,” wali.
LEV 8:33 “Dage te Godigo sel Ugwa Be sunumide bidaludubadi te nogo a naga olama, me badu nogo si wagi solama sogo bidao. Te dage pris sęba muani sogo 7 sogo elalueibao. Tama tibaso, dagego me tagaligio, te sogoba usu nama silimainao.
LEV 8:34 Genuai Bidigo digi dabolo walama, te dagego sęgę sela sąyu, te tigidali sę emainogo yai. Te megi da dago te sę yali dao.
LEV 8:35 Dage te sel Ugwa Be sunumide te giligade me hulide bidalubadi, te a naga olama, me si sogo usu nao, tama dagego te Genuai Bidigo dagebolo yao wali sę tigidali yao. Genuai Bidigo enabolo tama tiwai po wai. Tiyu, dagego agai po sela sąbaso, te dage isabuo wai dao.”
LEV 8:36 Te Mosesgo pedauwalide naga Genuai Bidigo Aron dali aga ogwa dabeba me te sę yabo po walama, tama augwaligo te tiwai sę yai dao.
LEV 9:1 Te dei 7, te tama side augwaligo Aron dali aga ogwa dabe te pris sęba muna silibo sę ela silali. Te 8 wabo side Mosesgo te Aron dali aga ogwa dabe dali i obadi, te Israel tobolu bidi dabe me sisinagasao olama, i walio.
LEV 9:2 Augwali agaba sisinagasobo si da, Mosesgo Aronbolo te tiwai po wai, “Te ogwa bidi bulmakau omai me deli sobadi, te omai sipsip kibu me deli sao, augwali si te keni kenigo tigi me dolisąwai dabe tama sao. Tama nago te kibu si Genuai Bidiba ofa yao. Te kibu kaugo te sęgę sela sąbo ofa ebadi, te sipsip kibugo te isiba tigidali ulama dela silibo ofa yao,” te po wai.
LEV 9:3 “Tama nago te Israel we bidi dabeba waliyu, te sęgę sela sąyabo meme kibu omai deli sesao po wao. Te kibu be deli yai omai kau kibu me deli sobadi, te kibu be deli yai sipsip kibu me deli sobadi elama, te isigo tigidali dabo ofa yaibao. Augwaligo te wiegi yai kibu naga sao, te keni kenigo augwa tigi me dolisąwai naga sabo usu dao.
LEV 9:4 Tama te we bidi augwaligo te omai bulmakau me deli sobadi, te omai sipsip kibu me deli sobadi elama, te deli haliga yabo ofa yaibao. Augwaligo te kibu si Genuai Bidiba ofa emainao, te wit ulubo ofa augwaligo te oliv wel dali taluali. Te megi tama side Genuai Bidi augwali geduba pedalubaso da, teda hasia bolo te ofa augwaligo yao wao,” wali.
LEV 9:5 Tialima, Aron dali te we bidi augwali pelama, te Mosesgo augwalibolo sigi pao po wali nai dabe selama, tama augwaligo te Godigo sel Ugwa Be pąba selasa asali. Te tigidali we bidi te Genuai Bidiba lotu wainogo te sel Ugwa Be pąba sisinagasalio.
LEV 9:6 Tama Mosesgo augwaliba te tiwai po wali, “Genuai Bidigo te po wali, dagego te ofa ebaso da, te Godigo moni bomai ula te dageba pedalumainu yaibao,” wali.
LEV 9:7 Tama nosali Mosesgo Aronbolo te po walali, “Nage te altaba pelama, te sęgę sela sąbo ofa me yao. Nago te naga sęgę dali, te we bidi dabego sęgę sela sąbo ofa dali, si tama yao. Nosali, te tigidali we bidigo sesali ofa selama, te augwa sęgę sela sąbo ofa yao, te Genuai Bidigo po wali gilama te sę yao,” wali.
LEV 9:8 Tialima, Aron te altaba pelama, te ogwa bidi kau kibu omai elali, te aga digi aga sęgę sela sąmainu yalio.
LEV 9:9 Te aga ogwa dabego te kibu kaneme selama, agabolo mani, tama agai nogo dani te kanemeba holama, te dwasianu kaneme te gąų me si me si te alta dage me si me si badu teba muai. Tama agai te me badu munaluali kaneme selama, te alta aiya dogwa saliba gealuali.
LEV 9:10 Tama nosali Arongo te kau kibu ili tigidali sobadi, te haliga bealubo delegabe, me te si wabo homugo si siyu, tama te altaba ulai dao, te Genuai Bidigo Mosesbolo po wali gilama yai dao.
LEV 9:11 Tama agai te kibu mi tigidali me kibu tigi wali te we bidi bidibo madi bulu badu nogani isiba ulama, te isigo tigidali dela silai dao.
LEV 9:12 Arongo te silibo si da, teda agai te isiba tigidali ulama dabo ofa yabo kibu elali. Tama aga ogwa dabego te kibu kaneme selama, agabolo mani, tama agai te kaneme te alta bogo me si me si badu sąsągą pai dao.
LEV 9:13 Te augwaligo te kibu tobolu dali, te kibu me badu delage pedai me tigidali agabolo menama, tama te tigidali te isigo tigidali dela silibo altaba ulalio.
LEV 9:14 Agai te kibu tabi haliga bono dabe ąį telawali, te kibu sągą si me. Tama agai te me badu pedai tigidali te isiba tigidali ulubo ofa daiba munama, te isigo mu dela silai dao.
LEV 9:15 Nosali Arongo te we bidi augwaligo ofa dabe selama, te Genuai Bidiba ofa ilali. Te we bidi dabe augwa sęgę sela sąwainu sesali kibu meme agai salio. Agai ela munama, tego ofa yali, te agai aga sęgę sela sąyu, te ofa yali kibude yali sę tiwai te ofade tama tialio.
LEV 9:16 Te we bidi augwaligo te isiba tigidali ulabo ofa yainu sesali kibu si dabede te me deli agai sali, te ofago bomai pode wali po tiwai gilama, te augwaligo tigidali sogo kigamude ofa eyu yai. Tama agai te plaua selama, te wit ulubo ofa yali. Agai te dwasianu plaua nogogo selama, te plaua te isigo dela silibo ofa ebo altaba ulali.
LEV 9:18 Nosali Arongo te we bidi dabego Genuai Bidi dali deli haliga pedalubo ofa yainu sesali kau kibu me sipsip elali. Te kibu sigo kaneme aga ogwa dabego selama, te agabolo mani, tama agai te kaneme te alta bogo me si me si badu sąsągą bilai dao.
LEV 9:19 Tama Arongo te nisai sipsip kibu danu sobadi, te kibu sigo te ili sali. Agai te haliga bealubo delegabe me te si wabo homugo si siyu, te polalubo deli wabo dini homu wiegi yai deli sai dao.
LEV 9:20 Tialima, augwaligo te nai dabe te kibu si bauba munama, te tigidali altaba sela pali. Tama Arongo te kibu ili tigidali te altaba ulai dao.
LEV 9:21 Tama agai te kibu kau me sipsip bau, me kibu dolo sągą me agai nogode tolaluyu, te Genuai Bidigo gedude iba eda hoga yali, te Mosesgo po wali gilama yai dao.
LEV 9:22 Arongo te ofa dabe ela silama da, teda agai nogo si te we bidi dabeba ugwa selama, te po weyu, te Godigo augwali wiegi yai ilao wali. Nosali agai te alta tagalama, aiyaba dulalio.
LEV 9:23 Te Moses de Aron si te Godigo sel Ugwa Be tomoba pai. Te augwali si buluba teda soabo sogo augwa si te po weyu, te augwa homugo te Godigo wiegi yai sę te tigidali we bidiba yao po wali, tama Godigo genuai ula hania haninama pedelama, te we bidi augwaligo suai dao.
LEV 9:24 Te polo tama mu Genuai Bidigo isi te altaba tagala palama, tama isigo te siago tigidali mu dela silibo ofa dali te kibu ili tigidali me polo dela silai. Te we bidi dabego te sę ebo sulama, te augwa bomonama i weyu, te augwa gesabidi tǫba pǫgulama, te Genuai Bidiba lotu po wai dao.
LEV 10:1 Te sogo Nadap dali Abihu, te Arongo ogwa si, te augwa si plet digi selama, te wiegi yai denami ebo pauda ulali. Tama augwa si te sia dage me pauda te wiegi yai denami hano ebo te plet pou dabeba munama, tama augwali sigo te isi te Genuai Bidiba te ofa eyu sela pali. Tiali goli, Genuai Bidigo augwali sibolo te tiwai isi sesao po me wabeo. Tama te sia te Godigo nai da wasiąyu, te Godigo homu godolo me ebeo.
LEV 10:2 Te polo mu tama Genuai Bidigo te isi tagala palama, augwali si ulama, te augwali si Genuai Bidi gedude isai dao.
LEV 10:3 Tama Mosesgo Aronbolo te po wai, “Polobadu Genuai Bidigo te tiwai po wali, ‘Te eno sę eyu pąba asobo bidi dabe, ena te olo bidi tiwai meni augwaligo te tiwai koneabo elalubao, ena God mu dao. Augwaligo te tama homu bugagia konebaso da, teda eno genuai bomo me ula te we bidi augwaliba ola mawaibao.’ Agai te tama po wai, tiali goli te bidi sigo te po wali me pisąbaso, tama Genuai Bidigo augwali si dolali,” Mosesgo te po wai. Tama Arongo te tiali po odama, agai po me wabeo.
LEV 10:4 Te Mosesgo Misael me Elsafan i obaso augwali si asali. Augwali si te Usielgo ogwa si, te Arongo aya sabi bidi dao. Mosesgo augwali siba te tiwai po wali, “Dage sigo te duga si amago tigi sagasao, te Godigo sel Ugwa Be tagalama, augwali si te Godigo pesagede buluba sela peyu, pubaligi pao,” te po wali.
LEV 10:5 Tialima, te bidi si pelama, te isali bidi si selama, te bidibo pesage tagalama, buluba soali, te Mosesgo wali po tiwai gilama yali. Tiali goli, augwali sigo te isali bidigo gudali ugwa me peda sąbeo. Menio. Augwali si ugwa dali te tigi tolasa palio.
LEV 10:6 Megi da Mosesgo po Aronba mayu, te aga gasa ogwa sibolo te po wali, Eleasar dali Itamar si. Agai augwaliba te tiwai po wali, “Dagego te isali bidi side homu dene ebo kolesaga wali me pigio. Te dagego tobolu nisi yaga tigidali side sao. Te dagego olo elalumainogo me elamuo. Te dagego homu dene ebo dąį iliyu, te duga ugwa me pisągio. Dagego te homu dene ebo kolesaga wali pobaso da, teda Genuai Bidigo dage tigidali ela silama, te Genuai Bidigo te da Israel we bidi tigidaliba wado po dwai mu waibao. Te gasa Israel dabe, te duga deli hani, te Genuai Bidigo isi tagala palama, te elali bidi side augwali gasa Israel dabego naga homu dene emainao.
LEV 10:7 Dagego te Godigo sel Ugwa Be me tagaligio. Dage te buluba sobaso da, te dage isaibao, magi baso meni, eno te Genuai Bidigo wel dageba muani, tama dage te Genuai Bidigo bidi dolo mu bidibao,” wali. Tialima, augwaligo te Mosesgo po odama, augwaligo te tama tiwai yai dao.
LEV 10:8 Genuai Bidigo Aronba te tiwai po wali,
LEV 10:9 “Te nage me nago ogwa dabego te bomai ąį wain me bia tulama, dage eno sel Ugwa Be tomoba me pelamuo. Te habu mu dao. Te dagego sel Ugwa Be tomode sę yabo sogo ąį tulama, te Ugwa Be tomoba pobaso da, te dage isaibao. Te dagego bulai wąį nǫų dabe nosali pedalubo hani, augwaligo me te bomai po wali pomainao.
LEV 10:10 Te dagego bomai ąį tusąbaso da, teda dagego bugagia dagaliyu, te mena nai eno nai ma te olo we bidigo nai mena elalubo bugagia dagalaibao. Te dagego eno gedude mena nai te meda menisąyu, te mena nai meda elalubo te bugagia mu dagalaibao.
LEV 10:11 Tama dagego te Israel we bidi te bomai po tigidali eno dagebolo te Mosesgo pedauwalide mabo te ola mobaso usu yaibao,” te po wai.
LEV 10:12 Tama Mosesgo Aron dali aga bidibo ogwa si daliba te po wali, Eleasar me Itamar. Agai te tama po wali, “Dagego te me badu pedai plaua te wit ulubo ofago te Genuai Bidiba ofa yali me badu munalubo sao. Tama te plauago, dagego te yis meni yai bret nigao. Tama dagego te alta pąde te bret tuiyąo, magi baso meni, te nai te olo nai menio, te God aga ofago digi dagebolo mabo dao.
LEV 10:13 Dagego te bret te Godigo sel Ugwa Be obo tomode bididu tuiyąo. Te witgo ebo ofa pedai tigidali te duga dali te duga hani ogwa dabego dali me dao. Dagego te we bidigo Genuai Bidiba ofa yali plauago siyąo. Genuai Bidigo enabolo te sęde po walai dao,” wali.
LEV 10:14 “Te dage dali, te duga we bidi hanigo dali, te kibu bau me kibu dolo sągą te deli haliga pedaliyu ofa yali nai siyąo. Te kibu bau augwa te Genuai Bidigo gedude nogo tolaluyu, ugwa eda ebo dao. Te pesage me deli God gedude wiegi yai me elalubaso da, teda dage te me badu pelama, te kibu dage tuiyąo. Godigo te ofa yali kibu mi te dage me duga ogwa dabe dali tumainogo mawai dao.
LEV 10:15 Te we bidigo te ofa yabo ili me te kibu kau me sipsip sągą me bau te sela asobaso, te dagego nogo tulaluyu, te Genuai Bidi gedude iba eda yao. Tama nosali dagego te ili alta isiba ulao. Tiali goli, dagego te kibu sągą me kibu bau selama, tuiyąo. Sesemane sogo te kibu pedai dage si dage dali, duga wai dabe daligo nai siyąo. Genuai Bidigo te tama po wai dao,” wali.
LEV 10:16 Nosali Mosesgo augwaliba po bomonama weyu, te tiwai po wali, “Dagego te sęgę sela sąbo ofa ebo memede mena sę yaliwe?” Tialima, augwaligo te po agabolo wali, “Dago te isiba sese ulama, dela silalio.” Tialima, Mosesgo te po odama, tama agai te Eleasar me Itamar augwali siba wado po wai. Tama agai te po wai,
LEV 10:17 “Magi baso dage te Godigo sel Ugwa Be tomode bidama, te sęgę sela sąwani kibu tubewe? Te God aga ofa me deli da olama, sa muyu, te agai dageba menama, te dagego te we bidi dabego yali sęgę sela sąmainogo ebo ofa dao.
LEV 10:18 Dagego te ofa yali kibu kaneme te Tedali Gasagi Yai Be Habuba me sela pisąwai, tama tialima, magi baso dagego te kibu dage te eno dagebolo wali po gilama te Tedali Gasagi Yai Be Habude tuai meniwe?”
LEV 10:19 Tialima, Arongo Mosesbolo te tiwai po wai, “Odao. Megi tama naga te we bidi dabego te augwa sęgę sela sąyabo ofa te Genuai Bidiba mayu, te augwaligo te isiba tigidali ulama dabo ofa yabo sesalio. Tiali goli, te dwai sę enaba pedelai dao. Tialima, te megi tama eno te sęgę sela sąbo ofa ebo kibu mi tubaso da, teda Genuai Bidigo homugo te ebaso godolo yaiba, agawe? Eno homugo te menio,” wali.
LEV 10:20 Mosesgo te wabo odama, tama agai te Arongo po wiegi yai da homu yali. Tama aga haliga dua nagame igulama bidalio.
LEV 11:1 Te Genuai Bidigo Moses de Aron sibolo walama,
LEV 11:2 te Israel dabeba te tiwai po omainogo yali, “Dagego e tobage tǫde bidibo hasa sibi naga tuagameo,” wali.
LEV 11:3 “Te nogo sągą age si elalubo hasa sibi dabe naga, te augwaligo kibu bulmakaugo nosai tutudubo tiwai ebo dao.
LEV 11:4 Tiali goli dagego te kamel kibu, me rabit, me te masigi gabalode bidibo bolo gesia, te me tulamuo. Te hasa dabego te kaugo nosai tubo tiwai ebo dao, tiali goli augwaligo nogo sągą te age si elalubeo. Tama tiyu, dagego homugo augwali te eno gedude wiegi yai meni da homu elama, te dagego habu sao.
LEV 11:7 Tama te kibu mu me dagego tugio. Te nogo sągą dani age si elalubo, tiali goli agai te kibu kaugo nosai tubo tiwai gilama ebo meni. Tama tiyu, dagego homugo kibu mu te dwai nai da homu eyu habu selao.
LEV 11:8 Dagego te tobage hasa sibi me tugio, te augwali isali sogo te dagego augwali tigiba nogo me mugio, magi baso meni, augwali eno gedude wiegi yai me ebeo,” wali.
LEV 11:9 “Dagego te tobage sųgų tigidali te tigide pobolo yai me bogo elalubo, te tiwai sųgų tuagameo, te olo ąį dabede ma tamu ąįde bidibo sųgų dabe, te usu dao.
LEV 11:10 Tialima, tigidali sųgų me te dwasianu nai tigidali te tamu ąįde bidibo, me olo ąį dabede bidibo, te tigi pobolo me bogo meni yai, dagego homugo augwali dwali homu yao.
LEV 11:11 Tama eyu, dagego me tugimio, te augwali isai elalubadi te dagego nogogo me diągio. Te habu mu dao.
LEV 11:12 Ma odao. Dagego te bogo meni yai sųgų me te tigide pobolo isąwai sųgų te węde bidibo me tugio. Te nai dabe dagego habu selao,” wali.
LEV 11:13 “Te tobage ba meba dageba habu selibao, te dagego me tugio. Dagego te nai tigidali dwali homu yao. Te e tobage ba dabe, te tobage genuai me dwasianu ba kemodage, te tobage tigidali ba kemodage hani hulide bilibo ba me, te ba gaugau, me te kebi dabe, te kanai dabe, me te sągą dili bobage yai ba me, te tobage ba hopou, me te komoran wabo ba pato, me te dwasianu bogwą, me genuai bogwą, te dagego habu sao. Te nai tigidali dagego tubo habu selao.
LEV 11:20 Te sągą si me nogo si me bogo elalubo nai tigidali, te augwali wiegi yai nai meni, te habu sabo usu dao.
LEV 11:21 Te sągągo sasa mano pabo, te tobage nai yaibaso da, teda dagego tuabo usu yaibao.
LEV 11:22 Tama dagego te tobage kuli mano tigidali tubaso usu yaibao, te genuai me dwasianu dabe te tuagameo. Te tama dao.
LEV 11:23 Te gasa nai tigidali te nogo si sągą si te bogo me elalubaso da, teda augwali dagego te dwai nai da te homu elama, habu sao,” wali.
LEV 11:24 “Te me badu gasa tobage hasago me te dage eno gedude meda pedalubo sę yaibao. Te bidi me deli te isai hasago tigi diąwai baso da,
LEV 11:25 ma agai gasaba me tolasa pai baso da, teda te bidi eno gedude meda pedelama, te bididubadi be pioba mu usu naibao. Tama te hasa tolali bidigo ugwa me ąį telayao,” te po wai dao.
LEV 11:26 “Te sągąde age elalubo tobage hasa dabego, te sągą dani age si elalusiąyu, ma te bulmakaugo nosai tubo tiwai isąbo hasa dabe, te hasa hani dabe dagego te wiegi yai nai meni da, te homu yao.
LEV 11:27 Te tobage tigidali hasa te sągąde dani elalubaso, te wiegi yai hasa menio. Dage te tobage hasa isai tigi me diąwai baso da, teda dage eno gedude meda pedelama, tama dage tiwai bididubadi te giliga dega sigulaibao,” Genuai Bidigo te po wai.
LEV 11:28 “Bidigo te tobage hasa tigi gasaba me tolasa peyu da, agai ugwa ąį telayao, tiali goli aga meda elaludubadi te giliga dega sigulaibao. Te tobage hasa dabego dage meda ilibo dao,” wali.
LEV 11:29 “Te tobage hasa hani me habu selali, te bolo gesia dabe me tǫde bolo me, te dwasianu yogwa dabe me genuai yogai dabe, te habu saibao.
LEV 11:31 Eno te hasa dabe dageba habu selibao, te augwali isai madi dagego augwali tigi diąbaso da, te dage meda pedelama, te elaludubadi giliga dega siguluboba usu naibao.
LEV 11:32 Tama te hasa dabe me deli isilama, te nai me deli daiba tulaluei baso da, te nai eno gedude meda pedalubao. Te naigo tigi te augwaligo nigo nigai nai, me name ugwaba, me kau kibu waliba, me beg daiba tulaluei baso, te aga mena sę elalubaso da, te tagalao, te augwali meda pedelaibao. Tama tiyu, te dagego ąį telayao, tialima te nai dabego meda elalubadi te giliga dega sigulubo sogoba usu naibao,” te po wai dao.
LEV 11:33 “Tama te hasago tigi te tǫgo nigai sospen tomoba tulaluei baso da, teda te sospende elaluali nai tigidali te meda pedelaibao. Tama dagego te sospen sene alua sąyao.
LEV 11:34 Te nai meba pąde munalubadi te sospen ąį teba gelai baso da, teda te nai me meda pedelaibao. Te sospende elaluali ąį te doyu, meda yali dao.
LEV 11:35 Te hasa sibi te mena naiba me tulalubaso te tagalao, te nai te meda ilaibao. Te augwa tǫgo nigai stov ma aven me deli yaibaso, te me dagego aluao.
LEV 11:36 Tialima, te hasa me te ulu pedalubo ąįba me te olo tǫde pedalubo ąįba ma te tank ąįba tulaluei baso da, teda te ąį meda pedalugobeo. Menio. Tiali goli, te mena gasa nai te hasa tigide keąlubaso da, te meda elama, dwali dao.
LEV 11:37 Te hasa sibi me deli te isama, te dagego bulainogo ebo nai waiba tulaluei baso da, te usu dao, magi baso meni, te nai wai meda ilibeo, aga te wiegi yai elalubao.
LEV 11:38 Tiali goli, te nai wai te ąįde munalubadi, te hasago tigi daiba tulaluei baso da, teda te nai wai dabe te eno gedude meda pedalubaso, te habu selabo usu dao,” wali.
LEV 11:39 “Te eno dagebolo te tuao wali hasa dabe tuabo homu ebaso, te usu yaibao. Te hasa sibi hani me deli te odolali me isai madi, te bidi me we me deli teba nogo diąwani da, te bidi ma we eno gedude meda pedelaibao. Te tiwai agade elalubadi, te sia ge dega siguluboba usu naibao,” te po wai dao.
LEV 11:40 “Tama bidi me deligo te hasa mi tubaso, ma agai te hasa tolai baso da, teda agai ugwa ąį telayao. Tialima, aga digi te meda elalubadi te sia ge dega sigi paboba mu usu naibao,” wali.
LEV 11:41 “Dagego te dwasianu hasa dabe me, ma te tǫba tedela pabo binatang me tulamuo. Augwali te dwai nai da, dagego te homu yao.
LEV 11:42 Te haligago bulu bilibo tobage hasa dabe, ma te nogo sągągo bilibo hasa, ma te sągą hauwa elalubo hasa me, te dagego me tugio. Augwali te wiegi yai nai dabe meni, te habu sao.
LEV 11:43 Dagego te hasa sibide deli me tugio. Te dagego tubaso da, te eno gedude dage meda mu pedelaibao,” po wai.
LEV 11:44 “Ena Genuai Bidi, ena duga God dao. Tama tiyu, te duga digi dage enabolo mayu, te dolo isąbo kolesaga tagaluyu, te doloba pai kolesaga wali peyu, te meda meni yai wiegi yai tedali mu bidao. Magi baso meni, ena digi ena te magi meda meni yai wiegi yai tedali bidiyu, eno te wiegi yai kolesaga me doloba pai sę mu ebo dao. Tama te tǫde bilalubo dwasianu hasa dabe me tugimio. Tiyu, dage eno gedude meda pedelabuo.
LEV 11:45 Ena Genuai Bidigo, eno dage te Isipde selama, odasa asali, te ena dagego God bidainogo yali. Tialima, dage te tedali gasagi yai mu bidu, te wiegi yai doloba pai kolesaga naga wali piyąo, magi baso meni, ena digi ena te tedali gasagi yai mu bidiyu, te eno kolesaga wiegi yai doloba pai mu elalubo dao,” wali.
LEV 11:46 “Te dagego megi sali te bomai pode elalubo po, agai te tobage hasa sibi me te ba dabe, te węde bidibo sųgų dabe, te dwasianu hasa sibi tigidali, te tǫde bilalubo binatang, te nai sibide bomai po wali dao.
LEV 11:47 Tama dagego bugagia dagaliyu, te mena meda meni yai nai, me te mena naigo dage eno gedude meda pedelabo te bugagia dagaliąo. Te dagego tuabo hasa sibi dabe bugagia konebadi, dagego tusiąma habu sabo hasa sibi me konebadi tama yao,” Genuai Bidigo te Moses dali Aron dali sibolo te po wai.
LEV 12:1 Genuai Bidigo Mosesbolo te tiwai po wali,
LEV 12:2 “Nago te Israel we bidibolo walao, te we me deli haliga elama, te aga wai ogwa ame nobaso da, teda aga eno gedude meda elalubao, te we poluago elibo gasi ebo sogo te tiwai elalubao, te aga meda elalubadi te nogo a naga olama me badu nogo si wabo sogo bidaibao.
LEV 12:3 Tama te 8 wabo side, augwaligo te waigo gasa tigi wali togwao.
LEV 12:4 Te we te 33 sogo bidama, te aga wiegi yai meda meni yai ma pedelaibao, magi baso meni, te aga wai ame nani sogo te aga tigide elaluali kaneme tagalalio. Agai te Godiba mani nai da olama, habu selali nai me deli nogo diąsiąbadi te eno dąį ilali sogoba usu nao. Tama aga te eno sel Ugwa Be obo tomoba pisąbadi, te aga meda meni yai wiegi yai pedalubo sogoba usu nao,” po wai dao.
LEV 12:5 “Te wego wegi ame nabo sogo, aga eno gedude wiegi yai ebeo, te we sibigo poluago elibo gasi ebo sogo tiwai ebao, te aga Sarere si, te 14 dei usu nama meda elalueibao. Tama te we aga bidibadi, te 66 dei ma bidama da, te aga meda meni yai dwagi yai ma pedelaibao, magi baso meni, agai kaneme tagalai dao.”
LEV 12:6 “Te tama sogo te we dabe sibi meda meniyu, wiegi yai ma pedalubo si da, teda te wego te kibu be deli yai sipsip kibu sao, te siaba tigidali ulabo ofa yaibao, te augwaligo te ba hi wabo, te ba me deli, te sęgę sela sąyu ofa yabo ba sao. Agai te ofa yabo nai si te eno sel Ugwa Be sunumiba selasa pobaso, usu dao.
LEV 12:7 Tama prisgo te wego te sesali ba hi me kibu sipsip selama, te Genuai Bidi, enaba ofa ebaso da, te we te meda meniama, te wiegi yai pedelaibao. Tama te kanemego te we meda me elalumainogo me egobeo. Megi da aga eno gedude wiegi yai yalio. Te wai ogwa ma wegi ame nabo wego te bomai po wali pao,” te po wai dao.
LEV 12:8 “Tialima, te wego mone sǫą pelama, te aga sipsip kibu wai abelabo mone usu meni baso da, teda agai te ba hi sesao. Te ba hi me deligo te isiba tigidali ulubo ofa eyu, te me gasa bago te sęgę sela sąbo ofa yaibao. Te prisgo te ba hi si ofa eyu, te we wiegi yai pedelaibao, tama te we eno gedude wiegi yai pedelaibao,” te po wai dao.
LEV 13:1 Te Genuai Bidigo Moses de Aron sibolo te tama po wai,
LEV 13:2 “Te bidi me deli ma we te tigide keni ma dili keni pedalubaso, ma tigide magi sę me deli pedalubaso, tama te sęgo tonobo te oiyabe gasi tiwai pedelabo homu tiwai ebaso da, teda augwaligo te bidi ma we te Aronba me aga hani prisba odasa pao,” wali.
LEV 13:3 “Tama te prisgo te sę bugagia osolama, te agai suali madi te tigi nisi tedela elama, te keni tigi tomoba paibaso da, teda te oiyabe gasi dolo tama ebao. Te prisgo te bidi suali sogo da, agai te tama po wao, ‘Te bidigo tigi wiegi yai me elalubeo,’ po wabo dao.
LEV 13:4 Tialima, te dąį tedela yai pedelama, te prisgo suali keni te tigi tomoba pisąma, te tigi nisi tedela pedalisąbaso da, teda prisgo te bidi agaduba te be me deliba munama elalubadi, te Sarere deli, a naga me si sogo, usu nama bidimainao.
LEV 13:5 Te 7 wabo side, prisgo te dąį yai elaluali ma osola suao, tama agai homugo te tiwai naga tama me elalubaso, te genuai pedalisąbaso da, teda te bidi agaduba te be me deliba munama bididubadi, te 7 sogoba usu nao,” te po wai.
LEV 13:6 “Te Sarere si silibaso da, teda prisgo te bidi ma sulama, te nai genuai pedalisąma silainogo ebaso da, teda te bidi olo keni da homu yao. Tialima, prisgo agabolo walama, ‘Nage God gedude wiegi yai da,’ po wao. Te bidi aga ugwa wę tedelama, te aga wiegi yai mu pedalumainao,” te po wai.
LEV 13:7 “Te tudi badu nosali, te keni ma pedalubaso da, teda te bidigo pris ma sugi pao.
LEV 13:8 Tama prisgo te bidi bugagia sumainao, tama te keni genuai pedalubaso da, teda te bidigo oiyabe gasi elalueibao. Te prisgo agabolo te tiwai po waibao, ‘Nage wiegi yai me ebeo.’”
LEV 13:9 “Te bidi me deli bomai keni elalubaso, te augwaligo aga te prisba odasa pao,” wali.
LEV 13:10 “Te bidi te prisgo bugagia osa yao. Te keni tedela eyu, te tigi nisi tedela pedelama, tama te kenide keni bole pągąną pobaso da,
LEV 13:11 teda te bidi te oiyabe gasi dolo elalubao. Tama prisgo te bidiba te tiwai po wao, ‘Nage wiegi yai me ebeo.’ Prisgo koneani, te bidi wiegi yai ebeo, tama tiyu, te bidi agaduba deli bidimainogo me elamu dao.
LEV 13:12 Tama te gasi genuai mu pedelama, te bidigo tigi tigidali usu nubaso da,
LEV 13:13 teda prisgo te bidigo tigi bugagia osa yao. Te prisgo suali digi te gasigo te bidigo tigi tigidali usu nama, te tigi tigidali tedela ebaso da, agai te bidibolo te tama po wao, ‘Nage Godigo gedude wiegi yai yalio.’ Te bidi wiegi yai mu yai dao.
LEV 13:14 Tiali goli, nosali te keni ulu podilama, te tomode elalubo mi hanilibaso da, teda te bidi wiegi yai mu me ebe dao.
LEV 13:15 Prisgo te keni ma sulama, agai suali keni te tiwai ulu podilaibaso, agai te bidibolo walao, ‘Nage wiegi yai ebeo.’ Te keni elalubo bidi te keni ulu podilama, te keni tomode mi elalubo bidi da, aga eno gedude wiegi yai me egobeo. Te tobage keni te dwai mu dao.
LEV 13:16 Tialima nosali, te keni pedela selama, tigi tedela pedalubaso da, teda te bidi te prisba ma pomainao,” wali.
LEV 13:17 “Te prisgo te bidi bugagia ma sulama, agai suali te keni pedela selama, te tigi tedela yaibaso da, teda te bidi eno gedude wiegi yai yalio. Te prisgo agabolo te tiwai po walao, ‘Nage wiegi yai mu yai dao,’ po wao,” wali.
LEV 13:18 “Te bidi me deli tigide dili keni elama, te keni pedela selama,
LEV 13:19 tama nosali dili keni yali madi du elama, tedela pedalubaso, ma tigi mama yai me tedela dali elalubaso da, teda te bidi prisba pao,” wali.
LEV 13:20 “Tama prisgo te bidi dili keni yali pesage bugagia suao. Te keni dwasianu tomoba pelama, te badu tigi nisi te tedela pedelai baso da, teda prisgo te bidibolo te tiwai po walao, ‘Nage God gedude wiegi yai ebeo.’ Te gasi te dili keni pedela sali pesagede pedelali da, te dwai nai mu dao.
LEV 13:21 Tiali goli, prisgo te tigi sulama, agai te tigi nisi tedela isąwai sulama, te keni tigi wali tomoba pisąwai, agai te usu ma yabo tiwai tonobo homu ebaso da, teda prisgo agaduba munama bidibadi, te Sarere deli bidama, te nogo a naga olama, te me badu nogo si wagi solama sogo usu nama bidao.
LEV 13:22 Te nosali te 7 wabo sogo te nai genuai pedalubaso da, teda te dwai nai mu da, te prisgo bidibolo te tama po walao, ‘Nage te God gedude wiegi yai ebeo,’ po wao.
LEV 13:23 Tiali goli, te tigide dąį ilali te tiwai me tama elaludu, te genuai pedalisąbaso da, teda te dili kenigo dila pali tigi wali te masalu pedela salio, te tama dao. Tama te prisgo te bidibolo te tiwai po wao, ‘Nage te God gedude wiegi yai yali dao,’” wali.
LEV 13:24 “Te isigo bidi me deli tigi dai madi, te keni mama yai ma tedela yai te pedalubaso da,
LEV 13:25 teda prisgo te keni bugagia osola suao. Te keni tedela yali madi te kenide tigi nisi pedelama, te siago ulali madi keni tomoba paibaso da, teda te keni dwai nai mu dao. Tibaso, prisgo te bidibolo te tama po wao, ‘Nage God gedude wiegi yai ebeo,’ po wao.
LEV 13:26 Te keni elalubo madi tigi nisi te tedela yai pedalisąma, te keni tomoba pisąma, te suali madi pedela sabo homu tiwai ebaso da, teda prisgo te bidi agaduba munama bidibadi, te 7 wabo sogo usu nama bidimainao.
LEV 13:27 Te 7 wabo side te prisgo aga ma osola suao. Te keni genuai pedelai baso, te keni dwai mu dao. Te prisgo agabolo te tiwai po walao, ‘Nage dwagi yai me ebeo,’ te po wao.
LEV 13:28 Tiali goli, te keni me tama elalubaso, te genuai pedalisąbaso da, teda te tigide isigo ulali madi masalu naga elalubao. Tialima, prisgo te bidibolo te po walao, ‘Nage God gedude wiegi yai dao,’” wali.
LEV 13:29 “Te bidi me deli ma we buluba keni keni te tobolude pedalubaso, ma penanede keni ebaso da,
LEV 13:30 teda prisgo te buluba keni bugagia suao. Te prisgo homugo te keni keni tigi tomoba pali homu elama, te agai suali te buluba keni yali pesagede te tigi nisi hauwa elalu, te tigi nisi sęwa yaibaso da, teda prisgo koneama, te buluba keni keni dwai nai mu da homu yaibao. Agai te po te bidibolo walao, ‘Nage God gedude wiegi yai ebeo,’ wao.
LEV 13:31 Tiali goli, prisgo aga subo sogo, te agai suali te buluba keni kenigo tigi wali tomoba sela pabeo, te buluba keni elaluali madi tigi nisi wiegi yai me pedalisąwai, tialima agai te bidi agaduba munama, te Sarere deli bidimainao,” te po wai.
LEV 13:32 “Te 7 wali side me tama elalubaso da, prisgo te bidigo tigi ma osola suao. Te buluba keni me tama elaluyu, te genuai pedalisąma, te prisgo homugo te tigi tomoba pogobe homu eyu, tama te badu sęwa yai tigi nisi pedalisąbaso da,
LEV 13:33 teda te bidi aga tobolu nisi me penani nisi tigidali poayao, tiali goli te keni elalubo madi poagio. Te nosali prisgo te bidi agaduba tedali bididubadi, te nogo a naga olama, me badu nogo si wagi solama sogo ma bidimainao.
LEV 13:34 Tama te 7 wabo sogode prisgo te bidigo keni keni ma suao. Te keni keni te tama tiwai me elalu, te genuai me isąyu, tama prisgo homugo te keni tigi tomoba pabe homu eyu da, te agai te bidibolo te tiwai po wao, ‘Nage God gedude wiegi yai yalio.’ Tialima, te bidigo ugwa ąį telabaso, te wiegi yai ebo dao.
LEV 13:35 ‘Nage wiegi yai yalio,’ te prisgo te po wali sogo tudi badu nosali te habo keni genuai pedelai baso da,
LEV 13:36 teda te prisgo aga ma osola suao. Te habo keni genuai pedelai baso da, teda prisgo te tiwai koneao, te bidi wiegi yai ebeo homu yao, tama agai te sęwa yali nisi munu me gegegio,” wali.
LEV 13:37 “Tialima, te prisgo aga suali madi, te habo keni te tiwai me elaluabo homu eyu, te genuai pedalugobe homu elama, tama te keni yali madi wiegi yai tigi nisi pedalubaso da, teda te habo keni silalio. Tialima, prisgo agabolo te tama po walao, ‘Nage God gedude wiegi yai yalio.’”
LEV 13:38 “Te bidi ma we me deligo tigide tedela yai nai meba pedelai elalubaso da,
LEV 13:39 teda prisgo te tigide dąį elalubo bugagia suao. Te dąį elalubo te olo tedela elaluyu, te ula mu meni baso da, teda te dąį olo tama te tigide pedelali homu yao. Tama tialima, te bidi eno gedude wiegi yai yali dao,” wali.
LEV 13:40 “Te bidigo tobolu nisi meniama wane paibaso da, teda aga eno gedude meda elalubeo. Menio. Aga wiegi yai bidi dao.
LEV 13:41 Te tobolu nisi tomo bulude naga, te wane pai bidi yai baso da, teda te bidi aga eno gedude meda meni yai wiegi yai bidi dao.
LEV 13:42 Tiali goli, te wane pai bidi tobolude te keni pedelama, te kenigo au te mama yai me tedela elalubaso da, teda te keni dwai mu dao.
LEV 13:43 Te prisgo bugagia osola suao. Te kenigo au te mama yai ma tedela yai elalu, te oiyabe yai bidigo keni tiwai elalubaso da,
LEV 13:44 teda te tobolu wanede keni te dwai nai mu dao, te prisgo agabolo te tiwai po wao, ‘Nage Godigo gedude wiegi yai ebeo.’”
LEV 13:45 “Bidi me delide te tobage keni elalubaso, agai te pisila pai ugwa munama, te tobolu nisi yaga sigio. Tama aga nogogo pedauwali pania selama, te tiwai i wao, ‘Ena dwagi yai menio. Ena dwagi yai menio,’ te tama po wao.
LEV 13:46 Sesemane sogo te tobage keni elalubo bidi, aga eno gedude wiegi yai me ebeo. Agai te aga abagi dabe tagalama, te bidibo pesage bulu badu tedali bidao,” te po wai dao.
LEV 13:47 Genuai Bidigo po ma weyu, te Moses de Aron sibolo te tama po walio, “Me sogo te nai mebago te ugwa dolobo sę eyu, te gudubo ugwa dabede, me name ugwade, me augwa te sipsip nisigo nigali, ma te wiegi yai hobigo nigali, te bulmakau tigi walide pedaliyu, te tobage naigo nigali naide pedaliyu yaibao,” wali.
LEV 13:49 “Tama te nai te ni yano tigi poai, ma mama yai pedalubaso da, teda augwaligo te ugwa dabe prisba waselama, ola magasao,” te po wai.
LEV 13:50 “Te prisgo selama, bugagia sulama, te nai gasa, badu munama, te nogo a naga olama me badu nogo si sogo elalumainao.
LEV 13:51 Te 7 wabo side te agai ma suao, tama te ugwade genuai pedelaibaso da, teda te oiyabe gasi tiwai ebao, tama te ugwa ma kau wali te eno gedude wiegi yai egobe dao.
LEV 13:52 Tama prisgo te ugwa isiba ulao. Te oiyabe pedalubo tiwai yali nai, te isiba ulama, mu siago dela silimainao,” wali.
LEV 13:53 “Tiali goli, prisgo te nai suali te tiwai tama me elaluyu, te ugwade genuai pedalisąbaso da,
LEV 13:54 teda agai augwalibolo olama, te ugwa wę tela yao olama, te munalubadi te 7 wabo sogoba usu nao.
LEV 13:55 Nosali agai ma suao, te oiyabe tiwai yali te au me tama elaludubaso, te ugwa menade te nai pedelali madi elalu, te nai elaluali pesagede me genuai pedalisąbaso da, tagalao, te eno gedude wiegi yai me egobeo. Tialima, prisgo te ugwa isiba ulao.
LEV 13:56 Tialima, augwaligo ąį telawai madi te prisgo ma suali madi, te oiyabe tiwai yali nai silainu ebaso da, teda agai te ugwa pedai te nai pedelali madi togwa sąyu, te tigi wali me peda sąyao, te dolali naga sela sąyao.
LEV 13:57 Tialima, nosali te ugwa me kau tigi wali dolali nai ma pedalubaso da, teda te ugwa aga ayago ma kau wali me te isiba ulao, te mu dela silimainao,” wali.
LEV 13:58 “Tialima, agai te ugwa me kau wali ąį telabo sogo, te oiyabe tiwai nai menia sobaso da, teda agai si sogo ąį tedelama, te ugwa eno gedude wiegi yai mu pedelaibao,” wali.
LEV 13:59 “Te tobage naigo te gasa tobage nai dolo bomai po elaluali, te ugwa ma te name ugwa augwa te wiegi yai hobigo nigali, ma te sipsip nisigo nigali, te tigidali nai augwa te kau waligo nigali nai. Te bomai pode te nai dabe te eno gedude wiegi yai yali, ma wiegi yai isąwani te bomai po wai dao,” wali.
LEV 14:1 Te Genuai Bidigo Mosesbolo te tiwai po wai,
LEV 14:2 “Te mena bidide oiyabe gasi elalubaso, te sę yabo bomai po e dao. Te aga gasi silama, te aga eno gedude wiegi yai pedelainogo ebaso da, teda augwaligo te prisba tede po wagi pao.
LEV 14:3 Tialima, pris te we bidi bidibo pesage tagalama, buluba solama, te oiyabe gasi sai bidi tedali bidibo madiba peyu, tama te aga tigi bugagia osola suao. Te oiyabe gasi mu silai baso da,
LEV 14:4 teda prisgo augwalibolo olama, te eno gedude wiegi yai ba si bidibadi sesao,” wali, “te ni sida dwasianu dage sobadi, te mama yai dila pai hobi me sesao, te ni hisop nologo me selasa asao,” wai dao.
LEV 14:5 “Te prisgo augwaliba walama, te tǫgo nigai sospen selama, te dwasianu wę asobo madi te ąį tulama sesao. Tialima, nosali augwaligo te ba si wali bago me deli selama, te tǫgo nigai sospen ugwadu tolaluama, te ela munama, te kaneme sospen seneba dulaibao.
LEV 14:6 Te prisgo gasa ba me ni sida dage, te mama yai hobi string me, ni hisop me, te selama, te kaneme yai ąįba munama, te ugwaba polo ma sao.
LEV 14:7 Tama elama, agai te kaneme dwasianu te nogo a naga olama, te me badu nogo si wagi soabode te eno gedude dwagi yai pedelabo bidi tigiba sąsągą bilao. Tama prisgo agabolo te tiwai po walao, ‘Megi da nage God gedude wiegi yai pedelalio.’ Tama prisgo te bidibo ba selama, te buluba solama, te aga bola pomainogo yaibao.
LEV 14:8 Te bidi aga wiegi yai pedelainogo eyu da, te aga ugwa ąį tedelama, te tobolu nisi togolama, te aga tigi me te aga ąį pauwao. Agai tama tibaso da, teda aga eno gedude wiegi yai pedelaibao. Tama aga te bidibo pesageba pagameo, tiali goli aga ugwa bede bulu, badu bidibadi a naga me si sogo usu nama te usu dao.
LEV 14:9 Te nogo a naga si wabo side te aga tobolu nisi me penani nisi tigidali ma togwao, te gedu nisi me, te aga tigide gasa tigi nisi elalubo tigidali mu poayao. Te aga ugwa me ąį telayu, te aga me ąį pauwao, teda aga eno gedude wiegi yai magi meda meni yai pedelaibao,” wali.
LEV 14:10 “Te 8 wabo side agai te sipsip omai wai si selama, te sipsip kibu so me deli kibu be deli yai sobadi yao. Augwali te dwai keni kenigo me dolisąwai wiegi yai mu sao. Tama agai te plaua sęgę kilogram sela yali wiegi yai sao, agai te oliv wel dali taluali, te wit ofa ulubo ofa tiwai eyu, te oliv kap wel si me sao,” wali.
LEV 14:11 “Tama agai te kibu sipsip dabe te plaua nai me eno sel Ugwa Beba sela pao, te pris me deligo aga wiegi yai pedalumainogo tau saibao. Tialima, prisgo te bidi te aga ofa yabo nai dabe dali te ena Genuai Bidi eno sel Ugwa Be sunumiba selasa pao,” wai dao.
LEV 14:12 “Megi da prisgo te sipsip sigo te me deli selama, agai te oliv wel dali te dwai są yali isilibo ofa tiwai yao. Hasia bolo agai te nai dabe nogogo tulama, te eno gedude hogayu, iba eda yao,” po wai.
LEV 14:13 “Tama nosali prisgo te sipsip wai te pesagede elao, augwaligo te sęgę sela sąyu, te bulmakau dabe elama, ofa ebo pesage, te isigo tigidali dela silimainu ofa ebo digi dao. Prisgo tama tiao, magi baso meni, te dwai sę silimainu ebo ofa tiwai te sęgę sela sąbo ofa tiwai ebao. Te ena dolo mu ebo sę ena God, eno te sipsip mi te pris dabebolo mawai dao.
LEV 14:14 Nosali prisgo te sipsipgo kaneme dwasianu selama, te meda sela sąnama, wiegi yai pedelainu ebo bidigo dolo nogo olo badu muao, te dolo nogo a danide me mubadi, te bidigo dolo sągą a danide me muao,” wali.
LEV 14:15 “Tama prisgo te oliv wel dwasianu selama, te aga pobase nogoba gelama, te wel nogo diąyao.
LEV 14:16 Tama agai dolo nogo dani me deli te welba munama, te wel a naga si sogo sąsągą bilibaso da, te ena Genuai Bidi, eno aga sueibao.
LEV 14:17 Nosali prisgo te aga nogode elaluali dwasianu wel selama, te wiegi yai pedalumainu ebo bidigo dolo nogo badu oloba muao, te genuai a nogo danide elalubo kanemeba me muyu, te bidigo a sągą danide elalubo me mubadi yao.
LEV 14:18 Te wel me badu prisgo nogode elalubo agai te bidi toboluba muao. Te tebo kolesagade agai te bidi eno gedude wiegi yai pedalubo sę ilibo dao,” wali.
LEV 14:19 “Te silama da, teda prisgo te sęgę sela sąbo ofa ebaso da, te bidi eno gedude wiegi yai mu pedelaibao. Te nosali agai te isigo tigidali mu dela silibo ofa yao,” te po wai dao.
LEV 14:20 “Tama agai te ofa ebo kibu dali te wit ulubo ofa dali te altade yao. Te kolesagade prisgo te bidi sęgę sela sąbo ofa ebao, tama te bidi eno gedude meda meniama, wiegi yai mu pedelai dao,” te po wai dao.
LEV 14:21 “Te bidi magi nai mu meniama, te aga wiegi yai pedelabo ofa yabo nai dabe abelabo mone meni baso da, teda agai te omai sipsip wai deli naga sesao. Te kibu sipsipgo te aga dwai sę yali silimainu yaibao. Te nosali prisgo nogogo tolaluyu, te iba eda eno gedude tama tiao. Tama te bidigo te kilogram deli yai wiegi yai plaua somainao, tama te oliv wel dali taluama te wit ulubo ofa yao. Te agai oliv wel kap si sesemainao,” wali.
LEV 14:22 “Tama agai augwaligo te nogi hi wabo tobage ba si sesao, te ofa yabo, magi baso meni, agai te sipsip hauwa abelabo usu ebeo. Te ba hi me deligo te dwai sęgę sela sąyu, te me deligo te isiba ulama tigidali dela silibo ofa yaibao,” te po wai dao.
LEV 14:23 “Te augwaligo aga te wiegi yai pedalumainu sę ebo side, te 8 wabo side, agai te kibu doado bage te prisba sela peyu, te Genuai Bidi eno sel Ugwa Be sunumiba selasa asobaso da, teda eno sueibao,” wali.
LEV 14:24 “Tialima, prisgo te sipsip me oliv wel saibao, te nogogo tulama, te eno gedude iba eda yao.
LEV 14:25 Tama prisgo te sipsip wai elama, te dwai sę yali silimainogo ofa yaibao. Agai te ofa ebo nai kaneme dwasianu selama, te wiegi yai pedelainu ebo bidigo dolo nogo olo badu pilao, te agai dolo nogo a danide me pilibadi, te bidigo dolo sągą a danide me pilao,” wai dao.
LEV 14:26 “Te prisgo oliv wel dwasianu selama, te aga pobase nogode gealuama, te wel nogo tuwao.
LEV 14:27 Te agai dolo nogo dani te welba munama, te wel nogo a naga si sogo sąsągą pobaso da, te ena Genuai Bidi, eno sueibao.
LEV 14:28 Nosali prisgo te dwasianu wel ąį te hasia agai te dwasianu kaneme muani pesagede muao. Agai te bidigo dolo olo badu mumainao, te dolo a nogo danide me muyu, te agai dolo sągą a danide me muao.
LEV 14:29 Te nogode elalubo wel tigidali te prisgo te wiegi yai pedelainu ebo bidigo tobolude pilao, te kolesagade prisgo te bidigo sęgę sela sąbo ofa ebao.
LEV 14:30 Tama prisgo te ba hi si te bidigo sela asali te salio, te ofa yabo dao.
LEV 14:31 Agai te ba higo te sęgę sela sąbo ofa tiwai eyu, te gasa bago te isiba tigidali ulama dabo ofa yaibao. Agai te wit ulubo ofa dali te ba hi si dali ofa yao. Te kolesagade prisgo te bidigo sęgę sela sąbo sę eyu, eno gedude wiegi yai pedalubo sę tama yaibao.
LEV 14:32 Te bomai po te oiyabe gasi yali bidigo gasi sia somainu ebo bomai po, tiali goli te aga mone sǫą pobaso, te agai te bomai pode sesao wali nai tigidali sela pabo usu isąbaso, te aga eno gedude wiegi yai emainogo te tiwai ofa ebo dao,” wali.
LEV 14:33 Te Genuai Bidigo Moses de Aron dali sibolo te tiwai po wali,
LEV 14:34 “Nosali dage te tǫ kantri Kenanba bidigi paibao, te eno dageba mawainogo homu ebo bulu, te dagego tǫ mu sesemane elalueibao. Tama dage te Kenan tǫba sabolama bidibo sogo, te eno nai me deli te oiyabe pedalubo tiwai elama, te dagego masigigo nigai be mebade pedelama, te be dolobo sę ilaibao.
LEV 14:35 Te be aga ayago suali, te tama sę elalubaso, aga te prisba pelama, agabolo te tiwai po walao, ‘Eno suali, te oiyabe tiwai nai me deli eno beba pedelama, te eno be dolainu homu ebao.’
LEV 14:36 Prisgo te tiwai po odobaso da, teda agai te be page bidibolo walama, te be tomode doado bage tigidali selama, te buluba sela soao. Te bidigo tama tisąwani da, te pris aselama, agabolo te tiwai po walaibao, ‘Te bede tigidali doado bage te God gedude dwalio olama, te nagebolo habu selaibao.’ Tialima, bidigo te bede doado bage tigidali buluba sela soai digi yai baso da, teda pris te be tomoba pelama, te be sumainogo yao,” po wai.
LEV 14:37 “Agai te be paiyali daga masigi dabe dolobo nai te bugagia osola suao. Te agai suali madi te ni yabe tiwai nai ma mama yai naigo te amamogo tubo tiwai te be daga paiyali masigi dabede dwasianu dodogo paibaso, tama agai homugo te naigo te be daga dodogo pelama, tomoba mu paibaso da,
LEV 14:38 teda pris te buluba dią solama, te po walao, ‘Te bede bidisąma, habu selama, te nogo a naga olama, me badu nogo si sogo olo elalumainao.’
LEV 14:39 Te 7 wabo side pris aselama, te be ma suagasao. Te nai te be paiyali daga masigi dabede genuai mu pedelaibaso da,
LEV 14:40 teda prisgo augwalibolo walama, te dwai nai elalubo masigi dabe sela sąnama, te taun bulu, badu sąyao te eno gedude dwai nai sela sąbo pesageba sela sąyao.
LEV 14:41 Augwaligo tama tilama da, teda augwaligo te masigi mesegelali simen tigidali te be tomode elalubo sela sąyao. Tama augwaligo te taun buluba sela solama, te dwai meda yai nai sąbo pesageba naga sąyao.
LEV 14:42 Tama augwaligo te gesi masigi dabe selama, te poloba elaluali masigi hasegelama, te be daga masigi te pedai badu ma nigao. Te augwaligo gesi simen selama, te be daga nigali tigidali ma haluao,” wali.
LEV 14:43 “Te oiyabe tiwai nai te be obo dagade ma pedaliyu, te sę yali tudi, badu te nai ma pedalubaso da,
LEV 14:44 teda pris te beba ma pelama, bugagia suao. Te nai genuai pedelama, te be dolabo homu ebaso da, teda te be eno gedude dwali dao.
LEV 14:45 Tibaso, te be augwaligo hųgilama, te tigidali masigi me, ni me, simen me, sela sąyao. Tama augwa te taun bulu badu sela soao, te augwa eno gedude meda yai doado bage sela sąbo pesageba pelama, mugi pao,” te po wai dao.
LEV 14:46 “Te be habu selali elalubadi, te be tomoba bidi me deli pobaso da, te bidi eno gedude meda pedelama, aga te tiwai bididubadi te giliga iba dega sigulaibao,” wali.
LEV 14:47 “Te bidi me deli te tomode godege piali ma nai tubaso da, teda aga ugwa ąį telayao,” wali.
LEV 14:48 “Tialima, prisgo te be suagasobo sogo da, teda agai suali, te be wiegi yai elaluyu, te nai ma pedalisąbaso, te agai te tiwai po augwaliba walao, ‘Te be Godigo gedude wiegi yai elalubao.’ Magi baso meni, te oiyabe tiwai naigo te be dolali, te munu ma elalubeo.
LEV 14:49 Te be eno gedude wiegi yai pedalubo kolesaga e tiwai elalubao. Prisgo te ba hi si sobadi, te ni sida dwasianu dagenu siyu, te mama hobi string dagenu sobadi, te ni hisop nologo sobadi yao.
LEV 14:50 Tama augwaligo te tǫgo nigai sospen selama, te dwasianu asobo ąįba pelama, te ąį tulama sesao. Te prisgo ba hi me deli selama, te sospen ugwadu tolaluyu elama, te kaneme sospenba dulaibao,” wali.
LEV 14:51 “Nosali agai te ni sida dagenu me siyu, te ni hisop nologo me siyu, te mama hobi string me sobadi, te bidibo ba hi selama, te kaneme elalubo ąįba munama, te polo ma kega sao. Tama agai te kaneme elalubo ąį te a naga si sogo te beba sągąyao.
LEV 14:52 Prisgo tama tilama, te be eno gedude wiegi yai pedelaibao.
LEV 14:53 Tama agai te bidibo ba bidibadi te taun buluba te kala elalubo pesage buluba bola pomainogo tagala palama, bola pomainu yao. Te kolesaga te bego dwai meda elalubo sia selama, te be eno gedude wiegi yai ma pedalubo tiwai ebo dao,” wali.
LEV 14:54 “Te bomai pode te tama po wali, te oiyabe gasi yai we bidi, me te habo keni keni yai we bidi, me te keni ebo me dili keni ebo, me te masalu tigide pedalubo po me walio, te ugwa doado bage, me be dolobo te bomai pode te po wali.
LEV 14:57 Te bomai pogo te dagebolo ola mayu, te mena nai te meda yai nai, ma te mena nai te wiegi yai eno gedude pedalubo, te bomai pogo page ola mabo po dao,” te po wai dao.
LEV 15:1 Te Genuai Bidigo Moses de Aron sibolo te tiwai po walali,
LEV 15:2 “Nago te Israel bidi dabebolo walao, te bidi me deligo gasade keni dį pedalubaso, te keni dįgo aga eno gedude meda ilibao.
LEV 15:3 Te keni dį ebogo te ąį bole tiwai gasade pedalubaso, ma te naigo bomogo te poi tabo sunumi pania sobaso da, teda te bidi eno gedude meda elalubao.
LEV 15:4 E tiwai elalubao. Te dugulalubo bet sai me pibo bet sai me tigidali te meda pedelaibao. Te aga dugabo sia sai tigidali me te meda ela silaibao.
LEV 15:5 Mena bidigo te bidigo pibo betba nogo mubaso, ma te bidi dugabo sia saiba dugabaso da, teda aga ugwa digi wę telayu, te aga me ąį paugi pao, tiali goli te agade meda elaludubadi te be pio mu igi paibao.
LEV 15:7 Te mena bidi me wego te tobage gasi elalubo bidigo tigiba nogo mubaso, te aga ugwa digi ąį telayu, te aga wę me paugi pao, te meda agade elaludubadi te giliga iba dega sigulaibao.
LEV 15:8 Te gasi elalubo bidi agai te eno gedude wiegi yai elalubo bidi me deliba pesą sąbaso da, teda te gasa bidi me te meda pedalubao, te agai ugwa me ąį telayu, ąį me paugi pao, te meda agade elalubadi te giliga iba dega sigulaibao,” te po wai dao.
LEV 15:9 “Te tobage gasi elalubo bidi te hosde dugabo nai satelba dugabaso da, teda te nai meda pedalubao.
LEV 15:10 Te bidi me deligo te bidi dugayali nai satelba nogo muani da, aga me meda ilama, te tiwai me bididubadi te giliga iba dega sigulaibao. Te nai bidi me deligo sela pobaso me, nosali bidi teba dugabaso da, teda aga ugwa ąį tedelama, te ąį paugi pao, te meda agade elaludubadi te sia ge iba dega sigulaibao.
LEV 15:11 Te gasi elalubo bidi, te agai nogo ąį bolo telasiąma, te agai nogo gasa bidiba mubaso da, teda te gasa bidi agai ugwa ąį tedelama, te ąį paugi pao, te aga meda elaludubadi te sia ge iba dega sigulaibao,” wai dao.
LEV 15:12 “Te gasi elalubo bidigo agai nogo te tǫgo nigai sospenba mubaso da, teda augwaligo te sospen aluao. Te agai augwaligo te nigo nigai pou disba nogo mubaso da, teda augwaligo te pou dis bugagia ąį telayao,” wali.
LEV 15:13 “Te bidigo gasi usu ma ebaso da, teda aga te a naga me si sogo bolo bidilama, te aga wiegi yai ma pedelaibao. Te Sarere silibaso da, teda aga ugwa ąį telayao, te pelama, ąį me deliba paugi pao, te aga eno gedude wiegi yai pedelaibao,” wali.
LEV 15:14 “Te 8 wabo side agai te tobage ba hi si seselama, te ena Genuai Bidi geduba dolagasao, te eno sel Ugwa Be sunumiba aselama, te ba hi si prisba magasao.
LEV 15:15 Tama prisgo te ba hi me deligo te sęgę sela sąbo ofa tiwai eyu, te gasa ba mego te isiba tigidali ulama dela silibo ofa yaibao. Te tebo kolesagade agai te gasi silai bidi tau selama, te bidi eno gedude wiegi yai pedelaibao,” wali.
LEV 15:16 “Te bidi me deli piali madi aga gasade olo dali gawa gealueibaso da, teda aga meda pedelali, te aga tigi tigidali ąį pauwao, te aga meda elalubadi te giliga dega sigulaibao.
LEV 15:17 Te bidigo tigide ąį te ugwade tulalueibaso, ma nami ugwade, ma te bulmakau waligo nigali nai dabede tulalueibaso da, teda te nai dabe meda yaibaso te ąį telawaibao, te nai dabe meda elalubadi te giliga dega sigulaibao,” wali.
LEV 15:18 “Te bidigo we dali pagela pibaso da, te augwali side meda pedelaibao. Te augwali si gagali ela silama da, te augwa si ąį paugi pao, te augwali side meda elalubadi te giliga dega sigulaibao,” te po wai.
LEV 15:19 “Te we me deli poluago elibo gasi sabo side, te aga meda pedelama elalubadi, te Sarere deliba usu naibao. Bidi ma wego te weba nogo mubaso da, teda augwaliba te meda dagana selama elalubadi, te sia ge iba dega sigulaibao,” wali.
LEV 15:20 “Te we pibo bet sai me tigidali te aga dugabo sai me tigidali, te tigidali meda ela silaibao,” wai dao.
LEV 15:21 “Mena bidi ma wego te betba nogo muani, ma aga duabo naiba me nogo mubaso da, te meda agade pedelaibao. Te aga ugwa digi ąį telagi pelama, ąį me paugi pao, te meda agade elalubadi sia ge iba dega sigulaibao.
LEV 15:23 Te pibo ugwa sitbet, ma mena nai te we dulaluali te tagalao, te bidigo ma wego teba nogo mubaso da, te meda agade elalubadi, te be pio mu igi paibao.
LEV 15:24 Te bidi me deligo te we poluago elai gasi elalubo sogo te we dali pagela pibaso da, teda bidigo te wego meda selama, te bidi meda elalubadi Sarere deli bidaibao. Te mena bet te bidi pibo madi me meda elalueibao,” wali.
LEV 15:25 “Te we aga tigide kaneme elalu, te meba sogoba usu niyu, te poluago elibo gasi agade isąbadi, ma te poluago elibo gasiba wadolama, te kaneme idubadi, te meba sogoba usu nubaso da, teda agade te meda elalubadi te silibo sogoba usu naibao. Te wego bulu be gasigo kolesagade te tama tebo dao.
LEV 15:26 Te aga mena betde piali ma mena sia saide dulaluali me, te tagalao, te bet doado bage meda pedalubo dao,” te po wai.
LEV 15:27 “Te bidi ma we me deligo te naiba nogo mubaso da, te meda agade pedelali. Te aga ugwa ąį tedelama, te ąį paugi pao. Te meda agade elalubadi te sia ge dega sigulaibao.
LEV 15:28 Te wego tigide pedelali kaneme wa pabo si da, te aga Sarere deli bidilama, te aga eno gedude meda meniama, wiegi yai pedalubo dao.
LEV 15:29 Te a naga me sela wabo side agai te tobage ba hi si selama, te eno sel Ugwa Be sunumiba sela pelama, te prisba mao.
LEV 15:30 Tama prisgo te ba higo te sęgę sela sąbo ofa tiwai me eyu, te gasa me bago te isiba tigidali ulama, dela silibo ofa emainao. Te kolesagade agai te we eno gedude wiegi yai pedalumainu usu ilibo dao,” wai dao.
LEV 15:31 “Dage sigo bomai po te Israel dabeba menama, te augwali eno gedude meda elalubo sogo dua dao, bugagia koneao. Eno sel Ugwa Be augwali tomode elalubao, te augwali meda elalubaso da, teda te be tomoba augwali me pelamuo. Tiyu, augwaligo te sel Ugwa Be meda ilidalio. Te sel Ugwa Be augwaligo meda ilibaso da, teda eno augwali ela mueibao,” wali.
LEV 15:32 Te bomai pode te tama po wali, te bidigo gasade tedela yai kaneme pedalubo, me odolali gasade ąį gealubo, me te naigo aga meda ilibao.
LEV 15:33 Tama te we tigide poluago elibo gasi ebo po me, te bidi ma we tigide te aga naide tedela kaneme pedalubaso, te bidigo aga we dali pibo po te me te meda elalubao po wai dao.
LEV 16:1 Polobadu Arongo ogwa sigo te Genuai Bidiba ofa igi pali te agai augwali sibolo te ofa yabo po wasiąbadi, tibaso augwali si isalio. Te tilama, nosali Genuai Bidigo Mosesbolo te tiwai po wali,
LEV 16:2 “Nago naga ama Aronbolo walao, sesemane sogo aga te Tedali Gasagi Yai Mu Be Habu te genuai dąį togwali tudi badu tomoba me pelamu dao. Tialima, ena digi dąį ilibo sogo, aga tomoba pagameo. Magi baso meni, ena te pǫ me deli tomode bidama, te ena hanilagasu, te sęgę sela sąbo Dąų Wali Bomai Po Elalubo Halobage daiba pedalubo dao. Te aga olo dali te be habu tomoba pobaso da, teda aga isaibao.
LEV 16:3 Aron te Tedali Gasagi Yai Mu Be Habu tomoba pabo sogo, agai e tama timainao. Hasia bolo agai te sęgę sela sąbo ofa yabo ogwa bidi bulmakau omai me deli sela pao, te agai omai kibu sipsip me deli te isiba tigidali ulama, dela silabo ofa yabo te me sela pao,” wali.
LEV 16:4 “Tama agai prisgo te tobage gasa ugwa gudaibao. Agai te bobage aiyaba tagalalubo ugwa gudama, te pęwadage trausis ugwa me muani, te ugwa nami agai haligade kukulu tiwai kekelama, te nami ugwa me deli te toboludu madi tiwai munama, kekaluao. Te tedela ugwa dabe naga muao. Ena digi te prisgo gudabo ugwa dabe dąį ilali. Tama tibaso, Aron aga ąį bolo paluama, nosali te ugwa doado bage mubaso usu dao,” wali.
LEV 16:5 “Te Israel we bidi augwaligo te sęgę sela sąyabo meme omai si sobadi, te omai sipsip deli isiba tigidali ulabo me selama, te Aronbolo mao.
LEV 16:6 Tama Arongo te omai bulmakau aga digi sela asali te aga sęgę me aga we wai pulubago sęgę dali sela sąyabo ofa yainogo eyu, tama te eno geduba osogo muao,” te po wali.
LEV 16:7 “Nosali agai te meme omai si selama, te si selasa pelama, te ena Genuai Bidi eno sel Ugwa Be sunumiba dolagasobaso, eno sueibao,” wali.
LEV 16:8 “Te agai masigi si sao, me masigi deli e tiwai po elalueibao, ‘Te Genuai Bidigo da,’ te gasa masigide e tiwai po elalueibao, ‘Te Asaselgo dao.’ Te masigi si agai geme dualama, te deli deli guda selama, te ena Genuai Bidigo meme me deli dąį iliyu, te me deli Asasel dąį ilao,” te po wai dao.
LEV 16:9 “Tama Arongo enabolo te dąį ilali meme selama, te we bidi dabego sęgę sela sąbo ofa tiwai yao.
LEV 16:10 Tialima, agai te Asaselba dąį ilali meme me eligio. Menio. Arongo eno geduba sesao. Tama te bidi meni yai buluba agai te Asaselbolo tagala palao, tama tiyu da, te memego te we bidi augwaligo sęgę sela pabo tiwai yaibao,” wali.
LEV 16:11 “Arongo te sęgę sela sąbo ofa yabo homu ebo sogo, agai te kolesaga wali pao. Hasia bolo agai te omai bulmakau seselama, te ela munama, te aga sęgę me aga we wai pulubago sęgę sela sąbo ofa yao,” po wali.
LEV 16:12 “Nosali agai ain sospen me deli selama, te altaba pelama, te sia dage sospenba bulama, te Tedali Gasagi Yai Mu Be Habuba selasa pao. Te wiegi yai denami ebo pauda agai nogo sigo sabua selama, te sela pelama, te sospende elalubo siaba mugi pao, te eno sueibao. Te paudago hanogo te sęgę sela sąbo pesage te Dąų Wali Bomai Po Elalubo Halobage mesega saibao. Te tiwai ebaso da, Arongo te sęgę sela sąbo pesage sugobeo. Tiyu, agai subaso, te eno aga ela muidali weyu tama tiaibao.
LEV 16:14 Tama agai te bulmakau kaneme me badu selama, te kaneme nogoba holama, te kaneme te sęgę sela sąbo pesage daiba ugwadu sąyao. Agai te kaneme nogo danide ma selama, te kaneme nogo a naga si sogo te Dąų Wali Bomai Po Halobage gesabidiba sąyao,” po wali.
LEV 16:15 “Nosali agai te we bidi dabego sęgę sela sąbo ofa yabo kibu meme ela muao. Tama agai te meme kaneme te Ugwa Be Tedali Gasagi Yai Mu Be Habu tomoba sela pelama, te dwasianu me badu te sęgę sela sąbo pesageba sąyao. Te agai dwasianu meba te Dąų Wali Bomai Po Elalubo Halobage gesabidiba sąyao. Agai te bulmakau kanemego yali sę tiwai yao,” wai.
LEV 16:16 “Te kolesagade agai te Tedali Gasagi Yai Mu Be Habu eno gedude wiegi yai pedelaibao. Magi baso meni, te Israel we bidigo hagoma eyu, eno po sela sąnama, te dwai sę hauwa eyu, te kolesagago te Tedali Gasagi Yai Mu Be Habu meda ilibo dao. Eno sel Ugwa Be te Israel dabe tomode elaluyu, te augwaligo dwai kolesagago te sel Ugwa Be eno gedude meda pedalubao. Tibaso, Arongo te kaneme dwasianu selama, te tobage sę te sel Ugwa Beba me yao, te agai te Tedali Gasagi Yai Mu Be Habude yali sę tiwai elama, te sel Ugwa Be wiegi yai ma pedelaibao.
LEV 16:17 Arongo aga sęgę dali, aga we wai pulubago sęgę dali sela sąbo ofa eyu, te Israel we bidi tigidaligo sęgę sela sąbo ofa yao. Aga te Tedali Gasagi Yai Mu Be Habu mu tomoba pabo sogo, te bidi me deli eno sel Ugwa Be tomoba me pisąbadi, te Aron buluba ma dią soaboba usu naibao. Te habu mu dao,” wali.
LEV 16:18 “Nosali agai te Tedali Gasagi Yai Mu Be Habu tagalama, buluba dią solama, te isiba tigidali domainu ulubo ofa ebo altaba pao. Te Israel dabego dwai sęgo te alta eno gedude meda ilali. Tibaso, Arongo te alta wiegi yai pedalumainu ilao. Agai te bulmakau kaneme dwasianu siyu, te meme kaneme siyu elama, te alta bogo me si me si elalubo madi te kom me si me side pibili pao. Tama agai nogo dani te kanemeba munama, te kaneme a naga me si sogo te altaba sąyao. Te kolesagade agai te alta wiegi yai pedalumainu ilaibao, tama te alta eno sę delide naga elalumainu sula tagalao,” te po wai dao.
LEV 16:20 Genuai Bidigo po e tiwai ma wali, “Te Arongo te Tedali Gasagi Yai Mu Be Habude yali sę tigidali badi, te sel Ugwa Be badu yali sę tigidali mu sia somainu elama, te alta wiegi yai pedalumainu yai baso da, teda agai te meme, te Asaselba sa muani meme, te enabolo selasa asao,” po wali.
LEV 16:21 “Te meme tede bidibadi te Arongo nogo si te meme toboluba munama, Arongo te Israel we bidi dabego yali dwai sę, me dwai kolesaga tigidali, me hagoma kolesaga hanilama pusao. Te kolesagade agai te sęgę tigidali te meme toboluba mueibao. Nosali te meme agai te sa muani bidi me deliba menama, tama te bidigo te tǫ wa pai buluba te meme kibu sela pelama, teba tagaligi paibao.
LEV 16:22 Tama te memego te Israel dabe augwaligo sęgę tigidali tolama, te bidi meni yai habu me deliba tagaligi pabo dao,” te po wai dao.
LEV 16:23 “Te sę silama da, teda Aron eno sel Ugwa Be tomoba pelama, tama aga te Tedali Gasagi Yai Mu Be Habu tomoba painogo gudali ugwa dabe peda mugi pao. Tama agai te ugwa te sel Ugwa Be tomode elalumainogo yao.
LEV 16:24 Tama aga te sel Ugwa Be obo tomoba ąį paugi pao, tama aga te sel Ugwa Be tomoba ma pelama, te ugwa gudama, te hetprisgo gudubo ugwa au yao. Nosali aga te buluba teda solama, te isigo tigidali dela silibo ofa si yao, me ofa agade eyu, me te tigidali we bidide yao. Te ofago aga sęgę sela sąbo ofa eyu, te we bidi augwaligo sęgę sela sąbo ofa me yao,” te po wali.
LEV 16:25 “Te agai augwaligo sęgę sela sąbo ofa yali kibu ili te siaba ulao.
LEV 16:26 Te meme kibu te tǫ wa pai buluba sela pelama, tagaligi pali bidi, agai ugwa ąį tedelama, te aga tigi bolo ąį pauwao, tama nosali aga te bidibo pesage tomoba ma asomainao,” te po wai dao.
LEV 16:27 “Tama augwaligo te sęgę sela sąyabo ofa yabo kibu bulmakau me meme sesao, te hasia bolo prisgo te kibu sigo kaneme te Tedali Gasagi Yai Mu Be Habu tomoba sela pelama, te aga sęgę sela sąyu, te we bidi dabego sęgę me sela sąmainu tama tiali. Augwaligo te kibu si te bidibo pesage bulu badu sela pelama, te isiba ulama, te sia keli naga elalumainogo yao. Te bidi me deligo te kibu wali me mi me haliga di te isiba ulama, te mu deli silimainogo yaibao.
LEV 16:28 Nosali te bidigo ugwa ąį tedelama, te aga tigi me ąį paluama, te aga bidibo pesageba ma asomainao,” wai dao.
LEV 16:29 Genuai Bidigo po e tiwai ma wali, “Dagego te bomai po sesemane sogo wali piduao. Te polua a naga olama, me badu nogo si wabo polua, te dei 10de, dage tigidali Israel dali te gasa hani dage dali bidibo we bidi, dage te nai tubo habu selama, te wiegi yai pemene ebo sę me habu selao, tama dagego sę tagalama, te dage toma tuao.
LEV 16:30 Magi baso meni, te side naga te prisgo dagego sęgę sela sąbo ofa yaibao, tama dage eno gedude wiegi yai ma pedelaibao.
LEV 16:31 Te side te eno genuai side dolo dao. Te dagego tigidali pemene ebo sę te side habu selama, te dage toma nao. Dagego sę munu me elamuo. Te habu mu dao. Te bomai po dagego sesemane sogo wali piduao.
LEV 16:32 Mena prisgo dage te duga ayago yali sę sabo dąį ilali bidi, agai naga te we bidi dabego sęgę sela sąbo sę emainu yao. Hasia bolo hetprisgo gudubo tedela ugwa te aga tigide muao.
LEV 16:33 Te nosali agai te sęgę sela sąbo ofa ebaso da, teda te Tedali Gasagi Yai Mu Be Habu tigidali badu, me sel Ugwa Be me, alta me, te pris dabe me, te Israel we bidi tigidali, te eno gedude wiegi yai ma pedalumainogo yaibao,” te po wai dao.
LEV 16:34 “Augwaligo te bomai po sesemane sesemane sogo wali pidubadi geao. Hetprisgo te tobage ofa te tigidali kibu bede deli sogo yao, te Israel we bidigo sęgę sela sąyu tiao, te augwali eno gedude wiegi yai pedalumainu ebao,” wali. Genuai Bidigo te po Mosesbolo mobaso, te po tigidali Mosesgo wali pai dao.
LEV 17:1 Te Genuai Bidigo Mosesbolo po walama,
LEV 17:2 te Aronbolo po weyu, agai te agai ogwa dabeba me te Israel we bidi tigidaliba walomainogo yali. Genuai Bidigo te tiwai po wai, “Eno te bomai po dabe dageba mobao.
LEV 17:3 Te dage Israel bidigo te kibu tuabo homu ebaso, dagego te kau, me sipsip, me meme me deli selama, te bidibo pesage tomode me bulu badu ela mubaso da,
LEV 17:4 teda dagego eno sel Ugwa Be sunumiba selasa aselama, te enabolo ofa tiwai mao, te nosali duga selama, tuagameo. Te dagego kibu elama, te kaneme gelama, te dagego enaba ofa me isąbaso da, teda dagego te bidi ela muani tiwai ebaso, te dagego dwai sę eno gedude elalueibao. Tibaso, dage eno hani tomode bidibo sela sąwaibao.
LEV 17:5 Te po page e tiwai dao. Polobadu dage Israel dabego te kibu elama, te bidibo pesage bulu, badu ofa yali, tiali goli megi da, dagego te kibu elibaso, te prisba selasa pao, te eno sel Ugwa Be sunumiba pelama, te ena dali deli haliga pedalubo ofa yao.
LEV 17:6 Te prisgo te kibugo kaneme selama, te sel Ugwa Be sunumi pąde elalubo te alta bogo baduba sąwaibao. Tama agai te ofa yabo kibu ili te ofa eyu, altaba ulubaso, te ena Genuai Bidi, eno denami odama, te eno homu godolo eyu, tede eno bugai haliga ebo dao.
LEV 17:7 Dage Israelgo te bulu haubo bidi dabeba kibu elama, ofa ebo sę munu ma elamuo. Dagego te tiwai elama, te dagego ena tagaliyu, te tibo godiba homu kęą pali. Sesemane sogo dage hanigo te eno sel Ugwa Beba te kibu ofa tiwai siyu idu geao,” wali.
LEV 17:8 “Te nago te tiwai po augwaliba walao, te dage Israel bidi me deli, ma te dage dali bidibo gasa hani bidi me deligo, te isiba tigidali ulubo ofa me te agai gasa tobage ofa yabo homu ebaso da, teda agai te kibu eno sel Ugwa Beba sela aselama, ofa yao. Te meni baso da, te ena Genuai Bidi, eno hani we bidide aga sela sąyu, gudulaibao,” wali.
LEV 17:10 “Dagego te kibu elibo sogo, dagego aga dogoni togolama, te kaneme tigidali aiyaba pomainao. Te dage Israel bidi me deli, ma dage dali bidibo gasa hanigo te kibu mi kaneme elalubadi tubaso da, teda ena Genuai Bidi eno agaba boi bidi eyu, te aga eno hani we bidide sela sąwaibao.
LEV 17:11 Kanemego tigidali bidiba bidibo ula mayu, te kibuba mobao. Tibaso, eno te po dagebolo obao. Prisgo te ofa ebo kaneme altaba gelibao, te dage we bidigo sęgę dabe sela sąyu, kanemego te bidibo ula page elalubao, te kaneme deligo naga dage we bidi dabego sęgę sela sąbo dao.
LEV 17:12 Tama tibaso, eno dage Israel dabebolo obao, te dage me deligo, ma te dage dali bidibo gasa hani bidi me deligo te kibu mi kaneme elalubadi me tugio. Te habu mu dao,” wai dao.
LEV 17:13 “Te dage Israel bidi me deligo, ma te gasa hani bidi me deligo aga te hasa gegegi pelama, agai te uni meme me deli, ma ba me deli, te eno dagebolo tugio wasiąwai nai enai baso da, teda agai te naigo kaneme gelama, te kaneme tǫgo haluao.
LEV 17:14 Magi baso meni, te tigidali bidigo bidibo ula me te hasago bidibo ula te aga kanemede naga elalubao. Te pagede naga eno dage Israel we bidibolo waliyu, dagego te kibu mi kaneme elalubadi tugio po obao. Bidigo te kibu mi kaneme elalubadi tubaso da, teda aga te eno we bidi hanide sela sąwaibao,” te po wai dao.
LEV 17:15 “Tialima, te kibu me deli olo dali isali, me uni hasago te hasa ela muai, nosali dage hanide digi te bidi ma we me deligo te hasa mi tubaso da, teda aga eno gedude meda pedalubao. Tialima, aga ugwa ąį tedelama, te aga digi me ąį paugi pao, te meda agade elalubadi giliga dega sigulaibao. Giliga iba dega sigulai baso da, teda aga dwagi yai ma pedalubo dao.
LEV 17:16 Te agai tigi me ugwa ąį telayu, pauyu isąbaso, te sę page agade digi elalubao, te aga yali kolesagade te sęgę aga tolobo dao,” te po wai.
LEV 18:1 Genuai Bidigo Mosesbolo walama,
LEV 18:2 te agai po Israel dabebolo omainogo yali. Agai te tiwai po wali, “Ena Genuai Bidi, ena dagego God dao.
LEV 18:3 Te mu tama, dage Isipde bidaluyu, tialima dagego te Isip dabego kolesaga wali pigio. Te megi eno dage Kenan tǫba odasa painogo ebao, tialima dagego te Kenan dabego kolesaga wali pelamuo. Dagego te augwaligo tama tiao wabo po dabe wali me pelamo dao.
LEV 18:4 Odao, dagego eno bomai po deli naga wali pao, tama eno dagebolo yao po wabo sę deli naga tigidali yao. Ena Genuai Bidi, ena duga Godgo eno te po dagebolo mobao.
LEV 18:5 Dagego te tigidali kolesaga me tigidali bomai po eno godolo yabo sę me eno dagebolo mobao. Te dagego tama sę eyu da, te dagego bidibo ula elalueibao. Ena Genuai Bidi, ena duga God, eno te po obao,” wali.
LEV 18:6 “Ena Genuai Bidi, eno te po obao. Nago te naga deli hanide we me deli sabo homu elama, nago aga gedu eyu, aga dali gagali me igio. Te tobage kolesaga habu mu selibao.
LEV 18:7 Nago naga ida mu dali gagali ebo sę igio. Nago te tiwai sę ebaso da, te nago naga aya hale ilibo sę mu ebao. Te naga ame nani ida mu dali gagali ebo sę habu mu selibao,” te po wali.
LEV 18:8 “Nago naga ayago gasa we dabe, te nago paba dabe, te dali gagali ebo sę me elamuo. Te nago tama tibaso da, teda nago naga ayabolo dwai hale mu ilibo sę ebo dao.
LEV 18:9 Nago naga abe mu dali dobo sę ebo gagali eyu, ma gasa ayago wegi me ida dali te dobo sę ebo gagali me igio. Te idago ayago bede ame naibaso, ma gasa bede ame naibaso, tagalao, te naga abe dao, te nago aga dali dobo gagali ebo sę me elamo dao.
LEV 18:10 Nago naga wegigo wegi, ma naga ogwago wegi dali te dobo sę ebo gagali me igio. Te kolesagade nage hale dwai mu ilaibao.
LEV 18:11 Nago naga pabago wegi dali te penani sę ebo gagali igio. Te naga ayago wai dao, tibaso te nago abe elalubao. Te aga nago we da olama sabo sę te habu mu dao.
LEV 18:12 Nago te naga ayago abe dali penani igio, magi baso meni, te ayago deli kaneme dao.
LEV 18:13 Nago te naga idago ama dali dwai penani sę ebo kolesaga igio, magi baso meni, te naga idago deli kaneme elalubao.
LEV 18:14 Nago te naga aya sabi bidigo we dali penani sę me elamuo, magi baso meni, te we te nago ida sabi we elalubao. Te naga aga dali pibaso da, teda nago te nago aya sabi bidi hale dwai mu ilibo sę ebo dao.
LEV 18:15 Nago te naga ogwago we dali penani sę igio. Magi baso meni, te nago we menio, teyu te nago aga dali penani ebo sę habu mu dao.
LEV 18:16 Nago naga amago we dali penani igio. Te nago aga dali pibaso da, teda nago ama hale dwai mu ilibo sę ebo dao.
LEV 18:17 Te nago we me deli sali, te wego gasa bidide wegi ame naibaso da, teda nago te wai ma sigio, ma agai wegi me sigio. Te nago wego ogwago wegi me, te nago me somainu elamo dao,” wali. “Magi baso meni, te we dabe te nago wego deli kaneme elalubao. Te nago augwaliba dwai sę ebaso da, teda nago te hale genuai ebo kolesaga ebao.
LEV 18:18 Nago naga wego ama nago sigio, te nago we bidibadi sigio. Tiyu, nago augwa si wado yabo sę ilabuo. Te kolesaga dolo ebeo,” te po wai dao.
LEV 18:19 “Nago te we poluago elai gasi sai elalubadi te penani igio, magi baso meni, te sogo aga wiegi yai me elalubeo.
LEV 18:20 Nago naga abagigo we dali penani me igio. Nago tama tibaso da, teda nage eno gedude meda pedelaibao,” wali.
LEV 18:21 “Odao, ena duga Genuai Bidi eno dagebolo te duga wai dabe elama, te isiba ulama, te tibo god Molekba ofa ebo habu selama, te po eno dageba bomai po obao. Tiyu, dagego eno nogi aiyaba elaluidalio, te dagego God dao,” wali.
LEV 18:22 “Te bidi duga hasigo te gasa bidi tągio. Te dwai kolesaga mu ebao, te eno homude godolo me egobeo.
LEV 18:23 Bidi dagego te so hasa kibu sibi me te tągio, te we dagego te hasa sibigo dage tąmainogo sula tagaligio. Te kolesagade dage eno gedude meda pedelaibao. Te tebo kolesaga dwai nai mu dao,” wai dao.
LEV 18:24 “Dagego te dwai kolesaga dabe me elamuo. Te sę dagego eyu da, teda dage eno gedude meda pedelaibao. Te ena Genuai Bidigo po odisąwai hani bidi dabe te Kenan tǫde bidaluyu, augwaligo te tobage dwai kolesaga dabe elama, te augwali meda mu pedelalio. Te megi eno augwali ela gudulubo sę ebao, te dagego augwaligo tǫ somainogo ebo dao.
LEV 18:25 Te augwali dwai kolesagade te tǫ digi meda pedelali. Te augwaligo tǫba eno dwai dene mabo sę elama, tama te tǫgo te Genuai Bidigo po odisąwai hani bage te bugubo tiwai eyu, te augwali Kenan tǫde munu ma bidalugobeo.
LEV 18:26 Tialima, dage da, dagego eno dagebolo te mani bomai po tigidali wali pao. Dage te Israel we bidi dali, te gasa hani dage dali bidalubo hanigo dali, te Genuai Bidigo po odisąbo bidi dabego ebo kolesaga tiwai igio, magi baso meni, te kolesaga dwai kugumini mu ebaso, te eno godolo homu menio.
LEV 18:27 Dagego koneani, te Godigo po odisąwai hani dabe te tǫde polasa bidali, augwaligo te kugumini yai kolesaga yali. Tibaso, te tǫ eno gedude meda yai dao.
LEV 18:28 Tiyu, dagego me tama tidalio. Te tama sę dagego eyu da, teda te tǫgo digi dage sela sąwaibao, te ena Genuai Bidigo po odisąwai hani dabe polasa bidali bage sela sąwani tiwai gilama dage me tiabuo.
LEV 18:29 Te dage Israel mena bidi ma wego te tobage dwai sę ebaso da, teda eno aga te eno hani we bidi tomode bidali sela sąwaibao,” te po wali.
LEV 18:30 Genuai Bidigo te tama po wai, “Te eno dagebolo mabo po te dagego wali pao. Dagego te tǫde polasa bidali hani bidi dabego yali dwai kugumini yai kolesaga wali me pelamuo. Te dagego tama tibaso da, tiyu dage eno gedude meda pedelabuo. Odao, ena Genuai Bidi, ena duga God, eno te po wai dao,” wali.
LEV 19:1 Genuai Bidigo Mosesbolo te po walama,
LEV 19:2 te Israel we bidibolo te tiwai po omainogo yali, “Dage wiegi yai mu tedali mu bidiyu, te eno godolo yabo wiegi yai doloba pai kolesaga wali pao. Magi baso meni, ena God, dagego Genuai Bidi, ena tedali wiegi yai mu elalu, eno kolesaga wiegi yai doloba pai mu elalubo dao.
LEV 19:3 Dage deli deligo duga ida aya dologode bidu, te augwaligo po wali pao. Dagego te olo toma nabo sogo, te Sabat side, sę me igio, dage olo toma naga tuyu, bidao. Ena Genuai Bidi, ena duga God, eno te po wai dao,” wali.
LEV 19:4 “Dagego te tibo godiba lotu weyu, ena me tagaligio. Te dagego olo dali te olo nai aingo te lotu wabo tibo god nigilama, teba lotu me wagio. Te habu mu dao. Ena Genuai Bidi, ena dagego God, eno te po wai dao.”
LEV 19:5 “Te dagego ena dali deli haliga pedelabo ofa ebo sogo, dagego eno dagebolo mani bomai po wali pelama, te ofa yao. Dagego te tama ebaso da, teda eno dagego ofa ebo godolo yaibao.
LEV 19:6 Dagego te ofa yali kibu mi te kibu elali side ma te nosali side tuiyąo. Te kibu mi munalubadi te sela sogo wabo siba sabalobaso da, teda dagego te isiba ulama, te keli naga elalumainao.
LEV 19:7 Te bidi me deligo te sela wabo side elaluali kibu mi tubaso da, teda te kolesaga eno gedude dwalio, tama eno te ebo ofa godolo homu me egobeo,” wali.
LEV 19:8 “Mena bidigo te sela wali sogoba usu nani munaluali kibu mi tuali bidi da, te ena mani nai digi agai dwai ilibao, te aga yali sę dagede sęgę elalubao. Tama tialima, eno we bidi hanide aga sela sąwaibao,” wali.
LEV 19:9 “Te dagego duga gide nai inawai tau yai togobo sogo, dagego te gi sesege homu badu elalubo nai togolama sigio. Te gi tomode nai dagego sabo sogo, te nai meba ela soabaso da, teda dage ma geasa peyu te nai ma sigio. Tede tama elalumainogo sula tagalao.
LEV 19:10 Te dagego te wain tau inayani sela silibo sogo, dage te wain giba si sogo ma pelama, te hasia susiąma tagalali nedu du wain ma sigi pigio. Te tǫba tudulaluai munalubo wain du dagego me sigio. Dagego te nai dabe tagalama elalu, te magi nai meni yai bidi dabego, ma te gasa hani dage dali bidibo, te hani augwali somainao. Ena Genuai Bidi, ena duga Godigo, eno te tiwai po obao,” wai dao.
LEV 19:11 “Dagego gasa bidigo nai dabe wi me sigio, te dagego gasa bidiba tibo po wagio, te agai nai anoma elama sainogo tigio. Te dagego gasa bidiba tibo po ola magio.
LEV 19:12 Te dagego bidi me deliba bomai po dąų walu, ena nogide te po dąų walai baso da, teda dagego te bomai po olo dali dąų walama, aga tibo po ola magio. Dagego duga te dąų wali bomai po wali pisąbaso da, teda dagego eno nogi aiyaba elalubao. Ena Genuai Bidigo, eno te po wai dao.
LEV 19:13 Dagego gasa bidi me doloyu, te agai nai dabe wi me sigio. Te dagego bidi me deliba sę mawai baso da, teda dagego agai sę te ela silibo side te abelebo mone mao, te sogo piode. Dagego te mone tolalubadi be huliama te kigamude me magio,” wai.
LEV 19:14 “Dagego te olo degai we bidi augwaliba te po dwai me wagio, ‘Godigo dage dolabo sę elalubao.’ Dagego te gedu widai bage habela muabo bono gaga te sunumide me mugio. Dage ena Godide wi yao, duga Genuai Bidi dao,” wali.
LEV 19:15 “Te dagego po tų odobo si da, teda dagego te po tųde doloba pai kolesaga naga yao. Te dagego po bugagia dodolao. Dagego te magi nai meni yai bidi dabe tau siyu, te augwaligo po tų ebode ugwaba ela holomainogo elamuo. Me ma, dage te nogi yai bidide wi eyu, te augwali tau selama, te po tųde ela holomainogo elamo dao.
LEV 19:16 Duga abagi dabeba kisa sigi pelama biliyu, te gasa bidiba posobo po wagio. Te augwaligo bidi me deligo te genuai sęgę sai madi po tų ilibaso, te dagego aga po tųde tau sabo homu eyu da, teda dagego tau sao. Tiyu, dage pedauwali panialubaso, te po tųgo aga ela muao po wabuo. Eno homugo dagego tama tiwai yao, magi baso meni, ena duga Genuai Bidi dao,” wai dao.
LEV 19:17 “Te nago abagi me deligo nageba dobo sę yai baso da, teda nago homude aga dali sesemane sogo wado po udugio. Nago aga dali po dodolobaso da, te po isaibao. Tiyu, nago me agai yali kolesagade homu kone paludu, te nago me dwai sęgę me deli sabuo.
LEV 19:18 Te naga abagi me deligo nageba dwai sę ebo te nago wei me ponogio, te nago sesemane sogo aga dali wado po me udugio. Nago gasa we bidi dabe godolo mu yao, te naga digi naga godolo ebo tiwai yao. Ena Genuai Bidigo eno te po obao.”
LEV 19:19 “Dagego eno bomai po dabe wali piyąo. Dagego te kibu hasa sibi si augwa hasi omai sę elama, te wai ame nomainogo sula tagaligio. Tama dagego te tobage nai wai hani si te gi delide buligio. Tama dagego augwaligo te olo hobigo hobolai nami ugwa dali te sipsip nisigo nigai hobigo hobolai ugwa te me gudugio. Te kolesaga ebo habu dao,” wai dao.
LEV 19:20 “Te bidi me deligo aga olo sę ebo we te agai gasa bidiba maiabo po dąų wali, tialima te gasa bidigo abelesąwai. Tama te we tonalubo bidigo te we dali dobo sę gagali yai baso da, teda dagego augwali si te po tų kotba odasa piyąo. Tiali goli, te dagego augwali si ela mugio, magi baso meni, te we te tonalubo bidigo olo sę ebo we dao.
LEV 19:21 Tama te tonalubo bidigo te sipsip kibu omai me deli selama, te eno sel Ugwa Be sunumiba pao. Agai te sipsip ena Genuai Bidiba ofa elama, te dwai sę dodoliyu, te agade elalubo sęgę silimainao.
LEV 19:22 Tama prisgo te bidigo sęgę sela sąbo ofa yao. Te eno sulama, eno te sęgę sela sąwaibao,” wali.
LEV 19:23 “Dage te Kenan tǫba pabo sogo dagego te tobage du walobo ni du dabe bulubaso da, teda dagego te kibu be selade te bulali ni du tusiąma te habu selao.
LEV 19:24 Te kibu be me si me si wabode, dagego te ni du wai tigidali te ena Genuai Bidiba mao, te dagego enaba wiegi yai pemene eyu puba hwi wabo ola mabo tiwai ebao.
LEV 19:25 Tialima, te a naga wabo kibu bede te ni du walobo nai duga tuao. Eno te po dagego wali pobaso da, teda dagego ni du wai hauwa umabo walaibao. Odao, ena God, dagego Genuai Bidi, eno te po obao.”
LEV 19:26 “Dagego te kaneme elalubo kibu mi tugio. Te dagego haniani pobi wabo sę me te kebele aubo sę me igio.
LEV 19:27 Te dagego tobolu nisi te dagego olo pąde togogimio, te dagego penani nisi togolama pęwadage iligimio.
LEV 19:28 Te dagego tigide todogo pelama masalu ebo sę iligio. Te bidi isaide, ma we isaide homu dene eyu, duga tigi togobo sę igio. Ena Genuai Bidigo eno dagebolo te kolesaga dabe ebo habu mu selibao,” wali.
LEV 19:29 “Dagego te Godigo po odisąwai bidi dabego ebo kolesaga tiwai eyu, te duga wegi dabe te penanide sǫbo we dabe tiwai pedalumainu elamuo. Tiyu, dagego te tiwai sę eyu, te ena tagaluyu, te dage te tibo godide gone tuą peyu, haniani dwai sę yabuo. Te dagego bulu tigidalide te dwai kolesaga pągąna pidalio.”
LEV 19:30 “Dagego te olo toma neyu bidibo sogo, te Sabat side, sę munu me igio. Dagego te we bidi dabe aselama, te enaba lotu po wagasobo sel Ugwa Be godolo mu yao. Ena Genuai Bidi, eno dagebolo wai dao,” wali.
LEV 19:31 “Te dagego wiegi yai homu kolesaga sabo homu ebaso da, teda pelama, te isali bidi dabego noma bidi dali po mibo bidi dabeba me hanalugi pigio, te noma bidide homu kolesaga selama, dageba momainogo igio. Te dagego tama sę ebaso da, te dage eno gedude meda pedelaibao. Ena Genuai Bidi, ena duga God, eno te po wai dao.”
LEV 19:32 “Dage te monu dabe dologoba pelama, augwaligo po wali peyu, te augwaliba wiegi yai sę yao. Te dage ena dologoba aselama bidao, te dagego God dao. Ena Genuai Bidi, eno te po wai dao,” wali.
LEV 19:33 “Dagego te gasa hani bidi te dagego tǫde bidibo hani bidi augwaliba dwai sę elamo dao.
LEV 19:34 Dagego wiegi yai kolesaga naga augwaliba yao, te duga deli hani te Israel dabeba ebo kolesaga tiwai yao. Te dagego augwali godolo homu mu eyu, te duga digi duga godolo ebo tiwai yao. Dage te Isipde polobadu bidali, tama te tiyu bidigo aga page bulu tagalama, te gasa bulu tǫ kantride bidibo kolesaga dagego koneao. Tama tiyu, dagego te gasa hani dage dali bidibo bage bugagia tonaluao. Ena Genuai Bidi, ena duga God, eno te po wai dao.”
LEV 19:35 “Te gasa bidigo abelabo nai dabe usu selama, dagalama, te nedebo sogo da, teda dagego aga tibo po ola magobeo.
LEV 19:36 Menio. Dagego dolo usu selama, dolo dodolama, te nai dabe dolo naga nedao. Ena Genuai Bidi, ena dagego God, te eno dage Isipde selama, te dage odasa asai dao.
LEV 19:37 Tama tibaso, eno dagebolo mani bomai po tigidali wali pao. Ena Genuai Bidigo, eno te po dagebolo wai dao,” te po wai dao.
LEV 20:1 Te Genuai Bidigo Mosesbolo te tiwai po walali,
LEV 20:2 “Nago Israel we bidi augwaliba te tiwai po wao, te dage Israel me deli, ma dage dali bidibo gasa hani me deli, agai aga wai te tibo god Molekbolo ofa tiwai mobaso da, teda dagego te bidi ela muao. Tigidali we bidigo agaba masigi sąnama, te aga isibo siba usu nao.
LEV 20:3 Te bidigo wai te Molekba mabo kolesagade, te eno sel Ugwa Be meda ilama, te eno genuai nogi aiyaba mu elalubo sę ebao. Tibaso da, eno te bidiba boi bidi elama, te aga eno we bidi hani tomode bidibo sela sąwaibao.
LEV 20:4 Tiali goli, te we bidi augwaligo te bidigo kolesaga suali, te augwaligo homude olo nai me tiwai da homu elama, te augwaligo aga me ela musiąbaso da,
LEV 20:5 teda ena digi eno agaba boi bidi eyu, te aga deli hani bageba me te ena tudiba munama, te Molekba lotu wabo we bidi tigidaliba te tiwai yaibao. Te augwali eno we bidi hanide sela sąwaibao,” wali.
LEV 20:6 “Te bidi me deli te kebele aubo bidiba pelama, te isali bidi noma bidi dali po mibo sę igi pabo sę ebo bidi yai baso da, teda te bidigo ena tagalama, te Godigo po odisąwai hanigo kolesaga wali pobao. Tibaso, eno agaba boi bidi eyu, te aga eno hani we bidide sela sąwaibao.
LEV 20:7 Dage te tedali gasagi yai bidu tama sesemane sogo te eno godolo yabo wiegi yai doloba pai kolesagade bilao. Ena Genuai Bidi, ena duga God, eno te wai dao.
LEV 20:8 Dagego eno bomai po tigidali wali pao, magi baso meni, ena Genuai Bidigo dage eno we bidi wiegi yai pedalumainu sa muai dao,” wali.
LEV 20:9 “Te bidi me deligo me, o te we me deligo me, te aga ida ayabolo te dwai da te tiwai po weyu, ‘Godigo nage dolomainao,’ obaso da, teda dagego te bidi ma te we ela muao. Bidi ma wego te tobage po wali da, te aga yali sę dagede aga isimainao,” wali.
LEV 20:10 “Te bidi me deligo abagi me deligo we penani yai baso da, teda dagego te bidi me te we dali si ela muao.
LEV 20:11 Te bidigo te aga ayago we me deli dali penani sę yai baso da, te bidigo aga aya dolobao. Tialima, augwaligo te bidi dali te we dali si ela muao. Augwali sigo dwai sę yali sęgę elalubao, tialima augwali si isimainao.
LEV 20:12 Te bidi me deligo aga ogwago we dali penani ebaso da, teda dagego augwali si ela muao. Augwa si deli kanemego te penani yali, tialima augwali sigo dobo sę yali sęgę elalubaso, te augwali si isimainao.
LEV 20:13 Te bidi mego gasa bidi me penani ebaso, augwali sigo dwai sę genuai mu yalio. Tialima, dagego augwali si ela muao. Augwa si yali sę dagede naga augwa si isibao.
LEV 20:14 Te bidi me deligo te we me we aga ida dali sabo si da, te dagego augwali sela ela munama, augwa tigi isiba ulao, magi baso meni, augwaligo dwai sę genuai mu yali, tama dagego te tobage kolesaga dage tomode ebo we me bidi te sula tagaligio.
LEV 20:15 Te bidi me deligo te kibu sibi me penani ebo bidi, dagego te bidi ela muyu, te kibu me ela muao.
LEV 20:16 Te we me deli te hasa sibiba pelama, te hasa sibigo aga penani emainogo ebaso da, dagego te we dali, te hasa dali, ela muao. Augwa si yali sęgęde augwali si isimainao,” wai dao.
LEV 20:17 “Bidi me deligo aga abe mu ma sali, ma gasa aya ma idago wegi saibaso, te bidi me wego dwai kolesaga mu yalio. Tialima, tigidali we bidigo gedude dagego augwali siba wado po olama, te augwali si sela sąyu, te augwali si dage dali munu ma bidigio. Te bidi aga abe dali penani yali, tialima aga yali kolesagade sęgę tolomainao.
LEV 20:18 Te bidi me deligo aga we te tigide bulu be gasi sai elalubadi te tąbaso da, teda augwali sigo eno gedude dwai meda yai kolesaga mu yali. Tama dagego augwali si eno we bidi hani tomode sela sąyao,” wali.
LEV 20:19 “Te bidi me deligo aga ida sabi we dali, ma aga ayago abe dali penani ebaso, te aga deli kanemede te sęgę sobao, te augwa si yali dwai kolesagade sęgę tolomainao.
LEV 20:20 Te bidi mego aga aya sabi bidigo we dali penani yali da, te bidigo aga aya sabi bidi hale dwai mu ilibao. Tama te bidi me te we augwa si yali sęde sęgę tolao. Te bidigo sobaso da, teda agai te wai dabe ame nabo usu egobeo, me te aya sabi bidigo wego te wai dabe me ame nogobeo.
LEV 20:21 Te bidi mego aga amago we anoma elama sali da, te agai dwai kolesaga mu Genuai Bidi eno gedude ebao, te aga ama hale ilibao. Tibaso, te bidigo me te wego wai me ame nogobeo,” te po wai dao.
LEV 20:22 “Dagego eno bomai po tigidali me eno po tigidali wali pao. Megi eno dage odasa pabo, te Kenan tǫ te agai dage me bugulisąma, te dage bugagia bidaibao.”
LEV 20:23 “Te ena Genuai Bidigo po odisąma te Kenan tǫde bidibo bidi dabego kolesaga dagego wali me pigio. Augwaligo te dwai sę yai baso, te eno augwali godolo homu mu ebeo. Te megi da, eno augwali te tǫ kantride sela sąnama, te dagego te tǫ sagameo.
LEV 20:24 Eno te po dagebolo wai dao, te tǫ da wiegi yai mu, te ili hauwa elalubao, te nai hauwa tede holaibao. Te eno dagebolo menama, te dagego tǫ mu pedelaibao. Ena Genuai Bidi, ena dagego God, te eno dage gasa hani tomode sali, te dage enaduba deligo we bidi naga bidimainogo yai dao.
LEV 20:25 Tama tialima, dagego te mena kibu hasa ba sibi me bugagia dagaliyu, te wiegi yai tuabo me tusiąma habu sabo me dagalao. Hasa me ba te eno gedude wiegi yai isąwani, te dagego habu sao. Eno te tobage nai dabe te wiegi yai isąwai nai po dagebolo wali, te hasa me ba te dwasianu nai me, tialima te dagego tubaso da, teda dage eno gedude meda mu pedelaibao.
LEV 20:26 Dagego te dwai kolesaga dabe tagalama, te wiegi yai tedali mu bidiyu, te eno wiegi yai doloba pai kolesaga naga wali pao, magi baso meni, ena digi ena tedali wiegi yai elaluyu, te eno kolesaga tigidali te wiegi yai doloba pai mu elalubao. Te ena Genuai Bidi, eno dage te gasa hani bage tomode sali, te dage ena bage naga elalubao.
LEV 20:27 Mena bidigo ma wego te isali bidigo noma bidi dali po minama, te augwalide homu kolesaga sabo we bidi yai baso da, aga isimainao. Dagego agaba masigi sąnama, te aga ela muao. Aga yali sę dagede aga isimainao,” te po wai dao.
LEV 21:1 Te Genuai Bidigo Mosesbolo weyu, te Arongo hani pris augwaliba te po mao wali. Agai te tiwai po wali, “Te dage deli kaneme hani me deli isibaso da, teda diligi peyu, dagego te isali bidide homu dene ebo kolesaga wali pigimio. Te kolesagade dage eno gedude meda ilibo sę pedalubo dao.
LEV 21:2 Tialima, te duga deli kaneme mu isai, te ida, ma aya, ma ogwa, me wegi ma ama,
LEV 21:3 te abenu mu bidigo sisąwai te aya dali bede bidibadi, te tiwai deli kaneme dabe isibaso da, teda dagego te homu dene ebo kolesagade meda pedalidali homu ebo tagalao, dagego te homu dene ebo kolesaga yagameo.
LEV 21:4 Tialima, te prisgo wego hanide, te aga wąį me deli isibaso da, teda prisgo te homu dene ebo kolesaga wali me pelamuo. Teyu, aga eno gedude meda pedalidalio,” wali.
LEV 21:5 “Te dage prisgo homu dene ebo kolesaga wali pabo sogo da, teda dagego tobolu me badu tobolu nisi tigidali togogio, tama te penane nisi togolama pęwadage iligio, tama te homu dene ebo kolesagade duga tigi olo madi togogimio.
LEV 21:6 Magi baso meni, te dage pris dabe enaba kęą pai bidi mu bidimainogo sa muai. Ena dagego God, te dagego eno nogi aiyaba me elalugio. Dagego enaba ofa ebo sę dabe elalubao, te ofa dabe te dagego enaba nai mabo tiwai ebao. Tibaso, dagego te dwai kolesaga tigidali tudiba munama, te ena dali naga bilao.
LEV 21:7 Dage pris eno bidi naga elalubao. Tialima, dagego te penanide bilibo we me sigio, te gasa bidigo penani yai we, ma aga bidigo sela sąwai we me selamo dao.
LEV 21:8 Te we bidi augwaligo homude dage pris te eno bidi hani dolo da homu emainao, magi baso meni, dagego te ofa ebo nai dabe enabolo mabo dao. Ena digi ena Genuai Bidi. Ena tedali wiegi yai elaluyu, ena te wiegi yai doloba pai kolesaga naga ebo God bidibao. Eno ena we bidi dabe tedali wiegi yai pedalumainu yaibao, te augwaligo wiegi yai doloba pai kolesaga naga wali pabo dao,” wai dao.
LEV 21:9 “Te dage prisgo wegi me deligo te penani ebo we pedelama, te meda yai kolesaga wali pabo si da, agai aga aya hale mu ilibao. Tibaso, te we bidi dabego aga ela munama, tama aga tigi isiba ulao,” wali.
LEV 21:10 “Hetprisgo aga sęde te nogi yai namba sali, te augwaligo aga toboluba wel gelebo sogo, te augwaligo aga te pris sę emainogo sa muai. Tama aga deli hani bage me deli isibaso, te homu dene ebo kolesaga wali pabo sogo, agai tobolu nisi olo elalumainogo igio, aga tobolu yaga bugagia sao. Te agai aga ugwa me pisągio.
LEV 21:11 Hetpris te isali bidi munalubo beba me pigio. Tiyu, aga eno gedude meda pedelabuo. Te aga aya ida isibaso, tagalao, agai aga digi te homu dene ebo sogo te meda iligio.
LEV 21:12 Tama aga te eno Ugwa Be tagalama, te bidi tigi munalubo beba pelamuo. Agai tama sę eyu da, agai eno sel Ugwa Be meda pedalubo sę ilaibao. Dagego aga wel pilali, te eno dagebolo mani welgo te aga hetpris pedalumainu sa muai dao, tama tialima aga te isai bidi tigi munalubo beba pigio. Ena Genuai Bidigo eno te po wai dao.
LEV 21:13 Hetprisgo te bidi dali me pisąwai we sobaso usu dao.
LEV 21:14 Agai te we, bidi me isiyu taga pai we me sigio, ma we aga bidigo sela sąwai we sigio. Agai te sunumide penani sę ela bilai we, ma we, gasa bidigo penani yai we me sigio. Te tama we dabe augwalide habu sali. Agai te bidi dali me pagela pisąwai we sao, tama agai we te pris augwa hanide naga sao,” te po wai dao.
LEV 21:15 “Te agai eno te po wali pisąbaso da, teda agai wai dabe eno gedude meda pedelaibao. Ena Genuai Bidi, eno aga ena da olama, sa muani, tama eno aga te hetpris sęba muai dao,” wali.
LEV 21:16 Genuai Bidigo Mosesbolo ma wali,
LEV 21:17 “Nago Aronba te tiwai po wao, te bidi me deli nago hanide pedalubaso, ma nosali te aga tigi dwasianu dolai baso, te bidigo enabolo mabo nai ofa me elamo dao.
LEV 21:18 Tigidali bidi augwali tigi dwasianu dolai baso, augwaligo enaba ofa me elamuo. Eno te tiwai tobage pris bidi dabede po obao, te gedu widai bidi dabe, ma sągą dwai bidi, ma gesabidi dwai bidi, ma te idago aga ame nani sogo te nogo sągą pęwadage elama gagea paibaso,
LEV 21:19 ma bidi sągą ma nogo dolali,
LEV 21:20 ma bidi tudi sugąsi bidi, ma pęwadage bidi mu yai baso, ma gedu dwai bidi, ma tigi dolali bidi yai baso, ma bidi aga domo dolai bidi, te tama tiwai bidi dabego pris sę eyu, enaba ofa nai me magio.
LEV 21:21 Awe, te nago hanide bidai bidi me deli, te aga tigi dwasianu dolai elalubaso, agai te we bidigo mabo te tobage ofa dabe enaba me elamuo. Te habu mu dao.
LEV 21:22 Tialima, dagego enaba te ofa ebo kibu me gasa nai ofa ebo dabe te agai tumainao. Eno dage prisbolo menama tumainogo ebo ofa nai dabe te agai me sela tumainao.
LEV 21:23 Tiali goli, aga te Tedali Gasagi Yai Mu Be Habu genuai ugwa munalubo be habu pąba me pigio, aga te alta pageba me pelamuo. Tiyu, te wiegi yai nai dabe agai eno gedude meda ilidalio. Magi baso meni, ena digi ena Genuai Bidi, tama eno te nai dabe dąį eyu, sa muani, ena sę digi emainogo yali.” Genuai Bidigo te tama po wai dao.
LEV 21:24 Tama Mosesgo te tigidali po Aronbolo weyu, te aga ogwa dabeba me walio, te Israel we bidi tigidaliba me te po wai dao.
LEV 22:1 Genuai Bidigo Mosesbolo te tiwai po wali,
LEV 22:2 “Te Aron dali, aga ogwa dabeba dali, te tama po walao. Bugagia kone palao, te Israel we bidi dabego ofa dabe da, te ena nai mu dao. Tialima, dagego te ofa dabe bugagia tonaluao. Te meni baso da, teda dagego eno genuai nogi aiyaba muyu dolaibao. Ena Genuai Bidigo eno te po obao.
LEV 22:3 Te dage pris hanide bidi me deli te eno gedude meda pedalubaso da, teda aga te Israel dabego enabolo mabo ofa ebo nai pąba pabo habu mu selibao. Aga te pąba pali da, teda eno aga sela sąyu, te aga pris sę munu ma egobeo. Dagego te bomai po sesemane sesemane sogo wali piduao. Ena Genuai Bidigo, eno te po wai dao.”
LEV 22:4 “Te dage pris hani bidi me deli te oiyabe gasi elaluyu, ma aga tigide te bomai keni elama, te keni dį tigide pedalubaso da, teda aga eno gedude meda pedelama, te enaba ofa ebo nai dabe tusąbadi, te aga usu ma ebo sogoba usu nao. Te tama kolesagade aga meda pedelai baso, te ofa ebo nai dabe me agai tulamuo, te isai bidi tigide elaluali nai agai me diąwai baso, ma agai gasade gawa ąį pedalubaso, ma agai te wiegi yai isąwai meda yai hasaba nogo mueibaso, ma agai eno gedude meda elalubo bidiba kisa sigi paibaso da, teda te tiwai bidigo eno ofa nai me tulamo dao.
LEV 22:6 Mena pris te tiwai meda pedalubaso, te meda agade elalubadi te giliga dega sigulaibao. Te aga ąį bolo bugagia paluama, te augwaligo enabolo ofa mabo kibu mi dabe tuagameo. Te wę pausąbaso, te agai me tugobe dao.
LEV 22:7 Te giliga dega sigulai baso da, teda aga wiegi yai ma pedelali, te agai Genuai Bidi eno te ofa nai dabe tumainao, magi baso meni, te dage prisgo nai dao.
LEV 22:8 Agai te odolali isali kibugo mi yai baso me tulamuo, te bulu uni hasago ela muai dao, te me tugio. Te agai tubaso da, te aga eno gedude meda pedalubao. Ena Genuai Bidigo, eno te po obao.
LEV 22:9 Dage prisgo eno dagebolo mabo bomai po tigidali wali pao. Te dagego eno po sela sąbaso da, teda dagego dobo sę elama, te sęgę elalubaso, te eno dage ela mueibao. Ena Genuai Bidi, eno dage pris ena hani bage mu te sa muai, teyu eno te po wabo dao,” wali.
LEV 22:10 “Bidi ma we te dage pris hanide, te augwa naga te we bidi augwaligo ena mabo ofa ebo nai tuao. Te gasa bidigo me tugio. Te pris dali osogo bidibo bidi, ma aga sę bidi, augwaligo me tugio. Te habu mu dao.
LEV 22:11 Tialima, pris me deligo abelali olo sę ebo bidi dabe, ma olo sę ebo we dabe, te augwali aga dali bidali, te augwa wai dabe, te aga idago te prisgo bede ame nani, te augwaligo da te prisgo sabo tobage nai dabe somainao.
LEV 22:12 Te pris me deligo wegi te pris sę isąbo bidigo sai baso da, teda te wego eno te ofa ebo nai dabe me tulamo dao.
LEV 22:13 Tialima, te wego bidi isama, te we aga olo bidibadi, ma aga bidigo sela sąnama olo bidibadi, te wai meni badi, te we aga ayago beba ma pelama, bidibadi yai baso da, teda aga te prisgo tubo nai tuao, te aga ayago tubao. Tiali goli, bidi ma we te prisgo hani isąwaigo me tugobeo. Te habu dao,” wai dao.
LEV 22:14 “Te bidi me deli dage pris hani isąwai, te aga bugagia homu kone palisąma, te agai enabolo ofa mabo nai me badu dage tueibaso da, teda agai prisgo te nai wei ponao. Te agai a naga nai dage saibaso da, teda aga a naga me deli wei ponomainao.
LEV 22:15 Tialima, te pris dabego bugagia tonaluao, te olo we bidi augwaligo enaba ofa mabo nai te me tugio,” te po wai dao.
LEV 22:16 “Te dage prisgo te olo bidi me deligo tumainogo yali da, teda te bidigo dwai sę yali, tama agai te nai wei te pris dabeba wei ponao. Magi baso meni, ena Genuai Bidigo eno te ofa sa munama, te ena da weyu, habu selai dao.” Te po wali.
LEV 22:17 Tama Genuai Bidigo Mosesbolo te tama po wali,
LEV 22:18 “Nago te po Aronba me aga ogwa dabeba menama, te Israel we bidi tigidaliba wao. Te dage Israel bidi me deli, ma te dage dali bidibo gasa hani bidi me deli, agai te isiba tigidali ulama dabo ofa me deli sela asiyu, te agai enaba dąų wali po me deli usu nainogo, ma aga homugo digi naga sela asobaso da,
LEV 22:19 teda agai bulmakau omai me deli, ma sipsip omai, ma meme omai ofa emainao. Tialima, dagego te keni kenigo tigi dolai kibugo ofa me elamuo. Dagego tama teyu da, eno te godolo homu me egobe dao.
LEV 22:20 Bugagia odao. Te dagego kibu tigi dwasianu dwai gana yaigo ofa ebaso da, teda eno godolo me egobeo.
LEV 22:21 Te bidi me deligo ena Genuai Bidi dali deli) haliga ebo ofa mabo sogo, te agai ena dali dąų wali po usu niyu, mabo ofa yaibaso, te tagalao, te aga homugo digi ebo ofa yaibaso da, teda agai wiegi yai bulmakau ma sipsip te keni kenigo aga tigi me dolisąwai sesao. Te agai tama tibaso da, teda eno agai ofa mabo godolo homu yaibao.
LEV 22:22 Dagego te gedu widai kibu, ma sągą dwai, ma tigi dolai, ma bomai keni elalubo, ma tigi gesigo togai, ma buluba yai kibu yaibaso, enabolo ofa me elamuo. Dagego te tobage tigi poąį kibu te eno altade ofa elamo dao.
LEV 22:23 Te dagego ofa me deli duga homugo digi ebaso da, teda dagego te kibu nogo sągą kikasi pęwadage ma gagea pai selama, te sę ebaso usu yaibao. Tialima, dagego te tobage kibu tiwai selama, te dagego enaba dąų wali bomai po me deli usu nabo ofa yainu da, te tiwai sę me elamuo. Te habu dao.
LEV 22:24 Te kibu domo dolai baso, ma augwaligo togali ma pedali, ma augwaligo domo diasąwai baso, dagego te tobage kibu enabolo ofa me igio. Dagego te kibu dabe te tobage kolesagade te duga tǫ kantride doligio. Te habu dao.
LEV 22:25 Dagego te tobage kibu dabe te gasa bulu tǫ kantride bidi nogode selama, te ofa me elamuo. Te tiwai kibu dabe eno gedude wiegi yai menio. Eno te tobage ofa homu godolo me egobeo. Mu menio,” wali.
LEV 22:26 Te Genuai Bidigo te tiwai po Mosesbolo wali,
LEV 22:27 “Te bulmakau, me sipsip, me meme te wai ame nabo sogo da, teda te wai dabe aga ida dali te a naga me si sogo bidiyu bolo yao. Te nosali badu, dagego ofa ebo homu eyu da, te altaba sela pelama, ofa yagameo, eno dagego te ofa godolo homu ebo dao.
LEV 22:28 Tiali goli, te deli sogo naga dagego te bulmakau, ma sipsip, ma meme te augwa wai dabe elama, te ida me wai selama, te ofa igio. Te habu dao.
LEV 22:29 Te dagego ena Genuai Bidiba buba hwi wabo ofa me deli ebaso da, teda dagego te ofa ebo bomai po wali pao, teda eno dagego ebo ofa godolo yaibao.
LEV 22:30 Te be ulade naga dagego ofa eyu, dagego te ofa ebo kibu mi tuao. Te me sogo kigamu nosali tueiba olama, te dagego elalumainogo igio. Te tebo sę habu mu selibao. Ena Genuai Bidigo eno te po wai dao,” wali.
LEV 22:31 “Odao. Dagego Genuai Bidi eno bomai po tigidali wali pao.
LEV 22:32 Dagego eno genuai nogi aiyaba muyu me doligio. Dage tigidali Israel we bidi te ena dologode bidao, magi baso meni, ena wiegi yai doloba pai mu elalubao. Ena digi ena Genuai Bidi, te eno dage wiegi yai doloba pai we bidi pedalumainogo ebo dao.
LEV 22:33 Ena dagego God bidainogo, te dage eno Isipde selama, odasa asali. Ena Genuai Bidigo, eno tama tiai dao,” wali.
LEV 23:1 Te Genuai Bidigo Mosesbolo e tama po wali,
LEV 23:2 “Te Israel we bidi dabebolo te genuai lotu wabo side eno augwaliba bodolu muyu dąį ilai dao po walao. Dage sisinama, e tama side lotu waiyąo.
LEV 23:3 Dagego sę yabo side te a naga me deli sogo elalubao. Tialima, te Sabat side da, te toma nabo side naga elalubao, te dagego sę me igio. Dage sisinama, lotu waiyąo. Te Sabat side dage menade bidali tagalao, dagego te ena Genuai Bidigo bodolu muani side da homu yao.
LEV 23:4 Megi da, eno dagebolo te genuai sogo dąį ilali po walainogo ebao. Te tigidali kibu bede dage te sogo sisinama lotu wao,” wali.
LEV 23:5 Te Genuai Bidigo e tiwai po wali, “Dagego Godigo Da te Isipde Bugagia Bidimainu Sula Tagalali Genuai Side, te Pasova Side homu kone palama, dąį ilao. Te genuai side te hasia wabo polua, dei 14, tede gagalao, te giliga dega sigulubo sogo, te deli sogo bubugade usu nama bidao.
LEV 23:6 Te polua dei 15 wabode, te Bo Disąwai Bret Tubo Genuai Side elalubao. Tama dagego te bo disąwai yis meni yai bret tudubadi, te Sarere deliba usu nao.
LEV 23:7 Te Sarere hasia side dage lotu wainogo sisinao, te dagego duga sę me elamo dao.
LEV 23:8 Dagego ena Genuai Bidiba te kibu me nai ula mabo ofa deli deli bubugade idubadi, te Sarere deliba usu nao. Te nogo a naga me si wabo side dage ma sisinama, lotu wao, te side dagego sę munu me elamo dao,” wali.
LEV 23:9 Te Genuai Bidigo Mosesbolo te tiwai po ma wali,
LEV 23:10 “Te Israel we bidi augwaliba te tiwai ma wao. Te dage eno mawainogo ebo tǫba bidigi pabo sogo, te nosali dagego duga gide te wit tau inawai sabo sogo da, teda te tigidali kibu bede te polasa duani wit selama, dagego te pris dabeba selasa pao.
LEV 23:11 Tama prisgo te wit duani nogode tolaluyu, te eno gedude uga eda elama, te eno dagebolo usu da waibao. Prisgo te Sabat side tudi badu nosali ofa ebaso usu dao.
LEV 23:12 Tama dagego te wit ofa ebo sogo, dagego te sipsip wai kibu be deli yai ofa yao, te wiegi yai mu, te keni kenigo tigi me dolisąwai ofa yao. Te sipsip te isiba tigidali ulubo ofa yao.
LEV 23:13 Dagego te wiegi yai plaua me badu dage sao, te aga sęgę 2 kilogram, te oliv wel dali taluama, te wit ulubo ofa yao. Te isiba tigidali ulama dabo ofa dali ofa ilao, eno te ofa ebo denami godolo yaibao. Tama dagego te lita deli wain selama, te ofa si dali ofa yao.
LEV 23:14 Tialima, dagego te hasia duani wit te duga God, enaba sela asisąbadi, dagego te gide sabo gesi wit tugio. Te dagego sela aselama da, teda duga tuagameo. Dagego te wit ge disąwai nai tuao, ma duga isiba uluyu yao, ma dagego plaua nigilama, te bret ulama tuao. Dagego te ofago bomai po wali peyu, te duga wąį nosali, me nosali pedalubo bage, augwaligo me wali pomainao,” wali.
LEV 23:15 Te Genuai Bidigo po te tiwai ma wali, “Te ena Genuai Bidiba, dagego te duani wit magasobo side te nosali badu nedebo gagalobo te Sarere a naga me si dao.
LEV 23:16 Te 50 wabo side, te a naga olama si wali Sarere silibo si nosali badu, dagego te wit gasa gesi ofa enabolo mao.
LEV 23:17 Te we bidi wai augwali deli delide bret si seselama, enabolo te gesi wit ofa mabo tiwai yao. Dagego te sęgę kilogram si yai plaua si te bret deli deli nigabo usu selama, te yis dali taluama ulao, te Genuai Bidi, enaba te bret ofa yao. Te prisgo nogo tolaluyu, eno gedude iba eda yao.
LEV 23:18 Te dagego gasa nai te bret dali ofa yao. Dagego te kibu sipsip wai te kibu be deli yai a naga me si ofa yao, te ogwa bidi bulmakau me deli, te omai sipsip si sobadi te ofa yao. Dagego te kenigo aga tigi dolali kibu me sigio. Te wiegi yai kibu naga sao. Te dagego enaba te isiba tigidali domainu ulubo ofa tiwai yao, te wit me wain meba te ofa dali muao, te dagego tigidali sogo ebo tiwai yao. Te ofago wiegi yai denami ebaso, ena Genuai Bidigo, eno godolo mu ebo dao.
LEV 23:19 Dagego te omai kibu meme me deli selama, te sęgę sela sąbo ofa yao, te kibu be deli yai omai sipsip wai si me selama, te deli haliga pedelabo ofa yao.
LEV 23:20 Prisgo te polasa tau inawai witgo nigai bret me te sipsip si selama, nogode tolaluyu, iba eda eno gedude yao, te ofa tiwai ebao. Te ofa dabe te ena nai mu elalubaso, eno te pris augwaliba mawaibao.
LEV 23:21 Dagego te ofa ebo side dage sisinama, lotu wao. Dagego duga sę dabe te side me elamuo. Te duga wąį nǫų dabe te nosali nosali pedelama, te menade bidibaso, tigidaligo te bomai po sesemane wali pidubadi geao,” te po wai dao.
LEV 23:22 “Te dagego duga gide te wit tau inawani sabo sogo, dagego te gi sesege badu mu gagalama sigimio. Dagego te gi tomode nai sabo sogo, te me badu nai dagego ela soeibaso da, teda dage te si sogo ma pelama sigi pigio. Te elalumainogo elama, te nai meni yai bidi dabego me te gasa bulu bidi dage dali bidibo bidi, augwaligo te nai somainao. Ena Genuai Bidi, ena dagego Godigo, eno te tama po wai dao.”
LEV 23:23 Genuai Bidigo Mosesbolo te tiwai po wali,
LEV 23:24 “Te Israel we bidibolo te tiwai po walao. Te 7 polua dei 1, dage toma nao. Te duga genuai side me deli dao, te dagego bu wabo nai biugel bu olama, te dage sisinagaselama, lotu wao.
LEV 23:25 Tama te side dagego duga sę me elamuo. Menio. Dage te altaba pelama, enaba ofa mao,” te po wai dao.
LEV 23:26 Te Genuai Bidigo Mosesbolo wali,
LEV 23:27 “Te 7 polua dei 10de Te We Bidi Augwaligo Sęgę Sela Sąbo Genuai Side dąį ilali. Te side dagego nai tubo me wiegi yai pemene ebo sę tigidali habu selao. Te dage lotu wainogo sisinama, te ofa me deli enaba sesao.” Te po wai dao.
LEV 23:28 “Te side dagego sę me igio, magi baso meni, te side prisgo te sęgę sela sąbo ofa yaibao. Prisgo te ofa ebaso, ena God, dagego Genuai Bidi, te eno dagego sęgę tigidali sela sąwaibao.
LEV 23:29 Bidi me deligo te side nai tuali da, te aga eno we bidi hanide sela sąwaibao.
LEV 23:30 Bidi me deligo te side sę ebaso da, teda ena digi ena aga ela mueibao.
LEV 23:31 Odao. Eno po ma obao, dagego te side sę me deli igio. Dagego sesemane sogo te bomai po wali piduao. Te dagego wąį nǫų nosali nosali pedelama, menade bidibaso me, augwaligo me wali pomainao,” te po wai dao.
LEV 23:32 “Dage te side bugagia toma nao. Te gagalobo side te dei 9 wabode gagalaibao, te giliga dega sigi pabo sogo, te dei 10 wabode te sia ge dega sigi paboba usu naibao. Te side usu nama tigidali, dage nai tubo me wiegi yai pemene tigidali ebo habu mu selao,” wali.
LEV 23:33 Genuai Bidigo Mosesbolo walama, Israel dabeba te po mao wali.
LEV 23:34 Agai te tiwai po wali, “Te 7 polua 15 dei wabode, te namba 1 dei te genuai side te we bidi augwaligo te dwasianu be te ni nologo selama sę ebo side elalubao, te bede bididubadi te a naga si sogo Sarere deliba usu nama, ena homu kone palao.
LEV 23:35 Te Sarere hasia wabo side, dage sisinama, lotu wao, te dagego duga sę me elamo dao.
LEV 23:36 Dagego enaba te Sarere usu nama ofa tigidali side yao. Te 8 wabo side, dage ma sisinama, lotu weyu, te dagego ofa yao. Te dei 8 wabo side da, te lotu wabo side naga dao, te dagego sę me igio,” te po wai.
LEV 23:37 “Te side dabe da te ena Genuai Bidigo dąį ilali side, te dage lotuba sisinama, ena ofa yao. Te dagego isiba tigidali ulubo ofa eyu, te wit ulubo ofa, me wain ąį gelebo, me gasa ofa me yao. Tama dagego te ofa deli deli te aga bodolu muani side dolo iyąo.
LEV 23:38 Dagego te tigidali side bodolu wali peyu, te enaba lotu weyu, toma nabo Sabat side tigidali me tiao. Dagego te ofa dabe eyu, te dagego enabolo gasa mabo nai me mao, te dąų yali po usu nubo ofa dabe, me te duga homugo digi enabolo mabo ofa me maiyąo,” wali.
LEV 23:39 “Te 7 polua 15 dei wabo side, te dagego tau yali nai sela aselama nosali, dagego te nogo a naga olama. me si wabo genuai si te osogo bidabo bede bidiyu, te ena Genuai Bidiba homu kone palao. Te hasia wabo dei me dei 8 wabo side, dage toma nabo side sę tagalama, bidao.
LEV 23:40 Te namba wan dei wabo side dagego wiegi yai nai mu meba dagego te tubo ni dude sao. Tama dagego te ni det nologo me te yabe hauwa elalubo ni nologo me sao. Tama dage wiegi yai pemene idubadi, te nogo a naga me si wabo siba te eno gedude tama yao, Genuai Bidi, dagego God dao.
LEV 23:41 Tigidali kibu bede te 7 wabo poluade te dagego enaba muani genuai bodolu te 7 sogo elalueibao. Te duga wąį nǫų nosali nosali pedalubo bagego te bomai po wali pao.
LEV 23:42 Dage tigidali Israel we bidi te dwasianu tolu yabe bede te a naga me si sogo bidao.
LEV 23:43 Dagego tama tibaso da, te wąį nǫų nosali pedalubo hani dabe, augwaligo sulama koneyu, te eno dage te tǫ kantri Isipde selama, te dage odasa asali homu yaibao, tama te sogo eno dage te tobage bede bidali tiwai yali. Ena Genuai Bidi, ena duga God, eno te po wai dao,” wali.
LEV 23:44 Mosesgo te po odama, agai te Israel augwaliba olama, te tigidali genuai bodolu side te Godigo nogi ugwaba sao po wai dao.
LEV 24:1 Genuai Bidigo Mosesbolo te tiwai po wali,
LEV 24:2 “Te Israel tigidaliba walama. augwaligo te wiegi yai ni oliv wel te eno sel Ugwa Be tomode munalubo lamba muabo wel sesao. Te pris dagego tigidali hulide lam sole udaludaibao,” te po wai.
LEV 24:3 “Arongo te lam sole dabe pio ebode mu udulama. te tigidali hulide te lam ula elaludu. te sogo kigamuba usu naibao. Te lam dabe te genuai walali ugwa dąį togali bulu.badu edade elalu. te Dąų Wali Bomai Po Munalubo Halobage te Tedali Gasagi Yai Mu Be Habu tomode munalubo ena Genuai Bidi, eno sueibao. Eno te bomai po dagebolo mani, te dage me duga hani nosali pedalubo hanigo me te bomai po sesemane wali pao.
LEV 24:4 Arongo te ni dagede elalubo lam sole bugagia tonaluao, te bugagia tonaluyu, te lam ula sula sabuo, te augwali ula elalubo eno sueibao,” wali.
LEV 24:5 Genuai Bidigo Mosesbolo te po ma weyu, te tiwai wali, “Nago te sęgę 12 kilogram elalubo wiegi yai plaua selama, te plauago 12 bret nigao. Te sęgę deli deli dobolama, te bret deli deli nigao.
LEV 24:6 Nosali te bret dabe te tebolba muao, augwa te ni akasgo me wiegi yai golgo nigali, te Genuai Bidi ena gedude e munalueibao. Te bret nani si wasilao, te bret a naga me deli te nani deli deli wasilao.
LEV 24:7 Te wiegi yai denami pedalubo pauda meba dali te bret nani si dali muao, te nosali augwaligo te pauda enabolo ofa yao, te bret hasegeliyu, tama yao.
LEV 24:8 Te tigidali Sabatde te pris augwaligo te bret tebolba mubaso eno sueibao. Sesemane sogo te Israel augwaligo te kolesaga wali pao. Tede te po dąų wabo kontrak me deli eno augwali dali ebao.
LEV 24:9 Te bret te Aron dali aga hani pris dabe daligo nai elalueibao. Augwaligo te bret eno sel Ugwa Be obo tomode tuao, magi baso meni, te we bidi augwaligo enaba ofa yali nai dage dao. Te ena nai digi, te eno pris dabeba mawaibao.” Godigo te po Mosesbolo mawai dao.
LEV 24:10 Bidi me deli bidali, aga aya Isip bidi, aga ida Israel we me deli. Ida nogi, te Selomit, Selomit te Dirigo wegi, te Dango hani. Te Selomitgo ogwa te bidibo pesagede bidiyu, te Israel bidi me deli dali hwįani. Augwa si hwįbo sę eyu, te Selomitgo ogwago te Genuai Bidigo nogide agabolo po dwai wali. Tama augwaligo aga Mosesba sela palio.
LEV 24:12 Tama Mosesgo aga kalabusiba munama, te Genuai Bidigo te bidiba mena sę yabo po te agabolo wabo tonaluali.
LEV 24:13 Tialima, Genuai Bidigo Mosesbolo po walali,
LEV 24:14 “Te bidi selama, te bidibo pesage buluba pao. Agai enabolo po dwai po wabo odali bidi tigidali, augwaligo nogo aga toboluba muao. Augwaligo tama tebo, te we bidi augwaliba ola mayu, te bidigo dwai sę yalio, te sęgę agade elalubao. Te tigidali we bidigo agaba masigi sąnama, te aga isibo siba usu nao.
LEV 24:15 Nosali nago Israel augwaliba te po walao, ‘Te bidi me deligo enaba po dwai wali da, aga yali dwai sęgę elalubaso, te aga yali sęgo sęgę tolalubo dao.
LEV 24:16 Agai te dwai po wabo sogo ena Genuai Bidi nogi ebaso da, teda aga isimainao. Te Israel bidi mu me, te Israel tomode bidibo gasa hani dabe me, tagalao. Te bidigo ena nogi te tiwai nogi ebaso da, teda tigidali we bidigo agaba masigi sąnama, aga isiboba usu nao,’ te po wao,” wali.
LEV 24:17 “‘Te gasa bidi ma we ela mubo bidi yai baso da, teda dagego aga me ela muao.
LEV 24:18 Bidigo gasa bidi mego bulmakau ela mubaso da, te agai gasa bulmakau te bidiba wei ponao. Te tobage dwai sę ebo dodolobo kolesaga e tiwai. Bidigo gasa bidigo kibu elali, agai te tobage tiwai naga agaba wei ponao.’”
LEV 24:19 “‘Te bidi mego gasa bidigo tigi dolobaso da, teda dagego deli tigi poai sę agaba wei ponao.
LEV 24:20 Te agai gasa bidigo dili togai baso, dagego aga dili me togao. Te agai gasa bidigo gedu dolali, dagego agai gedu me dolao. Te agai gasa bidigo kele degai baso da, teda dagego agai kele me degao. Bidigo mena sęgo te gasa bidi dolai baso, dagego te tobage deli kolesaga naga agaba wei ponao.
LEV 24:21 Bidigo gasa bidigo kibu ela muani da, agai te bidiba deli tigi tobage naigo wei ponao. Tiali goli, bidigo gasa bidi me ela muani da, dagego te bidi aga digi ela munama, wei ponao.
LEV 24:22 Eno te bomai po deli dage Israelba me dage tomode bidibo gasa haniba me dąį mubao. Ena Genuai Bidi, ena dagego God dao, eno dagebolo te po wai dao,’” wali.
LEV 24:23 Mosesgo te po dabe Israel we bidi augwaliba pusula silama da, te nosali augwaligo te Godiba po dwai wali bidi selasa, te bidibo pesage buluba odasa pali. Te augwaligo agaba masigi sąnama, aga ela muani. Te kolesaga yali te Israel augwaligo te Genuai Bidigo Mosesba mani po wali peyu yai dao.
LEV 25:1 Moses te Sainai bulu dude bidibadi,
LEV 25:2 Genuai Bidigo agabolo te Israel augwaliba maiabo po pusali. Genuai Bidigo te tiwai po walio, “Te dagebolo eno mawainogo ebo tǫba dage bidigi pabo sogo da, teda te a naga me si wali kibu be te kibu be me delide dagego nai me bulugio. Dagego te tǫ olo elalumainogo yao. Tǫ toma nomainao, te dage Sabat side toma nabo tiwai emainao. Dagego te tiwai ebo te eno kibu be da olama, dąį eyu yao.
LEV 25:3 Te kibu be me sela me selade dagego te duga tǫde mena tobage nai bulao, te wain nologo dabe togolama, te gide nai sao.
LEV 25:4 Tiali goli, te 7 wabo kibu be me delide dagego te tǫ toma neyu, olo elalumainao. Te kibu be dagego eno kibu be da olama, sa muao. Dagego nai me bulisąma, te ni wain nologo me togolamo dao.
LEV 25:5 Te nai wit pedelama olo dali elalubaso da, teda dagego te nai wai me selama, nai mubo beba me sisinigio. Te ni wainde te age holobaso da, teda dagego te wain nigainogo me sigio. Tigidali sula tagalama elalumainao, magi baso meni, te kibu bede tǫ bugagia toma nomainao.
LEV 25:6 Te kibu bede dagego tǫde nai odolali pedelali, te tuyu naga yao. Te nai sisinibo beba sisiniyu, ma wain nigibo sę me egobeo. Dage me, olo sę ebo bidi me, olo sę ebo we me, gasa sę bidi dabe me, te dage dali bidibo gasa hani we bidi dabe, duga tuiyąo.
LEV 25:7 Te bulmakau, sipsip, meme dabe, te bulu uni kibu hasa dabego me tumainao,” te po wai dao.
LEV 25:8 Genuai Bidigo po ma weyu, te tiwai po wali, “Te a naga me si sogo dagego te kibu be 7 te tama nedao, te kibu be bidi sese si a naga me si me si, te 49 kibu beba usu naibao.
LEV 25:9 Te kibu be 49 wabo side, te 7 polua dei 10 wabo sogo, dagego bidi meba tagala palama, te duga tǫ kantri pedaiba te bu wabo nai biugel bu wagi pomainao. Te side te God eno genuai side, eno te We Bidi Augwaligo Sęgę Sela Sąyabo Side mu dao.
LEV 25:10 Te kibu be te 50 gagalobo, te side dagego bu wabo nai biugel bu wao, te eno kibu bede dolo ebao. Te dagego tigidali we bidi augwaliba hanilama weyu, te augwa sęgę silama, te augwa bugagia bidaibao po wao. Te kibu bede, te gasa bidigo tǫ abelali bidi dabe, augwaligo te tǫ aga aya muba, me ma tǫ aga ayago deli haniba te wei ponao. Te olo sę ebo bidi dabe me olo sę ebo we dabe bidali, augwa te sę yali tagalama, te augwa deli hani sibiba ma pelama bidao.
LEV 25:11 Te kibu be 50 obaso, te kibu bede da, tigidali we bidi pemene elama, bugagia bidalubo kibu be pedelaibao. Te kibu bede duga tǫde nai me bulugio, tama dagego te wit dabe togolama me sisinigio. Te dagego wain du selama, te wain ąį me nigilamo dao.
LEV 25:12 Magi baso meni, dagego te kibu be tigidalide ena Genuai Bidigo kibu be naga da, te homu yao. Te dagego duga tǫde olo pedalubo nai sela tuao, te tama. Dagego te gasa nai dabe me tulamo dao,” te po wai dao.
LEV 25:13 “Te kibu bede dage bidi dabego tǫ gasa bidiba mani, dagego te tǫ duga ma sao.
LEV 25:14 Te gasa bidi dagego tǫ abelemainogo mabo sogo, dagego koneao, te nisu naga kibu bede te nai tigidali wei ma mabo, te nisu naga sogo agai te bulali nai tau yali sabo me elalubo. Agai bugagia abelemainao, te tǫde mone usu nama dolo sao.
LEV 25:16 Te kibu be hauwa yabo elalubaso da, teda mone ugwaba holao. Tialima, te kibu be hauwa egobe da weyu da, te mone aiya dulao, magi baso meni, agai te tǫ mu abelegobeo. Menio. Te tigidali kibu bede te tǫ agai nogode elalu, agai te tǫde sabo nai abelebo dao.
LEV 25:17 Dagego te abagi me deli tibo po ola magio, te tǫ abelabo monede. Menio. Dagego enade wi yao, dagego God dao, te doloba pai kolesaga naga yao. Ena Genuai Bidigo te tiwai po obao,” wali.
LEV 25:18 Genuai Bidigo po ma weyu, te tama po wai, “Dagego eno po tigidali bugagia wali peyu, eno bomai po me tigidali wali pao. Te dagego tama tibaso da, teda eno dage mawainogo ebo tǫde sesemane bugagia bidaibao.
LEV 25:19 Te nai hauwa te tǫde pedelama, te dagego nai hauwa sesemane sogo tudaibao. Tama dage te tǫde bugagia bidaibao.
LEV 25:20 Tama teyu, dagego te tiwai po waidalio, ‘Te a naga si wabo kibu bede dago te nai me bulisąma, te odolali tau yali nai naga sisinaibao,’ wagio. ‘Te tama tebo dago habu selai baso da, teda dago magi nai mu te kibu bede tueibawe?’
LEV 25:21 Tagalao, dage moni homu si me igio. Ena Genuai Bidi, te 6 wabo kibu bede eno te tǫ wiegi yai bugagia mu ilaibao, te dagego te nai tudubadi kibu be selaba usu naibao.
LEV 25:22 Te 8 wabo kibu bede dagego bulubo nai da, te kibu be a naga me delide sali nai tudubadi geaibao. Te dage nai usu elalubadi, te gesi tamadi bulali nai sabo bodoluba usu naibao,” te po wai dao.
LEV 25:23 Genuai Bidigo te tiwai po ma wali, “Te gasa bidigo dagego tǫ abelai baso, agai sesemane sogo mu tonaludugio. Magi baso meni, te duga tǫ mu elalubeo. Te ena Genuai Bidigo tǫ elalubao, te eno dage Israel bidimainogo yali, te bidi dabego augwa tǫde te gasa tǫ kantri bidi dabe osogo bida wabo tiwai yai dao,” wali.
LEV 25:24 “Te dage bidi me deligo te duga bage gasa bidigo tǫ abelebaso da, teda agai te tiwai bugagia kone palao, te nosali tǫ aga ayago ma abelemainogo ebaso da, teda aga abelemainao.
LEV 25:25 Te duga abagi me deli magi nai doado bage meni baso, te agai mone meba sabo homu elama, te gasa bidigo aga tǫ abelemainogo ebaso da, teda aga deli kanemego dolo tonalubo sę eyu aga tau sabo sę yao, agai te tǫ ma abelama te agaba ma mao.
LEV 25:26 Tialima, te aga tau sabo deli kaneme meni yai baso, aga digi ma abelemainao. Te nosali aga mone hauwa elalubaso da, teda aga te tǫ ma abelao.
LEV 25:27 Agai nedali te nisu naga kibu be elalubaso, te nai dabe ma wei mabo kibu be gegabo sogo, te kibu be dabede agai nisu naga nai pedelabo te nedao. Tama agai te nai usu nabo mone usu selama, te aga tǫ polobadu abelali bidibolo mao, tama aga tǫ ma sabo usu dao.
LEV 25:28 Tialima, te aga mone sǫą pelama, tama aga te tǫ ma abelabo usu meni yai baso da, teda te tǫ abelali bidi aga nogode elalubadi, te nai dabe page bidiba ma mabo sogoba ma usu numainao. Te kibu beba pedalubo sogo, te tǫ abelali bidigo te tǫ aga page bidiba ma dolo mabo usu dao,” wali.
LEV 25:29 “Te taun obo tomode elalubo bidigo be, te bidi me deligo abelai baso da, teda te be aga ayago te kibu be deli bididubadi, te be page bidigo ma abelabo usu dao.
LEV 25:30 Te kibu be deli bidai digi agai te be ma abelesąbaso da, teda agai ma abelabo sunumi me elalubeo. Mu menio. Megi da te be te abelali bidi aga be elalueibao, te aga wąį nǫų nosali pedalubo hanigo be pedelaibao. Tama agai te nai dabe wei ma mabo kibu bede ma abelainu ebo usu me egobeo.
LEV 25:31 Tiali goli, te obo elalusąbo madi elalubo dwasianu be dabe, te dagego homugo augwali te nai bulabo tǫ tiwai da homu yao. Tialima, te be dabe aga ayago ma abelabo usu yaibao, te nai dabe wei ma mabo kibu bede, te abelali bidi dabego te be aga ayabolo wei ponobaso usu dao.
LEV 25:32 Tialima, te Livai hani da, augwaligo te bomai po wali pelamuo. Te augwa taun obo tomode elalubo be yai baso da, teda augwaligo ma abelemainao,” te po wai.
LEV 25:33 “Te Livai me deligo aga be bidigo abelemainu yali, te aga ma abelesąbaso da, teda te be abelali bidigo agai te Livai agabolo ma mao, te nai dabe wei ma mabo kibu bede tiao. Magi baso meni, eno dage gasa Israelba tǫ sa muani, tiali goli te Livai hanibolo te tiwai me ebeo. Menio. Eno taun naga augwaliba mani. Tialima, te Livai dabego taunde elalubo be dabe, te Livai hani augwa be mu naga tama sesemane elalubo dao.
LEV 25:34 Te Livai dabego taun sesege badu elalubo tǫ dabe, te gasa bidigo me abelamuo. Te Livai dabe augwa tǫ sesemane elalueibao,” wali.
LEV 25:35 Genuai Bidigo po te tiwai ma wali, “Te dagego abagi me deli magi nai meni yai bidi pedelama, te doado bage abelabo mone gegabo sę usu isąbaso da, teda duga digi aga tonaluao, te gasa tǫ kantri bidi dage dali bidagasali bidi tonalubo tiwai yao. Te tiwai ebaso da, te abagi dage dali bidaibao.
LEV 25:36 Te agai dagede mone negeli yai baso da, teda agai te mone negeli wei ponobo sogo te dagego gasa ugwadu daganobo mone dali manama, momainogo elamuo. Te agai nai abelainogo ebaso, te dagego mone ugwaba holoyu, te agade gasa mone dali saiba homu igio. Dage Godide wi naga elama, te abagi dage dali bidimainao.
LEV 25:38 Ena God, duga Genuai Bidi, eno po dagebolo walio. Ena dagego God bidibao homu yai, tibaso eno dage te tǫ kantri Isipde selama, odasa asali, dagebolo te tǫ kantri Kenan mawai hagede yai dao,” wali.
LEV 25:39 Genuai Bidigo po te tiwai ma wali, “Te abagi me deli magi nai menia sobaso, te aga dagego olo mu sę ebo bidi tiwai abelebaso da, teda dagego aga te olo mu sę ebo bidi sesanobo tiwai elamo dao.
LEV 25:40 Aga dage dali bidu, te mone sę ebo bidi tiwai bidao, te aga dage dali sę ela pidubadi, te tigidali nai wei ma mabo kibu beba usu nao,” po wai.
LEV 25:41 “Te wali kibu bede aga me aga we wai dali, te augwaligo dage tagalama, te aga haniba ma pelama, te aga wąį nǫų dabego tǫde bidaibao.
LEV 25:42 Te page e tiwai elalubao. Polobadu dage Israel te Isipde olo mu sę ebo bidi bidai, eno dage sagaselama, dagego te Isip mu taga soali. Tama tialigo, dage ena Genuai Bidigo olo mu sę ebo bidi ma we pedelali, te dagego me abagi dabe abelama, te augwali olo mu sę ebo bidi sesemane bidaibao homu igio. Te habu mu dao.
LEV 25:43 Tama tialima, dagego te abagi selebo sę eyu, aga sę dene ilibo sę igio. Menio. Dage enade wi yao, dagego God, te dagego bugagia wiegi yai sę naga agaba yao.
LEV 25:44 Te dagego olo mu sę yabo sę bidi, me sę ebo we sabo homu ebaso da, teda dage pąde elalubo tǫ kantri dabede sao, augwali te Israel hani bage isąwai.
LEV 25:45 Tama me dagego te olo mu sę ebo bidi abelai hagede te gasa tǫ kantri bidi dabe dage dali bidibo hanide abelao. Te dagego olo mu sę ebo bidi me olo sę ebo we te augwalide abelabo usu mu dao.
LEV 25:46 Te dage isibo si da, te duga ogwa dabe augwaligo te olo mu sę ebo bidi ma we dabe somainao. Te augwaligo dagego ogwa dabego sę sesemane sogo idumainao. Tiali goli, te duga abagi dagego digi te olo mu sę ebo bidi pedelai baso da, teda dagego augwali selebo sę igio. Dagego augwalide dua dua yao,” wali.
LEV 25:47 “Te gasa tǫ kantri bidi dage dali bidagasali bidi te mone bidi pedelali. Te dagego abagi Israel bidi me deli te magi nai meni yai bidi pedelai baso, aga te gasa tǫ kantri bidigo abelemainogo elama, aga te bidigo olo sę ebo bidi bidimainao, ma te bidi aga deli hanigo olo sę ebo bidi bidibaso me usu dao.
LEV 25:48 Te abagi Israelgo tama tibaso da, teda dagego aga ma abelama sagameo. Aga ama me deligo,
LEV 25:49 ma aga aya sabi bidigo, ma aga deli kaneme hanigo aga ma abelao. Te aga mone sali usu yai baso da, teda aga digi abelama, te dwai sę olo ebo tagalao,” wali.
LEV 25:50 “Te bidigo aga abelali bidi dali po minama, te elaluali tigidali kibu be dali te nai wei ma mabo kibu be dali me usu nama nedao. Tialima, te olo sę yali bidi aga tonaluali genuai bidigo te kibu bede te bidigo mone sę yali dąį ilao. Tama te bidi aga digi ma aga deli kaneme bidigo te tobage tiwai monego mu te bidi ma abelebaso usu dao.
LEV 25:51 Te kibu be hauwa elalubadi yai baso da, teda te bidigo genuai mone te tonalubo genuai bidibolo wei ponama mao.
LEV 25:52 Te kibu be hauwa bidisąwai te nai wei ma mabo kibu be pedalubaso da, teda agai dwasianu mone te tonalubo bidibolo wei ponao,” te po wai.
LEV 25:53 “Te tonalubo bidigo koneao, sę bidi te kibu be deli delide te kontrak sę ebo bidi tiwai da weyu, te aga dwagila selebo sę me igio. Agai dua tama naga yao.
LEV 25:54 Te augwaligo te bidi te kolesaga me delide te ma abelesąbaso da, teda te nai dabe wei ma mabo kibu bede, te tonalubo bidigo te bidi aga we wai dali tagala palama, olo mu bidimainao.
LEV 25:55 Dagego te dage Israel me deli olo mu sę ebo bidi sesemane bidimainao wagio, magi baso meni, ena Genuai Bidi, ena dagego God, te eno dage Isipde selama, te dage odasa asali. Tama tibaso, dage enade digi te olo mu sę ebo bidi bidimainogo yai dao,” wali.
LEV 26:1 Genuai Bidigo te po wai, “Dagego te ni dage selama, tego te piksa noma nigigio, ma genuai masigi selama dualiyu, ma te masigi selama, tego babaga pabo sę elama, te tobage nai dabe dagego tibo god da olama, teba lotu wagio. Menio. Dagego ena deliba naga lotu wao, dagego Genuai Bidi dao.
LEV 26:2 Dagego te Sabat dabe side sę me igio, eno dageba dąį ilai dao. Dage toma naga nao. Te dagego eno be godolo mu iyąo. Ena Genuai Bidigo eno te po wai dao,” wali.
LEV 26:3 “Te dagego eno bomai po dabe wali peyu, te eno dagebolo yao po wabo sę dabe ebaso da,
LEV 26:4 teda eno te tulubage tulubo sogo te tulubage tulumainogo ilaibao. Tama eno dagego tǫde nai wiegi yai mu holomainogo elama, te ni dabego nai hauwa walaibao.
LEV 26:5 Te dagego nai hauwa mu elalu, te dagego wit tau yali sesa pidubadi, te wain du tau yali sabo sogoba usu naibao. Tama dagego te wain du tau yali sidubadi, te wit wai bulubo sogoba usu naibao. Te dage nai tudumainogo genama, te dage haliga mu pągąwaibao. Te dage bugagia mu duga tǫde dugulalu bidaibao,” wai dao.
LEV 26:6 “Te eno dageba haliga nagame ebo kolesaga menama, te dage bugagia dugulalu, te dage godege pibo sogo magi nai me delide wi me egobeo. Eno dagego tǫde te dwai uni hasa dabe sela sąnama, te boi bidi dabego dage te tǫde bidibadi te boi me hwįgobeo.
LEV 26:7 Te boi bidi augwaliba dagego hwįbaso da, te dagego augwali pobelama, ela mubaso, te hwįbogo augwali mu dolaibao.
LEV 26:8 Te dage nogo a naga bidigo te bidi sese a naga 100 boi bidi aiyaba elalueibao, te dage 100 bidigo te bidi sese umabo hauwa 10,000 boi bidi aiyaba elalueibao, tama tigidali boi bidi dolaibao,” te po wai.
LEV 26:9 “Te eno dage wiegi yai iliyu, dagebolo eno te wai hauwa menama, te dage genuai hani pedalumainogo ilaibao. Te eno polobadu dage dali te dąų wali bomai po kontrak usu naibao.
LEV 26:10 Te nai dabe dagego te gide polobadu kibu bede sali te elalubadi, te nosali kibu beba ma usu naibao. Te elaluali nai bugai te dagego gesi tau yali nai sabo sogo, te nai dagego sąyu, tama te nai muani pesagede dagego gesi nai mueibao.
LEV 26:11 Te ena dage tomode bidiyu, te ena be tomode digi bidaibao, te eno dage tudiba me mugobeo.
LEV 26:12 Te ena dage tomode biliyu, te ena dagego God bidaibao. Te dage eno we bidi dabe bidaibao,” te po wai dao.
LEV 26:13 “Ena digi ena Genuai Bidi, ena dagego God dao. Polobadu dage te Isipde olo sę ebo bidi bidibaso, eno te kalabus ebo sę togwa sąnama, te dage odasa asai. Eno dage te kalabus yali bidi dabego bogo toga sąwai, te dage kalabus tagalama, te wiegi yai homu pemene eyu asai dao,” wali.
LEV 26:14 Genuai Bidigo po te tiwai ma wali, “Te dagego eno po sela sąyu, tama dagego te bomai po dabe sela sąbaso da, teda eno dagebolo te dene mabo sę yaibao,” te po wai.
LEV 26:15 “Te dagego eno bomai po me eno po dali te tudiba munama, tama eno dage dali te dąų wali bomai kontrak te dagego togwali da,
LEV 26:16 teda eno dagebolo dene maiabo sę e tiwai yaibao. Polo tama eno dage dwai wi mu ilama, te dage te tobage genuai gasi somainogo ilaibao, te tigi posolo mu ilibo gasi, me te dage gedu widaibao, te dagego tigi me dolaibao. Te dagego gi nai da bulaibao, tiali goli dagego te nai ge me sela tugobeo. Mu menio. Te boi bidi dabego naga sela tueibao.
LEV 26:17 Te ena digi eno dageba boi bidi yaibao, tama eno te gasa bidi dabego dageba boi hwįagasomainogo elama, te dage aiyaba elalumainogo ilaibao. Tama te bidi dabego dage dali dwai homu mu eyu, augwaligo dage tonalubo sę yaibao. Te boi bidi dabego dage pobeasa asisąbadi goli tagalao, te duga digi odolali wi elama, te wi paibao,” wali.
LEV 26:18 “Tama eno te kolesaga dabego dageba te dwai dene mabo sę ebaso, te tudi, badu nosali dagego eno po wali me pisąbaso da, teda eno te dwai dene mabo sę dageba mu geninaibao.
LEV 26:19 Te eno dagego hagoma aiyaba mu elalueibao. Te eno tulubage tulubo paliama, te dagego tǫba tulubage me tulugobeo, te tǫ mu wa pelama, te ain tiwai dila pai pedelaibao.
LEV 26:20 Te nai dabe te gide dabe me hologobeo, te ni dabego du me walogobeo. Te dagego sę dene yali odolali yaibao,” te po wai dao.
LEV 26:21 “Te tama sęgę dabe dageba pedalubaso, te dagego hagoma idu, te po me odisąbaso da, teda eno dagego te ebo dwai kolesagade homu kone paludama, te eno dageba dwai dene mabo sę me mu ela pidubadi geaibao.
LEV 26:22 Eno te bulu uni hasa dabe dage tomoba tagala palama, te augwaligo te wai dabe ela muyu, te bulmakau dabe me ela mueibao. Tama tialima, te dagego tǫ kantri sunumide te bidi dabe me bilalugobeo, te dwasianu hani we bidi naga bidaibao,” wali.
LEV 26:23 “Eno te tiwai dwai dene mabo sę dageba ebaso, te nosali dagego eno po me odisąma, te dagego enaba hagoma ebo dwai sę me idubaso da,
LEV 26:24 teda eno digi dagego te ebo sęgęde homu kone palama, te eno dage dwai dene mabo sę genugia mu idubadi, te dage posolo dwai mu yaibao.
LEV 26:25 Dagego eno dąų wali bomai po kontrak togalio, tama dageba te boi bidi dabego hwįabo sę eno ilaibao. Te dage te genuai taun te bomai obo elalubo tomoba sisinigi pelama, te dage bugagia bidiba homu yaibao, tagalao, te eno dwai genuai gasi dabe dageba tagala palama, te dage we bidi hauwa mu isaibao. Te dage dolobo sogo da, teda eno dage te boi bidi dabe augwali nogoba mawaibao,” te po wai.
LEV 26:26 “Te eno dagego nai mu sǫą pomainogo yaibao, tama te we dabego augwa iside ulabo nai hauwa meni yaibao, te sia tigi delide nogo si wego nai ulaibao. Te dage tigidaligo te nai dwasianu dwasianu naga selama tueibao, tiali digi te dage nasi me elaludaibao,” Genuai Bidigo te po wai dao.
LEV 26:27 “Eno te sę dabe yali, te dagego hagoma me idubadi geyu, te eno po ma sela sąbaso da,
LEV 26:28 teda eno haliga sębę dwai mu eyu, te eno dagego dwai sę ebo umagia mu wei ponodu, te dageba dwai dene mu madubadi geaibao,” wali.
LEV 26:29 “Te dage nasi dwai mu ebaso, te duga wai te ogwa me wegi dabe te ela tueibao,” te po wai dao.
LEV 26:30 “Te eno dwai haliga dageba elama, te dagego tibo god dabego lotu be te bulu dude sę yani te eno dolaibao, te wiegi yai denami ebo hano holobo ofa ebo alta eno alueibao. Te eno dage ela munama, te eno dolali te tibo god piksa daiba sąwaibao.
LEV 26:31 Te eno dagego taun dabe me lotu be dabe dolaibao, tama eno dagego te ebo ofa dabe homu godolo me egobeo.
LEV 26:32 Te eno dagego tǫ mu dolaibao, te dagego boi bidi dabego te tǫ selama bidibo sogo, te augwa sulama, te dwai noma mu saibao.
LEV 26:33 Eno digi te boi bidi dabego dageba boi hwįmainogo ilaibao, te eno dage augwaligo te gasa tǫ kantriba tedela palomainogo ilaibao. Te dagego tǫde bidi meniama olo elalu, te taun dabe dolai elalueibao.
LEV 26:34 Tialima, dage te boi bidi dabego tǫde bidalubo sogo, dagego te tǫ dabe olo dali elalu, te toma nedueibao. Polobadu dage te tǫde bidaluyu, tama dagego te 7 wabo kibu bede te tǫ toma nomainu ilibeo, eno dagebolo te tama tiao po wali gilama me ebeo. Tialima, te tǫ olo elalubo sogo aga te bugagia toma tueibao, te sogo tǫgo godolo yaibao,” wali.
LEV 26:36 “Te dage hani dwasianu naga elalu, te boi hwįbo sogo me isigobeo, te dage boi bidi dabego tǫ kantriba bidigi paibao. Te dage eno wi dwai mu ilaibao, te dagego waligo te ni yabe gele gele dwasianu wabo odobaso da, teda dage odolali wi elama, tama te boi bidi dabego pobebaso wi pabo tiwai yaibao. Te boi bidi dabego pobesąbadi digi, te dage odolali wi pelayu, udabogo duga hasi hodola palama, tula munana paibao. Te boi bidi dabego dage dali hwįbaso da, teda dagego augwali dali me hwįgobeo.
LEV 26:38 Tialima, dage te boi dabego tǫde isila paibao. Te augwaligo tǫgo dage aiyaba mu dalubo tiwai yaibao.
LEV 26:39 Te dage dwasianu hani dabe te boi bidi augwaligo tǫ kantride bidaibao, te dage deli deli dolama, te dage hani silabo homu yaibao. Magi baso meni, duga digi, me te aya dabe, me wąį nǫų dabego yali sęgęde me duga tigidaligo sęgęde tama tiaibao,” te po wai dao.
LEV 26:40 “Tiali goli, nosali dage te hani dabe te augwa yali sęgę homu kone palama, te augwaligo enaba pusaibao. Augwaligo te tama po waibao, ‘Dena digi me te sęgę siyu, te wąį nǫų dabego me sęgę salio. Dago hagoma elama, te nago po sela sąwai dao.’
LEV 26:41 Dagego hagoma ebaso, tialima eno dageba dwai dene menama, tama dage te duga boi bidi dabego tǫ kantriba tagala palali. Tialima, duga hanigo te hagoma ebo tagalobo sogo te augwa digi elaluama, te augwa yali sęgę dwai dene sobaso da,
LEV 26:42 teda eno te Jekop, me Aisak, me Abraham augwali dali te dąų wali bomai po kontrak homu ma koneaibao, te Kenan tǫ augwa wąį nǫų dabebolo mawaibao po wai dao.
LEV 26:43 Tialima, hasia bolo dagego te tǫ tagalai elalueibao, te tǫ odolali elaluama, te bobage sesabi elama, toma neyu elalueibao, te dagego tǫ te olo elalumainogo isąwani te sogoba usu naibao. Te dage sęgę tolama, te dwai dene saibao, magi baso meni, dagego eno bomai po tigidali tudiba munama, te eno po me tigidali sela sąwai dao.
LEV 26:44 Tiali goli, dage te boi bidi dabego tǫ kantride bidibo sogo, te dage mu tagalisąma, te eno dage tigidali mu me dologobeo. Mu menio. Eno te tiwai egi sogo da, teda eno dage dali te dąų wali bomai po kontrak dąų wali, te siligi da. Tiali goli, ena God, duga Genuai Bidi, eno te tama tiwai kolesaga me egobeo.
LEV 26:45 Eno dageba homu koneama, eno te dagego wąį nǫų dabe dali dąų wali bomai po kontrak ma homu kone palaibao. Te bidi dabe eno polobadu te tǫ kantri Isipde selama odasa asali, te gasa tǫ kantri we bidi tigidaligo te eno genuai bomo suali. Eno dage sela asali, te Genuai Bidi ena hani bage pedalumainu yali, ena dage Israelgo God bidainogo yai dao,” te po wai dao.
LEV 26:46 Te po dabe me te bomai po Genuai Bidigo Mosesbolo te Sainai bulu dude mayu dąų walai dao. Tama agai te po weyu, te Israel dabego tigidali wali piyąo wai dao.
LEV 27:1 Genuai Bidigo po Mosesbolo weyu,
LEV 27:2 te Israel dabebolo te tiwai po walao wali, “Te bidi me deli aga po dąų waliyu, te aga enaba mawaibao, ma gasa bidi me we te enabolo mawaibao wai baso da, teda agai te dąų wali po usu nainogo te monego te bidi ma we hasegelainogo eyu, te mone meba pris bidiba mao,” te po wai.
LEV 27:3 “Te we bidi dabe ma abelabo dąį ilali mone e tiwai elalubao. Te kibu be 20 dąį elama, te kibu be bidi sese sela 60 igi pali bidi, augwaligo te mone 500 kina tama monego hasegeliyu abelao.
LEV 27:4 Te wego kibu be bidi sese delide dąį elama te bidi sese selaba dąį igi pali we da, te mone 300 kinago abelao.
LEV 27:5 Te bidi kibu be a nagade dąį elama te kibu be bidi sese deliba usu nani bidi da, te mone 200 kinago abelao. Te we kibu be a naga dąį elama te kibu be bidi sese deliba usu nani we da, te mone 100 kinago abelao,” te po wai.
LEV 27:6 “Te wai ogwago polua delidu te kibu be a naga usu nani wai da, te mone 50 kinago hasegeliyu abelao. Te wegi te polua delidu te nogo a naga kibu beba usu nani wegi da te mone 30 kinago abelao,” wali.
LEV 27:7 “Te kibu be bidi sese sela 60 yali bidi, te 150 kina monego abelao. Te kibu be bidi sese sela 60 yali we da, te 100 kina monego hasegeliyu abelao,” te po wai dao.
LEV 27:8 “Te tiwai mone muabo po dąų wali bidigo, te aga digi aga ma abelabo mone ma aga abagi abelabo mone me meni baso da, teda te bidi prisba pao. Te prisgo te bidigo mone aiyaba dulama, te prisgo homugo aga muabo homu ebo mone usu nama mueibao,” wali.
LEV 27:9 “Te bidigo te kibu me deli ena Genuai Bidiba ofa yaibao po dąų wai baso, agai te tobage kibu dabe eno dagebolo ofa yao po wabo kibugo te ofa yao. Te dagego ofa ebo kibu tigidali te eno nai mu dao.
LEV 27:10 Tama te bidigo te wiegi yai kibu hasegelama, te dwai kibugo ofa igio. Agai te kibu dwai hasegelama, te wiegi yai kibu ofa igio. Tialima, agai hasegelibaso da, teda te kibu si dali si te ena, Genuai Bidigo dao.
LEV 27:11 Te bidi me agai enabolo te wiegi yai isąwai kibu me deli agai enabolo ofa yabo usu meni baso da, teda agai te prisba selasa pao,” wali.
LEV 27:12 “Prisgo te kibu wiegi yai yaliwe ma dwaliwe sulama, agai te mone dąį ilaibao. Tama te mone nogi tagalama, gasa mone dąį me iligio.
LEV 27:13 Te bidigo te kibu ma abelabo homu ebaso da, teda agai te mone meba dali te prisgo dąį ilali mone dali sesao. Te prisgo 5 kina dąį ilibaso da, teda agai te mone 6 kinago abelao. Ma, prisgo te mone 10 kina po obaso da, agai te mone 12 kina mobaso usu dao,” wai dao.
LEV 27:14 “Te bidi me deligo aga be ena Genuai Bidiba maiabo homu ebaso da, teda prisgo te be wiegi yai ma dwai yabowe naga suao, agai digi te bego mone dąį ilao, te prisgo dąį ilali mone me hasegeligio.
LEV 27:15 Tama ena Genuai Bidiba te be mani bidigo, te nosali aga be ma abelabo homu ebaso da, teda agai te bego mone usu nama mayu, te gasa me badu dali daganama mao. Te prisgo te bego mone 100 kina dąį ilai baso da, teda te bidigo 120 kina mao. Agai te mone prisba menama, te aga be ma sobaso te usu dao,” wali.
LEV 27:16 “Te bidi me deligo agai tǫ pedai enaba mobaso da, teda prisgo te nisu naga te nai wai bali te tǫde bulugowe naga te osola suao. Te augwaligo te sęgę bidi sese deli 20 kilogram bali bulabo tǫ usu yai baso da, teda te tǫgo mone 100 kina usu dao.
LEV 27:17 Tama agai enabolo te mani tǫ te nai dabe wei ma ponabo kibu be yagasobode te hasia wabo kibu bede mobaso da, teda te mone te tiwai elalumainao, te me hasegelamo dao.
LEV 27:18 Tialima, agai enabolo mabo tǫ te kibu be meba nosali wabo te genuai kibu be wabo sogo mobaso da, teda prisgo nisu naga kibu be elalubadi yai baso te nedao, te nai dabe wei ma ponabo kibu be nisu naga elalubo koneainogo tiao, tama agai te tǫgo mone aiyaba togaibao.
LEV 27:19 Te tǫ enabolo te mani bidi, te aga tǫ ma abelainogo ebaso da, teda agai te monego abelemainao. Te mone prisgo 100 kina dąį ilai baso da, teda te bidigo 120 kina mao. Agai te mone prisba menama, te aga tǫ ma somainogo emainao.
LEV 27:20 Te hasia bolo agai te tǫ ena Genuai Bidiba abelesąma, tama agai te tǫ gasa bidiba mawai baso da, teda nosali aga digi ma abelainogo ebaso, usu me egobe dao.
LEV 27:21 Tama te nai dabe wei ma ponobo kibu be pedalubo sogo, teda te tǫ abelali bidigo enabolo ma mao. Tama te tǫ ena tǫ sesemane sogo elalua paibao, te we bidi augwalide habu selaibao. Te eno pris augwaliba naga mawaibao,” te po walio.
LEV 27:22 “Te tǫ me deli bidigo abelai, te aga wąį nǫų dabego tǫ menio, agai te tǫ ena Genuai Bidiba mobaso da,
LEV 27:23 teda te nai dabe wei ma mabo te nisu naga kibu be elalubowe naga te prisgo neda suao. Tama agai mena tama kibu be elalubo usu nama te tǫde mone dąį ilao, te side naga dolo te bidigo te prisgo tǫba mone mao. Tama te mone da ena Genuai Bidigo nai dao.
LEV 27:24 Tialima, te nai dabe wei ma ponobo kibu bede, te tǫ sali bidigo te tǫ aga ayaba wei ponama dolo mao,” wali.
LEV 27:25 “Dagego te eno megi po wali tigidali naigo mone dolo neda suao,” te po wai.
LEV 27:26 “Te dagego ofa me deli enaba maiabo homu ebaso da, teda dagego te tigidali kibu me gasa nai dabego te podolali nai dabe me sigio, magi baso meni, te eno nai da po walio. Tagalao, te bulmakau ma sipsipgo te gomunai wai dabe, tigidali te eno dao.
LEV 27:27 Tialima, te kibugo gomunai wai dabe te kibu dabego eno gedude me wiegi yai meni baso da, teda duga ma abelagameo. Te prisgo 10 kina dąį ilibaso da, teda dagego agabolo 12 kina mao. Tama bidigo te kibu me abelesąbo homu ebaso da, teda prisgo gasa bidigo abelemainogo elama, te prisgo dąį ilali mone usu nama abelao.”
LEV 27:28 “Tialima, te bidi me deligo te nai me deli ena Genuai Bidi dolo dąį mu ilali naigo, te gasa sę me igio olama, habu selai baso da, teda agai te nai gasa bidigo abelemainogo me igio, te aga digi me te pris dabede ma abelamuo. Te tagalao, agai bidi me deli, ma we me deli, ma kibu me deli, ma te aga wąį nǫų dabede sali tǫ me deli yai baso da, teda sesemane sogo te ena Genuai Bidigo nai naga elalueibao.” Te po wali.
LEV 27:29 “Odao. Te agai bidi ma we enabolo sa muyu dąį ilai baso tagalao, teda agai ma abelainu ebo usu egobeo. Mu meni. Dagego te tiwai mani bidi ma we ela muyu naga yao.”
LEV 27:30 “Te gide pedalubo nai tigidali, te nai wit wai ma ni du wai da, dagego te nogo si badu dobolama, te me deli badu ena Genuai Bidiba mao. Te nogo si wali nai dagego tubo habu mu selaibao. Te enaduba deligo nai naga dao.
LEV 27:31 Te bidi me deligo te naigo meba abelainogo ebaso da, teda agai abelemainao. Te naide mone 5 kina yai baso da, teda agai 6 kinago hasegeliyu abelama, te pris dabeba mao.
LEV 27:32 Te nogo si bulmakau me sipsip dabe elalubaso, te me deli eno dao. Dagego te kibu dabe tigidali wasilama, te augwali nedelama, tama te nogo si wali tigidali enabolo mao.
LEV 27:33 Te nogo si wali kibu wiegi yai ma dwai baso me tagalao, dagego me hasegeligio. Tialima, dagego hasegelibaso da, teda te nogo si wali kibu dali te hasegelali dali saibao, te si dali si eno nai dao, te dagego ma abelamo dao,” wali.
LEV 27:34 Te po dabe dali te bomai po me Genuai Bidigo Mosesbolo te Sainai bulu dude mawai. Tama agai te po weyu, te Israel dabe augwaligo tigidali wali piyąo po wai dao.
NUM 1:1 Te si wabo kibu bede te Israel dabe te Isip bulu taga soali tudi badu nosali, te namba 2 poluago namba 1 dei, tede te Genuai Bidigo Moses dali te nai meni yai bulude te Godigo ugwa bede po miani.
NUM 1:2 Genuai Bidigo te e tama po wali, “Nage dali Aron dage sigo te Israel dabego nogi tigidali siąo,” po wali. “Dage sigo tigidali bidi dabe sese tama nedama, tama augwa wąį hani tali tali asęyu yao.
NUM 1:3 Te tigidali kibu be 20 yai bidi dabe dali, te kibu be 20 edelai bidi dabe dali, augwali te ami bidi nigabo usu yai bidi dabe dao, tama augwaligo nogi me asęyao.
NUM 1:4 Tama dage sigo deli deli bidi wąįde deli deli tobolu bidi sa muyu ela pao, te dage si tau sabo bidi dabe.
NUM 1:5 Tama dage si te sę ebo tau sabo bidi dabego nogi e tama dao. Te Ruben hanide da, nago te Sedeurgo ogwa Elisur sagameo.
NUM 1:6 Te Simeon hanide da, nago te Surisadaigo ogwa Selumiel sagameo.
NUM 1:7 Te Juda hanide da, nago te Aminadapgo ogwa Nason sagameo.
NUM 1:8 Te Isakar hanide da, nago Suargo ogwa Netanel sao.
NUM 1:9 Te Sebulun hanide da, nago Helongo ogwa Eliap sagameo.
NUM 1:10 Tama te Josepgo wąį hanide da, te Efraim hanide da, nago te Amihutgo ogwa Elisama sagameo. Tama te Manase hanide da, nago te Pedasurgo ogwa Gamaliel sagameo.
NUM 1:11 Te Benjamin hanide da, nago te Gideongo ogwa Abidan sagameo.
NUM 1:12 Te Dan hanide da, nago te Amisadaigo ogwa Ahieser sagameo.
NUM 1:13 Te Aser hanide da, nago te Okrango ogwa Pagiel sagameo.
NUM 1:14 Te Gat hanide da, nago te Duelgo ogwa Eliasap sagameo.
NUM 1:15 Te Naptali hanide da, nago te Enango ogwa Ahira sagameo,” te po wai.
NUM 1:16 Tama te Mosesgo te Israel we bidi hani tomode te tobolu bidi dabe sa muna silali. Augwali da, te augwa wąį hani polalubo bidi dabe dao.
NUM 1:18 Tama te Moses de Aron si me te 20 tobolu bidi dabe, augwaligo te tigidali we bidi sisinagasao po wali, tama te si wabo poluago hasia wabo dei, tede augwali polo sisinagasali. Tama te tobolu bidi dabego te tigidali we bidi dabego nogi, me augwa hani tali tali me nogi asęyu yali. Augwaligo te 20 kibu be yai bidi dabe dali, te 20 kibu be edelai bidi dabe me nedali.
NUM 1:19 Te Genuai Bidigo Mosesbolo wali po dolo tama wali pelama tama tiali. Te we bidi te nai meni yai bulu Sainaide bidibadi, Mosesgo augwaligo nogi selama, tama augwaligo nogi lista nigali.
NUM 1:20 Augwaligo te bidi dabe te kibu be nogo si sągą si eyu yai bidi dabe me nogi asęyu, me kibu be bidi sese edelai bidi dabego nogi me asęyu yali. Te bage te ami bidi dabe nigabo usu yai bidi dabe dao. Augwaligo te bidi dabego nogi selama, tama augwaligo augwa hani bidi we wai nanide nogi lista nigilama tagalali. Te Rubengo hanide gagalali, te Jekopgo gomunai ogwade gagalali. Te bidi dabego namba e tama dao. Te Rubengo hani bidi namba te 46,500 bidi tama bidali. Te Simeongo hani bidi namba te 59,300 bidi tama bidali. Te Gat hani bidi namba te 45,650 bidi tama bidali. Te Juda hani bidi namba te 74,600 bidi tama bidali. Te Isakar hani bidi namba te 54,400 bidi tama bidali. Te Sebulun hani bidi namba te 57,400 bidi tama bidali. Te Efraim hani bidi namba te 40,500 bidi tama bidali. Te Manase hani bidi namba te 32,200 bidi tama bidali. Te Benjamin hani bidi namba te 35,400 bidi tama bidali. Te Dan hani bidi namba te 62,700 bidi tama bidali. Te Aser hani bidi namba te 41,500 bidi tama bidali. Te Naptali hani bidi namba te 53,400 bidi tama bidali. Te tigidali te ami bidi nigabo usu yai bidi dabe namba te 603,550 bidi tama bidali.
NUM 1:47 Te augwaligo te bidi dabego nogi asębo sogo, augwaligo te Livai hani bidi dabego nogi te nogi listade asębeo.
NUM 1:48 Te magi baso meni, Genuai Bidigo Mosesbolo e tama po wali,
NUM 1:49 “Nago te bidi dabego nogi sabo sogo, nago te Livai hani dabego nogi asęnamuo,” po wali.
NUM 1:50 “Te menio. Nago te Livai dabebolo nago sę menama, tama augwali eno name ugwago nigali lotu be tonalubo sę eyu, me augwaligo eno be tomode munalubo nai tonalubo sę emainao, tama augwali tede sę eyu emainao. Tama dage gasaba bidigi pabo sogo augwaligo te name ugwago nigali lotu be dali, te be tomode munalubo nai sese dali tolasa pabo sę eyu emainao. Tama augwaligo augwa ugwa be eno ugwa be bagulama sę emainao.
NUM 1:51 Te dagego te pesage nigilama, tama gasaba gudasa painogo, te ugwa be hųgiasa painogo da, teda te Livai dabego naga te ugwa be hųginama, tama te bede mubo nai dabe dali augwaligo naga sela pomainao. Tama dagego gesi noma pesage nigibo sogo da, te Livai dabego naga te eno ugwa lotu be sę emainao. Tama gasa olo bidi dabe teba pąba me asobo si da, dagego augwali ela muao.
NUM 1:52 Te gasa Israel we bidi augwaligo augwa hani bagego plak ugwa dodolali madi augwaligo be tede naga sese peyu emainao, te augwa hani mu naga sisinibo madi.
NUM 1:53 Tiali goli, te Livai dabego te ugwa be te eno ugwa be sę yalubo bagulama naga sę emainao, te augwaligo eno be tonaluyu emainogo. Tiyu, bidi me deli te be pąba asai madi ena sębę ilama ebode, eno dage Israel dabe sese dolidali weyu,” Genuai Bidigo te po wai.
NUM 1:54 Tama te Mosesgo te Israel dabebolo Godigo te Moses agabolo wali po sese pusali, tama augwaligo wali pali.
NUM 2:1 Godigo Moses de Aron sibolo te tama po wali,
NUM 2:2 “Te Israel dabe augwaligo gesi noma pesage nigigi pabo sogo da, te deli deli bidi aga ugwa be te aga hani mugo plak ugwa walalubo pagede mu sę emainao. Augwaligo name ugwa be eno name ugwa lotu be bagulama sese pomainao. Tiali goli, augwaligo eno name ugwa be pąde mu sę emainu elamuo. Menio. Augwaligo be digibulu ganama sę emainao.”
NUM 2:3 “Te giliga asobo badu bidi hani sela te Juda wąį hanigo plak pąde sisinalubo madi dao. Augwaligo te augwa hani tobolu bidi dologode naga bidiyu ebo dao. Te Juda wąį hanigo tobolu bidi te Aminadapgo ogwa Nason dao. Te Juda hani bidi da, te 74,600 bidi dabe tama bidibao. Te Isakar hani bidi dabego tobolu bidi da, te Suargo ogwa Netanel dao. Te Isakar hani bidi te 54,400 bidi tama bidibao, tama augwali te Juda hani bogo badu bidaibao. Te Sebulun hani tobolu bidi da, te Helongo ogwa Eliap dao. Te Sebulun hani bidi te 57,400 bidi tama bidibao, tama augwali te Isakar hani pąde bidaibao. Te bidi hani sela tama namba te 186,400 bidi tama elalubao. Tama te gasaba pabo sogo te hani sela bolo polasa pomainao,” wali.
NUM 2:10 “Te Godigo ugwa lotu be saut badu te bidi hani sela te Ruben hanigo plak pagede sisinalubo dao. Augwali te augwa hanigo tobolu bidi dologode naga bidimainao. Te Ruben hanigo tobolu bidi te Sedeurgo ogwa Elisur dao. Te Ruben hanigo te 46,500 bidi tama elalubao. Te Simeon hanigo tobolu bidi da, te Surisadaigo ogwa Selumiel dao. Te Simeon hani bidi da, te 59,300 bidi tama bidibao. Tama augwali te Ruben hani bogo badu bidaibao. Te Gat hanigo tobolu bidi da, te Ruelgo ogwa Eliasap dao. Te Gat hani bidi da, te 45,650 bidi tama bidibao. Tama augwali te Simeon hani bogo badu bidaibao. Te bidi hani selago bidi dabe namba deliba sisinama, te 151,450 bidi tama bidali. Te gasaba pabo sogo da, te hani sela te polasa pabo hani wali tama pomainao.”
NUM 2:17 “Augwali te pesage nigilama bidali taga peyu, gasaba pabo sogo da, te Juda hani wąį dabe bolo polasa te gasa hani tudiba ilama, augwali bolo polasa pomainao, te gasa hani dabego te augwa dolo nogo badu bidibo bage augwa plak ugwa dali polasa yai digi, te meba hani nosali tama peyu emainao. Tama te Livai hani dabego te Godigo ugwa be, me te ugwa be tomode munalubo nai dabe, augwaligo selasa peyu, augwali te gasa hani dabe tomode mu elama tama peyu emainao. Te a naga olama, me badu nogo deli bidi hani polasa peyu, tama te Livai hani tomode elalu, me a naga olama, me badu nogo deli bidi hani nosali elama, tama pomainao.”
NUM 2:18 “Te giliga dega sabo badu te bidi hani sela te Efraim wąį hanigo plak pąde sisinalubo, tama te bage augwali te augwa hani tobolu bidi dologode naga bidimainao. Te Efraim hanigo tobolu bidi te Amihutgo ogwa Elisama dao. Te Efraim hani bidi te 40,500 bidi tama bidibao. Te Manase hanigo tobolu bidi te Pedasurgo ogwa Gamaliel dao. Te Manase hani bidi te 32,200 bidi dabe tama bidibao. Tama augwali te Efraim hani bogo badude bidaibao. Te Benjamin hanigo tobolu bidi da, te Gideongo ogwa Abidan dao. Te Benjamin hani bidi te 35,400 bidi dabe tama bidibao. Tama augwali te Manase hani bogo badude bidaibao. Te bidi hani selago nedali bidi namba deliba taluyu, te 108,100 bidi dabe tama elalubao. Tama te gasaba pabo sogo da, te bidi hani sela te Livai dabe wali nosali tama peyu yao.”
NUM 2:25 “Te not badu te bidi hani dabe te Dan hanigo plak pąba sisinama bidibo dao, te augwali te augwa tobolu bidi dologode bidalumainao. Te Dan hanigo tobolu bidi te Amisadaigo ogwa Ahieser dao. Te Dan hani bidi te 62,700 bidi dabe tama bidibao. Te Aser hanigo tobolu bidi te Okrango ogwa Pagiel dao. Tama te Aser hani bidi te 41,500 bidi dabe tama bidibao. Tama augwali te Dan hani bogo badude bidaibao. Te Naptali hanigo tobolu bidi te Enango ogwa Ahira dao. Tama te Naptali hani bidi te 53,400 bidi dabe tama bidibao. Tama augwali te Aser hani bogo badude bidaibao. Tama te bidi hani selago nedali bidi dabe te taluyu, te 157,600 bidi dabe tama elalubao. Tama te gasaba pabo sogo, te hani sela augwali te nosali mu elama peyu emainao.” Godigo te po wai dao.
NUM 2:32 Te tigidali Israel dabe namba sese deliba taluyu, te 603,550 bidi dabe tama elaluali.
NUM 2:33 Tiali goli, augwaligo te Genuai Bidigo po wali peyu, augwaligo te Livai hani te gasa Israel dabe dali me nedebeo. Te Livai hani bage te tedali dao.
NUM 2:34 Te tama tialima, te Israel dabe augwaligo te Genuai Bidigo te Mosesbolo augwaligo yao wali sę dabe naga wali peyu yali. Tama deli deli bidigo aga ugwa be te augwa plak pąde sę eyu ela pali. Tama augwali gasaba pabo sogo, augwaligo augwa hani dabe mu wali naga peyu yali.
NUM 3:1 Te Genuai Bidigo te Moses dali te bulu du Sainaide po wali sogo, te Aron de Moses sigo wai puluba e tama elaluali.
NUM 3:2 Arongo te ogwa me si me si tama elaluali. Agai te gomunai ogwa te Nadap dao, te tudi badu Abihu, te tudi badu te Eleasar, te tudi badu te Itamar dao.
NUM 3:3 Mosesgo augwaligo tobolude wel gelama, tama augwali te pris bidi naga nigilali.
NUM 3:4 Tiali goli, augwali te nai meni yai bulu Sainaide bidiyu, te Nadap de Abihu augwali sigo te wiegi yai denami ebo hano holobo nai selama, tama Genuai Bidibolo te ofa tiwai mani. Te Genuai Bidi agai mao po wasiąbadi, tama tibaso Genuai Bidigo augwali si elama isilali. Tama augwali sigo wai bǫų dabe meni yai dao. Tialima, te Eleasar de Itamar sigo naga te pris sę yai dao, te Aron augwa aya bidibadi.
NUM 3:5 Te Genuai Bidigo Mosesbolo e tama po walali,
NUM 3:6 “Te Livai dabego hani odasa aselama, tama augwali te pris Arongo sę bidi tiwai sa muao.
NUM 3:7 Augwali eno name ugwa bede sę eyu, me pris dabe tau sabo sę eyu, me te we bidi tau sabo sę eyu emainao.
NUM 3:8 Augwaligo eno name ugwa lotu bede doado bage dabe bugagia tonaluyu emainao. Te eno Israel dabebolo emainu wali tiwai.
NUM 3:9 Te Livai dabe augwaligo te sę deli naga dao. Augwali te Aron dali aga ogwa dabego sę tigidali sogo emainao.
NUM 3:10 Nago te Aron me aga ogwa dabe augwaligo naga te pris sę emainogo sa muao. Tiali te gasa bidi dabego me te pris sę yainogo ebaso da, teda dagego aga ela muiąo,” wali.
NUM 3:11 Tama Genuai Bidigo Moses e tama tiwai po walali,
NUM 3:12 “Megi eno te Livai hani te ena hani mu tiwai sa megi mubao. Te eno te Isip dabego gomunai ogwa dabe ela muani sogo, eno te dagego gomunai wai dabe me, te bulmakau sipsip meme dabego gomunai wai dabe me, eno sa muai dao. Tama augwali sese ena mu dao po wai dao. Tiali goli, megi da, eno te gomunai ogomani dabe me sogobeo. Menio. Te Livai dabego augwali hasegelali, tama te Livai dabe te ena mu dao. Ena Genuai Bidi, eno po polo wali.”
NUM 3:14 Te nai meni yai bulu Sainaide Godigo Mosesbolo te po wai,
NUM 3:15 “Te Livai dabe nedama, tama augwa we wai tali tali augwa hanide lista nigao,” po wali. “Tama nago te augwaligo ogwa wai dabe te polua deli polo yai waide gagalasa, tama tigidali ogwa me bidi dabego nogi me sao,” te po wali.
NUM 3:16 Tama te Mosesgo te Genuai Bidigo wali po selama, tama tiwai yali.
NUM 3:17 Te Livaigo ogwa sela elaluali. Te Gerson, me Kohat, me Merari, tama dao.
NUM 3:18 Te Gersongo ogomani nogi te e tama dao, te Lipni me Simei dao.
NUM 3:19 Te Kohatgo ogomani nogi e tama dao, te Amram, me Ishar, me Hebron, me Usiel, tama dao.
NUM 3:20 Te Merarigo ogomani nogi da e tama dao, te Mali me Musi si dao. Te Livai dabego hani wąį nogi te e tobage nogi elaluali.
NUM 3:21 Gersongo hanigo bidi hani te si digi tama elaluali, te Lipni me Simei hani.
NUM 3:22 Augwaligo te bidi dabe dali te ogwa dabe te polua deli polo yai wai dabede gagalasa nedama, tama te namba te 7,500 tama elaluali.
NUM 3:23 Te hani wąįgo be dabe te name ugwa lotu be tudi badude te giliga pabo badu elalumainao, te Godigo be elalubo tǫ sesegede.
NUM 3:24 Tama Eliasap, te Laelgo ogwa, te hanigo tobolu bidi dao.
NUM 3:25 Augwaligo te Godigo ugwa be tonalubo sę elaluyu, me te name be ugwadu halubo nai dabe tonalubo sę elaluali, me te sunumi palibo name ugwa me tonaluyu,
NUM 3:26 me te alta sai, me te ugwa be bagulubo name ugwa dabe tonalubo sę eyu, me te name ugwa obo sunumi palibo name ugwa tonaluyu yali. Augwaligo te nai dabe tonalubo sę naga elaluali.
NUM 3:27 Te Kohat hani wai dabe te me si me si elaluali. Augwali te Amram, me Ishar, me Hebron, me Usiel tama.
NUM 3:28 Te augwaligo bidi dabe dali te ogwa dabe te polua deli polo yai wai dabede gagalasa, ugwaba iguluyu nedama, te 8,300 tama elaluali.
NUM 3:29 Te hani augwali te name ugwa be te saut badu augwaligo name ugwa be nani elama bidaluyu emainao.
NUM 3:30 Tama augwaligo tobolu bidi te Usielgo ogwa Elisafan dao.
NUM 3:31 Augwaligo Godigo Dąų Wali Bomai Po Munalubo Halobage me, tebol sai me, lam tolalubo nai me, alta si me, genuai pou me, plet dabe te pris bidi dabego te habu selai te habu badu me, te habu selai te be habu palibo name ugwa me, tama tonalubo sę ebo dao.
NUM 3:32 Te pris bidi Arongo ogwa Eleasar te tigidali Livai dabego tobolu bidi dao. Agai te bidi dabe te Godigo be tomode sę ebo bidi dabe tonalubo dao.
NUM 3:33 Te Merari hanigo aga hani si elaluali. Te augwali te Mali dabe me Musi dabe, tama dao.
NUM 3:34 Augwaligo bidi dabe dali te wai ogwa dabe te polua deli polo yai ma ugwaba igulali ogwa dabe me te namba te 6,200 tama usu nani.
NUM 3:35 Te Abihailgo ogwa Suriel te augwaligo tobolu bidi dao. Tiali tama, te hani augwaligo name ugwa be nani te Godigo ugwa be te not badu augwaligo be nani emainao.
NUM 3:36 Augwaligo te ugwa bego dili tonalubo sę elaluali. Augwaligo te be ni pos, me te pos ni tulubo halobage tonalubo sę eyu, me te pos ni tuabo te bobobage ni dabe me, te meba te be dili tolalubo doado bage dabe me tonalubo sę ebo dao. Tama augwaligo te nai dabe naga tonalubo sę emainao.
NUM 3:37 Te me augwaligo te ugwa be mesalo bagulubo obo pos ni dabe, me te pos ni tulubo te halobage dabe me tonalubo sę emainao. Me te brasgo nigai bobobage nil dabe, me te baklain bono me tonalubo sę emainao, te name ugwa be bomo elama kegaluabo.
NUM 3:38 Moses me Aron si augwa wai puluba dabe dali augwaligo be Godigo name ugwa be gedu dolo mu dodolama muani, te giliga asobo badu. Te hani augwali deli naga te habu selalubo te be habuba pelama, tama augwaligo te haniani sę eyu, me te we bidi tau sabo ofa nai mayu yali. Ma, te sę gasa hani mebago ebaso da, teda Israel dabe augwaligo aga ela isilimainao.
NUM 3:39 Te Livai hani bidigo namba te 22,000 bidi dabe tama usu nama elaluali. Augwaligo tigidali bidi dabe me, tigidali ogwa dabe me, te tigidali ogwa wai dabe te polua deli polo yai gagalasa, ugwaba igulali te genuai ogwa bidiba usu nani, te me augwaligo nedali.
NUM 3:40 Tama Genuai Bidigo Mosesbolo walali, “Te dage Israel dabego gomunai ogwa dabe te tigidali te eno naga dao. Tama tibaso, nago te tigidali gomunai ogwa dabe nogi sao, augwali polua deli polo yai dabede gagalasa, tama te genuai ogwa bidiba usu nama pao.
NUM 3:41 Tiali goli, eno te bage hasegelama, tama te bidi dabe bidimainu sula tagaliyu, tama eno te Livai dabe naga saibao. Te Genuai Bidi ena hani tiwai mu yaibao. Te me ma, te Livai dabego gomunai kau kibu omai dabe eno siyu, te we bidigo gomunai kau kibu omai dabe tagalaibao. Ena da, ena Genuai Bidi dao,” wali.
NUM 3:42 Tama Mosesgo Genuai Bidigo po wali peyu, te te Israel dabede tigidali gomunai bidi dabe dali, te ogomani dali,
NUM 3:43 te polua deli edelai ogwa dabe me nedali, te 22,273 tama elaluali.
NUM 3:44 Tama Genuai Bidigo Mosesbolo ma weyu e tama po wali,
NUM 3:45 “Megi da, nago te Livai dabe tigidali enabolo mao, te Israel dabego gomunai bidi dabe ogomani hasegeleyu, tama te Livai dabe te eno hani mu bidaibao. Tama augwaligo kau kibu ena mayu, tama augwaligo te Israel dabego gomunai kau kibu hasegelaibao.
NUM 3:46 Te Israel dabego gomunai bidi dabego te Livai dabe te 273 nambago augwali edelali, tama tibaso dagego te bidi dabe ma abela sao, te 273 bidi dabe.
NUM 3:47 Nago te silva mone ge a naga, a naga, tama sesa pao, te augwaligo deli deli bidi dabede, te augwali ma abelama siyu yao.
NUM 3:48 Tama te mone te Araon aga ogomani dali augwalibolo mao,” te po wai.
NUM 3:49 Tialima, Mosesgo Genuai Bidigo te sę yao wali po wali peyu, te deli deli ogwa dabede te mone siyu, te 13,650 kina selama, tama te mone te Aron me aga ogwa dabe augwalibolo te mone mani.
NUM 4:1 Genuai Bidigo Moses de Aron sibolo te po wai,
NUM 4:2 “Te Livai genuai bidi hani bugulama, tama te Kohat hani bidi dabego nogi sao.
NUM 4:3 Dagego te e tobage Kohat hani bidi dabego nogi sao, te augwaligo kibu be te 30 dąį gagalasa, tama te kibu be 50 te dąįba usu nagasobo bage, te augwaligo nogi sao. Te gesi ogwa bidi dali, te monu dabe dali si, te tagalao. Te nogi sali bidi augwali te eno name ugwa bede sę yabo usu yai bidi dabe dao.
NUM 4:4 Augwaligo sę te Tedali Gasagi Yai Mu Be Habu tomode elalubo doado bage dabe tonalubo sę ebo dao,” wali.
NUM 4:5 Tama Genuai Bidigo te po Mosesbolo mani. Agai te po wali, “Te Israel dabego te bidibo pesage taga peyu, gasaba painogo da, teda Aron aga ogwa dabe dali augwali eno ugwa be tomoba tula pelama, tama augwaligo te eno Dąų Wali Bomai Po kontrak elalubo halobage pąde walobo moni ugwa name selama, tama te halobage halumainao.
NUM 4:6 Tama me augwaligo te wiegi yai tamu węde bidibo sikau sabeago belama, tama me augwaligo wiegi yai sisi name ugwa belama, te halobage haluao. Te tigidali tama mesegeliyu, tama te ni dage si te gol ring dedage si elalubo tedu palama, tolabo nigilao.”
NUM 4:7 “Tama augwaligo enabolo mani bret mubo tebol sai te sisi dagalu yai name ugwago halumainao, te ena Genuai Bidibolo mani nai. Tama augwaligo te pou me, plet me, te wiegi yai denami holobo hano nai dabe augwaligo somainao, me te gasa ofa ebo nai me, tama te nai dabe sese te sisi name ugwa daide muao. Tama tigidali sogo bret name te name ugwade munalumainao.
NUM 4:8 Tama augwaligo te nai dabe sese te bedeba name ugwa me deligo belemainao. Tama tamu węde sikau sabea wiegi yaigo te bedeba ugwa name belemainao, tama te tebol tolabo ni dage si te ring tomoba mumainao.”
NUM 4:9 “Tama augwaligo te lam dabe tolalubo nai me, te lam dabe me, te lam wik me, te sisi dulu bulubo dwasianu plet me, te oliv wel bubo botol, te sisi dagalu yai name ugwago belao.
NUM 4:10 Tama augwaligo te tamu węde bidibo sikau sabea wiegi yai me selama, tego tomagelama, tama tolabo naiba me muao.”
NUM 4:11 “Nosali augwaligo gol alta sisi dagalu yai name ugwago tomagelao, tama te ugwa te tamu węde sikau sabea wiegi yaigo tomagelao, tama te alta tolabo te ring dedagede te ni dage muao, te alta tolabo.”
NUM 4:12 “Tama augwaligo te dis pou dabe te pris bidi dabe te Tedali Gasagi Yai Be Habu badu elalubo te pou doado bage dabe selama, tama sisi dagalu yai ugwago belama, tama tamu węde sikau sabea wiegi yaigo belama, tama tolabo nai tomoba muao.”
NUM 4:13 “Tama augwaligo te brasgo nigai alta saide munalubo te sisi dulu dabe sela sąnama, tama te alta te bedeba name ugwa belao.
NUM 4:14 Tama augwaligo te pris bidi dabego te alta saide sę eyu sabilibo nai dabe sese sao. Te e tama nai dabe, te pou dabe te isi mubo dabe me, te mi enebo yaga dabe me, dwasianu savol dabe me, te dwasianu ofa ebo nai kaneme sabo dwasianu plet dabe sao. Tama augwaligo te nai dabe te tamu węde bidibo sikau sabeago belama, tama te alta saiba munama, tama te alta tolabo ni dage si tolabo muao.”
NUM 4:15 “Te Kohat hanigo te nai dabe tolobo sę elalubao, te eno name ugwa be tomode elalubo nai dabe. Tiali goli, augwaligo te nai dabe nogo toumainu elamo. Ma, augwaligo nogo tuali da, teda eno augwali ela isilaibao. Tialima, Aron aga ogomani dali augwaligo te ugwa be tomode mubo doado bage bugagia tomagelama, tama te gasaba gudasa peyu yao. Tama nosali te Kohat dabego sagaselama, tolasa peyu emainao. Te da, te Kohat dabego sę dao. Te sę augwaligo tigidali sogo gasaba gudasa painogo, te sę naga eyu emainao,” wali.
NUM 4:16 “Te pris bidi Arongo ogwa Eleasargo te name ugwa be, me lam wel, me te pris bidi sa mubo te wel me, te wiegi yai denami ebo pauda me, te wit ofa nai dabe, tama agai tonalumainao. Me agai eno bede munalubo nai dabe sese me agai tonalumainao,” te po wai.
NUM 4:17 Tama Genuai Bidigo Moses de Aron sibolo e tama tiwai po wali,
NUM 4:18 “Te Kohat hani augwali eno doado bage munaluboba pąba asobo si da, dagego augwali bugagia tonaluao. Tiyu, augwaligo dwasianu sę me geda muai digi, eno augwali ela muidalio. Tama tialima, Aron aga ogwa dabe dali augwali te be tomoba bolo pelama, tama te Kohat hani dabe deli deligo sę bolo yao, tama augwalibolo mena nai dabe augwaligo tolabo po walao.
NUM 4:20 Tiali goli, te Kohat dabe augwali te tomoba odolali pelama, te pris dabego eno doado bage dabe dodolodubadi sugi pali da, teda eno augwali elama isilaibao,” te po wai.
NUM 4:21 Genuai Bidigo Mosesbolo wali,
NUM 4:22 “Te Gerson dabe augwa hani dabe nogi sao,” po wali, “te Livai hani dabego deli kaneme bugwai dabe.
NUM 4:23 Dagego te e tobage Gerson hani bidi dabego nogi sao, te augwaligo kibu be te 30 dąį gagalasa, tama te kibu be 50 teba usu nagasobo bage, te augwaligo nogi sao. Te gesi bidi dali, monu dabe dali si te tagalao. Tama te nogi sai bidi dabe te augwali eno name ugwa be tomode sę yabo usu yai bidi dabe dao.”
NUM 4:24 “Augwaligo e tama nai dabe tolabo sę elalubao.
NUM 4:25 Te da te name ugwa bego name ugwa dabe me, te namba wan walobo haluali genuai ugwa, me namba 2 walobo haluali genuai name ugwa me, te me augwaligo wiegi yai tamu węde sikau sabeago haluali te me, me te sunumi palibo te genuai name ugwa me,
NUM 4:26 me te obo nigabo name ugwa me, me te name ugwa be bagulali baklain bono me, alta me, obo ebo genuai name ugwa, te sunumi paibo name ugwa me, te ugwa be dąų walobo te dwasianu nai dabe me, te obo ebo nai dabe me, augwaligo somainao. Te Gerson dabego te doado bage dabe dodolama, tolobo sę tigidali elalubao.
NUM 4:27 Aron aga ogwa dabe dali augwaligo te Gerson dabego ebo sę me tonaluyu, me te Gerson dabego tolabo doado bage dabe ola mayu yao.
NUM 4:28 Te Gerson hani bage augwaligo te sę te ugwa bede emainao. Tama te pris Arongo ogwa Itamargo augwaligo te sę tonalumainao,” wali.
NUM 4:29 Genuai Bidigo Mosesbolo “Te Livai hanide Merari hanigo deli kaneme dabe me nogi sao,” po wali.
NUM 4:30 “Tama dagego te e tobage Merari hani bidi dabego nogi sao, te augwaligo kibu be te 30 dąį gagalasa, tama te kibu be 50 teba usu nagasobo bage, te augwaligo nogi sao. Te gesi bidi dali monu dabe dali si te tagalao. Te nogi sali bidi augwali te eno ugwa lotu be tomode sę yabo usu yai bidi dabe dao.
NUM 4:31 Augwaligo te ugwa be pos ni tolabo sę elalubao, me te be paibo ni name dabe me, me ugwa be te pos ni tulubo halobage dabe me,
NUM 4:32 me te ugwa be mesalo bagualubo pos ni dabe, me te pos ni dąų walobo halobage dabe me, te bobobage brasgo nigai nil dabe, te obo dąų walobo te nil dabe, me baklain te obo ni dąų walobo me, te meba obo dąų walobo nai dabe me, tama te pris dabego deli deli bidi dabe augwaligo tolabo nai dabe ola mayu yao.
NUM 4:33 Te Merari hani augwaligo te ugwa be augwaligo te sę emainao. Tama pris Arongo ogwa Itamargo augwaligo te sę tonalumainao,” wali.
NUM 4:34 Moses me Aron me te we bidigo tobolu bidi dabe augwaligo Genuai Bidigo po wali peyu, tama augwaligo te Livai hani selade bidi dabego nogi sali. Augwali te Kohat dabe, me Gerson dabe, me Merari dabe, tama dao. Tama augwaligo augwa hani me augwa deli kaneme bagego nogi selama, lista nigali. Augwaligo te bidi dabe te kibu be 30 elama 50 kibu be tama yai bidi dabego nogi augwaligo sali, te augwali te Godigo ugwa bede sę yabo usu yai bidi dabe. Augwaligo namba e tama tiwai dao, te Kohat dabego te 2,750 bidi elaluali, me te Gerson dabe te 2,630 bidi elaluali, me te Merari dabe te 3,200 bidi tama elaluali. Te bidi dabe sesego namba te 8,580 tama dao.
NUM 4:49 Augwaligo te Genuai Bidigo Mosesbolo te wali yali gilama, augwaligo tigidali bidigo nogi sali. Tama Genuai Bidigo deli deli Livai dabego sę Mosesbolo magi ilao po wali. Augwaligo te Godigo ugwa bede sę eyu, me augwaligo te ugwa bede nai dabe tolobo sę yao, Mosesgo te po polo odama, te Godigo wali po wali pali, te agabolo wali yali gilama.
NUM 5:1 Genuai Bidigo Mosesbolo e tama tiwai po walali,
NUM 5:2 “Te Israel dabebolo te po pusao, te oiyabe yai bidi dabe me, te kenide keni wę bole ebo bidi dabe buluba tagala palao, me tigide wę me te kaneme augwaligo tigide pedalubaso, me te bidi isaide nogo tuali bidi dabe me, te tobage we bidi eno gedude wiegi yai menio. Tama augwali te dwai augwa tigide elaludubadi, te bidibo pesage nigilama, bidibo pesage taga pelama, digibulu gana pomainu yao.
NUM 5:3 Ena te eno we bidi bidalubo pesagede ena me tede bidibo dao, tama tialima, nago te eno gedude dolo isąwai we me bidi me te dįą siyu, te buluba tagala palao. Tiyu, augwaligo te bidi bidibo pesage eno gedude meda ilabuo,” wali.
NUM 5:4 Tama te Israel dabego Genuai Bidigo Mosesbolo wali po wali dolo tama yali, tama augwaligo te tobage we bidi dįą selama, te bidi dabe bidalubo pesagede buluba tagala palali.
NUM 5:5 Tama Genuai Bidigo Mosesbolo
NUM 5:6 e tama tiwai po te Israel dabebolo pusa mao po wali. Agai e tama po wali, “Te bidi me we deligo ena tudiba sąnama, tama agai gasa bidi me we dali dwai kolesaga ebaso da,
NUM 5:7 teda agai aga yali dwai kolesaga wei ponoyu abelemainao, te sęgę sela sąmainu yao. E tama tiwai yao. Agai te aga abagigo te 5 kina wi sobaso da, teda agai te 5 kina ma wei ponoyu, tama me wan kina me manao.
NUM 5:8 Tiali goli, te mone sabo bidi isai baso me, ma aga ama dabe me meni baso, ma aga ogwa meni baso da, teda te mone mabo bidigo ena Genuai Bidibolo momainao, tama te pris bidi dabego somainao. Tama me agai sipsip kibu omaigo ofa nai menama, aga dwai sęgę sela sąmainao.
NUM 5:9 Tama me te Israel dabego wiegi yai nai seselama, enaba sesebaso da, teda te pris dabego augwaligo nogode saibao.
NUM 5:10 Te tigidali ofa mabo nai dabe te pris bidi me deliba mobaso da, teda te pris bidi aga somainao,” wali.
NUM 5:11 Te Genuai Bidigo Mosesbolo te po te Israel dabebolo mao po wali, Genuai Bidigo e tama po wali, “Te bidi me aga homugo agai we te gasa bidi dali piali homu ebaso, tama te we eno gedude dwai meda yai tiwai pedalubaso me, tama te bidigo konesąma ebaso, te mu po yaliwe, ma tibo po yaliwe konesąma elama, me ma te wego pusisąma eyu, tama me gasa wego me bidigo me susą ebaso, tiali goli bidigo aga we dali dwai homu ebaso da,
NUM 5:15 teda te bidigo aga we te pris bidi pageba odasa pao. Tama me, te bidigo te 1 kilogram plaua te rais baligo nigai, te ofa nai tiwai sela pao. Tiali goli, agai oliv wel te ofa naiba gelamuo, me agai te wiegi yai denami holobo pauda me teba me gelamuo, magi baso meni, te ofa da te bidigo homugo aga wego dwai kolesaga yaliwe homu ebo ofa dao. Teda te agai ofa yali te augwaligo konemainogo, te wego te dwai kolesaga yaliwe ma meniwe, augwaligo konemainogo,” wali.
NUM 5:16 “Teda te pris bidigo te we eno geduba dodolagasao, ena Genuai Bidi, te alta sai pagede.
NUM 5:17 Tama te pris bidigo te habu selai wę te tǫgo nigai seneba gelao, tama aga eno ugwa be suiyamede elalubo tǫ hogomu meba selama, tama te wę dali taluao, tama te wę ha yaibao.
NUM 5:18 Tama te we eno gedude me dolalubadi da, te pris bidigo te wego tobolu haluali ugwa sela sąnama tobolu nisi olo tagalao, tama tobolu nisi olo elalumainogo yao. Tama pris bidigo te bidi aga homugo aga we dwai sę elama, gasa bidi dali piali da homu ebo bidigo ofa yali plaua selama, tama te plaua te we nogoba tolomainao. Tama pris aga digi te ha wę tǫ sene tolalumainao. Te węgo te dwai kolesaga yali we bidi dabe dolobo dao.
NUM 5:19 Tama pris bidigo eno gedude bomai po deli me weyu, te pris bidigo te webolo e tama po walao, ‘Te nago dwai kolesaga bidi me dali yai meni wida, teda te dwai sę yali we bidi dabe dolobo węgo nage dologobeo.
NUM 5:20 Tiali goli, nago bidi me deli dali dwai kolesaga yai wida, teda nage Godigo gedude meda yali, tama nage dolaibao.’ Te pris bidigo te po te webolo wao.
NUM 5:21 Tama pris bidigo po geninama weyu, e tama po wao, ‘Tialima, nago te sę mu tama yai da wida, te Genuai Bidigo nage dwai olo nai tiwai ilaibao, te we bidigo gedude, tama agai nago tabi bǫ delama, tama nago nai dagana somainu yaibao.
NUM 5:22 Tama te dwai sę yali we bidi dolobo wę nago tabi tomoba pelama, tama nago tabi bǫ delama, naga nai boga somainu ilaibao,’ pris bidigo te po waibao. Tama te wego e tama po wei ponomainao, ‘Te dolo dao. Genuai Bidigo te tama timainao.’ Wego te po waibao,” wali.
NUM 5:23 “Tama pris bidigo te po te pepade me asęnama, tama te asęnama pen wę te ha ebo wę seneba tulao.
NUM 5:24 Nosali te pris bidigo te wę te webolo menama, te wego te wę tulama, ha emainao, te agai haligade, me aga tigi dene dwai mu yaibao.
NUM 5:25 Tiali goli, hasia bolo te pris bidigo te ofa yali plaua te wego nogode ma siyu bolo yao, tama ugwaba tulama, tama hogolama, iba eda eyu bolo yao, ena Genuai Bidi gedude. Tama nosali agai te alta saiba sela pao.
NUM 5:26 Tama agai te dwasianu plaua selama, tama alta saide ulubo ofa tiwai uluyu, te ofa sa muao. Tama nosali agai te ha ebo wę te wego tumainu yao.
NUM 5:27 Tialima, te wego bidi me deli dali dwai sę yai baso da, teda te wę Genuai Bidigo gedude dwai dao, tama aga tigi dene genuai mu ilama, tama agai tabi bǫ delama, tama aga nai boga saibao. Tama aga hanigo gasa bidi dabe dali dwai po wainogo da, augwaligo e tama po waibao, ‘Godigo te we dolali yali gilama, nage me dolomainao,’ te po waibao.
NUM 5:28 Tiali goli, te wego dwai kolesaga isąwai da, teda aga eno gedude wiegi yai dao, tama te węgo aga me dologobeo. Menio. Te nosali aga tabi elama, wai sabo usu yaibao,” wali.
NUM 5:29 “Ma, te wego gasa bidiba me dwai kolesaga yali da, tama bidigo homugo aga wego dwai kolesaga yali dao homu elama, aga we dali dwai homu ebaso da, teda dagego te bomai po wali piąo.
NUM 5:30 Tama me dagego bidigo aga wego bidi me deli dali dwai kolesaga yali dao olama, olo dali dwai homu ebaso me wali piąo. Tiali, bidigo te tama homu eyu da, teda agai te we odasa ena Genuai Bidi eno geduba dolalugi pao, te alta sai pąba. Tama pris bidigo te tigidali kolesaga emainao.
NUM 5:31 Tama te we aga bidigo po sęgę page meni yaibao. Tiali goli, te we aga sęgę elaluali da, teda aga te yali dwai kolesagago sęgę tolomainao,” Genuai Bidigo Mosesbolo te po ola mani.
NUM 6:1 Te Genuai Bidigo te po te Mosesbolo te po te Israel dabebolo mao po wali.
NUM 6:2 Genuai Bidigo e tama po wali, “Tialima, me sogo te wego me bidigo me aga digi aga enaba mabo homu ebaso da, te aga bomai po dąų walama ebaso da,
NUM 6:3 teda agai te wain me bomai wę me tulamuo. Me agai te wain du wę me tulamuo, me te wain du tau yai me tulamuo, me te augwaligo te wain ni du te giligade olai, te ni du agai tulamuo. Te tigidali nai habu mu dao.
NUM 6:4 Te bidi aga tigidali sogo aga digi enaba mayu da, teda te aga bodolu mani sogo tomode agai te ni wain du wali me, o te ni du me munu me ma tulamuo, te tigidali te ni wain dugo nai dabe me tulamuo,” wali.
NUM 6:5 “Tigidali sogo bidi aga te wali po wali pidubadi, agai aga digi tedali gasagi yai nigilama, tama enaba mayu da, agai aga tobolu nisi me penane nisi me, me togolamuo. Te aga ena mu dao, tedali dao, tama te bodolu mani sogo tama agai aga tobolu nisi tagaliyu, me penane nisi bobobage holomainu sula tagalao.
NUM 6:6 Te bobobage tobolu nisigo aga te enaba mawai bidi tiwai magi ilaibao. Tama tibaso, tigidali sogo agai aga digi enaba mobao. Tama aga te we me bidi isai tigi munalubo pąba pelamuo. Te aga aya, ma aga ida, ma aga ama me abe isai ebaso me tagalao. Tiyu, aga eno gedude meda idalio.
NUM 6:8 Tigidali sogo te bidi aga digi aga enaba mawaibao wali te po wali peyu bidali da, te aga ena mu dao, te ena Genuai Bidigo mu dao,” wali.
NUM 6:9 “Ma, deli sogo tama, bidi me deli aga pąde mu isali da, teda agai te tobolu nisi eno dao wali meda ilaibao. Tama tialima, aga te a naga olama, me badu nogo si sogo tama bolo tonaluama, tama agai tobolu nisi togomainao, tama te sogo aga eno gedude wiegi yai ma pedalaibao.
NUM 6:10 Tama te 8 wabo sogo da, agai ba hi si sela asiyu, eno ugwa be maboba asao, tama te ba hi si te pris bidibolo momainao.
NUM 6:11 Tama pris bidi agai selama, tama me te sęgę sela sąbo ofa mayu, me te isigo sese ula silibo ofa mayu emainao. Te bidi te isai bidi tigi pąde bidai bidi te eno gedude meda yali da, tiali goli te ofa sigo eno gedude wiegi yai ma yaibao. Tama te sogo naga agai tobolu nisi te ena mu ma magi ilao.
NUM 6:12 Tama agai aga digi enabolo mawai wali bubuga dabe nedebo ma gagalao. Agai hasia aga digi aga enaba mani bubuga bugai ma kone elamuo. Magi baso meni, te tobolu nisi agai enaba magi ilali da, te meda elama, tama enaba dąų walali bodolu togalio. Teda te meda mu yalio. Tama tibaso, agai wai sipsip kibu omai te kibu be deli yai enaba sela aselama ofa yao, te agai te yali sęgę sela sąyabo,” te po wai.
NUM 6:13 “Te bidigo aga bomai po wali usu nama da, teda aga eno name ugwa be sunumi pąba doligi pao.
NUM 6:14 Tama agai ena Genuai Bidiba ofa sela tama yao. Agai te kibu be deli yai sipsip kibu wai omai selama, tama isigo sese dela silibo ofa yao. Tama me kibu be deli yai sipsip kibu so sela aselama, tama te sęgę sela sąbo ofa yao. Tama me sipsip omai deligo me te ena dali deli homu ilabo ofa yao. Agai te wiegi yai sipsip kibu dabe naga tama sao.
NUM 6:15 Tama agai te bret te bo dabo nai yis meni yai te basket wa deli pągąnama, tama ofa nai tiwai sesao. Te basket wade te bret nai genuai mu dabe te augwaligo wiegi yai plauago nigilama, augwaligo oliv wel dali begelama nigai sao. Tama te bisket te oliv welgo pilai dabe me sao. Tama agai te ofa nai ulubo kolesaga wali peyu, te wit ulubo ofa wali peyu, me wain te bretde gelama ulubo ofa wali pelama, tama yao.”
NUM 6:16 “Tama te pris bidigo te nai dabe sese enaba mayu, me te sęgę sela sąbo ofa mayu yao, me te isigo sese dela silibo ofa uluyu, tama yao.
NUM 6:17 Tama nosali agai te omai sipsip kibu elama, tama te bret basket wa dali ofa yao. Teda te ena Genuai Bidi dali homu deli ma ebo ofa tiwai tama yao. Tama me ma agai te wit me wain sigo ofa me tama yao,” wali.
NUM 6:18 “Tama bidigo aga dąų wali po usu na silama da, aga eno ugwa be sunumi pąba bidigi pelama, tama aga tobolu nisi togolama, tama te tobolu nisi te homu deliba ma yabo te ofa nai ulubo teba siaba mugi pao, te siago te nisi domainao.
NUM 6:19 Tama nosali te prisgo te ofa yali sipsip kibu omaigo na mi selama, tama senede ulao. Tama te nai mi dabo si da, te pris bidigo te hasa mi dwasianu selama, tama aga te basket waba pelama, te yis meni yai bret deli me siyu, me bisket deli siyu, tama elama, te bidigo nogoba mao.
NUM 6:20 Tama te pris bidigo te nai dabe te bidigo nogode ma selama, tama eno gedude hogolama, ugwa eda elama yao. Te ofa te eno mu elama, tama te pris bidigo somainao. Tama te omai sipsip kibugo bau me sągą te pris bidi dabego dao. Tama te pris bidigo te sę ela silibo si da, te bidigo te wain ma tumainao.
NUM 6:21 Te we bidi augwa digi augwali enaba mawaiba wali, te we bidi dabego te bomai po wali peyu, omainao. Tiali goli, me deligo aga gasa nai me enabolo mawainu po dąų wali da, teda agai aga te po wali peyu, tama timainao.” Genuai Bidigo te po wai.
NUM 6:22 Genuai Bidigo Mosesbolo e tama po walali,
NUM 6:23 “Te Aron dali, aga ogwa dabe dali, augwaligo me sogo me sogo te Israel we bidibolo eno te wiegi yai mobo po mawainogo eyu, augwaligo e tama po pusumainao,
NUM 6:24 ‘Eno homugo Genuai Bidigo dage dali wiegi yai kolesaga elama, dage bugagia tonalumainao.
NUM 6:25 Tama Genuai Bidigo dage dali dwagi yai homu elama, dage olo mu tau somainao.
NUM 6:26 Tama Genuai Bidigo dage dali wiegi yai homu elama, dage dali homu nagame elama tama dage bugagia bidaibao.’”
NUM 6:27 “Te tama tibo dwagi yai sę pedalumai hagede ebo kolesagago augwaligo Genuai Bidi eno nogi nogilama, tama enabolo te Israel dabe dali wiegi yai sę emainu hanalu waibao. Tama eno augwali dali wiegi yai sę mu yaibao,” Genuai Bidigo te po wai.
NUM 7:1 Te Mosesgo Godigo name ugwa lotu be dodoloyu sę yani, tama agai te sę silali sogode agai Godigo doado bage dabe sa muainogo wel selama, tama agai te name be wel meba muyu, me alta, me aga tigidali nai dabe wel muna muna peyu silali. Tama agai te doado bage dabe te Godigo doado bage magi ilali.
NUM 7:2 Tama te Israel dabego deli deli tobolu bidi dabego doado bage dabe seselama, Godibolo magasali, te Israel wąį hanigo tobolu bidi dabe. Te bidi dabe augwaligo naga tama te bidi dabe nogi asęyu nediyu ebo sę polobadu tonaluai dao.
NUM 7:3 Augwaligo te a naga olama me badu nogo deli karis, me nogo si olama, me badu sągą si kau kibu sela aselama, Genuai Bidigo name ugwa beba sela aselama, magasali. Te deli deli tobolu bidi dabego te karis te deli te bidi sigo sigo ela pelama, te deli deli tobolu bidigo te karis kegabo kau kibu deli deli sesali.
NUM 7:4 Augwaligo seselama silibo si, tama Genuai Bidigo Mosesbolo e tama po wali,
NUM 7:5 “Nago augwaligo te mani nai dabe sela, tama te Livai dabebolo mao. Tama te deli deligo te name ugwa bede doado bage tolasa bilibo sę emainu eyu, tama mao,” wali.
NUM 7:6 Tama te Mosesgo te karis me kau kibu selama, te Livai dabebolo mani.
NUM 7:7 Te karis si, me kau kibu me si me si selama, Gerson dabebolo mani, te augwaligo augwa sę emainogo.
NUM 7:8 Tama me agai te karis me si me si, me te kau kibu a naga olama, sela, te Merari dabebolo mani, te augwaligo augwa sę emainogo yai. Tama te Arongo ogwa Itamargo te Gerson hani dabe dali te Merari hani dabego sę dabe tonaluali.
NUM 7:9 Tiali goli, Mosesgo te karis me kau kibu dabe te Kohat dabebolo me mabeo. Magi baso meni, te Godigo nai dabe augwaligo tonalubo nai dabe te augwaligo olo nagede tolabo nai dabe naga dao.
NUM 7:10 Tama te alta sa mubo sogo te Godigo bubuga mu dao. Te tobolu bidi dabego te ofa yabo nai dabe sesali. Augwaligo te nai dabe seselama, altaba sabolama, tama augwaligo Godibolo mawainogo yali.
NUM 7:11 Magi baso meni, Genuai Bidigo Mosesbolo e tama po walali, “Te deli deli bidigo te ofa ebo te alta eno dao olama sa muao. Te deli bubugade te deli bidigo ofa eyu, tama nosali bubugade gasa bidi me deligo ofa eyu tama yao, tama te tiwai augwali tigidaligo te ofa tigidali siligi pao,” wali.
NUM 7:12 Tama te deli deli tobolu bidi dabego te augwa sa muani deli deli bubugade te ofa nai sesiyu yali. Te dei namba wande, te Juda dabego tobolu bidi Aminadapgo ogwa Nasongo ofa sesali. Te dei namba tu, tede te Isakar hanigo tobolu bidi Suargo ogwa Netanelgo ofa sesali. Te namba 3 deide, te Sebulun hanigo tobolu bidi Helongo ogwa Eliapgo ofa sesali. Te namba 4 deide, te Ruben hanigo tobolu bidi Sedeurgo ogwa Elisurgo ofa sesali. Te namba 5 deide, te Simeon hanigo tobolu bidi Surisadaigo ogwa Selumiel agai ofa sesali. Te namba 6 deide, te Gat hanigo tobolu bidi Duelgo ogwa Eliasapgo ofa sesali. Te namba 7 deide, te Efraim hanigo tobolu bidi Amihutgo ogwa Elisamago ofa sesali. Te dei namba 8, tede te Manasę hanigo tobolu bidi Pedasurgo ogwa Gamalielgo ofa sesali. Te dei namba 9, tede te Benjamin hanigo tobolu bidi Gideongo ogwa Abidango ofa sesali. Te dei namba 10, tede te Dan hanigo tobolu bidi Amisadaigo ogwa Ahiesergo ofa sesali. Te dei namba 11, tede te Aser hanigo tobolu bidi Okrango ogwa Pagielgo ofa sesali. Te dei namba 12, te sogo te Naptali hanigo tobolu bidi Enango ogwa Ahirago ofa sesali. Te tigidali tobolu bidi dabego te deli tigi poai ofa tiwai naga sesali, te silva pou te 1 kilogram elama hap deli sesiyu, me silva plet te sęgę 800 gram yai deli sesiyu yali. Augwali deli deligo te dis pou me plet te wiegi yai plaua te augwaligo te oliv wel dali begelai plaua pągąnama sesali, te witgo ofa yali. Tama te deli deli tobolu bidi dabego te gol plet te 110 gram tama sęgę yai nai sesali. Tama te plet dabede te wiegi yai denami pągąna pai paudago te plet pągąna pali. Tama te deli deli tobolu bidi dabego te deli deli omai kau kibu ogwa bidi siyu, me deli deli sipsip kibu omai, me sipsip kibu omai kibu be deli yai, tama yali, te iside sese ula silabo ofa nai dabe. Me augwaligo sęgę sela sąbo ofa yabo meme kibu omai me sesali. Me kau kibu si omai, me a naga sipsip kibu omai, me a naga meme kibu omai, me a naga sipsip kibu omai te kibu be deli yai me sesiyu yali, te God dali deli homu ilabo ofa sesali.
NUM 7:84 Tama te bage augwaligo te 12 tobolu bidi dabego seselama te Godigo alta sai mu sa muani, te nai dabe nedali. Tama te nai dabe namba te e tama dao. Augwaligo 12 silva dis pou sesiyu, me 12 silva plet sesiyu tama yali. Te pou dali plet sigo sęgę te 28 kilogram tama yali.
NUM 7:86 Augwaligo te gol plet 12 tama sesali. Augwa sęgę te 1,320 gram tama elaluali. Augwaligo te plet dabe te wiegi yai denami hano holobo paudago pągąnama sesali.
NUM 7:87 Tama me augwaligo te kau kibu omai te 12 sesiyu, me sipsip kibu 12 omai kibu sesiyu, me te kibu be deli polo yai omai sipsip kibu 12 kibu sesiyu tama yali, te iside sese dela silabo ofa yainogo. Tama augwaligo wit ulubo ofa te ofa dali deliba taluama ulali. Tama me augwaligo sęgę sela sąyabo ofa yainogo te 12 meme kibu omai me sesali.
NUM 7:88 Tama te tiwai eyu, augwaligo te 24 kibu kau omai sesiyu, me 60 omai sipsip kibu sesiyu, me 60 te meme kibu omai sesiyu, me te kibu be deli yai sipsip kibu omai gǫų te 60 sesiyu, tama yali. Te wiegi yai homu deli yabo ofa nai tama sesali. Augwaligo te alta te Godigo mu dolo sa muani, te hasia augwaligo tama bolo tiali. Tama nosali augwaligo te ofa dabe Godibolo mani.
NUM 7:89 Tama te Moses te Godigo ugwa beba te Genuai Bidi dali po miainogo tula pabo si da, teda agai te Genuai Bidigo penanedu po wabo agai te sęgę sela sąbo be tomode po wabo odali, te kontrak halobage ugwadu daide te ensel bidi piksa noma si tomode.
NUM 8:1 Genuai Bidigo Mosesbolo walali,
NUM 8:2 “Nago Aronbolo walao, te agai te 7 lam sole te lam tolalubo naiba mubo sogo da, te Tedali Gasagi Yai Be Habude mubo sogo, agai augwali bugagia mumainao, tama te be habu tomoba te sole ula emainao,” wali.
NUM 8:3 Tama Arongo Genuai Bidigo po wali pelama, tama agai te lam sole dabe te lam tolalubo naigo nogo dabede mumuna pali, tama te sole ula te Tedali Gasagi Yai Be Habuba ula yali.
NUM 8:4 Polobadu te nai nigali sogo, augwaligo gol meba selama, tama hamago te lam sole tolalubo nai sese nigainogo elali, tama agai pagede gagalama, agai nogo me aga au me te ni plaua dabe tiwai yali. Augwaligo te Genuai Bidigo Mosesbolo ola mani piksa tiwai tama nigali.
NUM 8:5 Tama Genuai Bidigo Mosesbolo po geninama weyu, e tiwai po walali,
NUM 8:6 “Nago te Livai dabe naga te Israel hanide dįą siyu i olama, tama eno gedude wiegi yai ilao. Te augwali i olama, tiao.
NUM 8:7 Nago e tama tiao: te bidi dabe eno gedude wiegi yai ebo ąį selama, tama augwali tigiba sąyao. Tama me augwaligo augwa tigide elalubo tigi nisi sese tama toga sąyu, me augwa ugwa wę telayu emainao. Augwaligo te tama tila silama da, teda augwali wiegi yai yaibao.
NUM 8:8 Tama nosali augwaligo ogwa bidi kau kibu omai deli siyu, me te oliv wel dali begelai plaua wiegi yai me siyu yao, te wit ulubo ofa yainogo. Tama augwaligo te kau kibu dali ofa emainao. Tama me augwaligo gasa kau kibu omai me somainao, te sęgę sela sąyabo ofa yainogo.
NUM 8:9 Tama te Livai dabe eno ugwa lotu be sesegeba odasa aselama, tama te Israel hani augwali dali deliba sisinao.
NUM 8:10 Tama te Livai dabe eno gedude dolalubadi da, te Israel dabe dagego augwaligo toboluba nogo muiąo.
NUM 8:11 Tama Arongo te Livai dabe te nogogo tola selama, iba eda ebo ofa tiwai yali gilama, nogo tola selama, eno gedude iba pogoliyu, eda kegeyu yao. Tama te ebo kolesagago te Israel dabego te Livai dabe eno sę bidi dabe pedelaibao,” wali.
NUM 8:12 “Tama te Livai dabego augwa nogo dabe te omai kau kibu sigo toboluba mumainao. Tama augwaligo me da te sęgę sela sąbo ofa mayu, me da augwaligo isigo sese mu ulubo ofa eyu emainao. Te ofa nai si da, te Livai dabego sęgę sese mu sela sąbo ofa dao.
NUM 8:13 Nago te Livai dabe enabolo te wiegi yai nai mabo tiwai yao. Te Livai dabe augwali te Aron dali aga ogwa dabego gesabidide dolalumainao. Tama Arongo te Livai dabe te nogogo tola selama, iba eda ebo ofa tiwai yali gilama, nogo tola selama, eno gedude iba pogoliyu, eda kegeyu yao.
NUM 8:14 Tama nago te ebo kolesagago te Livai dabe te meba Israel hanide gasagi yai me pedalomainogo magi ilama, tama ena hani mu bidaibao,” wali.
NUM 8:15 “Te nago augwali eno gedude wiegi yai ilama enabolo mabo si da, teda augwali eno ugwa bede sę ebo usu yaibao.
NUM 8:16 Eno te Israel dabe dagego gomunai ogwa dabe eno hasegelama, tama eno te Livai dabe eno sai dao. Tama te Livai dabe te eno mu dao.
NUM 8:17 Odao. Dage Israel dabego gomunai ogwa dabe, me sipsip, meme, bulmakau kibu dabego gomunai wai dabe me, eno mu dao. Augwali eno te Isip dabego gomunai wai dabe elali sogo, eno dagego ogwa dabe me sipsip kibugo hasia wai dabe eno sa muai dao.
NUM 8:18 Tama tialima, megi da, eno te Livai dabe sobao, te Israel dabe dagego gomunai ogwa dabe hasegelama salio.
NUM 8:19 Tama eno te Livai hani te Aron aga ogwa dabe augwalibolo olo mobao, te wiegi yai olo mabo tiwai ebao, augwaligo te Israel dabe dagebolo eno ugwa be tomode yao wali sę emainu ebao. Tama tialima, augwaligo dage hasegelalio. Tama dage te habu selai be habuba dage me peyu egobeo. Tiyu, dage pąba pabo digi eno dage dolidali weyu,” te po wai.
NUM 8:20 Tama te Moses, me Aron, me Israel we bidi augwaligo te po wali peyu, te Livai dabe te Genuai Bidigo hani pedalumainu sa muani.
NUM 8:21 Te Livai dabego te Godigo gedude wiegi yai pedalobo kolesaga wali pelama, tama augwa ugwa dabe wę telawali. Tama Arongo te nogo tulama mabo ofa tiwai elama, nogo tulama, tama Genuai Bidigo gesabidide iba eda hoga yali. Tama agai augwaligo sęgę sela sąyabo ofa yali, te augwali wiegi yai pedalaibao.
NUM 8:22 Te we bidigo Genuai Bidigo Mosesbolo walali po wali pelama, te Livai dabebolo tigidali sę tama yali. Tama tibaso, te Livai dabego Godigo ugwa be tomode sę yabo usu yali. Tama Aron aga ogwa dali augwaligo augwali tonaluali.
NUM 8:23 Tama Genuai Bidigo Mosesbolo e tiwai po wali,
NUM 8:24 “Te Livai dabe augwali te kibu be 25 yai bagego eno ugwa bede sę emainao.
NUM 8:25 Augwaligo te sę ela pidubadi, augwa te kibu be 50 tama usu nama te sę emainao.
NUM 8:26 Te sę elama, nosali augwaligo te sę ma tulamuo. Tiali goli, augwaligo augwa deli sę ebo bidi tau siyu digi emainao, te name ugwa be tomode. Nago te po te Livai dabebolo menama, tama augwaligo te tama timainao,” Genuai Bidigo Mosesbolo te po wai.
NUM 9:1 Te Israel dabe augwaligo Isip bulu taga solama, nosali te namba 2 kibu bego hasia wabo poluade augwali te nai meni yai bulu Sainaide bidibadi, Genuai Bidigo Mosesbolo e tama po wali,
NUM 9:2 “Edao, te poluago 14 deide, te pio mu dage Israel dabego sipsip dabe elama, ofa tiwai yao, tama te nai ulubo te eno dage bugagia bidimainogo sula tagalali bubuga Pasova te ma kone paliąo. Te nai ulubo bubuga mu te dao. Tama dagego aga te bomai po dabe dolo wali pelama, tama dage te nai dabe tuiąo,” wali.
NUM 9:4 Tama te Mosesgo te Israel we bidi dabebolo te Godigo augwali olo bidimainogo tagalali Pasova bubugade augwalibolo te nai dabe ulao po wali.
NUM 9:5 Tama augwaligo te nai te namba wan poluago 14 deide ulali, te Sainai bulu nai meni yai bulude. Tama te we bidi dabego Godigo Mosesbolo wali po sese tama wali pelama, tama te nai dabe ula tuali.
NUM 9:6 Tiali goli, bidi meba augwaligo te isai bidi tigi nogo tulama yaligo augwali Godigo gedude wiegi yai menio. Tama tibaso, augwaligo agai te bubuga mude nai ula tubo usu egobeo. Tama te nai tubo bubugade augwali Moses de Aron si pageba pelama,
NUM 9:7 augwaligo e tama po wagasali, “Dago te isai bidigo tigi nogo dįąwai dao. Tama tibaso, da wiegi yai menio. Tiali goli, magi baso dago te meba we bidi dabe dali te ofa Genuai Bidiba ebo tagalomainowe?” Te po hanalu wali.
NUM 9:8 Tama Mosesgo te po wali, “Dwasianu tonaluyu bolo yao. Eno Genuai Bidibolo hanaluyu bolo yaibao,” wali.
NUM 9:9 Tama Genuai Bidigo Mosesbolo te Israel we bidibolo
NUM 9:10 e tama po walao wali, “Te dage dugago me, ma duga wąį wai bǫų dabego te bidi isai bidi dabe nogo polo toulama, tama te Pasova tubo sogo eno gedude meda yaibaso da, teda tagalao. Te polua deli silama, tama nosali dagego te Pasova bubuga kone palobo nai te sogo uliagameo. Tama me dage hani meba digibulu bulu bilibaso da, teda augwaligo me tubo nosali usu yaibao.
NUM 9:11 Tiali goli, te bidi hani augwaligo te dei namba te namba 2 poluade te nai ulumainao, te pio mu. Tama augwaligo te nai uluyu, te nai ulubo bomai po wali peyu emainao. Augwaligo te nai te yis meni yai bret dali tuyu, me ha ebo dwanai dali tuyu emainao. Augwaligo te hasa mi me tagalama kigamuba me sabolamuo. Te augwaligo te sipsip pesabo sogo augwaligo te hasa dili togolamuo.
NUM 9:13 Tialima, bidi me deli aga eno gedude wiegi yai elama, me ma augwali digibulu pisąma yai me augwaligo te namba wan poluade te nai ulisąma yali da, teda dagego augwali eno we bidi hanide sela sąyao. Magi baso meni, augwaligo enaba ofa nai mabo sogo masiąma ebaso. Tama tibaso, augwali sęgęgo sęgę augwa ma tolomainao.
NUM 9:14 Tama gasa bulu bidi dage dali bidama, agai me dage dali te nai ulama tuainogo yali da, te usu dao, agai emainao. Tiali goli, agai te naigo bomai po wali bugagia pomainao. Te bulu page bidi dabe, me gasa bulu badu asai bidi dabego augwaligo deli te bomai po wali peyu emainao,” Genuai Bidigo Mosesbolo te po wai.
NUM 9:15 Augwaligo Genuai Bidigo name ugwa be sęą silama, tama ulade augwaligo sęą silali. Tama pǫgo te name ugwa lotu be mesega sagasali. Tama hulide augwaligo suali, pǫ te isi tiwai dabo suali.
NUM 9:16 Te tigidali sogo ulade pǫgo te name ugwa be mesegaluyu iduali. Tama hulide da, te pǫ isi tiwai mu tama elaluali.
NUM 9:17 Te pǫgo te ugwa be taga pabo sogo da, te Israel dabe augwaligo te doado bage dabe selama, wali peyu ebo dao. Tama te pǫ gasa badu me dolalubaso da, teda augwaligo bidabo pesage tede nigigi pabo dao.
NUM 9:18 Te Genuai Bidigo po wabo si da, te Israel dabe augwaligo me pesage taga pabo dao. Tama me Genuai Bidigo po wabo si da, augwaligo gasa buluba pesage nigigi pabo dao, te gesi noma pesage nigigi pabo dao. Ma, te pǫ te name ugwa be dai pedude me elalubaso da, teda te we bidi hogodasa pabo menio.
NUM 9:19 Te pǫ hauwa sogo te name ugwa be pedude bidibaso da, te we bidi dabe augwaligo Genuai Bidigo po wali pelama, augwali gasaba me peyu ebe.
NUM 9:20 Te me sogo da, te pǫ be pedude pęwadage sogo bidama, tama ma gudasa peyu ebo dao. Te bobobage sogo ma pęwadage sogo bidibadi me tagala. Te Israel dabe augwaligo te Genuai Bidigo po wali peyu, te pǫgo augwali ola mabo te wali naga tama peyu ebo dao.
NUM 9:21 Te me sogo da, te pǫ te deli madi me te pio deli madi elaluama, kigamu tama naga elalubo dao, tama te bulu taga peyu pabo dao. Tama augwaligo sulama, tama augwali te pǫ wali peyu ebo dao. Te pǫ hulide pobaso me ulade pobaso me, augwali wali peyu ebo dao. Te sogo tama te we bidi augwali me hogodama, wali peyu ebo dao.
NUM 9:22 Te mena tama sogo te pǫ name ugwa bede elaluali me tagala, te sigo me ma deli sogo me, ma polua deli me, ma kibu be deli bidibo me, augwali me pabeo. Tiali goli, te pǫ gudasa pabo si da, augwali me gudasa pabo dao, te bulu taga peyu.
NUM 9:23 Te Genuai Bidigo po wabo sogo da, augwali gudasa gasaba pabo dao, te gasa buluba pesage nigigi peyu. Tama agai po wabo sogo augwaligo doado bage selama, gasa buluba gudasa pabo dao. Genuai Bidigo te po Mosesbolo mabo dao, tama Mosesgo te we bidibolo pusubo dao, tama te we bidigo wali pabo dao.
NUM 10:1 Te Genuai Bidigo Mosesbolo te po walali,
NUM 10:2 “Megi dagego te kapa silva meba selama, hamago elama, te bu wabo nai biugel si nigiąo. Tama nago te biugel te nago te we bidi sisinagasomainu i wabo sogo me eliyu, me te painu doado bage sisi ebo sogo me eliyu yao.
NUM 10:3 Dagego te biugel si bobobage sogo elebo sogo da, teda te we bidi eno ugwa be sunumiba sisinagasomainao.
NUM 10:4 Ma, dagego biugel deli naga elebaso da, teda te tigidali hanigo tobolu bidi dabe naga aselama, nage dali sisinagasomainao.
NUM 10:5 Ma, dagego te biugel pęwadage sogo mu elebaso da, teda te giliga asobo badu bidalubo hani bage augwali hogodasa pomainao, te kem pesagede bidalubo bage bolo pomainao.
NUM 10:6 Tama dagego te biugel pęwadage sogo ma elebaso da, teda te saut badu bidibo bidi hani hogodasa pomainao. Dagego biugel dage te pesage nigilama bidibo pesage taga peyu painu da, dagego te biugel pęwadage sogo eliyu yao.
NUM 10:7 Tiali goli, dagego te we bidi deliba sisimainogo i weyu da, dagego te biugel bobobage sogo elao,” wali.
NUM 10:8 “Te Arongo ogwa dabe te pris bidi dabe augwaligo te biugel elebo sę emainao. Dage me, dagego hani nosali asobo bagego te bomai po wali bidada peyu yao.
NUM 10:9 Te boi bidi dabego dagego tǫba dage dali hwįainu asobaso da, teda dagego te biugel elama, bidi dabe hodolama, hwįgi pomainao, te boi bidi dabe dali. Dagego te tama tiyu da, teda ena God, dagego Genuai Bidi, eno dage homu koneama, tama te boi bidi dabe dolaibao, te augwaligo dage aiyaba elalugobeo.
NUM 10:10 Tama me ma, te lotu wabo genuai sogo me, te gesi noma poluade me, ma gasa lotu wabo genuai sogo me, te biugel eliyu yao. Dagego te biugel te isigo ulama, sese dela silibo ofa ulubode, me homu deliba yainu ebo ofa ebode, te biugel eliyu yao. Tama eno dage koneama, eno dage tau saibao. Ena God, dagego Genuai Bidi, eno polo wali.” Te po wai.
NUM 10:11 Te namba 20 dei, te namba 2 poluade, namba 2 kibu bede te Israel dabe augwaligo Isip bulu taga solama nosali, te pǫgo Godigo name ugwa be tagalama pali.
NUM 10:12 Tama te Israel dabego sulama, te nai meni yai bulu Sainai taga peyu pali. Tama te pǫ pelama, te nai meni yai bulu Paranba doligi pelama, elaluali.
NUM 10:13 Genuai Bidigo Mosesbolo po hasia menama, tama Mosesgo Israel dabe hogodama pao po wali. Tama augwali hogodama pali.
NUM 10:14 Tama te Juda hani, me Isakar, me Sebulun hani, augwali bolo polasa pali. Augwali dwasianu hani pebeda selama, augwa plak ugwa nogo tolasa pepela yali. Tama te Nason, te Aminadapgo ogwa, te hani selade tobolu bidi nigasa, tama Juda hani polasa mu pali.
NUM 10:15 Tama Natanel, te Suargo ogwa, te Isakar hanigo tobolu bidi nigasa pali.
NUM 10:16 Tama te Eliap, te Helongo ogwago, te Sebulun hanigo tobolu bidi nigasa pali.
NUM 10:17 Te Gerson hani me, Merari hani me, Livaigo hani si, augwaligo te hani sela wali tama pali. Augwaligo name ugwa lotu be me, aga doado bage me, augwaligo selasa pali.
NUM 10:18 Te augwali nosali badu te Ruben hani we bidi, me Simeon hani, me Gat hani, augwali augwa hanide dwasianu pebedasa, augwa plak ugwa tolasa pepela yali. Tama te Sedeurgo ogwa Elisur te hani selago tobolu bidi bidali.
NUM 10:19 Tama te Surisadaigo ogwa, Selumiel, te Simeon hanigo tobolu bidi bidali.
NUM 10:20 Te Duelgo ogwa, Eliasap, te Gat hanigo tobolu bidi bidali.
NUM 10:21 Tama te Livai hanigo hani Kohat dabego te Tedali Gasagi Yai Be Habu doado bage dabe augwaligo tolasa, gasa hani meba wali tama pepela yali. Tama te Kohat dabe te gesi noma pesage nigibo madi saboligi peyu da, te hasia pali meba Livai hani dabe augwaligo Godigo name ugwa be polo sę eyu yai suali. Teda te Kohat dabe te tolali doado bage dabe te pris dabebolo menama, te pris dabego te doado bage dabe te ugwa be tomoba muyu yali.
NUM 10:22 Tama nosali te Efraim hani we bidi, me Manase hani we bidi, me Benjamin hani we bidi, augwali augwa dwasianu hani pebedasa pelama, augwa plak ugwa nogo tolasa pepela yali. Te hani selago tobolu bidi te Amihutgo ogwa, Elisama, bidali.
NUM 10:23 Te Pedasurgo ogwa, Gamaliel, te Manase hanigo tobolu bidi bidali.
NUM 10:24 Te Gideongo ogwa, Abidan, te Benjamin hanigo tobolu bidi bidali.
NUM 10:25 Tama nosali mu te Dan hani we bidi, me Aser hani we bidi, me Naptali hani, augwali augwa dwasianu hani pebedasa pelama, augwa plak ugwa tola sesa pelama, pebela yali. Tama te hani selago tobolu bidi te Amisadaigo ogwa, Ahieser, bidali.
NUM 10:26 Te Okrango ogwa, Pagiel, te Aser hanigo tobolu bidi bidali.
NUM 10:27 Te Enango ogwa, Ahira, te Naptali hanigo tobolu bidi bidali.
NUM 10:28 Te tigidali sogo te Israel dabego te pesage nigilama bidali te taga peyu da, augwali tama nanidu peyu yali.
NUM 10:29 Augwali painogo Mosesgo aga base Hobap, Jetrogo ogwa, Midian bulu bidibolo e tiwai po wali, “Megi da, da te Genuai Bidigo dabolo mawaibao wali te buluba hogodama paibao. Agai dabolo polo wai dao, da te bulude bugagia mu bidaibao po wai dao. Tama tibaso, eno homugo nage da dali aselama, tama dago wiegi yai nai hauwa nage dali dobolama saibao,” wali.
NUM 10:30 Tiali goli, Hobapgo te po wali, “Te usu dao, tiali goli, tagalao. Ena ena bulu muba ma paibao,” wali.
NUM 10:31 Tama Mosesgo te po wali, “Hobedeo, baseo, nago da taga pigio. Nago koneani, te menade te wiegi yai madi te pesage nigilama bidabo nago koneani, te moni nai meni yai bulude nago da ola mabo usu yaibao.
NUM 10:32 Ma, nage da dali asiyu da, teda Genuai Bidigo dabolo mani wiegi yai nai dabe nage dali dobola saibao,” wali.
NUM 10:33 Te we bidi augwaligo te Genuai Bidigo bulu du taga pali, te Sainai bulu du dao. Augwali sela sogo tama pali. Tama augwaligo Godigo Dąų Wali Bomai Po Munaluali Halobage bolo polasa sela pali, te bidabo pesage nigabo pesage gege peyu pali.
NUM 10:34 Te augwali pabo sogo da, teda te Genuai Bidigo pǫ augwali ugwadu elalubo dao. Te tigidali sogo giligade te pǫ me tama elalubo dao.
NUM 10:35 Augwaligo te kontrak halobage tolasa pabo sogo, te Mosesgo te po wabo dao, “Genuai Bidi, nage polasa pelama, nago boi bidi dabe dali hwįnama, augwali sela sągi pao. Tama te bidi dabego nage godolo ebo tagalai bage, augwali wi peyu emainao.”
NUM 10:36 Tama augwaligo te kontrak halobage toma tuyu tǫba mubo sogo, Mosesgo Genuai Bidibolo te po wabo dao, “Genuai Bidi, nage da tausen tausen Israel we bidi daba ma asao,” te po wabo dao.
NUM 11:1 Te we bidigo sęgę dabe augwali tigide pedalobaso, augwaligo konila po wabo Genuai Bidigo odali. Tama tibaso, aga sębę dwai mu elama, tama agai isi te we bidi bidibo pesageba taga palali. Tama te isigo te bidibo pesage me badu bogo badu dali.
NUM 11:2 Te tama tibaso, te we bidigo Mosesgo augwali tau somainu i wali. Tama Mosesgo augwaligo po odama, agai Godibolo gedu haluasa po wabode te isi sula sali.
NUM 11:3 Tama augwaligo te bulu nogi augwaligo e tama nogi yali, Tabera wali, te po page da “Isigo dai.” Magi baso meni, Genuai Bidigo isigo augwali dai madi dao.
NUM 11:4 Te gasa bulu we bidi Israel dabe dali aselawai bage me elaluali. Augwali bulu hasa hauwa tubo we bidi dao. Tama tibaso, augwali hasa hauwa tuaio po hauwa mu kųą pali. Tama te Israel dabego me te po hauwa tama wali, “Dago te hasa hauwa tuaio. Tiali goli, dago menade sogowe?
NUM 11:5 Te Isipde dago sųgų hauwa olo selama, tuyu yai dao. Me, dago te haniani bobi, me melen, me haniani aniani me sai dao.
NUM 11:6 Tiali goli, megi da, dago bomo pela silalio, tama dago nai menio. Te nai mana naga elalubo da, te nai hagela mu dao,” wali.
NUM 11:7 Mana te dwasianu bin ge tiwai nai dao, tama aga tigi poai te bunu dabego mege tiwai dao.
NUM 11:8 Tama te bidibo pesagede hulide te tulubage segeni eyu da, te mana dali tama tulalubo dao. Tama kigamu hulide we bidi te pesagede bilaluyu, te mana tama sesa bilibo dao. Tama nosali augwaligo masigi du selama dilama, ma ni dagego haluama plaua nigilama, tama nosali augwaligo meba selama, senede ulama, augwaligo bisket nigibo dao. Te augwaligo tubadi, te bret augwaligo oliv wel dali ulai bret tubo tiwai ebo dao.
NUM 11:10 Tama te we bidi augwa we wai puluba augwali augwa ugwa be mabode dolalua peyu, gela weyu yali. Tama Mosesgo augwali gela wabo odali. Tama Genuai Bidigo augwali dali sębę genuai mu ebaso, Moses aga homu sęgę yali,
NUM 11:11 tama Genuai Bidibolo e tama po walali, “Nago magi baso ena dali dwai sę yaliwe? Magi baso nago ena dali wiegi yai homu ebewe? Te me nago magi baso te we bidi tonalubo sę enadubabolo mawai dawe?
NUM 11:12 Tama eno augwali tabide pedalumainu yai menio. Tama me ena we gilama augwali ame nai menio. Te tama tialima, nago enabolo te wai tolalubo we yali gilama, magi baso eno nogode tolalua po waliwe? Te Isip tǫdu gagalama, te nago augwaligo wąįbolo mawaibao olama wali te tǫba usu nigi paibawe?
NUM 11:13 Te we bidi augwali hasa dabe hagede gela olama, enabolo hanalubo. Tiali goli, eno te hasa dabe menade sogowe? Ena usu munu me egobeo.
NUM 11:14 Enaduba deligo naga te we bidi tonalubo usu egobeo. Eno usu me egobeo.
NUM 11:15 Ma, nago te sę ena dali tama tiainogo da, teda nago ena hobede elama, nago ena elama, isilao, tama eno te bomai sę me te sęgę tologobeo,” Mosesgo te po wai.
NUM 11:16 Tama Genuai Bidigo Mosesbolo e tama po wali, “Nago 70 genuai bidi dabe ena pageba sesao. Tama nago augwali eno ugwa beba odasa aselama, tama augwali nage dali dolalumainao.
NUM 11:17 Tama ena aiyaba dulama, nage dali po waibao. Tama eno nagebolo te mani te mobo bidigo bomo meba selama, tama eno augwalibolo mawaibao. Tama augwaligo nage tau selama, te bidi dabego sęgę augwaligo me tolomainao, tama nagaduba deligo nago te sęgę tigidali me tologobeo.
NUM 11:18 Megi te we bidi dabebolo e tama po walao, ‘Dagego te Godigo gedude wiegi yai pedalobo kolesaga wali piąo,’ po wao. E po me augwalibolo wao, ‘Tama dagego do te mi tuabo nai sabo kegaluao. Genuai Bidigo dagego hasa hagede gela wabo te polo odalio. Tama dagego dage Isipde bugagia bidai dao wabo po me, Genuai Bidigo polo odalio. Tialima, megi da, odao, Genuai Bidigo dage hasa menama, tama dagego tuiagameo.
NUM 11:19 Dagego te hasa dabe tuabo te deli sogo o si sogo, o a naga sogo, o nogo si sogo, o 20 sogo me tugobeo, menio.
NUM 11:20 Dagego te nai mi dabe te tudubadi polua deli pelama, tama dage boguabo homu elama, tuabo hagela yaibao. Genuai Bidi dage tomode te bidibao, tiali goli dagego aga tudi ola menama, tama dagego aga dali wado po wali weyu, e tiwai po wali dao, “Magi baso dago Isip tagalama asaliwe?” Dagego te tama kolesaga yalio. Tiali, megi te nai dabe dageba megi pedalaibao.’ Te tama po augwalibolo pusao,” Genuai Bidigo Mosesbolo te po wai.
NUM 11:21 Te Mosesgo Genuai Bidibolo e tama po wei ponani, “Genuai Bidi, odao. Eno te 600,000 bidi dabe tolalubo dao. Tama nago te po wali, ‘Augwalibolo te polua delide tuabo te hasa dabe mi mawaibao,’ po walio. Tiali goli, nago te hasa dabe menade gegelama, augwali mawaibawe?
NUM 11:22 Dago te tigidali sipsip me kau kibu dabe sese eliyu da, augwali sese usu egowe? Ma, te genuai tamu ąįde elalubo sųgų dabe augwali sese mu siyu da, augwali sese usu egowe?”
NUM 11:23 Tama Genuai Bidigo Mosesbolo po wei ponoyu, e tama po wali, “Te eno bomo usu meni yali bogo. Te pęwadage sogo tama nago suaibao. Tama nago koneama, nago homugo eno nagebolo mawaibao wali te nai te yabao po waibao. Te nai pedalogowe, ma meniwe?” wali.
NUM 11:24 Mosesgo te po oda selama, tama aga buluba pelama, tama te be bulu badu bididuali we bidibolo Genuai Bidigo wali po pusigi pali. Tama agai 70 tobolu bidi dabe sisinama, tama augwali te lotu be bagulama dolaluao po wali.
NUM 11:25 Nosali Genuai Bidi te pǫ dulude bidama, te tǫba dulama, tama Moses dali po wagasali. Tama nosali Genuai Bidigo Mosesbolo mani mobo bidigo bomo meba selama, te 70 tobolu bidi dabebolo mani. Tama te bomo augwaliba asobo si da, teda te pęwadage sogo tama augwaligo te profet bidi dabego po pusubo tiwai pusali.
NUM 11:26 Tiali goli, te 70 tobolu bidi dabe tomode bidi si, te Eldat me Medat, augwali si te bede bididuai, tama augwali si te meba tobolu bidi dabe dali te name ugwa beba pai menio. Augwali si te bede bidibadi, tama Genuai Bidigo te mobo te augwali sibolo mani, tama augwali sigo te profet dabego wabo po tiwai wali.
NUM 11:27 Tama gesi bidi me udalama, Mosesbolo te po waligi pali, “Eldat me Medat si bede bidiyu, te profet bidigo wabo po wali.”
NUM 11:28 Te Josua, Nungo ogwa, Moses dali bididuali. Te Josua aga te Moses tau sabo bidi, aga gesi bidide bida bida asudama, megiba tama usu nagasali. Tama Josuago te gesi bidigo wabo po odama, agai e tama po te Mosesbolo walali, “Genuai bidi, nage pelama, augwali sigo pedauwali panigi pao,” wali.
NUM 11:29 Tiali goli, Mosesgo te po wei ponoyu, e tiwai po wali, “Nago homugo ena bidi mebago hasegelaiba homu sęgę ebawe? Homu sęgę tagalao. Eno homugo Genuai Bidigo agai mobo bidi tigidali we bidibolo menama, tama tigidali we bidigo profet bidigo po omainao.”
NUM 11:30 Mosesgo po ola silama, aga dali te Israel dabego tobolu bidi dabe dali augwali beba ma pepela yali.
NUM 11:31 Tama te Genuai Bidigo moni genuai wali te tamu ąįde pedalomainogo elama, te waligo te ba sibi hauwa mu te wan mita tama ugwadu te tǫba bola asali. Tama augwali te bidi dabe bidibo pesage tomoba, me te bidibo pesage bogo badu dabe me duadua peyu tama yali. Augwaligo te kilomita hauwa mu te tǫ mesesege pelama elaluali. Te augwali bidibo pesage nigilama bidali tǫ sesegede tigidali tama.
NUM 11:32 Tama te we bidigo te ba dabe sabo sę te hulide me, ulade me yali. Tama me sogo be posobode me, augwaligo te tiwai sę naga yali. Tama te we bidi sesego ba dabe hauwa sali, te 1,000 kilogram usu nama deli deligo mu sali, tama we bidi mebago ba hauwa mu sali, te 1,000 kilogram edelama ba sali. Tama augwaligo te ba dabe pesalama, tama te be mesalo dabede giligade nani elama wialali, te giligago te ba mi omainu.
NUM 11:33 Tama te we bidi dabe augwaligo te ba dabe tubo gagalo pobadi yaide, deli sogo tama Genuai Bidigo te we bidi dali sębę yali, tama agai moni gasi tagala palama, tama we bidi hauwa isali.
NUM 11:34 Tama augwaligo te we bidigo tigi te bulude pubulali. Tama augwaligo te bulu nogi e tiwai polali, “Te hasa tuainogo gela wabo we bidigo gų page dao.”
NUM 11:35 Tama nosali augwaligo te bulu taga pelama, te Haserot buluba pesage nigigi pali.
NUM 12:1 Te Mosesgo te bulu Itiopia we me sai. Tama augwali te Haserotde bidibadi yaide, Miriam de Aron sigo Mosesgo te sę yali pode dwai po wali.
NUM 12:2 Tama augwali sigo e tiwai po wali, “Te Genuai Bidigo te we bidibolo po te Mosesgo pedauwalidu naga mabo yali bogo? Meni ma, agai te po da sigo penanedu me mabo dao,” wali. Tama Genuai Bidigo augwali sigo te wabo po odali.
NUM 12:3 Te bidi Moses agai aga nogi aga aiyaba dualabo bidi mu dao. Te kolesagade agai te gasa bidi dabe tigidali aiyaba elaluai dao.
NUM 12:4 Te augwali sigo po ola silibode, polo tama Genuai Bidigo Moses me Aron me Miriambolo e tama po walali, “Dage sela eno ugwa beba asomainu homu ebao.” Tama te bage augwali hogodama pali.
NUM 12:5 Augwali polo doligi pai madi te Genuai Bidi te pǫde bidai aiyaba dulali, tama te pǫ te ugwa be sunumide dolaluali. Tama Genuai Bidigo i weyu e tama po wali, “Aron de Miriam si, dage si asiąo,” wali. Augwali sigo odama, tama augwali si pąbanu gana pali.
NUM 12:6 Tama Genuai Bidigo po wali, “Dage sigo eno po odiąo. Te profet bidi me dage Israel dabe tomode bidibo sogo, eno ena digi agaba te nade ola mabo tiwai elama, eno aga dali nade po wabo dao.
NUM 12:7 Tiali goli, eno sę bidi Moses te profet bidi dabe tiwai menio. Eno aga dali gasa kolesaga mu ebo dao. Eno agabolo eno sę sese agabolo menama, tama eno koneani, agai eno sę sese yaibao.
NUM 12:8 Tialima, eno aga dali po wabo te bidigo aga abagi dali po wabo tiwai wabo dao. Tama eno po agabolo hanilama mu wabo dao, eno po begelama, po digi pogo me wabo menio. Te me agai ena dwasianu suai dao. Tama dage sigo magi baso mu Moses dali dwai po wabo wi ebewe? Te eno sę bidi dali.” Te po wai.
NUM 12:9 Tama Genuai Bidigo augwali si dali wado po genuai mu elama, augwali si taga peyu pali.
NUM 12:10 Te pǫgo Godigo ugwa be taga pali, tama polo tama te oiyabe gasigo Miriamgo tigi halua sagaselama, tama tigi wali tedela mu yali. Tama nosali Aron begelama suali, te gasigo Miriam mesega sai suali.
NUM 12:11 Tama Arongo Mosesbolo e tama po walali, “Genuai bidi, da sigo dwai kolesaga elama, dwai sęgę salio. Nago dadi si hobede elama, tama nago da sigo dwai kolesaga yalide sęgę tolomainu igio, te dwai kolesagade.
NUM 12:12 Tama nago te Miriam te wego wai tabide isai ame nabo wai tigi wali dadagala pabo tiwai ebadi sula tagalamuo. Agai tigi wali polo dagala palio,” wali.
NUM 12:13 Tialima, Mosesgo Genuai Bidiba e tama po i walio, “Godio, eno homugo nago Miriam ma usu ilao,” wali.
NUM 12:14 Te Genuai Bidigo te po wei ponoyu, e tiwai po wali, “Te Miriam aga ayago aga gesabidide pesą sąyu da, te aga hale Sarere delide tama egowe? Waa? Te tama tiali goli, Miriam Sarere deli te bidi bidibo pesage bulu badu bolo bidimainao. Tama nosali aga be nani tomoba ma asomainao,” wali.
NUM 12:15 Tialima, augwaligo Miriam te be nani bulu badu bolo tagala palali, te Sarere delide tiali. Tama te we bidi gasaba me hogodasa pabeo. Menio, augwaligo Miriambolo ma asobo tonaluyu bolo yali.
NUM 12:16 Tama nosali augwaligo te bulu Haserot taga pelama, tama Paran bulugo nai meni yai buluba ugwa be nani nigigi pelama, bidigi pali.
NUM 13:1 Genuai Bidigo Mosesbolo e tiwai po walali,
NUM 13:2 “Nago koneani, te kantri bulu Kenan eno dage Israel dabebolo maiabo homu ebo nago koneanio, tama tialima, nago te 12 hani tomode deli deli tobolu bidi sa mumuna pelama, tama augwali te Kenan bulude tigidali tǫba sa susa biligi pomainogo tagala palao,” wali.
NUM 13:3 Mosesgo Genuai Bidigo po odama wali peyu, augwali te Paran bulu kemi sane yai bulude bidiyu, agai te hani tobolu bidi dabe tagala palali.
NUM 13:4 Augwaligo nogi te e dao: Samua, te Sakurgo ogwa, te Ruben hani dao.
NUM 13:5 Safat, te Horigo ogwa, te Simeon hani bidi.
NUM 13:6 Kalep, te Jefunego ogwa, te Juda hani bidi dao.
NUM 13:7 Igal, te Josepgo ogwa dao, te Isakar hani bidi dao.
NUM 13:8 Hosia, te Nungo ogwa dao, te Efraim hani bidi dao.
NUM 13:9 Palti, te Rafugo ogwa dao, aga te Benjamin hani bidi dao.
NUM 13:10 Gadiel, te Sodigo ogwa dao, aga te Sebulun hani bidi dao.
NUM 13:11 Gadi, te Susigo ogwa dao, aga te Manase hani bidi dao.
NUM 13:12 Amiel, te Gemaligo ogwa dao, aga te Dan hani bidi dao.
NUM 13:13 Setur, te Maikelgo ogwa dao. Aga te Aser hani bidi dao.
NUM 13:14 Nabi, te Vopsigo ogwa dao. Aga te Naptali hani bidi dao.
NUM 13:15 Me Guel, te Makigo ogwa dao, aga te Gat hani bidi dao.
NUM 13:16 Mosesgo te hani tobolu bidi dabe te Kenan bulu tǫ sese sa sugi pomainu tagala palali. Tama agai te Hosia te Nungo ogwago nogi hasegelali. Tama agai aga te Josua poali.
NUM 13:17 Te Moses agai augwali tagala palainu, agai augwalibolo e tiwai po walali, “Dage pelama, te distrik Negev ela pelama, ugwadu bulu du dabeba piąo.
NUM 13:18 Dagego bugagia suiąo, tama dagego koneiąo, te mena tiwai bulu yaliwe koneagameo. Tama dagego suiąo, mena tama we bidi te bulude bidibawe weyu suiąo, te augwali bomai hani yaliwe, ma meni yaliwe, suiawe?
NUM 13:19 Tama me dagego bugagia mu suiąo, te bulu tǫ te dwai yaliwe, ma wiegi yai yaliwe suiąo. Te we bidi te bomai obo tomode bidibowe, ma olo obo meni yai hanude bidibowe, suao.
NUM 13:20 Tama bugagia suiąo, te tǫ ili elalubowe, ma meniwe? Me te dulu elalubowe, ma meniwe, suao. Tama dagego te bulude ni du wai dabe me selama sesiąo. Dage olo ma aselamu dao.” Mosesgo augwalibolo te po te ni wain du tau ebo gagalobo sogo te po augwalibolo mani.
NUM 13:21 Tama te bidi dabe augwali te bulu tǫ dabe tigidali mu sa susa biligi pali. Te giliga asobo badu wę meni sane bulu badu gagalama, te saut badu usu nigi pali, tama te hanu Rehopba saboligi pali, te hanu Hamatba pabo sunumi pąbadu te not badu.
NUM 13:22 Hasia augwali te distrik Negev sabolama, tama augwali te hanu Hebronba pali. Te Ahiman de Sesai, me Talmai hani, te Hebronde bidali. Augwali te hani sela te augwaligo wąį te Anak hani dao. Te hanu Hebron te gasa bidi hanigo bolo hasia nigai, tama te kibu be a naga olama si nosali te Isip hanigo te hanu Soan nigai dao.
NUM 13:23 Tialima, te Israel tobolu bidi dabe augwali te Eskol odogo yai buluba sabolama, tama augwaligo te ni wain du hauwa yai ni nologo deli togali. Te ni nologo sęgę mu yali, tama bidi deligo tolabo usu meni yani. Tama tibaso, bidi sigo ni palama dedage elama tolali. Te me augwaligo te ni fik du dabe me, pomigranet du dabe me, tama sali.
NUM 13:24 Nosali Israel dabego te odogo yai bulu nogi Eskol poali. Magi baso meni, te genuai bidi dabe augwaligo te pesagede ni wain du tede sai dao weyu.
NUM 13:25 Augwaligo te bulu bidi sese si sogo sa susa bilama, nosali augwali te Moses, me Aron, me te Israel we bidi dabe pageba ma aselayali. Augwali sese te bulu Kades te nai meni yai bulu Parande bidibadi. Tama te tobolu bidi dabego augwaligo suali nai po pusigi pali, tama augwaligo te sesali nai te we bidibolo waselali.
NUM 13:27 Tama augwaligo Mosesbolo e tama po wali, “Te nago dabolo sugi pao wali, te kantri bulu dago polo sugi pai dao. Tama te bulu tǫ wiegi yai mu elama, tǫ ili mu yai yali. Suao. Dago te bulu nai meba du sesali dao.
NUM 13:28 Tiali goli, te bulu bidi dabe augwali bomai bidi dabe mu bidama, augwaligo hanu dabe genuai mu dabe elama, tama bomai obo mu elaluali. Tama me dago te Anakgo wąį wai puluba dabe bidibo suali. Augwali te moni moni bidi dabe.
NUM 13:29 Te Amalek dabe te saut badu bidibo, te Negevde. Tama te Hit dabe me, Jebus hani dabe me, Amor hani dabe me, augwali te bulu du badu bidibo suali. Tama te Kenan dabe te genuai tamu ąį Mediterenian pąde bidibo, tama me badu te wę Jordan sesegede bidibo,” augwaligo te po wai.
NUM 13:30 Te Israel dabe augwaligo te tobolu bidi dabego po odama, augwali wi yali. Tama augwaligo Mosesbolo po hauwa wali. Tiali goli, tobolu bidi me deli, aga nogi Kalep, agai augwali daga bola sąyu e tama po wali, “Dage magi baso po hauwa wabawe? Megi da augwali dali hwįgi pelama, augwaligo tǫ sigi pinao. Magi baso meni. Dago bomo elalubao, tama dago augwa aiyaba elaluaibao, tama dago te tǫ saibao,” wali.
NUM 13:31 Tiali goli, te meba tobolu bidi dabe te Kalep dali te bulu sugi pali, te bidi dabe augwaligo te po wali, “Mu menio. Augwali bomo mu elalubao. Dago augwali dali hwįbo usu egobeo,” te po wai.
NUM 13:32 Tama tialima, augwaligo te Israel dabebolo te augwaligo suali bulu po tibo po ola mani. Augwaligo e tama po wali, “Te bulu tǫ te dwai mu dao,” wali. “Te dwasianu nai dabe naga holiyu, te we bidi nai habuge ebo. Tama tialima, te bulu da usu egobeo. Tama tigidali we bidi dago suali, augwali te dili bobobage yai bidi dabe mu.
NUM 13:33 Tama dago moni bobobage moni bidi dabe mu bidibo suali. Augwali te Anakgo hani dao. Dago augwali sulama, dago homugo tiali da te olo nai te kuli mano tiwai dao homu yali. Tama me ma, augwaligo da suali, te kuli mano tiwai tonani,” augwaligo te tobage tibo po wali.
NUM 14:1 Te we bidi dabego te tobolu bidi dabego po odama, te hulide augwali hǫą olama, tama augwali gela udubadi be posali.
NUM 14:2 Tama augwali sesego Moses de Aron si dali wado po wali. Augwaligo e tama po wali, “Te wiegi yai mu, da te Isipde me o e nai meni yai bulude isigi sogo da, usu mu igi dao.
NUM 14:3 Magi baso Genuai Bidigo da u buluba odasa painogo ebawe? Ma, da te buluba peyu da, teda da ela silama, tama augwaligo dago we dabe me wai dabe te kalabus bidi tiwai oda saibao. Ma, da Isipba ma peyu da, teda usu mu yaibao,” wali.
NUM 14:4 Tama augwa hasi po geninama ma weyu, e tama po wali, “Polo beda, dago tobolu bidi me deli sa munama, tama agai da Isipba ma kegasa pomainu inao,” wali.
NUM 14:5 Te we bidigo te po obaso, Moses de Aron si tobolu aiyaba basi giluali, tama te we bidi dabego augwali si suali.
NUM 14:6 Tama te Josua, Nungo ogwa, de Kalep, te Jefunego ogwa, augwali si te Kenan bulu sa sugi pali bidi si, augwali si te wali pode homu sęgę elama, augwa si ugwa pisąyali.
NUM 14:7 Tama augwali sigo te we bidibolo e tama po walali, “Te dago te sa sugi pali tǫ te wiegi yai mu dao.
NUM 14:8 Te Genuai Bidigo da dali wiegi yai homu eyu da, teda agai da te buluba odasa pelama, tama dabolo te tǫ ili hauwa elalubo tǫ dabolo mawaibao.
NUM 14:9 Dagego te Genuai Bidi dali dwai homu elama, agai po sela sąyu elama, tobolu gagea pigimio, tama dage te ude bidibo we bidi dali wi igimio. Magi baso meni. Augwali te dago bulu hasa tiwai dao. Dago augwali aiyaba elalubo bomai sę me egobeo. Magi baso meni. Genuai Bidi da dali bidiyu, agai augwaligo augwa tonalubo tibo god dabe polo dolalio. Tialima, augwalide wi igimio,” te bidi sigo te po wai.
NUM 14:10 Tiali goli, te Israel dabego te Kalep de Josua sigo po mu dao homu ebe. Tama augwaligo te bidi si masigi sąnama, augwali si ela muaibao po wali. Augwaligo te tama tiainogo ebadi, polo tama te we bidigo Godigo bomo yai ula te name ugwa be pedude dula sabo suali. Tama tibaso, augwaligo te bidi siba masigi sąbeo.
NUM 14:11 Tama Genuai Bidigo Mosesbolo e tama po wali, “Hauwa sogo mu te we bidigo eno po sela sąyu, tama augwaligo eno po mu dao homu ebeo. Eno augwali tomode wiegi yai sę hauwa yali, Tiali goli, augwaligo teba homu dąų wabeo.
NUM 14:12 Tialima, eno augwaliba te moni gasi dwai mu tagala palama, tama augwali dolomainu yaibao. Tiali goli, eno nage te bomai hani mego wąį te Israel hani edelama emainu ilaibao,” Godigo te po wai.
NUM 14:13 Tiali goli, Mosesgo Genuai Bidibolo e tama po walali, “Genuai Bidi, te nago naga bomogo te we bidi Isip buludu eba polo odasa asali dao. Tialima, nago te we bidi dolali da, teda te Isip dabego te sę yali po odaibao.
NUM 14:14 Tama augwaligo te bulude bidibo we bidi mebabolo te po walaibao. Te hanigo nage da dali bidibo po odali, tama nage haninama mu bidibo dao, te nago pǫ te ugwadu elalubadi, da dali bidibo dao. Tama me augwaligo nage te pǫde bidiyu, tama nage giligade polasa peyu, me hulide nage siade bidiyu ebo po augwaligo odai dao, te nage polasa peyu ebo po.
NUM 14:15 Tama tialima, nago naga we bidi tigidali sese tama eliyu da, te gasa we bidi hanigo nago genuai nogi odali bagego te e tama po waibao,
NUM 14:16 ‘Genuai Bidigo aga hani agai augwalibolo mawaibao wali te tǫba odasa pabo usu egobeo,’ te po waibao. ‘Tama tibaso, agai augwali te nai meni yai bulude ela muna silali dao,’ augwaligo nagede te tama po waibao.”
NUM 14:17 “Genuai Bidi, eno homugo nago te yaibao wali te sę yao, te nago genuai bomo dabolo ola mayu yao. Naga digi naga e tama po wai dao,
NUM 14:18 ‘Ena Genuai Bidi, eno sębę polo me ebo menio. Tama eno te we bidi godolo eyu, tama eno ena po tigidali sogo wali peyu ebo dao. Tama eno augwali dwai sę tigidali sela sąyu, me eno augwaligo hagoma homu ebo eno sela sąyu, tama ebo dao. Tiali goli, eno te dwai sę ebo we bidi dene iliyu, me eno te wai dabe me dene iliyu, me agai wąį wai dabe dene iliyu ela pelama, te namba 3 haniba saboligi peyu, me namba 4 haniba saboligi peyu, tama yaibao, te nosali pedalobo hanide.’ Nago tama po wai dao.
NUM 14:19 Genuai Bidi, nago da godolo eyu, tama nago da hobede eyu, tama tede nago me hasegelebo menio. Tama tialima, eno nagebolo hanalu obao, nago te we bidigo sęgę sela sąmainogo. Te augwali Isip bulu tagalama asobode yali gilama, me megi tama me ela asudu gilama yao,” Mosesgo te po wai.
NUM 14:20 Genuai Bidigo Mosesgo po odali. Tama agai te po wei ponoyu, e tama po wali, “Eno augwaligo sęgę sela sąwaibao. Te nago enabolo hanalu wali tiwai tama yaibao.
NUM 14:21 Tiali goli, ena tigidali sogo mu bidibo dao, tama eno bomo me ula tigidali tǫde elalubo dao. Tama tialima, megi eno e bomai po wabao.
NUM 14:22 Te eno po odoyu wali pisąwai we bidi augwali te eno augwalibolo mawaibao wali te tǫ eno augwalibolo magobeo. Augwaligo te eno bomo yai ula suali, te augwalibolo eno ola mani, te ena augwali dali bidibao. Tama me augwaligo eno te Isipde, me nai meni yai kemi sane bulude yali sę augwaligo polo suai dao. Tiali goli, hauwa sogo mu augwaligo ena dali tobolu gagea pelama, tama augwaligo eno po wali pabeo.
NUM 14:23 Te we bidi deli me augwali eno dagego wąį dabebolo mawaibao wali te tǫba augwali munu me pogobeo. Mu menio.
NUM 14:24 Tiali goli, eno sę bidi Kalep, agai te gasa homu me elalubao, tama agai eno homu kolesaga wali mu pabo. Tama tibaso, eno aga te agai sugi pali te buluba eno odasa paibao. Tama aga tede bidaibao. Tama agai wąį wai pulubago te bulu saibao.
NUM 14:25 Te Amalek hani me te Kenan dabe bidibo te bulu odogo te badi. Tialima, do dage sese e bulu tagalama, tama begasa peyu, dage te nai meni yai bulu kemi sanedu pelama, te tamu ąį Retsi te Akaba bulu badi, te badu piąo,” Genuai Bidigo Mosesbolo te po wai.
NUM 14:26 Tama Genuai Bidigo Moses de Aron sibolo e tama po walali,
NUM 14:27 “Hauwa sogo te dwai we bidigo ena dali wado po wai dao. Eno polo odama, tama eno augwaligo te po hagela mu yalio. Nisu mu augwaligo te po wabo mu tagalogowe?
NUM 14:28 Tiali megi da, eno te po augwalibolo pusa mao, ‘Ena Genuai Bidi, ena tigidali sogo mu bidiyu, eno po mu dage dali e tama wabo dao. Eno odali, dagego dage te bulude isaibao po wali. Tama tiali, megi da eno dagego te homu yali po tiwai tama yaibao.
NUM 14:29 Dage sese isila pelama, tama dagego tigi pulu dabe te kemi sane bulude olo tede munalua paibao. Dagego wado po olama, ena dali po hauwa mu walio. Tama tibaso, te bidi dabe te kibu be nogo si, sągą si, 20 edelai bidi dabe, augwali te buluba pogobeo.
NUM 14:30 Eno dage sese te buluba bidigi pomainu po wai goli, megi da dage sese te buluba pogobeo. Kalep de Josua si naga paibao.
NUM 14:31 Dagego te po wali dao, “Te bulu bidi dabego da dali hwįnama, da ela silama, dago wai saibao,” po wai dao. Tiali goli, menio. Eno te wai puluba dagego te hagela yali te buluba odasa paibao. Tama augwaligo selama, tama augwali tigidali sogo tede bidaibao.
NUM 14:32 Tiali goli, dage da, me usu egobeo. Te dage da, te olo kemi sane bulude isaibao.
NUM 14:33 Tama dagego wai puluba dabe te kemi sane bulude bidi sese si 40 kibu bede te bulude subigila tama bilaluaibao, te dage sese isa silibo siba tama usu naibao. Dagego ena te wego aga bidi tagalama subigila penanide soyu, tama pabo tiwai te yali dao. Tama tibaso, te wai dabego dagego te dwai sę yalide sęgę tolomainao.
NUM 14:34 Dage te buluba biligi pelama, te bulu susa bilali te bidi sese si 40 bubugade susa bilai da weyu. Tialima, dagego dwai sę yali te sęgę te kibu be bidi sese si te 40 kibu bede te dagego dwai sę yali te wei ponaibao. Eno deli kibu be te dage te bulude bilali deli deli bubuga usu naibao. Tama te tibogo dagego konemainu yaibao, eno te po sela sąbo kolesaga hagela ebo dagego koneaibao.
NUM 14:35 Eno mu po mu te wabao, eno dage tigidali we bidi eno po sela sąnama dage te deli homu naga yali, te we bidi dage sese tama eno silaibao, dage te ena tudi ola mani, te we bidi dage. Dage deli deli te kemi sane bulude isila paibao. Ena Genuai Bidi, eno po polo wali dao,’ te po augwalibolo pusao.” Genuai Bidigo Mosesbolo te po wai.
NUM 14:36 Te Mosesgo te bulu sa susa biligi pomainogo te taga palali, te bidi dabe augwali ma asiyu, augwaligo te we bidibolo tibo po walagasiyu, tama e tama po wali, “Te bulu te dwai mu dao,” wali. Tama te wali pogo te we bidi tigidali Genuai Bidi dali sębę emainogo ilalio. Tama tialima, Genuai Bidigo te bidi dabebolo moni gasi mu emainogo ilama, te ili po wali bidi dabe augwali bolo hasia polo isali.
NUM 14:38 Te bulu sugi pali bidi dabe augwali polo isila pali. Te Kalep dali Josua dali si da isibeo. Augwali si bugagia bididuali.
NUM 14:39 Mosesgo Genuai Bidigo te wali po Israel dabebolo pusa silibo si, augwali gela dwai mu ola pali.
NUM 14:40 Tama te sogo kigamu hulide mu augwali hogodama, Mosesbolo e tama po wagi pali, “Odao. Dago koneani, dago te dwai kolesaga yalio. Tiali goli, megi da, dago homugo Genuai Bidigo dabolo te wali te tǫba da pabo homu ebao.” Tama augwali te bulu duba hogodasa pali, te Kenan dabe dali hwįgi painogo yali.
NUM 14:41 Tiali goli, Mosesgo te po wali, “Mu menio. Magi baso dage po sela sąnama, tama Genuai Bidi da hagoma yainogo ebawe? Tama dage peyu da, teda dagego augwali aiyaba elalubo usu egobeo.
NUM 14:42 Dage pigimio. Magi baso meni, Genuai Bidi dage dali me bidibeo. Tiyu, dage pabo digi te boi bidi dabego dage aiyaba elaluaibao.
NUM 14:43 Ma, dage peyu da, te dage Kenan dabe dali, me Amalek dabe dali hwįyu, tama augwaligo dage ela silaibao. Genuai Bidi dage dali te hwįbode bidigobeo. Magi baso meni. Dage aga tudiba sąnama, tama aga wali me pisąma ebaso,” wali.
NUM 14:44 Mosesgo te po augwalibolo mani, tiali goli augwaligo po odobeo. Augwali te bulu duba hogodasa pali. Tiali goli, Moses augwali dali pabeo. Aga te bidibo sili nigali digi bididuali. Tama me augwaligo te Godigo Dąų Wali Bomai Po Munolubo Halobage sabeo. Te me augwaligo te bidibo pesagede tagalama pali.
NUM 14:45 Tiali, te Israel dabe augwali pali, tama te Amalek dabe me Kenan dabe augwali bulu du taga solama, edaba dulama, te Israel dabe dali hwįagasali, tama augwali aiyaba elaluali. Tama augwaligo te Israel dabe pobeasa pelama, te hanu nogi Hormaba usu nigi pali.
NUM 15:1 Genuai Bidigo Mosesbolo e po te Israel dabebolo mao po wali. Agai e tama po wali, “Te dage eno mawainogo ebo te buluba pabo sogo da, tama dage tede bugagia dualaluyu,
NUM 15:3 tama dagego ena Genuai Bidiba ofa nai ulainogo da, teda duga kau kibu, ma sipsip kibu, ma meme kibu siyu yagameo. Tama dagego te iside sese tama ulubo ofa eyu, me duga dąų wali po usu nabo ofa eyu, me genuai lotu wabo sogo me ofa eyu, me duga homugo ofa ebo me, eno te dagego wiegi yai denami ebo ofa dabe enabolo ebo ofa eno godolo ebo dao.
NUM 15:4 Te bidi me deligo te isigo mu ula silabo ofa yabo sipsip kibu ma meme kibu omai sesiyu, tama agai ena Genuai Bidibolo mawainogo da, teda agai te kilogram deli yai plaua agai te oliv wel lita deli dali begelai plaua sesiyu, te isigo wit ulubo ofa emainao.
NUM 15:5 Me te wain ąį lita deli yai me siyu, tama elama, tama agai te nai dabe agai te sipsip kibu dali, ma meme kibu dali, eyu emainao,” wali.
NUM 15:6 “Ma agai sipsip kibu omai deligo ofa eyu da, teda agai te plaua kilogram si yai siyu, me oliv wel lita deli elama, habu siyu elama, taluai siyu elama,
NUM 15:7 tama me agai lita deli wain wę selama, habu siyu tama elama, te omai sipsip kibu dali ofa emainao. Te tobage wiegi yai denami ebo ofa eno godolo ebo dao.
NUM 15:8 Ma, te bidi me deligo te omai bulmakau sesiyu, te isigo sese ula silibo ofa uluyu, ma te dąų wali po usu nubo ofa uluyu me, ma homu deliba dąų wabo te ofa ulainogo da,
NUM 15:9 teda agai te kilogram sela yai plaua te lita si yai oliv wel dali selama, taluao.
NUM 15:10 Me agai te wain wę lita si yai siyu, tama elama seselama, tama te nai dabe te kau kibu omai dali ofa yao. Ena Genuai Bidi, eno te tobage wiegi yai denami ebo ofa eno godolo ebo dao,” tama wali.
NUM 15:11 “Dagego te tobage plaua, me oliv wel, me wain tama enabolo ofa iyąo, te tigidali deli deli kau kibu omai dali me, sipsip kibu omai dali me, sipsip kibu gǫų, dagego enabolo ofa ebo dabe tama tiao.
NUM 15:12 Ma, dagego kau kibu si ma sela ofa eyu da, te dagego te deli kau kibu usu nama plaua, me wel, me wain, te deli deli hasa usu nama, ofa yao.
NUM 15:13 Tama te tigidali sogo dage Israel dabego Genuai Bidi eno godolo ebo denami ebo ofa dagego me yainogo da, teda dagego te plaua, me wel, me wain, te ofa dali tama eyu yao.
NUM 15:14 Ma, te gasa bulu bidi aga dage dali pęwadage sogo, ma dagego bulude mu bidainu bidibo bidigo Genuai Bidi eno godolo ebo ofa yainogo ebaso da, teda agai emainao. Te bomai po tigidali sogo elalua pidu piduaibao, tama te wąį nosali asobo te wąį dabeba mu tama usu nigi paibao. Tiali goli, agai te ofa ebo bomai po wali pomainao, te dage Israel dabego ebo kolesaga ebo tiwai yao.
NUM 15:15 Te bomai po deli naga elalubao, te Israel dabe dage me te gasa bulu bidi dabe dagego wali pabo po elalubao. Te bomai po tigidali sogo elalua pidu piduaibao, tama te wąį nosali asobo te wąį dabeba mu tama usu nigi paibao. Magi baso meni, ena Genuai Bidi eno suali, dage Israel dabe me gasa hani bidi dabe deli mu tama yai yalio.
NUM 15:16 Dage Israel dabe me gasa bulu bidi dabe me, dage deli kolesaga naga yao, te ofa ebo kolesaga.” Te po wai.
NUM 15:17 Genuai Bidigo te po Mosesbolo
NUM 15:18 te po Israel dabebolo magi pao po wali. Agai e tama po wali, “Megi da, eno dage mawaibao wali te tǫba te odasa pobao. Tama nosali dage tede bugagia dualaluaibao.
NUM 15:19 Tama dagego nai gegelama, tama nai tau yai saibao, tama dagego tuainogo da, teda dagego te nai dabe meba selama, enabolo ofa tiwai maiąo.
NUM 15:20 Te hasia mu dagego te hasia plaua witgo bret nigiyu da, dagego bret meba selama, enabolo ofa tiwai maiąo. Te witgo nai mu sabo pesagede mu selama, enabolo geside mu ofa yao. Te dagego te nai mibo pesagede mu selama, mao.
NUM 15:21 Dage me, duga wąį nosali pedalobo hani, dagego te hasia mu te ulubo te bret selama, tama enabolo te ofa tiwai maiąo,” wali.
NUM 15:22 “Dagego te bomai po Mosesgo nogode sali, tama nosali pedalobo hani dabego me saibao. Tiali goli, bidi mebago kuna konesąma, te bomai po meba bolaibao.
NUM 15:24 Te Israel dabego kuna homugo konesąma, te bomai po meba bolobaso da, teda augwaligo kau kibu deli ofa emainao, te isigo mu ulu silibo ofa tiwai emainao. Me augwaligo te wit ulubo ofa me eyu, me te wain gelebo ofa te kau kibu dali emainao. Tama me augwaligo te meme kibu omai te sęgę sela sąbo ofa emainao. Tama eno te ofa denami ebo godolo yaibao.
NUM 15:25 Te pris bidigo te ofa te we bidi tigidaligo sęgę sela sąbo ofa emainao, tama ena Genuai Bidi eno augwaligo sęgę sela sąwaibao. Magi baso meni, augwaligo homugo kuna kone palisąma, augwaligo eno bomai po bogi pai yaibaso. Tama augwali augwa sęgę sela sąyabo ofa seselama, enabolo mobaso,
NUM 15:26 eno te Israel we bidi tigidaligo sęgę sela sąyu, me te gasa bulu bidi tede bidibo we bidigo sęgę me sela sąwaibao. Te da, te augwaligo eno bomai po meba sela sąwani da,” wali.
NUM 15:27 “Ma, te bidi me deligo homugo bugagia konesąma dwai sę yaibaso da, teda agai te meme kibu so te kibu be deli yai selama, ofa emainao, te sęgę sela sąbo ofa tiwai emainao.
NUM 15:28 Tama Genuai Bidi eno gedude pris bidigo te meme kibu selama, tama te bidigo sęgę sela sąbo ofa yao. Te pris bidigo te tama tiyu da, teda eno te bidigo sęgę sela sąwaibao.
NUM 15:29 Te dagego homugo bugagia konesąma dwai sę yaibaso da, te dagego te bomai po deli naga wali piąo. Te Israel dabe, ma te gasa bulu bidi duga bulude bidibo me, tagala.
NUM 15:30 Tiali goli, bidigo me, ma wego me ena dali tobolu gagea pelama, dwai sę ebaso da, teda agai ena Genuai Bidi posobo po tiwai te wabao. Tama tialima, dagego aga elama isilao. Te aga te dage Israel dabe, ma gasa bulu bidi yaibaso me, tagalao, te dagego bulude bidibo me tagalao.
NUM 15:31 Magi baso meni, te we ma bidi aga digi aga tobolu gagea peyu, aga homugo eno bomai po te sela sąbao. Tama tibaso, dagego aga ela muao, te aga dagede dao,” te po wali.
NUM 15:32 Te Israel dabe augwali te nai meni yai kemi sane bulude bidibadi, te bidi me deligo Sabat sogo isi sabo suali.
NUM 15:33 Tama augwaligo te bidi Moses de Aron si ebadi, me te Israel we bidi tigidaliba odasa pali.
NUM 15:34 Tama augwaligo aga kalabus iliyu bolo yali. Magi baso meni, augwaligo konebe, augwaligo aga magi sę egowe te augwaligo konesąbaso.
NUM 15:35 Tama Genuai Bidigo Mosesbolo e tama po wali, “Dagego te bidi elama isilao,” po wali. “Aga te dage bidibo pesage tagalama, buluba ogwaba odasa pelama, tama masigi dabe aga tigiba sąnama, aga elao, tama isibaso tagalao,” wali.
NUM 15:36 Tama te we bidi dabe augwaligo Genuai Bidigo po wali peyu, augwaligo te bidi bidalubo pesage taga peyu, odasa pelama, bulu badu augwali aga masigigo enama, isali.
NUM 15:37 Te Genuai Bidigo Mosesbolo Israel dabebolo e tama po pusao po wali,
NUM 15:38 “Dagego te pęwadage hobi bono dų selama, tama duga ugwa sabi me si me si badu gebelabo nigilama gebelao. Te hobi dų deli delide dagego sisi yai bono hobi deli deli muyu ela pao. Te dagego me duga wąį nosali pedalabo bagego te tama tiao.
NUM 15:39 Tama dagego te bono dage subo sogo, dagego eno dagebolo mani bomai po tigidali ma koneagameo. Tama dagego te bomai po wali piagame. Tama tiyu, dagego ena gegeda pelama, duga homugo bilama, dwai sę dabe me egobeo.
NUM 15:40 Te hobi dage dabego dagego eno bomai po kone palama, wali pomainogo yaibao, tama dage eno we bidi mu bidaibao.
NUM 15:41 Ena Genuai Bidi, ena dagego God dao. Eno dage Isip bulude selama, odasa asai dao, te ena dagego God tigidali sogo bidainogo. Ena God, dagego Genuai Bidi, eno po polo wali.” Te po wai.
NUM 16:1 Te Kora, te Ishargo ogwa, te Kohat hani bidi, te Livai bidi, aga dali me te Ruben hani bidi sela augwaligo Moses dali dobo kolesaga yali. Te bidi selago nogi te e dao: Datan me Abiram, te Eliapgo ogwa si, me On te Peletgo ogwa. Te me si me si bidigo te Israel dabe tobolu bidi te 250 selama, augwali hodobo tama te dwai tobolu gagea pabo kolesaga yali. Te Israel dabe augwaligo te tobolu bidi dabe sa muai, te tigidali we bidigo gedude nogi elaluai dao.
NUM 16:3 Tama te bidi dabe augwali sisinagaselama, Moses de Aron si pageba sisinagaselama, tama augwali sibolo e tama po wali, “Odao, da tigidali tama te Genuai Bidigo dao, te dage si naga menio. Tama Genuai Bidi da tigidali dali bidibao. Tama tialima, dage sigo magi baso duga nogi ugwaba selama, da tonalubawe? Dage sigo kolesaga dolo menio,” tama po wali.
NUM 16:4 Teda Mosesgo te po odama, tǫba degasa dulama, gedu haluasa po wali.
NUM 16:5 Tama nosali aga hodaluama, aga Kora dali me Kora wali pabo bidibolo e tama po wali, “Odao. Do kigamu Genuai Bidigo ola mawaibao, te mena bidi te agai mu dawe, te dago suaibao. Te mena bidi te agai sa muaniwe, te suaibao. Te agai augwali naga te alta pageba pąba mu pomainu ebowe, te suaibao.
NUM 16:6 Teda Kora, nage dali, naga hani dali, dagego e tama tiao. Te do kigamu dagego te dwasianu plet selama, te denami ebo te pauda ulabo selama,
NUM 16:7 tama te dwasianu isi dage munama, tama te wiegi yai denami ebo pauda te pletide munama, sesao. Tama dagego altaba sela pelama, Genuai Bidigo geduba dolalugi pao. Tama Genuai Bidigo da tomode mena bidi agai sa muai yaliwe sueibao, te agai sę emainogo. Dage Livai dabe, dagego naga te dolo isąwai kolesaga ebo,” wali.
NUM 16:8 Tama Mosesgo Korabolo po geninama weyu, e tama po wali, “Livai dabe, dagego odao.
NUM 16:9 God, da Israel dabego Genuai Bidigo da, te dago we bidi tomode dage dįą sai dao. Tama dage naga agai sę eyu, tama agai be pąba pomainu yai dao. Me te we bidigo gedude dolaluyu, augwaligo ofa sę tau siyu dolalumainu yai dao. Godigo dage me te gasa Livai dabe dagego agai sę emainogo sa muyu, tedali gasagi yai muai dao, te nogi elalubo sę emainogo. Tama, mena tama tiali te duga gedude te sę te olo nai tiwai dawe? Tama tialima, dage me te pris me nigainu ebawe?
NUM 16:11 Tama Aron ma mena tiwai bidi da weyu, dagego aga dali wado ebawe? Aga te olo bidi dao. Tialima, nage dali, naga hani dali, dagego Aron dali wado ebeo. Menio. Dagego God dali wado ebao, Genuai Bidi dali.” Mosesgo te po wali.
NUM 16:12 Tama Mosesgo te Datan de Abiram si asao wabo po ola tolali. Tiali goli, augwali sigo po wei ponoyu, e tama po wali, “Da si asogobeo,” po wali.
NUM 16:13 “Nago da wiegi yai bulu Isipdu odasa e nai meni yai buluba odasa aselama, da ela isilainu asai dao. Tama nago homugo te da, te olo sę dawe? Tama megi me nago da tonaluainuwe?
NUM 16:14 Nago da te wiegi yai buluba me odasa pai menio, te dago nai gi dabe elaluyu, me wain gi dabe elalu emainu odasa pai menio. Nago homugo da te kolesaga meni yai, tama nago da ili po ola mawaibawe? Nago usu egobe, tama tibaso da si me asogobeo,” te bidi sigo te po ola tolali.
NUM 16:15 Mosesgo te po odama, aga sębę elama, tama Genuai Bidibolo e tama po walali, “Nago te bidi hani dabego sesali ofa nago selamu dao. Augwaligo te po wali, eno augwali subigila tolalubo po wali. Tiali goli, eno augwaligo kibu donki deli me wi siyu, me augwali dali dwai kolesaga me eyu me ebeo. Mu menio,” wali.
NUM 16:16 Tama Mosesgo Korabolo e tama po walali, “Do nage me te nage wali pabo 250 bidi, dage te Godigo name ugwa beba asiąo. Tama Aron me tama asaibao.
NUM 16:17 Tama dage deli deligo isi dabo nogobo plet te wiegi yai denami ilibo pauda tede munama, tama Genuai Bidibolo agai altaba aselama, ofa yagasao.” Te po wai.
NUM 16:18 Tama te sogo kigamu te bidi dabe augwa te wiegi yai denami ilibo te pauda ulubo te plet sesali. Tama augwaligo te plet dabede te isi dage munama, tama te wiegi yai denami ebo te pauda te isi daide muani. Tama augwali te Moses de Aron si dali te Godigo ugwa be sunumiba doligi pali.
NUM 16:19 Nosali Korago te we bidi sese sisinama, tama augwali te Moses de Aron si bidiboba hobolu gelama, augwali si tonaluali. Augwali si me te ugwa be sunumide dolaluali. Augwali polo sina silibo si, Genuai Bidigo agai ula te Israel dabe tigidaligo sumainogo haninama pebili dilide mu yali, tama tigidali Israel dabego suali.
NUM 16:20 Tama Genuai Bidigo Moses de Aron sibolo e tama po wali,
NUM 16:21 “Dage si gedao. Te we bidi taga pao. Megi tama eno te we bidi ela silaibao,” wali.
NUM 16:22 Tiali goli, Moses de Aron si gesabidi tǫba elama, degasa duliyu, augwali sigo Genuai Bidibolo e tama po wali, “God, nago deli naga te tigidali tǫde bidibo we bidi nigilama, augwali te bidibao. Te bidi deligo dwai sęgę sai madi, tama nago tigidali Israel we bidi ela silaibawe?”
NUM 16:23 Tama Genuai Bidigo Mosesbolo e tama po wali,
NUM 16:24 “Te we bidibolo te Kora, me Datan, me Abiram, augwaligo ugwa be tagalama, digibulu obanu gana pao po wao.”
NUM 16:25 Tama Moses de Israel dabe tuni bidi dabe augwali te Datan de Abiram si sugi pali.
NUM 16:26 Tama Mosesgo tigidali we bidibolo e tama po walali, “Dage tigidali ugwanu kila sesa piąo, te dwai bidi dabego ugwa be pąde, tama augwaligo nai dabeba me dagana selama me elamuo. Tiyu, dage augwa pąde bidiyu da, augwaligo sęgę dage me isabuo.”
NUM 16:27 Tama te we bidi augwaligo odama, augwali ugwaba kila selama, Kora, me Datan, me Abiramgo ugwa be dabe taga pali. Tiali goli, te Datan de Abiram si augwa ugwa be buluba aselama, augwa be sunumiba dolaluagasali. Tama augwa we wai dabe me augwali dali dolaluali.
NUM 16:28 Tama Mosesgo te we bidibolo e tama po wali, “Te megi magi nai me pedalainu ebo dagego megi sueibao, tama dagego koneaibao, Genuai Bidigo digi ena taga palama, dage tonalumainu yai dao. Eno ena homu kolesagago me ebeo. Mu menio.
NUM 16:29 Megi da, te bidi dabe isaibao. Ma, Godigo augwali elisąma ebaso da, tama augwali olo dwai isibaso da, teda dagego koneagameo, te Genuai Bidigo agai sę emainogo ena tagala palobe, te homu yaibao.
NUM 16:30 Tiali goli, Genuai Bidigo gasa sunumi medu te bidi dabe isilibaso da, te e tiwai elama, te tǫ tomode mu peda pelama, tama te bidi dabe augwa doado bage dali te tǫ dedageba gealubaso da, tama augwali bidibadi te isai bidigo buluba pobaso da, teda dagego koneaibao, te bidi dabe augwaligo te Genuai Bidi tudi ola menama, agai po sela sąwali dao,” te po wali.
NUM 16:31 Mosesgo po ola silibo si, polo tama te Datan de Abiram si dolaluali te tǫ tomode peda pelama, genuai tǫ dedage mu yali.
NUM 16:32 Tama te Datan, me Abiram, me Kora, me aga dali bidali bidi dabe, augwa we wai puluba, me augwa doado bage sese tama, te tǫ dedageba tula pelama, tama te tǫ ma madua sali, tama te bage mesega sali.
NUM 16:33 Tialima, augwali isisąbadi augwali augwa we wai, me augwa doado bage dali te isai bidigo buluba pali, tama te tǫ ma madua selama, augwali mesega sali, tama te we bidi dabego augwali munu me ma subeo.
NUM 16:34 Te augwali te dedageba tulaluali sogo, augwali hǫą dwai mu wali, tama te Israel we bidi te pąde bidali we bidi augwaligo te po wali, “Da wi polo pinao, tiyu da te tǫ peda peyu, da me te tǫ dedageba tola pelama, da me hagayabuo.” Tama tibaso, augwali wi polo pali.
NUM 16:35 Tama Genuai Bidigo isi tagala palama, te 250 bidi dela silali, te denami wiegi yai ebo pauda ulama ofa yali bidi dabe.
NUM 16:36 Nosali Genuai Bidigo Mosesbolo e tama po wali,
NUM 16:37 “Te pris bidi Arongo ogwa Eleasarbolo te isigo dali te bidi dabego bras plet sao, tama nage pageba sesao, te po agabolo wao. Tama nosali nago selama, digibulu gana ma pelama, tama te pletide elalubo isi dabe buluba sąsąyao. Magi baso meni, te plet dabe te eno nai dabe mu dao, tama habu selai nai mu dao.
NUM 16:38 Te plet dabe te bidi dabe te Genuai Bidi eno altaba pali sogo habu selai nai pedelai dao. Tama augwaligo te wiegi yai denami hano holobo ofa yai dao. Tama tialima, te dwai sęgę selama, isai bidi dabego plet seselama, tama elama, tama olo kapa dage tiwai pedalumainao. Tama te bras kapago te alta mesegelao. Te Israel dabego te brasgo te alta halualubaso, augwaligo koneaibao. Tama augwaligo te bidi dabego yali kolesaga tiwai egobeo,” te po wai.
NUM 16:39 Tama Mosesgo te pris Eleasarbolo te po wabo si, te Eleasargo te plet dabe sali. Tama bidi mebago te plet halubo si, te plet te bras kapa sawali dage tiwai pedelali, te alta haluabo kapa tiwai pedelali.
NUM 16:40 Te halubo nai te Israel dabego homu dąų walabo dao. Tama augwaligo koneaibao, te Arongo hanigo naga te altaba pelama, te wiegi yai denami hano holobo pauda te Genuai Bidigo gedude uluyu yaibao. Ma, te gasa olo bidi dabego te tobage ofa ebaso da, Genuai Bidigo aga te Kora aga hani dali dolali tiwai aga hani dali dolaibao. Tama Eleasargo te Genuai Bidigo Mosesgo penanedu wali po wali pelama, te sę dabe dolo tama yali.
NUM 16:41 Te sogo bidama me sogo bubugade, tigidali we bidigo Moses de Aron si dali wado po wali. Augwaligo e tama po wali, “Dage sigo Genuai Bidigo we bidi meba elalio.”
NUM 16:42 Augwali sese polo sisinani, te Moses de Aron si dali wado po wainogo. Tama augwali begelama, Godigo ugwa beba tonani, tama augwaligo suali, pǫgo te ugwa be mesega sai suali. Tama Genuai Bidigo ula haninama mu ebo suali.
NUM 16:43 Tama te Moses de Aron si te ugwa be sunumiba doligi pali.
NUM 16:44 Tama Genuai Bidigo Mosesbolo e tama po wali,
NUM 16:45 “Dage si te we bidi pagede gediąo, pelama, te we bidi taga pelama, digibulu gana doligi piąo. Tama polo tama eno augwali dolaibao,” wali. Augwali sigo te po odama, augwali si gesabidi aiyaba begelama, tǫba degasa dulali.
NUM 16:46 Tama Mosesgo Aronbolo e tama po walali, “Te wiegi yai denami yai pauda ulubo plet sao. Tama te altade isi dage me selama, nago te pletiba muao. Tama wiegi yai denami ebo pauda selama, tama te isi daide muao. Tama te we bidi pageba polo sela pelama, sęgę sela sąbo ofa igi pao, tama augwali Godigo gedude wiegi yai pedalaibao. Magi baso meni, Genuai Bidigo augwali dali sębę me elama, genuai gasi dwaigo te we bidi dolobo gagalali,” wali.
NUM 16:47 Tama Arongo Mosesgo po wali pali, tama agai te wiegi yai denami hano ebo ofa ulubo plet sali, tama aga te we bidi sisąlubo tomoba udayali. Tama agai suali, te gasi dwai te we bidi tigiba polo pedalai suali. Tama tibaso, agai te wiegi yai denami hano holobo te pauda te pletide munama ofa yali.
NUM 16:48 Tama Aron te we bidi isali, me bidibo we bidi tomode dolaluyu, te ofa yali. Agai te tama tibo si, te gasi silali.
NUM 16:49 Te 14,700 we bidi te gasigo isali. Tiali goli, augwaligo te Kora dali isali te we bidi dali nedebeo, te 14,700 we bidi dali nedebeo.
NUM 16:50 Te gasi silibo si, Aron aga te Godigo ugwa be sunumiba Moses pageba ma asali.
NUM 17:1 Te Genuai Bidigo Mosesbolo e tama po walali,
NUM 17:2 “Te Israel dabebolo te 12 te tolasa bilibo dono mao po walao. Te deli deli hani wąį tobolu bidide sao. Tama nago deli deli tobolu bidigo nogi te deli deli donode asęao.
NUM 17:3 Tama Arongo nogi te Livai hanigo donode asęao.
NUM 17:4 Tama nosali nago te dono dabe sisinama, eno ugwa bede te Dąų Wali Bomai Po Munalubo Halobage pąde ena dage dali pąba sisinagaselama, po mibo pąde wialagalao.
NUM 17:5 Tama te bidi eno sa muani bidigo ni dagede te kulubi holaibao. Tama augwaligo koneaiba, te bidi te pris sę emainogo, eno sa muai te yabao po waibao. Tama eno te tama ebo kolesagago te Israel dabego penane paliaibao, te augwaligo nage dali wado yabo sunumi paliaibao, te augwaligo megi nage dali ebo tiwai egobeo,” Genuai Bidigo te po wai.
NUM 17:6 Tama te po Mosesgo Israel dabebolo pusubo si, te deli deli tobolu bidi dabego dono Mosesbolo mani. Te deli deli dono te deli deli hanigo dao, te 12 hani wąį usu nama, tama augwaligo Aron nogi asęai dono me te nogo si olama si dono dali muani.
NUM 17:7 Tama Mosesgo te dono dabe selama, te kontrak halobage pąde muani, te name ugwa be tomode.
NUM 17:8 Tama do Moses te ugwa be tomoba tula pali. Tama agai suali, te Aron nogi asęai te dono suali, te Livai hani magi elama muani, te donode te kulubi holama, plaua walama, du walai suali, te ni amon du walama, tama te ni du polo tau yai suali.
NUM 17:9 Tama Mosesgo te dono dabe sela pelama, buluba solama, te Israel dabebolo waseligi pali. Augwaligo sula silibo si, tama te tobolu bidi dabe augwa dono dabe ma sagasiyu tama yali.
NUM 17:10 Tama Genuai Bidigo Mosesbolo e tama po walali, “Te Arongo nogi asęai te dono selama, te ugwa be tomoba pelama, te kontrak halobage pąde mugi pao. Te aga tede munaluyu, te dwai kolesaga ebo we bidigo homu kolesaga elama konemainu ilaibao. Tama tego augwaligo penane paninama, tama augwaligo ena dali wado po me wagobeo. Tama eno augwali me elama isiligobeo,” wali.
NUM 17:11 Teda tama Mosesgo te Genuai Bidigo walali po tiwai wali pelama tiali.
NUM 17:12 Mosesgo te sę ela silibo si, te Israel we bidigo agabolo e tama po walali, “Te mu tama, megi da, da dola silaibao. Megi da, da sese hagala silaibao.
NUM 17:13 Te da hani bidi me te Godigo ugwa be pąba pobadi me tagala. Teda Godigo aga elama isilaibao. Tama tibaso, da tigidali tama isaibao,” augwaligo te po wai.
NUM 18:1 Genuai Bidigo Aronbolo e tama po walali, “Te nage, me Livai dabe, me nago ogwa dabe, dagego eno ugwa bede sę dolo isąma ebaso da, teda duga digi geda muani dao, tama te sęgę duga tolaibao. Tiali goli, ma nage naga ogwa dabe dagego te pris sęde dolali da, teda dage naga te sęgę saibao.
NUM 18:2 Tama naga hani bidi naga sao, te augwali te Livai bidi hanigo bidi dabe sao, naga wąį dabe, tama augwali nage dali sę elama, nage tau saibao, te nage naga ogwa dabe dali eno ugwa bede sę ebo sogo.
NUM 18:3 Augwaligo te nago mabo sę me eyu, me augwa sę me te ugwa bede yao. Tiali goli, augwaligo te Tedali Gasagi Yai Be Habude munalubo nai me, ma te altade elalubo nai dabe, augwaligo nogo me dįąnamu dao. Ma, augwaligo nogo toyu da, teda nage me augwali dali isaibao.
NUM 18:4 Te Livai hani dabe naga eno ugwa be tomode sę emainao. Tiali goli, te bidi dabe eno sa musiąma yali bidi dabe, augwali nage dali sę egobeo.
NUM 18:5 Nage me, nago ogwa dabe dagego naga eno te habu selai be tomode sę eyu, me altade sę eyu, iyąo. Tama tiyu da, eno dage dali sębę elama, dage Israel dabe me ma dologobeo.
NUM 18:6 Odao, ena digi eno nago hani sa muai dao. Te Livai dabe te Israel hani tomode eno dįą selama, tama eno augwali nagebolo me nago ogwa dabe dagebolo mawai dao, te wiegi yai nai tiwai dao. Te bidi dabe augwali eno mu dao, te augwaligo eno ugwa be tomode sę emainogo.
NUM 18:7 Tiali goli, nage dali nago ogwa dabe dagego naga te pris sę eyu, me te altade sę eyu, me te Tedali Gasagi Yai Mu Be Habude sę eyu, tama iyąo. Eno te pris sę dagebolo te wiegi yai nai tiwai tama mawai dao. Tama tialima, te pris sę, me altade sę, me te Tedali Gasagi Yai Mu Be Habude sę, te dagego sę mu dao. Ma, te bidi me aga eno sa musiąwai bidi aga te sę yainogo asobaso da, teda dagego aga ela muiąo,” Genuai Bidigo te po Aronbolo wai.
NUM 18:8 Tama Genuai Bidigo Aronbolo po ma weyu, e tama po wali, “Odao, eno digi eno te hasa mi dage dabe te we bidi iside ulisąma enabolo masiąma yali te nagebolo mobao. Te ofa yali nai mi dage dabe te nagebolo me nago wąį hani dabebolo tigidali sogo mu mabo dao, tama dagego tuiagameo.
NUM 18:9 Te ofa nai dabe te tedali gasagi yai nai mu dao, te eno nai mu dao weyu, tama augwaligo ulisąma yali te dabe dage pris dabego siąo. Te da te wit ulubo ofa, me te sęgę sela sąbo ofa, me te nai dabe wei ponobo te ofa dao. Te we bidi dabego enabolo mabo te nai dabe eno ofa mu dao. Eno te nagebolo me nago ogwa dabe dagebolo mobao.
NUM 18:10 Dagego te hasa dabe te eno ofa mu tiwai suiąo. Tama tialima, dagego te nai dabe te ugwa be obo tomode tuiąo, te bidi dabego naga tumainao,” wali.
NUM 18:11 “Te me ma dagego te gasa ofa te Israel dabego ena mabo te ofa siagameo, te da te pris dabe nogo tulama, eno gedude te hogayu, ugwa eda ebo te ofa dao. Eno te nai nage, naga ogwa wegi dabe dali, te nai eno tigidali sogo te mobao. Te nago we bidi hani tigidali eno gedude wiegi yai mu polo pedalai dao, augwaligo te hasa nai dabe tumainao.”
NUM 18:12 “Te meba gasa Israel dabego te tigidali hasia podolali nai wiegi yai oliv wel, me wain, me wit deli deli kibu bede enabolo mabo dao. Tama eno te nai dabe dagebolo mawaibao.
NUM 18:13 Te hasia tau yali nai dabe te Israel dabego enabolo maiabo nai, te dagego dao. Te tigidali dage hani we bidi eno gedude wiegi yai dao, te augwaligo selama tumainao.
NUM 18:14 Te tigidali nai dabe enaba mani te Israel dabego augwaligo augwa ma abelegobeo, teda dagego mu dao.
NUM 18:15 Te Israel dabego gomunai wai dabe, me hasa dabego gomunai wai dabe, augwaligo enabolo ofa sesebo, te me dagego mu dao. Tiali goli, te hasa meba augwali te ofa maiabo wiegi yai nai mu menio, te tobage hasa gomunai wai dabe te ofade sigio. Te page bidigo monego te hasa gomunai wai hasegeleyu, tama te mone nago sao. Te me te Israel dabego augwa gomunai wai augwali monego hasegelama abelemainao.
NUM 18:16 Te Israel dabe augwaligo augwa wai dabe te a naga silva mone gego abelemainao, te waigo polua deli ebo si,” wali.
NUM 18:17 “Tiali goli, augwaligo te hasa dabe eno gedude wiegi yai tedali gasagi yai, augwaligo ma abelebo usu egobeo. Te da te kau kibugo gomunai wai, me sipsip kibugo gomunai wai, me meme kibugo gomunai wai dabe me, te augwaligo ma dobolama abelegobeo. Magi baso meni, te augwali te eno mu dao, tama te ofa yabo nai dabe dao. Dagego augwali ela munama, tama augwaligo kaneme te altaba te ofa tiwai sąyao, tama agai ili te altade ofa tiwai ulao. Tama eno te ofa ulubo nai denami odama, tama eno godolo mu yaibao.
NUM 18:18 Tama te ofa ebo nai mi dabe te dagego dao, te dagego te Israel dabego mabo ofa eno gedude ugwaba edaba te hogayali, te ofa bau me, dolo sągą me mabo ofa tiwai dao, te dagego sabo nai dao.
NUM 18:19 Te Israel dabego enabolo mabo te ofa dabe meba, megi da, eno nage dali naga wai dabe dali tigidali sogo mawaibao. Eno tede te kontrak nage dali, me nago wai hani dali, te kontrak tigidali sogo mu te ebao, tama eno te kontrak toga sągobeo. Mu menio,” wali.
NUM 18:20 Tama Genuai Bidigo Aronbolo e tama po wali, “Dagego te Israel bulu tomode tǫ me selamu dao, te dage isibaso, dagego wai dabe nosali bidabo. Me dagego te Israel tǫde te gasa mone sabo sę me egobeo. Magi baso meni, te dagego habuge yali nai dabe dagego enade siagameo. Ena Genuai Bidide,” tama po wali.
NUM 18:21 Tama Genuai Bidigo po genina ma weyu, e tama po wali, “Te Israel dabego te nai dabe nedama, nogo si wabo nai deli me bogelama, enaba magasobo si da, teda eno te nai deli dabe te Livai dabe mawaibao. Te da, te augwaligo pe tiwai, te sę ebo masigi tiwai sabo dao, te eno ugwa bede sę ebo pe tiwai dao.
NUM 18:22 Te tigidali sogo nosali me te Israel dabe eno ugwa be pąba me peyu me elamuo. Ma, augwali pąba pali da, teda augwa dagede augwali elama isilaibao.
NUM 18:23 Te Livai dabe augwaligo naga te ugwa be tonalubo sę eyu, augwaligo te ugwa bede sę eyu emainao. Ma, augwaligo te sę bugagia me isąma yali da, teda augwa te sęgę augwa tolomainao. Te bomai po te me tama elalubadi, nago wąį nosali pedalobo te hanigo me wali pomainao. Te Livai dabe augwali te meba Israel dabego yali gilama, augwali tǫ menio.
NUM 18:24 Magi baso meni, eno te Israel we bidi dabego mabo te nogo si nai me deli bogelama mabo, te nai dabe te Livai dabe augwali mabo dao. Te tama po pagede, eno augwalide te e tama po wali dao, ‘Augwali te Israel tǫ tomode augwaligo tǫ me sogobeo.’”
NUM 18:25 Genuai Bidigo Mosesbolo
NUM 18:26 te Livai dabebolo e tama po wao po wali, “Te meba Israel dabego te nogo si nai deli me bogelama, Genuai Bidi mobaso da, tama te nai te Genuai Bidigo dagebolo mawaibao. Tama dagego te nai dabe sabo sogo da, teda dagego te nai dabe bugulama, nogo si nai nigilama, te nai nogo si wali deli bogelama, Genuai Bidi mao, te ofa tiwai mao.
NUM 18:27 Tama dagego te tama mabo ofa te Genuai Bidigo ofa te gesi gi nai ofa, te gesi wit me wain, te bidi dabego agabolo mabo nai te tiwai gilama ebao waibao.
NUM 18:28 Dagego te tama tiyu da, teda dagego te ofa te Genuai Bidibolo mawainu ebo usu yaibao, te Israel dabego hasia nai tau nogo si nai deli selama, dagebolo mabode, te dagego nogo si nai ma nedama, deli me te pris bidi Aronbolo mao.
NUM 18:29 Dagego te sabo nai wiegi yai dabe bugagia bugulama, tama te wiegi yai nai te Genuai Bidigo nai sa muao, tama dagego agabolo mao.
NUM 18:30 Te dagego te wiegi yai nai dabe te Genuai Bidibolo polo menama da, tama da, te Livai dabe dagego te me munalubo nai sagameo. Te bidigo ofa elama, te nai meba nosali sabo tiwai yali gilama tama yao.
NUM 18:31 Te nai dabe da, te dagego te Godigo ugwa be tomode dagego sę ebo pe tiwai dao. Tialima, dage pelama, dage duga we wai puluba dage duga te nai dabe meba elalubo te nai tugi piąo.
NUM 18:32 Dagego te wiegi yai nai dabe hasia ofa bolo elama, tama nosali dagego meba nai dabe tuyu da, teda dage me geda mugobeo. Tiali goli, ma dagego ofa bolo isąma, dagego bolo tuali da, teda dagego te Israel dabego ofade dagego geda muyu, tama dagego duga dagede Genuai Bidigo dage ela isilaibao,” Genuai Bidigo te po wai.
NUM 19:1 Genuai Bidigo Moses de Aron sibolo
NUM 19:2 te bomai po te Israel we bidibolo mao po wali. Agai e tama po wali, “Te Israel dabego te so kau kibu bedeba yai, te wiegi yai kau kibu mu, agai te gi tǫ elibo nai kegebo sę isiąwai kau kibu dao, te kenigo agai tigi me dolisąwai, te tobage so kau kibu sao. Tama augwaligo dage siba odasa asao.
NUM 19:3 Tama dage sigo te kau kibu te pris Eleasarbolo mao. Tama bidi mebago te kau kibu hanu nigila bidibo pesage taga pelama, bulu badu odasa pao. Tama te Eleasargo augwali subo si da, teda augwaligo kau kibu elama, isilao.
NUM 19:4 Tama te Eleasargo te kibu kaneme dwasianu agai nogo danigo selama, tama a naga olama si sogo agai eno ugwa be te badu tonoyu sąyao.
NUM 19:5 Tama Eleasargo augwali tonalubadi, tama augwaligo te kau kibu sese tama iside ulumainao. Augwaligo te kau wali, me mi, me kaneme, me kigibili, sese tama iside ulumainao, te haliga bono dabe me sese tama ulumainao. Te tama sese tama sia saibao.
NUM 19:6 Tama te pris bidigo te ni bǫ pedai dage me siyu, me te ni hisop dage me siyu, me te sipsip nisi bedeba yai siyu, tama elama te nai sela te kau kibu ulubo te isiba ula palao.
NUM 19:7 Tama nosali te pris bidi aga ugwa wę tedalama, tama aga tigiba wę gea palao. Pris aga te sę ela silama, tama aga te bidi bidibo pesage tomoba pomainao. Tiali goli, aga eno gedude meda elaluama, giliga iba dega saboba usu naibao.
NUM 19:8 Tama te bidi te kau ulali te bidi aga ugwa me wę tedalama, tama aga tigi wę me paugi pao. Tama aga me eno gedude meda elaluama, giliga iba dega saboba tama usu naibao,” wali.
NUM 19:9 “Tama nosali, te bidi me eno gedude wiegi yai bidi pelama, te kau kibu ulali te isi sisi dulu sigi pelama, tama te bidibo pesage bulu badu eno gedude wiegi yai yai pesageba pelama, tede muao. Tama te sisi dulu te wiegi yai pesagede bugagia munalubadi, te Israel dabe augwaligo węba munama, tama augwali augwa digi wę telayu elama, tama eno gedude dolo isąma yali nai dabe sela sąmainao. Augwaligo te ebo kolesagade augwali me wę paumainao, te sęgę sela sąwainogo.
NUM 19:10 Tama te sisi dulu sali bidi agai aga ugwa me wę tedamainao. Tiali goli, aga eno gedude meda elalubadi, giliga ibaba dega saboba usu naibao. Te bomai po da tigidali sogo elaluyu, elalua paibao. Tama te Israel we bidigo, me te gasa we bidi te Israel bulude bidibo we bidi augwaligo me, te bomai po wali pomainao,” wali.
NUM 19:11 Genuai Bidigo po geninama ma weyu, e tama po wali, “Ma, te bidi mego te isai bidigo tigiba dįąwai yaibaso da, teda aga eno gedude meda elalubadi, 7 sogo tamaba usu nigi paibao.
NUM 19:12 Tama te dei namba 3 me namba 7, te si sogo tomode agai te bidi wiegi yai ilibo te wę selama, aga tigide munama, tama aga eno gedude wiegi yai pedalaibao. Tiali goli, agai te namba 3 deide, me dei namba 7, tede agai te tama tisąma yali da, teda aga wiegi yai pedalogobeo.
NUM 19:13 Te bidi me deli aga te bidi me isai te bidigo tigi dįąwai yaibaso da, tama agai aga digi eno gedude wiegi yai pedalisąma ebaso da, teda aga eno gedude meda elaluaibao. Magi baso meni. Augwaligo te bidi wiegi yai ilibo te wę selama, tama augwaligo agai tigiba sąsiąma ebaso. Te kolesagago Genuai Bidi eno ugwa be eno gedude meda ilibo dao. Tama tialima, te bidi eno we bidi hani tomode aga me bidigobeo,” wali.
NUM 19:14 “Ma, te we me bidi me te olo ugwa be tomode isali da, tama te bidi isibode te bidi dabe te ugwa bede bididuali me, ma te bidi dabe te ugwa be tomoba asobaso da, augwali eno gedude meda elalubadi, a naga olama, si sogo tama usu naibao.
NUM 19:15 Tama me te tǫ sene, me dis dabe te po meniama te ugwa bede munaluali da, augwali te meda yaibao.”
NUM 19:16 “Ma, bidi me te dulude ma kala silide bilibadi, te isai bidi tigi me dįąwai yaibaso da, te bidi ela muai bidi ma aga digi olo dali isai bidi dįąwai yaibaso, ma te damua pai bidigo dili dįąwai yaibaso, ma agai te gų pagede sągą agawai yaibaso da, teda te bidi eno gedude meda yaibao. Tama aga meda elalubadi, a naga olama, si sogo tama elaluaibao,” wali.
NUM 19:17 “Te isai bidi tigiba dagana sai bidigo meda sela sąbo kolesaga da, te e tama dao. Te so kau kibu ulali te sisi dulu meba sao, te we bidigo sęgę sela sąyabo, tama te tǫgo nigai seneba muao. Tama tǫ dedage węba pelama, tama te senede wę tabia sao.
NUM 19:18 Tama te bidi me eno gedude meda isąwai bidi, agai te ni hisop nologo dwasianu me selama, agai te nigo te wę selama, te bidi isali ugwa beba me, te we bidi tomode bidibo me, te ugwa be tomode elalubo doado bage seseba te wę segeni sąyao. Tama ma, te bidi aga te isai bidi tigiba nogo dįąwai ebaso, ma te bidi dili dįąwai ebaso, ma te bidi gų pagede sągą agawaibaso da, teda te bidi eno gedude wiegi yai yai bidigo te wę segeni te bidi tigiba sąmainao.
NUM 19:19 Te dei namba 3; te dei namba 7, te bubuga side te eno gedude meda isąwai bidigo te wę segeni te eno gedude meda elalubo bidi tigiba te wę segeni sąmainao. Tama te bidi aga homugo aga wiegi yai pedalainogo da, teda te bidi aga ugwa wę telayu, me aga digi aga tigiba wę geliyu emainao, tama te namba 7 deide te giliga ibaba dega sabo side aga wiegi yai pedalaibao.
NUM 19:20 Tialima, te bidi me deli aga eno gedude meda elaluai bidi yaibaso, tama agai te meda isąwai pedalobo te kolesaga isąma ebaso da, teda aga eno gedude meda elalubo bidi me bidaibao. Magi baso meni, augwaligo te bidi meda isąwai pedalobo wę aga tigiba sąsiąma ebaso. Tama tibaso, aga wiegi yai me pedalogobeo. Tama agai Genuai Bidi eno ugwa be eno gedude dwai pedalaibao. Tialima, aga eno we bidi tomode me bidigobeo.
NUM 19:21 Te Israel dabe augwaligo te bomai po tigidali sogo wali peyu emainao. Tama te bidigo te bidi dabe tigiba te wę segeni tigiba sąba, te bidi aga ugwa wę telayu yao. Tama bidi mego nogo te ąįba muani da, te bidi wiegi yai ma pedalobo te węba nogo dįąni da, teda te bidi eno gedude meda elalubo bidi pedalaibao, tama te tama elalubadi, te giliga dega saboba usu nigi paibao.
NUM 19:22 Tialima, bidi me eno gedude wiegi yai isąwai bidi te nai meba dagana saibaso da, teda te nai dabe eno gedude meda yai elaluaibao. Tama te niwai bidi me te naiba dagana sali bidi me te meda elalubadi, giliga dega saboba usu nigi paibao,” te po wali.
NUM 20:1 Te hasia wabo poluade te Israel we bidi sese te masigi kemi sane buluba saboligi pelama, tama augwali te bulu Kadesba bidigi pali. Augwali te bulu Kadesde bidibadi, te Miriam, te Aron Moses sigo abe, tede isali, tama augwaligo tede pubulali.
NUM 20:2 Te bulude wę mu meni yai. Tama tibaso, te we bidi augwali Moses de Aron si pageba sisinigi pali.
NUM 20:3 Tama augwaligo Moses dali wado po hauwa weyu, e tama po wali, “Te usu igi dao, da te Genuai Bidigo ugwa be mesalode dena abagi dali isigi sogo da, usu igi dao.
NUM 20:4 Magi baso nago da e wa pai buluba odasa asaliwe? Nago homugo da me dago hasa dabe e bulude isimainogo yaliwe?
NUM 20:5 Tama me nago magi baso da Isip bulude odasa e dwai buluba odasa asaliwe? Dago te nai bulubo usu isąma yabo digi? Te bulude te wiegi yai wit me te wiegi yai ni du dabe me menio. Me te ni wain me menio, me te tuabo ąį me menio,” te po wali.
NUM 20:6 Moses de Aron sigo te po odama, tama te we bidi taga pelama, tama augwali si te Godigo ugwa be sunumiba doligi pali. Tama augwali si gesabidi aiyaba elama, degasa dulali. Augwali sigo te tama tibo si, Genuai Bidigo ula augwali siba pedelali.
NUM 20:7 Tama Genuai Bidigo Mosesbolo te po wali,
NUM 20:8 “Te Dąų Wali Bomai Po Munolubo Halobage pąde munalubo te dono selama, tama nage dali Aron dage sigo te we bidi sisinama, tama augwali gedude nago te u genuai masigi dali po walama, tama wę tedu asaibao. Nago te tama tibo kolesagago te wę te masigidu asobadi, te we bidigo, me kau kibu, me sipsip, augwaligo te wę tumainao,” wali.
NUM 20:9 Tama Mosesgo Genuai Bidigo po wali pelama, tama te dono sigi pali.
NUM 20:10 Tama Moses de Aron sigo te we bidi te moni genuai masigi pageba sisinigi pali, tama Mosesgo augwalibolo te tama po walali, “Odao, dage te po sela sąbo we bidi dao. Te dago dagego wę te masigide saibawe?”
NUM 20:11 Tama te Mosesgo te masigi dali po wabe. Menio. Agai te dono selama, si sogo te masigi elali. Tama moni ąį te masigide pedalali, tama te we bidi, me augwa kau me sipsip dabego te wę tuali.
NUM 20:12 Tiali goli, Genuai Bidigo Moses de Aron sibolo e tama po wali, “Megi da e sogo dage sigo eno po sela sąnama, tama dage sigo enaba homu dąų wabeo. Tama dage sigo eno bomo te Israel we bidibolo ola mabeo. Tialima, duga si digi te Israel we bidi eno augwali te mawainogo po dąų wali te buluba odasa pogobeo,” te po wai.
NUM 20:13 Te sę te bulu Meribade pedelai dao, te da te Mosesgo te wę pedalumainogo yali te bulu dao. Te Meribade te Israel we bidigo Genuai Bidi dali te po hauwa mu wali, tama Genuai Bidigo te Israel dabebolo aga te holi, tedali gasagi yai, te magi meni yai mu dao olama te ola mayu, tama agai te po sela sąbo kolesaga hagela ebo dao olama ola mani.
NUM 20:14 Te Israel dabe te Kadesde bidibadi, Mosesgo Idom tuni bidiba po sela pabo bidi meba taga palali. Augwaligo agabolo e tama po wagi pali, “Dago naga deli hanigo po sesebao. Te augwali te Israel dabe dao. Augwaligo nagebolo e tama tiwai po walali, ‘Nago koneani, dade te haniani sę pedalali nago koneani.
NUM 20:15 Tama nago koneani, dago wąį dabe te Isip bulude kibu be hauwa mu bidai dao. Tama te Isip dabego da dali dwai sę eyu, augwali dali me dwai sę eyu yai dao.
NUM 20:16 Tama tibaso, dago Genuai Bidibolo i olama, da tau sao po wai dao. Tama agai dago i wabo odama, tama agai ensel bidi me taga palali. Tama ensel bidigo da Isip bulude selama, odasa asai dao. Tama megi da Kadesde bidibao, te nago kantri bogo badu elalubo bulu.
NUM 20:17 Tama tialima, nago da nago bulude bilabo usu dao waibawe? Da te wit gidu me wain giba da me, dago kau kibu dabe me, bogi pogobeo, me dago dagego tǫ dedage wę me me tugobeo. Da te moni sunumidu naga pelama, te nago kantri edelaibao,’ te Israel bage augwaligo te po ola tolali,” te Mosesgo tagala palali bidi dabego te Idom bagebolo te po wai.
NUM 20:18 Tiali goli, te Idom dabego Israel dabebolo e tama po wali, “Mu menio,” po wali. “Dage dago buludu me solamu dao,” po wali. “Ma, dage asali da, dago dage dali hwįaibao,” te po wai.
NUM 20:19 Tama te Israel dabego augwalibolo te po walali, “Da te moni sunumidu naga soaio. Tama ma, dago me dago kau kibu dabego dagego wę tubaso da, teda dago abelaibao. Da dagego kantridu soaio, te tama dao,” wali.
NUM 20:20 Tiali goli, Idom dabego po bomo elama ma weyu, e tama po wali, “Mu menio. Dage me solamuo.” Tama augwaligo ami bidi hauwa me selama, te Israel dabe dali hwįainogo asali.
NUM 20:21 Te Idom dabego Israel dabe augwaligo buludu solamu dama habu selali. Tama tibaso, Israel dabego Idom bulu tagalama, gasa sunumidu pali.
NUM 20:22 Te Israel we bidi augwali Kades bulu taga pelama, tama Hor bulu duba pali,
NUM 20:23 te Idom bulu sesege badu. Augwali te bulu dude bidibadi, Genuai Bidigo Moses de Aron sibolo e tama po wali,
NUM 20:24 “Aron, nage eno te Israel dabebolo mawaibao wali te tǫba nage pogobeo, nage isaibao. Magi baso meni, dage sigo eno po te bulu Meribade sela sąwai dao.
NUM 20:25 Tialima, Moses, nago Aron de aga ogwa Eleasar si oda selama, tama dage te Hor bulu duba holao.
NUM 20:26 Tama nago Arongo pris ugwa dinama, Eleasar tigiba bulao. Magi baso meni, Aron aga te bulu dude tede isaibao,” te po wali.
NUM 20:27 Tama Mosesgo Genuai Bidigo po wali pali. Tama agai te Aron de Eleasar si te bulu duba odasa peyu, tama holali. Tama te Israel dabe augwaligo te bage augwali pabo suali.
NUM 20:28 Augwali saboligi pelama, Mosesgo te Arongo pris ugwa pedama, aga ogwa Eleasargo tigiba gudulali. Tama Aron te bulu dude bidama isali. Tama nosali Moses de Eleasar si te bulu du taga solama, dulali.
NUM 20:29 Tama augwali sigo tigidali we bidibolo e tama po wali, “Aron polo isalio,” po wali. Tama augwali sese agade gela odubadi, polua deli usu nani.
NUM 21:1 Te hanu Arat tuni bidi te Kenan hani bidi, tama agai hanu te Kenan bulude saut badu elalubo. Te tuni bidigo te Israel dabe te Atarim bulu sunumidu asobo po odali. Tama tialima, te tuni bidi aga hani ami bidi dabe dali augwali te Israel dabe dali hwįgi pali. Tama augwaligo Israel hani bidi meba toulama, odasa pali.
NUM 21:2 Tialima, Israel dabe augwaligo Genuai Bidibolo bomo yai po deli dąų walali. Augwaligo e tama po wali, “Te nago dago te bidi hani dolomainogo sula tagaliyu da, teda dago te we bidi sese me, augwaligo hanu me, dago dola silama, te ofa nai tiwai nagebolo mabo tiwai me yaibao,” te po wai.
NUM 21:3 Tama te Genuai Bidigo augwaligo po odama, tama augwali tau selama, te Kenan dabe te Arat hanu dolomainogo yali. Tialima, te Israel dabego te Kenan dabe augwa hanu dabe dali mu dolama tagalali. Tama augwaligo te bulu Horma polali.
NUM 21:4 Te Israel dabe augwaligo te Hor bulu du tagalama, te Akaba bulu badu te Retsi mama tamu wędu pabo sunumidu pali. Magi baso meni, augwaligo Idom tǫ taga painogo. Augwali pali pali dobaso, augwali sunumide hagela mu yali.
NUM 21:5 Tama augwaligo Godibolo me Moses dali augwaligo wado po wali. Augwaligo e tama po wali, “Magi baso dagego da Isipde oda selama, e nai meni yai buluba odasa asaliwe? Da te nai meni yai kemi sane bulude isimainu yaliwe? Te bulude nai mu menio. Tama dago te dwai nai mana da, dago hagela mu yalio,” te po wai.
NUM 21:6 Augwaligo te wado po wabo Genuai Bidigo odali. Tama Genuai Bidigo dwai gula mani dabe taga palali, te Israel dabeba, tama te gula mani dabego te we bidi hauwa gąǫ kelama isilali.
NUM 21:7 Tama te we bidi te Moses pageba aselama, e tama po wali, “Dago sęgę polo salio, te dago Genuai Bidi dali, me nage dali wado po walide. Megi nago Genuai Bidibolo gedu haluasa po wao, agai te gula mani sela sąmainao,” wali. Tama Mosesgo te we bidi tau somainogo Genuai Bidibolo gedu haluasa po wali.
NUM 21:8 Genuai Bidigo te gedu haluasa po wabo odama, tama agai Mosesbolo e tama po wali, “Nago te dwai gula manigo noma me nigilama, tama moni bobobage pos nide walao. Tama te mena we bidi augwali te gula manigo gąǫ kelali da, augwaligo te gula mani nomaba tonobode augwali me isigobeo. Menio, augwali usu ma yaibao,” te po wai.
NUM 21:9 Tama Mosesgo te brasgo gula mani me nigilama, tama bobobage ni posde walali. Tama te gula manigo te we bidi gąǫ kelali da, teda augwaligo te bras gula maniba tonobo si da, augwali usu ma yali.
NUM 21:10 Te Israel dabe augwali te Hor bulu du taga pelama, tama te bulu Obotde bidabo pesage nigali.
NUM 21:11 Nosali augwali te bulu Obot taga pelama, Abarimba bidabo pesage nigigi pali. Te bulu Abarim te dolama mu elaluali. Abarim te Moap bulude giliga asobo badu elaluali, te nai meni yai bulude elaluali.
NUM 21:12 Tama nosali augwaligo te pesage taga pelama, augwali te Seret odogo buluba pesage nigigi pali.
NUM 21:13 Tama nosali augwaligo te wę Arnon nogegi pelama, te Arnon wę not badu augwaligo pesage nigigi pali, te nai meni yai bulude. Te nai meni yai bulu te Amor dabego buluba pai elaluali. Tama te wę Arnonde dąį yai elaluali.
NUM 21:14 Te po pusubo sęgę yaigo te Genuai Bidigo hwįani po te bulude tama naga po pusali. Agai te po wabo, “Te bulu Wahep te Sufa badu me odogo bulu, me Arnon wę me te odogo bulu te hanu Arba usu nigi pelama,
NUM 21:15 me te bulu Moap badu dąį igi pali badu usu nigi pali,” te bukude te po tama elalubao.
NUM 21:16 Nosali augwaligo te bulu tagalama, tama augwali te bulu me augwaligo tǫ dedage wę wabo te buluba pali. Te bulude te ulu wę genuai deli elaluali. Tama te węde Genuai Bidigo Mosesbolo e tama po wali, “Te we bidi i olama, tama augwali sisinagasobo si, eno augwali wę mawaibao,” wali.
NUM 21:17 Tama te sogo te Israel dabego te balia po wali, “Ulu wę, nago wę pedalama soao. Tama dago te sulama, tama dago wiegi yai homu pemene ebo balia po waibao.
NUM 21:18 Te tuni bidi dabe, me tobolu bidi dabe, augwaligo te tobolu bidigo dono me biliyu, sabilibo dono me nogo tolasali, tama augwaligo te ulu wę digawali.” Tama nosali te Israel dabe augwaligo te nai meni yai bulu taga pelama, augwali te bulu Matanaba pali.
NUM 21:19 Tama augwali te bulu Matana taga pelama, te bulu Nahalielba pali. Tama nosali augwali te bulu Nahaliel taga pelama, augwali te bulu Bamotba pali.
NUM 21:20 Tama augwali te bulu Bamot tagalama, augwali te bulu Moap te bulu du Pisga pąba pali. Te bulu dudu te bidi dabego te nai meni yai buluba tonobo dao.
NUM 21:21 Nosali te Israel dabego te Amor tuni bidibolo po olama tolali. Augwaligo te po olama tolali,
NUM 21:22 “Dago homugo nago da nago buludu somainogo sula tagalao. Dago te sunumi me tagalama, da dagego giba me o wain giba me bogea peyu me egobeo. Tama me dagego ulu wę dabe me tuyu me egobeo. Da te moni sunumide pedu genama, nago bulu taga pabo si, tama usu naibao,” te po ola tolali.
NUM 21:23 Tiali goli, te tuni bidi Sihongo te Israel dabe agai buludu soao homu ebeo. Tama agai aga ami bidi dabe sisinama, tama augwali te hanu Jahasba te nai meni yai buluba pelama, te Israel dabe dali hwįgi pali.
NUM 21:24 Tiali goli, Israel dabego te Amor hani hauwa me elama, augwaligo tǫ sali. Te wę Arnondu gagalama, te not badu elalubo wę Jabokba usu nigi pali. Teda te bulu Amongo bulu dąį dao. Tama te Amon hanigo bomai ami bagego te bulu dąį tonalubo dao.
NUM 21:25 Tama te Israel dabego te hanu Hesbon me, te meba pąde elaluali hanu dabe me, te Amor dabego hanu dabe sese tama sali, tama augwali te hanu dabede bidali.
NUM 21:26 Hesbon te Amor tuni bidigo wiegi yai hanu mu dao. Polobadu te Sihongo te Moap tuni bidi dali hwįnama, tama agai tǫ tigidali sese tama sai dao, te wę Arnonba usu nigi pai dao.
NUM 21:27 Te tama tiali pagede te tęąbi po wabo bidi dabego te tęąbi po e tama wai dao, “Dage Hesbonba asao, tuni bidi Sihongo hanuba. Dago homugo augwaligo te hanu Hesbon ma nigimaina, tama aga bomo elama bidimainao.
NUM 21:28 Polobadu te Sihongo ami bidi dabego te hanu taga pelama, tama hanu Arba bomo elama hwįgi pai, te bulu Moapba. Te kala isi dabo tiwai yali. Tama te ami bidi dabego hanu dolama, tama tobolu bidi dabe mu silali, te Arnon wę sesegede te bulu dude bidali bidi dabe.
NUM 21:29 Moap we bidi dabe, hobede mu dao. Dage moni sęgę mu saibao. Te we bidi dagego te tibo god Kemosba lotu po wabo dao, dage mu tama dolaibao. Dagego te god te we bidi dabe aga wali asomainogo ebo god aga bulu taga pelama, te wau bilibo bidi tiwai bilaibao. Tama agai te Amor tuni bidigo dagego we dabe pagea somainu ilaio, tama augwaligo agai kalabus sę yali.
NUM 21:30 Tiali goli, megi da, dago augwali polo enani dao, te Hesbon hani bidi me, te hanu Dibon hani bidi me. Dago augwali mu dolama, taga pelama, te hanu Nofaba usu nigi pali, te hanu Medeba pąba.” Te tęąbi po wabo bagego tama tęąbi po wai dao.
NUM 21:31 Tiali tama, te Israel dabego te Amor dabego hanu dabe selama, tama augwali te hanude bidali.
NUM 21:32 Tama nosali Mosesgo bidi dabe te hanu Jaserba tagala palama, tama te hanu dolabo sunumi wiegi yai gegali. Tama te Israel dabego te hanu Jaser dali hwįnama, tama augwaligo te hanu me, te hanu pąde elaluali bulu dabe tama sali. Tama augwaligo te Amor dabe te bulude bidali bidi dabe sela sąyani.
NUM 21:33 Tama nosali te Israel dabe ma begelama, tama begasa te bulu Basanba pabo sunumi badu begasa pali. Augwali saboligi pabo si, te Ok, te Basan bulu tuni bidi, aga ami bidi dabe dali, augwaligo te Israel dabe dali te hanu Edreiba wąbi hwįagasali.
NUM 21:34 Tama Genuai Bidigo Mosesbolo te po walali, “Dage te tuni bidi Okde wi igimio. Magi baso meni. Eno dage tau selama, tama dagego aga aiyaba elaluaibao, tama dagego agai tǫ saibao. Dagego aga te Amor tuni bidi dolali yali gilama tiwai tama yao, te aga polobadu te Hesbon bulude tuni bidi bidali bidi,” te po wai.
NUM 21:35 Tialima, Israel dabe augwaligo te po wali pelama, augwaligo tuni bidi Ok, me aga ogwa dabe, me aga hani bidi dabe sese ela silali. Tama deli me bidibeo. Tama nosali Israel dabego augwaligo tǫ sali.
NUM 22:1 Nosali te Israel dabe augwaligo te bulu taga pelama, te Moap dabego buluba mu augwa bidabo pesage nigigi pali. Te bulu mu te wę Jordan te sia asobo badu te Jeriko hanu u badu elaluali.
NUM 22:2 Balak, te Siporgo ogwa, te Moap dabego tuni bidi dao. Agai te Israel dabego te Amor dabe dali yali wali po agai odali.
NUM 22:3 Tama aga dali aga hani bidi dabe augwaligo te Israel dabe suali, augwali hauwa mu yali. Tama augwali sese tama te Israel dabede wi mu yali.
NUM 22:4 Tialima, te Moap dabego te Midian dabe tobolu bidibolo e tama po wali, “Pęwadage sogo mu tama te hanigo dago bulude elalubo nai dabe sese mu silaibao, te kau kibugo nosai tubo tiwai yaibao,” te po wai.
NUM 22:5 Tama tialima, tuni bidi Balakgo te bidi Balambolo waligi pomainu bidi dabe tagala palali, te Beorgo ogwa, te aga te tuni bidi Balak suagasomainogo yai. Balam te hanu Petor te ąį Yufretis pąde bidali, te aga page bulu pąde. Balakgo te bidi dabebolo te Balambolo e tama po wao po wali, “Ena Balak dao. Eno homugo nago konemainogo ebao, te we bidi hani me te Isip buludu aselama, te tigidali buluba mu usu nigi palio. Tama megi da, augwali dago bulu pąde bidibao, tiyu augwaligo dago bulu sidalio.
NUM 22:6 Augwali hauwa mu dao, tama dago augwali aiyaba elaluabo usu menio. Tama tialima, eno homugo nago te god dabe nogi olama, tama te god dabego augwali dolomainao. Tiali tama nago tama tiyu da, teda dago homugo dago augwali dali bomona hwįnama, tama augwali dago tǫde sela sąwaibao. Eno koneani, nago te god dabebolo te we bidi bugagia bida wali te godigo tama tibo dao. Tama ma, nago te we bidi dolao wali da, teda te god dabego augwali tama dolobo dao,” Balakgo te po Balamba ola tolali.
NUM 22:7 Tialima, te Moap de Midian tobolu bidi dabego te po te Balam pageba sela pali. Augwaligo te Israel dabe dolao omainogo abelabo mone dabe meba me sela pali. Tama augwali Balam pageba sabolama, tama Balakgo po agabolo pusali.
NUM 22:8 Tama Balamgo e tama po wali, “Dage megi hulide eno bede piao, tama dagebolo eno Genuai Bidigo wabo po dabe dagebolo do pusaibao,” te po wali. Tialima, te tobolu bidi dabego Balamgo po odama, aga dali bidali.
NUM 22:9 Tama hulide God aselama, Balambolo te po hanalu wagasali, “Te mena bidi dabe nage dali bidibowe? Augwali magi sę yainogo asaliwe?” wali.
NUM 22:10 Tama Balamgo Godibolo te po walali, “Balak te Moap tuni bidigo augwali eba taga palali, tama augwali enabolo te po pusainogo asali,
NUM 22:11 te we bidi hani me deli Isip bulu tagalama, tama Moap bulu tigidali usu nani wabo po pusainu asai dao. Tama agai homugo eno te god dabebolo olama, te god dabego augwali dolama, tama agai te bage dali bomo elama hwįnama, augwali sela sąwaio wali,” Balamgo te po wai.
NUM 22:12 Tiali goli, Godigo Balambolo te po wali, “Nage te bidi dabe dali me pelamu dao, tama nago te Israel dabe dolao po me wagi pelamu dao. Magi baso meni, ena augwali dali bidama, augwali eno bugagia tonaluai dao,” wali.
NUM 22:13 Tialima, kigamu te Balam te Balakgo tuni bidi dabe pageba pelama, te po wali, “Dage naga duga buluba ma piąo. Ena me pogobeo. Genuai Bidigo ena dage dali pigio homu yalio.”
NUM 22:14 Tialima, te bidi dabe augwali Balak pageba pelama, te po wagi pali, “Balam da dali asobo hagela yalio,” te po wai.
NUM 22:15 Tialima, nosali Balakgo te tobolu bidi dabe te hasia pali bidi dabe tobolu bidi nogi edelai bidi dabe hauwa mu i olama asali.
NUM 22:16 Tama agai augwalibolo agai po Balambolo pusigi pomainu yali. Balakgo po e dao, “Balam, nage ena pageba tama asao. Eno homugo nage magi nai mego nage dąų omainu igio homu ebao.
NUM 22:17 Nage aselama, tama nage eno nai dabe hauwa mu menama, tama nago homugo enabolo ya wabo nai dabe sese tama eno yaibao. Tama tiali, eno homugo nage aselama, tama te we bidi dolabo bomai po nago wagasao,” Balakgo te po ola tolali.
NUM 22:18 Tama augwali pelama, sabolama, te po Balamba pusali. Tiali goli, Balamgo te Balakgo sę bidi dabebolo te po wali, “Te Balakgo ena agai be te silva de gol sigo pągąnama, tigidali mobadi me tagalao. Eno Godigo po me sela sągobeo. Te eno Genuai Bidigo magi nai me dabede me sela sągobeo.
NUM 22:19 Tiali goli, dage eno bede hulide piao, te hasia asali bidi dabego yali gilama, tama eno suaibao, Genuai Bidigo enabolo po meba me magowe nama suaibao, ma meni yaliwe suaibao,” te po wai.
NUM 22:20 Tialima, te sogo hulide God Balam pageba aselama, te po agabolo wagasali, “Te bidi dabe aselama, nage augwali dali pinao olama, hanalu wagasali dao. Tiali megi da, nage augwali dali pagameo. Tiali goli, nago tigidali sę eno nagebolo wabo te sę naga yagameo. Nago gasa sę dabe me naga homugo me elamuo,” wali.
NUM 22:21 Tama tiali, kigamu Balam aga kibu donkide dualama, te Moap tuni bidi dabe dali pali.
NUM 22:22 Balam aga hogodasa pabode, Godigo aga dali sębę yali. Balam aga donkide dualama peyu, tama aga sę ebo bidi si aga dali peyu yali. Tama Genuai Bidigo ensel sunumide dolaluyu, sunumi palialuali.
NUM 22:23 Te enselgo bainat hwą tolaluyu, sunumide dolalubo suali, tama tibaso donkigo sunumi tagalama, bogo badu pali. Tama tibaso, Balamgo aga donki elama, sunumiba ma tagala palali.
NUM 22:24 Tama nosali te ensel ma pelama, te wain gi si elalubo sunumi tomoba doligi pali. Tama te pesagede da, te sunumi pena sai madi, te masigigo te obo yai madi te sunumi sesege si tama badu.
NUM 22:25 Donkigo ensel dolalubo suali, tama tibaso donki te oboba mu dagana sali madi te Balamgo sągą pena sali. Tama tibaso, Balamgo donki ma elali.
NUM 22:26 Tialima, te ensel polasa ma pelama, te sunumi dwasianu mu yai digi doligi pali.
NUM 22:27 Tama te donkigo te ensel subaso, agai koneani, agai te ensel edelegobe homu koneama, tama aga te sunumide pigiluali. Tama tibaso, Balam aga sębę elama, te donki kibu wabi dage selama elali.
NUM 22:28 Tama Genuai Bidigo donki kibu po omainu ilali, tama donkigo Balambolo te po wali, “Eno nage dali magi sę ebaso, nago ena sela sogo elaliwe?”
NUM 22:29 Tama Balamgo donkibolo te po wali, “Nago ena te polai bidi tiwai gagalalio. Tama tibaso, eno nage sela sogo elalio. Ma, eno bainat hwą tolalugi sogo da, eno nage ela mugi dao.”
NUM 22:30 Tama donkigo te po wali, “Ena naga donki mu dao, tama nage enade nage gesi bidide gagalama dualasa bilibadi, megiba tama te usu nagasobao. Eno te tobage sę nage dali hasia me yai dawe? Ma meniwe?” Tama Balamgo menio wali.
NUM 22:31 Tama Genuai Bidigo Balamgo te ensel bainat tolaluyu sunumide dolalubo sumainogo ilali. Tama polo tama Balam gesabidi aiyaba elama, tǫba degasa dulali.
NUM 22:32 Tama enselgo agabolo te po walali, “Magi baso nago naga donki sela sogo tama elaliwe? Odao. Eno nago sunumi paliainu asai dao. Magi baso meni, nage pabo eno wiegi yai homu ebeo.
NUM 22:33 Tiali goli, nago donkigo ena sulama, sela sogo te gasa badu pai dao. Ma, te donkigo tama tigi meni sogo da, eno nage ela munama, donki naga tagaligi dao,” te po wai.
NUM 22:34 Tialima, Balamgo Genuai Bidigo enselbolo te po wei ponani, “Eno dwai kolesaga yalio. Eno konebeo, nago ena elainu sunumide dolalubo eno subeo. Tama tialima, megi nago ena pabo godolo isąma ebaso da, teda ena ena buluba ma geasa paibao,” wali.
NUM 22:35 Tiali goli, enselgo agabolo te po walali, “Te usu dao, nage te bidi dabe dali pao. Tiali goli, eno nagebolo mabo po naga pusao. Nago gasa po me pusulamuo.” Tama te Balam te Balakgo tobolu bidi dabe dali pali.
NUM 22:36 Nosali Balakgo Balam asobo po odali. Tama tibaso, aga pelama, te Balam te hanu me wę Arnon pąde elalubo hanuba pali, te Moap bulu dąįba Balam tįąba pali.
NUM 22:37 Tama Balakgo Balambolo te po walali, “Odao. Hasia eno bidi dabe tagala palama, nage odasa polo asomainu yai goli dao, tiali goli nage magi baso asobo hagela yaliwe? Nago homugo nage eno mone dabe hauwa magobe homu yaliwe?”
NUM 22:38 Tama Balamgo te po wali, “Tagalao, eno megi asali dao. Tiali goli, eno God aga digi ena mabo po naga pusaibao, te tama deli naga. Eno gasa po me wabo bomo eno menio,” wali.
NUM 22:39 Tialima, Balam te Balak dali te hanu Husotba pali.
NUM 22:40 Tama Balakgo te kibu kau me sipsip elama, ofa eyu, tama mi dabe meba te Balam dali me aga dali te bidali te tobolu bidi dabebolo mani.
NUM 22:41 Te kigamu Balakgo Balam te hanu Bamotbalba obaba odasa pali. Tama Balam doligi pelama, Israel dabe bugwai meba ade bidalubo suali.
NUM 23:1 Tama agai Balakbolo te po wali, “Eno homugo nago ede te 7 alta nigilama, tama 7 kau kibu omai, me 7 sipsip kibu omai sesao.”
NUM 23:2 Tama Balakgo te Balamgo agabolo wali po wali tama pelama, tama yali. Tama aga dali, Balam dali augwali sigo te kau kibu me sipsip kibu te deli deli altade ofa yali.
NUM 23:3 Augwali sigo ofa ela silama, Balamgo Balakbolo te po walali, “Nage te isigo sese dela silibo ofa pagede dolaluao, tama ena uba paibao. Eno homugo Genuai Bidigo ena teba tiąba asogowe, ma meniwe, eno konebeo. Ma, aga aselama, enabolo magi nai me ola magasobaso da, teda eno nagebolo waibao,” wali. Agai te po olama, aga te bulu duba ugwaba holali.
NUM 23:4 Tialima, Godigo Balam tiąba asali. Tama Balamgo Godibolo te po wali, “Eno a naga olama, si alta nigilama, tama a naga olama, si kau kibu omai, me sipsip kibu omai a naga olama, si deli deli altade ofa yalio,” te po wai.
NUM 23:5 Genuai Bidigo te po odama, agai Balambolo te po wali, “Nage Balak pageba ma pelama, e po agabolo wagi pao.”
NUM 23:6 Tiali aga ma pelama, suali, Balak te Moap bulu tobolu bidi dabe dali dolalubo suali, te isigo dela silibo ofa pąde dolalubo suali.
NUM 23:7 Tama Balamgo augwalibolo profet po pusuyu, te po wali, “Balak, te Moap tuni bidigo, ena odasa asai dao. Agai ena Siria bulu oda selama asali, te giliga asobo badu bulu dude, tama ena asali. Agai te po wali, ‘Eno homugo nage aselama, e god dabego te Jekopgo hani bage dolabo po pusagasomainao,’ po wali. ‘Asao, nago te Israel dabeba dwai sę pedalumainogo eyu, nago naga po wao,’ te po wali.
NUM 23:8 Tiali goli, Godigo augwali dolomainao po wabeo. Tama magi baso eno tama wabo usu yaibawe? Godigo augwali po tų me ela mabeo. Tama magi baso eno augwali po tų ela magawe?
NUM 23:9 Ena te masigi bulu du te bulu dude dolaluyu, eno augwali suali. Ena ugwadu bidiyu suali, te we bidi augwali tedali bugagia bidibo suali. Godigo augwali bugagia tau siyu, tama augwaligo koneani, augwali gasa we bidi hani dali deli menio homu yalio.
NUM 23:10 Te Israel hani wąį augwali hauwa mu, te tǫ hogomu tiwai mu pedalaibao. Dego mu augwali meba naga nedaibawe? Te bidigo usu me egobeo. Eno homugo ena te Godigo we bidi tiwai pedalaibao. Tama eno homugo ena tama bida bida pelama, ena isiboba usu nigi paibao. Mu tamao, ena tabi nagame elama, bidama isaibao, te doloba pai we bidi hani yali gilama,” wali.
NUM 23:11 Balakgo te po odama, tama agai Balambolo te po wali, “Magi baso nago te tobage kolesaga ena dali ebawe? Eno nage odasa asali da, nago te Godigo eno te boi bidi dabe dolao po omainogo yai. Tiali goli, nago te sę ebeo. Menio. Nago ma augwali bugagia bidimainao po naga wali.”
NUM 23:12 Tama Balamgo po wei ponoyu, te po wali, “Hobede mu dao. Tiali goli, eno te Genuai Bidigo enabolo mani te po naga nagebolo pusa mawaibao. Eno gasa po me pusugobeo,” te po wai.
NUM 23:13 Tama nosali Balakgo Balambolo te po wali, “Ena dali asao, da si gasa buluba me pinao. Tama nago te Israel dabe pąde mu me bidibo suagameo. Nago tigidali mu sugobeo. Tama nage tede dolaluyu, augwali dolabo po wagameo.” Balakgo te po wai.
NUM 23:14 Tama agai Balam te bulu Pisga te bulu duba dolo pali, te augwaligo te bulu aiyaba tonabo usu yai madi. Tama agai 7 alta nigilama, tama kau kibu omai 7; sipsip kibu 7 tama, te deli deli altade ofa yali.
NUM 23:15 Tama Balamgo Balakbolo te po wali, “Nage e isigo ula silibo ofa pagede dolaluao, tama ena God uba sugi paibao,” wali.
NUM 23:16 Tama Balam aga pelama, Genuai Bidigo aga sulama, tama agai wabo po pusa mani. Genuai Bidigo Balambolo te po wali, “Nage pelama, Balakbolo te po agabolo pusigi pao.”
NUM 23:17 Tialima, aga ma pelama, te Balak te Moap tuni bidi dabe dali te isigo sese dela silibo te ofa pagede dolalubo suali. Tama Balakgo Balambolo hanaluyu, te po wali, “Genuai Bidigo nagebolo mena po maniwe?”
NUM 23:18 Tama Balamgo te pusabo po pusali, “Balak, hodaluao, odao. Siporgo ogwa, eno megi e pusainogo ebo po odao.
NUM 23:19 God da, aga te tǫde bidi mu menio. Godigo da bidigo yali gilama ili po me wabo menio. Agai homu da bidigo yali gilama me hasegelebo menio. Mu menio. Te agai magi sę me yainogo eyu, po dąų wali da, teda agai tama ebo dao. Agai te po wabogo naga te sę tama pedalobo dao.
NUM 23:20 Godigo enabolo te po pusumainao po wali, ‘Te Israel dabe bugagia bidaibao.’ God aga digi augwali bugagia bidimainu ilibo dao, tama eno hasegelebo usu egobeo. Mu menio.
NUM 23:21 Te Israel dabeba pedelainu ebo sę eno suali, te augwali dali dwai sę elama, dolabo sę menio. Te mu menio. God augwa Genuai Bidi augwali dali bidibao, tama augwaligo te po wali, aga te augwaligo tuni bidi dao po walio.
NUM 23:22 Godigo augwali Isip bulude oda selama, asali dao. Tama augwaligo bomo te bomo yai bulu uni kau kibugo bomo tiwai dao.
NUM 23:23 Ma, te boi bidi dabego pobi weyu, me kebele aulama augwali elali da, tego augwali me dologobeo. Tama tialima, megi te gasa we bidigo te Jekopgo hani dabede te po waibao, ‘Te Godigo Israel bage augwali tau sainogo genuai sę dabe mu yali suao.’
NUM 23:24 Israel dabe te boma pai uni yowi laion tiwai dao. Aga toma polo tubo menio. Agai te hasa elama, mi pepedama tuyu ebo dao, tama te hasa dabego kaneme me tubo dao, tama nosali aga toma tubo dao.”
NUM 23:25 Te Balakgo te po odama, Balambolo te po walali, “Te nago te Israel dabe dolomainao po wagobe wida, teda nago Godigo augwali bugagia tau saibao po me wagio,” wali.
NUM 23:26 Tama Balamgo te po wei ponoyu, te po wali, “Hasia eno nagebolo polo wai dao, te Genuai Bidigo enabolo yao wabo sę naga eno wali paibao po wai dao. Tama nago odai meniwe?” Te po wai.
NUM 23:27 Tialima, Balakgo Balambolo te po wali, “Nage ena dali asao, tama nage eno gasa bulu meba odasa paibao. Tiali, te Godigo nage te gasa bulude dolalubo sulama, tama agai nago te Israel dabe dolao wabo po omainu sula tagalaibawe, ma meniwe, te dago sueibao,” te po wali.
NUM 23:28 Agai po ola silama, Balam te bulu du Peor peduba odasa pali. Bidi te bulu dude dolaluyu, te nai meni yai wa pai bulu sese tigidali sula silaibao.
NUM 23:29 Tialima, Balamgo agabolo te po wali, “Eno homugo nago te a naga olama si alta e pesagede nigao. Tama te a naga olama si kau kibu omai, me sipsip kibu a naga olama si omai ena pageba sesao,” wali.
NUM 23:30 Balakgo te po odama, agai Balamgo wali po tiwai tama wali pelama yali. Tama agai te kau kibu me sipsip kibu deli deli te deli deli altade ofa yali.
NUM 24:1 Megi da, Balam agai koneani, Genuai Bidigo Israel dabe dali wiegi yai kolesaga yainogo ebo suali. Te tama tibaso, aga pelama, Genuai Bidibolo hasia yali gilama agabolo te po ola momainu me hanalube. Menio. Aga begelama, nai meni yai wa pai buluba tonani.
NUM 24:2 Tama agai deli deli Israel hani dabego ugwa be dabe waselama, elalua pabo suali. Te Godigo Mobo Bidi agaba aselama,
NUM 24:3 tama agai te profet po pusuyu te po wali, “Eno e po odao. Ena Balam, te Beorgo ogwa dao. Eno gedu wiegi yai mu elama, tama eno bugagia mu tonono bilibo dao.
NUM 24:4 Tama eno Godigo pusubo po odobo dao. God Tigidali Bomo Elalubo Bidigo te nade ebo sę tiwai enade pedalobo dao. Tama eno bomonama mu tonama, te nai dabe eno hania mu subo dao.
NUM 24:5 Eno te Israel dabego ugwa be sualio, tama te wiegi yai mu dao.
NUM 24:6 Te ugwa be dabe bugagia dolo wasilama, te ni det bobobage nani dabe tiwai dao. Me, te genuai wę sesegede elalubo gi tiwai dao. Me, te Genuai Bidigo bulai wiegi yai ni alo tiwai dao, me te ni bǫ te wę sesegede elalubo tiwai dao.
NUM 24:7 Te tulubage hauwa te Israel buluba tulaibao. Tama te Israel dabe augwa nai dabe te wiegi yai tǫde bulaibao. Te Israel dabego tuni bidigo bomo me genuai nogigo te Agak tuni bidigo nogi aiyaba elaluaibao. Tama Israel dabego tuni bidigo we bidi hani hauwa mu tonaluaibao.
NUM 24:8 Godigo augwali Isip buludu oda selama, augwali eba odasa asai dao. Godigo te bulu uni kau kibu omai tiwai bomonama elama, tama Israel dabego boi bidi dabe aiyaba elalubo dao. Tama tialima, te Israel dabego te boi bidi dabego ene dolama, augwaligo dili mia sąwaibao.
NUM 24:9 Israel dabe te boma pai laion tiwai dao. Te aga pilamubadi da, te bidi me deligo aga hodolobo usu egobeo. Ma, te bidi mego Godigo te Israel dabe dali wiegi yai sę yao po wali da, teda eno homugo Godigo te bidi dali wiegi yai sę yaibao. Ma, te bidi me deligo Godigo te Israel dabe dolomainao po wali da, teda eno homugo Godigo te bidi dolaibao,” Balamgo te po wai.
NUM 24:10 Balakgo te po odama, aga sębę mu elama, aga nogo si elali. Tama agai Balambolo te po walali, “Eno nage i olama asali da, nago eno boi bidi dabe dolao po omainogo i wai dao. Tiali goli, nago sela sogo augwali bugagia bidaibao po walio.
NUM 24:11 Teda tagalao, ena hagela ebo. Nage naga buluba megi ma pao. Hasia eno mone dabe hauwa nagebolo mawaibao po wai dao. Tiali goli, Genuai Bidigo nago sunumi palialigo da, nago sogobeo,” wali.
NUM 24:12 Tama Balamgo te po wei ponoyu, te po wali, “Odao. Eno nago ena oda sagasomainu taga palali bidi dabebolo eno polo wai dao,
NUM 24:13 te nago te gol me silva dabe te tuni bidigo bede selama, ena mobaso me tagalao. Eno ena homugo sę me egobeo. Tiyu, eno Genuai Bidigo po sela sąidalio. Eno te Genuai Bidigo enabolo pusao wali po naga pusaibao,” Balamgo te po wai.
NUM 24:14 Tama Balamgo Balak dali po genina ma weyu, te po wali, “Megi ena ena we bidiba ma paibao. Tiali goli, eno nagebolo te Israel dabego nago we bidi dali nosali yabo sę po nagebolo pusaibao.”
NUM 24:15 Tama agai te profet po pusali, “Beorgo ogwa Balam, eno te po odao. Eno gedu wiegi yai mu elama, tama eno bugagia tonono bilibo dao.
NUM 24:16 Tama eno Godigo pusubo po eno odobo dao. Tama eno God Dagalude Bidibo Bidigo mabo kolesaga sabo dao. God Tigidali Bomo Elalubo Bidigo enabolo te nade ebo sę tiwai enabolo haninani, tama eno te nai hania mu suali.
NUM 24:17 Eno te nosali yabo sę dabe naga suali, te sę megi pedalugobeo. Tama eno te Israel dabe bidibo suali. Te bidi me deli te bomo dali genuai nogi yai bidi te Israel hani dabego tuni bidi pedalaibao. Tama agai te Moap tobolu bidi dabe dali bomona mu hwįaibao, tama augwaligo tobolu dili aluaibao, tama agai te Setgo hani wąį dabego tobolu dili dolama tagalaibao.
NUM 24:18 Agai te aga boi bidi dabe te Idom bulude dolama, tama augwaligo tǫ saibao. Tama te Israel dabego bomonama, aga Seir boi bidi dabe augwali aiyaba elaluyu yaibao.
NUM 24:19 Tama te Israel dabego te boi bidi dabe agalama, tama augwali mu dolaibao, tama augwali deli me bidigobeo,” wali.
NUM 24:20 Tama te Balamgo te nade suali nai dabe po, te Amalek dabe suali po te profet po augwalide pusali. Agai te po wali, “Te Amalek dabe te bomai bidi hani me deli bidai dao. Tiali goli, augwali nosali mu dolaibao.”
NUM 24:21 Tama te nade suali te profet po te Kin hani bidi dabe po augwalide pusali. Agai te po wali, “Dagego te bidibo pesage te wiegi yai bomai pesage me deli dao. Dage te ba kemodagego be te bulu du te masigi yai bulude elalubo be tiwai dao.
NUM 24:22 Tiali goli, nosali te Asiria dabego dage dali hwįagaselama, dage dolama, tama dage Kin hani dabe kalabus elama, odasa paibao.”
NUM 24:23 Tama Balamgo profet po me deli pusuyu, te po wali, “Tiali, Godigo te tobage kolesaga eyu da, teda de mu bugagia bidaibawe?
NUM 24:24 Te Saiprus dabego te sip geba sela aselama, tama te Asiria de Eber dali hwįnama, augwali aiyaba elaluaibao. Tiali goli, Saiprus dabe me mu tama hagawaibao.”
NUM 24:25 Balamgo te po polo ola silama, tama aga buluba ma geasa pali, tama Balak me aga buluba ma pali.
NUM 25:1 Te Israel dabe augwali augwa pesage te odogo bulu, te bulu Sitim tede bidiyu, te Israel dabego te Moap we dabe te bulude bidali we dabe dali penane sę ebo gagalali.
NUM 25:2 Tama te we dabego te Israel dabe te Moap dabego te tibo godibolo ofa elama, lotu po wabo pesageba odasa pali. Tama te Israel dabego te ofa yali nai tulama, tama tibo godiba lotu po wali.
NUM 25:3 Tama te kolesagago te Israel dabego tibo god Bal wali pali, te Peor bulu dabego tibo god. Tama tibaso, Genuai Bidigo augwali dali sębę yali.
NUM 25:4 Tama agai Mosesbolo te po wali, “Dage Israel dabego duga tobolu bidi dabe selama, tama te dwai sę yali bidi dabe selama, te niba walama, bidi gesabidide ela muao, te we bidi dabego augwali suaibao. Dagego te tama tiyu da, teda eno te tigidali we bidi dabe dali moni sębę me ma egobeo,” wali.
NUM 25:5 Tialima, Mosesgo Israel dabe tobolu bidi dabe dali te po wali, “Dage deli deligo duga hani bidi te Peor bulugo tibo god Balba lotu po wabo bidi ela muao,” wali.
NUM 25:6 Moses te we bidi dabe dali augwali te Godigo ugwa be sunumide bidiyu, gela odubadi yaide, tama augwaligo suali, te Israel hani bidi me deligo te Midian we me deli odasa, aga ugwa be tomoba odasa soabo suali.
NUM 25:7 Tama te Finias, te pris bidi Arongo ogwa Eleasargo ogwago augwali si suali. Tialima, agai te we bidi taga pelama, tama polo pelama, aga sesemone sigi pali.
NUM 25:8 Tama aga te we bidi si wali pelama, te ugwa be tomoba tula pelama, te we de bidi si hodobo agai sesemonego enani. Genuai Bidigo dwai gasi me te Israel we bidibolo menama, tama 24,000 we bidi te gasi selama isali. Tiali goli, Finiasgo te we de bidi si ela mubo si, te gasi sia sali.
NUM 25:10 Tialima, Genuai Bidigo Mosesbolo te po wali,
NUM 25:11 “Te Finiasgo te si elalio, tama tibaso eno te Israel we bidi dali sębę menio. Magi baso meni. Agai homugo te Israel dabego te tibo godiba lotu wabo hagela mu yali. Agai bomogo augwali ena deliba naga lotu omainao olama bomo yali dao, te eno ena homugo emainao wali gilama tama. Tama tialima, eno tigidali we bidi mu dolai menio.
NUM 25:12 Tama tibaso, megi nago agabolo te po wao, eno aga dali megi mu kęą pobao, te ena aga abagi tigidali sogo bidaibao.
NUM 25:13 Tama tialima, aga aga wąį wai dabe augwali pris sę sesemane sogo elalua pidu mu elalua paibao. Magi baso meni. Agai homugo te Israel dabe ena hasegelama, te tibo godiba lotu wabo hagela mu yalio. Tama agai te we bidi dabego sęgę sela sąyabo sę me deli yalio,” te po wai.
NUM 25:14 Simri te Finiasgo te Midian we dali hodobo elama isilali Israel bidi dao. Simri te Salugo ogwa dao. Tama te Salu te Simeon hani bugai mebago tobolu bidi dao.
NUM 25:15 Tama te Midian wego nogi te Kosbi dao, tama te Kosbi aga aya nogi te Sur dao. Tama te Sur te Midian hani mego tobolu bidi dao.
NUM 25:16 Tama Genuai Bidigo Mosesbolo te po wali,
NUM 25:17 “Dage te Midian dabe dali hwįgi pelama, augwali doligi piąo.
NUM 25:18 Magi baso meni. Augwaligo te Peorde yali te ili po walide augwaligo dage dali dwai kolesaga yai dao. Me te Kosbigo yali dwai kolesagago me dage dolai dao. Kosbi te Midian bulu we dao, te Finiasgo te ela muani we dao, te moni gasi me deli te Israel dabede ebaso elali we dao, te Peorde.” Genuai Bidigo te po wai.
NUM 26:1 Te genuai gasi silama, tama Genuai Bidigo Moses de Arongo ogwa Eleasar sibolo te po wali,
NUM 26:2 “Megi da, nago te Israel hanigo wąį hani bidi dabe sese tama nedao. Teda te kibu be nogo si sągą si yai bidi dabe, me te nogo si sągą si edelai bidi dabe me nedao, tama augwali ami bidi nigabo usu yai sao,” wali.
NUM 26:3 Tialima, Moses de Eleasar sigo Genuai Bidigo po wali pali. Tama augwali sigo te bidi dabe te kibu be nogo si sągą si, me te kibu be edelai bidi dabe i wali. Tama augwali te Moapde dola pai buluba sisinagasali, te wę Jordan sesege badu, te hanu Jeriko pąde. Augwaligo te Isip tagalama asali bidi dabe nedao po wali, tama augwaligo namba e tama dao.
NUM 26:5 Ruben te Jekopgo gomunai ogwago hanigo wąį aga hani mu e tama elaluali, Hanok, me Palu,
NUM 26:6 me Hesron, me Karmi.
NUM 26:7 Te hani me si me si bidi dabe te 43,730 te elaluali.
NUM 26:8 Te Palugo ogwa te Eliap dao.
NUM 26:9 Tama te Eliapgo ogwa te e dao, te Nemuel, me Datan, me Abiram. Tama polobadu te we bidigo te Datan me Abiram si tobolu bidi bidimainogo sa muai dao. Tiali goli, augwali si te Moses de Aron si dali hagoma elama, augwali si Kora hani dali taluama, augwali sesego Genuai Bidi dali dwai hagoma kolesaga yali.
NUM 26:10 Tialima, te tǫ tomode si peda pelama, moni dedage nigilama, tama te bidi augwali sese tama te dedageba tulaluama, tama tǫ ma madu selama, augwali mesegelai dao. Augwali te Kora dali tama isali, tama te sogo me te 250 bidi aga wali pali bidi te isigo dolali. Tama te kolesagago te Godigo bomai homu kolesaga mu te we bidi mani, te augwaligo me te dwai kolesaga wali pidali weyu.
NUM 26:11 Tiali goli, te Korago ogwa dabe te dolali sogo isai menio.
NUM 26:12 Te Simeon aga hani meba e tama elaluali, te Nemuel, me Jamin, me Jakin,
NUM 26:13 me Sera, me Saul dao.
NUM 26:14 Tama te a naga hani deligo da te 22,200 bidi elaluali.
NUM 26:15 Te Gat hani bidi dabe augwa hani meba e tama elaluali, te Sefon, me Hagi, me Suni,
NUM 26:16 me Osni, me Eri,
NUM 26:17 me Arot, me te Areli dao.
NUM 26:18 Tama te a naga olama si hani deligo te 40,500 bidi dabe elaluali.
NUM 26:19 Te Juda hanigo aga hani meba e tama elaluali, Sela, me Peres, me Sera, Hesron me Hamul, Peres te Hesron de Hamul sigo aya dao. Polobadu Judago ogwa si me te Er me Onan si te bulu Kenande isai dao.
NUM 26:22 Te a naga hani deligo te 76,500 bidi dabe tama elaluali.
NUM 26:23 Isakar aga hani meba te tama elaluali, te Tola, me Puva, me Jasup, me Simron. Te Puva aga hani augwa digi augwa nogi te Pun nogi yali.
NUM 26:25 Te me si me si hani deligo te 64,300 bidi tama elaluali.
NUM 26:26 Te Sebulun hanigo hani meba e tama elaluali, te Seret me Elon me Jalel.
NUM 26:27 Te hani selago bidi dabe te 60,500 tama elaluali.
NUM 26:28 Te Josepgo hani si elaluali, te Manase me Efraim.
NUM 26:29 Te Manase hani te e tama dao. Te Makir te Manasego ogwa dao, te Gileatgo aya. Tama te Gileatgo wąį dabe deli hani da, te e tama dao, te Ieser, me Helek,
NUM 26:31 me Asriel, me Sekem,
NUM 26:32 me Semida, me Hefer.
NUM 26:33 Selofehat, te Hefergo ogwa, agai ogwa meni. Agai te wegi mani naga elaluali. Augwaligo nogi e tama dao, Mala, me Noa, me Hokla, me Milka, me Tirsa.
NUM 26:34 Te a naga olama deli te Manase wąį hani deligo te 52,700 bidi dabe tama elaluali.
NUM 26:35 Te Efraim hani wąį deligo da e tama elaluali, Sutela, me Beker, me Tahan.
NUM 26:36 Tama Sutela te Eran hanigo wąį dao.
NUM 26:37 Tama te hani wąį deli selago da te 32,500 bidi tama elaluali. Te Manase hani de Efraim hani augwali sigo wąį deli dao, te Josep dao.
NUM 26:38 Te Benjamin hanigo wąį e tama elaluali, Bela, me Asbel, me Ahiram,
NUM 26:39 me Sefufam, me Hufam.
NUM 26:40 Tama te Art me Naman augwa wąį te Bela dao.
NUM 26:41 Tama te hani wąį a naga augwaligo te 45,600 bidi tama elaluali.
NUM 26:42 Te Dango te aga hani wąį deli tama elaluali, te Husim dao,
NUM 26:43 tama te hanigo te 64,400 bidi tama elaluali.
NUM 26:44 Te Aser hanigo wąį te e tama elaluali, te Imna, me Isvi, me Beria.
NUM 26:45 Tama te Beria te Heber de Malkiel sigo wąį dao.
NUM 26:46 Asergo wegi deli dao, te wegi nogi te Sera dao.
NUM 26:47 Te deli wąį selago te 53,400 bidi tama bidali.
NUM 26:48 Te Naptali hani wąį te e tama elaluali, Jasiel, me Guni,
NUM 26:49 me Jeser, me Silem.
NUM 26:50 Te deli wąį me si me sigo te 45,400 bidi dabe tama elaluali.
NUM 26:51 Tialima, te Israel dabe namba sese tama te 601,730 bidi dabe tama elaluali.
NUM 26:52 Nosali Genuai Bidigo Mosesbolo te po walali,
NUM 26:53 “Megi da, eno homugo nago te deli deli hani bidi wąįgo we bidi dabe namba usu nama, augwali tǫ nosali dobayao.
NUM 26:54 Nago te tǫ togola dobayainu, te satu gagali yao. Tama te we bidi hauwa elaluali we bidi haniba te tǫ genuai togola mao, tama te we bidi dwasianu yali we bidi haniba te tǫ dwasianu tama togola dobayao,” te po wai.
NUM 26:57 Te Livai hanigo wąį te dao, Gerson me Kohat me Merari.
NUM 26:58 Gerson, me Kohat, me Merari, augwali hani wąį te e dao, Lipni, me Hebron, me Mali, me Musi, me Kora. Kohat te Amramgo aya dao.
NUM 26:59 Tama Amramgo te Jokebet sai dao, te Livaigo wegi. Jokebet augwali te Isipde bidibadi ame nai dao. Tama Jokebetgo ogwa si ame nai dao, te Aron de Moses si. Tama Jokebetgo te wegi deli ame nai dao, te agai nogi te Miriam dao.
NUM 26:60 Tama nosali Aron aga we selama, te ogwa me si me si ame nani, te Nadap, me Abihu, me Eleasar, me Itamar dao.
NUM 26:61 Te Nadap de Abihu si te habu selai isi selama, Genuai Bidibolo ofa yaide isai dao.
NUM 26:62 Te Livai hani dabego bidi dabe naga namba te dwasianu polua deli yai waidu gagalama, polo monu dabe yaiba sabolali bidi namba, te 23,000 dao. Augwaligo te Livai dabego namba dali te Israel dabego namba dali deliba talubeo. Magi baso meni, augwaligo te Israel dabebolo yali gilama te Livai dabebolo tǫ me mawai menio.
NUM 26:63 Moses de Eleasar si te Moap bulude te dola pai bulude bidiyu, te Jordan wę u badu, te Jeriko hanu pąde, augwali si tede bidiyu, te Israel bidi dabego nogi selama, tama lista nigali.
NUM 26:64 Polobadu te Moses de Aron sigo te bidi dabe te nai meni yai bulude nedai dao, te Sainai bulu du pąde. Tiali goli, megi da, te hani me bidibadi Mosesgo augwali nogi me sabeo. Mu menio.
NUM 26:65 Polobadu Genuai Bidigo augwalibolo te po walai dao, “Te bidi dabe augwali sese te nai meni yai bulude isila paibao,” po wai dao. Tiali goli, Jefunego ogwa Kalep, de Nungo ogwa Josua augwali si digi te isibeo.
NUM 27:1 Te Selofehat te Hefergo ogwa dao, te Hefer te Gileatgo ogwa dao, tama te Gileat te Makirgo ogwa da, tama te Makir te Manasego ogwa dao, tama te Manase te Josepgo ogwa dao. Tialima, Selofehatgo we selama, wegi a naga ame nani. Augwaligo nogi Mala, me Noa, me Hokla, me Milka, me Tirsa dao. Tama augwali te hani wegi mani augwali
NUM 27:2 te Godigo name ugwa be sunumi pąba dolalugi pali, te Moses, me Eleasar, me te tobolu bidi dabe, me te Israel hani geduba doligi pali. Tama te wegi manigo te po wali,
NUM 27:3 “Dago aya te nai meni yai kemi sane bulude isai dao. Aga te Kora wali pelama, te Genuai Bidi dali hagoma yali bidi hani me deli menio. Aga digi sęgę selama isai dao. Tiali goli, agai ogwa menio.
NUM 27:4 Te mu tama. Agai ogwa menio te agai nogi sabo. Tiali goli, magi baso ayago nogi da Israel tomode hagagowe? Tama tialima, dago homugo nago dabolo te ayago hanigo tǫ da mao,” wali.
NUM 27:5 Tiali, Mosesgo augwaligo po selasa Genuai Bidiba selasa pali.
NUM 27:6 Tama Genuai Bidigo Mosesbolo te po wali,
NUM 27:7 “Te Selofehatgo wegi manigo te po te dolo dao. Tama tialima, nago te wegi manibolo augwa ayago hanigo sabo tǫ meba mao. Augwaligo agai tǫ somainogo sula tagalao.
NUM 27:8 Tama eno homugo nago Israel dabebolo te po wao, ‘Te bidigo aga ogwa meniama, agai wegi naga elalubaso da, tama nosali aga isali da, teda aga wegi manigo agai doado bage dabe somainao.
NUM 27:9 Ma, te bidigo wegi mani me meniama isibaso da, teda te bidi aga ama sologo te bidigo nai dabe somainao.
NUM 27:10 Ma, agai ama mu meni yai baso da, teda te bidi aga ayago amago te doado bage dabe somainao.
NUM 27:11 Ma, aga ayago ama mu meni yai baso da, teda te bidi aga deli hani wąįgo somainao, te bidigo doado bage. Te tigidali te Israel dabego te bomai po wali pomainao. Te Genuai Bidi eno nagebolo megi wabo te po wali pomainogo yao,’” te po wai.
NUM 27:12 Genuai Bidigo Mosesbolo te po wali, “Nage te bulu du Abarimba pelama, tama nago eno te Israel dabebolo mawainogo ebo te tǫba nago tonao.
NUM 27:13 Nago bolo suao, tama nosali nage isaibao. Te naga ama Aron isali tiwai nage me isaibao.
NUM 27:14 Magi baso meni. Dage sigo eno po te nai meni yai bulu te augwaligo te Sen wabo bulude sela sąwai dao. Te we bidigo enabolo te po hauwa wali te bulu Meribade. Nago augwalibolo eno genuai bomo ola mawai menio,” tama wali. Te ulu wę te nai meni yai kemi sane bulu Sende elalubao.
NUM 27:15 Tama Mosesgo Genuai Bidibolo te po wali,
NUM 27:16 “God, Genuai Bidi, nage deli naga nage te tigidali we bidigo bidibo ula page bidi dao. Tama tialima, eno nagebolo e we bidi tonaluabo bidi me deli sa muao po nagebolo hanalu obao.
NUM 27:17 Te augwali bugagia bidimainogo tau siyu, me wąbi hwįbode augwali bugagia tonaluyu yabo. Tama naga hani te sipsip kibu aga tolalubo bidi meni yai tiwai bidigobeo,” Mosesgo te po wali.
NUM 27:18 Tama Genuai Bidigo Mosesbolo te po wali, “Josua te Nungo ogwa, aga dali te eno Mobo Bidi mu bidibao, tama aga eno sę ebo usu yaibao. Tama tialima, eno homugo nago aga oda sigi pelama asao. Tama aga te pris Eleasar, me te Israel we bidi si pageba odasa pelama, doligi pao. Tama augwaligo gedude nago nogo agai tobolude munama, tama te po wao, ‘Te Josuago ena hasegelaibao,’ po wao. Tama nago sę agabolo mao.
NUM 27:20 Tama nago namba dage me, nago bomo me agabolo mao, te we bidi tigidaligo agai po wali peyu emainogo.
NUM 27:21 Tiali goli, Josua te Eleasar pageba pelama, tama eno homu kolesaga te tigidali nai dabede koneainogo yaibao, nosali. Tama Eleasargo te prisgo gudubo te name ugwa baude daganalubo te masigi si te dwasianu paus sao, te eno homu kolesaga konea sainogo. Tama Eleasargo te Josuabolo me te we bidi sesebolo te tigidali te sę ela silimainogo,” wali.
NUM 27:22 Tialima, te Mosesgo te Genuai Bidigo wali po tiwai tama yali. Agai te Josua te Eleasar me te we bidi pageba dolalumainogo yagasali.
NUM 27:23 Tama Mosesgo aga nogo te Josuago toboluba nogo munama, tama te po wali, “Josuago ena hasegelama, tama dagego tobolu bidi bidaibao,” wali. Mosesgo te Genuai Bidigo agabolo wali po wali pelama, tama yali.
NUM 28:1 Te Genuai Bidigo Mosesbolo
NUM 28:2 te bomai po te Israel dabebolo mao po wali. Tama agai te po wali, “‘Dage Israel dabego te enabolo digi ofa eyu, te ulubo te haniani nai dabe sao. Tama eyu, wiegi yai denami ebo ofa ulao. Eno te tobage ofa godolo ebo dao. Dagego te tobage ofa te eno bodolu muani te tigidali sogo uluyu yao.’
NUM 28:3 Moses, nago te Israel dabebolo tama wao, ‘Dagego te ofa Genuai Bidibolo mao,’ po wao. ‘Te tigidali sogo dagego sipsip kibu te kibu be deli yai, tama keni dabego agai tigi me dolisąma yai, si selama, ofa eyu yao. Te si te isigo mu dela silabo ofa dao.
NUM 28:4 Tama dagego me deli kigamu ofa eyu, me pio ofa eyu yao.
NUM 28:5 Tama te kigamu ebo ofade te kilo deli yai plaua augwaligo te witgo nigilama, tama lita deli te oliv wel dali begelai, te nai te sipsip dali ofa yao.
NUM 28:6 Dagego te ofa tigidali sogo yao, te isigo tigidali mu dela silama, tama sisi dulu naga tede elaluaibao. Polobadu dage te Sainai bulu dude bidibadi, eno te tobage ofa yao wai dao. Te wiegi yai hasa dabego te wiegi yai denami ebo tiwai te ofa ulubo te ena Genuai Bidigo godolo elama, wiegi yai homu ebo dao.
NUM 28:7 Tama dagego lita deli wain wę selama, te sipsip dali ofa yao, tama nosali te wain te alta sesegede gelao.
NUM 28:8 Tama pio te sipsip te wit ulubo ofa me wain gelebo ofa me ulao. Te dagego kigamu ulali ofa tiwai tama yao. Te me te isigo sese ula mu dela silibo ofa dao, tama te wiegi yai denami elama, ena Genuai Bidigo godolo elama, wiegi yai homu ebo ofa dao,’ te po augwalibolo pusao,” te po wai.
NUM 28:9 Tama Genuai Bidigo Mosesbolo te Israel bagebolo e pusabo po wali, “‘Te Sabat side dagego te omai sipsip kibu si, kibu be deli yai sipsip si ofa yao, tama te keni dabego augwaligo tigi me dolisąma yai sao. Tama kilo si yai wiegi yai plaua selama, tama oliv wel dali begelao, te wit ulubo ofa tiwai. Tama te wit ulubo ofa me te wain gelebo ofa te sipsip dali ulao.
NUM 28:10 Dagego te ofa te tigidali Sabat side isigo dela silibo ofa yao. Tama me dagego isigo sese dela silibo ofa, me te wain gelebo ofa dali tama yao, te dagego tigidali sogo ofa ebo dao,’ te po augwalibolo pusao,” te po wai.
NUM 28:11 Tama Genuai Bidigo Mosesbolo te we bidibolo te po omainu yali, “‘Te tigidali poluago namba wan deide dagego Genuai Bidiba ofa yao. Te da, te isigo mu dela silabo ofa dao. Dagego kau kibu omai si ofa eyu, me sipsip kibu omai si ofa eyu, me 7 sipsip kibu omai te kibu be deli yai, te ofa yao. Tama te hasa dabe tigidali te augwaligo tigi keni dabego me dolisąma yai dabe sao.
NUM 28:12 Tama dagego te wit ulubo ofa te sipsip me kau kibu dabe deli deli dali yao. Te kilo sela yai te plaua selama, tama te oliv wel dali taluai te plaua selama, tama te kau kibu dali ofa yao. Tama te 2 kilo yai te plaua selama, tama te oliv wel dali taluama, tama te sipsip kibu omai dali ofa yao.
NUM 28:13 Tama me te wan kilo plaua selama, te oliv wel dali taluama, tama te sipsip kibu gǫų dabe dali ofa yao, te sipsip omai gǫų deli deli dali ofa yao. Te isigo sese dela silabo te hasa ofa dao. Tama Genuai Bidigo te wiegi yai denami godolo elama, tama aga wiegi yai homu yabo ofa dao.
NUM 28:14 Dagego 2 lita wain wę selama, te kau kibu omai dali ofa yao, tama wan lita sela habu wain selama, te sipsip kibu omai dali ofa yao. Tama sipsip kibu gǫų dali da, te wan lita wain te deli deli sipsip gǫų dali ofa yao. Dagego te tama ofa te tigidali kibu bede deli deli poluago hasia wabo deide yao. Te isigo sese dela silabo ofa dao.
NUM 28:15 Tama dagego meme kibu omai te sęgę sela sąyabo ofa yainogo sao, tama te isigo sese mu dela silabo te ofa dali me te wain gelebo ofa dali yao. Te ofa dali te tigidali sogo yabo ofa dali tama yao.’ Te po augwalibolo pusao,” Genuai Bidigo Mosesbolo te po wai
NUM 28:16 Tama Genuai Bidigo Mosesbolo te we bidi dabebolo te po wao wali, “‘Dagego te namba wan poluago dei 14 te e tiwai sogo, te Pasova sogo sa muao. Tama te sogo dagego genuai nogi Genuai Bidibolo mao.
NUM 28:17 Tama te dei namba 15 te genuai lotu wabo gagalabo sogo dao. Tama dagego te yis meni yai bret te a naga olama me badu nogo si sogo dabe tuiąo.
NUM 28:18 Te hasia wabo sogo, te tedali gasagi yai sogo wabo, te we bidi te lotu wainogo sisiniąo. Tama augwaligo te sogo sę me elamuo.
NUM 28:19 Tama dagego Genuai Bidibolo ofa iyąo. Te ogwa bidi kau kibu omai si selama, tama sipsip kibu omai deli me, te 7 sipsip kibu omai gǫų te kibu be deli yai, te keni meni yai dabe selama, ofa yao. Tama dagego te isigo sese dela silibo ofa tama ulao.
NUM 28:20 Tama dagego te hasa dabe dali te wit ulubo ofa me yao. Dagego te plaua te oliv wel dali taluao. Te plaua kilo sela te omai kau kibu deli deli dali ofa yao, tama te plaua kilo si te sipsip kibu omai dali ofa yao.
NUM 28:21 Tama te kilo deli te sipsip kibu gǫų deli deli dali ofa yao.
NUM 28:22 Tama me dagego te sęgę sela sąbo ofa te meme kibu omai te ofa yao. Tama te ofago te we bidi tigidali eno gedude wiegi yai pedalaibao.
NUM 28:23 Dagego te ofa te tigidali sogo kigamu ebo ofa dali tiwai tama yao.
NUM 28:24 Dagego deli kolesaga naga elama, te ofa a naga sogo olama me badu nogo si wabo sogoba usu nigi pao. Tama agai te ofa ebo denami godolo yaibao. Tama me dagego te isigo sese mu dela silibo ofa, me te wain gelebo ofa tigidali sogo yao.
NUM 28:25 Tama te dei namba 7, te genuai tedali gasagi yai sogo da, tede dage ma sisinama lotu po ma wao. Tama te sogo te sę ebo te habu mu dao,’ te po pusao,” te po wali.
NUM 28:26 Tama Genuai Bidigo Mosesbolo te we bidibolo e tama po wao po wali, “‘Te gide nai siyu, wiegi yai homu ebo genuai sogo da, teda dagego te nai hasia inayali te selama, Genuai Bidibolo mao. Tama dage sisinama, lotu po wao. Tama te tedali gasagi yai sogo dagego sę me elamu dao.
NUM 28:27 Tama dagego te kau kibu omai si selama, te sipsip kibu omai deli me, te 7 sipsip kibu gǫų, te keni dabego augwaligo tigi me dolisąma yai sao. Tama dagego te nai dabe te isigo sese mu dela silibo ofa tiwai ulao. Te tobage ofa te Genuai Bidi agai godolo elama, tama wiegi yai homu ebo dao.
NUM 28:28 Tama dagego wiegi yai plaua augwaligo witgo nigai sao, tama dagego te plaua te oliv wel dali taluao. Tama dagego te plaua kilo sela te deli deli kau kibu omai dali ofa yao. Tama te kilo si plaua te sipsip kibu omai dali ofa yao.
NUM 28:29 Tama deli deli omai sipsip kibu gǫų dali, te kilo deli plaua dali ofa yao.
NUM 28:30 Tama me ma, dagego te meme kibu omai te sęgę sela sąbo ofa yao, tama te we bidi Genuai Bidigo gedude wiegi yai pedalabo ofa yao.
NUM 28:31 Tama dagego te ofa ebo sogo dagego bugagia suao, te kenigo augwaligo tigi me dolisąma yai suao. Tama me ma, dagego te wain gelebo ofa me yao, me te isigo sese mu dela silibo ofa me yao, me te wit ulubo ofa me yao. Te dagego tigidali sogo ebo ofa tiwai tama yao,’ augwalibolo te po wao,” Genuai Bidigo te po wali.
NUM 29:1 Tama Genuai Bidigo te we bidibolo Mosesgo te po wao wali, “‘Te 7 wabo poluago dei namba wande dage sisinama lotu weyu, tama dage te sę me elamuo. Te sogo da te biugel eliyu, wiegi yai homu ebo genuai sogo dao.
NUM 29:2 Tama me dagego te isigo mu dela silabo ofa Genuai Bidiba maiabo sogo dao. Agai te tobage ofa agai godolo ebo dao. Dagego te kau kibu omai ogwa bidi kibu deli, me sipsip kibu omai deli, me 7 sipsip kibu gǫų, te kibu be deli elama, augwaligo tigide keni dabego dolisąwai selama, ofa iyąo.
NUM 29:3 Tama dagego te wit ulubo ofa te ofa dabe dali yao. Dagego te wiegi yai plaua augwaligo witgo nigai, tama augwaligo oliv wel dali taluai selama, te ofa yao. Te kau kibu omai dali te 3 kilo plaua dali ofa yao, tama sipsip kibu omai dali te kilo si yai plaua ofa yao.
NUM 29:4 Tama sipsip gǫų dabe deli deli dali te plaua kilo deli dali ofa yao.
NUM 29:5 Tama me ma, dagego meme kibu omai te sęgę sela sąyabo ofa yao. Tama te sę ebogo te we bidi Genuai Bidigo gedude wiegi yai pedalaibao.
NUM 29:6 Dagego te ofa dabe yao, tama me dagego te isigo dela silibo ofa me eyu, me te wit ulubo ofa me eyu yao, te dagego tigidali poluago hasia wabo deide ebo tiwai yao. Tama me tigidali sogo yabo ofa me yao. Te da, te isigo sese dela silibo ofa, me te wit ulubo ofa, me te wain gelebo ofa dao. Genuai Bidigo te tobage ofa dabe godolo ebo dao, te wiegi yai denami ebo ofa,’ augwalibolo te po wao,” te po wai.
NUM 29:7 Tama Genuai Bidigo Mosesbolo te we bidibolo te po wao po wali, “‘Dage te 7 poluago namba 10 deide dage sisinagaselama, lotu wagasao. Tama dage nai dabe habu selama, tama dagego duga digi wiegi yai homu pemene ebo sę elamuo. Tama me dage te sogo sę me elamuo.
NUM 29:8 Tialima, dagego te kau kibu omai ogwa bidi kau kibu, me omai sipsip kibu, me 7 sipsip kibu gǫų dabe sao, te kibu be deli yai kibu sipsip dabe. Te hasa tigidali augwali tigide keni dabe mu meni yai sao. Tama dagego sese tama Genuai Bidibolo ofa yao. Te isigo sese dela silibo ofa tiwai ulao. Tama Genuai Bidigo te tobage ofa denami godolo mu yaibao.
NUM 29:9 Tama me dagego te wit ulubo ofa, me te isigo sese dela silibo ofa dali tama ulao. Te witgo wiegi yai plaua selama, tama oliv wel dali taluama, tama ofa yao. Dagego plaua kilo sela te kau kibu omai dali ofa yao,
NUM 29:10 me te sipsip kibu omai dali te plaua kilo si ofa yao, me te sipsip kibu gǫų deli deli dali te plaua kilo deli ofa yao.
NUM 29:11 Tama me ma, dagego te meme kibu omai te we bidigo sęgę sela sąbo ofa tiwai yao, te Genuai Bidigo gedude wiegi yai pedalabo ofa eyu, me te tigidali sogo yabo ofa me tama yao. Te da, te isigo sese dela silibo ofa, me te wit ulubo ofa, me te wain ąį gelebo ofa dao.’ Augwalibolo te po wao,” Genuai Bidigo te po wai.
NUM 29:12 Tialima, Genuai Bidigo Mosesbolo te we bidibolo te po walao po wali, “‘Dage te dei 15, te 7 poluade sisinama, lotu po omainu yao. Dagego a naga olama, me badu nogo si sogo te Genuai Bidiba genuai lotu wabo sogo bodolu muao. Tama dagego te sogo dabe dage sę me elamuo.
NUM 29:13 Te dei namba wan te 7 lotu wabo bodolu muani, te sogo dagego Genuai Bidiba ofa yao. Agai te tobage ofa ebo denami agai godolo ebo dao. Dagego te kau kibu omai ogwa bidi kibu te 13 tama ofa yao, me te sipsip kibu omai si, me 14 sipsip kibu gǫų te kibu be deli yai, tama keni dabego augwaligo tigi me dolisąwai sao. Dagego wiegi yai hasa dabe naga sao, te augwali tigide keni dabego me dolisąwai sao.
NUM 29:14 Te wit ulubo ofa, me te plaua ulainogo dagego te plaua oliv wel dali taluao. Te plaua kilo sela te kau kibu omai deli deli dali ofa yao. Tama te sipsip kibu deli deli dali te plaua kilo si te sipsip kibu dali ofa yao.
NUM 29:15 Tama me te plaua kilo deli te deli deli sipsip kibu gǫų dali ofa yao.
NUM 29:16 Tama me dagego te meme kibu deli te sęgę sela sąyabo ofa yao. Dage tigidali sogo yabo ofa me tama iyąo, te da te isigo sese dela silibo ofa dao, me te wit ulubo ofa, me wain gelebo ofa me, tama yao.’ Te po wao,” wali.
NUM 29:17 “‘Tama te dei namba 2, teda dagego te kau kibu omai ogwa bidi kibu 12 te ofa yao, tama te sipsip kibu omai si, me te 14 sipsip kibu gǫų te kibu be deli yai tama ofa yao, te augwali te keni dabego tigi me dolisąma yai sao.
NUM 29:18 Dagego te ofa dabe dali te dei namba wande yali ofa dali yao, te wit dali, wain ąį dali, te togbage nai me te dei namba 2 ma mayu ofa tama iyąo. Tama me dagego te meme omai me deli te dwai sęgę sela sąbo ofa dali yao.’”
NUM 29:20 “‘Tama te dei namba 3, tede dagego te 11 kau kibu omai ofa yao, me te sipsip kibu omai si, me te 14 sipsip kibu gǫų te kibu be deli yai, te ofa yao. Te kibu dabe augwali keni dabego dolisąma yai sao, tilama tama ofa yao.
NUM 29:21 Dagego te ofa te dage te dei namba wande te yali ofa, te wit, me wain, me meme, te tobage ofa dali tama me ulao. Tama me dagego te meme omai me deligo te dwai sęgę sela sąbo ofa dali yao.’”
NUM 29:23 “‘Tialima, te dei namba 4, tede dagego te kau kibu nogo si ofa yao, tama te sipsip kibu omai si, me te 14 sipsip kibu omai gǫų te kibu be deli yai, tama augwaligo tigide keni dabego me dolisąwai selama ofa yao.
NUM 29:24 Dagego te ofa dabe te gasa ofa dabe dagego te dei namba wande yali ofa dali me ma yao. Tama me dagego te meme omai me deligo te dwai sęgę sela sąbo ofa dali yao.’”
NUM 29:26 “‘Tama te dei namba 5, tede dagego te kau kibu omai 9; te sipsip kibu omai si, me te sipsip kibu gǫų 14 te kibu be deli elama, tama keni dabego me augwaligo tigi dolisąwai selama, ofa yao.
NUM 29:27 Tama dagego te ofa te dagego gasa meba sogo te dei namba wande yali ofa dali tama me yao, te wit, me wain, te tobage ofa me ma yao. Tama me dagego te meme omai me deligo te dwai sęgę sela sąbo ofa dali yao.’”
NUM 29:29 “‘Te dei namba 6, tede dagego te kau kibu omai 8 ofa yao, me te sipsip kibu omai si, me te sipsip kibu omai gǫų 14, tama te kibu augwali te keni dabego me dolisąwai sao, te kibu be deli yai kibu dabe.
NUM 29:30 Tama dagego te ofa dabe dagego te dei namba wande yali ofa dali ma eyu, tama yao. Tama me dagego te meme omai me deligo te dwai sęgę sela sąbo ofa dali yao.’”
NUM 29:32 “‘Tama te dei namba 7, tede dagego te 7 kau kibu omai ofa yao. Me te sipsip kibu omai si, me te sipsip kibu omai gǫų 14, te kibu be deli yai, te keni dabego augwaligo tigi me dolisąma yai selama, ofa tama yao.
NUM 29:33 Tama dagego te ofa te gasa ofa dagego te dei namba wande yali ofa dali tama yao. Tama me dagego te meme omai me deligo te dwai sęgę sela sąbo ofa dali yao.’”
NUM 29:35 “‘Tama te dei namba 8, tede dage sisinama, lotu wao. Tama te sogo dagego sę me elamu dao.
NUM 29:36 Tama dagego nai ofa Genuai Bidiba yao. Agai te tobage ofa ebo denami godolo ebo dao. Tama te ofade dagego te kau kibu omai deli siyu, me sipsip kibu omai deli siyu, me 7 omai sipsip kibu gǫų, te kibu be deli elama, tama keni dabego augwaligo tigi dabe me dolisąma yai selama, ofa yao. Tama isigo sese dela silabo ofa yao. Te kibu dabe te keni dabego augwaligo tigi dolisąma elama, wiegi yai mu selama, te ofa yao.
NUM 29:37 Dagego te kibu dabe ofa dali te dagego te gasa dei namba wande yali ofa dali yao, te wit me, wain me, te sęgę sela sąbo meme omai ofa me, te tama ofa me ma yao.’”
NUM 29:39 “‘Dagego te isigo dela silibo ofa ebo bomai po wali peyu, me te wit ulubo ofago bomai po, me wain gelebo ofa ebo bomai po, me homu deli ilibo ofa ebo bomai po, te dage bolo agai te genuai lotu wabo sogo agai dagebolo sa muani sogo wali pabo bomai po dao. Dagego te ofa dabe dagego te dąį ilali sogoba usu nabo ofa, me duga homugo ebo ofa me tama yao,’ te po augwalibolo pusao,” Genuai Bidigo te po Mosesbolo wai.
NUM 29:40 Mosesgo te po odama, tama agai te Israel we bidibolo agai te wali po sese tama pusa mani.
NUM 30:1 Mosesgo te Genuai Bidigo po dabe te Israel dabego tobolu bidi dabebolo pusali.
NUM 30:2 Agai te po wali, “Te bidi mego te nai me Genuai Bidibolo maiabo po polo wai ebaso da, ma agai mu po ugwadu mu weyu, agai magi sę dabe me yainogo po dąų obaso da, teda agai aga po wali pelama, tama agai yaibao wali sę dabe tama mu yao, agai te dąų wali po togogio,” wali.
NUM 30:3 “Ma, te gesi wegi aga ayago bede bidiyu, tama Genuai Bidibolo magi nai me mawaibao po weyu, ma agai magi sę dabe me egobeo po wali da, teda agai te po usu dao.
NUM 30:4 Ma, agai ayago te po odama, aga habu selesiąbaso da, teda te wegigo aga te wali po tigidali wali pelama, emainao.
NUM 30:5 Tiali goli, aga ayago te wegi agai wali po odobaso da, tama agai te odali sogo te wegibolo agai wali po wali pigio olama habu selali da, teda te wegigo digi wali po wali pelamuo. Tama te Genuai Bidigo agai sę te agai wali po wali pisąma yali te sęgę sela sąwaibao. Magi baso meni, aga ayago te wegigo wali po wali pomainogo sula tagalobeo,” wali.
NUM 30:6 “Ma, te bidigo sasiąwai gesi wegigo aga homugo bugagia kone palama, te mena mena sę eno yaibao wali da, ma agai olo dali tama wali da, teda te dwagi yai dao.
NUM 30:7 Tialima, te wegi aga nosali bidi pelama, tama aga te bidigo agai te yaibao wali sę po agai odama habu selisąma yali da, teda te wegi aga te yaibao wali te sę dabe wali pelama tama yao.
NUM 30:8 Tiali goli, te wegi aga bidigo te wegigo aga haniani sę dabe aga homugo yaibao wali po odali sogo, tama aga we habu selali da, teda te we aga te po wali pelamuo. Tama tiali, te Genuai Bidigo te wego aga wali po wali pisąma yali te sęgę sela sąwaibao.”
NUM 30:9 “Ma, te we me aga bidi isai, ma aga bidigo aga sela sąwai wego agai aga mena mena sę dabe aga yaibao waibaso, ma egobe waibaso da, teda te usu dao, aga te mena mena sę aga emainao. Tiali goli, agai te dąų wali po wali pao.”
NUM 30:10 “Ma, te bidigo sai wego te mena mena sę dabe aga yaibao po me waibaso da, teda wiegi yai dao.
NUM 30:11 Ma, te we aga bidigo aga wego wabo po odama, tama agai magi po me olama, aga webolo te po wali me pelamuo olama, habu selisąma yali da, teda te we aga te yaibao wali po wali pelama, tama aga te sę dabe sese tama wali pela emainao.
NUM 30:12 Tiali goli, te we aga bidigo te wego wabo po odali sogo tama habu selali da, teda te we aga te wali po sese tama wali pomainu elamuo. Te aga bidigo aga habu selali dao. Tama tialima, Genuai Bidigo te wego sęgę sela sąwaibao, te we aga wali po wali pisąma yali sęgę.
NUM 30:13 Te we aga bidigo te wego wali po wali pao wabo me, ma aga wego wali po wali pigio wabo me ebo, te usu dao.
NUM 30:14 Tiali goli, te bidigo te po odali sogo nosali bidama, agai po me olama, habu selisąma yali da, teda te wego aga wali po dabe sese tama wali pelama, aga mena sę dabe yai wali tama yao. Te we aga bidigo te po dąų walalio, magi baso meni, agai aga we habu selebo po olama ebeo.
NUM 30:15 Tiali goli, bidama nosali me sogo agai aga we te po wali pelamuo olama, habu selali da, teda te bidi aga digi te wego aga te wali po wali pisąma yali te sęgę te bidigo saibao,” Mosesgo Godigo te po augwalibolo pusa mani.
NUM 30:16 Genuai Bidigo te mena mena sę yaibao olama, te dąų walobo pogo bomai po te Mosesbolo mani. Te bomai po dabe te bidigo wego ma wegigo augwa mena mena sę augwa yaibao olama dąų wali pogo bomai po dao. Te bidigo wego yabo po dao, me te gesi wegi aga bidi pisąbadi te aga aya dali bidibadi, te wego yabo po dao.
NUM 31:1 Genuai Bidigo Mosesbolo te po wali,
NUM 31:2 “Dage pelama, te Midian bagego dage Israel dabe dali dwai sę yali, te sę wei ponigi peyu, augwali sese ela mugi pao. Dagego te sę ela silibo si, tama nosali Moses nage isaibao,” te po wali.
NUM 31:3 Tialima, Mosesgo Israel dabebolo te po wali, “Dagego hwįbo nai dabe dodolama, tama Midian dabe dali hwįgi pao. Magi baso meni. Genuai Bidigo te bidi dabe augwaligo dage dali dwai kolesaga yali te sę wei ponoyu, augwali sese ela silaibao.
NUM 31:4 Dagego te deli deli wąį dabede dagego te 1,000 bidi dabe dage Israel dabe tomode sa munama, hwįgi pomainao,” te po wai.
NUM 31:5 Tama tialima, augwaligo te Israel dabego wąį deli delide augwaligo 1,000 bidi dabe sesa pelama, 12,000 bidi tama nigali. Augwali hwįgi pabo usu mu elaluali.
NUM 31:6 Tama Mosesgo augwali hwįgi pao po olama, tagala palali. Tama Eleasargo ogwa Finias augwali dali pelama, augwali tonaluali. Tama Finiasgo te Godigo ugwa bede nai dabe meba selama tolaluali, me te bidi hwįgi pomainu bu wabo te biugel, me te beba ma asomainu bu wabo, te biugel me agai tonaluali.
NUM 31:7 Tama augwali te Genuai Bidigo po wali gilama, te Midian dabe dali hwįgi pali, te Mosesbolo wali po wali peyu, tama augwaligo te Midian bidi dabe sese tama ela muna silali.
NUM 31:8 Tama augwaligo Midian dabego tuni bidi dabe a naga me ela muani. Te da te Evi, me Rekem, me Sur, me Hur, me Reba. Me augwaligo te Beorgo ogwa Balam me augwaligo ela muani.
NUM 31:9 Te Israel dabe augwaligo te Midian dabego we wai, me augwaligo kau kibu, me sipsip kibu dabe selama, asali. Te meba wiegi yai nai dabe me tama sali.
NUM 31:10 Tama nosali augwaligo te Midian dabego hanu, me te augwali osogo bidali pesage sese tama isi tulali.
NUM 31:11 Tama nosali augwaligo te we wai, me kau kibu, me sipsip kibu, me te wiegi yai nai dabe augwaligo te
NUM 31:12 Moses, me Eleasar, me te Israel dabe pageba te Moapde malu bulude bidibadi sesali, te wę Jordan u badu, te Jeriko dolo si dao.
NUM 31:13 Moses, me Eleasar, me te Israel dabego tobolu bidi dabe sese, augwali te bidibo pesage tagalama, bulu badu pelama, te ami bidi dabe tiąba pali.
NUM 31:14 Augwaligo te bage sulama, tama Mosesgo te 1,000 ami bidi tonalubo ofisa bidi, me 100 ami bidi dabe tonalubo ofisa bidi dabe sesanani. Megi da, augwali hwįani madi tagalama, augwa pesageba ma asali.
NUM 31:15 Tama agai augwalibolo hanaluyu, te po wali, “Magi baso dagego te we dabe ela mubewe?
NUM 31:16 Dagego polo koneai dao, te we dabe augwaligo te Balamgo po wali pelama, tama da hani we bidi te Genuai Bidi tudi ola momainogo yai dao, te da te bulu Peorde bidibadi. Tama tibaso, te gasi dwai me deli te Genuai Bidigo we bidi tigide pedalai dao.
NUM 31:17 Tialima, megi da, dagego ogwa dabe, me te we dabe bidi dali piai we dabe ela muao.
NUM 31:18 Tiali goli, te bidi dabe dali pisąma yali, te wegi dabe da, tagalao. Tama augwali duga siąo,” wali.
NUM 31:19 “Tama dage te bidi ela muani bidi dabe, ma te isai bidi tigi nogo tuali bidi dabe, dage bulu badu bidibadi, a naga sogo olama, si sogo dage bulu badu, te bidibo pesage bulu badu bidiąo. Tama te dei namba 3; te namba 7 deide, dage me duga te hwįani sogo sali te we dabe dage te Godigo gedude wiegi yai pedalainu ebo kolesaga iyąo. Tama dage Godigo gedude wiegi yai pedalaibao.
NUM 31:20 Tama dagego te duga nai dabe me te Godigo gedude wiegi yai pedalobo kolesaga iyąo. Te da, te dagego ugwa dabe, me te augwaligo kau kibu waligo nigai nai me, te meme nisigo nigai nai me, te ni name dage me.” Mosesgo te po wai.
NUM 31:21 Tialima, te pris Eleasargo te wabi hwįnama ma asali bidi dabebolo te po wali, “Genuai Bidigo Mosesbolo te mani te bomai po odiąo.
NUM 31:22 Te isigo dolisąbo nai dabe, te gol, me silva, me ain, me kapa, me bras, te tama nai dabe dagego isi bogoliba osogo muao, tama te nai dabe Genuai Bidigo gedude ma wiegi yai pedalaibao. Ma, te nai dabe te isigo mu dolabo nai dabe yaibaso da, dagego te wę telayao, te bedeba so kau kibu sisi dulu dali taluali węgo tama telayao, tama augwali wiegi yai ma pedalaibao.
NUM 31:24 Te dei namba 7, tede dage te duga ugwa dabe ąį tedalama, tama dage Godigo gedude wiegi yai pedalaibao. Tama dage te bidi bidibo pesage tomoba pagameo,” Eleasargo te po wai.
NUM 31:25 Tama Genuai Bidigo Mosesbolo te po wali,
NUM 31:26 “Nage, me Eleasar, me we bidigo tobolu bidi dabe, dagego te wegi dabe sese, me wai dabe, me te hasa sibi, te ami bidi dabego boide sali nai, dagego te nai dabe tama nedao.
NUM 31:27 Tama te nai dabe si bugulama, tama hani sibolo dobayao, te hwįgi pali bidi dabe, me te bede bidali bidi hani si bugulama, tama dobayao.
NUM 31:28 Nago eno takis me sao, Genuai Bidi eno takis sao, te nago te ami dabebolo mawainogo ebo te hanide. Te 500 kalabus ilali wegide me deli, me te 500 kau kibude me deli, me te donkide deli, me sipsip kibude deli, me meme kibude deli tama selama,
NUM 31:29 tama te takis te pris Eleasarbolo mao, te nai bugai te enabolo ma mabo tiwai.
NUM 31:30 Tama tialima, nago te bede bidali we bidibolo mabo te nai dabede me takis sao. Te 50 kalabus wegi dabede deli siyu, me te kau kibude deli, donkide deli, me sipsipde deli, me meme kibugo deli, tama te tigidali 50 50 elama te Livai dabebolo takis mao. Te augwali eno ugwa be tonalubo bidi dabe dao,” Genuai Bidigo te po wai.
NUM 31:31 Tialima, Moses de Eleasar sigo Genuai Bidigo Mosesbolo wali po dolo tama tiali.
NUM 31:32 Te ami bidi dabego te boide sali nai dabe namba e tama dao, te sipsip kibu te 675,000, me kau kibu te 72,000, me te kibu donki te 61,000, me te 32,000 bidi dali pisąwai gesi wegi mani. Tiali goli, augwaligo te boide isali boi bidi dabego au dodobage dabe me sai dao.
NUM 31:36 Te nai dabe si bugulama, te ami bidi dabego te 337,500 sipsip kibu sali, tama augwaligo te 675 te Genuai Bidibolo te takis tiwai mani. Te kau kibu me augwaligo te 36,000 sali, tama Genuai Bidibolo te takis mayu, te 72 mani. Te 30,500 donki kibu augwaligo sali. Tama augwaligo 61 donki kibu te Genuai Bidibolo takis mani. Tama augwaligo 16,000 gesi wegi mani sali, tama augwaligo 32 wegi mani Genuai Bidibolo te takis tiwai manio.
NUM 31:41 Tama Mosesgo te takis augwaligo mani selama, Eleasarbolo mani. Te Genuai Bidigo wali po gilama tama tiali.
NUM 31:42 Tama Mosesgo te ami bidi dabebolo dobayali tiwai te we bidibolo dobayali. Te we bidigo te 337,500 sipsip, me 36,000 kau kibu, me 30,500 donki kibu, me te 16,000 gesi wegi mani tama sali.
NUM 31:47 Tama Mosesgo te nai tama dobalama, tama agai te tigidali 50 kalabus wede deli selama, me kau kibude deli, me te donki kibude me deli, me sipsip kibude deli, me te meme kibude me deli selama, tama agai Livai dabe te Godigo ugwa be tonalubo bidi dabebolo mani. Agai Genuai Bidigo wali po gilama dolo tama tiali.
NUM 31:48 Tama nosali te ami ofisa dabe, te 1,000 ami bidi dabe, me 100 ami bidi dabe tonaluali ofisa bidi dabe, augwali Moses pageba aselama,
NUM 31:49 agabolo te po wali, “Genuai bidi, dago dena tonaluali ami bidi dabe nedali, te dolo tama bidibo suali, te boide me isai sube.
NUM 31:50 Tama tibaso, dago te aubo nai dabe, te gol nogode mubo nai, me dogonide domobo, me olode walobo, me te ring dabe da deli deligo boide sali, dago God Genuai Bidibolo mawaibao. Te da ma abelali pe tiwai dao. Magi baso meni, Genuai Bidigo da boi bidigo da elemainu sula tagalobeo,” te po wai.
NUM 31:51 Tialima, Moses de Eleasar sigo te gol au dodobage sali.
NUM 31:52 Te gol au dodobage sęgę te pąde 200 kilo tama yali.
NUM 31:53 Tiali goli, te olo ami bidi dabego te boide sali nai dabe sesebeo.
NUM 31:54 Tama Moses de Eleasar sigo te gol au dodobage selama, tama ugwa be tomoba mugi pali, te Godigo ugwa be tomoba. Augwali sigo te tama tiali, te Godigo te Israel dabe homugo koneama, tama tonalumainu tiali.
NUM 32:1 Te Ruben hani, me Gat hani augwaligo kau kibu dali sipsip dali hauwa mu bidali. Tama augwaligo te distrik Jaser, me Gileat tǫde te kau kibu dabego tubo nosai dabe wiegi yai mu elalubo suali.
NUM 32:2 Tama tibaso, augwali te Moses, me Eleasar, me te we bidi dabego tobolu bidi dabe pageba pelama, augwalibolo te po wagi pali,
NUM 32:3 “Te Genuai Bidigo da Israel dabego tǫ somainu tau sali da, teda wiegi yai mu dao. Tama te tǫ te hanu Atarot, me Dibon, me Jaser, me Nimra, me Hesbon, me Eleale, me Sipma, me Nebo, me Beon elalubo pesage da. Tama te bulu dabede te kaugo nosai dabe wiegi yai mu elalubao, tama dago kau kibu hauwa mu bidibao.
NUM 32:5 Tama tialima, dago homugo dagego te tǫ dage dabolo me mao homu ebao. Dago homugo dagego da te wę Jordan nogelama, u badu bidigi pomainu ebo tagalao,” wali.
NUM 32:6 Tama Mosesgo te Gat hani, me te Ruben hani dali po bomona weyu, te po wali, “Magi baso dage ede bidiyu, duga Israel hani meba naga boi hwįgi pomainu ebawe?
NUM 32:7 Dagego te meba Israel dabego homu kolesaga dolainu ebawe? Dagego homugo Genuai Bidigo augwalibolo mani te buluba Jordan wę nogelama pabo tagalamaina homu ebawe? Magi baso dagego te tama tiainu ebawe?
NUM 32:8 Polobadu duga aya dabego tama tiai dao, te da te bulu Kades Barneade bidali sogo, tama eno augwali te tǫ sugi pomainu tagala palali sogo.
NUM 32:9 Augwali te malu bulu Eskolba naga pelama, te bulu sugi pali. Tiali goli, augwali ma aselama, augwaligo te augwa abagi Israel dabe wi ilama, tama augwali te Genuai Bidigo augwalibolo mani tǫ tomoba pabeo.
NUM 32:10 Tama tialima, te sogo polobadu Genuai Bidi aga sębę elama, bomai po te tama wali,
NUM 32:11 ‘Te bidi dabe te kibu be 20 elama, me te kibu be 20 edelai bidi dabe te Isip tagalama te asali da. Augwaligo homu dąų olama, tama augwaligo ena wali me asobeo. Tama tialima, mu tama, augwali me deli te eno te Abraham, me Aisak, me Jekopbolo mu mawaibao wali te buluba augwali me pogobeo.
NUM 32:12 Te e bidi si naga paibao, te Kalep, te Jefunego ogwa te Kenas hani, me Josua, te Nungo ogwa, augwali si naga paibao. Magi baso meni. Augwali sigo homugo ena kęą pelama, ena Genuai Bidi wali asalio,’ walio.
NUM 32:13 Tama Genuai Bidigo te we bidi dali wado elama, te we bidi te nai meni yai bulude kibu be bidi sese si tede bidimainu yai dao. Te bidi dabe aga sębę ilali, te bidi dabe isila pomainu yai dao,” wali.
NUM 32:14 “Tama megi dage duga aya dede hasegelama, tama dage sęgę sai bidi dabe pedalobawe? Tama dagego Genuai Bidi sębę dwai mu emainu elama, tama agai da Israel dabe elemainu ebawe?
NUM 32:15 Te dage Ruben hani, me Gat hani, dagego Genuai Bidi wali megi pabeo. Tama agai da Israel dabe tudi ola mawaibao, tama da olo te nai meni yai bulude ma deli bilimainu elama, tama da sese tama ede dolaibao. Tama te sę pedalobaso da, teda te duga dagede yaibao,” Mosesgo te po wali.
NUM 32:16 Augwaligo te po odama, tama augwali Moses pąba pelama, te po wali, “Odao. Te nago da te sipsip obo me te hanu te masigi obo bolo ebo sula tagalaibawe? Tama dago we wai bugagia bidaibao.
NUM 32:17 Dago te sę elama da, nosali da hogodama, pelama, dena abagi dabe dali talua sigi pelama, tama te boi bidi dabe aiyaba elaluama, tama dago abagi dabe sela pelama, augwali duagi painogo ebo te buluba tagaligi paibao. Tialima, da te obo bolo elama, te boi hwįgi pali da, teda da hani we bidi te bomai hanude bidiyu, tama te bulu we bidigo augwali me dologobeo.
NUM 32:18 Te da meba Israel hani deli deligo augwa sabo tǫ bolo me siyu bolo emainao. Tama nosali da dena buluba ma asaibao.
NUM 32:19 Dago te wę Jordan u badu dago tǫ me sogobeo. Magi baso meni, dago te Jordan wę giliga asobo badu dago sabo tǫ polo sai dao,” te po wai.
NUM 32:20 Tama Mosesgo augwalibolo po wei ponoyu, te po wali, “Te dagego po mu oba wida, teda dagego duga ami bidi dabe dodolama, tama Genuai Bidigo gedude dage boi hwįgi pao.
NUM 32:21 Dagego ami bidi dabe sese Genuai Bidi dologode elaluyu, tama te Jordan wę nogelama, tama dago boi bidi dabe dali hwįgi pelama, Genuai Bidigo augwali aiyaba elaluboba usu nama,
NUM 32:22 tama augwaligo tǫ saibao. Te tama tilama, nosali dage ma asagameo. Magi baso meni. Dagego Genuai Bidigo dage mani sę silama, me dagego duga abagi dabe polo tau sela silali dao. Tama tibaso da, Genuai Bidigo dagego te Jordan wę giliga asobo badu elalubo tǫ sobaso, te usu dao po waibao,” wali.
NUM 32:23 “Megi eno po bomona dage dali te obao, dagego duga dąų wali po wali pisiąbaso da, teda dagego Genuai Bidi dali sęgę saibao. Tama dagego te tama koneao, Genuai Bidigo dagego dwai sęgę kone palama, tama dage ela silaibao.
NUM 32:24 Te usu dao, dagego hanu dabe geseliyu, me sipsip obo dabe bolo eyu yao. Tama nosali dage hwįgi piąo, duga po polo yaibao wali gilama,” Mosesgo te po wai.
NUM 32:25 Tama te Gat hani de Ruben hani sigo Mosesbolo te po wali, “Genuai bidi, da naga sę bidi dabe dago nago po wali paibao.
NUM 32:26 Tama te we wai, me kau kibu, me sipsip kibu dabe te Gileat dabego hanude bidaibao.
NUM 32:27 Tiali goli, da bidi dabe dena hwįbo nai dabe dodolama, tama te Genuai Bidigo da tonalumainu usu elama, tama hwįgi paibao. Da te Jordan wę nogelama, tama te boi bidi dabe dali hwįgi paibao, te nago wali yali gilama,” te po wali.
NUM 32:28 Tama tialima, Mosesgo po meba te pris bidi Eleasar, me Josua aga aya nogi Nun, me te Israel dabe tobolu bidi dabebolo mani.
NUM 32:29 Mosesgo te po wali, “Te Gat hani bidi, me Ruben hani bidi dabe, augwaligo Genuai Bidigo po wali pelama, tama dage dali Jordan wę nogelama, tama boi bidi dabe dali hwįgi peyu da, teda usu dao, wiegi yai dao. Tama dagego te boi bidi dabe aiyaba elaluama, te bulu sobaso da, teda dagego te Gileat tǫ pedai me te bage augwalibolo menama, tama augwali tigidali sogo tede bidimainao.
NUM 32:30 Tiali goli, augwali te Jordan wę nogelama, dage dali hwįgi pisąma ebaso da, teda augwaligo tǫ Kenan bulude tǫ somainao, dage yali gilama.” Mosesgo te genuai bidi dabebolo te po wai.
NUM 32:31 Tama Gat hani de Ruben hani sigo po wei ponoyu, te po wali, “Te usu dao, dago te Genuai Bidigo wali po wali pelama, tama tiaibao.
NUM 32:32 Genuai Bidigo da tonalubadi, te wę Jordan nogelama, tama Kenan buluba boi hwįgi paibao. Tama nosali da te Jordan ąį giliga asobo bulu tǫde tede bidaibao, te wę e badu,” wali.
NUM 32:33 Tama tialima, Mosesgo te Sihongo tǫ sese magi yali, te Amor tuni bidigo tǫ, me te Basan tuni bidi Okgo tǫ me magi yali, te hanu dabe me tǫ dabe tama magi yali, me pąde elalua pabo bulu me. Tama agai te tǫ te Gat hani, me Ruben hani, me te Manase hani bugai, tama bage augwalibolo mani.
NUM 32:34 Tama te Gat hani we bidigo te polobadu bomai obo elaluali te sipsip tomoba muabo obo dabe ma dodolali. Augwaligo hanu Dibon, me Atarot, me Aroer,
NUM 32:35 me Atrot Sofan, me Jaser, me Jokbeha,
NUM 32:36 me Betnimra, me Betharan ma geselali.
NUM 32:37 Tama te Ruben hani we bidigo te hanu Hesbon, me Eleale, me Kiriataim,
NUM 32:38 me Nebo, me Balmeon, tama hanu ma geselali. Augwaligo hanu Balmeon nogi ma hasegelali, tama gasa nogi me polali. Tama augwaligo hanu Sipma ma geselali. Tama augwaligo te geselali hanu dabe gesi nogi dabe ma poali.
NUM 32:39 Tama te Manasego ogwa Makirgo aga hani kegasa pelama, te Gileat tǫba pelama, te Amor dabe dali hwįnama, augwali sela sąnama, tama augwaligo tǫ sali.
NUM 32:40 Tama tialima, Mosesgo te Gileat tǫ te Makirgo hanibolo mani, tama te hani we bidi augwali te tǫ selama, bidali.
NUM 32:41 Tama bidi me nogi Jair, te Manase hani bidi, aga hani selama, tama gasa bulu mebaba pelama, hwįgi pali, tama te bulu selama, tama te bulu nogi te tama poali, “Te Jairgo Bulu Dabe Dao,” po wali.
NUM 32:42 Tama bidi me nogi Noba, aga hani kegasa pelama, tama te hanu Kenat me te Kenat sesegede elalubo buluba hwįgi pelama, te bulu sali. Tama te bulu nogi te hanu Noba polali, te aga nogi tiwai polali.
NUM 33:1 E da te Israel dabego pesage nigilama bidali bulu dabe nogi dao. Augwali te Isip bulu taga solama, nosali te Moses de Aron sigo augwali tonaluai dao.
NUM 33:2 Genuai Bidi aga digi obadi, te Mosesgo te pesage nigilama, bida bida bilali bulu nogi asęani. Te bulu dabe nogi e tama dao.
NUM 33:3 Te Israel dabego Isip bulu te namba 15 deide, te namba wan poluade taga soali. Teda te Israel dabego te Godigo augwali bugagia bidimainu sula tagalali, te genuai nai ulali Pasova sogo nosali, Genuai Bidigo augwali tonalubadi, augwali te hanu Rameses tagalama pali. Tama Isip dabego augwali suali.
NUM 33:4 Te sogo te Isip dabe augwa gomunai ogwa dabe pubalobadi yaide. Te Genuai Bidigo augwali ela wialai. Te da, te Genuai Bidigo te tibo god dabego bomo aiyaba elaluama, tama agai bomo te Isip dabe augwalibolo ola mayu yai.
NUM 33:5 Tama Israel dabego te bulu Rameses taga pelama, tama hanu Sukotba solama, pesage nigilama bidali.
NUM 33:6 Tama nosali augwali Sukot taga pelama, bulu Etamba pesage nigigi pali, te nai meni yai wa pai bulu sesegeba augwaligo pesage nigigi pali.
NUM 33:7 Tama augwali te bulu Etam tagalama, tama te bulu Pihahirot te giliga asobo bulu Balsefon sabolama, tama te hanu Mikdol pąde pesage nigilama bidali.
NUM 33:8 Tama augwali te Pihahirot tagalama, tama te tamu wę Retsi nogelama, tama Surgo nai meni yai wa pai bulu sabolali. Tama te masigi kemi sane buludu augwali sela sogo pelama, tama augwali te bulu Maraba sabolama, tama tede pesage nigali.
NUM 33:9 Tama nosali augwali Mara taga pelama, augwali bulu Elimba saboligi pelama, tama augwaligo pesage tede nigali. Elimde te nogo si olama, sągą si ulu ąį elalubo, me te du tubo ni det te 70 tama elalubo.
NUM 33:10 Nosali augwali te bulu Elim taga pelama, te tamu ąį Retsiba sabolama, pesage nigigi pali.
NUM 33:11 Tama augwali Retsi taga pelama, tama augwali te bulu augwaligo te nai meni yai wa pai bulu Sen wabo, te buluba saboligi pali, tama augwaligo pesage nigali.
NUM 33:12 Tama augwali te bulu te nai meni yai wa pai bulu Sen taga pelama, augwali te bulu Dopkaba sabolama, tama pesage nigigi pali.
NUM 33:13 Nosali augwali te Dopka taga pelama, tama augwali bulu Alusba pelama, pesage nigigi pali.
NUM 33:14 Tama augwali Alus taga pelama, tama augwali te bulu Refidimba sabolama, pesage nigigi pali. Te bulu Refidim te tuabo wę meni yai bulu dao.
NUM 33:15 Augwaligo te bulu Refidim taga pelama, augwali te bulu dabede pesage nigigi peyu, ela pali: nai meni yai bulu Sainai, me bulu Kibrot, me Hatava, me bulu Haserot, me bulu Ritma, me Rimonperes, me bulu Lipna, me bulu Risa, me bulu Kehelata, me te bulu du Sefer, me bulu Harada, me bulu Makhelot, me bulu Tahat, me bulu Tera, me bulu Mitka, me bulu Hasmona, me bulu Moserot, me bulu Benejakan, me bulu Hor Hagigat, me bulu Jotbata, me bulu Abrona, me te hanu Esiongeber, me te nai meni yai bulu Sen, te gasa nogi wabo Kades. Tama nosali augwali te bulu du Hor te Idom bulu sesegeba sabolama, pesage nigali.
NUM 33:38 Augwali tede bidiyu, tama namba 5 poluago namba wan deide, te kibu be bidi sese si bidama Isip bulu taga solama nosali, te pris Aron aga Genuai Bidigo po wali pelama, te bulu du Horba holama, isali. Te aga 123 kibu be bidai dao.
NUM 33:40 Tama te bulu saut badu bulu Arat te Kenan badu tuni bidigo te Israel dabe asobo po odali.
NUM 33:41 Te Israel dabe augwali te bulu du Hor taga pelama, tama augwali te buluba dabe pali: te bulu Salmona, me te bulu Punan, me te bulu Obot, me te bulu Abarim, te bulu hanu dolai elaluali, te bulu Moapde, me te bulu Dibon Gat, me te bulu Almon Diplataim, me bulu du Abarim te bulu du Nebo pąde, me te bulu Moapgo malu bulu te Jeriko pąde, te Jordan wę u badu. Te hanu Bet Jesimot me te Abel Sitim bulu tomode augwaligo pesage tede nigali.
NUM 33:50 Augwali te Moapgo malu bulu, te Jeriko pąde, te Jordan wę u badu bidibadi, Genuai Bidigo Mosesbolo po meba mani,
NUM 33:51 te Israel we bidibolo pusumainu. Genuai Bidigo e tama po wali, “Dage te wę Jordan nogelama, Kenan bulu tomoba peyu da,
NUM 33:52 teda dagego te bulude bidibo bidi dabe sese sela sąyao. Tama augwali nigali tibo god dabe dolao, te augwali masigi dali ain dali sigo nigali god. Tama augwaligo lotu wabo pesage dabe me dolao.
NUM 33:53 Eno te tǫ dagebolo te mobao, tama dage te tǫ selama, tama dage tede bidiąo.
NUM 33:54 Tama dage satu gagali elama, tama duga hani deli deli wąį, me duga deli kaneme dabebolo dobayabo yali gilama tiao. Tama te tǫ te we bidi geninama elalubo hanibolo genuai tǫ mayu, me te we bidi dwasianu elalubo we bidi hanibolo tǫ dwasianu mayu yao.
NUM 33:55 Tiali goli, dagego te bulude bidibo bidi dabe sela sąsiąma yali da, teda augwaligo dagebolo dene me sęgę mawaibao, te sesane bonogo gedude me bogo badu enebo tiwai yaibao. Tama augwaligo dage te bidibo bulude dage dali hwįaibao.
NUM 33:56 Dagego augwali sela sąsiąma yali da, teda eno dage dolaibao, te eno augwali dolainu yali homu ebo tiwai gilama,” Genuai Bidigo te po wai.
NUM 34:1 Genuai Bidigo te po te Mosesbolo te Israel
NUM 34:2 dabego yabo po dabe mani. Agai te po wali, “Dage te bulu Kenan tomoba peyu da, te bulu eno dage mawaiba, dagego te bulu tigidali mu sese tama saibao.
NUM 34:3 Te bulu dąį te nai meni yai bulu augwaligo Sen wabo, te bulu du gagalama, tama te Idom bulu dąį tama magi usu tama soali dao, te saut badu polobadu. Tama te giliga asobo badu da, te saut badu sigi wę Detsi badu dąį dao.
NUM 34:4 Tama te magi te saut badu polobadu te Akrabim bulu du badu pabo sunumi badu, te odogo te bulu du dabe tomodu soayu, te odogodu todogo soayu, Sen badu tama soayu, tama te bulu Kades Barneaba tama usu nigi paibao. Tama te dąį te Hasaradar badu begasa soayu, tama Asmon bulu usu nigi paibao.
NUM 34:5 Tama te magi te Asmon bulu tagalama, Isip dali dąį wę dulu dulama, tama moni tamu ąį Mediterenianba usu nigi paibao,” wali.
NUM 34:6 “Te moni tamu ąį Mediterenian pąbadu elalubo tǫ, te da te dagego dąį tiwai te giliga dega sabo badu elaluaibao.”
NUM 34:7 “Te not badu magi te moni tamu wę Mediterenian tagalama, bulu du Horba tagaligi paibao.
NUM 34:8 Tama te bulu du Hor tagalama, odogo bulu Hamatba tagaligi paibao. Tama te magi pelama, bulu Sedatba sabolama,
NUM 34:9 tama Sifronba saboligi paibao, tama te bulu Hasarenanba usu nigi paibao,” wali.
NUM 34:10 “Te giliga asobo badu magi da, te Hasarenandu gagalama, tama pelama, Sefamba saboligi paibao.
NUM 34:11 Tama te magi te bulu Sefam tagalama, pelama, te saut badu te bulu Riplaba sabolama, giliga asobo badu Ainba sabolama, tama te sigi wę Galili nambis sesegedu dwasianu bulu duba usu nigi pelama, tama sigi wę Galili giliga asoboba saboligi paibao.
NUM 34:12 Tama dąį te sautba pelama, tama Jordan wę dulu dulama, tama sigi wę Detsiba saboligi paibao. Te da, te dagego bulu tǫ sesege dąį dao,” Genuai Bidigo Mosesbolo te po wai.
NUM 34:13 Tama tialima, Mosesgo Israel dabe augwalibolo walali, “Genuai Bidigo te tǫ te 9 wąį hani bidi dabe, me te Manase hani bugai me badu, dage tama bagego tǫ magi yalio. Dagego duga satu gagali yao, duga te tǫ bugulama, dąį elama sainogo tama iyąo.
NUM 34:14 Te Ruben hani, me te Gat hani, me Manase hani bugai, augwali augwa tǫ polo sai dao.
NUM 34:15 Augwaligo te giliga asobo badu te Jordan wę u badu te Jeriko pąde salio,” Mosesgo te po wai.
NUM 34:16 Tama Genuai Bidigo Mosesbolo te po wali,
NUM 34:17 “Te pris Eleasar, me Josua te Nungo ogwa, augwali sigo te tǫ te we bidibolo dobawaibao.
NUM 34:18 Tama nago te Eleasar de Josua si tau sabo tobolu bidi dabe me sa muao,” wali.
NUM 34:19 Tama Genuai Bidigo te bidi dabe sa muani. Te Juda hanide da, te Jefunego ogwa Kalep magi ilali.
NUM 34:20 Te Simeon hanide da, te Amihutgo ogwa Selumiel magi ilali.
NUM 34:21 Tama te Benjamin hanide da, te Kislango ogwa Elidat magi ilali.
NUM 34:22 Tama te Dan hanide da, te Jokligo ogwa Bukui magi ilali.
NUM 34:23 Tama te Manase hanide da, te Efotgo ogwa Haniel magi ilali.
NUM 34:24 Tama te Efraim hanide, te Siptango ogwa Kemuel magi ilali.
NUM 34:25 Te Sebulun hanide, te Parnakgo ogwa Elisafan magi ilali.
NUM 34:26 Te Isakar hanide, te Asango ogwa Paltiel magi ilali.
NUM 34:27 Te Aser hanide, te Selomigo ogwa Ahihut sa muani.
NUM 34:28 Te Naptali hanide te Amihutgo ogwa Pedahel sa muani.
NUM 34:29 Genuai Bidigo te bidi dabe naga sa muani, te Eleasar dali Josua si te bulu Kenande tǫ togola dobayabo bidi dabe, te Israel we bidi dabebolo dobayabo bage, te Kenan bulude.
NUM 35:1 Augwali te Moap bulugo dola pai bulude te Jordan wę u badu, te Jeriko pąde bidibadi, Genuai Bidigo Mosesbolo te po wali,
NUM 35:2 “Eno homugo nago Israel dabebolo te po walao homu ebao: augwaligo hanu meba geselama, tama te Livai dabebolo mao. Te nosai wiegi yai elalubo tǫ te hanu pąde elalumainao, te kau kibu dabego tuabo.
NUM 35:3 Te Livai dabe augwaligo te hanu dabe saibao. Tama te nosai wiegi yai elalubo tǫ te hanu dabe pąde, te da te kau kibu me sipsip te Livai dabego kibu dabego tuabo nai.
NUM 35:4 Te tǫ te nosai dabego te hanu bagua sai elalumainao. Te obo sesegedu gagalama, tama te 450 mita te tǫ dąįba usu nigi pao.
NUM 35:5 Tama tialima, te hanu tomode elalubadi, te tǫgo bagua sai elalumainao. Te me badu sabidu te me badu sabiba te 900 mita tama elalumainao.
NUM 35:6 Dagego te a naga olama, me badu nogo deli hanu te Livai dabebolo duala sabo hanu me mao. Te bidi mego aga abagi dali boi bidi isąma, tama agai olo dali aga abagi elali da, teda aga te duala sabo hanu me deliba wi udula somainao. Te bidi mego aga te abagi isali te wei ponainu yali da, teda agai te bidi elama isidali weyu. Tama me dagego gasa 42 hanu dabe te Livai dabebolo maiąo.
NUM 35:7 Te wiegi yai nosai elalubo tǫ te hanu page dabede elalumainao. Tama te Livai dabego te 48 hanu dabe tama elalumainao.
NUM 35:8 Dagego te Israel hani dabego hanu dabe dagego te Livai hanibolo momainogo da, teda dagego te gasa Israel hani dwasianu elalubaso da, teda dagego augwaligo hanu si sela naga Livaibolo mao, ma genuai hani yaibaso da, teda dagego augwalide hanu hauwa siyu, tama te Livai dabebolo mao. Te bidi hani bugagia dodolama, hanu selama, tama augwali hani namba dolo sao,” wali.
NUM 35:9 Tama Genuai Bidigo Mosesgo
NUM 35:10 te Israel dabebolo te po momainu e tama po wali, “Dage te Jordan wę nogelama, te bulu Kenan tomoba peyu da,
NUM 35:11 teda dagego duala sabo hanu me sa muiąo. Tialima, te bidi mego aga abagi dali boi bidi homu isąma, geda muyu ela mubaso da, teda aga te hanu me deliba wi udula selama, tama tede bugagia bidimainao.
NUM 35:12 Te hanu dabe te duala sabo bulu tiwai elalumainao. Tama te isali bidi aga hanigo te isali bidi wei ponidali weyu. Tama te gasa bidi elali bidi aga bugagia bidama, tama aga po tų eboba bolo usu nigi pomainao. Tama te po tųde aga isimainao wali da, teda augwaligo aga ela mumainao.
NUM 35:13 Dagego a naga olama me badu nogo deli hanu tama sa muao.
NUM 35:14 Te hanu sela te Jordan wę u badu giliga asobo badu elalu, me sela te Kenan bulude elalumainao.
NUM 35:15 Te hanu dabe da, te Israel dabe duga duala sabo, te gasa bulu bidi dage dali pęwadage sogo ma bobobage sogo bidibo bidi dabe duala sabo hanu dao. Tiali te bidi deli aga abagi dali boi bidi homu isąma, tama mena sę ebode geda muyu, aga abagi ela mubaso da, teda aga te hanu dabe meba geme duala sigi pomainao,” te po wali.
NUM 35:16 “Tiali goli, te bidigo aga abagi dali boi bidi homu elama, tama agai ain dili, ma masigi du, ma wabi dage selama, aga abagi ela muani da, teda dagego aga me ela muao. Magi baso meni, aga digi polo sęgę sai dao, aga te bidi ela muani bidi mu dao.
NUM 35:19 Te isali bidi aga deli kaneme bidi me deligo te bidi ela mumainao. Te aga deli kaneme hani deligo te bidi subaso da, teda agai te bidi tama ela mumainao.
NUM 35:20 Ma, te bidi mego aga abagi godolo isąma, olo dali bomona dega palama, tama aga abagi tulaluyu isalio, agai magi nai me nogogo sąnama, ma agai nogo sugunama elama isali da, teda agai te sęgę sai dao, tama dagego aga me ela muao. Teda aga amago te bidi isali wei ponabo sę elalubao. Agai te bidi ela mumainao. Te agai te bidi subosi, agai te bidi polo ela mumainao,” wali.
NUM 35:22 “Tiali goli, aga abagigo boi bidi homu isąma, aga abagi bomona dega palali digi isibaso, ma agai magi nai me nogogo sąnama, tama aga abagi ela mubaso,
NUM 35:23 ma agai suisąma olo dali masigi togolai madi te bidi ela muani da, teda dagego te tama tiąo.
NUM 35:24 Dagego te sę yali po te bomai po wali peyu, tama te bidi aga abagi elali bidigo kolesaga me agai po osola suyu bolo yao. Tama dagego te isali bidi aga deli kaneme mego te ela mumainu sula tagaligio.
NUM 35:25 Dagego aga ma oda selama, tama te isali bidi aga amago te bidi elegobeo. Tama dagego aga te duala sabo te hanuba taga palao. Te bidi te hanude bidibadi, te sogo te bidibo te tobolu bidi pris bidi isiyu bolo elama, tama nosali aga te duala sabo te hanu taga pomainao,” wali.
NUM 35:26 “Tiali goli, te tobolu bidi pris bidi isisąma ebadi, te bidi elali bidi aga digi te hanu tagalama buluba sobadi, te isali bidi aga hanigo te bidi sulama ela mubaso da, teda te po tų menio.
NUM 35:28 Magi baso meni. Te aga abagi elali te bidi aga digi te duala sabo hanu taga soali dao, te sogo bidibo tobolu bidi pris bidi isisąma ebadi. Tialima, agai taga pobaso da, teda aga dagede dao. Te hetpris bidi isai digi da, teda aga te aga bulu muba ma pomainao, tama agai te yali sęde po mu menia saibao.”
NUM 35:29 “Dage me duga hani nosali asobo wąį dabego te bomai po wali naga piąo, tigidali sogo. Dage me gasa bulude bidali me tagalao, te bomai po wali naga piąo.
NUM 35:30 Te augwaligo po tų ela mubadi, bidi mego aga abagi dali boi bidi homu eyu elalio po obaso, tama bidi si ma selago sulama, tama po tų ebode deli po naga obaso da, teda dagego aga ela muagameo. Tiali goli, bidi deligo sulama, aga po tų ela mobaso da, teda dagego aga ela mugio,” wali.
NUM 35:31 “Dagego te bidi aga abagi dali boi bidi homu elama, aga abagi ela muani bidi dagego ela muiąo. Te bidi aga digi aga te monego ma abelegobeo. Mu menio. Aga isimainu yao.”
NUM 35:32 “Ma, te bidi me aga te duala sabo te hanuba pelama, geme dualaluama, tama nosali aga te aga buluba ma soainu sunumi abelebaso da, te hetpris bidi bidibadi, teda agai usu egobeo. Dagego agai te tama timainu sula tagalamuo. Te habu mu dao.”
NUM 35:33 “Ma, dagego aga pomainu sula tagalali da, teda duga digi duga bulu eno gedude meda ilaibao. Te bidi ela mubo kolesagago te bulu meda ilibo dao. Tama te bulu wiegi yai ma ilabo sunumi deli elalubao. Te da e tama dao. Dagego te bidi aga abagi elali te bidi aga wei ponama ma elao.
NUM 35:34 Dagego duga bidibo bulu eno gedude meda ilamu dao, Genuai Bidi eno gedude. Magi baso meni. Ena dage Israel dabe tomode bidibao,” Genuai Bidigo te po wali.
NUM 36:1 Te Josep te Manasego aya, tama Manase te Makirgo aya, tama Makir te Gileatgo aya dao. Tialima, me sogo te Gileatgo hani tobolu bidi augwali te Moses pageba pali, me te gasa Israel dabego tobolu bidi dabe pageba pali.
NUM 36:2 Tama augwaligo te po wali, “Genuai Bidigo dagebolo te tǫ da Israel dabebolo dobayainu, dage satu gagali yao po wai dao. Tama me ma, agai dagebolo te dago hani Selofehatgo tǫ dabe me mao po wai dao, te aga wegi dabebolo.
NUM 36:3 Tiali goli, augwali te gasa hani bidi dabe dali bidi peyu da, teda augwa bidi dabego wąį hanigo te tǫ dage saibao. Te augwa bidigo hanigo te tǫ selama, tama augwa tǫ dali talua saibao. Tama dagego da magi ela mani te tǫ te dwasianu igi paibao.
NUM 36:4 Tama nosali te tǫ gasa bidibolo mani te tǫ ma siyu, te tǫ abelali nai ma wei ponobo genuai sogo da, teda te Selofehatgo wegi mani dabego te tǫ dage, te wegi manigo augwa bidi dabego hanigo te tǫ selama, tama augwa tǫ dali talua saibao. Tama te tǫ da hanigo meni yaibao,” te po wai.
NUM 36:5 Tama tialima, Mosesgo Genuai Bidigo te po te tigidali Israel dabebolo mani. Mosesgo te po wali, “Te Manase hanigo te po te mu tama dao.
NUM 36:6 Tialima, Genuai Bidigo te po wali, te Selofehatgo wegi dabe augwa homugo te bidi me pomainao. Tiali goli, augwaligo augwa hani bidi dali naga augwali bidi pomainao.
NUM 36:7 Tama tiali da, dage deli deli Israel hani dabego duga tǫ dugade naga elalua paibao. Tama duga hani mebago me sogobeo.
NUM 36:8 Te wegi mani augwa aya isaide augwa ayago doado bage dabe saibaso da, teda te wegi aga ayago hani bidi dali peyu emainao. Dagego te tama tiyu da, teda dage Israel dabego duga wąį mugo nai dabe me tǫ dabe selama, elalua pidu mu elalua paibao.
NUM 36:9 Tama tialima, dagego te gasa hanigo dagego tǫ somainu sula tagaligio. Menio. Deli deli hanigo augwa tǫ mu naga tolaluaibao,” Mosesgo te po wai.
NUM 36:10 Tialima, te Selofehatgo wegi dabe, augwaligo nogi Mala, me Tirsa, me Hokla, me Milka, me Noa, augwali te augwa ayago hani mu dali pali. Te Genuai Bidigo Mosesbolo wali gilama tama tiali.
NUM 36:12 Augwali te Manase hani bidi dabe dali bidi pali, te Josepgo ogwago hani. Tama tialima, te tǫ dage te aga ayago hanide elaluali.
NUM 36:13 Te bomai po dabe te Genuai Bidigo Mosesbolo te Moapgo malu bulude, te Jordan wę u badu, te Jeriko pąde mani.
DEU 1:1 Te bukude te Mosesgo te Israel we bidibolo te bidi meni yai bulude augwali bidiyu, te po pusa mani buku dao. Te Jordan wę pąde, te giliga asobo badu, augwali te Jordan wę sesegede malu bulude bidai, te bulu Sup pąde. Tama hanu Paran te me badu pedai badu elaluali. Tama te hanu Tofel, me Laban, me Haserot, me Disahap, te gasa me badu pedai badu elaluali.
DEU 1:2 Tialima, nage te bulu du Sainaidu hogodama, tama nage te Idom bulu du sunumidu peyu da, teda nage nogo si olama, deli sogo te bulu Kades Barneaba sabolaibao.
DEU 1:3 Te Israel dabe augwali te Isip bulu taga soali te kibu be bidi sese si silama, tama te dei namba wan, te 11 poluade, Mosesgo te we bidibolo te God, Genuai Bidigo agabolo walali po pusali.
DEU 1:4 Te sę te Genuai Bidigo te Sihon, te Amor dabego tuni bidi, aiyaba elaluama, nosali te po pusubo sę pedelai dao. Tuni bidi Sihongo te hanu Hesbon tonaluai dao. Tama Genuai Bidigo te tuni bidi Ok aiyaba elaluai dao. Te Basan dabego tuni bidigo te hanu si tonaluai dao, te hanu Astarot, me hanu Edrei.
DEU 1:5 Te da, te Israel dabe augwali Jordan wę giliga asobo badu bidali sogo, te Moap dabego tǫ dage badu bidali sogo, Mosesgo te bomai po me te Godigo po page bugagia hanilama, tama te we bidibolo ola mabo gagalali.
DEU 1:6 Mosesgo te po wali, “Da te Sainai bulu dude bidali sogo, God, dago Genuai Bidigo dabolo e tama po walai dao, ‘Dage e bulu dude bobobage sogo mu bidali dao. Eno homugo te usu dao.
DEU 1:7 Dage te pesage tagalama, tama pelama, tama dage te Amor dabego bulu du buluba piąo, tama me te bulu pąde elalubo bulu dabeba me. Te da, te Jordan wę odogode elalubo bulu dao, tama te malu bulu me, bulu du bulu me, tama te tǫ dage me te saut badu elaluyu me, te genuai tamu wę Mediterenian pąbadu elalubo nambis tǫ me. Tama dage Kenan dabego tǫba piąo, tama me te bulu du Lebanon tǫ u badu me pelama, te genuai wę Yufretisba usu nigi pao.
DEU 1:8 Te tigidali tǫ ena Genuai Bidi eno te tǫ duga wąįbolo mawaibao po dąų walai dao. Te Abraham, me Aisak, me Jekopbolo wai dao, me te augwaligo wąį nosali asobo bagebolo me. Tialima, dage megi pelama sigi piąo,’ wali,” Mosesgo te po wali.
DEU 1:9 Tialima, Mosesgo te we bidibolo walali, “Hasia eno dagebolo e tiwai po walai dao. ‘Dage tonalubo sę genuai mu dao. Enaduba usu egobeo.
DEU 1:10 God, dago Genuai Bidigo dage hauwa mu, te dagalude hǫ tiwai pedalumainu ilai dao.
DEU 1:11 Eno homugo Genuai Bidi, dago wąįgo Godigo dage bidi hani hauwa umabo mu pedalumainu ebao. Tama eno homugo agai dagego tigidali nai dabe wiegi yai pedalumainu ebao, te agai dage dali hasia dąų wali gilama yali.
DEU 1:12 Tiali goli, mena tama enaduba deligo dagego tigidali pogo hwįbo sęgę dodologowe? Ena usu egobeo.
DEU 1:13 Tama tialima, dagego me badu koneai bidi dabe, me wiegi yai bidi dabe, me te tobolu bidi bidibo kolesaga koneai bidi dabe, dagego sa muiąo. Dagego augwali duga hani deli deli tomode sa muiąo. Tama eno augwali dage tonalumainogo sa muaibao.’
DEU 1:14 Eno te tama po wai, tama dagego te sę yabo usu dao po wai dao.
DEU 1:15 Tama tialima, eno te polalubo bidi dabe, te koneai bidi dabe me, te wiegi yai tobolu bidi dabe eno sai dao. Te duga digi duga hani deli deli tomode sa muai dao. Tama eno augwali dagego tuni bidi bidimainu sa muai dao. Tama mebago te 1,000 we bidi tonaluyu, meba te 100 we bidi tonaluyu, mebago te 50 we bidi, me te nogo si we bidi tama tonalubo sę yai dao. Tiali me ma, eno deli deli hani tomode ofisa bidi deli deli sa mumuna pai dao.”
DEU 1:16 “Tama te sogo eno te tobolu bidi dabe te e tama ola mawai dao, ‘Dagego olo bugagia munama, te we bidigo wabo po dabe bugagia odao,’ po wai dao, ‘te we bidi aga hasi tomode wabo po. Tama dagego te we bidigo wabo po bugagia osola suao, te duga abagi dabe tomode, ma te Israel hani isąwai bidi hani dabe dage tomode bidibo bagede pedalubaso me.
DEU 1:17 Dagego te tigidali bidi dabe te deli kolesagago naga dodolao. Te aga genuai bidi me, ma olo bidi me. Tama dage bidi me delide wi me elamuo. Magi baso meni, God aga digi dagego homu kolesaga te po tų ebode dodolaibao. Ma, te sęgę genuai mu me elalubaso da, tama dodolabo usu isąbaso da, teda dagego ena pageba odasa asao, teda eno po tų odaibao.’ Eno augwalibolo te tama po walai dao.
DEU 1:18 Tama te sogo me, eno dagego meba sę dabe yabo eno ola mawai dao,” Mosesgo te po wai.
DEU 1:19 Mosesgo po geninama weyu, te po wali, “Dago te God dago Genuai Bidigo wali po wali pelama, tama dago Sainai bulu du taga solama, tama da te bulu me te mu dwai digi pai dao, te moni nai meni yai kemi sane buluba. Tama tedu peyu, da te Amor dabego bulu duba dabe sabolali. Da te bulu Kades Barnea sabolali sogo,
DEU 1:20 eno dagebolo te tama po walai dao, ‘Megi da, da te Amor dabego bulu duba te sabolai dao,’ po wai dao. ‘Dago Godigo te bulu dagebolo megi mawainogo te ebao.
DEU 1:21 Te tǫ suao. God dago wąį dabego Genuai Bidigo dagebolo megi mani dao. Dage pelama, teba duagi piąo, te agai dagebolo hasia wali gilama. Dage wi elama, homu hauwa me kųą pelamo dao.’ Eno te po wai.”
DEU 1:22 “Tiali goli, dage ena pageba sabolama, tama dagego te po wali, ‘Polo beda, dago bidi meba polasa tagala palama, tama augwaligo polasa te bulu sa sugi pomainao. Tama augwaligo dago wali pabo sunumi wiegi yai deli ola momainao. Tama me augwaligo dabolo mena tiwai hanu elalubowe dabolo augwaligo omainao,’ wali.
DEU 1:23 Eno homugo tiali dago te po wali peyu da, te usu yaibao homu yali. Tama tialima, dago nogo si olama si hanide eno te deli deli bidi dabe sa muai dao.
DEU 1:24 Tama augwali te bulu du, me malu bulu me, te Eskol buluba dabe tama susa biligi pali.
DEU 1:25 Augwaligo ni du dabe meba ma seselama, dabolo ma magasali. Tama augwaligo te po wali, ‘Te God, dago Genuai Bidigo dabolo megi maiabo tǫ, te tǫ ili hauwa mu elalualio,’ wali.”
DEU 1:26 “Augwaligo te tama po wai goli, dagego God dago Genuai Bidigo wali po sela sąnama, tama dage te buluba pabo hagela homu yai dao.
DEU 1:27 Dage duga ugwa be tomode dabe bidiyu, duga hasi po kųą pali. Tama dagego te po wali, ‘Genuai Bidigo da godolo ebeo,’ po wali. ‘Tama tiyu, agai da Isipdu oda selama, e buluba odasa asalio, tama da te Amor dabego nogoba muagasali dao. Tama augwaligo da dolaibao.
DEU 1:28 Magi baso mu da te buluba pogowe? Da wi ebao. Te bidi dabe, dago te sa sugi pomainu tagala palali bidi dabe, augwali ma aselama, te po wagasali, “Te we bidi augwali boma pai, tama bobobage dili yai we bidi mu, te bulude bidibao.” Augwaligo te po wali. “Te we bidi dabe augwali te masigigo nigai bomai obo tomode bidibo, te dagalu dąį yai obo tomode bidibo. Tama te hanu dabede augwali te moni moni bidi dabe bida bida pabo suali,” te sa sugi pali bidi dabego dabolo te po wai,’ dagego te po wali.”
DEU 1:29 “Tiali goli, eno dagebolo te po wai dao, ‘Dage te we bidi dabede wi igimio.
DEU 1:30 God, dago Genuai Bidi, agai dage tudiba togolama aga bolo polasa paibao. Aga polasa pelama, hwįaibao, te dagego agai te Isip bulude ebo suali tiwai yaibao.
DEU 1:31 Me, te nai meni yai kemi sane bulude yali me. Dagego gedugo polobadu suali, agai dage odasa asiyu yali kolesaga, me megi dage e bidibo te buluba me te sabalobao. Te da, te aya me deligo aga wai nogode tolasa bilibo tiwai te ebao.’
DEU 1:32 Eno te po dagebolo walio. Tiali goli, tegoba! Dagego te po odisąma bididuai. Tama dagego Genuai Bidiba homu dąų wabeo.
DEU 1:33 Polobadu te aga polasa pelama, tama agai dage sunumi ola menama, tama agai dage duga ugwa be dabe sę yabo pesage ola mawaidu geai dao. Te hulide da, te aga polasa peyu, te sia bogoli me ebo tiwai elama, dage kegasa pai dao. Ma, ulade da, te pǫ me tiwaigo dage kegasa pai dao,” Mosesgo te po wali.
DEU 1:34 Mosesgo te po wali, “Genuai Bidigo dagego po dogia pabo suali, tama aga haliga sębę mu yai dao. Tama tialima, agai po haninama, bomona weyu, te po wali,
DEU 1:35 ‘Dage dwai we bidi, dage eno duga wąįbolo mawaibao wali te buluba dage mu pogobeo. Mu menio.
DEU 1:36 Kalep, te Jefunego ogwa deli digi, aga te buluba paibao. Aga ena dali deli homu mu eyu, agai deligo naga eno tigidali po wali palio. Tama tialima, aga dali, te aga ame nabo wai puluba dali sigo naga, eno te mabo tǫ suaibao,’ Genuai Bidigo te po wai.”
DEU 1:37 “Te nosali badu me sogo deli te dage we bidi dabego yali kolesagago te Genuai Bidigo ena dali me sębę ebo sę ilali, tama agai te po wali, ‘Moses, nage me te bulu tomoba me pogobeo.
DEU 1:38 Tiali goli, nago namba tu bidi Josua, te Nungo ogwa, deli naga teba paibao. Nago Josuago homu kolesaga dąų walao. Magi baso meni, agai te Israel dabe te buluba odasa pelama, te buluba bidigi paibao,’ wali.”
DEU 1:39 “Nosali Genuai Bidigo da tigidalibolo te po wali, ‘Dagego wai bǫų dabego te dwai sę me wiegi yai kolesaga augwaligo me kuna dagalasiąyu ebo konebeo. Te augwali te wai puluba naga. Te augwali naga te bulu tomoba paibao. Dagego te po wali, te boi bidi dabego augwali elaibao, wali. Tiali goli, eno te bulu augwalibolo mawaibao. Tama augwali te bulude bidaibao.
DEU 1:40 Tama dage genuai we bidi da, dage ma gelama, tama te nai meni yai kemi sane buluba ma soaiąo. Te tamu wę Ret Si, te Akaba, te buluba pabo sunumi badu soaiąo,’ wali.”
DEU 1:41 “Tama dagego enabolo te po wali, ‘Hobedeo. Moses, dago Godigo gedude dago dwai sę yalio. Tiali goli, dago megi da te Amor dabe dali hwįgi paibao, te Genuai Bidigo dabolo wali gilama,’ wali. Tama dage deli deligo te hwįyu gudubo ugwa dabe gudama, tama dagego homugo te bulu du bidi dabe te olo nai tiwai dao homu yai dao, tama dagego augwali aiyaba elaluaibao homu yali.
DEU 1:42 Tiali goli, Genuai Bidigo enabolo te po wali, ‘Dagego augwali habu selao. Tama augwali hwįgi pomainogo igio. Magi baso meni. Eno augwali tau sogobeo. Tama te boi bidi dabego augwali mu dolaibao,’ wali.
DEU 1:43 Genuai Bidigo po eno dagebolo mani. Tiali goli, dagego agai po odobeo. Te dagego hagoma eyu, po sela sąnama, tama dage hogodama pelama, te boi bidi dabe dali subigila hwįgi pali, te bulu du buluba.
DEU 1:44 Tialima, te Amor dabe augwali dagego te bulu dude te bidi gąǫ kelebo te nenemo tiwai bidibo dagego suali. Augwaligo dage pobeasa, te Horma buluba saboligi pali. Te Idom bulugo bulu du tomoba pali. Tama augwaligo dage sese tama mu dolali.
DEU 1:45 Tama dage gela olama, tama Genuai Bidigo tau somainogo i wai dao. Tiali goli, agai dagego po me odobeo. Menio.
DEU 1:46 Tama te tiali hagede dage te bulu Kadesde bobobage sogo mu bidai dao,” Mosesgo te po wai.
DEU 2:1 Tama Mosesgo te po wali, “Tama nosali mu, da te ma geasa te nai meni yai kemi sane buluba pai dao. Tama da te tamu wę Retsiba pabo sunumi badu pai dao. Tama dago te Genuai Bidigo wali po wali tama pai dao. Tama da bobobage sogo mu te Idom bulude te bulu dude bilai dao,” wali.
DEU 2:2 “Tama nosali Genuai Bidigo enabolo te po wali,
DEU 2:3 ‘Bobobage sogo mu dage e nai meni yai bulu du elalubo tǫde bilai dao. Tama megi dage te notba te badu pao.’
DEU 2:4 Agai te po dagebolo pusao obaso walai dao, ‘Megi da, dage te Idom bulu tomoba paibao,’ po wali. ‘Te da, te duga ama dabego tǫ dao, te Isogo wai hani dabego tǫ dao. Tama augwaligo dagede wi yaibao. Tiali goli, dagego augwali dali dua dao.
DEU 2:5 Dagego augwali homu hogodama, te hwįainogo igimio. Magi baso meni. Eno augwaligo tǫ dage dwasianu dagebolo me magobeo. Menio. Eno te bulu du elalubo bulu Idom te Isogo wąį dabebolo naga polobadu mu mawai dao.
DEU 2:6 Te augwaligo bulude dagego te wę dabe nai dabe abelagameo,’ Genuai Bidigo te po wali.”
DEU 2:7 “Dagego te sę dabe gegeda pelamuo. God dago Genuai Bidigo da tigidali te wiegi yai sę naga yali. Agai dage wiegila mu te nai meni yai bulude bugagia mu tonaluali. Te kibu be bidi sese si 40 agai da bugagia tonalubao. Aga dage dali bidibao, tama dage magi nai me sǫą pabeo,” wali.
DEU 2:8 “Tialima, da te sunumi te hanu si Elat me Esiongeber sidu gagalama asali. Tama te sigi ąį Detsiba saboligi pali. Tama da te nai meni yai bulu Moapba ma begasa pai dao.
DEU 2:9 Tama Genuai Bidigo enabolo te po wali, ‘Dagego te Moap dabe dali dwai sę me elamo dao,’ po walio. ‘Augwali te Lotgo wąį hani dao. Tama augwali dali wąbi me hwįnamuo. Magi baso meni, augwalibolo eno te hanu Ar mawai dao. Tama eno augwaligo tǫ dage dwasianu dagebolo me magobeo,’ Godigo te po wali,” Mosesgo te po wai.
DEU 2:10 (Te genuai bomai we bidi me deli, augwaligo augwali te Em hani wabo dao, augwali te bulu Ar wabo, te bulude augwali polobadu bidai dao. Augwaligo bobobage dili te Anak dabego dili bobobage tiwai elaluali. Te bidi dabego augwali te Refaim poai dao. Tama te Refaim dabe augwali te bulu Moapde bidibaso, te Moap dabego augwali te Em dabe dao po wai dao.
DEU 2:12 Polobadu te Hor dabe te bulu Idomde bidai dao. Tiali goli, te Isogo wąįgo te hani dolama, tama te tǫ selama, tama te tǫde te bidibao. Nosali te Israel dabego me te deli tobage kolesaga naga elama, tama augwaligo Genuai Bidigo augwalibolo mani tǫ sai dao.)
DEU 2:13 Tama Mosesgo po geninama weyu, te po wali, “Nosali dago Genuai Bidigo po wali gilama, te wę Seret nogeyu da, tama nogeai dao.
DEU 2:14 Tama kibu be 38 dolo tama pela silama, te Kades Barnea taga solama, tama dago te wę nogeagasali sogoba tama usu nagasali. Tama te da Israel hani tomode elaluali hwįbo bidi dabe dago te Kades Barnea taga soabode bidai dao, te kibu be 40 tomode augwali sese tama isila silai dao. Te sę te yali da, te Genuai Bidigo wali gilama tama te pedalali dao.
DEU 2:15 Tama Genuai Bidigo te bidi dabe dali boi bidi mu elama, tama augwali silibo si tama tagalali, augwali megi da dali me bidibo menio,” wali.
DEU 2:16 “Te polobadu bidali Israel hwįbo bidi dabe augwaligo sabi bidi dabe isila silibo si,
DEU 2:17 Genuai Bidigo te po wali,
DEU 2:18 ‘Megi tama dage te Moap dabego tǫ tomodu peyu, te hanu Arba pabo sunumidu pao.
DEU 2:19 Tama dage te Amon dabego bulu pąba paibao, te Lotgo wąį hani bidi dabe bidalubo digi. Tiali goli, dagego te bage augwali te sębę elama, tama wado yabo sę me elamuo, magi baso meni, te tǫ eno augwalibolo mawai dao, tama eno te augwaligo tǫ dagebolo me te tǫ dage me magobeo,’ Genuai Bidigo te po wai.”
DEU 2:20 (Te tǫ dage me te Refaim dabego tǫ dage dao po wabo dao. Magi baso meni. Augwali polobadu te tǫde bidai dao. Tiali goli, te Amor dabego te bidi dabe augwalibolo te Samsum dabe dao po wai dao.
DEU 2:21 Tama augwali me te Anak dabe bobobage bidi dabe tiwai dao. Augwali hani te hauwa mu dao, tama augwali bomai bidi dabe mu bidai dao. Tiali goli, Genuai Bidigo augwali mu silama, tama te Amon dabego augwali hasegeliyu, tama te tǫ selama, tama augwali te tǫde bidibao.
DEU 2:22 Agai te sę tiwai te Isogo hani dali elama, te Idom dabego bulu dude bidibo tiwai yalio. Tama Genuai Bidigo Hor dabe silali. Tama tialima, te Idom dabego augwaligo tǫ selama, tama augwali tede bidibao.
DEU 2:23 Te tama tiali gilama, tama te ailan Krit hanigo te Av dabe ela silama, augwali tede bidibo gilama tiali. Augwaligo tǫ te genuai tamu wę Gasa pąba tama usu nigi pelama elaluali, te sautba polo badu. Tama te Krit dabego augwaligo tǫ selama, augwali tede bidali.)
DEU 2:24 Tama Mosesgo po geninama weyu, te po wali, “Dago te Moap taga soali, tama Genuai Bidigo dabolo te po wali, ‘Megi da, dagego te Armon wę nogeao. Megi da, eno te Amor bidi dabe tede tagalaibao. Te Hesbon bulu bidi dabego tuni bidi Sihon, agai tǫ dali dagego nogoba muaibao. Tialima, dagego augwali dali boi dala palama, tama agai tǫ sabo gagalao.
DEU 2:25 Megi tama, eno te tigidali bulu bidi dabe dagede wi emainogo ilaibao. Tialima, augwaligo dagego nogi odobo si da, teda augwali wi elama, didibili yaibao,’ Genuai Bidigo te po wali,” Mosesgo te po wai.
DEU 2:26 Tama Mosesgo po geninama weyu, te po wali, “Tialima, da te bulu Kedemot kemi sanede bidali sogo, eno te Hesbon tuni bidi Sihonbolo wiegi yai po sela pabo bidi tagala palali.
DEU 2:27 Augwali saboligi pelama, te po wagi pali, ‘Nago da nago bulu tomo sunumidu soabo usu dao po waibawe? Da te genuai sunumi delidu naga soaibao.
DEU 2:28 Tama dago te wę me, nai me, olo me sogobeo. Menio. Teda dago abeliyu naga yaibao. Da olo nago bulu tomodu soaibao.
DEU 2:29 Tama da te tomodu solama, te Jordan wę nogelama, te God dago Genuai Bidigo da mawainogo te wali tǫba paibao. Te Isogo hani te Idom bulude bidibo. Tama te Moap dabe te Ar bulude bidibo. Augwali sesego dabolo usu dao po olama, da augwaligo bulu tomodu soao po walio,’ te po sela pabo bidi dabego te bidi Sihonbolo te po wali.”
DEU 2:30 “Tiali goli, tuni bidi Sihongo da agai buludu somainogo usu dao po wabeo. God dago Genuai Bidigo aga te hagoma homu ebo sę iliyu, aga homu dąų walali. Te dago aga aiyaba elaluama, tama agai te tǫ dago somainogo tama yali. Te tǫ megi da, te bidibao,” wali.
DEU 2:31 “Tama Genuai Bidigo enabolo te po walali, ‘Odao, megi eno te tuni bidi Sihon me agai tǫ sese tama nago nogoba mubao. Te tǫ sabo gagaliyu, tede bidao,’ Genuai Bidigo tama wali.
DEU 2:32 Tialima, te tuni bidi Sihon aga hani bidi dabe selama, tama da dali te hanu Jahas pąde hwįagasali.
DEU 2:33 Tiali goli, God dago Genuai Bidigo te bidi aga ogwa dabe, me aga hani sese tama, dago aiyaba elaluama tama dago augwali ela silimainu ilai dao.
DEU 2:34 Tama te sogo tama dago agai tǫ selama, tama dago agai hanu sese tama dolama tagalai dao. Tama dago te bidi sese tama ela siliyu, me dago augwaligo we wai dabe sese tama ela silai dao. Dago te bage me bidibadi me sulama tagalai menio.
DEU 2:35 Tama dago te tigidali hanu dabede te tigidali kau kibu, me tigidali doado bage dago sai dao.
DEU 2:36 God dago Genuai Bidigo te tigidali hanu dabe dolomainogo sula tagalai dao. Te moni hanu Aroerdu gagalama, te Arnon wę sesegede, me te wę sesegede elalua pabo bulu du tama pelama, te Gileat dabego tǫba usu nigi pali, te hanu me deligo da paliabo usu me ebeo.
DEU 2:37 Tiali goli, da te Amon dabego tǫ pageba me pabeo, me te Jabok wę pageba me da me pabeo, me te bulu dude dabe elalubo hanu me, ma te gasa buluba me da pabeo. Te da, te God dago Genuai Bidigo da habu selai dao,” Mosesgo te po wai.
DEU 3:1 Tama Mosesgo po geninama pusuyu, te po wali, “Tama nosali da te notba polo badu da pali. Te bulu Basanba pabo sunumidu pali. Tama te tuni bidi Ok aga hani bidi dali asali, te da dali hwįainogo, te hanu Edrei pąde.
DEU 3:2 Tiali goli, Genuai Bidigo enabolo te po wali, ‘Nage te bidide wi me elamuo. Te eno aga, me aga we bidi tigidali, me tǫ dali, sese tama nagebolo mawaibao. Tama nago te Amor dabego tuni bidi Sihon dali yali kolesaga tiwai me aga dali yaibao,’ Genuai Bidigo te po wali.”
DEU 3:3 “Tama tialima, Genuai Bidigo te tuni bidi Ok me aga we bidi sese dago nogoba mubo si, dago tigidali mu ela silai dao.
DEU 3:4 Tama te sogo dago agai hanu dabe sese dago selama, tama deli me tagalai menio. Mu menio. Dago te bulu Argopde dago te 60 hanu mu sese tama sai dao. Te da, te tuni bidi Okgo bulu tiai dao. Ok aga te genuai hanu Basande bidiyu, tama te bulu me hanu tonaluai dao.
DEU 3:5 Tigidali te hanu dabe te masigigo nigai moni obo mu elama, tama bomai sunumi mu nigali, tama augwaligo te sunumi dabe te bomai ain dili dabego dąų waliyu yali dao. Tama te obo meni yai dwasianu bulu dabe hauwa mu elaluali.
DEU 3:6 Dago te tigidali hanu dabe doliyu, me te we bidi me wai dabe dago sese mu ela muna silai dao. Dago te deli kolesaga tiwai naga dago te Sihon te Hesbon hanu tuni bidi dabe dali dago tama tiai dao.
DEU 3:7 Tama dago te kau kibu dabe, me te hanude elaluali nai dabe sese tama sai dao.”
DEU 3:8 “Tama tialima, dago te tuni bidi sigo tǫ dago sai dao, te Amor dabego tuni bidigo tǫ, te Sihon me Ok si. Te tǫ te wę Jordan te giliga asobo badu elalubao. Tama te wę Arnondu gagalama, tama pelama, te bulu du Hermon te sautba sabolama, tama te notba saboligi pali.
DEU 3:9 Tiali goli, te Saidon bidi dabego te Hermon wabo dao, te Amor dabego te Senir wabo dao.
DEU 3:10 Dago te malu bulude elaluali bulu dabe dago sai dao. Tama dago te Gileat tǫ dabe, me Basan tǫ, me te hanu si Saleka me Edrei hanu tǫ me, sese tama dago salio. Te tǫ dabe sese te tuni bidi Okgo tǫ dago sese tama sai dao,” Mosesgo te po wali.
DEU 3:11 (Te tuni bidi Ok aga te Refaim dabe sabi simanobo tuni bidi dao. Aga pubulabo halobage augwaligo te masigigo nigali. Te halobage bobobage te 4 mita, tama genuai te 2 mita tama. Te da, te hanu Raba te bulu Amonde elalubao.)
DEU 3:12 Mosesgo te Israel dabebolo te po wali, “Dago te hanu dabe sela silibo si, eno te Ruben hani me Gat hani dali sibolo tǫ mani, eno te hanu Aroerdu gagalama, te wę Arnon pąba saboligi pelama, te dąį ilali. Tama eno augwalibolo te Gileat bulu du si badu augwalibolo eno mawai dao. Te aga hanu dabe dali sese tama mawai dao.
DEU 3:13 Tama eno te Gileat me te Basan tǫ sese te Manase hani bugai mebabolo mawai dao. Basan te tuni bidi Okgo polobadu tonaluai tǫ badu dao. Te tǫ tigidali te Manase hanibolo mawai dao,” wali. (Te bulu augwaligo Argop dao wabo dao. Polobadu augwaligo te Basanbolo te po wai dao, te Refaim dabego tǫ dao po wai dao.
DEU 3:14 Nosali te Manase hani bidi me Jairgo te bulu Argop sese tama sali. Te tǫ augwaligo te Basan te wabao. Te tǫ dąį te bulu Gesur me Maka bulu si sesegeba te dąį igi palio. Tama aga digi aga nogi te bulu dabe poali. Tama tialima, te bidi dabego te po wabo dao, te bulu dabe te Jairgo bulu dabe dao wabo dao.)
DEU 3:15 Tama Mosesgo po ma wadolama weyu, te po wali, “Eno te Gileat tǫ te Makir dabego somainu sa muai dao. Te Makir dabe te Manase hani bugai meba dao.
DEU 3:16 Tama te Ruben hani, de Gat hanibolo da, eno te tǫ te Gileat tǫdu gagalama, tama Arnon węba tama usu nigi pelama mawai dao. Augwaligo dąį te saut badu gagalama, te wę tomoba saboligi pai dao. Tama augwaligo tǫ dąį te giliga asobo badu pelama, tama te Jabok węba saboligi pali. Tama te wę Jabok te Amon bulu dali dąį elaluali wę dao.
DEU 3:17 Tama te giliga dega sabo badu da, te augwaligo dąį te Jordan węba dąį igi pali. Te dąį te sigi wę Galilidu te not badu gagalama, tama pelama, te sigi wę Detsi te saut badu tama pelama, te bulu du Pisgadu pelama, te sigi wę Detsiba saboligi palio,” wali.
DEU 3:18 “Tama te sogo naga eno te Ruben hani dali, Gat hani dali, te Manase hani dali, augwalibolo te po wali, ‘God dago Genuai Bidigo dagebolo te tǫ te giliga asobo badu te Jordan wę badu dage mani dao, te dage tede bidimainogo. Megi da, dagego bidi dabego te hwįabo nai dabe sao. Tama dagego augwali polasa te Jordan wę nogelama, tama augwali augwa ama Israel dabe nosali ilama, tama pelama, te tǫ somainogo tau sigi pao.
DEU 3:19 Tama dagego we wai dabe augwali te dagebolo eno mani te hanu dabede tagalao, augwali tede tonalumainu yao. Eno koneani, dagego kau kibu hauwa bidibao. Tiali goli, augwali me te hanu dabede bidimainao.
DEU 3:20 Dagego duga ama solo tau sela mao, tama augwali te God dago Genuai Bidigo augwalibolo mawainu yali te Jordan ąį pabo badu te giliga dega sabo badu tǫ sabo si tagalao. Dage augwali dali bidibadi, te Genuai Bidigo augwali te tǫde bugagia bidimainu sula tagalobode tagalao. Te agai dage dali yali sę tiwai tama ebaso. Tama nosali da, teda dage duga eno dagebolo mani tǫba ma piagameo,’ wali.”
DEU 3:21 “Nosali eno Josuabolo te po wali, ‘Nago polo suali dao, God dago Genuai Bidigo te tuni bidi Ok de Sihon side agai tigidali sę yali. Te agai te tiwai deli kolesaga naga te dagego hwįnama, tama te augwaligo tǫ sainu ebo bage dali tiaibao.
DEU 3:22 Dage augwalide wi me elamuo. Magi baso meni, God dago Genuai Bidigo dage tau selama, tama augwali dali hwįaibao,’ eno te po wali,” Mosesgo te po wai.
DEU 3:23 Te Mosesgo te po wali, “Te sogo eno gedu haluasa po bomo elama, te po wai dao,
DEU 3:24 ‘God, Genuai Bidi, eno koneani, nago enabolo nago genuai yabo sęde te sę dwasianu deli naga me nago enabolo ola manio. Te gasa god dagalude me tǫde me bidibeo, te nago te genuai sę nago polo yali, te sę tiwai yabo.
DEU 3:25 Megi eno homugo nago ena te Jordan ąį nogelama, u badu pomainogo yao. Tama eno te wiegi yai ili yai tǫ me, wiegi yai bulu du me, te Lebanon bulu du me sugi pomainogo yao,’ eno tama po wali.”
DEU 3:26 “Tiali goli, menio. Dagego geda muanigo dagego dolaligo da, Genuai Bidigo ena dali sębę elama, tama olo palialubao. Agai te po wali, ‘Penane pania sao,’ wali. ‘Nago enabolo te nai po ma hanalugio.
DEU 3:27 Nage te Pisga bulu duba pelama, tama te notba me sautba tonoyu, me giliga asobo badu tonoyu, me giliga dega sabo badu tonoyu yao. Nago te buluba dabe bugagia mu tonono bilao. Magi baso meni, nage te ąį Jordan nogelama, te tǫ tomoba nage pogobeo. Mu menio.
DEU 3:28 Josua bugagia ola mao, tama agai homu kolesaga bugagia dąų walao. Magi baso meni, aga digi aga te we bidi te wę u badu odasa paibao. Tama augwali nago megi te suabo tǫde bidaibao,’ wali.
DEU 3:29 Tama tialima, da te odogo bulude bidai dao, te hanu Betpeor u badu,” Mosesgo te po wali.
DEU 4:1 Megi da, Mosesgo te we bidibolo te tama po walali, “Dagego eno megi dagebolo mabo po bugagia wali pobaso, tama dage bugagia bidiagameo. Tama dage duga wąį dabego God, Genuai Bidigo mawainu ebo tǫde bidiagameo, te dagebolo megi mabo tǫ dao.
DEU 4:2 Te God dago Genuai Bidigo megi agai e mabo bomai poba dagego duga gesi noma bomai po me teba daganamuo, te megi eno dagebolo e mobao. Tama dagego te Godigo bomai po me deli sela sąnamuo. Dagego te bomai po tigidali tama wali piąo.
DEU 4:3 Genuai Bidigo te bulu du Peorde yali sę duga digi polo te suali dao. Te bulude te dage tomode bidi hauwago te tibo god Balba lotu wali, tama Godigo augwali sese tama dolalio.
DEU 4:4 Tiali goli, te dago God Genuai Bidide augwa homu mu kęą pai bidi dabe, dage da me te bidibao,” wali.
DEU 4:5 “Edao. Eno dage tigidali haniani bomai po ola mena silali, te God dago Genuai Bidigo dabolo wali gilama tiai dao. Megi da, dage te bulu sigi pelama, tama tede duagi paibao. Tama dage te bulude bidiyu da, teda dagego te bomai po tigidali wali piagameo.
DEU 4:6 Dagego te bomai po dabe mu tama wali piąo. Tama te gasa bulu bidi dabego te tiwai sę ebo konemainao, te dagego wiegi yai kolesaga elaluyu, me wiegi yai homu kolesaga hauwa elaluyu ebo augwaligo koneaibao. Tialima, augwaligo dagego te bomai po elalubo po odobo sogo, augwaligo te po waibao, ‘Tegoba! Te we bidi augwaligo wiegi yai kolesaga, me wiegi yai homu kolesaga elalubao,’ po waibao. ‘Augwaligo da mu edelama, mu elalubao,’ waibao,” Mosesgo te po wai.
DEU 4:7 “Dagego meba we bidi dabe kone paliawe? Augwaligo genuai bomo da elalubadi goli, tagalao, augwali tau sabo god menio, te God dago Genuai Bidi da dali ebo tiwai. Tigidali sogo Genuai Bidi aga da dali pąde mu bidiyu, tama dago agaba i wabo si da, teda agai da polo tau sabo dao.
DEU 4:8 Tama te gasa we bidi augwaligo te doloba pai bomo yai po augwaligo elalusiąwai, te eno dagebolo me e ola mabo haniani bomo yai po tiwai elalubeo. Mu menio.
DEU 4:9 Dagego bugagia tonaluiąo. Te dage tigidali sogo e tǫde bidiyu, dagego duga te suali te nai dabe munu me gegeda pelamuo. Te Godigo yali sę suali te duga homude mu dąų walao. Dagego duga wai dabe, me waigo wai dabeba pusa mayu,
DEU 4:10 te dagego te God Genuai Bidi pąde dolaluyu suali, te po pusao, te Sainai bulu dude. Te sogo Godigo enabolo te po wali, ‘Te tigidali we bidi i olama sisinao. Eno homugo augwaligo eno wabo po odomainao. Tama tiyu, augwali e tǫde bidiyu, ena dologode naga elalumainao. Tama augwaligo augwa wai dabeba me nosali ola menama, tama augwali me ena dologode elalumainao,’ Godigo enabolo te po wali.”
DEU 4:11 “Godigo po wabo si, dage te bulu du sesegeba dolaluagasai dao. Tama sisi pǫ me hano sigo bulu du mesega selama, tama moni isi bogoli dagaluba holai dao.
DEU 4:12 Tama Genuai Bidi te iside bidiyu, dage dali po wabo dagego odai dao, te agai digi po wabo. Tiali goli, te God e tiwai nai me deli da weyu, te agai tigi te dagego me subeo. Mu menio.
DEU 4:13 Tama te sogo agai nogo si bomai po dagebolo menama, tama agai masigi sawali side asęai dao. Te bomai po te agai dage dali te po dąų waliyu, te tama tiai dao. Tama agai dagebolo te bomai po wali piąo po wai dao.
DEU 4:14 Tama Genuai Bidigo enabolo dage agai megi mawainu ebo te tǫde bidiyu, wali pabo haniani bomai po meba eno dagebolo ola mao po wali,” Mosesgo te po wai.
DEU 4:15 Te Mosesgo po geninama weyu, te po wali, “Te Sainai bulu dude te Genuai Bidi te isi dabo tiwai ebo tomoba bidagaselama, te dage dali po miani sogo, dagego te God e tiwai nai me deli da olama dąį ilibo dagego me subeo. Tama tialima, dage bugagia dolasa bidiąo,
DEU 4:16 tiyu dagego tibo god me nigidali weyu. Ma, dagego tama tiyu da, teda dagego dwai kolesaga yaibao. Dagego te bidi piksa, ma we piksa, ma te hasa dabe piksa, ma ba piksa, ma te gula mane piksa, ma sųgų piksa me nigilama, dagego god dao olamuo.
DEU 4:19 Tiyu dagego dagalude elalubo subo nai dabeba lotu po waidalio, te giliga, me polua, me hǫ dabeba lotu olamuo. Menio. God dago Genuai Bidigo te gasa we bidi dabego te nai dabeba lotu omainu sula tagalai dao.
DEU 4:20 Tiali goli, dage da, menio. Godigo dage Isip bulude oda selama, dage eba odasa asali. Te dage te isi hobulude honialuai tiwai tama odasa soai dao. Tama agai dage odasa asali, te aga we bidi mu bidainogo odasa asai dao, te dage megi bidibo tiwai tama.
DEU 4:21 Te dagego dwai kolesaga yaligo da, God dago Genuai Bidigo ena dali sębę yali. Tama agai po bomonama, hanilama weyu, te po wali, te ena te Jordan ąį nogelama, te wiegi yai tǫ elalubo te buluba pogobeo po wali, agai megi dagebolo mawainu ebo te tǫba.
DEU 4:22 Eno te wę nogegobeo. Menio. Ena e bulude isaibao. Tiali goli, dage da, te wę nogelama, tama te wiegi yai ili yai tǫba bidigi paibao.
DEU 4:23 Dage bugagia tonaluao. Tiyu dagego God Genuai Bidigo dage dali dąų walali te po dagego gegeda pabuo, dagego. Dagego agai po wali piąo. Tama dagego duga tibo tibo god dabe me geselamuo.
DEU 4:24 Dagego te tama tilamuo. Magi baso meni, God dago Genuai Bidi, aga deli naga te God mu dao. Tama agai dage te gasa tibo godiba me lotu omainu sula tagalogobeo. God aga da, te posolai isi tiwai mu dao, tama agai aga boi bidi dabe ulama daibao,” wali.
DEU 4:25 “Tama nosali, dage te tǫde bobobage sogo bidama, tama dagego wai dabe me dagego wąį wai puluba dabego me bidiyu, tama dagego dwai kolesaga eyu, dagego te tibo god me geselamuo. Ma, dagego te tobage nai dabe geseliyu da, teda dagego sęgę saibao. Te da, te Godigo gedude dwai kolesaga mu dao, tama te kolesaga aga sębę mu ilaibao.
DEU 4:26 Odiąwe, megi eno te dagalu me tǫ si i obao, te augwaligo eno dage dali te wabo bomai po odomainu. Ma, dagego Godigo po sela sąyani da, teda dua dao. Godigo dage tigidali polo tama te tǫde sela sąwaibao. Tama dage te Jordan wę u badu elalubo te tǫde bobobage sogo bidigobeo, te dagego megi te sainu ebo te tǫde. Menio. Dage sese sia saibao.
DEU 4:27 Teda Genuai Bidigo dage sese tama gasa buluba dabe subigila sela sąwaibao. Tama we bidi hauwa mu isila paibao, tama dage dwasianu we bidi naga te gasa haniani bidi hani tomode bidaibao.
DEU 4:28 Tama te bulu dabede da, dage tibo godiba dabe lotu po waibao, te bidi dabego te masigigo me ni dabego nigai godide. Te god dabego te tonoyu, me odoyu, me po weyu, me nai tuyu, me nai denami odoyu me egobeo.
DEU 4:29 Tama te sogo dagego homu hogodama, tama dagego duga dago God Genuai Bidiba ma asabo homu mu hogodaibao. Te dagego sese homugo me sese homu kolesagago aga gegabo homu yali da, teda dage aga pąba mu asiagameo.
DEU 4:30 Tiali goli, dage genuai sęgę tomode bidibo sogo da, me te dwai nai dabe dageba pedalobo sogo me, teda dage homu begelama, ma geasa asama, Genuai Bidigo po wali paibao.
DEU 4:31 Magi baso meni, aga te bidi hobede ebo God dao. Agai dage mu tagaliyu, ma dage mu dola siliyu me egobeo. Tama agai te dago wąį dali dąų walali te bomai po me gegeda pogobeo,” Mosesgo te po wai.
DEU 4:32 “Dagego polobadu bidaliba ma kone paliawe, te dage ame nisąbadi? Tama me te Godigo hasia bidi me deli nigaliba kone palawe. Te dage te tigidali tǫba pobadi goli, tagalao, dagego te tobage genuai sę tiwai me pedalobo sugobeo. Te tobage sę po polobadu bidi mego odai elalubawe? Menio.
DEU 4:33 God te isi tomode bidiyu, po wai dao, tama dagego agai po odai dao. Tiali goli, te bidi me te po polobadu odai goli, me isisąma me yai elalubadi bogo? Te menio.
DEU 4:34 God dago Genuai Bidigo da Isip bulude oda selama, da te Isip hani tomodu dįą selama, odasa asu, da aga we bidi mu pedelai dao. Te dagego gedude agai haniani sę hauwa agai genuai bomogo yai dao. Agai te Isip dabebolo genuai gasi augwalibolo mayu, me agai augwali dali hwįyu yai dao. Tama agai gasi hauwa mayu, me agai haniani bidi noma sabo sę geninama mu yali, te augwali wi ma iliyu. Tialima, te gasa god mego te tobage sę me yai dawe? Mu menio.
DEU 4:35 Genuai Bidigo te sę dabe ola mani da, teda dagego konemainu te yali dao, te aga deli digi naga God bidibao olama konemainu te yali dao. Tama te gasa God me bidibeo. Mu menio.
DEU 4:36 Agai dage dodola ola mawainogo, tama tialima, agai dagego agai po dagaludu wabo odomainu tagaliyu te yali dao. Tama te tǫde dagego agai genuai isi dabo sumainu te yali dao, tama agai te iside bidiyu, dage dali po te wali dao.
DEU 4:37 Genuai Bidigo duga wąį dabe godolo mu elama, tama agai dage aga we bidi mu bidimainu sa muai dao. Tama tialima, aga dage dali bidiyu, agai genuai bomogo dage Isip bulude oda selama, tama dage e buluba te odasa asali dao.
DEU 4:38 Tama dage te asali sogo, agai te genuai boma pai we bidi sela sąwai dao, te augwaligo bomo te dagego bomo edelai bage. Agai te tama tiali da, te da agai dage odasa aselama, tama augwaligo tǫ dagebolo mawainu te yali dao. Te da, te tǫ dage megi bidibo, te tǫ te dao.
DEU 4:39 Tama tialima, dagego te tiali sę gegeda pelamuo. Genuai Bidi aga te dagalude me tǫde God dao. Tama te gasa God me menio. Mu menio.
DEU 4:40 Dagego agai bomai po tigidali wali piąo, te eno dagebolo mani te po. Tama tiyu da, dage me, duga wai dabe me, dage bugagia bidaibao. Tama dage te God, dago Genuai Bidi, te mabo te tǫde dage bugagia bobobage sogo mu bidaibao. Tama te tǫ tigidali sogo duga tǫ elaluaibao,” Mosesgo te Israel dabebolo te po wai.
DEU 4:41 Nosali Mosesgo giliga asobo badu te Jordan wę badu agai hanu sela sa muani.
DEU 4:42 Te hanu sela, te da, te bidi me deligo agai magi sę ebode geda muyu, olo bidi me ela muai yai baso da, te hanuba duala sigi peyu emainu. Agai hasia bolo te isai bidi dali dwai homu ebeo. Menio. Geda muyu, isilibaso da, te bidide po menio. Te bidi aga te hanu sela me deliba duala sigi peyu, wi pomainogo, tama wei ponobo bidi augwaligo aga elama isilibo usu egobeo, te habu selai dao.
DEU 4:43 Te hanu sela te e tama dao. Te hanu me te Beser, te da te Ruben hanigo duala sabo hanu dao. Te da te bulu dude elalubo. Me da, te Ramot dao, te Gileat tǫ dage badu. Te da, te Gat hanigo duala sabo hanu dao. Tama me da, te Golan dao. Te da, te Basan tǫ dage badu. Te da, te Manase hanigo duala siyu yabo hanu dao.
DEU 4:44 Mosesgo Godigo bomai po te Israel dabebolo mani.
DEU 4:45 Agai te bomai po augwalibolo augwali te Isip bulu taga solama, tama augwali te giliga asobo badu te Jordan wę badu, te malu bulude bidibadi, te po mani, te Betpeorba tonobo badu polo badu. Te badu te tǫ te tuni bidi Sihon, te Amor dabego tuni bidigo tǫ dao. Polobadu agai te hanu Hesbonde bidiyu, te tǫ tonaluai dao. Tama Moses de Israel dabe augwaligo te bage augwali te Isip bulu tagalama asali sogo, augwali aiyaba elaluai dao.
DEU 4:47 Tama augwali agai tǫde, me te Ok te Basan tuni bidigo tǫde augwali bidaluali. Te Amor dabego tuni bidi si te Jordan wę te giliga asobo badu bidai dao.
DEU 4:48 Te Israel dabego polo sali tǫ te dąį te Aroerde gagalali, tama Arnon węba sabolama, tama pelama, te bulu du Sirion, te nogi me Hermon, teba saboligi pali.
DEU 4:49 Tama me augwaligo te Jordan wę te giliga asobo badu tǫ sese tama sali, tama pelama, tamu wę Detsiba tama pelama, tama bulu du Pisgaba saboligi pali.
DEU 5:1 Te Mosesgo Israel we bidi tigidali i ola sisinama, tama agai augwalibolo te po walali, “Dage Israel dabe, dagego eno megi dagebolo mawainogo ebo te bomai po odiąwe. Dagego te bomai po konea sao, tama bugagia wali piąo.
DEU 5:2 God, dago Genuai Bidigo, da dali te Sainai bulu dude po dąų walai dao.
DEU 5:3 Agai te dąų walali po te dago wąį dabe dali naga dąų walai menio. Menio. Agai te po dąų walali te da megi e bidibo bage da dali me dąų walali dao.
DEU 5:4 God te isi tomode te bulu dude bidiyu, tama agai po dage dali dolo wai dao.
DEU 5:5 Tama te sogo eno te Genuai Bidi de me dage dali tomode po ugwaba pusuyu, edaba pusuyu ebo bidi bidai dao. Magi baso meni, dage te iside wi elama, tama dage bulu duba pabo usu isąbaso tiali,” wali. “Genuai Bidigo te po wali,
DEU 5:6 ‘Ena Genuai Bidi, ena dagego God dao. Dage olo sę ebo bidi te Isip bulude bidibaso, eno dage oda selama, eno dage odasa asai dao.’”
DEU 5:7 “‘Dage gasa God meba lotu po me olamuo. Dagego ena deliba naga lotu po wao.’”
DEU 5:8 “‘Dagego te olo nai piksa te dagalude me tǫde elalubo nai, ma wę te tǫ dologode elalubo nai piksa dabe me nigilamuo.
DEU 5:9 Dage te tibo god piksaba bogoli sugunama, lotu po me olamuo. Magi baso meni, ena Genuai Bidi, ena dagego God dao, tama eno dage te tibo god piksaba lotu omainu me sula tagalogobeo. Eno kolesaga da, e tama tilalubo, eno te bidi dabe ena godolo isąma ebo bidi dene mabo dao. Tama eno te bage augwaligo wai te nosali pedalobo bage te namba 3; te namba 4 hani, me nosali pedalobo bagebolo me te tobage dene me mawaibao.
DEU 5:10 Tiali goli, te we bidi ena godolo elama, eno bomai po wali asobo we bidi da, teda eno augwali godolo mu elama, augwa hani nosali 1,000 pedalobo me godolo mu elalua paibao,’ wali.”
DEU 5:11 “‘Dagego God eno nogi olo dali nogi igio, duga Genuai Bidi. Magi baso meni, eno nogi olo dali nogi ebo bidi dene mawaibao.’”
DEU 5:12 “‘Dagego Sabat sogo eno bubuga mu nigilao, duga God, Genuai Bidi, eno sogo, te eno dagebolo wali gilama tama.
DEU 5:13 Te a naga olama deli sogo duga olo sę yao.
DEU 5:14 Tama te dei namba 7 te Sabat dao, ma te hodo dolobo sogo dao. Te da eno bubuga dao. Tama te sogo mu deli da dage me, duga wai puluba me, duga sę bidi me, we dabe me, duga negebo hasa dabe me, gasa bulu bidi me dagego bulude bidibaso da, teda te sogo deli munu me sę elamuo, te sę ebo habu mu dao. Te duga sę ebo we bidi augwali te sogo te dage hodo doliyu, dage olo bidibo te yali gilama augwali me olo bidimainao.
DEU 5:15 Dagego koneawe, dage te Isip bulude te olo sę ebo bidi bidali, te koneao, tama eno genuai bomogo, ena dagego God Genuai Bidi, eno dage tedu odasa asai dao. Tama te tiali pagede da, dagego eno te bomai po wali piąo, tama te toma tubo sogo bugagia wali pelama, toma tuyu yao,’ wali.”
DEU 5:16 “‘Dage duga ida aya dologode elaluyu, tama augwaligo po wali piąo, te ena God, dagego Genuai Bidi, eno dagebolo wabo yali gilama. Tialima, dagego te tama sę eyu da, teda dagede tigidali sę wiegi yai mu pedelaibao. Tama dage eno megi te mabo te tǫde dage bobobage sogo mu bidaibao,’ wali.”
DEU 5:17 “‘Dagego gasa we bidi elama isiligio.’”
DEU 5:18 “‘We sai me bidi pai we te we bidi dagego penani sę igio.’”
DEU 5:19 “‘Dagego nai wi sigio.’”
DEU 5:20 “‘Dagego ili po olama, gasa we bidi po tų ela magio.’”
DEU 5:21 “‘Dagego gasa bidigo we pesą igio. Tama dagego agai be pesą daliyu, me tǫ pesą daliyu, me agai sę ebo we bidi me pesą iyu, me kau kibu pesą iyu, me donki kibu me pesą me iyu elamuo, me te agai meba gasa nai dabe me pesą me iyu elamuo.’”
DEU 5:22 Tama Mosesgo te po wali, “Dage tigidali te bulu dude sisinani sogo, Genuai Bidi te isi tomode me te moni genuai sisi pǫ tomode bidai dao. Tama agai po bomona haninama, tama te bomai po dabe dagebolo mani. Tama agai gasa po teba daganobeo. Tama agai te bomai po te masigi pedai side asęnama, enabolo mani,” wali.
DEU 5:23 Mosesgo po geninama weyu, te po wali, “Te isigo te bulu du mesega sali sogo, dagego te pǫ hulia sai tomode po me deli wabo odali. Tama tibaso, dagego genuai bidi dabe me dagego hanide genuai bidi augwali ena pageba aselama, tama augwaligo te po wali,
DEU 5:24 ‘God, dago Genuai Bidigo, dabolo agai genuai bomo mu ola mani, te dago aga te isi tomode po wabo odali sogo. Megi da, dago koneani. Me sogo Godigo te bidi me deli dali po wabo usu yaibao, tama te bidi me isibeo.
DEU 5:25 Tiali goli, God dago Genuai Bidigo da dali po ma wabo dago ma odiyu da, teda da isaibao. Te dwai isigo mu da dolaibao. Te magi baso mu megi da isaibawe?
DEU 5:26 Te niwai bidi mu te God tigidali sogo mu bidibo bidigo po te isi tomode bidi po wabo de isigobewe?
DEU 5:27 Moses, nage ma pelama, God dago Genuai Bidigo wainogo ebo te po ma odigi pao. Tama odama, tama ma asama, nago te odali po dabolo pusao. Teda dago odama, wali paibao,’ dagego tobolu bidi dabego te po enabolo te sogo wali,” Mosesgo te po wai.
DEU 5:28 “Te tama tialima, Genuai Bidigo dagego ena dali te wabo po odali, tama agai enabolo te po wali, ‘Te we bidi augwaligo po eno polo odalio, tama augwaligo po te dolo mu dao.
DEU 5:29 Eno homugo augwaligo te tobage kolesaga tigidali sogo emainu homu ebao, tama augwali tigidali sogo ena dologode elaluyu, tama eno bomai po tigidali sogo wali pomainao. Te tama eyu da, augwaligo sę dabe, me augwa wąį nosali asobo bagego sę dabe bugagia pedalaibao.
DEU 5:30 Tama tialima, nage ma pelama, augwali augwa ugwa beba ma piąo po wagi pao.
DEU 5:31 Tiali goli, Moses, nage ma asama, nage deli naga ena dali ede bidao, tama nagebolo eno bomai po tigidali mawaibao. Nago te we bidi te bomai po ola mao. Tama augwaligo te bomai po tigidali augwalibolo eno megi mawainu ebo te tǫde bidiyu, te bomai po wali pomainao,’ wali.”
DEU 5:32 Tama Mosesgo augwalibolo te po wali, “Dagego bugagia tonaluiąwe, God dago Genuai Bidigo dagebolo mani te tigidali bomai po dabe wali piąwe. Dagego te bomai po me deli geda munamo dao.
DEU 5:33 Te tigidali bomai po bugagia wali peyu da, dagego ebo sę dabe tigidali wiegi yai pedalaibao. Tama dage bobobage sogo mu te megi dagego sainogo ebo te tǫde bidaibao,” Mosesgo te po wali.
DEU 6:1 Te Mosesgo po geninama weyu, te po wali, “Megi da e dao, te God dago Genuai Bidigo dagebolo ola mao wali te bomai po dabe. Tama dage te megi dagego sainogo ebo te buluba sabolama, duagi painogo ebo buluba sabolama da, teda dagego te bomai po wali piąo.
DEU 6:2 Dage tigidali sogo tǫde bidiyu da, dage me, duga wai nosali pedalobo te wai dabego me, tigidali sogo God dago Genuai Bidi dologode naga elaluao. Tama dagego agai bomai po tigidali wali piąo, eno megi dagebolo te mobao. Tama tiyu da, dage tǫde bobobage sogo mu bidaibao.
DEU 6:3 Israel dabe, dagego bugagia odiąo, tama te bomai po bugagia wali piąo. Tama tiyu da, dagego tigidali sę dabe ebo wiegi yai mu pedalaibao, tama dage te bomai we bidi deli me pedalama, tama dage te wiegi yai tǫ ili elalubo te tǫde wiegila bidiagameo. God, dago wąį dabego Genuai Bidigo, te tama po dąų walalio,” Mosesgo te po pusai.
DEU 6:4 “Dage Israel dabe, dagego bugagia odiąo. Genuai Bidi deli tama dago God deli tama dao.
DEU 6:5 Dagego God dago Genuai Bidi deli naga godolo mu iyąo. Dagego aga te duga haligade godolo eyu, me dagego homu kolesagade godolo eyu, me dagego bomogo dali mu aga godolo iyąo.
DEU 6:6 Tigidali sogo dagego eno dagebolo megi mabo te bomai po kone paliyu yao.
DEU 6:7 Tama dagego te bomai po duga wai bǫų dabebolo tigidali sogo ola mayu yao. Tama augwalibolo te bomai po duga bede bidiyu, me dage sunumidu peyu me, me dage toma tubo sogo me, ma dage duga sę ebo sogo dagego te bomai po duga wai dabebolo ola mao.
DEU 6:8 Tama dagego te po dabe dagego pepade asęnama, tama duga nogode me, ma te duga gebode daganama, kęyu yao. Tama tiyu da, dagego po dabe munu me gegeda pogobeo.
DEU 6:9 Tama me te duga be sunumi nide me, ma duga be mesalo obo sunumi nide me, asęao,” Mosesgo te po wai.
DEU 6:10 Mosesgo te po wali, “God dago Genuai Bidigo dago wąį Abraham, me Aisak, me Jekop, te augwalibolo te genuai bulu me deli, te hanu wiegi yai hanu hauwa duga digi nigisiąwai bulu mawaibao po polobadu dąų walai dao.
DEU 6:11 Tama te wiegi wiegi yai nai dabe dagego bede pągąnaluaiba po wai dao, te da duga digi te be tomoba musiąwai nai dabe. Tama te tǫ dedage wę dabe meba me hauwa elalubo, te duga digi nigisiąwai wę elaluaibao. Tama me te wain gi me, te oliv gi me elaluaibao, te duga digi bulisąwai elaluaibao. Genuai Bidigo dage odasa pelama, te buluba sabolama, tama dagebolo te nai dabe mawaibao. Tama dagego te haniani wiegi yai nai dagego tulama, tama dage tabia peyu ebaso da,
DEU 6:12 teda dage dua mu dao, tiyu dagego Genuai Bidi gegeda palabuo. Agai digi dage Isipde olo kalabus sę ebo bidi tiwai bidibaso, dage odasa asai dao. Tama agai digi dage Isip bulu tagalama, odasa asai dao.
DEU 6:13 Dage God dago Genuai Bidi dologode naga bidiąo. Tama dage deli deligo gasa bidi dali po dąų omainogo eyu da, teda Genuai Bidigo nogi naga nogi elama, te po dąų walao.
DEU 6:14 Dagego te dage pąde bidalubo te we bidi dabego tibo godiba lotu po me olamuo.
DEU 6:15 Ma, dagego te tibo god dabeba lotu po wali da, teda Genuai Bidi agai sębę mu elama, tama agai dage te isigo dwai dwai nai dabe dela silibo tiwai tama dela silaibao. Magi baso meni, God dago Genuai Bidi da dali megi bidiyu, tama agai dage gasa god meba lotu omainu sula tagalogobeo, mu menio,” wali.
DEU 6:16 “Dagego God dago Genuai Bidigo bomo usu sigimio, te dagego te bulu Masade polobadu yali tiwai elamuo.
DEU 6:17 Dagego agai dagebolo mani te bomai po dabe, me mena kolesaga wali pao wali po, te dolo mu wali piąo.
DEU 6:18 Dagego tigidali sę dage eyu, te Genuai Bidigo te wiegi yai dola pai nai dao wabo te sę dabe naga yao. Tama tialima, dagego tigidali yainu ebo sę dabe te wiegi yai mu pedelaibao. Tama dagego te wiegi yai ili yai tǫ saibao, te da te Genuai Bidigo duga wąį dabebolo dage mawaibao wali te tǫ dao.
DEU 6:19 Tama dagego duga boi bidi dabe sela sąbo usu yaibao, te Genuai Bidi aga digi te po dąų walali gilama tiaibao,” wali.
DEU 6:20 “Nosali nosali duga wai dabego dagebolo e tama po hanaluyu, ‘Magi baso God dago Genuai Bidigo dabolo te tigidali bomai po wali pao po waliwe?’ waibao.
DEU 6:21 Teda dagego augwalibolo te po walao, ‘Da te Isip tuni bidigo olo sę ebo bidi bidai dao, tama Genuai Bidigo da agai bomogo oda sai dao.
DEU 6:22 Mu tama, dago gedude mu tama Genuai Bidigo te haniani sę, me te haniani dene te Isip hani bidi dabe, me augwa tuni bidibolo, me aga ofisa bidi dabebolo te dene mabo suai dao.
DEU 6:23 Agai da Isip bulude oda selama, tama da buluba olo madi odasa asai dao. Te da eba odasa aselama, tama dabolo te e tǫ mawainogo. Te agai dago wąįbolo polobadu po dąų wali gilama tialio.
DEU 6:24 Tama nosali God dago Genuai Bidigo dabolo e bomai po wali pomainogo mawai dao, tama da aga dologode eluinao. Tialima, dago tama tiyu da, tigidali sogo agai dago bulu tonaluaibao, tama megi elalubo yali gilama tama tiwai elalumainogo yaibao.
DEU 6:25 Tialima, dago agai bomai po tigidali wali peyu da, teda agai da dali wiegi yai homu elama, dabolo te doloba pai we bidi dao po waibao,’ te tama po duga wai augwalibolo wei ponoyu pusao,” Mosesgo te po wai.
DEU 7:1 Te Mosesgo po geninama weyu, te po wali, “God dago Genuai Bidigo dagebolo megi sainogo ebo te tǫba odasa paibao. Tama agai te bidi hani hauwa te tǫde bidibo bidi hani sela sąwaibao. Dage tǫba pabo sogo, agai te a naga olama si, te 7 bidi hani sela sąwaibao, te tǫde bidali bidi hani. Te bage augwaligo bomogo da, dagego bomo edelai bage dao. Te hani te Hit, me Girgas, me Amor, me Kenan, me Peres, me Hivi, me Jebus, te tama hani dao.
DEU 7:2 Te God dago Genuai Bidigo dagego augwali aiyaba elalumainogo ebo si da, teda dagego augwali ela mu silao. Dagego augwali dali abagi olama, tama augwali hobede me eyu elamuo.
DEU 7:3 Tama me dagego augwali dali we si me abelamo dao.
DEU 7:4 Magi baso meni. Augwaligo dagego ogwa dabego God tudiba mubo ilaibao, tama augwaligo tibo godiba lotu po waibao. Tama tialima, te wai dabego te tama tiali da, tede polo tama Genuai Bidi sębę elama, tama dage dolaibao.
DEU 7:5 Dage te bidi hani dali abagi igimio. Menio. Dagego augwaligo alta togoyu, me augwaligo tibo god noma elalubo masigi pos ni toga sąyu, me te tibo god we nogi Aserago noma elalubo ni pos toga sąyu elama, me augwaligo tibo god piksa sia uluyu yao.
DEU 7:6 Dagego tama tiao. Magi baso meni, dage da God dago Genuai Bidi aga we bidi dao. Te tigidali tǫde we bidi hani tomode agai dage deli naga sa munama, dage agai doloba pai we bidi dao,” wali.
DEU 7:7 “Dage te genuai bidi hani edelebaso, te Genuai Bidigo dage koneama, tama dage sa muai meni. Menio. Dage te dwasianu hani naga bidai dao.
DEU 7:8 Tiali goli, Genuai Bidigo dage godolo mu elama, tama agai dago wąį dali te dąų wali te po wali peyu te ebao. Te page delide tama agai genuai bomogo dage tau sali dao. Tama teyu, dage te Isip tuni bidigo olo sę ebo bidi dabe bidibadi, agai dage te Isip tuni bidigo nogode ma dobola sai dao.
DEU 7:9 Dagego te tiali sę wiegila koneiąwe, God dago Genuai Bidi aga deli naga te God mu dao. Tigidali sogo agai aga po dolo wali peyu ebo dao. Tede aga munu me tulalubeo. Tama tialima, agai aga dąų wali po wali peyu yaibao, tama agai te we bidi augwaligo aga godolo eyu, agai bomai po wali pabo we bidi, augwali hani te nosali nosali pedalua pabo bage, augwali 1,000 solo usu siyu, tama agai augwali godolo mu eyu ebo dao.
DEU 7:10 Tiali goli, we bidigo aga godolo isąma yali we bidi, agai polo tama dene dolo mu mawaibao.
DEU 7:11 Tialima, dagego agai dagebolo mani te po wiegila wali peyu, tama dagego eno dagebolo megi mani te haniani bomai po bugagia wali piąo,” Mosesgo te po wali.
DEU 7:12 Mosesgo te po wali, “Tialima, dagego te bomai po dabe odama, tama dagego te po wali dolo peyu da, teda God dago Genuai Bidigo aga dąų wali po wali paibao. Tama tigidali sogo agai dage godolo mu yaibao, te agai dagego wąį dali wali gilama tama yaibao.
DEU 7:13 Agai dage godolo mu elama, tama agai dage dali wiegi yai sę mu yaibao. Tialima, dagego wai puluba hauwa mu elama, tama dagego wąį genuai mu yaibao. Tama me agai dagego gi dabe wiegi yai ilama, tama dagego gide wit me, wain bono du me, te oliv wel me, hauwa mu elaluaibao. Tama me te kau kibu me sipsip dabego wai hauwa ame nomainogo yaibao. Agai te wiegi yai nai dabe hauwa dage mawaibao, te agai duga wąįbolo mawaibao olama po dąų wali te tǫde.
DEU 7:14 Te tǫde we bidi mebabolo Godigo dagebolo te nai dabe hauwa mabo tiwai te gasa we bidi mebabolo me egobeo. Te dagego we dabe me, o dagego kau kibu so dabe te wai ame nisąma olo bidigobeo.
DEU 7:15 Tama Genuai Bidigo dage bugagia tonaluama, tama dage te tigidali haniani gasi me sogobeo. Tama agai dagebolo te haniani dwai gasi dagego Isip bulude suali, te gasi tigidali dagebolo me tagala palogobeo. Tiali goli, agai te gasi te dagego boi bidi dabebolo naga mawaibao.
DEU 7:16 Dagego te tigidali bidi hani dabe mu tama ela siliąo, te God dago Genuai Bidigo dagebolo dagego nogoba mabo, te bidi hani dabe. Tama dagego augwali hobede me elamuo. Me augwaligo tibo godiba lotu wabo te habu mu dao. Ma, dagego augwaliba lotu po wali da, teda dage tuloluaibao,” Mosesgo te po wai.
DEU 7:17 “Tiyu dagego te homu idali, ‘Te hani bidi augwali genuai hani bidi dao,’ homu elama, dagego ‘augwaligo da elalugowe’ homu idalio. Tama dagego augwali sela sągobeo homu idalio.
DEU 7:18 Menio, dage augwalide wi me elamuo. Dagego dago God Genuai Bidigo te Isip tuni bidi hani we bidi dabe augwaligo tigide yali te sę bugagia ma koneiąo.
DEU 7:19 Dagego te Isip bulude suali, te haniani gasi koneiąo. Tama me dagego te Godigo yali te we bidi noma sabo sę, me te haniani genuai sę yali te koneiąwe. Tama dagego Godigo dage Isip bulude dobola sainogo yali te genuai bomo koneiąo. Tama tialima, Godigo dagego megi wi ebo te we bidi dabe dali me te deli tiwai sę naga yaibao. Tama agai augwali dolama, mu dola silaibao.
DEU 7:20 Tiali goli, augwali hani meba wi pelama, duala sigi pali da, teda Godigo te bidi tigide gąǫ kelebo te bunu dabe tagala palama, augwali dolomainu yaibao,” wali.
DEU 7:21 “Tama tialima, dage te bidi hanide wi elamo dao. Magi baso meni, God dago Genuai Bidi dage dali bidibao. Agai bomo genuai mu elalubao, tama tigidali bidi dabe augwali agade wi mu yao.
DEU 7:22 Dage pąba saboligi pabo si, agai te hani bidi dua dua sela sąbo sę iduaiba, te dage pąba saboligi pabo si. Tama dagego augwali polo dolobo usu me egobeo. Ma, dagego augwali polo doliyu da, teda bulu hasa dabe hauwa mu pedelama, tama augwaligo dage elaibao.
DEU 7:23 Genuai Bidigo dagego duga boi bidi dabe aiyaba elaluama, dolomainogo sula tagalaibao. Tama agai augwali wi mu ilama, tama dagego augwali ma siliboba usu naibao.
DEU 7:24 Tama agai augwaligo tuni bidi dabe dagego nogoba muaibao. Tama dagego augwali ela muaibao. Tama nosali te bidi dabego augwali me kone me egobeo, gegeda mu paibao. Tama dage paliabo bidi meni yaibao. Menio. Dagego augwali sese ela isila silaibao.
DEU 7:25 Dagego augwaligo tibo god dabe sese tama isi ula silao. Tama me dagego augwaligo te augwa te tibo god au ilali gol me silva, te nai dabe godolo me elamuo. Dagego te nai dabe me selamuo. Magi baso menio, Genuai Bidigo te tibo god dabede dwai homu mu ebo dao. Tiyu, dagego sai madi dagego Genuai Bidiba lotu po wabo kolesaga tagalamu dao.
DEU 7:26 Dagego te tibo god dagego be tomoba me seselamuo. Godigo te po wali, te nai dabe dolaibao wali, tama dagego me sali dage me dolaibao wali. Te tibo god dabe te dwai nai mu dao. Tama tialima, dagego augwaliba tudi mu ola mao,” Mosesgo te po wai.
DEU 8:1 Tama Mosesgo te po wali, “Dagego megi eno dagebolo mawainogo ebo te bomai po wiegila wali piąo. Tama tiyu da, dage bugagia bidiyu, tama dagego Genuai Bidigo dagego wąįbolo mawaibao olama dąų walali te tǫ sigi paibao. Tama dage tede hauwa mu pedalaibao.
DEU 8:2 Dagego bugagia mu kone paliąo, God dago Genuai Bidi aga polasa peyu, tama agai dage te bobobage sunumidu asali tau sai dao. Dage te nai meni yai kemi sane bulude dage te kibu be bidi sese si 40, te tama te bulude bilai dao. Tama Godigo haniani sęgę taga palai dao, te dage usu sela suyu, te dagego te tigidali bomai po wali pogowe ma meniwe elama suainogo tiai dao.
DEU 8:3 Te dage hagoma homu idali, agai dage nasi ilai dao, tama nosali agai dage te mana mawai dao, te dagego tumainogo. Te nai dagego me duga wąį dabego te tobage nai polobadu augwaligo me tuai menio. Agai te tama tiali da, te bidi dago konemainogo te yali dao, te bidi da te tubo naigo naga da bidibo ula sogobe da weyu, te yali dao. Menio. Dago Godigo po deli naga wali peyu da, teda da bidibo ula saibao.
DEU 8:4 Te 40 kibu bede dagego ugwa dabe me pisila pai menio. Tama me dagego sągą dabe me, me bǫ dai menio. Meni, te bugagia naga tama bidali.
DEU 8:5 Tialima, dagego koneao, te aya mego aga wai elama dodolainogo elebo tiwai elama, God dago Genuai Bidigo da te dodolali dao,” wali.
DEU 8:6 “Tama tialima, dagego Godigo dagebolo yao wali te sę dabe wali pelama yao. Tama me, dagego agai bomai po wali pelama, tama aga dologode naga elaluao.
DEU 8:7 Magi baso meni, God dago Genuai Bidigo dage te wiegi yai buluba te odasa pobao. Te bulude te genuai wę hauwa elaluyu, te ulu wę hauwa te ebao. Tama wę meba me te tǫ dologodu solama, tama te odogo bulude pedaliyu, meba te bulu dude pedaliyu ebo dao.
DEU 8:8 Te bulude te nai wit elaluyu, me bali, me wain ni du, me ni fik du, me pomigranet ni du, me ni oliv du, me pusai bunu ge te hani elaluyu ebo bulu dao.
DEU 8:9 Tama te tǫde dage nasi me elama, tama dage magi nai me sǫą pogobeo. Tama me te bulu masigi te ain elalubao. Me dagego te kapa dabe te bulu dude dabe gegeyu digagameo.
DEU 8:10 Tama me dagego tuabo homu ebo nai dagego saibao. Tama dagego agabolo buba hwi po waiagameo, te agai te wiegi yai bulu dagebolo manide,” te po wai.
DEU 8:11 Mosesgo po geninama weyu, te po wali, “Dagego bugagia tonaluiąwe, tiyu dagego God dago Genuai Bidi gegeda pidali weyu. Tiyu dagego Genuai Bidigo haniani bomai po eno dage megi mabo, te bomai po gegeda pidalio.
DEU 8:12 Ma, dagego te tubo nai dabe hauwa eyu, me dagego wiegi yai be dabe sę eyu ebode,
DEU 8:13 me kau kibu hauwa elaluyu, me sipsip kibu hauwa elalu ebode, me gol me silva, me te wiegi yai nai hauwa elaluyu ebode,
DEU 8:14 teda dage dila pelama, tama hagoma homu elama, tama God dago Genuai Bidi gegeda pelamuo. Agai dage Isip bulude oda sai dao, te dage te olo sę ebo bidi bididuali pesagede.
DEU 8:15 Tama aga digi aga te nai meni yai kemi sane bulude aga polasa dage nosaliba ilama, polasa pai dao, te dwai gula mane elaluyu, me te bidi gąǫ kelebo hwą dwai elaluyu ebo bulude tiai dao. Tama te bulude te mu wa pai me elaluyu ebo digi, agai te wę me te genuai dila pai masigi delide pedelemainogo elama ebode dagego te ąį tuai dao.
DEU 8:16 Tama me te bulude agai dage mana mawai dao, dage tumainogo. Te da, te gasa nai me deli dagego wąį dabego polobadu me tusiąma yai nai dao. Tama agai sęgę dabe tagala palai dao, te dage usu siyu. Tama tialima, agai wiegi yai sę dageba nosali pedalomainogo tama yai dao.
DEU 8:17 Tama tialima, dage homugo te wiegi yai nai dabe dena nogogo te nigilali dao, te homu me elamuo. Menio.
DEU 8:18 God dago Genuai Bidigo dage te nai dabe hauwa somainogo te bomo mabo dao. Dagego te sę me gegeda pelamo dao. Agai te tama tibo da, magi baso meni, agai dagego wąį dali te dąų wali te po wali peyu, tama tibo dao.
DEU 8:19 Dagego God dago Genuai Bidi me gegeda pelamuo. Tama dagego tibo god dabe wali pelama, tama augwaliba lotu po me olamuo. Megi eno haninama dagebolo bomona te walibao, ma dagego te po sela sąyani da, teda mu tama o, Godigo dage mu tama dolaibao.
DEU 8:20 Genuai Bidigo dagego pabo sunumidu elalubo te bulu dabe dolai dao. Tiali goli, dagego agai po wali pisąma yali da, teda dage me te deli tiwai dene naga saibao,” Mosesgo te po wai.
DEU 9:1 Mosesgo te po wali, “Israel dabe, dagego odao. Tamadi tama, dage te Jordan wę nogelama, tama dagego te genuai hani bidigo tǫ sigi paibao. Augwaligo bomogo da, dagego bomo edelama elalubao. Augwaligo hanu genuai hauwa mu elaluyu, me augwaligo hanu masigigo nigai obo te ugwanu mu holama, te dagaluba usu nigi pai elalubao.
DEU 9:2 Te bomai we bidi augwali bobobage dili elalubao, tama augwali genuai we bidi mu dao, tama dage polo odai dao, te bidi mego augwali dali hwįbode elaluabo bidi deli me menio.
DEU 9:3 Tiali goli, dagego megi bugagia mu koneagameo, God, dago Genuai Bidi, aga bolo polasa paibao, te isi hobolu tiwai elama polasa paibao, te dage tudiba togolama. Te dage pabo sogo agai augwaligo bomo aiyaba elaluaibao. Te dagego augwali dali hwįnama, tama augwali aiyaba elaluama, tama polo sela sąwaibao, te agai polo dąų walali gilama,” Mosesgo te po wai.
DEU 9:4 “Te God dago Genuai Bidigo augwali polo sela sąbo side, tiyu duga hasi duga digi te po olamuo, ‘Godigo da te tǫ mani, magi baso meni, agai da suali, da te wiegi yai doloba pai bidi tiwai suali.’ Te tobage homu ebo te mu po menio. Genuai Bidigo suali, megi te tǫde bidibo we bidigo augwaligo dwai kolesaga hauwa mu ebo, tama tibaso agai augwali tede sela sąwaibao.
DEU 9:5 Dagego homugo tilamuo, dago wiegi yai doloba pai kolesaga ebo dao homu elamuo, tama te tama tibo pagede Genuai Bidigo dago te tǫ somainogo sula tagalali dao homu elamo dao. Menio. Agai augwali sela sąwaibao, magi baso meni, augwali te dwai bidi dabe dao. Me ma, agai te wąį dabe dali dąų wali po usu nainogo te ebao, te dago wąį Abraham, me Aisak, me Jekop dali.
DEU 9:6 Mu tama, te tǫ ili hauwa elalubo tǫ dao. Tiali goli, Genuai Bidigo te tǫ dagego wiegi yai doloba pai kolesaga ebaso dagebolo me mabeo. Menio. Dage te po odisąwai hagoma ebo homu ebo we bidi naga dao,” wali.
DEU 9:7 “Dage te nai meni yai kemi sane bulude bidali te gegeda pelamuo. Te dage tede bidiyu, dagego Genuai Bidi sębę ilali, te gegeda pelamuo. Dagego te Isip taga solama, megi e bulu bidibode dagego Genuai Bidigo po sela sąyu idu geai dao.
DEU 9:8 Tama me, te Sainai bulu dude dagego Genuai Bidi sębę dwai mu ilama, tama dage pąde dolainogo yai dao.
DEU 9:9 Ena te bulu duba holama, tama te masigi si sigi painogo pai dao, te masigi pedai side agai dage dali dąų walali te po asęai dao. Ena te giligade me hulide te bidi sese si 40 bubugade tede bidai dao, tama eno nai me tuyu, wę me tuyu me yai menio.
DEU 9:10 Tialima, Genuai Bidigo enabolo te masigi pedai si mani, te masigi pedai side agai dagebolo mani te bomai po tede aga nogogo digi asęani, te dage te bulu du pagede bidiyu, aga te isi tomode bidiyu yali sogo,” wali.
DEU 9:11 “Ena te bulu dude te bidi sese si 40 dei bidai dao. Tama Godigo enabolo agai te dąų wali po asęani te masigi mawai dao.
DEU 9:12 Tama agai enabolo te po walali, ‘Nage te bulu du tagalama, tama nage aiyaba polo dulao. Magi baso meni, te we bidi nago te Isipde odasa asali, te we bidi augwaligo dwai dwai kolesaga hauwa mu ebao,’ te po wali. ‘Polo tama augwaligo eno bomai po togolama, tama augwaligo tibo god me geselalio,’ wali.”
DEU 9:13 “Tama Genuai Bidigo enabolo po geninama weyu, te po wali, ‘Eno polo koneanio, te we bidi augwali tobolu mu gagea pabo o.
DEU 9:14 Tama tialima, eno augwali sese mu tama dola silaibao, tama bidi mebago augwali me konegobeo. Nago ena me togolamuo. Eno te tama tilama, tama nage nosali moni genuai bomai hanigo aya nigilaibao, te dwai we bidi dabe edelama ilaibao,’ Genuai Bidigo enabolo te po wai.”
DEU 9:15 “Tialima, eno te Godigo dąų walali te po asęani te masigi pedai si selama, tama ena te bulu dude ena aiyaba dulai dao. Tama te sogo genuai isi bogoli te bulu dude dai dao. Tama agai bogoli ugwaba mu holai dao.
DEU 9:16 Ena aiyaba polo dulama, suali da, dagego te bomai po mu tama bolama, tama God dago Genuai Bidiba tudi ola mawai suai dao. Tama dagego tibo godigo piksa kau kibu noma te golgo nigai dao. Tama te kolesagago dagego God bolo te sęgę sai dao.
DEU 9:17 Tama tialima, dagego gedude eno te masigi si tǫba sąnama, tama te masigi pedai si tama tomode si togwa pai dao.
DEU 9:18 Tama deli sogo ma deli ena Genuai Bidi pageba pelama, tama ena gesabidi tǫ aiyaba ilama, pila muani. Ena pila mudubadi, te giligade me hulide te bidi sese si 40 dei tama yali. Tama eno magi nai me wę me tuai menio. Eno te tama tiali, magi baso meni, dagego Genuai Bidigo gedude dwai kolesaga elama, agabolo sęgę selama, tama aga sębę ilai baso.
DEU 9:19 Genuai Bidigo dage dali sębę mu elama, tama agai dage mu tama silabo homu yali. Tama tibaso, ena wi mu genuai yali. Tiali goli, eno gedu haluasa po olama, tama Genuai Bidigo eno po ma odali.
DEU 9:20 Tama Genuai Bidigo Aron dali wado genuai mu yali, tama agai aga ela muainogo yali. Tama tibaso, eno Aron me dage tau somainogo gedu haluasa po wali.
DEU 9:21 Dagego te kau kibu wai geselama, tama dage sęgę sali. Tama tibaso, eno te kau kibu selama, tama eno isiba sąwani, tama eno tigidali miminama, tama tigidali tama hogomu tiwai gagawali, tama eno te hogomu te bulu dude gomo elalubo węba aiyaba gea palali,” Mosesgo te po wali.
DEU 9:22 “Tama me dage te bulu Masa, me te bulu nogi Isigo Dai wabo, te bulude, me te We Bidi Hasa Tuainogo Gela Hauwa Wali Te We Bidi Gų Page nogi wabo bulude me, dagego God dago Genuai Bidi sębę ilai dao. v
DEU 9:23 Me polobadu agai dagebolo te Kades Barneade agai dagebolo mawaibao wali te buluba bidigi piąo wai goli, dagego agai po sela sąwai dao. Tama dagego agai po mu dao olama, agai po wali me pai menio. Mu menio.
DEU 9:24 Te ena dage dali sę gagalama, dage dali megi bida bida asoboba tama, dagego God dali tobolu gagea pabo dao,” wali.
DEU 9:25 “Tama tialima, dage te bulu du sesegede bidibadi, ena te bulu duba holama, tama ena gesabidi tǫba ilama, tama ena bidi sese si 40 dei tama ena pila muai dao. Eno te tama tiali, magi baso meni, Genuai Bidigo dage sese tama dola silaibao obaso.
DEU 9:26 Tama eno gedu haluasa po weyu, te po wali, ‘God, Genuai Bidi, nago naga we bidi doligio,’ te po wali. ‘Naga digi nago te we bidi augwali nago genuai bomogo Isip bulude oda selama, odasa asai dao.
DEU 9:27 Nago Abraham, me Aisak, me Jekop, te bage koneao, naga sę bidi dabe. Tama nago te e we bidigo sęgę, me dwai kolesaga, me dwai augwaligo geda mubo kolesaga kone me igio, te sula tagalao.
DEU 9:28 Tiyu te Isip dabego nago te we bidi augwali te nago augwalibolo mawaibao te tǫba odasa pabo usu egobe po wabuo. Tama tiyu, agai aga we bidi te nai meni yai buluba ela isila silainogo odasa pali dao wabuo.
DEU 9:29 Hobede mu tama, Genuai Bidi, nago te we bidi naga we bidi mu dao olama, sa muai dao. Tama naga genuai bomogo augwali Isipde oda selama, odasa asai dao. Tama tialima, nago augwali doligio,’ eno te gedu haluasa po tama wali,” Mosesgo te po wai.
DEU 10:1 Mosesgo po geninama weyu, te po wali, “Tialima Genuai Bidigo enabolo te po wali, ‘Nagebolo eno hasia mani te masigi pedai tiwai si togwao. Tama ni name dabe dulama, tama halobage me deli geselao. Tama nago te masigi si enabolo ugwa bulu duba sesao.
DEU 10:2 Tama eno te masigi side ma asęaibao, te eno polobadu nago togwa sąyani te masigide asęani po ma te masigi side ma asęaibao. Eno asęna silibo si da, teda nago si tama te halobageba muagameo,’ wali.”
DEU 10:3 “Tialima, eno te halobage te ni akasgo geseliyu, me eno te masigi si togoyu te hasia masigi tiwai tama. Tama eno te masigi si tama bulu duba ugwaba sela pali.
DEU 10:4 Tama Genuai Bidigo te hasia asęani te po tiwai tama te masigi side ma asęani. Agai te nogo si bomai po asęani, te agai dagebolo dage bulu du pageba sisinama bidiyu, aga te isi tomode te bulu dude bidiyu yali sogo dagebolo te mani nogo si bomai po. Agai asęna silama, agai te masigi dage si enabolo mani.
DEU 10:5 Tama ena begelama, tama ena bulu dudu aiyaba asali. Tialima, eno te masigi si te Genuai Bidigo enabolo obaso te nigali te halobageba muani, te Genuai Bidigo enabolo wali gilama tiali. Tama te masigi si halobagede me munalubao,” wali.
DEU 10:6 (Nosali Israel dabe augwali te Jakan we bidi dabego ulu wę dabe tagalama, augwali bulu Moseraba pali. Tama Aron te bulude isibaso, augwaligo aga tede pubulali. Tama aga ogwa Eleasargo aga hasegelama, tama pris sę sali.
DEU 10:7 Augwali tede hogodama, augwali te bulu Gugodaba pali, tama nosali augwali bulu Jotbataba ma pali, te da te wę hauwa elalubo bulu dao.
DEU 10:8 Polobadu augwali Sainai bulu dude bidibadi, Godigo te Livai hanigo te Dąų Wali Bomai Po Halobage tolomainogo sa muai dao. Te bidi dabe augwaligo te pris sę tuyu, me te we bidibolo augwaligo God augwali dali wiegi yai sę yaibao po weyu yai dao. Tama augwaligo te sę ela asidubadi, megiba tama usu nubao.
DEU 10:9 Tama tialima, te Livaigo hanigo te meba Israel we bidi dabego yali gilama tǫ me sai menio. Wiegi yai nai augwaligo sali da te e dao, te augwali Genuai Bidigo pris bidi nigali. Te God dago Genuai Bidigo dąų polo wali po wali gilama tiali.)
DEU 10:10 Mosesgo te po wali, “Ena te bulu dude te bidi sese si 40 dei te giligade me hulide bidali, te eno hasia yali gilama tama tiali. Tama Genuai Bidigo eno gedu haluasa po wali ma odama, tama agai ao olama, tama agai dage dolobeo.
DEU 10:11 Nosali agai enabolo te po wali, ‘Nage te we bidi pageba pelama, tama nago augwali eno dagebolo mawaiba wali te tǫba sela pao, te augwaligo wąį dabebolo dage mawaibao wali te tǫ,’ wali.” Mosesgo te po wali.
DEU 10:12 Te Mosesgo po geninama weyu, te po wali, “Megi da, dage Israel dage bugagia odiąo, te God dago Genuai Bidigo te dagego yao wabo po odao. Dage tigidali sogo God dologode naga bidiąo, tama agai po tigidali wali piąo. Dagego aga godolo mu yao, tama dagego wiegi yai homu pemene dagego homude, me duga homu kolesagade eyu, tama agai sę iyąo. Te tebo yalawainu igimio, te dagego homugo sese tama te tobage kolesaga iyąo.
DEU 10:13 Tama megi dagego agai bomai po tigidali wali piąo, megi eno dagebolo mobao, te po. Dagego bugagia wali peyu da, teda dage bugagia mu bidaibao.
DEU 10:14 Dagalu ugwanu mu elalubao, te da te Godigo dao. Tama te tǫ, me te tǫde elalubo nai dabe sese tama, te Godigo naga dao.
DEU 10:15 Tiali goli, Genuai Bidigo dagego wąį dabe godolo mu yali, tama tiyu agai gasa hani me sa me mubeo. Menio. Agai dage naga aga we bidi naga bidimainogo sa muai dao. Tama megi me, dage agai we bidi te bidibao.
DEU 10:16 Tialima, dagego te tobolu gagea pabo kolesaga tagaliąo, tama agaba homu kęą peyu, Genuai Bidigo po bugagia wali piąo.
DEU 10:17 Magi baso meni, God dago Genuai Bidigo te tigidali te tibo god dabe me te tigidali bomo elalubo te tigidali nai dabego bomo edelai mu elalubo. Aga te genuai bomai mu dao, tama tiyu tigidali nai dabe aga dologode naga elaluao. Agai te po tų ebode te abagi si ebo kolesaga wali peyu, me te we bidigo agaba magi nai mayu, aga homu bea sabo homu ebo kolesaga emainogo sula tagalobo menio, te haniani sę ebo kolesagade.
DEU 10:18 Agai te bidi isai wilawe we dabe dali wiegi yai doloba pai kolesaga ebo dao, me te wai bǫų dabe augwa aya isai wai dabe me, augwali agai bugagia tonalubo dao. Agai gasa buludu asai we bidi da dali bidibo, te bage augwali nai dabe mayu, me augwali ugwa dabe mayu ebo dao.
DEU 10:19 Tama tialima, dagego me gasa we bidi digibulu we bidi dage tomode bidibo we bidi godolo iyąo. Magi baso meni, dage me te Isip bulude te gasa badu bulu we bidi tiwai bidai dao.
DEU 10:20 Dage tigidali sogo God dago Genuai Bidi dologode bidiąo, tama aga delide naga lotu weyu yao. Dagego agaba dąų ola selama, tama dagego tigidali po aga delide naga dąų waliyu yao.
DEU 10:21 Dagego agai nogi ugwaba siyu yao. Aga te dago God dao, tama agai dage tau sainogo te bidi wi ilabo bomai sę eyu, me gasa noma sabo bomo yai kolesaga me yali, te dage tau somainogo. Tama dagego duga gedugo digi te agai yali sę suai dao.
DEU 10:22 Dagego wąį dabe Isip buluba pali da, teda augwali 70 we bidi tama naga pai dao. Tiali goli, megi da, God dago Genuai Bidigo dage hauwa mu, te dagalude elalubo hǫ tiwai pedalomainogo ilali dao,” Mosesgo te po wai.
DEU 11:1 Mosesgo augwalibolo te po wali, “Dagego God dago Genuai Bidi godolo mu yao, tama agai haniani bomai po tigidali sogo wali piąo.
DEU 11:2 Dagego Genuai Bidigo da ola mayu, agai haniani bomai sę hauwa ebo dagego suai dao. Duga digi duga te sę dabe ebo suai dao, te dagego wai dabego menio. Menio. Dagego Godigo bomo suali, te genuai mu dao.
DEU 11:3 Tama dagego suali, Genuai Bidigo te we bidi noma sabo kolesaga me ebo suali. Tama me dagego te Isip tuni bidide me agai bulude yali, te kolesaga tigidali dagego suai dao.
DEU 11:4 Dagego suai dao, Genuai Bidigo te Isip ami bidi dabe augwa hos kibu me karis dabe sese tama ela silibo suai dao, te augwaligo dage pobeasa asali sogo. Agai te tamu wę Retsigo augwali mesega somainogo yai dao.
DEU 11:5 Duga digi duga polo koneai dao, te Genuai Bidigo dage tau sainogo yali sę dabe koneai dao, te nai meni yai kemi sane bulude, te dage megi da e bidibo buluba sabolisąma ebadi.
DEU 11:6 Tama me, dagego agai te Datan de Abiram side yali sę me koneai, te Eliapgo ogwa si, te Ruben hani bidigo ogwa si. Dage tigidaligo te tǫ peda pelama, tama te bidi si augwa we wai, me augwali sigo ugwa be, me augwa doado bage sese tama te tǫ dedageba tulalubo suai dao, tama te tǫgo augwali sese tama ma halua sabo suai dao. Te dagego wai dabe augwaligo te sę dabe suai meni. Menio.
DEU 11:7 Mu tama dao, duga digi Godigo te genuai sę dabe yali suai dao,” Mosesgo te po wali.
DEU 11:8 Te Mosesgo po geninama weyu, te po wali, “Dagego eno dagebolo megi mabo te bomai po tigidali mu tama wali piąo. Tama tiyu da, teda dage te ąį nogelama, u badu pelama, tama dagego megi sigi painogo ebo te tǫ sigi pabo usu yaibao.
DEU 11:9 Tama dage te wiegi yai tǫ ili hauwa elalubo, te tǫde dage bobobage sogo mu bidaibao. Te da, te Genuai Bidigo duga wąį nǫų dabebolo mawaibao olama po dąų wali te tǫ tama agai te tǫ dagebolo me mawaibao, dage da te bagego bulai wai dabe dao.
DEU 11:10 Te bulu dagego megi sainogo ebo, te bulu te Isip bulu tiwai menio. Te dage polobadu bidali te bulu tiwai menio. Menio. Te dagego Isip bulude te gide nai bulama, dagego giba wę tulama usabo bomai sę mu yai dao.
DEU 11:11 Tiali goli, te bulu dagego megi sigi painogo te eba te bulu da, te bulu du dabe elaluyu, me odogo bulu elaluyu yai digi, tama tulubage te giba dabe tuluyu ebo dao.
DEU 11:12 God dago Genuai Bidigo te tǫ tigidali polua me kibu bede bugagia tonalubo dao, sesemane sogo,” wali.
DEU 11:13 “Tama tibaso, dagego eno megi dagebolo e mabo te bomai po bugagia wali piąo. Dagego God dago Genuai Bidi godolo mu iyąo, tama dagego haligade, me homu kolesagade sese wiegi yai homu pemene mu agai sę eyu yao.
DEU 11:14 Tama dagego te tama tiyu da, teda agai tulubage te gi bugagia tau sabo sogo tulubage dagego giba dabe tagala palaibao. Tama tiyu, dagego nai dabe hauwa mu elaluyu, me wain dabe, me oliv wel dabe usu me elama, mu elaluaibao.
DEU 11:15 Tama dage nai me sǫą pogobe, me dagego kau kibu dabego tuabo nosai dabe hauwa mu elaluaibao,” wali.
DEU 11:16 “Dagego gasa hani bidi dabego dagego homu kolesaga dolomainogo sula tagaligimio. Tiyu, augwaligo dagego homu kolesaga dolai madi, dagego duga Genuai Bidi gegeda pelama, augwaligo tibo god dabeba lotu olama, tama te tibo godigo sę dabe eyu yabuo.
DEU 11:17 Tialima, dagego te kolesaga wali peyu da, teda Genuai Bidigo dage dali sębę yaibao. Tama agai tulubage paliama, tama tǫde wę meniama, tama nai dabe me hologobeo. Tama polo tama, dage te Genuai Bidigo dagebolo te wiegi yai tǫ bulu mawainogo ebo tǫde polo isaibao,” Mosesgo te po wali.
DEU 11:18 “Dagego homu kolesaga me, dagego homu me, te e bomai pogo pągąnama elaluao. Dagego te bomai po dabe asęnama, tama dagego nogode me gesabidide dagana kęyu yao, tama dagego augwali me gegeda pogobeo.
DEU 11:19 Tama dagego te bomai po duga wai dabebolo me ola maiąo. Tama dagego te bomai po tigidali miąo. Te dage duga bulude bidibo sogo, me digibulu bidiyu, me te sę ebo sogo, me olo toma tubo sogo, te bomai pode po miąo.
DEU 11:20 Dagego te bomai po duga be sunumide, me obo bogi pabo sunumide, te bomai po dabe asęiąo.
DEU 11:21 Tialima, dagego tama tiyu da, teda dage me duga wai dabe dage bobobage sogo mu God dago Genuai Bidigo dago wąįbolo mawaibao wali te tǫde dage bobobage sogo mu bidaibao. Dage te tǫ tigidali sogo bidaibao, te dagalu te tǫ ugwadu tigidali sogo elaluaibao tiwai tigidali sogo bidaibao,” wali.
DEU 11:22 “Dagego eno dagebolo obao te po tigidali wali piąo. Dagego God dago Genuai Bidi godolo mu iyąo, tama agai po tigidali bugagia wali piąo, tama dagego homugo agaba bugagia kęą peyu yao.
DEU 11:23 Tama tiyu da, agai te meba gasa bidi hani dage augwali pąba pabo si, augwali sela sąwaibao. Tama dage te genuai bomai we bidi hanigo tǫde dage bidaibao, te augwaligo bomo dagego bomo edelama elalubo bagego tǫde dage bidaibao.
DEU 11:24 Tama tigidali tǫ dage bilaiba tǫ, te tigidali tǫ duga tǫ gagawaibao. Dagego tǫ dąį te olo kemi sane bulu te saut badu gagalama, tama pelama, te Lebanon bulu duba usu nigi paibao, te not badu usu nigi paibao. Tama dąį te giliga asobo badu te wę Yufretisdu gagalama, tama pelama, te genuai tamu ąį Mediterenian te giliga dega sabo badu te usu nigi paibao.
DEU 11:25 Tama dagego sunumi togolabo bidi mu meni yaibao. Tama me dage tigidali e tǫ dage mena badu pabo si da, teda God dago Genuai Bidigo te we bidi dabe dwai wi mu ilaibao, te agai polobadu dąų walali gilama,” Mosesgo te po wai.
DEU 11:26 “Odią, eno dagebolo sunumi si ola mobao, te dagego me deli selama, wali pao. Te sunumi me deli da, te Godigo dage tau sabo sunumi dao, tama me sunumi da, te agai dage dolabo sunumi dao.
DEU 11:27 Ma, dagego God dago Genuai Bidigo bomai po wali peyu da, te eno dagebolo megi e mabo te po wali peyu da,
DEU 11:28 teda Godigo dage dali wiegi yai sę yaibao. Tiali goli, dagego Godigo po wali pabo sunumi dega muyu da, tama dagego tibo godiba lotu po wagi peyu da, te dagego polobadu lotu me wasiąma yali teba lotu obaso da, teda Godigo dage dolaibao.
DEU 11:29 Te Genuai Bidigo dage odasa agai dagebolo megi mawainogo ebo te tǫba odasa pabo si da, teda dage te bulu du Gerisim me bulu du Ebal teba piąo. Tama te bulu du Gerisimde dagego Genuai Bidigo dage dali yaibao wali te wiegi yai sę po dabe nogi iyąo. Tama te bulu du Ebalde da, dagego te Godigo dage dali dwai sę yainogo yali te sę dabe po nogi iyąo.
DEU 11:30 Te bulu du si te Jordan wę giliga dega sabo badu te elalubao, te Kenan dabego tǫ, te Jordan wę odogo malude. Te bulu du si te giliga dega sabo badu elalubo, tama te tedali gasagi yai te ni sili pąde, te More bulude, te Gilgal hanu pąde.
DEU 11:31 Tamadi tama, dagego Jordan wę nogelama, tama God dago Genuai Bidigo dabolo mawaibao wali te tǫba bidigi paibao. Dagego polo selama, tama dage teba bidigi peyu da,
DEU 11:32 teda dagego bugagia koneama, tama dagego eno dagebolo megi mabo te bomai po bugagia wali piąo,” Mosesgo te po wali.
DEU 12:1 Tama Mosesgo po geninama weyu, te po wali, “Te e bomai po bugagia mu odiąo. Genuai Bidi, dagego wąįgo God, aga te u badu tǫ dagebolo mawaibao wali, te tǫ dagego mu somainogo yali. Tama tialima, dage te tǫba bidigi pelama, tama tede bidada peyu, bidada pidubadi, dagego te bomai po dabe bugagia dolo naga wali mu piąo.
DEU 12:2 Tama dage te bulu dabe polo sabo si da, dagego te we bidigo tibo godiba lotu wabo pesage dolama, mu silao. Te bulu dabe te genuai bulu dude, me dwasianu bulu dude te elalubao, me te moni genuai ni silide te elalubao.
DEU 12:3 Augwaligo te lotu wabo alta me, te masigi pos dabe me dolama, tagalao. Tama dagego te we god Asera augwaligo nigo nigali te piksa me tama sigi hwą selama, te tibo godigo piksa dabe togolama, tagalao, te augwaligo nigali te tibo god piksa. Tama tiyu da, augwali teba pelama, lotu po ma wagi pidali weyu,” wali.
DEU 12:4 “Dagego dago Genuai Bidi dago Godiba lotu po wabo sogo, dagego te tibo godiba lotu po wabo bidi dabego ebo kolesaga elamo dao.
DEU 12:5 Genuai Bidigo dage lotu po wabo pesage me deli dage hanigo tǫde sa muaibao. Tama te pesagede naga te we bidi augwali pąba aselama, tama augwali agaba lotu po omainao.
DEU 12:6 Tama te pesagede dagego te duga te haniani ofa iyąo. Te da, te isigo sese dela silibo te ofa, me te gasa meba ofa dabe tama yao. Tama dagego te nai dabe sese nogo si dobola silama, tama nogo si olama, deli Godibolo mao. Dagego te nai bugwai me deli te lotu wabo pesageba sesao. Tama me dagego meba gasa nai dabe Genuai Bidibolo mawainogo ebo, te nai dabe me seselama, tama me dagego dąų wali te poba usu nabo te ofa yabo nai dabe, me te duga homugo maiabo homu ebo, te ofa yabo nai, me te kau kibugo hasia ame nani te kibu gǫų dabe me, te tigidali tama seselama, ofa igi pao.
DEU 12:7 Te pesage da, te God dago Genuai Bidigo gedude, te dage me duga we wai dagego tuyu, me dage wiegi yai homu pemene yabo madi da, magi baso meni, te Genuai Bidigo dagebolo bomo mayu, tama tigidali dagego yali sę te wiegi yai pedelai baso, tama tiagameo,” wali.
DEU 12:8 “Tama dagego te lotu wabo pesage deli nigilama da, teda dagego duga digi duga homugo subigila lotu po waba, te kolesaga me elamuo, te dagego megi ebo gilama.
DEU 12:9 Magi baso meni, dage Genuai Bidigo dagebolo mawainogo ebo te tǫba dage me sabalobeo. Dage te bulude bugagia bidama, tama te bulude bugagia toma tuyu bidagameo.
DEU 12:10 Dage te Jordan wę nogebo si da, teda Genuai Bidigo dagebolo te tǫ mawaibao, tama dage te tǫde bidimainu yaibao. Agai dage bugagia tonaluyu, tama te boi bidi dabe dage pąba me asogobeo. Tama tiyu, dage homu nagame elama bidiagameo.
DEU 12:11 Genuai Bidigo agaba lotu wabo pesage deli aga sa muaibao. Tama te pesagede da, dagego eno megi dagebolo wali te nai dabe sesiąo. Tama te ofa da, te isigo sese dela silibo ofa, me te meba ofa dabe me, te tigidali nai bugwai me badu te ofa me, te me gasa nai dabe dagego Genuai Bidibolo mawainogo yali, te ofa me te wiegi wiegi yai nai dabe te dąų wali te po usu nabo, te nai dabe tama sesao, te eno hasia polo wali.
DEU 12:12 Tialima, dage, me duga wai dabe, me duga sę ebo we bidi, me te Livai dabe te dagego hanude bidibo, te bage dage sese tama Genuai Bidi pageba pelama, tama agaba wiegi yai homu pemene mu igi piąo. Dagego Livai dabe bugagia mu koneawe, magi baso meni, augwaligo tǫ mu menio.
DEU 12:13 Dagego duga homu kolesagago niga selama, tama ofa subigilama olo madi tede ela biligimio.
DEU 12:14 Dagego ofa te Genuai Bidigo dage hani mego pesagede te sa mubo, te pesage delide naga dagego ofa eyu yao. Te pesage delide naga dagego te isigo dela silibo ofa eyu, me te gasa meba ofa dabe eno dagebolo polo wali, te ofa dabe tama iyąo,” wali.
DEU 12:15 “Tiali goli, dage bidibo pesagede dabe da, te hasa dabe ela tubo da habu me selebeo. Te tigidali nai dabe Genuai Bidigo dagebolo mani, te nai dabe da, dagego tuabo nai dabe naga dao. Dage sesego tama tuiąo. Te dage Godigo gedude wiegi yai bidi me, o te Godigo gedude meda yai bidi dabe, dagego mu tuiagameo. Dagego te olo pesage dabede tuiagameo, te dagego olo bulu hasa dabe tubo yali gilama tuiąo.
DEU 12:16 Tiali goli, dagego augwaligo kaneme tulamo dao. Mu menio. Dagego tǫba olo wę yali gilama, olo tǫba gea palao.
DEU 12:17 Dagego te nai dabe da tuiagameo. Tiali goli, dagego Genuai Bidigo ofa duga bulude tulamuo. Te ofa nai dabe da e dao. Te nogo si wabo te wit dabe, me te wain, me oliv wel, me te kau kibugo gomunai wai, me sipsip kibugo gomunai wai, me te dagego Genuai Bidi dali dąų wali po usu nabo, te nai dabe me te duga homugo mabo, te ofa me te gasa meba ofa dabe.
DEU 12:18 Dage me duga wai puluba, me duga sę ebo we bidi dabe, me te Livai dabe dagego hanude bidibo, te bagego dage dali te ofa tuiagameo. Tiali goli, dagego te ofa te God dago Genuai Bidigo bulude tuiagameo. Te pesage delide naga Genuai Bidigo te lotu po wabo pesage magi ilaibao. Dagego te pesagede tuyu, tama dage duga te wiegi yai nai dabe bomai sę elama, nigilalide wiegi yai homu tede iyąo.
DEU 12:19 Tama tigidali sogo dage te tǫde bidiyu da, dagego te Livai dabe tau sabo gegeda pelamuo,” wali.
DEU 12:20 “Nosali Genuai Bidigo dagego bulu genuai mu igi pabo si da, te agai te po polo dąų walali gilama ebo si da, teda duga homugo mena sogo duga hasa dabe tuabo homu ebaso da, tuiagameo.
DEU 12:21 Tialima, te lotu wabo pesage digibulu mu yaibaso da, teda dagego eno wali po sao. Dagego te kau kibu o sipsip kibu elao, tama dagego te hasa dabe duga bulude tuiąo, te Genuai Bidigo mani, te nai dabe. Dagego te sę tigidali sogo dagego godolo ebo sogo tama tiao.
DEU 12:22 Te Godigo gedude wiegi yai bidi me o te Godigo gedude meda yai bidigo me te hasa dabe tuiagameo. Te augwa te bulu hasa dabe tubo gilama tama tuagameo.
DEU 12:23 Tiali goli, dage te hasa dabe augwa kaneme dali dagego tulamo dao. Magi baso meni, kaneme da, te tigidali bidibo nai dabego bomo mabo page nai dao, tama dagego te bidibo ula mabo nai te kaneme tugio.
DEU 12:24 Dagego te hasa dabego kaneme tugimio. Menio. Dagego te tǫba olo wę gea palobo tiwai tama tǫba gea palao.
DEU 12:25 Tialima, dagego te hasa dabego kaneme tusiąma ebaso da, teda Genuai Bidigo dagego kolesaga godolo yaibao. Tama agai dagego sę dabe me agai wiegi yai pedalomainogo yaibao.
DEU 12:26 Tiali goli, dagego te ofa me aga dali dąų walali te po usu nabo te ofa dabe te Genuai Bidi agai te sa muabo te pesageba pelama, tama te ofa lotu wabo sa muabo te pesage deliba naga sela piąo.
DEU 12:27 Tama te pesagede dagego te isigo sese dela silibo ofa me uluyu, me te mi, me te kaneme sese tama Genuai Bidigo alta saide ulao. Tama meba ofa dabe dagego kaneme dabe sese alta bogo baduba gelama, tama te mi dabe da, dagego tuiagameo.
DEU 12:28 Dagego eno te mani te bomai po tigidali bugagia wali peyu da, tama Genuai Bidigo dagego me duga waigo wai dabego sę dabe sese tama tigidali sogo wiegila mu pedalomainogo yaibao. Magi baso meni. Dagego Godigo gedude wiegi yai doloba pai kolesaga naga yaiba weyu, te God dago Genuai Bidigo gedude,” Mosesgo te po wali.
DEU 12:29 Tama Mosesgo po geninama weyu, te po wali, “Genuai Bidi, dago God, agai te tigidali we bidi hani sese tama dage augwaligo buluba pabo si, augwali sese tama dola silaibao. Tama dagego te tǫ selama, tama tede bidiagameo.
DEU 12:30 Te Godigo augwali dola silibo si da, teda dage bugagia dua dao, tama augwaligo lotu wabo kolesagade habu selama, tama augwaligo lotu wabo kolesaga wali pelamuo. Tiyu dage augwaligo kolesaga wali peyu da, teda dage isaibao. Tiyu dagego te po wabo, ‘Te bulu badu olo bidibo bagego lotu po mena tama wabowe’ wabo. ‘Teda dago me te tobage kolesaga elama, lotu po waina,’ te po wabuo.
DEU 12:31 Te dage Genuai Bidi dago God agaba lotu po wabo sogo da, dagego te Godigo po odisąbo bulu badu bage augwa lotu weyu ebo kolesaga me elamuo. Menio. Te bage augwali lotu po augwa te tibo godiba lotu weyu da, augwaligo te Godigo godolo isąwai haniani dwai sę ebo dao. Augwaligo te e tama me tibo dao, augwaligo augwa wai bǫų dabe meba elama, tama te alta saide te ofa ulubo dao,” Mosesgo te po wai.
DEU 12:32 “Dagego eno dagebolo walali te sę dabe naga eyu yao. Te gasa bomai po ugwadu ma daganebo, me te bomai po me deli sela sąbo tagalao, te habu mu dao,” Mosesgo te po wai.
DEU 13:1 “Ma, te profet bidi o te na yai po haninibo bidigo dage kegasa, dage te tibo god dagego polobadu lotu me wasiąma yai, te lotuba odasa painogo ebaso, me agai haniani bomo yai sę dagego sulama, homu begelama, mu dao omainogo ebaso, ma agai po mu dao omainogo te sę dabe ebaso da, teda dagego te po munu me odamuo. Agai pogo obadi, te haniani sę te tiwai mu pedaluali goli, tagalao.
DEU 13:3 Dagego agai po me odamuo. Dago God Genuai Bidigo dage agai pode tulalubowe olama usu somainogo tiaibao. Dagego dago Genuai Bidi dagego homudu, me dagego kolesagadu sese tama aga mu godolo ebowe weyu, ma meniwe olama, tama tiaibao.
DEU 13:4 Dage Genuai Bidi dologode naga elaluyu, aga wali naga piąo. Tama dagego agai po odama, tama agai bomai po tigidali wali piąo, tama aga deliba naga lotu weyu, tama aga dąų olama tola sao.
DEU 13:5 Tiali goli, dagego te profet bidi o te na yali po page pusubo bidi ela muiąo. Ma, augwaligo dagebolo Godigo po sela sąyao obaso da. Dagego God aga dage Isip bulu olo sę ebo kalabus bidi tiwai bidibadi odasa sali, te konea. Te tama bidi hani dabego dage te Genuai Bidigo dagebolo te wali pao wali te sunumi taga pelama, digibulu pomainogo kegebo bage dao. Tama dagego te tama bidi dabe elama, isilao. Tama tiyu da, dagego te dwai kolesaga silaibao,” Mosesgo te po wali.
DEU 13:6 “Tialima, te bidi o we, te dagego ama, o duga ogwa, o duga wegi, o duga we me, te dagego godolo mu ebo we me, o duga abagi mugo me, agai geme mu tama dagebolo tibo godiba lotu po wao po obaso da, teda dagego agai po me odamuo. Magi baso meni, dage me duga wąį dagego te tibo godiba polobadu lotu po me wai menio.
DEU 13:7 Te tigidali e tǫde we bidi tigidaligo te tibo godiba lotu po wabo dao. Te augwali dage pąde bidibo bage me, o te digibulu bidibo bage me, tagalao.
DEU 13:8 Tialima, te we o bidigo dage te tibo godiba lotu omainogo kegebaso da, teda dagego agai ili po wabo odogio. Dagego agai po sela sąyao. Tama dagego aga hobede dwasianu me elamuo, o dagego aga tau me selamuo. Menio.
DEU 13:9 Dagego aga ela muao. Te wego o bidigo dage kegainogo ili po waibaso da, teda duga bolo hasia te we o bidiba masigi sąyao. Tama nosali meba gasa we bidigo masigi sąyao.
DEU 13:10 Masigi sąnama, aga elama, isilao. Agai dage God dago Genuai Bidi pąde tagalama, digibulu mu pomainogo ili po olama, te kegeyu, te yali dao. Dagego kone palao, God aga digi dage Isip bulude olo sę ebo bidi bidibaso, oda sai dao.
DEU 13:11 Dagego te we o bidi mu tama ela muiąo. Teda te Israel we bidi sesego te tama tiali po odama, tama augwaligo bugagia tonaluama, tama augwali wi elama, tama augwaligo te tobage dwai kolesaga me ma egobeo,” wali.
DEU 13:12 “Dage te Genuai Bidi dago God agai dagebolo mawainogo ebo te hanuba bidigi pelama, tama dagego po me deli e tama wabo odoyu da,
DEU 13:13 te dage tomode te dwai bidi dabe meba augwa hanude bidalubo we bidi dabe homu kolesaga dolama, tama augwali te tibo god augwali polobadu lotu wasiąwai, te godiba lotu wabao po wabo odoyu da,
DEU 13:14 teda dagego te tama po sabi odobaso da, teda dagego po page bugagia bolo gegela suao. Tama augwaligo te dwai kolesaga mu tama yaibaso da,
DEU 13:15 teda te hanude we bidi augwa kau kibu dabe dali sese tama ela silao. Te hanu mu tama dolama, tagalao.
DEU 13:16 Tama dagego te we bidi dabe doado bage dabe sese selama, tama hanu tomoba sisinao. Tama dagego te hanu, me te bagego hanude elaluali nai dabe sese tama isi ulao. Te da, te dago Godigo ofa tiwai ulao. Tama te hanu da, te dolai tama elaluaibao. Tama te hanu munu me ma nigigobeo, te habu mu dao.
DEU 13:17 Dagego te hanude nai deli me selamo dao. Te isigo sese dela silimainogo sula tagalao. Tama tiyu da, Genuai Bidigo sębę tagalama, dage hobede yaibao. Tama agai dage hani genuai mu pedalomainogo yaibao, te agai dagego wąį dabe dali polobadu po dąų walali gilama tiaibao.
DEU 13:18 Agai te tama tiaibao, magi baso meni, te dagego agai tigidali bomai po wali pali da, te eno megi dagebolo mani, te po. Tama me dagego agai godolo ebo sę naga eyu yali dao,” Mosesgo te po wai.
DEU 14:1 Mosesgo po geninama weyu, te po wali, “Dage da, te Genuai Bidi dago God agai wai puluba dao. Tialima, dage te isai bidide gela weyu da, te usu dao. Tiali goli, dagego duga tigi wali me togoyu, o duga tobolu nisi gebo badu me poayu me igio. Teda te wani yaibao, te Godigo po wali pisąbo bagego ebo gilama yaibao.
DEU 14:2 Dage Genuai Bidi dago Godigo tedali gasagi yai we bidi dao. Magi baso meni, agai dage tigidali tǫde we bidi tomode selama, tama dage aga we bidi bidimainogo dage sa muai dao. Dage da, agai dila pai wiegi yai nai tiwai elalubao,” wali.
DEU 14:3 Tama Mosesgo po ma wadoliyu, te po wali, “Dagego te hasa dabe te dwai nai dao olama habu selali, te hasa dabe tulamo dao.
DEU 14:4 Dagego kau kibu, me sipsip kibu, me meme kibu mi,
DEU 14:5 me bulu hasa dia, me bulu kibu sipsip, me bulu kibu meme, te dagego tuiagameo, me bulu hasa dabe te bulu dude bidibo, te hasa dabe tuiagameo.
DEU 14:6 Augwaligo nogo sągą tomode si peda pelama, tama augwali kau kibugo yali gilama augwali nosai tubo dao.
DEU 14:7 Tiali goli, te hasa dabe augwaligo nosai te bulmakaugo tiwai tusiąma, tama nogo sągą dani peda pisąma ebaso da, teda dagego tubo habu mu dao. Dagego te kamel, me rabit, me gesia te masigi bulude bidibo, te hasa tubo habu mu dao. Augwali te kau kibu yaligia te nosai dabe tuyu ebo dao, tiali goli agai nogo sągą dani te tomode si peda pabeo. Tama tibaso, dagego koneao, te tama tiwai hasa dabe te Godigo gedude meda yai dao homu yao.
DEU 14:8 Dagego kibu tugio. Augwaligo kau kibugo yaligiama sągą ogo dani elalubadi goli, augwaligo nosai te bulmakaugo tiwai tubo menio. Tama tibaso, dagego koneiąo, te tama tiwai nai dabe te Godigo gedude meda yai dao. Dagego te hasa dabe tubo habu dao, tama augwali isai digi dagego nogo tubo me habu dao,” Mosesgo te po wai.
DEU 14:9 “Dagego te sųgų dabe te bogo elaluyu, tigide abolo elaluyu ebo, te sųgų dabe tuyu yagameo.
DEU 14:10 Tiali goli, te węde bidibo nai dabe te bogo meni eyu, abolo meni eyu yai, te nai dabe da me tulamuo. Dagego te homu yao, te sųgų nai dabe te Godigo gedude meda yai nai dao, te homu yao,” wali.
DEU 14:11 “Dagego Godigo gedude wiegi yai ba naga tuao.
DEU 14:12 Tiali goli, dagego te tigidali hani genuai me dwasianu kemodage, me hulide bilibo uni, me kugidi, me te toli, me te nambisde ba kanai, me te bobobage dogoni yai ba, me te ba augwaligo hupou nogi wabo, me te pato, me augwaligo komoran wabo, te pato, me hulide bilibo bogwą, dagego tugio,” wali.
DEU 14:19 “Te Godigo gedude bogo yai te pa dabe te meda yai dao. Tama tibaso, dagego tulamo dao.
DEU 14:20 Tiali goli, dagego Godigo gedude wiegi yai te pa o mano dabe tuiagameo.”
DEU 14:21 “Dagego te hasa dabe olo dali isai tulamo dao. Te gasa bulu bidi dagego bulude bidiba, te bidi dabego te hasa tumainogo tagalao, ma augwaligo dageba abelemainogo yao. Tiali goli, dage da, te God Genuai Bidigo we bidi dao. Dage aga tedali gasagi yai hani we bidi mu dao,” wali. “Dagego te meme kibu so me deligo ame pę te senede tabilama, tama te meme so kibugo digi gǫų tede ma ulamo dao,” wali.
DEU 14:22 Mosesgo te po wali, “Dagego tigidali nai dabe dagego tigidali sogo kibu bede duga gide siyu eba, dagego nogo si pesage holama, tama dagego pesage deli muao.
DEU 14:23 Nosali dagego te nai dabe te Genuai Bidigo lotu wabo pesage deli sa muaibao, te pesageba sela pao. Tama te pesagede Genuai Bidigo gedude dagego te nai dabe te wit, me wain dabe, me ni oliv wel me dagego te nai pesage deli te sesali te nai tula siliąo. Tama me ma, dagego te kau kibu me sipsip kibu dabego gomunai wai dabe tede elama tuiąo, te lotu wabo pesagede. Dagego te tama tiyu da, teda dagego tigidali sogo God dologode naga bidibo kolesaga elaluaibao, te God dago Genuai Bidi.
DEU 14:24 Ma, dage digibulu mu bidiyu da, teda dagego te wiegi yai nai dagego me selama, tama dagego te Godigo lotu wabo pesage sa muani teba seseyu usu sąbaso,
DEU 14:25 teda dagego te olo bidi dabego te nai dabe abelemainogo sula tagalao. Tama nosali te mone te sa muani lotu wabo pesage deliba selasa pao.
DEU 14:26 Tama monego dagego te godolo ebo nai sese tama abelagameo. Te kau kibu me te sipsip kibu dabe tama abeliąo, me te wain, me bia tiwai nai abeliąo. Tama te lotu wabo pesagede te Genuai Bidigo gedude dagego me, duga wai puluba, dagego te nai dabe tulama, tama wiegi yai homu pemene mu iyąo.”
DEU 14:27 “Tiali goli, dagego te Livai dabe dagego hanude bidibo bage me gegeda pelamuo. Augwaligo dagego hanude augwaligo tǫ menio. Augwaligo tǫ me, be me, te meba nai dabe te augwa mu menio.
DEU 14:28 Te tigidali kibu be sela ebo sogo, dagego te bugulali muani tubo nai dabe sese sela pelama, tama te bakstuaba muagasao, te duga hanu dabede tama tiao.
DEU 14:29 Te nai dabe te Livai dabego nai dao. Magi baso meni, te bage augwaligo augwa tǫ me, be me menio. Tama me ma, te digibulu asama bidagasai bidi, me te tiana wai, me wilawe we dabe me, augwali dagego hanude te bidibao. Te we bidi augwali augwa homugo aselama, te muani nai sagasiyu emainao. Dagego te tama tiyu da, teda Genuai Bidi dago God aga dagego tigidali sę dabe wiegi yai mu ilaibao,” Mosesgo te po wai.
DEU 15:1 Tama Mosesgo po geninama weyu, te po wali, “Te tigidali kibu be namba 7 wabode, te kibu be silibo si, dagego te bidi dabego dage negeli ilali te negeli wei ponao homu ebo tagalama, te negeli sela sąyu, isiliyu yao.
DEU 15:2 Dagego te tama tiao. Bidi mego aga abagi mone mawai baso me, te bidi aga abagigo negeli sela sąnama isilao. Tama aga abagibolo wei ponao po wagio. Magi baso meni, Genuai Bidi agai digi te abagigo negeli yali sela sąyu silabo sogo te pedelai dao, te kibu bede.
DEU 15:3 Ma, te Israel hani isąwai gasa bulu bidigo dage dali negeli yai baso da, teda dagego agabolo negeli yali we ponao po wagameo, te usu dao. Tiali goli, duga abagi solo, te Israel hani bage, augwali dali negeli yali da, wei ponao po wagio. Menio. Te negeli sela sąyao.
DEU 15:4 Te dagego Genuai Bidigo po eno dagebolo megi mabo te bomai po wali bugagia peyu, agai po odiyu yali da, teda Genuai Bidi dago God agai dagebolo mawainogo ebo te bulude dage dali wiegi yai sę yaibao. Tama tibaso, te dage hani bidi me deli nai me habuge me elamuo.
DEU 15:6 Magi baso meni, Genuai Bidigo agai po dąų wali da, te po wali pelama, tama dage dali wiegi yai sę yaibao. Tama we bidi hauwago dage dali negeli eyu yaibao. Tiali goli, dagego augwali dali negeli me egobeo. Tama dagego te tǫ pedai kantri hauwa tonaluaibao. Tiali goli, kantri mego dage me tonalugobeo,” wali.
DEU 15:7 “Tialima, duga abagi me Genuai Bidigo dage mawainogo ebo te hanude bidibaso da, tama aga nai meba habuge yai baso da, teda dagego aga tudiba togolama, tama aga tau sabo homu me tagalamuo.
DEU 15:8 Menio. Dagego aga hobede elama, tama dagego agai sǫą pali nai tau sao.
DEU 15:9 Dagego homugo te negeli yali sela sąyabo kibu be pąba yalio homu igio. Tama tilama, dagego homu dąų olama, tama abagi tau sabo hagela ebo homu igimio. Dagego te dwai homu kolesaga dagede pedalomainogo sula tagalamuo. Ma, dagego tau sabo mone agabolo mabo hagela homu yali da, teda te bidigo Genuai Bidi i olama, tama agai dage wei ponoyu, dage Godigo gedude sęgę saibao.
DEU 15:10 Te agai hanalubo nai dabe tigidali tama maiąo. Te hagela ebo homu igio. Tama Genuai Bidigo dagego ebo sę dabe sese tama wiegi yai pedalomainogo ilaibao.
DEU 15:11 Tigidali sogo dage Israel dabe meba te nai dabe sǫą peyu bidaibao. Tama tibaso, eno dagebolo te po te wabao, dagego augwali hobede elama, tama augwaligo habuge yali nai dabe tau sao, tama augwali dali wiegi yai sę yao,” Mosesgo te po wai.
DEU 15:12 Te Mosesgo po geninama weyu, te po wali, “Te Israel hani tomode te we o bidi me deli te negeli elalubaso, agai digi aga bidi mebolo olo sę ebo bidi tiwai mobaso da, teda agai sę te kibu be a naga olama, deli, te 6 kibu be tama naga sę emainao. Tama te namba 7 kibu be wabode aga sę tagalomainao.
DEU 15:13 Tama agai te bidigo sę ebo tagalama pabo si da, teda te page bidigo aga aga buluba olo taga palamuo. Menio.
DEU 15:14 Dagego Genuai Bidigo dagebolo mani te nai dabe meba, te sipsip, me wit, me wain dabe, tama selama aga mao.
DEU 15:15 Dagego te dage me te Isipde olo sę ebo bidi bidali te kone paliąo, tama Genuai Bidi dago God agai dage oda selama, olo ma tagala palai dao. Te tama tiali po pagede eno megi te bomai po dagebolo te mobao,” wali.
DEU 15:16 “Tiali goli, te sę bidigo te page bidi me aga we wai godolo mu eyu da, teda agai te po waibao, ‘Eno dage taga pabo hagela ebo,’ po waibao.
DEU 15:17 Te tama po obaso da, teda aga odasa pelama, aga genuai bidigo be sunumiba sabolama, tama neli me deli selama, tama agai olo te sunumi pos niba munama, neligo enama, sunumi nigilama, tama aga te be page bidigo sę bidi bidama, aga monu dabe elama isimainao. Dagego te deli sę te duga sę ebo we dabe dali me tama tiao.
DEU 15:18 Dagego duga te aga negelide sali sę bidi dabe te namba 7 wabo kibu bede olo taga paliyu, tede dwai homu me elamuo. Magi baso meni, agai dagede sę te kibu be a naga olama deli kibu be, te 6 tama elama, tama agai hap pe naga sali. Dagego te tama tiyu da, Genuai Bidi dago God agai dagego tigidali sę ebo agai wiegi yai mu pedalomainogo yaibao,” wali.
DEU 15:19 Mosesgo po geninama weyu, te po wali, “Dagego duga te kau kibugo hasia wai omai, me sipsip kibugo hasia wai omai, te Genuai Bidi dago Godibolo sa muao. Tama tialima, te sa muani kau kibugo waigo sę ebo te habu mu dao. Me te sa muani sipsip kibu waigo nisi togoyu sabo me habu mu dao.
DEU 15:20 Te tigidali deli deli kibu bede dagego te tobage sa muani kibu dabe te lotu wabo pesage deliba sela pelama, duga hani we wai dagego te hasa dabe tuyu yao.
DEU 15:21 Tiali goli, te kau kibu o sipsip kibu augwaligo sągą gagea peyu, ma agai gedu hwidiyu, o agai meba dwai gasi dabe yai baso da, teda dagego Genuai Bidi dago Godibolo ofa eyu tama tugimio.
DEU 15:22 Menio. Te tama tiwai hasa dabe te duga bulude naga tuiąo. Dage tigidaligo tama tuiąo, te dage Godigo gedude wiegi yai bidigo me o meda osogo yai bidigo me tama tuiąo.
DEU 15:23 Tiali goli, dagego te hasa dabego kaneme tugimio. Menio. Dagego olo wę yali gilama tǫba gea palao,” Mosesgo te Israel dabebolo te po wai.
DEU 16:1 Tama Mosesgo po geninama weyu, te po wali, “Te tigidali sogo kibu bede, te polua Abipde, teda dagego te Genuai Bidi Godigo dage Isipde bugagia bidimainogo sula tagalali te side sa muyu, nai ulama tuiąo. Tama dagego Genuai Bidi dago God agai nogi ugwaba siąo. Magi baso meni, polobadu me sogo hulide, te polua Abipde, agai dage Isip bulude oda sai dao.
DEU 16:2 Dage te Genuai Bidigo deli sa muaibao te lotu wabo pesage deli, te pesageba pelama, tama te kau kibu deli o te sipsip kibu deli te dagego God dago Genuai Bidibolo ofa tiwai elama elao. Tama duga te Godigo dage bugagia bidimainogo sula tagalali, te Pasova nogi poai sogo, te hasa dabe me te nai dabe tuao.
DEU 16:3 Dagego te nai tubo sogo, dagego yis dali ulai bret tulamuo. Te a naga olama si, te 7 tama sogo, dagego te yis meni yai bret tuao. Magi baso meni. Te polobadu dagego te Isip bulu taga soainogo aseąsa biliyu, dagego te yis meni yai bret tuai dao. Dagego te bret tubo da, teda dagego Isip bulude dodolama bidali me Isip bulu taga soali, te bodolu tigidali kibu be ma kone paliyu, tama te bret tuao, te dage isibo sogoba usu tama nao.
DEU 16:4 Te a naga olama si, te 7 tama sogo, te Yis Meni Yai Genuai Sogo tomode, dagego be tomode te bret bo dabo nai yis elalubo habu mu dao. Tama te hasia wabo deide, dagego hasa dabe ofa ebo te tuao, tama hulide naga silao. Dagego kigamu tuabo me tagalamuo,” wali.
DEU 16:5 “Dagego te Godigo dage olo taga palali te bubuga kone paliyu, te eleba te hasa dabe Genuai Bidi agai dagebolo mawainogo ebo te hanu dabede elamo dao. Menio.
DEU 16:6 Dagego te agai sa muani lotu po wabo te pesage delide naga elama, tama Genuai Bidibolo ofa yao, te giliga ibaba dega sabo sogo mu dao. Magi baso meni, dagego Isip bulu te giliga dega sabode taga soai dao.
DEU 16:7 Dagego te hasa dabe te lotu wabo pesage delide naga uluyu tuiąo. Tama kigamu duga buluba ma piąo.
DEU 16:8 Te a naga sogo olama deli, te 6 tama sogo naga dagego te yis meni yai bret tuiąo. Tama te dei namba 7, tede dagego God dago Genuai Bidiba lotu po wao. Tama te sogo te sę dabe ebo te habu mu dao,” Mosesgo te po wai.
DEU 16:9 Tama Mosesgo po geninama weyu, te po wali, “Te dagego gide wit dabe sabo gagalobo sogo da, teda dagego te Sarere dabe nedebo gagalao.
DEU 16:10 Tama dagego te namba 7 wikde sabi simanobo sogo deli ma magi yao, te Genuai Bidi dago God agaba wiegi yai homu pemene yabo sogo. Tama dagego homugo tiao, Godigo dabolo te nai dabe hauwa mu mani dao homu yao. Tama tialima, duga homugo digi te nai meba bugulama, tama Genuai Bidibolo ofa tiwai mao.
DEU 16:11 Dage sese tama te lotu wabo pesage deliba pelama, tama Genuai Bidigo gedude dage wiegi yai homu pemene igi pao, te dage, me duga wai puluba, me duga sę ebo we bidi, me te Livai dabe, me te gasa bulu bidi dabe, me te wai dabe augwa aya isai dabe, me te we dabe augwa bidi isai dabe, dage te hanu dabede bidalubo bage, dage sese tama wiegi yai homu pemene iyąo.
DEU 16:12 Dagego dage te Isip bulude olo sę bidi dabe bidiyu yali kone palao. Tialima, dagego te bomai po dabe tigidali bugagia wali piąo,” Mosesgo te po wali.
DEU 16:13 Tama Mosesgo po geninama weyu, te po wali, “Dagego te wit bo sela sąyu, me dagego te wain du agalama, silama, nosali da, teda te osogo bidabo yano be, te bede olo bidibo genuai sogo dao. Tama te 7 dei wabode,
DEU 16:14 dage tigidali sese tama olo toma tuyu bidao, te dagego homu wiegi yai pemene eyu bidao. Te duga, me duga wai puluba, me duga sę bidi, me duga sę we dabe, me te Livai dabe, me te gasa bulu bidi dage dali bidibo, me te wai puluba augwa aya isai, me we augwa bidi isai wilawe we dabe, dage sese te hanu dabede bidalubo, te bage.
DEU 16:15 Dage sese tama te Godigo sa muaibao wali lotu wabo pesage delide dage te Genuai Bidi dago God agaba lotu po weyu, tama agai nogi ugwaba siyu yao. Dagego homugo tiao, ‘Genuai Bidigo dago gi me dago sę dabe sese tama wiegi yai ilai dao,’ te homu yao, tama dage wiegi yai homu pemene mu yao,” wali.
DEU 16:16 “Tama tialima, sela sogo deli kibu be tomode te duga hani bidi dabe dage naga te Genuai Bidiba lotu po wabo sa muani pesage deliba pelama, lotu weyu yao. Te sela sogo te e tama dao. Te Yis Meni Yai Bret Genuai Sogo, me te Gide Nai Siyu Wiegi Yai Homu Pemene Ebo Sogo, tama me te Osogo Bidabo Yano Bede Bidibo Genuai Sogo. Tama dage bidi deli deli nogo olo Genuai Bidigo geduba olo me aselamuo.
DEU 16:17 Menio. Dagego Genuai Bidibolo maiabo nai dabe sesao. Dagego te homu yao, ‘Godigo dabolo wiegi yai nai hauwa mani dao,’ te homu yao. Tama tialima, dagego te nai dabe meba bugulama, meba agabolo mao,” Mosesgo te po wali.
DEU 16:18 Tama Mosesgo po geninama weyu, te po wali, “Te dage hani deli deli tomode, dagego te jas me te ofisa dabe sa mumuna pao, te Genuai Bidi dago God agai dage mawainogo ebo te hanu dabede bida bida pabo, te bidi dabe.
DEU 16:19 Te bidi dabe augwaligo te po tų odobo kolesaga te doloba pai kolesagadu naga yao. Augwaligo te po tų ebo dolama, tama bidi meba naga tau selama, tama te bidi meba aiyaba me elaluamuo. Tama augwaligo te bidi mebago augwali nai momainogo me elamuo. Magi baso meni. Te bidi gugu po olama mabo te nai dabego te doloba pai bidi dabego kolesaga dolama, tama te wiegi yai homu kolesaga yai bidi dabe te po tų ebo sogo augwaligo te po tų eyu, po bugagia dodologobeo.
DEU 16:20 Tigidali sogo dagego mu po naga olama, tama dagego doloba pai kolesaga naga te po tų ebode wali pao. Tama tiyu da, dage te Genuai Bidi dago Godigo mawainogo ebo te tǫde tigidali sogo wiegila bida bida peyu, bidaibao,” wali.
DEU 16:21 “Te dagego Genuai Bidi dago God agai alta nigibo sogo, dagego haniani ni pos togolama, tama te we god Aseraba lotu wabo pos dabe me tede bulamuo.
DEU 16:22 Tama dagego te tibo god agaba lotu waboba te masigi du pos tede me bulamuo. Te tobage nai dabe te Genuai Bidi dago God agai gedude te dwai nai mu dao,” Mosesgo te po wai.
DEU 17:1 “Dagego te kau kibu o sipsip kibu te agai tigi dolai me selama, tama Genuai Bidi dago God agaba ofa me elamuo. Genuai Bidigo te tiwai nai mu godolo me egobeo,” wali, Mosesgo.
DEU 17:2 “Te me sogo te dage hani we bidi me deli aga te Genuai Bidigo dagebolo mani hanude bidibo bage, agai te Genuai Bidi dago Godigo te da dali dąų walali bomai po bogi paibao, tama te ebo kolesagago da, agai agade sęgę saibao.
DEU 17:3 Teda agai Godigo bomai po sela sąnama, tama agai te tibo godiba lotu po waibao, te giligaba lotu weyu, o te poluaba lotu weyu, o te hǫba lotu weyu yaibao, tama agai te nai dabe wali peyu tiaibao.
DEU 17:4 Tialima, dagego te tama kolesaga tiali po obaso da, teda dagego te po page bugagia gegelama suyu bolo yao. Tialima, te po mu tama elama, tama te dwai sę dage Israel dabe tomode pedalobaso da,
DEU 17:5 teda dagego te we o bidi te hanu bulu badu odasa pelama, tama masigi aga tigiba sąnama, tama aga mu isilao.
DEU 17:6 Tialima, te bidi sigo ma selago te we o te bidigo te dwai kolesaga ebo subaso da, teda dagego te we o te bidi elama, isilao. Ma, bidi deligo naga suai baso da, teda te we o bidi elama isilabo sunumi meni yaibao. Usugobeo.
DEU 17:7 Te bidigo me o te wego te we o bidigo te dwai kolesaga ebo suali da, te we bidi augwa digi bolo masigi hasia te bidi tigiba sąnama, tama olo we bidigo nosali masigi te bidi tigiba sąmainao. Dagego te bidi elama isiliyu, dagego te dwai kolesaga dage tomode pedalali sela sąyu yao,” wali.
DEU 17:8 “Te me sogo te po sęgę genuai mu te hanude yaibao, tama te jas dabe te hanu dabede bidibo te bagego dodolobo usu egobeo. Te bidi dabe aga hasi boi bidi homu elama, me bidi ela muai baso, o te bidigo tǫ hagede o be hagede wado yai baso, o te bidi dabe aga hasi hwįnama, me bidigo tigi mu dolai baso. Tiali tama, te tobage nai dabe te jas dabego dodolobo usu isąbaso da, teda dage te lotu wabo pesage Genuai Bidi dago God agai sa muaiba, te pesage deliba naga pao.
DEU 17:9 Tama dagego te Livai hani dabego pris dabebolo me te sogo te po tų ebo tonalubo te jas dabebolo hasia bolo pusao, tama augwaligo dagego po dodolomainao.
DEU 17:10 Augwaligo te po tų ebo kolesaga page sese tama pusaibao, te Genuai Bidigo sa muai bulude, tama dagego augwaligo wabo sę dabe sese tama wali piąo.
DEU 17:11 Dagego augwaligo te po dabe sese selama, tama augwaligo po sese tama wali pao, te augwaligo dagebolo mabo te po.
DEU 17:12 Ma, bidi mego te jas o te pris te Genuai Bidigo gedude sę ebo bidigo po sela sąwani da, teda dagego te bidi elama, isilao. Te tama tiyu, dagego te dwai kolesaga te Israel tomode sela sąyu yao. Po menio.
DEU 17:13 Tama tiyu da, te po te tigidali we bidigo odama, tama augwali wi elama, te gasa we bidi mebago te tobage dwai kolesaga me egobeo,” Mosesgo te po wali.
DEU 17:14 Tama Mosesgo po geninama weyu, te po wali, “Dagego te Genuai Bidi dago God agai dagebolo mawainogo ebo te tǫ selama, tama dage te tǫde dualaluyu da, teda dagego homugo tiaibao, ‘Te tuni bidi te kingo da tonalumaina,’ te homu yaibao, ‘te gasa hani bidi dabego ebo tiwai inao,’ homu yaibao.
DEU 17:15 Tialima, teda te sogo dagego Genuai Bidi aga digi te bidi me deli te king tuni bidi pedalomainogo sa mumainao. Dagego duga homugo me sa munamo dao, tama me ma duga hani bidi me deli te tuni bidi pedalomainogo yao. Dagego gasa hani bidi te tuni bidi nigimainogo sa mugio.
DEU 17:16 Te tuni bidi dolo siyu, tama agai ami bidigo hos kibu hauwa me selamo dao. Tama agai te bidi dabe te hos abelemainogo Isipba tagala palamuo. Magi baso meni, God Genuai Bidigo te po wai dao, ‘Eno we bidi te Isip buluba ma pelamuo,’ po wai dao.
DEU 17:17 Te tuni bidi kingo we hauwa selamo dao. Magi baso meni, augwaligo agai Genuai Bidiba tudi ola momainogo yaibao. Tama me ma, agai gol me silva hauwa sabo sę elamuo wao.
DEU 17:18 Te bidi aga tuni bidi king nigibo sogo, agai te Godigo bomai po asęai buku me deli e tiwai somainao. Agai te Livai pris dabego tonalubo bomai po elalubo buku nedama, tama aga nogogo digi te gasa bukude te bomai po asęao, tama te buku agade munolumainao.
DEU 17:19 Agai te buku aga pagede munama, tama agai te tigidali po page agai tede nedemainogo yao. Tama tiyu da, agai Godigo bomai po wali peyu, aga tigidali sogo Genuai Bidi dologode elaluyu, tama agai te bukude elalubo po dolo wali paibao.
DEU 17:20 Tama tialima, agai aga digi ugwaba siyu, tama agai meba Israel dabe aiyaba me elalugobeo. Tama me ma, agai te Genuai Bidigo dwasianu bomai po dabe me bolamuo. Tama dwagi yai kolesaga tama tiyu da, aga tuni bidi king kibu be hauwa sogo bidaibao. Tama nosali nosali me tuni bidi king aga hanide naga pedaliyu, iduaibao,” Mosesgo te po wali.
DEU 18:1 Tama Mosesgo po wadolama ma weyu, te po wali, “Te pris dabe augwali te Livai hani dabe dao. Tama tibaso, augwali dali te gasa Livai hani sese augwaligo te tǫ me selamuo, te da meba Israel dabego yali gilama egobeo. Menio. Te augwaligo nai dabe da, te da augwaligo te Israel dabego te ofa mabo naide, me te Genuai Bidibolo olo mabo te nai dabede somainao.
DEU 18:2 Augwaligo te meba hanigo yali gilama, tama tǫ augwaligo me sogobeo. Te wiegi yai nai augwaligo sali da, te e dao, augwali te Genuai Bidigo pris bidi te nigali dao, te Genuai Bidigo po dąų wali gilama yali,” wali.
DEU 18:3 “Tialima, te bidi me deligo te kau kibu omai me te sipsip kibu elama, tama agai Godibolo ofa tiwai nai mobaso da, teda agai te hoboludu mi, me nogo na mi me sobadi, me penane mi sobadi, me haliga selama, tama agai te pris bidibolo mao.
DEU 18:4 Tama me dagego te hasia inabo wit meba, me wain, me oliv wel, me te sipsip nisi selama, tama te pris bidi dabebolo mao.
DEU 18:5 Genuai Bidi dago God, agai te dage Israel hani tomode gasa bidi hani meba te pris bidi nigimainogo sa me mubeo. Mu menio. Agai te Livai hani deli naga aga nogide te pris sę tigidali sogo emainogo sa muai dao,” wali.
DEU 18:6 “Tialima, te Livai me deligo aga bidali hanu taga pelama, tama te eno sa muani lotu wabo pesageba bidigi pabo homu ebaso da,
DEU 18:7 teda agai te Godigo pris sę emainao, te aga hani dali augwaligo augwa te lotu wabo pesagede te pris sę tigidali sogo ebo gilama ma emainao. Te usu dao.
DEU 18:8 Te deli deli pris bidigo sabo nai tiwai deli naga siyu emainao. Tama me augwaligo te meba nai dabe te augwa hanide sabo nai, te me tolalumainao,” wali.
DEU 18:9 Tama Mosesgo po geninama weyu, te po wali, “Dage te Genuai Bidi dago God agai dage mawainogo yali te buluba sabalobo sogo da, teda dagego te bulu we bidigo ebo dwai kolesaga konea siyu, mu wali me pelamuo.
DEU 18:10 Dagego duga wai bǫų dabe elama, te iside te alta saide me ulamuo. Tama me dagego duga hani we bidi te sogo yesi bidi nigiyu, me esela bidi nigiyu, me kebele aubo sę eyu, me pobi mubo sę eyu, me te ho po wabo sę dabe me emainogo sula tagalamuo, me dagego te isai bidi noma dali po me olamuo.
DEU 18:12 Genuai Bidi dago God agai te tobage dwai kolesaga ebo we bidi agai godolo me ebo menio. Te tama tibo te page delide tama agai te we bidi dage pąba saboligi pabo si, agai augwali te bulude sela sąwaibao.
DEU 18:13 Te tigidali kolesaga ebode dagego Genuai Bidi wali naga piąo,” wali.
DEU 18:14 Tama Mosesgo te po wali, “Megi dagego augwaligo tǫ sigi painogo ebo, te we bidi hani da, te da augwaligo te yesi bidi dabego po wali pelama, tama esela bidi wali peyu, tama ebo dao. Tiali goli, Genuai Bidi dago God, agai dagego te kolesaga wali pelamuo olama, habu selai dao.
DEU 18:15 Tiali goli, Genuai Bidi dago God agai duga ama me te profet bidi ena yali gilama tiwai bidi nigabo sa muaibao. Tama dagego agai po wali peyu yao,” wali.
DEU 18:16 “Te dage te Sainai bulu duba sisinani sogo da, dagego Genuai Bidibolo hanaluyu, agai po ma olamuo po wai dao. Tama me ma, dagego te God bidibo te moni isi bogoli ebo subo wi ebo po wai dao. Magi baso meni, dage wi dwai mu elama, dagego homugo tiali. Te dagego odoyu, me suyu ebode dage isidali weyu, te homu yai dao.
DEU 18:17 Tama tialima, Genuai Bidigo enabolo te po wali, ‘Augwaligo hanalubo po usu dao,’ wali.
DEU 18:18 ‘Tama eno te we bidi hani tomode eno bidi me deli sa muaibao,’ po wali. ‘Tama aga te profet bidi nage yali gilama nigaibao. Tama eno po agabolo mayu yaibao. Tama eno po me deli te we bidibolo pusigi pao po obaso da, teda agai pusiyu yaibao.
DEU 18:19 Tama ena nogide naga te profet bidigo te po pusiyu yaibao. Tialima, te bidi mebago agai po sela sąyani da, teda eno aga dene mawaibao.
DEU 18:20 Tiali goli, bidi mego aga homugo eno agabolo masiąma yai po aga homugo naga nigilama pusali da, teda aga isimainao. Ma, bidi mego te tibo godigo nogide te profet tiwai po weyu da, teda aga me isimainao,’ Genuai Bidigo te sogo enabolo te po wai dao,” Mosesgo te po wali.
DEU 18:21 “Tama dagego homugo mena tama dagego koneaibao, te profet bidigo po te Genuai Bidigo pusai po dawe, ma meniwe, dagego konegobeo, te homu yaibao.
DEU 18:22 Dagego te po e tama koneagameo. Agai te po Genuai Bidigo nogide pusai goli, te sę pedalisąma ebaso da, teda agai te po Genuai Bidide sabeo. Te da, te profet bidi aga homugo naga Genuai Bidigo nogide tibo po pusai yaba homu yao. Tama dagego agade wi homu me elamuo,” Mosesgo te po wali.
DEU 19:1 Tama Mosesgo po geninama weyu, te po wali, “Genuai Bidi dago God agai dagebolo mawainogo eba te bulu bidi dabe sese dola silaibao. Tama dagego augwaligo hanu me be dabe saibao. Te dage bugagia duagi pabo sogo da,
DEU 19:2 teda dagego te bulu te distrik sela nigilao. Tama te sela bulude da, dagego hanu wiegi yai madi me nigiąo, te bidi me ela muani bidi wi duala sigi pabo sunumi sinana bilibo sę yabuo. Tialima, te bidi mego te bidi elebaso da, teda aga wi pelama, tama te hanuba geme duala sigi pomainao.
DEU 19:4 Tialima, te bidi mego aga abagi olo dali ela muai baso da, o me augwali si hasia wado isąma, o boi bidi isąma yai baso da, teda aga te hanu sela me deliba geme duala sigi pelama, bugagia bidimainao.
DEU 19:5 Te e dao. Te bidi si augwa si busiba pelama, aga abagi mego ni geliduai madi mego te sigi hwą osoga sainuma, me isilai yai baso da, teda aga te hanu me deliba wi pelama, tama te hanude geme duala selama, bugagia bidimainao.
DEU 19:6 Ma, hanu deli naga elaluyu da, teda usu me egobeo. Tiyu te hanu digibulu mu elaluyu, te bidi wei sabo bidigo aga ama mego te bidi wei siyu, te bidi olo dali ela muabo, te bidi aga sębę genuai me elama, te bidi toulama elabo. Tiali goli, te ogwaba, te bidigo sęgę menio. Agai homugo aga abagi dali boi bidi homu elama, tama agai aga abagi ela muabo homu me ebeo. Menio. Te sigi hwą naga osoga sainuma, aga elai goli, te wei elidali weyu, te geme wi duala sigi pomainao.
DEU 19:7 Te tama tidali weyu, eno dagebolo te hanu sela sa muao po te wabao,” wali.
DEU 19:8 “Nosali Genuai Bidigo dagego bulu tǫ genuai ugwanu ma dąį igi paibao. Te agai duga wąį dabebolo po dąų wali gilama tiaibao. Tama agai augwalibolo te mawaibao wali te tǫ sese tama mawaibao.
DEU 19:9 Tama tialima, te sogo dagego te gasa hanu sela me ma sa muagameo. Tialima, dagego eno dagebolo megi wabo te bomai po dabe tigidali wali pelama eyu da, me dagego Genuai Bidi dago Godigo po godolo mu elama, tama agai po tigidali sogo wali peyu da, teda agai te tǫ sese tama dagebolo mawaibao.
DEU 19:10 Dagego duala sabo hanu sela me ma sa muao. Tama elama, tama dage te agai dagebolo mabo tǫde bidiyu da, dagego te bidi sęgę meni yai bidi olo dali ela mubode te dage sęgę me sogobeo,” wali.
DEU 19:11 “Ma, te bidi mego aga abagi hagela mu elama, tama geme dualaluama, tama aga dwagila mu elama, tama aga ela muai baso da, tama tilama, aga wi pelama, te hanu me deliba geme duala sigi peyu pai ebaso da,
DEU 19:12 teda aga hanu page tobolu bidi dabego te geme duala sigi pabo hanu page bidibolo hanaluama, tama aga te aga hanuba ma asao po omainao. Tama augwaligo te aga ama wei sabo bidigo nogoba menama, tama agai te bidi elama isilimainao.
DEU 19:13 Dagego aga hobede me elamuo. Mu menio. Te bidigo sęgę meni yai bidi elabo kolesaga te Israelde elalubo. Tama te ebo kolesagago dagego te sęgę sela sąyao. Tama tilama, dage bugagia bidiagameo,” Mosesgo te po wali.
DEU 19:14 Tama Mosesgo po geninama weyu, te po wali, “Dagego duga abagigo tǫ dąį ugwanu ma pogolama, aga tǫ meba sigio. Magi baso meni. Augwaligo polobadu polo dąį ilai dao, te Genuai Bidigo megi dagebolo mawainogo ebo te tǫde,” te po wai.
DEU 19:15 Tama Mosesgo po geninama weyu, te po wali, “Tialima, te bidi me deligo naga te dwai sę ebo sualio po agai te po tų ebode pusubaso da, teda te po tų ebo bidigo odobo bidigo te po odigio. Te bidi sela o sigo suai dao obaso da, teda augwaligo agai po tų ela mabo usu yaibao.”
DEU 19:16 “Tialima, te bidi me deligo ili po olama, tama me bidi doliyu, agai te bomai po te bolali dao po obaso da,
DEU 19:17 teda augwali si tama te lotu wabo pesageba pomainao. Tama te pris bidi me jas bidi dabe augwaligo te sogo te Genuai Bidigo gedude te dodolomainao.
DEU 19:18 Te jas dabe augwaligo te po bugagia osolama, tama augwaligo suali madi te aga abagi po tų ela mani bidigo agai ili po olama, aga abagibolo po olo dali kisilama waibaso da,
DEU 19:19 teda te dwai dene te augwaligo te po tų ela mani bidigo sabo magi ilali te bidi aga somainao. Te tama tiyu da, dagego te dwai kolesaga dage tomode elalubo sela sąwaibao.
DEU 19:20 Tama tiyu da, te we bidi tigidaligo te tama tiali po oda silama, tama augwali bugagia tonaluama, tama bidi mego te tobage kolesaga me egobeo.
DEU 19:21 Dagego te tibo po wabo bidi dagego hobede me elamuo. Agai homugo aga abagi isimainogo yali, teda te tibo po wali te bidi aga isimainao. Te bidi agai homugo aga abagigo gedu, o kele, o sągą, o nogo me dolomainao homu elama waibaso da, teda te ili po wali te bidi aga tigide te gedu, ma kele, ma nogo, ma sągą dolomainao. Te bidi aga tigide te sę aga tigiba ma wei ponao,” Mosesgo te po wai.
DEU 20:1 Tama Mosesgo po wadolama weyu, te po wali, “Te dage te boi hwįgi pabo sogo, te dagego duga boi bidigo te karis me hos kibu elalubo suyu, me augwa ami bidi nambago dage edelai baso da, tagalao, dage wi me elamuo, augwalide. Magi baso menio. Genuai Bidi, dago God, agai dage Isip bulude selama, tama dage odasa asai dao. Aga digi dage dali bidaibao.
DEU 20:2 Te dagego boi gagalisiąbadi, te pris bidi me deli te ami bidi dabego gesabidiba dolagaselama, tama augwalibolo te po wao,
DEU 20:3 ‘Dage Israel bidi dabe, dagego odao. Megi da, dage boi hwįgi painogo te ebao. Tiali goli, dagego te boi bidi dabede wi me elamuo. Tama dagego nogo nagame me elamuo. Tama dage augwalide noma me selamuo, wi pelamuo.
DEU 20:4 Genuai Bidi, dena God, aga digi dage dali te pobao. Tama agai dagego hwįbo tau saibao. Tama agai boi bidi dabe aiyaba elaluama, tama dagego ugaba ela holomainu yaibao,’ te pris bidigo te po waibao,” Mosesgo te po wai.
DEU 20:5 “Tama te ofisa dabego te po walaibao, ‘Te niwai bidi te aga be gesi sęnama, tama agai Godibolo te augwali te bede bugagia bidimainogo tau sao po olama bidisiąbadi yali bidi me ede bidibo homu ebawe? Te tama tiwai bidi me ede bidiba wida, teda augwali augwa buluba ma pomainao, te hwįbo madigi pogobeo. Magi baso meni, augwali te hwįbo boide elai madi, gasa bidigo agai gesi be sidali weyu.
DEU 20:6 Te bidi meba te wain gi gesi elama, tama te wain du togolama, wain wę nigisiąma yai bidi me e tomode bidibo homu ebawe? Te tama tiwai bidi meba ede bidiba wida, teda te bidi dabe augwali geasa, aga beba ma pao. Tiyu augwali boide elai madi, augwa wain gi gasa bidigo saibao. Te dolo egobeo.
DEU 20:7 Te bidi meba te we sainogo te we noma sali bidi meba e tomode me bidibawe? Te tama tiwai bidi me ede bidibaso, teda te bidi te hwįbo madigi pogobeo, aga beba ma geasa pao. Tiyu augwali boide isai digi, gasa bidigo augwaligo te we sabuo,’ te ofisa bidi dabego te po wao,” Mosesgo te po wali.
DEU 20:8 “Tama te ami ofisa bidigo te po me waibao, ‘Te bidi meba te boi hwįbo wi elama, didibili homu ebo bidi me bidibo homu ebawe? Te tama tiwai bidi me ede bidibo wida, teda te bidi aga beba ma geasa pao, augwaligo ebo sęde meba bidi dabe me wi ilidali weyu.’
DEU 20:9 Te ofisa dabego te po ola silama, tama augwaligo te deli deli ami bidi hani tomode polaluabo bidi dabe sa mumuna pao, te boi hwįabo bidi hani tomode,” wali.
DEU 20:10 “Dage te genuai obo me yai hanuba me hwįgi pabo si da, tama dage te hanu pąba saboligi peyu da, teda hasia dagego te po waiąo, te hanu page we bidibolo te po waiąo, ‘Dagego da dali hwįgio. Dagego te hanu dabolo olo maiąo,’ te po walao.”
DEU 20:11 “Augwaligo dagego pode usu dao olama, tama augwaligo hanu genuai sunumi dabe olo dabaso da, teda augwali dage dologode bidiyu yaide augwali kalabus sę emainao.
DEU 20:12 Tiali goli, te hanu page we bidi dabego dagego po waliba usu dao po wasiąma, augwaligo dage dali hwįainogo ebaso da, teda dagego ami bidi dabego te hanu bomo elama, bobegela sao.
DEU 20:13 Tama Genuai Bidi, dago God, agai dagego te hanu somainogo dagego nogoba mubo si, dagego polo selama da, teda dagego te hanu tomode bidi dabe sese tama ela silao.
DEU 20:14 Tiali goli, dagego te hanude we dabe, me wai dabe, me kau kibu dabe, me te gasa meba nai dabe te hanude nai dabe sao. Tama dagego duga boi bidi dabego nai dabe selama, sabilagameo. Magi baso meni, Genuai Bidi aga digi te nai dabe dagebolo mawaibao.
DEU 20:15 Dagego te tama sę dabe te gasa meba hanu dabe dagego bulu digibulu elalubo hanu dabede me tama naga tiao,” Mosesgo te po wai.
DEU 20:16 “Tiali goli, dagego te Genuai Bidi dago Godigo dabolo mu mawainogo ebo te bulude dagego te hanu me siyu da, teda dagego tigidali we bidi elama, mu silao.
DEU 20:17 Dagego te Hit dabe, me Amor dabe, me Kenan dabe, me te Peres dabe, me te Hivi dabe, me te Jebus dabe, tama elama mu silao. Te da te Genuai Bidi aga wali gilama tama tiao.
DEU 20:18 Dagego augwali mu tama ela silao, tiyu augwaligo te tibo godiba lotu po wabo dwai kolesaga ola magobeo. Tiyu, augwaligo dage kegelama, tama dagego Genuai Bidide sęgę sabuo,” wali.
DEU 20:19 “Te dagego te hanu me deli sainogo hauwa sogo bomonama, bagulama biliyu, tama dagego te hanu obo sesegede elalubo te ni dabe gela gela peyu da, teda dagego te ni du walobo ni gelamo dao, dagego te ni du tuiagameo. Tialigo dagego te ni dabe dolamo dao. Magi baso meni, te ni dabe dagego boi bidi dabe menio.
DEU 20:20 Tiali goli, dagego meba olo ni dabe da, dagego gelama, tama dage hwįbo tau sabo nai dabe nigao, te boi bidi dabe aiyaba elaluama, te hanu sabo gilama,” Mosesgo te po wali.
DEU 21:1 Tama Mosesgo po geninama ma weyu, te po wali, “Te dagego te bidi dabe mebago te ela muai bidigo tigi isai munalubo, te Godigo dagebolo mawainogo ebo te tǫde munalubaso da, teda dego elaliwe, dagego konesiąma ebaso da,
DEU 21:2 teda dagego e tama tiao. Te tobolu bidi dabe, me te augwa jas dabe oda selama pelama, te bidi tigi munalubo tedu gagalama, tama pąde elalubo hanuba usu siyu, usu ni sesa pao.
DEU 21:3 Tialima, te pąde elalubo hanu page tobolu bidi dabego te kau kibu so te sę dabe isąwai sa muao.
DEU 21:4 Tama augwaligo te kau kibu te sula sisąbo wę pąba sela pelama, tama te tǫ pedai te bidigo gi isąwai digi, augwaligo te kau kibu elama, mage togwa.
DEU 21:5 Tama te pris dabe, te Livai hani bage, augwali me te pesageba pomainao. Magi baso menio. Augwaligo te bidi mego te gasa bidi me elai baso, te po tų odobo sę ebo bage dao. Genuai Bidi dago God agai augwali sa munama, agai sę elama, tama te Godigo nogi te we bidibolo ola mayu, te Godigo augwali dali wiegi yai sę yaibao po weyu yabo bage dao.
DEU 21:6 Tialima, te hanu pąde elalubo tobolu bidi dabe augwaligo te kau kibu daide augwaligo nogo ąį telamainao.
DEU 21:7 Tama augwaligo te po wao, ‘Dago te bidi ela mubeo,’ po omainu yao. ‘Tama dago konebeo, te dego te sę yaliwe,’ po omainao. ‘Genuai Bidi, nago da te Israel we bidi dabego sęgę sela sąyao. Nago da Isip bulude ma oda sai dao,’ po wao. ‘Te bidigo dwai sę me isąbadi, augwaligo aga ela muani dao.
DEU 21:8 Tama nago homugo te dwai sę yali te page dade elalubo homu elamo dao,’ augwaligo te tama po wao.
DEU 21:9 Tialima, dagego te wiegi yai doloba pai kolesaga Genuai Bidigo gedude tama eyu da, teda Genuai Bidigo te po waibao, ‘Dagego te dwai kolesaga geda munama, te bidi ela mubeo,’ po waibao,” Mosesgo te po wai.
DEU 21:10 Tama Mosesgo po geninama weyu, te po wali, “Te Genuai Bidi dago God agai dage tau selama, tama dagego te boi hwįbo gasa bidi aiyaba elalubaso da, tama dagego te boi bidi dabe meba kalabus ilibaso da,
DEU 21:11 te bidi me deli dage hani tomode agai te sawi yai we me deli te kalabus yali bidi hani tomode bidibo suaibao, tama agai te we sabo homu yaibao.
DEU 21:12 Te da, te bidi naga te we naga beba odasa pelama, tama te we agai aga tobolu nisi sese togwa sąmainao, tama me agai nogo dani sese togwao.
DEU 21:13 Tama agai te wego te kalabus hanude gudali te ugwa sese sela sąmainao, te gasa ugwa gudao. Tama aga te bede bidiyu, aga ida aya hagede gela odubadi, te polua deli pomainao, tama nosali nago te we sagameo.
DEU 21:14 Tama tialima, nosali da, nago aga godolo ma isąma ebaso da, teda nago aga olo ma taga palao. Magi baso meni, nago aga bomo elama, kegelama, tama dage si te pagela piali dao. Tilama, nago te olo sę we dao homu elama, tama gasa bidi mego abelemainao homu me elamo dao. Mu menio,” Mosesgo te po wai.
DEU 21:15 Tama Mosesgo po geninama weyu, te po wali, “Tialima, bidi mego te we si sai baso da, tama agai te we me deli naga godolo mu elama, tama agai me we kuna godolo isąma ebaso da, tama te wego aga gomunai ogwa ame nenama, tama nosali me wego me ogwa ame nobaso me.
DEU 21:16 Tama te bidi aga homugo te aga isibo sogo augwaligo te nai dabe te ogwa dabe dali dobayabo homu ebaso da, teda agai te gomunai ogwago sabo doado bage sa muyu, te aga godolo ebo wego ogwabolo magio. Menio.
DEU 21:17 Agai te e kolesaga wali peyu, tama tiao. Agai te doado bage bugulama, tama te ogwa wegi augwali tigidali deli delibolo maiabo nai dodolama, tama te hasia mu ame nani ogwa agabolo te doado bage me manama, agabolo mawainogo sa muao. Te agabolo maiabo nai te dadagano pabo sę tama yao. Magi baso meni, te da te bidi aga hasia mu te ame nai ogwa dao. Tama aga da te aga ayago gomunai ogwa mu dao, tama agai te gomunai ogwago te sabo doado bage nosali somainao,” wali.
DEU 21:18 Tama Mosesgo po geninama weyu, te po wali, “Tialima, te bidi mego te ogwa me deli bidiyu, tama tigidali sogo te aga ida de aya sigo po sela sąduai dao, tama augwaligo aga eliyu iduali goli, tama agai aga ida ayago po me sela sąyu, te wali pisąma eyu ebaso da,
DEU 21:19 teda aga ida ayago te wai augwa hanude bidibo tobolu bidi dabe pageba odasa pelama, te wai po tų ela momainu yao.
DEU 21:20 Te ida ayago te tobolu bidi dabebolo te po wao, ‘Da sigo ogwa te bidi po odisąbo bidi dao,’ po wao, ‘tama po sela sąyu, tama agai da sigo po odobo menio. Aga te polobo bidi tiwai dao, aga te poliyu, da sigo mone subigila sąyu ela bilibo dao,’ tama po wao.
DEU 21:21 Tialima, te hanude tobolu bidi dabego te ogwa te masigi nogogo selama, aga tigiba sąnama, elama, isilao. Tama tialima, dagego te dwai nai dabe sela sąnama, tama dage tomode elalumainu igio. Tama te Israel we bidi sesego te tama tiali po odama, tama augwali wi yaibao,” Mosesgo te po wai.
DEU 21:22 Tama Mosesgo po geninama weyu, te po wali, “Tialima, te bidi mego te dwai kolesaga mu yai baso, tama augwaligo aga elama, tama augwaligo agai tigi te ni pos me delide walai baso da,
DEU 21:23 teda te nide walalubadi, te be huliama, kigamu ebo te habu mu dao. Magi baso meni. Bidigo tigi te nide walalubo te Godigo gedude te dwai sęgę maiabo bidi mu dao. Tama tialima, te bidigo tigi te bidi isibo sogo tama pubulao. Ma, meni eyu da, teda te Genuai Bidi dago God agai dabolo te mani tǫ te agai gedude te dwai meda mu ilaibao,” Mosesgo te po wali.
DEU 22:1 “Tialima, me dagego te duga abagi mego kau kibu o sipsip kibu te aga obo tagalama, te olo bulu badu bilibo subaso da, teda dagego te tama bilimainogo sula tagaligio. Menio. Dagego te abagi aga pageba ma odasa pao.
DEU 22:2 Tiali goli, te kau kibu o sipsip kibu aga ayago be digibulu elalubaso, o te dagego te kau kibu o sipsip kibugo aya dagego konesiąma ebaso da, te dagego duga dali beba odasa pao, tama nosali te kau kibu o sipsip kibu aga ayago gege asobaso da, agabolo ma magameo.
DEU 22:3 Tama tialima, dagego duga abagigo te donki kibu o te ugwa dage dabe me, te mu tula pai te sunumide subaso da, te meba nai dabe me te tula pai subaso da, teda dagego te tiwai deli kolesaga naga yao,” Mosesgo te po wai.
DEU 22:4 “Te naga abagigo kau kibu o donki kibu te sunumide me tula muai me elalubaso da, teda dagego te tama elalumainogo sula tagaligio. Menio. Dagego te abagi tau selama, te abagigo te kau me donki ma hodolomainogo tau sao,” wali.
DEU 22:5 “Te we sibigo te bidi ogwago ugwa gudubo habu mu dao. Me, te bidi sibigo te we sibigo ugwa gudubo te habu mu dao. Genuai Bidi dago God agai te tobage kolesaga dabede dwai homu mu ebo dao. Mu tama dao.”
DEU 22:6 “Tialima, te ba kimi me te nide o tǫde aga gede pilamubaso da, o aga gǫų dabe dali bidibaso da, teda dagego te ba kimi me selamuo.
DEU 22:7 Dagego te ba wai dabe naga sagameo. Tiali goli, dagego te ba kimi pomainogo tagalao. Tama tiyu da, dage e tǫde bobobage sogo bidama, tama Genuai Bidigo dage bugagia bidimainogo ilaibao,” wali.
DEU 22:8 “Te dagego gesi be me sę ebo sogo, dagego te be nigilama, te sawale yai pedu sesegede dagego dwasianu obo yao, te bidi me tula muidali weyu. Tama tiyu da, te obo elaluali goli, te bidi me tulaluyu, isilibaso da, teda dagego sęgę sogobeo, te page aga digi dao,” Mosesgo te po wali.
DEU 22:9 “Dagego te wain gide gasa meba olo nai dabe bulamo dao. Ma, dagego te gasa meba olo nai wai dabe me buliyu da, teda dagego te meba olo nai me, te wain du me, me selamo dao, te habu dao.”
DEU 22:10 “Dagego te kau kibu me donki si te deli gi tǫ elebo ain dagede bono gebelama, tama augwali si te gi tǫ elemainogo tagalamuo.”
DEU 22:11 “Dagego te sipsip kibu nisigo nigai hobi dali, te gasagi yai nisigo nigai hobi dali taluama, te gudubo ugwa nigigio,” wali.
DEU 22:12 “Dagego te duga name ugwa habu badu me si me side te au ilabo nai hobolao,” Mosesgo te po wali.
DEU 22:13 Tama Mosesgo po geninama weyu, te po wali, “Tialima, bidi me deligo we me deli selama, tama aga dali pagela pilama, tama nosali aga te we godolo ma isąma eyu da,
DEU 22:14 tama agai te webolo po olo dali kisilama, te we te gasa bidi mego penani yai te eno megi koneai dao po obaso da,
DEU 22:15 teda te wego aga ida ayago te wegigo te penani me yai menio olama, te sa munama me elaluali te nai selama, ola mao. Tama me agai hanu tomoba tula pabo sunumiba sela pao, te po tų ebo pesageba.
DEU 22:16 Tama te we aga ayago te tobolu bidi dabebolo e tama po walao, ‘Eno wegi te bidibolo tama menama, tama aga tama sai dao. Tiali goli, megi agai godolo ma ebeo.
DEU 22:17 Tama te bidigo te wegibolo ili po weyu te po wali, “Eno te sali goli, eno suali, te we te penani sę polobadu yai eno tamadi tama sualio,” po walio. Tiali goli, dagego suao, te name ugwago te wegi te penani sę me isąwai dao olama, te sa elaluali, te name ugwa e dao,’ po wao. Tama agai te ugwa te tobolu bidi dabego gesabidide tǫba mumainogo yao.
DEU 22:18 Tama tialima, te tobolu bidi dabego te wego bidi te bįgo elemainao.
DEU 22:19 Tama te bidigo te mone K1,000 tego te kot abelemainao, tama te mone te wegi aga ayago somainao, te aga ayabolo mao. Magi baso meni, te bidi agai te Israel we wiegi yai me deli hale ilai baso. Tama te we aga te bidigo we bidama, tama te bidi isiboba tama usu nigi pomainao. Te bidigo te me sela sąmainu me elamuo. Mu menio,” wali.
DEU 22:20 “Tiali goli, te po mu tama olama, tama augwaligo te we aga bugagia dolo bidai dao olama, augwalibolo ola maiabo nai meni baso da,
DEU 22:21 teda te we te tobolu bidi dabego te we aga ayago be sunumi bulu badu odasa pelama, tama aga te hanu page bidi dabe augwa digi te masigi sąnama, tama isibode tagalao. Agai te dwai hale yai sę te dago we bidi tomode te yali dao. Magi baso meni. Aga te aga bidigo sisąbadi, aga ayago bede bidiyu, te bidi me deli dali te penani yali dao. Tama tialima, dagego aga ela mubaso, te dwai kolesaga sela sąnama, silaibao,” Mosesgo te po wali.
DEU 22:22 “Tialima, dagego te bidi mego te gasa bidigo we dali pibo subaso da, teda te we de bidi si tama ela muao. Tama tialima, dagego te tama tiyu da, dagego te dage tomode elalubo dwai kolesaga ebo sela sąwaibao.”
DEU 22:23 “Tialima, dagego te bidi mego te wegi me te bidi mebolo odolai elalubadi, te bidi mego penani ebadi subaso da,
DEU 22:24 teda dagego augwali si te hanu bulu badu odasa pelama, masigigo elama, isilao, te augwali si isimainao. Te we aga te hanu pąde te gela wabo odabo pąde goli, tama agai augwaligo aga tau somainogo hae wasiąama ebaso da, teda aga isimainao. Te bidi me isimainao. Magi baso meni, agai te aga abagi mebolo odolai we penani yai baso. Te tama tiyu da, dagego te dage Israel tomode elaluali dwai kolesaga ebo sela sąwaibao,” wali.
DEU 22:25 “Tiali goli, te we me te bidigo sabo kegalubadi, tama aga te hanu pąde bidisąma ebadi, te bidi mego sulama, tama agai odasa pelama, tama agai te wegi penani sę yai baso da, teda augwaligo te bidi naga elama isilimainao.
DEU 22:26 Te kolesaga da, te bidi mego aga abagi me olo dali elama isilibo tiwai dao. Tiali goli, augwaligo te wegi dali te magi sę me deli elamuo. Magi baso meni, agai dwai sęgę me sabeo, te augwaligo aga elama isilabo page menio.
DEU 22:27 Te bidigo te hanu bulu badu mu bomonama eyu, te wegi dali penani yali dao. Tama te wegigo te bidi dabego aga tau somainogo hae wai goli, te bidi meni yalio, pąde me bidibeo,” Mosesgo te po wali.
DEU 22:28 “Tialima, dagego te wegi me te bidigo noma sisąwai olo bidai wegi dali te bidi mego bomonama penani yai baso da,
DEU 22:29 teda te bidigo te wegi aga ayabolo te mone 500 kina te we aga ayabolo menama, tama agai te we somainao. Magi baso meni. Te bidigo te wegi kegelama, aga dali te piali dao. Tama tialima, te we te bidigo we bidama, te bidi isibaso tama usu nao. Tama te bidigo te we me sela sąnamo dao. Mu menio.”
DEU 22:30 “Te me, te bidi mego aga ayago we dali penani sę me elamuo. Tiyu, augwaligo aga aya hale ilabuo,” Mosesgo te po wali.
DEU 23:1 Tama Mosesgo po geninama weyu, te po wali, “Tialima, augwaligo te bidi mego sogoli dinama, ma augwaligo agai gasa sese togwai bidi yai baso da, aga te Godigo we bidi hani tomoba pelamuo, augwali deliba sisinama, Godibolo lotu po wabo sogo.”
DEU 23:2 “Tialima, bidi mego te we me dali penani sę elama, tama wai ame naibaso da, teda te wai te Genuai Bidigo we bidi hani tomoba me aselamuo. Tama agai wai hani me, augwali nosali te Genuai Bidigo we bidi tomoba aselamuo, te wąį hani nosali ame neyu, neyu idu gelama, tama hani sibi nogo siba usu nenama, tama te nosali ame nabo bage augwali te Genuai Bidigo we bidi hani tomoba asobo te usu dao, te nosali mu,” wali.
DEU 23:3 “Te Amon hani me Moap hani me, augwali te Genuai Bidigo we bidi hani tomoba aselamuo, augwaligo hani wąį nosali ame neyu, neyu idu gelama, tama hani sibi te nogo siba usu nubosi da, nosali mu, teda augwali te Genuai Bidigo we bidi hani tomoba asomainao.
DEU 23:4 Te tama tiabo page da e tama dao. Da te Isip tagalama asali sogo, augwaligo da nai mawai menio, te wę me da me mawai menio. Tama augwaligo Balam abelama, da Godigo dolomainu yao wabo po omainogo abelai dao. Balam da, te Beorgo ogwa dao, te hanu Petor, te Mesopotemia bulu bidi dao.
DEU 23:5 Tiali goli, Genuai Bidi dago God aga te Balamgo po odobeo, menio. Agai te da dolomainogo wali dwai po dabe, te po te wiegi yai po naga iliyu yai dao, te da tau sabo po nigiliyu yai dao. Magi baso menio. God agai da godolo mu ebaso.
DEU 23:6 Tama tialima, dagego tigidali sogo te we bidi augwali dali abagi dao weyu, dwagi yai bidabo bomai po augwali dali dąų wagimio.
DEU 23:7 Tama te Idom me Isip dabe meba dage dali bidaibao. Tialima, dagego te Idom dabe dali dwai homu me elamo dao. Magi baso meni, augwali te duga deli kaneme dao. Tama me ma, dagego te Isip dabe dali me dwai homu me elamuo, magi baso meni, polobadu dage augwaligo bulude te bulu meni yai bage tiwai tede bidai dao.
DEU 23:8 Augwaligo hani wąįgo waidu gagalasa, augwali te Genuai Bidigo we bidi hani tomoba asobo te usu yaibao,” Mosesgo te po wali.
DEU 23:9 Tama Mosesgo po geninama weyu, te po wali, “Te dage hwįainogo pabo sogo da, tama dagego ami bidi dabe te pesage nigali tede bidibaso me, teda augwali te Godigo gedude dwai nai dabede wi homu yao.
DEU 23:10 E tama tiwai yao. Tiali te bidi me hulide piai madi agai naide aga gasadu wę olo dali pedalai baso da, teda aga te bidibo pesage taga pelama, bulu badu bidigi pomainao.
DEU 23:11 Tama aga pio wę bugagia paulama, tama pio giliga iba dega sainogo ebode aga te bidibo pesageba ma asomainao,” wali.
DEU 23:12 “Te ami bidi dabego poi tabo pesage me di tabo pesage bidibo pesage bulu badu deli madi naga elalumainao.
DEU 23:13 Tama te ami bidi dabego te ni dage me deli augwaligo sabiliyu emainao. Tama augwali di tainogo da, augwaligo te ni dagego tǫ dogolama, di telama, tama ma halumainao.
DEU 23:14 Genuai Bidi dago God tigidali sogo dage dali te kem nigilama bidibo pesagede bidaibao. Te dagego te boi bidi aiyaba elalumainogo tau siyu bidaibao. Tama tiyu, dage bidibo pesage agai gedude wiegi yai mu elalumainao, te tigidali sogo. Dagego Godigo gedude meda yai sę me deli elamo dao. Tiyu, Genuai Bidigo dageba tudi ola maiabuo,” wali.
DEU 23:15 Tama Mosesgo po geninama weyu, te po wali, “Tialima, te olo sę bidi me deli aga te dage Israel dabego tǫ bulu badu bidiyu, tama aga tonalubo bidide wi pelama, tama aga dageba aselama, aga tau somainogo hanalu wagasobaso da, teda dagego aga ma tagala paligio.
DEU 23:16 Tialima aga dagego hanu me deliba bidigi painogo ebaso da, te usu dao, aga bidigi pomainao. Tama dagego agaba dwai sę me elamo dao.”
DEU 23:17 “Dage Israel dabe, dage te Israel hani isąwai we bidi dabego tibo godigo lotu bede penani we penani bidi gagalamo dao.
DEU 23:18 Me, te penani sę elama sai mone te Godigo lotu beba sela aselamo dao. Te habu mu dao. Dagego agabolo dąų wali po me deli usu nainogo eyu, te Genuai Bidi dago God agai beba seselamo dao. Agai te niwai we ma bidigo te tobage kolesaga ebode agai dwai homu mu ebo dao,” te po wali.
DEU 23:19 “Tialima, dagego duga abagigo dagego mone negeli sainogo elama da, teda dagego te monede ugwadu gasa mone me daganama selamo dao. Tialima, augwaligo tubo naide negeli sobaso, me o gasa meba nai dabede negeli sobaso da, teda dagego te negeli yali nai wei ponama, gasa ugwadu me dagana ma mao po olamo dao.
DEU 23:20 Tialima, dagego gasa hani mego dageba negeli somainu yai da, te Israel hani isąwai bage, teda dagego augwalide te ugwadu daganabo mone sagameo. Tiali goli, duga abagi solo mu da, te Israel hani bagede, me tilamo. Menio. Dagego te bomai po wali pelama, tama Genuai Bidi, dago God, agai dagego te ebo sę dabe sese tama wiegi yai mu ilaibao, te dage megi te bidigi painogo ebo te tǫde tama tiaibao.”
DEU 23:21 “Tialima, dagego Genuai Bidi dago God agabolo po me deli dąų olama wai baso da, teda dagego te po polo usu nao. Teda Godigo dagego dąų wali te po gegeda pogobeo, tama dagego te dąų wali te po usu nisąma ebaso da, teda Godigo gedude sęgę saibao.
DEU 23:22 Me ma, dagego Genuai Bidiba po me dąų wasiąma yali da, teda dagego sęgę me sogobeo.
DEU 23:23 Tiali goli, dagego duga digi duga homugo Genuai Bidiba po me dąų walai baso da, teda dagego te dąų wali te po wali pelama, tama mu tama yao,” wali.
DEU 23:24 “Tama dagego duga abagi dedego wain gidu nogegi soayu da, teda duga homugo te wain du meba selama tuiąo. Tiali goli, dagego te du hauwa wade bulama, sela pelamo dao.
DEU 23:25 Ma, dage duga abagigo wit gidu nogegi peyu da, teda wit ge dagego nogogo gugudu piagameo, tama dagego tuiagameo. Tiali goli, dagego te wit hauwa sarip hwągo togolamo dao,” Mosesgo te po wai.
DEU 24:1 Tama Mosesgo po wadolama ma weyu, te po wali, “Tialima, niwai bidi mego we saibaso da, tama nosali agai gedude te wego te dwai sę yali homu gegebaso da, tama agai te we godolo isąma ebaso da, teda agai te webolo pas asęnama, menama, tama agai te we aga sela sąnama pomainao.
DEU 24:2 Tama tiali goli, te we aga gasa bidi ma pobaso da,
DEU 24:3 tama nosali te bidigo me te we godolo isąma ebaso da, teda agai me te we sela sąbo pas asęnama, te webolo menama, tama te we sela sąwai dao. Ma, te wego nosali pali te bidi isibaso da,
DEU 24:4 teda aga hasia tagalali bidigo te we ma sogobeo. Menio. Te bidi aga digi koneao, te we te bidi aga gedude meda yai dao, te po konemainao, tama agai te ma selamo dao. Ma, te bidigo te we aga ma sobaso da, teda Genuai Bidigo te tobage kolesaga godolo me egobeo. Tama tialima, Genuai Bidigo dage mawainogo ebo te tǫba dage bidigi pabo side, dagego te tobage dwai kolesaga tede me elamo dao,” Mosesgo te po wali.
DEU 24:5 Tama Mosesgo po meba ma weyu, te po wali, “Tialima, bidigo we tamadi sobaso da, augwaligo aga te ami sęba o gavmanigo meba genuai sęba tagala palamo dao. Menio. Aga te bulu badu olo bidibadi, kibu be deli bolo emainao, tama aga we dwagi yai homu pemene ilimainao.”
DEU 24:6 “Tialima, dagego gasa bidigo dage negeli emainogo tagaliyu da, tama dage agai magi nai me momainogo homu eyu, o te negeli yali nai begelebao homu yabo nai me deli momainogo da, teda dagego agai wit bo palubo te masigi me selamo dao. Tiyu, dagego agai sę ebo nai sela sąyabuo. Tama te bidi aga tuabo nai dola muabo menia sabuo.”
DEU 24:7 “Tialima, te bidi mego aga abagi Israel hani bidi me deli wi selama, tama aga olo sę emainogo tola sai baso da, ma agai te gasa bidi mego te wi sali bidi abelemainu elama, tama te abagi te bidigo olo sę ebo bidi pedelemainogo ebaso da, teda dagego te tobage kolesaga ebo bidi elama, isilao. Tama tiyu da, dagego te tobage dwai kolesaga dage tomode sela sąwaibao,” wali.
DEU 24:8 “Tialima, te keni dwai dagego tigide olo dali pedalobaso da, teda dagego te pris, te Livai dabe, augwaligo wabo tigidali po wali piąo, te dagebolo wabo po dabe. Dagego eno augwalibolo mani te bomai po tigidali wali piąo.
DEU 24:9 Dagego te Genuai Bidi dago Godigo te we Miriam dali polobadu yali te kolesaga kone palao, dago te Isip taga solama, asali sogo,” wali.
DEU 24:10 “Dagego duga abagigo dageba negeli emainogo sula tagaliyu da, tama agai te negeli mu wei ponaibao po dąų omainogo eyu, aga doado bage nai me deli nagebolo osogo mawaibao wali. Tama tibo da, teda dagego aga be tomoba pelama, tama te nai sigi pelamo dao. Menio.
DEU 24:11 Dage bulu badu tonalubadi, te bidi aga digi te nai buluba sela asomainao.
DEU 24:12 Tialima, aga nai meni yai bidi mu yai baso da, tama agai moni name ugwa te agai negeli yali te nai osogo mabogo te mu wei ponaibao po dąų olama mobaso da, teda dagego nogo tusiąbadi do sabolao.
DEU 24:13 Dagego aga pageba ma giliga dega sabode sela pao. Teda aga pibo sogo banua pimainao, te pibo sogo. Tama tiyu da, te bidigo dagebolo agai buba hwi po waibao, tama me Genuai Bidi dago God agai dagego kolesaga godolo mu yaibao,” wali.
DEU 24:14 “Tialima, dagego sę bidi aga nai meni yai baso da, teda dagego aga dali dwai sę me elamo dao. Te aga duga abagi Israel hani bidi yai baso, me o gasa hani bidi dagego hanuba bidagasai me,
DEU 24:15 dagego aga sę yali pe te tigidali sogo pio abeliyu yao, te aga te yali sęde. Aga mone habuge ebaso, tama agai momainogo tonaluyu te ebao. Te dagego aga pe masiąma yali da, teda agai Genuai Bidiba gela obaso da, dage Godigo gedude sęgę pedelama elaluaibao,” Mosesgo te po wali.
DEU 24:16 “Tialima, te niwai bidi mego dwai sę yaibaso da, teda dagego aga ida ayaba te sę wei ponamo dao, tama augwali si elama, isilamo dao. Te tiwai naga, te aga ida ayago dwai kolesaga yaibaso da, dagego te augwaligo wai puluba me ela munamo dao. Dagego te dwai kolesaga yali bidi deli digi naga ela muao,” wali.
DEU 24:17 “Dagego te gasa hani bidi me, o te tiana wai puluba, te tobage bomo meni yai bage augwali dali dwai kolesaga me elamo dao, tama augwaligo nai dabe me anoma elama, selamo dao. Tialima, te we me aga bidi isai wego dage dali negeli yaibaso da, teda dagego agai nai wei ponaibao wali po dąų walabo nai siyu, aga ugwa selamo dao.
DEU 24:18 Magi baso meni. Dagego te dage Isip bulude te olo sę ebo bidi dabe dwai madi bidali sogo yali, te kone paliąo. Genuai Bidi dago God agai dage wiegila olo bidimainogo iliyu, dage ma dobola sali, te koneiąo. Dage me te sogo te dwagila mu bidai dao. Tama tialima, eno dagebolo te bomai po te mobao,” Mosesgo te po wali.
DEU 24:19 “Dagego gide wit nai togolama muai te sigi pelama, tama meba gegeda peyu, taga soai baso da, teda dage ma pelama, ma selamo dao. Dagego te oliv du me, o te wain bono du me, te hasia pelama, sisinama, saibaso da, teda dagego si sogo ma pelama, te ni du dabe te nide elaluali ma sigi pelamo dao. Dagego te wit me oliv du me wain bono du te elalumainogo sula tagalao, tama te gasa bulu bidi hani ebadi, me te wai puluba aga aya isai, me we aga bidi isai, te wilawe we, te bage augwaligo te nai tagalali dabe somainao. Tama tiyu da, Genuai Bidi dago God aga dagego ebo tigidali sę dabe tau selama, wiegi yai mu pedelemainogo yaibao.
DEU 24:22 Dagego te dage Isip bulude olo sę bidi bidiyu, dage dwagila mu bidali, te dwai sogo bidali koneiąo. Tama tibaso, eno dagebolo te bomai po megi te mobao,” Mosesgo te po wai.
DEU 25:1 “Me sogo dage Israel dabe bidi si te jas pageba pelama, wado po wali dodoligi peyu pelama, tama jas te po tų ebo bidigo te po dodola suali madi te bidi me deligo te sęgę sai suaibao, tama mego te sęgę meni yai suaibao.
DEU 25:2 Tama tialima, te po tų odobo jas bidigo te po obaso da, te sęgę elalubo bidi augwaligo bidi elebo bį selama, te bidi tudi ela obaso da, teda te bidi te bet saiba piao olama, augwaligo aga te aga dwai sę yaliba usu nama tama elao, te jas bidigo gesabidide.
DEU 25:3 Tiali goli, agai dwai sę mu yai baso da, te dąį me elalubo, augwaligo aga te bidi sese si olama tama naga elemainao. Tiyu, augwaligo te 40 edelama, aga hauwa sogo mu elebaso, aga hale mu yabuo, te we bidi hauwa gedude. Te dolo menio,” wali.
DEU 25:4 “Te dagego kau kibugo te wit ge agayu, te bo tama sela sąbo sę edubadi, tama dagego aga penane paninamo dao, agai te wit ge meba tumainao,” wali.
DEU 25:5 Tialima, Mosesgo po wadolama ma weyu, te po wali, “Tialima, aga ama name si deli tǫ pedai badu bididuama, tama aga ama mego wai ogwa me ame nisąma, tama aga isibaso da, teda te bidigo we te gasa bidi hani dali me pelamo dao. Menio. Te isali bidi aga amago te we somainao.
DEU 25:6 Tama gomunai ogwa te wego ame nobaso da, teda augwaligo te isali amago wai dao po waibao. Tama tiyu da, te isali bidi agai hani sibi nogi da Israel hani tomode hagasiąwaibao.
DEU 25:7 Ma, te isali bidi aga amago te we sabo hagela ebaso da, teda te we te po tų ebo madiba pelama, te tobolu bidi dabe sugi pelama, te po wagi pao, ‘Te eno bidi aga amago te bomai po wali pabo hagela yalio,’ po wao. ‘Agai ena selama, tama wai ame nenama, tama aga amago wąį pedelemainu ebo hagela yalio. Tiyu, agai amago wai hani da Israel hani tomode menia sabuo,’ tama po wao, te wego.
DEU 25:8 Tialima, te hanude tobolu bidi dabego te bidi i olama, aselama, tama te bidi dali po dodolomainao. Tama tialima, agai te we sabo hagela me ebaso da,
DEU 25:9 teda te bidi isai wego aga salego sągą su me deli sela sąyao, te tobolu bidi dabego geduba sabolama tiao, tama agai gesabidiba pesą sąyao, tama te po wao, ‘Dago te tobage kolesaga te bidigo aga ama tau selama, aga amago wai dalabo homu isąbo bidi dolo te tobage kolesaga ebo dao,’ po wao.
DEU 25:10 Tama dage Israel dabego te bidigo we wai dabe nogi te augwaligo agai sągą nadoba pisiga sąwai bidigo wai puluba hani dao po waibao,” wali.
DEU 25:11 Mosesgo po geninama weyu, te po wali, “Tialima, te bidi si hwįbadi, te bidi me aga wego aga bidi tau selama tama me bidigo sogoli kegebaso da,
DEU 25:12 teda dagego te we hobede me elamo dao. Agai nogo togolama, sąyao.”
DEU 25:13 “Tialima, te we bidi dabego dagego nai dabe abelagasobaso da, teda dagego te nai meba ma buga selamo dao.
DEU 25:15 Dolo tama mao. Tama tiyu da, dage e tǫde bobobage sogo bugagia bidaibao, te Genuai Bidi dago God agai dabolo mawainogo ebo te tǫde.
DEU 25:16 Godigo te tibo kolesaga ebo bidide dwai homu mu ebo dao,” Mosesgo te po wai.
DEU 25:17 Tama Mosesgo po geninama ma weyu, te po wali, “Dagego te Amalek dabego dage Isip bulu tagalama asobadi yali dwai sę koneiąo, te gegeda pigimio.
DEU 25:18 Augwaligo God dali wi me ebo menio. Tama tiyu, augwali tudi badu aselama dage dali hwįagasali. Dage meba te dili telega elama dobadi, te pabo usu isąbadi, tama augwaligo te bidi dabe te omagia polo pabo usu isąma nosali asali bidi dabe augwaligo elama muai dao.
DEU 25:19 Tama tialima, Godigo te bulu dagebolo mabo sogo tama bugagia bagulama, tama boi bidi dabe pąde bidalubo bagego dage me dologobeo. Teda dagego Amalek dabe tigidali elama isilao. Tama tilama da, te bidi dabego augwali kone me egobeo. Dagego te tama tiyąo. Dagego munu me gegeda pelamo dao,” Mosesgo te Israel dabebolo te po wai.
DEU 26:1 Tama Mosesgo po geninama weyu, te po wali, “Nosali dage Genuai Bidi dago God agai mawainogo ebo te tǫba sabolama, bidiyu da,
DEU 26:2 teda dagego te bulude hasia inabo gide nai dabe sabo sogo, dage deli deligo te Genuai Bidibolo magasao. Tama te basket wade bulama, tama Godigo sa munama elaluabo te pesageba selasa pao.
DEU 26:3 Dagego te ofa ebo tonalubo pris bidi bidibo pesageba te pris bidi te sogo bidibo bidi pageba sela pao, tama agabolo te po wao, ‘Megi da, eno mu koneani, Genuai Bidi nago God agai te dąų wali te po mu tama te pedelali dao, tama agai dago wąįbolo da mawaibao wali te tǫba da agai odasa asai dao,’ te po wao.”
DEU 26:4 “Tialima, te pris bidigo te basket wa nai dagego nogode selama, tama agai Genuai Bidi dago God agai alta pąba mugi paibao.
DEU 26:5 Tialima, Godigo gesabidide dagego e tama po wao, ‘Eno wąį da, te aga te Aram bidi dao, tama aga page bulu mu tagalama, subigila bilai dao. Tama nosali aga we wai puluba selama, augwali Isip buluba bidigi pai dao. Augwali te Isip buluba pali sogo, augwali te dwasianu hani naga dao. Tiali goli, augwali genuai hani mu pedelama, tama augwali boma pai hani mu pedelalio.
DEU 26:6 Te Isip dabego da selama, tama da dali dwai sę elama, dene menama, tama da te olo sę ebo bidi tiwai nigimainogo ilali.
DEU 26:7 Tama tibaso, dago te Genuai Bidi, dago wąį dabego God, dago aga i wali, te da tau somainogo. Agai dago gela wali odali, tama me agai suali, dago tigide dene ebo, me bomai sę dabe, me dwai sogo dade posobo me agai suali.
DEU 26:8 Tama tialima, Godigo genuai bomai sę mu yali, da te Isip bulude ma dobola sainogo. Godigo gasagi yai boma pai sę dabe elama, tama haniani dwai sę augwalide pedalomainogo ilali.
DEU 26:9 Tama agai da odasa aselama, tama agai da e wiegi yai ili yai tǫ da mani.
DEU 26:10 Tama tialima, Genuai Bidi, eno te nago enabolo mani te tǫde hasia inawani nai megi nage e sesali dao,’ te po dagego wao.” “Dagego po ola silama da, dagego te nai basket wa te Godigo gesabidiba pąba muagasao. Tama te pesagede lotu po wao.
DEU 26:11 Tama dagego Genuai Bidi dago Godiba wiegi yai homu pemene iyąo, te aga wiegi yai sę dagebolo me duga haniba yali pode. Tama te Livai hani, me te gasa bulu hani bidi dage tomode bidibo me, dage dali wiegi yai homu pemene emainogo yao, te dage dali deliba sisinama.”
DEU 26:12 “Te tigidali kibu be sela wabode, dagego duga gide nai sesao, tama nogo si tama 10 bugulama wialao. Tama dagego te nai pesage me deli te Livai hani dabebolo mao. Me te gasa bulu bidi hani dage dali bidibo, te hani sibolo te nai mao, me te tiana wai pulubabolo, me te wilawe we dabe, te bagebolo te bugulali nai pesage me deli dobola mao. Tialima, dagego tama tiyu da, teda te we bidi nai usu elama mu bidaluaibao. Dagego te sę dabe elama, silibo sogo da,
DEU 26:13 teda dagego Genuai Bidi dago Godiba te tama po walao, ‘Tigidali nai eno nagebolo momainu yali, te nai dabe sese eno nagebolo mani dao. Te eno polo dobola silama, tama eno bede me munalubeo. Eno te nai dabe te Livai dabebolo mayu, te we bidi gasa hani bulu we bidibolo mayu, me te tiana wai puluba mayu, me te wilawe we dabebolo mayu, ela silai dao. Eno nago po tigidali sese wali pela silalio. Eno nago po sela sąyu o gegeda peyu me ebeo. Mu menio.
DEU 26:14 Eno bidi isali sogo gela wali sogo eno nago nai dali me tuai menio. Te ena nago gedude meda yai bidali sogo, eno te nai dabe eno be buluba pali me eno me selama, tuai menio. Tama eno meba selama, te isai bidiba ofa me yai menio. Genuai Bidi, eno God, eno nago naga te nai dabego nago enabolo yao wali, te sę dabe dolo tama yai dao.
DEU 26:15 Nage naga wiegi yai bulu dagalude bidiyu, tama eno homugo nago da Israel dabeba eba tonama, dabolo wiegi yai sę yao. Tama te tǫ wiegi yai ili hauwa yai, te tǫ nago dabolo mani tǫ wiegi yai ilao. Te naga digi dago wąį dabebolo mawaibao wali gilama tama,’ te tama po wao,” Mosesgo te we bidibolo te po wai.
DEU 26:16 Tama Mosesgo po geninama weyu, te po wali, “Megi da, Genuai Bidi dago God agai te po wali, dagego agai tigidali bomai po wali pao po walio. Tama tialima dage godolo mu elama, tama homu dąų olama, mu te bomai po wali pabo homu yao.
DEU 26:17 Megi da, dagego haninama te po wali dao, Genuai Bidi da, te dagego God dao, te po wali dao. Tama dagego agai tigidali po dabe me agai tigidali bomai po wali paibao po duga polo dąų wali dao. Tama me, agai tigidali ya wali sę dabe po me yaibao wali.
DEU 26:18 Tama megi da, Genuai Bidigo dage aga we bidi mu tiwai te sali dao, te aga digi dagebolo wali gilama. Dage da, te agai dila pai wiegi yai nai mu tiwai dao. Tama agai dagebolo agai tigidali bomai po wali piąo po te wali dao.
DEU 26:19 Agai dage hani bidi geninama mu pedelemainogo yaibao, te tigidali agai e tǫde nigali we bidi hani edelama, mu elaluaibao. Tama augwaligo dagego wiegi yai kolesaga sulama, tama augwali Godiba genuai nogi mu mawaibao. Tama dage God aga we bidi hani mu bidaiba, te aga te po hasia polo dąų wali gilama,” Mosesgo te po wali.
DEU 27:1 Tialima, Moses de Israel dabego tobolu bidi dabe, augwaligo te Israel we bidi dabebolo te po walali, “Dagego eno megi dagebolo mabo te po tigidali wali piąo.
DEU 27:2 Te dage te Jordan wę nogelama, u badu Genuai Bidi dago God agai dagebolo mawaibao wali te tǫba saboligi pabo sogo da, teda dagego genuai masigi dabe selama, tama simenigo pilao,
DEU 27:3 tama te bomai po dabe sese te simen daide aseąo, te dage te wiegi yai ili hauwa elalubo tǫba saboligi pabo sogo, te dago wąįgo Godigo dagebolo mawaibao wali te tǫ.
DEU 27:4 Tama dage Jordan wę u badu saboligi pabo sogo da, teda dagego te masigi du dabe te bulu du Ebalde duadalao, tama te masigi du dabe te simengo mesesegele pao, te eno megi dagebolo wabo gilama.
DEU 27:5 Tama dagego masigi meba selama, alta nigao. Tiali goli, te alta nigibo bagego te masigi aingo nigai hama haluyu, o togoyu elamo dao.
DEU 27:6 Dagego te masigi augwaligo halisąma yai masigi selama, dagego te alta geselao, te Genuai Bidi dago Godigo alta. Tama te alta delide naga dagego te isigo dela silibo ofa yao,
DEU 27:7 me te God dali haliga tigi deli ebo ofa me yao. Tama dagego te haliga tigi deli ebo te ofa ebo kibu mi te pesagede naga tuao, tama Genuai Bidi dago God agai gesabidide wiegi yai homu pemene iyąo.
DEU 27:8 Tialima, dagego te masigide simenigo pilali te masigi dagede Godigo bomai po tigidali haninama, bugagia mu aseiąo,” wali.
DEU 27:9 Tama tialima, Moses te Livai hani pris bidi dabe dali augwali doligulama, te Israel dabebolo te po walali, “Dage tigidaligo odiąo. Olo bugagia eno po waboba muao. Megi da, dage Genuai Bidi dago Godigo we bidi mu te pedelali dao.
DEU 27:10 Tama tialima, dagego agai po wali piąo. Tama dagego agai bomai po eno megi dagebolo mabo, te po tigidali mu wali piąo,” wali.
DEU 27:11 Tialima, Mosesgo Israel dabebolo te sogo ma walali,
DEU 27:12 “Dage Jordan wę nogelama, nosali te Godigo dage tigidali te wiegi yai ilabo po odainogo dage hani we bidi meba pelama, te Gerisim bulu duba dolalugi piąo. Te da, te Simeon hani, me Livai hani, me Juda hani, me Isakar hani, me Josep hani, Benjamin hani, tama tiao.
DEU 27:13 Tama tialima, meba hani da, augwali te Ebal bulu dude dolo si dolaluaibao. Te da, te Ruben hani, me Gat hani, me Aser hani, me Sebulun hani, me Dan hani, me Naptali hani dao. Tama te Godigo po odobo sogo da, te hani bage augwaligo te po wali pisąbo bagede te dwai dolabo bomai po te po walaibao.
DEU 27:14 Tama te Livai dabego po bomonama weyu, e tama po deli deli te we bidi sesebolo weyu, tama te we bidigo te po deli deliba po wei ponaibao.
DEU 27:15 Te Livai dabego e tama wao, ‘Te bidi mego te tibo god te masigigo nigilama, ma te nigo nigilama, ma aingo nigilama, tama agai geme dualama, tama agai geme teba lotu po odubaso da, teda Godigo te bidi dolaibao. Te nai dabe da, te bidigo digi nigai nai dabe dao. Tama Godigo te tibo godiba lotu po wabo we bidi godolo ebo menio,’ wao. Tama te we bidi sesego te po wei ponoyu, e tama po waibao, ‘Te mu tama dao, Godigo te tama timainao,’ waibao.”
DEU 27:16 “Te Livai dabego ma weyu, tama wao, ‘Tialima, te bidi mego aga ida ayago nogi dolai baso da, teda Godigo te bidi dolomainao.’ Tama te we bidi sesego te po waibao, ‘Mu tama dao. Godigo te tama timainao.’”
DEU 27:17 “‘Tialima te bidi mego aga abagigo tǫ dąį poagasai baso da, teda Godigo te bidi dolaibao.’ Tama tigidali we bidigo te po waibao, ‘Te mu tama dao. Godigo te tama timainao.’”
DEU 27:18 “Te Livai dabego ma weyu, te po waibao, ‘Tialima, te bidi mego me gedu widai bidi kegasa pelama, tama aga sunumi dolo painogo isąma ebaso da, teda Godigo te tobage dwai sę ebo bidi dolomainao,’ waibao. Tama tigidali we bidigo te po waibao, ‘Te mu tama dao, Godigo te tama timainao.’”
DEU 27:19 “‘Tialima, te bidi mego dwai sę te gasa hani bidi dali me, o te augwa aya isai wai puluba dali me, o te wilawe we dabe dali me yai baso da, teda Godigo te bidi dolomainao.’ Tama tigidali we bidigo te po waibao, ‘Mu tama dao. Godigo te tama timainao.’”
DEU 27:20 “‘Te bidi mego aga ayago we dali dwai sę me yai baso da, teda Godigo te bidi dolaibao. Te tama tiali kolesagago aga aya hale dwai mu te ilali dao.’ Tama tigidali we bidigo te Livai dabego te po wei ponoyu te po waibao, ‘Mu tama dao, Godigo te tama timainao.’”
DEU 27:21 “‘Te bidi mego te hasa dabe me penani yai baso da, teda Godigo te bidi dolomainao,’ te Livai dagego te po waibao. Tama tigidali we bidigo te po wei ponaibao, ‘Mu tama dao, Godigo te tama timainao.’”
DEU 27:22 “‘Te bidi mego aga abe dali penani ebo sę yai baso da, Godigo te bidi dolomainao.’ Tama tigidali we bidigo te po waibao, ‘Mu tama dao. Godigo te bidi dolomainao.’”
DEU 27:23 “‘Te bidi mego aga au, te aga wego ida dali penani ebo sę yai baso da, teda Godigo te bidi dolomainao.’ Tama te we bidi tigidaligo te po waibao, ‘Mu tama dao. Godigo te tama timainao.’”
DEU 27:24 “‘Te bidi mego geme gasa bidi me elama, mu isilai baso da, teda Godigo te bidi dolomainao.’ Tama tigidali we bidigo te po wei ponoyu, te po waibao, ‘Mu tama dao, Godigo te bidi dolomainao.’”
DEU 27:25 “‘Te bidi mego te bidi me sęgę meni yai bidi ela muabo mone sai baso da, Godigo te bidi dolomainao.’ Tama tigidali we bidigo te po waibao, ‘Te mu tama dao, Godigo te bidi dolomainao.’”
DEU 27:26 “‘Te bidi mego Godigo bomai po wali pisąma yai baso da, teda Godigo te bidi dolomainao,’ te Livai dabego te po waibao. Tama te we bidi sesego te po wei ponoyu, te po wao, ‘Te mu tama dao. Godigo te bidi dolomainao,’ tama po wao,” Mosesgo te po wali.
DEU 28:1 Tama Mosesgo po geninama weyu, te po wali, “Te dagego Genuai Bidi dago God agai po bugagia wali pelama, tama agai bomai po tigidali bugagia wali peyu da, te da eno dage megi e mabo po, teda dagego te tigidali tǫde bidalubo we bidi hani tigidaligo genuai nogi aiyaba elaluaibao. Te agai dagebolo genuai nogi mabo sogo tiaibao. Dagego Genuai Bidi dago Godigo po wali piąo.
DEU 28:2 Dagego Genuai Bidi dago Godigo tigidali po wali peyu da, teda agai dageba e tobage wiegi yai sę dabe pedalomainogo ilaibao,” wali.
DEU 28:3 “Godigo dagego hanu dabe me gi dabe wiegi yai ilaibao.”
DEU 28:4 “Godigo dage wai bǫų dabe hauwa mayu, me gide nai hauwa holomainogo elama, me dagebolo kau kibu hauwa mayu, me sipsip kibu hauwa mayu yaibao.”
DEU 28:5 “Godigo dagego wit gi dabe wiegi yai iliyu, me dage isi ulama tuainogo ebo nai dabe wiegi yai ilaibao.”
DEU 28:6 “Godigo dagego ebo sę dabe wiegi yai pedalomainu yaibao.”
DEU 28:7 “Godigo dagego boi bidi dabe dage dali hwįagasainogo asobode aiyaba elaluaibao. Augwali te sunumi me delidu pedalagasaibao. Tiali goli, augwali sunumi hauwadu wi paibao.”
DEU 28:8 “Genuai Bidi dago God agai dagego ebo sę dabe wiegi yai pedalomainogo elama, tama dagego wit nai dabe genuai mu elama, tama dagego nai mubo be pągąmainu ilaibao. Tama agai dagebolo megi mabo te kantride dage wiegi yai ilaibao,” Mosesgo te po wali.
DEU 28:9 “Te dagego Genuai Bidi dago God agai po wali pali da, tama dagego agai wabo po te sę dagego bugagia eyu da, teda agai dage aga tedali gasagi yai we bidi mu pedalomainogo ilaibao, te agai polobadu dąų wali po wali gilama.
DEU 28:10 Tama tialima, te tigidali tǫde we bidi dabego Genuai Bidi aga digi dage sa munama, aga we bidi mu dolo suaibao. Tama augwali dagede wi yaibao.
DEU 28:11 Tama Genuai Bidigo dagebolo wai puluba hauwa mayu, me kau kibu hauwa mayu, me gide nai hauwa mayu yaibao, te aga digi dagego wąįbolo mawaibao wali te tǫde te gide tama tiaibao.
DEU 28:12 God aga digi tulubage tonalubo dao, tama agai tulubage bugagia tagala palaibao, te tulubage side naga. Tama agai dagego tigidali sę dabe wiegi yai mu pedalomainogo yaibao. Tama tiyu, dagego gasa we bidi hanigo dageba negeli emainogo yaibao. Tiali goli, dagego doado bage usu genuai baso da, dagego augwaliba negeli emainogo me egobeo.
DEU 28:13 Te dagego tigidali sogo eno megi dagebolo mabo te po bugagia wali peyu da, teda Godigo dage tobolu bidi pedelemainu yaibao, te tigidali we bidi hani tomode. Tama augwali te danu tiwai naga bidaibao. Tama dage polasa paibao, dage augwali nosali me biligobeo. Tama tigidali sogo dagego nai dabe hauwa mu elaluaibao, tama dage nosali nai me sǫą pogobeo.
DEU 28:14 Tiali goli, dagego tigidali bomai po wali piąo, dagego deli me geda munamo dao. Mu menio. Tama me dagego tibo godiba lotu po olama, tama dagego augwaligo sę me elamo dao. Te habu kedale mu dao,” Mosesgo te po wali.
DEU 28:15 Tama Mosesgo po geninama weyu, te po wali, “Tiali goli, dagego Genuai Bidi dago Godigo po sela sąnama, tama dagego agai bomai po eno megi dagebolo mabo te po tigidali bugagia wali pisąma eyu da, teda e tama dwai sę dabe dageba pedelaibao,” wali.
DEU 28:16 “Godigo dagego hanu dabe me gi dabeba dwai sę ilaibao.”
DEU 28:17 “Godigo dagego gide wit dabe dolama tagalaibao, me dage tuainogo ulubo nai dabe me dolaibao.”
DEU 28:18 “Godigo dage dali dwai sę elama, tama dagebolo wai bǫų dabe hauwa me magobeo. Tama dagego gi dabe mu dwai mu yaibao, tama te kau kibu me sipsip kibu dabe hauwa me ame nogobeo.”
DEU 28:19 “Godigo dagego tigidali ebo sę dabe dolaibao.”
DEU 28:20 “Te dagego Genuai Bidiba tudi ola menama, dwai sę dabe yali da, teda agai haniani dwai sę dage tigide pedalomainu yaibao. Tama agai dage dolomainu elama, tama dagego ebo sę tigidali geda muyu elama, te nai dabe dolaibao. Tama polo tama dage sese dola silaibao.
DEU 28:21 Tama agai haniani gasi dageba tagala palaibao. Te gasigo dage sese tama agai dagebolo megi mawainogo ebo te sainogo ebo tǫde silibo si tagalaibao.
DEU 28:22 Genuai Bidigo dage haniani dwai gasigo mu dolaibao, tama tigi bǫ dabo me, tigi posolo ebo me, tama agai mu posolai giliga tagala palama, tama bomai wali tagala palama, tama te gide nai sese tama mu dolaibao. Te dwai sę dabe dage tigide me elalubadi, dage isiboba sabolaibao.
DEU 28:23 Tama dage tulubage menia selama, tama dagego tǫ te ain tiwai mu pedalaibao.
DEU 28:24 Tama Genuai Bidigo tulubage hasegelama, bomai wali dali hogomu dali, kemi sane dali tagala palaibao. Te dage sese dolama tagalaboba usu naibao,” Mosesgo te po wali.
DEU 28:25 “Tama Genuai Bidigo te boi bidi dabego dage aiyaba elalumainogo yaibao. Dage augwali dali hwįainogo deli sunumidu paibao. Tiali goli, dage augwalide wi soayu, sunumi hauwadu wi soaibao. Tama te tigidali tǫde we bidigo dagede te sę dabe pedalobo sulama, tama augwali noma dwai mu saibao.
DEU 28:26 Dage isaibao, tama te ba dabe me bulu hasa dabe aselama, dagego tigi tuagasaibao. Tama augwali osalabo bidi mu menia saibao.
DEU 28:27 Tama Genuai Bidigo dili keni dagego tigide emainu yaibao, te agai Isip bageba yali gilama. Tama agai dagego tigide diluai keni dabe pedalomainogo yaibao. Te buluba keni dagego tigide pedelemainu elama, tama dagego kębo sę yaibao. Tiali goli, te gasi usu ma ilabo sunumi mu meni yaibao.
DEU 28:28 Tama Genuai Bidigo dagego homu kolesaga dolama, tama dage gedu widai bidi nigilama, tama dage polomainu yaibao.
DEU 28:29 Te moni giliga tomode mu dage pelama, tama dagego sunumi dabe gege bilaibao, te gedu widai bidi dabego sunumi gegebo tiwai yaibao, tama dagego sunumi gegebo usu egobeo. Tama dagego ebo sę dabe tigidali wiegi yai me pedalogobeo. Tama tigidali sogo gasa bidi dabe augwaligo dage aiyaba elaluama, tama augwaligo dagego nai dabe wi saibao. Tama dage tau sabo bidi me bidigobeo,” wali.
DEU 28:30 “Tiali, dagego bidi mego we odolai baso da, teda te bidigo te we sogobeo. Menio. Te gasa bidigo naga te we saibao. Dagego be sę yaiba, tiali goli dage te bede bidigobeo. Dagego wain gi bulaibao, tiali goli dagego te wain du dagego tugobeo.
DEU 28:31 Duga gedude mu te boi bidi dabego dagego kau kibu dabe elaibao, tama dagego te kibu mu me tugobeo. Tama dagego olo gedugo naga tonalubadi, augwaligo dagego donki kibu dabe selasa paibao, tama dagego augwali ma sogobeo. Tama me augwaligo dagego sipsip kibu dabe sagasaibao, tama dage tau sabo bidi dabe mu meni yaibao.
DEU 28:32 Tama dagego olo gedugo naga tonalubadi yaide, te gasa kantri bidi dabego duga wai puluba dabe selasa paibao. Tama tigidali sogo dage duga wai puluba ma asogowe weyu, tonaluyu yaibao, tama dagego te sunumidu gedu pomonama tonaluyu yaibao. Tiali goli, dage olo dali tonalubadi, dagego gedu olo dali dene yaibao. Tama dagego wai puluba ma oda sainogo dagego magi sę me egobeo.
DEU 28:33 Te gasa kantri bidi dabe, dagego konesiąma yali bidi dabe, augwaligo dagego bomai sę elama bulai gi nai dabe sagasaibao. Tama tigidali sogo augwaligo dage dali dwai sę elama, dage dwai dene mayu yaibao.
DEU 28:34 Tama tialima, dagego te dwai sę dabe sulama, tama dagego homu kolesaga kone mu tųą paibao, tama meba te polobo bidi pedelaibao.
DEU 28:35 Tama Genuai Bidigo dagego sągą dabede dwai keni hauwa pedalomainu yaibao. Tama dili keni dabe dagego tigi sese tamade emainogo ilaibao. Tama te keni olama, tama pedela sabo sunumi mu menia saibao,” wali.
DEU 28:36 “Tama Genuai Bidigo dagego tuni bidi king me, dage me, duga wąį dabe augwali polobadu me pisąma yai kantriba odasa paibao. Tama dage te bulude bidiyu, tama augwaligo tibo godiba dagego lotu waibao, te augwaligo nigo me masigigo nigai godiba lotu po waibao.
DEU 28:37 Tama te bulude dabe Genuai Bidigo dage subigila besela pomainogo yaibao. Tialima, te dwai sę dabe dage tigide pedalobo sulama, te we bidi augwali noma dwai mu saibao. Tama nosali augwaligo dage gisugu dwai menama, tama nosali augwaligo dage posobo po waibao,” Mosesgo te po wali.
DEU 28:38 “Dagego nai hauwa bulaibao, tiali goli manogo tula siliyu, mu menia saibao, tama tiyu dagego dwasianu bugai naga saibao.
DEU 28:39 Tama me dagego wain gi bulama tonaluaibao, tiali goli te muna dabego dolaibao. Tama tiyu dagego wain du selama, te wain wę me nigigobeo.
DEU 28:40 Tama me te oliv ni hauwa dagego tǫde holaibao. Tiali goli, te oliv du tau isąbadi, olo dali tǫba tegaibao, tama dagego oliv wel me nigigobeo.
DEU 28:41 Tama me dagego wai dabe elaluaiba, tiali goli augwali dage dali bugagia me bidigobeo. Te boi bidi dabego augwali sagaselama, tama augwa kantriba sela paibao.
DEU 28:42 Tama me te mano dabego dagego gide nai dabe me ni dabe tigidali dola silaibao,” wali.
DEU 28:43 “Te gasa kantridu asali te dage tomode bidibo bage, augwali genuai bomo siyu, genuai nogi siyu yaibao, tiali goli dage da, dagego bomo dali nogi dali si tulaluaibao, tama dage augwali dologode naga bidaibao.
DEU 28:44 Tama augwaligo mone hauwa elalubaso, dagego augwalide negeli yaibao. Tiali goli, augwaligo dage dali negeli me egobeo. Augwaligo dage tonaluaibao, tama dage te augwali dologode naga bidaibao,” wali.
DEU 28:45 “Te tobage dwai sę dabe me sęgę dagede pedalaibao, te boi bidi dabego dage pobeasa peyu, nogogo tuali gilama, te dage siliboba usu nigi paibao. Magi baso meni, dagego Genuai Bidi dago Godigo po wali pisąma ebaso. Tama me dagego agai dagebolo mani te bomai po tigidali wali pisąma ebaso.
DEU 28:46 Te dwai sę dabe tigidali elalubadi, dagego wai nosali pedalobo bagede me te sę dabe me ela pidu geaibao. Tama gasa we bidi hanigo dagede ebo sę sulama, tama augwaligo Godigo dage dali sębę ebo sueibao.
DEU 28:47 Genuai Bidi dago Godigo dagebolo wiegi yai nai hauwa mawai goli, dagego wiegi yai homu nagame elama, tama te naide bugagia sę yabo homu isąma ebaso da,
DEU 28:48 tama tibaso Genuai Bidigo boi bidi dabe tagala palama, dage dali hwįagaselama, tama dage augwalide sę yaibao. Tama dage nai sili bidaibao, tama dage wę nogonego isaibao. Tama me name ugwa dabe, me ugwa meba dabe, me gasa meba nai dabe habuge yaibao. Tama te boi bidi dabego dage agalama, dage sese dola siliboba usu naibao.
DEU 28:49 Te tama tilama, Godigo bidi hani me deli digibulu mu bulu badu me odasa asaibao, te dagego augwaligo po odisąma yai bidi hani me deli. Augwali dageba te kemodage me hasa ela tuainogo polo asobo tiwai yaibao.
DEU 28:50 Tama augwaligo bidi me hobede me egobeo, te dwasianu wai bǫų o monu dabe yai baso me, tagalao.
DEU 28:51 Tama augwaligo dagego kau kibu dabe, me sipsip kibu dabe, me gide nai dabe, me tigidali wit dabe, me wain, me oliv ni du wel me, augwaligo sese tula silaibao. Tama dage sese tama nasi dwai mu elama, tama dage isaibao.
DEU 28:52 Tama augwaligo hwįnama, tama augwaligo dagego Genuai Bidi dago Godigo mani te hanu dabe tigidali dolama silaibao. Tama te hanu bomai obo dagego te duala sainogo nigali, te hanu obo dabe degaibao,” Mosesgo te po wali.
DEU 28:53 “Te boi bidi dabego te hanu dabe bobegelama selama, hwįdubadi da, dage tuabo nai menia selama, tama dagego Genuai Bidi dago God agai dagebolo mani wai bǫų dabe sese dagego elama, tula silaibao.
DEU 28:54 Tama te sogo da, te wiegi yai nagamea pai bidi, genuai nogi elaluai bidi dabego me augwa wai bǫų elama tuaibao, tama augwaligo wai bǫų mi pedai augwa ama mabo hagela yaibao, o augwa godolo ebo we dabebolo mabo hagela yaibao, o meba te bidigo wai dabebolo me, me magobeo.
DEU 28:56 Tama te wiegi yai nagamea pai we dabe, dage tomode nogi elaluali we dabe me, te augwaligo mone hauwa elama, sawi yai duabo siade dualama, bidi dabego augwali tolasa biliba, te we dabe augwaligo deli te tobage sę naga yaibao. Te augwaligo te boi bidi dabego te hanu bobegelalubadi, te wai me ame nani da, teda augwaligo geme dualama, te wai bǫų elama, te wai be dali tama augwaligo geme tuaibao. Tama augwaligo augwa bidi dabebolo dage mabo hagela yaibao. Augwa godolo mu elama augwa meba wai dabebolo me magobeo,” wali.
DEU 28:58 “Te dagego Godigo tigidali po e bukude elalubo te po dabe sese bugagia wali pelama, tama dagego Genuai Bidi dago Godigo nogi bugagia ugwaba sela musiąwani da, te tama tiaibao.
DEU 28:59 Tama tialima, agai te haniani dwai gasi dabe dageba me, duga wąį dabeba me, te dwai gasi dabe pedelaibao. Tama te boma pai gasi dabe bobobage sogo elaluyu, me sia sogobeo.
DEU 28:60 Tama agai dagebolo te haniani dwai gasi dabe dagego Isip bulude suali, te gasi tiwai yaibao. Tama dage usu ma egobeo.
DEU 28:61 Tama me agai gasa dwai gasi dabe dage tigiba tagala palaibao, tama dage sese tama silaibao. Tiali goli, te gasi nogi te Godigo haniani bomai po dabe elalubo e bukude nogi elalubeo.
DEU 28:62 Dage te hǫ dabe ugwadu elalubo tiwai umabo mu pedalubadi me tagalao, dage sese tama silama, deli deli naga bidaibao. Magi baso meni, dagego Genuai Bidi dago Godigo po wali pisąma ebaso, tama tiaibao.
DEU 28:63 Hasia da, Godigo dage godolo mu elama, dage wiegi yai pedalama, tama dagego nai dabe hauwa elalumainogo ilai goli dao, te dage hauwa pedalama. Tama tiali goli, megi da, Genuai Bidigo dage dolama, silibo godolo mu yaibao. Tama agai dage megi te bidigi painu ebo te tǫde gudulama, sela sąwaibao,” wali.
DEU 28:64 “Te Genuai Bidigo dage subigila teba teba dobola palaibao, te tigidali e tǫba tedela palaibao. Tama te bulude dabe dage augwaligo masigigo me nigo nigai tibo god dabeba lotu po waibao. Polobadu dage me duga wąį dagego te tibo godiba lotu po me wai menio.
DEU 28:65 Tama dage wiegila bidabo madi gasa madi me gegegobeo. Tama dage duga bulu mu meni yaibao. Tama Genuai Bidigo dage homu kone hauwa sogo tųą somainogo yaibao, tama dage homu sęgę elama, tama dagego homugo dage mu tama hagayali dao homu yaibao.
DEU 28:66 Tigidali sogo dage dolobo wi yaibao. Te giligade me, hulide me, dage isibo deli moni homu elama, wi eyu yaibao.
DEU 28:67 Te tigidali nai dabe dagego subo da, dage wi dwai mu ilaibao. Tama tibaso, dagego be posobo si polo pomainogo yaibao. Tama tigidali sogo kigamu dagego te po waibao, ‘Te be polo pio eyu da, wiegi yai yaibao,’ te po waibao. Tama pio da, dagego te po waibao, ‘Te be kigamu polo eyu da, wiegi yai dao,’ po waibao.
DEU 28:68 Genuai Bidigo dagebolo te po wai dao, dage Isip buluba ma pabo usu egobeo po wai dao. Tiali goli, tagalao, Genuai Bidigo dage teba sipidu ma tagala palaibao. Tama te Isip bulude dagego te homu yaibao, te boi bidi dabego dage abelama, tama augwaligo sę emainu yaibao. Tiali goli, augwaligo hagela yaibao,” Mosesgo te po wai.
DEU 29:1 Te Genuai Bidigo Israel dabe dali te kantri Moapde dąų wali po page dabe te e dao. Agai te Israel dabe dali kontrak po dąų wali po wadolama, ma wali, te Sainai bulu dude polobadu wali po.
DEU 29:2 Mosesgo tigidali Israel dabe i olama, sisinama, agai augwalibolo te tama po wali, “Dagego te Genuai Bidigo te Isip king tuni bidi dali yali sę dagego polo suai dao, te aga ofisa dabe dali, me agai bulu tigidali tomode yali sę.
DEU 29:3 Tama dagego gedugo digi te augwali tigide te dwai gasi sali hauwa mu sualio, me te haniani boma pai sę ebo me, te Genuai Bidigo te genuai sę dabe ebo te suali dao.
DEU 29:4 Tiali goli, Genuai Bidigo dagego te sę dabe yali page konemainu sula tagalobeo, tama agai dagego gedugo tonomainu ebeo, tama me dagego ologo te sę yali page odomainogo me tagalobeo. Tama dage tama bida bida asidu gagali, megiba te usu naga sobao.
DEU 29:5 Tama Genuai Bidigo te po wali, ‘Te kibu be bidi sese si 40 eno dage kemi sane buludu odasa pai dao. Tama dagego ugwa dabe me, su dabe me, togwa pai menio. Mu menio.
DEU 29:6 Dagego bret, me wain, me bia me meni yai dao. Tiali goli, eno dage bugagia tonaluai, te dagego bugagia konemai hagede, te ena da Genuai Bidi dao, dagego God dao omainogo,’ wali.”
DEU 29:7 Tama Mosesgo po geninama weyu, te po wali, “Te da te buluba sabolagasali sogo da, te Hesbon tuni bidi king Sihon, me Basan tuni bidi king Ok, augwali si aselama, da dali hwįagasai dao. Tiali goli, dago augwali aiyaba elaluai dao.
DEU 29:8 Tama dago augwaligo tǫ selama, dago Ruben hani de Gat hani, me te Manase hani bugai, augwalibolo dobawai dao,” wali.
DEU 29:9 Tama Mosesgo te po me wali, “Tigidali sogo dagego te dąų wali po wali pao. Tama eyu da, dagego tigidali ebo sę dabe wiegi yai pedalaibao.
DEU 29:10 Megi dage Genuai Bidi dago Godigo gedude dolalubao, dage me, te tobolu bidi dabe me, haniani ofisa dabe me,
DEU 29:11 te we dabe sibi me, wai puluba me, te gasa bulu bidi dabe dage tomode bidibo me, te augwali dage dali bidiyu, dagego isi bagala mayu, me wę tula mayu eyu bidibo.
DEU 29:12 Dage megi ede bidibao, te Genuai Bidi dago Godigo gesi noma kontrak o dąų walobo po sainogo te bidibao, te dage dali dąų walobo po. Tama dagego te po wali paibao po olama, tama te po dąų walao.
DEU 29:13 Tama tiyu da, Genuai Bidigo dage aga we bidi pedalomainu elama, tama aga dagego God bidaibao. Te agai dagebolo dąų waliyu, me duga wąį dabebolo dąų waliyu yali gilama, te Abraham, me Aisak, me Jekopbolo wali gilama.
DEU 29:14 Godigo te kontrak o dąų wabo po da, megi aga gedude megi e dolalubo we bidi dabe da dali naga dąų walobeo. Menio. Agai dago wąį nosali pedalabo wai dabe dali me te ebao. Tama da tigidaligo wali paibao olama dąų wao,” Mosesgo te po wai.
DEU 29:16 “Dagego ma kone palao, dage mena tama te Isip bulude bidai dawe koneiąo. Tama dagego dage te gasa bidi hanigo tǫdu asiyu suali, te nai dabe me kone paliąo.
DEU 29:17 Dagego te mu dwai tibo god dabe augwaligo nigo nigali, me masigigo nigali, me golgo nigali, me silvago nigali, te suali dao. Te tibo god dabe te dwai nai mu dao.
DEU 29:18 Dagego bugagia mu tonaluiąo, te dage megi ede dolalubo we dabego, o bidi dabego, o bidigo we wai puluba deligo me, o bidi wąį ede dolalubo bage, dagego Genuai Bidi dago God agaba tudi me ola maidali weyu, tama te haniani dwai godiba lotu me waidali weyu, te gasa kantri bidi dabego god dabeba. Tialima, dagego te tobage kolesaga eyu da, teda te ni mego bono te ha ebo bono tiwai dao. Nosali agai honu genuai elama, genuai mu igi pabode da, te agai bidi hauwa mu dolaibao.
DEU 29:19 Dage tigidaligo bugagia mu tonaluiąo, te bidi me eno megi ede pusali te bomai po odali bidigo, te bidi me deligo te po sela sąnama, tama aga bugagia bidaibao homu yaibao. Tiali te bidi mego te po sela sąyani da, teda te tialigo dage sese tama dolomainu yaibao. Te wiegi yai bidi dabe me, te dwai bidi dabe dali si tama dolaibao.
DEU 29:20 Godigo te tama bidi dabego sęgę munu me sela sągobeo. Tiali goli, God sębę mu elama, tama isi delama, posolo genuai mu ebo tiwai mu yaibao. Tama te dwai sę dabe te bukude wali te dwai sę dabe te bidi tigide pedalaibao, te sę tama ela ela pidubadi, te Genuai Bidigo aga dolama, silibo siba usu nigi paibao.
DEU 29:21 Tama Genuai Bidigo te bidi deli naga dįą selama, dene menama, tama aga mu doloba usu naibao. Te Genuai Bidigo te tigidali dwai sę aga tigide yaibao, tama aga mu tama dolaibao, te agai e bukude wali gilama, te bomai po bukude wali gilama, agai te kontrak dąų walali po wali pisąma yali bidide te sę yaibao,” wali.
DEU 29:22 “Nosali duga wai nosali pedalobo, me gasa bulu bidi hani augwaligo te dwai sę yali dabe, me te sęgę dabe te Godigo dagego kantride yali suaibao.
DEU 29:23 Te gi dabe dola silama, dwai olo elaluaibao. Tama te tamu me dwai pauda nai salfa, te ni me nosai isilibo nai si te gide pągąna paibao, tama dagego nai me bulabo usu me egobeo. Tama te nosai dabe me te tǫde me hologobeo. Tama tialima, dagego bulu te Sodom de Gomora si tiwai tama yaibao, te Atma de Seboim hanu si tiwai me. Te hanu dabe Genuai Bidigo polobadu dolai dao, te agai wado elama, tama agai sębę dwai mu yali sogo.
DEU 29:24 Tama te tigidali bulu tǫ we bidi dabego hanalua paibao, ‘Magi baso Godigo te Israel dabe augwaligo bulude te tama tialiwe?’ te po weyu, ‘Magi baso agai augwali dali sębę dwai mu yaliwe?’ te po waibao.
DEU 29:25 Tama augwaligo augwa digi po ma wei ponoyu, te po waibao, ‘Magi baso menio, te we bidigo te augwa wąįgo God augwali Isip bulude bidibadi augwali te odasa asali, te Godigo dąų walali po sela sąwai baso da.
DEU 29:26 Te Israel dabe augwaligo tibo godiba lotu wali. Te god dabe augwaligo polobadu lotu po me wai menio. Te Genuai Bidigo augwali te nai dabeba lotu waidali weyu, habu selai dao.
DEU 29:27 Te tama tibaso, Genuai Bidigo aga we bidi dabe dali sębę elama, tama agai e bukude elalubo dwai nai dabe te augwaligo bulude pedalama elalubao.
DEU 29:28 Genuai Bidi moni sębę elama, wado po dwai mu yali. Tama tibaso, agai augwali augwa tǫde sela sąnama, tama augwali gasa buluba dabe tagala palali. Tama megi me augwali te tama bidibao,’ te bagego nosali te po waibao,” Mosesgo te po wali.
DEU 29:29 Tama Mosesgo po geninama ma weyu, te po wali, “Te Genuai Bidi dago God agai dabolo hanilisąma geme duali po meba te elalubao. Awe, te usu dao, te agai sę dao. Tiali goli, agai bomai po dabolo hanilama pusa mani, tama dago nosali ame nabo wąį dabego me, dago me, te bomai po wali tigidali sogo pomainogo yali,” Mosesgo te po wali.
DEU 30:1 Te Mosesgo po geninama weyu, te po wali, “Tialima, megi da eno sunumi si dagego wali peyu yabo magi ilibao. Te me deli da, te Godigo dage dali wiegi yai sę mu yabo, me da Godigo dage mu dolabo. Duga digi koneao, dage mena sunumidu dage wali painogo da. Tama nosali, te dwai nai dabe dageba pedalobode, tama dage te Genuai Bidi dago Godigo dage te tedela palali te gasa bidi dabego bulude bidiyu da, teda dagego eno dagebolo eno te ola mani te sunumi kone palao.
DEU 30:2 Tialima, dage me duga wąį dabe dage homu begelama, tama Genuai Bidi wali mu peyu, tama dagego homu sese dąų olama, tama eno agai bomai po dage megi mabo te bomai po mu wali painogo ebaso da,
DEU 30:3 teda Genuai Bidi dago God agai dage hobede yaibao. Tama agai dage aga digi te dobola palali te bulude dabe ma oda saibao, tama agai dage duga buluba mu ma odasa asaibao. Tama agai dagego tigidali nai dabe wiegi yai ma pedalomainogo yaibao.
DEU 30:4 Te dage digibulu bulude bidali goli, Genuai Bidi dago Godigo dage ma sisinama, ma odasa asaibao.
DEU 30:5 Tama dage duga wąį dabe polobadu bidali tǫde bugagia ma bidaibao.
DEU 30:6 Tama Genuai Bidi dago God agai dage hauwa mu pedalomainu elama, tama nai dabe hauwa mu elalumainu yaibao, te duga polobadu bidali wąį dabe edelama elalueibao. Tama agai dage me duga wai puluba dabe dage homu kolesaga hasegelama, tama gesi noma bidi ma pedalomainu yaibao. Tama dagego agai po sese wali mu paibao. Tama tiyu, dagego duga homugo sese aga godolo mu yaibao. Tama dage te tǫde tigidali sogo mu bidaibao.
DEU 30:7 Tama te tigidali dwai dolabo sę dabe po eno dagebolo wali da, te Genuai Bidigo te dwai sę dabe te boi bidi dabe dage godolo isąma yali bidi dabeba pedalomainu yaibao, me te dage dali dwai sę yali bidi dabeba te dwai sę pedalomainu yaibao.
DEU 30:8 Tiali goli, dagego agai po wali ma pelama, tama agai bomai po tigidali wali me paibao, te eno dagebolo megi mabo te po.
DEU 30:9 Tama Genuai Bidigo dagego tigidali sę dabe wiegi yai pedalomainu yaibao. Tama dagego wai bǫų dabe hauwa mu elama, me kau kibu dabe hauwa mu yaibao. Tama me dagego gide nai dabe hauwa mu holaibao. Tama Genuai Bidigo dagebolo nai hauwa mabo agai wiegi yai homu pemene mu yaibao, te agai dagego wąį dabe dali polobadu yali gilama.
DEU 30:10 Tiali goli, dagego Genuai Bidi dago God agai po wali pelama, tama e bukude elalubo bomai po me tigidali wali piąo. Dage agaba ma aselama, tama aga dagego homugo me homu kolesagago sese mu godolo mu iyąo,” Mosesgo te po wali.
DEU 30:11 “Te po eno dagebolo megi pusa mani po da, te po koneama wali pabo da bomai sę me egobeo. Menio.
DEU 30:12 Te po te ogwa dagalude me elalubeo. Tama ‘Te niwai bidi dagaluba holama, te bomai po sela dulubaso, dago te po odama, wali paibawe?’ te tama po dagego me hanalu obaso, usu egobeo.
DEU 30:13 Tama me ma, te bomai po te tamu wę u badu digibulu elalubeo, tama tibaso dagego me bolo hanalugobeo, ‘Dago te po odama wali pomainogo, de u badu pelama, te bomai po seselama, edaba magasogowe?’
DEU 30:14 Menio. Te po da, duga pagede mu te elalubao, te duga homu tomode, me duga penanede te elalubao. Tama tialima, dage aga koneama, tama agaba haninabo usu dao, tama tigidali sogo dagego te po wali piagameo,” wali.
DEU 30:15 “Tialima suao, eno megi dage sunumi si te ola mobao, te tama tialima, dagego sunumi deli naga wali pali da, dage bidibo ula wiegi yai mu saibao, tama dage tigidali sogo bugagia mu bidaibao. Tiali goli, dagego gasa sunumidu pali da, teda dage dwai dene siyu elama, tama dage isaibao.
DEU 30:16 Megi dagebolo eno po walobao, te dagego God mu godolo elama, tama agai po wali pelama, tama agai godolo ebo kolesaga dabe naga yao. Tama ebaso da, dage genuai we bidi pedalama, tama tigidali sogo dage bugagia mu bidaibao. Tama Genuai Bidi dago God agai dage megi te bidigi painogo ebo bulude dage dali wiegi yai sę mu ilaibao,” Mosesgo te po wali.
DEU 30:17 “Tiali goli, dage tobolu gagea pelama, tama po sela sąyu elama, tama dagego gasa hanigo ili po omainogo sula tagaliyu elama, tama dage augwaligo tibo godiba kidu sugunama, lotu po wagi peyu da,
DEU 30:18 teda dage sese tama mu hagala silaibao. Odao. Eno dagebolo haninama te obao, te dagego po sela sąyani da, teda dagego te Jordan wę u badu sigi pelama, bidigi painogo ebo te bulude dage bobobage sogo me bidigobeo.
DEU 30:19 Tialima, te bugagia bidabo sunumi me, isabo sunumi me, si te elalubao. Te me sunumidu da, Godigo dage dali wiegi yai sę yaibao. Tama te me sunumidu da, dage dolabo sunumi sueibao. Tialima, megi da, dagego wali pabo sunumi sa muao. Tama eno dagalu dali tǫ dali si i olama, tama augwali sigo dagego mena sunumidu painogo sa muaniwe konemainao. Tiali goli, eno homugo dagego te bugagia bidabo sunumi wali piąo, te dage me duga wai puluba dage bidainogo tama tiao.
DEU 30:20 Dagego Genuai Bidi dago God godolo mu elama, tama agai po wali pelama, tama agaba mu homu tigidali sogo kęą peyu yao. Tama tilama da, dage me duga wai puluba dabe me, dage bobobage sogo mu te Genuai Bidigo dago wąį dabebolo mawaibao wali te tǫde dage bugagia mu bidaibao, te Abraham, me Aisak, me Jekopbolo mawaibao olama, po dąų walali tǫde bugagia bidaibao,” Mosesgo te po wali.
DEU 31:1 Te Mosesgo Israel dabe tigidali dali po me weyu, te po wali,
DEU 31:2 “Ena 120 kibu be me bidibao, tama ena dagego polalubo bidi me bidigobeo. Tama me ma, Genuai Bidigo enabolo te po wai dao, ‘Nage te Jordan wę nogegobeo,’ wai dao.
DEU 31:3 Genuai Bidi dago God aga digi polasa pelama, tama agai te bulu badu bidibo bidi hani dolaibao, te agai dage tudiba togolama, polasa peyu. Tama tialima, dagego augwaligo tǫ sabo usu yaibao. Tama Josua dagego polasa pabo tobolu bidi nigaibao, te Genuai Bidigo wali gilama.
DEU 31:4 Tama Genuai Bidigo te hani dolaibao, te agai te Sihon de Ok si dali si augwa sigo kantri dolali gilama tiaibao, te Amor dabego tuni bidi sigo bulu yali gilama.
DEU 31:5 Tama Godigo dage tau selama, tama dagego augwali aiyaba elaluaibao, tama dagego augwali dali eno yao wali te sę sese tama augwali dali yao.
DEU 31:6 Dage dili elama dolalua, dage noma selama, augwalide wi elamo dao. Magi baso meni, Genuai Bidi dago God dage dali bidaibao. Tama agai dage me gegeda pelama, o dage olo bidimainogo me sula tagalogobeo,” Mosesgo te po wali.
DEU 31:7 Tama nosali Mosesgo Josua i olama, asobo si da, tama tigidali we bidi gesabidide agai agabolo te po walali, “Nage dili elama dolaluyu, nage wi me elamo dao. Nage te we bidi nosaliba togolama, tama nage bolo polasa pelama, tama Genuai Bidigo dago wąį dabebolo da mawaibao wali te tǫ sigi pao. Tama selama, nago te tǫ bugulama, tama meba te Israel hani dabe deli deliba dobola mao, te augwaligo Godigo nogode sabo tǫ pedai dabe dao.
DEU 31:8 Genuai Bidi nage tudiba togolama, aga bolo polasa pelama, tama nage tau saibao. Agai nage tagalama, nage dolomainogo te tagalogobeo. Tama tialima, nage noma selama, wi me elamo,” Mosesgo Josuabolo te po wai.
DEU 31:9 Te tama tialima, Mosesgo bomai po sese asęnama, tama agai te Livai hani pris bidi dabebolo, me te Israel dabego tobolu bidi dabebolo mani. Te Livai dabe augwaligo te Godigo kontrak asęani dąų walali po munalubo halobage tonalubo sę ebo dao.
DEU 31:10 Tama Mosesgo augwalibolo te po wali, “Te tigidali kibu be a naga olama si, te 7 kibu be siligi pabo sabide, te osogo bidabo bede bidibo genuai sogo da, teda dagego te bomai po tigidali te we bidibolo neda mao. Te namba 7 kibu be wabo, te kibu be da te negeli yali silibo kibu be dao.
DEU 31:11 Tama te kibu be tomode dagego Israel dabebolo me te bomai po sese nedao, te augwali Genuai Bidi dago Godiba lotu po wagasobode, te Godigo lotu po wabo pesage me deli sa mubo, tede.
DEU 31:12 Te bidi, me we, me wai, me gasa bulu bidi dagego hanude bidalubo sese tama i olama, tama dage sese tama aselama, te po odagameo. Augwaligo odama, tama Genuai Bidi dago God wi eyu, aga dologode bidimainao, tama agai tigidali bomai po bugagia wali pomainogo tama tiao.
DEU 31:13 Dagego te tama tiyu da, teda duga wąį wai puluba augwaligo Godigo bomai po me odisąwai, augwaligo nosali odaibao. Tama augwaligo odama, tama augwali aga dologode tigidali sogo dagego te Jordan wę u badu sigi painogo ebo te tǫde bugagia mu bidaibao,” wali.
DEU 31:14 Nosali Godigo Mosesbolo walali, “Tamadi tama nage isaibao. Tama tialima, Josua i olama, eno ugwa beba odasa asao, tama eno agabolo eno godolo elama agai emainogo ebo sę po ola mawaibao,” wali. Tama tialima, Moses de Josua si te sel ugwa beba pali.
DEU 31:15 Tama Genuai Bidi te bobobage pǫ me te sel ugwa be sunumide elalubo pǫde bidali.
DEU 31:16 Tama Mosesbolo Genuai Bidigo te po walali, “Pąde tama nage isaibao. Tama nosali te Israel we bidigo eno augwali dali dąų wali po togolama, ena tagalaibao, te bidi me aga we tagalama, te penani ebo weba pabo tiwai gilama. Tama tiyu augwaligo ena tudiba togolama, tama augwaligo tibo godiba lotu po waibao, te augwaligo megi sigi painogo ebo te bulude bidiyu tiaibao.
DEU 31:17 Te augwaligo te tama tibo sogo da, teda eno augwali sębę dwai mu yaibao. Tama tibaso, eno augwali tagalama, tama augwali tudi ola mawaibao. Tama augwali mu dolaibao, tama dwai sę dabe hauwa mu augwaliba pedelaibao. Tama augwaligo te po waibao, ‘Te God da dali bidibe yali bogo, tama te dwai sę dabe daba te pedalobo yabao,’ te po waibao.
DEU 31:18 Tama eno te sogo augwali tau sabo hagela mu yaibao. Magi baso meni, augwaligo dwai sę elama, augwaligo tibo godiba lotu wali pode.
DEU 31:19 Tama eno nagebolo balia me deli mawaibao, tama dagego asęao. Tama nago te Israel dabebolo te balia ola mao. Tama tialima, te balia pogo augwali nosali po tų ela mawaibao.
DEU 31:20 Eno augwali te wiegi yai buluba odasa painogo ebao. Te agai tǫ ili hauwa elalubo, te eno augwaligo wąį dabebolo po dąų walali gilama tama. Tama te bulude da, augwaligo nai hauwa mu saibao, tama augwali wiegila mu bidaibao. Tama tialima, te tama tibo sogo augwaligo ena tudiba togolaibao, tama tibo godiba lotu po waibao. Te augwaligo eno dąų walali po togwaibao.
DEU 31:21 Tama nosali haniani dwai sę dabe augwali tigide pedalaibao. Tama te Israel dabe augwali te dwai sogo bidibo bage augwaligo te balia po gegeda pomainogo egobeo. Te augwaligo te balia po me odubadi geaibao. Tama te balia po augwaligo augwa yali dwai kolesagade homu hogodolaibao. Eno augwali te mawaibao wali te kantriba odasa pisąbadi goli, tiali goli eno augwaligo homu kolesaga polo koneanio,” Genuai Bidigo te po wali.
DEU 31:22 Te sogo tama Mosesgo te balia po asęnama, Israel dabe ola mani.
DEU 31:23 Tama tialima, Genuai Bidigo Nungo ogwa Josuabolo te tama po walali, “Nage dili elama dolaluyu, tama nago magi naide wi me elamo dao. Nago te Israel dabe odasa, eno augwalibolo mawaibao wali te buluba pao. Tama ena da, ena digi nage dali tigidali sogo bidaibao,” wali.
DEU 31:24 Te tama tialima, Mosesgo Godigo bomai po dabe tigidali buku me delide asęna silali, tama me deli me tagalobe.
DEU 31:25 Agai asęna silama, tama agai po me deli Livai pris bidi dabe dali wali, te augwaligo Godigo kontrak dąų walali po munalubo halobage tonalubo bage. Te augwalibolo te po walali,
DEU 31:26 “Te Genuai Bidi dago God agai bomai po elalubo buku selama, tama te kontrak munalubo bokis pąde muao. Tama aga te pesagede munalumainao, tama te Godigo we bidi po tų ela mayu emainao.
DEU 31:27 Magi baso meni. Eno koneani, augwali tobolu gagea pelama, po sela sąbo we bidi dao. Megi ena bidibadi, augwaligo Genuai Bidigo po sela sąnama, tama agai bomai po bolobo dao. Tiali goli, ena mu isibo si da, teda tegoba, teda eno homugo te augwaligo dwai kolesaga genuai mu pedalaibao.
DEU 31:28 Tama tialima, te tobolu bidi dabe me te tigidali hanigo ofisa bidi dabe ena pąba sisinagasa po i wao. Eno te balia pogo po augwalibolo mawaio. Tama eno dagalu dali tǫ dali i olama, tama augwaligo eno te po dagebolo mabo sumainao.
DEU 31:29 Eno koneani, ena isai digi dage we bidi dwai mu pedelaibao, tama eno dagebolo mani po me wali pogobeo. Te dagego dwai kolesaga hauwa mu yaibao. Tama dagego Genuai Bidi sębę mu ilaibao, tama agai dageba dwai sę dabe mu pedalomainu yaibao,” Mosesgo te Livai pris dabebolo te po wali.
DEU 31:30 Tama tialima, Mosesgo te balia pogo page tigidali pusa mani, tama Israel dabe tigidaligo te po odali. Agai te po wali,
DEU 32:1 “Dagalu dali, tǫ dali, dage sigo eno po odao. Eno wabo poba bugagia olo munama, odao.
DEU 32:2 Eno pogo te dage we bidi bugagia sę mu ilaibao, te tulubage tulama, tama te nosai dabe bugagia holobo tiwai yaibao. Eno pogo da, te tulubage tulama, tama te tubo nai dabe hogodo gesi ma holama, dila pelama, tama genuai ebo tiwai yaibao.
DEU 32:3 Tama tialima, eno Genuai Bidigo nogi ugwaba saibao, tama dagego agai nogi haninaibao.
DEU 32:4 Dago God te tama tigidali sogo bidibo dao. Aga da, te genuai masigi me tiwai dao, te me hasegelisąwai masigi tiwai dao. Tigidali sogo agai aga po wali pabo dao, tama agai ili po me wabo menio. Tama agai kolesaga da, wiegi yai mu elama, doloba pai mu dao.
DEU 32:5 Tiali goli, dage Israel we bidi, dage te tiwai menio. Dage da, ili po wabo we bidi dao. Dagego po hasegeliyu, te dąų wali po boliyu ebo dao. Dage dwai sęgę sabo we bidi dao. Tama tialima, dage Godigo wai puluba hani me bidigobeo.
DEU 32:6 Tiali goli, God dagego aya dao. Agai dage sese tama nigai dao. Tama agai dage we bidi hani deli pedalomainu ilai dao. Tama tialima, dagego magi baso te dwai kolesaga agaba ebawe? Dage polobo bage, dage homu kolesaga mu meni yai dao.”
DEU 32:7 “Dagego te polobadu pedelali sę dabe kone palao. Duga aya dabebolo mena sę dabe yai dawe po hanalu wao. Tama me polo monu dabebolo polobadu yali sę dabe po pusumainogo hanalu wao.
DEU 32:8 God ogwa dagalu bidi, aga digi te tigidali we bidi hani bidabo pesage dobola menama, tama augwali bidabo digi dąį elama, mawai dao. Tama hasia bolo agai te Israel dabe nedama, augwaligo namba wali pelama, tama augwaligo tǫ dąį elama, tama tebogo gasa hani we bidi bidabo digi nosali dąį ilai dao.
DEU 32:9 Tiali goli, agai Jekopgo hani sa munama, aga digi augwali tonalumainogo yai dao.
DEU 32:10 Te Israel dabe augwali polama, augwali subigila bilaluali, te masigi kemi sane dwai bulude, me te wali genuai ebo bulude bilali. Tama Genuai Bidigo augwali gegelama, augwali oda selama, tama augwali tau sali. Tama agai augwali tonaluali, te aga digi aga tonalubo tiwai yali.
DEU 32:11 Godigo Israel dabe bugagia tau selama, tama te Israel dabe augwali me dolobeo, te ba kemodagego aga wai bola pomainu ola mabo tiwai yali. Tama te ba gǫų tulaluainu ebode, te kimi ba aga dologo badu polo pelama, tama aga bogogo sabua sabo dao, tama te ba gǫų dolobo menio.
DEU 32:12 God deligo tama aga we bidi sunumi ola mabo dao. Tama augwali gasa bulu tǫde tibo godigo augwali me tau sabeo.”
DEU 32:13 “Godigo augwali sula tagalu, te bulu du dabe tonalumainu ilali, tama te gide bulali nai dabe te augwaligo sela tuyu yali. Tama augwaligo te pusu nai te hani bunu ge te masigi dedagede sela tuyu yai dao. Tama me augwaligo oliv ni bugagia holali, te masigi hauwa yai tǫde.
DEU 32:14 Augwaligo kau kibu dabe, me meme kibu dabego ame pę hauwa augwaligo sali. Tama augwaligo kau kibu, me sipsip kibu, me meme kibu dabe moni bage mu nisali. Tama augwaligo wit me wain dabe wiegi yai mu holali.”
DEU 32:15 “Te Genuai Bidigo we bidi augwaligo nai dabe hauwa mu sali. Tiali goli, augwaligo aga dali dwai hagoma sę yali. Augwali nai hauwa sogo mu tulama, tama augwali genuai bidi dabe mu nisali. Godigo augwali nigilali, tama aga bomogo augwali ma oda sali. Tiali goli, augwaligo aga tudiba togolali, tama aga tagalali.
DEU 32:16 Augwaligo tibo godiba lotu po weyu yali. Tama augwaligo te dwai kolesagago Genuai Bidi sębę ilama, tama augwali dali wado yali.
DEU 32:17 Augwaligo bulu howa bidiba dabe ofa eyu yali, te augwaligo polobadu lotu wasiąma yai. Tama augwaligo gesi god dabe wali pali, te augwa wąį dabego polobadu dologode elalusiąma yai goli. Te tobage nai dabe te god mu menio.
DEU 32:18 Augwaligo bomai God, augwali nigali God da, gegeda palali.”
DEU 32:19 “Tiali, Godigo aga wai dabe augwaligo te dwai kolesaga ebo sulama, aga sębę elama, tama augwaliba tudi ola mani.
DEU 32:20 Tama agai te po wali, ‘Te we bidi augwali tobolu gagea pelama, tama augwali ena wali asobeo. Te dwai sęgę dabe augwaliba pedalobadi, me tagalao, eno augwali me ma tau sogobeo.
DEU 32:21 Augwaligo tibo god dabe wali pabo, teda augwali olo nai mu dao. Tama augwaligo te dwai kolesagago ena sębę elama, augwaliba wado homu emainu yali dao. Tama tialima, eno te bidi hani me deli, augwali nogi meni yai hani, te olo nai tiwai o augwali polobo bidi dabe tiwai, tama augwali eno tagala palama, tama te Israel dabe haliga tigi dolomainu elama, wado emainu tagala palaibao.
DEU 32:22 Tama te sogo eno sębę te isi bogoli tiwai elama, tama tǫde nai dabe tigidali mu ulaibao. Te sębę te tǫ aiyadu dologodu paibao, te isai bidi dabego buludu paibao. Tama agai te bulu du dabe dolalubo masigi du dabe isi ulaibao.’”
DEU 32:23 “‘Eno te dwai sę dabe te Israel dabe augwalide pedalomainu yaibao, te bidigo ene hauwa elalu, tama bidi enebo tiwai yaibao.
DEU 32:24 Eno augwali moni dwai nasi emainogo ilaibao, tama augwali haniani gasi elama, isila paibao. Tama eno haniani dwai gula mane dabe bulu hasa dabe aselama, augwali tula silimainu yaibao.
DEU 32:25 Tama genuai wąbi hwįbo si asobo suaibao. Te tama tialima, augwali sunumide bidali da, te boi bidi dabego augwali elama, isilaibao. Tialima, augwali bede geme dualaluyu da, augwali wi dwai mu yaibao, tama augwali me isaibao. Te boi bidi dabe augwaligo augwali sese tama ela isila silaibao, te gesi bidi, me gesi wegi, me wai bǫų dabe, me polo monu dabe me ela silaibao.
DEU 32:26 Hasia da, eno augwali sese mu tama silabo homu yai goli dao, te tama tilama, te bidi mego augwali kone me igi meni dao.
DEU 32:27 Tiali goli, eno tama tiali da, te boi bidi dabe augwali polama, te po wagi dao, “Dago Godigo we bidi dago bomogo augwali aiyaba elaluali dao,” po wagi dao. “Augwa Genuai Bidigo te sę dabe emainogo ebeo,” wagi dao. Tiyu, te boi bidi dabe augwaligo te po waidalio, tama tibaso, eno augwali mu siligobeo.’”
DEU 32:28 “‘Te Israel hani augwaligo kolesaga wiegi yai menio. Augwaligo homu kolesaga mu puna pai mu dao.
DEU 32:29 Tialima, augwaligo homu kolesaga elaluyu da, teda augwaligo augwali te dolali te sę page konigi dao.
DEU 32:30 Magi baso mu boi bidi dabe deli deligo te 1,000 Israel dabe dolama tagalaliwe? Tama ma, magi baso te boi bidi sigo te 10,000 Israel dabe aiyaba elalualiwe? Te po page da e tama dao. Te augwa Genuai Bidi Godigo augwali hagela polo yali. Augwa bomai Godigo augwali tudi ola mani.
DEU 32:31 Te boi bidi dabe augwaligo koneani da, augwaligo tibo god dabego bomo menio homu yali. Tiali goli, Israel dabego Godigo genuai bomo te genuai masigi deli tiwai dao.
DEU 32:32 Te Israel dabego boi bidi dabego kolesaga te dwai kugumini yai mu elaluali, te Sodom me Gomora te taun side bidali we bidi augwaligo yali dwai kolesaga tiwai mu yalio. Augwali te ha dwai mu ebo wain ni du tiwai yai dao.
DEU 32:33 Te augwaligo kolesaga te dwai hasamanigo bidi gąų kelebo bidi isilibo dwai nai tiwai dao.’”
DEU 32:34 “‘Ena Genuai Bidi, eno te Israel dabego boi bidi dabego yali kolesaga dabe konealubo dao. Eno augwali dene maiabo bubuga te tonalubo dao.
DEU 32:35 Te dwai sę yali wei ponobo kolesaga te eno sę dao. Ena digi te eno dwai dene wei augwalibolo ponaibao. Te mani bodolude augwali tuloluaibao. Pęwadage sogo mu augwali tolaluama, tama augwali sese mu dola silaibao,’ Genuai Bidigo te po wali.”
DEU 32:36 “Tama Genuai Bidigo aga hani we bidigo bomo sia selama, deli deli bidi naga bidibo subaso da, teda agai augwali te deli deli bidi dabe hobede elama, tama augwali agai sę ebo bage augwali ma oda saibao.
DEU 32:37 Tialima, Genuai Bidigo aga we bidibolo te po walaibao, ‘Dagego homugo te tibo god dabego bomo elalubao, dage tau saiba homu ebawe? Tiali goli, megi da, magi yaliwe?
DEU 32:38 Dagego augwaliba sipsip ili me wain dabe ofa yai dao. Teda megi augwaligo dage tau somainao. Augwaligo dage dwai madi bidibo ma oda somainao.
DEU 32:39 Dagego mu koneao, ena deli ena God mu dao. Tama ena tiwai god me menio. Eno bidi dabebolo bidibo ula mabo dao, tama eno bidigo bidibo ula ma sela sąbo dao. Eno bidi mu dolama, tama eno aga ma usu ilibo dao. Eno magi sę me yainogo da, teda eno yaibao, te bidi mego ena hagegobeo.
DEU 32:40 Awe, te mu tama dao. Ena deli naga Tigidali Sogo Bidibo God dao. Tama eno bomo yai po dąų waliyu, te po wali,
DEU 32:41 te eno bidi dabego kolesaga osola suaibao. Tama eno moni ge hwą dulama, tama aga mu poa pelama, tama ula mu yaibao, tama eno te hwą selama, tama eno ena boi bidi dabe ela muaibao, tama ena godolo isąma ebo bidi me ela muyu yaibao. Tama eno te bidi dabego ena dali hwįainu ebo bidi enaibao, tama augwaligo kaneme te enesigigo eneba geasa dulaibao. Tama tialima, bidi meba te boide isisąma ebaso da, teda eno augwali me ela muaibao,’ Genuai Bidigo te po wali.”
DEU 32:43 “Te gasa bulu we bidi, dagego Godigo we bidi dali wiegi yai homu pemene eyu yao. Godigo agai we bidi elama silibo we bidi dolabo dao. Tiali goli, aga we bidigo tǫ agai gedude egesi noma yai mu ilibo dao.”
DEU 32:44 Moses de Nungo ogwa Josua sigo te balia po page pusubaso da, Israel dabego odali.
DEU 32:45 Mosesgo Godigo te bomai po sese tama te we bidi dabebolo pusa mani.
DEU 32:46 Tama tialima, agai po geninama weyu, te tama po wali, “Dagego bugagia mu koneama, tama dagego eno megi dagebolo mani te bomai po bugagia mu wali piąo. Tama dagego duga wai puluba dabebolo me pusa mayu yao. Tama tiyu da, augwaligo me Godigo po tigidali sogo wali pomainao.
DEU 32:47 Godigo te po te olo po menio. Menio. Te da, te dage bugagia mu bidabo page po mu dao. Dagego bugagia wali pelama, tama dage bobobage sogo dage Jordan wę u badu bidaibao, te dage megi te bidigi painu ebo te bulude,” Mosesgo te po wali.
DEU 32:48 Tama te sogo bubugade naga Godigo Mosesbolo walali,
DEU 32:49 “Nage te Moap dabego bulu du te Abarim bulu duba dabe pao. Te bulu du dabe te Jordan wę pąde elalubao, tama Jeriko hanu te ąį u badu dolo si elalubao. Nage te bulu du Neboba holama, tama eno dage Israel dabebolo mawainogo ebo te buluba tonao.
DEU 32:50 Tama nage te bulu dude isaibao, te naga ama Aron te bulu du Horde isali yali gilama. Tama nage me naga wąį dabe dali bidigi paibao.
DEU 32:51 Aron isai dao, tama nage me isaibao. Magi baso meni. Dage sigo eno po me wali sogo bugagia wali pabeo, tama dage sigo eno nogi aiyaba elalualio, te Israel dabego gedude, te dage te Meriba bulude bidali sogo, te Kades hanu pąde, te masigi kemi sane olo bulude.
DEU 32:52 Tama tialima, nago te bulu suagameo, tiali goli nage te bulu pąba pogobeo. Tama nage eno megi te Israel dabe augwalibolo mabo te tǫ tomoba nage pogobeo,” Genuai Bidigo Mosesbolo te po wai.
DEU 33:1 Te Moses te Godigo po pusubo bidi isabo sogo pąde ebaso, agai Godibolo Israel dabe dali wiegi yai sę yao po olama, tama hanalu wali.
DEU 33:2 Agai te po wali, “Genuai Bidi Sainai bulu dude bidama asali. Aga te Idom bulu ugwadu te giliga tiwai asali, tama agai ula te Paran bulu dude elaluali, tama te ula aga we bidiba ula yali. Te ensel sibi tausen hauwa aga dali bidali, tama agai dolo nogo badu isi bogoli genuai mu iduali.
DEU 33:3 Godigo aga we bidi godolo mu ebao, tama agai augwali bugagia mu tonalubo dao. Tama tialima, dago agaba kidu sugunama, agaba tobolu basiliyu yao. Tama dago agai bomai po wali pinao.
DEU 33:4 Ena Moses dao. Eno te Godigo te bomai po dagebolo mani dao, tama dago wali pinao. Te bomai po da, te dago kantride polaluabo po mu dao.
DEU 33:5 Te Genuai Bidigo we bidi tigidali me, augwali tobolu bidi dabe me, deliba sisinai dao. Tama te sogo Genuai Bidi te augwa tuni bidi king bidai dao.”
DEU 33:6 “Te Ruben hani te dwasianu hani dao. Tiali goli, te hani munu me silamo dao.”
DEU 33:7 Tama Moses agai Juda hani kone palama, agai te po wali, “Genuai Bidi, nosali nago te Juda dabe augwaligo augwali tau somainu i wabo odao. Nago augwali ma odasa aselama, meba hani dali sisinagasomainao. Tama nago augwaligo augwa boi bidi dabe dali hwįbode tau sao,” wali.
DEU 33:8 Tama agai Livai hani dabe kone palama, agai te po wali, “Genuai Bidi, te Livai dabe te augwali nago wiegi yai sę ebo bidi dabe dao. Tama nago augwali te masigi si mani, te nago homu kolesaga tiwai dabolo ola maiabo masigi si. Nago augwali te bulu Masade me Meribade nago augwaligo kolesaga usu selama, suai dao, tama augwaligo kolesaga doloba pai mu elalubo suai dao.
DEU 33:9 Augwaligo nago po me nago kontrak dąų wali po wali pabo bomo elalubao. Tama augwaligo augwa ida aya, me augwa ama dede, me augwa wai bǫų dabego homu kolesaga wali me pabeo. Menio. Augwaligo te nago homu kolesaga naga wali pai dao.
DEU 33:10 Tama augwaligo Israel dabego nago bomai po wali pomainu ola mawaibao. Tama augwaligo nago altade augwaligo ofa dabe eyu yaibao.
DEU 33:11 Genuai Bidi, nago Livai dabe dali wiegi yai homu elama, tama nago augwali tau selama, augwaligo sę bomo mu emainogo tau sao, tama nago augwaligo ebo sęde wiegi yai homu pemene yagameo. Tama nago augwaligo boi bidi dabe sese aiyaba agayagameo, tama augwali munu me ma hodalogobeo,” wali.
DEU 33:12 Tama Moses aga Benjamin hani kone palama, agai te po wali, “Genuai Bidigo Benjamin hani godolo mu elama, agai tigidali sogo beasa bilibo dao. Tama tigidali sogo aga augwali dali pąde mu bidibo dao,” wali.
DEU 33:13 Tama agai Josep hani kone palama, agai te po wali, “Genuai Bidigo Josep hanibolo tulubage hauwa magameo.
DEU 33:14 Tama augwaligo tǫde wę hauwa ilimainao. Tama Genuai Bidigo augwaligo gi wiegi yai iliyu, tama giligago augwaligo gide tigidali nai tau dabe bugagia mu augwa side bugagia tau emainao.
DEU 33:15 Tama te polobadu bulu du dabe te gi yabo pesage wiegi yai bulu dabe pedalomainao.
DEU 33:16 Wiegi yai nai dabe te Josep hanigo bulude hauwa mu pągąna pomainao, te Josep hanigo tǫde. Genuai Bidi te dwasianu ni me isi dabo digi bidama, tama ena Mosesbolo te po wai dao, agai te Josep hani dali wiegi yai sę yaibao po wai dao. Magi baso meni. Josep aga te aga ama dedego tobolu bidi bidai dao.
DEU 33:17 Te Josep hani augwali bomo elalubo, te bulu uni kau kibugo tobolude gąų holai tiwai elalubao. Te Josepgo ogwa me Manase, te hani we bidi augwali te kau kibugo tobolu gąų me deli tiwai dao. Tama me te Josepgo gasa ogwa Efraim aga we bidi hani tausen hauwa te kau kibugo me tobolu gąų tiwai dao. Tama te tobolu gąų sigo te gasa we bidi hani enebo dao, tama augwali popogolo pelama, te tǫ sabiba usu nigi paibao,” wali.
DEU 33:18 Tama Moses agai Sebulun hani me Isakar hani si kone palama te po wali, “Sebulun hani, dagego gasa bulu bidi dabe dali bisnis sę ebo wiegi yai pedalaibao. Tama me Isakar hani augwaligo augwa bulude ebo bisnis me wiegi yai pedalaibao.
DEU 33:19 Te bidi hani augwali sigo gasa we bidi hani augwaligo bulu duba sisinagasomainogo i waibao. Tama augwaligo wiegi yai doloba pai ofa mu yaibao. Tama augwaligo te bisnis sę augwaligo te tamu ąįde sali nai dabede yaibao, me te kemi sanede sali naigo me. Tama augwaligo te bisnis sęde augwaligo mone hauwa mu saibao,” wali.
DEU 33:20 Tama agai Gat hani kone elama, te po wali, “Godigo Gat hanigo tǫ genuai pedalomainu ilai dao. Te tama tialima, dage sesego Godigo nogi ugwaba sagameo. Te Gat hani te boma pai dao, te laion te uni yowi te bulu hasa ela tuainogo nogo guda sąbo o tobolu wali me dagala sabo tiwai yaibao.
DEU 33:21 Te Israel hani tobolu bidi dabego tǫ dobola sainogo sisinibo sogo, te Gat hani augwa digi augwa sabo tǫ genuai bage wiegi yai me dąį elama sali. Te wiegi yai tǫ dage me deli te Gat hanigo sali. Tama augwaligo Genuai Bidigo po me bomai po bugagia wali pali,” Mosesgo te po wali.
DEU 33:22 Tama Moses agai Dan hani homu kone elama te po wali, “Dan hani te tamadi nisai laion yowi tiwai dao. Agai te bulu Basan tagalama, sasamano asali,” wali.
DEU 33:23 Tama agai Naptali hani kone elama, te po wali, “Genuai Bidigo nai wiegi yai hauwa te Naptali hanibolo mani. Te Galili sigi ąį augwaligo bulude elalubao. Tiali goli, te tǫ te wę edelama, ibanu pelama, ganama dao, te ąį u badu.”
DEU 33:24 Tama agai te Aser hani kone pelama, agai te po wali, “Genuai Bidigo te Aser hani dali wiegi yai sę genina mu elama, gasa meba hani augwali dali usu egobeo. Tama me Israel hani dabego augwali godolo umabo mu yaibao. Tama te ni oliv augwaligo tǫde hauwa mu pedalama, tama augwaligo te oliv wel hauwa mu saibao.
DEU 33:25 Tama augwaligo taun obo sunumi dabe te boma pai ain sunumi dabe elaluaibao. Tama tibaso, tigidali sogo augwali bugagia mu bidiyu, augwali wi me egobeo,” wali.
DEU 33:26 Tama Mosesgo te po wali, “Israel dabe, dago God tiwai gasa god me menio. Agai genuai bomo elaluyu, tama genuai ula tomode bidiyu, tama te dagalu pǫ daidu ugwadu asali, te da tau sainogo.
DEU 33:27 God Tigidali Sogo Bida Bida Pabo God dao, aga te dago duala sabo pesage dao. Tigidali sogo da aga nogogo tolaluyu, tama agai da me tagalobo menio. Dage te duga tǫ dabe sigi pabo sogo da, agai te boi bidi dabe sela sąwaibao. Tama dagebolo augwali sese elama, isila sila po walaibao.
DEU 33:28 Tama tiyu da, te Jekopgo hani augwali bugagia bidaluyu, tama te boi bidi dabego augwaliba me hwįagasogobeo. Tama te pesagede te hulide ąį segeni tulama, tama tǫ tedolama, tama tubo nai dabe hauwa elama, wain dabe me hauwa elaluaibao.
DEU 33:29 Te Israel dabe, dage wiegi yai homu pemene mu yao. Genuai Bidigo dage tau selama, ma oda sali tiwai, agai gasa we bidi hani me tau sai menio. Genuai Bidi aga digi te dagego awa tiwai elama, me dagego moni ge hwą tiwai dao. Agai dage obo ela selama, tama dagego wąbi hwįbode dagego gasa bidi dabe elalumainu ilibo dao. Dagego boi bidi dabe dageba aselama, tama dagego augwali hobede emainogo dageba gela wagasaibao. Tiali goli, dagego augwali agalama, tama augwali aiyaba elaluaibao,” Mosesgo te po wai.
DEU 34:1 Te Mosesgo te Moap dabego malu bulu tagalama, tama te bulu du Neboba holali, tama te Pisga bulu du boiabiba ugwaba holali, te giliga asobo badu, te Jeriko hanuba dolo si badu. Tama Moses te bulude dolalubadi, Genuai Bidigo agai te Israel dabebolo maiabo tǫ sese tama ola mani. Genuai Bidigo agabolo te Gileat tǫ dage ola menama, tama u badu not badu te Dan hanuba usu nigi pali.
DEU 34:2 Tama Naptali hanigo tǫ sese, me Efraim hanigo tǫ sese, me te Manase hanigo tǫ sese ola mena silali, tama Juda hanigo tǫdu pelama, te genuai tamu ąį Mediterenianba usu nigi pali, te giliga dega sabo badu.
DEU 34:3 Tama agai Mosesbolo Judago saut badu agai genuai tǫ mu ola mani. Tama me Jerikode elalubo malu tǫ me ola mani, te hanude ni det hauwa mu elaluali, tama pelama, Soar u badu usu nigi pali, te saut badu.
DEU 34:4 Te tama tialima, Genuai Bidigo Mosesbolo te po walali, “Eno te tǫ te Abraham, me Aisak, me Jekop, augwalibolo te tǫ te augwa wąį dabebolo mawaiba po eno augwali dali dąų walai dao, polobadu mu. Megi eno nago sumainu sula tagalali dao. Tiali goli, eno nage te tǫ tomoba pomainogo sula tagalogobeo,” wali.
DEU 34:5 Tama tialima, Moses, te Genuai Bidigo sę ebo bidi, aga te Moap dabego tǫ dagede tede bidama, tama aga tede isali, te Genuai Bidigo agabolo te hasia polo walali gilama tama tiali.
DEU 34:6 Tama Genuai Bidigo Mosesgo tigi te Moap bulude te hanu me te Betpeor hanu dolo si te odogo malu bulude pubulali. Tama megi me te bidi mego te Mosesgo gų page mena bulude odogode elalubawe, bidigo me konebeo.
DEU 34:7 Moses agai kibu be 120 kibu be elama, aga isali, tama aga bomo elalubadi, tama agai gedu wiegi yai elaluali.
DEU 34:8 Te Moses polo isai digi Israel dabe augwali te Moap dabego te malu bulude bidiyu, augwali gela udubadi, 30 be bubuga usu nani.
DEU 34:9 Te tama tilama, nosali da, teda Godigo Nungo ogwa Josuabolo wiegi yai homu kolesaga me kolesaga dabe hauwa mu mani. Magi baso meni, Mosesgo aga hasegelama, bidimainogo sa muai baso. Tama te we bidigo Josuago po odama, tama augwaligo te bomai po dabe Genuai Bidigo Mosesgo nogode mani po wali pali.
DEU 34:10 Tama megi tama usu nagasiyu da, Israel dabego profet bidi me te Moses tiwai bidi me menio. Genuai Bidigo Moses dali po te bidi sigo augwa hasi po wabo tiwai tama po weyu yai dao.
DEU 34:11 Genuai Bidigo Moses te Isip bulu tuni bidi me te tuni bidi aga ofisa bidi dabe me agai bulu tigidalide haniani bomai sę emainogo tagala palali. Te meba profet dabego te Mosesgo yali te bomai sę yali tiwai usu me egobeo.
DEU 34:12 Tama augwaligo genuai sę dabe me te we bidi dabe wi ilainogo yali, te sę tiwai usu me egobeo, te Israel we bidi tomode yali tiwai, te we bidigo gedude yali tiwai.
JOS 1:1 Te Moses aga te Godigo sę bidi dao. Tama Josua te Nungo ogwa te Moses tau sali bidi dao. Moses isai madi, tama Godigo Josuabolo te tiwai po wai,
JOS 1:2 “Eno sę bidi Moses isalio. Tialima, nage megi da, sisi yao. Nage dali te Israel we bidi tigidali dage e Jordan wę nogelama, tama eno dage mawainogo ebo te tǫba sabolao.
JOS 1:3 Eno Mosesbolo te tiwai po dąų walali, te dage soabo tǫ tigidali badu, te eno dagebolo mawaibao wai dao.
JOS 1:4 Te dagego tǫ sesege badu gagalama, te tiwai elaluaibao. Te olo masigi kemi tǫ elalubo te olo page badu gagalasa, u bulu du Lebanon te olo page meba, teba usu nigi pelama, tama te giliga pedalubo badu te genuai wę Yufretis te badu usu nigi peyu, tama te Hit we bidi hanigo tigidali tǫ pedai badu dąį igi pelama, tama te giliga dega sigi pabo badu te genuai tamu ąį, te badu dąį igi paibao.
JOS 1:5 Te bidi me deligo te dage aiyaba elalumainu elama, te nage isimainu ebo, te usu me egobeo. Te ena nage dali bidiyu, te ena Moses dali bidali tiwai gilama yaibao. Eno homugo nage me gegeda palogobeo, eno nage munu me taga pogobeo.
JOS 1:6 Nage bomo elama dolaluyu, tama nage wi me elamuo. Magi baso meni. Te nago te we bidi dabe augwali te eno augwalibolo mawaibao wali te tǫ pedaiba odasa pomainu yaibao, te tiwai eno te po augwa wąįbolo dąų wai dao.
JOS 1:7 Tama tibaso, nage bomo mu elama dolaluyu, tama nage wi me isiąyu, tama habu bulu me pelamuo. Nago bugagia tonaluyu, tama eno sę bidi Mosesgo nagebolo mani bomai po tigidali mu wali pao. Nago te bomai po me badu dwasianu munu me tagalamuo. Nago te bomo yai po dabe tigidali bugagia wali peyu da, teda te nage mena badu pabo te nage munu me dolomainu me egobe, te nage bugagia naga bidaibao.
JOS 1:8 Nago te bomai po elalubo bukugo po munu me homugo gegeda pelamuo. Te nago bugagia tonaluyu, tama te bomai pode elalubo tigidali po mu wali pomainogo eyu, nago te giligade me, hulide me, nago te bomai pode bugagia skul elama, konea sao. Te nago tama tiyu da, te nago gasa sę tigidali ebo te wiegi yai naga ilaibao.
JOS 1:9 Eno nagebolo wai dao. Tama nage bomo elama dolaluyu, tama nage wi munu me isiąyu, tama nage magi nai me delide habu bulu me pelamuo. Magi baso meni, ena God, te nago Genuai Bidi, te ena nage dali te nage pabo tigidali buluba paibao,” te po wali.
JOS 1:10 Tialima, Josuago te we bidi augwali tonalubo tobolu bidi dabebolo te po wai,
JOS 1:11 “Dage te we bidi bidibo pesage tomode bagula biliyu, te we bidi augwalibolo te po waiąo, ‘Te duga nai dabe sisinao,’ po wao. ‘Sela sogo naga digi elalubao, tama dagego e Jordan wę nogelama, tama God, duga Genuai Bidigo, dagebolo te mawaibao wali te tǫ dagego saibao,’ tama po wao,” Josuago te po wai.
JOS 1:12 Tama Josuago te po te Rubengo hanibolo, me Gatgo hanibolo, me te Manasego hani me badubolo me te tiwai po wai,
JOS 1:13 “Dagego te po bugagia homu kone palao, te tigidali po Mosesgo dagebolo wai dao, aga te Genuai Bidigo sę ebo bidi bidali. Agai te po wali, ‘God, duga Genuai Bidigo, e tǫ dagebolo menama, tama dage tede bidiyu, toma tuabo madi elaluaibao,’ te po wai.
JOS 1:14 Tialima, dagego e tǫ habu badu dagego selama da, tama duga we wai puluba me, te kibu dabe badi, augwali ede te wę Jordan e badu te Mosesgo mani tǫde tonaluyu bidagameo. Tiali goli, dagego ami bidi dabe da, augwa hwįabo nai dabe dodolama, tama e wę nogelama, te abagi dabe dali augwali polasa pelama, tama augwali tudi badu tonaluyu, te wąbi hwįbo tau somainao.
JOS 1:15 Te duga Genuai Bidi Godigo e tǫ dagebolo mawai dao. Tama dagego te gasa Israel hani bage duga abagi dede tau siyu, tama agai augwalibolo mabo tǫ sabo sogoba usu nagasu yao. Tama elama, te boi pilama wiegi yai pemene ebo sogo elaluyu, tama augwali me te toma tueibao, te dage megi ebo tiwai gilama yaibao. Tama tiliama, tama nosali dage duga e tǫba ma asomainogo, polobadu te tǫ Mosesgo dagebolo mawai dao, e tǫ te Jordan ąį badu, te giliga pedalubo badu dao,” Josuago te po wai.
JOS 1:16 Tama tigidaligo Josuabolo po wei ponoyu, te po wai, “Awe,” wali. “Te dago nago dabolo wali po tiwai gilama, te tama tigidali sę dago yaibao. Tama tigidaliba nago da tagala palobaso da, teda da teba paibao.
JOS 1:17 Te dago nago po tigidali wali peyu, te dago Mosesgo po sesemane sogo wali pali tiwai gilama yaibao. Tama dena homugo te God, naga Genuai Bidi, te nage dali bidiyu, te polobadu Moses dali bidali tiwai gilama bidimainao.
JOS 1:18 Te bidi me deligo hagoma eyu, nago po sela sąbaso da, te aga isimainu yaibao. Tiali goli, nage da, nage te bomo elama bidiyu, tama nage wi munu me elamu dao!” wali, te we bidi dabego.
JOS 2:1 Te Israel dabe augwali te bulu Sitimde bidalubadi, tama Josuago te moni tǫ Kenanba sa pabo bidi si tagala palali, tama agai augwali sibolo te po wai, “Dage si pelama, te moni tǫ Jeriko genuai hanu me, te pąde elalubo tǫ me, bugagia suao.” Tialima, te bidi si te Jeriko hanu tǫba pelama, tama te penani we me deligo beba sabolali, te we aga nogi Rahap. Tama augwali si agai bede bidai.
JOS 2:2 Tama gasa bidi dabe augwaligo te Jeriko tuni bidibolo te tiwai po wai, “Dua dao! Te Israel bidi meba te e sogo hulide te tǫba sa asobo bidi asai dao.”
JOS 2:3 Tama te tǫde te gavman tuni bidigo te tiwai po odolama, agai te bidi meba tagala palama, te po te Rahapbolo wagi pao wali, “Te nago bede bidibo bidi dabe, augwali te e tǫba sa asai bidi dabe dao! Nago augwali odasa asao,” wali.
JOS 2:4 Rahapgo te bidi si deli deli geme dualama, tama agai te tuni bidigo po tolagasali bage augwalibolo te po wai, “Mu tamao, bidi meba te eno beba asali. Tiali goli, augwali mena bulu badu asali te eno konebeo.
JOS 2:5 Te be pio ebode, te bidi dabego te hanu tomoba asobo genuai sunumi palibo sogo, augwali ede bidali ma tagalali. Augwali menaba pali, eno konebe, augwaligo enabolo me wabeo. Tiali goli, dagego augwali wali polo pobaso da, teda dagego augwali gegebo usu yaibao,” te po wai.
JOS 2:6 Mu tamao, Rahapgo te po wali, tiali goli hasia bolo agai augwali si te aga bidigi beba ugwaba odasa holama, tama agai augwali si te aga te name ugwa nigibo nosai dabe dunama muani, te dologoba geme dualai dao.
JOS 2:7 Tialima, megi da, te tuni bidigo bage augwaligo te hanu tagalama, tama augwali te sa asali bidi si gegegi peyu pai. Augwaligo gege pali pidubadi genama, te wę Jordan bolabo madi me deliba pabo sunumidu pai. Nosali augwaligo te hanu taga soai madi, te sunumi tonalubo bidi dabego te hanu tomoba pabo genuai sunumi paliali.
JOS 2:8 Te Israel bidi si godege pisąbadi, tama Rahap te be ugwaba holama,
JOS 2:9 tama augwali sibolo te po wai, “Eno koneani, Genuai Bidigo e genuai tǫ te dage Israel dabego nogoba mawainogo ebao. Tama eno po dolo mu dage sibolo obao. Da tigidali dagede wi elama, tama da didibili dwai mu ebo.
JOS 2:10 Magi baso meni, dagego te Isip tǫ taga soali sogo te Genuai Bidigo te Nosai Elaluali Tamu Ąį wai ilali po augwaligo dabolo te po pusai. Tama dago odali, dagego te Amor dabego gavman tuni bidi Sihon de Ok si me, te augwali sigo ami bidi dabe dali, te wę Jordan u badu ela silali po dago odai dao.
JOS 2:11 Dago te po odolama, tama da dagede wi mu ebao. Tama megi, da tigidali bomo menio. Magi baso meni, God, dagego Genuai Bidi, aga te dagalu de tǫ sigo God dao.
JOS 2:12 Tialima, megi da, dage sigo te Genuai Bidigo gedude te dage sigo eno hani bage bugagia tonaluabo po dąų walao, magi baso meni, te eno dage si bugagia tonaluali tiwai gilama yao. Tama dage sigo duga si dąų wali po mu dąų walobo dąį me dedeli enabolo mao.
JOS 2:13 Tama mayu, dage Israel dabego te eno aya ida badi, te ama, me abe, me te augwa hani bage tigidali munu me ela munamuo! Dage sigo te bidi dabe augwaligo da elemainu sula tagalu munu me tilamu dao!” te we Rahapgo te po wali.
JOS 2:14 Tialima, te bidi sigo po wei ponoyu, te po wai, “Da sigo po nagebolo dąų mu obao. Tama da sigo te dąų wali po togobaso da, te Godigo da si dolomainu yaibao. Te nago da sigo yali sę po dabe hanilisiąbaso da, teda da sigo te dąų wali po munu me togosiąyu, te nage dali, nago hani bage dali tau saibao, te Genuai Bidigo te genuai tǫ dabolo mabo sogo te tama tiaibao,” te po wai.
JOS 2:15 Te penani we Rahapgo be te moni hanu bagulali obo dali kisilai elaluai, tama me badu dąį togwali badu te be pola sali windo dedage te obo ugwadu elaluai. Tama Rahapgo te bono baklain te windode kęnama, tama baklain te masigigo nigali bobobage obo bulu badu manama, te bidi sigo te bonodu nogo toda duluyu, aiyaba dulama, te hanu buluba dįą pomainu tama tiai dao.
JOS 2:16 Tama augwali si tama painu ebadi, tama Rahapgo te po wai, “Dage si te bulu duba geme duala sigi pelama, sela sogo bidao. Tiyu, tuni bidigo bidi dabego dage si gegelama, suabuo. Nosali augwali te Jeriko hanuba ma soai digi, teda duga si buluba ma pao,” wali.
JOS 2:17 Tama te bidi sigo Rahapbolo te po wai, “Te da sigo nagebolo te yao wabo sę tigidali ela silibaso da, teda da sigo megi nagebolo e dąų wabo po munu me togogobeo.
JOS 2:18 Tialima, megi nago bugagia odao! Te da Israel dabe e buluba sabalobo sogode, nago te mama yai bono kęnao, megi da si aiyaba e dulubo windode, te da sigo nagebolo e mabo mama yai bono kęnao. Tama nago naga aya ida, me te ama dede dabe, me te naga hani bage tigidali selama, tama augwali nago beba naga sisinao.
JOS 2:19 Te me deli te bede bidali tagalama, te hanuba pabo sunumidu pobadi, tama augwali ela muani da, teda aga digi te dolabo page yali dao. Te da sigo sę menio. Tiali goli, me deli te be tomode bidibadi dolobaso da, teda te sę yali page da side elaluaibao.
JOS 2:20 Tiali goli, dua dao! Te nago da sigo e yali sę po pusuyu da, teda da sigo dąų wali po te sia saibao,” wali.
JOS 2:21 Tama Rahapgo po wei ponani, “Eno dage sigo pode usu da po obao.” Agai te tama po olama, tama agai augwali si tagala palai. Nosali agai te mama yai bono te be windode gebelai.
JOS 2:22 Tialima, te bidi si te bulu du dabeba sabolama, tama augwali si geme dualaludai. Tama tuni bidigo hani dabe augwaligo te bidi si te sunumidu tigidali bulu badu sela sogo gegedu gegedubadi geai. Tiali goli, augwaligo bidi me deli susiąbaso, tama augwali te moni hanu Jerikoba ma geasa pai.
JOS 2:23 Nosali te bidi sigo te bulu du dabe tagalama, tama aiyaba dulai, tama augwali si te wę Jordan nogelama, tama te Josua bidibo madi ma sabolama, tama te tigidali sę pedelali po agabolo pusai.
JOS 2:24 Tama te bidi sigo Josuabolo te po wai, “Mu tamao, Genuai Bidigo te tǫ tigidali da nogoba mawaibao. Awe, te tǫ tolalubo tuni bidi aga we bidi tigidali dade te dwai wi mu ebo dao,” wali.
JOS 3:1 Tama Josua te kigamu digi mu hodaluama, tama aga dali te Israel dabe augwali te bidali pesage te Sitim tagalama, tama augwali te Jordan ąįba sabolai. Tama augwali bidabo pesage tede nigai. Augwaligo te wę Jordan nogobeo.
JOS 3:2 Te nosali pabo sela sogo elalubadi, te genuai bidi nigali bidi dabe te pesage tomode biliyu,
JOS 3:3 tama te we bidibolo te tiwai po wai, “Dagego te Livai dabego pris bidi hani dabe augwali pabo subo sogo, tama te dago Genuai Bidi Godigo bomai po dąų wali po muani halobage tolasa pobaso da, teda dage hogodama, te duga tigidali doado bage selama, tama augwali wali piąo.
JOS 3:4 Tama tiyu, dage pabo sunumi te duga konemainu ebao, magi baso meni, dage te buluba polobadu me sabolisiąwai. Tiali goli, te bomai po dąų olama muani halobage pąba dage munu me pelamuo. Menio. Dage te dwasianu digibulu gana te po dąų wali halobage tolasa pabo wali pao,” te genuai bidi nigali bidi dabego augwalibolo wali.
JOS 3:5 Tama Josuago te we bidi dabebolo te po wai, “Te duga homu me kolesaga dodolobo sę iliyu, lotu po wao, magi baso meni, do da, te Genuai Bidigo noma sabo bomai sę te dage tomode yaibao,” wali.
JOS 3:6 Nosali Josuago te pris bidi dabebolo te po wai, “Dagego te bomai po dąų wali halobage te we bidi augwali nosaliba ilama, polasa te halobage tolasa pao,” wai. Te augwaligo tama tiai dao.
JOS 3:7 Tialima, Genuai Bidigo Josuabolo te po wai, “Megi da, te eno nago nogi ugwaba sabo sę te Israel dabe augwali gedude gagalaibao, te ena nage dali bidibo konemainu, te ena Moses dali bidali tiwai gilama yaibao.
JOS 3:8 Nago te bomai dąų wali po muani halobage tolobo pris bidi dabebolo te po wao, ‘Dage te Jordan ąį sesegeba sabalubo sogo, dage te wę tomoba doligi pelama, tonaluyu, bidao,’ te po wao,” wali.
JOS 3:9 Tama megi da, Josuago te Israel dabe augwalibolo te po wai, “Dage te pąba aselama, te Godigo po odao, te dago Genuai Bidi dao.
JOS 3:10 Megi da, dagego te dena God, te bidibo ula elalubo God, aga te da tomode elalubaso, tama agai te Kenan dabe me, te Hit bage dabe me, te Hivi dabe me, te Peres dabe me, te Girgas me, te Amor me, te Jebus dabe badi, te tama bidi hani dabe te Godigo bomogo sela sąbo te dagego koneaibao. Dagego te Godigo bomo bugagia sula selama, mu konemainu eyu,
JOS 3:11 te Godigo dąų wali bomai po muani halobage te tolasa polasa peyu, te wę Jordan nogobo sogo te tiwai yaibao.
JOS 3:12 Tama tibaso, dagego te Israel hani deli delide te deli deli bidi selama, te nogo si olama, sągągo si bidi nigilao.
JOS 3:13 Te pris bidi dabego te tigidali tǫde Genuai Bidi Godigo te dąų wali po muani halobage tolasa pabode, tama augwaligo sągą te węba agabo sogo, teda te wę tigidali dąų mu ola sigi pelama, tama te wę me soagobeo. Magi baso meni, te ugwadu wę daide te bulu du me dedeli tiwai gilama dolaluaibao,” Josuago te po wali.
JOS 3:14 Tialima, te we bidi augwali te bidali pesage tagalama, te wę Jordan nogoainu yali. Tama te pris dabego te dąų wali po muani halobage tolama, tama augwali polasa pai.
JOS 3:15 Te sogo te inawai nai gide sabo sogo, tama te Jordan wę genuai asobo sogo dao. Tiali goli, augwali te wę sesegeba sabolama, tama augwaligo sągą te węba agabo sogo,
JOS 3:16 te wę togoyu, mu dąų olama, tama te wę ma soabeo. Te wę ugwadu te bobobage bulu du tiwai gilama, te bulu Adamba usu nigi pelama, te wę pesage holai tiwai elaluai, te Saretan hanu me deli pąde yali. Tama te sigi ąį Det Si teba dulubo wę te tigidali sula sai elaluai. Tama te we bidi augwali te wę tomodu pelama, te Jeriko hanu pąba u badu sabolai.
JOS 3:17 Te Israel dabe augwali te tǫ wa pai madi naga pai. Tama te Genuai Bidigo te dąų wali po muani halobage tolali te pris bidi dabe, augwali te wę Jordan sula sali digi te tǫ dolo tomode dolaluali, te we bidi tigidali te wę nogelama, gasaba u badu sabola silibo usu nigi pomainu yai.
JOS 4:1 Te tigidali Israel dabego te wę Jordan nogola silali sogo, Genuai Bidigo te tiwai po Josuabolo wai,
JOS 4:2 “Te Israel hani deli delide, te nago bidi deli deli siyu, tama nogo si olama, sągą badu si bidi nigilao,” po wai.
JOS 4:3 “Tama augwalibolo te po mao, ‘Dagego te pris dabe dolalubo badu te Jordan wę tomode te masigi nogo si olama, sągągo si sao. Tama te masigi dabe dagego te megi hulide bidabo pesage nigibo digi te tolasa asama, muao,’” wai.
JOS 4:4 Tama po obaso, Josuago te bidi nogo si olama, sągągo si bidi nigilama, tama agai augwali i olama, asobode tama augwalibolo te po wai,
JOS 4:5 “Dage te Jordan ąįba dulama, tama te dago Genuai Bidi Godigo te dąų wali po muani halobage tolali bidi pris dabe augwali edelao. Dagego te genuai masigi dabe siąo, te Israel hani nogo si olama, sągą badu si usu nama sao. Tama dagego te deli deli masigi te duga nagede munama, tama tolasa asao.
JOS 4:6 Te masigi dabede te Genuai Bidigo yali sę dabede te we bidi augwaligo homude konealuabo sę dąį tama ilaibao. Tama nosali nosali sogo te duga wąį te nosali ame nabo wai dabego dagebolo te masigi dabe tede magi baso munalubawe po hanalu obaso da,
JOS 4:7 teda dagego augwalibolo te po waiąo, te Genuai Bidigo dąų wali po muani halobagego te wę Jordan nogali sogo te wę sula sai elalubadi, te masigi dabe sai dao po wainogo tama tiwai. Tama te masigi dabego te Israel dabego homu te sesemane bidada pabo sogo hogodomainogo tama tiao,” wali.
JOS 4:8 Tialima, te bidi dabego te Josuago po wali gilama tama tiali. Augwali te Jordan wę tomoba pelama, tama te masigi nogo si olama, sągągo si sai, te Genuai Bidigo Josuabolo wali po gilama tiwai. Tama augwaligo te masigi dabe te sogo bidabo pesageba tolasa aselama, muagasai.
JOS 4:9 Tama Josuago te gasa masigi dabe te nogo si olama, sągą badu si masigi te pris dabego te dąų wali po muani halobage tolaluyu dolaluali madi, te Jordan ąį tomode te sesege badu te masigi dabe dodolai. Tama te masigi dabe me elalubo dao.
JOS 4:10 Te pris dabe te Jordan ąį tomode me dolaludubadi, te bidi dabego te tigidali sę te Genuai Bidigo me, te Mosesgo me, te Josuabolo po wali sę tigidali ela siligi peyu, usu nigi pai. Te we bidi augwali polo mu te wę u badu sabolai.
JOS 4:11 Tama nosali augwali sabola silaide, te Genuai Bidigo dąų wali po munalubo halobage tolali pris bidi dabe, augwali me te augwali pela saboligi pelama, tama nosali augwali tudiba ilama, augwali ma poligi pai dao.
JOS 4:12 Te Rubengo bidi hani dabe me, te Gatgo hani me, te Manasego hani me badu badi, augwaligo te hwįainogo sisi elama, tama augwali polasa peyu, te gasa we bidi dabe augwali tudiba togolama, te Mosesgo augwalibolo wali po tiwai gilama yai.
JOS 4:13 Te hani selago hwįabo sisi yali bidi hani te bidi sese umabo, 40,000 bidigo te hwįainu sisi yai, tama Genuai Bidigo gedude augwali te doloba pai tǫ odogo malu me deli te hanu Jeriko pąba sabolai.
JOS 4:14 Te Israel dabego te sogode te Genuai Bidigo augwalibolo yali sę dabe sulama, tama augwaligo te Josua nogi ugwaba sali, augwaligo te Mosesbolo te tigidali sogo te aga nogi ugwaba sidubadi, te aga isiboba usu nagasali tiwai gilama yai dao.
JOS 4:15 Genuai Bidigo Josuabolo te po wali,
JOS 4:16 “Te pris dabebolo te dąų wali po tolali bage augwaligo te wę Jordan tagalama, edaba holao po wao,” wali,
JOS 4:17 tama Josuago te tiwai po augwalibolo wai.
JOS 4:18 Tama te dąų wali po muani halobage tolali bage te pris dabe te sesegeba sabolai digi, te wę dąų olaluali te gelama, tama aga soali pesagede dolo ma soai dao, genuai mu eyu tama yali.
JOS 4:19 Te we bidi augwaligo te Jordan wę nogali, te polua delide, te dei nogo si, te sogo te wę nogali, tama augwali bidali pesage te Gilgal, tede te Jeriko hanu pąde te giliga pedalubo badu te pesage nigai dao.
JOS 4:20 Te Gilgalde Josuago te masigi nogo si olama, sągą badu si masigi te Jordan ąįde te bidi dabego sali masigi tede ugwaba dodolai.
JOS 4:21 Tama Josuago Israel dabebolo te tiwai po wai, “Nosali, te ame nabo wai dabego te augwa aya dabebolo te tobage po hanalu obaso, te e masigi dabe magi baso ede munalubawe po obaso da,
JOS 4:22 teda augwaligo augwalibolo te po waiąo, ‘Te Israel dabego te Jordan wę te wę sula sai digi nogali te dąį ilali te dao,’ te po wao.
JOS 4:23 Magi baso meni, te dago Genuai Bidi Godigo te wę Jordan wai ilali, te dage asobadi polasa soyu tama tiwai, te dage gasa badu sabolomainu usu ilai, te agai te Nosai Elalubo Tamu Ąį wai ilali madi te da nogali tiwai yai dao.
JOS 4:24 Genuai Bidigo te sę yaligo da, te tigidali tǫ badu bidibo tigidali bidigo te agai bomo konemainu elama, tama dagego duga Genuai Bidi Godibolo sesemane sogo te lotu po omainogo yai dao,” Josuago te po wali.
JOS 5:1 Te sia ge dulubo badu te Jordan wę badu, te Amor tǫde bidibo te tigidali tuni bidi dabe badi, te genuai tamu ąį Mediterenian te sesegede te Kenan moni tǫde bidibo tigidali tuni bidi dabego me, augwaligo te Genuai Bidigo te Jordan wę wai ilai digi te da Israel dabego te wę nogali po odali. Tama te da Israel dabe augwali pąba asobaso, te tuni bidi dabe augwali wi dwai mu eyu, tama augwali homu didibili mu yai dao.
JOS 5:2 Nosali Genuai Bidigo Josuabolo te po wai, “Te masigi hwą ge poa pai meba nigilama, tama te Israel bidi dabego tigiwali pedai togwao, te Israel dabe augwaligo polobadu yali tiwai gilama yao,” te po wai.
JOS 5:3 Tialima, Josuago te hwą ge dabe nigilama, tama te bidi dabego tigiwali te dwasianu bulu du me deli tede togwali, tama augwaligo te bulu du nogi poyu, te Tigiwali Togobo Bulu Du dao po wai.
JOS 5:4 Agai te kolesaga yali page, e tiwai. Te Israel dabego te Isip tǫ taga soali sogo, te hwįbo usu yali bidi dabe tigidali, augwali te olo kemi tǫ bulude isila pai dao.
JOS 5:5 Te tigidali bidigo te Isip bulu taga soali sogo, augwaligo te augwa tigiwali togwai. Tiali goli, te idago te olo kemi tǫ bulude ame nani bidi dabe, augwaligo tigiwali te me togosiąwai.
JOS 5:6 Te Israel dabe augwali te nai meni yai olo kemi tǫde bilaludubadi, te kibu be bidi sese si 40 yia yai. Te sogo te hwįbo usu yali bidi dabe tigidali te augwali isila pai. Magi baso meni, te augwaligo Genuai Bidigo po wali me pisąbaso, tiwai dao. Te mu tama Genuai Bidigo te wąį dabe augwalibolo po dąų waliyu, agai te tǫ dabolo mawaibao wai. Te tǫ da, te wiegi yai mu dao. Tiali goli, agai te po wai, te po sela sąbo bidi dabe augwaligo me sugubeo, wai.
JOS 5:7 Tiali goli, te augwali bidali pesage hasegelali, te augwaligo ogwa dabe te tigiwali me togosiąwai, te augwali kemi tǫ bulude bilali sogo. Tama megi Josuago te tiwai sę augwalibolo yai.
JOS 5:8 Augwaligo te tigidali bidigo tigiwali togwa silama, tama te Israel dabe augwali te pesagede bidibadi, te bidi dabe augwaligo keni pedela sabo sogoba usu nagasai.
JOS 5:9 Nosali Genuai Bidigo Josuabolo te po wai, “Polobadu dage te Isip tǫde olo sę eyu bidai, tama dage hale mu yai. Tiali goli, megi eno dage te hale yali sę te dagala sąbao,” wai. Tama tibaso, te e sogo megi bubugade augwaligo te bulu nogi Gilgal wali, te page e dao, “Dagala sąwai.”
JOS 5:10 Te Israel dabe augwali te bulu nogi Gilgal te doloba pai tǫ Jerikode bidaluyu, tama te namba wan polua, dei te 14de, tede augwaligo te hulide te Pasova nai tuai dao.
JOS 5:11 Te nosali side te Israel dabego te nai bali me wit te Kenande sai. Augwaligo te bali ulama, te bo disąwai nai bret nigilama, tama augwaligo tuai dao.
JOS 5:12 Nosali te sogo te nai mana te munu ma dulubeo. Tama te Israel dabego te Kenande elalubo nai naga selama, tubo gagalalio.
JOS 5:13 Josua te hanu Jeriko pąde bidali sogo, agai bidi me deli te bainat hwą ge tolaluyu, dolalubo suai. Tama Josua aga dwai noma mu selama, tama agaba pelama, tama agabolo hanalu wali, “Nage te dago ami bidi me deli dawe, ma nage te boi bidi me deli dawe?” te po wai.
JOS 5:14 Te bidigo te po wei ponai, “Ena te ami bidi meni, tama ena te boi menio. Ena te Genuai Bidi Godigo ami kepten bidi dao,” wai. Te Josua aga tobolu te tǫba aiyaba mu pogulama, tama agabolo lotu po weyu, te po wai, “Ena nago sę bidi dao. Nago homugo eno mena sę emainogowe?” te po wai.
JOS 5:15 Tama Genuai Bidigo ami bidi keptengo Josuabolo te po wai, “Nago naga sągą nadoba dįą sąyao. Magi baso meni, te nage dolalubo tǫ, te gasa wiegi yai tedali mu elalubao.” Tama Josuago te tiwai tama yai.
JOS 6:1 Te Israel dabe augwali te pąba bidagasai elalubaso, tama te Jeriko hanu tomode bidibo bidi dabego te hanu tomoba pabo sunumi tigidali bugagia dąų walali. Te bidi dabe buluba peyu, edaba asu yabo usu me ebeo.
JOS 6:2 Tiali goli, Genuai Bidigo Josuabolo te po wai, “Bugagia odao! Te eno nagebolo te Jeriko hanu badi, te aga tuni bidi me, te bomai ami bidi dabe me, te eno nago nogoba mawaibao.
JOS 6:3 Nago naga ami bidi dabe dali te deli sogo te deli bubugade te nogo a naga olama, me badu deli sogo te hanu bagula bilao.
JOS 6:4 Te nogo a naga me si wabo sogo te pris bidi te dąų wali po muani halobage tolali bage polasa pabo badu te augwali poligi pelama, tama augwaligo te bu wabo nai biugel tolomainu yao, augwaligo te omai kibu sipsip gąų pedelaligo nigai. Tama te nogo a naga me badu si wabo side, nage dali te ami bidi dabe badi tama te hanu bagula nogo a naga olama, me badu si te tama sogo biliyu yao,” wai. “Tama dage te hanu obo sesege badu bagula bilibo sogo, te pris dabego te bu wabo nai biugel te bu ola biliduao.
JOS 6:5 Te augwaligo te biugel bu wabo te bobobage mu kegasa pabo sogo da, teda dage tigidaligo te i olama, po daga genuai mu wao, tama te po obadi, te hanu bagulali moni masigigo nigali obo masigi te pepeda paibao. Tama tigidali bidi te hanu tomoba dolo pomainao,” wali.
JOS 6:6 Tialima, Josuago te pris dabe i olama, asobode tama augwalibolo te po wai, “Dagego te dąų wali po muani halobage tolao,” wai. “Tama te pris a naga me badu sigo te biugel tolama, tama te dąų wali po muani halobage tolali bidi dabe asobadi, te augwali poligi pao,” wai dao.
JOS 6:7 Nosali Josuago te we bidibolo te po wai, “Dage piąo! Dagego te hanu bagulali masigi obo bagula biliyu, tama te ami bidi dabe te Genuai Bidigo dąų wali po muani halobage tolali bidi dabe asobadi te polasa pao.” Te po wai.
JOS 6:8 Tialima, augwaligo te Josuago wali po tiwai gilama yai. Te pris bidi dabe a naga olama, me badu si te Genuai Bidigo te dąų wali po muani halobage tolali bidi dabe nosali asobadi, te augwali te Genuai Bidigo gedude polasa peyu, te biugel bu ola pai.
JOS 6:9 Tama ami bidi dabe meba te pris dabe pabo badu polasa peyu, tama meba te dąų wali po muani halobage tolali bidi dabe pabodu nosali pai. Tama augwali pali sogo, te a naga olama me badu si te pris dabego te nai biugel bu olalua pai.
JOS 6:10 Tiali goli, Josuago te we bidi augwalibolo te po wai, “Te dagego te i me te kilikili me deli munu me wasiąbadi, te eno po dagebolo waboba te usu nigi pao,” wali.
JOS 6:11 Te agai te pris dabe dali, te Genuai Bidigo bomai po dąų wali po muani halobage tolali bage dali tagala palama, te hanu deli sogo bagulama bilimainogo yai. Te augwali ma geasa aselama, te sogo hulide augwali bidali pesageba ma bidagasai.
JOS 6:12 Tama Josua te kigamu digi mu hodaluama, tama te pris dabego te dąų wali po muani halobage ma selama, tama tolasa palio.
JOS 6:13 Tama te a naga olama, me badu si te pris dabego te bu wabo nai biugel te a naga olama, me badu si selama, tama polasa peyu, te bu wabo nai biugel bu ola pai. Tama ami bidi dabe meba te pris pabo badu polasa peyu, te meba nosali asiyu yai.
JOS 6:14 Augwaligo te tiwai naga te si sogo elama, tama augwa bidali pesageba ma geasa asai. Augwaligo te tama tiwai sę te nogo a naga me deli sogo te tiwai sę yai dao.
JOS 6:15 Te 7 wabo sogode, te be posobaso, tama augwali hogodaluama, te augwaligo polobadu yali tiwai gilama, augwaligo te hanu bagula bilai. Tiali goli, te bubugade augwaligo te hanu bagula bilali te nogo a naga sogo olama, me badu si, te tama sogo bilai.
JOS 6:16 Te tama sogo bilali silama, teda te pris dabego te bu wabo nai biugel te bu wabo mu bobobage sesabia pabode tama Josuago te we bidi augwalibolo te po wai, “Te i bomo elama, waiąo! Genuai Bidigo te hanu dagebolo mawai dao!
JOS 6:17 Dago te hanude elalubo tigidali nai dabe dali dolinao, dago te ofa me deli te Genuai Bidibolo te tigidali mabo tiwai gilama yao. Te penani we Rahap naga, te aga aya ida, aga hani dali, augwali te me ela munamuo, magi baso meni, agai te hanu sa asela suagasomainu tagala palali bidi si geme dualai dao.
JOS 6:18 Tiali goli, dagego te hanude nai me deli sidali weyu habu sai. Te dagego sali da, teda te dolabo te moni dwai sę te dage Israel dabe bidibo pesagede mu pedelaibao.” Te po wai.
JOS 6:19 “Te tigidali nai augwaligo te silvago me gol me bras me ain, tego nigali nai dabe, te Genuai Bidigo nai dabe naga dao. Dagego te Genuai Bidigo mone mubo beba naga sela asao,” Josuago te po wai.
JOS 6:20 Tialima, te pris dabego te bu wabo nai biugel bu wai. Tama te we bidi augwaligo odobo sogo, deli sogo mu tigidaligo te genuai i wabo sogode tama te hanu bagulali obo dabe te gisigasa dulali. Tama tiai digi, nosali te we bidi tigidali te tomoba pelama, tama augwaligo te hanu sai dao.
JOS 6:21 Augwaligo te tigidali we bidi me, te gesi we bidi me, te monu dabe, mosi dabe me, te bulmakau dabe me, sipsip, donki me, te nai dabe dali augwaligo te moni hwą bainatgo ela silai.
JOS 6:22 Tialima, hasia bolo Josuago te buluba sa asela suagasali bidi sibolo te po wai dao, “Dage si te penani wego be tomoba pelama, tama aga dali, te aga hani bage dali, augwali te selasa asama, te duga si dąų wali po tiwai gilama yao,” te po wai.
JOS 6:23 Tialima, te bidi si te be tomoba pelama, tama Rahap dali, te aga aya ida, me ama dede, me te tigidali hani wai puluba, me te augwa sę olo ebo bidi dabe, te augwali selasa aselama, tama augwali sigo te bage augwali te Israel dabe augwali bidibo pesage pąde tagalama, bidaluai.
JOS 6:24 Tama nosali te Israel dabe augwaligo sia nogolama, tama te hanu me te tomode elaluali nai tigidali te siago dai. Tiali goli, hasiabolo te Israel dabego te gol, me silva, me bras, me ain, tego nigali te nai dabe augwaligo selama, tama deli madi sisinama, te Genuai Bidigo mone mubo be tomoba muai dao.
JOS 6:25 Tiali goli, Josuago te Rahap me te aga hani bage tigidali bidalumainu sula tagalai, magi baso meni, agai te bidi si Josuago te Jeriko tǫba sa asobo bidi tagala palali sogo, agai te bidi si geme dualai. Tama te we Rahapgo wąį hani dabe te Israelde bidada asali, te megi e po asębo sogo me bidibo dao.
JOS 6:26 Tialima, Josuago bomai po te we bidi augwalibolo weyu, te tiwai po wai, “Te bidi me deligo e hanu Jeriko ma nigibaso da, teda Genuai Bidigo te bidi dali dwai sę yaibao,” wai. “Tama gasa bidi mego te hanu genuai obo dabe ma nigibaso da, teda aga ogwa gomunai bidi te isaibao. Ma, te tomoba pabo genuai sunumi ma nigibo bidi, te bidigo sabi ogwa bidi te isaibao,” te po wai, Josuago.
JOS 6:27 Genuai Bidi te Josua dali bidibaso, tama te tǫ dabe badu bidalubo tigidali bidi augwaligo agabolo genuai nogi mawai dao.
JOS 7:1 Hasia sogo Genuai Bidigo te po wai, te Israel dabego te dolabo nai dabego te nai me deli munu me selamuo po wai. Tiali goli, te Israel dabego te po sela sąwai, tama bidi me deli aga nogi Akan, te bidigo te nai meba sai. Tama tibaso, Genuai Bidigo sębę mu te Israel dabe dali eyu bidai. Akan te Karmigo ogwa, Karmi te Sapdigo ogwa, Sapdi te Serago ogwa, te Juda hani dabe dao.
JOS 7:2 Josua te Jerikode bidiyu, tama bidi meba te bulu nogi Ai teba tagala palai, te hanu me deli te giliga pedalubo badu te Betel badu, te Betaven pąde elaluai. Agai augwalibolo te hanu susa biligi pao po wai. Tialima, te bidi dabe augwali pelama, tama tiwai igi pai.
JOS 7:3 Nosali augwali ma asu, Josuabolo te tiwai po wai, “Nago te tigidali bidi pomainu mu elamuo. Te bidi sese sigo te umabo bidi hauwa mu 2,000, ma te bidi sese sela wabogo te umabo hauwa 3,000 bidi naga pelama, te Ai hanuba hwįgi pomainu tagala palao. Nago te tigidali bidi mu tagala palama, te hwįgi pomainogo me elamuo. Te genuai hanu menio,” te po wai.
JOS 7:4 Tialima, te Israel ami bidi dabe te bidi sese umabo 3,000 bidi mu pali. Tiali goli, te Ai hanu bidi dabego augwali edaba ma pobeasa asai.
JOS 7:5 Augwaligo te Israel dabe te hanu tomoba pabo te genuai sunumidu pobeasa pelama, te masigi pepedebo buluba usu nigi pai. Tama augwaligo te bulu duba aiya dulubo te sunumide te bidi te 36 tama bidi usu nama elai. Tama te Israel dabe augwali wi mu elama, tama bomo elama me dolalubeo.
JOS 7:6 Josua te homu sęgę mu elama, tama aga gudali ugwa pisąwai. Tama aga te Genuai Bidigo bomai dąų wali po halobage munalubo pąba te aga gesabidi te tǫba degasa dulama, munaluai. Tama te Israel dabe tonalubo bidi dabe augwali me te Josua dali tǫba degasa dulama, tama augwali tede bididubadi, te giliga aiyaba dega sigi pai. Augwaligo homu sęgę ebo te sa muyu, te augwa tobolude te tǫ hogomu muanio.
JOS 7:7 Tama nosali Josuago te po wai, “O God, Genuai Bidio! Magi elama, nago da te Jordan wę e badu odasa asaliwe? Nago da te Amor dabego nogoba menama, da dolomainogo yai dawe? Magi baso da te wę Jordan u badu bidimainu yai meniwe?
JOS 7:8 O Genuai Bidio, te Israel dabego te boi bidi dabe augwali tudiba ilama, tama augwali wi eyu, ma geasa asalio. Te eno magi po wagawe?
JOS 7:9 Te Kenan bidi dabego, me te e tǫde bidalubo gasa tigidali we bidi dabego te sę yali po odaibao. Tama tiyu, augwaligo da bobegelama, tama da tigidali elaibao! Tama naga nogi ugwaba sabo sę te nago megi magi elama yaibawe?” Josuago te po wai.
JOS 7:10 Tialima, Genuai Bidigo Josuabolo te po wai, “Hodaluao! Magi elama nage te tiwai tǫde pila mubawe?
JOS 7:11 Te Israel dabe augwaligo dwai sę yalio! Hasia eno augwalibolo habu seliyu, te Jeriko hanude elalubo nai dabe me sigio po wai, tiali goli augwaligo eno po sela sąwanio. Tama eno augwalibolo te dolao po wali nai dabe meba te augwaligo salio. Augwaligo te nai dabe wi selama, tama augwaligo tibo sę elama, tama augwaligo te nai dabe te augwa nai dabe tomoba geme dualalio.
JOS 7:12 Tama tialigo te Israel augwali bomo elama dolalu, te boi bidi dabe dali hwįabo te usu ebeo. Megi da, augwali te boi bidi dabe dali hwįbo wi soai, magi baso meni, te augwali dolomainao! Te dagebolo eno habu selali nai dabe te dagego dolisiąbaso da, teda ena munu me dage dali bidimainogo egobeo,” Genuai Bidigo wali.
JOS 7:13 “Tialima, hodaluao! Nage pelama, te we bidi dwagi yai ilama, tama augwali ena gesabidiba do asomainu sisi wiegi yai iligi pao. Magi baso meni, ena dagego God te eno po te elalubao, ‘Dage Israel dabe, dagego eno dagebolo te habu selali nai dabe meba salio. Dagego te nai dabe sela sąsiąbaso da, teda dagego te boi bidi dabe aiyaba me elalugobeo.
JOS 7:14 Tialima, te kigamu digi te dagego hani tigidali deli deli te ena bidibo madi sabolao. Te nai wi sali bidi hani haninimainogo tama tiao. Tama te hani me deli eno sa mubaso da, teda aga te hani bage tigidali deli deli bidi te ena bidiboba pedelao. Tama mena hani bage te eno nogo tų ilibaso da, teda aga hani we wai hani tigidali deli deli te sabola silao.
JOS 7:15 Tama mena bidigo eno te habu selali nai dabe saibaso da, teda dagego te bidi dali, te aga we wai puluba dabe dali, augwali te isimainu siaba ulama, tama aga tigidali doado bage dali ulaibao. Te bidigo te dwai sę genuai yaligo, tama te Israel dabe augwali hale dwai mu ilai. Tama agai te we bidigo ena dali dąų wali po togolama, bolalio,’ te po augwalibolo pusao,” Genuai Bidigo te po Josuabolo wai.
JOS 7:16 Tialima, Josua te kigamu digi mu hodaluama, tama te Israel hani tigidali deli deli pedalumainu ilalio. Tama agai te Judago hanibolo hasia mu sa muanio.
JOS 7:17 Agai te Judade te sibi bage tigidali te odasa asama, tama agai te Serago sibi sa muai. Tama Josuago te Serago hani sibi tigidali deli deli pedela silabo sę yalio. Tama agai te Sapdigo hani bage dolo sa muai.
JOS 7:18 Tialima, Sapdigo te aga hani tigidalide te bidi deli deli wasilama, tama Josuago te bidi Akan nogo tų ilai. Akan te Karmigo ogwa, tama Karmi te Sapdigo ogwa, tama Sapdi te Serago ogwa, te aga Juda hani dao.
JOS 7:19 Tama Josuago Akanbolo te po wai, “Ogwao, megi nage te Israel dabe dago Genuai Bidi God gedude dolugulama, tama nago te yali sę po dabe hanilama, hania pusao. Nago enade magi sę me deli munu me dualigio,” wali.
JOS 7:20 Tialima, Akango te po wai, “Mu tamao, eno dwai sę te Genuai Bidi, da Israel dabego God, agai gedude yalio. Megi nagebolo eno te yali sę po pusubao.
JOS 7:21 Te dago hwįyu, te Jeriko dabego nai dabe sali sogo, eno te nai dabe tomode te Babilon dabego sawi yai bobobage gudubo ugwa me deli suali, tama te silva sęgę me badu te 2 kilo usu badi, te gol me badu te sęgę deli usu elalubo eno suai. Eno te nai dabe pesa mu ebaso, tama augwali eno sai. Nago te eno ugwa be tomode munalubo gegelama, suagameo. Eno tigidali te tǫba pubulama, tama silva te dologode mu munalubao,” te bidi Akango te po wai.
JOS 7:22 Tama te po obaso, Josuago te bidi meba tagala palama, augwali udulama, te ugwa beba pai. Tama augwaligo te Akango po wali tiwai gilama te gegali, tama silva te gasa nai dologode mu munalubo suai.
JOS 7:23 Augwaligo te nai dabe selama, tama te Josua me te Israel bage tigidali bidiboba sela pai. Tama te Genuai Bidigo gedude augwaligo te tǫba muai.
JOS 7:24 Tialima, Josua dali te Israel dabe tigidaligo te Akan dali, te silva dabe badi, te ugwa me, te gol dage me, tama aga te ogwa dabe me, te aga wegi dabe me sobadi, tama te kibu bulmakau dabe badi, te donki dabe badi, te sipsip dabe me, te aga doado bage tigidali me sai. Augwaligo te tigidali nai dabe te selama, Akor bulu odogoba dulai dao.
JOS 7:25 Tama Josuago te po wai, “Magi elama nago te genuai sęgę daba sela asai dawe? Tama megi da, te Genuai Bidigo nagebolo me te sęgę mubao!” Te po ola silama, nosali te tigidali pali we bidigo te Akan aga we wai puluba dali tigidali te masigigo ela silama, tama augwali dali te augwa doado bage dali augwali tigidali te siago dai dao.
JOS 7:26 Tama augwaligo te masigi dabe hauwa te Akan aga we wai puluba dali augwali tigiba te masigi pesage holai. Tama te masigi pesage holali te e po asębo sogo me elalubao. Tama augwaligo te bulu nogi Akor poali, te sęgę pedelai bulu odogo dao. Augwaligo tama tialigo, tama Genuai Bidigo homu kedau ilai dao.
JOS 8:1 Tialima, Genuai Bidigo Josuabolo te po wai, “Te wi ebo tagalama, tama habu bulu pabo me tagalao! Te ami bidi tigidali nage dali pelama, te Ai dabe dali hwįgi pao. Eno nage tau selama, tama nago te Ai dabego tuni bidi te aiyaba elaluaibao. Tama agai bidi dabe badi, te hanu me, tama agai tǫ me, te eno nago nogoba mawaibao.
JOS 8:2 Nago te Ai hanude bidibo we bidi me, te augwa tuni bidi me, te mu silao, te nago Jeriko moni hanude te aga tuni bidi dabe dali silali tiwai gilama ilao. Tiali goli, te sogo dagego te tigidali bulmakau me, tama te bulude elalubo nai dabe tigidali sagameo. Megi dagego te hanuba hwįgi painu sisi elaluao. Hasia sogo bolo nago te ami bidi dabe meba tagala palama, te hanu tudi badu geme duala sigi pomainogo tagala palao,” wali.
JOS 8:3 Tialima, Josua dali te tigidali ami bidi dabe te Ai hanuba hwįgi painu sisi yai. Agai te hwįabo bomai bidi naga dagalama, tama te bidi sese umabo hauwa 30,000 bidi sa munama, tama augwali te hulide tagala palai.
JOS 8:4 Tama agai te po augwalibolo wai, “Dage pelama, te hanu pąde tudi badu geme duala sigi pao, te nǫ mumainogo tama yao. Tama dagego te hwįabo sisi elaluao.
JOS 8:5 Tiali goli, ena dali, te eno ami bidi dabe dali, da te hanu dolo asaibao. Tama te Ai hanu bidi dabego te da dali hwįainogo buluba asobaso da, teda dago te hasia sogo yali tiwai gilama te da wi soaibao.
JOS 8:6 Teda augwaligo da pobeasa asomainu sula tagaliyu, te dago augwali te hanu tagalama, digibulu kegasa soabo usu tiwai yaibao. Augwaligo homugo da te polobadu augwalide wi soali tiwai gilama ebo, te homu yaibao.
JOS 8:7 Dagego te tiwai ebo subaso da, teda dage te dualaluali pesage tagalama, tama te hanu tomoba pedela sigi pao. God, dago Genuai Bidigo, te hanu dagego nogoba mawaibao.
JOS 8:8 Dagego te hanu tomoba pedela sigi pabo sogo, dagego te Genuai Bidigo po wali tiwai gilama, te hanu siago ulao. Te eno po da, tama dagego bugagia wali piąo,” wali.
JOS 8:9 Tialima, Josuago augwali tagala palobaso, tama augwali pelama, te sia ge dega sigi pabo bulu me deli badu geme duala sigi pali, te Ai hanu de te Betel, te bulu si tomoba duala sigi pelama, tama te nǫ muai. Tama augwali tonalu bidali. Tiali goli, Josua te bidibo pesagede te sogo hulide tede bididuai.
JOS 8:10 Tialima, te kigamu digi mu te Josua hodaluama, tama te ami bidi dabe deliba sisinagasomainogo i wai. Nosali, aga dali, te Israel dabe genuai bidi dabe dali, augwali polasa peyu, tama te ami te Ai hanuba odasa pai dao.
JOS 8:11 Te Josua dali pali ami bidi dabe augwali te pąba pelama gana, te hanu tomoba pabo genuai sunumi te me badu sesege bogo badu pelama, tama augwali osogo bidabo pesage nigai. Tama te bulu odogo me deli te augwali de te Ai dabe dali te tomode elaluai.
JOS 8:12 Tama Josuago te bidi sese hauwa umabo 5,000 bidi tiwai usu pąde ami bidi dabe selama, tama augwali te sia dega sigi pabo badu, te hanu Ai de Betel tomo agebele si tomoba pelama, geme duala sigi pomainu tagala palai dao, te do tama yai dao.
JOS 8:13 Te ami bidi dabego te tama tialio, te genuai ami hanigo bidabo pesage te hanu sese bogo badu pąde nigai. Tama te gasa ami bidi dabe meba te sia ge dulubo badu te nǫ muyu bidali. Tama Josua te hulide te bulu odogode bidalio.
JOS 8:14 Te Ai hanu tuni bidigo te Josuago ami bidi dabe bidibo suali sogo, kigamu digi mu aga te aga bidi dabe tigidali dali asesa polo te Jordan odogo buluba dulama, te Israel dabe dali hwįainogo yali. Te bulu odogode te augwali polobadu hwįai madi. Tiali goli, te Ai gavman tuni bidigo te nǫ muani hwįbo bidi tudi badu asabo te agai munu me konebeo.
JOS 8:15 Josua me, te aga ami bidi dabe dali, te augwali tibo digi te augwali te kemi tǫ buluba wi soai.
JOS 8:16 Tuni bidigo te tama tebo subaso, tama agai te hanude bidibo tigidali bidi dabe i olama, te Israel dabe augwali nǫ bagulagasao wai. Tama augwaligo te Josua pobeasa soabo sę eyu, tama augwaligo te hanu taga soyu, digibulu mu soalio.
JOS 8:17 Megi da, te Ai hanu dali Betel hanu si ami bidi dabe tigidaligo te Israel dabe pobeasa pelama silai. Tama te hanu tomoba pabo genuai sunumi te olo dalaluali, tama te tonaluabo bidi me meni yanio.
JOS 8:18 Tialima, Genuai Bidigo Josuabolo te po wai, “Te nago sesemone ene ugwaba selama, tama te Ai hanu usu sao. Megi eno te hanu nage nogoba mawaibao,” wali. Tama Josuago te Genuai Bidigo wali po tiwai gilama yai.
JOS 8:19 Agai te sesemone ene ugwaba sobaso, tama polo mu, te ami bidi dabe geme dualaluali augwali hogodaluama, tama augwali udada peyu, te hanu tomoba pai. Augwaligo te hanu pedela sigi pelama, tama polo augwaligo te hanu siago ulalio.
JOS 8:20 Te Ai bidi dabego te hanuba tonono pobadi, augwaligo te hano ugwaba holobo suai. Augwaligo koneani, te augwali geme duala sabo pesage meni isiąyu, te dolabo sęgo augwali me edeligobeo. Magi baso meni, te Israel dabego augwali tibo po olama, tama te masigi tǫ buluba wi pali, megi da te augwali ma begelama, tama augwali dali hwįai.
JOS 8:21 Josua dali te ami bidi dabe augwaligo suali, te augwa age dabego te hanu selama, tama te siago ulubo suai. Tama tibaso, augwali ma gelama, begasama asiyu, tama te Ai bidi dabe ela mubo sę yai dao.
JOS 8:22 Tama te hanu tomoba pali te Israel dabe te buluba ma aselama, tama te Israel hani si augwaligo te Ai bidi bagua selama, tama te tigidali augwaligo ela muai. Te me deli wi me pabe, te me deli me bidibeo.
JOS 8:23 Te Ai hanu tuni bidi deli digi agaduba naga bidai. Tama Israel dabego aga pageabi elama, tama Josua bidibo madi odasa pai.
JOS 8:24 Te Israel dabe augwaligo te augwa boi bidi dabe tigidali te augwali pobeasa asali, te kemi tǫ bulude ela silai. Nosali augwali te Ai hanuba ma pelama, tama augwaligo te hanu tomode bidali we bidi tigidali ela muai.
JOS 8:25 Te sogode te Ai hanude bidali tigidali we bidi ela silali, te augwali elali namba te bidi sese umabo mu, te 12,000 dao.
JOS 8:26 Josua agai sesemone ene te Ai hanuba ponama tolaluali usu nama, tigidali te badu bidali we bidi tigidali isai.
JOS 8:27 Te Israel dabe augwaligo te bulmakau dabe, me te hanude elaluali doado bage dabe sali, te Genuai Bidigo Josuabolo wali po gilama tama tiai dao.
JOS 8:28 Josuago te Ai hanu siago ulama mu dolali, te megi tama e po asębo sogo me te tiwai dwai elalubao.
JOS 8:29 Tama Josuago te Ai tuni bidi te ni me delide walama, tama aga elalubadi te be pio igi pai. Tama pio Josuago po olama, tama te bidi dabego te tigi aiyaba sela dulama, tama augwaligo te hanu tomoba pabo genuai sunumiba sąwai. Tama augwaligo masigi hauwa aga tigi daiba ugwadu pesage holai. Te masigi pesage holali te e po asębo sogo me elalubo dao.
JOS 8:30 Te silama, nosali Josuago te Israel dabego Genuai Bidi Godigo alta me deli te Ebal bulu du bagede nigai.
JOS 8:31 Tama tiyu, agai te Genuai Bidigo sę bidi Mosesgo te Israel dabebolo wali po dolo tigidali wali palio. Mosesgo bomai pode te po wai, “Dagego te alta me deli te masigigo nigao, tiali goli dagego te masigi dabe te ain dage me deligo munu me togolamuo,” wali. Te alta daide te Israel dabego te siaba tigidali ulama dabo te ofa ilali, te siago dali keli naga elaluai. Tama augwaligo te Genuai Bidi dali deli homu ebo ofa yalio.
JOS 8:32 Te Israel dabe augwaligo tononaluyu dolalubadi, tama Josuago te Mosesgo bomai po te alta nigali masigide asęai.
JOS 8:33 Te tigidali Israel dabe dali te augwa genuai bidi dabe me, te ami dabego ofisa bage me, tama te po tų dodolobo jas dabe me, te augwali dali bidibo gasa bulu bidi dabe dali, tigidali te Genuai Bidigo po dąų wali halobage munalubo tomoba ilama, si dali si badu dolaluai. Te Livai hani pris dabego te bomai po munalubo halobage toloboba augwaligo tononaluai. Me deli badu te we bidi augwali te bulu du Gerisim te badu dolaluyu, tama te we bidi meba augwali gasa bulu du Ebal te badu dolaluyu yai. Moses, Genuai Bidigo sę bidigo, polobadu te bidi dabe augwalibolo weyu, te Genuai Bidigo augwali dali dwagi yai sę emainao po maiabo sogo te tiwai lain si wasiąo po wai dao.
JOS 8:34 Augwali tama dolalubadi, tama Josuago te Mosesgo te bomai po elaluali bukude asęani po tigidali nedali, agai te Godigo augwalibolo te dwagi yai sę yabo po me, tama te Godigo augwali dolabo po me nedai.
JOS 8:35 Megi da, Josuago te Mosesgo asęani bomai po tigidali mu nedama, tama tigidali Israel we bidigo odai. Te we dabe sibi me, te wai puluba me, te gasa buludu aselama augwali dali bidibo we bidi, augwaligo me te nedali po odai.
JOS 9:1 Te Jordan wę sia ge dega sabo badu bidalubo tuni bidi dabe badi, te bulu dude bidalubo tuni bidi dabe badi, te malu bulu dolo bidibo tuni bidi dabego me, tama te nabis ąį sani Mediterenian te badu te Lebanon teba usu nigi pelama bidalubo, te tuni bidi dabe augwali tigidaligo te Israel dabego ebo sę dabe po odada pai. Te Hit tuni bidi dabego badi, te Amor dabe badi, te Kenan dabe badi, te Peres dabego me, te Hivi, me Jebus, te tama tǫde bidalubo tuni bidi dabego te po odai.
JOS 9:2 Augwaligo te sę ebo po odama, tama augwali sisinama, te Josua dali me te Israel dabe dali hwįainogo yai.
JOS 9:3 Tama te Gibeon bulu bidi dabego me te Josuago te Jeriko de Ai hanu side yali sę po odama,
JOS 9:4 tama augwaligo aga gagamu selainu usu sabo po miani. Tama augwaligo te tibo nai dabe selama, te badi waba buluyu, te poloba badi meme waligo nigai botol pepeda pai selama, tama augwaligo ma hobolai. Tama augwaligo te nai dabe te augwa donki daiba ugwadu muai dao.
JOS 9:5 Tama augwaligo poloba badi ugwa gudubadi, te poloba badi sągą nadoba mubadi yai, tama te wa pai bret dwai mu yai selasa palio.
JOS 9:6 Tama nosali augwali te Josua bidibo pesage te Gilgal teba sabolama, tama augwaligo agabolo me te Israel bidi dabebolo te tiwai po wai, “Da te digibulu asalio. Te dago dage dali bomai po dąų walama, te da bugagia bidiyu, te me hwįgobeo, menio,” wali.
JOS 9:7 Tiali goli, te Israel dabego te Gibeondu asali Hivi dabebolo te po wai, “Magi baso dago te po me deli dage dali bomai po dąų omainogowe? Te dage pąde naga bidibo homu ebao,” wali.
JOS 9:8 Tiali goli, te Hivi dabego Josuabolo te po wai, “Dago te dagego sę bidi dabego sę ebo tiwai gilama sę yaibao.” Tialima, Josuago augwalibolo hanalu wali, “Dage mena hani dawe? Tama dage menadu asaliwe?”
JOS 9:9 Tialima, augwaligo agabolo te tiwai po wai, “Da te digibulu bulu me delidu asali, magi baso meni, dago te dagego Genuai Bidi Godigo genuai nogi elalubo po odalio. Dago te tigidali sę agai te Isip tǫde yali odai dao.
JOS 9:10 Dago agai te Amor dabego tuni bidi si dali, te wę Jordan te sia ge pedalubo badu yali sę po dabe odai. Augwali si da te Sihon, te Hesbon bulu tuni bidi, me Ok, te Basan tuni bidi dao. Aga te Astarot tede bidai dao.
JOS 9:11 Tama dena genuai bidi dabego, me te dago tǫde bidalubo tigidali we bidigo dabolo te tiwai po wai, ‘Te dage bilabo me deli te nai meba sisi ilao. Tama dage pelama, te Israel we bidi dabe sisinigi pelama, te po wagi pao, “Da te dagego sę ebo bidi dabe dao. Te dagego da dali te bugagia bidabo bomai po me deli dąų wao.” Te po Israel dabebolo pusigi pao,’ dena hani begego dabolo te po wali.
JOS 9:12 Te dago tubo nai bret suao. Te dago bidibo bulu taga soyu soali sogo, te bret tamadi tama ulama posolo elaluali. Tiali goli, suao! Te bret dabe te wa pelama, tama dwalio.
JOS 9:13 Te e meme tigiwali botol dabe te gesi elalubadi, te sogo dago te wain ąį buai. Tiali goli, megi da, suao! Augwali te pepeda pai. Tama dago gudali ugwa dabe me, te sągą nadoba me, te bobobage sunumidu asidubadi dolai dao,” te po wai.
JOS 9:14 Tama te Israel bidi dabe augwaligo te Hivi dabego elalubo nai dabe suali. Tiali goli, hasia bolo te Genuai Bidi God aga homuba augwaligo me hanalubeo.
JOS 9:15 Tialima, Josuago augwali nogo menama, tama te Israel dabego augwali munu me eligobeo po olama, te bomai po augwali dali dąų wai. Tama te Israel dabe genuai bidi dabego me te bomai po augwali dali dąų walio.
JOS 9:16 Augwaligo te bomai po dąų ola sai madi, tama nosali sela sogo bidai digi, te Israel dabego te po wali page gegali, te bidi dabe augwali te digibulu bidi meni, te bulu pąde bidi naga asai yalio.
JOS 9:17 Tama tibaso, megi da, te Israel dabe augwali hogodama, te gasa badu poloba palio. Augwali pelama, te sela sogo dąį igi pabode, tama augwali te hani dabego hanuba sabolai. Te hanu dabe nogi e dao: Gibeon, Kefira, me Berot, me Kiriat Jearim. Te e tama hanuba augwali sabolai.
JOS 9:18 Tiali goli, te Israel dabego augwali me elibeo, magi baso meni, te Israel augwa genuai bidi dabego te bomai po te we bidi augwali dali te augwa Genuai Bidi Godigo nogide te po te we bidi dabe dali dąų wai. Tama tiyu, te Israel dabego te augwa genuai bidi dabe augwalibolo te tama tiali pode te wado po naga augwalibolo wai dao.
JOS 9:19 Tiali goli, te Israel dabe augwa genuai bidi dabego po wei ponoyu, te po wai, “Dago te we bidi dabe augwali dali te dago Genuai Bidi God dali te bomai po dąų walio. Dago megi augwali me dologobeo!
JOS 9:20 Dago augwali magi baso sula tagaliyu meni, te dago bomai po dąų walalio. Te dago augwali elibaso da, teda Godigo da dolaibao.
JOS 9:21 Te augwali bidimainu sula tagaliyu, tiali goli augwaligo te dago isi me wę dabe sela mabo sę emainao.” Te genuai bidi dabego te tiwai po naga walai. Te po obaso, te Israel dabego te Gibeon bage elebeo.
JOS 9:22 Tialima, Josuago te Gibeon dabe i olama asobode, tama augwalibolo agai te po wai, “Magi baso dagego da tibo po ola maniwe? Dagego te dage digibulu me delidu asalio po wali. Tiali goli, dage pąde naga bidibao!
JOS 9:23 Dagego tibo po waligo da, teda dagebolo Godigo dwai sę ilaibao. Tama tibaso, sesemane sogo dage te eno Godigo lotu beba te isi me wę me sela mabo sę bidi bidagameo,” wali.
JOS 9:24 Tama te Gibeon dabego te po wai, “Dago e tiwai po odali, te dagego God, Genuai Bidigo, te aga sę bidi Mosesbolo weyu, te tǫ tigidali dagebolo mawaibao po wai, tama dage sabalubo sogo da, teda dagego tede bidibo we bidi tigidali ela siliąo po walio. Tama tibaso, da dwai wi mu dagede ebaso, tama dago te usu sabo po wai dao.
JOS 9:25 Tiali goli, megi da te nago nogode bidibao. Mena sę nago homude te dwagi yai dolo da homu ebaso, te sę nago dabolo yagameo,” wali.
JOS 9:26 Tialima, Josuago te Gibeon dabe tau selama, te Israel dabego augwali me ela mubeo.
JOS 9:27 Tialima, Josuago augwali te Israel dabego isi me wę me sigi pabo sę yabo bidi nigilai. Tama me augwaligo te Genuai Bidigo lotu bede muabo altade me te isi me wę me sesabo bidi dabe nigilai. Tama Gibeon dabego te tigidali te Genuai Bidigo lotu po wabo pesage nigabo madi te tigidali bulude te sę ela bilai dao. Tama te sę eyu, tama megi e po asębo sogoba usu nigi pai dao.
JOS 10:1 Te Adoni Sedek, te Jerusalem tuni bidigo, te Josuago te Ai hanu pedela selama, tama tigidali bidi dolama, tama Ai hanu tuni bidi ela mubadi yai, te agai te Jeriko hanude te aga tuni bidi dali yali sę tiwai gilama yali po odai. Tama agai odali, te Gibeon dabego te Israel dabe dali abagi si olama, nogo menama, tama augwali dali deli madi bidibo po odalio.
JOS 10:2 Tibaso, aga de te Jerusalem hanude bidali we bidi dabe dali, augwali si wi dwai mu yai, magi baso meni, te Gibeon hanu te genuai hanu elaluali, te gasa genuai tuni bidi elalubo hanu gagawai elaluai. Te genuai hanu digi mu te Ai hanu te aiyaba elaluai elaluali, tama tigidali bidi te hwįbo bomai bidi naga bidai. Tama tibaso, te Jerusalem bidi dabe te augwalide wi umabo mu yalio.
JOS 10:3 Tialima, Adoni Sedek tuni bidigo po te Hebron tuni bidi Hohambolo po tolobadi, tama Piram te Jarmut hanu tuni bidibolo me, tama Jafia te Lakis hanu tuni bidibolo me, tama Debir te Eklon hanu tuni bidi dali, te augwalibolo po ola tolalio.
JOS 10:4 Agai te tiwai po wai, “Dagego te eno Gibeon hanu bidi dabe dali hwįbo te dage aselama, tau sagasao, magi baso meni, augwaligo te Josua de te Israel dabe dali sibolo te abagi olama, deliba bidainogo nogo mawai dao,” te po ola tolali.
JOS 10:5 Te e tama a naga te moni hanu Amor tuni bidi dabe, augwali te Jerusalem hanu tuni bidi, me te Hebron, me Jarmut, me Lakis, me Eklon, te e tama a naga hanu dao. Tama te tuni bidi dabego te augwa ami bidi dabe sisinama, tama augwaligo te Gibeon hanu bobogela sigi pelama, tama augwaligo augwali dali hwįagasai.
JOS 10:6 Tama tibaso, te Gibeon hanu bidi dabe augwaligo Josua bidibo pesage te Gilgal teba po ola tolai. Augwaligo te po wai, “Te bulu dude bidalubo moni hanu Amor tuni bidi dabe tigidali te augwali deliba sisinama tama augwaligo da dali hwįainogo sabolai dao. Nago te naga sę bidi da munu mu tagalamuo! Nage polo asama, da tau sagasao!” wai.
JOS 10:7 Josuago te po odama, tama aga ami bidi tigidali dali hogodama, tama te bidali pesage Gilgal te tagalama, tama pelama, augwali tau sigi pai dao. Agai te hwįbo bomai bidi dabe me aga dali pali.
JOS 10:8 Tialima, Genuai Bidigo Josuabolo te po wai, “Te boi bidi augwalide wi me igio. Eno augwali te nago nogoba manio. Te bidi me deligo dage aiyaba me elalugobeo,” wali.
JOS 10:9 Tama Josua te aga ami bidi dabe dali augwali hulide pelama, tama te Amor dabe bidalubo madi pedelai. Te Amor dabe augwaligo te hwįabo sisi isiąbadi, tiali goli polo tama, te Israel dabe augwaligo te hwįbo gagalalio.
JOS 10:10 Te Amor dabego te Israel ami bidi dabe asobo sulama, tama Genuai Bidigo augwali wi ilama, tama augwali homu kolesaga umuna palai. Tama te Israel dabe augwaligo te Amor dabe augwali te Gibeon hanude dolobo sę ilama, tama augwaligo augwali pobeasa duluyu, te bulu du bagua sali te Bethoron teba dulai. Augwaligo te Amor dabe dolobo sę ela pidubadi, te Aseka te bogo badu usu nama, te Makeda teba dąį iligi pai.
JOS 10:11 Tama te Amor dabe te Israel ami bidi dabede wi pabo sę elayu, tama augwali te Bethoron te bulu baguba me te Aseka teba wi aiyaba palio. Tialima, Genuai Bidigo te moni kedau ilibo talua ge kulubage te masigi tiwai tulumainu ilama, tama te Amor dabe ela muna silai. Te masigi du tiwai talua ge tulubagego ela muani bidi dabego nambago te Israel bidi dabego ela muani bidi te namba aiyaba elaluai dao.
JOS 10:12 Tama te sogo te Genuai Bidigo te Israel dabe tau selama, tama augwaligo te Amor dabe aiyaba elaluai. Tama Josuago Genuai Bidi dali po miai. Tama te Israel dabe augwaligo gedude agai te po wai, “Giliga, nage te Gibeon hanu ugwadu dolaluao. Polua, nage te Aijalon bulu odogo ugwadu dolaluao.” Te po wai dao.
JOS 10:13 Tama te po obaso, te giliga ge dolalubadi, tama polua aiyaba me dulisąbadi, te Israel dabego te boi bidi dabe aiyaba elalubo siba usu nai. Giliga ge te polo me dega sigi pabeo. Aga te dagalude dolaludubadi, te deli sogo bubuga te tiwai usu nai. Tama augwaligo te sę yali po te Doloba Pai Bidi Dabede Po Wabo Bukude asęai dao.
JOS 10:14 Te polobadu sogo tede gagalasa, asama, tama megi e po asębo sogoba usu nagasobo, te tiwai sę me deli te me ebeo. Genuai Bidigo te bidi me deligo po odama, tama te Israel dabego hwįbode te agai augwali tau sai dao!
JOS 10:15 Nosali Josua te ami bidi dabe dali augwali te augwa bidali pesage te Gilgalba ma palio.
JOS 10:16 Tiali goli, te a naga tuni bidi dabe wi pelama, tama te bulu Makeda tede te masigi ola bede geme dualaludai.
JOS 10:17 Tama bidi mebago augwali dualalubo sulama, tama augwaligo Josuabolo te augwali dualalubo pesage te po wai.
JOS 10:18 Tialima, Josuago te po wai, “Te genuai masigi meba hogogobele pelama, tama te ola be dalalubo te paliama, tama te tonaluabo ami bidi meba teba munama te tonaluao,” wai.
JOS 10:19 “Tiali goli, duga digi tede olo me bidilamuo. Dage te gasa boi bidi dabe wali pelama, tama augwali tudi badu te nosali asali bidi dabe dalibolo hwįgi pao. Dagego augwali te augwa hanuba sabalomainogo sula tagalamuo! Magi baso meni, God, dago Genuai Bidigo, te dagego hwįbo bomo usu elama, te boi bidi dabe aiyaba elaluaibao po wai dao,” wali.
JOS 10:20 Tialima, Josuago me te Israel dabe augwaligo dali te boi bidi dabe tigidali pąde ela silainu yai. Tiali goli, meba wi peyu, te augwa hanu tomoba geme duala sigi palio, te hanu te genuai bomai obo elaluali.
JOS 10:21 Nosali Josuago ami bidi dabe tigidali augwali te Makedaba ma geasa asai. Te me dedeli me dolobeo. Tama tibaso, mena bidi me deligo te dwai posobo po te Israel dabebolo me wainogo ebo usu me isiąwai dao.
JOS 10:22 Nosali Josuago po ma wali, “Te masigi ola be paliali po dala sąnama, tama te a naga tuni bidi te ena bidiboba odasa asao,” te po wai.
JOS 10:23 Tialima, augwaligo tama tiwai yalio. Te bidi dabe augwaligo te Jerusalem hanu tuni bidi, me te Hebron, me Jarmut, me Lakis, me Eklon, te tama a naga hanu tuni bidi dabe te Josua bidiboba odasa palio.
JOS 10:24 Augwaligo te augwali te Josua bidiboba odasa aselawai madi, tama agai te Israel dabe tigidali i wali, tama agai te aga dali pali te ami bidi dabego ofisa bidi dabebolo te po wai, “Dage eba aselama, tama dagego sągą te tuni bidi dabego mageba agayao,” wali. Tialima, augwaligo tama tialio.
JOS 10:25 Nosali Josuago te ofisa bidi dabe augwalibolo te po wai, “Dage wi eyu, tama didibili munu me elamuo, bomonama dolaluao, te dagego nosali augwali dali hwįabo boi bidi dabebolo te Genuai Bidigo te tiwai naga ilaibao,” wali.
JOS 10:26 Nosali Josuago te tuni bidi dabe elama, tama augwali te ni pedai a nagade walalio. Augwali te nide walalubadi, te sia ge aiyaba dulai dao.
JOS 10:27 Tama be pio mu ebode, Josuago te bidi dabebolo olama, tama augwaligo te tigi dabe aiyaba sela dulama, tama augwa te dualaluali ola be tomoba sąwai. Tama te ola be augwaligo te moni genuai masigigo paliai. Tama te masigi dabe e po asębo sogode me elalubo dao.
JOS 10:28 Te sogo naga Josuago te Makeda hanu pedela sigi pelama, tama te hanude bidali tuni bidi pageabi yai. Tama agai te hanude bidali we bidi tigidali ela silai. Te deli me bidibeo. Agai te deli tobage tiwai kolesaga naga te Makeda tuni bidi dali yai, agai te Jeriko hanu tuni bidide yali sę tiwai gilama naga yalio.
JOS 10:29 Te silama nosali, Josua aga ami bidi dabe dali augwaligo te Makeda hanu tagalama, te Lipna hanuba pelama, tama augwaligo te hanude bidibo bidi dabe augwali dali hwįgi palio.
JOS 10:30 Tama Genuai Bidigo te Israel dabe augwali tau selama, tama augwaligo te boi bidi dabe augwali aiyaba elaluama, tama te hanu selama, te hanude bidali tuni bidi me pageabi yai. Tama Josuago te hanude bidali bidi tigidali ela silama, tama deli digi me bidibeo. Agai te tuni bidibolo te Jeriko tuni bidibolo yali kolesaga tiwai naga yai dao.
JOS 10:31 Te silama nosali, Josua aga ami dabe dali augwaligo te Lipna hanu tagalama, tama te Lakis hanuba pali. Augwaligo te hanu bobegelama, tama augwaligo te Lakis hanu bidi dabe dali hwįanio.
JOS 10:32 Genuai Bidigo te Israel dabe augwali tau selama, tama te si sogo wabode augwaligo te boi bidi dabe aiyaba elaluali. Tama Josuago me deli sula me tagalobeo. Agai tigidali bidi ela muai, agai te Lipna hanude yali tiwai gilama yalio.
JOS 10:33 Te Horam, te Geser hanu tuni bidi, aga aselama, te Lakis hanu bidi dabe tau sagasai. Tiali goli, Josuago aga me, te aga hani bidi dabe dali, te hwįanigo augwali aiyaba elaluai. Tama Josuago augwali me deli bidimainu me gogola tagalobeo.
JOS 10:34 Te silama nosali, Josua aga ami bidi dabe dali augwaligo te hanu Lakis tagalama, tama te hanu me nogi Eklonba pai. Augwaligo te hanu bagulama, tama augwaligo te Eklon dabe augwali dali hwįanio.
JOS 10:35 Augwaligo te hanu te deli sogo bubugade naga salio. Tama Josuago te hanude bidali bidi tigidali ela muani, te agai Lakis hanude yali tiwai gilama yai.
JOS 10:36 Te silama nosali, Josua aga ami bidi dabe dali augwaligo te Eklon hanu tagalama, tama te Hebron hanuba pai. Tama augwaligo te Hebron hanude bidali bidi dabe dali hwįnama,
JOS 10:37 tama te hanu sai. Tama augwaligo te tuni bidi eleyu, tama te Hebronde bidali we bidi dali tigidali elebadi, te gasa dwasianu hanu pąde bidaluali bidi dabe dali tigidali elalio. Tama Josuago te Hebron hanu tigidali mu dolali, te agai Eklon hanude yali tiwai gilama yai. Tama te hanu bidi me deli me bidai menio.
JOS 10:38 Nosali Josua aga ami bidi dabe dali augwali begelama, tama te Debirba pelama, tama augwaligo te Debir dabe dali hwįgi pai.
JOS 10:39 Augwaligo te hanu dali, te tuni bidi me siyu, tama te gasa pąde elalubo dwasianu hanu dabe me sai. Augwaligo tede bidali bidi dabe tigidali ela muai. Josuago te dedeli kolesaga tiwai naga te Debir hanude bidibo bidi dabebolo me te tuni bidi dali tiali, agai te Hebronde me te Lipna hanu side te augwa tuni bidi dabe dali yali kolesaga tiwai naga yai dao.
JOS 10:40 Tama elama, tama Josuago te tǫ tigidali badu te hwįanigo aiyaba elaluai. Agai te bulu dude bidali tuni bidi dabe me, te Negev dabe badu tuni bidi dabe me, te tǫ malude bidali tuni bidi dabe me, te bulu du pąde bidali tuni bidi dabe me, te agai augwali aiyaba elaluai. Agai bidi deli me sulama, gogola me tagalobeo. Agai tigidali ela muai. Agai te Israel dabego Genuai Bidi Godigo te agabolo wali po tiwai gilama yalio.
JOS 10:41 Josuago te giliga bogo badu te Kades Barneade gagalasa, te Gasa te nabis pąba dąį elama bidali bage tigidali aiyaba elaluali, tama te Gosen tǫ elalubo badu tedu dąį elama, te Gibeon badu, te tǫ me bogo badu usu nigi pai dao.
JOS 10:42 God, te Israel dabego Genuai Bidigo, te augwali tau sobaso, tama augwaligo te tigidali tǫde bidali tuni bidi dabe tigidali augwali aiyaba elaluama, tama augwaligo tǫ te hwįanigo naga sai dao.
JOS 10:43 Nosali Josua aga ami bidi dabe dali augwali te augwa bidali pesage te Gilgal teba ma pai dao.
JOS 11:1 Te bidi dabe augwaligo te Josuago yali tigidali sę po sela bilali po te Hasor tǫ tuni bidi Jabinba sabolali. Tama agai te po te Jobapbolo ola tolali, te Madon hanuba, tama te Simron hanu tuni bidibolo me, te Aksap hanu tuni bidiba me, te po ola tolali.
JOS 11:2 Tama te tǫ bogo badu te bulu du elalubo badu bidali tuni bidibolo me, tama te Jordan wę odogo malu tǫde, te Kineret, te tǫ bogo badu bidali tuni bidibolo me, tama te dolo elalubo tǫde bidali tuni bidibolo badi, tama te Dor hanude te ąį sane pąde bidali tuni bidibolo badi, te tama hanu tuni bidi dabe augwalibolo te po ola tolalio.
JOS 11:3 Tama agai te Jordan wę pąde bidaluali te Kenan dabebolo me po ola tolobadi, tama te bulu du bagede bidaluali hani, augwalibolo me wai. Te augwali Amor dabe, me te Hit dabe, me te Peres dabe, me te Jebus dabe, te augwalibolo po tolai. Tama agai te Hivi dabe augwali te Hermon bulu du pąde, te Mispa dabego tǫde bidalubo bage augwalibolo me te po ola tolai dao.
JOS 11:4 Augwaligo te po odama, tama augwali te augwa ami bidi dabe tigidali augwali dali asai. Tama augwali te bidi hauwa umabo mu elaluali, augwaligo ami bidi dabe te nabis masigi sane usu tiwai. Tama augwaligo hwįbo nai hos me karis hauwa mu elaluai.
JOS 11:5 Te tuni bidi dabego te augwa ami bidi dabe hauwa sisinama, tama augwali bidabo pesage te sigi ąį Meromde nigilama, te Israel dabe augwali dali hwįainogo yali.
JOS 11:6 Tialima, Genuai Bidigo Josuabolo te po wai, “Nage augwalide wi munu me elamuo. Do te tobage sogo ebode da, teda eno digi te Israel dabe augwali tau selama, tama augwaligo te boi bidi dabe tigidali ela muaibao. Tama dagego te hos dabe sągą genuai kigibili togolama, tama augwa te karis dabe dali siaba ulao,” wali.
JOS 11:7 Tama te boi bidi dabego hwįabo sisi isąbadi, tialima polo mu tama Josua dali, aga ami bidi dali, tigidaligo augwali dali te wę Meromde te hwįani.
JOS 11:8 Tama Genuai Bidigo te Israel dabe augwali tau selama, tama augwaligo te boi bidi dabe aiyaba elaluai. Te Israel dabe augwaligo hwįyu, tama te boi bidi dabe pobeasa peyu, te tǫ bogo badu te genuai bulu Saidon teba usu nama, te Misrefot Maim dąį igi pelama, tama te giliga pedalubo badu, te odogo bulu Mispa, te badu saboligi pali. Augwaligo hwį hwį pali, te boi bidi dabe tigidali siliboba usu nai dao.
JOS 11:9 Tama Josuago augwaligo hwįbo nai hos sągą genuai kigibili togobadi, te augwaligo karis dabe me siaba ulubadi yali, te Genuai Bidigo agabolo wali gilama tama tiai.
JOS 11:10 Te silama, nosali Josua ma begasa asiyu, tama te hanu Hasor selama, tama te hanude bidali tuni bidi ela muai. Te sogo te Hasor hanu te tigidali tǫde elaluali hanu dabego te polaluali hanu elaluai.
JOS 11:11 Te Israel dabe augwaligo te Hasor hanude bidali bidi tigidali ela munama, tama deli me bidibeo. Tama augwaligo te hanu siago ulai dao.
JOS 11:12 Josuago te tigidali tuni bidi pageabi elama, tama augwaligo hanu tigidali sai. Tama agai te bidi tigidali elibadi yali, te Genuai Bidigo sę yali bidi Mosesgo wali tiwai gilama yalio.
JOS 11:13 Tiali goli, te Israel dabe augwaligo te bidi dabe augwaligo te dwasianu bulu dude nigali hanu te me siago ulubeo. Josuago te Hasor hanu naga siago ulai dao.
JOS 11:14 Te Israel dabe augwaligo te hanude tigidali mone, me te tigidali bulmakau me selama, te augwa digi te augwa nai da olama, tolaluai. Tama augwaligo te bidi me deli sula tagalobeo. Te augwaligo tigidali ela silai dao.
JOS 11:15 Hasia bolo Genuai Bidigo po te aga sę bidi Mosesbolo mawai. Tama Mosesgo te po dabe te Josuabolo menama, tama Josuago te po tigidali wali pai. Josuago tigidali sę yali, te Genuai Bidigo Godigo Mosesbolo wali po tiwai gilama tama tiai.
JOS 11:16 Josuago te tǫ tigidali pedai badu sai. Agai te bulu dude elaluali tigidali bulu me, te tigidali Negev hanu tǫ badu me, te tigidali Gosen bulu badu me, tama te dolo tǫ elaluali bulu me, te Jordan wę odogo bulu elaluali me, tama te malu tǫ bulu me, te nosali nogi yali te Israel dabego bulu du elaluali bulu me, te tigidali Josuago sela silai.
JOS 11:17 Te tǫ dąį te Halak bulu dude gagalali, te Seir pąde, tama pelama, te bulu Balgat te Lebanon odogode elalubo, teba dąį igi pelama, te bulu du Hermon te tǫ bogo badu dao. Josuago te bobobage sogo mu te tuni bidi dabe dali hwįnama, tama agai te tigidali bidi ela silai dao.
JOS 11:19 Te hanu me deligo te Israel dabe augwali dali nogo menama, tama augwali dali me bidibeo. Gibeon te Hivi dabego page bulu, te bulu deligo te Israel dabe dali nogo mawai. Tigidali te gasa hanu dabe te hwįanigo dolai dao.
JOS 11:20 Magi baso meni, Genuai Bidigo digi te hani dabe homu hodolubo sę ilama, te Israel hani dali hwįmainogo ilali. Agai homugo te Israel dabego augwali te homu dene eyu, olo tau sabo homu kolesaga wiegi yai yabo homu munu me egobeo. Menio. Te augwaligo tigidali ela silaibao. Augwaligo te Genuai Bidigo te Mosesbolo polobadu mani po wali palio.
JOS 11:21 Tama te sogo Josua pelama, tama te Anak bidi dabe mu dolai. Augwali te Hebron bulu du bagede me, te Debir bulude me, me te Anap bulude me, te tigidali gasa Juda me Israel dabego bulu du bagede bidaluali. Josuago te bidi dabe tigidali mu ela siyu, te augwaligo tigidali hanu me mu dolai.
JOS 11:22 Te Anak dabe me dedeli te Israelde me bidibeo. Te dwasianu hani naga te Gasade me, Gatde me, te Asdot, tede bidaluai.
JOS 11:23 Josuago te moni tǫ pedai tigidali badu sela silali, te Genuai Bidigo Mosesbolo wali gilama te tiwai yali. Tama Josuago te Israel dabe augwalibolo te moni tǫ te augwa page bulu tiwai ilama mawai. Tama te tǫ te tigidali Israel hani deli delibolo dobayali. Tama tilama, te we bidi augwaligo hwįbo sę ebo sogo silama, tama augwaligo hwįbode te toma tuyu bidali.
JOS 12:1 Te Moses isisąbadi, te sogo te Israel dabe augwaligo te boi bidi dabe tigidali tǫde aiyaba elaluama, tama augwaligo te tigidali bulu te Jordan wę pąde te sia ge pedalubo badu te bulu dabe sai. Te tǫ te malu bulu te Arnonde gagalasa, tama pelama, te Jordan tǫ malu dąį igi pelama, tama te Hermon bulu duba usu nigi pai. Hasia bolo te Israel dabego hwįnama, te tuni bidi si aiyaba elaluai. Te augwali si nogi e dao: Sihon, me Ok.
JOS 12:2 Sihon te Amor dabego genuai tuni bidi, aga te Hesbonde bidai. Te agai tonaluali hanu te Aroer tǫde gagalama, te odogo malu elalubo tǫ Arnon sesege dąį igi pelama, tama te bulu badu dąį elama, tama pelama, te wę Jabokba usu nani. Te wę Jabok te bulu Arnon dabe de te Amon dabe dali sigo dąį elaluai. Te hanu te Gileat hanu pedai badu elaluai.
JOS 12:3 Tama te Jordan wę tǫ dolo elalubodu te sia ge pedalubo badu sigi ąį tǫ Galili hanu badu dąį gagalasa pelama, te Bet Jesimot te Isai Tamu Ąį dąį igi pelama, tama palio olama, te Pisga bulu du pageba, te tǫ me bogo badu dąį igi pai dao.
JOS 12:4 Tama te Israel dabe augwaligo te Basan hanu genuai tuni bidi Ok dali boi hwįnama, tama aga aiyaba elaluai. Aga te Refaimgo hani bidi. Polobadu te hani genuai elaluali, tama megi da te augwali dwasianu hani naga elalubo. Ok genuai tuni bidi te bulu Astarot, me Edrei, te bulu side bidai.
JOS 12:5 Okgo te bulu du Hermon badu me, te Saleka, me te tigidali Basan badu pelama, te Gesur dabe badu, me Maka te sesegeba usu nigi pelama, tama te Gileat badu te tuni bidi Sihongo tolalubo badu sigi pelama, tonalubo dąį yai.
JOS 12:6 Moses dali te Israel dabe augwaligo te boi hwįnama, te tuni bidi si aiyaba elaluai, polobadu. Tama Moses, te Genuai Bidigo sę bidigo, te augwa si tǫ te Rubengo hanibolo mobadi, te Gatgo hani me, te Manasego hani me badubolo mobadi yali.
JOS 12:7 Josua dali, te Israel dabe dali, augwaligo te Jordan wę te sia ge dega sabo badu te tigidali genuai tǫde bidali tuni bidi tigidali aiyaba elaluali, te Lebanon odogode elalubo bulu Balgat tede gagalasa, te Halak bulu du badu te Idom pąde, teba usu nigi pai. Tama Josuago te tǫ dobolama, tama te Israel hani sibibolo menama, tama megi te augwa page bulu mu gagalama bidibo dao.
JOS 12:8 Te mani tǫ da, te bulu du dabe elalubo tǫ, te dwasianu bulu du dabe, me te Jordan malu bulu me, tama te Jordan ąį pąde te dwasianu bulu du elalubo me, te olo kemi tǫ bulu elalubo madi me, te Negev bulu te dąį igi pai. Polobadu te Hit hani bage me, te Amor dabe me, te Kenan dabe me, te Peres dabe me, te Hivi dabe me, te Jebus dabe me, augwali tigidali te genuai tǫde bidaluai dao.
JOS 12:9 Te e nogi da te boi hwįani sogo te aiyaba elaluali tuni bidi dabego hanu nogi e dao: Jeriko, me Ai, te Betel bulu pąde elaluai,
JOS 12:10 Jerusalem, Hebron,
JOS 12:11 Jarmut, Lakis,
JOS 12:12 Eklon, Geser,
JOS 12:13 Debir, Geder,
JOS 12:14 Horma, Arat,
JOS 12:15 Lipna, Adulam,
JOS 12:16 Makeda, Betel,
JOS 12:17 Tapua, Hefer,
JOS 12:18 Afek, Lasaron,
JOS 12:19 Madon, Hasor,
JOS 12:20 Simron Meron, Aksap,
JOS 12:21 Tanak, Megido,
JOS 12:22 Kedes, Jokneam te moni tǫ pedai Karmelde elaluai,
JOS 12:23 Dor te nabis sese pąde elaluai, te Goim bulu te Gilgal tǫde elaluali,
JOS 12:24 tama Tirsa meo. Te tiwai te tigidali tuni bidi te bidi sese olama, nogo si te me badu deli, te tama usu nama tigidali bidiyu, tama Josua dali, te Israel dabe dali si, augwaligo te tuni bidi dabe tigidali aiyaba elaluama, augwaligo tǫ sai dao.
JOS 13:1 Megi da, Josua monu dabe mu yai. Tama Genuai Bidigo agabolo te po wai, “Nage monu dabe yalio. Tiali goli, te bulu hauwa te Israel dabego me sisąbadi elalubao.
JOS 13:2 Te elalubo bulu dabe te e dao: te tigidali Filistia dabego bulu me, te Gesur dabego bulu tigidali badi,
JOS 13:3 te tǫ te dwasianu wę Sihor te Isip tǫ sesede elalubo, tedu gagalasa, te palio olama, te Eklon tǫ bogo baduba dąį igi pelama, hasia bolo te Kenan dabe bidaluai madi. Te Filistia dabe tonalubo bidi dabe te bulu Gasade me, te Asdot, me te Askelon, me Gat, me Eklon, me tama te Av dabego moni tǫ te giliga dega sabo bogo badu elalubao.
JOS 13:4 Te tigidali Kenan, me Meara dabego tigidali elalubo tǫ, te Saidon dabego tǫde augwali bidibao, te tǫ pali te Afekba usu nama, te Amor dabe bidibo sesegeba dąį igi pai.
JOS 13:5 Te Gebal bulu bidi hani dabego tǫ, te tigidali Lebanon tedu pelama, te sia ge pedalubo badu dąį igi pali, te Balgat sesegede te Hermon bulu du pąde, tedu te bulu du baguali madiba pelama, usu nigi pali, te bulu augwaligo Hamat nogi yai,” wali.
JOS 13:6 “Tigidali Saidon bage, te augwali te Lebanon, me te Misrefot Maim te bulu du dabe elalubo tomo bulude bidalubo, tigidali te moni pedai hanu tomode bidibao. Te Israel dabe augwali asidubadi, tama eno digi te Saidon bage augwali gudulama, sela sąwaibao. Tama tialima, nago te tǫ usu selama, tama te Israel dabe augwalibolo menama, te augwa tǫ mu gagalama bidaibao. Nago te sę eno nagebolo wabo po tiwai gilama yao.
JOS 13:7 Tialima, megi da, te tǫ te Israel hani a naga me si me si dabebolo, me te Manasego hani me badubolo me, te tǫ dobolama, teda augwaligo te augwa tǫ mu tiwai selama, bidimainogo obao,” Genuai Bidigo te Josuabolo te po wai.
JOS 13:8 Te Ruben hanigo, me Gat, me Manasego hani me badugo te Jordan wę te sia ge pedalubo badu te tǫ polobadu sai. Te Moses, Genuai Bidigo sę bidigo, te tǫ augwalibolo mawai dao.
JOS 13:9 Te augwaligo sali tǫ te Arnon odogo tǫ sesegede elalubo bulu nogi Aroer, tedu gagalama, tama te odogo tomode elalubo hanu ela soayu, tama te Medeba dabego dolo elalubo tǫdu pelama, te Dibon tǫba usu nigi palio.
JOS 13:10 Tama augwaligo te Sihongo hanu tigidali sali, te Amor dabe tuni bidigo hanu sai. Polobadu te Sihon aga digi te Hesbonde bidiyu, tama agai te hanu dabe tolaluali te Amor dabe bidalubo sesege dąį igi pai.
JOS 13:11 Augwaligo te Gileat dabego tǫ me sali, tama te Gesur, me Maka dabego tǫ me, tama te Hermon bulu du pedai tigidali me, tama te Basandu te Saleka teba usu nigi pelama,
JOS 13:12 tama te Okgo tonalubo tǫ tigidali sobadi, te aga tuni bidi te Astarot me Edreide bidali sogo. Ok aga te Refaim bage me deli, tama aga te augwaligo sabi siminani dao. Mosesgo te boi hwįnama, te Refaim dabe augwali aiyaba elaluama, tama augwali ela gudulali.
JOS 13:13 Tiali goli, te Israel dabe augwaligo te Gesur dabe, me te Maka dabe dali te augwali ela gudulube. Augwali te Israel dabe dali hodobo bidada peyu, tama megi e po asębo sogoba usu nagasai.
JOS 13:14 Tiali goli, Mosesgo te Livai hani te tǫ me masiąwai. Magi baso meni, te Israel we bidi dabego Genuai Bidiba ofa ilabo nai dabe sela asobo si da, te Livai dabego meba sabo dao. Te Genuai Bidigo Mosesbolo wali po gilama yali.
JOS 13:15 Mosesgo te tǫ pedai me badu deli te Rubengo hani sibi dabe deli delibolo menama, tama te augwa tǫ mu pedelali.
JOS 13:16 Te augwaligo hanu tǫ pedai te Arnon odogo tǫ sesegede elalubo bulu nogi Aroer tede gagalama, tama te odogo tomode elalubo hanu ela soayu, tama te Medeba dabego dolo elalubo tǫ tigidali tedu pelama,
JOS 13:17 tama pelama, te Hesbonba sabolama, te tǫ malu dolo tǫde te tigidali hanu elaluali: Dibon, me Bamotbal, me Bet Balmeon,
JOS 13:18 me Jahas, me Kedemot, Mefat,
JOS 13:19 me Kiriataim, me Sipma, me Seretsahar, te tama bulu te malu tǫ te dwasianu bulu du ugwadu bagede elaluali,
JOS 13:20 tama te Betpeor, tama te Pisga bulu du pedai badu me, te Bet Jesimot,
JOS 13:21 me te gasa tigidali hanu me te tǫ malude elaluali. Tama te Amor dabe tigidali hanu dabe te tuni bidi Sihon deligo tonaluali. Aga te Hesbonde te gavman tuni bidi bidali. Mosesgo te boide hwįnama, tama aga aiyaba elalubadi, tama te Midian dabe tobolu bidi dabe me aiyaba elalubadi yali. Augwali da, te Evi, me Rekem, me Sur, me Hur, me Reba. Tigidali te hanude bidalubadi, tama te gavman tuni bidi Sihongo te augwa bidibo madi tonalumainu sę mani.
JOS 13:22 Tama Balam, te Beorgo ogwa, tama te bidigo te nosali pedelabo sę po wabo koneai bidi, te Israel dabego aga me ela muani.
JOS 13:23 Te wę Jordan te Rubengo hani bidibo sesegede elaluali. Tama te hanu me te bulu dabe te Rubengo hani sibi deli deligo te augwa tǫ da olama, sesa pali.
JOS 13:24 Tama Mosesgo te tǫ te Gatgo hani sibi tigidali deli delibolo doba yali, tama augwa tǫ gagalama bidali.
JOS 13:25 Jasago tǫ me te Gileat tigidali hanu, tama te Amon dabego tǫ pedai te Aroer teba usu nama, te Amon dabego tǫ tomode elaluali, te giliga ge pedalubo madi, te Raba tǫ pąde elaluali.
JOS 13:26 Te tǫ te Hesbonde gagalasa, pelama, te Ramatmispe, me Betonim, me te Mahanaim, te pelama, te Lodebar te sesegeba usu nigi pali.
JOS 13:27 Te Jordan wę tǫ malude elaluali bulu te Betharam, me Betnimra, me Sukot, me Safon, te gavman tuni bidi Sihongo tonaluali tǫ pedai badu, te Hesbon tǫ pedai badu, te Jordan wę te badu gagalasa, te giliga pedalu badu sabolama, tama te sigi ąį Galili tǫ badu dąį igi pelama sai.
JOS 13:28 Tama te hanu dabe me te bulu dabe, te Gatgo hani sibi te bagego te augwa tǫ da olama, sali.
JOS 13:29 Tama Mosesgo te Manasego hani sibi dabe deli delibolo te tǫ me badu te augwali bidimainu mani.
JOS 13:30 Augwaligo sali tǫ te Mahanaimde gagalasa, pelama, tama te Basan pedai tigidali badu sali, te gavman tuni bidi Ok tego polobadu tonaluali hanu Basan da. Tama augwaligo te Jairgo tonaluali hanu te bidi sese sela 60 hanu te Basande tomode elaluali tǫ tigidali sali.
JOS 13:31 Te tǫ sali te Gileat te badu me sali, tama te Astarot, me Edrei me sigi pali, te gavman bidi Okgo polobadu tonaluali hanu dabe da. Tama Mosesgo te tǫ dabe te Makirgo hani sibi dabe deli delibolo mani, te Manasego ogwa dao.
JOS 13:32 Te tiwai naga Mosesgo te giliga pedalubo badu tǫ, te Jeriko me Jordan tǫ, te sa muani, te aga Moap dabego te tǫ malude bidibo sogo tiali.
JOS 13:33 Tiali goli, Mosesgo te Livaigo hanibolo te tǫ me masiąwai. Agai augwalibolo te po wali, “God, te da Israel dabego Genuai Bidi, agade te dagego sę yaibao, tama tibaso te tǫ me badu dagego me sogobeo,” wali.
JOS 14:1 Te Israel dabego te Kenan tǫ sali. Te pris bidi Eleasar, me Josua te Nungo ogwa, tama tigidali Israel hani tobolu bidi dabego hani sibi deli deli augwalibolo te tǫ dobayali.
JOS 14:2 Hasia bolo Genuai Bidigo Mosesbolo te po wali gilama eyu, te tobolu bidi dabego te mena hani sibigo te mena tǫ sabo po dodolama, tama te tǫ te a naga olama, me si me si haniba dobayali. Tama augwaligo te tiwai yali.
JOS 14:3 Tama polobadu Mosesgo te tǫ deli deli pedai badu te hani sibolo mayu, tama gasa Israel hani me badubolo mayu, te Jordan wę te giliga pedalubo badu mobadi yali. Te Josepgo hani wąį dabe te hani si bugali, Manase me Efraim. Tiali goli, Mosesgo te Livai hani dabebolo te tǫ me mabeo. Augwaligo te hanu meba naga sali. Tama te hanude te augwaligo bulmakau me sipsip dabe elaluali, te hanu dabe pąde nosai elalubo digi me augwaligo sali.
JOS 14:5 Te Israel dabe augwaligo te tǫ tama dobayali, te Genuai Bidigo Mosesbolo wali gilama tama tiali.
JOS 14:6 Te tǫ dobayabo sogode, te Juda bidi dabe meba te Josua bidibo digi te Gilgalba sabolali. Tama Kalep te Jefunego ogwa, te Kenas bidi, te e tiwai po Josuabolo wali, “Nago koneani, te polobadu Genuai Bidigo te Godigo sę bidi Mosesbolo te po wali, te da sibolo te Kades Barneade wai dao.
JOS 14:7 Te sogo eno kibu be te bidi sese si, te 40 yia elalubadi, tama Genuai Bidigo sę bidi Mosesgo ena te tǫ Kades Barnea te ena geme sa pabo bidi tagala palali. Tama eno tede suali nai po mu te po eno te Mosesba wagasali.
JOS 14:8 Tiali goli, te ena dali pali bidi dabe augwaligo te we bidi wi ebo sę ilali. Tiali goli, eno te dago Genuai Bidi Godigo po bugagia dolo wali pali.
JOS 14:9 Tama tibaso, Mosesgo te tiwai po me deli ena dali te sogo dąų wali. Agai te po wai, ‘Nago te God wali bugagia pali, te dago Genuai Bidi da, tama tibaso, nage me, nago ogomani dali, te nage bilali tǫ pedai badu siyu, tama augwaligo te tǫ sesemane sogo elalua pidu, mu elalua paibao,’ te po wai.”
JOS 14:10 Tama Kalepgo te tiwai po ma weyu, te po wali, “Nago odao. Genuai Bidigo Mosesbolo te tama po olama, tama nosali te Israel dabe augwali te masigi kemi tǫde bilalubadi, tama megi da, te kibu be bidi sese si olama, a naga silalio. Tiali goli, Genuai Bidigo ena tau sobaso, tama ena megi e sogo me bidibao. Tialima, nago ena suao. Eno kibu be te bidi sese me si me si elama, te nogo a naga, te 85 kibu be yalio.
JOS 14:11 Tiali goli, megi te eno bomo me elalubo, te polobadu ena teba biligi pomainu tagala palali tiwai gilama elalubo. Te ena bomo me elalubadi, tama eno te boi hwįgi pelama, tama tigidali sę eno ela silabo megi me usu dao, te eno polobadu yali gilama elalubo.
JOS 14:12 Tialima megi da, te Genuai Bidigo enabolo te mawaibao wali te bulu du tǫ pesage te enabolo mao. Te polobadu sogo nago odali, te ena me, te ena dali pali bidi dabe, dago te nai suali po Mosesbolo pusali. Te Anakde moni bidi dabe te bulude bidalubadi, tama dago nagebolo wai. Augwali te genuai obo yai hanude bidalubo po wali. Te Genuai Bidi ena dali bidiyu da, teda te bidi dabe augwali eno ela gudulaiba homu ebao, te agai wali po tiwai gilama yaibao,” Kalepgo te po wai.
JOS 14:13 Tama Josuago te Kalepgo wali po odama, tama agai te Godigo nage dali dwagi yai sę emainao po te Kalepbolo wali, tama te Hebron hanu agabolo manio, te aga sabo tǫ mu tama dao.
JOS 14:14 Kalepgo Godigo po bugagia wali pali da, God da te Israel dabego Genuai Bidi dao. Tama Hebron hanu te Kalepgo wąį hanigo tǫ gagalama bidali, te Jefunego ogwa, te Kenas bidi dao.
JOS 14:15 Polobadu te Hebron hanu nogi te Kiriat Arba nogi yali. Tama Arba te Anak bulude te moni bidi me deli bidai. Tialima, te tǫ Kalepgo selama, tama te sogo da te bulude wąbi munu ma hwįsąma, bidaluali.
JOS 15:1 Te Judago hani sibi deli deligo te hanude tǫ sainu, te tiwai po augwaligo po miani: te tǫ dąį pali te Idom tǫ pedai bogo badu saboligi pali, tama pelama, te masigi kemi tǫ te augwaligo Sin nogi yali, te sesege bogo badu mu dąį iligi pali.
JOS 15:2 Te dąį pali te Isai Tamu Ąį te badu dąį igi pelama,
JOS 15:3 tama pali te bulu du Akrabim, te bulu nogi Sinba pedaligi pali. Tama Negevdu dąį pali, te Kades Barneaba sabolama, tama Hesron ela soayu, tama pelama, te Adarba sabolali. Tama nosali begelama, te Karkaba sabolama,
JOS 15:4 tama pelama, te Asmonba sabolama, tama te Isip dąį badu te dwasianu wę wali peyu, tama te wę nogi Mediterenian Tamu Ąį teba dąį igi pali. Te Judago tǫ dąį yali te saut badu siligi pai dao.
JOS 15:5 Te giliga pedalubo badu dąį te Isai Tamu Ąįde elama, tama pelama, te Jordan pabo wę te Isai Tamu Ąįba sabalobo madiba sabolali. Tama te pedai a badu te badu gagalama, dąį yali,
JOS 15:6 tama pelama, te Bethokla sabolama, tama pelama, te Betaraba te a badu ma sabolali. Tama palima, te Bohango genuai masigi elalubo teba saboligi pali, te Rubengo ogwa dao.
JOS 15:7 Tialima, te odogo tǫ Akor tede dąį palima, te Debir teba sabolama, tama nosali te not a badu palima, tama begelalima, te Gilgal teba pali. Te bulu Gilgal tedu te Adumim te malu tǫ bulu du te ogwa badu suali. Tama pidubadi, te wę Ensemes sabolama, tama palima, te Enrogelba dąį igi pali,
JOS 15:8 tama te Hinomgo ogwago te odogo tǫ tedu wali pelama, te Jebusgo bulu du te a badu sabolali. Te Jerusalem te badu elaluali. Tama dąį pidubadi geanima, te bulu duba sabolali, tama te giliga dega sigi pabo badu te Hinomgo malu elaluali, te badu dąį igi pali. Te dąį yali te Refaim dabego te tǫ odogo sesege badu tede elaluali.
JOS 15:9 Tama te bulu du bageba holama, tama palima, te Neptoa dabego te ulu węba sabolama, tama te Efrongo hanu dabe pąde te bulu duba pedelama, dąį igi pai. Te pedai badu te dąį begelama, te Bala te badu pali, te gasa nogi me elaluali te Kiriat Jearim dao.
JOS 15:10 Te Bala te badu te dąį yali te giliga dega sigi pabo badu palima, te Idomgo Bulu Du dabe elaluboba pedelali, tama palima, te bulu du Jearimba sabolali, te gasa nogi me elaluali Kesalon, te not badu tama pelama, te Betsemes teba dulalima, tama peyu, te Timna te bulu taga pali.
JOS 15:11 Tialima, te dąį te bulu du sao badu te Ekron te not badu wali palima, tama begelalima, te Sikeronba sabolama, tama te Bala bulu du taga peyu, tama te Japnelba sabolali. Tama te dąį pali, te Mediterenian Tamu Ąį teba siligi pai.
JOS 15:12 Te giliga dega sigi pabo badu te dąį igi pali, te Mediterenian Tamu Ąį sesege te tama dao. Te tǫ dąį ilama, bagulali, te Judago hani bage naga bidabo digi nigilali.
JOS 15:13 Polobadu Genuai Bidigo te Josuabolo po mayu, te augwaligo Juda dabego hanu tǫ me deli te Kalepbolo mao po wali, te Jefunego ogwabolo. Tialima, Josuago tama tiali. Tama te tǫ pedai Hebron, te Arbago hanu, te Anakgo aya dao.
JOS 15:14 Kalepgo te Anakgo hani bidi sela ela gudulali, Sesai, me Ahiman, me Talmai.
JOS 15:15 Nosali Kalepgo te bulu taga peyu, te pelama, te Debirde bidalubo hani bage dali boi hwįgi pali. Polobadu augwaligo te hanu nogi te Kiriat Sefer nogi yali.
JOS 15:16 Tialima, Kalepgo te po wali, “Te niwai bidigo te Kiriat Sefer teba boi hwįgi pelama, tama te hanude bidibo bage te aiyaba elalubaso da, teda agai te eno wegi Aksa somainogo yaibao,” wali.
JOS 15:17 Tama Otniel, te Kenasgo ogwa, te Kalepgo amago ogwa, te hanuba hwįgi pelama, te bulu bidi dabe aiyaba elaluama, te hanu sali, tama Kalepgo wegi Aksa te agaba menama, tama agai sali.
JOS 15:18 Tama te we Otnielba asobadi te sogo, Otnielgo bomo elama, te wego te aga ayabolo te tǫ me deli momainogo hanalu wao po olama, bomo yali. Tama te we te Kalep bidiboba pelama, tama aga donki kibu daide dulaluali tagalama, aiyaba samonani, tama Kalepgo agabolo hanalu wali, “Nago magi nai godolo ebasowe?”
JOS 15:19 Tialima, wego te po wali, “Eno homugo te nago ena wiegi yai homu yabo nai me deli mao. Nago te Negev hanu tǫ enaba mani, te tǫde wę menio. Tama nago enabolo te ulu wę meba mao,” wali. Tialima, Kalepgo te wę ulu ugwadu elalubo me aiyadu me mani.
JOS 15:20 Te tǫ dabe te Judago ogwa hani sibigo te augwa tǫ da olama, sesa pali.
JOS 15:21 Te Juda dabego hanu dabe te saut teba polobadu te Idom dabego tǫ sesege pąde elaluali, te hanu dabe augwali nogi te e dao, Kapsel, Eder, Jagur,
JOS 15:22 Kina, Dimona, Adada,
JOS 15:23 Kedes, Hasor, Itnan,
JOS 15:24 Sif, Telem, Bealot,
JOS 15:25 Hasor, Hadatat, Keriot Hesron, te gasa nogi me Hasor elaluali,
JOS 15:26 Amam, Sema, Molada,
JOS 15:27 Hasargada, Hesmon, Betpelet,
JOS 15:28 Hasarsual, Berseba, Bisiotia,
JOS 15:29 Bala, Im, Esem,
JOS 15:30 Eltolat, Kesil, Horma,
JOS 15:31 Siklak, Matmana, Sansana,
JOS 15:32 Lebaot, Silhim, Ain, Rimon. Te bidi sese deli olama, te nogo a naga me si me si, te 29, te tama hanu dabe badi, tama te hanu dabe pąde te dwasianu bulu dabe, te Juda hani sibigo elaluali.
JOS 15:33 Te dwasianu bulu du elalubo tǫde te giliga dega sigi pabo badude, e tama hanu dabe elaluali, te Estaol, Sora, Asna,
JOS 15:34 Sanoa, Enganim, Tapua, Enam,
JOS 15:35 Jarmut, Adulam, Soko, Aseka,
JOS 15:36 Saraim, Aditaim, Gedera, te gasa nogi me Gederotaim, te elaluali. Te nogo si olama, sągągo me si me si hanu badi, te tama tigidali bulu dabe dali te pąde elaluali.
JOS 15:37 Te e tama hanu dabe me elaluali, te Senan, Hadasa, Mikdalgat,
JOS 15:38 Dilean, Mispa, Joktel,
JOS 15:39 Lakis, Boskat, Eklon,
JOS 15:40 Kabon, Lamon, Kitlis,
JOS 15:41 Gederot, Betdagon, Nama, Makeda. Te 16 tama hani dali, te pąde elalubo dwasianu bulu dabe dali, te Juda dabego elaluali.
JOS 15:42 Te e tama hanu dabe me elaluali, Lipna, Eter, Asan,
JOS 15:43 Ipta, Asna, Nesip,
JOS 15:44 Keila, Aksip, Maresa, te tama hanu elaluali. Te 9 hanu te dwasianu bulu dabe meba augwali pąde elalua pali.
JOS 15:45 Te e tama hanu me elaluai, Ekron hanu me te dwasianu bulu dabe dali,
JOS 15:46 me tama tigidali hanu me bulu te Asdot pąde elaluali, te Ekron me te Mediterenian Tamu Ąį tomode elaluali.
JOS 15:47 Asdot me Gasa tede te hanu me te bulu dabe dali elaluali, te Isip dwasianu wę sesegede, me te Mediterenian Tamu Ąį te wę si pąde elalua pali.
JOS 15:48 Te bulu du bagede te e tama hanu dabe elaluali, Samir, Jatir, Soko,
JOS 15:49 Dana, Kiriat Sefer, te gasa nogi me Debir elaluali,
JOS 15:50 Anap, Estemo, Anim,
JOS 15:51 Gosen, Holon, Gilo, te tama hanu elaluai. Te 11 hanu dali, te augwali pąde elalubo dwasianu bulu dabe dali, te Juda dabego elaluai.
JOS 15:52 Te e tama hanu dabe me elaluali, Arap, Duma, Esan,
JOS 15:53 Janim, Bet Tapua, Afeka,
JOS 15:54 Humta, Kiriat Arba, te gasa nogi Hebron wabo, tama Sior, te tama hanu elaluali. Te 9 hanu dabe, me te augwali pąde elalubo dwasianu bulu dabe dali, te Juda dabego elaluali.
JOS 15:55 Te e tama hanu dabe me elaluai, Maon, Karmel, Sif, Juta,
JOS 15:56 Jesril, Jokdeam, Sanoa,
JOS 15:57 Kain, Gibea, Timna, te e tama hanu elaluali. Te nogo si hanu dali, te augwali pąde elalubo dwasianu bulu dabe dali, te Juda hani sibi dabego selama, elaluali.
JOS 15:58 Te e tama hanu dabe me elaluai, te Halhul, Betsur, Gedor,
JOS 15:59 Marat, Betanot, Eltekon, te e tama hanu elaluali. Te hanu 6 dali, te augwali pąde elalubo dwasianu bulu dabe dali, elalua pali.
JOS 15:60 Te e tama moni hanu si elaluali, Kiriat Bal, te gasa nogi wabo me te Kiriat Jearim, me Raba, te moni hanu si elaluai. Te hanu si pąde te dwasianu hanu dabe me elaluali.
JOS 15:61 Te masigi kemi olo tǫde te e tama bulu elaluali, Betaraba, Midin, Sekaka, elalubadi yali,
JOS 15:62 Nipsan, me te tǫde tamu elalubo hanu me elaluali, Engedi hanu me elaluali. Te hanu 6 dali, te augwali pąde elalubo dwasianu bulu dabe me, te Juda dabego dobayali.
JOS 15:63 Tiali goli, te Juda dabego te Jebus dabe te Jerusalemde bidalubo te augwali me sela sąyu, te me ela gudulubeo. Tama tibaso, te Jebus dabe te Juda dabe dali te Jerusalemde bidali, te megi e po asębo sogoba usu nagasali.
JOS 16:1 Te augwaligo Josepgo wąį dabego tǫ dąį nigilibo gagalali, te wę Jordan te Jeriko hanu pąde gagalasa pelama, te giliga pedalubo badu te Jeriko wę ulu pedalubo pąba sabolalima, tama te masigi kemi olo tǫ tomoba saboligi pali. Tama dąį tedu pelama, tama te bulu duba sabaligi palima, te Betel buluba dąį igi pali.
JOS 16:2 Te Beteldu dąį pali te bulu Lusba sabolama, tama palima, te Atarotba dąį igi palima, te Arka bidi dabe bidalubo madi dao.
JOS 16:3 Nosali te dąį pali, te giliga dega sigi pabo teba pedelama, te Japlet dabe bidiboba sabolali, tama pelama, te Bethoron elalubo te aiyadu te dąį igi pai. Tama tedu te dąį palima, Geserba pelama, tama te Mediterenian Tamu Ąį te pedaligi pali.
JOS 16:4 Te Josepgo wąį dabe, te Manasego hani me te Efraimgo hani dali, augwaligo te tǫ sali.
JOS 16:5 Te e da te Efraim hani sibigo tǫ dao. Te augwaligo te giliga pedalubo badu sabo, te Atarot Adar hanude gagalasa pali, tama palima, te Bethoron teba dąį igi pali.
JOS 16:6 Tama te dąį pali, te Mediterenian Tamu Ąį teba saboligi pali. Mikmetat te augwaligo tǫ pedai te not badu elaluali. Te giliga pedalubo badu dąį te Tanatsilode begelali, tama te bulu taga palima, tama pelama, te Janoa teba saboligi pali.
JOS 16:7 Tialima, dąį te Janoade tagalalima, te Atarot me Nara te bulu siba dulali. Tama Jerikoba sabolama, tama te Jordan węba simanigi pali.
JOS 16:8 Te Tapuadu dąį pali, te giliga dega sigi paboba sabolama, tama te wę Kanaba pedelama, tama palima, te Mediterenian Tamu Ąį teba sabolali. Te tǫ dabe dali te tigidali hanu elaluali, augwaligo te Efraimgo hani sibigo sabo nai naga dao. Tama te Efraim dabe meba te Manasego hanu dabede bidiyu, tama Manasego bulu tǫ tomode me bidaluali.
JOS 16:10 Tiali goli, augwaligo te Geserde bidali te Kenan bidi dabe te augwali me ela gudulubeo. Tama te Kenan dabe te Efraim dabe tomode bidaluali. Tama te Efraim dabego te Kenan dabe te augwaligo olo sę ebo bidi tiwai sę emainu yalio.
JOS 17:1 Augwaligo te Manasego hani dabego tǫ me deli te dąį ilali, magi baso meni, Manase te Josepgo gomunai ogwa dao. Makir, te Manasego gomunai ogwa da, tama aga te ami bidi me deli da, tama te Gileat tǫgo aya da. Tama augwaligo aga tǫ te Gileat badu, me Basan te badu, te tǫ dąį ilama, bidali.
JOS 17:2 Tama augwaligo te Manasego gasa hani dabe mebago tǫ dąį ilama, mani, Abieser, me Helek, me Asriel, me Sekem, me Hefer, me Semida, te tama bage tǫ dąį ilali. Te bidi dabe augwali te Manasego wai dabe, tama augwali te augwa hani dabe tomode te augwali tobolu bidi bidali da.
JOS 17:3 Te Selofehat, te Hefergo ogwa da, tama Hefer te Gileatgo ogwa, tama Gileat te Makirgo ogwa, tama Makir te Manasego ogwa da. Tiali goli, Selofehatgo te wai ogwa me deli ame nabe. Te agai wegi dabe a naga ame nani. Te augwali nogi e dao, Mala, me Noa, me Hokla, me Milka, me Tirsa.
JOS 17:4 Augwali pelama, te pris bidi Eleasar, me Josua, me te tobolu bidi dabe me sugi pelama, tama augwaligo te po wali, “Genuai Bidigo te Mosesbolo po weyu, te tǫ me deli te dabolo me mao weyu, te dena aya aga ama solobolo mabo tiwai gilama yao po weyu yali.” Te we a nagago te po wai. Tialima, augwaligo te tǫ me te we dabebolo me, te augwa aya aga ama solo bidi dabebolo me, te tǫ mani, te Genuai Bidigo wali po gilama yalio.
JOS 17:5 Tama te Manasego hanigo te nogo si tǫ pedai sali, te augwaligo polobadu te Gileatgo tǫ dali, me te Basan te Jordan wę u badu te giliga pedalubo badu dali sali.
JOS 17:6 Magi baso meni, augwaligo te Manasego ogwa wegi dali augwalibolo te tǫ mani. Tama augwaligo te Gileatgo tǫ te Manasego gasa hani wąį dabebolo mobadi yai.
JOS 17:7 Te Manasego tǫ sali te Aserdu gagalasa pelama, te Mikmetat buluba sabolama, tama te Sekem bulu pąba te giliga pedalubo madi sabolali. Tama te dąį te saut te badu te Entapua buluba sabaligi pali.
JOS 17:8 Te tǫ Tapua te Manasego tǫ dao. Tiali goli, te Tapua hanu te Efraimgo hanigo hanu mu dao, te Manasego tǫ sesege badu mu elaluali.
JOS 17:9 Tama dąį dulali, te dwasianu wę Kanaba dąį igi pali. Te wę te saut badu elaluali hanu dabe te Efraimgo hanu da. Te hanu dabe te Manasego hanu tǫ tomode elaluai. Tama Manasego tǫ dąį pali, te dwasianu wę te not badu te Mediterenian Tamu Ąį te badu pedaligi pali.
JOS 17:10 Te Efraimgo pedai badu te saut badu elalu, te Manasego tǫ pedai dąį te not badu elalu yali, tama Mediterenian Tamu Ąį te augwali sigo tǫ dąį si tomode te giliga dega sabo badu elaluai. Tama augwali sigo tǫ dąį te not badu te Asergo tǫ, me te Isakargo tǫ te giliga pedalubo badu elalu yali.
JOS 17:11 Te Isakar de Aser Israel hani sigo tǫ tomode te Manasego te hanu Betsan dali Ipleam dali si, me te pąde elalubo bulu dabe dali sobadi yali, tama Dor hanu te nabis ąį sane badu elaluali, tama Endor, me Tanak, me Megido, te pąde elaluali bulu dabe dali sai.
JOS 17:12 Tiali goli, te Manase hani dabe augwaligo te Kenan dabe te hanu me ela gudulubeo. Tama te Kenan dabego homu bomonama eyu, tama tede me bidaludali.
JOS 17:13 Nosali te Israel dabe bomai bage pedalubode, tama augwaligo te Kenan dabe te augwaligo sę olo ebo bidi pedela silali. Tiali goli, te augwaligo te augwali me sela sąyu, me ela gudulubeo.
JOS 17:14 Nosali te Josepgo wąį dabego Josuabolo te po wali, “Magi baso nago te tǫ pedai deli naga dabolo maniwe? Te da usu ebeo. Magi baso meni, te Genuai Bidigo da dali dwagi yai sę eyu, tama dago hani te genuai pedalumainu ilali, tama da hani hauwa mu pedelalio,” wali.
JOS 17:15 Tama Josuago te po wei ponani, “Te dage hauwa mu, tama te Efraimgo te bulu dude bidabo te dage usu meni baso da, teda dage te moni ni sili bulu tomoba pelama, tama duga bidabo digi penama, te Peres me Refaim dabego te tǫde bidao,” wali.
JOS 17:16 Tama te Josepgo wąį dabe augwaligo te po wali, “Te bulu du me te da usu me egobeo. Tiali goli, te Kenan dabe te malu tǫde bidiyu, tama te Betsande te pąde elalubo dwasianu bulu dabe dali, te Jesril malu tǫde me bidibo, augwaligo te boma pai hwįabo nai ain karis dabe elalubao,” wali.
JOS 17:17 Tialima, Josuago te Efraimgo me Manasego hani sibolo wali, “Te mu tama, dage te hauwa mu tama ebaso, tama dage te bomai hani me deli dao. Te tǫ pedai delide te dage usu egobeo. Tama tibaso, dagego te tǫ meba sagameo.
JOS 17:18 Te dagego te moni ni sili bulu du elalubo bulu te dagego sagameo. Mu tama, te genuai bulu elalubo, tiali goli te dagego penama, tama te tǫ tigidali saibao. Tede bidalubo Kenan dabego te bomo eyu, tama augwaligo te ain karis dabe elalubao, tiali goli te dagego augwali sela sąyu, ela gudulagameo,” Josuago te po wai.
JOS 18:1 Te Israel dabe augwaligo boi hwįnama, te tigidali bulu bidi dabe aiyaba elaluama, tama augwa hani tigidali te Siloba sisinani. Tede augwaligo te God dali sisinabo lotu be, te ugwa be, te augwaligo dodolama muai.
JOS 18:2 Tiali goli, te a naga olama, me badu si hani te augwali tǫ sisąwai.
JOS 18:3 Tama tibaso, Josuago te Israel dabe augwalibolo wali, “God, te duga wąįgo Genuai Bidigo, te tǫ dagebolo mawai. Dagego magi nai tonaludu, te dagego sabewe?
JOS 18:4 Te tigidali hani deli delide te bidi sela naga nidigili pao. Tama eno augwali te tigidali tǫ pedai usu nama tagala palama, tama augwa digi te augwa hanigo sabo tǫ dąį iligi paibao. Tama elama, tama augwaligo te tǫde po te ripot te asęaibao. Tama nosali augwali ena bidibo digi ma asaibao.
JOS 18:5 Augwaligo te tǫ a naga olama, me si te tama pedemainu yaibao. Te Judago hani augwali te saut badu te augwa sali tǫde bidiyu, tama te Josepgo hani augwali te not badu augwaligo sali tǫde bidiyu emainu yaibao.
JOS 18:6 Tama dagego te a naga olama, me si te tama tǫ suali po te asęnama, tama enaba selasa asao. Nosali eno te Genuai Bidigo gedude te tǫ sabo po dodolobo sę elama, te mena tǫ mu Godigo dagebolo sa mubowe, te koneaibao.
JOS 18:7 Tiali goli, te Livaigo hani da, te Genuai Bidigo pris sę ebo bage bidaibao, tama augwaligo te dagego tǫ sabo tiwai gilama te tǫ me sogobeo. Tama Gatgo hani me, Rubengo hani me, Manasego hani bage me badu me, augwali te wę Jordan te giliga pedalubo u badu te tǫ polobadu sai dao. Moses te Genuai Bidigo sę bidigo te tǫ augwali mani,” Josuago te po wai.
JOS 18:8 Josuago te tǫ sugi pelama, te po asęabo bidi dabebolo te e tiwai po wali, “Dage pelama, te tigidali tǫ sulama, tama tǫ po asęnama, tama enaba ma selasa asao. Tama e bulu Silode eno te tǫ sabo po dodolobo sę gagali elama, te mena tǫ te Genuai Bidigo dagego hani deli delibolo mabowe naga koneaibao.” Josuago te po wai. Tialima, te bidi dabego te Josuago po odama, tama augwali pali.
JOS 18:9 Tama augwali te tigidali tǫ bilama, tama augwaligo te suali po te buku me delide asęani. Augwaligo te tǫ a naga olama, me badu si togwali, tama te hanu dabe nogi me asęani. Nosali augwali te Josua bidibo madi te Siloba ma pali.
JOS 18:10 Tialima, Josuago te tǫ sabo po dodolobo sę elama, te mena tǫ Genuai Bidigo augwalibolo mabowe naga koneainogo yali. Tama nosali agai te tǫ dobolama, te Israel hani deli deli augwaliba te tǫ mani.
JOS 18:11 Te Benjamingo hani sibi deli deligo tǫ te Juda hani me Josep hani si tomode te tǫ dąį ilama, sali.
JOS 18:12 Te not pedai badu te augwaligo tǫ sabo dąį gagali, te wę Jordande gagalasa pelama, te dwasianu bulu duba holama, te not pedai badu te bulu Jerikoba sabolali. Tama dąį pali, te giliga dega sigi pabo te bulu dude begelalima, te masigi kemi olo tǫ badu te Betaven, teba dąį igi pali.
JOS 18:13 Tama te dąį pidubadi geani, te saut pedai badu te dwasianu bulu du me Lus teba dąį igi pali, te augwaligo te nogi Betel wali, tama te Atarot Adar teba aiya dulali, te bulu du me deli Bethoron pąde ugwadu elaluali, te saut pedai badu dao.
JOS 18:14 Tama te dąį gasaba poloba begelali. Te saut badu tagalama, te sia ge degegi pabo badu te bulu du a badu, te saut badu te Bethoron teba sabolali. Tama dąį pali, te hanu Kiriat Bal, te nogi augwaligo Kiriat Jearim wabo, teba pedelali. Te hanu te Juda dabego hanu. Te giliga dega sigi pabo te dąį pedai badu elaluali.
JOS 18:15 Te saut badu dąį te Kiriat Jearimde gagalasa pelama, te giliga dega sabo badu tugi pelama, te Neptoa dabego ulu wę elalubo madiba sabolali.
JOS 18:16 Tama te dulali te bulu du dolalubo sesege badu te Hinomgo ogwago tǫ malu elalubo pąba pedelali. Te bulu du te not badu te Refaim dabego malu tǫ sesege badu elaluali. Tama dąį pali te saut badu te Hinomgo tǫ malu bolama, tama te Jebus dabego dwasianu bulu du togolama, tama palima, te Enrogel te pedai badu dąį igi pali.
JOS 18:17 Tama dąį pali, te not badu te Ensemes sabolama, tama pali, te Gelilot dąį igi pelama, te bulu sesege Adumim pedai badu elaluali. Tama te dąį dulali, te Rubengo ogwa Bohango genuai masigi elaluali madiba sabolali.
JOS 18:18 Tama te dąį yaligo te dwasianu bulu du dabe bolali, te Betaraba teba sabolama, tama dulalima, te Jordan tǫ maluba sabolali.
JOS 18:19 Tama dąį pali, te dwasianu bulu du te not badu te Bethokla teba dąį igi pelama, tama te Isai Tamu Ąį te wę Jordan age siba pedelali. Te saut sesege badu dao.
JOS 18:20 Te giliga pedalubo badu te dąį pali, te wę Jordan wali pali. Te dąį yali te tǫ te Benjamin hani sibi dabego sabo tǫ dao.
JOS 18:21 Te Benjamingo hanu dabe te e tama elaluali, Jeriko, Bethokla, Emek Kesis,
JOS 18:22 Betaraba, Semaraim, Betel,
JOS 18:23 Avim, Para, Ofra,
JOS 18:24 Kefar Amoni, Opni, Geba, te 12 hanu dabe, te pąde bulu dabe dali elaluali.
JOS 18:25 Te e tama hanu me elaluali, Gibeon, Rama, Berot,
JOS 18:26 Mispa, Kefira, Mosa,
JOS 18:27 Rekem, Irpel, Tarala,
JOS 18:28 Sela, Haelep, Jebus, te augwaligo Jerusalem nogi yali, Gibea, Kiriat Jearim, te tama hanu elaluali. Te 14 hanu dabe, te pąde bulu dabe dali elaluali. Te tǫ pedai te Benjamingo hanigo sali tǫ me hanu dali, te dao.
JOS 19:1 Te augwaligo si wali tǫ dąį ilali, te Simeongo hani sibi deli deliba mani. Te tǫ pedai te augwaligo te Judago tǫ dąį ilali madi, te tǫ tomode elaluali.
JOS 19:2 Te tǫ pedaigo sigi pali tǫ te e hanu dabe elaluali, Berseba, aga gasa nogi Seba, te Molada,
JOS 19:3 Hasarsual, Bala, Esem,
JOS 19:4 Eltolat, Betul, Horma,
JOS 19:5 Siklak, Bet Markabot, Hasarsusa,
JOS 19:6 Bet Lebaot, Saruhen, te tama hanu tǫ sali. Te 13 hanu dabe dali, te pąde bulu dali elaluali.
JOS 19:7 Te e tama hanu me elaluali, Ain, me Rimon, me Eter, me Asan, tama elaluali. Te hanu me si me si dali, te pąde bulu dabe dali elaluali.
JOS 19:8 Te Balatber teba dąį igi pali, te gasa nogi wabo Rama tama, te Negev pedai badu elaluali, tama tede elalubo dwasianu bulu dabe elaluali. Te tama tǫ pedai naga te Simeongo hani sibi deli deligo sai dao.
JOS 19:9 Te Simeongo tǫ te Judago tǫ tomode elaluali. Te augwaligo Judago tǫ dąį ilali te genuai mu elaluali. Tama tibaso, te Juda dabego usu da po weyu, tama te tǫ pedai me badu te Simeongo hanigo sali.
JOS 19:10 Te sela wali tǫ augwaligo te Sebulungo hani sibi deli delibolo dąį ilama, mani. Te augwaligo sali tǫ dąį pali, te Sarit dąį igi pali.
JOS 19:11 Tama dąį pali, te giliga dega sabo badu te Mareal dąį igi pelama, te Dabeset te pąba sabolama, tama te Jokneam pąde elalubo dwasianu wę te giliga pedalubo badu sabolali.
JOS 19:12 Te Sarit pedai badu, te dąį pali, te Kislot Tabor te giliga pedalubo te sesege badu dąį igi palima, te pelama, Daberat sabolama, tama te Jafia te ugwaba pelama, sabolali.
JOS 19:13 Tama dąį pidubadi, te giliga pedalubo te dąį igi pelama, te Gathefer me Etkasin, teba sabolama, tama begelalima, te Nea badu te Rimon teba pabo sunumi te dąį igi pai.
JOS 19:14 Tama te not badu dąį begelali, te Hanaton dąį igi palima, tama te Iptahel tǫ maluba pedelali.
JOS 19:15 Tama te tǫgo te Katat, me Nahalal, me Simron, me Idala, me Betlehem, te tama hanu sigi pali. Te 12 te tama hanu dali, te pąde bulu dabe dali elaluali.
JOS 19:16 Te hanu dabe dali, te pąde elaluali bulu dabe dali, te Sebulungo hani sibi deli deligo sali tǫde te pedaide elaluali.
JOS 19:17 Te tǫ me si me si wali te augwaligo te Isakar hani sibi deli deliba sa munama mani.
JOS 19:18 Te tǫ pedaigo te Jesril, Kesulot, Sunem, te tama hanu sali,
JOS 19:19 Hafaraim, Sion, Anaharat,
JOS 19:20 Rabit, Kision, Ebes,
JOS 19:21 Remet, Enganim, Enhada, Betpases, te tama hanu dabe sali.
JOS 19:22 Tama dąį pali, te Tabor pąba sabolama, tama te Sahasuma, me Betsemes dąį igi pelama, tama pali, te wę Jordanba sabolali. Agai te 16 hanu te tama hanu dali, te bulu pąde elaluali bulu dabe dali sai dao.
JOS 19:23 Te hanu me bulu dabe dali, te tǫ pedai me te Isakargo hani sibi dabego sali.
JOS 19:24 Te tǫ pedai a naga wali te augwaligo Asergo hanigo somainogo sa muani.
JOS 19:25 Te tǫ pedai te Helkat, me Hali, me Beten, me Aksap, te tama hanu sobadi,
JOS 19:26 tama te Alamelek, me Amat, me Misal, te tama sali. Te giliga dega sabo badu te Karmel me Sihorlipnat te pąba pedelali.
JOS 19:27 Tama dąį begelali, te giliga pedalubo madi teba sabolali, te Betdagon te dąį igi pelama, tama palima, te Sebulungo tǫ pąba dąį igi pelama, tama te Iptahel te tǫ maludu pelama, te not te Betemek me Neiel sabolali. Tama dąį pidubadi, te not badu te Kabul dąį igi pelama,
JOS 19:28 tama Ebron, me Rehop, me Hamon, me Kana tama pali, te genuai hanu Saidonba sabolali.
JOS 19:29 Tama te dąį begelama, te Rama teba pelama, tama te Tairba pedelali, te hanude te dila pai obo masigigo bagulai elaluali. Tama te dąį begelalima, te Hosaba pelama, tama pali, te Mediterenian Tamu Ąį te badu sabolali. Te tǫ pedaigo te Mahalap, me Aksip sobadi,
JOS 19:30 me Uma, me Afek, me Rehop, te tama tǫ me hanu sobadi yali. Te 22 hanu, te tama hanu badi, te pąde elaluali bulu dabe dali sobadi yali.
JOS 19:31 Te hanu me, te bulu dabe dali, te tǫ dali te Asergo hani sibi deli deligo sali tǫde elaluali.
JOS 19:32 Te a naga olama, me badu nogo kibisa deli wali tǫ te augwaligo Naptaligo hani sibi deli delibolo dąį ilali.
JOS 19:33 Te augwaligo dąį eyu, te Helep tagalama, tama te Sananimde elaluali ni ok te dąį igi pelama, tama te Adami Nekep me Japnel dąį igi pelama, tama pali, te Lakum dąį igi pelama, tama te wę Jordanba siligi pali.
JOS 19:34 Tama dąį pali, te giliga dulubo badu begelama, te Asnot Tabor, me Hukok te dąį igi pelama, tama te Sebulungo tǫ te saut pąbadu sabolama, tama te Asergo tǫ badu, me te giliga dega sabo badu pelama, te Judago tǫ badu dąį igi palima, te giliga pedalubo badu te wę Jordan dąį igi pai.
JOS 19:35 Te dili yai masigigo nigali obo bagulali elaluali hanu dabe te e dao, Sidim, Ser, Hamat, Rakat, Kineret,
JOS 19:36 Adama, Rama, Hasor,
JOS 19:37 Kedes, Edrei, Enhasor,
JOS 19:38 Yiron, Mikdalel, Horem, Betanat, me Betsemes. Te hanu dabe dali, te gasa hanu dali nedeyu, te 19 tama hanu dali te tama bulu pąde dabe dali elaluali.
JOS 19:39 Te tama hanu me, te bulu dabe dali, te Naptali hani sibi deli deligo sali tǫde elaluali.
JOS 19:40 Te a naga olama, me badu nogo si tǫ te augwaligo Dan hani sibi deli delibolo sa muani.
JOS 19:41 Te tǫ pedaigo te e tama hanu sali, Sora, Estaol, Irsemes,
JOS 19:42 Salabin, Aijalon, Itla,
JOS 19:43 Elon, Timna, Ekron,
JOS 19:44 Elteke, Gibeton, Balat,
JOS 19:45 Jehut, Beneberak, Gatrimon,
JOS 19:46 Mejarkon, me Rakon, me te Jopa, te bulu habu badu elaluali.
JOS 19:47 Nosali te Dango hani dabe bidali tǫde te tǫ page bidi dabego augwali ela gudulai. Tama tibaso, te Dan dabe te Lesem buluba pelama, tama augwali dali boi hwįgi pali. Augwaligo te hanu sainu, te hanude bidali bulu page bidi dabe te tigidali ela silai. Nosali augwaligo te po wali, te tǫ te augwa tǫ dao wali, tama augwali tede bidaluali. Augwaligo te hanu Lesem te nogi hasegelama, tama augwaligo te nogi Dan poali, te augwa wąįgo nogi tiwai mu dolo poali.
JOS 19:48 Te bulude te elaluali hanu, me te pąde elaluali bulu dabe dali, te Dango hani sibi deli deli augwa sali.
JOS 19:49 Te Israel dabe augwaligo te tigidali tǫ sesabela silama, tama augwaligo te tǫ pedai me deli te Josua mani, te aga Nungo ogwa dao.
JOS 19:50 Josuago te bidi dabe augwalibolo hanaluyu, te Timnat Sera, te Efraimgo bulu du pedai badu mao po wali. Tialima, augwaligo agabolo te hanu mani, te Genuai Bidigo po wali gilama tama tiali. Tama Josuago te hanu ma nigilama, tama aga te hanude bidali.
JOS 19:51 Te pris Eleasar, me Josua te Nungo ogwa, tama te tigidali deli deli Israel hani sibi tigidalide te augwa genuai bidi deliba sisinama, te augwaligo te tǫ dobabo po dodolobo sę elama, te mena tǫ te Genuai Bidigo augwalibolo mabowe naga koneainogo yali. Te genuai bidi dabego te tiwai sę te Silo bulu pąde, te God dali deli sisinabo ugwa be sunumi pąde tama tiwai sę yai. Tama te tǫ dąį ebo, me te tǫ dobabo sę me, te silalio.
JOS 20:1 Nosali Genuai Bidigo te tiwai po Josuabolo wali,
JOS 20:2 “Nago te Israel dabebolo wao, ‘Dagego te bidi dabe teba wi pomainu yabo hanu dabe meba nogo tų ilao, te eno Mosesbolo olama, te dagebolo wali, te tiwai gilama yao.
JOS 20:3 Magi baso meni, te niwai bidi mego te gasa bidi me ela muai madi, tiali goli aga dali te boi isąma tama tiali, tama bidigo me konebe, te bidi aga digi te gasa bidi me ela mubo digi homu isąma te konebe, teda aga te hanu dabe te me deli teba pomainogo yao, te boi wei ponobo bidigo aga ela muidali weyu yao.
JOS 20:4 Aga te hanu dabe me deliba wi pelama, tama te po tų yabo madi te hanu genuai sunumi teba pedelama, tama te tobolu bidi dabebolo te sę mena tama yali po te hanilama pusumainogo yao. Nosali te tobolu bidi dabego aga te hanu tomoba pomainogo yaibao, tama augwaligo te aga augwali dali bidabo pesage te bulu menama bidimainogo yaibao.
JOS 20:5 Tama te wei ponainogo yali bidigo te aga wali pobeasa pelama, te hanuba pedalubaso da, teda tede bidibo bidi dabego te wi asali bidi te aga nogoba elimainogo magobeo. Magi baso meni, agai wado elama, te bidi me elibeo. Menio. Tama agai abagi Israel me deli ela muabo homu ebeo. Tama tibaso, te we bidi augwaligo te wi asali bidi bugagia tonaluaibao.
JOS 20:6 Tama aga te hanude bididubadi, te aga po tų te tigidali bidi gedude ilibo sogoba usu nao. Tama nosali aga tede bididubadi, tama te sogo bidali te het pris isibo sogoba usu naibao. Teda nosali te aga page bulu ma pabo te usu da, te aga polobadu wi soyu taga soali buluba ma pomainao,’” Genuai Bidigo te we bidibolo pusabo po te Josuabolo wali.
JOS 20:7 Tama po obaso, te we bidi augwaligo te Kedes hanu te Galili badu, te Naptaligo bulu du elalubo badu dąį ilali, tama te Efraimgo bulu du badu te Sekem hanu dąį ilibadi, tama te hanu Kiriat Arba, te gasa nogi Hebron tama, te Judago bulu du badu elaluai.
JOS 20:8 Te Jordan wę u badu, te giliga pedalubo badu, te Jeriko te masigi kemi tǫ badu dąį ilali, augwaligo te Rubengo tǫde te Beser hanu tǫ dąį ilali, tama me te Ramot hanu te Gileat bulu te Gatgo tǫ badu, tama me te Golan hanu te Basan bulu tomode, te Manasego tǫ badu elaluai.
JOS 20:9 Te tama hanu dabe te tigidali Israel dabe geme duala sigi pabo hanu dabe nigilali, te gasa bulu bidi dabe te augwali dali bidali bage me te hanuba naga wi duala sigi pomainogo yali. Tama te bidi me deligo te gasa bidi me elibaso da, tiali goli te agai aga dali boi bidi eyu me elibe, teda aga pelama, te hanude bugagia bidigi pagameo. Tama te bidigo wei ponainu wali pali bidi, agai te bidi me elamuo, tama te bidi te tigidali bidi dabe gedude te po tųba pedalumainogo emai hagede yao.
JOS 21:1 Te Livaigo hanide te tobolu bidi dabe pelama, te pris bidi Eleasar me, te Josua te Nungo ogwa me, te tigidali Israel hani dabe te tobolu bidi dabe bidibo madi sugi pali.
JOS 21:2 Augwaligo te bidi dabe te Silo bulu te Kenan dabego tǫba sisinama, tama augwalibolo te tiwai po wali, “Genuai Bidigo bomai po dabolo te Mosesgo pedauwalide mani, te dago digi dena hanu meba sobadi, tama te dago bulmakaugo tuabo te wiegi yai nosai elalubo tǫ saibao wali,” augwaligo te po wai.
JOS 21:3 Tama tibaso, te Israel dabego te Genuai Bidigo po wali pelama, tama augwaligo te hanu dabe me, tama te augwa nosai elalubo dwasianu tǫ dabe badi, te Livai hani dabebolo mani.
JOS 21:4 Hasia augwaligo te Kohatgo hani sibibolo dąį ilama, tama augwaligo te hanu dabe sai. Te hani pris dabe te augwali te polasa bidali, te pris te wąį Arongo hani dabe, tama augwaligo te Juda hanide me, te Simeon hani me, Benjamin, te hani selade augwaligo te nogo si olama, sągągo sela hanu sali.
JOS 21:5 Tama te Kohatgo gasa hani augwaligo te nogo si hanu dabe sali, te Efraimgo hanide, me Dango hani, me Manasego hanide te hanu dabe sali.
JOS 21:6 Te Gersongo hani sibigo te Isakar, me Aser, me Naptali, te hanide te augwaligo te 13, te tama hanu sali, tama te Manasego hani te Basande bidali bagego hanu meba, te Gersongo hani sibigo me sobadi yali.
JOS 21:7 Te Merari hani sibigo te Ruben, me Gat, me Sebulun, te hani selago hanu te 12 hanu sai.
JOS 21:8 Te Israel dabe augwaligo te Livai dabe hanu, me te bulmakau dabe bidabo tǫ dąį ilali. Augwaligo te Genuai Bidigo te Mosesgo pedauwalide wali po tiwai gilama te sę yali.
JOS 21:9 Te e nogi da te Juda me Simeon te hani sigo hanu dabe te Kohat hani sibigo te pris sę emainogo te hanu dabe hasia bolo mani. Te bidi dabe augwali te Arongo wąį dabe dao. Te we bidigo augwali bidabo badu bolo te hanu tǫ mani.
JOS 21:11 Tama augwaligo te hanu Kiriat Arba, te gasa nogi me Hebron elaluali, te augwaliba mani. Tama te polobadu bidali bidi Arba te Anakgo aya dao. Kiriat Arba te bulu du te Judago bulu badu elaluali. Augwaligo te Kohat dabebolo te hanu, me te pąde elaluali tǫ dali, te tama te bulmakau dabego tuabo wiegi yai nosai elaluali dali, te augwalibolo mani.
JOS 21:12 Tiali goli te we bidi augwaligo te gi sę yabo tǫ me, tama te hanu pąde elaluali bulu dabe dali, te Kalep agabolo polobadu mawai dao. Kalep te Jefunego ogwa dao.
JOS 21:13 Augwaligo te hanu dabe te pris Arongo wąį dabebolo mani. Te Hebron, te bidi dabe geme duala wi sigi pabo hanu da, me Lipna,
JOS 21:14 me Jatir, me Estemoa,
JOS 21:15 me Holon, me Debir,
JOS 21:16 me Ain, me Juta, me Betsemes, te tama hanu dabe dali te wiegi yai nosai te bulmakaugo tuabo te tǫde elaluai. Te Juda de Simeon hani sigo te 9 hanu augwali mani.
JOS 21:17 Te Benjamingo hanigo te hanu me si me si augwaliba mani, Gibeon me Geba,
JOS 21:18 me Anatot, me Almon, te bulmakaugo tuabo nosai elalubo wiegi yai tǫ dali, te augwali mani.
JOS 21:19 Augwaligo te hanu nogo si olama, sągągo sela hanu dali, te bulmakaugo tuabo wiegi yai nosai elalubo tǫ dabe dali mawai, te pris dabebolo, te augwali Arongo wąį dabe dao.
JOS 21:20 Te Kohatgo gasa hani mebago te Efraimgo hanide te tǫ me hanu meba sali.
JOS 21:21 Te bidi dabego te hanu me si me si augwali mani. Sekemde, te bulmakaugo tuabo nosai wiegi yai elaluali te Efraimgo bulu dude, te bidi elali bidi dabe geme wi duala sigi pabo hanu elaluali, me Geser,
JOS 21:22 me Kipsaim, me Bethoron dali, te wiegi yai nosai bulmakaugo tuabo tǫ dali elaluali.
JOS 21:23 Tama augwaligo te Kohat dabebolo te Dango hanigo hanu me si me si mani, te Elteke, me Gibeton,
JOS 21:24 me Aijalon, me Gatrimon dali, te wiegi yai nosai te bulmakau dabego tuabo nosai tǫ dali elaluali.
JOS 21:25 Te Manasego me badu hanigo te hanu si augwalibolo mani, Tanak, me Gatrimon dali, te bulmakaugo tuabo nosai elalubo wiegi yai tǫ dali mani.
JOS 21:26 Te hanu nosali sabo Kohatgo hani sibi dabe, augwaligo te hanu nogo si dali, te bulmakaugo tuabo nosai elalubo wiegi yai tǫ dali sali.
JOS 21:27 Te Livaigo gasa hani sibi te augwali nogi Gerson nogi wali, augwaligo te Manasego hani badu te hanu si sali, Golan te Basan pedai badu, te bidi elali bidi dabe geme wi duala sigi pabo hanu me deli, me te Bestera dali, te bulmakaugo tuabo wiegi yai nosai elalubo tǫ dali sali.
JOS 21:28 Te Isakargo hanigo te hanu me si me si te augwali mani, te hanu nogi dabe Kision, me Daberat,
JOS 21:29 me Jarmut, me Enganim, te bulmakaugo tuabo wiegi yai nosai elalubo tǫ dali mani.
JOS 21:30 Te Asergo hanigo te hanu me si me si te augwali mani, Misal, me Apdon,
JOS 21:31 me Helkat, me Rehop, te bulmakaugo tuabo nosai elalubo wiegi yai tǫ dali mani.
JOS 21:32 Te Naptaligo hanigo te hanu sela te Livai hani augwalibolo mani, Kedes te Galili pedai badu, te wiegi yai nosai elalubo badu, tama te da te bidi elali bidi dabe geme wi duala sigi pabo hanu me deli dao, tama me Hamotdor, me Kartan, te kibu bulmakau dabego tuabo nosai wiegi yai elalubo tǫ dali mawai.
JOS 21:33 Tama elama, tama te Gersongo hani sibi augwaligo te 13 hanu, me te augwali pąde te bulmakaugo tuabo nosai elalubo wiegi yai tǫ dali sali.
JOS 21:34 Te Livai gasa hani me badu, augwaligo nogi te Merari wali, augwaligo te Sebulungo hanigo hanu me si me si sai, Jokneam, me Karta,
JOS 21:35 me Dimna, me Nahalal, te bulmakaugo tuabo nosai wiegi yai elalubo tǫ dali sali.
JOS 21:36 Te Rubengo hani augwaligo te hanu me si me si te augwali mani, Beser, Jahas,
JOS 21:37 me Kedemot, me Mefat dali, te wiegi yai nosai bulmakaugo tuabo elalubo tǫ dali mani.
JOS 21:38 Te Gatgo hani augwaligo hanu me si me si te tigidali augwali mani, Ramot te Gileat pedai badu, te hanu da te bidi elali bidi dabe geme dula sigi pabo hanu me deli dao, tama me Mahanaim,
JOS 21:39 me Hesbon, me Jaser, te wiegi yai nosai te bulmakaugo tuabo elaluali tǫ dali mani.
JOS 21:40 Te Merarigo hani sibigo te hanu nogo si olama, sągągo si hanu dali te sali.
JOS 21:41 Te Israel dabe tigidali bidaluali tǫ pedai, te augwaligo te hanu bidi sese si olama, te a naga me sela, te tama hanu 48 dali, te bulmakaugo tuabo wiegi yai nosai elalubo tǫ dali, te Livai hani sibi augwalibolo mani.
JOS 21:42 Te tigidali hanu deli delide tǫde te bulmakau dabego tubo nosai te pąde elaluali.
JOS 21:43 Tialima, Genuai Bidigo te tigidali tǫ pedai te Israel dabe augwaliba mani, te polobadu agai te augwa wąį dabebolo te bomo yai po dąų wali tiwai gilama yali. Tama te Israel dabe augwaligo te bulu tǫ selama, tama augwali tede bidali.
JOS 21:44 Tama Genuai Bidigo te boi pilama wiegi yai pemene ebo sogo augwalibolo mani, te agai augwa wąį dabe dali dąų wali po tiwai gilama yali. Te haniani boi bidi hani dabe augwali te Israel dabe tigidali badu bidai goli, tama Genuai Bidigo augwali tau siyu, tama augwaligo augwa boi bidi dabe tigidali aiyaba elaluama, tama te boi bidi dabe deli mego te augwali aiyaba elaluainu ebo te usu meni yani.
JOS 21:45 Genuai Bidigo te tigidali wiegi yai te dąų wali po te Israel bage augwaliba mu usu nama, tama te sę ela silali. Agai wali po me deli munu me tulalubeo.
JOS 22:1 Nosali Josuago te Rubengo hani me, te Gatgo hani me, te Manasego hani me badu me, te augwali i olama, tama augwali deliba sisinagasali.
JOS 22:2 Tama agai te tiwai po augwalibolo wali, “Dagego te tigidali sę te Moses, te Genuai Bidigo sę bidigo, te dagebolo weyu, te yao po wali sę te tigidali ela silali. Tama dagego eno po tigidali wali pai.
JOS 22:3 Te tigidali sogo dagego te duga ama dede dabe tau sali, te megi e sogoba usu nani. Te deli sogo me dagego te augwali me tagalubeo. Dagego te Godigo po dabe bugagia wali pali, te dago Genuai Bidi dao.
JOS 22:4 Megi te God, te dago Genuai Bidigo, te boi pilama wiegi yai pemene ebo sogo te dagego ama dabebolo mayu, te polobadu agai po dąų wali tiwai gilama yali. Tialima, dage te duga beba ma geasa pelama, te tǫ pedai te Jordan wę u badu, polobadu Moses, te Genuai Bidigo sę bidigo, te dagebolo mani.
JOS 22:5 Tama dagego homu kone bugagia palama, tama te Genuai Bidigo sę bidi te Mosesgo po dabe me te bomai po te dagebolo mani, bugagia wali pao. Te bomai po page e tiwai dao, dagego duga Genuai Bidi God godolo mu iyąo. Tama dagego agai homu kolesaga me, po me, wali pao. Dage te aga dali bidiyu, tama dagego homu kolesaga me bomo tigidali te agaba munama, tama agai sę yao,” agai te po wai.
JOS 22:6 Tama Josua te wiegi yai po mobo augwali menama, tama agai augwali te Jordan wę boloyu, augwa beba ma pomainu tagala palali.
JOS 22:7 Mosesgo te Basan tǫ te Manasego hani me badubolo mani, te Jordan wę u badu, te giliga pedalubo badude. Tiali goli, Josuago te Manase hani me badubolo te tǫ mani, tama te gasa Israel hanibolo me, te Jordan wę e badu, te giliga dega sigilubo pedai badu, te tǫ me mani. Te Josuago te hani te augwa buluba ma tagala palali sogo, agai te po mobo augwaliba mayu,
JOS 22:8 tama agai te po wali, “Dagego te boide sali doado bage hauwa elalubao, tama megi dage duga buluba ma piąo. Dagego te bulmakau hauwa elalubo, me silva, me gol, me bras, me ain, tama ugwa me hauwa elalubao. Tama dagego te boi bidide sali doado bage meba te duga ude bidali abagi dabe mao,” wali.
JOS 22:9 Tialima, te Rubengo hani bidi dabe, me te Gatgo hani, me te Manasego hani, te augwali te augwa buluba ma soali. Te hanigo te gasa Israel hani dabe te Silo bulu te Kenan dabego tǫde taga soyu, tama augwali te Gileat, te augwa tǫba soali. Augwaligo te tǫ sali te Genuai Bidigo augwalibolo te Mosesgo pedauwalide wali pode tiwai gilama te tǫ polobadu sali.
JOS 22:10 Augwali Gelilotba sabolali, te Kenan dabego tǫ te Jordan wę sesegede, tama augwaligo te genuai alta me deli te bulu te wę pąde dodolali.
JOS 22:11 Tama tigidali gasa Israel dabego te tiwai sę yali po odali, “Odiao! Te Ruben dabego, me Gat, me Manase me badu, te tama hani bagego te alta me deli te Gelilot bulu, te Kenan tǫ sesegede, te Jordan wę pąde, te da bidibo pedai badu te alta nigalio,” te po wabo odali.
JOS 22:12 Augwaligo te po odama, tama tigidali te Silo buluba sisinama, tama augwaligo te hani sela dali boi hwįainogo sisi ilali.
JOS 22:13 Tialima, te Israel dabe augwaligo te Finias tagala palali, te pris bidi Eleasargo ogwa, te Rubengo hani me, te Gatgo hani me, te Manasego hani badi, te hani sela bidibo madiba te bulu Gileatba pai.
JOS 22:14 Tama te nogo si tobolu bidi dabe te Finias dali pali. Te bidi dabe augwali tigidali te Israel bidi dabe naga, tama te augwa deli hani sibi tobolu bidi dabe dao.
JOS 22:15 Augwali te Gileatba sabolama, tama augwaligo te tiwai po te Rubenbolo me, te Gat me, Manase me badu, te hani bage selabolo te po wali,
JOS 22:16 “Te Genuai Bidigo po odobo we bidi tigidaligo te tiwai po wali, ‘Magi baso dagego te dwai sę dena Godibolo yaliwe? Dagego te Genuai Bidigo po sela sąnama, tama dagego te duga alta te nigalio! Dagego te Genuai Bidi wali pabo ąǫ me ebeo!
JOS 22:17 Polobadu dago te bulu Peorde te dwai sę yali, tama Genuai Bidigo te gasi tagala palama, tama aga we bidi dolali. Dagego homugo te dwai sę yali te usu ebe homu elama, tama dagego gasa dwai sę me ma yali da, agawe?
JOS 22:18 Magi yaliwe, megi dagego te Genuai Bidi wali pabo hagela homu ebaso yaliwe? Te dagego agai po megi sela sąwani wida, teda do agai da Israel dabe tigidalibolo wado po waibao.
JOS 22:19 Te dage Genuai Bidigo gedude meda elaluyu, tama dagego tǫde lotu wabo te usu meni ebaso da, teda dage te Genuai Bidigo tǫba asiąo, te agai ugwa be elalubo buluba. Tede Godiba nai ula mabo alta elalubao, te dago Genuai Bidi dao. Tama dagego te da tomode te tǫ meba siagameo. Tiali goli, tiyu, te dagego Genuai Bidigo po sela sąyu, dagego te alta nigali gilama idalio.
JOS 22:20 Dagego te Akan te Serago bulali wąį ogwa te homugo gegeda palamuo. Te hasia Godigo te Jeriko hanude nai sigio olama, habu selali elalubadi, tama Akango te po sela sąnama, tama te nai meba sali. Tama te tigidali Israel dabego te dwai sę yali sęgę tolali. Te Akango yali dwai sę te Akan aga delide naga me elalubeo. Menio! Te gasa Israel we bidi dabe augwali me dolai dao!’ we bidi tigidaligo wali,” augwaligo te po wai.
JOS 22:21 Tialima, te Rubengo hani, me te Gatgo hani me, te Manasego hani meba me, te augwaligo te hani sibi tobolu bidi augwalibolo te tiwai po wei ponani,
JOS 22:22 “God te tigidali bomo elalubo! Agaduba deli naga te Genuai Bidi dao! Te dago magi baso te sę yali, te agai koneani. Tama dago homugo te dagego me konemainogo yaibao! Te dago Genuai Bidigo po sela sąnama, tama dago agai bomai po wali pisąwai baso da, teda dagego da te bidibo ula elalu bidimainu me gogolamu dao!
JOS 22:23 Te dago Genuai Bidigo po sela sąnama, tama dago te dena alta digi nigilama, tama te ofa ebo nai ulai digi, te wit ofa ilabo me, te deli homu ilabo ofa me, te sę yaibaso da, teda Genuai Bidi agai digi da dene ilimainogo yao.
JOS 22:24 Tiali goli, meniama, dago te sę isąbaso da, magi baso, te da wi eyu, tiyu te nosali dagego wąį dabego te tiwai po weyu, ‘Te magi baso dagego te God, da Israel dabego Genuai Bidibolo lotu po obawe?’ po waibao.
JOS 22:25 ‘Genuai Bidigo te wę Jordango da dąį tomode muani, tama dage te Ruben me Gat tego hani we bidi dabe, dage te Genuai Bidigo hani meni,’ te po waidalio. Tama tiyu, te dagego wąį dabego te dago wąį dabe paliama, tama augwaligo te Genuai Bidibolo lotu po me wagobeo.”
JOS 22:26 “Tama tibaso, dago te alta nigali. Te ofa yabo nai dabe, me te gasa tobage ofa, te ofa dabe yabo te me egobeo. Menio!
JOS 22:27 Te dago hanide dąį me deli, me te dage hanide dąį tama te dago wąį dabe ola mani, te aga ugwa bede dago lotu te Genuai Bidiba naga weyu, tama dago te ofa ebo nai dabe ulubo da, tama te dwai sę ebo ofa, me te deli homu ebo ofa me, te ofa yaibao. Tiyu nosali dagego wąįgo te dago hanibolo te tiwai po waidalio, ‘Dage te Genuai Bidigo hani menio,’ te po waidalio!
JOS 22:28 Dago te tiwai homu yali, ‘Te tobage posobo po te dabolo me te dago wąį dabebolo wabo side, teda dago te po wainogo, “Suao, te alta dago aya dabego nigali, te dagego alta tobage deli tiwai e elalubao,” omainogo yali. Tama te olo nai dabe me te dwai ofa ebo te tiwai me ebeo. Menio! Te alta da, te dago hani dali, te dage hani dali, te dąį deli naga iliyu hanilama tiwai yali,’ dago te homu yali.
JOS 22:29 Dago te olo nai, te hasa, me te wit, me te dwai sę ilibo ofa te tiwai me ebeo. Dago te tiwai sę ebo hagela yai. Mu menio. Te dago tama tiyu da, te Genuai Bidigo po sela sąnama, tama tudiba muaibao. Dago te Godigo alta te me hasegelegobeo, te dago Genuai Bidi, te alta aga ugwa be te gedude dolalubao.” Te Ruben, Gat, te Manase bage meba me, te hani selago te po wai.
JOS 22:30 Te pris bidi Finias te augwa we bidigo genuai dabe dali, te augwali te Israel hani sibi dabego tobolu bidi dao, augwaligo te Rubengo hani me, te Gatgo hani me, Manasego hani, te augwaligo wabo po odama, tama augwali wiegi yai homu pemene yai.
JOS 22:31 Tialima, Finias, te pris Eleasargo ogwago te Ruben, me Gat, me Manase, te hanibolo te tiwai po wali, “Megi dago koneani, te Genuai Bidi da dali bidibo, magi baso meni, dagego agai po me sela sąbeo. Tama tibaso, Genuai Bidigo da dali wado po me wagobeo,” wali.
JOS 22:32 Nosali Finias, me te tobolu bidi dabe, augwaligo te Ruben, me Gat, me Manase, te hani augwali te Gileat bulude taga peyu, tama augwali te Kenanba ma pelama, tama te wali po dabe te Israel dabebolo pusigi pali.
JOS 22:33 Tama te Israel dabego te augwaligo pusagasali pode te augwali wiegi yai homu pemene yai. Augwaligo te God nogi ugwaba siyu, tama augwaligo te Ruben, me Gat, te augwali dali boi hwįgi pabo homu eyu, te augwali bidali tǫ doligi pabo homu yali, te homu kone munu me ebeo.
JOS 22:34 Tama tialima, te Ruben dabe, me te Gat dabe, te augwaligo te alta nogi poali te “Hania Haninama Pusali,” magi baso meni, augwaligo te po wali, “E altago da tigidalibolo dąį iliyu, hanilama e po oda mabo dao, te Genuai Bidi aga deli naga te God dao,” wai.
JOS 23:1 Te kibu be hauwa bidama, tama Genuai Bidigo te boi pilama wiegi yai pemene ebo sogo te Israel dabebolo mani. Tama augwaligo te bidalua pabo boi bidi dabe dali te boi me hwįbeo. Te megi da, te Josua monu dabe mu yali.
JOS 23:2 Tialima, agai te Israel dabe tigidali i olama, tama te tobolu bidi dabe me, te genuai bidi dabe me, tama te tonalubo bidi dabe me, te ofisa bidi me, augwali i olama, tama agai augwalibolo te po wali, “Megi da, ena monu dabe yalio.
JOS 23:3 Dagego digi te tigidali sę te God, dago Genuai Bidigo, te boi bidi hani dali te dage homugo koneama, te sę yali dagego suali. God, te dago Genuai Bidigo, te dagego boi hwįbadi tau sali.
JOS 23:4 Megi te dagego bugagia odiąo! Te gasa hani dali tama te elalubo tǫ, te eno dagebolo somainogo sa muani. Eno te boi hwįnama aiyaba elaluali hani dali te tiwai naga yali. Tama dagego tǫ te wę Jordan sesege badu gagalasa pali, te giliga pedalubo madi, te Mediterenian Tamu Ąį badu, te giliga dega sigilubo pedai badu dąį igi pali.
JOS 23:5 God, dago Genuai Bidigo, te boi bidi dabe ela gudulama, tama dagede wi eyu pomainogo ilaibao. Tama te dagego augwaligo tǫ saibao, te Godigo bomo yai po dąų wali tiwai gilama yaibao.”
JOS 23:6 “Tama dage bomo mu dolaluyu, tama bugagia dua tama elama, tama dagego te tigidali po te Mosesgo asęani bukude elalubo bomai po wali piąo. Dagego te agai po dwasianu me deli tagalamuo.
JOS 23:7 Tama te dage tomode bidalubo gasa we bidi hani dali deliba me sisinamuo, tama dagego te augwaligo tibo god nogi te me nogilamuo, tama dagego te mu po dąų walainu te augwali nogi me nogi igio. Tama dagego te kidu sugunama, tama te augwaligo tibo godiba lotu po me wagio. Menio!
JOS 23:8 Tialima, te dagego te Genuai Bidi dali bugagia kęą pelama, tama aga wali peyu, te megi tama dagego te ela asali tiwai gilama yao.”
JOS 23:9 “Genuai Bidigo te genuai bidi dabe me, te bomai we bidi hani me, sela sąyu ela gudulama, tama mena bidi me deli te aga bomo elama dolalu, te dage me sela sąbeo.
JOS 23:10 Te dage hani bidi me deligo te umabo bidi mu, te 1,000 bidi dabe te wi pomainu ilibo sę ebaso, te usu yai dao, magi baso meni, God, te dago Genuai Bidigo, te dage tau siyu, augwali dali hwįai dao, te agai polobadu po dąų wali tiwai gilama yaibao.
JOS 23:11 Tama tibaso, dage te duga ebo kolesagade te bugagia dua yao. Dagego te dena Genuai Bidi, God, te godolo mu yao,” wali.
JOS 23:12 “Tiali goli, dagego te dena God tagaliyu, tama dage te hwįbode isiąwai gasa hani we bidi te dage tomode bidalubo bage dali sisinama, tama dagego augwali dali we si ebaso da,
JOS 23:13 teda dagego koneani, te Godigo te augwali munu me sela sągobeo. Menio. Te dagego boi bidi mu augwali pedelaibao. Te augwali te dage tulaluabo tǫ dedage tiwai elaluaibao. Tama augwaligo dage te keloago dene mayu, te bidi tudi badu elibo tiwai gilama dene mawaibao, tama te sesanigo bidi gedude enibo tiwai gilama yaibao. Tama te sęgę elalubadi, te dage tigidali te e wiegi yai tǫde polo isaibao, te dena Genuai Bidigo dagebolo mani tǫ.”
JOS 23:14 “Tialima, megi ena te tǫde bidibo sogo silainogo ebao. Dagego mu koneani, God, te dago Genuai Bidigo, te tigidali wiegi yai nai te po dąų wali nai mena silali. Te agai po dąų wali nai te tigidali pedela silali, te agai wali po me deli munu me tulalubeo.
JOS 23:15 Mu tama, God, te dago Genuai Bidigo, te agai po weyu, te sę yaibao wali te tigidali wiegi yai sę ela silali. Tiali goli, dagebolo te Godigo wali bomai dąų wali po, te dagego boloyu, bugagia wali me pisąyu, tama dagego te tibo godiba lotu weyu, tama dagego te augwaliba kidu sugunubaso da, teda Genuai Bidigo dagebolo wado po weyu, tama agai dageba dene ilama, te dage tigidali agai te mani wiegi yai tǫde polo isimainogo yaibao,” Josuago te po wali.
JOS 24:1 Josuago te Israel hani tigidali te Sekemba sisinani, tama nosali agai te tobolu bidi dabe me, te genuai bidi dabe me, te tonalubo bidi dabe me, te augwali tigidali i olama, sisinama, tama augwali te God gedude doligi pali.
JOS 24:2 Tama Josuago te tiwai po te tigidali we bidibolo wali, “Te Godigo po, te da Israel dabego Genuai Bidigo po, te tiwai obao, ‘Polobadu mu te dagego wąį dabe augwali te wę Yufretis pedai u badu bidali. Tama augwaligo te tibo godiba lotu po wai. Te wąį me deli nogi te Tera, tama aga te Abraham de Nahor sigo aya dao.
JOS 24:3 Tiali goli, eno te duga wąį Abraham te wę Yufretis u badu elaluali tǫde selama, tama eno aga te Kenan tǫ pedai tigidali badu selasa bilali. Tama eno te agabolo wąį hauwa mani. Eno te ogwa Aisak deli agabolo mani,
JOS 24:4 tama eno ogwa si mani, Jekop me Iso, te Aisakbolo mani. Tama eno te bulu du Seir, aga gasa nogi me Idom, te Iso mani, te aga tǫ gagalama bidali. Tiali goli, Jekop me, te aga hani wai dabe dali, augwali te Isipba pali.’”
JOS 24:5 “‘Te nosali eno te Moses de Aron si tagala palama, tama eno te dwai nai dabe mugo te Isip dabe mu dolali. Nosali eno dage te Isip taga soyu, tama eba odasa asali.
JOS 24:6 Eno dagego aya selama, tama te Isip taga soyu asali. Tama te Isip dabego te bomai hwįbo nai karis, me hos me selama, tama dage soali wali pobeasa asali, te augwali te nosai elalubo tamu ąįba sabolali.
JOS 24:7 Tiali goli, te aya dabe augwali wi elama, tama eno te Israel dabe tigidali augwali tau somainogo te i bomonama mu wali, tama eno te be hulia sabo tiwai te augwalide te Isip ami dabe dali si tomode muani. Tama eno te tamu ąį peda pomainogo ilama, tama te Isip dabe mesega sali. Dagego eno te Isip dabede yali sę te dagego suai dao. Tama nosali dage te kemi tǫ bulude sesabi elama, hauwa sogo mu bidali.’”
JOS 24:8 “‘Nosali eno dage te Amor dabego tǫba te Jordan wę pedai te giliga pedalubo badu odasa pali. Tama augwaligo dage dali hwįani. Tiali goli, eno dage tau selama, tama dagego augwali aiyaba elaluali. Tama dagego augwaligo tǫ sali, magi baso meni, ena polasa peyu, tama eno augwali dolali.
JOS 24:9 Nosali Balak, te Moap dabego tuni bidi Siporgo ogwago, te dage Israel bage dali hwįani. Agai po te Balambolo ola tolali, te Beorgo ogwa, tama agai te po dwai me deli weyu, tama dage dolomainogo hanalu wali.
JOS 24:10 Tiali goli, eno te Balamgo po odobo hagela homu yali, tama agai te dwagi yai mobo dagebolo maidu geani. Tama eno dage te Balakgo nogode ma dobola sali.’”
JOS 24:11 “‘Dage te wę Jordan nogelama, te Jerikoba sabolali. Tama te Jeriko bidi dabego dage dali boi hwįani. Tama te Amor dabe me, te Peres dabe me, te Kenan me, te Hit dabe me, te Girgas me, te Hivi dabe me, te Jebus dabe me, te augwaligo me dage dali boi hwįani. Tiali goli, eno augwali dagego nogoba muani.
JOS 24:12 Ena dage asobadi polasa peyu, tama eno digi te boi bidi dabe wi ilama, tama augwali sela sąwai dao, tama te tialigo te Amor tuni bidi si wi pomainu ilali. Tiali goli, duga digi te poai hwą ge bainatgo, me te sesemonego te augwali si gudulu baso wi me pabeo.
JOS 24:13 Tama tiyu, eno dagebolo te tǫ me deli te duga digi sę me isąwai digi, te tǫ dagebolo mani. Tama eno dagebolo te dagego me nigisiąwai hanu me mobadi yali. Megi dage te bulu dabede bidaluyu, tama dagego te ni du wain, me te ni oliv me tuyu bidibao. Tiali goli, te duga digi me bulusiąwai dao,’ dago Genuai Bidi God agai te po obao,” Josuago te po wai.
JOS 24:14 Tama Josuago po ma weyu, te po wai, “Tialima, megi da, dagego te Genuai Bidi dologode bidiyu, agaba lotu po weyu, tama sesemane sogo dagego agade sę te dagego bomo tigidali teba munama, sę yao. Dagego te tibo godiba homu kone ebo tagalama, te duga wąį dabego te Mesopotemiade me te Isip pedai badu side bidali sogo augwalibolo te lotu po wali. Dagego te Genuai Bidiba naga lotu po wao.
JOS 24:15 Tiali goli, dagego te Genuai Bidiba lotu wabo hagela homu ebaso da, teda dagego bugagia homu kone palao. Te dagego lotu po debolo waibawe? Te duga wąįgo te Mesopotemiade te tibo godiba lotu wali te Godiba lotu po waibawe? Ma, te Amor dabego tibo god, te megi te dage te bidibo tǫde te Godiba lotu waibawe? Tiali goli, ena, te ena we wai sibi dali, te dago da te Genuai Bidiba naga lotu po waibao,” Josuago te po wai.
JOS 24:16 Tama te we bidi augwaligo te tiwai po wei ponoyu, te po wai, “Dago te Genuai Bidi tagalama, te tibo god dabeba lotu munu me wagobeo! Mu menio!
JOS 24:17 Te Genuai Bidi deli naga te dago God, tama agai te da dali, te dago aya dede dali, te Isip kalabus sęde bidibadi, te da ma dobola selama, odasa asali. Tama dago te agai te ebo bomai sę suali. Te da gasa hani dabego tǫde bilaluali sogo, tama da te mena pabo sogo me, te Godigo da bugagia tonalualigo te da bugagia bidali.
JOS 24:18 Te da asali sogo, Genuai Bidigo te tigidali hani bage ela gudulubo sę yali, te Amor dabe dali, augwali te e tǫde bidibadi tiali. Tama tibaso, dago me te Genuai Bidiba lotu waibao wali. Aga deli naga te dago God dao,” augwaligo te po wai.
JOS 24:19 Tialima, Josuago augwalibolo te po wei ponani, “Te dagego homugo te Genuai Bidiba lotu po wabo homu ebawe? Aga te magi dwai sę isiąma, tama agai homugo te dagego tibo godiba lotu wabo hagela homu ebao. Agai homu te tibo god me deligo aga me hasegelegobeo. Te agai dagego sęgę me dwai sę yali te me sela sągobeo.
JOS 24:20 Tama mu tama, agai polobadu dagebolo wiegi yai sę mu yali, tiali goli te dagego Genuai Bidi tagalama, tama te gasa hanigo tibo Godiba lotu po obaso da, teda Genuai Bidigo po wado po olama, tama agai dage dene ilama, tama agai dage dolaibao,” te po wai.
JOS 24:21 Tiali goli, te we bidigo Josuabolo te tiwai po wei ponani, “Mu menio! Te sę me egobeo. Te dago Genuai Bidiba naga lotu po waibao.”
JOS 24:22 Tialima, Josuago augwalibolo te po wali, “Duga digi haninama pusali, tama duga digi te Genuai Bidiba naga lotu po wabo po dąų wali.” Tama augwaligo te po wali, “Te tama dao! Dago haninama po pusali. Te dena digi dade wali po dao.”
JOS 24:23 Tama Josuago po ma wali, “Tialima, dagego te gasa hani dabego te tibo god dage tomode bidalubo te dagego sela sąyao. Tama dagego duga homu tigidali te God, te duga Israel dabego Genuai Bidiba muao.”
JOS 24:24 Tama te we bidi augwaligo Josuabolo te po wali, “Dago te Godiba lotu wainogo, te dago Genuai Bidi, tama aga bomai po naga wali paibao.”
JOS 24:25 Tialima, te sogo Josuago te we bidi dabe dali po me deli dąų walali. Tama te bulu Sekemde Josuago te bomai po me te po me asęnama, augwalibolo mani, te augwaligo wali pomainogo.
JOS 24:26 Josuago te po dabe te Godigo bomai po elalubo buku me deli tomode asęani. Nosali agai te masigi me deli selama, tama te ni kali pąde, te Genuai Bidiba lotu po wabo madi pąde te masigi dolaluama, muani.
JOS 24:27 Tama Josuago te we bidi augwalibolo wali, “Te sesemane sogo dago te masigi subo sogo da, te dago homugo te dago te dąų wali poba homu kone ma palaibao. Te masigigo te Genuai Bidigo dabolo wali po tigidali odali. Te dage homu hodolabo dąį me deli te ilali, te dagego te dena Godigo po munu me sela sąnamu dao,” te po wali.
JOS 24:28 Nosali Josuago te augwali te augwaligo sabo tǫba ma tagala palali. Tama tigidali te augwa buluba ma pelawali.
JOS 24:29 Nosali Josua, te Nungo ogwa, te Genuai Bidigo sę bidi, aga isali. Tama aga isali sogo agai kibu be te 110 kibu be yali.
JOS 24:30 Augwaligo aga te tǫ doba yali sogode agai sali tǫ Timnat Sera tede pubulali. Te bulu te not te bulu du Gas, te Efraimgo bulu du, te pedaide dao.
JOS 24:31 Te Josua bidibadi, te sogo da, te Israel dabego te Genuai Bidiba lotu po uduai. Tama nosali te Josua isai madi me te augwaligo Genuai Bidiba lotu po udali. Augwaligo tama tidubadi, te Genuai Bidigo te Israel dabe tau siyu ebo sę suali te genuai bidi dabe augwali me isali.
JOS 24:32 Te Josepgo dili te we bidigo Isipdu tolasa asali, te augwaligo te Sekemde pubulali, augwaligo te Jekopgo te mone 100 silvago te Hamorgo ogwa dabe dali polobadu abelali, te tǫde pubulali. Hamor te Sekemgo aya dao. Tama Josepgo hani augwaligo te tǫ sali.
JOS 24:33 Tama Eleasar, te Arongo ogwa, te isibaso, tama augwaligo aga te Gibeade pubulali. Te hanu augwaligo te aga ogwa Finiasbolo mani, tama te Efraimgo bulu du te badu elaluai dao.
JDG 1:1 Te Josua isai madi tama te Israel dabego te tiwai po te Genuai Bidibolo hanalu wali, “Te mena hani polasa peyu, tama te Kenan dabe dali boi hwįgi pogowe?” wali.
JDG 1:2 Tama Genuai Bidigo te po wei ponani, “Te Judago hani polasa paibao, magi baso meni, eno te tǫ augwalibolo mawai dao.”
JDG 1:3 Tama Judago hanigo te Simeongo hanibolo wali, “Te hasia dage da dali aselama, tama da te augwaligo dabolo sa muani tǫba pinao,” wali, “tama dago te Kenan dabe dali hwįaibao. Nosali da Juda dabe dage dali te augwaligo dagebolo sa muani tǫba paibao.” Te po wai. Tama te Simeongo hani te Judago hani dali pali.
JDG 1:4 Tama Judago hani te boi hwįgi painu polasa pali, tama Genuai Bidigo te Kenan hani me te Peres hani si te Judago hani dabe nogoba munama, tama augwaligo te bidi sese umabo bidi mu, te 10,000 bidi te Besekde ela silali.
JDG 1:5 Tama te Juda dabego te tuni bidi Adoni Besek te aga hani dali gegelama, tama augwaligo augwali dali hwįani, tama augwali aiyaba elauali.
JDG 1:6 Adoni Besek wi pali, tiali goli te Juda dabego aga pobeasa pelama, tama aga pageabi elama, tama te genuai a nogo si togwali, tama te a sągą si me togobadi yali.
JDG 1:7 Tama Adoni Besekgo te po wali, “Polobadu eno te tuni bage bidi sese sela te gasa bidigo nogo si te 70 bidi te augwali eno te a nogo me, a sągą me togolama, tama augwaligo te nai kakali te eno tebol sai dologode sela tuyu yai. Megi Godigo te tiwai sę naga te enaba wei ponobao,” wali. Tama augwaligo te tuni bidi Adoni Besek te moni hanu Jerusalemba sela pelama, te Jerusalemde bidibadi tama aga isai dao.
JDG 1:8 Te Juda dabego te Jerusalemde bidali bidi dabe dali boi hwįnama, tama augwaligo tǫ sali. Tama augwaligo te we bidi ela munama, tama augwaligo bulu dabe dali sia ulali.
JDG 1:9 Nosali augwali pelama, te Kenan bidi dabe te bulu dude me bulu odogode bidalubo bidi dabe dali hwįgi pali, tama augwaligo te bulu nogi Negev teba pelama, me hwįgi pai.
JDG 1:10 Tama nosali ma augwali pelama, te Hebronde bidibo Kenan bidi dabe dali hwįgi pali. Te bulu Hebron te polobadu augwaligo te hanu nogi Kiriat Arba nogi yai. Tama Juda dabego te Sesai bulu bidi me, te Ahiman bulu me, te Talmai bulu bidi, te augwali aiyaba elaluai dao.
JDG 1:11 Te Juda dabego te Hebron bidi dabe augwali aiyaba elaluama, tama augwali pelama, te Debir we bidi dabe dali hwįgi pali. Te bulu Debir polobadu augwaligo te hanu nogi Sefer nogi yali.
JDG 1:12 Tama Kalepgo te po wali, “Te niwai bidi me deligo te Sefer hanu we bidi dali boi hwįnama, te augwali aiyaba elaluama, tama te hanu sobaso da, teda agai te eno wegi Aksa te somainu yaibao.” Kalepgo te po wali.
JDG 1:13 Tama Otniel, te Kenasgo ogwa, te Kenas da te Kalepgo dwasianu amanu, agai te hanu sigi pali. Tama tibaso, Kalepgo aga wegi Aksa te Otniel menama, tama agai sali.
JDG 1:14 Tama te Aksa sabalubode, Otnielgo agabolo po bomo elama weyu, te aga ayabolo te tǫ pedai me deli momainogo te po hanalu wao po wali. Tama Aksa te Kalepba pelama, tama aga te kibu donkide dualaluali te tagalama tǫba samonani, tama Kalepgo agabolo hanalu wali, “Nago magi nai sabo homu ebowe?”
JDG 1:15 Tama Aksago po wei ponani, “Eno te nai me deli sabo homu ebao. Nago ena te ili meni yai wa pai tǫba muani, te tǫ nogi Negev, te megi nago ena te wę ulu meba mao,” wali. Tama Kalepgo te ulu wę ugwadu me aiyadu me elalubo tǫ me te agabolo mani.
JDG 1:16 Te Mosesgo wąį monu te Kengo hani dao. Tialima, te ayago hani dali, te Judago hani dali, augwaligo te pam ni sili elalubo bulu taga peyu, tama augwali te Judago bulu te wa pai elalubo te Arat pedai te badu bidigi pali. Tama augwali te Amalek bidi dabe dali te bulude bidali.
JDG 1:17 Tama te Juda me, te Simeon me, te hani si augwali pelama, tama te Sefat hanude bidibo Kenan bidi dabe aiyaba elaluali. Tama augwaligo te hanu tigidali dola silali. Tama augwaligo te hanu nogi gesi poali, te Horma nogi yai.
JDG 1:18 Tiali goli te Juda dabe augwaligo te bulu Gasa me Askelon si te sabeo, tama Ekron te tǫ pedai dabe dali te sisąwai.
JDG 1:19 Genuai Bidigo te Juda dabe tau sobaso tama augwaligo bulu du elalubo tǫ dabe sali. Tiali goli, augwaligo te wę sanide bidalubo bidi dabe sela sąyabo te usu meni yai, magi basowe, te bidi dabe augwaligo te hwįbo nai dabe karis ain elaluali.
JDG 1:20 Tama augwaligo te bulu Hebron te Kalep mani, te tiwai te polobadu Mosesgo po wali gilama. Tama Kalepgo te Anakgo ogwa sela te augwali Hebronde bidali te sela sąwani.
JDG 1:21 Tiali goli, te Benjamin hanigo te Jebus dabe te Jerusalemde bidibo te me sela sąbeo. Tama te Jebus dabe te Benjamin hani dali bidaluama, tama megi e po asęani sogoba usu nagasali.
JDG 1:22 Tama tialima, te Josepgo hani pelama, te Betel hanude bidali we bidi dali boi hwįgi pali. Polobadu augwaligo te hanu nogi te tiwai nogi poali, te Lus wai. Tama Genuai Bidigo augwali tau sabo sę yali. Tialima, augwaligo te bidi meba tagala palama, te hanuba sa pali.
JDG 1:24 Tama te sa pali bidi dabego te bidi me deli te hanu tagalama buluba soabo suali. Tialima, augwaligo agabolo te po wali, “Te nago dabolo te hanu tomoba pabo sunumi ola mobaso da, teda dago nage dali dwai sę me iligobeo,” te po wali.
JDG 1:25 Tama agai augwalibolo te hanu tomoba pabo sunumi ola mani. Tama augwali te hanu tomoba pelama, tama te hanude bidali we bidi tigidali ela silali. Tiali goli, augwaligo te bidi deli te aga hani dali te augwali me elibeo.
JDG 1:26 Tama te bidi aga te Hit dabego tǫba pelama, tama agai te hanu me deli nigali, tama agai te hanu nogi te Lus nogi poali. Tama te nogi me elalubo dao.
JDG 1:27 Te Manasego hanigo te bulu Betsan, me Tanak, me Dor, me Ipleam, me Megido, te bulu dabe pąde elaluali dwasianu bulu dabede te bidali bidi dabe te augwali te augwaligo me sela sąbeo. Magi baso meni, te Kenan dabego homu bomonama eyu, tama tede me bidalu dali.
JDG 1:28 Tama te Israel dabe augwaligo bomo pedalubo sogo, augwaligo te Kenan we bidi augwali kalabus ilibo sę yali. Tiali goli, te Israel dabego te augwali mu tigidali sela sąyu me ebeo.
JDG 1:29 Tama Efraimgo hanigo te Kenan we bidi te Geser hanude bidali te augwali me ela gudulisiąwai. Tama te Kenan we bidi augwali dali tede me bidaluai.
JDG 1:30 Tama Sebulungo hanigo te hanu Kitron me Nahalal te hanu side bidali we bidi te augwaligo ela gudulube. Tama te Kenan we bidi te augwali dali hodobo bidaluai. Tama te Sebulun hanigo te Kenan dabe augwali kalabus ebo sę ilali.
JDG 1:31 Tama Asergo hanigo te Ako me Saidon, me Alap, me Aksip, me Helba, me Afek, me Rehop, te tama hanude bidali we bidi te augwaligo me sela sąsiąwai.
JDG 1:32 Tama te Aser dabe te Kenan dabe dali bidali, magi baso meni, te augwaligo augwali te bidi me sela sąsiąwai.
JDG 1:33 Tama Naptaligo hanigo te hanu Betsemes me Betanat te hanu side bidali we bidi augwali te me sela sąbeo. Tama augwali te Kenan dabe dali bidaluali. Tama Naptaligo hanigo te Kenan dabe augwali kalabus ilibo sę yali.
JDG 1:34 Tiali goli, te Amor dabego bomo eyu, tama te Dango hani dabego augwali te odogo tǫde ela gudulubo usu meni yai. Tama tibaso te Dango hani dabe meba bulu duba holama bidali. Tama te Amor dabego te augwali te tǫ maluba dulumainu me ebeo.
JDG 1:35 Te Amor dabe augwali naga te Aijalon, me Salbim, me Heres, te tama sela bulude bidaluai. Tiali goli, nosali te Josepgo hanigo bomo genuai pedelama, tama augwali tonaluyu, tama augwali kalabus ilibo sę yai.
JDG 1:36 Tama te Amor dabego tǫ dąį te bulu du Akrabimde gagalasa pelama, te bulu Selaba sabolama, tama ugwaba mu pidubadi geani.
JDG 2:1 Te Genuai Bidigo Mobo Bidi Ensel te Gilgal bulu tagalama, te Bokim buluba pali. Tama agai te Israel dabebolo te po wali, “Eno dage te Isip tǫde odasa, te eno duga wąį dabebolo mawaibao wali bulu tagaligi soali. Tama eno te po wali, ‘Te eno dage dali dau wali po te eno togogobeo.
JDG 2:2 Tama tialima, dagego te tǫde bidalubo bidi dabe dali te po dau me waidali weyu, te eno habu selebao. Dagego te augwaligo alta dabe aluama dolao,’ eno te po wai. Tiali goli, dagego te eno dagebolo igio wali te sę munu me elamuo. Menio. Dagego te gasagi yai sę mu yalio!
JDG 2:3 Tama tialima, eno dagebolo megi obao, te eno dage pabo madi te bidi dabe augwali eno polasa me sela sągobeo, te dage augwaligo tǫba painogo ebo sogo tama tiaibao. Te augwali dagego boi bidi dabe bidaluaibao. Tama augwaligo tibo godigo te dagego konealubo po usu selama, mu dolaibao.” Genuai Bidigo Mobo Bidi Enselgo te po wali.
JDG 2:4 Nosali Mobo Bidigo te po wai madi, te tigidali Israel we bidi dwai gela mu wali.
JDG 2:5 Tama te tiali bulu nogi augwaligo te Bokim poali. Tama augwaligo te bulude God Genuai Bidibolo ofa ilali.
JDG 2:6 Tialima, polobadu Josuago te Israel dabe augwalibolo te sabo tǫ sigi piąo po wali. Tama deli deli bidi dabe pelama, te augwa sa muani tǫ selama, tama tede bidali.
JDG 2:7 Te Josua bidibadi te sogo te Israel dabe augwaligo te Genuai Bidiba lotu po wali. Tama nosali te Josua isai madi me te augwaligo Genuai Bidiba lotu po me udali. Augwaligo tama tiwai sę me idubadi, te Genuai Bidigo ebo sę sulama, te Israel dabe tau sali bidi dabe me augwali isai.
JDG 2:8 Josua, te Nungo ogwa, te Genuai Bidigo sę bidi, te agai kibu be 110 bidama, te aga isali.
JDG 2:9 Tialima, augwaligo aga te bulu Timnat Sera tede pubulali. Te bulu te aga bidali madi te Efraimgo bulu te bulu dude, te Gas bulu du te not pedai badu.
JDG 2:10 Te Josua aga deli hani me te augwali isila pali, tama gesi noma we bidi pedelai. Te gesi hani we bidigo te Genuai Bidi konesiąyu, tama agai te Israel dabede yali sę me te munu me konesiąyu gegeda pali.
JDG 2:11 Tialima, te Israel dabe augwaligo te tibo god dabe Balba lotu weyu, tama dwai sę Genuai Bidigo gedude ilali.
JDG 2:12 Augwaligo munu me te Genuai Bidiba lotu me wabe, te augwa wąįgo God dao. Te aga digi augwali sigi pelama, te Isip tǫ augwaligo taga soai dao. Megi da, te augwaligo te bulude bidalubo bidi dabego haniani tibo godiba lotu wali. Te Israel dabe augwaligo te tibo godiba kidu sugunama, lotu obaso, tama Genuai Bidigo te tiwai sębę sali.
JDG 2:13 Augwaligo munu me te Genuai Bidiba lotu po me wabeo. Augwaligo lotu te Bal, me te tibo god we dabe Astarte teba lotu wali.
JDG 2:14 Tama Genuai Bidigo sębę eyu, tama dwai homu mu elama, tama agai te hwįbo boi bidi dabe me, te nai wi sabo bidi me te aselama, te Israel dabe dali hwįagasomainu ilali, tama augwaligo doado bage dabe me wi sagasomainu yali. Tama Genuai Bidigo te bidalubo boi bidi dabego te augwali aiyaba elalumainu ilali. Tama te Israel dabe augwali bomo elama, dolalu hwįaiyu ebo usu me isiąwai dao.
JDG 2:15 Tigidali sogo augwali hwįgi pali, te augwali tulalumainu eyu, te Genuai Bidigo augwali munu me augwali dwasianu tau me sabe, te agai augwali dali po dau wali gilama tama tiali. Tama te Israel dabe augwali dwai mu bidali.
JDG 2:16 Megi da, Genuai Bidigo te Israel dabebolo te bomo yai tobolu bidi meba mani. Te tobolu bidi dabego te Israel dabe tau selama, tama te hwįbo boi bidi dabe, me te doado bage wi sagasobo bidi dabego nogode ma dobola sali.
JDG 2:17 Tiali goli, te we bidi augwaligo te tobolu bidi dabego po me odobe. Augwaligo te Genuai Bidi tudiba munama, tama augwaligo te tibo godiba lotu po me udai, te bidigo aga we tagalama, te penani ebo weba pabo tiwai yali. Te augwa wąį dabe augwaligo te Godigo po wali pai, tiali goli te hani wai dabe polo hasegelama, tama augwaligo te tiwai kolesaga me ebeo.
JDG 2:18 Tigidali sogo Genuai Bidigo te Israel dabego tobolu bidi me deli sa muani, te agai tonalua pidubadi, te aga isiboba usu niyu yali. Tama te tobolu bidi dabego te Israel dabe tau siyu, te boi bidi dabe aiyaba elaluali. Genuai Bidigo te augwali homu dene eyu, tau sali, magi baso meni, augwali te augwa yali sęde dene me sęgę te boi bidigo nogode siyu, gela weyu yali.
JDG 2:19 Tiali goli, te tobolu bidi isibode, te we bidi augwaligo te augwa poloba yali kolesagaba ma begasa peyu yali. Tama augwaligo dwai kolesagago te augwa wąį polasa pali bidi dabego yali kolesaga te aiyaba elaluali. Augwaligo te gasa tibo god wali peyu, tama teba lotu wali. Augwaligo te bomo mu eyu, te augwa ebo dwai kolesaga wali mu pali. Augwa dwai sę tagalabo homu ebeo, tede hagela homu naga yali.
JDG 2:20 Tama tibaso, Genuai Bidigo te dwai sębę mu te Israel dabe dali eyu, tama wado yali, tama agai te po wali, “Te we bidi augwaligo te augwa wąį dabebolo wali pao wali te dau wali po bolali. Te augwaligo eno po wali me pisąbaso,
JDG 2:21 tama eno te bidalubo boi bidi dabe pomainu me gudulugobeo, te Josua isai madi tiali.
JDG 2:22 Tama eno te boi bidigo te Israel dabe usu siyu, tama eno augwali suainogo te augwaligo eno po wali pabo te augwa wąį dabego yali kolesaga tiwai ebowe naga suainogo tiaibao,” wali.
JDG 2:23 Tama Genuai Bidigo te Kenan hani bidi dabe bidalumainu yai dao. Te agai augwali polo asesa me gudulubeo. Tama agai augwali te Josuago nogoba mu mabeo.
JDG 3:1 Genuai Bidigo te Israel hani tomode te gasa we bidi hani meba te Israel we bidi dabe tomode bidimainogo tagalali, te Kenan tǫde, magi baso meni, agai homugo te Kenan dabe dali moni boi hwįani sogo te boi hwįsiąwani Israel bage te augwaligo bomo te sogo usu sela suainu, te Genuai Bidigo tama tiali.
JDG 3:2 Genuai Bidigo tama tiwai kolesaga yali, te gesi hani Israel dabe deli deli te wąbi hwįbo kolesaga ola mayu tama tiali.
JDG 3:3 Te e tama hani we bidi, te Godigo augwali bidimainu yali: te Filistia dabe a naga hanu, tama tigidali hanu te Kenan dabego me, te Saidon me, te Hivi dabego me, te bulu du Lebanonde bidali, tama te bulu du Balhermon te pelama, te Hamat Sunumi tulu mage si teba usu nigi pali.
JDG 3:4 Genuai Bidigo te hani dabe augwali bidalumainu elama, te Israel dabe dali te hwįbo usu somainu yali, te augwaligo agai bomai po wali pabowe naga koneainu yalio. Te bomai po dabe te Godigo te augwa wąį dabebolo mani, te Mosesgo nogode mawai dao.
JDG 3:5 Tama te Israel dabe augwali te Kenan dabe, me te Peres dabe, me te Hit dabe, me te Amor dabe, me te Hivi dabe, me te Jebus dabe, te tama hani tomode te Israel dabe bidaluai.
JDG 3:6 Tama te Israel dabe augwaligo te hani dali we si elama bidiyu, tama augwaligo tibo godiba lotu weyu yali.
JDG 3:7 Te Israel dabego te augwa Genuai Bidi, te God te augwaligo homugo konesiąyu gegeda palali. Augwaligo dwai sę eyu, tama augwaligo te god Bal dali, te god we Astarte, te god dabe siba lotu wali.
JDG 3:8 Tama Genuai Bidigo te Israel dabe dali wado po olama, tama agai te gavman tuni bidi Kusan Risataim te Mesopotemia bulu bidi asomainu elama, te augwali aiyaba elaluali. Te Israel dabe augwali te gavman tuni bidi Kusan Risataim tego bomo dologode bididubadi, te kibu be a naga olama, me badu sela bidai.
JDG 3:9 Tama te Israel dabe augwaligo Genuai Bidiba gela obaso, tama Genuai Bidigo te bidi me deli sa munama, te augwali te gavman tuni bidigo bomo dologode bidibo tagalumainu yali. Te bidi aga te Otniel aga te hwįbo madiba pelama, tama Genuai Bidigo te bidigo te Mesopotemia gavman tuni bidi aiyaba elalumainu ilali.
JDG 3:10 Tama Genuai Bidigo Mobo Bidi te Otnielba asama, tama aga te Israel dabego tobolu bidi pedelali. Tama Otnielgo te Mesopotemia gavman tuni bidi dali hwįgi pelama, tama Genuai Bidigo aga tau selama, tama agai augwali aiyaba elaluali.
JDG 3:11 Nosali te bulu bidi hani dali me boi hwįsiąbadi, te kibu be bidi sese si bidali. Tama Kalep aga ama Kenas aga ogwa Otniel, te aga isali.
JDG 3:12 Te Israel dabe augwaligo dwai sę Genuai Bidi dali ma yali. Tama tibaso, Genuai Bidigo te genuai bomo te Moap gavman tuni bidi Eklonbolo menama, tama agai te Israel dabe aiyaba elaluali.
JDG 3:13 Te gavman tuni bidi Eklongo te Amor dabe me te Amalek dabe dali selama, tama augwaligo te Israel dabe aiyaba elaluama, tama te hanu nogi Ni Pam te nogi poali hanu me sali.
JDG 3:14 Tama te Israel dabe te gavman tuni bidi Eklongo bomo dologode bidiyu, tama augwali agade te kalabus sę idubadi, te kibu be 18 tama kibu be bidai.
JDG 3:15 Tialima, te Israel dabe augwaligo Genuai Bidiba gela obaso, tama agai bidi me deli augwali te boi bidigo nogode bidibo tagalumainu sa muani. Te bidi aga nogi te Ehut, aga te pobase nogo yai bidi, tama te Benjamingo hanide te Gerago ogwa dao. Tama te Israel dabego te gavman tuni bidi Eklon te wiegi yai homu ilibo nai tolali, te Moap gavman bidi bidai, tama te nai te Ehutgo sela pali.
JDG 3:16 Ehutgo te aga hwą ge bainat te tedali nigali. Te hwą ge poai te si badu elaluali, tama te bobage gana elaluali te hap mita. Tama agai te hwą ge te aga dolo nogo badu te aga sągąde dąų olama, te gudali ugwa dologode geme dualali.
JDG 3:17 Tialima, agai te wiegi yai homu ilibo doado bage te gavman tuni bidi Eklonbolo magi peyu pali. Eklon te moni genuai tigi ili yai bidi mu bidai.
JDG 3:18 Ehutgo te agai sela pali doado bage te Eklonbolo menama, tama aga dali te doado bage sela asali bidi dabe te augwali pai.
JDG 3:19 Augwali palima, te masigi togolama sabo bulu te Gilgal pąba sabolali, tama Ehut te agaduba ma gelama, tama te bulu Moapba ma sabolali. Agai te gavman tuni bidi Eklon suainu eyu, tama agabolo te po ola tolali, “Tuni bidi, eno po te nage deli dali naga wainogo asalio,” wali. Tama te tuni bidigo aga sę ebo bidi dabebolo te po wali, “Dage piąo,” wali. “Denaduba si naga bidaibao,” wali. Tialima, tigidali sę bidi dabe sese buluba sola silali.
JDG 3:20 Te gavman tuni bidi agaduba deli te kedau asobo be habu te ugwadu daide dulaludali, Ehut agaba asama te po wali, “Eno te nago po te Godidu asali po me deli te nage dali wabo po elalubao,” wali. Te gavman tuni bidi dolugulali,
JDG 3:21 tama Ehutgo te bainat hwą te pobase nogogo selama, tama te hwą ge te tuni bidigo tabide elali madi te hwą ge te tabi tomoba bula sigi pali.
JDG 3:22 Ehutgo te bainat hwą te tuni bidigo tabide dįą sabeo. Tama te hwą poai yali me te hwą ge sigi me te tigidali mu tomoba bula sigi pali. Tama te tabi iligo te hwą ge mesega sali, tama te bainat poai yali te tudi badu pedaligi soali.
JDG 3:23 Ehutgo te be sunumi paliama, dąų walama, tama te gasa sunumidu buluba teda soali, tama aga palio.
JDG 3:24 Te sę bidi dabe aselama suali, te be sunumi palialubo suali, tama augwaligo te homu yali, “Te gavman tuni bidi te di beba pali da,” te homu yalio.
JDG 3:25 Augwaligo sesabi gana elama tonaluali goli, agai te be sunumi dabo sube. Tama augwaligo ki selama, te be sunumi dalama, tama augwaligo suali, te augwa genuai bidi isama, tama te be degedude pila mubo suali.
JDG 3:26 Te sę bidi dabego homu hauwa eyu tonalu dali sogo, te Ehut aga wi soai. Aga palima, te masigi togobo pesage dabe te edelama, tama wi peyu, te bulu me nogi Seira teba geme wi duala sigi pai.
JDG 3:27 Nosali aga te Israel dabego tǫba pedelama, tama agai Efraimgo bidali bulu duba sabolama, te bu wabo nai biugel bu olama, te Israel bidi i olama, te hwįagasao wai. Tama augwali nosali asobadi aga polasa peyu, tama augwali te bulu duba dabe aiyaba dulali.
JDG 3:28 Ehutgo te Israel dabebolo wali, “Dage ena wali asiąo! Genuai Bidigo duga boi bidi, te Moap dabe, te dagego nogoba manio. Te dagego augwali aiyaba elaluaibao,” wali. Tialima, augwaligo te Ehut wali palima, tama augwaligo te Moap dabe soabo sunumi geą sigi pali, te Moap dabe augwali te wę Jordan nogeidali weyu tama tiali. Tama me deli te wę nogelama te me soabeo. Mu menio.
JDG 3:29 Te sogode te Israel dabe augwaligo te Moap dabego bomai ami bidi dabe te bidi sese umabo bidi, te 10,000 bidi ela muani. Te deli munu me wi pabeo.
JDG 3:30 Tama te Israel dabego te sogo te Moap dabe aiyaba elaluai. Tama te tǫde te boi me hwįsiąbadi, te kibu be bidi sese me si me si, te 80 yia bidai.
JDG 3:31 Te Ehut tudi badu te gasa tobolu bidi me pedelali, te aga nogi Samgar da, te Anatgo ogwa dao. Agai te bidi sese bidi hauwa elali, te e tama bidi, 600 te Filistia bidi dabe te dwasianu te kibu bulmakau tonalubo ene sesemonego te bidi dabe ela silali. Tama te Israel dabe tau siyu, agai tama tiai dao.
JDG 4:1 Ehut isai madi tama Israel dabego te Genuai Bidi Godigo gedude dwai sę ma ilali.
JDG 4:2 Tama tibaso, Genuai Bidigo te Kenan gavman tuni bidi Jabingo te augwali aiyaba elalumainu ilali. Te tuni bidigo te Hasor hanu tonaluali. Tama aga sę tonalubo te polalubo bidi Sisera te aga ami bidi dabego ofisa bidi dao. Aga te bulu Hasoret Hagoim tede bidali.
JDG 4:3 Jabin agai hwįbo nai te bidi sese hauwa 900 te karis ain elaluai. Tama agai te Israel dabe dodolama mu tolaluali, tama augwali subigila eliyu, tama doliyu idubadi, te kibu be bidi sese deli bidai. Tama te Israel dabe augwali tau somainu te Genuai Bidiba gela wali.
JDG 4:4 Te sogo te nosali pedelabo sę po pusali profet we me deli bidai, te we nogi Debora. Te bidi me deligo we, te bidi aga nogi Lapidot. Te sogo te we Deborago te Godigo homude mabo kolesaga te po te Israel dabebolo ola mawai.
JDG 4:5 Aga te ni me deli te ni pam dologode dulalu bidibadi, tama te Israel dabe agaba aselama, tama agai augwaligo po tų dodolomainu eyu, augwaligo agai po odagasiyu yali. Te ni te bulu Rama me Betel te Efraimgo bulu du tomode elaluali.
JDG 4:6 Tama Deborago po te Barakba ola tolali, te Abinoamgo ogwa da, te Naptali hanigo hanu Kedes te badu bidali. Tama Deborago agabolo te tiwai po wali, “God, te dago Genuai Bidigo, nagebolo te po wainogo yali: ‘Nage pelama, te Naptaligo hanide, me Sebulungo hanide te bidi sese umabo bidi e tama bidi, te 10,000 bidi dabe sigi pelama, tama augwali te bulu du Tabor teba sisinao,’ wali.
JDG 4:7 ‘Te eno te gavman tuni bidi Jabingo sę ebo polalubo ofisa bidi Sisera, te aga ami bidi dabe dali odasa asiyu, te nage dali te wę Kisonba hwįgulaibao,’ wali. ‘Aga te aga karis dabe me te aga ami bidi dabe dali asaibao,’ wali, ‘tiali goli tagalao, te eno augwali te dagego nogoba mawaibao,’ Genuai Bidigo te po wali.” Deborago te po te bidi Barakbolo pusali.
JDG 4:8 Tama Barakgo Deborabolo te po wali, “Te nage ena dali asobaso da, te ena paibao. Tiali goli te nage asisąbaso da, te ena me pogobeo,” wali.
JDG 4:9 Tama Deborago po wei ponoyu, te tiwai po wali, “Tialima, te ena nage dali pelama, tama nago te wąbi hwįbo bomogo te aiyaba elaluaibao. Tiali goli, te nago naga genuai nogi ugwaba me sogobeo, magi baso meni, Genuai Bidigo te hwįbo tobolu bidi Sisera te we me deligo nogoba mawaibao,” wali. Tialima, Debora hogodama, tama Barak dali te bulu Kedesba pali.
JDG 4:10 Barakgo te Sebulungo hani me, te Naptaligo hani me i olama, tama te Kedes hanuba pali, tama te bidi sese umabo 10,000 bidi te aga wali pai.
JDG 4:11 Tama Debora me te aga dali pali. Te sogo te Kengo hani te bidi me deli Heber, te agai ugwa be te Kedes hanu sesegede sęnama bididuai, te moni ni te Sananim bulu pąde dao. Polobadu Hebergo te Kengo gasa hani tede taga soai, te Hobap aga deli kaneme hani, te Moses aga wąįgo aya dao.
JDG 4:12 Te Siserago te Barak te Tabor bulu duba pali po odobaso,
JDG 4:13 agai te hwįbo nai te bidi umabo te 900 karis ain me, te aga hani bage me asao olama i wali, tama augwali te wę Kison te badu te elalubo hanu te Haroset Hagoim te badu pai.
JDG 4:14 Tama Deborago te Barakbolo te tiwai po wali, “Tegobao! Da pinao. Genuai Bidi te nage pabo badu te polasa pobao. Tama tibaso, te sogo Genuai Bidigo te nage tau selama, tama nago te Sisera aiyaba elalueibao,” te po wai. Tama po obaso, Barakgo te 10,000 bidi hauwa selama, tama augwaligo te Tabor bulu du tagalama, aiyaba dulali.
JDG 4:15 Te Barak aga ami bidi dabe dali pedalubo sogo te augwaligo hwįbo sę hodolali, tialima Genuai Bidigo te Sisera me aga karis dali tigidali badi, te aga ami bidi dabe dali, te augwali wabo pabo bidi dabe tiwai ilama, subigila tedela pali. Tama Siserago te aga karis dabe taga peyu, tama aga wi pali.
JDG 4:16 Barakgo te karis dabe me te ami bidi dabe dali pobeasa pidubadi, te Haroset Hagoim teba tagaligi pali. Tama Barakgo ami bidi dabego te Siserago ami bidi dabe tigidali ela silali. Te deli digi me bidibeo.
JDG 4:17 Sisera wi peyu, te Hebergo we Jaelgo ugwa beba wi duala sigi pali, te Kengo haniba, magi baso meni, Jabin, te Hasor gavman tuni bidi, agai te Hebergo hani dabe dali abagi olama bidali.
JDG 4:18 Tama Jael pelama, Sisera subaso, tama agai Siserabolo te po wai, “Genuai bidi, be tomoba asao,” wali. “Nage eno ugwa be tomoba asao,” wali. “Nage wi me elamuo.” Tama Sisera te ugwa be tomoba pelama, tama Jaelgo aga te ugwa blanket ugwa me deligo geme dologoba dualali.
JDG 4:19 Tama Siserago Jaelbolo te po wai, “Eno dogoni wa palio. Eno homugo te nago wę ena menama tueio,” wali. Tialima, Jaelgo te kibu meme waligo nigai te botol wę dala mani, tama te ame pę elaluali tama agai te Sisera menama tuali. Nosali Jaelgo aga ma dualali.
JDG 4:20 Tama Siserago Jaelbolo te po wali, “Nage te ugwa be sunumide dolaluao,” wali, “tama bidi me deli asama nagebolo hanalu wagasiyu, ‘Te bidi me deli tede bidibowe?’ wagasobaso da, teda nago te po weyu, ‘Menio’ po wao!” Siserago te po wali.
JDG 4:21 Te Siserago tigi hagela gana mu ebaso, tama aga piali te bidi isibo tiwai mu elama mu piai. Tama Jaelgo te hama me deli me te pęwadage ni me deli badi, te ugwa be sesege te tǫde dau wabo ni pin, te ni me selama, tama aga te dua dua digi te Sisera pila mubo madiba pali. Tama agai te ni pin te hamago elama, te bidi Siserago tobolu tomoba enani, tama te ni bulu badu teda solama, te tǫba bida sigi pali. Tama Sisera isali.
JDG 4:22 Tama Barakgo te Sisera gege asali sogo, Jaelgo te aga tiąba pelama, tama aga sulama, tama agabolo te tiwai po wali, “Nage asao!” wali. “Te eno nago te gegebo sę yali bidi te nagebolo eno ola mawaibao,” wali. Tama Barak te we dali te ugwa be tomoba pali. Tama agai suali, te Sisera isama, te tǫde pila mubo suai. Te enani ni te aga tobolude me elaluali.
JDG 4:23 Te sogode Godigo te Israel dabe tau selama, te Kenan gavman tuni bidi Jabin aiyaba elaluali.
JDG 4:24 Tama te Israel dabego te Kenan gavman tuni bidi Jabin dali bomo mu elama hwįnama, te augwaligo aga te tigidali mu dolama mu yalio.
JDG 5:1 Te sogo te we Debora, me Barak, te Abinoamgo ogwa, augwali sigo te tama tęąbi po wai:
JDG 5:2 “Genuai Bidigo nogi ugwaba sao! Te Israel tobolu bidi dabe augwaligo wąbi hwįabo bomo mu yali. Tigidali bidi wiegi yai homu pemene eyu, hwįabo homu yai!”
JDG 5:3 “Odao, dage gavman tuni bidi dabeo! Olo bugagia munama, dage tobolu bidi dabe dao! Te eno tęąbi me deli weyu, tama musik gagali te Genuai Bidiba waibao, te Israel dabe dago God dao!”
JDG 5:4 “Genuai Bidi, nago te Seir bulu du dabe taga solama, te Idomgo bulu taga soyu, tama aiyaba dulai, tialima te tǫ mali eyu, tama te tulubage tulali. Mu tama tiali, te wę dagaludu dulalio.
JDG 5:5 Te bulu du dabe Godigo gedude te mali yali, te Sainai bulu dugo Genuai Bidi, te Godigo gedude, te da Israel dabego Genuai Bidi dao.”
JDG 5:6 “Te Samgar, te Anatgo ogwa bidali sogo me, tama te Jael bidali sogo te bisnis sę ebo bidi dabe te genuai sunumidu me bilibeo. Te iba soyu, obaba soyu ebo bidi dabe, augwali te dwasianu sunumidu naga bilaluali.
JDG 5:7 Debora, te Israel dabego augwa hanu tagalama, tama te hanu olo elaludubadi, te nage pedalubo sogoba usu nagasali. Tama nage te augwali tonalubo ida tiwai yali.
JDG 5:8 Tama te Israel dabego te gesi god wali pabo sogo, te augwaliba boi hwįbo sę pedelali. Te Israel dabego boi hwįbo ami bidi dabe te bidi sese hauwa mu te 40,000 bidi dabe, tiali goli me deligo te boi hwįabo sabele me sesemone me me sela pabeo.
JDG 5:9 Te eno homu kolesaga te Israel dabego ofisago ami bidi dabede elaluali, tama te boi hwįainogo ebo bidi dabe dali elalu yali. Te Genuai Bidigo nogi ugwaba sao!”
JDG 5:10 “Dage te tedela yai donki te sadelde duabo genuai bidi dabe, tama dage te sągągo bilibo olo bidi dabe, dagego te nai po page pusao.
JDG 5:11 Odiąo! Te wę uluba sisinama, te po hauwa miani we bidi hani augwaligo te Genuai Bidigo nogi ugwanu sali po pusao, augwaligo te Israel bidi dabego ugaba ela holali po pusao wali! Tama te Genuai Bidigo we bidi augwaligo te hanu tagalama, tama augwali aiyaba dulai.
JDG 5:12 ‘Nage poligi pao, Debora, nage poligi pao! Nage poligi pao! Nago tęąbi po me deli wao! Tama nage poligi pao! Barak te Abinoamgo ogwa, nage hogodama pao! Nago te naga aiyaba elaluali kalabus bidi dabe sela pao!’”
JDG 5:13 “Tama te boi hwįani wiegi yai bidi dabe augwali te augwa genuai bidi bidibo madiba sisinagasali. Te Genuai Bidigo bidi dabe agaba aselama, tama augwali te boi hwįabo sisi elama bidali.
JDG 5:14 Te Efraim dabe aiyaba dulama, tama te tǫ maluba pali. Augwaligo te Benjamin hani bidi dabe wali pali. Te Makir bidi sibi tobolu bidi dabe te buluba dulali. Tama te Sebulungo hanide ofisa dabe te buluba dulali.
JDG 5:15 Te Isakargo genuai tobolu bidi dabe te Debora dali asali. Megi da, te Isakar me, Barak me asobao wai. Augwaligo te augwali wali peyu, te malu tǫba pali. Tiali goli, te Rubengo hani bidi augwaligo homu si elalu, tama augwali asabo homu me ebeo.
JDG 5:16 Magi baso dage te sipsip dabe dali bidibawe? Te sipsip tonalubo bidi dabego te sipsip hani dabe i wabo odainogo ebawe? Mu tama, te Rubengo bidi hani te si pedali, tama augwali asabo homu me ebeo.
JDG 5:17 Te Gatgo hani bidi te wę Jordan te giliga pedalubo pedai badu bidali. Tiali goli, magi baso te Dango hani te moni geba sipde sę yaliwe? Te Asergo hani te tamu ąį sanede bidai. Augwali te olo tama te augwa te wę sanede bidaluai.
JDG 5:18 Tiali goli, te Sebulungo bidi me, te Naptaligo bidi me te pąde augwali te boi hwįbo pesagede dolainu yali.”
JDG 5:19 “Te Israel isąwai gavman tuni bidi dabe aselama, te Tanakde hwįani, te Megido wę pąde hwįani. Te Kenan tuni bidi dabego Israel dali hwįagasali, tiali goli augwaligo te silva dabe me sela pabeo.
JDG 5:20 Te dagalude hǫ dabego me hwįani. Augwaligo te augwa sunumi ogwade wali biliyu, tama augwaligo Sisera dali hwįani.
JDG 5:21 Te wę Kison me aga bomo elama asiyu, te hwįbo bage augwali tolasa pali. Te węgo asobo te bomo mu yali. Te eno dili mobo selama, tama bomo elama paibao!
JDG 5:22 Tama te bomo yai hos dabe polo wi udulama, augwaligo te tǫba augwa sągągo elali, te be kulu wabo tiwai yali.
JDG 5:23 Te Genuai Bidigo ensel mobo bidigo te po wai, ‘Te Meros hanu dolomainao,’ wali. ‘Tama te hanude bidibo we bidi augwali me dolomainao. Magi basowe, augwaligo te Genuai Bidi tau sainu me asobeo, augwali te Genuai Bidi hwįbode tau sainu asobo ami bidi tiwai me asobeo.’”
JDG 5:24 “Jael, te Hebergo we, te Kengo hanide, te wiegi yai homu pemene emainao. Te agai wiegi yai homu pemene ebogo te gasa te ugwa bede bidalubo we dabego ebo homu pemene te aiyaba elalumainao.
JDG 5:25 Siserago te wę po agabolo hanalu wali, tiali goli Jaelgo ame pę aga mawai. Agai te wiegi yai ame pę te gasagi yai kap me delide sela asali.
JDG 5:26 Agai te ugwa be bobegelainu tǫde bulali ni elalubadi, te selama, me badu nogode tuali, tama dolo nogode te sę bidi dabe hama tola sali. Tama te agai Sisera elalima, tama aga tobolu pedai. Agai te poali ni aga tobolude enanima, tama tigidali peda pali.
JDG 5:27 Te Sisera aga sągą kiduba tulaluali, tama pila muani te Jaelgo sągą pąde. Te megi da, aga te tulaluama tama isalio.”
JDG 5:28 “Te Sisera aga ida dolugulama, te windodu tonaluali, agai gedu te be genagi dili agebeledu munama tonaluali. Tama agai te po wai, ‘Magi baso te Siserago karis te asobewe?’ wali. ‘Magi baso agai hos dabe me polo asobewe?’
JDG 5:29 Te aga dali bidibo kolesaga koneai we me deligo agabolo te po wei ponai, ‘Te ami bidi dabego te e tama tobage tiwai nai dabe dobadu te gegebo sę idubadi bogo,’ homu yali. ‘Te ami bidi dabego we deli ma me si, ma te Siserago sabo wiegi yai ugwa me, tama te kwin au ilibo wiegi yai beligo te kwingo magede au ilabo nai siyu ebadi bogo,’ te homu yali. Tama Siserago idago me te tiwai homu yai.”
JDG 5:31 “Tialima, Genuai Bidi, dago homugo te tama tialigo te nago boi bidi dabe isimainogo yao. Tiali goli, nago abagi dabe da, te ula eyu, tama te giliga nanobo ula tiwai pedalumainu yao,” te Debora dali Barak sigo te tiwai tęąbi po tama wali. Tama te tǫ pedaide te boi munu me hwįsiąbadi, te kibu be bidi sese si 40 yia bidali.
JDG 6:1 Te Israel dabego Genuai Bidigo gedude dwai sę ma yai. Tama agai augwali te Midian dabego aiyaba elalumainu ilama, tama augwali te Midian dabego tonalubadi te kibu be nogo a naga olama, me badu nogo si kibu be bidai.
JDG 6:2 Te Midian dabego bomogo te Israel dabego bomo aiyaba mu elalubaso, tama te Israel dabe te Midian dabede wi ebaso, augwali te masigi dedagede me gasa bulude me te augwali geme duala sigi pela silama, tama te Midian hani bidi dabego augwali gegainu ebo usu meni yani.
JDG 6:3 Tigidali sogo te Israel dabego nai dabe te gide bulama elalubadi, te Midian dabe me, te Amalek dabe dali me, te kemi tǫ bulude bidibo bidi dabe, te giliga pedalubo badu bidi dabe, te tama bidi hani aselama, tama augwaligo te Israel dabe dali boi hwįagasali.
JDG 6:4 Augwali bidabo pesage te tǫ pedai badu nigagaselama, tama gide elalubo nai dabe tigidali dolama, te Gasa tǫ pedai badu te saut teba usu nigi palio. Augwaligo te Israel dabego nai me badu dwasianu tagalama elalumainu me ilibeo. Tama augwaligo te sipsip dabe me, te bulmakau dabe me, te tigidali donki dabe me, te augwaligo tigidali sela pela silalio. Augwaligo te nai dabe te deli me tagalama me elalumainu ebeo.
JDG 6:5 Augwali te augwa bulmakau me te augwa ugwa be dabe dali sela asela wali, te sagado sibi dabe sisinama asobo tiwai elama asali. Te we bidi dabe dali te augwa kibu te kamel dabe me te augwali umabo mu, tama te bidigo nedabo usu meni yani. Augwali aselama, tama te tigidali gi dabe dolagasali,
JDG 6:6 tama te Israel dabego te augwali dali hwįabo bomo meni yani. Tama te Israel dabego te augwa Genuai Bidiba gela weyu, te augwali tau sao wali.
JDG 6:7 Te Midian dabego te Israel dabe augwali dolali sogo, teda te Israel dabego te augwa Genuai Bidiba gela weyu, te augwali tau sao wali.
JDG 6:8 Tama Genuai Bidigo profet me deli te augwaliba tagala palali. Te profetgo Godigo te po sali, te Israel bagego Genuai Bidi dao. Tama agai te po wali, “Eno dage odasa asaligo tama dage te Isipde kalabus sę yali taga soai dao.
JDG 6:9 Eno dage te Isip dabego nogode ma dobola selama tialigo tama e tǫde te bidi dabego dage dali te boi hwįani. Te dage asali sogo, te eno augwali ela gudulai. Tama augwaligo tǫ te eno dagebolo mawai dao.
JDG 6:10 Tama eno dagebolo wali, ‘Ena te God, duga Genuai Bidi da,’ po wai. ‘Dagego te Amor dabego tibo godiba lotu me olamu da,’ po wali. ‘Te bidi dabe augwaligo tǫde dage bidalu, te augwaligo tibo godiba lotu po me wagio,’ po wali. Tiali goli, dagego eno po me odobeo.” Profet bidi me deligo te Genuai Bidigo po wali.
JDG 6:11 Nosali Genuai Bidigo Mobo Bidi ensel asama, tama te moni ni te Ofra bulu pąde te ni dologode bidagasali, te Abiesergo hani bidi Joasgo bulude. Te aga ogwa Gideon, aga te Midian dabede wi ebaso, tama aga te wit agabo masigi me deli te tǫ dedage tiwai elalubo madi tede te geme duala sigi pelama bididuali. Tama agai te wit bo wali sela sąbo sę iduai.
JDG 6:12 Tama Genuai Bidigo Mobo Bidi ensel agaba pedelama, tama te po wai, “Nage te boi hwįabo bomai bidi dao, te Genuai Bidi nage dali bidibao!” Te po wai.
JDG 6:13 Tama Gideongo agabolo te po wali, “Genuai bidi, eno te po me deli nagebolo hanalu obao. Te Genuai Bidi da dali bidibao wida, magi baso te dwai sę dabolo pedelama elalubawe? Tama agai polobadu dago hani tau sali wiegi yai kolesaga, te tobage kolesaga agai te megi ma ebo menio. Magi basowe? Agai te dago wąį dabe te Isipdu sela soali, tama dago aya dedego dabolo te tiwai po pusai. Tiali goli, megi da, Genuai Bidigo da tagalama, tama da te Midian dabego nogode bidibao.” Gideongo te po wali.
JDG 6:14 Tama Genuai Bidigo agabolo te po wali, “Nago bomo tigidali dali te nage pelama, tama nago te Israel dabe te Midian dabego nogode ma dobola sao. Ena digi eno nage tagala palobao,” wali.
JDG 6:15 Tama Gideongo te tiwai po wei ponani, “Tiali goli, Genuai Bidio, te eno Israel dabe mena tama ma dobola sogowe? Eno hanigo bomo menio. Te gasa Manasego hani dabego da aiyaba elaluali. Tama ena da, te ena hanide te olo nai tiwai elalubao,” wali.
JDG 6:16 Tama Genuai Bidigo agabolo te po wai, “Nago ebo usu yaibao, magi baso meni, te eno nage tau saibao. Te nago Midian dabe eliyu, te bidi deli elibo te tiwai yaibao.” Te po wai.
JDG 6:17 Tialima, Gideongo te tiwai po wei ponai, “Te ena nago gedude dwagi yai bidi da omainogo da, nago enabolo te eno koneabo dąį me deli ilibaso, teda eno koneama, te nage Genuai Bidigo digi te ena dali po miani, te eno koneaibao.
JDG 6:18 Tama nage me pigio. Te nai meba eno nagebolo te wiegi yai homu ilama ofa mawaibao,” wali. Tama Mobo Bidi enselgo te po wali, “Te ena nage asobo tonalu bidaibao.”
JDG 6:19 Tama Gideon te aga be tomoba pelama, tama te ogwa bidi tamadi nisai meme me deli elama ulali. Tama agai te plaua meba ulali, te naigo sęgę te 10 kilo, tama yis meni yai. Agai te kibu mi te basket me delide muani, te sup ulali te poude muai. Tama agai te nai te Genuai Bidigo Mobo Bidi ensel te moni ni dologode bidibadi teba magi pali.
JDG 6:20 Tama ensel agabolo te po wali, “Te kibu mi dali te bret me te masigi daiba manao,” wali. “Tama te naiba ugwadu te sup gelao.” Tama Gideongo tama tiwai yali.
JDG 6:21 Tialima, te Genuai Bidigo Mobo Bidi enselgo te dono me deli agai nogogo tolasama, tama agai te dono habu te kibu miba dali te bretba me ugwadu muani. Tama polo te masigide sia bogoli pedelama, tama te kibu mi dali te bret me siago dali. Tama te Mobo Bidi ensel polo palio.
JDG 6:22 Tama Gideongo koneani, agai te Genuai Bidigo Mobo Bidi ensel suali homu elama, tama aga dwai noma mu selama, tama te po wai, “God Genuai Bidi dao! Eno nago Mobo Bidi ensel gesabidi sualio. Megi da magi nai enaba pedelaibawe?”
JDG 6:23 Tiali goli, Genuai Bidigo agabolo te po wai, “Te usu da, nage wi me igio. Te nage me isibeo,” wali.
JDG 6:24 Tama tibaso, Gideongo Genuai Bidigo alta me deli te bulude nigilama, tama agai te alta nogi weyu, “Te Genuai Bidi aga te homu nagame dua ebo bidi da,” wali. Te nigali alta te Abiesergo hani bagego tǫ pedai badu e po asębo sogode me elalubao, augwaligo te bulu nogi Ofra wai dao.
JDG 6:25 Te sogo hulide Genuai Bidigo Gideonbolo te po wai, “Nago te naga ayago bulmakau omai me deli sobadi, tama gasa bulmakau te kibu be 7 yai, te bulmakau me sao. Tama nago te naga ayago te tibo god Balba lotu wainu nigali te alta aluama dolao. Tama te pąde dolaluali, te tibo god we Asera aga noma piksa elalubo pos ni me te gelama, tama isi bagayao,” wali.
JDG 6:26 “Tama nago te Genuai Bidigo alta wiegi yai me deli te dwasianu bulu du daide nigao. Nosali nago te si wali bulmakau selama, tama nago te togali te habu selali ni pos dali te ofa tiwai elama ulao.” Genuai Bidigo te po wai.
JDG 6:27 Tialima Gideongo aga sę ebo bidi nogo si selama, tama augwaligo te Genuai Bidigo wali po selama, te tiwai sę yali. Tiali goli, Gideongo te sę te giligade me ebeo, magi baso meni, aga deli hani sibide wi ebaso, tama me te hanu tomode bidalubo bidi dabede me wi yali. Tama tibaso, agai te sę hulide yai dao.
JDG 6:28 Te kigamu mu te hanude bidaluali we bidi hogodama, tama augwaligo te alta dali te habu selali Asera pos ni dali tede elalubo me subeo. Tama augwaligo suali, te bidi dabego te si wali bulmakau te gesi altade ofa elama ulai sualio.
JDG 6:29 Tama te we bidi dabego augwa hasi tomode digi hanalua bilali, “Dego te sę yaliwe?” Augwaligo hanalua bilama, tama augwaligo bugagia gege bilama, te Gideongo te sę yali suali, te Joasgo ogwago, te sę yai.
JDG 6:30 Tama augwaligo Joasbolo te po wali, “Nago ogwa eba odasa asao, tama dago aga elaibao! Agai te god Balba ofa yali alta dali, te pąde dolaluali te dago god we Asera pos ni me dolalio,” wali.
JDG 6:31 Tiali goli, Joasgo te aga dali wado po wabo bidi dabe augwalibolo te tiwai wai, “Te dage da, dagego te tibo god Bal tau sabo homu elama, tama tiyu dagego te konila po obawe? Mena bidi agai te tibo god Bal tau siyu, te konila po wabo bidi da, te aga te giliga pedalisiąbadi isimainu yaibao. Te Bal te god me deli yai baso da, teda aga digi aga tau somaina,” Joasgo te po wali, “te magi baso meni, te augwaligo te togolama dolali alta te Bal aga nogi elalubo alta dao,” Joasgo te po wali.
JDG 6:32 Te sogo gagalasa, megi e sogo usu nagasu, te Gideongo gesi nogi elaluali Jerubal, magi baso meni, Joasgo tama po wali, “Te Bal aga digi aga tau somainu yao,” wali, “te magi baso wabe, augwaligo te togolama te dolali alta te Bal aga digi nogi elalubo alta dao,” po weyu, agai te tiwai po wai dao.
JDG 6:33 Megi da, te Midian dabe me, te Amalek dabe me, tama te olo kemi tǫ bulude bidibo bidi dabe me, augwali sisinai elaluali. Augwaligo te wę Jordan nogelama, tama te Jesril tǫ malu odogo bulude te osogo bidibo pesage nigilama bidai.
JDG 6:34 Tialima, Genuai Bidigo po wabo Mobo Ogwa Wai te Gideonba dulama, tama Gideongo te nai biugel me deli bu wali, te nai augwaligo te sipsip gąųgo nigai, te Abiesergo hani augwali aga wali asomainu i wali.
JDG 6:35 Agai te po sela pabo bidi dabe te tigidali buluba tagala palama, te Manasego hanibolo wagi pelama, te augwali aga wali asao po wai. Agai te po sela pabo bidi augwali te po te Asergo haniba me tagala palu, te Sebulungo hanibolo me, te Naptaligo haniba me te po sela pali. Te augwali me aselama, tama aga dali sisinama talualio.
JDG 6:36 Tama Gideongo Godiba te po wai, “Nago po weyu, te nago ena bomo mobaso, te Israel dabe tau sagameo po wai.
JDG 6:37 Tialima, eno te kibu sipsipgo tigi nisi meba te tǫba muaibao, te dago te wit haluyu agabo madi te tama tiaibao. Te kigamu te wę segeni naga te sipsip niside elalu, tama te tǫde wę segeni me elalusiąbaso da, teda eno mu koneama, te nago homugo eno te Israel dabe tau somainu te tiwai po nago wali gilama te sę yali te homu yaibao.” Gideongo Godibolo te po wai.
JDG 6:38 Tama te naide te tiwai sę pedelali. Tama Gideon te kigamu digi mu hodaluama, tama agai te sipsip niside elaluali ąį segeni sela sąwani. Tama te węgo te dwasianu pou me deli pągąwai.
JDG 6:39 Nosali Gideongo Godibolo te po ma wai, “Genuai Bidi, nago ena dali wado po wabo homu me elamuo, eno deli sogo digi ma po miabo homu ebao. Eno homugo nago enabolo te sipsip nisi deli sogo ma usu somainu yabo po eno nage dali omainu yao. Eno homugo te sipsip niside ąį segeni ebo te niside elalugobeo, tama te tǫde naga te ąį segeni elalumainu homu yai.” Te po wai.
JDG 6:40 Tialima, te sogo hulide Godigo te tama tiwai naga ilali. Te sipsip niside te ąį segeni elalubeo, tiali goli te tǫde da, te ąį segeni elaluali.
JDG 7:1 Tialima Jerubal, te tiwai te Gideon nogi, te aga bidi dabe dali tigidali augwali te kigamu digi mu hodaluama, tama augwaligo augwa osogo bidabo pesage te wę ulu Harot sesegede nigai. Tama te Midian dabego osogo bidibo pesage te Morego bulu du aiyadu pąde elaluali. Te Jerubalgo bidibo pesage pąde elaluai, tama aga hani meba te not badu bidai.
JDG 7:2 Tama Genuai Bidigo Gideonbolo te po wai, “Eno dage tau selama, te Midian dabe dali hwįnama, te augwali aiyaba elaluabo homu yali, tiali goli te bidi hauwa mu nage dali bidibao. Te augwaligo homu te tiwai idali, ‘Dago te Midian dabe aiyaba elaluali te dena bomode naga te tiali!’ te homu yaibao. Tama augwaligo homugo te eno augwali tau sali te homu me egobeo.
JDG 7:3 Tama nago te bidi dabebolo te po olama, ‘Te mena wi ebo bidi te aga te Gilboa bulu dude bidibo tagalama, tama augwa bidibo buluba ma geasa piąo!’ te po wao,” wali. Tialima, Gideongo te tiwai po olama, tama te bidi sese umabo mu, te 22,000 bidi te augwa buluba ma geasa pali. Tama te me badu nogo si hani bidi hauwa te 10,000 bidi naga bidali.
JDG 7:4 Nosali Genuai Bidigo Gideonbolo te po wali, “Te bidi dabe hauwa mu elalubao. Te augwali te ąįba aiyaba sela dulama, tama te bidi dabe dobolama wasilibo sę ebode te nage eno tau saibao. Te eno te tiwai po nagebolo weyu, ‘Te bidi da, te nage dali paiba,’ obaso da, teda aga paibao. Te eno te tiwai po me nagebolo weyu, ‘Te bidi nage dali me pigio,’ po obaso da, teda aga me pogobeo,” wali.
JDG 7:5 Tialima, Gideongo te bidi dabe te ąįba aiya selasa dulali. Tama Genuai Bidigo te po agabolo wai, “Nago te tigidali bidi te hani si nigilama wasilao. Te bidi dabego te wę tubadi te wę meba nogogo siyu, tama yowigo hamenago ąį tubo tiwai gilama ebo bidi, te augwali gasa me badu tedali muao. Tama te kidu sugunama, ąį tubo bidi tigidali, te gasaba me muao,” te po wai.
JDG 7:6 Tialima, te 300 bidigo naga te yowi hamenago wę tubo tiwai yali, tama gasa me badu bidi dabe tigidaligo te kidu sugunama, wę tuai.
JDG 7:7 Tama Genuai Bidigo Gideonbolo te po wali, “Te hamenago ąį tuali te 300 bidi dabego nogode te nage eno tau selama, tama dagego te Midian dabe aiyaba elaluaibao. Tama te gasa bidi dabe tigidali te augwa buluba ma geasa pao po wao.” Genuai Bidigo te po wai.
JDG 7:8 Tialima, Gideongo te tigidali Israel bidi te augwa buluba ma geasa pomainu tagala palu, tiali goli hasia agai te augwaligo te tǫgo nigali sospen sene me te augwaligo bu wabo nai biugel te tigidali sali. Tama tialima, te 300 bidi naga bidaluali. Tama te Midian dabe bidali pesage tǫ te tǫ malu aiyadu odogode elaluai.
JDG 7:9 Te sogo hulide Genuai Bidigo Gideonbolo te po wali, “Dage hogodama, tama te augwali bidibo pesageba dulama hwįgulao,” po wai. “Te eno dage tau selama, te Midian bidi hani dabe aiyaba elalumainu yaibao.
JDG 7:10 Tama nago te boi hwįgulabo wi ebaso da, teda hasia nago te naga sę bidi Pura selama, tama dage si te Midian dabe bidalubo pesageba dulao,” wali.
JDG 7:11 “Te nago augwaligo mibo po odama, tama nago augwali dali boi hwįabo bomo te sogode saibao.” Genuai Bidigo te po wai. Tialima, Gideon dali te aga sę ebo bidi Pura te augwali si te boi bidi dabe bidalubo pesage sesege badu pali.
JDG 7:12 Te Midian dabe me te Amalek dabe me, tama te kemi tǫ masigi wa pai bulude bidalubo bidi hani me, augwali te tǫ malu bulude te genuai kuli mano hani tiwai te bulu odogode bidada pai. Tama augwali te boi hwįbo tau sabo kibu kamel dabe te hauwa umabo me te ąį sanede ebo masigi kemi tiwai elaluali.
JDG 7:13 Te Gideon pedalubo sogo, agai odali, te bidi me deligo te aga abagi me delibolo te aga na yali po pusubo te agai odali. Te bidigo te po wali, “Eno e tiwai na yai. Eno te bret me deli suali, augwaligo te baligo nigai, tama te da bidalubo pesage tomoba bebegeli asama, tama te ugwa beba elagasali. Tama te ugwa be gea palama, tama tǫba degelama, tama tǫde dolo pila muanio,” wali.
JDG 7:14 Tialima, aga abagigo po wei ponoyu, te tiwai po wali, “Te gasa sę me ebeo. Menio! Te Gideongo bainat me deli dao! Te tama dao! Godigo te Gideon tau selama, tama agai da Midian dabe me, te dago ami bidi dabe dali, te tigidali aiyaba elaluaibao,” wali.
JDG 7:15 Tama Gideongo te na yali po page pusubo odali sogo, aga te kidu sugunama, tama Godiba lotu wali. Tama aga te Israel dabe bidalubo pesageba ma sabolama, tama i wali, “Hodaluao! Da pinao! Megi da, te Genuai Bidigo da tau selama, tama dago te Midian ami bidi dabe aiyaba elaluabo te usu yaibao.” Te po wai.
JDG 7:16 Tama Gideongo te 300 bidi dabe te hani sela nigilama wasilali. Tama agai te biugel me, te genagi dagede te ula ilibo ni kaneme elalubo te sospen sene tomode elalubo te selama, tama augwali deli delibolo te nai dabe mena mena pali.
JDG 7:17 Tama agai augwalibolo tama po wali, “Dagego tonalu, tama enaba sulama tonao. Te ena te boi bidi dabe bidalubo pesageba sabalubo sogo, te eno mena sę me ebo si da, teda dagego me te sę yao.
JDG 7:18 Tama eno te ena hani dali te biugel bu wabo si da, dagego me te boi bidi dabe bidalubo pesage tigidali badu bobegela selama, te biugel bu ola pelayu, tama te tiwai i waiąo, ‘Da te Genuai Bidigo hani dao! Da te Gideongo hani bidi dao,’ te po waiąo,” te po wali.
JDG 7:19 Tama Gideon dali, te aga dali pali bidi dabe te bidi sese a naga 100 bidi augwali pelama, te boi bidi dabe bidalubo pesage sesegeba sabolali. Te be mu hulia sai pąde tama te sogo te Midian dabego hulide tonalubo ami bidi dabe te hasegelai digi dao. Tialima, Gideon me te bidi dabe badi augwaligo te augwa te biugel bu ola peyu, tama augwaligo te todolaluali tǫgo nigali sospen sene alulu palio.
JDG 7:20 Augwali te sela hanigo te biugel bu ola peyu, tama te tǫgo nigai sospen sene aluali. Tama augwaligo te genagi dagede ula ilibo nai te pobase nogo badu tulama, te biugel te dolo nogo badu tolasa tama augwaligo i weyu, te tiwai wali, “Te Genuai Bidigo bainat me te Gideongo bainat me dao!”
JDG 7:21 Tigidali bidi dolugulama, tama te boi bidi Midian dabe bidalubo pesage bobegela sali. Tama te Midian dabego ami bidi dabego te i olala pelama, tama wi palio.
JDG 7:22 Tama te 300 bidi dabego te biugel bu wabo te sogo, Genuai Bidigo te Midian dabe esela pabo bidi tiwai ilama, tama augwa abagi dabe ma te bainatgo elali. Tama augwali wi peyu, te Betsita te Serera tǫ pedai badu palio. Tama augwali wi pelama, usu nigi pali bulu te Tabat pąde, te Abel Mehola buluba wi pai.
JDG 7:23 Gideon dali, aga ami bidi ofisa dabe dali, augwaligo te Naptali hani, me Aser hani, me te tigidali Manasego hani badi, te augwali aselama, te Midian dabe pobeasa bilagasao po olama i walio.
JDG 7:24 Tama Gideongo te bidi dabe augwali tigidali te Efraimgo bulu dude elalubo buluba pomainu tagala palu te po wai, “Dage aiyaba dulama, tama te Midian dabe dali hwįgi pao,” wali. “Dagego te wę Jordan me te dwasianu ąį te Betbara tede elalubo ąį dabe, te bugagia tonaluao. Tiyu, augwali te ąį nogelama u badu pabuo,” wali. Tama te Efraim bidi dabe augwali deliba sisinama, tama Gideongo po wali gilama tama yali.
JDG 7:25 Tama augwaligo te Midian dabego tobolu bidi si pageabi elama tuali, te bidi si nogi Orep me Sep. Tama augwaligo te Orep ela muani, te Orep aga nogi elalubo moni masigide elali, tama Sep augwaligo te wain haluama agabo madi te pesagede elama, te nogi augwaligo nogi eyu, te Sepgo wain elalubo pesage dao po wali. Tama augwaligo te Midian dabe pobeasa pabo sę idubadi geanio. Gideon te Jordan pabo pedai badu bidali, tama augwaligo te tobolu bidi si te Orep me Sep, te augwali sigo tobolu selama, tama te Gideon aga bidibo madi sela asai.
JDG 8:1 Te Efraim hani bidi dabego te Gideonbolo te tiwai po wali, “Te nago te Midian dabe dali hwįani sogo te nago da i wabe, te magi baso yaliwe? Magi baso nago dabolo te tiwai sę yaliwe?” Tama augwaligo agabolo dwai homu mu elama, wado po wai.
JDG 8:2 Tiali goli, Gideongo te po augwalibolo wai, “Te dagego yali sę te genuai sę mu yalio. Te eno yali sę te olo sę tama yali. Te dwasianu sę dage Efraim dabego yali sęgo te dago yali sę tigidali te aiyaba elalualio.
JDG 8:3 Godigo dagebolo te Midian dabego tobolu bidi si mani, te Orep me Sep. Te eno yabo usu isąbo sę te dagego yali.” Gideongo te po obaso, tama te Efraim hani dabego te wado po ma wabeo.
JDG 8:4 Gideon dali, te aga ami 300 bidi dabe dali, aga te Jordan pabo ąįba sabolama, tama augwali te ąį ugaba nogali. Augwali bomonama bilali, tigi bomo kimi isiyu, tama nasi yali, tiali goli augwaligo te boi bidi dabe pobeasa bilidubadi gebo sę yalio.
JDG 8:5 Tama Gideongo te Sukot hanude bidalubo bidi dabebolo hanalu te tiwai po wai, “Te eno ami bidi dabebolo te dagego bret meba maiąo. Augwali te bomo kimi isiyu, tama nasi ebao. Tama eno te Midian dabego king bidi si te Seba me Salmuna te augwali si pobeasa bilibo sę idubadi gebao,” Gideongo te po wai.
JDG 8:6 Tiali goli, te Sukot hanude bidali genuai bidi dabego te po wai, “Magi baso te dago nago ami bidi dabe nai momainogowe? Dagego te tuni bidi si Seba me Salmuna te bidi me pageabi elama nogo tubeo.”
JDG 8:7 Tama tibaso, Gideongo te po weyu, “Wiegi yai da!” wali. “Te Genuai Bidigo te Salmuna me Seba te ena nogoba mabo si da, te eno dagego tigi walide te masigi kemi tǫ wa pai bulude te sesani yai elalubo bonogo te dage tigi tologa pomainu elaibao,” wai.
JDG 8:8 Tialima, Gideon mu pelama, tama te bulu Penuelba sabolama, tama agai te bulu bidi dabebolo me te nai meba mao wabo po hanalu wali. Tiali goli, te Penuel bidi dabego po wei ponoyu, te Sukot bidi dabego wali po tiwai naga walio.
JDG 8:9 Tama Gideongo augwalibolo te po wali, “Te ena ma bega asiyu da, tama eno te dagego te boi bidi asobo tonaluabo bobobage be taua te pepedama dolaibao!” po wali.
JDG 8:10 Tama te Seba me, Salmuna me, te augwali sigo ami bidi dabe dali, augwali te bulu Karkorde bidaluali. Te bidi sese hauwa me badu te pąde 15,000 ami bidi dabe naga bidali, magi baso meni, te Israel dabe augwaligo te bidi sese hauwa umabo te 120,000 ami bidi dabe te elali.
JDG 8:11 Tama Gideon te masigi kemi tǫ wa pai bulu sesege badu sunumi wali pali. Te sunumi te giliga pedalubo badu te Noba me Jokbeha te tǫ pedai si badu elaluali. Tama polo tama mu Gideon teba sabolama, te wąbi hwįbo hodolali, tama te Midian dabego ami bidi dabe te dwai noma mu selama, midigi sai.
JDG 8:12 Tama te Midian king bidi si, Seba me Salmuna, augwali si wi pai. Tiali goli, Gideongo augwali si pobeasa pelama, tama augwali si pageabi elama, nogo tuai. Agai te augwali sigo ami bidi tigidali dwai noma selibaso, tama augwali wi mu pai.
JDG 8:13 Tialima, Gideon aga te hwįani pesage tagalama, tama te sunumidu wali peyu, te Heres buluba ugwa holali.
JDG 8:14 Te aga pobadi, te sogo agai te Sukot hanude bidibo gesi ogwa bidi me deli asobo sulama, tama aga nogo tolasa, tama agabolo hanalu te Sukot hanude bidibo tobolu bidi te de dawe wali. Tialima, te ogwa bidigo te bidi te 77 tobolu bidi dabe nogi asęnama, te Gideonbolo mani.
JDG 8:15 Nosali Gideon te Sukot hanu bidi dabe bidibo madiba sabolama, te tama po wali, “Dagego te sogo homu kone palu, tama dagego ena gisugu mayu, tama dagego te po wali, dagego te eno ami bidi dabe te bomo kimi meni eyu nasi ebadi, te dagego augwaligo nai me magobe po wali, magi baso ebe, eno te king bidi si te Seba me Salmuna te bidi si nogo tulama sisąbaso te tama tiali. Tiali goli, megi da, suiąo. Te augwali si e bidibao!” Gideongo tama po wali.
JDG 8:16 Tialima, agai te masigi kemi tǫ bulude elalubo te sesane elalubo bono selama, tama agai te sesane yai bonogo te Sukot hanude bidali tobolu bidi te elibo umabo sę mu yali.
JDG 8:17 Tama agai te Penuelde elaluali bobobage be taua aluama, dolama, tama te hanude bidali bidi dabe ela muai.
JDG 8:18 Nosali Gideongo te Seba de Salmuna sibolo te tiwai po hanalu wali, “Te Tabor bulude, te dage sigo ela muani bidi dabe, te augwaligo gesabidi te mena tiwai yaliwe?” Tama augwali sigo te tiwai po wei ponai, “Te augwaligo gesabidi te nago gesabidi naga tiwai. Augwali tigidali te king bidi deligo wai dabe tiwai dao,” wali.
JDG 8:19 Tama Gideongo te po wali, “Augwali te eno ama dede mu dao. Augwali te eno idago wai dabe mu dao. Te dagalu bidigo nogide mu po tama obao, te dagego augwali me ela mugi menigi sogo da, teda eno dage megi dage me eligi menigi dao.”
JDG 8:20 Tialima, te Gideongo aga gomunai ogwa, te Jeterbolo, wali, “Ae, te nago augwali si ela muao,” wali. Tiali goli, te ogwa agai te bainat hwą sisąwani, te magi baso ebe, aga te genuai bidi nigisiąbadi, tama tibaso aga wi yali.
JDG 8:21 Tiali goli, Seba de Salmuna sigo te po wai, “Tagalao! Naga digi nago da si ela muao,” wai. “Nage bidi mu da wida, teda nago tama tiao,” wali. Tialima, Gideongo te Seba de Salmuna si ela munama, tama agai te augwali sigo kamel magede au elaluali doado bage dabe sali.
JDG 8:22 Tama te Israel bidi dabego Gideonbolo te tama po wai, “Dago homugo te nage dago tobolu bidi bidimainu homu ebao. Tama nago wai dabe me, te nago waigo wai dabe te nago wąį dabe me, te nosali augwali dago tobolu bidi dabe bidimainu yaibao, magi baso meni, nago da tau selama, tama da te Midian dabego nogode bidali te ma dobola salio,” augwaligo te po wali.
JDG 8:23 Tiali goli, Gideongo te po wali, “Ena te dagego tobolu bidi me bidigobeo. Tama eno wai dabe me te dagego tobolu bidi me bidigobeo. Genuai Bidi naga te dagego tobolu bidi bidaibao,” wali.
JDG 8:24 Tiali goli, Gideongo po wadolama weyu, te tiwai po wai, “Eno dagebolo te nai me deli po hanalu obao. Dage tigidali deli deligo te dagego hwįyu, te boi bidi dabego olode mubo nai ring te sali enabolo maiąo,” wali. Te Midian dabe augwali te Ismaelgo hani tama tiyu, augwaligo te ring gol te augwa olode munama walai.
JDG 8:25 Tama augwaligo te tama po wali, “Te usu da, te dago nage mawaibao.” Tama augwaligo te ugwa pedai me deli te tǫba munama, tama tigidali deli deli bidi dabego te augwaligo sali ring te muani ugwa daiba mugi peyu yalio.
JDG 8:26 Te augwaligo te sisinani te ring gol dabego sęgę te 25 kilogram tama. Te sęgę te ring gol dabego sęgę naga tama. Te gasa au dobage dabego sęgę, te beli me te Midian king dabego muani te mama gudubo ugwa me, te kamel dabego magede au ilali au dobage dabe, te doado bage te ring dali taluama me nedebeo.
JDG 8:27 Tialima, Gideongo te tibo god me deli te golgo nigilama, tama agai te aga hanu Ofra teba muani. Tama tigidali Israel dabego te God tagalama, tama augwali te hanu Ofraba pelama, te nigali tibo godiba lotu wagi pali. Te tibo god te Gideongo nigali, te naigo te Gideon dali, te aga hani sibi we wai dabe dali, te mu kone tua pali.
JDG 8:28 Te Israel dabego te Midian dabe aiyaba elaluama, tama te Midian dabego magi sę me deli yabo bomo meni yani. Tama te Gideon bidali sogo te tǫde wąbi munu me hwįsiąbadi, te kibu be bidi sese si 40 yia bidai dao.
JDG 8:29 Megi da, Gideon te aga beba pelama bidigi pali.
JDG 8:30 Agai ogwa dabe te bidi sese sela olama, te gasa nogo si te 70 tama elaluali, magi baso meni, te agai we hauwa elaluai.
JDG 8:31 Gideongo we me deli te bulu Sekemde bidali. Tama te wego te ogwa me deli ame nani, tama Gideongo te ogwa nogi Abimelek poali.
JDG 8:32 Tama Gideon te monu dabe mu pedelama, tama isali. Tama augwaligo aga te aga aya Joasgo gų pagede pubulali, te bulu Ofrade, te Abiesergo hani dabego hanude dao.
JDG 8:33 Gideon isai madigi tama te Israel dabego Godiba lotu munu ma wabeo. Augwaligo te tibo god Balba naga lotu wali. Tama augwaligo te Balberit te augwa god elaluali.
JDG 8:34 Augwaligo te God, te augwa Genuai Bidi, te homu kone munu ma palubeo, te augwali boi bidi dabego bagua selama tomode bidibadi te augwali tau selama, te boi bidi dabe aiyaba elaluali, te homu augwaligo ma kone palubeo.
JDG 8:35 Tama augwaligo te Gideon hani sibiba te buba hwį po me wabeo, te tigidali wiegi yai sę te Gideongo augwali tau selama yai.
JDG 9:1 Te Abimelek, te Jerubalgo ogwa, te Sekem hanuba pali, te bulude te aga idago deli kanemede ame nani abe dede te bulude bidali. Tama Abimelekgo te aga deli kanemego nigali bagebolo olama,
JDG 9:2 te tiwai po te Sekem we bidibolo hanalu omainu wali, “Dagego homude te mena nai usu yaiba homu ebo dawe? Dagego homugo te Jerubalgo ogwa dabe te 70 bidi tigidali te dagego tobolu bidi bidimainu homu ebo dawe, ma dagego homugo te bidi deli naga te tobolu bidi bidimainao homu ebawe? Tama ena me homu kone palao, ena te dage dali deli kanemego nigai mu dao.” Abimelekgo te po wai.
JDG 9:3 Tama te Abimelekgo idago deli kanemede ame nani bage augwaligo te agai po selama, tama augwaligo te Sekem we bidi dabebolo pusali. Augwaligo te po odama, tama augwali aga wali pabo homu yali, magi baso meni, aga te augwa idago deli kaneme mu dao.
JDG 9:4 Augwaligo agabolo te ge mone bidi sese sela olama, nogo si, te 70 mone silva te tibo godiba lotu wabo be Balberit tempel bede te mone selama mani, tama agai te monego aga wali pabo dwai bidi dabe abelai.
JDG 9:5 Tama aga te aga ayago be elalubo bulu te Ofra teba ma geasa pai. Tama agai te aga ama dabe te bidi sese sela olama, nogo si bidi dabe te masigi me deli ugwadu daide augwali ela muai. Te bidi dabe te augwali Jerubalgo ogwa dabe naga tama elali. Tama Jotam te Jerubalgo sabi ogwa dao. Aga wi pelama, geme duala sigi pali, tama tiyu te Abimelekgo aga me ela mubeo.
JDG 9:6 Tialima, te Sekem me Betmilo we bidi tigidali augwali sisinama, tama augwali te Sekemde te wiegi yai genuai ni mu elalubo teba pelama, tama augwaligo te Abimelek te augwa tuni bidi king pedalumainu ilalio.
JDG 9:7 Tama Jotamgo te tiwai sę ebo po odobo sogode, aga pelama, te bulu du Gerisimba doligi pai. Tama agai hae augwaliba wali, “Dage Sekem bidigo, eno po odiąo, tama Godigo dagego po odabo homu yaibao.
JDG 9:8 Te me sogo te ni dabego te ni me deli te augwali tomode te king nigimainu nogo tų yaibao. Tama augwaligo te ni olivbolo po weyu, ‘Nage dago king pedelao,’ wai.
JDG 9:9 Tiali goli, te ni olivgo tama po wali, ‘Te enade elalubo wel te bidi dabego selama, te augwa god dabeba genuai nogi mabo sę ebo me te bidi dabeba te tiwai ebo dao. Magi baso te eno tagalu, tama te dagego king bidi pedalumainu obawe?’ te ni olivgo te po wai.
JDG 9:10 Tama te ni dabego te ni kayabolo weyu, te po wali, ‘Dago homugo te nage dago king pedalumainu homu ebao,’ wali.
JDG 9:11 Tiali goli, ni kayago te po wali, ‘Magi basowe? Te eno tubo wiegi yai pusu ebo nai tagalu, tama ena dagego king pedalumainu obawe?’ te po wali.
JDG 9:12 Tama tibaso, te ni dabego te ni wainbolo weyu, te po wali, ‘Te dago homugo nage te dago king pedalumai homu ebao.’ Te po wai.
JDG 9:13 Tiali goli, te wain nigo te po wali, ‘Magi basowe? Eno ąįgo te tibo god me te bidi dabe dali augwali te wiegi yai homu pemene ilibo dao. Te eno tagalama, tama ena dagego king bidi pedalumainu homu ebawe?’ wali.
JDG 9:14 Tialima, te ni dabego te sesane elalubo dwasianu nibolo weyu, te tama po wali, ‘Dago homugo te nage dago king pedalumai homu ebao,’ wali.
JDG 9:15 Tiali goli, te sesane elalubo dwasianu nigo te po wai, ‘Te dagego homugo godolo mu eyu, te ena dagego king pedalumainu te homu ebaso da, teda dage aselama, tama te eno nologo dologoba aselama, toma tuagasao. Te meni yani da, teda te dwasianu sesane elalubo nide te sia pedelama, tama te Lebanonde elalubo te wiegi yai ni wuli dabe te siago daibao,’ te sesene elalubo dwasianu nigo te po wali.” Jotamgo te po wali.
JDG 9:16 Tama tialima, Jotamgo te po wai, “Te dagego Abimelek te duga king bidi nigilama bidibo sogo, te dagego wiegi yai te doloba pai kolesaga ebo homu egowe, ma menigowe? Jerubal dali, te aga hani sibi dali, augwaligo te wiegi yai kolesaga elama, dage tau sabo sę yai. Tiali goli, te dagego aga homu te wiegi yai bugagia ilali, ma meniwe? Te menio.
JDG 9:17 Odiąo, te eno ayago dage tau siyu, te boi bidi dali hwįani. Aga digi te tobolu bidi nigilama, tama dage tau siyu hwįnama, tama dage te Midian dabego nogode bidibadi te ma dobola sai dao.
JDG 9:18 Tiali goli, megi da, dagego dwai kolesaga aga dali elama, tama dagego agai hani sibi ogwa dabe dolali. Dagego agai ogwa dabe te 70 bage augwali te masigi me deli daide elali. Te Jerubalgo sę ebo wego te Abimelek ame nai. Te aga deli naga tama ame nani. Tiali goli, megi da, dagego aga te Sekem bulu king bidi nigilali. Dagego homugo te aga duga deli kanemego ame nani da homu elama, dagego tama tialio.
JDG 9:19 Dagego te sę te Jerubal me aga hani sibi ogwa dabe dali yali, te wiegi yai doloba pai kolesaga yali homu eba wida, teda dagego te Abimelek dali te wiegi yai homu pemene iyąo. Tama agai me te dage dali wiegi yai homu pemene emainao.
JDG 9:20 Tiali goli, te sę dwai wida, teda sia te Abimelekde pedalumainu elama, tama te Sekemde me te Betmilo te bulu side bidibo bidi dabe te siago domainu yaibao. Tama tialima, te sia Sekemde me Betmilo bulu side pedalu, tama te siago Abimelek daibao,” Jotamgo te po wai.
JDG 9:21 Jotamgo te po ola silama, tama aga wi pali. Aga te aga ama Abimelekde wi ebaso, tama aga te bulu Ber teba pelama bidigi pai, te nogi page te wę ulu pedalubo madi da wali.
JDG 9:22 Abimelek te Israel dabego king bidibadi te kibu be sela bidai.
JDG 9:23 Tama nosali Godigo te wado po homu ilibo sę te Abimelek tomode me te Sekem bidi dabe dali pedalumainu ilali. Tama te Sekem bidi dabego te aga dali hagoma ebo sę yali.
JDG 9:24 Te sę pedelali te Abimelek dali, te Sekem bidi dabe dali, te augwaligo yali dwai sę wei ponoyu tiali, magi baso meni, te bidi dabe augwaligo aga bomo mayu dąų walobaso, te agai ama dede dabe ela muani, te augwali Jerubalgo ogwa dabe te bidi sese sela olama nogo si te 70 bidi ela muai dao.
JDG 9:25 Tama te Sekem bidi dabego te bidi dabe meba tagala palama, te bulu du dabe mageba duala sigi pelama, tama augwaligo te Abimelek elainu tonaluali. Tiali goli, te bidi dabego te sunumidu asela wali bidi dabe elama, tama augwaligo doado bage dabe siyu yai. Tama Abimelekgo te sę ebo po odali.
JDG 9:26 Tialima Gal, te Ebetgo ogwa, te aga ama dede dabe dali augwali te Sekemba asali. Tama te Sekem dabe augwali te aga wali pai.
JDG 9:27 Tialima, augwali te augwaligo wain giba pelama, tama te tau yali wain du dabe tigidali salio. Tama augwaligo te wain du pęgęlama, tama aga ąį te selama, tama augwaligo genuai nai daa tuali. Tama augwali te augwa tibo godiba lotu wabo be tempel tomoba pelama, tama augwa te nai me wę me tubo sę eyu, tama te Abimelekde dwai posobo po weyu yalio.
JDG 9:28 Tama Galgo te po wali, “Da Sekem dabe da maguai bidi dabe te dago Abimelek wali pobawe? Abimelek te de dawe? Polobadu Jerubal dali, te aga ofisa bidi Sebul dali, te Hamor te Sekemgo aya dologode bidali. Tialima, magi baso dago te Abimelek dologode bidibawe?
JDG 9:29 Tama te tigidali bidi dabe ena dologode bidibaso da, teda eno te Abimelek sela sąwaibao. Te eno agabolo weyu, ‘Nage pelama, te naga ami bidi tigidali sigi pelama, tama aselama, ena dali hwįagasao’ po waibao!” wali.
JDG 9:30 Tama Sebul, te hanude bidibo tobolu bidigo, te Galgo wali po odali, te Ebetgo ogwa, tama agai dwai homu mu elama wado po wali.
JDG 9:31 Tama agai te bidi dabe te Aruma teba tagala palama, tama augwaligo te tiwai po Abimelekbolo wagi pali, “Odao! Gal, te Ebetgo ogwa, te aga ama dede dali, te Sekemba aselama, tama te bidi homu hogodolama, te bidi dabego nage dali hwįmainu ebao,” wali.
JDG 9:32 “Tama tibaso, te hulide naga te nage naga ami bidi dabe dali, dage geme pelama, te bulu tomo busiba duala sigi pao,” wali.
JDG 9:33 “Tama kigamu mu dage hogodama, tama polo te hanuba pelama, tama boi hwįbo gagalao. Tama Gal te aga ami bidi dabe dali aselama hwįagasobo sogo, teda dagego augwali isilibo bidi mu elama dolao,” te po wai.
JDG 9:34 Tama tialima, te hulide Abimelek dali, te aga ami bidi dabe dali, tigidali augwali hogodama palio. Tama augwali hani me si me si buga selama, tama augwali te hanu bagulali obo bulu badu geme duala sigi pali.
JDG 9:35 Tama kigamu mu Gal te hanuba pabo sunumiba dolagasali, tama Abimelek te aga ami bidi dabe dali te augwali dualaluali pesage taga soali.
JDG 9:36 Tialima, Galgo augwali sulama, tama agai te Sebulbolo wali, “Suao! Te bidi te bulu du padodu aiyaba te dulubao!” Tama Sebulgo te po wali, “Te bidi menio. Nago te bulu du noma bidi sulama, tama nago te bidi yaliwe homu ebao.”
JDG 9:37 Tama Galgo po ma wali, “Menio! Te bidi dabe te bulu padodu dulubao. Tama gasa hani te moni wiegi yai ni elalubo badu holobo sunumidu wali asobao,” wali.
JDG 9:38 Tama megi da, Sebulgo Galbolo te po wali, “Megi da, nago posobo po wali te po mena elalubawe? Naga digi nago te po wai, ‘Abimelek te de dawe? Magi baso da te aga dologode bidibawe?’ Te e bidi dabe augwalibolo te nago posobo po walio. Tialima, megi da, te nage pelama, te augwali dali boi hwįgi pao,” wali.
JDG 9:39 Tama po obaso, Galgo te Sekem bidi dabe selama, tama aga digi te polasa peyu, te augwaligo Abimelek dali boi hwįani.
JDG 9:40 Tiali goli, te Abimelekgo aga pobeasa asobaso tama aga wi palio. Tama Abimelekgo hanigo te Galgo hani bidi hauwa ela muani, tama te bidi dabe augwaligo tigi te sunumidu munalua peyu, te hanuba pabo sunumiba dąį igi pali.
JDG 9:41 Tama Abimelek ma geasa pelama, te Aruma bulude bidai. Tama Sebulgo te Gal dali, te aga ama dede dali, sela sąyu ela gudulali, tama augwali te Sekemde ma bidainu ebo te usu meni yai.
JDG 9:42 Te nosali badu side te we bidigo te hanu tagalama, tama te giba pelawali. Tama me badu bidigo te po Abimelekbolo walali.
JDG 9:43 Tialima, Abimelekgo aga bidi dabe selama, tama hani sela nigilali. Tama augwali geme te bulu tomoba duala sigi pelama, tonalu bidali. Te agai te we bidi augwali te hanu tagalama aselabo side, aga te geme dualaluali pesage tagalama asiyu, tama augwali elagasali.
JDG 9:44 Abimelek dali, aga hani bidi dali, augwali udada pelama, tama te hanuba pabo sunumi pąba doligi pali. Tama te gasa hani si augwaligo te gide bidaluali bidi tigidali dali hwįnama, tama te tigidali ela muai.
JDG 9:45 Tama Abimelekgo te hanu tomode bidaluali bidi dabe dali boi hwįdubadi te be pio igi pali. Agai te hanu siyu, tama te hanude bidali we bidi tigidali ela silali. Tama agai te hanu tigidali aluama dolama, tama agai te hanu tǫba te tamu sąwani.
JDG 9:46 Te we bidi augwali te Sekemde te ami bidi dabego te genuai bomai bede bidalubo we bidigo te tebo sę po odama, tama augwali te bomai be tempel Elberit tomoba pelama, tama augwali geme dualaluali.
JDG 9:47 Te bidi dabego te Abimelekbolo weyu, te tigidali bidi te be tomoba sisinama bidalubo po walio.
JDG 9:48 Tama tibaso, aga dali, aga ami bidi dabe dali, te bulu du Salmon holali. Tama agai te sigi hwą me deli selama, tama agai te ni nologo meba togolama, tama aga magede tolasa pali. Tama agai aga ami bidi dabebolo te tiwai po wali, “Dagego eno e ebo sę suiąo. Tialima, dagego me polo asesa tama tiwai sę iyąo,” wali.
JDG 9:49 Tama tibaso, tigidali bidigo te ni nologo meba togali. Tama augwali te Abimelek pabo wali pelama, tama te sia sela pelama, te be sesegeba sisinigi pai. Tama augwaligo te sia nogonama, tama te siago te be tomode bidali bidi tigidali delama isali. Te pąde te Sekem bomai bobobage bede bidali we bidi dabe umabo 1,000 we bidi te augwali isai dao.
JDG 9:50 Nosali Abimelek pelama, te Tebes hanu tǫ bagua sigi pelama, tama te bidi dabe dali hwįnama, tama te hanu aga sali.
JDG 9:51 Tiali goli, te bomai bobobage be taua me deli te hanu tomode elaluali. Tama tibaso, tigidali we bidi wi peyu, teba pali. Tama augwali te tomoba pelama, tama sunumi paliama, tama te daiba holama bidaluai.
JDG 9:52 Abimelek aselama, tama te taua sainu te boi hwįagasali. Aga te taua te pabo sunumi pąba pelama, tama te pagede sia nogainogo yali.
JDG 9:53 Tiali goli, we me deligo te wit halulu pabo genuai masigi selama, tama aiyaba tula palu sąwanima, tama Abimelek toboluba tulalu, tama tobolu alua pali.
JDG 9:54 Tama polo agai te aga hwįbo nai sabilibo gesi bidi i wali. Tialima, agai te po agabolo wali, “Te nago bainat hwą selama, ena elao,” wali. “Te bidi dabego te po weyu, te wego ena ela muani po wabo te eno homugo usugobeo,” wali. Tama tibaso, te gesi bidigo te hwą bainatgo aga enama, tama aga isali.
JDG 9:55 Te Israel dabe augwaligo te Abimelek isibo sulama, tama tigidali te augwa buluba ma pelawali.
JDG 9:56 Tama tialigo Godigo te Abimelekgo te aga ayabolo me, te aga ama solo te bidi sese sela olama te gasa bidigo nogo si, te 70 bidi dabe ela muani, te dwai sę yali wei agabolo ponai.
JDG 9:57 Tama Godigo te Sekem dabe augwa dwai kolesaga yali sę wei ponani. Polobadu Jotam, te Jerubalgo ogwago te Sekem dabe augwali dolaibao po wali, tama megi da te tiwai sę pedelalio.
JDG 10:1 Abimelek isai madi tama Tola, te Puago ogwa, te Dodogo wąįgo wai, te Israel ma dobola sabo bidi pedelali. Aga Isakar hanigo bidi. Tama aga te Efraimgo hani bidali bulu du te Samirde bidali.
JDG 10:2 Aga te Israel dabe tobolu bidi nigilama bidibadi, te kibu be te 23 kibu be bidai. Tama aga isibaso, tama augwaligo aga te Samirde pubulali.
JDG 10:3 Te Tola bidali tudi badu nosali, te Jair te Gileat bulu bidi te tobolu bidi pedelai. Aga te Israel dabego tobolu bidi bididubadi, te kibu te 22 kibu be bidai.
JDG 10:4 Te agai ogwa dabe te 30 ogwa dabe elaluali, tama augwali te kibu donki te 30 donkide dualama bilali. Te augwaligo hanu 30 te Gileat tǫde elaluali. Tama te hanu dabe augwaligo nogi eyu, te Jairgo Ugwa Be Hanu da wali, te nogi elalua asali te megi e sogoba usu nagasali elalubao.
JDG 10:5 Nosali Jair isibaso, tama augwaligo aga te Kamonde pubulali.
JDG 10:6 Tama te Israel dabe augwaligo Genuai Bidigo gedude dwai sę ma yai. Augwaligo lotu po te Bal dabe me, te Astarte dabe me, lotu weyu yai. Te augwali te Siria dabego god, te Saidon me Moap, me Amon dabe me Filistia te tama bulu bagego god dao. Augwaligo te Genuai Bidi tagalama, tama te agaba lotu po me wabeo.
JDG 10:7 Tama tibaso, Genuai Bidigo te Israel dabe dali haliga sębę elama, tama agai te Filistia dabe me te Amon dabe aselama, te augwali dali boi hwįagaselama, te augwali aiyaba elalumainu ilali.
JDG 10:8 Te sogo kibu bede te augwali Israel dabe aiyaba elaluama, tama augwali mu dolali. Te Filistia dabego me te Amon dabego te Israel dabe aiyaba elaluama, tama augwaliba dwai sę mu ilidubadi, te 18 kibu be bidai. Te wę Jordan pedai me badu te Gileat te badu bidali te Israel dabede te tama sę yali. Te giliga pedalubo badu te Amon dabe bidali badu te sę yalio.
JDG 10:9 Tama te Amon dabego te ąį Jordan nogelama, tama te Judago hani me, te Benjamingo hani me, te Efraimgo hani, te hani augwali dali te Amon dabego boi hwįgi pai. Tama tialima, te Israel dabe augwali dwai dene mu sabo sogo pedelai dao.
JDG 10:10 Tialima, te Israel dabego Genuai Bidiba i weyu, tama augwaligo te po wali, “Dago dwai sę nagebolo yali, magi baso meni, dago nage tagalali, te dago God nage dago tagalama, tama dago te Balba lotu wali.” Augwaligo te po wali.
JDG 10:11 Tama Genuai Bidigo te Israel dabebolo te tama po wali, “Polobadu te Isip dabe me, te Amor dabe, me te Amon dabe, me te Filistia dabe me,
JDG 10:12 te Saidon dabe me, te Amalek me, te Maon dabe, te hani augwaligo dage elaluama, tama dageba dwai sę mu ilai. Tama dagego enaba i obaso, tama eno dage te augwaligo nogode ma dobola sai dao.
JDG 10:13 Tiali goli, dagego ena tagalama, tama gasa tibo godiba lotu wali. Tama tibaso, te eno dage tau ma sogobeo.
JDG 10:14 Dage pelama, te duga digi sa muyu nigilali god i wagi pao. Augwaligo te dage sęgę sabo sogo tau somainu emainao.” Genuai Bidigo te Israel bagebolo te po wai.
JDG 10:15 Tiali goli, te Israel dabego Genuai Bidi dali te po wali, “Dago dwai sę yalio. Te nago dabolo yainogo ebo sę te nago yao. Tiali goli, megi dago nagebolo hanalubo, te magi baso meni, te nago megi e sogo ma dobola somainogo hanalu wali.” Te Israel dabego te po wai.
JDG 10:16 Tialima, augwaligo augwa te tibo godiba lotu wali te tiali te sę dabe sela sąnama, tama augwaligo Genuai Bidiba lotu po wali. Tama agai te Israel dabe homu dene elama, tama agai homugo augwali te sęgę ma tolidali homu yai.
JDG 10:17 Nosali te Amon dabego ami bidi dabe sisinagaselama, tama augwa bidabo pesage te Gileatde nigali. Tama te Israel bidi dabe me sisinagaselama, tama augwa bidabo pesage te Mispa bulude nigalio.
JDG 10:18 Te bidi dabe me te Israel dabe polalubo bidi dabe te Gileatde bidalubo bidi dabe augwa hasi tomode digi hanalua pali, “Te niwai bidi da dali polasa peyu, tama te Amon dabe dali boi hwįaibawe? Te tama tebo bidi aga te Gileatde te tigidali bidigo tobolu bidi bidaibao,” po wali.
JDG 11:1 Jepta te Gileat bidi, aga te hwįbo bomai bidi me deli dao. Aga te penani we me deligo ogwa, tama Gileat te aga aya dao.
JDG 11:2 Tama Gileat aga sali we mugo me te wai ogwa meba ame nani. Tama te wai dabe augwali genuai ebo sogode, augwaligo te Jepta sela sąyu ela gudulali. Tama augwaligo agabolo te po wali, “Nago te dago ayago doado bage deli munu me selamuo,” wali. “Nage gasa wego wai dao.”
JDG 11:3 Tama tibaso, Jepta aga wi peyu, tama aga ama dede taga palio. Tama aga pelama, te Topgo tǫba bidigi pai. Agai te dwai sę ebo bidi meba haliga bega sabo po obaso tama augwali aga wali asai. Tama augwali te bulu dabeba tedela pelama, tama te bidi dabe elibo sę elama, tama augwaligo doado bage dobabo sę yali.
JDG 11:4 Tama nosali te Amon dabego te Israel dabe dali hwįgi pai.
JDG 11:5 Augwaligo tama tibaso, teda te Gileat bulu genuai bidi dabe te Topba pelama, te Jepta sigi pali.
JDG 11:6 Tama augwaligo agabolo te tama po wali, “Nage aselama, te nage dago polalubo bidi bidagasao, tama dago te Amon dabe dali hwįbo dao,” te po wali.
JDG 11:7 Tiali goli, Jeptago te genuai bidi dabebolo te tiwai po wali, “Dagego ena homu dene eyu godolo me isiąma, tama eno ayago bede te dagego ena sela sąwani. Tama magi baso dage ena bidibo madigi megi asaliwe? Dage sęgę sobaso, tama dage ena bidibo madi asali dawe?”
JDG 11:8 Tama te Gileatdu asali genuai bidi dabego te po wali, “Te tama dao. Dago te nage sagasiyu asalio, te nage da dali pelama, te Amon dabe dali hwįaibao. Dago homugo nage te da Gileat we bidi tigidaligo polalubo bidi bidimainu homu ebao,” wali.
JDG 11:9 Tialima, Jeptago te Gileat genuai bidi dabebolo te po wali, “Te dagego ena ma odasa pelama, tama eno te Amon dabe dali hwįbo si da, tama Genuai Bidigo ena tau selama, tama eno te Amon dabe aiyaba elalubaso da, teda ena dagego polalubo bidi mu bidaibao,” wali.
JDG 11:10 Tama te genuai bidi dabego te tama po wali, “Te dago nago te wabo po gilama tiwaibao. Genuai Bidigo te tama tiabo koneani,” wali.
JDG 11:11 Tama tibaso, Jepta te Gileat genuai bidi dabe dali palio, tama te we bidi dabego aga te augwaligo te augwa tigidali sęde te polalubo bidi nigilali. Tialima, Jeptago aga te sęde wali po tigidali te Genuai Bidi gedude te Mispa bulude te po wai.
JDG 11:12 Nosali Jeptago te Amon tuni bidi king bidibo digi te bidi meba tagala palama, tama augwaligo agabolo hanalugi pai, “Nago magi naide homu sębę ebaso, tama nago da dali hwįagasaliwe?”
JDG 11:13 Te Amon king bidigo te Jeptago tagala palali bidi dabebolo te po wei ponani. Agai te po wai, “Polobadu te Israel dabego te Isip tǫ taga soyu, tama augwali aselama, tama eno tǫ te wę Arnon pedai badu tǫ sagasali, te pali te wę Jabok me te wę Jordan dąį igi pali. Eno tede naga te eno haliga sębę yali. Megi da, eno homugo dagego te tǫ enabolo ma momainu homu ebao. Tiyu, da hwįdalio,” wali.
JDG 11:14 Tama Jeptago te Amon king bidiba te bidi dabe meba ma tagala palali.
JDG 11:15 Tama augwaligo agai po wei ponama te po wali, “Jeptago te po walio, ‘Te Israel dabego te Moapgo tǫ me te Amon dabego tǫ me te me sabeo,’ wali.
JDG 11:16 ‘Polobadu te Israel dabego te Isip tǫ taga soyu asali sogo, augwali te masigi elalubo bulu wa pai tǫdu naga sosolayu, tama augwali te nosai elalubo tamu ąį teba sabolali. Tama augwali te Kadesba sabolai dao.
JDG 11:17 Tama te Israel dabego te bidi meba tagala palu, te Idom king bidibolo te tiwai po hanalugi pali, “Te da nago tǫ tomodu soao po wabo usu da po waibawe?” Tiali goli, te king bidigo hagela homu yai. Tama augwaligo te Moap king bidiba hanalugi pabo bidi tagala palali. Tiali goli, te agai me te hagela homu yai. Tama tibaso, te Israel dabe augwali te Kades bulude naga bidaluai dao.’ Jeptago te po wai dao,” te Jeptago tagala palali bidi dabego te po wai.
JDG 11:18 “‘Te nosali augwali te bidi meni yai te tǫ wa pai madi te buluba pali. Tama augwaligo te Idomgo tǫ me, te Moap dabego tǫ me, te edelama pali. Augwali te giliga pedalubo te Moap dabego tǫ pedai badu soai, te wę Arnon pedai badu dao. Augwali bidabo pesage tede nigali, tiali goli augwaligo te ąį Arnon nogesiąwai, magi baso meni, te ąį te Moap dabego tǫ dąį yagasali madi dao.’”
JDG 11:19 “‘Tama te Israel dabego te Sihon, te Amor dabego king bidi, te Hesbonde bidibo madi teba te bidi meba tagala palali. Te augwaligo agabolo hanaluyu, “Te da nago tǫ tomodu soabo usu yaibawe?” po wali. “Da te dena tǫba soabo homu eyu obao,” wali.
JDG 11:20 Tiali goli, te king bidi Sihongo hagela homu yai dao. Tama agai aga ami bidi tigidali selama asiyu, tama te Jahasde te bidabo pesage nigilama, tama augwaligo te Israel dabe dali hwįai dao.
JDG 11:21 Tiali goli, God, te Israel dabe augwa Genuai Bidigo, te Israel dabe tau selama, tama augwaligo te king bidi Sihon aga ami bidi dabe dali tigidali aiyaba elaluai. Tama tialima, te Israel dabe augwaligo te Amor dabego tede elaluali tǫ tigidali sai dao.
JDG 11:22 Tama augwaligo te Amor dabego tǫ tigidali sali, te Arnon te tǫ saut badu gagalali, pelama, te Jabok te tǫ not te badu, tama te giliga pedalubo badu te bidi meni yai tǫ wa pai madiba sabolali, tama te pelama, giliga dega sigi pabo badu te Jordan ąį teba dąį igi pai.’”
JDG 11:23 “‘Te God, te Israel dabego Genuai Bidi, aga digi te Amor dabe sela sąyu gudulama, tama augwaligo tǫ te aga hani bage te Israel dabebolo mani. Tama nago te tǫ ma sabo homu ebaso, oba agawe?
JDG 11:24 Naga god Kemosgo nagebolo mani te doado bage tigidali te naga sao,’ wali. ‘Tiali goli, te tigidali doado bage te dena Godigo dabolo mani, te dago doado bage mu tama dao.
JDG 11:25 Tama nago magi homu ebowe? Nago homugo nage te polobadu bidai bidi Balak aiyaba elalubo homu eyu, te Siporgo ogwa, te Moap king bidi da, te homu ebawe? Nago homugo te agai da Israel dabe dali po konila yali, ma agai da dali hwįani homu ebawe? Menio!
JDG 11:26 Te Israel dabego te e tama tǫ sali, te Hesbon me Aroer tama augwaligo dwasianu bulu me, tama te wę Arnon sesegede elaluali tigidali hanu selama, tama te hanu dabede bidada pali te kibu be umabo te 300 bidali. Magi baso dagego te sogo te bulu dabe ma sai meniwe?
JDG 11:27 Tama tialima, eno dwai kolesaga me deli nage dali me ebeo. Nago digi te nago dwai kolesaga ena dali elama, tama nago ena dali hwįani. God te aga tigidali bidigo kolesaga dagalubo bidi da, tama megi da, te agai dago kolesaga dali, te dagego kolesaga dali osayu dagalaibao.’ Jeptago te po wali,” te agai tagala palali bidigo te Amon king bidibolo wali.
JDG 11:28 Tiali goli Amon king bidigo te Jeptago ola tolali po me odisiąwai.
JDG 11:29 Tialima, te Genuai Bidigo Mobo Bidi te Jeptaba bomonama bidagaselama, tama aga hogodama palima, te Gileat me Manase te badu te Mispa buluba pelama, tama aga te Amon dabe bidalubo madiba palio.
JDG 11:30 Jeptago te Genuai Bidibolo te tiwai bomai po me deli dąų walali, “Te nago ena tau selama, tama eno te Amon dabe augwali aiyaba elalubaso da,
JDG 11:31 teda eno te hwįgi pali silama, te ena eno beba ma asobo sogo, tama eno be taga soyu te sunumiba te ena tiąba asobo bidi da, teda eno aga te nagebolo mawaibao, te ofa me deli te tigidali siaba ulumainu ebo gilama yaibao,” wai.
JDG 11:32 Tialima, Jepta te wę nogelama, tama te Amon dabe dali hwįainu teba sabolali. Tama Genuai Bidigo aga tau selama, tama te Amon dabe aiyaba elaluai dao.
JDG 11:33 Agai augwali te bulu Aroerde elibo gagali pelama, tama te bulu Minit te badu pedaiba sabolali, te tigidali bidi sese te 20 hanu da. Tama agai te boi hwį hwį pali te ąį Keramim dąį igi pai. Te hwįani madi te bidi umabo mu isalio. Tama te Israel dabego te Amon dabe augwali mu ela silai dao.
JDG 11:34 Tama te Jepta aga bulu te Mispa teba ma begasa asobadi, te aga wegi te bede bidali taga soyu, te aga tiąba asai. Agai homu te wiegi yai pemene elama, tama dwasianu habidi elala asobo sę yai. Tama Jeptago wegi te deli naga tama bidai. Te agai gasa wai me mu meni yai dao.
JDG 11:35 Tialima, aga te wegi asobo subo si, te aga dwai noma selama, midigi siyu, tama aga ugwa pisąyu tama po wai, “Hobede ya! Eno wegio! Megi nago eno hobolu du togalubao!” wai. “Magi baso te nage asama, tama nago enaba genuai sęgę mobawe? Eno bomai po mu te Genuai Bidiba dąų walobo po wali te po eno me tagalogobeo!” Jeptago te po wai.
JDG 11:36 Tama te wegigo te po wai, “Ayao, te nago Genuai Bidiba bomai po dąų waibaso da, te nago po dau wali gilama te tiwai sę enade yagameo, magi baso meni, te Genuai Bidigo nage tau selama, tama nago te boi bidi Amon dabe aiyaba elaluali, te augwali nago boi bidi dabe dao.” Wegigo te po wai.
JDG 11:37 Tiali goli, te wegigo aga ayabolo te tiwai po wali, “Eno homugo te nago enade sę yabo po me deli omainu te homu ebao. Eno homugo te nago ena te polua si ena gogolama bidimainu homu ebao. Tama ena te ena abagi dabe dali pelama, tama bulu dude bilaluyu, tama ena te bidigo sisąbadi te isaiba olama, te homu dene ebo gela ola bilainu yaibao,” wali.
JDG 11:38 Tama aga ayago te po wali, “Te usu dao. Nage pao.” Tama Jeptago aga tagala palama, te aga polua si bilali. Tialima, aga dali, te aga abagi dede dali, augwali te bulu duba pelama, tede te aga abagi dabe dali pilala bilama, tama aga te bidigo sisąbadi isaiba wabo homu dene ebo gela wai.
JDG 11:39 Te polua si silama, tama aga aya bidiboba ma asali, tama ayago te Genuai Bidi dali bomai po dąų wali gilama tama tialio. Tama te wegi te bidi me deli dali me pagela pisąwai wegi. Te Israel dabede elalubo kolesaga page tama telalubo dao.
JDG 11:40 Augwaligo te tama tiwai kolesaga ebo dao: te Israel wegi ogwa we dabe te augwa pesage taga solama, tama te Jeptago wegi isaide te gela wagisu diligi pabo dao, te Gileat bidi, te tigidali kibu be usu nama, te tomode te me si me si tama sogo te tiwai sę ebo dao.
JDG 12:1 Te Efraim hani bidi dabe sisinama, tama te hwįbo doado bage selama, tama augwali te wę Jordan nogelama, tama te Safonba pali. Augwali pelama, Jeptabolo te tiwai po wagi pali, “Magi baso dage te ąį nogelama, tama dagego te Amon dabe dali hwįgi peyu, tama dagego da i olama, tama dage dali pomainogo yai meniwe? Odiąo! Megi te dago nage me te naga be dali domainu sia ulaibao,” wali.
JDG 12:2 Tiali goli, Jeptago augwalibolo te po wali, “Ena dali, te eno hani bage dali, dago te haliga sębę genuai te Amon dabe dali yali. Tama eno dage i wali goli, te dagego ena tau me sagasobeo.
JDG 12:3 Te sogo dagego ena tau sabo homu ąǫ isąbaso, teda eno te tiwai homu eyu te ‘Tagala,’ homu yali, ‘te ena isimainu yaibao,’ wali, ‘tiali goli eno te Amon dabe dali hwįgi paibao,’ wali. Tama eno te wę nogelama, te boi hwįani. Tama Genuai Bidigo ena tau selama te hani bidi aiyaba elaluai. Magi baso megi dagego ena dali hwįainu ebawe?” Jeptago te po wali.
JDG 12:4 Tialima, Jeptago te Gileat bidi dabe tigidali sisinama, tama augwaligo te Efraimgo hani dabe dali hwįnama, tama augwali aiyaba elaluali, magi baso meni, te Efraimgo hani bidigo te Gileat hani bidi dabebolo te tama tiwai po wali, “Dage Gileat dabe te Efraim dabego bulude me te Manase dabego bulude me bidaluyu, te dage te boi bidi asama hwįagasobo side, te dage wi soyu tama da taga soali!”
JDG 12:5 Tama te Gileat bidi dabego te bidi dabe te Jordan ąį nogebo pesage tigidali badu usu selama, no bidada pela silali, te wę pedai me badu, te wę ge bo kuna disąwai elaluali. Augwaligo tama tiwai yali, te Efraim dabe augwali te ąį Jordan munu me nogeidali homu yali. Te Efraim dabe dali hwįbo sogo augwali wi painu soyu, augwali aselama, tama augwaligo te po wali, “Da te ąį nogeainu ebao,” wali. Tialima, te Gileat dabego te augwali deli delibolo hanalua pali, “Nage te Efraimgo hani bage dawe?” Te agai te po weyu, “Menio,” po obaso da, teda augwaligo agabolo te po wai,
JDG 12:6 “Teda nago tama po wao,” obaso, “Sihibolet,” wali. Tama agai te “Sibolet” po obaso da, te augwaligo aga pageabi elama, tama ela muani, magi baso meni, agai te po dolo nogi isąbaso tiali. Tama augwaligo te tiwai ela pelama, tama te bidi umabo 42,000 te Efraim hani bidi dabe te wę nogebo madi no munama ela silali.
JDG 12:7 Jepta te Gileat bidi, te Israel dabego tobolu bidi nigilama bidibadi, te kibu be nogo a naga olama, me deli bidama tama aga isai. Tama augwaligo aga hanude digi pubulai dao.
JDG 12:8 Jepta isibaso, tama Ipsan te Betlehem bulu bidi te Israel dabego polalubo tobolu bidi bidai.
JDG 12:9 Agai ogwa dabe te 30 elaluali, te agai wegi dabe te me te 30 elaluali. Tama agai te wegi dabe gasa hani bidigo somainu mani. Tama agai te gasa hani bagego wegi te 30 wegi dabe selama, tama augwali te agai ogwa dabego sali. Ipsan te Israel dabego tobolu bidi bidali te kibu be a naga olama, me badu si bidai.
JDG 12:10 Tama aga isibaso, augwaligo aga te bulu Betlehemde pubulai dao.
JDG 12:11 Te Ipsan isibaso, tama Elon te Sebulun hani bidi te Israel dabego tobolu bidi bidibadi, te kibu be nogo si bidai.
JDG 12:12 Tama aga isibaso, te augwaligo aga te Aijalonde pubulali, te Sebulun hanigo hanu tǫde dao.
JDG 12:13 Te tobolu bidi Elon isai madi tama Apdon, te Hilelgo ogwa, te Piraton bulu bidi, aga te Israel dabego tobolu bidi dao.
JDG 12:14 Agai ogwa dabe te bidi sese si te 40 elaluali, tama te ogwago wai dabe te 30 elaluai. Tama augwali te donki dabe te 70 donkide dualasa bilali. Apdon te Israel dabego tobolu bidi bidibadi, te kibu be 8 bidai dao.
JDG 12:15 Tama aga isibo si, te augwaligo aga te Piraton bulude pubulali, te Efraim dabego hanu tǫde pubulalio. Te bulu te Amalek dabego te bulu du bagede elalualio.
JDG 13:1 Te Israel dabego dwai sę te Genuai Bidi gedude ma yali, tama agai augwali te Filistia dabego tolalumainu ilama, tama augwali te hanigo tonalubadi, te kibu be bidi sese si te 40 bidalio.
JDG 13:2 Tama bidi me deli te Sora hanude bidali, te bidi nogi Manoa. Aga te Dango hani bidi. Te agai wego te wai me ame nesiąwai.
JDG 13:3 Me sogode te Genuai Bidigo Ensel Bidi te weba asama, tama agabolo te tiwai po wali, “Polobadu nago wai me ame nesiąwai, tiali goli nage haliga elama, tama nago ogwa ame naibao,” wali.
JDG 13:4 “Tama tialima, nago bugagia odao. Nago te wain wę me, te bomai ąį me, te me tulamuo. Tama nago te eno bidi dabebolo te tugio olama, habu selali nai te me tulamuo,
JDG 13:5 magi baso meni, te nage haliga elama, tama nago te ogwa me deli ame naibao. Tama nago aga tobolu nisi me togolamuo. Te da te Genuai Bidigo sę naga tede elalubao, te aga idago ame nabo sogo tiaibao. Tama agai te wain ąį me, te bomai ąį me, me tusiąma, tama te bidi dabebolo tugio olama habu selali nai me te munu me tugio,” wai. “Tama agai te Israel dabe te Filistia dabego nogode ma dobola sabo sę te gagalaibao,” wali.
JDG 13:6 Tama te wego aga bidibolo wagi peyu, te tama tiwai po wali, “Te Godigo bidi me deli enaba asai. Te agai gesabidi ula yali, te Godigo Ensel gesabidi ula ebo tiwai yalio. Eno aga sulama, te ena wi mu yai. Eno aga te menadu asali po te hanalubeo. Tama agai te aga nogi me te nogi ebeo.
JDG 13:7 Tiali goli, agai enabolo te po wali, te ena haliga elama, te eno ogwa me deli ame naibao wai. Tama agai te po wai, eno te wain wę me, te bomai ąį me, te me tugio wali, tama eno te Genuai Bidigo habu selali nai me tugio wai. Godigo te ogwa sa muai baso, te aga Godigo bidi dolo bididubadi, te aga pedalubo sogo gagalasa pelama, te aga isibo sogoba usu nugi paibao wali.” Manoago wego agaba te po wai.
JDG 13:8 Tama Manoago Godiba gedu haluasa po weyu, te po wali, “Genuai Bidi, te nago tagala palali bidi, te eno homugo te bidi te nago da siba ma asomainu tagala palao. Tama agai da sibolo te wai nosali pedalubo si sabo sę po tigidali te da sibolo wagasomainu homu yai,” te po wai.
JDG 13:9 Tama Godigo Manoago te gedu haluasa po wabo odai. Nosali aga we te gide bididubadi, tama Godigo Ensel Bidi agaba pedelali. Tiali goli, aga bidi Manoa, te aga dali bidisiąwai.
JDG 13:10 Tama tibaso, te we polo udada pelama, tama aga bidibolo wagi pali, “Odao! Te polobadu enaba po wagasali bidi te megi ma asalio.”
JDG 13:11 Tama Manoa hogodama, tama te aga we wali pali. Manoa te bidi bidiboba sabolama, tama agabolo te tama po hanalu wali, “Nage te bidi polobadu nago te eno we dali po miani bidi da, agawe?” Tama te bidigo te po wali, “Awe, ena tama dao.”
JDG 13:12 Tama Manoago te po wali, “Teda, nago te po wali nai, te nosali pedalubo si da, teda te wai mena tama bidigowe? Te agai magi sę egowe?”
JDG 13:13 Tialima, Genuai Bidigo Ensel Bidigo Manoabolo te po walali, “Te wego te eno agabolo wali po tigidali te bugagia wali pao,” wali.
JDG 13:14 “Agai te ni wain du me tulamuo. Tama agai te wain ąį me tusiąma, te bomai wę me tugio. Tama agai te Genuai Bidigo te habu selali nai dabe me tugio. Agai te eno po tigidali dolo wali pela silao,” wali.
JDG 13:15 Manoago te bidi te Genuai Bidigo Ensel Bidi da homu isiąyu te agai konesiąwai. Tama tiyu, agai te po wali, “Nage polo pelamuo, te nage bidiyu bolo yao olama, tama da sigo te ogwa bidi meme kibu elama, ulama, te nage tuagameo,” wali. Tiali goli, enselgo te po wali, “Te dage sigo ena dąų olalubaso, te eno dage sigo nai me sela tugobeo. Te dagego te kibu elainu da, teda dagego te Genuai Bidiba ofa elama, tama te siaba ulama, tigidali domainu yao.” Te po wai.
JDG 13:17 Tialima, Manoago te po wali, “Nage nogi nogi yao. Tama nago te po wagasali sę, te sogo pedalubo side, teda da sigo nago nogi ugwaba saibao,” wai.
JDG 13:18 Tama enselgo te po wali, “Magi baso te dagego eno nogi koneainogowe? Te eno nogide te we bidi homu hauwa eyu, noma siyu ilaibao,” wali.
JDG 13:19 Tama tilama, Manoago te gesi ogwa bidi meme dali, te wit me selama, tama te Genuai Bidiba ofa ilali. Agai te alta masigi daide te ofa yali.
JDG 13:20 Te altade nogani sia te genuai deyu, tama te sia bogoli ugwaba holali, tialima te Manoa we de bidi sigo suali, te Genuai Bidigo Ensel Bidi te sia dabo wali te dagaluba holalio. Tama te we de bidi si te tǫba degasa dulama, te gesabidi tǫba pǫgulali.
JDG 13:21 Tama te ensel te Manoa dali aga we de bidi si bidiboba munu ma pedalubeo. Tialima, megi da, Manoago koneani, te bidi te Genuai Bidigo Ensel Bidi da te homu yai.
JDG 13:22 Tama Manoago aga webolo te po waliyu, te po wai, “Te da si isaibao, magi baso meni, dago te Genuai Bidigo Ensel Bidi sualio.”
JDG 13:23 Tiali goli, aga wego te po wai, “Te Genuai Bidigo da si elainogo tigi sogo da, te agai da sigo ofa yali te godolo igi menio. Tama agai te tigidali nai da sibolo me ola magi menio. Tama agai dabolo te megi e ola mani tobage sę po te me pusigi menigi dao,” wali.
JDG 13:24 Tialima nosali te wego te ogwa ame nenama, tama augwaligo aga nogi Samson poali. Te wai bomapi pedalubaso, te Genuai Bidigo aga dali wiegi yai sę yali.
JDG 13:25 Tama aga te Dango pesagede bididuali, te Sora me Estaol bulu si tomode bidai, tama Genuai Bidigo Mobogo aga sunumi ola mabo sę gagalali.
JDG 14:1 Samson te Timna buluba dulama, tama te bulude agai te Filistia dabego gesi wegi ogwa we me deli suali.
JDG 14:2 Tama aga buluba ma begasa pelama, tama aga aya idabolo wagi pali, “Eno te gesi wegi ogwa we me deli te Filistia dabego bulu Timnade suali. Eno homugo nago aga oda sobaso da, te aga eno saibao,” wali.
JDG 14:3 Tiali goli aga aya de ida sigo agabolo te po wali, “Magi basowe? Te wegi ogwa we me deli te da Dango hani tomode meni baso, ma te dena we bidi dabe tomode me meni baso weyu, obawe? Magi baso nago te Filistia we me deli sainogo, te augwali tigi wali togobo meni dawe?” Tiali goli Samsongo aga ayabolo wali, “Eno te we godolo mu ebao! Dagego te aga eno we siąo.”
JDG 14:4 Te aga aya dali ida sigo te Genuai Bidigo te Samson ola mayu, te tiwai sę ebo te konesiąwani, magi baso meni, Genuai Bidigo te Filistia dabe dali hwįabo sunumi gegebo sę yali. Te sogo te Filistia dabego te Israel dabe tonaluali.
JDG 14:5 Nosali Samson dali, te aga aya de ida si dali, te Timna buluba dulali. Tama Samsongo aga aya ida osogo tagalama, tama te Timna dabego wain giba sabolali. Tama polo te ogwa bidi laion me deli aselama, hwa weyu, aga gąų kela tueinu yali.
JDG 14:6 Tiali goli, Godigo Mobogo agaba bomo menama, tama agai te laion nogogo naga tola selama elali, te bidigo te meme wai me deli nogogo ela mubo tiwai gilama yai. Tiali goli, Samsongo te aga aya de ida sibolo te sę yali po me wabeo.
JDG 14:7 Tama Samson pelama, te wegi ogwa we dali po migi pali. Tama agai aga godolo mu yali.
JDG 14:8 Nosali dwasianu gana, Samson te we sainu ma palio. Tama aga te Timna buluba pabo sunumi tagalama, te agai te polobadu ela muani te laion sasia pai tigi sugi pali, tama suali, te genuai bunu hanigo te ganoma bunu ge tomoba mubo suai.
JDG 14:9 Agai te ganoma bunu meba te agai nogogo selama, tama aga tųdu peyu, te sunumi wali pai. Tama aga aya de ida si bidibo madiba sabolama, tama te bunu ge pedai augwali si menama, tama augwali sigo me tuali. Tiali goli, agai te ganoma bunu ge te laion tigide sali nai po te augwali sibolo me wasiąwai.
JDG 14:10 Tama aga aya pelama, te we dali po migi pelama, tama nosali Samsongo te genuai nai daa me deli te bulude ulama tuali, magi baso meni, te augwa gesi bidi dabego ebo kolesaga dao.
JDG 14:11 Tama te Filistia dabego te Samson subo sogo, augwaligo te gasa gesi bidi te 30 gesi bidi sigi pelama, tama augwali aga dali bidali.
JDG 14:12 Tama Samsongo augwalibolo te po walali, “Te eno po begelama wabo po me deli te dage dali waibao. Te dagego enabolo te po begelama wabo po te nai tuyu bidibo te a naga olama, me badu nogo si te sogo dagego te po begelali po page te enabolo obaso da, teda te eno dagebolo te pedai name ugwa te 30, me te holobo bobage ugwa te 30 te dage mawaibao,” wai.
JDG 14:13 “Tiali goli, dagego enabolo te po page me wabo te usu meni baso da, te dagego enabolo te pedai name ugwa te 30, me te holobo ugwa 30, te tama ena magameo,” wali. Tama augwaligo agabolo te po wali, “Ao! Nago po begelebo po pusao! Dago odaio.”
JDG 14:14 Tialima, agai augwalibolo wali, “Te tubo nai te nai tubo bage me delide pedelai. Te pusu nai te bomai nai me delide pedelai.” Samsongo te po begelama wali. Te sela sogo bidai, tiali goli augwaligo te po begelai page me konebeo.
JDG 14:15 Te me si me si wabo sogode augwaligo te Samsongo webolo walali, “Nago te naga bidi homu bega sabo po olama te agai dabolo te begelali po page dabolo omainao. Te meni baso da, teda dago nage dali, te nago hani dabe dali, te dago siaba ulaibao. Dage sigo da i obaso asali te dago doado bage wi sagasomainu wali dawe?” Te bidi dabego te webolo te po wai.
JDG 14:16 Tama tialima te Samsongo we te aga gesabidiba pelama, te gela wagi peyu, tama po wali, “Te nago ena godolo homu meni ebo! Nago wado homu naga ebao! Nago eno hanibolo te po page begelama mawai, tiali goli nago enabolo te po page wabeo,” wali. Tama Samsongo agabolo te po wali, “Ae, tegoba, eno te ena aya idabolo me te po me wabeo! Magi baso eno nagebolo te po wa naga obawe?”
JDG 14:17 Te wego te tiwai gela naga odubadi, te genuai nai ulama tuyu bidali te sogo te a naga olama, me badu nogo si wali sogo usu nigi pali. Agai po hauwa mu obaso, tama te a naga olama, nogo me si wabo side, Samsongo te begelali po page agabolo walali. Tama aga pelama, te aga hanibolo wagi pai.
JDG 14:18 Tama te giliga dega sigilusiąbadi, te 7 wabo side, tama te hanude bidali bidi dabego te po Samsonbolo walali, “Mena naigo pusugo te bunu ge hanigo pusu ebo aiyaba elalubo dawe? Tama mena naigo bomogo te laiongo bomo aiyaba elalualiwe?” Samsongo augwalibolo te tiwai po wali, “Te dagego eno so kibu bulmakau dali te tǫ pedegi menigi sogo da, te dagego eno begelali po page te konebo usu me igi menio.”
JDG 14:19 Tialima, te Genuai Bidigo Mobogo te Samsonba bomo mobaso, tama aga te Askelonba dulali. Agai te hanude bidali bidi te 30 bidi elibadi, tama augwaligo doado bage dabe dali sali. Tama agai te 30 ugwa te agai begelali po page pusali bidi dabe mani. Tama te sę pedelalide te aga haliga sębę mu elama, tama aga buluba ma begasa pai.
JDG 14:20 Tama augwaligo te Samsongo we te Samson dali te we sabo sogo te hai namu olama te bidali bidi me delibolo te we mawai.
JDG 15:1 Te nosali dwasianu gana, te wit togobo sogo, Samson pelama, aga we sugi pali. Agai te ogwa bidi meme me deli aga webolo mawainu sela pali. Tama agai te we aga ayabolo te po walali, “Ena te ena we bidibo be habu tomoba paio,” wali. Tiali goli we aga ayago hagela yai.
JDG 15:2 Agai Samsonbolo te po wali, “Mu tamao, eno homugo nago aga godolo homu mu isiąwai. Tama tibaso, eno aga te nai uluyu te sogo nage dali hai namu olama bidali bidibolo te we manio. Tiali goli, te aga amanu te sawi gesabi yai mu bidibao. Nago te aga sobaso, te usu yaibao,” wali.
JDG 15:3 Tiali goli Samsongo te po wali, “Eno te Filistia dabeba dwai sę ilaibao. Tama eno dwai sę yali po me wagobeo. Te augwa yali kolesagago naga dao!”
JDG 15:4 Tama tialima, aga pelama, te 300 uni yowi sigi pali. Agai te si si danu kękę pelama, tama nosali agai te sole me deli te kęnani danu side kęani.
JDG 15:5 Tama agai te sole domonama, tama te uni yowi si si tagala palama, tama augwali udada peyu, te Filistia dabego wit gi tomoba pali. Agai te wit dabe te togai elaluali me, te togosiąwai elaluali wit dabe me te siago ulali. Tama te oliv ni dabe me, te wain ąį nigibo du walobo bono dabe me, te siago dai dao.
JDG 15:6 Tama te Filistia dabego hanalua biliyu, te tiwai po wali, “Dego te sę yaliwe?” Tama augwaligo po odobadi te po wai, “Samsongo te sę yalio. Magi baso meni, te aga wąį ayago, te Timna bidigo te agai we selama, te aga dali te we sabo sogo nai uluyu te hai namu olama bidali bidi aga abagibolo te we mani,” wali. Tama te Filistia dabe pelama, te we dali aga aya me te aga be dali te siago te augwali dali ulugi pai dao.
JDG 15:7 Tialima, Samsongo augwaliba te po walai, “Dagego te tiwai kolesaga yali da, agawe? Tialima, eno te tiwai po dąų walobao, te ena polo toma me nogobeo. Hasia bolo eno dagego te yali kolesaga wei ponoma da, tama nosali te ena toma naibao,” wali.
JDG 15:8 Tama Samsongo augwali dolama, subigila mu elama, tama hauwa bidi mu ela muani. Nosali aga te moni dedage elalubo te masigi ola be me deli elalubo te Etam teba bidigi pai.
JDG 15:9 Nosali te Filistia dabe aselama, tama te Juda dabego tǫba te bidabo pesage nigagaselama, tama augwaligo te Lehi hanude bidibo bidi dabe dali hwįagasai.
JDG 15:10 Tialima, te Juda dabego augwaliba hanalu wali, “Magi baso te dagego da dali hwįagasaliwe?” Augwaligo te tiwai po wei ponani, “Da asali te dago Samson selama, kalabus ilainu, tama dago te agabolo te agai da dali yali deli tigi poai kolesaga te wei ponainogo te tiwai ilaibao,” wai.
JDG 15:11 Tialima, te Juda bidi dabe te bidi sese umabo mu, te 3,000 bidi te Etam te ola be masigi bulu duba pelama, tama Samsonbolo waliyu, te po wali, “Ae, tegoba! Te Filistia dabego megi da tonalubo te nago konebewe? Magi baso nago te tiwai dwai sęgę dabolo pedalumainu yaliwe?” Tama agai te po wei ponoyu, te po wai, “Te augwaligo ena dali yali dwai sę te eno augwaliba dolo wei ponoyu yali.”
JDG 15:12 Tama augwaligo agabolo wali, “Te dago nago nogo duagasu asali, tama nage te Filistia dabego nogoba muainogo eyu yaibao,” wali. Tama Samsongo te tiwai po augwaliba walali, “Dagego bomai po me deli enaba dąų waliyu, te tiwai waiąo, te dagego digi ena me ela mugobe po waiąo.”
JDG 15:13 Tama augwaligo te po wali, “Te usu da, te dago nage me ela mugobeo. Dago te nago nogo duagasu naga asali, tama nage te augwali nogoba odasa paibao,” wali. Tama te Juda dabego aga nogo te gesi bomai bono baklain sigo dunama, tama augwaligo te ola be masigi bulu du tagalama ma palio.
JDG 15:14 Augwali te Lehi hanuba sabalubo sogo, te Filistia dabego i weyu, udada asu, tama augwali tiąba asali. Tama Godigo Mobogo te Samsonba genuai bomo menama, tama te gesi baklaingo aga nogo duani, Samsongo te baklain te ugwa hobolobo hobi togobo tiwai te olo nai gagawai togali.
JDG 15:15 Tama agai te tamadi isali ogwa bidi donki me deligo penane dili sulama, tama te agai sali. Tama agai te penane diligo te bidi hauwa umabo te 1,000 bidi ela muai.
JDG 15:16 Tama tibaso, Samsongo tęąbi po me deli te tiwai wali, “Te donki penanego eno te bidi umabo 1,000 ela muani. Mu tamao, te donkigo penanego eno augwali dolama mu elali.”
JDG 15:17 Agai te po ola silama, tama agai te penane dili sąwani. Tama augwaligo te bulu nogi Ramatlehi wali. Te tiwai te penanego ela muani bage te dwasianu bulu du da wali.
JDG 15:18 Tama Samsongo dogoni te mu wa pali. Tama tibaso, agai Genuai Bidiba i olama, te tiwai wali, “Nago ena naga sę bidi tau sali, tama tialigo eno te boi bidi dabe dali hwįnama, augwali aiyaba elaluali. Magi eyu ebaso, te nago ena megi tagalali. Te enade ąį meniama, tama tiyu ena isabo ąǫ ebao. Tama tiyu, te Genuai Bidi nago po odisąbo bidi dabego ena dolidalio.” Te po wai.
JDG 15:19 Tama Godigo te dedage me deli te Lehi hanude aluama, tama ąį tedu pedelai. Tialima, Samsongo te ąį tulama, tama aga bomo ma sali. Tama tialima, augwaligo te wę nogi Hakore poali. Te nogigo page te tama tiwai, te bidigo i wali ąį dao. Te ulu wę te Lehi bulude me elalubo dao.
JDG 15:20 Te Filistia dabego te tǫ tonaluali sogo, Samson te Israel dabego tobolu bidi bididubadi, te kibu be bidi sese deli, te 20 kibu be bidai dao.
JDG 16:1 Tialima, Samsongo te Lehi hanu tagalama, te Gasaba pai. Tama te Gasa bulude agai te penani we me deli sulama, tama aga te wego beba bidigi pali.
JDG 16:2 Tama bidi mebago te Gasa bidi dabebolo waliyu, te po wali, “Samson asalio.” Tama tialima, augwaligo te bulu bagua selama, tama augwaligo aga te hanu bulu badu soabo sunumide geme dualaluyu tonaluali. Augwaligo te hulide kilikili me wabeo. Tama augwaligo tama homu yali, “Te dago tonaludubadi, te be posoboba usu nama, tama dago aga ela muaibao.” Te homu yali.
JDG 16:3 Tiali goli, Samson te pibo sai betide pila mudu bididubadi, te be huli tomoba mu usu nani. Nosali aga hodaluama, tama te hanu buluba piduali, te sunumi nogogo tulama, tama agai te sunumi te dali, pos ni si me, te tigidali elaluali dąų wabo nai dabe tigidali gudali. Tama agai te sunumi doado bage dali te Hebron bulu pąde elaluali bulu duba ugwaba tolasa holalio.
JDG 16:4 Te sę elama nosali, Samsongo te odogo bulu Sorek we me deli godolo homu yai. Te wego nogi te Delaila dao.
JDG 16:5 Tama te a naga Filistia tobolu bidi te we Delailaba pelama, agabolo te po walali, “Nago aga homu bega sabo po olama, tama agai te elalubo bomo te menade sali po koneainu tiao, tama magi baso dago aga aiyaba elaluabo usu ebe. Tama tiyu, te dago aga nogo dunama, tama aga aiyaba elaluaibao. Te nago te tama tebaso da, teda da deli deligo te mone 1,100 mone silva nage mawaibao,” wali.
JDG 16:6 Tama tibaso, Delailago Samsonbolo te po walali, “Te magi baso nago te tiwai genuai bomo elalubowe? Te po enabolo walao. Tama bidi me deligo te nage nogo dunama, tama nage aiyaba elaluainu ebaso da, te agai mena tama tiwai sę yaibawe?” wali.
JDG 16:7 Tama Samsongo agabolo te tiwai po walali, “Te ena augwaligo te enesigi balibi dolobo bono keloa te a naga te me si te tamago te ena nogo dubaso da, teda te eno bomo sia saibao. Tama ena te tigidali gasa bidi tiwai naga yaibao,” wali.
JDG 16:8 Tama me sogo nosali te Filistia dabe tobolu bidigo te gesi enesigi balibi dolobo bono keloa te a naga me si tama selama, tama augwaligo te we Delailabolo magasali. Tama agai Samson te bono keloa dabe nogo dunama elaluali.
JDG 16:9 Tialima, agai te bidi mebabolo po walama, te augwali gasa be habu badu tonalua po wali. Tama agai i weyu, “Samson, dua dao! Te Filistia dabe megi da asobao!” Tiali goli, agai te kę yani bono keloa dabe toga sąyu, te ugwa hobolobo hobi te siago ulubo sogo te togobo tiwai yali. Tama augwaligo agai te bomo ebo po page te me konesiąwai dao.
JDG 16:10 Tama Delailago Samsonbolo po wali, “Odao! Nago enabolo te tibo po wabo sę naga eyu, te ena pomonani. Tiali goli, megi nago enaba po dolo weyu, te bidi dabego nage mena tama tilama te bono kę yabo po waibawe?” wali.
JDG 16:11 Tialima, Samsongo agabolo walali, “Te augwaligo ena te gesi baklain mugo, te augwaligo polobadu magi sę me isiąwaigo te ena kę ebaso da, teda eno bomo elalubo te sia selama, tama ena te olo gasa bidi dabe tiwai naga yaibao.” Te po wai.
JDG 16:12 Tama tibaso, Delailago te gesi bono baklain meba selama, tama aga kęnani. Tama agai i weyu, “Samson, dua dao!” wali. “Te Filistia dabe asobao!” Tama te bidi meba te gasa be habu badu ma tonaluali. Tiali goli, Samsongo te bono baklain dabe tologa sąwani, te olo hobi tiwai naga ilali.
JDG 16:13 Tialima, Delailago Samsonbolo te po walali, “Nago enaba te tibo po wabogo te ena ma poma palali. Megi da, te nago enabolo mu po dolo te nage te bidi dabego mena tama kę emainu yabo po waibawe?” Tama agai te po wai, “Te e nago eno bobage tobolu nisi duani te haliga a naga olama, me si tiwai elalubo, te selama, tama nago bomonama te blanket ugwa nigibo masin bono string tomoba kęnama, tama bobage medabu selama, tama bomonama elibaso da, te tobolu nisi mu dąų ola saibao, te tama tebo si te eno bomo meniama, te ena te gasa olo bidi dabe tiwai naga pedelaibao,” wali.
JDG 16:14 Tialima, Delailago te Samson tibo po ola mayu, te aga godege mu pialio. Tama agai te Samsongo tobolude te bobage tobolu nisi haliga tiwai elalubo nisi a naga me si te tama selama, tama te masinde bomonama kęnama, tama te medabugo bomonama kęnani. Tialima megi da, Delailago i wali, “Samson, dua dao! Te Filistia dabe asobao!” Tiali goli, aga hodaluama, te tobolu nisi kega sąnama, te dąų walali medabu toga sąnama, te masin me tigidali nai dabe alua peyu toga palio.
JDG 16:15 Tama Delailago agabolo te po wai, “Magi baso nago te po weyu nago ena godolo ebo po obawe? Nago pedauwalidu olo gani bole ebo po naga obao. Nago ena dali te deli homu me ebeo. Megi da, sela sogo nago enabolo te tibo po wabo pogo te ena pomonobo sę elama, tama nago enabolo te nago bomo mena tama pedalubo po te enabolo me wabeo.” Te wego te po wali.
JDG 16:16 Te tigidali sogo te wego po hauwa weyu, tama agaba hanalubo sę yali. Tama tiyu, Samson te pode hagela dwai mu yalio.
JDG 16:17 Te megi da, Samsongo Delailabolo po dolo walali. Agai tama tiwai po wali, “Augwaligo te eno tobolu nisi me togobeo. Te idago ena ame nani sogo, ena te God aga mu dolo bidi pedelali. Te augwaligo eno tobolu nisi togobaso da, teda eno bomo silama, tama ena te gasa bidi dabe tiwai gilama te bomo meni yaibao,” te po wali.
JDG 16:18 Te sogo Delailago koneani, te Samsongo mu po wabo homu yali, tialima megi da agai te Filistia dabe tobolu bidiba po ola tolu, tama augwalibolo te tama po wai, “Dage ma asiąo. Megi da, agai enabolo mu po walio.” Tama augwaligo mone dali sela asu asali.
JDG 16:19 Tama Delailago te Samson ili po ola menama, tama aga telede pila mubadi, tama agai bidi me deli i olama asobo si tama te Samsongo bobage tobolu nisi te a naga olama, me si elaluali te tobolu nisi togali. Tama Delailago aga hodolobo sę iduali. Tiali goli megi da, te agai bomo elaluali te tigidali pela silalio.
JDG 16:20 Tama te wego i wali, “Samson, dua dao! Te Filistia dabe asobao!” wai. Tama Samson hodaluama te homu yai, “Te ena hodaluama peyu, tama ena te polobadu hasia te eno nogo kęduali sogo yali sę tiwai eyu, te nai dabe tologa paibao,” te homu elama pali. Tiali goli, te Genuai Bidigo agaba mani bomo te taga pali te agai me konebeo.
JDG 16:21 Tialima, te Filistia dabego aga pageabi elama, tama agai gedu si guda sąwani. Tama augwaligo aga te Gasaba sela pelama, tama augwaligo aga te brasgo nigai sengo gebelali. Tama augwaligo aga te sia me wit te nai sę ebo be te kalabus be tomode agaga pabo sę emainu ilali.
JDG 16:22 Tiali goli nosali te Samsongo tobolu nisi te bobage ma holobo gagalali.
JDG 16:23 Nosali te Filistia dabe tigidali polalubo bidi te sisinagasai. Augwaligo te wiegi yai homu pemene elama, tama augwa tibo godiba ofa ilali, Dagon. Tama augwaligo te po wali, “Te dena godigo da tau selama, dago te dena boi bidi Samson te aiyaba elaluali!” te po wali.
JDG 16:24 Nosali augwali te ąį tuai gęǫ eyu, tama augwaligo te po wali, “Te Samson odasa asama, tama dago agaba te hagoma ilibo sę yaibao!” Tialima, augwali te kalabus beba pelama, tama aga selasa asali. Tama te we bidi augwaligo aga subo sogo, augwaligo te augwa tibo god nogi ugwaba siyu, tama augwaligo te po wali, “Te dena godigo da tau selama, te dago dena boi bidi Samson aiyaba elaluali,” po wali. “Agai te dago tǫ mu dolama, tama dago bidi dabe hauwa ela muani!” Tama augwaligo aga te be genuai masigi pos elalubo tomoba dodolama dolalubadi, tama augwaligo agaba te dwai hagoma sę yali.
JDG 16:26 Tama Samsongo aga te nogo tolasa biliyu, tama aga pabo dolasa pomainu ebo te dwasianu ogwabolo po walali, “Nago ena sela pelama, eno te be genuai masigigo nigai pos te eno nogo tola sigi paibao. Ena te masigigo nigali posde te eno tigi tede tialumainu homu yai.” Te po wai.
JDG 16:27 Te be te we bidigo mu pągąna sai elaluali. Tama te tigidali Filistia dabe polalubo bidi a naga te augwali dali bidali. Tama te bidi sese umabo te pąde te we bidi 3,000 te be ugwadu daide bidalu, tama augwaligo te Samsonba aba tononalu, tama augwaligo agaba gagali ebo po wabo sę yali.
JDG 16:28 Tama Samsongo te Genuai Bidiba gedu haluasa po weyu, te e tama po wali, “God Genuai Bidi Yawe, nago ena megi homu kone palao. God, nago te megi e sogo deli naga enaba te genuai bomo ma mao,” wai. “Tama eno te Filistia dabeba te eno gedu si dolali te wei ponaibao,” wai.
JDG 16:29 Tialima, Samsongo te be tomode dąų olalubo te genuai masigi pos si nogogo tuali. Agai te pos si nogogo tulalu, tama aga tigi te pos siba tinigi palio.
JDG 16:30 Agai i wali, “Ena te Filistia dabe dali isainogo ebao!” Tialima, agai bomogo te pos si pogolali. Tama te be aluama, te degeyu, te polalubo bidi dabeba dali, te be tomode bidali gasa we bidi dabeba dali, te be degalio. Te aga dali isiyu te ela muani bidi dabego nambago, te aga bidibadi te elali bidi dabego namba te aiyaba elaluai dao.
JDG 16:31 Tama aga ama dede dabe me aga hani sibi tigidali dulama, tama aga tigi sagasali. Tama augwaligo aga te bulu si Sora me Estaol tomode pubulali, te aga aya Manoa muani gų pagede muai. Aga te Israel dabego polalubo bidi bidibadi te kibu be bidi sese deli bidai dao.
JDG 17:1 Bidi me deli te Efraimgo hani bidali bulu du bagede bidali, te bidi aga nogi Maika dao.
JDG 17:2 Agai te aga idabolo po wali, “Te bidi dabego nago mone silva te 1,100 mone te wi sali sogo, nago po weyu, te nai wi sali bidi dolomainao wali. Tama eno te po odai. Suao, te mone enade munalubao. Ena digi eno wi sali!” Tama idago te po wai, “Genuai Bidigo nage mobo momainu yao, te eno ogwa dao.”
JDG 17:3 Tama Maikago te mone te aga idabolo ma mawai. Tama idago te po wali, “Ena digi eno te mone te Genuai Bidiba mawaibao, tama te wiegi yai mu yali. Tama augwaligo te ni dulama tama te tibo god me deli nigilama, tama te silvago tigidali haluaibao,” wali. “Tiali goli, hasia bolo eno te mone nagebolo ma mawaibao.”
JDG 17:4 Nosali Maikago te mone aga idabolo ma mawai. Tialima, Maikago idago te mone 200 silva selama, tama agai te silva sę ebo bidiba mawai. Tama agai te tibo god me deli te nigo nigilama, tama te tigidali silvago haluali. Tama te Maikago bede te tibo god muai elaluali.
JDG 17:5 Te bidi Maika, agai dwasianu lotu be elaluali. Tama agai te pris bidi gudubo ugwa me te tibo god te lotu beba muani. Tialima, augwaligo teba lotu weyu, te aga ogwa digi me deli te pris bidi pedalumainu ilali.
JDG 17:6 Te sogo te Israelde te polalubo bidi me deli te bidisiąwai. Tigidali bidigo te augwa homu naga wali pali.
JDG 17:7 Te sogo te Livai hanigo te gesi ogwa bidi me deli elaluali, aga te Betlehem te Juda tǫde bidali.
JDG 17:8 Agai te aga bulu taga peyu, tama aga te gasaba bidigi painu homu yali. Tialima, aga pelama, tama te Maikago beba sabolali, te Efraimgo bulu du bage buluba pai.
JDG 17:9 Tama Maikago agabolo hanalu wai, “Nage menadu asaliwe?” Agai po wei ponoyu, te tama po wai, “Ena te Livai hani me deli te Betlehem te Juda bidi dao. Ena te bidainu ebo bulu me deli gege asai dao,” wali.
JDG 17:10 Tialima, Maikago agabolo te po wai, “Nage ede ena dali bidao. Te enabolo te homu kolesaga mabo bidi bididu tama nage eno pris me bidagameo,” wali. “Tama tigidali kibu bede te eno nagebolo te silva mone te nogo si mayu yaibao, tama te gudabo ugwa dabe me te tuabo nai dali mawaibao.”
JDG 17:11 Tama tibaso, te Livai gesi ogwa bidigo te po usu da olama, tama aga te Maika dali bidai. Tama aga te aga ogwa tiwai mu pedelali.
JDG 17:12 Tialima, Maikago te gesi ogwa bidi te agai pris bidi nigilali. Tama aga te aga bede bidali.
JDG 17:13 Tama Maikago te po wali, “Megi da, eno koneani, te Genuai Bidigo ena bidibo tomode te wiegi yai sę pedelaibao, magi baso meni, eno te Livai hani te eno pris bidi nigilai elalubao.” Te po wali.
JDG 18:1 Te sogo te Israelde te king bidi meni yani. Tama te Dango hani dabe meba te augwali bidabo tǫ me deli gegebo sę yali. Magi baso meni, te sogo augwali te Israel dabe tomode te augwa sabo tǫ tigidali me sisąwai. Te augwali olo naga bidaluai.
JDG 18:2 Tama tiyu, te Dan dabego te hanu si Sora me Estaol te kolesaga koneai bidi te nogo a naga bomai bidi tagala palu, te augwali te tigidali tǫ pedai susa biligi pomainu tagala palali. Tialima, augwali pelama, te Efraimgo bulu du bageba te Maikago beba sabolama, tama augwali aga dali bidali.
JDG 18:3 Augwali te Maikago beba sabolama, tama augwaligo te Livai gesi ogwa bidigo wabo po odama, tama augwaligo koneama, te Juda bidigo dogonide po odobo tiwai yali. Tialima, augwali doligi pelama, tama agabolo te tiwai po hanalu wali, “Nago e bulude magi sę ebawe? Dego nage eba sela asaliwe?”
JDG 18:4 Tama agai augwaliba te po wali, “Te Maikago enabolo usu da obaso, tama ena bidibao. Ena agai pris sę tiwai ebaso, tama agai ena abelibo dao,” wali.
JDG 18:5 Augwaligo agabolo te po walali, “Dago homugo te nago da e bilagasali sę po te Godiba hanalu omainu obao. Te wiegi yai dawe, ma meniwe?”
JDG 18:6 Tama te prisgo te tiwai po augwaliba wei ponani, “Dage te nai me deli homu si me dogia pelamuo. Te Genuai Bidigo te dage bilibo tonaluaibao,” wali.
JDG 18:7 Tama tialima, te a naga bidi dabego te bulu tagalama, tama augwali pelama, te hanu Laisba sabolali. Augwali pelama suali, te bidi dabe bugagia bidaluali, te Saidon bidi dabe tiwai bugagia bidali. Augwali te dua digi bugagia mu bidali, tama augwaligo te gasa bidiba wado po me wasiąwai. Tama augwaligo hwįabo homu me isiąwai. Augwali te nai me deli me sǫą pabeo. Tama augwaligo te gasa hani bage dali te bisnis sę me isiąwai. Tama augwali te Saidon dabe pąde me bidibeo.
JDG 18:8 Te a naga bidigo te bulu susa bilama, tama augwali te bulu Sora me Estaolba ma geasa pabo si, tama augwa deli hanigo augwaliba hanalu wali, “Dage pelama, te magi nai naga sualiwe?”
JDG 18:9 Tama augwaligo te e tama tiwai po wali, “Te dage asesa polo asama, tama dago augwali dali hwįnao. Dago te tǫ wiegi yai mu suali. Dage olo me bidilamuo. Asesa dao! Dago te augwaligo tǫ sigi paibao.
JDG 18:10 Te dage pabo sogo da, te augwali bugagia bidiyu, tama augwaligo hwįabo homu me elalubo sugubeo. Te tǫ genuai tama, te augwali magi nai me deli me sǫą pabeo. Odiąo, te Godigo da tau selama, tama dago augwali aiyaba elaluaibao,” wali.
JDG 18:11 Tama tialima, te Dango hani bidi dabe te 600 ami bidi te hanu Sora me Estaol tagalama, tama augwali hwįgi painu sisi yai.
JDG 18:12 Augwali pelama, tama te bidabo pesage te Kiriat Jearim te Juda tǫ pedai badu nigali. Tama te bulu nogi augwaligo te Dango Nigali Pesage wabo te nogi megi me elalubao. Tama te nigali pesage te giliga degasa dulubo badu te bulu Kiriat Jearimde elaluai.
JDG 18:13 Tialima, augwaligo te bulu taga peyu, tama te bidi Maikago beba sabolali, te Efraimgo bulu bage bulude elaluai.
JDG 18:14 Tama te a naga bidi te Lais dabego hanu tǫba sa pelama suali bidi dabego te augwa deli hanibolo te tiwai po wali, “Te badu te be me delide te tibo god me deli augwaligo te nigo nigilama, tama augwaligo te silvago haluama elaluali. Dagego te koneaniwe, ma meniwe? Tama te tibo god meba u mabo elalu, te pris dabego holobo ugwa me elalubao. Megi da te dago magi yaibawe?” te a naga bidi dabego te po wai.
JDG 18:15 Tialima, augwaligo te sunumi tagalama, tama te Maikago beba pelama, tama augwaligo te Livai gesi ogwa bidi bidibo suali. Augwaligo agabolo te siade da po weyu, te po wali, “Nage bugagia bidibawe?”
JDG 18:16 Tama te Dango ami bidi te 600 bidi te hanu bagulali obo te pabo sunumi dolalu, te augwaligo hwįabo sisi elalu bidali.
JDG 18:17 Te bulu sa geme pelama sugi pali te a naga bidi dabe augwali te be tomoba pelama, te tibo god dabe sigi pali. Tama te pris te 600 ami bidi dabe dali te hanuba pabo sunumide bidali.
JDG 18:18 Te bidi te Maikago be tomoba pelama, tama augwaligo te tibo god dabe sali, tama te prisgo augwaliba hanalu wali, “Dagego magi ebawe?”
JDG 18:19 Tama augwaligo agaba po waliyu, “Nago pedauwali pania sao,” wali. “Nago po me olamuo. Tama nage da dali asao, te nage pris bididu, tama nage te dabolo homu konebo kolesaga ola mabo bidi bidagameo. Te nage te Israel hani tigidaligo pris bidi bidibaso, te wiegi yai yaibao. Te deli hani sibigo pris naga bidibo te dwai dao,” wali.
JDG 18:20 Pris te pode wiegi yai homu pemene elama, tama agai te tibo god dabe selama, te augwali dali palio.
JDG 18:21 Tialima, tigidali bidi ma geasa pali. Tama te wai dabe me, te bulmakau dabe me, te doado bage me, te augwali polasa pali.
JDG 18:22 Te Dan dabego te Maikago be taga peyu, te digibulu pai madi, tama Maikago te aga pąde bidali bidi dabeba i waliyu, te augwali wali pobeasa pelama, te augwali dali hwįgi pao wai. Augwaligo te Dango hani dabe pobeasa peyu, wali pelama, te nosali augwaligo augwali suali.
JDG 18:23 Tama Maikago hanigo te Dango haniba i olama, hae wai. Tialima, te Dango hani dabe begelama, te Maikabolo wali, “Magi sę yaliwe? Magi baso nage te genuai hani bidi dali asaliwe?”
JDG 18:24 Tialima agai te po wai, “Dagego eno pris bidi me te eno nigali tibo god dabe selama, te dage wi soalio. Te eno doado bage deli te me munalubeo. Magi baso te dagego enabolo ‘Magi sę yaliwe?’ po hanalu obawe?”
JDG 18:25 Tama te Dango hanigo te po wali, “Te nago po me deli dabolo munu me olamuo. Tiyu, te bidi dabe wado ebo homu elama, te augwaligo dage dali hwįabuo. Tama augwaligo te nage dali, naga hani sibi dali ela muabuo,” wali.
JDG 18:26 Te Dan dabego po ola silama, te augwali palio. Tialima, Maikago suali, te bidi dabego bomo ebaso, tama aga augwali dali usu yabo homu isiąbaso, tama aga buluba me geasa palio.
JDG 18:27 Te Dan dabego te Maikago nigali nai me, te agai pris bidi me selama, tama augwali te hanu Laisba palio. Tama te Lais hanude bidali we bidi, te augwa bugagia bididu, tama hwįabo homu me isiąma bidali. Tama te Dan dabego te augwali tigidali ela munama, tama augwa hanu me te siago ulali.
JDG 18:28 Te augwali tau sabo bidi me meni yai, magi baso meni, te hanu te Saidon bulu digibulu elaluali. Tama augwaligo bisnis sę te gasa hani dabe dali me isiąwai. Te hanu te Betrehop hanu pąde elaluali. Tama te Dan hani dabego te hanu ma nigilama, tama augwa tede bidali.
JDG 18:29 Tialima, te hanu nogi augwaligo te Dan nogi poali. Augwaligo te augwa wąįgo nogi sali, Dan te Jekopgo ogwa, tama augwaligo te nogi te hanuba mawai. Polobadu augwaligo te hanu nogi Lais poali.
JDG 18:30 Tama te Dan dabego te nigo nigali tibo god dodolama, tama augwaligo teba lotu wai. Jonatan te Gersomgo ogwa, te Mosesgo wąį, agai te Dan dabego pris sę yali. Tama agade koliali wąį dabe me te pris sę ela pali, te augwali te gasaba kalabus igi pali sogoba usu nigi palio.
JDG 18:31 Tama te Maikago tibo god dabe tede elalubadi, te Godigo ugwa be te Silo bulude elaluai dao.
JDG 19:1 Te sogo te Israel dabego king bidi meni yai, te we sai Livai bidi me deli te Efraimgo bulu bagede bidai. Tama agai gasa we me deli te Betlehem bulu te Juda tǫde sai, te aga dali bidainu sali.
JDG 19:2 Tiali goli, te we te aga bidi dali bugagia bidisiąyu, penani ebo kolesaga yai. Tama te we te aga ayago bulu te Betlehemba wi ma pali. Tama aga ayago bede bidibadi, te polua me si me si bidai.
JDG 19:3 Tama nosali aga bidi hogodama, tama aga wali pelama, te aga dali po dodoligi pelama, te aga ma odasa asainu pali. Agai te aga sę ebo bidi me deli selama, te donki si me aga dali pali. Nosali te wego te bidi sulama, te aga selama, te aga ayago beba pali. Tama we aga ayago te bidi sulama, tama wiegi yai homu pemene mu yai.
JDG 19:4 Tialima te we aga ayago bomo eyu, te bidi aga dali bidao wali. Tama tibaso, aga sela sogo bidai, tama augwali nai tuyu, me wę tuyu yalio.
JDG 19:5 Tama te ene nanobo sogo me si me si tede te augwali si te kigamu mu hogodama, te augwa si painu doado bage sisi yali. Tiali goli, te we aga ayago te Livai bidiba weyu, te po wali, “Te nage nai tulama, haliga dąų waliyu bolo yao,” wai. “Nosali te naga pagameo,” wali.
JDG 19:6 Tama tibaso, augwali si dugulama, tama wę me nai me tuyu yai. Tama we aga ayago agabolo te po wali, “Eno homugo nage ede ma bidimainu elama, te da wiegi yai homu pemene emainao.”
JDG 19:7 Te bidi hogodama painu yali, tiali goli te wego ayago te aga bidimainu bomo mu yali. Tama tibaso, aga te deli sogo hulide aga dali bidai.
JDG 19:8 Te a naga sogo wabode te bidi te kigamu digi mu hogodama painu yali. Tiali goli, te we aga ayago te po wai, “Ae, te nage nai bolo tuyu bidi bolo yao,” wali. “Te giliga dwasianu kekeyu kedau ebo sogo da, teda naga pagameo,” wali. Tama tibaso, te bidi si dali nai ma tuali.
JDG 19:9 Tama te bidi aga we dali, te aga sę ebo bidi te augwali painogo sisi ebaso, te we aga ayago te po wali, “Suao, te giliga dega sigulainu ebao, tama dwasianu sogo tama be hulia sainu yali. Te wiegi yai mu tama te dage te sogo hulide bidiyu, te wiegi yai homu pemene yao. Do da, te kigamu mu, te duga hogodama, te duga buluba ma piagameo,” wali.
JDG 19:10 Tiali goli, te Livai bidi aga te gasa sogo hulide ma bidibo te aga hagela homu yali. Tialima, aga dali aga we me te augwa si hogodama palio. Augwa si te donki daide duabo nai sadel te donki side elaluali te donki tudide ąuasa pali. Te giliga dega sigulai madi augwali te Jebusba sabolali, te Jerusalem bulugo gasa nogi me dao. Tama te sę ebo bidigo te aga mama monubolo te tiwai po wali, “Te da te hanu Jebus tomoba pelama, tama hulide tede pinao,” wali.
JDG 19:12 Tiali goli aga mama monugo te po wai, “Menio, da te Israel hani ąǫ isiąwai bagego hanude me bidigobeo. Te da dwasianu ma pelama gana te Gibeade ma Rama tede piaibao,” wali.
JDG 19:14 Tama tiyu, augwaligo te Jebus hanu edelama, tama augwali palio. Tama be mu hulia sigilubode te augwali te bulu Gibeaba sabolali, te Benjamingo tǫ pedai badu dao.
JDG 19:15 Augwaligo te genuai sunumi tagalama, tama augwali te hanu tomoba pelama, te piabo pesage gegegi pali. Tama augwali te bidi dabe sisinama po mibo pesageba duadalalugi pali. Tiali goli, te bidi me deligo augwali te aga beba me odasa pabeo.
JDG 19:16 Augwali tede duadalaludubadi, tama monu dabe bidi me deli asali. Te aga gide sę yali silama, tama aga ma asali. Te bidi te Efraimgo te bage bulude bidai bidi, tiali goli aga aselama, te Gibea buluba bidagasali. Tama te Gibeade te Benjamingo hani bage bidaluai.
JDG 19:17 Te monu dabe bidigo te Livai bidi dali, te aga sę ebo bidi me, aga we dali, te bidi dabe po mibo pesagede dudulalubo suali. Tama agai augwaliba hanalu wali, “Dage menadu asaliwe? Tama dage menaba sobawe?”
JDG 19:18 Tama te Livai bidigo te po wali, “Da te Betlehem, te Juda buludu asali, tama da te eno bulu te Efraimgo bage bulu tomode elalubo buluba sobao. Tiali goli, te bidi me deligo da te aga beba me odasa pabeo.
JDG 19:19 Tagalao. Dago te dena nai dabe tigidali elalubao. Te donki sigo tuabo nai me elalubo, te eno bret me wain dali me, te eno sę ebo bidigo doado bage me elalubao,” wali.
JDG 19:20 Te monu dabe bidigo te po wali, “Te wiegi yai dao. Te dage eno beba asiąo! Te eno tigidali nai dabego te dage mayu gesaibao. Tiali goli, dage te po mibo pesagede te hulide me bidigobeo,” te po wai.
JDG 19:21 Tialima, agai augwali te aga beba odasa pelama, tama agai te donki si me nai mani. Agai te wę augwaliba menama, tama augwali sągą wę tedelama, tama nosali augwali nai me wę me tuali.
JDG 19:22 Te augwali wiegi yai homu pemene elama bidibadi, tama te hanude dwai kolesaga ebo bidi meba aselama, te be bagua sagaselama, tama te be sunumiba bebego wabo sę iduali. Tama augwaligo te monu dabe bidiba po waliyu, te po wali, “Te nago bede nage dali bidibo bidi, te aga buluba dinao. Te dago aga penani yaio,” wali.
JDG 19:23 Tiali goli, te monu dabe bidi buluba teda solama, tama augwalibolo walali, “Menio. Te eno ama dedeo, dagego te tiwai kolesaga me elamuo. Te e bidi eno beba asobaso, te eno aga tonalubao. Dagego te dwai kolesaga me elalumu dao.
JDG 19:24 Odiąo! Te eno gesi wegi ogwa we, me te e bede bidibo bidigo we me bidibao. Te eno augwali si odasa aselama, tama dagego augwali si penani yagameo. Tama duga te godolo ebo sę te duga homugo yagameo. Tiali goli, dagego te bidiba te hale ilibo kolesaga me elamu dao.” Monu dabego te po wai.
JDG 19:25 Tiali goli, te bidi dabego agai po me odisiąwai. Tama tibaso, te Livai bidigo te aga we selama, tama augwaliba mani. Tama augwaligo aga selama, tama aga tąnama, te agaba haniani dwai kolesaga idubadi te be mu posa palio. Tama nosali augwaligo aga tede bididubadi taga pali.
JDG 19:26 Tama te we asama, tama te monu dabe bidigo be sunumiba degagasali. Te aga bidi te bede bidai. Tama we te sunumide pila mudubadi te giliga pedelali.
JDG 19:27 Tialima, te kigamu te aga bidi hogodama, tama sunumi dalama, tama painu yai. Te agai sunumi dabadi, te sogo te aga we tede pila mubo suai, aga nogo si te sunumiba muainu yali, tiali goli usu meni yai.
JDG 19:28 Tialima te Livai bidigo te po wali, “Te hodaluama, da pinao,” wali. Tiali goli wego te po wei me ponobeo. Tama tibaso, agai te donki tudiba te we aunama, tama aga buluba palio.
JDG 19:29 Te aga buluba sabolama, te aga be tomoba pelama, tama hwą ge me deli sali. Tama aga te isai wego tigi tologali, te nogo si olama, sągągo si pedai pedelali. Tama agai te pedai deli deli te Israel hani te nogo si olama, sągągo si haniba todolo palio.
JDG 19:30 Tigidali bidigo te wego tigi pedai sulama, te po wai, “Dago te tobage tiwai sę te polobadu me subeo. Te da Israel dabego wąį dabego te Isip taga soyu asela bidali te e sogo megiba usu nagasali, te tiwai kolesaga me pedalubeo. Dagego mena tiwai homu ebawe? Te dago magi yaibawe?” augwaligo te po wai.
JDG 20:1 Te Israel bage tigidaligo te Livai bidigo wede po odama, tama augwali te deli hani tiwai naga aselama, tama augwali te Genuai Bidi gedude te Mispa buluba sisinagasali. Augwali te tǫ pedai tigidali badu te Dango tǫ pedai te not badu gagalasa asali, tama te saut te Berseba teba usu nigi pali, tama te Gileat tǫ pedai bage te giliga pedalubo badu augwali me asalio.
JDG 20:2 Tama te tigidali Israel hanigo polalubo bidi dabe te tigidali bage te Godiba sisinama po mibo madiba sabolali. Te bainatgo hwįbo ami bidi dabe te bidi sese umabo te 400,000 ami bidi dabe elaluali.
JDG 20:3 Tama te Benjamingo hani dabego te tiwai po wabo odali, te gasa Israel hani dabe te Mispaba sisinigi pali po walio. Tama te Israel dabego te Livai bidiba hanalu wali, “Nago dabolo pusao. Te dwai kolesaga mena tama pedelaliwe?”
JDG 20:4 Tama te Gibeade bidali Benjamin hani bagego te dolali we aga bidi agai te po wali, “Ena eno we dali, da si te Gibeaba pali, te Benjamingo hani dabego tǫba pali, tama da si te bulude hulide bidainu yali.
JDG 20:5 Tiali goli, te Gibea hanu bidi dabe augwali aselama, tama augwaligo ena elainu yai. Augwaligo ena te bidibo be hulide bagua sagasali. Tiali goli, augwaligo ena tagalu, tama augwaligo eno we tądubadi te aga isaboba usu nigi palio.
JDG 20:6 Tialima, eno aga tigi selasa aselama, tama eno te tigi pedai todogo pelama, tama eno te Israel tǫ pedai tigidaliba todolo pela silali. Magi baso meni, te bidi dabego te Israel tomode te dwai hale ilibo kolesaga yalio.
JDG 20:7 Dage tigidali Israel bidi dabe te eba sisinani, dagego homu kone bugagia palama, tama po waiąo. Megi da, dago te kolesagade magi sę yaibawe?” Te isali wego bidigo te po wai.
JDG 20:8 Tama tigidali bage dabe hogodama, tama augwaligo te tiwai po me deli wali, “Te da me deli te aga ugwa beba me pisiąma, tama me deli te aga buluba me pogobe dao.
JDG 20:9 Te Gibea dali hwįainogo te tiwai yaibao: te dago nogo si bidi te tigidali Israel hani deli delide te 100 bidi nidigili pelama, tama te 100 bidi nedada pabogo te 1,000 tigidali pedelama, tama te 1,000 bidi nedebogo te 10,000 bidi pedelaibao. Te bidi dabego te Gibea dabe dali hwįgi pabo bidi dabe tuabo nai sela pelama, te augwaligo hale ebo dwai kolesaga te Israel dabe dali yali sę te wei ponaibao,” augwaligo te po wai.
JDG 20:11 Megi da te Israel bidi tigidali te hani deli tiwai sisinama, tama augwaligo homu kolesaga me te deli elaluyu, te augwaligo te Gibea hanuba hwįgi painu yalio.
JDG 20:12 Tialima, tigidali Israel hanigo te bidi dabe tagala palama, te Benjamingo hanibolo wagi pomainu yali, “Magi baso e te tiwai dwai kolesaga dagego yaliwe?
JDG 20:13 Tama tialima, megi da dagego te dwai kolesaga yali Gibea bidi dabe selasa asao, te dago augwali ela munama, tama te Israelde dwai kolesaga elaluali te sela sąwaibao,” wali. Tiali goli te Benjamingo hanigo te Israel dabe gasa bidi dabego wagi pali po te sela sąwani.
JDG 20:14 Tama te Benjamingo hani tigidaligo te augwa hanu dabe tagalama, tama te Gibea hanuba sisinagasali, te Israel dabe dali hwįainogo yali.
JDG 20:15 Te sogode augwaligo te tigidali hanude bidalubo bidi dabe sisinama te 26,000 bidi pedelai. Te bidi dabego te bainat hwągo hwįbo koneani bidi. Tama te Gibeago digi te pobase nogogo hwįbo bidi te 700 bidi elaluali. Augwaligo te kibu waligo nigai te masigi enebo naigo hwįbo mu koneani, tama augwaligo enebo masigi te daiba mu sabalu ebo dao.
JDG 20:17 Tama te Israel dabego te hwįabo bidi dabe te 400,000 bidi sisinani, te augwaligo te bainat hwągo hwįbo dao. Tama augwaligo te namba nedali te Benjamingo hani dabe dali me nedebeo.
JDG 20:18 Megi da, te Israel dabe te lotu wabo pesage te Betelba pelama, tama augwaligo te Genuai Bidiba hanalu wai, “Te da mena hani bolo te hasia pelama, te Benjamingo hani dabe dali hwįgi paibawe?” Tama Genuai Bidigo te po wali, “Te Juda hani bolo polasa pomainao,” wali.
JDG 20:19 Tama tialima, te Israel dabego ami bidi dabe te kigamu mu hogodama, tama te Gibea hanu pąba sisinigi pelama, tama augwa osogo bidabo pesage tede nigilali.
JDG 20:20 Augwaligo te Benjamingo hani dali hwįgi pabo ami bidi dabe wasilama sisi elaluali.
JDG 20:21 Tama te Benjamingo hani dabe te hanu tagalama, tama aselama, hwįagasalio. Te giliga dega sigulusiąbadi tama te Benjamingo hani bagego te Israel ami bidi dabe te bidi sese umabo 22,000 bidi ela muanio.
JDG 20:22 Tama te Israel bidi te lotu wabo pesageba ma geasa pelama, tama augwaligo te Genuai Bidiba gela udubadi, te giliga dega sigulali. Augwaligo agaba hanalu wali, “Te dago dena ama dede te Benjamingo hani dabe dali ma hwįgowe, ma meni yaibawe?” Tama Genuai Bidigo augwaliba te po walali, “Dagego te augwali dali ma hwįgi pao,” wai. Tama tibaso, te Israel dabe te bomo ma selama, tama augwaligo te hwįgi pabo ami bidi dabe te hasia sogo te wasilali pesageba ma pelama, te ami bidi dabe ma wasilai dao.
JDG 20:24 Tialima, te Israel dabego te Benjamingo hani dali te si sogo ma hwįgi palio.
JDG 20:25 Tama te Benjamingo hani dabego me te sogo Gibea hanu tagalama, tama te Israel dabe dali hwįagasali. Te sogo te Benjamingo hani ami bidi dabego te Israel dabe hwįbo sę koneani ami te bidi sese umabo te 18,000 bidi ela muani.
JDG 20:26 Tama te Israel bage dabe tigidali te Betelba ma pelama, tama augwaligo te Genuai Bidiba gela wagi pai. Augwali te Genuai Bidigo gedude dualaludubadi, te giliga dega sigulama, tama augwaligo te nai me wę me munu me tusiąwai. Tama augwaligo te siago domainu te tigidali siaba ulubo ofa te Genuai Bidiba homu deli elama, te tama ofa yalio.
JDG 20:27 Te Dąų Wali Bomai Po halobage te sogo te Betelde munaluali, tama Finias, te Eleasargo ogwa, te Arongo ogwago, te tonalubo sę yai. Tama te Israel dabego Genuai Bidiba te tiwai po hanalu wali, “Te dago dena ama dabe te Benjamingo hani dabe dali ma hwįgi paibawe, ma dago tagalagawe?” Tama Genuai Bidigo te po wali, “Dage piąo. Do da, eno dage tau selama, tama dagego te augwali aiyaba elaluaibao,” te po wai.
JDG 20:29 Tama tibaso, te Israel dabego te Gibea hanu bagulabo bidi meba tagala palama, tama augwali teba geme duala sigi pai.
JDG 20:30 Tama te sela sogo wabo side augwali pelama, te Benjamingo hani bage dali hwįgi pai. Augwa te poloba yali gilama te ami bidi dabe te Gibea hanu pąde wasilai.
JDG 20:31 Te Benjamingo hani dabe te hwįagasu asobode tama te Israel dabego augwali te hanu digi kekasa soali. Tialima, te Benjamin dabego te polasa yali tiwai gilama yai, tama te Betelba pabo sunumide te bidi meba elibo sę ela peyu, tama te Gibeaba pabo sunumide bidi elala pelama, tama te bulu dabede te bidi elali. Tama augwaligo te Israel bidi dabe elala pali, te bidi sese deli olama, nogo si, te 30 bidi naga elali.
JDG 20:32 Tama te Benjamingo hani bagego te tama po wali, “Te wiegi yai da. Dago augwali aiyaba ma elaluali, te polasa yali tiwai gilama yali,” wali. Tiali goli, te Israel bidi dabego te po wai, “Ae, wi pinao, te dago augwali te kekasa peyu, te genuai sunumi te hanu taga soyu digibulu soainao.”
JDG 20:33 Tama tigidali Israel ami bidi dabe ma begasa pelama, tama augwali te Baltamar bulude sisinama bidali. Tama augwali bage meba te augwali te hanu bagulama, te geme dualalu, te Gibea ola be masigi elalubo madi te giliga dega sigulubo pedai badu bidali ami bidi dabe, te augwali polo tama te geme dualaluali pesage tagalama, tama haninama pedelai. Te hwįbo bomo ebo te Israel wiegi yai bidi dabe te augwaligo te hwįmainu sa muani bidi, te bidi sese umabo mu, te 10,000 bidi tama pedelali. Tama augwaligo hwįbo bomo mu yali. Tiali goli, te Benjamingo hani dabego te Israel dabego augwali dolabo te me konebeo.
JDG 20:35 Megi da tama te Genuai Bidigo augwali tau selama, tama augwaligo te Benjamingo hani bage dabe te aiyaba elaluali. Tama te sogode te Israel dabego te augwaligo ami bidi dabe te bidi sese umabo mu, te 25,100 bidi ela muani.
JDG 20:36 Tama te Benjamingo hani dabego koneani, te hwįanigo augwali aiyaba elaluali. Te Israel dabe te Benjamin dabede wi pela wali, magi baso meni, augwaligo koneani, te Gibea hanu pąde te gasa Israel bidi dabe geme dualalubo homu yalio.
JDG 20:37 Tama te dualaluali Israel bidi dabe augwali te Gibea hanu tomoba polo udada pelama, tama tigidali we bidi ela muai.
JDG 20:38 Tama te polasa Israel ami bidi hani me te dualaluali ami bidi te po mia selama, te dąį ilibo sę me deli yaibao wali. Te augwaligo te genuai hano te hanudu ugwaba holobo subo sogo da,
JDG 20:39 teda te polasa pali te ami bidi dabe ma begasa asali. Te sogo te hwįbo gagalu, te Benjamingo hani dabego te Israel bidi dabe te 30 bidi ela muani, tama augwaligo te homu yali, “Dago te augwali aiyaba elalu, te polasa tiwai yali da,” homu yalio.
JDG 20:40 Megi da te dąį ilaiba wali te pedelali. Te hanude te hano genuai ugwaba holali. Tama te Benjamin dabego te hanu begelama ma tonobadi, tama augwaligo te hanu tigidali siago dabo hano holobo sualio.
JDG 20:41 Tialima megi da, te tibo sę eyu, wi pali Israel dabe ma begelali. Te Benjamin dabego te tiwai ebo subaso, te augwali wi mu elama, tama augwaligo bomo me sia salio. Augwaligo megi da koneama, te augwali mu dola silaiba homu yalio.
JDG 20:42 Tama augwali te Israel dabede wi peyu, tama augwali te masigi tǫ kemi buluba pelawali. Tiali goli, augwali wi pabo sunumi meni yanio. Te geme dualaluali bidi dabe te hanu tagalama pali, tama te Israel ami bidi hani sigo augwali pobeasa pelama, tama augwali ela silalio.
JDG 20:43 Te Israel dabego te Benjamingo hani dabe pobeasa pelama, tama augwali te Nohade ela muna muna pidubadi, te Gibea pedai badu te giliga pedalubo pedaiba sabolali.
JDG 20:44 Augwaligo te bidi umabo mu te bidi sese 18,000 te Benjamin dabego wiegi yai hwįbo bidi dabe ela muai.
JDG 20:45 Te Benjamin dabego gasa bidi dabe begelama, tama wi peyu, te Rimon tǫ wa pai bulu te ola beba palio. Tama te Israel dabego te bidi meba te umabo te 5,000 bidi dabe te sunumide elala pali. Tama gasa bidi dabe te augwaligo pobeasa pelama, te Gidom hanuba te augwaligo siligi paboba mu usu nigi pali. Augwaligo te umabo bidi sese meba ma elali, te 2,000 bidi ela muani.
JDG 20:46 Tama te sogo ela muani bidi dabe te nedali namba te umabo mu, te 25,000 Benjamin hani bidi tama. Te bidi dabe hwįbo bomai bidi dabe dao.
JDG 20:47 Tiali goli, te 600 bidi begasa pelama, te wi peyu, te ola be masigi elalubo madi te Rimonba wi pai. Tama augwali tede bidaludubadi, te polua me si me si bidai dao.
JDG 20:48 Te Israel augwali ma begasa pelama, tama tigidali bidi elibadi te tigidali kibu me te augwaligo suali doado bage tigidali dolali. Tama augwaligo te Benjamin dabego tigidali hanu dabe te siago ula silalio.
JDG 21:1 Te Israel bidi dabego te Genuai Bidiba te bomai dąų wabo po te Mispa bulude wali. Augwaligo te tama tiwai po wali, “Dago te dena wegi mani te Benjamingo hani dabeba munu me bidi pomainu magobeo,” wai.
JDG 21:2 Tama te bage dabe te Betelba aselama, tama augwali te God gedude dualalubadi te giliga degegi palio. Tama augwa dwai gela mu wali.
JDG 21:3 Tama augwaligo tama po wali, “God, te da Israel hanigo Genuai Bidi, magi baso te sę daba pedalubawe? Tama magi baso dago hani me deli hagawainu ebowe?” Augwaligo te po hanalu wali.
JDG 21:4 Tama do te kigamu mu te we bidi hogodama, tama te pesagede te alta me deli nigai. Tama augwa te tigidali ulama siago domainu ebo ofa me te homu deliba mubo ofa yali.
JDG 21:5 Tama augwa te po wai, “Te da tomode mena we bidi hani te Genuai Bidi geduba eba me sisinagasobewe?” Augwaligo hanalu wali, magi baso meni, augwa bomai pode dąų walu, te tiwai po wai, “Te bidi me hani deli te Genuai Bidiba te Mispa te buluba asisąbaso da, te augwali isimainao,” wai dao, polobadu.
JDG 21:6 Tiali goli, augwaligo te augwa ama dabede homu dene mu yali, te Benjamingo hani. Tama augwa te po wali, “Te megi e sogode te Israel hani me deli hagawainu ebao,” po wai.
JDG 21:7 “Te dago magi elama te bidalubo bidi hani dabe we magowe? Magi baso meni, te dago bomai po te Genuai Bidiba dąų walu wai, te dago dena wegi dabe te augwaliba me magobe po wai dao.” Te po wai.
JDG 21:8 Tialima augwaligo hanalu wali, “Te dago hani mena bage, te Genuai Bidiba te Mispa buluba asobewe?” Tama augwaligo gegali te tiwai, te Jabes Gileat ami hwįbo bidi dabe te sisinani madiba me asisąwai.
JDG 21:9 Te polobadu hasia augwaligo te tigidali we bidi dabe sisinibo po weyu i wali, tiali goli te Jabes Gileat bulu ami bidi dabe me asisąwai.
JDG 21:10 Tama tibaso, te sisinani bidi hani dabego te bomai bidi naga dagalama, te 12,000 bomai bidi te Jabes hanu buluba tagala pali. Tama augwaligo bomai po augwaliba weyu, te tiwai po wali, “Dage te Jabes hanuba pelama, te tigidali bidi elibadi, te tigidali bidigo sali we me te tigidali wai dali ela muao,” wali.
JDG 21:12 Tialima augwali pelama, te tiwai elama, tama augwaligo te Jabes hanu tomode te gesi wegi ogwa we te bidi sese hauwa te 400 gegalio. Te wegi ogwa we dabe te bidi dali pagela pisiąwai wegi dabe dao. Tama augwaligo te wegi ogwa we dabe sela asu, te bidibo pesage Silo te Kenan tǫ pedaiba ma asai.
JDG 21:13 Te bidi dabe sisinagaselama, tama te Benjamingo hani me badu pedai te Rimon ola be masigide bidalubo madiba po ola tolu, tama augwaligo te tiwai po wali, “Megi da, te dago dage dali ma hwįabo homu ebeo. Tama dago homugo te boi pimainao,” wali.
JDG 21:14 Tialima, te Benjamingo hani te ma aselawali. Tama te gasa Israel hanigo te wegi ogwa we augwaliba menama, tama augwaligo sali. Augwaligo te wegi ogwa we dabe augwali te Jabes Gileat hanuba hwįgi pali sogo sai. Tiali goli te gesi we dabego te Benjamingo hani me badu te usu isiąwai.
JDG 21:15 Te Israel dabego homugo te Genuai Bidigo te Israel hani me deli pedelali homu elama, tama augwaligo te Benjamin dabede homu dene mu iduali.
JDG 21:16 Tama tiyu, te Israel polalubo bidi dabego te po wali, “Te Benjamingo hanide te we dabe me bidisiąma elalubao. Te dago mena tama tilama, te gasa bidalubo bidi dabego sabo we gegegowe?
JDG 21:17 Te Benjamin hani bidi dabego we elalusiąbaso, wai ame nogobeo, tama te hani sia saibao. Te dago te augwaligo we sabo sunumi gegemainao.” Te homu yai.
JDG 21:18 “Tiali goli dago te bidi dabe me deligo te dago wegi mani somainu me elamuo.” Augwaligo te tiwai po wali, magi baso meni, te po augwa polobadu wai, “Te bidi me deligo aga wegi te Benjamin hani bidi me delibolo mobaso da, te aga dolomainao,” wai dao.
JDG 21:19 Tama teyu, te polalubo bidi dabego te po wali, “Te Godiba genuai nai ulubo nai daa tubo sogo te megi da pąba yagasalio. Te ulubo nai daa tubo sę te tigidali kibu bede pedalubo, te megi te Silo hanude pedalubao,” wali. Silo te Betel pedai badu te notde elaluali, te Lebona bulu pąde te saut badu, tama te giliga pedalubo badu te bulu Betel me Sekem si pabo sunumi tomode dao.
JDG 21:20 Tama augwaligo te Benjamingo hani dabebolo weyu, te po wali, “Dage pelama, tama te wain gi tomoba geme duala sigi pelama,
JDG 21:21 tama tonaludu yao. Te genuai nai daa tubosi pedalubo sogo tama te Silo hanu gesi wegi ogwa we dabe sabolama, te tęąbi ebaso da, teda dage pedelama, tama dage deli deligo te wegi mani deli deli pageabi yao. Tama duga te we dabe selama, tama duga bulu tǫba ma piagameo.
JDG 21:22 Nosali augwa aya dabe me, ma te augwa abe dabe asu, tama dageba wado po wagasobaso da, teda dagego augwaliba te po waiąo, ‘Te augwali da dali bidimainu yao, magi baso meni, te da deli deligo te hwįani sogo te we me sisąwai. Tama duga digi dabolo me mabe, tama tibaso te duga dąų wali po te me dagego togobeo,’ te tiwai po augwalibolo waiąo.” Te polalubo bidi dabego te po wai.
JDG 21:23 Tama te Benjamingo hani dabego te tama tiali, tigidali deli deligo te danis yagasali wegi dabe selama, tama augwali palio. Tialima, augwali te augwa tǫba ma pelama, tama augwa hanu ma nigilama, tama augwa tede bidaluali.
JDG 21:24 Tama tigidali Israel dabe me te augwa haniba me te augwa deli hani sibiba ma pelama, te augwa tǫ pedai tigidaliba pelama bidada palio.
JDG 21:25 Tama te sogo te Israel dabe augwa king bidi meni yai. Tama tiyu, tigidali we bidi deli deligo te augwa homugo digi te mena mena sę ela peyu bidaluali.
RUT 1:1 Tama te tobolu bidi dabego te Israel dabe augwali tonalubo sogo, tama augwaligo te augwali tonaluabo tuni bidi king me deli nigilisiąbadi, tama genuai nasi te tǫba pedelai. Tama te Betlehem hanu bidi me deli, aga te Juda hani me deli dao, aga pelama, te Moap tǫ pedaiba kibu be meba bidigi palio, aga augwaligo tǫde bidai. Agai te tǫ abeliyu mone me sabeo. Te bidi aga we dali, aga ogwa si dali pai.
RUT 1:2 Te bidi aga nogi Elimelek, tama aga we nogi Naomi. Aga ogwa si nogi e dao, Malon me Kilion. Augwali te Efrata hani, tama te hanigo bulu te Betlehem, te genuai tǫ hani Juda. Tama augwali pelama, te Moap tǫ pedaiba bidigi palio.
RUT 1:3 Tama augwali te Moap tǫ pedaide bidali sogo, te bidi Elimelek isali, tama aga we Naomi naga aga ogwa si dali bidai.
RUT 1:4 Nosali Naomigo ogwa sigo te Moap tǫ we si sai. Te we si nogi e dao, Orpa, me Rut. Augwali we selama, tama augwali te Moap tǫde kibu be nogo si bidali homu yai dao.
RUT 1:5 Tialima, te sogo te Malon de Kilion si me isalio. Tama megi da, te Naomi agaduba deli bididuali, magi baso meni, aga bidi dali, aga ogwa si me, augwali isai dao.
RUT 1:6 Tama Naomi te Moap tǫde bidibadi, te sogo agai e tiwai po odai, Genuai Bidigo wiegi yai sogo aga we bidi Israel augwalibolo menama, tama nai augwaligo gide ma holobo po odalio. Tama Naomi aga auwa we si dali, augwaligo te Moap tǫ taga painogo sisi elalualio.
RUT 1:7 Megi da, augwali hogodolama, te Juda tǫba ma painogo yali, tiali goli augwali tųdu pidu digi,
RUT 1:8 tama Naomigo augwali sibolo te po wai, “Dage si ma geasa pelama, duga si ida dali duga page buluba bidigi pao. Dage sigo wiegi yai kolesaga ena dali me eyu, te isali bidi dabe dali me tialio. Tama eno homugo te tiwai sę naga te Genuai Bidigo wiegi yai sę dage si dali emainao.
RUT 1:9 Tama eno homugo te Genuai Bidigo dage si tau sobaso, tama dage sigo bidi me gegebaso, tama dage si bidigo ma selama, tama dage si bugagia ma bidaibao,” te po wai. Naomigo te we sibolo dage si tao wali, tiali goli, te we si dwai gela mu walio,
RUT 1:10 tama te we sigo e tiwai po te Naomi dali wai, “Menio, dago nage taga pogobeo. Da tigidali nago hani bidibo madi pinao,” wai.
RUT 1:11 Tiali goli, Naomigo te po wai, “Eno auwa we o, te dage si ma geasa pao. Magi baso dage si ena dali painogowe? Dage sigo homugo eno ogwa meba ma ame nenama, dage si ma somainogo homu eyuwe? Menio.
RUT 1:12 Ena mosi dabe yalio. Ena bidigo selama, wai ma ame nabo usu me egobeo. Duga si buluba ma geasa pao. Ma, ena megi hulide naga bidigo selama, tama ena haliga elama, tama wai meba ame nobaso da,
RUT 1:13 teda dage si augwaligo somainogo tonalubo usu me egobeo. Teda dage si gasa bidi dali pabo homu yaibao. Dage sigo tonalubo usu me egobeo. Menio! Genuai Bidigo ena dolama, tama eno dage homu dene ebao, magi baso meni, duga si bidi isai digi, tama dage si olo naga bidibao,” Naomigo te po wai.
RUT 1:14 Agai po ola silibo si, tama Rut de Orpa augwali si gela ma wabo sę yalio. Nosali Orpago Naomi dali nage tao olama, tama aga taga palio. Tiali goli, Rut aga Naomi dali bidainogo homu yalio.
RUT 1:15 Tama Naomigo Rutbolo te po wai, “Suao! Naga we ama aga haniba me aga wąįgo godiba te geasa pobao. Nage aga dali pao,” wali.
RUT 1:16 Tiali goli, Rutgo te po wai, “Nago enabolo nage taga pabo po wagio, tama nago ena nage dali pabo te geligio. Tigidali bulu nago pabo madi, te ena me ena paibao. Tigidali nage bidibo bulude, te ena me ena tede bidaibao. Nago hani te eno hani mu pedelaibao, te nago God da, te eno God me pedelaibao.
RUT 1:17 Te nago isibo bulude, te ena me isimai yaibao, tama augwaligo ena te bulude pubulumai yaibao. Eno te magi nai me deligo dadi si tomode dąį ilainogo ebo te me gogologobeo. Isibogo naga dadi si tomode pedemainu yaibao. Mu tamao. Ma, eno te po wali te eno wali pisąyu da, teda Godigo enabolo dene genuai mu ilimainogo emainao,” Rutgo te po wai.
RUT 1:18 Naomigo koneani, Rut aga dali painogo bomo mu yali, tibaso agai po me wabeo.
RUT 1:19 Augwali si pidubadi genama, tama Betlehemba sabolali. Augwali si Betlehemba sabolobo si, tialima tede bidali we bidi augwali dwai noma mu sali. Tama te we dabe sibigo te po wai, “E ma te we Naomi dawe? Ma, aga bidi badi, aga ogwa si, te mena bidibowe?”
RUT 1:20 Naomigo po wei ponoyu, te po wai, “Dagego ena nogi te Naomi te tiwai te dwagi yai homu pemene ebo we nogi igio. Menio! God te Tigidali Bomo Elalubo Bidigo enabolo dwai homu dene ilalio. Tama dagego ena nogi te Mara wao, te tiwai te homu sęgę ebo we dao.
RUT 1:21 Magi baso meni, eno e bulu taga pali sogo, eno doado bage hauwa elaluali, tiali goli Genuai Bidigo ena eba ma odasa asali, te eno doado bage tigidali menio. Dagego ena nogi Naomi munu me ma nogi elamu dao. Magi baso meni, God Genuai Bomo Tigidali Elalubo Bidigo ena aiyaba elaluama, tama ena mu dolalio.” Naomigo te po wai.
RUT 1:22 Tialima, e po da te Naomigo Moap tǫ taga soali po pusali, tama Naomi aga Rut dali ma asali, te Moap tǫ we, aga auwa augwali si te Betlehemba sabolali, te bali togobo sogode sabolali.
RUT 2:1 Bidi me deli aga nogi Boas bidai. Aga te genuai bidi, tama aga te Elimelekgo hani bidi, te bidi polobadu Naomigo bidi isai dao.
RUT 2:2 Tialima, megi da, Rut te Moap tǫ we agai Naomibolo te po wai, “Ena te gi dabe meba teba pelama, tama te bidi dabego togolama tagalai elalubo bali te sisinigi paio. Tama te gide sę ebo bidi dabego te po usu da obaso da, teda ena augwali wali pelama, te nai ge bali sisinigi paibao,” wali. Tama Naomigo po wei ponoyu, te po wai, “Te usu da, auwa. Nage pagameo.”
RUT 2:3 Naomigo po ola silama, tama Rut te gi me deliba pelama, tama aga te gide sę ebo bidi dabe augwali wali pelama, tama te olo tulaluai munalubo bali dabe sisinibo sę yai. Aga te mena bidigo giba pali te agai me konebeo. Tiali goli, aga te Boasgo giba dolo pai, te bidi hani me deli te Elimelekgo hani dao.
RUT 2:4 Tama nosali gana, Boas agaduba digi aga te Betlehem hanude bidali tagalama, aga sę ebo bidi dabe augwali pageba sabolama, tama siade da weyu, te po wai, “Eno homugo te Genuai Bidi dage dali bidimainao,” wali. Tama augwaligo po wei ponoyu, te po wai, “Genuai Bidigo wiegi yai sę nagebolo ilimainao.”
RUT 2:5 Tama Boasgo te sę ebo tonalubo bidibolo hanaluyu, te po wai, “Te e gesi wegi we te mena hani dawe?” wali.
RUT 2:6 Te sę ebo bidi dabe tonalubo bidigo po wei ponoyu, te po wai, “Te e we gasa hani, tama Naomi dali asai. Augwali sigo te Moap tǫ tagalama, eba ma asai dao.
RUT 2:7 Agai enabolo te sę ebo bidi dabe wali pelama, te bali sisinigi paio po hanalu wai. Tama agai sę kigamu digi yali, megi tama usu nagasali, tama megi aga toma dwasianu tuyu, te dwasianu bede bidibao,” wali.
RUT 2:8 Agai po siminama, tama Boas pelama, Rutbolo te po wai, “Gesi wegi we, nago eno po odao. Nago te gasa bidigo giba pelama, te bali munu me sisinigi pigio. Menio! Te nago bali te e gide naga selama, sisinao. Nage e gide bidiyu, eno gide sę ebo we dabe dali sę eyu, bidao.
RUT 2:9 Tama augwali sę ebo badu bugagia dąį elama, tama nage augwali dali bidao. Eno po te ena sę ebo bidi dabebolo walio, te augwaligo dwai sę munu me nage dali igio, te po wai. Tama me, nage ąį nogone ebaso da, teda nage pelama, eno sę ebo bidi dabego tuai wę te botolde munalubo wę tugi pao,” te po wai.
RUT 2:10 Agai po silibo si, tama Rut aga tobolu tǫba mu aiyaba pǫgųlali, te tiwai agai te Boas aga digi aga homu pemene wiegi yai mu emainu te agabolo ola mani. Tama agai Boasbolo te po wali, “Ena gasa bulu we dao. Magi baso nago homugo ena koneama, tama nago wiegi yai sę enabolo bugagia ilibawe?”
RUT 2:11 Boasgo po wei ponoyu, te po wai, “Eno odali, nago tigidali sę nago naga bidigo ida dali te naga bidi isali sogo yali po odalio. Tama eno koneani, nago naga aya ida me naga bulu taga solama, tama nage te polobadu nago konesiąwai we bidi augwali dali eba bidagasalio. Nago tama tiali po eno odama, tama eno homugo nage tau sainogo ebao.
RUT 2:12 Nage te God, te da Israel hanigo Genuai Bidiba asalio, te agai nage bugagia tonalumainu yaibao. Agai te nago wiegi yai kolesaga tigidali ebo suali, tama eno homugo agai te wiegi yai kolesaga nagebolo wei ponemainu ebao, tama agai te kolesaga me mu nagebolo wei ponono pidubadi gemainu yaibao,” agai te po wai.
RUT 2:13 Tama Rutgo po wei ponoyu, Boas dali te po wai, “Nago wiegi yai kolesaga mu enabolo ilibao! Ena te nago sę ebo we dabe tiwai wiegi yai meni, tiali goli, nago po dua digi mu enabolo wabo, tama tebo pogo ena homu dąų walobao,” wali.
RUT 2:14 Tama nosali te nai tubo sogo, Boasgo Rutbolo te po wai, “Nage eba da dali aselama, tama e nai bret dabe meba selama, tama te gasa tubo nai dali munama, tama meba selama, tama naga tuagameo.” Agai te tiwai po obaso, tama Rut aga te sę ebo bidi dabe augwali dali dulaluali. Tama te bali meba augwaligo te siade ulali, te Boasgo Rutbolo mani. Rut agai te nai tuali, aga tabi usu elama pągąbaso, tama te nai dabe meba munalualio.
RUT 2:15 Tama te nai tula silama, tama Rut aga ma hodaluama, te bali dabe ma sisinanio. Tama Boasgo aga sę ebo bidi dabebolo po weyu, te po wai, “Dagego te duna muani nai pąde te bali dabe meba te Rutgo sisinimainogo emainao. Dagego agai ede me te bali sobadi, aga dali wado po me olamuo.
RUT 2:16 Dagego kęanama muani bali te pisigina pai elalubo te agai meba sisinimainao. Dagego aga guduligio,” Boasgo te po wai.
RUT 2:17 Tama Rut agai te bali sisini pidubadi, tama be pio elama, sia ge iba dulai. Agai te bali dabe sisina silama, tama te bali dabe aga dono wąbigo elama, tama te nai aga ge naga sai. Te naigo sęgę te nogo si, te 10 kilo tiwai dao.
RUT 2:18 Tama Rutgo te nai bali ge selama, aga te hanuba pelama, aga bidigo ida Naomibolo te nai waseligi palio. Tama aga nai habu me badu te siade tusiąwani, agai te nai me sela pelama, agabolo magi pai.
RUT 2:19 Tama Naomigo Rutbolo e tiwai po hanalu wali, “Megi nago e bali menade saiwe? Nage mena bidigo bali gide sę yaiwe? Eno homugo Genuai Bidigo te nage sulama, te nage homu yali bidi dali te agai wiegi yai sę emainogo homu ebao,” wali. Rutgo te po wai, “Eno megi te bidi me deligo gide sę yali, te bidi nogi Boas dao.”
RUT 2:20 Tama Naomigo te po wai, “Eno homugo te bidide Genuai Bidigo wiegi yai sę emainao. Genuai Bidigo po te bidibo ula elalubo bidi dabe dali, me te isali bidi dabe dali, dąų wali po te munu me tagalogobeo.” Tama Naomigo te tiwai po oduai, “Te bidi aga te da deli hani, te da tomode augwaligo te da dali te Elimelekgo tǫ dabe dali tonalubo bidi me deli dao,” wali.
RUT 2:21 Tama tialima, Rutgo te po wai, “Boasgo po me deli enabolo ma wai. Te ena agai sę ebo we dabe dali naga sę yao, te sę silibo sogo usu nagasaibao, te po walio.”
RUT 2:22 Naomigo te po wali, “Te mu dao, auwa. Ma, nage gasa bidi dabego giba sę igi pali da, teda te gi page bidigo sę ebo bidi dabego dwai kolesaga nagebolo yaibao. Ma, nage te Boasgo sę ebo we dabe dali naga sę eyu da, teda nage bugagia bidiyu, magi sę me egobeo,” wali.
RUT 2:23 Tama tibaso, Rut te Boasgo sę ebo we dabe dali sę idubadi, te bali togobo sę me te wit sę dali silalio. Tama Rut aga auwa we dali bidaluai.
RUT 3:1 Tama nosali gana Naomigo Rutbolo te tiwai po wai, “Auwa o, eno bidi me deli gegelama, nage te bidigo selama, bugagia bidimainogo yaibao.
RUT 3:2 Tialima, nago megi odao. Te bidi Boas, nage te agai sę ebo we dabe dali sę yali, aga te dago deli hani mu dao. Megi hulide aga te tubo nai bali wali haluama sela sąbo madi solama, sę igi soaibao.
RUT 3:3 Tama nage wę paugi pelama, tama te denami ebo nai sanda me te wiegi yai ugwa muao. Megi da, nage te aga sę ebo badu pelama, tiali goli, te nage aga pąde me biligio. Tiyu, agai nage tonaluabuo. Tialima, nago aga nai tubo me wę tubo silibo tonaluyu, bidao.
RUT 3:4 Tama aga piainogo ebo sogo, teda, nago aga piabo madi bugagia suao. Nosali aga godege piai digi, nage aga piali ugwa dagalama, aga sągą pąba pigibao. Te tiwai kolesaga nago ebaso, te Boasgo nage tonaluama, te po hanalu waibao. Nosali agai te magi sę yabo po nagebolo waibao,” wali.
RUT 3:5 Tama Naomigo po ola silibo si, teda, Rutgo po wei ponani, “Wiegi yai dao! Te eno nago po tigidali wali paibao,” wali.
RUT 3:6 Tama Rut te bali haluama wali sela sąbo madi pali, tama agai Naomigo wali po tigidali wali palio.
RUT 3:7 Boas aga te nai me wę tula silibo si, te aga homu pemene wiegi yai yalio. Aga gedu sęgę ebaso, tama aga te bali pesage holali madi pąde pigi palio. Tama, nosali Rut aga dua digi naga pelama, tama aga te piali ugwa dagalama, te Boas sągą pąba pigi pali, te aga tonaluabo po agabolo hanalu wainogo tama tialio.
RUT 3:8 Tama huli tomode magi nai me deli Boas aga godege pila mubadi hodolali, tama begelama, agai te we me deli te aga sągą pąde pila mubo suai. Tama Boas aga noma siyu, agai e tiwai po hanalu walio, “Nage dewe?” Rutgo po wei ponoyu, te po wai, “Ena te Rut dao, ena te nago sę ebo we me deli tiwai dao. Nage te Elimelekgo deli hani dao, tama nago ena tau sainu, nago ena sao.”
RUT 3:10 Tama Boasgo te po wai, “Eno homugo wiegi yai sę Genuai Bidigo nagebolo emainogo, nage gesi wegi we dao. Magi baso meni, te kolesaga megi nago yali, te nago enabolo hanalu wali te nage eno somainogo, te nago naga bidigo ida bugagia tonaluali kolesaga te aiyaba elalualio. Te gesi bidi hauwa bidalubo, mebago doado bage hauwa elalubo, mebago doado bage menio, tiali goli, nage augwali me deli dali te augwaligo somainogo pabo homu te nago ebeo. Menio! Nago naga auwa wede homu naga me yai, te nago enabolo hanalu walio.
RUT 3:11 Tigidali e bulude bidibo we bidi augwaligo koneani, nage wiegi yai we dao. Tama nage wi me igio. Te nago enabolo wali sę tigidali te eno yaibao.
RUT 3:12 Tama nago mu po obao. Ena nage polobadu isali bidigo deli hani bidi dao, tama eno nage tonalubo sę megi ebao. Tiali goli, bidi me deli bidibo, aga te tobolu bidi, tama agai te sę ebo dao.
RUT 3:13 Tama megi hulide nage ede bidagameo, tama do kigamu ena te bidi pageba pelama, agai homu kolesaga te eno koneaibao. Ma, agai nage tonaluainogo ebaso da, te usu dao. Tiali goli, aga hagela homu ebaso da, teda eno nage tonaluaibao. Eno po te mu po naga dao. Genuai Bidigo te eno wabo po odobao. Tialima, megi da, nage ma piagameo,” wali.
RUT 3:14 Tama Boasgo po ma weyu, te po wai, “Tiyu, te we bidi augwaligo nage te penani sę ebo we dabego ebo kolesaga tiwai wali painu nage ede sę ebo bidi dabe dali eba piagasali, te homu yabuo.” Tama Rut te Boas sągą pagede ma piai. Tiali goli, be posisiąbadi, tama Rut hodaluama, tama bidi dabego aga me subeo. Tama aga buluba painu yai.
RUT 3:15 Tialima, Boasgo Rutbolo te po wai, “Nago naga name ugwa me deli sela aselama, tǫba muao.” Rutgo tama tiai, tama Boasgo bali te name ugwa ugwaba gelai. Te baligo sęgę te bidi sese, 20 kilo dao. Tama Boasgo te Rutgo bali abibo ugwaba sagolali, tama Rutgo te bali abilama, aga bidibo buluba pali. Tama Boas te hanuba pali, te Rutde te nai dodolainogo yai.
RUT 3:16 Tama Rut te aga bidibo madi sabalobadi, tama aga polobadu isali bidigo ida aga auwa wego agabolo e tiwai po hanalu wali, “Magi yaliwe, auwa?” Tama Rutgo agabolo te Boasgo yali sę po walio.
RUT 3:17 Tama Rutgo te po wai, “Boasgo bali hauwa bugulama, enabolo mani, tama agai te po wai, ‘Eno homugo nage naga auwa we bidibo digi olo pabo te eno homu usu egobeo,’ Boasgo te po enabolo wai.” Rutgo te po wai.
RUT 3:18 Tialima, Naomigo te po wai, “Auwa o, nage dwasianu tonaluyu toma tuao. Boas aga megi olo me bidigobeo. Menio! Agai te sę bolo hasia dodolaibao. Magi sę pedelabo te da sigo me konebe dao,” Naomigo te po wai.
RUT 4:1 Tialima, Boas te hanuba pelama, te po mibo madi pali, tama aga tede dulaluali. Tama gesege gana isiąbadi, te sogo agai suali, te gasa bidi me te Elimelek aga deli hani asobo sualio. Tama Boasgo aga i olama, “Ae, ama, nage aselama, eba duayagasao. Eno dwasianu po elalubao.”
RUT 4:2 Tama Boasgo te bulude bidibo tobolu bidi dabe nogo si bidi selama, tama augwalibolo agai te po wai, “Dage eba aselama, duayagasao.” Tama augwali aselama, duayagasalio.
RUT 4:3 Tama Boasgo aga deli hani bidibolo te po wali, “Naomi te Moap tǫde bidigi pali tagalama, eba ma asalio. Agai homugo bidi me deligo da sigo deli hani bidi Elimelekgo tǫ abelama, tama tonalumainogo homu yai. Tama gasa hani bidigo te tǫ abelai dao.
RUT 4:4 Tama eno te po nagebolo wainogo ebao. Ma, nago te homu ebaso da, teda nago te we Naomi tau siyu, tama te tǫ te tobolu bidi dabe dali te megi e bidalubo bidi gedude te tǫ nago ma dobola siyu, abelao. Te tǫ ma dobola sabo sęde, te nage tobolu bidi dao, te ena da te tudi badu bidi dao. Ma, nage sogobe da homu eyu da, teda nago enabolo te po wao.” Boasgo te po wali. Te bidigo te po wai, “Te eno saibao,” wali.
RUT 4:5 Tialima, Boasgo agabolo te po wai, “Nago te Naomigo tǫ ma dobola saiba homu eba wida, teda nago te Moap bulu we Rut, te nago aga me sao. Tama eyu da, te tǫ te isali bage aga hanigo tǫ ma elaluaibao,” wali.
RUT 4:6 Tiali goli, te bidigo te po wai, “Te mu tama, te tǫ ma dobola sabo sę te eno sę dao. Tiali goli, eno te we Rut selama, tama agai wai ame nobaso, eno te ena doado bage te wai dali, te eno megi elalubo wai dabe dali, augwali tigidaliba dobabo, te tiwai sę ebo te eno hagela ebo dao. Eno te tǫ me ma dobola selama, tonalugobeo. Tama megi te nai te naga nai dao,” Boasbolo te po wai.
RUT 4:7 Te polobadu te Israel bidi dabe augwaligo abelai nai dabe te po dodolainogo da, ma augwaligo nai dobu si yai madi yaibaso da, augwaligo te tiwai kolesaga yai: bidi mego sągą nadoba me deli pedelama, tama gasa bidibolo mawaibao. Te Israel dabe augwaligo po dodolainogo tama iduai dao.
RUT 4:8 Tialima, te bidigo Boasbolo te po wai, “Naga digi naga te tǫ selama, tonaluao,” tama agai sągą nadoba pedelama, Boasbolo manio.
RUT 4:9 Te bidigo sągą nadoba pedelama, Boasbolo mabode, tama Boasgo te tobolu bidi dabebolo, me te we bidi augwalibolo te tiwai po wali, “Dage tigidaligo suao. Hasia Naomigo te Elimelek badi, Kilion me Malon, augwaligo nai tigidali te Naomigo tonalualio. Tiali goli, megi te nai tigidali sabo sę eno yai dao.
RUT 4:10 Tama nai me deli digi elalubo. Eno Rut selama, tama megi te eno we dao. Te Moap bulu we Malongo sai, tama Malon isiyu, aga taga pai. Eno te Rut selama, tama Malongo tǫ te aga hanide dolo elaluaibao. Tama te isali bidi aga page bulu, te aga deli hanigo aga nogi sesemane sogo konealumainogo yaibao. Megi dagego sulama, tama dagego te sę ebo koneani dao,” te po wai.
RUT 4:11 Tama tigidali bidigo te po wai, “Awe, dago sulama, tama dago koneanio.” Tama tobolu bidi dabego te po wai, “Te we megi nago beba asobo we, dago homugo Genuai Bidigo agabolo wiegi yai sę emainogo, tama aga te Resel de Lea si tiwai pedalomainogo, te Israel dabego wai hauwa ame nani we, augwaligo auwa we si dao. Tama naga digi nage te nai hauwa elalubo genuai bidi nigilama, te Efratago hanide te Juda hani me dedeli, tama naga genuai nogi Betlehem hanude bidagameo.
RUT 4:12 Awe, dago homugo Genuai Bidigo wai hauwa dage sibolo momainogo elama, tama nago te Peresgo hani tiwai pedalomai yaibao, aga te Juda de we Tamar augwali sigo ogwa,” augwaligo te po wali.
RUT 4:13 Tama Boasgo Rut sali, tama Genuai Bidigo wiegi yai sę augwali sibolo yai. Magi baso meni, Boas Rut dali pilama, tama Rut haliga yai. Tama nosali agai ogwa me deli ame nanio.
RUT 4:14 Tama te we dabe augwaligo Naomibolo te po wai, “Dago Genuai Bidi nogi ugwaba sinao! Megi agai ogwa me deli nagebolo manio. Te e wai aga te nago wąį olama, tama aga genuai ebo sogo nage tonaluaibao. Dago homugo aga te Israel hani tomode te genuai nogi somainogo ebao!
RUT 4:15 Awe, agai nage bidibo tau siyu, tama nage mosi dabe ebode bugagia tonalumainogo yaibao. Naga auwago te e wai ame nani da, te we Rutgo nage godolo mu yalio. Agai nage tau sabo sę hauwa yali, tama agai yali sę te ogwa a naga olama, me badu nogo si bidigo yabo sę usu agai yali sęgo te aiyaba elaluai dao,” te we dabe sibigo Naomibolo te po wai.
RUT 4:16 Tialima, Naomigo te Rutgo wai selama, tama te wai aga bugagia tonalualio.
RUT 4:17 Tama te bulude bidali we dabego te po wai, “Rutgo wai ogwa ame nani, te Naomibolo mawai.” Tama augwaligo wai nogi mani, tama aga nogi Obet poai. Tama nosali Obet te Jesigo aya pedelali, tama Jesi te Devitgo aya, te aga Israel bagego genuai tuni bidi dao.
RUT 4:18 Te aga Peresgo hanide gagalama, te Devitgo haniba dąį tama igi palio: Peres te Hesrongo aya, tama Hesron te Ramgo aya, tama Ram te Aminadapgo aya, tama Aminadap te Nasongo aya, tama Nason te Salmongo aya dao. Salmon te Boasgo aya, tama Boasgo ogwa Obet, tama Obetgo ogwa Jesi, tama Jesi te Devitgo aya dao. Te tama dao.
1SA 1:1 Te Israel bidi me deli bidali, te aga nogi Elkana. Aga te Efraim hani bidi, tama aga te Rama hanude bidali, te Efraimgo bulu du bage bulude. Elkana te Jerohamgo ogwa, tama Jeroham te Elihugo ogwa da, tama Elihu te Tohugo ogwa, tama Tohu te Sufgo ogwa dao.
1SA 1:2 Elkanago we si sai, te we si nogi Hana me Penina. Peninago wai meba ame nani, tiali goli Hanago wai me ame nabeo.
1SA 1:3 Te tigidali kibu be te deli sogo naga te Elkana te aga bidibo hanu tagalama, tama te Silo buluba pelama, te Tigidali Bomo Elalubo Genuai Bidibolo te lotu po wainu, te ofa dabe igi pali. Hopni dali Finias si, te Eligo ogwa si, te Genuai Bidiba pris sę ebo bidi si te bulude bidali.
1SA 1:4 Tigidali sogo Elkanago ofa eyu, agai te ofa ebo kibu sipsip mi te hauwa dobaba pelama, tama te pedai deli deli te Penina me aga wai dabe deli delibolo me mayu yali.
1SA 1:5 Elkanago te Hana godolo mu yali, tiali goli Elkanago te ofa ebo mi agabolo te genuai pedai me mabeo. Menio. Agai te mi pedai deli naga mani. Magi baso meni, Godigo te Hanago haliga paliama, tama aga wai me ame nabeo.
1SA 1:6 Tama Peninago homugo te Genuai Bidigo te Hana haliga paliali homu yali, tama agai te Hanabolo te posobo po me hale ebo po te Hanabolo wali, te Hana haliga sęgę ilibo sę yai.
1SA 1:7 Te hauwa kibu bede Peninago te tobage kolesaga te Hana dali yali. Tigidali sogo augwali te Genuai Bidigo beba pabo sogode, Peninago te Hanaba posobo po obaso, tama Hana aga te pode homude dwai dene ebaso, tama gela weyu yali, tama tiyu, aga nai tusiąma, nai gisiliyu yai.
1SA 1:8 Tama Elkanago agabolo te tobage po hanalu wali, “Hana, magi baso nage gela obawe? Magi baso te nage nai tusiąma ebawe? Tama magi baso nage sesemane sogo haliga sęgę elaludubawe? Mu tama, nago te wai me ame nabeo. Tiali goli, eno homugo nago ena godolo ebo homu mu ebao, tama nago te wai ogwa nogo si ame nabode te homu tagalama, te nago homugo ena te nago polalubo bidi bidimainu te homu ebo dao,” wali.
1SA 1:9 Me sogo deli sogo augwali te Silode bidalu, tama augwa nai tula silibo si, tialima Hana hogodasa palima, te Genuai Bidiba ofa maiabo name ugwa be pąba doligi pali. Te sogo te pris bidi Eli te aga duabo sia saide dulalubadi, te Genuai Bidigo be obo bagulali tomoba pabo sunumi pąde dao.
1SA 1:10 Hana aga te homu dwai dene mu ebaso, tama gela udubadi genama, tama Genuai Bidiba gedu haluasa po walio.
1SA 1:11 Tama Hanago bomai po me deli te Genuai Bidiba dąų weyu, te tiwai po wai, “Genuai Bidio, nago tigidali bomo elalubo. Eno homugo nago ena sumainu homu ebao, nago sę ebo we dao. Eno te elalubo homu sęgę ebo sulama, tama ena homu kone palao. Te nago ena homu kone palobo te munu me tagalamuo. Te nago ena te wai ogwa me deli mobaso da, teda eno aga te nageba mayu, te aga nago sę bidi bididubadi, te aga isiboba usu nigi paibao. Tama te dąį nigiliyu, te augwaligo aga tobolu nisi munu me togogobeo,” tama po wali.
1SA 1:12 Hanago bobage sogo mu gedu haluasa po te Genuai Bidiba wali, tama Eligo te Hanago pedauwali memenege ebo sę suali.
1SA 1:13 Hanago homude naga te gedu haluasa po obadi, tama Eligo suali, te agai po wainu pedauwali mobodo ebo kolesaga tiwai ebo suali, tiali goli agai te Hanago po wabo me odobe. Tama Eligo homugo te Hana te polobo homu ebaso,
1SA 1:14 tama agabolo te tiwai po wali, “Nisu sogo nage te polobo homu ebo kolesaga tagalaibawe? Nago te e be tagalama, pao. Te nago polobo homu ebo kolesaga silibo si, te nage ma asagameo,” wali.
1SA 1:15 Tama Hanago po wei ponoyu, te tiwai po wali, “Genuai bidi, te ena me polobeo. Ena te wain me bia wę me tubeo. Mu menio. Eno haligade sęgę mu dwai ebaso, tama eno gedu haluasa po weyu, tama eno sęgę te Genuai Bidiba pusubao.
1SA 1:16 Nago homugo ena te dwai we me deli da, te tiwai homu me elamuo. Menio. Eno homude dwai homu mu eyu, te eno homu dolobo homu ebao. Tama eno gedu haluasa po weyu, te tiwai kolesaga ebo nago suali,” Hanago te po wali.
1SA 1:17 Tialima, Eligo te po odama, tama agabolo te po wali, “Tagalao, nage homu nagame elama, tama nage pao. Tama Israel dena Godigo nagebolo nago te hanalubo nai mawaibao.”
1SA 1:18 Tama Hanago Elibolo te tiwai po wali, “Genuai bidio, eno homugo nago dwagi yai haliga sesemane sogo enabolo yao.” Tialima, agai po ola silama, tama palio. Tama aga nai tulama, tama nosali aga homu sęgę ma ebeo.
1SA 1:19 Tialima, Elkana aga we wai puluba dali te Silo bulude tede hulide pilama, tama kigamu mu augwali hogodama, tama Genuai Bidiba lotu po wali. Augwa te lotu po ola silama, tialima te augwali te augwa bulu te Rama teba ma pai. Nosali Genuai Bidigo te Hanago gedu haluasa po wali te homu kone palama, tama te Hanago hanalu wali po tiwai gilama te wali palio.
1SA 1:20 Tama te Hana haliga elama, tama nosali agai te wai ogwa ame nani. Tama agai te po wai, “Eno Genuai Bidiba hanalu, te wai ena mao obaso, mawai. Tama teyu, eno aga nogi Samuel poali.”
1SA 1:21 Te tudi badu nosali, Elkana aga we wai puluba dali te Siloba ma pelama, te augwa Genuai Bidiba te tigidali kibu bede te ofa igi pabo tiwai ma igi pali, tama me te agai dąų walali bomai po me deli te usu nainogo homu yai.
1SA 1:22 Tiali goli, Hana te augwali dali me pabeo. Agai Elkanabolo te tiwai po wai, “Te wai dwasianu genuai gana elama, te ame tuali tagalubo side, teda aga eno te Genuai Bidiba selasa paibao. Tama aga te Genuai Bidigo bede sesemane sogo bidaibao,” wali.
1SA 1:23 Tialima, Elkanago Hanabolo te po wali, “Te nago homugo te tiwai ebo wiegi yai da homu ebaso da, teda nage te bulude bidiyu, tama te waigo ame tubo tagalubo si usu nao. Tama Genuai Bidigo te nago dąų walali po te mu pedelama, te agai wali po tiwai gilama emainao,” wali. Tama tiyu, Hana te bulude bidama, tama aga wai bugagia tonaluai.
1SA 1:24 Nosali te waigo ame tuali tagalubo side, teda Hanago te wai Genuai Bidiba sela pali. Tama agai te tiwai ofa me sela pali, te bulmakau omai sela, me te sęgę nogo si elalubo plaua, te meme waligo nigai beg me deli, tama tede te augwaligo wain ąį buai elaluali. Samuel te dwasianu ogwa pedalubadi, tama aga idago aga te Genuai Bidigo be te Silo buluba sela pali.
1SA 1:25 Augwali sabolama da, teda augwaligo te bulmakau me deli bolo hasia elama, tama nosali augwaligo te wai Samuel te Eli bidibo madiba sela pali.
1SA 1:26 Tama Hanago Elibolo te tiwai po wai, “Genuai bidio, nago ena homu kone palalubawe, ma meniwe? Mu tama, ena te we te ede polobadu dolalu, te Genuai Bidiba gedu haluasa po wali we dao.
1SA 1:27 Eno te Genuai Bidiba hanalu, te enabolo wai me deli mao wali, tama agai eno gedu haluasa po wabo odama, tama e wai te enabolo mawai.
1SA 1:28 Tama tibaso, megi eno aga te Genuai Bidiba mawainu ebao. Tama agai te Genuai Bidigo sę sesemane sogo yaibao.” Idago te po ola silibo si, teda Samuelgo gesabidi Genuai Bidiba basi gulama, agabolo lotu po wali.
1SA 2:1 Tama Hanago God dali te tiwai po wai, “Genuai Bidi, nago ena wiegi yai homu pemene umabo emainu ilali. Tama nago te genuai nogi enabolo mani, te eno homu wiegi yai pemene mu ebao. Tama eno te ena boi bidi dabede te gisugu dwai mu mobao. God, nago ena tau sali, tama eno haliga bugagia mu ebao.
1SA 2:2 Genuai Bidi, nago kolesaga te gasagi yai tedali mu ebo, tama nage wiegi yai gagawai, tama nage tiwai bidi tobage bidi me deli me elalubeo. Mu menio. Nago tigidali mu aiyaba elaluai. God, nage deligo te da tudi badu pogalu, tama da tau sobao. Te niwai bidi me deligo te nago ebo tiwai gilama me egobeo, te dago God nage naga dao,” wali.
1SA 2:3 “Da we bidigo bugagia koneao, Genuai Bidi aga God te dago ebo sę tigidali koneama, tama agai dago ebo kolesaga dagalubao. Tama tibaso, dage we bidigo duga digi duga nogi ugaba siyu, te po dagą wabo, dage pedauwali pania selama, tama te tobage po wabo tagaliąo.
1SA 2:4 Godigo te bomai ami boi bidi dabego enesigi togolama, tama augwaligo wąbi hwįabo bomo munu me egobeo. Tiali goli, te bomo meni yai bidi dabe, agai te augwali bomo ilibo dao.
1SA 2:5 Te polobadu nai hauwa elaluali bidi dabe, megi Godigo augwali nasi ilama, tama augwa sę emainu elama, tama augwa te nai naga siyu, te augwa mone sabo tiwai gilama emainao. Tama polobadu te nai menia siyu, nasi elama bidali we bidi, megi te Godigo nai hauwa augwaliba menama, tama augwali nasi me egobeo. Tama te polobadu wai ame nesiąwani we dabe, megi te Godigo augwali tau selama, tama augwaligo wai te a naga olama, nogo me si, te tama ame nabo usu yaibao. Tama te polobadu wai hauwa ame nani we, megi te wai dabe hagala silama, tama Godigo te we agaduba deli digi hobedagia bidimainu ilibo dao,” wali.
1SA 2:6 “Genuai Bidigo te bidi ela munama, tama te isai bidi dabe te bidibo ula mawaibao. Tama agai te we bidi dabe te isai bidi dabego pesageba tagala palama, tama agai te isai bidi dabe selama, tama augwali ma odasa aselama, tama augwa te bidibo ula ma selama, bidibo dao.
1SA 2:7 Tama Genuai Bidigo te we bidi meba te doado bage meni yai bidi pedalumainu ilama, tama agai te meba bidi dabe te doado bage mone hauwa elalumainu ilaibao. Agai te meba aiyaba elaluama, tama te mebabolo te genuai nogi mayu ebo dao.
1SA 2:8 Agai te magi doado bage meniama, te sǫą pabo we bidi dabe tau selama, tama augwali bugagia bidaibao. Tama agai augwali te augwa bulu tǫde te genuai pedelama, bidimainu ilama, tama te we bidigo augwaliba genuai nogi mawaibao. Agai te tama tebo, magi baso meni, te e tǫ tolalubo bomai nai dabe augwali te Genuai Bidigo digi nigilai nai dabe, tama aga digi te nai dabe daide ugwadu te tǫ sese nigilama elalubo dao,” wali.
1SA 2:9 “Genuai Bidigo te aga wali mu pabo we bidi dabe tonalueibao. Tiali goli, te dwai kolesaga ebo we bidi dabe agai augwali dolaibao, tama augwali te bulu dwai mu hulia sai madi hagawaibao. Te genuai bomo mu elalubo bidi me te tagalao, aga te aga bomode digi te bugagia me bidigobeo.
1SA 2:10 Genuai Bidigo te aga boi bidi dabe te dwai mu ilama, dolaibao. Aga te dagalude bidu, te agai augwaliba bomo elama, te dagalude be kulukulu wabo tiwai gilama yaibao. Tama Genuai Bidigo tigidali tǫde we bidi te agai po tųba sisinama, tama augwa yali kolesagade dagalaibao. Tama agai te sa muyu nigilali king bidiba bomo menama, tama te king bidigo genuai nogi te tigidali bidi hanide elalueibao,” wali.
1SA 2:11 Hanago te tama gedu haluasa po olama, tama aga ma pali. Tiali goli, te gesi ogwa bidi Samuel te Silo bulude bidama, tama te Genuai Bidigo sę yali, tama te pris Eligo aga tonalubadi te sę yai.
1SA 2:12 Hopni me Finias, te Eligo ogwa si, te bidi dwai si mu. Augwali si te pris bidai, tiali goli, augwali sigo te tiwai homu yai, Genuai Bidi te olo nai tobage tiwai da homu elama, tama augwali sigo subigila sę yali.
1SA 2:13 Tama augwali sigo te ofa ebo nai dage te pris dabego sela tumainu ebo, te bomai po wali me pabeo. Menio, te bidi me deligo te ofa ebo nai ulubo sę idubadi, teda te pris bidi sigo te augwa si sę ebo bidi tagala palama, te ulubo nai mi sagasai. Teda te ofa nai ula mabo sę bidigo te sipun ną age sela yai tego pusula selama, sela asiyu yai.
1SA 2:14 Tama te sę ebo bidigo te sene tomoba age yai sipun pok enama, tama mena tiwai kibu mi dage tede pusulasa holobaso da, teda agai te mi te pris si pageba selasa pali. Augwaligo te tobage dwai kolesaga te tigidali Israel we bidi dabe dali yali, te augwaligo ofa te Siloba igi pabo sogo tiali.
1SA 2:15 Tama me sogo te prisgo sę ebo bidigo te ofa yabo kibu ili sela sąsiama, te siaba ulusiąbadi, te bidi asai. Tama agai te ofa ebo bidibolo te po wai, “Te prisgo kibu mi meba enabolo mao, wai. Aga te siade ulainu, magi baso meni, agai dagego te sospen senede ulubo mi tubo te aga hagela homu ebo, wali. Dage aga te disąwai gesi mi mao, wai dao,” te po wai.
1SA 2:16 Tama te ofa yainu ebo bidigo agai te po obaso, “Te eno ofa ebo bomai po wali pelama, te ili te siade bolo ulama, tama nosali te nago mena tiwai mi godolo homu ebaso, sagameo,” po wali. Tiali goli, te prisgo sę ebo bidigo te po wai, “Woo, menio, megi tama nago ena mao,” po wai. “Te nago mabo hagela homu ebaso da, teda ena digi saibao,” wai.
1SA 2:17 Te Eligo ogwa sigo te tiwai dwai kolesaga dabe te we bidi dabego te Genuai Bidiba ofa yainu sesali nai dabede tama tiai, tama Genuai Bidigo suali, augwali sigo sęgę te dwai nai mu gagawai yai.
1SA 2:18 Augwali sigo te tobage dwai sę tama yali, tiali goli, te sogo me te gesi ogwa wai Samuelgo te Genuai Bidigo sę eyu, tama agai te prisgo sę ebo ugwa gudama, te sę yai.
1SA 2:19 Te tigidali kibu bede te aga idago te aga bulubo ugwa me deli nigiyu yai. Tama te tigidali kibu bede te aga ida de aya sigo te ofa yagasu asobo sogo, te idago te holobo ugwa sela aselama, te Samuelbolo magasu yai dao.
1SA 2:20 Tama aga aya de ida si te Eli bidiboba pelama, tama agai te Godiba hanalu, te Godigo augwali siba wiegi yai bugagia ilao po wai. Agai Elkanabolo te tiwai po weyu yai, “Te eno homugo te Genuai Bidigo nago te wego wai meba ma ame nomainu ilaibao, nago te Genuai Bidiba mani ogwa hasegelimainu yaibao.” Eligo te po ola silibo si, teda augwa si buluba ma soyu yai dao.
1SA 2:21 Tialima, Genuai Bidigo Hana bugagia wiegi yai ilama, tama nosali Hanago ogwa sela me wegi si tama ame nani. Tama Samuel te Godigo sę idubadi, tama genuai dwasianu yali.
1SA 2:22 Te sogo te Eli monu dabe mu yai bidali. Tama hauwa sogo Eligo odali, te aga ogwa sigo dwai sę tigidali te Israel dabe dali ebo po wai. Tama me agai te tiwai po odali, augwali sigo te Godigo ugwa be sunumi tonalu sę ebo we dabe dali pibo po wai.
1SA 2:23 Tama agai te po augwali sibolo wai, “Magi baso dage sigo te tobage dwai kolesaga ebo dawe? Tigidali we bidigo te dage sigo ebo kolesaga po te enabolo wagasobao.
1SA 2:24 Te dage si eno wai, tama dage sigo te tebo kolesaga tagaliąo. Te Genuai Bidigo hani bagego te dage sigo ebo kolesaga po mimi bilibao, tama te dwai sę mu dao.
1SA 2:25 Te bidi me deligo gasa bidi dali dwai sę me ebaso da, teda Godigo te po isimainu elama, tama te sę dodoloyu ebo dao. Tiali goli, bidigo te Godiba dwai sę yali da, te niwai bidi te tomode dolalu, tama te dwai sę dodolaibawe?” Eligo augwali sibolo te tiwai po wali, tiali goli, te Genuai Bidigo augwali si ela muabo homu elama, tama agai augwali sigo tobolu te dila palama, tama augwali sigo te augwa ayago po me odobeo.
1SA 2:26 Te sogo te Samuel te genuai bidi dwasianu pedalubo gana ebaso, tama God dali te bidi dabego me aga godolo homu yali, tama augwaligo homu me te bomai homu mu igulali.
1SA 2:27 Nosali Genuai Bidi agai po te profet bidi me delibolo menama, tama aga tagala palama, te Elibolo wagasali. Genuai Bidigo po te tiwai po wai, “Te nago wąį nǫų Aron, te aga we wai hani sibi dali, te Isip king bidigo olo sę ebo bidi bidibadi, tama ena augwaliba pedelama, tama augwaliba te eno homude elalubo kolesagade po walai dao.
1SA 2:28 Tama dage te Israel hani tigidali tomode, eno te Arongo hani deli selama, tama augwali eno pris bidi hani nigilali. Tama augwaligo te altade te denami ilibo pauda hano ilibo sę emainu yali, tama ena pąba asobo sogo te prisgo gudubo ugwa gudama, asu yao wali. Tama eno po weyu, augwa te Israel dabego te ofa yainu altaba selasa asobo nai dage te augwa tuao po wai dao.
1SA 2:29 Tama tiali, te magi baso te dagego te ofa dabe eno te Israel dabebolo yao wali sę te magi baso dolobawe? Te nago ogwa sigo te tigidali ofa ebo nai wiegi yai te eno hani bidi dabego enabolo magasobo nai, te augwali sigo tulama, tama augwali si tigi nisalio. Tama nago augwali sigo te tama temainu yali. Tama te kolesagago nago te augwali si nogi ugwaba siyu, tama eno nogi aiyaba elalubao. Magi baso nago te kolesaga ebo dawe?
1SA 2:30 Ena God, te dage Israel dabego Genuai Bidi, polobadu eno po nago wąį nǫų Aron dali po dąų walali, tama aga hani dali me, te augwali hani sesemane te pris sę iduaibao wai. Tiali goli, megi eno te dąų walali po hasegelaibao. Megi eno te tiwai po obao, te eno nogi ugwaba sabo bidi da, teda eno agaba genuai nogi mawaibao. Tama ena dali hagoma homu ebo bidi da, teda eno aga aiyaba mu elalueibao.”
1SA 2:31 “Bugagia odao. Nosali eno te tigidali gesi bidi hani pris bidi me, te nago hani nosali pedalubo me, te eno aiyaba elaluama, dolaibao, tama nago hanide te bidi me deli bomo elaluyu, te monu dabe yai me bidigobeo.
1SA 2:32 Tama dage dwai noma siyu, tama eno te wiegi yai nai dabe te gasa Israel dabebolo mobaso, pesa yaibao, tama dagego me sogobeo. Tama tigidali sogo nosali te nage hani bidi deli te monu dabe pedelama, me bidigobeo. Mu menio.
1SA 2:33 Tama nosali eno te boi bidi dabe asomainu elama, te nago hani bidi tigidali ela mumainu yaibao. Tama bidi deli naga bididu, te pris sę iduaibao. Tama te tebo sę dabego te nago homu kolesaga dolama, tama nago gedu halua saibao.
1SA 2:34 Tama nosali nago ogwa si, Hopni me Finias, te augwali si te deli sogo bubugade naga isaibao,” wali. “Tama augwali si isibo sogode nago koneaibao, eno te wali po tigidali mu po da homu yaibao.
1SA 2:35 Tiali goli, eno te pris bidi me deli nigilama, tama agai homu enaba mu munama, tama eno homugo emainu ebo sę tigidali te agai yaibao. Tama eno te agai hani dabe te sesemane sogo pris bidada pomainu ilama, tama augwali te eno nigilali king bidi dali sę emainu yaibao.
1SA 2:36 Tama nago hanide niwai bidi me deli bidali da, te pris pageba pelama, tama agabolo gonoyu, te dwasianu mone po me, nai po me hanalu waibao. Tama augwaligo te prisbolo te tiwai po waibao, ‘Te nago da meba te pris sę emainu eyu, te da nai meba somainu yaibawe?’ God Genuai Bidigo te po wai,” te profet bidigo Elibolo te po wali.
1SA 3:1 Te gesi ogwa bidi Samuelgo te Genuai Bidigo sę ebadi, te Eligo aga tonaluali. Te kibu be hauwa bidai madi, tama Genuai Bidigo te Israel dabebolo po hauwa sogo me wasiąwai. Te deli deli sogo naga te aga augwaliba te nade pedalubo tiwai elama, te augwaliba po magasali.
1SA 3:2 Megi da, Eligo gedu doyu, tama pąde aga gedu halua sainu yali. Tialima, me sogo hulide aga te Godigo be habude pila muani,
1SA 3:3 tama Samuel te Godigo Dąų Wali Bomai Po Muani Halobage elalubo madi pila muai. Te pąde be posainu ebadi, tama Godigo bede ula elaluali lam te me ula elaludai,
1SA 3:4 tialima, Genuai Bidigo Samuelba i wali. Tama Samuelgo te po wai, “Awe, ena bidibao,” wai.
1SA 3:5 Tama aga hodaluama, te Eli bidiboba udada pelama, tama te po wai, “Eno odali, nago ena i wabo, tibaso ena asali,” wali. Tiali goli, Eligo po wei ponoyu, te po wali, “Eno nage i me wabeo. Nage pelama, te naga betba ma pigi pao.” Tialima, Samuel te aga betba ma solama, pigi soali,
1SA 3:6 tama nosali Genuai Bidigo aga i ma wali, tama Samuel te Eli pila muboba hodasa pelama, tama te po wai, “Nago ena i obaso, tama ena asalio.” Tiali goli, Eligo te po wali, “Ogwa, eno nage i me wabeo. Nage te naga betba pelama, ma pigi pao.”
1SA 3:7 Samuelgo te Genuai Bidi bugagia konebe, magi baso meni, Genuai Bidigo polobadu aga dali po me misąwai dao.
1SA 3:8 Tialima, nosali Genuai Bidigo Samuel te sela sogo weyu i wali, tama Samuel Eli bidiboba hogodasa pelama, te po wai, “Nago ena i obaso, ena asalio,” wali. Megi da, Eligo koneani, Genuai Bidigo naga te Samuel i obao walio.
1SA 3:9 Tama Eligo agabolo wali, “Nage te betba ma pigi pao, tama agai nage i ma obaso da, teda nago te tiwai po wao, ‘Genuai Bidi, nago enabolo po walao. Ena nago sę bidi, te eno nago poba olo munama, odalubao.’ Nago te po wao,” Eligo te po wai. Tialima, Samuelgo Eligo wali po odama, tama aga te betba ma pigi pali.
1SA 3:10 Tama nosali Genuai Bidi ma dolagaselama, tama agaba i weyu, te polobadu wali po tiwai gilama wali, “Samuel! Samuel!” Tama Samuelgo te po wali, “Nago po megi da wao, ena nago sę bidi tama eno nago po waboba olo muai elalubao,” wali.
1SA 3:11 Tama Genuai Bidigo agabolo te tiwai po wali, “Bugagia odao. Te pąde eno te magi sę me deli te Israel dabe tomode yaibao, tama augwaligo te sę yabo po odama, te augwali midigi dwai mu saibao.
1SA 3:12 Tama te sogo te eno te tigidali dwai sę te Eligo hani sibi dabe dali wali po gilama te sę yaibao.
1SA 3:13 Eno homugo nago te tiwai po agabolo walao, te eno agai hani sibi dabede te yaibao wali sę elama, tama augwali mu silaibao, magi baso meni, te agai ogwa sigo dwai po enabolo wali. Tama Eli aga digi augwali sigo te sę ebo kolesaga koneani, tiali goli, agai augwali si te sę ebo hagebeo.
1SA 3:14 Tama teyu, eno te Eligo hani sibibolo te tiwai bomai po wai dao, te kibu elebo ofa ma te gasagi yai ofa ebo sę me deligo te augwaligo dwai sę yali, te munu me sela sągobeo. Mu menio,” wali.
1SA 3:15 Tialima, Samuelgo te po wabo odama, tama aga te betde pila munama, te be posa pali. Tama kigamude Samuel hodaluama, tama Genuai Bidigo be sunumi dagi pali. Tiali goli, Samuelgo te nade subo tiwai yali sę po te Elibolo wabo te aga wi yali.
1SA 3:16 Tiali goli Eligo Samuel i weyu, te tiwai wali, “Samuel, eno ogwa, nage e asao.” Tialima, Samuelgo te po wai, “Awe, ena asobao,” wali.
1SA 3:17 Tama Eligo agabolo hanalu wali, “Genuai Bidigo mena po nagebolo waliwe? Nago ena dali po me deli dualigio. Te nago po me deli dualubaso da, teda Godigo nageba dene momainu mu yaibao,” wali.
1SA 3:18 Tama tibaso, Samuelgo agabolo te Genuai Bidigo wali po tigidali wali, tama agai po deli te me dualubeo. Mu menio. Eligo odama, tama agai te po wali, “Aga digi te Genuai Bidi dao. Te agai mena sę yainu ebaso da, teda agai te sę ebo dao,” wali.
1SA 3:19 Tama bidu, nosali Samuel genuai bidi pedelama, tama God Genuai Bidi aga dali bidai. Tama teyu, Samuelgo te magi nai me deli pedelaibao po obaso da, teda Genuai Bidigo te Samuelgo wali po gilama te sę pedalu yai.
1SA 3:20 Tama teyu, te Israel tǫ pedai we bidi tigidaligo te tiwai koneani, Genuai Bidigo Samuel te aga profet bidi mu nigilali.
1SA 3:21 Tama te Genuai Bidi te Samuelba te Silo buluba pedelama, tama agabolo te po magasai.
1SA 4:1 Tama Samuelgo te Israel dabebolo te tigidali e sę ebo po obaso, augwaligo agai poba olo bugagia muani. Te sogo te Filistia dabego te Israel dabe dali boi hwįagasu asobaso, tama te Israel dabe hogodama, augwali dali te boi hwįgi pai. Tama te Israel dabe bidabo pesage te bulu Ebeneser te pąde nigilama bidali, tama te Filistia dabe bidabo pesage te hanu Afek pąde nigilama bidai.
1SA 4:2 Tama nosali te Filistia dabego augwa ami bidi dabe wasilama, tama te Israel dabe dali boi hwįani. Te boi genuai mu hodolama, tama te Filistia dabego te Israel dabe aiyaba elaluama, tama te bidi umabo, te bidi sese hauwa, te 4,000 bidi ela muai.
1SA 4:3 Tama te Israel ami bidi dabe te bidibo pesageba ma asobode, te polalubo bidi hetman dabego te po wai, “Magi baso Genuai Bidigo te da Filistia dabego aiyaba elalumainu ilaliwe? Tegoba, polo tama, dago bidi meba te Siloba tagala palama, te Genuai Bidigo Dąų Wali Bomai Po Munalubo Halobage te selasa asomainao. Tama da pelama, hwįgi pabo sogo, te Genuai Bidi da dali pelama, te da tau sobaso, te boi bidi dabego da aiyaba me elalugobeo,” wali.
1SA 4:4 Te polalubo bidi te hetman dabego te po wali silibo side, teda te ami bidi dabego te bidi meba Siloba tagala palama, tama augwaligo te Dąų Wali Bomai Po Munalubo Halobage te Genuai Bidigo Tigidali Bomo Elalubo, te halobage sigi pomainu tagala palai. Te halobagede te ensel bidi noma nigali elalubo, te ugwadu daide elaluai, tama te Genuai Bidi king duabo sia sai tiwai elaluai. Tama augwaligo te halobage sela asobo sogo da, teda te Eligo ogwa si, Hopni me Finias sigo te Dąų Wali Bomai Po Munalubo Halobage sela asobo tonalua asu, te bidi dabe dali asai dao.
1SA 4:5 Augwali te bidibo pesageba sabolama, tama te Israel dabe augwaligo te Dąų Wali Bomai Po Munalubo Halobage sela asobo sulama, tama augwa wiegi yai homu pemene eyu, tama po dagą bomonama wali, tama posolu wabo genuai mu pedelali.
1SA 4:6 Te Filistia dabego te Israel dabego te tiwai i wabo odama, tama augwa te po wai, “Te i wabo te Hibru dabe bidibo pesagede wabo odali. Magi baso te tiwai i dwai wabowe?” Nosali te Filistia dabego te tiwai po odali, te Genuai Bidigo Dąų Wali Bomai Po Munalubo Halobage te augwa bidibo pesageba sela asali po wai,
1SA 4:7 tama teyu, augwali wi elama, te po wai, “Te god meba augwali bidibo pesage tomoba asalio. Tegoba! Megi da, te da mu dolaibao. Polobadu te boi bidi me deligo te tiwai kolesaga da dali me yai menio.
1SA 4:8 Megi da, da mu hagala silaibao. Dego da tau selama, tama te bomai god dabego da dolidali da wabo usu egowe? Te god dabego naga te haniani dwai sę te Isip dabeba tagala palama, tama augwali te wa pai bulude ela muai dao.
1SA 4:9 Tiali goli, tagalao. Da bomo elama dolalu, tama bidi mugo hwįbo tiwai yao. Te tama tisąyu da, teda da te Hibru dabe olo sę ebo bidi pedelaibao, te augwali te da dologode polobadu bidali tiwai gilama yaibao. Tama tidali weyu, dago bomo elama hwįnao!” Te Filistia dabego augwa hasi te po wai.
1SA 4:10 Tialima, te Filistia dabego wąbi bomo elama, mu hwįnama, tama te Israel dabe aiyaba elalubaso, tama Israel dabe augwa buluba wi pepela walio. Te wąbi hwįani side te Filistia dabego te bidi umabo hauwa mu elalio, te e tama, 30,000 bidi tigidali elai dao.
1SA 4:11 Tama augwaligo te Eligo ogwa si me elibadi, tama augwaligo te Dąų Wali Bomai Po Muani Genuai Bidigo Halobage, te me sobadi yai.
1SA 4:12 Te Benjamin hanide ami bidi me deli te hwįani pesage taga soyu, te Siloba udulama, tama te sogo naga te buluba sabolali. Te hwįani sę pedelali sęde te aga haliga sęgę mu ebaso, tama aga gudubo ugwa pisilama, tama tobolude tǫ pialio.
1SA 4:13 Eli te Silode bidu, tama duabo sia saide te sunumi sesegede dulaludai. Aga te Genuai Bidigo Dąų Wali Bomai Po Muani Halobagede homu hauwa elama, homu kone palu bididuai. Tialima, te ami bidi te Siloba sabolama, tama te Israel we bidi te boide aiyaba elaluama, hagawali po pusali. Tama tigidali we bidi wi elama, tama dwai i wabo hwa walio.
1SA 4:14 Te sogo te Eligo kibu be 98 yali elaluali, tama aga gedu tigidali mu halua sai. Tialima, Eligo te we bidigo i hai wabo odama, augwalibolo hanalu wali, “Magi baso dagego tama tiwai i hai obawe?” Tialima, te ami bidi te Eli pageba udulama, tama agabolo te tiwai po wali,
1SA 4:16 “Megi e sogo naga ena te wąbi hwįbo pesagede wi asu, asali.” Tama Eligo agabolo hanalu wali, “Ogwa, magi yaliwe?”
1SA 4:17 Tama te bidigo po wei ponoyu, te tiwai po wai, “Te Filistia dabego da aiyaba elaluama, tama ami bidi dabe hauwa mu elali. Tama da augwalide wi soali. Tama me augwaligo nago ogwa si me elali, Hopni me Finias. Tama augwaligo te Genuai Bidigo Dąų Wali Bomai Po Munalubo Halobage me dobola sai dao,” wali.
1SA 4:18 Eligo te Dąų Wali Bomai Po Muani Halobage te sali po odama, teda aga te dualaluali sia sai tudi badu te Godigo be sunumi pąde tulaluali. Aga monu dabe eyu, te tigi nisai bidai, tama aga te sia tudiba degasa dulu, te aga dogoni mage toga peyu, tama isalio. Agai te Israel dabe tonalubo sę idubadi, te kibu be bidi sese si, 40 kibu be bidai dao.
1SA 4:19 Te sogo Eli aga ogwago we, te Finiasgo we, aga haliga elaluai, tama aga wai ame nabo te pąde yagasali. Tialima, agai te tiwai po odali, te Filistia dabego te Godigo Dąų Wali Bomai Po Muani Halobage sela pali po wali, tama aga wąį monu me aga bidi me, augwali si isali po odai. Tama polo tama, te wai ame nabo dene agaba pedelama, agai te wai ame nani.
1SA 4:20 Te pąde aga isainu, te aga tau sabo we dabego agabolo te tiwai po wali, “Nage wi me igio. Odao, nago ogwa ame nai dao,” wali. Tiali goli, wai aga idago te po odisiąma, tama te wego wali po wei ponobeo.
1SA 4:21 Tiali goli, agai te tiwai po wali, “Te Godigo ula yai bomogo da Israel dabe tagalalio.” Tama isiyu, agai te wai nogi Ikabot poali. Agai homugo te boi bidi dabego te Dąų Wali Bomai Po Muani Halobage sali, me te aga wąį monu, me aga bidi isali, te homu kone palama, tama te tiwai po wai.
1SA 4:22 Tama teyu, agai te po wai, “Te Godigo bomogo da Israel tagalali, magi baso meni, te boi bidi dabego te Godigo Dąų Wali Bomai Po Muani Halobage te salio,” wali.
1SA 5:1 Te Filistia dabego te Godigo Dąų Wali Bomai Po Muani Halobage selama, tama augwa te bulu Ebeneser tagalama, tama te halobage tolasa peyu, te augwa taun hanu me deli, te Asdotba pali.
1SA 5:2 Augwali teba sabolama, tama augwa te halobage tolasa peyu, te augwa tibo god Dagon lotu be tomoba pelama, tama augwali te masigigo nigali Dagon piksa noma pąde muani.
1SA 5:3 Tialima, kigamu mu te nosali side, te Asdot bulu bidi dabe hogodama, tama Dagon piksa noma suali, te tulaluama, gesabidi te tǫba te Godigo Dąų Wali Bomai Po Muani Halobage pąba pogulai elaluali. Tama augwa te Dagon selama, tama aga te muani pesageba ma muai.
1SA 5:4 Tiali goli, hulide augwali pilama, tama kigamu mu hodaluama, augwali te lotu beba pelama, tama augwaligo suai, te Dagon piksa noma te Genuai Bidigo halobage munalubo pąba ma tulaluai elalubo suali. Tama te Dagongo tobolu me nogo dali si alua pelama, tama te be degedu te sunumi pąde munaluali. Tiali goli, te Dagongo tigi me badu te alua pisąma, bugagia munalubo suali.
1SA 5:5 Te pagede naga tama, tama megi da te Filistia pris dabe me, te bidi dabe dali, augwaligo lotu po te Dagonba wali, augwali te Dagongo lotu be te munalubo madi pesage te degedude te Dagon tobolude nogo dali si te tulaluama, munalubo pesagede te augwali me bilisiąwai. Augwaligo te bogo badu naga bilibo dao.
1SA 5:6 Te halobage te Asdotde munaluali sogo, Genuai Bidigo te haniani sę mu te Asdot we bidi dabede eyu ebaso, tama te Asdot pąde bidali we bidi, te agai augwali wi dwai mu ilali. Tama agai augwali tigide te dwai dili keni pedalumainu ilali.
1SA 5:7 Te Asdot bulu bidi dabego te sęgę pedalubo sulama, tama augwa te po wai, “Te Israel dabego Godigo te dabolo, me te dago god Dagonbolo te dwai dene mawai. Tama teyu, dago te Dąų Wali Bomai Po Muani Halobage, te dago bulude munalumainu me elamu dao,” wali.
1SA 5:8 Tama tibaso, augwaligo te Filistia king bidi a nagabolo te po ola toloyu, te hanaluyu, augwali sisinagasao wali. Augwali sisina silibo si, tama te Asdot bulu bidi dabego augwalibolo te po wai, “Dago te Israel dabego halobage magi yaibawe?” Tama te polalubo tobolu bidi dabego te tiwai po wei ponani, “Te Gat taun hanuba sela pao,” wali. Tialima, augwaligo te Gat hanuba tolasa pali, te Filistia dabego gasa hanu dao.
1SA 5:9 Tiali goli, augwaligo te halobage te Gat hanuba sela pali goli, Genuai Bidigo te hanude bidali we bidi dabeba me te dwai dene mobaso, te augwali wi mu ilalio. Tama agai tigidali we bidi augwaliba te dili keni dwai mu pedalumainu elama, tama augwali mu dolalio.
1SA 5:10 Tama tibaso, te Gat hanu bidi dabego te halobage te Filistia dabego gasa hanu me nogi Ekron, teba tolali. Te halobage sabalubo side, te Ekron bulu bidi dabego i weyu, po dagą bomo elama weyu, te tiwai po wai, “Ae, tegobao! Augwaligo da tigidali ela mumainu, tama augwaligo te Israel dabego Godigo te Dąų Wali Bomai Po Munalubo Halobage te sela asalio,” wali.
1SA 5:11 Tama tibaso, augwaligo te Filistia king dabe i olama, asobo side, tama augwaligo te tiwai po te king dabebolo wali, “Dagego te Israel dabego Godigo e Dąų Wali Bomai Po Munalubo Halobage te augwa buluba ma tolao. Tama tibaso da, te agai da me, dago we wai dabe dali, me eligobeo.” Augwaligo te tiwai po wali, magi baso meni, Godigo augwaliba te dene mabo sę umabo eyu, tama hauwa we bidi isai. Tama teyu, augwali tigidali wi dwai mu yai.
1SA 5:12 Tama te bulu we bidi augwali meba isibeo, tiali goli, te dwai dili keni augwali tigiba pedelama elaluali. Tama augwa te Godigo tau somainu i weyu yalio.
1SA 6:1 Te Genuai Bidigo Dąų Wali Bomai Po Munalubo Halobage te Filistia bagego bulude munalubadi, te polua a naga me badu si bidali,
1SA 6:2 tama te Filistia we bidi dabego augwa pris dabe, me te po page konebo Filistia bidi dabe i olama, asobode te augwalibolo te tiwai po hanalu wali, “Te Genuai Bidigo halobage te dago magi yaibawe? Tama dago aga buluba ma tolobode, te dago magi nai dali tolaibawe?”
1SA 6:3 Tialima, te pris dabego me, te po page konebo bidi dabe daligo te tiwai po wai, “Te dagego te Israel dabego Godigo te halobage te augwa buluba ma tolabo homu ebaso da, te dolo da, dagego olo me tolamuo. Dagego te duga yali dwai sę silimainu ofa yabo nai meba dali tolao. Dagego tama teyu da, teda duga te gasi dabe usu elama, tama dagego bugagia koneaibao, te Godigo dwai dene dageba mabo sę page koneaibao,” wali.
1SA 6:4 Tama te bidi dabego te po wali, “Te dago magi ofa te Godiba tolaibawe?” Tama te pris dabego me, te po page konebo bidi dabe daligo te po wai, “Te gol selama, te dage tigide yali dili keni piksa noma a naga, me te bolo piksa noma a naga badi nigilama, tama te halobage dali tolao. Te dili keni yali namba me te bolo te Filistia dabe dago king a naga te usu nama tiao. Magi baso meni, te tobage genuai gasi te dageba, me te dago king a naga bidiba te gasi pedelali.
1SA 6:5 Dagego te dili keni piksa noma me, te dago bulu tǫ dolali bolo piksa noma dabe me, nigao,” wali. “Tama dagego te Israel dabego God dologode bidiyu, tama agai nogi ugaba siąo. Dagego te tiwai eyu da, te agai dageba me, te dagego godiba me, te dago bulu tǫba me, te dwai dene mabo sę me iligobeo.
1SA 6:6 Teyu, dagego te God dali hagoma eyu, te polobadu Isip king bidigo me te we bidi dabego yali tiwai yabuo. Tama Godigo te dwai nai dabe augwaliba tagala palu, tama augwaliba te sę dabego mu poma palama, te augwaligo te Israel dabe te Isip tǫ taga pomainu ilalio. Dagego te homu kone palama, tama dagego aga dali hagoma me elamu da,” wali.
1SA 6:7 “Tialima odiąo, dagego te gesi karis me deli nigilama, tama te so kibu bulmakau si, te sę me isiąwai kibu, tama augwa si wai ame tubo te tagalisiąbadi, tama tiwai kibu si sao. Tama dagego te kau kibu side te karis teba gebelama, tama augwa si wai dabe te kaugo obo banis muaniba ma sela pao.
1SA 6:8 Tialima, tama te Genuai Bidigo halobage selama, tama te karis daiba muao. Tama te bolo piksa noma, me te dili keni piksa noma dabe dagego te golgo nigai, te dwai sę yali silimainu ebo ofa tiwai yabo nigali nai, te bokis me deliba munama, te bokis te karisba munama, te halobage pąba muao,” wali. “Tama nosali te so bulmakau si pomainu ilama, tama te karis kekasa solama, tama augwa pomainu yao.
1SA 6:9 Tama dagego te karis mena tama pabowe suainu, te bugagia tonaluiąo. Te aga te taun hanu Betsemes tǫ te halobage asali bulu tǫ badu wali pobaso da, teda dagego bugagia koneiąo, te Israel dabego Godigo te dwai sę daba tagala palali da waibao. Tiali goli, karis te tiwai elama pisąbaso da, teda dagego koneama, Godigo te genuai sęgę daba tagala palobeo. Menio. Te sęgę olo naga pedelali wabo dao,” augwaligo te po wai.
1SA 6:10 Te bidi dabego te po olama, tama augwa wali pai. Augwaligo te so kibu bulmakau si selama, tama augwali side te karis kęani. Tama augwaligo te bulmakau sigo wai selama, tama te kau obo banis tomoba muani.
1SA 6:11 Tama augwaligo te Dąų Wali Bomai Po Munalubo Halobage me, te golgo nigai te dili keni piksa noma me, te bolo piksa noma muani te bokis halobage me selama, tama te karis daiba muanio.
1SA 6:12 Augwaligo te doado bage muai digi da, teda te bulmakau si pabo gagalali, tama augwali sigo te taun hanu Betsemes teba pabo sunumi dolo wali palio. Tama augwali sigo te sunumi me geda muyu, me ela pabeo, mu menio. Te augwa si hwa wabo i dali wabo sę ela palio. Tama te Filistia king bidi a naga te karis pabo wali pelama, te taun hanu Betsemes te tama dąį igi palio.
1SA 6:13 Te Betsemes hanu tǫ bidi dabe augwa te bulu odogode te wit togobo sę iduai. Tama augwaligo te sunumiba tononobadi, tama augwaligo te halobage asobo sulama, tama augwa wiegi yai homu pemene mu yai.
1SA 6:14 Tama te bulmakau sigo te karis kekasa pelama, te Josuago wit giba sabolali, te Betsemes hanu tǫ bidi me deli, tama augwali si te gi tomode elalubo genuai masigi me deli pąba doligi pai. Tama te Livai dabe aselama, te Genuai Bidigo Dąų Wali Bomai Po Munalubo Halobage dali, te piksa noma munalubo halobage bokis me, augwaligo te golgo nigai, te augwaligo selama, te genuai masigi daiba muani. Tialima, te bidi dabego te karis nigali ni nami selama, te nogabo sia pedali. Tama augwaligo te so kibu bulmakau si elama, tama Genuai Bidiba ofa ilali, te sia tigidali domainu ebo ofa tiwai yai. Tama me te Betsemes hanu bidi dabego me te sogo naga te Genuai Bidiba gasa ofa dabe me yai dao.
1SA 6:16 Te Filistia king bidi dabe a naga bidigo augwaligo te sę dabe ebo sulama, tama te sogo naga augwali te taun tǫ Ekronba ma geasa pai dao.
1SA 6:17 Te Filistia dabego te dili keni piksa golgo nigali a naga piksa noma te Genuai Bidiba tolali, te augwa dwai sę yali silimainu ebo ofa tiwai eyu tolalio. Te deli deli augwa hanu usu nama nigali, te Asdot, me Gasa, me Askelon, me Gat, me Ekron, te tama hanu taun dao.
1SA 6:18 Tama augwaligo te bolo dabego piksa noma me tolali, deli deli te bomai obo banis elalubo tigidali taun hanu usu nama tolali, tama Filistia king a naga bidigo tonalubo dwasianu bulu me te piksa noma tolali. Tama megi te genuai masigi te Genuai Bidigo halobage augwaligo muani te Josuago wit gide me elalubao, te hanu Betsemes bulu bidi. Tama te bulude pedelali sę te dąį tiwai ilali, te masigi elalubo dao.
1SA 6:19 Te Betsemes taun hanu bidi dabe te bidi sese sela olama, nogo si, te 70 bidi dabego te halobage tomoba tonononalubaso, tama Genuai Bidigo te bidi dabe ela muani. Tama te bulu bidi dabego homugo te Genuai Bidigo augwali dolali da homu elama, tama augwali gela wabo mu geninama wali.
1SA 6:20 Tama te Betsemes bidi dabego te tiwai po wai, “God, Genuai Bidi, te aga da te gasagi yai tedali mu dao, te dwai sę me deli isąbo bidi dao. Te agai da dali haliga sębę eyu da, teda da me deli te bugagia me bidigobeo. Tama dago te God bidibo halobage, te gasaba tolaibao. Tiali goli, dago menaba tolaibawe?” te po wali.
1SA 6:21 Tama te bidi dabe augwaligo te taun Kiriat Jearim hanude bidibo bidi dabe augwaliba te tiwai po wagi pomainu tagala palai, “Te Filistia dabego te Genuai Bidigo Dąų Wali Bomai Po Munalubo Halobage te dago buluba ma sela asalio. Tama tibaso, dago homugo te dage aiyaba dulama asu, tama sagasiąo,” te po wagi pai.
1SA 7:1 Tialima, te Kiriat Jearim bulude bidali bidi dabe aselama, te Genuai Bidigo halobage selasa peyu, te augwa hanuba ma sela solama, tama augwaligo te Abinadapgo be te dwasianu bulu dude elalubo beba muani. Tama augwaligo te aga ogwa te Eleasar te tonalubo bidi pedalumainu nigilali, te Dąų Wali Bomai Po Munalubo Halobage te bugagia tonalumainu yai.
1SA 7:2 Te kibu be bidi sese deli 20 sabalubode nosali badu, te Genuai Bidigo Dąų Wali Po Munalubo Halobage te Kiriat Jearim hanu buluba sabolali, te Israel dabe augwali tau somainu, Genuai Bidiba gela wabo sę bomonama yai dao.
1SA 7:3 Tama nosali Samuelgo te Israel dabebolo te tiwai po wai, “Te dage homu mu begelama, tama Genuai Bidiba ma begasa asabo homu ebaso da, teda duga te tibo god, me tama te tibo god we Astarte piksaba lotu wabo, te dagego sela sąyao. Tama dage Genuai Bidi dologode mu bidiyu, tama aga deliba naga lotu waiąo, tama teyu da, agai dage tau selama, tama te Filistia ami bidi dabe sela sąyu, te augwaligo dage ma tonalumainu me egobeo,” wali.
1SA 7:4 Tialima, Israel dabego te Samuelgo po odama, tama augwa te tibo god Bal piksa me, te god we Astarte piksa me, sela sąnama, tama augwa te Genuai Bidiba naga lotu walio.
1SA 7:5 Nosali Samuelgo te Israel dabeba po ola tolu, te tiwai po wai, “Dage te hanu Mispa teba sisinagasao, tama eno Genuai Bidiba gedu haluasa po olama, dage tau somainu yaibao,” wali.
1SA 7:6 Tialima, tigidali we bidi te Mispa hanuba sisinagasai. Tama augwa te wę te ulu węde tulama, tama tǫba gelu, te Genuai Bidiba ofa ebo tiwai yalio. Tama augwa nai tubo habu selama bididubadi, te giliga dega sigulali. Tama augwa te Genuai Bidiba te tiwai po wali, “Dago dwai sę te nago gedude yai dao.” Tama Samuel te Mispade bidu, tama te Israel dabego po tų yagasobo odama, tama augwaligo po dodola mayu yai dao.
1SA 7:7 Te Filistia dabego te Israel dabe te Mispa hanuba sisinani po odali. Tama te a naga king bidi dabego te augwa ami bidi dabe selama, tama te Mispa hanuba pelama, te Israel dabe dali boi hwįgi painu yali. Tama te Israel dabego te Filistia dabe asainu ebo po odama, tama augwali wi ebaso,
1SA 7:8 tama augwaligo Samuelbolo te po wai, “Nago te Godiba gedu haluasa po wabo bomo yao, te dago Genuai Bidi, te da tau sobaso, te Filistia dabego da dolainu ebo usu me egobeo. Nago te gedu haluasa po wabo munu me tagalamu dao,” wali.
1SA 7:9 Tialima, Samuelgo te ogwa bidi sipsip me deli elama, tama te tigidali siaba ulama, te Genuai Bidiba ofa ebo tiwai yai. Tama Samuelgo gedu haluasa po bomo elama weyu, te Genuai Bidigo te Israel dabe tau somainu yai, tama Genuai Bidigo agai te gedu haluasa po wabo odama, tama augwali tau sai dao.
1SA 7:10 Te Samuelgo ofa idubadi, te Filistia dabe pąba aselama, boi hwįainu yai. Tiali goli, Genuai Bidigo te dagaludu delege be bomo mu elama, te Filistia dabego ugwadu delege be elebo odobaso, tama augwali homu mu puna pelama, tama augwali wi tedela pobadi, tama te Israel dabego augwali sualio.
1SA 7:11 Tama te Israel bidi dabego te Mispa tagalama, tama te Filistia dabe pobeasa pelama, tama te sunumide hauwa bidi elala pidubadi, te augwali te bulu Betkar pąba sabolai.
1SA 7:12 Tama nosali Samuelgo te genuai masigi me deli selama, tama te masigi te bulu Mispa de Sen, te bulu si tomode ugwaba dodolama, muani. Tama Samuelgo te tiwai po wai, “Te masigigo te Genuai Bidigo da tau sesa asali usu nagasobo dąį ilibo masigi dao.” Tama agai te masigi nogi poliyu, te tiwai wai, Te Tau Sali Masigi dao.
1SA 7:13 Genuai Bidigo te tiwai sę dabe elama, tama te Filistia dabe aiyaba elaluama, te augwali paliama, tama augwaligo te Israel tǫ pedai tomoba ma hwįagasisiąbadi te Samuel polalubo tobolu bidi bidali sogo tama tiai dao.
1SA 7:14 Polobadu te Israel dabego te hanu meba elaluali, te Filistia dabego hanu tǫ pedai si Ekron me Gat tomode elaluali. Tama te Filistia dabego te Israel hanu dabe selama bidali. Tama megi te augwaligo Israel dabeba ma mawai. Tama teyu, te Filistia dabego te Israel dabego tǫ pedai me deli te augwaligo me tonalubeo. Tama me te Israel dabego te Kenan bidi dabe dali me hwįsąma, tama augwali dali bugagia bidai dao.
1SA 7:15 Samuel te Israelde polalubo tobolu bidi bidada pidubadi, te aga isiboba mu usu nigi pai dao.
1SA 7:16 Te tigidali kibu bede aga te Betelba, me Gilgalba, me Mispa, te bulu selaba pelama, tama te Israel dabego po tų ebo po odolama, tama augwaligo sęgę elalubo dodoliyu yai dao.
1SA 7:17 Agai te bulu dabede sę silibo si da, teda aga te aga bidali bulu te Rama buluba ma peyu yai. Tama agai te bulude me te po tų odali. Tama te Ramade agai te Genuai Bidigo alta me deli nigai elaluali.
1SA 8:1 Te Samuel aga monu dabe ebo sogo, agai aga ogwa si te Israel dabego polalubo tobolu bidi munama, bidali.
1SA 8:2 Te gomunai ogwa nogi Joel, te tomo ogwa nogi Abia. Tama augwali si te Berseba bulude bidiyu, tama te we bidi dabe po tų odama, tama augwaligo po dodoliyu bidalio.
1SA 8:3 Tiali goli, augwali sigo te augwa ayago kolesaga tiwai me wali pabeo. Menio. Augwali sigo te mone sabo homu godolo yai, tama augwali sigo te gasa bidigo homu bega sabo po odoyu, tama tede te mone siyu, tama augwali sigo te ebo kolesaga geda muyu, tama te po tų bugagia me dodolobeo.
1SA 8:4 Tama tibaso, te Israel polalubo tobolu bidi dabe deliba sisinama, tama pelama, Samuel te Rama hanude bidibo sugi pali.
1SA 8:5 Augwali teba sabolama, tama augwaligo Samuelbolo te tiwai po wai, “Odao. Nage monu dabe yai, tama nago ogwa sigo te nago yali wiegi yai kolesaga tiwai me wali pabeo. Tama teyu, dago homugo te nago bidi me deli nogo tų ilama, te da tonaluabo king bidi pedalumainu yaibao. Tama tiyu da, te da te gasa tǫ pedai bidi dabe tiwai pedalumainu homu ebao,” augwaligo te po wai.
1SA 8:6 Tiali goli, Samuelgo te augwaligo hanalu wali pode wiegi yai homu godolo me isiąbaso, tama agai te Genuai Bidiba hanalu, te agabolo mena po walobowe naga te po hanalu wali.
1SA 8:7 Tama Genuai Bidigo agabolo te tiwai po wai, “Te we bidi dabego te tigidali sęde wali po odao,” wai. “Te nago homugo te augwaligo nage hagela homu ebaso, te nage sela sąyabo homu eyu me wabeo. Menio. Augwaligo homugo te ena augwa king bidi bidibo te hagela homu ebaso, tama teyu, augwaligo ena sela sąbao.
1SA 8:8 Bugagia odao. Te eno augwali te Isipde selama, odasa asali, te megiba usu nagasu, te augwaligo ena tudiba munama, tama te tibo god dabeba lotu wai. Tama megi me, te augwaligo nage tudiba mubao.
1SA 8:9 Tama teyu, eno homugo te nago augwaligo po wali pelama, tama augwa king bidi nigilao. Tiali goli, hasia bolo te nago te po augwaliba pusao, te kingo tigidali kolesaga augwaliba yabo po. Tama nago bomai po augwaliba mayu, te augwaligo hanalu wali sęde te homu bugagia kone palomainu yao,” wali.
1SA 8:10 Tialima, te king po agaba hanalu wali bidi dabe bidibo madi te Samuel pelama, tama te augwalibolo te Genuai Bidigo agabolo wali po tigidali augwalibolo wai.
1SA 8:11 Samuelgo te tiwai po augwalibolo wai, “Te dagego king bidi elalubo sogo, teda te kingo te tama sę dabe dageba yaibao. Agai te dagego ogwa dabe te ami bidi nigilaibao. Tama te hwįbo sogo meba te karisde dolalu hwįbadi, tama meba te hosde dualasa peyu, hwįaibao. Tama meba te king aga te karisdu gasaba me painu pabo sogode te asobode udada paibao.
1SA 8:12 Tama agai te bidi meba te 1,000 ami bidigo kepten polalubo bidi, me te 50 ami bidigo polalubo bidi tama nigilaibao. Tama agai te dagego wai mebago te agai gi bulabo tǫ elimainu eyu, tama mebago te agai gide inayu tau yali nai saibao. Tama mebago te hwįabo ene nigaibao, tama agai karisde peyu, hwįabo nai dabe me nigaibao.
1SA 8:13 Tama te kingo te dagego wegi dabe selama, tama augwaligo agai te denami ebo nai sanda nigiyu, tama mebago me te bret, me gasa nai dabe te agai bede ulaibao.
1SA 8:14 Tama agai te dagego wiegi wiegi yai gi nai me, wain gi me, oliv gi me selama, tama aga sę polalubo ofisa bidibolo mawaibao.
1SA 8:15 Tama dagego wit dabe, me wain wai dabe te nogo si wali, te me deli agaba mawaibao. Tama agai te nai dabe te aga sę ebo polalubo ofisa bidiba, me aga sę ebo bidi dabeba mawaibao.
1SA 8:16 Tama kingo te dagego sę ebo bidi dabe me sę ebo we dabe siyu, tama dagego wiegi yai gesi bidi dabe me, te dagego donki dabe me selama, te agai sę emainu yaibao.
1SA 8:17 Tama agai dagego te tigidali nogo si sipsip elalubaso, te me deli agai saibao. Tama agai dage te olo sę ebo bidi pedalubo tiwai ilaibao.
1SA 8:18 Nosali te king pedalubode tama te kolesaga dagebolo ebaso, teda te dagego te duga kingo ebo kolesagade te wado eyu, dagego God Genuai Bidiba po hauwa waibao. Tiali goli, duga digi te king nigilali, tama tibaso, Genuai Bidigo te dagego wabo po me odogobeo.” Samuelgo Genuai Bidigo te wali po sese te bidi dabebolo tama pusali.
1SA 8:19 Tiali goli, te bidi dabego te Samuelgo wabo po odisiąma, tama augwaligo agabolo te tama po wai, “Tagalao, dago homugo te nago king me deli nigilao,” wali.
1SA 8:20 “Da te gasa tǫ pedai badu ebo tiwai pedelama, tama dena kingo da tonalumainu yaibao. Tama agai te dago boi bidi dali hwįgi pabode, te polasa peyu, te dago ami bidi dabe tonalumainu yaibao,” wali.
1SA 8:21 Tialima, Samuelgo te we bidi dabego wabo po odama, tama agai Genuai Bidiba te po wagi pali.
1SA 8:22 Tama Genuai Bidigo Samuelbolo te tiwai po wai, “Tialima, nago augwa po wali pelama, tama augwa king bidi me deli nigilao.” Genuai Bidigo po ola silibo si, tama Samuel pelama, te Israel bidi dabebolo te tiwai po wai, “Dage tigidali te duga buluba ma geasa pelama, tama nosali te eno dage i ma waibao,” wai.
1SA 9:1 Bidi me deli bidai, te bidi nogi Kis, te Benjamin hani bidi. Kis te Abielgo ogwa, tama Abiel te Serorgo ogwa, tama Seror te Bekoratgo owga, aga te Afiago ogwa dao. Kisgo doado bage hauwa elaluali, tama te gasa bidi dabe tomode te aga nogi elalubo bidi bidai.
1SA 9:2 Tama agai ogwa deli elaluali, te aga nogi Sol. Sol aga te bomai bidi, tama dili bobage uganu yai bidi, tama te gasa Israel bidi dabe te aga bobage yali tiwai me isiąwai. Tama me aga te sawi gesabidi mu yai, tama te gasa Israel dabe me te aiyaba elaluali.
1SA 9:3 Tialima, me sogo deli te bidi Kisgo donki kibu meba te tedela pelama, tama hagawai. Tama tibaso, Kisgo te tiwai po Solbolo wai, “Sol, nago te sę bidi me deli selama, dage sigo te donki dabe gegegi pao,” wali.
1SA 9:4 Tialima, augwali hogodama, te Efraimgo bage buluba pali, tama te Salisago tǫ pedaiba pali, tiali goli, augwaligo me sube. Tama tibaso, augwali te Salimgo tǫ pedaiba pali, tiali goli, te donki dabe tede me bidalubeo. Nosali augwali te Benjamin hanigo tǫba pai, tiali goli, augwali sigo te donki dabe tede me subeo. Mu menio.
1SA 9:5 Tama augwali te Sufgo tǫba pai. Tialima, augwali sabolama, tama Solgo aga sę bidibolo te po wai, “Ae, tegobao, dena buluba ma geasa pinao. Te meni baso da, te ayago dadi side homu dene eyu, tama te donki dabede homu kone me egobeo,” wali.
1SA 9:6 Tiali goli, sę bidigo Solbolo te po wai, “Dwasianu gana bolo tonaluinao. Te Godigo po pusubo bidi me deli te hanu Sufde bidibao. Tama tigidali po agai pusubo, te mu naga pedelaibao. Tama teyu, te we bidi dabego agaba genuai nogi mabo dao. Dago agabolo sugi pinao. Te da menadu gege peyu, wali pomainu ebo sunumi te agai dabolo ola mabo usu yaibao,” wali.
1SA 9:7 Tama Solgo te sę bidibolo te po wai, “Tiali goli, te da agaba pobaso da, te dago agabolo wiegi yai homu ilabo nai me deli magi pabo usu yaibao. Tiali goli, dago nai silama, te beg olo elalubao. Dago agaba magi nai mabo usu egowe?”
1SA 9:8 Tialima, sę bidigo te po wai, “Eno te dwasianu silva pedai dagenu me deli munalubao. Eno te aga menama, tama agai te donki bidalubo pesage mena badu elalubo te dabolo omainu ebo dao.”
1SA 9:9 Tama Solgo agabolo te po wali, “Te nago po wiegi yai mu wabo. Awe, da pinao.” Tialima, augwali si te Godigo po pusubo te bidi bidibo hanuba pali. Te augwali si te hanu elalubo madi te dwasianu bulu duba ugaba holobadi, augwali sigo te gesi ogwa we wegi mani meba te asobo augwali si gesabidiba yaga sali. Te we dabe te hanu buluba dia soali, te wę tuainu yali. Tama te bidi sigo augwaliba hanalu wali, “Te geme dulai po haninibo bidi te taun hanude bidibowe, ma meniwe?” Polobadu te Israel dabego te profet bidi nogi poali, te geme dulai po haninibo bidi wai. Tama te bidi mebago te Godiba magi nai po me deli hanalugi painu da, augwaligo te tiwai po wai, “Dago te geme dulai po haninibo bidi sugi pinao,” wali. Tama tibaso, Solgo te tiwai po weyu, te wegi dabe hanalu walio.
1SA 9:12 Tialima, te we dabego augwali sigo po wei ponoyu, te po wai, “Geme dulai po haninibo bidi te ede bidibao. Megi tama aga te taunba pali, magi baso meni, te bidi dabego te dwasianu bulu dude ofa yainu ebaso pali. Aga te dage si pabodu polasa pali, tama dage si asesa polo piąo.
1SA 9:13 Tama dage si te taun tomoba pabo sogo, te dage sigo aga sueibao, magi baso meni, aga te taunde me bididuaibao, tama aga te bulu duba nai tugi peyu pabeo. Agai te we bidi meba te ofa yali kibu mi tuagasomainu i wali. Tiali goli, te augwaligo agabolo asomainu tonalu, te aga sabalubo si te nai tueibao. Te aga asobo si da, teda agai te Godiba hanalu, te ofa wiegi yai ilimainu elama, tama nosali augwa te nai tueibao. Dage si asesa polo pobaso da, te dage sigo aga subaso usu yaibao,” wali.
1SA 9:14 Te we dabego po ola silibo si, tialima Sol aga sę bidi dali te taunba pai. Tama augwali si te obo elalubo sunumi tomoba pelama, tama te profet Samuel te asobo suali. Aga te taundu buluba dia solama, tama te lotu wabo pesageba holainu yai.
1SA 9:15 Te polobadu side kigamu te Genuai Bidigo Samuelbolo te tiwai po wai,
1SA 9:16 “Do te tama tobage tebo sogo, te eno te Benjamin hani bidi me deli te nageba tagala palaibao,” wali. “Tama nago aga toboluba te wel geliyu, te aga te eno we bidi Israel dabego king bidi pedalumainu ilao. Eno suali, te Filistia dabego genuai sęgę me, dene me, te tigidali Israel dabeba mobaso, tama te Israel dabego enaba gela weyu, te eno augwali tau sao po wabo odali. Tama tibaso, te bidigo augwali tau siyu, tama te Filistia dabego bomode bidalubo te ma dobola somainu yaibao,” wali.
1SA 9:17 Tialima, te side nosali Samuelgo Sol suali, tama Genuai Bidigo agabolo te po wali, “Te dao, do eno nagebolo po wali bidi te tama dao. Agai te eno we bidi tigidali tonaluaibao,” wali.
1SA 9:18 Tialima, Solgo te Samuel te taunba pabo sunumide gesabidi deliba unulubaso, te agabolo hanalu wali, “Te geme dulai po haninibo bidigo be menade dawe? Te nago enabolo wabo usu egowe?”
1SA 9:19 Tama Samuelgo te po wei ponai, “Te bidi ena dao. Dage si ena pabodu te lotu wabo pesageba polasa piduao, tama dage si megi sogode ena dali nai tuiagameo. Tama do kigamu te nago koneabo sę po tigidali nagebolo olama, tama eno nage tagala palaibao.
1SA 9:20 Eno koneani, te dagego donki dabe te hagawali polobadu sela sogo bidali, tiali goli, nago augwalide homu hauwa me dogia pelamuo. Te bidi mebago augwali gegela suali. Tiali goli, odao, te Israel we bidi dabego niwai bidi godolo mu ebo dawe? Augwaligo nage dali, te nago ayago hani sibi dali godolo ebao, te tama dao,” Samuelgo te po wali.
1SA 9:21 Tialima, Solgo Samuelbolo te tama po wai, “Ena te Benjamingo hani bidi, tama eno hani te dwasianu hani naga te Israel dago hani tomode elalubao. Tama eno ayago hani sibi te Benjamingo hani tomode nogi me elalubeo. Tama teyu, magi baso nago te tiwai po enabolo obawe?”
1SA 9:22 Solgo po ola silibo si, teda Samuelgo aga te aga sę bidi dali selama, te genuai tebol sai elalubo be habu tomoba pali. Samuelgo te bidi sese deli olama, nogo si bidi i wali, te bidi dabe augwali te nai tuabo madi dualama elaluali. Tialima, Samuelgo Sol me, aga sę bidi dali, augwali sibolo te po weyu, te polalubo sai te tebol elalubo pesage badu duagi pao wali.
1SA 9:23 Tialima, Samuelgo te nai ulubo bidibolo te tiwai po wali, “Te eno nagebolo mayu te muao po wai kibu sipsip mi, te megi da, nago sesao,” wali.
1SA 9:24 Tialima, te nai ulubo bidigo te kibu sipsip sągą me deli te mi dwagi yai mu elalubadi, tama te tebol daiba te Sol pąba muani. Tama Samuelgo Solbolo te tama po wai, “Te kibu mi sao, te dago nage nai muai elaluali, tama nage te tuao. Eno nage tonaluali te megiba usu nani, tama tibaso, eno te i wali bidi dabe dali nago te nai tuiąo,” wali. Tama tialima, Solgo Samuel dali te sogo nai tuali.
1SA 9:25 Tama nosali augwali te ofa yali bulu tagalama, tama te taunba dulai. Tama Samuelgo te Sol te aga be peduba odasa holama, tama Sol dali po miani. Tama hulide Sol te Samuel dali te bulude piali.
1SA 9:26 Te kigamu mu Samuel hogodama, tama Sol i olama, te po wai, “Nage hodaluao. Eno te nage naga buluba tagala palaibao.” Tialima, Sol hodaluama, tama aga Samuel dali te be taga solama, tama sunumiba pali, te Sol aga sę ebo bidi augwali si dali pali.
1SA 9:27 Augwali te taun sesegeba sabolama, tama Samuelgo Solbolo te tiwai po wai, “Naga sę bidibolo polasa pa po wao. Tiali goli, nage da ena dali dwasianu gana dolalu, tama te eno nagebolo te Godigo po mawaibao,” wali.
1SA 10:1 Tialima, Solgo te sę bidi polasa tagala palai, tama Samuelgo te oliv wel botol dwasianu me deli selama, tama te wel habu te Sol toboluba geliyu, te aga king pedalumainu nigiliyu, sa muani. Tama Samuelgo agaba te gesabidi nono neyu, te e tiwai po wai, “Genuai Bidigo te nage aga we bidi, te Israel dabego king bidi nigilali dao. Tama nago augwali tonalu, tama augwali tau siyu, te boi bidi dabego augwali dolomainu me egobeo. Tama megi eno te nageba nosali pedelabo sę po nagebolo wainogo ebao. Tama nago te sę dabe pedalubo subaso da, te nago koneao, Genuai Bidigo te nage sa muyu, te aga we bidi dabe tonalumainu nigilali dao. Te e tama tiwai sę dabe dao.
1SA 10:2 Te nago ena taga peyu pabo sogo, te nage te Benjamingo bulu tǫ te Selsa buluba sabolaibao. Tama nago te ola be masigi te Resel muani masigi pąde, te bidi si te nago augwali si gesabidi deli sisinaibao. Tama augwali sigo nagebolo te tiwai po waibao, ‘Te nago gegali donki dabe, te augwaligo gegelama, sulama, tama nago ayago te donki dabede te homu godolo menisąwai. Megi agai te nagede homu kone palu, tama hanalubo sę te tiwai ebao, eno mena tama tilama, te eno ogwa gegegowe?’ Te bidi sigo nagebolo te po waibao,” Samuelgo Solbolo te po wali.
1SA 10:3 “Tialima, nago te bidi augwali si tagalama pobadi, tama te habu selali ni te Tabor buluba sabolama, tama nago tede bidi sela te gesabidi sueibao. Augwali te Godiba ofa ilainu, te Betel buluba pabo sueibao. Te bidi sela te bidi me deligo te gesi ogwa bidi meme sela te sela asobo, te gasa bidi mego te bret sela sesali, tama sela wali bidigo te meme tigi walide augwaligo te wain wę tabiali, te abilasa asobo sueibao.
1SA 10:4 Tama te sela bidigo nagebolo siade da weyu, tama te bret si nage mawaibao. Tialima, nago te bret sao,” wali.
1SA 10:5 “Tama nosali nage te Godigo bulu du te taun Gibea te Filistia dabego ami bidi dabe bidalubo madi teba pao. Tama nage te taun pąba pabo sogo, te nago profet hani me deli augwa te bulu dude te alta tagalama, tama aiyaba dulubadi, te gesabidi deliba ununaibao. Tama augwaligo te tobage gita me, tamborin dabe me, ona elebo me, te tiwai eyu, tama te profetgo kolesaga ebo gilama, te Godigo po pususu paibao.
1SA 10:6 Tialima, te Genuai Bidigo Mobo te bomo elama, nageba pedalu, tama nage te profet dabe dali deliba muna selama, tama nago augwaligo te ebo kolesaga tobage tiwai yaibao. Tama nage gasagi yai bidi mu pedelaibao.
1SA 10:7 Te sę dabe nageba pedalubo sogo da, teda nago koneaibao, te God nage dali bidu, te Godigo nageba mani sę ebo te nage tau saibao. Tama nosali, nago homugo te mena sę te we bidi tau sabo wiegi yai sę da homu ebaso da, teda nago te sę yagameo.
1SA 10:8 Tama nage polasa pao, te bulu Gilgalba pelama, tama te bulude ena tonalu, te a naga olama me si sogo bidai madi, tama ena asu, nage dali muna sagasaibao. Tama eno te siaba tigidali ulubo ofa meba elama, te God dali deli haliga ebo ofa me yaibao. Tama eno nagebolo te nago mena sę yabo po me te waibao,” Samuelgo Solbolo te po wai.
1SA 10:9 Solgo te po odama, tama aga begelama, te Samuel tagalubo sogo, teda Godigo gesi homu kolesaga agaba mawai. Tama te sogode naga te sę tigidali te Solbolo ola mayu pedelali, Godigo aga te king pedalumainu nigilai, te Samuelgo agabolo wali po tiwai gilama yalio.
1SA 10:10 Te Sol aga sę bidi dali te Gibea buluba sabalubo sogo, te profet hani me deligo aga dali deliba gesabidi munasa, tama te Godigo Mobo agaba bomo elama pedelali. Tama aga te augwali dali deliba muna selama, tęąbi weyu, tama te profet dabego ebo tiwai te sasa mano bilai.
1SA 10:11 Tama te polobadu aga koneani, te mena we bidi augwaligo agai te profet bidi dabe dali te tiwai kolesaga ebo sulama, tama augwa hasi hanalu, te tiwai wali, “Magi sę te Kisgo ogwa Solba pedalubowe? Aga me te profet pedelainu ebowe?”
1SA 10:12 Tama te bulude bidi me deligo te po wei ponoyu, te po wai, “Te gasa profet dabe magi yai dawe? Eno homugo te augwa aya dabe te profet bidi bidisąwani homu ebao,” wali. Te Solba pedalubo sęde, te Israel dabego wabo po page me deli elalubao. Te bidi me deligo mena sę me deli yainu ebo sulama, tama augwaligo homugo agai te sę ebo usu egobe homu elama, tialima augwaligo te po wabo, “Magi elama, Sol te profet pedelainu ebo, agawe?”
1SA 10:13 Tialima, Solgo te profetgo ebo kolesaga tiwai elama, aga te bulu dude elalubo alta elalubo madi pai.
1SA 10:14 Nosali Solgo te aga aya sabi bidi te deliba gesabidi unulubaso, tama aga aya sabi bidigo te agabolo me, te aga sę bidiba me hanalu, te tiwai po wali, “Dage si mena pai asobawe?” Tama Solgo te po agabolo wai, “Da si te donki dabe gegegi pai. Tiali goli, da sigo gege gegi pali meni yani, tama tibaso, da si pelama, te Samuel sugi pai.”
1SA 10:15 Tialima, te aya sabi bidigo te po wali, “Agai mena po dage si dali waliwe?”
1SA 10:16 Tama Solgo te tiwai po wai, “Agai da sibolo te tiwai po wali, te bidi mebago te donki dabe gegela sualio, wai.” Tiali goli, Solgo te aga aya sabi bidibolo te Samuelgo aga te king pedelaibao wali po te aga aya sabi bidibolo wabeo.
1SA 10:17 Nosali Samuelgo te tigidali Israel dabe te Mispa buluba te Genuai Bidi geduba sisinagasomainu i wai dao.
1SA 10:18 Augwali sisina silibo si, tama agai augwaliba te tiwai po wali, “God, te da Israel dabego Genuai Bidigo, te po wai, agai dage te Isipde selama, tama dage odasa asai. Agai dage te Isip dabego nogode, me te gasa hani dabego dageba dwai sę mu ilibaso, tama agai dage ma dobola selama, te odasa soai dao.
1SA 10:19 Godigo dage ma dobola sali, te dwai sę ebo me sęgę te dageba pedalubaso sali. Tiali goli, megi dagego aga tudiba togoliyu, tama dagego te po obao, te Godigo dage tonalubo te dagego hagela ebo homu yai. Dagego homugo te eno dagebolo te king bidi me deli momainu yali. Tialima, megi da, te dage pelama, te duga hani sibi dali te Genuai Bidigo geduba dolalugi piąo,” wali.
1SA 10:20 Tialima, Samuelgo te tigidali hani deli delibolo te pąba asao po olama, tama agai te Genuai Bidigo homugo te gegelama hanilibo kolesaga elama, tama Genuai Bidigo te Benjamingo hani sa muyu, nigilali.
1SA 10:21 Tama Samuelgo te Benjamingo hani solo bage asao olama, tama God Genuai Bidigo te Matrigo hani nigilali. Tama Samuelgo te Matrigo hani sibi bidi asao po olama, tama Genuai Bidigo digi te Sol sa munama nigali, te Kisgo ogwa. Tama augwaligo aga gegebo sę yali, tiali goli, augwaligo aga me subeo.
1SA 10:22 Tama tibaso, augwaligo te Genuai Bidiba hanalu, te tama wali, “Te bidi asaliwe, ma meniwe?” Tama Genuai Bidigo po wei ponoyu, te tiwai po wali, “Sol te duga walu doado bage tomode te geme dualalubao,” wai.
1SA 10:23 Augwa te po odama, tama augwa udulama, tama Sol sela asai. Tama aga te we bidi dali dolaluali sogo, augwaligo aga suali, te dili bobage ugwanu gudai bidi, tama gasa bidi dabe te pęwadage elama, tama aga tiwai usu me ebeo.
1SA 10:24 Tialima, Samuelgo te we bidibolo te po wai, “Te Genuai Bidigo sa muyu nigilali bidi suao. Te tobage bidi tiwai me deli te da tomode me menio.” Tama tigidali bagego po dagą genuai olama, i weyu, te tiwai wai, “Aga te dago king bidi dao. Aga te kibu be hauwa te king bidimainao!” wali.
1SA 10:25 Tama Samuelgo te kingo yabo sę dabe po te bage dabebolo te po hania hanilama wali. Tama nosali agai te po te buku me delide asęnama, tama Genuai Bidigo beba munama elaluali. Tama agai te tigidali we bidi te augwa buluba ma tagala palali.
1SA 10:26 Tama Sol aga bulu Gibeaba ma pali. Tiali goli, Godigo te bomai bidi meba homu hodolama, tama augwali te Sol dali pelawali.
1SA 10:27 Tiali goli, te hagoma ebo bidi mebago te po wai, “Magi elama tama, te bidigo da tau saibawe?” Tama augwaligo te Sol hagela homu mu elama, tama augwaligo te wiegi yai nai me deli agaba me ma mabeo. Tiali goli, Solgo te po me deli augwaliba me wabeo.
1SA 11:1 Nosali Nahas, te Amon dabego king bidi, te aga ami bidi dabe selama, tama te Israel dabe augwa te nogi ebo bulu Gileat tǫ pedai tomoba asai. Tama Nahasgo ami bidi dabego te Jabes taun hanu bagulali, tama te Jabes taun bidi dabego te king agabolo te po wai, “Nago bomai po da dali dąų walama, te da bidimainu sula tagalu, tama te da nage dologode bidaibao,” wali.
1SA 11:2 Tiali goli, Nahasgo te po wali, “Te eno dage dali bomai po dąų wabo sunumi deli naga elalubao. Eno te dage tigidali Jabes dabego dolo badu gedu widilaibao, te dageba tama tilama, tama te tigidali gasa Israel dabe hale dwai ilaibao,” te po wai.
1SA 11:3 Tama te Jabes dabe augwa polalubo tobolu bidigo te tama po odobaso, tama augwaligo te Nahasbolo te po wai, “Te dagego da te 7 sogo bolo tonaluiąo, te dago te tigidali Israel tǫ pedaiba te bidi tagala palama, tama augwaliba hanalu, te da tau sagasao waibao. Tama da tau sabo bidi meni ebaso da, teda te da dagego tonalumainu ilaibao,” wali.
1SA 11:4 Nahasgo te Jabes dabego pode usu da po obaso, tama augwaligo te bidi meba te gasa Israel hani dabeba tagala palai. Te bidi dabe te Sol bidibo madi te Gibeaba sabolama, tama augwaligo te we bidibolo te po pusai. Te Gibea dabego odama, tialima, te augwali gela dwagila mu wai.
1SA 11:5 Te sogo Sol te gide sę iduai. Tama aga te gi taga soabo sogo, tama te sę ebo bulmakau odasa asobadi, agai te we bidi dabego gela wabo odali. Aga te bidibo pesageba sabolama, tiali te agai augwaliba hanalu wali, “Magi baso dage tigidali gela waliwe?” Tialima, augwaligo te Jabes dabego augwaliba ola tolali po wai.
1SA 11:6 Te Solgo te po odali sogo, te Godigo Mobo te bomo elama, agaba pedalubaso, te aga haliga sębę mu geninanio.
1SA 11:7 Tama tibaso, agai te bulmakau si selama, tama elama, tama te kibu sigo mi te todogo pai. Tama agai te kibu mi te bidi mebabolo menama, tama augwaliba weyu, te mi te Israel tǫ pedai tigidaliba sela pelama, tama te we bidiba ola mao wali. Tama Solgo augwaliba weyu, te po pusao, wai, “Niwai bidigo te Sol de Samuel sigo te Amon dabe dali hwįbo tau sisąbo bidi da, teda Solgo te bidigo bulmakau dabe ela munama, tama te kibu mi tologali tiwai gilama yaibao,” te po wali. Te we bidi dabego te po odama, tialima, te Genuai Bidigo augwali wi ilama, tama tigidali hogodama asali. Tama bidi me deli te bulude me bidibeo.
1SA 11:8 Tama Solgo te tigidali bidi te Besek buluba sisinagasao olama, tama agai suali, te Juda dabe umabo bidi te 30,000 bidi, te gasa Israel dabe te 300,000 te buluba sisinai.
1SA 11:9 Tama te ami bidi dabego te Jabes dabebolo weyu, te po wai, “Duga bage bidi dabebolo te tama po wagi pao, te do giliga te pedelai digi, te dago dage tau sagasu aselama, tama te boi bidi dabe ela gudulama, sela sąwaibao,” wali. Tialima, te Jabes dabe pelama, te augwa bage bidi dabebolo te po magi pali. Tama augwaligo te po odama, tama augwa wiegi yai homu pemene mu yai.
1SA 11:10 Tama te Jabes dabego augwa te po te boi bidi tobolu bidi Nahasbolo wali, “Do te da Jabes bage nageba asaibao, te nage dologode bidimainu, tama nago mena sę dabolo yainu da, teda nago te sę yagameo,” wali.
1SA 11:11 Te kigamu digi mu, te be posisąbadi, teda Solgo te aga ami bidi dabe dagalama, hani sela wasilali, tama be posa pabode augwali te udada pelama, te Amon dabe dali hwįgi pali. Tama augwaligo te augwali elala pidubadi, tama te belo nai tuboba usu nigi pai. Tama te Amon dabe deli deli te tigi dolisiąwani bage, augwali te wi tedela pai.
1SA 11:12 Nosali te Israel dabego Samuelbolo te tiwai po wai, “Te mena abagi dabego te po weyu, te Sol dago king bidi bidigio waliwe? Nago dabolo olama, tama dago te augwali ela muaibao,” wai.
1SA 11:13 Tiali goli, Solgo augwaligo po wabo odama, tama agai te po wali, “Menio. Dago abagi deli me ela mugobeo, te sogode naga Genuai Bidigo da Israel dabe te boi bidi dabego nogode ma dobola sai dao,” wali.
1SA 11:14 Solgo po ola silibo si, tialima Samuelgo te we bidi dabebolo te po wai, “Da te taun Gilgalba pelama, tama po hanilama weyu, te Sol dena king bidi bidibao po waibao,” wali.
1SA 11:15 Tama teyu, tigidali te Gilgal hanu taunba pelama, tama te Genuai Bidigo gedude augwaligo te tiwai po wai, “Sol aga te dago king dao.” Tama augwa te God dali deli haliga yabo ofa yali. Tama Sol dali, te tigidali Israel dabe daligo te yali sęde wiegi yai homu pemene mu yai dao.
1SA 12:1 Nosali Samuelgo Israel dabebolo te tiwai po wai, “Dagego odiąo. Eno te dagego enabolo hanalu wali sę tigidali yali, tama eno dageba te dage tonaluabo king bidi me deli mawai.
1SA 12:2 Tama agai ena bidali pesage hasegelama, tama dageba te wiegi yai sunumi ola mawaibao. Tiali goli, ena monu dabe elama, tama ena tobolu nisi te ili nisi yali, tama eno wai dabe te genuai, dage tiwai yalio. Ena te dagego polalubo bidi bidali, te ena gesi ogwa bidide bidada asali, te megi e sogoba usu nagasobao.
1SA 12:3 Dagego eno kolesaga bugagia koneani. Tiali goli, eno dwai sę me deli dageba yaibaso da, teda dagego megi ena te Genuai Bidigo gedude, me te agai sa muani king bidi gedude, te ena po tų iliąo. Te eno bidi me deligo bulmakau me donki te sai dawe? Ma, eno te bidi me deli tibo po ola mayu, tama agai doado bage me wi sai dawe? Ma, eno bidi me delide dwai sę ilaliwe? Te bidi me deligo enabolo te po tų ebo te homu bega sabo po weyu, mone mawai dawe? Eno te tiwai sę me deli yaibaso da, teda megi dagego enabolo te po obaso, tama eno te sę wei ponoyu, tama dodolaibao,” te po wai.
1SA 12:4 Tialima, te bidi dabego po wei ponoyu, te tiwai po wai, “Mu menio. Nago da ili po ola mayu, te nai me deli anoma eyu, ma dwai sę te dabolo me ebeo. Tama te bidi me deli nage homu bega somainu ebo po me wabeo,” wali.
1SA 12:5 Tama tialima, Samuelgo augwaliba te po wai, “Wiegi yai dao. Genuai Bidi dali king bidi agai sa muyu nigilali, te dagego wabo po augwali sigo odali, tama koneani, te dagego eno dwai sę yali me gegebeo.” Tama augwa te po wali, “Mu tama dao. Genuai Bidigo koneanio,” wali.
1SA 12:6 Tama Samuelgo po wadolama weyu, te tiwai po wai, “Awe, God Genuai Bidigo koneanio. Polobadu Genuai Bidigo naga te Moses de Aron si sa muyu nigilali, tama aga digi te duga wąį nǫų dabe te Isip tǫde selama, tama augwali odasa asai dao.
1SA 12:7 Tialima, dagego olo bugagia munama odalubadi, tama eno dage te Genuai Bidi gedude po tų ilaibao. Eno dagebolo te po obao, te Genuai Bidigo bomai sę elama, te dage me ma siyu, te duga wąį nǫų dabe me ma sai dao.
1SA 12:8 Tama tiwai dao. Te wąį monu Jekop te aga we wai dabe dali te Isip tǫba pelama bidigi pali sogo, te Isip bulu bidi dabego te duga wąį nǫų dabeba dwai sę mu yali. Tama tibaso, te augwali tau somainu Genuai Bidiba gela wali, tama agai te Moses dali Aron si augwaliba tagala palali. Tama augwali sigo te wąį nǫų dabe te Isip tǫde selama, tama augwali odasa aselama, te tǫ pedaiba bidagasomainu yai dao,” wali.
1SA 12:9 “Tiali goli, te we bidi augwaligo te dago Genuai Bidi te homugo gegeda palali. Tama tibaso, agai te Moap hani king bidi asomainu ilama, tama augwaliba te boi hwįagaselama, tama augwali aiyaba elaluali. Tama gasa sogo me agai te Sisera, te Hasor genuai taun ami bidi dabego polalubo kepten bidi asomainu ilali. Tama me sogo te Filistia dabe asali.
1SA 12:10 Tama tiyu, te nǫų wąį dabego te Genuai Bidiba gedu haluasa po wabo bomonama weyu, te augwali tau somainu yali. Augwaligo agabolo te tiwai po wali, ‘Genuai Bidio, dago nage tudiba munama, tama dago te tibo god Balba me te Astarte dabeba lotu po weyu yali. Tama tiyu, dago sęgę salio. Megi dago nageba hanalu obao, te nago da te boi bidi dabego nogode ma dobola sobaso da, te dago nageba lotu weyu, tama nage deli naga wali asaibao,’ augwaligo te po wali.
1SA 12:11 Tialima, Genuai Bidigo te augwaligo gedu haluasa po wabo odama, tama agai te Gideon, me Barak, me Jepta, me ena Samuel te augwali tau somainu tagala palali. Da tigidali deli deli dago te ma dobola selama, tama dage Israel dabe bugagia bidibao,” wali.
1SA 12:12 “Tama te tigidali sogo God, dena Genuai Bidi naga, te dena king bidi bidai. Tiali goli, nosali dagego suali, te Nahas, te Amon dabego kingo, te dage dali boi hwįagasainu yali. Tama tibaso, te God dagego king bidi bidibo te dagego homugo hagela yali. Tama dagego enabolo po wagasu, te tiwai po wali, ‘Tagalao. Dago homugo te nago king bidi me deli nigilao,’ wai.
1SA 12:13 Tialima, te e dao duga sa muani king bidi. Dagego te Genuai Bidiba te naide hanalu wali, tama Genuai Bidigo aga te dageba mani dao.
1SA 12:14 Tama dage dali, te duga king me, te dena Genuai Bidi God dologode bidao, tama dagego agaba lotu weyu, tama po odoyu, tama agai bomai po wali peyu, tama aga wali sesemane sogo pobaso da, teda te Godigo dage te bugagia mu bidabo pesage mawaibao.
1SA 12:15 Tiali goli, te dagego Genuai Bidigo po odobo hagela ebo homu elama, tama dagego hagoma eyu, tama agai bomai po bolobaso da, teda te Genuai Bidigo tigi dene ilabo sę dageba yaibao, te agai duga wąį nǫų dabeba yali sę tiwai dageba yaibao,” wali.
1SA 12:16 “Tialima, odiąo. Te dagego dwasianu tonalubo gana elama, tama dagego te genuai sę me deli te Genuai Bidigo digi te sę ebo suagameo.
1SA 12:17 Duga koneani, megi sogo te wit ininama tau yai togobo sogo elalubao, tama te tulubage ebo sogo me elalubeo. Tiali goli, megi eno gedu haluasa po obaso, te Genuai Bidigo dagalude te pǫdu te be kulukulu omainu ilama, tama tulubage tagala palaibao. Tama dagego te sę ebo sulama, tama dagego koneaibao, te dagego Genuai Bidiba hanalu, te dage king bidi me deli mao po wali sogo, te dage genuai sęgę salio,” Samuelgo te we bidi dabebolo te po wai.
1SA 12:18 Tialima, Samuelgo gedu haluasa po wali, te sogo bubugade naga Genuai Bidigo te dagalude pǫ kulukulu omainu ilama, tama tulubage tulali. Te bidi dabego sulama, tama augwali te Genuai Bidiba me Samuel dali me te wi dwai mu yalio.
1SA 12:19 Tama teyu, te we bidi dabego te tiwai po Samuelbolo wali, “Genuai bidio, dago homugo te nago gedu haluasa po te Godiba omainu homu ebao, te dago Genuai Bidibolo, tama agaba hanalu, te dabolo olo mu tau sabo wiegi yai homu kolesaga emainao, teda da isimainu me egobeo. Dago te dwai sę hauwa yali, tama megi dago koneani, dago te gasa sę me ma eyu, te dago nageba hanalu, te king me deli sa muyu nigilao po wali sogo, te sęgę me dago salio,” augwaligo te po wai.
1SA 12:20 Tiali goli, Samuelgo te tiwai po wei ponani, “Dage munu me wi elamuo. Mu tama, dagego te dwai kolesaga yali, tiali goli dagego te Genuai Bidi tudiba mumainu me igimio. Menio. Dagego aga wali mu peyu, tama dagego agai sę ebo bomonama yao.
1SA 12:21 Tama dagego te tibo god dabe wali me pelamuo. Augwali te olo nai naga elalu, tama augwaligo dage tau selama, te dage ma dobola sabo usu me egobeo.
1SA 12:22 Te Genuai Bidigo homugo naga te agai dage sa munama, te aga hani bage pedelali. Tama teyu, agai te aga genuai nogi me te aga dąų walali poba homu kone palama, tama agai dage tudiba me mugobeo.
1SA 12:23 Tiali goli, eno digi te eno gedu haluasa po sesemane sogo weyu, te dage tau sabo elalueibao. Ma, eno gedu haluasa po wabo tagaligi sogo da, eno dwai sę Genuai Bidiba igi dao. Te eno munu me egobeo. Tama eno dage te wiegi yai doloba pai kolesaga wali pomainu ola mawaibao.
1SA 12:24 Te Godigo dage tau siyu, te genuai sę dabe dageba yali te homu kone palama, tama dage aga dologode sesemane sogo bidiąo. Tama dagego aga wali mu peyu, tama dagego agai sę bomonama yao.
1SA 12:25 Tiali goli, dagego te dwai sę me idubadi gebaso da, teda Genuai Bidigo dage te duga king bidi dali dolaibao,” Samuelgo te po wai.
1SA 13:1 Te Solgo kibu be 40 elalubadi, te aga king bidi pedelali, tama aga king nigilama bidibadi, te 22 kibu be bidai dao.
1SA 13:2 Te Sol king bidi pedelama bidali sogo, te Israel dabe deli madi sisinaluali, tama Solgo te Israel bidi dabe te bidi sese umabo, te 3,000 bidi, te ami bidi nigilama, tama gasa bidi dabe te augwa buluba ma tagala palali. Agai te ami bidi dabede te bidi sese umabo, te 2,000 ami bidi te agai selama, tama augwali aga dali te bulu Mikmas te Betel bagego bulu dude bidaluai. Tama agai te 1,000 ami bidi te Jonatan dali tagala palali, te aga ogwa, tama augwali pelama, te Gibea tǫ te Benjamingo hanigo tǫ tomoba bidigi pali.
1SA 13:3 Tialima, Jonatan aga ami bidi dabe dali augwaligo te Filistia ami bidi dabe dali te Geba bulude hwįnama, tama augwali aiyaba elaluali. Tama te gasa Filistia dabego te tiali po odama, tama augwaligo te Israel dabe dali wado po wali. Tama tialima, Solgo te bidi meba te Israel tǫ pedai tigidaliba tagala palama, tama augwaligo te biugelgo te Sol tau sagasu hwįabo bidi dabe i ola bilali.
1SA 13:4 Te bidi dabego te tiwai po augwalibolo wali, Solgo te Filistia hani ami bidi dabe aiyaba elalubaso, tama megi da, te tigidali Filistia dabego te Israel dabe dali boi bidi ebao. Tialima, te bidi dabego te po odama, tama augwali Sol dali te Gilgal buluba sisinagasai.
1SA 13:5 Tama te sogo te Filistia dabe hauwa sisinagaselama, te Israel dabe dali hwįainu yali. Augwaligo boi hwįabo karis te bidi sese umabo mu, te 3,000 elaluali, tama te ami bidi 6,000 te hosde duayabo elaluai, tama tǫdu pabo ami bidi umabo mu, te nambisde masigi sane kemi tiwai elaluai. Te ami bidi dabe te Mikmas, te giliga pedalubo pedai badu, te Betaven te badu pelama, tede te augwa bidabo pesage nigilama bidai.
1SA 13:6 Tialima, te Filistia dabe dali te Israel dabe dali boi hwįani. Tiali goli, te Filistia dabego hwįbo te bomo mu ebaso, tama te Israel dabego koneani, te augwaligo bomogo te boi bidi dabe aiyaba elaluabo homu ebeo. Tama tibaso, te Israel dabe meba te tǫ dedageba geme duala sigi peyu, te genuai bulu duba duala sigi peyu yali, tama meba te genuai masigi ola be tomoba duala sigi peyu, tama meba te wę ulu pedalubo tǫ dedage tomoba pelama, duala sigi pali.
1SA 13:7 Tama meba te wę Jordan nogelama, te Gat hanigo tǫba, me te Gileat tǫba peyu yali. Te Israel dabe hwįgi peyu pabode, te Sol augwali dali me pisiąwai, magi baso meni, te Samuelgo po agabolo waliyu, aga te Gilgalde tonaluao obaso, te aga tonalubadi, te Sadede deli tama usu nama bidai. Tama tiyu, Sol te Gilgalde bididuai. Tama aga dali tede bidali ami bidi dabe, augwaligo odali, te Filistia dabego te Israel dabe aiyaba elaluali po wai, tama augwali wi dwai mu yali. Tama te Sadede deli tonalu, Sol tede bidali, tiali goli Samuel me asobeo, tama te bidi dabego te Sol taga pabo gagalama, tedela pela wali.
1SA 13:9 Tama tialima, Solgo augwaliba te po wai, “Te siago tigidali domainu ulubo ofa, me te deli haliga ilibo ofa yabo nai dabe selama, te enaba sesao,” wai. Tialima, augwaligo sela asobaso, tama agai selama, tama te siago tigidali domainu ebo ofa yalio.
1SA 13:10 Te ofa dabe ebo sę tigidali silali madi, teda Samuel sabolali. Tama Sol te lotu bedu buluba teda sobadi, tama aga dali deliba gesabi elama, tama agaba siade da po wai.
1SA 13:11 Tiali goli, Samuelgo Solbolo te tiwai po wai, “Nago magi sę yaliwe?” Tama Solgo te po wai, “Eno suali, te we bidi dabego ena tagalama, tama tedela pobaso, tama eno nage tonaluali te po wali gilama tama nage sabalubeo. Tama eno subadi, te Filistia dabego bidabo pesage te Mikmas buluba nigagasobo sualio.
1SA 13:12 Tama eno te tiwai homu yai, te Filistia dabego da dali te Gilgalba hwįagasobo homu yali, tama eno te Genuai Bidigo ena dali wiegi yai deli haliga yabo nai me deli masiąbo homu yai. Tama teyu, eno te ofa yabo homu yai dao.” Solgo te po wali.
1SA 13:13 Tialima, Samuelgo agabolo te po wai, “Nago kolesaga mu geda muanio. Nago te dena Genuai Bidi Godigo te nagebolo mani po, te nago wali me pabeo. Te nago agai po wali pigi sogo da, teda agai nage me, naga hani daligo me, te Israel bage sesemane sogo tonalumainu iligi dao.
1SA 13:14 Tiali goli, megi da, nage te king bidibo te sesabi elama, bobage sogo me bidigobeo. Nago te Genuai Bidigo po wali me pabe, tama tibaso, agai te bidi wiegi yai me deli te Genuai Bidi homude godolo ebo kolesaga ebo bidi gegelama, tama agai te bidi te aga we bidigo king bidi nigilama bidimainu yaibao,” wali.
1SA 13:15 Samuelgo te po ola silama, tama agai te bulu Gilgal tagalama, tama gasaba palio. Tama Solgo me te Gilgal bulu tagalama, tama te Gibeaba pelama, te aga ami bidi dabe dali deliba sisinama bidai. Tama te Gilgalde bidali tigidali we bidigo aga wali pali. Gibea bulu te Benjamingo tǫde elaluai. Augwali sabolama, tialima Solgo te aga dali bidalubo ami bidi dabe nedali, tama te 600 ami bidi naga elaluali.
1SA 13:16 Tialima, Sol dali, Jonatan dali, te augwa si ami bidi me pelama, te Geba tǫ te Benjamingo tǫ badu bidigi pali. Tama te Filistia dabe augwa bidibo madi te Mikmasde bidaluai.
1SA 13:17 Tama te Filistia dabego ami bidi te hani sela peda selama, tama te Israel dabe dali hwįgi pali. Hani me deli te taun Ofra te Sual tǫ pedai tomoba pali, te not pedai badu pali,
1SA 13:18 tama gasa hani meba te giliga dega sabo badu te Bethoron teba pali, tama gasa hani me te giliga pedalubo badu te tǫ wa pai bulu du pą badu pali, tama te bulu odogo yai badu te augwa nogi eyu, te uni yowi dabego odogo bulu da wai.
1SA 13:19 Te sogo te Israel tǫ pedai bidi me deligo te nai dabe te aingo me nigisiąwai, magi baso meni, te Filistia dabego homugo tiali, tiyu te Hibru dabego te bainat me sesemone nigidali homu yai. Tama tibaso, augwaligo te Israel dabebolo te nai dabe nigilamu po olama, habu selali.
1SA 13:20 Te tama pagede naga, te tigidali Israel dabe te Filistia dabeba pelama, te Filistia dabego te baida me, gasa tobage te tǫ pedebo ain me, te sigi hwą dabe, me te sarip dabe dulainogo abelai dao.
1SA 13:21 Tama te tǫ pedebo ain dulubo mone, te mone ge me deli, me te sigi hwą dulubo mone, me te bulmakau polo sę emainu selibo dwasianu ain sesemone dodolobo sę ebo, tede mone te dwasianu mone ge me deli dao.
1SA 13:22 Tama te hwįbo sogo, Sol de Jonatan sigo naga te sesemone me bainat hwą elaluali, tama te Israel ami bidi dabego te nai me elalubeo, menio.
1SA 13:23 Te sogo te Filistia dabego te ami hani meba tagala palama, te Mikmas pąde elalubo sunumi bobegela sigi pomainu yali, te bulu du si sau pado tomodu pabo sunumiba no bidigi pomainu, tagala palai dao.
1SA 14:1 Me sogo side nosali, Jonatango te aga gesi ogwa bidi ami bidi te hwįbo sesemone tolasa bilibo bidibolo te po wai, “Da si te Filistia dabe bidibo pesage, te pedai badu pinao,” wali. Tiali goli, Jonatango te aga aya Solbolo weyu, te aga paiba po me wabeo.
1SA 14:2 Te sogo Solgo ugwa be te ni pomigranet dologode sę yani, te Mikron bulu, te Gibea tǫ pąde, tama te ami bidi dabe te 600 te aga dali te Mikronde bidai.
1SA 14:3 Pris Ahiya te prisgo bebo ugwa gudama, te augwali dali bidai. Ahiya te Ahitupgo ogwa. Tama Ahitup te Ikabotgo ama, te Finiasgo ogwa si. Tama Finias te Eligo ogwa dao, te Genuai Bidigo pris polobadu te pris bidi te Silo bulude bidai. Tialima, Jonatan pai, tiali goli, te Solgo ami bidi dabego te Jonatan pali konebeo.
1SA 14:4 Jonatan dali, te aga hwįbo nai tolasa bilibo bidi dali, augwali si te Filistia dabego bidalubo pesageba pabo sunumi wali pali, tama augwali si te bulu du sau pado te tomodu pabo sunumi teba pedelali. Te pedai badu te moni masigi dolalubo pesage elaluali, me me badu elalu, me me badu elalu yali. Me masigi elalubo pesage nogi augwaligo te Boses nogi yali, tama gasa me masigi elalubo pesage augwaligo te Sene nogi yai.
1SA 14:5 Te masigi elalubo pesage me deli te not pedai badu te Mikmas sunumi elalubo badu, tama gasa masigi me te Geba tǫ pedai badu elaluali.
1SA 14:6 Tialima, Jonatan te masigi elalubo pesageba sabolama, tama aga te aga dali hodobo asali bidibolo te tiwai po wali, “Ae, da u badu pedai badu pelama, tama da te Genuai Bidigo po odisiąbo bage, te Filistia dabe bidalubo pesageba paibao. Te Genuai Bidigo da tau siyu, te dago augwali aiyaba elaluabo homu ebao. Te Genuai Bidigo te hwįabo bidi hauwa selama, te boi bidi dabe augwali aiyaba elalumainu me egobeo. Menio. Te dwasianu hani naga te usu dao,” wali.
1SA 14:7 Tama aga hwįbo nai tolasa bilibo bidigo te po wai, “Te usu dao. Nago mena sę yainogo ebaso da, teda eno deli haliga nage dali yaibao,” wai.
1SA 14:8 Tama Jonatango agabolo te po wali, “Wiegi yai mu dao. Megi da, da si te uba pedai badu pelama, tama te Filistia dabego da sumainu yaibao.
1SA 14:9 Tama augwaligo dabolo weyu, te augwali daba asainu tonalua po obaso da, teda da tede tonalu dolalueibao. Te da augwali pageba me pogobeo.
1SA 14:10 Tiali goli, te augwaligo po weyu, ‘Dage si asao,’ po obaso da, teda da augwali pageba paibao, magi baso meni, te tiwai ebaso, te dago koneabo sę ebao, te Genuai Bidigo da tau sobaso, te dago augwali aiyaba elalueibao,” wali.
1SA 14:11 Tialima, augwali si pelama, te pepeli diliba doligi pelama, tama te Filistia dabego augwali si suali. Tama te Filistia dabego te po wai, “Suao! Te Hibru bidi meba te augwa geme dualaluali dedagedu teda asai dao.”
1SA 14:12 Tama te Filistia ami bidi dabego te Jonatan dali aga hwįbo nai tolasa bilibo bidi dali augwali siba te tiwai i wali, “Ae! Dage si edaba holao,” wali. “Dago magi nai me deli dage siba ola mawaibao,” wali. Jonatango te po odama, tama agai te aga hwįbo nai tolasa bilibo bidibolo wali, “Nage ena wali asu, tama da pinao. Megi dago koneani, te Genuai Bidigo da Israel dabego augwali aiyaba elalumainu yaibao,” wali.
1SA 14:13 Tialima, Jonatan te bulu pado dwai madi nogo de sągą sigo gigi holali, tama aga tau sabo bidi me te aga wali holali. Tama augwali si te Filistia dabe bidibo madi sabolali. Tama Jonatango augwali elama, tama augwali te tǫba tulalubadi, tama aga tau sabo bidigo augwali te bainat hwągo ela muyu yai dao.
1SA 14:14 Jonatan te aga tau sabo bidi dali sigo te wąbi te Filistia dabe dali hwįnama, tama augwali sigo te bidi sese deli bidi ela muai. Te wąbi hwįani te dwasianu tǫ dage pedaide hwįai dao.
1SA 14:15 Tama te Filistia ami dabe te bidibo pesagede bidali, tama te bulude biliyu hwįbo ami bidi dabe, tama te tigidali gasa Filistia dabego me te hwįani po sabilibo odama, tama augwali wi dwai mu yali. Tama tǫ mali yai. Tama Godigo te Filistia dabe homu kolesaga dolama, tama augwali wi tedela pai dao.
1SA 14:16 Tama Solgo te Gibea hanu tonalumainu nigilali ami bidi dabego te Filistia dabe bidibo pesageba tononobadi, tama suali, augwali udayu, te iba soyu, eda asu eyu, te esela pabo bidi dabe tiwai bilalubo suai.
1SA 14:17 Tialima, augwali pelama, Solba wagi pali, tama Solgo homugo te agai ami bidi meba pelama, te Filistia dabe dali hwįgi pali da homu yai. Tama tiyu, Solgo aga ami bidi dabeba te tama po wali, “Te ami dabe nedama, tama niwai bidi dabe te bidisiąbaso da, te dago koneaibao,” wali. Tialima, augwa te tiwai elama, tama Jonatan dali te aga hwįbo sesemone sabilibo bidi dali, te augwali si bidisiąwai.
1SA 14:18 Te sogo te Godigo Dąų Wali Bomai Po Munalubo Halobage te Gibeade munaluai. Tama tiyu, Solgo te pris Ahiyabolo olama, te halobage sesao po olama, te augwa Genuai Bidigo homu kolesaga hanalu wainu yai.
1SA 14:19 Solgo te prisde po midubadi, tama te Filistia dabego i wabo sę mu idubadi genama, tama udayu, te augwa bidibo pesage tomoba pelama, te augwali esela pabo bidi dabe tiwai mu yali. Tialima, Solgo augwaligo te tebo odama, tama agai te prisbolo walali, “Te halobage tagalao. Da hwįgi pobao,” wai.
1SA 14:20 Tama Sol aga ami dabe dali i hae olama, tama udulama, te Filistia dabe dali hwįgi pali. Tama augwaligo te Filistia dabe te esela mu pabo tiwai sulama, tama augwa abagi hasi hwįyu yali.
1SA 14:21 Tama te Hibru bage meba te Filistia dabego ami dabe bidibo pesage tomode bidali. Tama megi da, augwaligo te Filistia dabe tagalu, tama Sol de Jonatan si dali deliba muna sigi pelama, tama augwa abagi dede, te Israel dabe, te hwįbo tau salio.
1SA 14:22 Tama te meba Israel dabe te Efraimgo bage bulu dude geme dulaluali bage, augwaligo te tiwai po odali, te Filistia dabe wi palio wai. Tama augwali aselama, te Sol de Jonatan si tau selama, te Filistia dabe pobeasa pali.
1SA 14:23 Tama augwaligo te Filistia dabe pobelama, tama hwį hwį pedubadi, te Betaven edelama, tama mu hwį hwį palio. Tama tiyu, te sogode Genuai Bidigo te Israel dabe tau selama, tama augwali aiyaba elaluali.
1SA 14:24 Te hwįani sogode Solgo bomai po te Israel dabeba wali. Agai te tiwai po wai, “Megi naga eno te boi bidi dabeba te dwai sę yali wei ponama, tama augwaliba dene mu mawainu ebao. Tama tiyu, dage tigidali bidi te nai me deli tusiąma, te giliga dega sigiluboba usu nao. Te bidi mego nai tuali da, teda eno homugo te Godigo aga dolomainu yaibao,” wali. Tama tibaso, te bidi mego nai me tusiąma, tama te Israel dabe tigidali te nasi dwai mu elama, tama bomo mu meni yani.
1SA 14:25 Tama augwali te busi me deliba sabolama, tama suali, te kiabi bunu hauwa te tǫde elalubo suali.
1SA 14:26 Augwaligo te kiabi bunu suali, tiali goli bidigo me tusiąwai, augwali te Solgo bomai po walide te wi ebaso tiali.
1SA 14:27 Tiali goli, Jonatango aga ayago te ami bidi dabe dali wali po te agai odisiąwai. Tama agai te tolasa bilibo dono sesegede te kiabi bunu meba elalubo selama, tama agai tuali. Agai tula silibo si, tama polo aga bomo ma sai.
1SA 14:28 Tama bidi me deligo Jonatanbolo te po wai, “Da tigidali nasi eyu, bomo meni ebo, magi baso meni, te nago ayago da te nai tugio olama, habu seliyu, tama dabolo po bomonama te tiwai po wai, te bidi me deligo e boi hwįbo sogo bubugade te nai me tubaso da, teda Godigo aga dolaibao po wai dao,” wali.
1SA 14:29 Tialima, Jonatango agabolo te po wai, “Eno ayago te wali pogo te da tigidali dolalio. Dagego ena suao. Eno te dwasianu hanamu naga tuali goli, te ena bomo ma salio.
1SA 14:30 Te dago te boi bidi dabede sali nai te dago tubaso da, teda dago bomo sabo usu yaibao. Dago te Filistia dabe hauwa elali, tiali goli dago te tiwai bomo sigi sogo da, teda dago te Filistia dabe umabo mu elegi dao,” wali.
1SA 14:31 Te sogode te Israel dabego te Filistia dabe dali hwįani, te Mikmas bulude gagalama, tama pelama, te taun Aijalonba usu nigi pali. Tama tiyu, te Israel dabe nasi mu dwai eyu, tama bomo meni yai.
1SA 14:32 Giliga degasa dulai madi, teda augwali udulama, te sipsip me bulmakau dabe te boi bidi dabego nai dabe sali, te nai dabe sigi pali. Tama augwaligo ulama, tama te mi kaneme elalubadi tuali.
1SA 14:33 Tialima, bidi meba pelama, Solbolo wagi pali, “Odao. Te ami bidi dabego te kibu mi kaneme elalubadi tubo sę yai! Augwaligo te Genuai Bidiba sęgę sabo sę yalio,” te po wai. Solgo te po odama, teda agai te tiwai i wai, “Tegobao, augwaligo te God tudiba muani dao.” Tama agabolo te po sesali bidi dabebolo te tiwai po wai, “Dagego te genuai masigi me deli sigi pelama, tama hogogobele aselama, ena pageba sabolao.
1SA 14:34 Tama nosali dage te ami bidi dabe tomoba tedela pelama, tama augwalibolo te bulmakau me sipsip dabe sesao po wagi pagameo. Tama augwaligo te masigi ugwadu daide ela munama, tama ulama tede tuagameo. Tiyu, augwaligo te kibu mi kaneme elalubadi tulama, te Genuai Bidigo gedude dwai sę idalio,” wali. Tama tialima, te sogo hulide digi te ami bidi dabego bulmakau sela asobaso, tama te pesagede elali.
1SA 14:35 Tama Solgo te masigi te Genuai Bidigo alta tiwai ilama dąį ilali, te hasia sogo naga agai te alta nigibo sę yai.
1SA 14:36 Nosali, Solgo aga bidi dabebolo te tiwai po wali, “Ae, da aiyaba dulama, tama te Filistia dabe hulide pobeasa pelama, tama augwali dali wąbi hwįdubadi, te giliga pedalumainu yaibao. Tama dago te bidi dabe tigidali elama, tama augwaligo doado bage saibao,” wali. Tama augwa te po wai, “Te usu dao, dago tama tiwai yaibao.” Tiali goli, prisgo te po wai, “Te Godiba dago hanalu bolo ebo dao,” wai.
1SA 14:37 Tialima, Solgo te tiwai po Godiba hanalu wali, “Te dago te Filistia dabeba hwįgi pogowe, ma meni egowe? Tama te usu yali da, teda nago da tau sobaso, te augwali aiyaba elalugowe?” Tiali goli, megi te sogo Godigo agai po wei me ponobeo.
1SA 14:38 Tama Solgo te Israel dabe tobolu bidibolo te po wai, “Dage asiąo,” wali. “Te e megi bubugade dego te dwai sęgę yali te gegelama hanilaibao, tama tialigo te Genuai Bidigo dabolo te po wei ponobeo.
1SA 14:39 Genuai Bidi te sesemane sogo bidada pidu, tama da Israel dabe tau sabo, tama aga nogide eno te tiwai bomai po dąų wali, te dwai sę yali bidi aga isimainao, te mena bidi yaibaso me te tagalao, te isimainu yaibao. Tama te dwai sę Jonatango me yaibaso da, te eno wai tama digi tagalao, aga te isimainu yaibao.” Solgo te po wai. Tiali goli, te niwai bidi me deligo te po wei me ponobeo, mu menio.
1SA 14:40 Tialima, Solgo te tama po te tigidali Israel dabebolo wali, “Dage tigidali u badu pedai badu dolaluiąo, tama Jonatan da si te e pedai badu dolalueibao.” Tama augwaligo te po wali, “Te usu da, dago te tama tiaibao,” wai.
1SA 14:41 Tialima, Solgo Godiba hanalu wali, te Israel dabego Genuai Bidiba hanalu, te tiwai wali, “Genuai Bidio, magi baso nago eno po wei ponobewe? God, te Israel dabe dago Genuai Bidi, te eno ma te eno ogwa Jonatango te dwai sę yaibaso da, teda nago te prisgo te polalubo masigi somainu dąį ilao. Tiali goli, te gasa Israel we bidigo te dwai sę yaibaso da, teda nago te prisgo te namba 2 masigi somainu ilao,” wali. Tialima, Godigo odama, tama prisgo te Jonatan dali Sol si naga dąį ilibo masigi sali, tama te olo we bidi dabe menio.
1SA 14:42 Tama megi da, Solgo tama po wali, “Te dego dwai sę yaliwe naga gegebo sę ebo tobage kolesaga eyu, ena ma Jonatan da si yaliwe, te sueibao.” Tialima, augwaligo tama tiali, tama te masigigo te Jonatan dąį ilali.
1SA 14:43 Tama tialima, Solgo Jonatanba hanalu wali, “Nago magi sę yaliwe?” Tama Jonatango te po wai, “Eno te tolasa bilibo donode te dwasianu kiabi bunu ge naga te sela tuali. Tiali goli, tagalao, ena isimainu yaibao,” wali.
1SA 14:44 Tialima, Solgo agabolo te po wai, “Awe, nage isimainao. Dago te nage elisąbaso da, teda eno dwai sę te Genuai Bidi gedude elalubaso, tama Godigo ena ela muaibao,” wali.
1SA 14:45 Tiali goli, te we bidi dabego te po Solbolo wai, “Odiąo. Jonatango da Israel dabe tau selama, tama agai te genuai wąbi hwįagasali bage te augwali aiyaba elaluai. Te aga elimainu obawe? Mu menio! Dago te sesemane sogo bidada pabo Genuai Bidigo nogide mu po obao, nago dwai sę me deli agaba munu me elamuo. Magi baso meni, Godigo e sogo side aga tau selama, tama agai te sę yai,” wali. Tama tibaso, te we bidigo te Jonatan ma dobola sali, tama Solgo aga me ela mubeo.
1SA 14:46 Tialima, te sogo nosali, Solgo te Filistia dabe ma pobeasa me pabeo. Tama te Filistia dabe te augwa tǫ pedaiba ma geasa pai.
1SA 14:47 Te Sol Israel dabego king mu pedelali sogo, aga dali, te aga ami bidi dabe dali, te Israel dabego boi bidi te tigidali tǫ pedaide bidalubo bage dali hwįani. Augwaligo te Moap dabe me, Amon dabe me, Idom dabe dali, me te Filistia dali, me te Soba king dabe dali hwįani. Tama te hwįani te augwaligo te boi bidi dabe tigidali aiyaba elaluama, tama te boi bidi dabeba dene mayu yai dao.
1SA 14:48 Tama Solgo te ami bidi dabe haliga hodolama, hwįmainu elama, tama augwaligo hwįbo bomo mu elama, tama te Amalek dabe me aiyaba elaluali. Tama tibaso, te boi bidi dabe te Israel dabe dali hwįagasu munu me asobeo.
1SA 14:49 Te Solgo ogwa dabe te e tiwai, Jonatan, me Isvi, me Malkisua. Tama agai wegi si nogi te e tiwai, gomunai wegi te Merap, te tomo wegi Mikal.
1SA 14:50 Te Solgo we nogi te Ahinoam, te Ahimasgo wegi da. Tama Solgo ami polalubo tobolu bidi te Apner, te Nergo ogwa, tama Ner te Solgo aya sabi bidi dao.
1SA 14:51 Te Sol aga aya Kis, tama Kis me Ner, augwali si te Abielgo ogwa si dao.
1SA 14:52 Te Sol king bidali sogo, agai ami bidi dabego te Filistia dabe dali hwįbo bomo mu yali. Tama agai te hwįbode wi isiąwai bomai bidi dabe te olo bidibo subo si da, teda agai augwali selama, tama augwali te aga ami bidi dabe pedalumainu sai dao.
1SA 15:1 Me sogo deli Samuelgo Solbolo te tiwai po wai, “Te eno nage te Israel dabego king tiwai nigilama sa muani sogo, te Genuai Bidigo we bidi, te Genuai Bidigo digi enabolo te tama tia olama, tagala palali. Tama tialima, megi nago odao,
1SA 15:2 te Tigidali Bomo Elalubo Genuai Bidigo po. Genuai Bidigo te Amalek dabeba dwai dene mawaibao po wali, magi baso meni, te dago wąį nǫų dabe te Isip tǫ tagalama asali sogo, te Amalek dabego dwai sę augwaliba yai dao.
1SA 15:3 Tama tiyu, nage te naga ami dabe dali pelama, tama te Amalek dabe dali hwįgi pelama, tama augwaligo doado bage tigidali dolama, tama tigidali bidi me, we me, ogwa me, wegi me, wai puluba me elibadi, tama tigidali bulmakau me, sipsip me, kamel me, donki me, te ela silao wali. Nago te deli munu me tagalamu dao,” Samuelgo Solbolo te po wai.
1SA 15:4 Solgo te po odali, tialima agai te ami bidi dabe i olama, te Telaim hanuba sisinani. Tama te Juda hani bidi 10,000 elaluali, tama te gasa Israel hani sibi dabego te 200,000 bidi elaluai.
1SA 15:5 Nosali Solgo te aga ami dabe selama, te Amalek dabego taun pąba pelama, tama augwali te polobadu wę soai digi tama megi te wę sula sai madi, te pesage me delide te geme duala selama bidaluai.
1SA 15:6 Te Amalek dabe pąde bidali Ken hani bageba te Solgo te tiwai po ola tolali, “Dagego te Amalek dabe taga peyu, te duga gasa pedai badu bidigi pao,” wai. “Tiyu, dago dage te Amalek dabe dali elabuo. Eno te duga wąį nǫų dabego te wiegi yai kolesaga te da Israel dabeba eyu, te dago wąį nǫų dabe te Isip tǫ taga soyu asali sogo te wiegi yai kolesaga yali, te homu kone palama obao, tama tiyu, eno dage me eligobeo,” Solgo te po ola tolali. Tialima, te Ken dabego odama, tama augwa te Amalek dabe taga peyu palio.
1SA 15:7 Tama Solgo hwįbo sę bomo mu ela pelama, tama te Amalek dabe aiyaba elaluali, te Havilago tǫde gagalasa pali, tama te tǫ wa pai bulu te Sur, te giliga pedalubo pedai badu, te Isip te badu usu nigi palio.
1SA 15:8 Tama agai te Agak nogo pageabi yali, te Amalek dabe augwa king bidi da. Tama te Israel dabego te gasa tigidali Amalek dabe ela muani.
1SA 15:9 Tiali goli, augwaligo te augwa king bidi Agak te elibeo, tama me augwaligo te wiegi yai nisai sipsip wai dabe me, nisai bulmakau wai dabe me, elisąwai, magi baso meni, augwaligo te hagela homu yai dao. Augwaligo te sipsip me bulmakau dabe te dwai yali te gasa tobage kibu sibi dabe naga te ela silali.
1SA 15:10 Tama Genuai Bidigo Samuelbolo te tiwai po wali,
1SA 15:11 “Odao. Solgo ena tudiba munama, tama eno po sela sąwanio. Tama tibaso, eno aga te king pedalumainu ilali tama eno tede homu dene mu ebao,” wali. Samuelgo te po odama, tama aga homu sęgę eyu, tama haliga dwai yali. Tama te sogo hulide Samuelgo te Genuai Bidiba hanalu, te olo tau sabo wiegi yai homu kolesaga te Solba emainu yali, tama be posobo side te agai gedu haluasa wali po te silagasu, gedu haluasa po walio.
1SA 15:12 Te kigamu mu Samuel hogodasa peyu, te Sol gegegi pali. Tiali goli, augwaligo agabolo weyu, Sol aga te taun Karmelba pelama, te aga hwįanide te genuai nogi tede sali te sa muyu, te masigi me deli dodoligi pali po wai. Aga te masigi dodolugulama, teda aga te Gilgalba pai.
1SA 15:13 Tialima, Samuel pelama, te Sol sugi pobadi, tama Solgo agabolo te tiwai siade da po wali, “Samuel, te Genuai Bidigo wiegi yai sę bugagia nageba emainao. Eno te Genuai Bidigo po wali pai dao,” wali.
1SA 15:14 Tiali goli, Samuelgo te po agabolo wai, “Mu da, agawe? Tama magi baso eno te bulmakau me sipsip dabe hwa wabo odobawe?”
1SA 15:15 Tama Solgo tama po wei ponani, “Te eno ami bidi dabego te Amalek dabede salio. Augwaligo te sipsip me bulmakau dabe ela muyu silali, tiali goli augwaligo te wiegi wiegi yai te dago Genuai Bidi Godiba ofa yainu sai dao,” wali.
1SA 15:16 Tialima, Samuelgo agabolo te po wai, “Sagia sao. Pedauwali panialuao. Tama eno nagebolo te Genuai Bidigo megi hulide enabolo wali po waibao,” wali. Tama Solgo te po wai, “Te usu da, nago enabolo wao.”
1SA 15:17 Tialima, Samuelgo Solba te tiwai po wai, “Polobadu naga homugo nage te olo nai tiwai homu yali, tiali goli nage te da Israel hanigo polalubo tobolu bidi pedelali. Genuai Bidigo digi nage sa munama, tama nage te king bidi pedelai dao.
1SA 15:18 Tama agai nage tagala palobaso, te nago Amalek dabe dali hwįgi pali. Tama agai te po wai, ‘Nago hwį hwį pidu genama, tama te tigidali dwai bidi dabe ela silao,’ po wai.
1SA 15:19 Tiali goli, magi baso nago te Genuai Bidigo po wali pabewe? Magi baso dage udada pelama, te Amalek dabego doado bage sigi paliwe? Genuai Bidigo homude dagego te yali dwai kolesaga hagela mu yalio,” wali.
1SA 15:20 Tiali goli, Solgo Samuelba te tiwai po wei ponai, “Menio. Eno te Genuai Bidigo po wali palio. Tama ena pelama, te Amalek dabe dali hwįgi pali, te agai enabolo wali po gilama yali. Tama eno te Amalek we bidi tigidali elali. Tama eno te king Agak odasa asai dao.
1SA 15:21 Dago koneani, Genuai Bidigo aga da wali te kibu sa muna selama, tama agai dabolo weyu ela po wai. Tiali goli, te ami bidi dabego te wiegi wiegi yai kibu dabe naga te e Gilgalba odasa aselama, tama dago Genuai Bidi Godiba ofa eyu elaiba homu eyu odasa asai dao,” po wai.
1SA 15:22 Tiali goli, Samuelgo agabolo te po wali, “Genuai Bidigo dago mena kolesaga ebo godolo ebo dawe? Agai te tobage ofa ebo dabe naga godolo ebo dawe? Ma, te dago agai po wali pomainu homu ebo dawe? Odao. Te agai po wali pabo kolesaga te polasa yaibao. Tama te wiegi yai kibu dabe ofa ebo sę, te nosali badu naga yaibao. Te dago agai po odobo kolesaga te wiegi yai dao, tiali goli te omai sipsip ili siago deyu, tama ofa ilibo, te nosali badu naga yaibao.
1SA 15:23 Magi baso meni. Te Godigo po sela sąbo kolesaga tobage te dwai pobi wabo kolesaga tobage ebao, tama te God dali hagoma ebo kolesaga te tibo god wali pabo kolesaga tiwai ebao. Te tobage kolesaga ebo te dwai kolesaga mu dao. Nago te Genuai Bidigo po tudiba muani, tama tiyu agai nage tudi ola mayu, tama nage king munu me bidigobeo dao,” Samuelgo te po wali.
1SA 15:24 Tama Solgo te tiwai po wei ponani, “Awe. Eno dwai sę yalio, tama eno Genuai Bidigo po me, nago po me, sela sąwani. Ena te ena ami bidi dabede wi ebaso, tama eno augwaligo po wali pai dao.
1SA 15:25 Tiali goli, megi eno homugo te nago eno dwai sę sela sąnama tagalu, tama ena dali aselama, tama eno te Genuai Bidiba lotu waibao,” wali.
1SA 15:26 Tiali goli, Samuelgo Solba te tiwai po wali, “Ena nage dali me pogobeo, magi baso meni, nago te Genuai Bidigo po tudiba muani, tama tiyu agai nage tudiba muyu, tama nage te king munu ma bidigobeo,” wai.
1SA 15:27 Tialima, Samuel te baguasa soyu, painogo yali. Tiali goli, Solgo aga gemainu yali, tama tiyu agai te Samuelgo ugwa sabi badu tola sagasali, tama te ugwa pisila pai.
1SA 15:28 Tama Samuelgo te tebo sulama, tama Solbolo te tiwai po wali, “Te usu da, odao. Megi te Genuai Bidigo te king sę nagede elaluali te sela sąwani, tama nago te Israel dabe munu me tonalugobeo, te nago megi te ugwa pisila sąwani tiwai gilama ebao. Tama agai te gasa Israel bidi me deliba mawaibao. Aga te wiegi yai bidi te nage aiyaba elaluai dao.
1SA 15:29 Nago homugo Godigo te e po hasegelaiba te homu me elamuo. Mu menio. God, te da Israel dabego wiegi yai ula yai bomo agade elalubao, tama agai tibo po me wagobe, ma agai homu me hasegeligobeo. Menio. God te da bidi tiwai meni, tama tiyu agai wali po ma hasegeligobeo,” wali.
1SA 15:30 Tama Solgo po wei ponoyu, te tama po wali, “Mu da, eno dwai sę yalio. Tiali goli, te nage ena dali asobo homu usu eyu da, te eno dago Genuai Bidi Godiba lotu wagowe? Tama tiyu da, nago te tobolu bidi dabe me te gasa we bidi dabego te augwa homu ena bugagia ma konemainu ilao,” te po wai.
1SA 15:31 Tialima, Samuel te Sol dali pelama, tama Solgo te Genuai Bidiba lotu po walio.
1SA 15:32 Nosali Samuelgo augwaliba te po wali, “Te Agak odasa asao, te Amalek dabe augwa king bidi.” Agak te bugai haliga elasa asu, tama tiwai homu yali, ‘Te ena isigobe da,’ homu yai.
1SA 15:33 Tiali goli, Samuelgo te po wai, “Nago bidi hauwa elali, tama megi da, te bidi dabe augwa ida dabego wai meni. Tama tiyu, megi te nago ida me, te ida dabe tiwai gilama pedelaibao,” wali. Tama agai po olama, augwaligo te Agak ela munama, tama aga dwasianu dwasianu te Genuai Bidigo gedude te Gilgal alta pąde te dwasianu tologalio.
1SA 15:34 Tama nosali Samuel te Ramaba ma geasa peyu, tama te king Sol aga be te Gibeaba palio.
1SA 15:35 Tama Samuelgo te Sol gesabidi munu me ma susiąbadi, te aga isiboba usu nani, tiali goli agai te Solde homu kone palu, te aga haliga sęgę mu yalio. Tama Genuai Bidigo Sol te Israel king pedalumainu ilali sęde te aga homu dene mu yai dao.
1SA 16:1 Nosali Genuai Bidigo Samuelbolo te tiwai po wali, “Nago sesemane sogo te Solde haliga sęgę elaluai. Nisu sogo nago te haliga sęgę elalubo silaibawe? Eno aga sela sąwanio, tama eno gedude aga te Israel king munu ma bidibeo. Tialima, eno homugo megi nago te sipsip gąų me deli selama, tama tede te king bidi sa muabo oliv wel tabilao, tama nage pelama, Jesi sugi pao, te Betlehem bidi me deli, magi baso meni, eno te agai ogwa dabede te ogwa me deli te king pedalumainu nigilai dao,” wali.
1SA 16:2 Tiali goli, Samuelgo Genuai Bidiba te tiwai po wai, “Eno te sę mena tama egowe? Te Solgo eno tama tiali po odobaso da, teda agai ena ela muaibao.” Tialima, Genuai Bidigo agabolo te po wali, “Menio. Te bulmakau so kibu me deli te Betlehemba sela pelama, tama te taunde bidibo we bidibolo te tiwai po weyu, ‘Ena te Genuai Bidiba ofa yainu asai dao,’ po wao.
1SA 16:3 Tama nago Jesibolo hanalu, te ofa eboba asao olama, tama eno nagebolo te mena sę nago te Jesi dali yabo sę po waibao. Tama eno nagebolo te mena bidi nago te welgo te king nigilabo po waibao,” wali.
1SA 16:4 Tialima, Samuelgo te Genuai Bidigo po odama, tama hogodama, te Betlehemba pai. Aga sabaligi pabode, te taunde bidali tobolu bidi dabego te aga dali deliba gesabidi ununani. Augwali wi elama, dwai noma siyu, tama agabolo te po wali, “Haniani po page konebo bidi, magi yaliwe? Nage asali, te da wiegi yai bugagia ilagasu asaliwe, ma meniwe?” wali.
1SA 16:5 Tama Samuelgo te po wali, “Ena te Genuai Bidiba naga ofa ilagasu asali. Dage te duga digi te God gedude wiegi yai bolo ilama da, tama nosali dage ena dali asama, te ofa yagasao,” wali. Tama aga te Jesiba pelama, tama te Jesi dali aga ogomani me te Genuai Bidi gedude dwagi yai ilama, tama augwaliba hanalu te ofa yaboba asao wai.
1SA 16:6 Augwali sabola silama, tama te Genuai Bidi geduba dolagasali, tialima Samuelgo te Eliap, te Jesigo gomunai ogwa, sulama, te tiwai homu yali, ‘Te bidi tama, te Genuai Bidigo aga te king pedalumainu nigilali,’ te homu yalio.
1SA 16:7 Tiali goli, Genuai Bidigo agabolo te po wai, “Nago homugo aga te dili bobage bidi, ma aga te sawia pai suyu, tama eno aga nigilabo homu me egobeo. Menio, eno homugo te bidi king pedalumainu homu ebo hagela homu ebao. Magi baso meni, eno bidi dagalubo sę ebo te e tǫde bidigo bidi dagalubo tiwai gilama me tegobeo. Menio. Te bidi dabego te bidi tigiba tonono ebao. Tiali goli, eno te homu kolesaga me te bidigo kolesagade si sulama, tama eno augwali dagalaibao,” wali.
1SA 16:8 Tama Jesigo te tomo ogwa Abinadap i wali, tama aga te Samuelba odasa asai. Tiali goli, Samuelgo te po wai, “Menio, Genuai Bidigo aga sa mubeo.”
1SA 16:9 Tama Jesigo te ogwa me te Sama te Samuelba odasa asali, tiali goli Samuelgo te po wai, “Menio. Aga me, te Genuai Bidigo sa me mubeo.”
1SA 16:10 Tialima, Jesigo aga gasa ogomani me si me si te Samuelba odasa asali, tama Samuelgo agabolo te po wai, “Genuai Bidigo te bidi dabe augwalide me deli te sa me mubeo.”
1SA 16:11 Tama Samuelgo Jesibolo te tiwai po wali, “Nago ogomani te tigidali tama naga dawe?” Tama Jesigo te po wali, “Menio. Te ogwa bidi ogwa me deli digi elalubao. Te augwa ama sabi bidi tama. Tiali goli, aga te sipsip dabe tonalubo sę ebao,” wali. Tialima, Samuelgo agabolo te po wali, “Tagalao. Te bidi me deli tagala palama, te aga odasa asao. Aga bolo asobo si da, te dago ofa yaibao,” wali.
1SA 16:12 Tialima, Jesigo te bidi me deli tagala palama, aga te ogwa sela asomainu yali. Jesigo te ogwa te gesi ogwa bidi, tama aga gesabidi te sawia pai mu elama, tama aga gedu te ula mu elama, tama aga tigi te wiegi yai mu yai. Tialima, Genuai Bidigo te tiwai po Samuelbolo wai, “Aga te bidi tama dao. Te king sa mubo wel selama, tama agaba muao,” wali.
1SA 16:13 Tialima, Samuelgo agai te selasa pali oliv wel selama, tama agai te wel te Devit toboluba te aga ama dede gedude gelali. Tama te sogode te Genuai Bidigo Mobo Bidi te agaba bomo elama bidagaselama, tama te Mobo Bidi agade nosali sesemane sogo bidada pali. Samuelgo wel te Devit toboluba munama da, teda Samuel te Ramaba ma pai.
1SA 16:14 Te sogo te Genuai Bidigo Mobo Bidigo te Sol tagalu, tama Genuai Bidigo te dwai haubo mobo me deli te Sol agaba tagala palama, tama aga homu kolesaga dolama, tama aga wi dwai ilali.
1SA 16:15 Tama Sol aga sę ebo bidi dabego agaba te tiwai po wai, “King o, dago koneani, Godigo te dwai haubo mobo me deli nageba tagala palama, tama nage dwai ilibao.
1SA 16:16 Tama nago homu usu da wida, teda da pelama, te string elalubo musik elibo bugagia mu koneai bidi me deli gegi paibao. Tama Godigo nageba te dwai haubo mobo tagala palubo sogo da, teda te bidigo te musik elibo si, tama nago homu kolesaga te wiegi yai ma pedaligi soaibao,” wali.
1SA 16:17 Tialima, Solgo aga sę bidi dabeba te tiwai po wai, “Te tama dao. Dage pelama, te musik bugagia elibo koneai bidi me deli gegegi pelama, tama aga enaba odasa asao,” wali.
1SA 16:18 Tama sę bidi me deligo Solbolo te po wali, “Eno te Betlehem bidi Jesigo ogwa me deli suai dao. Te gesi ogwa bidigo agai te musik elibo mu koneai. Tama aga te wiegi yai hwįbo bomai bidi da. Tama aga te wiegi yai po weyu, tama tonobo sawi yai bidi mu. Tama Genuai Bidi me aga dali bidibo dao,” wali.
1SA 16:19 Solgo te po odama, tama agai te bidi dabe tagala palu, te tiwai po Jesibolo wagi pali, “Nago te ogwa Devit, te sipsip dabe tonalubo bidi, eno homu nago aga te ena pageba tagala palao homu ebao,” te po wagi pali.
1SA 16:20 Tialima, Jesigo odama, tama Devit te Solba tagala palali. Agai Devitbolo te donki me deli mobadi, tama te bret meba te basket side pągąnama, tama te donki tudi badu daide kęnani. Tama me agai te Devitba te meme wali me deli augwaligo te wain buai te mani, tama gesi meme me deli me, tama agai Devitbolo weyu, te nai dabe te Solba wiegi yai homu tiwai ilama mao wai.
1SA 16:21 Tama Devit te Sol pageba sabolama, tama aga sę bidi pedelali. Tama Solgo te Devit godolo mu yali. Tama tiyu, agai Devitbolo te aga hwįbo sesemone sabilibo sę mawai dao.
1SA 16:22 Tama Solgo Jesiba po ola toliyu, te tiwai po wai, “Eno Devit godolo homu ebao. Tama tiyu, eno homugo nago aga te eno sę bidi bidimainu ilao,” wali.
1SA 16:23 Tialima, Devit Sol dali bidali. Tama Godigo te dwai haubo mobo te Solba tagala palobo sogo da, teda Devitgo te musik eliyu yai. Tama Solgo te musik elibo odobo sogo, teda te dwai haubo mobogo te Sol tagalubaso, tama aga homu kolesaga wiegi yai ma pedaliyu, tama aga usu ma eyu yai dao.
1SA 17:1 Nosali te Filistia ami dabe te Sokoba sisinagasali, te Juda dabego taun me deli dao. Tama augwali osogo bidabo pesage te Efesdamimde nigali, te Soko taun de Aseka taun si tomode, tama augwaligo te Israel dabe dali hwįainu sisi elaluali.
1SA 17:2 Tama Sol dali, te aga ami bidi Israel dabe dali pelama, te Ela bulu odogoba sisinama, tama bidabo pesage nigai. Augwali te bulude bidalu, tama augwa te Filistia dabe dali hwįainu sisi elama bidali.
1SA 17:3 Tama te Filistia dabe te bulu du me deli u badu bidalu, tama te Israel dabe te bulu du me deli e badu bidalu yali, tama te ami hani sigo hwįbo pesage te tomo bulu odogo malu tǫde elaluali.
1SA 17:4 Te sogo te hwįbo bomai bidi me deli, augwa te Goliat nogi yali, te Get taun bidi, aga te Filistia ami dabe bidibo pesage taga soyu aselama, te pepeli diliba hania dolagaselama, tama te Israel dabego aga suali. Te aga bobage usu te 3 mita pąde tama.
1SA 17:5 Tama aga te hwįbo madi me, bulubo ugwa me, te augwaligo te brasgo nigai te muani, tama te hwįbo ugwa dabe sęgę te 50 kilogram elaluai.
1SA 17:6 Tama aga sągą te bras dagego haluai. Tama agai te brasgo nigai sesemone te aga nagede tolasa bilali.
1SA 17:7 Te sesemone te genuai mu, te ugwa hobolobo masin moni ba ain dili tiwai. Tama poai yali te enego gąų te augwa aingo nigai. Tama te aingo sęgę te 7 kilogram tama elaluai. Tama ami bidi me deligo te Goliatgo hwįbo sabele tolama, tama aga asobodu polasa pai.
1SA 17:8 Tialima, te Goliat dolagaselama, tama te Israel dabeba genuai po dagą weyu, te tiwai po wai, “Magi baso dage te tama tiwai wasialubawe? Dagego hwįainogo, ebawe? Dage te Solgo olo sę ebo bidi naga da, tama ena deli da, te Filistia ami bidi dao. Ae, dagego te bidi me deli nigilama, te ena dali hwįagasao.
1SA 17:9 Te agai bomo ugwaba igulama, tama ena ela mubaso da, teda da te dagego olo sę ebo bidi pedelaibao. Tiali goli, eno aga aiyaba elaluama, tama aga ela mubaso da, teda dage te dago olo sę ebo bage pedelagameo,” te po wai.
1SA 17:10 Tama Goliatgo po mu ma weyu, te tiwai po wali, “Odiąo, megi eno dage Israel ami dabe usu saibao. Dagego te ena dali hwįabo bidi me deli nigilao,” wali.
1SA 17:11 Sol me aga ami dabe daligo te po odama, tama augwali wi dwai mu yai.
1SA 17:12 Te Devitgo hani sibi te tiwai dao. Devit te Jesigo ogwa dao. Tama Jesi te Efrata bulu bidi, tama te Betlehem bulu te Juda hanigo tǫde bidai. Jesigo ogwa te a naga olama, meba sela elalubo sogo te Sol king pedelali, Jesi te monu dabe yai mu bidai.
1SA 17:13 Te Jesigo gomunai ogwa me, tomo ogwa me, te tudi badu ogwa me, te boi hwįgi paboba Sol dali pali. Te gomunai ogwa nogi Eliap, tama te tomo ogwa nogi Abinadap, tama te ogwa me Sama. Tama Devit aga te Jesigo sabi ogwa mu dao.
1SA 17:15 Tama me sogo side Devit pelama, te Solba sę igi peyu, tama me sogo side agai te Sol taga soyu, te Betlehemba ma solama, te aga ayago sipsip dabe tonalugi peyu yai dao.
1SA 17:16 Te bidi sese si te 40 sogo usu nama, te kigamu me pio te Goliat aselama, te pepeli diliba dolagaselama, tama te Israelba i weyu, te aga dali hwįabo bidi me deli te tagala palao po wai.
1SA 17:17 Te me sogo deli Jesigo te Devitbolo te tiwai po wali, “Te e nogo si bret selama, tama te sęgę nogo si yai te augwaligo te siade ulubo wit me selama, tama augwa te bidalubo pesageba polo selasa pelama, tama naga ama dede genuai bagebolo te nai magi pao,” te po wai.
1SA 17:18 “Tama te nogo si sis me sela pelama, tama te ami hani dabe augwa polalubo ofisa bidi magi pao. Tama nago naga ama dede dabeba hanalu, te augwali bugagia bidibawe, ma meniwe, te po hanalu wao. Tama nago nai me deli selasa ma asobaso da, teda eno koneama, te nago augwali suali da waibao.
1SA 17:19 Te king Sol dali, naga ama dede me, te gasa ami bidi dabe dali, te Filistia dabe dali te Ela odogo bulude hwįbo sę ebao,” Jesigo Devitbolo te po wai.
1SA 17:20 Tialima, te sogo nosali Devit te kigamu mu hogodama peyu, tama gasa bidibolo te sipsip dabe tonaluao po wali. Tama agai te nai dabe selama, te Jesigo agabolo wali gilama te bage bidalubo pesageba pali. Tama te Israel dabe te hwįbo pesageba pobadi, te aga augwali bidibo pesageba pedelali. Te ami dabego i weyu, genuai po dagą dali pelawali.
1SA 17:21 Tama te Filistia ami me, te Israel ami me, te nani u badu me e badu me wasilama, tama augwa hwįainu sisi elaluali.
1SA 17:22 Devitgo te nai dabe te walu tonalubo ofisa bidi dabeba menama, tama aga te ami dabe bidibo madiba udulama, tama aga ama dede dali po miani.
1SA 17:23 Te agai augwali dali po midubadi, Goliatgo te Filistia hani taga soyu, tama te pepeli diliba dolagaselama, tama te Israel dabeba te polobadu wali po tiwai wali, tama Devitgo agai te wabo po odali.
1SA 17:24 Te Israel dabe augwaligo te Goliat sulama, te augwali wi dwai mu ebaso, tama augwali wi pai.
1SA 17:25 Tama te Israel dabe augwa hasi digi po miyu, te tiwai po wai, “Te bidi suao, te agai i wabo po odao. Agai te wąbi hwįainu da dianobao. Tiali goli, kingo te po wali, te Filistia elibo bidibolo te agai mone umabo hauwa mawaibao wali, tama te bidibolo te agai wegi somainu yaibao wai. Tama kingo te bidi aga hanide te takis mone me sisąma, tama augwali haniba te kingo sę tobage yagasomainu i me wagobeo,” wali.
1SA 17:26 Devitgo te po bugagia odisąbaso, tama agai te aga pąde bidalubo bidi dabeba hanalu, te tiwai wali, “Te kingo mena sę te Filistia elibo bidibolo elama, tama da Israel dabeba te genuai hale pedalubo sę tagalaibawe? Te Filistia bidi te Godigo po odisiąwai bidi naga te dao. Agai hagoma mu eyu, tama te Sesemane Sogo Bidibo Godigo amiba te posobo po wali dao,” te po wai.
1SA 17:27 Tama augwaligo agabolo te tigidali sę te Goliat elali bidibolo te kingo yabo sę po wali.
1SA 17:28 Eliap, te Devitgo ama gomunai bidigo, te agai te bidi dabe dali po mibo odai. Tama aga haliga sębę elama, tama Devitbolo te tiwai po wai, “Magi baso nage eba asai dawe? Tama dego nago te dwai sipsip dabe te buside tonalubawe? Eno koneani, nage te hagoma ebo bidi, tama nage te hagoma kolesaga ebo bidi da. Nage te hwįbo naga suainogo asali dao,” wali.
1SA 17:29 Tama Devitgo aga amabolo te tiwai po wai, “Menio. Eno te nai me deli koneainogo, tama tiyu, eno te bidi dabeba hanalu wali. Te dwai da, agawe?” wali.
1SA 17:30 Tialima, aga begelama, palima, tama gasa bidi dabeba hanalugi peyu, te mena sę kingo te Godigo amiba te posobo po wali Filistia bidi elibo bidibolo yabo po wai. Tama augwaligo agabolo te sę yabo po dabe walio.
1SA 17:31 Te bidi mebago Devitgo po odama, tama augwaligo te Solba wagi pali. Tama tibaso, agai te Devit aga asomainu i wali.
1SA 17:32 Devit sabolama, tama agai Solba te tiwai po wali, “King, odao. Da Israel te Filistiade wi me elamuo. Te ena digi eno aga dali hwįgi paibao,” wali.
1SA 17:33 Tiali goli, Solgo te po wali, “Mu menio. Nage usu me egobeo. Te nago mena tama aga dali hwįaibawe? Nage olo ogomani da, tama aga te ami bidi te ogwa bidide sogo bidali te e sogo megiba usu nagasobao,” wali.
1SA 17:34 Tiali goli, Devitgo Solba te tiwai po wei ponani, “King o, eno te ena ayago sipsip tonaluali. Tama meba sogo te dwai uni hasa laion me bea dabe aselama, tama te sipsip dabe selasa pali.
1SA 17:35 Tialima, eno te laion me bea te pobeasa pelama, tama elama, tama te sipsip ma dobola siyu yai. Tama te laion me bea te begelama, ena elainu ebaso da, teda eno te mage pedu nisi tola selama, tama aga ela muyu yai dao.
1SA 17:36 King o, eno te laion dabe me te bea me eliyu yai, tama eno te tobage tama tiwai kolesaga te Genuai Bidigo po odisiąbo Filistia bidide tiaibao, magi baso meni, agai te Sesemane Sogo Bidada Pabo Godigo amibolo te posobo po walio.
1SA 17:37 Genuai Bidigo ena tau sobaso, tama tiyu te laion me beago te ena me dolobeo. Tama megi me, agai ena tau siyu, tama te Filistia bidigo ena me ela mugobeo,” wali. Tialima, Solgo agabolo te po wai, “Wiegi yai da, nage pagameo. Tama eno homugo Genuai Bidi nage dali bidimainao,” wali.
1SA 17:38 Tama Solgo te brasgo nigai madi te Devit toboluba muani, tama te brasgo nigali holobo ugwa agaba menama, te aga tigi halua somainu yali. Te hwįbo doado bage te Solgo nai dabe mani.
1SA 17:39 Devitgo te Solgo bainat hwą te brasgo nigai te holobo ugwade walama, tama pabo usu sela suali. Tiali goli, te usu meni yani, magi baso meni, agai te tobage nai te aga tigide polobadu musiąwai. Tama tiyu, te Solbolo agai te po wali, “Eno nago e hwįbo doado bage munama tama hwįgi pogobeo. Eno te doado bage tigide musiąwai,” wali. Tama agai te tigidali peda sąwai.
1SA 17:40 Nosali aga te tolasa bilibo dono selama, tama te dwasianu wę me deli elalubo madi pelama, tama te dwasianu dudu du masigi a naga selama, tama aga dwasianu waba bulali. Tama agai te masigi sąyabo kibu wali tolasa peyu, tama pelama, te Goliat dali hwįgi palio.
1SA 17:41 Tama Goliatgo Devit suali, tama aga asu, te agaba gesabidi deli ununama asali. Tama te Goliatgo hwįbo sabele tolasa bilibo bidi, aga te polasa asali. Tialima, Goliat asu, te Devit pąba aselama,
1SA 17:42 tama agai Devit suali, te gesi bidi mu, tama aga gesabidi te wiegi yai mu yai, tama agai hwįabo usu meni yai. Tama tiyu, agai homugo Devit te olo nai naga homu yali.
1SA 17:43 Tama tiyu, aga dolagaselama, tama Devitbolo te po wali, “Magi baso nago te bilibo dono sela asaliwe? Nago homugo ena te yowi da weyu, elainu asali, agawe?” Tialima, agai te aga tibo god dabe i olama, te Devit dolomainu yali.
1SA 17:44 Tama agai Devitbolo te tiwai po wali, “Nage asao, te eno nage ela munama, tama nago tigi te ba dabebolo me te uni hasa dabeba me menama, tama augwaligo tumainu yaibao,” wali.
1SA 17:45 Tama Devitgo po wei ponoyu, te po wai, “Nago te bainat me sesemone dabe tolasa asu, ena dali hwįagasainu ebao. Tiali goli, eno nageba hwįagasainu ebo te Tigidali Bomo Elalubo Genuai Bidi, te da Israel ami dabe tonalubo Godigo nogide, te eno nage dali hwįagasobao. Te God agaba nago hagoma elama, tama agabolo te dwai posobo po wali dao.
1SA 17:46 Odao. Megi e sogode naga te Genuai Bidigo nage eno nogoba mawaibao. Tama eno nage ela munama, tama nago tobolu togwaibao. Tama dago te dage Filistia ami dabe ela munama, tama augwaligo tigi dabe te ba dabeba, me te uni hasa dabeba menama, augwaligo tueibao. Te eno tama tiwai sę ebo sogo, te tigidali tǫ pedaide bidalubo we bidi augwaligo te tiwai eyu koneaibao, te da Israel dabego God, te God mu da waibao.
1SA 17:47 Tama ede bidibo tigidali bidigo te tiwai ebo suyu, te Genuai Bidigo aga we bidi dabe te aga bomogo digi ma dobola sabo sueibao. Agai te hwįbo sesemone me bainat tolasa asobo bidigo bomogo te da ma dobola sogobeo. Mu menio. Genuai Bidigo digi te hwįbo aiyaba elaluama, tama agai dage tigidali te dago nogoba mawaibao,” te po wali.
1SA 17:48 Devitgo po ola silama, tialima Goliat ma peyu, te Devit pąba asali, tama polo tama Devitgo te Goliat dali hwįainu udada peyu pai.
1SA 17:49 Tialima, Devitgo nogo te aga waba munama, tama masigi me deli selama, tama te masigi sąyabo naiba munama, tama Goliatba enani. Te masigigo te Goliat gesabidide dolo dolama, tama aga gebo tomoba bula sigi pelama, tama aga gesabidi tǫba ilama degasa dulali.
1SA 17:50 Tama tialima, Devitgo ugwaba ela holama, tama Goliat te masigi sąyabo nai dali masigi sigo naga ela muai dao. Aga te hwą bainat meni yai.
1SA 17:51 Goliat te tǫde pigulai munalubadi, tama Devit udada pelama, aga pąba doligi pelama, tama Goliatgo bainat hwą dią selama, tama aga mage toga sąnama, tama aga ela muani. Te Filistia dabego augwa te polaluali ami bidi ela mubo sogo suyu, tialima tigidali wi tedela palio.
1SA 17:52 Tialima, te Israel bidi dabe me, te Juda dabe me, te i weyu genuai po dagą olama, tama augwali pobeasa pelama, tama augwali ela muani. Tama te Filistia dabe dolama, tama te sunumide degasa peyu ela pali, te Saraim tagalama pali, te Getba usu nigi pelama, te Ekron taun sunumi obo elalubo madiba sabaligi palio.
1SA 17:53 Te Israel dabego augwali pobeasa pelama, tama augwali te Filistia dabe bidali pesageba ma geasa aselama, tama te Filistia dabego taga pali tigidali doado bage te sali.
1SA 17:54 Tama Devitgo te Goliatgo tobolu sela peyu, te Jerusalemba pelama, te agai Goliat aiyaba elaluali po te augwaliba ola magi peyu waseligi palio. Tiali goli, hasia bolo te aga ugwa beba digi pelama, tama te tigidali hwįbo nai te Goliatde sali nai mugi palio.
1SA 17:55 Devit pelama, te Goliatba hwįgi pabo Solgo sulama, tama agai te ami dabe augwa polalubo ofisa bidi, Apnerbolo te tiwai po hanalu wai, “Te ogwa te dego wai dawe?” Tama Apnergo agabolo wali, “King o, eno mu po nagebolo obao, eno konebeo,” wali.
1SA 17:56 Tama Solgo te po agabolo wai, “Tialima, nago te bidi dabeba hanalua biligi pelama, tama nago enabolo wagasao,” wai.
1SA 17:57 Nosali badu Devitgo te Goliat ela munama, te aga bidali pesageba ma asobode tama Apnergo aga selama, te Solba pali. Devitgo te Goliat tobolu tolalubadi, tama te Apner dali pelama, te Sol sugi pali.
1SA 17:58 Tama Solgo agaba hanalu wali, “Te ogwa bidio, nage te dego ogwa dawe?” Tama Devitgo agabolo te po wali, “King o, ena te Jesigo ogwa da, te Betlehem bidi me deli dao, aga te nago dologode bidibo bidi dao,” Devitgo te po wai.
1SA 18:1 Sol de Devit dali si po mia silibo si, tialima nosali Jonatan, te Solgo ogwa, te aga homu Devitba mu kęą pelama, tama agai te Devit godolo mu eyu, te aga digi aga godolo ebo tiwai mu yalio.
1SA 18:2 Tama te sogode Solgo Devit selama, aga dali bidali, tama aga page buluba ma pomainu me ebeo.
1SA 18:3 Tama Jonatango Devit godolo homu mu ebaso, tama tiyu, agai bomai po me deli Devitba dąų walali, te agai Devit godolo ebo homu te sesemane elalubao. Tama Devitgo me Jonatanba te tiwai po naga wai, tama augwali si te age name si tama bidai.
1SA 18:4 Tama Jonatan aga bobage holobo ugwa te pedelama, tama aga hwįbo doado bage me te sali. Tama agai te doado bage dali, te bainat me, sesemone me, kukulu me selama, te Devitba mawai.
1SA 18:5 Tama Devit te Sol dali bidali, tama Solgo te Devitbolo olama, te ami bidi dabe selama, te boi bidi dabe dali hwįgi pao wali, tama augwali hwįbo sogo da, teda Devitgo hanigo te boi bidi dabe aiyaba elaluali. Tama tibaso, Solgo aga te ami dabego polalubo ofisa bidi nigilali. Te tigidali we bidigo me, te Solgo ofisa bidi dabego me, augwaligo suali, Devit te genuai bidi pedalubaso, tama augwali bugai haliga mu yai.
1SA 18:6 Te Devitgo Goliat elibode nosali tama te ami dabego hwįani silibo si, teda augwa pesageba ma begasa asali. Tialima, te tigidali hanude te Israel we dabe te taundu buluba soyu, te king Sol sunumide tiąba pali. Augwaligo te wiegi yai pemene ebo tęąbi weyu, tama augwaligo te balia dali wai. Tama augwaligo te wiegi yai musik weyu, te dudu du musik te belo elalubo te eliyu, tama te tobage gita me deli dali te tęąbi wali.
1SA 18:7 Tama augwaligo tęąbi te tiwai wai, “Solgo te hauwa umabo tausen bidi elali. Tama Devitgo te umabo umabo hauwa tausen bidi mu elalio,” augwaligo te tiwai wai.
1SA 18:8 Solgo te tęąbi odama, tama agai homugo godolo mu meni yai. Tama aga haliga sębę elama, te po wai, “Augwaligo homugo te Devitgo te umabo tausen hauwa bidi elali homu yali, tama eno umabo tausen naga elali homu ebao. Te nosali augwaligo homugo te agai eno bidibo sę ebo pesage me saibao homu ebao,” wali.
1SA 18:9 Tama tiyu, te sogode gagalasa, Solgo homu tede kone palama, tama tiyu Devitba haliga dwai yalio.
1SA 18:10 Te nosali side Genuai Bidigo te dwai mobo haubo me deli te Sol aga bede bidibadi te agaba tagala palali. Tama deli sogo polo tama, te dwai mobo haubogo te Solgo homu kolesaga tonaluagaselama, tama Solgo te i ola biliyu, te esela pabo bidi mu tiwai ilali. Te sogo Devitgo te agai gita elibo sę iduali, te aga tigidali sogo ebo tiwai gilama yali. Tama Solgo aga sesemone ene tolalu,
1SA 18:11 tama te tiwai homu yali, ‘Megi da, te eno Devit te sesemone enego enama, tama aga ela muaibao,’ homu yai. Tialima, agai te sesemone ene te Devitba sąnama enani, tiali goli Devitgo te sesemone ene geda munama, ela soali. Tama Solgo te tiwai si sogo yali.
1SA 18:12 Genuai Bidi te Devit dali bidibo te Solgo koneani, tama Sol tudiba muduali. Tama tiyu, Sol te Devitde wi elama,
1SA 18:13 tama agai te Devit aga dali te kingo bede bidimainu me ilibeo. Menio, agai aga te 1,000 ami bidi dabego ofisa bidimainu muani. Tama tiyu, Devitgo te ami dabe selama, te boi bidi dabe dali hwįgi peyu yalio.
1SA 18:14 Tiali goli, Genuai Bidi aga dali bidiyu, tama aga tau siyu, tama tigidali sę agai ebo te wiegi yai naga pedelali.
1SA 18:15 Tama Solgo suali, Devitgo te wiegi yai sę mu ebaso, tama aga te Devitde wi mu umabo yalio.
1SA 18:16 Tiali goli, te tigidali Israel me Juda bagego te Devit godolo homu mu yali, magi baso meni, aga te ami dabego wiegi yai ofisa bidi dao.
1SA 18:17 Nosali Solgo te tama homu yai, ‘Eno homugo te Devit isimaina homu yali. Tiali goli, tiyu eno digi aga ela muidalio. Te aga te Filistia dabeba hwįgi pelama, tama te Filistia dabego aga ela mumainao,’ homu yai. Tama teyu, Solgo Devitba te po wali, “Odao. Eno nage te Merap maiabo homu ebao, te eno gomunai wegi, tama nago selama, duga si bidagameo. Eno homugo nago aga te tobage mone tiwaigo abelimainu homu yai. Nago eno ami bidi sęde bomo elama sę eyu, tama nage wi munu me elamuo. Tama te Genuai Bidigo homugo dago te boi bidi dali hwįgi pomainu ebo sogo da, teda nago te augwali dali hwįgi peyu yagameo,” wali.
1SA 18:18 Tialima, Devitgo Solgo te tama po wabo odama, tama po wei ponoyu, te tiwai po wai, “Tagalao, eno aga me sogobeo. Ena te olo bidi naga dao. Tama ena hani sibi dabe te nogi me elalubeo. Tama tiyu, eno nago wegi me sogobeo,” wali.
1SA 18:19 Tiali goli, Solgo bomo elama, Devitgo te Merap somainu eyu, tama agai te wegi somainogo ebo bodolu muani. Tiali goli, te we sabo bodolu muani sogo, Solgo aga te Devitba magasobeo. Menio. Agai te Merap gasa bidiba mani, te bidi aga nogi Adriel, te Mehola taun bidi dao.
1SA 18:20 Tama nosali, Mikal, te Solgo gasa wegi, te Devitde mu tulaluama, wei mu eyu, tama aga godolo mu yali. Tama Solgo te tebo po odama, tama aga wiegi yai homu pemene mu yalio.
1SA 18:21 Tama agai homu te tiwai yali, ‘Wiegi yai mu da. Te Mikal eno te Devitba mawaibao. Tama eno te Devit te Filistia dabe dali hwįmainu tagala palaibao, te wegi abelibo mone mabo tiwai elama, tama te Filistia dabego aga ela mumainu yaibao.’ Tama Solgo Devitbolo ma po wali, “Eno homugo nago te eno wegi somainu homu ebao,” wali.
1SA 18:22 Tama Solgo aga ofisa dabebolo weyu, te Devit sugi pao wali, te Devit agaduba deli naga bidibo sogo, tama aga homu bega sabo po te tiwai wai, “King Solgo nageba wiegi yai homu pemene eyu, te aga ofisa dabe dago me nage godolo ebao. Tama odao, megi e wiegi yai sogo nago te agai wegi siyu da, te usu dao,” wali.
1SA 18:23 Tialima, augwali pelama, te po te Devitba wagi pali. Tiali goli, agai po wei ponoyu, te tiwai po wali, “Dagego homugo ena te mone bidi da homu elama, tama ena nogi elalu, te eno kingo wegi somai da homu eyu, oba agawe? Mu menio. Ena magi nai meni yai bidi, tama ena te olo bidi tama dao. Tama tiyu, aga eno me sogobeo,” wali.
1SA 18:24 Tialima, te ofisa dabego te Devitgo wali po tigidali te Solba wagi palio.
1SA 18:25 Tama Solgo homugo te Devit te Filistia dabeba hwįgi pomainu tagala palama, tama te Filistia dabego aga ela mumainu homu yai. Tama tiyu, agai te ofisa dabebolo olama, te po Devitba ma wagi soali. Agai te tiwai po wali, “Eno homugo Devitgo enabolo te wegi abelabo nai deli te tiwai momainu homu yai. Eno homugo Devitgo te Filistia ami dabe te bidi sese a naga te 100 elimainu elama, te enade boi bidi yali wei ponomainu homu ebao. Tama agai te 100 bidi augwa gasa tigi wali togolama, tama te tigiwali enabolo sela asomainu yaibao,” wali.
1SA 18:26 Tialima, te Solgo po te aga ofisa dabe pelama, te Devitba wagi pali. Tama Devitgo te homu yali, te Solgo wegi abelimainu ebo te wiegi yai kolesaga da homu eyu, tama aga te kingo wąį pedelabo homu eyu, aga homu wiegi yai mu yai. Tama Solgo te tigi wali sesabo bodolu muani. Tiali goli, te bodolu muani sogoba pedalisiąbadi,
1SA 18:27 tama Devit aga ami bidi dabe dali pelama, tama te Filistia bidi 200 bidi elama, tama augwa gasa tigi wali togolama, tama te kingba selasa aselama, tama nedalio. Agai te sę dabe yali te Solgo wegi sainu tama tiali. Tama tialima, Solgo aga wegi Mikal te Devitbolo menama, tama augwa si selama bidalio.
1SA 18:28 Megi da, Solgo te tiwai bugagia koneani, Genuai Bidi te Devit dali bidibaso, tama te Mikalgo me Devit godolo homu mu yai dao.
1SA 18:29 Tama teyu, Sol te Devitde wi umabo mu ebaso, tama aga godolo meni yani. Tama Solgo sesemane sogo aga dali boi bidi homu elaluali.
1SA 18:30 Te hauwa sogo te ami dabe augwa polalubo bidi kepten tego te Filistia ami bidi dabe odasa asu, te Israel dabeba hwįagasali, tiali goli Devitgo aga ami bidi dabe daligo te hwįbo bomo mu eyu, tama augwali aiyaba elalu iduali. Te Solgo gasa ofisa dabe te augwa hani ami dabe dali te augwaligo hwįbo bomo te Devitgo hwįbo bomo tiwai gilama me ebeo. Tama tibaso, te we bidi dabego te genuai nogi Devitba mayu yai dao.
1SA 19:1 Te Solgo te Devit ela muabo homu elama, tama agai te po aga ogwa Jonatanbolo walali, tama aga ofisa dabebolo me wali. Tiali goli, Jonatango te Devit godolo homu mu yai,
1SA 19:2 tama tibaso aga pelama, Devit sugi pelama, agabolo te po wai, “Eno ayago nage ela muainu ebao. Tama teyu, do kigamu nago naga digi te bugagia tonaluao. Nage te giba pelama, geme duala sigi pao.
1SA 19:3 Tialima, te aya da si te pedai te pą badu te nage geme dualalubo badu soyu, tama ena te aya dali dolalu, te nagede po miaibao. Tama agai magi sę nage dali yainu ebo te eno gegelama subaso da, teda eno nagebolo waibao,” wali.
1SA 19:4 Tialima, kigamu Jonatan de Sol si peyu, tama po miani, tama Jonatango te Devit nogi ugwaba siyu tama Solbolo te tiwai po wai, “Ayao, te eno magi nai po me deli nageba wabo usu egowe? Te e tiwai dao. Nago dwai kolesaga te naga sę bidi Devitba munu me elamuo. Magi baso meni, te agai dwai sę me deli nage dali me ebeo, menio. Te tigidali sę agai yali, te nage tau siyu naga yali.
1SA 19:5 Te agai Goliat elali sogo, te aga isabo me, te aga bugagia bidabo, te me agai tǫba eyu godolo me ebeo. Tama tialima, te Devitgo nogode, Genuai Bidigo da Israel tau sabo te geninama mu elalu, tama te boi bidi aiyaba mu elalualio. Tama naga digi sulama, tama nage wiegi yai homu pemene mu yai. Agai te dwai sę me eyu, tama magi nai me delide dwai sę yali me elalubeo. Tama tialima, magi baso nago aga olo dali ela muainu ebawe? Te nago tama tiyu da, teda nago dwai sę yali elalueibao,” te po wali.
1SA 19:6 Solgo Jonatango te wali po odama, teda tialima agai bomai po me dąų walu, te po wai, “Eno mu po te Sesemane Sogo Bidibo Genuai Bidigo nogide obao, eno Devit munu me ela mugobeo,” wali.
1SA 19:7 Solgo po ola silama da, teda aga palio, tama nosali Jonatango Devit i olama asali, tama agabolo te aga ayago wali po pusali. Nosali agai Devit selama, te Sol pageba pali, tama Devit aga te kingde polobadu yali sę tiwai ma yalio.
1SA 19:8 Me sogo nosali, te Filistia dabe me Israel dabe dali ma hwįani. Tialima, Devit te ami dabe dali pelama, te Filistia dabeba hwįbo te bomo mu igi pelama, tama augwali aiyaba mu elalubaso, tama te Filistia dabe wi tedela palio.
1SA 19:9 Te tudi badu nosali, Genuai Bidigo te dwai haubo mobo me deli te Solba ma tagala palama, tama aga tolalugi pali. Te sogo Sol te aga be tomode dugulalu, tama te sesemone ene nogode tolaluai. Tama Devit aga dali bidiyu, tama aga te gita elibo sę iduai.
1SA 19:10 Tialima, Solgo sesemone ene te Devitba sąnama, tama aga ela mumainu yai. Tiali goli, Devitgo te enani ene geda muani, tama te enego te be paiali dagade naga dolali. Tama Devit aga wi palio.
1SA 19:11 Tama te sogo hulide Solgo te sę bidi meba tagala palama, te Devit te bede tonalumainu, te tiwai ebaso te Devit wi pisiąbadi, tama Solgo aga te kigamu te beba aselama, te bede ela muainu tialio. Tiali goli, Mikal, te Devitgo wego, te Devitbolo te tiwai po walali, “Megi e sogo hulide naga nage wi pao. Te meni yani da, te do augwaligo nage ela muaibao,” wali.
1SA 19:12 Tama te Mikalgo te baklain bono me deli selama, tama te be windode gebelama, tama Devitgo te baklain bonodu te tǫba dulama, tama aga wi palio.
1SA 19:13 Devit pai madi, teda Mikalgo te agai tibo god me deli augwaligo te nigo nigai selama, tama te god te Devitgo betba pilali. Tama agai te dwasianu tobolo ni pilo me deli augwa te meme nisigo nigai te selama, tama te tibo godigo tobolu dologo badu muani. Tama nosali agai te tibo god te bobage ugwa pedai me deligo halualio.
1SA 19:14 Tialima, te Solgo sę bidi dabe aselama, te Devit sagasainu asobo sogo, Mikalgo augwaliba te tama po wai, “Devit te gasi elalubao,” wai.
1SA 19:15 Tialima, augwali te Solba ma pelama, tama agabolo wagi pali. Tiali goli, agai augwaliba te po wali, “Dage ma geasa pelama, tama te be tomoba pelama, tama Devit suao. Tama dage aga te betde selama, tama aga odasa aselama, tama eno aga ela muaibao.”
1SA 19:16 Tialima, augwali geasa ma pelama, tama be tomoba pelama, tama augwaligo te tibo god betde te pilo tobolo ni tobolu dologode aiyadu munama pila mubo te suali.
1SA 19:17 Augwaligo sula selama, tama Solba wagi pali. Tama nosali Solgo Mikalba te tama po hanalu wali, “Magi baso nago ena usu sabo sę yaliwe? Magi baso nago eno boi bidi wi pomainu ilaliwe?” Te po wai. Tialima, Mikalgo te tiwai po agaba wei ponani, “Devitgo enabolo weyu, te aga wi pomainu eno aga tau sisąbaso da, te agai ena ela muaibao po wali. Tama tibaso, eno aga tau sai dao,” te po wai.
1SA 19:18 Te Devit wi pali sogo, aga pelama, Samuel te Rama taunba sugi pali. Tama Devitgo agabolo te Solgo te tigidali sę yali po pusali. Nosali Devit dali Samuel si te Naiotba pelama, bidigi pai.
1SA 19:19 Tama bidi mebago Solba te tama tiwai po wai, “Devit te Naiot bulude bidibao, te taun Rama pąde dao,” wali.
1SA 19:20 Tama tialima, Solgo te bidi meba tagala palama, te Devit pageabi igi pomainu yali. Tama augwali teba sabalubo sogo, augwaligo te profet hani me deli te tęąbi weyu, tama te profet hanigo ebo kolesaga tiwai eyu, te sasa mano pabo sę ebo sualio. Tama augwaligo suali, Samuel te profet dabego tobolu bidi bidali. Tialima, Genuai Bidigo Mobo te Solgo tagala palali bidi dabeba bomo elama pedaliyu, tama augwaligo me te tęąbi weyu, sasa mano pali.
1SA 19:21 Nosali Solgo te tama sę ebo po odama, tama agai gasa bidi dabe tagala palali, tama augwali me te profet dabego ebo kolesaga tiwai yali. Tialima, Solgo me tama tiwai ebo odali, te agai geninama bidi meba mu tagala pali, tiali goli augwali me te profet dabego ebo kolesaga tiwai yalio.
1SA 19:22 Tama nosali Sol digi aga te Ramaba pali, tama pidubadi genama, te genuai ulu wę pedalubo madi te bulu Sekuba sabolali. Tialima, agai te Seku bidi dabeba hanalu wali, “Samuel me Devit menade bidibowe?” Tama augwaligo te po wali, “Augwali si te Rama pąde, te Naiot bulude bidibao,” wali.
1SA 19:23 Tialima, aga te sunumidu pidubadi, tama Godigo Mobo agaba bomo elama pedaliyu, tama aga me te tęąbi eyu, tama te sunumidu sasa mano peyu, aga te Naiot buluba sabolalio.
1SA 19:24 Tama agai te aga ugwa dabe peda sąnama, te gasa bidi dabego ebo tiwai elama, tama aga me te profet dabego ebo kolesaga tiwai yali, te Samuel pąde tiali. Tama te giligade me, hulide me, aga te dwasianu ugwa name bea selama, tama pila mudali. Te sę te Solba pedelali, te po me deli page te bidi dabego pusali po elaluai. Te pogo te tiwai po wai, “Magi yaliwe? Te Sol me te profet pedalubo, agawe?” te po page te tama po wabo dao.
1SA 20:1 Sol te bulu Naiotba sabalubo si, te Devitgo te bulu taga soyu, tama Jonatan bidibo madi wi ma soali. Tama agai Jonatanbolo te tiwai po wali, “Ei, Jonatan! Magi baso nago ayago ena ela muainu ebawe? Eno magi dwai sę me deli isiąyu, ma dwai kolesaga me deli agaba me ebeo. Mu tama, eno magi dwai sę me deli me ebeo,” wali.
1SA 20:2 Tialima, Jonatango Devitba po wei ponoyu, te po wali, “Menio. Nage me isigobeo. Eno ayago enabolo te agai yabo sę po tigidali waibao, te dwasianu sę yabo me, genuai sę me, te enabolo weyu yaibao. Tama agai te tobage sę yabo po geme me dualugobeo. Tama tiyu, eno koneani, te agai nage me ela muainu ebo usu me egobeo,” wali.
1SA 20:3 Tiali goli, Devitgo agabolo te po wali, “Nago ayago bugagia koneani, te nago ena godolo homu ebo agai koneani. Tama tiyu, te agai ena ela muabo homu ebo po te nageba me walogobe homu yaibao. Agai homugo te sęde nago homu sęgę idali homu yaibao. Tiali goli, te Sesemane Sogo Bidibo Genuai Bidigo nogide eno mu po obao, nago ayago ena ela muabo homu ebao. Eno te koneanio, te eno koneani megi nage ena dali bidibo tiwai. Tama dwasianu sogo pąde te nago ayago te tama tiaibao,” wali.
1SA 20:4 Tama Jonatango Devitbolo te po wai, “Nago homugo eno magi sę ebogo nage tau somainuwe? Te mena sę yaibaso, eno ebaso te usu yaibao,” wali.
1SA 20:5 Tialima, Devitgo te tama po agabolo wali, “Do da, te gesi poluago te genuai side tama eno te king dali nai tugi pabo da. Tiali goli, nago homugo te wiegi yai da eyu da, teda ena te giba geme duala sigi pelama, te gasa do da wabo sogo te be pio eboba usu naibao.
1SA 20:6 Tama nago ayago suali, ena te tebol te nai tubo madi dugulalusiąbaso, tama agai nageba hanalu, ena menade bidibowe obaso da, teda nago agabolo te tiwai po wao, ‘Devit te aga asesa polo te aga bulu Betlehemba painu yali, magi baso meni, te sogo te tigidali kibu bede te aga hani sibi deliba sisinama, te ofa ebo da po wali. Agai enabolo hanalu, te ena pao waibawe obaso, tama eno agabolo usu da wai dao.’ Nago te po agabolo wao.
1SA 20:7 Nago te kingba po walama, tama agai te po weyu, ‘Wiegi yai da,’ obaso da, teda nago koneani, te ena bugagia bidimainu ebao. Tiali goli, te aga haliga sębę ebaso da, teda nago koneao, te agai enade dwai sę yabo homu eyu tebao.
1SA 20:8 Eno koneani, ena te olo bage nai tiwai yali, tiali goli nago ena wiegi yai bugagia ilao, magi baso meni, te Genuai Bidigo gedude nago te bomai po me deli dąų walu, te ena nago abagi mu sesemane sogo bidaibao po wai. Tiali goli, eno dwai sę elama, tama eno te sę yali sęgę elalubaso da, teda nago digi ena ela muagameo. Tiyu, nago ena te naga aya bidibo madi selama, pelama, te agai ena ela muidalio,” Devitgo te po wali.
1SA 20:9 Tama Jonatango agabolo te tama wali, “Tagalao, nago te tama homu tiwai homu me igio. Te eno ayago dwai sę nageba yainu ebo te eno konebaso da, teda eno nageba walaibao. Eno munu me geme dualugobeo,” wali.
1SA 20:10 Tialima, Devitgo agabolo te po wali, “Nago enade po ayabolo walali madi, tama agai te wado pogo naga te po wei ponobaso da, teda dego enabolo te po wagasogowe?”
1SA 20:11 Tama Jonatango Devitbolo te po wai, “Da si te giba pelama, po migi pinao.” Tialima, augwa si hogodama palio.
1SA 20:12 Augwa si teba sabolama, tede Jonatango Devitbolo te tiwai po wali, “God, te da Israelgo Genuai Bidi, te dago e wabo po odomainao. Tama eno tibo po weyu da, teda agai enaba te dene momainu yaibao. Do, ma duba, e tiwai tobage sogo, eno ayabolo te nagede po hanalu waibao. Tama agai nagede usu da po obaso da, teda eno nageba po ola tolaibao.
1SA 20:13 Tiali goli, eno ayago nage dolabo homu ebaso da, teda eno nagebolo walaibao. Te eno nageba walisiąyu, tama eno nage wi pomainu tau sisąbaso da, teda Genuai Bidigo te genuai dene enaba momainu yaibao. Genuai Bidi te eno aya dali bidu, tama eno homugo me te nage dali bidiba homu ebao.
1SA 20:14 Tama nosali, ena me bididubaso da, teda eno homugo te nago ena isimainu me iligobeo. Menio. Nago wiegi yai homu eyu, olo tau mabo kolesagago te ena wiegi yai bugagia ilao, te nago Genuai Bidigo gedude te bomai po dąų walali po te tiwai yao.
1SA 20:15 Tama sesemane sogo nago eno wai hani sibiba me te wiegi yai bugagia ilao. Nago dwai sę augwaliba me elamuo.
1SA 20:16 Tama Genuai Bidigo te nageba boi bidi yali tigidali silibo sogo da, teda nago dago te dąų walali bomai po te nago homugo me gegeda palamuo. Nago te dąų wali bomai po wali pisąwani da, teda Genuai Bidigo nageba dene mawaibao,” wali.
1SA 20:17 Tama Jonatango Devitba ma weyu, te Devitgo aga sesemane sogo godolo homu ebo bomai po dąų wao po wali. Magi baso meni, Jonatango te Devit godolo homu mu yali, te aga digi aga godolo homu ebo tiwai yai. Tama Devitgo te Jonatango wali po tiwai gilama te bomai po dąų walali.
1SA 20:18 Tama Jonatango Devitba te tiwai po wali, “Do da, te gesi poluago genuai side dao. Tama nage te nai tubode bidisiąbaso da, teda ayago te nago sia sai te olo elalubo subaso, tama aga homu hauwa yaibao.
1SA 20:19 Tama duba nage te genuai masigi tudi badu pelama, te polobadu yali tiwai gilama teba geme duala sigi pelama bidao,” wai.
1SA 20:20 “Tama ena asama, tama eno te ene te wali po selama, te tiwai sa muani madiba eneyu, tama eno te ene sela te masigiba enaibao.
1SA 20:21 Tama eno ena sę bidibolo weyu, te eno ene te gegegi pao po waibao. Tama eno agabolo weyu, te edanu ma asao po waibao, magi baso meni, te ene eda badu munalubaso waibao, teda Devit, nage enaba asao. Te Genuai Bidigo nogide eno mu po obao, te nago eno tama po wabo odobaso da, te nago koneama te nage bugagia bidimainu eyu, tama te magi nai me deligo nage me dologobeo.
1SA 20:22 Tiali goli, eno te sę bidiba po weyu, te ene dabe uga badu munalubao obaso da, teda nage hogodama, gasa badu pao, magi baso meni, Genuai Bidigo digi nage te tagala palobao.
1SA 20:23 Tama nage bugagia bidibo sogo, nago te Genuai Bidigo dago e po dąų wabo suali, te homugo me gegeda palamuo, tama sesemane sogo nago te dąų wali po wali pao,” Jonatango te po wali.
1SA 20:24 Tama tiyu, Devit te giba geme duala sigi pelama bidali. Tama do te king Sol te gesi polua side te genuai nai tugi peyu palio.
1SA 20:25 Tama aga te be paliali daga pąde elalubo sia saide dugayu, te aga sesemane sogo ebo tiwai gilama yali. Tama Jonatan hogodama, dolugulali, tama Apner te king pąde dulaluali. Tiali goli, te Devitgo sia duabo sai te olo elaluali.
1SA 20:26 Tialima, Solgo suali, te Devit bidibo subeo, tiali goli te sogode agai te sęde po me mibeo. Aga homugo naga kone palali, ‘Te Devit mena sę yaliwe? Te magi nai me deli agaba pedelama, tama aga te God gedude wiegi yai me egobe da homu ebaso, te aga asobewe?’
1SA 20:27 Tialima, te gesi polua te si sogo wabode augwali te nai ma tueinu sisinani, tama te side me te Devitgo sia olo elaluai. Tialima, Solgo Jonatanbolo wali, “Ae, tegobao! Do bidali sogo, me megi me, te Jesi aga ogwa te nai tuboba me asobeo. Magi baso aga asobewe?” Solgo te po hanalu wali.
1SA 20:28 Tama Jonatango te po wali, “Agai bomo elama, enaba hanalu, aga te Betlehemba pomainu yao po wali.
1SA 20:29 Agai enabolo te tiwai po wali, ‘Eno homugo nago ena pomainu yao, magi baso meni, te eno hani sibigo bulude te ofa yainu, tama eno amago te po ola tolai baso, ena augwali dali sisinagasao po wali. Tama nage eno abagi mu da wida, teda nago ena pomainu elama, te eno hani sugi pomainogo yao.’ Agai te tiwai po obaso, teda eno aga pomainu ilalio. Tama te pagede naga tama aga te nage dali te nai tubode dulalu bidibe dao,” te po wai.
1SA 20:30 Solgo te po odama, tama aga te Jonatan dali dwai haliga sębę mu yali, tama agabolo te tiwai po wai, “Nage sunumidu bilama ame nai wede wai dao! Nage te dwai hagoma ebo we mugo wai dao! Nage eno koneani, nago te Jesigo ogwa dali abagi hai namu olasa bilali. Tama nago te kolesaga eyu, nage te olo bidi tiwai pedaliyu, tama teyu, te genuai hale ebo te nageba dali te nago idaba me pedalubao.
1SA 20:31 Magi baso meni, te bidi bidibo sogo digi, nago te tǫ pedaide king bidi me pedalugobeo. Tama tiyu, nago te bidi polo tagala palama, te aga selasa asao, te eno aga ela muaibao,” wali.
1SA 20:32 Tama Jonatango Solgo po wei ponoyu, te tiwai po wai, “Magi baso aga isimainu obawe? Agai magi dwai sę yaliwe?”
1SA 20:33 Solgo te po odama, tama polo tama aga te sesemone ene Jonatanba sąyu aga dolomainu yali, tiali goli Jonatango te enani ene geda muani. Tama megi da agai koneani, te aga ayago Devit ela muabo homu bomo ebo koneanio.
1SA 20:34 Tialima, Jonatango te aga aya dali haliga sębę umabo mu elama, tama te nai tudali tebol sai taga peyu, palio. Tama aga te gesi polua side te nai tubo si sogo wabode te nai me tubeo. Agai homugo te ayago aga dolali homu eyu, tama aga te Devitde homu dene mu elama, tama haliga sęgę mu yalio.
1SA 20:35 Te nosali badu kigamu, Jonatan te giba pelama, te Devit dali deliba sisinainu yali, te augwa si wali po gilama tiwai yai. Tama agai te ogomani me deli aga dali selama pai.
1SA 20:36 Tama Jonatango te ogwabolo te tiwai po wali, “Eno te enesigi ene meba te uba elainu ebao. Te ene dabe eno ena silibo si da, teda nage pelama, gegegi pagameo. Ae, megi da nage pao.” Tialima, te ogwa udulama pobadi, tama Jonatango ene me deli enani, te ela soyu, tama u badu tulalugi pai.
1SA 20:37 Te ogomani pelama, te ene tulaluali madiba sabalubo side, teda Jonatango te tiwai i wali, “Nage ugaba dwasianu gana pao. Te ene uga badu munalubo homu ebao.”
1SA 20:38 Tama Jonatango te ogwanuba te tiwai i ma wali, “Asesa polo pao! Nage olo tede dolalugio.” Tama te ogwago te ene sela asu, aga bidiboba ma asai.
1SA 20:39 Tiali goli, te ogwago Jonatango te wali po page agai me konebeo. Menio. Jonatan de Devit dali sigo naga koneani.
1SA 20:40 Tama Jonatango enesigi dali te ene dabe me te ogwabolo menama, tama agabolo weyu, te taunba ma tolasa pao po wai.
1SA 20:41 Te ogwa pai madi, teda Devit hogodama, tama te masigi tudi badu geme dualaluali taga soyu asama, tama Jonatan pąba kidu sugunagaselama, tama aga tobolu tǫba sela sogo basi gulali. Tama aga dolugulama, tama augwa si nono nenama, tama gela wai. Tama Devitgo homu dene eyu, hobede ebo homugo te Jonatango homu dene eyu hobede ebo homu te aiyaba elalualio.
1SA 20:42 Tialima, Jonatango Devitbolo te po wai, “Nage te wiegi yai homu nagame dali pao. Dago te Genuai Bidigo nogide te po dąų waliyu, te dena digi dena bugagia wiegi yai sesemane sogo ilao, tama nago hani me eno hani nosali pedalubo bage me, augwa me te tobage deli kolesaga emainu yaibao. Tama Genuai Bidigo dago te dąų walubo po odali, tama dago wali paibao.” Agai po ola siminama, tama Devit gasaba peyu, tama Jonatan te taunba ma begasa palio.
1SA 21:1 Devit wi peyu, te taun Nopba sabolama, tama pelama, te pris Ahimelek sugi pali. Tama Ahimelek noma selama, tama aga bedu bulu dia aselama, tama Devitbolo weyu, te po wai, “Magi baso nage nagaduba asaliwe?”
1SA 21:2 Tama Devitgo te po wai, “Kingo te sę me deli enaba mobaso, tama ena asalio. Tama agai te po wali, te eno gasa bidi dabeba te sęde ena tagala palobaso asaide po me wagobeo. Tama eno ena ami bidi dabebolo waliyu, te ena augwaligo gasa badu deliba sisinaibao wali.
1SA 21:3 Tiali goli, nago mena tobage nai munalubawe? Te nago bret elalubaso da, teda ena a naga mao. Te meni baso da, teda gasa naigo me ena mao,” wali.
1SA 21:4 Tama prisgo agabolo te po wai, “Eno olo bret me elalubeo. Te Godigo gedude muani habu selali bret naga munalubao. Te nago ami bidi dabe te e sogo augwali te we dali me pisąwani wida, teda nago te bret sagameo,” wali.
1SA 21:5 Tama Devitgo Ahimelekbolo wali, “Eno nagebolo dolo obao, dago e sogo te we dabe dali me pibeo. Tigidali sogo dago te boi bidi dali hwįgi pali, te ami dabe augwa digi me, te augwa doado bage dabe me, te God gedude wiegi yai elalubao. Tama megi me, te dago gasagi yai genuai sę elalubaso, tama da te wiegi yai mu bidibao.”
1SA 21:6 Tama tibaso, prisgo te habu selali elaluali bret te agabolo mani. Te habu selibo bret augwa te Godiba mabo nai, te naga elaluali. Te gasa nai me elalube. Augwaligo te poloba bret hasegelama, tama gesi bret te God gedude te tebol saiba muani. Tama teyu, prisgo te poloba habu selai munaluali bret te Devitba mawai.
1SA 21:7 Te sogo te Idom bidi me deli, aga nogi Doek, te Godigo bede bidu, tama te ofa ebo sogo tonaluali. Tama agai suali, Ahimelekgo te bret Devitbolo mabo suai. Doek te Solgo bulmakau dabe tonalubo bidi me deli, tama aga te bomai bidi mu dao.
1SA 21:8 Devitgo te bret siyu bolo elama, tialima agai te Ahimelekba te tama po wai, “Nago te sesemone me deli, ma te bainat me munalubawe, ma meniwe? Te nago elalubaso da, eno homugo nago ena mao, magi baso meni, te kingo agai sę emainu ena asesa polo selibo sę ebaso, tama tiyu, eno te hwįbo bainat me gasa nai te sisąwai. Ena olo naga asai dao,” wali.
1SA 21:9 Tama Ahimelekgo agabolo te po wai, “Eno te bainat hwą deli naga munalubao. Te Goliatgo bainat, te Filistia nago te Ela bulu odogode elali. Augwaligo te name ugwago mesegelama, tama te prisgo name ugwa elalubo madi te tudi badu munalubao. Te nago sabo homu ebaso da, nago te bainat sao.” Tama Devitgo te po wai, “Ena mao. Te bainat wiegi yai mu tama. Te gasa bainatgo te bainat aiyaba me elalubeo,” wali.
1SA 21:10 Tialima, Devit te Solde wi elama, tama te side digi Devitgo te bulu tagalama palio. Tama aga pelama, te Get taun king Akis bidibo madiba sabolali.
1SA 21:11 Tama te king Akisgo ofisa bidi dabego te kingbolo te tiwai po wali, “Te bidi te Devit tama da, te aga tǫ pedaide king bidi da. Te we dabego agade tęąbi po te tiwai wali, ‘Solgo te umabo hauwa tausen bidi elai. Tama Devitgo te umabo tausen tausen bidi elalio,’ augwaligo agade te po wai,” te ofisa dabego te po te king Akisbolo wali.
1SA 21:12 Devitgo odama, tama te agai homugo kone mu palali, tama aga te king Akisgo elabo homu eyu wi mu yalio.
1SA 21:13 Tama tiyu, te kingo me te aga ofisa dabego gedude dali, Devitgo te tibo po digi te aga esela pabo pedelali. Tama augwaligo aga nogo tuainu ebo sogo, teda aga te esela pabo bidi mu tiwai yalio. Tama aga te taunba pabo sunumide asesa biliyu, tama aga pedauwalide te pesa dini pedalumainu ilama tama te pesa te aga penani nisidu gila dulali.
1SA 21:14 Akisgo sulama, tama aga ofisa dabebolo te tama po wali, “Te bidi te esela mu pobao. Tama teyu, magi baso dagego aga enaba odasa asaliwe?
1SA 21:15 Dagego homugo eno bulu tǫ pedaide te esela pabo bidi hauwa te meni da weyu yali, agawe? Te hauwa bidalubao, tama tialima, magi baso dagego te bidi te eno gedude te esela pabo kolesaga emainu odasa asaliwe? Aga te eno bede me bidigobeo,” wali. Tama tialima, Akisgo te Devit pomainu yai.
1SA 22:1 Devitgo te taun Get tagalama, tama aga wi pelama, te taun Adulam pąba pelama, tama te genuai bulu du ola be me delide bididuali. Te aga ama dede dali te aga hani bagego aga te bulude bidibo po odobaso, teda augwali pelama, aga dali bidigi pai.
1SA 22:2 Tama te tigidali haniani sęgę elalubo bidi me, te tigidali negeli elalubo bidi me, te tigidali te Sol dali wado po wali elalubo bidi me, augwali me te Devitba pelama, tama aga te augwaligo polalubo hetman bidi pedelali. Tama te bidi sese hauwa, 400 tiwai aga dali bidalio.
1SA 22:3 Tialima, Devitgo aga aya ida selama, tama te badu bidali tagalama, te taun Mispa te Moap bulu tǫ pedaiba pali. Tama agai te Moap kingbolo weyu, te tama po wali, “Eno homugo nago te eno aya me ida te nage dali bidagasomainu elama, te Godigo magi sę enaba yainu ebo te eno koneainu yaibao,” wali.
1SA 22:4 Te Moap king bidigo te Devitgo wali po te usu da po obaso, tama Devitgo aga aya de ida si tede tagalama, tama augwa si te Moap king bidi dali bidibadi, te sogo Devit te masigi ola bede geme dulalualio.
1SA 22:5 Nosali te profet Gat te Devitba aselama, tama agaba te po walali, “Nage te bulu munu me ma bidamuo. Nage megi tama hogodama, tama te Juda tǫba pao,” wali. Tialima, Devitgo te bulu tagalama, tama te Judaba pelama, tama te genuai busi bulu me nogi augwaligo te Heret wali, tede bidai.
1SA 22:6 Me sogode Sol te genuai ni me deli dologode te dwasianu bulu du Gibea bagede dugulalu, tama aga sesemone ene tolalubo sę elaluai. Tama aga ofisa dabego aga pąde dolalu, tama aga bagulama elaluai. Te bidi mebago te Devit me badu bidibo po te agabolo pusa mani.
1SA 22:7 Tama tialima, Solgo aga ofisa dabebolo te po walali, “Dage te Benjamingo hani bidi da, bugagia odiąo! Dagego homugo te bidi Devitgo dageba te nai gi meba, me te wain gi me meba te maiabo homu eyu yali da, agawe? Tama agai dage deli delibolo te 1,000 ami bidi, ma te 100 ami bidi tonalubo ofisa bidi pedalumainu homu ilibo homu eyu, yali da agawe?
1SA 22:8 Dagego tede homu kone palama, tama tiyu, dagego ena dolomai da homu eyu, te po miai dawe? Te dage me deligo enabolo weyu, te naga ogwago te Devit tau sabo po dąų walali po ena dali me walobeo. Dagego ena homu kone ma isiąma, tama enabolo weyu, te eno ogwago te Devit, te eno sę bidigo enade boi bidi pedalubo sę po enabolo me wabeo. Tama megi da, te Devitgo ena ela muabo sunumi gegebo sę ebao,” Solgo te po wali.
1SA 22:9 Te sogo te Doek, te Idom bulu bidi, te Solgo ofisa bage dali dolaluali. Tama agai Solba te tiwai wai, “Ena te Nop taunde bidali sogo tama eno suali, Devit te Ahimelek pris bidiboba pali, te Ahitupgo ogwa dao.
1SA 22:10 Tama Ahimelekgo te Genuai Bidiba hanalu, te Devitgo aga mena sunumi wali pomainu ebo po wai. Tama prisgo te nai meba siyu, te Goliatgo bainat hwą me selama, tama Devitba mawai,” wali.
1SA 22:11 Solgo te po odama, teda agai te bidi meba te Nopba tagala palama, tama te pris Ahimelek dali te aga hani pris tigidali selama, tama augwali odasa asao wali.
1SA 22:12 Te pris hani pedalubo side da, teda Solgo Ahimelekbolo te tama po wai, “Ahimelek, eno nagede po elalubao.” Tama Ahimelekgo te po wali, “Genuai bidio, nago magi po elalubowe?”
1SA 22:13 Tama Solgo agabolo te po wai, “Magi baso nage dali Devit dage sigo ena dolabo po miai dawe? Nago te nai meba Devit mayu, te bainat hwą me deli mani, tama nago Genuai Bidiba hanaluama, te agaba momainu yai. Tama megi da, agai enade boi bidi elama, tama agai ena ela muabo sunumi gegebo dao,” wali.
1SA 22:14 Tama Ahimelekgo po wei ponoyu, te tama po wali, “Mu menio. Devit te wiegi yai ofisa mu tama nage wali mu peyu yali. Te mena ofisa me deligo aga aiyaba elalubeo. Tama aga te nago wąį da, tama nage pąde te nage bugagia tonalu ebo ami bidi hani me deli dao. Tama nago bede bidibo bidi tigidali, augwaligo te agai wiegi yai kolesaga homu kone palama, tama genuai nogi agaba mabo dao.
1SA 22:15 Te hasia sogo naga eno te Genuai Bidiba hanalu, te agaba po momainu yali da, agawe? Mu menio. Tama nago po enaba me ma eno we wai haniba po kisiligio. Dago te dage dolabo po me mibeo. Tama nago megi te wabo po eno konesiąwai po dao,” te po wai.
1SA 22:16 Tiali goli, kingo te po wali, “Tagalao. Eno nago po me odogobeo. Nage dali, naga hani bage, dage tigidali isimainu yaibao.”
1SA 22:17 Tama agai te pąde dolalubo ami bidi dabe augwaliba te tiwai po wali, “Polo mu dao. Dagego te Genuai Bidigo pris dabe ela muao. Augwali te Devit dali muna sabo sę eyu, tama aga enade wi pabo te augwa koneani, tiali goli te augwaligo enabolo me wabeo.” Solgo te tama po wali, tiali goli te ami bidi dabego augwali elabo homu ebe, magi baso meni, augwali te Genuai Bidigo pris dabe dao.
1SA 22:18 Tama tialima, Solgo te Doekbolo weyu, “Nage pelama, augwali ela mugi pao,” wali. Tialima, Doek pelama, te pris dabe tigidali ela muani. Te side agai te Genuai Bidigo pris bidi dabe te bidi sese me si me si olama, a naga, te 85 bidi elali, te bidi dabe augwali te prisgo gudubo ugwa mumainu nigilali bidi dabe dao.
1SA 22:19 Tama Solgo aga ami bidi dabe te Nopba tagala palama, te pris dabego taunba pelama, tama augwaligo te tigidali we bidi ela muai. Augwaligo te tigidali bidi me, we me, ogomani me, te dwasianu augwa idago ame tubo wai dabe me elali, tama te tigidali bulmakau, me sipsip, me donki, te ela muani. Te Solgo ami dabego te augwali mu ela silalio.
1SA 22:20 Tiali goli, augwaligo te Abiatar, te Ahimelekgo ogwa me deli, te elibeo. Menio. Aga te augwalide wi pelama, tama Devit dali bidigi pai.
1SA 22:21 Tama Abiatargo Devitba te tiwai po wali, “Solgo te Genuai Bidigo pris tigidali elalio.”
1SA 22:22 Tialima, Devitgo agabolo te po wali, “Ena homu dene mu ebao. Tama megi eno te nago aya dali bidali te sogo homu kone palubao. Eno te Doek me bidibo suali, tama eno koneani, agai Solbolo te enade po walali homu ebao. Te eno yali sę pagede naga tama Solgo te nago deli kaneme bage tigidali elalio.
1SA 22:23 Tiali goli, nage wi munu me igio. Nage ena dali bidao. Te mu tama, Solgo te nage me, ena me, da si elainu ebao. Tiali goli, nage ena dali bidibaso da, teda eno nage tonalu, tama nage bugagia bidaibao,” wali.
1SA 23:1 Nosali bidi mebago Devitba te tiwai po wali, “Te Filistia dabego te Keila taun bulu bidi dabe dali hwįbo sę po wali. Tama augwaligo te Keila dabego wit te Keila dabego te nai sela tuabo madi pesage holali elalubadi, te wi sela pali,” te po wali.
1SA 23:2 Devitgo te po odama, tama agai te Genuai Bidiba hanalu, te tama po wali, “Te ena pelama, te Filistia dabe dali hwįgi pabo te usu yaibawe, me meniwe?” Tama Genuai Bidigo agabolo te po wali, “Te usu dao. Nago augwaliba hwįgi pelama, tama te Keila dabe tau siyu, te augwali dolidali weyu te tama tiao,” wali.
1SA 23:3 Tiali goli, te Devit dali bidali bidi dabego te po Devitbolo wai, “Odao. Megi da te Judade bidiyu, tama da wi ilibo nai hauwa elalubao. Tama magi baso da te Keilaba pelama, te Filistia dabe dali hwįgi paibawe? Da me pogobeo,” wali.
1SA 23:4 Augwaligo te tama po obaso, tialima Devitgo te Genuai Bidiba ma hanalu wali. Tama Genuai Bidigo te tiwai po te Devitbolo wai, “Dage te hogodama, pelama, tama te Filistia dabeba hwįgi pao,” wai. “Magi baso meni, eno dage tau siyu, tama dagego augwali aiyaba elalueibao.” Te po wali.
1SA 23:5 Tialima, Devit aga bidi dabe dali te Keilaba pelama, tama te Filistia dabeba hwįgi pali. Tama augwaligo te Filistia dabe hauwa ela munama, tama augwaligo bulmakau dabe sali. Te hwįanigo te Devitgo te Keila dabe ma dobola selama, tama augwali me dolobeo.
1SA 23:6 Te Devit te Keilaba pisiąbadi, tama Abiatar, te Ahimelekgo ogwa, te king Solde wi peyu, tama te Devitba asali sogo, Abiatargo te prisgo masigi si elalubo ugwa sesali, augwa te Godigo homu konea sabo nai, tama te sela asai. Tama augwali te Keilaba pabo sogo, teda Abiatargo te ugwa pedai augwa dali peyu sela pai dao.
1SA 23:7 Tama bidi mebago Solbolo weyu, te tiwai po wali, “Devit te Keilaba pelama bidibao,” wai. Tialima, Solgo te po wai, “Wiegi yai mu da, megi te Godigo aga te ena nogoba mawaibao. Devit te obo elalubo taun tomoba pali, tama te kolesagade aga digi aga te kalabus tiwai ilali. Tama tiyu, eno aga tuainu ebo te sunumi gegebo sę dene yai dao.”
1SA 23:8 Tialima, nosali Solgo te aga ami bidi tigidali i olama, tama augwali te bulu Keila pelama, te Devit aga bidi dabe dali bidibo teba bagua sigi painu yali.
1SA 23:9 Tiali goli, Devitgo odali, te Solgo agaba dwai sę yabo homu ebo po wai. Tama tibaso, agai te pris Abiatarbolo walali, “Te pris ugwa selama, sesao,” po wali.
1SA 23:10 Agai sela asobo si da, teda Devitgo gedu haluasa po te tiwai wali, “God, da Israelgo Genuai Bidi, ena naga sę ebo bidi da, eno te tiwai po odali, Solgo ena e Keilade bidibo koneanio. Tama aga aselama, te bulu dolagasabo homu ebo dao.
1SA 23:11 Tama eno koneainogo homu yali, te e bulu bidi dabego ena te Solba magowe, ma meniwe? God, da Israelgo Genuai Bidi, eno homugo nago eno te hanalu wali po wei pomainu homu ebao.” Tama Genuai Bidigo agabolo te tiwai po wali, “Sol da te asaibao.”
1SA 23:12 Tama Devitgo Genuai Bidiba ma hanalu wali, “Te Keila bulu bidi dabego ena me, te eno bidi dabe dali, te Solba mawaibawe, ma meniwe?” Tama Genuai Bidigo te po wai, “Augwaligo te tama tiwai yaibao.”
1SA 23:13 Devitgo te po odama, tialima te polo mu tama aga hani bidi dabe selama, te megi da augwali namba te tama 600 bidi elaluali. Tama tigidali hogodama, tama te Keila bulu tagalama palio. Augwali te hauwa pedai badu tedela bilali. Te Solgo te Devit te bulu Keila tagalama wi pali po odobo side, teda Sol te Keila buluba pabo homu me ebeo.
1SA 23:14 Devit pelama, te bulu meba wiegi yai madi te Sif bulu pąde, te bulu du dabede geme dualaluali. Te bulu pedai te bidi meniama, olo elalubo bulu tama. Tama Solgo Devit sesemane sogo gegabo sę yali, tiali goli Godigo te Solgo aga somainu me ilibeo.
1SA 23:15 Solgo te Devit ela muabo homu ebaso, tama tiyu Devit wi yai. Tama te sogo Devit pelama, te Sif bulu pąde te Hores bulude bidai.
1SA 23:16 Tama Jonatango aga sugi pelama, tama wiegi yai po agaba weyu, te Devitgo konealubo po Godiba bomo elaluabo po wai.
1SA 23:17 Jonatango agabolo te tiwai po wali, “Nage wi munu me igio. Eno ayago nage me dologobeo. Nosali nage te Israel king pedalubo side, tama ena te nage tudi badu bidi nigilama bidaibao. Tama eno ayago me te sę yabo koneai dao,” wali.
1SA 23:18 Tama Genuai Bidigo gedude, augwa si te abagi mu olama, sesemane sogo bidabo te bomai dąų walubo po ma wali. Tama nosali Jonatan aga buluba ma begasa peyu, tama Devit te bulu Horesde me bididuai.
1SA 23:19 Tialima, te Sif bulu bidi mebago te Sol Gibeade sulama, tama agabolo te tiwai po wali, “King, odao. Devit te da bidibo pedai badu, te Hakila bulu du pedai badu, te Juda dabego bulu tǫ wa pai te saut badu geme dualalubao. Augwali te hwįbo pesage me badu te geme dualalubao, te Hores bulu pąde dao.
1SA 23:20 Dago koneani, nago homugo te bidi tolasabo homu mu elalubao, tama tiyu te nage aselama, aga sagasao. Tama dena digi te aga nage nogoba mawaibao,” te po wai.
1SA 23:21 Tama Solgo augwaliba te po wai, “Dagego wiegi yai kolesaga eyu, te ena tau sobao. Tama tiyu, eno homugo te Genuai Bidigo dage wiegi yai bugagia ilimainu yaibao.
1SA 23:22 Tiali goli, te bidi dabego te po wali, Devit te geme dualubo sę mu konea pai bidi, tama agai da tibo po me ola mawaibao. Tama tiyu, eno homugo dage te deli sogo ma pelama, te aga bidibo pesage sugi pelama, tama aga suali bidi dabe te nogi koneyu yao,” te po wali.
1SA 23:23 “Dagego te aga geme dualubo pesage tigidali te bugagia koneama, tama polo aselama, enabolo wagasao. Tama ena dage dali pelama, tama aga tede me bididubaso da, teda eno aga bugagia gegegi paibao. Tama eno aga pobeasa peyu, te tigidali Juda pedai badu pobaso da, teda te eno aga sigi pabo si mu te usu naibao.”
1SA 23:24 Solgo po ola silibo si da, te Sif dabego aga taga peyu, tama aga asomainu elama, tama augwa buluba polasa pai. Tama augwa te tama tiwai koneani, Devit dali, te aga dali bidibo bidi dabe dali, augwali te Maon wa pai bulude bidaluali, te Juda pedai genuai bulu te saut badu bidalio.
1SA 23:25 Solgo odama da, teda aga dali, te aga bidi hani dali, augwali hogodama, teba pelama, te Devit gegegi pali. Tiali goli, te bidi mebago Devitba wagi pali. Tama tibaso, aga pelama, te masigi hauwa elalubo bulu dwai me deliba pelama bidigi pali, te gasa pedai badu, te Maon wa pai bulu pedai badu bidigi pai. Te Solgo Devit te badu pali po odobo si da, teda Solgo aga wali pai dao.
1SA 23:26 Tama Sol aga hani bidi dabe dali te bulu du pado me deli pedai badu bidali, tama Devit dali, aga hani bidi dali, te augwali Solde wi pelama, tama te bulu du gasa pedai badu bidigi pai. Tama Sol aga hani bidi dali te pąba mu aselama, tama augwaligo te Devit dali te aga hani bidi dali tola sainu yali.
1SA 23:27 Tialima, bidi me deli aselama, te Solbolo wagasiyu te po wai, “Odao. Te Filistia dabego dago bulu tǫ pedaiba hwįagasobao. Nage asesa polo ma geasa asao,” te po wagasali.
1SA 23:28 Tialima, Solgo te po odama, tama aga me, te aga hani bidi dabe dali te Devit taga soyu, tama te Filistia dabe dali hwįgi soai. Tama tialima, augwaligo te bulu nogi polali, Te Wąbi Hwįbo Togolali Masigi Hauwa Elalubo Bulu Da po wai.
1SA 23:29 Tama Devitgo te pesagede bidali te tagalama, tama pelama, te wiegi yai geme dualaluabo pesage te Engedi dabego tǫba bidigi palio.
1SA 24:1 Solgo te Filistia dabe pobeasa pelama, teda aga ma geasa aselama, te Devit ma gegagasali. Tialima, te bidi mebago agabolo te po wali, “Devit te tǫ wa pai bulu te Engedi pąde bidibao,” wali.
1SA 24:2 Tama tibaso, Solgo te wiegi yai Israel ami bidi dabe te 3,000 nigilama, tama augwali selama, pelama, te Devit dali, aga hani dali, gegegi pali. Augwali te dwai bulu padodu soali, augwa te bulu nogi poyu, te Dwai Uni Memego Bulu da po wai.
1SA 24:3 Augwali pelama, te genuai ola be me deli te sunumi sese bulu dude elaluai, tama te sipsip meba obo pąde elaluali. Tama Sol aga te di tabo homu ebaso, tama aga te ola be tomoba pali. Tiali goli, Devit dali, te aga bidi dabe dali, augwali te ola be tomode mu dulalu bidaludai.
1SA 24:4 Tialima, te Devitgo aga bidi dabego agabolo weyu, te po wali, “Te dao. Megi te nago wiegi yai sogo dao. Genuai Bidigo nagebolo waliyu, te agai te boi bidi nage mawaibao po wai, tama nago mena sę agade yainogo da, teda nago te sę yao. Megi da, te sę ebo sogo dao. Ae, nage pao.” Tialima, Devit te dua dua peyu, te Sol pąba pelama, tama te Solgo bobage ugwa aiyadu dwasianu pedainu togwa sali, tiali goli Solgo me konebeo.
1SA 24:5 Devitgo togwa selama, teda nosali agai te yali sęde aga homu kone palali, te dwai sę dao, te homu yali.
1SA 24:6 Tama aga bidi dabe bidibo madiba ma pelama, tama augwaliba te tiwai po walali, “Genuai Bidigo enabolo te eno king dolomainu ilibeo, magi baso meni, te Genuai Bidigo digi aga nigilama, tama aga te king munama bidali. Eno te Genuai Bidigo sa muani kingba dwai kolesaga deli me egobeo,” wali.
1SA 24:7 Tama Devitgo aga hani bidi dabeba wado po waliyu, tama augwaligo te Sol eligi pomainu ebeo. Tama Sol te di telama, tama aga hogodama peyu, tama te ola be tagalama, soalio.
1SA 24:8 Tialima, Devit te Sol pali tudi badu nosali aga te ola bedu buluba dia solama, tama Devitgo agaba i weyu, te tiwai po wali, “King Sol, eno genuai bidi dao!” Solgo te i wabo odama begelali, tama Devit kidu sugunama, tama tobolu tǫba pogulali, te Solba genuai nogi mayu tiali.
1SA 24:9 Tama Devitgo Solba te tiwai po wali, “Magi baso nago olo te bidi dabego wabo poba muyu, te eno nage dolaibao homu ebo dawe?
1SA 24:10 Megi da, nago koneani, e sogo naga nage te bulu du ola bede bidibadi, tama Genuai Bidigo nage eno nogoba muanio. Tama eno hani bagego nage elao po wali, tiali goli eno olo tau sabo wiegi yai homu kolesagago nage tau siyu, eno te po wali, eno nage me dologobeo, magi baso meni, Genuai Bidigo digi nage sa mubaso, tama nage te king pedelai dao.
1SA 24:11 Eno aya, suao, nago eno e tolalubo ugwa dage pedai bugagia suao. Eno te nago ugwade togwa sali, tiali goli eno nage me elibeo. Tama teyu, nago bugagia koneao, eno nageba dwai sę yabo homu me, te nage dolabo homu me elalubeo. Eno nagede hagoma eyu, nage dologode bidibo hagela homu ebeo. Eno tede sęgę sabeo. Eno dwai sę me deli nageba me ebe, tiali goli, nago ena gegebo sę eyu, te ena ela muainu ebao.
1SA 24:12 Genuai Bidigo digi te da sigo ebo kolesaga dagalama, tama dego te dwai sę yali sueibao. Agai nageba te dwai dene mayu, te nago ena dali yali dwai kolesaga wei ponoyu tiaibao. Tiali goli, eno digi eno te nageba dwai sę me iligobeo.
1SA 24:13 Te polobadu digi te wali po nago koneani, ‘Te bidi dwaigo naga te dwai kolesaga yaibao.’ Tiali goli, ena te bidi dwai meni tiyu, te eno dwai kolesaga nageba me egobeo. Mu menio.
1SA 24:14 Da Israelgo king, nago ena pobeasa biliba, agawe? Tiali goli, ena de dawe? Ena te isai yowi tiwai yai. Ena te nǫ me deli tiwai naga dao.
1SA 24:15 Tama tibaso, te da si tomode te dego dwai sę yali te Genuai Bidigo digi dagalumainu yaibao. Agai ena tau siyu, te po dodoliyu, te nago ena me dologobeo. Tama eyu, agai da sibolo ola mawaibao, eno nagede dwai sę me deli me ebeo,” wali.
1SA 24:16 Devitgo po ola silibo side, tama Solgo agabolo te po wali, “Devit, eno waio, nago digi enaba te po oba, agawe?” Tama Sol gela walio.
1SA 24:17 Tama agai Devitba te tiwai po wali, “Nage wiegi yai bidi, te ena da dwai bidi mu dao. Nago enaba wiegi yai kolesaga mu yali, tiali goli eno dwai kolesaga nage dali yalio.
1SA 24:18 Tama megi tama nago ena pusali, nago wiegi yai kolesaga enaba elama, tama ena nago nogoba te Genuai Bidigo muani sogo, nago ena me ela mubeo.
1SA 24:19 Eno koneani, te bidi me deligo aga boi bidi dolabo sunumi elalubaso da, teda agai te aga olo me tagala palogobeo. Tiali goli, nago te wiegi yai kolesaga megi enaba yaligo, tama tiyu eno homugo te Genuai Bidigo nage wiegi yai bugagia mu ilimainu yaibao.
1SA 24:20 Odao, eno mu koneani, te nage Israelde bomai king pedelaibao.
1SA 24:21 Tama tiyu, eno homugo nago te Genuai Bidigo nogide te bomai po dąų walu, te nage king pedalubo sogo, te nago eno hani munu me eligobe po wao. Tiyu, nago augwali elibaso, tama eno nogi dali, te eno hani dali, tigidali mu silidalio,” Solgo te po wali.
1SA 24:22 Tialima, Devitgo bomai po dąų walali. Tama Sol aga buluba ma geasa peyu, tama Devit aga bidi dabe dali te geme dualaluali pesageba ma geasa pai.
1SA 25:1 Nosali Samuel isibaso, tama tigidali Israel we bidi sisinagaselama, tama agade gela wali. Tama augwaligo aga te Ramade te aga be pąde pubulali. Nosali te Samuel isai madide, Devit te aga bidi dabe dali te tǫ wa pai Paran buluba bidigi pai.
1SA 25:2 Te Maon taun bidi me deli, te aga nogi Nabal bidali. Aga te Kalep hani bidi. Tama agai tǫ pedai me deli te Karmel taun elaluali. Aga te mone hauwa elalubo bidi mu, tama agai sipsip te 3,000 elaluai, me 1,000 meme dali elaluali. Aga we, te Abigel, aga te wiegi yai sawi yai we mu, tama aga wiegi yai homu kolesaga hauwa koneai elaluali. Tiali goli, Nabal te wado po wabo bidi, tama aga kolesaga te wiegi yai elalusiąwai. Te sogo Nabal te Karmel taunde bidiyu, tama augwaligo te agai sipsip nisi dabe togobo sę iduai.
1SA 25:4 Devit te tǫ wa pai bulude bidibadi, tama Nabalgo te sę ebo po odai.
1SA 25:5 Tama tibaso, agai nogo si gesi bidi tagala palama, Nabal te taun Karmelba sugi pomainu yai. Devitgo te tiwai po augwaliba wai, “Dage te taun Karmelba pelama, tama Nabal gegegi pao, tama eno nogide dagego agaba te siade da po waiąo.
1SA 25:6 Tama dagego Nabalbolo te tama po wao, ‘Nage dali, te nago hani sibi dali, te nago tigidali doado bage dali me, te nage bugagia bidao.
1SA 25:7 Devitgo te tiwai po odali, te bidi dabego nago sipsip nisi togobo sę ebo po wai. Tama Devitgo nago bugagia konemainu yali, te nago sipsip tonalubo bidi dabe te da dali te Karmelde bidali sogo, dago augwaliba te dwai sę me ilibeo. Tama dago te augwaligo doado bage wi me sabeo.
1SA 25:8 Te nago augwaliba hanalu da, teda augwaligo te tobage deli po tiwai nageba waibao. Megi nago te genuai nai daa tubo po obaso, te Devitgo da nageba tagala palali. Tama tiyu, agai homugo te nago daba olo tau mabo wiegi yai kolesaga emainu homu yai. Da te nago sę bidi tiwai, tama nage te Devitgo aya tiwai dao. Tama tiyu, nago nai meba elalubaso da, te nago dabolo maiabo homu yao,’ te po wao,” Devitgo te po wali.
1SA 25:9 Tialima, te Devitgo bidi dabe pelama, tama te po te Devitgo nogide te Nabalba wagi pelama, tama augwali tonalu bidali.
1SA 25:10 Tama Nabalgo te tama po wei augwaliba ponoyu, te tiwai po wai, “Te Devit, te Jesigo ogwa, te de dawe? Eno aga me konebeo. Megi e sogo te sę tonalubo bidide te olo sę bidi hauwa wi peyu ebo sogo elalubao. Te aga me te olo sę ebo bidi naga homu ebao.
1SA 25:11 Dage menadu asali, te eno konebeo. Tama tiyu, eno te bret me, wę me, te kibu dabe te sipsip nisi togobo sę ebo bidi dabe ela maiabo nai, te dageba selama me magobeo. Mu menio,” wali.
1SA 25:12 Te Devitgo tagala palali bidi dabego te po odama, tama augwa te Devitba ma geasa pelama, tama te Nabalgo wali po tigidali agaba walali.
1SA 25:13 Tialima, Devitgo te po wali, “Dage tigidaligo te bainat hwą selama, tama hwįabo sisi yao.” Tama tibaso, augwaligo agai po wali pali. Tama Devitgo me aga bainat hwą kukuluba gedelali. Tama agai te 400 bidi aga selama pali, tama agai te 200 bidibolo waliyu, te bida po olama, te doado bage tonaluao wai.
1SA 25:14 Te sogo te Nabalgo sę ebo bidi me deli palima, te Abigel sugi pali, te Nabalgo we, tama agabolo te tama wai, “Devit te tǫ wa pai bulude bidiyu, tama aga bidi meba tagala palama, te dago genuai bidi Nabalba aselama, tama augwaligo agaba te siade da po wai. Tiali goli, agai po dwai augwaliba manio.
1SA 25:15 Tiali goli, augwaligo dwai sę daba me ebeo, menio. Augwaligo te wiegi yai kolesaga naga dabolo sesemane sogo yali. Tama tigidali sogo augwali da dali te kala elalubo pesagede bidiyu, te augwaligo dago doado bage wi me sabeo.
1SA 25:16 Tama tigidali sogo dago te sipsip dabe tonalubo sę yali sogo, teda te Devitgo hanigo da te giligade me, hulide me, bugagia tonaluai dao.
1SA 25:17 Tama tiyu, nago bugagia koneao, megi da, te Devit aga bidi dabe dali asiyu, te dago genuai bidi me te tigidali we bidi dali dolagasaibao. Tama magi naigo nago te yagasobo sę paliabo sunumi te bugagia homu kone palao. Ena nageba asali, magi baso meni, Nabal te hagoma bidi, tama agai te dago po me odogobeo,” wali.
1SA 25:18 Abigelgo te po odama, tama polo tama aga te 200 bret sisi elama, tama te meme wali si me augwa te wain wę paganai elaluali, tama te ulali a naga sipsip, me te 20 kilogram wit augwa te siaba ulai nai me, te 100 wain bono du duani me, te duani 200 fik te augwa olali, tama te tigidali nai selama, te donki meba teba muanio.
1SA 25:19 Tama agai aga sę ebo bidi dabebolo te tiwai wai, “Dagego te donki dabe polasa sela piduao. Te ena dage wali asaibao,” wali. Tiali goli, agai te tama tiali sęde te aga bidibolo me walobeo.
1SA 25:20 Tama Abigel te donki me delide dugulama, tama te sunumi me delidu wali peyu, te Devit gegegi pali. Tama Devit te aga bage bidi dali augwali te deli sunumidu naga asai. Tama Abigelgo te bulu du me deli te sau pado sunumi wali bagula pelama, tama Devit dali deliba sisinani.
1SA 25:21 Devitgo te tiwai homu yali, “Magi baso eno te bidigo nai dabe te wa pai bulude bugagia tonaluali, agawe? Dago te agai nai me deli wi me sabeo, menio. Te agai nai tigidali te bugagia elaluali. Tama megi agai dwai kolesaga enaba wei ponani. Te aga kolesaga dolo me ebeo.
1SA 25:22 Tama tialima, eno te hani bidi tigidali te hulide digi ela muainu yaibao. Te meni ebaso da, Godigo ena te boi bidi dabego ela mumainu emainao,” wai.
1SA 25:23 Abigelgo Devit sulama, tama polo tama aga te donki dulaluali tagalu, tama te tǫba samonani.
1SA 25:24 Tama aga te Devit pąba pelama, tama kidu sugunigi pelama, tama tobolu te tǫba pogulali. Tama agai Devitbolo te tama wali, “Genuai bidi, eno nage dali po miainu ebao. Tama nago eno po odabo homu yaibawe? Te nage wado ilabo homu ebo ąǫ ilali sę, te page enade naga elalubao.
1SA 25:25 Tama nago te Nabalgo poba homu kone me palamuo, magi baso meni, te aga kolesaga dwai mu yali. Te aga nogi page te tiwai, kolesaga geda mubo bidi da. Tama aga kolesaga te deli tigi poai tiwai naga yali. Tama genuai bidio, ena digi eno te nago tagala palali gesi bidi te eno me subeo. Mu menio.
1SA 25:26 Odao. Genuai Bidigo digi nage paliama, tama nago te boi bidi dabeba te dwai kolesaga isiąyu, tama augwali me ela mubeo. Tama te Sesemane Sogo Bidibo Genuai Bidigo nogide eno po bomo elama weyu, te tiwai po obao, te nago boi bidi dabeba te Godigo dene ilimainu yaibao, te Nabalba yabo sę tiwai gilama yaibao.
1SA 25:27 Tama tialima, genuai bidi, eno homugo te eno nageba wiegi yai homu ilimainu te sesali nai te nago somainu homu ebao, tama naga hani bidi dabeba mao,” wali.
1SA 25:28 “Te eno yali sę nage gedude dolo meni ebaso da, teda eno homugo nago te eno yali dwai sę te sela sąyao. Eno koneani, te Genuai Bidigo homugo nago te boi bidi dabe dali hwįgi pomainu homu ebo sogo, teda nago te boi bidi dabe dali hwįgi pali. Tama nago te dwai kolesaga ebo bidi meni. Tama tibaso, Genuai Bidigo nage te king pedalumainu elama, tama te Israel king dabe te nago wai hanide pedelaibao.
1SA 25:29 Te bidi meba aselama, nage dali hwįagasu, te nage elainu ebaso da, teda God, dago Genuai Bidigo, te nage bugagia tonaluyu, te bidigo aga wiegi yai doado bage bugagia tonalubo tiwai yaibao. Tiali goli, te agai nago boi bidi ela gudulu, te bidigo masigi te katapelde munama, tama te masigi enebo tiwai gilama yaibao.
1SA 25:30 Tama Genuai Bidigo te tigidali wiegi yai sę agai nageba po dąų walu te nageba yaibao wali sę tigidali yaibao. Tama agai nage te da Israel dabego king pedalumainu ilaibao.
1SA 25:31 Te nago bidi meba odolali me elisiąyu, ma nago digi te bidi me deliba dwai sę me isiąbaso da, teda te Genuai Bidigo nage te king pedalumainu ebo sogo te nage haliga sęgę ilibo nai, ma nage hale ilibo sę me deli te meni yaibao. Tama Genuai Bidigo nage wiegi yai ilibo sogo, teda nago ena homu kone palama, tama ena bugagia wiegi yai ilao,” wali.
1SA 25:32 Devitgo te po odama, tama Abigelbolo te po wali, “God, da Israelgo Genuai Bidigo, te nage megi tagala palobaso asali, tama nago ena dali deliba gesabidi sisinama bidibao. Tama tiyu, eno wiegi yai homu pemene eyu, te aga nogi ugwaba sobao.
1SA 25:33 Eno Godiba te nago wiegi yai homu kolesaga me po walide te usu da po obao, tama agai nage wiegi yai bugagia mu ilimainao. Magi baso meni. Megi nago ena palialigo tama eno bidi meba elisiąyu, tama te Nabalgo yali dwai sę te eno digi nogide wei ponama me elibeo.
1SA 25:34 Tama Genuai Bidigo ena palibaso, te eno nageba dwai sę me yainu homu yali te me ebeo. Tiali goli, te Sesemane Sogo Bidibo Genuai Bidigo nogide, eno mu po obao, te nage enaba polo tama asigi menigi sogo da, teda te kigamu te Nabalgo sę bidi te me deli te bidibo ula dali me bidigi menigi dao,” Devitgo te po wali.
1SA 25:35 Tama Devitgo te Abigelgo sesali nai tigidali selama, tama Abigelbolo te tiwai po wali, “Megi nage te naga beba ma peyu, tama nago haliga dua nagame igulama bidao. Te eno nago po wali tiwai gilama eyu, tama eno te Nabal me ela mugobeo,” wali.
1SA 25:36 Tialima, Abigel te Nabalba ma geasa pali. Tama aga te beba sabolama suali, Nabalgo te nai daa tuali, te kingo genuai wiegi yai nai daa tiwai tobage tualio. Tama Nabal te gęǫ page mu eyu, tama wiegi yai homu pemene eyu bidali, tama tibaso, te Abigelgo po me deli te agabolo me wasiąma te kigamuba usu nani.
1SA 25:37 Te be posobode te Nabalgo tobolu ula ma igi soabo si da, teda tama Abigelgo agabolo te tigidali pedelali sę po wali. Nabalgo te po odama, tama polo mu tama aga tobolu abuai dwasianu doliyu, tama aga tigi te bomo kimi meni yani. Tama aga degasa dulama, tama te masigi tiwai elama pila mugulali.
1SA 25:38 Tama te tiwai te nogo si sogo bidama da, tama Genuai Bidigo te Nabal ela muanio.
1SA 25:39 Devitgo te Nabal isali po odama, tama agai te tiwai po wai, “Eno Genuai Bidiba wiegi yai homu pemene ebao. Aga digi te dwai kolesaga Nabalgo enaba yali te homu koneama, tama agai wei ponani. Nabalgo te dwai kolesaga ebaso, tama Genuai Bidigo agaba dene manio. Tama Genuai Bidigo aga sę bidi eno sunumi palialigo, tama eno dwai sę me ebeo,” wali. Tialima, nosali Devitgo sę bidi meba tagala palama, te Devitgo aga sabo po te Abigelbolo wagi pai.
1SA 25:40 Tama te sę bidi dabe pelama, te bulu Karmelba sabolama, tama Abigelbolo waliyu te tiwai po wai, “Devitgo nage sainu walio. Tama agai da tagala palu, te nage agaba odasa asao wai,” augwaligo te po wai.
1SA 25:41 Abigelgo te po odama, teda aga kidu sugunama, tama tobolu tǫba basi gulali. Tama aga te tiwai po wai, “Ena te aga odolali sę ebo we tiwai dao. Tama eno ena te genuai bidigo sę ebo bidi dabego sągą wę telawaibao,” wali.
1SA 25:42 Tama polo tama aga hogodama, te aga donki selama, teba duagulali. Tama agai sę ebo a naga we te aga dali pinao po wai. Tialima, aga dali, te aga sę ebo we dabe me, te Devitgo sę bidi dabe dali pela wali. Augwali te Devit bidibo madiba sabolama da, teda Abigel te Devit aga we pedelama bidali.
1SA 25:43 Te hasia Devitgo te Jesril taun we Ahinoam sai, tama megi agai te Abigel me sali.
1SA 25:44 Tama Mikal, te Solgo wegi, aga me te Devitgo we bidali. Tiali goli, Solgo aga te wegi ma oda selama, tama aga te bidi Paltielba mani, te Laisgo ogwa, te taun Galim bidi dao.
1SA 26:1 Te Sif bulu bidi meba aselama, te Sol Gibeaba suagaselama, tama agabolo te tama po wai, “Devit te bulu du Hakilade, te Juda bulu tǫ wa pai bulu sesegede geme dulaluyu bidibao,” wai.
1SA 26:2 Tama polo Solgo te wiegi yai Israel ami bidi te 3,000 selama, tama te tǫ wa pai bulu te Sifba pelama, Devit gegegi pali.
1SA 26:3 Tama Solgo osogo bidabo pesage te Hakila bulu du te sunumi pąde nigali. Devit te tǫ wa pai bulude bidibadi, tama agai odali, Solgo aga te tǫ wa pai buluba gegagasali po wali.
1SA 26:4 Tama tialima, agai te bidi meba tagala palama, te Sol geme sa pelama sugi pali, tama augwaligo te tiwai koneani, Sol asai yalio.
1SA 26:5 Augwali aselama, Devitba wagasobaso, tama Devit hogodama, te Sol bidagasobo pesageba pelama, tama te Sol me te polalubo ofisa bidi, Apner, te Nergo ogwa, augwali si pibo pesage te bugagia sula sali. Sol te pesage nigali tomode pibadi, tama aga ami dabego aga bagulama piai.
1SA 26:6 Tama Devitgo te Ahimelek te Hit hani, me Abisai, te Devit aga abe Seruiago ogwabolo walali. Abisai aga te Joapgo ama da. Devitgo augwali sibolo te tama po wali, “Te dage sigo de te Solgo bidibo pesageba pabo homu ebowe?” Tama Abisaigo te po wali, “Ena paibao.”
1SA 26:7 Tialima, te sogo hulide Devit dali Abisai si te Solgo bidibo pesage tomoba pai. Tama augwali sigo suali, aga te pesage tomode pila muyu, tama aga sesemone ene te aga tobolu pąde te tǫba tulama elaluali. Tama Apner dali te ami bidi dabe daligo aga bagua selama, piai elaluali.
1SA 26:8 Tialima, Abisaigo Devitbolo te tama po wai, “Megi da, te Godigo nago boi bidi te nago nogoba muanio. Te eno aga te aga sesemone enego digi enemainu eyu, te tǫba dąų walumainu ilao. Te eno aga deli sogo naga enama, tama aga isaibao. Eno aga si sogo me enegobeo,” wali.
1SA 26:9 Tiali goli, Devitgo agabolo te po wali, “Tagalao, nago aga me dolamuo. Magi baso meni, Genuai Bidigo Sol te sa mubaso king pedelali, tama bidi me deligo te Sol dolobaso da, teda Genuai Bidigo te tebo bidiba dwai dene ilaibao.”
1SA 26:10 Tama Devitgo po ma mu weyu, te po wai, “Te Sesemane Sogo Bidibo Genuai Bidigo nogide eno nagebolo obao, te Genuai Bidigo digi Sol elabo, me ma Sol aga digi isabo sogo bodolu elalu, ma te boi bidi dabego aga te hwįbode elabo te elalubao.
1SA 26:11 Genuai Bidigo agai te sa muani king te eno aga dolomainu ilibeo. Dago te agai sesemone me te sene wę naga selama, tama da pinao.” Devitgo te po wali.
1SA 26:12 Tialima, Devitgo te aga tobolu pąde munaluali sesemone ene me sene wę dali si sali. Tama aga dali, te Abisai me, augwali si palio. Tama te bidi me deligo ma augwali sigo te tiali sę me konebeo. Tama te sogo te bidi me deli te me hodalubeo. Menio. Augwali te ni pulu tiwai mu piali, magi baso meni, Genuai Bidigo digi te tigidali bidi bomo elama, mu pimainu ilalio.
1SA 26:13 Tialima, Devit soyu, te bulu du si tomode te odogo malu bulu si nogelama, solama, tama te Sol bidibo pesage dwasianu digi bulu gana elaluali, tama te bulu du me deli bageba holama dolugulai.
1SA 26:14 Tama aga te Solgo ami dabeba me te Apnerba i wai. Agai te tiwai po wai, “Apner! Nago eno i wabo odaliwe, ma meniwe?” Tialima, Apnergo agaba te i wei ponoyu, te tama po wai, “Nage dego tama nago te kingba i obawe?”
1SA 26:15 Tama Devitgo po wei ponoyu, te tiwai po wali, “Te nage bidi mugo oba, agawe? Te Israelde mena bidi te nage tiwai dawe? Te mu menio. Nago augwali aiyaba elaluai. Tama tiyu, magi baso naga tonalubo bidi, te king bugagia tonalubo meni dawe? Te nago konebe, agawe? Megi naga tama, te bidi me deli te king bidibo pesage tomoba pelama, te king ela muainu yali.
1SA 26:16 Apner, odao. Nago wiegi yai sę me ebo. Tama dage ami bage, dage tigidaligo te duga tonalubo bidi te bugagia me tonalubeo, te Genuai Bidigo sa munama te king bidibo, te bidi dao. Tama te Sesemane Sogo Bidibo Genuai Bidigo nogide, eno mu po obao, te dagego te bidi bugagia tonalusiąbaso, te kingo dage tigidali ela mugi sogo da, te usu igi dao. Dage pelama, te king aga tobolu muani pąde te sesemone me sene ąį sugi pao. Te nai si te munalubowe, ma meniwe?”
1SA 26:17 Solgo koneani, te Devitgo dogoni da wali, tama tiyu agai Devitba i wali, “Devit o, eno wai, te nage tama da, agawe?” Tama Devitgo agabolo te po wali, “Awe, king, te ena tama dao.
1SA 26:18 Genuai bidi, eno magi dwai kolesaga ebaso, tama nago naga sę bidi ena nago gegebo sę ebawe?
1SA 26:19 Tialima, king, eno po te nago odomainu homu ebao. Te Genuai Bidigo digi te nage aselama, ena dolomainu yai baso da, teda eno agaba te ofa me deli eyu, tama agai te olo tau sabo wiegi yai kolesagago ena tau somainu yaibao. Tiali goli, te bidi dabego te nago ena elimainu ebo si da, teda eno homugo te Genuai Bidigo augwali dolomainu yaibao. Magi baso meni, augwaligo ena te Genuai Bidigo tǫ pedaide ela gudulama, tama ena te tibo godiba lotu wagi pomainu ilibao. Tama eno te Genuai Bidigo aga hani bageba mabo wiegi yai doado bage te eno me sogobeo.
1SA 26:20 King, nago ena elainu asali te bidigo nǫ gegainu, ma bidigo te bulu dude te bidibo uni gogolo ba elainu asobo tiwai gilama yali. Tiali goli, nago ena te gasa hanigo tǫ pedaide me ela mugio. Tiyu, ena te Genuai Bidi digibulu bidibo gana elalubadi, te ena isidalio.” Devitgo te po wai.
1SA 26:21 Solgo te po odama, tama Devitba te tiwai po wai, “Hobede da. Eno dwai kolesaga yali. Tiali goli, Devit, te eno wai, nage enaba ma geasa asao. Eno nage dolabo usu me sogobeo, magi baso meni, te e sogo hulide nago ena me ela mubeo. Mu tama, te eno ebo kolesaga te mu geda muani. Eno dwai sę ebo te dwasianu me ebeo,” wali.
1SA 26:22 Tialima, Devitgo Solbolo wali, “King, odao. Te nago sesemone ene te eno nogode elalubao. Eno homugo te nago bidi me deli tagala palama, sagasomainu yao.
1SA 26:23 Genuai Bidigo te aga bugagia wali mu pabo bidi te wiegi yai iliyu, tama te doloba pai kolesaga ebo bidiba me te wiegi yai ilaibao. Nago homugo te megi naga agai nage te eno nogoba muani, tiali goli eno nage me dolobeo. Magi baso meni, eno koneani, te Genuai Bidigo nage sa munama, nage te king bidibao.
1SA 26:24 Eno te tama homu yali, eno homugo te nage dologobeo. Menio, eno nage te bugagia bidimainu ilali. Tialima, megi da, eno homugo te Genuai Bidigo te tiwai wiegi yai kolesaga enaba emainu homu yali, tama eno sęgę tigidali silama, te ena bugagia bidainu homu ebo dao,” te po wai.
1SA 26:25 Tialima, Solgo Devitbolo te tiwai po wali, “Devit, eno waio, Godigo wiegi yai sę nageba emainao. Tama tiyu, nago yainu ebo sę tigidali te wiegi yai naga pedelaibao,” wali. Augwa si te po mia silama, teda Devitgo te bulu du tagalama, tama palio, tama Sol te aga buluba ma geasa soai dao.
1SA 27:1 Nosali Devitgo te tama homu yali, ‘Te pąde sogo tama te Solgo ena ela muaibao,’ homu yali. ‘Tama te wiegi yai mu da ena te Filistia tǫ pedaiba wi pelama, bidigi pobaso da, teda Solgo ena me sogobe da,’ homu yali. ‘Tama Sol te hagela ebaso, tama ena gegebo sę munu ma egobeo,’ te homu yali.
1SA 27:2 Tama tialima, Devit dali, te aga hani bage te 600 bidi me, te Get taun king bidi pageba pali, te Akis, te Maokgo ogwa dao.
1SA 27:3 Tama Devit aga me, aga bidi hani dabe dali, te aga we wai dabe dali, augwali te Getde bidaluali. Tama Devitgo we si te aga dali bidai. Te we me deligo nogi te Jesril bulu we Ahinoam, tama gasa we nogi Abigel te Karmel bulu we, aga te we da, te aga hasia isali bidi Nabalgo we dao.
1SA 27:4 Solgo te tiwai po sabilibo odali, Devit wi pelama, te taun Getde bidibo po odobo sogo, agai te aga munu ma pobeasa me bilibeo.
1SA 27:5 Nosali Devitgo te king Akisbolo te tama po wai, “Te nago ena wei ebaso da, teda nago ena te nago dwasianu buside elalubo taun me deliba ena bidigi pomainu yao. Tiyu, da nage dali te genuai taunde bidiyu, tama nago da tonalubo sę dene yabuo,” wali.
1SA 27:6 Tialima, Akisgo te Devitgo po odama, tama agabolo te dwasianu taun me deli mani, augwa te nogi Siklak nogi yali. Tama tialima, te Siklak taun te Juda dabe kingo taun me pedelama, tama augwa taun elaluali te e buku asęani bidi dabe bidibo sogo usu nama elaluai dao.
1SA 27:7 Devit te Filistia bulu tǫ pedaide bidali, te kibu be deli olama, polua me si me si bidai dao.
1SA 27:8 Te sogo Devitgo aga hani bidi dabe dali te pelama, te Gesurba, me Girsi, me Amalek, te tama bageba hwįgi pali. Te hani bage te Israel dabego boi bidi dabe elaluai, tama augwali te Isip pąde, te tǫ wa pai bulu te saut pedai badu bidali. Tama augwali tede te kibu be bidi sese umabo mu bidai dao.
1SA 27:9 Tama Devitgo aga hani bage dali augwaligo te augwali dali hwįani sogo, augwaligo te tigidali we bidi elama, tama tigidali sipsip, me bulmakau, me donki, me kamel te augwaligo ugwa dabe me, te tigidali nai sali. Augwaligo te tiwai ela silama da, teda augwali te Akis bidibo madi ma asiyu yai.
1SA 27:10 Tama Akisgo Devitba hanalu wali, “Megi da, nago mena badu hwįgi paliwe?” Tama Devitgo te Akisba tibo po ola mayu, agabolo te tiwai po weyu yali, “Eno te Juda dabeba hwįgi pai da,” weyu yali, ma “Eno te Kin dabeba hwįgi pali,” te po weyu yali. Te bidi dabe te Juda tǫ pedai te saut badu bidiba po wali.
1SA 27:11 Te Devit pelama hwįgi pabo sogo, agai te tigidali we bidi ela muyu yali. Agai te tama homu yali, ‘Tiyu me deli te Get taunba pelama, tama augwaliba te eno me, ena hani bage dali, dago ebo sę po wagi pidali,’ homu yai. Tigidali sogo Devit te Filistiade bidu, te tama kolesaga naga yalio.
1SA 27:12 Tialima, Akisgo te Devitba homu kęą peyu, tama tiwai homu yali, ‘Agai te Israel dabeba hwįgi peyu, te aga abagi dabeba digi hwįgi poba,’ homu elama, ‘tama tibaso, augwaligo aga wei ebo homu meni yani. Megi da, te agai ena tau siyu, tama eno sę sesemane sogo yaibao,’ te po wai dao.
1SA 28:1 Dwasianu bidama gana, nosali te Filistia dabe augwa ami bidi dabe sisinama, te Israel dabeba hwįgi painu yai. Tama Akisgo Devitba te tama po wali, “Te nago koneani, te nage dali te naga hani bidi dabe te ena dali pelama, te Israel dabe dali hwįgi painu homu ebo, agawe?”
1SA 28:2 Tama Devitgo agabolo te po wali, “Eno koneanio. Ena nago sę bidi da, tama nosali nago eno wiegi yai sę ebo sueibao.” Tama Akisgo te po wali, “Wiegi yai mu dao. Te eno nago nogi ugwaba siyu, nagebolo te ena sesemane sogo tonaluabo sę mawaibao,” wali.
1SA 28:3 Polobadu te Samuel isibaso, tama tigidali Israel te agade gela olama, tama augwaligo aga te Ramade pubulali, te aga taunde digi. Tama te sogo Solgo te tigidali bidi me we te isali bidi dabe noma bidi dali po mibo we bidi augwali ela gudulali. Tama agai te bidi dabe te Israelde bidimainu me ebeo.
1SA 28:4 Te Filistia dabego te Israel dabe dali hwįainu yai. Tialima, te Filistia ami dabe te not pedai badu pelama, tama te augwa osogo bidabo pesage te Sunem taun pąde nigai. Tama Solgo te Israel ami bidi dabe sisinama, tama augwali pelama, te augwa bidabo pesage te bulu du Gilboade nigilama bidali.
1SA 28:5 Te Solgo te Filistia ami bidi dabe suali sogo, te aga wi dwai mu yai.
1SA 28:6 Tama tiyu, agai te Genuai Bidiba te tama po hanalu wali, “Te eno mena tama sę yagawe?” Tiali goli, Genuai Bidigo te nade agabolo te po wei ponisiąyu, ma te Godigo homu konea pabo masigi me, ma te profet dabego pedauwalide me, te po wei me ponisiąwai. Genuai Bidigo te po me deli te wei me ponobeo. Mu menio.
1SA 28:7 Tialima, Solgo te aga ofisa dabebolo te tama po wali, “Dage pelama, te isai bidi noma dali po mibo we me deli gegegi pelama, tama te eno aga dali po migi paibao.” Tama augwaligo agabolo te po wai, “Te me deli te taun Endorde bidibao,” wai.
1SA 28:8 Tialima, Solgo te kingo mubo ugwa muani te hasegelama, tama gasagi yai tobage ugwa bulali, te bidi dabego aga te king da weyu koneidali weyu te tama tiali. Tama agai te aga ofisa bidi si selama, tama hulide augwali pelama, te we sugi pali. Augwali sabolama da, tialima Solgo te tiwai po te webolo wali, “Eno homugo nago te isai bidi noma bidi dali po mimainu homu ebao, tama te mena sę pedelabo po te enabolo omainu yaibao. Eno homugo te bidi nogi elama, tama nago aga noma bidi i obaso, te hania hanilagasomainu yaibao,” wali.
1SA 28:9 Tialima, te wego te po wali, “Nago te king Solgo yali sę koneani. Agai te isali bidi noma bidi dali po mibo we bidi tigidali sela sąyu, ela gudulali. Magi baso nago ena usu sagasu, tama te Solgo ena ela mumainu yabo sunumi te hanilagasobawe?” wali.
1SA 28:10 Tama Solgo agaba te tiwai bomai po me deli dąų waliyu, te tiwai po wali, “Te Genuai Bidigo nogide eno te mu po nageba dąų walu obao, nago te sę ebaso da, teda augwaligo nageba te dwai dene me iligobeo,” wali.
1SA 28:11 Tama te wego Solba hanalu wali, “Tialima, nago homugo eno de i omainuwe?” Tama Solgo te po wali, “Nago te Samuel i wao.”
1SA 28:12 Tialima, te wego te Samuelba i wali, tama agai te Samuel pedalubo sogo sulama, aga te i dwai mu weyu, tama te Solbolo te tama po wali, “Magi baso nago ena usu sobawe? Naga digi nage te king Sol dao!” Te wego te po wai.
1SA 28:13 Tama kingo te po wali, “Tagalao, nage wi me elamuo. Nago magi nai sualiwe?” Tialima, te wego te po wali, “Eno te bidi noma me deli te tǫ daidu asobo sualio.”
1SA 28:14 Tama Solgo agabolo hanalu wali, “Te noma bidi te magi nai dawe?” Tama te wego te po wali, “Te monu dabe tiwai te bobage ugwa gudama, tama asalio.” Tialima, Solgo koneani, te Samuel tama da homu elama, tama Sol te kidu sugunama, tama aga tobolu te tǫba basi gulama, te Samuelba genuai nogi mayu tama tialio.
1SA 28:15 Tama Samuelgo Solba te tiwai po wali, “Magi baso nago ena hodolama, tama ena ma asomainu i obawe?” Tama Solgo te tama po Samuelba wei ponani, “Eno sęgę genuai mu elalubao. Magi baso meni, te Filistia dabego enaba hwįagasobo side, tama Godigo ena tagalalio. Te agai enaba te profet dabego pedauwalide me, ma te nade me, te po ena dali me wabeo. Te eno mena sę elama te eno homugo konemainu ebao. Tama tiyu, te nago enabolo omainu te eno nage i wali,” Solgo te po wali.
1SA 28:16 Tialima, Samuelgo agabolo te po wali, “Odao. Genuai Bidigo nage tudiba muyu, tama nago boi bidi pedelalio. Tama tialima, magi baso nago ena i waliwe? Eno nage tau me sogobeo.
1SA 28:17 Genuai Bidigo nageba te sę yali, te nagede po agai eno pedauwalide polobadu wali. Agai nage te king sęde sela sąyu, tama nago te Israel munu ma tonalugio po wai. Tama agai te sę te nago abagi Devitba mawai dao.
1SA 28:18 Nago te Genuai Bidigo po sela sąwani. Polobadu Genuai Bidigo te Amalek dabe dali haliga sębę ebaso, tama nagebolo weyu, te Amalek tigidali dolao po walali, tiali goli nago agai po wali pabeo. Tama megi Genuai Bidigo te sę nageba ebao.
1SA 28:19 Tama te sę naga nageba me egobeo. Menio. Aga te nage dali, te gasa Israel dabe dali, te Filistia dabego nogoba mawaibao. Do da, te nage dali, te naga ogwa dabe dali, te isama, tama ena dali te isali bidi dabe bidibo pesageba bidagasaibao. Tama Genuai Bidigo te Filistia ami dabego te dage Israel aiyaba elalumainu elama, tama dage aiyaba mu elalueibao,” Samuelgo te po wai.
1SA 28:20 Solgo te po odama, tama aga wi dwai mu elama, tama polo tama mu aga te tǫba degasa dulama, tama pila muani. Tama aga bomo kimi meni yani, magi baso meni, aga te sogode nai me tusiąwai.
1SA 28:21 Tialima, te we te Solba pelama, tama aga te wi dwai mu ebo suali. Tama te wego Solba te tiwai po wali, “Genuai bidi, odao. Eno nago po wali pali. Ena te augwaligo ela muaiba homu me ebeo. Menio. Eno nago po odama, te sę yalio.
1SA 28:22 Tama tialima, megi eno homugo te nago eno po odama, te sę me deli emainu obao. Eno te nai meba nage menama, tama eno homugo te nago tumainu homu ebao. Nago te nai tulama da, te nago bomo sabo si da, tama nage ma pobaso te usu dao,” wali.
1SA 28:23 Tiali goli, Solgo te po wali, “Woo, menio. Ena nai tubo hagela ebuo,” wai. Tialima, aga te ofisa bidi si badi te wego me, augwa bomo eyu, Solgo te nai tuao wali. Tama agai augwaligo po odama, tama hogodama, te pibo bet saiba duagulali.
1SA 28:24 Tama polo tama te wego te aga ogwa bidi nisai bulmakau elama, tama te bulmakau mi ulai. Tama aga te plaua meba selama, tama te yis meni yai bret meba polo nigilama, tama ulali.
1SA 28:25 Te nai sisi ela silama da, teda te wego te nai te Solba me, te aga ofisa dabe daliba, sela asama tama augwali tuali. Augwa tula silibo si da, teda te sogo hulide naga augwa te we taga soyu, tama soalio.
1SA 29:1 Te Filistia dabego augwa ami dabe sese selama, augwa te taun Afekba sisinagasali. Tama te Israel dabe augwa bidabo pesage te wę ulu pedalubo pąde nigilali, te Jesril bulu odogode te wę ulu odolali te tǫde pedalubo madi bidali.
1SA 29:2 Te Filistia a naga king dabego te augwa ami dabe te 100 bidi me 1,000 bidi hani bubugulu pelama, tama te ami bidi dabe te hwįbo pesageba sela painu yali. Te Filistia dabe augwa ami polasa pobadi, tama Devit aga ami bidi dabe dali te king Akis tudi badu nosali pali.
1SA 29:3 Tama te Filistia ofisa dabego te Devit aga hani bidi dali asobo sulama, tama augwa te po wali, “Magi baso te Hibru dabe ede bidalubawe?” Tialima king Akisgo augwaliba te po wali, “Te aga da Devit dao, polobadu aga te Solgo ofisa bidi me deli da, te Israel king bidi dao. Tiali goli, aga te hauwa sogo mu te ena dali bidali. Tama tigidali sogo me aga ena dali bidali, te eno agade te dwai sę ebo me gegebeo,” wali.
1SA 29:4 Tiali goli, te ofisa dabego te Akisba wado po weyu, te po wai, “Aga te nago mani taunba ma geasa pomainu tagala palao. Nago aga te munu me da dali te hwįboba pomainu elamuo. Tiyu, aga homu hasegelama, tama da Filistia dabeba hwįyu, tama da ela muidalio. Te agai te tama tiyu da, teda te wiegi yai sunumi nigilibaso, te king Solgo aga wei ma eyu, te wiegi yai homu pemene yaibao.
1SA 29:5 Aga te bidi Devit tama dao, te we dabe sibigo agade te augwa balia yali sogo, te tęąbi po wai. Augwa tęąbi po te tiwai wali, ‘Solgo te boi hwįbode te umabo tausen bidi elali, tiali goli Devitgo te bidi umabo hauwa tausen tausen bidi elali,’ po weyu tęąbi wai dao,” te po wali.
1SA 29:6 Tama tibaso, Akisgo te Devit i olama, agabolo te tama po walali, “Te Sesemane Sogo Bidada Pabo Genuai Bidigo nogide, te dage Israel dabego God dao, eno te tiwai mu po nagebolo obao, nage te doloba pai bidi, tama ena digi eno homugo te nage ena dali asu, tama te wąbi hwįbo side da tau somai da homu eyu, wiegi yai homu yai. Eno te magi dwai sę nago ebo te susiąbadi, nage enaba asali sogoba usu nama te megi sogoba dąį yagasobao. Tiali goli, te gasa king dabego te nage da dali asomai da homu usu ebeo.
1SA 29:7 Tama tiyu, nago te king dabeba wado po weyu, subigila sę me elamuo. Tiyu, augwaligo homu dwai nage dali yabuo. Nage te naga bidali pesageba ma geasa pelama, tama bugagia dulalu bidao,” wali.
1SA 29:8 Tama Devitgo Akisbolo te po wali, “Tiali goli, genuai bidio, eno mena dwai sę yaliwe? Eno te nago sę gagalali sogo eno mena dwai kolesaga ebo nago suali, te megi e sogoba usu nubawe? King o, magi baso ena te nage dali peyu, te eno genuai bidigo boi bidi dabe dali hwįgi pomainu ebewe?”
1SA 29:9 Tialima, Akisgo Devitba te tiwai po wei ponani, “Te eno gedude nage te Godigo ensel me deli tiwai yali, tama nago te magi nai me delide te dwai sę yali me elalubeo. Tiali goli, te gasa ofisa dabego po walio, nage da dali te hwįbo digi pogobe po wali dao.
1SA 29:10 Tialima, Devit, odao. Do da, te nage dali, te gasa Israel ami dabe dali, te huli tomode digi hogodama, tama doado bage sisi yao. Tama be posobo si da, teda dage hogodama, piąo,” wali.
1SA 29:11 Tama tialima, kigamu mu Devit te aga ami bidi dabe dali te Filistia bulu tǫ pedaiba ma geasa pobadi yaide, tama te Filistia dabe te Jesril buluba palio.
1SA 30:1 Te Devit dali, aga ami bidi dabe dali, te sela sogo solama, tama augwali te augwa taunba sabolali, te Siklak taun, tama augwaligo te Siklak taun dolai sualio. Devit te Filistia ami dabe dali bidali sogo te Amalek dabe aselama, te saut badu bidali Juda we bidi dali hwįagasali. Tama augwaligo te Siklak dabe dali hwįnama, tama augwali aiyaba elaluama, tama te taun siyu, te taun siago ulali.
1SA 30:2 Tama te Amalek dabego te Siklak taunde bidali we wai tigidali sali. Augwaligo te deli me te me elibeo, menio. Augwaligo te tigidali selama, te augwa dali pali.
1SA 30:3 Nosali Devit te aga ami dabe dali augwali te Siklak taunba sabolama, tama augwaligo te taun siago dai sualio. Tama augwa te tama koneani, te Amalek dabego te Devitgo we wai me, te aga ami dabego we wai me selama, tama tigidali augwali dali selama pai yalio.
1SA 30:4 Tialima, Devit dali, te aga ami bidi dabe dali, augwali te dwai gela mu ola pidubadi, te augwa bomo siligi pabo si teba usu nani.
1SA 30:5 Tama te Amalek dabego te Devitgo we si me sela pali, te Ahinoam me Abigel, tama augwali si te augwali dali pai sualio.
1SA 30:6 Te Devitgo bidi dabego homugo te boi bidi dabego te augwaligo we me wai sela pali homu elama, tama augwa haliga sęgę elama, tama Devitba wado po wali. Tama tialima, augwaligo agaba te masigi sąnama, tama aga ela muaibao wali. Tama Devit aga genuai sęgę mu elaluali. Tama Devitgo gedu haluasa po, te aga Genuai Bidiba wali, tama Godigo aga homu kolesaga dąų walalio.
1SA 30:7 Tama tialima, Devitgo te pris Abiatarbolo wali, te Ahimelekgo ogwa da. Agai te tama po wai, “Te pris ugwa seselama, tama dago te Godigo homu sulama koneaibao.” Tialima, Abiatargo te Devitba sesalio.
1SA 30:8 Tama Devitgo Genuai Bidiba hanalu wali, “Te bidi dabe augwali te eno pobeasa pabo usu yaibawe? Tama ena pobaso da, teda eno augwali suabo usu yaibawe?” Tama Genuai Bidigo agabolo te po wali, “Nago augwali pobeasa pao. Te nage augwali paboba sabolama, tama augwali elama, tama te dagego we me wai dabe augwali ma dobola saibao,” te po wali.
1SA 30:9 Tama tialima, Devit dali, te aga 600 bidi dabe dali, augwa hogodama peyu, te Amalek dabe pobeasa pali. Augwali pali, te wę Besorba sabolama, tama bidi meba te ma pabo usu meni yani. Te tama 200 bidi usu nama, te węde bidali, magi baso meni, te augwali tigi te hagela eyu, tama augwa te wę nogelama pabo usu ebeo. Tama tibaso, Devit dali te 400 bidi naga augwali te Amalek dabe pali wali pai.
1SA 30:11 Te Devitgo ami bidi dabe augwali pelama, tama te Isip bidi me deli te ogwa bidi sulama, tama augwaligo aga te Devitba odasa asali. Tama augwaligo aga te bret meba me, wę me menama,
1SA 30:12 tama te ni fik du wai dwasianu me deli duani te augwa olali te me selama, tama te wain du wai duani si me augwa te wai ilali, te tama nai meba mawai. Aga te nai me wę tusiąbadi, te sela sogo mu nai sili bidai, tama aga te nai sigo mu selama, tama bomo meni yai. Tama tialima, aga te nai tula silibo si da, aga te bomo ma salio.
1SA 30:13 Tialima, Devitgo agaba hanalu wali, “Te nage tonalubo bidi de dawe? Nage mena bulu bidi dawe?” Tama aga te po wali, “Ena te Isip bidi da, tama ena te Amalek dabego sę bidi me deli dao. Ena te gasi sobaso, tama ena tonalubo bidigo ena ede bididubadi taga pali, tama enaduba ede te sela sogo bidai dao.
1SA 30:14 Da te saut te Juda tǫ pedai badu pelama, te Keret dabe dali hwįyu, te Juda dabe dali, me te Kalep dabe dali te hwįgi pelama, tama augwaligo doado bage sobadi yali. Tama da te Siklakba pelama, tama te taun siago ulubadi yali,” te po wali.
1SA 30:15 Tialima, Devitgo agaba hanalu wali, “Nago te Amalek dabeba ena odasa pobaso da, te usu yaiba, agawe?” Tama agai te po wali, “Eno usu yaibao. Tiali goli, nago te Godigo nogide te bomai po dąų waliyu, te nago ena munu me ela musiąyu, ma ena te tonalubo bidigo nogoba magobe po wao,” wali. Tialima, Devitgo te bomai po agaba dąų walali.
1SA 30:16 Tama te Isip bidigo Devit te Amalek dabeba sela pali. Te Amalek dabe te tǫ pedai badu digi bidalu, tama augwa te genuai nai daa tubo sę eyu bidali, magi baso meni, augwaligo te Filistia dabede me te Juda dabego tǫde me, te doado bage hauwa umabo mu sali.
1SA 30:17 Tialima, Devit te aga ami dabe dali te kigamu digi mu pelama, tonalugi pelama, tama augwali pelama, te wąbi hodolama hwįani. Tama augwaligo te Amalek dabe dali hwįdubadi, te pio mu igi palio. Tama augwaligo te Amalek dabe hauwa ela muani. Te 400 bidi naga te kamelba duagi pelama, tama augwa wi palio. Tiali goli, te Devitgo hanigo te gasa Amalek tigidali ela muanio.
1SA 30:18 Tama Devitgo te aga we si ma dobola siyu, te gasa tigidali we dabe me, te wai dabe me sobadi, te Amalek dabe sela soali doado bage tigidali me, te ma sai dao.
1SA 30:19 Te augwa doado bage deli te me hagabeo. Te aga ami dabego wai tigidali, te tigidali bidaluali. Tama augwa te tigidali ma dobola sai.
1SA 30:20 Tama augwaligo te Amalek dabego bulmakau me, sipsip me, tigidali sali. Tama te ami dabego te kibu dabe polasa sela soyu, tama augwa hae olama i weyu, te tiwai po wali, “Te e kibu dabe da, te Devitgo naga dao,” wai.
1SA 30:21 Augwali pelayu, tama te bomo meni ebaso, te Devit dali painu yali, te augwali te wę Besorde bidali te 200 bidi dabe tonalu bidibo madiba sabolali. Te bidi dabe asiyu, te Devit dali asali te we bidi dali deliba gesabidi sisinama, tama Devit te augwali pąba pelama, te augwaliba siade da po walio.
1SA 30:22 Tiali goli, te Devit dali pelawali te ami bidi mebago, te augwali bidi dwai, tama tiyu augwa te po wai, “Te bidi dabe augwali te da dali me pabeo. Tama tiyu, dago te boi hwįyu sali doado bage te augwali somainu me egobeo. Te augwa we wai naga selama, tama pomainu yaibao,” wali.
1SA 30:23 Tiali goli, Devitgo te po wai, “Ama dede dabeo, dagego te tobage tiwai po me wagimio, magi baso meni, Genuai Bidigo digi te doado bage dabolo mani. Agai da tonalu, tama da tau sobaso, te dago taun dolali bidi te dago augwali aiyaba elaluali dao.
1SA 30:24 Dego te dagego pode usu da po waibawe? Te po wabo bidi me deli te menio. Dago te doado bage bugagia te tigidali bidiba te deli tiwai si naga dobolama, sesa paibao. Te bidiyu, te doado bage tonalu bidali bidi dabego sabo doado bage deli te tiwai te hwįgi pali bidi dabego me saibao,” wai.
1SA 30:25 Tama Devitgo te kolesaga eyu, te Israel augwa bomai po me deli te pedalumainu yai. Tama tiyu, te Israel dabe augwa te bomai po sesemane sogo wali pai dao.
1SA 30:26 Devit te Siklak taunba ma begasa pelama, tama agai te hwįyu sali doado bage meba selama, tama aga abagi dabeba tolali, te Juda dabe polalubo tobolu bidi dabeba tolai. Tama agai augwaliba te tiwai po wali, “Te dage wiegi yai homu ilibo doado bage dao. Dago te Genuai Bidigo boi bidide te doado bage hauwa sali, tama dago me badu dage mobao.”
1SA 30:27 Devitgo te wiegi yai homu pemene ilibo doado bage te e tama taunde bidibo bidi dabeba tolali, Betel me tama te taun bulu Rama te Juda pedai te saut badu elaluali, tama te Jatir buluba me,
1SA 30:28 tama te Aroer me Sipmot buluba, me Estemoa buluba,
1SA 30:29 me Rakalba, me te Jeramel dabego taunba me, te taun bulu Kinba me,
1SA 30:30 Horma, me Borasan, me Atak,
1SA 30:31 me Hebron, te e tama bulu dabeba te doado bage tolali. Tama agai te doado bage meba te aga dali te aga ami bidi dabe augwali te polobadu bilali te bulu tigidaliba usu nama tolalio.
1SA 31:1 Te Filistia dabego te Israel dabe dali te Gilboa bulu dude hwįnama, tama te Israel bidi hauwa te hwįani madi isali. Tama te gasa Israel dabe te hwįani tagalama, wi pai.
1SA 31:2 Sol dali, te aga ogomani dali me, wi pali, tiali goli te Filistia dabego augwali pobeasa pelama, tama te Solgo ogwa sela ela muani, te Jonatan, me Abinadap, me Malkisua.
1SA 31:3 Te Sol pobeasa pali bidi dabego wąbi hwįani te bomo mu yai. Tama te Filistia dabe mebago te Solba ene sesemone enani, tama te ene sesemone mebago te Sol dolama, tama aga dolabo homu yali.
1SA 31:4 Tama aga te hwįbo doado bage sabilibo te gesi bidi i olama, tama agabolo te tiwai po wai, “Te nago bainat hwą selama, ena ela muao,” wali. “Te Godigo po odisiąwai Filistia dabego te enade dwai gagadi sę eyu, ena ela muidali weyu, te nago ena ela muao,” wali. Tiali goli, te gesi ogwa bidi aga wi dwai mu eyu, tama agai Sol te bainat hwągo me enebeo. Tama tialima, Sol aga bainat hwą aga digi tolasa te bainat poa pali daiba ugadu degasa dulama, tama te bainatgo aga tigide enama, tama aga isai dao.
1SA 31:5 Te gesi ogwa bidigo te Sol isali subo si da, teda aga digi aga bainat poaiba degasa dulama, tama aga te Sol dali isalio.
1SA 31:6 Tama tialima, te sogo naga te Sol dali, te aga ogwa sela badi, tama te gesi ogwa bidi me, tama te Sol tonaluali ami bidi dabe me, te tigidali isalio.
1SA 31:7 Tama te Jesril bulu pedai pesage odogode bidali Israel dabe, me te giliga degasa dulubo pedai badu te wę Jordan badu bidali bage, augwaligo po odali, te Israel ami dabe te Filistia ami dabede wi pali po wai. Tama me te tiwai po odali, Sol dali, te aga ogomani dabe dali isali po wai. Tialima, te augwa taun digi te tagalama, tama augwa wi pebelawali. Tama nosali te Filistia dabe aselama, te Israel dabe augwa te taun sagaselama, tama tede bidalio.
1SA 31:8 Te hwįani silibo si da, teda te nosali side te Filistia dabe pelama, te Israel isali bidi dabego hwįani doado bage te tigide elaluali te sigi peyu pali. Tama augwaligo te Sol tigi dali, me te aga ogomanigo tigi me, te Gilboa bulu dude munalubo suai.
1SA 31:9 Tialima, augwaligo te Solgo tobolu togolama, tama agai hwįbo doado bage elaluali me sai. Tama augwaligo te po sela pabo bidi dabe te Filistia bulu tǫ pedaiba tagala palama, te wiegi yai po te augwa tibo godiba, me te augwa bageba, te po sela pomainu yai dao.
1SA 31:10 Tama augwaligo te Solgo tigide muani te hwįbo doado bage te tibo god we Astartego te lotu beba muani. Tama augwaligo te Solgo tigi me, te aga ogomanigo tigi me, te Betsan taun buluba sela pelama, tama te taun bagulali masigi obode daganama enai.
1SA 31:11 Tama te Jabes taun te Gileat tǫde bidali Israel dabego te Filistia dabego te Solde yali sę po odai.
1SA 31:12 Tama tialima, te Jabes taun bulu bidi dabe te bomai bidi dabe te hulide pelama, tama te Betsan taunba sabolali. Tama augwali te taun bagulali masigi obo elaluboba pelama, tama te Solgo tigi me, te aga ogomanigo tigi dali selama, tama te Jabesba tolasa aselama, tama te tigi dabe siaba ulali.
1SA 31:13 Tama augwa te Solgo dili me te aga ogomanigo dili me sobadi elama, tama Jabes taun ni me deli dologode pubulali. Tama augwalide te augwa homu dene mu ebaso, tama nai osogo habu selalubadi, te Sadede deli, te a naga olama, me si, te tama sogo nai tusiąma bidai dao.
2SA 1:1 Devit te aga ami dabe dali, augwaligo te Amalek dabe dali wąbi hwįani. Augwaligo te Amalek dabe aiyaba elalubo si da, teda augwa te Siklak taunba ma geasa solama, tama si sogo bidali. Te sogo te king Sol isalio.
2SA 1:2 Tama te sela sogo wabode te gesi ogwa bidi me deli te Siklakba sabolali. Agai te aga ugwa pisilama, tama aga tobolude te tǫ piali, te aga homu dene ebo ola magasiyu tiai. Aga te Devitba pelama, tama kidu sugunama, tama gesabidi tǫba pogulama, Devitba homu dwagi yai ilali. Te bidi te Sol bidali pesage tagalama, asali.
2SA 1:3 Tama Devitgo agaba te tiwai hanalu wali, “Nage menadu asaliwe?” Tialima, te ogwa bidigo te po wai, “Te boi bidi dabego te Israel dabe dolobaso, tama ena te bidali pesage taga soyu, tama nageba wi asai dao,” wali.
2SA 1:4 Tama Devitgo agaba hanalu wali, “Eno homugo nago te hwįani sęde po enabolo pusumainu homu ebao,” wali. Tama te gesi bidigo te po wali, “Te Israel ami dabe te hwįbaso wi sobadi, tama te Filistia ami dabego te bidi dabe augwali hauwa ela muanio. Tama king Sol dali, te aga ogwa Jonatan me, te augwali si me isalio,” wali.
2SA 1:5 Tialima, Devitgo agabolo hanalu wali, “Mena tama tilama te Sol de Jonatan si isali, te nago koneaniwe?”
2SA 1:6 Tama te gesi ogwa bidigo te po wali, “Ena te Gilboa bulu dude bidiyu, tama eno suali, te Solgo aga sesemone te tǫba dodolama, tama aga digi te sesemone enede tialuainu dąų walubo sę eyu tonaluai. Tama me te boi bidi dabe te Sol pąba pabo sę iduali, te karisde dugawali ami dabe, me te hosde dugawali ami bidi dabe, augwaligo te tiwai yali.
2SA 1:7 Tama Sol begelama, tama ena sulama, te ena i wali. Tama eno te po wali, ‘Awe, genuai bidio,’ wali.
2SA 1:8 Tama agai enabolo te tama po hanalu wali, ‘Nage mena badu bidi dawe?’ Tama eno te po wai, ‘Ena te Amalek bidi me deli dao,’ walio.
2SA 1:9 Tialima, agai te tiwai po enabolo wai, ‘Te boi bidi dabego ena doliyu, dwai mu elama, tama pąde ena isainu ebao. Nage polo asu, tama ena silagasao,’ walio.
2SA 1:10 Eno agai po odobo si da, teda ena aga pąba pelama, tama aga ela muanio, magi baso meni, eno koneani, te aga nogogo tolaluali te sesemone ene tagalu da, te aga tǫba degasa dulubaso da, teda aga mu isaibao wai. Aga isibo si da, teda eno aga tobolude muani te kingo madi me sobadi, te nogode muani nogo mǫ me siyu elama, tama eno sesalio. Genuai bidi, te e doado bage eno nageba mawainu ebao,” te gesi bidigo te po wai.
2SA 1:11 Devitgo te po odama, tama aga haliga sęgę mu elama, tama aga ugwa pisa yali. Tama aga ami bidi dabego me te tobage deli kolesaga tiwai naga yalio.
2SA 1:12 Augwaligo te Sol, me Jonatan, me te gasa Israel dabede homu kone paliyu tiali, te augwali Genuai Bidigo hani bage da homu elama, tama augwa te augwalide homu dene ebo gela weyu, tama nai habu selalubadi, te giliga dega sigulali. Magi baso meni, te hwįani madigi te bidi hauwa isai.
2SA 1:13 Tama Devitgo te gesi ogwa bidiba te tiwai po hanalu wali, “Nage mena badu bulu bidi dawe?” Tama agai te po wai, “Ena te Amalek bidi deli da, tiali goli polobadu digi eno ayago te Amalek dabego bulu tagalama, Israel tǫ pedaiba gudasa soai dao,” wali.
2SA 1:14 Tialima, Devitgo agaba ma hanalu wali, “Magi baso yaliwe? Te Genuai Bidigo sa muyu nigilali bidi, te king elibo te nage wi dwasianu me isiąyu yali, agawe?”
2SA 1:15 Tama Devitgo aga ami bidi me deli i olama, asobo side, tama agabolo te tiwai po walali, “Te bidi ela muao,” wali. Tialima, te Devitgo ami bidigo te bidi te bainat hwągo togolama tama te bidi isalio.
2SA 1:16 Magi baso meni. Tama Devitgo te Amalek bidibolo tama te po hasia bolo walio, “Te naga digi yali sęgo, te nage isaibao. Naga digi nago te Genuai Bidigo sa muyu nigilali king ela muani po te hanilama pusali dao,” wali.
2SA 1:17 Devitgo te homu dene ebo balia po te Sol de aga ogwa Jonatan side wai dao.
2SA 1:18 Tama Devitgo te Juda we bidiba te balia po usu somainu ebo po wali. Te baliago nogi te Balia Enesigi poali. Tama augwa te Doloba Pai Bidi Dabego bukude asęani. Devitgo te balia po te tama tiwai wai dao.
2SA 1:19 “Te da Israelgo polaluali bidi dabe te bulu dude isalio. Te dago bomai ami bidi dabe te isali dao.
2SA 1:20 Dagego te tiali sę po munu me te Get taunde me, ma te Askelon taun sunumide me pusulamuo. Tiyu, te Filistia dabego we dabego odoyu, tama augwali wiegi yai homu pemene yabuo. Tiyu, te Genuai Bidigo po odisąbo bidigo wegi manigo te augwa bugai haliga mu yabuo.”
2SA 1:21 “Te dago bomai ami bidi dabe te Gilboa bulu dude isalio. Tama te hwįani sabele dabe te bulu du dabede olo munalubo. Tama te Solgo sabele me te olo munalu, tama augwaligo me mubeo. Tama tibaso, eno homugo te hulide tulubo tulubage segeni wę, me tulubage te bulu duba munu ma tulumainu me egobeo. Tama nai me te tǫde munu ma pedalumainu me egobeo.”
2SA 1:22 “Te Jonatango enesigi te nai dwai mu elaluali. Te munu me geda musiąwai. Tama te Solgo bainat hwą te olo me munalubeo. Menio. Te bainat hwągo te bomai ami bidi dabe eliyu, tama te boi bidi dabego kaneme tede pągąnaluai dao.
2SA 1:23 Te Israel aga hanigo bidigo te Sol de Jonatan si godolo homu mu eyu yai. Augwali si te wiegi yai bidi mu dao. Te sesemane sogo augwa si bugagia mu kisasa bilama, tama augwa si isali me te kisalubadi isalio. Augwali si te polo asesa mu udayu, te boi bidi dabe pobeasa pali, tama te ba kemodagego te hasa dabe ela tuainu pobebo te aiyaba mu elaluali. Tama augwali sigo bomogo te laiongo bomo aiyaba elaluai dao.”
2SA 1:24 “Dage te Israel we dabe, dagego te Solde homu dene ebo gela waiąo. Agai dageba te sawi yai mama ugwa te gasagi yai mu mani, tama te dage au yabo te tobage gol dabe mawai dao.”
2SA 1:25 “Te bomai ami bidi te hwįbode isalio. Tama Jonatan me isali, tama aga tigi te bulu dude munaluai dao.
2SA 1:26 Eno ama, Jonatan, nagede eno homu dene mu ebao. Eno nage godolo mu eyu, tama nago ena me godolo mu yai. Nago godolo ebo homu te bomo mu eyu, tama te wego bidi godolo ebo homu te aiyaba elalualio.
2SA 1:27 Te bomai ami bidi dabe te hwįani sogo isiyu, tama te hwįbo genuai bage te dolalio.” Devitgo te balia po wai.
2SA 2:1 Te Sol de Jonatan si isai madi, tama nosali Devitgo Genuai Bidiba te tama po hanalu wali, “Ena pelama, te Juda dabego taun me deliba duagi pelama bidibaso, usu yaibawe?” Tama Genuai Bidigo te po wali, “Nage pao.” Tialima, Devitgo agaba ma hanalu wali, “Te ena mena taunba duagi pelama bidigowe?” Tama Genuai Bidigo agaba te tiwai po wei ponani, “Nage pelama, te Hebron taunba bidigi pao,” wai.
2SA 2:2 Tama tialima, Devitgo aga we si, te Ahinoam te Jesril bulu we, me te Karmel bulu we Abigel badi selama, tama augwali pelama, te Hebronba bidigi pai. Polobadu u Abigel te Nabalgo we da, tiali goli Nabal isibaso, tama Devitgo aga sali.
2SA 2:3 Devitgo hani bidi te aga sibi dabe dali, augwali te Devit dali pelama, tama augwali te Hebronde bidiyu, tama te Hebron pąde elalubo bulude bidiyu yai.
2SA 2:4 Tialima, te Juda hani bidi dabe te Hebronba aselama, tama augwaligo te Devit toboluba wel gelama, te augwa king pedalumainu yalio. Devit te king pedalubo si da, teda agai te tiwai po odali, te Jabes taun bage, te Gilgal tǫ bidi dabego te Sol tigi pubulali po walio.
2SA 2:5 Tama tialima, te aga bidi meba tagala palama, te Jabes dabeba te tama po wagi pomainu yali, “Genuai Bidigo te dage wiegi yai bugagia ilimainao, magi baso meni, dagego wiegi yai homu ebo kolesaga te Solba ola mayu, te duga kingba tiali, tama dagego aga tigi pubulali dao.
2SA 2:6 Tama megi da, eno homugo te Genuai Bidigo dage bugagia tonalu, tama dage dali sesemane sogo bidimainao. Tama eno me te dageba wiegi yai kolesaga eyu, te dagego wiegi yai kolesaga te Solba yali te wei ponoyu, te tiwai ebo dao.
2SA 2:7 Mu tama Sol, te dagego king, isalio, tiali goli te Juda hanigo ena te augwa king pedalumainu yai. Tama tibaso, dage bomo elama dolalu, tama dage te magi nai me delide te wi me elamu dao,” wali.
2SA 2:8 Te Filistia dabego te Sol elali sogo, Apner, te Nergo ogwago, te Isboset oda sali, te Solgo ogwa da, tama augwa peyu, te wę Jordan nogelama, tama te taun Mahanaimba sabolai. Apner te Solgo amide te polaluali ofisa bidi dao.
2SA 2:9 Augwali te Mahanaimde bidalu, tama Apnergo te Isboset te Gileat tǫ, me Aser, me Jesril, me Efraim, me Benjamin, me te Israel tǫ tigidali tǫ gasa badu, te tama bulu bage bidigo king bidi pedalumainu nigilali.
2SA 2:10 Isbosetgo kibu be bidi sese si, te 40 bidai elalubadi, tama augwaligo aga te king nigilali. Tama aga te king bidali te kibu be si naga bidai. Tiali goli, te Juda hani dabego te Devit wali pelama,
2SA 2:11 tama aga te augwa king nigilama bidali. Tama aga te Hebron taunde bidali kibu be te 7, te polua a naga, me badu nogo kibisa deli, te tama sogo bidalio.
2SA 2:12 Apner dali te Isbosetgo ami dabe hogodama, augwa te Mahanaim taun taga soyu, tama te Gibeon taunba sabolali.
2SA 2:13 Tialima, Joap te Devitgo ami bidi dabe dali asiyu, augwali te Gibeon sigi ąį pąba te augwali deliba gesabidi sisinanio. Te Isbosetgo hani te sigi wę sesege e badu bidalu, te Devitgo hani dabe te ąį sesege u badu bidalu yali. Te Joap aga ida te Seruia dao.
2SA 2:14 Tialima, Apnergo te tiwai po te Joapba hanalu wali, “Te da hwįbo usu si yaibawe? Nago te naga gesi ogwa bidi ami meba tagala palu, tama eno ami bidi meba te tagala palu elama, te augwali dali hwįbo usu somainu inao,” wali. Tama Joapgo te po wali, “Te usu da, dago tama tibo dao.”
2SA 2:15 Tialima, te Benjamin hanigo te nogo si olama, sągągo si bidi, te Isbosetgo ami bidi dabe, augwali aselama, te Devitgo ami bidi nogo si olama, sągągo si bidi dabe dali te hwįbo ususu si yagasalio. Tama te Devitgo ami bidi deli deligo te Isbosetgo ami bidi deli deli dali tedali hwį hwį palio.
2SA 2:16 Tama augwali te hwįbo ususu si yali sogo, te deli deli bidigo aga boi bidi te tobolu tola sesa pelama, tama aga boi bidi te tigi me badu te bainat hwągo enani. Tama te bidi sese deli olama, me si me si, te 24 bidi tigidali degasa dulu, tama isalio. Te bidi dabego te tiali pesage bulu nogi poyu, “Te Bainat Dabego Pesage Dao,” wai.
2SA 2:17 Tama te sogo te genuai wąbi te hani si tomode hodolama, hwįanio. Tama Devitgo hanigo te Apnergo hani, me te Israel hani dabe aiyaba elaluai dao.
2SA 2:18 Te Devit aga abe Seruiago ogwa sela, te Joap, me Abisai, me Asahel, augwali me te hwįbode bidali. Asahelgo udabo te bulu uni hasago bomo elama, mu udabo te tiwai yai dao.
2SA 2:19 Tama tialima, te Israel dabe wi tedela pabo side, tama Asahel hogodama, tama te Apner dolo udulama, tama aga pobeasa pali.
2SA 2:20 Tialima, Apnergo begelama, ma tonobadi, tama te Asahelgo aga pobeasa asobo sę ebo subaso, tama agaba hanalu wali, “Asahel, te nage tama da, agawe?” Tama Asahelgo te po wai, “Awe, ena tama dao.”
2SA 2:21 Tialima, Apnergo te po wali, “Nago ena me pobeasa aselamuo. Nago te gesi ogwa bidi me deli pobeasa pelama, tama aga pageabi elama, tama agai doado bage dabe sao.” Tiali goli, Asahelgo te Apnergo po me odobeo. Menio. Agai te Apner pobeasa pabo sę idubadi geani.
2SA 2:22 Tialima, Apnergo agabolo ma wali, “Ena sula tagalao. Nago homugo te eno nage ela mumainu eba, agawe? Tiali goli, te eno nage ela mubaso da, teda ena te nago ama Joap gedude te dwai hale mu yaibao,” wali.
2SA 2:23 Tiali goli, Asahelgo aga sula me tagalubeo. Tama tialima, Apnergo sesemone ene te tudiba pogolali digi, tama te ene page poa pali tego te Asahel haligade dolama, tama me badu pedelalio. Tama Asahel degasa dulama, tama isalio. Tama te gasa ami bidi dabe te Asahel tigi munalubo pesageba pedelali sogo, te augwali doligi pelama naga tononaluali.
2SA 2:24 Tiali goli Joap de Abisai sigo Apner pobeasa pali, tama te be pio ebode mu augwali si te bulu du Ama te giliga pedalubo badu te Gia bulu te Gibeonde pabo tǫ wa pai sunumi elalubo te badu pedaiba sabolalio.
2SA 2:25 Tama augwali sigo suali, te Benjamin hani bidi dabe dali, Apner dali, te dwasianu bulu du bagede deliba ma muna selama, tama hwįainu elaluai.
2SA 2:26 Te Apnergo augwali si subo si da, agai aba Joapba te tiwai i wali, “Magi yaliwe? Te hwįani siligobe da, agawe? Te kolesagago te daba genuai sęgę maiabo, te nago konesiąyu eba, agawe? Da te deli kaneme dao. Mena sogo te nago te naga bidi dabeba waliyu, te augwaligo da munu me pobeasa pelamuo po waibawe?” wali.
2SA 2:27 Joapgo te tama wabo po odama, tama agai te tama po wei ponani, “Te Sesemane Sogo Bidada Pabo Godigo nogide, eno mu po nagebolo obao. Nago te tama po me wagi menigi sogo da, te eno hani bidi dabego dage pobeasa pidubadi te do kigamu be posoboba usu nigi pigi dao,” wali.
2SA 2:28 Joapgo te po ola siminama, tama agai te biugel bu wali, te aga ami bidi dabego te Israel dabe ma pobeasa pidali weyu, paliali. Tama tibaso, te wąbi hwįani silalio.
2SA 2:29 Apner te aga ami bidi hani dali augwa te bulu tagalama, tama te Jordan odogo malu buluba pali. Tama te hulide augwali te odogo buludu pelama, tama te wę Jordan nogealio. Tama augwali pelama, tama te giliga tomo yagasobadi, te belode augwali te taun Mahanaimba sabolali.
2SA 2:30 Te Apner aga ami bidi dabe dali pai madi, teda Joapgo aga ami bidi hani dabe sisinama nedali. Tama agai nedalama koneani, te aga ami bidi dabe te 19 bidi isai yalio. Tama Asahel me isai.
2SA 2:31 Tiali goli, te Devitgo hanigo te Benjamingo hani bidi dabe te 360 bidi elai, te Apnergo hani dabe dao.
2SA 2:32 Tialima, Joap te aga bidi dabe dali augwa te Asahel tigi sela pelama, te Betlehemba pubaligi pali, te aga ayago gų pageba. Augwaligo aga pubulama da, teda augwali hulide pelama, tama augwali te Hebronba be posobadi sabolalio.
2SA 3:1 Te tudi badu nosali side, te Devitgo hanide Solgo hani si tomode te wąbi hwįani sesabi mu elaluali. Tama Devitgo hani te bomo yai mu pedelama, tama augwaligo te Solgo hanigo bomo tamonobo sę mu yalio.
2SA 3:2 Te Devit te Hebronde bidali sogo, agai te ogwa a naga olama, me badu kibisa nogo deli tede ame nani. Augwa nogi dabe te tiwai, te gomunai ogwa aga te Amnon. Te Amnongo ida te Ahinoam, te Jesril bulu we dao.
2SA 3:3 Te tomo ogwa te Kileap. Te Kileapgo ida te Abigel, te Karmel bulu we. Polobadu Abigel te Nabalgo we da, tiali goli te Nabal isibaso, tama Devitgo aga sali. Te sela wali ogwa te Apsalom. Te Apsalomgo ida te Maka, te king Talmai te Gesur bulu bidigo wegi dao.
2SA 3:4 Te me si me si wabo ogwa te Adoniya. Te Adoniyago ida te Hagit. Te a naga wali ogwa te Sefatia. Te Sefatiago ida te Abital. Te nogo kibisa ogwa te Itream dao.
2SA 3:5 Te Itreamgo ida te Ekla. Te tigidali ogomani te Hebronde bidiyu, ame nai dao.
2SA 3:6 Te Solgo hani, me te Devitgo hani si tomode hwįbo sę yali sogo, Apner te Solgo hanide genuai bidi pedalubo sę yalio.
2SA 3:7 Tialima, me sogode Isbosetgo te Apnerbolo te tiwai po kisilama wali, “Nago te eno aya Solgo we me deli dali pagela pialio. Te we aga te Rispa, te Aiago wegi da. Te nago magi baso yaliwe?”
2SA 3:8 Apnergo te po odama, tama haliga sębę dwai mu elama, tama te po wali, “Nago homugo ena te naga yowi da weyu, wali da, agawe? Tama nago homugo eno te Juda dabe tau sabo sę eba homu eyu wabo, agawe? Menio. Kone palao. Te nago aya, Sol, te king pedelali sogo dąį elama, te megi e sogoba usu niyu, te ena aga wali bilali, tama te aga ama dabe me, abagi dali me, te megi tama me wali bilibao. Tama me, te eno nage te Devitgo selama dolomainu ilibeo. Tiali goli, megi nago te we me deli po enaba kisilibao. Te olo nai naga tiwai dao.
2SA 3:9 Genuai Bidigo te bomai po te Devitba dąų waliyu, agai te Solgo hani dabe sela sąnama tama augwali te Israel king bidilamu da po wai. Tama Genuai Bidigo te po weyu, te agai Devit te Israel me Juda daligo king pedelama, tama Devitgo te tǫ pedai bulu tigidali tonaluaibao, wai. Te Godigo bomai po dąų wali gilama, eno te Devit king pedalumainu tau sisąwani da, teda Godigo ena ela mumainao,” te po wali.
2SA 3:11 Tialima, Isboset te Apnerde wi mu ebaso, tama agai po deli me wabeo.
2SA 3:12 Tialima, Apnergo Devitba po ola toliyu, te tama po wai, “Dego mu te bulu tǫ pedai tonalueibawe? Eno homugo te nago bomai po me deli ena dali dąų walubaso da, teda eno nage tau siyu, tama te tigidali Israel hani we bidi te nago hani we bidi naga pedelaibao,” te po ola tolali.
2SA 3:13 Tialima, Devitgo Apnerba te tiwai po ola tolali, “Te nago po wiegi yai dao. Tiali goli, eno homugo te nago sę me deli bolo hasia ebaso da, tama eno te tobage bomai po nage dali dąų waibao. Te sę te tama tiwai. Nago te Mikal, te Solgo wegi, selama, tama aga te enaba ma odasa asao. Te nago tama tisąbaso da, teda nage eno me sugobeo,” wali.
2SA 3:14 Tama nosali Devitgo te Isbosetba po ola toliyu, tama po wai, “Eno homugo te nago eno we, Mikal, te enaba ma tagala palao. Eno aga te Filistia dabe te bidi sese a naga 100 bidigo gasa tigi waligo abelali. Tama aga te eno we mu tama dao,” wali.
2SA 3:15 Isbosetgo te po odolama, tama agai te bidi meba te aga bidi Paltielba tagala palama, tama te Mikal sigi pali, te bidi Laisgo ogwa dao.
2SA 3:16 Tiali goli, te Mikal augwaligo te Devitba ma odasa soabo sogo, Paltiel te Mikal wali peyu, gela wabo sę ela pali. Tialima, augwali te taun Bahunimba sabalubo si, tama Apnergo te Paltielbolo walali, “Nage te naga buluba ma geasa pao,” wai. Tialima, Paltielgo te po odama, tama aga ma geasa palio.
2SA 3:17 Te augwali Devitba pisąbadi, Apner te Israel polalubo hetman dabeba pelama, tama augwaliba te tiwai po wai, “Odao,” wali. “Hauwa sogo weyu, dagego te Devit duga king pedalumainu homu godolo ebo homu yai dao.
2SA 3:18 Tialima, megi da, te aga king pedalumainu ebo sogo dao. Dagego te Genuai Bidigo wali po homu kone palao. Agai te tama po wai, ‘Devit te eno sę bidi, tama te eno agabolo te eno we bidi, Israel dabe, te Filistia dabego nogode me, te gasa boi bidi dabe nogode dali, te ma dobola sabo sę mawaiba,’ po wai dao,” Apnergo augwalibolo te po wali.
2SA 3:19 Tama Apnergo te Benjamingo hani dabe dali me po miani. Tama nosali aga te Hebronba pelama, te Devitba te Benjamingo hani dabego me te Israel dabego yainogo yali sę po te Devitbolo wagi pali.
2SA 3:20 Tialima, Apnergo te we Mikal selama, tama aga bidi dabe te bidi sese deli bidi dali pelama, te Devit bidibo bulu Hebronba sabolali, tama Devitgo genuai naa te augwaliba ula mani.
2SA 3:21 Tama nosali Apnergo Devitbolo te tama po wai, “Te ena pelama, tama te Israel tigidali odasa aselama, tama augwali te nage dologode bidabo bomai po dąų walumainu yaibao. Tama nage te tigidali bulu tǫ pedai king bidi pedalu, te nago godolo ebo sę tiwai yagameo,” wali. Tama Devitgo te aga hani dabeba hanilibo po wali, te augwaligo Apnerbolo te dwai sę me elamu da po wai. Tama nosali agai te Apner tagala palama, tama Apner bugagia ma soalio.
2SA 3:22 Apner te Hebronde osogo bidali sogo, te Joap dali, te Devitgo ami bidi dabe dali, augwali te sogo tede bidisąwai. Augwali te boi bidi dabeba hwįgi pai. Tama dwasianu bidama gana, nosali Devitgo te Apner tagala palama pai madi, te Joapgo hanigo te hwįbode sali hauwa doado dali augwali te Hebronba sabolali.
2SA 3:23 Tama Joapgo te tama po odali, te Apner, te bidi Nergo ogwa, aga te king Devit suagasali po wai. Tama Devitgo te bidi dabeba habu seliyu, augwaligo te Apner me elamu da po olama, tama Devitgo aga tagala palai.
2SA 3:24 Tama tialima, Joap pelama, te king sugi pelama, tama agabolo te tiwai po wali, “Augwaligo te tama po walio, Apnergo nage suagasu aselama, tama nago aga olo mu pomainu tagala palali po walio. Magi baso nago tama tialiwe? Nago te kolesaga yali te dolo ebeo.
2SA 3:25 Te nago Apnergo kolesaga konesiąyu, te tama tiali da, agawe? Aga asali, te agai tibo po naga nageba ola magasali, te nage tau sagasu me ebeo. Menio. Aga asali, te nage pabo bulu tigidali te menaba pabo me, te nago sę ebo tigidali me, te bugagia sula sainu naga yali, te nageba ma aselama, hwįagasainu yali dao,” wai.
2SA 3:26 Joapgo te po ola silama da, teda aga te Devit tagalama, palio. Tama agai bidi meba tagala palama, te Apner pali wali pobeasa peyu, te agaba hanalu omainu elama, te ma geasa asomainu yai. Tama te bidi dabe te Apner pidubadi, te ulu wę nogi te Sira teba sabolama, tama augwaligo aga ma odasa asai. Tiali goli, Devitgo te Joapgo yali sę te agai me konebeo.
2SA 3:27 Te Apner aselama, te Hebronba sabolali sogo, Joapgo aga sela pelama, te taun genuai sunumi elalubo pąba doligi pelama, tama aga dali te geme po miainu ebo tiwai gilama yai. Tiali goli, augwali si te sunumide dolaluali sogo, Joapgo te aga pęwadage hwą ge selama, tama Apner te haligade enani, tama Apner isalio. Joapgo Apner elali, te Asahel isali te wei ponani, te Joapgo ama dao.
2SA 3:28 Nosali augwaligo te sę yali po te Devitba wabo si, tama agai te po wali, “Genuai Bidigo koneani, te eno yali sęde te Apner me isibeo. Tama eno we bidi tigidaligo me, te sęde augwali magi sę me egobeo. Menio. Te Joap agaduba deligo yali sę naga dao.
2SA 3:29 Tama Genuai Bidigo agade me te we wai sibi tigidalide homu kone palama yaibao, tama aga wąį te nosali pedalubode me, tama Genuai Bidigo te augwaliba dene mawaibao. Eno homugo te Joapgo hani bidi sibi deli delide te tobage gasi nogi gonoria me, oiyabe gasi me, ma augwali te we dabego sę naga emainu me, ma te boi bidi dabego augwali te hwįbo side ela mumainu homu ebo me, ma augwali te sesemane sogo nai nasi eyu, te nai sǫą pomainu homu ebao,” Devitgo te po wai.
2SA 3:30 Apnergo te Asahel elali, te Joap de Abisai sigo ama, te polobadu te Gibeonde hwįani digi da. Tama tibaso, augwali sigo te augwa si ama isali te wei ponoyu, tama augwali sigo te Apner ela muani.
2SA 3:31 Devitgo te Joapbolo me te Joap aga hani dabebolo te tiwai po wali, “Dagego te duga ugwa dabe pisilama, tama homu dene ebo ugwa gudao,” wai. “Tama te pubulabo madiba peyu, dage aga tigi polasa biliyu, dagego Apnerde te homu dene ebo gela wao.” Te Apnergo hani bage augwaligo Apner te Hebronde pubulali. Tama augwaligo te Apnergo tigi tolama, te gų pageba pubaligi pabo sogo, king Devit te augwali pabo wali pai. Tama Devit dali, te we bidi tigidali te gų page pąde dolalu, tama tigidaligo gela bomo elama mu walio.
2SA 3:33 Tama Devitgo Apnerde homu dene ebo balia te tama wali, “Apner te esela me pisąwai bidi. Magi baso aga te tiwai isali dawe?
2SA 3:34 Augwaligo te aga nogo sągą me dubeo. Augwaligo aga tibo po weyu, usu selama, te aga elali, te nai wi sabo bidi raskol dabego ebo tiwai yalio.” Devitgo te balia po ola silama, tama tigidali we bidi dabego te Apnerde gela ma wai.
2SA 3:35 Te silibo si nosali, te we bidi dabego Devitbolo weyu, te aga nai tuao wali. Tiali goli, aga hagela homu elama, tama aga bomai po dąų weyu, te tama po wai, “Ena te nai munu me tusiąbadi, te giliga dega sigulaibao. Tiali goli, eno homugo te giliga dega sigi pisąbadi, te eno nai tubaso da, teda Godigo ena ela mumainao,” Devitgo te po wali.
2SA 3:36 Te we bidi dabego kingo te po wabo odobo si da, augwali haliga te wiegi yai pemene mu yali. Tiali goli, te sę deligo naga augwali wiegi yai homu pemene me ilibeo. Menio. Augwa te kingo ebo kolesaga tigidalide te wiegi yai homu pemene yai dao.
2SA 3:37 Tama te Devitgo we bidigo me, te Israel we bidigo me, te sę dabe te king Devitgo te sogode ebo sulama, tama augwa te tama koneani, te kingo te Nergo ogwa Apner ela muani bidi dali te deli homu me ebe homu yali.
2SA 3:38 Tama kingo te aga ofisa dabebolo te tiwai po wali, “Odiąo. Te e sogode da Israelgo bomai bidi mu me deli te isali dao.
2SA 3:39 Te mu tama, Godigo ena sa munama, tama ena te king pedelali. Tiali goli, eno digi eno te Seruiago ogwa sigo yali dwai kolesaga wei ponabo bomo menio. Augwali si te bomo elalubao. God Genuai Bidigo digi te augwaliba dene mayu, te augwa yali dwai kolesaga usu niyu tiaibao,” king Devitgo te po wali.
2SA 4:1 Te Solgo ogwa Isbosetgo te tama po odali, augwaligo te Apner te Hebronde ela muani po odali, aga te wi dwai mu elama, tama te tigidali Israel dabe dwai noma mu sai.
2SA 4:2 Te Isbosetgo ofisa bidi sigo te boi bidi dabe dali hwįgi pabode tonalubo bidi si bidali. Augwa si nogi Bana me Rekap, tama augwali si te Rimongo ogwa si. Rimon te Berot taun bidi me deli da. Te bidi si te Benjamingo hani, magi baso meni, te bidi dabe augwa te Berot taun te Benjamin hanigo taun me deli tiwai nigilai.
2SA 4:3 Te Berot taun bulu bidi hani bage mu te wi pelama, tama megi da augwali te bulu Gitaimde bidiba, te augwa page bulu me menio wai.
2SA 4:4 Jonatan, te Solgo ogwago, te ogwa me deli elaluali, aga nogi te Mefiboset. Te Sol me Jonatan isali sogo, te Jesril dabego te Jonatango hani sibiba po ola tolali. Te sogo te Mefibosetgo kibu be a naga elaluali. Augwa te po odobo si da, teda te Mefiboset tonaluali wego te Mefiboset ąųwą selama, wi pali. Tiali goli, aga asesa polo mu udawali digi, tama Mefiboset tulaluama, tama dolama, te sągą dwai pedelali.
2SA 4:5 Me sogo deli sogode, te ama nami si te Rekap me Bana te Isbosetgo beba pelama, te augwali si giliga tomo yagasobode te agai beba sabolali. Te sogode te Isboset te toma neyu, te aga be habu badu pila mudai.
2SA 4:6 Tama augwali si te wit sainu ebo tiwai gilama eyu, te be tomoba pali. Tiali goli, augwali si te Isbosetgo be habu tomoba pelama, tama aga te bet saide pila mubo suai. Tama augwali sigo aga haligade te hwą gego enama, tama aga ela muani. Tialima, augwali sigo aga mage togolama, tama aga tobolu te augwali si susiąwani bidi dabeba sela pali. Augwali si te hulide te Jordan wę odogo maludu pelama, tama te do da
2SA 4:8 augwali te Hebronba sabolali. Tama augwali sigo te Isboset tobolu sela peyu, te king Devitba tama agabolo waseligi pai. Tama augwali sigo te tama po kingbolo wali, “King o, suao! Te e da Isbosetgo tobolu da, te naga boi bidi, Solgo ogwa da. Polobadu te Solgo nage elainu usu sesa bilali, tama tialima, te Genuai Bidigo nage tau siyu, te Sol dali, te aga hani ogomani dabe daligo te dwai sę yali kolesaga wei ponani da,” te po wai.
2SA 4:9 Tiali goli, Devitgo augwali siba te tiwai po wei ponani, “Te Sesemane Sogo Bidibo Genuai Bidigo aga ena te dolabo te tobage sę dabe ma dobola sali. Tama aga nogide, eno dagebolo te tiwai mu po obao.
2SA 4:10 Te ena Siklakde bidali sogo, te bidi me deli ena bidiboba sabolama, tama te Sol isali po wagasali. Tama agai homugo te eno agai pode wiegi yai homu pemene yaibao homu yali. Tiali goli, menio. Eno te ami bidi dabebolo olama, te augwaligo te bidi aga pageabi elama, tama aga ela muani. Te tiwai yali te agai te po sela asalide te agabolo te eno mone mabo te tiwai yai dao.
2SA 4:11 Tama megi dage sigo te bidi me deli te aga bede pila munubadi, te odolali mu ela muanio. Dage si te dwai bidi si mu. Tama dage sigo homugo te dage si eno gogolama, bidaiba homu eyu, yali da, agawe? Mu menio. Te eno dage sigo dwai kolesaga yali sę wei ponoyu, tama eno dage sigo bidabo ula me mu sia somainu yaibao,” Devitgo te po wali.
2SA 4:12 Tialima, Devitgo te aga ami bidi dabeba te usu da po weyu, te Rekap de Bana si ela muao po wai. Tama te ami bidi dabego augwali si ela munama, te togolama, peselama, tama augwa nogo sągą gugudama, tama augwa tigi te Hebron pąde elaluali sigi ąį pąde walali. Tiali goli, te ami bidi dabego te Isbosetgo tobolu selama, tama te Apner pubulali gų page te Hebron bulude pubulai dao.
2SA 5:1 Te sę dabe elama nosali badu, te tigidali Israel hanigo te Devit Hebronba suagasali. Tama augwa te tama po Devitba wai, “Da tigidali te deli kaneme dao.
2SA 5:2 Polobadu, Sol te king bidali sogo, tialima naga digi te da Israel ami bidi dabe tonalu, tama augwali te hwįbo madiba odasa peyu yai. Tama Genuai Bidigo nageba weyu, te aga we bidi dabe da tonalubo bidi nage pedelama, tama nage dago king pedelaiba po wai dao,” augwaligo te po wai.
2SA 5:3 Tama nosali, te tigidali Israel polalubo tobolu bidi dabe aselama, te king Devit bidibo madi te Hebronba sisinagasali. Tama agai te God gedude te bomai po me deli augwali dali dąų wali. Tama augwaligo aga toboluba te wel gelama, te aga Israel king pedalumainu sa muyu nigilali.
2SA 5:4 Devitgo kibu be te bidi sese deli olama, nogo si, te 30 kibu be elalubadi, tama aga te king pedelali. Tama aga te king sęde bidibadi, te kibu be bidi sese si, te 40 kibu be bidai dao.
2SA 5:5 Devit te Hebronde king bidibadi, te kibu be 7 olama, te polua nogo a naga olama, me deli tede bidali. Tama aga te Jerusalemde king bidali kibu be te 33 kibu be tama te Israel me Juda dabe dali tonalubo king bidi bidai dao.
2SA 5:6 Me sogo deli sogo king Devit te aga ami bidi dali te Jerusalem taun sainu hwįgi pali. Jerusalem te Jebus dabego augwa page bulu da. Te Jebus dabego homugo Devitgo te augwaligo taun sabo usu egobe da homu yai, tama tiyu, augwa te tiwai posobo po Devitba wali, “Dage te dago taun tomoba asainu ebaso, te usu me egobeo. Te gedu widai bidigo me, te sągą dwai bidi dabego, te augwaligo dage asabo sunumi panibaso, te usu yaibao,” wali.
2SA 5:7 Tiali goli, augwaligo po te geda muani, magi baso meni, Devit dali, te aga ami bidi dabe dali, hwįgi pelama, tama te bomai masigigo bagulai obo elaluali taun salio. Te taun nogi Saion, te Jerusalem bulu me badu pedai dao. Tiali goli, nosali te we bidi dabego te tiwai nogi polali, Devitgo Taun da wali.
2SA 5:8 Tama Devitgo te taun me sisąbadi, hasia bolo agai te aga ami bidi dabebolo te tiwai po wai, “Dago te taun sainogo da, teda da te Jebus dabe augwa hanu tomoba asobo wę dedage nigalidu geme paibao,” wai. “Tama dago te dedage wali pidu genama, tama da te taun tomoba sabolaibao. Tama dago te u gedu widai bidi dabe dali, me te sągą dwai bidi dabe dali hwįaibao. Eno te tobage bidi wei eyu, godolo me ebeo,” wali. Megi da, Devitgo te wali po homude kone elaluama, tama augwa te tiwai po weyu yai, “Te gedu widai bidi me sągą dwai bidi dabe te genuai bidi kingo be tomoba munu me pelamu da,” po wabo dao.
2SA 5:9 Tama nosali, Devit te Saionba bidigi pelama, tama te taunba te tiwai nogi mawai, Te Devitgo Taun da wali. Tama Devitgo te po wali, tama te sę bidi dabego te taun bagulama, be dabe sę yao po wai. Augwaligo te be dabe sę ebo gagalu, te tǫgo pągąnani bulu me deli odogode te be dabe sę yani.
2SA 5:10 God, te Tigidali Bomo Elalubo Genuai Bidi, te Devit dali bidali, tama tibaso Devit te bomai king sesemane sogo pedalubo sę iduai dao.
2SA 5:11 Te king Hiram te Tair taun bidigo te polalubo bidi meba te Devitba tagala palali. Tama agai te wiegi yai ni bǫ tigi dabe me, te be sę ebo kamda bidi me, te masigide sę ebo koneai bidi dabe augwali tagala palama, te king Devitgo genuai be sę emainu yai.
2SA 5:12 Devitgo te nai dabe te doado bage te agaba sabalubo te tiwai aga sulama, tama koneani, te Genuai Bidigo aga te king mu pedalumainu yai. Tama agai te tama koneani, te Genuai Bidigo te aga we bidi tau sabo homu yali homu yai, tama tiyu, Genuai Bidigo te Israel bulu tǫ pedai te bugagia mu pedalumainu ilibo sę yai dao.
2SA 5:13 Te Devit Hebronde bidali tagalama, te Jerusalemba aselama, bidagasali sogo, agai te we meba ma siyu, tama agai te we hani si meba ma sai. Tama aga te we dabego te ogomani me wegi mani meba te Jerusalemde bidu ame nani.
2SA 5:14 Te ogwa dabego nogi te e tiwai elaluali, Samua, me Sobap, me Natan, me Solomon,
2SA 5:15 me Iphar, me Elisua, me Nefek, me Jafia,
2SA 5:16 me Elisama, me Eliada, me Elifelet. Te Devitgo ogwa dabego nogi dao.
2SA 5:17 Te Filistia dabego te tama po odoyu, te Israel dabego te Devit te augwa king bidi nigilali po odobaso, tama te Filistia dabe hogodama, te hwįgi pelama, aga sainu yai. Tiali goli, Devitgo augwaligo te sę yabo koneama, te geme duala sigi pabo bomai pesageba dulama, tede bididuai.
2SA 5:18 Tama te Filistia dabe aselama, augwali te bulu pesage Refaim odogoba sabolama, tama augwali tede bidaluai.
2SA 5:19 Tialima, Devitgo Genuai Bidiba te tama po hanalu wali, “Nago homugo eno te Filistia dabeba hwįgi pomainu homu ebawe? Tama ena pobaso da, teda nago ena tau siyu, te augwali aiyaba elalumainu yaibawe?” Tama Genuai Bidigo te tama po agaba wei ponani, “Awe, nage pao. Te augwali nage nogoba eno munama, tama te nago augwali aiyaba mu elalueibao,” wali.
2SA 5:20 Tialima, Devitgo te Filistia dabe augwaliba hwįgi pelama, tama augwali aiyaba elaluai. Tama agai te tama po wai, “Genuai Bidi te wę bomo asobo tiwai elama, tama eno boi bidi hani dabe pedelama togolali.” Tama tiyu, augwaligo te bulu nogi te tiwai nogi yali, Te Genuai Bidigo Te Hani Togolai Dao.
2SA 5:21 Te Filistia dabe wi peyu, te augwa tibo god dabe taga pali. Tama Devit dali te aga ami bidi dabego te doado bage selasa palio.
2SA 5:22 Tiali goli, nosali te Filistia dabe ma geasa aselama, te Refaim bulu odogode bidali.
2SA 5:23 Tama Devitgo Genuai Bidiba hanalu, te po wali, “Te eno magi yagawe?” Tama Genuai Bidigo te po wei ponoyu, te tiwai po wai, “Dagego augwaliba hwįgi pao, tiali goli dage augwali bidibo dolo si me pelamuo. Dage te augwali tudi badu pelama, tama te ni balsam sili dolalubo pesage badu pelama, te hwįabo sisi elaluiąo,” wali.
2SA 5:24 “Tama dagego te ni dabe ugwadu daide te hauwa bidi bilibo kilikili wabo tiwai odaibao. Tialima, dagego koneama, ena digi ena te dage Filistia dabe dali hwįgi pabodu te ena polasa paibao. Dagego te tiwai sę ebo po odobo si da, teda dage udayu, te augwaliba hwįgi piąo,” wali.
2SA 5:25 Tialima, Devitgo te Genuai Bidigo po odama, tama te Israel dabego te Filistia dabe pobeasa pelama, tama augwali dolali, te Geba taunde gagalasa pali, te Geser taunba usu nigi palio.
2SA 6:1 Devitgo te hwįbo bugagia mu koneani bidi dabe ma sisinani. Te Israel ami dabego namba te umabo mu, 30,000 usu nama elaluai.
2SA 6:2 Tama Devitgo augwali te Juda tǫde elalubo taun Balaba sela pelama, te Godigo Dąų Wali Bomai Po Muani Halobage sigi painu yali. Te halobage augwa nogi eyu, Te Tigidali Bomo Elalubo Genuai Bidigo Halobage da wali. Te halobagede te ensel bidi noma si te ugadu daide elaluali, tama te king bidigo Genuai Bidigo duabo sia tiwai dao.
2SA 6:3 Tialima, te Devit aga ami dabe dali te Bala taunba sabolama, tama augwali te Abinadapgo dwasianu bulu dude elalubo beba pai. Tama augwa te halobage selama, tama te gesi karis me deliba munama, te augwali dali sela painu yali. Usa me Ahio, te Abinadapgo ogwa sigo, te augwali pabo sogo te karis nogogo dodolubo sę ela piduai.
2SA 6:4 Ahio te karis asobodu te polasa pali.
2SA 6:5 Tama Devit dali, te tigidali Israel dali, te karis dali peyu, tama augwa te tęąbi po me weyu, te musik wabo sę me yali, te Genuai Bidigo nogi ugwaba siyu tialio. Augwa te ni wuligo nigai habidi, me gita eliyu, tama te haniani musik wabo sę dali yalio.
2SA 6:6 Tialima, augwali te bidi me deligo tǫ pedaiba sabolali, te bidi Nakon, te augwa te nai wit selama, tama te bo sela sąbo pesageba sabolali. Tama tede te karis kegebo bulmakau dabego te Godigo halobage te hogobeasa dulainu yai. Tama tibaso, Usago nogo mugi pelama, tama te halobage tola sali.
2SA 6:7 Tama Genuai Bidigo te Usa dali wado eyu, sębę mu yali, magi baso meni, Usago homugo te halobage olo nai da homu eyu, tama agai nogogo tuali. Tama Godigo aga elalima, tama aga te Godigo halobage dolo pąde isalio.
2SA 6:8 Devitgo te Genuai Bidigo Usade ebo te sę sulama, tama Devitgo sębę homu eyu, wado yali. Tama augwa te pesage nogi eyu, Godigo Te Usa Dene Mani Pesage da wali. Tama megi me te bulu bage bidigo te tiwai nogi udubo dao.
2SA 6:9 Tama megi da, Devitgo te tama po wali, “Magi elama tama, te Genuai Bidigo Dąų Wali Bomai Po Muani Halobage ena dali pelama, bidigi pogowe?” wali.
2SA 6:10 Tama tibaso, Devitgo te halobage te Devitgo taunba sela pabo hagela homu yali, te Jerusalem, tama aga te Jerusalemba pabo sunumi tagalama, tama te halobage te Get taun bidi me deli, te Obetidomgo beba sela pali.
2SA 6:11 Tama halobage te Obetidomgo bede munalubadi, te polua sela bidai. Tama te sogo Genuai Bidigo te Obetidom dali te aga hani sibi tigidali te wiegi yai bugagia ilali.
2SA 6:12 Tama nosali, king Devitgo te tama po odali, Genuai Bidigo te Obetidom dali te aga hani sibi me tigidali doado bage te wiegi yai bugagia ilibo po wali, magi baso meni, te halobage augwali dali munaluai. Tama tialima, Devit te Obetidomgo beba pelama, te Godigo halobage te Jerusalemba selasa asainu yai. Tama te we bidi dabe augwa homu wiegi yai pemene mu yai.
2SA 6:13 Tialima, te bidi dabego te halobage tolama, soabo gagalali. Augwaligo soabo gagalama, dwasianu gana pelama, tama augwali doligi pelama, tama Devitgo te Genuai Bidiba ofa yali. Agai te bulmakau omai me deli dali, te nisali sabi omai bulmakau me deli dali, ofa yalio. Te ofa ebo silama, tama augwali ma pabo gagalalio.
2SA 6:14 Devitgo te prisgo bebo ugwa me deli gudali, te augwa sawi yai name ugwago nigai. Tama aga tęąbi eyu, tama sasa mano pali, te Genuai Bidigo nogi ugwaba siyu tiai dao.
2SA 6:15 Tama te tama kolesaga yaligo te Devit dali te tigidali Israelgo te Genuai Bidigo Dąų Wali Bomai Po Muani Halobage te Jerusalemba selasa soali. Augwa wiegi yai homu pemene eyu, tama i weyu, tama te bu wabo nai biugel dali pomono pai dao.
2SA 6:16 Te halobage augwa te Devitgo taun tomoba sela asali sogo, Mikal, te Solgo wegi, te sigi be windodu aba tonalubadi, tama augwali suali. Tama agai te aga bidi suali, te king Devit, te tęąbi eyu, te sasa mano bilu, te Genuai Bidigo nogi ugwaba sali. Tama Mikalgo Devitgo te tama tebo kolesaga te aga hagela homu yai, tama aga haliga dwai aga dali yalio.
2SA 6:17 Tialima, augwa te halobage te Devitgo augwa te halobage muainu sę yani ugwa be me deli tomoba te halobage muani. Tama aga te siago tigidali domainu ulubo ofa me, te Genuai Bidi dali deli haliga pedalubo ofa me, yalio.
2SA 6:18 Augwa te ofa ela silibo si da, teda Devitgo te we bidi dabeba te tiwai po wai, “Te Tigidali Bomo Elalubo Genuai Bidigo te dage wiegi yai bugagia ilimainu yao,” wali.
2SA 6:19 Tama Devitgo te we bidi tigidali nai mani. Te tigidali we me bidi deli deligo te bret deli me, augwa te siade ulai sipsip kibu mi me, te augwa te siade olali wain wai duani me, te augwa salio. Augwa te selama da, teda augwa pesageba digi ma geasa peyu yai.
2SA 6:20 Tama Devit aga beba ma pelama, te aga hani sibi wiegi yai ilimainu, te Godiba hanalugi peyu pali. Tama Mikal te bedu buluba dia solama, tama aga dali deliba gesabidi ilama, tama agai te po wali, “Ae, te Israel kingo te aga genuai nogi ola mayu, tama te bugagia sasa mano pali. Tama aga ofisa dabego olo sę ebo we dabego gedude te aga hale gagolobo sę ebo sumainu yalio. Nago te tama tiali, te homu kolesaga meni yai bidigo ebo tiwai yali dao,” te we Mikalgo te po wali.
2SA 6:21 Tama Devitgo te tiwai po wei ponani, “Eno te sasa mano peyu, te tęąbi yali da, te Genuai Bidigo nogi ugwaba siyu yai. Agai ena sa munama nigilali, te nago aya me hani sibi te hasegeliyu, tama tiali, tama agai ena aga te hani bage dabego tobolu bidi nigilali, te Israel dabede. Tama eno aga genuai nogi mayu, tęąbi mu iduaibao.
2SA 6:22 Tama ena digi ena nogi aiyaba mu elaluama, tama ena gedude te olo bage tiwai pedalumainu yaibao. Tiali goli, megi nago te po wabo olo sę ebo we dabe, augwaligo te genuai nogi enaba mawaibao,” Devitgo te po wai.
2SA 6:23 Tama Mikal, Solgo wegi, te aga wai me ame nisąbadi, te aga isibo sogoba usu nani.
2SA 7:1 King Devit aga bede bidiyu, tama bugagia dulaluali, magi baso meni, Genuai Bidigo te boi bidi dabego te Israel dabeba hwįagasomainu me ilibeo.
2SA 7:2 Tama kingo profet Natanbolo te tiwai po wali, “Ena te augwaligo te ni bǫgo sęwai wiegi yai genuai be me delide bidibao, tiali goli te Godigo Dąų Wali Bomai Po Muani Halobage te ugwa bede naga munalubao. Te dolo meni da, homu ebao,” wali.
2SA 7:3 Tialima, profet Natango te tiwai po Devitba wali, “Genuai Bidi nage dali bidibao, tama tiyu, nago magi sę me deli yainogo homu ebaso da, nago te sę naga yao,” wali.
2SA 7:4 Tiali goli, te sogo hulide Genuai Bidigo Natanbolo te tiwai po wali,
2SA 7:5 “Eno sę bidi Devitba nage pelama, tama eno te po agabolo pusa magi pao. Te po wao, ‘Devit, nage te bidi eno sa muyu, eno te be sę emainu yali bidi nage menio.
2SA 7:6 Ena te genuai bede munu me bidibeo. Menio. Te Israel dabe eno te Isip dabede dobola selama, te augwali ma odasa asali sogo, ena te ugwa bede naga bidali. Tama te tigidali pedai badu ena peyu, asu yali, ena te ugwa bede naga bidiyu ebo dao.
2SA 7:7 Ena te dage Israel dabe dali te bulu pedai hauwa badu bilali, tama eno te dage tonalumainu nigilali te tobolu bidi dabe me delibolo eno te tiwai po me hanalu, te tama tiwai po me wasiąwai, “Magi baso te nago eno be me deli te ni bǫgo me sę ebe dawe?” eno te po wabe,’ te po Devitbolo wao,” Genuai Bidigo Natanbolo te po wai.
2SA 7:8 Tama God Genuai Bidigo te po Natanbolo ma weyu, tama po wali, “Te eno sę bidi, Devitbolo, te tiwai po wao,” wali. “‘Ena, Te Tigidali Bomo Elalubo Genuai Bidi, eno nage te sipsip tonalubo sę ebo bidi bidibadi selama, tama eno nage sa muyu, te eno hani bage bidi, te Israel dabego tobolu bidi pedalumainu yai dao.
2SA 7:9 Ena te nage dali bidiyu, te nage pabo tigidali tǫ pedaide te ena bilai dao. Tama eno te nago boi bidi dabe aiyaba elalu yai dao. Tama eno nageba te genuai nogi mawainu yali, te gasa bulu tǫ pedai te bulu tonalubo bomai bidi tiwai pedalumainu yai.
2SA 7:10 Eno dage Israel dabego tǫ me deli sa muani, te ena we bidi dabe, tama eno dage te duga bulu tǫ pedaide bugagia bidimainu ilali. Tama te dwai boi bidi dabego dage me doloyu me egobeo. Polobadu digi te boi bidi dabego dage dolali. Te wąį nǫų dabego te tǫ sagasobo gagalali sogo, tama te eno dagego tobolu bidi nigilama mani sogo, te boi bidi dabego dage dolobo sę iduali. Tiali goli, megi da, te eno augwali paniama, tama te augwaligo nage me, te nago bulu tǫ me, te me dologobeo. Tama eno nago hani bidi bidimainu elama, tama augwaligo te nago wąį nǫų wai dabe te ame nomainu yaibao.’”
2SA 7:12 “‘Te nage isibode te augwaligo nage pubalubo sogo, teda te eno nago ogwa me deli te king pedalumainu ilama, tama aga te bomai king pedelama, tama eno te magi nai me deligo aga aiyaba elalumainu me egobeo.
2SA 7:13 Te kingo naga te eno be sę emainu yaibao, te eno we bidi dabe augwali ena pąba asomainu emainao. Tama te eno aga hani bidi dabede naga te sesemane bidada pabo sogo king bidi pedalumainu ilaibao.
2SA 7:14 Tama ena te aga aya bidiyu, tama aga te eno wai bidiyu yaibao. Te agai dwai kolesaga ebo sogo, te eno agaba dene mabo sę eyu, te ayago aga waibolo ebo sę tiwai yaibao.
2SA 7:15 Tiali goli, eno aga godolo mu eyu, te olo tau sabo wiegi yai kolesaga agaba sesemane sogo yaibao. Te eno aga tudiba me musiąyu, te eno te Solba yali sę tiwai eyu, te eno aga sela sąwani sogo, tama te nago agai bidali pesage sali gilama te tiwai me egobeo.
2SA 7:16 Te nago hani da, te me sia sogobeo. Tama eno te nago hani bidi dabede te king sesemane sogo pedalumainu ilaibao,’ nago te po Devitbolo pusigi pao,” God Genuai Bidigo te po Natanbolo wali.
2SA 7:17 Tama Natango Genuai Bidigo te wali po dabe odama da, teda tama aga pelama, te Genuai Bidigo te agaba ola mani po dabe tigidali te Devitba wagi palio.
2SA 7:18 King Devitgo Godigo te wali po dabe oda silama da, teda aga te Genuai Bidigo ugwa be tomoba pelama, tama te Genuai Bidigo geduba duagi pelama, tama te tiwai gedu haluasa po wali, “Tigidali Nai Tonalubo God, Genuai Bidi, nago wiegi yai kolesaga hauwa enaba yali. Tiali goli, ena dali, te ena hani sibi dabe, da de dawe? Da te nogi meni yai bage naga dao. Da wiegi yai baso tama nago te tiwai sę me ebeo.
2SA 7:19 Tigidali Nai Tonalubo God, Genuai Bidi, nago te wiegi yai kolesaga dabe enabolo yali te usu meni da homu elama, tama megi nago gasa kolesaga yabo sę po enabolo ma walio. Nago te eno wąį nǫų hani dabeba yabo sę po te enabolo pusali. Genuai Bidi, ena olo bidi gagawai da. Tiali goli, nago enabolo te nago yabo sę dabe po ola manio. Nago te da we bidi dali te tiwai kolesaga ebo dawe?”
2SA 7:20 “Tama tialima, Tigidali Nai Tonalubo Genuai Bidi, te eno mena po me nageba wagawe? Ena naga sę bidi, tama nago ena koneanio.
2SA 7:21 Te nago te genuai sę dabe te naga homugo digi yali. Tama megi te nago enabolo te po pusa mani, te naga kolesaga digi ena ola mani.”
2SA 7:22 “Tigidali Nai Tonalubo God, Genuai Bidi, nage te polalubo bidi mu bidibao! Te nage tiwai me elalubeo. Nage deli te God mu bidibo, te dago nǫų wąį dabego pedauwalide odali po tiwai odobo dao.
2SA 7:23 Nago da Israel te Isip dabe nogode kalabus bidibadi ma dobola selama, tama nago da te naga we bidi hani pedalumainu ilali. Tama te gasa we bidi hani te naga we bidi hani bidi da Israel tiwai me bidibawe? Mu menio. Tama nago te tobage wiegi yai genuai sę te da tau siyu, te nago we bidi da te bulu tǫ pedaiba sabolali sogo, te tobage sę dabe yai. Nago te gasa we bidi dabe ela gudulu sela sąnama, tama nago augwaligo tibo god dabe doliyu elama, tama dago augwaligo bulu tǫ sagasali. Tama tialima, te tigidali bulu tǫ pedaide bidali we bidi dabego te nageba genuai nogi mawai dao.
2SA 7:24 Genuai Bidi, nago da Israel hani we bidi dabe te naga hani we bidi mu pedelama, tama da te tiwai sesemane sogo bidaibao. Tama Genuai Bidi naga digi nage te dago God pedelai dao.”
2SA 7:25 “God, Genuai Bidi, ena te naga sę bidi, megi eno homugo nago enabolo me te eno haniba dąų walali po te tiwai sę pedaliyu, tama nago te tiwai sę sesemane sogo iduao.
2SA 7:26 Tama te we bidi dabego nago te tebo sę ebo dabe sulama, tama sesemane sogo augwaligo nage genuai nogi mayu yaibao. Tama augwa te po weyu, ‘Te Tigidali Bomo Elalubo Genuai Bidi te Israel dabego God da,’ po waibao. Tama nago te eno hani bidi dabede naga te sesemane sogo king bidi pedalumainu ilaibao.”
2SA 7:27 “Genuai Bidi, nage te tigidali bomo elalubo, tama nage te da Israel dabego God. Tama nago enabolo te tama po pusali, nago te eno wąį nǫų hani bidi dabe te bomo sesemane sogo elaluaiba wali. Tama ena, te naga sę bidi, eno te nageba gedu haluasa po wabo wi me egobeo.
2SA 7:28 Tigidali Nai Tonalubo God, Genuai Bidi, naga digi nage te God, tama nago te po dąų weyu, te yaibao po wali wiegi yai sę tigidali te sę ebo da. Tama nago te wiegi yai sę yabo po ena nago sę bidi dali dąų wali.
2SA 7:29 Tama eno homugo te nago dąų wali po te homu kone palu, tama nago te eno hani dabe wiegi yai bugagia ilao. Tama te augwali sesemane sogo nage dologode bugagia bidimainu yao. Magi baso meni, Tigidali Nai Tonalubo God, ena naga sę bidi naga bidali goli, nago te tobage wiegi yai sę sesemane ilabo po te eno wąį nǫų dabe dali dąų wabo po wai dao,” Devitgo te po wali.
2SA 8:1 Me sogo deli sogo nosali, Devit dali aga ami dabe daligo te Filistia dabe dali wąbi hodolama, hwįani. Augwaligo te Filistia dabe aiyaba elaluali, tama tibaso te Filistia dabego te Israel dabe munu ma tonalubeo.
2SA 8:2 Tama nosali Devit dali, te aga ami bidi dabe dali pelama, te Moap dabe dali boi hwįgi pelama, tama augwali aiyaba elaluali. Tama agai te Moap dabe te wasilama, te tǫde pimainu ilali. Tama agai te bono baklain me deli selama, tama augwali usu sali. Te bidi dabe te polaluali dąį elalubode bidali me, te si wali dąį ilalide bidali bidi dabebolo, agai te augwali isimaina po wai. Tiali goli te sela wali dąį ilalide bidali bidi dabe, agai te augwali sula tagalalu bidimainu yali. Tama agai te tiwai sę ela pidubadi, te wasilali hani siligi paboba usu nigi pali. Tama te ela musiąwai Moap dabe aga dologode bidiyu, tama agaba te takis mawai.
2SA 8:3 Tama nosali, Devit dali, te aga ami bidi dali, augwa te Soba tǫ kingba boi hwįgi pali, aga te Hadateser, te Rehopgo ogwa dao. Soba bulu tǫ te Siria hani bage me deligo tǫ pedai elaluai. Te sogo Hadatesergo aga ami bidi dabe selama, tama te wę Yufretis pedai badu pidubo sę elama, te boi bidi dali hwįainu yali, te aga tǫ pedai ma sainu yali. Tama Devitgo hanigo augwali sisinama,
2SA 8:4 tama te hwįnama, te augwali aiyaba elaluali. Tama Devitgo te Hadatesergo ami bidi dabe hauwa sai. Agai te ami bidi te bidi sese hauwa, 20,000 sali, tama te hosde dualama hwįbo ami dabe te 1,700 bidi sobadi yai. Tama me, Devitgo te hwįbo side te karis dabe kegabo hos dabe te bidi sese a naga, 100 sali. Tiali goli, Devitgo te gasa hos dabego sągą gabulu kigibili dabe dolama, tama augwali te bomo elama bilabo usu meni yai.
2SA 8:5 Te sogo te Damaskus bulude bidali Siria dabe, augwali hogodama, te king Hadateser dali hwįbo tau sigi pali. Tiali goli, Devit dali, aga ami bidi dabego dali, te Siria ami bidi dabe te bidi sese umabo, te 22,000 bidi ela muani.
2SA 8:6 Tama Devit aga ami bidi meba te Siria dabego bulu tǫ pedaide muna muna pelama, te augwaligo wąbi ma hwįdali weyu, te tonalumainu muani. Tama te Siria dabe te Devitgo dologode bidiyu, tama augwaligo agaba takis mone mani. Te tigidali bulu tǫ pedaiba Devitgo boi hwįgi pabo side, te Genuai Bidigo aga tau siyu, tama aga ugwaba dįą holali.
2SA 8:7 Tama Devitgo te Hadatesergo ofisa dabego te golgo nigai hwįbo sabele tolasa asobo suali. Tama agai te wiegi yai sabele dabe selama, tama te sabele dabe te Jerusalemba selasa palio.
2SA 8:8 Tama me, agai te Beta taunde, me Berotai taun side te bras umabo hauwa sali, te Hadatesergo taun si dao.
2SA 8:9 Te Hamat bulu tǫ king Toigo te tama tiwai po odali, Devitgo te Hadatesergo ami bidi dabe aiyaba elaluali po odalio.
2SA 8:10 Tama tialima, Toigo aga ogwa tagala palali, Joram, te king Devitba pelama, te wiegi yai homu iliyu, siade da po wagi peyu, tama Devitgo te Hadateser aiyaba elaluali te wiegi yai homu pemene ilibo po wagi pomainogo tagala palai. Te Devitgo te Hadateser aiyaba elalualide te king Toi aga wiegi yai homu pemene yai, magi baso meni, te hauwa sogo Hadatesergo te Toi dali boi bidi iduali. Tialima, Joram te Devitba aselama, tama agaba te wiegi yai homu ilibo nai dabe magasali, te augwa te silvago, me golgo, me brasgo nigai dao.
2SA 8:11 Devitgo te wiegi yai homu eyu magasobo nai dabe selama, tama God Genuai Bidiba sa munani. Te agai gasa boi bidi dabe aiyaba elaluama, te sali gol me silvade te tobage kolesaga yali tiwai gilama yalio.
2SA 8:12 Agai te silva me gol dabe te Idom dabede, me Moapde, me Amon dabede, me Filistia dabede, me Amalek dabede te nai dabe sali, tama te Soba hanu tǫ te king Hadateserde te me sai dao. Agai te tobage sali nai dabe tigidalide te Godigo nai dao po olama, Godiba maduali.
2SA 8:13 Tama nosali, Devit dali, te aga ami bidi dabe dali pelama, te Tamu Hauwa Elalubo Odogo Bulude bidibo Idom bage dali hwįgi pali. Tama augwaligo te Idom bidi dabe te bidi sese umabo, te 18,000 bidi ela muani. Te bidi dabego te hwįani po odama, tama augwa te Devitba genuai nogi mu mawai dao.
2SA 8:14 Tama Devitgo te aga ami hani bidi meba te Idom bulu tǫ pedaide munama, te Idom dabe tonalumainu yali. Tama te Idom dabe aga dologode bidai. Te Devit pelama, hwįgi pabo bulu tǫ pedai tigidalide, te Genuai Bidigo aga tau siyu, tama aga ugwaba dįą holali.
2SA 8:15 Devitgo te Israel tǫ pedai tigidali badu tonalu, tama agai wiegi yai doloba pai kolesaga te tigidali we bidi dali yalio.
2SA 8:16 Joap, te Devit aga abe Seruiago ogwa, te ami dabego polalubo ofisa bidi bidali. Tama Jehosafat, te Ahilutgo ogwa, te polalubo kuskus sę bidi bidiyu, tama te gavman dabego sę ebo buku dabe tonalubo sę bidi bidali.
2SA 8:17 Tama Sadok dali Ahimelek, augwali si te pris bidi bidali. Sadok te Ahitupgo ogwa. Tama Ahimelek te Abiatargo ogwa dao. Tama Seraia aga te kingo kuskus sę ebo bidi bidai.
2SA 8:18 Tama Benaia, te Jehoiadago ogwa, tego te king Devit tonalubo ami bidi dabe te augwa tonalubo sę yali, te augwali Keret me Pelet hani dabe da. Tama te Devitgo ogwa dabe te pris bidi bidai dao.
2SA 9:1 Devitgo te tama po te bidi dabebolo hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilainu homu yali, te Jonatango wiegi yai kolesaga enaba yali te wei ponainu tiaibao,” wali.
2SA 9:2 Te sogo te Solgo hani sibide te sę ebo bidi me deli bidali, aga nogi te Siba. Tialima, augwaligo aga i olama, aga te king sugi somainu yali. Aga te kingba sabalubo si, tama te kingo agaba te tama po hanalu wali, “Nage te Siba da, agawe?” Tama aga te tama po wai, “Awe, ena tama dao.”
2SA 9:3 Tama te kingo agaba ma hanalu wali, “Te Solgo hani sibi bage meba elalubawe, ma meniwe? Te elalubaso da, teda eno augwali wiegi yai bugagia ilaibao, te eno Godiba bomai po dąų wali gilama tiainu obao,” wali. Tialima, Sibago Devitba po walali, “Te Jonatango ogwa me deli bidibadi goli, te aga sągą penelama, dwai bidibao,” po wali.
2SA 9:4 Tama kingo te po wali, “Aga menade bidibowe?” Tama Sibago agabolo te po wai, “Aga te taun hanu Lodebarde bidibao, te Amielgo ogwa, Makirgo bede bidibao,” po wali.
2SA 9:5 Kingo te tama po odama, tama agai te bidi meba tagala palama, te Jonatango ogwa odasa asomainu yai.
2SA 9:6 Te bidi aga nogi te Mefiboset dao. Aga te Jonatango ogwa, tama te king Solgo ogwago wai, te aga nǫų wąį dao. Te aga sabalubo sogode, teda aga kidu sugunugulama, tama aga gesabidi tǫba pogulama, te Devitgo nogi ugwaba siyu tama tiali. Tama Devitgo agabolo te tama po wali, “Mefiboset, siade dao.” Tama Mefibosetgo te tama po wali, “King o, ena naga sę bidi naga dao.”
2SA 9:7 Tama Devitgo te tama po wali, “Nage wi munu me elamuo. Eno nago aya Jonatan te homu kone me elalubadi geani, tama tiyu, eno te wiegi yai kolesaga nageba yabo homu ebao. Te eno nageba te nago nǫų wąį Solgo tǫ tigidali te nageba mawaibao. Tama tigidali sogo nage te enaba naga aselama, nai tuagasu yagameo,” wali.
2SA 9:8 Tama Mefibosetgo gesabidi te tǫba ma pogulama, te po wai, “King, magi baso nago te tiwai wiegi yai kolesaga enabolo yainogo obawe? Ena te olo nai tobage naga, te isali yowi me deli te tiwai dao,” wali.
2SA 9:9 Mefiboset pai madigi, tialima te kingo Siba i olama, asobo side tama agabolo te tama po wali, “Te naga genuai bidi Solgo tigidali tǫ dali doado bage me, tama agai hani sibi bage me, megi eno te Mefibosetgo nogoba manio, te Solgo nǫų wąį dao.
2SA 9:10 Tama tibaso, nage dali, te naga ogwa dabe me, te naga sę ebo bidi dabe me, te tǫde gi buluiąo. Tama dagego te gide inayu tau yai nai selama, tama selasa asiąo. Tama tiyu da, te Solgo hani sibi te augwa nai elalueibao. Tiali goli, Mefiboset aga da te ena dali sesemane sogo nai tuagasu daibao,” Devitgo te po wali. Te bidi Sibago ogwa te 15 elaluyu, me te sę bidi dabe te bidi sese tama elaluali.
2SA 9:11 Tialima, Sibago te tiwai po Devitba wali, “King o, te nago wali po tiwai gilama te tigidali sę eno yaibao,” wali. Te sę dabe elama, nosali Mefiboset te king Devit dali nai tugi peyu yali, te king aga ogwa me deli tiwai mu gagawai dao.
2SA 9:12 Mefibosetgo ogwa me deli te ogwa bidi bidali, aga nogi te Mika. Te sogo te Sibago hani sibi bage bidi me we, te Mefibosetgo tǫde sę iduali.
2SA 9:13 Tiali goli, Mefiboset te Jerusalemde bidali, magi baso meni, tigidali sogo bidibo dononama, te aga king Devitgo bede nai tudali. Te Mefibosetgo sągą si te penelama, dwai elaluai dao.
2SA 10:1 Nahas, te Amon dabego king bidi, te isibaso, tama aga ogwa, Hanun, te king pedelali.
2SA 10:2 Tama Devitgo te tama po wali, “Eno te wiegi yai kolesaga Hanunba yaiba,” wali, “te aga aya, Nahasgo, te enabolo yali kolesaga tiwai gilama yaiba,” wali. Tama tiyu, Devitgo te bidi meba tagala palama, te Hanunba homu dene ebo po wagi pomainu yali. Tiali goli, augwali te buluba sabalubo side,
2SA 10:3 te Amon bulu tǫ pedai tobolu bidi dabego te augwa kingba te tama tiwai po wali, “Nago homugo Devitgo te bidi dabego te nago ayabolo homu dene eyu, te genuai nogi magasu asali da, homu eyu teba, agawe? Mu menio. Agai augwali tagala palali, te dago hanu taun te bugagia sula selama, tama nosali te aga ami bidi dabe dali aselama, te da dolagasainu yalio,” tama po wali.
2SA 10:4 Hanungo te po odama, tama agai te Devitgo hani bidi dabe pageabi elama, tama augwaligo penane nisi me badu togolama, tama me badu te elalubadi, tagalali. Tama agai te augwaligo bobage gudali ugwa te togolama, pęwadage mu igulali, te gasa bidi dabego augwaligo tigi habu mi sumainu ebo tiwai ilama, tama agai augwali te augwa buluba tagala palalio.
2SA 10:5 Tiali goli, te bidi dabe augwa te hale mu ebaso, tama augwa buluba ma pabo te augwa hagela homu yali. Te Devitgo haniba te Hanungo te tama kolesaga yali po odama da, teda agai te bidi dabeba te tama po ola tolali, “Dage te Jerusalemba polo asabo homu kelekele me elamuo. Menio. Dage te Jerikode bidilama, te dagego penane nisi ma holobo si, tama nosali dage asiąo,” wali.
2SA 10:6 Te Amon dabe augwa koneani, augwa te tiali kolesagade te Devitgo haliga sębe mu ilabo sę yali homu yai. Tama tiyu, te Devit augwali dali hwįagaselama, augwali aiyaba elaluidali homu eyu, augwa te bidi meba te Siria tǫba tagala palama, te Betrehop bulu bidi dabe me, Soba bulu bidi dabe, augwali dali te bomai po dąų walali. Tama te bulu side te ami bidi umabo mu, te 20,000 bidi tagala palu, te Amon dabe dali hwįbode tau sagasomainu tialio. Tama te Amon dabego te Top bulu bidi dabe dali me te bomai po dąų walama, te ami bidi umabo mu, te 12,000 bidi sainu tiali. Tama te Amon dabego te Maka bulu king bidi dali me bomai po dąų walama, te augwali te Devit dali hwįbode tau sabo ami bidi dabe umabo, te 1,000 bidi me abelama, salio.
2SA 10:7 Te Devitgo te Amon dabego te tama tiwai eyu, te ami bidi dabe sisinibo po odolama, tama agai te Joap dali, te Israel ami bidi dabe tigidali dali tagala palu, te augwaliba boi hwįgi pomainu yali.
2SA 10:8 Tialima, te Amon dabe te augwa genuai hanu taun, te Raba, te masigigo bagulali obo te tomoba pabo sunumi elalubo pąde te sisinama dolaluali. Tama te Siria dabe me, te Top dabe me, te Maka dabe augwali te kala sili elalubo pesagede wasilama, sisinama bidaluali. Tama tigidaligo te Israel dabe dali hwįainu sisi elalualio.
2SA 10:9 Joapgo te boi bidi dabe sulama, tama agai koneani, te Israel dabeba augwaligo te si badu bugasa hwįaiba homu yali. Tama tibaso, agai te Israel wiegi yai bomai ami bidi meba nidigili pelama, tama augwali te kala silide bidalubo ami bidi hani dabe bidalubo pąde te augwali wasilali. Tama aga digi te augwali tonaluali.
2SA 10:10 Tama agai aga ama, Abisai, nigilama, te agai gasa ami bidi dabe tonalumainu nigilali, tama Abisaigo augwali te Amon dabe bidalubo pąde wasilali.
2SA 10:11 Tialima, Joapgo Abisaibolo te tama po walali, “Te hwįbo hodolama hwįbo sogo, tama nago suali, te Siria dabego da aiyaba elaluabo homu ebaso da, teda dage asu, da tau sagasao. Ma, te Amon dabego dage aiyaba elalueinu ebaso da, teda dago dage tau sagasaiba,” wali.
2SA 10:12 “Dage wi me elamuo. Dago dena hani bidi me te Godigo dabolo mani hanude homu kone palama, tama dago bomo elama, hwįąo. Tama Genuai Bidigo aga homu wali pelama, tama aga te godolo ebo homu tiwai emainu yao,” Joapgo te aga ama Abisaibolo te po wai.
2SA 10:13 Tialima, Joap te aga ami bidi dabe dali pelama, te boi hwįgi pobadi, tama te Siria dabe wi pela walio.
2SA 10:14 Tama te Amon dabego te Siria dabe wi pabo subo sogo, augwali me te Abisaigo hanide wi peyu, tama te augwa taun bagulali obo tomoba pelama, geme duala sigi pali. Tialima, Joapgo te Amon dabe tagalama, te aga ami bidi dabe selama, te Jerusalemba ma geasa palio.
2SA 10:15 Te Siria dabe augwali te hwįanide te suali, te usu meni yani tiwai yali, tama tialima, augwa ami bidi dabe tigidali i olama, sisinagasalio.
2SA 10:16 Tama te Soba bulu king bidi Hadatesergo te bidi meba tagala palama, te giliga pedalubo madi, te wę Yufretis elalubo badu bidalubo, te Siria bulu bidi dabe sigi pomainu elama, tama augwali sisinagasali. Tigidali te bulu Helamba sisinama, tama Sobak, te king Hadatesergo polalubo ofisa bidigo, te augwali tonalualio.
2SA 10:17 Devitgo te Siria dabe te Helamba sisinibo sę ebo po odobaso, tama aga hogodama, te Israel ami bidi dabe tigidali sisinama, tama augwa pelama, te wę Jordan nogelama, tama pelama, te bulu Helamba sabolai. Tama te Siria dabe deliba wasilama, nani bidiyu, tama augwa te Israel dabeba boi hwįbo hodolama, hwįanio.
2SA 10:18 Tiali goli, te Israel dabego hwįbo te bomo mu elama, tama te Siria dabe augwali pogasa peyu, te augwa bidiboba ma palio. Tama Devit te aga ami bidi dabe daligo te karisde dolalua peyu hwįbo ami bidi dabe te bidi sese hauwa, 700 bidi elali, tama te hosde dualasa peyu hwįbo ami bidi dabe te bidi sese umabo mu, te 40,000 bidi ela muani. Tama augwa te Sobak me elali, te Siria dabe augwa polaluali ofisa bidi, tama aga te hwįani pesagede dolo tede tama isai dao.
2SA 10:19 Te king Hadatesergo dologode bidali king mebago te tiwai ebo si, te Israel dabego augwali aiyaba elalubo sulama, tama augwa te Israel dabe dali nogo menama, tama augwali dologode bidalio. Tama te Siria dabe te Israel dabede wi mu elama, tama tibaso, augwaligo te Amon dabe tau ma me sabeo.
2SA 11:1 Te tigidali deli deli kibu bede, te kedau ebo silainu ebo sogo, te king dabego te augwa boi bidi dabe dali boi hwįyu yai. Tialima, te Devitgo te Siria dabe aiyaba elaluali te kibu bede nosali badu, tama te kedau ebo silainu ebo sogo, Devitgo te Joap dali, te aga ofisa dabe me, te Israel ami bage tigidali dali, te Amon dabe dali boi hwįgi pomainu tagala palali. Augwa te boi hwįgi pelama, tama te Amon dabe aiyaba elaluama, tama te taun hanu Raba bagulali. Tiali goli, Devit digi te hwįbo madiba me pisąwai. Aga te Jerusalemde bidai.
2SA 11:2 Me sogo deli be pio ebode Devit godege pilama, tama pio mu ebadi, aga te betde pila muani tagalama, hogodaluali. Te aga be te pedu daide te toma nabo pesage elaluai. Tama tialima, aga teba ugwaba holama, tama tede toma neyu bilali. Aga te aba tonono bilibadi, tama agai te we me deli gasa bede wę paudubo suali. Tama te we te gasa sawi yai we muo.
2SA 11:3 Tialima, Devitgo te niwai we mu yaliwe, te mu koneai sainu, te bidi me deli tagala palali. Tama agai te tama koneani, te we aga te Batseba bidibo suali, te Eliamgo wegi, tama aga te Uriago we dao, te Hit hani bidi me deli dao.
2SA 11:4 Tama Devitgo te bidi meba ma tagala palama, te we Batseba odasa asomainu yali. Te sogo te Batseba aga te poluago elali gasi te silibaso, tama aga te wiegi yai ma pedalubo kolesaga wali pai. Tialima aga te Devitba aselama, tama Devitgo te we aga dali pagela piai. Tama nosali Batseba te aga beba ma pai.
2SA 11:5 Tama bidama gana nosali, Batseba aga haliga ebo si koneama, tama aga Devitba po ola tolali.
2SA 11:6 Devitgo te tama sę ebo konebaso, tama agai po me deli Joapba ola toliyu, te tiwai po wai, “Eno homugo nago Hit hani bidi, Uria, te enaba tagala palomainu homu ebao,” wali. Tama Joapgo Uria te Devitba tagala palali.
2SA 11:7 Uria te aselama, te Devit pageba sabalubo si, tama Devitgo te tama po agaba hanalu wali, “Joap te aga ami bidi dabe dali bugagia bidibawe, ma meniwe? Tama te boi hwįbo mena tama tebawe? Da te ugwaba dia holabo homu ebowe, ma meniwe?” Tama Uriago te sę ebo po dabe te agaba pusali.
2SA 11:8 Devitgo Uriabolo tama po wai, “Wiegi yai mu dao. Eno odalio. Megi nage te naga beba pelama, tama wę payu, toma nao.” Tialima Uriago te king tagalama, buluba dia soali. Tama nosali Devitgo te bidi me deli tagala palama, te wiegi yai homu ilibo nai te Uriaba selasa pali.
2SA 11:9 Tiali goli, Uria te beba me pabeo. Aga te king tonalubo bidi dabe dali piali, te kingo be sunumi pąde piai.
2SA 11:10 Augwaligo Devitba waliyu, te Uria aga beba me pabeo po wali. Tama tibaso, Devitgo agaba walaligi pali, “Nago te naga be bobage sogo taga pai dao. Magi baso te nage naga beba pabewe?” wali.
2SA 11:11 Tialima, Uriago te tama po wei ponani, “Te Israel ami dabe, me Juda ami dabe, te hwįbo pesagede te ugwa bede naga me bidalubao, tama te Dąų Wali Bomai Po Muani Halobage te augwali dali munalubao. Tama Joap, te eno genuai bidi, te bidibo pesagede te ofisa dabe dali bididubao. Te ena naga te ena beba pelama, tama te nai sela tuyu, te wę tuyu, tama te ena we dali pagela piyu ebo, te eno homugo te dwai da homu ebao. Eno mu po tama obao, eno te tama kolesaga me egobeo. Ma eno te tiwai eyu da, teda Genuai Bidi Godigo ena ela mumainao,” te po wali.
2SA 11:12 Tama tialima, Devitgo te tama po wali, “Te usu dao, megi nage ede bidao, tama do te nage eno ma tagala palaibao.” Tialima, Uria te Jerusalemde bidalio. Tama do te be pio ebadi,
2SA 11:13 Devitgo te Uria i olama, te aga dali te nai me wę tuagasomainu elama, tama agai te Uria gęǫ page ilali. Tiali goli, te sogo hulide me Uria te aga bede me pibeo. Menio, te aga ugwade digi banuama, tama te king tonalubo bagego be habude pialio.
2SA 11:14 Tama kigamu digi Devitgo te pas me deli Joapba asęnama, tama Uriaba menama, tama aga te hwįbo pesageba ma tagala palalio. Tama Devitgo agabolo waliyu, te pas Joapba mao wai.
2SA 11:15 Devitgo te paside asęani po te tiwai po wali, “Te Uria dali, te polalubo ofisa hani dali, te hwįbo bomo ebo madiba muao,” po wali. “Tama dage tigidali te tudiba ma kilasa peyu, tama te boi bidi dabego te Uria ela mumainu yao,” po walio.
2SA 11:16 Joap dali, te ami bidi dabe, augwa te Raba taun hanu sainu hwįbo sę idubadi geai. Tama Joapgo te pas sali sogo, teda agai te Uria te Amon dabego hwįbo sę bomo mu ebo madiba muanio.
2SA 11:17 Tama te Amon dabe ami bidi te taun hanu buluba dia solama, tama te Joapgo ami dabe dali hwįani. Tama te hwįanide, te Devitgo ofisa bidi meba isali. Uria aga te ofisa dabe dali isali bidi me deli te aga dao.
2SA 11:18 Tama nosali, Joapgo te boi hwįani digi te sę yali po te Devitba po ola tolali.
2SA 11:19 Tama Joapgo te hwįani po sela soainogo ebo bidiba te tama po walali, “Nago te hwįyu suali sę po tigidali te kingba wagi pao,” wai.
2SA 11:20 “Tama eno homugo te kingo te tiwai wado po waiba homu yali, ‘Magi baso dage te taun hanu bagulali obo pąba hwįgi pai dawe?’ te po waibao. ‘Dagego koneanio, te boi bidi dabe te bagulali masigi obo daide bidiyu, tama augwaligo dage enabo usu elalubo dao.
2SA 11:21 Te polobadu te Abimelekde yali sę te dagego homude gegeda pai elaluai dawe? Abimelek, te Gideongo ogwa, te taun hanu Tebes obo bagulali pąde dolalubadi, tama we me deli te masigi obo daide dolalu, tama genuai masigi aba sąnama, tama aga ela muani. Tama tialima, magi baso dage te bagulali obo pąba pai dawe?’ Te kingo tama po nageba obaso da, teda nago agaba te tama po wao, ‘Nago sę bidi, Uria te Hit bidi, te ofisa dabe dali isali bidi me deli dao,’ tama po wao,” Joapgo te po wai.
2SA 11:22 Tama tialima, te Devitba po sela pabo bidi te pelama, tama agaba te po pusigi pai dao.
2SA 11:23 Agai te tama wai, “Te boi bidi dabego hwįbo bomo mu ebaso, tama augwa te taun hanu tomode bidali te buluba dįą solama, tama da dali te pepeli deliba aselama, hwįani. Tiali goli, dago te hwįbo bomo mu ebaso, tama augwali ma pogosa pelama, te taun hanu tomoba pabo sunumi pąba dąį igi palio.
2SA 11:24 Tiali goli, te Amon ami bidi dabe meba te bagulali obo daide bidiyu, tama augwa te enesigigo enama, tama nago ofisa bidi meba dolama, tama isalio. Nago sę bidi Uria te Hit bidi, aga te ofisa dabe dali isali bidi me deli dao,” te po wali.
2SA 11:25 Devitgo te po agabolo wali, “Nage ma geasa pelama, tama te po Joapbolo pusa mao, te aga bomo elama hwįmainu ebo po. ‘Joap, nage te sęde te haliga sęgę me elamuo, magi baso meni, te mena bidi aga te hwįbode isabo, te aga me konegobeo. Nago te Amon dabe dali hwįbo sę bomo elama, tama augwali aiyaba elaluama, tama te taun hanu mu dola silao,’ te Joapgo homu dąų omainogo te po agabolo pusao,” Devitgo te po wali.
2SA 11:26 Tama nosali, Batsebago te aga bidi isali po odobaso, tama aga homu dene ebo gela te aga bidide wai dao.
2SA 11:27 Te homu dene yali sogo silibo side da, teda Devitgo augwaliba te Batseba te kingo beba odasa asao po wai. Tama Devitgo aga sali, tama nosali Batsebago te Devitgo wai ogwa me deli ame nani. Tiali goli, Genuai Bidigo Devitgo te sę yalide te aga homu godolo eyu, wei me ebeo.
2SA 12:1 Te Genuai Bidigo te profet Natan Devitba tagala palama, tama Natango te tiwai po Devitbolo wai, “Te bidi me si te taun hanu me delide bidali. Me deligo te mone me doado bage hauwa elaluyu, tama gasa me bidi te magi nai meniama, tama dwasianu doado bage naga elaluai.
2SA 12:2 Te mone hauwa elalubo bidigo te bulmakau me sipsip hauwa umabo elaluali.
2SA 12:3 Tiali goli, te magi doado bage meni yani bidigo te dwasianu sipsip kibu so me deli naga elaluali. Aga te sipsip abelama, te bugagia tonaluai. Tama te sipsip aga bede bidiyu, tama te bidi aga wai dabe dali te genuai pedelama bidali. Tama aga tubo nai kakali te sipsipba mayu, tama te sipsipgo aga wę tubo kapde wę tumainu eyu yali, tama te sipsip te bidi aga hagawiade piyu yai. Tama tiyu, te sipsip te aga wegi tiwai mu pedelali.”
2SA 12:4 “Tiali goli, me sogo deli te mone hauwa elalubo bidi aga abagi aselama, te aga beba sabolagasali. Tialima, te mone bidigo te aga sipsipgo digi me deli elama, tama aga abagi ula maiabo homu me ebeo. Menio. Aga pelama, te magi doado bage meni yai bidigo sipsip sigi pelama, te elama, tama ulama, te aga abagigo tumainu yalio.”
2SA 12:5 Devitgo Natango te wali po odolama da, teda Devit aga haliga sębe dwai mu te mone hauwa elalubo bidi dali eyu, tama po wali, “Te Genuai Bidigo nogide, eno mu po tama obao, te tobage kolesaga yali bidi te aga dwai bidi mu dao. Te augwaligo aga ela muabo sunumi te wiegi yai mu tama nigali dao.
2SA 12:6 Tama agai te magi nai doado bage meni yai bidibolo te sipsip me si me si te wei ponao wagi dao, magi baso meni, agai dwai kolesaga mu elama, tama te bidide homu dene dwasianu me ebeo,” wali.
2SA 12:7 Tialima, Natango te tama po Devitbolo walali, “Te mone hauwa elalubo bidi wali, te nage tama dao! Tama God, te Israel dabe dago Genuai Bidigo, te tama tiwai po nagede elalubao, ‘Eno nage tau saligo, tama nage Solgo me dolobeo. Tama eno nage te Israel king bidi pedalumainu nigilali.
2SA 12:8 Tama eno te king Solgo be me, we dabe me, te doado bage dabe nageba menama, tama nage te Israel me Juda king pedalumainu ilali. Te nai dabe nage usu meni baso da, teda eno nage umabo nai doado bage madubadi geai dao.
2SA 12:9 Magi baso nago ena Genuai Bidigo po te olo nai da homu eyu, te po sela sąnama, tama nago te dwai kolesaga yaliwe? Nago Uria te Amon dabego nogode ela mumainu elama, tama nago aga we salio.
2SA 12:10 Tialima, bugagia odao. Nago eno po sela sąwanima, tama nago te Uriago we sali. Tama tialima, tigidali sogo nosali te bidi dabe mebago te nago hani sibi wąį bǫų dabe meba ela mubo sę yaibao.
2SA 12:11 Ena Genuai Bidi, eno tama po wali, te eno te tiwai iliyu, te naga hani sibi meba bidigo digi te genuai sęgę nageba mawaibao. Tama eno te nago we dabe selama, te gasa bidi dabeba mabo, te naga sueibao. Tama aga te augwali te pepeli dilide hania penani sę yaibao. Tama tigidali we bidigo aga te kolesaga ebo sueibao.
2SA 12:12 Nago dwai kolesaga yali sę te geme pesagede yali. Tiali goli, eno nago te kolesaga yali wei ponoyu, te hanilama, pepeli dilide ebo tama te tigidali Israel dabego sueibao,’ te po Devitbolo pusao, “wali.
2SA 12:13 Devitgo te po odama, tama aga te po wai, “Eno te Genuai Bidi gedude agade dwai sę yalio.” Tama Natango te tama po agabolo wei ponani, “Genuai Bidigo nago te dwai sę yali sela sąnama, tama nage me isigobeo.
2SA 12:14 Tiali goli, naga te dwai kolesagago, te Genuai Bidigo boi bidi dabego te agaba hagoma emainu yali dao. Tama tibaso, nago wai te Batsebago ame nabo si da, te aga isaibao,” wali.
2SA 12:15 Natango Devitgo te dwai sę yali po pusa silama da, teda aga te aga beba ma begasa pai dao. Tama nosali, Genuai Bidigo Devit de te Batseba sigo te wai te dwai gasi somainu ilali.
2SA 12:16 Tama Devitgo gedu haluasa po Godiba weyu, te Godigo te wai usu ma ilimainu tiali. Tama Devit aga osogo nai tubo habu siyu, gisilali. Tama hulide te aga be habuba pelama, te be soiyamede olo bulude pila muani.
2SA 12:17 Te aga sę ebo bidi monu dabe te agaba pelama, te aga hodolobo usu sabo sę ilali, tiali goli aga me hodalubo hagela homu yai. Tama te aga augwali dali nai tubo me hagela homu yalio.
2SA 12:18 Te Sadede deli pabo side tama te wai isalio, tama te Devit aga sę ebo bidi dabego te wai isali po te agabolo walabo te augwa wi mu yalio. Augwa hasi digi augwa po mia siyu, te tama po wali, “Te wai isisąbadi, te dago Devitba po waligi pali, tiali goli te agai dago po odabo homu isiąwani. Tama tiyu, megi te dago agabolo te wai isali po walainu ebaso, te usu me egobeo. Tiyu, aga hodalu, te aga digi aga dolabuo,” augwaligo te po mia sali.
2SA 12:19 Tialima, Devitgo te augwa hasi pomu po ola pabo suali, tama megi da aga koneani, te wai isali homu yalio. Tama agai augwaliba te tama po hanalu wali, “Wai isali da, agawe?” Tama augwa te po wali, “Awe, aga isalio.”
2SA 12:20 Devitgo te po odolama, aga te be soiyame degedude pila muani hogodama, tama pelama, wę pagu pali. Tialima, aga tigi te denami ebo wel sandago au ilama, tama tobolu nisi yagago selama, tama gesi ugwa muani. Tama aga te Genuai Bidigo lotu beba pelama, tama Genuai Bidiba lotu po wali. Tama Devit te aga beba ma begasa asobo sogo, agai te aga nai ulubo bidi dabeba hanaluama, tama augwaligo te aga nai meba te pouba togolama, tama aga nai tuai dao.
2SA 12:21 Te sę bidi dabego Devitgo te tama tebo kolesaga sulama, tama augwa te tama po agabolo wali, “Nago te tama kolesaga ebo magi basowe? Te wai isisąbadi, nago agade gela olama, tama nago te nai tubo habu siyu gisilali. Tiali goli, megi da, aga isibode te nage hogodama, nai tubao. Nago te tebo kolesaga page mena tama dawe?” augwaligo te po hanalu wali.
2SA 12:22 Tialima, Devitgo te tama po wali, “Ena gela olama, tama nai gisilali te wai isisąbadi, te magi baso meni, eno homugo te Genuai Bidigo olo tau sabo wiegi yai kolesaga enaba eyu, tama te wai isimainu iligobe homu yali.
2SA 12:23 Tiali goli, megi da, te aga isai digi, tama magi baso te eno nai tubo habu selalueibawe? Te kolesagago te wai ma odasa asomainu eba, agawe? Mu menio. Nosali te ena te aga pali buluba paibao. Tiali goli, te aga enaba ma begasa me asobo usu me egobeo,” wali.
2SA 12:24 Devitgo wiegi yai po mobo aga we Batsebabolo mani, te aga homu haliga dąų walu tiali. Tama nosali Devit aga dali pilama, tama nosali Batseba te haliga elama, tama gasa ogwa me ame nani, tama Devitgo aga nogi te Solomon nogi yali. Tama Genuai Bidigo te wai godolo homu mu yai.
2SA 12:25 Tama tiyu, agai te profet Natan te Devitba tagala palama, te waiba te nogi Jedidia momainu yalio.
2SA 12:26 Te sogo te Joapgo ami dabego te Raba taun hanude hwįbo sę idubadi geani, te Amon dabe augwa genuai taun dao. Tama agai te taungo tǫ pedai me badu sai.
2SA 12:27 Tama tibaso, agai Devitba po ola toliyu, te tama po wai, “Eno te Raba taun bidi dabe dali hwįnama, tama eno augwaligo te wę tubo madi te pesage sai dao,” po wali.
2SA 12:28 “Tama tiyu, nago asesa, te Israelde bidalubo ami bidi sisinama, tama aselama, te Raba taunba hwįagaselama, tama augwali aiyaba elaluama, tama te hanu taun sinao. Tiyu, eno hanigo naga te hanude bidibo bidi aiyaba elalubaso, tama te we bidi dabego genuai nogi enaba maidalio.” Joapgo te po ola tolali.
2SA 12:29 Tama Devitgo te ami bidi dabe tigidali sisinama, tama augwa te Raba taun hanuba hwįgi pelama, tama te taun hanu sai dao.
2SA 12:30 Tama Devitgo te kingo madi te Amon dabego king tobolude sai. Te madi augwa te golgo nigai, tama aga sęgę te 35 kilogram tama. Tama augwa te madi te wiegi yai masigi mugo au ilali. Tialima, te Israel dabego te madi selama, tama te Devitgo toboluba muani. Tama Devitgo te taun hanude te mone hauwa, me doado bage sai dao.
2SA 12:31 Tama agai te Raba taun hanude bidali we bidi tigidali selama, tama augwali te so, me baira, me tamiok hwą, te naigo ebo haniani sęba muani. Tama agai augwali meba te brik nigibo sęba muani. Agai te tobage kolesaga tiwai naga te gasa taun hanu te Amon bulu tǫ pedaide bidalubo bage bidi dabeba te tiwai yai. Tama nosali, Devit te aga ami bidi dabe tigidali dali augwa te Jerusalemba ma geasa soalio.
2SA 13:1 Apsalom te Devitgo ogwago abe te gasa sawi yai mu me deli bidali, aga nogi te Tamar. Tama Amnon, te Devitgo gasa ogwa mego, te Tamar godolo mu elama,
2SA 13:2 tama aga pesa mu yai. Tiali goli, Tamar te bidi me deli dali me pagela pisąwai, tama augwa te habu seliyu, te bidi me deli aga pąba me pelamuo po wai. Tama tiyu, Amnongo koneani, aga te Tamar pąba pelama, tolasainu yabo usu meni yai, tama Amnon aga te Tamarde wei mu eyu, godolo mu elama, te aga gasi sai.
2SA 13:3 Tiali goli, Amnon aga abagi me deli elaluali, aga nogi te Jonadap. Aga te Samago ogwa, te Devit aga ama, tama aga te gasagi yai tedali te haniani sunumi gegelama konea pabo homu kolesaga elaluali.
2SA 13:4 Tialima, Jonadapgo Amnonbolo te tama po wali, “Te kingo ogwao, magi yaliwe? Tigidali sogo eno nage te wiegi yai homu pemene eyu bidibo me subeo. Magi baso nage haliga sęgę elalubawe?” wali. Tama Amnongo te tama po agaba wei ponani, “Eno homu pesa mu te Tamarde ebao, te Apsalomgo abe, te eno amago abe dao,” wali.
2SA 13:5 Tialima, Jonadapgo Amnonba te tama po wali, “Nage te gasi ebo tiwai elama, te naga betba pila mugi pao. Tama naga ayago nage suagasobo sogo da, teda nago te tama tiwai po agabolo walao, ‘Eno homugo te nago eno abe Tamar te enaba tagala palama, te eno gesabidiba te nai ulagasomainu yao. Tama aga te nai ulali silibo si, te aga digi enaba magasomainu yaibao.’ Nago te king tibo po ola mayu, te tama po obaso da, teda agai te Tamar nageba tagala palaibao.” Jonadapgo te po wali.
2SA 13:6 Tama Amnongo te Jonadapgo po wali pai. Aga te tibo gasi elama, tama te aga betba pila mugi pali. King Devitgo te aga ogwa, Amnon, te gasi elalubo po odobaso, tama aga te Amnongo beba pelama, aga sugi pali. Tama Amnongo agabolo te tama po wali, “Ena gasi elalubo, tama eno homugo nago eno abe Tamar te tagala palama, tama te pusu yai kek meba enaba ula magasomainu homu yali. Tama aga digi te nai enaba magasomainu yaibao,” te tama po wai.
2SA 13:7 Tamar te king Devitgo bede bidali, tama tibaso Devitgo te tama po agaba ola tolali, “Eno homugo nage te Amnongo beba pelama, te agaba nai meba ula momainu homu ebao,” wali.
2SA 13:8 Tialima, Tamargo te Devitgo po odolama, tama te Amnongo beba pelama, tama te Amnon aga betde pila mudubo suai. Tama Tamargo te plaua meba selama, tama te kek dabe nigilama, tama te praipande ulubadi, tama Amnongo aga tonalu dalio.
2SA 13:9 Agai ula silibo si da, tialima aga plet pouba gelama, te Amnongo tumainu yali, tiali goli Amnon aga te nai tubo hagela homu yai. Aga te tama po wai, “Tigidali bidi buluba piąo,” wali. Te bidi dabe augwa te po odolama, tama augwa te be tagalama, tama palio.
2SA 13:10 Megi da, Amnongo Tamarbolo te tama po wali, “Te kek dabe eno betba selasa asao, tama nago digi ena mobaso, te eno tueibao,” wali. Tialima, Tamargo te kek dabe selama, te aga sela pali.
2SA 13:11 Tiali goli, Tamargo te kek dabe agaba magi pabo si da, teda Amnongo aga pageabi eyu, tama po wali, “Abeo, eno homugo te nage ena dali pimainu homu ebao,” wali.
2SA 13:12 Tiali goli, Tamargo hagela homu ebaso, tama aga po bomo eyu, te tama po wali, “Menio, nago ena te tobage dwai kolesaga yaboba me kekegio,” wali. “Da Israelgo te tobage kolesaga me ebo menio.
2SA 13:13 Nago te tama tobage kolesaga eyu da, teda ena hale dwai mu elama, tama ena te we bidi dabe gedude munu ma biligobeo. Tama nage me, te gasa Israel dabego nage aiyaba elalu, tama nage mu dolaibao. Nago te kolesaga megi me elamuo. Te kingba hanaluyu bolo ebaso, te wiegi yai yaibao. Te nago ena sainu ebo homu te agai nage me paligobeo,” Tamargo te po wali.
2SA 13:14 Tiali goli, Amnongo te Tamargo wali po me odobeo. Amnongo bomo mu eyu, te Tamar aga kekelama, tama te dwai sę agade yalio.
2SA 13:15 Te Amnongo aga dali pilama da, teda megi da, agai te Tamar wei elama, godolo homu me ebeo. Polobadu agai te Tamar wei eyu, godolo mu yali, tiali goli megi da, agai te Tamar wei homu me isiąma, tama agade te haliga dwai mu elalu dalio. Tama tiyu, aga po bomo elama, Tamarba weyu, “Nage pao,” wali. “Nage ede me bidamuo,” wali.
2SA 13:16 Tiali goli, Tamargo agaba te tama po wei ponai, “Ama, homu deneo, nage te tobage kolesaga igio. Te nago ena megi sela sąyu da, te genuai sęgę mu elama, tama nago enaba te yali dwai sę te aiyaba elalueibao,” wali. Tiali goli, Amnongo te Tamargo po odobo te aga hagela homu mu yai.
2SA 13:17 Tama tialima, aga sę bidi i olama, te tama po wali, “Te we asesa polo tama te buluba ela gudulao,” po wai. “Te eno aga ma subo te ena hagela mu ebao. Te aga ela gudulama tama sunumi paliąo,” wali.
2SA 13:18 Tialima, te sę bidigo Tamar sela sąyu, tama te sunumi paliali. Te kingo wegi dabego kolesaga te tama tiwai yai. Te augwali bidigo sisąbadi, te wegi ogwa we bidibo sogo, augwa te bobobage nogo yai sawi yai ugwa me deli muyu ebo dao. Tama Tamargo te tobage bobage nogo ugwa te aga Amnonba asali sogo muani.
2SA 13:19 Tiali goli, Amnongo te Tamar sela sąbo si da, Tamar pelama, te sia keli aga toboluba munama, tama te ugwa pisawali, te aga homu sęgę me homu dene ebo ola mayu, te tama tiali. Tama aga nogo te aga toboluba munama, tama bomonama gela weyu tama soalio.
2SA 13:20 Nosali, Apsalomgo te aga abe Tamar te gela ola asobo sulama, te agabolo hanalu wali, “Magi yaliwe? Te naga abe Amnongo te dwai sę nageba yali da homu ebe da, agawe? Tagalao, te nage homu sęgę kuna me elamuo, magi baso meni, te naga abe naga dao. Tiali goli, nago te Amnongo yali kolesaga te bidi me deliba me pusulamuo,” wali. Tama Tamar te Apsalomgo beba pelama, tama aga dali bidali. Tiali goli, Tamar te homu sęgę dali me mu sesemane sogo elalu bididualio.
2SA 13:21 Tama Devitgo Amnongo te kolesaga yali po odoyu, agai te wado po dwai mu walio.
2SA 13:22 Tama Apsalomgo me te Amnon dali haliga sębę mu elama, tama aga godolo me ebeo, magi baso meni, Amnongo te dwai kolesaga agai abeba yali, Tamarba. Tama tiyu, Apsalomgo te mena sę yabo po deli me te Amnon dali po munu me ma mibeo.
2SA 13:23 Te nosali kibu be si bidama da, teda te sę bidi dabego te Apsalomgo sipsip nisi togobo sę te Balhasor bulude yali. Te bulu te Efraim hanigo tǫ pedai pąde elaluali. Tama Apsalomgo te kingo ogomani tigidali i olama, augwali te buluba sisinagasomainu yali.
2SA 13:24 Apsalom te king Devitba pelama, tama agabolo te tama po wali, “King o, te bidi dabe augwali te eno sipsip nisi togobo sę ebaso, tama eno homugo te genuai nai daa tueinu ebao. Te nage dali, naga ofisa dabe augwali dali, dage te eno genuai nai daa tuboba asabo usu yaibawe?”
2SA 13:25 Tama kingo te tama po wei ponani, “Ogwao, menio. Da me pogobeo. Te da tigidali peyu da, teda nago da tonalubo sę eyu, te gesebo sę dene mu yabuo.” Tiali goli, Apsalomgo bomo eyu, te kingba hanalu wali, tama kingo bomo eyu, pabo hagela homu yai. Tama kingo te tama po wali, “Apsalom, te nage da pao.”
2SA 13:26 Tiali goli, Apsalomgo te po wai, “Tialima, te nage pogobe da wida, te nago gomunai ogwa Amnon pomainu ebo usu egowe?” Tama kingo agaba hanalu wali, “Magi eyu te nago aga pomainu obawe?”
2SA 13:27 Tiali goli, Apsalomgo te Devitba bomo elama mu hanalu obaso, tama nosali Devitgo te Amnonde usu da weyu, te aga gasa ogomani dabe me te Apsalom dali pomainu yalio.
2SA 13:28 Te Apsalomgo Devit taga soyu, te Balhasor buluba ma soabo sogo, agai te aga sę bidi dabeba te tama po walali, “Te nai daa tubo sogo, dagego te Amnon bugagia tonaluao. Te aga gęǫ page ebo sogo, teda eno dagebolo olama, tama dagego aga ela muiyagameo. Dage wi me elamuo, magi baso meni, ena digi eno te aga ela mua po obao. Tama dagego aga ela muyu naga yao, tama dage munu me wia selamuo.”
2SA 13:29 Tialima, te sę bidi dabego te Apsalomgo po wali peyu, tama te nai daa tubo sogo augwaligo te Amnon ela muai dao. Te kingo gasa ogomanigo te tama tebo sulama, tama augwali te augwa donkiba ąųą sigulama, tama wi soai dao.
2SA 13:30 Te augwali sunumidu aseladubadi, te bidi meba polasa pelama, tama Devitba te tama po wai, “Apsalomgo te nago ogomani tigidali ela muani, tama deli me bidibeo.”
2SA 13:31 Kingo te po wabo odolama, tama aga haliga dwai midigi selama, tama agai te aga ugwa pisilama, tama tǫba pigulali. Tama aga ofisa dabe me te tobage kolesaga naga yalio.
2SA 13:32 Tiali goli, Jonadap, te Samago ogwa, te Devitgo ama, agai Devitba te tama po walali, “King o, nago te poba homu munu me mugio. Augwaligo te nago ogwa dabe tigidali me ela mubeo. Menio. Augwaligo te Amnon deli naga elali. Te page te tama telaluali. Polobadu Amnongo te dwai kolesaga Tamarba yali, te Apsalomgo abe da, tama tiyu, Apsalomgo te dwai kolesaga wei ponabo homu elalu, sesemane sogo te homu kone palaludu genama, tama te Amnon ela muanio. Eno koneanio, Apsalomgo te homu elalubo, magi baso meni, eno aga gesabidi te be hulia si tiwai elalubo suali.
2SA 13:33 King, augwaligo te po da, te po wali asobo tiwai ebao. Te nago gasa ogwa tigidali te bidalubao. Amnon deli naga isai dao,” te po wali.
2SA 13:34 Te Jonadap Devit dali po midubadi, te hanu tonalubo ami bidi me deligo te Horonaim badu asobo sunumiba tonobadi, tama agai te bidi hauwa te bulu du badu dulubo suali. Tialima, aga te kingba pelama, te tama po wai, “Eno te bidi meba bulu dudu aiyaba dulubo suali, te Horonaim badu asobo sunumi badu asali,” wali. Tama tialima, Jonadapgo Devitba te po wali, “Te tama dao. Te nago ogwa dabe asobao, te eno nageba wali po tiwai gilama ebo,” wali. Jonadapgo po ola silibo side, teda polo tama mu, te Devitgo ogomani te tomoba asiyu, tama augwa te gela wabo gagalali. Tama Devit dali aga ofisa dabe me te gela geninama augwali dali walio. Apsalomgo te Amnon ela mubo si da, teda aga te Gesur bulu tǫ pedaiba wi pelama, tama aga te Talmai dali bidai, te Amihutgo ogwa dao. Talmai aga te Gesur bulu tǫ pedai tonalubo king bidai, tama Apsalom te Gesur tǫ pedaide bidibadi, kibu be sela bidai. Tama tigidali side Devitgo te Amnon isalide homu dene iduali.
2SA 13:39 Tiali goli, nosali, aga te Amnonde homu dene yai sia sabo side, tama aga te Apsalomde homu dene ebaso, te aga ma asomainu homu yai dao.
2SA 14:1 Joap, te Seruiago ogwago, te king Devitgo te aga ogwa, Absalom, te ma suabo homu godolo ebo te koneani.
2SA 14:2 Tama tialima, Joapgo te bidi me deli te Tekoa buluba pomainu tagala palama, te we me deli agaba sela asomainu yai. Te wego homu kolesaga wiegi yai elaluali. Te we sabalubo side da, tama Joapgo te tama te webolo wali, “Eno homugo nago e tama temainu, nage te haliga sęgę mu elalu, tama nage te bidi me deli isai homu dene tiwai elaluao. Nago te homu dene ebo ugwa gudama, tama nago tobolu nisi te tobolu yaga me selamuo. Nago naga digi te bidi me deli isaide te bobage sogo homu dene elaluali, te tama tiwai pedelao,” wali.
2SA 14:3 “Tialima, nage te kingba dolo pelama, tama eno nageba te mawainu ebo po dabe pusao,” wali. Tama Joapgo agai te kingba pusumainu yabo po meba agaba mani. Tialima, te wego te Joapgo agaba wali sę po tigidali te ola silama, tama nosali aga te kingba pai.
2SA 14:4 Aga te king gesabidide te tǫba degasa dulama, te kingba genuai nogi mayu tiali. Tama wego te tama po wali, “Te king o, eno homugo te nago ena tau somainu homu ebao.”
2SA 14:5 Tama kingo agaba hanalu wali, “Nago magi sęgę elalubawe?” Tama wego te tama po wali, “King o, ena bidi isai dao.
2SA 14:6 Polobadu eno ogwa si elaluali, tiali goli me sogo deli sogo augwa si te gide bidali, tama augwa si te magi nai me delide wado po olama, tama augwa si hwįani. Te augwa si hwįbo togolabo bidi meni yani, tama te ogwa me deligo bomo mu elama, tama aga ama ela muani.
2SA 14:7 Tama te ena bidigo hanigo te ena dali wado genuai elama, tama augwa te tama po weyu, eno te bidibo ogwa selama, tama te augwaliba tagala palao olama, tama augwa te bomai po wali peyu, tama aga ela muainu yali, te agai elali ama wei siyu, te aga ela muainu yali. Tiali goli, eno te augwaligo po wali pigi sogo da, teda eno wai me deli bidigi menio. Te eno sia dage me deli dwasianu elalubo tiwai ebadi, tama augwaligo te sia me sula sawainu ebo tiwai yali. Te augwaligo tama tiyu da, teda eno bidigo hani me te eno bidigo nogi dali te sia sigi dao,” te wego te po wali.
2SA 14:8 Kingo te po odolama, tama agai te weba te tama po wai, “Tagalao, nago moni homu me elamuo. Naga beba ma geasa pao, tama nago te sęgę eno dodolaibao,” wali.
2SA 14:9 Tiali goli, wego te tama po kingba wai, “King, te nago eno te sęgę dodolabo te tobage sunumi te mena tama gegibaso da, teda nago te sę yali page te enaba me, eno hani sibiba dali, asomainu yaibao. Tiali goli, nage dali te naga hani sibide me, te sę po meni yaibao,” wali.
2SA 14:10 Tama kingo agaba te tama po walai, “Te bidi me deligo nageba dwai sę ilaiba po obaso da, teda nago aga enaba odasa asao. Tama tiyu da, te agai nageba sęgę me magobeo,” wali.
2SA 14:11 Tiali goli, te wego po wadoliyu, te tiwai po ma wali, “King, eno homugo nago te naga Genuai Bidi Godigo nogide po bomo elama omainu homu ebao, tama augwaligo eno e gasa ogwa te ela mumainu homu me egobeo. Menio. Te mu tama, te deli kanemego te aga ama ela mumainu yabo bomai po muani te elaluali, tiali goli, nago agai te tama temainu elama, tama eno te wai ela mumainu me elamuo,” wali. Tama Devitgo te tama po wali, “Te Sesemane Sogo Bidibo Genuai Bidigo nogide, eno mu po nageba obao, augwaligo te nago ogwaba te magi sę deli me egobeo,” wali.
2SA 14:12 Tama te wego agabolo te tama po wai, “King, te eno nageba po me deli ma omainu yabo te usu da wagowe?” Tama Devitgo te po wai, “Te usu da, nago po wao.”
2SA 14:13 Tialima, megi da, te wego po hanilama te Devitba walali, “Magi baso naga digi nago te tobage dwai kolesaga te Godigo we bidi dabeba yai dawe? Naga digi nago te naga ogwa sela sąyu, ela gudulama, tama nago aga ma asomainu ebeo. Tama tialima, megi nago enaba te mani pogo, naga digi naga sęgę elalubo po ilali dao.
2SA 14:14 Dago koneani, da tigidali te isaibao, tama te da bidabo ula ma sainu ebo te usu me egobeo. Te wę tǫba gealuali, te dago ma sainu ebo te usu isiąbo, te tobage tiwai ebao. Tiali goli, Godigo te bidigo bidibo ula te olo dali sela sąwainu ebaso, usu me egobeo. Menio. Te bidi me deli agade te digibulu bidibaso da, agai te bidi te aga pąba ma odasa asabo sunumi gegibo dao.
2SA 14:15 King o, te bidi dabego nageba te dwai sę yaiba po obaso, tama ena augwalide wi elama, tama ena nageba asalio. Eno homugo te eno nageba hanalu obaso da, te nago ena tau sabo sunumi gegaibao homu yai dao.
2SA 14:16 Eno homugo te ena me, eno ogwa dali dolobo bidi te nago gogologobe da homu yali. Te agai tama tiyu da, teda te Godigo aga we bidi dabe daba mani tǫde te da si te tǫde ma bidainu ebo te usu egobe da, homu yai dao.
2SA 14:17 Tama tiyu, eno homugo te nago ena tau sabo bomai po dąų walobaso, tama ena bugagia bidaio. Eno genuai bidi, nage da te Godigo mobo bidi ensel tiwai eyu, tama nago te mena wiegi yai kolesaga me, te dwai kolesaga ebo me, te nago koneani. Tama God, te naga Genuai Bidi, te nage dali bidimainao,” te wego te po wali.
2SA 14:18 Kingo odama, tama agai te weba te tama po wai, “Wiegi yai dao. Tiali goli, megi da, eno hanalubo po me deli elalubao, tama eno homugo te nago mu po enaba wei ponainu homu ebao.” Tama wego te po wali, “Tialima, king, nago enaba hanalu wao,” wali.
2SA 14:19 Tialima, Devitgo agaba te tama po hanalu wali, “Te Joapgo nage tagala palobaso, te nago te po wagasu asali da, agawe?” Tama wego te tama po wali, “King o, te ugwaba mu da, eno nago te hanalubo po me ela soyu, tama eno po geme me dualugobeo. Awe, te mu dao, te nago ofisa bidi Joapgo ena tagala palu, tama aga digi te megi eno nageba pusali po tigidali te enabolo ola mawai dao.
2SA 14:20 Tiali goli, agai odolali me wabeo. Menio. Agai te Apsalomgo te sęgę silabo homu elama, tama po wali. Tiali goli, king, nago te wiegi yai homu kolesaga koneani hauwa elalubao, te Godigo mobo bidi ensel tiwai elalu, tama nago te tǫde pedalubo sę tigidali konebo dao,” wali.
2SA 14:21 Te we pai madigi, tama nosali kingo te Joap i olama asobo si, tama agai te tama po Joapbolo wali. “Odao. Eno nago homu wali peyu, usu da po wali. Tama tialima, nage pelama, te Apsalom sigi pelama, tama aga odasa asao,” wali.
2SA 14:22 Joapgo te po odolama, tama aga te king gesabidiba te tǫba degasa dulama, te kingba genuai nogi mayu tialio. Tama agai te tama po wai, “O king, Godigo wiegi yai sę nageba yao. Megi da, eno koneani, nago enaba wiegi yai homu pemene ebao, magi baso meni, nago eno hanalu wali pode usu da po walio,” wali.
2SA 14:23 Tialima, Joap hogodolama, te Gesurba pelama, tama Apsalom te Jerusalemba ma odasa asai.
2SA 14:24 Tiali goli, kingo te tama po wali, “Apsalom te aga bede digi bidimainu emainao. Aga aselama, te ena me suagaselamuo,” wali. Tialima, Apsalom te aga bede digi bidiyu, tama aga te king gesabidiba me sabaligi pabeo.
2SA 14:25 Apsalom te gasa sawi yai bidi mu, tama aga tigide te keni keni yali masalu deli me elalusiąwani. Te Israel bidi me deli te Apsalomgo gesabidi sawi yai tiwai me elalusiąwai, tama te Israel augwa te aga suabo homu elama, te wiegi yai homu pemene mu yai dao.
2SA 14:26 Te aga tobolu nisi hauwa elalu, tama te tobolu nisi bobage holama, te sęgę yai. Tama aga te tigidali kibu bede te deli sogo togoyu iduai. Tama agai te togali tobolu nisi augwa te sęgę dagala subadi, te aga sęgę te dagala suali te kilogram si usu igulali, te kingo skel tiwai yai dao.
2SA 14:27 Tama Apsalom te we sali, tama te ogwa sela elaluai, te wegi deli, aga nogi te Tamar. Tamar te gasa sawi yai we mu dao.
2SA 14:28 Te Apsalom te Jerusalemde kibu be si bidali, tiali goli te kibu be si tomode aga te king sugi pabo usu me ebeo.
2SA 14:29 Tama tiyu, Apsalomgo te Joapba hanaluama, te aga kingba tagala palomainu homu yali, tiali goli Apsalomgo te Joapba po ola tolobo sogo, Joapgo te Apsalom suagasabo homu me isąwai. Tialima, te si sogo weyu, agai te Joapba po ma ola tolali, tiali goli Joap aga me asisąwai.
2SA 14:30 Tialima, Apsalom te hagela ebaso, tama te aga sę bidi dabeba te tama po wai, “Joapgo bali nedu du gi te eno gi pąde elalubao. Eno homugo dage pelama, te agai nedu du bali gi te siago ulugi piąo,” wai. Te sę bidi dabego te po odama, tama pelama, Joapgo te bali nedu du gi te siago ulugi pai.
2SA 14:31 Tama te sę bidi dabego te sę yali kolesaga po te Joapgo odolama, tama aga te Apsalomgo beba pelama, te agaba hanalugi pai, “Magi baso nago sę bidi dabego te eno nedu du gi siago ulali dawe?”
2SA 14:32 Tama Apsalomgo te tama po wei ponani, “Eno nageba po ola toliyu, te nago ena suagasao wali, tiali goli nage asisąwai. Eno homugo nago te eno po selama, te kingba wagi pomainu homu yai. Eno po te tama tiwai. Te magi baso dagego ena te Gesurde bidibadi selama, te Jerusalemba ma odasa asali, te page eno konemainu yali. Te ena Gesurde me bididugi sogo da, teda wiegi yai mu igi dao. Tialima, megi da, eno homugo nage te kingba pelama, agabolo hanalugi pao, te agai te eno aga sugi pabo te usu da po wagowe? Tama agai homugo te eno dwai sę yai da homu ebaso da, teda aga ena ela mumainu yaibao,” wali.
2SA 14:33 Tialima, Joap te kingba pelama, tama agaba te Apsalomgo wali po dabe wagi pali. Kingo odolama, tama agai te bidi meba tagala palama, te Apsalom sigi pelama asomainu yai. Apsalom aselama, te king gesabidiba te tǫba degasa dulali, te kingba genuai nogi mayu tiali. Tama kingo aga nono nanio.
2SA 15:1 Tiali goli nosali, Apsalomgo te wiegi yai karis me deli me, te hos meba me selama, tama te aga meba me painogo ebo sogo, aga te karisde dualasa peyu, te polasa pabo bidi te bidi sese si olama, nogo si, te 50 bidi me salio.
2SA 15:2 Tigidali side aga te kigamu digi mu hogodama, tama pelama, te hanu tomoba soabo sunumi pąba dolalugi piduali. Tama bidi me deligo te aga abagi dali wado po olama, tama te kingo dodolomainu asobo sogo da, teda te Apsalomgo aga i olama asobo si, tama agaba te tama po hanalu wali, “Nage mena bulu bidi dawe?” Tama te bidigo te aga te mena hani Israeldu asali po te agabolo weyu yai dao.
2SA 15:3 Tialima, Apsalomgo te sęgęgo page koneama tama da, te Apsalomgo agaba te tama po weyu yai, “Odao, te nago po dolo mu da,” weyu yali. “Tiali goli, hobede ya, kingo te nago po dagalumainu ebo bidi me nigilibeo,” tama po wali.
2SA 15:4 Tama Apsalomgo te bidiba te tama po weyu yai, “Eno homugo ena digi ena te po odobo jas bidi bidabo homu godolo ebao. Te ena tama te bidigi sogo da, teda eno te sęgę elalubo bidi dabego po dagaligi baso, tama te augwaligo po te eno bugagia dodoligi dao,” wali.
2SA 15:5 Tama me, te bidi me deligo te Apsalom sulama, tama agaba kidu sugunagasu, te agaba genuai nogi magasubaso da, teda Apsalomgo te bidigo te tama temainu eyu gogoliyu, me sula tagalobeo. Menio. Te Apsalomgo aga pagea siyu, nono nani.
2SA 15:6 Tama Apsalomgo te bidi dabe augwa sęgę te kingba dodolainu asobo side, te tama naga tialio. Tama te kolesagago, Apsalomgo te Israel bidi dabego homu kekelama, tama augwaligo aga godolo homu yai.
2SA 15:7 Te kibu be me si me si te bidama da, tama Apsalomgo te king Devitba te tama po wagi pali, “King o, te eno bomai po me deli te Genuai Bidide dąų walali po usu nigi peyu, tama nago ena te Hebronba pomainu yao homu yaibawe?
2SA 15:8 Magi baso meni, te ena te Gesur te Siria tǫ pedaide bidali sogo, eno te tama bomai po Genuai Bidiba dąų walali, te Genuai Bidigo ena te Jerusalemba ma odasa pabo sogo da, teda eno te agaba lotu waibao po wai,” Apsalomgo te po wali.
2SA 15:9 Tialima, kingo agaba te po wai, “Nage te nagame yai homu dali pao,” wali. Tama tialima, Apsalomgo te Jerusalem tagalama, tama te Hebronba pai dao.
2SA 15:10 Tiali goli, agai te tigidali Israel hani mebabolo te po sela pabo bidi meba tagala palali. Tama augwaliba te tama po wai, “Te dagego te biugel bu wabo odobo si da, teda dagego te tama i waiąo, ‘Apsalom te Hebronde king pedelama, bidiba,’ po wao,” wali.
2SA 15:11 Te aga Hebronba pabo sogo, Apsalomgo te Jerusalem bidi dabe te bidi sese nogo si, 200 bidi dabeba hanalu, te aga dali pinao po wai. Tiali goli, te bidi dabego te Apsalomgo elalubo homu kolesaga page te mu konesiąwai. Augwa te aga wali odolali tama palio.
2SA 15:12 Augwa pelama, te Hebronba sabolama, tama Apsalomgo te ofa me yai. Tama aga te ofa yali sogo, agai te taun hanu Giloba te bidi meba tagala palama, te Ahitofel sela asomainu yai. Ahitofel aga te king Devitba wiegi yai homu kolesaga mabo bidi dabede te bidi aga me deli dao. Tama aga te Gilo, te aga hanu tagasu, tama Apsalomba asai. Megi da, te Apsalom wali pabo bidigo namba te genuai pedaliyu, tama augwali te bomai hani mu pedelalio.
2SA 15:13 Bidi me deli asu, tama king Devitba te tama po wali, “Megi da, te Israel hani bidi tigidali te Apsalomba wali painu sisi elalubao,” wali.
2SA 15:14 Devitgo te odolama, tama agai te aga dali Jerusalemde bidibo ofisa dabe te sisinama, tama augwaliba te tama po wai, “Dago te Jerusalem polo tagalama, tama polo wi pinao. Tiyu, Apsalomgo da tigidali elabuo. Da polo asesa pinao. Te tama tisąyu da, teda te Apsalomgo hani polo asiyu, te hanu dolama, tama te hanude we bidi tigidali elaibao,” Devitgo te po wali.
2SA 15:15 Tialima, te kingo ofisa dabego te tama po wei ponani, “King o, te nago mena sę yainogo ebo, dago te nage wali pabo naga te sisi elalubao,” wali.
2SA 15:16 Tama tialima, te king dali, te aga we wai dabe me, te aga ofisa dabe me, augwa te Jerusalem hanu tagalama, palio. Tiali goli, aga te namba tu wali te nogo si wali we hani te bidimainu yali, te kingo be tonalumainu tiai dao.
2SA 15:17 Te king aga hani dali peyu, tama te Jerusalem taga painu yali sogo, augwali te hanu sesege dage badu mu elalubo be pąba doligi pali.
2SA 15:18 Tama king dolaludubadi, tama te ofisa dabe nogo sągą sąyu, tama polasa peyu, te king tonalubo ami bidi hani dabe dali pela wali, te augwali te hani Keret me Pelet hani dabe tama. Tama te Get hanu ami bidi tigidali te 600 bidi me te augwa nogo sągą sąsą pelayu, palio. Polobadu te 600 ami bidi dabe te Get hanude Devit dali bidai, tama augwa te aga wali asali.
2SA 15:19 Tama kingo te tama po Itaibolo wai, te Get hanu ami bidi augwa polalubo bidibolo, te tama po wai, “Magi baso nage te da dali painogowe? Nage te ma geasa pelama, tama te king Apsalom dali bidigi pao,” wai. “Magi baso meni, nage te gasa badu bidi dao, tama nage eba bidagasali, te naga bulu tǫ pedai digibulu taga soyu, bidagasai dao.
2SA 15:20 Nage ede te pęwadage sogo naga bidali, tama tiyu, eno homugo nago te bidibo bulu tagalumainu ilama, tama da dali bilimainu me iligobeo. Da te bulu wau subigila bilalubo bidi tiwai bilaluaibao. Te nago naga hani selama, tama dage ma geasa peyu da, te wiegi yai dao. Tama eno homugo te Genuai Bidigo nage bugagia wiegi yai ilama, tama nage sesemane sogo tonalumainu homu ebao,” Devitgo te po wali.
2SA 15:21 Tiali goli, Itaigo Devitba te tama po wai, “Te Sesemane Sogo Bidibo Genuai Bidigo nogide, eno mu po tama obao, te ena sesemane sogo nage dali bidada paibao,” wali. “Tama nage mena buluba pobaso, te ena nage dali paibao. Tama augwaligo te nage ela mubaso da, teda augwa ena me ela mumainu yaibao,” Itaigo te po wali.
2SA 15:22 Megi da, Devitgo agaba te po wai, “Te usu da, dage ena dali pogǫǫ.” Tama tibaso, Itai me, aga ami bidi dabe me, te augwa we wai puluba dali, augwa te gasa hani wali palio.
2SA 15:23 Te Devit aga hani dali augwa te Jerusalem taga pabo sogo, te tigidali we bidi gela umabo sę elama, mu dwai homu dene ebo gela wai. Tama king te aga hani dali te wę Kidron nogelama, tama te bulu kemi tǫ wa pai bulu pedaiba poloba pelawali.
2SA 15:24 Te Devit doligi pelama, tama te we bidi dabe paboba tonani sogo, te pris Sadok me, Abiatar me, tama te Livai dabe me bidalubo suali. Te Livai dabego te Dąų Wali Bomai Po Munalubo Halobage te tolasa aselama, tama te tǫba aiya mubo suai. Tama te pris Abiatargo te ofa ebo sę ela pidubadi, te we bidi augwa te Jerusalem hanu taga pabo sogoba usu nanio.
2SA 15:25 Tama kingo Sadokbolo te tama po wai, “Te Dąų Wali Bomai Po Muani Halobage te hanuba ma sela pao,” wai. “Te Genuai Bidigo enaba wiegi yai homu pemene eyu da, teda agai ena te ma odasa aselama, tama eno te Dąų Wali Bomai Po Munalubo Halobage me, te aga bidibo ugwa be me, te eno sueibao.
2SA 15:26 Tiali goli, agai enade wiegi yai homu pemene isiąbaso da, teda tagalao. Te agai mena sę enade yainogo homu yali da, aga te sę emainu yaibao,” Devitgo Sadokbolo te po wali.
2SA 15:27 Tama Devitgo te po ma naga te Sadokba weyu, te tama po wai, “Nage te nosali pedalubo sę koneani bidi dawe, ma meniwe? Eno e tama po obao. Nago te naga ogwa, Ahimas, me Jonatan, te Abiatargo ogwa sobadi elama, tama dage te taunba te duga wiegi yai nagame yai homu pemene dali ma geasa piąo,” wali.
2SA 15:28 “Ena te kemi tǫ wa pai buluba pelama, ena te wę nogebo pesageba sabalubo sogo da, teda te Jerusalemde pedelali sę po te dagego ola tolobo po odainu, te dage tonalu te sogoba usu naibao,” wali.
2SA 15:29 Tialima, Sadok de Abiatar dali sigo te Dąų Wali Bomai Po Muani Halobage te ma sela pelama, tama augwa te Jerusalemde bidali.
2SA 15:30 Tama king Devit te homu sęgę mu ebaso, tama aga sągą nadoba su dia sanama, tama ugwa namego aga tobolu mesegaluali. Tama aga gela umabo sę elama mu weyu, tama peyu, te sunumidu wali palio. Te ugwaba holobo sunumi te Oliv bulu du bolama pabo sunumi elaluali. Tama aga dali pali we bidi tigidali, augwali me te augwa tobolu mesega selama, tama augwa gela wabo sę ela peyu, tama palio.
2SA 15:31 Tama augwali pelabadi, te sogo Devitgo te tama po odali, “Ahitofel pelama, te Apsalom aga hani dali tau sigi pai da,” po walio. Tialima, Devitgo te tama gedu haluasa po wali, “Genuai Bidio, nago te Ahitofelgo wabo po te tedali gasagi yai omainu ilama, te mu geda mumainu ilao,” wali.
2SA 15:32 Augwali te bulu duba holama, tama augwa te Genuai Bidiba lotu wabo pesageba sabaligi palio. Augwa teba sabalubo si da, teda te Devitgo abagi me deligo te aga dali deliba gesabi ununama, tama aga dali painu yali. Te bidi aga nogi Husai, tama aga te Arka bulu bidi dao. Agai te aga ugwa pisilama, tama aga tobolude tǫ piali, te aga Devitde genuai homu dene ebo ola mayu, te tiwai yai dao.
2SA 15:33 Devitgo aga sulama, tama agabolo te tama po wai, “Te nage ena dali asainogo da, teda nago dabolo te nage dago tonalubo sę dene mawainu ebao.
2SA 15:34 Tiali goli, te nago ena tau sabo homu ebaso da, teda te wiegi yai da, te nage te Jerusalem moni hanu tomoba ma pelama, tama nago te Apsalom subaso da, teda nago agabolo te tama po wao, ‘King, polobadu eno te wiegi yai homu ilibo kolesaga te nago ayabolo mabo sę yai. Tama megi da, ena te nago sę bidi me deli tiwai bidaio,’ te tama wao. Te nago te tiwai ebaso da, teda nago te Apsalomba mawainu ebo homu kolesagago te Ahitofelgo agaba mani homu kolesaga te aiyaba elalueibao.
2SA 15:35 Odao, te pris si, Sadok me, Abiatar si me, te Jerusalemde bidiba,” po wai. “Tama nago te kingo bede tigidali odali po te augwali siba waibao.
2SA 15:36 Tama Ahimas, te Sadokgo ogwa, te Jonatan dali, te Abiatargo ogwa, augwali si me te augwa si aya dali bidibao. Te mena po nago odali, teda nago augwali siba wagi pobaso, tama augwali sigo te enaba te po wagasomainu yaibao,” Devitgo Husaibolo te po wai.
2SA 15:37 Tialima, Husai, te Devitgo abagigo te Devitgo po wali pelama, tama te Jerusalemba ma geasa palio. Te aga pelama, te Jerusalemba sabaligi pabo sogo, te Apsalom me te hanuba sabolagasalio.
2SA 16:1 Devitgo te Husai dali po mia silama da, teda aga te bulu du bagede bidali tagalama, tama dwasianu pabo gana yali. Tama Siba, te Mefibosetgo sę bidi, te asu, agaba gesabidi ununani. Sibago te 200 bret me, te augwaligo olali te duani wain wai te 100 me sobadi, te ni fik wai duani te 100 me, te meme tigiwali delide te augwa wain wę tede tabiai elaluali. Tama aga te nai dabe te donki siba munama, tama Devitba selasa asai.
2SA 16:2 Tama Devitgo agaba hanalu wali, “Magi baso nago te nai dabe sesaliwe?” Tialima, Sibago te tama po wei ponani, “Te e donki dabe te nago sibi dabego dugulasa bilabo donki dabe dao. Tama te bret, me te nedu du, te nago hanigo tumainu ebo nai da. Tama te wain wę da, augwa te kemi tǫ wa paide bilalu, tama augwa tigi te hagela ebaso tumainu yabo wę dao,” Sibago te po wali.
2SA 16:3 Tama kingo te tama po wai, “Wiegi yai mu dao. Tiali goli, eno koneainu yai, te naga tonalubo bidi, Mefiboset, aga menade bidibawe?” Tama Sibago te po wai, “Aga te Jerusalemde me bididubao, magi baso meni, aga te homu ebao, megi te Israel dabego aga te king pedalumainu nigilama, tama agai te Israel dabe tonalu, te aga wąį nǫų, te king Solgo, yali tiwai gilama yaibao,” wali.
2SA 16:4 King Devitgo te tama po odolama, tama aga te Sibabolo te tama po wai, “Mu da, agawe? Tialima, megi eno te Mefibosetgo doado bage tigidali te nageba mawaibao,” wali. Tialima, Sibago Devitba te tama po wali, “Ei, king, ena te nago olo sę ebo bidi tiwai me deli dao. Tama eno homugo te eno ebo sę tigidaligo te nago homu wiegi yai pemene ilaibao,” wali.
2SA 16:5 Devitgo te Siba dali po miani silibo si da, teda Devit te aga hani dabe dali te Bahurim buluba pali. Augwali te pesageba sabalubo sogo, te Solgo hani bidi me deli te buluba dįą aselama, te Devit dali deli gesabidi ununani. Aga nogi te Simei, tama aga te Gerago ogwa da. Simeigo te wado po wabo sę eyu, tama dwai po Devitba weyu, tama asidualio.
2SA 16:6 Te Simei te Devit me aga ofisa dabe augwali pąba asali sogo, agai te masigi meba augwaliba sąwani. Agai te hauwa we bidide me, te Devit tonalubo ami bidi dabede me, te wi me isąyu, augwali te Devit dali peyu, tama Devit te augwali tomode bidai. Te aga wi me ebeo. Menio.
2SA 16:7 Simeigo Devitba te dwai po te tama wai, “Nage gedao! Nage te bidi ela mubo bidi dao! Nage dwai bidi, nage gedao!
2SA 16:8 Nago te Sol sela sąnama, tama aga bidali pesage hasegelama, tama king pedelali. Tama nago te Solgo hani bidide te bidi hauwa ela muani. Tama tibaso, megi God Genuai Bidigo nago te dwai kolesaga yali wei ponobao. Tama Genuai Bidigo nage hasegelama, tama naga ogwa Apsalom te Israel king pedalumainu nigilaibao. Nage te bidi elibo bidi yai baso, tama tiyu, Godigo nage te dolobao,” te bidi Simeigo te po wai.
2SA 16:9 Tama Abisai, te Seruiago ogwago, te Devitba te tama po wali, “King, magi baso te dwai yowigo nageba te dwai po wali gogola tagalaliwe? Te eno aga dogoni togomainu ilao,” wali.
2SA 16:10 Tiali goli, kingo Abisaibolo me, te aga ama Joapba me, te tama po wai, “Te dage sigo sę me menio. Te aga gogola tagalao. Te Genuai Bidigo te bidiba po walobaso, te agai enaba te dwai po waibaso da, teda dego agaba hanalu waibawe, ‘Magi baso nago te tobage po obawe?’”
2SA 16:11 Tama Devitgo te Abisaibolo me te gasa ofisa dabeba te tama po wai, “Odao. Te ena ogwago digi ena ela muabo homu eyu da, teda magi baso da te e Benjamin hani bidigo enaba te wado po wabode te da midigi sobawe? Genuai Bidigo digi agaba obaso, te enaba dwai po omainu homu yali bogo, tama tibaso, aga te po omainu gogola tagalao.
2SA 16:12 Genuai Bidigo te eno ebo dwai kolesaga koneama, tama Genuai Bidigo te homu eyu, te agai enaba te dwai po wali dabe hasegelama, tama aga te wiegi yai sę enaba yaibawe? Te dago sueibao,” wali.
2SA 16:13 Devitgo te tama po ola silama da, tama aga dali, te aga hani bidi dabe dali, palio. Augwa te wali pali sunumi, te bulu du pąba pabo sunumi elaluali. Tama Simei te bulu du ugwadu soyu, tama Devitba dwai po wabo sę eyu, tama agaba te masigi me tǫ dulu sąbo sę yai dao.
2SA 16:14 Tiali goli, king dali te ami bidi dabe, me te aga we bidi dabe te pelama, tama augwa te painogo yali buluba sabolalio. Augwali pali te bomo mu yai, tama tibaso, augwa tede toma nanio.
2SA 16:15 Te Apsalom dali, te gasa Israel dabe tigidali me, te Jerusalemba sabolali. Tama Ahitofel te Apsalom dali asai.
2SA 16:16 Tama nosali, Husai, te Devitgo abagi, pali, te Apsalom dali deliba gesabidi si ununama, tama agai Apsalomba i weyu, te tama po wali, “King o, nage te sesabi gana elama, bidagameo!”
2SA 16:17 Apsalomgo te po odama, tama aga Husaiba te tama po wai, “Ei, nage te Devitgo wiegi yai abagi me deli dao. Magi baso nage te aga dali pabewe? Te kolesaga te abagi kolesaga ebo wiegi yai da, agawe?”
2SA 16:18 Tialima, Husaigo Apsalomba te tama po wai, “Menio. Te Genuai Bidigo dali, te e bidalubo we bidi dabe me, te tigidali gasa Israel dabe daligo te king me deli nigilibaso da, teda ena te aga dologoba pelama, tama aga dali bidaibao.
2SA 16:19 Tama ena te nago sę bidi bidisąyu da, teda ena dego sę bidi bidigi pagawe? Polobadu eno te nago ayago sę yali, tama megi da, te aga ogwa, nago sę yaibao,” te po wai.
2SA 16:20 Tialima, Apsalomgo Ahitofelbolo te tama po wai, “Megi da, te dagego enabolo waiąo. Te eno magi yagawe?”
2SA 16:21 Tama Ahitofelgo te po wali, “Nage pelama, te naga ayago si wali we hani dali pigi pao, agai te kingo be tonalumainu taga pai. Te nago tama tiyu da, teda te tigidali Israel we bidi hanigo te tama koneaibao, nago te naga aya dali boi bidi ebo tiwai mu pedelaibao. Tama tiyu, te megi nage wali painu ebo we bidi tigidaligo, augwa te nage wali pabo bomo mu yaibao,” wali.
2SA 16:22 Ahitofelgo te tama po wali, tialima augwa te kingo be ugwadu daiba te bidi meba tagala palama, tama augwa te ugwa be me deli sę yani. Tama tigidali we bidigo gedude Apsalom te ugwa be tomoba pai. Tama augwa te aga ayago si wali we dabe sibi hani odasa aselama, te Apsalomgo augwali deli deli dali pagela pimainu yai dao.
2SA 16:23 Te bidi dabe augwa te Ahitofelgo po odali sogo, augwa te homu eyu, te po te Godigo digi pusai po wali te homu elama, tama augwa wali mu palio. Hasia bolo Devitgo te Ahitofelgo po tigidali wali pali, tama megi me Apsalomgo wali pabo homu yalio.
2SA 17:1 Nosali gana dwasianu, Ahitofelgo te tama po Apsalomba wai, “Te nago usu da obaso, te eno te bidi sese hauwa, te 12,000 bidi selama, tama megi hulide te ena dali te bidi dabe dago te Devit pali wali pomainu ilaibao,” te po wai.
2SA 17:2 “Megi da, aga poma peyu, tama haliga sęgę elalubadi, te eno aga dali hwįgi paibao. Te aga dwai noma siyu, tama aga hani bidi dabe wi pabo si da, tama eno te king deli naga ela muaibao,” po wali.
2SA 17:3 “Tama eno agai hani bidi tigidali te eno nageba ma odasa asaibao. Te augwali te we me deli te megi tamadi sai wego tama aga bidide dwai haliga sębę ebaso, te wi pabo tiwai yali, tiali goli nosali te aga bidiba ma asobo tiwai gilama emainu yaibao. Te nago homugo te Devit wali pali we bidi te nageba ma odasa asomainu ebo homu elalubao. Tama tiyu, nago te Devit ela mumainu homu elama, tama te we bidi dabe bugagia bidimainu homu elalubao,” wali.
2SA 17:4 Apsalom dali, te Israel dabego tonalubo bidi dabe daligo te po odama, tama augwa homugo te wiegi yai homu mu da homu yali.
2SA 17:5 Tama Apsalomgo te tama po wai, “Te Husai me i olama, te aga homude elalubo po pusagaselama, te dago odaibao,” wali. Tialima, augwa aga i olama, asali.
2SA 17:6 Husai asobo si da, tama Apsalomgo te Ahitofelgo wali po tigidali te agabolo walali. Apsalomgo agaba te tama po olama da, teda Apsalomgo te Husaiba hanalu wali, “Te homu dago wali pobaso, te usu egowe, ma meniwe? Te meniyu da, teda nago te dabolo te mena sę yabo po te nago dabolo walao,” wali.
2SA 17:7 Husaigo te tama po Apsalomba wei ponani, “Te megi Ahitofelgo nageba te mani homu kolesaga te wiegi yai me ebeo.
2SA 17:8 Nago koneani, naga aya, Devit, te aga ami bidi dabe dali, augwali te hwįbo bomai bidi dabe dao. Augwali te haliga sębę dwai mu elama tama bidibao, te so hasa beago te aga wai dabe tigidali te bidigo wi sela paide te haliga sębę ebo tiwai elalubao. Te nago ayago te hwįbo kolesaga mu koneani, tama tibaso, aga te we bidi dali hulide piainu eyu, te usu me egobeo.
2SA 17:9 Te megi da, aga te bulu du genuai tǫ dedagede, ma gasa pedai badu me, te geme dualalubo homu ebao. Tama te megi dago hwįgi pobaso, tama augwaligo te dago ami bidi meba elibaso da, teda te we bidi dabego te sę yali po odoyu, tama augwa te tama po waibao, ‘Te Apsalomgo hani te dwai sę yabo sogoba mu gegali da,’ po wabuo.
2SA 17:10 Tama nago te gasa ami bidi dabego te tama po odama, tama te wi dwai mu eyu, te augwa digi te hwįbo bomai bidi elalu, tama augwa te laion tiwai gilama te bomai bage dolalu, te tagala weyu godolo meni yani. Te Israel bage tigidaligo koneani, te nago aya te polalubo ami bidi mu, tama agai bidi dabego te bomonama mu hwįbo dao,” wali.
2SA 17:11 “Tialima, eno homu da te tama tiwai, nago te Israel bulu tǫ pedai tigidali badu te tigidali bidi i olama, tama augwali sisinama, tama augwali umabo mu pedelama, te tamu ąį masigi kemi tiwai pedalumainu emainao. Tialima, te naga digi polasa peyu, tama dagego te Devit dali hwįgi piąo,” wai.
2SA 17:12 “Te dago Devit gegi pelama, te dago menade te aga dali deliba gesabidi unulubaso da, teda dago agai haniba te hwįbo sę umabo mu ilaibao. Te augwaligo da palibaso, te usu me egobe, te hulide tǫba dulubo segene wę te bidigo palibo usu isiąbo tiwai gilama yaibao. Tama dago te Devit dali, te aga hani dali tigidali elama, tama me deli te me bidigobeo.
2SA 17:13 Tiali goli, te aga hanu me deli tomoba wi pobaso da, teda da Israel ami bidi dabego te baklain bono selama, tama te bono dabe te hanu bagulali obode gebelama, tama te hanu te odogo buluba kekelama, tama te tigidali dolaibao. Tama te hanu bagulali masigi te dwasianu elalumainu me egobeo. Mu menio.” Husaigo te po wali.
2SA 17:14 Husaigo po ola siminibo si da, teda Apsalom dali, te tigidali Israel dabe daligo te tama po wai, “Te Husaigo homu kolesaga te wiegi yai mu elama, tama te Ahitofelgo homu kolesaga te aiyaba elalualio,” te po wai. Genuai Bidigo te augwaligo homu te Husaigo homu kolesaga wali pomainu ilali, magi baso meni, Genuai Bidigo te Apsalom dolabo homu dola sai elaluai. Te mu tama, te Ahitofelgo homu te wiegi yai po wali, tiali goli Genuai Bidigo augwaligo te homu kolesaga wali pomainu me ilibeo.
2SA 17:15 Te po minama nosali, Husai pelama, te pris Sadok me Abiatar siba te po waligi peyu, te agai Apsalomba me, te Israel dabe tobolu bidi dabeba dali mani po te wagi pali. Tama agai augwali siba te Ahitofelgo yali homu kolesagade po me wai.
2SA 17:16 Tama agai te tama po wali, “Te dage sigo te po asesa, te Devitba ola toliąo. Te tama po agabolo wao, ‘King, megi nage te Jordan wę nogeabo bulu pąde me pigio,’ po wao. ‘Nago te wę asesa nogelama, tama te wę u badu pedaiba polo pao. Tiyu, augwali aselama, te nage me, naga hani dali, tigidali ela muabuo,’ dage sigo te po Devitba ola tolao,” Husaigo te po wali.
2SA 17:17 Jonatan de Ahimas si te Jerusalem obo bogo badu te wę Enrogelde tonalu, bididuali. Augwali si te pris sigo ogwa dao. Te augwali te hanu tomoba soabo te we bidi dabego augwali si suidali homu eyu te hagela yali, tama augwa si te bulu badu geme dualaluali. Tama te sę ebo we me deligo te hanu tomode ebo sę po te augwali siba wagi peyu yali, tama augwali pelama, te po te Devitba wagi peyu yai dao.
2SA 17:18 Tiali goli, te sogo te gesi ogwa bidi me deligo augwali si sulama, tama te Apsalombolo wagi pali. Tama augwali si asesa polo te Bahurim bulu bidi me deligo beba palio. Te bidigo be pąde te wę ulu me deli elaluali, tama Jonatan dali Ahimas si te tǫ dedage tomoba pelama, geme dualaluali.
2SA 17:19 Tama te bidigo wego te name ugwa me deli selama, tama te wę ulu dedage dalalubo te mesegelali. Tama agai te wit meba selama, tama te ugwa daide ugwadu muna muna palio. Te augwali geme dualalubo, te bidi dabego konesiąmainu ebo tiwai ilalio.
2SA 17:20 Nosali, te Apsalomgo bidi mebago te augwali si soali wali aselama, pedalagasu, tama te weba te tama po hanalu wali, “Ahimas me Jonatan si menade bidibawe?” Tama wego te tama po wali, “Augwali si te wę nogelama, palio.” Tialima, te bidi dabego te Jonatan de Ahimas si gegegi pali, tiali goli augwaligo te augwali si me subeo. Tama tibaso, te Apsalomgo tagala palali bidi dabe augwa te Jerusalemba ma geasa palio.
2SA 17:21 Te ofisa dabe augwa ma geasa pai madigi, Ahimas de Jonatan si te tǫ dedagede dualaluali tagalama, tama buluba teda soalio. Tama augwali si te hogodama, te Devit bidibo madiba palio. Tama augwali sigo agaba te tama po wai, “Nage ede me bidilamuo. Nago te naga hani tigidali selama, tama asesa, tama te wę nogelama, te u badu pedaiba pao,” wali. Tama nosali, augwali sigo te Ahitofelgo aga dolainu wali po tigidali te Devitba walali.
2SA 17:22 Devitgo te po wabo oda selama da, teda polo tama mu te aga hani selama, tama augwa te wę Jordan nogelama, u badu palio. Tama be posobode, tigidali pela silalio. Te me deli tede me bidibeo.
2SA 17:23 Ahitofelgo te Apsalomgo agai po wali pabo susiąbaso da, tama aga donkiba duagi pelama, tama aga hanuba digi ma geasa pai. Tama aga pelama, te aga we waigo tigidali doado bage me, te aga bisnis me, te tigidali dodolama, tama nosali aga digi te aga ba bonoba walama, tama isalio. Tama aga hani sibi dabego te aga tigi selama, tama aga ayago gų pageba pubaligi palio.
2SA 17:24 Tialima, Apsalom dali, te Israel ami bidi dabe dali, te hogodama, Devit pali wali pobeali. Tiali goli, Apsalom te Jordan wę nogebo sogo, Devit te aga hani bidi dabe dali te hanu taun Mahanaimba sabolalio.
2SA 17:25 Apsalomgo te Amasago te Joapgo pesage selama, te aga ami dabego polalubo ofisa bidi nigilali. Amasa te Jetergo ogwa dao. Jeter te Ismael hani bidi me deli, tama agai te we Abigel sali, te Nahasgo wegi da. Tama Seruia, te Joapgo ida, aga te Abigelgo ama dao.
2SA 17:26 Tialima, Apsalom te Israel dabe dali te Gileat bulu tǫ pedaiba sabolama, tama tede te bidabo pesage nigalio.
2SA 17:27 Tama Devit te Mahanaimba sabaligi pabo sogo, te bidi selago agaba gesabidi deliba unulagasali. Te augwa nogi te tama. Sobi, te Nahasgo ogwa. Sobi te Raba hanu bidi, te Amon bulu tǫ pedai bidi dao. Tama Makir, te Amielgo ogwa dao. Makir aga te Lodebar hanu bidi da. Tama Barsilai, te Rogelim hani bidi, te Gileat bulu tǫ pedai bidi dao.
2SA 17:28 Augwaligo te plet, me sospen, te tǫgo nigai sene, me te bet dabe, te tama nai meba seselama, te Devitba me te aga hani bidi dabeba mawainu sela asai. Tama augwaligo te nai me meba sesali, te wit me, bali me, plaua me, tama augwa te siade ulai wit me, tama gasa tobage tagabi si me, hani me, te bulmakau ame pę me, tama te bulmakau ame pęgo nigai nai sis me, te tama nai sesela magasalio. Tama augwa te sipsip meba me sesali. Augwa koneani, Devit te aga hani dabe dali te wa pai bulu te bobage sunumidu aselawali homu yali, tama te tialigo te Devitgo hani te nasi ilama, tama dogoni wa palama, tama augwali tigi te bomo kimi mu meni yani homu yai. Tama tibaso, augwaligo te nai dabe augwaliba sesali, augwa te nai tumainu elama, tama bomo ma somainu, tama tiai dao.
2SA 18:1 King Devitgo aga ami bidi dabe sisinama, tama te 1,000 bidi hani, me te 100 bidi hani tonaluabo ofisa dabe nidigili pai.
2SA 18:2 Tama agai aga ami bugulama, te genuai hani sela nigilama, tama Joapgo te hani me deli tonalu, tama Abisai, te Joapgo amago, te hani me deli tonalu, tama te Get bulu bidi Itaigo te hani me deli tonalu yali. Tama Devitgo aga hani ami bidi dabeba te tama wai, “Te ena digi ena me te hwįboba dage dali paibao,” wali.
2SA 18:3 Tiali goli, augwaligo te tama po agabolo wai, “Menio. Nage da dali me pogobeo. Te boi hwįbode da tigidali wi sobaso da, teda augwaligo dade te homu kone me egobeo. Te augwaligo da hani me badu togwa selama, elibaso da, tede me te augwaligo homu kone me egobeo. Tiali goli, nage da dali pai madi, tama augwaligo nage elibaso da, teda augwaligo te da hani 10,000 bidi elimainu ebo tiwai yaibao. Tama tiyu, dago homugo nage te taunde bidibaso, te wiegi yai yaiba homu ebao. Tama da te bidi, me hwįbo doado bage, sǫą pobaso da, teda nago da tau selama, tolomainu yaibao,” wali.
2SA 18:4 Tama kingo po wei ponoyu, te tama wai, “Te usu dao, eno te dagego homu wali pabo homu elalubao.” Tama Devit te taun bagulali genuai obo pąde dolalu, tama agai te ami hani dabe te nogo sągą sąyu, te mas ela peyu, te buluba soabo suai. Te ami bidi dabe te 1,000 bidi hanidu, me 100 bidi hanidu wasiasa soalio.
2SA 18:5 Tama Devitgo te Joapba, me Abisaiba, me Itaibolo te tama bomai po mawai, “Dagego ena homu kone palama, tama dagego te gesi ogwa bidi Apsalomba te wiegi yai homu elama, olo tau sabo homu te bidiba yao,” te po wai. Tama Devitgo te ofisa bidi selabolo wabo po te ami bidi dabego me odali.
2SA 18:6 Te Devitgo ami bidi dabe pelama, te Israel dabe daliba gesabidi deliba ununani, te augwali Apsalomgo ami bidi dabeba te augwali deliba gesabidi ununanio. Tama augwaligo augwali dali te Efraimgo busi bulude hwįanio.
2SA 18:7 Augwali hwį hwį pelama, tama te Devitgo ami bidi dabego te Israel dabe aiyaba elaluama, tama augwali mu dolali. Te hwįbo genuai pelama, tama augwa te bulu tǫ pedai tigidali badu hwį hwį pela walio. Tama bidi hauwa te bulu tomode esela pelama, tama augwali isila pai. Tama tialima, te buside isali bidi dabego nambago te hwįbode isali bidi dabego namba te aiyaba elalualio. Te hwįani sogo tomode isali ami bidi dabego namba te umabo bidi sese, te 20,000 bidi tama isai dao.
2SA 18:9 Te Apsalom te donkide dualasa peyu, tama donki te genuai ni kali te ni me elalubo dologodu pobadi, tama Apsalomgo bobage tobolu nisi te ni nologo tomode habela selama, dąų wali. Tama te donki udayu, tama Apsalom tede walaluai. Apsalomgo te Devitgo ami bidi meba te agaba gesabidi unulubaso, te sogo aga wi pobadi, te tama sę agaba pedelai dao.
2SA 18:10 Tama te ami bidi dabe augwali me deligo te Apsalom sulama, tama agai te tama po Joapba waligi pali, “Megi da, eno Apsalom te ni me deli te ni kali nologode walalubo sualio,” po wai.
2SA 18:11 Tama Joapgo te tama po agabolo wali, “Mu tama, nago aga sualiwe? Tialima, magi baso nago te aga polo ela muai meniwe? Te nago aga ela mugi sogo da, teda eno nagebolo te mone 100 kina me, te kukulu me deli me, te nageba magi dao,” wali.
2SA 18:12 Tiali goli, te bidigo Joapbolo te tama po wai, “Tagalao, nago enaba te mone silvago te 10,000 kina mobaso da, teda eno magi sę me deli te kingo ogwa dali me egobeo,” wali. “Magi baso meni, da tigidaligo te kingo po nageba me, Abisai me, Itaiba me, te tama po mabo odai, ‘Dagego ena homu kone palama, tama te gesi ogwa bidi Apsalomba olo tau sabo wiegi yai kolesaga yao,’ po wai dao.
2SA 18:13 Tama eno kingo te po wali sela sąyu, tama Apsalom ela mubaso da, teda kingo eno te sę yali po odaibao. Magi baso meni, kingo te tigidali sę pedelali po odobo dao. Tama kingo ena po tų ela mobaso da, eno koneani, te nago ena tau me sogobeo,” wali.
2SA 18:14 Tama Joapgo te tama po wei ponai, “Te tagalao, ena nage dali po mibo hagela ebao,” wali. Tialima, Joapgo te sesemone ene sela selama, tama te Apsalom walalubo ni elalubo madiba palio. Te Apsalom isisąbadi, tama Joapgo aga te enego enani, tama te enego aga homu hobolu dude dolalio.
2SA 18:15 Tama nosali, te Joap agai ene sela bilibo ami bidi nogo si bidi, augwali te Apsalom pąba udada aselama, tama aga ela muai.
2SA 18:16 Apsalom isaide, teda Joapgo te ami bidi me delibolo te biugel bu wao po olama, te Devitgo ami bidi augwa te hwįbo tagalumainu yai. Tialima, Devitgo hanigo odolama, tama augwa te Israel dabe taga soyu, ma geasa asali.
2SA 18:17 Tama augwa te Apsalomgo tigi selama, tama te buside genuai tǫ dedage me deliba aiyaba sąwani. Tama augwa te masigi hauwa selama, tama aga tigi daiba ugwadu te masigi sąnama, tama augwa te masigi pesage holali te genuai pedelai. Tama te Israel dabe wi pelayu, te augwa bulu deli deliba ma tedela palio.
2SA 18:18 Polobadu, te Apsalom bidibo ula elalu bidali sogo, agai te bobage masigi genuai me deli selama, tama te Kingo Odogo Bulude dodolali, te aga nogi sa mubo tiwai ilali. Tama agai te tama wai, “Te ena bidali pesage hasegelama bidabo wai meni baso, tama te Israel dabego ena homu kone palabo ogwa meni yani,” homu elama, te tama kolesaga yai. Tama tialima, Apsalom aga nogi digi te masigiba mawai elaluai. Tama megi me te we bidi dabego te masigi nogi weyu, te tama po obao, “Te Apsalomgo masigi da,” wabo dao.
2SA 18:19 Te Apsalom isai madi nosali, Ahimas, te Sadokgo ogwago, te Joapbolo te tama po wai, “Te nago ena te kingba udulama pomainu elama, tama te wiegi yai po agaba magi pomainu eyu, te Genuai Bidigo aga boi bidi dabego bomo te togwa sąwani po wagi pomainu yabo, te usu da po waibawe?” te po wali.
2SA 18:20 Tiali goli, Joapgo agaba te tama po wai, “Menio, megi nago te kingba wiegi yai po me sela pomainu me egobeo. Te me sogo gasa sogo nosali nage pomainu ebo homu usu yaibao. Tiali goli, megi da, menio, magi baso meni, te aga ogwa isai dao,” wali.
2SA 18:21 Tama Sudan bulu bidi me deli bidali, tama aga te kingo sę bidi da. Tama Joapgo agaba te tama po wai, “Nage udada pelama, nago te suali sę dabe po te kingba waligi pao,” po wai. Tialima, te sę bidigo Joapba te mage basigulama, tama nosali te aga udada palio.
2SA 18:22 Tiali goli, Ahimasgo Joapba po bomo elama, te tama po wai, “Te enaba magi sę pedalubaso, me te tagalao, eno homugo nago ena te Sudan bidi pali wali peyu, tama ena me te kingba paio,” wali. Tama Joapgo agaba te tama wai, “Gesi ogwa bidi, magi baso nage painogowe? Te nago mena wiegi yai nai me sogobeo.”
2SA 18:23 Tiali goli Ahimasgo po ma wali, “Te enade magi sę pedalubaso, teda tagalao, ena paio,” wai. Tama Joapgo te tama po wali, “Usu da, nage pao,” wali. Tama Ahimas te Jordan malu tǫ dolo elalubo badu te udada pelama, tama te Sudan bidi asobo badu te aga polasa saboligi pai dao.
2SA 18:24 Te sogo Devit te hanu obo bagulali genuai obo pąde dugulaludali. Tialima, te hanuba asobo bage tonalubo bidi pelama, te bagulali obo sunumi pąde ugwadu daiba dolagasali. Agai digibulu tonono pobadi, tama te bidi deli naga udada asobo suai.
2SA 18:25 Tama te tonalubo bidigo te kingba i weyu, te tama po wai, “Te bidi me deli udada asobao,” wali. Tama kingo te tama po wai, “Te bidi me deli naga asobaso da, teda agai te wiegi yai po sela asiyu tebao.” Tama te tonalubo bidigo te bidi te hanu pąba udada asobo suai.
2SA 18:26 Tama nosali te tonalubo bidigo te gasa bidi me udada asobo sulama, tama agai te sunumi tonalubo bidiba i weyu, tama agaba te tama po wai, “Suao, te gasa bidi me udada asobao,” wali. Tama kingo te tama po wai, “Te bidigo me te wiegi yai po sela asiyu ebadi bogo dao.”
2SA 18:27 Tama te tonalubo bidigo te tama po ma weyu te po wai, “Eno te polasa udada asobo bidi te Ahimas, te Sadokgo ogwa, subo tiwai ebao,” wali. Tama kingo te tama po wai, “Ahimas te wiegi yai bidi, tama agai te wiegi yai po sela asoba homu ebao.”
2SA 18:28 Tialima, Ahimas te pąba asiyu, tama aga te kingba i weyu, te tama po wai, “Da te bugagia bidibao.” Tama aga te kingba sabolama, tama te tobolu tǫba basigulama, tama aga te po wai, “King, nage eno genuai bidi da, dago te dena Genuai Bidi God nogi ugwaba sinao. Te augwaligo nage dali hwįnama, te nage sela sąwainu yali, tiali goli Genuai Bidigo augwali te dago nogoba munama, tama dago augwali aiyaba elalualio,” wali.
2SA 18:29 Tama kingo Ahimasbolo te tama po hanalu wai, “Te eno ogwa, Apsalom, aga me te bugagia bidibawe, ma meniwe?” Tialima, Ahimasgo agabolo te tama po wai, “King, eno te bidi hauwa sisinama, tama genuai po dagą weyu ebadi, te eno sulama tama te Joapgo ena te nago sę bidi dali tagala palali. Tiali goli te augwaligo mena sę ebo te eno me konebeo,” wali.
2SA 18:30 Tialima, kingo te tama po agabolo wali, “Nage u badu dolalugi pao.” Tama Ahimasgo te king taga soyu, u badu dolalugi soali.
2SA 18:31 Tialima, polo tama te Sudan bidi te sabolagaselama, tama kingba te tama po wai, “King, nage eno genuai bidi da, eno nageba maiabo wiegi yai po sela asali elalubao. Te nage dali hwįnama te nage sela sąwainu yali bidi dabe da, tiali goli te sogode megi te Genuai Bidigo nage tau selama, tama augwaligo magi dwai sę nage dali ma egobeo,” te po wai.
2SA 18:32 Kingo odolama, tama te po wai, “Te eno ogwa, Apsalom, aga te bugagia bidibawe, ma meniwe?” Tama te Sudan bidigo po wei ponoyu, te tama po wai, “King o, eno homugo te tobage sę te gesi ogwa bidiba me pedalumainu homu eyu, te nago boi bidi tigidaliba me, te nage dali hwįainu eyu, te nageba dwai sę yainu ebo bage dabeba me, pedalumainu homu ebo dao,” wali.
2SA 18:33 Kingo te po odolama, tama aga haliga dwai mu elama, tama aga hogodasa peyu, te obo bagulali sunumi te elalubo pąde daiba te be habu tomoba pelama, tama aga gela udali. Tama aga ugwaba holiyu, te tama tiwai i wali, “Te eno ogwa, Apsalom o. Eno ogwao, eno ogwa, Apsalom. Te eno nage hasegeliyu, te ena isigi sogo da, te wiegi yai mu igi dao. O Apsalom, eno wai o, eno wai o!”
2SA 19:1 Tama nosali bidi mebago Joapbolo te tama po wali, “Devitgo te Apsalomde homu dene mu ebaso, tama gela wabo sę idubao,” wali.
2SA 19:2 Tama te sogo te Devitgo ami bidi dabego te tama tiwai po odali, te king Devitgo te aga ogwa Apsalomde homu dene ebo gela udubo po odobaso, tama augwa te hwįanide te wiegi yai homu pemene yali tiwai ma ebeo. Menio, augwa haliga sęgę elaluali.
2SA 19:3 Tama te ami bidi dabe augwa te hanuba ma begasa asiyu, te dua dua mu asiyu, te hwįbo side wi aselabo ami bidi dabe tiwai elama, tama genuai hale dali elasa asasawai dao.
2SA 19:4 Tama te sogo te kingo aga gesabidi halua selama, tama homu dene ebo sę ebaso, te bomonama i weyu, te tama po wai, “O eno wainu, Apsalom. O Apsalom, eno wai, eno waio.” Te tama po wai.
2SA 19:5 Tialima, Joap te kingo beba pelama, tama agaba te tama po wai, “Odao. Megi nago te naga ami bidi tigidali te dwai hale mu ilibo sę yalio. Te sogode naga te bidi dabego nage tau salio. Tama nage dali, te nago we wai, me te nago si wali we hani dabe dali, te dage tigidali me dolobeo.
2SA 19:6 Tiali goli, nago te nage wei eyu godolo ebo bidi dabe te nago godolo ebo meni, tama nago te nage godolo meni sabo bidi dabe, te nago augwali godolo ebo da. Te nago kolesagade dabolo te tama tiwai dolo ola mani, nago homugo te naga ofisa dabe, me ami dabe te olo nai tiwai da homu ebao. Tama eno koneani, te Apsalom bidibadi, tama da tigidali isigi sogo da, teda tego nago homu wiegi yai pemene iligi dao,” Joapgo te po wali.
2SA 19:7 “Tialima, odao. Nage hogodasa pelama, te ami bidi dabe wiegi yai homu pemene ilabo po migi pao,” wali. “Te Genuai Bidigo nogide, eno mu po tama obao, te nago tama tisąyu da, teda te sogo hulide te tigidaligo nage taga pobaso, tama nage sęgę genuai mu saibao. Tama te sęgęgo te nage gesi ogwa bidide bidibadi nageba te pedelali tigidali sęgę te aiyaba elaluama, tama megi e sogoba usu nagasaibao,” wali.
2SA 19:8 Joapgo po ola simanobo si da, teda king Devit hogodasa pelama, te taun hanuba pabo sunumi pąba duagi pai. Tama aga ami bidi dabego tama po odali, te king aselama, te taun hanuba soabo sunumi pąba duayagaselama, tede bidibo po odai. Tama tibaso, te ami bidi dabe pelama, aga dali hodobo bidigi pai. Te tigidali Israel dabe wi pelayu, te augwa bidali deli deli buluba ma pela silalio.
2SA 19:9 Tama te tigidali Israel hani we bidi augwa hasi tomode digi te konila po wai. Tama mebago te tama po wali, “King Devitgo te da tau selama, tama te Filistia dabego, me te gasa boi bidi dabego te da me dolobeo. Tiali goli, aga te Apsalomde wi peyu, tama dago bulu tǫ pedai taga pai dao.
2SA 19:10 Dago te Apsalom te dago king bidi pedalumainu nigilali, tiali goli augwa te hwįnama, tama augwaligo te aga ela muai dao. Tialima, magi baso te da olo tama bidiyu, tama dago te king Devit ma oda sigi pisąma ebawe?” Augwaligo te po wali.
2SA 19:11 Bidi mebago te Israel dabego te wabo po te Devitba walali, tama tibaso, king Devitgo po te pris Sadokba me te pris Abiatarbolo ola tolu, te tama po wai. “Eno homugo dagego eno po Juda bage tobolu bidi dabeba pusumainu homu ebao. Ena ede bidiyu, tama te Israel dabego wabo po eno odali. Tialima, magi baso dage Juda bagego te Israel hani dabego te polasa enaba hanalu, te ena eno beba ma asomainu ebo po omainu sula tagalu gogolobawe?
2SA 19:12 Da tigidali te deli kaneme dao. Tama tiyu, magi baso dagego te gasa bidi dabe te dageba poligi somainu elama, tama ena ma odasa asomainu ebo po omainu ebo dawe?”
2SA 19:13 Tama me Devitgo te pris siba po waliyu, te tama po Amasaba omainu yai, “Dadi si te deli kaneme dao. Eno nago te Joapgo pesage selama, tama eno ami dabego polalubo ofisa bidi nigilaibao. Te eno tama tisąbaso da, teda Godigo ena ela mumainu yaibao,” wali.
2SA 19:14 Tialima, Devitgo te wali pogo te Juda bidi dabe tigidaligo homu kekebaso, tama augwaligo agaba te tama po ola tolali, “Dago homugo te nage naga hani dabe dali, dage tigidali te Jerusalemba ma asomainu homu ebao,” wai.
2SA 19:15 Tialima, Devit dali, aga hani dabe te hogodama, palima, tama te wę Jordanba sabolali. Te Juda bidi dabego Devit te wę Jordan nogebo sogo, te Devit dali gesabidi deliba unulabo homu yai. Tama tiyu, augwali pelama, tama te wę Jordan pąde te bulu Gilgalba tonalugi pai dao.
2SA 19:16 Tama Simei, te Gerago ogwa, aga te Benjamingo hani bidi, tama aga te bulu Bahurimdu asai, aga te Juda dabe dali polo asesa, te Devit dali deliba gesabidi unulainu asai.
2SA 19:17 Tama te Benjamingo hani bidi 1,000 te aga dali asai. Tama me, Siba, te Solgo hani sibi dabego sę bidi me, te aga ogwa dabe te 15 ogomani, me te aga sę bidi te bidi sese deli badi, tama augwa bolo asesa pelama, te king Devit asisąbadi, te wę Jordanba polasa sabolai.
2SA 19:18 Tama augwa te kingo we wai hani sibi dabe te wędu edaba nogebo te tau sainu yali. Tama augwa te tigidali sę yali te kingo homugo emainu ebo sę naga te augwaligo yalio. Te king aga wę nogeainu sisi ebo sogo, tama Simei aga aselama, te aga gesabidi te king pąde te tǫba pǫgulali.
2SA 19:19 Tama Simeigo te tama po kingba wali, “O, genuai bidi, eno homugo te nago eno yali dwai sę tagalumainu homu ebao. Tama nago te Jerusalem taga soyu sobadi, te eno nageba yali dwai sę te nago homude munu ma homu kone palamuo,” wali. “Eno homugo nago eno te dwai kolesaga yalide te homu kone palobo te tigidali mu tagalumainu homu ebao.
2SA 19:20 King o, eno koneani, eno dwai sę yali, tama tiyu, te gasa not pedai badu bidibo hani te tudiba togolama, te ena bolo polasa aselama, tama ena genuai bidi, te eno nage dali gesabidi deliba ununainu, te ena nage tiąba asai dao,” te bidi Simeigo te po wali.
2SA 19:21 Tiali goli, Abisai, te Devitgo abe Seruiago ogwago, te tama po wai, “Te Simei isimaina ebo homu te wiegi yai da homu yai. Magi baso meni, agai te Genuai Bidigo nigilali kingba po dwai walio,” wali.
2SA 19:22 Tiali goli, Devitgo te Abisaide, te aga ama Joap dali siba te tama po wai, “Te dage sigo sę menio,” wali. “Dage si te Seruiago ogwa si da, magi baso megi dage sigo enaba boi bidi yabo homu ebawe? Megi eno koneani, ena te tigidali Israelgo king bidibao, tama te tobage sogo, dago te Israel bidi deli me ela mugobeo. Mu menio!”
2SA 19:23 Tama kingo bomai po te Simeiba weyu, aga nogo guni sisu weyu, te tama po wai, “Eno mu po nagebolo obao, augwaligo nage me ela mugobeo,” wali.
2SA 19:24 Tama Mefiboset, te Solgo ogwago ogwa, te wai, aga me aselama, te king dali deliba gesabidi ununani. Te Devitgo te Jerusalem taga soali sogo gagalasa, tama te king ma asobo sogoba usu nagasu, te Mefiboset te aga sągą wę me telasiąbadi, tama aga penane nisi me togosiąma, tama aga ugwa me wę me telayu isiąbadi te Devit Jerusalemba ma asobo sogoba usu nanio.
2SA 19:25 Mefibosetgo te Jerusalem taga soyu, tama aselama, te kingba sabolai. Tialima, kingo agaba te tama po hanalu wai, “Mefiboset, magi baso te nage ena dali wi pabewe?” te po wai.
2SA 19:26 Tama Mefibosetgo te tama po wei ponai, “Eno genuai bidi, nago koneani, ena sągą dwai elalubao. Tama te sogo nago te Jerusalem taga pali sogo, te eno augwaliba weyu, te eno donki dodolao po wali, te donkiba ena duagulama, te ena nage dali painogo yai. Tiali goli, ena sę bidigo ena tibo po ola mawai dao.
2SA 19:27 Tama aga nage wali peyu, tama ena nogi te aiyaba elalubo tibo po walio. Tiali goli, genuai bidi, nage te Genuai Bidigo mobo bidi ensel tiwai dao. Tama nago mena wiegi yai sę enaba yabo te wiegi yai da homu eyu da, nago te sę naga tama yao.
2SA 19:28 Nago te eno ayago hani we bidi tigidali eligi da. Tiali goli nago olo tau sabo wiegi yai homu ebo kolesaga enaba eyu, tama nago ena te nago bede sesemane sogo nai tuagasomainu ilali. Tama tibaso, te eno nageba te gasa nai me ma enaba mao olama, me hanalugobeo,” Mefibosetgo te po wali.
2SA 19:29 Tama kingo te po wai, “Te usu da, te po ma wagio. Eno homude te tama tiali, nage me Siba dage sigo te duga wąį Solgo tǫ dobayu, te bugulama, te me badu nago siyu, te me badu agai siyu emainu, te tama homu yalio,” wali.
2SA 19:30 Tiali goli, Mefibosetgo kingba te tama po wai, “Te Sibago tigidali somainu yaibao. Eno tede homu si me ebeo. Eno homugo te nage bugagia bidimaina homu yali, tama te nage ma asali dao.”
2SA 19:31 Tama Barsilai te Gileat bulu bidigo te Rogelim tǫ tagalama, tama te wę Jordanba dulama, te king dali te kingo te wę nogebo sogo bidali.
2SA 19:32 Barsilaigo kibu be te bidi sese me si me si, te 80 kibu be bidai elaluai, tama aga monu dabe mu yai. Agai te mone doado bage hauwa elaluai, tama agai te king Devit tonalu, tama te Devit dali, aga hani dabe dali, augwali te hanu Mahanaimde bidali sogo nai geseyu bidai dao.
2SA 19:33 Tama kingo agabolo te tama po wai, “Nage ena dali te Jerusalemba aselama, te eno nage tonalueibao,” po wai.
2SA 19:34 Tiali goli, Barsilaigo te tama po wei ponai, “Genuai bidio, te kibu be hauwa isiąbadi, te ena isabo homu ebao. Tama tibaso, ena te nage dali te Jerusalemba painu wabo te usu meni baso, te tagalao.
2SA 19:35 Odao, eno kibu be te bidi sese me si me si, 80 kibu be megi elalubao, tama eno te mena nai me deli te wiegi yai, ma meni, te eno konebeo. Tama eno te nai me wę me tubaso da, eno te naigo pusu te odobowe, ma meni, te eno konebeo. Tama eno olo te wiegi yai meni baso, tama te we bidi dabego balia po wabo dogoni te eno odabo usu meni yaibao. Tama tibaso, magi baso te ena nage dali pelama, te nageba sęgę momainuwe?
2SA 19:36 Tama king, magi baso nago te wiegi yai kolesaga mu enaba yabo homu ebawe? Menio. Eno homugo te wę Jordan nogelama, tama ena nage dali dwasianu pelama gana, tama eno nage tama taga soyu, te ena ma soabo homu ebao.
2SA 19:37 Ae, nago ena te ena buluba ma pomainu elama, tama ena te ena aya de ida si muani pesage te gų pagede nosali pubulumainu yaibao. Tiali goli, eno ogwa, Kimham, te bidibao. Tama aga te nage dali pomainu yaibao. Tama nago aga mena sęgo tau sabo homu eyu da, teda te tama naga tiao,” Barsilaigo te po wali.
2SA 19:38 Tama kingo po wei ponoyu, te tama po wai, “Wiegi yai dao. Kimham te ena dali pomainu yaibao. Tama nago homugo eno mena sę agade emainu homu ebaso da, teda te tama naga eno te sę yaibao. Te nago enaba te mena sę emainu hanalu wali da, teda tagala, te sę eno yaibao,” Devitgo Barsilaibolo te po wali.
2SA 19:39 Tialima, king me aga hani we bidi dabe te wę Jordan nogelama, u badu tugi pali. Tama kingo te Barsilaiba te gesabidi nono nenama, tama Godiba hanalu, te Barsilai wiegi yai ilimainu yali. Tama Barsilai te aga buluba ma geasa palio.
2SA 19:40 Tialima, king te hanu Gilgalba pali, tama Kimham aga dali pai. Tama te Juda ami bidi tigidali dali, te Israel ami bidi hani me badu me, te king dali pela wali.
2SA 19:41 Devit te Gilgalde bidibadi, tama te Israel bidi tigidali asama, tama agaba te tama po wai, “Genuai bidio, magi baso dago ama dede, te Juda dabego, te da Israel dabede te po geme dualama, te augwa digi te nage dali, te nago we wai dabe me, te nago ami bidi dabe daligo te wę Jordan nogemainu, te odasa asaliwe?”
2SA 19:42 Te Juda bidi tigidaligo te po odolama, tama augwa po wei ponoyu, te tama po wai, “King aga te da deli hani elalubaso, tama tiyu, dago te tama kolesaga yali. Tialima, magi baso dagego daba hale sębę ebawe? Kingo te dago nai me abelama, tama agai te nai me deli te dabolo me mabeo,” wali.
2SA 19:43 Tama te Israel bidi dabego po wei ponoyu, te tama po wai, “Te bidi me deli king pedalubaso da, teda aga te dago tǫ pedai tonalubo king bidaibao. Tama te bulu tǫ pedai tomode, te da Israel te nogo si hani elalubao, tama dage Juda bagego hani te deli naga elalubao. Mu tama, Devit te dagego hanidu king bidibao, tama da nogo si hanigo te dage aiyaba elaluali. Tama tiyu, magi baso dagego da begela dolobawe? Dagego bugagia homu kone palao, dago digi te king edaba odasa asabo te homu kolesaga yabo page te dade elalubao,” wali. Tiali goli, te Juda dabego konila po te bomonama mu olama, tama te Israel dabego po aiyaba elaluai dao.
2SA 20:1 Te sogo te bidi dwai me deli te Israel dabe tomode bidali, aga nogi Seba. Aga te Bikrigo ogwa, tama aga te Benjamingo hani bidi. Sebago te biugel bu weyu, te i olama, te tama po wali, “Te Devit tagalao, da te agai hani menio. Da te Jesigo ogwago hani bidi menio. Dago aga wali me pelamuo. Ae, te da Israel bidi tigidali, dena buluba ma pelainao,” po wai.
2SA 20:2 Tialima, te Israel dabego te tama po odolama, tama tigidaligo te Devit tagalama, tama Seba dali palio. Tiali goli, te Juda bidi dabe da, te Devit dologode bidiyu, tama augwa aga wali pabo bage bidibo dąį te Jordan wę sunumi tedu pelama, te Jerusalemba usu nama elaluai.
2SA 20:3 Augwali te Jerusalemba sabolama, tama Devit aga te king bidibo beba pelama, tama te si wali nogo si we hani, te aga kingo be tonalumainu taga pali we dabe sali. Tama agai augwali te gasa beba munama, tama augwali tonaluabo bidi meba nigilali. Tama agai te bidi hani mebago augwali tonalu, te augwali nai mayu yabo bidi dabe meba nigilali, tiali goli agai te polobadu yali tiwai gilama te aga augwali dali ma pagelama pigi pabeo. Tama sesemane sogo augwa te bede naga bidaludubadi, te augwa isibo sogoba usu nani. Te we dabe augwali wilawe we dabe bidalubo tiwai yai.
2SA 20:4 Nosali kingo Amasabolo te tama po wai, “Nage pelama, te Juda bidi dabe i olama, tama augwali sisinama, tama do ma duba dage tigidali aselama, enaba sabolao,” wai.
2SA 20:5 Tialima, Amasa pelama, augwali i wagi pali, tiali goli agai te kingo bodolu mani sogo edelama, me asobeo.
2SA 20:6 Amasa te polo ma asisąbaso, tama kingo Abisaiba te tama po wai, “Apsalomgo te daba genuai sęgę mawai, tiali goli megi Seba, te Bikrigo ogwago, te genuai sęgę dabolo ma manio. Tama tibaso, nago eno ami bidi dabe selama, tama aga pobegi pelama, tama aga pageabi igi pao. Tiyu, Seba te aga hani dabe dali pelama, te bomai obo bagulai tomoba pelama, bidigi pai madi, tama dago aga sainu ebo usu egobeo,” wali.
2SA 20:7 Tama tialima, Abisaigo te Joapgo ami bidi dabe selama, tama te king tonalubo ami bidi me sali, te augwali Keret me Pelet dabe, tama te tigidali hwįbo bomai bidi me, tama augwa te Jerusalem tagalama, tama pelama, te Seba pobegi pai.
2SA 20:8 Augwali te Gibeon moni masigi elalubo teba sabolali, tama Amasa te augwali dali deliba gesabidi ununani. Joapgo te hwįbo nai munasa pai, tama agai te aga kukulude te bainat hwą ge gedelai. Te bainat te aga bulalubo be tomode bulaluai, tiali goli Joap te Amasa pąba pabo sogode, te bainat te tǫba dialuali.
2SA 20:9 Tama Joapgo te tama po Amasa dali wali, “Siade da, ama, nage bugagia bidibawe?” Tama aga Amasago penane nisi te dolo nogogo tola selama, tama agai te aga dali nono nainogo ebo tiwai gilama yalio.
2SA 20:10 Tama Joapgo te bainat hwą me deli te pobase nogode tolaluali, tiali goli Amasago te bainat hwą subeo. Tama Joapgo Amasago haligade te hwągo enama, tama agai haliga tigidali dįąsa soyu, te tǫba tulaluama, tama polo tama aga isai. Tama tibaso, Joapgo te hwągo aga ma enebeo. Joapgo te Amasa ela munama da, teda aga dali, te aga ama Abisai, augwali sigo te Seba pobeasa palio.
2SA 20:11 Tama te Joapgo ami bidi me deli te Amasago tigi pąde dolalu, te i weyu, te tama po wali, “Te Joap me Devit godolo homu ebo bidi dabego, te augwali Joap wali piąo,” walio.
2SA 20:12 Tiali goli, te kanemego Amasa tigidali mu halua sali, tama te tigi te sunumi tomode munaluali. Tama te tigidali ami asela wali, augwaligo te tigi sulama, tama augwali ma pabeo. Te Joapgo ami bidigo te augwali me soasiąbaso, teda agai te tigi te sunumi sesegeba kekasa pelama, tama te tigi te ugwago mesegelalio.
2SA 20:13 Te Amasago tigi te sunumide ma munalusiąbaso, tama te tigidali ami bidi te Joap wali pelama, tama te Seba pobeasa palio.
2SA 20:14 Seba pelama, te tigidali Israel dabego tǫ pelama, te siminigi pali te tǫ sesegeba mu sabolama, tama aga te hanu Abel Betmaka teba sabolali. Tama te Beri hani tigidali te aga dali muna selama, tama aga wali peyu, te hanu tomoba palio.
2SA 20:15 Te Joapgo ami bidi dabego odali, te Seba te hanu tomode bidibo po odai, tama tialima augwali aselama, te hanu bobegelali obo pąde te tǫ pesage holama, te augwa te hanude hwįainogo yalio. Tama augwaligo te obo pąde te dedage dogali, te masigi obo degasa dulumainu yai.
2SA 20:16 Tiali goli, te wiegi yai homu yai we me deli te hanude bidai, tama agai te Joapgo haniba te i weyu te tama po wali, “Ae! Dagego odiąo! Te Joap asa po walao. Eno agade po elalubao.”
2SA 20:17 Tialima, Joap te pąba pelama, tama te wego agaba hanalu wali, “Nage te Joap dawe?” Tama Joapgo te po wai, “Awe, te ena tama dao.” Tama wego agabolo te po walali, “Genuai bidio, eno po me deli elalubao. Tama eno homugo nago eno te poba bugagia olo mumainu homu ebao.” Tialima, Joapgo te po wai, “Te usu dao. Eno nago po odaibao.”
2SA 20:18 Tama wego Joapba te tama po wai, “Polobadu augwaligo te tama po wai, ‘Te nago homude po me elalubaso da, nage te hanu Abelba pao,’ wai. Augwa te dena bulu Abelba aselama, tama te Abel dabego augwa te homu sęgę elalubo dodoliyu yai dao.
2SA 20:19 Odao. Te dago hanu te Israel bulu tǫ pedaide te polalubo hanu me deli dao. Dago te hwįbo sę dabe me isiąwai. Dago te dena king naga mu wali peyu ebao. Tiali goli, megi nago te hanu dolainu ebao. Magi baso nago te Genuai Bidigo nai te dolainu ebawe?” wali.
2SA 20:20 Tama Joapgo te po wai, “Eno te hanu doliyu, te silabo homu me elalubeo.
2SA 20:21 Mu menio. Dago te bidi me deli naga sagasu asali, aga nogi te Seba, te Bikrigo ogwa. Aga te Efraimgo pesage te bulu dude bidi dao. Te bidigo te bidi dabego homu hodolobaso, te king Devit aiyaba elaluainu yai. Dago homugo dagego te bidi Seba naga daba mobaso tama, teda dago te dagego hanu tagalama, paibao,” Joapgo te po wai. Tama te wego Joapbolo te tama po wai, “Mu tama obao, dago te bidi ela munama, tama agai tobolu naga te obo buluba sąbo, te nago sueibao,” wali.
2SA 20:22 Tama tialima, te we te hanude bidibo bidi dabeba pelama, tama agai homude sela pali po te augwaliba pusali. Augwaligo te agai po wali pelama, tama augwaligo te Sebago tobolu mage togogi pelama, tama aga tobolu selama, tama Joapba te tobolu buluba dinani. Tialima, Joapgo te biugel bu obaso, tama aga ami dabe te hanu taga soyu, tama augwa buluba ma palio. Tama Joap te king Devit bidibo madi, te Jerusalemba ma pai.
2SA 20:23 Joap te ami dabego polalubo ofisa bidi, tama te Israel bulu tǫde tigidali ami tonalubo bidi dao. Tama Benaia, te Jehoiadago ogwago, te king tonalubo ami bidi dabe tonalubo bidi bidai, te augwali Kelet me Pelet dabe dao.
2SA 20:24 Tama te kingo te bidi mebabolo te agai sę yao po wabo sogo da, teda Adoniramgo te hani bidi dabe tonalu yai. Tama Jehosafat, te Ahilutgo ogwa, aga te king Devitgo ebo sę tigidali po te asębo bidi bidali.
2SA 20:25 Tama Seva aga te kingo kuskus sę ebo bidi bidai. Tama Sadok me Abiatar te pris sę ebo bidi si bidai,
2SA 20:26 tama Jair hani bidi Ira, aga me te Devitgo pris bidi bidai dao.
2SA 21:1 Te Devit king bidali sogo, te nasi ebo sogo me deli pedelama, tama te Israel dabe me, Juda me, te nai sǫą pelama, te nai sili bididubadi, te kibu be sela bidai. Tama tibaso, Devitgo Genuai Bidiba te tebo sę ebo page hanalu wali, tama Genuai Bidigo agaba te po wai, “Te sę ebo page te tama telalubao. King Solgo te Gibeon dabe ela muani, tama te dwai sę yali page te aga hanide elalubao,” wai.
2SA 21:2 Tialima, Devitgo te Gibeon dabe i olama, asali. Te Gibeon dabe augwali te Israel we bidi menio. Augwali te Amor hani bage da. Te gasa Amor dabe te hagawai, tama te dwasianu hani naga bidai. Polobadu mu te Israel dabego te bomai po mu dąų weyu, te Gibeon dabe augwaligo me dologobeo po wai. Tiali goli, king Solgo bomo eyu, te Israel de Juda si naga te Israel tǫde bidimainu yai. Tama tiyu, Solgo te Gibeon dabe silimainu tiai dao.
2SA 21:3 Megi da, te Gibeon dabego Devit suagasobaso, tama agai augwaliba te tama po wai, “Eno homugo dago dageba te dwai sę yali dodolainu ebao, tama dagego te Genuai Bidiba hanaluama, te aga we bidi hani dabolo wiegi yai sę emainu yao. Dagego homugo eno magi sęgo te dwai sę yali dodolumainu homu ebawe?” Devitgo te Gibeon bage te po hanalu wali.
2SA 21:4 Tama te Gibeon dabego Devitba po wei ponoyu, te tama po wai, “Te sęgę te da dali, te Solgo hani sibi dali tomode elalubo sęgę, te sia somainu ebaso, te usu me egobeo, te nago dabolo te gol me silva mawainu ebaso, te tagalao. Tama me, dago nageba hanalu, te gasa Israel bidi dabe ela muao po me obaso, me te usu egobeo.” Tama Devitgo te po wai, “Tama dagego homugo te eno magi sę dageba emainu homu ebawe?”
2SA 21:5 Tama augwaligo kingba po wei ponoyu, te po wai, “Solgo te da dolama, tama da tigidali silimainu homu yali, te da hani me deli te Israelgo tǫde me bididali homu yai dao.
2SA 21:6 Tama tibaso, dago homugo te nago dabolo te Solgo hani sibigo bidi te a naga olama, me si, te tama bidi dabolo momainu homu ebao. Tama dago augwali te bulu Gibeaba sela paibao, magi baso meni, Gibea te Solgo page bulu dao, te king te Genuai Bidigo nigilali. Tama te God Genuai Bidigo gedude te dago augwali te niba walama, tama augwali isimainu yaibao,” te Gibeon bagego te po wai. Tama Devitgo augwaliba te tama po wai, “Tialima, te eno augwali dageba mawaibao,” wai.
2SA 21:7 Te Genuai Bidigo nogide, Devitgo te Solgo ogwa Jonatan dali te bomai po dąų wali, tama megi da, agai te dąų wali bomai po te homu kone ma palali. Tama tiyu, agai te Mefiboset sabeo, te Jonatango ogwa, tama te Solgo wąį, tama te Gibeon dabeba mabeo. Menio.
2SA 21:8 Agai te Armoni, me gasa Mefiboset, te si sali. Augwali si te Sol de Rispa sigo ogwa, te Aiago wegi dao. Rispa aga te Solgo si wali we hanide te we me deli da. Tama Devitgo te Merapgo ogwa a naga me sali, te Solgo wegigo wai. Merap te bidi Adrielgo sai, te Barsilaigo ogwa te Mehola bulu bidigo selama, tama augwali sigo te a naga ogomani ame nai.
2SA 21:9 Devitgo te bidi dabe te Gibeon dabeba menama, tama te Gibeon dabego augwali sela holiyu, te bulu duba holama, tama te Genuai Bidigo gedude augwaligo te a naga olama, me si, te tama bidi dali te niba walama, tama tigidali isalio. Te sę pedelali, te bali gi nedu du sabo sogo sisi elalubadi, tiali tama te bidi dabe augwa te rais bali wai sabo gagalalio.
2SA 21:10 Tialima, Rispa, te isali bidi sigo ida, aga te poloba badi ugwa meba selama, tama te bulu duba ugwa holali. Tama aga te sela holali badi ugwa dabego te dwasianu ugwa be tiwai gana te masigi tǫ bulude kekelama sę yani. Tama aga te bidi dabego tigi tonaludubadi, te polua meba bidali, te tulubage te tǫba ma tulubo sogo, te nogo a naga, me badu si, te tama bidigo tigi dili te tulubagego telamainu ebo sogoba usu numainu tonalualio. Rispago te bidi dabego tigi te giligade me hulide te bugagia tonaluai, tiyu te ba dabego me te bulu hasa dabego augwali tigi tuagasidali weyu, tama tiai dao.
2SA 21:11 Nosali Devitgo te Rispa, te Aiago wegigo yali sę po odama,
2SA 21:12 tama Devit te Jabes bidi dabego hanu te Gileat tǫ pedaiba pelama, te Sol de Jonatan sigo tigi dili dabe sigi pali, te Solgo ogwa dao. Polobadu te Filistia dabego te Sol me Jonatan si te Gilboa bulu dude elama, tama augwali sigo tigi selama, te deliba sisinibo hanu te Betsanba waligi pali. Tama nosali te Jabes dabe te Betsan hanuba pelama, tama augwali sigo tigi wi selama, tolasa soai dao.
2SA 21:13 Tialima, megi da, Devitgo te po aga sę bidi dabeba olama, tama augwaligo te Sol de Jonatan sigo dili dabe sela palio. Tama augwaligo te a naga olama, me si, te Gibeon dabego elali bidi dabego dili dabe me sisinama, salio.
2SA 21:14 Tama augwali te Benjamin hanigo tǫ te hanu Selaba pelama, tama augwaligo te Solgo dili me, Jonatango dili dali, te Solgo aya Kis muani gų pagede pubulali. Augwaligo te kingo wali po gilama, te tigidali sę ela silai. Tama te elama nosali badu, te Godiba gedu haluasa po wabo bidi dabego te augwa bulu tǫ pedai bugagia ilabo gedu haluasa po wali, tama Godigo augwaligo te gedu haluasa po wabo odai.
2SA 21:15 Te Filistia dabe de Israel dabe si tomode te hwįbo ma hodolali, tama Devit te aga ami bidi dabe dali aiyaba dulama, tama te Filistia dabe dali hwįani. Augwali te boi hwį hwį pelama, tama Devit te bomo kimi meni baso, tama ma hwįabo ąǫ ebeo.
2SA 21:16 Tama te Filistia bidi me deli, aga nogi te Isbibenop, agai te Devit ela muainu yali. Isbibenop te moni moni bidi dabede te bidi me deli aga da. Te agai ene tobolu bobage, augwaligo te brasgo nigai, tama te brasgo sęgę te sela olama, me badu pedai, te tri hap kilogram usu tama. Tama Isbibenopgo te gesi bainat me te kukulude gedelai elaluai.
2SA 21:17 Tiali goli, Abisai, te Devitgo abe Seruiago ogwago, te Filistia bidi sulama, tama aga aselama, te Devit tau sagasali. Tama Abisaigo te Filistia bidi dali hwįnama, tama aga ela muai. Tama te Devitgo ami bidi dabe aselama, tama Devitba bomai po weyu, te tama po wai, “Te dago boi hwįgi pabo sogo, nage da dali munu me aselamuo,” wali. “Nage te da Israelba te ula mabo lam sole tiwai elalubao, tama nago te lam sole ula sula sawainu me elamuo,” te po wai.
2SA 21:18 Nosali te Israel dabego te Filistia dabe dali ma hwįani. Te sogo augwali te bulu Gopde hwįani. Tama Israel bidi me deli, aga nogi Sibekai, te Husa bulu bidi, agai te moni moni bidi dabede te bidi me deli ela muani, aga nogi te Saf dao.
2SA 21:19 Tama gasa sogo ma, te Israel dabego te Filistia dabe dali te bulu Gopde hwįani. Tama Elhanan, te Jareoregim te Betlehem bulu bidigo ogwago te Get hanu bidi Goliat ela muani. Te Goliatgo enego bobobage te ugwa hobolo masin ba te genuai tiwai dao.
2SA 21:20 Tama nosali ma, te Get hanude gasa boi hwįbo ma hodolali. Tama te moni moni genuai bidi dabego te bidi me deli bidali, tama aga te dili bobage bidi mu tama. Te aga nogo dani deli delide te nogo a naga, me badu nogo kibisa deli tama elaluai, tama aga sągą dabe me te tiwai naga elaluali. Aga nogo sągą dani te bidi sese deli olama, me si me si elaluai.
2SA 21:21 Te bidigo te dwai posobo po Israel dabeba wali, tama te Jonatan, te Samago ogwa, te Devitgo amago, te aga ela muai.
2SA 21:22 Te me si me si te Filistia dabe augwa te Get hanu moni moni genuai hani bidi dabe tedu asali. Tiali goli, Devit dali, te aga ami dabego dali, te augwali ela muanio.
2SA 22:1 Te Genuai Bidigo Devit te Solgo nogode, me te tigidali gasa boi bidi dabego nogode, te ma dobola sobaso, tialima Devitgo te balia gagalama weyu, te Genuai Bidiba balia wali.
2SA 22:2 Te baliade te tama po wali, “Genuai Bidi te eno bomai obo dao. Aga te ena geme sesalubo masigi tiwai, tama agai ena te boi bidi dabego nogode ma sai dao.
2SA 22:3 God te genuai masigi tiwai, te ena agaba pelama, te boi bidi dabede geme duala sigi pabo masigi tiwai elalubao. Genuai Bidi te eno sabele tiwai elalu, tama ena te boi bidi dabede geme dualalubo tiwai ebao. Agai te ena ma dobola selama, tama ena tonalubo bomo elalubao. Aga te bomai obo, tama ena dualalubo pesage da. Genuai Bidi, nago ena tau mabo bidi, tama ena dolainu ebo sogo tama nago ena ma dobola sabo dao.
2SA 22:4 Eno Genuai Bidiba gedu haluasa po obaso, tama agai ena tau sali. Tama te boi bidi dabego ena dolainu yali usu ebeo. Dago te Genuai Bidigo nogi ugwaba sao!”
2SA 22:5 “Te isabogo te ena pąde gegali, te wę si genuai pedaliyu, tama ena haluainu yai.
2SA 22:6 Te isabogo ena pąde tola selama, tama ena te gų pageba painu yali. Te umben wago ena tola selama, tama ena te wi pabo usu isiąbo tiwai yalio.
2SA 22:7 Ena haliga sęgę dwai mu ebaso, tama ena gela weyu, Genuai Bidiba i wali. Eno ena Godiba i weyu, te agai ena tau somainu yai. Aga te aga bede bidiyu, tama agai eno gela wabo odali. Tama agai eno gedu haluasa po waboba olo muai.”
2SA 22:8 “Tialima, Genuai Bidigo te eno boi bidi dabeba wado yali. Tama tiyu, agai te tǫ mali dwai mu ilibaso, tama te bulu du dabe me dagalu te aiyǫge page mu yalio.
2SA 22:9 Te Genuai Bidigo gunide hano pedelali. Tama aga pedauwalide sia pedelama, tama nai hauwa ulali. Tama agai te sia dage eneyu, tedela palali.
2SA 22:10 Agai te dagalu dalama, aiyaba dulai. Tama husugu yai pǫ te aga sągą dologode elalubao.
2SA 22:11 Te mobo bidi ensel me deligo aga tolama, tama bola asobo tiwai yaibao. Tama te Genuai Bidi te walide bidiyu, tama bomonama, asesa asobo tiwai gilama ebo dao.
2SA 22:12 Agai te be hulia sabo te aga ugwa be tiwai pedalumainu ilali, tama te tulubagego husugu haowago aga mesegelali.
2SA 22:13 Tiali goli, agai te bulu ula tigidali ilali, tama te sia dage te uladu te buluba teda soali.
2SA 22:14 Genuai Bidi ugwadu bidiyu, tama genuai po dagą mu weyu, te pǫ kulukulu wabo tiwai yali. Te Ugwadu Mu Bidibo Godigo te aga po pusali.
2SA 22:15 Agai te pǫgo ula be sele te aga ene tiwai pedelali, tama agai te boi bidi dabe enebaso, tama augwa wi tedela pai dao.
2SA 22:16 Genuai Bidigo te boi bidi dabeba wado po olama, tama aga haliga sębę te bomai waligo augwali sela sąbo tiwai yali. Tama aga haliga sębęgo te tamu ąį te tigidali sula sąbo tiwai eyu, tama te tǫ dąų walali nai dabe te hanilama pedelalio.”
2SA 22:17 “Genuai Bidi te ugwadu bidiyu, tama te nogo aiyaba munama, tama ena ma dobola sali. Te genuai sigo ena mesegelali, tiali goli agai ena ugwaba kekasa holali.
2SA 22:18 Te eno boi bidi dabe augwaligo bomo mu ebaso, tama eno augwali aiyaba elaluainu ebo usu meni yai. Tiali goli, Genuai Bidigo ena te augwali nogode ma dobola sali.
2SA 22:19 Te enade sęgę elalubo sogo augwaligo enaba hwįagasali. Tiali goli, Genuai Bidigo ena tonaluali.
2SA 22:20 Agai ena tau sobaso, tama ena bugagia bidai. Agai ena godolo mu ebaso, tama agai ena ma sai dao.”
2SA 22:21 “Eno te doloba pai kolesaga wali pobaso, tama tiyu, Genuai Bidigo te wiegi yai nai hauwa enaba mawai. Eno te dwai sę me deli isiąbaso, tama Godigo ena wiegi yai bugagia ilai dao.
2SA 22:22 Eno te Genuai Bidigo bomai po bugagia wali pali. Eno te ena God tudiba munama, tama dwai kolesaga me ebeo.
2SA 22:23 Eno te agai bomai po wali peyu, tama eno agai po te tudiba me mubeo.
2SA 22:24 Eno dwai sę yali me deli elalubeo. Eno te ena bilibo te bugagia tonaluali, tiyu eno dwai sę me deli idali weyu tama tiali.
2SA 22:25 Tama tiyu, Genuai Bidigo eno doloba pai kolesaga te homu kone palama, tama agai wiegi yai kolesaga enaba wei ponani, magi baso meni, ena te aga gedude magi dwai sę isąyu, te wiegi yai mu bidali.”
2SA 22:26 “Genuai Bidi, te bidi mego nage me tagalisiąbaso da, teda nago aga me tagalugobeo. Te bidigo doloba pai kolesaga eyu, tama dwai sę me elalusiąbaso da, teda nago agaba te doloba pai kolesaga naga wei ponobo dao.
2SA 22:27 Te bidi me deligo te wiegi yai kolesaga wali peyu da, teda nago agaba te nago wiegi yai kolesaga ola mobao. Tiali goli, bidigo te dwai kolesaga wali pobaso da, teda nago agaba dwai kolesaga wei ponaibao.
2SA 22:28 Nago te augwa digi augwa aiyaba elalubo we bidi ma sabo da. Tiali goli, nago te hagoma ebo we bidi dabe aiyaba elalubo dao.”
2SA 22:29 “Genuai Bidi, nago digi naga te enade ula da, tama nago enade te be hulia sai elalubo te sela sąbo dao.
2SA 22:30 God, te nago ena tau sobaso da, teda eno te genuai boi bidi hani te aiyaba elalubaso, te usu yaibao. Tama nago ena dąų walobaso da, eno te hanu genuai obo bolobaso, te usu yaibao.
2SA 22:31 Te Godigo kolesaga wiegi yai mu elama, tama tigidali dolo mu elalubao. Tama agai po te mu po naga wabo da. Genuai Bidi te hwįbo sabele tiwai elama, tama agai te agaba pabo bidi tigidali bugagia tonalu, tama augwali te boi bidi dabede geme wi dualalubo dao.”
2SA 22:32 “Genuai Bidi naga te God mu da. Agaduba deligo naga da, te genuai masigigo bagualubo tiwai elalubao.
2SA 22:33 God aga te ena geme duala sabo bomai pesage elalubo. Agai ena bilabo sunumi te wiegi yai nigali.
2SA 22:34 Agai ena bugagia bilimainu ilali, te bulu uni hasa te bulu du bagede bilibo tiwai eyu, tama ena tulaluabo te usu me egobeo.
2SA 22:35 Agai ena te hwįbo ola mani, tama eno nogo bomo ilali. Tama eno augwaligo te brasgo nigali enesigi te balibi kegeyu, enebo usu yaibao.
2SA 22:36 Genuai Bidi, nago ena te boi bidi dabego nogode ma dobola sali. Nago enabolo te naga sabele mobaso, tama ena tede geme duala sai. Nago ena tau sobaso, tama eno genuai nogi te we bidi dabe gedude elaluali.
2SA 22:37 Nago enaba wiegi yai sunumi mobaso, tama eno sągą te bedege me ebeo. Ena pobadi, te ena me tula mubeo.”
2SA 22:38 “Eno te boi bidi dabe pobeasa pelama, tama augwali dolali. Eno augwali dwai dene mu menama, dolama, tama eno augwali tigidali silalio.
2SA 22:39 Eno augwali tigidali enama, tama augwali tulaluali. Augwali te eno sągą pąde pila muani, tama augwali ma hodalubeo.
2SA 22:40 Nago te hwįbo bomo enaba mani. Tama nago te boi bidi dabe eno nogoba mawai, tama eno augwali aiyaba elaluai.
2SA 22:41 Nago te boi bidi dabe enade wi pomainu ilali, tama eno te ena godolo isiąbo bidi dabe te eno augwali ela silalio.
2SA 22:42 Augwaligo te augwali tau sabo bidi meba gegali, tiali goli bidi me bidibeo. Tama augwaligo Genuai Bidi nageba gela wali, tiali goli te nago augwaligo gedu haluasa po wali te me odobeo.
2SA 22:43 Eno te augwali mu dolama, tama augwali te tǫ hogomu tiwai pedelali. Eno augwali agalama, tama augwali aiyaba elaluali, te ena pu elalubo nagame yai tǫ elalubo sunumidu pabo tiwai yali.”
2SA 22:44 “Te ena we bidi dabego enaba boi bidi ebo sogo, nago ena tau sobaso, tama augwaligo ena me dolobeo. Tama nago ena te gasa we bidi tonalubo bidi me bidimainu ilali. Te eno augwali konesiąwani we bidi, megi augwali te ena dologode bidibao.
2SA 22:45 Te gasa bulu tǫ pedai we bidi dabego enade wi elama, tama enaba kidu sugunagasali. Augwaligo eno genuai nogide po odama, tama polo tama augwali ena dologoba pali.
2SA 22:46 Augwa bomo haga wali, tama augwa bomai hanu tagalama, tama augwali didibili dali enaba asai.”
2SA 22:47 “Genuai Bidi sesemane sogo bidibao! Aga te genuai masigigo ena bobegelalubo tiwai yali, tama dago aga nogi ugwaba sao. Godigo ena tau siyu, tama ena ma sali, tama dago aga genuai nogi ugwaba sao.
2SA 22:48 Godigo te eno boi bidi dabego dwai kolesaga wei ponani. Tama agai te gasa hani bage te ena dologoba muani.
2SA 22:49 Tama agai ena te boi bidi dabego nogode ma dobola sai. Genuai Bidi, nago enaba te we bidi dabego gedude genuai nogi manio. Nago ena tau sobaso, tama te hwįbo bidi dabego ena me ela mubeo.
2SA 22:50 Tama tibaso, te gasa we bidi hani tomode te eno nago nogi ugwaba saibao. Tama eno nago nogi ugwaba sabo balia obao.”
2SA 22:51 “Genuai Bidigo ena Devit te king pedalumainu nigilali. Tama sesemane sogo eno te boi bidi dabe aiyaba mu elalumainu ilali. Sesemane sogo agai ena godolo mu eyu, tama agai eno hani nosali pedalubo bage me te godolo homu yaibao.”
2SA 23:1 Te e da te Devitgo po silagasu pusali po. “Ena Devit, te Jesigo ogwa, eno te tama po wai. Te Jekopgo Godigo ena te king nigilama, te ena bidibao, tama agai enabolo te we bidi gedude genuai nogi mawai. Tama eno te Israel dabego wabo wiegi yai balia hauwa asęani. Eno te tama po obao.”
2SA 23:2 “Te Genuai Bidigo Mobo Bidigo eno pedauwalide te po pusali. Eno te dagebolo wabo po te agai enabolo pusa mani.
2SA 23:3 Te da Israel dabego God te genuai masigi tiwai elama, tama da bobegelalubao. Agai enabolo te tama po wai, ‘Te king God dologode bidiyu, tama te we bidi doloba pai kolesagade tonalubaso da,
2SA 23:4 teda te we bidi dabego agaba wiegi yai homu pemene eyu, augwa te kigamude giliga bugagia naniyu, tama te pǫgo te ula mesegelisiąbaso, te wiegi yai homu pemene ebo tiwai yaibao. Tama te tulubage nosali silibo side, te giligago te nosa ula ilali.’ Eno te po wai.”
2SA 23:5 “Tama Godigo te eno hani sibi bomo ilama, bidimainu ilali, magi baso meni, agai te bomai po me deli te ena dali dąų wali, tama agai te dąų wali po te togolama, me ma bologobeo. Menio. Teda te dąų wali po te sesemane sogo elalueibao. Te eno godolo ebo nai tigidali, te Godigo ena mawaibao. Tama agai te ena te sesemane sogo ugwaba ela holomainu ilali.
2SA 23:6 Tiali goli, te dwai bidi dabe augwali te sesani yai bono elalubo tiwai yali, te bidi dabego sela sąwaibao. Te bidi mego te tobage sesane yai bono te nogode tolalubaso, te usu me egobeo.
2SA 23:7 Te bidi mego te bono sela sąwainu da, agai te ain dage me, te ene sigi me selama, tama te bono dabe elalubo pesagede te deliba sisinama, tama augwali te siaba ulao. Tama augwali tigidali te sia saibao.” Te da te Devitgo po silagasu pusali po dao.
2SA 23:8 Te Devitgo bomai ami bidi dabego nogi te tama elaluali. Josep Basebet te Takemon hani bidi, aga te nogi elalubo hwįbo bidi selago polalubo ofisa bidi dao. Me sogo deli te Josep Basebetgo te sesemone tolalu, tama te 800 boi bidi dali hwįnama, tama agai tigidali ela muai.
2SA 23:9 Eleasar, te Dodogo ogwa, aga te sela wali genuai nogi elaluali ami bidi dabede te si wali polalubo bidi me deli dao. Aga te Ahohi hani bidi dao. Me sogo deli Eleasar te Devit dali bidai, tama te Israel dabego te Filistia dabe te hwįabo madiba sisinibo suali. Tama te Israel dabego te Filistia dabeba te hwįainu diana sali, tiali goli te Filistia dabe asobaso, te Israel ibaba habu bulu kilasa pai.
2SA 23:10 Eleasar aga deli naga te bomo elama dolalu, tama te Filistia dabe ela mubo sę yalio. Tama aga nogo tobalu elama, tama aga nogo te ge hwą poude holalu tolalubo tagalobeo. Te sogo Genuai Bidigo te Filistia dabe aiyaba mu elalualio. Tama nosali, te Israel dabe te Eleasarba ma begasa asali, tiali aga te Filistia dabe ela muani augwaligo suali. Tama sę me deli naga elaluali. Te isali Filistia bidi dabego hwįani doado bage sabo sę elaluali.
2SA 23:11 Sama, te Agigo ogwa, te Harar bulu bidi, aga te genuai nogi elalubo bidi dabede te sela wali bidi aga da. Me sogo deli te Filistia dabe te Lehi buluba sisinagasai, te bidi dabego tągabi bulai gi me deli pąde elaluai. Tama te Israel dabego augwali bidalubo sulama tama wi pai.
2SA 23:12 Tiali goli, Sama te wi elama, me kilasa pabeo. Menio. Aga te gi tomode dolalu, te Filistia dabe dali bomonama hwįani, augwaligo te tǫ sidali weyu te tama tialio. Tama agai te Filistia dabe ela muani, tama te tiali kolesagago te Genuai Bidigo te Filistia dabe aiyaba mu elaluai dao.
2SA 23:13 Te Devitgo ami bidi dabego tobolu bidi meba elaluali, tama augwa te hani dabe nogi poyu, te 30 bomai ami bidi dabe da po wali. Tama me sogo deli Devit te genuai tǫ dedage te Adulam bulu dude bidibadi, tama te 30 wali bomai ami bidi dabede te ami bidi me selago te Devit aga sugi pali. Te nai inilama tau yai sabo sogo tama tiali. Tama te sogo me te Filistia ami bidi meba te Refaim bulu odogoba dulama, tama augwa bidibo pesage tede nigilama bidali.
2SA 23:14 Te sogo Devit te bomai geme dualalubo pesagede bidali, tama te Filistia ami dabego te Betlehem hanu salio.
2SA 23:15 Tama Devitgo te Betlehemde elalubo wiegi yai węba ma homu kone palama, te tama po wai, “Homu dene mu ebao,” wali, “te Betlehem hanu sunumi pąde elalubo ulu wę meba tugi sogo da, teda ena wiegi yai homu pemene mu igi dao,” wali.
2SA 23:16 Te bomai ami bidi selago te tama po wabo odama, tama augwali hogodama, palio. Te Filistia dabego te Betlehem hanu tonalubo te wi homu me isiąma tagalali, te bidi selago augwali dega palama, tama augwali pelama, Devitgo te po wali ulu wę tugi pai. Tama augwa te wę selasa aselama, te Devitba magasali. Tiali goli, aga te wę tuabo homu me ebeo. Menio. Agai selama, tama Genuai Bidiba te ofa tiwai eyu, gelali.
2SA 23:17 Tama agai te tama po wai, “Genuai Bidi, eno te wę me tugobeo. Te eno tubaso da, teda eno te bidi dabego kaneme tubo ąǫ yaibao, magi baso meni, te augwali te wę sigi painu pali sogo, te isibogo augwali mu gegali digi tama dao,” wali. Tama tiyu, Devitgo te wę me tubeo.
2SA 23:18 Abisai, aga te 30 bomai ami bidi dabego polalubo ofisa bidi da wali. Aga te Joapgo ama, tama augwa si ida te Seruia dao, te we da te Devitgo abe dao. Me sogo deli sogode Abisaigo te aga sesemone tulama, tama te 300 boi bidi dali hwįnama, tama tigidali ela muai. Tama aga te sela ami bidi dabego sali genuai nogi tobage te agai me salio.
2SA 23:19 Agai te genuai namba mu siyu, tama te genuai nogi elalu, te augwaligo polalubo bidi dabe bidali te agai augwali ela soali. Tiali goli, aga digi aga te ami bidi selade te aga deli me kisalubeo.
2SA 23:20 Tama Benaia, te Jehoiada te Kapsel hanu bidigo ogwa, aga me te bomai ami bidi me deli dao. Tama hauwa sogo agai te boi bidi dabe dali bomonama, hwįani. Me sogo deli agai te Moap dabe bomai ami bidi si ela muani. Tama me sogo deli sogode te talua ge tulubage te tǫba tulubo side, Benaia te genuai tǫ dedage me deli aiyaba dulama, tama te bomai hasa laion me deli ela muani.
2SA 23:21 Tama gasa sogo agai te Isip moni dobo dwai bidi me deli ela muani. Te bidigo te sesemone tolaluali, tiali goli Benaiago te ni dage selama, tama aga pąba pelama, tama aga dali hwįani. Tama Benaiago te bidigo sesemone nogode dobola selama, tama aga te sesemonego aga ma enema, ela muai.
2SA 23:22 Benaiago te bomai sę dabe yali, tama tiyu, agai te ami bidi selago te genuai nogi elalubo te tobage genuai nogi agai me salio.
2SA 23:23 Agai te sali genuai nogigo te gasa bidi sese olama, nogo si ami bidi dabego te sali genuai nogi te aiyaba elaluali, tiali goli aga te genuai nogi elalubo ami bidi selade te aga deli me kisalubeo. Devitgo te Benaiago te king tonalubo ami bidi dabe tonalumainu nigilali.
2SA 23:24 Te e da te bidi sese olama, nogo si te bomai ami bidi dabe nogi te tama tiwai. Asahel, te Joapgo ama, Elhanan, te Dodogo ogwa, te Betlehem hanu bidi,
2SA 23:25 Sama de Elika si, te Harot bulu bidi si da,
2SA 23:26 Heles, te Pelet hanu bidi, Ira, te Ikesgo ogwa, te Tekoa hanu bidi,
2SA 23:27 Abieser te Anatot hanu bidi, Mebunai te Husa bulu bidi da,
2SA 23:28 Salmon te Ahohi hanu bidi, Maharai te Netofa hanu bidi,
2SA 23:29 Helep, te Banago ogwa, te Netofa hanu bidi, Itai, te Ribaigo ogwa da, te Benjamingo hanigo tǫ te Gibea hanu bidi,
2SA 23:30 Benaia te Piraton hanu bidi, Hidai te Gas bulu du te odogo bulu pąde bidi da,
2SA 23:31 Abialbon te Araba hanu bidi, Asmavet te Bahurim bulu bidi,
2SA 23:32 Eliaba te Salbon hanu bidi, Jasengo ogwa dabe, Jonatan,
2SA 23:33 Sama te Harar bulu bidi, Ahiam, te Sarargo ogwa, te Harar bulu bidi,
2SA 23:34 Elifelet, te Ahasbaigo ogwa, te Maka bulu tǫ pedai bidi, Eliam, te Ahitofelgo ogwa, te Gilo bulu bidi
2SA 23:35 Hesro te Karmel hanu bidi, Parai te Arap bulu bidi,
2SA 23:36 Igal, te Soba hanu bidi Natango ogwa, Bani te Gat hani bidi,
2SA 23:37 Selek te Amon bulu tǫ pedai bidi, Naharai te Berot hanu bidi, aga te Joapgo hwįbo sesemone ene dabe tolasa bilali bidi dao,
2SA 23:38 Ira me Garep si te Itra hani bidi da,
2SA 23:39 Uria te Hit hani bidi da. Te ami bidi dabego namba te bidi sese deli olama, nogo si olama, a naga me badu si, te tigidali usu nama te 37 ami bidi dabe dao.
2SA 24:1 Me sogo deli sogo ma Genuai Bidigo te Israel dabeba wado elama, tama agai te Devitba homu kolesaga menama, te Devitgo augwaliba te sęgę sesemainu yai. Genuai Bidigo Devitba te tama po wai, “Nage pelama, te Israel me Juda we bidi augwali nedegi pao,” wai.
2SA 24:2 Tialima, Devitgo Joapba te tama po wai, te aga ami bidi dabego polalubo ofisa bidi dabeba me te tama po wali, “Nago naga ofisa bidi dabe selama, tama pelama, te dago hani Israel we bidi tigidali nedegi pao,” wai. “Dage te bulu tǫ pedai tigidaliba pelama, te Dan hanu te not tǫ pedai badu, me te saut tǫ pedai, te Berseba hanu pedai badu usu nigi pelama, tama augwali nedao,” wai. “Eno te we bidi dabego namba koneainu obao,” wali.
2SA 24:3 Tiali goli, Joapgo te tama po kingba wei ponani, “King, eno homu te God, te nago Genuai Bidigo, te we bidigo namba te ugwaba mu holomainu ilama, tama augwali te umabo hauwa we bidi mu pedalumainu yao. Tama eno homugo te nage bidibadi, te pedalubo nago sumainu homu ebao. Tiali goli, te we bidi nedebo sę te dago sę meni, tama tiyu magi baso nago te dwai kolesaga yabo homu ebawe?” wali.
2SA 24:4 Tiali goli, kingo bomo eyu, te Joap aga ofisa dabe daligo te po wali pao wai. Tama tibaso, augwa te king taga peyu, tama augwa pelama, te Israel hani bage nedegi palio.
2SA 24:5 Tialima, augwa te wę Jordan nogelama, tama augwa te Aroerba sabolali, te hanu te Gatgo hanigo tǫ te odogo malu tomode elaluali. Tama augwa bidigi pali pesage te hanu tǫ te saut pedai badu nigilama bidali. Tama nosali augwa te Aroer tagalama peyu, tama te not tǫ pedai badu pelama, tama te hanu Jaserba sabolai dao.
2SA 24:6 Nosali ma augwa te Jaser taga peyu pelama, te Gileat bulu tǫba pali, te Tatimhotsi te tǫ pedai badu palio. Tialima, augwa te badu bidali tagalama, tama augwali te bulu Danjanba sabolali, tama augwa baguasa pelama, tama te Saidon bulu, te giliga dega sigulubo pedai badu, teba sabolali.
2SA 24:7 Tama augwali te saut tǫ pedai badu ma begasa aselama, tama te Tair hanuba pedelagasali, te hanu te bobegelali masigi obo te bomai mu elaluali. Tama nosali augwa te Tair hanu tagalama, tama augwa hogodama, te Hivi dabego me Kenan dabego hanu tigidaliba pali. Tama nosali mu augwali te Juda tǫ pedai saut badu te Berseba buluba sabolali.
2SA 24:8 Augwa te tigidali bulu tǫ pedai bila usu nama, tama augwa te moni hanu Jerusalemba ma asai. Augwali te bulu tigidali usu nama bilali, te polua a naga olama, me si me si, te 9 polua me te Sadede sela tama usu nama bilali.
2SA 24:9 Te augwali sabolali sogode, tama Joap pelama, te bilali po tigidali te kingba waligi pali, “Israelde te ami sę yabo bidi te bidi sese umabo mu, te 800,000 bidi elaluali, tama te Judade te umabo bidi sese mu te 500,000 bidi elaluali,” Joapgo Devitbolo te po wali.
2SA 24:10 Nosali Devit aga te yali sęde homu sęgę ebaso, tama aga Genuai Bidiba gedu haluasa po weyu, te tama po wai, “Ena te homu mu puna peyu, tama eno te bidi dabe nedalio. Tama eno te tiali kolesagade te eno dwai sę mu yali. Tiali goli, Genuai Bidi, eno nageba hanalu obao, eno te yali sęgę te nago sela sąyao,” wali.
2SA 24:11 Tiali goli, te side digi tama, Genuai Bidigo Gatba te po walali, te Devitgo profet bidi, te agai te tama po Devitba wagi pomainu yai. “Ena Genuai Bidi, eno po dolo obao, eno te sunumi sela nageba mobao, tama naga digi te augwali selade te me deli sa muao. Tama mena sunumi nago nigilali, te naga eno wali peyu, tama nageba te sę pedalumainu ilaibao,” wali. Te nosali badu kigamude Devit hodalubo si da, tama te
2SA 24:13 Gatgo aga sugi pali, tama te Genuai Bidigo po agaba pusali. Tama agai Devitba te tama po hanalu wali, “Genuai Bidigo homugo te nago te sela pode te po me deli nago te dąį ilao. Nago homugo te genuai nasi elalubadi, te kibu be a naga olama, me si, te tama bidabo homu usu yaibawe? Ma, nago homugo te boi bidi dabego dageba hwįagasomainu homu elama, tama dage augwalide wi pelama, te polua sela bidibaso te usu egowe? Ma, nago homugo te nago bulu tǫ pedai we bidiba te dwai gasi te sela sogo pedalumainu ebaso, te nago homugo usu yaibawe? Nago homu kone bugagia palama da, te nago homugo wei ebo po te enabolo obaso da, tama eno nago te po selama, te Genuai Bidiba ma begasa paibao,” te profet bidi Gatgo te po wali.
2SA 24:14 Tialima, Devitgo Gatba te tama po wali, “Nago enabolo te wali pode te ena homu sęgę mu ebao. Tama tibaso, Genuai Bidigo digi te agai mena sę te dabolo yabo homu ebo te sę emainu yao, magi baso meni, aga te olo tau sabo wiegi yai kolesaga sesemane sogo ebo God dao. Tiali goli, te eno homugo te boi bidi dabego da dolomainu ebo te eno homugo usu meni yai,” wali.
2SA 24:15 Tama tialima, Genuai Bidigo te dwai gasi te Israel dabeba tagala palali, te sogo kigamu digi gagalama, tama agai te dąį ilali bodoluba usu nigi pali. Tama te bidi sese umabo bidi mu, te 70,000 we bidi isali, te tigidali bulu tǫ pedai te Dan hanu te not tǫ pedaiba dąį igi pelama, tama te hanu te saut te Berseba, te tama bulu tǫ pedaiba te gasi usu nigi palio.
2SA 24:16 Tama te we bidi dolobo sę ebo mobo bidi ensel, aga te Jerusalemba sabolama, tama te Jerusalem dolainu sisi elaluali. Tiali goli, Genuai Bidigo te dwai sę te we bidiba pedalubo sęde te homu dene yali. Tama aga homu hasegelama, tama te mobo bidi enselba te tama po wai, “Tagalao, te usu dao,” wai. Te sogo te mobo bidi ensel te augwa te wit nai ge siyu, tama te bo wali dabe sela sąbo pesage me deli pąde te dolaluali. Te tǫ pedai te Arauna, te Jebus hani bidi me deligo tǫ elaluali.
2SA 24:17 Devitgo te mobo bidi ensel sulama, tama agai Genuai Bidiba te tama po wai, “Eno naga tama eno te dwai sę yali, tama eno dwai sę genuai yalio. Tiali goli, te we bidi dabe augwali, augwa te mena dwai sę ebaso, tama nago augwaliba te dene maniwe? Nago te ena me, ena we wai, dabolo naga te dene magi sogo da, usu igi tama dao,” wali.
2SA 24:18 Tama te sogode naga te profet Gatgo te Devit sugi pelama, tama agaba te tama po wai, “Tama nage te Jebus hani bidi Araunago te nai wit sabo madi, te pesage te bulu duba ugwa holama, tama nago te Genuai Bidigo alta me deli nigao,” te po wai.
2SA 24:19 Tialima, Devitgo te Genuai Bidigo po wali pali, te Gatgo agabolo po wali gilama, tama aga te nai wit sabo pesageba palio.
2SA 24:20 Tama Arauna te sę ebo pesagede bidiyu, tama aiyaba tonono ebadi, tama te king me aga ofisa dabe dali augwali te agaba asobo suali. Tama aga te augwali dali deliba gesabidi unulama, tama aga te king pąba kidu sugunigi pelama, tama te tobolu basi gulama, te kingba genuai nogi mayu tama tialio.
2SA 24:21 Tama aga te tama po wai, “King, magi baso nago ena suagasu asaliwe?” Tama Devitgo po wei ponoyu, te tama po wai, “Te eno homugo megi te nago te wit nai sabo pesage tǫ abelabo homu ebao,” wali. “Eno te Genuai Bidigo alta te pesagede nigabo homu yali, tama te we bidiba pedelali te genuai gasi silimainu yaibao,” wali.
2SA 24:22 Tialima, Araunago Devitba te tama po wai, “King, nago eno te tǫ abelainu wabo, te eno homugo tagala homu ebao. Te nago tama sao. Tama nago te ofa yabo te gasa nai me sainu da, te sao. Nago te ofa eyu, te tigidali siago domainu ulabo te bulmakau dabe me sao,” po wai. “Tama nago te wit bo paulubo ni name me, te bulmakau sigo sę emainogo magede poliali ni nami me selama, tama nago te sia nogonama, tama te ofa ebo nai te siaba ulao,” te po wali.
2SA 24:23 “King, te tigidali doado bage te eno nageba mobao.” Tama Araunago te po ma weyu, te tama po wai, “Eno homugo te God, nago Genuai Bidigo, te nago agaba ofa ebode te wiegi yai homu pemene emainogo yao.”
2SA 24:24 Tiali goli, kingo agaba te tama po wai, “Te eno ena digi te sę dene isiąwai nai te eno olo selama, te Genuai Bidiba te ofa tiwai eyu magobeo. Tama tibaso, eno nago te doado bage abelaibao,” wali. Tialima, Devitgo te tǫ pedai me, te bulmakau dabe dali, te silva mone bidi sese te 500 kinago abelali.
2SA 24:25 Tama Devitgo te Genuai Bidigo alta me deli te pesagede nigilama, tama te siago tigidali dabo ofa me, te God dali deli homu pedalubo ofa me, yalio. Tama nosali, Genuai Bidigo te bidi dabego augwa bulu tǫ pedai te bugagia wiegi yai emainu, te gedu haluasa po wabo odali. Tama agai te Israelde elaluali te gasi silalio.
1KI 1:1 Megi da, king Devit te monu dabe mu pedelalio, tama sesemane sogo aga tigi te kedau yali. Tama augwaligo te ugwa blanket dabe selama, aga banulani, tiali goli te blanket dabego aga tigi dwasianu posolo me ilibeo. Menio.
1KI 1:2 Tama tiyu, aga ofisa bidi dabego agabolo te tiwai po wai, “King, dago homugo te nage dali bidiyu, te nage tonaluabo gesi wegi we me deli te gegabo homu ebao. Aga te nage dali pibaso, te nage tigi posolo ilimainu yaibao,” wai.
1KI 1:3 Tama tialima, augwali te Israel tǫ pedai tigidaliba biligi pelama, te gasa sawi yai sawi wegi ogwa we me deli gegegi pali. Tama augwaligo te Sunem bulu wegi Abisak sulama, tama aga te kingba selasa asali.
1KI 1:4 Abisak aga te gasa sawi yai wegi mu dao. Tama agai te king bugagia tonalu, tama aga tau sali, tiali goli kingo te aga dali gagali me ebeo.
1KI 1:5 Adoniya aga te Devit de Hagit dali sigo ogwa da. Te Hagitgo aga ame nani, te Apsalomgo idago te Apsalom bolo ame nai madi te nosali aga ame nani. Adoniya te gasa sawi yai gesabidi yai bidi mu da. Te aga ogwa bidi bidali sogode gagalasa, te megi sogoba usu nagasu, te aga ayago aga dali wado po weyu, ma te aga dodoliyu me ebeo. Tialima megi da, aga te king pedelabo homu elama, bomo yali. Tama agai te karis meba me, hos me, te karisdu polasa pabo bidi te bidi sese si olama, nogo si bidi, te 50 bidi me te sogo te aga gasaba painu te tama bidi selama pai.
1KI 1:7 Agai te Joapba po migi pali, te Seruiago ogwa, tama te pris Abiatar dali me te po olama, tama augwali sigo aga dali te deli homu yalio.
1KI 1:8 Tiali goli, pris Sadok me Benaia, te Jehoiadago ogwa, tama te profet Natan me, Simei me, Rei me, te king tonalubo ami bidi dabe me, augwaligo te Adoniya dali deli homu me ebeo.
1KI 1:9 Me sogo deli sogode te Adoniyago te ofa yainu, tama aga te augwa nogi ebo bulu meba pali, te Masigi Hasamani wai, te dwasianu wę Enrogel pąde elaluali. Agai te sipsip dabe me, te omai bulmakau me, te nisai bulmakau wai me elama, tama te kibu dabe augwali te Godiba ofa ilali. Te aga ofa yainu ebo sogo, agai te kingo gasa ogwa dabe tigidaliba, me te kingo ofisa te Juda dabe te po ola toliyu, tama agai augwaliba hanalu, te ofa ebo genuai nai ulubo madiba asao po wali.
1KI 1:10 Tiali goli, agai te profet Natanba me, Benaia me, te king tonalubo ami bidiba me, te aga ama Solomonba me, te po me ola tolobeo.
1KI 1:11 Tialima, profet Natan te Solomongo ida, te Batseba, bidibo madiba pelama, tama agabolo te tama po wai, “Adoniya, te Hagitgo ogwa, te aga digi te king pedelainu ebao, tama king Devitgo te sę ebo me konebeo. Nago te tebo sę ebo po odaliwe, ma meniwe?
1KI 1:12 Te augwaligo nage dali, te nago ogwa Solomon dali elebo te nago hagela homu ebaso da, teda nago eno te e wabo po wali pao,” po wai.
1KI 1:13 “Nage te king Devitba polo pelama, tama agabolo te tama po wao, ‘King, polobadu nago enaba te bomai po dąų waliyu, te eno wai Solomongo te nago sę yali pesage selama, te king pedelaibao wali. Tiali goli, magi baso tama megi da te Adoniya king pedelainu ebawe?’ Nago te po Devitbolo wao.
1KI 1:14 Tialima, Batseba, nago te king Devit dali po midubadi, te ena tomoba asiyu, tama nago pode eno te mu po dao waibao,” Natango te po wali.
1KI 1:15 Tialima Batseba pelama, te king aga pibo be habuba sugi pali. King te monu dabe mu yai digi, tama Abisak, te Sunem bulu wegigo, te aga tonalubo sę yai dao.
1KI 1:16 Tama Batsebago te king pąba tobolu basi gulubaso, tama kingo agaba te tama po hanalu wali, “Nago magi nai godolo ebowe?”
1KI 1:17 Tialima, Batsebago agabolo te po wali, “Eno king o, polobadu nago digi bomai po me deli te ena dali dąų walali, te dena Genuai Bidi Godigo nogide te tama po wali. Nago bomai po dąų waliyu, te eno ogwa Solomongo te nage hasegelama, tama te king pedelama, tama te nage king bidali siade dulaluaibao po wai dao.
1KI 1:18 Tiali goli, megi Adoniya te king pedelalio, tama nago te sę ebo konebe dao.
1KI 1:19 Tama agai te bulmakau omai hauwa, me te nisali bulmakau wai hauwa, me te sipsip hauwa badi te elama, tama te ofa yali. Tama agai te nago ogwa tigidaliba, me te pris Abiatar, me Joap, te ami bidigo polalubo ofisa bidiba te po ola tolobaso, tama augwali agai te nai ulubo madiba pali. Tiali goli, agai te Solomonba hanalu, te augwali dali pina po me wabeo.
1KI 1:20 Eno king, te odao. Te Israel we bidi tigidaligo te nageba digi te tonalu, te dego mu nage hasegelama, te king pedelabo po nago digi wabo te tonalubao,” te po wai.
1KI 1:21 “Te nago augwaliba megi po walisiąbaso da, teda nage isai madi da, te bidi dabego ena dali me eno wai, Solomon, da si te bidi me we dwai subo tiwai eyu, tama augwaligo da si ela muaibao,” Batsebago te tama po wai.
1KI 1:22 Batsebago po odubadi, tama te profet Natan te kingo beba sabolagasalio.
1KI 1:23 Tialima, te kingo sę ebo bidi dabego te kingba te po walali, “Profet Natan aselama, te nage suagasainu ebao,” wali. Kingo usu da po obaso, tama Natan te be tomoba pelama, tama kidu sugunama, tama te king pąde te aga tobolu tǫba basi gulalio.
1KI 1:24 Tama Natango Devitba te tiwai po wai, “Eno king dao, te nago po obaso, tama te Adoniyago te nago sę yali pesage selama, tama te king pedelama, tama nage te king dualalubo sia saide bidimainu homu eba, agawe?
1KI 1:25 Magi baso meni, megi te sogode naga Adoniya te me badu me pelama, tama te bulmakau hauwa me, sipsip me, te nisali bulmakau wai dabe me, te hauwa elama, tama agai te Godiba ofa igi palio. Tama agai te nago ogwa dabeba hanaluyu, tama te ami ofisa dabeba me, te pris Abiatarba me hanalu elama, te aga dali nai tuagasao po wai. Tama megi da, augwali te nai me wę me tubo sę eyu, tama te Adoniyaba i weyu, wiegi yai homu pemene ebo po te tama waibao, ‘Adoniya te bobage sogo king bidimainu yao,’ po obao,” wali.
1KI 1:26 “Tiali goli, agai te enaba me, te pris Sadokba me, Benaiaba me, te Solomonba te po me ola tolobeo.
1KI 1:27 Tama king, magi yaibawe? Nago te sęde usu da homu yaiba, agawe? Te tiyu da, teda magi baso nago te naga ofisa dabeba te po waliyu, te bidigo nage hasegelama, tama te king pedelaiba po wai meni dawe?” profet bidi Natango Devitbolo te po wali.
1KI 1:28 Tialima, king Devitgo te sę bidi dabeba te po walama, te Batseba i olama ma asao po wai. Batseba aselama, tama te king pąba dolagasali.
1KI 1:29 Tama kingo agabolo te tama po wali, “Te Sesemane Sogo Bidibo Genuai Bidigo, agai ena tau selama, tama ena te tobage tigidali sęgęde ma dobola sai dao.
1KI 1:30 Tama agai nogide te eno mu po nageba obao, megi e sogode naga eno te polobadu nage dali te Israelgo Genuai Bidi Godigo nogide te nage dali dąų walali bomai po te usu niba kadu weyu, usu naibao. Eno dąų wali bomai po te tama tiwai, te nago ogwa Solomongo eno sę yali pesage te hasegelama siyu, tama ena te king bidali sia saide bidaibao po wai dao,” wali.
1KI 1:31 Batsebago te po odobo si da, teda te aga kidu sugunama, tama tobolu basi gulama, tama Devitba te tama po wai, “King, nage eno genuai bidi, tama eno homugo nage sesemane sogo nage bugagia bidimainu homu ebao,” te po wai.
1KI 1:32 Tama te king Devitgo te sę bidi dabe augwaliba te po walali, “Dage pelama, te Benaia, me pris Sadok, me profet Natan, te augwali i olama, tama augwaligo ena suagasa po walao.” Te sela bage asobo si da,
1KI 1:33 teda te kingo te tama po augwaliba wali, “Dagego te Solomon te eno donkiba duagulao po walama, tama dage dali, te ena tonalubo ami bidi dabe daligo, aga te wę Gihonba selasa piąo,” po wai.
1KI 1:34 “Tama tede, te pris Sadok me profet Natan sigo te wel te Solomon toboluba gelao, te aga te Israel king pedalumainogo te tama tiao. Dagego te sę ela silibo si da, teda dagego te biugel bu weyu, tama te tiwai i waiąo, ‘Solomon da, te bobage sogo king bidaiba,’ po waiąo,” po wai.
1KI 1:35 “Tama dage aga wali ma aselama, tama aga te ena king bidali sia saide duayagasaibao. Tama agai eno sę yali pesage te hasegelama, tama te king pedelaibao, magi baso meni, te eno aga te Israel me Juda hani bagego king pedalumainogo nigilali,” Devitgo te po wai.
1KI 1:36 Tama Benaiago kingba te tama po wai, “Wiegi yai dao, te dago homugo te God, dena Genuai Bidigo, te nago po wali te tigidali sę dabe te tiwai tama pedalumainu yaibao.
1KI 1:37 Tama Genuai Bidi te Solomon dali bidiyu, te aga tau somainu yaibao, te agai nagede yali gilama tiwai emainu yaibao. Tama me te Godigo Solomon te wiegi yai bomai king pedalumainu elama, tama te genuai nogi elalu, te nago genuai nogi elaluali te aiyaba elalueibao,” wali.
1KI 1:38 Tama tialima, te Sadok, me Natan, me Benaia, me te king tonalubo ami bidi dabe dali, te augwali Keret me Pelet dabe, augwaligo te Solomonba po obaso, tama aga te king Devitgo donkide duagulama, tama augwaligo aga te wę Gihonba odasa pali.
1KI 1:39 Sadok te Genuai Bidigo ugwa beba pelama, tama te sipsip gąųde augwa te oliv wel tabia muai te sali. Tama augwali te wę Gihonba sabalobo sogo, agai te kibu gąų selama, tama te wel meba te Solomongo toboluba gelali, te aga king pedalumainu sa munama nigilali. Tama augwa te biugel bu obaso, tama tigidali we bidigo te tiwai i wali, “Solomon te bobobage sogo king bidaibao,” po walio.
1KI 1:40 Tigidali we bidigo te Solomon wali peyu, te Jerusalemba ma pepelayu, tama augwa wiegi yai homu pemene mu eyu, tama i weyu, te ona eliyu yali. Augwaligo i wabo te bomonama mu obaso, te tǫ mali ebo tiwai usu yalio.
1KI 1:41 Adoniya dali, te aga hani bage dali, augwali te nai tula silama da, tama augwaligo te genuai i wabo odali. Tama Joapgo te biugel bu wabo odama, tama agai te po wai, “Te magi sę eyu, te genuai kulukulu te Jerusalemde pedalobowe?” wali.
1KI 1:42 Te Joapgo po odubadi yaide, Jonatan, te pris Abiatargo ogwa, te augwali bidibo madiba sabolali. Tama Adoniyago agabolo te tama po wai, “Nage asao,” wali. “Nage wiegi yai bidi da, te nago daba te wiegi yai po sela asai da, te homu ebao,” wali.
1KI 1:43 Tiali goli, Jonatango Adoniyaba po wei ponoyu, te tama po wai, “Hobede da, eno te wiegi yai po me sela asobeo, magi baso meni, dago genuai bidi king Devitgo te Solomon king pedalumainu ilali.
1KI 1:44 Devitgo te pris Sadok dali, te profet Natan me, Benaia me, te king tonalubo ami bidi dabe me tagala palama, tama augwali te Solomon dali pai. Tama augwali pali sogo, Solomon te king Devitgo donkide digi dugulasa pai.
1KI 1:45 Tama augwali te wę Gihonba pali, tama Sadok de Natan dali sigo te Solomon toboluba wel gelama, tama aga te king sa muyu nigilali. Tama augwa te i weyu, wiegi yai homu pemene elama, tama te Jerusalemba ma aselama, tama megi da, te Jerusalem bidi dabego me te i hai weyu, tama kulukulu genuai mu wali. Te kulukulu wabo naga megi nago odalio.
1KI 1:46 Tama megi da, Solomon te king dugulalubo sia saide dugulalubao,” po wai.
1KI 1:47 “Tama te kingo ofisa bidi dabego me te king Devit sugi pelama, tama agaba wiegi yai homu pemene yai. Augwa te tiwai po wai, ‘Godigo digi te Solomon te wiegi yai bomai king pedalumainogo ilama, tama agai te Solomongo genuai nogi ilibogo te nago genuai nogi elaluali te aiyaba elalueibao.’ Augwaligo te po wai. Tialima, te king Devit te aga betde bidiyu, tama te Godiba genuai nogi mayu, te agai tobolu basi gulali.
1KI 1:48 Tama agai te po wai, ‘Dago te Godigo nogi ugwaba sao, te da Israel dabego Genuai Bidi dao, magi baso meni, megi agai te ena ogwago ena hasegelama, tama eno sę yali pesage siyu, te king pedelali, tama agai enabolo te agai yali sę eno sumainu ilali. Dago te Godiba wiegi yai homu pemene inao,’ Devitgo te po wai,” te bidi Jonatango te po Adoniyabolo wali.
1KI 1:49 Te Adoniya dali dugulaluyu nai tudali bidi dabego te Jonatango te po wabo odama, tama augwali wi dwai mu yai. Tama augwali hogodama, tama te Adoniya taga peyu, tama augwali tedela palio.
1KI 1:50 Adoniya te Solomonde wi elama, tama aga te Genuai Bidigo ugwa beba wi tomoba pelama, tama te alta dage badu te dolalugi pali, te bulmakaugo gąų tiwai naiba te kisa sigi pali.
1KI 1:51 Tama bidi mebago te king Solomonba te tiwai po wagi pai, “Adoniya aga te nagede wi ebaso, tama te Genuai Bidigo name ugwa beba pelama, tama te alta dage badu kisa sigi pelama, dolalugi pai, te aga bugagia bidaiba homu elama, te tama tiali. Tama agai te tiwai po walio, ‘Eno te alta tolaluyu kisalubo te me tagalisiąma, te king Solomongo bomai po te Genuai Bidigo nogide dąų weyu, te agai ena ela mugobe po wabo si, teba usu naibao,’ te po wai.”
1KI 1:52 Tialima, Solomongo augwaliba te tiwai po wei ponai, “Te agai wiegi yai kolesaga wali peyu da, te eno agaba dwai sę me iligobeo. Tiali goli, te agai dwai kolesaga eyu da, teda aga isaibao,” po wai.
1KI 1:53 Tama king Solomongo te bidi meba tagala palama, tama Adoniya te altade kisalubo te sigi pomainu yali. Tama augwaligo aga te Solomonba selasa asali, tama Adoniyago te king pąba kidu sugunama, basi gulali. Tama te king Solomongo agaba te tiwai po wai, “Naga beba pao,” walio. Devitgo te Solomonba silagasu wabo po mawai
1KI 2:1 Te Devitgo koneani, te dwasianu pąde sogo tama aga isabo homu ebaso, tama tiyu, te aga ogwa Solomonba te po dabe pusa mawai.
1KI 2:2 Agai te tiwai po wali, “Te megi da, te pąde ena isaibao. Nage te bidi mu tiwai bomonama dolaluyu, tama naga te sę yao.
1KI 2:3 Tama nago te tigidali sę te God, dago Genuai Bidigo, te nagebolo yao po wali sę te yao. Nage te wiegi yai sunumidu bilao, te agai daba te tiwai tama sa muani, tama nago te bomai po tigidali wali peyu, tama aga po te Mosesba mani bomai pode te po elalubao. Tama te nage mena badu pedaide bidibaso da, te tagala, tama te Godigo nage tau siyu, te nago ebo sę tigidali te wiegi yai pedelaibao.
1KI 2:4 Genuai Bidigo te bomai po me deli enaba dąų waliyu, tama enabolo te tiwai po wai, ‘Devit, te nago hani ogomanigo te sesemane sogo ena wali pabo bomo eyu, tama augwa homu sese teba muyu, tama eno gedude te bugagia dolo bilibaso da, teda sesemane sogo eno te nago hani me deli te Israelde king pedalumainogo ilaibao.’ Genuai Bidigo te tama po wai. Tama tialima, Solomon, nago agai po tigidali te bugagia wali peyu, tama agai te enaba dąų walali bomai po te togolidali weyu te tama tiao,” Devitgo te po wali.
1KI 2:5 “Tama odao, nago koneani, eno te Seruiago ogwa te Joapgo dwai kolesaga yalide te eno genuai sęgę elalubao. Agai te Israelde te polalubo ofisa bidi si ela muani, te Apner, te Nergo ogwa, me te Amasa, te Jetergo ogwa ela muani. Agai augwali si te hwįbo side me ela mubeo. Menio, agai te bidi si te odolali tama ela muani, tama te dwai sę yali sęgę te agade daganalubo dao.
1KI 2:6 Nago te naga wiegi yai homu kolesagade wali peyu, tama aga te dwai sę yali kolesagade wei ponao, tiali goli nago aga te odolali monu dabe elama, te isimainu me elamuo,” wali.
1KI 2:7 “Tiali goli, nago te Gileat bulu bidi Barsilaigo ogomani te bugagia wiegi yai ilama, tama augwali te nago hani dabe dali duayagaselama, te nai tumainu yao. Magi baso meni, te ena nago ama Apsalomde wi pali sogo, te augwaligo ena bugagia nai mayu, geseyu yai dao,” wali.
1KI 2:8 “Tama Simei, te Gerago ogwa, te Benjamin hanigo tǫde te Bahurim bulu bidi, aga me bidali. Polobadu ena te Mahanaim tǫba pali sogo, agai enaba te po dwai mu weyu, tama te ena dolomainu te Godiba hanalu wai. Tiali goli, ena ma asali sogode, aga te wę Jordanba dulama, tama ena dali gesabidi deliba ununani, tama eno te Genuai Bidigo nogide bomai po dąų waliyu, te eno aga me ela mugobeo wali.
1KI 2:9 Tiali goli, te nago agaba te dwai dene mao. Nago homu kolesaga te wiegi yai elama, te nago aga ela muainogo te mena sunumi wali pabo te konebaso, te aga ela muao,” te po wai.
1KI 2:10 Tama nosali, Devit isilama, tama augwaligo aga te Jerusalemde pubulali, te hanu pedai augwa te tama nogi poali “Te Devitgo Hanu da,” wali.
1KI 2:11 Aga te Israel tǫde te king bidibadi, te kibu be bidi sese si, te 40 yia bidai. Aga hasia bolo te Hebronde king bidibadi, te kibu be a naga olama, me si elama, tama nosali te Jerusalemde king bidibadi, te 33 kibu be bidali.
1KI 2:12 Devit isibaso, tama aga ogwa Solomongo te aga bidali pesage hasegelama, tama te king pedelai. Tama Solomon te bomai king pedelali, tama bidi mego aga aiyaba elalueinu ebo te usu meni yai dao.
1KI 2:13 Me sogo deli Adoniya, te Hagitgo ogwa, aselama, te Batseba suagasali, te Solomongo ida dao. Tama Batsebago agaba hanalu wali, “Nago te wiegi yai po me wagasiyu asai dawe?” Tama Adoniyago po wei ponoyu, te tiwai po wai, “Awe, te dolo dao.”
1KI 2:14 Tama agai po te ma weyu, te tama po wali, “Eno te po me deli dwasianu elalubao.” Tama Batsebago agabolo te tama po wai, “Te usu da, nago te po enaba wao,” po wali.
1KI 2:15 Tama Adoniyago te po wali, “Nago koneani, te hasia bolo te Israel bidi tigidaligo te ena king pedelaiba homu yai. Tama ena te king pedaligi digi, te Genuai Bidigo homugo digi te eno ama king pedalumainu elama, tama ena meni yanio.
1KI 2:16 Tialima, megi da, eno hanalubo po deli naga elalubao. Tama eno homugo nago eno te hanalubo pode usu da po omainu homu ebao.” Tama Batsebago te po wai, “Nago enaba olama, tama eno odaibao,” te po wai.
1KI 2:17 Tialima, Adoniyago agabolo te po wali, “Eno homugo nago te king Solomonba hanalugi pomainu elama, tama agai enabolo te Sunem bulu we, te Abisak, somainu usu da po omainogo te homu yai. Eno koneani, te kingo nago po sela sągobe da homu yai.”
1KI 2:18 Tama Batsebago te Adoniyaba te tiwai po wai, “Te usu da, te ena pelama, te agaba hanalugi paibao,” wali.
1KI 2:19 Batseba pelama, te king Solomon sugi pelama, te agaba hanaluyu, te Abisak te Adoniyago sabo po hanalugi pai. Kingo te Batseba asobo sulama, tama aga dolugulama, tama kidu sugunu gulama, tama tobolu basi gulama, te aga idaba genuai nogi mayu te tama tiali. Tama aga te king dulalubo sia saiba ma duagulama, tama te sę bidi dabeba weyu, te augwaligo sia sai me deli sela asao olama, tama aga te king dugulalubo sia sai pąde te aga dolo nogo badu munama, tama Batseba te sia saiba duagulali.
1KI 2:20 Tama Batsebago te tiwai po wai, “Eno homugo nageba te po me deli dwasianu hanalu wainu ebao, tama eno homugo nago eno te hanalubo pode usu da po omainu ebao.” Tama Solomongo te tiwai po wei ponani, “Ida, nago te hanaluyu bolo yao. Nago koneani, eno nago te hanalubo pode te po olamo po me wagobeo.”
1KI 2:21 Tialima, Batsebago te tama po wali, “Eno homugo te nago ama, Adoniyago, te we Abisak somainu homu ebao.”
1KI 2:22 Kingo te hanalubo po odama, tama aga wado po weyu, te tiwai po wali, “Magi baso nago enaba te Abisak te Adoniyaba mao po hanalubawe? Te tiwai ebaso da, teda nago enaba dolo hanaluyu, te agai ena hasegelama, tama te king pedalumainogo ilibewe, magi baso meni, aga te eno ama genuai bidi dao. Tama nago te pris Abiatar me Joap, te Seruiago ogwa, te augwali sigo hanalu wali po me sela asobewe?” te po wai.
1KI 2:23 Tialima, king Solomongo te Genuai Bidigo nogide te bomai po te tiwai wali, “Adoniyago te wali po te geda muani elalubao. Tama tibaso, eno te aga ela muaibao. Te eno te tama tisąbaso da, teda eno homugo Godigo ena ela mumainao.
1KI 2:24 Magi baso meni, Genuai Bidigo digi ena tau sobaso, tama ena dąų walama, tama eno te ena aya Devitgo sę yali pesage selama, tama ena te king bidibao, te polobadu Genuai Bidigo te enaba me te eno haniba te tiwai bomai po dąų walali. Tama te Sesemane Sogo Bidibo Genuai Bidi nogide, te mu tama, megi tama te Adoniya te isaiba,” walio.
1KI 2:25 Tialima, king Solomongo te po wali, tama Benaia pelama, te Adoniya ela muani.
1KI 2:26 Solomongo te pris Abiatarbolo te tiwai po wali, “Nage te hanu Anatotba ma pelama, tama naga tǫba bidigi pao,” wali. “Nago te dwai sę yai elalubaso, tama nage isimainu yaibao, tiali goli te eno nage me eligobeo. Magi baso meni, polobadu nage te eno aya Devit dali bidai, tama nago te dena Genuai Bidigo te Dąų Wali Bomai Po Muani Halobage tolasa bilali. Tama Devitgo te sęgę me dwai sę hauwa tolali sogo da, teda nage aga dali bidiyu, tama nago me te sęgę dabe toliyu yai dao.” Solomongo te po wai.
1KI 2:27 Solomongo te Abiatar te Genuai Bidigo pris sę yali te sela sąwani, tama te kolesagade agai te Genuai Bidigo polobadu te Silo bulude te mena sę te pris Eligo haniba pedalubode te wali poba usu niyu, tama te tiwai yai dao.
1KI 2:28 Te Joapgo te Apsalom dali me kisasiąwai, tiali goli agai te Adoniya tau salio. Tama agai te Adoniya me Abiatar dali side pedelali sę dabe po odama, aga te wi ebaso, tama te Genuai Bidigo ugwa beba wi pelama, tama te alta dage badu kisa sigi pelama, dolalugi pai dao.
1KI 2:29 Tama bidi meba pelama, te king Solomonba te tiwai po wagi pali, “Joap te udulama, te Genuai Bidigo ugwa be tomoba pelama, tama te alta sabi badu tolalubao,” po wai. Tialima, Solomongo Benaiaba te po olama, tama te Joap ela mugi pao po wali.
1KI 2:30 Tama Benaia te Genuai Bidigo ugwa beba pelama, tama Joapbolo te tiwai po wai, “Kingo te po wai, nage te pesagede bidibo tagalama, te buluba dia soa po wali.” Tiali goli, Joapgo te po wai, “Woo, menio, ena te buluba me dia soagobeo,” wai. “Nago ena ede tama ela muao,” wali. Tialima, Benaia te kingba ma begasa pelama, tama agaba te Joapgo wali po wagi pali.
1KI 2:31 Tama kingo Benaiabolo te tiwai po wei ponani, “Te usu da,” wali. “Nago te agai homu wali pelama, tama aga te bidibo pesagede elao,” wali. “Tama agai tigi tolasa pelama, pubaligi pao. Joapgo te magi dwai sę me isiąwai bidi dabe te odolali ela muai, tama agai te dwai sę yali kolesaga enade me, te eno ayago hanide me elaluali. Tama nago te aga elao, tama agai te dwai sę yali sęgę dade te ma elalugobeo.
1KI 2:32 Genuai Bidigo te wei ponobo dwai kolesaga te Joapba me iduaibao, te aga yali dwai sęde te tama tiaibao. Joapgo te Nergo ogwa, Apner, te olo dali elali, tama te Amasa, te Jetergo ogwa me elali. Apner te Israelde ami bidi dabego polaluali ofisa bidi, tama Amasa te Juda bage ami bidi dabego polaluali ofisa bidi da. Te bidi si te wiegi yai bidi si, tama te magi dwai sę me isiąwai, tama augwali sigo kolesagago te Joapgo kolesaga aiyaba elaluali. Tiali goli, Joapgo te eno ayabolo po me wasiąma, tama agai te aga homugo digi te bidi si ela muai dao.
1KI 2:33 Eno homugo te Genuai Bidigo Joapgo te dwai sę yalide te sę yali homu kone palidu, te sesemane sogo te Joapba me te aga hani nosali pedalubo bageba te dwai dene maduaibao,” wali. “Tiali goli, sesemane sogo Genuai Bidigo te Devitgo haniba te bugagia bidimainu ebo kolesaga mayu, tama agai hanide te pedalubo tigidali kingde te tiwai yaibao,” Solomongo te po wai.
1KI 2:34 Benaiago te po odama, tama aga te Genuai Bidigo ugwa beba ma pelama, tama te Joap ela mugi pai. Tama augwa te Joapgo tigi te aga beba sela pali, te bulu tǫ pesage wai madi, tama augwaligo aga te aga be pąde pubulali.
1KI 2:35 Tama kingo Benaia te ami bidi dabego polalubo ofisa bidi nigilali, te Joapgo pesage agai hasegelama sali. Benaia te Jehoiadago ogwa dao. Tama kingo te pris Abiatargo bidali pesage te pris Sadokgo hasegelama somainu nigilali.
1KI 2:36 Te Joap isai madi, tama nosali kingo te Simei i olama, asobo side tama agabolo te tiwai po wai, “Nago be me deli te Jerusalemde sęnama, tama nage te bede bidao. Tama nago munu me te Jerusalem tagalama, tama gasa tǫ bogo badu me pelamuo,” wai.
1KI 2:37 “Te nago te wę Kidron bolama, tama te hanu Jerusalem dali dąį elalubo taga pali da, teda polo tama eno te nage ela muaibao. Tama nage te naga digi yali dwai sęde isaibao,” wali.
1KI 2:38 Tialima, Simeigo te po wei ponani, “King, te nago po te wiegi yai da, tama eno nago te po wali gilama te tiwai yaibao,” wali. Tama tialima, Simei te bobage sogo mu te Jerusalemde bidai.
1KI 2:39 Te kibu be sela bidama da, tialima te Simeigo olo sę ebo bidi si te Get hanuba wi pelama, tama te king Akis dali bidai, te Makago ogwa da. Tama bidi mebago te Simeiba te tiwai po wali, “Nago sę bidi si te Get hanude bidibao,” po wai.
1KI 2:40 Tialima, polo tama Simei te aga donkiba duagulama, tama te king Akis bidibo Get hanuba pali, te aga sę bidi si gegi pali. Te agai augwali si gegali sulama da, agai te augwali si te Jerusalemba selasa asali.
1KI 2:41 Tama Solomongo odali, Simeigo te Jerusalem tagalama, tama te Get hanuba pelama, tama ma asali po odali.
1KI 2:42 Tama agai te Simei i olama, asobo side te po agabolo walali, “Eno te Genuai Bidigo nogide te bomai po nageba dąų walali, te nago te Jerusalem tagalama, te gasa tǫba me pelamuo po wai. Tama eno po bomo elama, nageba weyu, te tiwai po wali, ‘Nago te hanu taga pali da, teda polo tama te eno nage ela muaibao,’ po wai. Tama nago te tiwai po enabolo wai, ‘Te usu da, te eno nago po wali paibao,’ po wai dao.
1KI 2:43 Tialima, magi baso nago te Genuai Bidigo nogide dąų walali bomai po te togolama, tama nago eno po sela sąwaniwe?
1KI 2:44 Te nago dwai kolesaga te nago eno aya Devitba yali, te nago koneai. Tama megi da, nago te yali kolesagade, te Genuai Bidigo te nageba dene mawainu ebao,” wali.
1KI 2:45 “Tiali goli, te Genuai Bidigo te ena bugagia wiegi yai iliyu, tama sesemane sogo agai te Devitgo hani bidi dabe te king pedalumainu ilaibao,” wali.
1KI 2:46 Te Simei pai madi, tama te kingo te Benaiabolo walama, te aga ela mugi pao po wai. Tialima, te Benaiago te king tagalama, pelama, tama te Simei ela mugi pali. Megi da, Solomon te bomai king mu pedelama, tama te bidi mego aga aiyaba elaluainu ebo te usu me ebeo.
1KI 3:1 Solomongo te Isip king bidigo wegi sai, tama te kolesaga yaligo agai te Isip king bidi dali te bomai po dąų walali, tama te bulu tǫ pedai kantri si te bugagia bidiyu, tama te hwįyu me ebeo. Solomongo aga we te Jerusalem te Devitgo Hanuba odasa asali. Tama te Solomongo te aga be me, te Genuai Bidigo tempel be me, te Jerusalem obo bagulu, tama te sę dabe ebadi yali sogo, te we aga dali te sogo tede bidali.
1KI 3:2 Polobadu te Israel dabego te Genuai Bidigo be me deli te dolo me sesiąwai, te augwa Genuai Bidiba lotu wabo digi tama, tama tiyu, te we bidi dabego te Genuai Bidiba ofa ebo sę te lotu wabo pesagede te bulu du bage dabede ofa eyu yai dao.
1KI 3:3 Solomongo te Genuai Bidi godolo mu elama, tama agai te wiegi yai kolesaga dabe wali pali, te aga aya Devitgo kolesaga tiwai yali, te agabolo te tiwai tama yao po wali. Tiali goli, agai me te kibu dabe elama, tama te lotu wabo pesagede te Genuai Bidiba ofa eyu yai, te bulu du bage dabede tama iduai.
1KI 3:4 Gibeon te lotu wabo polalubo pesage tama, tama tibaso me sogo deli Solomon te Gibeonba pelama, ofa igi pai. Solomongo te bidi sese hauwa umabo, te 1,000 omai kau kibu dabe odasa pelama, tama te siago tigidali domainu ulubo ofa te Gibeon altade te ofa yai.
1KI 3:5 Tama te hulide Solomon te Gibeonde godege piai madi, tama te nade te Genuai Bidi agaba pedelali. Tama Godigo te tiwai po wali, “Te nago mena nai godolo eyu, te enaba hanalu obaso da, tama teda eno nageba mawaibao,” po wali.
1KI 3:6 Solomongo po wei ponoyu, te tama po wai, “Eno aya Devitgo te nage wali mu peyu, tama te wiegi yai doloba pai kolesaga yali, tama tiyu, sesemane sogo nago aga godolo mu elama, tama agaba wiegi yai sę bugagia mu yai. Tama megi me, nago te tiwai sę me idu, tama nago ena, te aga ogwago, te aga hasegelama, tama te king bidimainu ilama bidibo dao.
1KI 3:7 O God, eno Genuai Bidi, nago te eno te ena ayago sę yali pesage hasegelama somainogo ilali, tiali goli, ena te olo ogomani tiwai elalu, tama eno te mena tama te we bidi tonalubo kolesaga ebo te eno konebeo.
1KI 3:8 Megi da, ena te nago da olama, te sa muani te we bidi hani dabe tomode bidibao,” wali. “Augwali te hauwa umabo mu ebaso, tama te bidi dabego nedebaso, te usu me egobeo.
1KI 3:9 Tama tibaso, eno homugo nago enabolo te konebo wiegi yai homu kolesaga mao, te tama eno nago te we bidi bugagia tonalumainogo tiao, tama te mena kolesaga te wiegi yai ebo, ma te mena dwai kolesaga ebo me, te eno bugagia dagalamainu te tama tiao. Te meni ebaso da, teda te mena bidi me deligo nago te genuai we bidi hani dabe tonalubaso, te usu egobeo. Ena digi eno te usu mu me egobeo,” wali.
1KI 3:10 Genuai Bidigo Solomongo te hanalu wali po odama, tama agai bugai homu mu te Solomonba yalio.
1KI 3:11 Tama tibaso, Godigo Solomonba te tiwai po wali, “Te nago enaba hanaluyu, te nageba eno te wiegi yai konebo homu kolesaga nageba menama, te nago te Israel dabe bugagia tonaluaibao po hanalu wali, te wiegi yai dao. Tama nago enaba te nage te tǫde sesabi sogo elama bidabo po me hanalubeo, tama nago enaba hanalu, te eno nageba te mone hauwa mao po wabe, tama me nago enabolo te nago boi bidi dabe dolabo po me hanalubeo.
1KI 3:12 Tama tiyu, te mu tama, nago enaba te hanalu wali nai te eno nage mawaibao,” wali. “Megi da, te eno nagebolo te konebo wiegi yai homu kolesaga hauwa mawaibao,” po wai. “Polobadu te bidi me deligo te tobage kolesaga koneai me elalubeo, tama te nosali me te bidi me deligo nago te koneani kolesaga tobage tiwai te bidi mego sogobeo.
1KI 3:13 Mu tama, nago enaba te genuai nogi me te mone hauwa saio wabo po me hanalubeo. Tiali goli, eno nagebolo te tigidali nai doado bage mawaibao, tama nage te king bidibo sogo te nago genuai nogi elalubo tiwai te gasa kingo te tiwai genuai nogi me elalugobeo.
1KI 3:14 Tama te nage eno te sa muani te wiegi yai sunumidu peyu, tama nago te bomai po me eno po me wali peyu, te naga aya Devitgo te yali kolesaga tiwai ebaso da, teda eno nage te sesabi elama, te bobage sogo te tǫde bidimainu yaibao,” po wali.
1KI 3:15 Genuai Bidigo po ola silibo si da, teda Solomon hodaluali, tama te tiwai te na yali da homu eyu, te tama koneani. Tialima, nosali te aga Jerusalemba ma pelama, tama te Genuai Bidigo Dąų Walali Bomai Po Munalubo Halobage elalubo madi pąba dologi pali. Tama agai te tigidali siago domainu ulubo ofa me, tama te God dali deli homu pedalumainu ebo ofa dabe dali yalio. Tama te tudi badu nosali, agai te ofisa dabego me, te aga sę bidi dabego dali, te genuai daa tubo nai ulama, tuai dao.
1KI 3:16 Me sogo deli te penani we si te kingba asali, te agai augwali si po dodolumainogo asalio.
1KI 3:17 Tama we me deligo te tiwai po wai, “Eno king, te odao. Te we da si te be delide bidali. Tama eno te wai ogwa me deli ame nani. Tama eno te wai ame nani sogo, te we te bede ena dali bidai.
1KI 3:18 Te si sogo nosali, agai me te wai ogwa ame nani. Tama da si naga te bede bidai. Te sogo te gasa bidi ma we te da si dali me bidibeo.
1KI 3:19 Tama te hulide, te agai wai te isali, magi baso meni, aga bomonama pigilu, tama begeligi soyu, tama aga wai dai badu pigulali. Tama tialigo te wai isali.
1KI 3:20 Ena pilamubadi, tama te huli tomode te aga hodaluama, tama eno wai sagaselama, tama aga pibo betba selasa pai yalio. Tama agai te isali wai sela aselama, tama ena pąba pilagasai yalio.
1KI 3:21 Te kigamu ena hodalu, tama eno te ena wai ame mawainu yali, tiali goli eno suali, te aga isai yalio. Tama eno aga te wai bugagia tonalu osola sulama, tama eno koneani, te aga eno ame nani wai tiwai tonobo ąǫ me ebeo,” wali.
1KI 3:22 Te wego po ola silibo si da, tama gasa wego te po wai, “Menio. Te isali wai, te naga wai dao. Tama te bidibo wai da, te eno wai dao,” wali. Tiali goli, te polasa po wali wego po wei ponoyu, te po wai, “Mu menio. Te isali wai, te naga wai dao,” wai. “Tama te bidibo wai da, te eno wai dao.” Tama augwa si te konila po wabo sę te king gedude yalio.
1KI 3:23 Tialima, kingo te tama po wai, “Dage si te deli tobage pode te konila po wabo sę idubao. Me deligo te po wali, ‘Te bidibo wai da, te eno dao, tama te isali wai te naga wai dao,’ tama gasa wego me te po wai, ‘Mu menio, te isali wai, te naga dao, tama te bidibo wai da te eno da,’ po wali.”
1KI 3:24 Tama kingo te tiwai po aga sę bidi dabeba wai, “Te bainat hwą me deli sela asao,” wai. Tialima, augwaligo sigi pelama, tama te kingba selasa asai.
1KI 3:25 Tama agai augwaliba te po wali, “Te bidibo wai selama, tama te tomode dolo asegelama, tama me badu pedai te we meba mayu, tama te gasa pedai me badu te gasa weba mayu yao,” te tama po wali.
1KI 3:26 Tiali goli, te wai aga ida mugo te waide homu dene mu eyu, tama kingo te ela mumainu homu me ebeo. Tama agai kingba te tiwai po wali, “King, te tagalao. Te wego te wai somainu emainao. Nago aga me ela mugio.” Tiali goli, te gasa wego te po wai, “Woo, menio, nago te agaba ma te enaba me menamuo,” wai. “Te si badu asegao,” po wai.
1KI 3:27 Tialima, kingo te po wali, “Enabolo te wai elamuo po wabo webolo te wai mao,” wali. “Te aga da te waigo ida mu tama dao. Dagego te wai munu me elamuo,” wali.
1KI 3:28 Nosali te king Solomongo te we sigo po dodolali kolesagade po te tigidali Israel we bidigo te po odolama, tama agai te koneani wiegi yai kolesagade te augwali dwai noma mu sai. Tama augwaligo agaba te genuai nogi mawai, magi baso meni, augwa koneani, te Godigo digi te wiegi yai koneani homu kolesaga te kingba menama, tama te kingo te we bidi dabego po tų bugagia dodolumainogo te homu kolesaga mani da, te homu yai.
1KI 4:1 Te King Solomongo te Israel tǫ pedai tigidali badu tonaluali.
1KI 4:2 Te aga polalubo ofisa bidi dabe te tama tiwai elaluai: Asaria, te Sadokgo ogwa, aga te pris bidai.
1KI 4:3 Elihorep me Ahiya, augwali si te Sisago ogwa si, augwali si te kingo kuskus sę ebo bidi si dao. Jehosafat, te Ahilutgo ogwa, agai te kingo ebo sę po page tigidali te asębo bidi dao.
1KI 4:4 Benaia, te Jehoiadago ogwa, aga te ami dabego polalubo ofisa bidi dao. Sadok dali Abiatar, te pris bidi si dao.
1KI 4:5 Asaria, te Natango ogwa, agai te polalubo kiap dabe tonalubo sę elaluai. Pris Sabut, te Natango ogwa, agai te kingba wiegi yai homu kolesaga mabo sę ebo bidi bidai.
1KI 4:6 Ahisargo te kingo bede sę ebo sę bidi dabe tonaluali. Adoniram, te Apdago ogwago, te kingo sę yao po wabo sogo te bidi dabe tonaluali.
1KI 4:7 King Solomongo te Israel tǫ pedai dabe tonaluabo polalubo kiap dabe te nogo si olama, sągągo si, te tama bidi nigilali. Te bidi dabego te augwa bulu tǫ pedaide digi te nai gegebo sę elalu, tama te Jerusalemba toloyu, te Solomon me te aga dali bidibo we bidi dabego tumainogo yabo nai toloyu yali. Te deli deli tǫ pedaide te king dali aga hani me tonalubo sę elaluali, te tigidali kibu bede te deli deli poluade tuabo nai te tama tiali.
1KI 4:8 Te polalubo kiap dabego nogi te e tama tiwai: Benhur, agai te Efraim hanigo te bage bulu hani pesage tonaluali.
1KI 4:9 Bendeker, agai te Makas hanu, me te Salbim, me Betsemes hanu me, tama te Elon Bethanan bulu me tonaluali.
1KI 4:10 Benheset, agai te hanu Arubot, me te Soko hanu, me te Hefer hanude elalubo bulu tǫ tigidali te tonaluali.
1KI 4:11 Ben Abinadapgo te Dor hanude elalubo te bage bulu du te pesage tonaluai. Agai te Tafat sali, te Solomongo wegi me deli te sai dao.
1KI 4:12 Bana, te Ahilutgo ogwa, agai te Tanak hanu me, Megido hanu me, tama te Betsande elalubo tigidali bulu tǫ te tonaluali. Te tǫ te Saretan hanu pąde elaluali, te saut pedai badu te Jesril hanu badu elaluali. Te bulu tǫ pedaigo dąį pali, te hanu Abel Mehola te giliga pedalubo badu usu nigi pelama, tama te hanu Jokmeam te giliga dega sigulubo madiba te dąį sabolalio.
1KI 4:13 Bengebergo te Gileat tǫde te Ramot hanu tonaluai, tama agai te Jair dabego bulu tǫ dabe me tonaluali, te bidi te Manasego hani bidi dao. Te bulu dabe me te Gileat tǫde elaluali. Tama agai te bulu badu te Argop, te Basango tǫ pedai badu me tonaluali. Te badu te genuai hanu te bidi sese sela, te 60 genuai hanu elaluali, tama te hanu dabede te bomai masigi obo me te bomai sunumi te elaluali. Augwa te sunumi dabe palibo nai augwa te brasgo te bomai nai bago te sunumi nigai elaluai.
1KI 4:14 Ahinadap, te Idogo ogwago, te Mahanaim hanu tonaluali.
1KI 4:15 Ahimasgo te Naptali hanigo tǫ tonaluai. Agai te Basemat sali, te Solomongo gasa wegi me dao.
1KI 4:16 Bana, te Husaigo ogwago, te Aser hanigo tǫ me agai te Bealot hanu me tonaluai dao.
1KI 4:17 Jehosafat, te Paruago ogwago, te Isakargo hanigo tǫ tonaluali.
1KI 4:18 Simei, te Elago ogwago, te Benjamingo hanigo tǫ tonaluai.
1KI 4:19 Geber, te Urigo ogwago, te Gileat bulu tǫ pedai tonaluali. Polobadu te bulu tǫ te king Sihon te Amor dabe, me te king Ok te Basan bulu tǫ pedai, te king bidi sigo tǫ elaluali. Te tigidali bulu tǫ pedaide te polalubo kiap dabe tonalubo ofisa bidi me deli elaluai dao.
1KI 4:20 Te Juda me Israel we bidi dabe augwali te genuai hani mu bidali, te nabisde te masigi kemi sane gisiga sąwai tiwai usu nama te tiwai yali. Augwali te bugagia bidiyu, tama augwa te nai me wę te elaluyu, tama augwa wiegi yai homu pemene eyu bidali.
1KI 4:21 Solomon te tigidali tǫ pedai te wę Yufretisdu gagalasa, te giliga pedaluboba usu nama, tama te giliga dega sigilubo te Filistia dabego tǫ pedaiba usu nigi pelama, te tigidali tǫ tomode te king bidali. Tama te Isip tǫ te saut badu dąį igi pali. Te bulu tǫ pedai bidi dabego te Solomonba takis mone mayu, tama augwali te aga dologode bidada pali te aga isibo sogoba usu nai dao.
1KI 4:22 Tigidali sogode Solomongo te tiwai nai sali, 6,000 kilogram plaua, me 3,000 kilogram te wiegi yai plaua,
1KI 4:23 me te bidi sese deli te 20 bulmakau, me te nogo si nisai bulmakau, te augwa bugagia negali bulmakau kibu dabe me, te bidi sese a naga te 100 sipsip me, tama te buside elalubo te haniani hasa dia me te nisali kakaruk dabe, te tama nai dabe te deli deli sogo sai dao.
1KI 4:24 Solomongo te tigidali tǫ pedai te Israel tǫ pąde elalubo bulu me, te pali te wę Yufretis te giliga pedalubo pedai, te badu te usu nigi pai. Te dąį te hanu Tipsade gagalasa peyu, te wę Yufretisba dąį igi pelama, tama pali, te Gasa hanu te giliga dega sigilubo teba usu nigi pali. Te badu te tigidali tǫ pedaide bidali te tigidali king te aga dologode bidali, tama te agai bulu tǫ pedai pąde elaluali, te gasa bulu tǫ pedai bidi dabe, augwaligo te agaba boi bidi me ebeo.
1KI 4:25 Te Solomon king bidali sogo, te Juda me Israel te tigidali badu te tigidali we bidi, augwali te augwa te wain bono dabe me te ni kaya fik gi dabe pąde bugagia dugulalu bidali, tama te dwai nai me deli te augwaliba me pedalubeo.
1KI 4:26 Solomongo te hwįbo karis kegebo hos dabe mubo be hauwa elaluali. Tama te be dabede te hos bidabo be habu nigilai elaluali. Agai te 40,000 hos dabe te beba muabo usu yali. Tama me Solomongo te hwįabo ami bidi dualabo hos dabe te 12,000 elaluali.
1KI 4:27 Te tǫ pedai deli delide bidibo te polalubo kiap dabe te nogo si olama, sągągo si, te augwaligo te king Solomongo augwaliba te dąį ilali poluade te nai sela asu yali. Te nai te king dali, te aga bede bidibo hani bage tigidaligo tuabo nai sesali. Te kiap dabego augwa sę te bugagia ebaso, tama tiyu, te king aga nai me sǫą pabeo.
1KI 4:28 Tama te kingo dąį ilali poluade, augwa te rais bali me, tama te karis dabe kegebo hos dabego nosa dabe me, te gasa polo pabo hos dabego tuabo nosa dabe seseyu yali. Augwa te nai dabede te hos dabe bidalubo deli deli hanuba selasa peyu yai dao.
1KI 4:29 Godigo te wiegi yai homu me konebo homu kolesaga te Solomonba mawai. Agai koneani kolesaga te umabo mu, te nabis wę sanede te masigi kemi tiwai elalu, tama te bidigo nedainu ebo te usu me egobeo.
1KI 4:30 Te agai wiegi yai homu me te koneani kolesagago te giliga pedalu badu tede bidali koneani bidigo kolesaga, me te Isip bidi dabego kolesaga koneani bidi dabe me, te agai aiyaba mu elaluai dao.
1KI 4:31 Te Solomongo koneani wiegi yai homu kolesagago te tigidali tǫde bidigo koneani wiegi yai kolesaga yali bidi dabe te aiyaba elaluai. Agai te Esra hani bidi Etango koneani wiegi yai kolesaga me, te Hemango koneani wiegi yai kolesaga me, te Kalkol me Darda, te bidi Maholgo ogwa dabego koneani te wiegi yai homu kolesaga te aiyaba elaluali. Tama te Israel bulu tǫ pedai pąde bidalubo we bidi dabe, augwaligo te agai genuai nogide po odali.
1KI 4:32 Solomongo te 3,000 te wiegi yai homu kolesagade te wiegi yai pęwądage po asęani, me te 1,005 balia po me asęanio.
1KI 4:33 Te agai wali po dabede te tiwai te tobage tigidali nai dabede po peni togoliyu, mesegelama wali, te genuai ni te tiwai te Lebanon moni ni bǫ, me te dwasianu ni te hisop te masigi obo dabede holobo ni po wali. Tama agai te tobage hasa me, ba me, yogeai me, sųgų, te tama tobage nai dabede po me wai dao.
1KI 4:34 Te tigidali bulu tǫ pedaide king dabego te Solomongo koneani wiegi yai homu kolesaga te hauwa elalubo po odolama, tama agai te wiegi yai po odagasomainogo, te augwa bidi meba agaba tagala palai dao.
1KI 5:1 Polobadu Hiram te Tair hanu king bidigo te Devit dali wiegi yai abagi olama bidai. Tama Hiramgo odali, te Solomongo te Devit hasegelama, tama te king pedelali po odobaso, agai te tobolu bidi mebago te Solomon sugi pomainogo tagala palai dao.
1KI 5:2 Tama Solomongo te Hiramba te tiwai po ola tolai,
1KI 5:3 “Nago koneani, te eno aya Devit te king bidali sogo, agai te aga Genuai Bidi Godigo be te sę yabo sogo te meni yani, magi baso meni, te tigidali sogo te boi bidi dabego agaba hwįagasu iduali. Agai homugo te Genuai Bidigo te boi bidi dabe bolo elalumainu homu elama, tama nosali agai te Genuai Bidigo be sęwaiba homu yali.
1KI 5:4 Tiali goli, te megi da, te God, eno Genuai Bidigo, te gasa bulu tǫ pedai bage te augwali ena dali bugagia bidimainu ilali. Te hani dabe augwaligo te da dali boi bidi munu ma isiąyu, tama te dwai sę ebo nai dabe daba me pedalubeo.
1KI 5:5 Tama tibaso, megi da, te eno Genuai Bidi Godigo be sę yabo homu ebao. Polobadu Genuai Bidigo te bomai po dąų waliyu, eno ayabolo te tiwai po wai, ‘Eno te nage te naga ogwa me deligo hasegelama, te king pedalumainu yaibao,’ po wai. ‘Tama agai te eno be sę emainogo elama, te we bidi augwali tede ena pąba asomainu yaibao,’ wali. Genuai Bidigo te tiwai bomai po dąų walaligo tama megi da, eno agai te dąų walali bomai poba usu nagasobao,” wali.
1KI 5:6 “Tama tialima, eno homugo te nago sę bidi dabe tagala palumainu yai, te augwali Saidon dabe, te Lebanon bulu duba pelama, tama eno te be sę emainu yabo ni bǫ dabe togogi pomainu yao,” wai. “Te Saidon dabego te ni togobo te mu koneai, tama eno sę bidi dabego te me konebeo,” wali. “Tiali goli, te eno sę bidi dabego te tau sagasomainu naga te augwali tagala palaibao. Tama nago te naga sę bidi dabe te nisu naga monego abelimainu homu ebaso da, teda eno mayu naga yaibao,” po wai.
1KI 5:7 Hiramgo Solomongo te po odolama, tama aga haliga te wiegi yai mu yai. Tama agai te tiwai po wai, “Megi dago te Genuai Bidigo nogi ugwaba sinao. Magi baso meni, agai te wiegi yai ogwa te Devitba manigo te aga hasegelimainu elama, tama te bomai bulu tǫ pedai tonalumainu yai. Devitgo te ogwago te kolesaga koneani wiegi yai homu kolesaga elaluai dao,” wali.
1KI 5:8 Tialima Hiramgo Solomonba te tiwai po ola tolai, “Eno nago po odama, tama eno tede usu da wai. Tama eno te ni bǫ dabe me te ni wuli dabe te nageba tolaibao,” wai.
1KI 5:9 “Te eno sę bidi dabego te Lebanonde te ni dabe togolama, tama te nabis wę saneba sela dulaibao,” wali. “Tama augwa te ni dabe te tamu ąįba sisinigi pelama, tama bonogo bomonama kęnama, seseba dabe nigilama, tama te augwaligo nageba sesaiba,” wai. “Te augwaligo sela asiyu, te nago mena badu tuagasabo te dąį ilali pesage nabis badu tuagasomainu yaibao. Tama tede, te eno sę bidi dabego te bono dabe pisiginama, tama naga sę bidi dabego te ni dabe somainu yaibao. Te nai me delide eno homugo nago te sę emainu homu ebao. Eno homugo nago te nai dabe tolomainu homu ebao, te ena dali te eno bede bidibo hani dabe dago tuabo nai dao,” Hiramgo te po ola tolali.
1KI 5:10 Tama tialima, Hiramgo te ni bǫ me wuli te hauwa mu te Solomonba tolali, te Solomongo dąį ilali namba usu nama tama tolai dao.
1KI 5:11 Tama te tigidali kibu bede Solomongo Hiramba te 2,000 ton wit me 4,000 lita te wiegi yai oliv wel madu geani, te Hiram dali te aga hani daligo tuabo nai te tiwai toloyu yai dao.
1KI 5:12 Genuai Bidigo te aga bomai po dąų walali gilama te koneani wiegi yai homu kolesaga te Solomonba mawai. Tama Hiram dali Solomon si te wiegi yai abagi mu pedelali. Tama augwa si tomode te bugagia bidabo bomai po dąų walali.
1KI 5:13 King Solomongo te Israel bulu tǫ tigidali pedai badu te 30,000 bidi selama, tama augwaliba weyu, agai te sę yao po wai dao.
1KI 5:14 Agai augwali te hani sela dobayu elama, tama augwali deli deli hanide te 10,000 bidi elaluali. Tama te tigidali poluade te hani me deli te Lebanonba sę igi peyu, te polua deli bidama, tama augwa ma asiyu yai. Tama gasa hanigo augwali bidali pesageba hasegelama, peyu yai. Te hani sela te hasegeliyu, hasegeliyu, te tiwai yali, tama te kolesagade te deli deli hani te polua deli sę igi pelama, tama ma aselama, te augwa pesagede polua si bidiyu yali. Adoniramgo te sę ebo bidi hani dabe tonalu bidai dao.
1KI 5:15 Tama Solomongo te masigi togwabo te 80,000 bidi me selama, tama augwali te bulu du pesagede te masigi togobo sę yali. Tama agai te masigi dabe tolabo bidi te 70,000 bidi salio.
1KI 5:16 Tama agai te sę tonaluabo bidi dabe te 3,300 bidi nigilali.
1KI 5:17 Te sę bidi dabego te Solomongo po wali pelama, tama augwali te gasa sawi sawi yai masigi elalubo pesageba pelama, tama te masigi moni moni bage togwali, te wasilama, te daide ugwadu te Genuai Bidigo be sę yainu tama tiali.
1KI 5:18 Tama te be sę ebo koneani bidi dabe te Solomongo me Hiramgo sę ebo bidi dabe tomode bidali, tama augwa te Biblos hanu bidi dabe dali te Genuai Bidigo be sę yabo nai te masigi me ni name dabe dulama, tama dodolobo sę yai dao.
1KI 6:1 Te Israel dabego te Isip taga soyu aselama, te augwa bulali wąį dabego wąį dabe bidali sogoba usu nagasu, te tama kibu be 480 yia bidali. Tama te wabo kibu be me si me si te Solomon te Israelde te king te tama kibu be bidali. Tialima, te kibu bede, te si wali polua, te polua nogi augwa te Siv poali, Solomongo te Genuai Bidigo be sę ebo gagalali.
1KI 6:2 Te habu selali be habu te be tomode dąį te tiwai nigai. Te bobage usu sali te 27 mita, me te genuai da te 9 mita, tama te be pedu dąį badu te 13 me hap mita nigali.
1KI 6:3 Tama te be mabo me deli te be hobolu badu elaluali. Te aga dąį te tiwai. Te aga genuai te habu selali be habu tiwai tobage, te 9 mita usu elaluali. Tama te aga bobagego usu da, te 4 me hap mita naga tama dao.
1KI 6:4 Te be paiali daga dabede te windo meba elaluali, tama te windo dabede te tomode genuai elalu, te bulu badu dwasianu elaluai. Tama augwa te windo dabe te dedage hauwa elalubo nai dabego te haluama, te be tomoba te ula asomainu yai dao.
1KI 6:5 Tama te gasa be me badugo te habu selabo be habu sela bagulai elaluai. Te be habu badu te dwasianu be habu dabe hauwa elaluali, tama te be habu badude te sela be soiyame ni sawali elaluai.
1KI 6:6 Augwa te be habu dabe nigabo homu yali, tiali goli, augwa te habu selabo be habu daga dabe badu te agebele me nigibeo, te soiyame saide te kau ni te pos daiba muai dao. Tama augwa te si wali soiyame sai plua te kau ni muabo obo nigilali pesagede, augwa daga dwasianu tomoba gana nigali, te tobolu ni pilabo madi te pesage elaluai. Tama augwa te deli tobage tiwai kolesaga te sela wabo plua te pesagede elaluai. Tama te pagede tama te hasia plua te dwasianu igi pali, te 2 mita me 20 sentimita teba usu nani. Tama te si wali plua te dwasianu genuai gana yai, te 2 mita me 70 sentimita teba usu nani. Tama te sela wali plua, te ugwaba muabo plua tama, te genuai mu nigali, te 3 mita me 10 sentimita usu nama nigalio.
1KI 6:7 Te augwaligo te masigi dabe sali sogo, augwa halama, tama augwa te masigi dabe sabo madi bugagia dodolali. Tama nosali augwa te Genuai Bidigo be sę yainu sela asalio. Tama augwa te be sę ebo sogo, te hama me, hwą me, gasa nai dabe augwa te aingo nigali nai dabe me, te be sę ebo madi te kao me kidagalo me wabeo.
1KI 6:8 Te be sai si nigali habuba holobo togobili si elaluali, tama te togobili te be pedai saut badu elaluai.
1KI 6:9 Te Solomongo sę bidi dabego te be me badu pedai sęą silibaso, teda augwaligo te ni bǫ dabe selama, tama te dąų weyu, te walawali ni dabe me te ene sabali ni tiwai munama, te be pedu nigai. Tama augwa te bǫ nami selama, tama te be haluali.
1KI 6:10 Te bego te habu selalubo be habu bagulali, tego te bedugu sela elaluali. Tama te pedu hani ugwadu daide te tobage deli tigi poai naga sela elaluali, te 2 mita me 20 sentimita usu tama. Tama augwa te ni bǫ me selama, te be pedu bagulali oboba podolama muani, te habu selali be habu dabe me te ni dabe te be plua nigali, te pos ni dabe ugwadu daiba muani, tama te be pedai badu te pedu tiwai pedelai dao.
1KI 6:11 Tama nosali, Genuai Bidigo Solomonba te tiwai po wai,
1KI 6:12 “Te megi nago eno be sę ebao, tede eno po nage dali wainu ebao. Te nago eno tigidali bomai po me eno po odoyu, te bugagia wali pobaso da, teda eno nageba te wiegi yai kolesaga dabe eyu, te eno polobadu nago aya Devitba dąų walali gilama tiwai yaibao.
1KI 6:13 Tama ena dage Israel tomode bidiyu, te dage eno we bidi bidaibao. Tama eno dage munu me tagalogobeo. Mu menio,” wali.
1KI 6:14 Te Solomon aga sę bidi dabe dali augwa te Genuai Bidigo be sęą silibo si da,
1KI 6:15 teda augwa te bǫ ni nami selama, tama te habu selali be habu paiali masigi be daga dabe haluali, te be sai te pluade gagalasa, te be peduba usu nigi pai. Tama augwa te ni wuli ni nami dabe selama, tama augwa te be sai plua haluali.
1KI 6:16 Augwaligo te Genuai Bidigo be habu tomoba baguliyu, te genuai daga nigali. Te be habu tomode mu augwa te tama nogi poali, te Tedali Gasagi Yai Mu Be Habu da wali, tama aga usu sali dąį te 9 mita. Tama gasa be habu me, te Tedali Gasagi Yai Be Habu, te aga bobage usu nama te 18 mita. Te habu si tomode togali daga, augwaligo te bǫ ni nami dabego nigali. Tama te daga te be peduba usu nama nigali.
1KI 6:18 Augwaligo te bǫ ni nami dabe selama, tama te be tomode te daga tigidali haluama, tama te bidi dabego masigigo bagulali daga suabo usu meni yai. Tama augwaligo te ni nami daide te bobigo wiegi yai piksa noma me, te ni dabego te plaua dabe me asęyu, togoyu yali.
1KI 6:19 Te Tedali Gasagi Yai Mu Be Habu augwaligo te be tomode mu nigali, te Genuai Bidigo Dąų Wali Bomai Po Munalubo Halobage muabo digi nigali.
1KI 6:20 Te Tedali Gasagi Yai Mu Be Habu tigidali te deli tigi poai naga nigali. Te aga bobage usu, te 9 mita, tama aga genuai da, te 9 mita, tama te dąį ugwadu me, te 9 mita. Augwa te wiegi yai gol selama, tama te be haluali daga ni nami dabe haluali. Te be habu sunumi pąde augwaligo te ni bǫgo nigali alta me deli elaluali, tama augwaligo te alta me te golgo haluali.
1KI 6:21 Tama augwaligo te wiegi yai gol selama, tama te tempel be tomo bagulali madi te tigidali daga haluali. Tama augwa te sen gol meba nigilama, tama te Tedali Gasagi Yai Mu Be Habu sunumi tede walali. Augwaligo te be habu togwali madi te golgo haluali,
1KI 6:22 tama tialima, te Genuai Bidigo be pedai tigidali tomo badu me, te Tedali Gasagi Yai Mu Be Habude elalubo alta me, augwaligo te tigidali golgo mesegelali.
1KI 6:23 Augwaligo te ni oliv selama, tama te ensel mobo bidi si noma nigali, te ensel si te Tedali Gasagi Yai Mu Be Habu tomoba muainu yai. Te ensel mobo bidi noma sigo bobage usu nama te 4 me hap mita, te tama usu nigali. Te ensel si te deli tigi poai si mu nigai. Augwa si bogo te dolo si diliga palama elaluali. Tama te deli deli bogo usu sali, te 2 mita me 25 sentimita teba usu nani. Tama te ensel me deligo bogo si bobage, te 4 me hap mita dao.
1KI 6:27 Augwaligo te ensel si nigila silama da, teda augwaligo te ensel si te Tedali Gasagi Yai Mu Be Habu tomode dodolali. Te ensel me deli te dolo nogo badu dolaluyu, tama aga bogo me deligo te dolo nogo badu elalubo dagaba ponigi pelama elaluali. Tama gasa ensel te pobase nogo badu dolaluyu, tama aga bogo me deli te pobase nogo badu elalubo dagade ponigi pelama elaluali. Tama augwali sigo te gasa bogo si te be habu tomoba mu sisinagaselama elaluai.
1KI 6:28 Tama augwaligo te ensel mobo bidi noma si me te golgo haluali.
1KI 6:29 Augwaligo te ensel dabego piksa me, ni det me, tama te ni plaua me, te Tedali Gasagi Yai Be Habu me te Tedali Gasagi Yai Mu Be Habu daga daide te asęyu togolama, te dąį togwali be habu si au ilai tama tiali.
1KI 6:30 Tama augwaligo te gol selama, tama te be habu si te plua sai te golgo haluali.
1KI 6:31 Augwaligo te oliv ni nami selama, tama te Tedali Gasagi Yai Mu Be Habu sunumi nigali, tama augwaligo te sunumi muabo pesagede walama elaluai. Tama augwa te sunumi paliainu ebo sogo, te sunumi si te deliba madua sagasai. Te sunumi sigo walabo pesage te a naga pedai badu elaluali.
1KI 6:32 Tama augwa te ensel mobo bidigo piksa me, te ni det me, te sunumi sigo plaua me asęyu togwalio. Tama augwa te gol selama, tama te be sunumi dali, te enselgo piksa me, te ni det, te tama nai te golgo mesegelali.
1KI 6:33 Tama te Tedali Gasagi Yai Be Habu sunumi nigainu, augwa te oliv ni nami selama, tama te sunumi muabo pesage nigilali. Tama te sunumigo walabo pesage te me si me si pedai badu tama naga elaluali.
1KI 6:34 Tama augwaligo te wuli ni nami selama, tama te be sunumi si nigali. Tama te sunumi si deli deligo te sę si elaluali. Tama augwaligo te be sunumi muabo madi te sunumi walama elaluai, augwaligo te Tedali Gasagi Yai Mu Be Habu nigali tiwai gilama yali.
1KI 6:35 Tama augwaligo te enselgo piksa, me te ni det, me plaua te be sunumi dabe au ilabo nai dabe asęyu togolama, tama te golgo bugagia mesegelali.
1KI 6:36 Te be bulu badu te be mesalo bagulali obo augwaligo nigai dao. Augwaligo te masigi dabe augwa te bugagia dodolama togwai te selama, tama te bugulama, nani sela wasilali, te gasa nani te me nani daide ugwadu muani. Tama augwa te bǫ ni hani me deli te masigi hani sela daide ugwadu manama, muani. Tama augwa te masigi hani sela ma wasilama, tama te ni nami hani deli muani, tama augwa tama tede holudubadi, te be mesalo obo sę usu nigi pabo madiba usu nigi pali.
1KI 6:37 Augwaligo te Genuai Bidigo be sę ebo gagalali te si wabo polua, te kibu be me si me si elama, te Solomon king bidibo sogo te be sę yani. Te polua nogi augwaligo Siv poali. Te poluade digi augwa te genuai masigi wasilibo sę gagaliyu, te masigi dabe daide ugwadu te be sę yainu yalio.
1KI 6:38 Te sę bidi dabego te be sę yani kibu be 7, te tama kibu bede te be sę yani, tama te polua 8 te Solomon te king bidibadi, te kibu be 11, teba usu nagasu, te be sęą silali, te polua nogi augwa te Bul nogi yali, augwa te be sę ebo sę tigidali silalio. Augwaligo te sę bugagia yaligo, tama te bede tigidali sę te dolo mu pedelali, te Solomongo augwalibolo te sę tama yao wali gilama te be sę tama yai dao.
1KI 7:1 Te Solomon aga obo tomode genuai bego digi sę yani, tama te sę ebo bidi dabego te be silabo sę idubadi te kibu be 13 te be dabe sę ebo sę yai dao.
1KI 7:2 Te Solomongo sę bidi dabego te genuai be me deli sę yani, aga nogi te tama tiwai, te Lebanon Genuai Ni Sili Be da wai. Te bego bobage usu te 44 mita, te aga genuai usu te 22 mita, te ugwadu usu sali te 13 me hap mita usu yali. Te be tomode te ni pos te Lebanonde sali ni bǫ genuai tigi te ni hani wasilali, te me si me si tama elaluai. Augwaligo te be bobage usu nama wali peyu, te bǫ ni bobage selama, tama te pos dabe daide ugwadu te bego pedu ene sabali ni dabe muani.
1KI 7:3 Tama te bego genuai usu nama wali pali te augwaligo te be pedu ene sabali ni hani sela te pos dabe ugwadu daide nani wasilai. Tama augwaligo te Lebanonde sali ni bǫ selama, te be pedu haluali.
1KI 7:4 Tama te be paiali daga e badu me u badu pedai badu te windo hani sela elaluali. Augwaligo te windo dabe dolo si bugagia wasilaligo tama te deli deli windogo te gasa pedai badu elalubo windo te dolo si ponai elaluai. Te bego sunumigo ebo sę te me si me si naga elaluai.
1KI 7:6 Tama augwaligo genuai be me deli sęnama, te nogi te tiwai polali, Te Genuai Pos Dabego Be da wali. Te bego bobage usu te 22 mita, tama te bego aga genuai usu te 13 me hap mita yai. Te bego mabo veranda me tama te veranda mabo dąų elalubo pos me elaluai.
1KI 7:7 Tama augwaligo te Sia King Be, ma te Po Tų Odobo Be, me sę yani. Te Solomongo te we bidigo po tų odabo be tama sę yani. Augwaligo te bǫ ni nami dabe selama, tama te be paiali daga dabe haluali, te aiyadu plua saide gagalasa, te be peduba usu nigi holalio.
1KI 7:8 Augwaligo te Solomongo be digi sę yani, te gasa obo banis tomo badu te Po Tų Odobo Be tudi badu elaluali. Augwaligo te gasa be dabe sę yani tiwai gilama naga sę yani. Tama augwaligo te Solomongo wego be me te tiwai sę yani, te Isip king bidigo wegi dao.
1KI 7:9 Augwaligo te be tigidali sę yainu te gasa sawi sawi yai sagala masigi dabe naga selama, te be sę yani, te aiyadu sabo suiyame saide gagalasa, te be peduba usu nigulali, tama te bidi dabe me deliba sisinabo pesage me te obo nigilama, bagulali. Augwa te usu selama, tama te masigi dabe togwali, tama augwa te so selama, tama te me badu pedai te bugagia dodolali.
1KI 7:10 Tama augwaligo te sawi sawi yai masigi dabego te moni moni bage todogo pedama, te nani wasilama, tama te daide te be ugwadu sę yainugo tiali. Te masigi mebago genuai usu te 3 me hap mita usu, te meba te 4 me hap mita dao.
1KI 7:11 Augwaligo te genuai moni masigi dabe nani wasila silama da, teda augwaligo te bugagia dodolali te gasa sawi yai masigi me, te bǫ tigi dabe me selama, tama augwa te be dabe sę yai dao.
1KI 7:12 Tama augwaligo te kompaun tigidali bagulubo obo me deli nigali. Te obo augwa te tiwai nigali. Augwa te togolama bugagia dodolai masigi hani sela te muani. Tama augwaligo te masigi dabe daide te ni bǫ hani ni tigi deli te daide muna muna pali. Augwaligo te tiwai naga ela pidubadi, te obo bagulubo sę siligi pabo siba usu nani. Augwaligo te obo nigali deli poai kolesaga elama, augwa te bidi deliba sisinibo obo bagubo sę yali, te Genuai Bidigo tempel be gesabidi badu elaluai, tama te tiwai te be habu te Genuai Bidigo tempel be gesabidi nigai elaluali.
1KI 7:13 Te Tair hanude bidi me deli bidali, aga nogi te Huram. Te bidi aga te brasgo te nai dabe nigibo sę te mu koneai bidi mu dao. Te bidi Huramgo aya aga te Tair hanu bidi, tama agai me te brasgo te nai doado bage nigibo te mu koneai bidi me deli, tiali goli te aga isali. Te Huram aga ida te Naptali hani we me deli dao. Solomongo te Huramba po ola tolobaso, tama aga aselama, tama te tigidali nai te brasgo nigila silali, te Solomongo agabolo wali po tiwai gilama te tiwai yalio.
1KI 7:15 Te Huramgo te genuai bobage pos si te brasgo nigali. Agai te pos si te deli tobage tigi poai si tama nigali. Te pos sigo bobage usu te 8 mita, tama te pos sigo tigi genuai usu te 5 mita me 30 sentimita dao.
1KI 7:16 Tama agai te pos sigo tobolu me te brasgo nigai, te augwali si te bobage pos dabe daiba ugwadu muainu tialio. Te pos tobolu dabe aiyadu ugwaba gagalasa nedali usu, te 2 mita me 20 sentimita dao.
1KI 7:17 Tama agai te brasgo sen dabe nigilama, tama te wego nigibo wa tiwai kęnama, te pos si tobolu dagede walali, te pos si au iliyu tama tialio. Te deli deli posde te tobage au ilali te a naga nogo me si elaluali.
1KI 7:18 Tama agai te bras selama, tama te ni wai pomigranet piksa hauwa nigilama, tama agai te pomigranet piksa dabe te wa tiwai sen dabede walama, te pos si bagulama elaluali. Deli deli posde te au yabo pomigranet hani si elalua palio.
1KI 7:19 Te deli deli pos tobolude te gasa sawi yai plaua me deli te dinigalubo tiwai tonobo ąǫ yalio, tama te plauago bobage usu te 1 mita me 80 sentimita elaluai.
1KI 7:20 Te pos dabe tobolu te bagua sai tama Huramgo te nai dabe te wa tiwai te dwasianu ugwanu gana te bagua salide kęnama walali. Tama te daide ugwadu, agai te pomigranet piksa te hani si walali. Te deli deli posde te 200 pomigranet elalua pali.
1KI 7:21 Huramgo te pos dabede sę yali silibaso, tama te pos si augwaligo te Genuai Bidigo tempel be sunumi pąde te ugwaba dodolama muani. Te saut badu elaluali sunumi pedai badu dodolama muani pos, te nogi augwa te Jakin nogi yali, tama te not pedai badu muani gasa pos, te nogi augwa te Boas nogi yai dao.
1KI 7:22 Te pos si tobolude te nai te augwaligo gasa sawi yai plaua nigai te dinigaluali. Tama te pos dabede yali sę tigidali silai.
1KI 7:23 Te Huramgo te genuai tank ąį deli te brasgo nigali. Te tank ugwadu daide usu sali, te 2 mita me 20 sentimita, tama te dedage usu sali, te 4 mita me 40 sentimita, tama aga tigi genuai yali, te 13 me hap teba usu nigi pai.
1KI 7:24 Te tank sese tobolu badu te agai te bobigo piksa hani si nigilama, te tank tobolu sese tigidali bagulali, tama te tigidali mita dąį tomode te nogo si piksa elaluali. Tiali goli, agai te piksa dabe nigilama, te tankde kęnebeo. Menio. Agai te tank nigali sogo, agai te piksa dabe dali nigai, tama augwali te tankde elalubo tiwai yai dao.
1KI 7:25 Huramgo te omai bulmakau te nogo si olama, sągągo si te brasgo nigali, tama augwaligo te nigali bulmakau tudi daide te tank ąį muani. Te bulmakau dabe tudi badu te tank ąį dologode elaluali, tama augwaligo gesabidigo te tigidali pedaiba tonalua pai. Te bulmakau selago te giliga pedaluboba tonalu, te me selago te giliga dega sabo pedai badu elalu, te me sela te not pedai badu elalu, te me sela te saut pedai badu elalu yalio.
1KI 7:26 Te brasgo dąį igi pali, te tank bulu badu gagalasa pali te tank tomoba usu nani, te usu sali te 8 sentimita yali. Te tank sesege badu te kap pedauwali tiwai elama, tama te gasa sawi yai plaua dinigalubo tiwai yali. Te tankde wę elaluabo usu te 40,000 lita wę elalueibao.
1KI 7:27 Huramgo nogo si wilkar te brasgo nigali, te daide ugwadu te dwasianu tank wę dabe muainu yali. Te wilkar me si me si pedai bogo badu te deli tigi tobage dąį elaluali, te 1 mita me 80 sentimita usu nama, tama augwali te daide ugwadu, te 1 mita 30 sentimita usu nama elaluai.
1KI 7:28 Agai te wilkar dabe te tiwai nigali. Hasia bolo agai te wilkar dabego dili nigilama, tama nosali agai te bras dabego te laion piksa dabe elalubo nigali, me te omai bulmakau, me ensel, te piksa dabe nigali. Agai te bras pedai dabe selama, tama te wilkar me si me si elalubo te dili dabe kęani. Tiali goli, agai te dili dabe tigidali mu me halubeo. Te wilkar dabego dili te bagua si dodo bolo pai au tiwai dabe elalualio, tama te dodo bolo pali te dologode elalubo te laion me bulmakau dabego piksade te tiwai elaluali. Tama te deli tigi poai dodo bolo pali te piksa dabede ugwadu elalualio.
1KI 7:30 Te deli deli wilkar dabede te me si me si wil bras, me te ba bras dabego te wil dabe dąų olama tolaluali. Te habu sugą sali me si me si ugwadu te tigidali wilkarde te bras me si me si elaluai, te tank ąį tolalubo tiwai elama, tama te pos dabede te baguasi madi au dodo bolo pai elaluai dao.
1KI 7:31 Te ring tiwai baguasi bras me deli elaluali, tama te pos me si me si dabego te deli ring naga dąų olama tolaluali. Tama te wę tank te ring daide ugwadu munaluali. Te wilkar dagede digi gagalasa pali, te ring sabi badu usu nigi pali te 45 sentimita. Tiali goli, te wilkar ugwadu dagede gagalasa pali, tama te ring dage ugwadu teba usu nigi pali, te 67 sentimita yai. Te ringde te windo piksa dabe elalu, te ring tigidali bagua selama, tama te haniani piksa dabe te windo dabe tomode elaluai dao.
1KI 7:32 Te wilkar dabego genuai wil te 67 sentimita elaluai. Tama te wil tolaluali te bras ba dabe, te Huramgo nigilama, te wilkarde me kęnebeo. Menio. Te wilkar aga tiwai tigi poaigo digi nigali. Te wil dabe te laiongo piksa dabe dologode elaluali.
1KI 7:33 Te wil dabe te hwįbo karis dabego wil tiwai si yali. Tiali goli, Huramgo te wil tigidali te brasgo nigali, te wil dabe tolaluabo ba dabe, tama te wil dili spok dabe tolalubo nai dabe, tama te spok dabego digi, tama te wil sesegede baguasi elaluali.
1KI 7:34 Tama te ring dabe dali, te tank wę dualabo pos dabe me, te Huramgo nigilama, tama te wilkar daide ugwadu me kęnebeo. Menio. Agai te wilkar dolo si tiwai pedaigo nigali. Te ring dabe ugwadu usu sali, te 22 sentimita usu si yai dao.
1KI 7:36 Huramgo te ensel dabego piksa noma, me laion, me te ni det te ni pos dabego togolama nigali, tama te nai dabe tomode te ringde windo elalubo tiwai elaluali. Mena badu te piksa asęabo elalubaso da, teda agai te piksa dabe tede asęani. Tama agai te piksa dabe baguluyu, te dodo bolo pai te au ilibo nai hauwa asęani.
1KI 7:37 Huramgo te nogo si wilkar nigali, te deli tigi poai si naga nigilama, tama te tigidali wilkarde nigilali nai te mak te deli tigi poai naga pedelai dao.
1KI 7:38 Huramgo te nogo si tank wę nigilama, te deli deli wilkarde muainu yali. Te tigidali tank węgo genuai usu selama nigali usu te 1 mita me 80 sentimita tama. Tama augwa te tank wę deli delide te wę elaluabo te 800 lita wę te tama usu nigai dao.
1KI 7:39 Huramgo te nai dabe nigila silama da, teda agai te a naga wilkar te Genuai Bidigo tempel be mesalode muyu, te saut pedai obo pąde muani, tama te gasa a naga wilkar te not pedai obo pąde te badu muani. Tama agai te genuai tank wę te be sabi badu pąde te saut badu pedai badu muani.
1KI 7:40 Huramgo te wę pauabo moni dis pou me, te dwasianu savol dabe me, te gasa dis pou dabe me nigalio. Tialima, megi da, Huramgo te king Solomongo agabolo te mani sę, te Genuai Bidigo tempel be sę yali, te sę tigidali silalio.
1KI 7:41 Te Huramgo nigali nai dabe te e tama dao. Te genuai bobage brasgo nigai pos si, tama te pos dabego baguasi tobolu si me, tama te pos dabe tobolu au ilibo te wa tiwai nai dabe me nigali.
1KI 7:42 Tama agai te 400 pomigranet piksa nigilama, te pos si tobolude bagulali te wa dabede kęnainu yali. Te deli deli posde te pomigranet hani te tobolude elalua pai.
1KI 7:43 Tama agai te nogo si wilkar, me te nogo si tank wę te wilkarba muabo nai dabe nigali,
1KI 7:44 tama te genuai tank wę me deli me, tama te omai bulmakau nogo si olama, sągągo si nigali, te bulmakau dabe daide te genuai tank wę muani.
1KI 7:45 Tama agai te sospen sene dabe, me te dwasianu savol dabe, me te dis dabe, tama nai nigali. Huramgo te Solomongo po wali pelama, tama te Genuai Bidigo tempel bede te tigidali nai nigila silali. Agai te nai dabe nigila silama da, tama agai augwali te dwagi yai brasgo bugagia mu nigai dao.
1KI 7:46 King Solomongo te Hurambolo po weyu, te nai dabe te Jordan wę odogo bulu, te hanu Sukot me te hanu Saretan si tomode nigao po wali. Tede te tobage sę yabo wiegi yai mama yai tǫ elaluai.
1KI 7:47 Te tigidali nai Huramgo te brasgo nigai, augwali te hauwa umabo mu tama dao. Tama tibaso, Solomongo te bidi dabe augwaliba po weyu, te brasgo sęgę dabe osola suabo po me wabe. Tama tiyu, te nai dabego sęgę te bidigo me konebeo.
1KI 7:48 Solomongo te sę bidi dabebolo weyu, te Genuai Bidigo bede muabo doado bage dabe nigao po wali. Tialima, augwa te gol selama, tama te alta, me tebol te Godigo gedude maiabo nai bret muabo nai dabe nigali.
1KI 7:49 Tama augwa te wiegi yai gol selama, tama te nogo si lam tolaluabo nai nigali, te Tedali Gasagi Yai Be Habu daga pąde dodolabo nai nigai. Te a naga te dolo nogo daga pąde dolaluyu, te me a naga te pobase nogo badu elalubo be daga pąde dolaluali. Tama augwaligo te gol selama, tama te plaua piksa noma dabe me, te lam, te sisis tiwai nai te sia tolalubo nai, te tama nai dabe te golgo nigai dao.
1KI 7:50 Tama augwa te wiegi yai gol selama, te ofa ebo kaneme muabo pou dis dabe, me gasa dis dabe me nigali, tama te lam sula sabo nai me, tama te denami ebo pauda ulabo plet me, te sia tolasa bilabo plet me nigali. Tama augwa te gol selama, tama te Tedali Gasagi Yai Mu Be Habu paliabo sunumi te hinsis dabe nigali, tama te tempel bego moni be habu sunumi hinsis me nigai dao.
1KI 7:51 Te king Solomon dali, te sę bidi dabe daligo te Genuai Bidigo tempel be sę yali tigidali silama da, teda Solomongo te tigidali silva, me gol, me te dis nai dabe te aga aya Devitgo nai dabe selama, te Genuai Bidiba dąį ilali nai dabe, tama augwa te doado bage tigidali te Genuai Bidigo be tomode elaluali bakstua be habu tomoba muanio.
1KI 8:1 King Solomongo te tigidali te Israel dabe te polalubo bidi tigidali dali, te tigidali hani sibi tobolu bidi dabe dali, te genuai haniba po ola tolali, tama te dwasianu hanigo tobolu bidi dabeba me po weyu, tama agai augwaliba po waliyu, te augwali aselama, te aga bidibo Jerusalemba sisinagasao po wai. Agai augwali te Saionba pomainu homu yali, te Devitgo Taun Hanuba pelama, tama te Genuai Bidigo Dąų Wali Bomai Po Muani Halobage sigi pelama, tama Genuai Bidigo tempel beba tolasa asao po wai dao.
1KI 8:2 Tialima, tigidali te sisinagasali te nogo a naga me si wabo poluade, te polua nogi augwa te Etanim poali, te osogo bidabo bede bidibo genuai sogode te tama tiai dao.
1KI 8:3 Te tigidali polalubo bidi me tobolu bidi te deliba sisinani sogo, teda te pris dabego te Dąų Wali Bomai Po Muani Halobage te tolali.
1KI 8:4 Tama te meba pris me Livai dabe daligo te Genuai Bidigo ugwa lotu be, me te Godigo nai da weyu sa muani te ugwa bede muani doado bage me selama, tama te Genuai Bidigo tempel be pąba selasa pali.
1KI 8:5 Augwali pelama, sabalubo si da, teda e Solomon dali te tigidali Israel we bidi me te Dąų Wali Bomai Po Muani Halobage pąba sisinani. Tama augwaligo te genuai sipsip hani me, te omai bulmakau dabe dali elama, tama Godiba ofa yali. Augwaligo te kibu hauwa mu te ofa eyu elali, tama bidigo augwali nedabo usu meni yai dao.
1KI 8:6 Augwa te tigidali kibu dabe ofa ela silama da, teda te pris dabego te Dąų Wali Bomai Po Muani Halobage te Genuai Bidigo tempel be tomoba tolasa pelama, tama agai te muainu sisi ilali pesage te Tedali Gasagi Yai Mu Be Habuba muani, te ensel mobo bidi noma sigo bogo dologoba muai dao.
1KI 8:7 Te bogo dabe te dinigaluali, tama tialima, augwa te halobage dali te halobage ni palali bobage ni si me te halualio.
1KI 8:8 Te ni palali ni si te bobage mu, tama bidi te Tedali Gasagi Yai Be Habude dolaluyu, tama te Tedali Gasagi Yai Mu Be Habuba tonobaso da, agai te ni si dage badu suali. Tiali goli, bidi te be habu bulu badu dolalubaso da, te agai me sugobeo. Tama te ni me munalu dai dao.
1KI 8:9 Te halobage tomode te hauwa nai me munalubeo. Te Godigo bomai po elalubo masigi sawali si elaluali, te naga munaluali. Polobadu te Israel dabego te Isip bulu taga soyu, te Sainai bulu duba bidagasali sogo, tama Genuai Bidigo bomai po augwali dali dąų wai. Te dąų wali bomai po te masigi sawali side asęai elaluai, tama Mosesgo te masigi si te halobage tomoba muai dao.
1KI 8:10 Te pris dabe augwali te Tedali Gasagi Yai Mu Be Habude bidama, te buluba teda soali, tialima polo mu tama te pǫgo te Genuai Bidigo tempel be pągąna sali.
1KI 8:11 Tama Genuai Bidigo bomo yai ula te pǫde ula umabo mu eyu, tama aga te pągąna sali, tama tiyu te pris dabego augwa sę yabo usu meni yani.
1KI 8:12 Tialima, Solomongo gedu haluasa po e tama wali, “Genuai Bidi, nago te po weyu, nage te hulia sai pǫde mu bidaibao wai dao.
1KI 8:13 Tiali goli, megi da, eno te nago be wiegi yai mu me deli sę yani elalubao, tama nage te bede sesemane sogo bidada peyu, bidada pagameo,” wali.
1KI 8:14 King Solomongo gedu haluasa po olama da, teda aga begegi solama, tama te we bidi dabeba tonagasu, tama Godiba hanalu, te augwali bugagia wiegi yai ilao po wali.
1KI 8:15 Tialima, agai te tama po wali, “Te Godigo nogi ugwaba sao,” wali, “te Israel dabe dago Genuai Bidi dao. Magi baso meni. Aga digi agai te eno aya Devit dali dąų wali po te bugagia wali pali. Devitgo homugo te we bidi God pąba sisinagasabo be me deli sę emainu homu yai, te dago Genuai Bidi, te agaba lotu po omainu yali. Tiali goli, Genuai Bidigo agabolo te tama po wai, ‘Te eno ena we bidi te Isipde gagalasa sela asali, te megi sogoba usu nagasu, eno te Israel dabe augwaligo enaba lotu omainu ebo be sę yabo te hani me deligo hanu me deli te eno sa me musiąwai dao. Tiali goli, Devit, eno nage sa muani, te eno we bidi nago tonalumainu yali. Nago te eno genuai be me deli sę yabo homu ebo, tama nago te ebo homu te wiegi yai homu dao.
1KI 8:19 Tiali goli, nago digi eno te be me sę egobeo. Menio. Te nago ogwa mu me deligo te eno be sę emainu yaibao, te eno we bidi dabe augwali te ena pąba asomainu yaibao,’ God Genuai Bidigo te po wali.”
1KI 8:20 “Genuai Bidigo te bomai po dąų waligo da, tama megi da, agai te tigidali usu nanio. Eno te ena aya Devitgo sę yali pesage hasegelama selama, tama ena te dage Israel bagego king bidibao, te Genuai Bidigo bomai po dąų wali gilama te tiwai yali. Tama te dena Genuai Bidi te Godigo be me deli te eno sę yani, te da Genuai Bidi pąba pomainu yabo be dao.
1KI 8:21 Tama eno te pesage me deli te be tomode nigali, te Dąų Wali Bomai Po Muani Halobage muabo madi. Te halobagede te dago wąį nǫų dabe te Isip tǫ tagalama, te bidi meni yai bulu te Sainai bulu duba odasa aselama bidali sogo, te Genuai Bidigo mani bomai po asęani masigi sawali si te halobagede munaluali,” Solomongo te Israel we bidi dabebolo te po wai.
1KI 8:22 Tama te tigidali Israel we bidi gedude Solomon pelama, te Genuai Bidigo alta pąba doligi pelama, tama agai nogo si ugwaba selama,
1KI 8:23 tama gedu haluasa po te tiwai wali, “God, Israelgo Genuai Bidio, te nage tiwai god me deli te dagalu ugwadu ma te tǫ aiyadu me bidibeo. Tama da te nago gedude bugagia bilibaso da, tama te dwai kolesaga me yabo homu isiąyu ebaso da, teda nago te naga sę ebo bage da dali te dąų wali bomai po te bugagia wali pomainu elama, tama sesemane sogo nago da godolo mu ebo dao.
1KI 8:24 Naga digi nago te eno aya Devit te naga sę bidi dali polobadu te bomai po dąų wali, tama naga digi te po bugagia wali pelama, tama megi da, nago naga te dąų wali bomai po te usu nani dao,” wali.
1KI 8:25 “Tama megi da, te God, te Israel dabego Genuai Bidi, eno nageba te nago gasa bomai po te eno aya Devit dali dąų wali pode te nageba hanalu obao,” wali. “Nago agaba te tama po wali, ‘Devit, te nago wai puluba hanigo te wali po sesemane sogo bugagia wali peyu, tama eno gedude dolo biliyu, te nago ebo tiwai gilama ebaso da, teda sesemane sogo te eno nago hanide te bidi me deli te Israel bagego king pedalumainu yaibao,’ wali.
1KI 8:26 Awe, te Israelgo God, eno homugo nago te eno aya Devit dali te dąų wali bomai po usu numainu homu ebao,” wali.
1KI 8:27 “Tiali goli, God, te mu tama nage te tǫba bidagasainu homu ebo da, agawe? Dagalu te genuai pesage mu tama da, tiali goli te nage bidabo pesage te genuai me elalube. Tama magi baso te eno nago be sę yani te be te nago usu da waibawe? Te be usu egobeo.
1KI 8:28 Tiali goli God, eno Genuai Bidi, eno homugo te nago ena naga sę bidigo gedu haluasa po wabo, me eno hanalubo po, te nago odomainu homu ebao, tama megi eno nagebolo bomonama hanalubo po te tiwai sę nago emainu homu yai.
1KI 8:29 Nago te po wali, te nago we bidi te nage pąba asomainu yabo be da po wai. Tama eno homugo nago te beba tigidali sogode tonalumainu homu ebao, te giligade me hulide, tama ena nago sę bidi eno te beba tonaluyu, te gedu haluasa po nageba wabo sogo da, teda nago eno te gedu haluasa po wabo odobo usu yaibao.
1KI 8:30 Genuai Bidi, nage te naga bulu te dagalude bidibao. Tiali goli, te ena nago sę ebo bidi me te Israel dabe, te naga we bidi hani dabego, te beba tonalu, te nageba gedu haluasa po obaso da, teda nago dago te gedu haluasa po wabo odolama, tama te dago sęgę sela sąyao,” po wai.
1KI 8:31 “Te bidi me deligo te gasa bidiba dwai sę ebaso, tama augwali te beba aselama, tama te nago alta pąba pelama, tama agai te aga te dwai sę mu ebeo dąų wabo po obaso da,
1KI 8:32 teda Genuai Bidi, nage te dagalude bidiyu, tama nago augwali sigo te po wabo odolama, tama augwaligo te po tų dodolao. Tama nago te dwai sę yali bidiba te dwai dene ilama, tama te dwai kolesaga agaba wei ponao. Tama nago te dwai sę isiąwani bidiba te wiegi yai sę eyu, te agai dwai sę isiąwani te bidiba ola mayu, te tama tiao,” wali.
1KI 8:33 “Tama da Israel dabe, naga we bidi dabego, te boi bidi dabeba hwįbode tama nago te augwaligo da aiyaba elalumainu yai, magi baso meni, dago te nageba dwai sę ebaso, tama nosali dago homu ma begeliyu, te nage dologode bidiyu, tama da nago te be tomoba aselama, tama gedu haluasa po weyu, te dago dwai sęgę sela sąya po hanalubaso da,
1KI 8:34 teda Genuai Bidi, nage te dagalude bidiyu, tama nago te naga we bidi dabego gedu haluasa po wabo odolama, tama dago dwai sęgę sela sąyao,” wali. “Tama te boi bidi dabego da te gasa tǫ pedaiba selasa pobaso da, teda nago digi da te dena wąį nǫų dabebolo te nago polobadu da mani te tǫba ma odasa asu yao,” po wai.
1KI 8:35 “Tama naga we bidi dago dwai sę nageba ebaso, tama nago te dwai sę wei ponoyu, te tulubage dąų weyu palia sobaso, te nosali dago ge nenama, homu begeliyu, tama nage dologoba aselama bidiyu, tama dago te beba tonalu, tama nageba gedu haluasa po obaso da,
1KI 8:36 teda Genuai Bidi, nage te dagalude bidiyu, te gedu haluasa po odoyu, tama nago te da Israel naga sę ebo we bidi dabego sęgę sela sąyu yao. Nago dabolo te doloba pai kolesaga wali pomainu ola mao. Tama te dago tǫ da olama bidimainu nago te polobadu naga we bidi dabolo mani tǫba te tulubage ma mayu tagala palao,” te po wai.
1KI 8:37 “Tama te genuai nasi te dago tǫba pedalubaso, ma te genuai gasi me deli pedalubaso, ma te posolai wali asu, tama te gide nai dabe dolabo gasi me deli pedalubaso, ma te kuli mano hauwa umabo mu asiyu, te nai dabe silibaso, ma te boi bidi dabego hwįagasu te dago hanude te da bagua sagasobaso, ma te haniani gasigo da dolobaso,
1KI 8:38 tama nosali da Israel dabe me deli te naga we bidi dabe, te sęgę agaba pedaluyu, tama aga yali dwai sę koneyu elama, tama te tempel beba tonalu, tama aga nogo ugwaba siyu, tama nageba gedu haluasa po obaso da,
1KI 8:39 teda Genuai Bidi, nage te naga bulu te dagalude bidiyu, tama nago agai gedu haluasa po wabo odolama, tama agai sęgę sela sąyu, te aga tau sao. Nago naga te nago tigidali bidigo homu koneani, tama tiyu, nago te tigidali deli deli bidigo kolesaga dagaliyu, tama augwa te yali kolesagade usu nama, te dene wei ponobo dao.
1KI 8:40 Te nago tama tibaso da, teda da naga hani bidi dabe te nago dago wąį nǫų dabebolo te mani tǫde bidiyu, te tigidali sogo nage dologode bidaibao,” te po wali.
1KI 8:41 “Te gasa bulu tǫ pedaide bidibo Israel hani isąwai bidi dabego te nago genuai nogide po odoyu, tama te nago te naga we bidi dabe tau siyu, te genuai sę dabe mu ebo po wali. Tama te bidi dabe augwali me deligo te nageba lotu wabo homu ebaso, tama te aga page bulu tagalama, tama te tempel be pąba aselama, tama nageba gedu haluasa po obaso da,
1KI 8:43 teda Genuai Bidi, nage te naga bulu dagalude bidiyu, tama nago agai gedu haluasa po wabo odolama, tama nagebolo hanalu, te yao wali sę te sę nago yao. Tama tiyu, te tigidali bulu bidi hanigo te nage koneama, te nage dologode bidaibao, te da Israel dabe, te nago we bidi dabego ebo tiwai gilama yaibao. Tama te augwa koneama, eno te sę yani be, te nago be elalubaso, tama te pesageba te we bidi dabe nage pąba asomainu te tama tiao,” po wali.
1KI 8:44 “Tama nago te naga we bidi dabe da te me badu me te boi bidi dabeba hwįgi pomainu tagala palalima, tama augwaligo nago te sa muani taunba dali, te tempel beba dali si tonalu, tama augwaligo gedu haluasa po obaso da,
1KI 8:45 teda Genuai Bidi, nage te bulu dagalude bidiyu, tama te nago augwaligo gedu haluasa po wabo odolama, te nago te olo mu tau sabo wiegi yai kolesaga elama, te augwali tau sao,” po wali.
1KI 8:46 “Tigidali we bidigo dwai sę ebo da. Tama nosali te Israel dabego te dwai sę nageba ebaso, tama nago augwali dali wado po weyu, tama nago te boi bidi dabego augwali aiyaba elalumainu elama, te augwali kalabus elama, tama augwali te pąde elalubo bulu tǫba, ma te digibulu tǫba selasa pomainu ilama,
1KI 8:47 tama nosali augwali te boi bidi dabego bulu tǫde bidiyu, tama augwaligo te augwa yali dwai sęde homu hauwa kone paliyu, te augwaligo homu begelibaso da, teda Genuai Bidi, nago augwaligo te gedu haluasa po wabo odao. Mu tama, augwali te boi bidi dabego tǫde kalabuside bidiyu, tama augwaligo nageba konealubo homu dąų weyu, te nageba naga homu koneyu, tama ge nenama, homu mu begelama, tama augwaligo te nago augwaligo wąį nǫų dabeba sa muyu mani te tǫba tonalu, te e hanuba dali te nago eno sę yani beba tonalu, te we bidi dabe nage pąba asainu ebo homu elama, tama te augwaligo gedu haluasa po te tama waibao, ‘Te hobede mu da, da te dwai sę ebo kolesagade biliyu, tama te dwai kolesaga haniani yali dao,’ te po obaso da, teda nage te naga bulu dagalude bidiyu, tama te nago augwaligo gedu haluasa po wabo odolama, te nago olo tau mabo wiegi yai kolesaga eyu, te augwali tau sao,” po wai.
1KI 8:50 “Tama nago te nago we bidigo nagede yali tigidali dwai sę me, hagoma ebo kolesaga tigidali te tagalumainu elama, tama nago te boi bidi dabego augwali homu dene emainu eyu, tama te olo mu tau mabo wiegi yai kolesaga emainu ilao,
1KI 8:51 magi baso meni, da Israel hani te nago digi tedali sa muani we bidi dabe mu da. Tama nago da te Isipde sali, te bulu te sesena pabo sia tiwai ebaso, tama nago da te sa muani tǫde bidimainu odasa asai dao,” wali.
1KI 8:52 “Genuai Bidi, sesemane sogo nosali nago sę ebo we bidi da Israel dabe tonaluyu, tama naga we bidi dabe dago gedu haluasa po wabo odainu sisi elaluao, me ena te Israel dabego kingo gedu haluasa po weyu, hanalu wabo po me odoyu yao.
1KI 8:53 Magi baso meni, nago da Israel dabe te gasa hani we bidi tigidali tomode dia selama, tama da te nago tedali sa muani we bidi mu pedelali, te nago bomai pode dąų wali po wali peyu, te tiwai yali. God, Genuai Bidi, nago te bomai po te Moses, naga sę bidigo pedauwalide dąų walali, te nago dago wąį nǫų dabe te Isip tǫde selama, te augwali odasa asali sogo te tama tiai dao,” Solomongo te tiwai aga gedu haluasa po wai.
1KI 8:54 Te Solomongo Genuai Bidiba gedu haluasa po wabo sogo, agai kidu te alta pąba sugunugulama, tama agai nogo si te ugwa sali. Tialima, agai te tigidali gedu haluasa po ola silibo si da, te aga hodaluama dolalu,
1KI 8:55 tama agai bomonama i weyu, te tigidali we bidigo bugagia odomainu yali, tama agai Godiba hanaluyu, te Israel we bidi tigidali bugagia wiegi yai ilao po hanalu wai. Solomongo te tiwai wali,
1KI 8:56 “Te Genuai Bidigo nogi ugwaba sao. Agai te wiegi yai homu nagame ebo me, te bugagia bidibo kolesaga te da Israelbolo mani, te aga we bidi dabebolo, te agai po dąų walali tiwai gilama te tiwai yali. Agai dade te aga dąų wali wiegi yai po te aga sę bidi Mosesgo pedauwalide wali po te me deli me tagalubeo. Menio. Agai te po tigidali usu nai dao.
1KI 8:57 God, dago Genuai Bidi, eno homugo te nage da dali bidimainu ebao, te dago wąį nǫų dabe dali bidali tiwai gilama emainu yao. Tama eno homugo agai da tagaliyu, te da olo bidimainu me egobeo.
1KI 8:58 Tama eno homugo agai te dago homugo aga wei homu emainu elama, tama da te agai dabolo sa muani wiegi yai sunumidu bilimainu yaibao, tama dago te bomai po dabe me te agai dago wąį nǫų dabebolo mani po te wali pomainu emainao.
1KI 8:59 Tama eno homugo sesemane sogo giligade me hulide, God, dago Genuai Bidigo, te eno agabolo gedu haluasa po wabo te aga homugo konemainu ebao. Tama agai te olo mu tau sabo wiegi yai homu kolesagago te da Israel dabe, te aga we bidi, tau somainu yaibao, tama agai te dago king tau somainu yaibao. Tama tigidali side te da nai te me sǫą pomainu me egobeo.
1KI 8:60 Tama tialima, te tigidali bulu tǫ pedai badu te tigidali bidi hanigo te tiwai konemainu yaibao, te Genuai Bidi deli naga te God tama, te gasa god me meni da homu emainao.
1KI 8:61 Tiali goli, sesemane sogo dagego te dena Genuai Bidi, te Godiba naga homu kone paliyu, tama aga deli dologode naga bidao,” wali. “Tama dagego te tigidali bomai po me, agai po me, bomonama wali peyu, te dagego megi ebo tiwai gilama yao,” Solomongo augwalibolo te po wai.
1KI 8:62 Tialima, king Solomon dali te tigidali we bidigo te ofa dabe te Genuai Bidiba yali.
1KI 8:63 Solomongo te bidi sese umabo te 22,000 bulmakau omai, me te bidi sese umabo te 120,000 sipsip dali meme dali sela aselama, tama te God dali deli homu pedalubo ofa yali. Te kolesagade, te king dali, te tigidali Israelgo me te tempel be te Genuai Bidigo be mu da weyu, te sa muyu, te tama sę pedelali.
1KI 8:64 Te sogo me, king Solomongo te sisinani pesage tomode te Genuai Bidigo tempel be gesabidide elaluali tǫ pedaide te sa muani, tama te tǫ te Genuai Bidigo tǫ mu pedelali. Tama te tǫ pedaide te siago tigidali domainu ulubo ofa me, te wit ofa ebo me, tama agai te kibu dabego ili me te deli homu pedelainu ebo ofa dabe yabo tǫ nigilali. Augwa te ofa dabe te tǫ pedaide te siaba ulali, magi baso meni, te pesagede te genuai elaluali, tama te alta bras te dwasianu ebaso, tama augwa te ofa dabe te altade naga yabo te usu meni yani.
1KI 8:65 Te sogo Solomon dali, te tigidali Israel dabe me, te Jerusalemba sisinama, te osogo bidabo bede bidibo bodolu muani te genuai side sisinama bidali. Augwali te Genuai Bidi dago Godigo gedude sisinama bidali te a naga olama, me si sogo te sisinama bidali, tama nosali augwali te a naga olama, me si te tama sogo ma sisinani, te tigidali deliba taluama, te 14 sogo bidai. Te genuai hani we bidi te tigidali tǫ pedai badu asali, te Hamat hanuba pabo sunumi tulumage side gagalasa pali, te not pedai badu teba usu nigi pelama, te Isip tǫ pedai te saut badu dąį igi pai.
1KI 8:66 Te genuai bodolu muani side bidali te silama, tama te nosali Solomongo te we bidi dabe augwa buluba ma tagala palali. Tama te we bidi dabego te kingba usu da po weyu, te tigidali sę agai te elama, te augwaligo te Genuai Bidiba hanaluyu, te agaba wiegi yai sę bugagia emainu yali. Tama augwali pabo sogo te augwali wiegi yai homu pemene mu yali, magi baso meni, te Genuai Bidigo te Israel dabe augwaliba te tigidali wiegi yai sę yali homu kone palama tiali, te aga we bidi augwaliba te sę yai, te aga sę bidi Devit dali te dąų walali po tigidali te usu nagasu te tama tiai dao.
1KI 9:1 Te Solomongo te Genuai Bidigo tempel be me, te aga kingo bidabo genuai wiegi yai be me, tama agai te sę yabo homu yali, te tigidali gasa be me te sęą silai.
1KI 9:2 Tama nosali Genuai Bidi agaba te nade ma pedelali, te polobadu Genuai Bidi te Gibeonde pedelali tiwai gilama yali.
1KI 9:3 Tama Genuai Bidigo agabolo te tama po wai, “Eno te nago te enaba wali gedu haluasa po dali, te nago bomonama hanalu wali po me, te odali. Tama eno nago te sę yani be sa muyu, te be te eno be elalueibao, tama sesemane sogo te we bidi augwali te ena pąba te beba asiyu yao po wai. Tama sesemane sogo eno te beba tonaludu, tama teba homu kone yaibao.
1KI 9:4 Tama nagede, te nago ena deli naga homu konealu, tama doloba pai kolesagade biliyu, tama eno bomai po tigidali wali peyu, tama eno nagebolo wali sę po tigidali eyu, te naga aya Devitgo yali sę tiwai gilama yao po wai.
1KI 9:5 Te nago te tama tibaso da, teda te sesemane sogo eno te Israel king dabe te nago hanide naga pedalumainu yaibao, te eno nago aya Devit dali te dąų wali bomai po usu nainogo te tama tiaibao. Eno agabolo te tama po wai, ‘Devit, te sesemane sogo te eno nago hani bidi me delide te Israel king pedalumainu ilaibao,’ po wai dao,” wali.
1KI 9:6 “Tiali goli, Solomon, te nage me, te nago hani nosali pedalubo bagego, te ena mu tagaliyu, te eno dagebolo mani bomai po me eno gasa po dali te wali me pisiąma, tama dagego te tibo god dabe wali peyu, te augwaliba lotu obaso da,
1KI 9:7 teda eno augwaliba te mani tǫde bidibo te tigidali Israel dabe te eno sela sąwaibao,” wali. “Tama me eno te tempel be te tudi ola mayu, te ena digi sa muai be te eno te beba homu kone me egobeo. Tama te tigidali bulu bidi hanigo te Israel dabe te dolobo po me, te posobo po me, te augwaliba waibao
1KI 9:8 Megi da, te tempel bego genuai nogi elalubao, tiali goli te dolaibao. Tama tedu asobo bidi augwaligo sueibao. Te augwali midigi dwai mu selama, te moni wi mu yaibao. Tama augwa te kęnę po waibao, ‘Magi baso Genuai Bidigo te tǫ me, te be dolaliwe?’
1KI 9:9 Tama mebago te po wei ponaibao, ‘Te page e dao,’ po waibao. ‘Te Israel dabego te God tagalali, te augwa Genuai Bidi dao. Polobadu agai te augwa wąį nǫų dabe te Isipde selama, tama augwali te buluba odasa asali. Tiali goli, augwaligo te God tagaliyu, tama te tibo godiba begegi pelama, te augwali dologode bidiyu, augwali wali peyu, te augwaliba lotu wali. Tama tibaso, Genuai Bidigo te dolobo sę augwaliba pedelali dao,’ augwaligo te po waibao,” God Genuai Bidigo te po wali.
1KI 9:10 Te Solomon dali, te aga sę bidi dabe daligo te Genuai Bidigo tempel be sę yani silama, tama nosali aga be me sę yani. Te tigidali sę te bidi sese kibu be 20 yia tomode ela silali.
1KI 9:11 King Hiram te Tair hanu bidigo te bǫ ni dabe me, wuli ni me, tama te gol hauwa me te Solomonba menama, te sę emainu yali. Tama te tigidali sę silali sogo, Solomongo te bidi sese deli te 20 taun te Hiramba te wiegi yai homu ilibo tiwai elama mani. Te hanu dabe te Galili bulu tǫ pedaide elaluai.
1KI 9:12 Tama Hiram te Tair hanude bidali tagalama, te aselama, te taun dabe suagasali, tiali goli te taun dabe augwali te agai wei meni yani.
1KI 9:13 Tama te agai Solomonbolo te tama po wali, “Amao, te menagi yai taun dabe te nago enaba maniwe?” Te tama page naga elalubaso, tama megi te tama tebode te bidi dabego te badu pedai badu te tama nogi polali, te Kabul Tǫ da wai dao.
1KI 9:14 Te Hiramgo Solomonbolo mani te gol dabe te hauwa umabo mu tama mawai dao, te be dabe sę yabo nai dao. Tama te golgo sęgęgo te 4 ton wabo te aiyaba mu elaluai dao.
1KI 9:15 King Solomongo te bidi hauwa selama, tama augwalibolo te agai sę yao po wali. Agai te Genuai Bidigo tempel be sę me, te aga be sę me, te Jerusalem masigi obo bagulubo sę me emainu yali. Tama agai augwaligo te Jerusalemde te odogo elaluali pesage te dolo si iliyu, pągąnumainu ebo sę ilali. Tama agai augwaligo te Hasor hanu me, Megido hanu me, Geser hanu te ma nigimainu ebo sę mawai dao.
1KI 9:16 Polobadu te hanu Geser te Kenan dabego hanu elaluali, tiali goli te Isip kingo augwaliba hwįagaselama, tama augwali ela muyu, tama te hanu siago uluyu yai. Tialima, Solomongo te kingo wegi sali sogo, te kingo te Geser hanu te aga wegiba wiegi yai homu ilibo tiwai eyu, te hanu mawai dao.
1KI 9:17 Tama nosali Solomongo te hanu Geser ma nigai. Tama agai te Bethoron Aiyadu te hanu me,
1KI 9:18 te Balat hanu me, te Tamar hanu ma nigali. Balat me Tamar te hanu si te Juda wa pai bulu tǫde elaluai.
1KI 9:19 Tama agai te mena hanu te aga genuai bakstua elalubo hanu me, te hwįbo karis muabo hanu me, te hos dabe muabo hanu me, te tigidali gasa nai agai te Jerusalemde me Lebanonde te agai tonalu tigidali bulu hanu tǫde nigabo homu yali nai, te tigidali nigila silali.
1KI 9:20 Te Israel bulu tǫde te gasa hani we bidi meba augwali bidali. Te augwali te Amor, me Hit, me Peres, me Hivi, me Jebus, te hani augwali bidali.
1KI 9:21 Polobadu mu te Israel dabego te hani augwali te hauwa mu elali, tiali goli augwaligo te augwali tigidali mu ela silibeo. Megi da, Solomongo te hani dabe augwali aga te olo mu sę ebo bidi dabe pedelali, tama megi me augwali te olo mu sę ebo bidi dabe bidibao.
1KI 9:22 Tiali goli, Solomongo te Israel dabe augwali te olo sę ebo bidi tiwai pedalumainu me ebeo. Mu menio. Te agai augwali te ami bidi bidibo sę me, te gavman ofisa bidi sę me, te ami bidi dabe tonalubo bidi ofisa sę me emainu yali. Tama meba te ami bidi dabe tonalubo ofisa sę bidi tiwai te karisde dolaluyu, hwįgi pabo ami bidi tonalubo sę me, te hosde dualasa peyu hwįbo ami bidi dabe tonalubo sę ebo bidi meba te sę ela pali.
1KI 9:23 Te Solomongo sę ebo bidi hani dabe tonalubo sę ebo bidi dabe te 550 elaluai dao.
1KI 9:24 Te Solomongo wego te Devitgo hanude bidali tagalama, te Solomongo aga gesi sę yani beba pelama, bidigi pali. Te we te Isip kingo wegi dao. Tama te tudi badu nosali, Solomongo te bidi dabebolo te po weyu, te Jerusalem odogo elalubo pesage badu te pągąnao po wai dao.
1KI 9:25 Te tigidali kibu bede, te sela sogode, Solomongo aga te nigali altade te Genuai Bidiba ofa eyu yai. Agai te siago tigidali domainu ulubo ofa me, te Genuai Bidi dali deli homu pedalumainu ebo ofa dabe me yali. Tama agai te ebo ofa dabe dali, te denami hano holobo ofa dali yali. Solomongo te tempel be sę yani te ofa me te lotu me wainu sę yai. Tama agai te ofa dabe gagalama yali sogo, te bego sę te agai usu nama mu yai dao.
1KI 9:26 King Solomongo sip hauwa te Esiongeber hanude nigali. Esiongeber te Idom bulu tǫ pedai, te Elat hanu pąde, te Mama Yai Tamu ąį sane, te Akaba tǫ pedai badu elaluai dao.
1KI 9:27 Tama king Hiramgo te agai wiegi yai boskru meba te Solomongo boskru dabe dali te sipde sę emainu tagala palalio.
1KI 9:28 Tama te sip dabe te Ofir bulu tǫ pedaiba pelama, tama te gol hauwa selama, tama te Solomonba selasa asiyu yali. Te gol dabego sęgę te nogo si olama, sągągo me si me si, te 14 ton aiyaba elaluai dao.
1KI 10:1 Te Seba tǫ pedai kantri polalubo we, te kwin wabo we, te kwingo te tama po odali, te Genuai Bidigo te Solomon bugagia wiegi yai ilama, tama te Solomongo genuai nogi elalubo po odali. Tama tiyu, te kwin we aselama, te Solomonba te gegeda pai hanalubo po meba, te Solomon aga usu sabo hanalubo po meba, te agaba hanalu wagasali.
1KI 10:2 Kwin te Jerusalemba asali, te aga sę bidi hauwa dali, te genuai hani kamel dali me asali. Te kamel dabego te gol hauwa mu me, te tobage pauda me, te wiegi yai denami ebo nai dabe me, te gasa sawi yai masigi dabe, te nai dabe sesali. Te kwin we sabolagaselama da, teda agai te hanaluabo homu yali po tigidali te Solomonba hanalu walio.
1KI 10:3 Tama Solomongo agai te hanalu wali po tigidali dolo mu wei ponani. Te hanalu wali po me deli te Solomongo me konesiąwai ebeo. Mu menio.
1KI 10:4 Kwingo te Solomongo koneani wiegi yai homu kolesaga tigidali po odali, tama me agai te kingo genuai be sę yani me suali.
1KI 10:5 Tama kwingo te wiegi yai nai hauwa te tigidali sogo Solomongo sabo suali, te agai ofisa dabe te Solomon dali deliba dualama nai tubo me suali. Tama agai te kingo sę bidi dabe me, te gasa sawi yai ugwa te augwa mubo suyu, te agai te wain wę dobabo bidi dabe me suali. Tama agai Solomongo te Genuai Bidigo tempel beba sela pabo kibu dabe me, te tigidali siaba ulama domainu ofa ebo me suai. Agai te wiegi yai nai dabe tigidali sulama, tama aga midigi mu elama, te aga po mu wabeo.
1KI 10:6 Tama nosali Solomonba agai te tiwai po wali, “Ena te ena bulu tǫ pedaide bidiyu, tama eno te nago ebo sę dabe po, me te nago koneani wiegi yai homu kolesagade po te eno odali. Tama megi da, eno koneani, te tigidali po te mu dao.
1KI 10:7 Hasia eno homugo te mu po da homu me ebeo. Tiali goli, megi da, ena aselama, te ena gedugo digi eno subao. Te mu tamao, te megi eno suali nai dabego te eno odali po te aiyaba elaluali. Te nago koneani wiegi yai homu kolesaga te umabo digi mu igulama, tama te nago mone me doado bage te hauwa mu elalubao,” po wali.
1KI 10:8 “Te nago bidi dabego te wiegi yai homu pemene ebadi bogo dao. Tama naga dali te bidalubo ofisa dabego, augwaligo me te wiegi yai homu pemene ebo homu ebao, magi baso meni, sesemane sogo augwaligo te nago koneani wiegi yai homu kolesagade po te augwaligo odobao.
1KI 10:9 Eno te Genuai Bidi te nago God nogi ugwaba sobao. Agai bugai homu nageba ebaso, te nage Israel king pedalumainu ilali. Agai dage Israel te wei ebo homu umabo mu elama, tama agai te godolo eyu, wei ebo homu te me siligobeo. Tama tialima, agai nage te king pedalumainogo ilama, te nago te po tų odobo sę dolo mu naga eyu, tama te Israel dabe te wiegi yai doloba pai kolesagago tonalumainu yali dao,” te Seba kwin wego te po wai.
1KI 10:10 Tialima, te Seba kwingo te gol hauwa te Solomonba mani, tama te golgo sęgęgo te 4 ton aiyaba elaluali. Tama kwingo te tobage nai pauda dabe te wiegi yai denami ebo nai me, te gasa wiegi yai masigi dabe me mani. Te pauda dabe te hauwa mu tamao. Tama nosali te sogo te tobage denami ebo pauda hauwa te Israel bulu tǫ tomoba me asobeo.
1KI 10:11 Te Hiram kingo sip dabe te Ofir tǫ pedaiba pelama, te gol hauwa me, te tobage wiegi yai ni nami me deli te hauwa badi, te gasa wiegi yai masigi me hauwa selama, tama augwaligo te Israelba selasa asali.
1KI 10:12 Tialima, Solomongo te sę bidi dabebolo te wiegi yai ni sao po olama, tama te Genuai Bidigo tempel be au ilabo nai me, te aga be au ilabo nai me nigibadi yali. Tama me agai augwalibolo te wiegi yai ni selama, te gita dabe nigao po wali, te bidi dabego te musik weyu elimainu yali. Tama te sogo nosali te bidi dabego te tobage wiegi yai ni hauwa te Israel tǫ pedaide me susiąwai.
1KI 10:13 King Solomongo te wiegi yai nai hauwa te Seba kwinba mani, te kwingo wei homu ebo te usu nubo sę yali. Tama me te Solomongo digi te gasa wiegi yai nai hauwa te agabolo mawai. Tialima, nosali te kwin aga sę bidi dabe dali te augwa bulu tǫ pedaiba ma palio.
1KI 10:14 Te tigidali kibu bede Solomongo te 23 ton gol siyu yai.
1KI 10:15 Tama agai te tobage bisnis bidi dabede me te takis mone siyu yai. Tama te Arebia bulu kingo me, te Israel tǫ pedai dabede bidibo te polalubo kiap dagego me, te agaba mone mayu yai dao.
1KI 10:16 Solomongo po obaso, tama augwa te sę bidi dabego te hwįbo genuai sabele te 200 nigali. Tama augwa te gol selama, te sabele dabe haluali. Te deli deli ni sabele te golgo sęgę te pąde 7 kilogram tama.
1KI 10:17 Tama augwa te hwįabo dwasianu ni nami sabele te 300 nigali. Tama augwa te gol selama, te ni sabele dabe haluali. Te deli deli sabelede te golgo sęgę te pąde 2 kilogram tama. Tama Solomongo po obaso, tama te sę bidi dabego te tigidali sabele te nogi polali be, te Lebanon Genuai Ni Sili Be, te tomoba muani, te be au iliyu tama tiali.
1KI 10:18 Tama te Solomongo po obaso, tama augwaligo te genuai sia king me deli nigai. Tama augwaligo te wiegi yai gol me, te genuai hasa elefango moni kele dabe me selama, tama te sia sai au ilali.
1KI 10:19 Te ugwadu daide muabo sia king te augwaligo te agala sabo madi te me sela, me sela nigali, te siaba holabo digi nigilali. Tama augwaligo te boma pai uni hasa laiongo piksa te nogo si olama, sągągo si nigilama, tama te agala sabo madi dualali. Te agala sabo pesage deli delide te laion si elaluali, te me badu me elalu, te me badu me elalu yali. Tama te sia ugwadu tudi badu te baguasi elaluai. Tama te siade te nogo muabo pesage si elaluali. Te nogo muabo pesage pąde te augwa laiongo piksa si ma nigai, te me badu me elalu, me badu me elalu yali. Te gasa bulu tǫ pedai king dabego te tobage tiwai sia me elalubeo.
1KI 10:21 Te sę bidi dabego te gol selama, tama te Solomongo wę tubo kap dabe nigali. Tama te tigidali plet pou te Lebanon Genuai Ni Sili Bede munaluali, augwa te wiegi yai golgo naga nigai. Augwaligo te nai dabe me deli te silvago me nigibe, magi baso meni, te Solomon bidali sogo augwaligo homugo te silva te olo nai tiwai da homu yali.
1KI 10:22 Solomongo te genuai sip hauwa elaluali, tama te sip dabe te buluba pabo te Hiramgo sip dabe dali bilali. Te sip dabe te kibu be selade biliyu, te gol, me silva, me te elefan kele, me te haniani hasa monki dabe selama, tama augwaligo te Israelba selasa asali.
1KI 10:23 King Solomongo te gasa bulu tǫ pedai king dabe te doado bagego, me monego, me te koneani wiegi yai homu kolesagago te augwali gasa bulu king dabe te aiyaba mu elaluai dao.
1KI 10:24 Te tigidali bulu bidi dabe aselama, Solomon suagasu yali, te Godigo agabolo mani te koneani wiegi yai homu kolesaga te po odainu yai.
1KI 10:25 Te tigidali kibu bede te bidi dabe asiyu, tama tigidaligo te Solomonba wiegi yai homu eyu maiabo nai sesali. Augwaligo te bidi dabego te silvago me golgo nigai nai dabe sela asiyu, me augwaligo te wiegi yai ugwa dabe, me te hwįbo nai dabe sesali, tama te tobage pauda me te wiegi yai denami ebo nai, te hos dabe, me te donki dabe, te sela asiyu yai dao.
1KI 10:26 Te sesemane sogo Solomongo te hwįabo karis dabe, me te aga ami dabego hos dabe sabo sę yali. Tama agai te karis dabe me, te hos me, te hanu meba dabeba munama, te agai augwali tonalumainu sa muani hanuba te augwali muani, tama meba aga dali te Jerusalemde bidali. Agai te hwįbo karis te 1,400, me te hos 12,000 me tama elaluali.
1KI 10:27 Te Solomon king bidali sogo, agai te silva me te bǫ ni hauwa te Jerusalemba sesali. Tama te sogo te silva hauwa mu elaluai, te olo masigi dabe tiwai elaluai. Tama te ni bǫ me hauwa elaluali, te olo ni dabe te Israelde te dwasianu bulu dude sai ni dabe tiwai elaluai dao.
1KI 10:28 Solomongo te aga hos dabe te bulu Musri tǫde, me te Silisia tǫ pedaide salio. Agai te bisnis bidi dabe te Silisia tǫba te agai hos dabe abeligi pomainu tagala palai dao.
1KI 10:29 Tama te bisnis bidi dabego te karis me, hos dabe me, te Musri bulude abelali. Te deli deli karis abelali mone te 6,000 kina, me te deli deli hosde te abelali mone, te 1,500 kina dao. Tama te bisnis bidi dabego te karis dabe, me te hos dabe selama, te Hit me Siria bulu king dabeba sela pelama, tama te king dabego abeliyu yai dao.
1KI 11:1 Solomongo te gasa bulu we dabe hauwa te wei eyu, godolo homu yai. Agai te Isip king bidigo wegi sali, tiali goli agai te gasa bulu te Moap, me Amon, me Idom, me Saidon, me Hit, te tama bulu we dabe me te sali.
1KI 11:2 Tiali goli, te we dabe augwali te Godigo po odisąbo bulu hani we, tama Genuai Bidigo te Israel dabe augwaliba habu seliyu, te tobage we dabe sigio wali. Polobadu Genuai Bidigo te Israel dabeba te tiwai po wai, “Dage Israel dabego te Godigo po odisąwai bulu we dabe sigio,” wali. “Te tiwai dagego ebaso da, mu tama te augwaligo dage kekebaso, tama te dagego ena tagalama, tama te augwaligo tibo god te wali paibao.” Genuai Bidigo te tama po wali, tiali goli Solomongo te we dabe augwali wei eyu, godolo homu mu yali.
1KI 11:3 Solomongo we 700 elaluali, te augwali te gasa tǫ pedai kantri polalubo bidi dabego wegi da, tama agai te gasa si wali we hani me te 300 elaluai. Tama te we dabego agai homu bega selama, tama agai te Genuai Bidi tudiba muani.
1KI 11:4 Te aga monu dabe ebo sogo, aga te we dabego aga homu te tibo godiba kekasa pali. Tama tiyu, Solomongo te aga aya Devitgo kolesaga te tagalama, tama agai te aga Genuai Bidi wali mu me pabeo. Menio.
1KI 11:5 Agai te Astarte, te Saidon dabego god weba lotu weyu, tama aga te Molek, te Amon dabego kugumini yai tibo godiba me lotu weyu yai.
1KI 11:6 Te kolesagade Solomongo te Genuai Bidigo gedude te dwai kolesaga mu yali. Agai te Devitgo wiegi yai kolesaga tagalali, tama agai te Genuai Bidi wali mu me pabeo.
1KI 11:7 Agai te Moap dabego te kugumini yai tibo god te Kemosba lotu wabo pesage me deli nigali. Te bulu te Jerusalem giliga pedalubo badu te bulu du bagede elaluai. Tama agai te Amon dabego kugumini yai god te Molekba lotu wabo pesage me deli nigali.
1KI 11:8 Tama agai te Godigo po odisąbo bulu we dabego te denami ilibo ofa, me te gasa tobage te tibo god dabeba ofa yabo pesage meba me nigai.
1KI 11:9 God, te Israelgo Genuai Bidi, te si sogo Solomonba pedelama, tama agabolo te tibo godiba lotu wagio po olama, te habu selali. Tiali goli, Solomongo te Genuai Bidigo po sela sąnama, te aga tudiba muani. Tama tialima, Genuai Bidigo Solomonba wado po weyu,
1KI 11:11 tama agabolo te tiwai po wali, “Odao. Nago te naga homu wali naga peyu, tama nago eno dąų wali bomai po togolama, tama nago eno po wali me pabeo. Tama tibaso, eno homugo te nage king bidibo sę te sela sąyabo homu eyu, tama nago te bulu tǫ ma tonalubaso, te usu me egobeo. Tama eno te nago ofisa bidi me deli te king pedalumainu yaibao,” po wali.
1KI 11:12 “Tiali goli, te sę megi tama me egobeo, magi baso meni, eno nago aya Devit te homu kone palali. Nage isai madi, te nago ogwa king pedalubaso da, teda eno te aga sela sąwaibao.
1KI 11:13 Tiali goli, eno aga te king sęde mu sela sągobeo. Menio. Magi baso meni, eno te ena sę bidi Devitde homu kone palali, me te Jerusalem, eno te sa muani hanu da. Tama tiyu, eno te nago ogwago te king bidibaso, te agai te Israel hani nogo si olama, sągą me badu si hani dabe tomode agai te hani me deligo naga king bidimainu ilaibao,” God Genuai Bidigo te po wai.
1KI 11:14 Tialima, Genuai Bidigo te Solomonba boi bidi ebo bidi me deli pedalumainu ilali. Te boi bidi nogi te Hadat, tama aga te Idom kingo hani bage dao.
1KI 11:15 Polobadu, king Devit bidali sogo te Idom dabe dali boi hwįani. Tama Joap, te Israel amide polalubo ofisa bidi, aga te Idomba pelama, te boi hwįyu isali bidi tigidali pubaligi pai.
1KI 11:16 Tialima, te aga ami bidi dabe dali te Idom bulude te polua me sela me sela bidiyu, tama augwaligo te Idom bidi dabe naga elala pali, te tigidali siligi pabo teba usu nani.
1KI 11:17 Te sogo Hadat aga te dwasianu ogomanide, tama aga te Idom bidi meba dali wi pali, te aga ayago ofisa bidi dabe dali pai. Augwali te Isipba painu pai,
1KI 11:18 tama augwali peyu, te Midian tǫ taga pelama, tama te wa pai bulu Paranba sabolali. Tama augwaligo te Paran bidi meba selama, tama tigidali te Isipba pali. Augwali sabolama, teda augwaligo te king sugi pelama, tama agai te Hadatbolo te tǫ me deli mayu, te be me deli mayu elama, tama aga te nai mayu bidali.
1KI 11:19 Kingo te Hadat wei eyu, godolo homu elama, tama kingo te kwin Tapenesgo ama te Hadatba mawai. Tapenes te Isip kingo we dao.
1KI 11:20 Tialima, te Hadatgo wego te ogwa me deli ame nani, tama augwaligo aga nogi te Genubat poali. Tama kwin Tapenesgo te Genubat selama, tama aga te kingo bede te Isip king bidigo wai dabe dali tonalu bidali.
1KI 11:21 Te Hadat te Isipde bidali, tama nosali agai te tiwai po asobo odali, Devit dali Joap me, te Israel ami tonalubo polaluali ofisa bidi, te isali po odali. Agai odali, te Israel bage te isali po wai. Agai te po odama, teda aga pelama, te Isip kingba te tiwai po wagi pali, “Eno homugo te nago ena te ena bulu tǫba ma pomainu ilao,” po wali.
1KI 11:22 Tama kingo agabolo te tama po hanalu wali, “Magi baso te nage naga bulu tǫba ma painu obawe? Te nage ena dali bidiyu, te magi nai me deli sǫą pobaso obawe?” Tama Hadatgo agabolo te tama po wai, “Ena te magi nai deli me sǫą pabeo. Tiali goli, eno homugo te ena pomainu ilao,” wali.
1KI 11:23 Te Godigo te Solomonba boi bidi yabo gasa bidi me deli ma pedalumainu ilali. Te bidi aga nogi Reson, te Eliadago ogwa dao. Polobadu Reson te king Hadateser te Soba bulu tǫ bidide sę yali, tiali goli aga wi pelama, tama aga te hwįbo hani bidi, me te nai wi sabo bidi, te polalubo bidi pedelama bidali.
1KI 11:24 Nosali te Devitgo te Hadatesergo ami bidi dabe ela silali sogo, te Reson aga hani dabe dali te Damaskus hanuba pelama, bidigi pai. Tama aga hanigo aga tau sobaso, aga te Damaskus hanude king pedelali.
1KI 11:25 Tama te Solomon king bidali sogo, Resongo te Israel dabe dali boi bidi ebo sę yali, te Hadatgo ebo kolesaga tobage tiwai yali. Tama Reson te Siria tǫde king bidiyu, tama te Israel dabe te agai wei isiąyu, godolo homu me isiąwai.
1KI 11:26 Te Solomon aga ofisa bidi me deligo me te Solomonba tudi ola mayu, tama agaba boi bidi yai. Te bidigo nogi te Jeroboam. Te aga ayago nogi, te Nebat, te aga ida te Serua dao. Tiali goli, Nebat te isalio. Jeroboam aga te Sereda hanu bidi, te Efraim hanigo bulu tǫde bidibo bidi dao.
1KI 11:27 Jeroboamgo te king Solomon aiyaba elaluabo homu yali. Te homu yali po page te e tiwai dao. Te Solomongo te Jerusalem odogo bulu tǫ pągąnobo sę yali sogo, me te Devitgo taun bagulubo obo sę dodolali sogo,
1KI 11:28 Jeroboamgo sę bugagia mu yai. Solomongo te agai sę wiegi yai ebo subaso, tama agai aga te Josepgo hani tonalubo bidi nigilali, te kingo augwaliba sę manio.
1KI 11:29 Me sogo deli Jeroboamgo te Jerusalem tagalama, tama te sunumi me deli wali pobadi, tama te Silo hanu bidi profet Ahiyago aga dali te sunumide gesabidi deliba ununani. Augwali si naga bidali, tama gasa bidi te pąde me bidibeo. Te sogo Ahiyago te gudubo ugwa gesi me deli munasa asali.
1KI 11:30 Tialima, Ahiyago te ugwa dilama, tama te ugwa pisilama, te nogo si olama, sągągo si wagi soali.
1KI 11:31 Tama agai te Jeroboamba te tama po wali, “Te nogo si pedai ugwa nago sao,” wali, “magi baso meni, God, da Israel dabego Genuai Bidi, te tama po nagebolo wali, ‘Ena Genuai Bidi, eno homugo te Solomon te king sęde sela sąyabo homu yai. Tama eno nago te Israel hani nogo si nago tonalumainu ilaibao,’ po wai dao.
1KI 11:32 ‘Tiali goli, eno te Solomongo te hani deli tonalumainu yaibao, magi baso meni, eno te ena sę bidi Devitde homu kone paluyu, tama te hanu Jerusalem eno te ena hanu da weyu, te tigidali Israel hanu tomode te sa muai dao.
1KI 11:33 Eno te kolesaga te Israel dabeba yaibao, magi baso meni, augwaligo ena tudiba munama, tama augwaligo te Astarteba lotu wali, te Saidon dabego god we, tama te Kemos, te Moap dabego god, tama te Molek, te Amon dabego god dao. Tama augwaligo te eno sa muani wiegi yai sunumidu bilibeo, tama augwaligo te eno bomai po dabe me, te eno gasa po me wali pisiąma, tama augwaligo te eno wei eyu, godolo homu yabo sę me isiąwai. Augwaligo te Devitgo yali wiegi yai kolesaga tagalalio,’” te po wali.
1KI 11:34 “‘Tiali goli, eno Solomon te king sęde mu me sela sągobeo. Eno te ena sę bidi Devitde homu kone paliyu, te bidi eno sa muani. Agai te eno bomai po, me eno gasa po wali pali. Eno agade homu kone paliyu, tama te Solomon king bidimainu ilama, te aga isibo siba usu naibao,’ te po wai.
1KI 11:35 ‘Solomon isibaso, tama aga ogwa te king pedelali, teda eno te Israel hani nogo si te aga nogode dobola selama, tama nageba mawaibao,’ wai.
1KI 11:36 ‘Tiali goli, eno te Solomongo ogwago te Israel hani me deli tonalumainu yaibao. Tama tiyu, te eno sę bidi Devitgo lam sole te sula somainu me egobeo. Menio. Te sesemane sogo te Devitgo hani bidi me deli te Jerusalemde king bidimainu yaibao, te taun eno te bidi dabego te ena pąba aselama, lotu wagasomainu nigilali pesage tiwai dao.
1KI 11:37 Tama Jeroboam, te eno nage te Israel king pedalumainu elama, tama nago te tonaluabo homu yali, te tigidali tǫ te nago tonaluaibao.
1KI 11:38 Te nago eno bomai po tigidali me, te eno po me, te wali peyu, tama nage te eno sa muani te wiegi yai sunumidu biliyu, tama nago eno te wei eyu, godolo homu yabo kolesaga eyu, te Devitgo yali tiwai ebaso da, teda ena nage dali bidiyu, te nage tau saibao. Tama eno nage te Israel dabego king bidimainu yaibao. Tama sesemane sogo eno te nago hanide king pedalumainu eyu, te eno Devit dali yali tiwai gilama yaibao.
1KI 11:39 Solomongo dwai sę yali, tama te eno te Devitgo wąį nǫų nosali pedalubo hani dabede te dwai dene mawaibao. Tiali goli, te eno sesemane sogo augwaliba te tobage sę eyu me egobeo,’” te profet bidi Ahiyago te Godigo pusali po tama wali.
1KI 11:40 Nosali Solomongo koneama, te Jeroboamgo aga aiyaba elaluainu ebo homu koneani. Tama tiyu, Solomongo te Jeroboam te ela muabo homu yali. Tiali goli, Jeroboam te Isipba wi pelama, tama te Isip king Sisak dali bidai. Tama aga te Isipde bididubadi, te Solomon isibo bodoluba usu nanio.
1KI 11:41 Te tigidali gasa sę Solomongo yali me te agai koneai wiegi yai homu kolesaga tigidali, te augwaligo te bukude asęani, augwa te nogi tama nogi yai, Te Solomongo Po Dabe Da Asęani Po dao.
1KI 11:42 Solomon te Jerusalemde king bidibadi, te kibu be bidi sese si, te 40 yia bidali, tama aga te Israel hani tigidali tonaluai dao.
1KI 11:43 Tialima, aga isibaso, tama augwaligo aga te Jerusalem tǫ pedaide pubulali, augwa te nogi poyu, te Devitgo Hanu Da wali. Tama Rehoboam, te aga ogwago, te agai sę yali pesage hasegelama, tama te king pedelali.
1KI 12:1 Te bidi Rehoboam aga te Sekem hanuba pali, magi baso meni, te tigidali Israel hani we bidi dabe, te not badu bidali hani we bidi dabe, augwali te taun Sekemba sisinama bidibaso, te bidi Rehoboam aga augwa king bidi nigilaiongo yali.
1KI 12:2 Polobadu te bidi Jeroboam, te bidi aga aya Nebatgo ogwa da, tama aga te king Solomon sulama, te aga wi pelama, te Isip buluba bidigi pali. Tama tialima, te sogo te Israel hanigo te bidi Rehoboam king bidi nigilabo homu yali, tama tibo po te bidi Jeroboamgo te po agai odali, tama te aga te Isip bulu tagalama, tama aga asobe.
1KI 12:3 Tama te Israel hani dabego te me badu bidi dabe augwali tagala palama, te bidi Jeroboambolo te po waligi pali, aga asao po wagi pali. Tama aga asali, tama aga dali, te tigidali Israel hani dabe dali, augwali pelama, te bidi Rehoboam sugi pelama, tama augwaligo e tama po agabolo wali,
1KI 12:4 “Nago aya Solomon agai dabolo moni sęgę menama, tama dago sę dene dwai mu eyu bidibao,” wali. “Tama teyu, megi dago homugo nago da dua tonaluao, tama dago tigide me badu sęgę elalubo sęgę silama, bidaio. Tialima, nage tama teyu da, teda da nage dologode bugagia bidaibao,” tama po wali.
1KI 12:5 Tama te king Rehoboamgo agai te po odama, tama agai augwalibolo e tama po wali, “Dage pelama, te sela sogo bidigi pelama, tama dage ma asiąo,” wali, “tama eno homude elalubo po dagebolo ola mawaibao,” wali. Tama augwaligo aga tagalama, tama augwali pali.
1KI 12:6 Tama te king Rehoboam pelama, te monu dabe ofisa bidi dabe dali po miani. Polobadu te gavman ofisa bidi dabego aga aya Solomon te dwagi yai kolesaga yabo po ola mawai bidi dabe da. Te king Rehoboamgo augwalibolo e tama po hanalu wali, “Dagego homugo eno mena tama tiwai po te we bidi dabe augwalibolo wei ponomainuwe?”
1KI 12:7 Tialima, augwaligo te bidi agabolo e tama po ola mani, “Tialima, nage dwagi yai sę bidi bidainu homu eyu da, teda teya, te hani we bidi dabe augwali nago tau sao, awe, megi nago dwagi yai po me augwalibolo ola mao. Tialima, nago tama teyu da, teda te augwali nage dologode bidaibao,” te po wai.
1KI 12:8 Tiali goli, te king Rehoboamgo te monu dabe gavman ofisa bidi dabego ola mani po sela sąnama, tama aga te gesi ogwa bidi gavman ofisa bidibolo ma hanalugi pali, aga ma dwagi yai kolesaga ola momainu. Te gesi ogwa bidi gavman ofisa bidi dabe te aga dali dilai bidi dabe da, te aga age tiwai hani bidi dabe da.
1KI 12:9 Tama agai augwalibolo e tama po wali, “Te we bidi dabe augwaligo homugo te me badu sęgę yai sę te eno ayago te augwaliba muani sęgę sę te eno sela sąyu yao po wabo. Tialima, dagego homugo te dago mena po te augwaliba wei ponaibawe?”
1KI 12:10 Tama te gesi ogwa bidi gavman ofisa bidi dabego e tama po wali, “Tialima, nago homugo te we bidi dabe augwaligo te nago ayago mani sęgę me badu silimainu hanalu wali po, nago homugo augwaligo te hanalu wali po e tama po begelama, augwalibolo wei ponao, nago e tama po augwalibolo ola mao, ‘Dagego homugo eno ayago dage dolo bomai po olama, pobegai dawe, a? Menio. Teda te ayago te yali sę te olo bage mu dao,’ wao. ‘Eno dwasianu kibisa nogo danigo te eno ayago bomo aiyaba elaluaibao,’ tama wao.
1KI 12:11 ‘Te mu tama dao, eno ayago dagebolo sęgę mani, tiali goli eno da, dagebolo moni genuai sęgę mu ma mawaibao,’ wao. ‘Eno ayago dage te wipgo elai dao, tiali goli eno da, dage te bomai wip selama, bomonama me eluduaibao,’ tama po wao,” te gesi ogwa bidi gavman ofisa bidi dabe augwaligo te po wai.
1KI 12:12 Sela sogo wali bodolu polo sia sigi pali, tibaso te bidi Jeroboam dali, te tigidali Israel hani we bidi dabe tigidali asama, te king Rehoboam augwaligo sugi pali, aga te wali po tiwai.
1KI 12:13 Tama te kingo te monu dabe gavman ofisa bidigo ola mani kolesaga tų wali pabe. Mu meni. Tama agai te gesi ogwa bidi gavman ofisa bidi dabego ola mani kolesaga tų wali peyu, tama agai te tigidali we bidi agai te augwalibolo po bomai mu wali. Agai augwalibolo e tama po ola mani, “Te mu tama, ayago dagebolo sęgę mawai dao, tiali goli eno dagebolo genuai sęgę ma mawaibao. Eno ayago dage te wip bįgo elai dao, tiali goli eno da, te dage bomai wip bį selama, tama dage me eluduaibao,” wali.
1KI 12:15 Genuai Bidi God aga digi te king bidi Rehoboam homu kolesaga begelama, te tigidali we bidigo kolesaga tų wali pabe. Magi baso meni, Genuai Bidi aga te polobadu te Jeroboam dali po bodolu muani poba usu nigi painu tama kolesaga yali, Jeroboam te Nebatgo ogwa. Polobadu te profet bidi Ahiya, te Silo bulu bidi, agai te Genuai Bidigo te po te Jeroboambolo te po wali.
1KI 12:16 Tialima, megi da, te we bidi dabego koneani, te kingo te augwali dali po wabo odobo usu meni, tama augwaligo moni dagą weyu, e tama i wali, “Da te Devitgo hani king bidi dologode da bidibo hagela palio,” wali. “Da te Devitgo hani menio, tama da te Jesigo ogwago agai hani da menio. Da tigidali te Israel hani dabe naga dao, dena buluba ma begasa pinao. Tama dage te Devitgo hani dabe, duga digi duga hani tonaluao.” Augwaligo te po tama olama, tama augwa buluba tedela pali.
1KI 12:17 Tiali goli, me badu Israel hani bidi dabe te Juda dabego te moni hanude te Juda dabe dali bidali. Te bidali bidi dabe digi te king bidi Rehoboam dologode bidali.
1KI 12:18 Nosali te king Rehoboamgo te bidi Adoniram aga te Israel hani bidi dabe bidibo madigi tagala palali. Adoniramgo agai sę te king bidigo sę ebo bidi dabe tonalubo sę ebo bidi da. Agai gasa nogi me e tama, Adoram. Tialima, te bidi Adoniram augwali pageba sabalobo sogo, tama te tigidali Israel bidi dabego te bidi tigiba masigi sąnama, tama aga elama, isilali. Tama te tiali po te king Rehoboamgo augwaligo te bidi tama elali po odobo si, tama aga te aga karisba polo holama, dugula siyu, te Jerusalem taun buluba aga wi samana pali.
1KI 12:19 Te sogo tama gagalama, tama asu, megi tama e bidibo bodoluba usu nagasali, te Israel hani bidi dabe, te not badu bidibo bidi dabe, augwaligo homugo te Devitgo hanigo te king nigilama, augwali tonalubo augwali hagela ebo olama, tama augwaligo hagoma genuai mu yali.
1KI 12:20 Te Israel hani we bidi dabe tigidaligo te bidi Jeroboam te Isip bulu tagalama, tama ma asali po odobaso, tama augwaligo agabolo hanalubo po me deli ola tolali, “Nage dago po mitin eboba asao,” wali. Tama aga aselama, sabolali, tama augwaligo aga te augwaligo king bidi nigilali. Tialima, te Juda hani deli naga te Devitgo hanigo king bidi nigibo dologode naga bidali.
1KI 12:21 Te king Rehoboam te Jerusalem taunba sabaluyu, tama agai te Juda hani bidi dabe, me te Benjamingo hani bidi dabe te bomai ami soldia bidi dabe naga i olama, tama augwali asama, sisinagasali. Te soldia ami bidi dabe augwaligo namba e tama namba usu nama, ami bidi dabe sali namba 180,000. Rehoboam agai homugo te not badu bidibo Israel hani bidi dabe dali boi hwįgi painogo homu yali, tama tilama, te augwali aga dologode ma bidimainogo yali.
1KI 12:22 Tiali goli, te profet Semaiabolo te Godigo e tama po ola mani,
1KI 12:23 “Nage te Juda hanigo king bidi Rehoboam pageba pao, tama me te Benjamingo hani we bidibolo me, me te Juda hani we bidibolo me, me te gasa hani we bidi dabebolo me, tama nago augwalibolo e tama po ola mao,
1KI 12:24 ‘Ena Genuai Bidi, eno obao, dage pelama, te Israel hani dali boi hwįgi pigio, te augwali te dagego abagi solo. Meni. Dage tigidali duga buluba pela silao, magi baso meni, ena digi ena tilama, te Israel togolama, tama dage tagalalio,’ te po wao,” Godigo te po wai. Tama tialima, te profet bidi Semaia pelama, augwalibolo te Genuai Bidigo po pusa magi pali, tama augwali augwa buluba begasa pepelawali.
1KI 12:25 Te king Jeroboamgo te taun Sekem masigigo nigai obo ma geselama, dąų walama, te Efraim bulu dudu gagalama, tama te taun Sekem bagulama dąų wali. Tama tilama, me badu sogo aga te taunde bidali. Tama nosali te hanu tagalama, tama aga te Penuel hanuba pelama, tama te hanu te Gileat bulu pedaide elalubo hanu da, tama agai te hanu me obo masigi bagulama, te hanu bugagia dąų walali, magi baso meni, te boi bidi dabego te hanu sidali weyu yali.
1KI 12:26 Te king Jeroboamgo e tama homu yali, ‘Eno hani we bidigo ena tagalama, tama augwaligo te Devitgo hani king bidi dologoba ma bidigi paibao.
1KI 12:27 Megi tama augwali te Jerusalemde te Genuai Bidigo beba pelama, te Genuai Bidi dolo denami yai ofa nai ula magi pabo dao. Tiali goli, tigidali sogo tama tiyu da, teda augwaligo kolesaga hasegelama, tama augwali augwa tobolu bidi dologode ma bidigi paibao. Aga da, te Juda hanigo king bidi Rehoboam. Tama tiyu, augwaligo ena ela munama, tama augwali te king Rehoboam pageba ma geasa paibao,’ agai te homu yali.
1KI 12:28 Te king bidi Jeroboamgo te tama tibo homu kolesaga dagalobo sogo, tialima agai te kibu bulmakau omai noma si te gol selama, nigali. Tama agai te we bidi dabebolo e tama po ola mani, “Dage umabo sogo te Jerusalemba pelama, te lotu po wagi pai dao. Tiali goli, megi da, dage munu ma pelamuo. Suao. E elalubo da, Israel hani duga god dao. Te godigo da, dage te Isip buludu selasa asai dao. Dagego te e godiba lotu po waiąo,” agai te po wai.
1KI 12:29 Tama tialima, agai te tibo god noma dabe nigali te me deli te taun Betel buluba mugi pali, tama me te taun Dan buluba mugi pali.
1KI 12:30 Tialima, te we bidi dabe augwaligo te tibo god te bulmakau noma siba lotu po wali. Tama te tibo kolesagago te augwaligo sęgę sali. Tiali goli, hanu Dan te digibulu elalubo bulu goli, te tigidali we bidi dabe augwali te Dan taunde elalubo tibo god bulmakau nomaba augwaligo lotu po wagi pabo kolesaga iduai dao.
1KI 12:31 Tama te king Jeroboam agai te kolesaga me yali, te bulu du dabede te lotu po wabo pesage nidigi bilibo sę yali. Tama agai te me badu bidi dabe te pris bidi dabe dąį ilali. Tiali goli, te agai dąį ilali bidi dabe augwali te Livai bidi hani dabe menio, te olo bage tama dao.
1KI 12:32 Tama te king Jeroboamgo agai te namba 8 polua wabode, te 15 dei, te sogo te Israel dabego moni lotu po wabo bodolu deli dao olama, dąį ilali. Te genuai lotu po wabo sogo, te Juda hanigo lotu po wabo bodolu sogo deli gagawai tiwai tama da. Tama agai te hasa dabe elama, tama te denami yai ofa nai ulubo alta saide ulali, tama aga te golgo nigali kibu bulmakau noma siba te ofa eyu, tama tiwai. Tama agai te ofa nai ulali te Betel hanude tama tiwai. Tama agai te aga te sę tama tonalumainu, me te lotu po wabo pesage tonalumainu, tama agai te dąį ilali pris bidi dabebolo te e Betel bulu hanuba te dage eba sę yagasiąo olama, agai augwali asao olama, po ola tolali.
1KI 12:33 Tialima, te namba 8 polua, te 15 dei, te dei da wabode te aga digi dąį iliyu, te po wali, te Israel hani we bidi dabego moni lotu po wabo bodolu sogo dao wali, tama te king bidi Jeroboam aga te Betel bulude nigali ofa nai ulubo alta saiba pelama, te agai ofa nai ulugi pali.
1KI 13:1 Tama te king Jeroboamgo aga te alta saide dolaluyu, te ofa nai ulubo sę eyu, alta saide dolaluali, tama te Godigo sę ebo profet bidi me deli aga pageba sabolali. Te profet bidi te Juda hani bidi da, tama te Genuai Bidigo te agabolo “Te Juda tǫ tagalama, tama nage te Betel buluba asao,” wali.
1KI 13:2 Tama te Genuai Bidigo homugo te alta po elalubaso, tama te profet bidibolo te e tama po pusa mao po agabolo ola mani, “Alta sai, ena Genuai Bidi God da, eno nage dali po elalubao. Ogwa me deli, agai nogi e dao, Josaia, te ogwa aga te Devitgo hanidu pedelaibao,” wali. “Tama aga king bidi nigilama, bidibo sogo da, tama agai naga ugwadu te ofa nai ulubo pris bidi dabe selama, tama agai augwaligo augwa tigi te nage baude ugwadu daiba munama, tama augwali elama, isilaibao. Tama agai te isali bidi dabe dili selama, tama te ugwadu nage baude uluyu, tama nage tigidali meda mu ilaibao,” te po wali.
1KI 13:3 Tama te profet bidigo te po wai, te agai po ma wadolama weyu, te tama po wali, “Megi tama, eno nagebolo wabo pode, te Genuai Bidigo te sę me deli yabo po pusali. Te Genuai Bidigo wali po te dolo mu wayabo homu emainu, te koneama dagalamainu te ola mabo sę gedugo sumainu yabo po wali. Tama te ofa nai ula mabo alta sai auluama, tama te aga pagede munalubo sisi dabe gelaibao,” te po wai.
1KI 13:4 Tama te king Jeroboam te alta saide dolalubadi yaide, te po tama wabo odali. Tialima, agai nogo hodolama, tama te profet bidiba nogo tų eyu, te po wali, tama po wali, “Te bidi pageabi yao,” wali. Tama tialima, te polo tama mu te king Jeroboamgo nogo tama mu dąų olama, tama dolaluali, tama agai nogo aiyaba me elalubo usu meni.
1KI 13:5 Tama me te alta sai me auluama, tama te sia sisi dabe te tǫba tulaluama, pesala sąyani, te Genuai Bidigo te profet bidigo pedauwalidu poba usu nigi soyu tama tiali.
1KI 13:6 Tama tialima, te king Jeroboamgo te profet bidibolo e tama po wali, “Eno homugo nago te Godibolo gedu haluasa po wao,” wali, “naga Genuai Bidi Godibolo wao, tama agai ena tau selama, tama eno nogo ma gesa somainao,” wali. Tama tialima, te profet bidigo te gedu haluasa po wabode te Godigo te king bidi nogo dwagi yai ma ilama, tama te kingo nogo te polobadu tiwai ma ilai.
1KI 13:7 Nosali king bidigo profet bidibolo e tama po wali, “Eno homugo nage te eno beba pelama, tama nage ena dali nai tugi paibao. Tama nage eno te wiegi yai nai me deli olo mawaibao,” te po wai.
1KI 13:8 Tiali goli, profet bidigo agabolo e tama po wali, “Tagalao,” wali. “Tialima, nago homugo te naga mone dabe me maiabo homu eyu da, teya si bugulama, te me badu pedai te ena maiabo homu yali goli, ena te nago beba me pelama, te e Betel bulude te nai me tuyu, ąį me tuyu egobeo,” wali.
1KI 13:9 “Magi baso meni, Genuai Bidigo te po wali, eno te dage dali te nai tuyu, tama te ąį tuyu, me te magi nai me siyu egio po wai. Tama me te ena asali tųdu ma begasa peyu, te ena buluba pogobeo. Menio. Ena gasa tųdu ma paibao,” wali.
1KI 13:10 Tialima, te profet bidi aga te Betel bulu tagalama, tama aga gasa tųdu wali pali. Aga te aga asali tųdu ma pabe.
1KI 13:11 Tama te tiali sogo, te Betelde te monu dabe profet bidi me deli bidali. Tama aga ogwa dabe asama, agabolo te Juda profet bidi asama, te sogo te Betel bulude yali po dabe agabolo pusali. Tama nosali aga te ogwago te Juda hani profet bidigo te king Jeroboambolo wali po agabolo wali.
1KI 13:12 Tama tialima, te augwa aya monugo augwalibolo e tama po hanalu wali, “Te profet bidi te mena tųdu pabo sualiwe?” Te profet bidi pali tų te aga ogomanigo suai, tama teyu, te augwaligo te augwa ayabolo pusali.
1KI 13:13 Tialima, tama agai augwalibolo e tama po wali, “Dage pelama, te eno donkiba te eno dugabo satel ugwa mugi pao,” wali. Augwaligo tama tibo si, aga te donki kibude dugula siyu, tama aga pali.
1KI 13:14 Tama te monu dabe profet aga te Juda profet bidi pali tųdu aga wali pali, tama nosali agai suali, ma te Juda profet bidi te ni me deli dologode dugulalubo suali, te ni nogi kali. Tama te monu dabe profet bidigo te Juda profetbolo e tama po hanalu wali, “Nage te Juda bulu taga solama, asali profet bidi da, agawe?” Tama te profetgo te po wali, “Awe, te ena tama dao,” wali.
1KI 13:15 Tialima tama, te monu dabe profet bidigo agabolo e tama po wali, “Eno homugo nage eno beba asama, tama ena dali nai tuagasao,” wali.
1KI 13:16 Tiali goli, te Juda profet bidigo agabolo e tama po wali, “Ena nage dali nago beba ma geasa pabo usu egobeo,” wali. “Tama eno nai me, ąį me, e bulu pedaide me tugobeo,” wali.
1KI 13:17 “Magi baso meni, Genuai Bidigo te enabolo te po wai, te bulu pedai badu te nai me tugio, te ąį me tugio po wai dao, me te ena asali tųdu ma begasa soagio po wai. Tama ena ena buluba peyu, ena gasa tųdu paibao,” wali.
1KI 13:18 Tialima, te monu dabe profet bidigo te agabolo e tama po wali, “Ena me te nage tiwai bidi profet bidi dao,” wali. “Tama Genuai Bidigo sę ebo ensel bidi me deli asama, enabolo e tama po wagasali, ena nage ma pelama, nage oda sigi pelama, tama eno nage ma odasa, eno beba pelama, te me badu nai dabe nage mayu, tama me te nage tuabo ąį me mayu yao po wai.” Tiali goli, te monu dabe profet bidigo agabolo ili po ola mani.
1KI 13:19 Tama te Juda hanigo profet bidigo te po odama, tama aga te monu dabe profet bidigo beba pelama, tama te nai tuyu, te ąį tuyu, tama yali.
1KI 13:20 Augwali si te tebol saide tugulaluali, tialima te monu dabe profet bidibolo te Genuai Bidigo po me deli ola mani.
1KI 13:21 Tama te monu dabe profet bidigo moni po dągą mu weyu, e tama po te Juda profet bidibolo ola mani, “God Genuai Bidigo e tama po wali, nago agai wali po sela sąnama, nago agai wali po tų wali pabe. Meni.
1KI 13:22 Nage te eba ma begasa asama, tama te nai tuyu, tama te ąį tuyu yali. Agai te habu selali bulude nago nai dabe tuali. Tama teyu, nage ede isaibao, tama augwaligo te nage naga hani pubalobo gų pagede te nago tigi pubalogobeo,” te po wai.
1KI 13:23 Te Juda hani profet bidi nai tula silali, tama te monu dabe profet bidigo aga te kibu donki dodolama, tama te Juda profet bidi dugulama, pomainu sula tagalali.
1KI 13:24 Tama aga pabo sogo, tama te bulu uni yowi laion me deli asama, tama aga ela muani. Tama agai tigi te tųde munalubo suali, tama aga te donki kibu me te aga tigi munalubo madigi sesegede dolaluyu, bidibo susali, tama te bulu uni yowi laion me te aga tigi munalubo sesegede te pąde dolalubo suali.
1KI 13:25 Tama nosali me badu bidi dabe augwali te tųdu peyu, tama augwaligo suali, te bidi tigi te tųde munalubo suali, tama te bulu uni yowi laion me te bidi tigi munalubo pąde dolalubo susali. Tama tialima, augwali pelama, te Betel buluba pelama, tama te we bidi dabebolo wagi pali, te bidi tigi munalubo suali po augwalibolo pusigi pali.
1KI 13:26 Te monu dabe profet bidigo te tama tiali po odama, tama agai e tama po wali, “Te da, te Juda hanigo profet bidi tigi tama dao,” wali. “Agai te Genuai Bidigo po sela sąyanigo da, tama te Genuai Bidigo te uni yowi laion tagala palama, tama te uni yowi asu, tama aga dolama, tama aga ela muanio, te Genuai Bidigo tama tiaibao wali po usu nigi soyu tama tiali,” te po wai.
1KI 13:27 Te tama tialima, te agai aga ogomanibolo agai e tama po augwalibolo wali, “Eno donki kibuba te dugabo satel ugwa saligi soao,” wali. Tama augwaligo tama tiali.
1KI 13:28 Tama aga te tųdu wali pobadi yaide, tama te aga tonono pobadi yaide, te profet bidi tigi tama te tų dilide munalubo suali. Tama agai subadi yaide, te aga donki kibu dali, te bulu uni yowi laion dali si, te aga tigi munalubo madigi pąde dolalubo suali. Te bulu uni yowigo te agai tigi mi me pedama tube, te agai te donki kibu tigide me te bulu uni yowigo kelama tube, bugagia tama dolalubo suali.
1KI 13:29 Tama te monu dabe profet bidigo te Juda profet bidi tigi selama, tama te aga kibu donki ugwadu te tudi dai badu munama, tama agai te Betel buluba ma selasa pali, tama aga hobede eyu, tama aga gela olama, tama te Juda hanigo profet bidi aga tigi pubulali.
1KI 13:30 Tama te monu dabe profet bidigo te Juda profet bidi tigi te aga hani pubalobo gų pagede te profet bidi tigi pubulali. Tama aga dali, te aga ogomani dali, tama augwaligo hobede genuai mu eyu, gela olama, tama augwaligo e tama po wali, “Hobede mu dao, dago ama. Hobede mu dao, dago ama dao,” tama po wali.
1KI 13:31 Tama augwaligo te profet bidigo tigi pubalobo sę silali, tama te monu dabe profet bidigo aga ogomanibolo e tama po wali, “Te ena isibo sogo, dagego te eno tigi te Godigo profet bidi pubulali gų page pąde te ena me isibo si da, ena me te deli gų pageba naga pubulao,” wali.
1KI 13:32 “Mu tamao, Genuai Bidigo te profet bidigo agai pedauwalidu te tigidali wali poba usu nigi paibao. Genuai Bidigo agai te Betel bulude elalubo ofa nai ulubo alta sai me dolama, tama me te agai te Samaria taun dabede elalubo lotu po wabo pesage me dodolo paibao,” te po wai.
1KI 13:33 Te king Jeroboam agai te augwaligo te tama sę pedalobo suali, tiali goli agai te meda yai te dwai sęgę sabo kolesaga me tagalu ebe. Meni. Tama agai te pris sę yabo bidi dabe dąį ilibo sę eyu, tama me te agai te lotu po wabo pesage nigali. Mena olo bidi te aga homugo te pris bidi nigainu homu yali, tialima te king Jeroboamgo aga te tama sę yabo dąį ilibo sę yali.
1KI 13:34 Te king Jeroboam dali, te aga hani dali, augwaligo te tama sęgę sabo dwai meda yai kolesaga me eyu gęani, tama augwaligo augwa te dwai kolesagago sęgę me sę edu gęani. Tama te tiali bagego da, Genuai Bidigo te king Jeroboamgo hani tigidali nosali mu dolali.
1KI 14:1 Tama te tiali sogo Abiya, te king Jeroboamgo ogwa, gasi yali.
1KI 14:2 Tama te king Jeroboamgo aga webolo e tama tiwai po ola mani, “Eno homugo nage te gasa gagawai au yao, tama te tigidali bidi dabego te king eno we da homu munu me konegobeo. Awe, tama te nage te Silo buluba pao. Te bulude te profet bidi Ahiya te bidibao,” wali. “Tama te profet bidi agai enabolo weyu, ena nage te Israel hanigo king bidi nigilama bidao wali profet bidi te bulude te bidibao,” wali.
1KI 14:3 “Tama nago te nogo si bret name sobadi, te me badu bisket dabe sao, tama me te kanama bunugo ąį tabiali sospen genagi deli selama, tama nago te nai dabe selama, aga magi pao,” wali. “Tama eno homugo nago agabolo hanalu wao, te magi nai mugo te dadi sigo wai tigide pedelaibawe po wao,” wali. “Tama agai te po bage agai nagebolo ola mawaibao,” wali.
1KI 14:4 Tama te king Jeroboam aga wego te aga bidigo wali po odama, tama aga te Silo buluba pelama, tama te profet bidi Ahiyago beba sabolali. Tama te profet bidi Ahiya aga te megi monu dabe mu yai, tama agai gedu tigidali mu halua sali.
1KI 14:5 Tiali goli, te we te profetgo beba sabalisiąbadi yaide, Genuai Bidigo te profet Ahiyabolo e tama po wali, “Te king Jeroboamgo ogwa moni gasi ebao,” wali. “Tama te king Jeroboamgo we aselama, te nagebolo hanalu wagasaibao, agai wai ma usu ilaibawe, ma meniwe, po hanaluyu wagasobao. Tama te we aga te gasa we gagawai mu elama asu, nagebolo ili po mu waibao,” wali. Tama te Genuai Bidi agai te profet Ahiyabolo te king Jeroboamgo we asobode pusabo po dabe ola mani.
1KI 14:6 Tama te king Jeroboamgo we asama sabolali, tama te profet bidi Ahiyago te king Jeroboamgo we asu, te agai be tų pąde te sągągo agaga asu, bada wabo odolama, tama agai e tama po wali, “Jeroboamgo we o,” wali, “nage e be tomoba asao,” wali. “Magi baso nage te gasa we gagalama, tama nago enabolo ili po wagasobawe? Eno nagebolo wabo po me deli elalubao, tama te pogo nago haligade sęgę yai po mu ma waibao.
1KI 14:7 Nage te naga bidi Jeroboam pageba ma geasa pao,” wali, “tama agabolo Genuai Bidigo e po tama pusa magi pao,” wali, “‘Ena God, Israel hanigo Genuai Bidi dao, eno e tama po obao. Jeroboam o, eno nage deli te Israel hani tomode sai dao, eno hani we bidi dabeo, tama eno nage deli tama augwaligo genuai bidi king nigilama bidimainu dąį ilai dao.
1KI 14:8 Eno bomonama, te Devitgo hanigo te king sę yali sela sąnama, tama te sę eno nagebolo mawai dao. Tiali goli, nago te Devitgo yali gilama dwagi yai kolesaga tų wali pabeo, aga te eno sę bidio,’” wali. “‘Agai te bomo mu elama, tama te eno bomai po wali painu ebo bidi bidali. Tama te magi kolesaga doloba pai eno gedude ebawe, te tama tiwai kolesaga te Devitgo yai dao.
1KI 14:9 Tiali goli, nago te sęgę sabo meda yai kolesaga me tama edubao,’” wali. “‘Nago te sęgę sabo meda yai kolesagago da, te polobadu king bidi dabego yali kolesaga aiyaba elalualio. Nago bomonama, ena mu tudiba mu ilama, tama nago te bras dabe selama, tama te tibo god noma nigilama, tama augwaliba nago kidu sugunama, tama augwaliba nago lotu po wabo,’” wali. “‘Nago tama tibo kolesagade eno haliga sębę dwai mu ebo,’” wali.
1KI 14:10 “‘Tama teyu, mu tama, eno te nago hani mu tama dolaibao. Tama te Jeroboam, tama eno te Israel hani tomode elalubo te nago hani we bidi dabe tigidali eno mu dola silaibao,’” wali, “‘ma te augwali te ogwa bidi me, ma te we sai bidi genuai bidi me, te augwali tigidali eno sela sąwaibao. Te e tama tiwai gilama yaibao, bidigo te di telama, te habude me dwasianu te elalusiąbo tiwai gilama yaibao.
1KI 14:11 Tialima, nago deli hani me deli e taun tomode isibaso da, teda augwaligo tigi te yowigo tuaibao. Tama tialima, te me badu bidi dabe te taun bulu badu isai baso da, te bidi tigi te ba kemodage aselama tuabuo. Ena Genuai Bidi, eno po mu walio,’” te Ahiyago te po wai.
1KI 14:12 Tama te profet bidi Ahiyago agai te king Jeroboamgo webolo e tama po ma wadolama ola mani, “Nage te naga buluba ma geasa pao. Tama nage te taun tomoba pabo sogo, teya naga wai isaibao.
1KI 14:13 Tama te tigidali Israel hani dabego aga gela usu menama, tama aga gų pageba pubulaibao. God, da Israel hani dena Genuai Bidi dao, suali, te ogwa deligo mu te Jeroboamgo hani tomode agai dwagi yai kolesaga mu ebao. Tama tialima, Genuai Bidigo agai tigi gų pageba pubalobo sula tagalali, tiali goli te Jeroboamgo gasa hani bidi, meni.
1KI 14:14 Genuai Bidigo bidi me deli dąį ilali, te bidi te Israel hanigo king bidi nigilainu, tama te king hanigo da te king Jeroboamgo hani mu augwaligo mu dola silaibao. Awe, te tama sę megi tama pedelaibao,” wali.
1KI 14:15 Te profet bidi Ahiyago po ma wadolama, te po wai, “Te Israel dabe augwaligo te tibo god we Asera noma nigilama, tama augwaligo teba lotu po wali, tama augwaligo te tama tibo kolesagade Genuai Bidigo haliga sębę mu augwali dali yali. Tama tialima, Genuai Bidigo augwali dolobaso da, teya tama augwali wi mu eyu, tama midigi dwai mu eyu, tama te sigi te ąįde dolalu, tama te ąį asu, peme ebo ąǫ yaibao. Tama te Genuai Bidigo te Israel hani augwali te dwagi yai tǫ te agai te aga wąį nǫų dabe augwali mani tǫde bidibo agai augwali sela sąwaibao. Tama agai te augwali selama, te ąį Yufretis u badu pedai badu tatagalo paibao.
1KI 14:16 Tama te king Jeroboam agai me te sęgę sabo sę me eduali, tama agai te Israel hani augwali me kegelama, tama sęgę sabo kolesaga eyu sęgę sali. Tama te Genuai Bidi Godigo te augwaligo te sęgę sabo kolesaga homu kone palama, tama agai te Israel hani dabe augwaliba agai tudi ola mani,” Ahiyago te po wai.
1KI 14:17 Tama te king Jeroboamgo wego agai te po odali, tama tialima, aga hogodama, tama aga te Tirsa hanu taunba ma geasa pali. Tama aga te gagalama, te aga be tomoba pabo sogo, te sogo tama te wai bǫų isali.
1KI 14:18 Tama augwaligo te wai bǫų tigi pubulama, tama te tigidali Israel hani we bidi dabe augwaligo te wai bǫų pubulama, hobede ebo gela wali. Te tama tialigo da, te profet bidi Ahiya agabolo te Genuai Bidi Godigo ola mani poba usu nigi pali, aga sę bidi.
1KI 14:19 Te tigidali po te king Jeroboamgo gasa haniani sę agai yali po da, te po gasa bukude elalubo, augwaligo e tama te buku nogi ebo da, Israel Hani King Bidi Dabego Po Dao. Te buku da te agai te boi hwįyu, te boi bidi hani dali yali sę yali po me, me te aga bidibo bulu tǫ tonaluali kolesaga po me elalubo buku dao.
1KI 14:20 Te king Jeroboam aga te king nigilama, bidali kibu be te 22 yia, tama te aga isalima, tama augwaligo aga tigi te gų pageba pubulali. Tama aga ogwa, nogi Nadapgo, te aga ayago te king sę yali te aga ogwago hasegelama, te aga te king bidi nigilama sę yali.
1KI 14:21 Rehoboam, aga te Solomongo ogwa, tama aga te Judago king bidi bidali. Te aga king bidi pedalobo sogo, te agai kibu be bidi sese si olama, te ugwadu deli wabode te aga king bidi pedelali. Tama aga te king sę edubadi yaide, agai kibu be nogo si olama, te sągągo a naga olama, me badu sągągo si, tama kibu be usu nama bidali, te 17 yia. Te aga te Jerusalemde bidali, te hanu te Genuai Bidi agai te Israel hani bulu tǫ tigidali pedai badu te tǫ tomode dąį ilai bulu dao, tama tialima, te tigidali Israel hani augwali tigidali te aga pageba pąba aselama, tama augwaligo agadolo lotu po omainogo dąį ilai bulu dao. Rehoboam aga ida, aga te Amon bulu hani bidi we da. Aga ida nogi Nama dao.
1KI 14:22 Te tama tibo sogo, te Juda hani we bidi dabe augwaligo te Genuai Bidi Godigo gedude augwaligo te dwai kolesaga ebo sę umabo mu yali. Augwaligo tama tibo kolesaga ebogo te Genuai Bidi God agai augwali dali haliga sębę dwai mu yali. Polobadu augwa wąį nǫų dabego sęgę sali kolesaga tiwai gilama yali, tama tede Genuai Bidigo sębę yai dao. Tiali goli, megi te e hanigo te yali dwai kolesagade te Genuai Bidigo sębę moni genuai mu yai.
1KI 14:23 Megi tama te Juda hani dabe me augwaligo te lotu po wabo pesage te augwaligo te bulu dude me, te moni ni dologode me, tama ninigi pali. Tama augwaligo te masigigo te kąų ni tiwai te pos nigilama, tama augwaligo tulama, tama te tibo god we Asera noma te kąų nide te lotu po wabo pesagede wawalo pali, tama augwaligo te nomabolo lotu po wali.
1KI 14:24 Tama augwaligo te dwai kolesaga mu me deli pedelali. Tama te me badu we bidi dabe augwaligo te penani ebo sę selama, tama augwaligo te lotu po wabo pesagede te penani sę yali. Polobadu te tǫde bidali we bidi augwaligo te tobage dwai kolesaga eduyu geai baso, tama Genuai Bidigo te hani augwali sela sąnama, tama te tǫ te Israel hani dali Juda hani sibolo mani. Tiali goli, tegoba! Te Juda hani we bidi dabe tigidaligo te polobadu te tǫde bidali we bidi dabego te augwaligo te dwai damua pai kolesaga yalidu augwaligo me wali pelama tiwai kolesaga naga yai.
1KI 14:25 Te bidi Rehoboam aga te kibu be a naga te king sę eyu bidai, Sisak, te Isip king bidi da, te king bidi aga ami bidi dabe dali asama, tama te augwaligo te Jerusalem taunba boi hwįagasali.
1KI 14:26 Tama augwaligo te Jerusalem bulu hani bidi dabe aiyaba elaluama, tama augwaligo te dwagi dwagi yai doado bage dabe me siyu, te Genuai Bidi God dolo lotu po wabo bede muani doado bage me, tama me te kingo bede muani doado bage me sali. Tama me te augwaligo te king Solomongo nigali sabele ni name dabe, te golgo haluali ni name, te me te tigidali doado bage augwaligo sali. Tama te doado bage augwaligo te Isip buluba tolasa pai.
1KI 14:27 Tama tilama, nosali te king Rehoboam aga sę ebo bidi dabebolo te po wali, tama augwaligo te bras selama, tama augwaligo te sabele dabe ma nigali. Te Isip hani dabego selasa pali sabele dabe hasegelama, te muani siliba muani. Tama te king Rehoboamgo agai te king be tų tonaluabo gavman ofisa bidi me deli dąį ilama sę mani, tama augwaligo te sabele dabe bugagia tonalubo dao.
1KI 14:28 Tama te king te Genuai Bidigo tempel beba pabo sogo, teda te sabele tolalubo bidi dabego te tola selama, te king dali hodobo pabo da. Tama te king aga beba ma begasa pabo sogo, teda te sabele tolalubo bidigo be habuba ma muyu ebo dao.
1KI 14:29 Te king Rehoboamgo gasa tigidali haniani sę dabe yali po da, te gasa bukude elalubao. Augwaligo e tama nogi wabo dao, te Juda Hani Dabego King Bidi Dabego Po Elalubo Buku Dao wabo dao.
1KI 14:30 Te king Rehoboam me, me te king Jeroboam dali, augwali si bidibo sogo, te bulu hani bidi si tigidali sogo tama boi naga hwįduai dao.
1KI 14:31 Tama nosali te king bidi Rehoboam isai, tama augwaligo aga tigi te aga wąį nǫų Devitgo taun bulu te isali bidi pubalobo gų pageba augwaligo aga tigi pubaligi pai. Tama aga ogwa, nogi Abiya, agai te aga ayago yali sę agai selama, tama aga king bidi pedelali. Rehoboam aga ida, agai nogi e tama Nama da, tama aga page bulu te Amon bulu hani we dao.
1KI 15:1 Te king Jeroboam aga te Israel hani dali king bidi bidali kibu be te nogo si olama, sągągo a naga olama, me badu sągągo sela, 18 yia, Abiya, agai gasa nogi me Abijam, aga te Juda hanigo king bidi pedelali.
1KI 15:2 Tama aga te Jerusalemde king nigilama bidali kibu be me si me deli, tama kibu be usu nama bidai. Maka, Apsalomgo wegi da, aga te Abiyago ida da.
1KI 15:3 Te Abiya agai te aga ayago yali dwai sęgę sabo kolesaga yali gilama, Abiya agai me te tigidali haniani kolesaga dwai mu yali. Agai te aga wąį nǫų Devitgo yali dwagi yai kolesagadu wali pabe, tama agai te God dali deli homu ebe, aga Genuai Bidi.
1KI 15:4 Tiali goli God Genuai Bidigo Devit ma kone palali, tama tibaso agai te ogwa deli te Abiyabolo mani, tama agai te aga bidali silide te king bidi pedelama bidimainu yali. Tama teyu, te king Devitgo sole munu me sula sogobeo. Tama teyu, te Genuai Bidigo te bulu Jerusalem taun bugagia elalumainao homu yai.
1KI 15:5 Genuai Bidigo te Devit homu kone palali, magi baso meni, Devit agai te dwagi yai kolesaga te Genuai Bidigo gedude yai. Tigidali sogo agai te Genuai Bidigo tigidali bomo yai po wali pai. Tialima, me sogo deli, meni. Te tama sogo deli Devitgo te Hit hani bidi Uria dali te dwai sę yali.
1KI 15:6 Te king Abiya dali te king Jeroboam dali si bidibo sogo, tigidali sogo te augwali sigo hani si te boi naga hwįduai.
1KI 15:7 Te king Abiyago te gasa haniani sę yali po da, te po gasa bukude elalubo. Augwaligo te buku e tama nogi wabo da, te Juda Hani King Bidi Dabe Augwaligo Po Elalubo Buku Da wabo dao.
1KI 15:8 Tama nosali te king bidi Abiya isibo si, tama augwaligo aga tigi sela pelama, te aga wąį nǫų Devitgo hanu taunba pubaligi pai. Tama aga ogwa, Asa, agai aga ayago king sę yali silide selama, te aga king pedelama bidali.
1KI 15:9 Te bidi sese deli kibu be, te 20 yia, te Jeroboam aga king bidi nigilama, te Israel hani dali bidiyu, tama kibu be usu nama bidali, te bidi sese deli, 20 yia, te bidi Asa aga te Juda hanigo king bidi nigilama bidali.
1KI 15:10 Tama aga te Jerusalem bulude king nigilama bidali kibu be e tama dao, te 41 yia usu nama bidai. Maka, aga te Apsalomgo wegi da, te Asa aga auwa mosi da.
1KI 15:11 Tialima, te bidi Asa agai te wiegi yai kolesaga te Genuai Bidigo gedude yali, te Devitgo yali gilama tiwai mu yai, aga wąį da, agai tama tiali.
1KI 15:12 Tama te bidi Asa agai te tibo god dolo lotu po wabo pesagede bidiyu, te penani ebo sę yali we bidi dabe sela sąyani. Tama me te agai te aga wąį nǫų dabego te tibo god noma nigilama, te kąų nide wawalo pali piksa noma dabe me agai sela sąyani.
1KI 15:13 Tama agai te aga idago auwa mosi agai sela sąyani, Maka, tama agai sę me te ma sula tagalobe, te aga namba yali me, te kingo ida da homu meni. Magi baso meni, te we Maka agai te tibo god we Asera noma me deli nigibo sę yai. Tama te bidi Asago te po wali, “Tama dagego te dwai kugumini yai piksa noma nigali togolama, tama dagego selasa pelama, te Kidron wę odogo maluba sia ulugi pao,” wali.
1KI 15:14 Te mu tama dao, te king bidi Asa agai te augwaligo te tibo god dolo lotu po wabo pesage munu me dolobe, tiali goli tigidali sogo agai te Genuai Bidi deli koneama, tama agai godolo mu eyu, tama aga te tigidali sogo te Genuai Bidi dologoba mu egi pai.
1KI 15:15 Tama te king Asa agai te aga ayago te Genuai Bidigo nai dao olama, dąį ilali doado bage dabe me, me te agai me te doado bage selama, te Genuai Bidiba mawaibao olama dąį ilali, tama agai te nai dabe selama, tigidali te Genuai Bidigo tempel be tomoba muani. Te nai dabe, te me silva, me te gol, tama me te haniani dis pou dabe me, te tigidali tempel be tomoba muai.
1KI 15:16 Te tama tibo sogo, te bidi Basa aga te Israel hanigo king bidi nigilama bidali. Tama te king bidi si, Asa dali, te Basa dali, augwali si te king bidi bidibo sogo, te sogo te augwali sigo hanigo augwa hasi te tigidali sogo boi hwįdu bidai dao.
1KI 15:17 Me sogo deli te king Basago aga boi hwįbo ami bidi dabe selama, tama te Juda hani dabe augwali dali boi hwįai. Tama augwaligo te hanu taun Rama selama, tama augwaligo te hanu taungo masigigo nigai obo bologo pelama, obo dąų walobo sę yali, tama te tigidali we bidi dabe te Juda buluba ugwa peyu, eda asu eidali weyu, augwaligo te tų paliali.
1KI 15:18 Tama tibaso, te king Asa agai te tigidali silva me, me te gol, me te Genuai Bidigo mone mubo be habu badu muani me, me te kingo bede muani doado bage dabe tigidali mu agai sali. Tama agai selama, te aga sę ebo ofisa bidibolo menama, tama agai augwali tagala palama, te Damaskus bulu king bidi Benhadatbolo momainu augwali tagala palali, te Siria king bidi. Te bidi Benhadat aga aya te Taprimon dao, tama aga wąį nǫų Hesiongo ogwago ogwa dao. Tama te king Asago aga sę ebo ofisa bidi dabebolo e tama po wali, “Te king Benhadatbolo e tama po agabolo ola mao,” wali,
1KI 15:19 “‘Eno homugo te dadi si te po dąų olama, te abagi name si da olama, bidaibao, te polobadu te dadi sigo aya sigo yali gilama tiwai yaibao,’” wali. “‘Tama teyu, megi eno te e silva me, te gol me, te e tolobo dao, te olo tama mobao. Eno homugo nago te bidi Basa dali po dąų walali po toga sąyao, te Israel hanigo king bidi. Tama agai aga ami soldia bidi dabe sela peyu, tama eno tǫ taga pomainao,’ te po te king Benhadatbolo pusao,” king Asago te po wali.
1KI 15:20 Tama te king Benhadat agai te king Asago te ola tolali po agai odama, tama agai aga dali te po usu dao po wali. Tama teyu, agai aga ofisa bidi dabe dali e tama po wai, “Dagego te ami soldia bidi dabe selama, te Israel hanigo taunba boi hwįgi pao,” wali. Tama augwaligo te boi hwįgi pelama, tama augwaligo te hanu Ijon me, me te taun Dan me, me te taun Abel Betmaka, te taun sela tama augwaligo sali. Tama me te augwaligo te Galili bulu sigi wę ge elalubo pąde elalubo tǫ me, te Naptali hanigo te tigidali tǫ dabe me augwaligo sali.
1KI 15:21 Tama te king Basago te Siria hani augwali asama, te Israel hani dabego hanu taunba boi hwįagasali po odobo sogo, tama agai hanu taun Ramade yali sę tagalali, tama aga te Tirsa hanu taunba pelama bidali.
1KI 15:22 Tama nosali te king Asago agai te tigidali Juda hani bidi dabebolo agai po ola tolama, “Dage te Rama hanu taunba pao,” wali. Tama augwali pelama, tama te king Basago tigidali te masigi me, te ni name me, Basa agai te sisinani doado bage te Juda dabe augwaligo sali. Tama te Basago te hanu taun obo dąų wabo sę yainu yali nai augwaligo selama, tama augwaligo tolasa pali. Tama te king Asa agai te aga Mispa hanu taun obo me, me te Benjamingo hanigo tǫde elalubo hanu taun Geba taun obo me, tama te king Asa agai te taun sigo obo dąų walobo sę yai.
1KI 15:23 Te king Asago te haniani gasa sę yali po te gasa bukude elalubo, te buku augwaligo e tama nogi wabo da, Juda Hani Dabego King Bidi Dabe Po Elalubo Buku Da wabo dao. Te bukude elalubo po te king bidi Asago agai te bomai sę yali po me, me te agai te gasa sę me, te taun masigigo nigai obo dąų walobo sę yali po dabe me elalubo buku da. Tialima, te king Asa aga monu dabe ebo sogo, tama aga sągąde te dwai gasi me deli pedelali.
1KI 15:24 Tama nosali te king Asa isibaso, augwaligo aga tigi te aga wąį nǫų dabe pubalobo gų pageba pubaligi pali, te aga wąį nǫų Devitgo hanu taunba. Tama te aga ogwa Jehosafatgo, agai te aga ayago sę yali silide selama, tama aga te king bidi nigilama bidali.
1KI 15:25 Te bidi Asa aga te Juda hanigo king bidi nigilama bidali kibu be si naga bidai, te Nadap, aga te aya te king Jeroboamgo ogwa da, aga te Israel hani dabego king bidi pedelama bidali. Tama aga te kibu be si digi tama bidali.
1KI 15:26 Tama agai te aga ayago yali dwai kolesaga tiwaidu wali pali. Aga digi aga sęgę sabo dwai kolesaga te Genuai Bidigo gedude yali, tama teyu, agai te Israel hani we bidi dabe me agai kegelama, sęgę sali.
1KI 15:27 Tama te Basa, aga aya te Ahiyago ogwa da, augwali te Isakargo hani dao, agai te bidi Nadap ela muainu tų kegali. Tama tibaso, te bidi Nadap dali, te aga ami bidi dabe dali, augwali te Filistia hani dali boi hwįgi pai, tama augwaligo te Gibeton hanu taun bologobe yai, tama te king Basa aga te king Nadap aga pageba sabolama, tama te king Nadap ela muani.
1KI 15:28 Tama tilama, te bidi Basa aga te Israel hanigo king bidi nigilama bidali. Te tama sęgę pedelali, te bidi Asa aga te Juda hanigo king bidi nigilama bidiyu, te kibu be sela wabo kibu bede te sęgę pedelali.
1KI 15:29 Polo tama te king Basago te king Jeroboamgo hani we wai dabe tigidali agai polo ela munama silali. Tama te agai te bidi me deli bidibadi me deli sulama, tagalobe. Mu meni. Tama te tiali kolesagago da, te Genuai Bidi aga sę ebo bidigo pedauwalidu wali poba usu nigi peyu, te tama sęgę pedelai, te taun Silode bidibo profet bidi Ahiyago wali poba usu nani.
1KI 15:30 Te king Jeroboamgo hanide yali sęgę te page e tama tiwai da, te king bidi Jeroboam aga digi te polobadu te Genuai Bidi Godigo gedude yali sęgęde dao, Israel bidi dabego Genuai Bidi, tama me te agai te Israel hani we bidi dabe kegelama, te augwaligo sęgę sali bage. Augwaligo te tama yali sęgęde te Genuai Bidi haliga sębę genuai mu ilali, tama teyu, te Genuai Bidigo te king Jeroboamgo hani tigidali dola silali.
1KI 15:31 Te king Nadapgo te tigidali haniani sę yali po elalubo te gasa bukude elalubo, te augwaligo e tama nogi wabo da, Israel Hanigo King Bidi Dabego Po Elalubo Buku Da wabo da.
1KI 15:32 Te bidi Asa aga te sela wabo kibu bede aga te Juda hanigo king bidi bidai, te side Basa, aga te Ahiyago ogwa, aga te Israel hani dabego king bidi pedelali. Tama aga te Tirsa bulu taunde king bidi nigilama bidali kibu be te 24 yia usu nama bidai. Tama te king Asa dali, te king Basa dali si, te augwali si king bidi nigilama bidibo sogo, tigidali sogo augwa sigo hani dali boi uga de eda si boi hwįdu geai.
1KI 15:34 Basa agai te king Jeroboamgo yali dwai kolesaga yali gilama, te agai me te yali kolesagadu wali pelama, tama agai me dwai kolesaga yali. Tama te agai me te Genuai Bidi God gedude sęgę sali. Tama me te agai te tigidali Israel hani we bidi kegelama sęgę sai.
1KI 16:1 Me sogo deli te Genuai Bidi Godigo te profet Jehubolo te po walali, Hananigo ogwa dao, agabolo te king Basabolo pusabo po wali. Genuai Bidi Godigo po e tama dao,
1KI 16:2 “Basa, bugagia odao. Hasia te nage olo bidi mu gagawai, tialima eno nage te king bidi nigilama, tama nago te Israel hani augwali tonaluai, te we bidi dabe augwali te eno hani we bidi dabe da. Tiali goli, nago te king Jeroboamgo yali gilama, te nago kolesaga dwai mu ebuo,” wali. “Tama nago te we bidi dabe augwali kegelama, sęgę sabuo,” wali. “Tama augwaligo te sęgę sabo kolesagago te eno haliga sębę augwali dali ebao,” wali.
1KI 16:3 “Tama tibaso, eno nage dali, te naga hani we wai me silaibao, te eno te king Jeroboam aga hani dali yali gilama yaibao,” te tama po wai.
1KI 16:4 “Tama tialima, te nago hani bidi dabe me badu te taun tomode isibaso da, teda te augwaligo tigi te yowigo tuaibao,” wali. “Tama tialima, me badu bidi dabe te taun bulu badu isibaso da, teda augwaligo tigi te ba kemodagego tuaibao,” Godigo te Basabolo te po wali.
1KI 16:5 Te king Basa agai te tigidali haniani sę yali po da, te po gasa bukude elalubo, tama augwaligo e tama nogi ebo da, Israel Hani Dabego King Bidi Dabego Po Elalubo Buku Da wabo dao. Te bukugo te agai te tigidali dila pai sę yali po ola mabo buku dao.
1KI 16:6 Tama nosali te king Basa isali, tama augwaligo te aga tigi te Tirsa taunde pubaligi pali. Tama aga ogwa nogi Ela, agai te aga ayago king bidi nigilama bidali silide aga ogwago selama, tama aga te king bidi nigilama bidali.
1KI 16:7 Te king bidi Basa agai te Genuai Bidigo gedude sęgę sai, te king Jeroboam aga hani dali bidiyu, te augwaligo yali kolesaga tiwai mu yali, tama te king bidi Basa agai te dwai kolesaga ebaso, te Genuai Bidigo haliga sębę dwai mu yai. Tama me, te king Basa agai te king Jeroboamgo hani we bidi dabe tigidali ela muna silali. Tama tibaso, te Genuai Bidigo te profet bidi Jehu tagala palama, tama aga te king Basa pageba pelama, tama agai agabolo e tama tiwai po ola mani, “Genuai Bidigo nage dali, te naga hani dali si tigidali agai dolaibao po walio,” po wali.
1KI 16:8 Te bidi Asa aga te Juda hani bidi dabego king bidi bidibadi, agai kibu be te 26 yia wagi solama kibu be yai, te side Ela, aga te king Basago ogwa da, aga te Israel hanigo king bidi pedelali. Tama te king bidi Ela aga te taun Tirsa bulude king bidi nigilama bidali kibu be si digi mu usu nama bidai.
1KI 16:9 Tama te king Ela aga sę ebo ofisa bidi, agai nogi Simri, tama te bidi agai te king Ela ela muabo sunumi kegali. Te bidi Simrigo agai te king bidigo boi hwįbo nai karis me badu bugulama, te Simrigo tonalubo sę yai. Me sogo deli te king Ela aga te bidi Arsago beba pai, tama te bidi aga te kingo be tonalubo sę ebo bidi da. Tama agai suali, ma te king Ela aga te bomai wę tuyu bidibo suai, tama aga te wabo pabo gagalobo suali.
1KI 16:10 Tama tibaso, te bidi Simri aga te be tomoba pelama, tama agai te king bidi Ela mu ela muani. Tama te Simri aga te king bidi pedelama bidali. Te tama sęgę pedelali, te Juda hanigo king bidi Asa aga kibu be te 27 wagi solama kibu be bidibadi te tama sęgę pedelali.
1KI 16:11 Te bidi Simri king bidi pedelai madigi, tialima, polo tama agai te king Basago hani bidi dabe tigidali ela muna silai. Tama me te aga deli kaneme me, te aga abagi dabe me, ela muna silai. Tama agai te bidigo hani bidi me deli me, me bidibo sula tagalobe.
1KI 16:12 Tama te bidi Simri agai te king Basago hani bidi dabe ela silai. Tama tiali kolesaga, te Genuai Bidi Godigo sę ebo profet bidi Jehugo pedauwalidu ola mani poba usu nigi peyu tama tiali.
1KI 16:13 Te king Basago hani tigide pedelali sęgę page e tama dao. Te king bidi Basa dali, te aga wai te king bidi Ela dali si, augwali sigo te Genuai Bidi Godigo gedude augwali sigo sęgę sai, Israel hanigo Genuai Bidi, tama augwali sigo te tibo godiba lotu po wali. Tama augwali sigo te Israel hani dabe augwali kegelama, sęgę sabo sę yali. Augwali sigo tama tiali sęgęde te Genuai Bidigo augwali dali agai haliga sębę mu yai, tama teyu, te Genuai Bidi agai te king Basago hani tigidali dolali.
1KI 16:14 Te king Elago agai te tigidali haniani gasa sę yali po dabe da, te po dabe gasa bukude elalubaso, augwaligo e tama nogi wabo da, Israel Hanigo King Bidi Dabego Po Elalubo Buku Da wabo dao.
1KI 16:15 Te Juda hanigo king bidi Asa aga te Juda dabe dali king bidi bidibadi, agai kibu be te 27 yia bidali, tama te bidi Simri aga te Israel hanigo king bidi pedelama bidai. Tama aga te Tirsa hanu taunde king bidi bidali, te 7 pela dei bidai, te Sadede deli tama usu nama bidali. Tama te sogo te Israel ami soldia bidi dabego te Filistia hanigo te Gibeton hanu bologobe yagaselama, tama augwaligo boi hwįbo sę eyu, tama augwaligo te hanu sabo homu eyu yai.
1KI 16:16 Tama augwali te boi hwįbo sę eyu bidibadi, tama augwaligo e tama po odali, te bidi Simrigo agai te dwai kolesaga eyu, tama agai te king Ela ela muani. Tialima, te sogo tama te tigidali ami soldia bagego augwaligo te augwa tobolu ofisa bidi me deli augwaligo dąį ilali, te nogi te Omri, aga te Israel bagego king bidi pedelali.
1KI 16:17 Tama tialima, te bidi Omri dali, te aga ami soldia bidi dabe tigidali, augwaligo te Gibeton hanu tagalama, tama augwaligo te Tirsa hanu bologobe egi pelama, tama augwaligo boi hwįnama, tama augwaligo te Tirsa taun sai.
1KI 16:18 Tama te king bidi Simri aga te Tirsa taunde bidibo sogo tama agai suali, ma te Omrigo ami bidi dabego bomo mu eyu, tama augwaligo agai ami soldia dabe aiyaba elaluama, tama te Tirsa hanu te taun sali, tama tibaso, aga te kingo kompaunde te dila pai be me deliba aga bula sigi pali. Tama agai te beba isi nogonama, tama te kingo be dabe tigidali siago dela peyu, tama aga me aga digi aga te siago delama, aga isali.
1KI 16:19 Te bidi Simri aga tigide te pedelali sęgę, magi baso meni, agai te king Jeroboamgo yali tiwai dwai kolesaga agai me tibaso, te tiwai sęgę aga tigide pedelai. Agai te Genuai Bidigo gedude agai me sęgę sai, tama me te agai te Israel hani we bidi dabe agai kegelama, te we bidi dabe augwaligo me sęgę sali.
1KI 16:20 Te king Simri agai te tigidali haniani gasa sę yali po da, te po gasa bukude elalubo, tama augwaligo e tama nogi ebo da, te Israel Hanigo King Bidi Dabego Po Elalubo Buku Da wabo da. Tama te bukugo agai te king Ela aiyaba elaluali po wabo buku da.
1KI 16:21 Te bidi Simri isama, tama nosali te Israel hani we bidi dabe augwali bugulama, tama augwali nani si nigilama bidali. Me hani augwaligo homugo te bidi Tipni aga augwaligo king bidi nigilama bidaibao. Tipni aga aya nogi te Ginatgo ogwa da. Tama te me hani augwaligo king bidi te Omri king bidi nigilama, augwali tonalumainogo homu yali.
1KI 16:22 Tama nosali te king Omrigo hani augwaligo bomo mu elama, te king Tipnigo hani dabe augwali aiyaba elaluali. Tama te Tipni isilama, tama te bidi Omri aga king bidi pedelali.
1KI 16:23 Tama te bidi Asa aga te Juda hanigo king bidi nigilama bididubadi, tama agai kibu be 31 tama kibu be usu nama king bidi bidali, Omri aga te Israel hanigo king bidi pedelama bidali. Tama aga tede 12 yia bidali. Hasia aga te Tirsa hanude agai kibu be te nogo a olama, me badu nogo deli wagi solama kibu be bidali,
1KI 16:24 tama nosali te king Omri agai te dwasianu bulu du me deli elalubo tǫ dobu elama sai, tama te bulu dude te agai homugo te hanu taun nigilama, tama te dila pai obo mu masigigo nigai. Agai te dobu yali tǫ te bidi me deligo tǫ da, te bidi nogi Semer, tama agai te tǫ dobu yali silva mone te 60,000 kina agai te bidi Semerbolo mawai. Omri agai homugo te bidi Semer nogi koneama, tama te agai te hanu taun nogi te Samaria taun nogi poai da.
1KI 16:25 Te king bidi Omri agai te Genuai Bidigo gedude agai te sęgę genuai mu yai. Te bidi Omri agai ebo sęgęgo te hasia bidali king bidi dabego yali sęgę aiyaba mu elaluali.
1KI 16:26 Agai te king Jeroboamgo yali dwai kolesaga tiwaidu agai me eyu, wali pai. Tama agai me te Godigo gedude agai sęgę sai, Israel hanigo Genuai Bidi. Tama me te agai te Israel hani we bidi agai augwali kegelama, te sęgę sabo sę eyu, tama augwaligo te tibo godiba lotu po wabo sę yai. Tama augwa te sęgę sabo kolesagago te Genuai Bidigo augwali dali haliga sębę emainu dianani.
1KI 16:27 Te king Omrigo haniani sę yali po da, te po gasa bukude elalubo, augwaligo e tama nogi ebo da, Israel Hani Dabego King Bidi Dabego Po Elalubo Buku Da wabo da. Te bukugo te king bidi Omri agai te haniani tigidali dila pai sę yali po ola mabo buku dao.
1KI 16:28 Tama nosali te king bidi Omri isibaso, tama augwaligo aga tigi te bulu Samaria taunde pubulali. Tama aga ogwa, Ahap, agai te aga ayago king bidi nigilama bidali silide agai selama, king bidi nigilama bidali.
1KI 16:29 Asa aga te Juda hani dali king bidi bidibadi, aga e tama kibu be usu nama bidai, 38 yia bidali, Ahap aga te Omrigo ogwa da, aga te Israel hanigo king bidi nigilama bidali. Tama aga te Samaria bulude king bidi nigilama bidali kibu be, te 22 yia usu bidali.
1KI 16:30 Tama te king Ahap agai te Genuai Bidigo gedude umabo sęgę mu sai. Te king bidi Ahapgo agai yali sęgę te hasia pedali king bidi dabe augwaligo sęgę aiyaba mu elaluai, tama agai mu umabo sęgę mu sai.
1KI 16:31 Agai te sęgę sali te king Jeroboamgo sali sęgę tiwai agai me sai, tiali goli agai homugo te da olo bage da homu yali. Tama teyu, agai te we Jesebel sai, te Saidon hanude bidali king bidi Etbalgo wegi sali. Tama agai te tibo god Balba lotu po wabo gagalali, te Saidon hanigo tibo god.
1KI 16:32 Tama te king Ahapgo agai Samaria bulude be me deli sę yani, te bede te tibo god Balbolo lotu po wabo be, tama agai te tibo god Balgo alta me deli nigibo sę yai, te lotu be tomode.
1KI 16:33 Tama me te agai te tibo god we Asera piksa noma nigibo sę yai. Tama agai te tama tiali sęgęgo God, Israel hanigo Genuai Bidi, agai aga dali sębę mu yai. Te bidi Ahapgo sęgę umabo mu siyu, tama agai te sęgęgo te hasia pedali king dabego yali sęgę aiyaba elaluai.
1KI 16:34 Te king Ahap aga te king bidibo sogo, te bidi Hiel aga te Betel taun bidi, agai te Jeriko taun ma hodolobo sę yai. Te bidi Hielgo sę ma hodolobo sogo, te bidi Abiram, Hielgo hasia gomunai ogwa, aga mu isali. Tama agai te taunde moni tų nigibo sę ebadi, tialima Segup, agai te sabi ogwa, aga isali. Tama sęgę te Hiel tigide pedelali, aga tigide te yali sę te polobadu te Genuai Bidigo te profet Josuabolo ola mani poba usu nagasu, tama sęgę aga tigide pedelai dao, Josua te polobadu bidali bidi nogi Nungo ogwa da.
1KI 17:1 Elaija aga te Tisbe taundu asai profet bidi deli da, aga te Gileat tǫ page bidi da. Me sogo deli aga aselama, tama te king Ahap suagaselama, tama agai agabolo e tama po wali, “Ena Godigo sę bidi dao, Israel hani dabe dena Genuai Bidi. Te God tigidali sogo bidada peyu, bidada pabo God dao, tama agai nogide eno nagebolo dolo po mu obao, te kulubage me, te hulide asobo segeni wę me asisiąbadi, te si sela kibu beba usu nigi paibao,” te po tama wali. “Tama tilaludu bididubadi, tama eno po wabo sogo bodoluba usu nagasaibao,” Elaijago te po wai.
1KI 17:2 Tama nosali te Genuai Bidigo te Elaijabolo e tama po wai,
1KI 17:3 “Nage e bulu tagalama, tama nage te giliga pedalobo madi te wę Jordan u badu pao, tama nage te dwasianu wę Kerit pąde duala selama, bidao,” wali.
1KI 17:4 “Nago te wę tuyu bidao. Tama eno te ba tadibolo olama, tama augwaligo tigidali sogo nagebolo nai magasu yaibao,” wali.
1KI 17:5 Tama tialima, te profet Elaija agai te Genuai Bidigo te wali podu wali pai, tama aga pelama, te wę Kerit pąde bidali, te Jordan wę u badu, te giliga pedalobo badu dao.
1KI 17:6 Tama te tigidali sogo te kigamu me, tama te pio me, te ba tadi dabe augwaligo te nai bret me, me te tuabo mi dabe me, te ba dabego agabolo magasuduali, tama agai te nai dabe tuyu, tama aga te dwasianu wę tuyu, tama bidali.
1KI 17:7 Tiali goli, te Israel bulude te tulubage munu me tulube, tama teyu, te me badu sogo nosali, te dwasianu wę Kerit me sula siyu yai.
1KI 17:8 Te wę Kerit te sula sai, tama tialima, Genuai Bidigo te Elaijabolo e tama po ola mani,
1KI 17:9 “Tama nage hogodama, nage te Saidon bulude te Sarefat hanu taunba bidigi pao,” wali. “Te taunde te Israel hani isąwai we me deli te bidibao, te we aga bidi isai dao,” wali. “Eno te we dąį ilibao, te wego agai nage tubo nai tau siyu, tama agai nage bugagia tonalumainao,” wali.
1KI 17:10 Tama tibaso, Elaija aga hodaloama, Sarefat buluba pai. Tama aga pelama, te oboba sabaligi pai, tama agai suali, ma we me deligo isi selama, sisinibo suali. Elaija agai sulama, agai koneani, te we wilawe we da homu yali. Tama agai te we i weyu, e tama wali, “Ena wę tuabo homu ebuo,” wali. “Nago te wę tubo mouwa dage genagi wę tulama, tama nago enabolo magasobo usu yaibawe?” te po wali.
1KI 17:11 Te wego te Elaijago wali po odama, tama aga wę sigi peyu pali. Tama Elaijago te we ma i weyu, e tama wali, “Eno homugo nago te dwasianu tubo nai bret pedainu me magasao,” wali.
1KI 17:12 Tama te wego agabolo te po wali, “Godigo nogide, naga Genuai Bidi, te God tigidali sogo bidada peyu, bidada pabo God dao, eno mu po tama obao, eno te bret nai menio,” wali. “Eno te dwasianu o gagawai nai plaua deli digi te tǫgo nigali mouwa dage genagi sospende munalubo,” wali. “Tama me te dwasianu oliv wel te gasa mouwa dage genagi sospende munalubao,” wali. “Eno megi te e dwasianu isi sesa bilibo da, teda eno te plauanu ulugi painu ebao,” wali. “Eno ogwa dali dadi sigo te megi tama silibo nai tama dadi sigo ula tulama, tama nosali dago tuabo nai mu menio,” wali, “tama teyu, da mu isaibao,” te wilawe we agai tama po wali.
1KI 17:13 Tialima, te Elaijago agabolo e tama po wali, “Nago homugo naga te dwasianu nai da olama, moni homu egio,” wali. “Nage pelama, te nago munalubo wali bret tama ulao,” wali. “Tiali goli, hasia bolo nago te plauago dwasianu peda siyu, tama me te nago wel me dwasianu siyu, tama te nago te bret dali ulama, tama nago enabolo magasao,” wali. “Tama nosali naga wai dali duga sigo tuabo bret nai ula tuao,” wali.
1KI 17:14 “Magi baso meni, God, Israel hanigo Genuai Bidi, agai e tama po wai, ‘Naga te mouwa dage genagi munalubo plaua munu me sia sogobeo, tama me te nago te wel me, te nago mouwa dage genagi sospende munalubo wel me munu me sia sogobeo,’ po wali, ‘tama munalua pobadi, te Genuai Bidigo te kulubage e tǫba tulubo bodoluba usu nigi paibao,’ po wali,” Elaijago te po te webolo wai.
1KI 17:15 Tama tialima, te wego aga beba pelama, te Elaijago wali po gilama yali. Tama nosali Elaija dali te we aga hani dali sigo augwali tuabo nai te umabo sogo tuabo nai usu mu elaluali.
1KI 17:16 Tama agai te mouwa dage genagide moni plaua umabo mu me munaluali, munu me sia sabe. Tama agai te wel mubo mouwa dage genagi me, te wel munu me sia sabe, tialima Genuai Bidigo agai te Elaijago pedauwalidu wali gilama yali.
1KI 17:17 Tialima, nosali te wego te wai gasi sali. Tama te wai gasi genuai mu elama, tama te wai isali.
1KI 17:18 Tama tialima, te wego te Elaijabolo te po wai, “Nage te Godigo sę ebo bidi dao, magi baso nago te tiwai kolesaga ena dali yaliwe? Tama nage aselama, tama Godigo homugo eno sęgę koneama, tama teyu, te eno wai isalio,” te wego te po wai.
1KI 17:19 Tama te Elaija agai te po wei ponoyu, e tama wali, “Nago te wai enabolo mao,” wali. Tama tialima, te Elaijago agai te isali wai digi aga idago nogode agai selama, tama agai aga pibo be ugwa badu habuba selasa holali, tama agai te betba pilali.
1KI 17:20 Tama agai e tama gedu haluasa po bomai mu wali, “God, eno Genuai Bidi, te e wilawe wego ena agai bugagia tonalubo da. Magi baso nago genuai sęgę e we tigide pedelaliwe? Tama magi baso agai e wai isilaliwe?”
1KI 17:21 Tama Elaija aga te wai bau badu aga sela sogo pigiluama, tama agai e tama gedu haluasa po wai, “God, eno Genuai Bidi, nago te e waigo hoboludu ogwa wai mobo ma mao,” wali.
1KI 17:22 Tama tialima, te Genuai Bidigo te Elaijago te gedu haluasa po wabo odama, tama agai te waigo hoboludu ogwa wai mobo ma mawai. Tama tibaso, te isali wai ma hoda holali.
1KI 17:23 Tama tibaso, Elaijago agai te wai nogo tolasa, aiyaba dulali, tama aga idabolo mani. Tama te Elaijago aga idabolo e tama po wali, “Suao, naga wai bugagia bidibao,” wali.
1KI 17:24 Tama aga idago e tama po wei ponani, “Mu tama o, megi eno koneanio, nage te Godigo sę ebo bidi dao. Mu tama dao, Genuai Bidi aga digi nagebolo mabo po te nago dabolo pusubo dao,” te wego te po wali.
1KI 18:1 Te sogo te genuai poi pibo giliga nanobo sesabi elama bidali sogo, te sela wabo kibu bede Genuai Bidigo Elaijabolo te tiwai po wai dao, “Nage pelama, te king Ahap sugi pao, te eno tulubage ma tagala palaibao,” wali.
1KI 18:2 Tialima, Elaija hogodama, palio.
1KI 18:3 Te tiali sogo, te Samaria dabe te nai mu meniama sǫą pai, tama king Ahapgo po ola toloyu, te Obadia aselama, aga suagasao po wai. Obadia aga te kingo bede tigidali doado bage tonalubo sę idualio. Obadiago te Genuai Bidi deliba naga lotu weyu, aga dologode bidai dao.
1KI 18:4 Tama te sogo te we kwin Jesebelgo te Genuai Bidigo po pusumainu tagala palali profet dabe ela mubo sę ebaso, Obadiago te profet dabe bidi sese a naga, 100 profet bidi dabe selama, augwali te genuai masigi ola be dedage tomoba geme dualali. Agai te bidi sese si olama, nogo si, 50 te gasa ola be dedageba dualiyu, te gasa bidi sese si olama, nogo si, 50 te gasa masigi ola beba geme dualiyu yai. Te agai augwali tonalu, te nai me wę mayu, iduai dao.
1KI 18:5 Obadia te Ahap pageba asobaso, te Ahapgo agabolo te tama po wali, “Da si te tigidali tǫ kantri dabeba pelama, te ulu ąį, me dwasianu ąį dabe polobadu elaluali madi susa bilaibao. Te pedai badu te nosai dabe elalubo suina homu ebao, te hos dabe me, donki dabego me tumainu homu ebao. Te nosai elalubaso da, teda dago te hos dabe me donki dabe eligobeo,” te po wali.
1KI 18:6 Tialima, augwali sigo te tǫ kantri pedai me badu pabo badu dąį ilali, te Ahap aga pelama, te nosai gegegi pabo madi, te me badu pedai badu te Obadia pabo madi tama tialio. Tialima, augwali si pai dao.
1KI 18:7 Te augwali sigo dąį ilali madi Obadia pali, tama Elaija aselama, aga dali te sunumide gesabidi si deliba ununani. Tama Obadiago aga sulama, konebaso, te aga gesabidi tǫba pǫgulama, te Elaijabolo genuai nogi mawai. Tama agabolo e tiwai hanalu walio, “Elaija, eno genuai bidi, te nage tama da, agawe?”
1KI 18:8 Tama Elaijago te tiwai po wei ponani, “Awe, ena Elaija dao. Nage ma peyu, te king Ahapbolo te tiwai po wao, Elaija asai dao,” wali.
1KI 18:9 Tama Obadiago agabolo te tiwai po wali, “Genuai bidi, eno mena dwai sę ebaso, te nago homugo te king Ahapgo ena ela mumainogo ebawe?
1KI 18:10 Te Sesemane Sogo Bidibo Godigo nogide, eno mu po tama obao, kingo nage ma suabo homu godolo ebao. Tama agai nage te tigidali tǫ kantride gegebo sę idubao. Te tǫ kantri pedai me deli tonalubo tuni bidi me deligo te po weyu, nage te agai tǫ kantride bidisiąbaso da, teda Ahapgo te tǫ kantri pedai tonalubo bidibolo po bomonama weyu, mu po ugwaba obao po weyu, te nage ede bidibeo po weyu, te po wabo dao.
1KI 18:11 Tialima, nago homugo ena pelama, te kingba nage ma asai da po wagi pomainu homu ebao. Eno te tiwai ebo hagela homu ebao.
1KI 18:12 Te eno nage taga pabo sogo, teyu te Genuai Bidigo Mobo Bidigo nage selasa, te eno konesiąwai bulu me deliba sela pidalio. Te king Ahapgo nage gegagasali nage susąbaso, te agai wado homu elama, te ena ela mueibao. Nago ena me tagala palogobeo. Menio. Nago ena homu dene yao, magi baso meni, sesemane sogo ena Genuai Bidi dologode bidiyu, te agaba lotu udali, te ena ogomanide gagalali, te megi e sogoba usu nagasalio.
1KI 18:13 Te kwin we Jesebelgo te Genuai Bidigo profet dabe ela muani sogo, eno te bidi sese a naga, 100 profet dabe te genuai masigi ola beba geme dualali. Eno te bidi sese si olama, nogogo si, 50 bidi te gasa ola beba geme dualali, te gasa bidi sese si me nogo si, 50 bidi dabe te gasa ola beba geme dualali. Te eno augwali tonalu, te nai mayu, wę mayu, yali. Eno te wiegi yai sę yali nago koneao,” te po wai.
1KI 18:14 “Tiali goli, nago homugo eno te kingba wagi pelama, te nage asai da po waibao. Te eno nago po wabo tiwai elama, te nosali kingo nage susąbaso da, teda agai ena ela mueibao,” Obadiago te po wali.
1KI 18:15 Tialima, Elaijago agabolo te tiwai po wai, “Nage wi elamuo. Ena te Tigidali Bomo Elalubo Genuai Bidigo sę bidi dao, te Sesemane Sogo Bidibo God dao. Te eno agai nogide po weyu, mu po tama obao, Ahapgo ena megi e side tama sueibao,” wali.
1KI 18:16 Tialima, Obadia pelama, te king Ahap gege pelama subaso, agai Ahapbolo te tiwai po weyu, te Elaija ma asalio po wai dao. Tama Ahap hogodasa pelama, te Elaija sugi pai dao.
1KI 18:17 Ahapgo aga sulama, te po wai, “Te megi da, eno nage sualio. Te sę yali page te nagede naga elalubaso, tama te tulubage tulisiąbaso, genuai sęgę Israelde elalubo dao,” wali.
1KI 18:18 Tama Elaijago Ahapgo poba wei ponoyu, te tiwai po wai, “Nago tibo po obao. Te sę yabo page eno menio. Te sę yabo page nago dali, te nago ayago hanide dali elalubao, magi baso meni, dagego te Genuai Bidigo po sela sąnama, te dagego tibo god Bal dabeba lotu oduai dao.
1KI 18:19 Tialima, megi da, nago te Israel we bidi tigidaliba po ola tolama, te augwaligo ena te Karmel bulu duba tede da gesabidi sisinaibao. Tama nago te tibo god Balgo profet dabe 450 me, te tibo god we Aserago profet dabe 400 me sesao,” wali, “te tigidali te kwin we Jesebelgo augwali tonalu nai ula maduai dao,” Elaijago te po wai.
1KI 18:20 Tialima, Ahapgo Israel we bidi tigidali i obadi, te profet tigidali me i walio, tama augwali pelama, te bulu du Karmelba sisinigi pai dao.
1KI 18:21 Tama Elaija te we bidi dabe augwali pąba doligi pelama, te tama tiwai po walio, “Dage homu si elalubo we bidi dabe da, mena sogo dagego homu deli naga elalueibawe? Genuai Bidi aga te God mu yaibaso da, teda dagego aga deliba naga lotu waiyąo. Bal te God mu yaibaso da, teda dagego aga deliba naga lotu wabo usu dao,” wali. Tialima, te we bidi augwaligo po me deli wei me ponobeo. Mu menio.
1KI 18:22 Tialima, Elaijago augwaliba te tiwai po wai, “Te Genuai Bidigo profet me deli me bidibeo. Ena deli naga bidibao. Tialima, te Balgo profet dabe 450 elalubao.
1KI 18:23 Tialima, eno homugo dagego te omai bulmakau si sesao. Tama eno homugo te Balgo profet dabego me deli somainao. Te augwaligo me ela munama, te peselama, te ofa yao. Tama augwaligo te god Balgo altaba te isi munama, tama te kibu mi dabe te isiba ugwadu muao. Tiali goli, te sia me nogonama, domainu me igio. Tama eno te gasa bulmakau me selama, te tiwai ofa yabo deli kolesaga tiwai yaibao. Te eno me isi me nogogobeo.
1KI 18:24 Tialima, dagego te duga godiba gedu haluasa po obadi, te eno ena Genuai Bidiba gedu haluasa po obadi yaibao. Tama mena godigo te gedu haluasa po odama, te isi tagala palama, te ofa nai ulubaso da, teda te naga te God mu da wabo dao,” Elaijago te po wai. Tigidali we bidigo te po odama, te augwaligo i te tiwai wali, “Te wiegi yai dao. Dago tama tiaibao,” wali.
1KI 18:25 Tialima, Elaijago Balgo profet dabeba te tiwai po wai, “Dage hauwa dao, tama dage polasa pao. Dagego te bulmakau me deli selama, te ofa yabo sisi ilao. Tiali goli, dagego isi me nogolamuo. Te dagego duga godiba gedu haluasa po weyu, te agai isi tagala palama, te ofa ulagasomainao,” wali.
1KI 18:26 Tialima, te profet bidi dabego te bulmakau sali, te we bidi dabego augwaliba sesai. Te augwaligo ofa yabo sisi ilalio. Tama augwaligo te god Balba gedu haluasa po wali, te kigamude gagalasa, te sia ge tomoba yagasobo te belo wabo siba usu nagasalio. Augwaligo gedu haluasa po weyu, i e tiwai wali, “Bal, dago homugo nago dago gedu haluasa po wabo odomainu obao,” wali. Tialima augwaligo te gedu haluasa po wali wei me ponobeo. Mu menio. Augwaligo tęąbi weyu, te bidi dabego nigali alta bobegelabo siyu, sasa mano bilali.
1KI 18:27 Tama te giliga tomo yagasobode, te belo wabo side, Elaijago augwaliba te tiwai posobo po wali, “Dage bomo kimi me igimio. Aga te god dao. Tama te bomo elama, gedu haluasa po wabo sę mu yao. Te agai gasa naiba me homu kone palidu, te agai dageba olo musąyu, ma aga toma nigi pali homu ebao. Ma, te meni baso da, te aga digibulu buluba pali homu yaibao. Ma, te aga godege pila mubowe homu me ebao, tama tibaso dagego aga hodoliąo,” wali.
1KI 18:28 Tialima, te profet dabego i hai bomonama mu weyu, te augwaligo hwą ge dabe me, pęwądage bainat me sobadi elama, te augwaligo augwa lotu wabo kolesaga wali peyu, augwa digi augwa tigi dabe tologwalio. Te kaneme augwa tigide dulai dao.
1KI 18:29 Te be pio mu yai madi tagalao, augwaligo te esela pai bidi dabego i wabo tiwai udubadi, te be pio te ofa yabo sogoba usu nigi palio. Tialima, te augwaligo gedu haluasa po wabode wei munu me ponosiąma, te magi nai me deli pedalubeo. Mu menio.
1KI 18:30 Tialima, Elaijago te we bidi augwaliba te tama po wali, “Dage ena pąba asiąo.” Tama tigidali sisinagaselama, aga bagua sagasali. Tialima, Elaijago te Genuai Bidigo alta ma dodolali, te bidi dabego polobadu aluali.
1KI 18:31 Agai te nogo si olama, sągągo si alta nigabo masigi sali. Te masigi dabego te dąį tiwai te Jekopgo ogwa dabe nogo si olama, sągągo me si hani dąį ilali tiwai yali, te Israel dabego wąį nǫų dabe dao. Polobadu Genuai Bidigo Jekopbolo te tiwai po wali, “Te we bidi augwaligo nago nogi Israel nogi yaibao.” Te po wai dao.
1KI 18:32 Tialima, Elaijago te masigi dabe selama, te Genuai Bidiba ofa yabo alta nigali. Agai te alta nigila silibo si da, teda agai te alta bagulubo ąį gamia nigali. Te ąį gamiade ąį pągąwani usu te nogo si olama, sągągo me si me si, te 14 lita usu nama dao.
1KI 18:33 Nosali Elaijago te alta daiba isi manama, te kibu bulmakau mi tologolama, te sia daiba ugwadu mananio.
1KI 18:34 Tama agai te we bidi augwaliba te tiwai po wali, “Te genuai sospen sene me si me si selama, te augwalide wę tulama, te ofa yabo kibu miba ugwadu me, te isiba me, gelao,” wali. Tialima, augwaligo te tama tialio. Tama agai augwalibolo te tama ma tiao wali. Augwaligo te tiwai ela silibo si da, te agai augwalibolo te po ma wali, “Deli sogo ma yao.” Tama augwaligo te tiwai yai dao.
1KI 18:35 Tama wę te alta sese badu dulama, te alta bagulama nigali ąį gamia pągąwai dao.
1KI 18:36 Tama te pio mu ebode te ofa ebo sogo, te Godigo po pusali bidi profet Elaija te alta pąba pelama, te gedu haluasa po te tama wali, “God, te Abraham, me Aisak, me Israel, te augwaligo Genuai Bidi, eno homugo nago te tiwai nago te we bidi dabeba megi ola momainu homu ebao, nage naga te Israelgo God dao. Tama me nago augwaliba te tiwai ola momainu ebao, ena nago sę bidi eno nago po naga wali pelama, eno te tigidali sę yai dao.
1KI 18:37 Genuai Bidi, eno buba hwi wabo po odama, te eno nagebolo hanalubo tiwai gilama yao, tama te we bidi dabe augwaligo konemainao, nage naga, naga te God mu, tama te nago augwali homu begelama, te nageba ma asomainu ebo dao,” tama wali.
1KI 18:38 Tialima, Genuai Bidigo isi aiyaba tagala palai. Tama isigo te ofa me, te isi me, te alta nigali masigi dabe me, te alta sesede elaluali tǫ me isigo dela silali. Tama te ąį gamiade elaluali ąį me tigidali sula selama, wa pai dao.
1KI 18:39 Te we bidi augwaligo te sulama da, teda augwa digi te tǫba pinilaluama, tama augwaligo te tiwai i hai wali, “Genuai Bidi naga aga God mu dao. Genuai Bidi naga aga God mu dao,” te po wai dao.
1KI 18:40 Tama Elaijago augwaliba te tama po wali, “Te god Balgo profet bidi dabe tigidali pageabi yao. Te me deli wi pomainu me sula tagaligio,” wali. Tama tialima, augwaligo te profet dabe pageabi elala pelama, tama Elaijago te profet dabe selama, te ąį Kison sesegeba dulama, te augwali ela muai dao.
1KI 18:41 Augwali te badu bidibadi, te Elaijago Ahapbolo te tama po wali, “Nage polo asesa pelama, nai tugi pao. Eno odali, te genuai tulubage u ola asida obao po walio,” wali.
1KI 18:42 Tialima, Ahap pelama, nai tugi pali. Te Elaija aga sę bidi dali te bulu du Karmelba ugwaba holali. Tama Elaija basi gulama, te aga tobolu te sągą kidu si tomoba pǫgulali.
1KI 18:43 Tama agai aga sę bidibolo te tiwai po wai, “Nage u badu pelama, te tamu ąįba tonaludugi pao,” wali. Tialima, te sę bidi pelama, tonaludugi pelama, ma asu, te tama po wali, “Eno magi nai deli me subeo.” Tama Elaijago te sę bidibolo te tama po wai, “Nage ma pelama, tonaludugi pao.” Te sę bidigo tama tiwai yalio. Elaijago te deli po naga udubadi, te a naga olama, me si sogo usu nani.
1KI 18:44 Te a naga olama, si wabo side, te sę bidi ma begasa asu, te tiwai po wali, “Eno suali, te dagalu pǫ me deli tamu ąįde pedelali. Te dwasianu naga, te bidigo nogo tiwai usu.” Tialima, Elaijago aga sę bidibolo te tiwai po wali, “Nage polo pelama, te king Ahapbolo walama, te aga karis sisi elama, te asesa polo aiyaba dulao. Tiyu, tulubagego aga pabo sina sabuo,” te po wai dao.
1KI 18:45 Te polo tama te haowa pedelama, te dagalu polo sesela sai. Te wali po tiwai pedelama, te genuai tulubage tulubo gagalali. Te Ahap aga karisba duagulama, te hanu Jesril sunumidu wali palio.
1KI 18:46 Tama Genuai Bidigo bomo Elaijaba pedelai. Te Elaija aga name ugwa bugagia dąų olama, te Ahapgo karis pabodu aga polasa uda yali. Aga te tiwai udada pidubadi, augwali si te Jesrilba sabolali.
1KI 19:1 King Ahap te Jesrilba sabolama da, teda agai aga we kwin Jesebelbolo, te Elaijago yali sę po tigidali pusali. Tama me agai te Elaijago te tibo god Balgo profet bidi tigidali ela muani po me walio.
1KI 19:2 Tama Jesebelgo Elaijaba te tiwai po ola tolai, “Te eno nage ela mueibao, te nago Balgo profet bidi dabe ela muani tiwai nage ela mueibao. Do megi e tiwai sogo usu nagasobo side, te nage isaibao. Te eno te tiwai me isąbaso, eno homugo te god dabego ena digi ela mumainao,” wali.
1KI 19:3 Elaijago te po odama, te aga wi elama, wi palio. Agai aga sę bidi selama, augwali si pelama, te Berseba te Juda tǫ kantri buluba saboligi pai. Elaijago aga sę bidi te bulude bididubadi taga pelama,
1KI 19:4 te agaduba digi te tǫ wa pai bulude bilidubadi, te deli sogo bubugaba usu nai. Te aga ni me deli elalubo madi pedelama, te ni dologode dugulaluyu, gedu haluasa po te tiwai wali, “Genuai Bidi, enaba te pedelali sęgę dabede ena usu yalio. Te megi eno homugo nago ena isimainu sula tagalao, magi baso meni, ena wiegi yai bidi me elalubeo. Menio. Ena te ena wąį nǫų dabe tiwai gagawai dao,” wali.
1KI 19:5 Agai te gedu haluasa po wali silibo si da, teda aga gedu sęgę ebaso, aga te ni dologode godege piali. Tama polo mu tama, te mobo bidi ensel me deli asu, aga tigiba dią yagaselama, te hodoliyu, te tama po wai, “Nage hodaluama, nai tugulao,” wali.
1KI 19:6 Tialima, Elaijago gedu peda sanama, tonono bilibadi, te aga tobolu badu pąde agai te bret me deli augwaligo masigide ulai munalubo suali, te wę sospen me suali. Tialima, agai te nai me wę tulama, nosali te aga godege ma pialio.
1KI 19:7 Nosali te Genuai Bidigo mobo bidi ensel aselama, te aga ma hodolagasu, agabolo te tiwai po wali, “Nage hodaluama, nai tugulao. Te meni baso, nage te bobobage sunumidu pobaso usu egobe dao,” wali.
1KI 19:8 Tialima, Elaija hodaluama, te nai me wę ma tuali. Te naigo aga tigi dili ilama, te aga pidubadi, te giligade me hulide usu nama te bidi sese si, 40 dei wabo sogoba usu nai. Tama nosali aga te bulu du Horep ma Sainaiba sabolai, te Godigo bulu du dao.
1KI 19:9 Te hulide Elaija te masigi ola be me deli tomoba pelama, piai. Elaija te masigi ola be tomode bidibadi, te Genuai Bidigo agabolo te tiwai po hanalu wai, “Elaija, nage magi baso ede bidibawe?” te po wai.
1KI 19:10 Te Elaijago te tama po wai, “Genuai Bidi, Tigidali Bomo Elalubo God dao, eno te Israel we bidi tigidaligo nage deli naga wali pomainogo ebo sę bomo ebao. Tiali goli, augwaligo nage tudiba muyu, tama te nago augwali dali dąų wali bomai po kontrak bolali. Te augwaligo nago alta dabe aluama, te nago po pusubo profet bidi tigidali ela muani. Te enaduba deli naga bidibao, te megi augwaligo ena me ela mumainu ebo dao,” wali.
1KI 19:11 Tialima, Genuai Bidigo agabolo te po wali, “Nage te buluba eda teda solama, te eno gesabidide bulu duba doligi soao. Magi baso meni, ena te bulu du pąba aselama paibao,” wali. Tialima, bomai wali me deli asama, te Genuai Bidigo bomode, te waligo te bulu du dabe masigi me pepeda sąwai. Tiali goli, Genuai Bidi aga digi te walide me bidisiąwai. Tialima, wali silama, te tǫ mali pedelali, tiali goli Genuai Bidi te mali ebo tomode me bidibeo.
1KI 19:12 Te mali elama, nosali te sia pedelali. Tiali goli, Genuai Bidi te sia tomode bidibeo. Te isi pedelali tudi badu, Elaijago odali, te bidigo dua digi mu po mibo posolu wabo tiwai odalio.
1KI 19:13 Elaijago te tebo odolama da, tialima aga bobobage gudali ugwago aga gesabi dali halua selama, te aga masigi ola bede bidali tagalama, te masigi dedage pąba dolagasali. Tama agai po me deli te tiwai odali, “Elaija, magi baso nage ede bidibawe?” te po wali.
1KI 19:14 Tama Elaijago po e tiwai wei ponani, “God, Tigidali Bomo Elalubo Genuai Bidi, eno te Israel we bidi tigidali nage deliba naga wali pomainu ebo sę bomo ebao. Tiali goli, augwaligo nage tudiba munama, te nago augwali dali dąų wali bomai po bolalio. Te augwaligo nago alta dabe aluama doliyu, te nago po pusubo profet bidi dabe tigidali ela muani. Tama enaduba deli naga bidibao. Te megi augwaligo ena me ela mueinu ebo dao,” tama wali.
1KI 19:15 Tialima, Genuai Bidigo agabolo te tama po wali, “Nago te naga sunumi wali pelama, tama pidubadi, te tǫ wa pai bulu te Damaskus hanu pąba sabolao. Te nosali nage te taun tomoba pelama, te Hasael sulama, te nago aga toboluba te wel ąį gelao, aga te Siria king bidi pedalumainogo dąį tama ilao.
1KI 19:16 Tama nago te Jehu me dąį ilao, te Nimsigo hani, te Israel king pedalumainao. Tama nago te Elisa me dąį ilao, te Safatgo ogwa, te taun Abel Mehola bidi da, te nage bidali pesage selama, te eno po pusabo profet bidi pedalumainogo yao.
1KI 19:17 Te Hasael king bididubadi, agai te we bidi hauwa ela mueibao. Te meba agade wi pobaso da, teda Jehugo augwali ela mueibao. Te Jehude meba wi sobaso da, teda Elisago augwali ela mueibao.
1KI 19:18 Tiali goli, te eno bidi sese umabo, 7,000 we bidi, te Israelde bidimainu hageai dao. Te augwali enaba naga wali pabo we bidi da, te augwaligo te tibo god Balba kidu sugunisąma, te agai piksa noma dabeba nono nisąma, te agaba lotu po me wasiąyani we bidi dao,” Genuai Bidigo te po wai.
1KI 19:19 Elaijago Genuai Bidigo po odola silibo si, teda agai te Sainai taga soyu, te Israelgo tǫba ma soalio. Tama agai Elisa suali, te Safatgo ogwa, aga te nogo si olama, sągągo deli gasa bidi dali te gide sę iduai. Augwaligo te bulmakaugo te tǫ elibo nai kegasa bilibo sę ebo tonalubo sę yai. Te nogo si olama, sągągo deli bidi dabe te augwa bulmakau dali polasa pobadi, te Elisa aga bulmakau si dali nosali asali. Tialima, Elaija te Elisa pageba pelama, te aga gudaluali tigidu aiyaba tagalaluali bobage ugwa saket dilama, te Elisaba gudulalio.
1KI 19:20 Te tama tilama, Elaija aga pobaso, te Elisa aga sę iduali tagalama, te Elaija pabo wali udulama, te agabolo te tama po wali, “Te ena ma begasa ma pelama, te eno aya idabolo dage tao po wagi pelama, te ena ma asobaso usu dawe?” Te Elaijago agabolo te tiwai po wali, “Te usu da, nage pao. Eno nage me paligobeo,” wali.
1KI 19:21 Tialima, Elisa ma begasa palio. Tama agai te aga bulmakau dabe elali. Agai te bulmakaude kęnani ni name dabe te bulmakau mi dabe ulabo isi dabe sali. Tama agai te we bidi augwaliba menama, te augwa tualio. Agai tama tila silama da, teda aga te Elaija wali pelama, te agai sę bidi pedelai dao.
1KI 20:1 Te Benhadat, te Siria king bidi, te aga ami bidi soldia dabe tigidali sisinama, te Israel dabeba boi hwįgi painogo sisi ilali. Tama te bidi sese deli olama, nogo si olama si, 32 gasa king bidi te augwa hos hani dabe me, te boi hwįbode kegasa pabo karis me selama, te aga tau sagasainu yalio. Tialima, tigidali pelama, te Samaria taun bagua sigi pelama, te Israel dabeba boi hwįainu elalualio.
1KI 20:2 King Ahap te Samariade bidibadi, te Benhadatgo te bidi dabe tagala palama,
1KI 20:3 te Ahapbolo te tiwai po wagi pomainogo yai, “Nago te tigidali silva me, gol me, te nago wiegi yai we dabe me, wai dabe me, enabolo mao,” te po wai dao.
1KI 20:4 Tama king Ahapgo e tama po te Benhadatbolo ola tolali, “King Benhadat, eno genuai bidi da, te eno nago wali po tiwai gilama yaibao. Ena me, eno doado bage tigidali, te tigidali naga nai naga dao,” te po wai.
1KI 20:5 Nosali Benhadatgo te bidi dabe te Ahapba ma tagala palama, te po agabolo wagi pomainu yali, “Hasia bolo eno nagebolo weyu, te nago silva dabe, me gol, te nago we wai dabe, augwali ena mao po wai dao.
1KI 20:6 Tialima, megi eno homugo te eno ami ofisa dabe nago beba me, te nago ofisa dabego beba tagala palaibao. Tama augwaligo te nago homugo godolo ebo nai dabe gegelama subaso da, bomonama saibao. Do tama augwali nageba asaibao, te megi e sogo tobage side asaibao,” te po ola tolali.
1KI 20:7 King Ahapgo te po odobo si da, teda agai te tigidali Israel tobolu bidi dabe i olama, augwali sisinagasobaso, te agai augwalibolo te tiwai po walio, “Hasia bolo te bidigo enabolo weyu, eno agabolo te eno we dabe sibi me, wai me, te eno silva me, gol dabe, te mao po wai. Tama eno agai te wali pode usu da po wai. Tialima, megi agai po hasegelai, tama te tiwai dabolo ola mawai, te agai da dolaiongo wabo po tiwai yali dao,” wali.
1KI 20:8 Tama te tobolu bidi dabego, me te tigidali we bidigo Ahapbolo te tiwai po walio, “Nago agai te po munu me wali pelamuo. Nago te kolesaga me elamu dao,” wali.
1KI 20:9 Tialima, Ahapgo te Benhadatgo bidi dabebolo te tiwai po wali, “Dage pelama, te king Benhadatbolo te tama po waligi pao, eno agai te hasia wali pode usu da wali, tiali goli agai te namba 2 wali pode eno usu da munu me wagobeo. Mu menio,” wali.
1KI 20:10 Tialima, Benhadatgo augwali ma tagala palama, te gasa po Ahapbolo wagasomainogo yali, “Megi da, eno ami bidi umabo mu seselama, nago te taun dolagasomainu yaibao. Augwaligo te tigidali doado bage dolama, te olo nai pobele bage tiwai mu pedelaibao. Eno te tiwai isąbaso da, teda ena te ena god dabego ela mumainu emainao,” te po ola tolali.
1KI 20:11 Tialima, Ahapgo te bidi dabeba te po ma wai, “Dage pelama, Benhadatba te tama po wagi pao. Ami bidi mugo, agai te genuai po dagą me pemene ebo te bainat hwą aga bede bulalubo sogo me tegobeo. Menio. Agai te boi bidi dali hasia bolo hwįnama, te aiyaba elalubaso, te nosali naga aga pemene ebo usu dao,” Ahapgo te po ola tolali.
1KI 20:12 King Benhadat dali, te gasa king dabe me, augwali te taun Sukotde bidaluyu, te bomai wę tubo sę idu bidali. Tama te Ahapgo po sela asobo bidi agaba asali. Agai te po wali odama, te aga ami soldia bidi dabeba waliyu, te augwali Samariaba pelama, boi hwįgi pao wali. Tialima, augwali te Sukot taun tagalama, palio.
1KI 20:13 Te sogode te profet me deli te king Ahapba pelama, agabolo te tama po walali, “Genuai Bidi Godigo te tiwai po wai, ‘Te Benhadatgo genuai ami soldia hani suao. Megi da, eno te nago augwali aiyaba elalumainu sula tagalaibao. Te nago koneama, ena digi ena Genuai Bidi da wao.’ Genuai Bidigo te po wai,” te profet bidigo wali.
1KI 20:14 Tialima, Ahapgo profetba te tiwai hanalu wali, “Dego augwaliba hwįnama, te augwali aiyaba elalueibawe?” Tama profetgo Ahapbolo te tiwai po wali, “Genuai Bidigo te po wai, te gesi ogwa bidi ami soldia dabe, te tǫ pedai distrikde bidibo tobolu bidi dabe bidibo, te hani dabe augwaligo te augwali aiyaba elalueibao,” wali. Te king agaba ma hanalu wali, “Te dego mu augwalibolo hwįgi pao obaso, te augwaligo hwįgi paibawe?” Te profetgo tama po wali, “Nage tama dao.”
1KI 20:15 Tialima, kingo te gesi ogwa bidi ami soldia i olama, sisinagasomainogo yali. Te augwaligo namba te 232 usu da. Tama nosali agai te gasa Israel ami tigidali sisinagasomainu i wai. Te augwaligo namba te bidi sese umabo mu, te 7,000 bidi dabe dao.
1KI 20:16 Te giliga tomo yagasu, te belo wabo side, augwa te taun tagalama, te boi hwįainu pali. Te sogo Benhadat dali, te gasa 32 king dabe dali, te Sukotde bidaluyu, te bomai wain ąį tulama, te gęǫ page sę ebo gagalalio.
1KI 20:17 Benhadatgo te aga ami soldia dabe tagala palama, te Israel ami dabe asobo tonalugi pomainu yali, tama augwaligo te Israel ami bidi dabe aselabo suai. Te augwali ma pelama, te tiwai po te Benhadatbolo wagi pali, “Bidi meba te Samaria tagalama, asobao,” po wali.
1KI 20:18 Tialima, Benhadatgo aga ami bidi dabeba te tiwai po wai, “Dage pelama, augwali pageabi igi pao, te augwali boi hwįainu asai baso, ma te boi hwįbo hagela ebo po wagasai baso me, te tagalao. Tialima, dagego augwali me ela munamo dao,” wali.
1KI 20:19 Te Israel gesi ogwa bidi ami bidi dabe polasa pobadi, te tigidali gasa ami soldia bidi dabe augwali wali pali, tama augwa te Siria dabe dali hwįgi pai dao.
1KI 20:20 Te hwįbo gagalali sogo, te Israel ami dabego bugagia mu hwįnama, tama augwaliba boi hwįagasali Siria dabe tigidali ela silali. Tialima, te gasa Siria dabe wi pobaso, te Israel dabego augwali pobeali. Tiali goli, Benhadat te hosde dugulama wi peyu, tama te hosde dugulasa boi hwįani ami bidi dabe dali wi palio.
1KI 20:21 Te king Ahap dali, te meba ami dabe dali, augwa te Samaria tagalama, te Siria ami dabe te hosde me karisde dualasa wi pali ami dabe dali hwįgi pali. Tama augwaligo te Siria dabe hauwa mu ela munama, augwali aiyaba mu elaluai dao.
1KI 20:22 Te nosali te profet bidi te king Ahapba pelama, agabolo te po ma wali, “Nage ma begasa solama, te naga ami bidi dabe ma dąų walama, te nago mena kolesagago te Siria ami dabe dali hwįabo te bugagia homu kone palao. Magi baso meni, te Siria kingo dageba te nosali kibu bede ma hwįagasaibao,” te po wai dao.
1KI 20:23 Te hasia hwįani side nosali badu, te king Benhadatgo ami ofisa dabego agabolo te tiwai po wai, “Te Israel dabego god te bulu dude bidibo god da, tialima dago te bulu dude hwįani sogo, te god dabego Israel dabe tau selama, te augwaligo da aiyaba elaluai. Tialima, dago augwali dali te odogo bulude hwįbaso da, teda dago augwali aiyaba elalueibao,” wai dao.
1KI 20:24 “Tama me nago te king dabe sela sąwaibao, te augwaligo nago ami bidi dabe munu ma tonalugobeo, te nago te ami bidi soldia dabe tonalumainu yabo ofisa bidi dabe muagameo.
1KI 20:25 Te me nago ami soldia pedelabo bidi hauwa sao, te nago ami bidi hani te genuai pedelama, te polobadu tiwai yaibao. Te me nago te hwįabo hos, me karis hauwa sao, te dolali hos me karis dabe augwaligo pesage hasegelaibao. Tama dago te Israel dabe dali te doloba pai odogo bulude hwįgi pelama, te dago augwali aiyaba elalueibao,” augwaligo te po wai. King Benhadatgo augwaligo te wabo po odama, tama agai augwaligo wali po tiwai gilama yai dao.
1KI 20:26 Te nosali kibu bede agai te aga ami bidi dabe selama, augwali te Afek taunba pelama, te Israel dabe augwali dali hwįgi pai.
1KI 20:27 Tialima, te Israel kingo aga ami bidi dabe sisinagasomainu i olama, te augwa hwįabo doado bage sisi ilali. Tama augwali pelama, te Siria dabe bidibo pesage pąba pali, te Israel dabego bidabo pesage si badu nigai. Te Israel hani dabe dwasianu mu elaluali, te meme hani si tiwai elaluai. Tiali goli, te Siria ami te umabo mu, te tigidali pedai badu usu nama bidada pai dao.
1KI 20:28 Tialima, te profet te king Ahap bidibo madiba ma pelama, agabolo te tiwai po wai, “Genuai Bidigo te tama po walio, ‘Te Siria dabego ena te bulu dude bidibo God da tiwai po obao, tama ena te odogo bulude God meni da po wai. Tama tialima, eno dagego te augwaligo genuai ami bidi dabe aiyaba elalubo si da, teda dage Israelgo koneagameo, ena digi ena Genuai Bidi dao, dagego te tama po waibao,’ God Genuai Bidigo te po wai,” profet bidigo te po wali.
1KI 20:29 Te Siria dabe me Israel dabe augwali te augwa kem nigali pesagede naga te a naga me deli wabo si usu bidali, tama te a naga si wabo side augwa te hwįbo gagalali. Te side digi tama te Israel dabego te Siria ami bidi dabe te bidi sese umabo mu, te 100,000 bidi ela muai dao.
1KI 20:30 Tama te Siria gasa ami bidi dabe te taun Afek tomoba wi pai. Tama te taun bagulali genuai masigigo nigali obo aluasa dulu, te augwali mesega sigulama, te bidi sese umabo bidi, te 27,000 bidi te tiwai isai dao. Benhadat me wi pali, te taun tomoba pelama, te be me deli dąį habuba geme duala sigi pali.
1KI 20:31 Tama aga ami polalubo tobolu bidi ofisa dabego aga sugi pelama, agaba te tiwai po walio, “Dago odali, te Israel king dabego te olo mu tau sabo kolesaga ebo bidi dabe dao wali. Tama tialima, dago homugo te homu dene ebo ola mabo ugwa gudulama, te dago magede baklain bono bagulama, te Israel kingba paibao. Dago te tama tebo usu egowe, ma meniwe? Dago te tiwai ebaso da, te agai nageba te olo tau sabo homu kolesaga elama, te nage sula gogola tagalu, te nage me ela mugobe, te homu ebo dao,” augwaligo te po wai.
1KI 20:32 Benhadatgo te augwaligo hanalu wali pode usu da obaso, tama augwaligo te homu dene ebo ola mabo ugwa gudama, te bono baklain augwa magede bagulai. Tama augwali te Ahapba pelama, te agabolo te tama po wai, “Te nago sę bidi Benhadatgo homugo te nago aga homu dene elama, te nago aga munu me ela mugio,” wali. Te Ahapgo augwaliba te tiwai po wai, “Aga bidiba, agawe? Wiegi yai dao. Aga eno ama tiwai dao,” wali.
1KI 20:33 Te Benhadatgo ofisa dabego Ahapgo te po wabo sogo olo mubadi, tama augwaligo te tiwai po odali sogo, “ama da,” obaso da, teda augwaligo koneai, augwaligo yainu homu yali sę te pedalubo usu yaibao wali. Tama tialima, polo tama te “ama dao” wabo po selama, te augwaligo te tama po wali, “Mu tamao, Benhadat te nago ama da.” Te Ahapgo augwaliba te po walali, “Aga enaba odasa asao.” Tialima, augwali pelama, Benhadatbolo wagi pobaso aga te Ahapba palio. Tama Ahapgo Benhadatbolo waliyu, te nage aga karisba duagulao po wai dao.
1KI 20:34 Te Benhadatgo Ahapbolo te tama po wali, “Te polobadu eno ayago nago aya dali boi hwįnama, te sali taun tigidali nagebolo eno wei ponaibao. Te me te tobage bisnis dabe nago te Damaskusde yagameo, te polobadu eno ayago te Samaria taunde yali tiwai,” wali. Te Ahapgo agabolo te tama po wali, “Te nago tama tiabo homu ebaso da, teda eno nage pomainogo sula tagalaibao,” wali. Tama Ahapgo te Benhadat dali te bomai po kontrak me deli dąų walama, tama Benhadat pomainogo yai dao.
1KI 20:35 Benhadat pai digi da, teda Genuai Bidigo te profet hani dabede te profet me deli homu hodolali, tama te profetgo gasa profetba te tiwai po walali, “Eno homugo nago ena ela homu ebao.” Tiali goli, te gasa profetgo hagela homu yalio.
1KI 20:36 Tama te profetgo gasa profetba te tiwai po wali, “Eno nageba te mani po, te Genuai Bidigo digi wali po. Tialima, nago te Genuai Bidigo po sela sąwai, te nago ena tagalama pabo sogo da, teda te bomai hasa laion me deligo nage ela mueibao,” wali. Tama te gasa profet pabo si da, te laion me deli pedelama, te aga ela muai dao.
1KI 20:37 Tialima, nosali te profet te gasa bidiba pelama, agabolo te tiwai po wali, “Eno homugo nago ena elimainu homu ebao.” Tialima, te bidigo te profet bomonama umagia mu elalima, te profet bidigo tigi selali.
1KI 20:38 Te profet aga digi aga gesabidi te name ugwago halua sali, te bidi dabego aga te profet da waidali weyu, te tama tiali. Tama aga pelama, te sunumi pąde dolalu, te king Ahap asobo tonaluai dao.
1KI 20:39 Te king sabalubo si da, profetgo te tiwai i wali, “King, odao. Ena te boi hwįbode bidai, tama dago ami bidi me deligo te boi bidi me deli enaba odasa aselama, tagalagasu, agai te tiwai po ena dali wali, ‘Te bidi bugagia tonaluao,’ po wai. ‘Te aga wi pali da, teda eno nage ela mueibao. Ma nage elisąyu da, teda nago mone bidi sese umabo mu, te 30,000 kina silvago te kot abelaibao.’ Te ami bidigo te tama po ena dali olama, aga palio.
1KI 20:40 Tialima, king, eno te gasa sę hauwa eyu, eno te boi bidi bugagia tonalusiąwai, te aga wi palio,” wali. Tialima, kingo agabolo te tama po wai, “Naga digi naga po tų ilalio. Tama te nageba magi sę pedelaibao, te nage koneani dao.”
1KI 20:41 Kingo po ola silibo si da, te polo mu tama, te profetgo aga gesabidi halualuali nami ugwa pedai dagala sąnama, te aga gesabidi sumainu ilali, tama kingo sulama koneai, aga te profet bidi gesabidi suai dao.
1KI 20:42 Tama profetgo kingba te tiwai po wai, “Genuai Bidigo te tama po walio, ‘Ena Genuai Bidi, eno te po wai dao, te dage boi hwįbo sogo, dagego te boi bidi tigidali mu ela muao. Tiali goli, nago te Benhadat sula tagalama pomainu yali, tama nago aga ami bidi dabe wi pomainu sula tagalai. Tama tibaso, nage isibogo te Benhadatgo pesage nago hasegelaibao, te nago ami bidi dabe me isibogo te agai ami bidi dabego pesage hasegelaibao,’” te po wai dao.
1KI 20:43 Kingo te po oda silama da, teda aga wado homu elama, te haliga sębę dwai mu elama, tama ma aga begasa peyu, te aga bulu Samariaba pai dao.
1KI 21:1 Te Nabot te taun Jesril bidi me deli da, tama agai wain gi te king Ahapgo genuai be pąde te Jesril taunde elaluali. Tama nosali te Siria dabego genuai boi hwįagasali side,
1KI 21:2 Ahapgo Nabotbolo te tiwai po wali, “Nago wain gi eno be pagede elalubao. Tama tialima, eno homugo nago ena menama, te eno te tǫde keba gi bulabo homu ebao. Te nago enaba mobaso da, teda eno nageba te gasa wain gi mayu, te wain gigo nago gi aiyaba elalubo tiwai yaibao. Ma, nago mone sabo homu wei ebaso da, eno te gi te genuai monego abelaibao,” wali.
1KI 21:3 Tialima, Nabotgo kingba te tiwai po wai, “Polobadu digi te tǫ pedai te eno wąį nǫų hani dabego tǫ elaluama, te megi me eno tonalubao. Tialima, te Genuai Bidigo nogide, eno nageba me magobeo,” wali.
1KI 21:4 Ahapgo Nabotgo te wali po odama, te aga wado homu elama, haliga sębę me dwai yali. Tama aga be elalubo madi Samariaba pelama, te betba pigi palima, te gesabidi be dagaba begaluai. Te aga nai tubo gisilai dao.
1KI 21:5 Nosali aga we Jesebelgo aga sugi pelama, agabolo te tiwai po hanalu wali, “Magi baso nago haliga sębę dwai elama, nai tubewe?” wali.
1KI 21:6 Tama agai Jesebelbolo te tama po wai, “Nabot, te Jesril bulu bidigo, eno po odisąwai. Eno agabolo po waliyu, te eno agai wain gi abelabo homu yai. Ma, agai te mone sabo homu wei isąbaso, eno agaba te gasa wain gi maiabo homu yai. Tiali goli, agai enabolo maiabo homu me ebeo,” wali.
1KI 21:7 Tama Jesebelgo agabolo te tiwai po wali, “De mu te Israel tǫ kantri king bidi da, nage, ma gasa bidi dawe? Moni homu igio, tagalao. Hogodama, nai tugulao. Eno te Nabotgo wain gi selama, nageba mawaibao,” wali.
1KI 21:8 Tialima, Jesebelgo te pas dabe asęnama, te Ahapgo nogi me dąį te ugwadu te pas daide muani. Tama agai te Jesril taun tobolu bidi dabeba, me te genuai bidi dabe augwaliba tolai dao.
1KI 21:9 Te pas dabede asęani po te tama tiwai elaluali, “Dagego te nai tusiąma, habu selabo sogo me dąį ilao. Te side, dagego te taun Jesril we bidi dabe sisinagasao olama, i wao. Tama te sisinibo side, Nabot te hasia te polali siade dugamainu ilao,” wali.
1KI 21:10 “Tama te dwai bidi si aga pąde dugamainu ilao, tama te bidi sigo agaba te tiwai po kisilama omainu ilao, ‘Nabot, nago dwai po te Godiba me kingba wali.’ Te tama po Nabotba kisilama po walama, Nabot te taun buluba sela solama, te agaba masigi sąnama, te aga ela muao,” te po te pasde wai dao.
1KI 21:11 Te Jesril taun tobolu bidi dabe, me genuai bidi dabe, augwaligo te pas sabo si da, teda augwaligo te Jesebelgo po wali pelama,
1KI 21:12 tama augwa te nai me sogo deli gisilabo sogo dąį ilai. Tama augwa te we bidi dabe i olama, sisinagasali. Tama augwaligo Nabot te polalubo sia saide dugamainu ilali.
1KI 21:13 Tialima, te dwai bidi si Nabot pąba dolo si dugayagasali, te we bidi dabego gedude augwali sigo tibo po kisilama, Nabotba te tiwai po wali, “Nabotgo te dwai posobo po te Godiba me kingba walio,” wali. Te we bidi augwaligo te wabo po odolama, tama augwaligo Nabot te bedu taun buluba sela solama, te augwaligo agaba masigi sąnama, aga ela muai dao.
1KI 21:14 Nosali augwaligo Jesebelba te tiwai po tagala palali, “Dago Nabot te masigigo ela munama isalio,” te po ola tolali.
1KI 21:15 Jesebelgo te po odama, te polo tama Ahapbolo te tiwai po wagi pali, “Nabot aga me bidibeo. Aga isai dao. Tialima, nage pelama, te agai te wain gi sigi pao, polobadu agai nageba mabo hagela homu yai dao,” wali.
1KI 21:16 Ahapgo te po odobo si da, teda aga hogodasa pelama, te wain gi sigi pai dao.
1KI 21:17 Tama te sogo Genuai Bidigo te profet bidi Elaijabolo te po wali, te taun Tisbe bidibolo te tama po wai,
1KI 21:18 “Nage hogodasa pelama, te Israel king Ahapbolo te tama po wagi pao. Megi aga te Samaria tagalama, te Nabotgo wain gide bidibao. Agai te gi sąį hagede ebo dao.
1KI 21:19 Nago agabolo te tama po walao, ‘Ena Genuai Bidi, eno te po obao, nago te bidi ela munama, megi da nago agai wain gi me sainogo eba, agawe? Tialima, eno te tiwai po dolo nageba obao, te yowigo Nabotgo kaneme tuali pesagede, te nago kaneme me augwaligo tede tueibao,’ te po agabolo pusao,” Genuai Bidigo te po wali.
1KI 21:20 Elaijago Genuai Bidigo po odama, aga te Ahap bidibo madiba pali. Tama Ahapgo te Elaija subo sogo, aga te tama po wali, “Eno boi bidi, nage enaba ma pedaluba, agawe?” Tama Elaijago te tama po wei ponani, “Awe, eno nage suagasali, magi baso meni, nago godolo ebo homu, me te homu kolesaga tigidali bomo elama, te Genuai Bidigo gedude dwai kolesaga nago ebo dao.
1KI 21:21 Tialima, Genuai Bidigo nagede te po elalubao, ‘Ena Genuai Bidi, te eno nage dolaibao. Te eno nage te Israel hanide pedalubo bidi tigidali silimainogo yaibao, te augwali gesi ogwa bidi yaibaso, ma te gegunai bidi dabe me, tagalao, te mu silaibao.
1KI 21:22 Nago te we bidi augwali dwai sę eboba kegebaso, tama nago te tebo kolesagago ena haliga sębę ilibao. Tama tialima, eno te deli tigi poai kolesaga te nago deli hani sibiba yaibao, eno te king Jeroboamgo deli hani sibiba yali sę tiwai yaibao, te Nebatgo ogwa da, te king Basago deli hani sibiba me te tiwai yali, te Ahiyago ogwa dao,’ wali.
1KI 21:23 Te Genuai Bidigo po te nago we Jesebelde me elaluali. Agai te tama po wai, ‘Te Jesebel isibo si da, te yowi dabego agai tigi te Jesril obo banis pąde tueibao,’ Genuai Bidigo te po wai dao.
1KI 21:24 Te Ahap, nago hani sibi bidi meba te taun tomode isibaso da, teda yowi dabego augwaligo tigi tueibao. Te me badu taun bulu badu isai baso da, teda te ba kemodagego augwa tigi tueibao,” Elaijago Ahapbolo te po pusali.
1KI 21:25 Mu tamao, te Ahap king bidali sogo, te agai homugo me koneani kolesaga tigidali te Genuai Bidigo gedude dwai sę yabo kolesaga bomo elaluali. Polobadu bidi me deligo te tiwai kolesaga me ebeo. Aga we Jesebelgo naga, te aga homu begelibo po obaso, te dwai kolesaga yali dao.
1KI 21:26 Ahapgo te tibo god dabeba lotu weyu, tama agai te Amor dabego kugumini yai kolesaga dabe wali pali, te augwali te tǫde polobadu bidali we bidi dabe da. Tialima, Genuai Bidigo augwali ela gudulama, tama te tǫ Israel dabe augwaliba mawai dao.
1KI 21:27 Ahapgo te Elaijago po odali sogo da, teda aga homu dwai dene mu yalio. Agai aga ugwa pisilama, te homu dene ola mabo ugwa gudalio. Tama aga nai tubo habu selali. Tama aga hulide me te homu dene ola mabo ugwa dali piali. Aga moni homu hauwa mu elama, te aga homu pemene dali sę me ebeo.
1KI 21:28 Tialima, Genuai Bidigo te profet Elaijabolo te tiwai po walali,
1KI 21:29 “Megi da, te Ahap aga digi eno gedude aiyaba elaluali. Nago agai te tebo kolesaga sualiwe, ma meniwe? Agai te tiwai kolesaga ebaso, tama eno agai hani sibi dabeba te dwai dene mabo sę te aga bidibo sogo me egobeo. Menio. Eno agai hani sibi dolabo sę te aga ogwa king bidibo sogode te tama sę yaibao,” te po wai.
1KI 22:1 Te Israel me Siria te tǫ pedai kantri si munu ma boi hwįsąbadi, te bugagia mu bidada pali, te kibu be si yai dao.
1KI 22:2 Te sela wabo kibu bede, Jehosafat, te Juda king, aga pelama, te Israel king Ahap sugi palio.
1KI 22:3 Tama Ahapgo te Israel ami polalubo ofisa bidi dabe augwaliba te tama po wali, “Dagego koneani, te Gileat tǫ pedaide te Ramot taun te dago taun elaluai, tiali goli te Siria dabego sali. Te magi baso dago dena te taun te Siria dabe kingo nogode ma sabo sę me deli ebe dawe?” wali.
1KI 22:4 Tama Jehosafat sabolama, tama Ahapgo agabolo te tiwai po wali, “Eno te taun Ramot ma sainu boi hwįgi pabo homu ebao. Nage ena dali asobaso usu dawe, ma meniwe?” Tama Jehosafatgo te tiwai po wei ponani, “Ena nago homu wali asabo dola sai naga elalubao. Te eno ami bidi dabe, me te hos dabe dola selama, te nage tau sabo homu naga elalubao.
1KI 22:5 Tialima, hasia bolo dago te yainu ebo sęde Genuai Bidigo homude mena tiwai ebo dago koneainogo inao,” wali.
1KI 22:6 Tialima, Ahapgo te profet bidi dabe asomainu i wali. Te bidi sese nogo si sągą si, te 400 profet bidi dabe sabalubaso, te Ahapgo augwaliba te tiwai po hanalu wali, “Eno te Ramot taun ma sainu boi hwįgi pobaso usu yaibawe, ma meniwe?” Te augwaligo te tiwai po wei ponani, “Te usu da, nage pagameo. Genuai Bidigo nage tau sobaso, te nago augwali aiyaba elalueibao,” wali.
1KI 22:7 Tiali goli, Jehosafatgo Ahapbolo te tiwai hanalu wali, “Te Genuai Bidigo geme dualali po pusubo profet bidi me deli elalubawe, ma meniwe? Te bidibaso da, te Genuai Bidigo mena homu elalubo dago koneainu, agaba hanalu wainao,” wali.
1KI 22:8 Tama Ahapgo agaba te tama po wai, “Te profet me deli bidibao, aga nogi Mikaia, te Imlago ogwa da. Tiali goli, eno te bidi godolo homu me isąwai, magi baso meni, agai te wiegi yai profet po enabolo me pususąbaso. Sesemane sogo agai te dwai sę naga enaba pedelabo po wabo dao,” wali. Tialima, Jehosafatgo te po agaba wali, “Nago te tobage po me olamuo.”
1KI 22:9 Tialima, Ahapgo aga ofisa bidi me deli i olama, asobo si agabolo te tama po walali, “Nage polo tama pelama, te Mikaia, Imlago ogwa, odasa asao,” te po wai.
1KI 22:10 King Ahap de king Jehosafat augwali si te kingo gudubo ugwa au elama, te augwali si augwa sia kingde dugulaluai. Augwaligo te augwali sigo dugabo sia sai te taun Samaria genuai obo sunumi bulu badu muani, te tǫ malu dolo yai pesage tǫ me deli, te bidi dabego te wit dili bo dabe sela sąnama, te nai ge sabo madi, te badu elaluali. Tama te profet dabego te nosali badu pedelabo nai po olama, te profet te king sibolo pusubo sę yalio.
1KI 22:11 Sedekaia, te Kenango ogwa, aga me deli te bidi sese nogo si, sągągo si, 400 profet dabe tomode bidali bidi. Agai te ain dage selama, te bulmakau gąų tiwai nigali. Te aga toboluba munama asu, te Ahapba te tiwai po wali, “Genuai Bidigo te tiwai po wali, nago te Siria dabe dali boi hwįnama, te augwali aiyaba elalueibao. Te tiwai nago augwali te kau gąų komgo augwali enana pidubadi, te augwali silibo siba mu usu naibao,” te po wai.
1KI 22:12 Te gasa profet dabego me te tiwai deli po naga wali. Augwaligo te tama po wai, “Nago te Ramotba hwįgi pobaso, te mu tama, nago te taun saibao. Genuai Bidigo nage tau sobaso, te nago augwali aiyaba elalueibao,” wali.
1KI 22:13 Te ofisa bidi, Ahapgo te Mikaia sigi pomainu tagala palali bidi, agai te Mikaia odasa asali. Augwali si te kingba sabalisiąbadi, ofisago Mikaiaba te tama po wai, “Tigidali profetgo po weyu, kingo hwįbaso, te boi bidi aiyaba elalueibao wali. Tama tialima, nago me nago wiegi yai kolesaga eyu, wiegi yai po naga te kingba mao,” te po wai.
1KI 22:14 Tialima, Mikaiago ofisa bidiba te tama po wai, “Te Sesemane Sogo Bidibo Genuai Bidigo nogide, eno mu po nageba obao, mena po Genuai Bidigo enaba mani, te po naga eno pusaibao,” wali.
1KI 22:15 Te Mikaia pelama, te king Ahapba sabalubo si da, teda Ahapgo agaba te tama po hanalu wali, “Mikaia, te dago Ramot taun ma sainu hwįgi pobaso usu yaibawe, ma meniwe?” Tama Mikaiago te kingba posobo po wabo homu ebo po te tiwai wai, “Magia! Te usu da, nago hwįgi pelama da, te taun nago saibao. Genuai Bidigo nage tau sobaso, te nago augwali aiyaba elalueibao,” wali.
1KI 22:16 Tiali goli, Ahapgo agaba te tama po wali, “Tibo po tagalao. Sesemane sogo eno nagebolo weyu, te nago Genuai Bidigo nogide mu po naga omainogo yai. Nisu sogo nago po odaibawe?” wali.
1KI 22:17 Tialima, Mikaiago Ahapba te tiwai po wali, “Eno suali, te Israel ami bidi dabe te bulu du dabede bidalua pelawali, te kibu sipsip augwa tonalubo bidi wasman meni yai tiwai elaluali. Tama eno odali, Genuai Bidigo te po wai, te bidi dabe augwa tobolu bidi meni yai. Augwa te hwįbo tagalama, te augwa buluba ma pelama, te bugagia bidibaso usu yaibao,” Mikaiago te po wali.
1KI 22:18 King Ahapgo te po odama, agai te king Jehosafatbolo te tiwai po wali, “Tes, te megi da, eno nagebolo walio. Te profetgo enabolo wiegi yai po me wagobeo. Sesemane sogo agai enaba te dwai nai naga pedelabo po naga wabo dao,” wali.
1KI 22:19 Tialima, Mikaiago po wadolama weyu, te tama po wai, “Tialima, megi da, eno homu nago olo bugagia munama, odao, te eno nagebolo te Genuai Bidigo enabolo ola mani nai dabede po waibao. Eno suali, te dagalude Genuai Bidi te aga dugulalubo sia saide dugulaluali, te tigidali mobo bidi ensel dabe aga pąde dolalubo suai dao.
1KI 22:20 Te Genuai Bidigo augwaliba te tama po hanalu wai, ‘Dego mu te Ahap te Ramotba pelama, isimainu geanigi paibawe?’ Tama te deli deli mobo bidi enselgo augwa konealubo homude po te Genuai Bidiba pusai.
1KI 22:21 Augwaligo te tiwai idubadi, te noma bidi mobo me deli Genuai Bidi pąba pelama, te tama po wai, ‘Ena da, ena pelama, aga geanigi paibao,’ te po wai.
1KI 22:22 Te Genuai Bidigo agaba hanalu wai, ‘Nago te Ahap mena tama tųba geanobo po waibawe?’ Tialima, te mobo noma bidigo Genuai Bidiba te tama po wali, ‘Te ena pelama, te Ahap aga profet dabego digi aga tibo po momainogo ilaibao.’ Tama Genuai Bidigo te noma mobo bidibolo te tiwai po wali, ‘Nage pelama, aga geanobo po wagi pao, te agai nago poba homu mueibao,’ Genuai Bidigo te po wai,” Mikaiago te tiwai wali.
1KI 22:23 Tama Mikaiago po dolo tama te Ahapba te tiwai po wali, “Genuai Bidigo homugo nage dolomainu homu elama, tama agai te noma mobo bidi tagala palama, tama naga te profet bidi tigidaligo nage te poba homu dąų omainu, tibo po ola mabo tiwai yali dao,” wali.
1KI 22:24 Profet Sedekaia, te Kenango ogwago, Mikaiago Ahapba te pusali po odama, te aga Mikaia pąba pelama, tama aga naboge badu nogo sawaligo eliyu, te tama po wai, “Te Genuai Bidigo Noma Mobo Bidigo ena magi elama tagalama, te nageba solama, tama nagebolo te po maniwe?”
1KI 22:25 Te Mikaiago Sedekaiago po te tiwai wei ponani, “Nosali te boi bidi dabe asu, te da Israel aiyaba elalubaso, te naga digi wi peyu, te be me deli habu tomoba geme dula sigi paibao. Te tebo sogo naga nago koneaibao, Genuai Bidigo digi enaba te po mobaso, eno te po pusai yabo, te homu nago yagameo,” Mikaiago te po wali.
1KI 22:26 Tialima, king Ahapgo aga ofisa bidi me deliba te tiwai po wali, “Te Mikaia pageabi elama, aga te Emonba sela pao, te polalubo kiap bidi da, me te eno ogwa Joasba pao.
1KI 22:27 Tama nago eno te po augwali siba mao, ‘Eno homugo dage sigo te bidi kalabusiba ma mumainu homu ebao. Te aga dwasianu tubo nai bret me wę naga mao, tama te boi hwįbo silama, ena ma asobo siba usu nao,’ te po wao,” wali.
1KI 22:28 Tama Mikaiago Ahapba te tiwai po ma wali, “Nage te dolobo sęgo gegesiąma, te nage asobaso da, teda Genuai Bidigo enabolo te po mabe da homu yagameo,” wali. Tama Mikaiago te tama po ma wali, “Dage tigidali hani we bidigo te po bugagia odao,” wali.
1KI 22:29 Tialima, nosali Ahap, te Israel king, me Jehosafat, te Juda king, sigo te ami bidi dabe selama, te Siria dabe dali te taun Ramot, te Gileat bulu tǫ pedaiba boi hwįgi palio.
1KI 22:30 Te boi hwįsąbadi yaide, Ahapgo Jehosafatba te tiwai po wali, “Te dago boi hwįgi pabo sogo, te eno kingo gudubo ugwa hasegelama, te gasa ugwa mueibao, te boi bidi dabego ena king da te konea pidali weyu, te tiwai yaibao. Tialima, nago da, te kingo ugwa au elama muao,” wali. Tibaso, king Ahapgo te gasa ugwa gudama, te augwa si boi hwįgi peyu palio.
1KI 22:31 Te sogo naga tama, te Siria kingo te 32 kepten bidi dabe i wali, te ami augwali te karisde dolalu hwįbo bidi dabe augwaliba te tama po wali, “Dagego te Israel kingba naga boi hwįąo, te dagego gasa bidi dabeba me hwįnamo dao,” wali.
1KI 22:32 Te augwali boi hwįani sogo, te kepten dabego te king Jehosafat sulama, augwaligo Israel king Ahap mu dao, te homu yai. Te augwaligo aga dali boi hwįgi painu yali, tialima Jehosafatgo bomonama i obaso,
1KI 22:33 tama augwaligo te tiwai koneai, aga te Israel king meni da homu yai. Tama augwaligo aga dali hwįbo tagalalio.
1KI 22:34 Te ami bidi dabe augwa hwįbo sę idubadi, te Siria ami bidi me deligo te ene te enesigi balibiba nanama, te enesigi kegelama, te Israel dabe bidibo pedaiba enanio. Te enego te Ahap dolali, te aga tigi te hwįbo nai olo mesegelisąwai elaluali badu dolalio. Tama Ahapgo aga karis guni tolasa pabo bidibolo te tama po walali, “Ena dolalio. Te karis polo begelama, te hwįbo pesage tagalao,” wali.
1KI 22:35 Tialima, te Siria ami bidi dabe me Israel ami bidi augwa te boi hwįbo bomo mu ebaso, Ahapgo te hwįbo pesage taga soabo usu ebeo. Aga te karisde naga bididuai, te aga ami bidi dabego aga tonalubo sę yai. Tama agai Siria dabeba tonaludualio. Tama Ahapgo kaneme duludu, te aga karis sawali ni nami mesegelali. Aga te tiwai bididubadi, te be pio muba usu nigi pelama, te aga isai dao.
1KI 22:36 Te giliga iba degasa dulubo pąde igi pabo si da, teda te Israel ami bidi dabe, me Juda ami bidi dabego te tiwai i walio, “Da tigidali te dena bulu tǫ pedai kantriba, me te dena bulu dabeba pela silinao,” walio.
1KI 22:37 King Ahap isai baso da, teda augwaligo aga tigi te Samariaba sela pelama, te augwaligo gų pageba pubulalio.
1KI 22:38 Tama augwaligo aga karis te Samaria dwasianu sigi ąįba sela pelama, wę telagi pai. Te węde te penani ebo we dabe augwa te ąį paubo da. Te yowi dabe asu, agai kaneme tuagasali, tama te tama tiali sęgo te Genuai Bidigo pusali poba mu usu nai dao.
1KI 22:39 Te king Ahapgo gasa sę dabe tigidali yali po, te tiwai nogi wabo bukude te po elalubo, Te Israel King Dabego Yali Sę Po Buku Dao. Te bukude te wiegi yai genuai be agai sęnama, te elefan hasa kelego au ilali po wali, te me agai te taun dabe obo masigi banis dąų walobo sę me yali po wai dao.
1KI 22:40 Ahap isai baso da, teda augwaligo aga tigi pubulama da, te aga ogwa Ahasiago te aga ayago pesage selama, te king pedelalio.
1KI 22:41 Te kibu be me si me si Ahap te Israel king bidali side, Jehosafat, te Asago ogwa, te Juda king pedelai dao.
1KI 22:42 Jehosafatgo kibu be te 35 kibu be elalubadi, te sogo aga king pedelali, tama aga te Jerusalemde king bidibadi, te kibu be bidi sese deli olama, a naga bidai. Jehosafatgo ida, te Asuba, te Silhigo wai dao.
1KI 22:43 Jehosafatgo te aga aya Asago yali kolesaga tigidali bugagia wali pali, te agai wiegi yai doloba pai kolesaga Genuai Bidigo gedude yali. Tialima, agai isąwani sę me deli te tiwai, agai te tibo godiba lotu wabo pesage dolobeo. Tibaso, te we bidi augwaligo te ofa ebo sę me, te wiegi yai denami hano ilibo pauda me, te pesage ulubo sę iduai dao.
1KI 22:44 Te Jehosafat king bidali sogo, te tǫ kantri Israel de Juda tǫ kantri si te munu me boi hwįbeo. Menio. Jehosafatgo te Israel king dali nogo menama, te augwali bugagia hodobo bidai.
1KI 22:45 Te king Jehosafatgo te gasa sę tigidali yali po, te tiwai nogi wabo bukude elalubao, Te Juda Kingo Yali Sę Po Buku Dao. Te bukude wali po te tigidali bomai sę agai yali po wali, te agai gasa tǫ kantri dabeba boi hwįgi pali po dabe wali dao.
1KI 22:46 Polobadu Asa, te Jehosafatgo ayago te tibo godiba lotu wabo pesagede te penani kolesaga ebo sę bidi dabe ela gudulali. Tiali goli, te meba me elalubaso, te Jehosafatgo augwali tigidali mu dola silai dao.
1KI 22:47 Te sogo te tǫ kantri pedai Idom te king elalubeo. Te Juda kingo naga te bidi dąį ilama, te Idom dabe tonalumainu yalio.
1KI 22:48 King Jehosafatgo po obaso, te sę bidi dabego genuai sip te tǫ kantri Ofirba gol sigi pabo sip dabe nigali. Tiali goli, augwali pabeo, magi baso meni, te sip dabe te saut badu tamu ąį nambisde elaluali taun Esiongeberde dolali.
1KI 22:49 Te nosali, Ahasia, te Israel kingo, te Jehosafatgo sip dolali po te tiwai odama, tama agai Jehosafatba te tama po wali, “Te nago sip dabe ma tagala palabo homu ebaso da, teda eno boskru bidi dabe te nago boskru bidi dabe dali pomainu yaibao,” wali. Tialima, Jehosafatgo hagela homu yai dao.
1KI 22:50 Nosali Jehosafat isibaso, te augwaligo aga te aga wąį nǫųgo gų pagede pubulali, te Devitgo Taunde elaluali. Te Jehoram, te aga ogwago, te agai sę yali pesage selama, te king pedelai dao.
1KI 22:51 Te nogo si olama, sągągo a naga me si, te tama kibu be te Jehosafat te Juda king bidali kibu bede, Ahasia, te Ahapgo ogwa, te Israel king pedelali. Te aga Samariade te kibu be si tama bidalio.
1KI 22:52 Agai te aga aya me ida sigo yali dwai kolesaga tiwai eyu, te Jeroboam, te Nebatgo ogwa, agai me te Israel dabe dwai sę eboba kegali king dao. Ahasiago Genuai Bidi gedude dwai sę eyu,
1KI 22:53 agai te tibo god Balba lotu wabo sę yai. Te tiali kolesagade agai te God, te Israelgo Genuai Bidi, agaba haliga sębę dwai ilali, te aga aya Ahapba dwai haliga yali tiwai yai dao.
2KI 1:1 Tama te nosali te Israel bidigo king bidi Ahap isali, te Moap bage augwaligo homugo te Israel bagego da tonalugobeo homu yai. Tama tibaso, augwaligo te Israel bage augwali sela sąyani.
2KI 1:2 Me sogo deli te Israel bidigo king bidi te Ahasia aga bede te ugwa badu habu badu bidibadi yaide, tama te be kąų togasa dulunama, tama aga te tǫba tulaluama, tama aga te nogo sągą me, te tigide me genuai mu tama selali. Tama tibaso, agai te me badu po sela pabo bidi dabe te Filistia bulu te moni hanu te Ekronba tagala palali, te augwaligo te Ekron hanude bidibo bidi dabego te augwa tibo god Balsebup hanalugi pao olama, tama te aga ma usu yaibawe, ma meniwe, olama hanalu wai.
2KI 1:3 Tiali goli, te Genuai Bidigo po sela pabo ensel bidigo te profet bidi Elaija te Tisbe taun hanude bidibadi e tiwai po wali, “Tama nage pelama, te Samaria king bidigo te taun Ekronba tagala palali bidi dabe nago augwali tiąba pelama, tama nago augwalibolo e tiwai po tama wao, ‘Magi baso te dagego homugo Ekron augwaligo tibo god Balsebup hanalugi sobawe?’ wao,” wali. “‘Tialima, Israel bidi dabeo, dage dali God bidibewe?’ wao,” wali, “‘tibaso dage sobawe?’ wao,” wali.
2KI 1:4 “‘Awe, odao, Genuai Bidi Godigo te e po te king bidi Ahasiabolo waliąo,’” wali, “‘nage ma usu egobeo. Mu menio. Nage tama pila muna muna pedubadi genama, tama isibo bodoluba usu nigi paibao,’ tama po wao,” wali. Elaijago te po odama, tama aga hodaluama peyu, te bidi dabebolo te po wagi pai.
2KI 1:5 Te bidi dabe augwaligo te Elaijago wabo po odama, te bage augwali te king pageba ma geasa pelama, tama te kingo augwalibolo e tiwai po hanalu wali, “Magi baso te dage polo ma begasa asaliwe?”
2KI 1:6 Tama augwaligo te kingo wali po wei ponoyu, te e tiwai po wali, “Bidi me deligo te da te tųba tiąba aselama, tama agai dabolo te po wai, ‘Dage me geasa pelama, te Genuai Bidigo po te king bidibolo wagi pao,’ obaso da, ma geai dao,” wali. “Te po e tiwai dao, ‘Magi baso nago te bidi dabe augwali tagala palama, te augwali pelama, te Balsebup hanalugi pa waiwe, te Ekron bidi augwaligo tibo godiba? God Mu Israel bidi dage dali meni baso, nago tama tiwai da, agawe? Mu tamao, nage munu ma gesa solama, ma usu egobeo. Mu menio. Nage tama pila muna muna pedubadi kęnama, te nage isibo bodoluba sabaligi paibao,’ agai dabolo te po wao wali,” augwaligo te king bidibolo te po wali.
2KI 1:7 Kingo te po odama, tama agai augwalibolo e tiwai po hanalu wali, “Te bidigo dagebolo te po ola mani, aga mena tiwai bidi dawe?”
2KI 1:8 Tama augwaligo te po wei begelu e tiwai po wali, “Te bidi aga te hasa nisigo nigai bulubo ugwa bulai bidi dao,” wali, “tama aga te hasa usugaligo nigai kukulu gudai bidi dao,” wali. Kingo odama, tama agai te po wai, “Te bidi aga te Godigo po pusubo profet bidi Elaija da,” wali.
2KI 1:9 Awe, tama te kingo te ami tobolu bidi me deli dali, te bidi sese si olama, nogo si, 50 ami bidi dabe dali, tagala palama, tama augwali pelama, te Elaija odasa asomainu tagala palai. Augwali pelama, te Elaija aga bidibo buluba sabolali, tama te ami tobolu bidi keptengo Elaija te bulu dude dugulalubo suali. Tama te keptengo te Elaijabolo e tiwai po tama wai, “Nage Godigo po pusa mabo bidi da, kingo nage asao wali. Nage eba dulama, tama te king aga sugi pao,” wali.
2KI 1:10 Tialima, Elaijago e tiwai po wei ponani, “Tialima, mu tama, ena Godigo po pusa mabo bidi da wida,” Elaijago te po wali, “teda eno homugo te dagalude elalubo isi tagala palama, te nage dali, te naga te 50 ami bidi dali, isigo domainao,” wali. Tama te po wabo si, te dagalude elalubo isi polo tulaluama, tama te ami tobolu bidi kepten bidi dali, te aga te 50 ami bidi dali, isigo dela pelama, tama augwali isila pali.
2KI 1:11 Nosali te kingo gasa me ami kepten bidi dali, te bidi sese si selama, te nogo si, 50 ami bidi dali, te Elaija pageba ma tagala palali. Tama augwali Elaija pageba sabolama, tama kepten bidigo te Elaijabolo e tiwai po wai, “Nage Godigo po pusubo bidi da, kingo te po walio, nage polo dulama, tama nago aga suagasao po wali,” te po wai.
2KI 1:12 Tama Elaijago agabolo te po wei ponoyu, te po wai, “Tialima, mu tama dao, ena te Godigo po pusa mabo bidi da wida, teda eno homugo te dagalude elalubo isi polo tulaluama, tama te nage dali, te naga 50 ami bidi dali, isigo domainao,” wali. Tama te po wabo si yaide, te Godigo isi polo tagala palama, tama te kepten bidi dali, te 50 ami bidi dali, tama te augwali isigo dali, tama augwali isigo dela pelama, isali.
2KI 1:13 Tialima, kingo gasa kepten me dali, te 50 ami bidi dali, te Elaija pageba ma tagala palali. Tiali goli, te sela wagi siyu pali kepten, te bidi agai te e tiwai kolesaga yai, aga te Elaija bidibo bulu duba holama, tama aga te Elaija bidibo pąba sabolama, tama te kepten agai te kidu sugunama, Elaija agabolo e tiwai po olama wai, “Godigo po pusa mabo bidio.” Keptengo agai te bomai po weyu, e tiwai po wali, “Nago ena dali, te eno ami bidi dali, te nago ena dali te bugai homu pemene yao,” wai. “Tama nago da doligio,” wali.
2KI 1:14 “Eno koneanio, te dagalude elalubo isi tulaluama, te kepten si dali, te bidi sese a naga, 100 ami bidi dali, te augwali isigo dai dao.” Keptengo bomai po weyu, te po wai, “Eno homugo nago ena dali, te eno 50 ami bidi dali homu dene eyu, tama da doligio,” wali.
2KI 1:15 Keptengo po ola silali, tialima te Genuai Bidigo ensel bidigo te Elaijabolo e tiwai po tama ola mawai, “Nage dulama, te kepten bidi dali pao,” wali. “Nage aga sulama, wi egio.” Awe, Elaija hodaluama, tama aga kepten bidi dali te king pageba pai.
2KI 1:16 Elaija sabaligi pelama, kingbolo te po wai, “Genuai Bidigo e tiwai po tama wai. ‘Nago homugo God Israel bidi dabe dali bidibewe?’ wai, ‘tama tibaso, nago me badu bidi tagala palama, te Balsebup hanalugi pao waliwe, te Ekron dabego tibo god dao. Tama tibaso, nage munu ma usu egobeo. Mu menio. Nage tama pila muna muna pedubadi kęnama, tama nage isigi paibao,’ wali.” Elaijago kingbolo te po ola mawai.
2KI 1:17 Tama te nosali Ahasia isali, tama te po Elaijago pedauwalidu te Genuai Bidigo po pusali te sogo mu usu nani. Ahasia aga ogwa meni. Tama tibaso, aga ama Joramgo aga ama Ahasiago yali sę selama, te king bidiyu, Israel bidi dabe tonaluyu bidali. Te Joram king nigilama bidibadi, te kibu be si pai, te Jehoramgo, te Jehoram te Jehosafatgo ogwa, tama aga Juda bulu tǫde aga king bidi nigilama, Juda dabe tonaluyu bidai.
2KI 1:18 E po dabe te king Ahasiago te tigidali te gasa sę yali po, te po gasa buku elalubo, augwaligo te nogi wai, te Israel Bidi Dabe Augwaligo Kingo Yali Sę Po Elalubo Buku dao wali.
2KI 2:1 Genuai Bidi Godigo homugo te Elaija deli sogo te pobege ebo waligo dagaluba selasa holaiba homu yali. Tama te sę pedalabo elalubadi yaide, te Elaija dali, te Elisa dali, augwali sabi name si te Gilgal bulu tagalama pai.
2KI 2:2 Tama Elaijago te aga sabi Elisabolo e tiwai po wai, “Nage ede tama bidiyu, tonaluao,” wai. “Magi baso meni, Genuai Bidigo ena Betel buluba pao wai,” wali. Tiali goli, Elisago e tiwai po wei ponani, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao,” wali. Tama tibaso, te augwali te Betel taunba talua si pai.
2KI 2:3 Te Betelde te Godigo po pusubo profet bidi hani me badu tede bidai. Tama augwali aselama, te Elisa sabi name si sisinagaselama, tama augwaligo Elisabolo e tiwai po ola mani, “Megi te Genuai Bidi Godigo te naga genuai bidi Elaija selasa paibao,” te tiwai po Elisabolo ola mawai, “te nago koneaniwe, ma meniwe?” wali. Tama Elisa agai augwalibolo te po wei ponoyu, e tiwai po wai, “Eno me te konea palio. Dagego te nai po me wagio,” wali.
2KI 2:4 Augwali si te Betel bulude me bidibadi yaide, tama Elaijago te Elisabolo e tiwai po tama wai, “Nage ede tama bidu tonaluao,” wai, “magi baso meni, Genuai Bidigo ena Jeriko pao walio.” Tialima, Elisago te po wai, “Genuai Bidi bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali mu paibao,” wali. Tialima, augwali si te Jeriko taunba talua si pai.
2KI 2:5 Te me badu te profet hani te Jeriko taunde bidalubo bidi dabe, tama augwali te Elisa pageba aselama, tama augwaligo agabolo e tiwai po tama wali, “Megi te Genuai Bidi Godigo te naga genuai bidi Elaija selasa holaibao,” wali. “Tama nago teda koneaniwe, ma meniwe?” Tama Elisago augwalibolo te po wei ponoyu, e tiwai po augwalibolo wai, “Eno koneanio,” wali. “Te sę yabo po dagego munu ma wagio,” wali.
2KI 2:6 Augwali si te Jerikode me bidibadi yaide, tama te Elaijago aga sabi bidi Elisabolo e tiwai po tama wai, “Nage ede tama bidiyu, tonaluao, magi baso meni, Genuai Bidigo enabolo ‘Te nage te Jordan ąįba pao,’ walio.” Tiali goli, te Elisago te po wai, “Genuai Bidi tigidali sogo bidada peyu, bidada paibao. Te mu po dao. Tama te tiwai gilama, eno mu po tama obao, ena nage dali paibao.” Tialima, aga sabi dali talua si pai.
2KI 2:7 Tama bidi sese si olama, te nogo si, 50 profet bidi dabe te sabi name si wali pai. Augwali pelama, te Jordan ąįba sabolama, tama te ąį pąde dolaluali. Tiali goli, te 50 profet bidi dabe te digibulu ganama dolaluali, tama te sabi name si tonaluali.
2KI 2:8 Tialima, Elaija aga bobobage bulubo ugwa dilama, tama te tomagelama, tama te bulubo ugwago te Jordan ąįba elali. Tama te ąį tomode si bugasa pelama, tama te ąį tomode tǫ dila pai mu elaluali. Tama augwali si tedu pelama, te Jordan ąį uba pedai badu sabolali.
2KI 2:9 Augwa si peyu, tama te Elaijago te aga sabi Elisabolo e tiwai po tama wai, “Pąde tama megi Genuai Bidigo ena saibao,” wali, “tama eno nage taga paibao. Tama tibaso, nago homugo eno nage magi naigo nagebolo hasia tau sagawe?” wali. Elisago te po wei ponoyu, e tiwai po tama wai, “Nago te Godigo bomo mu selama, tama nage te profet sę yai dao. Tama eno homugo nago te sę yali bomo ena mao,” wali, “te ayago aga gomunai ogwa umabo nai mabo kolesaga tiwai gilama yao. Tama eno te nago bidali madigi bidiyu, te usu nama, tama te profet sę yaio,” wali.
2KI 2:10 Elaijago te po wei ponoyu, e tiwai po tama wai, “Te nai nago enabolo hanalu wali, te eno tama polo nagebolo polo magobeo,” wali. “Tiali goli, Genuai Bidigo ena sela holobo sogo, te sogo nago ena subaso da, teda te sogo nago te bomo sagameo, tama tialima, nago ena pabo sogo susąyu da, teda nago sabo usu egobeo,” wali.
2KI 2:11 Tama augwali si te po mimi pabo sę ela peyu pali, tibadi yaide, polo tama te isi bogoli te bidi si tomo agebelede isi bogoli pedalali. Te isi tomode augwali sigo tonobadi yaide, te kibu hosgo te ni namego sai yai madigi bidi dugabo karis kegasa asobo suai. Awe, tama tialima, te pobege ebo waligo te bidi Elaija te dagaluba selasa holali.
2KI 2:12 Elisago te Elaija pabo sulama, tama te Elisago agai i weyu, e tiwai tama wai, “Eno aya, eno aya. Nage bomai bidi mu dao, te Israel bage tau sali bidi mu dao. Tama nage te hauwa hwįbo nai te kibu hos me te karis, nage te tiwai dao,” wali. Elaija te dagaluba polo paide te Elisa agai munu ma sube, tama tibaso, te Elisa aga haligade moni homu sęgę mu eyu, te aga te bobobage bulubo ugwa tomode si peda sąyani. Te page e tiwai, aga homu dene ebo page ola mani.
2KI 2:13 Te sogo te Elaija Godigo te dagaluba selasa holali sogo, te aga bobobage holobo ugwa te agai te tǫba tula palali. Awe, tama tibaso, Elisa agai te Elaijago te holobo ugwa selama, te Jordan ąįba geasa pelama, tama aga te Jordan ąį sanide dolaluali.
2KI 2:14 Tama te Elisa agai te Elaijago bobobage holobo ugwa selama, tama agai te Elaijago yali kolesaga tiwai elama, te agai te holobo ugwa selama, te ąįba elali. Tama agai te węba elali sogo agai te po wai, “God, nage Elaijago Genuai Bidio, nage mena bidibawe?” Tama te po obadi yaide, te ąį tomode si buga pali, tama tibo si, te Elisa te ąį tomodu pelama, te ąį u badu pedaiba sabaligi pali.
2KI 2:15 Te 50 profet bidi dabe te augwali te Jeriko bulude bidibo bidi dabe da, tama augwali te bulude me bidaluali. Te bidali bage magi baso meni, augwaligo homugo te Elisago ebo sę page suainu bidaluali. Tama augwaligo te po wai, “Suao. Te bomo te polobadu te Godigo Elaijabolo mawai bomo dao, te bomo megi te Elisa dali bidibao,” wali. Tama augwali asama, tama aga tiąba aselama, augwaligo kidu sugunama, tama augwaligo tobolu me tǫba naga basilali, tilama augwaligo te Elisa genuai nogi mani.
2KI 2:16 Tama augwaligo te Elisabolo e tiwai po wai, “Dago hanigo te bidi sese si olama, te nogo si bomai bidi dabe bidibo,” wali. “Tama dago homugo te bomai bidi dabe augwaligo te nago genuai bidi Elaija gegegi pomainao,” wali. “Genuai Bidigo Mobogo aga selasa pelama, tama te aga bulu du me, bulu odogode me, aga tede tagalama, bidi badi bogo,” wali. Tiali goli, te Elisago augwalibolo te po wai, “O tegio,” wali. “Dagego te bage tagala palama, aga gegegi pigio,” wali.
2KI 2:17 Tiali goli, te profet bage augwaligo bomo mu yali, tama augwaligo te Elisa aga hanalubo sę bomo mu yali, tama tibaso, Elisa agai homugo te augwali pogobeo olama, agai augwali dąų wagobeo homu elama, tama agai te po wai, “Awe, usu dao,” wali, “dagego te augwali tagala palao,” wali. Tama augwaligo te bidi sese si olama, te nogo si, 50 bidi augwali pelama, tama te Elaija gegedubadi yaide, te sela sogo hodolai, tiali goli augwaligo aga me sube.
2KI 2:18 Elisa aga te Jerikode bidiyu, tama augwali asobo tonaluali. Tama augwali ma geasa asobo sogo, Elisa agai te profet bagebolo e tiwai po tama wai, “Eno magi po waidawe? Tialima, dagego homugo eno wali po dagego odobeo,” wali.
2KI 2:19 Elisa te Jeriko taunde me bidibadi yaide, tama te taun bidi dabe augwali aselama, Elisa agabolo e tiwai po wali, “Genuai bidio, nago suao, te e taun te dwagi yai mu dao,” wali. “Tiali goli, wę digi dwagi yai menio. Tama te we dabe augwali wai haliga elalubo sogo augwaligo te wę naga tubo dao,” wali, “tama augwaligo te wai polo ame nabo, tama augwaligo te wai dabe te haligade genuai isąbadi ame nabo dao, tama teyu, augwaligo te wai dabe polo isibo dao,” wali.
2KI 2:20 Tama te Elisago augwalibolo e tiwai po tama wali, “Dage pelama, te gesi pou dis me deli selama, tama te poude te sol tamu munama, selasa asao,” wali. Awe, tama augwaligo te Elisago wali po wali pelama, tama tiali.
2KI 2:21 Tama te Elisa aga te ulu ąįba pelama, te ulu ąįba te tamu gelali, tama agai te po wai, “Genuai Bidi Godigo e tiwai po tama wai, ‘Ena Genuai Bidi, eno e wę ma dwagi yai ma ilibao. Tama te e węgo bidi te munu ma isibo sę egobeo, tama te we dabego polobadu yaliga te we dabego wai ame nabode te haligade genuai isąwai augwaligo ame neyu yai, te yali tiwai ma egobeo,’” wali.
2KI 2:22 Awe, tama te ąį ma dwagi yai pedalali, tama te Elisago wali yali gilama, tama bidada asali yali gilama, tama megi eba usu nagasobao.
2KI 2:23 Tama nosali te Elisa Jeriko taun tagalama, tama te Betel buluba pali. Tama te umabo ogomani te taunde bidibo ogomani te taun bulu badu bidalubadi yaide, te augwaligo Elisa soabo suali, tama augwaligo te Elisa posoyu, e tiwai po olama, tama posoyu yai, “E, nage tobolu wane yai bidio, nage gedao,” wali, “nage te pesagede bidigio, nage gedao,” wali.
2KI 2:24 Elisa aga ma begelama, tama agai te ogomani bomo mu elama tama tonaluyu, agai te augwaliba e tiwai po agai wali, “Eno mu po tama obao, Genuai Bidigo dage dolaibao.” Elisago te po wabo si, te bomo yai genuai uni kibu tiwai kibu sou si nogi bea, te kibu te dwai tǫdi gagawai kibu da, te kibu bea si aselama, te bidi sese si olama, me si, 42 ogomani te kibu sigo ela muna silali, tama te augwali tigi minama mu silai.
2KI 2:25 Tama Elisago te bulu tagalama, te Karmel bulu duba pai, tama nosali aga te Karmel bulu du tagalama, tama te aga te Samaria buluba ma begasa pai.
2KI 3:1 Te Jehosafat te Juda tǫde te king bidi nigila bidiyu, te kibu be 18 wagi solama kibu be pai, te Joram, Ahapgo ogwa, te Joram aga te Israel bage tonaluabo king bidi nigilama bidai, tama aga te Samaria bulude king nigilama bidali, me te kibu be nogo si olama, te sągągo si, 12 kibu be pai.
2KI 3:2 Joram agai te Genuai Bidi gedude agai dwai kolesaga yali. Tiali goli, agai dwai kolesaga yali, te aga ida dali, te aya dali sigo yali kolesaga tiwai me ebe. Menio. Agai te kolesaga yali te tibo god Bal noma piksa te bede dagana ulali te Joram agai sela sąyani, te polobadu te aga ayago te tibo god Bal noma nigai.
2KI 3:3 Tialima, Joramgo te dwai kolesaga yali sęgę te king Jeroboamgo yali te sęgę sabo kolesaga te tiwai naga yali, aga te Nebatgo ogwa, te agai yali sęgę te tiwai, augwaligo te yali tiwai sęgę sabo kolesaga naga eyu, te Jeroboamgo agai te Israel augwali kegelama, te augwaligo te tiwai dwai kolesaga emainu Joramgo Israel augwaligo me tiwai kolesaga emainu kegai. Joramgo agai te dwai kolesaga ebo me tagalobe. Mu meni.
2KI 3:4 King Mesa, te Moap bagego king bidi, te bidi agai te kibu sipsip umabo mu bidali. Tama te Moap hanigo king bidi te Israel hanigo king dologode bidali. Tama teyu, tigidali kibu bede te agai koneama, te kibu sipsip wai te bidi sese umabo te 100,000 selama, te Israel kingbolo te takis mone tiwai mawai. Tama me te agai te kibu sipsip omai kibu te bidi sese umabo mu, te 100,000 aga sa muyu yali. Tama te kibu omai dabe augwaligo nisi me poalama, tama te nisi augwaligo te Israel bagego king bidi pageba toliyu yai.
2KI 3:5 Tialima, nosali te Israel bidi dabego king bidi te Ahap isali, te Moap hanigo king bidi Mesago te Israel bidi dabego gesi noma king bidi dali hagoma eyu, tama agai takis mone ma mabe.
2KI 3:6 Awe, tialima te king Joram aga te Samaria polo taga soyu, tama agai te tigidali ami bidi sisinibo sę yali.
2KI 3:7 Tama Joramgo te Juda bidi dabego king bidi Jehosafatbolo po ola tolali, Judago king o, e tama tiwai dao, “Te Moap bulu king bidigo ena dali hagoma ebo. Tama tibaso, eno homugo eno aga dali hwįgi paibao. Tama nage ena dali paibawe, o ma meniwe?” te po hanalu wali. Tama Jehosafat agai te po wei ponoyu, e tiwai tama wali, “Ena te nage dali muna selama paibao,” wali, “tialima ena tonalu bidibao, te naga homugo mena sogo pobaso da, teda ena asaibao. Tama te eno ami soldia bidi me, te eno hos kibu me, eno te nage tau sabo dodo bage dola selama bidibao,” wali.
2KI 3:8 “Tialima, da mena tųdu tama da paibawe?” wali. Tama Joramgo te po wei ponoyu, e tiwai po tama wai, “Tama da te wa pai buludu te Idom bulu tųdu paibao,” wali.
2KI 3:9 Awe, tama te king Joram badi, te Juda bidi dabego king bidi badi, me te Idom bidi dabego king bidi badi elama, te augwa ami bidi dabe me selama, tama augwali pali. Tama te tų te bobobage tų mu tama augwali pedubadi yaide, te Sadede deli mu silai, tama teyu te augwaligo wę sia sali. Tama tialima, te ami bidi dabe me, me te walu sela pabo donki kibu dabe me, tama te augwali tuabo wę sia sali.
2KI 3:10 Tama te king Joram agai e tiwai po tama wai, “Homu dene mu ebao, God Genuai Bidi aga digi da sela king bidi dabe sisinama, tama agai da sela bidi te Moap bidi dabego king bidi nogoba mubo yabao,” wali.
2KI 3:11 Tialima, te king Jehosafatgo te king Jorambolo hanaluyu, te po wai, “Genuai Bidi Godigo po pusubo profet bidi me deli bidibowe, ma meniwe?” wali. “Tialima, bidibaso da, teda dago agabolo e tiwai po tama wainao, ‘Naga Genuai Bidi Godibolo hanaluama, te dago mena tiwai sę yaibawe?’ wainao, “Jehosafatgo te po wali. Te king Joramgo sę ebo kiap tobolu bidi me deligo te po wei e tiwai tama ponani, “Elisa, aga te Safatgo ogwa, bidibao. Polobadu aga te profet Elaijago sę ebo bidi bidali,” wali.
2KI 3:12 Tama te king Jehosafat agai odama, tama agai te po wai, “Elisa aga te Genuai Bidi Godigo sę ebo profet bidi mu dao,” wali. Tama tialima, te king dabe augwaligo te profet Elisa sugi pali.
2KI 3:13 Elisa agai te Israel bidi dabego king bidi subaso, tama agai te po wai, “Magi baso nage ena pageba asobawe? Nage pao, tama te polobadu naga aya me, te ida me, augwaligo pelama, te hanalugi pali te profet bidi bageba pao,” wali. Tiali goli, te king Joramgo te po wei ponoyu, e tiwai po tama wali, “Menio. Genuai Bidi aga digi te da sela king bidi dabe sisinama, tama da te Moap hanigo king nogoba muainu ebao,” wali. “Tama tibaso, da nage pageba asai dao,” wali.
2KI 3:14 Tama te Elisago te Jorambolo e tiwai po tama ola mani, “Ena te Genuai Bidigo sę ebo bidi dao. Aga te tigidali sogo bidada peyu, bidada pabo dao, tama aga tigidali bomo mu elalubo bidi dao. Tama agai nogide eno mu po tama e obao, tama tialima, te Jehosafat nage dali bidigi menigi sogo da, teda eno nage gesabidi sugi menio, ma po me wagi menio. Tiali goli, eno koneanio, Jehosafat aga te dwagi yai bidi mu yai baso, tama eno nago po odobao,” Elisago te po te king bagebolo wai.
2KI 3:15 “Awe, eno homugo megi te dagego pelama, te gita gagali ebo bidi, me ma te musik gagali ebo konea pai bidi mu me deli odasa asao,” wali. Awe, tama augwaligo te gita gagali ebo bidi odasa asali, tama te bidigo te gita gagali ebo side, te Genuai Bidi Godigo bomo te Elisaba asali.
2KI 3:16 Tama Elisago agai po pusuyu, e tiwai po tama wali, “Genuai Bidigo te po wai, polobadu te wę soali silide, te dagego te wę soabo madigi te umabo ąį sabo tǫ dedage nigao wali, tiali goli te megi da, te ąį te sula sali dao, wali.
2KI 3:17 Tama dagego te kulubage me, te wali me, asobo susiąbadi, tialima te wę te aga soali madigi wę ma soabo suaibao, wali. Tama tialima, dage dali, te duga bulmakau kau kibu me, me te donki kibu me, te dagego te tuabo ąį me mu usu elama, te umabo mu pągąwaibao,” wali.
2KI 3:18 Tama te Elisago agai po me wadolama pusuyu, e tama wali, “Genuai Bidigo te homu yai, te wę dage mabo sę, te genuai nai menio. Te dwasianu nai dao. Tama tialima, Genuai Bidi agai homugo te gasa sę dagebolo me mawaibao. Te sę tama pedalaibao, te dagego te Moap hani dali boi hwįbode agai dage tau selama, augwali aiyaba elaluaibao, wali.
2KI 3:19 Tama tilama, te bomai obo elalubo te dwagi yai taun siagameo. Tama dagego te tigidali te dwagi yai ni dabe togolama, tama te tigidali augwaligo te ulu ąį tubo pesage hagalu pelama silao. Tama dagego te masigi selama, tama te augwaligo te gi yabo tǫba sąsąwaibao wali, tama te augwaligo nai wai bulubo usu me egobeo.” Tama te Elisago te po ola silibo si, te king bidi sela te augwaligo te Elisa aga tagalama, augwa pali.
2KI 3:20 Tama te giliga pedalubo si, te giliga nosali pedalai badi te kigamu digi mu, tama tibo sogo te kigamu denami yai ofa nai te Godidolo ula mabo sogo dao, wę te wa pai ąį gamiadu te Idom tǫ pedai badu aselama, tama te tigidali te augwaligo digawai tǫ dedage dabe te węgo pągąwai dao.
2KI 3:21 Moap bage augwaligo e tiwai po tama wabo augwaligo odai, te sela king bidi hani aselama, te augwali dali boi hwįagasaibao po wabo odali. Tama tibaso, te augwaligo tigidali bomai bidi te ami nigilama, te boi hwįabo bidi naga i olama, tama augwali sisinagasali. Tama nosali augwali aselama, te Moap tǫ dali, te Idom tǫ pedai dali, te dąį dolo tonaluyu bidaluai, tama augwali dola selama, te boi hwįabo deli naga tonaluai.
2KI 3:22 Tama te nosali te do kigamu tama, te Moap hani augwali te kigamu digi hodaluai. Tama tialima, te sogo tama te Genuai Bidi Godigo te Israel bagebolo wę mawai. Tama te giliga naniyu, te węba ula ilali, tama augwaligo te węba subo si, te węde te kaneme tiwai mu te mama yai mu elaluali. Tama te Moap bage augwali digibulu bidiyu, tama augwaligo suali.
2KI 3:23 Tama augwaligo i weyu, e tiwai tama wali, “Tonao! Tialima kaneme naga elalubo suao!” Augwaligo te homu eyu, te po wai, “Te boi bidigo tama te augwa digi te augwali te umabo mu te boi hwįyu, te elali bidi kaneme te e tǫde elalubao,” wali. “Polo pinao. Dago pelama, te augwaligo nai dabe me, me te augwali te bidibo bulu pesage dago sigi pinao!” te po wali.
2KI 3:24 Awe, te po olama, augwali hodaluama peyu, te Israel bidi bidibo buluba pali. Tialima, augwali pelama, sabaligi pali sogo, te Israel bagego te ami bidi dabe hodaluama, tama augwali dali bomo mu elama, boi hwįai, tama augwali tigidali pobeasa pelama, te augwa bulu tǫ Moapba tagaligi pai. Tama te Israel ami bidi dabego te Moap ami bidi dabe te umabo mu ela muani.
2KI 3:25 Tama te augwaligo te moni hanu taun mu tama dolali. Tama te Israel bidi dabe augwaligo te Moap hanigo tigidali taun bilama, mu usu nigi pali. Tama augwali te augwaligo gi nai bulabo tǫ dwagi yai me deli elalubo madigi sabalobo sogo, tama te tigidali ami soldia bage augwaligo te masigi selama, tama augwaligo te gi bulabo madigi te masigi sąsą pelama silali, tama te masigigo te tǫ tigidali te tǫ pągąna sela silali. Tama me te augwaligo tubo ulu ąį te ma paliali. Tama te dwagi yai ni dabe augwaligo gelali, tama augwaligo te tigidali taun dola silali. Tama te tialima, te taun me deli digi tagalali, te taun nogi Kirheres, te Moap bage augwaligo moni hanu. Awe, tama te sut katapel ami bidi dabe augwaligo te taun augwaligo bagua sali, tama augwaligo te taun tomoba te masigi selama, enebo sę yali.
2KI 3:26 Te Moap king bidigo suali, ma te boi bidi dabego te aga pąde tama aiyaba elaluaibao homu ebaso, tialima te king agai te bainat ge hwą tulama, te boi hwįbo konea pai bidi naga te agai sali, te bidi dabe te bidi sese hauwa, te 700 ami bidi sai, tama augwali te taun tagalama, te Idom king bidi pageba painu yai, tiali goli augwaligo usu ebe.
2KI 3:27 Tama tibaso, te Moap king bidigo te agai godigo aga tau sao homu eyu, te aga te gomunai ogwa selama, aga te waigo te aga isibode te king nigilama, te king sę yaga wali ogwa. Tama te kingo aga te ogwa selama, tama elama, te tibo godiba ofa nai ula mawainogo te wai elali, te ogwa te isiba sese ulama, te ofa tigidali dela pela silali. Te ofa te Moap bage augwa te tibo godiba ula mawai. Agai te ofa nai ulali, te taun genuai obo ugwa badu daide ofa nai ulai. Israel bage augwaligo te tama tibo sulama, tama te augwali te sęde dwai homu mu yai. Tama augwali te boi hwįbo tagalama, tama te augwali te augwa buluba ma pai.
2KI 4:1 Me sogo deli te profet bidigo we me deli te Elisa pageba asai. Te we aga bidi isai, tama te we aga olo bidibo wilawe we dao. Awe, agai te Elisabolo e tiwai po tama wai, “Genuai bidi, eno bidi isai dao,” wali. “Naga koneani, aga Genuai Bidi dologode bidada pai dao. Tialima, agai bidi me delide negeli sai, tama megi eno te negeli sali nai wei begelabo mone menio. Tama tialima, te bidi aselama, te eno wai ogwa si selama, tama te ogwa sigo te bidi aga te olo sę ela mabo bidi nigimainu ebo,” wali, “magu meni, te bidigo te negeli mone begelu, te ogwa sigo te bidi aga olo sę ela momainu homu yai,” te wego te po wali.
2KI 4:2 Elisago te po odama, tama agai te webolo e tiwai po tama ola mani, “Tama eno nage mena tama tau saibawe? Nago magi nai nago bede munalubowe?” wali. Tama te wego po wei ponoyu, e tiwai po tama wai, “Eno te oliv wel munalubo dwasianu sospen genage deli dao,” wali, “eno bede te gasa nai me menio. Te deli tama dao,” wali.
2KI 4:3 Tama te Elisa agai te we agabolo e tiwai po agabolo ola mawai, “Nage pelama, te naga abagi dabebolo hanalugi pelama, te augwaligo te nai bula tubo mouwa dage kenage sospen, nage me osogo momainao,” wali. “Tama augwaligo te olo me munalubo mouwa dage kenage augwaligo nage me mobaso da, tama nago umabo mouwa dage kenage sao.
2KI 4:4 Tama nago te mouwa dage kenage osogo selama, tama te naga be tomoba selasa pelama, tama te tų paliao,” wali. “Tama te nage dali, te naga wai dali si tama bidiyu, tama naga te mouwa dage kenagede munalubo wel te gasa mouwa dage kenageba te wel gelao,” wali. “Te sogo nago te mouwa kenage me deliba gelama te pągąna muai, awe, tama nago te gasa habuba me deli muao,” wai. “Nago te tama naga tidi pedubadi kęnama, tama naga te sali tigidali mouwa dage kenageba te wel gelama, te tigidali mouwa dage kenageba te pągąnoboba usu nigi pao,” wali.
2KI 4:5 Te wego te po odama silibo si, tama aga pelama, te aga abagi dedego mouwa dage kenage sospen dabe sigi pai, tama aga beba selasa pali. Tama aga dali, te aga ogwa dabe dali, te aga be tomoba bula selama, tama aga te be tų paliali. Tama te aga ogwa si augwaligo te mouwa dage kenage selama, te augwa idabolo magi pabo sę yali. Tama te augwa idago te mouwa dage kenage te wel gelebo sę yali.
2KI 4:6 Te wego te tigidali mouwa dabe kenage te welgo pągąna silali, tama te agai te aga ogwa me delibolo te e tiwai po tama wai, “Te gasa mouwa dage kenage me sela magasao,” wali. Tama te ogwago te po wai, “Idao, te tigidali mouwa dage kenage welgo pągąna silalio,” wali. Awe, tama te sogo dolo mu, wel te wego te mouwa dage kenageba wel munu ma pedalobeo. Menio. Te wel asobo silalio.
2KI 4:7 Awe, tama te wego te profet Elisabolo e tiwai po tama wagi pali, “Eno te tigidali mouwa dage kenage sospen welgo pągąna silalio,” wali. Tama Elisago agabolo e tiwai po tama wali, “Tama nago te wel selama, te we bidibolo dobolama, mone sao. Tama naga bidigo te negeli sali mone naga te welde sali monego wei begelao. Tiali goli, me badu mone te nagade munaluaibao. Tama te monego te nage dali, te naga ogwa si dali bidiyu, tama naga nai abelama tuagameo,” wali.
2KI 4:8 Me sogo deli Elisa te Sunem hanu taunba pai. Te hanude we me deli bidibo, tama agai te mone me, te haniani doado bage me, umabo mu munalubo we da. Tama te wego te Elisa hanalu wali, “Nage asama, eno beba nai tuagasao,” olama, hanalu wai. Tama tibaso, tigidali sogo Elisa te Sunem hanuba te we bidibo madigi peduali, tama agai te we pageba pelama, te agai bede nai tugi peduai.
2KI 4:9 Me sogo deli te wego aga bidibolo e tiwai po tama wali, “Eno konea palio, te bidi da dali me sogo me sogo asama, nai tuagasobo bidi, aga te dwagi yai bidi mu da, tama aga te Godigo sę ebo profet bidi mu dao,” wali.
2KI 4:10 “Tama teyu, eno homugo dago bede te aga piagasabo madigi te be habu badu me deli nigilama, dąį palinao,” wali, “te dago e be pedu badu nigilinao. Tama dago te be habude te piabo bet me, te tama ni name me, te tebol sai me, te lam sole me, me te dugabo ni name me, te nai dabe tigidali te dago aga pibo habu badu te nai dabe dago muguo. Tama te bidi aga asobo sogo, awe, te aga te habude bidimainao.” Awe, tialima, augwaligo te bidi piagasabo habu me deli nigibo sę yali.
2KI 4:11 Me sogo deli Elisa te Sunem hanu buluba ma geasa asama, tama aga te be peduba ugwaba holama, tama aga pibo habu badu te aga bet saide piali, te dwasianu toma tuyu piai.
2KI 4:12 Tama aga te toma tuyu, tama aga bidiyu, te Gehasibolo te po wai, aga sę bidi, e tiwai dao, “Tama nage aba dulama, te a we sugi pao, te agai eno piabo be habu nigali. Tama aga asao po wao.” Awe, Gehasigo tama tiali. Tama te we ugwaba holama, tama aga te be pibo pesage habu bulu badu dolaluali.
2KI 4:13 Tama Elisago Gehasibolo te po wai, “Nage pelama, te webolo e tiwai po tama hanalugi pao, ‘Nago homugo da tau siyu, te sę yali, te magi naigo nage homu pemene ilagawe, te nago da tau siyu, te moni sę dene yali magi naigo begelagawe? Nago homugo te Elisa pelama, te king sugi pomainu homu ebawe? Ma, te ami tonalubo tobolu ofisa bidi me deli tama augwali hanalugi pelama, tama augwaligo dwagi yai nai me deli nage momainuwe?’” Awe, tialima Gehasi pelama, te webolo hanalugi pali, tama te wego te po wei ponoyu, e tiwai po tama wali, “Ena te ena hani dali augwali tomode ena bugagia bidibo dao,” te po wali, “tama eno magi nai me deli godolo ebeo,” wali.
2KI 4:14 Gehasi aselama, Elisabolo te po wagasali, tama Elisago agabolo e tiwai po tama hanalu wali, “Tiali goli, te we aga da dali te dwagi yai kolesaga ebo te magi naigo wei begelaibawe?” Tama Gehasigo te po wai, “Te we agai wai menio, tama aga bidi monu dabe mu yalio.”
2KI 4:15 Awe, tama te Elisago te Gehasibolo te po wai, “Te webolo olama, eba asao,” wali. Tama te Gehasi pelama, te webolo wagi pobaso, tama te we aselama, te be tųba dolagasali.
2KI 4:16 Tama Elisago te webolo e tiwai po tama wali, “Te nosali kibu bede, megi te polua mude, te nago ogwa me deli ame naibao, tama nago naga nogo tuaibao,” wali. Tiali goli, te wego te po wei e tiwai po tama ponani, “Mu tama o, genuai bidio, nage Godigo po pusubo bidi dao. Nago enabolo ili po ola magio,” wali.
2KI 4:17 Tiali goli nosali, te we haliga yali. Tama nosali kibu bede, te polua dolo mu, te wego aga wai ogwa ame nani, te Elisago wali po tiwai gilama yali.
2KI 4:18 Tama te wai dwasianu genuai yali, tama nosali me badu kibu bede te waigo aga aya te gide bilibo sugi pai. Te bodolu te wit togobo sogo da, tama teyu, te aga aya te aga sę ebo bidi dabe dali te gide bidibadi.
2KI 4:19 Te waigo augwali sę eyu bidibadi, te augwali tonono bilali, polo tama agai aga ayabolo i weyu, e tiwai wali, “E, aya, eno tobolude dene dwai mu ebo. Dene me elalubo.” Tibaso, aga ayago te aga sę bidi me delibolo wali, “E wai aga ida pageba auwasa pao,” wali.
2KI 4:20 Tama aga te sę ebo bidigo te wai auwasa peyu, aga ida pageba tagaligi pali. Tama te wai aga ida sągą pagede godege pila mudubadi, te giliga dolo dolagasu, te belo waboba usu nigi pai, tama te wai aga isali.
2KI 4:21 Awe, tama aga idago te wai tola selama, te Elisa pibo be, te augwa be pedude, te habuba tolasa holama, te bet saiba mugiluama, tama aga ida buluba teda solama, tama tų paliali.
2KI 4:22 Tama aga bidi i olama asobode, tama aga bidibolo e tiwai po tama wali, “Eno homugo nage pelama, te naga sę ebo bidi me delibolo olama, te kibu donki me deli odasa, ena pageba asao,” wali. “Magi baso, eno homugo ena polo pelama, tama te profet bidi sugi paio, tama ena ma polo asaibao,” wali.
2KI 4:23 Tama aga bidigo te po wai, “Magi baso nago homugo nage megi tama polo paiwe? Nago homugo te Sabat bodolude sabolagasobo tonalubo meniwe, ma te gesi polua genuai bodolude pedalubo tonalubo meni da, agawe?” Tama wego te po wali, “Tagalao, ena homugo dao. Nage dua bidao,” wego te po wali.
2KI 4:24 Te sę ebo bidigo te kibu donki tudide te dugabo sai yai te somo gagawai nai muani, tama we te kibu donkide duga yali. Awe, tama te wego te sę ebo bidibolo e tiwai po tama wali, “Dadi si pabo sogo, nago te kibu donki polo pomainu osalao. Tialima, eno homugo donki kibu dua pomainu da, teda eno nagebolo waibao,” tama po wali.
2KI 4:25 Tama te we te donki kibude dugulama, tama aga dali, te sę ebo bidi dali, te augwali te Karmel bulu duba pali, te profet Elisa sugi pai. Augwali si digibulu asobadi yaide, tama te Elisago augwali si asobo suai. Tama Elisago Gehasibolo te po wai, aga sę ebo bidibolo, e tiwai po tama wali, “Suao, te Sunem hanude bidibo we te asobao,” wali.
2KI 4:26 “Nage aga pageba udalama, sugi pao, aga dali te aga bidi me aga wai me bugagia bidibowe, ma meniwe?” Awe, Gehasigo te webolo hanalugi pali, tama te wego e tiwai po wei ponani, “Da bugagia bidibao,” wali.
2KI 4:27 Tiali goli, te we te bulu duba te Elisa bidibo madigi asama, sabalobo sogode, agai te basi gulama, tama te Elisago sągą tuali. Gehasigo te wego tama tibo sulama, tama agai homugo te we dwasianu digibulu ganama pao olama, dega palali. Tiali goli, Elisago Gehasibolo e tiwai po tama wali, “Tegio, sula tagalao,” wali, “eno koneanio, aga genuai sęgę mu ebaso ebao. Tiali goli, Genuai Bidigo agai te sęgę ebo po enabolo wabeo,” wali.
2KI 4:28 Tama wego e tiwai po wali, “Genuai bidi, e da naga po dao, tama tiali goli Godigo ena te wai mawai dao. Eno nagebolo hanalubeo. Tiali goli, eno nagebolo te po wai, ‘Nago ena ili po ola magio,’ te po eno nagebolo hasia wai dao.”
2KI 4:29 Elisago te wego wabo po odama silibo si, tama Elisago aga sę ebo bidi Gehasibolo e tiwai po tama ola mani, “Naga gudubo name ugwa dąų olama, guda selama, tama te eno tolasa bilibo dono selama, tama nage te Sunem hanuba polo pao. Tialima, tomode bidi me deli nago me subaso da, teda nago siade da po olama, nago dolalubo sesabi egio. Tialima, bidi me deligo nage dali siade da po obaso da, teda nago agai te po wei ponogio, taga pao. Nage te wego beba dolo mu pelama, tama eno tolasa bilibo dono te wai gesabidide ugwa badu te eno dono muao,” po wali.
2KI 4:30 Tialima te wai aga idago tama suali ma, Elisa aga dali pabo homu meni baso, tama agai Elisabolo e tiwai po tama wali, “Genuai Bidi te bidada peyu, bidada pabo dao. Te mu po naga dao. Tama te tiwai gilama, eno mu po tama obao, eno nage taga pogobeo.” Tama tialima, Elisa hodama, te we dali te Sunem hanuba pali.
2KI 4:31 Te Gehasi polasa pelama, tama te Elisago tolasa bilibo dono te wai gesabidi badu mugi pali, tiali goli magi nai me deli pedalobeo, mu menio. Tama tibaso, Gehasi ma begasa pali. Tama agai te augwali tųde sisinani sogo, agai te Elisabolo e tiwai po tama wai, “Eno te nago te po wali gilama yali, tiali goli te wai hodalobeo,” wali.
2KI 4:32 Awe, tama augwali te beba sabalobode, tama Elisa aga pibo be habu badu tųde doligi pelama, tama subadi yaide, tama te isali wai agai pibo be habu badu te agai betde munalubo suali.
2KI 4:33 Awe, aga te pibo be habuba tula pelama, tama tų paliali, tama aga gedu halua selama, po Genuai Bidibolo wali.
2KI 4:34 Tama aga te bet saiba hola solama, tama aga te wai tigi munalubo madigi aga kidu sugunama, aga tobolu te wai tigiba ugwadu daiba basi gulai, tama Elisa agai e tama tiali, agai pedauwali me, te gedu me, te nogo me, tama te waigo nogo me, pedauwali me, te gedu dabe dali ugwa badu sebedi usubo ąǫ elama, ususu si yai. Elisa agai tama tibode te wai tigi posolo dwasianu yali.
2KI 4:35 Tama tialima, Elisa te bet saide bidali tagalama, te be tomo habude dwasianu tama bilali. Tama aga ma pelama, te wai bau boalu kidu sugunani. Tama tibo si, te waigo asiga weyu, te nogo a olama, me badu nogo si wagi solama sogo asiga wali, tama te waigo gedu me pedali.
2KI 4:36 Tama Elisago te aga sę ebo bidi Gehasi i olama, tama agabolo e tiwai po tama wali, “Nage pelama, e wai aga ida asao po wagi pao,” wali. Awe, tama Gehasigo te po odama pai, tama te wego te be peduba ugwa holama, tama te Elisa pibo be habuba tula pali, tama Elisago te webolo e tiwai po tama wai, “Tama nago e wai sela pao,” wali.
2KI 4:37 Awe, tama te wego kidu sugunama, tama aga tobolu te Elisago sągą page pąde te tǫba te wego tobolu tǫba ponani, tama te Elisabolo genuai nogi mawainu te sę yai, tama nosali aga hodaluama, tama aga wai selasa pai.
2KI 4:38 Israel bulude te dwai bodolu sogo me deli pedalali. Tama te we bidi dabe augwaligo tuabo nai mu menia sali. Tama te sogo Elisa aga te Gilgal hanuba tama ma geasa pelama, bidigi pai. Me sogo bodolude deli sogo, me badu profet bidi dabe augwali te Elisa pageba asama, agade skul olama, kolesaga sali. Tama augwali dugulama, tama te Elisago po odoyu bidali. Tama Elisago aga sę ebo bidibolo e tiwai po wai, “Genuai mouwa dage kenage sospen selama, tama te profet bage tuabo nai dali, te keba me, te sup ulao,” wali.
2KI 4:39 Tama profet bidi me deli pelama, te sup dwanai dali ulabo keba gegegi pai. Tialima, te agai te bulu bobi sulama, agai homugo te dwagi yai tubo bobi da, homu yali. Tama tialima, agai te bulu wel bobi umabo mu sali, tama aga name ugwaba togolama muani madigi, te aga name ugwa mu pągąwai. Tama agai te beba sela asama, tama agai te hwą ge selama, te totogolama, tama te keba sup nai dali ulai.
2KI 4:40 Te dwanai sup yali nai dali, awe, tama augwaligo te pouba muna muna pali, te profet bidi dabe augwa tumainu. Tiali goli, augwaligo te tubode, te augwaligo pedauwalide sup dwanai ha yali, tama augwaligo Elisabolo i e tiwai tama wali, “Nage Godigo profet bidi dao, te sup dwanai ha dwai mu ebo. Dago tugobeo, da isidalio,” wali. Tama tibaso, augwaligo homugo te nai tugobeo homu yai.
2KI 4:41 Awe, tama Elisago te po wali, “Te wit siago nigali te o gagawai plaua selasa asao,” wai. Augwaligo selasa pelama, tama Elisago agai te mouwa dage kenageba sąyani, tama te aga sę ebo bidibolo e tiwai po tama wali, “Tama te sup dwanai augwaligo pouba ma muao, tama te profet bagego tumainao.” Tama augwaligo tuali, tama te sup dwanai te augwaligo pedauwalide megi ma ha ebe.
2KI 4:42 Nosali me sogo deli, bidi me deli te aga Balsalisa bulu tagalama, tama te Elisa pageba asali. Te sogo te sia gagawai wit togobo sogo, tama nedu bali du gide tau ebo sogo. Tama te hasia sogo augwaligo te nai bali du togwali, augwaligo te dwasianu bret skon nigainu. Tama tibo bodolu sogo, te bidi Elisa pageba asali, te bidi agai te me badu te sia gagawai wit selasa asai, tama te augwaligo te togwali sia gagawai nai witgo nigai bret agai te bidi sese deli tama selama, tama aga begba bulama, sela asai. Tama Elisago te aga sę ebo bidibolo e tiwai po tama wali, “Te nai te profet bidi dabe mao,” wali.
2KI 4:43 Tiali goli, aga sę ebo bidigo e tiwai po tama wali, “Tialima, e nai dwasianu mu dao,” wai. “Magi elama te e dwasianu naigo te bidi sese a naga, 100 bidi mena tama usu yaibawe?” Awe, tama Elisago agai po wei ponoyu, e tama po wai, “Po menio, te nai augwali mao,” wali. “Magi basowe, Genuai Bidigo e tiwai po tama wai dao, ‘Tigidaligo te nai tuao, tama te nai me badu me munaluaibao,’” wali.
2KI 4:44 Tama te sę bidigo te agai profet bage augwali te nai mawai, tama augwaligo te nai tuali. Tama augwaligo tulama, tabi mu pągąna pali, tama me badu me munaluali, Genuai Bidigo wali poba usu nigi pali.
2KI 5:1 Te Naman aga te Siria bulude ami polalubo ofisa tobolu bidi da. Siria bulude bidibo kingo te bidi agade godolo mu elama, tama agai moni homu pemene mu yai, magi baso meni, te bidi Naman aga nogo tų yaide te God Genuai Bidi aga digi te Siria ami bidi dabe augwali tau siyu, tama augwaligo te boi bidi dabe aiyaba elaluali. Naman aga te dwagi yai ami bidi mu, tiali goli aga tigide oiyabe gasi yali.
2KI 5:2 Me sogo deli Siria ami bidi dabe augwaligo te Israel bidi dabe dali boi hwįgi pai, tama augwaligo te Israelgo wegi ogwa we me deli nogo tulama, augwa buluba odasa soali. Tama te wegi te Namango wego sę ebo we nigilama bidai.
2KI 5:3 Nosali te Israel wegi ogwa wego te Namango webolo e tiwai po tama wai, “Tialima, te naga bidi aga pelama, te Samaria bulude bidibo profet bidi sugi pobaso da, teda te dwagi yai mu yaibao. Magi baso meni, te profet bidi agai nago bidi te gasi ma usu ilaibao,” wali.
2KI 5:4 Te Namango te po odama, tama aga pelama, te king agabolo wagi pali, te Israel wegi ogwa wego wali po wagi pai.
2KI 5:5 Awe, kingo agabolo e tiwai po tama ola mani, “Eno pas me deli asęnama, te Israel bidigo king bidiba tolaibao. Te pas eno nagebolo menama, tama nago sela pelama, agabolo magi pagameo,” wali. Tama kingo pas asęnama, te Namanbolo mawai, tama Namango te 300,000 silva mone sobadi, tama me te gol te sęgę bidi sese sela 60 kilogram gol sobadi, me te nogo si dwagi yai au ebo bulubo ugwa sobadi elama, tama aga hodaluama, te Samaria buluba pai.
2KI 5:6 Tama te Namango te Siria bidi dabego king bidigo te pas selama, tama agai sela pelama, tama te Israel king bidibolo magi pali. Te pasde e tiwai po wali, “Te pasgo te eno ami sę ebo polalubo ofisa bidigo sęgę po nagebolo konelaibao,” wali. “Naman aga te oiyabe gasi yalio, tama eno homugo te nago aga ma usu ilao,” wali.
2KI 5:7 Israel kingo te Siria king agai te pas sulama, tama agai te aga holobo ugwa pisą yali. Aga te ugwa pisą yali te aga haligade sębę dwai mu ebo page ola mayu, tama tiwai. Tama agai e tiwai po tama wai, “Magi elama, te Siria king bidigo te po enabolo tolali, eno menagi elama, e bidi oiyabe gasi dodolomainu waliwe? Agai homugo ena God da weyu, tama te bidi dabe bugagia bidibo me, ma te bidi isibo me, te bomo agai homugo eno elalubawe weyu, waliwe, a? Eno koneanio, agai homugo ena dali boi hwįainu tų gegeyu walio, te tama dao,” wali.
2KI 5:8 Tiali goli Elisa, te Godigo sę ebo profet bidi, agai te kingo te holobo ugwa pisąlama, te haligade sębę ebo po odali. Tama tibaso, Elisago te kingbolo e tiwai po ola tolali, “Magi baso nage haliga sęgę elama, tama naga holobo ugwa pisą yaliwe? Te bidi ena pageba eba tagala palao, tama eno aga e tama ola mawaibao, te Godigo profet bidi me deli te Israelgo bulude bidibao,” wali.
2KI 5:9 Awe, kingo Namanbolo te po wai, tama Naman aga te kibu hosgo kegebo karis nai Naman aga tede dugulasa pali. Te me badu karis me te bidi aubo hos kibu me aga dali augwali hodobo pali. Tama augwali hodobo tama pelama, te Elisago be tųba sabaligi pali.
2KI 5:10 Tama Elisago bidi me deli tagala palama, te bidigo Namanbolo e tiwai po tama walali, “Nage te wę Jordan teba pelama, te nogo a olama, me badu nogo si wagi solama sogo, nage tama sogo wę pauao. Tama teyu, nago gasi silaibao, tama naga tigi wiegi yai tigiwali yaibao,” wali.
2KI 5:11 Namango te po odama, tama agai wado dwai mu yali, tama te Elisago be tagalama pali. Tama agai te po wali, “Eno homugo Elisa aga buluba tią asama, agai ena sumainu homu yaio. Tama agai Godibolo mu gedu haluasa po omainu eyu, aga Genuai Bidi dolo, tama agai nogo ena e gasi oiyabe keni yai tigiba pąba mugi sogo da usu, tama agai te kolesaga egi sogo da, teda ena ma usu egi dao. Tiali goli, menio.
2KI 5:12 Agai enabolo Jordan wę paugi pao, te po wali. Tiali goli, Damaskus bulude wę si elalubo, te wę si nogi Abana me Farpar, te wę sigo Israel bulude elalubo tigidali wę dabe aiyaba elaluai dao. Tiali te wę dabede tegi sogo da, teda eno oiyabe gasi ma usu egi dao. Tialima, ena bulude bidigi sogo da, tama ena te wę si paubo si, teda eno oiyabe gasi ma usu egi dao.” Namango te po wali, tama agai haligade sębę genuai me elasa peyu, aga pali.
2KI 5:13 Awe, aga sę ebo bidi dabe augwaligo tama augwali aga pageba aselama, te po wai, “Genuai bidi, tialima profet bidi agai nagebolo tigi dene yabo sę po nagebolo wagi sogo da, dago koneanio, tama nago te sę egi da. Tialima, agai te tiwai po me wabeo. Menio. Tialima, agai nagebolo wę deli pauao po walio,” wali. “Tama tialima, dwagi yai dao, tialima nago agai po wali pelama, nage wę pauagameo,” wali.
2KI 5:14 Awe, tama Namango augwaligo te wali po odama, tama aga pelama, wę nogo a olama, me badu nogo si wagi solama sogo Jordan węde pauali, Elisago te po wali gilama, tama tibo si agai te oiyabe gasi tigidali sia sali. Tama agai tigiwali te dwagi yai elama, te gesi wai bǫų tigiwali tiwai pedelali.
2KI 5:15 Tama aga dali, te aga sę ebo bidi dabe dali, augwali hodobo ma geasa peyu, te Elisa pageba sabolali. Te profet te Godigo profet bidi mu. Tama te Namango Elisabolo e tiwai po tama wali, “Mu tamao, megi eno koneanio, e tigidali bulu tǫde god me deli me bidibeo. Israel dagego God, te God deligo tigidali bulu usu elalubao. Tama tialima, Elisa, eno genuai bidi, eno homugo eno nagebolo eno puba hwi wabo nai nagebolo mawaio,” wali.
2KI 5:16 Tialima, Elisago te po wei ponoyu, te po wali, “Menio. Ena te tigidali sogo bidada pabo Genuai Bidi Godigo sę ebo bidi dao. Tama agai nogide, eno mu po obao, eno nago magi nai me deli munu me deli sogobeo,” wali. Naman agai bomo mu eyu, “Elisa nago eno nagebolo puba hwi wabo nai nago sao,” wali. Tiali goli, Elisa agai hagela ebo, tama agai sogobeo.
2KI 5:17 Namango te po wai, “Tialima, nago homugo te puba hwi nai enade sogobe wida, awe, teda tagalao. Tialima, eno homugo nago ena sula tagalao, eno te Israel bagego tǫ me eno saio, dwasianu te eno donki kibu sigo tolabo usu nuo, tama ena buluba ma peyu, selasa paio. Te tǫ aiyadu munama, Genuai Bidi dolo denami yai ofa nai ulabo madigi sai yainu, alta ugwa badu te Genuai Bidi dolo denami yai ofa nai ula mabo sę yaio. Tama nosali eno te ofa nai siaba ulama, te siago tigidali ulama, te siago tigidali nai dela pabo ofa nai me, tama te gasa ofa nai me, te genuai mu deliba tama sisinama, ulaio. Tama eno te gasa tibo godiba ofa nai ula magobeo, eno munu ma usu egobeo. Mu menio.
2KI 5:18 Tiali goli, eno homugo nago eno sęgę koneao, tama Genuai Bidi agai eno te dwai kolesaga yali sęgę sela sąmainao. Te eno king bidi agai te tibo god Rimon godiba lotu po wagi pabo dao. Tama ena aga dali bidibo. Tama da te lotu be tomoba pabo sogo, kingo ena nogo tolasa pabo da. Tama teyu, te agai te tibo god Rimon lotu po weyu, kidu sugunubo dao. Agai ena kegasa pabo dao, tama eno me te eno te tibo god noma elalubo madigi te pąba pelama, eno kidu sugunubo dao. Tama eno homugo te Genuai Bidi God agai eno te sęgę sela sąmaio,” wali.
2KI 5:19 Tama Elisago te po wai, “Nago haliga sęgę egio,” wali. “Nago haliga tegaluama, tama nage pao,” wali. Awe, tama te Namango Elisa taga pali. Tialima, Naman digibulu pisąbadi,
2KI 5:20 tama Gehasi, Elisago sę bidi, aga digi e tiwai po aga homude tama wali, ‘Eno genuai bidigo te Naman olo pabo sula tagalali. Magi baso agai Namango te Naman aga homugo te aga dolo mawainu yali nai sabewe? Genuai Bidi God aga te tigidali sogo bidada pabo dao. Te mu po dao. Tama te tiwai gilama, eno mu po tama obao, tama ena Naman aga pali wali ma udada pelama, tama me badu agai te nai eno saio,’ Gehasigo te homu yai.
2KI 5:21 Tama aga hodaluama, te Naman pali wali pai. Namango tonobadi yaide, bidi me deli udada asu, te aga wali asobo suali, tama tibaso aga te karis kibu dąų walama, tama aga tǫba dulama, tama te tų tilide dolaluali, tama Gehasi asama, tama aga sisinagasali. Tama Namango Gehasibolo e tama tiwai po hanalu wali, “Magi nai me deli dagede pedalaliwe, a?”
2KI 5:22 Tama Gehasigo te po wai, “Menio. Da bugagia bidibao. Tiali goli, eno genuai bidigo ena tagala palama, e tiwai po nagebolo tama wagi soao obaso, ena asobao,” wai. “Megi tama bolo te profet gesi bidi si agai beba asalio. Te profet bidi si augwali si te bulu du Efraimde bidibo profet hani dao. Tama agai homugo te nago aga silva mone beg me deli badi, me te dwagi yai bulubo ugwa si ebadi elama, mao wali. Tama Elisa agai te profet bidi dabe augwaliba mawaibao,” wali.
2KI 5:23 Te po obaso Namango te po wei ponoyu, e tama po wali, “Deli silva beg naga sigio, me silva beg me sao,” wali. Tama agai te Gehasigo sao olama, bomo yali, tama Gehasi agai te po usu dao wali. Tama tialima, Namango te beg side silva muani silva te 60,000 kina mone usu te beg side bulali. Tama me te agai te dwagi yai holobo ugwa si me sela mani, tama agai te nai dabe selama, tama aga te sę ebo bidi sibolo mani, tama agai augwali sibolo te dodobage tolao po wali, tama dage si polasa pao wali, Gehasi aga Elisago beba polasa pali.
2KI 5:24 Augwaligo te Samaria bulude te Elisago beba sabalobo sogo, Gehasigo te nai dabe tolama, te be tomoba selasa pali. Tama aga te sę ebo bidi si te Naman pageba tagala palali.
2KI 5:25 Te bidi si paide, tama aga te beba ma pai. Tama Elisago agabolo hanalu wali, “Gehasi, nage mena pai, tama nage asobawe?” Tama Gehasigo te po wali, “Genuai bidi, ena gasaba me pabeo.”
2KI 5:26 Tiali goli, Elisago te po agabolo wali, “Menio, nago tibo po wabuo. Nago homugo da, eno nage subewe weyu obawe, a? Eno mobo nage dali bidibadi, tama eno sulali da, te bidi te kibu karisde duga yali tagaluyu, nage pageba asobo sualio,” wali. “Gehasi, megi da, te mone selama, te holobo ugwa me, me te oliv gi me, tama me te wain gi me, tama me te sipsip kibu me, tama me te bulmakau dabe me, tama me te sę bidi dabe me, me te olo sę we dabe me, te abelabo sogo megi menio.
2KI 5:27 Tiali goli, nago te Naman dali te mone me te haniani dodobage salio,” wali. “Tama tialima, te Namango tigide elaluali oiyabe gasi, megi te nage tigide pedalaibao. Tama nage dali, te naga hani te nosali pedalobo hanide, dage te oiyabe gasi tigidali sogo sesa peduagameo,” wali. Tama te Gehasigo te Elisa taga pabo sogo, te Gehasi te oiyabe gasi sali. Tama agai tigi usugali tigidali te tedela yai mugo sela pali.
2KI 6:1 Elisago te me badu profet hani dali bidiyu, tama augwali tonaluali. Tama me sogo deli te profet bidi dabe augwaligo agabolo e tiwai po tama wali, “Dago te be dwasianu mu dao, tama da usu egobeo.
2KI 6:2 Nago da tigidali te Jordan węba tama ni togogi pabo usu yaibawe? Tama dago gesi be me sę yaio, dago te be Jordan wę sesegede sę yaibao,” wali. Tama Elisago te po wai, “Usu dao, dagego be sę yao.”
2KI 6:3 Tama profet bidi me deligo agabolo e tama hanalu wali, “Mu tamao, genuai bidi, dago homugo nage da dali asao.” Tama Elisa agai te po wali, “Usu dao, ena dage dali asaibao,” wali.
2KI 6:4 Awe, tama aga augwali dali pali. Augwali te Jordan węba sabolama, tama te augwaligo te ni gelebo gagalali.
2KI 6:5 Tama augwali te sę eyu bidali, tama profet bidi me deligo agai sigi hwą ge osaga peyu, te Jordan węba tula pali. Tama te profet bidi agai aga te sigi hwą agai sabo usu ebe, tama agai e tiwai i Elisabolo tama wali, “Genuai bidio, homu dene mu dao, ena gasa bidigo hwą osogo sesalio, tama megi te hwą węba tula palio,” wali.
2KI 6:6 Tama Elisa, te Godigo profetgo, e tiwai po tama hanalu wali, “Te hwą menade tula paliwe?” Tama profetgo te Elisabolo te hwą tula pali pesage ola mani. Awe, tama Elisago ni nologo dwasianu toga selama, tama te węba sąyani, tama te hwą wędu aiyadu edaba pedalu gulama, ąį daide pilali.
2KI 6:7 Tama Elisago te po wali, “Megi da, nago te hwą sao,” wali. Tama te profetgo aga dulama, aga nogogo te hwą sali.
2KI 6:8 Te Siria king bidigo aga ami bidi dali aselama, te Israel bidi dabe augwali dali boi hwįagasainu yai. Tama kingo te aga sę ebo gavman ofisa bidi dabe dali po miai, tama te ofisa bage augwalibolo te kem nigilama, bidabo pesage nigigi pomainu augwalibolo po ola mani.
2KI 6:9 Tialima, Elisa, te Godigo profet bidigo, agai te Siria bidi dabego kem nigilama bidabo pesage te agai koneai, tama agai te Israel king bidibolo po konelani, tama me te Israel kingbolo te po dali tama wali, “Dage te Siria bage augwali bidibo pesage pąba pigio,” wali. “Tama dage Siria bage augwali bidibo madigi pąba peyu da, teda augwaligo dage dolaibao,” wali.
2KI 6:10 Tama te Israel king bidigo te po odama, tama te agai te soldia ami bidi meba tagala palama, te ami bidi dabego te Siria bagego kem nigilama bidabo pesage sugi pomainu tagala pali. Tama te Siria bage teba te buluba pedalobo sogo, augwaligo suali, ma te Israelgo ami bidi te pesagede bidibo suai. Tama tibaso, augwaligo kem nigilama bidabo pesage nigibo usu meni. Te tobage kolesaga hauwa sogo mu pedalali.
2KI 6:11 Tama Siria king bidigo te tobage sę pedalubaso, agai homu kolesaga hauwa sogo mu eyu, moni homu elama bidali. Tama tibaso, agai aga sę ebo gavman ofisa bidi dabe augwali agai i olama, tama augwali asobo si, e tiwai po tama hanalu wali, “Enabolo wao,” wali, “da hani niwai bidi me deligo te Israel hani king bidi tigidali sogo tau siduai dawe?” wali.
2KI 6:12 Tama aga sę ebo gavman ofisa bidi me deligo te po wei ponoyu, e tama wali, “King, da hani bidi me deligo te Israel king bidi tau me sai menio, mu menio. Tialima, Elisa deli digi dao, te Israel bage augwaligo profet bidi. Te profet bidi agai te tigidali nai dabe, dago homugo yaibao wabo sę dabe me, agai koneama, te aga Israel king bidibolo ola mabo dao. Elisago nago te tigidali po wabo te agai konea palio, naga te pibo be habude bidiyu wabo po me, me nage te geme wabo po me, te Elisago konea palio,” wali.
2KI 6:13 Tama kingo te aga sę ebo gavman ofisa bidi augwalibolo e tiwai po tama wali, “Dage pelama, te Elisa mena badu pedai badu bidibo wenama, kegegi pao,” wali. “Tama dagego te ami soldia bidi dabe selama, tama dagego te nogo tulama, kegasa asiąo,” wali. Augwaligo tama kegegi pelama, tama Elisa aga te Dotan hanude bidibo sualio.
2KI 6:14 Tama tibaso, kingo te umabo ami soldia bidi dąį ilama, tama agai te bidi duabo hos kibu me, me te karis kibu dali, tama augwali te Dotan hanuba tagala palali. Tama augwali hulide sabolama, tama te augwaligo te taun bobegela sali.
2KI 6:15 Tama kigamu hulide mu Elisago sę ebo bidi hodaluama, tama aga buluba teda soali, tama agai subadi yaide, te Siria ami bidi dali, te hos kibu me, me te karis kibu me, tama augwali augwa te nai dabe dali asama, te taun bobegela saiali. Tama aga pelama, tama te Elisabolo e tama po walali, “Genuai bidio, te Siria bidi dabe augwali asama, da nǫ bagua sai yabuo,” wali. “Megi tama dago magi yagawe?” te po hanalu wali.
2KI 6:16 Tialima, Elisago agabolo te po wali, “Wi egio, tagalao,” wali. “Tialima, mu tama, augwaligo umabo ami bidi bidibo, tiali goli dago me, te da tau sabo hani te genuai mu dao,” wali.
2KI 6:17 Awe, tama Elisago agai e tama God dolo gedu haluasa po wai, “Genuai Bidi, nago te bidi gedu pedelao, tama agai te eno te po wali bidi hani agai sumainao.” Tama tialima, te Elisago sę ebo bidi te agai gedu te Genuai Bidigo pedelama, tama te sę bidi agai suali, ma te gasa hos kibu me, te karis kibu me, te augwali asama, te Elisa bidibo bulu duba usu na sai yali. Te hos kibu me, me te karis kibu me, te bidi dabe me, augwali te isi bogoli ula gagawai mu tiwai pedelai.
2KI 6:18 Awe, tama te Siria bidi dabe augwali asama, te Elisa pageabi yai hagede yai. Tama Elisago e tama God dolo gedu haluasa po wali, ““Genuai Bidio, eno homugo nago te Siria hani augwaligo gedu te hulia palama, tama augwaligo bugagia tonalubo usu me igio,” wali. Tama tialima, Genuai Bidigo tama augwaligo gedu hwidilali.
2KI 6:19 Tama Elisa aga pelama, te Siria bage augwali bidiboba pelama, tama augwalibolo e tama po wali, “Tialima, dage kekede asalio,” wali. “E tų da, tea dage te hanuba pabo dage usu egobeo, te duga homugo soainu yali taunba sabalogobeo. Usu dao. Dage ena wali asiąo, tama eno dage odasa pelama, tama dagego te kegebo sę ebo bidi bidibo madigi sabolagameo,” wali. Awe, tama augwali aga wali pali, tama agai augwali odasa pelama, te Samaria taunba tagaligi pali.
2KI 6:20 Tama augwali te taun tomoba pela silali, awe, Elisago e tama gedu haluasa po wali, “Genuai Bidi, nago te Siria bage augwali gedu ma pedelama, ma usu ilao,” wali, “tama augwaligo gedugo bugagia usu nama tonomainao.” Tama Genuai Bidigo augwaligo gedu ma usu ilali. Tama augwaligo e tama suali, ma te augwali te Samaria taun tomode bidibo suali.
2KI 6:21 Te Israel king bidigo sualima, te Siria bidi dabe te taun tomode bidibo sulama, tama agai te Elisabolo e tama hanalu wali, “Genuai bidi, tialima eno augwali elama, isilagawe, a?”
2KI 6:22 Tiali goli, Elisago te po wali, “Menio. Elegio,” wali. “Tama nago te hwįbo sogo te boi bidi dabe tuao wali, nago augwali me elama, isilibo menio. Tama teyu, nago te hani augwali nago eligio. Menio. Tama dago augwali nai bugagia mao, tama augwali augwa king pageba nosali sabalu,” wali.
2KI 6:23 Tama tibaso, te Israel king bidigo moni nai mu dodolama, tama te Siria bage augwali mani. Augwaligo te nai dabe me, te ąį dabe me, tula silama, tama agai augwali augwa te Siria king bidi pageba tagala palali. Tama te sogo te Siria bage augwaligo te Israel bage augwali dali munu ma hwįagasobe.
2KI 6:24 Me badu kibu be sia sali, tama te Benhadat, Siriago king bidi, agai te tigidali soldia ami bidi sisinama, tama augwali pelama, tama te Samaria taun bobegela sali, tama augwaligo te Samaria hani bidi dabe dali hwįainu tama tiai.
2KI 6:25 Tama te sogo te Samaria bage augwali nai menia sai, te nasi ebo bodolude da, tialima te Siria bage augwaligo bobobage sogo mu te taun bobegela selama bidali. Tama Samaria bage augwaligo te nai me te taun tomoba magasobe. Tama tialima, bidi me deli aga homugo te donki kibu tobolu abela tuainu da, teda mone bidi sese sigo abelao wali, 80 kina. Tama tialima, bidi me deli aga 250 gram sęgę ba di tiwai tubo nai ge abelainogo da, teda agai te ni yabe si podolai, te 5 kina, te monego abelemainao.
2KI 6:26 Me sogo deli te Israel king bidi aga te taun moni masigigo nigai obo banis te ugwadu te daide pai, tama we me deligo aga i weyu, e tama wali, “Eno king, nago ena tau sao,” wali.
2KI 6:27 Tama kingo e tama po wei ponani, “Tialima, Genuai Bidi Godigo nage tau sabo usu esiąbasowe, tialima eno mena tama nage tau saibawe? Nago homugo eno te sia gagawai nai wit me, me te wain wę, te nai si eno bede me munalubaso, nage tau somainu obawe, a?”
2KI 6:28 Awe, tama kingo aga hanalu wali, “Nago homugo eno mena tama nage tau somainu obawe?” Tama te wego te po wei ponoyu, e tama wali, “Ena dali, te e wego aga dali, dadi sigo e tama po olama dąų wai, tama dadi sigo te po wai, hasia eno ogwa bolo elama tuaibao wai, tama nosali dadi sigo te agai wai elama, tuaibao wai.
2KI 6:29 Tama tialima, dadi sigo te eno wai elama, tama dadi sigo te wai nogelama, tuai dao,” wali. “Tama nosali eno te po wai, ‘Megi da, nago wai te dadi sigo elama, tuinao,’ wali. Tiali goli, agai wai elebeo. Menio. Tama agai aga wai dualigi pali,” te wego te po wali.
2KI 6:30 Kingo te po odali, tama aga holobo ugwa pisą yali, magi baso, te agai haligade sęgę mu yai. Tama aga te taun obo banis ugwa badu daide dolalua pai, tama me te tigidali we bidi augwaligo te agai homu dene eyu holobo ugwa holama, bilibo tigidali we bidi augwaligo usu nama suali, king agai holobo ugwa dologode kęai elalubo suai.
2KI 6:31 Tama kingo te po wai, “Elisa aga te dago e sęgę yabo te agai page dao. Megi tama e bubugade eno te agai mage togoluyu, aga tobolu sąwaibao, tama megi aga isaibao,” wali, “tialima, eno homugo te eno tama tisąyu da, teda Godigo agai ena elama, isilimainao.”
2KI 6:32 Kingo te po tama olama, tama agai te Elisa eligi pao olama, tama agai bidi me deli tagala palali. Te sogo Elisa aga dali, te Samaria tobolu bidi dabe dali, tama te aga bede te aga dali bidai. Te bidi te kingo tagala palai bidi, te bidi aga sabalisiąbadi, te Elisago e tama po te tobolu bidi dabebolo e tama po ola mawai, “Dago king bidi, aga bidi ela mubo bidi dao. Tama megi agai te bidi me deli ena dogoni togomainu tagala palali dao. Tialima, te sogo te bidi asama sabalobaso da, tama dagego te be tų dąų olama, paiąo,” wali, “tama aga e be tomoba asobo usu egobeo. Tama te nosali te king aga me te bidi wali tama asobao,” wali.
2KI 6:33 Elisago po odubadi yaide, tama te kingo tagala palali bidi sabolagasobadi yaide, te king bidi tama asama, sabolagasali. Tama kingo Elisabolo e tiwai po tama wai, “Genuai Bidi aga digi te bodolu sogo dwai mu da tigide pedalai dao,” wali. “Tama dago agai da nai me deli tau somaio olama, tama magi baso dago aga me tonaluaibawe?” wali.
2KI 7:1 Tama te moni nasi ebo sogode Elisago te po wei ponoyu, e tama wali, “Mu tama dao, odao. Genuai Bidigo te po wai, ‘Do tama tibo sogo bodolude, te we bidi dabe augwali te taun sunumi pąde elalubo maket teba peyu, tama augwaligo te 3 kilogram te witgo nigai dwagi yai plaua abeligi paibao, me te 6 kilogram rais bali, te podolai monego abeligi paibao’ tama wali.” Elisago te po wali.
2KI 7:2 Tama te king tonaluyu tau sabo gavman ofisa bidi me deli aga te king dali asali. Te bidigo te Elisago wali po odali, awe, tama agai te po wei e tama ponani, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego dago nai abelebo me usu egi menigi da,” wali. Tama Elisago te gavman ofisa bidibolo te po wai, “Mu tama dao, tama nago te nai pedalobo suagameo, tiali goli nago te wit nai dabe munu me tugobeo,” Elisago te po wai.
2KI 7:3 Te sogo te bidi me si me si tama bidi tigide te oiyabe gasi yai bidi, te bage te Samaria taun tomoba pabo moni tų te bulu badu te me si me si tama bidi augwali tede bidai. Tama augwa naga po miyu, e tama po wali, “Magi baso da ede naga olo bidiyu, tama te isibo bodolu naga tonalubo wagawe?” te po wali.
2KI 7:4 “Da pelama, te tuabo nai kegegi pinao,” wali. “Tiali goli, da te Samaria taun tomoba pogobeo. Augwali te tuabo nai meni, tama teyu nasigo da me isaibao, tama me ma te tiali, tama da e pesagede naga bidalu da, teda da me isaibao. Tialima, da te Siria bage bidibo pesageba pinao. Tama tialima, augwaligo da me elebaso da, te usu dao. Tialima, augwaligo da sula tagalama, da bida obaso da, teda usu dao,” augwaligo augwa hasi te po wai.
2KI 7:5 Tama tialima, te pio mu augwali hodaluama, te Siria bidi hani bidibo pesageba pali. Tama te Siria bage bidibo pesage pąba sabalobo sogo, augwaligo suali, ma te pesagede bidi me deli bidibo sube.
2KI 7:6 Magi baso, tigidali te Siria bage wi pela silai suali. Te pio mu, te Genuai Bidi aga digi te Siria bage augwali wi pomainu genuai po mu kulukulu u wai, te Siria bage augwaligo odama, tama tialima, te genuai hani ami bidi dabe te bidi duabo kibu hos me, me te karis kibu dabe dali, augwali hodobo asai tiwai ąǫ yali. Tama te Siria bage augwaligo te po tama wai, “Tialima, te Israel bage augwaligo te Hit king bidi badi, te Isip king dabe dali, augwaligo abelama, tama te ami bidi dabe augwaligo da dali hwįagasainu wabao,” wali. Siria bagego te po olama, tama te augwali bidali pesage polo tagalama, tama augwali polo tama mu hodaluama, isidali weyu wi pai. Augwaligo te sel ugwa be me, te hos kibu me, me te donki kibu me, augwa naga tede bidibadi taga pai. Tama augwali wi pai, tama augwali peyu, magi nai me deli sela pabe.
2KI 7:8 Tama te sogo te me si me si tama bidi augwali te Siria bidi dabe bidali pesageba sabaligi pali, augwaligo pelama, te sel ugwa be me deli tomoba pali, tama augwaligo te be tomoba subadi yaide, te Siria bagego tubo nai me, te wain ąį me, te be tomode munalubo suali. Tama augwaligo te nai selama tuyu, te ąį me selama tuyu bidali. Tama nosali augwaligo te silva me, gol me, ma name ugwa me, te Siria bagego doado bage hauwa mu augwaligo selama, tama te tolasa pelama, te gasa madigi me deli dualigi pai. Tama augwali ma aselama, tama augwaligo te me sel ugwa bede muani doado bage dabe me ma sali. Tama augwa ma tolasa pelama, gasa madigi me dualigi pali.
2KI 7:9 Tama nosali augwa digi augwa tomode po miyu, te e tiwai po tama wali, “Tialima, dago dwagi yai kolesaga ebeo. Megi dago dwagi yai nai mu sualio. Tama da pelama, te tigidali we bidibolo wagi pinao,” wali. “Tialima, dago te pedauwali dąų ola selama bidiyu, tama te be posoboba usu nigi peyu da, teda dago sęgę mu elaluaibao. Polo tama, da megi pelama, tama te kingo sę ebo gavman tobolu ofisa bidi dabe augwalibolo wagi pinao,” wali.
2KI 7:10 Augwali te hulide tama augwali te Samaria buluba ma geasa pai. Tama te taun tų tonalubo bidi dabe augwali i wagi peyu, e tama wai, “Da te Siria bage bidali pesageba pai dao. Tama dago suali, ma bidi me deli bidibo subeo,” wali, “tama te bidi dabego po wabo dago odobeo,” wai. “Te Siria bage augwali pela silai, tama te augwaligo tigidali doado bage te augwa bidali pesagede taga pela silai yalio,” wali. “Tama te doado bage munalubao. Augwaligo te hos kibu, me te donki kibu, me te gebelali haliga augwaligo te peda palebe yalio,” wali. “Menio. Te kibu dabe te haliga kebealu bidibo, te Siria bage bidali pesagede bidibo sualio. Tama te tubo nai me, te tigidali doado bage me, te sel ugwa bede me munalubo,” tama po wali.
2KI 7:11 Te taun obo sunumi tonalubo bidi dabe augwaligo te po odali, tama augwaligo i weyu, tama te we bidibolo po olama, tama te po te kingo beba pusugi pao wali.
2KI 7:12 Huli tomode mu kingo te po odali. Tama aga hodaluama, te aga sę ebo gavman ofisa bidi dabe augwalibolo e tiwai po tama ola mani, “Eno koneanio, te Siria bagego homu kolesaga. Augwaligo koneani, ma dago tuabo nai mu menia sobaso yalio. Tama tibaso, augwaligo te bidali pesage taga pelama, tama augwali te kala dasuba duala sali bogo. Augwaligo te homu yai, tama dago te taun tagalama, buluba pali bogo homu eyu, tama augwaligo homugo da pageabi elama, tama dago te taun augwaligo sainu ebao,” kingo te po wali.
2KI 7:13 Tama te gavman ofisa bidi me deligo agabolo te po wai, “Tama dago bidi me badu tagala palama, tama augwali pelama, te Siria bage wi pali page te magi nai me pedalubaso wi pai yabo wenama, sugi pomainao,” wali. “Tama tialima, te Siria bage augwaligo te dago e tagala palobo bidi dabe me ela muai baso da, teda usu dao, magi basowe, da tigidali te taun tomode te bidibao, da dolabo me hasia te tolali bidi hani isilali gilama da me tama isilaibao. Tama tialima, dago te me badu bidi dabe augwaligo te e bidibo a naga hos kibu selama, tama augwali pomainao,” wali.
2KI 7:14 Awe, tama tialima, augwaligo te bidi me badu dąį ilali. Tama te kingo te karis kibu si badi, me te hos kibu badi elama, te bidi dabebolo mani. Tama te bidi dabe tagala palama, tama augwali pali, te magi naigo te Siria bage bidibo pesage gudulali wenama, sugi pai.
2KI 7:15 Te bidi dabe augwali pelama, kegegi pali bage e tiwai tama suali, te Siria bidi dabe augwa digi wi pai suali. Tama augwali te Siria bidi dabe pali wali pelama, te wę Jordanba sabaligi pali, tama augwaligo te Siria bagego doado bage te name ugwa me, me te hwįbo nai me, me te gasa nai dabe me tama, te Siria bage augwali wi peyu, te doado bage dabe te tų sisiyu tulalua pai suali. Tama tialima, augwali ma geasa pelama, te king bidibolo pusugi pali.
2KI 7:16 Tama te sogo te we bidi dabego te nai dabe suali po odobo si, augwali polo udulama peyu, te Siria bage bidali pesageba sabolama, tama augwaligo te Siria bagego taga pali nai dabe tigidali sai. Tama augwaligo te o gagawai nai te plaua umabo mu sali, tama me te nai bali me umabo mu sali. Tama tibaso, augwaligo 3 kilogram te sęgę te dwagi yai o gagawai nai plaua, o 6 kilogram sęgę te bret bali, te nai si te maket munama, te mone podolai sabo usu naga muani, te Genuai Bidi Godigo tama tiaibao wali podu wali peyu, tama tiai.
2KI 7:17 Kingo te aga sę ebo gavman ofisa bidi, te bidi aga te hulide sę ebo konea pai bidi mu, king agai te bidi dąį ilali, te bidi aga pelama, te ami bidi dabego tonalubo madigi te taun moni tųba tonalugi pao wali. Tama te gavman ofisa bidi te taun tų pąde dolalubadi yaide, tama te we bidi dabe augwali te Siria bidi dabe bidali madi soainu soyu, tama te we bidigo udulama soali. Tama te umabo we bidi mu te tų bulu badu udulama asali, tama tialima, te we bidi dabe augwaligo te bidi agabolo hanalubadi yaide, tama aga degasa pai munalubadi yaide, tama te we bidi dabego agaga pedubadi kęnama, te bidi isiboba usu nigi pali. Polobadu te kingo Elisa sugi pali sogo, tama Elisago te agai homugo te nosali yabo sęgę po te agai koneama pusali po, te wali poba usu nigi soyu, te bidi isibo yabao wali. Megi te po te nai walali gilama, te poba mu usu nani dao wali.
2KI 7:18 Elisago te kingbolo e tiwai po tama polobadu ola mani, “Do e tama tibo bodolu tiwaide, te tigidali we bidi augwali te Samaria taunba pabo tųba naga paibao,” wali, “tama augwaligo te 3 kilogram sęgę yai te dwagi yai o gagawai nai plaua me, me te nogo a olama, te me badu nogo kibisa wagi solama sęgę yai 6 kilogram rais bali te podolai mone usu te augwaligo abelaibao,” Elisago te po polobadu gana wai dao.
2KI 7:19 Tialima, te gavman sę ebo ofisa bidi megi da mu isali. Agai Elisago po wei ponoyu, e tama po wali, “Tagalao. Tialima, Genuai Bidi God aga digi te dagalude elalubo moni bakstua tų dalama, te umabo nai daba gealugi sogo da, teda eno homugo dago e tiwai dwasianu monego nai abelebo usu egi menigi da,” te po wai dao. Awe, tama te Elisago te gavman ofisa bidibolo e tama po wai, “Mu tamao, naga gedugo digi suagameo, te nai te pedalobao, tialima nago da te wit nai nago munu me usu elama te nai tugobeo,” wali.
2KI 7:20 Tama megi te sęgę te Elisago wali po tiwai gilama te pedalobao wali. Te gavman sę ebo ofisa bidi te taun tomoba pabo tųde dolaluali bidi, tama te we bidi augwali te nai polo sainu te buluba udulama soyu, tama augwaligo te bidi degasa pai munalubadi, tama te we bidigo ugwadu agaga sodu geai madigi, tama te ofisa bidi aga mu isali.
2KI 8:1 Polobadu me sogo deli te Elisa pelama, te taun Sunemde bidibo te webolo po ola magi pai dao. Te we te polobadu aga ogwa wai isali we tama, tama Elisago agai te wai ma hodolai. Tama megi Elisa agai te webolo e tama po wali, “Genuai Bidigo te po wai, nosali dago e bulude moni nasi mu pedelaibao, tama te we bidi dabe augwali te nai menibadi, te kibu be nogo a olama, me badu nogo si, te 7 kibu beba usu nigi paibao, wali. Tama tialima, naga wai dabe me, me te naga deli hani me, tama augwali selama, tama nage gasa bulu meba bidigi pelama, tama te nasi ebo kibu be te dwai bodolu siliboba usu nigi pao,” wali.
2KI 8:2 Tama tialima, te wego te Elisago wali podu wali pai, tama te wego te aga hani dali tama augwali pelama, te Filistia buluba bidigi pali, te kibu be nogo a olama, me badu nogo si, 7 kibu be silali.
2KI 8:3 Te nogo a olama, meba nogo si wagi soabo kibu be silibo si, te we aga hani dali te Israel buluba ma begasa asali. Tama aga pelama, te kingbolo hanalugi pali, magi baso meni, te aga be me te tǫ me ma sa wabo wenama odainu hanalugi pai.
2KI 8:4 Te we te king pageba pabo sogo, kingo te Gehasi dali po miai, te Elisago sę ebo bidi. Kingo te Gehasibolo e tiwai po tama wai, “Eno homugo nago te Elisago te moni sę yali po ena dali po pusao,” wali.
2KI 8:5 Tama tialima, Gehasigo te Elisago sę yali po gagalama pusali, polobadu mu te sogo te Elisago te wai bǫų me deli isai te agai ma hodolali. Gehasigo te Elisago te sę yali po pusudubadi yaide, tama te we asama, sabolagasali, te kingbolo aga tǫ me, te be me, aga te tigidali doado bage ma sabo sula tagalaibawe olama, te kingbolo hanalu wagasali. Gehasigo te we asobo sulama, tama agai te kingbolo e tama po walali, “King, suao. Te isai hodolali wai page we, te dao. Tama te wai tama isai, tama te Elisago ma hodolali wai, te dao.”
2KI 8:6 Awe, tama kingo te webolo te Elisago te wai hodolali po te webolo hanalu wali, tama te wego king agabolo te sę yali po pusai, tama nosali te kingo te aga sę ebo gavman ofisa bidi me deli i olama, tama te bidi asobode te bidi agabolo e tama po ola mani, “Nago te we tau selama, tama aga te tigidali nai dabe, ma doado bage dabe ma somainao. Tama me te nago te aga mone sabo me tau sao, te mone te aga gide bulali nai dabe usu nama tama mao, te nogo a olama, te me badu nogo si olama kibu bede te gasa bulude bidibadi yai dao,” wali.
2KI 8:7 Me sogo deli Elisa te Damaskus buluba pai, Siria bagego moni hanu taun, te sogo Benhadat, Siria bulude king bidi bidai, tama aga gasi yai. Tama augwaligo te kingbolo e tiwai po tama wai, “Elisa, te Godigo po pusubo profet bidi, aga digibulu aselama, tama aga megi te Damaskus bulude bidibo,” wali.
2KI 8:8 Awe, tama te kingo Hasaelbolo te po wai, aga sę ebo gavman ofisa bidi me delibolo, e tama po wai, “Tama nago magi nai me deli selasa peyu, te profet bidi sugi pao. Tama nago agabolo e tama po hanalu wao, ‘Nago te Genuai Bidi Godibolo e tama hanalu wao, ena gasi ebo po te sia saibawe, ma meniwe?’ tama po hanalu wao,” wali.
2KI 8:9 Tama tialima, te Hasaelgo te me badu dwagi yai haniani te kingo doado bage te Damaskusde sai, te bidi sese si 40 kamel kibugo tolabo usu nama tama sai, tama agai te kamel kibuba munama, tama te Elisa pageba selasa pai. Tama aga Elisa pageba sabolama, tama agai Elisabolo e tama po wai, “Genuai bidio, ena te king Benhadatgo sę ebo bidi dao, tama agai ena tagala palu, te po wai, aga gasi ebo sia saibawe, ma meniwe olama, te nagebolo hanalu wagasalio,” te po wai.
2KI 8:10 Tama Elisago agai te po wei ponoyu, e tama po wai, “Nage pelama, te kingbolo wao, aga gasi da, teda silaibao. Tiali goli, Genuai Bidi Godigo agai enabolo e tama po ola manio, te king aga isaibao po walio,” wali.
2KI 8:11 Elisago te po tama ola silama, tama agai te Hasael aga bomo mu elama, gedugo tonaluai, tama tibaso, te Hasael aga te moni homu sęgę mu eyu bididubaso, tama Elisa gela mu wali.
2KI 8:12 Tama te Hasaelgo agabolo hanalu wali, “Genuai bidi, magi baso nage gela obawe?” Tama Elisago agai te hanalu wali po wei ponoyu, e tama wali, “Eno e gela wabo. Magi baso meni, eno koneani, nosali nago te dwai haniani kolesaga umabo mu te Israel we bidi augwali dali yaibao,” wali. “Nage dali, te naga ami soldia bidi dabe dali, muna siyu, tama augwaligo te bomai obo mu dolama, tama te isi ulaibao. Tama dagego te Israel hanigo ogwa bidi naga dagego elama, isilaibao,” wali. “Tama dagego da te augwali dwasianu wai puluba tola sabo ąǫ elama, tama te tǫba sąbode tama augwali isaibao. Tama dagego te haliga yai we subode, tama dagego te bainat hwą ge selama, tama te we haliga pedaibao,” wali.
2KI 8:13 Hasaelgo te po odobo si, tama te Elisago po wei ponoyu, e tama wali, “Ena olo bidi dao. Tama te genuai sęgę yai sę eno ma mena tama usu nama yaibawe?” wali. Awe, tama Elisago agabolo e tama po wai, “Genuai Bidigo enabolo e tama ola mawai dao, nage Siria hani tonaluabo king bidi nigaibao,” wali.
2KI 8:14 Augwali si te po minama sia sali, tama te Hasael aga te king Benhadat pageba ma geasa pai. Tama kingo agabolo hanalu wali, “Elisago nagebolo mena tama po ola maniwe?” Tama Hasaelgo te po wai, “Agai te po wali, mu tama nago gasi da sia selama, tama nage ma usu yaibao,” wali.
2KI 8:15 Tiali goli, te nosali te sogo Hasael agai homugo te king elainogo homu yai. Tama tialima, agai te bolo nisi ugwa agai me deli selama, tama te węba mugi pelama, tama agai selasa pelama, te king gesabidiba halua paligi pai. Tama agai bomonama mu dąų olama, halualu tolaluai, magu meni, king aga te mobo sidali weyu tiai. Tama teyu, te king isali. Tama nosali te Hasael aga te Siria hanigo king nigilama bidai.
2KI 8:16 Te Joram aga tama bidibadi, te kibu be nogo a naga pai, Joram aga te Ahapgo ogwa, aga Israel king bidi bidai, te Jehoram aga aya te Jehosafat da, aga aya king bidali pesagede selama, tama te Juda hanigo king bidi nigilama bidai.
2KI 8:17 Agai kibu be te 32, tama kibu be pelama, aga te king nigai. Tama aga te Jerusalemde king bidibadi, te kibu be te 8 yia pai.
2KI 8:18 Tama agai te Ahapgo wegi sai, Israel hanigo king. Tama teyu, agai te Ahap hani dali te Israel hanigo te me badu king dabego yali te dwai kolesagadu agai wali pali, tama agai te Godigo gedude te dwai kolesaga yaligo te sęgę sai.
2KI 8:19 Tiali goli, Genuai Bidigo te Juda bagego bulu me dolobe. Magi baso meni, Genuai Bidigo te aga sę ebo bidi bidali koneama, te bidi te Devit, tama te me agai te polobadu po bodolu me te agai muai, te po bodolu e tiwai, te king Devitgo hani me deligo te king bidi nigilama bidaibao wai. Tama teyu, te Devitgo lam sole munu ma sula sogobeo wali.
2KI 8:20 Te sogo te Jehoram te Juda hanigo king bidi nigilama, bidali sogo, te Idom hani augwaligo te po sela sąbo kolesaga genuai mu eyu, tama augwali te Juda hanigo king bidi dologode me bidibeo. Mu meni. Augwa digi augwa king dali dąį ilama, tama augwa te kingo augwa tedali tonaluali.
2KI 8:21 Tama tibaso, te Jehoram agai te ami soldia bidi te karis kibude dolalua peyu, te hąuwa hwįbo koneai bidi naga sali, tama augwali Sair buluba te pedai badu te Idom hani dali hwįgi pali. Tama augwali pelama, te sabaligi pabode, tama te Idom hani augwali asama, tama te bage augwali bobegela sagaselama, tama augwali dali hwįainu tonaluali. Tama te hulide te Jehoram dali, te aga sę ebo gavman ofisa bidi dabe dali, augwaligo te hąuwa hwįabo karis kibu dolaluali, tama augwaligo te bomo mu elama, tama hąuwa hwįnama, te Idom hani sela sąyani. Tiali goli, agai te me badu ami soldia bidi dabe augwaligo te hąuwa hwįsąma, te augwa buluba ma wi pai.
2KI 8:22 Tama tialima, te Juda dabe augwaligo te Idom hani aiyaba me elalube, tama tialima, te Idom hani augwa digi augwa bulu tonalu bidali, tama bidada asu, megi tama te po asębo bodoluba usu nagasali. Tama te tibo bodolu sogo te Lipna hanude bidibo we bidigo me te po sela sąbo kolesaga eyu, te hagoma yali, tama augwali te Juda hani dologode munu me bidibeo.
2KI 8:23 Te e po dabe te king Jehoram agai te tigidali te gasa gasa nai sę yali po dao, te po buku me delide elalubao, tama te buku augwaligo nogi eyu, e tama wabo da, Te Juda Dabego King Bidi Dabego Po Elalubo Buku Da wabo dao.
2KI 8:24 Nosali te king Jehoram isali, tama augwaligo te aga tigi te aga wąį nǫų pubulali gų pagede aga pubulali, te king Devitgo moni hanude. Tama aga ogwa, Ahasia, agai aga ayago yali sę te agai selama, tama aga king bidi nigali.
2KI 8:25 Te Joram, aga Ahapgo ogwa da, aga kibu be te nogo si olama, te sągą badu si, 12, te Israel bulude king nigilama bidai, te sogo Ahasia, aga aya te Jehoramgo ogwa dao, aga te Juda bulude te king nigilama bidibo gagalali.
2KI 8:26 Ahasia agai te kibu be te 22 wabode te aga king nigai, tama aga te Jerusalem bulude aga te king nigilama bidiyu, te agai kibu be deli digi silali. Aga ida nogi Atalia, aga aya te king Ahapgo wegi, tama te Ahap aga wąį nǫų te nogi Omri, Omri te Israel bidi dabego polobadu bidali king bidi da.
2KI 8:27 Te Ahasia aga ida te Ahapgo hanidu asai, tama tialima, Ahasia agai te Ahapgo dwai kolesaga yali tų wali pali, agai tama teyu, te Genuai Bidi gedude te dwai sęgę sabo kolesaga eyu ma bidali, tama te Ahap augwaligo hanigo ebo kolesaga tų wali peyu, te dwai sę yali gilama yali.
2KI 8:28 Me sogo deli te king Ahasia aga te Joram dali pai, Joram aga te Israel hanigo king da, tama augwali te Hasael dali hwįgi pai, te Hasael te Siria king bidi da. Augwali te Ramot hanu pąde boi hwįai, te moni distrik Gileat, tama te Siria soldia ami bidigo te king Joram pigi enesigigo tama aga enani, tama aga isibe, aga sili enama tagalali.
2KI 8:29 Awe, tama tialima, Joram aga te boi hwįani tagalama, tama aga pelama, te hanu Jesril te hanude aga bidibadi aga tigi ma usu ebo wenama suainu bidigi pai. Tama aga te Jesril hanude bidibadi yaide, tama te king Ahasiago aga suagasali.
2KI 9:1 Te king Joram aga te Jesril hanude bidibo sogo, te Godigo po pusa mabo profet bidi Elisago te gasa ogwa bidi profet bidi me deli i olama, aga pageba asai, tama agabolo e tama tiwai po wai, “Naga name ugwa bugagia gudama, tama nage e dwasianu botol te oliv wel yai nai sao,” wali. “Tama nage hodolama, te Ramot hanuba, te Gileat tǫ, te moni hanuba pao,” wali.
2KI 9:2 “Tama nage te Ramot hanuba sabalobo sogo, tama nage pelama, te Jehu kegegi pao,” wali, “Jehu aga te Jehosafatgo ogwa dao, tama te Jehosafat aga wąį nǫų Nimsigo ogwa da. Tama tialima, aga te aga abagi hasi dali augwali deliba bidibaso da, awe, tama tibaso da, teda nago aga selasa, gasa be habu me deliba aga odasa pao.
2KI 9:3 Awe, tama te botol wel selama, tama te wel aga toboluba geliyu, e tiwai po agabolo wao, ‘Genuai Bidigo aga digi nagebolo te po obaso, aga digi nage te Israel hanigo king bidi bidimainu dąį ilibao,’ tama wao. Tama nago te sę elama silibo si, tama te tų dala salama, nage polo wi pao,” wali.
2KI 9:4 Elisago te po ola silama, tama te ogwa bidi profet bidi hodaluama, te Ramot hanuba pai.
2KI 9:5 Tama te aga sabalobo sogo, agai te tonobadi yaide, te Jehu aga dugulalu, te aga gasa ami ofisa bidi dabe dali po miyu bidibo suali. Tama agai e tama po wali, “Ofisa, eno po me deli elalubo.” Tama te Jehugo agabolo hanalu wali, “Nago te po de dali wabo elalubowe?” Tama te profetgo te po wai, “Eno po nage dali wabo elalubao.”
2KI 9:6 Awe, tama tialima, augwali si te be me deli habu tomoba augwali pai, tama te profet bidigo te oliv wel selama, te Jehu toboluba te oliv wel gelaliyu, agabolo e tama po wai, “God, Israel we bidi dena Genuai Bidigo, te po tama wai, ‘Megi eno nage dąį ilibo, te nage Israel we bidigo king bidi nigilibao,’ wali. ‘Tama nago eno te we bidi dabe augwali nago tonaluao.
2KI 9:7 Tama nago te Ahap hani augwali nago elama isilao, te king nage polobadu te nage gavman ofisa bidi bidai dao. Tama tibo kolesagago eno wei ma dolo te kwin we Jesebel agaba wei ma begelaibao. Te wego polobadu agai te eno profet bidi dabe me, tama me te eno te gasa sę ebo bidi dabe me, ela muai dao.
2KI 9:8 Tialima, eno te Ahap aga deli hani me te aga hani tigidali dola silaibao. Mu tamao, eno te tigidali bidi te Ahapgo hani te Israel haniba wadolali bidi me, te eno homugo te tigidali silaibao. Tama augwali te ogomani me, o te genuai bidi me, mu silaibao.
2KI 9:9 Tama eno augwali dali deli kolesaga naga yaibao, tama te polobadu eno te king Jeroboam aga hani dali silali yaligia gagawai yaibao, Jeroboam aga te Nebatgo ogwa da, te king Basago deli hani dao, te Basa aga te Ahiyago ogwa dao.
2KI 9:10 Tama te Jesebel isibo si, te agai tigi selasa pelama, pubaligi pabo bidi menia saibao. Mu meni. Tama agai tigi te yowi dabego tueibao, te Jesril hanu pąde.’ Genuai Bidigo te po wai.” Te profet bidigo te Genuai Bidigo po Jehubolo pusa silama, tama aga te be tų dala sąnama, tama aga wi pai.
2KI 9:11 Jehu ma geasa pelama, te gasa gavman ofisa bidi dabe augwali bidiboba sabalobode, te ofisa dabe augwaligo agabolo e tama po hanalu wai, “Magi nai me deli pedalaliwe, a? Magi baso te e wabo pabo bidigo asama, nage suagasaliwe?” wali. Tama Jehugo te po wei ponoyu, e tama po wai, “Dagego koneanio, te tama tibo bidi dabego augwaligo kolesaga. Augwaligo te po subigilama po wabo dao,” wali.
2KI 9:12 Tama augwaligo te po wali, “Polo tama, nago da dali wabo po dolo mu wao. Tama nago te ili po olama, te po dualobo tagalao,” wali. Tama tialima, te Jehugo po dolo mu te ofisa bage dali pusuyu, e tama po wali, “Te bidi asama, enabolo wagasali po e tama po walio, agai ena te Israel hani tonaluabo king bidi dąį ilalio,” wali.
2KI 9:13 Te ofisa bagego te po odobo si, polo tama augwaligo te bobobage bulubo ugwa dia sasa pelama, tama augwaligo te be togobiliba hagalu pai, tama te Jehu te be togobili ugwa badu mu dolalugi ulali. Tama augwaligo te bu wabo nai biugel selama, te bu weyu, te i weyu, te po wai, “Te Jehu te king nigalio,” po wai.
2KI 9:14 Jehu te Ramot hanude bidiyu, tama te aga sę ebo gavman ofisa bidi dabe dali po minama, te po dąų walu, te po wai, “King Joram elama, isilaibao,” wali. “Tama te aga bidali pesagede ena king nigilama bidaibao,” wali. Tiali goli, Joram te Jesril hanude me bidali. Magi basowe, aga te Israel hanigo te Siria hanigo king Hasael dali hwįani sogo, Joram aga me tama te ene dolai gasi munalu bidai, tama aga te gasi sana pesiąbadi. Tama tialima, Jehu aga sę ebo gavman ofisa bidi dabe augwali dali e tama po wali, “Tialima, dagego ena dali deli homu eyu da, awe, teda dage bugagia tonaluao, tama bidi me deligo te Ramot hanu tagalama, tama te Jesril hanuba pelama, tama te dena homugo ede yabo sę po te Jesril hanuba pusigi pigio,” wali.
2KI 9:16 Awe, te Jehu te aga hosgo kegebo karis nai ugwa badu daiba hola pali, tama aga dali, te me badu soldia ami bidi dabe dali, te augwali te Ramot hanu tagalama, tama augwali te Jesril hanuba pai. Te king Joramgo gasi usu esiąbadi pai. Tama tibaso, aga bet saiba pigi ulali, te Jesril hanude. Tama te sogo te Juda hanigo king bidi Ahasia aga te Jesril hanuba te king Joram suagasiyu asai. Tama tialima, aga si talua si te Jesril hanude bidibadi.
2KI 9:17 Tama te bidi me deli te Jesril hanu genuai masigi obode nigai bobobage sigi be te be tomoba bula selama bidiyu, te digibulu asobo bidi suainu tonalubo dao. Tama te bidigo tonobadi yaide, te king Jehu aga hani dali asobo suali. Tama agai i olama, tama te taun tomode bidibo bidi dabebolo e tama po pusai, “Eno suali, te geninama bidi mu asobo,” wali. Te bidi dabe augwaligo te Jorambolo te taun tonalubo bidigo wali po agabolo wali. Tama Joramgo augwalibolo e tama po wali, “Te ami soldia me delibolo olama, te aga pelama, te hos kibu me deli sigi pao, tama aga tede dugulama, tama aga udulama peyu, tama augwali asobo tomoba tiąba pelama, tama agai augwalibolo e tama po hanalu omainao, ‘Dage dwagi yai homu eyu asaliwe, ma meniwe?’ te po aga hanalugi pao, “te po wali.
2KI 9:18 Awe, tama tiali, te ami soldia bidi me deli te kibu hosde dugulama, tama aga udada peyu, tama augwaligo te Jehubolo sisinigi pelama, tama agai e tama po wali, “King Joram agai homugo koneaio, dage dwagi yai homu eyu asaliwe, ma meniwe?” Tama te Jehugo e tama po wei begelali, “Te nago nai menio. Nage da wali naga asao,” wali. Tialima, Jesrilde bidibo te tonalubo bidigo suali, ma te ami soldia bidi ma begasa asobe, tama tibaso, agai te kingbolo e tama po ola tolali, “Te ami soldia bidi nago tagala palali bidi, te bidi aga te pelama, augwali pageba sabolali. Tiali goli, aga polo ma begasa asobeo,” wali.
2KI 9:19 Tialima, kingo te gasa ami soldia bidi me tagala palali, tama te ami soldia bidi augwali pageba pedalobo sogo, te ami soldia bidi agai me te king Jehubolo e tama po wali, “King Joram agai homugo koneaio, dage dwagi yai homu eyu asaliwe, ma meniwe?” wali. Tama Jehu agai te po wei ponoyu, e tama po wai, “Te nago sę menio. Nage da wali asao,” wali.
2KI 9:20 Te taun tonalubo bidigo te tagala palali ami soldia bidi ma geasa asobo subeo, tama agai te king bidibolo e tama po ola tolali, “Te nago te tagala palali gasa ami soldia bidi, te ami bidi aga me asobeo. Tama eno suali, ma te bidi te karis naide bidibo suali, tama agai te wabo pabo kolesaga homu mu ebao, te Jehu te Nimsigo hani, augwaligo koneama te tiwai kolesaga ebo da, augwaligo te hos kibu augwali bomonama mu udayu, tama te karis gegasa asobao,” wali.
2KI 9:21 Tama tialima, te king Joramgo te po wali, “Eno karis dodolao,” wali. Awe, tama augwaligo te Joramgo karis dodolama, tama te Joram aga te karisba hola solama, dugawai, tama te king Ahasia aga me te gasa karis meba hola solama dugayali, tama augwali si udulama peyu, te Jehu asobo tomoba tiąba pali. Tama augwali sigo te Jehu te Jesril bidi Nabotgo tǫ pąde asobadi, teba tiąba pai.
2KI 9:22 Tama te Joramgo Jehu suali, agai te Jehubolo e tama po hanalu wali, “Te dage dwagi yai homu dali asaliwe, ma meniwe?” Tama te Jehugo te po wei ponoyu, e tama po wali, “Magi yaliwe usu elalubao,” wali, “tialima, naga ida Jesebel, agai te tibo god wali pabo sę eyu, tama te dwai kolesaga eyu, tama te bidi isibo pobi enebo sę ebo dao,” wali. “Naga idago te tama tibo dwai kolesaga ebo sęgę te genuai mu pedalobao,” wali.
2KI 9:23 Jehugo te wali po te Joramgo odama, tama aga te karis begelama, tama polo wi pai. Tama agai te king Ahasia i weyu, e tama i wali, “Ahasia, te asali bidigo ena aiyaba elaluainu ebao,” wali.
2KI 9:24 Tialima, te Jehugo aga enesigi polo bomonama kegelama, tama te ene toga peyu, te Joram tudide dolali. Tama te enego aga hobolu dude dolali. Tama te Joram aga te karis daide tulaluama, tama te Joram aga isali.
2KI 9:25 Tama te Jehugo te Bitkarbolo te po walali, te aga dali bidiyu sę yali gavman ofisa bidi, e tama, “Te Joramgo tigi sagaselama, tama te bidi Nabotgo tǫba sągi pao,” wali, “te Jesril bidi. Te Genuai Bidigo te polobadu king Ahapbolo pusa mani po nago me konealubawe, Joram aga aya? Dadi si te Ahap wali pobao, te dadi sigo karis me tama te Genuai Bidigo te Ahapbolo e tama po wali,
2KI 9:26 ‘Tialima, te do tama eno suali, ma te bidi dabe augwaligo te nago homugo ebo kolesaga tų wali peyu, tama augwali te Nabot aga wai buluba dali te augwaligo elama isilalio, tama teyu, te ena Genuai Bidi dao, te eno mu po tama obao, tama te nago te Nabot tǫde yali dwai kolesaga te eno nagebolo dolo mu wei begelaibao.’” Tama te Jehugo te Bitkarbolo e tama po ma wali, “Te Joramgo tigi selama, tama te Nabotgo tǫ naga tama sągi pao, te Genuai Bidigo poba usu nigi peyu, tama tiao,” wali.
2KI 9:27 Te Juda king Ahasiago te Joram isibo suali, tama aga te aga karisde bidibadi yaide, tama tibaso, aga te Bethagan hanu pedai badu wi pai. Tama te Jehu aga ami soldia bidi dabe daligo te Juda king Ahasia pobeai, tama te Jehugo te aga ami soldia bidi dabebolo e tama po wali, “Te king aga me enao,” wali. Awe, tama tialima, te king aga karisde dugula selama, te Gur bulu duba ugwaba udada holobadi yaide, tama augwaligo aga enani, te Ipleam hanu pąde. Tiali goli, te king Ahasia aga wi peyu, te Megido hanu pedai badu wi pai, tama nosali aga isali.
2KI 9:28 Tama te aga sę ebo gavman ofisa bidi dabe augwaligo te aga tigi sagaselama, tama te karis me deliba munama, tama te Jerusalem buluba selasa pali. Tama augwaligo te augwa wąį nǫų pubalobo gų pageba pubaligi pai, te Devitgo hanude elalubo madigi pubulali.
2KI 9:29 Joram aga te Israel dabego king bidi bidiyu, tama te nogo si olama, te sągą badu deli wagi soabo kibu be silali sogo, te sogo te king bidi Ahasia aga te Juda hanigo king bidi nigilama, pedelali.
2KI 9:30 Tama te Jehu aga hani dali augwaligo te king Ahasia pobeasa pelama, tagaligi pai, tama augwali ma te Jesril hanu tųdu ma begasa asai. Tama te kwin we Jesebel te bulu pedai badu bidibo da, tama agai po odali, e tama po wai, Joram isai dao wali. Tama tialima, te kwin we Jesebel aga te gedude me, te aga tobolude me au yai, tama tilama, te kingo sigi be te dwasianu windo tųde dolaluyu, te tųba aiyaba tonaluai.
2KI 9:31 Tama te Jehu aga te taun te moni tų badu te taun tomoba asai, tama te kwin we Jesebelgo aga dolo i weyu, e tama i wai, “Simri, nage naga genuai bidi ela mubo bidi dao, nage bugagia bidibawe, a?”
2KI 9:32 Jehu agai te po wabo odama, tama agai te beba te dwasianu windo tų elalubo madigi te agai ugwaba tonani, tama agai e tama i wali, “De nage eno haniba asaibawe?” Tama te me badu sę ebo bidi dabe augwali te kingo te bede bidali bidi dabego te Jehugo wabo po odama, tama augwali te bede te dwasianu windo tų badu dolagaselama, tama augwaligo te Jehu agaba aiyaba tonani.
2KI 9:33 Tama Jehugo augwalibolo e tama po wali, “Te we eba eda sąyao,” wali. Tama augwaligo te Jesebel selama, tama te we aga aba sąwai. Tama agai kanemego dobola sąyu, tama te kanemego tama te bede me te kaneme dagana sali, tama te Jehugo hos kibude me te kaneme dagana sali. Tama Jehugo te hos kibugo me te karisgo me te Jesebel tigidu agaga pali.
2KI 9:34 Nosali te Jehu aga te kingo be tomoba pelama, te nai tuai. Tama aga nai tuyu, tama te wę tuyu elama, tama agai te bidi dabebolo e tama po augwalibolo wali, “Godigo te po wai dao, te dwai we dolao, wai dao. Tiali goli, te we aga aya te king me deligo wegi dao, tama tialima, dagego te we agai tigi selasa pelama, pubaligi pao,” wali.
2KI 9:35 Tama augwaligo buluba pelama, tama te wego tigi siyu, pubulainu yali. Tiali goli, augwaligo te wego tigi munalubo sube, menio. Augwaligo te suali, te tobolu dili dali, te nogo sawali dili badi, te sągą sawale dili badi elama munalubo suali.
2KI 9:36 Tama augwali ma begasa pelama, te Jehubolo te sę yali po pusugi pali, tama agai e tama po pusali, “Te sę te Genuai Bidi God aga sę ebo bidigo pedauwalidu wali podu dolo mu pedalali, te Elaija aga te Tisbe hanude bidali bidi dao. Genuai Bidigo e tama po wai dao, ‘Te kwin we Jesebel isibo sogo, te yowigo agai tigi tueibao,’ wali, ‘te Jesril hanu tǫde tiaibao.
2KI 9:37 Tama te agai tigi pebeda pai mu, te yowi di gagawai mu te tǫde munalua pabo sueibao, tama tiwai munalua pabo te bidi dabego sueibao, te augwaligo te Jesebel tigi te yaba wabo augwaligo munu me konebe,’ Genuai Bidigo te po polobadu wai dao,” Jehugo te po wai.
2KI 10:1 Te wai dabe te ogomani naga ebadi elama, te king Ahapgo wąį nǫų ogomani Samaria taunde bidali. Te bidi dabe augwaligo namba te bidi sese sela selama, te ugwadu nogo si bidi selama, 70 bidi bidai. Tama te Jehugo te pas asęnama, tama te Jesril hanu tobolu bidibolo me, te genuai bidi dabe te taun tonalubo bidibolo me, tama me te Ahapgo wąį nǫų ogwa dabe tonalubo genuai bidi dabebolo me, te Jehugo pas asęnama, augwalibolo tolali. Agai te po e tama po asęani,
2KI 10:2 “Te Ahapgo ogomani augwali hani dage dali bidibao, tama te dagego te hąuwa hwįbo karis me, te hos kibu me, me te ene me, tama me te hąuwa hwįbo gasa nai me munalubo. Tama dage te taunde bidibo te masigigo nigai bomai obo elalubo. Tama tialima, dagego eno e pas sabo sogo,
2KI 10:3 dagego te Ahapgo hanigo te augwa tomode te dwagi yai bidi me deli sulama, te bidi aga king dąį ilao. Tama aga te king nigilama bidimainogo eyu, dagego aga tau siyu, tama da dali wąbi hwįnao,” te po asęna tolali.
2KI 10:4 Te Samaria tobolu bidi badi, te me badu genuai bidi badi, augwaligo te Jehugo te tolali pas selama, tama augwali wi dwai mu eyu, tama augwa hasi te po wali, “Jehugo te king si tama aiyaba elaluali. Tama tialima, mena tama dago aga aiyaba elaluaibawe? Dago aga aiyaba elalubo usu munu ma egobeo,” wali.
2KI 10:5 Tama tialima, te kingo be tonalubo bidi me, me te taunde polalubo tobolu bidi deli ebadi, te me badu tobolu bidi dabe ebadi, te me badu te Ahapgo hani ogomani tonalubo genuai bidi dabe ebadi elama, augwali tigidaligo te Jehubolo e tama po ola tolali, “Da tigidali te naga sę bidi dabe naga dao, tama dago homugo te nago homu kolesagadu naga wali painu, te da dola selama bidibao. Dago te gasa bidi me deli te king me nigiligobeo. Mu menio. Nago homugo mena tama sę yabo homu ebowe, teda teya naga sę yao,” te po ola tolali.
2KI 10:6 Awe, tialima, Jehugo te gasa pas me asęnama, tama te bidi dabe augwalibolo e tama po wali, “Tialima, dagego homugo ena wali asainu, tama dage ena dologode bidagameo, tialima, eno homugo dagego te Ahapgo hani ogomani tigidali ela silao,” wali. “Tama te do kigamu e tama tibo sogo, dagego te augwali tobolu naga toga selama, tama te Jesril hanuba muagasao,” wali Tama te bidi sese sela selama, te ugwadu nogo si bidi te Ahapgo hani ogomani, te Samaria taun bulude bidibo genuai bidi dali augwali te bidalubao, tama te genuai bidi dabe augwaligo te augwali te ola mayu bidali.
2KI 10:7 Tialima, te genuai bidi dabe augwaligo te Jehugo te pas sali, tama augwaligo te Ahapgo hani ogomani te bidi sese sela olama, te nogo si bidi, te 70, te augwaligo elama, isilali. Tama augwaligo te bage tobolu togolama, tama augwaligo te basket wa dabeba bulama, te Jehubolo tolali, te Jesril hanuba.
2KI 10:8 Te sogo Jehugo te po odali, te bidi dabego te Ahapgo ogomani tobolu togolama, augwaligo teba muagasali po odali, tama agai te bidi dabebolo e tama po wali, “Augwaligo te bage tobolu pesage te taun tomoba pabo tų sesegede te pąde tobolu pesage si sisinao, tama augwaligo te tobolu dabe munalubadi, te doba tama usu nigi pomainao,” wali.
2KI 10:9 Do kigamu te giliga asai badi, tama te Jehu hodasa pelama, te taun tomoba asobo tų sesegeba pelama, te tobolu dabe munalubo sugi pai. Umabo we bidi sisinama bidibo sulama, tama Jehu aga doligulama, tama agai augwalibolo e tama po wali, “Ena digi ena homugo te Joram aga eno aiyaba elaluai dao. Tama tialima, eno aga elama, isilai dao. Tama eno koneanio, dagego bidi me ela mubo menio. Tiali goli, te dego mu te hani ela muaniwe? Dago konebeo.
2KI 10:10 Tiali goli, tego da e tama ola mawai, tigidali po te Genuai Bidigo te Ahapgo hani dali polobadu wai po naga dao, te mu te pedalobo sę naga ebao. Te Godigo sę ebo profet bidi Elaijago pedauwalidu wali te dąų wali poba te megi Genuai Bidi usu na silibao,” wali.
2KI 10:11 Tama tialima, nosali Jehugo te Ahapgo hani te Jesril taunde bidali deli hani te Jehugo ela silali. Me te aga sę ebo gavman bidi me, me aga dwagi yai hai namu me, tama me te pris bidi dabe me, tama te bage augwali tigidali te Jehugo augwali me deli me bidibo sula tagalobe. Mu meni.
2KI 10:12 Tialima, te Jehu dali, te aga ami soldia bidi dabe dali, augwaligo te Jesril hanu tagalama, te augwaligo homugo te Samaria hanuba painu homu yali. Tama augwali te tųdu wali pelama, tama augwali te bulu me deliba sabaligi pai, te bulu nogi da Te Kibu Sipsip Tonalubo Bidi Dabego Sisinibo Pesage da.
2KI 10:13 Tama augwaligo te me badu bidi dabe sulama sisinibo si, tama augwaligo e tama po hanalu wali, “Dage mena pedai badu asaiwe?” Tama augwaligo te po wei ponoyu, e tama po wai, “Da da, te king Ahasiago hani dao,” wali. “Dago homugo te Jesril hanuba sobao, te king Joramgo hani ebadi, te kwin Jesebelgo hani dabe ebadi elama, te augwali dago suainu sobao,” wali.
2KI 10:14 Jehugo te po odali, tama aga hanibolo e tama po augwalibolo wali, “Te bidi dabe augwali polo tuao.” Tama augwaligo te bidi dabe tigidali tulama, tama augwaligo te bidi dabe te moni maguludawe elalubo madigi te bidi dabe odasa pai. Tama augwaligo te king Ahasiago hani tigidali ela silali, me deli me munu me bidibe. Te augwaligo namba te bidi sese si olama, te ugwadu si tama usu, bidi 42 isali.
2KI 10:15 Te Jehu dali, te aga ami soldia bidi dabe dali, augwaligo te bulu tagalama, tama augwali pobadi yaide, tama augwaligo te bidi me suali, te bidi nogi Jonadap, te bidi te Rekapgo ogwa da. Tama te Jehugo te bidibolo te giligade dao po wali, tama agai agabolo e tama po wali, “Eno homugo te nago ebo homu kolesaga te godolo mu ebo. Tama tialima, nage magi yaliwe, eno e ebo sęde nago bugai homu pemene ebawe, ma meniwe?” Tama te Jonadapgo te Jehubolo e tama po wai, “Awe, eno nage dali eno deli haliga ebao,” wali. Tialima, Jehugo te po wai, “Dwagi yai dao. Tama tibaso da, tea nago nogo enaba mao. Dadi si nogo mainao.” Tialima, te Jehugo te Jonadapgo nogo tulama, tama aga te karis daiba agai nogo kegali.
2KI 10:16 Tama Jehugo agabolo e tama po ola mani, “Nage ena dali asu da, teda nago koneaibao, eno te Genuai Bidi naga wali painu, bomo mu ebao.” Jonadapgo te po usu da homu yali, tama augwali te karisdu augwali te Samariaba pali.
2KI 10:17 Augwali te Samaria buluba sabolali, tama te Jehugo te bulude te Ahapgo hani gasa me badu te bulude bidali bidi dabe tigidali elama, isilali. Agai te bidi dabe elama, mu silali, tama te tialigo te Genuai Bidigo polobadu te profet Elaijabolo mani te poba usu na silali.
2KI 10:18 Tama nosali te Jehugo te Samaria we bidi dabe tigidali i olama, tama “Eba sisinagasiąo,” wali, tama agai augwalibolo e tama po wali, “Polobadu te king Ahapgo te Balba lotu po weyu yai. Tiali goli, eno te Balba lotu po bomo mu yaibao.
2KI 10:19 Tama tialima, eno homugo dagego te profet bage me, me pris bage me, tama te tigidali we bidi augwaligo te Balba lotu po wabo we bidi me, tama augwali asama, eba sisinagasao,” wali. “Te bede me deli me bidigio,” wali. “Magi baso meni, eno homugo Balba moni denami yai ofa nai ula mawaio. Tialima, bidi me deli asisąbaso da, teda te bidi isaibao,” wali. Jehugo te po wali, te tibo god Bal lotu po wabo we bidi mumua siyu, agai homugo agai te we bidi tigidali ela silainu te po wali.
2KI 10:20 Tama Jehugo e tama po ma wali, “Dago te me sogo te genuai bodolu deli dąį ilama, tama te Bal lotu po waguo,” wali. Tialima, augwaligo te bodolu deli dąį ilali.
2KI 10:21 Tama te Jehugo te Israel bidi dabe bidibo buluba te agai po ola todolo pali, tama te Balba lotu po wabo we bidi dabe, augwali asama, sisinagasao wali. “Bidi me deli me te naga bede bidigio,” wali. Tama tialima, te we bidi dabe te Bal lotu po wabo moni lotu beba te tigidali we bidi te be tomoba pelama, te mu pągąna sai.
2KI 10:22 Augwali te lotu be tomoba bula sela silama bidaluali, tama tialima, te Jehu aga te pelama, te lotu weyu te bulubo ugwa tonalubo bidi pageba pai. Tama agai e tama po agabolo wali, “Tama te bulubo ugwa selama, te Balba lotu po wabo we bidi dabebolo mena mena pao,” wali. Tama te bidigo te Jehugo wali po selama, te ugwa selama, mena mena pali.
2KI 10:23 Tama nosali te Jehu dali, te Jonadap dali si, Jonadap aga aya te Rekapgo ogwa da, augwali si te lotu be tomoba pali. Tama te Jehugo te we bidibolo e tama po wali, “Dagego te duga hasi bugagia tononu bilama, tama duga digi dagaliąo, magu menio, bidi me deli me, we me deli me, te Genuai Bidi God dolo mu lotu po wabo we bidi me deli da dali bidamuo,” wali. “Te eno homugo da te Bal dolo lotu po wabo we bidi naga da e be tomode bidinao,” wali.
2KI 10:24 Agai te po tama olama sia sali, tama aga dali, te Jonadap dali si, augwali si te denami yai ofa nai ula mabo madigi te habuba pai. Tama augwaligo te habu badu denami yai ofa nai me, me te gasa ofa nai me, te augwaligo te tibo god Balba te tigidali ofa nai selama, te siaba ula palama, te siago sese tama dela pelama, silibo da. Tama te tigidali we bidi asisąbo sogo Jehu aga te bidi sese te me si me si nama, 80 ami soldia bidi dąį ilama, tama agai augwalibolo e tama po wai, “Dage te lotu be togobe badu bidiyu, te bulu badu tonalu bidao.” Tama agai augwalibolo e tama po wali, “Dagego te tama tiao, te tibo god Balba lotu po wabo we bidi dabe tigidali te hani elama, silao,” wali. “Tialima, te soldia bidi me deligo te hani augwali me deli wi pabo sula tagalobaso da, tea te soldia bidi aga me elama, isilaibao,” wali.
2KI 10:25 Jehugo te siaba te ulama, te siago sese dela pabo denami yai ofa nai ulubo sę ela silali, tama tilama, te lotu be tomode taga solama, tama aga te ami soldia bidi dali, te aga sę ebo gavman ofisa bidi dabe dalibolo e tama po wali, “Dage te lotu be tomoba pelama, te we bidi dabe tigidali ela muna silao,” wali. “Dagego augwali me badu te wi pabo sula tagaligio,” wali. Te po obaso, te ami soldia bidi dabe augwali te be tomoba pelama, te we bidi dabe tigidali te bainat hwą gego te we bidi dabe elama, silali. Tama nosali tama te we bidi augwaligo tigi selasa pelama, te taun sesege bulu badu pubaligi pai. Tama tilama, augwali ma begasa peyu, te taun tomode te tibo god Bal lotu po wabo beba ma pai.
2KI 10:26 Tama augwali te lotu po wabo be tomoba pelama, tama augwaligo te bidi dabego lotu po wabo te noma ni dabe sali, tama augwaligo te ni dabe selasa buluba pelama, tama augwaligo te bulude te noma ni dabe isiba ulali.
2KI 10:27 Tama augwaligo te tibo god Bal noma nigali piksa me, te lotu po wabo be me, te augwaligo mu dolali, tama augwaligo te lotu be te di be mu nigilali, tama te be me tama elalu, bidada asama, megi e po asębo bidi dabe bidali sogoba usu nagasalio.
2KI 10:28 Tama tilama, te Jehugo te kolesaga eyu, tama te tibo god Bal teba lotu po wabo kolesaga sia sąyani, tama te Israel bage augwaligo te tibo god Balba lotu po munu ma wabe.
2KI 10:29 Tama te Genuai Bidi Godigo te Jehubolo e tama po ola mani, “Nago te ebo homu kolesaga te eno me te tiwai kolesaga tų wali te pobao,” wali, “tama nago te Ahapgo hani dali te tibo sę, tama nago te tibo kolesaga te dwagi yai mu dao. Tama tialima, te nosali te eno homugo te nago hani augwali tomode te bidi me deli te king bidi nigilibo eno sula tagalaibao,” wali. “Tama tidi peyu, te duga ame nabo wai dabe te wąį nǫų te me si me si tama namba haniba nama usu nigi paibao,” wali. Tama tiali goli, nosali te king Jehugo te king Jeroboamgo yali dwai kolesaga wali ma pai, te bidigo te polobadu te Israel hani agai kegelama, te augwaligo te sęgę sabo te dwai kolesaga yali bidi dao, Jeroboam agai te golgo te kibu bulmakau noma si nigilama, tama agai me deli te Betel hanude muani, tama me deli te Dan hanude muani. Tama te Israel hani augwaligo te kibu bulmakau nomaba lotu po obaso, te Jehugo sulama, tagalali.
2KI 10:31 Tama me te Jehugo te Israel bidi dabego Genuai Bidi Godigo te tigidali bomai po te agai bugagia bomo elama, wali pabe. Menio. Agai te king Jeroboamgo yali kolesagadu wali pali, te kingo te polobadu agai te Israel hani augwali kegelama, te augwaligo te dwai sęgę ebo kolesaga yai.
2KI 10:32 Te Jehu aga king bidi nigila bidibo bodolude te Genuai Bidigo te gagalama, te gasa hanigo te Israel hani aiyaba elaluama, te augwaligo tǫ dabe te me badu pedai te boi bidi dabego somainogo sula tagalai. Te Siria hanigo king bidi te aga nogi Hasaelgo te Israel hani dabe dali te boi hwįbo sę yali, magu meni, augwaligo homugo te Israel bagego moni te tigidali te tǫ dabe te augwaligo sainogo te moni boi mu hwįai.
2KI 10:33 Te tǫ pedai te giliga asobo pedai badu elaluali, te wę Jordan u badu elaluali, tama te king Hasaelgo te Israel hani aiyaba elaluama, tama te tigidali tǫ dabe sali, te taun Aroer tedu gagalama sai. Te wę Arnon pąde te giliga pabo badu gagalama, tama te moni te genuai tobolu hanu si, te hanu si nogi te Gileat me te Basan, te bulu siba usu nigi pali, te giliga asobo badu, te pedai badu, te not, te tǫ dabe te bidi dabego tǫ da, me te Gat agai hanigo tǫ me, te Rubengo hanigo tǫ me da, tama me te Manasego hanigo tǫ me dao. Te hani sela augwaligo tǫ dabe dao.
2KI 10:34 Te king Jehugo te gasa sę yali po dabe, te gasa bukude elalubo da, augwaligo te buku e tama tiwai nogi wabo da, Te Israel Hanigo King Bidi Dabe Augwalide Po Elalubo Buku dao, wabo da. Te bukude te tigidali king bidi dabego te tigidali bomai sę yali po elalubo buku dao.
2KI 10:35 Tama te nosali te king Jehu isali, tama augwaligo aga te Samaria bulude pubulali. Tama te aga ogwa Jehoahasgo te aga ayago yali sę eyu, te king nigilama bidali.
2KI 10:36 Te Jehu te king nigilama bidali kibu be te 28 olama kibu be usu nama kibu be silai.
2KI 11:1 Te sogo te Atalia, te king Ahasia aga idago, e tama po odali, aga ogwa Ahasia isali po odali. Awe, tama tialima, agai polo tama te ami soldia bidi dabebolo e tama po ola mani, “Dagego te Juda dabego king bidigo hani bidi dabe tigidali ela silao,” wali.
2KI 11:2 Tiali goli, te ami soldia bidi dabe augwaligo te Joas deli digi elebe, te king Ahasiago ogwa, magi baso meni, Jehoseba, te we Jehoseba aga te king Joramgo wegi, tama te king Ahasiago aga abe, tama Jehosebago te Joas dali te aga tau siyu tonaluabo we me deli dali selama, tama augwali si te augwaligo te pibo somo gagawai nai matres dabe te pibo bet sai dabe mubo madigi te habuba Jehosebago te wai ogwa Joas me te aga tonaluabo we augwali si teba geme dualali. Tama tialima, te Ataliago te Joas ela muabo usu meni.
2KI 11:3 Tama te Jehoseba agai te ogwa te Joas dualaludubadi, te kibu be nogo a olama, me badu nogo kibisa olama kibu be usu nigi pali, te tama kibu be tomode te Genuai Bidigo tempel be tomode naga geme bididubadi genama, te kibisa nogo kibu beba usu nigi pai. Tama te sogo te Atalia te Juda hanigo kwin we bididuali.
2KI 11:4 Tiali goli, te Atalia aga te kwin we nigilama bidibadi, te nogo a olama, me badu nogo si, te kibu be bidali, tialima te pris bidi Jehoiadago agai te gavman ofisa bidi dabebolo, te ami soldia bidi te kwin tonalubo soldia bidi me, te kwingo be tonalubo soldia bidi dabe, augwalibolo e tama po ola tolai. Tama agai augwalibolo e tama po wali, “Dage te Genuai Bidigo tempel beba asiąo,” wali. Te po obaso, augwali teba asai, awe, tama te Jehoiada agai te augwali dali te bomai po mu e tama olama, dąų wali. Agai te po me deli augwali dali polali, tama augwaligo te bomai po mu te Genuai Bidigo nogide polama, tama augwaligo te tigidali sę agai augwalibolo e tama sę yao wabo sę po te wali mu paibao wali. Tama nosali agai te Joas odasa asali, Ahasiago ogwa da, tama te asama, augwalibolo ola magasali.
2KI 11:5 Tama te Jehoiada agai augwalibolo e tama po ola mani, “Eno homugo dago te Joas aga king bidi nigilinao,” wali. “Tama teyu, eno homugo dagebolo eno e tama po ola mobao, te dago yabo sę po waibao. Eno koneanio, te ami soldia hani si augwaligo te sę ebo te Sabat bodolu side silama, tama augwali toma tubo dao, tama te gasa hani me deligo te augwaligo hasegeligi pelama, tama augwaligo te sę ma gagalama sę ebo da. Tiali goli, te Sabat bidibo bodoluba sabalobao, eno homugo te dage te sela nani dage tigidali te Genuai Bidigo tempel beba asao, te ami soldia bage augwaligo te Sabat bodolu side sę gagalobo, te ami soldia bage hani te augwaligo te kingo be tonaluyu, tama te me badu bage augwaligo te moni tų, te augwaligo te tų nogi te Sur, te tonalubo bage dao, tama te me badu hani augwaligo te me badu gasa ami soldia bidi dabe dolalubo tudi badu, augwaligo te obo banis moni tų tonalubo ami soldia bidi dabe tudi badu dolaluao. Dage tigidali asama, te Genuai Bidigo tempel beba asama, tama te Joas tonaluagasao. Tigidali ami soldia bidi dabe, dagego te bainat hwą ge tolama, tama te dagego tigidali pedai badu dolalua peyu, te Genuai Bidigo tempel be tomoba ilama, tama te king dali bugagia tonaluao. Tialima, te king aga te bulu me deliba pabo side, te dage meba aga dali hodobo peyu yao, tialima bidi me deli te aga page pąba asobaso da, teda dagego te asobo bidi ela muao,” wali.
2KI 11:9 Te gavman ofisa bidi dabe augwaligo te pris Jehoiadago te wali po wali peyu, tama te Sabat bodolude augwaligo te sę silali ami soldia bidi dabe augwaligo selama, tama augwali toma tuabo homu ebadi, tama te ami soldia bidi dabe augwali hasegelama, tama augwaligo te sę gagalali, tama augwaligo tigidali te Jehoiada pageba te Genuai Bidigo tempel beba odasa asali.
2KI 11:10 Te king Devitgo polobadu muani sesemone badi, tama te me badu sabele dabe te Genuai Bidigo tempel be tomode munalubo. Tama te Jehoiada agai te augwaligo te nai dabe selama, te gavman ofisa bagebolo mawai.
2KI 11:11 Tama tialima, te ami soldia bidi dabe augwali pelama, te Genuai Bidigo tempel be bologobea sali obo tigidali pedai badu augwali dolalua pali. Augwali dolalubo te giliga dega sabo pedai badu gagalama dolalu, te ela pelama, te giliga asobo badu pedai badu usu nigi pali. Tama augwali te Genuai Bidiba nai ula mabo madigi te mabo alta te pedai badu pąde dolaluyu elama, tama augwaligo te bainat hwą ge tolama, tama augwaligo bugagia tonaluali.
2KI 11:12 Ami soldia bidi dabe dola selama silali, tama tilama, te pris Jehoiadago te Joas odasa te buluba teda aselama, tama agai te Joas tobolude te kingo wiegi yai madi bulali. Tama me agai te Joasbolo te bomai po elalubo buku me deli agabolo mani. Tama nosali augwaligo te oliv wel te Joas agai toboluba gelali, te aga king bidi nigiliyu, te dąį ilama tama tiali. Tama te tigidali we bidi dabe augwaligo bugai homu pemene eyu, tama augwaligo nogo eleyu, e tama tiwai i wali, “Joas, dena homugo nage king bidi bidiyu, te bobobage sogo mu bidagameo,” wali.
2KI 11:13 Te kwin we Ataliago te ami soldia bidi dabego me, te tigidali we bidi dabego me, augwaligo te i wabo te Ataliago odali, tama aga te aga be tagalama, te aga te Genuai Bidigo tempel beba pelama, te agai suali, ma te we bidi dabe augwali sisinama, bidali.
2KI 11:14 Aga pelama, sabaligi pali, tama agai te gesi noma king bidi te bobobage pos bras dolalubo madigi pąde dolaluyu bidibo suali, te Genuai Bidigo tempel be gesabidi dolo, e tama tiwai te king bidi dabego au ebo gilama yai. Tama agai suali, ma te ami gavman ofisa bidi me, tama me te biugel selama, te bu wabo bidi me, te augwali te king bidi pagede te pąde bidibo suali. Tama agai me te we bidi dabego augwaligo te pemene ebo sę suali, tama te me badu we bidi dabego te biugel selama, bu wabo suali. Tama tibaso, te Atalia aga bulubo ugwa selama, te pisa yali. Magi baso meni, agai haliga sębę dwai mu yali. Tama agai e tama i wali, “Dage dwai bidi dabe mu dao. Dagego dwai kolesaga mu yalio, tama dagego ena kwin we aiyaba elaluainu yalio,” tama i wali.
2KI 11:15 Te pris bidi Jehoiada agai homugo te Atalia augwaligo aga te Genuai Bidigo tempel be elalubo pąde augwaligo te Atalia elamuo homu yali. Tama tialima, agai te gavman ofisa bagebolo e tiwai po wali, “Te Atalia tulama, tama agabolo e tama po walao, ‘Nage te ami soldia bidi dabe tomo agebeledu pao,’ wao. Tama te Genuai Bidigo be obo banis buluba teda pelama, tama tialima, te bidi me deli aga wali pobaso da, teda te bidi dagego ela muao,” Jehoiadago te po wai.
2KI 11:16 Tialima, augwaligo te kwin we te Atalia tulama, tama augwaligo te aga selasa, te kibu hos te kingo be obo banis tomoba pabo tųdu pali. Tama augwaligo aga te tomoba odasa pelama, tama augwaligo te Atalia aga tede ela muani.
2KI 11:17 Te pris bidi Jehoiadago te king Joas dali, te we bidi dabe dali, e tiwai po augwali dali wali, “Tama te dage te Genuai Bidi dali wadolagaselama, te gesi noma bomai pode dąų wagasiąo,” wali, tama augwali te augwali Genuai Bidigo hani we bidi naga bidimainogo yai. Tama me te agai te king dali, te we bidi dabe augwali dali, e tama po wai, tama augwaligo te augwa tomode te gasa bomai po me deli augwa digi dąų wali.
2KI 11:18 Tama nosali te we bidi dabe augwali te tibo god Balgo lotu beba pelama, tama te lotu be hųgia sąyani. Tama augwaligo te lotu wabo pesage te alta dabe me, tama me te tibo god Bal noma piksa me, pepedelama sąyani. Tama augwaligo te Matan elama isilali, te tibo god Balgo pris bidi, te alta dabe pąde elali. Tialima, te Jehoiada agai te ami soldia bidi dabe me badu te Genuai Bidigo tempel be tonaluabo soldia ami bidi dabe dąį ilali.
2KI 11:19 Tama tialima, te Jehoiada dali, te ami gavman tobolu bidi ofisa badi, tama me te king tonalubo ami soldia bidi dabe me, tama me te kingo be tonalubo ami soldia bidi dabe me, augwaligo te Genuai Bidigo tempel bedu king Joas oda selama, tama king aga beba tagaligi pali. Tama te tigidali we bidi dabe augwali wali pali. Augwali sabalobo sogo, te Joas aga te augwaligo te tų te Ami Soldia Sunumi nogi wabo tųdu tomoba pelama, tama aga te king dugabo wiegi yai ni pedaide duga yali.
2KI 11:20 Tama tigidali we bidi dabe augwaligo te bugai homu pemene genuai mu eyu, tama augwali te Jerusalemde augwaligo nagamea pai haliga naga me elama bidali, magi baso meni, soldia bidi dabego te kingo be pąde te kwin we Atalia augwaligo elali.
2KI 11:21 Joas aga te king nigilama, te king sę sali sogo, te sogo te aga kibu be nogo a olama, me badu nogo si, te 7 kibu be naga elaluali.
2KI 12:1 Te Jehu aga te Israel hanigo king bidi nigilama bidibadi, agai kibu be nogo a naga olama, me badu nogogo si olama kibu be pai, te Joas aga te Juda hanigo king bidi nigilama bidali. Tama aga te Jerusalemde king bidi nigilama bidibadi, agai bidi sese si, 40 kibu beba usu nigi pali. Joas aga ida, aga nogi Sibia, te Berseba we dao.
2KI 12:2 Te Joas aga king bidibo sogo, tama agai Genuai Bidigo gedude te agai dwagi yai doloba pai kolesaga naga yali. Magi baso meni, te polalubo pris bidi Jehoiada agai aga te e tama dwagi yai kolesaga ola mabo sę yali.
2KI 12:3 Tiali goli, Joas agai te augwaligo tibo god dolo lotu po wabo bulu du pesage me dolobe, tama teyu, te we bidi dabego te lotu po wabo pesageba ugwaba pelama, tama augwaligo te tibo godiba te denami yai ofa nai ula mayu, tama me te dwagi yai denami pedalomainogo ebo te pauda augwaligo uluyu yali.
2KI 12:4 Tama te Joas agai te pris bage i wali, tama augwali asobo si, tama agai augwalibolo e tama po wali, “Te pris bage dagego te tigidali mone selasa asao, te tigidali we bidi dabego te Genuai Bidigo tempel bede mubo takis mone dao, tama me te bidi dabego te bodolu ponaniba usu numainogo te augwaligo te mabo mone me,
2KI 12:5 tama pris bidi dabego te we bidi dabe augwaligo dagebolo mabo mone dagego bugagia tonaluao. Tama te sogo dagego suali madigi, te Genuai Bidigo tempel be te me badu pedai badu deli dolai baso da, teda dagego te mone selama, tama dagego te tempel be dolali dodolobo bidi abelao,” wali.
2KI 12:6 Tiali goli, me badu nosali kibu bede, agai te king bidi bidibadi, agai e tama kibu be bidali, te 23 kibu be bidali, te Joasgo suali, ma te pris bage augwaligo te sę me deli ebe, te Genuai Bidigo tempel be dodolobeo.
2KI 12:7 Tama tibaso, te king Joasgo te polalubo pris Jehoiada dali, te gasa pris bidi dabe dali, augwali asao olama i wali, tama augwali asobo si, tama Joas agai e tama po augwalibolo wali, “Magi baso dagego te Genuai Bidigo tempel be me badu pedai dologa pali dodolisiąma tonalubawe? Tama teyu da, teya dagego te we bidi dabe augwalide te sabo mone te dagego munu ma tonalugio. Menio. Dagego te tonalubo mone te eno bidi me deli eno digi dąį ilama, tama dagego te bidibolo maiyagameo. Tama tilama, te tempel be me badu pedai dologa pali dodolomainao,” po wali.
2KI 12:8 Te pris bidi dabe augwaligo te Joasgo wali po usu dao wali, tama augwaligo augwa po minama, po me deli dąų weyu, e tama po olama dąų walali, tama augwaligo te we bidi dabe dali mone me sogobeo wali, me te augwaligo te po wali, “Te Genuai Bidigo tempel be dologa pai baso, dodolobo sę me te dago me tonalugobeo,” wali.
2KI 12:9 Tama nosali Jehoiadago te halobage me deli selama, tama agai te halobagede dedage me deli nigilama, tama gedu ge gagawai nigali. Tama tilama, te halobage te alta pąde muani. Tama te we bidi dabe te tempel be bologobea sali obo tomoba te we bidi dabe augwali aselama, bagula bilibo sogo, tama augwaligo te halobage te alta elalubo madi dolo nogo badu munalubo suali. Te pris bage augwaligo te pabo tųde tonaluali, magi baso meni, augwaligo te we bidi dabego muagasobo mone augwaligo sainogo, tama tilama augwaligo te mone selama, te halobageba bulali.
2KI 12:10 Tama te pris bidi dabego subo sogo suali, ma te halobage te monego pągąwainogo yali tama tibaso, te pris bage augwaligo te king bidi dali, te tobolu pris bidi dali, te augwali sigo te mone dodolobo kuskus bidi asao olama, po ola tolali. Tama te kuskus bidi augwali si aselama, tama te mone begde bulama, tama sela pelama, tama te mone nedigi pali.
2KI 12:11 Tama augwaligo neda silama, tama te augwaligo Genuai Bidigo tempel be dologa pali dodolomainogo sę tonalubo bidi dabe augwalibolo te mone menama, tama augwaligo te be sę ebo kamda bidi abelali.
2KI 12:12 Tama te bidi dabe augwaligo te masigi be sę ebo koneai bidi me, me te masigi togobo koneai bidi me, tama me te ni name me, me te masigi me, te sę yabo doado bage abelebo bidi dabe me tama abelali. Tama me te gasa nai dabe me te nai dabego augwaligo te sę ebo tau sabo da, tama augwaligo te deli monego naga abelebo dao.
2KI 12:13 Te mone augwaligo te Genuai Bidigo bede sabo da, te deli sę naga da, te deligo naga te Genuai Bidigo be dologa pali dodolobo dao. Tama teyu, augwaligo te mone selama, te monego te silvago nigali te dis pou me, me te dwasianu plet pou me, te monego augwaligo abelebo munu me usu egobeo, me te bu wabo nai biugel me, tama me te augwaligo lam sole sula sabo nai me. Tama te me badu te gasa doado bage dabe augwaligo te golgo me, me te silvago me nigali nai dabe me, te nai dabego te Genuai Bidigo tempel be tomode sę ebo nai naga dao. Te nai dabe augwaligo te tempel be ma dodolabo monego abelebeo, te tedali mu dao.
2KI 12:15 Te sę tonalubo bidi dabe augwaligo te monede me subigila kolesaga elama, augwaligo wi tubo meni, tama teyu, te polalubo tobolu bidi dabe augwaligo te mone tonalubo bidi dabe augwali dali te monego dagego magi sę me yaliwe olama, augwaligo me hanalubeo.
2KI 12:16 Tiali goli, te we bidi dabe augwaligo te God dolo mu augwa te dwai kolesaga yali sęgę dodoluyu ofa mabo mone me, me te sęgę sela sąbo ofa yali, te tibo mone augwaligo te Genuai Bidigo tempel be dologa pali dodolobo mone mubo halobagede augwaligo te mube. Augwaligo te tobage ofa mone te pris bidi dabe augwalibolo naga dolo mani.
2KI 12:17 Te Juda dabego king bidi Joasgo te Genuai Bidigo tempel be dodolabo bidi augwali dąį ila silali, tama te nosali te Siria king bidi Hasael aga ami soldia bidi dabe dali augwali aselama, tama te taun Get hanude boi hwįani. Tama te augwaligo te taun Get bage augwali aiyaba elaluama, tama augwaligo te Get hanu sali. Tama tialima, augwali ma begegi soyu, te Jerusalemba boi hwįgi painu pali.
2KI 12:18 Tiali goli, te king Joasgo agai te homu yali, ‘Te king Hasaelgo aga ami soldia bage dali aselama, te eno hani dali te e Jerusalem taunba hwįagasigio,’ homu yali. Tama teyu, te Joas agai te king Hasaelbolo te olo mabo doado bage tolali. Tama te Joasgo te aga wąį nǫųgo tigidali doado bage aga naga sai, te king Jehosafatgo doado bage me, tama me te king Jehoramgo doado bage me, tama me te king Ahasiago doado bage me, augwaligo te Genuai Bidiba dąį ilai doado bage dabe da, tama te king Joas agai me te tigidali doado bage te Genuai Bidiba dąį ilali me, tama me te agai te tigidali gol me, te Genuai Bidigo tempel bede te mone mubo habadu muani goli me, me te kingo bede muani gol me agai sali. Tama agai te nai dabe selama, te king Hasaelbolo olo mu te bugai homu pemene iliyu mani. Tama te king Hasaelgo te doado bage dabe sali, tama tibaso, agai te Jerusalem bage dali hwįsąma, sula taga pali.
2KI 12:19 E te king Joasgo te gasa sę dabe yali po dabe elalubao, te gasa bukude elalubao, te buku augwaligo nogi weyu, Juda Hanigo King Bidi Dabego Yali Sę Po Elalubo Buku dao.
2KI 12:20 Me sogo deli te Joas aga sę ebo gavman ofisa bidi dabe augwaligo te Joas elabo po sisinama, minama dąų wali. Tama augwali me sigo, me nogi Josakar, Simeatgo ogwa da, tama me te Jehosabat, aga te Somergo ogwa da. Tama te augwaligo te Joas aga te Sila buluba aiyaba pabo tųde be me delide bidibadi, augwaligo te Joas elama, isilali. Te be te Jerusalem elalubo pedai badu te bulu odogo elalubo madigi be teba naga maganama be sę eyu yai. Joas aga isali. Tama augwaligo aga te aga wąį nǫųgo gų pageba pubaligi pai, te Devitgo moni hanude, tama te aga ogwa Amasia, agai aga ayago sę yali silide tama te king nigilama, sę yali.
2KI 13:1 Te Ahasiago ogwa Joas aga te Juda hanigo king bidi bidiyu, tama kibu be te bidi sese deli olama, te ugwadu nogogo sela kibu be silali. Tama te sogo te Jehugo ogwa Joahas, aga te Israel hanigo king bidi nigilama, bidali. Tama aga te Samaria bulude king bidi nigilama bidali kibu be te 17 kibu be usu nama bidali.
2KI 13:2 Tama agai te king Jeroboamgo yali dwai kolesaga tiwai te agai me te Genuai Bidi gedude dwai kolesaga yali. Polobadu te king Jeroboamgo te Israel hani kegelama, tama teyu augwaligo te Genuai Bidigo gedude augwaligo dwai sęgę sabo kolesaga yali. Tama tialima, te Joahas agai me te king Jeroboamgo yali gilama deli kolesaga naga yali, tama agai te dwai kolesaga me tagalobe. Mu menio.
2KI 13:3 Tama tialima, te Genuai Bidigo umabo sogo mu te Israel hani dali wado po weyu yali, tama teyu, agai king Hasaelgo augwali dali boi hwįmainu sula tagalali, te Siria king bidi, tama umabo sogo augwali asama, te Israel hani dali boi hwįagasali, tama te Israel hani augwali aiyaba elaluali. Tama nosali Benhadat, aga te Hasaelgo ogwa, tama te bidi aga Siria hanigo king bidi nigilama bidali, tama agai me te Israel hani dali naga boi hwįyu, tama aiyaba naga elaluali.
2KI 13:4 Tama tialima, te king Joahas agai te Genuai Bidi dolo gedu haluasa po wali, tama Genuai Bidigo te Joahasgo gedu haluasa wali po odali, magi baso meni, Genuai Bidigo konea pali, te Siria bage augwaligo te Israel bage aiyaba elaluama, mu dolobo sę ebaso.
2KI 13:5 Tama Genuai Bidigo te Israel bidi dabe tau sabo bidi me deli dąį ilali, tama te bage augwali te bidigo te Siria hanigo nogode ma dobola sali. Tama tialima, te Israel bage augwali augwa bulude bugagia ma bidali, te polobadu bidali gilama ma bugagia bidali.
2KI 13:6 Tiali goli, augwa te sęgę sabo dwai kolesaga sela sąbe. Te polobadu te king Jeroboamgo hani bidiyu yali gilama, tama te Israel hani augwaligo me augwali wali pabo tagalobeo. Menio. Augwaligo te dwai kolesaga ebo sę me eduali. Tama augwaligo te tibo god te we Asera noma nigilama, te Samaria bulude muani piksa noma, augwaligo munu me sela sąbeo.
2KI 13:7 Tama te sogo te king Joahas agai te ami soldia bidi umabo mu meni badi, magi basowe, te Siria hani augwaligo te Israel hanigo ami soldia bidi dabe umabo mu ela muai dao. Tigidali sogo te Siria hanigo augwali dolobo sę mu yali, tialima megi te Israel hani augwaligo ami soldia bidi dabe te bidi sese si olama, nogo si, 50 tama bidi dabe naga te hos kibude dugulama, tama boi hwįbo usu elalubo. Tama tialima, augwaligo te boi hwįbo karis nai nogo si naga bidali, me te gasa ami soldia bidi dabe te 10,000 tǫdu pabo ami soldia bidi naga bidali.
2KI 13:8 Te king Joahasgo agai te gasa sę yali po tigidali dao, te gasa bukude elalubaso, augwaligo te buku nogi e tama wabo da, Te Israel Hanigo King Bidi Dabe Augwaligo Haniani Sę Yali Po Elalubo Buku dao. Te po elalubo buku te kingo te bomai sę yali po tigidali elalubao.
2KI 13:9 Tama nosali te king Joahas isali, tama augwaligo te Samaria bulude aga pubulali. Tama te aga ogwa Jehoas, tama agai te aga ayago yali sę agai selama, tama king bidi nigilama sę yali.
2KI 13:10 Tama te Joas aga Juda hanigo king bidi nigilama bidali, kibu be e tama pai, te 37 kibu be silai, Jehoas, aga te Joahasgo ogwa da, aga te Israel hanigo king bidi nigilama bidali. Tama aga te Samaria bulude king nigilama bidali kibu be e tama pai, te 16 kibu beba usu nigi pali.
2KI 13:11 Tama agai dwai sęgę sabo dwai kolesaga Genuai Bidigo gedude te king Jeroboamgo yali kolesaga tiwai naga yali. Polobadu te Jeroboamgo te Israel hani kegelama, tama augwaligo te Genuai Bidigo gedude te dwai sęgę sabo kolesaga yali. Tama megi me, te Jehoasgo me agai te Jeroboamgo yali gilama tiwai te dwai sęgę sabo dwai kolesaga deli naga yali. Tama agai te dwai kolesaga me tagalobe. Mu menio.
2KI 13:12 Te king Jehoasgo te tigidali te haniani sę yali po da, te gasa bukude elalubo dao, augwaligo te buku nogi ebo da, Israel Hanigo King Bidi Dabe Augwaligo Haniani Sę Po Elalubo Buku da wabo dao. Te e bukude te Israel hanigo te Juda hanigo king bidi Amasiago hani dali te boi hwįbode te king Jehoasgo te haniani bomai sę yali po elalubo buku dao.
2KI 13:13 Tama nosali te king Jehoas isali, tama augwaligo aga te Samaria bulude te Israel hani dabego king bidi isibo side pubalobude gų pagede augwaligo aga pubulali. Tama te gasa Jeroboam te aga sabi bidigo tama aga king nigilama, te king Jehoasgo sę yali silide agai selama, sę yali.
2KI 13:14 Te Jehoas aga king nigilama bidibo sogo, Elisa aga monu dabe bidiyu, tama aga gasi sali. Tama te pąde aga isabo ąǫ ebadi yaide, tama te king Jehoas aga pelama, sugi pali. Tama king Jehoasgo Elisa aga sulama, homu dene eyu, tama aga gela wali, tama agai agabolo e tama po wali, “Eno aya, eno aya, nage bomai bidi, nago da Israel tau sai bidi dao, nage da, te boma pai boi hwįbo hos kibu me, te karis nai me tiwai mu dao,” wali.
2KI 13:15 Tama Elisago agabolo e tama po wali, “Nage pelama, naga enesigi selasa asao,” wali. Tialima, Jehoas aga pelama, tama te enesigi selama, tama magasali.
2KI 13:16 Tama Elisago agabolo e tama po ola mani, “Te enesigi selama, tama enainu tama te ene enesigi balibiba tulama dolaluao.” Tama te kingo tama tiali, tama te Elisago nogo te kingo nogo ugwadu dai badu agai nogo muani.
2KI 13:17 Tama Elisago kingbolo e tama po wali, “Megi nago te dwasianu windo tų nage pelama, dagi pelama, tama nago te giliga asoboba tonaluao.” Tama tialima, te king Jehoasgo te enesigi balibi petegelama, tama pelama, aga pelama, te dwasianu windo tų dagi pali. Tama Elisago te kingbolo te po wali, “Tama nago enesigi balibi dolama, tama te pelama ene enigi pao.” Tama te king Jehoasgo agai wali po selama, tama tiali, tama Elisago i wali, “Te ene, te Genuai Bidigo ene dao. Te enego te Siria hani aiyaba elaluaibao. Tama tialima, te sogo te nago Siria hani dali boi hwįbo sogo, te augwa te Afek taunde boi hwįaibao, tama nago augwali mu silaibao,” wali.
2KI 13:18 Tama Elisago te kingbolo e tama po wai, “Te ene dabe sao,” tama kingo te ene dabe selama, tama te Elisago e tama po wali, “Te ene dabego te tǫba elao,” wali. Tama tibaso, te king Jehoasgo te ene selama, te tǫba sela sogo tǫba elali.
2KI 13:19 Te profet bidi Elisago sulama, tama agai wado po weyu, tama kingbolo e tama po wali, “Nago homugo te enego a naga sogo, ma a olama, me badu nogo kibisa wagi solama sogo tǫba elai meniwe? Tialima, nago tama tigi sogo da, teda te nago te Siria hani te nago usu mu elama, aiyaba elalugi da. Tiali goli, nago megi da, nago augwali sela sogo naga aiyaba elaluaibao, “wali.
2KI 13:20 Nosali Elisa aga isali. Tama augwaligo aga tigi selasa pelama, te augwaligo masigigo te isibo bidi muainogo dedage nigali gų pageba pubaligi pali. Tigidali kibu bede te Moap hani bidi dabe me badu aselama, te Israel hani dabe dolagasali.
2KI 13:21 Me sogo deli te Israel hanigo te bidi me deli isai bidi te gų pageba pubulainu edubadi, tialima augwaligo suali, ma te Moap hani bidi dabe me badu asobaso, tama augwaligo te isali bidi tigi polo tama augwaligo te Elisa pubulali digi te Elisago dili munalubo madigi augwaligo te isali bidi tigi te gų page dedageba polo subigila munama, tama taga pali, tama augwali wi pela silali. Tama te isali bidigo tigi te Elisago dili munalubo madigi dagana sigi pali, tibaso te isali bidigo mobo bidi aga tigiba ma begasa asobo si, tama te isali bidi ma hoda holali.
2KI 13:22 Joahasgo tigidali kibu bede, Jehoas aga aya, aga te Israel hanigo king bidi bidali sogo, te king Hasael, aga te Siria bidigo king bidi bidai, tama agai te Israel hani dali boi hwįagaselama, tama augwalibolo sęgę madu geani.
2KI 13:23 Tiali goli, Genuai Bidigo te Israel hani augwali hobede mu yali, tama tibaso, aga bugai homu pemene augwaliba yali. Agai te polobadu te Abraham dali, te me te Aisak ebadi, me te Jekop ebadi, te bage dali te agai bomai po bodolu selama, dąų waliba gogone peyu tama tiali, tama teyu, agai te Israel bage augwali tau selama, tama agai augwali munu me dolobe. Tama agai homugo te Israel hani sela sąnama, tama augwali te aga gesabidide te augwali digibulu bidigi pabo agai hagela homu yali.
2KI 13:24 Tama nosali te king Hasael isali, tama te Benhadat, aga ogwago, te aga ayago yali sę selama, tama aga aya bidali silide bidiyu, tama aga te Siria hanigo king bidi nigilama bidali.
2KI 13:25 Awe, tama te Jehoas, aga te Israel hanigo king bidi dali, tama te aga ami soldia bidi dabe dali, augwaligo te Siria king bidi Benhadat dali, te aga ami soldia bidi dabe dali, augwaligo augwali dali boi hwįgi pali. Tama te king Jehoasgo te king Benhadatgo aga soldia dali aiyaba elalualima, tama augwaligo te Siria hanigo sali taun augwa ma sali, te taun polobadu te Israel hanigo taun te polobadu te king Jehoasgo aya Joahas bidali sogo te Siria hanigo sai taun megi te augwa ma sali. Jehoasgo te king Benhadat aga te sela sogo aga aiyaba elaluali.
2KI 14:1 Jehoas agai te kibu be si pali, aga te Joahasgo ogwa da, aga te Israel hanigo king bidi bidali, Amasia, aga te Joasgo ogwa da, tama aga Juda hanigo king bidi nigilama bidali.
2KI 14:2 Agai kibu be te 25 kibu be elalubadi, te aga king bidi pedelali, tama aga te king bidi nigilama, te Jerusalemde bidali kibu be e tama da, te 29 kibu beba usu nigi pai da. Aga ida, aga nogi Jehoadin, te we te aga bulu te Jerusalem moni taun bage we dao.
2KI 14:3 Te king Amasia agai te Genuai Bidigo gedude dwagi yai kolesaga yali, tama tialima aga aya Joas agai tama sę yali, tiali goli agai aga wąį nǫųgo te king Devitgo yali gilama te dwagi yai kolesaga gagawai me ebe, Devit agai yali gilama.
2KI 14:4 Magi baso meni, te king Amasia agai te augwaligo te tibo godiba lotu po wabo pesage te king Amasiago me dolobeo. Tama tibaso, te tigidali we bidi dabego me sę eyu bidali, te augwaligo te lotu po wabo bulu du pesageba pelama, tama augwaligo te tibo godiba te denami yai ofa nai ula mayu, tama me te wiegi yai hano holama denami ilibo pauda ulubo sę iduali.
2KI 14:5 Tama te sogo king Amasiago te Juda hanigo bulu bomo mu elama tonaluali, agai tama po wali, “Te eno aya elali gavman ofisa bidi elama, isilao,” wali, tama augwaligo augwali elama, isilali.
2KI 14:6 Tiali goli, agai te gavman ofisa bidigo wai dabe da me elebe. Menio, tama agai te bidimainu sulama tagalali. Agai Genuai Bidigo bomai po te Mosesgo te polobadu Israel we bidibolo mawai, te bomai po elalubo bukude sulama, wali pali. Te Genuai Bidigo po e tama tiwai, “Tialima, bidi me deligo waigo kolesaga geda mugi sobaso da, teda dagego te wei begelama, te aga ida aya ela mugio. Tama tialima, aga ida ayago kolesaga geda muai baso da, teda dagego te ida aya naga dagego ela muao. Dagego te kolesaga wei ponoyu, te augwaligo wai puluba ela mugio. Bidigo kolesaga dwai ebaso da, te aga deli naga ela muao,” te asęani po te Amasiago wali peyu yali.
2KI 14:7 Tama me sogo deli te king Amasia dali, te aga ami soldia bidi dabe dali, augwaligo te Idom hani te 10,000 ami bidi dabe dali boi hwįgi pali, te Idom bulu odogo malu te umabo tamu elalubo madi hwįani. Tama augwaligo te Idom hani aiyaba elaluama, tama augwaligo te taun Sela sali. Tama te king Amasiago te taun nogi poali, te taun nogi Joktel. Tama te megi tama e po asębo sogo me, te augwaligo te king Amasiago te gesi nogi poali te nogi naga wabo dao.
2KI 14:8 Tama te king Amasiago te me badu bidi dabe te king Jehoas pageba tagala palali, te bidi te Israel bagego king bidi da. Te king Jehoas te aga aya te Joahas, te Joahas aga wąį nǫų te king Jehu dao. Tama te tagala palali bidi dabe augwali pelama, te king Jehoas pageba sabolama, tama augwaligo agabolo e tama po ola mani, “Te king Amasiago te agai homugo te Israel bage dage dali hwįaibao walio,” wali.
2KI 14:9 Tialima, te king Jehoas te po wei ponoyu, Amasiabolo e tama po page po digi po begelama pusali, “Te Lebanon bulude, te sesane yai nosaigo te po ola tolali, te moni ni me delibolo, te ni nogi bǫ, tama agabolo e tama po wali, ‘Eno homugo nago te wegi te eno ogwa me magameo, ma aga si selama, tama bidimaio,’ wali. Tiali goli, nosai te bulu uni hasa me deli te pedai badu biliyu, tama te nosai te uni hasago agayali, tama te nosai agalama dolali.”
2KI 14:10 Te king Jehoasgo te po digi po begelama pusali, tama agai king Amasiabolo e tama po wadolama pusali, “Eno koneanio, nago te Idom hani augwali dali tama te nago boi hwįnama, tama augwali aiyaba elaluai dao. Tama tialima, te nago bugai homu pemene mu gana peyu, tama nago naga digi naga nogi ugwaba siyu, te wabao,” wali. “Nage genuai nogi sali, te nago te boi hwįanide saliąo,” wali, “tama tialima, megi te nage naga bulude bugagia bidiyu, tama nage bugai homu pemene yao. Tiali goli, te nago da dali boi hwįainogo ebadi, te menio. Naga digi dolabuo, nago tama teyu, te Juda hani augwali me dolabuo,” tama wali.
2KI 14:11 Tiali goli, te king Amasiago homugo te king Jehoasgo wali po odobe. Tama tibaso, te king Jehoas dali, te Israelgo ami soldia bidi dabe dali, augwali pelama, te moni hanu Betsemesba pai, te Juda hanigo taunba, tama augwaligo te king Amasia dali, te aga ami bidi dabe dali, hwįgi pali.
2KI 14:12 Tama augwaligo boi hwį hwį pelama, tama te Israel hani ami soldia bidi dagego te Juda ami soldia bidi dabe augwali aiyaba elaluali, tama te Juda dabego ami bidi dabe augwali augwa buluba wi pela silali.
2KI 14:13 Tama te king Jehoasgo te king Amasia nogo tulama, tama aga hadabu ilali. Tama nosali, te king Jehoas dali, te aga te Israel ami bidi dabe dali, augwaligo te Betsemes hanu tagalama, tama augwali te Jerusalem taunba pali. Tama augwaligo te taun bologobea sali moni masigi obo banis aluali, tama augwaligo te Efraim Pabo Tų badu gagalama, agalu pelama, te tų me nogi te Kona, te tųba usu nigi pali. Tama augwaligo te obo banis aluali bobobage dąį usu, te 200 mita dąį usu tama aluali.
2KI 14:14 Tama te king Jehoas aga te Jerusalem taun tomoba pelama, tama agai te taun tomode muani gol me, te silva me tigidali sali. Tama te agai te pou dis me, tama me te dwasianu plet pou me, te me badu te Genuai Bidigo tempel bede muani doado bage me, tama me te tigidali doado bage me, te kingo mone mubo madigi te habu badu muani doado bage me, tigidali te agai naga sali. Tama me te Juda hanigo genuai bidi dabe hadabu ilama, tama te Jehoasgo te king Amasiabolo e tama po wali, “Amasia, nago da Israel hani dali ma boi hwįainu homu kone paligio. Tialima, nago tama ma teyu da, teda te eno nago e genuai bidi dabe ela muaibao.” Agai te po tama ola silali, tama agai te genuai bidi dabe dali, te tigidali sali doado bage dali selama, tama te Samaria buluba ma geasa pali.
2KI 14:15 Te king Jehoasgo agai te gasa tigidali sę yali po dao, te gasa bukude elalubo, augwaligo te buku e tama nogi wabo da, Te Israel King Bidi Dabe Augwaligo Yali Sę Po Buku. Tama te bukude po tigidali te bomai sę agai yali po dao, tama agai te boi hwįani, te Israel hani dabe augwaligo te Juda dabego king bidi Amasia dali hwįani po.
2KI 14:16 Tama nosali te king Jehoas isali, tama augwali aga tigi te Israelgo king bidi pubalubo gų pageba te augwali Samaria buluba pubaligi pali. Tama aga ogwago nogi Jeroboam, tama agai te aga ayago yali sę selama, tama aga king nigilama, te bulude bidali.
2KI 14:17 Te Israel hanigo te king Jehoas isali, tiali te Juda hanigo king bidi te Amasia aga te 15 yia bidama, tama aga me isali.
2KI 14:18 Te king Amasiago agai te tigidali gasa sę yali po, te po dabe te gasa bukude elalubo. Augwaligo te buku nogi weyu, e tama wabo da, te Juda Dabego King Bidi Dabego Yali Sę Po Elalubo Buku dao, wabo dao.
2KI 14:19 Te king Amasia aga te Jerusalemde bidibadi yaide, tama te me badu bidi dabego augwaligo te king Amasia aga ela muabo po minama, dąų wali. Augwaligo te tama tiabo po wali te agai odali, tama tibaso, aga te Lakis hanuba wi pai. Tiali goli, aga te boi bidi dabe augwaligo te me badu bidi dabe tagala palama, tama augwali aga wali pelama, te Lakis taunba sabolama, tama augwaligo te king Amasia ela muani.
2KI 14:20 Tama augwaligo aga tigi selama, te kibu hosba munama, tama augwaligo te Jerusalem taunba ma selasa asali. Tama augwaligo aga te aga wąį nǫų pubalubo gų pagede augwaligo aga tede pubulai, aga wąį nǫų Devitgo taunde.
2KI 14:21 Tama te nosali Juda hani augwaligo te gasa bidi me sali, te bidi nogi Usia, agai nogi me te Asaria, tama augwaligo te bidi aga dąį ilama, tama te king bidi nigilali. Te bidigo aga aya Amasiago sę yali pesagede bidiyu, sę yali. Usia agai kibu be te nogo si olama, te sągą a olama, te me badu sągągo kibisa deli wagi solama, te 16 kibu bede aga king bidi nigai.
2KI 14:22 Tama nosali me badu sogo te aga tudi badu te king bidi nigilali, tama agai boi hwįgi pelama, tama te Elat taun te boi bidi dabego nogode elalubadi ma sali. Tama te taun te me badu pedai badu dolali, te agai me dodolali.
2KI 14:23 Te king Amasia te Joasgo ogwa da, tama agai kibu be te 15 kibu be yai, te Juda hanigo king bidi tama kibu be bidali, Jeroboam, Jehoasgo ogwa, aga te Israel hanigo king bidi nigilama, pedelali. Tama aga te Samaria bulude te king bidi nigilama bidiyu, tama te kibu be te bidi sese si olama, te deli, te 41 kibu beba usu nama bidai dao.
2KI 14:24 Tama agai kolesaga te aga sabi bidi Jeroboamgo yali dwai kolesaga tiwai agai me te Genuai Bidi gedude te dwai kolesaga yali. Polobadu te king Jeroboam te aga sabi bidigo te Israel hani kegelama, tama augwaligo te dwai sęgę sabo kolesaga te Genuai Bidigo gedude dwai mu yali. Tama megi te king nigali sabi bidi te Jeroboamgo me, te hasia king Jeroboamgo yali deli kolesaga tiwai naga te sęgę sabo kolesaga eyu, tama bidali.
2KI 14:25 Te Jeroboam aga king bidi nigisąbadi, te sogo te boi bidi dabe augwaligo te Israel hanigo umabo tǫ mu te boi bidi dabego sai. Tialima, megi te king nigali Jeroboam agai boi hwįnama, tama te tǫ dabe tigidali ma sali, te tǫ sabo gagalali te not badu te taun Hamat pabo tųdu gagalama, sesa pabogo te saut badu te sigi ąį ge elalubo pesageba usu nigi pali, te ąį nogi Detsi wabo da. Tama te king Jeroboamgo agai te tǫ ma sabo yali kolesagago te Genuai Bidi Godigo wali poba usu nigi pali, Israel hanigo Genuai Bidi. Te tama tiali sę te profet bidi Jonago pedauwalidu wali poba usu nigi pai, te Jona aga aya te Amitaigo ogwa dao. Te profet bidi Jona aga te taun Gathefer bulu bidi deli dao.
2KI 14:26 Genuai Bidigo suali, ma te Israel hani augwa boi bidi dabego te augwali tigiba genuai sęgę mu mabo sę eyu, tama augwali mu silibo homu ebo koneani. Tama tialima, te deli deli bidi naga bidada pali. Tama me te augwali tau sabo bidi me deli meni.
2KI 14:27 Tama te Genuai Bidigo te Israel hani augwali mu silaibao po me wai menio, tama augwaligo nogi me tigidali silaibao po me wai menio. Tama teyu, agai te king Jeroboam dąį ilali, Jeroboam aga te Jehoasgo ogwa da, te bidigo bomo elama, te Israel hani te boi bidigo nogode augwali ma somainogo dąį ilai.
2KI 14:28 Te po te king Jeroboamgo te gasa tigidali haniani sę yali po dao, te po te gasa bukude te elalubao. Te buku augwaligo e tama nogi wabo da, Te Israel Hanigo King Bidi Dabego Yali Sę Po Elalubo Buku dao wabo dao. Te e bukugo te king Jeroboam agai te bomai sę yali po me, me te boi hwįnama te taun Damaskus dali, te taun Hamat dali si ma sali po elalubo buku dao. Polobadu te Juda hani augwaligo te Hamat taun tonaluai dao.
2KI 14:29 Tama nosali te king Jeroboam isalio, tama aga ogwa te Sekaraiago aga ayago yali sę agai selama, tama aga king nigilama bidai dao.
2KI 15:1 Te king Jeroboam aga te Israel hanide te king nigilama bidali kibu be te 27 kibu be silai, tama te sogo Usia, Usia aga te king Amasiago ogwa dao, te Usia aga te Juda hanigo king bidi nigilama bidali. Te Usia aga me nogi Asaria.
2KI 15:2 Agai kibu be te 16 kibu be silama, aga king bidi nigali, tama aga king bidi nigilama, te Jerusalemde bidali kibu be te 52, tama kibu be usu nigi pai. Aga ida nogi Jekolia. Te we aga bulu te taun Jerusalem bulu we deli da.
2KI 15:3 Te king Usia agai te Genuai Bidi Godigo gedude agai te dwagi yai kolesaga yali, tialima te aga aya te Amasiago yali kolesaga tiwai gilama yali.
2KI 15:4 Tiali goli, te king Usia agai te augwaligo te tibo god dolo lotu po wabo bulu du pesage me dolobeo. Tama teyu, te we bidi dabe augwaligo te tibo god dolo te denami yai ofa nai me, tama me te dwagi yai hano holoyu, denami naga pedalumainu ebo pauda ulubo sę me iduali.
2KI 15:5 Me sogo deli te Genuai Bidigo te king Usia tigide te oiyabe gasi pedalali. Tama te oiyabe gasi te mena tama polo usu elama siligobe. Tama te king Usia aga te king bidi bidibo be tagalama, tama te aga gasa tedali beba pelama, bidigi pali, tama aga ogwa, te Jotamgo, agai te king sę gagawai eyu, tama te king be tonaluyu, tama me te Juda hanigo bulu tonaluyu, tama teyu, te king Usia isiboba usu nigi pai.
2KI 15:6 E po te king Usiago agai te tigidali gasa sę yali po da, te po te gasa bukude elalubo dao, tama augwaligo te buku e tama nogi ebo da, Juda Hanigo King Bidi Dabego Yali Sę Po Elalubo Buku dao, wabo dao.
2KI 15:7 Tama te king Usia isibo sogo, tama augwaligo aga tigi sela pelama, te aga wąį nǫų pubalubo gų pageba pubulali, te Devitgo taunde. Tama tialima, te megi aga ogwa, Jotamgo, te aga ayago sę te agai selama, tama aga king mu nigilama, king sę mu yali.
2KI 15:8 Te Usia aga te Juda hanigo king bidi nigilama bidali kibu be te 38 kibu be, te sogo Sekaraia, aga aya te namba 2 king bidi Jeroboamgo ogwa da, te bidigo ogwa Sekaraia aga te Israel hanigo king bidi nigali. Tama aga te Samaria bulude king bidi bidali te polua nogo a olama, me badu nogo kibisa nogo deli wagi solama polua naga bidali.
2KI 15:9 Tama te king Sekaraiago te Genuai Bidigo gedude agai me dwai kolesaga yali, te aga wąį nǫų dabego yali kolesaga tiwai naga yali. Agai te dwai sęgę sabo dwai kolesaga yali, te hasia king Jeroboamgo yali tiwai naga yali. Polobadu te king Jeroboamgo te Israel hani agai kegelama, te dwai kolesaga eyu, tama te augwaligo Genuai Bidigo gedude te sęgę sabo kolesaga genuai mu yai. Tama te king Sekaraiago agai me te king bidi dabego yali kolesaga tiwai ma yali.
2KI 15:10 Tama te Salum, aga te Jabesgo ogwa da, Salum dali, te me badu bidi dabe dali, augwali sisinama, tama augwaligo te Sekaraia ela muainogo tų me deli gegali. Tama nosali te Salumgo te tigidali we bidi dabe gesabidide Sekaraia ela muani, tama te Salum aga te king bidi nigilama bidali.
2KI 15:11 Tama agai te kolesagago te Genuai Bidigo te polobadu wali poba usu nigi pali. Polobadu Genuai Bidigo te king Jehubolo e tama po wai, “Tama eno te bidi dabe te nago hanigo king bidi naga nidigi peyu, tama te nago me si me si tama nani wąį nǫųba usu nigi pomainu sula tagalaibao.” Te king Sekaraiago te tigidali te gasa haniani sę yali po, te gasa bukude elalubo, te buku augwaligo e tama nogi wabo da, Te Israel Hani King Bidi Dabego Yali Sę Po Elalubo Buku da wabo dao.
2KI 15:13 Te Juda hanigo king bidi Usia agai kibu be te 39 kibu be te king nigilama bidai, tama te sogo Salum, Salum aga te Jabesgo ogwa da, aga te Israel hanigo king bidi nigali. Tama aga te Samaria taunde king sę eyu, polua deli naga bidai.
2KI 15:14 Tama te sogo te bidi te Menahem, aga aya te Gadigo ogwa, aga te Tirsa hanu tagalama, tama aga te Samaria hanuba pali, tama agai te king Salum ela munama, tama Menahem aga king nigilama bidali.
2KI 15:15 Te king Salumgo te gasa nai dabede sę yali po, te gasa bukude elalubao, tama augwaligo te buku e tama nogi ebo da, Te Israel King Bidi Dabego Yali Sę Po Elalubo Buku da. Te e bukude elalubo po te king Salumgo kolesaga dali, te gasa bidi dabe daligo te king Sekaraia ela muani po me elalubao.
2KI 15:16 Tama te sogo te bidi Menahem dali, te aga hani bidi dabe dali, augwaligo te Tirsa hanu tagalama, tama augwali te Samaria hanuba pali, tama augwali te Tipsa hanuba sabolali. Tiali goli, te Tipsa hani bidi dabego te Menahemgo hani bidi dabe te augwaligo taun tomoba soao po wabe. Tama tibaso, te Menahem aga hani dali sisa siyu, tama te Tipsa hani bidi dabe dali boi hwįani. Tama augwaligo boi hwįnama, tama te Menahem aga hani dali augwaligo te Tipsa taun mu dolali. Tama augwaligo te Tipsa taun we bidi me te bulu pedai badu bidada pali we bidi dabe me ela muna muna pali. Tama augwaligo te bulu we te wai haliga yai we naga selama, tama augwaligo te we dabe haliga hwą gego togobo si yaide, tama augwali isai dao.
2KI 15:17 Te king bidi Usia te Juda hanigo king bidi nigila bidali kibu be bidi sese si pąde, te 39 kibu be pai, tama te sogo Menahem, aga te Gadigo ogwa da, aga te Israel hanigo king bidi nigilama bidali. Tama aga te Samaria bulude king nigila bidali kibu be te nogo si kibu be bidai.
2KI 15:18 Tama te Genuai Bidigo gedude agai dwai kolesaga mu yali. Tama te hasia king Jeroboamgo yali kolesaga tiwai naga yali. Polobadu te king Jeroboamgo te Israel hani agai kegelama, tama augwaligo te Genuai Bidigo gedude sęgę sai dao. Tama te bidi te Menahemgo me te deli kolesaga naga ela pedu kęnama, tama aga isiboba usu nigi pai.
2KI 15:19 Tama te bidi Menahem aga king bidi bidibo sogo, te Asiria king bidi nogi Tiklat Pileser, aga asama, te Israel hani dali boi hwįagasali. Te king Tiklat Pilesergo gasa nogi me te Pul. Tama tialima, te Menahemgo e tama doado bage me mone me sali, 3,000,000 mone silva selama, tama te king bidi Tiklat Pileser bidibolo mani, tama te aga abeleyu mawai da, te magu meni, te Israel hani dali nosali agai ma hwįagasidali weyu tama teyu, aga te king Menahem tau siyu, tama te Israel bulude Menahem aga bomai king bidi mu bidimainu yali.
2KI 15:20 Tama te mone sainu, Menahem agai te tigidali bidi te umabo mone mubo bidi dabe dali te takis mone sali. Tama agai te deli deli te tobage bidigo te 50 kina mone sali,, tama te king Tiklat Pileserbolo mawai. Tama tibaso, te king Tiklat Pilesergo te Israel bulu tagalama, aga pali.
2KI 15:21 Te king Menahem bidiyu, te agai haniani sę yali po te gasa bukude elalubo, augwaligo te buku e tama nogi ebo da, Israel Hani King Bidi Dabego Yali Sę Po Elalubo Buku da wabo dao.
2KI 15:22 Te king Menahem isali, tama augwaligo aga pubaligi pali. Tama aga ogwa Pekahiago aga ayago yali sę selama, tama king bidi nigali.
2KI 15:23 Te king Usia te Juda hanigo king bidi bidibadi, agai kibu be te 50 kibu be pai, tama te sogo Pekahia, aga te king Menahemgo ogwa da, aga te Israel hanigo king bidi nigali. Tama te bidi Pekahia aga te Samaria bulude king sę eyu, kibu be si bidali.
2KI 15:24 Tama agai te dwai sęgę sabo kolesaga te Genuai Bidigo gedude yali, te hasia king Jeroboamgo yali kolesaga tiwai gilama yali. Polobadu king Jeroboamgo te Israel hani augwali kegelama, tama augwaligo te Genuai Bidi gedude dwai kolesaga eyu, sęgę sali. Tama te megi tama nigali king bidi Pekahiago me te deli kolesaga naga iduali.
2KI 15:25 Tama te king Pekahia agai boi hwįbo ami gavman tobolu bidi me deli, te bidi agai nogi Peka, te bidi aga aya Remaliago ogwa da, tama te bidi Peka dali, te me badu bidi dabe te moni taun Gileat bulu bidigo te 50 bidi dabe dali, augwali sisinama, tama augwaligo te king Pekahia ela muabo po minama, dąų wali. Te king Pekahia aga te Samaria bulude te king be te bomai daga rum habude bidibadi yaide, tama te bidi dabe augwali te bomai rum habu tomoba pelama, tama augwaligo te king Pekahia ela muani. Tama augwaligo te bidi me si nogi Argop me te Arie, te bidi si me ela muani. Tama te ami tobolu bidi Pekago te king bidi nigilama, sę yali.
2KI 15:26 Te king Pekahiago te tigidali haniani sę yali po da, te po gasa bukude elalubo, augwaligo te buku e tama nogi ebo da, Israel Hanigo King Bidi Dabego Yali Sę Po Elalubo Buku da wabo dao.
2KI 15:27 Te Juda hanigo king bidi Usia aga king bidi bidibadi yaide, te 52 kibu be silama, tama Peka, Remaliago ogwa da, te Peka aga te Israel hanigo king bidi nigilama, bidali. Tama aga te Samaria bulude king nigilama bidali kibu be te bidi sese deli usu nama bidai dao.
2KI 15:28 Tama te Peka agai te Genuai Bidigo gedude te dwai kolesaga yali, te hasia king Jeroboamgo yali dwai kolesaga tiwai deli naga yali. Polobadu te king Jeroboamgo te Israel hani kegelama, tama augwaligo te Genuai Bidi gedude tama augwaligo dwai kolesaga eyu, sęgę sali. Tama te king Pekago me te deli kolesaga naga yali.
2KI 15:29 Te bidi Peka king bidibo sogo, te Tiklat Pileser, te Asiria king bidi, augwali asama, te Israel hani dali boi hwįagaselama, tama augwali aiyaba elaluama, tama te Asiria hanigo te taun tigidali sesa pali, me te taun Ijon sali, me te taun Abel Betmaka, tama me te taun Janoa, tama me te taun Kedes, tama me te taun Hasor, tama te genuai distrik Gileat, tama me te moni distrik Galili me, tama te Naptali hanigo tigidali tǫ pedai dabe me, te Asiria hanigo sali. Tama te bulu we bidi dabe augwaligo selama, tama te Asiria digibulu buluba kalabus mugi pali.
2KI 15:30 Te bidi Jotamgo agai kibu be te bidi sese deli, te bidi king Usiago ogwa da, aga te Juda hanigo king bidi nigilama bidali, te bidi me Hosia, aga aya Elago ogwa da, tama te Hosia dali, te me badu bidi dabe dali sisinama, te king bidi Peka elabo po minama, sunumi kegali, tama nosali te bidi Hosiago te king Peka ela muani. Tama Hosia aga te Israel hanigo king bidi nigilama bidali.
2KI 15:31 Te king Pekago te tigidali haniani sę yali po te gasa bukude elalubo, augwaligo te buku e tama nogi ebo, Te Israel Hanigo Te King Bidi Dabe Augwaligo Yali Sę Po Elalubo Buku dao.
2KI 15:32 Peka te Israel hani dali king bidali kibu be si digi mu bidali, Jotam, aga te king Usiago ogwa da, te Jotam aga te Juda hanigo king bidi bidali.
2KI 15:33 Tama agai kibu be te bidi sese deli olama, ugwadu nogo a naga, te 25 kibu be elaluama, tama aga king bidi nigali. Tama aga te Jerusalem bulude king nigilama bidali kibu be te 16 kibu beba usu nama bidali. Aga ida nogi Jerusa, te we aga aya Sadokgo wegi da.
2KI 15:34 Tama te Jotamgo agai dwagi yai kolesaga te Genuai Bidi gedude dwagi yai kolesaga yali. Tama te aga aya Usiago yali dwagi yai kolesaga tiwai yali.
2KI 15:35 Tiali goli, Jotam agai te tibo god dolo lotu po wabo bulu du pesage dolobe. Tama tiyu, te tigidali we bidigo te lotu po wabo pesageba holama, lotu po wabo sę bomo mu eyu, tama augwaligo te pesageba pelama, tama te denami yai ofa nai ula mayu, me te denami yai hano ebo pauda me selama, uluyu iduali. Jotamgo te po obaso, tama augwaligo te Genuai Bidigo tempel be obo tų ma nigao po wali, augwaligo te tų nogi eyu Ugwadu Obo Tų dao. Tama po obaso, augwaligo te sę yali.
2KI 15:36 Te king Jotamgo te tigidali haniani sę yali po da, te po gasa bukude elalubao, augwaligo e tama nogi wabo, Juda Hanigo King Bidi Dabego Yali Sę Po Elalubo Buku dao.
2KI 15:37 Jotam te king bidibo sogo, Genuai Bidigo te Resin tagala palali, te Siria king bidi, tama te king Peka, aga te Israel hanigo king da. Aga dali, te augwa si ami bidi dabe dali, augwaligo te hasia sogo mu deli tama te Juda hani dali boi hwįgi pali.
2KI 15:38 Tama te king Jotam isali, tama augwaligo sela pelama, tama te aga wąį nǫų pubalubo gų pageba pubaligi pali. Te gų page te aga wąį nǫų Devitgo taunde elalubo. Tama Jotam aga ogwa Ahas, Ahas agai te aga ayago yali king sę selama yali, tama aga king bidi nigali.
2KI 16:1 Te king Peka aga te Israel hani dali king sę eyu bidibadi, te 17 kibu be silama, tama te sogo Ahas, aga te king Jotamgo ogwa, tama Ahas aga te Juda hanigo king bidi nigali.
2KI 16:2 Tama agai kibu be bidi sese deli olama silibo si, tama aga king bidi nigali, tama aga te Jerusalem bulude king nigila bidali kibu be te 16 kibu be pai. Tiali goli, agai aga Genuai Bidi Godigo gedude agai doloba pai kolesaga me ebe, tiali tama aga wąį nǫų Devitgo yali kolesaga tiwai ebe.
2KI 16:3 Meni. Agai te dwai kolesaga naga yali, te Israel hanigo king bidi dabego yali kolesaga tiwai naga yali. Tama me te agai te dwai kolesaga naga mu yali. Tama tiyu, te aga wai bǫų me elama, te tibo godiba ofa nai tiwai ula mayu, te siaba tigidali mu sese ulali. Tama agai dwai kolesaga mu wali pai polobadu te tǫde bidali Israel hani isąwai we bidigo yali kolesaga wali pali. Tiali goli, Genuai Bidigo augwali sela sąnama, tama te tǫ te Israel hani augwalibolo mani, polobadu.
2KI 16:4 Tama te king Ahas aga te tibo god dolo lotu po wabo bulu du pesageba piduai. Tama te lotu po wabo pesage te bulu du ugwadu elaluyu, tama me te moni ni page pąde nigilama, elaluyu yai. Tama agai te pesagede agai te ofa nai ula mayu, me te dwagi yai hano ilama, denami ebo pauda siaba ulama, dwagi yai denami yali.
2KI 16:5 Tama te Siria king bidi Resin dali, te Israel king bidi Peka dali si, tama augwali sigo te augwa si ami soldia bidi dabe augwali sigo selama, te Jerusalem bulu taunba boi baguligi pali, tama te Jerusalem bidi dabe dali augwali boi hwįani. Tiali goli, augwaligo te king Ahas dali, te aga ami bidi dabe dali, augwaligo augwali aiyaba elaluabo usu meni.
2KI 16:6 Tama te sogo te Siria king bidi Resin aga soldia bidi dabe dali boi hwįnama, tama te taun Elat ma sali. Tama agai te taun selama, te Juda hani te taunde bidali we bidi augwali sela sąyani. Tama agai te Idom hani te taunba asama bidali we bidi dabe da, teda agai sela sąbe. Tama augwali bidada asama, megi tama e po asębo bodoluba usu nagasobao.
2KI 16:7 Tama te king Resin dali, te Peka dali sigo te taun Jerusalem bulude me bagusa bididuali, tama tibaso, te king Ahasgo te me badu bidi dabe selama, te Asiria king bidi Tiklat Pileser pageba tagala palali, tama agai agabolo e tama po ola mani, “Ena te king Ahas dao, ena te nago sę ebo bidi dao, tama ena nago wai bǫų bidibao. Tama megi te Siria hanigo king dali, te Israel hanigo king bidi badi elama, augwali asama, te ena dali augwaligo boi hwįagasalio,” wali. “Tama tibaso, eno homugo nage asama, te augwali dali boi hwįagasao,” wali, “tama augwaligo da dolidalio.” Te po wai.
2KI 16:8 Tama te king Ahas agai te Genuai Bidigo tempel bede munalubo gol me, me te silva me, tama me te mone munalubo bede silva me, gol me, me te kingo bede muani nai dabe me selama, tama te agai te nai dabe selama, te Asiria kingba tolali. Magi baso meni, agai homugo te Tiklat Pilesergo te Juda hani tau sao homu eyu, tama te monego abelainu yali.
2KI 16:9 Tama te king Tiklat Pileser agai te king Ahasgo agabolo wali te po agai odali, tama agai aga ami soldia bidi dabe selama, tama agai te Damaskus taunba pelama, boi hwįgi pelama, tama agai te Siria dabego taun Damaskus sali. Tama te king Tiklat Pileser agai te Siria king Resin ela muani. Tama te we bidi agai augwali digibulu odasa pelama, te taun Kirba kalabus egi pali, te gasa tedali tǫ pedai mude.
2KI 16:10 Tama nosali te king Ahas aga te Damaskus buluba pelama, te king Tiklat Pileser sugi pali. Tama aga te bulu pedai badu bidibo sogo, agai te taun Damaskus alta elalubo suali. Tama agai te taun alta noma nigilama, tama te alta nigibo haniani kolesaga ebo po asęani. Tama agai te pris bidi Uriabolo te Jerusalemba tolali, tama agai e tama po me ola mayu, tama wali, “Te nomaba tonama, tama nago e alta tiwai me deli nigao,” wali.
2KI 16:11 Tama te pris bidi Uria agai te king Ahasgo wali po agai odali, tama agai te Damaskus bulude elalubo alta tiwai mu tama nigali, tama te king Ahas aga te Jerusalem buluba asisąbadi yaide, te pris bidi Uriago te alta polo nigila silai.
2KI 16:12 Tama te sogo te king Ahas te Jerusalemba ma sabolagasali, tama agai te alta sugi pali. Tama agai homugo te ofa nai ulainu homu yali, tama tibaso, aga te moni genuai alta ugwadu daiba holali.
2KI 16:13 Tama agai te ofa nai te siaba naga ulama, tama tigidali siago dela pela silai. Tama te sia gagawai nai te wit te ofa nai ulali, me te wain wę gelebo ofa yali. Tama te aga hasa kaneme selama, tama te God dali te deli homu ebo ofa yali, tama agai te hasa kaneme te alta daiba segeni sąsąga pali.
2KI 16:14 Tama te king Ahas agai te gesi alta tede te ofa nai ula mena silali, tama agai te polobadu te ain brasgo nigali alta sela sąnama, tama te gesi nigali alta bogo badu dodolali, te not pedai badu. Hasia te ain brasgo nigali alta sai te gesi alta sai uga togolu te Godigo tempel be tų edaba togolu elama, tomo agebelede te polobadu alta sai dodolali.
2KI 16:15 Tama te king Ahasgo te pris bidi Uriabolo e tama po wali, “Tigidali sogo nago te ofa nai ulainu da, teda nago te gesi alta saiba naga pelama, ofa nai ulao. Tigidali sogo te kigamu naga nago te isigo dela pabo ofa nai naga uluyu, me te tigidali sogo te pio naga te sia gagawai nai te witgo naga ofa nai ulao. Tama nago te king bidigo ofa nai ula mayu, tama te tigidali we bidigo ofa nai uluyu yao,” po wali. “Te ofa te tigidali te siaba sese ula palobo ofa nai da, tama me te sia gagawai nai witgo ula mabo ofa nai da. Tama me te nago te gasa ofa ebo te we bidi dabe ofa tama yao,” wali, “te ofa te nago te wain wę gelao. Tama nago te tigidali hasa kaneme selama, te ofa elama, tama te gesi alta saiba segeni sąsąga pao. Tiali goli, te brasgo te nigali te alta sai, te ena naga dao. Te alta sai eno naga dolaluabo page te eno Godibolo hanaluama, tama agai enabolo te tigidali sę eno yabo sę te agai mobogo te eno mobo ola momainao,” te po wali.
2KI 16:16 Tama te pris bidi Uriago te kingo tigidali po odama, tama tigidali sogo agai wali pali, tama agai wali po wali peyu, e tama sę ela silali.
2KI 16:17 Tama nosali te king Ahasgo te aga sę ebo bidi dabebolo te po olama, tama augwali Genuai Bidigo tempel be obo banis tomoba pelama, tama augwaligo te wilkar dabe aluali, polobadu te king Solomongo sę ebo bidi dabego te brasgo nigai nai dabe da. Tama augwaligo te wę tubo tank dabe te wilkar ugwadu daide muani tank ąį me sali. Tama me te augwaligo te brasgo nigai bulmakau noma dabe te genuai ąį tubo tank te dologo badu elaluali nai me sali. Tama nosali augwaligo te masigi dabe selama, tama te gesi bet sai yali, te genuai ąį tubo tank muabo bet sai nigali.
2KI 16:18 Tama te Genuai Bidigo tempel be togobe badu pąde tama, te king aga dulabo dwasianu be gagawai nai me deli elaluai, augwaligo te nai nigali page e tiwai, te giliga asobo badu paliainu, te Sabat side te madi tiwai nigai nai da, tama megi Ahasgo po obaso, augwaligo te nai hųgiali. Tama augwali te Genuai Bidigo tempel be obo banis tųba te king pabo tųba te augwali pai, tama augwaligo te tųde te dwagi yai au yai nai elaluali me hųgiali, tama te au yai nai te bidi dabego munu me subeo. Tama te king Ahasgo agai te Asiria kingo homu wali painu homu yai, tama agai te tobage sę te tempel bede sę yali.
2KI 16:19 Te king Ahasgo te gasa haniani sę yali po da, te po gasa bukude elalubo, te augwaligo e tama nogi wabo da, Te Juda Hanigo King Bidi Dabe Augwaligo Yali Sę Po Elalubo Buku da.
2KI 16:20 Tama nosali te king Ahas isali, tama augwaligo aga te aga wąį nǫų dabe gų pageba te Devitgo taunba pubaligi pali. Tama aga ogwa, te Hesekiago, te aga ayago sę selama, tama aga king bidi nigali.
2KI 17:1 Te king Ahas aga te Juda hanigo king bidi nigilama bidali kibu be te nogo si olama, te sągągo si, te 12 kibu be silama, tama Hosia, aga te Elago ogwa da, te Hosia aga te Israel hanigo king bidi nigali. Tama aga te Samaria bulude king bidi nigilama bidali kibu be te 9 kibu be pai.
2KI 17:2 Tama agai te Genuai Bidigo gedude te agai dwai kolesaga yali, tiali goli te agai te dwai kolesaga ebo sę te gasa king dabego yali kolesaga tiwai gilama te agai genuai me ebe.
2KI 17:3 Tama te Hosia aga king bidibo sogo, te Asiria king bidi nogi Salmaneser, aga asama, tama te Israel hani dali boi hwįagasali. Tama te Asiria hanigo te Israel hani aiyaba elaluali, tama te king Hosiago te po dąų wali, te Asiria king bidi Salmaneser dologode bidiyu, tama te takis mone te tigidali kibu bede mawaibao wali.
2KI 17:4 Tiali goli, kibu be me delide te king Hosiago te meba bidi dabe te Isip king bidi So pageba tagala palali, tama te king Sogo aga tau somainu hanalu wali. Tama te kibu bede te king Hosiago te takis sabo mone te king Salmaneser pageba me mabe, tama te tigidali kibu be yali tiwai me ebe. Te Asiria king bidi Salmanesergo te Israel hanigo king bidi Hosiago dąų wali po togobo page te agai polo kegelama, polo haninani, tama tibaso, agai te me badu ami soldia bidi dabe tagala palali, tama augwaligo te king Hosia tulama, tama aga kalabus beba muainu yai.
2KI 17:5 Tama te nosali te king Hosia augwaligo aga kalabus ilali, tama te king Salmanesergo aga ami soldia bidi dabe selama, tama augwali pelama, te tigidali Israel bidi dabe dali boi hwįgi pai. Augwali pelama, tama te Samaria taun bulu bobegelama, tama augwali boi hwįdubadi yaide, te kibu be selaba usu nigi pali.
2KI 17:6 Tama te Israel hanigo king bidi Hosia te Israel hani dabe dali king bidi nigilama bidibadi, te agai kibu be te 9 kibu be silama, tama te sogo te Asiria king bidigo te boi hwįnama, te Samaria hani me aiyaba elaluama, tama te taun sali. Tama agai te Israel hani te Asiria buluba selasa pai, tama te me badu bidi dabe te agai te Hala taun bulude bidao wali, tama te me badu bidi dabe agai te Habor wę pąde te distrik Gosan bulude bidao wali, tama me badu bidi dabe te Midia taun bulu tǫde bidao wali.
2KI 17:7 Te tama sęgę te Israel hani augwali tigide pedalali, magi baso meni, augwaligo te Godigo gedude augwaligo sęgę sabo dwai kolesaga yali, augwa Genuai Bidi. Augwaligo te homu ebe, augwa wąį nǫų dabe te augwali te Isip king bidi nogode ma sali augwaligo te konebe. Meni. Israel hani augwaligo te tibo god dolo lotu po wabo sę yali,
2KI 17:8 tama augwaligo augwa king bidi dabego dwai kolesaga yalidu wali pabo sę yali. Tama me te polobadu te gasa hani we bidi dabe te tǫde bidali we bidi dabego yali dwai kolesagadu wali peyu yai. Tiali tama, te Genuai Bidigo te hani dabe augwali sela sąnama, tama te tǫ te Israel hani augwalibolo mani.
2KI 17:9 Te Israel hani dabe augwaligo Genuai Bidigo godolo isąbo haniani dwai kolesaga geme yali. Augwaligo te tigidali genuai boma pai masigigo nigai obo elaluali taun bulu dabede me, te dwasianu bulu dabede me, te augwaligo te tibo god dolo lotu po wabo pesage elalua pali.
2KI 17:10 Tama augwaligo te kolesaga yali, augwali te bulu duba holama me, tama me te moni ni dologode me tama kolesaga yali, tama augwaligo te masigigo te ni pos tulubo ąǫ elama, tama te tibo god we Asera noma muna muna pali, tama augwaligo te teba lotu po wali.
2KI 17:11 Tama augwaligo te bulu dude lotu po wabo pesagede tama augwaligo te tǫde polobadu bidali we bidi dabego lotu po weyu yali kolesaga tiwai delidu wali pali, tama augwaligo te dwagi yai hano holama, denami ebo pauda siaba uluyu yai. Te Israel hani dabe augwaligo te haniani dwai kolesaga ebaso, te Genuai Bidi Godigo moni sębę mu yali.
2KI 17:12 Polobadu Genuai Bidigo augwalibolo e tama po ola mawai, “Dagego te tibo god nomaba dagego te lotu po teba wagio,” po wali. Tiali goli, augwaligo agai te wali po sela sąyani, tama augwaligo te nomaba me lotu po wabo sę yali.
2KI 17:13 Tama te Genuai Bidigo te profet bidi dabe me te nosali pedalubo sę koneai bidi dabe me augwali te Israel haniba me, me te Juda haniba me tagala palali, tama augwalibolo bomai po e tama wali, “Dagego kolesaga begelama, tama dagego te dwai kolesaga ebo sę tagalama, tama dagego te tigidali bomai po te eno po odama wali pao,” wali. “Te bomai po dabe me te eno te dagego wąį nǫųbolo mawai po dao, tama te po dabe te eno sę ebo bidi dabego eno ola mobaso, augwaligo pedauwalidu pusai dao, te bage te profet bidi dabe dao,” te po wali.
2KI 17:14 Tiali goli, te Israel hani dabe augwaligo te Godigo po sela sąnama, tama augwaligo God dali hagoma genuai mu yali, tama augwaligo augwa wąį nǫųgo yali kolesagadu wali pai. Te wąį nǫų dabe augwaligo te Godigo po dąų wasiąma, tama augwaligo konealubo homu te God dali kęnama, dąų wai meni, augwa Genuai Bidi dali.
2KI 17:15 Te Israel hani bidi dabe augwaligo te augwa Genuai Bidi Godigo po tudiba sąnama, tama te bomai po te agai augwa wąį nǫų dabe augwali dali dąų wai po, tama te tigidali bomai po agai augwalibolo mani. Tama augwaligo te po umabo sogo mu sela sąnama, tama augwaligo te tibo godiba lotu po mu weyu, bidali. Te tibo god augwali te God mu menio. Tiali goli, te Israel we bidi dabe augwaligo te tibo god te olo naiba augwaligo lotu po bomo yali. Tama te Israel hani augwa digi augwa te olo bage gagawai mu pedelali, te olo tibo god tiwai. Polobadu te Genuai Bidigo augwalibolo e tama po augwalibolo ola mawai, “Dagego te dage pąde bidibo bidi dabego ebo kolesagadu wali pigio,” wali, tiali goli te Israel hani augwaligo te Genuai Bidigo wali po sela sąnama, tama augwaligo te hanigo yali kolesagadu wali pali.
2KI 17:16 Tama augwaligo te Godigo bomai po tigidali sela sąyani, augwa Genuai Bidigo po. Tama augwaligo te gol selama, te bulmakau kibu omai si nigilama, tama augwaligo te kibu noma siba lotu po wali. Tama me te tibo god we Asera noma nigaliba lotu po weyu yali. Tama me te augwaligo te dagalu hǫba lotu po wali, tama me te tibo god Balba lotu po weyu yali.
2KI 17:17 Tama augwa wai bǫų dabe elama, tama augwaligo te wai dabego tigi te siaba munama, augwa tibo godiba te ofa nai tiwai gilama olo mani. Tama augwali me badu te sogo yesi bidi pageba pali, me badu te we bidi dabego te isai we bidigo isi bidi dali po mibo we bidi dabe pageba pali, tama augwaligo te hani augwalibolo augwali tau somainu hanalu wali. Te Israel hani dabe augwaligo deli homu naga yali, tama teyu, augwaligo dwai kolesaga me edu bidali. Tama Genuai Bidigo augwaligo te kolesaga me ebo sulama, tama agai augwalibolo agai wado ela mani.
2KI 17:18 Tama Genuai Bidigo te Israel hani dabe augwali dali agai sębę genuai mu me eyu, tama agai te Israel hani subo hagela mu yali. Tama tibaso, agai augwali augwa aga dali bidali buludu digibulu mu sela sąyani. Tama te Israel hani bidi dabe me deli te bulude me bidibe. Te Juda hani augwa naga te augwa tǫde bidali.
2KI 17:19 Tialima, te Juda hani bidi dabe augwaligo me te Godigo bomai podu wali pabe, augwa Genuai Bidi. Mu meni. Augwaligo me te deli kolesaga naga yali, polobadu te Israel hani bidaluyu yali kolesaga tiwaidu me wali pali.
2KI 17:20 Tama tibaso, Genuai Bidigo te Israel hani we bidi dabe augwali agai tudiba mu sąyani. Tama agai sębę mu eyu, tama agai te boi bidi dabe tagala palama, tama te boi bidi dabego te Israel hani dali boi hwįnama, te Israel bidi dabe me badu ela muyu, ela pali. Tiali goli, te Israel hani bidi dabe augwaligo te dwai kolesaga ebo sę me tagalobe, tama tibaso te Genuai Bidigo hagela mu eyu, tama augwali aga dali me bidisiąmainogo eyu, te agai augwali augwa buludu digibulu mu sela sąnama, bidigi pao wali.
2KI 17:21 Polobadu Israel hani dali, te Juda hani dali si, augwali te king Devit dologode bidai. Tiali goli, nosali te Genuai Bidigo te Israel hani augwaligo te Juda hani tagalama, augwa tedali bidimainu nigilali. Tama tilama, te Israel hani augwa king tedali dąį ilali, te bidi te Jeroboam, Nebatgo ogwa, te Jeroboam te bidi te Israel hanigo king bidi nigilali. Tiali goli, te king Jeroboamgo te Israel hani augwali kegelama, tama augwaligo Genuai Bidi tagalama, tama augwaligo dwai kolesaga umabo mu eyu, tama genuai sęgę mu sali.
2KI 17:22 Tama nosali te Israel hanigo me te augwaligo te king Jeroboamgo ebo kolesaga wali pabo sę eyu, tama augwaligo te haniani sęgę sali, te kingo sali sęgę tiwai sali. Augwaligo te sęgę sabo kolesaga me tagalobe. Mu meni.
2KI 17:23 Tama nosali te Genuai Bidigo augwali hagela mu ebaso, tama augwali aga pąde me bidisiąmainogo eyu, agai augwali te gasa buluba bidigi pomainu digibulu mu sela sąyani. Genuai Bidigo tama tiali, magi baso meni, te Israel hani bidi dabe augwaligo te tigidali po agai te aga sę bidi profet bidi dabego pedauwalidu ola mani podu wali pabe, te profet bidi dabe te aga sę ebo bidi dabe dao. Tama tibaso, te Asiria hani augwali asama, te Israel hani dabe dali boi hwįagaselama, te Israel hani augwali aiyaba elaluali, tama augwali te Asiria buluba odasa pali. Tama augwali te bulude me bidibao. Te gasa hani we bidi dabe augwali asama, te Israel hanigo buluba bidagasali.
2KI 17:24 Te Asiria king bidigo te taun Babilon we bidi dabe me, me te taun Kuta, tama me te taun Iva we bidi dabe me, tama me te taun Hamat we bidi me, me te taun Sefarvaim we bidi me agai selama, tama te augwali te Samaria bulu taun dabeba odasa pelama, tama te Israel hanigo bulu taunba augwali tatagalo pali. Tama te we bidi augwali te Israel hani we bidigo bulu tǫ selama, mu bidali.
2KI 17:25 Te gesi noma we bidi dabe augwaligo te Genuai Bidi dolo mu lotu po wabo we bidi dabe meni, tama tialima, Genuai Bidigo te bulu uni yowi laion tagala palama, tama me badu bidi dabe te uni yowi laiongo ela muani.
2KI 17:26 Tama tialima, te me badu we bidi dabe pelama, te Asiria kingbolo e tama po wagi pali, “Te nago te i Samaria bulu taunba odasa pali hani we bidi dabe, augwaligo te i tǫde godigo bomai po augwaligo konebeo,” wali. “Tama teyu, te godigo te dwai bulu uni yowi tagala palama, tama te we bidi dabe ela mubo sę ebo,” wali.
2KI 17:27 Tama te kingo te po odobaso, tama te aga sę ebo gavman ofisa bidibolo e tama po ola mani, “Nage pelama, te dago te e Asiria buluba odasa asali pris bidi me deli oda sigi pao,” wali. “Tama te pris bidi aga te Israel bagego Samaria buluba ma tagala palinao, tama aga bidiyu, te we bidi dabe augwali te bulu tǫ page bidi godigo bomai po agai augwali ola momainao,” te po wali.
2KI 17:28 Tama augwaligo te Israel hanigo pris bidi me deli sali, tama augwaligo aga te Samaria bulu tǫdu tagala palali. Tama aga te taun Betel buluba bidigi pali, tama agai te we bidi dabebolo Genuai Bidi God dolo mu lotu po wabo kolesaga mu ola mani.
2KI 17:29 Tiali goli, te hani dabe deli deli augwaligo te tibo god noma nigilama, teba wali pabo kolesaga me idu bidali. Tama augwaligo te god noma nigali, te polobadu te Israel hani dabego te lotu po wali pesagede muna muna pai, te bulu du dabede. Tama augwaligo te deli deli hani augwa god deli deli nidigi pelama, tama augwa bidibo taun bulude muna muna pali.
2KI 17:30 Tama te Babilon hani augwa tali nigali tibo god noma nogi da Sukotbenot, tama me te taun Kuta hanigo tibo god noma nogi e dao, Nergal da, tama me te taun Hamat hanigo tibo god noma nogi e dao, Asima da.
2KI 17:31 Tama te taun Iva hanigo tibo god noma nigali nogi e dao, Niphas, tama te me nogi Tartak dao. Te Sefarvaim hani augwali te augwa wai bǫų elama, tama augwaligo te ofa nai tiwai gagawai mu te tibo god siba ula mani, tama te god si nogi me nogi Adramelek, tama me nogi Anamelek.
2KI 17:32 Tama me te Genuai Bidi dolo lotu po mu wabo we bidi dabe augwa digi augwa hani bidi dabe me deli Genuai Bidigo pris bidi me deli dąį ilali. Te pris bidi aga te lotu po wabo bulu du pesagede bidiyu, agai e tama kolesaga yali, te we bidi dabego magasabo hasa dabego te Genuai Bidi dolo ofa nai ula mayu yali.
2KI 17:33 Tama me te augwaligo Genuai Bidi dolo lotu po mu wabo kolesaga me, tama me te augwa page bulude polobadu bidiyu yali kolesagadu wali peyu, tama augwaligo te augwa tibo god dolo lotu po weyu yali, te tedali kolesaga si talua si yali.
2KI 17:34 Tama te megi tama me, te hani augwaligo te kolesagadu me wali peyu bidibao. Augwaligo te Genuai Bidi dolo mu lotu po wabo meni, tama augwaligo te agai te bomai po te Jekopgo hanibolo mani po augwaligo wali pabo meni. Jekop te bidi te aga te Genuai Bidigo gasa nogi me poali nogi, te nogi te Israel da.
2KI 17:35 Polobadu te Israel hani dabe augwali dali te Genuai Bidigo te bomai po me deli dąų wali po e tama po dąų wali, “Dagego te tibo godiba lotu po wagio,” wali. “Tama dage te tibo god dologode dage bidigio. Mu menio. Dagego augwalide kidu sugunama, tama ofa nai augwalibolo magimio.
2KI 17:36 Menio. Dagego ena Genuai Bidi deliba naga lotu po wao, tama ena dologode naga bidao. Te eno genuai bomogo naga te eno dage te Isip bulude selama, tama dage eba odasa asai dao. Tama teyu, dagego ena deliba naga kidu sugunama, lotu po weyu, tama te ofa nai ena deliba naga mao,” po wali.
2KI 17:37 “Dagego te eno asęani tigidali bomai po me, te eno e tobage kolesaga yao wali po dabe me, tama dage dua dua eyu, dagego te po mu wali pao. Dagego te tibo god dolo lotu po wagio.
2KI 17:38 Tama dagego te eno dage dali te bomai po dąų wali po kegeda paligio, tama tilama, dagego te tibo godiba lotu po wagio.
2KI 17:39 Menio. Dagego ena Genuai Bidi duga God deliba naga lotu po wao, tama ena dologode naga bidaluao,” wali. “Tialima, dagego tama teyu da, teda te eno dage tau saibao, tama eno dage te boi bidigo nogode ma dobola saibao,” wali.
2KI 17:40 Genuai Bidigo e tama po wali, tiali goli te we bidi dabego agai te wali po sela sąnama, tama augwaligo te polobadu yali kolesagadu me wali pabo sę iduali.
2KI 17:41 Te Samaria buluba asama bidagasali hani we bidi dabe, tama augwaligo te Genuai Bidi dolo lotu po weyu, tama me augwa te tibo god dolo lotu po weyu iduali. Tama te megi tama augwa ame nani wai dabego me te polobadu te yali deli kolesagadu naga wali pabo dao, e po asębo sogoba usu nagasali.
2KI 18:1 Hosia aga king nigilama bididubadi, te kibu be sela pai, te Hosia aga aya te Elago ogwa da, te bidi aga te Israel hanigo king bidi nigilama bidali, Hesekia, aga aya Ahasgo ogwa, aga te Juda hanigo king bidi nigilali.
2KI 18:2 Hesekiago agai kibu be bidi sese deli olama, ugwadu nogo a nama kibu be pabo side, te aga king bidi nigai, tama aga te Jerusalem bulude king bidi nigila bidali kibu be te 29 kibu be bidali. Te aga ida nogi Abiya, Abiya aga aya te Sekaraiago wegi da.
2KI 18:3 Hesekia agai te dwagi yai kolesaga te Genuai Bidigo gedude yali, te aga wąį nǫų king Devitgo yali kolesaga tiwai yali.
2KI 18:4 Tama te king Hesekia agai te e tama kolesaga yali, te augwaligo te tibo godiba lotu po wabo pesage dolama, tama agai te masigide age ni posde te tibo god noma piksa nigilama daganani masigi pos dabe me hųginama sąyani. Tama me te nigo te tibo god we Asera noma nigilama daganai age ni pos gelama, sąyani. Tama me polobadu Mosesgo te brasgo nigali hasamani te agai selama, augwaligo te hasamani e tama nogi poai, Nehustan, tama te hasamani noma agai te denege minama, sąyani. Magi baso meni, te we bidi dabego te hasamaniba lotu po weyu, te dwagi yai denami emainu hano ebo pauda ulubaso, tiai dao.
2KI 18:5 Hesekia agai te Genuai Bidiba konealubo homu dąų mu wali, te Israel hanigo God da. Te Juda hani king bidigo Godiba konealubo homu dąų wai king bidi me deli bidai meni, te Hesekiago yali tiwai gilama yai bidi me deli meni yai. Agai te Godiba konealubo homu dąų mu wai, te agai konealubo homugo te hasia king bidi dabe me, te nosali nigabo king bidi dabego konealubo homu me, te king Hesekiago konealubo homugo augwali aiyaba elaluai mu dao.
2KI 18:6 Aga te Godiba kęa pelama, dąų mu wagi pali. Tama agai te tigidali sogo Genuai Bidi munu me tagalobe. Mu meni. Tama agai tigidali bomai po te Godigo te Mosesbolo mani po tigidali te agai bugagia wali mu pali.
2KI 18:7 Tama teyu, te Genuai Bidi te king Hesekia dali bidiyu, tama aga tau sali, tama tigidali sę agai yali, te bugagia mu pedalali. Te king Hesekiago homugo te Asiria hani king bidigo te Juda hani augwali tonalubo hagela mu yali, tama tibaso augwali te hanigo dologode ma bidibe.
2KI 18:8 Tama te king Hesekia aga ami soldia bidi dabe selama, te Filistia bidi dabe dali boi hwįgi pelama, tama te tigidali taunde me, me te bulude te bomai obo bogo badu elalubo bulu dabe me, augwaligo te boi hwįgi pali. Tama augwaligo te Filistia hani aiyaba elalu, ela peyu, tama te taun Gasaba usu nigi peyu, tama te bulu pąde elalubo bulu dabe dali aiyaba elaluama, sali.
2KI 18:9 Te king Hesekia aga te Juda hanigo king bidi bidibadi, te agai kibu be te me si me si tama kibu be pai, tama te Israel hanigo king bidi Hosia aga te Israel hanigo king bidi bidibadi e tama kibu be yali, te 7 kibu be yali. Aga aya te Ela dao. Tama te kibu bede, te Asiria king bidi Salmanesergo aga ami soldia bidi selama, te Israel hani bidi dabe dali boi hwįagasali. Tama augwaligo te taun Samaria bobegelalu, tama te taun sainu boi hwįani.
2KI 18:10 Tama augwaligo te taun bobegelalu te boi hwįdubadi yaide, kibu be selaba usu nigi pali, tama te nosali augwaligo te Samaria hani aiyaba elaluama, te Samaria bulu taun sali. Tama te kibu bede da, te king Hesekia agai king bidali kibu be te 6 kibu be ebadi te boi hwįani, tama te Israel hani bidi dabego king bidi Hosia aga king bidali kibu be te 9 tama kibu be wabode te boi hwįani.
2KI 18:11 Tama te Asiria king bidigo te Israel hani augwali te Asiria buluba odasa pali, tama tede me badu bidi dabe te taun Hala bulude tagalama bidao wali, tama te me badu bidi dabe te Gosan bulu taun pąde te wę Habor te bulude bidao wali, tama me badu bidi dabe augwali te Midia hanigo taun dabe bulu tǫde bidao wali.
2KI 18:12 Te sęgę te Israel hani augwalide pedalali, magi baso meni, augwaligo te Godigo po sela sąbaso, augwa Genuai Bidi, tama augwaligo te Genuai Bidigo augwali dali te bomai po bodolu selama dąų wali po togolama, tama augwaligo Genuai Bidigo aga sę bidi Mosesbolo mani bomai po me tigidali bolali. Augwaligo te Genuai Bidigo po odobe, tama augwaligo te agai bomai po me wali pabe.
2KI 18:13 Te Hesekia aga king bidibadi, agai te 14 kibu be silama, tama te Asiria hanigo king bidi Senakerip aga ami soldia bidi dabe dali asama, tama augwaligo te Juda hani dabe dali boi hwįagaselama, tama augwaligo te Juda hani aiyaba elaluama, tama augwaligo te bomai obo yai taun naga sesa pelama, bidali. Tiali goli, te Jerusalem taun bulu digi sabeo.
2KI 18:14 Te king Senakerip aga te taun Lakis bulude bidali, tama te Hesekiago te kingbolo e tama po ola tolali, “Eno nage dali hagoma eyu, tama eno dwasianu geda muanio. Tiali goli, eno homugo nago ena dali boi hwįbo tagalama, tama nago eno bulu tagalama, pao,” wali. “Tialima, nago tama teyu da, teda eno nagebolo magi nai mawaibawe te nago enabolo hanalubaso.” Tama tibaso, te king Senakeripgo te king Hesekiabolo e tama po wali, “Nago enabolo te 10,000 kilogram silva me sobadi, tama me te 1,000 kilogram gol sobadi elama, enabolo mao,” te po wai.
2KI 18:15 Tama te po obaso, te king Hesekia agai te Genuai Bidigo tempel bede muani te tigidali silva dabe me, tama me te kingo bede te mone munalubo habu badu muani doado bage me, tigidali agai selama, tama te king Senakeripbolo sese tama mani.
2KI 18:16 Tama me te agai te Genuai Bidigo tempel be tųde elaluali gol me, tama me te tų sesegede elalubo golgo age ni pos me tama agai tigidali sela sąnama. Polobadu te king Hesekia aga digi te aga sę ebo bidibolo olama, tama te tų sunumi daide te golgo haluali, tama me te pos ni daide golgo haluama dagayani. Tama megi agai te tama muani gol selama, tama te gol dabe te king Senakeripbolo mani.
2KI 18:17 Tama te king Senakeripgo te gol dabe me, te silva dabe me agai sali, tiali goli agai te ami gavman tobolu ofisa bidi sela dali, te ami soldia bidi umabo dali, tagala palali, tama augwali te Lakis bulu taun tagalama, Jerusalem taun buluba pali. Tama augwali te Jerusalem taunba sabolali, tama augwali te Jerusalem taunba te sigi węgo te ugwadu da Jerusalemba aiyaba kegasa tulali wę pabo gamia, te wę gamia pąde augwali bidaluali. Te wę gamia tų te moni sunumi sesegede te name ugwa nigibo buluba pabo sunumi sesegede pąde elaluali.
2KI 18:18 Tama te Asiria hanigo te king Hesekiabolo augwaligo po ola tolali, te aga asao olama po wali. Tama tiali goli, agai te aga sę ebo gavman tobolu bidi sela tagala palama, tama augwaligo te Asiria hani sugi pali. Tama agai te tagala palali bidi dabe nogi da, te bidi me te Eliakim, aga aya Hilkiago ogwa da, te bidi agai sę te kingo be tonalubo bidi da, tama me bidi nogi Sepna, te bidigo sę te king bidigo kuskus bidi da, te bidi me nogi Joa, aga aya te Asap, te bidigo ogwa da, te bidigo agai ebo sę te king bidigo agai te tigidali ebo sę po asębo sę ebo bidi dao.
2KI 18:19 Tama te bidi sela te Asiria hani bidiboba sabalobo sogo, te Asiria ami gavman tobolu bidi me deligo augwali dali e tama bomo yai po wali, “Dage pelama, te king Hesekiabolo te e bomai king bidigo po agabolo pusigi pao, aga te Asiria hanigo king bidi, e tama po wali, ‘Hesekia, nago mena tama tiwai bomo elalubaso ebawe, nago eno bomo dologode bidibeo?
2KI 18:20 Nago homugo olo po tama wabogo bomo eyu, te wabao, te boi hwįbo da nago aiyaba me elaluaibawe, a? Nago ena dali hagoma ebawe? Naga homugo dego asama, nage tau sagasabo weyu, tama nago ena dali hagoma ebawe?
2KI 18:21 Eno koneani, nago homugo te Isip haniba tonono eyu, tama nago boi hwįbode augwaligo nage tau saiba. Tiali goli, eno nagebolo obao, te Isip hani augwali da, te da te sigi dili deli toga pai tiwai dao. Tiali tama, nago selama, tama te tolasa bilibo dono tiwai dao, tama tialima, te sigi dage mego naga nogode eneyu, dolaibao. Te Isip hanigo king bidigo agai kolesaga te bomo isąwai sigi dili mu tiwai dao,’ wali. ‘Tama teyu, nago boi hwįbode agai nage usu nama, nage me tau sagasogobeo.
2KI 18:22 Tiali goli, nago te po weyu da, dage Israel hani dabe dagego konealubo homu Godiba dąų wali da, duga Genuai Bidi, tama te agai dage tau saibao, tiali goli dego me te usu me egobeo. Magi baso meni, Hesekia, nago te aga dolo lotu po wabo pesage me, tama me te ofa nai ulubo sai alta dabe elalua pali bulu dabe dolai dao. Tama nago te Juda hani dabe ebadi, te Jerusalem ebadi elama, tama nago augwali e Jerusalem buluba sisinama, tama deli ofa nai ulubo alta saiba naga sisinama, lotu po wao, wai.’”
2KI 18:23 “Tama eno kingo gasa po me wali, Hesekia, eno kingo 2,000 hos kibu nage mabo usu yaibao, tialima nago te 2,000 ami soldia bidi kegelama, tama augwali te kibu hosde dugulama, tama augwaligo boi hwįabo. Tiali goli, eno koneani, naga digi naga te namba tiwai ami soldia bidi menio,” te po wali.
2KI 18:24 “Tama nago homugo te Isip hanigo ami soldia bidi dabe augwaligo te hos kibu me, tama me te karis me, tama te nai dabe nago boi hwįbode tama augwaligo nage tau saibawe? Tiali goli, nage munu me tau sogobeo, tama augwali munu ma asogobeo. Tama teyu, naga bula bomogo eno dwasianu ami soldia hani da me aiyaba elalugobeo.
2KI 18:25 Nago homugo ena te asali, te ena homugo digi asama, te boi hwįagaselama, nago bulu dolaliwe weyu, a? Mu menio. Genuai Bidi Godigo aga digi enabolo obaso, te ena aselama, te nago te bulu te dolaliąo wali,” te Senakeripgo tagala palali bidi dabego te po wali.
2KI 18:26 Eliakim tama, me te Sepna ebadi, tama me te Joa, tama te bidi selago te po wabo odali, tama augwaligo te Asiriago ami soldia gavman tobolu bidi dali e tama po wali, “Nago da dali po wainu da, te Siria pogo naga wao,” wali, “magi baso meni, dago te hanigo po koneani dao. Nago te Hibru pogo naga wagio, te taun obo banis daide ugwa badu dolalubo Juda bagego me nago te wabo po odabuo,” wali.
2KI 18:27 Tiali goli, te ami gavman ofisa bidigo e tama po wei ponani, “Eno kingo ena tagala palama, te eno e wabo po te duga king dali, dage dali sigo naga odomainu ena tagala palobeo. Menio. Te oga taun obo banisde dolalubo bagego me te po odomainao wali. Magi baso meni, tialima te boi hwįbaso da, teda te dago te Jerusalem taun bologobea saibao, tama te dage tigidalide dwai bodolu sogo mu dageba dolo pedalaibao,” wali. “Tama te taun obo banis daide ugwadu oga bidibo bage augwaligo tuabo nai mu menio. Tama augwali te di tuyu, tama te augwa poi ma tuyu, te yaibao,” wali, “te tibo tiwai te dage tama dao,” wali.
2KI 18:28 Tama te Asiria gavman ofisa bidigo te taun obo ugwadu daide te bidibo bidi dabeba tonama, tama agai te Hibru pogo moni dagą olama weyu, e tama po wali, “Dagego olo bugagia munama, tama te bomai kingo po bugagia odao, aga te Asiria king bidi dao,” wali.
2KI 18:29 “Agai te tama po wali, ‘Dagego te king Hesekiago agai dage dali ili po wabo po te mu po da homu igimio,’ wali. ‘Te Hesekiago dage tau selama, ena aiyaba me elaluama, dage bugagia me bidigobeo.
2KI 18:30 Dagego te Hesekiago agai te ili po wabo munu me odogio, tama dagego homugo te Genuai Bidigo dage tau selama, tama te da Asiriago dage aiyaba elalusiąma, tama te taun Jerusalem sogobewe homu eyuwe?
2KI 18:31 Dagego te king Hesekiago agai wabo po munu me odogio, tama agai po dagego odama, tama dagego ena dali dagego boi hwįagasabo homu egio. Tiali tama, dage bugagia bidabo homu eyu, tama naga te ulu ąį bugagia tuyu, tama duga te ni wain du me tuyu, tama me duga te gide ebo kaya du me bugagia bidiyu tuainu da, teda tea dagego te taun dago sagasobaso da, teda dagego gedugo sula tagalao,’ wali.
2KI 18:32 ‘Tama dage bugagia bidada pedubadi yaide, tama ena asama, tama dage selama, tama te gasa bulu meba tagalama, te bulu te duga bulu tiwaide bidaibao. Te bulu da, te du tubo ni wain gi me umabo mu ebo dao, tama me te sia gagawai nai wit, te bret nigibo nai gi me te bulude umabo mu elalubao. Tama te ni oliv me, tama me te ganama bunu me te bulude umabo elalubo bulu dao,’ wali. ‘Tialima, dagego eno po wali peyu da, tea dage bugagia bidiyu, tama dage me isigobeo. Tama Hesekiago agai dage ili po ola mayu, e tama po wabo da, Genuai Bidigo dage tau selama, tama da aiyaba elaluaibao wabo po. Tiali goli, dagego homugo agai po mu da olama, dago te boi hwįaibao olama, dagego genuai homugo konealugio,’ te po wali.
2KI 18:33 ‘Dagego homugo te gasa hani augwaligo godigo augwali tau selama, tama augwaligo da Asiria hani dali boi hwįnama, tama augwaligo da aiyaba elalualiwe, a? Mu menio.
2KI 18:34 Tama dago te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te hani dabe dali boi hwįgi pabo sogo, augwaligo god mena bidibowe tama augwali tau sabowe? Tama dago te Samaria buluba boi hwįagasali sogo, tama te Samaria hani augwa godigo augwali tau selama, tama augwaligo da Asiria aiyaba elalualiwe? Mu menio.
2KI 18:35 Dago te umabo bulu bidi dabe dali hwįani, tama te hani augwaligo da te augwa umabo god bidibadi, tiali goli augwaligo te god me deligo augwa te bulu me tau selama, tama dago augwali dali boi hwįani me tagalai menio. Tama tialima, te Jerusalem hani bidi dabe, dagego homugo te duga Genuai Bidigo dage tau saibawe, tama dago dage aiyaba elalubo usu egobewe?’ Eno king bidigo te po dagebolo ola tolai dao,” te Asiria gavman ofisa bidigo te po wai.
2KI 18:36 Te Asiria gavman ofisa bidigo agai te po wabo silama, tiali goli te taun obo ugwadu daide bidali bidi dabego tama augwaligo sagia siyu, po me deli wei ponobe, magi baso meni, te king Hesekiago augwalibolo te Asiria hani augwaligo te po wei ponogio olama, habu selai baso, tama augwaligo te po wei ponobeo.
2KI 18:37 Tama tialima, te Asiria gavman ofisa bidigo wali pode te Eliakim, tama me te Sepna, tama me te Joa, te bidi sela augwaligo haliga sęgę mu yali. Tama tibaso, augwa bulubo ugwa pibisayali. Tama augwaligo te Asiria gavman ofisa bidigo wali po tigidali po te king Hesekiabolo pusigi pali.
2KI 19:1 Tama te king Hesekiago te Asiria bagego wali po dabe odali, tama aga homu sęgę mu ebaso, tama aga bulubo ugwa pisila sąwai. Tama agai te homu dene ebo bulubo ugwa bulama, tama aga te Genuai Bidigo tempel be tomoba pali.
2KI 19:2 Tama te king Hesekiago te kingo be tomode sę ebo bidi Eliakim i wali, te bidi te kingo be tonalubo bidi da, me te bidi Sepna dali, te bidi te kingo kuskus bidi da, tama me te pris sę kibu be hauwa yali bidi dabe dali. Tama agai augwali te profet Aisaia sugi pomainu tagala palali, aga aya Amos da. Tama te bidi dabe me tigidali te homu dene eyu, te tobage ugwa naga bubulu pali.
2KI 19:3 Tama augwali pelama, te profet bidi Aisaia pageba sabolama, tama augwaligo te profet bidi Aisaiabolo e tama po wali, “Kingo te po wali, ‘Megi e tama side da, teda moni homu sęgę ebo sogo dao,’ wali. ‘Tama te Asiria hani augwaligo dabolo tama te hale yabo po umabo po weyu, posobo po walio. Da te we me deli haliga yai we gagawai dao, tama te wai ame nabo sogo te pedalobao, tiali goli te we te wai ame nabo te bomo menio,’ wali.
2KI 19:4 ‘Asiria king bidigo aga sę ebo gavman ofisa bidi tagala palali bidigo aselama, dago God dolo agai dwai po mu wagasalio, dena Genuai Bidi dao, aga te tigidali sogo bidada peyu, bidada pabo God dao. Tialima, te aga dolo te dwai po wali aga odali bogo, tama aga digi te po wali bidibolo wei ponoyu, sęgę mawaibao,’ wali. ‘Tama teyu, dago homugo nago te God dolo gedu haluasa po wao, tama agai da dwasianu hani bidibo tau somainao,’ kingo te po wali,” augwaligo te po wai.
2KI 19:5 Te profet bidi Aisaiago te king Hesekiago ola tolali po odali,
2KI 19:6 tama te po sela asali bage augwalibolo e tama po wali, “Dage te king pageba ma peyu, tama te Genuai Bidigo e po tama aga dolo pusao. Genuai Bidigo e tama po wai, ‘Nago augwaligo te dwai po wali te pode moni homu elama, nage wi igio,’ wali. ‘Te po wali bidi dabe augwali da, te Asiria king bidigo olo sę ebo bidigo ena dolo te po wali dao.
2KI 19:7 Magi baso meni, ena Genuai Bidi, eno te Asiria king bidigo homu begela tagalama, tama agai po me deli odobo si, teda agai dage tagalama, aga buluba ma begasa paibao,’ wali. ‘Tama aga te Asiria bulude bidibo sogo, tama eno te me badu bidi homu begelama, augwaligo moni ge hwągo aga ela mumai yaibao,’ Genuai Bidi Godigo te tama wali,” Aisaiago te po wali.
2KI 19:8 Te Asiria bulu bidi gavman ofisa bidigo e tama po odali, te king Senakerip te Lakis taun tagalama pali po odali. Tibaso, te ofisa bidi aga te Jerusalem bulu tagalama, tama aga ma begasa pelama, tama te bidi pali page koneainu kegegi pai, kingo te taun Lipna hani dali boi hwįgi pobaso, tama agai aga teba sugi pali.
2KI 19:9 Te Asiria hani augwaligo boi hwįyu bidali, tama me badu bidi dabe aselama, te king Senakerip e tama po wagasali, “Te Itiopia bulu king bidi Tirhaka aga ami soldia bidi dabe dali, augwali asama, nage dali boi hwįagasobao,” wali. Te king Senakerip agai te po odobaso, tama agai pas asęnama, te me badu bidi nogode munama, tama augwaligo te king Hesekiabolo magi pali, magi baso meni, te agai homugo te taun Jerusalem agai sabo homu eyu, tama tiai dao.
2KI 19:10 Te king Senakeripgo pasde e tama po wali, “Eno koneanio, te nago konealubo god, te agai te po wai, agai ena sula tagalama, tama eno dage aiyaba elaluama, te Jerusalem taun me sogobe,” wali. “Tiali goli, te ili po dao, tama teyu, nago homugo agai te wali po mu da homu eyu, konealugio,” wali.
2KI 19:11 “Naga digi naga konea palio, da Asiria hani king bidi dabego ebo kolesaga da, dago te gasa bulu hani bidi dabe dali boi hwįgi pabo kolesaga, dago naga augwali mu dolobo dao. Nago homugo eno te nago bulu dolobe da homu eyuwe, a?
2KI 19:12 Polobadu eno wąį nǫų dabe augwaligo gasa bulu taun Gosan, me te taun Haran, tama me te taun Resep, tama te hanu dabe dolai dao. Tama augwaligo te Beteden hani augwali te Telasar taunde bidibadi, ela muna silai dao,” wali. “Tama augwaligo god dabego te hani augwali me tau sabeo,” wali, “tama augwali bugagia me bidibe. Mu menio.
2KI 19:13 Te taun Hamat, tama me te taun Arpat, tama me te taun Sefarvaim, tama me te taun Hena, tama me te taun Iva, te taun bulu hani king bidi dabe augwali me bidiba, agawe? Menio. Dago augwali tigidali ela muna silai dao,” Senakeripgo pasde te po wali.
2KI 19:14 Te king Hesekiago agai te king Senakeripgo tolali pas agai te bidi dabego nogode agai sali. Agai te pas asęani po neda silama, tama agai te Genuai Bidigo tempel be tomoba selasa pali. Tama agai te pas te Genuai Bidi bidibo pesage pąde muani, tama agai pisaganama, tama bugagia dodolama, muani.
2KI 19:15 Tama te king Hesekia agai te Genuai Bidi dolo gedu haluasa e po tama wali, “Genuai Bidi, nage da Israel hanigo God, tama nage e bede naga sę ebo ensel mobo bidi si noma si ugwadu daide bidibo dao, tama nage king naga te dugabo ni namede dugulalubao. Nage te nage God mu dao, te nago naga te e tǫde te tigidali bulu hani dabe tonalubo dao. Naga deli naga te tǫ me, te dagalu me, naga naga nigai dao,” te po wali.
2KI 19:16 “Genuai Bidi, eno homugo nago olo bugagia munama, tama eno gedu haluasa po wabo odao, tama naga te da tigide te dwai nai pedalabo nago bugagia suao,” wali. “Tama eno homugo augwaligo te dwai po wali te nago odao, te king Senakeripgo agai nage dali posobo po wabo, God nage tigidali sogo bidada pabo bidi dao.
2KI 19:17 Genuai Bidi, dago koneanio, te Asiria king hani augwaligo te umabo we bidi mu tama augwaligo elama, silibo dao, tama augwaligo taun bulu me tama dolobo dao,” wali.
2KI 19:18 “Tama me te king bidi dabe augwaligo te hani we bidi dabe augwaligo te tibo god noma nigali piksa dabe tigidali selasa pelama, siaba tigidali ulali. Te tibo god dabe da, polo dolobo god dabe da, magi baso meni, te god dabe da, te da tibo god dabe da. Te god dabe da, bidigo digi te ni dabe te masigi dabe selama, te nogogo nigai god naga dao.
2KI 19:19 God, dago Genuai Bidi, megi tama eno homugo nago da tau selama, te megi te king Senakeripgo nogode nago tama nago da ma dobola sao,” wali. “Tama tiyu, tigidali tǫde hani we bidi dabe augwaligo nage bugagia mu konemainao, nage deli mu God mu dao.” Te king Hesekiago te God dolo gedu haluasa po weyu, e tama po wai dao.
2KI 19:20 Awe, te profet Aisaia, aga aya nogi Amos, te Aisaiago te king Hesekia e tama po ola tolali, “God, Israel hani dena Genuai Bidigo, e tama po walio, agai te nago gedu haluasa po wali te agai odalio.
2KI 19:21 Tama megi te agai te king Senakerip dali naga po elalubao wali, te Asiria king bidi. Genuai Bidigo e tama po wali, ‘Senakerip, te taun Jerusalemgo te nage dali te gisugu dwai mu weyu, tama nage dali posobo po weyu, tama nage dali dwai bidi mu da olama, tama dwai mu da wabuo,’ wali.
2KI 19:22 ‘Senakerip, tama nago te posobo po weyu, tama te po dwai weyu, tama te naga digi naga nogi ugwaba siyu, tama teyu, nago hagoma ebao,’ wali, ‘nago homugo nago te tibo sę de dali ebawe? Nago te tama tibo kolesaga ena dali tama tibao, Israel hanigo God, God ena da dwagi yai bidiyu, tama te doloba pai kolesaga naga tigidali sogo ebo dao.
2KI 19:23 Nago po te naga sę ebo gavman ofisa bidi dabe augwaligo ola menama, tama augwali nago nogi ugwaba mu salio,’ te po wali, ‘tama augwali ena dolo posobo po walio. Senakerip, tama augwaligo pedauwalidu nago e tama po digi po wali, nage te naga te boi hwįbo karis hauwadu dolaluyu, tama nage te Lebanon moni te bulu du tobolu muba holobao, wali. Tama nage te Lebanon bulu te ni dulu tomoba mu tula pobao wali, tama te bulu te bidi bilisąbo madigi pelama, tama nago te ni bǫ dabe te bobobage bobobage ni dabe naga togwao, tama te dwagi dwagi yai ni saipres me togwao wali.
2KI 19:24 Tama nago me po tama wali, nage te gasa bulu taunba pabo sogo, te nage tubo wę da nage me habuge me ebeo. Te nage te wa pai buluba pabo sogo me, te naga te tǫ togalide me te wę pągąna sai elalua pai dao, tama tiwai wę te naga hani augwaligo tama me te wę tuai dao. Tama tialima, nage te Isip buludu te pobadi me, nago sągągo sula sąwai dao.’”
2KI 19:25 “‘King Senakerip, nago konebeo, polobadu digi eno nage tama sę emainu dąį ilai dao. Ena digi nagebolo tama bomo menama, tama nago te bomai obo elalua pabo taun dabe dolomainu bomo eno nage mawai dao. Tama nago eno homu kolesagadu wali peyu, tama nago te taun dabe dolama, tama augwali te moni masigi pesage tiwai nigilama, tama te moni pobele bage tiwai pesage holao, eno te homu polobadu elama, tama nago tama tiai dao.
2KI 19:26 Tama te taunde bidali we bidigo augwali wi dwai mu yali, tama augwaligo homu kolesaga teba dąų mu wali, augwaligo tama teyu, augwa bomo mu sia sali. Augwali e tama tiwai bidaluali, te nosai giliga doloyu, wa pabo tiwai gilama mu tiwai, mu tama augwali bidaluali, te posola pai wali te giliga asobo badu asali. Te nosai te be pedu ugwa badu holai, tama te nosai dabe holala pali, te nosai dabe te nosai te posola pai wali asobo sogo dila pai elalubo nosai menio.’”
2KI 19:27 “‘Tiali goli, eno nage bugagia mu konea palio. Te eno nago homu kolesaga konea palio, tama me te eno nago homu kolesagago ebo sę eno subo dao, tama te tigidali nage pabo bulude me. Tama me te eno koneani, te nago ena dali sębę mu genuai ebo, te eno koneanio.
2KI 19:28 Nago ena dali sębę ebo eno sualio, tama te nago te hagoma eyu, wabo po me, tama te kolesaga me eno koneanio, tama te naga digi naga nogi ugwaba sabo. Tama te megi eno nage dali eno bomai po mu obao. Tama eno te huk selama, tama eno te nago guniba muaibao, tama me te eno te ain dage te bidi dabego te kibu hos gunide mubo ain dage eno selama, tama eno te nage pedauwalide munama, dąų walaibao. Tama tilama, te nosali eno nage te naga asali te tųdu te nage eno kegasa paibao,’ God Genuai Bidigo te po wali,” Aisaiago te po ola tolali.
2KI 19:29 Tama te profet bidi Aisaiago te king Hesekiabolo e tama po me deli ola mani, te king Hesekiago agai te e tama sę ebo sulama, dąį ilimainu, tama te king Hesekia agai te tama sę ebo sulama, tama agai koneagameo, tama te tigidali sę dabe te Genuai Bidigo wali po gilama te Asiria king bidi Senakerip tigide mu pedalama, sęgę saibao. Te profet bidi Aisaiago te po wali, “Tama nago te tama tibo sę ebo subaso da, teda te dąį nago suao. Tama te megi tama bidibo kibu bede me, tama te nosali bidibo kibu bede me, te dagego tuabo nai bulubo usu me egobeo, te boi bidi dabe pąde bidibaso. Tama tialima, dagego te sia gagawai nai wit dabe tama te dagego gide olo dali pedalai nai tiwai duga selama, tuaibao,” wali. “Tiali goli, te sela wabo kibu bede, te dagego gide nai bulama, tama duga nai selama, tuaibao,” wali. “Tama te ni wain me duga bulama, tama duga te ni wain du me duga selama, tama tuaibao, te sela wabo kibu bede.
2KI 19:30 Tama te Juda hani we bidi augwali, te boi bidi dabego te augwaligo te Juda hani augwali mu dolobo munu me usu egobeo, tama augwali bugagia mu bidaibao, tama augwali hani te umabo mu ma pedalaibao, te sia gagawai nai te wit tiwai te gide bulama, te umabo mu mubo tiwai mu ma pedalaibao,” wali.
2KI 19:31 “Te boi bidi hani augwaligo te Jerusalemde bidibo tigidali we bidi dabe munu me mu dologobeo. Menio. Te dwasianu hani augwali me bidaibao. Tigidali Bomo Elalubo Genuai Bidigo agai te dila pai homu kolesagago te nai nosali mu pedalaibao homu yali,” Aisaiago te Hesekiabolo te po wali.
2KI 19:32 Tama agai po me wadolama, tama wali, “Tama te Genuai Bidigo e tama po ma wai, ‘Asiria king bidi dali, te aga ami soldia bidi dabe dali, augwaligo te Jerusalem taun tomoba asobo usu egobeo, tama me te augwaligo te ene me deli te taun tomoba enebo usu egobeo. Te ami soldia hani augwaligo te boi hwįbo awa me deli selasa, tama augwali te taun pąba asobo usu egobeo,’ wali. ‘Tama augwaligo te tǫ selama, te taun obo banis pąde sisiniyu, tedu holomainu ebo usu me egobeo, tama augwali te tǫ tųde dolaluyu, boi hwįabo, te me menio.
2KI 19:33 Ena Genuai Bidi da, tama eno te Asiria king bidi homu begelama, te tama aga asali tųdu ma begasa paibao. Tama tiyu, aga te e Jerusalem bulu taun tomoba asobo usu me egobeo.
2KI 19:34 Eno tama tiwaibao, magi baso meni, eno ena genuai nogi tobade, tama me te polobadu eno sę bidi Devit dali po dąų wali po tobade tama tiwaibao.’” Aisaiago te Genuai Bidigo te tama wali po te king Hesekiabolo pusa mani.
2KI 19:35 Tialima, megi hulide tama, te Genuai Bidigo sę ebo ensel mobo bidi me deli te Asiria hani bidibo pesageba pelama, tama te 185,000 ami soldia bidi elama, isilali. Tama te do kigamu mu te king Senakerip aga hodaluama, te ami soldia bidi dabe isali tigi suali.
2KI 19:36 Tama tialima, te aga dali, te me badu ami soldia bidi dabe dali, augwali me bidaluali, tama augwali hodaluama, tama augwali te Asiria pabo bulu tųdu ma geasa pali, tama te king Senakerip aga te Nineve taunba bidigi pali.
2KI 19:37 Tama nosali me sogo deli aga te lotu be tomoba pelama, te Nisrokba lotu po wabo sę edubadi yaide, te Nisrok te aga tibo god da. Tama aga ogwa si, me nogi Adramelek, tama te me wai nogi Sareser da, tama te augwa sigo te ge pedai bainat hwą selama, tama te lotu be tomoba pelama, te augwa si aya king Senakerip elama, isilali. Tama tilama, nosali augwa si te Ararat buluba wi pelama, bidigi pali. Tama tiali, te aga te gasa ogwa me, aga nogi e dao, Esarhadon, aga te ogwago aga ayago te king yali sę selama, tama aga te Asiria king nigilama bidali.
2KI 20:1 Tama te Asiria hani augwali asama, te Juda hani me dolagasiąbadi, te sogo, te king Hesekia aga moni gasi mu sali, tama pąde aga isabo homu mu yali. Tialima, te profet bidi Aisaia, te Amosgo ogwa, agai te king Hesekia gasi ebo sugi pelama, tama agai e tama po wali, “Genuai Bidigo e tama po wali, ‘Nago te gasi sia sogobeo, tama nage isaibao,’ wali, ‘tama teyu nago te naga bede bidibo we bidi augwalibolo e po wao, tama augwaligo te nago sę dabe dodolinao,’ God Genuai Bidigo te po wai,” Aisaiago te po wali.
2KI 20:2 Tama te Hesekia agai te wali po odali, tama aga gesabidi te be habu dagaba gegi solama, tama agai e tama gedu haluasa po Genuai Bidibolo wali,
2KI 20:3 “Genuai Bidi, ena nage wali mu peyu, tama eno nago sę mu yai dao. Tigidali sogo eno nago homu godolo ebo kolesagadu naga wali pai dao,” wali. “Tama teyu, nago te eno te sę yaliba kone palama, tama nago ena isimainogo sula tagaligio.” Tama agai tama gedu haluasa po olama, tama aga gela genuai mu wali.
2KI 20:4 Tama te profet Aisaia aga te kingo be tagalama, tama aga pali. Tiali goli, aga te kingo te be obo sesege taga pisąbadi yaide, tama Genuai Bidigo agabolo po ma wali,
2KI 20:5 “Nage ma geasa pelama, te king Hesekia sugi pao, te king te eno hani we bidigo king bidi dao,” wali, “tama agabolo e tama po wao, ena God dao, aga wąį nǫų Devitgo Genuai Bidi, eno agai gedu haluasa po wali eno odalio, tama aga moni gela wabo sualio,” wali. “Tama tibaso, eno aga ma wiegi yai ma ilibao,” wali. “Tama duba te aga te eno lotu beba ma pelama, te ena dolo lotu po waibao,” wali.
2KI 20:6 “Tama agabolo e tama po wao, ena Genuai Bidi, eno po obao, tama eno aga bidabo kibu be ma bobe ilibao, te e tama kibu be aga ma bidaibao, te nogo si olama, te sągą badu a naga, te 15 kibu me ma bidama, tama nosali aga isaibao,” wali. “Tama teyu, te Asiria king bidigo aga aiyaba elaluama, tama augwaligo te Jerusalem taun somainu eno sula tagalogobeo. Mu menio,” wali. “Eno tama tiwaibao,” wali, “magi baso meni, eno ena genuai nogi ma kone paliyu, tama me te eno polobadu te king Devit dali po me bodolu sali poba kone paliyu, tama tiaibao, te eno sę bidi.” Genuai Bidigo te po Aisaiabolo pusali.
2KI 20:7 Tama te profet bidi Aisaia pelama, te po mina silama, tama agai te kingo sę ebo bidi dabebolo e tama po ola mani, “Dage pelama, te ni kaya du augwaligo te wa ilali kaya du sigi piąo,” wali. Tama augwaligo te ni du dabe sigi pelama, tama dodolama, tama te king Hesekiago te bomai keniba muani, tama tibo si, te kingo bomai keni pedala selama, tama te moni gasi silali.
2KI 20:8 Tialima, hasia bolo king Hesekiago Aisaiabolo e tama po hanalu wali, “Genuai Bidigo agai enabolo mena tama tiwai sę ola menama, tama tedu eno koneaibao, eno ma wiegi yai pedalama, tama duba ena nago gedude te tempel beba paibawe?” te po hanalu wali.
2KI 20:9 Tama te profet bidi Aisaiago agabolo e tama po ola mani, “Genuai Bidigo e tama dąį nagebolo ola mawaibao. Nago te tama dąį sulama, koneagameo. Dago te be posobode te giliga ge soabo me nedebo togobilide suao. Nago homugo te giligago te togobiligo noma polo selasa peyu, te nogo si dąįba usu nigi pabo si, ma nago homugo te togobilide te noma polo ma geasa peyu, te nogo si dąįba usu nigi pabo si?”
2KI 20:10 Tama te king Hesekiago e tama po wali, “Te tama tibo te usu dao, te giligago te togobili noma polo selasa peyu, te nogo si dąį usu nigi pabo te bomai sę meni. Tama tialima, eno homugo me te togobili noma aga polo tama ma begasa peyu, te nogo si dąįba usu nigi pabo tama emainao,” wali.
2KI 20:11 Tama tialima, te profet bidi Aisaiago te Genuai Bidi God dolo bomonama mu wali, tama te Genuai Bidi Godigo te togobili noma te giligago polo ma selasama, ma geasa peyu, te nogo si dąįba polo usu nigi pali. Te togobili te polobadu king Ahasgo nigai togobili dao.
2KI 20:12 Te Merodak Baladan, Baladango ogwa, aga te Babilon bulu king bidi. Agai te king Hesekia moni gasi yali po odali, tama tibaso, agai te pas me deli asęnama, tama me te agai te olo tau siyu maiabo nai me deli dodolama, tama agai te tagala palobo bidi dabebolo nogode munama tolali, tama augwaligo selasa pelama, te king Hesekiabolo magi pali.
2KI 20:13 Tama te king Hesekiago te bidi dabego wali po odama silibo si, tama agai te bidi dabe te agai te moni bakstuaba te agai augwali odasa pelama, tama agai te tigidali mone me, tama me te gasa nai dabe me, te nai dabe me tigidali te bidi dabebolo agai augwalibolo wasilali. Tama te augwaligo te agai te mone mubo bede muani te tigidali silva me, me te gol me, te nai dabe tigidali augwaligo sula silali, tama te dwagi yai denami ebo pauda me, tama me te dwagi yai denami ebo sanda wel me, tama me te boi hwįbo nai dabe tigidali me, tama me te agai te bakstuade muani te gasa nai dabe tigidali augwaligo suali. Te king Hesekia agai te nai me deli me dualobe. Mu meni. Tama agai te kingo be obo tomode elalubo nai me, tama me te Jerusalem bulude elalubo nai dabe tigidali te agai augwalibolo ola mena silali.
2KI 20:14 Tama te Babilon bulu bidi dabe te augwa buluba ma begasa pela silali, tama nosali te profet bidi Aisaia asama, te king Hesekia suagasali, tama agai agabolo e tama po hanalu wali, “Nage pageba te asali bidi dabe, te augwali mena bulu bidi dabe dawe? Tama augwaligo nagebolo magi nai po waliwe?” Tama te king Hesekiago agai agabolo e tama po wei ponani, “Te bidi dabe augwali te digibulu bulu mu, te Babilon bulu bidi dabe asalio,” wali.
2KI 20:15 Tama te profet bidi Aisaiago te po wali, “Tama augwaligo mena mena nai naga mu te nago obo tomoba pelama, sualiwe?” Tama te king Hesekiago agai te po wei ponoyu, e tama po wali, “Tama eno augwalibolo te eno te tigidali doado bage dabe me dualobeo,” wali, “tama augwalibolo te eno te doado bage tigidali mu ola mena silalio,” wali.
2KI 20:16 Tialima, te profet bidi Aisaiago te king Hesekiabolo te po wali, “Megi eno nagebolo eno e po obao, Genuai Bidigo po dao.
2KI 20:17 Genuai Bidigo te po wai, ‘Bodolu me deli nosali pedalaibao,’ wali, ‘tama te Babilon hani augwali asama, tama te kingo bede te mubo doado bage tigidali sagasaibao,’ wali, ‘tama me te tigidali doado bage te naga wąį nǫųgo polobadu te augwaligo te mone te genuai bakstuade sisinama muani doado bage me. Tama augwaligo te doado bage me deli munalubo sula tagalogobeo. Mu menio. Tama augwaligo te tigidali doado bage dabe selasa, te augwa Babilon buluba paibao,’ wali.
2KI 20:18 ‘Tama te augwaligo te nago hanigo tomode te me badu wai dabe selama, tama te wai dabe augwali te Babilon buluba odasa paibao. Tama augwaligo te odasa pabo ogomani te augwali te kibu ebo gilama te sogoli tinama, tama te augwali te Babilon bulu king bidigo bede sę yabo bidi nigilaibao,’ wali.”
2KI 20:19 Tama te king Hesekiago agai te profet Aisaiago wali po odali, tama agai te profet bidi Aisaiabolo e tama po walali, “Genuai Bidigo po nago enabolo pusa mobao,” wali, “te po te dwagi yai po dao.” Hesekiago te tama po wali, magi baso meni, agai e homu yali, ‘Te ena king bidi me bidibo sogo, te dwai dwai sęgę ebo sę pedalogobeo. Tama da bugagia mu bidaibao, tama te boi me hwįgobeo,’ te homu yali.
2KI 20:20 Te king Hesekiago te tigidali haniani sę yali po da, te po gasa bukude elalubo, augwaligo e tama nogi wabo da, Te Juda Hanigo King Bidi Dabego Yali Sę Po Buku dao. Te bukugo te tigidali bomai sę agai yali po, tama te tǫ dulude te bobobage wę asabo wę gamia tų agai nigilama, te Jerusalem taun buluba wę kegasa asai dao. Tama te e bukugo me te po wabo da, te agai ulu wę nigai da wabo dao.
2KI 20:21 Te king Hesekia isali, tama te aga wai, te Manase, te aga ayago yali sę selama, te aga king bidi nigilama bidali.
2KI 21:1 Te Manase aga king bidi nigilama bidibo sogo, agai kibu be te nogo si olama, te sągągo si olama, te kibu be elaluama, tama te aga king bidi nigali. Tama aga te Jerusalem taunde te king bidi nigilama bidali kibu be, te 55 kibu be usu nama bidali. Aga ida nogi te dao, Hepsiba dao.
2KI 21:2 Tama te king Manase agai te dwagi yai kolesagadu me wali pabe. Mu meni. Tama me te agai te tǫde polobadu te bidali bidi dabego yali haniani dwai kolesagadu wali peyu, tama Genuai Bidigo augwali sela sąnama, tama agai te tǫ te Israel hani dabe augwali te tǫ mani. Tama te king Manase agai te hanigo yali kolesagadu wali pali, tama te king Manase agai te Genuai Bidigo gedude dwai kolesaga mu iduali.
2KI 21:3 Te king Manase agai te dwai haniani kolesaga naga tama yali. Tama agai te tibo god dolo lotu po wabo pesage ma nigibo sę yali, polobadu aga ayago, te king Hesekiago, sela sąyani pesage. Tama agai te tibo god Bal dolo lotu po wabo pesagede agai te alta sai nigibo sę yali. Tama agai te tibo god we nogi Asera noma nigibo sę yali, te polobadu te king Ahapgo yali tiwai, te Israel hanigo king bidi, te agai te sę yai, tama me te agai te dagalude elalubo hǫba lotu po wabo sę iduali.
2KI 21:4 Tama agai te tiwai sę yali, te Genuai Bidigo tempel be tomode te agai te tibo god dolo lotu po wabo alta sai nigibo sę yalio. Tiali goli, polobadu Genuai Bidigo te bede e tama po wai, “Te Jerusalemde elalubo be, te be te tigidali we bidi dabe augwaligo ena deli dolo naga lotu po wabo be dao,” wai dao.
2KI 21:5 Tiali goli, te king Manase agai te me badu alta sai te Genuai Bidigo tempel be habude te tigidali we bidi sisinagasabo madigi te pesagede si te be tomode elalubo madigi, te agai te me badu alta sai nigibo sę yali, tama aga te alta saide bidiyu, te hǫ dabeba lotu po wali.
2KI 21:6 Tama agai te aga ogwa elama, tama agai aga te wai te siaba sese ula palali, te ofa nai ulubo tiwai gilama yali. Tama agai te polobadu isali bidi isi bidigo aga tau somainu i wali, tama agai me te sogo yesi bidi me hanalu wali, tama te bidi dabe augwaligo aga tau somainu, tama agai te haniani kolesaga umabo mu yali. Manase agai te Genuai Bidi gedude sęgę sabo kolesaga genuai mu sęgę sali. Tama agai tama tibo dwai kolesaga ebaso, tama te Genuai Bidigo te king Manase dali sębę genuai mu yali.
2KI 21:7 Tama te king Manasego agai te tibo god we Asera noma nigali piksa selama, tama agai te Genuai Bidigo tempel be tomode muani, tialima te polobadu te Genuai Bidigo te king Devit dali, te king Solomon dali, augwali sibolo e tama po ola mawai dao, “Te Jerusalemde elalubo tempel be, te be te ena digi te ena te Israel hani dabe augwali tomode eno dąį ilai dao,” wali, “tama tigidali sogo tama augwali eno te beba naga aselama, tama augwaligo ena deliba naga lotu po wabo be dao.
2KI 21:8 Tama tialima, dage tigidali eno hani we bidi dabe me, me te eno po odama wali pabo we bidi dabe, me te eno bomai po wali pabo we bidi dabe me, Moses, eno sę bidi, agai dagebolo mawai po, tama tiali tama te eno dage munu me sela sągobeo, te tǫ te polobadu te eno duga wąį nǫųbolo mawai tǫ dao, tama te megi te tǫde dage te bidibao,” wali.
2KI 21:9 Tiali goli, augwaligo te po odama, tama augwaligo wali pabe. Mu meni. Tama te king Manasego te augwali kegelama, tama augwaligo te dwai dwai kolesaga umabo mu yali. Polobadu te tǫde te bidali Israel hani isąwai we bidi dabe augwaligo te dwai dwai kolesaga ebaso, tama Genuai Bidigo augwali te tǫdu sela sąyani. Tama te Juda bagego te dwai dwai kolesagago te polobadu te tǫde bidali dwai bagego yali kolesaga aiyaba elaluali.
2KI 21:10 Genuai Bidigo te king Manasego te dwai kolesaga ebo sę suali, tama tibaso te Genuai Bidigo te profet bidi dabebolo e tama po augwalibolo ola mani, te profet bidi dabe augwali te aga sę ebo bidi dabe da. Te Genuai Bidigo po e tama da,
2KI 21:11 “Te king Manase agai te haniani dwai dwai kolesaga mu yali, te polobadu te Amor bagego yali kolesaga aiyaba elaluali. Agai te tibo god noma nigilama, tama agai teba lotu po wali. Tama agai te tibo kolesagago te Juda hani umabo mu agai kegelama, tama augwaligo me ena gedude sęgę sabuo.
2KI 21:12 Tama tialima, ena God dao, Israel hani duga Genuai Bidi dao, eno po obao, tama eno te Jerusalem bulu me doloyu, tama te Juda hani me mu dolaibao,” wali, “tama te gasa bulu bidi dabe augwaligo te sę yali po odobo sogo, tama augwali midigi genuai mu selama, tama augwali moni homu mu yaibao.
2KI 21:13 Tama te eno te Jerusalem taun dolabo kolesaga e tiwai dao, eno te Samaria bulu doloyu, te king Ahap aga hani dali doloyu yali deli kolesaga tiwai naga yaibao,” wali. “Tama eno te Jerusalem bulu taun dolama, tama te tigidali we bidi dabe mu dola silaibao, tama tilama, te Jerusalem taun te e tama tiwai elaluaibao, te plet pou wę telawai tiwai gilama, te magi nai mu me te dwasianu pobele bage me meni yai olo mu elaluaibao,” wali.
2KI 21:14 “Tama tialima, te me badu we bidi dabe tede me bidibaso da, teda augwali te eno munu me tau sogobeo. Mu menio. Tama augwali te eno te boi bidi nogoba muaibao. Tama te boi bidi dabe augwaligo te augwali dolama, tama augwaligo doado bage dabe me wi sela pomainao,” wali.
2KI 21:15 “Eno tama tiwaibao, magi baso meni, te eno hani we bidi dabe augwaligo eno gedude te dwai sęgę sabo kolesaga te augwa wąį nǫųgo te Isip bulu tagalobo side te sęgę sabo gagalalio, tama augwaligo te deli kolesaga naga me edu bidali. Tama augwaligo te dwai sęgę sabo kolesaga me edu bidibaso, te eno te haliga sębę mu yalio,” God Genuai Bidigo te po wai.
2KI 21:16 Te king Manasego agai te Juda hani augwali kegelama, tama augwaligo te Genuai Bidi gedude sęgę genuai mu sali. Tama me te agai aga hani we bidi dabe dali boi bidi ebo kolesaga yali. Tama te tigidali Jerusalem bulude te king Manase agai e tama kolesaga yali, te dwai kolesaga isiąwai doloba pai we bidi umabo mu agai ela muna muna pali.
2KI 21:17 Te king Manase agai te haniani sę yali po, te gasa bukude elalubo, te buku da augwaligo e tama nogi ebo buku dao, Te Juda Hanigo King Bidi Dabego Yali Sę Po Elalubo Buku da, wabo dao. Te e bukude me, te king Manasego sęgę sali sę po ola mabo buku dao.
2KI 21:18 Tama te king Manase isali, tama augwaligo te aga te kingo be sesegede te obo tomode te tǫ me deli elalubo madigi te king Manase pubulali. Te tǫ te augwaligo e tama nogi wabo, te tǫ te Usago tǫ da. Te aga ogwa, agai nogi te e dao, Emon, tama te bidi agai te bidigo sę yali silide te aga king sę yali.
2KI 21:19 Te bidi Emon aga te king bidi nigilibo sogo, agai kibu be te bidi sese deli olama, te ugwadu si, te 22, tama te aga Jerusalem bulude te king nigilama bidali kibu be te si digi mu tama bidai. Te aga idago nogi da, Mesulemet, te aga bulu te taun Jotba bulu bidi Harusgo wegi da.
2KI 21:20 Tama te king Emon agai me te Genuai Bidi gedude dwai kolesaga yali, te aga ayago yali tiwai yali, te king Manasego yali gilama tiwai kolesaga yali.
2KI 21:21 Tama agai te aga ayago polobadu yali gilama te tibo godiba lotu po wabo sę yali, tama agai te aga ayago yali dwai kolesagadu dolo mu wali pali.
2KI 21:22 Agai te God tudiba mu togolali, te aga wąį nǫųgo Genuai Bidi mu, tama agai te Genuai Bidigo godolo ebo kolesagadu wali pabe.
2KI 21:23 Tama me sogo deli te Emon aga sę ebo gavman ofisa bidi dabe augwali sisinama, tama augwaligo te king Emon ela muabo tų kegeyu, te po miani. Tama nosali augwaligo te aga te kingo be tomoba pelama, ela muani.
2KI 21:24 Tama nosali te Juda hani we bidi dabego te king Emon elali ofisa bidi dabe me te augwali me ela muanio. Tama augwaligo te bidi te Josaia sali, te king Emongo ogwa da, tama augwaligo te bidi dąį ilama, tama te bidi aga te Juda hani augwaligo king bidi nigilalio.
2KI 21:25 Te king Emongo te gasa haniani sę yali po da, te gasa bukude elalubo, te buku augwaligo e tama nogi wabo buku da, Te Juda Hanigo King Bidi Dabego Yali Sę Po Elalubo Buku da, wabo dao.
2KI 21:26 Tama augwaligo te king Emon te Usago tǫde elalubo gų pageba pubaligi pali. Tama aga ogwa Josaiago tama aga ayago king sę yali silide selama, tama king bidi nigilama, sę yali.
2KI 22:1 Te Josaia agai kibu be te nogo a olama, te me badu nogo sela, te 8 kibu be bidama, tama aga te Juda hanigo king bidi nigilali. Tama aga te Jerusalem taun bulude king nigilama, sę eyu bidali kibu be te 31 kibu be usu nama bidai. Aga idago nogi dao, Jedida, te taun Boskat bulu bidi Adaiago wegigo ame nani ogwa dao.
2KI 22:2 Tama te king Josaia agai te Genuai Bidigo gedude te dwagi yai kolesaga yali. Tama agai te aga wąį nǫų Devitgo yali tiwai dwagi yai kolesaga mu yali, te king Devit, agai te polobadu yali sę. Tama te king Josaia agai te Genuai Bidigo tigidali po agai bomo mu elama, dolo naga wali pali.
2KI 22:3 Tama te king Josaia aga te king bidi sę edubadi yaide, te kibu be te 18 wabo kibu be tomode, tama agai te aga kuskus bidi tagala palali, te bidi nogi Safan, agai te po Genuai Bidigo tempel beba selasa pali. Te bidi Safan, te aga aya Asaliago ogwa da, tama te aga wąį nǫų ogwa te Mesulam. Te king Josaiago te kuskus bidi Safanbolo e tama po ola mani,
2KI 22:4 “Nago te tobolu pris bidi Hilkia sugi pelama, tama agabolo e tama po wao, te Genuai Bidigo tempel be tųde tonalubo bidi dabe augwaligo te tigidali we bidigo mabo te tigidali mone nedao wao,” wali.
2KI 22:5 “Tama te Hilkiabolo e tama po walao, tama agai te mone selama, tama te sę tonalubo bidi dabebolo te mone mao,” wali, “tama augwaligo selama, tama te Genuai Bidigo tempel be ma geselao. Tama augwaligo te monego te sę bidi dabe abelama, tama augwaligo te Genuai Bidigo be ma geseleyu, dodolobo sę emainao.
2KI 22:6 Tama augwaligo te monego naga te be sę ebo kapenda bidi dabe dali, tama me te masigigo te be sę ebo koneai bidi dabe me abelao. Tama me te ni name me, te masigi me, abelao,” wali, “tama te me badu bidi dabe augwaligo te togolama, tama bugagia dodola muna silali selama, tama te Genuai Bidigo tempel be ma geseleyu sę yao.
2KI 22:7 Eno koneanio, te sę tonalubo bidi dabe augwaligo te ili po olama, te augwaligo te mone wi sabo bidi dabe menio. Tama teyu, te tobolu pris bidi nago homugo augwaligo te monego magi sę egowe weyu, nago augwalibolo hanalugio,” Josaiago te tama po ola tolali.
2KI 22:8 Tama te kuskus bidi Safan aga pelama, te kingo wali po gilama wali. Tama te pris bidi Hilkiago te po oda silibo si, tama agai te kuskus bidi Safanbolo e tama po wali, “Eno te Genuai Bidigo tempel bede munalubo buku me deli suai dao. Te bukude te Genuai Bidigo Bomai Po elalubao,” wali. Tama te buku te pris bidi Hilkiago te kuskus bidi Safanbolo mani, tama te bidi Safango nedali.
2KI 22:9 Agai te buku neda silama, tama agai te buku dali agai sela pelama, te king Josaia agabolo e tama po wagi pali, “Naga sę ebo bidi dabe augwaligo te Genuai Bidigo tempel bede muani mone tigidali selama, tama te sę tonalubo bidibolo menama, tama augwaligo te Genuai Bidigo be dodolobo sę emainogo yalio,” wali.
2KI 22:10 Tama te kuskus bidi Safango agai e tama po ma wali, “King, te tobolu pris bidi Hilkiago te e buku enabolo manio.” Tama agai te buku dinigilama nedali, te kingbolo te po nedali.
2KI 22:11 Tama te kingo te Godigo te Bomai Po te buku tomode elalubo po odobo si, tama agai haliga sęgę mu eyu, tama aga holobo ugwa pisayali.
2KI 22:12 Tama agai te pris bidi Hilkia i wali, me te bidi Ahikam, aga te kuskus bidi Safango ogwa da, tama me te bidi te Akbor, aga aya te Mikaiago ogwa da, me te kingo kuskus bidi Safan, tama me te Asaia, te bidi Asaia aga te kingo sę ebo ofisa bidi da. Tama te bidi dabe augwali asela silibo si, augwalibolo e tama po wali,
2KI 22:13 “Megi te Bomai Po elalubo buku eno salio, Genuai Bidi agai homugo agai da tigidali da e kolesagadu wali pomainu, e tama po hanilama wali. Tiali goli, dago wąį nǫų dabe augwali te e dwagi yai po wali pabeo. Tama tialigo da, teda te Genuai Bidi agai da dali te moni haliga sębę mu yalio. Tiali goli, te megi dago te Genuai Bidigo Bomai Po elalubo buku dago te ma suali dao,” wali, “tama tialima, eno homugo dage pelama, te Genuai Bidibolo hanalugi pelama, tama agai homugo te mena sę te ena dali me, te Juda hani we bidi dabe dali me, me te Jerusalem bulu we bidi dabe dali yabo sę po page gegegi piąo,” wali.
2KI 22:14 Te bidi dabe augwaligo te kingo po oda silibo si, tama augwali te Jerusalemde te gesi noma taun pedai baduba pelama, tama augwaligo te profet we me deli te gesi noma taunde bidibadi yaide, augwaligo te profet we dali po miani, te wego nogi e dao, Hulda. Hulda aga te Salumgo we da, Salum agai te pris bidi dabego te au dodobage gudubo ugwa mubo habu pesage tonalubo sę ebo bidi da. Salum aga aya te Tikvago ogwa da, tama aga wąį nǫų ogwa te Harhas. Tama te Huldago agai te bidi dabe augwaligo wali po oda silali.
2KI 22:15 Tama agai e tama po wei ponani, “God, da Israel hanigo Genuai Bidi, agai te po wai, ‘Dage tagala palali bidi pageba ma geasa pao,’ wali, ‘tama agabolo e tama po walao’,
2KI 22:16 ‘Ena God, Genuai Bidi, tama eno te e buku tomode elalubo Bomai Po wali peyu, tama te Bomai Po te kingo nedebadi yaide, tama te eno te Jerusalem taunde bidibo we bidi dabe dali te taun dali dolaibao.
2KI 22:17 Te tigidali we bidigo ena tudiba ilama, tama augwaligo te tibo god dabeba ofa nai ula mabo sę ebo dao. Tama augwa te dwai kolesaga ebogo te eno augwali dali eno wado te ebao. Eno sębę genuai mu te Jerusalem dali eyu, tama eno te sębę ebo sę te eno polo sia sogobeo,’ wali.
2KI 22:18 ‘Tama tialima, te megi te ena God da, te Israel bage duga Genuai Bidi da, eno homugo duga king bidibolo e tama po ola mobao. Tama augwaligo te buku nagebolo neda mabo sogo,
2KI 22:19 nago koneanio, te magi nai sę eno dagebolo olama, tama te Jerusalem dali, te Jerusalem taunde bidibo we bidi dabe augwali dali yabo sę po, eno e tama po obao, Jerusalem bulu dolaibao, tama te Jerusalem te olo bulu mu elaluaibao. Tama te gasa hani we bidi dabe augwaligo homugo te dwai po te augwa boi bidi dabe dali weyu, augwaligo e tama po waibao, “Dage te Jerusalem taun bulu dolali yali gilama dage me tama dolao,” waibao. Tialima, te king, nago te e tama po odobo sogo tama te nago hani we bidi dabe dali yabo sę po da, nage haliga begelama, tama te eno gedude naga digi aiyaba elaluali. Tama me te naga bulubo ugwa pisalama, tama gela weyu, tama ena i wai dao. Tama teyu, megi ena Genuai Bidi, eno po obao, eno nago i wabo odalio.
2KI 22:20 Tama te Jerusalem taun bulu dolabo sogo nage dolidali weyu, teda eno sula tagalogobeo. Menio. Nage bugagia mu bidaibao. Tiali goli, nosali nage isibo si, tama augwaligo nage gų pageba pubalobo sogo, teda te eno te Jerusalem taun dolaibao.’ Genuai Bidigo te po wai.” Te profet we Huldago agai te Genuai Bidigo po te bidi dabe augwalibolo mena silali, tama tilama, augwaligo te po te kingbolo pusigi pali.
2KI 23:1 Tama tialima, te king Josaia agai te tigidali Juda hani tobolu bidi dabe me, me te Jerusalem taunde bidibo tobolu bidi dabe me, agai te augwali asama, sisinagasamainu i wali.
2KI 23:2 Tama te kingo te pris bidi dabe me, me te profet bidi dabe me, me te Juda hani tigidali we bidi dabe me, tama me te Jerusalem hani we bidi dabe me, augwali te nogi yai bage me, te nogi meni yai bage me, agai augwali deliba te Genuai Bidigo tempel beba sisinani. Augwali sisina silali, tama agai te Genuai Bidigo tempel be tomode ma suali buku, te Dąų Wali Bomai Po elalubo buku agai selama, tama agai te tigidali po te bukude elalubo augwalibolo neda mani.
2KI 23:3 Te king aga te Genuai Bidigo be mabo dolo elalubo bobobage pos dolalubo madigi aga dolaluali, tama agai te Genuai Bidi dali e tama bomai po dąų wali. Agai te tigidali te bomai po te buku tomode muani po wali paibao wai. Agai te po bodolu selama polali deli homu naga, deli kolesaga naga tigidali bomai po me, me te Genuai Bidi agai po me wali mu paibao. Tama te tigidali we bidi dabego me augwali tigidaligo te bodolu selama, dąų wali po delidu naga wali paibao olama, polali.
2KI 23:4 Nosali te king Josaiago agai tobolu pris bidi Hilkia dali, te aga dologode sę ebo pris bidi dabe dali sali, tama me badu pris bidi dabe te augwali te Genuai Bidigo tempel be tų tonalubo pris bidi dabe me, tama agai augwalibolo te po wali, “Dage te Genuai Bidigo te be tomoba pelama, tama te tigidali te tibo god Bal me, me te god we Asera me, me te dagalu hǫ dabe, te tobage tibo god dabeba lotu po wabo doado bage dabe tigidali selama, buluba sela sąyao,” wali. Tama tilama, te kingo augwalibolo te po wali, “Te doado bage dabe tigidali selama, tama te buluba tolasa pelama, tama te wę Kidron wę bulu odogoba pelama, te doado bage tigidali sia ulao,” wali. Tigidali doado bage siago dela pela silibo si, tama te augwaligo te keli naga sela pelama, tama te taun Betel buluba pao wai.
2KI 23:5 Tama te king Josaia agai te tibo godiba te alta saide te ofa nai ula mabo pris bidi dabe sela sąyani. Polobadu te Juda hanigo king bidi dabego dąį ilai bidi dabe da, te pris bidi dabe augwaligo te tibo god dolo lotu po wabo pesagede ofa nai ula momainu dąį ilai pris bidi dabe dao. Tama te lotu po wabo bulu du pesage dabe te Juda hanigo taunde me elaluyu, me te Jerusalem taun pąde me elaluyu yali. Tama me te tibo god Bal me, me te giliga, me te polua, me te dagalu hǫ dabe, te tobage tibo god dabeba ofa nai ula mabo pris bidi dabe me, te agai sela sąyani.
2KI 23:6 Tama agai te augwaligo te tibo god we Asera noma nigilama, te Genuai Bidigo tempel bede munaluali piksa noma me sela sąyani, tama augwaligo te Jerusalem bulu tagalama, tama te bulu me odogo te wę Kidron elalubo odogoba selasa pai. Tama te augwaligo siaba ulali. Tama te nosali augwaligo te sisi selama, tama augwaligo haluama, te pauda mu dolo nigali. Tama tilama, augwaligo te pauda selasa pelama, te taun Jerusalem bulude te olo we bidi dabe isali te pubulali gų pageba sąsą biligi pali. Magi baso meni, te Aseraba lotu po wabo nai te dwai dwai nai mu da, te ola momainogo tama tiali.
2KI 23:7 Tama te king Josaiago te po wai, tama augwaligo te tigidali we bidi dabe augwaligo te Genuai Bidigo be tomode te penani sę ebo we bidi dabe augwaligo dwasianu be dabe sela sąyao wali. Te be dabe te god we Aserago gudabo name ugwa ebo we dabe sę eyu, bidibo tǫ pedai badu elalubao wali.
2KI 23:8 Te Juda hanigo bulu tomode te tigidali taun bulude te pris bidi dabego te tibo godiba ofa nai ula mabo bulu du alta sai, te king Josaiago sela sąsą pela silali. Agai te alta dolobo sę te taun Geba te taun te not badu da, te taundu gagalama, te saut badu te taun Bersebaba usu nigi pali. Tama agai te augwaligo te lotu po wabo pesage te tigidali bidi dabe gedude meda mu ilali. Tama agai te pris bidi dabe selama, tama te Jerusalem taunba odasa asali. Tama me te agai te Josuago beba pabo tų pąde dolo elaluali alta sai me dolali. Tama te bidi Josua te aga te Jerusalem taun tonalubo namba wan gavman tobolu bidi deli da. Tama te bidi agai te tų nigali, te pobase nogo badu nigilama, te Jerusalem taun tomoba pabo genuai tų pedai badu nigai.
2KI 23:9 Te pris bidi dabe, te kingo te Jerusalem taunba odasa asali bidi dabe augwali, augwaligo te Jerusalemde bidibo pris bidi dabe augwali dali sisinama, te nai bret bo dabo yis musiąwai nai tuali. Tiali goli, augwaligo te Genuai Bidigo te tempel bede elalubo alta saide te augwaligo ofa nai me ulubo usu meni.
2KI 23:10 Te king Josaia agai te augwaligo te lotu wabo pesage nogi te Tofet wabo pesage te agai dolali, te bulu te Hinom bulu odogode elaluai dao, tama te bulu me te bidi dabego gedude meda mu ilali. Tama tibaso, te bidi dabe augwaligo augwa te buluba nosali ma begasa pelama, tama te augwaligo augwa wai bǫų elama, te tibo god Molekba te ofa nai tiwai gilama me augwaligo ula magi pogobe.
2KI 23:11 Polobadu te Juda hanigo king bidi dabe me badugo homugo te giliga te god deli da homu elama, tama augwaligo teba lotu po wali. Tama augwaligo te me badu hos kibu siyu, me te boi hwįabo te karis siyu elama, tama augwaligo te god giligaba dąį ilama, tama augwaligo te doado bage dabe te Genuai Bidigo tempel be obo banis bologobea sai madigi pąde, te tomode te tǫ pedai me delide te doado bage dabe muani. Te tǫ pedai te Natanmelekgo be obo tų pąde elaluai, te kingo sę ebo gavman ofisa bidi me deli. Tama tialima, te king Josaiago te sę yali te hos kibu sela sąyani, tama me te karis dabe selama, tama siaba ula palali.
2KI 23:12 Tama te kingo be ugwadu te pedu badu rum habu me deli nigai, te habu badu augwaligo e tama nogi wabo da, te King Ahasgo Be Habu Badu da wabo da. Polobadu te Juda hanigo king bidi dabe augwaligo te me badu alta sai te rum habu badu te be pedu doloba pai pedude te alta sai nigali. Tama te king Manasego te alta sai te sisinibo pesage si elalubo madigi te Genuai Bidigo te be obo bologobea sali tomode elaluali. Tialima, te king Josaiago te tigidali alta sai hųgia sąnama, tama te miminama mu, dwasianunu mu ilali. Tama nosali augwali te alta mimina sąyani, te pobele bage selama, tama augwaligo te Kidron wę elalubo odogo buluba sągi pali.
2KI 23:13 Tama te polobadu king Solomongo nigali ofa nai mubo alta sai te giliga asobo pedai badu elaluali alta sai, te king Josaiago dolali, te saut pedai badu te Oliv Bulu Du elalubo bulu du pedai badu elaluai. Te king Solomongo te nigali alta sai dabe te tibo god we Astarte teba ofa nai ula maiabo alta sai nigai, te Saidon hanigo te dwai we god da, tama me te Moap hanigo te dwai god me nogi da, tama te nogi te Kemos da, me te god Molek, te god te Amon hanigo te dwai god da, tama te tibo dwai god dabe augwali te Genuai Bidigo gedude te dwai olo bage mu tonani.
2KI 23:14 Tama te king Josaia agai te masigigo te pos nigali me, me te nigo pos nigilama te te tibo god we Asera noma piksa nigilama daganani pos ni dabe togolama, sąyani. Tama agai te isai bidi dili dabe selama, tama lotu po wabo pesagede subigila sąsą pali.
2KI 23:15 Polobadu te king Jeroboamgo, te Nebatgo ogwa da, tama agai te ofa nai muabo alta sai me deli nigali, tama te lotu po wabo bulu du pesage me deli te taun Betelde nigali. Jeroboam aga te king te polobadu Israel hani kegelama, tama te Genuai Bidi gedude dwai kolesaga haniani elama, sęgę sali. Tialima, megi te king Josaia aga te taun Betel buluba pelama, tama te bidi dabe augwalibolo e tama po ola mani, tama augwaligo te lotu po wabo pesage me dolama, tama te alta sai me hųginama, sąyani. Tama augwaligo te lotu po wabo pesagede te sia dogonama, tama nosali augwaligo te sisi dabe selama, tama augwaligo te haluama, tama te pauda gagawai mu pedalali. Tama me te augwaligo tibo god we Asera noma piksa elalubo pos ni selama, tama augwaligo siaba ulali.
2KI 23:16 Tama te king Josaia aga dolalu bidama, tama aga begegi soabo sogo, agai te gų page me deli te dwasianu bulu dude elalubo suali. Tama tialima, te agai te aga sę ebo bidi dabebolo te po wali, “Tama dage pelama, te isali bidi dabe dili hodigi pao,” wali. Tama te king Josaiago te isali bidi dili dabe selama, te king Jeroboamgo nigali alta saiba munama, tama siaba ulali, tama te kolesaga yaligo da, te alta sai te tigidali bidi dabe gedude meda mu ilali. Tama tiali kolesagago te Genuai Bidigo te profet bidi me deli pedauwalidu wali pogo te kolesagaba usu nigi pali.
2KI 23:17 Tama te king Josaiago te dili dabe siaba ula silama, tama agai suali, ma te gasa gų page me elalubo suali. Tama agai augwalibolo hanalu wali, “Te e te gų page dego dawe?” Tama te taun Betel bulu bidi dabego e tama po wei ponani, “Te gų page da, te Juda buludu asali profet bidi gų page dao,” wali, “polobadu te profet bidi aga aselama, te megi nago te e alta saide yali sę po page pusa magasali bidi dao,” wali.
2KI 23:18 Tama te Josaiago augwalibolo e tama po ola mani, “Dagego aga gų pagede te magi sę me deli elamuo,” wali. “Aga gų pagede te aga dili bugagia munalubo sula tagalao,” wali. Tama tialima, augwaligo te profet bidigo dili me sabe, tama me te gasa profet bidi te Samaria buludu asali profet bidi agai dili me sabe.
2KI 23:19 Polobadu te Israel hani bidi dabego king bidi dabe augwaligo te Samaria bulu taunde te tibo god dolo lotu po wabo bulu du pesage nigigi pali, tama augwaligo te tama tiali kolesagago te Genuai Bidi aga haliga sębę ilali. Tama te megi da, te king Josaia agai te augwaligo te lotu po wali pesage dabe dolali, te agai Betel bulu taunde yali gilama yali.
2KI 23:20 Tama agai te augwaligo te lotu po wali pesagede te pris bidi dabe tigidali agai oda sali, tama agai augwali te augwa te nigali alta sai dabede te pris bidi dabe augwali ugwa badu munama, tama ela muna muna pali. Tama me te agai isali bidi dabe dili me selama, tama te augwa te nigali altaba munama, tama te sia ulali. Tama agai tama tibo sę silali, tama aga te Jerusalem taun buluba ma begasa pali.
2KI 23:21 Tama nosali te king Josaiago te we bidi dabebolo e tama po ola tolali, “Dago te Pasova nai ula tubo te bodolu kone palao,” wali, “God, dena Genuai Bidi, agai te dago wąį nǫų dabe te Isip bulude augwali bugagia bidimainu sula tagalai bidi dao, tama te augwaligo te e po bodolu selama, dąų wali bukude augwaligo asęani. Da tigidaligo te bukude elalubo tigidali po wali pao,” wali. Tama tialima, te tigidali we bidi dabe augwaligo te kingo wali gilama te po wali pali.
2KI 23:22 Tama te sese Israel dabego tobolu bidi dabe augwali bidibo sogo te sę ebo kolesaga gagalama, ela asu, te Israel hanigo king bidi dabe me, me te Juda hanigo king bidi dabe bidibo sogoba usu nagasai, te Israel hani we bidi dabe augwaligo te Pasovade wabo bomai po wali bugagia me pabeo, te polobadu te Godigo te Israel hani augwali bugagia bidimainogo Godigo te sula tagalama dąį ilali sogode te augwaligo te nai ulama, tubo bodolu sogo augwaligo bugagia kone palama, wali me pabe.
2KI 23:23 Tiali goli, te king Josaia aga te king bidi bidibadi, te kibu be te 18 wagi solama kibu be pai, tama augwaligo te bukude muani po bugagia wali pali. Tama augwaligo te Jerusalem bulude te Genuai Bidide kone paleyu, te Pasova bodolu sogo koneama, nai ulama tuali.
2KI 23:24 Tama te king Josaia agai te isali we bidi dabe noma dali po mibo we bidi dabe me agai augwali sela sąyani, tama me te agai te augwaligo bede munalua pali te tibo dwasianu god dabe agai sela sąsą pali, tama me te augwaligo nogogo nigali god noma me. Tama te Jerusalem bulude elaluali me, tama me te tigidali Juda bulu pedaide me elaluali doado bage me, te bulu badu Genuai Bidi Godibolo lotu po wasiąwai we bidi hani dabego lotu po wabo dwai haniani doado bage dabe buluba tigidali agai buluba sela sąyani. Agai tama tiali, magi baso meni, agai homugo augwaligo te tobolu pris bidi Hilkiago te Genuai Bidigo tempel be tomode munalubo ma suali bukude te Godigo tigidali Bomai Po elalubo podu wali pomainu, tama kolesaga yai.
2KI 23:25 Josaia aga dwagi yai king bidi mu da. Agai homu kolesaga me mu deli homu kolesaga naga yai, agai te Genuai Bidigo bomo dologodu naga wali pai, tama me te Mosesgo tigidali bomai po me wali pai. Polobadu te king bidi dabe augwali te king Josaia tiwai me bidai meni, tama te nosali me te aga tiwai me bidai meni. Te king Josaia aga deli mugo tigidali king bidi dabe aiyaba elaluai da.
2KI 23:26 Te king Josaia agai dwagi yai kolesaga umabo mu yali, tiali goli te Genuai Bidigo agai te homu yali, te king Manasego agai te dwai kolesaga yaliba ma agai me kone palali, tama agai haliga sębę genuai mu te Juda hani augwali dali yali, agai te haliga sębę yali te sębę me sia sabe. Mu menio.
2KI 23:27 Tama tibaso, te Genuai Bidigo te tama po wali, “Tama te deli kolesaga naga te Juda hanigo bulude yaibao,” wali, “te polobadu te eno te Israel hanigo bulude yali tiwai yaibao. Tama eno augwali sela sąnama, tama augwali digibulu mu gudulaibao,” wali. “Magi baso meni, eno augwali tonobo hagela mu ebuo. Tama eno te Jerusalem bulu taun eno tudiba ilaibao, te taun bulu te ena digi ena bulu da olama, dąį ilai dao. Tama eno te we bidi dabe augwali asama, te ena dolo lotu po omainu eno te dąį ilali be, te me eno tudiba ilaibao,” God Genuai Bidigo te po wali.
2KI 23:28 Te king Josaiago te agai te gasa sę dabe yali po dao, te po gasa bukude elalubo, augwaligo te buku e tama nogi wabo da, Te Juda Hanigo King Bidi Dabego Yali Sę Po Elalubo Buku da wabo dao.
2KI 23:29 Te Josaia aga king bidibo sogo, te bidi Neko, te Isip king bidi, agai te aga Isip ami soldia bidi dabe selama, tama augwali te Juda hanigo tǫ ela solama, te Yufretis węba pali, augwali te Asiria hani tau somainu, augwa sigo boi bidi dabe dali boi hwįgi peyu pali. Tama te king Josaiago te boi hwįbo po odali, tama te agai te aga ami soldia bidi dabe selama, tama te augwali pelama, te Isip hani dali boi hwįgi pali. Tama augwaligo te Megido hanu taunde augwaligo te boi hwįani, tama te Isip hanigo te king Josaia elama, isilali.
2KI 23:30 Tama te Josaiago sę ebo gavman tobolu ofisa bidi dabego te king Josaia tigi selama, te boi hwįbo karis me deliba munama, tama augwaligo te Jerusalem taunba selasa pali. Tama augwaligo te king Josaia tigi selama, te Juda hanigo king bidi dabe pubalobo gų pageba pubaligi pali. Tama tialima, te Juda hani augwaligo te bidi Joahas sali, aga aya te king Josaiago ogwa, tama augwaligo te wel selama, tama aga toboluba te wel gelama, tama aga augwaligo te king bidi nigilama, dąį ilali.
2KI 23:31 Te bidi Joahas aga kibu be te 23 kibu be usu nama, tama augwaligo aga te Juda hanigo king bidi nigilama bidali. Tama aga te Jerusalemde king bidi nigilama bidali, polua sela digi bidai. Aga ida nogi da, Hamutal da, te we aga bulu te Lipna bulu taun bidi Jeremaiago wegi da.
2KI 23:32 Te bidi Joahas agai te aga wąį nǫųgo yali kolesagadu wali pali, tama teyu, agai te Genuai Bidigo gedude dwai kolesaga genuai mu yali.
2KI 23:33 Te Isip bulu king bidi Nekogo agai te bidi Joahasgo te king sę yali sela sąyani, tama aga te Hamat bulu taun Ripla taunde aga te hadabu bede bidali, tama te king Joahas aga king bidi nigilama ma bidibe. Tama te king Nekogo te Juda hani dali te agai takis mone sali, te mone te 3,400 kilogram usu silva me sali, me te 34 kilogram gol, tama mone dabe selama, takis mone mani.
2KI 23:34 Tama te king Nekogo agai te bidi Eliakim sali, te king Josaiago gasa ogwa me da, tama te king Neko agai homugo te bidi Eliakim aga te Juda hanigo king bidi nigilainu yali, te bidigo te aga aya Josaiago king sę yali silide bidiyu, king sę yali. Tama te king Neko agai te bidi Eliakim nogi hasegelama, tama aga nogi Jehoiakim poali. Tama nosali te king Nekogo te Joahas aga te Isip buluba odasa pelama, tama aga te Isip bulude bididubadi yaide, isibo bodoluba usu nigi pali.
2KI 23:35 Tama te king Jehoiakim agai te tigidali we bidi dabe dali, te silva me gol me sali, tama te agai te nai dabe selama, tama te Isip king bidi Nekobolo te takis mone mawai. Te king bidi Jehoiakim agai augwalibolo te po wali, “Dagego te takis mone te duga usu naga sesaibao,” wali. “Te umabo mone mubo bidigo da, teda augwaligo genuai mone muao,” wali, “tama te dwasianu mone munalubo bidigo da, teda te dwasianu mone mao,” wali. Tama tialima, te king Jehoiakimgo te we bidi dabego te muani te silva me, te gol me agai selama, tama te king Nekobolo tolali.
2KI 23:36 Te bidi Jehoiakim aga king bidi nigila bidibo sogo, agai kibu be te bidi sese deli selama, te ugwadu nogo a naga, te 25 kibu be usu bidali. Tama te aga Jerusalemde aga king bidi nigilama bidali kibu be te 11 kibu be usu nama bidai. Aga ida nogi te e da, Sebida, te wegi aga aya te Ruma taun bulu bidi Pedaiago wegi da.
2KI 23:37 Te king bidi Jehoiakim agai te aga wąį nǫųgo yali kolesagadu wali peyu, tama agai te dwai sęgę sabo kolesaga te Genuai Bidigo gedude yali.
2KI 24:1 Te Jehoiakim aga te Juda hanigo king bidi nigilama bidibo sogo, te Babilon bulu king bidi Nebukatnesargo te aga ami soldia bidi dabe selama, tama te augwaligo te Juda hani dabe dali boi hwįagasali. Tama te augwaligo te king Jehoiakim aga hani dali augwali aiyaba elaluali. Tiali goli, nosali te kibu be sela silibo si, te king Jehoiakim agai homugo te king Nebukatnesargo aga munu me tonalugobe homu yali, tama teyu, te king Jehoiakim aga te king Nebukatnesar dologode munu ma bidibe.
2KI 24:2 Tama tibaso, Genuai Bidi Godigo te Babilon hani bidi me siyu, me te Siria hani bidi dabe me siyu, tama me te Moap hani bidi dabe me siyu, tama me te Amon hani bidi dabe me siyu elama, tama te king Jehoiakim dali boi hwįnama, tama te Juda hanigo bulu Jerusalem taun dolomainu Genuai Bidigo tagala palali. Genuai Bidigo agai tama tiali sę te agai te profet bagebolo pusa mani poba usu nigi pai, te profet bidi dabe te aga sę ebo bidi dabe da.
2KI 24:3 Genuai Bidi aga digi te tama tiwai kolesaga te bidi haniba menama, tama tiwai sę yali. Magi baso meni, agai homugo te Juda hani hagela mu eyu, agai homugo te Juda hani augwali te augwa tǫ tagalama, te digibulu sela sąwainu yai. Genuai Bidi agai te king Manasego yali te dwai kolesaga me konealudu, agai tama kolesaga augwalide dolo yali.
2KI 24:4 Tama me te agai e tama homu koneani, te king Manasego agai te tigidali Jerusalem bulu pedaide te haniani dwai kolesaga isąwai doloba pai we bidi dabe ela muani, tama Genuai Bidi agai homu te king Manasego te dwai kolesaga yali sęgo sali sęgę agai tagalabo homu ebe.
2KI 24:5 Te king Jehoiakim agai te haniani sę yali po elalubo, te gasa bukude elalubo da, te buku augwaligo e tama nogi ebo da, Te Juda Hanigo King Bidi Dabego Yali Sę Po Elalubo Buku da, wabo dao.
2KI 24:6 Te king Jehoiakim isali, tama te aga ogwa, Jehoiakingo te aga ayago sę selama, tama aga king bidi nigilama, sę yali.
2KI 24:7 Megi tama tibo sogo te Babilon kingo te bulu taun tonaluali polobadu te Isip bulu king bidigo te bulu taun tonaluai, tama te Isip bulu dąįde gagalama, te wę Yufretis teba sabaligi pali. Tama teyu, te Isip hani dali te augwa ami soldia bidi dabe augwaligo te gasa buluba me pelama, te boi me hwįgi pabe.
2KI 24:8 Te bidi Jehoiakin agai kibu be te 18 kibu be usu nama bidama, aga te Juda hanigo king bidi nigilali. Tama aga te Jerusalem bulude aga te king bidi nigilama bidali, te polua sela bidai. Aga ida nogi te e dao, te agai nogi Nehusta, te aga aya te Jerusalem bulu bidi Elnatango wegi da.
2KI 24:9 Te king Jehoiakingo agai te aga ayago yali kolesagadu wali pali, tama agai te Genuai Bidi gedude dwai kolesaga mu yali.
2KI 24:10 Tama te king Jehoiakin aga te king bidi bidibo sogo, tama te Nebukatnesar aga sę ebo gavman ofisa bidi dabe meba augwaligo te Babilon ami soldia bidi dabe siyu elama, tama te augwali asama, te Jerusalem bulu taun bobegela sagaselama, tama augwaligo te boi hwįnama, te Jerusalem taun sainu yali.
2KI 24:11 Te Babilon ami soldia bidi dabe augwaligo te Jerusalem bulu taun bologobealudubadi yaide, tama te king Nebukatnesar aga digi aga ami soldia bidi dabe dali aga aselama, bidalubo suali.
2KI 24:12 Tama te king Jehoiakingo sualima, te king Nebukatnesar aga ami soldia bidi dabe dali asama bidibo suali, tama tialima, te king Jehoiakin ebadi, te aga ida ebadi, tama me te aga gavman ofisa bidi me, me te augwa genuai bidi dabe me, tama me te kingo be tonalubo bidi dabe me, augwali tigidali te taun tagalama, buluba pelama, te king Nebukatnesar dali sisinama, tama augwaligo Nebukatnesarbolo te po wali, “Tama dago homugo te boi ma hwįgobeo,” wali. Tama tialima, te king Nebukatnesargo te king Jehoiakin aga kalabusiba muani. Tama te sę yali sogo, te king Nebukatnesar agai kibu be te 8 kibu be te Babilon bulude king bidai.
2KI 24:13 Tama te king Nebukatnesar aga te Genuai Bidigo tempel be tomoba pelama, tama agai te tigidali gol te king Solomongo nigali naide muani gol dabe tigidali sali. Tama me te gasa dwagi yai doado bage te Genuai Bidigo tempel bede muani me, me te kingo bede muani doado bage me, tama tigidali te agai te Babilon buluba selasa pali. Agai te tama tiali sę te Genuai Bidigo polobadu wali poba usu nigi peyu, tama sę yali.
2KI 24:14 Tama te king Nebukatnesar agai te tigidali te Jerusalem bulude bidali we bidi dabe tigidali me, me te tigidali gavman ofisa bidi dabe me, tama me te boma pai ami soldia bidi dabe me, te we bidi dabe tigidali, te 10,000 usu bidi dabe agai selasa, te Babilon buluba pai. Tama me te agai te tigidali bidi dabe te haniani nai dabe nigibo konea pai bidi naga selama, tama me te ain nigibo konea pai bidi dabe me, agai selasa pali. Tama agai te bidi dabe augwali tigidali te Babilon taun buluba odasa pelama, te kalabus iligi pali. Tama agai e tama tiali, te tigidali te haniani nai dabe mu meni yai bidi dabe naga tagalama, te Juda hani augwa bulude bidibadi taga soali.
2KI 24:15 Tama te king Nebukatnesargo te king Jehoiakin dali, te aga ida ebadi, me te aga we me, me te aga sę ebo gavman ofisa bidi dabe me, tama me te Juda hanigo genuai bidi dabe me, augwali tigidali te kalabus elama, tama agai augwali te Babilon buluba odasa pali.
2KI 24:16 Te king Nebukatnesargo agai te tigidali te Juda hanigo bomai ami soldia bidi dabe naga selasa pali, te bidi dabego namba usu te 7,000. Tama me te haniani nai dabe nigibo konea pali bidi me, tama me te haniani nai te ain dabe nigibo konea pai bidi dabe me naga, agai te augwali umabo mu sali. Te bidi dabe augwaligo namba te 1,000 usu da. Te tigidali bidi dabe, tama te bidi dabe augwali te ami soldia bidi dabe nigilama, sę yabo boma pai bidi naga mu.
2KI 24:17 Te king Nebukatnesar agai homugo te bidi Matania, te bidi te king Jehoiakin aga aya sabi bidi da, te bidi agai te aga amago ogwa Jehoiakin hasegelama, aga te king bidi nigilali. Tama te king Nebukatnesargo te bidi Matania nogi hasegelama, te agai nogi Sedekaia nogi polali.
2KI 24:18 Te bidi Sedekaia agai kibu be te 21 kibu be elalubadi, tama aga te Juda hanigo king bidi nigilali. Tama aga te Jerusalem taunde aga king nigilama bidali kibu be te 11 kibu be bidai. Aga ida nogi da, agai nogi Hamutal, Jeremaiago wegi da, aga aya te taun Lipna bulu bidi da.
2KI 24:19 Sedekaia agai te king Jehoiakimgo yali kolesagadu wali pali, tama agai te Genuai Bidigo gedude dwai kolesaga mu yali.
2KI 24:20 Tama te Juda hanigo augwaligo me, te Jerusalem taunde bidibo we bidi dabego me, te haniani dwai kolesaga ebo sęde te Genuai Bidi aga haliga sębę dwai mu yali, tama tibaso, te Genuai Bidigo te we bidi dabe augwaligo gesabidi subo hagela mu eyu, tama agai te we bidi dabe augwali te augwa bulu tǫ tagalama, digibulu bidigi pomainu, mu sela sąyani.
2KI 25:1 Te king Sedekaia agai homugo te Babilon king bidigo aga tonalubo hagela yali, tama teyu, aga te Babilon hanigo king aga dologode munu ma bidigobe homu yali. Tama tialima, te king Sedekaia agai kibu be te te 9 yia, te ugwadu polua nogo si, te 10 mun, tama te king bidi bidali, tama te nogo si wabo poluade te dei nogo si dei, te Babilon king Nebukatnesargo te agai te tigidali ami soldia bidi dabe selama, tama te Jerusalem bulu taun bologobea sagaselama, tama augwaligo te taun sainogo te boi hwįani. Tama augwaligo te Jerusalem taun bologobea selama, tama augwaligo te tǫ selama, te taun obo pąde munama, tama du ilali, tama augwali teba doligiluama, boi hwįainogo tama tiai dao.
2KI 25:2 Tama augwaligo te taun Jerusalem bologobealudubadi yaide, te kibu be deli selama, te hap yia, te polua nogo a olama, te me badu nogo deli, te 6 mun tama bidali, te kibu bede te Sedekaia aga te king bidi bidali kibu be te 11 yia.
2KI 25:3 Tama te kibu be tomode te 4 polua, dei 9 wabode, te Jerusalem taunde bidali we bidi dabe te nasi dwai mu yali, magi baso meni, augwaligo tuabo nai sia sali.
2KI 25:4 Tama te sogo te Babilon hanigo te masigigo nigai genuai obo banis te me badu pedai badu deli auluama, te Jerusalem taun tomoba augwali pai. Tialima, te king Sedekaia dali, te Jerusalemde bidibo ami soldia bidi dabe dali, augwaligo homugo wi painu, tama be hulide augwali te kingo giba pabo tųdu peyu, tama te augwaligo te taun tagalama, te obo banis si unulali nogo habu badu te elalubo tųdu augwali pai. Te umabo Babilon hani bidi dabe augwaligo te Jerusalem taun bulu bologobea sabo sę me elalubo suali, tiali goli te Jerusalem taun ami soldia bidi dabe augwali tama te Jerusalem taun tagalama, tama augwali te wę Jordan wę elalubo odogoba pabo tųdu wali pali.
2KI 25:5 Tiali goli, te Babilon ami soldia bidi dabego te king Sedekaia pobeasa pelama, tama augwaligo aga pageba sabaligi pelama, te Jeriko hanu pąde te tǫ malu pesage elalubo madigi augwaligo aga nogo tuali. Tama tibaso, te king Sedekaiago ami soldia bidi dabego aga tagalama, tama augwali wi pela silali.
2KI 25:6 Tama tialima, te Babilon hani ami bidi dabego te king Sedekaia nogo bono dunama, tama augwaligo aga te Babilon bulu king bidi pageba odasa pali. Te tama tiali sogo, te Babilon king bidi aga te Ripla hanude bidibadi da. Te king Nebukatnesargo te king Sedekaia sulama, tama te po wali, “Te king Sedekaia, naga digi te kolesaga geda muanigo da, teda te nage dwai dene mu sao,” wali.
2KI 25:7 Te Babilon hani ami bidi dabego te king Sedekaiago ogwa dabe me oda sali, tama augwaligo te Ripla hanuba augwali odasa asali. Tama te bulude te king Nebukatnesargo te po wai, tama te augwaligo te king Sedekaiago ogwa dabe te augwaligo te augwa aya Sedekaiago gedugo tonalubadi yaide, augwaligo ela muani. Tama te kingo te po wali, tama augwaligo te king Sedekaiago gedu ge si dia sąyani. Tama augwaligo aga nogo sągą dabe te aligabo bonogo dunama, tama te Babilon buluba kalabusiba mugi pali.
2KI 25:8 Te Babilon king bidi Nebukatnesar aga te Babilonde king bidi bidibadi, agai kibu be te bidi sese deli pąde, te 19 yia, aga king bidi bidama, tama te nogo a wabo poluago dei te nogo a olama, te me badu nogogo si, te 7 dei, megi e kibu be tomode tama, te king Nebukatnesar te Babilon king bidigo aga sę ebo gavman ofisa bidi me deli, aga te Jerusalem buluba asali. Te bidi Nebusaradan agai te king tonalubo ami soldia bidi dabe tonalubo tobolu bidi dao.
2KI 25:9 Tama agai te Genuai Bidigo tempel be me, tama me te Juda hanigo king bidigo be me, tama me te Jerusalemde bidibo genuai bidi dabego be dabe tigidali sia tulama, tama siago dela pela silali. Te Babilon hani augwaligo mu te be me tulube.
2KI 25:10 Tama te Babilon ami soldia bidi dabe tigidali, augwaligo te bidi Nebusaradan dali naga bidai hani naga da, augwaligo te masigi obo togolama, te Jerusalem taun bologobea sali moni masigi obo banis auluali.
2KI 25:11 Tama te Nebusaradango agai te taun Jerusalem bulude bidali we bidi dabe dali, te gasa hani we bidi dabe dali oda sali, tama augwali te odasa pelama, te Babilon buluba kalabusiba mugi pali. Tama me te Juda hani dabe te boi hwįbo sogo te Jerusalem bulu tagalama, wi peyu, te Babilon hani dabego bidibo pesageba osogo bidigi pali we bidi dabe me, agai te augwali selama, tama agai augwali te Babilon buluba odasa pelama, augwali hadabu iligi pali.
2KI 25:12 Tialima, me badu Juda hani we bidi dabe augwali te me badu te tigidali doado bage dabe meni yai we bidi dabe, tama te augwali te bidi Nebusaradango augwali tagalama, tama augwali bidaluyu, tama augwaligo te wain gi dabe me, me te gasa gasa gi dabe me augwaligo tonaluali.
2KI 25:13 Tama te Babilon hani bidi dabe augwaligo te Genuai Bidigo tempel beba pelama, tama augwaligo te brasgo nigali moni pos si me, tama me te bidi dabego te bras selama, nogogo nigali wilkar dabe me, tama te wę tubo dwasianu tank te wilkar ugwadu daide muani nai dabe me tigidali, te augwaligo auluama sąyani, tama augwaligo te tigidali te bras dabe te Babilon buluba selasa pali.
2KI 25:14 Tama te Babilon hani bidi dabe augwaligo te nai bulanabo kamugi kenage dage me, tama me te savol me, tama me te lam sole sula sabo nai dabe me, tama me te dwagi yai hanu holoyu, denami ebo pauda ulubo plet pou dabe me, tama me badu te gasa doado bage dabe me, te Genuai Bidigo tempel bede muani te brasgo nigali doado bage dabe tigidali, te augwaligo sela silali.
2KI 25:15 Tama te bidi Nebusaradan agai te bidi dabego te nogogo te gol me te silva selama nigali wiegi yai nai dabe me sali, tama me te sia sabo plet pou me, tama me te ofa nai ulubo te kaneme mubo dis pou dabe me sali.
2KI 25:16 Polobadu te king Solomongo sę ebo bidi dabego te bras dabe selama nigali bobobage genuai pos side, tama te genuai tank ąį muani me, te dwasianu wilkarde te dwasianu tank wę dabe ugwadu muani. Tama te king Solomongo te po wai, tama augwaligo te doado bage dabe te Genuai Bidigo tempel beba muao wali. Tiali goli, megi te Babilon hani bidi dabe augwaligo te nai dabe auluama, tede muani bras dabe augwaligo sali, tama te brasgo sęgę te bidigo skelim ebo usu me ebe, te hauwa mu elaluali.
2KI 25:17 Te bidi dabe augwaligo polobadu te brasgo nigali pos si te augwaligo hasia nigali ususi elama naga pos si nigali. Te bobobage yali usu te 8 mita usu. Te augwaligo te pos si toboluba mubo au ebo nai nigali, te dwasianu genuai gagawai, tama te au ebo nai bobobage usu te 1 mita tama te 30 sentimita usu. Tama augwaligo te bras selama, te dwagi yai te au yai nigali, te tiwai te sųgų gegebo wago au yali tiwai mu, me te ni du pomigranet dabe te ni dugo au yali tiwai au yali, te augwaligo te pos side tama augwaligo te au yai nigali. Tama augwaligo te brasgo nigai ni pomigranet du dabe selama, tama te wa umben gege pabo au yali. Tama augwaligo te au yai doado bage selama, tama te brasgo nigai bobobage pos tobolu side tama augwaligo au yai nai munama, tama te pos si tobolude bagulali.
2KI 25:18 Te bidi Nebusaradan, te bidi aga te Babilon bulude polalubo tobolu gavman ofisa bidi deli da, tama agai te tobolu pris bidi Seraia sali, tama me te Sefanaia me sali, te bidi te Seraia tudi badu bidiyu sę ebo bidi da, tama me te gasa pris bidi sela, te bidi sela te Godigo tempel be tų tonalubo bidi sela dao, te bidi selama, agai kalabus ilali.
2KI 25:19 Tama te Jerusalem bulude bidibo ami soldia tonalubo gavman ofisa bidi me agai sali. Tama me te agai te Juda hanigo king bidi dabe te kolesaga ola mabo bidi dabe te a naga sali. Te bidi hani dabe augwali te Jerusalem bulude bidibadi, te agai te augwali nogo tuali. Tama agai te Juda hani bidi dabego ami soldia bidi dabego tobolu gavman ofisa bidigo kuskus bidi te agai sali, te bidi agai sę te ami soldia bidi nigabo bidi dabe te agai sabo sę ebo bidi da. Tama agai suali, ma te Jerusalem bulude te kuskus bidi tau sabo bidi sese sela bidi bidibo suali, tama agai te bidi dabe me sali.
2KI 25:20 Tama tialima, te bidi Nebusaradango agai te sali bidi dabe tigidali te Babilon king bidi aga te Ripla hanude bidiboba odasa pali.
2KI 25:21 Te Hamat hanigo tǫ, te Ripla hanude, tama te kingo te po wai, tama augwaligo te bidi dabe elama, isilao wali. Tama te Babilon hani bidi dabego e tama tiali, tama nosali te augwaligo te gasa Juda hani bidi dabe selasa pelama, te Juda tǫ tagalama, te Babilon buluba hadabu egi pali.
2KI 25:22 Tama te king Nebukatnesargo agai te Juda bidi Gedalia dąį ilama, tama agai te Babilon hani bidi dabego te Juda hani siyu, te me badu we bidi dabe te Juda hani dabe augwa bulu tǫde me bidibadi taga soali we bidi dabe tonaluao olama, te bidi Gedalia dąį ilali. Gedalia aga aya Ahikamgo ogwa da, tama te aga wąį nǫų bidi te Safan dao.
2KI 25:23 Te me badu Juda ami gavman ofisa tobolu bidi ebadi, me te Juda hanigo ami soldia bidi dabe augwali, te bidi dabe augwali te gasa bulu mede polobadu bidada pali. Tama augwaligo e tama po odobo sogo, tama te Babilon king bidigo te bidi Gedalia dąį ilama, tama te bidigo te Juda hanigo tǫ tonaluao wali, augwaligo te bidi Gedalia te Mispa bulude bidibo sugi pali. Te gavman ofisa bidi dabe nogi e tama da, me Netaniago ogwa Ismael da, tama me te bidi Johanan, te bidi te Kareago ogwa, tama me te Seraia, te Seraia aga aya Tanhumetgo ogwa da, te bidi aga bulu Netofa, me te Maka tǫ page bidi Jesania da.
2KI 25:24 Tama te bidi Gedaliago augwali sulama, augwalibolo e tama po wali, nogo guni sisiyu muyu, te po wali, “Mu tama dao, dagego te Babilon hani bidi dabe augwali sulama, dage wi me egio. Mu menio. Dage te e tǫde tama bidiyu, tama te Babilon hanigo king bidi dologode tama bidao, tama tialima dage bugagia mu bidaibao,” wali.
2KI 25:25 Te bidi Ismael aga te bidi te Netaniago ogwa da, tama te aga wąį nǫų bidi te nogi Elisama da. Tama te bidi aga te Juda hanigo king bidi augwali deli hani bidi dao. Tama tialima, te megi te kibu bede te nogo a olama, te me badu nogogo si me da sigi soabo poluade, te bidi agai te nogo si bidi selama, tama augwali te Mispa buluba asama, tama augwaligo te bidi Gedalia ela muani. Tama augwaligo te bidi aga dali bidali Juda hani bidi dabe me ela muani, tama me te Babilon hani ami soldia bidi dabe me, te bidi Gedalia dali te Mispa bulude bidali ami soldia bidi dabe me, augwali ela muai dao.
2KI 25:26 Tama tede nosali, te tigidali Juda hani bidi dabe augwali te bulu pedaide bidali bidi dabe, te ami gavman ofisa bidi dabe me, augwali tigidali te Babilon hani bidi dabe sula peyu, wi mu yali. Tama teyu, augwali tigidali te wi pelama, te Isip buluba bidigi pali.
2KI 25:27 Te Juda hanigo king bidi Jehoiakin aga te Babilon bulude hadabu bede bidali kibu be e tama bidali, te 37 kibu be usu nama bidali, tama te 37 kibu be wabo te Evil Merodak aga te Babilon hanigo king bidi nigali. Tama te kibu bede te polua te nogo si olama, te sągągo si wabo polua, te 27 dei, Evil Merodak agai te king Jehoiakin hobede eyu, tama agai aga te kalabuside bidali tagala palali.
2KI 25:28 Tama te bidi Evil Merodak agai te king Jehoiakin dali te dwagi yai kolesaga eyu, tama agai agabolo te genuai nogi mayu, tama aga namba mayu yali, tama te tialigo te gasa king bidi dabe te king Jehoiakin aga dali te Babilon bulude kalabus bidali augwaligo namba me aiyaba elaluali.
2KI 25:29 Tama teyu, te king Jehoiakin agai te kalabus bidigo bulubo ogwa ma bulube. Tama tigidali sogo te Babilon hani king bidi dali nai tuyu bidai, tama aga te nai tuyu bidada pelama, te king Jehoiakin isibo bodoluba usu nigi pali.
2KI 25:30 Te Babilon king bidigo te po wai, tama te tigidali sogo augwaligo mone me, te tigidali doado bage dabe me, te king bidi Jehoiakin mayu bidali, te bidi Jehoiakin aga bugagia bidimainu. Augwaligo tama tidi peduama, tama te king Jehoiakin isibo bodoluba usu nigi pai dao.
1CH 1:1 Adam te Setgo aya, te Set Enosgo aya dao.
1CH 1:2 Enos te Kenango aya, tama te Kenan te Mahalalelgo aya, te Mahalalel te Jaretgo aya dao.
1CH 1:3 Jaret aga te Enokgo aya, tama Enok te Metuselago aya, Metusela te Lamekgo aya,
1CH 1:4 tama Lamek te Noago aya dao. Tama Noago ogwa sela elaluali. Ogwa sela nogi e tiwai, Sem, me Ham, me Jafet.
1CH 1:5 Te Jafetgo ogwa dabego nogi e tiwai dao, Gomer, me Magok, me Madai, me Javan, me Tubal, me Mesek, me Tiras dao.
1CH 1:6 Gomer agade bulali wąį nǫų hani bage te Askenas, me Rifat, me Togarma dao.
1CH 1:7 Javan agade bulali wąį nǫų hani bage Elisa, me Tarsis, me Saiprus, me Rodes dao.
1CH 1:8 Hamgo ogwa dabe nogi e tama dao, Kus, me Misraim, me Put, me Kenan. Kus agade bulali wąį nǫų dabe Sudan, te Misraim agade bulali wąį nǫų te Isip dabe dao, te Put agade bulali wąį nǫų te Libia dao, te Kenan agade bulali wąį nǫų te Kenan hani dabe dao.
1CH 1:9 Te Kusgo ogwa dabego nogi e tiwai, Seba, me Havila, me Sapta, me Rama, me Sapteka. Ramago ogwa si ame nai, Seba me Dedan dao.
1CH 1:10 Kusgo gasa ogwa me elaluai, aga nogi te Nimrot. Nimrot te hasia mu te we bidi tonalubo bomai king bidi pedelama bidali.
1CH 1:11 Misraim agai wąį nǫų dabe te Lidia dabe, me Anam dabe, me Lehap dabe, me Naptu dabe,
1CH 1:12 me Patrus dabe, me Kaslu dabe dao. Tama nosali te Filistia dabe da te Kaslu hanidu pedelai dao. Tama te Kaptor dabe me augwali te Misraim agai wąį nǫų dabe dao.
1CH 1:13 Kenan agai bulali wąį nǫų dabe te Saidon dabe, te agai gomunai ogwago bulali wąį nǫų hani dabe dao. Tama me Kenan aga te Hit dabe, me
1CH 1:14 te Jebus dabe, me Amor dabe, me Girgas dabe,
1CH 1:15 me Hivi dabe, me Arka dabe, me Sini dabe,
1CH 1:16 me Arvat dabe, me Semar dabe, me Hamat dabe, te augwali bulali wąį nǫų Kenan dao.
1CH 1:17 Siemgo ogwa dabe nogi e tiwai, Elam, me Asur, me Arpaksat, me Lut, me Aram, me Us, me Hul, me Geter, me Mesek dao.
1CH 1:18 Arpaksat aga te ogwa Selago aya, te Sela te ogwa Ebergo aya dao.
1CH 1:19 Ebergo ogwa si ame nani, Pelek me Joktan dao. Te tǫde we bidi augwali te hani hauwa pebeda pabo sę ebo gagalali, te Pelek pedelali sogo tialio, tama tibaso aga ayago aga nogi Pelek poalio.
1CH 1:20 Te Joktango ogwa dabego nogi e tiwai dao, Almodat, me Selep, me Hasarmavet, me Jera,
1CH 1:21 me Hadoram, me Usal, me Dikla,
1CH 1:22 me Ebal, me Abimael, me Seba,
1CH 1:23 me Ofir, me Havila, me Jobap dao.
1CH 1:24 Siem te Arpaksatgo aya, aga Selago aya, me
1CH 1:25 Sela te Ebergo aya, te Eber Pelekgo aya, aga te Reugo aya dao,
1CH 1:26 te Reu aga te Serukgo aya, te Seruk Nahorgo aya dao. Tama Nahor te Terago aya,
1CH 1:27 tama Tera te Abramgo aya da. Abram nogi gesi me hasegelali, te nogi Abraham dao.
1CH 1:28 Abrahamgo ogwa si elaluai, Aisak me Ismael dao.
1CH 1:29 Ismaelgo gomunai ogwa te Nebaiot. Te Ismaelgo gasa ogwa dabego nogi e tiwai dao, Kedar, me Atbel, me Mipsam,
1CH 1:30 me Misma, me Duma, me Masa, me Hadat, me Tema dao,
1CH 1:31 me Jetur, me Nafis, me Kedema dao.
1CH 1:32 Abrahamgo si wali we me sai, aga nogi Ketura. Te Keturago ame nani ogwa dabe nogi e tiwai, Simran, me Joksan, me Medan, me Midian, me Isbak, me Sua. Joksango ogwa si elaluali, Seba me Dedan.
1CH 1:33 Te Midiango ogwa dabe nogi e tiwai, Efa, me Efer, me Hanok, me Abida, me Elda, te tama dao.
1CH 1:34 Aisak, te Abrahamgo ogwa, agai ogwa si elaluai, Iso me Jekop. Te Jekopgo gasa nogi me da, te Israel dao.
1CH 1:35 Tama Isogo ogwa dabego ogwa nogi dabe e tiwai, Elifas, me Ruel, me Jeus, me Jalam, me Kora dao.
1CH 1:36 Elifasgo ogwa dabe nogi e tiwai, Teman, me Omar, me Sefi, me Gatam, me Kenas, me Timna, me Amalek dao.
1CH 1:37 Ruelgo ogwa dabe nogi e tiwai, Nahat, me Sera, me Sama, me Misa dao.
1CH 1:38 Seirgo ogwa dabe nogi e tiwai, Lotan, me Sobal, me Sibeon, me Ana, me Dison, me Eser, me Disan dao.
1CH 1:39 Lotango ogwa dabe nogi e tiwai dao, Hori me Homam. Lotango abe Timna dao
1CH 1:40 Sobalgo ogwa dabe nogi e tiwai, Alvan, me Manahat, me Ebal, me Sefi, me Onam dao. Sibeongo ogwa dabe nogi e tama, Aia me Ana dao.
1CH 1:41 Anago ogwa te Dison da. Disongo ogwa dabe nogi e tama, te Anago ogwago ogwa nogi e tiwai, Hamran, me Esban, me Itran, me Keran dao.
1CH 1:42 Esergo ogwa dabe nogi e tama da, Bilhan, me Savan, me Jakan. Te Disango ogwa dabe nogi e tama, Us me Aran dao.
1CH 1:43 Te tǫ kantri Israelde tuni bidi king elalusiąbadi, te tǫ kantri Idomde king hauwa elalua pali. Hasia mu bidali king Bela, te Beorgo ogwa da. Aga te taun Dinhabade king bidali.
1CH 1:44 Tama Bela isibaso, Jobap, te Serago ogwa, te taun Bosra bidi, te king pedelai dao.
1CH 1:45 Tama Jobap isibaso, te Husam te Teman bulu tǫ bidi te king bidai dao.
1CH 1:46 Tama Husam isibaso, Hadat, te Bedatgo ogwa, te king pedelai dao. Hadat te tǫ kantri Moapba pelama, te Midian dabe dali boi hwįnama augwali aiyaba elaluai. Hadat te taun Avitde king bidalio.
1CH 1:47 Te Hadat isibaso da, Samla te taun Masreka bulu bidi king pedelali.
1CH 1:48 Te Samla isibo si da, Saul te taun Rehobot te wę Yufretis bulu pąde bidi, te king pedelama bidai dao.
1CH 1:49 Te Saul isibaso da, Balhanan, te Akborgo ogwa, te king pedelai dao.
1CH 1:50 Tama te Balhanan isibaso, Hadat king pedelali. Tama aga te taun Pau tede king bidai, aga we, te Mehetabel da, te Matretgo wegi, te Mesahapgo bulai wąį nǫųgo wegi dao.
1CH 1:51 Hadat isibo si da, nosali te tobolu bidi hetman dabego te Idom tonaluai dao. Augwaligo te bulu tǫ pedai distrik dabe tonaluai, Timna, me Alva, me Jetet,
1CH 1:52 me Oholibama, me Ela, me Pinon,
1CH 1:53 me Kenas, me Teman, me Mipsar,
1CH 1:54 me Makdiel, me Iram, te bulu dabe te 11 tama bulu dabe tonaluai dao
1CH 2:1 Israelgo ogwa dabe augwaligo nogi dabe e dao, Ruben, me Simeon, me Livai, me Juda, me Isakar, me Sebulun,
1CH 2:2 me Dan, me Josep, me Benjamin, me Naptali, me Gat, me Aser dao.
1CH 2:3 Judago ogwa dabego nogi e tiwai, Er, me Onan, me Sela dao. Te sela bidigo augwa ida te Batsua, te Kenan hani we me deli da. Er, Judago gomunai ogwa, agai dwai kolesaga mu ebaso, te Genuai Bidigo aga ela muai dao.
1CH 2:4 Tama Judago gasa ogwa si me elaluali, Peres me Sera. Augwali sigo ida Tamar da, Judago au we da. Judago ogwa a naga elaluai dao.
1CH 2:5 Peresgo ogwa dabego nogi e tama da, Hesron me Hamul dao.
1CH 2:6 Te Serago ogwa dabe nogi e tama da, Simri, me Etan, me Heman, me Kalkol, me Darda. Serago ogwa a naga elaluai dao.
1CH 2:7 Akan, te Kamrigo ogwa, aga te Serago hani da. Te Israel dabego Godiba sa muai nai dabe agai salio. Te tama tiali hagede Godigo te Israel we bidi genuai sęgę mawai dao.
1CH 2:8 Etango ogwa deli ame nai, te ogwa nogi te Asaria dao.
1CH 2:9 Hesron te Peresgo ogwago te ogwa dabe sela elaluai, augwa nogi e dao, Jeramel, me Ram, me Kalep dao.
1CH 2:10 Ram te Aminadapgo aya, tama Aminadap te Nasongo aya da, te Juda hani dabego polalubo tobolu bidi me deli dao.
1CH 2:11 Tama Nason te Salmongo aya, tama Salmon te Boasgo aya da,
1CH 2:12 tama Boas te Obetgo aya da, tama Obet te Jesigo aya dao.
1CH 2:13 Jesigo ogwa nogo a naga olama, me badu nogo si tama bidali. Gomunai ogwa Eliap, si wali ogwa Aminadap, sela ogwa wali Simea, aga gasa nogi me Sama dao.
1CH 2:14 Te me si me si wali ogwa Netanel, te a naga wali ogwa Radai.
1CH 2:15 Me badu nogo kibisa wali ogwa nogi da Osem, te nogo a naga olama, me badu nogo si wali ogwa da te Devit dao.
1CH 2:16 Tama me Jesigo wegi si elaluali, Seruia me Abigel. Seruiago ogwa sela ame nani, Abisai, me Joap, me Asahel.
1CH 2:17 Tama Abigel te Ismael hani bidi Jetergo selama, tama Abigelgo ogwa deli ame nani, aga nogi Amasa dao.
1CH 2:18 Kalep, te Hesrongo ogwago, te we Asuba sali. Tama Asubago wegi me deli ame nai, aga nogi Jeriot. Tama Jeriotgo ogwa dabe nogi e tiwai, Jeser, me Sobap, me Ardon dao.
1CH 2:19 Te Asuba isibaso, Kalepgo te we Efrata salio. Tama nosali Efratago te ogwa me deli ame nai, aga nogi Hur dao.
1CH 2:20 Tama Hur te Urigo aya, tama Uri te Besalelgo aya dao.
1CH 2:21 Te Hesrongo kibu be bidi sese sela, 60 kibu be elalubadi, aga te bidi Makirgo wegi salio. Te we Gileatgo abe da. Tama te wego te ogwa deli ame nai, aga nogi Segup dao.
1CH 2:22 Segup te Jairgo aya da. Tama Jairgo te tǫ kantri Gileatde elaluali taun dabe te 23 taun te tonaluai dao.
1CH 2:23 Tialima te Gesur me Siria te hani dabego te boi hwįagaselama, te Jairgo taun dabe sobadi te taun Kenat dali te aga pąde elaluali taun dabe me salio. Augwaligo te 60 taun dabe salio. Te badu we bidi dabe augwali te Makirgo bulali wąį nǫų dabe da, te Gileatgo aya dao.
1CH 2:24 Te Hesron te taun Kalep Efrata tede isali sogo, aga we, Abiya, haliga elaluai. Tama nosali Abiyago ogwa ame nobaso, tama aga nogi te Asur poali. Tama Asurgo te taun Tekoa nigilama hodolai dao.
1CH 2:25 Jeramel, te Hesrongo gomunai ogwa da, agai a naga ogwa elaluai. Gomunai ogwa te Ram, te gasa ogwa dabego nogi e tiwai, Buna, me Oren, me Osem, me Ahiya dao.
1CH 2:26 Ramgo ogwa sela elaluai, Mas, me Jamin, me Eker dao. Tialima Jeramelgo gasa we me sali, agai nogi da Atara. Tama Atarago ogwa deli ame nani, aga nogi da Onam dao.
1CH 2:28 Tama Onamgo wai dabe nogi e tiwai, Samai me Jada. Te Samaigo wai dabe nogi da e tama, Nadap, me Abisur, si tama dao.
1CH 2:29 Abisurgo te we Abihail selama, tama Abihailgo te ogwa si ame nani, Aban me Molit si dao.
1CH 2:30 Te Nadapgo ogwa dabe nogi e tama, Selet me Apaim. Selet aga wai meni ebadi aga isai dao.
1CH 2:31 Tialima Apaimgo ogwa deli ame nani, aga nogi Isi dao. Tama Isigo ogwa deli elaluai, aga nogi da Sesan. Te Sesango ogwa deli bidali, aga nogi da Alai dao.
1CH 2:32 Jadago ogwa dabe nogi da e tama da, te Samaigo amago ogwa dabe e tiwai, Jeter me Jonatan. Jeter aga ogwa me ame nisąbadi aga isai dao.
1CH 2:33 Tialima Jonatango ogwa si bidali, Pelet me Sasa. Te hani bidi augwali da te Jeramelgo ogwa hani dabe dao.
1CH 2:34 Sesango ogwa me bidibeo. Agai wegi dabe naga bidali. Tama te Sesango olo sę ebo Isip bidi me deli bidai. Te olo sę iduali bidigo nogi da, te Jara dao.
1CH 2:35 Tama Sesango aga wegi me deli te Jarago somainu ilalio. Tama augwali sigo ogwa deli ame nani, aga nogi da Atai dao.
1CH 2:36 Tama Atai te Natango aya, tama Natan te Sabatgo aya dao.
1CH 2:37 Tama Sabat te Eplalgo aya, tama Eplal te Obetgo aya dao.
1CH 2:38 Tama Obet te Jehugo aya, te Jehu da Asariago aya dao.
1CH 2:39 Tama Asaria te Helesgo aya, te Heles Eleasago aya da.
1CH 2:40 Tama Eleasa te Sismaigo aya, tama Sismai te Salumgo aya dao.
1CH 2:41 Tama Salum aga Jekamiago aya, tama Jekamia te Elisamago aya dao.
1CH 2:42 Kalep aga te Jeramelgo ama, te agai hasia gomunai ogwa, te Mesa dao. Tama Mesa te Sifgo aya da, tama Sif te Maresago aya, tama Maresa te Hebrongo aya dao.
1CH 2:43 Te Hebrongo ogwa dabego nogi e tama dao, Kora, me Tapua, me Rekem, me Sema dao.
1CH 2:44 Sema te Rahamgo aya, tama Raham te Jorkeamgo aya dao. Rekem te Samaigo aya,
1CH 2:45 tama Samai aga te Maongo aya, te Maon te Betsurgo aya dao.
1CH 2:46 Te Kalepgo si wali we hani me deli nogi, te Efa. Te we Efago ogwa dabe nogi e tama dao, Haran, me Mosa, me Gases. Tama Haran te gasa Gasesgo aya dao.
1CH 2:47 Te Jadaigo ogwa dabe nogi e tiwai, Regem, me Jotam, me Gesan, me Pelet, me Efa, me Sap, te tama dao.
1CH 2:48 Te Kalepgo gasa si wali we hani me, te Maka dao. Te Makago ogwa dabe nogi e tiwai, Seber, me Tirhana,
1CH 2:49 me Sap, me Seva da. Sapgo te taun Matmana hodolobo sę yali, tama Sevago te taun Makbena hodolobo sę ebadi te taun Gibea me nigalio. Tama Kalepgo wegi deli bidali, aga nogi Aksa dao.
1CH 2:50 Tama Kalepgo gasa ogwa hani dabe me elaluali, Hur te Kalepgo we Efratago gomunai ogwa dao, tedu te gasa hani pedelali. Te Hurgo ogwa dabe nogi e tiwai, Sobal, me Salma, me Harep. Sobalgo te taun Kiriat Jearim nigali, te Salmago te taun Betlehem nigali, tama Harepgo te taun Betgader nigai dao.
1CH 2:52 Sobal, te Kiriat Jearim taun hodolali bidi da, aga te Haroe hani me Menuhot hani pedai bulali wąį nǫų da,
1CH 2:53 me te Kiriat Jearim hani dabe, te augwali Itra, me Put dabe, me Sumat dabe, me te Misra dabe da. Te Sora taun me Estaol taun te hani we bidi dabe augwaligo taun dao.
1CH 2:54 Salma te Betlehem taun we bidi dabego bulai wąį nǫų da, tama me te taun Netofa, me te bulu Atrot. Betjoap tama te Manahatgo hani pedai dabe, te augwali Sor dabe dao.
1CH 2:55 Tama gasa hani dabe augwali te taun Jabesde bidaluali, tama augwali te polobadu yali sę ripot po ma asębo sę, me te gasa naide po asębo sę page konea pai bidi dabe. Te hani dabe augwa nogi e tama dao, te Tira dabe, me Simea dabe, me Suka dabe, te tama bage bidali. Te hani dabe augwali te Kingo hani dao. Te augwali bulali wąį nǫų da, te Hamat. Hamat aga te Rekap dabego wąį nǫų me dao.
1CH 3:1 Te Devitgo ogwa dabe meba te aga Hebron taunde bidali sogo ame nani. Augwaligo nogi dabe e dao. Gomunai ogwa Amnon da. Aga ida Ahinoam, te Jesril bulu we dao. Te si wali ogwa te nogi Daniel da, aga ida te Abigel, te taun Karmel we dao.
1CH 3:2 Sela wali ogwa Apsalom. Aga ida, te Maka, te Talmaigo wegi da, te Gesur king bidi da. Te ene nanobo me si me si wabo ogwa nogi Adoniya. Aga ida da, te Hagit dao.
1CH 3:3 Te nogo a naga wali ogwa te Sefatia da. Aga ida nogi da, te Abital. Te nogo kibisa wali ogwa te Itream. Aga ida nogi da, te Ekla dao.
1CH 3:4 Devitgo ogwa dabe te 6 tama ogwa dabe aga te Hebronde king bidali sogo ame nani. Te aga Hebronde king bidali kibu be nogo a naga si, me polua a naga me deli tama bidai dao. Tama nosali aga Jerusalemde king bidibadi te kibu be 33 kibu be bidai dao.
1CH 3:5 Tama aga tede bididubadi, agai te ogwa Simea, me Sobap, me Natan, me Solomon ame nani. Te me si me si ogwa dabego augwa ida te Batseba, te Amielgo wegi dao.
1CH 3:6 Tama nosali, Devitgo gasa ogwa a naga olama, me si me si pedelali. Augwali nogi e tama, Iphar, me Elisama, me Elifelet,
1CH 3:7 me Noga, me Nefek, me Jafia,
1CH 3:8 me gasa Elisama, me Eliada, me gasa nogi sabi Elifelet dao.
1CH 3:9 Devitgo te tama ogwa dabe ame nai. Tama agai ogwa meba umabo me elaluali, te agai si wali hani we dabego ame nani. Tama Tamar te Devitgo wegi dao.
1CH 3:10 Solomongo ogwa dabe hani dabego nogi e tiwai elalubao. Solomon te Rehoboamgo aya, te Rehoboam te Abiyago aya, te Abiya Asago aya da. Te Asa Jehosafatgo aya,
1CH 3:11 tama Jehosafat te Jehoramgo aya da, te Jehoram Ahasiago aya da, tama Ahasia te Joasgo aya dao.
1CH 3:12 Tama Joas te Amasiago aya, tama Amasia te Usiago aya da, agai gasa nogi me Asaria. Tama Usia te Jotamgo aya da,
1CH 3:13 tama Jotam te Ahasgo aya, te Ahas Hesekiago aya, tama Hesekia te Manasego aya dao.
1CH 3:14 Tama Manase te Emongo aya, te Emon te Josaiago aya dao.
1CH 3:15 Josaiago ogwa dabe nogi e tiwai. Gomunai ogwa Johanan, tomo ogwa Jehoiakim, te sela wali ogwa Sedekaia, te ene nanobo me si me si wali ogwa Salum da, te aga gasa nogi me Joahas dao.
1CH 3:16 Te Jehoiakimgo ogwa si elaluali, Jekonia me Sedekaia. Jekoniago gasa nogi me Jehoiakin dao.
1CH 3:17 Te Jehoiakin aga te boi bidi dabego selama, te gasa tǫ kantriba kalabus igi pali king da. Te agai ogwa dabego nogi e tama elalubao, Sealtiel,
1CH 3:18 me Malkiram, me Pedaia, me Senasar, me Jekamia, me Hosama, me Nedabia dao.
1CH 3:19 Pedaiago ogwa dabe nogi e tiwai elalubao, Serubabel me Simei. Serubabelgo ogwa si elaluali, Mesulam me Hanania, te wegi me deli elaluali, aga nogi da Selomit dao.
1CH 3:20 Tama Pedaiago gasa ogwa me nogo a naga ogwa dabe bidali. Augwa nogi dabe e tiwai da, Hasuba, me Ohel, me Berekia, me Hasadia, me Jusap Heset.
1CH 3:21 Te Hananiago ogwa dabe nogi e tama, Pelatia, me Jesaia. Te Jesaia aga te Refaiago aya, te Refaia te Arnango aya, te Arnan te Obadiago aya, tama Obadia te Sekaniago aya dao.
1CH 3:22 Sekaniago ogwa deli naga elaluai, aga nogi da Semaia. Te Semaiago ogwa nogo a naga elaluai. Augwa nogi dabe e tama, Hatus, me Igal, me Baria, me Nearia, me Safat dao.
1CH 3:23 Neariago ogwa sela bidali, Elioenai, me Hiskia, me Asrikam da.
1CH 3:24 Elioenaigo ogwa te 7 ogwa dabe bidali, Hodavia, me Eliasip, me Pelaia, me Akup, me Johanan, me Delaia, me Anani, te tama dao.
1CH 4:1 Judago ogwa hani meba nogi e tiwai elalubao, Peres, me Hesron, me Karmi, me Hur, me Sobal dao.
1CH 4:2 Sobal te Reaiago aya da, te Reaia te Jahatgo aya, aga te Ahumai de Lahat sigo aya. Te bidi dabe augwali te Sora taun we bidigo wąį nǫų dao.
1CH 4:3 Hur te gomunai ogwa da, Efrata, Kalepgo wego ame nani. Hurgo te Betlehem taun nigibo sę hodolali. Hurgo ogwa dabe e tiwai elalubao, Jesril, me Isma, me Itbas, me Penuel, me Eser. Jesril ma Isma me Itbas, augwaligo te taun Etam nigibo sę hodolali. Te Hasalelponi te sela bidigo abe da. Penuelgo te taun Gedor hodolobo sę yali, te Esergo te taun Husa nigibo sę hodolai dao.
1CH 4:5 Asur, te Tekoa taun nigali bidi da, agai we si elaluali, Hela me Nara dao.
1CH 4:6 Narago ogwa ene nanobo ogwa me si me si ame nani. Augwali nogi e tiwai elalubao, Ahusam, me Hefer, me Temeni, me Hahastari da.
1CH 4:7 Tama Helago ogwa sela ame nani. Augwali nogi e tiwai, Seret, me Ishar, me Etnan dao.
1CH 4:8 Kos te Anupgo aya me Sobebago aya da. Tama aga te Aharhelgo bulai wąį nǫų deli hani bage mu da, te Harumgo ogwa dao.
1CH 4:9 Bidi me deli bidali, aga nogi da Jabes. Agai kolesaga te wiegi yai mu eyu te aga ama dabego ebo kolesaga aiyaba elaluali. Tama we bidi augwaligo genuai nogi agabolo mawai. Te Jabes aga idago aga ame nani sogo genuai dene ebadi ame nani, tama tibaso agai aga nogi Jabes nogi yali.
1CH 4:10 Me sogo deli Jabesgo te Israelgo Godiba gedu haluasa po te tiwai wali, “God, eno homugo nago ena tǫ hauwa mao. Te eno homugo nage ena dali bidama ena tau sao, te nago ena bugagia tonaluao, te dwai nai dabego enabolo dene maidalio,” wali. Tialima Godigo agai gedu haluasa po wabo odama, tama Jabesgo agaba hanalu wali sę po tiwai sę yai dao.
1CH 4:11 Kelup, te Suhago ama da, aga te Mehirgo aya, tama Mehir te Estongo aya dao.
1CH 4:12 Tama Eston te Betrafa, me Pasea, me Tehina augwali selago aya da. Tehinago te taun Nahas nigibo sę hodolali. Te hani augwali te bulu Reka pedai badu bidai dao.
1CH 4:13 Kenasgo ogwa dabe nogi te tiwai elalubao, Otniel, me Seraia. Tama Otniel te Hatatgo aya dao.
1CH 4:14 Meonotai te Ofrago aya. Seraia aga te Joapgo aya da. Te bulali wąį nǫų Joap te bidali bulu augwa te tiwai nogi yali, “Te Sę Bidi Augwa Odogo Bulu Da,” wai dao. Te odogo bulugo nogi te tama telaluali, magi baso meni, tede bidali bidi dabe augwaligo te haniani nai nigibo sę mu konea pai bidi dabe dao.
1CH 4:15 Kalep, te Jefunego ogwa, agai ogwa sela elaluali. Augwa nogi e tiwai elalubao, Iru, me Ela, me Nam. Te Ela Kenasgo aya da.
1CH 4:16 Te Jehalelgo ogwa dabe nogi e tiwai, Sif, me Sifa, me Tiria me Asarel.
1CH 4:17 Te Esrago ogwa dabe nogi e tiwai elalubao, Jeter, me Meret, me Efer me Jalon. Meretgo we Bitia sali, te Isip king bidigo wegi da. Te augwali sigo wai dabe nogi e tiwai da, Miriam me Samai me Isba. Isbago te Estemoa taun nigibo sę yalio. Tama Meretgo te Juda hanigo we me deli salio. Augwali sigo wai dabe nogi e tiwai da, Jeret me Heber me Jekutiel. Jeretgo te taun Gedor nigibo sę yali, te Hebergo te taun Sogo nigibo sę hodolali, te Jekutielgo te taun Sanoa nigibo sę hodolalio.
1CH 4:19 Hodiago te Nahamgo abe sali. Augwali si te Gerem hanigo wąį nǫų te taun Keilade bidali, me te Maka hani te taun Estemoade bidalio.
1CH 4:20 Te Simongo ogwa dabe nogi e dao, Amnon, me Rina, me Benhanan, me Tilon da. Te bidi Isigo ogwa nogi dabe e tama, Sohet me Bensohet dao.
1CH 4:21 Sela te Judago ogwa me deli da. Selago ogwa dabe meba nogi e tiwai, Er, me Lada, me Jokim, me Joas, me Sarap da, te Koseba taunde me Betasbea te taun side bidali bidi hani dabe da. Te Betasbea hani bidi dabego te wiegi yai nami ugwa dabe nigibo sę yai. Ergo te taun Leka nigibo sę yali, te Ladago te taun Maresa nigibo sę yai. Tama Joas me Sarap sigo te Moap tǫ me Jasubi Lahem tǫ tonalualio. Te bidi dabe augwali te taun Netaim me taun Gederade bidaluai, tama augwaligo te augwali tonaluali king bidigo sę eyu tama te tǫgo sospen nigibo sę agabolo yai. Te augwalide asęai po dage te bidi dabego polobadu mu asęai dao.
1CH 4:24 Te Simeongo ogwa dabe nogi e dao, Nemuel, me Jamin, me Jarip, me Sera, me Saul dao.
1CH 4:25 Saul te Salumgo aya, te Salum Mipsamgo aya, tama Mipsam te Mismago aya da.
1CH 4:26 Te Mismago hani dabe nogi e dao. Misma te Hamuelgo aya, te Hamuel Sakurgo aya, te Sakur Simeigo aya da.
1CH 4:27 Simeigo ogwa te 16 ogwa, te wegi 6 tama elaluai. Tialima aga ama dedego wai hauwa me ame nabeo. Tama tialigo, te Simeongo hani genuai pedalisiąyu te Judago hani tiwai me ebeo.
1CH 4:28 Te Simeon hani dabe te tama taunde bidali, Berseba, me Molada, me Hasarsual,
1CH 4:29 me Bilha, me Esem, me Tolat,
1CH 4:30 me Betuel, me Horma, me Siklak,
1CH 4:31 me Bet Markabot, me Hasarsusim, me Betbir, me Saraim. Te Simeongo hani dabe te taun dabede bidalubadi te king Devit bidali sogoba usu nai dao.
1CH 4:32 Tama me augwali te a naga taunde bidali, Etam, me Ain, me Rimon, me Token, me Asan,
1CH 4:33 tama te taun dabe pąde elalubo dwasianu bulu dabede me bidada pelama, te taun Balatba usu nigi palio. Te taun dabe te Simeongo hanigo taun dabe elaluali. Tama te Simeongo hanigo te augwa wąį nǫų hanidu gagalasa te augwa deli hani tigidali nogi asęai elaluai dao.
1CH 4:34 Te Simeongo tobolu bidi dabego nogi dabe te e dao, Mesobap, me Jamlek, me Josa, te Amasiago ogwa, me Joel, me Elioenai, me Jakoba, me Jesohaia, me Asaia, me Adiel, me Jesimiel, me Benaia, me Jehu, me Sisa da. Jehu te Josibiago ogwa, Josibia te Seraiago ogwa, tama Seraia te Asielgo ogwa da. Tama Sisa te Sifigo wai, te Sifi te Alongo ogwa, te Alon Jedaiago wai, tama Jedaia te Simrigo wai, tama Simri te Semaiago ogwa dao. Te tobolu bidi dabego ame nani ogwago bulali wai dabe hani te umabo genuai mu pedelama,
1CH 4:39 tama augwa te bulmakau me sipsip tuabo wiegi yai nosai gegabo homu yai. Tibaso, augwali te Gedor taun pąba bidigi pali, te giliga pedalubo badu te odogo bulu badu dao.
1CH 4:40 Augwaligo te bulu odogo malu tǫ genuai mu elalu, te wiegi yai nosai elalubo sualio. Te augwali bugagia tegaluama bidiyu, te magi nai me deligo augwaliba sęgę me mabeo. Te Ham hani augwali polobadu tede bidai dao.
1CH 4:41 Te Juda king bidi Hesekia bidali sogo, te Simeon hani tobolu bidi dabego te badu te wiegi yai nosai dabe elalubo suali. Tama tialima, augwali pelama, te Ham dabe dali me Meun dabeba me boi hwįgi palio. Tama augwaligo te hani dabego sel ugwa be dolama, te tigidali we bidi mu ela silai. Te delinu me bidibeo. Tama nosali te Simeon hani augwali te tǫba bidigi palio.
1CH 4:42 Tama te bidi sese hauwa 500 bidi te Simeongo hani hogodama, te Seir bulu du te Idom pedai badu pali. Te augwa polalubo bidi dabe te Isigo ogwa dabe da. Augwa nogi da e tama da, Pelatia, me Nearia, me Refaia, me Usiel dao.
1CH 4:43 Polobadu te Amalek dwasianu hani te Israel dabede wi solama te badu bidigi soai. Tialima te Simeongo hanigo te Amalek hani tigidali ela munama, tama te Simeon hani te tǫba bidigi pali, te bidada pali te buku asęani bidi bidali sogoba usu nai dao.
1CH 5:1 Ruben aga te Jekopgo gomunai ogwa da, Jekop aga gasa nogi Israel. Tialima agai te aga ayago we me deli dali pagela piali. Tama sę yaligo, aga te gomunai ogwa wabo nogi sabeo. Menio. Te aga ama Josepgo ogwa dabego te nogi salio. Tama tialima te Israelgo ogwa dabego nogi elalubo madide, te Ruben polalubo gomunai ogwa nogi elalube dao.
1CH 5:2 Mu tama, Judago genuai nogi aga ama dede tomode elaluali, tiali goli Josepgo nogi ugwanu igulama, te gomunai ogwa nogi tiwai elaluai dao.
1CH 5:3 Rubengo ogwa dabego nogi e tiwai da, te Israelgo hasia ame nani ogwago ogwa dabe te tiwai elalubao, Hanok, me Palu, me Hesron, me Karmi dao.
1CH 5:4 Joelgo hani e tiwai dao. Joel te Semaiago aya, tama Semaia te Gokgo aya, te Gok Simeigo aya da,
1CH 5:5 tama Simei te Maikago aya, tama Maika te Reaiago aya, tama Reaia te Balgo aya da,
1CH 5:6 tama Bal te Berago aya. Te Bera te Ruben hanide tobolu bidi me deli da, tama Tiklat Pileser, te Asiria kingo, aga te kalabus sela pai dao.
1CH 5:7 Te Rubengo bulali deli hani dabe, te polalubo tobolu bidi dabego nogi e tama da. Hasia bidi Jeiel, te gasa si me elalubao, Sekaraia,
1CH 5:8 me Bela da. Bela te Asasgo ogwa, tama Asas te Semago ogwa, te Sema Joelgo ogwa da. Te Belago hani dabe augwali te taun Aroerde bidali, te Aroer not badu tǫde bidada pali, te Nebo taunba usu nama, te Balmeon taun dąį igi pai dao.
1CH 5:9 Augwali te tǫ pedai Gileat badu bidalu, tama augwaligo bulmakau me sipsip hauwa umabo pedelalio. Tibaso, augwali meba pelama, te giliga pedalubo badu te wa pai bulu tǫde bidali, te wa pai bulugo dąį pali te wę Yufretisba usu nigi pai dao.
1CH 5:10 Te Sol king bidali sogo, te Rubengo hanigo te Hagar hani dali boi hwįnama, te augwali ela muai. Tama Ruben hani dabego te Hagar hani dabego tǫ selama, tama augwaligo te bulude augwali bidalio. Te tǫ pedai te giliga pedalubo badu te Gileat tǫ pedai badu elaluai dao.
1CH 5:11 Te Gatgo hani dabe te Basan tǫ pedai te not badu te Ruben hani bidali badu pąde bidali. Te augwaligo tǫ dąį pali te taun Saleka te giliga pedalubo badu usu nigi pai dao.
1CH 5:12 Te Gatgo deli hani bage meba te Basan tǫ pedaide bididubadi te bidi Joel hasia polaluali, tama te Safam si wabo bidi bidali, tama te tobolu bidi si Janai dali Safat dali si bidali.
1CH 5:13 Te Gatgo deli hani te gasa ayago ame nani hani te 7 te tama hani me bidali. Augwa nogi da e tama da, Maikel, Mesulam, me Seba, me Jorai, me Jakan, me Sia, me Eber dao.
1CH 5:14 Te hani augwa bulali wąį nǫų da te Abihail, te Hurigo ogwa da. Tama Huri te Jaroago ogwa, tama Jaroa te Gileatgo ogwa, tama Gileat te Maikelgo ogwa, tama Maikel te Jesisaigo ogwa, te Jesisai te Jadogo ogwa, tama Jado te Busgo ogwa da.
1CH 5:15 Te hani augwaligo polalubo tobolu bidi da te Ahi da, te Apdielgo ogwa te Gunigo wąį nǫų dao.
1CH 5:16 Te a naga olama me si hani augwali te Gileat me Basan tǫ pedai te taun dabede me te pąde dwasianu bulu dabede bidali, tama me augwali te tǫ Saronde bidai, te tigidali bulude te bulmakau me sipsipgo tuabo wiegi yai nosai dabe elalualio.
1CH 5:17 Te Gat hani dabe nogi asęani bidi dabego king Jotam te Juda king bidali sogo me te Jeroboam te Israel king bidali sogo te asęai dao.
1CH 5:18 Te Israel dabe augwali te wę Jordan te giliga pedalubo badu bidali, te Ruben hani me Gat hani me Manase hani me badu bidali, augwaligo ami bidi dabe te bidi sese hauwa umabo mu, te 44,760 bidi dabe bidali. Augwaligo te boi hwįbo sabele tulama, te hwą bainatgo hwįbo mu konea pai bidi dabe da, tama augwa te enesigigo enebo sę me mu konea palio.
1CH 5:19 Augwali pelama, te Hagar, me Jetur, me Nafis, me Nodap hani dabeba boi hwįgi pai dao.
1CH 5:20 Te boi hwįgi pabo sogo te Israel dabe augwaligo Godiba gedu haluasa po weyu hanalu te augwali tau somainu yali. Tama Godigo augwali tau mu selama, tama augwaligo te boi bidi dabe aiyaba elaluali. Te Israel dabego homu kolesaga bomo elama, te Godigo augwali tau somainu ebaso, tialima agai augwali tau salio.
1CH 5:21 Te Israel dabe augwaligo te boi bidi dabego hasa sibi dabe salio. Augwaligo te bidi sese hauwa umabo 50,000 kamel sobadi, te 250,000 sipsip sobadi, te 2,000 donki me salio. Tama me augwaligo te boi we bidi dabe bidi sese hauwa mu 100,000 boi bidi dabe sali.
1CH 5:22 Tiali goli te augwali boi hwįani sogo te boi bidi hauwa isali, magi baso meni, God aga digi te hwįbo tonalualigo te tama tialio. Tama nosali te Israel dabego te boi bidi dabego tǫ augwa selama bidali. Tama augwali te tǫde bidada pidubadi, te gasa boi bidi dabego te Israel dabe gasa tǫ kantriba kalabus sela pali sogoba usu nai dao.
1CH 5:23 Manasego hani me badu genuai mu bidali. Augwali tǫ pedai distrik Basan badu bidali, tama augwali bidali bulu tǫ dąį te not badu te taun Balhermon buluba usu nama pali, te bulu du Senirba me Hermon bulu du dąį igi pai elaluai dao.
1CH 5:24 Te augwali hanide tobolu bidi bidali bidi dabego nogi da e dao, Efer, Isi, Eliel, Asriel, Jeremaia, Hodavia, me Jadiel dao. Te tobolu bidi dabe te wiegi yai ami dabe te genuai nogi elalualio.
1CH 5:25 Ruben, me Gat, me Manase te hani sela augwaligo te augwa wąį nǫųgo Godigo po sela sąnama, augwa dwai sę yali. Tama augwaligo te bulude polobadu bidali bidi hanigo tibo godiba lotu po walio. Te Israel augwali te tǫba sabolali sogo, Godigo te tǫde bidali gasa hani bage sela sąwani. Tialima megi da, te Israel dabego God tagalali, te wego aga bidi tagalama subigila bidi hauwa dali penani sę ela bilibo tiwai yalio.
1CH 5:26 Tama tialima, Israelgo Godigo te Asiria king bidi Pul homu hodolali, te aga gasa nogi me Tiklat Pileser wali. Tama te Asiria dabego te Israel dabeba boi hwįagaselama, te augwali aiyaba elalualio. Tama te Asiria dabego augwali selama, te Hala tǫba kalabus mugi pali, te Habor tǫba me, te wę Gosan pąde te Hara bulu du pesageba pali. Tama augwali tede bidalubadi, te e buku asęani bidi bidali sogoba usu nai dao.
1CH 6:1 Te Livaigo ogwa dabe nogi te tama da, Gerson, me Kohat, me Merari dao.
1CH 6:2 Kohatgo ogwa nogi dabe e tiwai da, Amram, Ishar, me Hebron, me Usiel da.
1CH 6:3 Amramgo ogwa dabe nogi da e tama, Aron me Moses, me te wegi nogi Miriam. Te Arongo ogwa dabe nogi da e tama Nadap, me Abihu, me Eleasar, me Itamar dao.
1CH 6:4 Eleasar te Finiasgo aya, te Finias Abisuago aya,
1CH 6:5 me Abisua te Bukigo aya, Buki te Usigo aya,
1CH 6:6 tama Usi te Serahiago aya, tama Serahia te Meraiotgo aya,
1CH 6:7 tama Meraiot te Amariago aya, tama Amaria te Ahitupgo aya da,
1CH 6:8 tama Ahitup te Sadokgo aya, tama Sadok te Ahimasgo aya,
1CH 6:9 tama Ahimas te Asariago aya, tama Asaria te Johanango aya,
1CH 6:10 aga te gasa Asaria mego aya da. Te king Solomongo Godigo tempel be te Jerusalemde sę yani sogo te bidi Asaria aga te hetpris bidai dao.
1CH 6:11 Tama te Asaria te Amariago aya, tama Amaria te Ahitupgo aya,
1CH 6:12 Ahitup te Sadokgo aya, te Sadok Salumgo aya,
1CH 6:13 te Salum te Hilkiago aya, tama Hilkia te Asariago aya,
1CH 6:14 tama Asaria te Seraiago aya, tama Seraia te Jehosadakgo aya dao.
1CH 6:15 Te Genuai Bidigo king Nebukatnesar homu hodolali sogo, te Babilon dabe asama, te Juda dabe me Jerusalem dali selama, kalabus igi pali, te sogo augwaligo te bidi Jehosadak me kalabus sela pai dao.
1CH 6:16 Te Livaigo ogwa dabe nogi da e tama da, Gerson, Kohat, Merari da.
1CH 6:17 Te Gersongo ogwa dabe nogi da e tama da, Lipni me Simei da.
1CH 6:18 Kohatgo ogwa dabe nogi e tama da, Amram, me Ishar, me Hebron, me Usiel da.
1CH 6:19 Merarigo ogwa dabe nogi da e da, Mali me Musi. Te hani sibi bidi dabe augwali te Livaigo deli hani bage dao.
1CH 6:20 Te Gersongo hani dabego nogi dabe da e tama da. Gerson te Lipnigo aya, Lipni te Jahatgo aya, Jahat te Simago aya,
1CH 6:21 Sima te Joago aya, Joa te Idogo aya da, Ido te Serago aya, Sera te Jeateraigo aya dao.
1CH 6:22 Kohatgo hani e tama da. Kohat te Aminadapgo aya, Aminadap te Korago aya, te Kora Asirgo aya,
1CH 6:23 te Asir Elkanago aya, te Elkana Ebiasapgo aya, tama Ebiasap te gasa Asirgo aya,
1CH 6:24 tama Asir te Tahatgo aya, Tahat te Urielgo aya da, Uriel te Usiago aya, tama Usia te Saulgo aya dao.
1CH 6:25 Elkanago ogwa dabe nogi e tama da, Amasai, me Ahimot,
1CH 6:26 me Elkana. Te Elkanago hani da e tama, Elkana te Sofaigo aya, te Sofai te Nahatgo aya,
1CH 6:27 te Nahat te Eliapgo aya, tama Eliap te Jerohamgo aya, tama Jeroham te Elkanago aya dao.
1CH 6:28 Samuelgo ogwa dabe nogi e tiwai elalubao, Joel te gomunai ogwa, te tomo ogwa Abiya dao.
1CH 6:29 Merarigo hani da e tama elalubao. Merari te Maligo aya, Mali te Lipnigo aya, Lipni te Simeigo aya, tama Simei te Usago aya,
1CH 6:30 tama Usa te Simeago aya, tama Simea te Hagiago aya, tama Hagia te Asaiago aya dao.
1CH 6:31 Te ede nogi elalubo bidi dabe te king Devitgo te Genuai Bidigo bede wiegi yai po wabo nai musik elabo bidi dabe sa muai dao. Te Dąų Wali Bomo Yai Po Muani Halobage te Genuai Bidigo sel ugwa beba muagaselama nosali badu Devitgo te hani dąį ilai dao.
1CH 6:32 Te lotu wabo sogo te hani dabego te sisinibo pesage te Genuai Bidigo ugwa be sunumi mabo pąde te wiegi yai musik wabo sę yai. Augwaligo te sę Genuai Bidigo sel ugwa bede ela pidubadi, te king Solomongo te Genuai Bidigo gesi tempel be Jerusalemde sę yani silibo sogoba mu usu nai. Te hani augwaligo te augwa ebo sęde te bomai po bugagia wali pabo sę ela piduai dao.
1CH 6:33 Devitgo te musik wabo sę tonalubo bidi sela dąį ilali. Tama nosali augwa wai dabego me te tobage deli sę naga yalio. Te hasia polalubo bidi te Kohatgo hani, tama aga nogi da te Heman. Agai te tęąbi po wabo mu koneani. Heman te Joelgo ogwa, tama Joel te Samuelgo ogwa, tama
1CH 6:34 Samuel te Elkanago ogwa, tama Elkana te Jerohamgo ogwa, tama Jeroham te Elielgo ogwa, te Eliel te Toago ogwa da,
1CH 6:35 tama Toa te Sufgo ogwa, Suf te Elkanago ogwa, tama Elkana te Mahatgo ogwa, Mahat te Amasaigo ogwa da,
1CH 6:36 tama Amasai te Elkanago ogwa, te Elkana Joelgo ogwa, te Joel Asariago ogwa, tama Asaria te Sefanaiago ogwa,
1CH 6:37 tama Sefanaia te Tahatgo ogwa, te Tahat Asirgo ogwa, te Asir Ebiasapgo ogwa, tama Ebiasap te Korago ogwa da,
1CH 6:38 tama Kora te Ishargo ogwa, te Ishar Kohatgo ogwa, tama Kohat te Livaigo ogwa da, tama Livai te Israelgo ogwa dao.
1CH 6:39 Te Devitgo dąį ilali si wali bidi me nogi, te Asap. Asap te aga ama te Heman dali deli sę ebo bidi da. Tama te musik tęąbi wabo sogo Asap te aga hani dali te Hemango hanigo dolo nogo badu dolaluali. Asap te Berekiago ogwa, te Berekia Simeago ogwa da,
1CH 6:40 tama Simea te Maikelgo ogwa, tama Maikel te Baseago ogwa da, tama Basea te Malkiago ogwa da,
1CH 6:41 tama Malkia te Etnigo ogwa, te Etni te Serago ogwa, tama Sera te Adaiago ogwa da,
1CH 6:42 tama Adaia te Etango ogwa, tama Etan te Simago ogwa, te Sima Simeigo ogwa da,
1CH 6:43 tama Simei te Jahatgo ogwa, tama Jahat te Gersongo ogwa, tama Gerson te Livaigo ogwa dao.
1CH 6:44 Devitgo dąį ilali sela wali bidi me nogi te Etan, agai te Merari hani tonaluali. Te musik tęąbi wabo sogo te Merarigo hani bage te Heman hani pobase nogo badu dolaluali. Etan te Kisigo ogwa, tama Kisi te Apdigo ogwa, tama Apdi te Malukgo ogwa dao,
1CH 6:45 tama Maluk te Hasabiago ogwa, tama Hasabia te Amasiago ogwa, te Amasia te Hilkiago ogwa,
1CH 6:46 tama Hilkia te Amsigo ogwa, te Amsi te Banigo ogwa da, tama Bani te Semergo ogwa,
1CH 6:47 Semer te Maligo ogwa, Mali te Musigo ogwa, Musi te Merarigo ogwa, tama Merari te Livaigo ogwa dao.
1CH 6:48 Te Godigo ugwa be tomode meba gasa sę tigidali yabo, te genuai bidi dabego te Livaigo gasa haniba dąį ilalio.
1CH 6:49 Te Aron me aga ogomani dabe dali augwaligo te isiba tigidali ulama dela silibo ofa te altade ebo sę elaluali, tama te gasa altade me te wiegi yai denami ilibo hano holobo ofa ebo sę ilali. Tama augwaligo te tigidali Tedali Gasagi Yai Mu Be Habude sę me yali. Tama augwaligo te Israel dabego sęgę sela sąbo ofa me yalio. Tama augwaligo te tigidali sę ebo sogo augwaligo tigidali po te Moses, Godigo sę bidigo, te Aronba mani po tigidali mu wali pabo sę yalio.
1CH 6:50 Arongo hani e tama dao. Aron te Eleasargo aya, Eleasar te Finiasgo aya, tama Finias te Abisuago aya,
1CH 6:51 tama Abisua te Bukigo aya, te Buki Usigo aya, tama Usi te Serahiago aya,
1CH 6:52 Serahia te Meraiotgo aya, tama Meraiot te Amariago aya da, te Amaria Ahitupgo aya,
1CH 6:53 tama Ahitup te Sadokgo aya, tama Sadok te Ahimasgo aya dao.
1CH 6:54 Te ede da te Israel dabego Arongo hani dabeba dąį ilama mani taun nogi dabe asęani elalubao. Aron te Kohat hani bidi da. Te Israel dabego te Livai haniba te taun dabe dobawainogo yali sogo, augwaligo te satu gagali bolo elama, te mena hanigo mu hasia te taun sabo ola momainu yalio. Tialima satugo te Arongo hani dabego te taun sabo dąį ilama dolo ponanio.
1CH 6:55 Tama tibaso, te Israel dabego te Juda hanigo tǫde elaluali taun Hebron te Arongo haniba mawai. Tama augwaligo te taun pąde elaluali tǫ me tigidali manio. Te tǫde te bulmakau me sipsip dabego tuabo wiegi yai nosai elaluai.
1CH 6:56 Tialima te gi dabe me te dwasianu bulu te Hebron pąde elaluali, te Israel dabego te Arongo hani dabeba mabeo, magi baso meni, augwaligo te Kalepba mawai, te Jefunego ogwa dao.
1CH 6:57 Te Israel augwaligo te taun Hebron me taun Jatir te hanu si te Arongo hani dabeba mawai. Hebron taun te Israel dabego te gasa bidi ela muani bidi wi pelama geme duala sigi pabo taun da olama dąį ilali. Tama augwaligo te gasa taun dabe me te Aron hani dabeba mawai. Te taun nogi dabe e tama da, Lipna, me Estemoa,
1CH 6:58 me Hilen, me Debir da,
1CH 6:59 me Asan, me Betsemes. Tama augwaligo te taun pąde elaluali tǫ meba me mawai. Te tǫde te wiegi yai nosai te bulmakau dabe me sipsip dabego tuabo nosai elaluai dao.
1CH 6:60 Tama te Israel dabego te Benjamin hanigo tǫde elaluali taun meba mawai. Te taun dabego nogi e tama da, Geba, me Alemet, me Anatot. Tama augwaligo te wiegi yai nosai elalubo tǫ dali mawai. Augwaligo te 13 te tama taun tigidali te Arongo hani dabeba mawai dao.
1CH 6:61 Te Israel dabe augwaligo satu gagali ma elama, te gasa hani te Kohat hani dabe taun nogo si dąį ma ilali. Te taun dabe te Manase hani pedaigo tǫde te giliga dega sabo badu elaluali.
1CH 6:62 Tama augwaligo te nogo si olama sela taun dabe te Gersongo haniba dąį ilama mawai. Te taun dabe te Isakar, me Aser, me Naptali, me te Manase hani pedai te Basan tǫde bidali, te hani me si me sigo taun dabe manio.
1CH 6:63 Tama augwaligo te 12 taun dabe te Merarigo hani dabeba dąį ilala peyu mawai. Te taun dabe te Ruben, me Gat, me Sebulun, te augwali hanigo tǫde elaluai dao.
1CH 6:64 Te tama tiali kolesagade augwaligo te taun dabe dali te wiegi yai nosai elalubo tǫ dali te Livai dabeba mawai dao.
1CH 6:65 Te taun dabe meba te Juda, me Simeon, me Benjamin, te augwali hanigo tǫde elaluali. Te hanu dabe nogi nago suali dao. Augwaligo satu gagali elama te taun dąį ilai dao.
1CH 6:66 Te Kohat hani dabe meba augwaligo sali taun dabe meba te Efraim hani augwaligo tǫde elaluai dao.
1CH 6:67 Sekem te elaluali taun dabede te taun me deli da, tama te Efraimgo bulu du badu elaluai. Te taun Sekem te Israel dabego dąį ilali te bidi elali wi pabo bidi te taunba geme duala sigibu yali taun me deli da. Te gasa taun dabe nogi e tiwai elalubao, Geser,
1CH 6:68 me Jokmeam, me Bethoron,
1CH 6:69 me Aijalon, me Gatrimon da. Te Israel dabego te taun dabe te Kohat haniba mani sogo, augwaligo te wiegi yai nosai elalubo tǫ dali te augwaliba mawai.
1CH 6:70 Te Kohat hanigo taun meba te Manasego hani pedaigo tǫ badu elalualio. Te taun nogi e tama da, Aner me Bileam. Te Israel dabego te taun dabe te Kohat haniba mani sogo, augwaligo te wiegi yai nosai elalubo tǫ dali manio.
1CH 6:71 Te Israel dabego te Gerson haniba mani taun dabe meba, te Manase hani pedaigo tǫde elaluai. Te taun dabe nogi e tama da, te Basan tǫ pedai distrikde, te taun Golan me taun Astarot si elaluali.
1CH 6:72 Tama te taun meba te Isakargo hani dabego tǫde elaluali. Te taun nogi e tama, Kedes, me Daberat,
1CH 6:73 me Ramot, me Anem dao.
1CH 6:74 Te taun meba te Aser hanigo tǫde elaluai. Augwa nogi e tiwai da, Masal, me Apdon,
1CH 6:75 me Hukok, me Rehop dao.
1CH 6:76 Te taun dabe meba te Naptali hanigo tǫde elaluai. Augwa nogi da e tama da, taun Kedes te tǫ pedai distrik Galilide elalu, me taun te Hamon, me taun te Kiriataim da. Tama Israel dabego te taun dabe te Gerson haniba mani sogo, augwaligo te wiegi yai nosai elalubo tǫ dali manio.
1CH 6:77 Te Israel dabego te taun dabe meba te Merarigo haniba mani, te gasa Livai hani me da. Te taun dabe te Ruben hani me Gat hani me Sebulun hani te augwaligo tǫde elaluali. Te Sebulun hanigo tǫde elaluali taun dabe nogi e tama da, Rimon me Tabor da.
1CH 6:78 Te Ruben hanigo tǫde elaluali taun dabe nogi e tama da, Beser te tǫ wa pai bulude elaluali, me Jasa, me Kedemot, me Mefat da. Te Ruben hanigo tǫ da, te giliga asobo badu te wę Jordan te Jeriko taun pąde dao.
1CH 6:80 Te Gat hanigo tǫde elaluali taun dabe nogi e tiwai da, Ramot te Gileat tǫ pedai distrikde elaluali, me Mahanaim,
1CH 6:81 me Hesbon, me Jaser da. Te Israel dabego te taun dabe te Merari haniba mani sogo, augwaligo te wiegi yai nosai elalubo tǫ dali mawai dao.
1CH 7:1 Te Isakargo ogwa me si me si bidali. Augwali nogi e tama da, Tola, me Pua, me Jasup, me Simron da.
1CH 7:2 Te Tolago ogwa dabe nogi da e tama da, Usi, me Refaia, me Jeriel, me Jamai, me Ipsam, me Samuel. Te bidi dabe augwali te Tolago hani dabe te tobolu bidi dabe, tama augwali te bomai ami bidi dabe da. Tama Devit te king bidali sogo, te Tola hanigo bidi 22,600 bidi dabe bidali te ami bidi pedelabo usu yai dao.
1CH 7:3 Usigo ogwa deli digi mu tama bidali, aga nogi Israhia da. Te Israhiago ogwa me si me si bidali. Augwa nogi e tama da, Maikel, me Obadia, me Joel, me Isia. Tigidali te augwa hanide polalubo tobolu bidi bidai dao.
1CH 7:4 Te hani augwaligo we me wai hauwa elaluai. Tama augwali hani te genuai pedelali, tama te hani dabe nogi asęani sogo, augwaligo nedali te 36,000 bidi te ami bidi pedelabo usu yalio.
1CH 7:5 Isakargo hani we bidi dabe tigidali nogi dodolali sę yali sogo, augwaligo nedali namba e tama 87,000 bidi te ami bidi nigabo te usu yalio.
1CH 7:6 Benjamingo ogwa sela elaluai, Bela, me Beker, me Jediael dao.
1CH 7:7 Belago ogwa nogo a naga ogwa bidali. Augwali nogi e tama da, Esbon, me Usi, me Usiel, me Jerimot, me Iri da. Tigidali te augwa hanide tobolu bidi bidali, te augwali bomai ami bidi dabe da. Tama te hani dabego nogi dodolali sogo, augwaligo nedali te 22,034 bidi te ami bidi pedelabo usu elaluai dao.
1CH 7:8 Bekergo ogwa dabe nogi e tama da, Semira, me Joas, Elieser, Elioenai, Omri, Jeremot, Abiya, me Anatot, me Alemet da. Te tigidali bidi te Bekergo ogwa dabe, tama tigidali te augwa hani dabede polalubo tobolu bidi dabe bidali, tama augwali te bomai ami bidi dabe bidai dao.
1CH 7:9 Tama augwaligo te hani dabe nogi dodolobo sogo da, augwaligo nedali 20,200 bidi te ami pedelabo usu yai elalualio.
1CH 7:10 Jediaelgo ogwa deli digi tama bidali, aga nogi da Bilhan. Tama Bilhango ogwa dabe nogi e tama da, Jeus, Benjamin, Ehut, Kenana, me Sitan, Tarsis, me Ahisahar dao.
1CH 7:11 Te tigidali bidi augwali te Jediaelgo hani dabe te augwali tigidali te augwa hanide polalubo tobolu bidi bidali, te augwali bomai ami bidi dabe naga nigilama bidali. Tama augwaligo te hani dabego nogi deliba sisinama nedali sogo, augwaligo suali, te 17,200 bidi te ami bidi pedelabo usu elaluali.
1CH 7:12 Irgo ogwa dabe nogi e tama da, Supim me Hupim, tama augwali sigo hani si nosali pedelali. Tama Husim te Ahergo ogwa dao.
1CH 7:13 Te Naptaligo ogwa dabe nogi e tama da, Jasiel, Guni, Jeser, me Salum da. Te wai dabe augwa auwa mosi te Bilha da, te Jekopgo si wagi soayu sali we dao.
1CH 7:14 Te Manasego ogwa dabe nogi da, Asriel me Makir da. Augwa ida, te Manasego si wali we da, aga te Aram hani we me deli da. Te Makir te Gileatgo aya dao.
1CH 7:15 Makirgo te Hupimba maiabo we me deli gegali, te gasa we me Supimbolo mawainogo me yalio. Makirgo abe te Maka. Te Makirgo tomo ogwa, te Selofahat. Te Selofehatgo te wegi dabe naga elalualio.
1CH 7:16 Te gasa Maka, te Makirgo wego, te ogwa si ma ame nani. Makago te me deligo nogi e tiwai poali, Peres, te gasa ogwa me nogi Seres. Seresgo ogwa si ame nai, Ulam me Rakem dao.
1CH 7:17 Ulamgo ogwa dedeli ame nai, aga nogi Bedan. Te nogi tama nogi yali we bidi, augwali te Gileatgo hani dabe da, Gileat te Makirgo ogwa, te Makir Manasego ogwa dao.
1CH 7:18 Hamoleket, te Gileatgo abe da, agai te ogwa Ishot, me Abieser, me Mala, te ogwa sela ame nai dao.
1CH 7:19 Semidago ogwa nogi e tama da, Ahian, Sekem, me Likhi, me Aniam da.
1CH 7:20 Te Efraimgo hani e tama da. Efraim te Sutelago aya, Sutela te Beretgo aya, te Beret Tahatgo aya da, te Tahat Eleadago aya,
1CH 7:21 Eleada te gasa Tahatgo aya, tama Tahat te Sabatgo aya da, tama Sabat te gasa Sutelago aya. Efraimgo gasa ogwa si me bidali, te Eser me Eleat. Tiali goli te Get dabego augwali si ela muai, te augwali si Get taunba pelama, te Get dabego bulmakau wi sigi painu ebadi te Get dabego augwali si ela muai dao.
1CH 7:22 Tama Efraim, augwa si aya, te augwalide homu dene ebo gela hauwa sogo wali, te aga ama dede asama, te aga dali homu dene eyu bidagaselama te aga homu bedegau ilibo sę yalio.
1CH 7:23 Tama nosali Efraim aga we dali sigo te gasa ogwa ame nani. Tama Efraimgo te ogwa nogi Beria poali, magi baso meni, te aga ogwa dabeba dwai sogo pedelai dao.
1CH 7:24 Te Efraimgo wegi te Sera. Aga dali te aga hani dabe dali te taun Bethoron Ugwadu nigibadi, te taun Bethoron Aiyadu me Usensera taun nigibadi yali.
1CH 7:25 Tama Efraim te Refago aya, tama Refa te Resepgo aya, te Resep aga te Telago aya, te Tela te Tahango aya,
1CH 7:26 tama Tahan te Ladango aya, te Ladan te Amihutgo aya, te Amihut te Elisamago aya da,
1CH 7:27 tama Elisama te Nungo aya, tama Nun te Josuago aya dao.
1CH 7:28 Te Efraim hani augwaligo taun me tǫ te tama da, taun Betel me te pąde elaluali bulu dabe me, tama me te tigidali tǫ te Naran taunde gagalasa te giliga asoboba usu nama pali, te giliga dega sabo badu te taun Geserba usu nai, te Geser pąde elaluali bulu dabe me da. Te Sekem taun me te pąde elaluali bulu dabe me, te taun Aia me te pąde elaluali bulu dabe te Efraim hani dabego dao.
1CH 7:29 Tama te Manasego hani dabego te taun Betsan, me Tanak, me Megido, me Dor, te tama taun me te pąde elaluali bulu dabe te Manasego hani dabego tonaluali. Te Josepgo bulali wąį nǫų dabe, te Israelgo ogwa, augwali te taun dabede bidalio.
1CH 7:30 Te Asergo ogwa dabe nogi e tama da, Imna, Isva, Isvi, me Beria. Te Asergo wegi te Sera da.
1CH 7:31 Beriago ogwa dabe nogi da e tama da, Heber me Malkiel. Tama te Malkiel te Birsaitgo aya da.
1CH 7:32 Heber te Japlet, me Somer, me Hotam te augwali selago aya da. Tama Hebergo wegi da, te Sua dao.
1CH 7:33 Japletgo ogwa dabe nogi da, Pasak, me Bimhal, me Asvat dao.
1CH 7:34 Somer, te Japletgo amago ogwa dabe nogi e tama da, Roga, me Jehuba, me Aram dao.
1CH 7:35 Helem te Somer amago ogwa dabe nogi da, e tama da, Sofa, me Imna, me Seles, me Amal da.
1CH 7:36 Te Sofago ogwa dabe nogi da, Sua, me Harnefer, me Sual, me Beri, me Imra da,
1CH 7:37 me Beser, me Hot, me Sama, me Silsa, me Itram, me Bera dao.
1CH 7:38 Te Jetergo ogwa dabe nogi da, Jefune, me Pispa, me Ara da.
1CH 7:39 Te Ulago ogwa dabe nogi da e tama da, Ara, me Haniel, me Risia da.
1CH 7:40 Te bidi dabe te Asergo hani ogomani tama augwali te augwa hani dabede tobolu bidi bidalio. Te polaluali genuai bidi dabe augwali wiegi yai bidi mu tama te bomai ami dabe da. Te Aser hani dabe nogi te bidi dabe augwaligo sisinani sogo, te augwali nedali namba 26,000 bidi te ami bidi pedalobo usu yaibao te homu yai dao.
1CH 8:1 Benjamingo ogwa dabe nogi da. Te gomunai ogwa Bela, tomo ogwa Asbel, sela ogwa Ahara,
1CH 8:2 te ene nanobo me si me si wali ogwa Noha, te a naga ogwa te Rafa dao.
1CH 8:3 Belago ogwa dabe nogi e tama da, Adar, me Gera, me Abihut da,
1CH 8:4 me Abisua, me Naman, me Ahoa,
1CH 8:5 me Gera, me Sefufam, me Huram da.
1CH 8:6 Te Ehutgo ogwa dabe nogi da, Naman, me Ahiya, me Gera. Augwali te taun Gebade bidali we bidi hani dabego polalubo tobolu bidi dabe bidali. Tialima Gerago te aga ama dede sela sąbaso, augwali pelama, te taun Manahatba bidigi palio. Gera te Usa me Ahihut sigo aya da.
1CH 8:8 Saharaim te tǫ kantri Moapde bidiyu, te aga we si sela sąwani, Husim me Bara. Tama nosali Hodes, agai gasa we mego, te wai ogwa dabe ame nai. Augwa nogi e tama da, Jobap, me Sibia, me Mesa, me Malkam,
1CH 8:10 me Jeus, me Sakia, me Mirma da. Te ogwa dabe augwali te augwa hanide te tobolu bidi pedelama bidai.
1CH 8:11 Tama me te Saharaimgo gasa ogwa si elaluali, te we Husimgo ame nai, te Abitup me Elpal dao.
1CH 8:12 Elpalgo ogwa dabe nogi da, Eber, me Misam, me Semet da. Semet te aga hani dali augwaligo te taun Ono me taun Lot te pąde elaluali bulu dabe me nigai dao.
1CH 8:13 Te Elpalgo gasa ogwa si te Beria me Sema augwali sigo hani bidi dabe augwali te taun Aijalonde bidalio. Augwali si te hanide tobolu bidi bidali, tama augwaligo te taun Getde bidali hani we bidi dabe augwali sela sąwai dao.
1CH 8:14 Beriago ogwa dabe nogi e tama da, Ahio, me Sasak, me Jeremot, me Sebadaia, me Arat, me Eder, me Maikel, me Ispa, me Joha dao.
1CH 8:17 Te Elpalgo ogwa dabe nogi da e tama, Sebadaia, me Mesulam, me Hiski, me Heber, me Ismerai, me Isilia, me Jobap dao.
1CH 8:19 Simeigo ogwa dabe nogi e tama da, Jakim, me Sikri, me Sapdi, me Elienai, me Siletai, me Eliel, me Adaia, me Beraia, me Simrat da.
1CH 8:22 Sasakgo ogwa dabe nogi da e tama, Ispan, me Eber, me Eliel, me Apdon, me Sikri, me Hanan, me Hanania, me Elam, me Antotiya. me Ipdea, me Penuel dao.
1CH 8:26 Te Jerohamgo ogwa dabe nogi da e tama da, Samserai, me Seharia, me Atalia, me Jaresia, me Elaija, me Sikri dao.
1CH 8:28 Te bidi dabe te augwa hanide polalubo tobolu bidi bidiyu, te genuai bidi pedelama bidai. Augwali te Jerusalemde bidalio.
1CH 8:29 Te Gibeon taun nigibo sę hodolali bidi te taun Gibeonde aga we dali bidali, aga we nogi Maka dao.
1CH 8:30 Agai gomunai ogwa te Apdon. Te agai gasa ogwa dabe nogi e tiwai da, Sur, me Kis, me Bal, me Nadap,
1CH 8:31 me Gedor, me Ahio, me Seker da,
1CH 8:32 me Miklot. Miklot te Simeago aya da. Te hani dabe te Benjamingo gasa hani me badu te Jerusalemde bidibo te hani pąde bidalio.
1CH 8:33 Te bidi Ner te Kisgo aya, tama Kis te Solgo aya da. Solgo ogwa dabe nogi e da, Jonatan, me Malkisua, me Abinadap, me Esbal, aga gasa nogi me da Isboset dao.
1CH 8:34 Jonatan te Meribalgo aya, aga gasa nogi me da Mefiboset. Tama Meribal te Maikago aya dao.
1CH 8:35 Maikago ogwa dabe nogi e tiwai da, Piton, me Melek, me Tarea, me Ahas da.
1CH 8:36 Ahas te Jehoadago aya. Tama Jehoadago ogwa dabe nogi da, Alemet, me Asmavet, me Simri da. Simri te Mosago aya,
1CH 8:37 tama Mosa te Bineago aya, tama Binea te Rafago aya, te Rafa te Eleasago aya, tama Eleasa te Aselgo aya dao.
1CH 8:38 Asergo ogwa te 6 wagi solama ogwa bidali. Augwa nogi da e tama, Asrikam, me Bokeru, me Ismael, me Searia, me Obadia, me Hanan da.
1CH 8:39 Te Aselgo ama Esekgo ogwa dabe nogi e tama da, gomunai ogwa te Ulam, tomo ogwa te Jeus, te tudi badu ogwa te Elifelet dao.
1CH 8:40 Te bidi Ulamgo ogwa dabe te bomai ami bidi elalu, te augwaligo te enesigigo enebo sę mu koneai da. Augwaligo wai dabe hauwa elalu, te bulali wąį nǫų wai me hauwa elaluali, te bidi 150 usu elaluai. Te nogi elalubo bidi tigidali te Benjamingo hani dao.
1CH 9:1 Augwaligo te Israel hani dabe tigidali nogi sisinani. Tama te nogi sisinama asęani buku nogi augwaligo e tama nogi ebo da, Te Israel Dabego King Dabego Po Buku wabo dao. Te Israel dabe kalabus igi pali bulu tagalama ma asali (Dąi 9:1-34) Te Israel augwali te tǫ kantri Judade bidalu, te God tudiba muani, tama tibaso agai te Babilon dabego te augwali sagaselama, te tǫ kantri Babilonba kalabus sela pomainogo ilalio.
1CH 9:2 Tama nosali te Israel hani dabe meba te kalabus igi pali bulu tagalama, te augwa page bulu, te augwa tǫba me augwa taunba bidagasalio. Te tomode te hasia polasa ma asali hani dabe e tama da, te pris hani dabe me Livai hani dabe badi, te augwa bulali wąį nǫų hani wai dabe te Godigo be tomode sę yali hani bage badi, te gasa we bidi dabe augwali me te polasa ma asai dao.
1CH 9:3 Israel meba te Juda hani me, Benjamin hani me, Efraim hani me, Manase hani me, te augwali hani dabe te Jerusalemba bidagasalio.
1CH 9:4 Te Juda hani we bidi te 690 te Jerusalemba bidagasali. Augwa tobolu bidi me deli te Utai. Utai te Amihutgo ogwa, aga te Omrigo ogwa, te Omri te Imrigo ogwa, tama Imri te Banigo ogwa da. Te bidi hani dabe augwali te Peresgo hani bidi dabe, te Judago ogwa da. Te gasa tobolu bidi me Asaia. Te aga ayago gomunai ogwa te aga te Sela hanide tobolu bidi bidali, te Judago ogwa da. Te gasa tobolu bidi me Juel. Aga te Serago hanide tobolu bidi bidai, te Judago ogwa dao.
1CH 9:7 Te Benjamingo hanide tobolu bidi me deli nogi Salu, te Mesulamgo ogwa. Mesulam te Hodaviago ogwa da, tama Hodavia te Hasenuago ogwa dao.
1CH 9:8 Benjamingo gasa tobolu bidi dabego nogi da e tiwai, Ipnea, te Jerohamgo ogwa, te Ela, te Usigo ogwa, te bulali wąį nǫų Mikri da, tama Mesulam, te Sefatiago ogwa da. Sefatia te Ruelgo ogwa, Ruel te Ipniyago ogwa dao.
1CH 9:9 Te bidi dabe augwali te Benjamin hanigo te tobolu bidi hani dabe Te hani dabe augwali hani we bidi namba te 956 elaluai dao.
1CH 9:10 Te pris meba te pris hani mebade tobolu bidi bidali. Augwali nogi e tama da, Jedaia, me Jehoiarip, me Jakin,
1CH 9:11 me Asaria da. Augwaligo Asaria te Godigo bede polalubo bidi nigilali. Asaria te Hilkiago ogwa, te Hilkia Mesulamgo ogwa, Mesulam te Sadokgo ogwa, tama Sadok te Meraiotgo ogwa, te Meraiot Ahitupgo ogwa dao.
1CH 9:12 Tama gasa tobolu bidi te Adaia. Adaia te Jerohamgo ogwa, te Jeroham Pasurgo ogwa, te Pasur Malkiago ogwa da. Te gasa tobolu bidi Masai. Masai te Adielgo ogwa, te Adiel Jaserago ogwa, tama Jasera te Mesulamgo ogwa, te Mesulam te Mesilemitgo ogwa, te Mesilemit te Imergo ogwa dao.
1CH 9:13 Te pris hani dabe augwade te tobolu bidi dabe bidali namba e tama, 1,760 elaluai. Te tobolu bidi dabego te Godigo bede ebo sę augwa nogode elaluali, tama augwaligo te sę bugagia ela piduai dao.
1CH 9:14 Te Livai meba te tobolu bidi augwa hani dabede bidali. Tobolu bidi me deli te Semaia, te Hasupgo ogwa. Te Hasup Asrikamgo ogwa, tama Asrikam te Hasabiago ogwa da. Te hani bidi dabe augwali te Merari hani dao.
1CH 9:15 Te tobolu bidi mebago nogi da e tiwai da, Bakbakar, me Heres, me Galal, me Matania. Matania te Mikago ogwa, tama Mika te Sikrigo ogwa, te Sikri Asapgo ogwa dao.
1CH 9:16 Tama gasa tobolu bidi me da te Obadia, te Semaiago ogwa. Semaia te Galalgo ogwa, tama Galal te Jedutungo ogwa da. Te gasa tobolu bidi me Berekia, te Asago ogwa, te Elkanago ogwago bulai wąį nǫų da. Te Berekiago hani dabe augwali te Netofa taun pąde elalubo bulu dabede bidalio.
1CH 9:17 Te kalabus igi pali bulu tagalama te ma asali we bidi hani augwali tomode, te Godigo be tonalubo bidi hani dabe meba elaluali. Augwa nogi e tama da, Salum, me Akup, me Talmon, me Ahiman, me te deli sę ebo bage, te augwa ama dabe da. Tama Salum aga te hanide tobolu bidi bidai dao.
1CH 9:18 Polobadu, te Jerusalem dolisąbadi, te hani bidi dabego te Godigo be sunumi tonalubo sę te giliga asobo badu yali, te sunumi nogi augwaligo te tama wali, Kingo Sunumi Dao, wali. Te polobadu mu te hani dabe augwa nǫų hani dabego te Livai dabe bidali pesagede te Israel te tǫ wa pai bulude bidali sogo augwali te tonalubo sę ebo bidi bidalio.
1CH 9:19 Tama te sogo te Kora hani augwali te Genuai Bidigo pesage elaluali madi augwali te pesage tomoba pabo sunumide tonalubo bidi bidali. Te Finias, te Eleasargo ogwago, augwaligo te ebo sę dabe tonaluali. Genuai Bidi te Finias dali bidimainao, te bidi dabego sulama augwaligo te tama po walio. Tama te Devit bidali sogo, te gasa bidi Salum te aga ama dede dali, te Kora hani bidi dabe da, augwaligo te Genuai Bidigo Sel Ugwa Be sunumi badu tonalubo sę elaluali. Te Salum te Korego ogwa, te Ebiasapgo ogwago ame nenama bulali hani wąį nǫų dao.
1CH 9:21 Tama Sekaraia, te Meselemiago ogwa, aga te Genuai Bidigo Sel Ugwa Be sunumi tonalubo sę ebo bidi bidalio.
1CH 9:22 Augwaligo te sę emainu dąį ilali bidi dabe tigidali namba te 212 bidi da. Augwaligo te bidi dabe augwa hani bage deli deli dabego nogi asęsędulali te augwali hani deli deli bidada pabo pesagede tama sę yali. King Devitgo me profet Samuel sigo te sę te bidi dabeba mawai dao.
1CH 9:23 Tama te hani dabe augwali te Genuai Bidigo Sel Ugwa Be sunumi dabe tonalubo bidi bidai da. Tama nosali augwa ame nani ogwago ame nani wąį nǫų dabego me Genuai Bidigo tempel be tonalubo tobage sę naga yai dao.
1CH 9:24 Augwaligo te me si me si badu elalubo be daga sunumi dabe tonaluali, te not badu me saut badu, me giliga asobo badu me giliga dega sabo badu, te tama badu elaluali be sunumi tonaluai dao.
1CH 9:25 Tama me sogo augwa ama dede bidali bulu tagalama asu augwali te tau sabo sę yagasali. Te ama dabe augwa te sę Sadede delide elama, augwa buluba ma peyu yai dao.
1CH 9:26 Tialima, te Livai hani bidi me si me sigo te tonalubo polalubo bidi bidali. Augwaligo te be dąį togwali habu dabe me te Godigo bede nai mubo be habu dabe tonalubo sę elaluai dao.
1CH 9:27 Te hulide augwali te Godigo be obo banis te be habu dąį togwali tomode piyu yali, magi baso meni, augwa te be tonalubo sę yali, tama te tigidali sogo kigamu te sunumi dabe dayu yalio.
1CH 9:28 Tama te Jerusalem dolisiąwani sogo, te Livai hani mebago te moni dis dabe, me te pou plet, me doado bage tonaluali, te bidi dabego lotu wabo sogo te sę ebo nai dabe da. Te lotu wagi pabo sogo augwaligo sela pelama, te augwaligo ma sela asobo sogo, te Livai hani dabe augwaligo bugagia nedeyu yalio.
1CH 9:29 Tama te gasa hani Livaigo te Genuai Bidigo bede sę ebo gasa doado bage dabe tonalubo sę yali. Tama te hanigo te wiegi yai nai plaua, me wain, me oliv wel, me te wiegi yai denami hano ilibo pauda, me te tobage wiegi yai pauda, te tama nai dabe tonalubo sę me yai dao.
1CH 9:30 Tialima te haniani pauda dabe selama te deliba talubo sę te pris dabego ebo sę naga dao.
1CH 9:31 Livai me deli, aga nogi te Matitia, agai te ofa yabo plaua dabe ulubo sę elaluali. Matitia aga te Salumgo gomunai ogwa, te Korago hani dao.
1CH 9:32 Te Kohat hani Livai mebago te Godiba tigidali Sabat side maiabo bret dodolobo sę agai yai dao.
1CH 9:33 Te tobolu bidi hani dabe mebade te Livai hani dabego te wiegi yai tęąbi musik wabo sę meba elaluali. Te bidi dabe augwali te Godigo be obo te dąį togwali be habu tomode piyu yali, magi baso meni, augwaligo sę te siade me hulide me te sę tama yai dao, tama augwaligo gasa sę me ebeo.
1CH 9:34 Te kalabus igi pali bulu tagalama ma asali bidi dabe, augwali te Livai hanide polalubo tobolu bidi hani dabe da. Tama te genuai bidi dabe augwali te Jerusalemde bidalio.
1CH 9:35 Jeiel, te Gibeon taun hodolali bidi, te taun Gibeonde aga we Maka dali bidali.
1CH 9:36 Agai gomunai ogwa te Apdon. Te agai gasa ogwa dabego nogi e tama, Sur, me Kis, me Bal, me Ner, me Nadap da,
1CH 9:37 me Gedor, me Ahio, me Sekaraia, me Miklot dao.
1CH 9:38 Miklot te Simeamgo aya. Te augwali hani dabe te Benjamingo gasa hani te Jerusalem pąde bidali te hani dabe pąde bidalio.
1CH 9:39 Ner te Kisgo aya, tama Kis te Solgo aya da. Te Solgo ogwa dabe nogi e tama da, Jonatan, me Malkisua, me Abinadap, me Esbal, aga gasa nogi me Isboset dao.
1CH 9:40 Jonatan te Meribalgo aya, agai gasa nogi me Mefiboset. Tama Meribal te Maikago aya dao.
1CH 9:41 Maikago ogwa dabe nogi e tama da, Piton, me Melek, me Tarea, me Ahas.
1CH 9:42 Ahas te Jarago aya. Tama Jarago ogwa dabe nogi e tama, Alemet, me Asmavet, me Simri. Simri te Mosago aya da,
1CH 9:43 tama Mosa te Bineago aya, te Binea te Refaiago aya, te Refaia te Eleasago aya, Eleasa te Aselgo aya dao.
1CH 9:44 Aselgo ogwa dabe te 6 ogwa dabe bidali. Augwali nogi da e tama, Asrikam, me Bokeru, me Ismael, me Searia, me Obadia, me Hanan dao.
1CH 10:1 Te Filistia augwaligo te Israel dabe dali te bulu du Gilboade boi hwįnama, tama te Israel bidi hauwa te hwįani madi isai. Te gasa Israel dabe te hwįani tagalama wi pai dao.
1CH 10:2 Sol me te aga ogwa dabe dali wi palio, tiali goli te Filistia dabego augwali pobelama, te Solgo ogwa sela ela muai, te Jonatan, me Abinadap, me Malkisua dao.
1CH 10:3 Te bidi dabe augwaligo te Sol pobeyu, te hwįbo bomo mu yali. Tama te Filistia mebago te ene dabe Solba enani madi tama te ene mebago aga tigi dolama, te aga dolainu yalio.
1CH 10:4 Tama tialima, agai te hwįbo nai tolasa bilibo gesi bidi i olama, te agaba te tiwai po walio, “Te nago bainat hwą selama, ena ela muao. Tiyu, te bulu badu haiden bidi te Filistia dabe asu, te enaba hagoma eyu, te ena ela muidalio,” wali. Tiali goli te gesi bidi wi mu ebaso, tama agai bainat hwągo aga elebeo. Tama tibaso, Sol aga bainat hwą aga digi tolalu badi tama te bainat hwą poaiba ugwadu degasa dulama, te hwą poaigo enama isalio.
1CH 10:5 Te gesi ogwa bidigo suali, te Sol isaibaso, teda aga me aga digi aga bainat hwą poaiba degasa dulama isai dao.
1CH 10:6 Tialima te Sol dali te aga ogwa dabe sela dali isali, te aga hani mu silalio.
1CH 10:7 Tama te odogo bulude bidali Israel tigidali, augwaligo suali, te augwa ami bidi dabe te Filistia dabede wi palio. Tama me augwaligo te tama po odali, Sol dali aga ogwa dabe dali isalio po odalio. Tialima augwa taun dabe digi tagalama, te augwali wi pepelawalio. Tama nosali te Filistia dabe augwa te Israel dabego te taun dabe sagaselama bidalio.
1CH 10:8 Hwįani silama da, teda te nosali badu te Filistia dabe augwa te hwįbode isali Israel bidi dabego hwįyu gudali ugwa dabe pepeda sągi pelama, tama te isali Israel bidi dabego doado bage salio. Tama augwaligo suali, te Sol me aga ogwa dabe daligo tigi dabe te Gilboa bulu dude munalubo suali.
1CH 10:9 Tialima augwaligo te Solgo tobolu togwalio. Tama augwaligo te tobolu dali, te agai hwįani nai dabe dali sela palio. Tama augwa te kantri Filistia dabeba te sę yali po me te augwa tibo godiba me te we bidi dabeba po sela pabo bidi dabe tagala palalio.
1CH 10:10 Tama augwa te tibo godigo lotu bede te Solgo boi hwįyu gudali nai doado bage muanio. Tama augwaligo te Solgo tobolu selama, te augwa tibo god Dagon muani be dagade kęnanio.
1CH 10:11 Tama te taun Jabes te Gileat tǫde bidali Israel dabego te Filistia dabego te Solde te tiali sę po odalio.
1CH 10:12 Tialima te Jabes boma pai bidi dabe pelama, te Sol me aga ogomanigo tigi dabe dali sigi pelama, te Jabesba sela asalio. Tama augwaligo te Solgo dili dabe te aga ogwa dabego dili dabe me sigi pelama, tama augwaligo te Jabes taunde elalubo moni ni ok dologode pubulalio. Te augwaligo augwalide homu dene dwai ebaso, te augwa nai osogo gisilama te Sadede deli bidai dao.
1CH 10:13 Sol isali, magi baso meni, agai Genuai Bidigo po bugagia wali pabeo. Menio. Agai te Genuai Bidi bomai po sela sąwani. Tama agai te isali bidi dabego noma bidiba hanalu te agaba mena sunumi ola mabo te agai wali painu yali,
1CH 10:14 tama agai Genuai Bidiba hanaluama te agabolo ola momainogo ebeo. Tibaso, Genuai Bidigo aga ela munama, tama Devit, te Jesigo ogwa, te king pedelai dao.
1CH 11:1 Te sę yali nosali badu, tigidali Israelgo Devit te Hebronba suagasali. Tama augwaligo te tama po agabolo walali, “Da tigidali te deli kaneme dao.
1CH 11:2 Polobadu Sol king bidali, tiali goli naga digi te da Israelgo ami bidi tonalu, te augwali hwįboba odasa peyu ma odasa asu yali. Tama God, Genuai Bidigo, nageba walobaso, te aga we bidi dabe da tonalubo bidi pedelaibao, tama nage dago king pedelaibao,” wali.
1CH 11:3 Tama nosali te Israel tobolu bidi dabe tigidaligo te king Devit Hebronba sisinagaselama gesabi deliba yalio. Tama agai te Godigo gedude bomai po me deli dąų waliyu kontrak salio. Tama augwaligo aga toboluba te dąį ilibo wel gelama, te aga Israel king da olama dąį ilali, te Genuai Bidigo po te profet bidi Samuelgo pedauwalide wali tiwai gilama yai dao.
1CH 11:4 Tama king Devit dali te tigidali Israel bage te Jerusalemba pali, te taun gasa nogi Jebus da, te Jebus dabego page bulu mu dao.
1CH 11:5 Tama te Jebus dabego Devitba te tama po wali, “Dage munu ma te dago taun tomoba me aselamuo,” wali. Tiali digi Devit aga ami dabe daligo te boi hwįnama, tama te masigigo nigai bomai obo elaluali taun pedai sali. Te taun pedai badu nogi da Saion. Tiali goli, nosali te we bidi dabego te taun nogi e tiwai wali, Devitgo Taun Dao, walio.
1CH 11:6 Devitgo te taunba boi hwįainu yali sogo, agai te tiwai po aga ami dabeba wali, “Niwai bidigo te Jebus bidi me deli te polasa ela mubo bidi yaibaso da, teda aga eno ami dabede te polalubo ofisa bidi pedelaibao,” wali. Tialima Joap, te Seruiago ogwa, te polasa pelama, te boi hwįbo gagalali. Tama tialima, Devitgo aga te amide polalubo ofisa bidi sa muanio.
1CH 11:7 Tama nosali Devit pelama, te Saionba bidigi pai. Tama tialima, te we bidi augwaligo te taun nogi e tama wali, Devitgo Taun Dao.
1CH 11:8 Tama Devitgo te po obaso, tama te sę bidi dabego te be dabe sęsę pelama, te taun tigidali badu bagua salio. Augwaligo te be dabe sę ebo gagalali te tǫ wai bulama pągąnani pesage badu te sę yai. Te Joapgo te taun dabe gasa badu me ma nigalio.
1CH 11:9 Tigidali Bomo Elalubo Genuai Bidi te Devit dali bidali, tama tibaso Devit te sesemane sogo bomai king pedelai dao.
1CH 11:10 Te nogi asęsędulai elalubo da, te Devitgo bomai ami bidi tobolu bidi dabe da. Godigo te tǫ kantri Israelde homu kone palama, te agai bomai po dąų weyu, Devit te king pedalumainu yalio. Te ami bidi dabe augwali dali te tigidali gasa Israelgo me te sę bomo eyu, Devit te king pedelama bomai bidi bidali, te tama tiali kolesagade te Genuai Bidigo aga dąų wali poba mu usu nai dao.
1CH 11:11 Te Devitgo bomai ami bidi dabego nogi da e tiwai, Jasobeam te Hakmoni hani, aga te polalubo ofisa bidi. Me sogo deli sogo Jasobeamgo aga hwįbo sesemone ene tolalu, te 300 boi bidi dali hwįnama, te tigidali ela silai dao.
1CH 11:12 Te Eleasar, te Dodogo ogwa, aga te genuai nogi elalubo sela wali ami bidide te si wali bidi aga da. Aga te Ahohi hani dao.
1CH 11:13 Me sogo deli aga Devit dali te bulu Pasdamimde bidali, tama te Filistia dabego boi hwįainu sisinani. Te Filistia dabe asobo si da, te Israel dabe wi palio. Te pedai badu te bali gi me deli elaluali,
1CH 11:14 tama Devit de Eleasar augwali si te gi tomode dolaluali, tama te Filistia dabe dali hwįbo bomo yali, augwaligo te tǫ sidali weyu yali. Tama augwali sigo te Filistia dabe ela muanio. Te kolesaga yalide Genuai Bidigo te Filistia dabe aiyaba mu elaluama, tama te Israel dabe augwali bugagia bidai dao.
1CH 11:15 Te Devitgo ami dabede te ami tobolu bidi dabe elaluali, te hani dabe nogi augwaligo te tiwai nogi yalio, te Bidi Sese Deli Olama Nogo Si 30 Ami Tobolu Bidi Da, wali. Me sogo deli Devit te bulu Adulam genuai masigi ola bede bidibadi, tama Bidi Sese Deli Olama Nogo Si wali ami bidi dabe tomode te ami tobolu bidi selago Devit aga suagasali. Te tama tebo sogode me te ami dabe te bulu Refaimba dulama bidabo pesage nigilama bidai dao.
1CH 11:16 Te sogo Devit te boma pai geme dulalubo bulude bididubadi, tama te Filistia ami dabe mebago te Betlehem taun sai yalio.
1CH 11:17 Tama Devitgo te Betlehem wiegi yai ąįba homu kone paligi solama, tama agai te tama po walio, “Homu dene mu ebao, eno te taun Betlehem obo sunumi pąde elalubo wę meba tugi sogo da, teda ena wiegi yai homu pemene mu igi dao.” Devitgo te po wali.
1CH 11:18 Te bomai ami bidi selago te po odama, te augwali hogodama palio. Te Filistia dabego te Betlehem taun tomoba pabo sunumi tonalubadi goli, tagalao, te ami selago augwali sela sąnama peyu, Devitgo te po wali ulu ąį tugi palio. Tama augwaligo sela asama, Devit magasali. Tiali goli, aga te wę tuainu yali te aga hagela ebaso tubeo. Menio. Agai te selama, te Genuai Bidiba ofa tiwai eyu gelalio.
1CH 11:19 Tama agai te tiwai po wali, “Te Godigo nogide, eno mu po obao, eno te ąį me tugobeo. Te wę eno tubaso da, eno te bidi dabe augwaligo kaneme tubo tiwai yaibao, magi baso meni, augwali te wę sigi painu pali sogo te augwali isabo sę tiwai mu yalio.” Tama tibaso, Devitgo te ąį tubeo. Te bomai ami bidi selago yali sę me deli te dao.
1CH 11:20 Abisai, Joapgo ama, aga te 30 wali bomai ami augwalide te polalubo bidi da. Me sogo deli Abisai aga hwįbo sesemone tolasa te 300 boi bidi dali hwįnama, te tigidali ela silalio. Tama aga nogi ugwanu ma igulama, te sela ami bidigo genuai nogi elalubo tiwai si me elaluai dao.
1CH 11:21 Agai namba genuai ugwanu mu sigiluama, te sela ami bidi dabego genuai nogi elaluali edelali, te augwa polalubo bidi pedelali. Tiali goli aga digi te sela ami bidi dabe tiwai me elalubeo.
1CH 11:22 Tama Benaia, te Jehoiadago ogwa te Kapsel taun bidi, aga me te bomai ami bidi me deli da. Te hauwa sogo agai te boi bidi dabe dali hwįbo bomo yalio. Me sogo deli agai te Moap moni bomai ami bidi si ela muai. Te me sogo deli, te talua ge tulubage te tǫba tulalubo sogo, Benaia te genuai tǫ dedage me deliba dulama, te bidi elebo bomai hasa laion me deli ela muai dao.
1CH 11:23 Te gasa me sogo agai te moni dobo dwai Isip bidi me deli ela muani. Te Isip bidigo tigi bobobage usu nama te 2 mita, te bobage bidi mu da. Te Isip bidigo sesemone te genuai mu da. Te sesemone sigi te genuai, te ugwa hobolobo masin lum dili tiwai da. Tiali digi Benaiago te ni tigi dage selama, te Isip bidi pąba pelama, aga dali hwįani. Tama Benaiago te bidigo sesemone dobola selama, tama aga te aga sesemonego digi aga ma ela muai dao.
1CH 11:24 Benaiago te bomai sę dabe yali, tialima agai nogi genuai elalu te ami bidi selago genuai nogi elalubo tiwai elaluali.
1CH 11:25 Agai te sali genuai nogigo te ami bidi bidi sese deli olama nogo si 30 te gasa ami dabego elalubo bomo aiyaba elaluali, tialima aga te genuai nogi elalubo ami bidi selago nogi tiwai agade me elalubeo. Devitgo Benaia dąį ilama, te kingo be tonalubo ami bidi hani dabe tonalubo bidi nigilai dao.
1CH 11:26 Te badu te Devitgo ami bidi hani dabede te bomai ami bidi dabego nogi asęani elalubao. Asahel, te Joapgo ama, me te Elhanan, te Dodogo ogwa, te taun Betlehem bidi da,
1CH 11:27 tama Samot te Haror bulu bidi, te Heles te Pelon bulu bidi,
1CH 11:28 te Ira, te Ikesgo ogwa, te taun Tekoa bidi da, te Abieser te Anatot taun bidi,
1CH 11:29 tama Sibekai te Husa bulu bidi, te Ilai te Ahohi hani bidi da,
1CH 11:30 tama Maharai te Netofa taun bidi, te Helet, te Banago ogwa, te Netofa taun bidi,
1CH 11:31 te Itai, te Ribaigo ogwa, te Gibea taun bidi te Benjamin hanigo tǫ da, tama Benaia te taun Piraton bidi da,
1CH 11:32 tama Hurai te odogo bulu pąde te Gas bulu du bidi, te Abiel te taun Araba bidi,
1CH 11:33 te Asmavet te Baharum bulu bidi, te Eliaba te taun Salbon bidi da,
1CH 11:34 tama te Hasemgo ogwa dabe te bulu Gison bage, te Jonatan, te Sagego ogwa, te Harar bulu bidi da,
1CH 11:35 tama Ahiam, te Sakargo ogwa, te Harar bulu bidi, me Elifali, te Urgo ogwa da,
1CH 11:36 te Hefer te Mekera bulu bidi, te Ahiya te Pelon bulu bidi,
1CH 11:37 tama Hesro te taun Karmel bidi, te Nadai, te Esbaigo ogwa,
1CH 11:38 tama Joel, te Natango ama, te Miphar, te Hakrigo ogwa da,
1CH 11:39 tama Selek te tǫ kantri Amon bidi, te Naharai te taun Berot bidi da, aga te Joapgo boi hwįbo nai te ene dabe sabilibo bidi,
1CH 11:40 tama Ira me Garep te bidi si te Itra taun bidi,
1CH 11:41 tama Uria te Hit hani, te Sabat, te Alaigo ogwa,
1CH 11:42 te Adina te Sisago ogwa, aga te Ruben hanide tobolu bidi me deli da, tama te Adina hani te bidi sese deli nogo si 30 bidi da,
1CH 11:43 tama Hanan, te Makago ogwa, te Josafat te Mitan bulu bidi,
1CH 11:44 tama Usia te Astarot taun bidi, te Sama me Jeiel, augwali si te Hotamgo ogwa te Aroer taun bidi da,
1CH 11:45 tama Jediael me Joha, te bidi si te Simrigo ogwa si te Tis bulu bidi da,
1CH 11:46 te Eliel te Mahava bulu bidi, te Jeribai me Josavia, te bidi si te Elnamgo ogwa, te Itma te Moap tǫ kantri bidi da,
1CH 11:47 tama Eliel, me Obet, me Jasiel, te bidi sela te bulu Mesoba bidi dao.
1CH 12:1 Te Sol, Kisgo ogwa, agai te Devit pobeasa bilibo sę ebaso, Devit pelama, te taun Siklakba bidigi pali. Devit te Siklakde bidibadi, tama te bomai ami bidi dabe meba aga dali bidagasali. Tama augwaligo aga te boi hwįbo tau siyu bidalio.
1CH 12:2 Augwaligo te enesigigo ene enebo me te katapel tiwai naigo enebo mu konea pai bidi dabe da, te augwaligo dolo nogo badu enebo me pobase nogogo enebo te mu koneai baso tagala wali. Tama augwali te Benjamin hani bidi, Sol te hanidu bulasa asai dao.
1CH 12:3 Augwaligo polalubo ofisa bidi, te Ahieser. Te aga ama, Joas, aga te tomo bidi da. Augwali si te Semago ogwa, te Gibea taun bidi. Te gasa bidi dabe nogi e tiwai elalubao, Jesiel me Pelet, te bidi si Asmavetgo ogwa, te Beraka, me Jehu te Anatot taun bidi da,
1CH 12:4 te Ismaia te Gibeon taun bidi. Ismaia te bidi sese deli olama nogo si 30 te Devitgo ami bidi dabede polalubo ofisa bidi da, tama aga te wiegi yai ami bidi mu da. Te Benjamin hanide te gasa bidi dabe augwali nogi e tiwai elalubao, Jeremaia, me Jahasiel, me Johanan, me Josabat, aga te Gedera taun bidi me deli dao,
1CH 12:5 tama te Elusai, me Jerimot, me Bealia, me Semaria, me Sefatia, te Harip bulu bidi da,
1CH 12:6 tama Elkana, me Isia, me Asarel, me Joeser, me Jasobeam, augwali te bulu Kora bidi da,
1CH 12:7 tama Joela me Sebadaia, te Jerohamgo ogwa si, te Gedor bulu bidi dao.
1CH 12:8 Te Devit te geme duala sabo bomai bulu te tǫ wa pai bulude bidali sogo, te Gat hanigo bomai ami bidi mebago Sol tagalama, te Devit dali bidagasalio. Te bidi augwali te wiegi yai ami bidi dabe mu te sabele tulama, te sesemone enego enebo mu koneai. Te augwali boi hwįani sogo, augwa gesabi mu tuluga sali, te wi meni yai hasa laiongo gesabi tiwai yali. Tama augwa umagia mu udayu, te bulu dude bidibo uni hasa udabo tiwai yalio.
1CH 12:9 Augwa nogi e tiwai elalubao. Hasia polalubo bidi Eser, namba 2 Obadia, namba 3 Eliap,
1CH 12:10 namba 4 Mismana, namba 5 te Jeremaia,
1CH 12:11 te namba 6 Atai, me namba 7 Eliel,
1CH 12:12 namba 8 te Johanan, te namba 9 Elsabat,
1CH 12:13 te namba 10 te gasa Jeremaia, te namba 11 Makbanai dao.
1CH 12:14 Te Gatgo hani augwali te Devitgo ami polalubo ofisa bidi pedelai. Augwali te wiegi yai ofisa dabe mu da. Te boi bidi dali augwaligo hwįbo sogo, te augwali gasa me badugo te bidi sese nogo a naga 100 bidi aiyaba elalueibao, te gasa me badu augwaligo te bidi sese hauwa 1,000 boi bidi ela mubo dao.
1CH 12:15 Te ami dabe augwaligo tama te wę Jordan asali genuai mu te ąį asobo dąį ela holai mu elalubadi, te kibu be me deli te polua deli wabode, te sogo te ąį nogealio. Te sogo augwaligo te ąį pąde te giliga asobo badu me giliga dega sabo badu tede bidali we bidi augwali dali boi hwįgi pali. Tama te we bidi augwali wi tedela sanama pela silai dao.
1CH 12:16 Me sogo deli te gasa Benjamin hani me te Juda hani te bidi meba pelama, te Devit geme dualalubo bomai buluba sugi palio.
1CH 12:17 Devitgo augwali dali deliba gesabi hanilibo sogo, agai augwaliba te po wali, “Te dage abagi tiwai homu elama, ena tau sainu asali wida, teda ena wiegi yai pemene eyu dagego abagi pedelaibao. Tiali digi eno dwai sę deli me ebeo, tama tialima dagego ena te eno boi bidi dabe nogoba muabo homu ebaso da, teda dena wąį nǫų dabego Godigo koneaibao, te agai dage po tų ilaibao, magi baso meni, eno dage dolo sę me ebeo,” Devitgo te po wai dao.
1CH 12:18 Tialima, Godigo Mobo Noma Bidi te Amasaiba pedelali, te augwali me deliba, tama Amasaigo Devitba te tama po wali, “Devit, te Jesigo ogwa, da te nago hani bidabo homu ebao. Te naga Godigo nage tau sobaso, tama nage dali, te nage tau sabo hani dabego dali te sesemane sogo ugwaba ela holama te bugagia bidaibao,” wali. Tialima Devitgo augwali selama, tama augwali te agai ami dabego ofisa dabe pedelai. Te nosali, Amasai te nogi yai 30 bomai ofisa bidi dabe tomode aga te polalubo ofisa bidi pedelai dao.
1CH 12:19 Devit te Filistia dabe dali pelama, te Sol dali boi hwįgi painu yali sogo, te Manase hanigo ami bidi mebago te Sol tagalama, te Devit dali bidigi pali. Tialima, Devitgo te Filistia dabe tau sabeo, magi baso meni, te Filistia kingo te Devit aga hani dabe dali sela sąwani. Augwaligo aga sela sąwani, magi baso meni, augwaligo koneani, polobadu Devit te Solgo sę bidi bidai, te augwa wi elama te homu yali, tiyu te hwįbo sogo Devitgo te Solgo hani tau selama, te Filistia dabe ela muidali da homu yali. Tibaso, te king dabe augwa po mia selama, te Devit aga tagala palai dao.
1CH 12:20 Tama Devit te aga bidali taun Siklakba ma soali sogo, te Manasego ami hani bidi aga dali soalio. Augwa nogi e tama da, Atna, me Josabat, me Jediael, me Maikel, te me gasa Josabat, me Elihu, me Siletai. Te Manase hanigo amide augwali te bidi sese hauwa te 1,000 amigo ofisa bidi bidai dao.
1CH 12:21 Te bidi dabe augwali te polalubo ami dabe mu tama Devitgo augwali agai amide te ofisa dabe pedalumainu ilali. Tama augwaligo Devit tau selama, te hwįyu nai wi siyu ebo bidi hani dabe dali boi hwįai dao.
1CH 12:22 Tama tigidali side te bidi hauwa te Devitba asesa aselama, te agai ami pedelainu yali. Tialima agai ami bidi hani te genuai mu pedelai.
1CH 12:23 Devit te Hebron taunde bidibadi, tama te ami bidi hani hauwa agaba aselama, aga te Israel king pedalumainu ilama te Solgo pesage hasegelimainu yali, te Genuai Bidigo wali po tiwai gilama yai. Augwaligo te augwa boi hwįbo doado bage dali sesalio. Te asali bidi dabego namba e tiwai dao.
1CH 12:24 Te Juda hani ami bidi dabe bidi sese umabo te 6,800 ami bidi bidali, te augwa boi hwįbo sabele dabe me te bobage sesemone ene dali sesalio.
1CH 12:25 Te Simeon hanigo ami bidi dabe te bidi sese hauwa mu te 7,100 ami bidalio. Augwali te boi hwįbo mu konea pai wiegi yai ami bidi dabe dao.
1CH 12:26 Te Livai hanigo ami bidi sese umabo te 4,600 ami bidi elaluai.
1CH 12:27 Te Jehoiada te Aron hanide tobolu bidi dabede te bidi sese umabo bidi mu te 3,700 ami bidi bidalio.
1CH 12:28 Tama me Sadok, te gesi ogwa bidi me deli te wiegi yai ami bidi, aga deli hani te 22 bidi dabe dali asalio. Te bidi dabe augwali te ami ofisa bidi dao.
1CH 12:29 Te Benjamin hani da, te augwali Solgo deli hani dabe da, augwaligo ami bidi dabe te bidi sese umabo mu 3,000 bidai. Hasia mu te hani bidi hauwa te Sol wali pali, tiali goli megi da augwali te Devitba asalio.
1CH 12:30 Te Efraim hanigo bidi hauwa umabo mu te 20,800 ami bidi bidali. Augwali te wiegi yai ami dabe mu, te augwa deli hani tomode digi te genuai nogi elalualio.
1CH 12:31 Te Manase hani me badu pedai te giliga dega sabo badu bidibo hani bidi, te bidi sese umabo 18,000 ami bidi bidai. Te augwa hani dabego digi augwali te Hebronba pelama, te Devit king pedalumainao po obaso, te augwali dąį ilibaso pai dao.
1CH 12:32 Tama Isakar hanide te ofisa bidi te 200 bidi dali te Isakar hani ami tigidali badi te augwali dologode bidali. Te ofisa dabego homu kolesaga wiegi yai elalu, te mena tiwai nai pedalubo page me koneani, tama te Israel dabego mena tiwai sę yabo me koneai silai dao.
1CH 12:33 Tama te Sebulun hani bidi dabe te bidi sese umabo hauwa mu te 50,000 dwagi yai ami bidi bidali. Augwa te Devit deli naga tau sabo homu kolesaga naga elaluai. Tama augwa te tobage boi hwįbo nai doado bage dabe dali sesu asalio.
1CH 12:34 Te Naptali hanide te ofisa bidi dabe te bidi sese umabo te 1,000 bidi elalu, te ami bidi te bidi sese hauwa me 37,000 bidi bidali. Tama augwa te boi hwįbo sabele me bobage sesemone ene dali sela asalio.
1CH 12:35 Tama te Dan hani bidi dabe te bidi sese hauwa 28,600 ami bidi bidali. Tigidali sogo augwaligo te boi hwįabo sisi elalu bidalio.
1CH 12:36 Te Aser hani bidi dabe te bidi sese hauwa mu te 40,000 ami bidi bidali. Tama tigidali sogo augwaligo me te boi hwįabo sisi elalu bidai dao.
1CH 12:37 Te Ruben hani me Gat hani me te Manase hani pedai te giliga asobo badu te wę Jordan badu bidali, augwali te hani dabe, te bidi sese umabo mu te 120,000 ami bidali, te augwa boi hwįbo te tobage nai doado bage dali sesalio.
1CH 12:38 Te ami bidi dabe augwaligo te augwa boi hwįabo nai dabe dali seseyu, te Hebronba sabolalio. Augwaligo deli homu naga elaluali, te tigidali Israel pedai badu te Devit king pedalumainao homu naga yali. Te tigidali gasa Israel dabego me te tobage deli homu naga yai dao.
1CH 12:39 Te bidi dabe augwali Devit dali te Hebronde bidali. Te augwa abagi dabego augwali nai hauwa sisi ilali, tama augwa genuai nai daa sela sogo usu nama tuai dao.
1CH 12:40 Te tigidali tǫ pedai badu te tigidali Israel, te Isakar me Sebulun me Naptali te hani sela bidibo te not badu usu nama sisinama, te wiegi yai pemene umabo mu eyu, tama augwa te haniani nai sibi te Hebronba sisinibo sę yai. Augwaligo te plaua hauwa badi, te duani wain wai du dabe me, te ni fik kaya te augwaligo olali me salio, te hauwa wain me oliv wel sobadi yali. Augwa te nai dabe te donki dabeba, me kamel dabeba, me bulmakau dabeba ugwadu munama sesalio. Tama augwa te we bidi dabego tuabo bulmakau me sipsip dabe me sesai dao.
1CH 13:1 Devitgo te bidi sese hauwa umabo 1,000 ami bidi tonalu, me te bidi sese a naga 100 bidi tonalubo ofisa bidi dabe augwali dali te po mibadi, te gasa tobolu bidi dabe dali me te po pusalio.
1CH 13:2 Tialima nosali te miani po agai te aga dali sisalu bidibo te tigidali Israelba te po pusalio. Agai augwaliba te tiwai po wali, “Eno te tama homu yali, da pelama, te Godigo Dąų Wali Bomai Po Muani Halobage sigi pelama sela asobaso, te wiegi yai egowe te homu ebao, magi baso meni, dago te Dąų Wali Bomai Po Halobage te Sol king bidali sogo homu kone me isąma tagalalio. Tibaso, dagego te tama homu ebo usu da olama, tama te God, dago Genuai Bidigo, homugo dago te Dąų Wali Bomai Po Munalubo Halobage sela asomaina homu ebaso da, teda dago dena abagi dabe te tigidlai habu badu te Israel tǫ pedai kantride bidalubo bage tigidali i waibao. Tama dago te pris dabe me Livai dabe te augwa taunde bidalubo me i waibao. Tama te hani tigidali da dali deliba sisinagasomainao,” te po walio.
1CH 13:4 Te we bidi tigidali augwaligo homugo te wali po godolo mu elama, Devitgo te po usu da po walio.
1CH 13:5 Tibaso, Devitgo te tigidali Israel dabe te tigidali tǫ pedaiba i wali, te wę Sihor te Isip tǫ dąį igi pali te saut badu gagalama, tama te bulu Hamatba pabo te sunumi tunu mage si te not badu usu nigi palio. Tialima augwali sisinagaselama, te bulu Kiriat Jearimba pelama, te Dąų Wali Bomai Po Munalubo Halobage muani te sigi peyu yalio.
1CH 13:6 Tama Devit dali te tigidali Israel te Juda tǫba pali, te Bala taunba pali, te aga gasa nogi me Kiriat Jearim. Augwaligo te Godigo Dąų Wali Bomai Po Muani Halobage sigibu palio. Te halobage te nogi augwa e tiwai wali, Genuai Bidigo Dąų Wali Bomai Po Munalubo Halobage dao wali. Te halobagede te mobo bidi ensel si noma ugwadu daide elaluali, te Genuai Bidi king dugulalubo sia sai tiwai dao.
1CH 13:7 Tialima augwali pelama, te taun Balaba sabolali, tama augwali te Abinadapgo beba pali. Tama augwa te Dąų Wali Bomai Po Munalubo Halobage selama, te gesi karis me deliba muani, te augwa dali sela painu yali. Tialima augwali hogodasa peyu, tama Usa dali Ahio dali sigo te karis pogolobo sę ela palio.
1CH 13:8 Tama Devit dali te tigidali Israel dali dwagi yai homu eyu, te karis sela pelayu, te augwa tęąbi wabo sę genuai eyu musik weyu, te Godigo nogi ugwaba mu salio. Augwa te bu wabo nai biugel ponoyu, te hąbidi me gita eleyu, te musik wabo sę haniani mu yalio.
1CH 13:9 Tialima augwali te bidi me deligo tǫ badu sabolali, te bidi Kidon, te bidi dabego tubo nai wit ge naga siyu, te wit wali sela sąbo pesageba sabolali. Tama te pesagede te karis kegebo bulmakau dabe degasa painu, tama tebogo te Dąų Wali Bomai Po Munalubo Halobage tǫba tula palainogo ilali. Tibaso, te bidi Usago te halobage nogogo dįayanio.
1CH 13:10 Tama Genuai Bidi sębę mu yai, magi baso meni, Usago nogo te Dąų Wali Bomai Po Muani Halobageba muani. Tama tede digi tama te Genuai Bidigo aga ela muani, te Genuai Bidi aga gedude tiwai dao.
1CH 13:11 Devitgo suali, Genuai Bidigo te Usa ela muani sę sulama, tama Devitgo wado yali. Te bulu nogi augwaligo te tiwai nogi yai, Godigo Usa Ela Muani Pesage dao, wali. Tama te buku asęani bidi bidali sogo te we bidi augwaligo te tiwai nogi me udalio.
1CH 13:12 Tama Devit te Genuai Bidide wi ebaso te tama po wali, “Magi elama mu eno te Godigo Dąų Wali Bomai Po Muani Halobage ena dali te buluba sela paibawe?”
1CH 13:13 Tama tialima, Devitgo te halobage te Devit agai taun, te Jerusalemba sela pabeo. Menio. Agai te Jerusalemba pabo sunumi tagalama, te Dąų Wali Bomai Po Muani Halobage te bidi Obetidomgo beba mugi pali, te Get taun bidi me deli dao.
1CH 13:14 Tama te Dąų Wali Bomai Po Muani Halobage te bidi Obetidomgo bede munalubadi te polua sela bidali. Te tiali sogo Genuai Bidigo te Obetidom te aga we wai augwaliba wiegi yai sę ilama, te augwa tididali nai doado bage wiegi yai usu mu ilalio.
1CH 14:1 Te king Hiram te taun Tair bidigo te agai gavman ofisa bidi meba te Devitba tagala palali. Tama me agai te ni bǫ tigi dabe me te kapenda bidi dabe dali, te masigigo be nigibo sę yabo bidi dabe me tagala palali, te augwaligo king Devitgo genuai wiegi yai be sę emainogo yai dao.
1CH 14:2 Devit agaba te sę dabe pedalubo sulama, tama agai te tama koneani, Genuai Bidigo digi aga te Israel king mu pedalumainu ilali homu yalio. Tama me agai koneai, Genuai Bidigo aga we bidi dabe tau sainu ebao homu yali, tama tiyu Genuai Bidigo te Israel tǫ kantri te wiegi yai mu pedalumainu ilalio.
1CH 14:3 Devit te Jerusalemde bidu agai te we meba salio, tama agai te wai dabe meba ame nanio.
1CH 14:4 Te agai ogwa dabe nogi e tama da, Samua, me Sobap, me Natan, me Solomon da,
1CH 14:5 tama Iphar, me Elisua, me Elpelet,
1CH 14:6 me Noga, me Nefek, me Jafia da,
1CH 14:7 tama me Elisama, me Beliada, me Elifelet dao.
1CH 14:8 Te Filistia dabe augwaligo te e tiwai po tama odali, te Israel dabego Devit te augwa king pedelali po obaso, te Filistia dabe hogodama, te boi hwįgi pelama, aga sainu yali. Tialima Devitgo te Filistia dabego te sę yainu ebo po odama, te agai aga ami bidi selama, te augwaliba boi hwįgi painu yalio.
1CH 14:9 Te Filistia dabe augwali te odogo bulu Refaimba dulama, tama augwaligo te bulude bidibo we bidi augwaliba dwai sę ilalio.
1CH 14:10 Tialima Devitgo Genuai Bidiba te tiwai hanalu wali, “Nago homugo eno te Filistia dabe augwaliba boi hwįgi homu eba agawe, ma meniwe? Te ena pobaso da, teda nago ena tau siyu, te augwali aiyaba elalumainu yaibawe, ma meniwe?” wali. Tama Genuai Bidigo te tiwai po agaba wei ponani, “Awe, nage pao. Te eno augwali nago nogoba munama, te nago augwali aiyaba elalueibao,” te po wai dao.
1CH 14:11 Tialima Devit dali, aga ami bidi dabe dali, augwaligo te Filistia dabe dali hwįgi pelama, te augwali aiyaba elaluai. Te agai te tiwai po wali, “God te bomai wę tiwai asama, te eno nogode agai eno boi bidi hani dabe togolalio,” wali. Tama augwaligo te bulu nogi te tiwai wali, Genuai Bidigo Te Hani Si Togolobo Dao, walio.
1CH 14:12 Te Filistia dabe augwali wi peyu, te augwa tibo god taga palio. Tama Devitgo te tama po aga ami bidi dabeba obaso, te augwaligo te tibo god dabe isiba ulai dao.
1CH 14:13 Tialima nosali te Filistia dabe te odogo bulu Refaimba ma aselama, te augwaligo dwai sę te we bidi augwaliba ma yagasalio.
1CH 14:14 Tama Devitgo Godiba te tiwai po hanalu wai, “Eno magi sę yagawe?” Tama Godigo te tiwai po wei ponani, “Dagego augwaliba boi hwįgi pao, tialima dage augwali gesabidi dolo mu me pigio. Menio. Te dage augwali tudi badu pelama, te augwaliba hwįainu te ni balsam sili dolalubo pesagede te hwįabo sisi elaluao.
1CH 14:15 Tama dagego te bidi dabe augwali te ni abude bilibo sela wabo tiwai odaibao. Tialima dagego koneaibao, ena digi eno te Filistia dabe dali hwįainu polasa paibao. Tama dagego te sela wabo odobo sogo, te dage udayu, te augwaliba boi hwįgi pao,” te po wali.
1CH 14:16 Tialima Devitgo te Godigo po wali pelama, te Israel augwaligo te Filistia dabe pobelama, te augwali dolali, te taun Gibeonde gagalasa pali, te taun Geserba usu nigi palio.
1CH 14:17 Te tigidali bulu tǫ kantri we bidigo Devitgo te tama sę yali po odama, te augwaligo Devitba genuai nogi manio, tama Genuai Bidigo digi te augwali Devitde wi emainu ilai dao.
1CH 15:1 Te Devitgo aga be dabe digi te Jerusalemde sę yani, te Devitgo Taun dao. Tama me aga te Godigo Dąų Wali Bomai Po Muani Halobage muabo pesage me deli sisi elama, tama augwa te pesagede sel ugwa be sę yai dao.
1CH 15:2 Tialima Devitgo te tama po walio, “Genuai Bidigo te Livai dabe dąį ilama, te Dąų Wali Bomai Po Muani Halobage tolabo bage dąį ilama, te agai sę sesemane sogo emainogo yali. Tama tibaso, te Livai dabego augwaligo naga te tedali halobage tolobo sę emainu dąį ilai dao,” wali.
1CH 15:3 Tama Devitgo te Israel dabe tigidali te Jerusalemba sisinagasomainu i wali, te augwali pelama, te Dąų Wali Bomai Po Munolubo Halobage te agai sisi ilali pesageba sela asomainu yalio.
1CH 15:4 Tama agai te pris dabe sisinani, te Arongo hani dabe, tama agai te gasa Livai dabe sisinani. Te Livai dabe nogi te tama da,
1CH 15:5 Uriel, te Kohat hanigo tobolu bidi, te gasa 120 aga hani bidi dali,
1CH 15:6 tama Asaia, te Merari hani tobolu bidi, te aga hani bidi 220 bidi dali,
1CH 15:7 tama Joel, te Gerson hani tobolu bidi me, te aga hani bidi 130 bidi dali me,
1CH 15:8 tama Semaia, te Elisafan hani tobolu bidi me, te aga hani bidi 200 bidi dali sisinani,
1CH 15:9 tama Eliel, te Hebron hanide tobolu bidi, te aga hani bidi 80 bidi dali sisinani,
1CH 15:10 te Abinadap, te Usiel hanide tobolu bidi bidali, te aga hani bidi 112 bidi dali sisinagasalio.
1CH 15:11 Tialima Devitgo te pris Sadok me pris Abiatar i obadi, te Livai hani dabego tobolu bidi me i walio, te bidi Uriel, me Asaia, me Joel, me Semaia, me Eliel, me Aminadap, te tama tobolu bidi dabe i wai dao.
1CH 15:12 Tama agai te tiwai po augwaliba wali, “Dage te Livai deli hani dabede tobolu bidi dabe, dage dali, te duga hani dali, te Genuai Bidi gedude duga digi wiegi yai pedalubo kolesaga wali pao. Tama dagego te God, te da Israelgo Genuai Bidigo, Dąų Wali Bomai Po Muani Halobage sela asobaso usu yaibao, eno te sisi ilali pesage te buluba sesao,” walio.
1CH 15:13 “Te hasia dago sigi pali sogo te dage da dali me pisąwai. Te God, Genuai Bidigo, te dabolo dene mabo sę yali, magi baso meni, dago te dolo yai kolesaga wali pelama te Godiba bolo te dago mena kolesaga yabo te hanalubeo,” wali
1CH 15:14 Tialima te pris dabe me Livai dabe te augwa digi God gedude wiegi yai pedalubo kolesaga yalio, te augwa te Israelgo Genuai Bidi Godigo te Dąų Wali Bomai Po Muani Halobage sigi painu tama tilama, te sesai dao.
1CH 15:15 Te Livai hani dabego te halobage tolainu yali sogo, augwaligo te halobage tolobo kolesaga wali pali, te polobadu Genuai Bidigo Mosesbolo wali po tiwai gilama yali. Augwaligo te halobage ni palali ni te augwa nagede manama, te halobage tolasa pai dao.
1CH 15:16 Tama Devitgo te Livai hani tobolu bidi dabeba walama, te tęąbi weyu musik te halobage sela asobo sogo wabo Livai hani bidi meba dąį ilao po wali. Augwaligo te gita dabe me te brasgo nigai plet pou dabe me te elibo sę eyu, te musik hwą genuai u omainu ilama, te augwaligo wiegi yai homu pemene ebo sę hania ola mao wai.
1CH 15:17 Tialima te tobolu bidi dabego te bidi Heman dąį ilali, te Joelgo ogwa, me aga hani bidi te Asap, te Berekiago ogwa. Tama me augwaligo te Etan dąį ilali, te Kusaiago ogwa te Merari hani bidi. Te bidi dabego te tęąbi eyu te brasgo nigai plet pou elibo sę eyu yalio. Te tobolu bidi dabego te bidi sela tau sabo gasa bidi dabe me dąį ilali. Te Livai dabego te gita elebo sę elaluai. Te augwali mebago te gasa tobage gita me elali, te aga dogoni ugwaba ebo da. Te bidi dabe nogi da e tama, Sekaraia, me Jasiel, me Semiramot, me Jehiel, me Uni, me Eliap, me Masea, me Benaia da. Te mebago te gasa tobage gita me elali, te dogoni aiyaba dulalio. Te bidi dabe nogi e tiwai da, Matitia, me Elifelehu, me Miknea, me Obetidom, me Jeiel, me Asaia. Obetidom me Jeiel te bidi si te Godigo be sunumi tonalubo bidi hani dabede te sę ebo bidi me si dao.
1CH 15:22 Augwaligo te bidi Kenaia dąį ilama te halobage sela asobo sę tigidali tonaluali, magi baso meni, agai te tobage sę ebo mu koneai bidi. Kenaiago te tobage sę sesemane sogo tonalubo sę ebo bidi bidai.
1CH 15:23 Tama augwaligo te Berekia, me Elkana, me Obetidom, me Jehia, te me si me si bidigo te Dąų Wali Bomai Po Muani Halobage tonaluabo bidi dąį ilali. Tama augwaligo te halobage tolasa asobodu polasa pabo pris meba dąį ilama, te bu wabo nai biugel bu ola pomainu yali. Te pris dabe nogi e dao, Sebania, me Josafat, me Netanel, me Amasai, me Sekaraia, me Benaia, me Elieser dao.
1CH 15:25 Augwali sisi ela silibo si da, teda Devit dali, te Israel tobolu bidi dabe me te bidi sese umabo 1,000 ami tonalubo ofisa bidi dabe dali, augwali te Obetidomgo beba pelama, te Genuai Bidigo Dąų Wali Bomai Po Munalubo Halobage selama, te Jerusalemba sela palio. Tama te we bidi dabe augwali wiegi yai homu pemene mu yai dao.
1CH 15:26 Tama te Livai dabego te Godigo Dąų Wali Bomai Po Munalubo Halobage tolasa pabo sogo, te Godigo augwali tau salio. Tibaso, augwaligo te kibu bulmakau omai a naga olama si badi, te sipsip kibu omai me a naga olama si te Godiba ofa yai dao.
1CH 15:27 Devitgo te bobobage aiyaba tagalalubo ugwa augwaligo te gasa sawi yai nami ugwago nigai ugwa au yalio. Te Dąų Wali Bomai Po Munalubo Halobage tolobo pris dabe me te musik wabo prisgo me, te Kenaia, te sę tonalubo bidi, tigidaligo te Devitgo gudali ugwa au yali tiwai tobage au naga yalio. Te bobage ugwa daide ugwadu, Devitgo te prisgo gudubo nami ugwa me deli te muani, te augwa gasa sawi yai nami ugwago nigai dao.
1CH 15:28 Tama tiali kolesagade te Genuai Bidigo Dąų Wali Bomai Po Muani Halobage te tigidali Israelgo te Jerusalemba selasa pai. Augwa wiegi yai homu pemene elama i bomonama weyu, tama augwa te tobage biugel bu weyu, te brasgo nigali pletba elu, te tobage gita dabe me elali, tama te musik eliyu kulukulu genuai mu pedelalio.
1CH 15:29 Tama augwaligo te halobage te Devitgo Taun tomoba sesali sogo, Mikal, te Solgo wegi, te be habu dogwa sali windodu dolalu te augwali suali. Tama agai te aga bidi king Devit suali, te aga wiegi yai pemene dali te tęąbi eyu sasamano bilali, tama Mikalgo Devitgo te tama tebo kolesaga aga hagela eyu, tama aga dali dwai haliga sębę yai dao.
1CH 16:1 Tialima augwaligo te Godigo Dąų Wali Bomai Po Munalubo Halobage muaiba olama Devitgo te sę yani sel ugwa be tomoba te Dąų Wali Bomai Po Muani Halobage teba muanio. Tama augwa te isiba tigidali ulama domainu ebo ofa dabe ebadi, te God dali deli haliga pedalubo ofa me yalio.
1CH 16:2 Devitgo te ofa dabe ela silama da, teda agai te tiwai po te we bidi dabeba wali, “Eno homugo te Genuai Bidigo wiegi yai sę dagebolo emainao,” wali.
1CH 16:3 Devitgo te tigidali we bidiba nai mani. Tigidali we bidi deli delibolo te bret deli selama, te augwa te iside ulali bulmakau kibu mi dali mena mena pelama, te olali wit meba dali mawai dao.
1CH 16:4 Tama nosali Devitgo te Livai meba dąį ilali, te Dąų Wali Bomai Po Munalubo Halobage pąba pelama, Godiba lotu wabo bidi meba dąį ilali, te Israelgo Genuai Bidi da. Augwa te Godiba buba hwi olama, gedu haluasa po weyu, usu da po olama, te agai nogi ugwaba somainao wali.
1CH 16:5 Devitgo te hanigo tobolu bidi te Asap dąį ilali, te Sekaraia te Asap tudi badu daganalubo si wali bidi da. Te gasa bidi meba nogi e tama da, Jeiel, me Semiramot, me Jehiel, me Matitia, me Eliap, me Benaia, me Obetidom, me gasa Jeiel da. Te bidi dabego sę da te gita elebo sę elaluali. Te Asapgo te brasgo nigali pou pletba elebo sę yai dao.
1CH 16:6 Tama Devitgo te pris Benaia me pris Jahasiel te pris si dąį ilama, te Dąų Wali Bomai Po Munalubo Halobage pageba pelama te biugel bu omainu yai dao.
1CH 16:7 Te hasia sogo mu tama Devitgo te Asapgo haniba te sę mayu, te Genuai Bidiba usu da po wabo tęąbi po omainu yai dao.
1CH 16:8 Te Asapgo hani augwaligo te tęąbi yalio, “Dago Genuai Bidi nogi olama, agaba i weyu te agabolo usu da po wao. Te dago po hanilama pusao, te tigidali we bidi haniba te agai yali genuai sę dabe po pusao.
1CH 16:9 Dago tęąbi po dabe agaba pemene elama weyu, te agai nogi ugwaba sao. Te agai wiegi wiegi yai sę dabe yali po dago hanilama pusubaso usu dao.
1CH 16:10 Dago wiegi yai pemene elama, te agaba genuai nogi mao. Te Genuai Bidi pageba pabo bidi dabe augwali te wiegi yai pemene mu emainao.
1CH 16:11 Sesemane sogo dago te Genuai Bidi pageba pelama, te agabolo hanalu te da tau selama bomo momainao.
1CH 16:12 Dage te wąį nǫų Abrahamgo wai dabe, aga te Genuai Bidigo sę bidi, dage Jekopgo hani, dage we bidi dabe Genuai Bidi aga da olama sa muani, dagego homu kone ma palao, te Genuai Bidigo bomai sę dabe te bidigo isąwai noma sabo sę agai yalio. Te dagego homu kone palao, agai yabo sę dabe te dwai bidi dabeba te dwai dene mawaibao.
1CH 16:14 Genuai Bidi aga dago God tama da. Agai e tǫde we bidi tigidali tonalubao.
1CH 16:15 Agai bomai po dąų wali kontrak me deli da dali yali, te dąų wali po te sesemane sogo elalueibao. Tama sesemane sogo agai te dąų wali poba homu kone paludubo dao.
1CH 16:16 Genuai Bidigo te dąų wali bomai po Abraham dali yai. Tama agai bomai po bodolu selama dąų wali po Aisak dali weyu te dąų wali bomai po wali pao wali.
1CH 16:17 Agai Jekopba te po ma wali, aga te Israel dabe wąį nǫų da, te agade eno te dąų wali bomai po sesemane elalua paibao.
1CH 16:18 Genuai Bidigo te tama po wali, ‘Eno te Kenan tǫ nageba mawaibao, tama te tǫ te nago wąį nǫų dabe augwali hani wai dabego tǫ elalueibao,’ wali.
1CH 16:19 Polobadu Israel dabe augwali te dwasianu hani mu bidali, tama augwali te bulu wau bilibo bidi te tǫ meni yai bidi tiwai bidalio.
1CH 16:20 Augwali te gasa hani dabego tǫde subigila bilalualio.
1CH 16:21 Tialima te Genuai Bidigo gasa hani bidi dabe mebago dage aiyaba elalumainu me ilibeo. Agai augwali tau siyu te augwaliba dwai sę yainu ebo king dabe agai wado po wali.
1CH 16:22 Agai te tiwai po te king dabeba walali, ‘Eno te we bidi augwali dąį ilali, te eno sę emainu, tama dagego augwaliba te dwai sę munu me igio. Te dagego eno po pusubo sę ebo profet bidi dabeba dwai sę me elamo dao,’ wali.
1CH 16:23 Dage tigidali tǫde we bidi, dagego tęąbi po te Genuai Bidiba wao. Te tigidali side agai dage ma dobola sali po hanilama pusao.
1CH 16:24 Dagego te tigidali we bidi haniba te agai genuai nogi po dagego te po walao, te agai wiegi wiegi yai sę dabe yai dao.
1CH 16:25 Genuai Bidi te polalubo bidi mu da, tama dago agai nogi ugwaba mu sinao. Te gasa god dabe te Genuai Bidi tiwai me elalubeo. Tama tibaso, da te Genuai Bidi dologoba pelama bidinao.
1CH 16:26 Magi baso meni, te gasa hani we bidi augwaligo god dabe augwali te tibo god naga da. Tialima Genuai Bidigo naga te dagalu nigai dao.
1CH 16:27 Genuai Bidi aga bede bidibao, te aga genuai nogi elalu te king bidibao. Aga te tigidali bomo elalubo page bidi, te tigidali wiegi yai pemene ebo kolesaga me te tigidali sawi yai nai page bidi dao.
1CH 16:28 Dage tigidali hani we bidi, dagego wiegi yai homu pemene Genuai Bidiba yao. Dage te agai genuai nogi me bomode wiegi yai pemene yao.
1CH 16:29 Genuai Bidi polalubao, tama tialima dagego agai genuai nogi ugwaba sao. Dagego te ofa sela asu, agai beba asiąo. Genuai Bidigo kolesaga te wiegi yai doloba pai mu elalubao, te kolesaga aga wiegi yai au tiwai elalubao. Tama tialima dagego te homu koneama te agaba lotu po wao.
1CH 16:30 Dage tigidali tǫde we bidi da, dage agade wi elama didibili yao. Genuai Bidigo te tǫ dili ilama elalubao, tama tǫ te kikilasa me biligobeo.
1CH 16:31 Tǫ me dagalu, dage si homu pemene elama te we bidi hani dabeba te tiwai po walao, ‘Genuai Bidi king bidibao,’ te po wao.
1CH 16:32 Tamu ąį, nage pemene elama te ąį u genuai wao. Te dage tigidali nai dabe te tamu ąį tomode bidibao, dagego me wiegi yai pemene yao. Dage gi dabe, dage te gide elalubo nai dabe, dage tigidaligo wiegi yai homu pemene yao.
1CH 16:33 Genuai Bidi asama te king bidu, te tigidali tǫ habu badu tonalueibao. Tama tebo sogo te genuai bulu tǫ tomode te tigidali nigo te wiegi yai pemene ebo tęąbi po wabo dao.
1CH 16:34 Dago Genuai Bidiba usu da po wao, magi baso meni, agai kolesaga te wiegi yai mu da, tama sesemane sogo agai da godolo homu mu ebo dao.
1CH 16:35 Tama dago te tiwai po me wainao, ‘Te we bidi dabe ma dobola sabo God, megi nago da ma sao. Da sisinama te gasa hani dabego nogode ma sao. Tama tibaso dago nago genuai nogide homu kone palama, te nageba gedu haluasa po weyu usu da po waibao. Tama dago wiegi yai homu pemene eyu te nago nogi ugwaba saibao.’
1CH 16:36 Dago God nogi ugwaba sinao, Israelgo Genuai Bidi da, megi me tigidali sogo nosali, me bidada peyu bidada paiba.” Te Asapgo hani augwaligo te tęąbi po ola silama da, teda te we bidi augwaligo te po wali, “Mu dao, te sę mu pedalumainao. Te Genuai Bidigo nogi ugwanu sao,” wali.
1CH 16:37 Devitgo Asap aga deli hani dabeba dali te sę mayu, te Genuai Bidigo Dąų Wali Bomai Po Muani Halobage pagede bidao wali, te deli deli side lotu wabo tonalumainu yali. Augwa te sę sesemane sogo tonalumainu yai dao.
1CH 16:38 Tama Devitgo Obetidomba sę mani, te Jedutungo ogwa, te aga hani dabe te 68 bidi dabe, augwaliba dali te sę mawai, te Asapgo hani tau somainu yali. Tama Obetidom dali te Hosa siba te Dąų Wali Bomai Po Munalubo Halobage munalubo sel ugwa be tonalubo sę mawai dao.
1CH 16:39 Tama Devitgo te pris Sadok aga ama dali dąį ilali, te gasa pris dabe, te Gibeon taunde elalubo sel ugwa bede lotu wabo sę tonalumainu yalio.
1CH 16:40 Tigidali side kigamu me pio augwaligo te isiba tigidali ulama dela silibo ofa yao wali, te Gibeonde elalubo altade te sę yali. Augwaligo te ofa ebo bomai po wali piyąo te sę Genuai Bidigo Israel augwaliba mawai sę dao.
1CH 16:41 Tama Devitgo Heman me Jedutun dali te Livai meba te Genuai Bidiba tęąbi weyu usu da po wabo bidi meba agai dąį ilalio. Te tęąbi nogi e tiwai wali, “Sesemane sogo Genuai Bidigo da godolo umagi mu ebo dao.”
1CH 16:42 Heman de Jedutun sigo te biugel eliyu, te brasgo nigai pletba elali, te gasagi yai musik dabe te lotu tęąbi wabo sogo elalio. Tama te Jedutungo ogwa dabego te Gibeonde elaluali Genuai Bidigo sel ugwa be sunumi dabe tonalubo sę yalio.
1CH 16:43 Devitgo po silibo si da, teda te tigidali we bidi dabe augwa buluba pela silalio. Tama Devit aga beba ma peyu, te Godiba gedu haluasa po hanalu te aga we wai dabeba wiegi yai sę bugagia ilimainu hanalu wai dao.
1CH 17:1 King Devit aga beba pelama bidigi pai elalubadi, tama nosali aga te Godigo po pusa mani bidi profet Natanbolo e tiwai wali, “Ena te genuai wiegi yai be me deli augwaligo te dwagi yai ni bǫgo sęwai bede bidibao, tiali goli te Genuai Bidigo Dąų Wali Bomai Po Halobage te sel ugwa olo bede munalubao. Te dolo meni da homu ebao,” wali.
1CH 17:2 Tialima te profet Natango Devitba te tiwai po walio, “God nage dali bidibao, tibaso nago mena sę me deli yabo homu ebaso, te sę yao,” wali.
1CH 17:3 Tialima te sogo hulide digi Godigo Natanbolo te tiwai po wali,
1CH 17:4 “Nage eno sę bidi Devitba pelama, tama nago eno e po agabolo mao, ‘Devit, nage eno te be sę yabo bidi da olama, sa muani bidi nage menio,’ te po Devitbolo wao.
1CH 17:5 ‘Ena te genuai bede bidibeo. Menio. Eno te Israel dabe te Isipde ma selama odasa asali sogo, ena te sel ugwa bede naga bidali. Te tigidali badu ena peyu asu yali, ena te sel ugwa bede naga bidai dao.
1CH 17:6 Te dage Israel dabe dali te hauwa pedai badu bilalio, tama eno te dageba dąį ilali tobolu bidi dabe me deli augwaliba hanalu eno te tiwai po me wabeo, “Magi baso nago eno be te wiegi yai ni bǫ namego sę ebe dawe?” eno te po wabe.’ Te po Devitbolo pusao,” Genuai Bidigo te Natanbolo wali.
1CH 17:7 Tama Genuai Bidigo po ma daganu Natanbolo tama po wali, “Nago te Devitbolo e po pusao, ‘Ena Tigidali Bomo Elalubo Genuai Bidigo, eno nage te kibu sipsip tonalubo bidi bidali sogo selama, tama eno nage te ena we bidi Israel dabego tobolu bidi pedalumainu sa muyu dąį ilai dao.
1CH 17:8 Ena te nage mena badu pabo tigidali usu nama bidai. Tama nago boi bidi dabe eno aiyaba bomo kidilai madi te nosali nago augwali aiyaba elaluali. Te eno nageba genuai nogi mawaibao, te gasa tǫ kantri dabego polalubo bomai bidi dabego genuai nogi tiwai elalueibao.
1CH 17:9 Eno te dage Israel dabego tǫ me deli dąį ilali elalubao, te ena we bidi dabe, tama eno dage duga te tǫde bugagia bidimainu yalio. Tama te dwai sę ebo bidi dabego dageba dwai sę munu ma me egobeo. Te wąį nǫų dabego te tǫ sabode gagalama, te eno dagego tobolu bidi dąį ilibo sogoba usu nama te boi bidi dabego dage dolali sę teba dąį yagasaibao. Tialima megi da, eno augwali palibaso da, te augwaligo dage munu ma dolisąyu, te dagego tǫ kantri me dologobeo. Te eno nago hani dabe bidalumainu sula tagalama, te augwaligo nago wąį nǫų dabe dalomainu yaibao,’ te po Devitbolo wao,” wali.
1CH 17:11 “‘Te nage isama augwaligo nage pubalobo sogo da, teda eno nago ogwa me deli te king pedalumainu yaibao. Te aga bomai king pedelama, te eno magi nai me deligo aga aiyaba elalumainu me egobeo.
1CH 17:12 Te kingo tama te eno be sęwaibao. Te eno agai hani bidide naga te sesemane sogo king pedalumainu yaibao po walio.
1CH 17:13 Tama ena te aga aya bidu, te aga eno ogwa bidaibao. Tama eno agaba te olo mu tau sabo wiegi yai kolesaga sesemane sogo idueibao. Eno aga tudiba me mugobeo, te nage king bidisiąbadi te bidali kingba eno te yali kolesaga tiwai me egobeo. Menio.
1CH 17:14 Te eno agai hani bidi dabede te king sesemane pedalumainu ilaibao, tama augwaligo eno te we bidi hani dabe tonalumainu yaibao po wai dao,’ te po Devitbolo pusao,” Genuai Bidigo Natanbolo te po wai.
1CH 17:15 Tama Natango Genuai Bidigo te po dabe wabo odama, tialima aga pelama, te Genuai Bidigo agabolo te ola mani sę po tigidali te Devitba waligi palio.
1CH 17:16 King Devitgo Godigo te po dabe wali odobo si da, tialima aga te Genuai Bidigo sel ugwa be tomoba pelama te Genuai Bidigo geduba duagi pelama, te tiwai gedu haluasa po wali, “God, Genuai Bidi, nago te wiegi yai kolesaga hauwa enabolo yalio. Tialima ena dali te eno we wai da hani sibi, da te wiegi yai mu bidibaso nago te tiwai sę ebeo.
1CH 17:17 God, nago te wiegi yai kolesaga dabe enabolo yali te usu isąbo homu ebaso, te nago gasa wiegi yai sę megi enabolo ma ebao. Te nago eno wąį nǫų dabe dali yabo sę po pusalio. God, Genuai Bidi, megi digi nago ena te genuai nogi elalubo bidi tonobo tiwai elama,
1CH 17:18 te nago ena nogi ugwaba sobao. Tama tialima, eno mena po nagebolo wagawe? Ena naga sę bidi, te nago ena koneai dao.
1CH 17:19 Nago ena wiegi yai bugagia ilabo homu ebaso, te naga homugo digi nago te genuai sę dabe ebao. Te megi da, nago te tama genuai sę dabe yabo po enabolo pusali dao.
1CH 17:20 Genuai Bidi, nage tiwai deli me menio. Naga duba deli te God mu da, te dago dena wąį nǫų dabego pedauwalide odali tiwai dao.
1CH 17:21 Nago da Israel dabe te Isipde kalabus bidibadi ma selama, nago da te naga hani we bidi pedalumainu ilali. Tama tialima, te gasa hani bage te naga hani we bidi dabe da tiwai me elalubeo. Tama nago da tau sabo te wiegi yai genuai mu te nago we bidi dabe da te tǫ kantriba sabalubo sogo ebao. Nago te gasa hani we bidi dabe ela gudulama, te dago augwaligo tǫ sagasalio. Tama tibaso, te tigidali bulu tǫ kantrigo te nageba genuai nogi mabo dao.
1CH 17:22 Genuai Bidio, nago da Israel dabe te naga we bidi hani mu pedalumainu elama, tama da te tiwai sesemane sogo bidaibao. Te naga digi nage dago God pedelama bidibao,” wali.
1CH 17:23 “Genuai Bidio, eno homugo nago te enabolo me eno haniba te bomai po dąų walu te yaibao wali tiwai sę te tiwai sę nago sesemane sogo yao.
1CH 17:24 Te we bidi dabe augwaligo nago te sę ebo sulama, te sesemane augwaligo nageba homu kone palu, te nageba genuai nogi mawaibao. Augwa te tama po waibao, ‘Tigidali Bomo Elalubo Genuai Bidi, te Israelgo God, aga duba deli mu te Israel augwaligo God da.’ Tama nago eno hani bidi dabe delide naga te king sesemane sogo pedaludumainu yaibao te po wai dao.
1CH 17:25 Nage eno God, nago enabolo te tama tiwai ola mani, nago te eno wąį nǫų hani dabe te bomo sesemane elaludumainu ilaibao. Tibaso ena, nago sę bidi, eno te tama gedu haluasa po nageba wabo wi me egobeo.
1CH 17:26 Genuai Bidi, naga digi nage God, tama nago te wiegi yai po ena dali dąų wai dao.
1CH 17:27 Tama tialima eno homugo nago eno haniba wiegi yai sę bugagia yao, tama augwali nage dologode sesemane sogo bugagia bidimainao. Nago eno hani dabe augwaliba te dwagi yai sę yaibao po wali, tibaso eno koneani, te nago sesemane sogo augwali bugagia wiegi yai ilaibao,” Devitgo te gedu haluasa po wai dao.
1CH 18:1 Me sogo nosali, Devit dali aga ami bidi dabego dali te Filistia dabeba boi hwįgi pali. Augwaligo te Filistia dabe aiyaba elaluama, tama augwaligo te taun Get dali, te pąde elaluali bulu dabe dali sai dao.
1CH 18:2 Tama nosali, Devit dali, te aga ami bidi dabego dali te Moap dabeba boi hwįgi pelama, augwali me aiyaba elaluai. Tama te Moap dabe aga dologode bidiyu, te agaba takis mone madu geai dao.
1CH 18:3 Tama nosali, Devit aga ami bidi dabe dali augwa te Hadateser dali boi hwįgi pali, aga te Soba king bidi da. Soba te Siria hani dabego tǫ kantri me deli da, tama te tǫ kanrti Hamat pąde elaluai. Te sogo Hadatesergo aga ami bidi dabe selama, te wę Yufretis u badu pedai badu pabo sę yali, te boi hwįnama te tǫ sai hagede yali. Tama Devitgo hanigo augwali dali deliba gesabi unulama,
1CH 18:4 te boi hwįani digi augwali aiyaba elaluali. Tama Devitgo te Hadatesergo ami bidi dabe umabo salio. Agai te 20,000 ami bidi sobadi, te hosde dugulama hwįbo ami bidi umabo te 7,000 bidi sali. Tama Devitgo te hwįbo karis bidi sese umabo te 1,000 sobadi, te hwįbo karis kekebo hos 100 salio. Tialima Devitgo te gasa hos dabe sągą meba dolai madi te augwali bomona pabo usu isąwai.
1CH 18:5 Te sogo te Siria dabe te bulu taun Damaskusde bidali, augwali hogodama peyu, te king Hadateser tau selama te boi hwįani. Tialima, Devit te aga ami bidi dali augwaligo te Siria ami bidi umabo te 22,000 bidi ela muanio.
1CH 18:6 Tama Devitgo aga ami bidi hani dabe meba te tǫ kantri Siriade muani, te augwali tonalu, te augwaligo boi ma hwįdali weyu yalio. Te Siria dabe aga dologode bidu, te Devitba takis mone manio. Te tigidali habuba Devitgo boi hwįgi pabode, Genuai Bidigo aga tau sobaso, te agai bomo ugwanu mu yai dao.
1CH 18:7 Tama Devitgo suali, te king Hadatesergo ami polalubo ofisa dabego te hwįbo sabele dabe augwa te golgo nigai sela asali. Tama agai te wiegi yai sabele dabe selama, tama augwali te Jerusalemba odasa palio.
1CH 18:8 Tama me, agai te bras hauwa te taun Tiphat me taun Kunde sali, te taun si te Hadatesergo taun da. Nosali, Solomongo te bras dabego te Godigo tempel bede muabo nai dabe nigainu salio, te genuai ąį tank me te bobobage pos si, te dis dabe me plet dabe, te tama nai nigalio.
1CH 18:9 King Toi te tǫ kantri Hamat bidigo odali, te Devitgo te king Hadatesergo ami bidi dabe aiyaba elaluali po odai, te Soba taun king dao.
1CH 18:10 Tama tialima, Toigo aga ogwa Hadoram tagala palalio, aga gasa nogi me Joram, te king Devit bidibo madiba pelama, Devitgo te king Hadateser aiyaba elaluali po obaso te agaba wiegi yai homu pemene ebo weyu siade da po wagi pali. Tama me, Toigo te Devitba wiegi yai homu ilibo nai tolali. Augwaligo te wiegi yai homu ebo ilibo nai te gol me silva me brasgo nigai. King Toigo te Devitgo te king Hadateser aiyaba elalualide wiegi yai homu pemene yali, magi baso meni, hauwa sogo Hadatesergo Toi dali boi bidi yai dao.
1CH 18:11 Devitgo te Toigo wiegi yai homu eyu mani nai dabe agai te Genuai Bidiba dąį ilama manio. Agai te tobage deli kolesaga te agai gasa boi bidi dabe elaluama sali silva me gol te Genuai Bidiba naga mawai, te Idom dabe, me Moap dabe, me Amon dabe, me Filistia dabe, me Amalek dabe, te hani augwali Devitgo aiyaba elaluai dao.
1CH 18:12 Tama nosali, Abisai, te Seruiago ogwago, te Devitgo ami bidi dabe selama, te Tamu Hauwa Elalubo Odogo Bulude bidibo Idom dabeba boi hwįgi pali. Tama augwaligo te bidi sese umabo te 18,000 Idom bidi dabe ela muai dao.
1CH 18:13 Tama Abisaigo te Idom bidi hani dabe tonaluabo ami bidi dabe meba muani, tama te Idom dabe augwali Devit dologode bidalio. Te Devitgo boi hwįgi pabo tigidali habuba, te Genuai Bidigo aga tau sobaso, aga ugwanu igulama elaluai dao.
1CH 18:14 Devitgo te tigidali Israel habu badu tonalu, te wiegi yai doloba pai kolesaga tigidali we bidiba yalio.
1CH 18:15 Joap, te Seruiago ogwa, te ami bidi dabego augwa polalubo ofisa bidi bidali. Te Jehosafat, te Ahilutgo ogwa, te polalubo kuskus bidi bidiyu, te gavmango buku dabe tonalubo bidi bidai dao.
1CH 18:16 Te Sadok dali Ahimelek si, augwali si pris bidali. Sadok te Ahitupgo ogwa. Te Ahimelek te Abiatargo ogwa. Tama Savsa te kingo sę ebo kuskus bidi bidai.
1CH 18:17 Te Benaia, te Jehoiadago ogwa, agai te king Devit seselalubo ami dabe tonalubo ofisa bidali, te augwali Keret me Pelet hani dabe da. Tama te Devitgo ogwa dabe augwali te gavmande genuai bidi naga bidai dao.
1CH 19:1 Te Devit te bomai king pedelai madi, tama nosali Nahas te Amon dabego king isama, te aga ogwa Hanun, te king pedelai dao.
1CH 19:2 Tama Devitgo te tiwai po wali, “Eno te Hanunba wiegi yai kolesaga yaibao, magi baso meni, aga aya Nahasgo te ena dali wiegi yai kolesaga yalio,” wali. Tibaso Devitgo te bidi meba tagala palama, te Hanunba wiegi yai homu yabo po wagi pabo bidi tagala palai. Tialima augwali te Hanunba sabaligi pabo side,
1CH 19:3 te tǫ kantri Amon tobolu bidi dabego te tiwai po Hanunba walali, “Nago homugo Devitgo te bidi dabe tagala palali te nago ayade wiegi yai po wagasu te genuai nogi magasu yali da homu eba, agawe? Mu menio. Te agai augwali tagala palali te dago tǫ pedai kantri bugagia susa bilimainu yali, tama nosali aga dali, te aga ami bidi dabe dali aselama, da dolainu yali dao,” wali.
1CH 19:4 Hanungo te po odama tama agai po obaso agai sę ebo bidi dabego te Devitgo tagala palali te hani bidi dabe pageabi elama, te augwaligo penane nisi me badu poa yalio. Tama me augwaligo gudali bobobage ugwa te togolama pęwadage ilali, te gasa bidi dabego augwaligo habu mi sulama hale yabo sę ilalio, tama tilama agai te bidi dabe tagala palalio.
1CH 19:5 Tialima te bidi dabe augwali hale mu ebaso, te augwa buluba ma begasa pabo hagela homu yalio. Hanungo te tama kolesaga Devit agai hani bidi dabeba yali po odali sogo, agai te tiwai po te bidi dabeba ola tolalio, “Dage te Jerusalemba polo asabo te moni homu igio. Menio. Dage te Jerikode bidalu, te dagego penane nisi ma holobo sogoba usu nao, tama nosali dage ma asiagameo,” te po wai dao.
1CH 19:6 Te Amon dabe augwaligo koneani, augwaligo te yali kolesagago Devitgo haliga dwai posolo mu ilali homu yai. Tama tibaso Hanun dali aga hani dabego te Mesopotemia dabeba, me te Siria dabe te tǫ kantri Makade bidali bidi haniba, me te tǫ pedai Soba te augwaliba te boi hwįbo karis dabe meba me ami bidi meba badi te aga tau somainu hanalu wali, te hos dabede dualama hwįbo ami bidi dabe me, te aga tau sao wali. Tama Hanungo te silva hauwa tolali, te aga sęgę te bidi sese umabo 35,000 kilogram usu dao, te kantriba tolali, te ami bidi dabe me te karis dabe dali abeliyu yalio.
1CH 19:7 Augwaligo Hanunba te boi hwįbo nai karis te bidi sese hauwa 32,000 manio. Tama me, te Maka taun king bidi aga ami dali asu, te Hanun tau sagasainu yali, tama augwa bidabo pesage te taun Medeba pąba sili nigilama bidagasalio. Te Amon ami bidi dabe me augwa te taun dabe tagalama, te augwali asama, te Israel dabe dali boi hwįainu sisi elaluai dao.
1CH 19:8 Devitgo odali, te Amon dabe augwaligo te ami bidi dabe sisinibo po odama, tama agai Joap dali, te Israel ami bidi dabe dali, te boi hwįgi pomainu tagala palalio.
1CH 19:9 Tialima te Amon dabe te taun Raba bagulali genuai obo sunumi pąde dolaluali, te augwaligo genuai taun da. Te Siria king ami bidi dabe aselama, te Amon dabe tau sagasali, te augwali te kala bulu badu dolaluali. Tama tigidaligo te Israel dabe dali boi hwįainu sisi elaluai dao.
1CH 19:10 Joapgo te boi bidi dabe sulama agai koneani, augwaligo te Israel dabeba si badu hwįainu elalubo koneanio. Tama agai te wiegi yai bomai ami dabe meba dąį ilama, tama augwali te kala bulu pesage badu dolalubo bage pąbadu wasilali. Tama aga digi augwali tonaluai dao.
1CH 19:11 Tama agai aga ama Abisai dąį ilali, te agai gasa ami bidi dabe tonalumainu yali, tama Abisaigo augwali te Amon dabe pąbadu wasilalio.
1CH 19:12 Tialima Joapgo Abisaibolo te tiwai po wali, “Te boi hwįbo hodolobo sogo nago suali te Siria dabego da aiyaba elaluabo homu ebaso da, teda dagego da tau sagasao. Me ma, te Amon dabego dage aiyaba elalueinu ebaso da, teda dago dage tau sagasaibao.
1CH 19:13 Dage wi me elamuo. Dago dena we bidi dabede me Godigo dabolo mani taun dabe homu kone palama, tama dago hwįbo bomo yao. Te mena sę Genuai Bidigo dabolo yabo sę te wiegi yai da homu ebaso da, teda agai te tama sę naga emainao,” Joapgo aga ama Abisaibolo te po wali.
1CH 19:14 Tialima Joap te aga ami dabe daligo boi hwįgi palima, te Siria dabe wi palio.
1CH 19:15 Te Amon dabego te Siria dabe wi pabo sulama, augwali me te Abisaigo hanide wi pelama, tama augwa taun genuai obo tomoba geme duala sigi pali. Tialima Joapgo aga ami bidi dabe selama, te Jerusalemba ma palio.
1CH 19:16 Te Siria dabe augwaligo te tiwai suali, augwaligo te boi hwįabo usu meni baso, te augwaligo bidi meba tagala palama, te Siria hani bidi dabe augwali te sia ge asobo badu te wę Yufretis elalubo madi teba sigi pelama, tama te Siria dabe aselama, augwali tau sagasomainu yalio. Tama Sobak te king Hadatesergo polalubo ofisa bidigo augwali tonaluali.
1CH 19:17 Devitgo te Siria dabe deliba sisinibo po odobaso, tama aga hogodama, te Israel ami dabe tigidali sisinama, tama augwali pelama, te wę Jordan nogelama, tama te Siria dabe bidibo pesage pąba sabolali. Te Israel dabe nani wasilama dolalu, tama Devitgo te Siria dabe dali hwįani. Te Siria dabego Israel dabe dali boi hwįanio.
1CH 19:18 Tialima te Israel dabego hwįbo bomo mu eyu, te Siria dabe pogasa palio. Tama Devit aga ami bidi dabego dali te bidi sese umabo bidi 7,000 ami bidi te karis dabede dolalu hwįbo bidi dabe elali, te meba ami bidi dabe te bidi sese umabo mu te 40,000 bidi ela muani. Tama augwaligo te Sobak me elalio, te Siria dabe augwa polalubo ofisa bidi dao.
1CH 19:19 Te Siria dabe te king Hadateser dologode bidali sogo, te suali, te tiwai te Israel dabego augwali aiyaba elaluai baso, augwaligo Devitba walama, te augwaligo Israel dabe augwali dali munu ma boi hwįgobeo po walio, tialima augwali te Devit dologode bidali. Te tudi badu nosali, te Siria dabego te Amon dabe tau selama, te Israel dabe augwaliba ma hwįbo hagela yai dao.
1CH 20:1 Tigidali kibu be deli delide, te kedau ebo silainu ebo sogo, te kingo augwa ami bidi dabe odasa pelama, te boi bidi dabe dali hwįgi pomainu yalio. Tialima te nosali kibu bede Devitgo te Siria dabe aiyaba elaluali, tama te kedau silainu ebo sogo, Joapgo te aga ami bidi dabe selama, te Amon dabeba boi hwįgi palio. Augwaligo hwįnama, te Amon dabe aiyaba elaluama, te taun Raba bagulali, te augwa genuai taun da. Tiali goli Devit te hwįbo madi pabeo. Aga te Jerusalemde bidali. Joap dali te Israel ami bidi dabe daligo te Amon dabe dali hwįbo bomo elama, te taun Raba selama tama mu dolai dao.
1CH 20:2 Tama Devit te taun Raba teba aselama, te kingo madi te Amon kingo tobolude sagasali. Te madi augwaligo te golgo nigali, te aga sęgę te 35 kilogram elaluai. Tama augwa te madi te gasa sawi yai wiegi yai masigi dabego au ilali. Tialima te Israel dabego te madi selama, te Devitgo toboluba muani. Tama me Devitgo te taunde mone hauwa sai dao.
1CH 20:3 Tama agai te taun Raba we bidi tigidali selama, tama augwali te so me baria me sigi hwą mayu, augwaligo sę emainu yalio. Agai te tobage deli tigi poai kolesaga te tǫ Amon taun we bidi dabebolo te gasa we bidi augwaliba tama sę yalio. Tama nosali, Devit dali te aga ami bidi hani dabe dali augwali te Jerusalemba ma pai dao.
1CH 20:4 Tialima te Filistia dabe dali Israel dabe dali si tomode te boi dala sai, te Geser taun pąde da. Te Israel me deli, te aga nogi Sibekai te Husa bulu bidigo, agai te moni dobo dwai bidi dabede te bidi me deli ela muani, aga nogi Sipai. Tama te Israel dabe augwaligo te Filistia dabe aiyaba elaluai dao.
1CH 20:5 Tama me sogo ma te Israel dabe augwaligo te Filistia dabe dali ma hwįani. Tama Elhanan, te Jairgo ogwago, te Lami ela muani, te Goliatgo ama te Get taun bidi da. Te Lamigo sesemone ene te genuai mu te ugwa hobolobo masin lum ain dili tiwai dao.
1CH 20:6 Tama nosali te Get taunde boi me ma dala selama hwįani. Te moni dobo dwai bidi dabede te dobo dwai bidi me deli bidali, te agai dili bobage ugwanu mu holai bidi. Aga nogo deli delide te nogo a naga me deli tama elaluai, te agai sągą me te tiwai elaluali. Agai dani dabe te 24 dao.
1CH 20:7 Te bidigo te Israel dabe augwaliba posobo po wali, tama te Jonatan, te Samago ogwa, te Devitgo amago ogwago, aga ela muanio.
1CH 20:8 Te Filistia moni dobo dwai bidi nani dabedu te Get taun badu asalio. Tiali goli, Devitgo te aga ami bidi dabe daligo augwali ela muai dao.
1CH 21:1 Te Satango te Israel dabe sęgę mawai hagede, tama agai Devitba homu kolesaga mobaso te Israel we bidi augwali nedao wai dao.
1CH 21:2 Tialima Devitgo te Joapbolo te gasa ami ofisa dabeba te tiwai po walali, “Dage pelama, te Israel we bidi nedegi pao,” wali. “Dage te tǫ pedai tigidali badu bilao, te taun Berseba te saut badu usu nama pao, tama te taun Dan te not badu me pao. Tama dagego te sę yali po asęnama enaba sesao, tama tibaso eno te we bidi dabego namba koneaibao,” wali.
1CH 21:3 Tialima Joapgo kingba te tiwai po wei ponani, “King, eno homugo Genuai Bidigo te we bidi dabe augwaligo namba ugwanu holomaina homu ebao, tama augwali te we bidi hauwa umabo pedalumainu homu ebao. Nago koneao, tigidali Israel nage dologode bidibao, te nage tama augwaligo king bidibao. Tialima magi baso nago te dwai kolesaga elama, te tigidali we bidide dwai sę elalueibawe?” te po wai.
1CH 21:4 Tialima kingo Joapgo te po wali pao olama bomo yali. Tialima Joapgo te king tagalama, te tigidali tǫ pedaiba tedela pelama, te we bidi dabe nedegi painu yali. Te nosali aga Jerusalemba ma asalio.
1CH 21:5 Tialima Joapgo te sę ela bilali po Devitba wagi pali, Israelde te hauwa umabo we bidi mu, te 1,100,000 bidigo te ami bidi sę yabo elaluali, te Juda bidi me te bidi sese umabo hauwa mu te 470,000 bidi dao.
1CH 21:6 Tiali goli Joapgo te kingo aga te mani sęde agai homu wei ebeo, tama tiyu agai te Livai hani dabe dali te Benjamin hani dabe dali si te nedebeo.
1CH 21:7 Augwaligo te Israel we bidi dabe nedali sęde Godigo wiegi yai homu pemene isąwai, tama teyu agai te Israel dabeba dwai dene mabo sę yalio.
1CH 21:8 Tama Devitgo Godiba te tiwai gedu haluasa po wali, “Eno homu kone mu tųa palama, eno te bidi dabe nedalio. Te tama tiali kolesagade eno dwai sę genuai mu yalio. Tialima nago ena homu dene eba wida, te eno nagebolo hanalu obao, te nago eno yali sęgę sela sąyao,” wali.
1CH 21:9 Tialima Genuai Bidigo Gatba te po walali, te Devitgo profet bidi, te agai te tiwai po Devitba waligi pomainu yali, “Ena, Genuai Bidi, eno po dolo tama obao, eno nagebolo te sunumi sela ola mobao, te naga digi te nago me deli te dąį ilao. Te nago mena sunumi dąį ilali, te naga te eno wali pelama, te sę nageba pedalumainu ilaibao,” te po walio.
1CH 21:11 Tialima Gat pelama, Devit sugi pelama, agaba te tiwai po walio, “Genuai Bidigo nageba te po weyu, te sunumi sela elaluba wali nai dabede te nai me deli nago dąį ilao po wali dao.
1CH 21:12 Nago homugo te kibu be selade usu nama te genuai nai nasi si pedelama te bidimai da homu yaibawe? Ma, nago homugo te boi bidi dabego dage dolagaselama, te dage augwalide wi pelama, te polua sela bidigi pabo homu yaibawe? Ma, nago homugo te Genuai Bidigo dage dolama te dwai gasi nago tǫ pedai we bidi augwaliba te gasi sela sogo elalumainao homu nago yaibawe? Megi tama nago homu kone palama, te nago mena homu ebo po enabolo walobaso, tama eno te po Genuai Bidiba ma sela pelama wagi paibao,” Gatgo te po wali.
1CH 21:13 Tialima Devitgo Gatba te tama po wali, “Nago enabolo te wali po dabede homu sęgę mu ebao. Tama tibaso, te Genuai Bidi aga digi enabolo emainu sula tagalao, magi baso meni, aga te dade homu dene eyu tau sabo wiegi yai kolesaga sesemane sogo ebo God da. Tialima eno homugo te bidi dabego da dolobo te hagela homu ebao,” wali.
1CH 21:14 Tama tialima, Genuai Bidigo dwai gasi te Israel dabe augwaliba tagala palama, tama bidi sese umabo hauwa te 70,000 we bidi isalio.
1CH 21:15 Tama Godigo te mobo bidi enselgo te Jerusalem dolomainu tagala palali. Tialima Genuai Bidigo suali, te enselgo te Jerusalem elainu ebaso, tama te dwai nai te we bidi augwaliba pedalubo te agai homu dene yalio. Te agai homu hasegelama, tama te ensel bidiba te tama po wali, “Tagalao. Te usu dao,” wali. Te sogo te ensel te augwaligo te nai wit ge siyu, te bo wali sela sąbo pesage me deli pąde dolaluali. Te tǫ dage te Araunago tǫ da, te Jebus hani bidi me deli. Te Araunago me nogi Ornan dao.
1CH 21:16 Tama Devit te Israel tobolu bidi dabe daligo te homu dene ebo ugwa gudalio. Tama Devitgo gedu ugwaba selama tonobadi, te Genuai Bidigo ensel bidi te dagalu de tǫ si tomode dolalu, te agai nogode bainat hwą tolalu, te Jerusalem dolai hagede sisilaluali. Tama Devit te tobolu bidi dabe dali degasa dulama te gesabidi tǫba pǫgulalio.
1CH 21:17 Tama Devitgo Godiba te tiwai gedu haluasa po wali, “Ena digi eno te po obaso, augwaligo te we bidi dabe nedalio. Eno naga eno te sęgę sali, tama eno dwai sę genuai yalio. Tialima te we bidi augwali hobedagi yali, augwaligo mena sę ebaso nago augwaliba te dwai dene maniwe? Augwali da, augwali te olo bidibo sipsip dabe naga tiwai dao. God, eno Genuai Bidi, nago ena te ena we wai dabe daliba te dene mao, tama nago naga we bidi dabe augwali te dwai gasigo dolomainu sula tagaligio,” wali.
1CH 21:18 Tialima te Genuai Bidigo enselgo te po Gatba walama, te Devitba wagi pomainogo yali, “Nage te bulu duba holao, te Jebus hani Araunago wit sabo pesageba holao, tama tede nago te Genuai Bidigo alta me deli nigao,” wali.
1CH 21:19 Tialima Devitgo Genuai Bidigo po wali pali, te Gatgo agabolo wali po gilama, tama aga te nai wit sabo pesageba holalio.
1CH 21:20 Te Arauna aga ogwa me si me si dabe dali te nai wit sabo sę iduai. Tama augwa te ensel subo sogo da, te ogwa dabe udulama geme duala sigi palio.
1CH 21:21 Tialima Araunago tonobadi te Devit asobo suali. Tama aga peyu, Devit dali deliba gesabi unulama, te aga sągą pageba bogoli sugunanio. Te aga tobolu basi gulama, te Devitba genuai nogi manio.
1CH 21:22 Tama Devitgo Araunabolo te tiwai po wali, “Te nago megi te nai wit sabo sę ebo pesage enabolo mao. Tama eno nageba te tǫ abelabo mone usugo dolo tama abelaibao. Eno te Genuai Bidigo alta te pesagede nigilama, tama te we bidi dabe augwaliba te pedalubo genuai gasi, te silimainu yaibao,” wali.
1CH 21:23 Tialima Araunago Devitba te tiwai po wali, “King, tagalao, eno te tǫ nago abelibo eno hagela homu ebao. Nago olo sao,” wali. “Tama nago te ofa yabo gasa nai dabe dali me sao. Eno te bulmakau dabe nageba mobao, te nago isiba tigidali ulama ofa yabo nai da. Te eno nagebolo te wit yabe dabe sela sąyabo ni pedai dabe dali te wit ge meba me mawaibao, te nago wit ulubo ofa emainu yaibao. King o, te tigidali nai eno nageba olo mobao,” wali.
1CH 21:24 Tialima king Devitgo Araunabolo e tiwai po wali, “Eno nago nai dabe te olo mu selama te Genuai Bidiba me magobeo. Eno ena digi sę dene elama pedalisąwai nai me delide te ofa ebo sę tiwai egobeo. Menio. Eno te nai dabe nagede abelibaso usu da, te aga mone dologo tama abelaibao,” wali.
1CH 21:25 Tialima Devitgo Araunabolo te 7 kilogram gol mawai, te tǫ abelama mawai dao.
1CH 21:26 Tama Devitgo te pesagede Genuai Bidigo alta me deli nigalio, tama agai te isiba tigidali ulama dabo ofa dabe ebadi, te God dali deli haliga pedalubo ofa me yalio. Tama Devitgo Genuai Bidiba gedu haluasa po obaso, tama Genuai Bidigo agai gedu haluasa po odama, tama te dagaludu isi tagala palama, tama te altade munaluali ofa yali nai dabe isigo dela silalio.
1CH 21:27 Tama Genuai Bidigo po obaso, te ensel bidigo te bainat hwą te aga munaluali pesageba ma muai dao.
1CH 21:28 Devit te Araunago tǫde bidu, tama agai gedu haluasa po te Genuai Bidigo odobo subo tiwai yali. Tama tibaso, Devit agai te bulude te Genuai Bidiba te ofa dabe ebo kolesaga gagalali.
1CH 21:29 Te sogo, te Genuai Bidigo sel ugwa be me te agaba ofa ebo alta dabe, te lotu wabo pesage mu te Gibeon taunde elaluali. Polobadu Mosesgo te sel ugwa be sę yani te Israel dabe augwali te tǫ wa pai bulude bidali sogo te tobage be sę yai dao.
1CH 21:30 Tialima te sogo Devit te taun Gibeonba pelama, te Genuai Bidigo homu konemainu yabo usu meni yai, magi baso meni, aga te Genuai Bidigo enselgo bainat hwą tolalubo sulama wi yai dao.
1CH 22:1 Tama tialima Devit te Araunago tǫde bididu agai te tama po wali, “Dago te Genuai Bidi Godigo be ede sę yaibao. Tama te ofa yabo alta dabe, te me ede elalueibao, tama te Israel dabe eba aselama, te ofa dabe yagasomainao,” wali.
1CH 22:2 Te Israel hani isąwai hani bidi dabe meba te Israel dabe dali bidali, tama king Devitgo augwali sisinagasomainu i olama, te agai sę augwaliba mawai. Agai meba dąį ilama, te masigi togobo sę emainu yali, tama agai augwaliba te po weyu, “Te masigi dabe bugagia togolama dodolao,” wali, “te Godigo be sę yabo nai dao,” wali.
1CH 22:3 Tama Devitgo te nil dabe nigabo ain umabo hauwa sisinani, tama te be sunumi dabe dąų walabo ain delage dabe me nigabo ain sisinani. Tama me, agai te bras hauwa mu sisinani, te bidigo aga sęgę dabe dagalabo usu meni yai dao.
1CH 22:4 Tama me, te taun Tair me Saidon bulu bidi dabego te wiegi yai ni bǫ hauwa mu te Devitba sesalio, tama te bidigo nedabo usu meni yai dao.
1CH 22:5 Te Devit isisąbadi, agai te Genuai Bidigo be sę yabo nai hauwa sisinanio. Agai te tiwai po wali, “Eno ogwa, Solomon, aga te gesi ogwa bidi mu elalubaso, tama agai te be sę ebo kolesaga kuna konesąwai elalubao. Tiali goli eno homugo Solomongo te Genuai Bidigo be wiegi yai sawi yai mu sę emaina homu elama, tama te tigidali bulu tǫ kantri we bidi augwaligo sulama, te wiegi yai pemene genuai mu eyu, te Genuai Bidiba genuai nogi mawaibao. Tama tiyu, ena digi eno Solomongo te be sę yabo nai doado bage sisinaibao,” wali.
1CH 22:6 Devit aga ogwa Solomonbolo agai te po walaiba homu yali, te Solomongo te Godigo be sę emai hagede yali, te Israelgo Genuai Bidi da. Tama tialima Devitgo Solomon asomainogo i olama,
1CH 22:7 tama agabolo te tama po walali, “Ogwao, ena digi eno te we bidi augwali te dago Genuai Bidi God pageba aselama, te agaba lotu wabo be me deli sę yabo homu yali.
1CH 22:8 Tiali goli Genuai Bidigo po enabolo mayu, te tiwai po wali, ‘Devit, nago eno be sę enamuo, magi baso meni, nago boi hauwa hwįnama, te bidi hauwa ela muai. Eno suali, nago bidi hauwa ela muani, tama tibaso eno homugo nago te be sę me egobeo. Menio.
1CH 22:9 Tialima eno te wai ogwa me deli nageba mawaibao, tama aga te king pedalubo sogo, agai te we bidi augwali bugagia tegaluama bidabo sę mawaibao, tama te gasa bulu tǫ kantri dabe augwaligo agaba te boi bidi yabo sę me iligobeo. Eno nagebolo te mabo wai da, agabolo polabo nogi da te nogi Solomon, magi baso meni, te aga king bidibo sogo eno te Israel we bidi augwali homu wiegi yai bugagia nagame elama bidabo sę ilaibao,’ wali.
1CH 22:10 ‘Te king agai tama naga te we bidi augwali ena pageba aselama lotu wabo be sę yaibao. Aga eno wai bidiyu, te ena agai aya bidaibao. Te eno agai hani bidi dabede naga te Israel king pedalu sę sesemane ilaibao,’ Godigo enabolo te po wai dao,” Devitgo aga ogwa Solomonbolo wali.
1CH 22:11 Tama Devitgo po te Solomonba ma weyu te tama wali, “Ogwao, eno homugo te Genuai Bidi nage dali bidu te nage tau sobaso, te Godigo be sę yaibao, dago Genuai Bidi, te tiwai po aga digi wai dao.
1CH 22:12 Te eno homugo Genuai Bidigo te wiegi yai homu konebo homu kolesaga nagebolo menama, tama nago te dago Genuai Bidi te Godigo bomai po tigidali wali paibao, te agai nage te Israel king pedalumainu ilibo sogo te tama tiaibao.
1CH 22:13 Solomon, te nago bugagia mu tonalubo sę eyu, nago te bomai po tigidali wali pao, te Genuai Bidigo da Israel dabebolo maiabo po Mosesba wali, te bomai po tigidali nago wali pobaso da, teda nago ebo sę tigidali te wiegi yai naga pedelaibao. Nage bomonama dolalu, te nage wi me elamuo. Te nage magi nai me delide kila sigio,” wali.
1CH 22:14 “Ena te sę dene mu elama, te tama nai sisinani, te 3,500 ton golgo sęgę, me te 35,000 ton silva, te tama sęgę elalubo nai sisinani, te Genuai Bidigo be sę yabo nai da. Tama eno te ain me bras hauwa umabo sisinani, te nai dabego sęgę te bidi dabego te skel ebaso usu egobeo. Tama me, eno te ni dabe me masigi dabe sisinani, tiali goli te nago umabo mu ma sao.” Devitgo te po Solomon dali wai dao.
1CH 22:15 “Nago sę yabo bidi hauwa elalubao. Te masigi togobo bidi dabe, me te masigigo be sę ebo koneai bidi dabe elalubao. Te be sę ebo kamda dabe me elalu, te tobage nai dabe te gol me silva me bras me ain,
1CH 22:16 te tama nai dabego haniani nai nigibo koneai bidi hauwa elalubao. Nago sę hodolao, tama te Genuai Bidi nage dali bidaibao,” Devitgo te po wali.
1CH 22:17 Tama nosali, Devitgo te Israelde polalubo bidi tigidaliba po walama, te Solomon tau sao walio.
1CH 22:18 Tama agai te tiwai po augwaliba wali, “God, dago Genuai Bidi, te dage dali bidibao. Agai eno te e tǫde polobadu bidali we bidi hani dabe augwali aiyaba elalumainu ilama, tama megi da augwali te aga me dage dologode bidibao. Te tama tiali kolesagade agai te wiegi yai bodolu si dageba menama, te dage bugagia tegaluama bidu, te boi bidi augwaligo dageba munu ma boi hwįbe dao.
1CH 22:19 Tama tialima, megi da, dagego homu deli naga elalu, tama dagego bomo mu elama, te dago Genuai Bidi Godigo homu wali pao. Tialima megi da, dagego te Genuai Bidi Godigo be sę ebo gagalao. Tama nosali dagego te Genuai Bidigo Dąų Wali Bomai Po Munalubo Halobage me te dis plet agai nai dabe selama, tama te beba muagameo, te be da te we bidi augwali te Genuai Bidi pageba aselama lotu wagasabo be dao,” Devitgo te po wai.
1CH 23:1 Te Devit te monu dabe mu ebaso, agai aga ogwa Solomon sa munama tama Solomon te Israel dabego king pedelai dao.
1CH 23:2 King Devitgo te Israel augwa polalubo bidi dabe sisinama, te pris dabe me Livai dabe dali sisinanio.
1CH 23:3 Agai te po obaso, te bidi dabe augwaligo te Livai hani bidi dabe nedada palio. Augwaligo te Livai dabe te kibu be 30 yia edelali bidide gagalama nedalio, tama te Livai dabe nedada pali te bidi sese umabo mu te 38,000 bidi bidai dao.
1CH 23:4 Tialima Devitgo te tama po wali, “Te bidi dabe augwalide te 24,000 bidigo te Genuai Bidigo tempel bede sę ebo tonalumainao, me te gasa 6,000 bidigo te ofisade pepa asębo kuskus bidi sę eyu, te po tų odobo sę ebo bidi bidimainao.
1CH 23:5 Tama te me 4,000 bidigo te Genuai Bidigo be tonalubo bidi bidao, te gasa 4,000 bidigo te Genuai Bidigo nogi ugwaba sabo tęąbi wabo wiegi yai musik omainao. Eno te musik wabo haniani nai dabe nigali, tama augwaligo te nai dabe selama te musik elebo sę emainao,” Devitgo te po wali.
1CH 23:6 Te Livai dabede te augwali hani sela elaluali. Augwali te Livaigo ogwa selade te hani pedelali, te ogwa dabe nogi e dao, Gerson, me Kohat, me Merari. Tama Devitgo te Livai dabe te hani selade dobayali, te augwaligo augwa te sę dabe emainu yalio.
1CH 23:7 Te Gersongo ogwa dabe nogi e tama tiwai da, Ladan me Simei dao.
1CH 23:8 Tama Ladango ogwa sela ame nani ogwa bidalio. Te gomunai ogwa te Jehiel. Te meba ogwa dabe nogi e tiwai da, Setam me Joel.
1CH 23:9 Te sela bage augwali te Ladango hani dabede tobolu bidi bidali. Simeigo ogwa sela bidali. Augwali nogi e tiwai da, Selomot, me Hasiel, me Haran dao.
1CH 23:10 Te bidi Simeigo ogwa me si me si nama ogwa bidali. Gomunai ogwa te Jahat, tomo ogwa Sina, aga nogi me te Sisa. Te mebago nogi e tiwai, Jeus me Beria. Jeus de Beria sigo te ogwa hauwa me elalubeo, tama tiyu te augwali sigo waigo ame nani wai dabe te deliba sisą palama te deli hani dabe naga tama pedelai dao.
1CH 23:12 Kohatgo ogwa me si me si bidali. Augwali nogi e tama da, Amram, me Ishar, me Hebron, me Usiel dao.
1CH 23:13 Te Amramgo ogwa dabe nogi e tiwai da, Aron me Moses da. Genuai Bidigo Aron te aga ogwa dabe dali dąį ilama, te we bidi augwaligo te Genuai Bidiba dąį ilama hasia podolali nai dabe te Aron aga ogwa dabe dali augwaligo tonalualio, tama augwaligo te sę dabe sesemane sogo idualio. Tama te Genuai Bidiba lotu wabo sogo tigidali augwaligo te wiegi yai denami ebo hano ilibo nai pauda ulubo sę yai dao. Tama me augwaligo Genuai Bidigo sę eyu, te we bidi augwaliba wiegi yai sę bugagia ilimainu te Genuai Bidiba hanalubo sę yai dao.
1CH 23:14 Tialima te Mosesgo ogwa dabe, te Godigo bidigo ogwa dabe, augwali te gasa olo Livai hani dabe tiwai pedelai dao.
1CH 23:15 Mosesgo ogwa dabe nogi e tama da, Gerson me Elieser dao.
1CH 23:16 Gersongo gomunai ogwa te Sebuel dao.
1CH 23:17 Te Eliesergo ogwa deli digi mu bidali, agai nogi da Rehabia da. Tialima Rehabiago ogwa hani hauwa elalualio.
1CH 23:18 Ishar te Kohatgo ogwa, tama Ishargo gomunai ogwa te Selomit bidali.
1CH 23:19 Te Hebron, te Kohatgo me ogwago te ogwa me si me si nama bidali. Gomunai ogwa te Jeria, tomo ogwa te Amaria, te sela ogwa Jahasiel, te ene nanobo ogwa wali te Jekameam dao.
1CH 23:20 Tama Usiel, te Kohatgo me ogwa mego te ogwa si bidali. Gomunai ogwa te Maika, te tomo ogwa Isia dao.
1CH 23:21 Merari te Livaigo ogwa da, tama te Merarigo ogwa dabe nogi e tiwai elalubao, Mali me Musi. Te Maligo ogwa nogi e tiwai elalubao, Eleasar me Kis da.
1CH 23:22 Eleasargo te wegi dabe naga ame nai bidali, tama agai te wegi dabe te augwa deli hani bidi dabego sali, te Kisgo ogwa dabego sai dao.
1CH 23:23 Musigo ogwa sela bidali. Augwali nogi e tama da, Mali, me Eder, me Jeremot dao.
1CH 23:24 Te tigidali bidi augwali te Livaigo hani wai dabe da, tama augwali te Livai augwa hanide tobolu bidi hani bidali. Te bidi dabe augwaligo te Livai hani augwaligo nogi dodolama asęsędulali sogo, tama deli deli bidi nogi te augwa bulali wąį hani me deli bidigo ame nani wai dabe te nogi muanio. Tama te Livai dabego kibu be bidi sese deli edelali da, augwa te Genuai Bidigo tempel bede sę eyu yai dao.
1CH 23:25 Devitgo te tama po wali, “God, Israelgo Genuai Bidigo, te agai we bidi augwaliba bugagia bidabo bodolu mawai, tama aga da te Jerusalemde sesemane sogo bidaibao.
1CH 23:26 Tama tialima te Livai dabe augwaligo te Genuai Bidigo sel ugwa be tolasa bilali sę me te lotu wabo nai dabe tolali sę me munu ma egobeo, te tobage sę ebo sogo te silali dao,” wali.
1CH 23:27 Tama nosali, te bidi dabe augwaligo te Devitgo simanobo po wali pelama, tama augwaligo te Livai hani dabe nogi asębo sę yali. Te Livai bidi dabego kibu be bidi sese deli edelebaso da, teda te bidi dabego augwaligo nogi mubo pesageba muani, augwa te Genuai Bidigo bede sę emainu yai dao.
1CH 23:28 Te Livai dabego sę e tiwai elalubao. Augwaligo te Genuai Bidigo bede te Arongo hani tau sabo sę elaluaibao. Tama augwaligo sę te bidi sisinibo pesage dabe me te Genuai Bidigo obo habu tomode tonalubo sę elaluali. Tama te dis me plet dabe te Genuai Bidigo nai da olama sa muani nai, te Genuai Bidigo gedude meda pedelai baso da, teda te Livai dabe augwaligo te nai dabe wiegi yai ma pedalumainu ebo sę elaluai dao. Tama me te Livai dabe augwaligo te tobage gasa sę te Genuai Bidigo be tomode ebo sę elaluai dao.
1CH 23:29 Augwaligo te Godiba mabo bret tonalubo sę yali, tama te wit ulubo ofa ebo plaua me tonalubo sę eyu, tama te bisket dabe tonalu te avende ulubo ofa dabe tonalu yali, tama augwa te wel dali taluama ulubo plaua me tonalubo sę yai. Tama me augwaligo te ofa yabo nai dabe dagala mubo sę elaluai dao.
1CH 23:30 Tama te tigidali sogo kigamu me pio augwa te Genuai Bidi gesabidi pąba asobo sę elalu, te wiegi yai pemene eyu agai nogi ugwaba sabo sę yalio.
1CH 23:31 Tama augwaligo te tobage deli kolesaga te tigidali Sabatde te ofa ulubo sogo eyu, te gesi polua genuai bodolu side me, te gasa lotu wabo genuai side te sę yalio. Te bomai pode te po wai te Livai dabe nisu naga bidigo te sę dabe te deli deli sogo yabo bomai po elaluai. Sesemane sogo te Livai dabego te Genuai Bidiba lotu wabo sę elaluai dao.
1CH 23:32 Te Livai dabe augwaligo hasia bolo te Genuai Bidigo sel ugwa be tonalubo sę eyu, tama nosali te Genuai Bidigo tempel be dali tonalubo sę yali. Te augwa deli hani dabe tau sabo sę me elaluai, te Arongo pris hani dabe, te augwaligo sę te Genuai Bidigo tempel bede yai dao.
1CH 24:1 E da te Arongo ogwa dabe hani sibi dabe da. Arongo ogwa dabe nogi da e tiwai elalubao, Nadap, me Abihu, me Eleasar, me Itamar dao.
1CH 24:2 Tialima Nadap me Abihu sigo wai me ame nisiąbadi te augwali si isali, te augwa si aya bidibadi da. Tialima Eleasar me Itamar si naga te pris pedelalio.
1CH 24:3 Tama Devit te king bidali sogo, agai homugo te pris dabego sę bugagia emainu homu elama, tama agai te pris hani dabe deli deliba te sę sabo dąį ilali. Tama Sadok de Ahimelek sigo te agai te pris dabeba sę dobabo tau salio. Sadok te Eleasargo hani wai da, tama Ahimelek te Itamar hanigo wai dao.
1CH 24:4 Augwaligo suali, te Eleasargo hanide tobolu bidi hauwa elaluali, tibaso augwaligo te 16 te tama hani augwali dobayalio. Tialima te Itamargo hani tobolu bidi hauwa meni baso, tama augwali hani te a naga me sela hani naga dobayalio.
1CH 24:5 Devitgo te pris sę yabo bidi dabe augwali dąį ilainu yali sogo, agai te Eleasargo hanide naga, ma te Itamargo hanide naga te dąį ebaso usu me egobeo. Menio. Agai te bidi hani dabe talua side naga dąį ilaibao, magi baso meni, te hani side te Godigo sę ebo usu yabo bidi dabe naga bidali, tama te Genuai Bidigo bede sę ebo usu yabo bidi dabe bidali. Tama tialima augwa te satu gagali elama, te bidi dabe dąį ilali.
1CH 24:6 Te Eleasar me Itamar sigo hani ogwa dabe te satu gagalide hasesegele pelama te pris dabe dąį ilali. Augwaligo dąį ilama te kuskus Semaia, te Livai hani te Netanelgo ogwa, agai augwaligo nogi asęani. Tama king Devit aga ofisa dabe dali, me te pris Sadok, me pris Ahimelek, te Abiatargo ogwa, tama te pris me Livai dabe augwali hani tobolu bidi dabe, tigidaligo te Semaiago te nogi asębo sualio.
1CH 24:7 Te augwaligo hasia sogo te satu gagali yalima, augwaligo te Jehoiaripgo hani dabe dąį ilali. Tama namba 2 te Jedaia hani dąį yali,
1CH 24:8 tama namba 3 te Harimgo hani, te namba 4 te Seorim hani dąį ilali.
1CH 24:9 Te namba 5 te Malkia hani da, te namba 6 te Mijamingo hani,
1CH 24:10 te namba 7 te Hakosgo hani, te namba 8 Abiyago hani dao.
1CH 24:11 Te namba 9 Jesuago hani da, te namba 10 te Sekanaiago hani dąį ilali,
1CH 24:12 te namba 11 te Eliasipgo hani, me namba 12 te Jakimgo hani dabe dąį ilali.
1CH 24:13 Te namba 13 te Hupgo hani da, te namba 14 te Jesebeapgo hani dąį ilali,
1CH 24:14 te namba 15 te Bilga hani, me te namba 16 te Imergo hani dąį ilali.
1CH 24:15 Te namba 17 te Hesirgo hani, me namba 18 te Hapisesgo hani dąį ilali,
1CH 24:16 te namba 19 te Petahiago hani dąį ilali, me te namba 20 te Jeheskelgo hani dąį ilali.
1CH 24:17 Namba 21 te Jakingo hani, me te namba 22 te Gamulgo hani dąį yali,
1CH 24:18 te namba 23 te Delaiago hani, me te namba 24 te Masia hani dąį ilai dao.
1CH 24:19 Augwaligo te dąį ilali pris hani dabe te Genuai Bidigo beba pelama, te augwa wąį nǫų dabe te Arongo yali kolesaga tiwai sę tobage yaibao wali. Polobadu God, te Israel dabe augwa Genuai Bidigo, te po Aronba walama te sę yalio.
1CH 24:20 Te e da te Livai sibigo bidi meba dao. Sebuel, aga me nogi Subael, te Amramgo hani ogwa dabe, te Jedea te Sebuelgo hani ogwa dabe dao.
1CH 24:21 Tama Isia te Rehabiago ogwa dabego polalubo bidi bidali.
1CH 24:22 Tama Selomit te Ishar hanigo wai dabe da, tama Jahat te Selomitgo hani dabe augwaligo ogwa dao.
1CH 24:23 Tama Hebron agai ogwa me si me si nama bidali. Gomunai ogwa Jeria, tomo ogwa Amaria, te sela ogwa Jahasiel, te ene nanobo ogwa Jekameam dao.
1CH 24:24 Maika te Usiel hani dabego ogwa, te Samir te Maikago hani dabego ogwa da.
1CH 24:25 Isia te Maikago ama, tama Sekaraia te Isiago hani ogwa dabe dao.
1CH 24:26 Te Merarigo ogwa dabe nogi e tama elalubao, Mali me Musi. Te Jasiago ogwa si, te Merarigo ogwa da. Te Merarigo gasa ogwa dabego nogi e tama elalubao, Soham me Sakur me Ipri. dao.
1CH 24:28 Te Maligo ogwa dabe nogi te tiwai elalubao, Eleasar me Kis. Eleasargo ogwa me ame nabeo. Tama Jeramel te Kisgo hani ogwa dao
1CH 24:30 Te Musigo ogwa nogi dabe e tiwai da, Mali, me Eder, me Jeremot. Te tama nogi yali bidi dabe, augwali tigidali te Livai hani sibi dabe dao.
1CH 24:31 Te Livai hani sibi tobolu bidi me te tobolu bidi dabego augwa dwasianu ama dede dabego te satu gagali elama, te Livai hani dabego mena sę yabo te dąį ilimainu yali. Augwaligo te augwa hani te ama dabego yali kolesaga tiwai si yainu yali, te augwali Arongo hani pris dabe da. Tama king Devit, me Sadok, me Ahimelek, me te pris hani sibi dabede tobolu bidi badi te Livai dabego me, augwali tigidaligo augwaligo te satu gagali ebo dąį ilibo sę ebo sualio.
1CH 25:1 Te Devit dali te Genuai Bidigo be tonalubo bidi dabego dali te Asapgo hani ogwa dabe, me Heman me Jedutun, te sela bidi hanigo ogwa dabe te Genuai Bidigo be tomode lotu wabo sę yabo hani dabe dąį ilali. Augwaligo te we bidi dabeba te Genuai Bidigo po pusubo sę elaluali. Augwaligo te gita haniani badi te plet bras badi eleyu, te po dali pusali. Te e da te hani dabego nogi dali te augwaligo yali sę po dali elalubao.
1CH 25:2 Te Asapgo hani ogwa dabede, augwaligo te Sakur, me Josep, me Netania, me Asarela, te tama dąį ilali. Asap aga digi augwali tonaluali, tama te Godigo po te kingo augwalibolo pusao po wabo sogo te po augwaligo pusai dao.
1CH 25:3 Te Jedutungo hani ogwa dabede, augwaligo te bidi nogo a naga me badu kibisa deli dąį ilali, te Gedalia, me Seri, me Jesaia, me Simei me Hasabia, me Matitia da. Tama Jedutun augwa ayago te augwali tonaluali. Augwaligo Godigo po te tiwai kolesagade pusali. Augwaligo te gasa tobage gita me deli elali tama Godiba buba hwį wabo tęąbi po weyu, te aga nogi ugwaba salio.
1CH 25:4 Te Hemango ogwa hani dabede, augwaligo te tama bidi dabe dąį yali. Bukia, me Matania, me Usiel, me Sebuel, me Jerimot, me Hanania, me Hanani, me Eliata, me Gidalti, me Romamtieser da, me Josbekasa, me Maloti, me Hotir, me Mahasiot dao.
1CH 25:5 Heman agai te Godigo po kingba pusubo sę elaluai. Godigo te bomai po dąų weyu Hemanba te genuai nogi mawaibao wai, tama tialima Godigo agabolo te wai ogwa dabe 14 badi te wegi sela mobadi yalio.
1CH 25:6 Hemango te hani ogwa dabego te haniani gita dabe badi te plet pou bras badi elali, te Genuai Bidigo bede te Godiba lotu wabo sogo tialio. Tama augwa ayago augwali tonaluali. Tama king Devitgo Asap me Jedutun me Heman te bidi sela tonaluai dao.
1CH 25:7 Te Genuai Bidigo nogi ugwaba siyu te tęąbi dabe bugagia wabo skul bugagia wali te bidi dabe dali te gasa meba Livai dabe daligo namba te 288 bidi dao. Te tigidali bidigo te musik wabo mu konea pai dao.
1CH 25:8 Te mena hanigo mu te sę hodolobowe noma suainogo, te tigidaligo te satu gagali yai dao. Te gesi ogwa bidi me monu dabe yaibaso me te tagalao, te musik wabo mu konea pai bidi dabe ma te musik wabo skul udubadi yaibaso me te tagalao, tigidaligo mu te satu gagali yai. Te deli deli hani augwalide te bidi 12 bidi elalua pai dao.
1CH 25:9 Hasia mu augwali te satu gagali elama, tama augwaligo te Josepgo hani dąį ilali, te Asapgo hani da. Te namba 2 sogo augwaligo te Gedalia dali te aga ogwa dabe me te aga deli hani dabe dali dąį ilali.
1CH 25:10 Te namba 3 sogo augwaligo te Sakur dali te agai ogwa dabe me aga deli hani dali augwali dąį ilalio.
1CH 25:11 Tama te namba 4 wagisu augwaligo te Seri dąį ilali, agai gasa nogi me da Isri, te aga ogwa dabe dali te aga deli hani dabe me dąį ilai dao.
1CH 25:12 Te namba 5 wagisu te Netania dali te aga ogwa dabe me aga deli hani dabe dali dąį yalio.
1CH 25:13 Te namba 6 wagisu te Bukia me aga ogwa dabe dali te aga deli hani dabe dali dąį ilalio.
1CH 25:14 Te namba 7 wagisu te Asarela dąį ilali, te aga nogi me Jesarela dali, te aga ogwa dabe me te deli hani dabe dali dąį yalio.
1CH 25:15 Te namba 8 wagisu augwaligo te Jesaia dali, aga ogwa dabe me, te aga deli hani dabe dali dąį ilai dao.
1CH 25:16 Te namba 9 wagisu augwaligo te Matania dali, aga ogwa dabe me, te aga deli hani dabe dali dąį ilai.
1CH 25:17 Te namba 10 wagisu Simei dali, aga ogwa dabe me, te aga deli hani dabe dali dąį ilali.
1CH 25:18 Te namba 11 wagisu augwaligo Usiel dąį ilali, te aga nogi me Asarel, te aga ogwa dabe dali me te aga deli hani dabe dali dąį ilalio.
1CH 25:19 Te namba 12 wagisu augwaligo Hasabia te aga ogwa dabe dali me te aga deli hani dabe dali dąį ilai dao.
1CH 25:20 Te namba 13 wagisu augwaligo Sebuel dąį ilali, te aga ogwa dabe me aga deli hani dabe dali dao.
1CH 25:21 Te namba 14 wagisu augwaligo te Matitia te aga ogwa dabe me aga deli hani dabe dali dąį ilalio.
1CH 25:22 Te namba 15 wagisu augwaligo te Jerimot te aga ogwa dabe me aga deli hani bage dali dąį ilai.
1CH 25:23 Te namba 16 wagisu te augwaligo Hanania aga ogwa dabe me aga deli hani bage dali dąį ilai dao.
1CH 25:24 Te namba 17 wagisu te Josbekasa aga ogwa dabe me aga deli hani dabe dali dąį ilalio.
1CH 25:25 Te namba 18 wagisu augwaligo te Hanani aga ogwa dabe me aga deli hani dabe dali dąį ilali.
1CH 25:26 Te namba 19 wagisu augwaligo Maloti aga ogwa dabe me aga deli hani dabe dali dąį ilalio.
1CH 25:27 Te namba 20 wagisu augwaligo Eliata aga ogwa dabe dali te aga deli hani bage me dąį ilali.
1CH 25:28 Te namba 21 wagisu augwaligo Hotir aga ogwa dabe me aga deli hani bage dali dąį ilali.
1CH 25:29 Te namba 22 wagisu augwaligo Gidalti aga ogwa dabe me aga deli hani bage dali dąį ilalio.
1CH 25:30 Te namba 23 wagisu augwaligo Mahasiot aga ogwa dabe me aga deli hani bage dali dąį ilai dao.
1CH 25:31 Te namba 24 wagisu augwaligo Romamtieser aga ogwa dabe me aga deli hani bage dali dąį ilalio.
1CH 26:1 Te Livai bidi mebago Genuai Bidigo tempel be tonaluali. Augwali nogi e tiwai elalubao. Meselemia, te Korego ogwa, te Asap hani sibidu asali, te Kora hani dao.
1CH 26:2 Meselemiago ogwa dabe nogi e tiwai elalubao. Gomunai ogwa te Sekaraia, te tomo ogwa Jediael, te sela ogwa Sebadaia, te ene nanobo ogwa Jatniel dao.
1CH 26:3 Te a naga wali ogwa Elam, te kibisa nogo badu deli wali ogwa te Jehohanan da, te nogo me badu si wagi soali ogwa te Elioenai dao.
1CH 26:4 Godigo te wiegi yai sę Obetidomba ebaso, te agai ogwa hauwa elaluali. Augwali nogi e tama da. Gomunai ogwa Semaia, te tomo ogwa Jehosabat, te sela wali ogwa Joa, te ene nanobo wali ogwa Sakar, te a naga wali ogwa Netanel, te nogo kibisa wali ogwa Amiel, te nogo me badu si wali ogwa Isakar, te nogo me badu sela wali ogwa te Peuletai dao.
1CH 26:6 Semaia, te Obetidomgo gomunai ogwago, te ogwa meba elaluali. Augwali te wiegi yai bidi dabe, tibaso augwali te augwa hani dabede te tobolu bidi pedelama bidali.
1CH 26:7 Augwali nogi da e tama elalubao, Otni, me Refael, me Obet, me Elsabat, me Elihu, me Semakia da. Elihu me Semakia augwali sigo te haniani sę ebo kolesaga mu konea pai bidi si dao.
1CH 26:8 Te Obetidomgo hani sibide te 62 bidi tigidali te tonalubo bidi bidali, tama tigidaligo augwa ebo sę mu koneai dao.
1CH 26:9 Te Meselemiago deli hani dabede te bidi nogo si olama a naga me badu sela bidi, augwaligo te augwa yali sę page bugagia koneai dao.
1CH 26:10 Hosa te Merarigo hani sibidu koliama asalio. Te Hosago ogwa dabego nogi e tama tiwai elalubao. Simri te polalubo bidi bidai,
1CH 26:11 tama tomo ogwa Hilkia, te sela wali ogwa Tebalia, te ene nanobo ogwa wali Sekaraia da. Simri te Hosago gomunai ogwa wali te meni, tiali goli aga ayago aga te polalubo bidi nigilali. Te Hosago deli hani sibide te 13 bidi te Godigo tempel be tonalubo bidi bidai dao.
1CH 26:12 Te tigidali tobolu bidi augwa te moni tempel be sunumi tonalubo bidi dabe te augwa hani dabe daligo, te Genuai Bidigo bede yabo sę elaluai, te meba Livai dabego ebo sę tiwai yalio.
1CH 26:13 Te hani sibi tigidaligo te satu gagali elama te Genuai Bidigo tempel bede mena sunumi te augwaligo tonalumainu ola mabowe naga ola momainu yali. Te augwali hauwa hani dabe ma dwasianu hani dabe yaibaso me te tagalao, te augwa tigidali sę ebaso usu dao.
1CH 26:14 Augwa te satu gagali elama, dego mu te giliga asobo badu sunumi tonaluabo te bidi hani ola momainu yali, tama satugo te Meselemia dąį ilai. Tama nosali augwa te satu gagali ma elama, te Sekaraiago te mena badu sunumi tonalugowe te ola momainu yali, tama satugo te not badu sunumi dąį ilali. Sekaraia te Meselemiago ogwa da, tama aga te wiegi yai homu kolesaga ola mabo bidi dao.
1CH 26:15 Tialima nosali satugo te Obetidom dąį ilama, te saut badu sunumi tonalumainu yali, satugo te agai ogwa dabe dąį ilama, te nai dabe doado bage muabo be habu tonaluao walio.
1CH 26:16 Tama satugo Supim me Hosa dąį ilama, te giliga dega sabo badu tonalumainogo yali, tama te sunumi nogi augwaligo Saleket te me tonaluao wali. Te sunumi Saleket te ugwaba holobo pabo tų pąde elaluali. Augwaligo te hani deli deligo te sę tonaluabo sogo dąį ilali, tama augwali te sunumi tonalubo sę me hasegelu me hani hasegelu iduai dao.
1CH 26:17 Tigidali side te sia ge asobo badu te sunumi tonalubo Livai te 6 bidigo te badu tonaluali, te me si me sigo te not badu sunumi tonaluai, te me si me sigo te saut badu sunumi tonaluali. Te me si me sigo te doado bage mubo madi tonaluai, me si te gasa habu badu tonalu, me si te me be habu badu tonalu yai dao.
1CH 26:18 Te 6 bidigo te be tonaluali te sia ge dega sabo badu tonaluai. Te bidi si te be sunumi tonalu, te bidi me si me sigo te pabo tų sunumi badu tonalu yalio.
1CH 26:19 Tigidali te tonaluali bidi te Korago hanidu me Merarigo hanidu asai dao. Augwaligo augwali tama dodolama, augwa sęba muani.
1CH 26:20 Te Ahiya, te Livai hani dabede te bidi me deli da, agai te Genuai Bidigo bede munalubo mone mubo be tonalubo tobolu bidi da, tama agai te wiegi yai nai dabe te elalubo be habu te bidi dabego Genuai Bidigo nai da olama dąį ilali nai te tonalubo bidi dabe tobolu bidi dao.
1CH 26:21 Bidi me deli te Ladan hani sibide te Gerson hani bidi, te Jehiel dao.
1CH 26:22 Tama te Jehielgo ogwa dabe nogi e tiwai elalubao, Setam dali aga ama Joel da. Augwaligo te Genuai Bidigo mone mubo be tonalubo sę elaluai dao.
1CH 26:23 Tama te Amram hani dabe, me Ishar hani, me Hebron, me Usiel, te hani dabe augwa yabo sę elaluai.
1CH 26:24 Sebuel te Amram hani da, aga te Genuai Bidigo monego be tonalubo polalubo ofisa bidi bidali. Te Gersomgo ogwa dabe hani bidi me deli da, te Mosesgo ogwa dao.
1CH 26:25 Sebuelgo ama deli bidali, aga nogi da Selomit. Selomit aga te Eliesergo hanigo ogwa, te Gersomgo ogwa. Elieser aga te Rehabiago aya, te Rehabia Jesaiago aya, tama Jesaia te Joramgo aya, te Joram da Sikrigo aya, tama Sikri te Selomitgo aya dao.
1CH 26:26 Selomit aga deli hani bage dali te wiegi wiegi yai nai dabe te bidi dabego Godiba dąį ilama te Genuai Bidigo beba muani nai dabe tonaluali. Te wiegi yai nai dabe da, te king Devit me augwa tobolu bidi dabe me te deli hani sibi te ami ofisa dabe, augwali tigidaligo te wiegi yai nai dabe te Godiba dąį ilai dao.
1CH 26:27 Te augwaligo boi bidi dabe aiyaba elaluali sogo, augwaligo te boi bidi dabego wiegi yai nai hauwa salio. Tama nosali augwaligo te nai meba te Godigo nai da olama sa munama, tama te Genuai Bidigo beba sela asalio. Nosali me sogo augwaligo te moni tempel bede ma geselebo sę elalubaso da, teda teba muani naigo augwaligo te sę ebo abelaibao homu yali.
1CH 26:28 Te Genuai Bidigo bede munaluali wiegi yai nai meba dabe, te profet Samuel me king Sol me Apner, te Nergo ogwa, te Joap, te Seruiago ogwa, te tama bidigo Godiba mawai. Te Selomit aga deli hani dabe daligo te nai dabe tigidali tonaluai dao.
1CH 26:29 Te Ishar hanigo ogwa dabede, augwaligo te Kenaia dali aga ogwa dabe dali te gavman sę emainu dąį ilali. Augwa te kuskus sę eyu te Israel we bidi dabego po tų odalio.
1CH 26:30 Te Hebrongo hani ogwa dabede, augwaligo te Hasabia dali te bidi aga deli hani bidi te 1,700 bidigo te gavman sę emainu dąį ilai. Augwaligo te gavman sę tigidali tonaluali te Israel tǫ kantri pedai te giliga dega sabo badu te wę Jordan pedai badu elaluai. Te bidi hani dabe augwaligo te gavman sę ebo mu koneai, tama te bidi dabego tigidali sę Genuai Bidiba ebo sę tonaluali, te kingo sę me tigidali tonaluai dao.
1CH 26:31 Jeria te tobolu bidi augwa hani tigidalide bidali, te Hebrongo wai dabe da. Te kibu be bidi sese si 40 te Devit king bidali sogo, augwaligo te Hebrongo hani tigidali gegebo sę yai. Tama augwaligo te hani bidi hauwa te taun Jaser te Gileat tǫde bidibo sualio. Te Jaser bidi dabe te augwaligo haniani sę ebo mu koneai bidi dabe mu bidalio.
1CH 26:32 Tama tialima, king Devitgo te Jeria hani bidi dabe te 2,700 bidi dąį ilama, te giliga asobo badu te wę Jordan pedai badu te bidibo Israel hani dabe tonalumainu yali, te Ruben hanigo tǫ, me Gat hanigo tǫ, me te Manase hani pedai, te hani selago tǫ da. Te 2,700 bidi dabe augwali te wiegi yai bidi tama augwali te augwali deli hanide tobolu bidi bidali. Te augwaligo tigidali sę te bidi dabego Godiba ebo sę tonalu, te kingo sę me tigidali tonaluai dao.
1CH 27:1 Te ede nogi elalubo te Israel hani sibi dabede bidali tobolu bidi dabe nogi da, tama te polalubo bidi dabe badi te gavman ami sę tonalubo sęde bidali ofisa dabe da. Te tobolu bidi dabe augwaligo te 12 te genuai hani bidi te sę ebo tonaluai. Te deli deli hanigo te polua deli deli dabede te sę yali, tama te deli deli hanide te bidi sese umabo 24,000 bidi tonalubo sę elaluai. Te tobolu bidi dabego nogi e tiwai tama elalualio.
1CH 27:2 Jasobeam te Sapdielgo ogwago te bidi sese umabo 24,000 bidi te polua delide sę ebo tonaluai dao.
1CH 27:3 Tama me, agai te ami ofisa tigidali tonalubo sę me yai. Aga te Peres hani bidi me deli dao.
1CH 27:4 Dodai te Ahohi hani bidigo te bidi sese umabo 24,000 bidi te namba tu poluade te bidi dabe augwali te sę ebo tonaluali. Miklot aga tudi badu daganalubo si wali bidi bidali.
1CH 27:5 Benaia te pris Jehoiadago ogwago te bidi sese umabo 24,000 bidi dabe augwali te namba 3 sela wali poluade sę ebo tonaluali bidi dao.
1CH 27:6 Aga te Devitgo bomai ami bidi dabe te 30 wali bidi dabede te bidi me deli wali aga da, tama aga te ami bidi dabede polalubo bidi bidali. Te Amisabat, aga ogwa, te aga tudi badu daganalubo si wali bidi bidai.
1CH 27:7 Asahel te Joapgo amago te namba 4 ene nanobo poluade te bidi sese umabo mu te 24,000 bidi te sę ebo tonaluali. Nosali aga ogwa te aga tudi badu daganalubo si wali bidi bidalio.
1CH 27:8 Samhut te Ishar hani bidigo te bidi sese umabo 24,000 bidi te namba 5 wali poluade sę ebo tonalubo bidi bidai dao.
1CH 27:9 Ira te Tekoa taun bidi Ikesgo ogwago te 6 wagi soabo poluade te bidi sese umabo mu te 24,000 bidi te sę ebo tonalubo sę yali.
1CH 27:10 Heles te Pelon bidigo te bidi sese hauwa umabo 24,000 bidi te namba 7 poluade te sę ebo tonaluai. Heles te Efraim hani bidi dao.
1CH 27:11 Sibekai te Husa bulu bidigo te bidi sese umabo 24,000 bidi te namba 8 wabo poluade te sę ebo tonalubo sę yali. Sibekai aga te Sera hani bidi dao.
1CH 27:12 Abieser te Anatot taun bidigo te bidi sese umabo 24,000 bidi dabe te 9 poluade augwali sę ebo tonaluai. Abieser te Benjamin hani bidi dao.
1CH 27:13 Maharai te Netofa taun bidigo te bidi sese umabo 24,000 bidi te namba 10 poluade te augwali sę ebo tonaluai dao. Maharai te Sera hani bidi dao.
1CH 27:14 Benaia te Piraton taun bidigo te bidi sese umabo 24,000 bidi te 11 wabo poluade te bidi dabe augwali sę ebo tonaluali. Benaia te Efraim hani bidi dao.
1CH 27:15 Heldai te Netofa taun bidigo te bidi sese umabo 24,000 bidi augwali te 12 wagi soabo poluade te sę ebo bidi dabe tonalualio. Heldai te Otniel hani bidi dao.
1CH 27:16 Te Israel hani dabe augwali tonaluali gavman ofisa bidi dabe nogi e tiwai elalubao. Elieser, te Sikrigo ogwago, te Rubengo hani tonalualio. Tama Sefatia, te Makago ogwago, te Simeongo hani tonaluai dao.
1CH 27:17 Te Hasabia, te Kemuelgo ogwago, te Livai hani tonaluai. Tama Sadokgo te Arongo hani tonaluai.
1CH 27:18 Te Elihu, te Devitgo ama me deligo, te Juda hani tonalualio. Tama Omri, te Maikelgo ogwago, te Isakar hani tonaluai dao.
1CH 27:19 Te Ismaia, te Obadiago ogwago, te Sebulun hani tonaluali. Te Jeremot, te Asrielgo ogwago, te Naptali hani tonaluai dao.
1CH 27:20 Tama Hosia, te Asaiago ogwago, te Efraimgo hani dabe tonaluai. Te Joel, te Pedaiago ogwago, te Manasego hani pedai me deli tonaluai.
1CH 27:21 Te Ido, te Sekaraiago ogwago, te Manase gasa hani pedai te Gileat tǫ badu bidali hani tonaluali. Tama Jasiel, te Apnergo ogwago, te Benjamin hani tonaluai dao.
1CH 27:22 Tama Asarel, te Jerohamgo ogwago, te Dango hani tonaluai. Teda te ofisa dabego te Israel hani deli deli augwali tonalubo sę yai dao.
1CH 27:23 King Devitgo te megi tama holobo gesi ogwa bidi augwaligo kibu be te bidi sese deliba usu nisąbo bidi dabego kibu be isąwai bidi augwali nedebeo, magi baso meni, Genuai Bidigo te Israel we bidi augwaligo namba ugwaba igulama, te hauwa mu te dagalude elalubo hǫ dabe tiwai pedalumainu hagede te Genuai Bidigo dąų wali bomai po wali peyu te tama tiai dao.
1CH 27:24 Joap, te Seruiago ogwago, te tobage bidi nedebo sę gagalali, tialima agai te sę yali simanobeo. Augwaligo te bidi hani nedebo sę ebaso, Godigo wiegi yai homu pemene isąwani, tama tialima te Israel augwaliba dene mabo sę yalio. Te sę yali pagede naga tama augwaligo te bidi dabego namba te bukude asęsąma, te king Devitgo yali sę po elalubo bukude me asęai menio.
1CH 27:25 Te bidi Asmavet, te Adielgo ogwago, te kingo mone me doado bage tonalubo bidi bidali. Te Jonatan, te Usiago ogwago, te tigidali tǫ kantride elalua pabo moni nai mubo genuai bakstua dabe tonalubo bidi bidali, te taun dabede, me te bidibo bulu dabede, me te hwįabo bomai bulu pesage dabede te moni bakstua elalua palio.
1CH 27:26 Esri, te Kelupgo ogwago, te gi sę ebo bidi dabe augwali tonalubo sę yalio.
1CH 27:27 Tama Simei, te Rama taun bidi, aga te kingo wain gi dabe tonalubo bidi bidai. Tama Sapdi te Sefam bulu bidi te wain mubo be habu dabe tonalubo bidi bidai dao.
1CH 27:28 Balhanan te Geder taun bidi te oliv ni du tonalubo bidi bidali, te sikomor ni dabe te giliga dega sabo badu te dwasianu bulu du dabe elalubo pedai badu elaluali me agai tonalubo sę yalio. Tama Joas te oliv wel mubo pesage tonalubo sę yai dao.
1CH 27:29 Sitrai, te odogo bulu Saron bidi, agai te odogo bulu Saronde bidalubo bulmakau dabe tonalubo bidi bidali. Tama Safat, te Atlaigo ogwa, agai te gasa odogo bulude bidibo bulmakau dabe tonalubo bidi bidali.
1CH 27:30 Obil te Ismael hani bidi te kingo kamel dabe tonalubo bidi bidali. Tama Jedea te Meronot bulu bidi aga te donki dabe tonalubo bidi bidali. Te Jasis te Hagar hani bidigo te kibu sipsip dabe meme dabe me tonalubo bidi bidai dao.
1CH 27:31 Te tigidali bidigo te king Devitgo nai doado bage tonalubo bidi dabe bidai dao.
1CH 27:32 Te Jonatan, te Devitgo aga aya sabi bidi da, agai te kingba wiegi yai homu kolesaga mani bidi da, magi baso meni, agai te bomai po bugagia koneama, te wiegi yai kolesaga hauwa koneai mu elaluai. Aga me Jehiel dali si, te Hakmonigo ogwa, augwali sigo te kingo ogwa dabe ola mabo sę elaluai dao.
1CH 27:33 Te Ahitofel aga te kingba wiegi yai homu kolesaga mabo polalubo bidi bidali, tama Husai te Arka bulu bidi aga te kingo wiegi yai abagi mu dao.
1CH 27:34 Nosali te Ahitofel isibo si da, Abiatar me Jehoiada, te Benaiago ogwago, te Ahitofelgo sę yali pesage hasegelalio. Tama Joap te kingo ami bidi dabego polalubo ami ofisa bidi bidai dao.
1CH 28:1 Devitgo te Israel tigidali genuai bidiba po ola tolu, te Jerusalemba sisinagasao po walio. Tibaso te Israel hani dabe augwa kiap polalubo bidi me, te kingo sę ebo genuai hani bidi tonalubo tobolu bidi dabe me, te deli deli hani sibi dabe tonalubo tobolu bidi dabe me, tama te kingo nai doado bage tonalubo bidi me te augwa ogwa dabe dali, te kingo bede sę ebo tonalubo bidi dabe dali me, te bomai ami bidi dabe me, tama te tigidali gegunai bidi dabe te Jerusalemba sisinagasao po wai dao.
1CH 28:2 Tialima king Devit dolugulama augwaliba te tiwai po walali, “Dage eno hani ama dabe, me te eno we bidi dabe, te eno dageba wabo po odiąo. Eno bomai homu elama te Genuai Bidigo Dąų Wali Bomai Po Muani Halobage muabo wiegi yai be sę yaibao homu yali, tama te be da te dena Godigo dugabo nai sia sai tiwai elalueibao. Tama eno te be sę yabo doado bage sisinani.
1CH 28:3 Tiali goli Godigo enabolo e tiwai po walio, ‘Devit, nage te ena pageba asabo we bidi augwaligo lotu wabo be sę yabo dąį ilali bidi nage menio. Magi baso meni, nage te ami bidi bidali sogo nago te bidi hauwa ela muai dao,’ Godigo enabolo te po wali.”
1CH 28:4 “Tialima God, da Israelgo Genuai Bidigo, ena dąį te eno ogwa dabe dali dąį ilama, te Israel sesemane bidabo sogo te Israel tonalumainu yalio. Hasia bolo agai te Judago hani dąį ilama, te Israel hanigo polalubo bidi hani bidimainu nigilali. Tama te Juda hanide agai eno ayago hani sibide dąį ilali. Tama nosali, Genuai Bidigo aga homu wali digi pelama, tama eno ama dede dabe tomode ena dąį ilali, tama agai ena te tigidali Israel hanigo king bidimainogo ilai dao.
1CH 28:5 Tama agai enabolo ogwa hauwa mani, tama te ogwa dabe augwali tomode agai te Solomon dąį ilama, te Israel we bidi tonalumainu yali, te Genuai Bidigo tǫ kantri dao.
1CH 28:6 Tama Genuai Bidigo enabolo te tiwai po wali, ‘Nago te ogwa Solomongo tama eno be sę badi, te be sesegede elalubo we bidi bilabo pesage dali nigibo sę me yaibao, magi baso meni, eno aga dąį ilama aga eno wai bidimainu yali, te ena agai aya bidaibao.
1CH 28:7 Tama agai eno bomai po me eno po dali wali pabo sę bomo eyu, te agai megi ebo sę tiwai ebaso da, teda te eno agai hani bidi dabede te sesemane bidada pabo sogo te king pedaludaibao,’ Genuai Bidigo enabolo tama po wali,” Devitgo te po walio.
1CH 28:8 Tama Devitgo te we bidi augwaliba te tiwai po ma walio, “Tialima te dena Godigo gedude me, te dage tigidali Israelgo gedude, dage te Genuai Bidigo we bidi dabe, eno te tiwai po dolo mu dagebolo obao. Dagego te bomai po tigidali bugagia wali pao, aga te God, dago Genuai Bidigo dabolo manio. Dagego te tiwai ebaso da, teda dage te wiegi yai tǫde bidaibao, tama te tǫ te dagego tǫ mu elalueibao. Te nosali dagego hanigo wai dabego me te tǫde sesemane bidada pidu, bidada paibao,” te po wai dao.
1CH 28:9 “Tialima nage Solomon, eno ogwa da, eno te tiwai bomai po nageba obao. Nago homu kolesaga deli naga elaluao, te naga ayago God dologode bidao. Te nago agai homu wali pabo sę bomo mu yao. Nago te tiwai yao, magi baso meni, Genuai Bidigo dago homude magi homu te tigidali agai koneaibao. Te nago agai godolo yabo kolesaga wali pabo sę bomo ebo kolesaga sobaso da, teda te nago aga bugagia konemainu yaibao. Tiali goli nago aga tudiba mubaso da, teda agai nage sela sąnama, te sesemane sogo agai nage tudiba mueibao.
1CH 28:10 Tialima megi da, bugagia odao. Genuai Bidigo nage dąį elama, nago te agaba te we bidi dabego lotu wabo tempel be sę emainu yai. Tama tialima nago bomo elama te sę yao,” Devitgo te po aga ogwa Solomonbolo wai dao.
1CH 28:11 Devitgo te po ola silama da, tialima agai te Solomongo te Genuai Bidigo tempel bede yabo po asęani nai salio, te sę yabo nai piksa dabe wali pelama, te sę emainu yai. Tama agai te asęani nai elalubo pepa te Solomonba mawai. Te asęani elalubo piksa dabede te Genuai Bidigo be habu tigidali piksa elaluai, te gesabidi badu elaluali be habu dabe da, te nai doado bage muabo be habu dabe me da, te ugwadu daide elalubo dwasianu be habu dabe me, te tomode elaluabo genuai be habu dabe me, te Tedali Gasagi Yai Mu Be Habu me, te Dąų Wali Bomai Po Muani Halobage muabo pesage me nigilali. Te Dąų Wali Bomai Po Munalubo Halobage muabo pesage da, te we bidi augwaligo dwai sę yali sęgę sela sąbo madi elaluai dao.
1CH 28:12 Tama me te nogi asęanide te tigidali nai te Godigo Mobo Noma Bidigo Devitba ola mani, te sisinabo pesage te Genuai Bidigo tempel be sę yabo pesage nigabo, me te piksa noma dabe elalubo ola mani te sisinibo pesage bagulali habu dabe, me te Godigo bede mone mubo be, me te Genuai Bidiba dąį ilama te bidi dabego mabo wiegi yai nai dabe ola mawai dao.
1CH 28:13 Tama me te asęani pode te pris dabeba me Livai dabeba te augwali hani deli deliba te sę yabo kolesaga po dąį eyu, te Genuai Bidigo bede sę yabo kolesaga po obadi yali. Tama te asęani pogo te po weyu, te Genuai Bidigo bede sę yabo plet dabe nigibo kolesaga yabo po walio.
1CH 28:14 Te asęai elalubo pode te nisu naga gol me silva selama, augwaligo te tobage kap me plet dabe nigimainu yali,
1CH 28:15 tama te sole lam dabe me, te lam ni dili muabo nai dabe me,
1CH 28:16 te tebol sai dabe nigabo ola mabo po asęai elaluai. Te tebol sai augwaligo te golgo nigali, te augwaligo Godiba mabo bret muabo tebol sai dao.
1CH 28:17 Tama te asęani po me te tiwai elaluali, te nisu naga wiegi yai gol augwaligo selama, te gąų yai na pok dabe te dis dabe me kap dabe nigabo po asęani elaluai, te nisu naga silva me gol dabego augwaligo te gasa dis dabe nigao po asęnama elaluai dao.
1CH 28:18 Te asęani pode te nisu naga wiegi yai gol augwaligo te selama, te wiegi yai denami ebo hano ebo ofa yabo pauda ulubo alta nigibadi, tama nisu naga golgo te ensel noma si nigibadi yaibao, te augwa si bogo dinigąlu te Genuai Bidigo Dąų Wali Bomai Po Munalubo Halobage daide elalueibao. Te ensel dabe te Genuai Bidigo gasaba pabo karis tiwai dao.
1CH 28:19 Tialima king Devitgo te po wai, “Te asęani elalubo piksa tigidali, te Genuai Bidi aga digi enabolo bugagia ola mobaso, eno te asęanio,” wali.
1CH 28:20 Megi da, king Devitgo Solomomba te tiwai po wali, “Nage bomo elama mu dolalu, te sę yao, te haniani sęgęgo nage aiyaba elalumainu ebaso te tagalao, magi baso meni, God, eno Genuai Bidi, te nage dali bidiyu, te nage tau saibao. Agai nage me tagalogobeo. Menio. Te aga nage dali bididubadi nago te be sę tigidali silibo siba usu naibao.
1CH 28:21 Dago te pris hani dabe me te Livai dabe te Godigo bede te tobage tigidali sę yabo bage dąį ilalio. Te haniani sę ebo page koneai bidi dabe augwaligo nage tau sainu tonalubao. Tama me te polalubo bidi dabe, me te tigidali we bidi dabego dali, augwaligo te nago po tigidali wali pabo dola sai naga elalubao,” Devitgo te po aga ogwa Solomon dali wai dao.
1CH 29:1 Tialima king Devitgo tigidali we bidiba te tiwai po wai, “Godigo eno ogwa Solomon dąį ilali, tiali goli aga gesi ogwa bidi mu elalubaso, te sę yabo kolesaga hauwa kuna konebeo. Te Genuai Bidi Godigo be sę ebo sę, te bidi dabe dago be sę eyu dua ebo tiwai sę gilama me egobeo. Menio, te genuai sę mu dao.
1CH 29:2 Tama tialima, eno te gol dabe me silva me bras me ni dabe sisinibo sę bomo yali, te Godigo tempel be sę yabo nai dabe nigibo sę yali. Tama eno te haniani gasa sawi yai masigi dabe hauwa sisinanio.
1CH 29:3 Eno te sisinani nai dabe daide ugwadu, eno te ena gol dabe me silva digi mawai. Magi baso meni, eno te ena Godigo tempel bede dwagi yai homu godolo genuai ebaso eno te tama sę yalio.
1CH 29:4 Eno te mani wiegi yai gol dabego sęgę da, te 100,000 kilogram igulama, te wiegi yai silvago sęgę da te 240,000 kilogram pedelali. Te Godigo be te daga dabe tomode au ilibo sę yaibao.
1CH 29:5 Tama me te kolesaga page koneai bidi dabe augwa te gol me silva te Godigo be sę yabo nai te piksade elalubo sulama, gasa nai dabe nigabo sę yaibao. Megi da, dage dego mu agai nai te Genuai Bidiba ofa mabo tiwai yaibawe?” te po wali.
1CH 29:6 Te deli sibi hani bage augwa tobolu bidi dabe dali, te Israel hani dabe augwa tobolu bidi dabego me, te 1,000 ami bidi tonalubo ofisa dabego dali, te 100 bidi tonalubo ofisa bidigo me, te kingo nai dabe doado bage tonalubo bidi dabego badi, augwaligo Devitgo te wali po oda selama da, te augwaligo haliga hogodama, te augwa wiegi yai nai dabe mawai dao.
1CH 29:7 Te augwaligo mani nai dabego sęgę te tiwai pedelalio, golgo te sęgę 170,000 kilogram igulali, te silvago sęgę 340,000 kilogram igulali, te brasgo sęgę 620,000 kilogram igulali, tama aingo sęgę da te 340,000 kilogram igulai dao.
1CH 29:8 Tama te haniani gasa sawi yai masigi elaluali bidi dabe, augwaligo te Godigo mone mubo be te Godigo be tomoba muanio. Jehiel, te Gerson hani bidi, aga te mone tonalubo bidi bidai dao.
1CH 29:9 Te we bidi augwaligo te augwa polalubo tobolu bidi dabego augwa haliga hogodama, te augwa wiegi yai nai mabo sulama, te augwa wiegi yai pemene umabo mu yalio. Tama king Devit me wiegi yai pemene umabo mu yalio.
1CH 29:10 Tialima te tigidali we bidigo gedude Devitgo te Genuai Bidigo nogi ugwaba siyu, tama agai gedu haluasa po te tiwai wali, “O Genuai Bidio, nage dago wąį nǫų Jekopgo God da, da naga we bidi dabego te sesemane sogo nago nogi ugwaba sidueibao,” walio.
1CH 29:11 “Nago tigidali bomo kolesaga mu elalubao. Nago nogi genuai elalu, te nage ugwadu mu bidibao. Nage mu polalubao. Magi baso meni, tigidali dagalude me tǫde elalubo nai tigidali te nago nigai nai naga elalubao. Tama nage te tigidali naigo tuni bidi king bidibao.
1CH 29:12 Nago te wiegi yai nai dabe hauwa dabolo mobao. Te nago naga te tigidali nai tonalubao. Naga digi nage te tigidali bomo me kolesaga page bidi da, tama nago naga te bidi dabe bomo pedalabo sę ilibaso te genuai nogi sabo dao.”
1CH 29:13 “Dago God da, megi dago nageba buba hwi obao, te nago genuai nogi ugwaba sobao.
1CH 29:14 Ena dali, te eno we bidi hani dabe dali, dago te tiwai po weyu dago nagebolo te mani nai dabego aya mu da dao po obaso usu egobeo. Menio. Da te olo bidi naga tama, te nai me deli te dena nai dabe dolo mu me elalubeo. Te tigidali nai nago nai naga da. Hasia bolo nago dabolo mani, te megi dago nageba ma mobao.
1CH 29:15 Te nago gedude da te bulu wau bilibo bidi tiwai ebao. Te dago dena wąį nǫų hani dabego yali sę tiwai gilama yalio. Te dago e tǫde dena bidibo ula dago dąų obaso usu egobeo. Da te plaua dabe pedalubo tiwai elama, te pęwadage sogo bidama, te isibo dao.
1CH 29:16 O God, dago Genuai Bidi, dago e sisinani nai tigidali te nago be sę elama, te nago genuai nogi ugwaba pedelabo sę ebao. Tialima te tigidali nai nagedu asali, te nago naga nigai nai dao,” wali.
1CH 29:17 “Eno God, nago tigidali bidigo haliga usu sabo da, tama nago te bugai haliga te doloba pai kolesaga ebo bidigo ebo sueibao. Eno te homu kone palama, tama me eno nago genuai nogiba homu kone elama, tama eno haliga hogodalu, eno te nai dabe nagebolo mawai. Te tobage deli kolesagade naga, nago te we bidi dabego te augwa nai dabe manio. Te eno augwaligo tama tebo sę ebo sulama, eno wiegi yai homu pemene umagi mu ebao.
1CH 29:18 Nage God, te dago wąį nǫų dabego Genuai Bidi, Abraham, me Aisak, me Jekop, te we bidi augwaligo te tobage wiegi yai homu kolesaga ebo te bomo elama, sesemane sogo elalumainu ilao. Tama me te augwaligo godolo ebo homu te nageba kęą pai sesemane elalubo sę ilao,” po wai dao.
1CH 29:19 “Nago Solomonba wiegi yai homu kolesaga hodolao, eno ogwa da, te agai nago bomai po me nago po mobo mabo wali pelama, tama agai nago te wiegi yai be sę emainao, eno te be sę yabo doado bage sisi ilai dao,” Devitgo te gedu haluasa po tama wali.
1CH 29:20 Tialima Devitgo te we bidi augwaliba te tiwai po walio, “Godigo nogi ugwaba sao, dago Genuai Bidi dao.” Te we bidi augwaligo odama, te augwa kidu sugunama, te gesabidi tǫba pǫgulali, te genuai nogi Devitba me Godiba mayu tialio, te augwaligo Genuai Bidi me augwa wąį nǫų dabego Genuai Bidi me dao.
1CH 29:21 Te nosali side, te we bidi dabe augwaligo te kibu bulmakau bidi sese hauwa mu te 1,000 kibu omai elali, me te kibu sipsip omai 1,000 elali, tama te kibu sipsip waigo te 1,000 sobadi elama, te Genuai Bidiba te isiba tigidali ulubo ofa tiwai elama manio. Tama augwaligo te wain gelebo ofa dabe me yalio. Te tigidali Israel we bidide te gasa ofa dabe me hauwa yalio.
1CH 29:22 Tama te side te we bidi dabe augwa te ąį dabe me kibu mi dabe tuali, te gasa ofa yali nai dabe tuyu, tama augwa wiegi yai pemene umabo mu te Genuai Bidiba yai. Tama me te side, te Genuai Bidigo nogide augwaligo wel te Solomon toboluba gealuama, te aga si sogo ma dąį ilama, te aga king pedalumainu ilalio. Tama me augwaligo Sadok te polalubo pris bidimainu dąį ilalio.
1CH 29:23 Megi da Solomongo te aga aya king bidali pesage hasegelama, tama te Genuai Bidigo we bidi augwaligo king pedelalio. Agai sę wiegi yai mu pedalubaso, tama Israel we bidi tigidaligo agai po wali pai dao.
1CH 29:24 Tama me te gavman ofisa bidi tigidaligo me, te bomai ami dabe dali me, te Devitgo ogwa tigidaligo me te king Solomon dologoba peyu, tede bidai dao.
1CH 29:25 Genuai Bidigo Solomon te tigidali Israel gedude polalubo bidi mu pedalubo sę ilalio. Tama me agai Solomon te genuai mu pedalubo sę ilama, te agai sali genuai nogigo te polobadu bidali Israel king tigidali aiyaba elaluali.
1CH 29:26 Te Devit, Jesigo ogwa, aga te tigidali Israel tǫ pedai kantri badu king bidai dao.
1CH 29:27 Aga te kibu be bidi sese si, 40 yia, king bidalio. Aga hasia bolo te Hebronde king bidali kibu be te 7 yia bidali, te Jerusalemde king bidali kibu be te 33 kibu be bidai dao.
1CH 29:28 Aga te we bidi augwaligo gedude genuai nogi elaluai, te agai mone me doado bage hauwa elalualio. Aga bidali sogo pęwadage meni, aga bidada pelama, monu dabe mu elama aga isalio. Nosali aga ogwa Solomongo agai sę yali pesage selama, te king pedelai dao.
1CH 29:29 Te king Devitgo yali sę po dabe, te aga king pedelama bidali sogo ela pali sę te isali sogoba usu nugi palio, te sę yali po dabe asęani buku sela nogi augwaligo te tama nogi yali, Te Profet Samuelgo Pusali Po, me Te Profet Natango Pusali Po, me Te Profet Gatgo Pusali Po, te profet bidi selago te Devitgo yali sę po asęani dao.
1CH 29:30 Te buku dabede te Devitgo bomai sę yali po asęani elaluali, te aga king bidali sogo te tǫ kantri tonalubo kolesaga yali po asęani buku elaluali. Te agaba gasa sę dabe pedelali po me augwaligo pusali, te Israel we bidi augwaliba me te Israel bagualuali tǫ kantri dabeba me te sę pedelali po elaluai dao.
2CH 1:1 Solomon, te Devitgo ogwa, agai bomonama eyu, te bomai king mu pedelali. Tama God Genuai Bidi aga dali bidiyu, tama agai genuai nogi ugwanu mu somainu ilali.
2CH 1:2 Tialima Solomongo te tigidali ofisa dabe i wali, augwali mebago te 1,000 bidi dabe tonaluali, mebago 100 bidi dabe tonaluali, agai augwali i wali. Me te po tų odobo jas bidi dabe me, te Israel dabego augwa hanide genuai bidi dabe me i wali. Tama me te deli ayago togali hanigo tobolu bidi dabe i wali. Tama te bidi dabe augwali te Israel we bidi dabe dali sisinagasali, tama Solomongo augwali dali po pusali.
2CH 1:3 Tama nosali augwali sese tama aga dali te lotu wabo pesage te hanu Gibeonba pali. Magi baso meni. Godigo ugwa be te hanude elalubaso. Te haus sel te polobadu Moses, te Genuai Bidi aga sę bidigo, sę yani te sel ugwa be dao, te nai meni yai wa pai bulude sę yani sel ugwa be.
2CH 1:4 Tiali goli te Dąų Wali Bomai Po Muani Halobage da, te Jerusalemde te gasa ugwa be me elaluali Te polobadu king Devitgo sę yani ugwa be dao. Tama Devitgo te Dąų Wali Bomai Po Muani Halobage te hanu Kiriat Jearimde selama, tama seselama, te Jerusalem taunba te sel ugwa be ba muagasai dao.
2CH 1:5 Tama me te alta me te Genuai Bidigo ugwa be gesabidi badu me elaluali, te bulu Gibeonde. Te da te brasgo nigai alta dao, te bidi Besalelgo polobadu nigai dao. Besalel te Urigo ogwa dao, tama wąį te Hur dao. Tialima Solomon aga te tigidali we bidi dabe dali te buluba pelama, augwali teba lotu po wagi pali, te Godiba.
2CH 1:6 Tama Solomon aga te brasgo nigai alta pąba dologi pelama, tama Genuai Bidigo gedude agai 1,000 ofa te isigo te hasa dabe sese dela silibo ofa yali, te alta saide.
2CH 1:7 Solomongo te ofa ela silai digi, te hulide God aga bidibo digi aselama, e tiwai po walali, “Nago enabolo mena nai nago wei ebaso da, nago enabolo hanalu wagameo. Tama eno nagebolo mawaibao,” wali.
2CH 1:8 Tama Solomongo Godigo po wei ponoyu, e tiwai po wali, “Nago eno aya Devit godolo mu eyu te aga dali homu kęą pai kolesaga iduai dao, tama nago aga dali wiegi yai sę mu yai dao. Tialima megi da nago ena king pedalama, agai pesage somainu ilai dao.
2CH 1:9 O God, Genuai Bidi, nago enabolo tonalumainu mani te we bidi augwali hauwa mu dao, tama te bidi dabego augwali nedebo usu me egobeo. Tama tialima megi da, eno aya Devit dali nago dąų wali po usu nagasa homu ebao.
2CH 1:10 Tama eno homugo nago enabolo wiegi yai hobolu du dali, wiegi yai kolesaga dali momainao homu ebao. Te tama tilama da, eno te we bidi bugagia tonaluabo usu yaibao. Tialima meni eyu da, teda nago te genuai we bidi hani tonaluabo bidi meni yaibao. Eno deligo eno usu munu me egobeo,” Solomongo te po wai.
2CH 1:11 Tama Godigo Solomongo po wei ponoyu e tiwai po wali, “Nago hanalu wali po wiegi yai mu dao. Nago enabolo mone hauwa hanaluyu, me o genuai nogi sainogo hanalubeo, tama nago enabolo nago boi bidi dabe dolomainogo me hanalubeo. Tama nago enabolo nage tǫde nage bobobage sogo bidaio olama me hanalubeo. Menio. Nago enabolo wiegi yai hobolu du dali, wiegi yai kolesaga dali si hanalu wai dao. Teda nago eno nagebolo tonalumainu mani te we bidi nago wiagila tonalubo usu yaibao.
2CH 1:12 Tama tialima, megi da eno nagebolo te wiegi yai hobolu du dali, me kolesaga dali si nagebolo mawaibao. Tama me eno nagebolo mone hauwa me mayu, te we bidigo nagebolo genuai nogi momainu ilaibao. Tama te tibogo da, te hasia bidali king dabego mone dabe me genuai nogi edelaibao, me te nosali asobo te king dabego mone dabe me genuai nogi dabe edelama mu elaluaibao,” Godigo te po wai.
2CH 1:13 Tama tialima Solomon aga Gibeonde te Godigo sel ugwa be te lotu wabo pesage taga pelama, tama aga Jerusalemba ma pali. Tama aga king Jerusalemde bidiyu, te Israel dabe tonaluali.
2CH 1:14 Tigidali sogo Solomongo te karis dabe te hwįabo nai dabe siyu, me te aga ami bidi dabego hos kibu dabe siyu yali. Tama me badu agai te nai dabe te agai tonaluainogo sa muani te hanude dabe tagalali, tama me badu aga dali Jerusalemde bidali. Agai 1,400 hwįbo karis elaluali, me te 12,000 hos kibu me elaluali.
2CH 1:15 Tama te Solomon aga king bidali sogo agai te silva me gol me wiegi yai ni bǫ hauwa mu te Jerusalemba sesali. Tama tialima te sogo silva me gol hauwa mu elaluali, te olo masigi dabe tiwai yali gilama. Me te ni bǫ hauwa mu elaluali, te olo ni dabe te Israel dabego dwasianu bulu du dabede elalua pabo ni dabe yali gilama tama elaluali.
2CH 1:16 Solomon agai aga hos kibu dabe te kantri Musri me kantri Silisiade sali. Agai te bisnis bidi dabe te Silisiaba agai hos dabe abeligi pomainu tagala paliyu yali.
2CH 1:17 Tama te bisnis bidi dabego agai karis dabe hos dabe Musride abeliyu yali. Tama te deli karis abelebo mone te 6,000 kina, me te deli deli hos kibu abelebo mone te 1,500 kina usu nama elaluali. Tama te bisnis bidi dabego te karis me hos dabe te Hit dabe me Siria dabego king dabe pageba sela peyu yali. Tama te king dabego abeliyu yali dao.
2CH 2:1 Te Solomongo Genuai Bidigo lotu be me deli genuai sęnama tama te we bidi te beba aselama, Genuai Bidiba lotu po wagasiyu yabo be sę yabo homu kone palali. Tama agai aga be sę yabo homu kone me palali.
2CH 2:2 Tama tialima agai 80,000 bidi dabe te bulu du dabede masigi du togobo sę emainu sa muani, tama me 70,000 bidi dabe te masigi dabe tolama usa yabo bidi dabe sa muani, tama agai te sę tonaluabo bos bidi dabe te 3,600 bidi dabe sa muani.
2CH 2:3 Tama Solomongo te king Hiram te taun Tair bidibolo po ola toliyu, e tiwai po wali, “Polobadu nago eno aya king Devit agai aga be sę emainogo nago agabolo ni bǫ tolai dao. Tama tialima, eno homugo nago te tiwai deli kolesaga naga ena dali me yao.
2CH 2:4 Eno megi God eno Genuai Bidigo lotu be me deli sę yainogo ebao. Te be da te God aga be mu elaluaibao, tama ena dali eno we bidi da te lotu be tomoba pelama, tama wiegi yai pauda te wiegi yai denami hano holomainu ulubo pauda uluyu yaibao. Tama tigidali sogo ofa tiwai mabo te bret tigidali sogo dago Godigo gedude muyu yaibao. Tama me dago isigo sese dela silibo ofa me iyu yaibao. Dago te ofa dabe tigidali sogo kigamu dabe iyu, me pio dabe iyu, me tigidali Sabat side iyu, me te gasa genuai sogo me ofa iyu, me gesi polua pedalobo side ofa iyu, me gasa genuai sogo te God dago Genuai Bidiba lotu wabo sogo ofa iyu yaibao. Agai da Israel dabebolo te tama sę tigidali sogo iyu ya po wai dao.
2CH 2:5 Tama eno genuai be mu sę yaibao. Magi baso meni. Dago Godigo genuai nogi mu elaluyu, tama me genuai bomo mu elaluyu, tama agai gasa meba god dabe edelama aiyaba elalubao.
2CH 2:6 Te mu tama, te bidi mego Godigo be sę yabo usu menio. Dago koneani. Dagalu da te genuai bulu mu dao, tiali goli aga te God bidabo usu genuai menio. Tama dego agai be sę ebo usu me egowe? Tama eno me eno agai be sę ebo usu me egobeo. Tiali goli, eno be te wiegi yai denami hano holobo pauda ulabo be sę yaibao, te God bidiboba wiegi yai denami hano holabo pauda ulubo be sę yainogo.”
2CH 2:7 “Eno ena bidi meba te Judade me Jerusalemde bidibao. Te polobadu eno aya Devitgo augwali te Godigo bede sę emainogo sa muai bidi dabe meba bidibao. Augwaligo haniani nai dabe nigibo kolesaga koneai dao. Tama tiali goli, eno homugo nago bidi me deli te wiegi yai kolesaga te tobage sę dabe ebo mu koneai bidi dali me tagala palao, te bage augwali dali sę emainogo. Te bidigo te golgo me silva me bras me aingo wiegi yai nai dabe nigibo, me te mama yai me sisi yai name ugwago wiegi yai au yai nai nigibo koneai bidi mu suao. Tama agai te golgo me masigi dabego piksa nigibo koneai bidi sao.
2CH 2:8 Tama eno me koneani, nago sę bidi dabe mebago te Lebanon bulude bulu du dabede ni gelebo kolesaga dabe koneai bidi dabe dao. Tama tialima, eno homugo te bage augwaligo te ni bǫ me pain ni dabe me ni junipa te Lebanonde elalubo ni gelama, ena bidiboba tolomainu yao. Tama eno ena sę bidi dabego nago sę bidi dabe tau somainogo tagala palaibao,
2CH 2:9 te ni dabe hauwa mu sisinimainu. Magi baso meni. Eno genuai sawi yai be mu sę yainogo.
2CH 2:10 Tama eno nago sę bidi dabe nai dabe meba mawaibao, tama eno augwali te 2,000 ton sęgę yai wit te augwaligo polo agawai yai mayu, me 2,000 ton sęgę yai rais bali mayu, me 400,000 lita wain mayu, me 400,000 lita oliv wel me mayu yaibao,” Solomongo te po olama asęna tolali.
2CH 2:11 Te king Hiramgo te Solomongo po polo odali. Tialima agai pas asęnama, Solomongo po wei ponoyu, e tiwai po wali, “Genuai Bidigo aga we bidi godolo mu yali. Tama tiyu, agai nage augwaligo king pedalomainu ilali dao.
2CH 2:12 Megi dago God, te Israel dabego Genuai Bidigo, nogi ugwaba sinao. Aga digi dagalu dali tǫ dali si nigai dao. Dago agai nogi ugwaba sinao. Magi baso meni, agai wiegi yai wai ogwa king Devitbolo manio, te aga hasegelama king pedalomainogo. Te Devitgo ogwago wiegi yai hobolu du me kolesaga hauwa elalubao, tama agai Genuai Bidigo be me aga be si sę yaibao.
2CH 2:13 Tama tialima eno polalubo sę bidi Huram nage tau somainogo tagala palaibao. Agai te haniani nai dabe nigibo kolesaga elaluyu, me agai wiegi yai homu kolesaga elalubo dao.
2CH 2:14 Aga ida te Dan hanigo we me deli dao, tama aga aya te hanu Tair bidi dao. Te Huramgo te golgo, me silva, me bras, me ain, me masigi, me nigo haniani nai dabe nigibo sę koneai dao, tama me te sisi yai name ugwago, me mama yai ugwa, me wiegi yai tedela ugwa dabego wiegi yai au yai nai dabe geselebo koneai bidi dao. Tama agai te wiegi yai piksa te golgo me masigigo nigibo koneai dao, tama agai te haniani piksa bidi dabego agabolo nigao olama hanalubo, te nai dabe agai nigibo dao. Tama nago aga te naga sę bidi dabe dali me naga aya king Devitgo polobadu sę bidi dabe dali sę emainu tagalagameo.”
2CH 2:15 “Tialima king Solomon, megi da dago homugo nago te tolaibao wali te wit, me bali, me wain, me oliv wel tolaiba wali, te nai dabe tolao homu ebao, nago te wali gilama.
2CH 2:16 Tama eno sę bidi dabe te Lebanonba pelama, tama nago te wei ebo ni dabe tigidali geligi paibao, tama augwaligo nabisba aiyaba selasa paibao. Tama augwaligo te ni dabe tamu węde sisinama, tama dąų olama, genuai ni seseba dabe nigiyu kęnaibao. Tama hanu Jopaba te tamu ąįdu tama selasa paibao. Tialima, nago sę bidi dabego te ni dabe te hanu Jopade selama, Jerusalemba ugwa sela holaibao,” te king Hiramgo Solomonbolo te po wei ponoyu asęna tolali.
2CH 2:17 Te king Solomongo pode augwaligo te gasa kantri bidi dabe te Israel bulude bidibo bidi dabe nedali. Te polobadu king Devit te Solomon aga ayago nedali, te hani. Tama megi da, Solomongo me augwali ma nedali. Tama augwaligo namba te 153,000 usu nama elaluali.
2CH 2:18 Tama agai te bage augwali te 80,000 bidi dabe augwali te bulu du dabede te masigi dabe togobo sę emainogo sa muani, tama me te 70,000 te masigi tolama usabo sę emainogo sali, tama me te 3,600 te sę tonalubo bos bidi nigilama, te sę tonalumainogo yali, te sę bage tonaluyu sę bugagia tonalumainogo ilali.
2CH 3:1 Te king Solomongo te Genuai Bidigo lotu be tempel te bulu du nogi Moria tede te be sę ebo sę gagalali, te Jerusalemde. Tiali te bulu dude Genuai Bidi Devitba polobadu pedelagasai dao, te Solomon aga aya. Polobadu te bidi Arauna te bulu dude te wit nai ge bo sela sąbo sę te bulu dude yai dao. Te Arauna da, te Jebus hani bidi me deli dao. Tama Devitgo te Araunago te sę iduali te pesage sa munama, tama agai te pesagede te Genuai Bidigo be sę yaibao wali.
2CH 3:2 Solomon te king pedelama, tama aga namba 4 wabo te kibu bede te polua namba 2 wabo polua silama, tama te sogo agai te sę gagalali.
2CH 3:3 Te Genuai Bidigo tempel be palibo be daga te king Solomongo usu siyu magi yali. Te tama tiwai, aga bobobage te 27 mita usu nama, tama aga genuai te 9 mita usu nama magi yali.
2CH 3:4 Tama te be gesabidi badu te rum me deli elaluali, te moni be mabo tiwai da, tama agai genuai te 9 mita usu nama elaluali, te Genuai Bidi aga tempel be magi tiwai si tama. Tama te be mabo be ugwa badu da te 54 mita usu nama elaluali, te genuai sigi be mu dao. Tama augwaligo te wiegi yai gol selama, tama augwaligo te be paiyai daga tomo badu munama, te be daga sese tama halua silali.
2CH 3:5 Tama augwaligo te ni pain name selama, tama augwaligo te Genuai Bidigo Tedali Gasagi Yai Be Habu badu papali pelama silali. Augwaligo te nel enene pelama silali. Tama augwaligo wiegi yai gol selama, te ni name dabe haluali. Tama te gol daide augwaligo ni det piksa noma togwalama, tama augwaligo au te sen tiwai yali.
2CH 3:6 Kingo te wiegi yai gol dabe te kantri Parvaimde sai dao. Tama agai te masigi dabe te bidigo abelainogo te genuai prais elalubo sawi yai masigi dabe selama, te be au ilali, te Genuai Bidigo tempel be.
2CH 3:7 Agai te bidi dabebolo te po wali, tama augwaligo te gol dabe selama, tama te be tigidali badu halua silao po wali. Teda te be punali daga ni, me te soiame ni, me te wala wala ni, me te sunumi dabe me te sunumidu aiyadu elalubo ni name dabe te gol selama mesegelali. Tama augwaligo ensel bidigo piksa te be daga nide togoali.
2CH 3:8 Tama Solomongo augwalibolo obaso, augwaligo te Tedali Gasagi Yai Mu Be Habu togali, te habugo genuai te 9 mita usu nama togwali. Te be aga magi dolo e tiwai tama togoali. Tama te be aga bobobage te deli tiwai magi naga yali, te 9 mita usu nama tama yali. Tama augwaligo wiegi yai gol selama, tama augwaligo te Tedali Gasagi Yai Mu Be Habu tomo badu be daga dabe te golgo mesegelali. Te golgo sęgę te 20,000 kilogram sęgę edelali.
2CH 3:9 Tama augwaligo te hap kilogram sęgę yai gol selama, tama augwaligo te nel hagalu pali. Tama me augwaligo te gol selama, augwaligo ugwadu elalubo be habu dabego daga dabe te golgo halua silali.
2CH 3:10 Tama te kingo sę bidi dabego ensel bidigo noma si nigali, tama augwaligo gol dabe selama, tama augwaligo te piksa noma si halua silali. Tama augwaligo te piksa noma si te Tedali Gasagi Yai Mu Be Habude dodolali.
2CH 3:11 Te piksa noma si tama te Tedali Gasagi Yai Mu Be Habuba gesabidi elama elaluali. Te augwali sigo bogo si dinigilama tama dolo mu tama elaluali, tama deli deli bogogo bobobage te 2 mita usu nama elaluali tama 25 sentimita elaluali. Tama te ensel me te dolo nogo badu dolaluyu, tama aga bogo me te dolo nogo badu be daga nide dagana sai elaluali. Tama te ensel me te pobase nogo badu dolaluyu, tama agai bogo me te pobase nogo badu be daga niba dagana sai elaluali. Tama augwali sigo me badu bogo si da te be habu tomoba talua sagasai elaluali. Te ensel sigo bogo bobobage si te 9 mita usu nama elaluali.
2CH 3:14 Tama te sę ebo bidi dabe augwaligo sisi ugwa name me bedeba ugwa name siyu, me wiegi yai tedela name ugwa siyu elama hobolama, augwaligo te Tedali Gasagi Yai Mu Be Habuba tula pabo sunumi paliali. Tama me augwaligo te ensel dabego piksa noma te name ugwa dabe daide hobolali. Tama augwaligo te moni name ugwa walama, te be sunumi tula pabo digi paliali.
2CH 3:15 Kingo po obaso, augwaligo pos bobobage si togolama, tama augwaligo Genuai Bidigo tempel be gesabidi badu dodolabo pos si dodolali. Te pos bobobage si tamago usu da te 16 mita usu nama elaluali, tama me augwaligo te pos si daide ugwadu augwaligo pos si guni nigilama tama te pos si daide muani. Tama te pos ugwadu daide muani au yabo guni naigo bobobage te 2 mita me 20 sentimita usu nama nigilama, te pos si daide ugwadu muani.
2CH 3:16 Nosali augwaligo sen dabe nigali tama te pos si ugwadude walali. Tama augwaligo te 100 pomigranetgo du piksa noma te brasgo nigilama, te sende wawalo pali.
2CH 3:17 Augwaligo te sę dabe ela silama, tama augwaligo te pos si te Genuai Bidigo tempel be gesabidi badu dodolali. Te pos me te u badu saut badu dodolali, me te not badu dodolali. Kingo te saut badu dodolai pos nogi te Jakin mani, tama agai te not badu dodolali posbolo agai nogi Boas polali.
2CH 4:1 Te king Solomongo pode augwaligo bras selama, alta me deli nigali. Te nai bobobage te 9 mita usu nama, tama aga genuai me te 9 mita usu nama nigali, tama aga bobobage ugwaba da te 4 hap mita tama usu nama nigali.
2CH 4:2 Tama augwaligo te genuai tank wę me deli te brasgo nigali. Te tank wę bobobage te 2 mita me te 20 sentimita usu nama nigali. Tama aga tomo dedage hala pali da, te 4 mita me 40 sentimita tama usu nama nigali, tama agai genuai usu da te 13 hap mita tama dao.
2CH 4:3 Tama te tank wę bogo badu tobolu badu augwaligo te lain si te kau kibu omai piksa noma tiwai si nigali. Te piksa noma sesego te tank wę ugwadu daide usu nama nigilama silalio. Tama te tigidali hap mita elalua pabo tomode te nogo si 10 kau kibu noma elalua pali. Tiali goli augwaligo te piksa noma nigilama te tankde daganebeo. Menio. Te augwaligo te tank nigali sogo augwaligo te piksa dali tama nigali. Tama augwali te tank pedai me tiwai tama elaluali.
2CH 4:4 Augwaligo nogo si olama, ugwadu si genuai kau kibu omai piksa noma te brasgo nigilama, tama augwaligo te tank wę ugwadu daide tede muani. Te kau kibu dabego tudi te tank dologode elaluama, tama augwaligo gesabidi te tigidali buluba ugwa gesabidi elalua pali. Te kau kibu selago te giliga asoboba poloba tonaluali, tama me selago te giliga paboba tonaluali, tama me selago te pobase oloba te notba pedai badu tonaluali, tama me selago te dolo olo badu te saut badu pedaiba tonaluali.
2CH 4:5 Te brasgo dąį te tank bulu badu gagalama, tama te tank tomoba usu nigi pai elaluali, teda te 8 sentimita usu nama elaluali. Tama te tank po te kapu po tiwai elaluali, tama te wiegi yai sawi yai plaua diniga pai elalubo tiwai yali. Tama te tank tomode augwaligo te 60,000 lita usu nama wę tomode pągąnama elaluabo usu yali.
2CH 4:6 Tama me augwaligo te nogo si te 10 tank dwasianu me nigali. Tama augwaligo a naga te saut badu te Genuai Bidigo tempel be daga pąde muani, tama me a naga te not badu be daga pąde muani. Te tank dabe da, te ofa yali hasa dage dabe ąį telayabo tank dabe dao. Tama te genuai tank te pris bidi dabe tede ąį pauabo dao.
2CH 4:7 Tama augwaligo gol selama, tama lam sole walabo bobobage nai geselali. Te lam sole walabo te bobobage nai nigibode bomai po elaluali. Augwaligo bugagia wali pelama, tama augwaligo te lam sole walabo nai dabe nigali, augwa te bomai pode elaluali kolesagadu bugagia wali pali. Tama me augwaligo nogo si 10 tebol sai geselali. Tama augwaligo te tebol me lam dabe augwaligo Genuai Bidigo tempel be tomode te Tedali Gasagi Yai Be Habude muani. Te tebol a naga ebadi me lam sole walabo bobobage nai a naga ebadi augwaligo not badu polo badu te be habu tomode muani, tama te a naga tebol me lam sole walabo bobobage nai dabe me augwaligo te saut badu polo badu muani, te be habu badu, te be tomode. Tama augwaligo gol selama, 100 dis pou nigali.
2CH 4:9 Augwaligo genuai me dwasianu bidi sisinibo pesage nigali. Te dwasianu yalawai sisinibo pesage te pris bidi dabe naga sisinibo pesage nigali. Tama augwaligo genuai sisinibo pesageba pabo sunumi dabe nigali. Tama augwaligo bras dabe selama, te sunumi dabe hagalu pelama, simanigi pelama silali.
2CH 4:10 Tama augwaligo te genuai tank augwaligo te be mesalode te saut badu muani, te kona o sabi pąde gana muani.
2CH 4:11 Te Huramgo te wę paubo dis dabe geseliyu, me dwasianu savol dabe geseliyu, me gasa meba dis pou dabe geseliyu yali. Tama tialima megi da, Huramgo te king Solomongo agabolo nigilama Godigo tempel be tomode muabo nai dabe nigao wali, te nai dabe nigila silali.
2CH 4:12 Te Huramgo nigali nai dabe te e tama dao. Te genuai bobobage bras pos si, me te pos si ugwadu bagulali bagua sai nai me nigali, tama me te umben te wa tiwai nai geselama te pos si ugwadu au ilabo geselali.
2CH 4:13 Tama agai te pomigranet du piksa noma te 400 geselali, te pos side bagulali te umben bono dabede wawalo pabo nai dabe geselali. Te deli deli pos tobolude te pomigranet du te hani si te umben bonode te pos bagulama elaluali.
2CH 4:14 Tama agai te wilkar geselali, tama me agai te wilkarde muabo tank dabe geselali.
2CH 4:15 Tama me te genuai tank wę me te tank tolaluabo nogo si olama ugwadu si genuai kau kibugo piksa noma te tank tolaluabo nigali, te omai kau kibu piksa noma nigali.
2CH 4:16 Tama agai te sene dabe me dwasianu savol dabe me te pok dabe geselali. Te Huram, te haniani nai dabe nigibo kolesaga mu konea pai bidigo, te Solomongo po wali pelama, tama agai te Genuai Bidigo tempel bede muabo nai dabe tigidali te brasgo geselai dao. Agai te nai dabe augwali gesela silama, tama agai augwali bugagia sawi yai ilali.
2CH 4:17 King Solomongo te Hurambolo te nai dabe geselao po te Jordan węde odogo malu bulude, te hanu Sukot me hanu Sereda tomode nigao po wali. Te bulude augwaligo te tobage sę yabo mama yai tǫ elalubo pesage wiegi yai madi mu dao.
2CH 4:18 Huram agai Solomongo po wali pelama, tama agai te nai dabe hauwa mu geselali, tama te nai dabego sęgę bidigo me konebeo.
2CH 4:19 Solomongo te sę bidi dabebolo te Godigo tempel be tomode muabo nai dabe geselao po wali. Tialima augwaligo gol selama alta geselali, tama me augwaligo Godiba mabo bret muabo tebol dabe me geselali.
2CH 4:20 Tama me augwaligo te gol selama, tama augwaligo lam dabe geseliyu me te lam walabo bobobage nai dabe me geselali, te Tedali Gasagi Yai Mu Be Habu pąde muabo madi geselali. Te lam walabo bobobage nai dabe geselabo sę yabode po te bomai po te elaluali. Tama augwaligo bugagia wali pelama, tama te lam walabo nai dabe geselali.
2CH 4:21 Tama me augwaligo te wiegi yai gol selama, tama augwaligo te plaua dabe geseliyu, me te lam dabe geseliyu, me te sisis tiwai te isi nogo tuabo nai dabe geselali.
2CH 4:22 Tama augwaligo te wiegi yai gol selama, tama lam sole sula sąyabo nai geselali, tama te ofa ebo nai kaneme muabo dis pou me geselali. Tama me te wiegi yai denami hano holobo pauda ulabo plet pou me geseliyu, me te isi sabilabo plet pou geseliyu yali. Tama me augwaligo gol selama, tama augwaligo te Tedali Gasagi Yai Mu Be Habu tomoba pabo sunumi daide muyu, me eda badu te Tedali Gasagi Yai Be Habu sunumi daide muyu tama yali, tama sese tama te golgo haluali.
2CH 5:1 King Solomon dali aga sę bidi dabe augwaligo Genuai Bidigo tempel bede sę dabe sese tama elama silali. Tialima Solomongo aga aya king Devitgo te silva dabe me gol me dis pou dabe me selama, te Genuai Bidi mawainu sa muani nai dabe augwaligo sali, tama augwaligo te nai dabe sese tama selama, te tempel be tomoba pelama, tama te wiegi yai nai muabo be habuba mugi pela silali.
2CH 5:2 Te king Solomongo te tigidali genuai wąįgo hani tobolu bidi dabeba, me te dwasianu hani wai dabebolo me, agai augwali te Jerusalemba sisinagasao po wali. Agai homugo augwali te Devitgo hanu Saionba painogo homu yali, te da te Jerusalem hanu pedai me deli dao. Tama te Dąų Wali Bomai Po Muani Halobage, te selama tama Genuai Bidigo tempel beba sesemainao homu yali.
2CH 5:3 Tialima sese tama te namba 7 poluade augwali sisinagasali. Te da te genuai sogo te Osogo Bidabo Bede Bidibo Genuai Sogo.
2CH 5:4 Te polalubo bidi dabe me tigidali hetman dabe sisina silibo sogo da, teda te Livai dabego te halobage tolali.
2CH 5:5 Tama te Livai dabe augwaligo te Dąų Wali Bomai Po Muani Halobage dali, te Godigo ugwa be lotu be dali, te aga tomode elalubo nai tigidali me, te Godiba sa muani nai dabe dao, te nai sese te Livai hani pris dabego selama, tama te tempel beba selasa pali.
2CH 5:6 Tama augwali teba sabolama, tama tede king Solomon dali, te Israel we bidi dali, augwali tigidali deliba sisinama, tama te Godigo Dąų Wali Bomai Po Muani Halobage pąde dolaluali. Tama augwaligo kau kibu omai dabe me sipsip kibu dabe augwaligo elama, Godiba ofa yali. Te ofa yabo hasa dabe augwaligo hauwa mu elali, tama te bidi mego augwaligo te ofa yainogo elali hasa dabe nedabo usu meni yani.
2CH 5:7 Augwaligo te hasa dabe ofa ela silama da, teda te pris dabego te halobage te tempel be tomoba augwaligo te Tedali Gasagi Yai Mu Be Habu me elaluali te Be Habu dodolagalai elaluali teba sela pali, te Genuai Bidigo be tomode, te ensel bidi sigo bogo si dologode muani.
2CH 5:8 Te bogo si dinigaluali. Tama tialima augwaligo te halobage dali te halobage tolobo ni dabe bobobage sigo haluali.
2CH 5:9 Te ni dage si te bobobage mu si dao. Tama tialima, te bidi te Tedali Gasagi Yai Be Habude dolaluyu da, teda te ni dage si sabi si suaibao. Tiali goli, bidi te be habu bulu badu dolaluyu da, teda agai te ni dabe sabi sugobeo. Tama te ni dage si me tama elalubao.
2CH 5:10 Te halobage tomode te nai dabe hauwa tomode meni yani. Te Godigo bomai po asęani te masigi si naga munaluali. Polobadu Israel dabe augwali Isip tagalama augwali bulu du Sainai bidagasali, tama tede Genuai Bidigo augwali dali po dąų walai dao. Te kontrak iyu, te dąų wali po te masigi side elalubadi Mosesgo te halobage tomoba muai dao.
2CH 5:11 Te augwaligo te Genuai Bidigo be tomoba te Dąų Wali Bomai Po Munalubo Halobage te muabo sogo bubuga isąbadi, te tigidali haniani pris bidi hani sibi augwa te Godigo gedude wiegi yai pedalobo kolesaga wali pelama yali. Tama te we bidi polo sisinagasai madi da, te Asap, me Heman, me Jedutun, te hani sela augwa wai puluba dabe dali, me augwa deli hani dali, augwali te wiegi yai nala ugwa gudama, tama augwali te giliga asobo badu elalubo alta pąde dolaluali, te tempel be mesalode. Te bidi dabe augwaligo te Livai dabego bidi hani dao, tama augwali te tęąbi po weyu musik elebo bidi dabe dao. Augwaligo haniani gita me bras plet dabe todolaluali. Tama te 120 pris bidi dabego te bu wabo nai biugel nogo tolaluyu, augwali dali dolaluali. Te bidi dabe augwali te musik elebo mu konea pai bidi dabe mu dao. Tama mena sogo augwali sisinama Genuai Bidigo nogi ugwaba siyu, buba hwi po olama tęąbi wabo sogo, te tęąbi po wabo bidi dabe me te biugel bu wabo bidi dabe augwali deliba taluama augwaligo tęąbi po wiegi yai mu wabo dao, tama te dogoni deli mu pedalobo tiwai ebo dao. Te pris bidi dabe augwaligo te Dąų Wali Bomai Po Munalubo Halobage te Genuai Bidigo tempel be tomoba polo muani, tama augwali buluba ma teda soabo sogo da, te musik elebo bidi hanigo biugel bu weyu, te plet bras tama elebo gagalali. Tama augwaligo Genuai Bidigo nogi ugwaba sabo tęąbi po tama wali. Augwaligo tęąbi po e tama tiwai wali, “Dago Genuai Bidiba buba hwi po wainao. Magi baso meni. Aga da, te da dali wiegi yai kolesaga ebo bidi dao. Agai da godolo mu ebo kolesaga te gamonaibao,” wali. Te augwaligo tęąbi po wabo si, polo tama te genuai pǫgo te Genuai Bidigo tempel be pągąna sagasali.
2CH 5:14 Tama Genuai Bidigo ula te pǫde ula genuai mu elama, tama aga te be tomo mu tama pągąna sali. Tialima te pris dabe augwali te be tomoba pelama augwa sę dabe igi pabo usu meni yani.
2CH 6:1 Solomongo te pǫgo te tempel be pągąna sabo sulama, tama agai e tama gedu haluasa po wali, “Genuai Bidi, eno nago be wiegi yai me deli sę yani dao. Tama eno megi koneani, nage te be tomode polo bidibao. Magi baso meni, nago te po wali nage te pǫ mu hulia sai madi bidibo dao po wali. Nage tigidali sogo te bede mu bidagameo,” Solomongo te gedu haluasa po wali.
2CH 6:3 King Solomon aga gedu haluasa po ola silama, begelama subadi, tama agai te we bidi dolalubo suali. Tama agai Godibolo augwali dali wiegi yai sę yao po hanalu wali.
2CH 6:4 Tialima agai augwalibolo e tama po walali, “Genuai Bidigo nogi ugwaba siąo, te Israel dabe dena God dao. Agai eno aya Devit dali dąų walali po wali palio. Devitgo homugo te Godigo be me deli sęnama, tama te we bidi te beba pąba aselama, tama Genuai Bidi dago Godiba asomainao homu yali, te agaba lotu po weyu yainogo homu yali. Tiali goli Genuai Bidigo Devitbolo e tiwai po walali, ‘Te ena we bidi Isip bulude odasa asalidu gagalasa aselama, megiba usu nagasali side, eno te Israel dabego eno nogi elalubo tempel be me sę emainogo te hanu me sa muai menio. Tama me ma, eno te bidi mego eno we bidi tonalumainogo sa me muai menio. Menio. Tiali goli megi da, eno hanu Jerusalem eno te we bidi augwali aselama, enaba lotu wagasiyu yabo pesage te sa mubao. Tama Devit nage eno we bidi tonalumainu sa mubao. Tama eno koneani, nago eno genuai tempel be me deli sę yabo homu ebo suali, tama nago te homu yali te wiegi yai dao.
2CH 6:9 Tiali goli, naga digi eno be sę enamo dao. Menio. Te naga ogwa mu mego eno te be sę yaibao, te we bidi ena pąba sisinagasabo madi,’ Genuai Bidigo te eno aya Devitbolo te po wali,” Solomongo te po wai.
2CH 6:10 Solomongo po me weyu, te po wali, “Genuai Bidigo te po dąų walai dao, tama megi da, te poba usu nagasali dao. Eno ena ayago pesage polo hasegelama sai dao, te ena aya Devitgo pesage sali, tama ena Israel dabego king bidibao, te Genuai Bidigo te po dąų walali gilama. Tama eno Genuai Bidi dago Godigo tempel be sę yani dao, te da Genuai Bidi aga pageba pelama lotu po weyu yabo gilama.
2CH 6:11 Tama eno te Dąų Wali Bomai Po Munalubo Halobage te be tomoba muai dao. Te halobage tomode te bomai po te we bidi dabe dali dąų walama asęani te masigi si te halobage tomode munaluali, te Israel we bidi dabe dali dąų walali po asęani masigi sawale si,” Solomongo te po wali.
2CH 6:12 Te Israel we bidi gesabidide Solomon aga te Genuai Bidigo alta pąba pali. Tama aga te augwaligo brasgo nigai saiba ugwaba doligi pali. Te sai te bidi sisinagasobo pesagede elaluali te alta sai pąde. Te sai genuai usu da te 2 mita me 20 sentimita usu nama tama dao, tama te sai aga ugwaba bobobage da, te 1 mita me 30 sentimita usu nama dao. Tama tialima, te Israel we bidi tigidali gedude agai bogoli si sugunama, tama aga nogo ugwaba dodolama,
2CH 6:14 tama gedu haluasa po weyu e tiwai po wali. “Genuai Bidi, Israel dabego God, te dagalude me tǫde god nage tiwai me menio. Te dago deli homu kolesaga naga elama, nago gedude bugagia bilibaso da, teda nago naga dąų walali po bugagia wali pelama, tama tigidali sogo nago da naga we bidi dali dąų wali po wali peyu, tama tigidali sogo nago da godolo mu ebo dao.
2CH 6:15 Nago eno aya Devit dali polobadu dąų wali po bugagia wali pai dao, te naga sę bidi dali, tama megi da nago te dąų wali po usu nagasali dao.
2CH 6:16 Tama megi da, Genuai Bidi, da Israel dabego God, eno nago eno aya Devit dali po me dąų wali te po me kone palao homu ebao. Nago agabolo e tama po walai dao, ‘Devit, te nago wai pulubago ena wali tigidali sogo peyu elama, tama eno gedude bugagia dolasa biliyu ebaso da, te nago ebo tiwai ebaso da, teda eno tigidali sogo nago hani bidide te Israel dabego king bidi pedalomainogo iyu yaibao,’ wali.
2CH 6:17 Tama tialima Genuai Bidi, Israel dabego God, eno homugo nago naga sę bidi Devit dali wali te po usuna homu ebao.”
2CH 6:18 “Tiali goli God, nage te da tǫde we bidi dali bidagasainu ebo te mu da, agawe? Dagalu te genuai bulu mu dao. Tiali goli nage tede bidabo usu meni yali bogo. Tama tialima, eno te sę yani bego nage mena tama tilama usu egowe?
2CH 6:19 Tiali goli, Genuai Bidi, eno God, eno homugo nago eno hanalubo po me eno gedu haluasa po wabo odao homu ebao, ena naga sę bidi, nago eno nagebolo hanalubo tiwai yao.
2CH 6:20 Magi baso meni. Nago e be te naga be tiwai pedalomainu po dąų walai dao, tama te we bidi augwali teba sisinagasiyu emainao. Tama eno homugo nago tigidali sogo te beba tonalumai ebao, te hulide me ulade me. Tama tialima, eno me eno te beba tonaluyu gedu haluasa po wabo si da, teda nago eno gedu haluasa po wabo odaibao.
2CH 6:21 Nage Genuai Bidi, nage naga bulu dagalude bidibao. Tiali goli eno homugo te ena me te Israel dabe te naga we bidi, dago nago te beba tonaluyu, gedu haluasa po wabo si da, teda nago dago gedu haluasa po wabo odama, tama nago dago sęgę sela sąyao.”
2CH 6:22 “Tialima bidi me deligo gasa bidi dali dwai sę yaibaso, tama augwali nago te beba te alta pąba pelama, tama nagebolo ‘Te eno dwai sę eyu da, teda nago ena dolao,’ po hanalubaso da,
2CH 6:23 teda Genuai Bidi nage ugwa dagalude bidiyu, tama nago augwaligo gedu haluasa po wabo odama tama augwaligo po tų ebo odao. Tama nago te dwai sę yali bidi dene mao. Tama nago te dwai sę isąwai bidi nago aga wiegi yai sę ilao. Teda te bidi dabebolo agai dwai sę ebeo olama ola mayu tama tiao.”
2CH 6:24 “Tama tialima, da Israel dabe naga we bidi dabe dago te boi bidi dabe dali hwįgi pabode augwaligo da aiyaba elalumainu ebo da, te magi baso meni, dago nageba dago sęgę sabo sę yalio, tiali goli da nosali homu begelama, tama nage dologoba bidagaselama, tama nago te beba bidagaselama gedu haluasa po weyu nageba hanaluyu, dago sęgę sela sąyao po obaso da,
2CH 6:25 teda Genuai Bidi, eno homugo nage dagalude bidiyu, tama nago da nago we bidigo gedu haluasa po wabo odama, dago sęgę sela sąyao. Tama me ma, te boi bidi dabego da gasa kantriba odasa paibaso da, teda nago da te e tǫba ma odasa asao, te nago polobadu dago wąį dabebolo mani tǫba.”
2CH 6:26 “Tama tialima, da naga we bidi dabe dago nageba sęgę saibaso da, tama nago te sęgę wei ponoyu tulubage paliai baso, tama nosali dago homu begelama, tama nage dologode bidiyu, tama dago te beba tonaluyu, gedu haluasa po obaso da,
2CH 6:27 teda, Genuai Bidi, nage dagalude bidiyu tama nago da Israel dabe naga we bidigo sęgę sela sąyao. Tama nago da te wiegi yai kolesaga wali pomainu ola mao. Tama nago tulubage te da naga we bidi dena tǫ tiwai dabolo mani tǫba tulubage ma mao.”
2CH 6:28 “Tialima genuai nasi dago kantride pedalobaso, o genuai gasi me deli pedalobaso, o te genuai bomai wali me pedalama, tama gide nai dabe gasi selama dolobaso, o te kuli mano dabe hauwa mu elama tama te nai dabe dolobaso, ma te boi bidi dabe aselama, tama da dena taun dabe tomoba bagua sagasobaso, o te haniani gasi dabego da dolagasobaso,
2CH 6:29 tama tialima te sogo da Israel dabe naga we bidi dabego te sęgę agade pedelali dao homu elama, tama agai nago te beba gedu tonama, tama agai nogo ugwaba selama, tama nageba gedu haluasa po obaso da,
2CH 6:30 teda, Genuai Bidi, nage nago bulu dagalude bidiyu, tama nago agai gedu haluasa po wabo odama, tama nago aga tau sao. Nago deligo naga bidigo ebo homu kolesaga konebo dao, tama tiyu nago tigidali deli deli bidigo ebo kolesaga dagalama, tama nago augwaligo yali kolesagaba usu nama pe wei mawaibao.
2CH 6:31 Tialima nago tama tiyu da, teda da nago we bidi nage dologode bidama, tama nago godolo ebo kolesaga wali paibao, te tigidali sogo da nago te dago wąį dabebolo mani te tǫde bidiyu tama tiaibao.”
2CH 6:32 “Tialima, te gasa kantri bidi dabego nago genuai nogi koneama, tama me genuai sę dabe nago naga we bidi da tau siyu yali sę koneyu elama, tama augwali me deligo nageba lotu po wainogo aga bulu tagalama, te be pąba aselama, nageba gedu haluasa po wainu ebaso da,
2CH 6:33 teda, Genuai Bidi, nage naga bulu dagalude bidiyu, tama agai gedu haluasa po wabo odama, tama nago agai nagebolo mena nai me hanalu obaso tau sao. Tama tiyu da, te tigidali gasa kantri we bidi nage koneama, tama nage dologode naga bidimainao, te da Israel dabe naga we bidi dago ebo tiwai emainao. Tama augwaligo koneaibao, eno te sę yani be te naga be mu dao homu yaibao. Tama te pesagede te we bidi augwali teba pąba aselama, tama nageba lotu po wagasiyu emainao.”
2CH 6:34 “Tama tialima, nago naga we bidi da gasa bulu meba hwįgi pomainu tagala palobode, tama dago te sa muani te hanuba tonama, eno nago te be sę yani teba tonaluyu, dago gedu haluasa po obaso da,
2CH 6:35 teda, Genuai Bidi, nage dagalude bidiyu, tama dago gedu haluasa po wabo odama, tama nago da hobede elama, tama nago da tau sao.”
2CH 6:36 “Te tigidali we bidigo sęgę sabo sę ebo dao. Tama tialima, dago nage dali sęgę sabo sę eyu da, tama nago da dali wado elama, tama nago boi bidi dabego da dali hwįagaselama da aiyaba elaluama, tama da kalabus elama, da digibulu o pąde elalubo kantri dabeba pomainu sula tagaliyu,
2CH 6:37 tama da te kantri dabede kalabuside bidiyu, dago dena yali dwai sę dabede homu sęgę hauwa kua pelama, tama dago homu begelebaso da, teda, Genuai Bidi, nago dago gedu haluasa po wabo odao. Mu tama, te da te boi bidi dabego kantride bidiyu, tama dago nageba homu bomo elama dąų olama tama nage deliba naga homu kone elama tama homu mu begelama, tama dago nago dago wąį nǫų dabebolo mani te tǫba tonama, me nago sa muani te hanude te nago sa muani madi te sę yani nago te beba, te we bidi nage pageba pąba asomainu yali teba tonama, tama tialima dago gedu haluasa po weyu te e tiwai po obaso da, ‘Hobede mu dao, da dwai sę eyu bilai dao, tama dago haniani dwai kolesaga hauwa mu yalio,’ obaso da, teda nage naga bulu dagalude bidiyu, tama dago gedu haluasa po wabo odama, tama nago da hobede elama tama nago da tau sao. Tama nago da naga we bidigo sęgę sela sąyao.”
2CH 6:40 “O eno God, eno homugo tigidali sogo nage pąde tede bidiyu, tama nago dago gedu haluasa po wabo wei ponainogo nage pąde bididuao, te nago be elalubo madi.
2CH 6:41 God, Genuai Bidi, nage naga Dąų Wali Bomai Po Munalubo Halobage dali aselama, tama naga toma tubo digi duyagasao. Te halobage te genuai bomai nago dąį me deli dao. God, Genuai Bidi, nago naga pris bidi dabe hobede elama, tigidali sogo nago augwali ma oda sao. Tama nago te kolesaga augwaligo au dodobage tiwai elalumainao. Tama naga we bidigo nago wiegi yai kolesagade wiegi yai homu pemene emainao.
2CH 6:42 Genuai Bidi, nago naga sę bidi Devit kone palao. Tigidali sogo nago aga godolo mu yai dao. Tama tialima, nago naga digi sa muani te king tudiba togolama tagalamo dao,” Solomongo te tiwai gedu haluasa po wali.
2CH 7:1 Te Solomongo gedu haluasa po ola silibo si da, teda Godigo dagaludu isi tagala palama, tama te isigo mu dela silibo ofa sese tama dela siliyu, me te gasa meba ofa yali dabe sese tama dela silali. Tama Genuai Bidigo ula genuai mu elama, tama aga te be ulago pągąna sali.
2CH 7:2 Godigo te genuai ulago te be pągąna sobaso, tama te pris bidi dabe te be tomoba pabo usu me ebe.
2CH 7:3 Te Israel dabe augwaligo te isi dulubo suyu, me augwaligo Godigo ula genuai mu aga te be tomode ebo suali, tama augwaligo bogoli sugunama, tama augwaligo tobolu te masigi augwaligo Genuai Bidigo be tomo badu dąį elama wasilali masigiba tobolu munama, tama augwaligo agaba lotu po weyu, tama Genuai Bidigo nogi ugwaba siyu e tiwai po wali, “Genuai Bidi aga da dali wiegi yai mu ebo dao. Agai da godolo mu ebo kolesaga te sesemane sogo elalua paibao,” wali.
2CH 7:4 Solomon me te we bidi augwaligo gasa me badu ofa dabe Genuai Bidiba yali.
2CH 7:5 King Solomongo te omai kau kibu te 22,000 sesiyu, me 120,000 sipsip kibu sesiyu elama ofa yali. King aga we bidi dabe dali augwaligo te ofa yali te be te Godigo be dolo mu dao olama sa muyu, te ofa yali.
2CH 7:6 Te pris dabe u badu dolaluyu me Livai dabe me e badu dolaluyu yali, te king Devitgo te musik elebo nai niga mani te nai dabe dali dolaluali. Polobadu Devitgo Genuai Bidigo nogi ugwaba sainogo da, te Livai dabe augwaligo musik omainogo te nai dabe eliyu yai dao. Tama Genuai Bidibolo buba hwi wabo tęąbi po weyu yai dao. Augwaligo te tęąbi po augwaligo te e tiwai nogi ebo te tęąbi po weyu yali, “Genuai Bidigo da godolo mu ebo kolesaga te sesemane sogo elalua paibao,” te wabo tęąbi po wali. Tialima megi da, te we bidi dabe dolalubadi tama te Livai dabego te tęąbi po obadi te pris dabego biugel bu wali.
2CH 7:7 Tama te sogo bubugade naga, te Solomongo te bidi sisinagasobo pesage te Genuai Bidigo tempel be gesabidi badu sa muani, tama te tǫ pedai te Genuai Bidigo tǫ mu pedelali. Tama te tǫ pedaide agai te isigo mu dela silibo ofa, me te wit ulubo ofa, me te ofa ebo hasa dabego ili dabe te God dali deli haliga yainu ulubo ofa dabe tama yali. Augwaligo te ofa dabe te tǫde ulali, magi baso meni, te pesage te genuai mu tama alta bras te dwasianu mu, tama augwaligo te alta daide ofa yabo usu meni yai.
2CH 7:8 Tama te sogo Solomon aga te Israel dabe dali augwali te Jerusalemba te nogo a naga olama me badu nogo si, te tama 7 sogo te Osogo Bidabo Bede Bidibo Genuai Sogo augwali tede sisinama bidali. Te genuai we bidi hauwa augwali te tigidali kantri badu asali. Te not badu te hanu Hamatba pabo sunumidu dąį elama, tama u badu te saut badu te kantri Isip usu nama tama asali. Te 7 sogo ma sisinama bidai dao, te alta te Godigo nai mu dao olama sa muainogo. Augwali te 14 sogo sisinama bidali. Tama te sogo nosali augwali deliba genuai mu ma sisinani.
2CH 7:10 Tama te namba 7 poluago 23 deide Solomongo Israel dabe augwali augwa buluba ma pepelamainu tagala palali. Tama augwali ma pepelabo sogo augwali wiegi yai homu pemene mu yali. Magi baso meni, augwaligo Genuai Bidigo tigidali wiegi yai sę Devit dali iyu, me Solomon dali iyu, me Israel we bidi dabe dali iyu yaibaso, te aga we bidi dabe dali.
2CH 7:11 Te king Solomongo Genuai Bidigo tempel be sę eyu, me aga be sę eyu ela silali. Agai te be side yaibao homu yali te nai dabe sese tama sę ela silali.
2CH 7:12 Tama Genuai Bidi agaba hulide pedelama, e tiwai po walali, “Eno nago gedu haluasa po wali polo odalio. Tama eno te pesage te bidi dabe teba aselama enaba ofa yagasabo pesage sa muani.
2CH 7:13 Tiali goli dagego eno po sela sąnama tama sęgę siyu eyu da, teda eno tulubage palibawe o kuli mano dabe tagala palama, dagego gide nai dabe tuagasomainu yaibao, o eno gasi dwai me dage eno hani we bidiba tagala palaibao. Tama te sogo tialima dage eno we bidi sa muani we bidi dagego duga yali dwai sę dabe kone palama, hobede elama, tama dage ena pageba aselama, gedu haluasa po wagasiyu, tama dagego te yali dwai kolesaga tagaliyu da, teda ena dagalude bidiyu, dagego gedu haluasa po wabo odama, dagego sęgę sela sąyu me dagego tǫ wiegi yai ma iliyu yaibao.
2CH 7:15 Tigidali sogo eno dagego te eno be elalubo pesagede gedu haluasa po wabo odainogo no munaluaibao.
2CH 7:16 Magi baso meni. Eno te be sa munama, tama te be ena be mu pedelama elaluaibao. Tama tigidali sogo we bidi eno te be pąba aselama, enaba lotu po wagasiyu emainao. Tama tigidali sogo eno te beba tonaluyu yaibao, tama teba homu kone iyu yaibao.
2CH 7:17 Tiali goli Solomon nage eno gedude dolasa bilao, tama eno bomai po sese bugagia wali pao, tama nagebolo eno yao wabo sę sese tama yao, te naga aya Devitgo yali tiwai yao.
2CH 7:18 Tialima nago te tama tiali da, teda eno nago aya Devit dali dąų wali te bomai po wali paibao. Eno agabolo e tiwai po wai dao, ‘Devit, tigidali sogo eno naga hani tǫde naga king bidi pedalomainu ilama, tama te Israel dabe tonalumainu yaibao.’ Eno aga dali te po dąų wali.”
2CH 7:19 “Tiali goli dage Israel dabego eno bomai po me eno gasa po dabe wali pisąma, dagego tibo godiba lotu po olama wali peyu ebaso da,
2CH 7:20 teda eno dagebolo mani te tǫde sela sąwaibao. Tama eno te ena be dao wali te be tudiba ola menama, tama eno te be homugo kone me egobeo. Tama gasa bidi hanigo te be posobo po olama, dolama tagalaibao.
2CH 7:21 Tialima megi da, te be te genuai nogi te elalubao. Tiali goli dagego ena tagaliyu da, teda te be dolaibao. Tama te bidi dabe augwali te pesagedu asiyu augwaligo sulama, augwali noma saibao. Tama augwaligo hanalu waibao, ‘Magi baso Genuai Bidi te bulu dali, te be dali si dolaliwe?’ po waibao.
2CH 7:22 Tama meba we bidigo augwalibolo te po walaibao, ‘Te po page da, e dao. Te Israel dabe augwaligo augwa wąį nǫųgo God tagalai dao. Polobadu agai augwali Isip bulude oda selama, tama augwali te buluba odasa asai dao. Tiali goli augwaligo God mu tagalama, tama augwaligo tibo god dabeba begelama, te god dabeba lotu po weyu yali. Te tama tialima, Genuai Bidigo te genuai sęgę augwaliba pedelemainu ilai dao,’ te Israel hani isąwai we bidigo te po waibao,” Godigo Solomonbolo te po wali.
2CH 8:1 Te Solomon aga sę bidi dabe dali augwaligo Genuai Bidigo tempel be sę ela silama, tama nosali Solomon aga be mu sę yani. Te sę dabe sese tama augwaligo kibu be bidi sese deli, te 20 kibu be tama augwaligo te sę yali.
2CH 8:2 Tama Solomongo te be side sę silibo si, teda agai te king Hiramgo agabolo mani te hanu dabe geselebo sę ma yali. Tama agai te Israel dabe meba te hanude bidimainu tagala palali.
2CH 8:3 Tama megi da aga ami bidi dabe selama, augwali te hanu Hamatba me Sobaba hwįgi pelama, augwali aiyaba elaluama, te hanu si sali.
2CH 8:4 Tama agai hanu me te wa pai bulu Tatmorde me geselali. Tama te hanu te distrik Hamatde agai bakstua dabe elaluali.
2CH 8:5 Tama me Solomongo hanu Bethoron Ugwadu geseliyu, me hanu Bethoron Aiyadu geseliyu yali. Agai bomai obo te hanu si bagulama yali. Tama me agai ain ba te hanu siba pabo sunumi palibo nai geselali.
2CH 8:6 Tama agai hanu Balat me geselali, me agai bakstua dabe elalubo madi me geselali, tama me agai boi hwįabo karis dabe muabo hanu dabe me geselali, me te hos kibu tagalabo hanu dabe me geselali. Tama agai meba nai dabe Jerusalem geselainu homu yali nai dabe geselali, te Lebanon me te agai tonalubo bulude dabe ela silali.
2CH 8:7 Te kantri Israelde te gasa bulu we bidi me bidali. Te augwali te Hit hani, me Amor hani, me Peres hani, me Hivi hani, me Jebus hani augwali dao.
2CH 8:8 Polobadu mu te Israel dabe augwaligo augwali hani te hauwa mu elai dao. Tiali goli augwaligo augwali mu silai menio. Tialima Solomongo augwali selama, tama augwali aga olo sę bidi dabe nigilali. Tama megi me augwali olo sę ebo bidi dabe bidibao.
2CH 8:9 Tiali goli Israel hani mude Solomongo te bidi me selama, agai olo sę ebo bidi me nigilibeo. Mu menio. Agai augwali te aga ami sę dabe me ofisa sę dabe somainogo sula tagalali. Tama mebago te karisde dualama te hwįgi pabo te tonalubo ofisa bidi nigiyu, meba te hos kibude dualama hwįgi pabo ami bidi dabe tonalubo ofisa bidi nigiyu tama yali.
2CH 8:10 Te bidi dabe tonalubo bos bidi dabe te 250 bidi tama bidi dabe elaluali.
2CH 8:11 Solomongo Isip king bidigo wegi sai dao. Tama agai te we te Devitgo hanude bidali. Tiali goli Solomongo te po wali, “Eno we te Devitgo bede bidamo dao,” po wali, “te Israel dabego kingo bede. Magi baso meni, polobadu Godigo Dąų Wali Bomai Po Munalubo Halobage te pesagede munaluai da weyu. Tama te halobage munaluali pesage te habu selai mu elaluai dao,” te po wali. Tama tibaso, Solomongo aga wego gesi be me sęnama, tama aga te we te beba odasa pelama, tama aga te beba bidigi pali.
2CH 8:12 Te Solomon aga te Genuai Bidigo tempel be elalubo pesageba pelama, tama agai te alta elaluboba pelama,, tama agai tede te isigo mu dela silibo ofa igi peyu yali.
2CH 8:13 Agai te ofa tigidali sogo mu iyu iduali, te Mosesgo wali gilama tiali. Tama me agai te Sabat side dabe me ofa iyu, me te genuai sogo dabe me ofa iyu, me gesi polua nanobo side me ofa iyu, me tigidali kibu bede sela sogo genuai side me ofa iyu yali. Te da te Yis Meni Yai Bret Ulubo Genuai Sogo, me Wiegi Yai Homu Ebo te Gide Nai Dabe Sabo Sogo, me te Osogo Bidabo Bede Bidibo Genuai Sogo me.
2CH 8:14 Solomongo aga aya Devitgo bomai po dabe me gasa po dabe wali pali, te Godigo sę bidigo po. Tama agai pris bidi dabe deli deli haniba dobayali, te sę tigidali sogo emainogo. Tama agai te Livai dabe te deli deli haniba dobayali, te pris dabe tau selama, te sę emainogo, tama me te Godigo nogi ugwaba sabo tęąbi po me weyu emainu yali. Te Livai dabego augwalibolo emainu deli deli sogo sa muani sę naga ebo dao. Tama me Solomongo deli deli haniba bidi tonaluabo bidi dobayali, te Genuai Bidigo tempel be sunumide tonaluyu emainogo yali.
2CH 8:15 Te pris dabe me Livai dabego Devitgo augwalibolo mena sę emainu wali po tigidali dolo tama wali peyu yali. Tama me augwaligo mone dabe mubo be tonalubo kolesaga dabe po ola mani me augwaligo wali pali.
2CH 8:16 Te Genuai Bidigo tempel be sę eyu, Solomongo genuai sę mu yali. Hasia aga sę bidi dabego genuai masigi dabe dodobage dodolama elaluali. Augwaligo te sę ela pidubadi te gagaloboba usu nigi pali, tama te sę me ela pidubadi te be sę mu siligi pabo si tagalali. Megi da, Solomongo Genuai Bidigo tempel be sę mu siligi pali. Tama te be sawi yai mu pedelali.
2CH 8:17 Tama nosali Solomon te hanu Esiongeber me taun Elatba pali. Te hanu si te kantri Idomde elaluali, te tamu ąį Retsi wabo te bulu nabis badu elaluali, te u badu Akababa polo badu.
2CH 8:18 Tama king Hiram te Tair bidigo aga sip meba dabe me wiegi yai boskru dabe selama, king Solomon bidibo madi tagala palali. Augwaligo Solomongo sę bidi dabe selama, kantri Ofirba odasa pali, tama tede dobu ebo sę eyu, gol hauwa selama, Solomon bidibo madi ma sesali. Te golgo sęgę te pąde 16 ton dao.
2CH 9:1 Te kantri Seba kwin we, te polalubo wego Solomongo genuai nogi elalubo po odali. Tama tialima, te kwingo Solomonbolo bidi me deligo wei ponabo usu isąyabo hanalubo po hanalu wainogo asali, te Solomongo kolesaga usu sela suainogo. Kwingo Jerusalemba aga sę bidi dabe hauwa me kibu kamel sibi hauwa dali asali. Te kamel kibu dabego gol dabe hauwa mu tolasa asiyu, me wiegi yai denami ebo pauda dabe hauwa, me te genuai umabo monego abelabo wiegi yai masigi dabe dali sesali. Tama te kwin polo sabolagaselama, teda agai te bomai bidigo ponobo usu isąwai po hanalu wainu kone palali po dabe Solomonbolo hanalu wali.
2CH 9:2 Tama Solomongo agai hanalu wali po sese tama wei ponani. Te hanalu wali po Solomongo gegedabo me meni yai elaluali. Mu meni.
2CH 9:3 Kwingo Solomongo kolesaga me homu kolesaga po odali, tama me agai te kingo sę yani be me suali.
2CH 9:4 Tama kwingo Solomongo wiegi yai tubo nai dabe tigidali be posobo sogo tubo suali. Tama me agai suali, ofisa bidi dabe Solomon dali dualama, Solomon dali nai tubo suali. Tama agai kingo sę bidi dabe suyu, me augwaligo gudubo au doado bage dabe me agai suali. Tama me agai te wain ąį dobabo bidi dabe me augwaligo mubo au doado bage dabe me suali. Tama me agai te Solomon agai hani dali augwali Genuai Bidigo tempel be ugwa holiyu ebo wiegi yai kolesaga ebo me agai suali. Agai te wiegi yai sę dabe ebo sulama, tama aga noma guda pelama, tama aga po menia sali.
2CH 9:5 Tama nosali agai Solomonbolo e tama po wali, “Ena ena kantride bidiyu, nago ebo sę dabe po me nago wiegi yai homu kolesaga me kolesaga po eno odali. Tama eno megi koneani, te po te mu tama mu dao.
2CH 9:6 Hasia da eno te po mu dao homu yai menio. Tiali goli megi ena digi aselama, eno ena gedugo mu suali dao. Eno nage sulama, eno polo koneani, nago homu kolesaga me kolesaga te genuai mu dao, tama tego te gasa bidi dabego pedauwalidu odali po mu edelalio.
2CH 9:7 Te naga bidi dabe augwali tigidali sogo wiegi yai homu pemene iyu ebo dao. Tama me nage dali bidalubo te ofisa dabe augwali me tigidali sogo wiegi yai homu pemene ebo dao. Magi baso meni. Tigidali sogo augwaligo nago wiegi yai homu kolesagadu po augwaligo odobo dao.
2CH 9:8 Eno nago God Genuai Bidigo nogi ugwaba sobao. Agai nage dali wiegi yai homu nagame elama, tama agai nage aga we bidigo king bidimainu nigilali dao. Agai dage Israel dabe godolo genuai mu ebao. Tama agai homugo dage tigidali sogo bugagia bidimaina homu ebao. Tama tialima, agai nage king bidi sa muani dao, te naga te Israel dabe te wiegi yai doloba pai kolesagago tonalumainu te yali dao,” te kwin wego Solomonbolo te po wali.
2CH 9:9 Tialima Seba we kwingo te doado bage dabe te Solomonbolo manani. Agai agabolo gol hauwa mu mani, tama te golgo sęgę te 4 ton edelai. Tama me kwingo te wiegi yai mu dila pai masigi dabe me wiegi yai denami ebo pauda dabe agabolo mani. Kwingo Solomonbolo te wiegi yai denami ebo pauda hauwa mu mani, te pauda dabe te wiegi yai mu elama, gasa meba pauda dabego denami mu edelai dao.
2CH 9:10 Te king Hiramgo sę bidi dabe me king Solomongo sę bidi dabe augwali te kantri Ofirba pelama, te gol, me gasa wiegi yai nigo name, me wiegi yai dila pai au yabo masigi dabe sigi pabo sę iduali. Tama augwaligo Solomon pageba sesedu geani.
2CH 9:11 Tialima Solomongo sę bidi dabebolo te ni name dabe selama, te Genuai Bidigo tempel be togobili me agai be togobili me geselao po wali. Tama me agai te ni name dabe selama, wiegi yai gita dabe me geselao po wali, te musik elebo bidi dabego nai dabe. Polobadu bidi dabego te kantri Judade augwaligo te tobage wiegi yai nai dabe me suai menio.
2CH 9:12 Tama me king Solomongo Seba kantri kwin webolo agai wiegi yai nai dabe hauwa mu mani. Te kwingo homu usu ilabo mu tama mani. Tama te nai dabe te king Solomongo te kwin webolo mani te nai dabego kwingo Solomon mani nai dabe edelama mu mani. Tama tialima kwin aga sę bidi dabe dali augwali augwa kantriba ma pali.
2CH 9:13 Tigidali kibu bede Solomongo 23 ton sęgę gol sabo dao.
2CH 9:14 Tama me agai te haniani bisnis sę ebo bidi dabede agai takis mone sabo dao. Tama me te Arebia king dabego me Israel distrik polalubo kiap dabe agabolo gol dabe silva dabe mayu ebo dao.
2CH 9:15 Solomongo po obaso aga sę bidi dabego 200 wąbi hwįbo sabele geselali. Tama augwaligo gol selama, te ni name ugwadu hagalu pali. Te deli deli sabelede ugwadu daganani golgo sęgę te 7 kilogram pąde yai gol mayu yali.
2CH 9:16 Tama augwaligo dwasianu hwįbo sabele te 300 geselali. Tama augwaligo gol selama, te sabele ugwadu daganabo gol me selama daganani. Te sabele dwasianude muani golgo sęgę te 4 kilogram sęgę pąde yai gol muani, te sabele deli deliba. Tama Solomongo pode te sę bidi dabego te sabele dabe selama, tama augwaligo te wiegi yai be nogi augwaligo Lebanon Ni Sili Be wabo be tomoba muani.
2CH 9:17 Tama Solomongo pode augwaligo genuai sia king deli geselali. Augwaligo wiegi yai gol siyu, me elefan kibugo moni kele dabe siyu elama, te sia king au ilali.
2CH 9:18 Te sia king bobobage ugwanu mu geselali, tama augwaligo te sia saiba holabo togobili ni nogo a naga olama, me badu nogo deli podilali. Tama augwaligo te 12 hasa laiongo piksa nigilama, deli deli togobili ni podilali te nide dodolo pali. Te deli deli togobili ni dage badu si tama te laion piksa si si naga dodolo pali. Augwaligo me me badu muyu, me me badu muyu yali. Tama augwaligo dwasianu nai me deli te sia noma gagawai me geselali, te kingo aga sągą te daiba mumainu. Augwaligo gol selama muani, te nai mesega somainogo, tama augwaligo te sia king sągąde kęnani. Te sia kingde te nogo muabo pesage si elaluali. Te nogo si manobo te pesage side augwaligo hasa laiongo piksa nigilama muani, te si te me me badu muyu, me me badu muyu yali. Te gasa me badu bulu king dabego te tobage sia king mu meni yai.
2CH 9:20 Te sę bidi dabe augwaligo gol selama, Solomongo ąį tuabo kapu nigali. Tama me te be nogi Lebanon Ni Sili Bede elaluali nai dabe augwaligo wiegi yai golgo naga geselali. Te Solomongo silva hauwa mu elalubo sogo augwaligo te po weyu yali, te silva te olo nai dao po olama, augwaligo te silvago wiegi yai nai dabe me geseliyu me ebeo.
2CH 9:21 Te king Hiramgo boskru dabego Solomongo genuai sip te kantri Tarsisba sela peyu ebo dao. Te Solomongo te sip dabe tagala palobo sogo da, augwali kibu be sela mu biliyu ebo dao. Tama augwaligo gol dabe, me silva dabe, me elefan kibugo kele dabe, me haniani hasa monki dabe sela asiyu ebo dao. Tama nosali augwali ma biligi peyu ebo dao.
2CH 9:22 King Solomongo mone hauwa elaluyu, me haniani wiegi yai nai dabe hauwa mu elaluyu yali. Tama me agai wiegi yai homu kolesaga me kolesaga hauwa mu elaluali. Agai gasa tigidali kantri king dabe edelai mu elaluali.
2CH 9:23 Te tigidali gasa kantri king dabego Solomon suagasiyu ebo dao. Te Godigo agabolo mani te wiegi yai homu kolesaga po odainogo asiyu yali.
2CH 9:24 Tigidali kibu bede augwali asiyu, augwaligo Solomon olo maiabo presen dali sesiyu asobo dao. Augwaligo wiegi yai nai dabe bidi dabego golgo me silvago geselai wiegi yai nai dabe sesiyu, me wiegi yai ugwa dabe, me ene dabe tama sesiyu yali, tama me wiegi yai denami ebo pauda me hos me donki me sesiyu yali.
2CH 9:25 Solomongo be habu dabe dwasianu hauwa mu geselai mu elaluali, te hos kibu dabe me hwįbo karis dabe muabo be habu. Te be habu dabe namba te 4,000 usu nama elaluali. Tama agai gasa 12,000 hos kibu meba elaluali, tama me badu aga dali Jerusalemde bidali, tama me badu te gasa meba hanu dabede tagalali, agai te augwali bidimainogo magi yali bulude tagalama tonalumainogo yali.
2CH 9:26 King Solomongo te tigidali kantri king bidi dabe tonaluali, te moni pabo ąį nogi Yufretis gagalasa pelama, kantri Filistiadu pelama, kantri Isip dąį usu nigi pali.
2CH 9:27 Te Solomon aga king bidali sogo agai silva me wiegi yai ni bǫ hauwa te Jerusalemba sesali. Tama tiyu, te sogo silva hauwa mu elaluai dao, te olo masigi du tiwai elaluali. Tama te ni sida bǫ hauwa mu elaluali, te Israel bulu du dabede dwasianu olo ni elalubo tiwai elaluali.
2CH 9:28 Solomongo aga hos dabe te kantri Musride siyu, me gasa kantri dabede siyu yali.
2CH 9:29 Te Solomongo meba sę dabe yali po, te aga king pedelalidu gagalama, tama pelama, aga isaliba usu nagasali po te buku sela tomode asęna elalubao, te profet bidi Natango bukude, me profet Ahiya te taun Silo bidigo bukude, me Godigo profet Idobolo ola mani nai dabe po bukude elalubao. Te profet Idogo bukude te bidi Jeroboam te Nebatgo ogwago po me te elalubao.
2CH 9:30 Solomon aga Jerusalemde bididubadi, aga king te kibu be 40 bidama, agai te Israel hani tigidali tonaluali.
2CH 9:31 Tialima aga isibaso, augwaligo aga te Jerusalemde pubulali, te augwaligo Devitgo Taun Dao wabo madi. Tama aga ogwa Rehoboamgo agai king sę sali, tama aga king pedelali.
2CH 10:1 Te not badu Israel we bidi augwali te taun Sekemba sisinagasali, te Rehoboam augwaligo king bidimainogo sa muainogo.
2CH 10:2 Polobadu Nebatgo ogwa Jeroboam te king Solomonde wi pelama, Isipba polobadu bidigi pai. Tama Israel dagego te Rehoboam king nigilainogo ebo po odama, Jeroboam aga kantri Isip tagalama asali.
2CH 10:3 Tama Israel dabego bidi meba te Jeroboam odasa ma asomainu tagala palali. Tama aga polo asai digi da. Aga dali, te Israel dabe dali, augwali te Rehoboambolo e tama po walainogo pali.
2CH 10:4 “Naga aya Solomongo dabolo genuai sęgę mu mawai dao, tama dago te tigi dene ebo bomai sę mu emainogo ilai dao. Tama tialima, dago homugo megi da nago da dali dua elama, tama dago meba sęgę dabe silaibao. Tialima nago te tama tiali da, teda da nage dologode bidaibao,” te po wali.
2CH 10:5 King Rehoboamgo te po odama tama agai augwalibolo e tama po wali, “Dage sela sogo bidiyu pelama, dage ma asao, tama dagebolo eno homu kolesagade po pusa mawaibao,” wali. Tialima augwaligo aga taga peyu pali.
2CH 10:6 Tama Rehoboam aga pelama, aga polo monu dabe ofisa bidi dabe dali po migi pali. Polobadu te bidi dabego aga aya Solomonbolo wiegi yai homu kolesaga mayu yai dao. Rehoboamgo e tama po hanalu wali, “Dagego homugo eno magi po mu te we bidibolo wei ponomainu yagawe?”
2CH 10:7 Tialima augwaligo aga e tama po walali, “Tialima nago augwaligo po wali pelama, wiegi yai kolesaga ola mayu, augwali dali wiegi yai po wali da, teda augwali nage dologode sesemane sogo bidaibao,” wali.
2CH 10:8 Tiali goli Rehoboamgo te monu dabe ofisa dabego po sela sąnama, tama agabolo homu kolesaga mabo gesi ofisa dabebolo hanalugi pali. Te bidi dabe te aga deli hai namu dabe tama aga dali genuai yai.
2CH 10:9 Tama agai augwalibolo e tama po walali, “Te we bidi augwaligo homugo eno ayago augwalibolo mani sęgę meba sela sąmainu homu yali. Tiali goli dagego homugo dago augwaliba mena tama po te we bidibolo wagowe?” wali.
2CH 10:10 Tama te gesi bidi ofisa bidi dabe agabolo e tama po wei ponani, “Tialima nago te we bidi augwaligo te hanalu wali po wei ponama, naga ayago augwalibolo mani sęgę meba silimainogo da, teda nago augwalibolo e tama po walao, ‘Dagego homugo eno ayago dage selai da, agawe? Menio. Te da olo nai dao. Eno dwasianu nogo danigo eno ayago bomo edelalio.
2CH 10:11 Te mu dao, eno ayago dagebolo sęgę mawai dao. Tiali goli, eno da, dagebolo sęgę genuai mu mawaibao. Agai dage bįgo elai dao. Tiali goli eno bomai bį wip selama, dage geninama mu elaibao,’ nago te po augwalibolo wao,” te gesi bidi ofisa bidi dabego te po wali.
2CH 10:12 Te sela sogo pela silibo si, te Jeroboam dali te Israel we bidi dabe dali augwaligo king Rehoboam suagasali, aga te po wali gilama tiali.
2CH 10:13 Tama te kingo te monu dabe ofisa bidi dabego po wali pabeo. Menio. Agai te gesi bidi ofisa dabego po wali pelama, tama agai bomai po mu te we bidibolo mani. Agai augwalibolo e tama po walali, “Te mu tama dao, ayago dagebolo sęgę mawai dao. Tiali goli eno da dagebolo genuai sęgę mu mawaibao. Agai dage bį wipgo elai dao. Tiali goli, eno da, bomai dila pai bį wip selama, dage geninama mu elaibao,” te po wali.
2CH 10:15 God aga digi ebaso, te king Rehoboamgo te we bidigo homu kolesaga wali pabeo. Magi baso meni. Genuai Bidigo Jeroboamde dąų wali po usu nagasainu tiali, te Nebatgo ogwade. Polobadu profet bidi Ahiya te Silo bidibolo te Genuai Bidigo te po te Jeroboambolo pusugi pomainu po ola mawai dao.
2CH 10:16 Tialima megi da, te we bidigo koneani, te kingo augwaligo po wali pogobe homu yali, tama augwaligo hai olama po weyu e tama po wali, “Da Devitgo hani dologode bidibo da mu hagela mu yalio. Da Devitgo hani bidi menio, tama da te Devitgo ogwa hani menio. Da Israel bidi dabe, da dena buluba ma pinao. Tama Devit hani dage duga digi duga ma tonaluiąo.” Augwaligo te po dabe ola silama, tama augwali augwa buluba tedela pali.
2CH 10:17 Tiali goli, Israel hani dabe meba augwali te Juda distrik te Juda hani dali meba tede bidali. Te hani augwali naga te king Rehoboam dologode bidali.
2CH 10:18 Nosali king Rehoboamgo Adoniram te Israel dabe pageba tagala palali. Adoniram aga te kingo sę ebo bidi dabe tonalubo bidi dao. Agai nogi me da te Hadoram dao. Tiali goli te Adoniram augwali bidiboba pedalobo si, te we bidigo masigi selama, enama, ela isilali. Rehoboamgo augwaligo te tama tiali po odama, tama polo tama aga aga karisba holama, tama aga Jerusalemba wi pali.
2CH 10:19 Te sogo tama gagalama, megi eba tama usu nagasalio, te Israel dabe te not badu bidali bidi dabe augwaligo homugo te Devitgo hani king bidigo dologode bidibo augwali hagela mu yali. Augwali hagoma homu elama tama tiali.
2CH 11:1 Te Rehoboam aga Jerusalemba saboligi pelama, agai bomai Juda hani ami bidi me Benjamin hanigo bomai ami bidi dabe i olama sisinagasali. Te ami bidi dabego namba te 180,000 usu nama asali. Rehoboamgo homugo augwali te Israel dabe dali te not badu hwįgi pomainao homu yali, tama augwali aga dologode ma bidimainu ilaibao homu yali.
2CH 11:2 Tiali goli, Genuai Bidigo te profet Semaiabolo e tama po walali,
2CH 11:3 “Nage king Rehoboam te Juda dabego king pageba, me Juda hani we bidi, me Benjamin hani we bidi pageba pelama, tama augwalibolo e tama po waligi pao.
2CH 11:4 ‘Ena Genuai Bidi, eno po obao, dage duga ama dede dali hwįgi pelamo dao. Magi baso meni, eno ena digi ebaso, te Israel dabego dagede buga pelama, dage taga pali dao,’ te po wao,” Genuai Bidigo te po wai. Tialima Semaia aga pelama, Genuai Bidigo po augwalibolo pusigi pali, tibaso augwali augwa buluba geasa ma pali, tama augwali Jeroboam dali hwįgi pabeo.
2CH 11:5 Te Rehoboam aga Jerusalemde bidiyu, agai meba sę bidi dabebolo te distrik Judade elalubo hanu bagulali masigigo nigai obo me badu bugagia dąų walao po wali.
2CH 11:6 Augwaligo te obo dąų walobo sę ela bilali hanu dabe te e dao, Betlehem, Etam, me Tekoa,
2CH 11:7 me Betsur, me Soko, me Adulam,
2CH 11:8 me Get, me Maresa, me Sif,
2CH 11:9 me Adoraim, me Lakis, me Aseka,
2CH 11:10 me Sora, me Aijalon, me Hebron dao. Te tama taun dabe te Juda hanigo tǫde me Benjamin hani dabego tǫde elaluali.
2CH 11:11 Augwaligo te obo dabe bugagia mu dąų walali. Te hanu tomode dabede king Rehoboamgo te hanu tonalubo ami bidi dabe me badu sa munama tatagalo pali. Deli deli hanude ofisa bidi deli deli te ami hani deli dali tagaliyu yali. Tama me agai te hanu dabede agai hwįabo no munaluabo nai dabe hauwa munama elaluali. Agai tubo nai hauwa muyu, me ni oliv wel me hauwa muyu, me wain du dabe muyu, me hauwa me hwįabo awa me sesemone hauwa mu muyu yali. Agai te tama tialigo da, agai te hanu dabe bomai hanu mu elalumainu ilama, tama aga Juda hani me Benjamin hani dabego king bidi bidali.
2CH 11:13 Te pris dabe me Livai dabe te Israel bulu badu tigidali augwali augwa bulu dabe taga solama, augwali Rehoboam dali bidagasali.
2CH 11:14 Te tama tiali page da e dao. Jeroboam me aga tudi badu nosali pedelali king dabego augwali sela sąnama, augwaligo te pris sę emainogo sula tagalobeo, te Genuai Bidigo sę emainogo. Tama tibaso, te pris bidi dabe me Livai dabe augwaligo augwa be dabe me tǫ dabe tagalama, augwali Jerusalemba me te Juda tǫ badu meba tǫba dabe bidigi peyu ela pali.
2CH 11:15 Jeroboamgo augwali sese sela sąna silama, tama aga digi aga gasa olo bidi dabe te pris sę te lotu wabo pesagede dabe tatagalo pali, te tibo god dabeba lotu wabo pesage dabede. Tama me te pris dabego te bulu hwą bidiba lotu wabo sę iyu, me kau kibu piksa omai siba lotu wabo sę iyu yali, te Jeroboamgo nigai piksa.
2CH 11:16 Israel we bidi meba augwaligo God augwa Genuai Bidiba lotu wabo godolo naga yali. Tama tibaso augwali te pris bidi me Livai dabe wali augwa distrik taga soayu asali, te Jerusalemba te augwali te lotu po weyu, God augwa wąį dabego Genuai Bidiba ofa iyu yainogo.
2CH 11:17 Te we bidi augwali te distrik Judade bidiyu, te kantri bomai bulu mu pedelali. Tama te kibu be selade augwaligo te king Devit me king Solomongo yali wiegi yai kolesaga tiwai yali. Tama te tama tialigo da, king Rehoboam te bomai king pedelemainogo tau sali.
2CH 11:18 Te Rehoboamgo we Mahalat te Jerimotgo wegi sali. Jerimot aga te king Devitgo ogwa dabe me deli dao. Mahalat aga ida te Abihail dao. Tama Abihail aga aya te Eliap dao, te Jesigo ogwa.
2CH 11:19 Mahalatgo ogwa sela ame nani, te bage selago nogi da te e tama dao, te Jeus ebadi, me Semaria ebadi, me Saham dao.
2CH 11:20 Nosali Rehoboamgo Maka sali, te Apsalomgo wegi. Tama Makago ogwa me si me si ame nani. Te bage augwaligo nogi da e tama dao, Abiya, me Atai, me Sisa, me Silomit dao.
2CH 11:21 Rehoboamgo we 18 tama sali, tama agai i badu namba tu we dabe sibi hani te 60 we bidali. Tama te we sibi hanigo ogwa dabe 28 ame niyu, me 60 wegi mane ame niyu yali. Rehoboamgo we hauwa mu sali goli, agai Maka godolo genuai mu yali.
2CH 11:22 Tama tibaso, Rehoboamgo Makago ogwa Abiya aga isibode nosali king bidimainogo sa muani. Tama agai Abiya te aga ama solo tomode polalubo bidi muani.
2CH 11:23 Tiali goli, Rehoboam aga wiegi yai homu elaluyu, tama aga ogwa dabe aga te obo dąų wawalo bilali te hanu dabe tonalua pomainogo sa muna muna pali, te Juda distrik me Benjamin distrikde tonalumainogo tama tiali. Tama agai augwalibolo tubo nai dabe hauwa mu augwalibolo mani. Tama me agai augwaligo sabo we hauwa mu gegela mani.
2CH 12:1 Te king Rehoboam aga bomai king pedelama, te kantri Juda bugagia tonalubo sogo da, teda aga dali aga we bidi dabe dali augwaligo Genuai Bidigo bomai poba tudi ola mani.
2CH 12:2 Tama te Rehoboam aga king bidibadi kibu be nogo a naga wabode, Sisak, te Isip king bidi, aga ami bidi dabe dali augwali aselama, Jerusalemba hwįagasali. Te sę pedelali da, magi baso meni, Juda dabe augwaligo Genuai Bidigo po sela sąnama hagoma ebaso tiai dao.
2CH 12:3 King Sisak aga geninama ami bidi dabe dali mu asali, te bidigo nedabo usu meni yai. Tama me agai 1,200 hwįbo karis elaluali, me 60,000 ami te hosde dualama hwįabo ami dao. Te ami bidi dabe te kantri Isip bidi, meba te kantri Libia, me kantri Suki bidi, meba te kantri Sudan ami bidi dabe dao.
2CH 12:4 Te ami bidi dabe augwaligo hwįnama, augwali bomai obo yai hanu dabe sesa pali, te kantri Judade. Tama augwali Jerusalem pąba sabolagasali.
2CH 12:5 Te Juda dabego tobolu bidi dabe augwali Sisakde wi elama, wi solama, Jerusalemba Rehoboam dali bidagasali. Tama tialima, Godigo profet bidi aga nogi Semaia agai augwali sugi pelama, e tama po augwalibolo walali. “Genuai Bidigo e tama po wali, ‘Dagego ena tudi ola mani, tama tibaso megi eno dage tudi ola mani dao, tama eno Sisakgo dage aiyaba elalumainogo yali dao,’ Genuai Bidigo te po wali,” te Semaiago te po wai.
2CH 12:6 King dali aga tobolu bidi dabe dali, augwaligo te po odama, augwaligo e tama po wali, “Mu tama dao. Dago genuai sęgę mu elalubao, tama Genuai Bidigo ebo kolesaga te dolo mu dao,” te po wali.
2CH 12:7 Te Genuai Bidigo augwaligo augwa digi augwa aiyaba mubo suali, tama agai gasa po me te profet Semaiabolo e tama po mani, “Eno augwaligo augwa digi augwa aiyaba ma elalubo sualio. Tama tialima, eno augwali dologobeo. Te Sisakgo te Jerusalemba hwįagasobaso da, teda eno augwali mu dolomainogo egobeo. Mu tama, eno augwali dali sębę mu yai goli, eno Sisakgo te hanu Jerusalem mu dolomainu eno agai nogoba mugobeo. Menio.
2CH 12:8 Eno Sisakgo augwali aiyaba elaluama, tama augwali agai sę bidi dabe pedalomainu yaibao. Tama te ebo kolesagago augwaligo koneaibao, augwali eno sę bidi bidibo kolesaga te wiegi yai dao waibao, tiali goli tǫde king bidi dabego sę bidi bidibo te kolesaga te dwai dao, te homu yaibao,” Genuai Bidigo te po wai.
2CH 12:9 Tialima te king Sisak aga ami bidi dabe dali augwali te Jerusalemba hwįagasali. Tama augwaligo augwali aiyaba elaluama, tama augwaligo te Genuai Bidigo tempel bede me kingo bede wiegi wiegi yai nai dabe tigidali sali. Tama me augwaligo te Solomongo nigali sabele te golgo mesegelali te sabele dabe me sali. Tama augwaligo te nai dabe te Isip buluba selasa pali.
2CH 12:10 Tiali goli te sę yai nosali badu, te king Rehoboamgo aga sę bidi dabebolo olama, augwaligo te bras me ni name dabe selama, te hwįabo sabele dabe nigali, te Isip dabego te sela pali te sabele ni dage dabe hasegelama nigali. Tama ami ofisa bidi dabego te kingo be sunumi tonalubo bidi dabebolo mani, tama augwaligo te sabele ni dage dabe tonalubo sę yali.
2CH 12:11 Tama te king aga Genuai Bidigo tempel beba painogo ebo sogo da, teda te tonalubo bidigo te sabele ni dabe selama, aga dali peyu ebo dao. Tama te king aga aga beba ma pabo sogo da, te tonalubo bidi dabego te sabele ni dage te wasman dabego be habuba ma sela peyu ebo dao.
2CH 12:12 Genuai Bidigo king Rehoboamgo aga digi aga aiyaba elaluama tama aga dologode bidibo suali. Tama me agai meba wiegi yai kolesaga te kantri Judade elalubo suali. Tama tibaso, augwali dali aga sębę me ebeo, te Rehoboam dali, tama agai aga mu dolama tagalobeo.
2CH 12:13 Rehoboam aga Jerusalemde bidiyu, aga bomai king mu pedelali. Aga te king pedelali sogo aga te kibu be 41 elaluali, tama aga king te 17 kibu be bidali. Aga Jerusalemde bidali, Genuai Bidigo te hanu te kantri Israel tomode mu sa muani. Te da te tigidali Israel dabe aga pąba sisinama lotu wagasiyu yabo pesage. Rehoboam aga ida te kantri Amon bulu we dao, te aga nogi te Nama dao.
2CH 12:14 Rehoboamgo dwai kolesaga Genuai Bidigo gedude yali. Magi baso meni, agai Genuai Bidigo homu kolesaga wali pabo homu ebeo.
2CH 12:15 Te king Rehoboamgo po dabe aga te king pedelali tedu gagalasa yali sę dabe te buku me augwaligo te profet Semaia me profet Ido sigo po bukude elalubao, te aga king pedelalidu isaliba sabolali po sese asęai te elalubao. Tama te bukude te kingo hani wąįgo nogi lista nigai te elalubao. Te king Rehoboam me king Jeroboam Israel bidi si king bidali side da, augwali si sesemane sogo hwįyu yai dao.
2CH 12:16 Tama nosali Rehoboam isali, tama augwaligo aga te Devitgo hanude pubulali. Tama aga ogwa Abiyago agai pesage selama king pedelali.
2CH 13:1 Te Jeroboam aga te Israel dabego king bidali kibu be 18 wabode, Abiya te Juda dabego king bidi pedelali.
2CH 13:2 Tama Abiya aga Jeruselemde kibu be sela king bidali. Aga ida te Mikaia, te bidi Uriel te hanu Gibea bidigo wegi dao. Tama boi genuai mu te king Abiya me king Jeroboam si tomode yali.
2CH 13:3 Abiyago 400,000 bomai ami bidi selama, tama augwali Israel dabe dali hwįgi pali. Tama Jeroboamgo 800,000 bomai ami bidi sali, te augwali boi hwįbo mu konea pai bidi dabe mu, tama augwali Juda dabe dali hwįainogo asali.
2CH 13:4 Te king si augwa ami bidi dabe dali augwali te Efraim hanigo bulu duba sisinani, te boi hwįabo kegaluyu. Tama Abiya aga te bulu du te Semaraim bageba doligi pelama, hai olama, e tama po wali. “Jeroboam, nage dali dage Israel dabe, dagego eno po waboba olo bugagia munama odao.
2CH 13:5 Genuai Bidi, da genuai hani Israel dabego God, agai bomai kontrak mu te Devit dali me aga hani dali yai dao. Te kontrakde e tama po elalubao, ‘Tigidali sogo Israel dabego king te Devitgo hanide naga pedaliyu emainao,’ po wai dao. Dagego te po konebe, agawe?”
2CH 13:6 “Polobadu Jeroboam te Nebatgo ogwa aga king Solomongo sę bidi bidai. Tiali goli aga hagoma elama, tama aga dali boi bidi nigali, te aga king bidi dali.
2CH 13:7 Tama haniani dwai dwai kolesaga ebo bidi dabego Jeroboam dali age nama kisa selama bilali. Tama augwaligo Solomongo ogwa Rehoboamgo augwaligo homu kolesaga wali pomainogo bomo yali. Te sogo te Rehoboam aga gesi bidi mu, tama agai te kantri tonalubo kolesaga bugagia konesiąma ebadi. Tama tialima, agai augwaligo po sela sąyabo usu isąwai.
2CH 13:8 Tama megi dage ami bidi dabe hauwa dali asiyu, me dagego te Jeroboamgo nigali te kau kibu noma te golgo nigali te duga god dabe tiwai nigali, te piksa dali asiyu ebao. Tama dagego hwįnama, Genuai Bidigo kantri aiyaba elaluainu ebao. Genuai Bidi aga digi Devitgo hani sa munama king pedalomainu elama, e kantri tonalumainu yai dao.
2CH 13:9 Tama me dagego Genuai Bidigo pris bidi dabe sela sąwai dao. Augwali te Arongo hani dao, tama me dagego Livaigo hani sela sąwai dao. Tama dagego duga haniani pris bidi duga digi sa muai dao, te gasa kantri we bidi dabego ebo kolesaga tiwai yali. Te bidi me deligo te kau kibu deli me sipsip kibu nogo a naga olama si sesebaso me tagalao, dagego aga dagego te tibo god dabego pris bidi bidimainu sa mubo dao.”
2CH 13:10 “Tiali goli dago da, dena Genuai Bidi dena God wali pobao, tama dago agaba tudi me ola mabeo. Tama Arongo hani pris bidigo Genuai Bidigo sę ebo dao, tama Livai dabego augwali tau sabo dao.
2CH 13:11 Te tigidali sogo kigamu me pio augwaligo isigo dela silibo ofa eyu, me augwaligo wiegi yai denami ebo pauda dabe ulama, Genuai Bidiba denami holiyu ebo dao. Tama augwaligo Godibolo te ofa tiwai mani te bret siyu ebo dao, tama augwaligo te bret te Godigo gedude doloba pai elalubo tebolba mugi peyu ebo dao. Tama tigidali sogo pio augwaligo lam sole udalobo dao, augwaligo te golgo nigali te lam ni dagede udaliyu ebo dao. Dago Genuai Bidi dena Godigo po wali pabo dao, tama te sę dabe tama ebo dao. Tiali goli dage da, menio, dagego aga tudiba mu ola manio.
2CH 13:12 Tama megi da, dagego bugagia odao. God aga da te dago polalubo bidi dao. Tama agai pris bidi dabe da dali megi ede bidiyu, dage dali hwįainu biugel bu wabo e kegalubao. Dage Israel dabe, dago Genuai Bidi dago wąį dabego God dali hwįbo tagalao. Dagego munu me ugwa ela hologobeo. Mu menio,” te Juda dabego king Abiyago tama po wali.
2CH 13:13 Te Abiyago po odubadi, Jeroboamgo aga ami bidi dabe me badu Abiyago ami dabe tudi badu geme no pomainu tagala palali, te augwali no bagua somainu.
2CH 13:14 Tiali goli Abiyago ami bidi dabe begelama suali, te Israel dabe ami bidi, tama augwaligo koneani, te Israel dabego augwali bagua selama te boi gagalainu ebao homu yali. Tama tibaso, polo tama augwaligo Genuai Bidi augwa God i wali te augwali tau somainogo, tama te pris dabego biugel bu wali.
2CH 13:15 Tama te Juda dabego i hai bomo elama geninama mu wali. Tama augwaligo te hai wabo si, Godigo Jeroboam aga hani dali wi ilama, augwa wi pomainu ilali.
2CH 13:16 Te Juda dabego Israel dabe pobeasa pelama, tama Godigo Israel dabe Juda dabego dolomainu sula tagalali.
2CH 13:17 Tama Abiya aga hani ami bidi dabe augwaligo Israel dabe dolama mu elama isilali, tama augwaligo te 500,000 Israel dabego wiegi yai hani ami bidi dabe elama isilali.
2CH 13:18 Te Juda dabe augwaligo koneani, te Genuai Bidi augwa wąį dabego God agai augwali hwįbode tau saibao homugo koneani. Tama tibaso augwaligo homu dąų mu olama, bomo elama, augwaligo Israel dabe aiyaba elaluama, tama augwali mu dolali.
2CH 13:19 Tama tialima, Abiya aga hani ami bidi dabe dali augwaligo te Jeroboam aga ami bidi dabe dali pobeasa pali, tama augwaligo Israel dabego hanu sela sali. Augwaligo nogi te e dao, te hanu Betel, me Jesana, me Efron dao. Tama me augwaligo te hanu sela pąde elaluali dwasianu bulu dabe me sese tama sali.
2CH 13:20 Tama Abiya aga bomai king mu pedelali. Agai we 14 selama, tama augwaligo 22 ogwa ame nani, tama augwali wegi 16 ame nani. Tiali goli Jeroboam aga bomai king ma pedalobeo, te king Abiya isiboba usu nagasali. Tama nosali Genuai Bidigo Jeroboam dolama, tama aga isali.
2CH 13:22 King Abiyago meba sę yali po te gasa buku me augwaligo te profet Idogo po buku wabo, te bukude elalubao. Te bukugo te Abiyago yali sę po dabe me agai tigidali kolesaga po me pusai te elalubao.
2CH 14:1 Te king Abiya isibo si, augwaligo aga king Devitgo taunde pubulali. Tama aga ogwa Asa te king pedelali. Te Asago te kantri Juda tonalubadi boi me hwįsąmadi kibu be nogo si mu pali.
2CH 14:2 Asago wiegi yai doloba pai kolesaga naga te Genuai Bidi aga God gedude yali.
2CH 14:3 Asago te bidi dabego gasa kantri bidi dabego tibo godiba lotu weyu yali te alta sai sela sąyani. Tama me agai te tibo godiba lotu wabo pesage dolama, tama me agai te tibo godigo piksa elalubo masigi pos me togwa sąyu, me agai te god we Aserago piksa elalubo te ni pos gelama tagalali.
2CH 14:4 Tama agai Juda dabebolo augwaligo augwa wąįgo God Genuai Bidigo homu kolesaga wali pabo bomo elama piao po wali, tama agai bomai po tigidali wali peyu, agai po wali piąo po wali.
2CH 14:5 Te Juda bulude tigidali taun dabede agai tigidali tibo godiba lotu wabo pesage sese sela sąnama, tama agai te wiegi yai denami hano holobo ofa ulabo te alta dabe me sese tama dolama tagalali. Agai te kantri bugagia tonalubadi te boi me pedalobeo
2CH 14:6 Tialima Asago Juda dabebolo e tiwai po walali, “Dago meba taun bagulabo bomai obo meba elama, tama te obo ugwadu daide bobobage taua be geselinao, te ami bidi dabe tede bidiyu, te boi bidi dabe no bidiyu tonaluabo. Tama me dago hanu sunumi dabe geseliyu, me te sunumi paliabo bomai ain ba geselinao. Megi da, da dena kantride wiagila te bidibao. Magi baso meni. Dago dena God dago Genuai Bidigo homu kolesaga wali bomo elama peyu ebao. Tama tialima, Genuai Bidigo dago kantri bugagia tonaluyu, tama tiyu dwai sęgę dago bulude me pedalobeo,” Asago te po wai. Tama tialima, Asago sę bidi dabe meba tagala palama, tama masigigo nigai bomai obo te meba taun dabe bagulama igi pali, te Juda bulude. Tama augwaligo te sę dabe idubadi, te boi me hwįbeo. Magi baso meni. Genuai Bidigo boi bidi dabego augwaliba hwįagasomainu me sula tagalobeo. Tama tialima Juda dabego te yali sę te wiegi yai mu yali.
2CH 14:8 King Asago ami bidi dabe te Juda hanigo bidi dabe te 300,000; Benjamin hani bidi agai ami tomode bidali bidi te 280,000 ami bidi tama bidali. Te Juda hani bidi dabego da, te ene sesemone dabe me hwįabo awa ni name dabe tolalubo dao. Tama te Benjamin bidi hanigo da, te hwįabo sabele ni name dage dabe me enesigi dabe dali tolalubo dao. Te bidi dabe augwali boma pelama, tama augwali hwįabo wiegi yai bage dao.
2CH 14:9 Te Asa aga te Juda bulude king bidi bidibadi, te Sera te kantri Sudan bidigo aga ami bidi hauwa mu selama, tama kantri Judaba boi hwįainu asali. Te Serago ami bidi dabego namba te 1,000,000 dao, tama hwįabo karis te 300 tama elaluali. Augwali aselama, te taun Maresaba sabolagasali.
2CH 14:10 Augwali polo sabolagasai madi, king Asa aga ami bidi dabe dali hogodama, augwali hwįainu pali. Te Juda dabe augwali te taun Maresa pąba saboligi pali, tama augwaligo te Serago ami bidi dabe augwaligo te odogo malu bulu te augwali nogi Sefata wabo bulude suali. Tama te ami bidi hani si tama dolaluyu boi hwįabo kegaluali.
2CH 14:11 Tama tialima Asago Godibolo i weyu e tama po wali, “Genuai Bidi, nago koneani, eno ami hauwa menio, tama dago bomo menio. Tama te bidigo da ami hani hauwa mu dao. Tiali goli nago te bomo meni yai bidi dabe tau sabo dao, tama augwaligo te bomai bidi dabe aiyaba elalubo dao. Genuai Bidi, nage da te dago God dao. Da tau sao, magi baso meni, dago dena homu nageba megi mubao,” Asago te po wai.
2CH 14:12 Asago gedu haluasa po ola silama, tama aga ami bidi dabe dali augwali Sudan dabe dali boi hwįgi pali. Tama Genuai Bidigo Sudan dabe aiyaba elalubaso, te Sudan dabe augwali wi pali.
2CH 14:13 Tama tialima Asa aga ami bidi dabe dali augwaligo te bage pobeasa pelama, taun Gerarba usu nigi pali, tama ami bidi dabe hauwa mu elama isilali, tama te Sudan ami bidi dabego ma hwįabo usu meni yani. Genuai Bidigo aga ami bidi dabe tau sali, te Juda dabe dao, tama augwaligo augwali mu dolama, tama augwaligo te boide augwaligo nai dabe hauwa mu sali.
2CH 14:14 Tama Genuai Bidigo te taun Gerar augwali wi dwai mu emainu ilali. Tama tialima Asago ami bidi dabego te hanu dua mu sali, te taun dabede nai dabe hauwa mu te bulude elaluali, tama te Asago ami bidi dabego te doado bage hauwa mu selama selasa pali.
2CH 14:15 Tama me te bulude te sipsip kibu me donki kibu tonalubo bidi dabe dali hwįnama tama augwaligo sipsip kibu me donki hauwa selama, tama augwa Jerusalemba selasa pali.
2CH 15:1 Te sogo Godigo Spirit Mobo Bidi te Odetgo ogwa Asaria tigide bomo elama mu pedelali.
2CH 15:2 Tama king Asa te Jerusalemba ma asobadi, te Asaria aga tiąba pelama, tama agabolo e tama po wali, “King Asa, me tigidali Juda dabe, me tigidali Benjamin hani, dagego odiąo. Tialima dage Genuai Bidi dali pąde mu bidiyu da, teda aga dage dali pąde mu bidaibao. Ma, dagego aga gegebo sę iyu da, teda dage aga pąba mu asobo usu yaibao. Tiali goli, dagego aga tudi ola mayu da, teda agai dage tudi ola mawaibao.
2CH 15:3 Bobobage sogo mu te God Mu Israel dabe dali munu me bidai menio. Magi baso meni, augwaligo agaba tudi ola mobaso. Tama augwaligo Godigo po augwaliba ola maiabo pris bidi meni yai dao. Tama me augwaligo agai bomai po dabe wali me pai menio.
2CH 15:4 Tiali goli te genuai po sęgę dali me sęgę augwaliba pedalobo si, te Israel dabe augwali Genuai Bidi dago Godiba ma asai dao. Augwaligo aga gegebo sę ebaso, agai augwali aga pąba mu asomainu sula tagalai dao.
2CH 15:5 Te polobadu Israel dabe augwali God dali digibulu mu bidali sogo da, teda haniani dwai dwai kolesaga dabe pedelama, tama te tigidali kantride we bidi dabe bidibo page dolai dao. Tialima te bidi dabe augwali augwa bulu tagalama, tama augwali gasa buluba me painu ebadi, te dwai bidi dabego augwali elama, augwali doliyu yai dao.
2CH 15:6 Tama me te meba kantri dabego meba kantri aiyaba elaluainu boi hwįyu, me te meba taun dabego meba gasa taun dali boi hwįnama tama gasa taun dabe sainogo iyu yai dao. Te tama kolesaga dabe pedelai dao, magi baso meni, Godigo te tobage trabel te bulude pedelama tama augwalibolo sęgę momainu yai dao.
2CH 15:7 Tiali goli dagego wiegi yai sę dabe ebo bomo elama iyąo. Dage dili elama dolaluiąo, tama Genuai Bidigo dagego sę sulama, tama dage dali wiegi yai sę yaibao,” Asariago te po wali.
2CH 15:8 Te Asago te Odetgo ogwa Asariago te po wabo odali, tama te pogo agai homu kolesaga dąų walali. Tama tialima agai te Juda hanigo tǫde me Benjamin hanigo tǫde agai te tibo god dabego piksa dabe sese sela sąyani. Tama me aga te Efraim hanigo tǫde bulu du dabeba me agai te boide sali, te taun dabeba pelama, tama agai te tibo god dabego piksa sela sągi pali. Te god dabe te Genuai Bidigo gedude te dwai nai mu dao. Tama Asa agai te sę bidi dabebolo olama, tama te Genuai Bidigo tempel bede elalubo alta bugagia dodolao po walali, te Genuai Bidigo tempel be gesabidi badu elalubo pesagede.
2CH 15:9 Te Efraim we bidi hauwa, me Manase we bidi hanigo, me Simeon hani dabe, augwali hauwago God Genuai Bidi Asa dali bidibo suali. Tama tibaso, te we bidi augwali kantri Israel tagalama, augwa Asa dali te kantri Judade saut badu bidagasali. Tama tialima, Asago te we bidi dabe ebadi te Juda we bidi me Benjamin we bidi augwali deliba sisinagasao po walali.
2CH 15:10 Tama namba 3 poluade, te Asa aga 15 kibu be wabode aga king bidi bidibadi, te we bidi augwali te Jerusalemba sisinagasali.
2CH 15:11 Tama augwali te sisinagasali sogo augwaligo te boi hwįbode sali te kau kibu 700 siyu me 7,000 sipsip kibu siyu elama, tama augwaligo kau kibu me te sipsip kibu augwaligo Genuai Bidiba ofa yali.
2CH 15:12 Tama augwaligo bomai po deli dąų waliyu te po wali, augwali tigidali sogo augwa wąį dabego God, Genuai Bidi, aga dologode bidaibao po wali. Tama me augwaligo augwa homu kolesaga bomo elama aga wali peyu, me augwaligo homude me dąų olama wali peyu yaibao po wali.
2CH 15:13 Tama augwaligo te po wali, te wego o bidigo te tama tisąma yali da, teda augwaligo aga elama isilaibao po wali. Te bidi aga gesi bidi bidibadi me aga monu dabe yai digi me tagalao, te ela muyu naga yaibao.
2CH 15:14 Augwaligo te bomai po Genuai Bidigo nogide dąų walali. Tama augwaligo hai olama, tama augwa biugel bu genuai wali.
2CH 15:15 Tama te kantri Juda we bidi augwaligo augwa te dąų walali te bomai pode augwali wiegi yai homu pemene yali. Magi baso meni. Augwaligo homu kolesaga bomo mu elama Genuai Bidi wali pabo homu ebaso. Augwaligo Genuai Bidi gegabo homu bomo yai mu yali, tama Genuai Bidigo augwali aga pąba asomainu sula tagalali. Tama agai augwaligo kantri bugagia tonaluyu, tama augwaliba sęgę me asomainu me sula tagalobeo.
2CH 15:16 Asago aga aua mosi Maka aga kingo ida sęde namba elaluali sela sąyani. Magi baso meni. Makago te tibo god we Asera piksa noma me deli nigai dao. Asago pode augwaligo te damua pai dwai piksa noma togolama, tama miminama, tama augwaligo sela pelama augwaligo te wę Kidrongo odogo malu buluba isi ulugi pali.
2CH 15:17 Te mu tama, Asago te tibo godiba lotu wabo pesage sese dolama silibeo. Tiali goli tigidali sogo agai Genuai Bidi wali pabo dao, tama agai dwai sę Genuai Bidigo gedude me ebeo.
2CH 15:18 Tama Asago aga ayago Godigo nai dao olama sa muani te nai dabe sese me silva me gol me haniani dis dabe me, te aga digi Godigo dao olama sa muani te nai dabe sese selama, tama Godigo tempel be tomoba mugi pali.
2CH 15:19 Tama te sogo tama gagalama Asa aga kingde bidibadi 35 kibu be yali tomode te boi bidi augwali dali me hwįagasobeo.
2CH 16:1 Te Asa aga Juda dabego king bidibadi kibu be 36 wabode, Basa te Israel dabego king aga ami bidi dabe selama, tama augwali Juda dabe dali hwįainogo pali. Augwaligo taun Rama selama, tama augwaligo te hanu bagulali obo dąų walama iduali. Te we bidi te Juda buluba ugwa eda idali weyu te sunumi paliyu yali.
2CH 16:2 Tama tialima Asago te Godigo tempel be tomode elalubo te mone mubo be tomoba pelama, tama silva me gol siyu, me aga digi kingo be tomoba pelama, te be habude elalubo nai dabe me siyu elama, tama Benhadat, te Siria king pageba tolali. Tama Asago king Benhadatbolo e tiwai po ola tolali,
2CH 16:3 “Eno homugo dadi si abagi si bidabo po dąų waibao, te polobadu dadi sigo aya sigo yali gilama. Tama tibaso eno te silva me gol dali si nagebolo te tolobao. Eno homugo nago te Israel dabego king Basa dali dąų wali po hųgia sąyao. Tama agai aga ami dabe sela peyu eno tǫ taga pomainao,” Asago te po ola tolali.
2CH 16:4 Te king Benhadatgo king Asago te po odali, tama agai agabolo usu dao po wali. Tama tialima agai aga ami ofisa bidi dabebolo augwa ami bidi dabe selama, augwali Israel dabe dali boi hwįgi pao po wali. Tama tialima augwali boi hwįgi pelama, tama augwaligo taun Ijon sobadi, me taun Dan sobadi, me taun Abel Betmak sobadi, te taun me nogi Abel Maim sali. Tama me augwaligo Naptali hanigo tǫde taun dabe me sali. Te da te Israel dabego tubo nai dabe mubo hanu dabe dao.
2CH 16:5 Tama king Basago te Siria dabego Israel dabego taun dabeba hwįagasalio po odobo si, teda agai te Ramade iduali sę tagalama, te obo silisąma taga pali.
2CH 16:6 Tama tialima king Asago tigidali Juda bidi dabe asao po wali, tama augwaligo te taun Ramaba pelama, tama augwalibolo king Basago te obo sę yainogo yali te masigi dabe me ni name dabe sigi pelama sela asao po wali. Tialima augwaligo te nai dabe sigi pelama, tama augwaligo hanu Mispa me hanu Geba siba sela pelama, tama augwaligo te hanu si obo dąų walali.
2CH 16:7 Tama te sogo profet Hanani pelama, te king Asa sugi pelama, agabolo e tama po walali, “Nago homugo Siria king bidigo nage tau sabo bomo genuai elalubao homu elama, tama nago dago Genuai Bidi dena Godiba homu dąų wabeo, tama agabolo nage tau sao olama hanalubeo. Tama tialima, nago naga boi bidi dabe aiyaba me elalubeo, me te Siria ami bidi dabe me nago aiyaba me elalugobeo.
2CH 16:8 Nago koneani, polobadu te kantri Sudan me kantri Libia ami sigo nage dali boi hwįagasai dao. Augwaligo ami sibi hauwa mu elaluyu, me augwaligo karis hauwa elaluyu, me augwaligo ami hani hauwa te hosde dualama boi hwįyu yai dao. Tiali goli te sogo nago Genuai Bidiba homu dąų olama, tama nago agabolo nage tau sao po hanalu wai dao. Tama Genuai Bidigo nagebolo bomo menama, tama nago augwali aiyaba elaluai dao.
2CH 16:9 Tigidali sogo Genuai Bidigo aga dologode elalubo bidi dabe naga bugagia tonalubo dao. Augwali menade tǫ dabede bidibo me tagala. Agai augwali tau selama augwali bomo ilibo dao. Tiali goli nago Siria king bidibolo nage tau somainogo hanalu wali da, teda te dwai kolesaga mu dao. Tama tialima nage dali te Juda dabe dage bugagia dua me bidigobeo, menio. Tigidali sogo boi bidi dabego dage dali boi hwįagasiyu yaibao,” wali.
2CH 16:10 Te profet Hananigo te wali pogo king Asa sębę dwai mu ilali. Tama agai pode augwaligo Hanani kalabusiba muani, tama agai sągą ni namego dąų walali. Tama te sogo naga Asago bomonama dwai sę te Juda we bidi meba dali yali.
2CH 16:11 King Asago yali sę dabe tigidali te po dabe te aga king pedelalidu gagalasa aga isaliba saboluyu yali sę po dabe, te buku augwali Juda Dabego King Dabego Po Buku wabo, me Israel Dabe Kingo Po Buku wabo, tede asęai dao.
2CH 16:12 Asa aga king bidibadi kibu be 39 wabode, gasi dwai me agai sągąde pedelali. Tiali goli Asa agai Genuai Bidibolo aga tau somainu hanalubeo. Menio. Agai te dokta dabebolo naga hanalu wali.
2CH 16:13 Tama Asa aga king bidibadi kibu be 41 wabode aga isali.
2CH 16:14 Tama tialima, augwaligo aga te augwaligo Devitgo Taun wabo tede pubulali, te masigi dudulawe tomode, aga digi te bidi dabebolo dogao po polo wai madigi. Te bidi dabego te wiegi yai denami ebo pauda me wel si taluama, tama augwaligo te pauda te dedage tomode bet me tomode muai tede gelali. Tama augwaligo kingo tigi te bet saiba ugwaba muani. Tama augwaligo aga hobede ebaso tama augwaligo agai genuai nogi konealuainogo, tama augwaligo genuai isi mu nogoani.
2CH 17:1 Te Jehosafat aga aya Asago pesage selama, tama aga Juda dabego king pedalali. Tama agai aga ami dabe bomo ilama dąų olama bomo mu ilali. Tama tibaso, te Israel dabe augwaliba boi hwįagasabo usu meni yani.
2CH 17:2 Agai aga ami bidi dabe te bomai obo elalubo taun dabede tagaliyu, me te kantride tigidali buluba dabe tatagalo bilali. Tama agai te ami dabe meba te Efraim hanigo taun dabede tagalali, te aga aya Asago te boide sali te taun dabe.
2CH 17:3 Tama Jehosafatgo aga wąį Devit hasia king pedelali sogo yali wiegi yai sę tiwai yali. Tama Jehosafat agai tibo god Balba lotu po me wayu ebeo. Tama tibaso Genuai Bidi aga dali bidiyu aga tau sali.
2CH 17:4 Jehosafatgo aga ayago God wali pelama, tama me agai aga Godigo bomai po sese tama bugagia wali pali, tama agai te Israel dabego king dabego ebo dwai kolesaga tiwai me ebeo.
2CH 17:5 Tama Genuai Bidigo Jehosafat aga bomai king mu pedalomainu elama, tama agai kanrti Juda tonaluali. Tama tigidali we bidigo agabolo doado bage dabe magasali. Tama tiyu, agai mone me nai dabe hauwa elaluyu, tama Juda dabego gedude agai genuai nogi mu elaluali.
2CH 17:6 Jehosafat aga Genuai Bidi wali pabo bomo elama mu yali. Tama aga te tigidali Juda kantri tǫ pedai badu sese tama biligi pali, tama agai te tibo god dabeba lotu wabo pesage doliyu, me god we Aserago piksa noma me doliyu yali.
2CH 17:7 Te Jehosafat aga king bidibadi kibu be sela wabode, agai aga genuai bidi dabe meba e badi, Livai dabe meba ebadi, pris bidi si ebadi agai Juda tǫ tigidali badu tagala palali. Agai augwalibolo Godigo tigidali bomai po dabe elalubo buku sese selasa tigidali taun dabeba pelama, tigidali we bidibolo te bomai po skul ola memena biligi pao po wali. Te genuai bidi dabego nogi e dao, Benhail, me Obadia, me Sekaraia, me Netanel, me Mikaia dao. Tama te Livai dabego nogi da e dao, Semaia, me Netania, me Sebadaia, me Asahel, me Semiramot, me Jehonatan, me Adoniya, me Tobia, me Tobadonia dao, tama pris bidi sigo nogi e dao, Elisama me Jehoram dao.
2CH 17:10 Te Jehosafat aga king bidibadi Genuai Bidigo te Juda bulu pąde elalubo kantri king bidi dabe me tobolu bidi dabe augwali Jehosafatde wi dwai mu emainogo ilali. Tama tibaso augwaligo aga dali boi me hwįagasobeo.
2CH 17:11 Tama te Filistia dabe mebago takis abelainogo agabolo silva dabe meba sesali, tama me augwaligo Jehosafatbolo meba doado bage dabe sesali. Tama me te Arebia dabego me agabolo 7,700 sipsip kibu me 7,700 meme kibu omai dabe te Jehosafatbolo magasali.
2CH 17:12 Tama Jehosafat aga bomai king mu genuai mu me pedaludali, tama agai Juda dabego taun dabeba bidi dabe tagala pabalo pali. Tama augwaligo te tubo nai dabe me wa hulu dabe wialubo bakstua dabe sę egi pali. Tama me augwaligo ami bidi dabe bidiyu boi bidi dabe no munaluaba pesage boma pai me geseliyu yali.
2CH 17:13 Tama tialima Jehosafatgo walu hauwa dabe te bakstua dabe tomoba mumuna pali. Tama me Jehosafatgo bomai ami bidi dabe Jerusalemde bidimainu tagalali.
2CH 17:14 Te ami bidi dabe augwali augwa deli deli we wai dali bidiyu tama deli deli ofisa dabego 1,000 ami bidi tonaluyu yali. Te tigidali Juda hanigo ami bidi dabego namba wan ami ofisa bidi nogi te Atna dao. Tama agai 300,000 bomai ami bidi tonaluai dao.
2CH 17:15 Tama agai namba tu ofisa bidi nogi te Jehohanan dao, tama agai 280,000 bomai ami bidi dabe tonaluai dao.
2CH 17:16 Tama namba 3 ami ofisa bidi te Amasia, te Sikrigo ogwa dao. Agai agabolo Genuai Bidigo sę me emainogo mani. Tama agai 200,000 bomai ami bidi dabe tonaluali.
2CH 17:17 Te Benjamin hanigo tigidali amigo namba wan ofisa te Eliada dao. Aga wiegi yai bomai ami dao, tama agai 200,000 ami augwali ni name sabele dagego me enesigigo boi hwįbo bugagia mu koneani bidi dabe tonaluali.
2CH 17:18 Eliadago namba tu ami ofisa te Jehosabat dao, tama agai 180,000 ami bid tonaluai dao. Tigidali sogo te ami dabe augwali boi hwįabo no munalubo dao.
2CH 17:19 Tigidali te ami hani augwali te Jerusalemde bidiyu, augwaligo kingo sę ebo dao. Tama kingo gasa meba ami bidi dabe augwali te kantri Judago bomai obo elalubo taun dabede bidali.
2CH 18:1 Te Jehosafat te Juda dabego king agai mone me haniani nai dabe hauwa mu elalubaso, te bidi dabego agabolo genuai nogi mu mani. Tama tiali goli, agai te Israel dabego king Ahap dali po dodolali, te Jehosafatgo ogwago Ahapgo wegi somainu yaibao po wali, teda te kantri si augwali bugagia bidimainogo.
2CH 18:2 Tama kibu be meba pela silai madi, te Jehosafat aga taun Samariaba pali, te king Ahap suainogo. Tama tialima king Ahapgo aga hani sę bidi dabebolo walama, augwaligo sipsip kibu hauwa eliyu, me kau kibu eliyu elama, augwali genuai nai ulali, te king Jehosafat me aga dali asali hanigo tuabo nai. Magi baso meni. Ahapgo Jehosafatbolo agai taun Ramot te distrik Gileatba boi hwįgi pabo tau somainogo hanalu wainogo.
2CH 18:3 Tama Ahapgo Jehosafatbolo e tama po walali, “Eno taun Ramot sainogo boi hwįgi painogo ebao. Nage ena dali asaibawe, ma meniwe?” Tama Jehosafatgo te po wei ponoyu, e tama po wali, “Eno nago homu kolesaga wali pabo homu usu elalubao. Tama eno ami dabego nage tau sabo homu no munalubao.
2CH 18:4 Tiali goli dago Genuai Bidigo homu kolesaga hasia bolo osola suinao, te dago te yainogo ebo te sę po bolo,” te po wali.
2CH 18:5 Tama tialima Ahapgo profet sibi i olama asao po wali. Te 400 profet sibi augwali sabolagasali, tama Ahapgo augwalibolo e tama po hanalu wali, “Dago te hanu Ramot ma sainogo boi hwįgi pabo usu yaibawe, ma meniwe?” Tama augwaligo te po wei ponoyu, e tama po wali, “Te usu dao, nage pagameo. Godigo nage tau selama, nago ugwaba ela holaibao,” wali.
2CH 18:6 Tiali goli Jehosafatgo Ahapbolo e tama po hanalu wali, “Te Genuai Bidigo gasa profet bidi me deli bidibawe?” po hanalu wali. “Tialima me bidibaso da, teda dago agabolo Genuai Bidigo homu kolesaga po bolo hanalu wainao,” wali.
2CH 18:7 Tama Ahapgo agabolo e tama po walali, “Te profet me deli bidibao, agai nogi Mikaia dao, te Imlago ogwa dao. Tiali goli eno te bidi me godolo ebo menio, magi baso meni, agai enabolo wiegi yai profet po enabolo me wabo menio. Tigidali sogo agai enabolo dwai sę pedelabo po naga wabo dao,” Ahapgo te po wali. Tiali goli Jehosafatgo aga te po wali, “Nago te tama tiwai po wagio.”
2CH 18:8 Tama tialima king Ahapgo aga ami ofisa bidi me asao olama, tama agabolo e tama po walali, “Nage polo pelama, tama te Mikaia te Imlago ogwa eba polo odasa asao, ena pageba.” Agai te po wali.
2CH 18:9 King Ahap me king Jehosafat augwali si kingo ugwa aulama tama augwali si augwa sia kingde dulaluali. Augwaligo augwali sigo sia king te Samaria taun sunumi bulu badu muai. Te bidi dabego wit dabe dili dabe sela sąnama, tubo nai dabe sabo malu tǫ dolaba pai bulu me delide. Tama tigidali profet sibigo profet po te king siba pusuduali, te king si pagede.
2CH 18:10 Sedekaia te Kenanago ogwa me deli dao, aga te 400 profet bidi me deli dao. Agai ain dage me deli selama, tama kau kibugo gąų tiwai geselai dao. Tama megi da agai aga tobolude te gąų munama, Ahapbolo e tama po wagasali, “Genuai Bidigo te po wali, nago boi hwįnama, tama augwali aiyaba elaluaibao. Te nago augwali te e gąųgo augwali enene pelama, augwali mu siligi paboba usu nigi paibao,” wali.
2CH 18:11 Tama meba profet bidi dabego me deli tiwai po naga wali. Augwaligo te po wali, “Nage Ramotba hwįgi pelama, tama nago te taun saibao. Genuai Bidigo nage tau selama, tama nago ugwaba mu holaibao,” augwaligo te po wali.
2CH 18:12 Te Ahapgo Mikaia oda sigi pomainogo tagala palali te ofisa bidigo Mikaia odasa asali. Tama augwali si sunumidu pedu, ofisago Mikaiabolo e tama po walali, “Tigidali profet dabego te po wali, kingo te boi hwįbode ugwaba ela holaibao po wali. Tama tialima, nago me deli kolesaga naga elama, tama wiegi yai po kingbolo mao,” wali.
2CH 18:13 Tiali goli Mikaiago te ofisabolo e tama po wali, “Te Genuai Bidi tigidali sogo bidibo bidigo nogide, eno nagebolo mu po e obao, mena po eno Godigo enabolo mani, te po naga eno pusaibao,” wali.
2CH 18:14 Tama Mikaia aga te king Ahap pageba saboligi pabo si, kingo agabolo e tama po hanalu wali, “Mikaia, dago te taun Ramotba boi hwįgi pelama tama dago te taun ma saibawe, me meniwe?” po hanalu wali. Tama Mikaiago king dolobo po wainogo e tama po wali, “Te usu dao, nage pelama hwįgi pao, tama nago te taun saibao. Godigo nage tau selama tama nago te bage aiyaba elaluaibao,” wali.
2CH 18:15 Tiali goli Ahapgo agabolo te po wali, “Ili po wabo tagalao. Tigidali sogo eno nagebolo Genuai Bidigo nogide mu po naga pusao po wabo dao. Nisu nago po odaibawe?” Ahapgo te po wali.
2CH 18:16 Tama tialima Mikaiago Ahapbolo e tama po walali, “Te Israel dabego ami bidi dabe te sipsip kibu augwa tonalubo bidi meni yai te bulu du dabede bidibo tiwai elalubo eno sualio. Tama eno Genuai Bidigo po wabo odali, ‘Te bidi dabe augwali augwa tobolu bidi dabe menio. Augwali te boi hwįbo tagalama, augwa buluba pelama, tama augwali bugagia bidimainao,’ wali,” Mikaiago te po wai.
2CH 18:17 King Ahapgo te po odama, tama agai king Jehosafatbolo e tama po walali, “Te dao, eno nagebolo polo wai dao. Te profetgo ena dali wiegi yai po me wabo menio. Tigidali sogo agai enade te dwai sę dabe enabolo pedelabo po naga wabo dao,” wali.
2CH 18:18 Tiali goli Mikaiago po wadolama weyu e tama po wali, “Tialima megi da, nago eno wabo poba bugagia olo munama odao, tama eno nagebolo Genuai Bidigo enabolo ola mani po pusaibao. Eno Genuai Bidi aga aga sia kingde dagalude dualalubo suai dao, tama tigidali ensel sibi augwali aga pąde mu dolalubo suali.
2CH 18:19 Tama Genuai Bidigo augwalibolo e tama po hanalu wali, ‘De pelama Ramotba boi hwįgi pelama, tama boide Ahap geana siyu isigi paibawe?’ Genuai Bidigo te po hanalu wali. Tama deli deli ensel sibigo Genuai Bidibolo augwa homu kolesagade po pusali.
2CH 18:20 Augwaligo te tama tidubadi, mobo bidi me deli Genuai Bidi pageba pelama, te po wali, ‘Ena pelama, aga mumuasa pelama geanigi paibao,’ wali. Tama Genuai Bidigo agabolo te po hanalu wali, ‘Te nage pelama, aga mena tama mumuasa bilama geanigi paibawe?’
2CH 18:21 Tama mobo bidigo Genuai Bidibolo e tama po walali, ‘Ena pelama Ahap aga profet dabe aga ili po ola momainogo igi paibao,’ wali. Tama Genuai Bidigo te mobo bidibolo e tama po wali, ‘Nage pelama, aga ili po ola magi pao, tama agai nago po mu dao homu elama homu dąų waibao,’ Genuai Bidigo te po wabo eno odalio.” Mikaiago te po wai.
2CH 18:22 Tama Mikaiago Ahapbolo po dolo tama weyu te po wali, “Genuai Bidigo nage dolomainu homu yalio. Tama tialima, agai te spirit o mobo bidi tagala palama, nago te profet dabego nage ili po ola momainogo te elama, te profet dabego nage polo ili po ola mani dao,” wali.
2CH 18:23 Te profet Sedekaia te Kenanago ogwago Mikaiago te po Ahapbolo pusubo odama, tama aga Mikaia pąba pelama, tama agai nabogede kala powali, tama te po wali, “Genuai Bidigo Mobo Bidigo ena mena tama tagalama, nageba pelama, tama nagebolo te po maniwe?”
2CH 18:24 Tama Mikaiago Sedekaiago po wei ponoyu, e tama po walali, “Nosali te boi bidi dabego da Israel dabe elaluagaselama, tama nage nagaduba wi pelama, nage be me tomode habu me delide geme duala sigi paibao. Tama te sogo naga nago koneaibao, Genuai Bidi aga digi enabolo te po menama, eno te po pusai yabo waibao,” wali.
2CH 18:25 Tama tialima king Ahap aga ami ofisa bidi me delibolo te po walali, “Te Mikaia tola selama, tama Emon bidibo digi odasa pao,” wali, “te taunde namba wan kiap pageba me eno ogwa Joas pageba odasa pao.
2CH 18:26 Tama nago eno e po augwali sibolo pusa mao, ‘Eno homugo te bidi te kalabus elama be habuba tagalao,’ po wao. ‘Tama aga dwasianu bret dali wę dali madubadi, te wabi hwįbo silama, ena ma asoboba usu nao,’ te po wao,” wali.
2CH 18:27 Tama Mikaiago Ahapbolo e tama po ma walali, “Te nage tigide dene me sisąma ma asobaso da, teda Genuai Bidigo te po enabolo mawai meni yabo wao.” Tama Mikaiago po genina ma weyu te po wali, “Dage tigidaligo eno po bugagia mu odiąo,” wali.
2CH 18:28 Tialima nosali Ahap te Israel dabego king me Jehosafat te Juda dabego king augwali sigo augwa ami bidi dabe selama, augwali distrik Gileatde taun Romatba boi Siria dabe dali hwįgi pali.
2CH 18:29 Te boi dala sisąbadi, Ahapgo Jehosafatbolo e tama po walali, “Da te boi hwįgi pabo sogo, eno te kingo ugwa sela sąnama, tama eno gasa ugwa me gudaibao, te boi bidi dabego ena gesabidi kone idali weyu. Tiali goli nago da, te kingo ugwa me gudao,” wali. Tama tilama, augwali si boi hwįgi peyu pali.
2CH 18:30 Tama te boi polo dala sisąbadi te Siria king bidigo te karisde dolaluyu hwįbo ami polalubo bidi dabebolo e tama po wali, “Dagego Israel dabego king dali naga hwįao, tama dagego gasa bidi dabe dali me hwįnamo dao,” wali.
2CH 18:31 Tama augwali te boi hwįbo sogo te ami kepten dabe augwaligo te king Jehosafat sulama, tama augwaligo homugo te da te Israel dabego king dao homu yali. Tama augwali aga dali boi hwįainogo pali. Tiali goli Jehosafatgo i bomo elama mu wali. Tama God Genuai Bidigo aga tau selama, tama augwaligo aga dali hwįmainu sula tagalobeo.
2CH 18:32 Tama te polasa pabo kepten dabe augwaligo koneani, aga te Israel dabego king menio homu yali, tama tibaso augwaligo aga pobeasa pabo tagalali.
2CH 18:33 Tiali goli te ami bidi dabe augwali hwįbo sę idubadi, te Siria ami bidi me deligo enesigi kegelama, tama Israel ami bidi dabe bidiboba uba ene subigila enani. Tama te enego Ahapgo tigi boi hwįbo ugwago aga tigi bugagia me dualisąma yali tede mu dolali. Tama aga karis guni tubo bidibolo e tama po walali, “Ena polo dolalio. Te karis polo begelama, tama hwįbo pesage taga pao,” wali.
2CH 18:34 Tiali goli te Siria ami bidi me Israel ami bidi augwali boi hwįbo bomo mu iduali. Tama Ahapgo te hwįbo pesage taga pabo usu meni yai. Aga aga te karisde bididubadi, Siria dabeba tonalubadi giliga dega saboba usu nigi pali. Tama giliga iba dega sabode aga isali.
2CH 19:1 Te Ahap da polo isali, tama Jehosafat aga me dolobeo, tama aga te aga king beba Jerusalemba ma asali.
2CH 19:2 Tama asidubadi te sogo profet Jehu te Hananigo ogwago te Jehosafat tiąba pelama, e tama po walali. “Nago homugo te dwai bidi dabe tau siyu, tama Genuai Bidi godolo isąma ebo bidi dali kisabo, te usu da, agawe? Nago te tama kolesaga yaligo da, Genuai Bidigo nage dali sębę homu yalio.
2CH 19:3 Tiali goli nago meba wiegi yai kolesaga me ebo dao. Nago naga kantride elaluali tibo god we Aserago piksa noma alulama sąwai dao. Tama nago Godigo homu kolesaga wali pabo homu kolesaga bomo mu yai dao,” Jehugo te po wali.
2CH 19:4 Te Jehosafat aga Jerusalemde bidiyu, tialigo agai aga we bidi susa biligi peyu, te bilibo te taun Berseba te saut badu gagalama, tama u badu notba te Efraim hanigo bulu duba usu nigi peyu ebo dao. Tama agai te we bidi dabebolo augwali te augwa wąį dabego God Genuai Bidiba ma asiąo po wabo dao. Tama tialima augwaligo po odama, augwali God pageba ma asali.
2CH 19:5 Tama Jehosafatgo te po tų ebo odabo bidi dabe sa munama. augwali te tigidali bomai obo elalubo taunde tatagalo pali.
2CH 19:6 Tama agai te jas dabebolo e tama po walali, “Dage dua dao, te dagego te we bidigo po tų odama dobabo sogo. Magi baso meni, dagego bidigo sę ebeo. Menio. Dagego Genuai Bidigo sę te ebao. Tama Genuai Bidi dage dali te po tų odobo sogo bidibo dao.
2CH 19:7 Genuai Bidi dago God agai te po tų ebo pauli ebo, me abagi tau sabo, me te bidi dabego dage mone menama dage nagame yainogo ebo sula tagalabo, te tama kolesaga dabe agai godolo munu ma ebeo. Tama tialima, dage po tų ebo odobo bidi dabe, dagego God dologode mu elaluyu, tama dagego po tų ebode bugagia peda selama elaluao,” Jehosafatgo te po wali.
2CH 19:8 Te augwali Jerusalemba ma asali sogo, Jehosafatgo deli hani wąį delide agai Livai dabe meba sa muyu, me pris dabe meba sa muyu, me tobolu bidi dabe meba sa muyu, me po tų odobo bidi jas, te hani bidi tomode te we bidi augwaligo Genuai Bidigo bomai po sela sąbaso te po tų odabo bidi me sa muyu yali. Tama me Jerusalem tomode bidibo we bidigo wado po wabo dodoliyu yabo me.
2CH 19:9 Tama Jehosafat agai te jas dabebolo e tama po walali, “Dagego te sę ebo sogo da, dage Genuai Bidi dologode bidiyu, tama dagego agai bomai po wali piąo. Tama dagego te sę wiegi yai mu pedelemainogo godolo mu iyąo.
2CH 19:10 Tialima dage dali deli sę ebo bage augwali gasa meba taunde bidibo bage, augwaligo augwali po tų odobo sęde tau somainu hanalubaso da, teda dagego augwali tau selama, tama dagego augwali po tų ebo wiegi yai doloba pai kolesaga ola mao. Te bidi ela muai po tų yaibaso, me o te bidigo gasa meba bomai po dabe bogi pai po tų yaibaso, me tagalao. Dagego augwali ola mao, tama augwaligo po tų dolo bugagia emainao. Tama augwali Genuai Bidigo gedude dwai sęgę me elalugobeo.
2CH 19:11 Tama me dagego bugagia odiąo. Te bidi si te po tų odobo bidide polasa pabo bidi si bidaibao. Het pris Amariago dage te Genuai Bidigo bomai po sela sąnama tama te po tų odabo sogo te tonaluaibao. Tama me te namba wan polalubo bidi Sebadaia te Juda dabego tobolu bidi te Ismaelgo ogwago te we bidigo te gavmanigo bomai po sela sąwai te po tų odabo sogo tonaluabo bidi dao. Tama te Livai dabego dage te tigidali po tų ebo sęde tau saibao. Tama tialima, dage dili elama dolaluyu, tama te sę tigidali tama yao. Magi baso meni, Genuai Bidi aga te doloba pai kolesaga ebo bidi dabe dali bidibo dao weyu.” Jehosafatgo augwalibolo te po wali.
2CH 20:1 Nosali te Moap hani ebadi, me Amon hani ebadi, me te gasa bidi hani me augwali Amon hani tomode bidai hani, augwali Juda dabe dali boi hwįagasali.
2CH 20:2 Tama bidi meba augwali king Jehosafat bidibo digi aselama, te po wagasali, “Tegobao, te genuai hani ami bidi dabe augwali sigi ąį Detsi u badu aselama, tama nage dali hwįainogo ebao. Megi da, augwali taun Tamar Hasasonde bidibao,” wali. Tamar te taun Engedigo nogi me dao.
2CH 20:3 King Jehosafat agai te po odama, aga wi mu yali. Tama agai homu boma pai mu elama, te Genuai Bidigo homu kolesaga hanalu wabo homu yali. Tama tialima, agai bomai po te kantri Juda tigidali badu we bidi dabe augwaligo nai gisilama Genuai Bidiba gedu haluasa po wao po wali.
2CH 20:4 Tama tialima te Juda bulude tigidali taunde we bidi augwali sese tama augwali Jerusalemba pelama, gedu haluasa po weyu, Genuai Bidibolo augwali tau somainogo hanalu wali.
2CH 20:5 Tama augwali sese tama Jerusalem we bidi dabe dali deliba sisinagasali, tama augwali te Genuai Bidigo tempel be gesabidi badu sisinibo pesage gesi elaluai, te pesageba sisinigi pali. Tama king Jehosafat te we bidi tomoba doligi pelama,
2CH 20:6 tama agai gedu haluasa po weyu e tama po wali, “O Genuai Bidi, dago wąįgo God, nage dagalude bidiyu nago tǫde we bidi tigidali tonalubo dao. Nago genuai bomo mu elalubao, tama bidi mego nage dali hwįnama, nage aiyaba elaluabo usu me egobeo.
2CH 20:7 Dago God, nago koneani, da Israel dabe naga abagi Abrahamgo hani wąįgo wai puluba dao. Tama da naga we bidi mu dao. Nago e tǫde polobadu bidali we bidi nago sela sąwai dao, tama nago e tǫ te dago wąį dabebolo mawai dao. Te dago tǫ tigidali sogo elalua pomainogo tiai dao.
2CH 20:8 Tama da bobobage sogo mu e tǫde polo bidalio. Polobadu dago wąį dabego te genuai tempel be sę yai dao, te we bidi augwali te pąba pelama nageba lotu po omainogo. Tama augwaligo te tempel be sęą silibo si, augwaligo e tama gedu haluasa po wai dao,
2CH 20:9 ‘Genuai Bidi, te da dolabo sęgo da gegebaso, o te boi bidi dabego da dali hwįainogo asobaso, o nago da dene mobaso, o te dwai gasi genuai me pedalobaso, o genuai nasi ebo sogo pedalobaso da, teda da te be gesabidi badu te nago geduba dolagasaibao. Magi baso meni. Te be da, te da nage pąba asabo pesage mu dao. Tama dago te sęgę asoboba kone palama, tama dago gedu haluasa po weyu, nagebolo da tau sao po hanalu waibao. Te tama tialima, nago dago gedu haluasa po wabo odama, da ma oda saibao,’ dago wąį dabego te sogo te po wai dao.”
2CH 20:10 Tama Jehosafat agai gedu haluasa po genina ma weyu, e tama po wali, “Genuai Bidi, nago polo sualio, te Amon dabe, me Moap dabe, me Idom dabe, augwali da dali hwįainogo polo asalio. Te hani augwali naga, nago dago wąį dabego augwali dali hwįmainogo nago me sula tagalai menio. Te dago wąį dabe augwali Isip tagalama augwaligo tǫba sabolali sogo, dago wąį dabego augwali dolai menio.
2CH 20:11 Tiali goli, augwaligo dago wąį dabego augwaliba te yali wiegi yai kolesaga yaliba konebeo. Menio. Augwaligo dwai kolesaga elama, tama da dali ma hwįainu ebao. Augwali polo asalio, te naga digi dabolo e mani te tǫde sela sąwainu.
2CH 20:12 O dago God, te genuai ami hanigo da dali hwįainu ebao. Tiali goli naga digi augwali dolama tagalao. Magi baso meni, dago augwali dali hwįabo bomo menio, tama me dago magi sę yagawe dago konebeo. Tama tibaso dago nage deliba tonalubao, da nago tau somainu,” Jehosafatgo te po Godibolo hanalu wali.
2CH 20:13 Te Juda bulu bidi dabe me we wai dabe augwali Genuai Bidigo gedude doligiluali, te Genuai Bidigo tempel be pąde.
2CH 20:14 Tama Livai bidi me aga nogi Jahasiel, aga te we bidi hani tomode bidali. Jahasiel aga te Sekaraiago ogwa dao, tama Sekaraia aga te Benaiago ogwa dao, tama Benaia te Jeielgo ogwa dao, tama Jeiel te Mataniago ogwa dao. Te hani bidi augwali te Asapgo wąį hani bidi dabe dao. Aga te Livai hani bidi me dao. Tama tialima, Genuai Bidigo Mobo Bidi bomonama mu Jahasiel tigiba pedelali.
2CH 20:15 Tama agai e tama po wali, “King Jehosafat, me Jerusalem we bidi, dage me tigidali Juda bulu we bidi, dagego bugagia odiąo. God Genuai Bidigo te po wali, ‘Dage te genuai ami hanide wi elama homu sęgę kuna igimio. Menio. Te hwįabo te God agaduba sę dao, te dagego sę menio.
2CH 20:16 Do da, te boi bidi dabe augwali te bulu du Sis sunumidu aselama, dage dali hwįagasaibao. Tama dage pelama, tama dagego augwali te odogo malu bulu, te wa pai bulu Jeruelde suaibao, te giliga asobo badu.
2CH 20:17 Tiali goli, dagego duga digi me hwįgobeo. Mu menio. Te dage te boi hwįbo pesageba saboligi pabo sogo da, teda dage olo dolaluyu olo tonaluiąo. Tama dagego gedugo suaibao, te Genuai Bidigo dage tau selama hwįaibao, tama dage tau selama augwali aiyaba elaluaibao. Dage Jerusalem we bidi me Juda bulu we bidi, dage homu sęgę elama dage wi igimio. Do dage hwįainu piąo, Genuai Bidi dage dali bidaibao,’ Genuai Bidigo te po wai,” Jahasielgo te po wali.
2CH 20:18 Te king Jehosafat me te tigidali we bidi augwaligo te po odobo si, teda te we bidi sese augwali sese bogoli sugunama, tǫba tobolu basi guluama, tama Genuai Bidiba lotu po wali.
2CH 20:19 Tialima te Kohat hanigo Livai dabe me Kora hanigo Livai dabe augwali doligiluama bomonama hai olama, tama Genuai Bidi te Israel dabego God nogi ugwaba sali.
2CH 20:20 Tama tialima augwali kigamu hulide mu hogodaloama, tama augwali te taun Tekoa, te nai meni yai wa pai bulu pąba pabo kegaluali. Te augwaligo Jerusalem taga pisąmadi, Jehosafatgo augwalibolo te po walali, “Dage Juda hani bidi, me dage Jerusalem bidi dabe, dagego odiąo. Dagego Genuai Bidi dena Godiba homu bomo elama dąų waiąo, tama dage bomo elama dolaluaibao. Tama me dagego Godigo profet bidi dabego po me mu po dao homu elama homu dąų wayu yao, tama dagego te wabi hwįbo ugwa ela holaibao,” wali.
2CH 20:21 Tama kingo te we bidi augwaligo homu kolesaga po hanalu wali, tama nosali agai bidi meba te ami bidi dabe tudiba togolama polasa peyu tęąbi po dali pomainogo sa muani. Tama e tama tęąbi po dali pali, ‘Genuai Bidigo kolesaga wiegi yai mu elama doloba pai mu dao. Tama te kolesaga te aga wiegi yai aubo nai tiwai dao. Dago te kone palama, tama agai genuai nogi ugwaba sinao. Dago Genuai Bidibolo buba hwi po wainao. Magi baso meni, tigidali sogo agai da godolo mu idubo dao,’ tama wali.
2CH 20:22 Te Jehosafat aga ami dabe dali augwa pabo gagalobadi yaide, te tęąbi po wabo bage augwaligo te Genuai Bidigo nogi ugwaba sabo tęąbi po ola pali. Tama tialima Genuai Bidigo te Amon ami bidi dabe, me Idom ami bidi dabe, me Moap ami bidi dabe augwa hasi wado elama, aga hasi tomode ma hwįmainu ilali. Hasia te Amon me Moap sigo te Idom dabe dali hwįnama, augwali sese mu ela silali, tama nosali te Amon dabe dali me Moap dabe dali aga hasi hwįnama, aga hasi mu dola siliboba usu nama tagalali.
2CH 20:24 Te Juda dabego ami bidi dabe augwali te nai meni yai wa pai bulude te be meba sabolali, te ami bidi dabe augwali te bede bidiyu boi bidi no munalubo be dao. Tama augwaligo te boi bidi dabe asobo suainu ugwaba gedu tonono bilali, tiali goli augwali noma sali, te boi bidi dabe augwali polo isai tigi dabe te tǫde munalua pabo suali, umabo. Te bage augwali me bidibadi me sube.
2CH 20:25 Tama tialima, Jehosafat me aga ami dabe augwali te tigi dabe munalubo tomodu pali, tama augwaligo nai nai dabe hauwa me elalubo suali. Tama augwaligo tubo nai dabe siyu, wiegi yai ugwa dabe siyu, me augwaligo meba wiegi wiegi yai nai dabe sali. Augwaligo te nai dabe sidubadi sela sogoba mu usu nani. Magi baso meni, te doado bage nai dabe hauwa bage me elalubaso.
2CH 20:26 Tama te de namba 4 te sogode augwali te odogo malu bulu meba sisinagaselama, augwaligo Genuai Bidigo augwali tau siyu yali te sęba kone palali. Tama augwaligo agai nogi ugwaba sali. Te tama tiali po pagede augwaligo te bulu nogi e tama poali, ‘Te Godigo Nogi Ugwaba Sabo Pesage Dao,’ polali.
2CH 20:27 Tialima Jehosafat aga polama, tama tigidali ami dabe augwali aga wali elama, tama augwali Jerusalemba wiegi yai homu pemene dali pali. Magi baso meni, Genuai Bidigo augwali tau selama, augwaligo boi bidi dabe aiyaba elaluai baso.
2CH 20:28 Augwaligo gita eliyu, biugel bu weyu ela peyu, te taun tomoba pali. Tama augwali Genuai Bidigo tempel be dolo mu pelama, tama agabolo genuai nogi mani.
2CH 20:29 Tama Genuai Bidigo te gasa kantri king dabe me tobolu bidi dabego te Genuai Bidigo Israel dabe tau selama, augwaligo boi bidi dabe ela silao wabo po odobode augwali wi dwai mu ilali.
2CH 20:30 Tama te Jehosafat king bidibadi boi me hwįagasobeo. Magi baso meni, Godigo aga kantri bugagia tonaluali.
2CH 20:31 Te Jehosafat aga 35 kibu be yai madi aga king pedelai, tama aga Jerusalemde 25 kibu be king bidali. Jehosafat aga ida Asuba dao, te Silhigo wegi dao.
2CH 20:32 Jehosafat agai aga aya Asago yali wiegi yai kolesaga wali pali, tama wiegi yai doloba pai kolesaga Genuai Bidigo gedude wali pelama yali.
2CH 20:33 Tiali goli agai sę me deli ebeo. Agai te tibo godiba lotu wabo pesage dolobeo. Tama me ma, te we bidi augwaligo augwa wąįgo God wali bomo elama me pabeo.
2CH 20:34 Te king Jehosafatgo yali sę dabe meba, te aga king pedelalidu gagalama aga isali sogo sabolama tomode yali tigidali sę po dabe, te buku augwali Jehu te Hananiago ogwago po bukude elalubao. Tama te buku te augwaligo King Dabego Buku wabo, te buku tomode elalubao.
2CH 20:35 Te me sogo king Jehosafatgo te Israel dabego king Ahasia dali sę yaibao po wali, te bidigo te haniani dwai sę hauwa mu ebo bidi dao.
2CH 20:36 Tama tialima augwali sigo sipgo te walu te kantri Tarsisba tolasa peyu, te bisnis yabo sip nigali. Tama te sę bidi dabego te sip dabe te taun Esiongeberde nigali, te nabis bulu me deli dao.
2CH 20:37 Tiali goli te Doavahugo ogwa Elieser te taun Maresa bidigo te Godigo bomai po te Jehosafat dali pusagasiyu, e tama po wali, “Nage te Ahasia dali abagi si igi palio. Tama tialima, Genuai Bidigo dage sigo te nigali sip dolaibao,” wali. Tama tialima, me sogo te sip dabe te ąįdu pobadi te dolali, tama augwali te Tarsisba pabo usu meni yani.
2CH 21:1 Te Jehosafat aga isibaso, augwaligo aga te aga wąįgo gų pagede pubulali, te Devitgo Taunde pubulali. Tama aga ogwa Jehoramgo aga bidali pesage selama aga king pedelali.
2CH 21:2 Te Jehoram te Jehosafatgo ogwa Juda dabego king, agai ama solo nogo a naga olama me badu nogo deli elaluali. Augwaligo nogi dabe e tama dao, Asaria, me Jehiel, me Sekaraia, me gasa Asaria, me Maikel, me Sefatia dao.
2CH 21:3 Jehosafat isisąbadi agai aga te ogomanibolo te gol dabe hauwa mu, me silva dabe, me te haniani nai te genuai monego abelali nai dabe me augwalibolo dobayali. Tama me agai augwali deli delibolo sę mani, te Juda bulude bomai obo elalubo taun tonalumai tagalali. Tiali goli Jehoram king pedelama agai pesage selama king nigilama bidimainu sa muani. Magi baso meni, Jehoram aga te agai gomunai ogwa dao.
2CH 21:4 Tama tialima Jehoram aga king pedelali, tama agai te kantri bomo elama tonalubo sogo agai ama solo me Juda bulude meba tobolu bidi dabe dali augwali elama isilali.
2CH 21:5 Jehoram aga king pedelali sogo agai kibu be 32 elaluali, tama aga Jerusalemde king bidibadi kibu be te 8 kibu be tama bidali.
2CH 21:6 Agai Israel dabego king Ahapgo wegi sai dao. Tialima aga te Ahapgo hanigo dwai kolesaga wali pali, me te meba Israel dabego king dabego kolesaga wali pali, tama agai Genuai Bidigo gedude dwai kolesaga yali.
2CH 21:7 Tiali goli Genuai Bidigo Devitgo hani me dolobeo. Magi baso meni, Genuai Bidi agai polobadu Devit dali dąų wali te po koneama tiali, tama me ma agai te po me dąų wayu te Devitgo wąį hani bidi dabe naga king pedaliyu yaibao wali. Tama tiyu da, te po digi wabo tiwai te Devitgo lam sula sogobeo wali.
2CH 21:8 Te Jehoram aga Juda dabego king bidali sogo, te Idom dabe augwaligo Jehoramgo po sela sąnama, tama augwali Juda dabego king dologode bidibeo. Augwaligo augwa tonaluabo king augwa digi sa muani.
2CH 21:9 Tama tialima, Jehoramgo te karisde dolaluama hwįbo ami bidi dabe selama, tama augwali Idom dabe dali hwįainu pali. Augwali pelama saboligi pabode, te Idom dabe augwali aselama, tama augwali bagua sagaselama, tama augwali dali boi hwįainogo yali. Tiali goli te hulide te Jehoram aga te karis tonalubo bidi dabe dali augwaligo bomo elama hwįnama tama wi sana pali.
2CH 21:10 Tiali goli Juda dabego Idom dabe aiyaba elalubeo, tama te Idom dabego augwa digi augwali kantri tonaluali, te augwaligo augwa digi tonalubo sę megi tama me ebao. Tama te sogo naga te taun Lipna hanigo we bidi me po sela sąnama tobolu tali nigali, tama augwali Juda dabe dologode munu me ma bidibeo. Te po page e dao. Jehoramgo aga Genuai Bidi aga wąį dabego Godiba tudi ola mani.
2CH 21:11 Tama me ma Jehoramgo tibo godiba lotu wabo pesage dabe agai Juda dabego bulu dude dabe nigali. Tama tilama, agai te Juda hani we bidi kegeyu, me Jerusalem taun we bidi kegeyu elama, Genuai Bidi tudiba sąnama tama agai gedude sęgę sali.
2CH 21:12 Tialima te profet Elaijago pas me deli Jehorambolo toliyu e tama po walali, “Genuai Bidi, te naga wąį Devitgo God, agai po nage dali e tama wabo elalubao. Nago naga aya king Jehosafatgo wiegi yai kolesaga yali wali pabeo. Me naga wąį Asago wiegi yai kolesaga yali wali pabeo. Menio.
2CH 21:13 Nago Israel dabego dwai kolesaga wali peyu, tama nago Juda dabe me Jerusalem dabe kegelama, tama augwaligo God tudiba mani dao. Nago Ahap aga hani dali augwaligo te Israel hani dali kolesaga tiwai mu tama te yali dao. Tama me ma, nago naga ama solo mu elama isilai dao. Augwali wiegi yai bidi dabe mu, tama augwaligo kolesaga nago kolesaga mu edelai dao.
2CH 21:14 Tama tialima, Genuai Bidigo naga we bidi dene mayu, me naga wai puluba dabe me dene mayu, me naga we dabebolo me dene mayu yaibao. Tama me agai nago doado bage dabe me dolaibao.
2CH 21:15 Tama nage da, nage te dwai gasi me deli nago tabi tomode saibao, tama deli deli be posobo sogo te gasi genuai genuai iduaibao, tama nago tabi naga di bono badu gudaluboba usu naibao,” te Elaijago asęna tolali pas tomode te po wali.
2CH 21:16 Tama te sogo Genuai Bidigo te Filistia me Arebia te Sudan bulu pąde elalubo tǫ bidi dabe augwaligo Jehoram dali sębę emainu ilali.
2CH 21:17 Tama tialima, augwali kantri Judaba boi hwįagaselama, tama augwaligo te king Jehoramgo be tomode elaluali tigidali doado bage sese selasa pali. Tama me augwaligo agai we me agai ogwa dabe me selasa pali. Tiali goli augwaligo Joahas te Jehoramgo sabi ogwa sela pabe.
2CH 21:18 Tama te sę elama nosali Genuai Bidigo king Jehoramgo tabide gasi dwai mu pedelemainu ilali, tama te gasi silabo usu meni yai.
2CH 21:19 Tama te gasi elalubadi kibu be si pali. Tama Jehoramgo tabi aga di bonodu gudaluali, tama aga dene dwai mu selama tama aga isali. Tama te Juda we bidigo agai genuai nogi kone palainu moni isi me nogobeo. Te augwaligo aga wąį dabe isibode yali tiwai sę me ebeo.
2CH 21:20 Te Jehoram aga kibu be 32 elaluali te aga king pedelali sogo, tama aga Jerusalemde king bidibadi kibu be te 8 kibu be tama naga bidali. Te aga isali sogo te bidigo aga hobede me ebeo. Augwaligo aga Devitgo Taunde pubulali, tiali goli augwaligo aga te king dabego gų page mu pubalobeo.
2CH 22:1 Te Jehoram aga king bidali sogo, te bidi mebago te hwįbo bidi dabe meba selama, tama augwali Juda buluba aselama, tama agai ogomani sese tama ela silali, tiali goli augwaligo Jehoramgo sabi ogwa mu Ahasia deli digi elebeo. Tama tialima, te king Jehoram isibo si, te Jerusalem dabego Ahasia augwa king pedelemainu sa muani, te aga ayago bidali pesage somainu. Ahasiago me nogi Joahas dao.
2CH 22:2 Ahasia aga king pedelali sogo agai kibu be 42 elaluali, tama aga Jerusalemde kibu be delide tama aga king bidali. Aga ida te Atalia dao, te king Ahapgo wegi, tama king Omrigo wąį dao.
2CH 22:3 Ahasia aga idago aga kolesaga ola maduali. Tama tialima Ahasiago te Ahapgo hanigo dwai kolesaga wali pali.
2CH 22:4 Tama agai Genuai Bidigo gedude dwai kolesaga yali, te Ahapgo hanigo ebo kolesaga tiwai mu tama yali. Magi baso meni, aga isai tudi badu agai te Ahapgo hani bidi aga kolesaga ola momainu sali. Tama agai augwaligo dwai kolesaga wali peyu, te dwai kolesaga tama yali.
2CH 22:5 Me sogo Ahasia agai te bidi dabego po wali peyu, tama aga Joram te Israel dabego king dali wali pali, tama augwali Siria dabego king Hasael dali hwįgi pali. Augwali te hanu Ramot te distrik Gileat pąde hwįani, tama Siria ami bidigo Joram enego enani tama aga selali.
2CH 22:6 Tama tialima Joram aga te hwįbo tagalama, aga te taun Jesrilba bidigi pali, te aga usu ma ebo tonaluyu. Aga Jesrilde bidibadi, Ahasiago aga sugi pali.
2CH 22:7 Godigo polo koneani, king Ahasiago Joram sugi paibao wali, tama agai te sogo agai Ahasia dolaibao homu yali. Tama Ahasia aga te Joram dali bidibadi, augwali sigo te Nimsigo ogwa Jehu suali. Jehu aga te Genuai Bidi aga digi te Ahapgo hani dolomainu sa muai bidi dao.
2CH 22:8 Tama tialima Jehugo te Ahapgo hani dolobo sę idubadi da, agai te Juda dabego tobolu bidi dabe meba me, Ahasia aga ama sologo ogomani meba agai suali. Te bidi dabe augwaligo te king Ahasiago sę dabe ebo bidi dabe dao. Tama tialima Jehugo te bidi dabe sese tama elama isila silali.
2CH 22:9 Agai augwali ela silama, augwaligo Ahasia gegebo sę yali. Ahasia aga Samaria bulude geme dualaluali, tama bidi mebago aga sulama, tama augwaligo aga Jehu pageba odasa pelama, tama augwaligo aga ela muani. Tiali goli augwaligo Ahasiago tigi olo munalumainu sula tagalobeo. Menio. Augwaligo aga wąį king Jehosafatgo wiegi yai kolesaga elama, tama aga homu kolesagago mu Genuai Bidi wali peyu yali te kone palama, tama augwaligo Ahasiago tigi pubulali. Tama Ahasia aga hani bid me deli bomo elama king pedelama, te Juda we bidi tonaluabo bidi meni yai.
2CH 22:10 Te king Ahasia aga ida Ataliago aga ogwa king Ahasia isalio po odobo si, polo tama agai te ami bidi dabebolo walama, te Juda dabe king hani bidi dabe sese ela silao po wali.
2CH 22:11 Tiali goli augwaligo te king Ahasiago ogwa Joas elebeo. Magi baso meni. Jehoseba te king Joramgo wegi, agai te Joas dali te aga tonaluabo wegi me dali, agai augwali si selama, tama agai augwali si te be habu me augwaligo bet dabe me matres me doado bage dabe wialobo be habude geme dualali. Tama Atalia agai Joas ela muabo usu ebe. Jehoseba te king Ahasiago abe dao. Tama tiyu, agai te Joas geme dualali. Jehoseba aga bidi te pris Jehoiada dao.
2CH 22:12 Tama augwali sigo aga te be habude oda selama Godigo tempel beba odasa pelama, tama aga te bede dualalubadi kibu be te 6 kibu be tamade dualaluali. Tama te tama kibu bede Atalia aga Juda dabego polalubo we kwin bidali.
2CH 23:1 Te Atalia kwin we bidibadi kibu be te kibu be 7 wabode, pris Jehoiadago magi sę me yabo homu bomo mu yali. Tama tialima agai te nogo a naga ofisa bidi dabe dali po minama, tama aga tau sabo po dąų wali. Te ofisa dabe augwaligo nogi e tama dao, Asaria te Jerohamgo ogwa, me Jehohanango ogwa Ismael, me Obetgo ogwa Asaria, me Adaiago ogwa Masea, me Sikrigo ogwa Elisafat dao.
2CH 23:2 Tama tialima te ofisa dabe augwali Juda bulude tigidali taunba dabe pelama, tama augwaligo te Livai dabe me deli deli wąį hanigo tobolu bidi dabe me augwali odasa asali, te Jerusalemba.
2CH 23:3 Tigidali te bidi dabe augwali Godigo tempel beba sisinama, augwaligo te king Joas dologode bidaiba po olama, po dąų wali. Tama te Jehoiadago augwalibolo e tama po walali, “Dagego Joas suao. Aga te king Ahasiago ogwa dao, tama aga king bidimainao. Magi baso meni, Genuai Bidigo te po wai dao, tigidali sogo king te Devitgo hani bage naga king bidimainao po wai dao.
2CH 23:4 Tama tialima, megi da eno dage dali mena sę me deli yabo po waibao. Te dage te pris dabe me Livai dabe dage Sabat side sęba asiyu da, dage bidi hani sela peda piąo. Te bidi hani me deli, dage te Godigo tempel be sunumi badu tonaluiąo.
2CH 23:5 Me te namba tu bidi hani, dagego te kingo bede no munaluao, te Joas aga bidibo madi. Tama namba tri bidi hani, augwali te sunumi augwaligo Jesot nogi wabo, te sunumide no muao. Tama tigidali gasa bidi dabe, augwali te Genuai Bidigo tempel be mesalo, te genuai sisinibo pesage, tede sisinao.
2CH 23:6 Te pris dabe dali Livai dabe augwaligo te pris dabe tau sabo sę elalubao. Augwali naga te Genuai Bidigo be tomoba pabo usu yaibao. Magi baso meni, Godigo augwali naga sa muai dao, te bede agai sę emainu. Tiali goli me olo we bidi augwali te bulu badu bidimainao, te Genuai Bidi aga digi wali gilama.
2CH 23:7 Te Livai dabe augwaligo te bainat hwą selama tolaluyu, king bugagia tonaluiąo, te king bagualuyu. Tialima king aga gasa madi me painu ebaso da, teda augwali aga dali peyu yao. Tialima bidi me Godigo be tomoba tula asobaso da, teda Livai dabe augwaligo aga elama isilao,” Jehoiadago te po wali.
2CH 23:8 Tialima te Livai dabe me te Juda bidi augwaligo te Jehoiadago po wali pali, tama te dei Sabatde te ofisa dabe augwaligo te sę silama toma tuainu soabo bidi dabe siyu, me augwali hasegelama sęba painu ebo bidi dabe me siyu, tama augwaligo te bage sese tama odasa asali. Magi baso meni. Jehoiadago augwali te sę silama toma tuainu me pelamo po wai.
2CH 23:9 Tama tialima Jehoiadago king Devitgo ene dabe siyu, me sabele ni name pedai genuai me dwasianu sese selama, te ofisa dabebolo mani. Te nai dabe te Godigo tempel be tomode munalubo dao.
2CH 23:10 Tama Jehoiadago te bidi dabebolo walama, augwali te Genuai Bidigo tempel be obo sesegeba tigidali badu dolalugi piąo po wali, te saut badu gagalama not badu tagaligi piąo po wali. Tama augwali alta pąde dolaluyu, Genuai Bidigo be pąde bainat hwą tolalu bugagia tonaluyu no munaluali.
2CH 23:11 Augwali polo dola selama no munalubadi da, teda te pris Jehoiadago te Joas buluba odasa aselama, kingo wiegi yai madi Joasgo toboluba madi bulali. Tama me agai agabolo te augwalibolo dodolama dąų wali bomai po elalubo buku me mani. Tama nosali Jehoiada aga ogwa dabe dali augwaligo oliv wel me selama, agai toboluba gelali, te king pedelemainogo. Tama te we bidi augwaligo hae olama, e tama po wali, “Joas aga bobobage sogo king bidimainao,” wali.
2CH 23:12 Te kwin Ataliago te we bidigo genuai po kulukulu wabo odali, te kingde wiegi yai homu iyu udula biliyu ugwa eda ebo po odali. Tama agai aga be tagalama, Genuai Bidigo tempel beba pali, te we bidi sisalubo madi pali.
2CH 23:13 Aga saboligi pelama, tama agai suali, gesi king me te Genuai Bidigo be gesabidi badu ni pos pagede dolalubo suali. Te king dabego ebo tiwai elalubo suali. Tama agai te ofisa dabe me te biugel bu wabo bidi dabe king pąde bidibo agai suali. Tama me agai te we bidi dabe wiegi yai homu pemene ebo suali, tama te we bidi meba augwaligo biugel bu wabo suali. Tama me te Godigo bede wiegi yai musik elebo bidi dabe augwaligo wiegi yai musik mu elebo agai suali, te we bidi wiegi yai homu pemene emainu yali. Tama tibaso, Atalia aga ugwa pisąyali, magi baso meni, aga tabi dwai ebaso. Tama agai po weyu e tama po wali, “Dage bidi dwai dabe, dagego dwai kolesaga elama, ena aiyaba elaluainu yalio,” wali.
2CH 23:14 Jehoiada agai homugo augwaligo Atalia te Genuai Bidigo tempel be mesalo pąde elebo hagela yali. Tama tibaso, agai te ami ofisa dabe i olama, te po wali, “Te Atalia nogo tulama, tama aga bolo ami bidi dabe tomodu pelama, Genuai Bidigo be mesalo tomodu buluba pao,” po wali. “Tama tialima, bidi mego aga wali pobaso da, teda dagego aga elama isilao,” po wali.
2CH 23:15 Tama tialima, augwaligo Atalia toulama, tama augwaligo aga kingo be obo tomodu osa pali, te augwaligo Hos Dabego Sunumi wabo, te sunumide odasa pali. Tama augwaligo aga tomoba odasa pelama, aga elama isilali.
2CH 23:16 Te pris Jehoiadago te king Joas me te we bidi augwaligo aga dali po dąų wao po wali, te augwali Genuai Bidigo we bidi naga bidimainu.
2CH 23:17 Tama nosali te we bidigo te tibo god Balba lotu po wabo be hųgigi pali. Tama augwaligo te god Balgo alta me piksa dabe tologogi pali. Tama me augwaligo Matan elama isilali, te Balgo pris bidi, te alta pąde.
2CH 23:18 Tama Jehoiadago te Livai dabede pris meba me Livai dabe meba augwali te Genuai Bidigo tempel be tomode sę yabo tonaluabo bidi meba sa muani. Te bidi hani si augwaligo te polobadu king Devitgo augwa wąį dabebolo polobadu yao wali sę tiwai yao wali. Tama augwaligo Genuai Bidibolo isigo mu dela silibo ofa uluyu yao wali, te Mosesgo bomai pode wali gilama tama tiao wali. Tama me augwaligo te ofa ebo side musik eliyu tęąbi po wabo bidi dabe me tonaluyu yao wali, te Devitgo wali gilama.
2CH 23:19 Tama Jehoiadago te Genuai Bidigo tempel be sunumide tonaluabo Livai dabe meba sa muani. Te we bidi Genuai Bidigo gedude dolo isąwai we bidi tomoba pidali weyu, te Livai dabe augwaligo bugagia tonalumainu.
2CH 23:20 Tama tialima Jehoiadago te ami ofisa dabe siyu, me genuai bidi dabe siyu, me tobolu bidi dabe siyu, me te gasa we bidi dabe siyu elama, augwaligo king te Genuai Bidigo tempel bede oda selama, kingo beba odasa pali. Tama augwali te sunumi augwaligo te Ugwadu Elalubo Sunumi wabo, te sunumidu pali. Tama augwaligo king te sia kingde duamainu odasa pali.
2CH 23:21 Tama te we bidi augwali wiegi yai homu pemene genuai mu yali. Tama me augwali homu tegaluama Jerusalemde bugagia bidali. Magi basi meni, te ami bidi dabego te we Atalia polo ela muaibaso.
2CH 24:1 Joas aga Juda dabego king pedelali sogo, agai kibu be 7 naga elaluali, aga gesi ogwa naga dao. Tama aga Jerusalemde king bidibadi kibu be 40 yali. Joas aga ida te Sibia dao, te taun Berseba we dao.
2CH 24:2 Te pris Jehoiada bidibadi da, Joasgo Genuai Bidigo gedude wiegi yai kolesaga iyu yai dao.
2CH 24:3 Tama Jehoiadago Joasgo we si odolali. Tialima Joasgo augwali si selama, tama augwali sigo ogwa me wegi ame nani.
2CH 24:4 Kibu be meba bidama nosali Joasgo Genuai Bidigo tempel be ma dodolabo homu yali.
2CH 24:5 Tama agai pris dabe me Livai dabe sisinama, tama augwalibolo e tama po wali, “Dage tigidali Juda dabego taunba pelama, tigidali we bidibolo dena Godigo be dodolabo mone maiąo po wao. Dagego te sę tigidali kibu bede iyąo. Tama megi da, dage polo pelama, te mone dabe polo sigi piąo,” wali. Tiali goli Livai dabego te polo ebeo.
2CH 24:6 Tialima Joasgo pris Jehoiada i wali, te pris dabe me Livai dabego polalubo bidi, tama agabolo e tama po hanalu wali, “Magi baso nago te Livai dabebolo te takis mone te Juda dabe me Jerusalem dabede mone polo sao po wabewe? Dagego koneani, polobadu Moses te Genuai Bidigo sę bidigo me Israel we bidi augwaligo po dąų weyu, te Genuai Bidigo ugwa sel be sę tonaluabo mone mawaibao po wai dao. Tama tialima, te Livai dabego te takis mone magi baso polo sigi pabo homu ebewe?” te po hanalu wali.
2CH 24:7 Joas agai te sę yainogo yali, te magi baso meni, te dwai we Atalia aga kwin bidali sogo aga hani meba te Genuai Bidigo tempel be tomoba tula pelama, tama meba nai dabe dolai dao. Tama me augwaligo Genuai Bidigo nai dao olama sa muani nai dabe sese sela pali. Te nai dabe sela pelama, te tibo god Balba lotu wainu sela pali.
2CH 24:8 Tialima kingo Livai dabebolo walama, augwaligo te mone muabo halobage me geselali. Tama augwaligo te halobage te Genuai Bidigo be tomoba tula pabo sunumide te halobage muani.
2CH 24:9 Tama augwaligo Jerusalem we bidibolo me gasa Juda bulu we bidi dabebolo te takis mone Genuai Bidiba sesao olama po ola tolali. Augwaligo polobadu Moses Godigo sę bidi augwalibolo te nai meni yai wa pai bulude bidiyu ma wali, te tama tiwai naga maiąo po wali. Te Israel we bidibolo wali gilama tama tiąo po wali.
2CH 24:10 Te tobolu bidi dabe me te we bidi augwaligo te po odama, augwali homu deli mu yali. Tama augwaligo mone seselama, te halobage muagasali, tama te halobage pągąna pali.
2CH 24:11 Tama tialima, tigidali sogo te Livai augwaligo suali madi te halobage pągąwai baso da, augwaligo te halobage te kingo ofisa dabeba sela peyu ebo dao. Tama tialima kingo kuskus bidi me polalubo pris bidigo ofisa bidi sigo te halobagede mone sabo si, tama te halobage augwaligo aga munaluali pesageba ma mugi peyu ebo dao. Te tama tiali kolesagago augwaligo Genuai Bidigo be dodolabo mone hauwa mu sali.
2CH 24:12 King Joas de hetpris Jehoiada augwali sigo te mone selama, augwaligo te be dodolobo sę ebo tonalubo bidi dabebolo mayu ebo dao. Te sę tonalubo bidi dabe augwaligo te kamda me te masigi dugo be sę ebo koneai bidi dabe siyu, me augwaligo te ain me brasgo nai dabe geselebo koneai bidi dabe me siyu yali. Tama augwaligo augwalibolo te Genuai Bidigo be ma dodolao po wali.
2CH 24:13 Te sę bidi dabe augwaligo sę bomo elama mu elama, tama Godigo be wiegi yai mu pedelama, tama boma pai polobadu elaluali tiwai yali.
2CH 24:14 Te sę bidi dabe augwaligo Genuai Bidigo tempel be dodolobo sę silali, tama te gol me silva bugai munaluali. Tama tialima te bos bidi dabego te gol dali silva dali si selama, augwali king de Jehoiada sibolo mani. Tama augwali sigo selama, gasa sę bidi dabebolo menama, augwalibolo te ofa yabo nai plet dabe, te wiegi yai denami ebo pauda ulabo plet dabe geselao po wali, tama te plet dabe me kap dabe me geselao po wali, tama Genuai Bidigo be tomode sę yabo nai meba me geselali. Te Jehoiada bidibadi te we bidi augwali Genuai Bidigo beba pelama, augwaligo isigo mu dela silibo ofa mu iyu yali, te tigidali sogo.
2CH 24:15 Tama nosali Jehoiada aga monu dabe mu yali, tama aga 130 kibu be elama, tama aga nosali isali.
2CH 24:16 Tama te we bidi augwaligo te Jehoiadago Godigo gedude wiegi yai sę dabe yali kone palali. Agai te we bidi tau sabo sę hauwa mu eyu, me Godigo be tau sabo sę me hauwa mu yali. Tama tibaso, augwaligo aga te king dabego gų pagede pubulali, te Devitgo Taunde.
2CH 24:17 Te Jehoiada aga polo isai madi, te Juda dabego tobolu bidi dabego king Joas homu begelabo po wali, tama agai augwaligo po wali pali.
2CH 24:18 Tama king dali te Juda we bidi me Jerusalem we bidi augwaligo Genuai Bidi augwa wąįgo God tudi ola mani. Tama augwali Genuai Bidigo bede lotu po me wayu ebeo. Menio. Augwaligo tibo god dabeba lotu weyu, me god we Aserago piksaba lotu po weyu yali. Augwaligo te dwai sę Godigo gedude yali. Tama tibaso Godigo augwali dali sębę yali.
2CH 24:19 Tama Genuai Bidigo profet dabe tagala palali, tama bomai po dabe augwalibolo olama, augwali agaba ma asomainu ilali. Tiali goli, te we bidi augwali po sela sąbo sę genuai mu yali, tama augwaligo te profet dabego po odobeo.
2CH 24:20 Tama tialima, Godigo Spirit Mobo Bidi bomo elama mu te pris Jehoiadago ogwa Sekaraiaba pedelali. Tama Sekaraia aga te we bidigo suabo pebeli diliba ugwa doligi pali, tama agai augwalibolo e tama po walali, “God Genuai Bidigo te po walio. Dagego agai bomai po polo bogi palio, tama dage bugagia munu me bidigobeo. Magi baso dagego te tobage kolesaga yaliwe? Dagego Godiba tudi ola manio. Tama tibaso, agai me dage polo tudi ola manio,” Sekaraiago te po wali.
2CH 24:21 King Joas aga ofisa dabe dali augwaligo te Sekaraiago wali po wei ebeo, tama augwaligo aga ela isilabo po miani. Tama tialima kingo pode te bidi dabego masigigo Sekaraia enani, tama aga te Genuai Bidigo tempel be bagulali obo tomode sisinibo pesagede elama isilali.
2CH 24:22 Kingo pris Jehoiada aga ayago yali te wiegi yai kolesaga aga dali yali te konebeo, te Sekaraia aga ayago yali kolesaga. Menio. Agai Sekaraia olo dali mu elama isilali. Tama Sekaraia aga isainu te po wali, “Genuai Bidigo dagego te ebo sę sulama, tama aga dage dene mayabuo,” wali.
2CH 24:23 Tama te kibu be silama gesi kibu be pedelainu ebode, teda te Siria ami bidi dabego king Joas dabe dali boi hwįagasali. Augwali te kantri Juda tomoba asiyu, me genuai taun Jerusalemba asiyu elama, augwali hwįnama, tama Joasgo ami aiyaba elaluali. Tama te Siria dabego augwaligo tobolu bidi dabe sese ela silama, tama augwaligo wiegi yai doado bage sese selama, tama Juda dabego wiegi yai nai dabe selama, tama Damaskus taunba ma sela pelama, tama Siria king bidibolo magi pali.
2CH 24:24 Te sę dabe pedelali, magi baso meni, te Juda dabe augwaligo Genuai Bidi augwa wąį dabego God tudi ola mobaso. Tama tibaso, Genuai Bidigo te Siria ami bidi dabe dwasianu hanigo Juda dabego ami bidi genima bage mu aiyaba elalumainu ilali. Tama te kolesagago naga Genuai Bidigo king Joas dene mani.
2CH 24:25 Te hwįani sogo Joas tigide genuai mu selali. Tama te hwįbo silama, te Siria dabe augwa buluba ma pabo side, te king Joasgo ofisa dabe mebago te Joasgo te pris Jehoiadago ogwa ela muani te kone palali. Tama augwaligo Joas ela muabo po pesela sali, te aga dwai kolesaga yali wei ponoyu. Tama nosali augwaligo aga te aga betde pila mubadi augwaligo aga ela muani. Tama bidi dabego agai tigi te Devitgo Taunde pubulali, tiali goli augwaligo aga te king dabego gų pagede pubalubeo.
2CH 24:26 Te king ela muani bidi sigo nogi, te Sabat, me Jehosabat si dao. Te Sabat aga ida te Simeat dao, te Amon hani we me deli dao. Te Jehosabat aga ida te Simrit dao, te Moap hani we me deli dao.
2CH 24:27 Te king Joasgo ogwa dabego po dabe, me te profet dabego Joas dolaibao wali te po dabe, me Joasgo Genuai Bidigo tempel be ma dodolali, te po me, te tigidali te po dabe te buku me augwaligo nogi ebo te buku nogi King Dabego Po Page Elalubo Buku, tede elalubo. Joas aga polo isai madi aga ogwa Amasiago aga pesage selama, tama aga king pedelali.
2CH 25:1 Te Amasia aga king pedelali sogo agai kibu be 25 elaluali, tama aga Jerusalemde king bidibadi 29 kibu be yali. Aga ida te Jehoadin dao, te taun Jerusalem we me deli dao.
2CH 25:2 Amasiago Genuai Bidigo gedude wiegi yai kolesaga yali. Tiali goli agai te kolesaga wali pabo bomo mu meni yai.
2CH 25:3 Tama Amasia agai te kantri Juda tonalubo bomo ebo sogo, agai pode augwaligo te agai aya king Joas ela muani ofisa bidi dabe ela muani.
2CH 25:4 Tiali goli agai te ofisa dabego wai dabe elebeo. Menio. Agai augwali bidimainu sula tagalali. Agai te Genuai Bidigo bomai po polobadu Mosesgo te Israel dabebolo mani po wali pali. Genuai Bidigo te po da e tama wai dao, “Te bidi mego waigo dwai sę elama tama bidi me ela muai baso da, teda dagego wei ponoyu aga ida aya ela munamo dao. Te tama tiwai naga, aga ida ayago dwai sę yai baso da, teda dagego augwa wai puluba elamo dao. Te bidigo te dwai sę yali da, te bidi deli naga dagego ela muiąo,” te bomai po te tama wali pali.
2CH 25:5 Te king Amasiago tigidali Juda hani dabe me tigidali Benjamin hani sisinagasiąo po wali. Te augwali sisina silagasabo si, agai te bidi dabe te kibu be 20 me 20 kibu be edelai bidi dabe aga selama sa muani, tama augwali agai ami haniba muani. Tama agai te ofisa bidi dabe sa muani, te augwali meba deli deligo te 1,000 bidi dabe tonaluyu, mebago 100 bidi dabe tonaluyu yabo sa muani. Tama agai deli deli ofisa dologode deli deli hani bidi dabe muyu muyu ela pali. Tama tigidali ami bidi dabe sesego namba te 300,000 usu nama elaluali. Tama te bage augwali bugagia hwįyu, me augwaligo enego me sabele ni name dage dabe dali bugagia mu hwįbo bage dao.
2CH 25:6 Tama me agai 100,000 wiegi yai ami bidi dabe te kantri Israelde sali. Agai augwali silvago abelali, te silvago sęgę te 3,000 kilogram edelai dao.
2CH 25:7 Tiali goli profet mego kingbolo te po wagi pali, “Nago te Israel dabego ami nage dali boiba odasa pigio. Magi baso meni, te kantri Israel bidi dabe augwali Genuai Bidi dologode bidibo menio, tama tibaso God augwali dali bidibo menio.
2CH 25:8 Tiali goli nago homugo augwali hwįabo bomai hani mu dao homu iyu da, teda nago augwali odasa pao. Tiali goli nago koneao. Godigo te boi bidi dabego nage elalumainu yaibao. Magi baso meni. God agaduba deligo naga bidi aiyaba elaluabo me ugwa ela holabo sę ilibo dao,” te profet bidigo te po wali.
2CH 25:9 Amasiago te po odama, tama agai te profetbolo te po hanalu wali, “Tiali goli, eno te Israel dabe ami bidi dabebolo mani, te silva dabe magi yaibawe?” Tama profetgo Amasiago po wei ponoyu, te po wali, “Nage moni homu igio. Genuai Bidigo nage silva hauwa mu mabo usu yaibao, nago augwali mani te silva edelama mu mabo usu yagameo,” wali.
2CH 25:10 Tama tialima Amasiago te ami bidi dabe augwali augwa buluba ma tagala palali. Tama augwaligo Juda dabe dali sębę genuai mu yali, magi baso meni, augwaligo te hwįboba pelama doado bage sabo tų megi paliali.
2CH 25:11 Tialima nosali Amasia aga homu dąų olama, tama agai aga ami dabe te bulu te Tamu Hauwa Elalubo buluba odasa pali, te Idom dabe dali hwįainogo. Tama augwaligo Idom dabego ami bidi 10,000 ela isilali.
2CH 25:12 Tama augwaligo gasa 10,000 Idom ami bidi kalabus elama bulu du meba odasa pali. Tama augwaligo te Idom dabe te sau pado dwai pesagedu aba sąyani, tama augwali isilama, tama augwaligo tigi dabe sese togoa pali.
2CH 25:13 Tama te Amasia aga ami bidi dabe dali augwali te Idomba hwįgi pali sogo, te Israel dabe ami bidi te Amasiago augwali ma tagala palali, te ami bidi dabe augwali ma aselama, Juda dabego taun dabeba hwįagasali. Te taun Samariadu gagalama, te taun Bethoronba usu nigi pali. Tama augwaligo 3,000 we bidi ela munama, tama augwaligo te taun dabede wiegi yai nai dabe hauwa mu sali, tama augwa sela pali.
2CH 25:14 Te Amasiago Idom dabe aiyaba elalubo si, agai te Idom dabego tibo god dabe agai Juda buluba ma sesali. Tama agai augwaliba lotu po weyu, me wiegi yai denami ebo pauda uluyu yali, te augwali ofa tiwai yali.
2CH 25:15 Genuai Bidigo king Amasiago ebo kolesaga sulama, agai aga dali sębę mu yali. Tama tialima Genuai Bidigo profet me deli tagala palama, te Amasiabolo te po waligi pali, “Magi baso naga gasa hanigo tibo godiba lotu po obawe? Te god dabego augwa we bidi tau selama, nago nogode dobola sabo suai menio, nago polo koneani. Tama tialima, nago magi baso augwaliba lotu obawe?” wali.
2CH 25:16 Profetgo po odubadi tama Amasiago agai po togoyu, te po wali, “Dego nage enabolo kolesaga mabo bidi nigilai dawe? Nage penane pania sao. Tiyu, eno ami bidi me delibolo nage elama isila po wai dalio,” wali. Profetgo te po odama, aga penane pania sainogo, hasia bolo agai kingbolo te po walali, “Megi da, eno koneanio, Godigo nage dolainogo yalio, magi baso meni, nago dwai kolesaga elama, tama megi nago eno po odobo hagela yalio,” wali.
2CH 25:17 Te king Amasia aga ofisa dabego homu hanaluama, tama agai ami bidi dabe Jehoas pageba tagala palali, te Israel dabego king pageba. King Jehoas aga te Joahasgo ogwa dao, te wąį Jehugo ogwago wai. Te bidi dabe augwali te Jehoas pageba saboligi pelama, augwaligo agabolo te po walali, “King Amasiago dage Israel dabe dali hwįaio po walio,” te po wali.
2CH 25:18 King Jehoasgo te king Amasiago po wei ponoyu, te po digi po begelama agabolo ola tolali, “Te kantri Lebanonde te nosai me sesane yai nosaigo te moni genuai bǫ ni me delibolo po ola toliyu te po wali, ‘Eno homugo nago eno ogwabolo nago wegi mao homu ebao, tama augwali si we de bidi si bidimainu,’ tama wali. Tiali goli nosaigo te po wai nosali badu, te bulu hasa genuai me tedu soayu te nosai agayali, tama te nosai doali.”
2CH 25:19 Jehoas agai te po begelama wali, tama agai Amasiabolo po wadolama weyu te po wali, “Eno koneani, nago te Idom dabe dali hwįnama tama nago augwali aiyaba elaluali. Tama tialima nage wiegi yai homu pemene elama, tama nage tobolu gagea pelama, tama naga nogi genina ugwaba mu te sabao. Tiali goli megi da, nage naga bulude bugagia bidao. Te da dali hwįainu ebo tagalao. Tiyu, nage dolabuo, tama nago Juda dabe me dolomainu ilabuo,” Jehoasgo te po ola tolali.
2CH 25:20 Tiali goli Amasiago Jehoasgo po odobo hagela yali. Te po page e dao. Godigo Juda dabe te boi bidi dabego nogoba muabo homu polo yai dao. Magi baso meni, augwaligo Idom dabego tibo godiba lotu wali pode.
2CH 25:21 Tama tialima, Jehoas te Israel dabe augwali te taun Betsemes te kantri Juda buluba pelama, tama augwaligo Amasia me aga ami bage dali augwaligo hwįgi pali.
2CH 25:22 Augwali hwį hwį pelama, Israel dabego Juda dabe aiyaba elaluali. Tama Juda dabego ami bidi dabe augwa buluba ma wi pali.
2CH 25:23 Tama Jehoasgo Amasia pagabi elama kalabus ilali. Tama nosali, Jehoas aga te Israel ami bidi dabe dali augwaligo te Amasia selama, tama augwaligo Betsemes tagalama, Jerusalemba pali. Tama augwaligo te taun obo meba hųgiali. Te Efraimgo Sunumidu gagalama pelama, te Konago Sunumiba usu nigi pali. Augwaligo te hųgiali te obo dąį da, te 200 mita tama usu nama ganama dao.
2CH 25:24 Tama Jehoas aga Jerusalem tomoba pelama, tama te taunde munaluali te gol me silva dabe tigidali tama sali. Agai te Godigo tempel bede dis o pou dabe me siyu, me plet dabe me siyu yali, te Obetidomgo hanigo tonalubo nai dabe. Tama me agai kingo mone mubo be habude munalubo nai dabe sali. Tama agai te Juda dabego tobolu bidi dabe me kalabus elama, augwaligo oda selama, te Samariaba ma sela pali.
2CH 25:25 Nosali Israel dabego king Jehoas aga isali, tama Juda dabego king Amasia aga 15 kibu be ma bidama, tama nosali augwaligo aga elama isilali.
2CH 25:26 Te king Amasiago yali sę po dabe te aga king pedelalidu yali sę dabedu tama gagalama, tama aga isaliba usu nagasali po, te buku augwaligo nogi ebo te Juda de Israel Hani Sigo King Dabego Buku wabo bukude te elalubao.
2CH 25:27 Te king Amasiago Genuai Bidiba tudi ola mabo si da, bidi mebago aga Jerusalemde ela muabo po pesela sali. Agai augwaligo te sę yaibao po wabo odali. Tama tibaso, aga taun Lakisba wi pali. Tiali goli aga te boi bidi dabego bidi meba aga wali te taun Lakisba pelama, tama aga tede ela muani.
2CH 25:28 Tama bidi mebago agai tigi te hosde munama, tama Jerusalemba sela pali. Tama augwaligo aga te aga wąį dabego gų pagede pubulali.
2CH 26:1 Te Amasia aga isibo si, te Juda dabe augwaligo aga ogwa sali, te Usia sali, tama augwaligo aga king bidimainu sa muani, te aga ayago pesage selama bidimainogo. Usia aga king pedelali sogo agai kibu be 16 tama elaluali.
2CH 26:2 Aga king bidama, nosali agai boi hwįgi pelama, agai te taun Elat te boi bidi dabego nogode ma sigi pali. Tama agai te taun dolali madi ma dodolali.
2CH 26:3 Te Usia aga king pedelali sogo, agai kibu be 16 kibu be elaluali, tama aga Jerusalemde king bidibadi kibu be 52 yali. Aga ida te Jekolia dao, te taun Jerusalem we me deli dao.
2CH 26:4 Te Usia aga king bidibadi, bidi me nogi Sekaraiago Usia aga gedu haluasa po wabo ola mayu, me God Genuai Bidi dologode bidibo kolesaga ola maduali. Tama Sekaraia aga isisąbadi da, king Usiago Godigo homu kolesaga wali pabo homu bomo elama mu elaluali, tama agai wiegi yai kolesaga Genuai Bidigo gedude eyu yali, te aga aya Amasiago yali gilama tama yali. Te Usiago Godigo homu kolesaga wali pabo homu bomo elalubadi da, teda Godigo aga tau siyu, tama Usiago ebo sę dabe tigidali wiegi yai naga iduali.
2CH 26:6 Tialima king Usia hogodama, tama te Filistia dabe dali hwįgi pali. Tama agai augwali aiyaba elaluama, tama agai te taun Get, me taun Japne, me taun Asdot obo aluali. Tama agai gesi taun dabe te Asdot dabego tǫde geseliyu, me te meba kantri Filistia tǫde nigiyu yali.
2CH 26:7 Godigo aga tau selama, tama agai te Filistia dabe, me Meun dabe, me te Arebia dabe te taun Gurbal dabe aiyaba elaluali.
2CH 26:8 Aga bomai king mu pedelali, tama te we bidi te kantri dabe te elalua pabo dabe me pelama, Isipba saboligi pali bagego agai genuai nogi po odali. Tama te Amon dabego agabolo takis mone mayu yali, te agabolo te augwali aga dologode bidiba weyu, te ola mayu te takis mani.
2CH 26:9 Tama Jerusalemde Usia agai te e tama taun obo dabe dodolobo sę yali. Agai te Konago Sunumide agai be sę yani, me te Odogo Malu Bulu Sunumide me, tama augwaligo te Sapela Kona wabo te sunumi badu me be te obo daide sę yani. Te ami bidi dabe tede bidiyu, te boi bidi asobo no munalu yabo.
2CH 26:10 Usiago kau kibu hani hauwa me sipsip kibu hauwa mu te giliga dega sabo bulu badu te malu tǫde me te bulu du dabede hauwa mu elaluali. Tama tialima, agai te bidi meni yai kala sili bulu badu agai te sigi be taua me badu geselali, magi baso meni, te agai sę bidi dabe mebago tede bidiyu, te agai hasa dabe bugagia tonalubo usu mu yali. Tama me agai te hasa dabego tuabo wę ulu hauwa mu geselali. Tama me ma Usia aga didiman sę ebo godolo mu ebo bidi dao. Tama tibaso, agai te we bidi dabebolo te wain gi hauwa buluyu, me gasa nai dabe te wiegi yai tǫ ili hauwa elalubo tǫde bulao po wali, te bulu du yali madi me nai bulao po wali.
2CH 26:11 Usia agai ami hani te hauwa mu elaluali, tama augwali te wiagila hwįbo bage dao. Tama Jeiel te kingo kuskus me deli dao, me Masea te ami bidi dabe nedama, te mena tama bidi te deli deli ami hani tomode bidabo sa mubo bidi. Tama Hanania te kingo polalubo ofisa me deli dao, te sę ebo bugagia tonalubo bidi.
2CH 26:12 Usia agai 2,600 polalubo bidi dabe elaluali, te deli deli ayago togali Juda wąį te agai ami tomode bidibo bidi dabe tonaluabo bidi dabe, agai te bomai ami dabe tonaluabo bage.
2CH 26:13 Tama te ami bidi dabego namba te 307,000 bidi tama elaluali, tama augwaligo bomo elama mu hwįnama, tama king tau selama, boi bidi aiyaba elaluabo usu yali.
2CH 26:14 Tama Usia agai hwįbo nai dabe tigidali dodolama elaluali, te ene, me ni name dage te sabele, me kapa hadi, me hwįyu gudubo ugwa, me enesigi dabe, me masigi du dabe te katapel te gumi enesigigo enabo me dodolama elaluali.
2CH 26:15 Tama me agai kolesaga koneai bidi meba Jerusalemde elaluali, tama augwaligo te masin dabe geselali, tama augwaligo te masin munama elaluali. Tama te hwįbo si asobaso da, augwaligo te taun obo nogo habuba te masin dabe ugwa sela pelama, me te ami bidi dabe bidiyu, te boi bidi dabe asobo no munaluyu tonaluyu bidibo te tauaba sela holiyu elama, tama augwaligo te masin selama, te ene enebo sę eyu me genuai masigi selama te boi bidi dabe bidiboba eneyu yabo masin elaluali. Te Usiago yali sę dabe tigidali te Godigo aga bugagia mu tau sali. Tama tialima aga bomai king mu pedelali, tama digibulu we bidigo agai genuai nogi po odali.
2CH 26:16 Tialima te Usia aga boma pelama, tama agai nogi genuai ugwadu mu pedalo si, da, agai homugo aga bomai king mu dao te homu yali. Tama tialigo aga dolali. Aga God aga Genuai Bidigo po wali pabe, tama aga digi te Genuai Bidigo tempel be tomode alta elalubo madi pelama, tama aga digi te wiegi yai denami ebo te pauda ulainogo pali.
2CH 26:17 Tiali goli pris Asariago aga tomoba tula pabo suali, tama agai Genuai Bidigo pris bidi 80 te wi meni yai pris sali. Tama augwali te king wali te Genuai Bidigo tempel be tomoba pali.
2CH 26:18 Augwaligo aga sesanama, tama agabolo te po wali, “Usia, nago odao. Te wiegi yai denami ebo pauda Genuai Bidibolo ulubo te nago sę menio. Te menio. Genuai Bidigo te Arongo hani pris bidi dabego te ofa emainogo sa muai dao. Nage polo tama te e tedali gasagi yai be habu taga pao. Magi baso meni, nago God dali dwai sę genuai mu yali dao. Tama tialima, God Genuai Bidigo nage dali wiegi yai haliga me egobeo,” augwaligo te kingbolo te po wali.
2CH 26:19 Usiago te wiegi yai denami ebo pauda ulubo plet nogo tolaluyu, tama aga te wiegi yai denami ebo pauda ulubo alta pagede dolaluali. Agai te pris dabego po odama, tama agai augwali dali sębę genuai mu yali. Tialima polo tama te oyabe gasi agai gesabidide mu yali, te kingo gesabidide, te Genuai Bidi aga tempel be tomode digi.
2CH 26:20 Te hetpris Asaria me te meba pris dabe dali augwaligo te oyabe gasi te kingo gesabidide elalubo suali, tama augwali noma mu selama, augwaligo aga buluba sela sąyani, te Genuai Bidigo bedu buluba sela sąyani. Tama aga digi me polo pali. Magi baso meni, agai polo koneani, Genuai Bidigo agai tigide te gasi pedelemainu ilama, aga dene mawainogo ebaso.
2CH 26:21 Te oyabe gasi te king Usia tigide yali te silabo usu meni yai. Tama tibaso, aga Genuai Bidigo tempel be ma pabo usu ebe. Tama me ma Usiago te kingo be tagalama, tama aga gasa be meba bidigi pali. Tama aga ogwa Jotamgo te king sę tolaluyu, te kingo be tonaluali, me agai te kantri tonalubadi te king Usia isiboba usu nigi pali.
2CH 26:22 Te king Usiago yali sę po dabe aga te king pedelali sogo gagalama aga isali sogoba usu nagasali po te buku profet Aisaia te Amosgo ogwago asęani bukude te elalubao.
2CH 26:23 Te Usia isibo si, augwaligo aga te aga wąį dabego gų pagede pubulali. Tiali goli augwaligo aga te meba king dabego gų page digibulu gana pubulali, magi baso meni, aga oyabe gasi yaibaso. Tama aga ogwa Jotamgo agai sę selama, tama aga king pedelama king mu bidali.
2CH 27:1 Te Jotam aga king pedelali sogo agai kibu be 25 elaluali, tama aga Jerusalemde king bidibadi kibu be 16 tama yali. Aga ida te Jerusa da, te Sadokgo wegi.
2CH 27:2 Jotamgo Genuai Bidigo gedude wiegi yai kolesaga yali, te aga aya Usiago hasia bolo yali gilama tama yali. Tama Jotam agai wiegi yai kolesaga me deli yali da, te aga aya Usiago te denami ebo pauda ofa ulainogo te Genuai Bidigo tempel be tomoba pali, te sę tiwai agai ebeo. Tiali goli te Juda we bidi augwaligo wiegi yai kolesaga me ebeo. Augwaligo te haniani dwai kolesaga dabe yali.
2CH 27:3 Te Jotamgo te sę bidi dabebolo walama, augwaligo te Genuai Bidigo tempel be sunumi, augwaligo Ugwadu Sunumi wabo, te sunumi ma geselali. Tama augwaligo te Ofel dwasianu bulu du, te Jerusalem tomode, tede elalubo obo dodolobo sę hauwa mu yali.
2CH 27:4 Tama me agai sę bidi dabego Juda bulude bulu du dabede taun nigiyu ela pali, me te ni dabe hauwa elalubo bulu dude me nigali. Augwaligo te ami bid dabe duala selama hwįabo bomo yai pesage nigali, me augwaligo te ami bidi dabe bidiyu te boi bidi dabe no muabo bobobage taua sigi be dabe geselali.
2CH 27:5 Tama nosali, Jotamgo aga ami bidi dabe dali augwali te Amon dabe king dali aga ami bidi dabe dali boi hwįgi pali. Tama Jotamgo ami bidi dabego Amon dabego ami bidi dabe aiyaba mu elaluali. Tialima Jotamgo Amon dabebolo agabolo takis mao po wali. Tama te kibu bede augwaligo agabolo te 3,400 kilogram silva mani, me 1,000 ton sęgę wit, me 1,000 ton sęgę rais bali agabolo mani. Tama te deli tiwai takis te namba 2 kibu bede me namba 3 kibu bede me mani.
2CH 27:6 Jotamgo Genuai Bidi aga Godigo godolo ebo kolesaga wali pali. Tama tiyu, aga bomai king mu pedelali.
2CH 27:7 Te king Jotamgo meba sę yali po dabe te buku nogi augwaligo te Juda Hani me Israel Hani Sigo King Dabego Po Buku wabo, te bukude meba po dabe tede te elalubao. Te bukugo agai hwįani me sę yali dabe po me pusai te elalubao.
2CH 27:8 Jotam aga king pedelali sogo aga 25 kibu be elaluali, tama aga Jerusalemde king bidibadi 16 kibu be yali.
2CH 27:9 Te Jotam isali sogo augwaligo aga te Devitgo Taunde pubulali, tama aga ogwa Ahasgo agai pesage selama, tama king pedelali.
2CH 28:1 Te Ahas aga king pedelali sogo aga kibu be 20 elaluali, tama aga Jerusalemde king bidibadi 16 kibu be yali. Tiali goli agai Genuai Bidigo gedude wiegi yai kolesaga me ebeo, te aga wąį Devitgo yali tiwai ebeo. Menio.
2CH 28:2 Agai dwai kolesaga naga iduali, te Israel dabego king dabego ebo kolesaga tiwai yali. Agai te sę bidi dabebolo olama, tama augwaligo bras dabe selama, augwaligo tibo godigo piksa Bal noma dabe nigali.
2CH 28:3 Tama aga te Hinom Dabego Odogo Malu buluba pelama, agai wiegi yai denami hano holobo pauda te buluba ofa igi pelama uligi peyu yali. Tama me agai dwai kolesaga mu iyu yali. Agai aga ogwa wai dabe elama, tama aga tibo godiba te isigo mu dela silibo ofa uligi peyu yali. Agai te tǫde polobadu bidali dwai we bidigo dwai kolesaga wali pali. Tiali goli Genuai Bidigo augwali sela sąnama, tama Genuai Bidigo te tǫ te Israel dabebolo mawai dao, polobadu.
2CH 28:4 Tama Ahas aga te tibo godiba lotu wabo pesageba peyu yali. Te pesage dabe te bulu dude dabe elaluyu, me te genuai ni dologode dabe elaluali. Tama agai ofa dabe iyu me wiegi yai denami hano holobo pauda uliyu yali.
2CH 28:5 Te king Ahasgo dwai kolesaga hauwa mu yali, tama Juda we bidigo me augwa wąįgo God te Genuai Bidiba augwa tudi ola mani. Tama tibaso, Godigo Siria king aga ami dali augwaligo Ahasa aga ami dali hwįagaselama tama aga aiyaba elalumainu ilali. Tama Siria dabego Juda dabe hauwa mu oda selama, Damaskusba kalabus igi pali. Tama nosali Genuai Bidigo Israel dabego king tagala palali, te Peka dao, te Remaliago ogwa, te bidi aga ami bidi dabe dali aselama hwįagaselama, Ahas dali aga ami dabe dali aiyaba elaluali. Tama deli sogo bubugade Juda hani ami bidi te 120,000 bidi elama isilali.
2CH 28:7 Tama Sikri te Israel bomai ami bidi me deligo Juda dabego genuai bidi sela ela muani. Augwaligo nogi e dao, king Ahasgo ogwa Masea, me kingo be tonalubo bidi Asrikam, me te kingo namba tu bidi Elkana, tama bage ela muani.
2CH 28:8 Te Israel dabe augwaligo te Juda dabe hobede dwasianu me ebeo, te augwa ama solo digi dao. Menio. Tama augwaligo Juda hani we wai dabe te 200,000 kalabus ilali, tama augwaligo wiegi yai doado bage dabe hauwa sali, tama te nai dabe sese te taun Samariaba sela pali.
2CH 28:9 Tama te sogo Genuai Bidigo profet bidi me deli Samariade bididuai, agai nogi Odet dao. Tama Israel dabego ami bidi dabe ma asobode te Odetgo augwali tiąba pelama, te po wali, “Genuai Bidi, dago wąįgo God, agai te Juda dabe dali sębę elama augwali agai dagego nogoba mawai dao. Tiali goli dagego sębę mu elama, tama agai po bolama, dagego augwali ela mubo sę genuai mu yalio. Tama Genuai Bidigo dagego te dwai kolesaga yali polo sualio.
2CH 28:10 Tama me ma dagego Juda we bidi me Jerusalem we bidi dagego duga olo sę ebo we bidi gagalainu odasa asalio. Mena tama tialiwe? Dagego homugo dage Genuai Bidi duga Godigo gedude dage bugagia bidiba homu yaliwe?
2CH 28:11 Tialima dagego odiąo. Megi dagego te ama solo me abe solo dagego te kalabus yali, te bage augwali ma tagala palao, te augwali augwa buluba ma pomainao. Magi baso meni. Genuai Bidigo dage dali sębę genuai mu dage dali ebao, tama agai dagebolo dene mawaibao,” wali.
2CH 28:12 Tama me ma Israel dabego tobolu bidi me si me sigo te Israel dabe ami bidi dabego yali te sę godolo ebeo. Augwaligo nogi e dao, Asaria te Johanango ogwa dao, me te Berekia te Mesilemotgo ogwa dao, me Jehiskia te Salumgo ogwa dao, me te Amasa te Hatlaigo ogwa dao.
2CH 28:13 Te genuai bidi dabego te ami bidi dabebolo te po walali, “Dagego te hani kalabus bage eba odasa asigimio. Dago Genuai Bidigo gedude te Juda dabego yali dwai sę polo wei ponai dao, tama me tede dage te agai po edelai dao. Tama agai da dali sębę genuai mu yalio. Tama tialima dagego te e dwai kolesaga iyu da, teda dago dwai sęgę genuai mu yaibao, Genuai Bidigo gedude,” augwaligo te po wali.
2CH 28:14 Te ami bidi dabe augwaligo te po odama, te kalabus dabe me te Juda bulude sali doado bage sese tama tagalali. Te genuai bidi dabe pagede me te Israel we bidi dabe pagede tagalali, tama tilama augwa pali.
2CH 28:15 Tama tialima, te me si me si genuai bidi dabego te kalabus hani tonalubo sę yali. Augwaligo te ami bidi dabego boide sali te ugwa dabe meba selama, tama augwaligo te kalabus hani we bidi ugwa mu habuge yali we bidibolo mani. Tama augwaligo augwali sendel sągą su gudumainu mani. Tama me augwaligo augwali tuabo nai me ąį tuabo mayu yali. Tama me augwaligo augwali kenide marasin muyu yali. Tama augwaligo te we bidi pabo bomo meni yai we bidi selama, augwaligo donki kibude dualali. Tama augwaligo te kalabus dabe odasa pelama, augwa deli hani bidi dabeba ma tagaligi pali. Augwali taun Jerikoba saboligi pali, te taunde ni det hauwa elaluali, tama te Israel dabego augwali tagalama, augwa Samariaba ma geasa pali.
2CH 28:16 Te Israel dabego Juda dabe dali boi hwįnama augwali aiyaba elaluama pabo tudi badu, nosali te Idom dabe ma aselama, tama te Juda dabe dali boi hwįnama Juda dabe aiyaba ma elaluali. Tama augwaligo meba we bidi kalabus elama odasa pali. Tama tibaso, king Ahasgo bidi meba Asiria king bidi sugi pelama, aga tau sagasomainu hanalugi pali.
2CH 28:18 Tama me te Filistia bidi hani aselama, giliga dega sabo badu me saut badu elalubo dwasianu Juda bulu dude taun dabeba boi hwįagasali. Augwaligo Juda dabe aiyaba elaluama, taun Betsemes sobadi, me taun Aijalon sobadi, me taun Gederot sobadi yali. Tama me augwaligo taun Soko sobadi, me Timna, me Gimso, me te taun dabe pąde elalua pali dwasianu be nani dabe me sali. Te Filistia dabe augwaligo te taun dabe polo sali. Tialima augwaligo te taun dabe augwa taun dabe gagalali.
2CH 28:19 Te sęgę te king Ahas me Juda we bidiba te pedelali po page da e dao, Ahasgo dwai kolesaga hauwa mu yali, tama agai Genuai Bidiba tudi ola mani. Tialima Genuai Bidigo te genuai sęgę pedelama, te kantri Juda aiyaba elalumainu sula tagalali.
2CH 28:20 Tama nosali king Tiklat Pileser te Asiria king bidi te Juda buluba asali, tiali goli agai Ahas tau sabeo. Menio. Aga dali aga ami bidi dabe dali augwaligo Ahas dali dwai sę iduali.
2CH 28:21 Tama tibaso Ahasgo Tiklat Pileser homu nagamea sainogo agai Genuai Bidigo tempel be munaluai gol dabe siyu, me kingo bede munaluai me siyu, me tobolu bidi dabego bede munaluai nai dabe me siyu elama, tama te Tiklat Pileserbolo mani. Tiali goli, te tama tialigo Ahas tau sabeo.
2CH 28:22 Te king Ahasgo te sęgę hauwa mu sabo sogo agai Genuai Bidi munu me homu kone ebeo. Menio. Agai Genuai Bidi tudiba munama, me genina mu tudi ola manio, tama dwai dwai sę hauwa mu yali.
2CH 28:23 Agai te po wali, “Te Siria dabego god dabego Siria dabe tau sai dao. Tama tialima eno augwaliba ofa eyu da, augwaligo ena tau sogowe?” te po wali. Tama tialima Ahasgo te Siria dabego tibo god dabeba ofa ebo sę iduali, te aga boide aiyaba elaluali bidi hani. Agai te kolesaga dabe yali, tama te agaba me Israel we bidi tigidaliba te genuai sęgę pedelali page dao.
2CH 28:24 Tama me king Ahasgo Genuai Bidigo tempel be tomode munaluali dis dabe plet dabe subigila aluama tagalali, tama agai Genuai Bidigo be sunumi dabe papali pali. Tama agai alta dabe te tigidali Jerusalem bulude nidigi pali, te aga te tibo god dabeba lotu weyu yabo nigali.
2CH 28:25 Tama te alta te Juda bulu taun tigidalide geseliyu ela pali. Agai te lotu wabo pesage geselali, te we bidi pelama, te tibo godiba te wiegi yai denami hano holobo pauda ofa igi peyu emainogo yali. Tama Ahasgo te yali kolesagago Genuai Bidi augwa wąįgo Godigo sębę genuai mu aga dali emainu ilali.
2CH 28:26 Te king Ahasgo yali sę dabe meba po me agai kolesaga te aga king pedelalidu gagalama aga isaliba saboluyu tomode yali sę dabe po te buku augwaligo Juda Dabe Me Israel Dabe Sigo King Dabego Po Buku wabo, te bukude asęai dao.
2CH 28:27 Te Ahas isali sogo, augwaligo aga te Jerusalemde pubulali. Tiali goli augwaligo aga te king dabe gų pagede pubalobeo. Tama aga ogwa Hesekiago agai pesage selama, tama aga king pedelali.
2CH 29:1 Te Hesekia aga king pedelali sogo agai kibu be 25 elaluali, tama aga Jerusalemde king bidibadi kibu be 29 yali. Aga ida te Abiya dao, te Sekaraiago wegi dao.
2CH 29:2 Hesekiago Genuai Bidigo gedude wiegi yai kolesaga yali, te aga wąį king Devitgo yali tiwai yali.
2CH 29:3 Te Hesekia aga king bidali sogo te namba wan kibu bede te namba wan poluade, te kibu bede agai Genuai Bidigo tempel be sunumi ma dayali, tama agai bidi mebabolo te sunumi ma dodolao po wali.
2CH 29:4 Tialima agai te pris hani meba me Livai hani augwali te Genuai Bidigo Bede giliga asobo badu te bidi sisinagasabo pesageba sisinagasao po wali.
2CH 29:5 Tama agai augwalibolo te po wali, “Dage Livai dabe, dage duga digi Genuai Bidibolo maiąo, te dago wąį dabego Godibolo. Tama te tempel be te agaduba be mu sa muao. Tama dagego Godigo gedude te be meda ilibo doado bage dabe sese buluba sela sąyao.
2CH 29:6 Dago wąį dabego dago Genuai Bidi dago Godigo po bugagia mu me wali pabeo, tama augwaligo agai gedude dolo isąwai kolesaga iyu yalio. Augwaligo God tagalama, tama augwali aga bidibo be taga peyu, tudi ola mawai dao.
2CH 29:7 Tama augwaligo Genuai Bidigo be sunumi dabe paliali, tama lam dabe sula sanama tagalali. Tama augwaligo wiegi yai denami hano holobo wiegi yai pauda me ulubeo. Tama augwaligo isigo mu dela silibo ofa ulubeo, te Israel dabego Godigo alta daide,” te po wali.
2CH 29:8 Te Hesekiago po me wadolama te po wali, “Te Juda dabe me Jerusalem dabe augwaligo te dwai kolesaga yali. Tama tibaso, Genuai Bidigo augwali dali sębę elama, tama agai augwali dene mawai dao. Agai te boi bidi dabe tagala palama, dago aya dabe ela silimainu yalio. Tama augwaligo dago we dabe me wai dabe kalabus elama, augwa kantriba odasa pai dao. Tama te gasa hani we bidigo Genuai Bidigo dago te taun dabeba te sę yali po odobo si da, teda augwali homu hauwa mu elama, wi geninama ma ebo dao. Dago te bugagia mu koneani dao,” kingo te po wali.
2CH 29:10 “Tama tialima, eno homugo dago megi da Israel dabego God dali wadolama bidabo po dąų wainao, tama agai da dali sębę munu me egobeo.
2CH 29:11 Dage te pris dabe me Livai dabe, dagego te koneąo, Genuai Bidigo dage agai sę emainu sa muai dao. Dage Genuai Bidigo gedude dolama tama agai sę yabo te elalubao, tama te we bidigo agaba mu lotu omainu ola maiabo te elalubao, tama me te wiegi yai hano holobo ofa yabo me te dao. Tialima dagego te sę bugagia mu yao,” Hesekiago te po wali.
2CH 29:12 Te Livai dabego te kingo po odali bagego nogi e dao. Mahat te Amasaigo ogwa, me Joel te Asariago ogwa. Te augwali si te Kohat hani wąį bidi dao. Me Kis te Apdigo ogwa, me Asaria te Jehalelgo ogwa, augwali si te Merari hani wąį bidi si dao. Me Joa te Simago ogwa, me Iden te Joago ogwa dao, augwali si te Gerson hani bidi si dao.
2CH 29:13 Me Simri me Juel te Elisafan hani bidi, me Sekaraia me Matania te Asap hani bidi,
2CH 29:14 me Jehuel me Simei te Heman hani bidi. Tama me Semaia me Usiel te Jedutun bidi hani dao.
2CH 29:15 Te Livai dabe augwali hogodama, augwa haniba pelama, augwaligo augwa digi Genuai Bidigo gedude wiegi yai pedalobo kolesaga wali pali. Augwali wiegi yai pedalama, tama augwaligo Genuai Bidigo bomai po wali peyu, tama augwaligo Genuai Bidigo tempel be dodolali, te kingo augwalibolo wali gilama tama tiali.
2CH 29:16 Tama tilama, te pris dabe augwali Genuai Bidigo tempel be tomoba pali, tama augwaligo Godigo gedude meda yai nai dabe sese sela sąyani. Augwaligo te nai dabe te genuai sisinibo pesage te Genuai Bidigo be gesabidi baduba sesali. Tama Livai dabego te nai dabe tolasa Jerusalem bulu badu pelama, te Kidron Odogo Malu buluba sągi pali. Tama nosali te pris dabego te be Genuai Bidigo gedude wiegi yai ma ilali.
2CH 29:17 Augwaligo te sę te dei namba wan te namba wan poluade te sę gagalali, te Genuai Bidigo obo tomode elalubo nai dabe wiegi yai ilimainu. Augwaligo sę ela pidubadi, dei namba 8 teba sabolali. Tama augwali te be sunumiba sabolali. Tama augwali gasa 8 sogo ma sę yali, te Genuai Bidigo be aga gedude wiegi yai ma pedalomainu. Tama augwaligo te sę te dei namba 16de silali. Tama te be augwaligo Genuai Bidiba lotu wabo usu elama sisi yai elaluali.
2CH 29:18 Te pris dabe me Livai dabe augwaligo sę silibo si da, teda augwaligo te king Hesekia sugi pali, tama agabolo te po wali, “Dago te Genuai Bidigo tempel bede tigidali nai dabe sese wiegi yai ilai dao. Te isigo sese dela silibo ofa ebo alta, me te altago doado bage dabe, me augwaligo Godibolo mabo bret mubo tebol, me te tebolgo tigidali doado bage dabe sese tama wiegi yai pedelali.
2CH 29:19 Tama me dago te king Ahas agai God tudi ola menama Genuai Bidigo bede sela sąwani te dis dabe me plet dabe, dago te nai dabe sese tama ma Genuai Bidigo beba ma sesalio, tama Genuai Bidigo gedude te nai dabe wiegi yai ma ilalio. Tama dago te Genuai Bidigo alta pąde munama elalubao,” wali.
2CH 29:20 Te king Hesekia agai te po oda selama, tama kigamu hulide mu agai te Jerusalem bulu tobolu bidi dabe sisinagasao po wali. Sese tama sisinagasobo si da, teda agai augwali sese tama Genuai Bidigo beba odasa pali.
2CH 29:21 Tama augwaligo te 7 kau kibu omai, me sipsip kibu omai te 7; te 7 sipsip kibu gǫų, me te 7 omai meme kibu augwali peyu tama selasa pali. Te a naga olama si te meme kibu omai te Juda we bidi me king aga hani we bidigo sęgę sela sąyabo sela pali, me te be te Genuai Bidigo mu dao wabo dali tama sali. Tama kingo te Arongo hani pris bidi dabebolo te hasa dabe te Genuai Bidigo altade ofa yao po wali.
2CH 29:22 Tialima augwaligo te 7 kau kibu omai bolo hasia elali, tama te kau dabego kaneme te pris dabebolo mani, tama augwaligo te kaneme altaba sąyani. Tama augwaligo nosali te 7 sipsip kibu omai me te 7 sipsip kibu gǫų dabe augwaligo elali, tama augwaligo te sipsip dabego kaneme me te alta daiba sąyani.
2CH 29:23 Tama nosali king dali te bidi dabe dali augwali dolaluali, tama augwaligo te 7 meme kibu omai sesali, tama te king me te bidi dabe augwali deli deligo nogo te meme kibu tigiba nogo muyu ela pali.
2CH 29:24 Tama tialima, te pris dabe augwaligo te 7 meme kibu elama, tama augwaligo kaneme te alta daiba segeni sąyani. Te Israel dabe sesego sęgę sela sąbo ofa tiwai yali. Magi baso meni, kingo te po wali, “Te sęgę sela sąbo ofa me iside sese dela silibo ofa, te Israel we bidi tau sabo ofa dao,” wali
2CH 29:25 King Hesekiago polobadu Genuai Bidigo profet Gat me Natan sigo pedauwalidu mani po te Devitbolo mani po wali pali, tama agai te Livai dabebolo olama tama augwaligo te musik elebo te gita dabe selama, Genuai Bidigo tempel be tomoba dolalugi pali.
2CH 29:26 Tialima te Livai dabe augwali dolaluyu, te gita dabe te Devit te Israel dabego kingo sabilali nai tiwai tolaluali. Tama te pris dabe augwali dali dolaluyu, augwa biugel bu wabo nai tolaluali.
2CH 29:27 Augwali dola selama usu elalubadi, Hesekiago te pris dabebolo te isigo sese mu dela silibo ofa yao po wali. Tama augwaligo te ofa ebo gagalobadi te Livai dabego Genuai Bidiba wiegi yai homu ebo tęąbi po gagalali. Tama te pris dabe augwaligo biugel bu weyu, me te Livai dabego augwa gitago wiegi yai musik eliyu me tama yali.
2CH 29:28 Tama te we bidi tigidali augwaligo Godiba lotu weyu, me Livai dabego tęąbi po weyu, me te pris dabego biugel bu weyu yali, tialima augwaligo te tama sę ela pidubadi te isigo dela silibo ofa mu siligi paboba usu nigi pali.
2CH 29:29 Te augwaligo te ofa ela silibo si da, teda king Hesekia me te we bidi augwaligo bogoli sugunama Godiba lotu po wali.
2CH 29:30 Tama king me tobolu bidi dabe augwaligo te Livai dabebolo te Devit de profet Asap sigo asęani tęąbi te Godigo nogi ugwaba sabo tęąbi po wao wali. Tialima te Livai dabe augwali wiegi yai homu hauwa mu iyu, te tęąbi po dabe tama wali. Tama nosali augwali bogoli sugunama, Godiba lotu po wali.
2CH 29:31 Tama nosali Hesekiago te sisinalubo digi bidali we bidibolo te po wali, “Megi dage duga digi duga Genuai Bidibolo te mani dao. Tama tialima, dagego Genuai Bidi dali homu deli ebo ofa siyu, me Genuai Bidibolo buba hwi wabo ofa siyu elama, Genuai Bidigo beba sesao,” wali. Tialima te we bidigo te kingo po wali pelama, augwaligo te ofa dabe sesali. Tama me badugo te isigo mu dela silibo ofa yainogo yali.
2CH 29:32 Tama augwaligo 70 kau kibu omai, me 100 sipsip kibu omai, me 200 sipsip kibu gǫų sesali, te Genuai Bidiba ofa yabo.
2CH 29:33 Tama me augwaligo 600 kau kibu omai me 3,000 sipsip kibu omai Genuai Bidiba sesali, te ofa tiwai yali.
2CH 29:34 Te pris hani dwasianugo naga Genuai Bidigo gedude wiegi yai pedalobo kolesaga yali. Tama tialima te ofa ebo kibu dabe elebo sęgo augwali edelali. Tama tibaso, te Livai dabego augwali te kibu dabe elebo tau sali, te sę polo silimainogo. Te tama tiali po page da e dao. Te Livai dabe augwali augwa digi Genuai Bidigo gedude wiegi yai pedalobo kolesaga polo yalio. Tiali goli te pris dabe augwaligo polo yai menio. Nosali da te pris dabe augwali augwa digi Godigo gedude wiegi yai pedalobo kolesaga yali. Tama te Livai dabego te sę me ebeo.
2CH 29:35 Te pris dabego iside mu dela silibo ofa hauwa mu yali. Tiali goli augwaligo te sę deli naga ebeo. Menio. Augwaligo homu deliba ebo ofa kibu ili me ulali, tama augwaligo te we bidigo te isigo mu dela silibo ofa dali ulabo wain me augwaligo sali, tama augwaligo ofa tiwai gelali. King Hesekia me te we bidi augwaligo Godigo augwali tau selama, te sę dabe polo silimainu yali kone palali. Tialima augwaligo Godiba wiegi yai homu pemene mu yali. Tama te kolesagago augwaligo te ofa ebo kolesaga me Genuai Bidigo tempel be tomode lotu wabo kolesaga ma gagalali.
2CH 30:1 Te king Hesekiago te Israel we bidibolo, me Juda we bidi augwali sese te Jerusalemba Genuai Bidigo tempel beba sisinagasomainu po olama tolali, te Godigo Israel Dabe Augwali Isipde Bugagia Bidimainu Sula Tagalali Sogo kone paliyu nai ulama tuainogo. Te sogo nogi augwaligo Pasova wabo. Tama me ma agai pas dabe te Efraim we bidi hanibolo me Manase we bidi hanibolo tolali.
2CH 30:2 Augwaligo te nai namba wan poluade ulugi dao. Tiali goli pris bidi hauwa augwali augwa digi Godigo gedude wiegi yai pedalobo kolesaga yai menio. Tama me ma te we bidi augwali Jerusalemba sisinagasobeo. Tama tibaso, king aga ofisa dabe me te we bidi augwaligo te nai te namba tu poluade tuaibao po dąų wali.
2CH 30:4 King me te we bidi augwaligo te pode usu dao olama, deli homu yali.
2CH 30:5 Tama tialima augwaligo po te Israel bulu tigidali badu te po olama tolali. Te taun Berseba te saut badu gagalama, pelama, te not badu te taun Danba usu nigi pali, tama augwaligo tigidali we bidi sese tama augwali Jerusalemba sisinagasao po wali. Te Genuai Bidi, Israel dabego God, agai augwali Isip bulude bugagia bidimainu sula tagalali te Godide kone palebo genuai sogo nai ulubo sogo te nogi Pasova wabo, te Godigo bomai pogo te po wai dao, te tigidali Israel dabe te nai ulama tuainu sisinagasao po wai dao. Tiali goli augwali mebago naga te bomai po wali peyu yali dao, polobadu.
2CH 30:6 King dali, aga ofisa dabe dali, augwaligo te pas asęnama, te pas te tigidali Israel dabebolo me Juda dabeba te pas sela pao po wali, te pas te bidi mebabolo mani augwaligo sela pomainu. Te pas tomode elaluali po dabe da e tama po elaluali, “Dage Israel hani dwasianu hani dabe te Asiria dabe kingo dolisąma yali bage, dagego odiąo. Dage Genuai Bidiba ma asiąo, te dago wąįgo God, te Abraham me Aisak me Jekopgo God. Tialima dagego tama tiali da, teda Genuai Bidi aga dage dali bidagasaibao.
2CH 30:7 Dagego duga aya me duga ama dedego yali dwai kolesaga tiwai igimio. Augwaligo dago wąį dabego Godiba tudi ola mawai dao, te dago wąįgo Genuai Bidi. Tama Godigo augwali dene genuagia mu menama, tama augwali mu dolai dao. Te sę dabe yali duga digi suai dao.
2CH 30:8 Dagego duga wąį dabego yali dwai kolesaga tiwai ma igio. Menio. Dagego duga digi duga Genuai Bidibolo maiąo. Tama dage Jerusalemba pelama, tama Genuai Bidi dago God agaba lotu wagi piąo. Te aga digi aga tempel be tigidali sogo elalua paiba wali, te bede. Dagego te tama tiyu da, teda agai dage dali sębę me egobeo.
2CH 30:9 Dagego koneani, te boi bidi dabego dage aiyaba elaluama, tama dagego hani meba kalabus elama, augwa buluba odasa pai dao. Tiali goli dage Genuai Bidiba ma asiyu da, teda agai te boi bidi dabego dagego te hani dabe hobede emainu ilama, tama augwaligo te dagego hani ma tagala palama duga tǫba ma asaibao. Genuai Bidi dago God aga te hobede iyu homu nagame ebo God dao. Tialima dagego homu begelama agaba ma asali da, teda agai dage ma selama, tama agai dage tudi ma ola magobeo,” te po asęna tama tolali.
2CH 30:10 Tialima te bidi dabego te pas dabe selama, te Efraim hanigo tǫde elalubo taunba sela peyu, me Manase hanigo tǫba sela pobadi, me Sebulungo hanigo tǫba te not badu sela pobadi yali. Tama augwaligo kingo po te we bidibolo pusali. Tiali goli te we bidi augwaligo te po odobo hagela elama, augwali gisugu dwai mu olama, tama augwaligo te po pusali bidi dabe posobo po wali.
2CH 30:11 Tiali goli te Aser hani bidi meba, me Manase hani bidi meba, me Sebulun hani bidi mebago te po odama, tama augwaligo augwa digi Genuai Bidigo gedude aiyaba elaluainu augwali Jerusalemba pali.
2CH 30:12 Tama God aga digi Juda dabe homu deli elama augwaligo te king aga ofisa dabe dali augwaligo po wali pelama, Jerusalemba sisinagasomainu ilali. Tama augwali Jerusalemba sisinagaselama, tama augwaligo te genuai nai ulali, te bomai pode wali gilama tama tiali.
2CH 30:13 Tialima te namba tu poluade te we bidi hani geninama mu augwali te Jerusalemba sisinagasali, te Yis Meni Yai Bret Ulabo Genuai Sogo.
2CH 30:14 Te augwali sese tama sisinagasobo si, teda augwaligo te tibo god dabego alta te Jerusalemde elaluali alta dabe hųgia sągi pali. Tama me ma augwaligo te we bidigo te wiegi yai denami hano holobo te alta me augwaligo sela sągi pali. Tama augwali te alta dabe sese tama selama, augwaligo te Kidron wę odogo malu buluba sągi pali.
2CH 30:15 Tama te namba tu poluago 14 deide augwaligo te sipsip kibu gǫų dabe elali. Te genuai sogo te Godigo te Israel Dabe Augwali Bugagia Bidimainu Tagalali sogo kone paliyu te Pasova ofa ebo sipsip elali. Tama te pris dabe me Livai dabe augwaligo augwa digi Genuai Bidigo gedude wiegi yai pedalobo kolesaga wali pelama ebeo, hasia bolo. Tama megi da, augwali hale dwai mu yali, tama augwaligo augwa digi wiegi yai pedalobo kolesaga ma igi pali. Augwali wiegi yai polo pedelama da, teda augwaligo te isigo mu dela silibo ofa sese te Genuai Bidigo beba selasa pali.
2CH 30:16 Te pris dabe me Livai dabe augwaligo Moses Godigo sę bidigo augwalibolo mani bomai po wali pelama, tama augwali augwaligo gesabidiba te Genuai Bidigo tempel beba dologi pali. Tama te Livai dabego te ofa kaneme selama pris dabebolo mani, tama te pris dabego te kaneme te alta daiba sąsąga pali.
2CH 30:17 We bidi hauwago augwa digi augwa Godigo gedude wiegi yai pedalobo kolesaga yai menio. Tama tibaso, augwaligo augwa ofa yabo sipsip kibu gǫų elabo usu meni yai. Tialima te Livai dabego te we bidigo sipsip kibu gǫų dabe elama, tama Genuai Bidigo nai dolo mu dao olama mu sa muani.
2CH 30:18 Tialima te we bidi tigidaligo te ofa yali sipsip tuali. Tiali goli augwali hani geninama augwaligo augwa digi Godigo gedude wiegi yai pedalobo kolesaga bolo hasia ebeo, te bomai pode wali gilama. Te we bidi augwali hauwa wiegi yai ebeo. Augwali te Efraim hanidu asiyu, me Manase hanidu asiyu, me Isakar hanidu asiyu, me Sebulun hanidu asiyu yali. King Hesekiago te we bidi augwa digi augwa wiegi yai pedalisąma yali te we bidi kone palama, tama agai e tama gedu haluasa po wali, “O Genuai Bidi, dago wąį dabego God, nago koneani, te e we bidi augwaligo nago bomai po wali peyu augwaligo augwa digi hasia nago gedude wiegi yai ebo kolesaga wali pabeo, tama augwali nago beba asali dao. Tiali goli augwaligo nageba aselama, nageba lotu wagasabo homu genuai mu ebao. Genuai Bidi, nage wiegi yai mu dao, tama nago te we bidigo sęgę sela sąyao,” wali.
2CH 30:20 Tama tialima, Genuai Bidigo Hesekiago gedu haluasa po wabo odama, agai te we bidigo sęgę sela sąyani, tama agai augwali dolobeo.
2CH 30:21 Te we bidi augwali te Yis Meni Yai Bret Ulubo Genuai Sogo augwali nogo a naga olama me badu nogo si sogo, te 7 tama bidali, tama augwali tigidali wiegi yai homu mu yali. Tama te Livai dabe me pris dabe augwaligo Genuai Bidigo bede te gasagi yai ų wabo gita dabe siyu elama eliyu, Genuai Bidigo nogi ugwaba sali. Te tobage gita dabe hǫą genuai bomona mu wabo dao.
2CH 30:22 Te Livai dabe augwaligo te lotu wabode me Genuai Bidiba ofa ebode augwaligo wiegi yai sę mu yali. Tama tibaso Hesekiago augwalibolo wiegi yai homu ebo po wali. Te we bidi augwali lotu weyu te nai ulubo sę idubadi, te 7 sogo tama bidali. Tama augwaligo God dali homu deli ebo ofa yali. Tama augwaligo gedu haluasa po weyu Genuai Bidi augwa wąįgo Godibolo buba hwi po wali.
2CH 30:23 Te nogo a naga olama si, te 7 sogo te Yis Meni Yai Bret Genuai Sogo siligi pali. Tialima te we bidi augwaligo te lotu wabo bubuga gasav 7 sogo ma bidaibao po mia sali. Tama tialima augwali te lotu weyu, wiegi yai homu pemene idubadi te 7 wabo sogo ma bidali.
2CH 30:24 Tama king Hesekiago 1,000 kau kibu omai mayu, me 7,000 sipsip kibu mayu, me aga ofisa dabego 1,000 kau kibu omai me 10,000 sipsip kibu te we bidibolo augwali ofa emainu mani. Tama te sogo pris bidi dabe hauwa augwaligo augwa digi Godigo gedude wiegi yai pedalobo kolesaga yali.
2CH 30:25 Tama te pris dabe me Livai dabe me Juda we bidi me te Israel tǫ badu asali we bidi, te not badu asali we bidi me gasa kantri we bidi te Juda dabe dali bidibo me Israel dabe dali bidibo me, augwali sese Jerusalemde bidiyu augwali wiegi yai homu pemene mu yali. Magi baso meni, te tobage sę te Jerusalemde me yai menio, te king Solomon te Devitgo ogwa bidalidu gagalama megi eba usu nagasali.
2CH 30:27 Tama nosali te Livai hanigo pris bidi dabe doligiluama, tama Godibolo te we bidi wiegi yai sę ilao olama hanalu wali. Tama God dagalude bidiyu, aga wiegi yai bulude bidiyu, tama agai te pris dabego gedu haluasa po wabo odali.
2CH 31:1 Tama nosali te genuai lotu po wabo sogo silibo si, teda te Jerusalemba sisinagasali we bidi sese augwali te Juda dabego taunba dabe pepelayali, tama augwaligo te tibo god piksa elaluali masigi pos aluama tagalali. Tama me augwaligo te tibo god we Asera piksa elalubo ni pos gelebadi elama dolama, tama augwaligo te tibo godiba lotu wabo pesage me alta dabe dolama tagalali. Tama me augwali te Juda hanigo tǫba, me Benjamin hanigo tǫba, me Manase hanigo tǫba, me Efraim hanigo tǫba pelama, augwaligo te tibo god dabego nai dabe dolama tagalali. Tama augwaligo te meba nai dabe sulama me tagalobeo. Tama nosali augwali augwa buluba ma pali.
2CH 31:2 Te king Hesekiago te pris dabe me Livai dabe deli deli haniba dobalama, tama augwalibolo te polobadu pris dabe me Livai dabego yali sę tiwai yao po wali. Augwaligo e tobage sę elaluali. Augwaligo te isigo mu dela silibo ofa iyu, me God dali deli homu ebo ofa iyu yabo elaluali. Tama me augwaligo Genuai Bidibolo buba hwi po weyu me agai nogi ugwaba siyu me Genuai Bidigo tempel bede sę dabe hauwa tama iyu yabo elaluali.
2CH 31:3 Tama kingo te pris dabe augwaligo aga obo tomode te sipsip me kau kibu dabe siyu elama, tama isigo mu dela silibo ofa iyu, me tigidali sogo kigamu, me pio, me Sabat side, me te gesi poluago genuai sogo, me te gasa lotu wabo genuai sogo ofa yainogo siyu yao wali, te Genuai Bidigo bomai pode wali gilama.
2CH 31:4 Tama kingo te Jerusalem we bidi dabe augwaligo tubo nai dabe te pris dabe me Livai dabebolo magasiyu yao po wali, te bomai pode wali gilama. Te we bidigo te tama tiali, te pris dabe me Livai dabe augwaligo sę bugagia eyu bidimainogo, te Genuai Bidigo bomai pode wali gilama.
2CH 31:5 Kingo te po te tǫ kantri pedai badu tigidaliba pelama odama, tama polo tama te we bidigo gide hasia ina yali nai dabe te wiegi yai wit, me wain hauwa, me ni oliv wel, me hani me te gasa meba nai dabe te gide elaluali nai dabe sali, tama augwaligo te pris dabe me Livai dabebolo magasali. Tama me augwaligo augwa nai dabe te pedama nogo si nigilama, nogo deli me bogelama te pris me Livai dabebolo mani.
2CH 31:6 Tama te Juda bulu taunde we bidi dabe augwaligo te nogo si nai te kau kibu me sipsip kibu augwaligo sesali. Tama me augwaligo nogo siba dobalama, tama augwaligo nogo me deli te Genuai Bidi augwa Godiba tagalali. Tama augwaligo te nai dabe sela aselama, tama augwaligo pesage hauwa nigilama muani.
2CH 31:7 Te we bidi dabe augwaligo te nai dabe sesidu geani, te namba 3 poluadu gagalama, pelama, namba 7 poluaba usu nigi pali.
2CH 31:8 Tama nosali Hesekia me te tobolu bidi dabe augwaligo te nai dabe sugi pali, te we bidigo sesali nai dabe, tama augwaligo Genuai Bidigo nogi ugwaba siyu elama, tama augwaligo te Israel we bidi dabe dali wiegi yai homu pemene yali.
2CH 31:9 Tama kingo te pris dabe me Livai dabebolo hanalu wali, “Mena tama tiyu dagego te nai pesage hauwa tama yaliwe?”
2CH 31:10 Tama tobolu pris Asaria, aga te Sadok hani bidi me deli dao, agai te kingo po wei ponoyu te po wali, “Genuai Bidigo aga we bidi dabe dali wiegi yai sę elama, tama augwaligo nai hauwa te Genuai Bidigo beba sesali dao. Dago te nai dabego dago nai hauwa mu tuai dao, tiali goli dago te nai dabe silabo usu menio. Tama tialima megi te nai pesage hauwa te me elalubao,” te po wali.
2CH 31:11 Tialima kingo pode te sę bidi dabego te be habu me te Genuai Bidigo tempel be obo tomode elalubo be dabede me dodolali.
2CH 31:12 Tama augwaligo te we bidigo Genuai Bidibolo mani te nai dabe me meba gasa nai dabe selama, te be habu dabe tomoba muani. Tama Livai bidi me aga nogi Konaniago te sę tonaluali, tama aga ama Simei aga tudi badu namba tu dolaluali.
2CH 31:13 King Hesekia, me Asaria te Godigo bede tobolu bidi, augwali sigo te Konania me Simei tau sabo Livai dabe meba ma sa muani. Augwaligo nogi e dao, Jehiel, me Asasia, me Nahat, me Asahel, me Jerimot, me Josabat, me Eliel, me Ismakia, me Mahat, me Benaia dao.
2CH 31:14 Tama te Livai me deligo Genuai Bidigo be obo sunumi tomoba asobo te giliga asobo badu sunumi tonaluabo sę elaluali. Te Livai bidigo nogi te Kore, te Imnago ogwa dao. Tialima augwaligo aga te we bidi augwa homugo Godibolo mabo ofa siyu emainogo sa muani, tama me meba gasa ofa dabe te we bidigo Genuai Bidibolo mayu ebo ofa me siyu emainu sa muyu, me te ofa bugai meba te habu mu selai te ofa siyu elama tama te pris dabebolo dobola paliyu yali.
2CH 31:15 Tama te Livai mebago Kore tau selama, te pris dabego taunde bidibo pris dabe nai dobabo sę yali. Te Livai dabego nogi e dao, Iden, me Miniamin, me Jesua, me Semaia, me Amaria, me Sekaria, augwaligo nai dobolama tigidali pris hani dabe usu nani, tama tigidali pris dabego nai sali, te augwali gesi bidi me o augwali polo monu dabe yai madi me augwali me tagalobe augwaligo te nai sali.
2CH 31:16 Te pris dabego ogwa dabe augwali kibu be sela polo yai madi da, augwaligo te bage augwaligo nogi te pris hanigo nogi listade asębo dao. Tama augwaligo nai te listade nogi elalubo bageba augwaligo te nai dobabo dao. Tiali goli te pris wąį hani me deli augwali te Jerusalemde Genuai Bidigo tempel bede sę yabo sogo yai baso, tama augwali polo paibaso da, teda augwaligo augwaliba nai dobagobeo, augwa page bulude.
2CH 31:17 Te augwaligo te pris dabego nogi asębo sogo, augwaligo augwa ayago togali deli deli wąįgo nogi lista dologode asębo dao, te augwali deliba sisinama sę iyu emainu. Tiali goli augwaligo te Livai dabe augwali kibu be 20 yai bagego nogi asęyu, me te kibu be edelama ugwadu yai bagego nogi asęyu, augwaligo augwa ebo sę dologode nogi asębo dao, te lista dologode.
2CH 31:18 Tama te lista dologode augwali augwa we waigo nogi me asębo dao. Tama te hanigo augwa digi augwa wiegi yai bidainu ebo sę elalubao, te Genuai Bidigo gedude tigidali sogo.
2CH 31:19 Te Arongo hani pris bidi dabe meba augwali te pris dabego taun pąde elalubo tǫ pedai dabede bidibo dao. Tama te hani pris bidi dabeba nai dobabo bidi dabe te taun dabede bidibao. Tama me augwaligo te Livai dabebolo me nai dobabo dao. Augwali nogi te Livai dabego nogi listade elalubao.
2CH 31:20 Te Hesekiago te pris hani me Livai hani dabe tau sabo sę wiegi yai te Juda bulu tigidali badu yali. Tama agai aga Genuai Bidi Godigo homu kolesaga wali pabo dao, tama agai Godigo gedude wiegi yai doloba pai kolesaga ebo dao.
2CH 31:21 Te king Hesekiago yali sę tigidali te Godigo tempel bede sę dabe tigidali ma hodolobo sę iyu, me Godigo bomai po me wali bugagia peyu yabo sę hodolali, Hesekiago aga homu kolesaga tomode Godigo homu kolesaga wali pabo homu bomo mu yali. Tama tiyu, agai ebo sę dabe tigidali wiegi yai mu pedelali.
2CH 32:1 Te king Hesekiago Genuai Bidigo po wali pelama, tigidali sę yai nosali badu da, king Senakerip, te Asiria bidi, aga ami dali augwali Juda buluba boi hwįagasali. Te Asiria dabego bomai obo yai taun dabe bagua sagasali. Tama Senakeripgo aga ami dabebolo olama, te boi hwįnama, te taun sainu yao po wali, te agai augwali tonaluainogo.
2CH 32:2 Tama Hesekia agai koneani, me tiali te Senakeripgo Jerusalem dali hwįagasabo homu yali.
2CH 32:3 Tama tialima Hesekia ebadi, ofisa bidi dabe ebadi, bomai ami bidi dabe augwaligo te taun bulu badu elalubo ulu wę dabe hagalu bilaibao po pesela sali.
2CH 32:4 Tialima augwali bidi hani hauwa mu sisinama, tama augwaligo augwalibolo te po walali, “Dago te taun bulu badu elalubo ulu wę dabe hagalu biligi pinao. Tama me dago te taun pąde soabo ąį me paligi pinao. Tiyu te Asiria dabe asiyu augwaligo tuabo wę hauwa elalu idali weyu,” te po wali. Tialima augwaligo te wę paligi peyu pali.
2CH 32:5 Te Hesekiago aga sę bidi dabego Jerusalem bulu obo polo dąų walao po bomo elama wali. Tama tibaso te sę bidi dabego te obo me badu toga pali polo ma dodolali, tama augwaligo te obo daide augwaligo bobobage sigi be taua dabe geselali, te ami bidi dabe tede bidiyu te boi bidi dabe no munalumainu. Tama te taun genuai masigi obo tudi badu augwaligo gasa masigi obo me ma bagulali, te taun bagulama mu yali. Tama te obo dąų wali te pesagede augwaligo te odogo malu bulu tǫ selama pamagąno pali, te augwaligo Devitgo Taun wabo te Jerusalem bulude. Tama augwaligo ene hauwa buyu, me ni name sabele hauwa geseliyu yali, te hwįabo nai dabe.
2CH 32:6 Nosali Hesekiago ami ofisa dabe magi ilali te Jerusalemde bidi dabe tonalumainu. Tama agai bidi dabe sese te taunba pabo sunumi pąde bidi sisinibo pesagede sisinani. Tama agai augwaligo homu dąų olama bomo ilabo po pusa mani. Agai e tama po wali,
2CH 32:7 “Dage bomo elama dolaluyu, tama dagego te Asiria king bidi aga te geninama ami bidi dabede dage wi igimio. Te mu dao, augwaligo genuai bomo elalubao. Tiali goli dago genuai bomo mu augwaligo bomo aiyaba elaluai mu te elalubao.
2CH 32:8 Te Asiria king bidigo bomo te bidi dabede sali dao. Tiali goli dago bomo te Genuai Bidi dago Godidu te asali dao. Aga da dali bidiyu, tama agai da tau saibao, tama dago boi bidi dabe aiyaba elaluaibao,” wali. Te we bidigo kingo te po odama, tama te pogo augwaligo homu dąų walali.
2CH 32:9 Tama te sogo te Senakerip aga ami dali augwali taun Lakisde boi hwįduali. Tialima agai ofisa bidi meba Jerusalemba taga palama, Hesekia me Juda dabe dalibolo po magi pomainu tagala palali. Agai te po e tama tiwai wali,
2CH 32:10 “Ena king Senakerip dao, eno koneaio. Dagego mena tama bomo elaluyu, tama dagego homugo dago dagego taun sogobe homu ebawe?
2CH 32:11 Eno koneani, Hesekiago dagebolo te po wali, Genuai Bidi duga God agai dage tau selama, tama da Asiria dabego dage dologobeo, te homu yali. Tiali goli Hesekiago dage ili po te ola mani dao. Tama dagego agai po mu dao homu dąų weyu, tama dagego dago te taun sao olama tagalisąma iyu da, teda dage dua dao. Dago dage bagua selama, tama dage nai me wę me menia selama tama dage isaibao.
2CH 32:12 Dagego koneani, te Hesekia deligo tama te Genuai Bidigo lotu wabo pesage me agai alta dabe dolai dao. Tama agai dage Juda dabe me Jerusalem dabe bolo deliba lotu wagi peyu, deli altaba wiegi yai denami hano holobo ofa yao po wai dao,” te bidigo te po wali.
2CH 32:13 “Te dagego polobadu eno wąį dabego yali sę dabe me megi ena digi meba gasa kantri dabede ebo konebe, agawe? Dagego homugo te meba hani augwa godigo augwali tau selama, eno augwaligo kantri dolobe homu eba, agawe? Mu menio.
2CH 32:14 Dago kantri hauwa dali hwįai dao, te augwali god hauwa elaluali. Tiali goli te god me deligo aga kantri tau selama tama dago hwįbode da te tula pai menio. Tialima dagego magi baso dagego homugo duga Godigo dage tau saiba homu ebawe? Tama dago dage aiyaba elalugobe homu ebawe?
2CH 32:15 Dagego te Hesekiago dage ili po ola momainu sula tagaligio, tama dagego agai po odigimio. Magi baso meni, te gasa meba kantri dabe augwa godigo augwali me tau sai meni, te eno wąį dabe hwįgi pabode me megi eno hwįbode te augwali me tau sabeo. Tama mu tama, dagego Godigo me dage tau sabo usu me egobeo,” te Senakeripgo te po ola tolali.
2CH 32:16 Tama te Asiria kingo ami ofisa bidi dabego me Genuai Bidi God dali me dwai po hauwa mu me wali, me te Hesekia te Genuai Bidigo sę bidibolo me tiwai po wali.
2CH 32:17 Tama te king Senakeripgo pas dabe asęnama, Genuai Bidi God posobo po wali, te Israel dabego God Genuai Bidibolo. Te pas dabede e tama tiwai po dabe elaluali, “Te eno meba kantri dabe dali hwįani sogo, augwa god dabego augwali tau selama, tama augwaligo ena aiyaba me elaluai menio. Tama Hesekiago Godigo me dage aga we bidi me tau sogobeo. Mu menio,” tama po asęna tolali.
2CH 32:18 Te Asiria ami bidi dabe augwaligo te Hibru pogo po bomona mu olama, te Jerusalem we bidi augwali te obo daide ugwadu bidiyu, augwaligo te po odama tama augwali wi dwai mu emainogo. Tama te Asiria dabe augwaligo te taun sainogo bomai sę idali weyu.
2CH 32:19 Te Asiria dabe augwaligo te posobo po wali. Magi baso meni, augwaligo homugo Jerusalem dabego God te gasa tibo god augwa nogogo nigai god dabe tiwai yaliwe weyu.
2CH 32:20 Te king Hesekia agai Asiria dabego te po odama, tama aga dali profet Aisaia, te Amosgo ogwa, augwali sigo Godiba gedu haluasa po wali, augwali tau sao po olama.
2CH 32:21 Tama Genuai Bidigo augwali sigo gedu haluasa po wabo odama, tama agai ensel bidi me deli tagala palama, Asiria dabego bidibo pesagede agai ofisa bidi dabe me kepten bidi dabe me bomai ami bidi dabe tama ela wialali. Tama tialima, king Senakerip aga hale dwai mu elama, tama aga te aga kantriba ma pali. Tama nosali aga tibo godigo lotu be tomoba pali, te aga godiba lotu po wainogo, tama aga ogwa mebago augwa bainat hwągo aga ela muagasali, tama aga isali.
2CH 32:22 Tama te tiali kolesagago Genuai Bidigo king Hesekia te Jerusalem dabe dali augwali tau sali. Tama te Senakerip te Asiria dabego kingo augwali dolobeo. Tama me ma Genuai Bidigo gasa boi bidi dabego Juda dabe dolagasomainu sula tagalobeo. Genuai Bidigo augwaligo ebo sęde tigidali tau sali, tama augwali bugagia bidali.
2CH 32:23 Tama we bidi hauwa gasa kantridu Jerusalemba aselama, Genuai Bidiba ofa sesiyu, me Hesekiabolo wiegi yai nai dabe magasiyu yali. Te sogo tama gagalama, te gasa kantri we bidigo king Hesekia Juda dabego kingbolo genuai nogi mani.
2CH 32:24 Te Asiria dabego Juda dabe dali dwai sę idubadi da, king Hesekia aga gasi genuai mu selama, tama aga pąde isabo ąǫ yali. Tialima agai Genuai Bidibolo gedu haluasa po wali, tama Genuai Bidigo aga gedu haluasa po wabo wei ponoyu, agabolo magi me deli mani, te agai gasi silaibao olama ola mayu.
2CH 32:25 Tama nosali Hesekiago gasi silali, tama agai Genuai Bidigo aga tau siyu yali te sę kone ebeo. Menio. Aga tobolu gagea pelama, tama Genuai Bidibolo buba hwi po wabeo. Tama tibaso, Genuai Bidigo aga dali sębę elama, tama aga dali Juda dabe me Jerusalem we bidi me dolabo homu yali.
2CH 32:26 Tiali goli Hesekia me Jerusalem dabe augwaligo dwai kolesaga tagalama, tama augwa digi augwa aiyaba elaluali. Tama tibaso, te king Hesekia bidibadi Genuai Bidigo augwali dene me mabeo.
2CH 32:27 Te Hesekia agai nai dabe hauwa mu selama, tama aga bomai king mu pedelali, tama agai genuai nogi elaluali. Agai te sę bidi dabebolo olama, tama augwaligo bakstua dabe sęnama tama augwaligo e tama tiwai nai dabe muani, silva, me gol, me genuai monego abelai wiegi yai masigi dabe, me wiegi yai denami ebo pauda dabe, me hwįbo ni name sabele dabe me, me gasa wiegi yai homua pabo nai dabe me te bede muani.
2CH 32:28 Tama me te sę bidi dabego te wit dabe, me wain dabe, me ni oliv wel muabo bakstua dabe me sę yani. Tama me augwaligo kau kibu tagalabo moni be sę eyu, me sipsip kibu tagalabo obo iyu yali.
2CH 32:29 Godigo Hesekiabolo wiegi wiegi yai nai dabe hauwa mu mani. Tama Hesekiago sipsip kibu me kau kibu hauwa mu sali. Tama aga sę bidi dabego agai taun hauwa mu geselali.
2CH 32:30 Polobadu king Hesekia aga digi te pabo wę Gihon ogwa badu paliai, tama agai gesi wę gamia nigasa dulama, giliga dega sabo badu te Devitgo Taunba tagaligi pali. Tigidali sę dabe king Hesekiago yali sę dabe sese tama wiegi yai mu pedelali.
2CH 32:31 Te kantri Babilon genuai bidi dabego Godigo te kantri Juda bulude te wiegi yai sę yali po odama, augwaligo te bidi dabego esiąbo bomai sę yali po page odainogo bidi me deli tagala palali, te Hesekiabolo hanalu wainu. Te sogo Godigo Hesekia tagalai madi, magi baso meni, agai Hesekia usu selama, tama agai kolesaga me homu kolesaga osola suainogo.
2CH 32:32 Te king Hesekiago yali meba sę po dabe te buku augwaligo te profet Aisaiago Suali Po Dabe wabo, te bukude te elalubao, tama gasa buku augwaligo te Juda Dabe Me Israel Dabego King Dabego Po Buku wabo, te bukude te elalubao.
2CH 32:33 King Hesekia isibaso, augwaligo aga te Devitgo hani king dabego gų pagede pubulali. Agai gų page te obanu ganama elaluali, te meba king dabego gų page i badu elaluali. Tama te Juda me Jerusalem we bidi augwali tigidali agai genuai nogi kone palama, augwali hobede genuai mu yali. Tama aga ogwa Manasego agai pesage selama, tama aga king pedelali.
2CH 33:1 Te Manase aga king pedelali sogo agai kibu be te 12 kibu be elaluali, tama aga Jerusalemde king bidibadi kibu be 55 yali.
2CH 33:2 Manase agai wiegi yai kolesaga wali pabeo. Menio. Agai te tǫde polobadu bidali te we bidi hanigo dwai dwai haniani kolesaga wali pali, te Genuai Bidigo augwali sela sąnama tama te tǫ Israel dabebolo mawai dao. Manase agai te hanigo kolesaga wali pelama, agai Genuai Bidigo gedude dwai kolesaga mu yali.
2CH 33:3 Manasego e tiwai dwai kolesaga yali. Agai te tibo godigo lotu wabo pesage ma geselali, te polobadu aga aya Hesekiago dolai. Tama me agai te tibo god Balba lotu wabo alta me geselali. Tama me agai god we Aserago piksa noma geselali. Me ma agai ogwa dagalude hǫ dabeba lotu wayu yali.
2CH 33:4 Tama agai tibo god dabego alta Genuai Bidigo tempel be digi tomode geselali. Tiali goli Genuai Bidigo te be po weyu agai e tama tiwai po polobadu wai dao, “Eno Jerusalem te eno tigidali sogo bidabo bulu sa mubao,” po wali, “tama te we bidi augwali te Jerusalemba aselama, ena deliba naga lotu wagasomainu,” wai dao.
2CH 33:5 Tiali goli Manase agai te Genuai Bidigo tempel be obo tomode agai alta si te genuai sisinagasobo pesagede geselali, te aga hǫ dabeba lotu wabo nai geselali.
2CH 33:6 Tama aga te Hinomgo odogo malu buluba pelama, tama aga ogwa wai dabe elama, tama augwali te isigo dela silibo te ofa tiwai ulali silali, te aga tibo godiba ofa tama yali. Tama agai isai bidi noma dabeba aga tau somainu i wali, tama agai sogo yesi bidi dabe me pobi bidi dabebolo aga tau somainogo hanalu wali. Tama agai yesi bubo sę haniani hauwa mu yali. Manase agai Genuai Bidigo gedude agai sęgę hauwa mu tolama yali. Tama agai te dwai kolesaga dabego Genuai Bidi sębę geninama mu emainu ilali.
2CH 33:7 Te Manase aga digi nigai tibo god piksa selama, agai Godigo tempel be tomode muani. Tiali goli polobadu Godigo Devit de Solomon sibolo e tiwai po wai dao, “Te Jerusalemde elalubo te tempel be da, te ena digi Israel hani tomode ena digi sa muai dao, te augwali tigidali sogo enaba aselama, enaba deli naga lotu wagasiyu yabo pesage deli elalua pomainu.
2CH 33:8 Tama dage eno we bidigo eno po wali peyu, me eno tigidali po me bomai po sese, eno sę bidi Mosesgo pedauwalidu mani po sese wali peyu da, teda dage eno polobadu duga wąį dabebolo menama tama dage megi bidibo te tǫde sela sągobeo,” te po wali. Genuai Bidigo te po wai goli, tama Manasego te tibo god piksa noma te tempel be tomode muani.
2CH 33:9 Manase agai Juda dabe me Jerusalem dabe kegelama, tama augwaligo dwai kolesaga hauwa mu yali. Augwaligo te dwai kolesagago te tǫde polobadu bidali we bidigo dwai kolesaga edelama mu yali, te Godigo te tǫde sela sąyani we bidigo yali dwai kolesaga edelali.
2CH 33:10 Te Genuai Bidigo Manase me te we bidi augwaligo te dwai kolesaga eboba tudi ola mao po wali, tiali goli augwaligo po odama wali pabeo.
2CH 33:11 Tama tibaso Genuai Bidigo Asiria ofisa bidi dabe augwa ami bidi dabe dali tagala palama, tama augwaligo Juda dabe dali hwįnama, tama augwali aiyaba elaluali. Tama te Asiria dabego Manase pagabi elama, tama aga gunide huku munama, tama augwaligo aga sen gebelama, tama aga augwa page bulu Babilon buluba odasa pali.
2CH 33:12 Tialima aga sęgę genuai mu tolaluali, tama tibaso aga digi Genuai Bidi aga wąį dabego Godigo gedude aga digi aga aiyaba elaluali. Tama aga God pageba ma asali.
2CH 33:13 Tama Godibolo aga tau somainogo hanalu wali, tama Godigo Manasego gedu haluasa po wabo odama, aga tau selama, tama aga Jerusalemba ma pelama, tama aga te kantri ma tonalumainu sula tagalali. Tama megi da Manasego koneani, Genuai Bidi deli naga te God mu dao homu yali.
2CH 33:14 Tama te nosali badu, Manase agai augwaligo Devitgo Taun wabo tede obo gesi me ma yali. Te obo te ugwanu mu dao. Te obo te giliga dega sabo badu odogo malu bulu badu gagalama, pelama, u badu not badu augwaligo Sųgųgo Sunumi wabo, te sunumiba usu nigi pali. Augwaligo taun Ofel wabo te taun bagua selama yali. Tama me Manasego te bomai obo elalubo taun dabe tigidali tonalua pomainogo agai ami ofisa bidi dabe sa muyu ela pali, te Juda distrikde.
2CH 33:15 Tama agai meba hanigo tibo god dabe sela sąyu, me aga digi Genuai Bidigo tempel be tomode muani te tibo god piksa dabe sela sąyani. Tama elalubo bulu dude te alta dabe sela sąyani. Tama meba te alta dabe te Jerusalemde elaluali dabe sese tama sela sąyani, tama agai te nai dabe taun buluba selasa pelama, tama sągi pali.
2CH 33:16 Nosali agai Genuai Bidigo alta ma dodolali. Tama agai God dali homu deli ebo ofa yabo hasa dabe me Godibolo buba hwi wabo ofa yabo kibu sesiyu yali, te altade ofa yabo sesali. Tama agai Juda dabebolo e tiwai po walali, “Dagego da Israel dabego God dena Genuai Bidiba naga lotu po waiąo,” wali.
2CH 33:17 Tialima te we bidi augwaligo king Manasego po wali pelama, augwaligo te tibo god dabeba me lotu po me wabeo. Mu tama, augwali sese tama Genuai Bidigo tempel beba Jerusalemba asobeo. Augwali te lotu wabo pesage dabeba pabo sę dabe tama iduali, tiali goli augwaligo Genuai Bidi augwa God deliba naga ofa ebo sę iduali.
2CH 33:18 Te king Manasego yali sę po dabe meba te buku me augwaligo Israel Dabego King Dabego Po Buku wabo, te bukude te elalubao. Te bukude te agai Godiba gedu haluasa po wali po me pusuyu, me Godigo nogide profet bagego agabolo pusali po me pusali, te Israel dabego God augwa Genuai Bidigo wali po pusali.
2CH 33:19 Tama king Manasego meba po dabe te gasa buku mede elalubao. Augwaligo te Profet Dabego Po Bukude elalubao. Te bukude agai dwai dwai sę dabe yali te po dabe me pusuyu, me agai Genuai Bidibolo tudi ola mani po dabe me pusa elalubao, tama te bukude te lotu wali pesage po, me te tibo godiba lotu wali pesage, me god we Asera piksa noma, me agai nogogo nigali tibo god piksa dabe po me tede elalubao. Te aga digi tibo god nigilama lotu weyu yali po me te Profet Dabego Po Bukude te elalubao. Tama te bukugo agai homu begelama, tama aga digi aga aiyaba elaluali po me tede te bukude pusai dao. Tama me agai Godibolo gedu haluasa po obaso tama Godigo agai gedu haluasa po odali po dabe pusali po me te elalubao.
2CH 33:20 Manase aga isibaso, augwaligo aga king dabego obo tomode pubulali, te king dabego be obo tomode. Tama aga ogwa Emongo agai pesage selama, tama aga king pedelali.
2CH 33:21 Te Emon aga king pedelali sogo, agai kibu be 22 elaluali, tama aga kibu be si digi te Jerusalemde bidali
2CH 33:22 Emongo me Genuai Bidigo gedude aga aya Manasego yali dwai kolesaga tiwai mu yali. Agai aga ayago polobadu nigali te tibo god piksa dabeba lotu po weyu yali, tama agai augwaliba ofa iyu ebo sę me yali.
2CH 33:23 Tama tiali goli agai aga digi Godigo gedude aiyaba elalubeo, te aga ayago yali tiwai ebeo. Menio. Agai dwai sęgę sabo sę genuai mu ela pidu geani.
2CH 33:24 Me sogo bubugade Emon aga ofisa bidi dabe sisinama, tama aga elabo po sunumi gegiyu po miani. Tama nosali augwaligo aga king be tomode elama isilali.
2CH 33:25 Tama nosali te Juda we bidi dabego te Emon ela muani ofisa bidi dabe selama augwali me elama isilali. Tama augwaligo Josaia te Emon aga ogwa selama, tama augwaligo aga augwa king magi ilali.
2CH 34:1 Te Josaia aga Juda dabego king pedelali sogo agai kibu be te 8 kibu be elaluali. Tama aga Jerusalemde aga kibu be 31 king bidali.
2CH 34:2 Josaia agai Godigo gedude wiegi yai kolesaga mu yali. Agai aga wąį king Devitgo polobadu yali wiegi yai kolesaga tiwai tama yali, tama agai Genuai Bidigo po tigidali wali pabo bomo mu yali, te po tagalobeo.
2CH 34:3 Te Josaia aga king bidibadi kibu be te 8 kibu be wabode, agai kibu be 15 elaluali, agai aga wąį king Devitgo Godiba lotu po wabo gagalali. Tama aga king bidibadi 12 kibu be ebode, agai tigidali sę bidi dabebolo olama, tigidali Juda me Jerusalem buluba pelama, augwali bolo tibo godiba lotu po wabo pesage, me god we Aserago piksa noma, me gasa tibo god piksa augwaligo nogogo nigai ni god, me aingo nigai god doligi pao po wali.
2CH 34:4 Tama aga sę bidi dabe dali biligi pelama, tama agai augwaligo te tibo god Balgo alta dabe doligi pabo suali. Tama me te wiegi yai denami hano holobo pauda ulubo alta me dolali, te Balgo alta ugwadu daide dolalubadi dolali. Augwaligo tibo god we Aserago piksa noma pisilama tagalali, me te meba tibo god dabego piksa noma pisilama tagalali, tama augwaligo te piksa dabe halua mia sąnama, keli gagabode mu tagalali. Tama augwaligo te pauda selama, tama augwaligo te tibo godiba lotu wali we bidigo gų pageba gegele biligi pali.
2CH 34:5 Tama Josaia agai te tibo god dabego pris bidi dabego dili selama, tama agai te pris dabego ofa iyu yali te alta daide ulali. Agai te sę ela silama, tama te Juda dabe me Jerusalem dabe augwali Godigo gedude wiegi yai me pedelali.
2CH 34:6 Tama Josaia aga Manase hanigo tǫba peyu, me Efraim hanigo tǫba peyu, me Simeon hanigo tǫba peyu, me not badu peyu, me Naptali hanigo tǫba tama biligi pali. Tama agai te tibo god dabego alta te polobadu boi hwįani sogo dolali, te hanigo taun dabede te alta dabe dolama tagalali.
2CH 34:7 Aga te Israel dabego tigidali buluba biligi pelama, tama te alta dabe doliyu, me tibo god we Aserago piksa doliyu elama, tama meba tibo god dabe doliyu elama, tama te nai dabe haluama, mia sąnama, tama pauda gagalali. Tama me agai te wiegi yai denami hano holobo pauda ulubo alta aluama tagalali. Agai te sę silama, tama aga Jerusalemba ma pali.
2CH 34:8 Te Josaia aga king bidibadi 18 kibu be wabode, agai te tibo god dabe sela sąnama, Godigo tempel be me aga kantri Godigo gedude wiegi yai ilali. Tama tialima nosali agai bidi sela te Genuai Bidi aga Godigo tempel be dodolabo sę ebo tonalumainu tagala palali. Te bage selago nogi e dao, Safan te Asaliago ogwa, me Masea te Jerusalem hanu tonalubo tobolu bidi, me Joa te Joahasgo ogwa. Joa aga kingo kuskus bidi dao. Te bidi sela augwali te Livai dabe te Genuai Bidigo tempel be sunumi tonalubo bidi dabe pageba pali. Augwaligo polobadu te
2CH 34:9 Manase hani we bidigo, me Efraim hani we bidigo, me gasa u not badu bidibo Israel we bidigo, me Juda we bidigo, Benjamin hani we bidigo, me Jerusalem hani we bidigo te Godigo tempel be dodolobo sę emainogo tau sabo mone sali. Tama augwali selago te mone tobolu bidi pris Hilkia bidibo madi te mone sela pali.
2CH 34:10 Tama augwaligo te mone te Godigo tempel be ma geselebo sę ebo tonalubo bidi dabebolo mani. Tama te sę tonalubo bidi dabego te mone selama, te bede te monego sę yali, te be dodolobo sę yali.
2CH 34:11 Te sę tonalubo bidi dabego te mone selama, te kamda te be sę ebo bidi dabebolo me masigigo be sę ebo koneai bidi dabebolo mani, tama te monego te bidi dabego polo dodolai masigi dabe abelali, tama me augwaligo te be kąų ni me be walawala ni abeliyu yali, te Godigo be obo tomode be dabe dodolobo sę yainogo. Polobadu te Juda dabego king dabego te be bugagia tonalusiąma yai digi te be dabe dwai yali.
2CH 34:12 Te bidi dabe augwaligo wiegi yai sę mu yali. Te kingo ofisa dabego te Livai dabego te sę ebo bidi dabe tonalumainu sa muani. Te Livai dabe augwaligo nogi e dao, Jahat, me Obadia, te Merari hani, me Sekaraia, me Mesulam, augwali si te Kohat hani dao. Tama te Livai dabego te gitago te musik elebo mu konea pali.
2CH 34:13 Augwaligo te be sę yabo nai dabe tolasa bilibo bidi dabe tonaluali, me te Genuai Bidigo obo tomode gasa meba sę ebo bidi dabe tonalubo sę yali. Tama meba Livai dabego kuskus sę yali, tama mebago te Godigo be sunumi tonalubo, te Godigo be obo tomode, tama mebago gasa meba sę dabe yali.
2CH 34:14 Te Livai dabego te we bidigo Genuai Bidigo tempel beba sesali mone dabe sidubadi, te tobolu bidi pris Hilkiago te Genuai Bidigo bomai po te Mosesgo nogoba mani bomai po mani, te po elalubo po buku suali.
2CH 34:15 Tama tialima Hilkiago Safanbolo te po walali, “Eno buku me deli Genuai Bidigo bede munalubo suali. Te bukude Genuai Bidigo bomai po elalubo suali,” wali. Tama Hilkiago te buku Safanbolo mani.
2CH 34:16 Tama Safango te buku selama, tama agai king magi pelama, tama agabolo e tama po walali, “Dago nago dabolo wali sę tigidali mu yalio.
2CH 34:17 Dago te Genuai Bidigo bede munaluali mone dabe tigidali selama, tama te be sę dodolobo ebo tonalubo bidi dabebolo mayu, me te sę bidi dabebolo mayu yali,” te po wali.
2CH 34:18 Tama Safan agai po ma weyu te po wali, “King, tobolu bidi pris Hilkiago enabolo e buku manio,” wali. Tialima agai te buku dagalama, kingbolo neda mani.
2CH 34:19 Te kingo te bukude Godigo bomai po te bukude elalubo po odobode, tialima agai homu sęgę genuai mu ebaso, tama aga ugwa pisąyali.
2CH 34:20 Tama agai pris Hilkia, me Ahikam te Safango ogwa, me Apdon te Maikago ogwa, me Safan te kingo kuskus, me Asaia, king aga ofisa bidi, augwali i olama asao po wali. Augwali asela silibo si, teda agai augwalibolo te po wali,
2CH 34:21 “Te bomai po buku eno megi sali da, tede Genuai Bidigo homugo dago wali pomainu homu yali po e bukude haninama te wali dao. Tiali goli dago wąį nǫų dabego te po wali pai menio. Tama tialima, te tama tialigo da, Genuai Bidigo da dali sębę genuai mu emainu ilali dao. Tiali goli dago megi Genuai Bidigo te buku polo te sali dao. Tama tialima, eno homugo dage pelama, Genuai Bidibolo hanalugi pao, tama ena dali Israel bulude bidibo we bidi me Juda bulude bidibo we bidi, dago mena sę emainu egowe page sugi piąo,” king Josaiago te po wali.
2CH 34:22 Te bidi dabe augwaligo kingo po polo oda sali. Tialima augwali Jerusalemde te gesi be naniba pali, te profet we aga nogi Hulda dali po wainogo pali. Hulda aga Salumgo we dao, te bidigo te pris bidi dabego aubo nai dabe munalubo pesage tonalubo bidi dao. Salum aga te Tokhatgo ogwa dao, tama aga wąį Hasra dao. Hulda agai te bidi dabego po odama da,
2CH 34:23 teda agai augwalibolo te po wali, “Genuai Bidi, da Israel dabego God, agai te po walio, ‘Dage te dage tagala palali te bidi pageba ma pao, tama agabolo e tama po walao,
2CH 34:24 “Ena God ena Genuai Bidi, eno te augwaligo te kingbolo neda mani te bukude bomai po wali paibao, tama eno te Jerusalem me te taunde we bidi dabeba dene mawaibao.
2CH 34:25 Te we bidi augwaligo enaba tudi ola menama, tama augwaligo tibo god dabeba ofa yai dao. Tama augwaligo te dwai kolesagago eno augwali dali sębę emainu ilai dao. Eno te Jerusalem dabe dali sębę mu elama, tama eno te sębę munu me siligobeo.
2CH 34:26 Tialima megi ena Genuai Bidi dage Israel dabego God, eno dagego kingbolo e tiwai po wainogo ebao, te augwaligo te buku nageba neda mani sogo,
2CH 34:27 nago koneani, eno mena sę te Jerusalemba iyu, me tede bidibo we bidibolo eno yaibao wali sę po nago koneani dao. Tama nago te po odali sogo nago naga digi aiyaba eno gedude aiyaba elaluai dao. Tama me ma nago naga ugwa pisąlama, tama nago enaba gela olama, tama enaba i walio. Tama tialima, ena Genuai Bidi eno te po te obao, eno nago i wali po polo odalio.
2CH 34:28 Tama eno te dolobo sę Jerusalemde pedalobo sumainu polo sula tagalogobeo. Menio. Nage bugagia naga mu bidaibao. Tiali goli nosali nage isilama, tama augwaligo nage polo pubulai digi da, teda eno te Jerusalem me tede bidibo we bidi dali sę tama dolaibao,” te po te dage tagala palali bidibolo walao,’ God Genuai Bidigo te po wai,” te we Huldago te po wali. Profet we Huldago Genuai Bidigo po te bidi dabe augwalibolo polo pusa silibo si, teda augwaligo te po king pageba ma sela pali.
2CH 34:29 Tialima king Josaiago tigidali Judade me Jerusalemde tobolu bidi dabe i olama sisinagasali.
2CH 34:30 Tama kingo te pris dabe me Livai dabe me tigidali Juda me Jerusalem we bidi sisinani, te nogi yai bidi dabe dali te nogi meni yai bage me, tama augwali Genuai Bidigo tempel beba sisinigi pali. Augwali sisinama, tama agai augwaligo Genuai Bidigo tempel be tomode sali Bomai Po buku selama, tama agai te tigidali bukude po augwalibolo neda mani.
2CH 34:31 King aga pesagede dolaluyu, tama agai Genuai Bidi dali po dąų wali. Te agai te we bidigo te bukude elalubo po tigidali wali paibao olama, po dąų wali. Agai po dąų weyu te po wali, “Eno tigidali kolesaga me homu kolesaga sese deli naga yaibao, te Genuai Bidigo tigidali bomai po me tigidali po wali paibao,” wali.
2CH 34:32 Tama kingo te Benjamin hani me gasa hani te Jerusalem tomode bidibo we bidi augwaligo Genuai Bidigo kontrak po wali paio po dąų waiąo po bomo yali. Tama tialima nosali te Jerusalem we bidi augwaligo te augwa wąįgo God dali dąų walali po tigidali wali pali.
2CH 34:33 Te Israel bulu tigidali badu te tibo god dabego piksa dabe sese me elaluali. Tama te nai dabe te Genuai Bidigo gedude dwai nai mu elaluali. Tialima Josaia agai te tibo god dabego nai dabe sese tama sela sąyani. Tama agai bomo elama, te Israel dabe augwaligo Genuai Bidi augwa God wali pao po wali. Tama aga king bidibo sogo da, te we bidi augwaligo Genuai Bidi augwa wąįgo God wali bomo elama mu wali pali. Tama augwaligo Genuai Bidi me tagalobeo.
2CH 35:1 Te king Josaiago pode augwaligo genuai nai mu ulali, te Israel dabe augwali te Isipde wiegila bidimainu sula tagalali sogo, te Pasova sogo wabo, te kone palebo nai ulali. Augwali Jerusalemba sisinagasali, tama te namba 14 deide, te namba wan poluade, augwaligo sipsip kibu gǫų hauwa elali, te genuai sogo kone paliyu.
2CH 35:2 Tama Josaiago te pris dabe dodolama, tama augwali deli deli augwa sę te Genuai Bidigo tempel be tomode ma yao po wali, tama me agai augwaligo homu dąų walali augwaligo te sę bugagia emainu.
2CH 35:3 Tama me agai Livai dabebolo po me deli mani. Augwali te Genuai Bidigo hani mu dao, tama augwaligo Genuai Bidigo po Israel we bidibolo ola maiabo sę elaluali. Agai po da e tama dao, “Dage pelama, tama Genuai Bidigo te Dąų Wali Bomai Po Munalubo Halobage te Genuai Bidigo tempel be tomoba mugi piąo. Polobadu king Solomon king Devitgo ogwago te tempel be nigai dao. Megi da, dagego polobadu yali gilama te halobage tolasa ugwa eda yabo menio. Tama tialima dagego Genuai Bidigo tempel be tomode sę bugagia iyąo, te dago God dao. Tama me dagego Israel we bidi, te Godigo we bidi, tau sao.
2CH 35:4 Dage deli deli bidi wąį tomode deli deli bidi dabe dage tomode Genuai Bidigo be tomode deli tobage sę ebo bidi dabe dage gasa bidi wąį hani tomode doligi peyu yao, te king Solomon me king Devitgo te bukude asęani po yali gilama.
2CH 35:5 Dage deli deli hani bidi dagego te deli deli wąį dabe tau sabo sę kegaluao, te Israel hani tomode meba gasa bage tau sabo gilama.
2CH 35:6 Dagego duga digi Godigo gedude wiegi yai pedaliąo. Tama dagego sipsip kibu gǫų dabe eliąo, te Godigo Israel Dabe Augwali Isipde Bugagia Bidimainu Ilali Sogo, te Pasova Sogo kone paliyu ofa yabo. Tama dagego te ofa yabo nai dabe dola muao. Te meba Israel dabe augwaligo te ofa ebo bomai po bugagia wali pomainao, te Genuai Bidigo Mosesbolo walali gilama,” king Josaiago te po wali.
2CH 35:7 Te Josaia agai aga obo tomode sipsip gǫų hauwa, me meme kibu gǫų, me kau kibu omai hauwa selama, te we bidibolo mani, te augwaligo ofa emainogo. Te sipsip kibu gǫų me meme kibu gǫų te 30,000 usu nama, tama sese tama te kau kibu omai dabe te 3,000 usu nama tama.
2CH 35:8 Tama te king aga ofisa dabego me te hasa dabe hauwa mu te we bidibolo mayu, me pris dabebolo me Livai dabebolo mayu yali, te augwaligo ofa emainogo. Tama pris tobolu bidi Hilkia me gasa bidi me si augwaligo Genuai Bidigo be tonaluali, te Sekaraia me Jehiel, augwaligo sipsip kibu gǫų hauwa me meme kibu gǫų hauwa, te 2,600 usu nama sese tama sali, me 300 kau kibu omai sali, tama te pris dabebolo mani, te genuai sogo ofa emainu.
2CH 35:9 Tama te Livai dabego genuai bidi dabe augwali te Konania dali aga ama si ebadi, te Semaia me Netanel, me Hasabia, me Jeiel, me Josabat, augwaligo sipsip kibu gǫų hauwa me meme kibu gǫų hauwa te 5,000 usu nama sali, tama 500 omai kau kibu selama, tama augwaligo te Livai dabebolo mani, te augwaligo te genuai sogo ofa emainu.
2CH 35:10 Te augwaligo ofa yabo nai dabe tigidali dodola silama, teda te pris hani me Livai hani augwali augwa bidibo pesage te alta pąba doligi pali, te kingo wali gilama.
2CH 35:11 Te Livai dabe augwaligo te sipsip me meme kibu ela silama, tama augwaligo te hasa dabego kaneme dabe te pris dabebolo mani. Tialima pris dabe augwaligo te kaneme dabe te altaba sądubadi te Livai dabego te hasa dabego wali dagabo sę iduali.
2CH 35:12 Tama te Livai dabego te kibu mi dage dabe meba selama, tama augwaligo te deli deli hani we bidi dabebolo mena mena pali, te augwaligo Genuai Bidiba ofa emainu, te genuai sogo te Godigo Israel Dabe Bugagia Bidimainu Sula Tagalali Sogo te kone palabo, te bomai po te Mosesgo bukude elalubo po yali gilama. Tama Livai dabe augwaligo deli tiwai kolesaga naga te kau kibu augwaligo elali kibude yali.
2CH 35:13 Tama te Livai dabego te sipsip kibu mi me meme kibu mi augwaligo te isi daide ulali, te ofa ebo bomai pode wali gilama. Tama me augwaligo te kau kibu mi selama, augwaligo te senede uluyu, me prainpende uluyu yali. Te kibu mi polo dabo si, augwali polo tama te we bidibolo dobagi pali.
2CH 35:14 Tama nosali te Livai dabego augwa kibu mi dodola muyu, me Arongo hani pris bidi dabego kibu mi dodola muyu yali. Te pris dabe augwa digi augwa kibu mi dola muabo usu meni yai. Magi baso meni, augwaligo te ofa ebo kibu mi me ili te uludubadi te giliga dega saboba mu usu nigi pali.
2CH 35:15 Tama te Asap hanigo Livai dabe, augwali te tęąbi po weyu me musik eliyu ebo bidi dabe dao. Augwali te Genuai Bidigo be tomode augwa dolobo pesagede dolaluali. Te polobadu te king Devit, me Asap, me Heman, me Jedutun te kingo profet te Asap hanibolo ya wali gilama tama tiali. Tama te Livai dabego te Genuai Bidigo tempel be sunumi tonalubo sę elaluali, augwali te deli deli sunumide dolalua pali, te Genuai Bidigo bede. Te hani augwaligo te sę ebo pesage taga pabeo. Magi baso meni, te meba Livai dabego augwaligo nai dabe dola mubaso.
2CH 35:16 Te sogo Israel dabego nai ulali, te Pasova Sogo, te genuai sogo nai ulali, tama augwaligo isigo mu dela silibo ofa te Genuai Bidigo altade sese tama ulali. Te king Josaiago augwalibolo wali gilama tama yali.
2CH 35:17 Te Israel we bidi augwali sese tama te Jerusalemde te sogo bidali. Augwaligo te tulama, tama me augwali nogo a naga olama me badu nogo si, te 7 tama sogo augwaligo te Yis Meni Yai Bret Tubo Genuai Sogo bidali.
2CH 35:18 Augwaligo te Pasova nai ulali te wiegi yai mu pedelali. Te nai ulaligo te polobadu Israel dabego te sogo kone paliyu ulali nai dabe mu edelali, te profet Samuelgo side gagalama aselama, te megi te king Josaiago siba usu nagasali. Te meba king dabego te be posobo sogo augwaligo wiegi yai te king Josaiago me te yali tiwai me yai menio, te king Josaia, me te pris dabe, me Livai dabe, me Juda dabe, me Israel dabe, me Jerusalem dabe augwaligo megi yali tiwai me yai menio.
2CH 35:19 Augwaligo te nai te Josaia aga king bidibadi te kibu be 18 wabode ulali.
2CH 35:20 Te king Josaiago te Genuai Bidigo tempel be dodolobo sę silibo si, teda te Neko, te Isip king bidi, aga Isip ami bidi dabe selama, tama augwali te Karkemis te ąį Yufretis sesege taunba pali, te boi bidi dabe dali hwįainu. Josaia agai te tama tiali po odali, tialima Josaia aga ami bidi dabe selama, tama te Isip dabe dali hwįainogo pali.
2CH 35:21 Tiali goli king Nekogo Josaiabolo po ola toliyu, te po wali, “Juda dabego king, odao, eno nage dali sębę menio, tama ena nage dali hwįainu me asobeo. Tama tialima, nago magi baso nago ena dali hwįainogo ebawe? Eno da ena boi bidi dabe dali naga boi hwįainogo ebao. Tama God ena dali bidiyu, tama enabolo polo hwįgi pao po wali. Tama tialima, nago aga paligio. Tiyu, agai nage dolabuo,” te po wali.
2CH 35:22 Josaia agai te po Godigo king Nekogo pedauwalidu pusali po odali. Tiali goli agai tobolu gagea pelama, tama agai hwįabo homu naga yali. Tama tibaso, agai kingo gudubo ugwa hųgia sąnama, tama agai gasa ugwa me gudali, te Isip dabe augwaligo aga konea pidali weyu. Tama agai aga ami dabe selama, tama augwali te Megido dabego odogo malu buluba pali, tama augwaligo Isip dabe dali hwįani.
2CH 35:23 Augwali boi hwįdubadi, te Isip dabe augwaligo enesigi kegelama u badu Juda dabe bidaloboba ene enani. Tama ene me deligo Josaia enani. Tama tialima agai aga sę bidi dabebolo te po walali, “Ena nai genuai mu polo dolalio. Dagego ena sela peyu, tama hwįbo pesage taga piąo,” wali.
2CH 35:24 Tialima augwaligo aga te bididuali te karisde selama, tama augwaligo aga gasa karis meba odasa pelama, tama aga Jerusalemba odasa pali. Tama aga isibaso, augwaligo aga te king dabego gų pagede pubulali. Tama te Juda me Jerusalem we bidi augwaligo te Josaia polo isai baso, augwaligo aga hobede ebaso gela wali.
2CH 35:25 Tama profet Jeremaiago Josaiade hobede tęąbi po me deli asęani. Tialima megi me te tęąbi po wabo we bidigo te hobede tęąbi po me wabo dao, te king Josaia kone paliyu yabo. Tama te hobede ebo sogo tigidali sogo te Israel dabe augwaligo te hobedai tęąbi po wabo dao. Te hobedai tęąbi po te hobedai tęąbi dabe elalubo bukude te elalubao.
2CH 35:26 Te king Josaiago yali sę dabe po me agai kolesaga po me, te aga king pedelali sogo gagalama tama isaliba usu nagasali po dabe, te buku augwaligo Israel Me Juda Dabego King Dabego Po Buku wabo, te bukude te elalubao. Te bukude te Josaiago Genuai Bidi bugagia mu wali peyu, me agai bomai po wali pali po me te pusai te elalubao, me agai te wiegi yai kolesaga yali po me tede elalubao.
2CH 36:1 Te Josaia isai nosali badu, te Juda dabe augwaligo Joahas sali, te Josaiago ogwa, tama agai tobolude wel gelali, te agai augwaligo king pedalomainu sa muyu, te aga Jerusalemde king bidimainogo.
2CH 36:2 Te Joahas aga Juda dabego king pedelali sogo, agai kibu be 23 elaluali, tama aga Jerusalemde king bidibadi polua sela digi tama yali.
2CH 36:3 Tama te king Neko Isip king te Jerusalemba aselama, tama Joahasgo king sę sela sąyagasali, tama Joahas aga king ma bidibeo. Tama king Nekogo te Juda dabe augwaligo agabolo te takis mone te 3,400 kilogram silva mayu, me 34 kilogram gol mayu yao po wali.
2CH 36:4 Tama king Nekogo Eliakim, Joahas aga ama selama, tama Eliakim te Juda me Jerusalem dabego king nigilali. Tama Neko agai Eliakimgo nogi hasegelama, tama agai nogi Jehoiakim polali. Tama nosali Neko agai Joahas Isipba kalabus elama odasa pali.
2CH 36:5 Te Jehoiakim aga king pedelali sogo agai kibu be 25 elaluali, tama aga Jerusalemde king bidibadi kibu be te 11 kibu be bidali. Jehoiakimgo Godigo gedude dwai kolesaga iyu yali, te aga Genuai Bidi gedude.
2CH 36:6 Tialima king Nebukatnesar te Babilon bidigo te Juda dabe dali hwįagaselama, tama Jehoiakim kalabus elama, tama aga sengo haliga gebelama, tama Babilonba odasa pali.
2CH 36:7 Tama Nebukatnesargo te Genuai Bidigo tempel bede munalubo dis me plet dabe te Babilonba sela pali, tama aga kingo bede muani.
2CH 36:8 Te king Jehoiakimgo yali sę po dabe aga king pedelali sogo gagalama yali sę dabe me te buku augwaligo te Juda Me Israel Dabego King Dabego Po Buku wabo, te bukude te elalubao. Te bukugo te dwai damua pai kolesaga me dwai kolesaga te Jehoiakimgo yali po te bukude pusai te elalubao. Tama aga ogwa Jehoiakingo agai pesage selama, tama aga king pedelali.
2CH 36:9 Te Jehoiakin aga Juda dabego king pedelali sogo agai kibu be te 18 kibu be elaluali. Tama aga Jerusalemde king bidibadi polua sela olama, tama nogo si te 10 sogo aga te Jerusalemde king bidali. Jehoiakin agai Genuai Bidigo gedude dwai kolesaga mu yali.
2CH 36:10 Te kibu bede te kedau sogo silainu ebadi, king Nebukatnesargo te ami bidi dabe tagala palama, Jehoiakin kalabus igi pelama, tama Babilonba odasa pali. Tama me te ami dabe augwaligo te Genuai Bidigo tempel bede munaluai te dis dabe me plet dabe te Babilonba sela pali. Tama Nebukatnesargo te Sedekaia, te Jehoiakin aga ama, te Juda dabego king Jerusalemde bidimainu magi ilali.
2CH 36:11 Te Sedekaia aga king pedelali sogo agai kibu be 21 elaluali, tama aga Jerusalemde king bidibadi nogo si olama deli tama kibu be bidali.
2CH 36:12 Sedekaiago te Genuai Bidi aga Godigo gedude dwai kolesaga yali. Tama te profet Jeremaiago te Genuai Bidigo po agabolo pusa mabo sogo, agai aga digi aiyaba elaluama tama agai po odobeo. Menio.
2CH 36:13 Sedekaia aga sębę mu elama, tama aga homu begelebo hagela elama, tama aga Genuai Bidi te Israel dabego Godiba ma asobo hagela mu yali. Nebukatnesargo Sedekaiabolo te Godigo gedude te ugwa dagalu bidigo gedude tigidali sogo Nebukatnesar agai po naga wali paibao po dąų omainu ilali. Tiali goli Sedekaia aga tobolu gagea pelama, tama aga Nebukatnesar dologode munu me bidibeo.
2CH 36:14 Tama me te pris dabego tobolu bidi dabe me te we bidi augwaligo Genuai Bidiba tudi ola mabo genuai mu elama, tama dwai damua pai gasa we bidigo ebo kolesaga wali pali. Tama augwaligo te dwai kolesaga ebogo te Genuai Bidigo te Jerusalemde te aga be dao olama sa muani, te be agai gedude dwai meda yai mu pedelali.
2CH 36:15 Tiali goli Genuai Bidi augwa wąįgo God agai aga we bidi me aga be dali dolobo hagela yali. Tama tibaso, agai te profet dabe hauwa mu agai po te we bidi dabebolo pusumainogo tagala palidu geani. Magi baso meni, agai augwali hobede mu ebaso.
2CH 36:16 Tiali goli te we bidigo te augwaliba tagala palali te bidi dabe posobo po weyu yali, tama augwaligo homugo tiali augwaligo po te olo nai tiwai dao homu yali. Tama augwaligo te profet dabe olo nai gagaliyu yali. Tama tibaso, Genuai Bidigo aga we bidi dabe hagela mu elama, tama augwali dali sębę genuai mu yali. Tama augwaligo agai augwalibolo tagala palainu ebo te dwai sę geda muabo usu egobeo.
2CH 36:17 Tialima Genuai Bidigo te Babilon king aga ami bidi dabe dali augwaligo te Juda dabe dolomainu tagala palali. Te Babilon dabe augwaligo te Juda dabego gesi bidi te tigidali Jerusalemde ela siliyu, me te Genuai Bidi aga bede ela siliyu yali. Kingo Juda dabe hobede dwasianu me ebeo. Mu menio. Te Babilon dabe augwaligo te Juda dabe gesi bidi me gesi wegi sese tama, me monu dabe, me te mosi dabe mu yai bage pąde tama te isabo ąǫ yai bage te Genuai Bidigo te Juda dabe sese tama te Babilon kingo nogoba muani.
2CH 36:18 Tama te Babilon kingo te haniani genuai me dwasianu dis dabe, me Genuai Bidigo tempel bede plet dabe, me Genuai Bidigo bede wiegi wiegi yai nai dabe siyu, me Juda dabego kingo doado bage, me aga ofisa bidi dabego doado bage siyu yali, te king aga ofisa dabego nai dabe sali, tama agai sese tama Babilonba selasa pali.
2CH 36:19 Tama te Babilon ami bidi dabego Genuai Bidigo be sia uluyu, me kingo be me sia uluyu, me Jerusalemde genuai genuai be dabe sese tama isi ulali. Tama augwaligo te taunde tigidali wiegi wiegi yai nai dabe sese tama dolama tagaliyu, me te taungo obo aluama tagaliyu yali.
2CH 36:20 Tama te Babilon kingo te we bidi te boide elisąma yali we bidi sese tama te Babilonba kalabus elama selasa pali. Tama te Juda we bidi augwali te Babilon king dabego olo sę ebo bidi we bidada pidubadi, te kantri Persia boma pai mu pedaliyu, tama te kantri Babilon aiyaba elalubo sogoba usu nagasali.
2CH 36:21 Te Israel dabe augwali augwa tǫde bidibo sogo, augwaligo augwa tǫ tigidali namba 7 wabo kibu bede augwaligo olo me tagalai menio. Tama tialima, augwali te Babilonde kalabuside bidibadi augwaligo tǫ olo bugagia toma tuyu, kibu be 70 olo toma tuali, te Genuai Bidigo te profet Jeremaiago pedauwalidu pusali po usu nigi pali.
2CH 36:22 Te Sairus aga kantri Persia king bidibadi kibu be deli wabode, Genuai Bidigo Sairusgo homu hogodolama, tama agai po me wali. Agai te po asęnama, tama agai te tonalubo tǫ tigidaliba tolali. Tama te po sela pabo bidi dabego te po augwaligo te we bidibolo neda mao wali. Te sę pedelali te polobadu Genuai Bidigo profet Jeremaiabolo menama, tama Jeremaiago te Israel we bidibolo pusali poba usu nagasali.
2CH 36:23 King Sairusgo te po e dao, “Genuai Bidi God da, te tigidali dagalude elalubo nai tonalubo God dao. Tama agai ena Sairus te tigidali tǫ tonalubo bos bidi nigilai dao. Megi agai enabolo agai be me deli Jerusalemde sę yao po wali, te Juda bulu distrikde. Genuai Bidi dage Israel dabego God aga tigidali aga we bidi dage dali tigidali sogo bidaibao. Tama megi da, dage duga buluba ma piagameo, te Jerusalemba,” te Persia dabego king Sairusgo te po asęna tolali.
EZR 1:1 Te hasia kibu be tede te bidi Sairus te Persia kantri tǫ pedaide king bidali sogo, God Genuai Bidigo aga homu hodolama, tama agai po me deli walio. Agai te po asęnama, tama agai te tonalubo tǫ pedai tigidaliba tolali. Tama te po sela pabo bidi dabe augwaligo te we bidi dabeba nedemainu yalio. Te sę pedelali, te Genuai Bidigo te polobadu bidali profet bidi Jeremaiabolo po menama, tama Jeremaiago te Israel dabeba pusali po me deli te poba usu nanio.
EZR 1:2 Te king Sairusgo po te tiwai, “God, Genuai Bidi, te tigidali dagalude nai tonalubo bidi, tama agai ena Sairus sa munama nigilali, te tigidali tǫ pedai tonalubo bidi pedalumainu ilali. Megi da, te agai enabolo weyu, te agai be me deli te Jerusalem taun, te Juda tǫ pedaide sę yao po walio.
EZR 1:3 God te dage Israel we bidi dali bidibao, dage aga we bidi dao. Polobadu te boi bidi dabego dage te duga page bulude selama, tama dage te digibulu odasa pelama, tama megi dage eno bulu tǫ pedaide bidibao. Tiali goli, megi dage Israel te Jerusalemba ma piagameo, te duga Genuai Bidi Godigo taunba pelama, tama agai be ma sę igi pagameo,” wali. “Tama dage te Israel dabe megi bidalubo taunde bidibo te gasa we bidi dabe, dagego augwali tau selama, tama wiegi yai nai hauwa augwaliba mao,” wali. “Tama augwa te Jerusalemba sela pelama, te Godigo be ma sę igi pomainao. Dagego te Israel dabeba te silva me gol meba mayu, te nai dabe me maiąo,” wai. “Tama te nai dabe sela pabo kibu donki dabe meba augwaliba mao,” wai. “Tama te Israel dabeba te kibu hasa dabe te Godiba aga te bede ofa yabo nai dabe mao,” king bidi Sairusgo te po wai dao.
EZR 1:5 Tama tialima, Godigo te Judago tobolu bidi dabe hani me, te Benjamingo hani me te homu hodoliyu, tama te pris dabe me, Livai dabe me, tama te gasa bidi dabe me, te augwali homu hodolama, tama augwa te Jerusalemba pelama, te Genuai Bidigo be ma sę igi pabo doado bage dabe sisi yai dao.
EZR 1:6 Tama gasa hani dabe te Israel pąde bidali bagego augwali tau siyu, tama augwaligo te silvago nigai dis genuai pou mayu, te gol me mayu, te nai me augwaliba mawai. Tama augwaligo gasa wiegi yai nai me mani, tama te Godigo bede ofa yabo hasa dabe me manio. Tama augwaligo te Israel dabeba te nai dabe sela pabo kibu donki dabe me manio.
EZR 1:7 Tama te king Sairusgo te Godigo tempel bede mubo genuai pou dis dabe te Israel dabe augwaba ma manio. Polobadu king Nebukatnesargo te dis pou dabe te Godigo bede sali, te agai Israel dabe dali boi hwįnama, tama te Jerusalem aiyaba elaluali sogo te dis pou dabe sai dao. Tama selasa asama, tama agai te dis pou tigidali te aga god dabego be tomoba muai dao, polobadu.
EZR 1:8 Tialima, king Sairusgo te nai dabe te Mitredatba mani, te kingo mone mubo be tonalubo bidibolo menama, tama Mitredatgo te augwali nedelama, tama te Sesbasarba mani, te Juda dabe augwa tonalubo polalubo tobolu bidi dao.
EZR 1:9 Te nai dabe e tama dao: 30 dis gol te ofa ebo nai, tama 1,000 dis silva te ofa yabo nai, tama te 29 gasa dis pou dabe, te tama mawai,
EZR 1:10 tama te 30 dwasianu dis gol, me te 410 dwasianu silva dis, me te gasa 1,000 dis te Godigo bede muabo nai dabe te mawai dao.
EZR 1:11 Te tigidali dis gol pou me, silva dali, te gasa nai dali deli taluyu, te namba e dao, 5,400 dao. Tama Sesbasargo te nai doado bage dabe sali, tama aga dali te gasa Israel bage dali augwaligo te bulu Babilon tagalama, te Jerusalemba soali sogo, tialima augwaligo te nai dabe selasa peyu pai dao.
EZR 2:1 Te Israel dabe hauwago te Babilon tǫ pedai tagalama, tama Jerusalemba ma pali, tama te gasa Juda pedai badu me pai, tama augwa hanigo page buluba palio. Te Israel dabe te Babilonde sesabi mu elama, bobobage sogo mu bidalio, te king Nebukatnesargo bidali sogo te Juda haniba hwįgi pelama, tama we bidi hauwa kalabus elama, tama augwali te Babilonba sela pai dao.
EZR 2:2 Te Juda dabe augwa tobolu bidi dabe nogi te tiwai dao, Serubabel, Josua, Nehemia, Seraia, Relaia, Mordekai, Bilsan, me Mispar, Bikvai, me Rehum, me Bana, te tama dao. Te tobolu bidi dabe te Juda dabe dali augwa page buluba ma pali. E da te Israel hani dabego nogi dao, te dali te deli deli bidi dabego hani bidi te Jerusalemba ma pelawali namba dao. Te hanigo namba e tiwai elalubao.
EZR 2:3 Te Parosgo hani bidi 2,172 elaluali.
EZR 2:4 Tama Sefatiago hani bidi 372 bidali,
EZR 2:5 tama te Ara hani bidi 775 elaluai.
EZR 2:6 Te Pahatmoap hani, te Jesua me Joap sigo bulali wai hani bidi, augwali te 2,812 bidi elaluali.
EZR 2:7 Te Elam hani bidi 1,254 elaluai.
EZR 2:8 Tama te Satu hani bidi 945 elaluali.
EZR 2:9 Te Sakai hani bidi 760 elaluai.
EZR 2:10 Te Bani hani bidi 642 bidi bidai.
EZR 2:11 Tama te Bebai hani bidi 623 bidi bidali,
EZR 2:12 tama te Asgat hani bidi 1,222 bidi bidai.
EZR 2:13 Te Adonikam hani bidi 666 bidi bidali,
EZR 2:14 tama te Bikvai hani bidi 2,056 bidi bidalio,
EZR 2:15 tama te Adin bidi hani te 454 bidi bidai.
EZR 2:16 Te Ater hani bage, te agai gasa nogi me Hesekia, te hani bidi 98 bidali,
EZR 2:17 tama te Besaigo hani bidi 323 bidali.
EZR 2:18 Te Jorago hani bidi 112 bidi bidai,
EZR 2:19 tama te Hasungo hani bidi te 223 bidai,
EZR 2:20 tama te Gibargo hani bidi te 95 bidi bidai dao.
EZR 2:21 E da te Juda dabego taun nogi hauwa dao. Te taun dabe te Juda tǫba ma pali bidi hani dabe augwa wąį dabego page bulu taun dao. Te Betlehem taun bidi dabego namba te 123 dao,
EZR 2:22 tama te taun Netofa bidi te 56 elaluai,
EZR 2:23 tama te taun Anatot te 128 dao,
EZR 2:24 te taun Asmavet bidi 42 elaluali.
EZR 2:25 Te Kiriat Jearim taun bidi dabe, me te Kefira, me Berot taun bidi dabe te 743 dao.
EZR 2:26 Tama te Rama me Geba taun bidi dabe te 621 bidali,
EZR 2:27 tama te Mikmas taun bidi te 122 dao.
EZR 2:28 Te taun Betel me Ai te bidi te 223 dao,
EZR 2:29 tama te Nebo taun bidi 52 bidai,
EZR 2:30 tama te Makbis taun bidi 156 bidai dao.
EZR 2:31 Tama te Namba 2 Elam bidi dabe 1,254 dao,
EZR 2:32 tama te Harim taun bidi te 320 dao.
EZR 2:33 Tama te Lot, me Hadit, me Ono, te taun bidi dabe te 725 dao.
EZR 2:34 Tama te Jeriko taun bidi dabe te 345 bidi hani bidai dao.
EZR 2:35 Tama te Sena taun bidi hani te 3,630 dao.
EZR 2:36 Te pris hani dabego nogi dali, te Jerusalemba ma pali pris dabego namba dali, te tiwai elalubao. Te Jedaia hani, te augwa ayago wai te Jesuago hani bidi, te 973 elaluali.
EZR 2:37 Te Imergo hani bidi 1,052 bidi elaluai dao,
EZR 2:38 tama te bidi Pasurgo hani bidi te 1,247 bidi elaluali,
EZR 2:39 tama te bidi Harimgo hani bidi te 1,017 bidi elaluai dao.
EZR 2:40 Te Livaigo hani dabe nogi dali, te Jerusalemba ma pali Livai dabego namba dali, te e tiwai dao. Te Jesua de Katmiel sigo hani bidi te 74 elaluali. Te bidi si augwa bulali wąį te Hodavia dao.
EZR 2:41 Te Godigo tempel bede musik wabo hani bidi dabe augwali te Asapgo hani bidi te 128 bidi bidali.
EZR 2:42 Te Godigo tempel be tonalubo bidi dabe, augwali te tama hani bage Salum, me Ater, me Talmon, Akup, Hatita me Sobai. Tama augwali te 139 bidi dabe elalualio.
EZR 2:43 Te Godigo tempel be tonalubo sę bidi dabe te Jerusalemba ma pali bage, augwali te bidi dabego hani dabe da, Siha, Hasufa, Tabaot,
EZR 2:44 me Keros, Siaha, me Padon,
EZR 2:45 te Lebana, me Hagaba, me Akup,
EZR 2:46 me Hagap, me Samlai, Hanan,
EZR 2:47 tama me Gidel, Gahar, Reaia,
EZR 2:48 Resin, Nekoda, me Gasam,
EZR 2:49 me Usa, Pasea, Besai,
EZR 2:50 me Asna, Meunim, me Nefisim,
EZR 2:51 Bakbuk, Hakufa, Harhur dao.
EZR 2:52 Te bidi nogi me Baslut, Mehida, Harsa,
EZR 2:53 Barkos, Sisera, Tema,
EZR 2:54 Nesia, me Hatifa.
EZR 2:55 Te hani bidi dabe augwali te bidi Solomongo sę bidi nogi yali, augwali me te augwa page buluba ma pali. Augwali te hani bidi dabego hani bidi dabe da, Sotai, Hasoferet, me Peruda,
EZR 2:56 me Jala, Darkon, Gidel,
EZR 2:57 Sefatia, Hatil, Pokeret Hasebaim, me Ami, te tama dao.
EZR 2:58 Te Godigo tempel bede sę ebo bidi dabe, me te Solomongo sę yali bidi dabe, te augwa page buluba pali bidi dabego namba e tama, te 392 dao.
EZR 2:59 Te Delaia me Tobia, Nekoda, te hani bage bidi namba te 652 elaluai. Augwali taun Telmela, Telharsa, me Kerup, Adan, me Imer, te taun page bidi dabe dao. Tiali goli, te hani bidi dabego te augwa bulali te wąįgo nogi kuna konesiąwai. Tama tiyu, augwaligo te Israel tuni bidi dabebolo augwa wąį dabego nogi ola maiabo sunumi te bugagia konesiąwai, augwali te Israel bagewe, ma meniwe, te subeo.
EZR 2:61 Te pris hani dabe te pris bage mebago te augwa wąį dabe nogi te tigidali pris hani nogi elalubo bukude gegebo sę yali, tiali goli augwaligo nogi elalubo me subeo. Tama tialima, te augwali te pris da po wabo te sunumi ola maiabo te bugagia mu me konebeo. Te pris hani bage nogi te tiwai, Habaia, me Hakos, me Barsilai. Te polobadu te Barsilaigo wąįgo te taun Gileatde bidali bidi nogi Barsilaigo wegi me deli sali, tama te wąįgo te aga ayago wąįgo nogi hasegelama salio. Te hani bidi selago te augwa wąįgo nogi me susiąbadi elaluali, tama te hetman dabego homugo te augwali olo bidi dabe naga dao homu yali, tama augwali te augwaligo pris bidimainu me ilibeo.
EZR 2:63 Tama te Juda dabe augwa polalubo gavman bidigo te bidi dabego te Godiba ofa ebo nai te tugio olama, te augwali habu selali. Agai te po wai, augwaligo te pris tuni bidi me deli pedalubaso da, teda te polalubo prisgo te dwasianu masigi side te po elalubo sulama, te Godigo homu sumainao, tama Godigo te po omainu yaibao, te bidi dabe augwali te pris sę emainao po wagowe, ma te subo dao.
EZR 2:64 Te tigidali Israel bage augwa page buluba ma pali bidi namba te e dao, 42,360 dao.
EZR 2:65 Tama augwa sę bidi me sę ebo we dabe namba te 7,337 dao. Tama te balia wabo we bidigo namba te 200 dao.
EZR 2:66 Tama te hosgo namba 736, tama te kamel dabego namba 435, te donki dabe namba 6,720, tama te hosgo hapkas me donki te namba 245 dao.
EZR 2:68 Te Godigo tempel be elaluali madigi te Jerusalemba te we bidi dabe pedelali sogo, te augwa hani tobolu bidi mebago te Godigo be ma sę ebo tau saio homu godolo yali. Tama tibaso, augwa te sę yainu te me badu dwagi yai nai dabe mani. Augwaligo te be te polobadu sę yani tǫde ma sę yainu yalio.
EZR 2:69 Te doado bage umabo elalubo bidi dabego te nai hauwa mani, tama te dwasianu nai elalubo bidi dabego te dwasianu nai mawai. Te Israel dabego mani tigidali golgo sęgę te 500 kilogram yali, tama te mani silvago sęgę, te 2,800 kilogram tama yali, tama augwaligo te prisgo gudubo ugwa te 100 manio.
EZR 2:70 Te pris dabe me, Livai dabe me, te meba we bidi te Jerusalem tomode bidali, tama pąde me bidali. Tama te musik wabo bidi dabe, me te tempel be tonalubo wasman, me te tempel bede sę ebo bidi dabe, augwali te taun te Jerusalem pąde bidigi pai. Tama te gasa Israel we bidi tigidali te augwa hanigo polobadu bidali page buluba pelama, bidigi pai dao.
EZR 3:1 Te 7 polua pedalubo sogo, te Israel we bidi dabe te taun dabede bidada pela silalio. Tama te poluade te augwaligo deli homu eyu, tama tigidali Jerusalemba sisinagasalio.
EZR 3:2 Tama Josua, te Jehosadakgo ogwa, tama gasa pris dabe me, te Serubabel, te Sealtielgo ogwa, te aga deli kaneme bage me, augwaligo te Israel dabe augwa Godigo alta ma nigali. Augwa te daiba ugwadu munama te siago tigidali dabo nai muabo nai nigai. Augwa te tama tiali te bomai po me deli wali peyu, Moses te Godigo sę bidigo te bomai po wabo bukude asęai dao.
EZR 3:3 Te gasa hani bidi dabe te tǫ pedaide bidibaso, te Israel hani dabe augwali wi yali, tiali goli te tagalao homu eyu, augwa te alta te polobadu elaluali pesagede nigalio. Tama augwaligo te Genuai Bidiba mabo te siago tigidali domainu ulubo ofa gagalama yali. Augwaligo te altade ofa ebo te tigidali sogo kigamu me, te tigidali sogo pio me, te ofa yali.
EZR 3:4 Tama augwa te osogo bidabo bede bidibo genuai sogo te wali pelama bidiyu, tama augwa te bomo yai pode wali po gilama te tigidali sogo ofa yalio.
EZR 3:5 Tama augwa te gesi poluago gesi noma dei pedalubo sogo me te ofa eyu, tama te gasa tigidali genuai lotu te bomai pogo te Genuai Bidiba ofa yao wali po gilama yali. Tama te bidi dabego te ofa meba augwa homugo digi ela palio.
EZR 3:6 Te we bidi augwaligo te Godigo tempel be ma sę ebo te gagalisiąbadi, te tiali goli te namba 7 polua te dei namba wan gagalobo sogo, augwaligo te ofa dabe te Genuai Bidiba ebo gagalai dao.
EZR 3:7 Te Sairus te Persia tuni bidi kingo te Israel dabebolo te ni bǫ dabe te Lebanon tǫde sao po usu da po walio. Tama te we bidi dabego te nai mayu, te ni oliv du wel me te augwa tobolu bidi dabeba menama, tama augwaligo te bidi dabe te taun Tair me Saidonba tagala palama, te Lebanon dabego ni bǫ abelimainu yai. Tama te Lebanon dabego te ni dabe te tamu węba munama, tama te tamu węgo tolasa aselama, te Jopa taunba homugi palio. Tama me, te Israel dabego te mone te tobolu bidi dabeba menama, te masigi togobo sę ebo bidi me te kapenda bidi dabe te monego abelimainu tiai dao.
EZR 3:8 Tama tialima, te polua 2 mun, te si wabo kibu bede te nosali augwali te Jerusalemba ma aselama, augwaligo te Godigo tempel be sę ebo ma gagalali. Te tobolu bidi Serubabel, me pris Josua, tama augwa si abagi dabe tigidali, te augwali pris, me Livai, tama tigidali bidi augwali te Jerusalemba ma aselama, augwaligo te sę hodolama yali. Tama augwaligo te Livai hani bidi dabe te kibu be bidi sese deli, te 20 yia yali bidigo te sę tonalubo bidi nigilali.
EZR 3:9 Tama te Jesua te Livai hani, tama te ogwa dabe me, tama aga deli kanemego nigali bage dali, te Katmiel te Juda hani, tama aga ogwa dabe dali, augwaligo te sę tonalualio. Tama te Livai te Henadat hanigo me te augwali tau sali.
EZR 3:10 Te sę bidi dabego te genuai masigi dabe te Godigo be daga pagede mubo sogo da, teda te pris dabego te prisgo ugwa gudulama, tama te biugel selama, tama te sę ebo pesageba dolagasalio. Tama te Livai te Asap hani me aselama, augwali dali dolagasali. Tama tigidali bidi deli deligo te kapa pou si te musik ebode elainu tola sesa pali. Tama augwa te king Devitgo asęani po wali pelama, tama augwa te Genuai Bidigo nogi ugwaba sai dao.
EZR 3:11 Augwa te Genuai Bidiba wiegi yai homu pemene ebo balia po wai, tama wali balia pogo ma weyu yali, te tiwai wali, “Genuai Bidigo te wiegi yai kolesaga sesemane sogo edu, tama sesemane sogo agai te Israel dabe godolo homu ebo dao,” wai. Augwa te balia po ola silibo si da, teda nosali te tigidali we bidigo i bomonama weyu, tama Genuai Bidigo nogi ugwaba sai, magi baso meni, te sę bidi dabego te Godigo be daga pagede mubo masigi te sogo te pageba muanio.
EZR 3:12 Tiali goli, hauwa monu dabe pris, me Livai te monu dabe, me te monu dabe tobolu bidi, te augwali hani deli deligo te Godigo polobadu elaluali beba homu kone palalio. Tama augwaligo suali, te sę bidi dabego te Godigo gesi be masigi mubo sulama, augwaligo homugo te be te polobadu elaluali be tiwai wiegi yai me pedalugobe da te homu ebaso, tama augwali gela walio. Tiali goli, te gasa bidi dabego da, te wiegi yai homu pemene eyu, tama i hai wai.
EZR 3:13 Te i hai weyu gela wali te genuai mu pedelama, tama te digibulu bidali bidi dabego te odabo usu yai. Tiali goli, augwaligo te bidi dabego te homu dene eyu, te gela wabo, ma te wiegi yai homu pemene eyu i hai oba, te homu me egobeo. Augwaligo te genuai posolu kulukulu wabo naga odai dao.
EZR 4:1 Te Judago hanigo me Benjamingo hanigo boi bidi dabego te Israel dabe te Jerusalemba ma aselama, tama te augwa God Genuai Bidigo tempel be ma sę ebo wabo po odali.
EZR 4:2 Tama tialima, augwali pelama, te Serubabel me tobolu bidi dabe te Israel deli deli hani bage sugi pelama, tama augwaligo te po wai, “Da te dage dali te Godigo be sę yagasomainu ilao,” po wali. “Dago me te dagego Godiba lotu wabo dao,” po wali. “Tama te Asiria tǫ king bidi Esarhadongo da te e bulu tǫ pedaiba tagala palama bidagasali, te megi e sogoba usu nagasobao, dago te Godiba ofa ebo dao,” po wali.
EZR 4:3 Tiali goli, Serubabel, me Josua, me tobolu bidi dabego me, augwaligo te po augwaliba wali, “Dagego da te dena God Genuai Bidigo be sę ebo tau me sagasigio,” wali. “Dena digi sę yaibao, te king Sairusgo dabolo wali po gilama yaibao,” wali.
EZR 4:4 Tialima, te tǫde sesabi gana elama bidali bidi dabe, augwaligo te Juda dabe wi elama, te augwa haliga dwai ebaso, te sę tagalomainao wabo sę usu salio.
EZR 4:5 Augwaligo te Persia gavman bidi dabeba mone mani, te augwaligo homu augwaliba muagaselama, te Juda dabego sę dolomainu wialubo tiwai yalio. Augwaligo te kolesaga yali te king Sairus bidibo sogo tiali, te bidada pali te king Dariusgo aga hasegelama, te king pedalubo sogoba usu nanio.
EZR 4:6 Te king Darius isai madi, tama Serksis te bidi te Persia bidi dabego king bidai. Tama te sogo te boi bidi dabego te pas me deli asęnama, tama te Jerusalemde bidibo we bidi dabe me, te Juda gasa badu bidibo bage me, po tų ilai dao.
EZR 4:7 Tama nosali te king Serksis isibaso, tama te king Artaserksis te Persia king pedalubo side da, teda Bislam, Mitredat, me Tabel dali, te aga deli sę ebo bage, augwaligo pas me deli te kingba asęna tolali. Augwaligo te pas te Aram pogo asęnama, tama te bidigo nedebo sogo da, teda agai te Persia poba begelama, te po waibao.
EZR 4:8 Tama te provins polalubo namba wan gavman bidi Rehum dali Simsai, te provins tǫ pedaide sę ebo kuskus bidi, augwali sigo te gasa pas me deli te king Artaserksisba asęna toliyu, te Jerusalem dabe po tų ilimainogo yai. Augwaligo te tama tiwai po asęai dao,
EZR 4:9 “Siade da, king. Ena Rehum, te e provins polalubo gavman bidi, tama Simsai, te bulu tǫ pedaide sę ebo kuskus dali, te da si dali deli sę ebo bage, te augwali jas me, te nago gasa ofisa bidi dabe me, augwali te bulu Erek me Babilon, tama te Susa taun te Elam tǫde bidibo bage, dago te pas nageba tolobao.
EZR 4:10 Tama te taun Samariade bidibo gasa we bidi, me te wę Yufretis e badu tǫ pedai badu bidibo we bidi dabe, augwaligo da dali deliba pedauwali taluama, te pas asęna tolobao. Polobadu te king Asurbanipal, te genuai nogi elaluali bomai king dao, agai te bidi te augwa page bulude ela gudulama, tama augwali te tǫ pedaiba munama bidibo dao.”
EZR 4:11 “Da nago sę bidi dabe, da te wę Yufretis e badu pedai badu bidibao, dago te po meba elalubao. Tama tibaso, dago te pas nageba asęna tolobao.
EZR 4:12 King, nagebolo dago te e tama po obao. Te Juda dabego nago gasa bulu tǫ pedaide bidali taga soyu, tama te Jerusalemba ma aselama, tama augwaligo te dwai taun ma geselainu ebao. Polobadu te hanu we bidi dabe augwaligo te kingo po sela sąwai we bidi dabe dao. Tama megi te Juda dabego te taun moni masigi obo nigibo sę ma gagalama, tama te pąde tama te sę silainogo ebao.
EZR 4:13 Tama tialima, king, odao. Te augwaligo te taun dali te obo dali ma nigibaso da, teda te Juda dabego nageba te haniani takis mone me magobeo, tama tiyu nago te bulu tǫ pedai kantri tonalu tau sabo mone sǫą paibao.
EZR 4:14 Nago haniani sę ebogo da tonalubao, tama tiyu, te Juda dabego nageba dwai sę idali weyu, te dago homude hagela homu ebao. Tama tiyu, dago te pas nageba toliyu, te po nagebolo pusubao.
EZR 4:15 Dago homugo te kuskus dabeba te po walama, te augwali pelama, te gavman buku nedegi pomainu yao, te nago wąį nǫų dabe bidali sogo asęani po tede elalueibao. Te nago tama tiyu da, te augwaligo asęani pogo nageba ola mobaso, tama nago te taun Jerusalem we bidi dabe koneama, te augwali dwai hagoma ebo we bidi dabe dao. Te wąį nǫų dabe bidali sogode digi, augwaligo te kingba me, te bulu tǫ pedai tonalubo bidi dabeba me, sęgę mayu yai. Te Jerusalem dabego te king dabego po sela sąbaso, tama te pagede naga tama te king dabego te taun dolai dao.
EZR 4:16 Tama tialima, king, dago te tama po nagebolo wainogo ebao, augwaligo te taun dali te obo dali ma nigibaso da, teda nago te wę Yufretis e badu pedai badu te tǫ pedai ma tonalubo te usu me egobeo.” Te pasde po augwaligo tama asęna tolali.
EZR 4:17 Tialima, kingo augwaligo pas sulama, tama pas wei ponoyu, te tama po wali, “Siade dao, te provins polalubo gavman bidi Rehum, tama te kuskus bidi nogi Simsai, tama dage si dali deli sę eyu, te Samariade bidibo bage, me tama te gasa tǫ pedai badu te wę Yufretis u badu pedai badu bidibo bage, dageba te po obao. Eno dagego po wei ponainu ebao.”
EZR 4:18 “Dagego te tolali pas, augwaligo te Persia poba begelama, tama enaba nedalio.
EZR 4:19 Tama eno te kuskus dabeba olama, tama augwaligo te tiwai elama gegali, hauwa sogo te Jerusalem we bidi dabego te hagoma eyu, te king dabego po sela sąwai dao. Tama mu tama, te bidi dwai dabe te hanu taunde pągąnalubao.
EZR 4:20 Polobadu te bomai king dabe te Jerusalemde bidiyu, tama augwaligo te wę Yufretis te badu provins dabe tigidali badu tonaluai. Tama augwaligo te we bidi tigidalide takis mone sai dao.
EZR 4:21 Tama tialima, dagego te bidi dabeba po bomo elama waiyąo, teda augwaligo te sę tagalama, te eno digi augwalibolo te sę ma yao po obaso, te sę ma emainu yaibao.
EZR 4:22 Dage polo pelama, augwali te obo nigibo sę igio olama, hagegi pao. Tiyu, augwaligo te sę me mu ela pidu gęyu da, te augwaligo enaba dwai sę ilaibao,” kingo te po asęna tolali.
EZR 4:23 Augwaligo te king Artaserksisgo pas selama, tama te selasa peyu, te gavman bidi Rehum me Simsai, tama augwa deli sę ebo bageba selasa pelama, tama augwaligo te pasde asęani po augwaliba nedalio. Te gavman dabego te kingo po odama, tama augwaligo te ami bidi dabe selama, tama asesa polo te Jerusalemba pelama, tama bomo eyu, te Juda dabego te sę tagalomainu ilalio.
EZR 4:24 Polobadu te king Sairus bidali sogo, te boi bidi dabego te Juda dabego sę dolobaso, tama te Juda dabego te Godigo tempel be sę yali te tagalali. Tama te be sę olo elaludubadi, te Persia tǫde te Darius te king bidi pedelama tama bidiyu, te si wabo kibu be, teba usu nagasali.
EZR 5:1 Tama te kibu bede te profet Hagai, me profet Sekaraia, te Idogo ogwago ogwa, te Israelgo Godigo po pusubo gagalama pusuyu, te Juda tǫ pedai distrik te Judade me te Jerusalemde pusubo sę yai dao.
EZR 5:2 Serubabel, te Sealtielgo ogwa, me te Josua, te Jehosadakgo ogwago, te profet sigo ebo sę po odolama, teda augwali sigo te bidi dabe selama, tama augwa te Godigo tempel be Jerusalemde ma sę ebo gagalali, tama te profet sigo augwali tau salio.
EZR 5:3 Tama Tatenai, tama te wę Yufretis e badu pedaide bidali gavman polalubo bidigo me, Setar Bosenai, te ofisa bidi me deli dali, te augwa si dali deli sę ebo bagego te Israel dabego te tama sę ebo po odolama, tama augwali asesa polo te Jerusalemba palio. Tama augwaligo te Godigo be sę ebo bagebolo te tiwai po hanalu wali, “Dego dagebolo te be aga doado bage dali ma geselao po waliwe?
EZR 5:4 Tama te sę tonalubo bidi dabego nogi de dawe?” augwaligo te po hanalu wali.
EZR 5:5 Tiali goli, Godigo te Juda tobolu bidi dabe tonaluali, tama te Persia gavman ofisa bidi dabego te augwaligo sę ebo me panibeo. Menio. Te ofisa dabe augwaligo konesiąyu, te augwaligo mena tama tegowe homu yali. Tama tibaso, augwaligo te pas asęnama, te king Dariusba toloyu, agabolo te tiwai po waliyu, te Juda dabego ebo sęde menagi egowe po wali.
EZR 5:6 Tama te kingo augwaligo pas wei ponobo tonaluai. Te kingba augwaligo asęna tolali po te tiwai po wai. “Siade dao, king Darius. Nage te bugagia bidao.
EZR 5:8 King, dago homugo nago te tiwai konemainogo ebao, da te Juda bulu tǫ pedaiba pelama, tama te Juda dabe augwaligo te augwa bomai Godigo be ma sę ebo sualio. Augwaligo te be te togwali moni dobo dwai masigigo sę eyu, tama augwaligo te be daga paiyu, te masigi mamano holobo sę yai. Augwaligo te wiegi yai sę mu ebao, tama tialima te sę bugagia mu ebo dao,” wali.
EZR 5:9 “Dago te sę ebo sulama, tama dago augwa tobolu bidiba hanalu te dego augwalibolo po obaso, te tigidali sę ebo doado bage dodolama, te augwa Godigo be ma sę ebawe te po dabolo waiyąo wabo po hanalu wali.
EZR 5:10 Tama dago te tobolu bidi dabe augwaligo nogi po me hanalu wali, te dego te sę tonalubo te dago koneama, te pas nageba tolainu te po me dago hanalu wai dao.
EZR 5:11 Tialima, te Juda dabego te tama po wei ponani, ‘Da te dagalu me tǫ tonalubo Godigo sę bidi dabe dao,’ po wai. ‘Tama polobadu mu te dago bomai king bidi me deligo te tempel be sę yani. Tiali goli, te boi bidi dabego te be dolali, tama dago megi ma sę ebao,’ wali.
EZR 5:12 ‘Te page te tiwai elalubao. Te dago wąį nǫų dabego te dagalude bidibo God haliga sębę ilibaso, tama agai te bulu Kaldia bidi Nebukatnesar, Babilon king, aselama, te augwaliba hwįagasomainu elama, tama te hwįagaselama, te augwali aiyaba elaluali. Tama te Babilon dabego te Godigo be dolama, tama augwaligo te we bidi te Babilonba sela pelama, te kalabus sę emainu mugi pai dao.
EZR 5:13 Tama Nebukatnesargo te Godiba lotu wabo sę ebo nai te gol me silvago nigali nai selama, tama agai Babilonba sela pelama, te aga tibo godigo be tomoba te tigidali nai muani. Tiali goli, nosali Sairus te Babilon king bidi pedelali. Tama aga hasia mu te king bidibo kibu bede, agai dabolo te Godigo be ma sę yao po walio. Tama king Sairusgo te lotu po wabo sę ebo nai dabe selama, tama da hani bidi me deliba mawai, aga nogi te Sesbasar dao. Te bidi te king Sairus aga digi te Juda distrikde te polalubo gavman bidi bidao po olama nigilalio.
EZR 5:15 Tama kingo te Sesbasarbolo weyu, “Te nai dabe te Jerusalemba ma sela pelama, tama Godigo be te polobadu be sę yani madi tede ma sę yao,” po wai. Tama Sesbasargo te nai dabe te gesi sę ebo be tomoba muao wali.
EZR 5:16 Tama tialima, Sesbasar te Jerusalemba ma aselama, tama te be sę ebo sę ma gagalali, tiali goli te sę silibeo. Tama dago te sę megi tama tebode idubao,’ po wali.
EZR 5:17 Te Juda dabego tama po wali. Tama tialima, king, te nago homugo te naga kuskus dabeba wabo homu ebaso da, teda augwaligo te Sairusgo po te Babilon gavmango bukude asęani po bugagia gegao wao. Te Juda dabego po te mu po dawe, ma meni, te nago koneaibao. Tama nosali nago dabolo te tiwai po wagameo, te augwaligo te be sę yao po usu da wali po tede konebo dao,” te po wai.
EZR 6:1 King Dariusgo te pas sulama da, teda agai te kuskus dabebolo walama, te augwali Babilonba pelama, tama te king Sairusgo po te gavmango bukude asęani po gegegi pali.
EZR 6:2 Augwaligo te buku te Babilonde munalubo susiąwani, tiali goli augwaligo te buku me deli te taun Ekbatana te Midia tǫ pedaide munalubo suali, tama te bukude te tiwai po elaluali,
EZR 6:3 “Te hasia polasa kibu be mude te king Sairus te king bidali sogode, agai te po weyu, augwaligo te Jerusalemde te Godigo tempel be daga page masigi dabe muyu, tama te be ma sę yao po wai. Tama augwaligo te siaba tigidali domainu ulubo ofa dabe me, tama te gasa tobage ofa dabe me emainao po wai. Te be daga bobobage ugwanu holali usu nama, te 27 mita, tama aga genuai usu nama, te me te 27 mita dao.
EZR 6:4 Augwaligo te be daga dabe te tiwai nigao wali. Augwaligo te masigi ugwaba pesage nani ilibo sela holoyu, tama te masigi muani daide te bǫ nami nani deli muao wali. Augwaligo te tama tede holodubadi gęnama, tama te dąį igulaboba usu nigulao po wai. Tama augwaligo mone te kingo mone sabo bede selama, tama te be sę yabo tigidali nai me abeliyu, tama te sę ebo bidi dabe mone mayu yao po wai dao.
EZR 6:5 Tama tiyu, augwaligo te golgo me silvago nigali nai te Godigo bede lotu wabo nai sao wai, tama te Jerusalemba ma selasa pelama, tama te Godigo gesi beba mugi pao. Polobadu te king Nebukatnesargo te nai dabe te Jerusalemde selama, te Babilonba sela pali, tiali goli te megi te nai dabe tigidali ma selasa pomainao wai,” te bukude te tiwai po elaluali.
EZR 6:6 King Dariusgo te bukude asęani po page odolama da, teda agai te pas me deli asęnama, tama aga ofisa dabego po wei ponoyu, te tama po wai, “Siade dao, Tatenai, te wę Yufretis u tǫ pedai badu bidibo gavman polalubo bidi dao, tama te Setar Bosenai, tama te duga si dali deli sę ebo bidi dabe dageba obao. Eno e tama po elalubao. Te Juda dabego te Godigo be sę emainogo sula tagalao.
EZR 6:7 Dagego augwali genama me panigio. Te Juda polalubo gavman bidi dali, te aga tobolu bidi dabe dali, augwa te Godigo be te polobadu sę yaluali madi ma sę emainao.
EZR 6:8 Tama tialima, eno megi po bomo elama, dagebolo obao. Dagego augwali te be sę ebo sę tau siąo. Dagego te sę ebo bidi dabe maiabo mone dodoliyu, tama augwali te sę yabo nai dabe abelainu ebaso da, teda dagego mone augwalibolo polo mayu yao. Dagego te mone te duga te wę Yufretis u badu provins dabede bidibo bulu bidi hanigo te mubo takis mone selama, tama te sę yao. Dagego te tama tiyu da, tama te sę me tulalugobeo.
EZR 6:9 Te Juda pris dabego dagebolo te magi nai augwaligo dagebolo te dagalude bidibo Godiba ofa yabo nai mao po obaso da, teda dagego augwaliba te tigidali sogo maiąo. Te augwaligo te bulmakau ogwa bidi, me te sipsip, ma te sipsip wai ma wit, me te tamu dabe, me ma te wain, ma te oliv ni du wel me, te sabo homu wei ebaso da, teda dagego augwaligo te ofa emainu maiąo.
EZR 6:10 Dagego te tama tibaso da, teda te augwaligo te augwa dagalude bidibo Godiba te wiegi yai ofa ebaso, tama te agai wei eyu godolo homu mu yaibao. Tama augwa te Godiba gedu haluasa po weyu, te enaba me, te eno ogwa dabeba me, te bugagia bidimainu te tama tiaibao.”
EZR 6:11 “Tama odao, eno bomai po me deli elalubao. Te bidi me deligo eno te po wali me pisąbaso da, teda eno sę bidi dabego te agai be paliali ni nami me deli dagala samainu yaibao. Tama augwaligo te ni nami polama, tama te bidi enama, isimainu yaibao. Tama augwaligo agai be dolama, tama te pobele bage pesage holobo tiwai pedelaibao.
EZR 6:12 Godigo te bulu Jerusalem naga sa muai dao, te aga bidibo pesage tiwai elaluai. Tama aga digi te mena king ma te we bidi hanigo eno te po sela sąyu, tama Godigo te Jerusalemde elalubo be dolobaso da, te God aga digi te bidi aiyaba elalueibao. Ena Darius, eno te po wali dao. Dage tigidaligo eno po wali piąo,” wai.
EZR 6:13 Te gavman polalubo bidi Tatenai, me Setar Bosenai, tama augwali si dali deli sę ebo bage dali, augwaligo te kingo pas salio, tialima augwaligo agai po tigidali bugagia wali palio.
EZR 6:14 Tama tibaso, te Juda dabe tobolu bidigo te Godigo be sę ebo sę te bugagia dolasa mu yalio, tama profet Hagai me profet Sekaraia augwali sigo te augwaliba wiegi yai po weyu, te augwali sę bomo emainu yai. Tama augwali te sę ela pidubadi genama, te be sę siligi paboba usu nanio, te augwa Godigo wali po tiwai gilama yali, tama Sairus, me Darius, me Artaserksis, te Persia tǫ pedai king bidi sela, augwaligo me te tiwai bomai po wai dao.
EZR 6:15 Augwaligo te sę silali te polua Adar, dei sela wabo side, te kibu be 6 wabo kibu bede te Darius king bidali sogo dao.
EZR 6:16 Tama tialima, te pris dabe me, te Livai dabe me, tama gasa Israel we bidi tigidali te Juda tǫba ma asalio, tigidali te wiegi yai homu pemene elama, tama te be te Godigo be da olama, te tedali gasagi yai be sa muai dao.
EZR 6:17 Te augwaligo te tama tiali sogo, teda augwaligo te bidi sese a naga te 100 kibu bulmakau sali, te 200 sipsip kibu omai sobadi, te 400 sipsip kibu wai sobadi elama, tama tigidali te Godiba ofa yalio. Tama augwaligo te nogo si olama, sągągo si, te 12 meme kibu omai te dwai sę yali sęgę sela sąwainu salio. Tama augwa te tigidali Israel hani deli deligo sęgę sela sąyu, te deli deli dononama ofa ela palio.
EZR 6:18 Tama me, te augwa Godigo be tomode te Jerusalemde sę yabo pris bidi dabe, me Livai bidi dabe augwa hani dabe dodolama te nigilalio, te Mosesgo polobadu asęani bukude wali po tiwai gilama te tama tialio.
EZR 6:19 Te nosali da wabo kibu bede, te namba wan polua nanobo polua, dei 4 wabode, te Juda we bidi augwaligo te genuai nai daa tubo sogo, te Godigo augwali Israel dabe te Isipde dolisąwani, te sogo muani bodolu pedalubode te Pasova genuai nai daa tuyu yai dao.
EZR 6:20 Tama tigidali te pris dabe me, Livai dabego me, augwali te God gedude te magi meda meni yai dwagi yai pedalabo yabo kolesaga wali palio. Augwali te magi meda meni yai wiegi yai pedelama da, teda te Livai dabego te sipsip wai elama, te genuai Pasova side ofa eyu yai. Te ofa dabe yali te we bidi tigidali ma asela silali olama, te ofa eyu, tama te pris dabe me Livai dabe augwade digi me te tama ofa eyu yai dao.
EZR 6:21 Te Juda buluba ma asali Israel we bidi tigidali, augwaligo te ofa yali sipsip mi tualio. Tama te tǫde mu bidali gasa Israel hani we bidi, te Babilonba polobadu pesiąwai hani bage, tama augwa te polobadu dwai sę yali tagalama, tama te Israel dabego Genuai Bidi Godiba lotu wabo ma gagalobo we bidi, augwaligo me te ofa yali sipsip mi tualio.
EZR 6:22 Augwa te wiegi yai homu pemene ebo te me sela, me sela, me deli, te 7 tama sogo elama, tama te bo disąwai nai bret tuali sogo, te genuai side yali kolesaga te wali palio. Augwaligo homu pemene yali te genuai mu yai, magi baso meni, Genuai Bidigo te Asiria king bidigo haliga wiegi yai ilibaso, tama agai augwali tau selama, te augwa Genuai Bidi Godigo tempel be ma sę yai dao.
EZR 7:1 Kibu be hauwade nosali, te Artaserksis te Persia king bidali sogo, te bidi me deli Babilonde bidai, aga nogi te Esra. Esra te polobadu bidali tobolu bidi pris Arongo hani bidi dao. Te Esrago hani e tiwai elaluali. Arongo ogwa te Eleasar dao, tama Eleasargo ogwa te Finias dao, tama Finiasgo ogwa te Abisua dao, tama te Abisuago ogwa te Buki dao, tama Bukigo ogwa te Usi dao, tama Usigo ogwa te Serahia dao, tama Serahiago ogwa te Meraiot da, tama Meraiotgo ogwa te Asaria dao, tama Asariago ogwa te Amaria dao, tama Amariago ogwa te Ahitup dao, tama Ahitupgo ogwa te Sadok dao, tama Sadokgo ogwa te Salum dao, tama te bidi Salumgo ogwa te Hilkia dao, tama Hilkiago ogwa te Seraia dao, tama te bidi Seraia aga ogwa te Esra dao.
EZR 7:6 Esrago te bomai po Godigo te Israelgo Genuai Bidigo polobadu te Mosesgo nogoba mani bomai po te bugagia koneai. Te sesemane sogo Godigo Esraba wiegi yai sę bugagia yali, tama te Esrago kingba te magi nai me deli maiabo po hanalu obaso da, teda te kingo aga mawai. Te kibu be te 7 yia te Artaserksis te king bidali sogo, tialima Esrago te Babilon tagalama, te Israel we bidi dabe meba dali te Jerusalemba palio. Te hani tomode te pris dabe me, Livai dabe me, te musik wabo bidi dabe me, te tempel be sunumide polobadu tonaluali bidi hani dabe me, te Godigo bede sę ebo bidi dabe, te tama hani bidi elaluai.
EZR 7:8 Augwaligo te bulu Babilon te deli wabo polua, dei deli wabode, te taga soalio. Tama Godigo augwali tau sobaso, tama augwali te Jerusalemba te a naga polua, te 5 mun, dei deli, te sogo te Jerusalemba sabolali, magi baso meni, te digibulu mu pai dao.
EZR 7:10 Godigo augwali tau siyu, augwali bugagia pali, magi baso meni, Esra te Genuai Bidigo bomai pode kolesaga sabo sę bomo eyu, teba aga homugo kęą pai mu dao, tama te bomai po bugagia wali pali bidi dao. Te me ma, agai te Israel dabeba te bomai po tigidali augwaligo me wali pomainogo bugagia ola mani bidi dao.
EZR 7:11 Te Esra aga te Babilon tagalasiąbadi, te king Artaserksisgo te pas me deli asęnama, tama Esraba mawai, te Genuai Bidigo te Israel dabeba mani te bomai po tigidali te bidi Esrago bugagia koneai. Te pasde te tiwai po wali,
EZR 7:12 “Ena te king Artaserksis, ena te tigidali bulu tǫ pedai hauwago king dao. Esra, nage te dagalude bidibo Godigo tigidali bomai po page koneai bidi da, eno nageba siade da po olama, te pas nageba asęani dao.
EZR 7:13 Eno bomai po te ena ofisa dabe tigidaliba te tiwai po wali. Te pris dabe me, Livai me, tama te gasa Israel we bidi, te augwali megi eno tǫ pedaide bidibao, augwali te nage dali Jerusalemba pabo homu ebaso da, teda augwa pomainao.
EZR 7:14 Ena dali, te enaba wiegi yai homu konebo kolesaga ola mabo bidi te a naga olama, me si, te 7 bidi, dago nage tagala palama, te nago Jerusalemde bidalubo we bidi, me te Juda tǫ pedai gasa badu bidibo we bidi, te sugi pomainao wali. Nago te Godigo bomai po elalubo buku tolalubao, tama tiyu, nago te we bidi dabego te bomai po wali pabowe naga te nago sugi pao.
EZR 7:15 Tama ena dali, te eno kolesaga koneai bidi dabe dali, te olo maiabo nai te gol me silva te dage Israel dabego Godiba maiabo homu ebao. Tama nago te olo mabo nai dabe te Jerusalemba sela pelama, tama te Godigo beba mugi pagameo.
EZR 7:16 Tama me nago te Babilon tǫ pedaide sali te silva me gol tigidali sobadi, te dage Israel we bidi me, te duga pris dabego dali, te Godigo be te Jerusalemde olo maiabo homu yali nai dabe badi selasa pagameo.”
EZR 7:17 “Tama nago te mone olodali me sagio. Nago te kibu bulmakau dabe me, te omai kibu sipsip dabe me, te sipsip wai dabe me, te wit me wain abelama, te Godigo bede alta saide te Jerusalemde ofa yainu tama tiao.
EZR 7:18 Nago te ofa yabo nai dabe abelama silibo si da, teda te gol me silva meba elalubaso da, nage dali te naga deli hani bage daligo te duga Godiba hanaluama, teda agai homugo dagego te monego mena nai abelimainu homu ebo ola momainu yao. Tialima, te dagego koneama da, tama duga te nai dabe abeliąo.
EZR 7:19 Tama nago te augwaligo nagebolo te duga Godigo be tomode te ofa emainu mani nai, te dis pou me tigidali nai sela pelama, tama te tigidali Godigo beba muao po wai dao.
EZR 7:20 Tama te nai dabe te usu meni baso da, teda nago te eno mone mubo bede te mone meba selama, tama nage te sǫą pali nai meba abelao,” po wai.
EZR 7:21 “Ena king Artaserksis, eno te bomai po te eno mone te wę Yufretis tǫ pedaide te eno mone tonalubo ofisa bidi dabebolo te po ola tolobao. Eno po e tiwai dao, ‘Te pris Esrago te bomai po te dagalu tonalubo Godigo po te skul bugagia mu elama konea pai bidi dao. Tama agai dageba te aga Godigo bede sę yabo magi nai me deli sabo po hanalu obaso da, teda polo tama te dagego aga maiąo.
EZR 7:22 Tiali goli, dagego te mabo nai dabego te dąį me edeligio. Silvago sęgęgo te 3,400 kilo edeligio, tama witgo te 500 bek ela pigio, tama waingo te 2,000 lita, me te oliv ni du welgo me te 2,000 lita ela pigio,’ te po wai. ‘Tiali goli dagego te tamu aga homugo wei ebo usu nama maiąo,’ walio.
EZR 7:23 ‘Dagego Esrabolo te dagalude bidibo Godigo agai bede muabo wei homu ebo nai tigidali maiąo. Tiyu, dagego te sisinibo doado bage tigidali te pesage genuai mu igulubaso, tama te Godigo enaba haliga sębę eyu, me te eno wai dabe te nosali king pedalubode me te sębę elaluidalio.
EZR 7:24 Tama odao, dagego te pris bidi dabede me, te Livai bidi dabede me, te musik wabo bidi dabede me, te tempel be sunumide tonalubo bidi me, te sę ebo bidi dabe, te augwali te tama bidi dabede te dagego haniani takis mone me selamu dao, tama te Godigo bede te sę ebo gasa bidi dabede me te takis sigio,’ eno te po wali.”
EZR 7:25 “Tama Esra, odao. Nago Godigo nageba te homu kolesaga hauwa mu mani, tama tiyu nago te kiap dabe nigiliyu, tama te tigidali we bidigo po tų dodolobo bidi dabe dali, te jas bidi te Godigo tigidali bomai po tonaluabo bidi dabe nigilama, tama te wę Yufretis u badu tǫ pedaide bidimainu yao. Tama dage we bidi mebago te Godigo bomai po konesiąbaso da, teda nago augwali bugagia ola mayu, te augwaligo me wali pomainao.
EZR 7:26 Te bidi me deligo te nago Godigo bomai po wali me pisąbaso da, ma te king Artaserksis eno bomai po me wali pisąyu ebaso da, teda nago mena dene mabo sę te polo tama agade yao. Nago aga ela muyu, me ma aga te gasa bulu tǫ pedaiba ela gudulao, ma agai doado bage siyu, ma aga kalabus me ilao. Te agaba dene mabo kolesaga te aga yali dwai sęde usu nama tama tiao,” te king bidigo Esrabolo te pasgo te po wai dao.
EZR 7:27 Ena Esra dao, eno te pas nedelama, tama eno e tiwai po obao, “Eno homu wiegi yai pemene eyu, tama Godiba usu da po obao, te dago wąį nǫų dabego Genuai Bidi dao. Magi baso meni, Godigo te kingo homu hodolobaso, tama kingo te Genuai Bidigo be Jerusalemde dwagi yai ilaibao po walio.
EZR 7:28 Godigo olo mu tau mabo kolesaga enabolo elama, tama agai te king dali, te aga wiegi yai homu kolesaga mabo bidi dali, te aga polalubo ofisa bidi dabe daligo, te augwaligo ena tau sainu homu yali. God dena Genuai Bidigo enabolo bomo menama, tama eno te augwali te Israel tobolu bidi dabe dali te Jerusalemba pabo po hanalu obaso, augwaligo te eno te pode usu da po walio.” Ena Esra eno te po obao.
EZR 8:1 Te e lista te deli deli hanigo polalubo bidi dabego nogi elalubo lista dao. Te da te ena Esra dali Babilonde bidama, ena dali Jerusalemba ma pali bage, te Artaserksis king bidali sogo dao. Te bagego nogi e dao.
EZR 8:2 Gersom, te Finiasgo hani, tama Daniel, te Itamargo hani, tama Hatus, te Sekaniago ogwa te Devitgo hani da, tama Sekaraia, te Parosgo hani bidi da. Tama aga hani te 150 bidi te Sekaraia dali palio. Augwaligo te augwa wąį nǫų dabego nogi asęani elalubo buku me deli te augwa tolaluai dao.
EZR 8:4 Tama Elioenai, te Serahiago ogwa, te Pahatmoap hani bidi da. Tama aga hani te 200 bidi aga dali pai dao.
EZR 8:5 Tama Sekaniai, te Jahasielgo ogwa te Satu hani bidi da. Tama aga hani bidi te 300 bidi te aga dali pali.
EZR 8:6 Tama Ebet, te Jonatango ogwa, te Adin hani bidi. Tama te 50 bidi hani aga dali pai dao.
EZR 8:7 Tama Jesaia, te Ataliago ogwa, te Elam hani bidi da. Tama aga dali te 70 bidi hani pai.
EZR 8:8 Tama Sebadaia, te Maikelgo ogwa, te Sefatia hani da. Tama aga dali te 80 bidi hani pai dao.
EZR 8:9 Tama Obadia, te Jehielgo ogwa, te Joap hani bidi da. Tama te 218 hani bidi te aga dali palio.
EZR 8:10 Tama Selomit, te Josifiago ogwa te Bani hani bidi dao. Tama 160 bidi dabe te aga dali pai dao.
EZR 8:11 Tama Sekaraia, te Bebaigo ogwa te Bebai hani bidi dao. Tama te 28 hani bidi aga dali palio.
EZR 8:12 Tama Johanan, te Hakatango ogwa te Asgat bidi hani da. Tama 110 aga hani bidi aga dali palio.
EZR 8:13 Tama Elifelet, me Juel, me Semaia, te Adonikam hani bidi dao. Tama te bidi sese sela, te 60 hani bidi te bidi sela dali pepelawalio. Tiali goli, augwali te sogo da dali asobeo, augwali te nosali asai dao.
EZR 8:14 Tama Utai me Sakur te Bikvai hani bidi da. Tama te Bikvaigo hani bidi 70 te augwali si dali palio.
EZR 8:15 Ena Esra, eno te bidi hani tigidali te taun Ahavaba aiya dulubo genuai wę gamia sesegeba sisinama, tama dago bidibo pesage nigilama, tama tede sela sogo bidai. Tama hanide te pris bidi meba bidibo eno suali, tiali goli, te Livai hani me deli elalubo me subeo.
EZR 8:16 Tama tialima, eno te polalubo bidi dabe te a naga olama, me si me si te asa olama i wali. Augwa nogi e tiwai dao, Elieser, me Ariel, me Semaia, me Elnatan, Jarip, tama te gasa Elnatan, me Natan, me Sekaraia, me Mesulam. Tama eno te wiegi yai homu kolesaga koneai bidi si me asomainu i walio. Augwali si nogi te Joiarip me Elnatan dao.
EZR 8:17 Tama eno augwali tagala palali, te augwali Ido sugi pao wali, aga te Godigo bede sę ebo hani bidi me deli da, tama te bulu tobolu bidi te Kasifia bidai. Tama eno augwaliba weyu, te agaba me te aga dali deli sę ebo bageba hanalu wao po wali, te bidi meba da dali te Godigo bede sę emainu tagala palao po hanalu wao po wai dao.
EZR 8:18 Godigo dabolo te olo mu tau mabo wiegi yai kolesaga eyu, tama tialima, agai te Livai me deli tagala palali. Aga nogi te Serebia, te Mali hani dao. Aga te wiegi yai sę ebo bidi da. Tama aga te ogwa dabe me, aga ama dede dali, te 18 bidi te tigidali augwali te aga dali asali.
EZR 8:19 Tama Idogo te Hasabia me Jesaia te Merari hani dali, te augwa si deli kaneme bidi te bidi sese deli, te 20 bidi tagala palai dao.
EZR 8:20 Tama agai te Godigo tempel bede sę yabo sę bidi hanide me te 220 bidi tagala palali. Polobadu te king Devit dali, aga ofisa dabego dali, te hani wąį nǫų dabe sę bidigo te Livai dabe tau somainu nogo tų ilama, sa muai. Tama te 220 sę bidigo nogi asęani te buku me delide elaluai dao.
EZR 8:21 Da te wę Ahava pąde bidalu, tama te tigidali sę bidibolo eno te tiwai po wai, “Dago te nai habu selama, tama dena God gedude dena digi aiyaba elaluinao,” po wai. “Tama dago agabolo hanalu, te da tau somainu eyu, tama da me te dago wai dabe tonalumainu eyu, te dago doado bage dabe dali, te da Jerusalemba pabo sogode me tonalumainu ebo dao,” wai.
EZR 8:22 Eno te tama po augwaliba wai, magi baso meni, eno te kingba hanalu obaso, te tǫdu asobo ami bidi dabe me te hosdu dualasa asobo ami bidi dabe, te da dali asiyu, te da sunumidu asobadi, te tonalua asidali weyu te eno kingba hanalubo te ena hagela ebao wali. Te ena king dali bidali sogo, eno agabolo te tiwai po walali, “Dago Godigo te aga wali pabo we bidi tigidali te bugagia tonalubo dao,” wali. “Tiali goli, agai te aga tudiba mubo we bidi tigidaliba te haliga sębę eyu, tama agai dwai dene te augwaliba mawaibao.” Eno te tama po kingba wali, tama eno agaba te ami hani dabe po hanalubo te ena hale yali.
EZR 8:23 Tialima, dago te osogo nai gisilama tama gedu haluasa po bomo elama, Godiba weyu, te agai da te sunumidu pabo tonalumainu emainao, tama agai dago te gedu haluasa po wali odolama, tama agai da bugagia tonaluali.
EZR 8:24 Eno te Serebia, me Hasabia, me tama te gasa nogo si te pris tonalubo bidi dabe te augwali asiąo olama, i wai.
EZR 8:25 King dali, te agaba wiegi yai homu kolesaga mabo bidi dabe me, te aga ofisa dabe me, te Israel we bidigo dali, te Godigo bede sę yabo te wiegi yai nai dabe mawai. Tama eno te nai dabe selama, te dobolama, tama te pris dabeba menama, tonalumainogo yai dao.
EZR 8:26 Te eno augwaliba mani nai dabego sęgę e tiwai yai. Silvago sęgę te 22,000 kilogram, tama golgo sęgę te 3,400 kilogram, tama te 100 dis pou silva, te augwaligo te sęgę 34 kilogram teba usu nai dao.
EZR 8:27 Tama te gol dis pou bidi sese deli 20 elaluai, te augwaligo sęgę usu nama te 8 kilogram me 400 gram, tama te bras dis pou si elaluali, augwaligo te wiegi yai mu nigai, tama te nai sigo mone te gol dis pou sigo mone sabo tiwai ususi pedelali.
EZR 8:28 Eno te nai dabe te nogo si olama, sągągo si pris dabebolo mayu, tama eno augwaliba te po wai, “Odao. Dage da, te tedali gasagi yai bidi dabe da, te Godigo sę ebo bidi dabe, te dena wąį nǫų dabego Genuai Bidi dao. Tama te dis pou dabe me te Genuai Bidigo nai mu da. Tama te gol me silva te augwaligo augwa homu wali peyu, Genuai Bidiba te olo mabo nai mu dao.
EZR 8:29 Te nai dabe te bugagia tonalua peyu, te dage Godigo beba sabaligi paboba usu nigi piąo. Tama dage sabaligi pabo sogo da, dagego te tigidali gol me silva me tigidali dis pou ma dodolama, te pris dabego polalubo bidi dabeba, me Livai dabebolo te Israel tobolu bidi te Jerusalemde bidibo bidi dabeba maiąo,” po wai dao.
EZR 8:30 Eno po wali dao, tialima te pris dabe me Livai dabego te tigidali silva me gol me dis pou salio, te da dali dago te Jerusalemba da pabo sogo selasa painu yai dao.
EZR 8:31 Tialima, te namba wan polua, dei 12, tede dago te wę Ahava tagalama, tama te Jerusalemba pabo sunumi wali palio. Tama God da dali bidiyu, tama da bugagia tonaluai. Tama tialima, te boi bidi dabego daba hwįagasu me ebe, tama te nai wi sabo bidi dabe te sunumi pąba geme me duala sagaselama, te daba samonagaselama tama te dago doado bage wi me sagasobeo.
EZR 8:32 Da digibulu mu pelama, tama nosali te Jerusalemba sabolama, tama da sela sogo toma neyu bidai dao.
EZR 8:33 Tama te dei namba 4 tede dago te silva me gol me dis pou me tigidali selama, tama te Godigo beba selasa pelama, tama te nai dabego sęgę dagalali. Dagala silama da, teda dago te nai tigidali te pris Meremotbolo mawai, te Uriago ogwa dali, te pris Eleasar, te Finiasgo ogwabolo manio, tama te Livai sibolo me, Josabat, te Jesuago ogwabolo, me te Noadia, te Binuigo ogwa, te tama bidi dabeba te nai dabe mawai dao.
EZR 8:34 Tialima, augwaligo te tigidali nai nedelama, tama bugagia dagalama, tama tigidali nai munaluali. Tama augwaligo te namba me te nai augwaligo sęgę dabe te buku me delide asęani.
EZR 8:35 Te hani bidi dabego te Babilon tagalama, te Jerusalemba ma soali sogo da, teda augwaligo te kibu hasa dabe meba selama, tama te Godiba ofa yainu sela pali, te Israel dago Genuai Bidi dao. Augwaligo te nogo si olama, sągągo si omai bulmakau te Israel 12 hani sa muyu, te ofa ilali, tama augwaligo te 96 omai kibu sipsip, me 77 sipsip kibu wai, te tama ofa yali. Tama augwaligo te augwa sęgę sela sąyu, te 12 meme omai te ofa yainu sela palio. Te tigidali kibu dabe te ofa eyu, te siaba tigidali ulabo nai dao.
EZR 8:36 Tama eno te kingo enabolo mani pas te selama, tama eno te polalubo gavmanba me te wę Yufretis e badu tǫ pedaide bidibo te gasa ofisa dabeba me, te pas tolali. Augwaligo te pas selama, teda augwaligo daba wiegi yai homu bugagia eyu, tama te Godigo be sę ebo tau salio.
EZR 9:1 Dago te sę tigidali ela silama da, teda dago te polalubo bidi dabe aselama, tama enabolo te tiwai po wagasalio, “Odao. Te pris dabe, me Livai dabe, me te dago we bidi tigidali te Godigo po odisąbo bidi hani bage digibulude me bidibeo. Menio. Augwaligo te Kenan dabe, me Hit dabe, me Peres, me Jebus, me Amon, me Moap dabe, me Isip dabe, me Amor dabe, te tama hani dabego ebo dwai kolesaga wali pobao,” wai.
EZR 9:2 “Da te Juda bidi dabego te hani bidi dabego wegi sobao, tama te da Godigo dolo mu sa muani tedali gasagi yai we bidi hani te Godigo bomai po odisąbo bidi hanigo kolesagaba palio. Te polalubo bidi dabe me, te ofisa dabego me, te tiwai e hasia bolo ebaso, tama te gasa we bidi dabego augwa me te dwai kolesaga ela palio,” augwaligo te po wai.
EZR 9:3 Eno te po odolama, tama ena haliga sęgę dwai mu yai. Tama te ena ugwa pisilama, tama ena tobolu nisi meba me, te penane nisi badi, te gudalio. Tama eno homu te mu umuna selama, tama ena te olo dugulalualio.
EZR 9:4 Ena dugulaludubadi, te pio ofa eboba usu nanio. Tama te we bidi dabego koneani, te da Israel dabego Godigo te dwai sę ebo we bidi dabeba te haliga sębę ebao weyu, tama augwali wi dwai mu yai. Tama hauwa te ena dulalu bidibo madiba aselama, sisinagasalio.
EZR 9:5 Te ofa ebo sogoba sabalobaso da, teda ena hodaluama, tama ena kidu sugunigulama, tama gedu haluasa po weyu, tama te eno nogo si te Godiba ugwa sali, te eno Genuai Bidi dao. Eno te pisawali ugwa te ena tigide digi gudalualio.
EZR 9:6 Tama eno gedu haluasa po te tiwai wali, “God, te ena genuai hale mu elalubao. Tama eno homugo te eno gedu haluasa po nageba wagasogobeo homu yai. Dago te dwai sę hauwa mu yalio. Tama dago sęgę te pobele bage pesage genuai moni bage me deli te dagaluba usu nainu holobo tiwai mu ebao,” wai.
EZR 9:7 “Te wąį nǫų dabe bidada asali, te megi e sogoba usu nagasobo sogo, da nago we bidi dabe dali, te king dabe me, te dago prisgo me, te dwai kolesaga umabo eyu, sęgę umabo siyu yai dao. Tama tibaso, nago te gasa bulu tǫ pedai king tagala palama, te da elagaselama, tama dago doado bage wi siyu elama, tama da te digibulu buluba te kalabus bidi sela pabo tiwai yai. Tama tialigo te da hani dabe polobadu te hale dwai mu yali, tama megi me da te tiwai me bidibao,” wai.
EZR 9:8 “Tiali goli megi da, God, dago Genuai Bidi, nago te olo tau mabo wiegi yai kolesaga te daba gagalama ma yalio. Tama da dwasianu hani naga te kalabus yali pesage tagalama, tama da te Jerusalemba ma asai, te naga wiegi yai bulu digi dao. Tama nago bomo dabolo megi ma mobaso, te da bugagia bidibao, da te gasa hanigo olo sę bidi bidibo tiwai ebadi digi te tagalao wali.
EZR 9:9 Te mu tama da, te olo sę bidi tiwai yali, tiali goli te nago dade homu kone ebo te me tagalogobeo. Menio. Nago daba te olo tau mabo wiegi yai kolesaga eyu, tama nago te Persia king dabego dabolo wiegi yai haliga emainu ilali. Tama nago te augwaligo da te ma somainu elama, te nago be dolali elalubao te ma sę egi somainogo ilali. Tama nago te augwaligo da tau somainu ilama, tama augwaligo dabolo te be sę yabo doado bage tigidali mawai. Tama megi da, da te Jerusalemde bugagia dugulalu, tama te Juda gasa pedai badu me, te nago da tonalubo dao,” wai.
EZR 9:10 “Te dago God, mu tama, nago te wiegi yai sę dabe daba yali, tiali goli dago te nago bomai po dabe wali pisąbaso, tama dago te sę bolobaso, te da hale dwai mu ebo dao,” wali.
EZR 9:11 “Te profet dabe, te augwali nago sę bidi dao, te bomai po nagade digi selama, tama augwaligo dabolo pusai dao. Tama augwaligo pedauwalide nago dabolo te tama po wali, ‘Te tǫ megi dagego sabo te eno gedude wiegi yai me ebeo,’ wali, ‘magi baso meni, te tǫ pedai we bidi hauwago te dwai kolesaga eyu, tama te tǫ badu tigidali te dwai meda yai kolesaga usu nai elalubao,’ wai.
EZR 9:12 ‘Tama tialima, dagego te hani bidiba te dagego wegi mayu, te we te hanide siyu me igio. Tama dagego te augwali bugagia bidimainu tau me sigio, tama dagego te augwaligo mena sę yainu ebo te tau me sigio,’ wali. ‘Te dagego eno po wali pobaso da, teda duga digi te tǫde bugagia bidiyu, tama bomai hani pedelama, tama nosali te duga wąį nǫų dabe, augwa te tǫde bugagia sesemane bidada pomainogo ebo dao,’ nago te po wai.”
EZR 9:13 “Te mu tama nago te tiwai po dabolo mu tama obadi, tiali goli dago nago po sela sąyu, tama te dwai sę ebo genuai mu yai. Tama tiyu, nago da sesanobo po obao. Dago te dwai sę hauwa mu yali, tama te nago da tigidali mu doligi sogo da, te dolo igi dao. Tiali goli, te menio, nago te olo tau mabo wiegi yai kolesaga daba eyu, tama nago te dwasianu hani bidimainogo ilalio.
EZR 9:14 Tama tiyu, te dago nago po ma sela sąyu, tama dago wegi te hani bidiba mayu, te dago augwali hani wegi ma siyu, te haniani dwai kolesaga ebo te dwai mu ebao. Dago koneanio, te dago augwali hanigo wegimani sobaso da, teda nago haliga sębę dwai mu elama, tama nago da dolama, tama da tigidali silimainu yaibao, tama da me deli te me bidigobeo.
EZR 9:15 God, te da Israel dabego Genuai Bidi, nago te doloba pai kolesaga naga ebo dao. Da wiegi yai we bidi weyu, te da nage pąba me pogobeo. Menio. Da te dwai sę ebo we bidi naga dao, te dwai sęgę umabo elalubao,” eno te gedu haluasa po tama wali.
EZR 10:1 Esra te Godigo be sunumi pąba pelama, tama aga digi te tǫba degasa dulama, tama aga gela weyu, tama te dwai sę yali sęgę sela sąbo po pusalio. Agai te tama tidubadi, tialima te genuai hani Israel we bidi wai puluba te aga pąba sisinagaselama, tama augwali me te dwai homu dene ebo gela mu walio.
EZR 10:2 Tialima Sekania, te Jehielgo ogwa te Elam hani, aselama, te tama po Esrabolo wagasali, “Mu tama, dago te Godigo po sela sąyu, dago te bulu badu Godigo po odisąbo hani we dabe sali sogo tama tiali, tiali goli dago te dwai sę kolesaga tagalabo sunumi te elalubao, te tama tibaso, te Godigo da me dologobeo.
EZR 10:3 Tialima, megi da, dago dena Godiba te dąų wabo bomai po weyu, te bulu badu sali we hani dabe te wai dabe dali sela sąnama, tama augwa page buluba ma tagala palaibao,” po wali. “Nage dali, te gasa bidi dabe daligo te Godigo bomai po wali pabo bage, te dagego te dago yabo tigidali sę po te dabolo walao,” po wai. “Tama dago te dagego po wali peyu, tama te kolesaga te Godigo bomai pode wali gilama te dago tama tiaibao.
EZR 10:4 Tama te sęgę te dodolabo te nago digi elalubao. Tialima, tagalao, wi igio. Polo hogodama, dodolao. Tama dago te deli haliga nage dali elama bidiyu, tama nago po tigidali wali peyu bidaibao,” po wai.
EZR 10:5 Tama te Esra hodalu, te po bomonama te polalubo pris bidi dabeba, me te Livai bidi dabeba weyu, tama te tigidali Israel dabe augwaligo me augwa digi dąų wabo bomai po me deli te Godiba weyu, te Sekaniago wali po tiwai waiyąo wai. Tialima, te augwaligo tama tiwai yai dao.
EZR 10:6 Tama Esrago te Godigo be sunumide bidali tagalama, tama te Jehohanango be habu tomoba pali, te Eliasipgo ogwa da. Tama aga te be habude bidiyu, tama aga te Israel dabego yali dwai kolesagade homu dene ebaso, tama gela hauwa mu wali. Tama te sogo aga nai me wę me tubeo.
EZR 10:7 Tama te Juda polalubo bidi dabe, me te tobolu bidi dabego te bidi meba tagala palama, te Jerusalemba ma asali bidi dabe, me te Juda meba bidi dabe te sugi pomainu yai. Augwaligo te bidi dabeba te tiwai po wali, “Te sela sogo silisąma, te elalubadi tama dage te Jerusalemba sisinagasao,” wai. “Tama te bidi me deli sabalisiąbaso da, teda augwaligo te agai doado bage tigidali te augwa selama, tama te tempel be sę eboba munama, tama agaduba digi naga te da Israel hani we bidi tomode sela sąwaibao,” te po wali.
EZR 10:9 Augwaligo te tama po pusulama, te sela sogo nosali, te 9 polua dei 20 wabode, te tigidali Juda hani we bidi, me te Benjamingo hani me, te Jerusalemba sabolama, tama te Godigo tempel be pąba sisinibo pesage teba sisinai. Tama te sogode te genuai tulubage tulama, tama te tigidali bidi te tulubage dolama, tama augwali gogo elama, didibili ilalio. Tama me te augwaligo te wainu yali pode te moni homu elama, tama augwali te midigi dwai siyu iduali.
EZR 10:10 Tialima, pris Esra hodaluama, tama augwaliba te tiwai po wali, “Dagego te Godigo bomai po wali pisąbo hani bidi dabego wegi sali, te Israel hani isąwai bage, tama te tiali kolesagago te Godigo po sela sąnama, tama da Israel dago sęgę te genuai pedelali.
EZR 10:11 Tialima, odao. Dagego duga te dwai kolesaga yali sęgę te Godiba pusuiąo, te dago wąį nǫų dabego Genuai Bidi dao. Tama dagego te agai wei elama godolo yabo kolesaga tigidali wali piąo. Tama dagego te dago tǫde bidibo te bidi hani dali kisiligi me pigimio, tama dagego te bulu badu te Godigo po wali pisąbo hani we dabe sali te sela sąiąo,” po wai.
EZR 10:12 Tialima, te bidi dabego te bomonama i weyu, te tiwai wali, “Nago po te dolo da, tama dago wali paibao,” po walio.
EZR 10:13 “Tiali goli, da te genuai hani mu elalubao, tama me te genuai tulubage me tulubao,” wali. “Tama da te bulu badu sesegede dolalu, te sę dodolainu ebaso, te usu egobeo. Da bidi hauwago te dwai kolesaga yalio, tama tiyu te dago polo tama me dodolainu ebaso te usu egobeo,” wali.
EZR 10:14 “Tama dago te homu ebao, te dago polalubo bidi dabego te sę tonalumai da homu ebao. Tama augwaligo te bulu badu hani dabego wegi te we sali bidi dabe augwaliba te po olama, te nisu sogo te deli deli bidi te Jerusalemba aselama, te sęgę dodolagasomainao homu ebao. Tama te bidi me deli asobo side, te tobolu bidi me te aga taunde po tų odobo jas bidi te aga dali asomainao. Dago te tibaso da, teda te Godigo haliga sębę yali te sia saibao,” te po wali.
EZR 10:15 Augwaligo te miani pode tigidali bidi dabego usu da wali, tiali goli Jonatan, te Asahelgo ogwa, dali Jasea, te Tikvago ogwa, augwali sigo homu usu meni yai. Tama Sabetai, te Livai bidi me deli, te Mesulam, augwali sigo me usu isąwai, tama augwali sigo me te Jonatan de Jasea sigo wali poba homu munama, te po dąų walai.
EZR 10:16 Te bidi me si me sigo naga te usu egobeo, tiali goli tigidali gasa bidigo te usu da olama, te sęgę dodolabo polalubo bidi meba nigilao wali. Tama tialima, Esrago te tobolu bidi nigilama, te augwali nogi buku me delide asęani. Tama te nogo si polua dei delide, augwali te bulu badu hani we dabe sali bidi dabe te asomainu gagalama i wali, te augwali aselama, te sęgę dodolagasomainogo yalio.
EZR 10:17 Augwaligo te sę ela pali, te nosali kibu bede polua selaba usu nama, tama te sę silalio.
EZR 10:18 Te bulu badu we dabe sali pris dabego nogi e tiwai dao, Masea, me Elieser, me Jarip, me Gedalia. Augwali te Josuago hani da, te Jehosadakgo ogwa, te bidalio.
EZR 10:19 Augwaligo te bomai po dąų waliyu, te augwa te sali we sela sąwaibao wali, tama augwa te kibu sipsip omai me deli selama, tama te Godiba ofa elama, te augwade digi elaluali dwai sęgę sela sąmainogo tiali.
EZR 10:20 Tama Hanani me Sebadaia, te Imer hani dao.
EZR 10:21 Tama Masea, me Elaija, me Semaia, me Jehiel, me Usia, te augwali Harimgo hani dao.
EZR 10:22 Tama Elioenai, me Masea, me Ismael, me Netanel, me Josabat, me Elasa, te augwali Pasur hani dao.
EZR 10:23 Te Israel hani isąwai bulu badu we dabe sali te Livai dabego nogi e tama dao, Josabat, me Simei, me Kelaia, te aga gasa nogi me Kelita, me Petahia, me Juda, me Elieser dao.
EZR 10:24 Te musik ebo konea pai bidigo te bulu badu hani we dabe sali bidi nogi e tama, Eliasip dedeli digi naga dao. Te Godigo tempel be sunumi tonalubo sę bidi dabego te Israel hani isąwai we dabe sali bidigo nogi e tiwai, Salum, me Telem, me Uri dao.
EZR 10:25 Te Israel gasa bidi dabego te Israel hani isąwai we dabe sali bidi dabego nogi e dao, Ramia, me Isia, me Malkia, me Mijamin, me Eleasar, me gasa Malkia, me Benaia, te Paros hani dabe dao.
EZR 10:26 Tama te Matania, me Sekaraia, me Jehiel, me Apdi, Jeremot, me Elaija, te Elam hani dabe dao.
EZR 10:27 Tama Elioenai, me Eliasip, me Matania, Jeremot, me Sabat, me Asisa, te Satu hani dabe dao.
EZR 10:28 Te Jehohanan, me Hanania, Sabai, me Atlai, te Bebai hani dao.
EZR 10:29 Mesulam, Maluk, me Adaia, me Jasup, me Seal, me Jeremot, te Bani hani da.
EZR 10:30 Te Atna, me Kelal, me Benaia, me Masea, me Matania, me Besalel, me Binui, me Manase, te Pahatmoap hani dabe da.
EZR 10:31 Te Elieser, me Isiya, me Malkia, me Semaia, me Simeon, me Benjamin, me Maluk, me Semaria, te Harim hani dabe da.
EZR 10:33 Te Matenai, me Matata, me Sabat, me Elifelet, me Jeremai, me Manase, me Simei, te Hasum hani dabe dao.
EZR 10:34 Te Madai, me Amram, me Uel, me Benaia, me Bedea, me Keluhi, me Vania, me Meremot, me Eliasip, me Matania, me Matenai, me Jasu, me Bani, me Binui, me Simei, me Selemia, me Natan, me Adaia, me Maknadebai, me Sasai, me Sarai, me Asarel, me gasa Selemia, me Semaria, me Salum, me Amaria, me Josep, te gasa Banigo hani dabe dao.
EZR 10:43 Te Jeiel, me Matitia, me Sabat, me Sebina, me Jadai, me Joel, me Benaia, te Nebo hani dabe da.
EZR 10:44 Te tigidali bidi hani dabego te bulu badu Godigo ebo kolesaga wali pisąbo hani dabego wegi dabe sali hani bidi dabe nogi te dao, tama tialima, te hani dabe augwaligo te sali we dabe te sela sąnama, tama te we dali, me te wai dabe dali, te augwa page buluba ma tagala palai dao.
NEH 1:1 Te wali po Nehemia, te Hakaliago ogwago, asęani. Te bidi sese deli kibu bede, te 20 yia wabo side, te Artaserksis te king bidali side, tama te polua Kislev, tede ena Nehemia, ena te gavmango polalubo moni taun, te Susade bidali sogo tama tiai dao.
NEH 1:2 Tama te sogo Hanani, te eno ama me deli, te hani bage me deli dali, augwa te Juda tǫ taga soyu, tama digibulu aselama, te Susa taunba sabolali. Eno augwali sisinama, tama eno augwaliba te tama po hanalu wali, “Eno te Juda hani dabe meba te kalabus yagasali pesage, e Babilon bulu tagalama, te Jerusalemba ma pali bagede, te po eno koneainogo hanalu obao,” wali. “Te augwali bugagia bidibawe, ma meniwe? Tama te taun Jerusalem me, te bugagia elalubawe, ma meniwe?” Eno te po te bidi si hanalu wali.
NEH 1:3 Tialima, augwaligo po wei ponoyu, te po wai, “Menio,” wali. “Te hani we bidide genuai sęgę elalubao,” wali. “Tama te Godigo bomai po wali pisąbo hani dabe, te Israel hani isąwai bage, te augwali pąde bidiyu, te augwali dolobo sę ebao. Tama te Jerusalem bagulali moni masigi obo dolali me tama elalubao. Tama te sunumi obo te siago polobadu ulali, te dabe augwali me te tiwai naga elalubao, tama te Jerusalemde bidibo bagego te nigabo homu me ebeo,” wali.
NEH 1:4 Eno te po odama da, teda ena duagulama, tama ena gela hauwa mu wali. Tama ena haliga sęgę me elaludu, tama si sela sogode eno te nai osogo habu selama, tama eno Godiba gedu haluasa po weyu iduali.
NEH 1:5 Eno e tiwai gedu haluasa po wali, “God, Genuai Bidi, nage te dagalu tonalubo bomai bidi da, tama da Israel dabe nage dologoba pelama bidibao. Nago te dąų wali bomai po te kontrak me deli da dali yali elalubao, tama dago nage godolo mu elama, tama nago po bugagia mu wali pobaso da, teda nago te dąų walali bomai po kontrak te me tagalisiąma, tama nago da godolo mu ebo dao.
NEH 1:6 Genuai Bidi, te giligade me hulide eno nageba hanalu, te Israel dabe tau sao obao, te augwali nago sę bidi me sę ebo we dabe dao. Tama tialima, eno homugo nago eno te gedu haluasa po wabo te bugagia odao. Eno te tiwai hania hanilama mu obao, ena dali, te eno wąį dabe dali, dago te dwai sęgę salio. Tama dago naga te sęgę me ebeo. Menio. Te Israel we bidi tigidaligo te sęgę sela silai dao.
NEH 1:7 Dago dwai kolesaga te nago gedude eyu, tama dago te nago po wali me pabeo. Polobadu nago bomai po te naga sę bidi Mosesgo nogoba mawai, tiali goli dago te bomai po dabe wali me pisąwai dao.”
NEH 1:8 “Tiali, goli nago te Mosesba mani e tiwai pode te nago homu kone ebo me gegeda paligio, ‘Te dagego ena tudiba mubaso da, teda eno dage e tǫdu sela sąnama, tama dage te gasa tǫ pedaiba tedela palama, bidigi paibao,’ wali.
NEH 1:9 ‘Tiali goli, dage te bulu tǫ pedaide bidiyu, te enaba homu begelama, tama dage enaba ma aselama, tama eno po wali pobaso da, teda eno dage te bulu me deli te dagego enaba lotu po omainu te sa muani buluba ma odasa asaibao. Te dage digibulu tǫ pedaide tigidalide bidibadi goli, te tagalao, te eno dage te bulu tǫ pedaide selama, ma odasa asaibao,’ nago te po Mosesbolo wali. Genuai Bidi, da te nage pageba ma asali dao, tama tialima, eno nageba hanalu, te nago dąų wali bomai po wali pelama, te da megi tama tau sao po hanalu obao,” walio.
NEH 1:10 “Genuai Bidi, da Israel te nago sę bidi, me sę we tiwai dao. Tama da te nago we bidi dabe mu da. Te nago genuai bomogo nago da te boi bidi dabego nogode polobadu ma salio, tama da mu hagabeo.
NEH 1:11 Tama da tigidali Israelgo te nageba wiegi yai homu pemene elama, tama nago nogi ugwaba sobao. Tama eno homugo megi nago te tigidali Israelgo gedu haluasa po wabo odomainu homu ebao. Tama me te nago megi eno e gedu haluasa po wabo me odao homu ebao. Tama eno te king sugi pabo si da, teda nago digi te kingo ena homu dene emainu ilama, tama agai ena tau somainu yao.” Eno te gedu haluasa po te ena kingo sę bidi bidali sogo wali. Eno sę te kingo wain ąį tonalubo sę yali, tama te wain wę sela pelama, te kingo tumainu magi pabo sę yai dao.
NEH 2:1 Te polua me si me si bidama, tama me sogo side deli te king Artaserksis te nai tudubadi, tama eno wain agaba sesali. Tigidali sogo eno te sę iduali te bugai haliga elama, te eno gesabidi wiegi yai pisigina pelama te sę iduali. Tiali goli, te sogode digi eno haliga sęgę mu elama, tama eno gesabidi te wiegi yai me pisigina pabeo.
NEH 2:2 Tama tibaso, kingo enaba hanalu wali, “Magi baso nage wiegi yai pemene isąbawe? Nage gasi da meni yai, tiali goli nage magi nai me delide haliga sęgę elalubao,” wali. Eno te po odoyu, te ena noma salio,
NEH 2:3 tama eno te tiwai po kingba wali, “King o, nage te bugagia sesabi elama bidagameo. Awe, ena haliga sęgę mu ebao, magi baso meni, te augwaligo eno wąį nǫų dabe pubulali madi te hanu taun te dolali elalubao, tama siago te bobegelali masigi obode te nigo nigali sunumi me ulali elalubo dao.” Eno te po wai.
NEH 2:4 Kingo te po odolama, tama enabolo te tiwai po hanalu wai, “Megi nago te eno magi sę me deli emainu, agawe?” Tialima, eno dagalude Godiba gedu haluasa po polo olama,
NEH 2:5 tama eno kingba te tiwai po wali, “King, te nago enaba bugai haliga ebaso da, teda eno nageba te magi nai po me deli hanalu wainu ebao. Te e tama tiwai. Te nago homu usu eyu da, te nago ena te ena wąį nǫų dabego taun te Juda tǫba pomainu ebaso da, te eno ena abagi dabe dali te taun ma geseliyu nigibo sę tau sigi pomainu ilao,” po wali.
NEH 2:6 Te eno king dali po mibadi, te aga we te kwin aga pąde dugulaluali. Kingo eno te po odolama, tama po wei ponoyu, te tiwai po wali, “Usu da, nage pao,” wali. “Tiali goli, nage te pęwadage sogo, ma te bobage sogo te Judade bidaibawe? Tama nisu sogo nage ma asaibawe?” Tialima, eno homude elaluali te ena ma asabo sogo po agaba pusalio.
NEH 2:7 Tama eno te kingba hanalu, te eno te wę Yufretis u pedai badu bidibo gavman bidiba maiabo pas meba mao wali. Te pas dabego augwaliba weyu, te ena augwaligo provinsdu peyu, te Juda tǫ pedaiba pabo usu da wabo pas mao, wai dao.
NEH 2:8 Tama eno kingba te Asapba te pas me deli asęa mao po hanalu wai, te bidigo te kingo ni sili elalubo tǫ tonaluai. Te pasgo agabolo te po waliyu, te pedabo ni nami meba enabolo mao wabo po pas asęani. Te ni nami dabego te Jerusalem moni masigi obode sunumi dabe nigiyu, te ami bidi dabego te Godigo tempel be tonalu bidabo bomai be obo sunumi, te me nigabo ni nami sao po wabo pas asęai, tama eno be sę yabo ni nami me dao. Tama God ena dali bidiyu, tama ena tau sai, tama tialima, kingo eno te hanalu wali nai dabede te usu da po walio.
NEH 2:9 Tama kingo te ami ofisa meba nigilibadi, te hosde dugulasa pabo ami hani me deli nigilibadi elama, tama agai te augwali ena dali tagala palama, te ena tonalua pomainu yalio. Tama da hogodama, digibulu mu peyu, te wę Yufretis u pedai badu palio. Tama da pelama, te tǫ pedai gavman bidi dabe bidibo madiba sabolama, tama eno te kingo pas augwaliba mena mena pai.
NEH 2:10 Tiali goli, Senbalat, te Bethoron taun bidi, me Tobia, te Amon provins ofisa bidi me deli, augwali sigo odali, ena aselama, te Israel we bidi augwali bugagia bidimainogo eyu, ena augwali tau sainu asali po odali. Tama tibaso, augwali sigo haliga dwai mu yalio.
NEH 2:11 Ena te Jerusalemba sabolama, tialima ena te sela sogo olo toma neyu bidali,
NEH 2:12 tama eno te bidi me deliba te Godigo enaba homu hodolama, te Jerusalemde yao wali sę po me wabeo. Tialima, te be hulia sabo tomo ebo tonaluama, tama ena dali te dwasianu hani bidi naga te hogodama, te da bidali pesage tagalama, tama da pelama, te taun moni masigi obo dolali te sugi pali. Ena naga te donkide dualasa pali, tama te gasa bidi dabe sągągo tǫdu pali. Tama dago te taun te giliga dega sigilubo te obo bagulali sunumi elalubo te badu te taga peyu pali, te augwaligo nogi eyu te Odogo Pesage Badu Sunumi dao wali. Tama da te saut badu peyu, tama te ulu wę edelama pai, augwaligo te nogi weyu, Te Genuai Hasamanigo Ulu Wę da wali, tama da te pelama, te nogi augwaligo te Pobele Bage Sela Sąbo Sunumi te badu sabolai. Te da pedalobo sogo, eno te taun obo aluali te bugagia tonalua pelama, te siago dali obo sunumi te bugagia susa palio.
NEH 2:14 Nosali da begelama, te not badu te Ulu Wę Sunumi elalubo badu pai, tama te Kingo Dwasianu Sigi Aį Elalubo te badu palio. Te badu, te sunumi paliai baso, tama ena te dugulalubo donki te ma pabo usu me ebeo.
NEH 2:15 Tama da te Kidron odogoba dulama, tama eno te obo bugagia osa yali. Tama nosali da tede ma begelama, tama da te asali sunumiba ma sabolagasali. Tama da te buluba soali, te sunumiba da ma pedalubo sogo da, te Odogo Pesage Sunumi dao, tialima da te taun tomoba ma pelawali.
NEH 2:16 Te Jerusalem ofisa bidi me deligo eno te hulide yali sę dabe me konesiąwai, magi baso meni, eno te hanu ma geselebo sę yabo Juda dabe me delibolo te sęde po me wasiąwai. Eno te pris dabeba, me te tobolu bidi dabeba, me te ofisa dabebolo, me te gasa bidi dabebolo dago te sę yaibao po te tigidali Juda dabeba me wasiąwai dao.
NEH 2:17 Tiali goli, megi da, eno te augwali sisinama, tama eno te po wali, “Dagego koneani, te Jerusalem obo sunumi te dolali elalubao, tama te taun tigidali badu me dolalio. Tama dago sęgę genuai mu elalubao. Tialima, megi da, dago te taun masigi obo ma niginao, tama te kolesagade dago te da dali posobo po wabo bidi dabego pedauwali paniaibao,” wali.
NEH 2:18 Tama eno augwaliba te Godigo ena tau siyu yali sę po walali. Tama eno augwaliba te kingo wali po tigidali walio. Tialima, augwaligo te tiwai po wei ponani, “Wiegi yai mu dao. Da hogodama, te sę inao.” Augwa te po ola silama da, tama augwali pelama, te sę yabo nai dabe dodola mugi pali.
NEH 2:19 Tiali goli, Senbalat, me Tobia, me Gesem, te Arap hani bidi me deli, te bagego dago te sę yabo po odali. Tama tibaso, te augwali aselama, tama dabolo te posobo po weyu, te gisugu mayu yalio. Augwaligo te tiwai po wai, “Dagego magi yainu ebawe? Dagego te taun obo ma nigainu eba, agawe? Dagego homugo te dagego tama tiwai elama, tama dage te bomai bage pedelama, tama dagego te king dali hwįaiba weyu teba, agawe?”
NEH 2:20 Tialima, eno augwaliba te tiwai po wei ponani, “Te dagalude Godigo da tau saibao,” wali. “Da te aga sę bidi da, tama tibaso dago te sę yaibao. Tiali goli, te taun Jerusalem te dagego taun menio. Polobadu dagego wąį nǫų dabe te taunde me bidibeo. Tama tibaso, te sę te dagego sę meni dao,” eno te po wali.
NEH 3:1 Tialima, tigidali bidigo te Jerusalem moni masigi obo ma geselebo sę gagalali. Polalubo pris Eliasip dali, te gasa pris dabe dali, augwaligo te obo dage me badu te augwaligo te Kibu Sipsipgo Sunumi nogi poali, te badu te obo nigibo sę yali. Augwaligo te sę silama, tama augwaligo te me badu obo dage sa muyu, te Godigo masigi obo mu da olama, te lotu po wai. Tama nosali augwaligo te sunumi palibo sunumi dabe muani, augwaligo te nogi te Kibu Sipsipgo Sunumi dao wali. Tama augwaligo te obo ugwanu holama nigali te usu nigulali, te Bidi Sese A Naga te 100 Tonalubo Bidi bobobage beba peyu nigali, tama te Hananelgo Tauaba usu nai, te bobobage be mu dao. Augwaligo silama, tama te Godigo obo da olama, te lotu po wali.
NEH 3:2 Te Jeriko bidi dabe te pris dabe pąde sę eyu, tama augwaligo te obo dage tegelama sę yai. Tama Sakur, te Imrigo ogwa, te bidi meba daligo te obo dage gasa me iba tega sabo sę te Jeriko bidi dabe sę ebo pąde wadolama yalio.
NEH 3:3 Te Hasenago hanigo te obo sę te Sakurgo hanigo obo sę ebo pąde wadoa selama, te sę yai. Te obo dage te augwaligo nogi eyu, te po wali, Te Sųgų Pisgo Sunumi elalubao wai. Tama augwaligo te ni nami dabe te sunumi sesegede paliama, tama te sunumi aga mubo pesagede muani, tama bomai lok munama, tama te sunumi dąų walobo bobage ain dili muani.
NEH 3:4 Tama Meremot dali, te gasa bidi dabego dali te obo dage gasa badu te Pisgo Sunumi pąde te obo nigibo sę yai. Meremot te Uriago ogwa, tama te Hakosgo wąį ogwa da. Tama Mesulam dali bidi mebago te obo dage me badu te sę wadolama, te Meremotgo hanigo sę ebo pąde yai. Mesulam aga te Berekiago ogwa, tama te wąį nǫų Mesesabelgo wąį nǫų dao. Tama te Sadok dali, bidi meba dali te obo sę wadolama, te Mesulamgo hani bage sę ebo pąde sę yai. Sadok aga te Banago ogwa dao.
NEH 3:5 Te Tekoa taun bidi dabego te Sadokgo hanigo sę ebo obo dage pąde wadoasa, te obo sę yalio. Tiali goli, te Tekoa tobolu bidi dabego te obo sę ebo tonalubo bidi dabego wabo po odisąbaso, tama te tobolu bidi dabego te sę me deli ebeo.
NEH 3:6 Joiada, te Paseago ogwa, dali Mesulam, te Besodeago ogwa da, tama te bidi meba dali te augwaligo te obo dage te Tekoago hanigo sę ebo obo dage pąde wadoa selama, te sę yai. Te obo dage pedai badu te nogi augwaligo te Jesana Sunumi da wabo nogi elaluai. Tama augwaligo te sunumi sesegede te ni nami paliama, tama te pesage agade te sunumi munama, tama bomai lok munama, tama te sunumi dąų walobo bobobage ain dili muai dao.
NEH 3:7 Melatia te taun Gibeon bidi dali, te Jadon te Merenot taun bidi, tama taun Gibeon bidi dabe, me te Mispa taun bidi dabego me, te obo wadolobo sę ebo te Joiada me Mesulam te bidi sigo hani bagego te obo sę ebo pąde gagalama, ibaba wadolali. Tama te sę ela pali, te wę Yufretis pedai e badu provins polalubo gavman bidigo beba tama tagaligi pali.
NEH 3:8 Usiel, te Harhaiago ogwa, dali te bidi mebago dali, te obo sę wadolasama eyu, tama te Melatia me Jadon sigo hanigo te obo sę ebo pąde gagalasa yai. Usiel te gasa tobage nai dabe te golgo nigibo bidi dao. Tama te Hanania dali, te bidi mebago dali te Usielgo hanigo sę ebo obo dage pąde wadoasa te sę yai, tama pali te augwaligo gasa Genuai Obo nogi wabo teba unuligi palio. Hanania te wiegi yai denami ebo nai sanda nigibo bidi da wai.
NEH 3:9 Tama Refaia te Hurgo ogwa dali te bidi meba daligo te masigi obo sę ebo te Hananiago hani sę ebo pąde te sę yali. Refaia te Jerusalem pąde elalubo tǫ pedai badu me deli te polaluali tobolu bidi dao.
NEH 3:10 Tama Jedaia te Harumapgo ogwa dali te bidi mebago dali, te gasa obo te aga be pąde digi wadolama, te sę yalio. Tama Hatus, te Hasapneago ogwago te obo banis sę ebo te Jedaiago hanigo sę ebo pąde te sę yai dao.
NEH 3:11 Tama Malkia, te Harimgo ogwa, dali Hasup, te Pahatmoapgo ogwa, te bidi mebago dali te masigi obo dage gasa badu pedai te Hatusgo hanigo sę ebo pąde wadoa selama, te sę yai dao. Tama te augwaligo te Stov Dabe Elalubo Bobobage Be te me nigalio.
NEH 3:12 Te Salum, te Halohesgo ogwa, dali te bidi meba daligo te obo banis dage gasa wadoasa nigali, tama aga wegi dabego aga te sę ebo tau salio. Te bidi Salum aga te si wali Jerusalem pąde elalubo tǫ pedai tonalubo polalubo bidi dao.
NEH 3:13 Tama Hanun, te Sanoa taun bidi dabe dali, augwaligo te obo banis te sunumi elaluali madi te augwaligo te nogi wali Te Odogo Pesage Badu Sunumi da walio. Te badu te sę wadoa selama, sę yai. Tama augwaligo te sunumi aga te pesagede muani, tama augwaligo te bomai lok munama, te sunumi palibo bobage ain dili muanio. Tama me augwaligo te obo gasa wadoasa pali, te augwaligo te nogi weyu, te Pobele Bage Sela Sąbo Sunumi da wali, tama te obo banis dąį usu nagasali, te 440 mita dao.
NEH 3:14 Te Malkia te Rekapgo ogwa dali te bidi mebago dali te sę wadolama, tama te obo te Pobele Bage Sela Sąbo Sunumi pedai badu bobegela selama nigali. Tama augwaligo te sunumi aga muani pesagede munama, tama augwaligo te bomai lok munama, te sunumi palibo bobage ain dili muai. Malkia aga te Bet Hakerem bulu tǫ pedai tonalubo polalubo bidi dao.
NEH 3:15 Tama Salum, te Kolhesego ogwa, aga te Mispa tǫ pedaide polalubo bidi dao. Aga dali te bidi meba daligo te obo banis wadolama sę eyu, te sunumi nogi augwaligo te Ulu Wę Elalubo Madi Sunumi da walio. Tama augwaligo te ni nami meba selama, tama te sunumi ugwadu daide te be pedu tiwai nigali. Tama te sunumi aga muani pesagede muai, tama bomai lok munama, te sunumi palibo bobage ain dili muani. Tama augwaligo te obo banis dage Te Sela Sigi Aį sesegede wadoa selama nigalio. Te obo banis te polobadu bidali kingo gi pąde elaluai. Tama augwaligo te obo banis sę wadoasa pabo te Devitgo Taunba pabo togobiliba usu nigi pai dao.
NEH 3:16 Tama Nehemia, te Asbukgo ogwa, aga te distrik Betsur hanude tobolu bidi dao. Tama aga dali aga hani dabe augwaligo te Salumgo hanigo yali obo dagedu wadolama yali. Augwaligo te obo sę ela pelama, te tuni bidi Devit gų pageba saboligi pali. Tama te wę ge te bidi dabego te bomai ami bidi dabego be mesalo pąba tagaligi pali.
NEH 3:17 Tama te Livai hani bidi dabego te obo banis sę te gasa badu me yali. Te augwali nogi e tiwai dao. Rehum, te Banigo ogwa, dali te gasa Livai dabe daligo te obo banis sę te bidi Nehemiago hanigo sę ebo pąde te wadolama, sę yali. Tama Hasabia, te Keila distrik tǫ pedai badu te polalubo tobolu bidi dao, aga dali te aga tǫ pedaide te gasa Livai dabe daligo te obo banis sę te Rehumgo hani sę ebo pąde sę yali.
NEH 3:18 Tama Bavai, te Henadatgo ogwa, aga te namba 2 wali Keila distrik tobolu bidi dao. Tama aga dali te gasa Livai dabego dali te obo banis sę te bidi Hasabiago hani sę ebo pąde sę yalio.
NEH 3:19 Tama Eser, te Jesuago ogwa, aga te Mispa taun tobolu bidi da. Tama aga dali, te gasa Livai dabego dali, te obo banis sę te Bavaigo hani bage sę ebo pąde te sę yai. Tama te obo dage te hwįbo doado bage mubo be pąde elaluai, tama pelama, te nogi augwaligo te Habu Sugunani wabo, te obo dage ponaniba usu nagasai dao.
NEH 3:20 Tama Baruk, te Sabaigo ogwa, dali te gasa Livai dabego dali te obo banis sę ebo te Esergo hani sę ebo pąde sę wadolama yali. Augwaligo bomo eyu, te obo sę ela pali, te polalubo pris Eliasipgo be sunumi elaluali pąba usu nigi pai dao.
NEH 3:21 Tama Meremot aga te Uriago ogwa, tama te Hakosgo wąį nǫų da. Tama aga dali, te gasa Livai dabego dali, te obo sę ebo te Eliasipgo be sunumi pąde gagalama pali, tama te be sesegeba usu nigi palio.
NEH 3:22 Tama te pris mebago me te obo banis me badu geselali. Te Jerusalem pąde elalubo bulude bidibo pris dabego te obo sę te Meremotgo hani sę ebo pąde te sę wadoasa yalio.
NEH 3:23 Pris bidi Benjamin me pris Hasup te gasa hani meba daligo te augwa sigo be pąde digi te obo sę gagalama yali. Tama pris Asaria, aga te Maseago ogwa, te aga wąį nǫų Anania dao. Tama aga dali, te gasa hani meba daligo te obo sę te aga be pąde yalio.
NEH 3:24 Tama pris Binui, te Henadatgo ogwa, dali te hani mebago te obo sę ebo te Asariago be pąde gagalasa ela pali, te obo nogi augwaligo te nogi Habu Sugunani teba usu nigi pai.
NEH 3:25 Tama pris Palal, te Usaigo ogwa, dali te hani mebago te obo sę te Habu Sugunani tedu gagalasa peyu, te si wali kingo bobobage be taua elalubo madiba usu nani. Te taua te tonalubo wasman dabego be pąde elaluai. Tama Pedaia te Parosgo ogwa dali meba hanigo dali te obo banis gasa badu te Palalgo hanigo sę ebo pąde sę yai.
NEH 3:26 Augwaligo te obo sę ela pelama, te Wę Sabo Sunumi pageba sabolama, te bidi dabego te Godigo tempel be tonalubo madiba pedelai. Te sunumi me taua te augwaligo nigali masigi obo elalubo badu te giliga dega sigilubo badu elaluali. Te obo dage te Ofel pąde elaluai, te Godigo be tonalubo sę bidi dabe bidibo madi te Jerusalem badu elaluai dao.
NEH 3:27 Te Tekoa taun bidi dabego te obo banis gasa badu wadolama, te Pedaiago hani sę ebo pąde sę yali. Te si sogo wagisu te obo sę yai. Augwaligo te sę te Godigo tempel be tonalubo taua pąde gagalama, tama augwali sę ela pali. Te Hos Dabego Sunumi elalubo madi te Ofel badu usu nigi pai dao.
NEH 3:28 Tama te pris hani mebago te obo te gasa badu te Hos Dabego Sunumi elalubo madi te not badu wadolama yai, tama te tigidali deli deligo te masigi obo sę ebo te augwa be pąde digi ela palio.
NEH 3:29 Tama Sadok, te Imergo ogwa, te hani meba daligo te pris dabe pąde sę eyu, tama te obo ma geselebo sę te Sadokgo be pąde digi wadoasa sę yali. Tama Semaia, te Sekaniago ogwa, dali te hani mebago te obo me badu wadoa selama, te Sadokgo hani pąde sę yalio. Semaia aga te giliga pedalubo badu Godigo tempel be sunumi tonalubo wasman bidi bidai.
NEH 3:30 Tama Hanania te Selemiago ogwa dali te Hanun, te Salapgo ogwa te a olama, me badu nogo kibisa deli wali ogwa da, tama te gasa hani meba daligo te obo sę ebo te Semaiago hani sę ebo pąde sę yai. Te augwali sigo te si sogo wagisu te obo sę yai. Te Mesulam, te Berekiago ogwa, dali te meba hani daligo te obo wadolama, te Hanania me Hanun te hani sigo sę ebo pąde te sę yali. Augwaligo te obo banis nigibo sę yali, te Mesulamgo be pąde digi te sę yalio.
NEH 3:31 Malkia te gasa haniani nai dabe te golgo nigibo bidi da. Te Malkia dali, te meba hani daligo te obo sę te Hanungo hani sę ebo pąde te sę yai. Augwaligo te obo ma geselebo sę ela pali, te Godigo tempel be tonalubo sę bidi dabego beba usu nama, tama te bisnis bidi dabego sę ebo madiba usu nigi pai. Te be te Godigo tempel be sunumi pąde elaluali, te nogi augwaligo te Tonalubo Wasman Bidigo Sunumi da wali, tama te obo nogo habu sugunani ugwadu elaluai dao.
NEH 3:32 Tama te golgo nai nigibo bidi dabe dali te bisnis sę te masigi obo nogo habu badu gagalama ebo madi, me te Sipsipgo Sunumi elalubo madi, teba te obo sę ela pelama, usu nigi pai dao.
NEH 4:1 Te Senbalatgo te da Judago te moni masigi obo dodolobo sę po odolama, tama agai wado po dwai mu weyu, tama dabolo te posobo po wai,
NEH 4:2 te aga hai namu dabego gedude te po weyu, tama te Samaria ami bidi dabe gedude me wai. Agai te tama po wai, “Te bomo isąwai dwai hobedagi yai bidi hani te Judago mena sę yainogo ebawe? Augwaligo homugo te augwaligo te taun bagulabo obo ma geselaiba homu eyu eba, agawe? Te augwaligo homugo te Godiba ofa ebogo te be sę ebo te deli sogo naga silaiba homu eyu eba, agawe? Augwaligo te homu eyu, te augwaligo te tomode kakali tibi holali te siago ulali masigi dabe selama te obo banis nigibaso te wiegi yai yaiba weyu eba, agawe?” te po wali.
NEH 4:3 Te bidi Tobia te Senbalatgo te po wabo sogo te pąde dolaluali. Tama Tobia te tiwai po wali, “Tagalao, te augwa nigimainu ilao. Tiali goli, augwaligo te obo banis bomonama me dulalubaso, usu me egobeo. Te uni yowi me deli te daiba ugwadu samanobaso da, te obo banis tigidali gisigasa dulaibao,” wai.
NEH 4:4 Bidi mebago te Senbalat me Tobia sigo wali po enabolo wagasali. Tama tibaso, eno e tama gedu haluasa po wali, “God, nago te bidi dabego dabolo wali posobo po nago odalio. Augwaligo da begela dolali, tama tibaso eno homugo te augwaba digi ma dolomainu ilao, tama nago te augwaligo doado bage gasa bidi dabego wi sagasomainu ilama, tama augwali selasa pomainu ilao.
NEH 4:5 Nago te augwaligo yali dwai sę yali kolesaga me sela sągio, tama nago augwaligo sęgę me sela sągio, magi baso meni, augwaligo te da doloyu, te posobo po hauwa mu te da te masigi obo sę ebo bidi dabebolo walio.”
NEH 4:6 Tialima, eno te tama gedu haluasa po olama, tama dago sę bomo mu yali, tama te sesabi me isąbadi tama te obo banis ugwaba holama, te tomoba dąį mu usu nigulali. Tama te deli tigi poai te dago siminabo obo banis te usu tama elalualio.
NEH 4:7 Tialima, Senbalat de Tobia si dali, te Arap dabe, me Amon, me Asdot dabego te tiwai po odali, dago te Jerusalem masigi obo sę bugagia mu ebo wali, tama dago te obo banis te alua degasa dulali te tigidali badu ma nigali po wai. Tama augwaligo te wado po umabo mu olama,
NEH 4:8 tama augwaligo te da dali hwįagasabo po minama, tama dago sę dolaibao po wai.
NEH 4:9 Tiali goli, dago te Godiba gedu haluasa po wabo sę eyu, te Godigo da tau somainu yai, tama te giligade me hulide te bidi meba munama, te boi bidi tonalumainu yali, tiyu te augwaligo da dolagasidali weyu tiai dao.
NEH 4:10 Te meba Judago te tiwai balia po me deli te augwa sę ebo sogo wali balia po te tiwai dao, “Te dago tolobo doado bage sęgę mu ebao. Tama dago tigi nogo sągą te bomo kimi mu meni ebao. Te kakali masigi hauwa mu dao. Megi da, dago te obo banis sę silabo usu meni dao,” wali.
NEH 4:11 Te da boi bidi dabego augwa haside digi te tiwai po obao, “Te da geme geme naga duala sesa pelama, te Juda dabeba pedelaibao. Tama te augwaligo da me sugobeo. Tialima, polo tama te dago augwali tigidali ela munama, tama te augwaligo augwa yali sę me simanogobeo,” wali.
NEH 4:12 Te boi bidi dabego te tama tiwai wali, tiali goli te da Juda meba te augwali pąde bidali, tama sesemane sogo augwali aselama, te boi bidi dabego da dolabo po wali po te dabolo wagasu yai.
NEH 4:13 Tama tibaso, eno te sesemone ene me, bainat hwą ge me, enesigi me, te sę ebo tigidali bidiba dobolama mani. Tama eno te augwa hani deli deli bage augwa deli kanemeba deliba sisinigi pelama, bidao po wali. Tama eno augwaliba weyu, te augwali pelama, te obo banis silisąwani te tigidali badu dolalua peyu, te no munalu, tama augwaligo te boi bidi dabe dali boi hwįabo sisi elaluao po wali.
NEH 4:14 Eno suali, te we bidi wi elama, haliga sęgę elaluai, tama tibaso eno te tobolu bidi dabeba, me ofisa dabeba, me te tigidali we bidiba te tama po wali, “Dage te boi bidi dabede wi me igio,” wali. “Dagego te sę ebo te bugagia homu kone palao, Genuai Bidi te bomai mu da, tama tiyu te tigidali bidi agade wi ebo dao. Tama tialima, odao. Dagego te bomo elama hwįbaso da, teda te dagego abagi dabe me, we wai puluba me, te duga be dabe, te doado bage me, te me dolisąma bugagia elalueibao,” wali.
NEH 4:15 Nosali te boi bidi dabego te augwaligo yaibao wali sę dabe po te dago odali po te augwaligo koneai. Tama te augwaligo koneama, te Godigo augwaligo sunumi palibaso, tama te augwaligo da me dolobe homu yai. Tialima, te da tigidali Judago te moni masigi obo nigibo gagalama, ma yai dao.
NEH 4:16 Te sogo dago te sę ebo kolesaga hasegelali. Tama eno te obo banis sę ebo hani tigidaliba weyu, tama meba augwaligo te sę edubadi, tama mebago tonalu, no munaluao wali. Te no munalubo bidi dabego te sesemone ene, me sabele, me enesigi tolalu, tama augwaligo te hwįbode gudubo kapago nigai ugwa bulali. Tama te tobolu bidi dabego te Juda we bidi tigidali tau mu selama,
NEH 4:17 te obo nigibo sę yai. Tama te bidi dabego te obo nigibo nai dabe tolasa pabo sogo, augwaligo te nai te me badu nogo badu toloyu, tama te gasa nogo badu te hwįabo nai tolaluali.
NEH 4:18 Tama te sę ebo bidi tigidaligo te bainat hwą ge te augwa kukulude gedelai. Tama te biugel bu wabo sę elalubo bidigo te boi bidi dabe asobo sogo, aga te ena pąde bidai.
NEH 4:19 Tialima, eno te we bidi dabeba, me te ofisa dabebolo, me te augwa tobolu bidi dabeba te po walali, “Obo banis te bobobage mu elalubao, tama dagego te hauwa pedai badu sę ebao, tama dage hani deli deli te gasa sę ebo hanide digibulu digibulu bidibao,” wai.
NEH 4:20 “Tama tialima, te boi bidi dabe pedalubo side, te biugel gela weyu, te bu dagego odobaso da, teda boi bidi asalio olama, dage te ena pąba sisinagasao. Tama God, te dago Genuai Bidigo, te dago boi bidi dabe dali hwįaibao.”
NEH 4:21 Eno te po augwaliba mawai, tama te kigamu digi mu te tigidali side tama te hǫ dabe te dagalude ula eboba usu nigi pabo sogode, te da hani mebago te obo nigibo sę ebadi, te gasa hani mebago te sesemone ene tolalu te tonaluai dao.
NEH 4:22 Te sogo eno te tigidali bidiba dali, te augwa sę bidi dabe dali, te tiwai po walali, “Te dagego sę te hulide simanobo sogo, dagego te Jerusalem me taga soyu, duga buluba pigio. Menio. Dage te moni obo tomode bidao. Tama te giligade dago sę eyu, te hulide tonalubo dao,” wali.
NEH 4:23 Tialima, da tigidaligo te tama tialio. Tama te godege pibo side te dago gudubo ugwa me hasegelibeo. Menio. Tama ena dali, te eno hai namu dabe me, te sę bidi dabe me, te ami bidi dabego dali, te ena tigidali side tonaluali, da tigidaligo te sę ebo side gudali ugwa te dago tigide me gudalubadi, tama da piali. Tama tigidali side dago te ene me sesemone tolaluali, tama da te węba pabo sogo me, te dago me tagalobeo. Tama tiyu, sesemane sogo te dago hwįabo sisi elaluai dao.
NEH 5:1 Nosali te Juda we bidi hauwa mu te doado bage sǫą pobaso, tama augwaligo te augwa abagi hasi dabe dali wado po wabo sę yali.
NEH 5:2 Mebago te tama po wai, “Dago te wai puluba hauwa elalubao, tama da nai sǫą palio. Tama dago te nai tusiąbaso da, te da isaibao,” wai.
NEH 5:3 Tama meba umabogo te tama po wai, “Dago te dena abagi dabe meba dali te nai abelabo mone negeli sai. Tama augwaligo te dabolo waliyu, te dago te negeli sali wei ponesiąbaso da, teda augwaligo te dago gi dabe me be me te negeli wei ponoyu saibao,” wai.
NEH 5:4 Tama hani mebago te tiwai po wali, “Dago me te dena abagi dabede te negeli selama, te kingba takis maiabo mone sai. Tama dago te negeli wei ponesiąbaso da, teda te abagi dabego te dago tǫ me wain gi saibao,” wai.
NEH 5:5 “Te dena abagi dabego digi, tama augwaligo te sęgę dabolo mawai. Te augwaligo homugo te augwaligo da aiyaba elalueiba homu eba, agawe? Menio. Da tigidali te deli tigi tiwai dao. Tama dago wai puluba dabe me te augwaligo wai puluba tiwai si elalubao. Tiali goli, dago te gasa sunumi me elalubeo. Tama tiyu, dago wai dabe te gasa bidi dabego olo sę ebo bidi pedelama, te dago mone somainu me egobeo. Tama te bidi dabego te dago wegimani selama, te augwaligo olo sę ebo we dabe pedalumainu ilali. Tama me te augwaligo dago tǫ me wain gi sali, tama dago te wai dabe ma sabo sę deli me elalubeo,” augwaligo te po wai.
NEH 5:6 Eno te we bidi dabego po wabo odobo sogo, eno haliga sębę mu ebaso,
NEH 5:7 tama eno te sęgę dodolabo sunumi bugagia homu kone palali. Eno koneani, te polalubo bidi dabe me, te ofisa dabego dali, te dwai kolesaga yali, tama eno augwali sisinagasomainu i olama, tama eno augwaliba po bomo elama, augwali dali wali, “Dagego te duga ama hasi dabe aiyaba elaluama, tama augwaliba dwai sę ilalio,” wali. Tama eno tigidali we bidi augwali sisinagasomainu i olama, te sęgęde po miainu yai.
NEH 5:8 Augwali sisinagasai madi, te eno augwaliba te tiwai po wali, “Dago te dena abagi dabe te Israel hani isąwai bidi dabego abelama, te olo sę ebo bidi bidibaso, te dena ma sainu te mone sisinibo sę dene mu ebo da. Tiali goli, megi dagego te duga abagi dabeba dwai sę iliyu, tama augwaligo te dugago digi te olo sę ebo bidi bidibo tiwai emainu ilali.” Eno te tama po obaso, te polalubo bidi dabe te pedauwali pania selama, te augwaligo po wei ponabo usu meni yai dao.
NEH 5:9 Tama eno po wadoa selama, te tama po wali, “Dagego kolesaga dolo me ebeo. Dage te God dologoba pelama, tama doloba pai kolesaga sesemane yao. Te dagego te tiwai ebaso da, teda te dago boi bidi dabego me te dago ebo kolesagaba te posobo po me wagobeo.
NEH 5:10 Ena dali, ena hani me, te eno sę bidi dabego me, te we bidi dabego dade te negeli selama, te nai me mone somainu ilali. Tama da tigidaligo te negeli augwaligo wei ponomainu te profit me somainu i me olamu dao.
NEH 5:11 Dago augwaligo negeli yali tagalao. Tama augwaligo te mone me wit, ma wain, me te oliv wel, te augwaligo negeli sali nai dabe te wei me ponogobeo. Tama te me wain gi me, oliv gi me, be me dagego te we bidide sali doado bage dabe, te dagego augwaliba ma maiąo, tama dagego te negelide ugwadu manani profit mone me te ma maiąo,” te po wai dao.
NEH 5:12 Tialima, te polalubo bidi dabego po wei ponoyu, te tama po wai, “Te dago nago wali po gilama te tiwai yaibao. Tama dago te abagi dabego nai dabe te augwaba ma menama, tama dago augwaliba i weyu, te negeli wei ponao po me wagobeo,” wali. Tama tialima, eno te pris dabe asao olama, i wali. Tama eno po bomo elama, te polalubo bidi dabeba weyu, te augwaligo te pris dabego gedude te po dąų waliyu, te augwaligo wali po te bugagia wali pomainu yai. Tialima, augwaligo te po dąų walali.
NEH 5:13 Tialima, megi da, eno te kukulu tiwai elama gudali te nami ugwa pedai peda sabo side tama te elaluali nai dabe memenege elama, te augwali tulaluali. Tama eno te tobolu bidi dabe augwaliba te tama po wali, “Te dagego te megi tama dąų walali po te dagego wali me pisąbaso da, teda te Godigo dage me memenege ilama, tama te dagego be dabe me tigidali nai te dobola selama, tama dage e nami ugwa tiwai olo mu elalueibao.” Tama tigidaligo te tiwai po wai, “Dwagi yai dao. Godigo te tiwai emainao.” Tama augwaligo te Genuai Bidi nogi ugwaba sali. Tama augwa beba ma pelabo sogo, augwaligo te augwa dąų walali po wali pai dao.
NEH 5:14 Ena te Juda gavman polalubo bidi bidibadi, te kibu be nogo si olama, sągągo si bidali, te Artaserksis te kibu be bidi sese deli te king bidibo side gagalasa, te aga kibu be te 32 yia, teba usu nagasalio. Tama te kibu be dabede ena dali, te eno hani daligo te kingo te namba wan gavman te polalubo bidiba mabo te mone selama, te eno nai me abela tubeo.
NEH 5:15 Te ena gavman bidi bidisiąbadi, te provinsde polasa gavman bidali bidi dabe, augwaligo te we bidi dabeba genuai sęgę mawai. Augwaligo te we bidi dabede te nai me, wain me, te mone 400 kina anoma elama siyu yali. Tama me te gavman bidigo sę bidi dabego te we bidi dabe augwali aiyaba elalu yai. Tiali goli, ena te God dologode bidiyu, tede homugo kone palobaso, tama tiyu, eno te tiwai kolesaga me ebeo.
NEH 5:16 Tama eno te tǫ me deli me abelibeo. Menio. Eno te sę bomo mu eyu, tama te Jerusalem masigi obo nigibo bidi dabe tau sali. Tama eno bede sę ebo sę bidi augwaligo me, augwaligo te obo banis nigibo bidi dabe tau sai dao.
NEH 5:17 Tigidali side te bidi sese hauwa te 150 we bidi eno beba nai tuagasali. Te augwali tobolu bidi dabe dali, te Juda olo we bidi dali, te nai tuagasiyu idualio. Tama te gasa bulu tǫ pedai we bidi dabego da suagasobo sogo da, teda augwali me te eno bede nai tuai dao.
NEH 5:18 Eno te tiwai po te nai ulubo bidi dabebolo wai, te tigidali nai ulubo sogo augwaligo te bulmakau omai me deli elama ulali, tama te wiegi yai sipsip te a naga olama, me nogo deli uluyu yai, tama te ba kakaruk te hauwa te we bidi dabego tumainu ulali. Tama te nogo si nogo si side te nai ulubo bidi dabego te we bidi dabego tuabo wain wę hauwa mu siąo wali. Te Juda we bidide genuai sęgę elalubo eno koneani, tama tiyu, te kingo enabolo te nai abelabo mone te we bidide sao po obaso, te eno me sabeo. Menio. Eno te nai ena monego digi abelali.
NEH 5:19 “God, eno nageba hanalu obao, te nago homugo eno te we bidi dabe tau siyu, te wiegi yai sę dabe ebaso, tama nago enade wiegi yai sę ilao,” po walio.
NEH 6:1 Te Senbalat, me Tobia, me Gesem, me te dago boi bidi mebago te po odali, te dago te moni masigi obo ma geselebo sę tigidali silali po odali, tiali goli dago te sunumi musiąbadi dao.
NEH 6:2 Tama te Senbalat me Gesem sigo te po enabolo ola tolali, tama enabolo hanalu, te augwali si dali te bulu me deliba sisinaibao wali, te odogo bulu nogi Onoba sisinibo da wali. Tiali goli, eno koneai, te augwaligo ena muma sabo po olama, te augwaligo ena dolainogo wabo homu yai.
NEH 6:3 Tama eno augwali siba te tiwai po te bidi mebago wagi pomainu tagala palali, “Nehemia te genuai sę me deli ebao, tama tiyu agai te sę taga soyu, dage suagasabo usu egobeo. Te aga asobaso da, te sę bidi dabego te sę me egobeo.” Eno te po ola tolali.
NEH 6:4 Tiali goli, te bidi sigo te wali po tiwai naga te ena dali me si me si sogo wali, tama tigidali sogo eno te po wei ponoyu, te wali po tiwai naga augwali dali wali.
NEH 6:5 Nosali Senbalatgo enaba po ma ola tolali. Tama te sogo agai asęani pas te halusiąwai. Agai te aga sę bidi me delibolo menama, te enaba tolali.
NEH 6:6 Te pasde wali po te tiwai, “Ena Senbalat, eno Gesemgo te tiwai po wabo odai, te da pąde bidibo we bidi hani tomode te po me deli sabilibo odali. Tama te sabilibo po te tiwai wai, nage dali, te gasa Juda dabe daligo te king dologode munu ma bidigobeo olama, tama dagego hwįnama, te duga gavman tedali hodolainu yali. Tama te pagede naga dagego te obo banis ma geselebao. Tama nago me te naga digi te king pedalumainu ebo dao.
NEH 6:7 Tama nago te profet mebabolo walama, augwaligo te tiwai po te Jerusalem tomode pusumainogo yai, ‘Megi da, te da Juda dabe dena digi te king elalubao.’ Eno te sabilibo po page bugagia koneainu ebao, tama tiyu, eno homugo dadi si deliba sisinama, te po dodolainu homu ebao, tiyu king aga digi nagede augwaligo te wali po odabuo,” Senbalatgo te tiwai po asęna tolali.
NEH 6:8 Tiali goli, eno agai pas wei ponoyu, te tiwai po wali, “Nago te asęani po tigidali, te mu po menio. Te naga digi te po naga homude hodolama wali dao.” Eno te pas asęnama, agaba tolai dao.
NEH 6:9 Eno koneani, Senbalatgo hani dabe daligo te pogo da wi ilabo po wali homu yai. Augwaligo homugo dago te sę tagalama, tama dago te obo banis sę silisąmainu homu yali. Tiali goli, eno Godiba gedu haluasa po e tiwai wali, “God, te augwaligo wabo po tagalao. Eno homugo nago ena te sę ebode dąų walomainu ebao,” wali.
NEH 6:10 Nosali ena pelama, te Semaia sugi pali, te Delaiago ogwa, tama wąį nǫų Mehetabelgo wai dao, magi baso meni, aga te gasi elalu, te aga be taga pabo homu isąwani. Tama agai enabolo te tiwai po wali, “Dadi si te Godigo tempel beba peyu, tama te Tedali Gasagi Yai Be Habu tomoba geme duala sigi pinao,” wali. “Tama dago te be sunumi dabe paliaibao, magi baso meni, te boi bidi dabe te megi hulide aselama, nage elaibao,” wali.
NEH 6:11 Tiali goli, eno agabolo te tiwai po wei ponani, “Ena te wi ebo bidi dabe tiwai elama, tama te wi peyu, te geme me duala sigi pogobeo. Tama ena te wi pelama, te Godigo be tomoba geme me duala sigi pogobeo. Mu menio,” wali.
NEH 6:12 Nosali te pode eno bugagia homu kone palama, te tiwai eno koneani, Godigo te tama po te Semaiabolo me wabeo. Menio. Eno koneani, Tobia de Senbalat sigo aga abelama, te po ena dali omainogo yali homu yai.
NEH 6:13 Augwali sigo homugo te Semaiago pogo ena wi ilama, tama ena te Tedali Gasagi Yai Be Habu tomoba pomainu elama, tama te habu selai kolesagade ena sęgę somainu yali. Tama tibaso, te augwaligo eno nogi dolama, tama ena aiyaba elalueinu yai.
NEH 6:14 Tama tibaso, eno gedu haluasa po wali, “God, nago megi te Tobia de Senbalat sigo enade yali kolesagade homu koneama, te augwali sibolo dwai dene mao. Tama nago te profet we nogi Noadia me homugo koneyu, te gasa profet dabego me te ena wi iliyu, te haniani po wabo dao,” wali.
NEH 6:15 Te dago te Jerusalem moni masigi obo ma geselali, te 52 dei tama usu nama yali, tama te 25 dei, te polua sogo nogi Elul usu nama, te obo ma geselebo sę silai dao.
NEH 6:16 Tialima, te dago boi bidi dabe te da pąde bidibo bulu tǫ pedai bidi dabego, dago te obo nigila silali po odali, tama augwaligo koneani, te Godigo digi da tau sobaso, dago te sę yali da homu yai. Tama augwa koneai, te augwaligo dwai kolesaga da dali yainu yai, te geda munama, tama te augwaligo nogi aiyaba tulaluai dao. Tama tibaso, augwali wi yai.
NEH 6:17 Te da Juda dabe tobolu bidi hauwa te Jerusalemde bidalu, tama augwaligo te Tobia tau sabo po dąų walali, magi baso meni, te da bidi mebago wąį ma base dao. Tobiago te Sekaniago wegi sai, te Arago ogwa dao. Tama me Johanan, te Tobiago ogwago, te Mesulamgo wegi sali, te Berekiago ogwa da. Tama dago te obo banis sę geselebo sogo, te tobolu bidi dabe dali, te Tobiago me, te pas hauwa ugwaba, edaba toloduai dao.
NEH 6:19 Tama te tobolu bidi dabego enabolo te Tobiago wiegi yai kolesaga ebo po pusagasai. Tama augwaligo te Tobiabolo te eno ebo sę po tigidali pusigi peyu yai. Tiali goli, Tobiago te pas hauwa enaba tolali, te ena wi ilibo pas tolai dao.
NEH 7:1 Megi da, te masigi obo sę silibaso, tama dago te nigali sunumi dabe te augwa muabo pesagede muani, tama dago te Jerusalem sunumi dabe tonaluabo bidi dabeba te sę mawai. Tama me dago te Godigo nogi ugwaba siyu, te balia po wabo bidi dabeba me te sę mani, tama dago te Livai hani bidi dabeba te sę mawai.
NEH 7:2 Tama eno te Jerusalem tonaluabo bidi si nigilai. Bidi me deli te Hanani, eno ama da, tama gasa bidi me te nogi Hanania da, te Jerusalemde ami bidi dabego polalubo ofisa bidi da. Hanania aga doloba pai bidi mu, tama te God dologode mu bidai. Agai kolesagago te gasa bidi dabego kolesaga aiyaba elaluai dao.
NEH 7:3 Tama eno augwali siba te tiwai po wai, “Dage sigo te tonalubo bidi dabego te Jerusalem obo banis sunumi dabe te kigamu digi mu tama te sunumi damainu me ilamuo,” wali. “Augwaligo te giliga bolo ugwaba pedaligi pomainu tonaluyu bolo yao. Tama te tonalubo bidi dabego sę te pio siligi pabode, augwaligo te sunumi paliama, tama te bobage ain munama, te dąų walao. Tama dage sigo te Jerusalem bidi meba nigilama, te tonalubo bidi dabe pedalumainu yao. Tama dage sigo te gasa bidi dabe nigilama, te augwa be pąde digi tonalua pomainu yao.” Eno te po wai.
NEH 7:4 Te Jerusalem te genuai taun mu da, tiali goli te we bidi hauwa tede me bidisąwai, tama be me hauwa me elalusiąwai dao.
NEH 7:5 Tama Godigo ena te homu kolesaga mayu, te we bidi dabe dali, te polalubo bidi dabe me, te ofisa dabe dali, me te tigidali we bidi wai puluba augwaligo nogi te buku me delide asęmainu yai. Eno tama tiainogo homu ebo sogo, tama eno te polasa te Babilon tagalama, te Juda Provinsba ma asali bidi hani dabego nogi elalubo buku me deli suali.
NEH 7:6 Te kibu be hauwa polobadu te king Nebukatnesargo te Israel we bidi hauwa selama, te Babilonba kalabus mugi pali. Tama nosali hauwa we bidi te Babilon tagalama, tama te Jerusalemba ma asali, te gasa Juda tǫ badu me asai. Tama augwali te augwa wąį nǫų dabego taun tǫba bidagasai dao.
NEH 7:7 Te augwali te Babilon tagalama ma asali sogo, te augwali odasa asiyu, te polasa asali bidi dabe nogi e tiwai, Serubabel, me Josua, Nehemia, Asaria, Ramia, Nahamani, Mordekai, me Bilsan, Misperet, Bikvai, Nehum, me Bana dao. Te Israel hani dabego nogi te augwali Jerusalemba me Juda Provinsba ma asai. Tama te bidi hani dabego bidi dabego namba e tiwai dao.
NEH 7:8 Te Paros hani bidi namba te 2,172 da,
NEH 7:9 tama te Sefatia hani bidi 372 elaluai,
NEH 7:10 tama te Ara hani bidi 652 elaluali.
NEH 7:11 Te Pahatmoap hani augwali te Jesua me Joap hani wąį nǫų dabe da, tama augwali hani bidi te 2,818 bidi elaluai.
NEH 7:12 Te Elam hani bidi te 1,254 elaluai,
NEH 7:13 tama te Satu hani bidi te 845 elaluali,
NEH 7:14 tama te Sakai hani te 760 bidi elaluai.
NEH 7:15 Te Binui hani te 648 bidi elaluai,
NEH 7:16 te Bebai hani bidi 628 bidai,
NEH 7:17 te Asgat hani bidi 2,322 elaluai.
NEH 7:18 Te Adonikam bidi hani 667 elaluai,
NEH 7:19 tama Bikvai hani bidi 2,067 bidai,
NEH 7:20 tama te Adin bidi hani 655 elaluali.
NEH 7:21 Te Ater bidi hani, te aga gasa nogi me Hesekia, te bidi elaluai,
NEH 7:22 tama te Hasum bidi hani 328 elaluai,
NEH 7:23 te Besai hani bidi 324 elaluali.
NEH 7:24 Te Harip hani 112 bidi bidali,
NEH 7:25 tama te Gibeon bidi hani 95 bidai dao.
NEH 7:26 E da te Judago taun nogi hauwa elaluai. Te taun dabe te augwa wąį nǫų te Judaba ma asali bidi dabego taun page bulu dao. Te Betlehem taun me Netofa taun side bidali bidi dabego namba te 188 elaluai,
NEH 7:27 tama te Anatot taun bidi 128 elaluai,
NEH 7:28 tama te Bet Asmavet taun bidi te 42 bidali.
NEH 7:29 Te Kiriat Jearim taun bidi dabe, me Kefira taun, me Berot taun, te bidi 743 elaluali.
NEH 7:30 Tama te taun Rama me Geba bidi dabe 621 elaluai,
NEH 7:31 tama te taun Mikmas bidi te 122 bidai.
NEH 7:32 Te Betel taun me Aį taun bidi te 123 bidalio,
NEH 7:33 tama te Namba 2 Nebo taun bidi te 52 elaluai.
NEH 7:34 Tama te Namba 2 Elam taun bidi dabe te 1,254 bidali,
NEH 7:35 tama te Harim taun bidi 320 bidai,
NEH 7:36 tama te Jeriko taun bidi 345 bidali.
NEH 7:37 Te Lot taun bidi, me Hadit taun, me Ono taun bidi dabe te 721 bidai,
NEH 7:38 tama te Sena taun bidi 3,930 bidai dao.
NEH 7:39 Te pris hani dabego nogi dali, te Jerusalemba ma asali pris dabego namba dali, te e tiwai dao. Te Jedaia hani, te augwa wąį nǫų te Jesua da, te bidi 973 bidai.
NEH 7:40 Imer hanigo 1,052 bidi elaluai,
NEH 7:41 te Pasur hani 1,247 bidai,
NEH 7:42 tama te Harim hani bidi 1,017 bidai dao.
NEH 7:43 Te Livai hani dabego nogi dali, te Jerusalemba ma asali Livai dabego namba dali si, e tiwai dao. Jesua me Katmiel hani bidi 74 elaluai. Te bidi sigo wąį nǫų bidi te Hodavia dao.
NEH 7:44 Te Godigo tempel bede musik wabo bidi dabe, augwali te Asap hani te augwali 148 bidi bidali.
NEH 7:45 Te Godigo tempel be tonalubo bidi dabe augwali hani te Salum me Ater, Talmon, Akup, Hatita, me Sobai. Te augwali 138 bidi dao.
NEH 7:46 Te Godigo tempel bede sę ebo sę bidi dabe te Jerusalemba ma asali, augwali te hani Siha, me Hasufa, me Tabaot dao,
NEH 7:47 me Keros, me Sia, me Padon,
NEH 7:48 me Lebana, me Hagaba, me Salmai,
NEH 7:49 te me Hanan, me Gidel, me Gahar,
NEH 7:50 Reaia, Resin, Nekoda,
NEH 7:51 me Gasam, Usa, Pasea,
NEH 7:52 me Besai, Meunim, Nefusesim,
NEH 7:53 me Bakbuk, Hakufa, Harhur,
NEH 7:54 me Baslut, Mehida, Harsa,
NEH 7:55 me Barkos, Sisera, Tema,
NEH 7:56 me Nesia, Hatifa, te tama hani bidi dabe dao.
NEH 7:57 Te gasa hani dabe augwali te Solomongo sę ebo bidi nogi yali, augwali me te augwa page buluba ma asai. Augwali te bage dabego hani dabe, Sotai, Soferet, Perida,
NEH 7:58 me Jala, Darkon, me Gidel,
NEH 7:59 me Sefatia, me Hatil, Pokeret Hasebaim, me Emon da.
NEH 7:60 Te Godigo tempel bede sę ebo bidi dabe me, te Solomongo sę bidi dabe dali, te augwa page buluba ma asali bidi, te 392 dao.
NEH 7:61 Te Delaia, Tobia, Nekoda, te hani bidi dabe augwaligo namba te 642 da. Augwali te taun Telmela, me Telharsa, me Kerup, me Adon, Imer bidi dabe da wali. Tiali goli, te bidi selago te augwa wąį nǫųgo nogi te augwa kuna konesiąwai elaluai. Tama tibaso, augwaligo te Israel tobolu bidi dabebolo te augwa hani page bidi dabe nogi bugagia ola maiabo sunumi meni yai, augwali te Israel haniwe, ma meniwe, te konebeo.
NEH 7:63 Te pris hani mebago te augwa wąį nǫų dabe te tigidali pris hani nogi elalubo bukude gegebo sę yali. Tiali goli, augwaligo te augwali nogi elalubo me subeo. Tama tiyu, augwali te pris mu dawe, ma meni, te bugagia ola maiabo sunumi meni yai. Te bidi dabe augwali nogi e tiwai, Hobaia, Hakos, Barsilai. Te polobadu te Barsilai hani wąį nǫų bidigo te gasa Barsilai hanigo te Gileat taun wegi me deli sai. Tama te wąį nǫųgo te aga ayago wąįgo nogi sabi poai. Te hani selago te augwa wąį nǫųgo nogi gegesąwai, tama tibaso te tobolu bidi dabego homugo te augwai olo bidi tiwai da homu elama, tama augwaligo te augwali pris bidi bidimainu me iligobeo wai dao.
NEH 7:65 Te Juda polalubo gavman bidigo te bidi dabego te Godiba ofa ebo nai tugio olama, habu selali. Agai te po wai, augwa te polalubo pris me pedalubaso da, teda te polalubo prisgo te Godigo homu konea sabo masigi si selama, tama Godigo te bidi dabe te pris bidi sę sogowe, ma meni egowe, te po wabo odaibao wai.
NEH 7:66 Te ma asali tigidali Israel bidi dabego namba e dao, te 42,360 dao.
NEH 7:67 Tama te sę ebo bidi me sę ebo we augwaligo namba e tiwai, 7,337 dao. Tama te musik elibo koneai bidi dabego namba te 245 elaluai dao.
NEH 7:68 Tama te hos dabe 736, te kamel dabe 435, te donki dabe 6,720, tama te hapkas hos me donki dabe namba te 245 elaluai dao.
NEH 7:70 Te we bidi hauwago mone me doado bage te Godigo tempel be ma sę emainu tau sabo nai mawai. Tama polaluali gavman bidigo te gol mawai, te aga sęgę usu te 8 kilogram yali, tama 50 dis pou gol, me 530 te prisgo mubo wiegi yai ugwa mawai. Tama te deli deli hanigo tobolu bidigo te 168 kilogram sęgę elalubo gol mayu, te 1,250 kilogram silva me mawai. Te gasa we bidi dabego te 168 kilogram sęgę elalubo gol, me 140 sęgę elalubo silva, me 67 te pris dabego gudubo ugwa me mayu yai dao.
NEH 7:73 Te pris dabe me Livai dabe, te tonalubo bidi me sę bidi, te Godigo tempel bede sę bidi dabe me, te musik wabo bidi dabe, me te gasa Israel we bidi dabe, tigidali pelama, te augwa taun dabeba digi te Juda Provins tǫ pedaiba bidada palio. Tama te polua 7 wabo polua pedalubo sogode, te tigidali we bidi augwa taunba bidada pela silalio.
NEH 8:1 Te polua 7 wagi soabode, te dei deli wabo side, te we bidi dabe aselama, te Jerusalemba sisinagasali, te sisinibo pesage te Wę Sabo Sunumi pąba sisinani. Augwaligo te Esraba hanalu wai, te pris te Godigo bomai po page koneai bidigo, te bomai pogo buku sela asao wali. Te bomai po Godigo te Israel dabeba te Mosesgo nogode mawai. Tialima, Esrago te buku selama, tama te sisinibo pesageba sela pali.
NEH 8:3 Tama aga dolugulama, te bomai po te we bidiba te kigamu mu nedada pidubadi, te belo giliga tomo yagasobadi, te nai tubo siba usu nigi pai. Tama augwa te Esrago poba olo bugagia muai. Tama te olo bugagia munama, te po selama, koneabo usu ebo wai dabe, augwali me te sisinibo madide bidai dao.
NEH 8:4 Hasia bolo augwali te bǫ nami selama, te Esrago te bomai po dolalu nedabo pesage me deli nigilai dao. Tama te Esra te pesagede dolaluai. Tama tede agai dolo nogo badu te bidi meba dolaluali, augwali nogi te tiwai, Matitia, Sema, Anaia, me Uria, Hilkia, me Masea. Tama te gasa bidi meba te pobase nogo badu dolaluali, augwa nogi te tiwai, Pedaia, Misael, me Malkia, Hasum, Hasbadana, Sekaraia, me Mesulam dao.
NEH 8:5 Te Esra dolugulumainu nigali pesage, te dwasianu ugwanu elaluai. Tama aga te bomai po neda mawainu dolugulubo sogo, te tigidali we bidigo aga suabo usu yali. Tama agai te buku dagabo augwaligo subo sogo, te tigidali we bidi dolugulai dao.
NEH 8:6 Tama Esrago te po wai, “Te Genuai Bidi nogi ugwaba sao. Agai te bomai God mu dao.” Tama tigidali we bidigo augwa nogo ugwaba selama, te tiwai po wali, “Mu da, mu dao,” wai. Tama tigidaligo kidu sugunu gulama, tama augwa tobolu tǫba basi gulama, tama augwa te Genuai Bidiba lotu po wai dao.
NEH 8:7 Nosali te we bidi hodaluama, ma dologulalio. Tama te Esrago te bomai po augwaliba neda mabo sogo, te Livai mebago te bomai po page pusa mawai. Te Livai dabego nogi te tiwai, Jesua, Bani, Serebia, me Jamin, me Akup, me Sabetai, Hodia, me Masea, Kelita, Asaria, Josabat, me Hanan, Pelaia dao.
NEH 8:8 Esrago te bomai po te Hibru pogo nedali, tama te Livai dabego te Aram pogo begelama, te we bidi dabego bugagia konemainu yai. Tama te Livai dabego te bomai po page augwaliba pusali.
NEH 8:9 Te we bidi dabego te bomai pogo wabo po odolama, tama augwali haliga sęgę mu elama, tama augwa gela walio. Tama te polaluali gavman bidi Nehemia, me pris Esra, tama te Livai dabego te we bidi augwaliba te tiwai po wali, “Megi te dago Genuai Bidi Godigo te genuai bodolu muai side dao. Tama tiyu, dagego te homu dene eyu, gela weyu me igio,” wali.
NEH 8:10 “Tagaliąo, dage te duga beba pelama, te genuai nai daa tugi piąo. Tama dagego te meba nai me, wain me, te nai sǫą pali we bidi dabe maiąo. Megi te Genuai Bidigo side digi da, tama tiyu dagego haliga sęgę me igimio. Menio. Dagego wiegi yai homu pemene te Genuai Bidiba elama, tama agai dage bomo mawaibao,” wali.
NEH 8:11 Tama te Livai dabe te we bidi augwali tomode biliyu, tama te po augwaliba mayu, te augwali haliga dua nagame elama bidimainu ilali. Augwaligo te tama po augwaliba wali, “Te haliga sęgę ebo tagalao. Megi te Godigo genuai bodolu side me da, tama dagego homu dene me igimio,” wali.
NEH 8:12 Tama te we bidi augwa beba pelama, tama augwa homu wiegi yai pemene elama, te nai me wę tuyu yai. Tama augwaligo te nai dage te nai sǫą pali we bidi mawai. Megi da, augwaligo te Godigo po page bugagia koneama, tama tiyu augwaligo te sę dabe yai dao.
NEH 8:13 Te nosali me sogo be posobode te deli deli hanigo tobolu bidi dali, te pris me Livai dabego dali, te Esra sugi pali. Augwaligo homugo agai te bomai pogo po page te augwali bugagia ola momainu yai,
NEH 8:14 Godigo te bomai po te Israel dabebolo te Mosesgo nogode mawai. Tama augwaligo po me deli te bomai pode elalubo suai. Te po e tiwai, te polua a naga olama, me badu si wabo te genuai side pedalubo sogo, te Israel we bidi te osogo bulaluyu bidibo bede bidiąo wai.
NEH 8:15 Tama augwaligo te tigidali Jerusalem we bidiba me te gasa taunba po ola tolali. Augwaligo te tama po wali, “Dage te bulu duba pelama, te oliv ni nologo me, yabe me, te yogo ma sebedi yabe dabe me sao, tama te gasa yabe hauwa elalubo tobage ni yabe dabe seselama, te osogo bidabo be sę yao. Dagego te bomai pode wali po wali pelama, tama te sę dabe iyąo,” wai.
NEH 8:16 Tialima, te we bidi pelama, te ni nologo sigi pelama, tama sela aselama, te osogo bidabo be dabe sę yani. Mebago te augwa be ugwadu daide digi sę yani, tama mebago te augwa be obo tomode sę yani, te augwa be mesalode, tama mebago te Godigo tempel be obo banis bagulali madi sę yai, tama mebago te Wę Sabo Madi Sunumi pąde te bidi sisinibo madi pąde sę yani, tama te Efraim Sunumi pąde elalubo sisinibo madi sę yani.
NEH 8:17 Te Babilon tagalama ma asali we bidi tigidali, augwaligo te osogo bidabo be sęnama bidali. Te polobadu mu te Nungo ogwa Josua bidali sogo, te Israel dabego te tobage osogo bidabo be sę yani. Tiali goli, te nosali Josua isai madi, augwaligo te kolesaga tagalama, bidada asali, te megi te sogoba usu nagasai. Tama megi da, te Israel dabego te kolesaga ma hodolama yali. Tama tiyu, tigidali we bidigo homu wiegi yai pemene mu yai dao.
NEH 8:18 Augwaligo te genuai side te lotu wabo sogo te a naga olama, me badu si, te tama sogo bodolu muani, tama te tigidali side Esrago te bomai po elalubo bukude te Godigo bomai po meba te we bidiba neda mawai. Tama te 7 wabo side tigidali sisinama, tama te genuai side sia sabo lotu po walio, te bomai pode wali po tiwai gilama yai dao.
NEH 9:1 Tama te poluago digi, te dei 24 wabode, te Israel dabe sisinagasai. Tama augwa te nai osogo tubo habu selali, te augwa sęgęde te homu dene ebo tiwai te augwa Godiba ola mayu tiali. Tama augwa te homu dene ebo ugwa dabe gudama, tama augwa toboluba te hogomu dabe muani, te augwa homu dene ola mabo tiwai ilali.
NEH 9:2 Te we bidi augwaligo te Israel hani isąwai hani bidi dali kisasa bilali kolesaga te tagalali. Tama augwali dolalu, te augwa sęgę me, te augwa wąį nǫų dabego sęgę me pusali.
NEH 9:3 Tama te sela auade te bidi mebago te augwa Genuai Bidi Godigo bomai po te augwaliba neda mobaso, tama te we bidi dabego olo bugagia muai. Tama nosali, augwaligo te augwa sęgę pusulama, tama Godiba lotu ma udubadi, te sela aua usu nama bidali.
NEH 9:4 Te Livai meba te po pusubo pesageba dolugulama, tama augwa Genuai Bidi Godiba i bomo elama weyu, tama augwa agaba gedu haluasa po wai. Te Livai dabego nogi te tiwai, Jesua, me Bani, me Katmiel, me Sebania, me Buni, me Serebia, tama gasa Bani, me Kenani dao.
NEH 9:5 Tama nosali te Livai mebago te we bidi dabeba po weyu, te augwaligo Godiba lotu ma waiąo po wai. Te Livai dabego nogi e tiwai, Jesua, Katmiel, me Bani, me Hasapnea, me Serebia, Hodia, Sebania, me Petahia. Augwaligo te tama po wali, “Dage dolugulama, te dena Genuai Bidi God nogi ugwaba siąo Sesemane bidada pabo sogo sesemane dago te aga nogi ugwaba sao,” wai dao. Tama augwa te gedu haluasa po wali, “Genuai Bidi, dago te nago genuai nogi ugwaba sainu ebao. Tiali goli, dago te wiegi yai pemene ebo homu te olo nai tiwai ebao. Nago nogi te genuai mu da, tama tiyu dago konebao, dago pemene ebo te nago gedude usu meni ebao.
NEH 9:6 Nagaduba deli naga nage Genuai Bidi da. Nago te dagalu me, hǫ dabe me, tǫ me, tamu ąį, te tigidali elalubo nai augwali nigai. Tama nago te tigidali naiba te bidabo ula mabo dao. Tama te tigidali dagalude bidibo ensel mobo bidi dabego nageba kidu sugunama, lotu po wabo dao.
NEH 9:7 God, Genuai Bidi, nago naga te Abram dąį ilama, tama aga te Babilon Provinsde, te taun Ur, tede selama, tama aga odasa asali. Tama nago agai nogi hasegelama, tama te nogi Abraham agaba mawai dao.
NEH 9:8 Nago agai homu haliga tomode suali, te nage naga wali pabo homu bomo yai, tama tibaso nago aga dali te bomai po dąų walali. Tama nago agabolo te po dąų waliyu, te Kenan dabego tǫ, me Hit dabego tǫ, me Amor dabego tǫ, me te Peres dabego tǫ, me Jebus dabego tǫ, me te Girgas dabego tǫ, te maiabo po dąų wai. Tama nago te po wali, te tǫ te aga wąį nǫų dabego tǫ pedalaibao wali. Tama nago naga te dąų wali po me togobeo, magi baso meni, nago kolesaga te doloba pai mu elalubo dao.”
NEH 9:9 “Tama nosali te dago wąį nǫų dabe te Isipde bidali sogo, te Isip dabego augwaliba genuai sęgę mabo nago suali. Tama nosali augwaligo te Isip tagalama, te tamu ąį Retsi teba sabalu, te augwali tau sao olama, te nageba gela wabo nago odalio.
NEH 9:10 Nago te Isip king me, ofisa dabe me, te Isip we bidi dali, te augwali aiyaba elaluainu te nago gasagi yai tedali bomai sę me yai. Nago tama tiali, magi baso meni, te Isip dabego naga we bidi dabeba te dwai sę mu ebo nago suai. Te sogo nago naga bomo te tigidali we bidiba ola mawai. Tama augwaligo nageba genuai nogi mena mena asali, te megi e sogoba usu nagasobao.
NEH 9:11 Nago po obaso, tama te tamu ąį si badu buga selama, tama tǫ wa pai nigilai, tama te we bidi dabe te tomodu peyu, te u badu pedaiba sabolali. Tama te Isip ami dabego nago we bidi pobeasa asali, tiali goli nago te tamu ąįgo te Isip dabe augwali mesega somainu elama, tama augwali te węba masigi tiwai dulama, te augwali ela silai dao.
NEH 9:12 Te giligade te ula elalubo sogo nage te pǫ me deli tomode bidiyu, tama te Israel dabe augwali asobo badu te nage polasa pali, tama augwaligo nage wali asali. Tama te be hulia sabode, nage te sia tomode bidiyu, tama nago ulago te augwali pabo sunumi ola mawai dao.
NEH 9:13 Tama augwali te Sainai bulu duba sabalubo sogo, nage te dagalude bidiyu, tama augwaliba po miai. Tama nage aiyaba dulama, nage te bulu dude bidai. Tama nago augwaliba te wiegi yai doloba pai bomai po mawai dao.
NEH 9:14 Tama nago augwaliba te po waliyu, te Sabat genuai side te bodolu nageba mubo tiwai nigilao po wai. Tama nago te haniani bomai po tigidali te dago wąį nǫų dabeba mayu, te naga sę bidi Moses nogoba muai dao.”
NEH 9:15 “Te augwali nasi ebo sogo, te nago te tubo nai dagaludu dulumainu ilama, te augwali tumainogo yali. Tama augwali te wę nogone ebo side, nago te masigide wę pedalumainu elama, te augwali tumainogo ilali. Tama nago augwaliba weyu te augwali mawaibao olama, te po dąų wali tǫ te sagameo wai.”
NEH 9:16 “Tiali goli, dago wąį nǫų dabego te hagoma mu eyu, tama augwa tobolu te dila pelama, tama augwaligo te nago po sela sąwani.
NEH 9:17 Tama augwaligo nago po wali pabo hagela yali. Te nago augwali tau selama, te bomai sę genuai tigidali yali te augwaligo homu konesiąyu gegeda palali. Tama augwali hagoma mu elama, tama augwa te tobolu bidi me deli nigilama, te augwa kalabus sę yali Isip tǫba ma odasa pomainu yali. Tiali goli, God, nago da tǫde we bidigo sęgę sela sąbo dao. Tama nago da godolo geninama eyu, tama daba wiegi yai sę mu ebo da. Tama nago haliga sębę polo me egobeo. Menio. Nago te olo mu tau sabo wiegi yai homu kolesaga te umabo me elalu, tama tiyu nago dago wąį nǫų dabe tudiba me mubeo.”
NEH 9:18 “Te augwali Sainaide bidali sogo, augwaligo te gol selama, tama te bulmakau piksa nigilama, tama augwaligo te po weyu, te bulmakau augwa god da olama, tama agai augwali te Isipde selama odasa asai da, walio. Tama te kolesagade te augwaligo nago nogi posoyu dolai dao.
NEH 9:19 Augwaligo te tama tiwai yali, tiali goli nago augwali te tǫ wa pai bulude me tagalobe, magi baso meni, nago te olo tau sabo wiegi yai homu kolesaga mu augwaliba yai. Nago te augwali giligaba sunumi ola mabo pǫ te dagala me sabeo, tama nago te augwali be hulia saidu pobadi, te sunumi ola mani sia ula, te me dagala sabeo.
NEH 9:20 Nago te naga wiegi yai Mobo Noma Bidi te augwaliba mayu, te augwali ola momainogo yai. Tama nago te tubo nai mana me wę augwali menama, te augwali te nai me wę dali tumainu yai.
NEH 9:21 Augwali te kibu be bidi sese si te tǫ wa pai bulude bilidubadi yali, tama te kibu be tigidalide te nago augwali nai madu bugagia tonaludali. Tama augwaligo gudali ugwa dabe me te me pisila pisąma, tama augwali sągą me dene elama me dabeo.”
NEH 9:22 “Nago te dago wąį nǫų dabego te king Sihon te Hesbon bulu tǫ bidi dali, me tama te king Ok te Basan tǫ pedai bidi si dali hwįmainu ilali. Tama augwaligo te augwali si aiyaba elaluama, tama augwali sigo tǫ salio. Tama te tǫ te augwa genuai tǫ pedai mu pedelai dao.
NEH 9:23 Tama nago augwaliba te wai dabe hauwa mawai, te dagalude elalubo hǫ dabe tiwai pedelali. Tama nago te augwaligo te boi bidi dabe aiyaba elalumainu ilama, tama nago te augwa bulali wąį nǫų dabeba mawainu te po dąų walali tǫ somainogo yai dao.
NEH 9:24 Tama augwaligo te Kenan hani bidi dabe dali te boi hwįani sogo, nago digi te Kenan dabe aiyaba elalumainu ilama, tama te bulali wąį nǫų dabego te tǫ somainu yali. Tama augwaligo te hani aiyaba elalubo sogo, tama nago te augwa homu kolesaga wali pomainu elama, tama te we bidi dabeba dene mabo sę dwai ilali, tama te Kenan tǫ king dabeba me te dwai mu yai dao.
NEH 9:25 Tama dago bulali wąį nǫų dabego te boi hwįnama, tama te bomai obo banis elalubo taun siyu, tama te ili hauwa elalubo tǫ sobadi, te doado bage hauwa pągąnalubo be dabe me sali. Tama augwali te bidigo nigai dwasianu sigi ąį dabe sali, tama te wain gi, me oliv ni gi sobadi, tama te wiegi yai nai hauwa elalubo tobage ni dabe me salio. Tama augwali te bulu tǫ pedaiba bidigi pali sogo, augwa te wiegi yai nai hauwa tuyu, te augwa tigi genuai nisali, tama nago wiegi yai nai tigidali augwaliba mawai baso, te augwali homu wiegi yai pemene mu yai dao.”
NEH 9:26 “Tiali goli, te we bidi augwali te hagoma mu elama, tama augwaligo nago po sela sąwai. Tama nago bomo yai poba augwaligo tudi ola mawai. Tama nago te profet bidi dabe augwaliba tagala palali, te augwaligo te nago bomo yai po augwaliba magasu asali, te augwali homu begelama, nageba ma asomainu yai. Tiali goli, augwaligo te profet dabe ela muani. Tama hauwa sogo augwaligo te tiwai kolesaga yali, tama augwaligo nago nogi mu dolai dao.
NEH 9:27 Tama tibaso, nago augwali gogolama sula tagaliyu, te boi bidi dabego augwaliba boi hwįagasomainu elama, tama augwali aiyaba elaluama, tama augwaliba dwai sę ilali. Tiali goli, nosali te bulali wąį nǫų dabego nageba hanalu, te augwali tau sao olama, i wali. Tama nage te dagalude bidiyu, tama augwaligo gela wabo nago odali, tama nago te olo tau sabo wiegi yai kolesaga augwaliba umabo mu elama, tama nago te bidi meba augwaliba tagala palama, te boi bidi dabe sela sąmainogo yai dao.”
NEH 9:28 “Tiali goli, te augwali bugagia ma dugulalu bidibo sogo, polo tama augwaligo dwai sę ebo kolesaga ma ebaso, tama nago te boi bidi dabego augwali aiyaba elalumainu elama, te augwali tonalubo sę yai. Tama te sogo me augwali homu ma begelama, tama augwaligo nageba hanalu, te augwali tau sao wai. Tama nage te dagalude bidiyu, te augwaligo i wabo odali. Hauwa sogo augwaligo te tiwai kolesaga naga iduali, tiali goli nago wiegi yai homugo olo mu tau sabo kolesaga augwaliba iduali, tama tigidali sogo nago augwali te boi bidi dabego nogode ma dobola sidu geai dao.”
NEH 9:29 “Nago po bomo elama augwaliba weyu, te nago bomai po wali pomainu yali. Tiali goli, augwaligo hagoma eyu, tama augwaligo nago bomo yai poba tudi ola mawai. Augwaligo koneani, augwaligo te bomo yai po wali pobaso da, te augwali bugagia bidimainu yai. Tiali goli, augwaligo tobolu te dila pelama, tama augwaligo tabi haliga te dagana sali, tama tiyu te augwaligo nago po wali me pisąwai dao.
NEH 9:30 Te kibu be hauwa nago dua dua tau sabo sę augwaliba eyu, tama augwali homu begeliąo wai. Te nago Mobo Bidigo te po te profet dabeba mawai, tiali goli te wąį nǫų dabego te po odisąwai. Tama tibaso, nago augwali te gasa bulu tǫ pedai bidi dabego nogoba mawai dao.
NEH 9:31 Tiali goli, nago olo tau sabo wiegi yai homu kolesaga te genuai mu elalubo, tama tiyu nago augwali tudiba me musąma, tama nago augwali mu dolomainu me ebeo. God, nage te olo mu tau sabo wiegi yai homu kolesaga me homu dene ebo page bidi mu da, tama nago da wei eyu, godolo mu ebo dao.”
NEH 9:32 “Dago God, nago genuai nogi me genuai bomo elalubao. Da tigidali te nago bomo dologode bidibao. Tigidali sogo nago te naga dąų walali bomai po wali pelama, tama nago dabolo te olo mu tau sabo wiegi yai kolesaga ebao. Megi da te genuai sęgę tolai, tama tiyu dago homugo nago da homu koneama tau sao. Polobadu te Asiria king dabego te dago kingba, me tobolu bidi dabeba, me pris, me profet dabeba dwai sę eyu, te dago wąį nǫų dabeba me te tiwai yai. Tama te sęgę dade elalua asidubadi, te megi e sogoba usu nagasobao.
NEH 9:33 Dago te dwai sę ebo kolesaga ebaso, tama nago te daba dene ilibo sę yali. Tama nago te kolesaga te dolo ebao. Sesemane sogo nago te naga dąų walali bomai po wali peyu, tama nago da tau sali, tiali goli dago hagoma eyu, tama dwai kolesaga haniani ebo dao.”
NEH 9:34 “Mu tama, te dago wąį nǫų dabe, me king dabe, me tobolu bidi dabe, me pris dabe, augwaligo te nago bomo yai po wali me pisąwai. Te nago bomo yai po augwaliba weyu, te nago po tigidali augwaligo wali pomainu yali, tiali goli te augwaligo te po odobo hagela homu eyu yai dao.
NEH 9:35 Te dago king bidali sogo, nago te wąį nǫų dabeba wiegi yai sę mu eyu, tama augwaliba wiegi yai nai mawai. Augwali te genuai tǫ pedaide bidalu, tama te tǫ ili umabo hauwa elalubo genuai tǫde bidai. Tiali goli, augwaligo te homu kone palobeo. Menio. Augwaligo te dwai sęgę sabo sę naga iduali, tama augwali homu begelama, te nageba ma asobeo.
NEH 9:36 Megi da te wiegi yai tǫde ma bidibao, te wiegi yai tǫ nago te da bulali wąį nǫų dabeba mawai. Te wiegi yai ili elalu, tama dago tede nai hauwa siyu yali. Tiali goli, da te gasa hanigo olo sę ebo bidi tiwai bidibo dao.
NEH 9:37 Dago te dwai sęgę sabo sę yalio, tama tibaso nago te gasa bulu tǫ pedai kingo da tonalumainu yai. Tama augwaligo te dago tǫde pedalubo nai tigidali siyu ebo dao. Te kingo te po obaso da, teda dago dali te dago tonalubo nai kibu dabego me te agai homu wali naga pabo dao. Tama tiyu, dago sęgę genuai mu elalubo dao,” augwaligo te po wali.
NEH 9:38 Te gedu haluasa po ola silama, da tigidali Israel we bidi da tigidaligo te daba pedalubo sęgęde homugo kone palama, tama dago homu deli elama, tama tialima te Godigo bomo yai po dago wali mu pabo homu eyu, tama te da dąų wabo bomai po me deli asęani. Tama te dago pris dabe dali, te Livai dabe, me tobolu bidi dabe, augwali aselama, tama te kontrak asęani pode augwa dąį ilama, tama te po bomo elama dąų walai dao.
NEH 10:1 Hasia polalubo bidigo nogi asęani, te polalubo gavman bidi Nehemia, te Hakaliago ogwa dao. Tama te Nehemia tudi badu nosali, Sedekaia aselama, te nogi asęagasali.
NEH 10:2 Te Sedekaia tudi badu nosali te pris dabe aselama, nogi asęagasali. Augwali nogi e tama tiwai, Seraia, Asaria, Jeremaia,
NEH 10:3 me Pasur, Amaria, Malkia,
NEH 10:4 me Hatus, Sebania, Maluk,
NEH 10:5 me Harim, Meremot, Obadia,
NEH 10:6 me Daniel, Gineton, Baruk,
NEH 10:7 me Mesulam, Abiya, Mijamin,
NEH 10:8 me Masia, Bilgai, me Semaia dao.
NEH 10:9 Te pris dabe tudi badu nosali te Livai dabego nogi asęagasali. Augwali nogi e tama tiwai, Jesua, te Asaniago ogwa, tama Binui, te Henadat hani, te Katmiel,
NEH 10:10 tama Sebania, Hodia, Kelita, Pelaia, Hanan,
NEH 10:11 me Mika, Rehop, Hasabia,
NEH 10:12 me Sakur, Serebia, me gasa Sebania,
NEH 10:13 me Hodia, Bani, me Beninu, te tama dao.
NEH 10:14 Te Livai dabe tudi badu nosali, te hetman dabego nogi asęagasali. Augwali nogi e tiwai, Paros, Pahatmoap, Elam, me Satu, Bani,
NEH 10:15 me Buni, Asgat, me Bebai,
NEH 10:16 me Adoniya, Bikvai, me Adin,
NEH 10:17 me Ater, Hesekia, me Asur,
NEH 10:18 me Hodia, me Hasum, Besai,
NEH 10:19 me Harip, Anatot, Nebai,
NEH 10:20 me Makpias, Mesulam, me Hesir,
NEH 10:21 me Mesesabel, me Sadok, Jadua,
NEH 10:22 me Pelatia, Hanan, Anaia,
NEH 10:23 me Hosea, Hanania, Hasup,
NEH 10:24 me Halohes, Pilha, Sobek,
NEH 10:25 me Rehum, Hasapna, me Masea,
NEH 10:26 me Ahiya, me gasa Hanan, me Anan,
NEH 10:27 me Maluk, Harim, me Bana, te tama dao.
NEH 10:28 “Da Israel we bidi dabe dago te po dąų walobo kontrak po asębao. Da te pris dabe, me Livai dabe te Godigo tempel be tonalubo bidi, tama te Godigo bede sę ebo bidi dabe me, te Godigo bede musik wabo bidi dabe, tama te tigidali gasa we bidi dabe me, da tigidaligo te Godigo bomai po wali pelama, tama dago te bulu badu bidi dabe, te Israel hani isąwai bidi, te dago tǫ pedaide bidalubo bidi dali kisasa me biligobeo. Da te dena we dabe dali, tama te dago wai dabego dali me tama te poba olo bugagia munama, te koneainu yali,
NEH 10:29 da te dena deli kaneme dabe dali, me te dago tobolu bidi dabe dali sisinagaselama, dago bomo yai po dąų waliyu, te dago Godigo bomai po sesemane sogo wali paibao wai. Te bomo yai po te Godigo te dago wąį nǫų dabeba mayu, te aga sę bidi Mosesgo nogoba mawai. Dago Genuai Bidigo te tama po wai, dago te bomo yai po dabe te bugagia wali peyu, te agai po tigidali me wali pao wali. Tama tibaso, dago te po bomai weyu, te dago wali paibao wali, tama dago te bomai po togolobaso da, teda te Godigo da dolomainao.”
NEH 10:30 “Tama dago te po weyu, te dago bulu tǫ pedai pąde bidalubo Israel hani isąwai bage dago te hani dali we si mu egobeo po wai dao.”
NEH 10:31 “Tama te bulu badu hani bidi dabego te nai wit ma gasa tobage nai te Sabat sogode, ma gasa genuai lotu wabo sogode sesebaso da, teda dago me abeligobeo, wali.” “Tama te kibu be a naga olama, me badu nogi si, te wabo kibu bede dago te gide nai me bulugobeo, wali. Tama dago te kibu bede te tigidali negeli elalubo siminaibao.”
NEH 10:32 “Tama te tigidali kibu bede te da deli deligo te dwasianu pedai dage silva mone menama, te Godigo bede muabo nai dabe abelimainu yaibao wali.
NEH 10:33 Te silvago te bret abelama, te tebolde te God gedude muaibao, tama te tigidali side ofa iduabo wit abelainu yaibao, tama te tigidali side siaba ulama domainu yabo kibu sipsip dabe abelainu yaibao, tama te Sabat side te ofa yabo nai dabe me, tama me te gesi polua side, me te tigidali gasa genuai side te ofa yabo nai dabe abelainu yaibao. Tama silvago te da Israel dabego sęgę sela sąyu ofa yabo nai dabe abelaibao, tama te gasa ofa, me te gasa tigidali nai te Godigo be tomode sę yabo nai dabe dao.”
NEH 10:34 “Tama da tigidali we bidi, me te pris dabe, me Livai dabe, dago te bomo yai pogo po wali pelama, tama dago te satu gagali elama, te mena mena hani nigilama, te sia sigi pelama, te selasa asiyu, te dena Genuai Bidi te Godiba sela asali ofa dabe ulabo sia sigi pomainu yaibao.”
NEH 10:35 “Tama te tigidali kibu bede te dago te polasa inayani nai selama, te ni nedu du dabe polasa tau yali selama, te Godiba selasa asaibao, wai.”
NEH 10:36 “Tama da tigidaligo te dago gomunai wai te ogwa dabe selama, te pris dabeba odasa paibao, te Godigo beba, tama augwali dolo te Godigo da olama, sa muaibao. Tama dago te tigidali omai bulmakau wai, me sipsip, me meme selasa pelama, te augwali dolo sa munama, Godiba mawaibao. Dago te tiwai ebo te Godigo bomai pode wali po gilama yaibao.”
NEH 10:37 “Tama te tigidali kibu bede dago te hasia nigali bret nigabo plaua dage selama, te dago gide te polasa tau elama inayani naigo te agaga pali wit dao, tama te wain, me oliv wel, tama te tedali tobage ni wai dabe selama, tama dago te nai dabe te pris dabebolo te Godigo beba mawaibao.” “Tama te Livai dabego te dago gide holali nai dabe me deli te nogo si walide sagasainu ebo sogo da, teda dago augwaliba mawaibao.
NEH 10:38 Tama te Aron hanigo pris dabe te augwa Livai dabe dali aselama, te nai dage me deli sagasaibao wai. Tama te Livai dabego te nai te nogo si pedai badu dobolama, tama me dage pedai deli te Godigo nai mubo be habuba mueibao wai dao.
NEH 10:39 Magi baso meni, te da we bidi me te Livai dabego te hasia podolali tigidali nai te wit me, wain me, te oliv wel me sela aselama, te Godigo nai mubo be habuba muaibao. Tama te dis pou me te be habude munaluai. Tama te Godigo be habu nigilali, tede te pris dabego be habu me, te tonalubo bidi dabego be habu me, te Godigo bede musik wabo bidi dabego be habu me elalua paibao.” “Tama dago te Godigo be tonalubo sę munu me tagalogobeo. Te dąų wali po te ola silali dao.” Te po da, te dąų wali po mu dao.
NEH 11:1 Te sogo te Israel tobolu bidi dabe te Jerusalemde bidali, tama te meba we bidi augwali gasa hanu dabede bidada pali. Tama augwaligo satu gagali yali, te augwa nogo si hani tomode deli deli hani te Jerusalemba bidigi pabo bage sa mumainogo, te Godigo hanu. Tama te gasa hani meba augwali te gasa meba hanu dabede bidada pali.
NEH 11:2 Tiali goli, te meba we bidi hanigo te augwa homu kolesaga wali pelama, te Jerusalemba bidigi pali, tama te Israel dabego wiegi yai homu pemene augwaliba yalio.
NEH 11:3 Te gasa Israel hani dabe me, pris dabe me, Livai dabe me, te Godigo bede sę ebo bidi dabe me, tama te king Solomongo sę bidi wąį nǫų hani dabe, augwali te augwa taunde me tǫde digi bidaluai. Te Juda tǫ provins pedai genuai bidi dabe te Jerusalemba bidagasali bidi dabego nogi e tiwai dao.
NEH 11:4 Te Juda hanigo tobolu bidi si elaluai, Ataia me Masea. Ataia aga te Usiago ogwa, tama aga bulali wąį nǫų te Sekaraia da. Te Ataia aga gasa me bulali bidi wąį nǫų te tiwai, Amaria, Sefatia, me Mahalalel. Augwali te bulali wąį nǫų bidi Peres da, te Judago ogwa dao.
NEH 11:5 Masea te Barukgo ogwa da, tama te bulali wąį nǫų bidi da, te Kolhose. Te Maseago gasa bulali wąį nǫų dabe te tiwai, Hasaia, Adaia, me Joiarip, me Sekaraia. Augwali te wąį nǫų Selago wai dabe da, te Judago gasa ogwa me dao.
NEH 11:6 Te Peresgo hani 468 te bomai bidi naga te Jerusalemde bidai dao.
NEH 11:7 Te Benjamin hanide te tobolu bidi dabe elaluali, Salu, me Gabai, me Salai, me Joel, me Juda. Salu te Mesulamgo ogwa, tama Joetgo ogwago wai te agai wąį nǫų da. Te Salugo gasa bulali wąį nǫų dabe te tiwai elaluali, Pedaia, me Kolaia, Masea, Itiel, me Jesaia dao.
NEH 11:8 Tama Gabai de Salai si te Salugo hai name da wali. Tama te Benjamingo we bidi hani tigidali te Jerusalemde bidali namba te tiwai, te 928 dao.
NEH 11:9 Tama Joel, te Sikrigo ogwa da, aga te Benjamingo hanide polalubo bidi bidali. Tama Juda, te Hasenuago ogwa te Benjamin hani da, aga te si wali Jerusalem pedai tobolu bidi dao.
NEH 11:10 Te Jerusalemde bidali pris dabego tobolu bidi dabe nogi te tiwai elaluali, Jedaia, te Joiaripgo ogwa, me Jakin dao.
NEH 11:11 Tama tobolu bidi Seraia, aga te Hilkiago ogwa, tama wąį nǫų Mesulam. Tama te Seraiago wąį nǫų dabe te tiwai, Sadok, me Meraiot, me polalubo pris Ahitup dao.
NEH 11:12 Te hani bidi te 882 te Godigo tempel be tomode sę yai dao. Tobolu bidi Adaia aga te Jerohamgo ogwa, tama te wąį nǫų Pelalia da. Tama aga wąį dabe te tiwai, Amsi, me Sekaraia, me Pasur, me Malkia dao.
NEH 11:13 Te hanide te 242 bidi elaluai. Tobolu bidi Amasai aga te Asarelgo ogwa, te wąį nǫų Asai. Tama agai wąį nǫų dabe te tiwai, Mesilemot me Imer dao.
NEH 11:14 Te hanigo te bomai ami bidi te 128 elaluai. Tama te ami bidi dabe augwa tobolu bidi, te Sapdiel, tama aga te genuai nogi elalubo hani sibi bidi me deli dao.
NEH 11:15 Te Livai hani tobolu bidi dabe te Jerusalemde bidali te tiwai. Polalubo bidi Semaia aga te Hasupgo ogwa, tama te wąį nǫų Asrikam. Tama te Semaiago wąį nǫų bidi si, te Hasabia me Buni dao.
NEH 11:16 Tama tobolu bidi Sabetai me Josabat sigo te sę dabe te Livai dabego te Godigo tempel be bulu badu ebaso tonaluai.
NEH 11:17 Tobolu bidi Matania te Mikago ogwa, tama agai wąį te Sapdi. Aga te Asap hani da. Te Godigo bede lotu po wabo sogo, Matania te bidi dabego gedu haluasa po weyu, Godiba usu da wabo tonalubo polaluali bidi dao. Tama tobolu bidi Bakbukiago te Matania te sę ebo tau sali. Tobolu bidi Apda aga te Samuago ogwa, tama aga wąį nǫų Galal. Aga te Jedutungo hani dao.
NEH 11:18 Te Godigo taun Jerusalemde bidali Livai dabego namba e tiwai, te 284 dao.
NEH 11:19 Te Godigo tempel be sunumi tonalu, te Jerusalemde bidali tobolu bidi sigo nogi e tiwai, Akup me Talmon. Te hanigo namba te 172 dao.
NEH 11:20 Te gasa Israel we bidi dabe, me gasa pris, me Livai dabe te Juda gasa taunde bidali, te augwa tǫde digi tama bidai.
NEH 11:21 Tama te Godigo tempel bede sę ebo bidi dabe te Ofelde bidali, te Jerusalem me badu, tama te bidi Siha me Gispa sigo augwali te sę ebo tonaluai dao.
NEH 11:22 Usi te Banigo ogwa da, tama wąį nǫų Hasabiago wai. Tama agai te Livai dabe te Jerusalemde tonalu bidali. Usi te Asap hani, tama aga wąį si, me Matania me Mika da. Te Asap hanigo naga te Godigo tempel be tomode te musik elibo sę tonaluai dao.
NEH 11:23 Kingo te bomo yai po me deli muyu, te mena mena hanigo te tigidali side Godigo be tomode musik elibo sę tonaluabo bidi nidigili pai dao.
NEH 11:24 Tama Petahia te Mesesabelgo ogwa, te Sera hani sibi, te Juda hani dao. Tama Petahia te Persia bidali te Israel dabe augwa pedauwali deliba munama, te king bidibolo po omainu ebo bidi bidai dao.
NEH 11:25 Te we bidi hauwa te augwa taun tǫ pąde bidaluai. Te Juda hani bidi meba te taun selade bidali, Kiriat Arba, me Dibon, me Jekapsel, tama te taun pąde elalubo bulu dabede bidalio.
NEH 11:26 Tama meba te taun Jesua, me Molada, me Betpelet,
NEH 11:27 me Hasarsual, me Berseba, tama me te Berseba pąde elalubo bulu dabede bidali.
NEH 11:28 Tama meba te Siklakde bidali, me te Mekonade, me te Mekona pąde elalubo bulu dabede bidai.
NEH 11:29 Tama meba te Enrimonde bidiyu, me te Sora, me Jarmutde bidai,
NEH 11:30 me te Sanoa, me Adulam, me te taun pąde elalubo bulu dabede bidai. Tama meba te taun Lakisde bidai, tama augwa te Lakis pąde elalubo tǫde bidai. Tama meba te taun Asekade bidali, tama te pąde elalubo bulu dabede bidai. Tama te Juda dabe te Bersebade bidali, te saut badu, te Berseba tomode elalubo taun tomode bidai, tama te odogo tǫ bulu te Hinom te not badu me bidai dao.
NEH 11:31 Te Benjamin we bidi hani meba te Geba taun, me Mikmas, me Aija, me Betel, tede bidali, me te Betel taun pąde elalubo bulu dabede bidai.
NEH 11:32 Tama meba te taun Anatot, me Nop, me Ananiade bidai,
NEH 11:33 me te taun Hasor, me Rama, me Gitaim,
NEH 11:34 me te taun Hadit, me Seboim, me Nebalat, te taunde bidali,
NEH 11:35 te Lot me Ono, te bidi dabego te haniani nai nigibo te odogo tǫ bulu pesage dao.
NEH 11:36 Tama te tobolu bidi dabego te Juda dabe dali bidibo Livai dabeba te po waliyu, te mebago augwa bidibo page bulu tagalama, te Benjamingo hani dali bidigi piąo wali, tama meba teba bidigi palio.
NEH 12:1 Te hauwa pris me Livai augwaligo te Babilon tagalama, tama te Serubabel dali te Jerusalemba ma asali, te Sealtielgo ogwa, tama polalubo pris Josua me asai. Te pris dabego nogi te tiwai, Seraia, me Jeremaia, me Esra,
NEH 12:2 me Amaria, me Maluk, me Hatus,
NEH 12:3 me Sekania, me Rehum, me Meremot,
NEH 12:4 me Ido, Ginetoi, Abiya,
NEH 12:5 me Mijamin, me Madia, me Bilga,
NEH 12:6 me Semaia, me Joiarip, me Jedaia,
NEH 12:7 me Salu, Amok, Hilkia, me Jedaia. Te polalubo pris Josua bidali sogo, te pris dabe augwali te pris dabego tobolu bidi bidai dao.
NEH 12:8 Te Livai dabe ma asali bidi dabego nogi e tiwai, Jesua, me Binui, me Katmiel, me Serebia, me Juda, me Matania, me Bakbukia, me Uno da. Matania te aga ama dabe daligo te Godiba buba hwi weyu, te usu da olama, balia po wabo bidi dabe tonaluai. Tama te hanigo te balia wali dage silibo si da, teda te Bakbukia me Uno dali te augwa si ama dabe, augwaligo te gasa balia po dage wei ponoyu, weyu yai dao.
NEH 12:10 Josua te Joiakimgo aya, tama Joiakim te Eliasipgo aya, tama Eliasip te Joiadago aya dao.
NEH 12:11 Tama Joiada te Jonatango aya, tama Jonatan te Jaduago aya dao.
NEH 12:12 Te Joiakim te pris dabego polalubo bidi bidali sogo, te pris dabe te augwa hanigo digi tobolu bidi bidali, Meraia te Seraia hanigo tobolu bidi, tama te Hanania aga te Jeremaia hanigo tobolu bidi bidai,
NEH 12:13 tama Mesulam aga te Esrago hani tobolu bidi bidali, tama Jehohanan te Amaria hanigo hetman bidai dao.
NEH 12:14 Jonatan aga te Maluki hanigo tobolu bidi, me te Josep aga te Sebania hanigo tobolu bidi bidali.
NEH 12:15 Te Atna aga te Harim hanigo hetman, te Helkai aga te Meraiot hanigo tobolu bidi bidali.
NEH 12:16 Sekaraia aga te Ido hani tobolu bidi, me Mesulam aga te Gineton hani hetman bidai.
NEH 12:17 Tama Sikri aga te Abiya hani hetman bidali, te Piltai aga te Miniamin hani me Moadia hani si tobolu bidi bidali.
NEH 12:18 Samua te Bilga hani hetman, te Jehonatan te Semaia hani hetman bidai,
NEH 12:19 me Matenai te Joiarip hani hetman, te Usi te Jedaia hanigo tobolu bidi dao.
NEH 12:20 Kalai te Salai hani hetman, te Eber te Amok hanigo hetman bidali,
NEH 12:21 tama te Hasabia te Hilkia hanigo hetman, me te Netanel te Jedaia hanigo tobolu bidi bidai dao.
NEH 12:22 Te polalubo pris bidi Eliasip, me Joiada, me Jonatan, me Jadua bidali sogo, augwaligo te pris dabego tobolu bidi dabe nogi te buku me delide asęai. Augwaligo te tama tede asali te king Darius te Persia king pedelali sogoba usu nagasai. Tama augwaligo te Livai dabego tobolu bidi dabe nogi me asęani, tialima te bukude te Juda tǫ pedaide yali sę dabe po dodolama asęai. Tiali goli, augwaligo te tiwai ela asidubadi, te polalubo pris Jonatan bidali sogoba usu nagasai, te Eliasipgo wąį te ogwa, tama nosali augwaligo munu me asębeo.
NEH 12:24 Te Israel dabego lotu po odubadi, te God nogi ugwaba siyu, te agaba buba hwi wabo sogo, te Livai dabego te king Devitgo wali po tiwai gilama yali. Devit aga te Godigo po pusubo bidi da. Te Livai hani nani si dolugulama, tama te hani me deligo te balia po ola simanobo si da, teda te gasa hanigo te gasa balia po dage me wei ponoyu wali. Tama Hasabia, me Serebia, me Jesua, te Katmielgo ogwago, te sę tonaluai.
NEH 12:25 Matania, me Bakbukia, me Obadia, me Mesulam, me Talmon, me Akup, te bagego te Godigo tempel be habude te doado bage mubo madi tonalubo sę elaluali. Te be habu togwali te Godigo be bobegela sali obo sunumi sesegede elaluali.
NEH 12:26 Tama te Livai dabe te polalubo pris Joiakim bidali sogo bidali, te Josuago ogwa, tama te wąį nǫų Jehosadak, me te polaluali gavman bidi Nehemia, me pris Esra bidali sogo, te Godigo bomai po page bugagia koneai bidi dao.
NEH 12:27 Te Jerusalem hanu moni masigigo nigai obo silali sogo, te tigidali bidi sisinagaselama, te obo te Godigo da olama, sa mubo lotu wali. Tama augwaligo te Livai dabe i weyu, te bidali pedai badu te taga soyu, te augwali dali deliba siginagaselama, te wiegi yai homu pemene elama, te Godiba balia po weyu, usu da wali. Tama augwaligo te tiwai balia po wabo sogo, te Livai mebago te musik weyu elabo kapa plet si tola siąo wai, tama mebago te haniani gita eliyu yalio.
NEH 12:28 Tama te augwali me, te Livai dabego dali, te Godigo bede balia po wali, tama augwa te bulu Netofa, me Betgilgal, me Geba, me Asmavet, me te augwa gasa bulu dabe taga solama, tama augwali te Jerusalemba sisinagasai. Te bulu dabe te Jerusalem pąde elaluai dao.
NEH 12:30 Hasia bolo te pris dabe me Livai dabe te augwa digi te Godigo gedude magi sę isiąwai wiegi yai mu pedalabo kolesaga wali pali. Tama augwaligo te tiwai tobage kolesaga te we bidiba eyu, me te Jerusalem oboba yai, me te obo sunumi dabeba me, tama tiwai kolesaga naga yai dao.
NEH 12:31 Ena Nehemia eno te Juda tobolu bidi dabe te obo daiba sisinama, tama eno augwali dobolama, te genuai hani si nigilama, te masigi obo ugwadu daidu biliyu, te taun tigidali badu bagula usu nama biliyu, tama te Godiba usu da olama, te balia po walio. Te polasa pabo hani te dolo nogo badu begasa peyu, te Pobele Bage Sela Sąbo Sunumiba pedelali.
NEH 12:32 Hosaia dali, te Juda tobolu bidi meba dali, augwaligo te balia po wabo bidi dabe augwali wali bilai dao.
NEH 12:33 Tama te pris meba augwali wali peyu, te biugel bu ola pali. Augwali nogi te tiwai, Asaria, me Esra, me Mesulam, me Juda, me Benjamin, me Semaia, me Jeremaia. Tama Sekaraia te augwali wali pali. Sekaraia te Jonatango ogwa, tama wąį nǫų te Semaia. Tama aga bulali wąį dabe te tiwai, Matania, me Mikaia, me Sakur, me Asap dao.
NEH 12:36 Tama te Sekaraia aga nogi sabi bidi mebago te aga wali pai. Te augwali nogi te tiwai, Semaia, me Asarel, me Milalai, me Gilalai, me Mai, me Netanel, me Juda, me Hanani. Te hani tigidaligo te balia po wabo haniani nai tolali, te king Devitgo polobadu elali musik tobage tiwai, te Godigo po pusali bidigo, te gagali yali nai tiwai dao. Tama pris Esra aga te polasa pabo hanide te polalubo bidi dao.
NEH 12:37 Augwali pali te Wę Ulu Elalubo Sunumiba sabolama, tama augwali te togobilidu ugwaba holama, te Devitgo Taunba sabolali. Tama augwali peyu, te Devitgo genuai be edelama, te giliga pedalubo te taun badu te Wę Tubo Sunumi oboba ma sabolalio.
NEH 12:38 Tama te si wali Livai hani te pobase nogoba begelama, te obo ugwadu daidu pobaso, te ena augwali wali pai. Tialima, te genuai hani we bidi ena wali asali, tama da pelayu, tama te Taua Stov edelama, tama te Genuai Oboba sabolali.
NEH 12:39 Tama dago te badu taga soyu, tama peyu, te Efraim Sunumi, me te Jesana Sunumi, me te Pisgo Sunumi, me te Hananel Taua, me te Tonalubo Bidi 100 Bidibo Taua, me te Sipsip Sunumi elaluali me, te ededeli palio. Tama da asiyu, te Godigo tempel be oboba sabolali, te sunumi augwaligo nogi yali te Kalabus Dabego Sunumi Dao wai.
NEH 12:40 Tama te Livai hani si te Godigo beba sabolama, tama te be tomoba doligi pelama, te Godiba usu da po wabo balia wainogo yai. Te ena wali asali bidi hani te tobolu bidi hani,
NEH 12:41 me te pris meba badi, augwaligo te bu wabo nai biugel tolaluali, te gasa bidi mebago me tolaluai. Te pris dabego nogi te tiwai, Eliakim, me Masea, me Miniamin, me Mikaia, me Elioenai, me Sekaraia, me Hanania dao.
NEH 12:42 Te gasa bidi dabego nogi te tiwai, Masea, me Semaia, me Eleasar, me Usi, me Eser. Tama Jesrahiago te balia wali bidi dabe tonaluai, tama tigidaligo te balia po wai dao.
NEH 12:43 Te side augwaligo te Godiba ofa hauwa eyu, tama augwa wiegi yai pemene genuai elaluali, magi baso meni, Godigo digi augwali te wiegi yai pemene ilali. Tama te we dabe me, wai puluba dabego me wiegi yai pemene yai. Tama te digibulu bidali we bidi, augwaligo te genuai i wabo me pemene ebo po odai dao.
NEH 12:44 Tama te sogo augwaligo te bidi meba nigilama, tama te we bidi dabego te Godiba mabo nai dabe, me te Godigo bede gasa nai doado bage te mubo be habu tonaluabo bidi nigilali. Te habu togwali madi augwaligo te gide polasa inayani nai, me te polasa tau yali nedu du dabe tama, me te we bidi augwaligo nogo si nai buguluyu, te me deli te Godiba mawainu te be habu nigilaliba sisinani. Te bidi dabe te we bidi dabego tǫba pelama, te sigi pabo sę elaluali te bomai pode weyu, te we bidigo te pris dabe me Livai dabeba nai maiąo po wali. Te Juda dabego te bidi dabego te pris dabe me Livai dabe tau sabo bidi nigilali, magi baso meni, te Juda dabego te pris dabeba me Livai dabeba te bugai haliga te augwaligo sęde yai dao.
NEH 12:45 Te pris me Livai dabego te lotu weyu, te we bidi dabe te Godigo gedude wiegi yai mu pedalabo sę yali, tama te gasa tobage lotu me te Godigo augwaligo emainogo yabo po augwaliba wai. Tama te musik wabo bidi dabe, me te Godigo be tonalubo bidi dabego te augwa sę me yali. Augwaligo te po polobadu te king Devit me te aga ogwa, king Solomon sigo, te hani si augwa wąį nǫų dabebolo te sę mawai dao.
NEH 12:46 Te musik wabo wąį nǫų dabego te wiegi yai pemene ebo balia weyu, te Godiba usu da olama, gedu haluasa po wali, te king Devit me Asap si bidali sogo tiali, te musik wali bidi dao.
NEH 12:47 Tama megi da, te Serubabel me Nehemia si bidali sogo, tigidali Israel we bidigo te tigidali side te nai sela aselama, te musik wabo bidi dabeba, me te Godigo tempel be sunumi tonalubo bidi dabeba magasali. Tama te we bidi dabego te wiegi yai nai te Livai dabeba mawai, te ofa God agaba digi mabo tiwai yali. Tama Livai dabego te ofa me pedai deli te pris dabeba mawai, te bomo yai po wali po tiwai gilama yalio.
NEH 13:1 Te sogo te we bidi dabe sisinagasobaso, tama te Livai dabego te Mosesgo bomai po augwaliba nedali. Tama augwaligo te bomai po nedali pode te tiwai po wali, te Amon dabe me Moap dabe te Godigo we bidi Israel hani tomoba me asogobeo wai.
NEH 13:2 Tama te Israel dabego te bomai po odali sogo, augwaligo te we bidi dabe sela sąwani, te augwa aya ma ida te bulu badu bidi te Israel hani isąwai bidi dao, tama augwaligo te augwali te Israel we bidi hanide bidimainu me ebeo. Te bomai pogo page te tiwai dao. Te Israel dabego te Isip tagalama asali sogo, te Amon dabe me Moap dabe augwaligo te nai me wę me augwali me mabeo. Tama te hanigo te profet Balam abelama, te Godigo Israel dabe dolomainu ebo po omainu yali. Tiali goli, Godigo Balamgo te po omainu me ilibeo. Menio. Balamgo te Godiba augwali wiegi yai bugagia ilabo po wai dao.
NEH 13:4 Pris Eliasipgo te dago Godigo tempel be doado bage mubo habu tonaluai, tama aga te Amon hani bidi Tobiago hai namu dao.
NEH 13:5 Eliasipgo Tobia te genuai be habu me delide bidimainu ilali, augwaligo te ofa yabo wit sisinani madi nigilai, tama te wiegi yai denami pedalubo pauda hano elalubo digi, te Godigo bede sę ebo doado bage mubo madi, te we bidigo ofa te pris dabeba mabo me, te nai dabe me wain, me oliv wel, te we bidi dabego Godiba mabo te pesage habu me deli te nigilali. Godigo te nai dabe te Livai dabe, me te musik wabo bidi dabe, me te Godigo be tonalubo bidi, te augwaligo tuabo nai te nigilama, sa muai.
NEH 13:6 Ena Nehemia, ena te Jerusalemde bidisąbo sogo te sę pedelali, magi baso meni, ena te Persia tǫ pedaiba ma pelama, te sę ebo ripot po te king Artaserksisbolo magi pai. Te sogo aga te Babilonde king bididubadi, te 32 kibu be bidai. Nosali eno te kingba hanalu, ena te Jerusalemba ma pagawe obaso, tama agai ena pao olama, usu da wai.
NEH 13:7 Tama ena te Jerusalemba ma sabaligi pabo sogo, augwaligo enabolo te tiwai po wali, Eliasipgo te Tobiabolo te genuai be habu te Godigo tempel be obo tomode te mawai da po wali. Agai te yali kolesaga te dwai mu dao wai.
NEH 13:8 Tama eno wado po dwai mu olama, tama eno te Tobiago tigidali nai doado bage buluba sela sąwai.
NEH 13:9 Tama eno te pris dabe augwaliba olama, te be habu te augwa ebo kolesaga wali pelama, te Godigo gedude wiegi yai me pedalumainu ilao po wali. Tama eno augwaliba weyu, te Godigo bede sę yabo doado bage te nai tigidali selama, tama te ofa yabo wit, me te wiegi yai denami hano ilibo pauda selama, tama tigidali te be habuba ma muiąo wai dao.
NEH 13:10 Eno te tiwai me odali, te Livai dabe, me te Godigo bede musik elibo hani dabe, augwa te Jerusalem tagalama, te augwa tǫba ma pali, magi baso meni, te we bidi dabego augwali nai me masiąwai.
NEH 13:11 Tama tibaso, eno te polalubo bidi dabeba wado po wabo sę ilama, tama eno augwaliba hanalu wali, “Magi baso dagego te Godigo be olodali elalumainu ilaliwe?” Tama eno te Livai dabe, me te Godigo bede musik wabo bidi hani ma odasa aselama, tama eno augwalibolo te sę ma hodolama yao po walio.
NEH 13:12 Tialima, tigidali Judago te wit, me wain, me oliv wel te bugai pedai me deli te ma gagalama, sela aselama, tama te Godigo nai doado bage mubo be habuba ma muai dao.
NEH 13:13 Tama eno te pris Selemia, me te po page koneai bidi Sadok nigilali, me Pedaia, te Livai hani me deli, te be habu dabe tonalumainogo yali. Tama eno te augwali tau sabo bidi me deli nigilali, aga nogi te Hanan, te Sakurgo ogwa, tama te wąį nǫų Matania dao. Te gasa bidi dabego te po wali, te bidi dabego te doloba pai kolesaga mu ebaso, tama eno augwali nigilali. Augwaligo te augwa deli sę ebo abagi dabede te nai dobabo sę ebo kolesaga elalubo dao wali.
NEH 13:14 Tama God, eno homugo nago eno te yali tigidali sę te nago be tonaluali, me te lotu wabo dodolobo sę yali kolesaga, te nago homugo konemainu yai. Eno homugo te eno wiegi yai sę yali po te nago naga bukude sela sągio.
NEH 13:15 Te sogo eno suali, te meba Juda dabego te nedu du wain agalama, tama te Sabat side wain wę siyu nigali. Tama te gasa Juda dabego te wit nai, me wain, me te wain nedu du wai, me te ni kaya fik, me te gasa tobage nai dabe selama, te donki daiba munama, tama te Jerusalemba sela pabo sę yali. Tama te Sabat side te eno augwaliba bomai po wali, “Te side da wabo sogo te we bidi dabego te nai dabe abelimainu me ilamuo,” po wali.
NEH 13:16 Te tamu ąį sesegede elalubo taun Tair bidi meba te Jerusalemba aselama bidai. Tama te Sabat side te hanigo te sųgų pis me gasa nai dabe te Jerusalemba sesali, te da we bidi dabego abelimainu yai.
NEH 13:17 Tialima, eno te Judade polaluali bidi dabeba wado po weyu, te tama po wali, “Odiąo. Dagego te dwai kolesaga mu ebao. Dagego te Sabat side dao wabo dolama, tama te olo side tiwai me deli pedalubao,” wali.
NEH 13:18 “Polobadu te wąį nǫų dabego te tobage kolesaga tiwai naga ebaso, tama te Godigo augwaliba dwai dene mayu, tama agai te taun dolali. Tama megi dagego te tobage kolesaga ebaso, tama Godigo da dali wado po mu odubo dao,” wali.
NEH 13:19 Tama eno po bomo elama, te tiwai po wai. Te Sabat si te tigidali Sadede pedalubo sogo, augwaligo te taunba pabo obo sunumi paliąo, wali. Augwaligo te tiwai sę ebo te Sabat side dolo tiąo, te giliga ibaba dega sigi pabo sogo. Tama te sunumi dabe palialudubadi, te Sabat siligi pabo sogoba usu nao. Tama eno te ena sę bidi mebabolo olama, te sunumi augwaligo bugagia tonalu, tama te bidi dabego te Sabat side te taun tomoba te nai dabe sela asigio olama, paliąo po wai dao.
NEH 13:20 Te si sela sogo te bidi dabego te tobage nai te we bidi dabego abelimainogo sela aselama, tama augwali te taun obo sesege badu pelama, tama dago te sunumi dabo tonaluai dao.
NEH 13:21 Eno augwali sulama, tama augwaliba wado po te tiwai wali, “Magi baso dage te obo bulu badu bidagasaliwe? Tegoba, dage piąo. Te dage Sabat side ma asali da, teda eno dwai sę dageba yaibao.” Augwaligo te po odolama, te nosali Sabat side augwali ma asobeo.
NEH 13:22 Tama nosali eno te Livai dabeba walali, te augwa digi te Godigo gedude wiegi yai pedalabo kolesaga wali pali, tama augwali te wiegi yai elama da, teda augwali pelama, te obo sunumiba tonalugi pelama, te bidi dabego augwa te Sabat side bomai po wali bugagia pomainu yai, te Godigo bodolu side, tama te gasa bidi dabego te taun tomoba nai sela asigio wali. God, nago te tigidali we bidi godolo mu elama, tama nago olo tau sabo wiegi yai kolesaga te augwaliba ebo dao. Tama tiyu, eno homugo nago eno te gasa wiegi yai kolesaga ebo me te homude koneama, tama nago te olo mu tau sabo wiegi yai kolesaga enaba yao.
NEH 13:23 Te sogo me eno te tiwai konea pali, te Juda bidi mebago te tǫ Asdot pedai we dabe, me Amon, me Moap we dabe sai.
NEH 13:24 Tama augwali hani wai mebago te Asdot dabego po koneani. Tama mebago te gasa po koneai. Tiali goli, augwaligo te da Juda dabego po konesiąwai dao.
NEH 13:25 Tama eno te bidi dabeba wado ilama, tama eno meba elama, tama mebago tobolu nisi guda sąwai. Tama eno te tiwai po augwaliba wali, “Dagego te dwai kolesaga ebaso, tama eno homugo Godigo dage dolainogo yaibao.” Tama eno te bidi dabego te Godigo nogide bomai po dąų walomainu ilali, te augwa dali, te augwa wai dabego me, te gasa bulu tǫ pedai we bidi hani dali we si ebo munu ma elamu dao po wai.
NEH 13:26 Tama eno augwaliba te tiwai po wai, “Dagego te king Solomongo dwai kolesaga wali pali dao. Polobadu Godigo te king Solomon godolo elama, tama aga te tigidali Israel hanigo king pedalumainu ilali. Tama Solomongo te wiegi yai homu kolesaga koneama sali, tama te gasa bulu tǫ pedai king tigidaligo koneani homu kolesaga tigidali te agai aiyaba elaluali. Tiali goli, agai te bulu badu we dabe, te Israel hani isąwai we meba selama, tama augwaligo agai homu kolesaga hugiabi selama, tama agai te dwai sęgę yai dao.
NEH 13:27 Dago te dagego ebo te dwai kolesaga wali pelama, tama dago te bulu badu hani we dabe sobaso da, teda dago te Godigo po sela sąwaibao. Dagego homugo dago te tama tiwai emainogo eba, agawe?” wali.
NEH 13:28 Joiada aga te polalubo pris Eliasipgo ogwa. Tiali goli, te Joiadago ogwa me deligo te gasa bulu tǫ pedai we me salio. Te we te Senbalatgo wegi dao. Tama eno te Joiadago ogwa sela sąnama, tama eno aga te Jerusalemba bidimainogo me ebeo.
NEH 13:29 Tama tialima, God, nago te pris dabego te yali dwai kolesaga homu koneao. Augwaligo te pris hani te nago gedude meda ilali. Tama nago te pris me Livai hani dabe dali dų walali bomo yai po te augwaligo dolalio.
NEH 13:30 Te kolesagade eno te bulu badu bage, te Israel hani isąwai bidi dabego te tigidali doado bage da tomode elaluali te sela sąwai. Tama eno te tigidali pris, me Livai hani deli deligo yabo sę dąį nigilali.
NEH 13:31 Tama te ofa ulabo sia sigi pabo we bidi meba eno sa muani, tama eno te sela asabo sogo bodolu muna muna pali. Tama eno augwaliba te po me weyu, te augwaligo gide polasa tau yali nai, me te polasa tau yali nedu du me selama, tama te ofa tiwai selasa asao po weyu, te sę dodolali. Tama te God, nago eno te yali kolesaga tigidali homu kone palama, tama nago enaba bugai homu ilao.
EST 1:1 Tama te sę dabe pedelali sogo, te Serksis te Persia genuai tǫ pedaide king tuni bidi bidibo sogo tiwai. Aga te genuai tuni bidi duabo sai siade te moni hanu Susa tede dulaluali, te Persia kantrigo genuai polalubo hanude bidai, tama agai te 127 te tama genuai provins dabe te tǫ Indiade gagalasa, te Itiopia teba dąį usu nagaselama tonaluali.
EST 1:3 Te kibu be selade te aga tuni bidi king bidiyu, agai te tigidali tǫde bidibo kiap dabe badi, tigidali provins polalubo gavman bidi dabe sisinao po olama, te genuai nai daa tuaibao wai. Tama te Persia ami dabe badi, te Midia ami dabe badi, te genuai nai daa tuboba aselama, bidai. Tama tonalubo bidi dabe badi, te tigidali provinsdu asali genuai bidi dabe, augwali me bidalio.
EST 1:4 Te nai daa tuali te tudubadi, te polua a naga me badu nogo deli bidali, tama king bidigo tigidali doado bage, te mone tigidali badi, te aga bede munalubo tigidali au dodobage te we bidi augwalibolo ola manio. Tama augwaligo te nai dabe sulama, tama te dwagi yai naga mu dao walio.
EST 1:5 Te silama nosali, king bidigo te aga be obo tomode digi, te aga be pąde, te gasa genuai nai daa tuali. Te nai daa tuainu ebo da, te Susa hanude bidibo tigidali bidigo tuabo nai, te mone elalubo bidi dabe badi, te magi nai meni yai bidi badi elama tuali. Tama augwali te nai daa tudubadi, te Sadede deli dolo usu nanio.
EST 1:6 Te obo bagulali te tedela ugwago me, te sisi ugwago badi te au ilama, tama augwaligo te dwagi yai dila pai bono baklaingo kęani. Tama te baklain bono te silva ring te bobobage masigi pos elalubo madi augwaligo kęanio. Augwaligo te obo tomode te haniani umabo masigigo te tǫ haluai, te plua tiwai te wiegi yai masigigo nigai. Te umabo mama yai masigigo me, te tedela masigi me, te sisi masigigo me mubadi, te nogo mogu me te dula ula tiwai masigi hauwago halubadi yali. Tama te golgo nigai duabo sia sai, me te silvago nigai sai dabe badi te obo tomode muna muna pai.
EST 1:7 Te bidi dabe augwaligo wę selama, tudu pali te haniani gasagi gasagi yai gol kapde wę tudu pai. Tama tuni bidigo te bidi dabebolo te wain wę hauwa mawai.
EST 1:8 Te augwaligo nisu naga wain tumainogo te dąį me ilibeo. Tuni bidigo te aga bede sę ebo bidi dabe augwalibolo te po wali, augwaligo te deli deli bidi dabebolo te augwa homu usu nama te ąį mao po wali.
EST 1:9 Tama te sogo me te tuni we kwin Vastigo te tuni bidigo bede te we sibi tigidaligo tuabo nai daa naga elama tualio.
EST 1:10 Te Sadede deli da wabode te genuai nai daa tubode, te tuni bidi te wain ąį tuali madi te aiyoge gana dwasianu yalio. Tama aga te nai ulubo bidi dabe a naga olama, me badu nogo si te augwali asomainu i wali. Te augwali nogi e dao, Mehuman, me Bista, me Harbona badi, Bikta badi, Abakta badi, Setar me, Karkas badi, tama dao.
EST 1:11 Tama tuni bidigo augwalibolo po weyu, te tuni we kwin Vasti sela asao wali. Te kwin Vasti aga te tuni we sę ebo madi tobolude munasa asao wali. Tuni we aga te sawi yai we mu, tama tiyu tuni bidi agai te kiap dabe augwalibolo me, te agai genuai nai daa tubo madi asali tigidali bidi dabebolo aga ola mawainogo yai.
EST 1:12 Te nai ulubo bidi dabego te tuni bidigo po te kwin Vastibolo wali, tiali goli te tuni we te asobo hagela yai. Tama te tuni bidigo wado po mu weyu, moni sębę yalio.
EST 1:13 Tama agai te po page koneai bidi dabe i olama asobo si, te po augwaligo agabolo pusubode te agai magi sę te tuni we dali yagasomainu yali. Te tuni bidigo te tiwai kolesaga elalubo te po page koneai bidi dabe aselama, te agai te bomai po me te we bidi augwali bidibo homu kolesaga dodolobo sę elaluai.
EST 1:14 Te bidi dabego nogi e dao, Karsena, Setar, Atmata, Tarsis, Meres, Marsena, Memukan. Augwali te bidi a naga olama, nogo me badu si bidi te Persia de Midia tǫ pedai side te tuni bidigo tǫ badu te polalubo gavman tobolu bidi dabe dao. Tuni bidigo te augwaligo po wali paibao.
EST 1:15 Tama agai te bidi dabe augwalibolo te po wali, “Ena te gavman tuni bidi king Serksis dao, eno te ena nai ulubo bidi dabe tagala paliyu, te eno we te gavman tuni we kwin Vastigo te sę dabe emainu te eno po agabolo tagala palali, tiali goli agai eno po sela sąwanio. Tama bomai pode magi po wabo dawe? Te gavman tuni we kwin dali dago magi yaibawe?” agai te po hanalu wali.
EST 1:16 Tialima, Memukango te gavman tuni bidibolo me, te aga tobolu bidi dabebolo dali, te po wai, “King bidi, nago odao! Te kwin we Vastigo yali dwai sę te nage delibolo naga me ebeo, menio, agai te dwai sę te nago tigidali hanude bidi tigidalibolo me, te tigidali tobolu bidi dabebolo me, te sę yalio.
EST 1:17 Te pąde tama digi te nago tonalubo tǫ pedai badu te tigidali we sibigo te gavman tuni wego yali kolesaga te po odaibao. Tama augwaligo te tiwai po waibao, ‘Te king Serksisgo te kwin Vastigo te aga suagasao po wali, tiali goli kwin we aga kolesaga hagoma elama, tama agai po sela sawanio,’ waibao. Tama te we dabe sibigo augwaligo me te augwa bidi dabe dali hagoma yaibao.
EST 1:18 Tama e sogo naga te Persia me Midia te tobolu bidi dabego we dabego te kwin wego yali kolesaga po odoyu, tama augwaligo augwa bidi dabebolo te sę yali po pusulama, tama te we dabe sibigo te dwai po hauwa weyu, te hagoma eyu yaibao,” te po wai.
EST 1:19 “Tialima, king bidi, nago homugo te po wiegi yai da wida, te nago te bidi dabebolo te tiwai po me tolao, te kwin Vastigo te nage me suagasigi po wao. Te po te Persia me Midia dabego te bomai po asębo bukude asęao. Tama te bomai po hasegelibo usu me egobeo. Tama nago te we Vasti te hasegelama, tama sawi yai dwagi yai we me selama, tama aga te gavman tuni we kwin nigilao.
EST 1:20 Nosali nago te po te nago tonalubo bulu tigidaliba te po bila silai madi, te tigidali wego te augwa bidigo po bugagia odomainogo, te nogi elalubo bidi, ma te nogi meni yai bidigo me, te augwa wego po odomainu yaibao,” Memukango te po wai.
EST 1:21 Te gavman tuni bidi king te aga tobolu bidi dabe dali augwaligo te po godolo elama, tama king bidigo te Memukango wali po gilama, te tiwai yai dao.
EST 1:22 Tialima, gavman tuni bidi kingo te aga tonalubo hanu tigidaliba pas asęna toliyu, tama agai te tigidali we bidigo wabo po deli delide te pas asęai. Agai tama tiwai po wai, “Bidigo naga te aga we wai puluba tonaluaibao,” te po wai.
EST 2:1 Nosali te gavman tuni bidi kingo wado po wali silama da, teda agai te gavman tuni we Vastigo agabolo yali kolesaga te agai homugo ma kone yagasalio. Agai te kwin we Vasti sela sąnama, te kwin we ma bidigobeo wali po te homugo ma kone yagasalio.
EST 2:2 Tama te king tau sabo bidi mebago agabolo te dwagi yai kolesaga ola mani, augwali te aga pąba duagi pelama, agabolo tama po wai, “Te nago gasa sawi yai wegi meba gegao,” te po wai.
EST 2:3 “Nago te naga tonalubo tigidali hanu bidi dabe augwali sa munama, tama augwaligo te sawi wiegi yai te wegi dabe te gavmango polalubo hanu, te Susaba odasa asomainu yao, tama nago te we dabe sisinibo beba sisinama muao. Te nago we dabe sibi tonalubo bidi, te Hegai, agai te augwali tonalumainu yao. Tama te we dabe augwa tigide wel mubadi, te augwa tigi gasa sawi yai mu pedalumainu au ilaibao.
EST 2:4 Tialima, te we dabe augwalide te me deli nago aga godolo mu eyu da, nago aga te gavman tuni we kwin nigilama, agai te kwin bidali we Vasti bidali pesage agai somainu yaibao,” te king tau sabo bidi mebago agabolo te po wai. Te king bidigo odama, tama agai te dwagi yai po da te homu yai, tama agai te po wali pai.
EST 2:5 Te gavmango moni hanu Susade te Juda bidi me deli bidai, te aga nogi Mordekai. Te aga Jairgo ogwa dao, tama Kis de Simei dali sigo hani, te Benjamin genuai hani dao.
EST 2:6 Polobadu te Babilon tǫ gavman tuni bidi king Nebukatnesargo te Juda gavman tuni bidi Jehoiakin me, te Juda dabe meba dali selama, tama augwali te tǫ Babilon teba kalabus igi pai. Tama agai te Mordekai augwali dali sela pai.
EST 2:7 Mordekaigo aga hai wegi me deli elaluali, aga nogi Esta. Tiali goli, aga nogi mu Hibru pogo te Hadasa wai. Te Esta aga aya ida isali sogo, te Mordekaigo te Esta selama, tama aga wai negebo tiwai gilama mu yalio. Tama Esta te gasa sawia yai wegi mu, tama aga tonobo te gasagi yai sawi wegi mu bidalio.
EST 2:8 Tama te king bidi Serksisgo po te we bidi augwaliba tolali. Tama augwaligo te tigidali buludu te sawi yai wegi dabe te moni taun Susaba odasa asobo sogo, augwaligo te Esta me augwali dali odasa asalio. Augwaligo te we dabe sibi te gavman tuni bidigo be bagulali obo te we dabe sibi mubo be tomoba te we Esta teba muai. Tama Hegaigo te we dabe augwali tonaluali.
EST 2:9 Hegaigo Esta te wiegi yai sawi yai wegi da te homu elama, tama aga godolo yai. Tama polo agai Estabolo te tigi au yabo doado bage me, te gasa dwagi yai nai dabe mani. Tama agai te we dabe sibi bidibo be te dwagi yai polalubo dąį togwali mu te Estabolo menama, tama te tuni bidigo bede te wegi ogwa a naga olama, me badu nogo si te augwaligo Esta bugagia tonalumainu nigilai.
EST 2:10 Hasia Mordekaigo Estabolo po weyu, aga te Juda we da po olamuo, te po wali. Tama Estago te aga tonalubo ayago po wali palio.
EST 2:11 Tigidali side Mordekai te we dabe bidibo obo sunumidu ugwa soyu, eda soyu iduali. Te Esta mena tama bidibowe naga koneainu, tama me te Estabolo augwaligo magi sę ebowe, te koneainogo yali.
EST 2:12 Augwaligo te we dabe wiegi yai sawi yai mu ilabo sę idubadi, te kibu be deli usu nanio. Te polua a naga me deli tama poluade augwaligo te ni mea kanemego nigai weligo te augwali tigide pilali. Te gasa 6 wabo poluade augwaligo te wel me te denami yai ili daligo te augwali tigide pilai. Te sę silibo si, nosali augwaligo te gesi wegimani deli deli te king Serksis bidibo madi odasa pai.
EST 2:13 Te wego aga homugo digi te au dobage munama, te tuni bidigo beba pomainu yai.
EST 2:14 We te tuni bidigo beba pio mu pelama, tama bididubadi, kigamuba usu nagasai. Tama kigamu augwaligo aga selama, te gasa we dabe bidibo beba sela pelama, tama aga te tuni bidigo si wali we hani tonalubo bidi, Sasgasgo nogoba mugi paibao. Tama te we te king bidigo beba munu ma pogobeo. Te king bidigo aga godolo eyu, tama aga i obaso da, teda aga te kingba ma pomainao. Te gasa sunumi me elalubeo.
EST 2:15 Megi da, te Estago te king bidi sugi pabo sogo bodolu te pedelai. Esta aga te Abihailgo wegi, tama Mordekaigo hai dao. Mordekaigo Esta aga selama, tama aga wai bǫų negebo tiwai gilama yai. Tigidali bidigo Esta sulama godolo ebaso, tama augwali agade mu tulaluai. Tama agai te tuni bidi sugi painu ebo sogo gudali ugwa, te we dabe sibi tonalubo bidi Hegaigo te nogo tų ilali ugwa gudali. Agai te gasa ugwa me gudubeo.
EST 2:16 Te sogo te king Serksis te tuni bidi bidali te 7 kibu be bidai. Tama te kibu bede te polua nogo si, te polua nogi augwaligo Tebet nogi yali, te poluade augwaligo Esta te king bidi bidibo digi odasa pai.
EST 2:17 Tama king bidigo aga godolo mu yali. Tuni bidigo te gasa we dabe godolo ebo usu tiwai gilama te Esta godolo ebeo. Agai homugo Estago augwali aiyaba elaluali homu elama, tama gasa sawi yai we mu dao. Te king bidigo Esta sulama, tama agade mu tulaluai. Tama tibaso, te king bidigo te tuni wego au yai madi te aga toboluba muani. Tama Estago te tuni we Vasti hasegelama, tama aga te gavman tuni we kwin pedelai.
EST 2:18 Tialima, te king bidigo te dwagi yai homu pemene Estabolo eyu, te genuai nai daa tuaibao wali. Agai te tigidali tobolu bidi badi, te polalubo kiap dabe badi, augwali te genuai nai daa tuboba asomainu i wai. Agai te po wai, “Tigidali eno tonalubo bulude bidibo we bidi tigidali, augwali te e side toma nomainu yao,” te po wai. Tama tuni bidigo wiegi yai nai hauwa te we bidi augwalibolo olo manio, dwasianu nai mabe.
EST 2:19 Te sogo naga, tuni bidigo Mordekai te aga be tonalubo bidi me deli nigilali.
EST 2:20 Polobadu Mordekaigo Estabolo te po weyu, aga te Juda we da po munu me olamuo po wali. Tama Estago te po wali pali, magi basowe, te aga Mordekaigo po sesemane sogo wali pabo kolesaga yalio.
EST 2:21 Te Mordekaigo te king Serksisgo sę tuali sogo, te bidi sigo te tuni bidi dali wado yabo homu elaluali, tama augwali sigo aga ela muabo po miani. Te bidi si nogi Biktana de Teres si dao. Te bidi sigo te gavman tuni bidi kingo be dąį togwali sunumi tonalubo sę elaluai.
EST 2:22 Tama Mordekaigo augwali sigo po odama, tama agai te gavman tuni nigali we Estabolo te po wai. Nosali Estago te king bidibolo te po Mordekaigo te bidi sigo wabo odali po pusai.
EST 2:23 Augwaligo te po page gegelama, tama augwaligo koneani, te mu po da wai. Tama tibaso, augwaligo te bidi si te ni pedaide walama, tama augwali si isali. Nosali king bidigo te po wai, “Te tiali po te dago dena gavmanigo hasia yali sę po buku, te bukude te po asęao,” wali. Tialima, augwaligo tama tiwai yalio.
EST 3:1 Nosali gana gavman tuni bidi Serksisgo bidi me deli nogo tų ilali, augwaligo te nogi Haman nogi yali, te polalubo gavman tiwai pedelai. Haman te bidi nogi Hamedatago ogwa, tama wąį Agakgo wai dao.
EST 3:2 Tama king bidigo te tigidali kiap bidibolo po olama, te Hamanba kidu sugunama, tama genuai nogi agaba mao po wai. Tigidaligo te kingo wali po gilama yali, tiali goli Mordekai deligo te tiwai sę me isiąwai. Mordekaigo te Hamanba kidu sugunubo te hagela mu yalio.
EST 3:3 Nosali te gasa kiap dabego sulama, tama augwaligo agabolo hanalu wali, “Magi baso nago te king bidigo po wali pabewe?”
EST 3:4 Hauwa sogo augwaligo Mordekaigo te tebo kolesaga ebo po wali, tiali goli Mordekaigo augwaligo te po odobo hagela yali. Mordekaigo augwalibolo te po wai, “Ena Juda dao, tama tibaso eno Hamanba kidu sugunubo usu egobeo.” Tialima, te kiap dabego Hamanbolo te Mordekaigo wali po wai. Augwaligo homugo, “Te Hamango te Mordekaigo te tiwai idumainu gogolama sula tagalobowe,” ma suainu yai dao.
EST 3:5 Hamango suali, Mordekaigo te kidu sugunama, tama agaba genuai nogi masiąbaso, tama aga haliga sębę dwai mu yalio.
EST 3:6 Nosali agai hania koneani, Mordekai te Juda bidi yaibaso, tama agai Mordekai dolabo po mia selama, dąų walali. Te Mordekai deli naga tegobeo, menio, agai te genuai kantri Persia tǫde bidalubo Juda dabe tigidali ela muabo homu ebo sunumi gegai dao.
EST 3:7 Te kibu be 12 wabode, te tama kibu bede te Serksis king bidi bidali, te hasia polua nogi Nisan delide, Hamango augwalibolo te satu gagali yao po olama, te mena polua te side te Juda dabe dolabo side te bodolu mumainogo te satu gagali yao po wali. Augwaligo gagali ela silama, tama augwaligo te tiwai haninibo suali, te nogo si olama, sągągo si wabo polua, te dei 13, te side te polua nogi Adar, te sogode agai augwali dolaibao po wai.
EST 3:8 Tama Hamango te gavman tuni bidibolo te po wai, “Te we bidi hani me deli te nago tonalubo tǫ pedai provinsde te bidada pobao. Tama te hanigo te ede bidalubo we bidigo ebo kolesaga tiwai me ebeo. Augwali te gasagi yai tedali mu elalubo. Tama augwaligo nago te tǫ pedaide bomai po elalubo te wali me pabeo. Tama nago augwali gogolama tama sula tagalidu da, teda tego naga tau me sisąyu, tama nago tǫ pedaide ebo sę te dolasa me pogobeo.
EST 3:9 Tialima, tuni bidio, te nago homugo te tigidali we bidiba po tagala palama, tama te we bidi augwali ela muabo po wao. Te nago tama tibaso da, teda megi eno mu po nagebolo obao, te eno mone silva umabo hauwa mu, te 50 milion kina te nago mone mubo beba muaibao. Te nago gavman sę te monego yagameo,” Hamango te po wai.
EST 3:10 Te king bidigo te dodobolo pai ring elaluali, te agai ebo sę bomo mabo nai. Tialima, kingo te po oda selama, tama agai nogo danide te ring pedama, tama Hamanbolo mani, te Juda dabego boi bidi dao, te Hamedatago ogwa, te Agak hani bidi dao.
EST 3:11 Tialima, megi da, king bidigo agabolo te po wali, “Te mone da, tagalao. Nago magi sę te we bidide yainogo wida, nago te naga yao,” wali.
EST 3:12 Te hasia nanobo polua deli te 13 deide, Hamango te tuni bidigo sę ebo kuskus bidi tigidali i wai. Tama agai po tigidali augwalibolo olama, tama augwaligo asęanio. Augwaligo te po te tǫ pedaide bidalubo we bidi tigidaligo po deli delide asęani. Tama agai te pas te tigidali tobolu bidi dabeba me, te tigidali gavmanba me, te tigidali kiap dabebolo badi, tama tolali, tama tigidali paside te king bidi Serksisgo ring masalu naga elaluali, tama te tuni bidi aga digi asęai pas tiwai gilama yalio.
EST 3:13 Te pas sela pabo bidi dabe augwaligo te pas selama, tama te tigidali tuni bidigo tǫ pedai tomode bidibo te tigidali tobolu bidi dabeba te pas selasa palio. Tigidali paside te tiwai po wai, “Te polua nogo si olama, te sągągo si wabo polua nogi Adar, te 13 deide, te dagego Juda dabe tigidali ela muiąo. Te gesi we bidi me, te monu dabe me, te we wai puluba me, te side naga tigidali mu ela silao. Te augwali homu dene ebo tagalao. Tigidali ela silama, tama augwaligo doado bage sao,” te po wai.
EST 3:14 “Te tobolu bidi dabego te pas te tigidali we bidi dabebolo nedao. Tigidaligo odama, bidimainao. Tama nosali te side pedalubo si da, teda augwali elainu te augwaligo sisi yao.” Te pas dabede te tiwai po elaluali.
EST 3:15 Tialima, te pas sela pabo bidi dabe augwali polo pelama, tama te tigidali tǫ pedaiba sela pali. Tama augwaligo te po me te polalubo moni hanu Susade pusali, tama te we bidi augwaligo odali. Tuni bidi king de Haman si naga te dwagi yai homu elama, dualama, wain ąį tudali. Tiali goli, te moni hanu Susade bidibo we bidi augwali te pode augwali dwai noma siyu, tama augwali homu kolesaga mu puna palio.
EST 4:1 Mordekaigo te pasde elalubo po odali sogo, te aga dwai wi mu yali. Te aga homu sęgę mu ebaso, tama aga ugwa pisąwali. Tama agai te pipisila pai badi ugwa munama, tama te sia keli te aga tobolude muani. Agai muna silama, tama aga te hanu tomoba pali, tama gela genuai weyu, tama homu dene ebo balia wabo sę yai.
EST 4:2 Aga pelama, te tuni bidi kingo be sunumiba sabolali, tiali goli aga tomoba pabe, magi baso meni, te bidi be tomoba painu da, te aga dwagi yai ugwa bolo hasia munama pabo dao.
EST 4:3 Tama augwaligo te tuni bidigo po te tigidali tǫ pedai provinsba pusali sogo, te Juda dabe tigidali homu sęgę mu eyu, tama i dwai mu wali. Augwali nai me tube, tama augwali dwai gela udu, tama homu dene ebo balia po wedu bidali. Tama Juda we bidi hauwago te ugwa pipisila pai gudama, tama augwali te sia nogobo kelide pilala palio.
EST 4:4 Te Estago sę ebo we dabe, me te aga tonalubo bidi dabe, augwaligo te Mordekaigo yali kolesaga po agabolo obaso, tama Esta homu sęgę mu yai. Agai te gudubo ugwa meba te Mordekaibolo tolali, te agai dwai hasegelama, te dwagi yai ugwa gudumainu yali. Tiali goli, Mordekaigo te ugwa sabo hagela yai.
EST 4:5 Tama Estago Hatak i olama, asali. Hatak te we dabe tonalubo bidi me deli, king tuni bidigo te Estago sę emainu nigilali. Tama Estago Hatak te Mordekai bidibo madi tagala palama, tama mena sę mu agaba pedelali te konemainu, tama magi elama te tiwai pedelali te konemainu, te Hatak tagala palai.
EST 4:6 Tialima, Hatak te Mordekai bidibo madi pali, te bidi sisinibo pesageba, te tuni bidigo genuai be sunumi pądeo.
EST 4:7 Tama Mordekaigo te Hatakbolo te agaba pedelali sę po tigidali wali. Tama Hamango te nisu naga mone te tuni bidigo mone mubo beba mubaso, te bidi dabego te Juda dabe tigidali elimainu te moni mone te king bidigo mone mubo beba muabo po wali, te po me agai wai.
EST 4:8 Tama Mordekaigo te Hamango tolali pas me deli selama, te Hatakbolo mani. Te paside te Juda we bidi tigidali augwali ela muaibao po wai. Mordekaigo Hatakbolo te pas sela pelama, tama te tigidali sę pedelabo po pusao po wai. Hatakgo Estabolo olama, te Esta te tuni bidi bidibo madi pelama, tama te tuni bidibolo hanaluama, tama agai te Juda dabe homu dene ebaso, olo mu tau somainao wabo po hanalugi pomainao, te po wai.
EST 4:9 Tibaso, Hatak pelama, Estabolo te po wagi palio.
EST 4:10 Tama Estago te Mordekaibolo wagi pabo po me deli mawai.
EST 4:11 Agai e tiwai po wali, “Ena pelama, te tuni bidi king eno sugi pogobeo. Te tuni bidigo bidi me deli i obaso da, teda aga te agai te be dąį togwali habu tomoba paibao. Te meniama, tama aga olo pali da, teda augwaligo te bidi ela mubo dao. Te bomai po gedelabo sunumi te deli naga elalubao. Te bidi me aga te tuni bidi bidibo madi olo pobadi, tama tuni bidigo aga te gol donogo nogo tų ilibaso da, teda te bidi aga me isigobeo. Te tuni bidigo sę ebo ofisa bidi tigidaligo me, te haniani provinsde bidibo tigidali olo we bidigo me, augwaligo te bomai po koneani. Tiali goli, te tuni bidigo ena i me wasiąbadi, te polua me deli megi pąde silainu ebao,” Estago te po ola tolali.
EST 4:12 Mordekaigo Estago po odama, tama agai te tiwai po wei ponani, “Mu tama, nage te tuni bidigo bede bidibo, tiali goli, nago homugo nage bugagia bidaibao te homu igio. Magi baso meni. Te nage da Juda we bidi meba dolobo tiwai gilama dolaibao,” Mordekaigo Estabolo te po ola tolali.
EST 4:14 “Te megi e sogo nago pedauwali pania sobaso da, teda gasa nai mego da tau saibao. Tiali goli, nage da isaiba, tama nago we wai hani dabe augwali te mu silaibao. Tiali goli, nage te gavman tuni we kwin pedelaligo te da megi sogo tau sogowe, te dago konebeo,” Mordekaigo te po ola tolali.
EST 4:15 Tialima, Estago te po Mordekaibolo ola tolai dao.
EST 4:16 Agai te tiwai po wai, “Nage pelama, te Susa moni hanude bidibo Juda dabe tigidali sisinama, tama dagego nai osogo gisilama, tama dagego ena homu kone palama, gedu haluasa po wao. Te megi gagalasa, dagego nai me wę me giligade badi, hulide me, te osogo gisilao, te sela wabo sogoba usu nao. Te eno ena sę ebo we dabe dali me, te dago tama tiwaibao. Tialima, te sę elama, nosali ena te king bidigo beba paibao. Tagala, te eno bomai po tama bolaibao. Te eno tama tilama, te ena isibaso da, te po meni, te ena isaibao,” Estago te po wai dao.
EST 4:17 Tama Mordekaigo Estago wali po odama, aga te king bidigo be sunumi pąde bidali tagalama soali, tama pelama, Estago agabolo wali po gilama te sę igi palio.
EST 5:1 Estago osogo nai sela sogo gisilama bidai. Tama sela wabo side, agai te kwin tuni wego gudubo ugwa munama, tama tuni bidi kingo be obo tomoba pelama, dologi pali, te tuni bidigo genuai dąį togwali be habu pąde teba dologi pelama, tama te tuni bidi dulalubo saiba tonono yali. Tuni bidi te saide dulalu, tama sunumiba tonono yai.
EST 5:2 Te kingo Esta te be habu bulu badu dolalubo sulama, tama aga homu dwagi yai Estabolo elama, tama aga te king bidigo gol dono tolalubo nogo dodolali. Tialima, Esta te pąba aselama, tama te dono sesege badu nogogo dia yanio.
EST 5:3 Tama king bidigo te po wali, “Kwin Esta, nago magi nai godolo ebawe? Nago homugo eno te genuai tǫ pedai te si bugulama, te me deli nagebolo momainu homu usu ebo wida, teda eno nagebolo mawaibao,” wali.
EST 5:4 Tama Estago te tiwai po wei ponani, “King bidio, te Haman dage si te genuai nai daa tubo madi megi e sogo hulide eno beba asobo usu egowe?” Te po wai.
EST 5:5 King bidigo te po usu da olama, tama agai Haman polo asao po olama, te augwali si Esta bidibo madi painu yai. Tama king bidi de Haman si te Estago genuai nai daa tubo sisi ilali madi pai dao.
EST 5:6 Augwali te bomai ąį wain tuyu, bidaluyu, tama king bidigo Estabolo hanalu wali, “Te nago mena nai godolo ebo te eno nagebolo momainu te enabolo po wao. Te nago enabolo hanalubo nai tigidali te eno nagebolo awe naga waibao. Te nago eno tonalubo tǫ pedai me badu sainogo homu ebaso da, teda eno nagebolo menama, tama nago tonaluagameo.” Tuni bidigo Estabolo te po wai.
EST 5:7 Tialima, Estago tuni bidibolo te tiwai po wei ponani,
EST 5:8 “Tuni bidio, te nago eno hanalubo po tigidali awe po waibao homu ebaso da, teda nage me Haman dage si te do gasa nai eno dage sibolo sisi ilibo madi do ma asao. Te sogo eno nagebolo eno homude elalubo po waibao,” Estago te po wai.
EST 5:9 Te Hamango te nai daa tuali be habu taga soyu, tama aga wiegi yai homu pemene me dwagi yai homu mu ebadi yai. Aga peyu, suali, tama Mordekai te tuni bidigo be sunumi pąde dulalubo suali. Tiali goli, Mordekaigo aga sulama, tama aga dolugulama, agabolo siade da po wabeo. Tama tibaso, Haman haliga sębę dwai mu yali.
EST 5:10 Te Hamango haliga sębę mu geninama yali, tiali goli aga homude digi pania selama, tama magi sę me deli ebeo. Aga pelama, sabolama, tama aga abagi dede dabe i ola sisinama, tama aga we Seresbolo me hanaluyu, augwali dali dualama bidali.
EST 5:11 Augwali sabola silibode, tama augwaligo gedude Hamango aga digi aga nogi ugwaba sali. Agai augwalibolo weyu, agai mone hauwa badi, te doado bage hauwa elalubo da po wai, tama aga ogwa me hauwa elalubo po wali. Tama te tuni bidigo genuai nogi me genuai sę mu agabolo mayu, tama te tuni bidigo sę tonalubo gasa ofisa bidi dabe tigidali te aga dologode bidibo da, po walio.
EST 5:12 Tama Hamango po ma weyu, te po wai, “Te kwin we Estago te genuai nai daa te tuni bidi de ena dali, da si naga te nai daa tuboba asao wai. Agai gasa bidi me asao olama i me wabeo, mu menio. Tama agai te po wai, te da si aga dali do ma nai tugi paibao po wali.
EST 5:13 Tiali goli, eno te Juda bidi Mordekai suali, te tuni bidigo be sunumi pąde dulalubaso, tama eno homu dwai mu yali, tama te wiegi yai nai dabe te eno homugo te olo nai tiwai naga yalio,” te po wai.
EST 5:14 Aga we Seres badi, te aga abagi dede augwaligo agabolo te po wai, “Moni homu me igio. Te bidi dabe augwalibolo olama, augwaligo te ni bobobage me deli tulao, te aga bobobage usu nama nedebo, te bidi sese tama 20 mita, tama do kigamu nage te tuni bidi bidibo madi pelama, te Mordekai te nide walabo po hanalugi pagameo. Te tiwai eyu da, te nage homu wiegi yai elama, te nage nai tugi paibao,” wali. Hamango te wiegi yai po da te homu yai, tama agai te bidi dabe mebabolo olama, tama augwaligo te Mordekai walabo ni me deli tulai dao.
EST 6:1 Te sogo hulide digi, te king bidi aga godege bugagia piabo ąǫ ebeo. Tama agai augwalibolo po olama, augwaligo agai te tonalubo tǫ pedaide ebo po tigidali asębo te buku sesao po wali, tama augwaligo po meba te bukude asęani nedainogo tialio.
EST 6:2 Augwaligo te Biktana de Teres sigo yali po me deli nedai, te king bidigo be habu tonaluali bidi si dao. Polobadu te bidi sigo te tuni bidi elabo tų gegali po wai. Nosali Mordekaigo augwali sigo homude te po gegelama koneani, mu tama yaibaso, tama te bidi si po tų ilali.
EST 6:3 Tama king bidigo te po wali, “Dago mena dwagi yai sę Mordekaigo te yali sęde yaliwe?” Tama te bidi dabe augwaligo agabolo te po wai, “Dago magi nai agabolo me deli mawai menio,” wali.
EST 6:4 Tialima, king bidigo augwalibolo hanalu wali, “Te eno sę tonalubo bidi ofisa bidi meba te bede bidibowe, ma meniwe?” Tama te po obadi, megi naga tama Hamango te tuni bidibolo hanalu wainu asali, te agai sisi ilali nide te Mordekai walainogo hanalu wagasali. Tama Haman aga digi te tuni bidigo be obo tomoba solama, asalio.
EST 6:5 Te sę ebo bidi dabe augwaligo aga soabo sulama, tama augwaligo te king bidibolo wali, “Haman aselama, tama tonalubao. Agai nage suainu ebo.” Tama king bidigo te po wali, “Aga e be tomoba odasa asao,” po wai.
EST 6:6 Tialima, Haman te be tomoba asobode, king bidigo agabolo te po wai, “Te bidi me deli bidibo bidi agabolo eno te genuai nogi mawainogo ebao. Te eno mena wiegi yai sę agabolo yabo te eno konebe. Nago homugo eno magi sę emainogowe?” wali. Tama Haman agade digi te tiwai homu yai, “Te tuni bidigo te sę debolo egowe?” te homu yai. “Te gasa bidi me meni, enabolo naga yaibao.”
EST 6:7 Tama Hamango tuni bidibolo po wei ponoyu, te po wai, “Naga mubo ugwago digi sela asama, tama te bidiba muao. Tama sadel me te hos bono baklaingo bugagia au ilama, tama naga hosba digi dualao. Tama hosgo tobolu me, mage dali, au ilao.
EST 6:9 Tama naga polalubo tobolu bidi me deli nigilama, teda nago ugwago te bidi aga au ilaibao. Tama te bidi te hosde dualama, tama te tobolu bidigo aga te bidi sisinibo genuai pesage te hanuba odasa pomainu yao. Tialima, te augwali si pabo sogo, te tobolu bidigo te tiwai i wao, ‘Te bidi suao. King bidigo genuai nogi agabolo mawai. Te wiegi yai sę tuni bidigo agabolo yali,’ po waibao,” Hamango te po wai.
EST 6:10 Te king bidigo te po odama, tama Hamanbolo te po wai, “Nage polo pelama, te gudabo ugwa me, hos me selama, tama eno sę ebo bidi Mordekaibolo genuai nogi mao, te Juda bidi dao, te aga eno be sunumi pąde sę idu bidai. Te tigidali sę nago megi wali po gilama yao,” wali.
EST 6:11 Tama Hamango te ugwa de hos dali si selama, tama agai te ugwa Mordekaibolo muani. Tama Mordekai te hosde dualama, tama Hamango aga te bidi sisinibo pesage hanuba odasa pai. Te augwali si pidu digi, te Hamango te tiwai po i olama, augwalibolo wai, “Te bidi suao! Te king bidigo genuai nogi agabolo mawainogo ebao. Tama agai te wiegi yai kolesaga agabolo yai dao,” tama wai.
EST 6:12 Nosali Mordekai te tuni bidigo sęba ma palio. Tiali goli, Haman da, te genuai hale elama, tama haliga sęgę yali, tama aga gesabidi halua selama, tama aga beba ma geasa pai.
EST 6:13 Tama agai aga webolo, me te aga abagi dede dabe dalibolo te agaba pedelali sę po tigidali wali. Tialima, we Seres dali, te abagi dede augwali daligo te kolesaga hauwa koneai elaluai, augwaligo te tiwai po agabolo wali, “Megi da, nago bomo me nogi elaluali te hagayu, tama Mordekaigo nage aiyaba elalualio. Aga te Juda bidi da, tama nago aga sunumi paniabo usu meni yaibao. Te nage doloyu naga yaibao.” Te po wai dao.
EST 6:14 Augwali po midubadi, tama te king bidigo sę ebo bidi dabe augwali sabolali. Augwaligo Haman polo te Estago genuai nai daa tubo madi sela painu yai.
EST 7:1 Tama si sogo ma te king bidi de Haman si te Esta dali nai tugi pai. Augwali te wain wę tudubadi, tama tuni bidigo Estabolo ma hanalu wali, “Tialima, kwin Esta, nago magi nai godolo ebawe? Nago po obaso, te eno nagebolo mawaibao. Te nago homugo eno tǫ pedai me badu nagebolo mabo usu yaiba wida, te eno nage mawaibao,” wali.
EST 7:3 Tama tuni we kwin Estago po wei ponoyu, te po wali, “King bidio, te nago ena dali dwagi yai homu mu elama, te nago enabolo wiegi yai sę ilaiba wida, teda nago tama tiao. Eno te ena dali, te eno hani dabe dali isidali homu te hagela ebao. Te da bidimainogo eyu, da tau sao.
EST 7:4 Magi baso meni. Bidi me deligo ena dali, eno hani bage dali elabo po mia sai elalubao. Agai da tigidali dolabo homu yalio. Tama timainogo agai te mone maiabo po wai dao. Te augwaligo da tagala palama, te da kalabus sę iligi sogo da, eno po me wagi menigi da, magi baso meni, te eno sęgę nagebolo magi menigio. Tiali goli, augwaligo da mu ela silainu ebaso, tama eno po hanilibao,” Estago te po wai.
EST 7:5 King Serksisgo te po odama, kwin Estabolo te tiwai po hanalu wali, “Niwai dwai bidigo te tiwai sę wi isiąyu yaliwe? Te bidi mena bidibowe?”
EST 7:6 Estago po wei ponani, “Te dwai bidi Haman te dao. Agai dade boi bidi elama, tama agai da dolabo sę sisi ilai dao,” wali. Tama Haman wi elama, tama dwai didibili mu yai.
EST 7:7 King bidigo odama, tama haliga sębę mu elama, tama te nai tudali tagalama, te be bulu badu plaua gi elalubo badu buluba teda pali. Hamango te tama sulama, tama koneani, te tuni bidigo aga dolaibao homu yai. Tama Haman te be tomode bidali, te kwin Estabolo te aga tuni bidigo dolainu ebo te olo tau siyu te gogolama, sula tagalalumainu yabo po te Estabolo hanalu wai dao.
EST 7:8 Tialima, tuni bidi te gide bidali tagalama, te nai tubo be habuba ma aselama, tama agai suali, Haman te Esta dulalu nai tubo bet sai te badu degasa dulai elalubo suai. Hamango Estabolo te aga olo tau somainu ebo po hanalu wai hagede tama tiali. Tiali goli, tuni bidi agai te tama telalubo sulama, i wali, “Ei, te bidigo ena gedude digi te tuni we kwin te eno bede penani yainu homu yalio,” te po wai. King bidigo po ola silibode, tama polo mu te sę bidi dabe asu, te Haman tobolu te ugwago haluama, te tuni bidigo elainu ebo bidi te tiwai sę augwaligo yai dao.
EST 7:9 Tama sę ebo bidi me deli nogi Harbona, agai te po wali, “Odao! Haman aga digi te ni pos bobobage bulali nedali usu te bidi sese 20 mita yali, te aga be pąde elalubao. Agai homugo Mordekai tede walainogo yai. Tiali goli, king bidio, polobadu Mordekaigo nage tau saligo, tama te boi bidi dabego nage me ela mubeo,” wali. Tialima, king bidigo te po wali, “Dagego Haman aga digi te tulali posba aga ma waligi pao,” po wai.
EST 7:10 Tama agai te Mordekai walainogo tulali posde augwaligo te Haman aga ma tede walali. Augwaligo te tiwai tama ela silama, tama king bidigo haliga sębę yali silai dao.
EST 8:1 Te sogo naga te king Serksisgo te Juda dabe augwalibolo boi bidi yali bidi Hamango be, me tigidali doado bage, te tuni we kwin Estabolo mawai. Nosali Estago tuni bidibolo te po wai, “Mordekai aga ena dali kaneme deli elalubao,” wali. Tama king bidigo te Mordekaigo te we Esta aga sesemane sogo suagasomainu sula tagalai.
EST 8:2 Tuni bidigo te Hamango nogode munaluali nogode holobo ring aga ma selama, tama aga nogode munaluali te ma dilama, te Mordekaibolo mani. Te ringde te tuni bidigo dąį nigilali elaluai. Tama Estago Mordekai sa munama, te Hamango tonaluali doado bage tigidali te Mordekaigo tonalu te tonalumainu nigilalio.
EST 8:3 Nosali Esta te king bidi bidibo digi pelama tama aga sągą pąba degegulama, tama gela udalio. Tama agai king bidibolo te dwai kolesaga yainogo yali bidi dabego kolesaga palimainu hanalu wali, Hamango te tiwai sę emainu te po minama, dąų walai dao.
EST 8:4 King bidigo Esta te gol donogo nogo tų ilama, tama Esta dolugulama, te po wai dao,
EST 8:5 “King bidio, te nago usu da wida, tama nago homugo ena kone palu da, tama nago homugo te dwagi yai nai da homu ebaso da, teda nago po te bidi dabebolo tagala palao, teda augwaligo te Hamango po wali pomainogo me elamuo. Hamango te nago tǫ pedaide bidibo Juda we bidi tigidali mu silimainao te po wai dao.
EST 8:6 Te dolabo dwai kolesagago te eno hani we bidi dabe augwali silidali te homu hagela mu eno ebao. Tama augwaligo te deli kaneme dabe augwali ela mubaso da, teda ena magi elama bugagia bidigowe?” Estago te po wai.
EST 8:7 Tama king bidi Serksisgo Esta de Mordekai si dali te tiwai po wai, “Odiąo, eno homugo te Hamango te Juda dabe augwali dolabo homu ebaso, tama eno aga te nide walali. Tama agai tigidali doado bage, eno te Estabolo mawai dao.
EST 8:8 Tiali goli, te pas augwaligo eno nogide asęnama, tama eno dąį digi tede muani, te eno hasegelibo usu me egobeo. Tiali goli, nago magi po te Juda dabebolo asęainogo da, tagala, te asęyu naga yao. Nago te pas eno nogide asęnama, tama eno dąį ugwadu tede me muao,” king bidigo te po wai.
EST 8:9 Augwaligo te tiwai sę te polua Sivan te 23 dei, tede te kibu be te sela poluade te tiwai yali. Tama Mordekaigo te tuni bidigo sę ebo kuskus bidi dabe tigidali i olama, tama augwali asai. Agai po augwalibolo menama, tama te po augwaligo te pas dabede asęai. Agai te pas dabe te Juda dabebolo me, te polalubo kiap dabebolo badi, te polalubo gavman dabebolo badi, tama te tigidali 127 tǫ pedai provinsde bidibo ofisa dabebolo me, te tǫ pedai provins Indiade gagalasa, te Itiopia teba usu nagaselama, te tǫ pedai tigidaliba te asęani. Te asęani pas dabe augwaligo te augwali tigidali tǫ pedai pogo naga asęnama, tama Juda dabego pogo me asęai dao.
EST 8:10 Mordekaigo augwalibolo te tuni bidi king Serksisgo nogide te pas asęao po wali, tama tuni bidigo dąį te paside muai. Te pas dabe selasa pabo bidi dabe augwali dualasa pabo wiegi yai polo pabo hos dabe augwali te tuni bidigo obo tomode sali, tama augwaligo te pas dabe te tigidali buluba selasa pai.
EST 8:11 Te pasigo te po wai, “Tuni bidigo po olama, te tigidali hanude bidibo Juda dabe tigidaligo te augwali, me augwa we wai puluba dali elainu usu sali te wąbi wei ponoyu hwįmainao,” po wai. “Te Juda dabego wąbi wei augwalibolo ponoyu, te mena gasa tǫdu asai bidigo, me ma te tǫ pedai provinsde bidibo bage. Tama eyu, augwaligo te boi bidi dabego doado bage somainao.
EST 8:12 Te Juda dabe augwaligo te tama tiwai te genuai tǫ Persia tigidali badu elama, te Hamango te Juda dabe tigidali elainu bodolu muani side te tiwai yao. Augwaligo te sę yainu da, te polua Adar te nogo si olama, te sągągo sela wabo, te 13 dei, te 12 wabo poluade te sę yao,” po wai.
EST 8:13 “Augwaligo te po pusuyu, te tuni bidigo bomai po tiwai me deli da olama, tama tigidali tǫ pedaide bidibo tigidali bidibolo wao. Tama tibaso da, te Juda dabe augwaligo sisi elaluama, te side pedalubaso, augwaligo te boi bidi dabebolo te wąbi wei ponomainao,” po wai dao.
EST 8:14 Gavman tuni bidi kingo te po obaso, tama te po sela pabo bidi dabe augwali te hosde dualama, tama polo udada palio. Tama me augwa te polalubo moni genuai hanu Susade bidibo tigidali we bidibolo me augwaligo te po pusai dao.
EST 8:15 Tama augwaligo te tuni bidigo tedela ugwa me te sisi ugwa te Mordekaigo tigiba munama, tama aga te mama bobobage ugwa me deligo aga banulai. Tama nosali augwaligo te genuai gol madi te wiegi yai au elalubo te aga toboluba muai. Aga te au ela selama, tama te tuni bidigo be tagalama, buluba teda soalio. Tama Susa moni hanude bidalubo we bidi augwaligo sulama, tama augwali wiegi yai homu pemene eyu, tama genuai po dągą olama, i wai.
EST 8:16 Tama Juda dabe augwali homu bugagia mu tegaluama, tama nagame yai homu elama bidai. Augwali wiegi yai homu pemene mu elama, tama augwaligo kone palali, te usu si yali homu elama, tama augwali hagabo usu me egobeo homu yai.
EST 8:17 Te tigidali provins badu me hanude me te Juda dabe augwaligo te tuni bidigo po selama, tama augwaligo bodolu me deli munama, augwaligo genuai nai daa tuyu, tama dwagi yai homu pemene yali. Te gasa bidi dabe hauwa te Juda dabe augwalide wi elama, tama augwali te augwaligo hani bageba wadolai dao.
EST 9:1 Megi da te polua Adar, dei te nogo si olama, sągągo sela, te bodolu muani sogo te pedelalio. Hasia bolo king bidigo te po wali, te sogode digi te boi bidi dabego te Juda augwali dolama, tama augwali mu silaibao po wai. Tiali goli, megi da, te Juda dabe hogodaluyu, augwali geanama, tama augwali aiyaba elaluai dao.
EST 9:2 Te tuni bidigo genuai provins dabe te tigidali hanude bidalua pabo Juda dabe, augwaligo dolainu yali bidi dabebolo te wąbi wei sainu sisi ela palio. Tama tigidali tǫ habu badu we bidi tigidali augwali te Juda dabede wi ebaso, tama augwaligo magi sę me deli te augwaliba yainu ebo usu isąwai.
EST 9:3 Tama tigidali provinsde te tigidali kiap dabe me, te tigidali gavman bage me, te tuni bidigo polalubo bidi dabe, te augwaligo me te Juda dabe augwali tau sali, magi baso meni, augwali te Mordekaide wi yalio.
EST 9:4 Te tuni bidigo provins dabede bidibo tigidali bidigo koneani, te king bidigo te genuai nogi me te genuai bomo te Mordekaibolo mawai. Tama agai bomo genuai geninama, tigidali sogo pedaliyu yalio.
EST 9:5 Tama te Juda dabego te augwa boi bidi dabebolo umabo sę eyu, te augwali mu dolali. Augwaligo te bobobage hwą ge bainat tulama, tama te boi bidi dabe dali hwįnama, tama bidi hauwa ela muai dao.
EST 9:6 Te gavmango polalubo moni hanu Susade te Juda dabe augwaligo te bidi sese umabo 500 bidi tigidali ela muani.
EST 9:7 Tama te Juda dabego boi bidi, te Hamango ogwa dabe nogo si bidi, te augwaligo ela muani. Te augwaligo nogi dabe e dao, Parsandata, Dalfon, Aspata, Porata, Adalia badi, Aridata, me Parmasta, Arisai, me Aridai, me Vaisata, te tama bidi ela muai. Tiali goli, te Juda dabego augwaligo doado bage me sabeo.
EST 9:11 Te sogo naga te Juda dabe augwaligo te Susa moni hanude te nisu naga bidi elaliwe te po tuni bidibolo pusali.
EST 9:12 Nosali gana king bidigo te tuni kwin we Estabolo te po wai, “Te moni polalubo hanu Susade naga te Juda dabe augwaligo te bidi sese umabo 500 bidi ela muanio,” po wai. “Tama augwaligo te Hamango ogwa dabe nogo si me elai. Tama eno homugo te gasa provins dabede me augwaligo te umabo hauwa bidi elali homu yai. Megi nago mena gasa nai sabo homu ebawe? Te usu da, te eno nage mawaibao. Te nago mena nai sainu godolo homu ebo te nago pogo naga wao,” kingo te po wai.
EST 9:13 Estago po wei ponoyu, king bidibolo te tiwai po wai, “Tuni bidi, nago homugo usu da wida, teda te Susa moni hanude bidibo Juda we bidi augwaligo do me te megi e sogode yali sę tiwai augwaligo te boi bidi dabe dali emainu sula tagalao. Tama augwaligo te Hamango ogwa nogo si bidi augwaligo tigi te ni posde walaibao,” wali.
EST 9:14 Tialima, king bidigo augwalibolo tama tiao po wai. Tama agai te po te moni hanu Susade bidibo bidi dabebolo ola tolai. Tama augwaligo te Hamango ogwa nogo si bidi te ni posde walobo te tigidali bidigo suai dao.
EST 9:15 Te polua nogo si olama, sągągo si wabo polua, te 14 dei, tede te Susa moni hanude bidibo Juda dabe ma sisinama, tama te bidi sese hauwa umabo 300 bidi mu te hanude ela muanio. Tiali goli, augwaligo doado bage dabe te augwaligo me sabeo.
EST 9:16 Te gasa provins dabede bidalubo te Juda dabe, augwali me te bugagia bidainu te hwįbo sę bomo yai. Augwaligo te boi bidi dabe dali umabo sę mu elama, te bidi sese hauwa umabo 75,000 bidi mu ela muani, te augwali godolo isąwani bidi dabe dao. Tiali goli, augwaligo doado bage te augwaligo me sai menio.
EST 9:17 Augwaligo te tiwai sę te provins dabede te polua Adar, te 13 dei, tede te sę ela pai. Tama do tama, te polua dei 14, tede augwaligo te boi bidi dabe me elibeo. Menio. Te side augwaligo te genuai nai daa tuyu, tama genuai homu pemene wiegi yai dali yai.
EST 9:18 Tiali goli, te moni hanu Susade bidibo Juda dabe, augwaligo te 12 wabo polua nogi Adar dei 15, tede augwaligo te olo bidabo side te holide yabo po bodolu tiwai me deli muani. Magi baso meni. Augwaligo te polua Adar te 13 deide, me 14 deide, te boi bidi dabe elali, te 15 deide, tede augwaligo me hwįbeo.
EST 9:19 Te tama tialide, te obo menisiąwai dwasianu hanude bidali te Juda dabe, augwaligo te polua Adar dei 14 tede te olo bidiyu, te dwagi yai homu pemene ebo genuai side tiwai bodolu muai. Augwaligo te side bodolu muyu, te genuai nai daa tuyu, tama augwa hasi deli delibolo te wiegi yai homu ilibo kolesaga yabo bodolu muai dao.
EST 9:20 Mordekaigo te side te pedelali sę po tigidali asęnama, tama te pąde bidibo Juda dabebolo, me te digibulu bidibo Juda dabebolo, te pas tolali, te provins tigidali badu te gavman tuni bidi king Serksisgo tonaluai madi dao.
EST 9:21 Agai augwalibolo weyu, augwaligo te polua Adar, dei 14; 15 dei, te side te tigidali kibu bede te olo bidiyu, toma nabo si bodolu muao po wai dao.
EST 9:22 Te side si sogo te Juda dabe augwaligo te augwa boi bidi dabe sela sąwani side dao. Tama te poluade naga te augwali homu sęgę me homu dene yali hasegelama, tama dwagi yai homu pedelai. Tama Mordekaigo augwalibolo weyu, te side si sogo te genuai nai daa tuyu, tama abagi dedebolo, me te magi nai meni yai bidi dabebolo, te nai dobayu yao po wai.
EST 9:23 Tama te Juda dabe augwaligo te Mordekaigo po wali pelama, tama augwaligo te wiegi yai homu pemene ebo kolesaga te tigidali kibu bede yai dao.
EST 9:24 Polobadu Haman, te Hamedatago ogwa tama Agakgo wąį, tama Juda dabego boi bidi agai te Juda dabe tigidali ela muainu te satu gagali elama, te elabo side te bodolu gegelama muani bidi dao. Te Hibru pogo te satu nogi augwaligo purim wali. Hamango te po minama, po dąų weyu, te Juda dabe tigidali silaibao po wai dao.
EST 9:25 Tiali goli, Esta te king bidi bidibo madi pobaso, tama tuni bidigo te tiwai po asęani, “Polobadu Hamango te Juda dabe dolaibao po wali, tiali goli megi da, aga digi te dolobao,” te tiwai po asęani. Tama augwaligo aga te nide walama, tama nosali augwaligo te aga ogwa dabe me te ni posde walai.
EST 9:26 Te tama tialide augwaligo te toma nabo side te bodolu si nogi yali, te page Purim. Te nogi page e dao, te satu dao. Augwaligo tama kolesaga yali, magi baso meni, te tiwai sę augwaliba pedelali homu elama, tama Mordekaigo augwaliba te pas tolama, tama augwalibolo weyu, te side te toma neyu, olo bidao po wai dao.
EST 9:27 Te Juda dabego te tiwai kolesaga ilali, te augwa digi me, te augwa wąį dabe nosali pedelabo bage dali, augwa bomai po muani, tama mena bidi te Juda hani tomoba asobo bidigo me te bomai po wali pai. Te si sogode te tigidali kibu bede, augwaligo te sę pedelali te homugo kone palao, te tiwai po Mordekaigo wai dao.
EST 9:28 Augwaligo e tama tiwai po wai, te tigidali Juda hani sibi deli delide te nosali pedalubo tigidali wąį dabe badi, te tigidali tǫ pedaide bidibo Juda we bidi me, te genuai hanude bidalubo we bidi tigidali augwaligo te bodolu muani, te Purim te bodolu side te tigidali kibu bede te toma tuyu bidao po wai dao.
EST 9:29 Tama kwin we Esta, te Abihailgo wegi, aga de Mordekai dali, augwali sigo te Purim bodolu muani si elalubo te gasa pas asęnama, tama tuni we kwingo te Mordekaigo hasia agaduba asęani paside po bolo dąų walai.
EST 9:30 Augwali sigo te pas te genuai tǫ Persiade elalubo te provins bidi sese hauwa 127 tede bidibo te Juda dabebolo tolalio. Paside te tiwai po wai, “Te dagego homu nagame ela bidiyu, tama duga homu tegaluama, bugagia bidiyu, tama hwįabo sę meni yaibao.
EST 9:31 Tama dage me, te duga wąį nosali pedalubo me, dagego te Purim side te bodolu si te dąų ola sao, te dagego nai osogo gisiliyu, te homu sęgę me gela weyu ebo sogo te dąų wabo bomai po tiwai gilama yao,” po wali. “Ena Mordekai de te kwin Esta dali, da sigo te bomo yai po dage tigidalibolo mobao.”
EST 9:32 Te kwin Estago bomai pogo te Purimgo bomai po dabe dąų walama, tama augwaligo te pepa me delide asęnama, tama munaluai dao.
EST 10:1 Tuni bidi Serksisgo te aga tonalubo tǫ pedai tigidalide bidali we bidibolo te takis mone mao po weyu, te po mu dąų walali. Te nambis provins dabe dali, te agai tonalubo tǫ tomode mu elaluali provins dabe dali, te tigidali tǫ pedai badu tede te takis mone sabo sę yai dao.
EST 10:2 Te tigidali dwagi yai me genuai sę me, tama tigidali po wabo kolesaga ebo me, te gavman tuni bidigo te genuai nogi Mordekaibolo mayu tama tiali, te tigidali sę yali augwaligo te Persia de Midia genuai tǫ tonalubo king bidi dabego buku dabede te sę yali po asęanio.
EST 10:3 Tama te Juda bidi Mordekai aga te gavman king bidi Serksisgo kisalubo tomo bidi bidali. Tuni bidi naga aga daide ugwadu elaluali. Tama Juda dabego aga godolo mu elama, tama augwali genuai nogi agabolo mawai. Tama agai te Juda dabe augwali bugagia bidabo sę tau sali, tama augwa hani dabe nosali pedalubo bage te augwali magi nai mede wi me isąma, augwali bugagia naga bidimainu tiai dao.
JOB 1:1 Te sia ge asobo badu, te tǫ kantri nogi Us, tede bidi me deli bidali, aga nogi Jop dao. Te bidi Jop aga Godigo gedude dwagi yai doloba pai bidi mu bidai, dwai kolesaga mu meni yai dao. Aga lotu po weyu, Godigo po dologode naga biliyu, tama agai po wali peyu yai. Tama tiyu, agai dwai sę ebo hagela homu yai.
JOB 1:2 Aga wego ogwa nogo a naga olama, me badu nogo si ogwa ame nai, wegi sela ame nai dao.
JOB 1:3 Tama agai kibu sipsip 7,000, tama kibu kamel 3,000, tama sę yabo kibu bulmakau 1,000, tama kibu donki so 500 tama bidai dao. Tama agai sę ebo we bidi hauwa mu bidai. Tama te we bidi dabego te bidi Jop nogi ugwaba mu sai dao, tama tiyu, agai nogi ugwade mu elaluyu, te sia asobo badu bidi dabego nogi aiya mu ilali.
JOB 1:4 Te deli deli Jopgo ogwa dabego, me sogo sogo augwa bede moni nai mu tuabo sogo bodolu weyu, tama yali. Te ogwa dabe deligo te nai tuabo sogo bodolu weyu da, aga ama dabe me aga abe dabe tama te nai tuagasa po weyu yai.
JOB 1:5 Tama te wai pulubago nai ula tubo si ela silibo si da, teda augwali sisi elaluama, te Jopgo augwali i olama, aselama, te aga wai dabe Godigo gedude dwagi yai ma emainogo te ofa nai mayu yai. Aga kigamu hulide mu hodaluama, te nai sese bugagia mu demainu ebo dao. Te bidi agai te nai ofa aga wai dabe deli delide usu nama ulubo dao. Augwaligo te nai da tula silibo si, Jopgo tama sę naga ebo dao. Magi baso meni, agai te homugo tibo dao, agai wai dego dwai sę eyu, augwa homude Godibolo dwai po me waliwe weyu, tibo dao. Tama te kolesaga Jopgo hauwa sogo idu geai dao.
JOB 1:6 Me sogo te Godigo ensel mobo bidi dabe augwali Genuai Bidigo geduba sisinagasali. Te dwai haubo tobolu bidi me teba asali, te Godigo gedu, te Satan dao.
JOB 1:7 Tama tibaso, Genuai Bidigo te Satan hanaluyu, te po wali, “Nage menade bidama asaliwe?” wali. Te Satango te po wei ponoyu, te po wali, “Ena te tǫ deli badu naga bidibo menio. Ena te tǫ tigidali bulu badu bilama, tama ena e asobao,” wali.
JOB 1:8 Tama Godigo aga hanaluyu, te po wali, “Nago eno sę ebo bidi me sualiwe, te Jop, ma meniwe? Jop aga te dwagi yai doloba pai bidi dao, eno gedude dwai sę me ebo menio. Agai ena dologode bidiyu, enade lotu po weyu ebo dao, tama eno tigidali po wali pabo dao. Agai dwai kolesaga mu hagela homu ebo dao. Te tǫde tigidali bulu badu te bidi tiwai menio,” wali.
JOB 1:9 Tama te po obaso, te Satango te po wei ponoyu, te po wali, “Nago homugo te Jop nage wi eyu, nage dologode olo dali elaluaibawe? Nago nogode nai me sisąbo si da, magi yaibawe? Eno homugo da, meni yaibao.
JOB 1:10 Magi baso meni. Aga nago obo tomode bidiyu, tama nago aga bugagia tonaluyu, aga wai puluba dabe, me aga nai dabe bugagia tonalubo dao. Me nago tigidali sogo aga dali dwagi yai sę ilibo dao. Tama nago aga bulmakau kibu hauwa mu usu elama mani, augwali tedela pelama, te bidibo bulu usu numainogo tiali.
JOB 1:11 Tama ma, nago agai te nai dolama, sela sąbo si da, teda nago suaibao, agai nago gesabidide dwai po waibao,” Satan haubo bidigo te po wai.
JOB 1:12 Tama Genuai Bidi agai Satanbolo te po wali, “Odao, eno agai te nai dabe tigidali nago nogoba mobao. Tagalao, nago te naide magi sę me yabo homu ebaso da, teda eyu naga yao. Tiali goli, nago Jop tigide dwai sę me deli bolo me elamuo,” wali. Te dwai Satango Godigo te po odama, tama aga taga pali.
JOB 1:13 Me sogo be posobode, te Jop aga wai dabe te augwa gomunai bidigo beba deliba sisinani, te moni nai tumainu yali.
JOB 1:14 Tama Jop aga sę ebo bidi me te Jop bidibo madiba aselama, agabolo e po walali, “Dago te bulmakau kibu dabe giba odasa pai dao, te gi tǫ elemainu. Tama te kibu donki dabe augwali pagede nosai tutu bilali.
JOB 1:15 Tama, polo tama te Sabea bage aselama, te donki kibu dabe dali, bulmakau kibu dabe dali si wi sela pali. Tama augwaligo nago sę bidi dabe sese ela muna silali. Ena enaduba deli tama wi aselama, nagebolo e wagasobao,” te po wali.
JOB 1:16 Te bidigo po odubadi yaide, gasa sę bidi me aselama, e po wagasali, “Be kulu weyu yaide, te be sele genuai elama, tama te kibu sipsip dali, te kibu tonaluali bidi dali, sese ela silalio. Enaduba deli wi aselama, nageba e po wagasobao,” wali.
JOB 1:17 Te bidigo po odubadi yaide, gasa sę bidi me sabolagaselama, te po wali, “Te Kaldia bidi hani sela aselama, te kibu kamel dabe wi sela peyu yaide, te sę bidi dabe ela muna silalio. Ena deli aselama, nagebolo e wagasobao,” wali.
JOB 1:18 Te bidigo po odubadi yaide, gasa sę bidi me sabolagasiyu, te po wali, “Nago wai dabe augwali nago gomunai ogwago beba sisinama, genuai nai ulama, tubadi yaide,
JOB 1:19 polo tama, mone wali olo kemidu gagalasa asiyu, te be dega polama, nago wai dabe sese elama, isilalio. Enaduba deli te sęde geda munama, tama nagebolo e wagasobao,” te sę bidigo te po wali.
JOB 1:20 Jopgo te po odama, moni homu sęgę elama, aga ugwa pįsilama, tama aga tobolu nisi tologali, te aga homu dene ola mayu tiali. Tama aga bogoli si tǫba bulama, Godiba gedu haluasa po wali.
JOB 1:21 Tama Jopgo te po wali, “Ena idago ame nani sogo, eno magi nai me sela asai menio. Tama ena isibo sogo, te tiwaidu naga paibao. Genuai Bidi aga digi ena te nai dabe mawai dao. Tama aga digi te nai dabe ma te sela sąna silali dao. Tama tibaso, eno agai nogi ugwaba mu sobao,” wali.
JOB 1:22 Mu tama, te dwai sęgęgo Jop hwa sali. Tiali goli, agai dwai sęgę elama, Godibolo sębę yai po me wabeo.
JOB 2:1 Me sogo ma, Godigo ensel mobo bidi dabe ma Godigo geduba ma sisinagasali. Te sogo me te Satan me Godigo geduba asali.
JOB 2:2 Tama tibaso, Godigo agabolo hanalu wali, “Nage menade bidama, asobawe?” po wali. Te po obaso, Satango te po wali, “Ena te tǫ deli badu naga bidama, asobeo. Ena te tigidali tǫde usu elama, bilama, asobao,” wali.
JOB 2:3 Te po obaso, Godigo agabolo te po hanalu wali, “Nago eno sę ebo bidi Jop sualiwe, ma meniwe? Jop aga te dwagi yai doloba pai bidi mu eno gedude bidibo dao, dwai sę me ebo menio. Aga lotu po weyu, ena dologode naga bilibo dao. Tama eno po bugagia wali peyu, tama ebo dao. Agai dwai sę ebo hagela homu ebo dao. Te tigidali tǫde bidi aga tiwai me bidibeo. Nago ena homu bega sabo po obaso, tama eno nage taga palali digi, nago aga dali dwai sę genuai mu yai dao. Tiali goli, agai ena tagalobeo. Menio. Agai ena polobadu wali asali tiwai me asai dao,” Godigo te po wali.
JOB 2:4 Te po obaso, Satango te po wei ponoyu, te po wali, “Mu tamawe? Tiali goli, eno homugo bidi me aga bugagia bidaibao homu eyu da, teda te bidi aga tigidali nai menama, aga bidibo ula abelaibao.
JOB 2:5 Tama eno homugo nago agai tigi dolomai homu ebao. Tama tibode nago suaibao, agai nagebolo dwai po mu waibao,” wali.
JOB 2:6 Te po obaso, Godigo agabolo te po wali, “Eno aga nago nogode e tagalobao. Nago agai tigide magi sę me yabo homu ebaso da, yao. Tiali goli, nago aga mu isilamo dao,” Godigo te po wai.
JOB 2:7 Tama tibaso, te dwai Satango Genuai Bidigo te po odasa, Genuai Bidi taga peyu, te Jopgo tigide dili keni tiwai hauwa mu ela bibideli pali.
JOB 2:8 Tama tibaso, Jop aga moni hanude dwai dwai nai sąbo madi pali, tama aga te isi nogani sisi dulude dulaluali. Tama agai te tǫgo nigali sene me toga pai, te dage me deli selama, tama agai aga te dene ebo keni naga hadu bidali.
JOB 2:9 Tama aga we aselama, te bidi sulama, te po wali, “Magi baso nago God wali me pidubawe? Nago God tagalama, tama agabolo dwai po wao, agai nage isilimainogo tiao,” wali.
JOB 2:10 Tiali goli, Jopgo wei ponoyu, te po wali, “Nago po te dwai kolesaga yai wego wabo ąǫ te ebao. Ma, dago dwagi yai te Godigo da dwagi yai nai dabe mabode dwagi yai homu ebo dao. Te magi baso dago Godigo dabolo te dwai sęgę mabode dwagi yai homu egobewe?” te po aga webolo hanalu wali. Mu tama, te dwai sęgęgo Jop pedelali goli, agai Godibolo dwai po me deli wabeo.
JOB 2:11 Te Jop aga abagi sela augwaligo te Jop agai tigi te dwai sęgę yali po odama, tama augwaligo po bodolu sali, te deliba sisinama, te bidi sugi paibao. Tama augwa bulu taga solama, Jop sugi soali, te agade augwaligo hobede ola mayu, tama agai homu dąų waliyu emainu. Te bage augwaligo nogi e tama dao, Elifas, te Idom bagego hanu nogi Tema bidi dao, te Bildat te tǫ nogi Suha, te Sofar te bulu nogi Nama.
JOB 2:12 Augwali Jop pąba sabolisąma ebadi, augwaligo aga suali. Agai tigi mu dolai mu sulama, tama agai tigi gasagi yai mu elaluali. Hasia bolo te bidi Jop da te kuna konegobeo. Augwa ugwa pipisąyali, augwali hobede ebo ola momainogo, tama gela wabo gagalali. Tama augwaligo tǫ hogomu augwa tigiba ugwaba sąyani.
JOB 2:13 Tama tilama, augwali aga dali tǫba duagulali. Augwali aga dali bidibadi, nogo a naga olama, me badu nogo badu si sogo aga dali bidali. Tama augwaligo agade po me wabe, magi baso meni, aga augwaligo suali, agai tigide moni dene mu saibaso.
JOB 3:1 Te nogo a naga olama, me badu nogo si sogo bidama silibo si, te Jop agai pedauwali pania sabo silama, tama po weyu, te aga idago aga ame nani sogoba dwai po wali.
JOB 3:2 Agai te po wali,
JOB 3:3 “Te Godigo ena idago haligade elalubadi yaide, teda tama doligi sogo da, usu igi dao. Tama ena idago ena ame nani sogo me tama doligi sogo da, usu igi dao.
JOB 3:4 Mu, te Godigo dwagi yai mu elama, te sogo hulide me hulia sai me elalugi sogo da, usu mu igi dao. Ma, te giliga nanomai ebo tagaligi sogo da, usu igi dao.
JOB 3:5 Te mu tama, Godigo te ena ame nani sogo mu gegeda pigi sogo da, usu igi dao. Mu da, agai ena ame nani sogo mu hulialugi sogo, tama sisi pǫgo te sogo dagalude hulia selama, te giliga palialugi sogo da, usu igi dao.
JOB 3:6 Tama eno homugo te mu usu mu igi dao, te eno idago haliga elalubadi, dagalu te sisi pǫgo mu huli dąų walalugi da. Ma, Godigo me bidi dabego te sogo te kalenda daide sela sągi sogo da, teda te bidi dabego te sogo nedigi menigi dao.
JOB 3:7 Ma, te sogo hulide te dwagi yai homu meni yai sogo tama we sibigo wai haliga isąwai sogo.
JOB 3:8 Ma, te pobi bidi dabe, te bulu hasa Leviatan guni tubo bage, augwaligo pobi weyu, te ena ame nani sogo te aiyaba elalugi sogo da, usu igi da.
JOB 3:9 Te ma te usu igi dao, te huli sesabi igi sogo da, tama kigamu te dagalude hǫ dabe te ula igi menigi sogo da, teda te be posa pigi menio.
JOB 3:10 Mu tama, te mu tama te sogo huli sesabi igi sogo, teda doligi dao. Magi baso meni, agai ena homu meniama iyu yaide, te idago haliga dąų wagi sogo da. Tisąma yaligo da, ena megi ena sęgę me, dene me, eno tigide hauwa mu te sabo yabao,” wali.
JOB 3:11 “Magi baso ena ena idago haligade isisąma yaliwe? Ma, te ena ame nani sogo tama tisąma yaliwe?
JOB 3:12 Magi baso idago ena agai teleba munama, magi baso ame maniwe?
JOB 3:13 Ma, ena isigi sogo da, teda ena pila muyu, hodo bugagia doloyu, pila mugi dao.
JOB 3:14 Teda ena te king dabe ma king dabego koneai bidi dabe yali gilama tama bidigi dao. Augwali polo isilama, tama augwa hodo doloyu, bugagia bidibao. Augwaligo moni hanu dolai goli ma hodolai dao. Tama tiali goli, augwali me polo isilama, bugagia bidiyu hodo dolobao.
JOB 3:15 Tama tialima, ena me augwali dali bugagia pila mugi da, te genuai bidi dabego te silva dali, gol dali si augwa bede pągąnani, tama te bage augwali polo isai dao.
JOB 3:16 Magi baso ena ena idago haligade isisąma yaliwe? Magi baso eno te giliga ula susiąma ebadi, eno idago haligade isilama pubalobewe?”
JOB 3:17 “Ma, te bidi polo isai bidi dabego bulude da, megi te dwai kolesaga yali bidigo ma ebeo. Tama bidi dabe augwa tigi te dene yali sę yali bage isama, tama megi augwali toma tuyu bidibao
JOB 3:18 Tama te bulude te bidi polobadu kalabus sę yali bage, megi da augwali dua bidibao. Augwaligo megi augwa tonalubo sesenani bidi dabego po wabo me odobo meni.
JOB 3:19 Te bulude da, te tobage bidi dabe te bidibo, tagala augwali genuai nogi elalubaso, me olo bidi yaibaso me. Te olo sę ebo bidi dabe augwali augwa genuai bidi dologode me bidibeo. Mu meni, augwali megi da hala palali,” Jopgo te po wali.
JOB 3:20 “Godigo te bidi dabe augwali dene dali sęgę siyu ebo agai subo dao. Magi baso agai augwa bidibo ula me elalubo sula tagalobo dawe?
JOB 3:21 Te bidi augwali isabo naga augwaligo wei mu ebo. Tiali goli, te bidi dabe augwali isibe. Augwali augwa isabo bomai sę elama gegebo sę tiwai ebo da, bidigo mone tǫ dogolama gegebo tiwai dao.
JOB 3:22 Augwali dwagi yai homu ebo da, augwali te isilama, augwali gų pageba pubaligi pabode ebo.
JOB 3:23 Godigo te tobage bidi dabego sunumi me sina sabo dao, te augwali te obo tomode elalubo tiwai eyu, tama te bidi dabe augwali pabo sunumi meni ebo dao. Augwaligo magi sę mu yaibawe? Tama magi baso Godigo augwali bidimainogo ebowe?”
JOB 3:24 “Ena nai me tubo meni yani. Eno haligade gela naga wabo. Ena dene dwai mu ebaso, ena hwąwa boma mu wabo dao. Tama eno homu sęgę da, ąį gamiade wę pągąlubo tiwai elama pabo tiwai ebo.
JOB 3:25 Magi baso meni, te tigidali nai dabe ena wi mu ebo da, te nai dabego ena sabolama, ena dolobo dao. Awe, te ena wi ilali sę dabe enaba pedelai dao.
JOB 3:26 Tibaso, eno bugai homu me ebe, tama ena dua me dulalube, tama tiyu, ena dua me dualalubeo. Mu menio. Tigidali sogo eno tigide dwai sęgę naga siyu ebo dao, tama eno homu tegalugobeo,” Jopgo te po wali.
JOB 4:1 Elifas te Teman hanu bidi agai Jopgo wali po oda silama, agai po wei ponoyu, te po wali,
JOB 4:2 “Jop, eno po dwasianu nage dali waibao. Ma, tama eno tama tiyu da, teda nago ena dali wado yaibawe, ma meniwe? Tiali goli, tagala, eno penane panialugobeo.
JOB 4:3 Eno koneani, nago dwagi yai homu we bidi hauwabolo mani. Tama nago bomo menia we bidi bomo ma ilali. Tede nago homu kone palao.
JOB 4:4 Te we bidi genuai sęgę selama, tǫba tulaluai goli, nago augwalibolo dwagi yai po mawai. Tama nago te pogo augwali ma hodolai dao. Tama augwali ma bomo elama dolalumainogo nago augwali tau sali.
JOB 4:5 Tiali goli, hobede mu dwali. Megi dwai sęgęgo mu nage te mesegelai yaba. Tama nage noma siyu, nago homu sęgę genuai mu te eba. Awe, te sęgę nageba pedalubaso, nage noma mu sali.
JOB 4:6 Nage Godigo po wali peyu, tama agade lotu po weyu, tama aga dologode naga bidiyu eyu yaide, nago dwagi yai doloba pai kolesaga tigidali sogo eyu ebo da. Tama megi me nago agade homu dąų walama, tama agai nage ma tau somainu yao,” wali.
JOB 4:7 “Jop, nago koneani, we bidi me dwagi yai kolesaga eyu, dwai kolesaga menia, te bidi dolama isaliwe? Ma, te doloba pai we bidi olo dolaliwe? Teda meni homu eba.
JOB 4:8 Tiali goli, eno suali, dwai kolesaga hauwa ebo bidi dabe da, te bage da dwai kolesaga wali peyu, augwali sęgę hauwa wali peyu ebo. Te e tiwai dao, bidigo aga gide dwagi yai nai wai bulama, tama te dwagi yai nai sabo tiwai, ma te bidigo dwai nai wai bulama, tama te dwai nai sabo tiwai.
JOB 4:9 Godigo te dwai sę ebo bidi dali sębę elama, tama augwali mu dolama, tama augwali mu silibo dao. Te e tiwai dao, isigo ni ulama sia sabo tiwai dao.
JOB 4:10 Dwai bidi dabego gasa bidi dolama, dwagi yai homu ebo, te bulu yowi laiongo bulu hasa ela munama, hai wabo tiwai ebo dao. Tiali goli, Godigo te bidi dabe aiyaba elaluama, sęgę mena tagalobo dao. Tama augwali te bulu yowi laion tiwai dao, te augwaligo kele degelama, te bulu hasa ma ela tuabo usu meni ebo dao.
JOB 4:11 Tama te bulu yowi laion aga tuabo nai meniama, tama isibosi, augwaligo wai dabe wi tedela pabo. Te tiwai te dwai bidi dabe tigide ebo dao,” Elifasgo te po wali.
JOB 4:12 Tama Elifas agai po genina mu ma weyu, te po wali, “Me sogo po me dua digi mu ena pageba sabolali. Pąde mu tama te po odabo ąǫ ebe.
JOB 4:13 Te po eno hulide sali. Te bidi dabe sese mu godege pilama tomo mu igi paide. Ena pila mubadi yaide, te haniani kolesaga eno tobolude iba oba ida wali.
JOB 4:14 Tama tibadi yaide, magi nai mego eno tigi wi ilama, tama eno tigi noma geninama mu sali.
JOB 4:15 Tama dwasianu wali eno gesabididu aselama, eno gesabidi pona sąyani. Teda ena wi genuai mu elama, tama eno tigi nisi hodaluali.
JOB 4:16 Eno magi nai me dolalubo suali. Tama tibaso, eno gedu dilasa mu tonali. Tama te nai eno bugagia koneabo ąǫ ebe, tama eno kilikili me me odobe. Tiali goli, nosali eno po me odali, te pogo e tama wali,
JOB 4:17 ‘Godigo tigidali we bidi nigai dao. Tama augwali aga dologode bidibao. Tama God agai gedude doloba pai bidi me bidibeo, te God aga tiwai.
JOB 4:18 Te Godigo ensel mobo bidi dabe God aga dali bidiyu, sę agade ebo. Tiali goli, me sogo augwaligo augwa sę bugagia me ebo menio. Godigo subo da, te ensel mobo bidi dabe me sogo bugagia me bidibo menio.
JOB 4:19 Tiali goli, bidi dabe da, e tǫde olo nai dao. Nago homu bidigo ensel bidi edelama, Godigo gedude doloba pai bidi bidaibawe? Godigo e tǫde bidigo tigi nigai dao. Tama augwali polo isibo da, te ba bogǫų bidigo sągą agala sabo tiwai dao.
JOB 4:20 Bidi me deli kigamu bugagia bidiyu, tama pio aga isilama, tama me badu we bidigo aga mu gegeda palaiba, agawe?
JOB 4:21 Te bidi dabe dwagi yai kolesaga sisąbadi yaide, te isibo augwaliba polo sabolobo dao, te sel ugwa be te bono pįsįgana palobo si, tǫba polo tulalubo tiwai ebo dao,” wali.
JOB 5:1 Tama Elifas agai po genina ma weyu, e tama wali, “Polobe da, Jop, nago i bomonama tau somainogo. Tiali goli, eno homugo bidi deli bidibo te asogowe? Nago homugo dagalude ensel bidigo nage tau somainu hanalu waibawe?
JOB 5:2 Ma, kolesaga meni yai bidigo da, teda dwai kolesaga wali paibao. Tama homu sęgę eyu, sębę ebo sę tigidali sogo yaibao. Tama aga te kolesagago aga digi aga ma isilaibao.
JOB 5:3 Eno suali, bidi meba augwa obo tomode bugagia bidibo suali. Tiali goli, augwaligo kolesaga mu dwai mu elalubo suali. Tama tibaso, eno God polo i wali, te bage dolomainu.
JOB 5:4 Ao, augwa wai puluba dabe bugagia bidabo sunumi meni yai. Tama bidi dwai dabego augwali po tų ebode aiyaba elaluainu ebaso da, teda augwali po tų ebode kisa sabo hai namu meni yaibao, te po tųde ela holabo.
JOB 5:5 Te we bidi nai menia siyu ebode, ma dogoni aloa siyu ebaso da, teda augwali te dwai bidi dabego giba dabe nai sagasiyu yaibao. Tagalogobeo, te dwai sesani bono tomode elalubo nai me, augwaligo te nai me siyu naga yaiba. Tama augwaligo moni doado bage sabo sunumi gegaibao, te bidi hanigo.
JOB 5:6 Dago koneani, te dwai dwai sęgę, me dwai dwai sę ebo kolesaga te nai tubo tiwai e tǫde pedalobo meni.
JOB 5:7 Bidi dena digi da, te tobage dwai dwai sęgę sabo kolesagago sę ebo dao. Dena digi te sęgę sabo, e tiwai ebo dao, te kenage isi ulama podiliyu, te isi hobolu, ugwaba dagala sąbo tiwai ebo dao,” wali.
JOB 5:8 Elifas agai po genina ma weyu, e tama wali, “Tiali goli, ena tama nago tigide sęgę yali tiwai igi sogo da, teda ena Godibolo gedu haluasa po wagi da, agai eno te sęgę silimainu.
JOB 5:9 Agai haniani sę hauwa mu ebo dao, tama dago te sę nedebo usu egobe. Augwaligo dago kolesaga edelai, te dago kuna konegobeo.
JOB 5:10 Agai te tulubage e tǫba mayu, te dago giba me tulubage mabo dao.
JOB 5:11 Agai genuai nogi te nogi meni yai bidibolo te genuai nogi mabo dao. Tama agai te dwai sęgę sobaso gela wabo bidi dabe tau siyu ebo, tama bugagia bidimainu,” wali.
JOB 5:12 “Agai te tibo po walama, dwai kolesaga ebo bidi agai tobolu dolobo dao, tama tiyu, te bidi dabe augwaligo yagą wali haniani sę ebo meni.
JOB 5:13 Bidi mebago haniani kolesagago bidi mebago homu kolesaga dolainu ebo dao. Tiali goli, God te dwai kolesaga ebo bidi aga te dwai kolesaga ebogo aga ma dolomainu ebo dao. Te e tiwai dao. Bidigo sųgų sabo wa te sųgų sainu wąį goli, te wa aga digi aga tigide ma agabesai subo dao. Tama augwaligo sainu yali homu te olo buluba taga pabo dao.
JOB 5:14 Augwaligo homu kolesaga mu kone tųą pabo dao, tama augwaligo magi sę me yabo homu ebo menio. Te giliga nanani da homu egobeo. Augwali te homu kolesaga mu menia pela, huli dulude bidibo tiwai elama, augwa pabo sunumi subo menio.
JOB 5:15 Tiali goli, Godigo te nai meni yai bidi tau sabo dao. Ma tagala, te bomo yai genuai bidi dabe da, augwaligo te nai meni yai bidi dabe dologobeo.
JOB 5:16 Tama tibaso, te nai meni yai bidi dabe augwa Godiba homu kolesaga dąų weyu, God augwali tau somainu tonalubo dao. Tama te dwai sę ebo bidi dabego augwalibolo dwai sę ma egobeo,” wali.
JOB 5:17 “Ma, te Tigidali Bomo Elalubo God agai bidi me deli kolesaga dodolobaso da, teda te bidigo dwagi yai homu yao. Tama megi da, agai nage dodolaiba, tiyu nago aga tudi ola maidali weyu.
JOB 5:18 Dago koneani, Godigo nage sęgę mu mayu elama ebaso da, teda aga digi nage usu ma ilaibao.
JOB 5:19 Tigidali sogo mu, agai nage dwai sogo ebaso me, agai nage tau saibao, tama te dwai naigo nage me dologobeo.
JOB 5:20 Ma, te nasi ebo si asobaso da, agai nage nai mawaibao, tama nage bugagia bidaibao. Ma, te wąbi hwįbo sogo, agai nage tonaluaibao, tama tiyu, te boi bidi dabego nage me ela mugobeo,” wali.
JOB 5:21 “Ma, te bidi dabego ili po walama, nago nogi aiyaba elaluainu ebaso da, me ma te dwai nai pedalama, tama nage dolainu ebaso da, teda God nage pagede bidiyu, tau saibao, nage wi me egobeo.
JOB 5:22 Te moni nasi si asobo sogo me, te dwai sogo me, Godigo nage tonaluaibao, tama nage dwagi yai homu elama, bugagia bidaibao. Tama nage bulu hasa wi me egobeo.
JOB 5:23 Te nago gide tǫ elebo si, te gide masigi du me sugobeo. Tama te bulu hasa dabe nage dali bugagia bidaibao.
JOB 5:24 Tama nago koneaibao, naga nai dabe bugagia bidiba olama, tama naga ugwa bede bugagia dua bidaibao. Tama naga kibu sipsip dabe bugagia bidibo suaibao, tama te kibu sipsip me hagagobeo.
JOB 5:25 Naga hani te genuai mu pedalaibao, tama augwali genuai mu pedalama, te tǫde nosai holobo tiwai yaibao.
JOB 5:26 Tama tibo si, nage monu dabe mu elama, tama nage isaibao. Nage te gide wit nai inabo tiwai elama, tama te bidi dabego sabo sogo saibao.
JOB 5:27 Jop, dago sulama, homugo koneama, tama dago mu suali, te nai dabe tama dago mu koneani, te mu tama mu dao. Eno te po pusali, te nage tau somainu. Tama tibaso, nago olo sąganama, bugagia odama, tama homu kolesaga bugagia sao,” Elifasgo te po wali.
JOB 6:1 Tama te Jop agai Elifasgo po wei ponoyu, e tama wali,
JOB 6:2 “Hobede mu, tiali goli, ma eno te tigidali homu sęgę dali, te tigidali nai dabe, te skel me deliba muyu da,
JOB 6:3 teda te dwai nai dabego sęgęgo te tamu ąį sanide elalubo masigi kemigo sęgę aiyaba ilaibao. Tama tibaso, eno wado elama, haniani po dabe obao.
JOB 6:4 God tigidali bomo elalubo, te agai ena te enego enani ene te dwai nabi tede elalubo. Tama te dwai nabi eno tigi tomoba pelama, tama eno homu dwali. Godigo haniani nai taga palali ena wi emainu,” wali.
JOB 6:5 “Te kibu donki dali, te kibu bulmakau sigo augwa tuabo nosai elalubaso, te hǫą wabo meni.
JOB 6:6 Tiali goli, dago pusu menia nai meba elalubo, dago te nai subigila tuaibawe? Menima. Hasia dago tamu bolo munama, tama dago tubo da. Ma, te ba ge gani pusu ebo dawe? Mu menima.
JOB 6:7 Eno haligago te tobage nai wei mu meni. Eno gedude te nai dwai mu da,” wali.
JOB 6:8 “Eno wei mu ebo, Godigo eno gedu haluasa po wabo odama, tama agai eno emainu wali sę dabe emainao.
JOB 6:9 Eno godolo ebo da, God agai ena sągągo agalama, tama elama, isilimai homu eba.
JOB 6:10 Ma, te ena genuai sęgę tolobo da hagela ebo, teda ena dwagi yai homu elama, sasamano bilaiba. Magi baso meni, eno koneani, tigidali sogo mu ena God dologode bidali, aga te dwagi yai kolesaga eyu, doloba pai kolesaga naga ebo God dao.
JOB 6:11 Eno bomo tigidali sia sali, tama eno mena dwagi yai nai enaba ma pedalobo tonaluaibawe? Ena bididuabo page da, mu meni. Tama magi baso ena homu nagame elama bidaiba? Te mu dwagi yai da, eno bidibo ula sia siyu da.
JOB 6:12 Mena tama tibo nago homugo ena bomo masigi dali, bras dali si tiwai dawe? Mu meni.
JOB 6:13 Eno bomo mu sia sali, tama eno mena sę ma eyu, ena ma tau somainu ebo usu menio,” wali.
JOB 6:14 “Bidi te genuai sęgę elalubo sogo da, augwa abagi mu dabe pąde elalubo dao, ma agai God tudiba sąwai badi, me aga God dologode me bidibadi.
JOB 6:15 Tiali goli, dage eno abagi dabe, dagego ena ili po bugagia mu ola mobao. Dage te ąį gamia wa pai elalubo, te tulubage tulisąma ebadi elalubo tiwai dao.
JOB 6:16 Te tulubage side da, te wę te ąį gamiadu soabo dao.
JOB 6:17 Tiali goli, te poi pibo side da, te ąį gamia dabe wa pai mu elalubo dao.
JOB 6:18 Me sogo side bidi dabe augwa bulu tagalama, gasa buluba augwa wa hulu sabilibo kibu kamel dali pabo sogo, tama augwali wę menia sabo sogo, augwali sunumi tagalama, te wę gamiaba gegegi pabo dao. Tiali goli, wę gamiade wę mu meni ebo dao. Tibaso, augwali wę geme elalubo badi udada bilibadi, augwali isibo dao.
JOB 6:19 Te bidi hani te hanu Tema bidi dali, Seba bulu bidi dabe, augwaligo me tiwai sę naga ebo dao. Augwaligo homugo te wę gamiade wę elalubao olama, augwa kibu kamel dabe teba sela pelama, te wę tumai homu elama, teba odasa pabo dao. Tiali goli, augwali te wę sula saibaso, noma sabo dao. Tama tibaso, augwali dwai homu ebo dao.
JOB 6:21 Eno homugo dage sela te wę gamia sula sai tiwai dao. Eno homugo dagego ena tau sainu asali. Tiali goli, dagego suali, ena mu dolai mu bidibo suali, tama tibaso, dage wi genuai mu yali.
JOB 6:22 Mena tama tiali? Polobadu eno dagebolo ena dobola somainogo te boi bidiba doado bage mao wabo sogo me elaluai dawe? O ma, eno dagebolo gasa bidi dabebolo mone momainu, te bidi dabe hanaluama, ena tau somainu yai dawe?
JOB 6:23 Ma, eno dagebolo boi bidi dabego nogode ma somainu dagebolo hanalu wai dawe? Ma, ena te dwai kingo nogode abelemainu yaliwe? Mu menima,” Jopgo te po wali.
JOB 6:24 “Tibadi polo ma, dagego ena olama ma, tama eno koneama, te eno dwai sę dabe yali koneaibao. Tibaso da, eno pedauwali pania selama, dagego po wabo naga odaibao.
JOB 6:25 Tama dagego po mu yaibaso da, teda eno te po oda selama, eno homu kone palama, mu da homu elama, wali paibao. Tiali goli, dagego olo ili po naga weyu da. Eno dwai sę me yai meni.
JOB 6:26 E sęgęgo ena mu dolali. Tama tibaso, eno po dodolama obao, tama dagego homugo, eno po olo wali bola bilibo tiwai yali. Tama dagego homugo dagego ena dodolaibawe?
JOB 6:27 Menima. Dagego kas gagali elama, te tiana wai dabe dego mu sogowe weyu suainu yabo bage dao. Tama duga abagi solo maketde munama, mone sainu yabo usu.
JOB 6:28 Mu tama, dagego ena bugagia sulama, osayama, eno dagebolo ili po me wagobe ma.
JOB 6:29 Dagego te tobage po dali, kolesaga dali si tagama, tama doloba pai kolesaga elama, eno kolesaga osayama. Dagego ena aiyaba elalugi, eno magi dwai sę me ebe.
JOB 6:30 Dagego homugo eno po dolo meni homu ebowe? Tama dagego homugo eno te dwai kolesaga menawe, te dwagi yai kolesaga dali si dagalogobewe, ebawe? Te bage?” Jopgo te po wai.
JOB 7:1 “Da e tǫde bidibo sogo, da e tiwai dao, bidigo da kegelama, wąbi hwįbo bidi nigibo. Da te sę ebo bidi dabe tiwai gilama, bomai sę naga tigidali sogo yaibao.
JOB 7:2 Da e tiwai olo sę bidigo te giliga ibaba dega sabode agai tigi dwanu kedau emai ebo. Tama da te sę bidigo aga mone sabo tonalubo tiwai dao.
JOB 7:3 Godigo bodolu te polua hauwa mu mani, ena dwai tiwai bidimainu. Tama tigidali hulide ena homu dwai idubao.
JOB 7:4 Ena pibo saide pila muyu, eno homugo te be polo posao homu ebao. Tiali goli, huli sesabi bobobage mu yaibaso, ena pibo saide ugwa begeliyu, eda begeliyu idubadi, be posalio.
JOB 7:5 Eno tigi tigide elalubo kenide te sawi pulai elalubo. Bomai tigi waligo te keni halubo dao, tama te keni dabe olo tigi wali pepeda pelama, tigidali tigide tilama, keni di pedalobo dao.
JOB 7:6 Me ma, ena e tǫde bidibo sogo polo peyu ebo. Tama tibaso, eno homugo eno tigi ma usu yaiba homu menio,” Jopgo te po wali.
JOB 7:7 Jop agai po genina ma weyu, e tama wali, “God, nago koneani, eno e tǫde bidabo sogo te pęwadage mu da, te eno gunidu mobo selama, buluba polo ma soabo tiwai mu dao. Tama tibaso, dwagi yai sogo ena tigiba ma asogobeo.
JOB 7:8 Bidi dabe augwaligo ena megi subao. Tiali goli, nosali augwaligo ena ma sugobeo. Nago ena gegebo sę yali goli, tama ena olo dali hagalama, nago ena ma sugobeo.
JOB 7:9 Bidi isibo da, teda aga polo isai bidi dabego buluba pabo. Te pǫ me deli tiwai dagalude bidisąma tedela pai te tiwai dao. Tama bidi dabe te bulude bidibo bage te buluba ma asogobe.
JOB 7:10 Aga aga beba ma asogobe. Tama aga hanigo aga homu kone me egobeo, tama mu gegeda paibao,” wali.
JOB 7:11 “Tama eno te homu ebo sogo, eno pedauwali pani sogobeo. Eno haligade gela genuai mu walama, tama ena sęgę genuai mu tolalio. Tibaso, eno po me waibao.
JOB 7:12 Magi baso nago ena tigidali sogo ena bomonama tonalubo dawe? Nago homugo ena te tamu ąįde bidibo masalai gula tiwai da weyu, eno te nai dabe dolomai homu ebowe?
JOB 7:13 Eno homugo tibo dao, ena godege piyu, te dene ebo gegeda pogowe homu ebo.
JOB 7:14 Tiali goli, ena pibo sogo nago ena haniani na ilama, tama eno te tobage hwą bidi suyu ebo.
JOB 7:15 Tialima, te sogo eno homugo te tibo kolesagago ena dogoni tola selama, ena isimainao. Eno wei ebe, ena te tigidali me bididu, te tobage sęgę siyu ebo hagela ebo.
JOB 7:16 Ena hagela polo yali. E tǫde bidibo da, ena hagela mu ebo. God, nago enabolo sęge ma menamo, ena sula tagalama, olo bidimainao. Magi baso meni, ena bidibo sogo pęwadage mu yali,” wali.
JOB 7:17 “Da we bidi magi nai dao olama, nago da homu ebo dawe? Magi baso nago da tigidali sogo tonalubo dawe?
JOB 7:18 Magi baso nago dago kolesaga tigidali sogo kigamu osabo dawe? Tama magi baso nago da usu sabo hodo dolisąma ebo dawe?
JOB 7:19 Eno homugo nago gesabidi gasaba begelama, tama ena nago pęwadage sogo naga tonalu homu yali goli da, ena pęsa dalobo doanu usu emainu.
JOB 7:20 Eno homugo eno dwai sę ebogo nage mu dolobo, tama nago homugo enabolo sęgę maiabo homu ebawe? Ena te nago enego enebo tą tigi tiwai pedalali, tama nago ene enaba enebo dao. Nago da tonalubo da, te enesigi bidi dabego kalabus bidi tonalubo ąǫ ebo dao. Ma, eno nagebolo genuai sęge maniwe?
JOB 7:21 Magi baso nago eno sęgę dali, dwai sę dali si tagalobo homu ebewe? Dwasianu sogo ena isama, ena gų pagede pila muaibao. Tama nago ena gegebo sogo, te nago ena munu ma sugobeo,” Jopgo Genuai Bidibolo te po wali.
JOB 8:1 Jopgo po ola silibo si, tama Bildat te Suha bulu tǫ bidigo agabolo e tama wali.
JOB 8:2 “Te bage. Nago po da, dwai goli da, mena sogo nago te kolesaga tagalaibawe? Nago po wabo te wali subigila pabo tiwai dao.
JOB 8:3 Godigo tigidali bomo elalubo, te doloba pai kolesaga hasegelama, tama da kegebo meni. Mu menima. Tigidali sogo agai kolesaga doloba pai naga dao.
JOB 8:4 Tialima, nago wai pulubago dwai sę ebaso, agai augwa sęgę wei ponani bogo.
JOB 8:5 Tiali goli, naga Godibolo gedu haluasa po wao. Agai tigidali bomo elalubo, tama nago agabolo nage hobede emainu ya.
JOB 8:6 Ma, nage Godigo gedude doloba pelama, magi sę me isąwai da, teda God aselama, nage tau sagasaibao. Teda aga nage bugagia nago bede bidimainu ilaiba, te polobadu bidali yali gilama.
JOB 8:7 Tama agai nagebolo nai dabe hauwa mu mawaibao, te polobadu nago elaluali nai mu edelaibao.
JOB 8:8 Nago polobadu bidali genuai bidi dabego dwagi yai doloba pai kolesaga page nago gega suao. Tama polobadu wąį dabego kolesaga me osola suao,” wali.
JOB 8:9 “Magi baso meni. Da tǫde pęwadage sogo bidibo dao, te bidigo tigi noma te tǫde osogo elalubo tiwai bidibo dao. Tama polo tama hagawaibao. Dago dwasianu kolesaga naga elalubo.
JOB 8:10 Polobadu bidi dabego dwagi yai kolesaga dali dwagi yai homu elaluali, tama augwaligo nage ola mawaibao,” wali.
JOB 8:11 “Augwaligo po meba e tama dao. Me badu tǫde wę menia digi da, te bulu awi me nosai da bugagia me hologobeo. Meni. Augwali te wę hauwa elalubo digi da, teda te awi dabe nosai dabe genuai mu holaibao.
JOB 8:12 Tiali goli, wę sula sabo si da, tama te awi dabe te nosai dabe genuai holobo meni, tibo si bidigo tagabo usu ebo menio. Augwali hogodo elalubadi, augwa ma sisibo dao. Te me badu nosai dabe polo sasia pisąma ebo te nosai dabe ebo gilama.
JOB 8:13 Te bidi dabe te God tudiba mubo bidi dabe augwali te nosai dabe tiwai dao. Te bidi dabego augwa dolabo sunumi wali pabo dao. Augwaligo homugo tibo meni, augwali bugagia bidiba homu egobeo. Menio. Augwali olo tama hagawaibao.
JOB 8:14 Augwa homugo da, augwali bugagia bidaiba homu ebo dao. Tiali goli, augwaligo te homu ebo da, te olo dali geda mubo dao. Augwali te kolesaga umawai meni yai bidi da, te be tolaluabo homu ebo tiwai dao. Te hologabe gagalama, be sigiba holobo dao. Tiali goli, te hologabe dabego be polo hųgia pabo da, tama augwali subigila tulalubo dao.
JOB 8:16 Hasia da, te bidi dabe augwali dila pai nosai tǫde elalu tiwai elaluai dao. Augwali wę hauwa elaluyu, tama bugagia holama, tama augwaligo pedali dabe tigidali tǫde usu yali.
JOB 8:17 Tama masigi dude bomonama dąų wala sali.
JOB 8:18 Tiali goli, bidigo te nosai gudubo sogo da, teda bidi mego konegobeo, polobadu tede dila nosai elaluai digi da homu egobe.
JOB 8:19 Mu tama, bidi dabego God tudiba mubo dao. Augwaligo wei ebo kolesaga pęwadage mu dao. Tama augwali isibo sogo, te gasa bidi dabe pedalama, te bidi dabego bidali pesage saibao,” wali.
JOB 8:20 “Ma, te bidigo doloba pai kolesaga wali peyu, tama Godigo gedude dwai sę me isąma yali da, teda Godigo aga tudiba me iligobeo. Tiali goli, bidigo dwai kolesaga ebaso da, teda Godigo aga tau sabo usu egobeo.
JOB 8:21 Megi da, Jop, Godigo nago kolesaga doloba pai suali da, agai nage homu wiegi yai ilaibao. Tibaso, nage wiegi yai homu elama, nage gisugu ma weyu, hai waibao.
JOB 8:22 Tama agai bidi dabe nage wei isąma yali bidi dabe aiyaba ilaibao, tama augwa moni hale mu yaibao. Tama te dwai kolesaga ebo bidi da, teda augwali hagawaibao, augwa te nai dabe dali sese hagawaibao,” te bidi Bildatgo Jopbolo te po wali.
JOB 9:1 Tama Jopgo Bildatgo po wei ponoyu, te tama wali.
JOB 9:2 “Mu tama, eno koneani, nago po dolo mu dao. Tiali goli, bidi Godigo po tų eboba sabolagi peyu da, teda mena tama aga Godigo gedude doloba pai bidi pedalaibawe?
JOB 9:3 Bidigo God dali pogo hąę po wabo sogo da, teda tagala, Godigo agabolo 1,000 nai dabe hanalu waibao. Bidigo Godigo hanalubo po wei deli me ponogobeo.
JOB 9:4 Godigo haniani dwagi yai kolesaga dabe, me dwagi yai homu kolesaga, tama bomo me elalubo, tama dęą sogobeo. Tialima, niwai bidigo Godigo bomo dali, kolesaga dali si usu selama, God edelaibawe?
JOB 9:5 Ma, God agai sębę deli sogo eyu da, agai bulu du dabede deli sogo ibaba kidilibo dao. Tama augwali mu dolama, tagalobo dao.
JOB 9:6 Agai te tǫ dąų walalubo nai mumunu baso, tama te tǫ mali genina mu emainu ebo dao.
JOB 9:7 Agai po wabo goli, tama giliga agai po wali pode pedalugobeo. Tama aga hǫ dabego ula paliama, dago ula me sugobeo.
JOB 9:8 Agaduba deligo naga dagalu ugwade dinigina palai dao. Te tamu ąį holobo sogo da, te ąįba hologobe aga ugwadu bilibo dao.
JOB 9:9 Tama God agai te hǫ dabe nigai, tama te hǫ dabe augwa nogi deli deli elalubo.
JOB 9:10 Agai haniani bomai sę mu ebo dao. Agai ebo kolesagago dago ebo kolesaga edelai elalubo. Tama dago agai nigali nai dabe nedebo usu egobeo,” wali.
JOB 9:11 “Tagala, God ena pąba mu aselama, tama ena ela soabo si, eno konegobeo. Tama aga ena pąba asobosi, eno aga me sugobe.
JOB 9:12 Ma, agai magi nai me wei yali da, teda agai siyu naga ebo dao. Bidi mego aga me togolobo, usu egobeo. Tama dego aga hanalu waiba, ‘Nago magi sę ebawe?’
JOB 9:13 God agai boi bidi dali sębę ebo kolesaga sesemane sogo idu gebo dao, simanogobeo. Mu tama, te moni tamu ąįde bidibo bulu hwabidi gulamane dali, aga wali asali genuai hani dali si, te Godigo aiyaba elaluama, tama aga dologode elalubo dao.
JOB 9:14 Ena bomo mu meniama, tama eno Godigo po wei ponabo usu egobeo. Tama ena God aga po tų ebode doloyu da, eno magi po wagawe?
JOB 9:15 Tagala eno magi sęgę meniama, magi po meniama, tama te po tų ebode ena dolo dali pai. God aga digi aga te po tų odobo bidi dao, tama agai ena po tų ebo dao. Tiali goli, eno agabolo ena hobede ya po hanalu waibao.
JOB 9:16 Ma, tama eno aga i olama, tama te po tų odagasa obaso da, tama aga asigi sogo da, teda eno homugo agai eno po odogi menio.
JOB 9:17 Agai moni tulubage dali, wali dali si tagala paligi dao. Tama ena aiyaba elaluama, tama eno dwai sę yai elalubao wainu, tiali goli agai ena mu doliyu igi dao.” Jopgo te po wali.
JOB 9:18 “Agai ena doanu me tagaliyu me ebe. Tama tibaso, ena homu hę wabo usu ebe. Agai te sę dabe ena tigide ebo digi, ena homu sęgę genuai mu ebao.
JOB 9:19 Ma, Godigo bomo eno usu sainogo eyu da, teda agai bomogo ena aiyaba elaluaibao. Tiali goli, eno po tų ebode po dodoliyu da, teda dego aga tobage dwagi yai te po tų ebode yaibawe?
JOB 9:20 Eno dwai sę me ebe, tama eno aga gesabidide dwai dwai sę dabe me ebeo. Tiali goli, ena Godigo po tųde doloyu da, teda eno po geda munama, ena digi ena ma po tų ela mawaibao.
JOB 9:21 Mu tama mu, eno magi sęgę sę deli mu me ebe. Tiali goli, eno homugo ena te olo nai dabe mu ąǫ te ebao. Tama ena bidibo ula mu da ena hagela mu ebao.
JOB 9:22 Eno polo mu konea pali. Tagala, da tigidalide te tobage sę naga ebo dao. Tama agai koneani, dago sęgę elalubo wei ma meni. Godigo da mu sia sabo dao.
JOB 9:23 Tama ma dwai sogo pedalobo si da, da doloba pai we bidi dolobo. Godigo dwagi yai homu ebo dao, te sęgę subode.
JOB 9:24 Godigo dwai dwai kolesaga ebo bidigo e tǫ tonalumainu sula tagalai dao. Tama agai te po tų odobo bidigo kolesaga begelama, tama te po tų bugagia odobo meni. Ma, Godigo te sę dabe igi menigi sogo da, teda dego mu igi dawe?” Jopgo te po wali.
JOB 9:25 “Eno bidibo bubuga polo sia siyu ebo dao. Augwali umagia mu polo pabo dao, te bidi po sela peyu pabo te edelebo dao. Tama tibaso, ena dwagi yai sogo ma sisinabo usu me egobeo.
JOB 9:26 Te be posobo sogo da, te węde geba polo pabo tiwai ebo. Te me e tiwai dao, te ba kemodagego bolo ela tuainu polo toga dulubo, te tiwai ebo.
JOB 9:27 Ma, eno yaide ena tigide sęgę elalubo homu gegeda palama, bugagia bidigi sogo da, teda usu mu igi dao. Tiali goli, eno homugo te wei ebo si da,
JOB 9:28 teda eno te sęgę dali, te tigi dene dali si wi ma ebo. Magi baso meni. God nago ena polo suali, eno dwai sę nago gedude ebo suali.
JOB 9:29 Tama tialima, eno magi baso eno magi sęgę me ebeo olama, usu me sidubo wagawe? Eno po olo madi toga pabo.
JOB 9:30 Ma, eno dwagi yai sobu selama, dwagi yai meda meni yai węba wę paugi pelama, nago gedude dwai meda menia pai pedaluyu da,
JOB 9:31 teda eno homugo ena olo wę pauwaibao.”
JOB 9:32 “Ma, God aga olo bidi tama tigi sogo da, teda da si po tų ebo madi pelama, da sigo po dodoligi pigi da.
JOB 9:33 Tiali goli, bidi me bidibe yabo, agai bomo usu mu elalubo, agai te da sigo wado po dabe, me po dabe tama dodolobo usu yaiba.
JOB 9:34 Tama te tobage bidi bidibe yabo, agai Godibolo po weyu, tama Godigo ena eleyu, me ena dene iliyu elama, tama ena wi ilibo tagalao po wabo bidi mu menio.
JOB 9:35 Ma, te tobage sę yabo bidi me deli elalubaso da, teda eno Godide wi me egobe, tama eno homu sęgę ebo po agabolo dolo wabo usu yaibao. Magi baso meni, eno koneani, eno dwai kolesaga mu menio,” wali.
JOB 10:1 Tama Jop agai po genina ma weyu, e tama wali, “Ena bidibo ena hagela mu polo yali. Ena isabo goli da. Tama tibaso, eno te moni sęgę hanilaibao. Awe, eno homu ha mu eyu, tama eno te Godide elalubo po dolo pusaibao.
JOB 10:2 Eno Godibolo e tama waibao, ‘God, nago ena olo dali po tų ela magi. Ma, nago ena dali wado eyu da, teda nago eno yali dwai sęgę dolo ola mao.’”
JOB 10:3 “Mena tama tiali? Nago homugo naga digi nigai bidi dolobo usu dawe? Te dwagi yai kolesaga dawe? Ma, te kolesaga nago bidi dwai dabe homu dwagi yai ilibo, te dwagi yai kolesaga dawe?
JOB 10:4 Ma, nago da bidi tiwai eyu, tigidali nai gedugo subo dawe? Nago gedu si te da tǫde we bidigo gedu naga tiwai elalubo, agawe?
JOB 10:5 Tama magi yali? Nage da yali gilama pęwadage sogo bidama, isaibawe?
JOB 10:6 Ma, meni wida, magi baso nago ena dąį ilama, eno dwai sęge gegebo sę ebawe?
JOB 10:7 Nago koneani, eno dwai kolesaga mu meni. Tiali goli, nago eno tigide dene mabo sę ebo. Tama nago koneani, ena nago nogode gasa bidigo dobola sabo usu meni,” wali.
JOB 10:8 “Naga digi eno tigi tigidali mu nigai dao. Tiali goli, megi nago begelama, ena dolobo sę egowe?
JOB 10:9 Konea, nago ena nigali te bidigo tǫ sene nigibo tiwai yai dao. Tama megi da, mena tama tialiwe? Nago homugo ena tǫ ma gagamainu ebawe?
JOB 10:10 Nago ena, ena idago haligade ame nomainu yai dao.
JOB 10:11 Nago eno tigi dili dali, kigibili po dali si nigaligo eno tigi bomo elalubao. Tama nago eno tigi mi dali, wali dali si te tigi nigilali, te tigi dili dali kigibili nigimainu.
JOB 10:12 Tama nago ena bidibo ula menama, tama nago ena wei mu yai dao. Tama nago ena bugagia tonaluama, megi da ena me bidibao.
JOB 10:13 Tiali goli, eno koneani, nago ena tonaluali sogo nago kolesaga polo yali ena dolainu.
JOB 10:14 Nago ena bugagia mu tonaluai, eno te dwai sę ebode tagalainu ganama tiali.
JOB 10:15 Ma, eno dwai sę igi sogo da, teda nago eno tigide sę geninama mu igi dao. Tama tiali goli, ma eno dwagi yai kolesaga ebaso da, teda eno dwagi yai homu elama, ena homu geda pabo homu egobeo. Mu meni. Te ena sęgęgo ena ma dolobo te ena moni hale mu ebao.
JOB 10:16 Tiali goli, ma ena homu geda peyu, tama ena homugo ena dwagi yai bidi da weyu da, teda nago deli sogo mu nago ena pobe asaibao, te bulu yowi laiongo te hasa dabe pobeasa pelama, elama, isilibo tiwai yaibao. Tama nago haniani te bidigo isąbo bomai sę elama, ena aiyaba elalumainu yaibao.
JOB 10:17 Tama nago haniani sęgę enaba taga palaibao. Te nago sębę enabolo ola mayu, tama nago te sębę geninama mu pedalibao. Tama nago ena dene geninama mu mawaibao, te ami bidi dabe hauwago ena dali hwįbo tiwai yaibao,” wali.
JOB 10:18 “God, nago magi baso ena, ena idago ame nomainu sula tagalai dawe? Tigi menigi sogo da, ena idago haligade isigi dama, tama mego ena sugi menima.
JOB 10:19 Te dwagi yai mu igi da, te ena ida haligade geme isai tigi sogo da. Tama augwaligo ena gųba pubaligi pigi sogo da, usu mu igi dao. Teda te tiwai naga igi da, ena tǫde pedalisąwai tiwai igi dao.
JOB 10:20 God, nago koneani, ena bidibo bodolu pęwadage mu dao. Tama nago ena dene magio. Nago ena haliga tigi naga me doanu emainu sula tagalama, tama de ena isaibama,” wali.
JOB 10:21 “Tama nosali da, eno e tǫ tagalama, nosali da, ena hulia sai buluba mu bidigi paibao. Tama ena ma asogobeo.
JOB 10:22 Te bulude tigidali nai dabe dolama, me elalube, subigila mu elalubo. Tama ula mu meni. Magi baso meni. Te bulu huli sesabigo halua sai mu elalubo,” Jopgo te po wai.
JOB 11:1 Sofar te Nama bulu bidigo odama, tama agai Jopbolo e tama wali.
JOB 11:2 “Jop, nago po hauwa mu te wabosei. Tama nago homugo nago te pogo nage dolo yai dao, dago te po omainu ebawe? Tega. Tama nago te dwai dwai po wabogo dago penane paliasa bidimai walama, nago te po obawe? Nago tigidali dwagi yai kolesaga homu dabe dolali. Tama nago homu te naga tede naga hale ilabo bidi meni yali, nago te homu eba, agawe? Ena pedauwali pania sogobema. Eno homugo nago po dabe wei ponaibao.
JOB 11:4 Nago te po wali, nago te pusali po dabe sese dwagi yai po mu naga dao wali. Me ma, nago te po wali, nago sęgę me dwai kolesaga Godigo gedude menio po wali.
JOB 11:5 Tegoba. Eno homugo God aga digi nago po wei ponomai igi dao.
JOB 11:6 Tama eno homugo aga digi nagebolo te dwagi yai kolesaga page dabe, me te dwagi yai homu kolesaga page dabe ola momai igi dao. Magi baso meni. Nai hauwa mu geme dualalubao, te da bidi dago kuna konegobeo. Jop, eno homu nago konemai yaibao. Godigo nage dali dua mu yali, tama agai nage genuai sęgę mu mabe, te nago dwai kolesaga dolo wei ponoyu,” wali.
JOB 11:7 “Nago homugo nago tigidali dwagi yai kolesaga dabe nago saiba weyu obawe? Tama te Godigo homu kolesaga dali, te bomo dali si nago usu nugi pelama, tama nago agai bomo dali usu nigi paibawe?
JOB 11:8 Godigo homu kolesaga da, ugwanu mu dao. Te dagalu ugwanu mu elalubo tiwai mu dao. Tama aiyanu mu dao, te isibo bidigo bulu edelama, mu elalubo bidi dao. Godigo kolesagago yaide e tǫ edelama, bobobage mu elalubo dao. Tama genuai mu elama, tama tamu ąį dąį edelama mu elalubo dao. Tama nago mena tama tilama, agai homu kolesaga dali, agai bomai kolesaga dali si gegelama, sueibawe?
JOB 11:10 Tama ma, Godigo nage kalabus elama, tama nage po tų eboba odasa pabo si da, tede dego mu aga paliaibawe?
JOB 11:11 Godigo koneani, mena bidi dabego dwai kolesaga wali peyu ebo si da, teda agai augwaligo ebo dwai kolesaga sulama, tama agai augwaligo ebo dwai kolesaga osolama, dagala suaibao.
JOB 11:12 Tama nago kibu donkigo wai ame nabo si, te bidi gesabidi poai ame nogobeo. Te tiwai me te dwagi yai homu kolesaga wali pisąwai bidi agai wiegi yai kolesaga me sogobeo,” Sofargo te po wali.
JOB 11:13 “Tiali goli, Jop, nage homu begelama, tama Godiba gedu haluasa po walama, tama nago agabolo hanaluyu, te po wai, ena hobede elama, tau sao po wao.
JOB 11:14 Ma, nago dwai sę yai da wida, teda nago te dwai sę tudiba togolao. Tama nago te dwai kolesaga nage dali ma bidimai igio.
JOB 11:15 Tama nago dwai sę yai da wida, teda nago dwai sę meni yai po olama, tama naga bugai homu elama, bidaibao. Tama naga bomo elama, magi naide wi me elama bidigobeo.
JOB 11:16 Tama nago te tigi dene dali, sęgę dali si gegeda palama, bidaibao. Tama nago te homu kone me egobeo. E tiwai dao. Bidigo te ni yabe wę asiyu, tolasa pabode gegeda pabo tiwai dao.
JOB 11:17 Tama nago bidibo kolesaga dali, bidibo page dali, tigidali mu hasegelaibao. Te dwagi yai mu pedalaibao. Te giligade nai tubo belo wabode nanebo tiwai mu yaibao. Tama te sęgę te hulide hulia sai tiwai elaluali da, te da te me hasegelama, kigamu be posobo tiwai mu yaibao.
JOB 11:18 Tama nago koneaibao, Godigo nage bugagia mu tonaluaibao. Tama tibaso, nage pibo sogo da, bugagia mu piaibao. Magi baso meni. Tama nago magi nai me wi egobeo. Tama bidi hauwago nage pageba aselama, augwali tau somainu hanalu wagasaibao.
JOB 11:20 Tiali goli, te dwai kolesaga ebo we bidi dabe, augwali Godigo sębę ebo sunumi gedelainu gegaibao. Tiali goli, augwaligo sugobeo. Tama augwali isibo deli naga tonaluyu bidaibao,” Sofargo Jopbolo te po wai.
JOB 12:1 Tama Jop agai po wei ponoyu, e tama wali,
JOB 12:2 “Mu tama. Eno homugo dage sela naga dwagi yai kolesaga siyu, homu kolesaga elaluyu yali bogo. Tama dage isibo sogo da, tama dagego te dwagi yai kolesaga dali, te homu kolesaga si duga sela peyu paibawe? Tama mu silaibawe?
JOB 12:3 Mu meni. Eno me ena kolesaga elalubao. Dagego kolesagago eno kolesaga me edelebe. Tigidali we bidigo dage selago te wali nai po dabe mu konea silali dao.
JOB 12:4 Tiali goli, megi da, dage eno abagi dabe, dagego ena gisugu mabo dao. Eno dwagi yai kolesaga naga eyu, tama Godigo gedude dwai sę me ebeo. Tama polobadu da, agai eno gedu haluasa po wabo odai dao. Tiali goli, megi da, dagego gisugu magasobao.
JOB 12:5 Te bidi dabe meba augwali bugagia bidiyu, dwai sęge augwaliba me asobeo. Te bagego dwai sęgę elalubo bidi dabe gisugu mabo dao. Augwali e tiwai dao, te bidi sunumide tulaluainu ebaso, tama augwali degemainu dega palobo tiwai gilama, mu dega palobo dao.
JOB 12:6 Tiali goli, nai wi sabo bidi dali, me te Godigo po sela sąbo bidi si da, augwali bidibo page da, dwagi yai dao. Augwa digi bomonama sulama, tama augwa bugagia bidibo page usu ilali. Tama tebogo augwaligo augwa god nigilali,” wali.
JOB 12:7 “Dage pelama, te bulu hasa dabe, ba dabe, sųgų dabebolo hanalugi pao. Tama augwaligo dage ola mawaibao. Ma, dagego wei ebaso da, teda dagego tǫbolo me hanalu wao, tama agai God kolesaga dagebolo ola mawaibao.
JOB 12:9 Tigidaligo mu koneani, te Genuai Bidigo ebo kolesaga tigidali.
JOB 12:10 Tigidali we bidigo bidibo ula dali, agai te nigali nai dabego bidibo ula, te aga nogode naga elalubo.
JOB 12:11 Dago pedauwaligo nai dabe dwagi yai yaliwe, ma dwai yaliwe olama, hanana subo dao. Te tama tiali goli, dago olo da te po dabe odama, tama dago te po bugagia dagala subo dao.
JOB 12:12 Te mu tama, te polo monu dabego da, te dwagi yai kolesaga dali, dwagi yai homu kolesaga si hauwa mu konealubo.
JOB 12:13 Tiali goli, Godigo homu kolesaga dali, te dwagi yai kolesaga sigo te polo bidi dabego kolesaga edelai elalubo. Tama agai genuai bomo me elalubo. Agai magi sę me yainu yali da, agai eyu naga ebo dao,” wali.
JOB 12:14 “Ma, te Godigo nai me togali da, te bidi me ma wadologobeo. Tama ma, Godigo bidi kalabusiba tagalali da, te bidi mego te kalabuside me sela sągobeo.
JOB 12:15 Ma, Godigo tulubage paliyu da, teda mone giliga nanama, mone poi piyu, tǫ mu wa pabo dao. Ma, agai tulubage hauwa taga paliyu da, teda wę dabe hauwa mu asiyu elama, tǫ dabe me genina mesega sabo dao.
JOB 12:16 Godigo genuai bomo dali, kolesaga dali elaluyu yaide, tigidali sę agai yabo homu ebo dao. Te ili po wabo bidi dali, te ili po wali pabo bidi dabe dali si, te tigidali tama Godigo nogode naga munalubo.
JOB 12:17 Godigo te tuni bidi kingba mobo mabo dabego homu kolesaga dolama, tagalobo dao. Tama augwali habu olo pabo dao. Tama agai te po tų odobo bidi dabego homu kolesaga dolobo dao.
JOB 12:18 Tama agai te tuni bidi king dabe augwa sęde sela sąbo dao, tama tuni bidigo ugwa ma gudubo menio. Augwali olo name ugwa gudubo dao, te olo sę bidi dabego gudubo gilama.
JOB 12:19 Agai te po ola mabo pris bidi dabe kolesaga punulama, tama augwa ugwa olo bilibo tiwai ebo dao. Tama agai augwaligo genuai nogi aiyaba elalubo dao.
JOB 12:20 Agai te mobo mabo bidi dabego pedauwali palibo dao, te we bidigo augwaligo po odidali weyu. Tama agai polo monu dabego homu kolesaga dabe sela sąbo dao.
JOB 12:21 Agai tobolu bidi dabego nogi aiyaba ilama, tama augwali nai meni yai bidi gagalobo dao. Tama agai bomai bidi dabego bomo me silibo dao.
JOB 12:22 Agai geme dulaluai nai dabe selama, pepeli diliba mubo dao. Tama agai ula te hulialuali buluba ula mabo si, te bulu ula mu ebo dao.
JOB 12:23 Agai te moni hani genuai nogi mabo si, te bulu tǫ kantri boma pela te bulu nogi elalubo dao. Tama nosali augwali ma dolobo dao. Tama agai te tǫ kantri mebago we bidi hauwa mu pedelumainu elama, nosali agai augwali gasa buluba kalabus emainu sela pabo dao.
JOB 12:24 Tama agai bulu tonalubo tuni bidi dabego tobolu dolama, tagalobo dao. Augwali te olo wau bilibo wabo pabo bage tiwai bilibo dao.
JOB 12:25 Augwali te hulia sai bulude bidibo bage tiwai gilama, sunumi gegeyu, nogogo isisi bilibo tiwai ebo dao. Tama agai augwali polobo bidi tiwai bilimainu ilibo dao.” Jopgo te po wali.
JOB 13:1 Jopgo po ma weyu, te po wali, “Mu tama mu. Tigidali po dagego pusali, te da eno polobadu sulama, odai dao. Te nai dabe tigidali eno polo konea silai dao.
JOB 13:2 Tigidali nai dabe dagego koneani da, eno me eno koneai nai dabe da. Dagego kolesagago eno kolesaga edelebeo.
JOB 13:3 Tama tiyu yaide, ena dage dali po wabo hagela mu yali. Eno homugo God Tigidali Bomo Elalubo Bidi dali po wabo homu yali. Eno homugo dadi si pogo hwįbo tiwai eyu, eno sęgę dodolaiba.
JOB 13:4 Tiali goli, dagego ena aiyaba elalumainu, ili po hauwa mu obao. Dage te dokta bidi te gasi sai bidi mego gasi dodolabo konesiąwai dokta bidi tiwai dao.
JOB 13:5 Tama tibaso yaide, po ma wagio, pedauwali pania sao, tama bidi dabego homugo dage dwagi yai homu kolesaga elaluba homu yabo,” wali.
JOB 13:6 “Tama megi da, dage pedauwali pania selama, eno po waboba olo munama, odao.
JOB 13:7 Dagego dwai po weyu, ili po dabe te obao. Tama dagego homugo te tobage po God tau somainogo homu ebawe?
JOB 13:8 Eno tonobo da, dagego homugo te tibo po walama, God po tau selama, tama te po tų ebode agai po mu omainu te ebao.
JOB 13:9 Te Godigo dage sulama, dagego ebo kolesaga osola subo sogo, teda dage bugagia bidaibawe? Ma, dagego God ili po ola mawaibawe, te bidi dabe ili po ola mabo gilama tiaibawe?
JOB 13:10 Ma, po tų ebode dagego God naga tau siyu, tama eno nogi aiyaba ilabo homu duga homude elalubaso da, teda eno koneani, Godigo dage sesenaibao.
JOB 13:11 Tama tede dagego agai genuai bomo odama, tama dage agade wi mu yaibao.
JOB 13:12 Te polo po dabe dagego pusali da, teda te olo nai mu dao, te isi nogobo sisi dulu tiwai dao. Tama me te pu anilai tiwai dao. Te augwali dili isąwai tiwai dao,” Jopgo te po wali.
JOB 13:13 Jop agai po genina mu ma weyu, e tama wali, “Dage pedauwali pania selama, enaduba deli naga po omainogo sula tagalao. Tama tagala, magi sę ena tigide pedalu si da, eno pedauwali pania sogobeo.
JOB 13:14 Ao. Ena wi meni. Eno God dali po wabo usu selama elalubao. Tama ena isimainogo, tama ena isimaina.
JOB 13:15 Eno gasa nai me tonalubeo. Ma, tama Godigo ena elama, isiliyu da, teda aga homugo naga dao. Tama tiali goli, hasia eno agai gedu e tama ola mawaibao, eno dwai sę me ebeo.
JOB 13:16 Ma, eno God dali po wabo wi isąma eyu da, eno homugo tibo ena dwai sę isąwai bidi dao homu agai yaibao. Tama agai ena hobede elama, tama ena bugagia bidimainu sula tagalaibao. Magi baso meni. Dwai sę ebo bidi dabego da, God dali po wabo wi yaibao.
JOB 13:17 Tama megi da, te eno homude elalubo po pusaibao. Tama eno homugo dagego olo saganama, eno po odao.
JOB 13:18 Godibolo pusabo po polo usu selama elalubao, eno te bidigo po tų ebode po pusainu ebo gilama. Eno koneani, eno dwai sę meni, tama tiyu, eno te po tų ebode eno po ela holaibao.
JOB 13:19 Dego ena dali pogo hwįbo tiwai elama, dego enade dwai sę yai bidi da po waibawe? Ma, bidi me bidibaso da, teda ena pedauwali paniasa bidama, isaibao,” wali.
JOB 13:20 “God, eno nagebolo hanalu waiba, nago enade sę si emainu. Ma, nago homugo eno te po si usu da homu eyu da, teda usu dao, ena wi elama, nagede wi me duala sogobeo.
JOB 13:21 Te hanalu wabo po si e tama dao. Eno homugo nago ena tigide dene ma ilamo dao. Tama me nago ena wi ilabo sę dabe hauwa eno tigide ma elamo.
JOB 13:22 Ma, nago tama tiyu da, teda nago ena dali po obaso da, eno nago po wei ponoyu yaibao. Ma, meniyu da, eno nagebolo po bolo waibao. Tama nago enaba po wei ponoyu yagameo.
JOB 13:23 Eno mena dwai sę, me kolesaga dwai, me sęgę yai sę dabe me yaliwe? Eno homugo nago enabolo pusa mao.
JOB 13:24 Magi baso nago ena naga boi bidi gagalama, ena tudi ola menama, edelebo dawe?
JOB 13:25 Ena da, olo ni yabe dali, olo nosai sasi isila pabo tiwai dao, te waligo subigila sąsąbo tiwai dao. Tama tibaso, nago ena magi baso wi ilama, magi baso dene ilama, tagalobawe?
JOB 13:26 Eno tonobo da, nago eno polobadu gesi bidide yali sęgę me konealubo ąǫ ebao. Tama megi nago te sęgę wei ponoyu, ena sęgę mabo ąǫ ebo.
JOB 13:27 Nago eno sągą haliga sengo gebelali, tama ena biligobeo. Tama tiali goli, ena biliyu da, nago ena wali asobo dao, ena mena menaba pali. Tama nago eno sągą pasalu bugagia tonalua asobo dao.
JOB 13:28 Da bidi dabe dobo da, te ni pago tulama, damua pabo tiwai dao. Tama te ugwa te asoba dabego tulama, popodolo pai tiwai dao,” Jopgo te po wali.
JOB 14:1 Te Jopgo po ma olama, te po wai, “Da we bidi e tǫde pęwadage sogo bidibo dao. Tama idago ame nanidu gagalasa, haniani dwai kolesaga dade pedalobo dao.
JOB 14:2 Da te plauwa tiwai kigamu pedalama, pio ma sasia pabo tiwai dao. Tama me e tiwai dao. Giliga noma pedalobo tiwai, tama pǫgo giliga polo halua sabo tiwai dao.
JOB 14:3 Tama tiali goli, nago magi baso dago kolesaga osabo dawe? God, ena olo dao. Tama magi baso nago ena po tų ela mobawe?
JOB 14:4 Da we bidi nago gedude meda mu yali. Tama dego da hasegelama, da tigi wiegi yai nago gedude ilaibawe? Mu meni.
JOB 14:5 Da e tǫde bidabo bubuga dali, kibu be dali si polo bodolu muai dao. Bidi mego aga bidabo bubuga bobobage ma ilabo usu egobeo.
JOB 14:6 Tama tibaso, ena nago tagala palao. Ena bididu, ena homu dwagi yai emainao, te sę bidi dabego dwagi yai homu aga sę pio silibaso ebo tiwai gilama,” wali.
JOB 14:7 “Eno koneani, bidigo ni geliyu da, teda pedalide sele elaluyu, gasa honu ma pedalobo dao.
JOB 14:8 Tagala, aga page sele polobadu holai ma sasia pai me.
JOB 14:9 Ma, tǫde wę elaluyu da, te gelai ni tanede kulubi ma pedalaibao. Aga holama, gesi ni holoyu, nologo pedebo tiwai yaibao.
JOB 14:10 Ma, da bidi dabe, da te tiwai ebo menio. Te da isibo sogo, te da mu tama sia sabo dao. Tama me badugo da ma subo menio.
JOB 14:11 Me sogo genuai wę dali, sigi ge dali si mu tama sula sabo dao.
JOB 14:12 Te tiwai me, we bidi dabe da isilama, ma hodalobo menio, te tǫ dali, dagalu dali si silibo sogoba usu naibao. Tama augwali pila mubadi, magi nai mego augwali me hodologobeo,” wali.
JOB 14:13 “Eno homugo nago ena te isila pali bidi dabego buluba geme dualigi sogo dao, te usigi da, ena tede bidiyu, te nago sębę homu kilabo sogoba usu nigi pigi dao. Tama eno homugo nago te enade homu ma kone palabo sogo bodolu muao. Ma, bidi me deli isibaso da, aga ma bidigowe? Mu meni. Tiali goli ena tonalu da goli, te nago ena ma bidimainu bodolu muani usu nagasabo si.
JOB 14:15 Tama te sogo naga koneaiba, naga digi ena nigai da homu yaibao. Tama nago ena nage pąde bidao homu yaibao. Tama tibaso, ena nago i wabo si nage pąba asaiba, nago i wabo dei.
JOB 14:16 Tama te sogo ena bilibode nago bugagia tonaluaibao. Tiali goli, nago eno dwai sęgę nedegobeo.
JOB 14:17 Teda nago eno sęgę sela sąnama, te sęge kone me egobe, te bidigo nai begide bulama, po dąų walama, susiąbo tiwai yaibao,” Jopgo te po wali.
JOB 14:18 “Tiali goli, eno homugo te nai dabe pedalogobe yali ąǫ ebo. Eno subo tigidali nai dabe dolobo subo dao. Te bomai bulu du dabe alua pelama, olo tǫ tiwai pedalobo dao. Te moni masigi me aga bidali pesage taga pelama, ibaba kilasai subo dao. Te bomai wę dabego te masigi ibaba kidilibo dao, tama tǫ sela sąnama, gasa buluba sela pabo dao. Tama tiali goli, God, te we bidi dabego homugo augwali bugagia bidigowe homu ebadi, nago haniani sę elama, augwaligo te ebo homu silibo dao.
JOB 14:20 Nago bomogo augwali aiyaba elaluama, tama augwali isibo dao. Tama augwali isila pali sogo, augwaligo gesabidi gasagi yai pedalobo dao. Tama nago augwali te isila pali bidi dabego buluba taga palobo dao.
JOB 14:21 Tama nosali da, te we bidi dabe augwaligo augwa ogomanibolo genuai nogi mabode, o ma augwaligo nogi aiyaba elaluama, augwali hale ilibo si da, teda te isila pali bidi dabego te sę koneyu, suyu me egobeo. Mu meni.
JOB 14:22 Augwa tigide dene ebo deli naga konebo dao. Tama augwali tigide elalubo sęgęde gela wabo dao,” Jopgo te po wali.
JOB 15:1 Jopgo po ola silibo si, te bidi Elifas, te Teman hanu bidigo po wei ponoyu, e tama wali.
JOB 15:2 “Jop, nage koneai bidi, tama nage dwagi yai kolesaga elalubo bidi dao. Tiali goli, nago magi baso po hauwa olama, wali asobo tiwai elama, pedauwalidu po hauwa dogia pobawe?
JOB 15:3 Nago pogo hwįhwį pabo. Tiali goli, nago po dwagi yai menio. Tama tego bidi me tau sogobeo. Menio.
JOB 15:4 Te tobage pogo te we bidigo kolesaga dolama, tama augwali God dologode me elalugobeo, tama aga me kone egobeo.
JOB 15:5 Nago dwai sę yali. Nago te tobage pogo naga yali dwai sę aiyaba mesegelainu elama, halubo po tiwai te obao. Nago po te ili po wabo bidigo po tiwai.
JOB 15:6 Eno nage po tų ela magobeo. Meni. Naga pogo digi naga ma po tų ela mayu, tama nago dwai sę polo yai dao olama, te ola mobao.
JOB 15:7 Mena tama tialiwe? Nago homugo bidi me hasia pedalisiąbadi, tama nage ame nani homu eba, agawe? Godigo te bulu du nigisąma ebadi, naga idago nage ame nai yali bogo. Tega?
JOB 15:8 Nage te Godigo te sę dabe yaiba obadi, nage te sogo me nage tede bidai dawe? Nagaduba deli naga dwagi yai kolesaga elalubawe? Tega? Mu menio.
JOB 15:9 Nago kolesagago dago kolesaga me edelebeo. Nago koneani nai me, dago me koneanisei, te nai.
JOB 15:10 Da tomode ili nisi yai monu dabe bidibo. Tama augwaligo kibu bego nago ayago kibu be me edelai dao,” wali.
JOB 15:11 “Jop, Godigo homugo nago dene osola sulama, tama nage homu nagame elama, dua bidimainu yaibao. Tama me ma, dago po doanu olama, tama nagebolo dwagi yai po wai dao. Tiali goli, nago homugo Godigo te yainu ebo sę te olo da, te homu ebawe?
JOB 15:12 Nage noma selama hodaluyu, God dali wado ebogo nage gedu pę te ebao. Tama nago haniani dwai po agabolo te obao. Tiali goli, magi baso nago te tobage kolesaga ebawe?
JOB 15:14 We me, bidi me, Godigo gedude doloba pai me elalubeo.
JOB 15:15 Te ensel dabego bidi edelali. Tiali goli, Godigo augwaligo me badu kolesaga doloba pai subo menio. Tama dagalude nai dabe me Godigo agai gedude dwagi yai menio.
JOB 15:16 Tiali goli, da tǫde bidi da, da dwagi yai mu menio. Dago kolesaga da, damua pai mu dao. Dago dwai sę yabo homu godolo naga ebo dao, dogoni wa pai bidigo wę gegebo tiwai dao,” wali.
JOB 15:17 “Megi da, Jop, nago eno poba bugagia olo muao. Eno sulama yali sę nagebolo ola mawaibao.
JOB 15:18 Eno te kolesaga te dwagi yai homu kolesaga yai bidi dabede konea sai dao. Augwaligo te kolesaga augwa ayade digi sai dao. Tama augwaligo ena ola mani sogo, te po me duala sabeo. Augwaligo tigidali mu pusalio.
JOB 15:19 Te hani augwali augwa bulude bidibo. Tama subigila bilai bidi dabe augwali bidiboba aselama, augwaligo kolesaga dolai menio.”
JOB 15:20 “Eno po e tama dao. Bidi dwai dabe da, dene sesa pidubadi, augwali isibo sogoba usu nagasaibao. Magi baso meni. Augwaligo gasa we bidi aiyaba ilama, dolobo dao.
JOB 15:21 Augwaligo haniani kulukulu odobo si, augwali wi mu ebo dao. Augwaligo homugo dwai naigo augwali dolainu asobao wabo dao. Tama augwaligo homugo augwali bugagia bidibao homu ebode da, teda bidi dabe aselama, augwali dolama, augwaligo nai dabe wi sagasobo dao.
JOB 15:22 Augwaligo po koneani. Dwai nai dabe augwaliba sabolama, te hulia siyu, tǫ mesegela sabo tiwai augwali mesega saiba homu ebo dao. Tama augwaligo konebo dao. Augwali te dwai sęde augwali geda mugobe homu ebo dao. Tama augwaligo koneani, te boi bidi dabego augwali bobobage kągo hwągo ela muaiba homu ebo dao.
JOB 15:23 Augwali nai gege biliyu, bilibo dao. Tiali goli, nai meni yai subo dao. Tama augwaligo konebo dao, pąde dwai sogo augwaliba pedalama, tama be huliyu, tǫ mesega sabo tiwai mesega saiba homu ebo dao.
JOB 15:24 Augwaligo homu kolesaga dolo meniama, tama dwai homu elama, augwali wi mu yaibao. Tama tego augwaligo homu kolesaga dolama mesegelaibao, te kingo aga boi bidi dolobo tiwai yaibao,” wali.
JOB 15:25 “Te dwai sogo te dwai bidi dabeba pedalaibao. Magi baso meni. Augwaligo homugo God tigidali bomo elalubo bidide genina mu da homu yaibao. Tama augwaligo tobolu gagea pelama, Godigo bomo usu sabo dao,
JOB 15:26 te hwįbo ugwa guduyu, te hwįbo ni name sabele tola selama, God aga dali hwįgi pabo tiwai.
JOB 15:27 Megi da, augwali bugagia bidiyu, augwaligo tigi genuai elama, tama nai dabe hauwa elalubao.
JOB 15:28 Tiali goli, augwali bidibo hanu dolama, tama be dabe te pobelebage pesage tiwai elama, bidi tede me bidigobeo.
JOB 15:29 Tama augwaligo moni nai dabe tigidali hagala silaibao.
JOB 15:30 Augwali te dolobo sęde geda mugobe. Teda augwali te hulia siyu, tǫ mesega sabo tiwai yaibao. God agai sębę e tiwai yaibao, isigo ni delama, waligo agai yabe da gasaba subigila sela pabo ąǫ yaibao.
JOB 15:31 Augwaligo dwai tibo kolesaga dąų wala selama, augwali homugo tego augwali dwagi yai mone sesaiba homu ebo dao. Tiali goli, meni. Augwaligo dwagi yai nai sabo me usu egobeo. Augwa tibo kolesaga mu da, teda augwaligo sabo masigi tiwai.
JOB 15:32 Tama augwali kibu be hauwa isiąbadi, polo isila paibao, te sagane ni bidigo gelai tiwai yaibao.
JOB 15:33 Te tobage bidi dabego sę hauwa mu ebo dao. Tiali goli, te sę dwagi yai pedalobo menio. Augwali e tiwai dao, ni waingo wain du walobo tiwai. Tiali goli, augwali tau isiąbadi, polo telega pabo tiwai dao. Tama augwali te ni oliv duduli hauwa walobo tiwai. Tiali goli, te duduli tulaluama, nedu du menia tiwai dao.
JOB 15:34 Te bidi hani Godigo po wali pisąma ebo bidi hani da, olo bidaibao. Augwali wai bǫų meni yaibao. Tama te doloba pai kolesaga isąma mone sali bidi dabego be isi ulaibao.
JOB 15:35 Te dwai dwai ili po olama, tibo po wabo homu kolesaga te bidigo haliga tomode te we sibigo wai haligade pedalobo tiwai ebo dao. Augwaligo homu kolesaga dali, augwali haliga dali si te dwai kolesaga yabo homu pągąnalubo dao. Tama tiyu, augwaligo haniani dwai sę ebo dao.” Te Teman hanu bidi Elifasgo te po Jopbolo wali.
JOB 16:1 Jopgo po wei ponoyu, e tama wali,
JOB 16:2 “Hauwa sogo me eno deli te po naga odali. Tama ma odobo ena hagela mu dao. Dagego ena tau me sabeo. Mu meni.
JOB 16:3 Dagego enabolo e tama wali, ‘Jop, nago po olo wę asobo tiwai tebao. Tama mena sogo pedauwali pania saibawe? Nago mena homu elaluyu, nage dwai bidiyu, dago po odaibawe? Meniwe te obao. Nago po wei ponoyu naga ebo.’ Dagego te po wabo dao.
JOB 16:4 Tiali goli, dagebolo walaibao. Ma, dage ena yaligia dwai bidigi sogo da, teda eno dagego te ebo kolesaga tiwai dage dali megi igi dao. Eno po hauwa wabo da, te eno hobede dagebolo ola mobao. Tama eno tobolu gagamunobogo dagebolo ola mayu, e tama tiwai igi dao, te dwai nai dageba pedalibaso, noma siyu tigi dao.
JOB 16:5 Eno pedauwalidu po hauwa olama, dage bomo ilama, dagego dene silimainu igi dao. Tama eno tigi sogo da, te tobage kolesaga dabego dage mena tama tau saibawe?
JOB 16:6 Tiali goli, enaduba ena kone palobo da. E tama tibo. Eno po wabode, o ena po pedauwali pania selama elaluyu da, tagala, tego ena tau selama, eno dene silibo meni,” wali.
JOB 16:7 “Mu tama, God. Nago eno bomo tigidali mu silalio. Nago ena dili hania ilama, eno tigi nomona salio. Tama tibaso, eno abagi dedego ena sulama, augwali wi ebao. Tama augwaligo homugo eno dwai sę yalio olama, tama nago ena te dwai sę wei ponobao. Augwaligo te homu ebo.
JOB 16:9 Godigo ena suyu, godolo isąma, ena agai boi bidi mu gagabao. Agai ena dali sębę genuai mu elama, eno tigi me dolobo, te bulu yowigo bulu hasa aga kelego pepedebo tiwai ebao,” wali.
JOB 16:10 “Bidi dabego ena bobegela sali, enade dwai sę yainu. Augwaligo ena gisugu mayu, eno naboge eleyu ebo.
JOB 16:11 Godigo ena aga tudiba mubo bagego nogoba munama, haniani dwai kolesaga ebo bagego nogoba muani.
JOB 16:12 Polobadu da, ena bugagia bidai dao. Tiali goli, God aselama, tama eno dogoni tola selama, dodolama, mu elali. Tama ena mu dwali. Agai ena te enego enebo nai me deli ilama,
JOB 16:13 tama agai ami bidi dabego ena enego enebo. Tama agai eno haliga togali, tama eno haliga buluba teda solama, tǫba tigidali mu tulaluali. Godigo ena hobede dwasianu me ebeo. Mu menio.
JOB 16:14 Agai ena obo elama, ena dali hwįbo da, te bomai ami bidigo boi bidi dabego hanu sainu ebo tiwai te ebao.
JOB 16:15 Polobadu da, ena genuai nogi elaluai dao. Tiali goli, megi da, ena nai meniama, dolama mu bidiba. Tama ena hale mu ebao. Tama au dodobage sela sąnama, hobede ebo ugwa gudama bidibao.
JOB 16:16 Ena gela genina ma wabo digi, eno gedu bǫ delama, tama eno gedu pę mu yali. Tama eno gesabidi dwai mu elalubo.
JOB 16:17 Eno dwai sę me isąbadi, tiali goli te sęgę dabe eno tigi olo dali mu pedalali. Eno gasa bidi dabe dali dwai sę me ebeo. Tama me ma, eno gedu haluasa po me, ena bilali me, God aga gedude mu elalubadi goli da.” Jopgo te po wali.
JOB 16:18 “Tǫ, odao. Ena isibo sogo te eno kaneme tulalubo si da, nago te kaneme haluamo. Menio. Nago te kaneme pepeli dilide elalumainu sula tagalao. Tama agai God i olama, te sęgę dodolomai yaibao.
JOB 16:19 Tiali goli, eno koneani, bidi me bidibo, ena pagede bidabo bidi dagalude bidibo. Agai koneani, eno magi dwai sę me ebe. Tama agai eno po tau selama, bomo ilaibao. Tama tiyu, eno po tų ebode ugwaba ela holaibao.
JOB 16:20 Te eno abagi dedego ena godolo isąmaiyu, ena dolobo. Tiali goli, eno Godibolo gela geninama wabo dao.
JOB 16:21 Tama eno homugo te ena bidabo bidi agai ena tau somainu yaiba, te God dali po dodolobode, te bidigo aga abagi po dodolobo tau sabo yali gilama.
JOB 16:22 Magi baso meni. Ena bidibo sogo bodolu pęwadage mu elalubaso, eno homugo kibu be deli o si elalubao. Tama ena isibo sunumidu pelama, tama ena ma asogobeo,” wali.
JOB 17:1 “Ena mu dolama, eno hoboludu ogwa wai bomo meni yai pedelama, tama ena isabo sogo maga mu yagasalio. Tama gų pagego ena teba asobo tonalubao.
JOB 17:2 Bidi dabe ena bagua selama dolaluyu, tama ena posobo po wabo. Tama eno augwaligo te dwai kolesaga augwa ebo suali.
JOB 17:3 God, ena digi eno nago po tų ebode ugwaba ela hologobeo. Bidi me deli bidibadi bogo ena pesage hasegelama, tama po tų ebode agai e tama omai, eno dwai sę me yai menio po omainu. Tama nosali da, eno dwai sę me ebo si da, teda te bidigo eno pesage selama, tama nage dali po tų dodolamainu. Te tobage kolesaga yabo bidi mu meni ena tau siyu. Tama tibaso, naga digi naga bidi gagalama, tama eno pesage sao.
JOB 17:4 Eno e abagi dedego ena tau sogobeo. Magi baso meni. Nago augwaligo homu kolesaga paliama, tama augwali megi kuna konebo meni. Tama augwaligo ena aiyaba elaluabo homu naga ebo. Tama tiyu yaide, nago augwaligo ena aiyaba elalumainu sula tagalamo. Menio.
JOB 17:5 God, nago polo po me kone palao. Te bidi mego aga abagigo mone dabe sabo homude aga abagi olo dali po tų ela mobaso da, teda te bidi aga dali, aga wai puluba dali si augwa te yali dwai kolesagade dene nosali saibao,” wali.
JOB 17:6 “Megi da, Godigo ena sęgę mobaso sulama, tama we bidi augwaligo eno gesabidiba pesą sąbo. Tama tigidali bulu badu ena posobo po weyu, e tama wabo, ‘Suao. Jopgo dwai kolesaga mu yai digi, tama aga dwai nai mu te dolobao,’ augwaligo te po obao.
JOB 17:7 Ena homu sęgę mu elama, tama ena gela genina mu obao. Tama tego eno gedu bǫ delama, tama eno bugagia tonogobeo. Tama ena dili pulu hą mu yali.
JOB 17:8 Te doloba pai bidi dabe augwali magi naide dwai sę me isąwai bidi dabe augwaligo e nai eno tigide pedalobo sulama, augwali noma salio. Tama augwaligo suali, dwai bidi dabe bugagia bidibo suali. Tama augwaligo augwalide homu sębę mu yali.
JOB 17:9 Tiali goli, tagala. Te doloba pai bidi dabego augwa dwagi yai kolesaga tagalogobeo. Menio. Augwa doloba pai kolesaga naga yainu bomo mu yaibao,” wali.
JOB 17:10 “Abagi dede, megi da, dage hodaluama, po ma wao. Tiali goli, eno dagego po odobo sogo da, teda eno homugo e tama tiaibao. Dage me deli dwagi yai kolesaga dali, homu kolesaga meni yai te yaba waibao.
JOB 17:11 Eno bidibo ula pąde mu tama sia sainu ebao. Tigidali nai dabe eno godolo elama yainu yali sę dabe, megi da, eno ma egobeo.
JOB 17:12 Ena hulia sai madi me bidibao. Tama eno abagi dedego menio po wali. Nage ulade bidiba wali. Augwaligo te po wali, ‘Nage moni homu igi. Pąde ula yaibao,’ wali. Tiali goli, eno suali da, moni hulia sai mu elalubo.
JOB 17:13 Isai bidi dabego bulu naga eno tonaluyu, tama te da eno be elalubo ąǫ igi sogo da, teda ena dwai bidigi dao. Tama ena te bulude pila muyu, tama huli sesabigo ena mesega sai elalugi da.
JOB 17:14 Tama eno te gų page e tama nogi yaibao, ‘Eno aya.’ Tama dwasianu osogane dabego eno tigi tuaiba. Teda eno augwali e tama nogi yaiba, ‘Eno ida dali, abe dali si,’ wagi da.
JOB 17:15 Tama eno homugo tama tidali, nosali te sęgę sia selama, ena bugagia bidaiba homu idali, teda eno olo dali tonaluidali. Tama dego ena bugagia ma bidaiba po waibawe?
JOB 17:16 Tama ena isilama, te isibo bidi dabego buluba aiya dulubo si da, teda eno homugo ena bugagia bidabo sunumi elaluaibawe?” Jopgo te po wali.
JOB 18:1 Jopgo po wala silibo si, te bidi Bildat te Suha bulu bidigo po wei ponoyu, e tama wali.
JOB 18:2 “Jop, nisu nago pedauwali pania saibawe? Nago naga po bolo hasia bugagia kone palao, tama dago nage dali po waibao.
JOB 18:3 Magi baso nago da kau kibu yaligia kolesaga meni yai dao homu ebawe?
JOB 18:4 Naga sębęgo naga ma me te dolobao. Jop, mena tama tialiwe? Nago homugo Godigo homu kolesaga hasegelama, nago homu kolesaga wali asomaina olama ebawe? Agai sęgę mabo da dwai kolesaga ebo wei ponoyu, tama tibo dao. Tama agai te kolesaga hasegelegobeo. Agai tigidali nai dabe nigilama, augwa pesagede muai dao. Tama agai augwali sela sągobeo. Agai te masigi sela sąnama, tǫ olo tagalogobeo. Mu tama, mu menio.
JOB 18:5 Dwai kolesaga ebo bidi dabe augwali dene sabo dao. Godigo augwali silibo da, te bidigo lam sole sula sabo tiwai ebo dao.
JOB 18:6 Tama te bidi dabego augwa bede lam sole ula me elalubo sugobeo. Aga bede te hulia saibao.
JOB 18:7 Tama te bidi dabe augwali bugagia bidibo sogo da, augwali bomo elama, bilibo dao. Tiali goli, augwali sęgę sabo sogo da, augwali mage basia selama, dua dua naga bilibo dao. Augwaligo gasa bidi dabede dwai sę yabo homu ebo dao. Tiali goli, augwaligo ebo homu geda munama, te homugo augwa ma dolobo dao.
JOB 18:8 Augwali te bulu hasa te kęde tubo tiwai dao. Augwali te bidigo te bulu hasa sainu tǫ dogai digi, te hasa tulalubo tiwai dao.
JOB 18:9 Augwali te hasa dabe bade tola sabo tiwai dao. Awe, augwali te kęde mu dąų walaibao.
JOB 18:10 Augwali te bidigo hasa tola sainu elama, bono gebelama, tola sabo tiwai dao. Tiali goli, te kę nanani bidi aga ma tola si da.
JOB 18:11 Augwali wi mu ilabo nai dabe da, te da tigidali bulu badu bobegela sai elalubo, augwali bilabo madi,” wali.
JOB 18:12 “Polobadu da, dwai sę ebo bidi dabe bugagia bidai dao. Tiali goli, megi da, augwali habuge elama, nasi mu ebo. Tama dwai sogo pedalobogo augwali dolainu no sealubo.
JOB 18:13 Gasi me deli dwai mu pedelama, tama te bidi dabego tigi nogo sągą dolama, augwali isilaibao.
JOB 18:14 Augwaligo homugo tibo augwa be dali, augwa mone dali sigo augwaligo bidibo ula usu ilaiba homu ebo dao. Tiali goli, isibo kolesagago augwali augwa bedu guda sąwaibao, tama augwali te isali bidi dabe dali bidigi paibao.
JOB 18:15 Augwali isilama nosali da, augwa hani dabe deli augwa te bede bidabo me bidigobeo. Tama tibaso, gasa bidi hani aselama, tama augwa masigi salfago nigai pauda te bede gelama, tama dwai denami sela sąwainu yaibao. Tama bidi dabe augwali te bede ma bidainu usu yaibao.
JOB 18:16 Dwai kolesaga ebo bidi dabe da, mu sia saibao, te ni aga pedali dali, nologo dali si sasia pelama, damua pabo tiwai yaibao.
JOB 18:17 Tama we bidi dabe augwali homu gegeda paibao, tama te bulude augwa nogi sia saibao.
JOB 18:18 Te bage augwali bididuali sogo da, augwaligo giliga ula suai dao. Tiali goli, isibo augwaliba asaligo augwali hulia sai madi mu pali.
JOB 18:19 Augwa hani da, mu hagawaibao. Tama augwa wai puluba, o augwa wegigo wai dabe augwa bulude me bidigobeo. Mu meni. Tigidali mu isila paibao.
JOB 18:20 Tama te giliga asobo badu bidibo bidigo me, giliga dega sabo badu bidibo bidigo me, te dwai sę te bageba pedelali po odama, tama augwali noma selama, wi mu yaibao.
JOB 18:21 Te tobage dolobo sę ebo, te Godigo po wali pisąma ebo bidi hani dali, augwa bulu dali side te sę pedalaibao.” Te Suha buludu asali bidi Bildatgo te po Jopbolo pusali.
JOB 19:1 Tama Jopgo Bildatgo po wei ponoyu, e tama wali,
JOB 19:2 “Dagego pogo ena dolama, dene genuai mu te mobao. Nisu dagego te po tagalaibawe?
JOB 19:3 Megi da, hauwa sogo mu dagego ena dolama, aiyaba elalubao. Dagego ena dali boi hwįagasiyu tiwai yali, tama dagego te sę ebode hale menio.
JOB 19:4 Tiali goli, mu tama, Godigo gedude eno dwai sę me yaibaso da, te da ena sę naga dao, te dagego sę meni.
JOB 19:5 Dagego homugo dage dwagi yai bidi dabe dao olama, ena dwai sę ebo bidi dao homu ebawe? Dagego homugo e dwai sę eno tigide yaibaso, eno dwai sę yali dao olama, dagego ena po tų ela mayu ebo.”
JOB 19:6 “Tiali goli, dolo koneao, eno dwai sę me ebe. E sę dabe yali God aga homugo digi yalio, tama te dolo menio. Agai ena aga sųgų sabo naide tola salio.
JOB 19:7 Godigo ena diluai sę mu elama, elalio. Tama tibaso, eno agai ena taga palomainao olama, i bomonama mu obao. Tiali goli, agai eno i wei ponobeo. Tama agai ena dali doloba pai sę ebeo.
JOB 19:8 Agai eno sunumi paliali, tama ena pabo usu egobeo. Tama agai te sunumi hulia selama, tama eno te sunumi suabo ąǫ ebeo.
JOB 19:9 Agai eno dwagi yai nogi dolaligo da, tama megi da, we bidi dabego ena dwai bidi da homu ebao.
JOB 19:10 Agai ena dolama, te bidigo be sese mu hųgibo tiwai yalio. Eno homugo tiali agai ena bugagia bidimainu tau saibao homu yai dao. Tiali goli, agai eno te homu sese sela sąyani, bidigo te sagane ni guda sąbo tiwai yai.
JOB 19:11 Godigo ena aga boi bidi homu elama, tama ena dali sębę genuai mu yali.
JOB 19:12 Aga boi hwįbo ami bidi dabe tagala palali. Tama augwaligo ena dolabo sunumi nidigi aselama, tama eno be bobegela selama, tama ena dali hwįali,” wali.
JOB 19:13 “Godigo ena ama sologo ena tagalama, digibulu bidimainu yali. Tama eno abagi dedego me ena me konebe. Augwaligo gedude ena gasa bulu bidi ąǫ ebo.
JOB 19:14 Tama ena deli kanemego me, ena abagi dedego me, ena mu tagalali.
JOB 19:15 Te bidi dabe eno beba me sogo bidagasiyu yali bidi dabego me, augwaligo ena mu gegeda palalio. Tama eno sę we dabego ena konebe.
JOB 19:16 Eno ena sę bidi i wabo dao. Tiali goli, agai eno i wei ponama, enaba asobo menio. Eno ena homu dene yabo po aga dali obadi digi, usubeo. Agai ena homu dene elama, ena suagasobeo.
JOB 19:17 Eno po wabo si da, eno keledu dwai kugumini ebo, tama ena we mugo ena pagede bidabo hagela ebo. Tama ena ama solo mugo ena tonobo da, olo nai tonobo ąǫ ebo.
JOB 19:18 Tega! Ena be nani dwasianu ogwa dabego ena posobo po olama, ena dolobo dao. Ena gasaba me hogodasa pabo si, augwaligo enabolo dwai po wabo.
JOB 19:19 Ena age solo mugo me ena godolo me ebeo. Tama bidi dabe eno godolo mu yali bidi dabe, augwaligo me ena tudi ola menama, ena aiyaba elaluainu ebo.
JOB 19:20 Ena dili pulu hą elama, ena mu nomona selama, bomo menia pali. Ena mu dolama, ena mu isabo ąǫ yali. Awe, pąde mu ena isai dao,” wali.
JOB 19:21 “Dage eno abagi dabe, dagego ena hobede elama, tau sama. Magi baso meni. God aga nogogo mu ena elama, tama ena dolali elaluba.
JOB 19:22 Magi baso dagego ena dolobao, Godigo ena dolobo yali gilama? Dagego ena dwai bidibo sulama goli, magi baso ena aiyaba elaluainu po hauwa mu haniani po obawe?” wali.
JOB 19:23 “Hobede mu da. Eno homugo bidi mego eno po buku me delide asęa po wagi da, eno po hagaidali weyu, me elalumai igi dao.
JOB 19:24 Eno homugo augwaligo eno po masigi togolama, asęlama, tede elalumai igi dao. Tama te po tigidali sogo tede elalumainu.
JOB 19:25 Tiali goli, eno koneani, bidi ena pagede bidiyu, te ena ma dobola sabo te bidi bidibo. Tama nosali aga aselama, e tǫde dodolagasaiba.
JOB 19:26 Eno e tigiwali da, hasia dolaibao. Tiali goli, ena tigiwali dali me bididu da, teda eno God sueibao.
JOB 19:27 Awe, gasa bidi dabego naga God sugobeo. Menio. Ena digi me ena God sueibao. Ena aga suabo homu bomo mu ebao.
JOB 19:28 Dagego e tama wabo dao, ‘Dago Jop po tų ela mabo kolesaga tagalogobe. Magi baso meni. Te dolali sę page aga tigide te elalubao,’ dagego te po wabo dao.
JOB 19:29 Tiali goli, dage digi dua dao. Dagego te tobage pogo Godigo sębę hodolaibao, tama agai dage dene genuai mu mawaibao. Tama agai te sę ebo si da, dagego koneaiba, dwai sę ebo bidi dabe augwali Godigo po tų eboba sabolaibao,” Jopgo te po wai.
JOB 20:1 Jopgo po ola silibo si, tama te bidi Sofar te Nama tǫ bidigo po wei ponoyu, e tama wali.
JOB 20:2 “Jop, odao. Nago pogo ena noma selama, tama ena homu hauwa mu te ebao. Tama eno nago po polo wei ponaibao.
JOB 20:3 Nago wado po eno polo odali. Tama tego da hale mu ilali. Tiali goli, eno dwagi yai homu kolesaga elalubao, tama eno nago po dolo wei ponaiba.
JOB 20:4 Nago koneani, polobadu gagalasa mu da, polobadu Godigo we bidi tǫba tagalalidu gagalasa, megiba usu nagasali da,
JOB 20:5 te dwai kolesaga ebo bidi dabe augwali pęwadage sogo tǫde bugagia godolo elama, bidai dao. Te God tudiba mubo bidigo bugai homu ebo sogo te bobobage menio.
JOB 20:6 Te tobage bidi genuai bidi nigilama, genuai nogi te we bidigo gedude saibao. Te bidi aga te bulu du tiwai pǫ dali dąį elalubo tiwai dao.
JOB 20:7 Tiali goli, te bidi aga di dolobo tiwai dolaibao. Tama aga sesemane mu hagawaibao. Tama bidi dabego aga polobadu sulama koneani bidi dabego da, augwaligo e tama po waibao, ‘E bidi mage sę yaliwe? Megi da, aga menade bidibowe?’ te po waibao.
JOB 20:8 Te tobage bidi aga te hulide ebo nade hagabo tiwai deli sogo hagawaibao. Awe, bidi dabego aga mu ma sugobeo.
JOB 20:9 Mu tama mu, aga, aga bulude munu ma bidigobeo. Tama tede bidibo bidigo aga munu me sugobeo.
JOB 20:10 Tama aga wai pulubago augwa ayago wi sali nai te nai meni yai bidi dabebolo wei ponaibao. Te doado bage aga digi te nai meni yai bidide wi sali nai wei ponaibao.
JOB 20:11 Ma, aga gesi bidide bidiyu, bomo hauwa mu elaluai da, teda deli sogo tama aga isaibao. Tama aga bomo sese mu tama siliyu, aga te gų pagede pila muyu elaluaibao,” wali.
JOB 20:12 “Te dwai bidi dabego dwai kolesaga godolo ebo dao. Tama augwaligo te dwai kolesaga tagalabo homu ebeo, te bidigo pusai nai godolo ebo tiwai tama aga hamena dologoba munama, tama te nai pusu polo silisą emainu.
JOB 20:14 Tiali goli, augwa dwai kolesagago augwa ma dolaibao, te tubo nai te bidigo haliga tomoba pabo tiwai yali gilama, tama augwa haligade te dwai gulago nabi tiwai pedelama, tama nosali augwa ma dolaibao.
JOB 20:15 Dwai bidi dabego mone dabe hauwa mu sisinibo dao, augwa te nai wi sabo kolesaga ebogo. Tiali goli, Godigo te kolesaga sela sąwaibao, te bidigo nai hauwa dalama, tama ma bugulobo yali gilama tiaibao.
JOB 20:16 Te tobagego sisinibo naigo augwa ma dolaibao, te gula manigo bidi gąų kelama, agai dwai nabigo augwali ela isilibo tiwai yaibao.
JOB 20:17 Augwaligo te nai dabe sisinibo si da, augwaligo homugo te nai dabe elalubaso, augwali bugagia bidiyu, dwagi yai homu yaiba homu yali. Tiali goli, augwaligo te homu kolesaga geda muaibao.
JOB 20:18 Augwali olo dali bomai sę yali, te mone dabe, te nai nai dabe olo dali bomai sę yali. Tiali goli, augwali te nai dabe nogo tolaluyu, dwagi yai homu idugobe. Magi baso meni. Godigo yaide gasa bidi dabego augwaligo te nai dabe somainu yaibao.
JOB 20:19 Agai te tama tiaibao. Magi baso meni. Augwaligo nai meni yai bidi dabe hobede isąma yali pode. Meni. Augwaligo augwalide dwai sę yali. Tama haniani tibo sę elama, tibo po olama, gasa bidigo be dabe sali.
JOB 20:20 Tigidali sogo augwaligo gasa bidigo nai sulama, pesą eyu yali. Tama augwaligo te nai dabe sabo hodo me dolabo homu me ebeo. Tama tibaso, God augwaligo te godolo ebo nai me tolalumainu sula tagalabo homu ebe.
JOB 20:21 Mena nai dabe augwaligo me godolo yali da, teda augwaligo siyu naga ebo dao, te bidigo dwagi yai tubo nai sulama, tula siliyu yaide, dage me tagalabo homu ebe tiwai yali gilama. Tiali goli, te dwagi yai sogo te pęwadage sogo bidama, tama sia saibao.
JOB 20:22 Augwaligo te dwagi dwagi yai nai dabe elalubo sogo da, genuai sęgęgo augwali mesegelama, tama dwai dene dabego augwali aiyaba mu elaluaiba,” Sofargo te po wali.
JOB 20:23 “Te nai dabe hauwa sabo homu yali bidi dabe da, teda Godigo augwaligo nai hauwa mu somainu sula tagalaibao. Tiali goli, te sabo homu ebo nai dabe dao, te dwagi yai nai dabe meni. Menio. Godigo te bage dali sębę genuai mu eyu, tama agai haniani sęgę augwalibolo menama, tama augwali mu pągąna paibao.
JOB 20:24 Agai boi bidi dabe teba tagala palaiba. Te augwa hwįbo ge hwą dali, ene te brasgo nigai dali, tama tagala palaibao. Tama te dwai bidi te boi bidigo hwą tolasa asobo sulama, wi pobaso da, teda te boi bidi dabego enesigi selama, ene te bras ula yaigo enaibao.
JOB 20:25 Tama te enego augwali tigide teda paibao. Te dwai bidi dabego te enede augwaligo kaneme elalubo subaso da, augwali wi mu yaibao.
JOB 20:26 Tigidali wa hulu dabe, mone dabe, augwaligo sisinani nai dabe da, sese dola silaibao. Tama te dwai bidi dabe dali, augwa we wai puluba dali sese, te bidi mego dalisąma yai iside sese hagala silaibao.
JOB 20:27 Dagalu aga digi te bidi dabego sęgę hanilaibao. Tama tǫgo me po tų ela mawaibao.
JOB 20:28 Godigo augwali dali sębę mu yaibao. Te agai augwaligo dwai sęgę wei ponoyu da, teda augwaligo mone nai dabe sese hagala silaibao, te genuai wę asiyu, augwaligo nai dabe sese da selasa pabo tiwai yaibao. Tama deli me elalugobeo.
JOB 20:29 Godigo te dwai sę ebo bidi dabego te dwai sęgę somainu dąį ilai dao. Awe, augwali te silibo tiwai emainu tiwai dao,” Sofargo te po wali.
JOB 21:1 Tama te Jopgo po wei ponoyu, e tama wali.
JOB 21:2 “Eno homugo dagego olo bugagia eno po waboba munama, odao. Tama dagego tama tiyu da, teda dagego eno homu dwagi yai bidimainu ilaibao.
JOB 21:3 Eno po bolo omainu sula tagaliyu bolo yao. Tama eno po wala silibo si, tama da, Sofar, nago ena posobo po ma waganio.
JOB 21:4 Tiali goli, odao. Eno bidi dabede po elalubowe? Mu menio. Eno Godide po elalubo. Tama tibaso, eno haliga dene mu ebao, agai eno po wei ponisą ebo pode.
JOB 21:5 Dagego ena bugagia tonaluao. Tama dage noma selama, hodaluyu yaide, duga nogo gąųgo halua naibao.
JOB 21:6 Eno te dwai nai dabe enaba pedalaliba homu ebo sogo da, ena wi genuai mu elama, noma genuai mu sabo dao,” wali.
JOB 21:7 “Magi baso Godigo dwai kolesaga ebo bidi dabe sula tagalama, tama augwali bugagia bidama, augwali monu dabe ebo da, agawe? Tama magi baso agai augwali genuai nogi selama, nai dabe hauwa elalumainu sula tagalaliwe?
JOB 21:8 Te bidi dabe augwa wai puluba dali wąį wai puluba dali si bidibo. Tama augwali bidiyu, augwa te wai puluba genuai ebo subo.
JOB 21:9 Te dwai kolesaga ebo bidigo we wai dabe bugagia augwa bede bidibo. Tama magi nai mego augwali wi me ilibe, tama Godigo augwali dene me ilibe.
JOB 21:10 Augwa bulmakau kibu omaigo so kibu tabi ilama, tama augwa wai dwagi yai saganama, me isibeo.
JOB 21:11 Te bidi dabe augwaligo wai puluba hauwa mu bidibo, augwa sipsip kibu namba tiwai bidibo. Tama augwa te wai puluba tęąbi subigila ola bilimainu sula tagalobo.
JOB 21:12 Bidi dabego gita dali, temborin dali, ona dabe tama eliyu, dwagi yai hwą mu wabo. Tama te wai dabego dwagi yai homu ebo tęąbi wabo.
JOB 21:13 Tigidali sogo dwai bidi dabe augwali bugagia bidiyu ebo. Tama augwali isilama, isibo bidi dabego buluba painu ebo si da, augwali gasi elama, dene me eyu ebe,” wali.
JOB 21:14 “Te dwai kolesaga ebo bidi dabe bidibadi, augwaligo Godibolo e tama wabo dao, ‘Nago da taga palama, naga pao,’ wabo dao. ‘Dago nago po odama, wali pogobeo,’ wabo.
JOB 21:15 Me ma, augwaligo e tama wabo, ‘God te Tigidali Bomo Elalubo, te dewe?’ wabo, ‘dago magi baso agaba lotu po weyu, aga dologode elaluaibawe? Tama dago ma agaba gedu haluasa po weyu da, dago mena dwagi yai nai saibawe?’ Augwaligo te tobage po wabo dao.
JOB 21:16 Te bidi dabe augwali bugagia bidiyu, nai dabe hauwa mu sabo dao. Tiali goli, te nai dabe augwa bomogo naga te nai sabo menio. Tama tibaso, eno te dwai bidi dabeba olo munama, augwaligo po wali, me kolesaga wali pogobeo,” Jopgo te po wali.
JOB 21:17 “Eno suali, Godigo dwai bidi dabe hauwa sogo isilibo menio. Tama hauwa sogo God dwai sogo augwaliba munama, tama augwali dene sabo menio. Tama Godigo te bage dali sębę ebo sogo da, te hauwa sogo augwalibolo dene mabo meni.
JOB 21:18 Eno suali, Godigo hauwa sogo augwali te bomai waligo sasi nosai sela sąbo ąǫ ebo menio.
JOB 21:19 Bidi dabego te po wabo dao, ‘Godigo dwai sę ebo bidigo wai dabe dolobo dao,’ wali, ‘augwa ayago dwai sęgę wei ponoyu.’ Tiali goli, eno homugo te kolesaga dolo meni. Teda Godigo te dwai bidi dabe augwa tigide digi te dene maiabo goli da, teda augwaligo koneaibao, Godigo augwa dwai sę dolo ponobo dao.
JOB 21:20 Awe, augwa digi sulama, dene konemainu te Godigo sębę, te God Tigidali Bomo Page Bidi.
JOB 21:21 Tama augwali te isibo bidi dabego buluba bidigi pabo si da, augwaligo augwa we wai puluba mena tama bidibo olama, kone me egobeo,” Jopgo te po wali.
JOB 21:22 “Te ensel sibigo da edelalio. Tiali goli, Godigo augwaligo kolesaga osola subo dao. Tama tibaso, dego God ola mabo usu yaiba, te mena kolesaga dwagi yai dabe emainu. Bidi meni.
JOB 21:23 Eno sulama, we bidi me badu augwa bidibode dwagi yai bugagia bidibo suali, te dǫgai hauwa yai hasa tiwai dao. Augwali gasi me isąma, sęgę me isąma, tama bidama, augwa isibo bodoluba sabalobo si tama isiyu ebo.
JOB 21:25 Tama me badu we bidi bugagia bidibo meni. Te we bidi dabe augwa bidibo ula hagede kone palama, ha ebo dao. Augwali dwagi yai homu godolo isiąbadi, tama augwali isiboba usu nagasobo dao.
JOB 21:26 Tiali goli, tigidali we bidi isiyu naga ebo dao. Tama augwali tigidali gų pagede deli madi kigilama, pila muyu, da tiwai si naga ebo dao. Tama te osogane dabe augwali tigide pągąbo dao,” wali.
JOB 21:27 “Eno polo koneani, dagego homu dabe. Dagego ena aiyaba elaluabo homu naga te ebao.
JOB 21:28 Dagego te po wali, ‘Te dwai dwai sę dabe te genuai bidi dabe te dwai kolesaga ebo bidi tigide pedalobo dao,’ po wali. ‘Tama augwaligo be dabe sese dolobo dao. Tama bidi dabego augwali ma subo menio.’ Dagego te po wali.
JOB 21:29 Tiali goli, eno homugo dagego iba peyu, eda soayu ebo bidi dabebolo po hanalube yali pogo te gasa bulu taga solama, pabo bidi dabebolote dwai sę ebo bidi dabede mena tama tibo dawe po hanalubeo.
JOB 21:30 Mu tama. Augwaligo dagebolo e tama waibao. Te God sębę elama, tama dwai sę pedalumainogo elama, tama we bidi hani deli pesage badu dolainu da, teda agai te dwai kolesaga ebo we bidi dolobo menio. Menio. Augwali bugagia bidimainu sula tagalobo dao.
JOB 21:31 Tama tibaso, dego dwai kolesaga ebo bidi dabe po tų ela mawaibawe? Bidi mego augwali po tų ela maiabo menio. Tama augwaligo dwai kolesaga wei ponainogo augwali tigide dene ilabo bidi menio.
JOB 21:32 Tama te dwai bidi dabe isibo sogo da, we bidi hauwa mu sisinagasobo dao, bidigo augwali nedebo usugobeo Tama augwaligo agai tigi sela pelama, gų pageba pubaligi pabo dao. Tama bidi me badugo augwaligo gų page bugagia tonalubo dao. Tama dwai bidi dabe gų pagede bugagia pila mubo dao.
JOB 21:34 Eno te tobage kolesaga te dwai sę yali bidi dabede pedalobo subaso, eno te homu ebao, dage ili po olama, gani bole ebo bidi dabe dao. Dagego homugo te dagego enabolo pogo eno haliga dili ilimainu ebawe? Te bage? Hobede ebo. Te po dabego ena deli me tau sabeo,” Jopgo te aga abagi selabolo te po wai.
JOB 22:1 Jopgo po ola silibo si, te Elifas hanu Teman bidigo po wei ponoyu, e tama wali,
JOB 22:2 “Da olo bidi dabego God tau sabo sę dabe ebo usugowe? Mu meni. Te koneai bidi dabe me usu egobeo.
JOB 22:3 Nago homugo nago doloba pai kolesagago God Tigidali Bomo Elalubo Bidi agai yabo sę tau saibawe? Ma, nago dwagi yai kolesaga naga eyu da, nago homugo tego Godibolo dwagi yai ilaibawe? Mu meni.
JOB 22:4 Ma, nago homu nago Godiba lotu po weyu, tama aga dologode bidibaso, agai nage sesanama, nage po tų ela mani, nago te homu ebawe? Te mu meni.
JOB 22:5 Jop, nago haniani dwai kolesaga mu yai dao, tama silibeo. Tama te po pagede naga God nage po tų te ela mobao,” wali.
JOB 22:6 “Nago e tama kolesaga yai dao. Nago naga abagi dabe negeli mani, tama augwaligo nagebolo augwa doado bage meba osogo menama, tonalumainu yali. Ma, augwaligo te negeli sali dolo wei ponesiąbaso da, teda nago te sali nai mu sobaso, usu yaibao. Mebago nagebolo augwaligo ugwa nagebolo te tiwai osogo mani. Tiali goli, augwaligo te negeli wei ponai goli, nago augwalibolo te ugwa wei ma masiąbaso da, augwa tigi haluabo ugwa meni.
JOB 22:7 Bidi dabe augwaligo dogoni aloa sali, tiali goli nago augwalibolo wę mawai menio. Tama me nago augwali nasi ebadi, nago augwali nai mabeo.
JOB 22:8 Nage genuai bidi, tama nage genuai nogi yali. Nago tama tiyu yai nago homugo tigidali sę nagaduba homugo yaibao wali. Tama nago gasa bidi dabego tǫ dage dali sai dao.
JOB 22:9 Me te we sibi augwa bidi isai baso, augwali aselama, nagebolo augwali tau sao obadi, nago augwali tau sabeo. Menio. Nago augwali sela sąbaso, augwali pai dao. Tama tiyu yaide, augwaligo wai puluba dabe me dwagi yai tau me siyu, tama bugagia bidibeo.
JOB 22:10 Nago te kolesaga dabe yai dao. Tama tiyu, megi da, nage tola selama, nage dolabo nai dabego nage bobegela selama, dolabo nai polo aselama, tama nage wi ilibao.
JOB 22:11 Te hulia sai tiwaigo nage mesegelama, tama nago nai dabe me sugobeo. Me te dene mabo sę hauwa nageba pedelai dao, te wę genuaigo nage te mesega sali tiwai dao,” wali.
JOB 22:12 “Jop, suao, te hǫ dabe tigidali ugwanu mu elalubao. Tiali goli, God te dagalude bidiyu, aga te hǫ dabe edelama, ugwadu mu bidibao.
JOB 22:13 Eno homugo tego nago homu kolesaga hodaluama, nago e tama po wabo dao, ‘Godigo mena nai dabe koneaniwe? Aga dagalude ugwadu mu bilibo dao, tama moni pǫgo aga mesega sali, tama moni hulia saligo aga mesega sali. Tama agai da subeo. Agai dago kolesaga mena tama dagalogowe?’ nago te po wabo dao,” Elifasgo te po wai.
JOB 22:15 “Tiali goli, Jop, nago mena tama tialiwe? Nago tigidali dwai sunumidu painu bomo genuai ebawe? Te da, te dwai kolesaga ebo bidi dabego wali pabo tų dao.
JOB 22:16 Augwali monu dabe isąbo sogo, deli sogo tama Godigo augwali silali dao. Augwali te be me te genuai wę sesegede elaluai, te wę asiyu, te be dolama, masigi dali, ni nami dali si, te węgo tolasa pabo tiwai yali.
JOB 22:17 Te bidi dabe augwaligo Godibolo e tama wali, ‘Nago da tagalama, naga pa,’ me ma augwaligo e tama wali, ‘God Tigidali Bomo Elalubo Bidigo dade magi sę mu ebo usugowe?’
JOB 22:18 Tiali goli, augwaligo konebe, Godigo digi augwalibolo te dwagi yai nai mawai da homu ebe. Tama tibaso, eno olo te dwai bidi dabego poba olo munama, augwaligo homu kolesaga wali me pogobeo.
JOB 22:19 Te doloba pai bidi dabego Godigo dwai bidi dabe tigide dene ilibo suali, tama augwali tede dwagi yai homu pemene ebo dao. Tama dwai kolesaga magi naide meni yai bidi dabe da, augwaligo te dwai bidi dabe kęnę po wabo dao.
JOB 22:20 Augwaligo e tama wabo dao, ‘Dwagi yai mu da, te dago boi bidi dabe polo dolai yabo. Tama isigo augwaligo dwagi dwagi yai nai dela pela silalio,’ te po wabo.” Elifasgo te po wali.
JOB 22:21 “Megi da, Jop, odao. Megi nago God dali po dodolama, tama dedeli homu yao. Ma, naga tama tiyu da, teda agai nage usu ma ilama, tama nage bugagia ma bidaibao.
JOB 22:22 Nago agai nage mawainu ebo kolesaga po nago tigidali sao. Tama agai po nago homude bugagia mu muao.
JOB 22:23 Nage God Tigidali Bomo Elalubo Bidiba ma asiyu da, teda agai nago sęgę sela sąna silama, tama nage bugagia ma bidaibao. Tama nago te dwai kolesaga tudi ola menama, tama nage te tobage kolesagade digibulu bidao.
JOB 22:24 Te nago dwagi yai gol masigi tigidali te dwai madi sąna silao, tama tiyu da, usu yaibao.
JOB 22:25 Tama nago God agai nago homude te dwagi yai gol dali, silva dali si hasegelainu yao.
JOB 22:26 Nago tama tiyu da, teda nago dwagi yai homu genuai mu te God Tigidali Bomo Elalubo Bidigo nage bugagia te sę yali pode yaibao. Tama nage aga dali haliga tegaluama, dua bidaibao.
JOB 22:27 Tama nago agaba gedu haluasa po olama, tama agai nago gedu haluasa po wabo odama, tama nago hanalubo nai dabe nage mawaibao. Tama naga Godide dąų wali po wali peyu, dwagi yai homu elama, te dąų walali po usu naibao.
JOB 22:28 Tama nago sę me yainu homu dąų wali sę dabe da, te da Godigo nago te sę emainu sula tagalama, dwagi yai pedalomainu sula tagalaibao. Tama Godigo nage bidibo page bugagia mu ilaibao.
JOB 22:29 Nago koneani. Godigo augwa nogi ugwaba sabo bidi aiyaba elalubo dao. Me ma, agai te augwa digi aiyaba elalubo we bidi ugwaba sabo dao, tama augwali bugagia bidibo dao.
JOB 22:30 Tama Godigo gedude nage doloba pai bidi bidibaso, agai dwai sę ebo we bidi me hobede eyu, tama augwali ma saibao. Augwali hagagobeo.” Elifasgo te po wali.
JOB 23:1 Tama Jopgo po wei ponoyu, e tama wali.
JOB 23:2 “Odao. Megi me eno homu dwai elalubo. Tama eno homugo te dwai nai dabego ena dolobo te po hauwa mu waibao. Ena gela wabo togolainu sinabao goli, eno usu munu me ebeo.
JOB 23:3 Hobede mu dao. Ma, eno God bidibo pesage eno koneai tigi sogo da, megi tama ena pelama, aga gedude mu dolo doligi pigi dao.
JOB 23:4 Tama teda eno te dwai dwai sę dabe ena tigi yali po pusugi dao. Eno po tų ebo tau somainu po hauwa mu wagi dao.
JOB 23:5 Tama eno koneaiba, agai eno po wei ponobo suaibao. Tama eno agai homu kolesagade ebo homu koneaibao.
JOB 23:6 Dagego homugo Godigo bomogo ena aiyaba elaluama, ena dali boi bidi homu yaiba weyu obawe? Mu menio. Agai eno poba olo saganama, odaibao.
JOB 23:7 Ena doloba pai bidi. Tama ena agai gedude dolo po tųde doliyu da, eno aga dali po migi dao. Tama agai eno po odoyu da, teda agai e tama waibao, eno dwai sę me agai gedude me ebeo po wagi dao. Tama eno po tų da, mu siligi da,” wali.
JOB 23:8 “Awe, ena God bidibo pesage eno koneai tigi sogo da, tama igi da. Tiali goli, ena God giliga asobo badu bidibowe weyu, gegegi peyu da, tede bidibo sugobeo. Tama eno aga giliga dega sabo madi gege peyu da, eno aga tede bidibo sugobeo.
JOB 23:9 Godigo sę me not badu, me saut badu me ebo goli, eno aga dwasianu me subeo.
JOB 23:10 Tiali goli, Godigo ena bilibo dabe tigidali mu koneanio. Ma, aga ena usu siyu da, teda agai ena tonobo da wiegi yai gol masigi tonobo tiwai yaibao.
JOB 23:11 Tigidali sogo ena aga bilibo sunumidu naga bilibo dao. Eno te sunumi tagalama, gasa sunumidu me pabeo.
JOB 23:12 Tama eno agai te tiwai ya wali po me sela sąbeo. Menio. Eno agai enabolo mani po wali peyu yai dao. Agai po pusu mu elama, tigidali deli deli sogo tuabo naigo pusu edelalio,” wali.
JOB 23:13 “Tiali goli, Godigo homugo magi sę me yainu yali da, tama dego agai homu ma hasegelaibawe? Agai me hasegelegobeo. Tama agai magi sę me yainogo da, teda agai eyu naga ebo dao.
JOB 23:14 Tama tiyu yaide, agai homugo enade magi sę me yabo homu ebaso da, agai ebo dao. Ma, agai haniani homu kolesaga me elalubo.
JOB 23:15 Tama tiyu yaide, ena aga gesabidide mu bidibao, tama ena agade wi mu ebao. Eno agai ebo kolesaga kone palama, eno dili didibili mu ebo.
JOB 23:16 God Tigidali Bomo Elalubo Bidigo eno bomo silama, tama ena wi mu ilalio.
JOB 23:17 Hasia ena tama bidai meni. Meni. Godigo tama te be huliasa tiwaigo ena mesega sagasali. Tiali goli, ena te hulide wi meni, ena te God dali naga wi ebao,” Jopgo te po wai.
JOB 24:1 Tama Jop agai po genina ma weyu, e tama wali, “Magi baso God Tigidali Bomo Elalubo Bidigo dwai bidi dabe po tų yabo bodolu mube yaliwe? Tama magi baso te we bidigo God wali pelama, te tobage po tų yabo sogo olo dali magi baso tonalubowe?
JOB 24:2 Te dwai kolesaga ebo bidi dabe augwaligo gasa bidi dabego tǫ wi sainu yali. Tama tiyu yaide, augwali tǫ dąį ibanu pogolobo dao. Tama te bidi dabego homugo tiaibao, te augwa tǫ da homu yaibao. Tama augwaligo mena sipsip kibu wi selama, augwa sipsip dali gea paligi pali.
JOB 24:3 Te bidi dwai dabe augwaligo wilawe we dabego donki kibu wi sabo dao. Tama te we dabe augwaligo sę elama, augwa wai dabe negabo usu ebo menio. Tama te we dabego negeli sainu ebo sogo, te bidi dabe augwa gi sę ebo bulmakau kibu osogo siyu, tonaluyu, te wego te negeli wei ponobo sogoba usu nubo dao.
JOB 24:4 Tama te dwai bidi dabego te moni nai dabe meni yai bidi dabe wi ilibo dao. Tama augwaligo augwa homugo magi sę me egobeo. Augwali wi elama, te dwai bidi dabe digibulu bidibo dao.
JOB 24:5 Hobede ya. Te we bidi augwali te wa pai buluba bidigi pomainu ebo dao. Tama augwali te bulu kibu donki ebo gilama nai meni yai bulude augwa wai puluba maiabo nai bomai sę elama, mabo dao.
JOB 24:6 Augwali gasa bagego tǫba pelama, haniani nai dwai dabe selama, naga asobo dao. Tama dwai sę ebo bidi dabego gide augwa sę bidi dabego te wain nedu du polo toga sai madi, te bage te nai meni yai bidi dabe augwali te giba pelama, te wain du deli deli walalubo dabe augwaligo saibao.
JOB 24:7 Te hulide augwali olo pilama, tama augwaligo tigi kedau ebo dao. Augwa tigiwali haluama piabo ugwa menio.
JOB 24:8 Augwali bulu du yai madi bidibadi yaide, tulubage tuluyu, augwali tula pabo dao. Augwa be meniama, tama masigi dologoba geme duala sigi pabo dao, te tulubage tuidali weyu” wali.
JOB 24:9 “Te dwai bidi dabe augwali te wilawe we dabeba pabo dao, tama augwaligo wai bǫų dabe bomonama eyu sabo dao. Tama augwaligo te wai bǫų dabe augwaligo olo sę ebo bidi gagalobo dao. Tama dwai bidi dabe augwaligo te nai meni yai we bidi dabego wai dabe oda selama, tama tola selama, te we bidi dabego augwa negeli yali wei ponomainu.
JOB 24:10 Tiali goli, te bage te we bidi augwa tigi haluabo ugwa meni. Augwali gasa bidi dabego giba sę igi pelama, te wit nai augwa nai tubo beba sisinigi pabo dao. Tiali goli, augwa mu da tuabo nai meni ebo dao. Tama augwali nasi dwai mu ebo dao.
JOB 24:11 Augwali te ni oliv sili tomode sę ela bilama, tama te oliv du te masinigo pęgębo dao, te olivgo wel nigimainu. Tiali goli, augwaligo te oliv wel tubo usubeo. Tama mebago te wain du sągągo gosę genama, tama wain wę sabo sę yai dao. Tiali goli, te sę ebo bage augwa mu te wain wę tugobeo. Tama augwali dogoni aloa sabo dao. Magi baso meni, te page bidigo habu selai dao.
JOB 24:12 Te moni hanu tomode te we bidi gela mu wabo. Augwali mu dobaso, Godigo augwali tau somainu gela olama, i wabo dao. Tiali goli, Godigo augwaligo gedu haluasa po wabo odobo menio,” wali.
JOB 24:13 “Bidi mebago Godigo ebo kolesaga godolo ebo meni. Augwali tobolu gagea pelama, tama te dwagi yai kolesaga dali boi bidi homu ebo dao, te dwagi yai ula kolesaga. Augwaligo hulia sai kolesaga naga wali pabo dao. Tama augwali ula yai sunumidu pabo homu ebo menio.
JOB 24:14 Te kigamu hulide mu te giliga pedalisiąbadi, te dwai bidi dabe hogodama, te nai meni yai bidi dabe ela muainu pabo dao. Tama hulide da, augwali nai dabe wi sainu bilibo dao.
JOB 24:15 Ma, te bidigo sai we dabe dali dwai sę ebo bidi dabe da, augwali giliga dega sabo bolo tonalubo dao. Tama augwali te gasa bidigo we dabe dali pigi pabo dao. Augwali pabo sogo da, augwa gesabidi halua selama, pabo dao. Tama augwaligo e tama wabo dao, ‘Ena niwai bidigo sulama, me konegobeo,’ wabo.
JOB 24:16 Te hulide da, te nai wi sabo bidi dabe pelama, bidigo be paiai daga hųginama, tama tomoba nai wi sainu pabo dao. Tiali goli, giligade da, augwa be tomode dualalubo dao. Magi baso meni. Giligade da, augwaligo sogo meni.
JOB 24:17 Te bidi dabe augwali giliga nanobo sogo bilibo wi ebo dao, te bidi meba hulide bilibo wi ebo yali gilama. Tiali goli, huli asobode da, augwali dwagi yai homu ebo dao,” wali.
JOB 24:18 “Dagego te tobage po wali, te dwai kolesaga ebo bidi dabe augwali bobobage sogo bidigobeo. Menio. Polo tama bomai wę aselama, augwali tolasa pali. Tama Godigo po obaso, augwaligo tǫ dolaibao. Tama augwa wain giba sę igi pabo bidi meni yaibao.
JOB 24:19 Te giliga nanobo sogo da, te pǫ dabe tedela pelama, silibo dao. Tama tiwai me, te isali bidigo bulude te dwai we bidi sabo dao, tama augwali sese mu silibo dao.
JOB 24:20 Tama augwaligo tigi te dwasianu osogane dabego pusai nai gagabo dao. Tama bidigo augwali kone me egobeo. Tama augwa ida mugo me homu kone me egobeo, mu gegeda paibao. Tama augwaligo dwai kolesaga me sese mu silaibao. Dagego te tiwai po wabo dao,” Jopgo te po wali.
JOB 24:21 “Tiali goli, eno po da, e tama dao. Te dwai bidi dabego te dwai kolesaga te wai ame nesiąma ebo we dabede ebo dao. Tama augwaligo te wilawe we dabe tau sabo menio.
JOB 24:22 Tiali goli, aga bomogo digi Godigo dwai bidi dabe genuai nogi bobobage sogo bidimainu tau sabo dao. Ma, augwaligo homugo augwali isiba homu ebo si da, Godigo augwali ma hodolama, augwali bugagia ma bidibo dao.
JOB 24:23 Godigo digi augwali bugagia dua bidimainu elama, tama dwai sęgę augwaliba me pedalobo menio. Tiali goli, tigidali sogo agai augwali bugagia tonalubo dao.
JOB 24:24 Tama augwali genuai nogi osogo naga elalubo dao. Tama deli sogo tama augwali polo isai, te gasa olo we bidi dabe isibo tiwai gilama. Augwali te wit nai inawai te bidigo togobo tiwai ebo dao.
JOB 24:25 Ma, dagego homugo eno wali po ili po da wida, teda dage tomode mena bidigo eno ili po pepeli diliba sela muaibawe? Tama dego enabolo homu bega sabo po weyu, ‘Nago wali po te page meni yai po da,’ dego te po wabo usugowe?” Jopgo te po wai.
JOB 25:1 Jopgo po ola silibo si, te Bildat te bulu Suha bidigo po wei ponoyu, e tama wali.
JOB 25:2 “Godigo genuai bomo elaluyu, agai tigidali nai tonalubo. Agai tigidali nai dabe noma selama, wi emainu ebo dao. Tama agai dagalude elalubo nai dabe dua bugagia bidimainu ebo dao.
JOB 25:3 Te dagalude ami bidi hauwa mu, tama bidigo nedebo usu egobeo. Tama Godigo ula tigidali we bidibolo mabo dao.
JOB 25:4 Mena tama da tǫde bidi doloba pelama, Godigo gedude meda meni yai pedalaibawe?
JOB 25:5 Dago polua ula genuai subo dao. Tiali goli, Godigo gedude da, te dwasianunu mu dao. Tama hǫ dabe me agai gedude dwagi yai menio.
JOB 25:6 Te mu tama, da bidi agai gedude doloba pai menio. Da te tǫde dwasianu sawi tiwai dao. Da te olo nai osogane tiwai naga dao,” Bildatgo te po wai.
JOB 26:1 Megi da, Jopgo Bildatgo po wei ponoyu, e tama hale ilibo po wali.
JOB 26:2 “Te ogomani nage bidi bomo meni yai bidi tau sabo bidi yali bogo.
JOB 26:3 Tama me ma, nage bidi homu kolesaga meni yai bidi tau sabo bidi mu yali bogo. Eno odali, nago ola mabo po hauwa mu wali, te dwagi yai mu dao.
JOB 26:4 Dego mobogo nage homu hodolama, te po omainu tau saliwe?”
JOB 26:5 “Tagala te isai bidi dabe tamu wę dologode bidibo me, augwali Godide duagobeo. Augwali Godigo gedude hania mu bidibo dao. Tama agai augwali tonobo sogo da, augwali wi elama, noma genuai mu sabo dao.
JOB 26:7 Godigo dagalu nigiyu, dįnįgįlai elalubo. Me ma, Godigo e tǫ olo walumainu nigilai dao. Te magi nai mego e tǫ aga bidibo pesagede bidimainu tolalubo menio.
JOB 26:8 Godigo te wę dabe te agai pǫgo bea selama, elalubo dao. Te wę sęgę mu ebo dao. Tiali goli, wę sęgęgo te pǫ alua sabo menio.
JOB 26:9 Godigo te pǫ aselama, agai sia king halua somainu ebo dao.
JOB 26:10 Tama agai dąį te tamu ąį bobegelama, elalubao. Tama te dąį ilali digi da, te ula dali, hulia sabo dali si deli madi sisinibo digi dao.
JOB 26:11 Te Godigo sębę ebo sogo da, teda te tǫ dali, dagalu dali si bomona ma posogwa sąnama, noma genuai mu sabo dao.
JOB 26:12 Polobadu Rahap, te moni hwa gula tamu ąį hasamani da, te Godide tobolu gagea pai dao. Tiali goli, Godigo bomo dali, aga dwagi yai kolesaga dali sigo pode Godigo te Rahapgo bomo aiyaba elaluai dao. Tama agai tamu ąį dua bidimainu yai dao.
JOB 26:13 God aga digi bomai wali tagala palama, te pǫ dabe sela sąwai dao, tama dagalu sisi ma yai dao. Tama aga nogogo digi naga te bulu hwa gula mani ma isilai dao.
JOB 26:14 Te Godigo nigilama pedelali nai dabe da, dago sulama konebo dao, te nai dabede agai genuai bomo dabolo dwasianunu naga ola mabo dao. Tama tego dago kolesaga edelebo dao. Ma, God agai bomo sese dabolo ola magi sogo da, teda dago mu konegi menigi da. Mu menio. Dago homu kolesaga agai bomoba usu nainogo ebaso da, usugobeo, te dęą saibao.” Te Jopgo te pogo te Bildatbolo po wei ponai dao.
JOB 27:1 Tama Jopgo po ma wadoluyu, e tama wali.
JOB 27:2 “God Tigidali Bomo Elalubo Bidigo enade dolo yai sę isąma yai digi, megi da, ena dolama mu bidibao. Agai odisąma, eno po tų bugagia sulama dodolobeo. Tama tibaso, ena haliga tigi sębę agai te kolesaga ebode ebao.
JOB 27:3 Tiali goli, eno te sesemane sogo bidibo Godigo nogi weyu, nogo guni sisu, eno mu po naga obao. Te Godigo ena me bidimainu eyu da,
JOB 27:4 te eno dwai po me pusulama, tama eno tibo po eno pedauwalidu me wagobeo,” wali.
JOB 27:5 “Tama tibaso, dagego bugagia mu odao. Te po dagego enabolo wali po dabe mu tama menio. Eno te homu ebo dao, tama te homu hasegelegobeo. Magi baso meni. Eno haliga dali, homu kolesaga dali si dolo mu Godigo gedude elalubo. Tama eno po bomo elama, e tama wali. Eno dwai kolesaga dabe, magi sę dabe me, te dwai dwai nai dabede me ebeo. Tama eno te deli po naga ola pidubadi, ena isibo sogoba siligi paibao.”
JOB 27:7 “Eno homugo bidi dabe ena dali boi bidi homu ebo bidi dabe dene momaina homu ebao. Agai deli kolesaga naga augwali tigide emainao, te dwai kolesaga ebo bidi dabede ebo tiwai.
JOB 27:8 Te bidi dabe augwali Godigo po wali pabo menio. Godigo augwaligo bidibo ula silibo sogo augwali dwagi yai nai me saibawe? Meni.
JOB 27:9 Te sęgę yai sę augwalide pedalobo sogo da, tama augwaligo Godigo augwali tau somainu i wabo dao. Teda Godigo augwaligo i wabo odaibawe? Mu meni.
JOB 27:10 Tama te tobage bidi dabego dwagi yai homu elama, God Tigidali Bomo Elalubo Bidiba gedu haluasa po tigidali sogo waibawe? Mu meni,” wali.
JOB 27:11 “Tama megi da, eno dage ola menama, tama dagego Godigo bomo bugagia koneagameo. Tama eno God Tigidali Bomo Elalubo Bidigo homu kolesagade yainu ebo sę po hanilama pusaibao.
JOB 27:12 Tiali goli, duga polo suali, te Godigo ebo kolesaga dabe. Tama tiali goli, dagego magi baso po geda mubawe?” wali.
JOB 27:13 “God Tigidali Bomo Page Bidigo polo dąį ilai dao, te haniani sęgę te dwai sę ebo bidi dabego pei yali gilama, tama gasa bidi dabe dali dwai kolesaga ebo bidi dabebolo me.
JOB 27:14 Te bidi dabego wai puluba hauwa elalubaso me tagalao, te boi bidi dabego augwaligo wai bǫų elama, isilagasaibao. Tama augwaligo hani da, tigidali sogo nai menia siduaibao.
JOB 27:15 Tama te dwai sę ebo bidi dabe isila pai madi da, te augwa hani bidibo bageba me moni gasi mu aselama, augwali me isaibao. Tama augwa we dabego me augwalide hobede isąma, diligi me egobeo.
JOB 27:16 Te dwai bidi dabego silva mone hauwa, me ugwa hauwa mu pesage augwa bede holai baso, tama te dwagi yai nai dabe da, augwaligo homude olo nai tiwai elaluaibao.
JOB 27:17 Tiali goli, nosali da, te doloba pai bidi dabego te dwagi yai nai dabe selama, augwa hasi dobola saibao. Awe, te dwai sę isąwai bagego te dwai bidi dabego silva augwa hasi tomode dobawaibao.
JOB 27:18 Te dwai bidi dabego sawi yai be sę ebo dao. Tiali goli, augwaligo be sesabi elama dolalugobeo. Te be dabe deli sogo mu degasa paibao, te hologabe be, me bidigo gi tonaluainu sę ebo be tiwai yali gilama yaibao.
JOB 27:19 Awe, augwali hulide piainogo da, augwaligo suali, augwa tigidali nai dolo elalubo suali. Tiali goli, kigamu hodaluyu suali, augwa dwagi yai nai dabe menia suali, dolo elalubo sube. Tama augwali nai meni yai bidi mu bidali,” wali.
JOB 27:20 “Te dwai wi ilibo nai dabe te dwai bidi dabeba hulide te wę aselama, bulu mesega sabo tiwai yaibao. Tama augwali wi mu yaibao. Te nai dabe te bomai wali tiwai elama, augwali sela sąwaibao, tama augwa pesagede munu me bidigobeo.
JOB 27:21 Te bomai wali te giliga asobo badu aselama, augwali sese sela sąbo tiwai dao.
JOB 27:22 Tama te waligo augwali tigide diluai sę mu ebaso, augwali wi peyu, geme duala sainu yaibao.
JOB 27:23 Tiali goli, augwaligo te waligo bomo sela sągobeo. Waligo augwali gisugu mabo tiwai elama, tama augwali sela sąwaibao,” Jopgo te po wai.
JOB 28:1 Te Jopgo po ma weyu, te po wali, “Te bidi dabego tǫ aiyanu mu dogobo dao, te silva dali, gol dali si sainu tibo dao. Tama augwaligo te gol dali, silva dali si ulabo madi geselebo dao, te dwai pobelebage sela sąnama, dwagi yai mu emainu.
JOB 28:2 Tama me ma, augwaligo te ain sainogo tǫ dedage aiyanu mu dogobo dao. Tama augwaligo tama masigi me diganama, kapa mu sainu ulubo dao, siade.
JOB 28:3 Augwaligo tǫ dedage tomoba mu dogobo dao, te ain dabe elalubo masigi dabe sainu tibo dao. Augwaligo lam sole domanama, te tǫ tomoba dogobo dao. Tama te lamgo te tǫ dedagede ula ilama, tama augwaligo te masigi dabe bugagia suyu, tama augwaligo sabo dao.
JOB 28:4 Augwaligo te tǫ dogobo te digibulu mu tama dogogi pabo dao, te gasa bidi dabe me pisąma ebo digi. Tama augwa naga bidiyu, sę ebo dao. Augwaligo bono gebelama, tedu walawala dulubo dao, te tǫ dedageba, te sę yainu.
JOB 28:5 Te bidi meba tǫ daide sę elama, nai dabe bulubo dao. Tiali goli, te tǫ dedage tomode sę ebo bidi dabe da, augwaligo masigi dabe haluama, tǫ dabe begela tagalama ebo dao. Tama tǫ dologo te isigo ula tiwai emainu ebo dao.
JOB 28:6 Te bidi dabe augwaligo te sawi yai masigi nogi sapaia te tǫde masigi dabede sisi yai masigi sabo dao. Te gol kapa elalubo masigi me augwaligo te tǫde sabo dao.
JOB 28:7 Te ba kemodage dabego te bidigo nigali tǫ dedage tomoba subo meni.
JOB 28:8 Te bulu yowi laion dali, me badu bomai hasa dabe, augwali te bobobage tǫ dedage te bidigo dogali tǫde bilibo meni,” wali.
JOB 28:9 “Augwaligo te bomai masigi bulu diganama, te moni bulu du pageba pabo dao.
JOB 28:10 Tama augwaligo te masigi bulude dedage nidigi pabo dao. Tama augwali tomoba pabo sogo da, augwaligo haniani dwagi yai masigi dabe te tǫ tomode subo dao. Bidi dabego te masigi abelebo genuai monego abelabo masigi dabe te tǫ tomode elalubo dao.
JOB 28:11 Tama te sę ebo bidi dabego sę ebadi yaide, te dwasianu ulu wę subaso da, te węgo te tǫ dedagede pągąidali weyu, augwaligo wę palibo dao. Tama augwaligo tǫde dualaluai nai dabe sabo dao, tama buluba pepeli diliba sela asobo dao,” wali.
JOB 28:12 “Tiali goli, da menaba mu pelama, te dwagi yai homu kolesaga dabe sigi pogowe? Te dwagi yai homu kolesagago bulu menade elalubowe?
JOB 28:13 Te dwagi yai homu kolesaga, te da nai mu, tama tego mone dabe edelai dao. Tiali goli, we bidi augwaligo te kuna konebeo. Tama te dwagi yai kolesaga da, te tǫde we bidide me elalubeo.
JOB 28:14 Tama te tamu wę dali, te bulu aiyanu yai digi agai e tama wali, ‘Te dwagi yai homu kolesaga ede me elalubeo,’ po wali.
JOB 28:15 Dago dwagi yai homu kolesaga abelainu te gol dali, silva masigi si skel ebo usu me egobe. Tagalao. Hobede mu dwali. Dago te nai abelebo usu egobeo.
JOB 28:16 Awe, mu tama, dago wiegi yai gol masigi Ofir bulude selama, abelabo da usu egobe. Me te genuai mone sabo masigigo me, dago dwagi yai kolesaga dali homu kolesaga si abelegobeo.
JOB 28:17 Ma, dago homugo dwagi yai homu kolesaga abelainu, tama dago te dwagi yai glas tiwai masigi dali, te genuai monego abelebo gol masigigo nigai au dobage nai me elalubaso, te me usu egobe.
JOB 28:18 Te dwagi yai homu kolesagago te tamu wę sanide au nai dabe me edelali. Me te dilai tedela yai dila pai masigi nogi jaspago ula edelali. Te bidi dabego moni mone sąnama, te tamu węde au yai beli tiwai nai abelebo dao. Tiali goli, te beli tiwai nai abelebo moni tiwaigo te dwagi yai homu kolesaga abelebo usu egobeo.
JOB 28:19 Dwagi yai sęwa yai masigi bulu nogi Sudande sabo masigi topas, me masigi gol isi ulama dwagi yai me, te dwagi yai nai sigo me te dwagi yai homu kolesaga abelebo usu egobeo. Magi baso meni, te homu kolesaga abelebo mone te ugwanu mu dao,” wali.
JOB 28:20 “Teda, dago te dwagi yai homu kolesaga menade mu gegaibawe? Dwagi yai homu kolesagago bulu menade mu elalubowe?
JOB 28:21 Te dwagi yai homu kolesaga aga bulude geme mu dualalubo. Tama te we bidigo me, te me badu bidibo nai dabego me, munu me sugobeo. Te ba dabe me dagalude bola bilibo. Tiali goli, augwaligo me subo usu egobeo.
JOB 28:22 Isai bidigo bulude me e tama po walio, ‘Eno me eno ologo naga te dwagi yai homu kolesaga po olo odali. Tiali goli, eno sube.’”
JOB 28:23 “Megi da, odao. God agaduba deli naga te dwagi yai homu kolesaga elalubo bulu koneanio. Tama agaduba naga teba pabo sunumi koneanio.
JOB 28:24 Magi baso meni. Agai tǫ tigidali mu sulama, tigidali dagalu dologode elalubo nai tigidali sula silibo dao.
JOB 28:25 Polobadu mu Godigo dąį ilama dobolama, tama waligo bomo me dąį ilama, tama tamu wę elaluabo pesage me dąį ilai dao.
JOB 28:26 Tama God agai te tulubage me te sisi pǫ elaluyu wali bilabo po dąų walai dao.
JOB 28:27 Tama Godigo te sę dabe ebo sogo, agai te dwagi yai homu kolesaga suai dao. Tama tigidali kolesaga sulama, agai osola suai dao. Tama agai dwagi yai homu kolesaga dabe bugagia elalumainu dąų walama, augwali usu ilai dao.
JOB 28:28 Tama God da tǫde we bidibolo e tama wai dao, ‘Bidi ena Genuai Bidide wi eyu, ena dologode bidibo bidi, agai te dwagi yai homu kolesaga page konebo gagalai dao. Tama dwai kolesaga tudiba mubo bidi, te bidi da, dwagi yai homu kolesaga elalubo dao,’ Godigo te po wai,” Jopgo te po wali.
JOB 29:1 Tama Jop agai po genina ma weyu, e tama wali,
JOB 29:2 “Hobede mu da. Ena polobadu bidali tiwai ma bidimaina homu godolo ebao. Te sogo da, Godigo ena bugagia mu tonaluai dao.
JOB 29:3 Aga te lam tiwai bidiyu, hulia sali ugwaba sela sąnama, tama ena bilabo sunumi ola mawai dao.
JOB 29:4 Awe, eno homugo ena polobadu bidali tiwai naga bidimaina homu ebao. God eno dwagi yai abagi mu bidiyu, eno hani wai dabe, me be nai dabe agai bugagia mu tonaluai dao.
JOB 29:5 Tama te sogo God Tigidali Bomo Elalubo Bidi ena dali bidali sogo da. Eno wai puluba dabe ena pagede bugagia bidai dao.
JOB 29:6 Tama eno bulmakau kibu, me meme kibu sigo ame pę hauwa mu sai dao. Tama te oliv du wel te eno masigigo nigai tang wę digi pągąnaluai dao,” wali.
JOB 29:7 “Awe, te sogo polobadu ena te genuai hanude genuai bidi bidiyu, tama ena te hanu tomoba tola pabo sunumide genuai tobolu bidi dabe dali genuai pesageba sisinigi pelama, po tų odai dao.
JOB 29:8 Tama te gesi bidi dabego ena asobo sulama, augwali ena asobo sunumide ugwanu kila sai dao. Tama polo monu dabe me dolaluama, ena duagilubosi augwali duagiluai dao. Ena genuai nogi mawainu tiai dao.
JOB 29:9 Te we bidigo tobolu bidi dabe augwali pedauwali pania sabode ola mawai dao, augwali eno po odainu usu elama, tama tiai dao.
JOB 29:10 Tama genuai bidi dabe me po me wabo menio. Augwali pedauwali pani selama elaluai dao,” wali.
JOB 29:11 “Te we bidi dabego eno po oda selama, augwaligo eno nogi ugwaba sai dao. Tama augwaligo eno ebo sę dabe subo sogo da, augwali eno ebo dwagi yai kolesagade gana peyu yai dao.
JOB 29:12 Magi baso meni. Te nai meni yai bidi dabe tau somainu i obaso, eno augwali tau siyu ebaso tiai dao. Tama eno tiana wai puluba sulama, tama augwali tau sabo bidi meni baso da, ena digi eno augwali tau sai dao.
JOB 29:13 Tama te we bidi augwali dolainu ebo si me, eno augwali tau sai dao. Tama augwaligo buba hwi olama, Godibolo hanaluama, ena tau somainu yai dao. Tama eno te we dabe augwa bidi isai wilawe we dabe me tau sai dao. Tama augwali gana paide bidiyu, dwagi yai homu elama bidai dao.
JOB 29:14 Tigidali sogo eno doloba pelama, dwagi yai kolesaga naga wali pai dao. Tama te kolesaga te eno tigide dwagi yai au yai gudubo ugwa eno tigide muai tiwai yai dao.
JOB 29:15 Ena te gedu tiwai te gedu dwai bidi dabe sunumi ola mawai, me ena te sągą tiwai te sągą dwai bidi bilibo tau sabo tiwai yai dao.
JOB 29:16 Tama ena te nai meni yai bidi dabego aya tiwai bidama, tama eno augwali tau sai dao. Tama eno te gasa buludu asai bidi dabego po tau sai dao, te gasa bidi dabego po tų elama, augwali aiyaba elaluainu ebaso tau sai dao.
JOB 29:17 Dwai kolesaga ebo bidi dabego bomo eno silai dao. Tama te we bidi dabe augwaligo nogode eno augwali ma oda sai dao,” wali.
JOB 29:18 “Eno homugo e tama tiwai dao. Ena e tǫde bobobage sogo bidiyu, tama ena bede dua bidiyu yaide isaiba homu yai dao.
JOB 29:19 Eno homugo ena te ni me deli dolalubo tiwai bidaibao homu yai dao. Agai selego wę hauwa mu kegebo. Tama hulide segene tulubage węgo agai yabe dabe dwagi yai pedalomainu ebo dao.
JOB 29:20 Tama tigidali sogo ena gana paiba, te eno bomo me elalubaso, tama eno bomai sę me me iduaibao, eno te homu yali,” wali.
JOB 29:21 “Te bidi dabe augwaligo yabo kolesaga po eno ola mabo sogo da, augwali pedauwali pania selama, olo saganama, bugagia eno po odai dao.
JOB 29:22 Eno po augwaligo haliga tomoba mu pai dao, te tulubage te tǫ tomoba pabo tiwai tama yai dao. Tama eno po ola silibo si da, augwaligo po mu meni yai dao, te eno homu kolesagade ebo po iba tega sabo meni.
JOB 29:23 Te bidi dabe augwaligo eno po bugagia sainu olo saganama, odai dao. Augwali te moni giliga nanai digi te tulubage tulubaso, te dwagi yai homu ebo tiwai yai dao.
JOB 29:24 Tama eno siade dao po te olo bidi dabe dali wabo sogo da, augwali noma selama, genuai bidi mego augwalibolo po wabo subo dao. Tama te kolesagago eno augwaligo haliga dąų walai dao.
JOB 29:25 Ena augwaligo tobolu bidi tiwai bidama, tama eno augwaligo wali pabo kolesaga dodolama, ola mawai dao. Ena augwali dali bidali, te kingo aga ami bidi dali bidibo tiwai yali. Tama me eno augwaligo tabi dili ilali, te we bidi dabego bidi isaide gela obaso, tabi dili ilibo tiwai yai dao,” Jopgo te po wai.
JOB 30:1 Te bidi Jop agai po ma wadoliyu, e tama wali, “Megi da, te nai meni yai bidigo wai dabe aselama, ena posobo po weyu, gisugu mayu ebao. Augwa aya dabe te olo nai tiwai, te we bidi gedude nai mu meni yai bidai. Tama augwaligo dwagi yai sę me yabo usu yai meni. Tama eno te tama tiwai bidi dabe pelama, te eno yowi dabe tau selama, eno sipsip kibu dabe me tonalugi pa po wagobeo. Magi baso meni, augwaligo te sę ebo usugobeo.
JOB 30:2 Eno augwali suali, augwali sę yabo bomo meni yai suai dao. Tama tibaso, eno augwalibolo eno sę yagasa po wai menio.
JOB 30:3 Te bidi dabe augwali nai menia sai mu olo sisinama, tama augwaligo tabi tigi nasi hagede gela obaso da, teda augwali te bidi meni yai buluba pai dao. Tama augwali dwasianu dwai nai dabe tede gegai dao.
JOB 30:4 Tama augwaligo te dwasianu ha ebo ni gudama, tama te ni sele bono, me te ni yabe me sese tula silai dao.
JOB 30:5 Tama augwali be pąba asobo si da, teda te be nanide bidali we bidigo hae menama, sela sąsą pai dao, te bidi dabego nai wi sabo bidibolo ebo tiwai yai dao.
JOB 30:6 Tama tibaso, augwali wi pelama, odogoba pelama, tama masigi gabaloba me tǫ dedageba dabe tama geme wi duala sigi pai dao.
JOB 30:7 Augwali bulu tǫ wa pai pesageba pelama, tama tede elalubo dwasianu ni sili dabe tomode biliyu, te bulu kibu donkigo po wabo tiwai yai dao. Tama augwa tigi posolo ebaso, augwali te ni dologoba tiwąį madi sisinagasai dao.
JOB 30:8 Augwali te be nanide we bidi dabego sese buluba mu gudulai digi, augwali nai mu meniama, tama augwali nogi mu meni yai dao,” wali.
JOB 30:9 “Tama megi da, te bagego ogwa dabego ma ena posobo pogo balia po wabo. Tama augwaligo homugo ena olo nai tiwai elama, augwaligo eno nogi olama, ena mu dolobo yabo.
JOB 30:10 Augwaligo homugo ena dwai olo nai tiwai ąǫ elama, tama ena subo hagela mu ebo. Tama augwali enade wi elama, habu bulu kilasa peyu, ena pąba me asobeo. Ma, augwali ena pąba asobaso da, teda augwaligo ena gesabidiba pęsa sąwainu tiaibao.
JOB 30:11 Godigo ena aiyaba elaluama, tama ena bomo kimi mu tamunanio. Tama tibaso, te bagego ena dolobo wi munu ma ebe. Menio. Augwaligo dwai kolesaga ena dali naga yai dao.
JOB 30:12 Te nai meni yai we bidi dabego enade wi munu ma ebeo. Augwali ena gesabi dolo badu mu aselama, ena elama, tama ena sela sąbo. Tama augwaligo haniani sę elama, ena dolainu ebo.
JOB 30:13 Augwaligo eno sunumi palia selama ebogo ena wi pogobe yabeo. Ena dolai polo elalubadi, tiali goli, augwaligo ena dolobo sę genuai mu ilalio. Augwa mu da bomo meni yai digi, tiali goli, augwaligo ena dolobo sę ebo dao.
JOB 30:14 Augwaligo ena dali hwįagasu da, te genuai hwįbo ami hani bagego moni hanu bagulali obo aluama, tomoba pelama, hanu tomode hwįbo tiwai mu ebo. Te tamu ąį dini holama, saneba buguasa asobo tiwai me augwaligo enaba asiyu tama tebo dao.
JOB 30:15 Te haniani sę dabe enaba pedelama, tama ena wi mu ilibao. Eno genuai nogi olo ni yabe tulalubo tiwai elama, te waligo sela pabo tiwai yali. Te ena wiegi yai bugagia bidali sę dali, te eno wiegi yai nai dabe dali, te silali, te dagalude pǫ dabe gasaba sisą sigi pabo tiwai elama, tama te dagalu olo madi pepeli dilide elalubo tiwai ebo dao,” wali.
JOB 30:16 “Pąde mu tama, eno bidibo ula mu tama silaibao. Tama tigidali sogo eno tigi dene naga eyu ebo.
JOB 30:17 Te hulide eno dili tigidali dene eyu ebo, te enego eno tigide enebo tiwai mu ebo. Tama te dene me elaludu genama, tama te dene ebogo ena me taga pabo meni.
JOB 30:18 Te agai genuai bomogo da, God agai eno tigi gasagi yai ma ilali. Tama agai ena nogo aligabo dųbo tiwai bomonama ebaso, te holobo ugwago dogoni magede kekebo tiwai ebo dao.
JOB 30:19 Tama Godigo ena te pu ąįyana pai madi sąnama, tama ena te tǫ hogomu olo nai tiwai elalu, me keli hogomu tiwai mu gagalalio.”
JOB 30:20 “God, ena naga gedude dolaluyu, tama nago ena tau somainu i obao. Tiali goli, nago olo tonaluyu naga elama, eno po waboba olo mubo menio.
JOB 30:21 Nago ena hobede dwasianu eyu, me olo tau sabo sę me ebeo. Menio. Nago ena te nago tigidali bomogo dolaiba homu naga ebo dao.
JOB 30:22 Nago ena te ni yabe tiwai gilama ugwaba sela sąnama, waligo tolasa pomainu sula tagalobo tiwai ebao. Tama nago ena waligo subigila sąsąbo tiwai tama ebo dao.
JOB 30:23 Eno koneani, nago ena isimainu elama, tama nago ena te nago nigilali te tigidali isibo we bidigo bidigi pabo pesage gų pageba pomainu ebao.
JOB 30:24 Ma, bidi me mu dolobaso, tama tau somainu i obaso da, teda bidi mego aga ma elama, aga mu dolaibawe? Te tama me tegobeo. Mu meni.” Jopgo te po wali.
JOB 30:25 “Polobadu da, eno bidi dwai dene sobaso, moni hobede mu yai dao. Tama eno homu sęgę genuai mu te nai meni yai bidi dabede yai dao.
JOB 30:26 Eno homugo tiali ena bugagia naga tigidali sogo bidaibao homu yai dao. Tiali goli, dwai sogo mugo ena gegali. Eno homugo ena ulade bidaiba homu yali, tiali goli hulia sabogo aselama, ena mesega sagasalio.
JOB 30:27 Tigidali sogo eno homu kone palidu gegeyu naga ebo. Tama tigidali sogo sęgę dali, dene dali si enaba naga pedalobo.
JOB 30:28 Ena dwai mu bidiyu yaide, eno gesabidi hasegelama, tama husuga sali. Tiali goli, giligago ena ulubeo. Menio. Gasigo yaligo ena tama tiwai bidiba. Ena we bidi tomode dolaluyu, tama augwalibolo ena tau sa po hanalu wali. Tiali goli, augwaligo ena tau sabeo.
JOB 30:29 Awe, ena genuai dene dali mu bidibao. Tama eno gela da, te bulu yowi dali, ba uni dali sigo i wabo tiwai ebo.
JOB 30:30 Eno tigi husugu gadia selama, mu wa pali. Tama eno tigiwali tologa pelama, tutulaluali. Tama gasigo eno tigi posolo mu ilibo.
JOB 30:31 Polobadu da, eno gita eliyu, ona eliyu elama, dwagi yai wei ebo nai naga elai dao. Tiali goli, te dwagi yai po wali nai dabe megi ma isibo bidigo hobede ebo gita dali, ona dali si elebo tiwai ebo,” te bidi Jopgo te po wali.
JOB 31:1 Te bidi Jop agai po ma wadoliyu, e tama wali, “Eno bomo yai po dąų mu olama, e tama wai dao. ‘Eno we sibi gedu me elama, penani ebo homu me egobeo,’ po wai dao.
JOB 31:2 Magi baso meni. God Tigidali Bomo Elalubo Bidi aga dagalude bidiyu, tama agai magi sę dabolo elama, dago dwai kolesaga ebo wei ponainu ebo dawe?
JOB 31:3 Agai dwai sogo te dwai kolesaga ebo we bidibolo wei ponobo dao. Tama te tibogo augwali mu dolama, tama augwali mu silibo dao.
JOB 31:4 Tiali goli, Godigo eno kolesaga tigidali mu koneai dao. Tama ena bilibo tigidali agai suai dao,” wali.
JOB 31:5 “Eno dwai tibo sę dabe elama, tama eno te we bidi dabe ili po me ola mayu yai meni.
JOB 31:6 Ma, Godigo eno kolesaga dabe dolo dagala suyu da, teda agai bugagia mu koneaiba, eno magi sę me yai sugobeo.
JOB 31:7 Tiali goli, ma eno gedu olo tagala palama, ena gedugo dwai kolesaga emainu sula tagalama igi sogo da, teda eno dwai kolesaga elama, agai gedude meda mu igi sogo da,
JOB 31:8 teda Godigo gasa bidi dabego eno gide nai selama, eno gi mu dolomainu sula tagaligi dao.
JOB 31:9 Ma, eno ena abagigo we tonama, pęsa eyu yai tigi sogo da, tama ena agai be pąba pelama, agai be pąde dualaluama, eno abagi gasaba pabosi, teda ena agai we dali pagela pigi bigi sogo da,
JOB 31:10 teda ena we mu me gasa bidigo sę we gagalama, gasa bidigo wit nai mimibo sę igi dao, tama gasa bidi dabe augwali aga dali piyu igi dao.
JOB 31:11 Ma, eno gasa bidigo we dali dwai sę me igi sogo da, teda dwai kolesaga mu dao. Teda augwaligo ena po tų ela menama, ena tigide dene mabo sę genuai mu igi dao.
JOB 31:12 Te tobage dwai sę da, te posolai isigo bidi ulubo tiwai dao. Ma, eno te tobage kolesaga yai madi tigi sogo da, teda te isigo ena ulama, eno nai dabe tigidali sia sąnama, tagaligi dao. Tama ena isilama, tama ena isai bidi dabego buluba bidigi pigi dao.
JOB 31:13 Polobadu eno sę ebo we bidi dabego ena dali nai mede po obaso, tama eno augwaligo po odigi menigi sogo da,
JOB 31:14 teda te Godigo eno te dwai kolesaga yalide po tų ela mabo sogo da, teda eno magi po wei ponaibawe?
JOB 31:15 God aga digi ena te ena idago haligade ame nomainu yai dao. Tama aga naga te sę ebo we bidi me augwa ida dabego haligade ame nomainu yai dao. Te God deligo naga da tigidali nigilama, tama da te God aga gedude deli tigi tiwai naga bidibao,” wali.
JOB 31:16 “Tigidali sogo eno nai meni yai bidi dabe tau siyu yai dao, te augwali meni yani nai dabe mawai dao. Tama eno wilawe we dabe subo si, eno augwali sula tagalobeo. Menio. Eno augwali me tau sai dao.
JOB 31:17 Eno ena nai dabe yogo elama, ena nai dabe dąų walama, enaduba tubeo. Menio. Eno me badu te augwa aya isai wai bǫų dabe te tiana wai bǫų dabe te nai mawai dao.
JOB 31:18 Ena gesi bididu gagalasa, megi tamaba, eno te tiana wai dabe tonaluyu, te augwa ayago ebo kolesaga tiwai yai dao. Me, te we dabe augwa bidi isai we dabe me, eno augwali tonaluyu, tau siyu yai dao.
JOB 31:19 Ma, bidi me ugwa meniama, tama kedaugo mu dolobo si da, teda eno te bidi olo bidimainu sula tagalai yali bogo? Meni.
JOB 31:20 Eno aga ena kibu sipsip nisigo nigai ugwa mawai dama. Te ugwago agai tigi posolo ilama ebaso, tama aga dwagi yai homu elama, enabolo buba hwi po wai dao.
JOB 31:21 Ma, eno homugo gasa tobolu bidi dabe eno po mu dao omainu elama, tama ena po tų ebode dolama tibo po olama, te augwa aya isai wai dabego nai sainu ebeo.
JOB 31:22 Teda eno te tama tiyu da, eno homugo eno nogo si guda pelama, tǫba tulalumainao.
JOB 31:23 Magi baso meni. Eno Godigo moni bomo eno koneama, tama me agai dwai nai dabe tagala palama, bidi dolobo me, eno koneai dao. Tama ena wi genuai mu yai dao. Tama tidali weyu, eno dwagi yai kolesaga naga yai dao,” Jopgo te po wai.
JOB 31:24 “Mu tama. Eno ena bomai sę elama, mone dabe hauwa mu sai dao. Tiali goli, eno tobolu gagea pelama, tama ena nogi ugwaba sai meni. Tama eno homugo e tama tiai meni, eno te dwagi dwagi yai gol dabe, mone dali sigo naga ena bugagia bidibo tau sabo usu yaibao, eno te homu me ebe.
JOB 31:26 Giliga ula genuai mu elama, tama te polua me ula dwagi yai ebo dao. Tiali goli, eno homugo te nai siba lotu po wabo homu yai menio. Tama eno nogode nono nenama, te nai si genuai nogi mawainu yai menio.
JOB 31:28 Ma, eno te tobage kolesaga dabe igi sogo da, teda eno God dagalude bidibo bidi tudi ola mayu, te agaba homugo kęą pabo kolesaga togoyu tigi dao. Tama te pagede agai ena po tų ela menama, ena sęgę genuai mu magi dao,” wali.
JOB 31:29 “Ma, eno ena boi bidi dabe dwai dene sabo sogo me, teda eno augwali dene sobaso, usu da homu me yai menio.
JOB 31:30 Tama eno Godibolo eno boi bidi dabe dolama isilimainu me hanalu wai meni. Ma, eno tama tigi sogo da, teda eno dwai sęgę sabo sę igi dao.
JOB 31:31 Eno sę bidi dabego e tama wabo dao, ‘Agai tigidali bidi nai mawai dao. Bidi me nai meni yai bidai menio,’ augwaligo te po wabo dao.
JOB 31:32 Mu tama. Te gasa bulu bidi dabe augwali piabo be meni ebo eno sulama, augwali te hanu sunumide olo bidimainu sula tagalobeo. Mu meni. Eno augwali ena beba oda sai dao.
JOB 31:33 Te bidi mebago augwa dwai sę elama, augwa ma dualobo dao. Tama eno me ena dwai sę elama, ena yali dwai sę dualai tigi sogo da, teda ena bede ena geme dulaluama, tama ena abagibolo po wagi menio. Te tama tibogo, ena bulude we bidide wi ebo ąǫ igi dao. Tiyu, augwaligo eno yali dwai sę sulama, ena posobo po olama, ena doligi dao. Tiali goli, eno dwai sę me ebe. Eno dualabo dwai sę menio.” Jopgo te po wai.
JOB 31:35 “Hobede ya, bidi me deli bidibaso, eno po waboba olo sagana munama, odigi sogo da, te usu igi dao. Eno e tama po wali, ‘Eno magi sę me elama, te po dąį ilama, te po bomo elama obao. Tama megi da, God Tigidali Bomo Elalubo Bidigo eno tigidali po wei ponomai yaiba. Te aga eno te po tų ebo odabo bidi da weyu, agai eno yali dwai sę kisilibo po pepade asęmainao.
JOB 31:36 Tama eno dwagi yai homu elama, te pepa selama, eno nagede tolaibao, tama te pepa eno tobolude te king tuni bidigo madi tobolude mubo ąǫ yaibao.
JOB 31:37 Tama ena Godigo gesabidiba kingo wai doligi pabo ąǫ elama, tama agabolo eno yali sę dabe tigidali po pusa magi dao.’ Eno te po wagi da,” Jopgo te po wali.
JOB 31:38 “Ma, eno gasa bidi dali dwai kolesaga elama, tama agai tǫ wi selama, tama te tǫ eno abelesiąbadi nai wai bulama, tama te tǫ aga digi gela genuai mu olama, wado genuai mu eyu da,
JOB 31:40 tama teda eno te wit nai dali, bali wai dali si te tǫde bulubo si, teda te dwai gąų yai bono dali, olo nosai si naga te tǫde holomainao,” wali. Jopgo po tama silali.
JOB 32:1 Tama megi da, Jop aga abagi selago suali, Jop agai dwai sę me yai menio olama, po bomo elama, aga doloba pai bidi dao olama, po bomo ebaso, augwaligo Jopgo po wei me ponobe.
JOB 32:2 Tiali goli, gesi bidi me deli augwali pagede bidama, augwaligo po wabo odaluali. Agai nogi Elihu, te Badakelgo wai. Elihu te Ram sibigo wai, tama te Ram te Bus hani. Tama Elihu agai wado po genuai mu Job dali wainu yali. Magi baso meni. Jopgo te po wali, Jop agai da, dwagi yai kolesaga ebo dao olama, Godigo ebo kolesaga da, dobo dao wali pode.
JOB 32:3 Tama agai Jop aga abagi sela dali me wado yali. Magi baso meni. Augwaligo Jopgo po wei bugagia ponabo usu isąbaso. Augwaligo po olo e tama wali, Jop agai dwai sę elama, dwai kolesaga dabe yai dao wali.
JOB 32:4 Elihu aga pedauwali pania selama, te monu dabego po omainu yai. Tama megi tama agai homude yali po Jop dali pusainu yali.
JOB 32:5 Aga sębę genuai mu yali. Magi baso meni. Agai suali, te bidi selago Jopgo po wei dolo ponisąma ebaso.
JOB 32:6 Megi da, Elihu, te Badakelgo wai, te Bus hanigo wai, agai e tama po wali, “Ena gesi bidi, tama dage da polo monu dabe dao. Tama tibaso, hasia da, ena wi elama, tama ena hale eyu yaide, eno homude yali po dagebolo pusabo yai goli, tagalai dao.
JOB 32:7 Eno e tama homu yali. Dagego kibu be hauwa mu da weyu, tama dagego homude yali dwagi yai po naga pusugowe weyu tonaludali digi dao.
JOB 32:8 Tiali goli, bidi mego kibu be hauwa elama, dwagi yai homu kolesaga agai naga elalugobeo. Menio. Tigidali Bomo Elalubo Godigo Mobo Bidi daba aselama, da dwagi yai homu kolesaga dabe mabo dao. Tama tibaso, polo monu dabego naga te dwagi yai kolesaga dali, dwai kolesaga dali si dagalogobeo.
JOB 32:10 Tama tibaso, eno me ena homude elalubo po pusaibao. Tama eno homugo dagego me odao,” Elihugo te po wali.
JOB 32:11 “Eno odama, dagego po tigidali osola suali. Dagego yaide dwagi yai homu kolesaga elalubo po naga homugo gegeyu, bomai sę mu yali, tama Jopbolo pusali. Tama eno dagego pusubo poba olo sagana muyu odaluali.
JOB 32:12 Tama eno suali, dage me deligo Jopgo po dolo menio olama wabo sube. Tama dagego agai po wei dolo ponobeo.
JOB 32:13 Tiali goli, dagego e tama wagio. Te dwagi yai homu da, God aga digi Jopgo po wei ponomainu olama sula tagalao. Bidigo da, usu egobeo. Te tama wagio.
JOB 32:14 Te bidi Jopgo ena dali po me mibeo. Menio. Te dagebolo naga po wai dao. Tiali goli, agai te po enabolo me wai tigi sogo da, teda eno dagego wei ponani po tiwai wei ponogi menio,” wali.
JOB 32:15 “Jop, suao. Naga abagi dedego homu kolesaga dęą salio. Magi baso meni. Nago augwali dolama, mu aiyaba mu elaluali. Augwaligo pedauwali mu pania sali. Tama augwaligo po meba ma wabo usu egobeo.
JOB 32:16 Suao, augwali olo mu dolalubo. Eno homugo augwaligo po meba ma wabo ąǫ ebe. Tama tibaso, eno tonaluabo ąǫ me ebeo.
JOB 32:17 Te eno homu kolesagade pusabo da. Eno te eno po meba nage dali pusaibao.
JOB 32:18 Magi baso meni. Eno homude hauwa mu elalubo nago po wei ponabo. Tama eno homude me dąų wagobeo.
JOB 32:19 Po eno pusabo po yaide, eno haligade mu pągąna palio, te wain ąį te meme kibu waligo nigai botol da pągąna pabo tiwai yalio. Tama pąde te kibu meme wali pisila pelama, te wain ąį gelabo tiwai tama yalio.
JOB 32:20 Teda mu tama mu dao. Eno pusaibao. Tama eno tabi duanu bidimainu yaibao.
JOB 32:21 Tama eno mu po dolo naga eno homude yali po pusaibao. Eno bidi mego odama, pusu elama wali pabo po pusogobeo.
JOB 32:22 Eno gasa bidi dabe ili po olama, pedauwali wę ilama ebo menio. Ma, tama eno te tobage kolesaga igi sogo da, teda deli sogo tama te ena nigai Godigo ena ela mugi dao,” Elihugo te po wali.
JOB 33:1 Tama Elihu agai po genina ma weyu, e tama wali. “Megi da, Jop, megi da eno nage dali po waibao. Tama eno homugo nago eno po dabe waboba olo saganama odaluao.
JOB 33:2 Megi tama eno te po nagebolo pusaibao.
JOB 33:3 Tama eno te pusubo pogo nage e tama megi ola mawaibao. Ena Godigo gedude doloba pai bidi dao. Tama eno homude yali po dolo naga pusubo dao.”
JOB 33:4 “God Tigidali Bomo Elalubo Bidigo Mobo Bidigo ena nigai dao. Tama agai mobo ena menama yaligo ena bidibao.
JOB 33:5 Polo begao, Jop, eno homugo nago ena dali pogo hwįa homu ebao. Tama nage usu ebaso da, teda nago eno po wei ponagameo.
JOB 33:6 Te Godigo gedude da, dadi si te tiwai si naga dao. Agai tǫ selama, ena nigai dao. Deli tamago nage me nigai dao.
JOB 33:7 Tama tibaso, nago enade wi elamo. Eno genuai sęgę nageba munama, nage aiyaba elalugobeo,” wali.
JOB 33:8 “Tiali goli, eno nago po odali. Nago po bomo elama, e tama wali,
JOB 33:9 nago dwai kolesaga me yai menio, po wali. Tama tibaso, nage Godigo gedude meda meni yai bidiba. Tama nago magi nai mede sę menio, po wali.
JOB 33:10 Tama nago e tama po wali, Godigo ena tonobo da, aga boi bidi tonobo ąǫ elama, agai nage sęgę mani, te dwai sę ebo bidi dabolo mabo yali gilama.
JOB 33:11 Agai nago sągą haligago gebelali tiwai yali, wali. Tama nage menaba pabo si da, teda agai nago sągą pasalu bugagia osasa bilibo dao, wali.”
JOB 33:12 “Tiali goli, Jop, odao. Nago te wali po da, dolo menio. Tama megi da, eno nago po e tama ponaibao. God da, polalubo mu dao. Tama agai homu kolesaga dali, bomo dali sigo da bidigo bomo dali, homu kolesaga dali si edelai dao.
JOB 33:13 Magi baso nago Godibolo po hauwa weyu, e tama wabo da, agai da bidi dabego po wei ponobo meni, magi baso nago te po wabo dawe?
JOB 33:14 Tiali goli, God agai po dabolo haniani sunumidu mabo dao. Tiali goli, bidi dago agai po me sogo konebo menio,” wali.
JOB 33:15 “Da hulide pibo sogo da, Godigo haniani na dabe dabolo mabo dao,
JOB 33:16 tama te na dabede da, da ola mabo dao. Tama da dwagi yai kolesaga menama, tama dago bidi kolesaga dodolomainu ebo dao. Tama agai te po dago homude dąų walumainu ebo dao.
JOB 33:17 Tama te kolesagago dago dwai kolesaga yabo wi ilibo dao. Tama agai dago tobolu gagea pabo aiyaba tamunubo dao.
JOB 33:18 Magi baso meni. Agai dago dwai kolesaga ebo wei meniama, tama boi bidi dabego da ela munama, tama da isibo bidi dabego buluba pidali weyu, tama tibo dao,” wali.
JOB 33:19 “Tama me sogo Godigo bidi dodolobo te tobage kolesagago tibo dao. Godigo te bidi gasi ilama, tama te bidi bede pila muyu, nomona selama, dili dabe dene tigidali sogo ebo sę ilibo dao.
JOB 33:20 Tama aga nai tuabo hagela homu ebo dao. Te bidi dabego dwagi yai mi dabe sesebaso, me tagalobo dao. Agai te tonobo da, te olo nai tonobo ąǫ ebo dao, tama agai munu me tugobeo.
JOB 33:21 Agai tigi nomona selama, tama dili pulu hą ebo dao. Tama agai dili pulu hania ebo dao.
JOB 33:22 Pąde aga mu tama isabo ąǫ ebo dao, tama bidi elama isilibo ensel bidigo aga silagasabo dao. Tama aga isai bidi dabego buluba tamadi paibao,” wali.
JOB 33:23 “Tiali goli, ma te Godigo ensel mobo bidi hauwa mu tomode deli digi aselama, te bidi tau sagasobaso da, teda agai dwagi yai kolesaga naga wali pomainu yaibao.
JOB 33:24 Tama ensel bidigo te bidi hobede ebaso, tama Godibolo e tama hanalu waibao, ‘Nago te bidi hobede elama, tama te bidi isibo bidigo buluba pomainu sula tagalamo,’ te po waibao. ‘Magi baso meni. Eno polo gegali, te bidi ma usu ilabo sunumi elalubao,’ ensel bidigo te po Godibolo waibao.
JOB 33:25 Tama teda te bidigo tigi ma usu elama, bomo ma yaibao. Awe, te aga gesi bidide bidali tiwai tama ma yaibao.
JOB 33:26 Tama aga gedu haluasa po wabo si da, teda Godigo agai gedu haluasa po wabo wei elama, tama aga dwagi yai sę ilaibao. Tama aga God pageba pelama, dwagi yai homu mu yaibao. Tama Godigo aga bidibo sogode aga nai dabe dolo ma dodola mawaibao.
JOB 33:27 Tama te bidigo gasa we bidi dali pusuyu, e tama waibao, ‘Eno dwai sę yai goli dao. Eno dwagi yai kolesaga me yai menio. Tama tibaso, Godigo eno tigide haniani sę mu igi dao. Tiali goli, agai ena hobede elama, agai te sę ebeo. Menio.
JOB 33:28 Agai ena ma dobola selama, tama ena isibo bidigo buluba pabeo. Ena me bidiyu yaide, bulu ula me subaso, dwagi yai homu ebao,’ po wabo dao.
JOB 33:29 Si sela sogo Godigo te kolesaga we bidi dabe dali ebo dao.
JOB 33:30 Magi baso meni. Agai augwali ma selama, tama augwali me isigobeo. Mu menio. Augwali bidiyu yaide, Godigo we bidibolo mabo giliga ula subo dao,” wali.
JOB 33:31 “Megi da, Jop, nago odao. Eno nage dali pusabo po meba elalubao. Tama tibaso, pedauwali pania selama, eno po waboba olo sagana munama, odao.
JOB 33:32 Tiali goli, ma nago po meba elalubaso da, teda nago pusao. Eno odaibao. Magi baso meni. Eno wei mu yali, te bidi dabego odama, nago dwai sę dabe me ebeo homu emainao.
JOB 33:33 Tiali goli, nago po meni baso da, teda pedauwali pania selama, eno po naga odao. Tama eno nage ola menama, tama nago dwagi yai homu kolesaga sagameo,” Elihugo Jopbolo te po wali.
JOB 34:1 Tialima te Elihu agai po ma weyu, Jop dali, aga abagi sela dali, augwalibolo e tama po wali.
JOB 34:2 “Dage dwagi yai homu kolesaga konea sai bagego da, dwagi yai kolesaga hauwa mu elalubao. Dagego eno poba olo sagana munama, bugagia odao.
JOB 34:3 Dago pedauwaligo nai dabe dwagi yai yaliwe, ma dwai yaliwe olama, hanala subo dao. Te tiwai dago ologo da, bidigo po odama, tama dagala subo dao.
JOB 34:4 Tama da dena digi dena wali po osola sumainao. Tama dago koneaibao, mena po dwagi yai doloba pai yaliwe waibao,” wali.
JOB 34:5 “Jop agai e tama po wai dao. ‘Eno magi sę me dolobeo,’ po walio. ‘Tiali goli, Godigo doloba pai kolesaga enabolo ebeo,’ po wali.
JOB 34:6 ‘Eno magi sę me dolama, magi dwai sę me yai menio. Tiali goli, Godigo homugo ena tibo po wabo bidi dao olama, tama ena dolama sęgę mu mabo dao. Te ena agai enego enebo tiwai mu elama, tama ena usu ma yabo ąǫ ebe,’ Jopgo te po wali.”
JOB 34:7 “Mena gasa bidigo Jopgo yali dwai sę tiwai yai dawe? Jopgo Godiba posobo po genina mu wali.
JOB 34:8 Tama me ma, agai yaide dwai kolesaga ebo bidiba kisa sigi pali. Dwai bidi dabe da, te aga abagi solo dao.
JOB 34:9 Agai te tobage kolesaga dabe ebo dao. Magi baso meni. Agai e tama po wali, ‘Ma, dago yaide God wei ebo kolesaga dabe eyu da, dago mena dwagi yai nai saibawe? Eno homugo te meni yaiba.’ Agai te tobage po wai dao,” wali.
JOB 34:10 “Tama dage bidi dabe, dagego dwagi yai kolesaga elalubao. Jopgo te tobage po obaso, eno po odiąo. God Tigidali Bomo Elalubo Bidigo dwai kolesaga me egobeo. Mu menio. Dwai sę ebo homu te Godide digibulu mu elalubo dao.
JOB 34:11 Agai da bidi dabe dago kolesaga dolo osola sulama, tama dago te yali sęde naga usu nama, te dene mabo dao.
JOB 34:12 Eno mu po tama obao. God Tigidali Bomo Elalubo Bidigo bidi me deli olo me dolama, tama dwai doloba pisąwai kolesaga me egobeo. Dago te agai dwai sę ebo homu ebo usu egobeo.
JOB 34:13 Tama me ma, dego mu God sę menama, e tǫ sese tonalumainu sę mawai dawe? Te bidi me meni.
JOB 34:14 Ma, God aga naga homugo koneama, tama aga mobo ma sigi sogo da, te tigidali bidibo nai dabede,
JOB 34:15 teda te tigidali tǫde bidibo nai dabe deli sogo tama isigi dao, tama da we bidi me tǫ ma gagagi dao,” Elihugo te po wali.
JOB 34:16 “Tama megi da, Jop, odao. Te nage homu kolesaga elaluba wida, nago eno wabo poba olo bugagia munama, odao.
JOB 34:17 Ma, Godigo yaide doloba pai kolesaga wei isąnama yali da, teda aga mena tama ma aga king bidiyu yaide e tǫ tonaluaibawe? Tiali goli, God agai genuai bomo elaluyu yaide, tama agai tigidali sogo doloba pai kolesaga naga ebo dao. Tama nago magi baso Tigidali Bomo Elalubo God po tų ela menama, tama dwai sę yali dao po obawe?
JOB 34:18 Te olo bidi mego te king mebolo naga dwai king mu dao me wagobeo. Tama me, genuai bidi mebolo te olo bidigo nage bidi dwai dao po me wagobeo.
JOB 34:19 God deligo naga agai te tama po wabo usu yaibao, magi baso meni, agai te tigidali we bidi nigai dao, tama agai gedude tigidali deli tigi poąį naga bidibao, te augwali doado bage hauwa elalubo bidi dabe me, te doado bage hauwa elalusiąbo bidi dabe me, tede moni homu me elalubeo, te tagalao. Te tigidali bidi Godigo gedude deli tigi tiwai naga bidibo dao.
JOB 34:20 Agai deli sogo naga tama da we bidi isimainu ebo dao. Te genuai nogi yai me, genuai bomo yai me, tagala, te huli tomo mude God agai te we bidi noma somainu elama, tama augwaligo bidibo ula hulide silibo dao. Te aga genuai bomogo tama tibo dao,” Elihugo te po wai.
JOB 34:21 “Godigo yaide, da we bidigo kolesaga tigidali sula silama, da bilibo madi sese tama sula silibo dao.
JOB 34:22 Tama tibaso, te dwai kolesaga ebo we bidi dabego hulia sai duala sabo madi me elalubeo.
JOB 34:23 Awe, Godigo dago kolesaga sese konea pai dao. Tama tibaso yaide, agai da osola sumainu agai po tų ebo madi pabo tagalomainu egobeo.
JOB 34:24 Te agai te genuai bidi dabe aiyaba elaluama, silainu eyu da, teda agai augwali mena tama tiwai bidi yaliwe olama gegegobeo. Meni. Agai augwali polo konea pela silai dao. Agai augwali sela sąnama, gasa bidi hasegelebo usu yaibao.
JOB 34:25 Agai augwaligo ebo dwai kolesaga sese mu konea silai dao. Tama hulide agai augwali aiyaba elaluama, mesegelama, tagalobo dao.
JOB 34:26 Agai we bidigo gesabidide me agai augwali tigide dene ilibo dao, te we bidi dabe augwaligo sumai hagede. Te bidi dabego te dwai kolesaga ebo we bidide ebo gilama,
JOB 34:27 agai augwali tigide dene ilibo dao. Magi baso meni. Augwaligo aga tudi ola mobaso. Tama me augwaligo God agai wei ebo kolesaga wali pisąma ebaso tebo dao.
JOB 34:28 Augwaligo nai meni yai bidi dabe dali dwai kolesaga yali, tama te bagego Godibolo i wali. Tama Godigo augwaligo i odali.
JOB 34:29 Tiali goli, Godigo magi sę me igi menigi sogo da, teda dego mu Godigo dwai page elalubao po wagi dawe? Ma, agai gesabidi dualigi sogo da, teda de aga pageba mu pigi dawe? Tiali goli, agai tigidali we bidi dali, tigidali bulu tǫ kantri dali si tonalubo dao.
JOB 34:30 Te dwai bidi dabe king pedalama, tama te we bidi dwai sę ebo sunumidu kegasa pidali weyu, Godigo tigidali kantri tonalubo dao,” wali.
JOB 34:31 “Jop, nago te nago dwai sę yali po te Godibolo pusaliwe? Nago te dwai kolesaga ma egobeo po agabolo waliwe?
JOB 34:32 ‘God, nago eno nago usu niba kadu wasiąbo kolesaga nago enabolo ola mao,’ te po nago agabolo hanalu waliwe? Ma, ‘Eno dwai sę yai baso da, teda eno te kolesaga dabe sese tagalaibao,’ nago te po me waliwe?
JOB 34:33 Nago te po wai goli, Jop, nago Godigo ebo kolesaga wei isąbaso da, teda nago homugo naga godolo ebo sę agai emaina homu igio. Tiali goli, naga digi dagala sulama, mena kolesaga nagede dwagi yai da homu ebo kolesaga dagala sao. Te eno sę meni. Ma, nago dwagi yai kolesaga me elaluba wida, teda te homu kolesaga dabolo megi pusao,” wali.
JOB 34:34 “Te eno te po te genuai homu kolesaga yai bidi dabego eno te po odobo si da, teda augwaligo enabolo e tama po waibao,
JOB 34:35 ‘Jop agai te page konesiąwai po olama, tama agai po sese geda muani dao’ po waibao. ‘Agai homu kone palama, po pusubo menio,’ wagi dao.
JOB 34:36 Jopgo te dwai kolesaga ebo bidi dabego po wei ponobo tiwai ebo dao. Tama tibaso, eno homugo Godigo yaide Jop me usu sidu genama, agai po hasegelebo si tagalomainu yaibao.
JOB 34:37 Agai dwai sę yai goli, nosali ugwadu agai God dali tobolu gagea pali. Agai da dali olo nai dao homu eyu, po si konila eyu, hwįanio. Tama agai wado po hauwa mu Godiba walio,” Elihugo te po wali.
JOB 35:1 Tama Elihu agai po genina ma weyu, e tama wali,
JOB 35:2 “Jop, nago te po wali, ‘Eno kolesaga dwagi yai, ma Godigo kolesaga dolo menio,’ po wali. Nago homugo te po dolo te wali dawe?
JOB 35:3 Me ma, nago e tama po wali, ‘God, ma eno dwai kolesaga isąma yali da, tego nage mena tama tau saibawe? Tama mena tama dwagi yai nai nageba pedalaibawe?’ Nago Godibolo te tobage po wali te dolo menio,” wali.
JOB 35:4 “Megi da, Jop, eno nage dali, nago abagi sela dali, wali po wei ponaibao.
JOB 35:5 Nago dagaluba tonama, te pǫ dabe suao. Augwali ugwanu mu bidibao. Godigo te dagalu dali, pǫ dali nigai dao.
JOB 35:6 Ma, nago dwai sę yai goli, tama nago aga dolobo usu egobeo. Nago dwai sę hauwa mu ebadi me, tagala. Tego aga mena tama mu dolaibawe?
JOB 35:7 Tama ma, nago doloba pai sę naga idubadi geani da, tego God mena tama tau saibawe? Tama agai mena dwagi yai nai agai nogode saibawe?
JOB 35:8 Ma, nago dwai kolesaga eyu da, tego da, bidi da naga dolaibao. Tama ma, nago doloba pai kolesaga eyu da, tego me bidi da naga tau saibao,” wali.
JOB 35:9 “Hauwa sogo bomai bidi dabego gasa bidi dabe aiyaba elaluama, mesegelama, tagalobo dao. Tama te bidi dabego gela genuai mu olama, tama gasa bidi dabego augwali tau somainu i wabo dao.
JOB 35:10 Tiali goli, bidi mego e tama tiwai i me wabo menio, ‘Te Godigo ena nigai da. Aga menade bidibowe? Agai da dwai sogo pedalobo si agai dago tabi dili ilama, tama da dwagi yai homu iliyu, balia dabe wabo dao.
JOB 35:11 Agai da ola mabode da homu kolesaga hauwa mu sabo dao. Tama dago homu kolesagago bulu ba hasa dabego kolesaga edelai elalubo dao.’ Te sęgę tolobo bagego te po wabo dao.
JOB 35:12 Te mu, te bidi dabego tau somainu i wabo dao. Tiali goli, augwali tobolu gagea pelama, tama dwai kolesaga ebo bidi dabe dao. Tama tibaso, Godigo augwaligo i wabo odobo menio.
JOB 35:13 Augwaligo doloba pai kolesaga meni. Tama tibaso, God Tigidali Bomo Elalubo Bidigo augwaligo i wabo odogobeo.
JOB 35:14 Tama Jop, eno homugo agai nago i wabo odogobeo. Magi baso meni. Nago polo wali, nago God subo menio wali. Me ma, nago e tama wali, Godigo nago po tų odobeo po wali. Tama nago bobobage sogo mu tonalubao po wali. Tiali goli, agai odobeo.
JOB 35:15 Tama me ma nago e tama po wali, God agai dwai kolesaga ebo bidi dabe tigide dene ilibo menio po wali. Tama augwaligo ebo dwai kolesaga teba me homu kone ebo menio, nago te po wali.”
JOB 35:16 “Jop da, page meni yai olo tibo po naga wabo bidi dao. Agai dwagi yai homu kolesaga menio, tiali goli agai po hauwa wabo dao,” Elihugo te po wali.
JOB 36:1 Tialima Elihu agai po genina ma weyu, e tama wali,
JOB 36:2 “Jop, nage dua bolo bididuao, tama eno nage genina mu ma ola mawaibao. Magi baso meni. Eno po meba elalubo te Godigo pode homu kone palama, tama pusaibao.
JOB 36:3 Agai ena nigai, ena haniani dwagi yai kolesagago pągąnalubao. Tama megi eno te koneani kolesaga po pusaibao, tego nage e tama ola mawainu, Godigo yaide doloba pai kolesaga sesemane idubo dao.
JOB 36:4 Mu tama obao, eno tibo po me deli wabo menio. Ena konea pai bidi mu nage dali bidibao,” wali.
JOB 36:5 “God aga genuai bomo elaluyu yaide, agai te bomogo agai homugo yainu yali sę eyu naga ebo dao. Tama agai we bidi dabego ebo kolesaga hobede mu ebo dao.
JOB 36:6 Ma, agai suali yaide, we bidi dabego dwai kolesaga ebaso da, teda agai augwali bidimainu sula tagalobo meni. Tama agai nai meni yai bidi dabego sęgę dodolobo dao.
JOB 36:7 Agai doloba pai we bidi tonaluyu, tau sabo dao. Tama we bidi dabego augwali genuai nogi tigidali sogo mabo dao, te augwaligo te king dabebolo ebo tiwai yali gilama.
JOB 36:8 Tiali goli, dwai sogo pedalama, mani sęgęgo te we bidi mesegelama, tama augwali nogo aligabo bono duani tiwai bidibo dao.
JOB 36:9 Tama da, Godigo augwalibolo e tama wabo dao, te dwai sogo augwalibolo pedalali da. Magi baso meni. Augwa digi augwa nogi ugwaba selama, haniani dwai kolesaga ebaso.
JOB 36:10 Tama agai augwalibolo dwagi yai kolesaga wali pomainu ola mabo dao. Tama agai augwalibolo ge neyu, dwai kolesaga tudiba muao po wabo dao.
JOB 36:11 Tama augwaligo agai po wali pelama, aga dologode bidibaso da, teda tigidali sogo augwali bugagia naga bididuaibao.
JOB 36:12 Tiali goli, augwaligo po odisąma yali da, teda augwa boi bidi dabego augwali ela muagasaibao. Tama augwaligo magi nai augwali tigiba pedalaliwe olama, konegobeo,” wali.
JOB 36:13 “Te God tudi ola mabo bidi dabe, augwaligo genuai sęgę augwaliba sabalobo si, augwaligo God dali sębę genuai mu ebo dao. Tama augwaligo Godigo augwali tau somainu i wabo menio.
JOB 36:14 Te tama tiyu yaide, augwaligo dwai kolesaga te we bidi gabidide ebo dao. Tama tede augwali gesi bidi bidibadi tama isibo dao.
JOB 36:15 Tiali goli, Godigo te bidi dabe dene dali, sęgę dali si me tolomainu sula tagalobo dao. Magi baso meni. Agai augwali dwagi yai kolesaga ola mawainu tama tibo dao. Tama te tibo sunumide augwali ma selama, tama augwali bugagia bidimainu ebo dao,” wali.
JOB 36:16 “Jop, megi da suao, nage moni sęgęde mu bidiyu, tama nage pąde silabo ąǫ te ebao. Tiali goli, Godigo nage bega sabo po weyu, ma oda selama, tama nage dua bidimainu elama, tama nage te dwagi yai nai dabe ma mawaibao. Tama magi naigo nage me paliama me egobeo.
JOB 36:17 Tiali goli, megi da, Godigo nage tonobo da, dwai sę ebo bidi tiwai tonobo ąǫ te ebao. Tama agai nage dali po tų ela mayu, tama nage tigide dene genuai mu te mabo sę yali dao.
JOB 36:18 Tiali goli, dua dao. Tiyu, naga homu sębęgo ebo digi tego nago Godibolo posobo po omainu ebo dao. Tama tiyu ma, nage ma oda sabo kolesaga ma genuai mu yaliwe wabo, tama nago God tagalabo.
JOB 36:19 Ma, nago Godibolo tau somainu i weyu da, ma naga bomo naga usu siyu da, tego da nago megi te elalubo sęgę siligobeo.
JOB 36:20 Nago homugo hulia saiba homu kuna wei igio. Te tobage bidi dolobo sę deli sogo te we bidi tigiba pedalobo dao.
JOB 36:21 Nago megi nago tigide ebo sęgę godolo me ebe. Tiali goli, nago dwai kolesaga yabo naga godolo yali bogo,” wali.
JOB 36:22 “Bugagia odao. God dagalude mu bidiyu yaide, genuai bomo mu elalubao. Tama aga te dwagi yai po ola mabo bidi dao. Dego mu agai ola mabo tiwai yaibawe?
JOB 36:23 Tama dego Godigo yabo sę dabe po dego ola mawaibawe? Ma, dego agabolo ‘Te nago geda muani’ po wabo usu yaibawe? Te tama tiabo bidi mu meni.
JOB 36:24 Te bidi dabego Godigo nigali nai dabe sulama, Godigo nogi ugwaba selama, balia po wabo dao. Tama tibaso, nago me te tobage kolesaga deli naga yao.
JOB 36:25 Te tigidali we bidigo Godigo yali sę dabe suali. Tiali goli, augwaligo agai yali sę kuna konebeo.” Te bidi Elihugo Jopbolo te po wali.
JOB 36:26 Tama Elihu agai po genina ma weyu, e tama wali, “God da, polalubo bidi mu da, tama aga ugwanu mu dao. Dago aga munu me kuna konegobeo. Tama dago agai kibu be nisu naga yaliwe olama, konegobeo.
JOB 36:27 Agai wę ugwaba holama, tama tulubage gagamainu ebo dao.
JOB 36:28 Tama te tulubage pǫ tagalama, tǫba tulubo dao. Tama we bidi tuabo wę hauwa elalubo dao.
JOB 36:29 Da tigidaligo munu me konebe, te pǫ genuai mu elama, tama Godigo ugwa be nigibo konebo menio. Tama dago konebe, mena tama te pǫde kulukulu olama ebowe olama, konebo menio.
JOB 36:30 Godigo te be sele ula tigidali te bulu dabeba dobola palobo dao. Tama ula tamu ąį dologoba mu pelama, te tigidali nai pepeli diliba mu ilibo dao.
JOB 36:31 Godigo tulubage dali, pǫ dali si tonalubo sę eyu, tama te kolesagago naga tigidali we bidi tonalubo dao. Tama agai tigidali tubo nai dabe bugagia tǫde holomainu ebo dao. Tama te we bidigo nai hauwa mu elalubo dao.
JOB 36:32 Te be sele ula agai nogo sigo tolalubo dao. Tama ene yali gilama agai dąį ilali naiba enebo dao.
JOB 36:33 Te be kulu wabo si da, tego ola mabo dao, te tulubage dali, wali dali si asainu tama tibo dao po wabo dao. Tama te bulmakau kibugo me aga asobo gagama eyu, konebo dao,” Elihugo te po wali.
JOB 37:1 “Te be kulu wabo si da, ena wi elama, homu menigasąbo dao.
JOB 37:2 Odao! Dagego be kulu wabo odao! Te da Godigo hae olama, i bomonama te obao.
JOB 37:3 Agai te be sele tigidali buluba pelama, te tǫ sabi simanigi paliba usu nigi pomainu ebo dao.
JOB 37:4 Tama nosali agai hąe olama, i wabo po dago odobo dao. Tama agai genuai bomo dago subo dao. Tama te Godigo tama tibo si da, te be sele ula tigidali buluba pela silibo dao,” wali.
JOB 37:5 “Godigo pedauwalidu gasagi yai po mu wabo dao, te be kulukulu wabo tiwai, te dwagi yai mu dao. Tama agai haniani sę mu eyu, te dago kolesaga edelai mu dao.
JOB 37:6 Agai olo pogo obadi, te ais dali, tulubage dali si tǫba tulubo dao. Agai po obadi, genuai tulubage mu tulubo dao.
JOB 37:7 Te tobage kolesagago we bidigo sunumi pania sabo dao, tama augwali sę ebo usu egobeo. Agai te tama tibo da, te we bidigo agai ebo sę dabe konemainu tibo dao.
JOB 37:8 Tama te tama tibo sogo da, bulu hasa dabe augwa buluba geme duala sigi peyu, te augwa bede bididubo dao.
JOB 37:9 Te bomai wali dabe augwa pesagedu asobo gagalama, asobo dao. Tama te genuai waligo moni kedau sesebo sogo asobo dao.
JOB 37:10 God agai wali pona palobosi, te ais pedalobo dao. Tama te genuai wę te ais gagalama, tama mu dila pabo dao.
JOB 37:11 Agai wę hauwa te moni dagalu pǫba sabobo dao, tama be kulu omainu elama, be sele tigidali buluba pela silibo dao.
JOB 37:12 Godigo po obaso, te pǫ dabe augwali tigidali tǫ pedai buluba pela silibo dao, te agai augwaliba ya wali sę emainu.
JOB 37:13 Me sogo da, agai we bidigo kolesaga dodolomainu tagala palobo dao. Tama me sogo da, augwali dwagi yai sę elama, tau somainu ebo dao. Tama me sogo da, agai tǫ ma usu ilimainu te dagalu pǫ dabe tagala palobo dao,” Elihugo te po wai.
JOB 37:14 “Jop, nage dua bidiyu, olo saganama, tama homu kolesaga selama, Godigo haniani bomai sę dabe Godigo ebo sę po sao.
JOB 37:15 Ma, nago Godigo te dagalu pǫ dabe mena buluba pomainu ebo sę page koneaniwe? Ma, agai te be sele ula ilibo sę page nago konea sai dawe?
JOB 37:16 Ma, nago Godigo te pǫ dabe dagalude walalumainu ebo kolesaga nago kone dawe? God agai te tigidali homu kolesaga elaluyu, agai te dwagi dwagi yai sę dabe ebo dao. Tiali goli, nago te tobage homu kolesaga menio.
JOB 37:17 Te posolai wali te pada badu saut badu asobo si da, tama teda nago tigi me, ugwa dali side posolo genuai mu yaibao. Nago magi sę me elama, te wali togologobeo.
JOB 37:18 God agai dagalu nigilama, tama diniginai. Tama te dagalu te gesabidi subo nai dula te brasgo nigai tiwai dao. Mena tama tiali, nago agai te sę dabe ebo tau saibawe?
JOB 37:19 Ma, nage usu yali wida, teda nago dago Godiba wabo po ola mao. Magi baso meni. Dago homu kolesaga kuna konea pisąbaso, tama dago agai po tų ebode wabo po niga mubeo.
JOB 37:20 Ma, Godigo odali digi yaide, eno po aga dali elalubaso da, teda agai eno po wabo odaibawe? Teda agai eno wabo po godolo me egobeo,” wali.
JOB 37:21 “Suama. Te waligo pǫ sela sąnama, tama dagalu hania elama, giliga ula genuai mu te ebao. Tama dago te giligaba tonobo usu egobeo.
JOB 37:22 Tama me badu pada badu not badu te moni ula mu dagaludu asobao. Agai au da, te gol masigi tiwai dao. Te da te God aga au te munama, tama genuai ula dali, moni bomo dali si te asobao.
JOB 37:23 Tigidali Bomo Elalubo God te ugwanu mu elalubo, tama da aga pąba pabo usu egobeo. Agai genuai bomo mu elalubo, tama aga doloba pai mu dao. Agai te po tų dodolobo sę ebode doloba pai kolesaga naga ebo dao. Tama agai da olo dali aiyaba elalugobeo.
JOB 37:24 Tama tibaso, we bidi agade wi ebo dao. Tama agai olo te bidi dabe augwaligo homugo augwali homu kolesaga hauwa elalubao homu ebode odobo menio,” Elihugo te po wai.
JOB 38:1 Te Elihugo po ola silibo si, tama te Genuai Bidi te genuai tulubage dali, bomai wali dali si tomode bidiyu, tama agai po e tama wali,
JOB 38:2 “Jop, nago dwagi yai homu kolesaga mu menio. Nage mena tama bidi da weyu, nago te po dabe obawe? Tama nago eno yainu ebo sę dolainu ebawe?
JOB 38:3 Megi da, nage bidi mu tiwai dolaluao. Tama eno nagebolo tigidali po hanaluyu ebode, nago eno po wei ponagameo.
JOB 38:4 Eno e tǫ nigilama, aga page dąų walobode, nage menade bididuai dawe? Ma, nago te sę dabe mu koneani wida, nago enabolo pusao.
JOB 38:5 Dego mu homu kone palama, e tǫ dąį ilai dawe? Eno homugo te nago koneai yali bogo, ma? Tama dego mu usu ni kegelama, te tǫ usu sai dawe?
JOB 38:6 Te tǫ dąų olalubo pos ni menade dolalubowe? Dego mu mone masigi munama, te tǫ ugwadu tede nigimainu yai dawe?
JOB 38:7 Tama te sę ebo si da, te dagalu hǫ dabe dwagi yai homu pemene elama, balia po wai dao. Tama te ensel dabego me dwagi yai homu pemene elama, hae wali.”
JOB 38:8 “Tama te tamu wę tǫ tabidu buluba podilasąbaso, dego mu sunumi paliai dawe? Tama dego te tamu ąį aga dąį tomode tama elaluai dawe?
JOB 38:9 Te tamu wę gesi sogo pedalali sogo da, eno aga pǫgo mesegaluai dao, te aga gudubo ugwa tiwai elaluai dao. Tama eno te wai bǫų agai idago te wai bǫų ugwa gudulubo tiwai, te pǫgo eno aga belai dao.
JOB 38:10 Tama eno te tamu wę te obo yali gilama bogo badu eno dąį ilai dao, tama te soabo sunumi paliai dao.
JOB 38:11 Tama eno tamu ąįbolo e tama po walai dao, ‘Nago genuai wę asobo dąį e tama dąį yagasao,’ po wai dao. ‘Habu seleyu, munu me e dąį me bolamo,’ po wai dao.”
JOB 38:12 “Jop, mena tama tiali. Nago olo pogo obadi yaide, te be posoyu, ula me yai me elalubawe? Tama nago te be posobo sę kigamu naga emainu bodolu muai dawe?
JOB 38:13 Hulia sabo da, teda ugwago bidi mesega sabo tiwai elama, tǫ mesegalubadi, te dwai bidi dabe te hulide biliyu yaide dwai kolesaga ebo dao. Ma, me sogo nago olo po obadi, te be posolama, te dwai kolesaga ebo bidi dabe noma somainu me yai dawe?
JOB 38:14 Kigamu giliga nanobo ulago te hulide susiąma yali nai te kigamu ula ebogo subo dao. Tama dago hulia sai madi susiąma yali nai, te ulade subo dao.
JOB 38:15 Hulibo sę dabe da, te dwai bidi dabego be te posobao. Tama augwali dwagi yai homu mu elama, biliyu yaide, haniani dwai sę ela bilibo dao. Tiali goli, ulago augwaligo bomo aiyaba elaluama, tama augwaligo dwai sę tagalomainu ebo dao,” wali.
JOB 38:16 “Te tamu ąį dologoba pelama, nago te wę pedalobo madi nago suai yali bogo. Tama nage te pesagede bilai dawe?
JOB 38:17 Mena tama tialiwe? Nage te isai we bidi pabo madi aiyanu mu nage dulai yali bogo?
JOB 38:18 Te tǫ genuai mu elalubo. Te nago tigidali badu sese koneai dawe? Ma, nago koneani wida, enabolo pusao,” wali.
JOB 38:19 “Te ula page buluba pabo sunumi nago koneai dawe? Tama te huli sesabigo bulu menade mu elalubowe?
JOB 38:20 Tama nago ena te ula dali, hulia sabo dali si wali pelama, pabo sunumi nago enabolo ola mawaibawe?
JOB 38:21 Jop, nage monu dabe mu da. Tama nago ena te nai sigo bulu ola mawaiba. Magi baso meni. Eno te ula dali, huli sesabi dali si nigisąma ebadi, naga idago nage ame nai yali bogo, agawe?”
JOB 38:22 “Mena tama tiali nago te ais dali, te talua ge tulubage ais si sabodubo pesage nago suai yali bogo, agawe?
JOB 38:23 Eno te nai dabe hagea selama muani naigote dwai kolesaga elama, gasa bidi dabe dali wąbi hwįbo gagalobo bidi dabe tigide dene ilimainu yai da.
JOB 38:24 Te be sele ula pedalama, tama te tedela pabo sunumi page menade elalubowe? Tama me te giliga asobo badu wali asobo sunumi menade elalubowe?
JOB 38:25 Dego te dagalude wę gamia nigilama, tama te tulubage dabego wali pelama, e tǫba tudulalumainu ebo dawe? Tama dego mu te tulubage tulubode be sele ebo te ulago wali pelama, tedela pomainu yali sunumi dego mu nigai dawe?
JOB 38:26 Dego mu te bidi meni yai bulu tǫ wa pai madi tulubage tulumainu ebo dawe?
JOB 38:27 Hasia te tǫde ni dali, nosai dabe dali holisiąbadi, tiali goli tulubagego te tǫ usu nama, te nosai dabe hauwa mu holai dao,” wai.
JOB 38:28 “Mena tama tialiwe? Te tulubo tulubage te aya me deli elalubawe? Te hulide ąį segeni ebo tulubagego aya bidibawe?
JOB 38:29 Tama te tǫde pedalubo ais dali, talua ge tulubage ais sigo ida de dawe?
JOB 38:30 Augwali te kedau sogo pedaluyu, tama te wę dabe masigi yali gilama dila pelama, te tamu ąį mesegelebo dao. Awe, te sigi ąį ugwadu dai te dila pabo dao,” wali.
JOB 38:31 “Jop, nago te hǫ hani me deli sisinama, tama te dagalude deliba sisinama dąų walaibawe? Tama nago te hǫ hani me deligo bono pįsįganama, tama te hǫ dabe tedela pomainu yaibawe?
JOB 38:32 Mena tama tialiwe? Nago te hǫ dabe augwali sunumi ola menama, tama te kibu bede mena sogo pedaluyu emainu waibawe?
JOB 38:33 Nago te dagalude hǫ dabego wali pabo bomai po page nago konealubadi bogo, agawe? Nago te tǫde nai dabego me te po wali pomainu yaibawe?” Godigo Jopbolo te po hanalu wali.
JOB 38:34 “Tama nago moni dągą olama, te pǫ dabego odama, tama te moni tulubage nageba gelemainu yaibawe?
JOB 38:35 Tama nago te be selebolo nago gasa madi me pao wabo si da, teda te be sele ulago nagebolo e tama po waibao, ‘Eno nago sę yabo naga eno tonalubao,’ po waibao, agawe?
JOB 38:36 Dego mu te bobobage dogoni yai bago te tama wę bole asaiba po omainu dego kolesaga mawai dawe? Tama dego te gogolo ba dabebolo be posobode po omainu dego kolesaga mawai dawe?
JOB 38:37 Dego homu kolesaga mu te pǫ dabe nedebo usu yaibawe? Te pǫ dabe da, te sene wę tiwai te dagalude elalubao. Tama dego augwali gea palama, te tulubage tulumainu yaibawe?
JOB 38:38 Tama dego te tǫ hogomu pu aiyana pelama, tǫ ma dila pomainu ebo dawe?” Godigo Jopbolo te po hanalu wali.
JOB 38:39 Tama Genuai Bidi agai po genina ma weyu, e tama wali, “Jop, mena tama tialiwe? Te nago te bulu hasa dabe te laion yowi te tǫ dedagede, me te bulu sesawai madi geme dualubo madi pąba asomainu elama, te laion yowi dabego ela tumainu ebaso, te augwa nasi ebo silimainu ebo da, agawe?
JOB 38:41 Tama te sisi yai kotkot ba dabe tuabo nai menia sobaso, tama nai gege bilibadi yaide, tama augwa wai dabe ena Godiba nai sainu hanalubadi, tama dego mu augwali nai mabo dawe?” te po wali.
JOB 39:1 “Jop, odao. Nago koneaniwe? Te bulu dulude bidibo meme kibugo wai ame nabo sogo nago koneai dawe? Tama me nago te hasa dia dabego wai ame nabo nago subo dawe?
JOB 39:2 Tama nisu naga polua te meme kibu dali, te dia hasa dali sigo wai augwa idago haligade bidibo, te nago koneaniwe? Tama nago koneani bogo, nisu te hasa ida dabego bogoli si sugunama, wai saibawe?
JOB 39:4 Tama te wai dabe augwa ida dabe dali buside me kala silide bidaibao. Tama augwali genuai elama, bomo ebo dao. Tama augwali genuai polo ela sabo si da, teda augwa ida taga peyu, mu tama pabo dao. Tama augwali ma asobo menio,” wali.
JOB 39:5 “Dego mu te bulu donki dabe bono pįsįgina palobaso, busiba subigila pomainu yai dawe?
JOB 39:6 Eno augwalibolo wa pai bulu, me doloba pai bulu, tama tamu elalubo bulu mawai dao. Tama augwa bulude bidibo ąǫ yaibao.
JOB 39:7 Te bulu donki dabe augwaligo koneani. Augwali hanude bidibaso da, teda bidi dabego augwali bono gebelama, tama augwaligo sę emainu hąe weyu yaibao. Tama tibaso, augwaligo te hanude wabo po dabe me kilikili wabo odogobeo. Te tudi ola mawaibao.
JOB 39:8 Tama augwali te bulu dude biliyu, augwa tuabo nai te nosai dabe, ni yabe dabe tama gege biliyu, bilaibao,” wali.
JOB 39:9 “Jop, nage de dawe? Te bulu kau kibu omaigo nago sę yaibawe? Tama hulide nago kau kibugo beba piagasaibawe?
JOB 39:10 Nago aga haliga gebelama, tama agai nago gi tǫ elebo masin kegasa bilimainu yaibawe? Tega?
JOB 39:11 Nago koneani, agai bomo genuai mu elalubo. Tama tibaso, nago homugo agai nage tau selama, nago genuai sę yaiba eyuwe?
JOB 39:12 Tama nago homugo agai nago wit nai giba pelama, tama te wit nai inayali sela aselama, te wit nai yabe dali, bo dali sela sąyao po waibawe?
JOB 39:13 Te tǫli tiwai genuai ba dabe dwagi yai homu ebo sogo da, te augwa bogo memenege ebo dao. Tiali goli, augwaligo te bobobage dogoni bago ebo gilama, augwali augwa wai dabe dali dwagi yai sę ilibo menio.
JOB 39:14 Te tǫli tiwai genuai ba dabe augwa ge tǫde mubo dao, tama tagalobo dao. Tama tǫ posologo te ge posolo ilimainu ebo dao.
JOB 39:15 Augwaligo augwa ge godolo me ebo menio. Tiyu, bidigo me, bulu hasago me te ge dabe agawaibao homu egobeo.
JOB 39:16 Te tǫli tiwai ba dabe augwa wai ma gasa bago wai tonobo ąǫ ebo dao. Tama augwaligo augwalide dwagi yai kolesaga me ebo menio. Augwa gǫų dolobaso, augwa ge odolali saganai dao homu me ebo menio. Augwa ge subigila sąsągano bilibo sę sabilibo dao.
JOB 39:17 Augwaligo tama tibo da. Magi baso meni. Eno augwali dwagi yai kolesaga me mawai menio.
JOB 39:18 Tiali goli, te tǫli tiwai ba dabe hodaluama, pabo si da, augwali bomonama mu udabo dao. Tama augwaligo bogo memenege genuai mu ebo dao. Tama udada peyu, augwaligo kibu hosde dualasa pabo bidi dabe geanobo dao,” wali.
JOB 39:19 “Jop, nago magi sę ebo usugowe? Nago te hos dabe bomo mabo dawe? Tama nago agai bobobage pedu nisi muai dawe?
JOB 39:20 Naga homugo te hos digibulu samanobo te mano yali gilama emainu naga digi nigilai dawe? Tega? Te hos dabego ga wabo bomonama mu wabo dao. Tama augwaligo ga wabogo we bidi dabe wi ilibo dao.
JOB 39:21 Te hos dabe augwaligo genuai bomo elalubode augwali pemene elama, augwali sasamano peyu, te augwa nogo sągą pidibu waibao. Tama augwali hwį yainogo bomonama mu udabo dao.
JOB 39:22 Te hos dabe augwali magi naide me wi elama, noma sabo menio. Te wąbi hwįbo genuai u badi me augwali wi me soabo menio, te wąbi hwįbode.
JOB 39:23 Augwaligo te ami bidi augwali tigide dulalumainu ebo dao. Tama augwali udabo sogo da, te hwįbo bidi dabego ene beledi kidagalo wabo dao. Tama te ami bidigo sesemone ene poa pali da, te giligade ula ebo dao.
JOB 39:24 Te hos dabego bu wabo odobo si da, augwali dua me bidibo menio. Mu meni. Augwaligo haliga tigi hodaluama, tama hwįgi pabo homu naga ebo dao. Tama augwali bomonama mu udabo dao.
JOB 39:25 Tama augwaligo bu wabo odobo si da, augwaligo ga wabo dao. Augwali te wąbi hwįbo digibulu elalubadi digi, augwaligo denami bolo odobo dao, te wąbi hwįbo denami. Tama augwaligo te ami ofisago i hae, te aga ami bidibolo wabo pode moni wąbi hwįmainu hae wabo po odobo dao,” wali.
JOB 39:26 “Jop, eno homugo nago te ba kemodagego ebo kolesagaba homu kolesaga muani bogo, tama augwali te dolo nogo badu poloba bola pabo dawe?
JOB 39:27 Teda nago digi te po wabode te ba bunutogobo dabe augwaligo be te bulu duba sę igi pabo dawe? Tega?
JOB 39:28 Augwali te bulu duba bidigi pelama, tama augwaligo be te masigi dabe yai madi, me bulu dwai madi augwaligo be sę igi pabo dao. Te tobage bulu da, augwaligo dwagi yai dualalubo bulu tiwai dao.
JOB 39:29 Augwali augwa bede dulaluyu, te hasa dabe gedu gegebo dao. Tama hasa digibulu bidibo me tagala, augwaligo subo dao.
JOB 39:30 Te bunutogobo gamigo gǫųgo te bulu hasago kaneme tubo godolo mu ebo dao. Tama wąbi hwįnama, bidi me isai tigi pulu tede munalubaso da, te kemodage sibi teba sisinagasabo dao,” God Genuai Bidigo te po Jopbolo wali.
JOB 40:1 Tama Genuai Bidigo Jop e tama po hanalu wali,
JOB 40:2 “Jop, nago pogo ena dali hwįbo tiwai walio. Ena da, Tigidali Bomo Elalubo God dao. Tama nago ena po tų ela manio. Tama megi da, eno nago eno po wei ponomainu agebele e ilibao. Nago wei ponobo usu yaibawe? Ma, meni yaibawe?” Godigo te po wai.
JOB 40:3 Tama Jopgo Godigo po wei ponoyu, e tama wali,
JOB 40:4 “Genuai Bidi, ena dolama, tama ena olo nai dao. Mena tama tilama, eno nago po wei ponaibawe? Ena nogogo pedauwali pania saibao.
JOB 40:5 Eno po hauwa mu wai dao. Tama tibaso, eno nago po wei ponoyu, po ma wagobeo,” wali.
JOB 40:6 Tama te Genuai Bidi te moni wali dali, tulubage dali side bidiyu yai, Jopgo po wei e tama ponani.
JOB 40:7 “Nage bidi mu tiwai tama dolaluao. Tama eno nagebolo haniani nai po hanalu waibao, tama nago eno hanalubo po wei ponao.
JOB 40:8 Nago po bomonama, e tama wali, nago tigidali kolesaga dolo dao, po wali. Tiali goli, nago ena magi baso po tų ela maniwe? Tama nago magi baso eno doloba pai kolesaga ebeo po waliwe?
JOB 40:9 Te nago bomo genuai mu eno bomo tiwai tama dawe? Eno i wabo da, te be kulu wabo tiwai tama wabo dao. Nago me eno te ebo tiwai yaibawe?” wali.
JOB 40:10 “Ma, nago usu yaiba homu ebaso da, teda nago ena hasegelama, tama dwagi dwagi yai au ugwa selama, tama genuai nogi dali, bomo dali si selama, tama nage te we bidigo gedude ugwade mu bidagameo.
JOB 40:11 Tama nago te bidi dabego dwai kolesaga ebo sulama, tama augwa nogi ugwaba sobaso da, teda nago sębę genuai mu elama, augwali aiyaba mu elaluagameo.
JOB 40:12 Awe. Nago dwai kolesaga ebo bidi dabe sulama, tama augwali aiyaba elaluao. Tama nago dwai kolesaga ebo bidi augwa bidibo bulude sągągo agayagameo.
JOB 40:13 Tama nago te bidi dabe tǫgo mesegelebaso, tama gasa we bidigo augwali me sugobeo.
JOB 40:14 Ma, nago te sę dabe eyu da, teda eno nago nogi ugwaba siyu, e po waibao, ‘Nago bomogo digi naga te dwai kolesaga ebo we bidi aiyaba mu elaluama, tama nago augwali mu silai dao,’ po waibao,” Genuai Bidigo te po wai.
JOB 40:15 Tama Genuai Bidi agai po genina ma weyu, e tama po wali, “Jop, nage pelama, te hasa augwaligo hipopotamus wabo hasa sugi pao. Ena digi augwali nigiyu, nage tama nigiyu tama yai dao. Te hipopotamus augwaligo kau kibugo yali gilama nosai dabe tubo dao.
JOB 40:16 Te hasa hipopotamusgo tigi genuai mu elama, tama augwaligo bomo genuai mu elalubao. Te augwaligo tabi dali, tudi dali si me bomo genuai mu elalubao.
JOB 40:17 Augwaligo danu te ni bǫ tiwai dila pai dolalubo dao. Tama augwaligo sągą boma pai mu dao.
JOB 40:18 Agai dili da, te augwaligo te dila pai bras o aingo nigai paip tiwai dao. Tama agai nogo sągą te genuai ain tiwai dao.
JOB 40:19 Te hasa hipopotamus te tigidali hasa ena God eno nigali hasago tobolu bidi dao. Awe. Enaduba deli naga augwali nigai dao. Tama enaduba naga agai bomo aiyaba elalubo usu yaibao.
JOB 40:20 Te hasa hipopotamusgo tubo nosai dabe da, te dwasianu bulu dude dabe holobo dao, te bulu hasa dabe bilalubo digi.
JOB 40:21 Te hasa hipopotamus te dwasianu ni sesane yai ni pagede piyu ebo dao. Tama pu ąįde dologode geme duala sabo dao.
JOB 40:22 Tama augwali te dwasianu ni wę sesegede elalubo ni dologode dualaluyu, bugagia toma tubo dao.
JOB 40:23 Tama te moni wę asobo sogo da, augwali wi munu me ebo menio. Tagala te wę aselama, augwaligo penaneba sabalobadi, me augwali homu nagamea pelama, bidibo dao.
JOB 40:24 Tama augwali no munalubadi da, dego mu augwali touwaibawe? Tama dego augwaligo guni pololama, augwali bono gebelama kegaibawe? Bidi menio,” wali.
JOB 41:1 Tama Genuai Bidigo po genina ma weyu, e tama po wali, “Jop, mena tama tiali nago huk sąnama, te genuai hasa pukpuk sela tuaibawe? Tama nago augwaligo hamena nago haligago gebelebo usu yaibawe?
JOB 41:2 Nago agai hamenade dedage nigilama, tama haliga gebelama, kegasa paibawe? Tama nago agai penanede hukugo kęaibawe?
JOB 41:3 Nago homu mena tama tibowe? Ma, nago aga toubo si da, teda agai nagebolo aga hobede ya po olama, tama aga tagala palao po waibawe? Agai nagebolo po dua mu dwagi yai pogo waibawe? Tega?
JOB 41:4 Agai nage dali po mia siyu, tama dage sigo deli homu eyu yaibawe? Tama aga nage dali bidiyu, nago sę bugagia tigidali sogo yaibawe?
JOB 41:5 Nago aga dali naga te negebo ba dali gagali ebo tiwai yaibawe? Ma, nago dwasianu bonode gebelama, naga wegimanigo kegasa bilimainu yaibawe?
JOB 41:6 Tama eno homugo te bisnis sę ebo bidi dabego da mone sainu po bomo yaibawe? Tama augwaligo te hasa pukpuk tologolama, denege minama, tama mone sainu maketiba sela paibawe? Tega?
JOB 41:7 Tama nago hauwa mu aga tigiba me toboluba nago sesemone hauwa mu enaibawe?
JOB 41:8 Polo be da nago nogo agaba munama, tama nago agai bomo usu siyu da, teda agai nage dali hwįbo genuai mu yaibao. Tama nago te wąbi hwįali homugo me gegeda pogobeo. Tama nago tama ma tigobeo,” wali.
JOB 41:9 “Ma, nago te genuai pukpuk dąų olama, tolaluabo homu ebaso da, teda nago te ebo homu mu gegeda palao. Magi baso meni. Ma, nago aga suyu da, teda nago dili tigidali didibila pelama, noma selama, tama nago bomo tigidali pela silaibao.
JOB 41:10 Te pukpuk pila mubadi hodolama, wąbi hwįbode aga aiyaba elaluabo bidi me menio. Tama te tiwai bidi meni baso da, teda dego ena edelebo usu yaibawe?
JOB 41:11 Te tigidali nai e tǫde elalubo nai dabe da, eno nai dabe naga dao. Tama dego mu ena dali usu si elama, tama eno bomo aiyaba elaluama, tama enabolo aga nai me mao po wabo usugowe?”
JOB 41:12 “Tama megi da, eno nagebolo waibao, te genuai pukpuk mena tiwaiwe, me agai bomo dali si po nagebolo pusaibao. Tama me ma, agai dwagi yai tigiwali po waibao.
JOB 41:13 Dego mu agai tigi abolo sela sąwaibawe? Tama de mu agai bomai penane pageba paibawe?
JOB 41:14 Agai penanede kele moni bage hauwa mu elalubo. Tama bidi dabe wi te kele dabede ebo dao. Tama tibaso, dego mu agai penane pedegaibawe?
JOB 41:15 Te hasa aga abolo boma pai elalubo dao. Tama te abolo dąų dąų mu olama, aga tigi dąų walama mu elalubo dao.
JOB 41:16 Te abolo dabe dąų mu olama, tama te abolo dabe tomode te agebele mu menio.
JOB 41:17 Augwali dąų mu ola sai madi, te magi nai mego agai abolo dagagobeo,” wali.
JOB 41:18 “Te aga sosogo wabo si da, te isi ula agai gunidu pedalama, subigila dobola palobo dao. Tama agai gedu ula te kigamu giliga pedalobo tiwai tama ebo dao.
JOB 41:19 Isi agai keledu pedalama, tama dwasianu isi subigila bola pabo dao.
JOB 41:20 Tama agai gunidu hano te sene iside nai ulai mobo tiwai tama ebo dao.
JOB 41:21 Tama agai kele ą wabo si da, agai mobogo isi dala sabo dao. Tama isi agai keledu buluba asobo dao,” wali.
JOB 41:22 “Agai mage dila pai mu dao. Tama bidi dabego aga subo si da, augwali wi genuai mu ebo dao.
JOB 41:23 Agai tigiwali me badu aga tigi meba dąų ola selama, tama munu me kilasa pabo menio. Mu menio.
JOB 41:24 Agai homugo magi nai wi me ebo menio. Aga hagawia da, te dila pai mu elalubo dao, te dilai masigi tiwai dao, te wit nai ge mimibo masigi tiwai dao,” wali.
JOB 41:25 “Aga hogodama, doligilubo si da, teda te bomai tuni bidi dabe augwali wi genuai mu ebo dao. Tama augwaligo agai wę bogoų wabo odobo si da, teda augwaligo homu dąų ola selama, magi sę me yabo homu ebo menio.
JOB 41:26 Tagala dagego hwągo elebadi, me te genuai sesemonego, dwasianu enego me enebadi me, tama te nai dabego aga me dologobeo.
JOB 41:27 Tama agai augwali tonobo da, olo nai tonobo ąǫ yaibao. Agai ain tonobo da, te kala sasi yai tiwai tonobo dao, me te kapa bras tonobo da, te ni mobi tiwai tonobo ąǫ ebo dao.
JOB 41:28 Te bidi dabego ene selama, aga ene badi, aga wi me pogobeo. Ma, te bidi dabego katapul selama, masigi waigo aga enebaso da, teda agai tigiba olo ni yabe sasi aga tigiba tulalubo ąǫ yaibao.
JOB 41:29 Te hwįbo wąbi tonobo da, te olo nosai sasi tiwai agai tonobo ąǫ ebo dao. Tama agai bobobage sesemone kę wabo odobo si da, aga wi me egobeo. Te da olo nai dabe dao, wabo dao,” te po wali.
JOB 41:30 “Te moni pukpukgo tabide elalubo abolo da, mu poa pai mu dao, tǫ sene pepeda pai tiwai dao. Tama aga pu aiyana pai madi pabo sogo da, te tigi abologo te tǫde dwasianu wę gamia nigibo dao.
JOB 41:31 Tama aga tamu wę tomode bilibo sogo da, te tamu ąį bugua sąsą paibao.
JOB 41:32 Tama aga te pali sunumi da, te wę tedela mu elama, te monu dabego ili nisi tonobo ąǫ ebo dao.
JOB 41:33 Te genuai pukpuk magi nai mede wi me ebo menio. Te gasa hasa dabe te aga tiwai me menio. Mu meni.
JOB 41:34 Agai gasa hasa dabe genuai nogi elalubo sali goli, agai augwali olo nai tonobo ąǫ ebo dao. Augwaligo augwa nogi ugwaba sobadi me, tagalao. Aga te aga tuni bidi tiwai bidibo dao,” Genuai Bidi Godigo Jopbolo te po wali.
JOB 42:1 Tama Jopgo Genuai Bidigo po wei ponoyu, e tama po wali,
JOB 42:2 “Genuai Bidi, megi da eno koneanio. Nagaduba deli naga tigidali sę ebo usu yaibao. Tama nago magi sę me yainu yali da, teda nage magi nai mego nage dąų me wagobeo.
JOB 42:3 Nago enabolo e tama hanalu walio, ‘Te nage de dawe, tama nago eno sę yainu ebadi panilaibawe?’ Nago te po wali. Hobede mu dao. Eno haniani dwai dwai po olama dolali, te ena digi te po page konesiąma yali po subigila wai dao. Te gasa nai dabe po eno wali da, tego eno homu kolesaga edelai mu dao,” wali.
JOB 42:4 “Me ma, nago enabolo e tama po wali, ‘Jop, nago olo sagana munama, eno po bugagia odao. Tama eno nagebolo haniani po hanaluama, tama eno hanalubo po wei ponao,’ te po wali.
JOB 42:5 Genuai Bidi, polobadu da, eno olo bidi dabego po naga odama, tama nage koneai dao. Tiali goli, megi da, eno nage ena gedugo mu te subao.
JOB 42:6 Tama tibaso, eno digi ena wali pode hale mu te ebao. Tama eno te po wali pode ge neyu, ena tǫ hogomude me kelide dualalubao. Te nagebolo ena homu begelalio olama, te ola mayu, tama tibao.” Jopgo Genuai Bidibolo te po wali.
JOB 42:7 Genuai Bidigo Jop dali po ola silama, agai Elifas te hanu Teman bidibolo e tama wali, “Eno nage dali, naga abagi si dali sębę eyu, wado po e obao. Magi baso menio. Dagego eno ebo sę po dolo mu pusubeo, te eno sę bidi Jopgo pusali yali gilama.
JOB 42:8 Tama tibaso, dagego kau kibu omai nogo a naga, me badu si sobadi, kibu sipsip a naga, me badu si sobadi, tama elama, tama eno sę bidi Jop pageba sela pao. Tama dagego augwali elama, tama ofa nai iside sese tama ulao. Tama Jopgo enabolo gedu haluasa po olama, tama eno dage dolabo homu yali tagalaibao. Teda eno agai gedu haluasa po wabo odaibao. Tama eno dagego te wali dwai po dabe usu nama, dagebolo dene me magobeo. Magi baso meni. Dagego eno ebo sę po dolo pusubeo, te eno sę bidi Jopgo pusali yali gilama,” Genuai Bidigo Elifasbolo wali.
JOB 42:9 Tama Genuai Bidigo te po obaso, te bidi Elifas te hanu Tema bidi, me te Bildat te bulu Suha bidi, me Sofar te bulu Nama bidi, augwali hogodasa pelama, te Genuai Bidigo wali po wali palio. Tama Genuai Bidigo Jopgo gedu haluasa po odama, augwali dene mabeo.
JOB 42:10 Te bidi Jopgo aga abagi dabe tau somainu gedu haluasa po ola silama, nosali da, Genuai Bidigo aga bugagia ma bidimainu ma ilalio. Genuai Bidigo Jop nai hauwa bage mu manio, te agai polobadu elaluali nai dali si daganama sali.
JOB 42:11 Tama te bidi Jop aga ama, me aga abe dabe, me aga polobadu abagi dabego Jopgo beba aselama, agai beba nai tuagasalio. Augwaligo agabolo pedelali sę dabe homu kone palama, tama augwaligo aga hobedeo po olama, agai tabi tigi dąų walalio. Tama tigidali augwali deli deligo aga silva mone ge me deli dali, te golgo nigali nogode mubo ring dali, manio.
JOB 42:12 Tede gagalasa, Genuai Bidigo te bidi Jop dali dwagi yai sę hauwa mu yalio. Tama aga sabi simanobo sogo bidali da, aga hasia bidali kibu be edelama, mu bidalio. Tama te bidi Jopgo 14,000 sipsip kibu, me 6,000 kibu kamel, me 2,000 bulmakau kibu, tama 1,000 donki kibu so pedelama, elaluali.
JOB 42:13 Tama te bidi Jopgo ogwa nogo a naga olama, me badu nogo si, wegi sela tama ma ame nanio.
JOB 42:14 Tama agai gomunai wegi nogi e tama poali, Jemima, tama tomo wegi nogi Kesia, tama sabi wegi nogi Kerenhapuk polali.
JOB 42:15 Tama te wegimani da, mu sawi mu yai wegi naga dao. Tama te bulude te wegimani sawi yali tiwai mu meni yai dao. Tama te bidi Jopgo aga ogomanibolo doado bage dabe dobalobo sogo da, teda agai te wegimanibolo meba me dobayalio.
JOB 42:16 Tama te bidi Jopgo te sęge sę silibo si nosali da, aga kibu be 140 bidama, tama aga wai dabego wai dabe sese suali. Tama augwa wai dabe dali, aga wai dabego wai dali suali.
JOB 42:17 Tama Jop bugagia bidama, tama aga monu dabe mu elama, tama aga isali.
PSA 1:1 Doloba pai bidi dali, dwai bidi dali side po wai. Niwai bidi agai te dwai bidigo po wali pisiąbo bidi, tama dwai sęgę sai bidigo tųde bilibo menio, tama God dali posobo po wabo bidi dali taluama, dulaluyu bidibo menio, tama tiyu, te bidi aga dwagi yai homu mu eyu bidaibao.
PSA 1:2 Magi baso meni, te bidigo Genuai Bidi Godigo bomo yai po naga godolo mu eyu, te po wali pabo dao. Tama agai te bomo yai po siade dali, hulide dali nedeyu, tede homugo kone paliyu ebo dao.
PSA 1:3 Te bidi te ni bidi mego ąį sesegede bulai ni elalubo tiwai bidibao. Te nigo nedudu walobo, te sogo dolo naga waliyu ebo dao, tama te ni yabe me sasia pabo menio. Tama tigidali sę agai ebaso, te bugagia pedalobo dao.
PSA 1:4 Tiali goli, dwai bidi dabe augwali te tiwai gilama mu menio. Augwali te tubo nai wit bo te waligo selasa pabo tiwai ebo dao, te yalala pai olo nai mu dao.
PSA 1:5 Tama tiyu, dwai bidi dabe augwaligo Godigo po tų ebo aiyaba elalugobeo. Awe, te dwai sęgę sai bidi dabe, augwali doloba pai bidi bidibo hani tomode bidigobeo.
PSA 1:6 Magi baso meni, Godigo te doloba pai bidi dabe bugagia tonalubo dao, tialima dwai kolesaga ebo bidi dabe, augwali dwai dene ebo bulude bidada peyu, bidada pabo elalubo.
PSA 2:1 Magi baso te Israel hani isąwai we bidi dabego te God dali hagoma kolesaga yabo po mia saliwe? Magi baso te we bidi dabe augwaligo te dwai kolesaga yabo po te odolali po mia saliwe?
PSA 2:2 Te augwaligo king dabe tigidaligo me te hwįabo sisi yali. Tama te tobolu bidi dabe sisinama, tama Godiba po dwai wali, tama agai te sa muani bidi te polalubo bidi, agaba me te dwai po wali.
PSA 2:3 Augwa te po wai, “Dago te augwali sigo nogo aligabo togoinao,” wali, “tama me te augwali sigo da kęalubo bono pisigina sąinao,” wali. “Te dena tedali bidinao,” wali.
PSA 2:4 God Genuai Bidi te dagalude dulalu, aga gisugu mayu, tama agai augwaliba posobo po obao.
PSA 2:5 Aga te haliga sębę posolo elama, tama augwaliba bomai po mobao. Tama agai wado po genuai weyu, te augwali wi dwai ilibao.
PSA 2:6 Tama te agai augwaliba te tama po obao, “Ena eno te bidi me deli nigilama, te king bidimainu yai, tama eno aga te Saionde munama bidimainu yali, te eno tedali gasagi yai wiegi yai bulu du dao,” agai te po obao.
PSA 2:7 God Genuai Bidigo sa muani kingo te po wali, “Megi da, eno te Genuai Bidigo enabolo mani po pusubao. Agai enaba te po wai, ‘Nage eno wai dao. Megi tama nage te king bidi pedalubo sogo, ena te nago aya pedalubao.
PSA 2:8 Enaba hanalubaso, tama te tigidali hani we bidi nageba mayu, tama te tigidali tǫ pedai te naga saibao.
PSA 2:9 Te nago augwali te nago bomogo tonaluagameo. Tama te nago augwali dwasianu kakali minama, te bidigo te tǫgo nigai sene alubo tiwai yaibao,’ Genuai Bidigo te po wai.”
PSA 2:10 Tama tibaso, te dage king dabe, dagego bugagia olo muiąo. Dage te tǫde tobolu bidi dabe, dagego te po odolama, tama dage dua dao.
PSA 2:11 Dagego Godide wi elama, tama agade midigi siąo.
PSA 2:12 Dage aga dologoba mu pelama, tama kidu sugunao. Meni baso da, teda agai haliga sębę polo elama, te dage isaibao. Bidigo konealubo homu Godiba dąų weyu, tama agaba mu kęa pelama ebo bidi, te aga wiegi yai homu pemene eyu bidaibao.
PSA 3:1 Devit te aga ogwa Apsalomde wi pali, tama te sogo agai te balia po asęai dao. Te buku 2 Samuel, Dąį 15 me 16, te suao. Genuai Bidio, te eno boi bidi dabe augwali te hauwa mu pedalubao. Te bidi hauwago ena dolobo sę ebao.
PSA 3:2 Mu tama, te augwa hasi augwaligo enade te tama wabo, “Te Godigo aga me tau sogobeo,” wabo.
PSA 3:3 Tiali goli, menio. Genuai Bidi naga digi te nago ena geme dualubo awa tiwai ebo dao. Nago naga ena te augwali aiyaba elalumainu ebo dao. Awe, nago naga te eno homu sęgę sela sąyu, tama eno tobolu ugwaba sabo dao.
PSA 3:4 Eno te Genuai Bidiba i weyu, te ena tau somainu ebao. Aga te aga wiegi yai tedali gasagi yai bulu dude digi bidiyu, tama eno i wabo odoyu, tau sali.
PSA 3:5 Ena te betde pibo, te ena isibo tiwai ebo dao. Kigamude ena ma hodasa holama, tama ena bugagia bidibao, magi baso meni, Genuai Bidigo ena tonaluali.
PSA 3:6 Te 10,000 boi bidigo ena te tigidali badu bobogela sobaso, tagalao, ena augwalide wi me egobeo.
PSA 3:7 Genuai Bidi nage asao. Nage eno God, nage aselama, ena tau sagasiyu, te boi bidi dabego nogode ma sao. Nago te eno boi bidi dabe tigidali aiyaba mu elalubo dao. Nago te dwai sę ebo bidi dabe dolobo dao.
PSA 3:8 Genuai Bidi, nago deligo naga te da ma siyu, tama da me dolisiąbo da. Eno homugo nago te naga we bidi dabe wiegi yai bugagia bidimainu ilao.
PSA 4:1 Te Devitgo asęani balia po me deli dao. God, nago ena tonalubo bidi da. Te eno nageba i wabo sogo, nago te eno i wabo odoyu, tau sao. Polobadu ena haliga sęgę dwai ebaso, tama nago eno te haliga sęgę ebo dagala sąwani. Nago te olo mu tau sabo wiegi yai kolesaga enaba megi elama, tama eno gedu haluasa wabo po odao.
PSA 4:2 Dage nogi elalubo bidi dabego, te nisu naga sogo te dagego nogi posobo po enaba obawe? Nisu naga sogo dagego te haniani te dwai sę ebo godolo homu iduaibawe? Nisu naga sogo dagego te tibo po wabo kolesaga wali piduaibawe?
PSA 4:3 Tiali goli, dagego te ebo sę koneiąo, te aga pagede bidibo we bidi, te Genuai Bidigo augwali sa muani, te aga da weyu yali. Tama tigidali sogo eno agaba i obaso, agai eno te wabo i odobo dao.
PSA 4:4 Dage te Godide wi elama, tama te dwai sę ebo kolesaga tagaliąo. Te dage betde godege pibo sogo, dagego tede bugagia kone paliyu, tama pedauwali pania siąo.
PSA 4:5 Dagego te Genuai Bidigo wei eyu godolo ebo tobage ofa dabe iyąo. Tama dagego konealubo homu agaba dąų mu waiyąo.
PSA 4:6 Bidi hauwago te tama po wabo dao, “Dago te wiegi yai nai dabe sobaso da, teda dago homu pemene wiegi yai yaibao,” wabo. God, nago te olo mu tau sabo wiegi yai kolesagago te da tau sao.
PSA 4:7 Te wit me wain te gide hauwa pedalubo sogo, te bidi dabe augwa wiegi yai homu pemene ebo dao. Tiali goli, te nago eno homude muani wiegi yai pemene ebo homugo, te augwaligo wiegi yai homu pemene ebo te aiyaba mu elalubo dao.
PSA 4:8 God, nago naga ena tonalubaso, tama ena bugagia bidibao. Tama tiyu, eno te magi nai me delide wi me ebeo. Te ena betba pabo sogo, te polo tama ena pibadi, nago ena tonalubo dao.
PSA 5:1 Te Devitgo asęani balia po me deli dao. Genuai Bidi, nago eno gedu haluasa po wabo odao, tama eno homu hę wabo madi olo muao.
PSA 5:2 Nage king me eno God da, te nago ena tau somainu, eno nageba gedu haluasa po obaso, nago eno i wabo odao.
PSA 5:3 Genuai Bidi, te tigidali sogo kigamude nago te eno gedu haluasa po odobo dao. Te giliga pedalubode eno nageba bomonama, gedu haluasa po obao, te ena ofa ebo tiwai. Tama eno te gedu haluasa po wali wei ponobo te nageba tonalubo dao.
PSA 5:4 God, te dolo isiąbo kolesagade nago te wiegi yai homu pemene me egobeo. Tama te dwai we bidi te nago augwali gesegobeo.
PSA 5:5 Nago gedude te hagoma ebo bidi dabe te dolalumainu me egobeo. Tama te dwai kolesaga ebo bidi dabe te nago godolo homu mu me isiąwaibao.
PSA 5:6 Nago te tigidali tibo po wabo bidi dolobo da. Tama bidi ela mubo bidi dabe, me te tibo po weyu, te gasa po dali ugwadu ma daganobo bidi, te nago godolo homu mu me egobeo.
PSA 5:7 Tiali goli, nago ena sesemane godolo mu ebo da. Tama ena te nago be tomoba asabo usu ebo tiwai yali. Eno te kidu sugunama, te nageba te nago tedali genuai lotu be tempel tomode lotu obaso, te usu yaibao.
PSA 5:8 God, te boi bidi hauwago ena dolainu ebao. Tama tiyu, nago eno sągą dodolobaso, teda eno nago doloba pai kolesaga wali paibao. Awe, te nago homugo ena somainu homu ebo sunumi te enaba ola mao.
PSA 5:9 Te eno boi bidi dabego te mu po dwasianu me wagobeo. Augwaligo te gasa bidi dolabo homu naga ebao. Te augwaligo pedauwali te gų page tǫ dedage dalalubo tiwai elalubao. Augwaligo te homu bega sabo po hauwade te bidi dabe dwai madiba kekebo dao.
PSA 5:10 God, nago augwali po tų ilama, tama augwaliba dwai dene mao. Te augwaligo dwai sę emainu sininama, te bage augwali dwai madi tula palomainao. Te augwali nago gesabidide digibulu sela sąyao, magi baso meni, augwaligo te nagede hagoma eyu, tama te dwai sę hauwa ebao.
PSA 5:11 Tiali goli, te nago tonalubo we bidi augwali tigidali, augwa wiegi yai homu pemene yao. Augwa te bugai homu mu elama, tama te wiegi yai homu pemene ebo balia sesemane waiyąo. Nago augwali bugagia sesela sao. Tama tiyu, te nage wei mu ebo we bidi dabego nago nogi ugwaba saibao.
PSA 5:12 Genuai Bidi, nago po wali pabo bidi dabeba te nago wiegi yai nai mayu ebo da. Awe, nago augwali geme dualiyu, tama augwali bugagia mu tonalu ebo da, te bidi te awago te seselaluyu, te bugagia bidibo tiwai ebo dao.
PSA 6:1 Te Devitgo asęani balia po me deli dao. Genuai Bidi, nago wado yabo homu elalubao, tiali goli nago enaba wado po me wagio. Nago haliga sębę yali, tiali goli nago enaba dene me magio.
PSA 6:2 God, nago te ena homu dene eyu, te tau sabo kolesaga enaba yao. Magi baso meni, ena bomo mu menibao. God, nago ena usu ma ilao, magi baso meni, eno bomo tigidali sia salio.
PSA 6:3 Eno haligade genuai sęgę mu elalubao. Tiali goli, God, nago magi ebawe? Nisu naga sogo enade te haliga sęgę elalu bidimainuwe?
PSA 6:4 Genuai Bidi, nage begasa aselama, ena usu ma ilagasao. Awe, nage te olo mu tau sabo wiegi yai kolesaga ebo bidi da, tama tibaso, te ena isidali weyu, nago ena tau sao.
PSA 6:5 Magi baso meni, te isali bidi dabego te nage homu kone me egobeo. Te gų pagede te bidi me deligo nago nogi ugwaba sobaso, te usu me egobeo.
PSA 6:6 Ena i udu udubadi genama, tama ena bomo tigidali sia salio. Tigidali sogo hulide te gedu gela giguai ąįgo te eno bet te gologo yai. Eno gela umabo mu udali digi, te eno tobolo ni het pilo te gela giguaigo gologo mu yai dao.
PSA 6:7 Ena gela udali madigi tama eno gedu bo dali, tama eno te nai dabe suabo usu meni yai, magi baso meni, eno boi bidi hauwa elalubao.
PSA 6:8 Dage te dwai kolesaga ebo bidi dabe, dage geda sao. Godigo eno gedu haluasa po odalio.
PSA 6:9 Eno Godiba i weyu, ena tau somainu yali, tama agai eno i wabo odalio. Agai eno gedu haluasa po wabo odali.
PSA 6:10 Te Godigo te boi bidi dabe aiyaba elaluama, tama augwali te sęgę toliyu, tama augwali hale mu yaibao. Tama polo tama augwali ma geasa wi peyu, augwali te noma siyu, umuna paibao.
PSA 7:1 Me sogo Devitgo te Kus paniabo homu sęgę elaluali, te Benjamingo hani bidi me deligo, te po agaba wali, tama tiyu agai te Genuai Bidiba gedu haluasa po wabo balia po wali. Genuai Bidi, eno God da, ena nageba asiyu, tama ena te boi bidi dabede geme duala saibao. Nago ena tau sobaso, te ena pobeasa asali bidi dabego te augwaligo ena me eligobeo. Nago ena ma sobaso, te ena me dolobeo.
PSA 7:2 Tiyu, te ena augwaligo dolidalio, te laiongo bidigo tigiwali togobo tiwai gilama idalio. Tiyu, te augwaligo ena te gasaba me kekasa peyu, tama ena ma sainu yabo bidi me deli meni yaibao.
PSA 7:3 Genuai Bidi, eno God da, te eno dwai sę meba te tama eyu da, te eno gasa bidiba dwai sę eyu,
PSA 7:4 tama eno ena abagi dali geagano bilibo sę eyu, tama eno te ena boi bidi dolobo sę olo eyu ebaso da,
PSA 7:5 teda, nago te boi bidi dabego ena pobelama, tama ena tola somainu yagameo. Tama augwa ena ela muyu, tama ena mu dolomainu yaibao. Awe, eno tigi te tǫ daide olo elalumainao.
PSA 7:6 God, nago haliga sębę elama, te nage hogodama, tama te boi bidi dabego dwai sębę eyu, ena dali bomonama mu hwįbaso, te nago augwali dwai dene ilao. Ena God, te nago ena polo mu tau sao. Magi baso meni, nago te doloba pai kolesaga naga wei homu ebo dao.
PSA 7:7 Te tigidali we bidi nage pąba naga sisinama, tama nago augwali tonalumainu yao.
PSA 7:8 Genuai Bidi, nago te tigidali we bidigo kolesaga dagalubo da. Tama tiyu, nago ena te po tųde tau sao. Magi baso meni, nago koneani, eno dwai sę me ebeo, eno te wiegi yai doloba pai kolesaga naga yai.
PSA 7:9 God, nage te doloba pai mu da. Nago te tigidali bidigo haliga me homu te dagalubo dao. Tialima, nago te dwai sę ebo bidi dabego dwai kolesaga ebo te tigidali silao. Tama nago te wiegi yai bidi dabego ebo dwagi yai kolesaga wei ponao.
PSA 7:10 God aga da, te ena tonalubo bidi da. Agai te aga po wali pabo bidi dabe tau sabo dao.
PSA 7:11 God te po tų dodolobo odobo wiegi yai jas bidi, tama te doloba pai po tų ebo da. Sesemane sogo agai te dwai bidi dabe aiyaba elalueibao.
PSA 7:12 Te dwai sę ebo bidi dabe te augwa homu begeleyu, ge nesiąbaso da, teda Godigo te aga bainat hwą dulaibao. Tama te agai enesigi balibi dolama, te hwįabo sisi elalueibao.
PSA 7:13 Agai augwali te sia dabo enego usu sali. Agai te bidi dabe augwali ela muabo ene dabe sisi yai elalubao.
PSA 7:14 Te dwai bidi suao, agai te gasa bidi dali dwai sę yabo homu beasi elalubao. Agai te tobage dwai sę yabo sisi elama, tama te sesemane sogo tibo po wabo dao.
PSA 7:15 Agai tǫde genuai tǫ dedage nigilama, te gasa bidi aba tulalumainu yali, tiali goli aga digi aga te nigali tǫ dedageba tulalubo dao.
PSA 7:16 Te tiwai naga aga te yali dwai sę tiali aga pageba ma asobo dao. Tama agai te gasa bidiba te wado me hwįyu ebogo begelama, tama aga digi aga dolaibao.
PSA 7:17 God te doloba pai mu da, tama tiyu, eno agaba usu da weyu, gedu haluasa po waibao. Tama te Ugwadu Mu Bidibo God nogi ugwaba selama, te eno balia po dabe waibao.
PSA 8:1 Te Devitgo asęani balia po me deli dao. Yawe, nage dago Genuai Bidi da, tama te tigidali tǫ badu te nago nogi te mu polalubao. Nago genuai nogi dali, nago bomo dali si te ugwanu mu elaluyu, te dagalu aiyaba mu elalubao.
PSA 8:2 Nago te wai dabe me te ogwa wegi sibi munama, tama augwaligo nago nogi dali, bomo dali si te ugwaba sabo dao. Tebogo nago te nage dali boi homu ebo bage augwali dwai hale iliyu, tama augwaligo sagia sabo dao. Te nago po sela sąbo bage me augwaligo po wabo tagaluyu, olo bidibo dao.
PSA 8:3 Te eno nago nogogo nigali dagalu subo sogo, tama eno te poluaba me, te tigidali hǫ te nago ugwade muani tonono ebo sogo,
PSA 8:4 eno midigi siyu, tama homu ebo da, ‘Da tǫde bidi te magi nai, tama nago dade homu kone ebo dawe? Da te olo nai tiwai da. Magi baso nago da te bugagia tonalubo dawe?’
PSA 8:5 Nago da nigilama, tama nago da te nagaduba deli naga dologode bidimainu muani. Nago da ugwaba siyu, tama daba genuai nogi mabo dao.
PSA 8:6 Nago da sa muyu, te nago nigali nai tigidali tonalumainu yai. Nago te tigidali nai dago dologoba munama, elalubo dao.
PSA 8:7 Awe, tigidali sipsip me, bulmakau me, te buside elalubo tigidali hasa dabe me,
PSA 8:8 tama te ugwadu bola bilibo tigidali ba me, tama te tamu ąįde tigidali sųgų me, tama te tamu ąįde bilibo tigidali nai me. Tigidali te da bidigo dologode bidibo dao.
PSA 8:9 God, nage dago Genuai Bidi da. Te tigidali bulu habude te nago nogi te mu polalubao.
PSA 9:1 Te Devitgo asęani balia po me deli dao. God, eno nageba usu da weyu, gedu haluasa po mu obao. Eno te we bidi augwaliba te nago midigi sabo wiegi yai sę tigidali yali po waibao.
PSA 9:2 Eno nageba homu koneama, tama eno te wiegi yai homu pemene ebo balia waibao. Te Ugwade Bidibo God mu, te eno balia weyu, nago nogi ugwaba saibao.
PSA 9:3 Te eno boi bidi dabego nage sulama, tama wi pai. Augwali tulaluama, tama mu isalio.
PSA 9:4 Nage te jas tiwai te siade dulalu, tama nago te doloba pai po tų ebao. Nago eno kolesaga osola suyu, dagalali, te nago suali, eno magi sę me deli ebeo.
PSA 9:5 Nago po odisiąwai bidi hani dabe, te Israel hani isąwai hani dabe, te nago po tų ilali. Nago te dwai sę ebo bidi dolali, tama te bidi mego augwaliba te homu kone munu me ma egobeo, augwa hani nogi mu miyą saibao.
PSA 9:6 Awe, te boi bidi dabe sesemane doludubadi usu nanio. God, nago te augwaligo hanu dabe dolama, tama te mena bidi me deligo te augwaliba homu kone ma egobeo. Mu menio.
PSA 9:7 Tiali goli, God te sesemane king bididubadi usu yai. Agai te po tų yabo sisi yai dao.
PSA 9:8 Mu tama, agai te tǫde we bidi tonalubo, tama agai bomai po te doloba pai mu da. Agai te tigidali we bidigo kolesaga dagalubo sę te deli tigi poai sęgo naga dagalubo dao.
PSA 9:9 God te bomai be me deli tiwai. Te bidi dabe te boi bidide sęgę sobaso, augwa te agaba aselama, bidagasobo dao. Te sęgę sabo augwa te agaba pelama, te geme dualalubo dao.
PSA 9:10 God, te nageba asobo we bidi te nago augwali tudiba munu me mugobeo. Tama tibaso, te nage koneani bidi dabego da, te nageba konealubo homu dąų mu wabo dao.
PSA 9:11 Genuai Bidi God te Saion hanude king bidibao. Dagego te aga nogi ugwaba siyu, te tęąbi waiyąo. Tama dagego te tigidali Israel hani isąwai bidiba po hanilama weyu, te agai yali tigidali bomai sę po waiyąo.
PSA 9:12 Magi baso meni, Godigo te dene tolobo bidi homugo konebo da. Tama agai te augwaligo gela wabo te homugo me gegeda palugobeo. Agai te augwaliba dwai dene mabo bidi dabeba te dwai dene wei ponobo dao.
PSA 9:13 Genuai Bidi, nago enaba te olo mu tau sabo wiegi yai kolesaga yao. Te boi bidi dabego enaba te dene me sęgę mabo, te nago suao. Te pąde ena isainu ebadi goli, tiali goli nage asiyu, ena dąų walao, te ena bugagia bidimainogo tiao.
PSA 9:14 Tama tiyu, eno te nago yali sę po tigidali weyu, tama eno nago nogi ugwaba saibao. Ena te Saion hanu sunumide dolalu, tama te nago ena ma sali po weyu, te wiegi yai homu pemene yaibao.
PSA 9:15 Te Genuai Bidigo po odisąbo Israel hani isąwai bagego te tǫ dedage diginama, te da kalabus emainu yali. Tiali goli, augwa digi teba tulaluai. Augwaligo te da tola somainu yabo bono gągą geme muani, tiali goli, te bono gągągo augwa digi ma tola sai.
PSA 9:16 Awe, te tama tebogo te God agai kolesaga te bidi dabeba te po tų ebo sogo ola mawai dao. Te dwai sę ebo bidi dabego te gasa bidi dolabo sę yali, tiali goli te naigo begelama, te augwa digi ma dolai.
PSA 9:17 Te dwai bidi dabe, me te God tudiba mubo we bidi hani dabe, te tigidali isimainu ebo dao.
PSA 9:18 Me ma, Godigo te magi doado bage meni yai bidi dabe te sesemane sogo homu kone palubo me tagalobeo. Mu tama, Godigo te genuai sęgę elalubo bidi dabe tau siyu, te augwa konealubo homu te odolali me tagalugobeo.
PSA 9:19 Genuai Bidi, nage asao. Te tǫde bidi dabego nage ela soyu, te poligi soabo bidi dabe te nago me gogolamuo. Nago po odisąbo Israel hani isąwai bidi dabe te nago po tųde augwali dodolama, tama augwa kolesaga dagalamainao.
PSA 9:20 Genuai Bidi, nago augwali dwai wi ilao. Nago te we bidi dabe augwali gę nomainu ilao, augwali te osogo bidibo tiwai konemainu ilao.
PSA 10:1 O Genuai Bidi, magi baso nage digibulu dolalubawe? Magi baso te dwai sę daba pedalubo sogo nago dade geme duala sobawe?
PSA 10:2 Te dwai bidi dabego te hagoma eyu, tama te magi doado bage meni yai bidi dabe pobeasa biliyu, te augwali dolainu ebo da. Augwa te gasa bidi dabe kalabus ilainu, te nigali tǫ dedageba te augwa digi teba tulolumainao.
PSA 10:3 Te dwai sę ebo bidigo te aga ebo dwai homu kolesagade hagoma homu eyu ebo dao. Tama te hauwa nai wei eyu, pesa ebo bidigo agai te Godiba dwai po weyu, tama aga tudiba mudu gebo dao.
PSA 10:4 Te hagoma ebo bidigo te tama po wabo da, “Eno koneani, Godigo eno ebo dwai sę wei ponobeo. Agai enade magi homu me egobeo.” Te dwai sę ebo bidigo te tama homu eyu, agai te Godigo ebo kolesaga wali pabo menio.
PSA 10:5 Te agai yali sę tigidali, te wiegi yai pedalubo dao. Agai te Godigo po tų yabode te homu kone dwasianu me ebeo. Agai te boi bidi dabeba te posobo po weyu ebo dao.
PSA 10:6 Agai te aga homude kone palama, tama te po weyu, “Ena bomonama dolalubo da,” po wai. “Te magi nai me deligo ena dwasianu me degelegobeo. Te enade sęgę me gegegobeo,” te po wabo dao.
PSA 10:7 Te sesemane sogo agai te gasa bidi dolomainu, agai te i ola mabo po wabo dao, tama tibo po me, te gasa bidi wi ilibo po me weyu ebo dao. Polo tama agai te dwai sę ebo kolesaga me, te haniani sę yabo po mibo sę ebo dao.
PSA 10:8 Te bidi te bidibo be nani pesage tomode geme dulaluyu, tama te dwai sę isąwai bidi dabe asobo tonaluama, tama augwali ela mubo dao. Aga te geme dulaluyu, tama te bomo meni yai bidi dolainu tonalubo dao.
PSA 10:9 Aga te geme duala selama, tonalu, te laion me deligo aga tǫ dedage tomode tonalubo tiwai ebo dao. Aga te geme duala selama, te bomo meni yai bidi tola sainu tonalubo dao. Agai te aga bono gągą haliga gebelama, tama aga kegasa pabo dao.
PSA 10:10 Te dwai sę isiąwai bidi dabe mu dolama, tama pila mudali. Te dwai bidigo genuai bomogo te augwali aiyaba elalubo dao.
PSA 10:11 Te dwai sę ebo bidigo te tama homu ebao, “Godigo te sę ebode magi sę me egobe da,” homu ebao. “Agai ena me sugobeo. Agai te aga gedu panianio,” dwai bidigo te tama homu ebo dao.
PSA 10:12 Genuai Bidi, holaluao, nago aga elao. O God, nago te sęgę tolobo bidi dabede homu kone ebo me tagalugio.
PSA 10:13 Te dwai sę ebo bidigo te God tudiba muani, tama aga homude te tama homu ebo dao, “Agai te eno dwai sę ebo wei ponogobe da,” wabo. Magi baso agai te tama po wabo dawe?
PSA 10:14 Tiali goli, menio. God, nago te dwai sę ebo bidi dabego kolesaga subo dao. Tama da gasa we bidi dabeba te sęgę me dene mabo, te nago koneani, tama nago da tau sainu sisi yai. Te bomo meni yai bidi aga digi te nage nogoba muani, magi baso meni, te sesemane sogo nago te magi nai meni yai bidi tau sabo dao.
PSA 10:15 Nago te dwai sę ebo bidi dabego bomo silao. Nago te augwa yali dwai kolesaga deli deli wei ponama, tama mu usu nao.
PSA 10:16 Te Genuai Bidi te sesemane sogo te king bidada peyu, bidada paibao. Agai te aga po odisąbo Israel hani isąwai bidi dabe te aga tǫde ela gudulama, tama augwali tede mu me bidigobeo.
PSA 10:17 God, te nage dologoba asobo we bidigo usu da weyu, gedu haluasa po wabo te nago odao, tama nago augwali homu dąų walao.
PSA 10:18 Te nago te tiana wai dabe me, te haliga sęgę elalubo bidi dabego me, te augwaligo gela wabo nago odobo dao. Te nago augwali tau selama, te augwa po tųde te gasa bidi aiyaba elaluama, buluba dią soaibao. Tama tiyu, te dwai sę ebo bidi dabego te augwali wi ma ilibaso, te usu me egobeo. Te dwai sę ebo bage augwali te tǫde osogo bidabo bage naga dao.
PSA 11:1 Te Devitgo asęani balia po me deli dao. Eno konealubo po mu dąų wali, Genuai Bidigo ena tonaluaibao. Abagi dede, dage kolesaga isąyu, dagego enabolo te po wali, “Nage bulu duba wi pao, te ba me deli wi ebaso, polo pabo tiwai yao.
PSA 11:2 Magi baso meni, dwai bidi dabe augwaligo ene selama, te balibiba tulama, nage enainu, te kegebao. Augwali te hulia sai bulude geme dualama, tama te dwagi yai bidi dabe enainu te ebao.
PSA 11:3 Tama tibaso, te we bidi dabe augwaligo te bomai po dologode bidibo kolesaga tagaliyu da, teda dwagi yai kolesaga ebo bidi aga mena tama tegowe?” Dagego enabolo te po wali.
PSA 11:4 Genuai Bidi God aga dwagi yai bede bidibo. Tama aga dagalude genuai tuni bidi bidiyu, tama agai gedugo tigidali bidi subo dao. Tama augwaligo tigidali sę ebo agai osola subo dao.
PSA 11:5 Genuai Bidigo dwagi yai bidi dali, dwai bidi dali osola subo dao. Agai bomo yai po sela sąbo te bidi agai hagela mu ebo dao. Te bagego gasa we bidi elebo kolesaga ebo dao.
PSA 11:6 Agai dwai kolesaga ebo bidibolo posolo yai sia ugwadu aiyaba gelebo dao. Tama te posologo augwali mu dene sabo dao. Te augwaligo dwai sę ebaso, dene somainogo tiwai.
PSA 11:7 Genuai Bidi aga dwagi yai dolo mu dao. Tama agai te dwagi yai kolesaga ebo we bidi godolo mu ebo dao. Bidi augwaligo agai po wali pabo bidigo aga gesabidi sueibao.
PSA 12:1 Te Devitgo asęani balia po me deli dao. God, nago da tau sao. Te wiegi yai bidi deli me bidibo menio. Te doloba pai bidi dabe subo me usugobeo.
PSA 12:2 Te tigidali bidigo te gasa bidi dabeba tibo po wabo da. Te homu bega sabo pogo augwali te geagano bilibo tiwai ebo dao.
PSA 12:3 Genuai Bidi, nago te homu bega sabo po wabo bidi dabe pedauwali paniama, tama te hagoma ebo bidi dabe pedauwali me paniao.
PSA 12:4 Te bidi dabego te tama po wai, “Te dena digi dena homugo po waibao,” wai. “Te mena bidi mego da me paligobeo,” wali. “Dego da tonalubo dawe?”
PSA 12:5 Tiali goli, Genuai Bidigo te tama po wai, “Te megi da, ena asaibao, magi baso meni, te magi doado bage meni yai bidi dabe te bidi dabego aiyaba elaluai. Tama te dene me sęgę tolali bidi dabe, te augwaligo gela udali. Te eno augwali te bugagia bidabo te augwa sainu tonaluali madi, teba muaibao,” wali.
PSA 12:6 Godigo dąų walali po te mu po naga dao. Agai po te wiegi yai mu, te wiegi yai kapa silva tiwai dao, tama te silva augwaligo te a naga olama, nogo me badu si, te tama sogo siaba ulama, te dwasianu meda mu meni yai tiwai mu dao.
PSA 12:7 Genuai Bidi, da bugagia tonaluao. Te sesemane sogo da bugagia tonaluao, te tobage bidi dabego da dolomainu me egobeo.
PSA 12:8 Te dwai sę ebo bidi dabe te tigidali habu badu bilalubao. Tama tigidali we bidigo te dwai sę ebo kolesaga te wiegi yai nai da homu ebo dao.
PSA 13:1 Te Devitgo asęani balia po me deli dao. Genuai Bidi, nisu naga sogo nago te enade homu kone ebo tagalubawe? Te bidada pabo sesemane sogo usu nama, agawe? Nisu naga sogo mu nago ena sula tagalobawe?
PSA 13:2 Te nisu naga sogo ena te dene tolomainu ebawe? Te nisu naga sogo ulade me hulide te eno haliga sęgę elaluaibawe? Nisu naga sogo ena te boi bidi dabe dologode bididuaibawe?
PSA 13:3 Genuai Bidi, nage eno God da. Nago enade homu koneama, te eno gedu haluasa po wabo odao. Te ena isidali weyu, nago ena dąų ma walao.
PSA 13:4 Tama tialima, te boi bidi dabego te enade po me wasiąwaibao, “Dago aga aiyaba elaluali,” te kęnę po me wagobeo. Tama augwaligo ena tulalubaso, te wiegi yai homu pemene me idali weyu obao.
PSA 13:5 Tiali goli, ena da, eno te nago ena sesemane godolo ebo kolesagade eno homugo dąų walai dao. Tama eno wiegi yai homu pemene nageba ebao, magi baso meni, te nago ena tau saibao.
PSA 13:6 Awe, Genuai Bidi, te eno nago nogi ugwaba sabo balia po waibao. Magi baso meni, nago enaba wiegi yai sę mu yai dao.
PSA 14:1 Te Devitgo asęani balia po me deli dao. Kolesaga meni yai dwai sę ebo bidi dabe augwa hasi te po wabo dao, “God bidibo menio,” wabo dao. Te bidi dabe augwali te dwai bidi dao. Augwaligo dwai kolesaga mu naga ebo dao. Bidi me deligo dwagi yai kolesaga me ebo menio.
PSA 14:2 Genuai Bidi dagalude bidiyu, tama agai tǫde bidibo we bidi aiyaba tonalubo dao. Agai te kolesaga koneai bidi me deli gegeyu, te God gegebo sę ebowe naga suainu tebo dao.
PSA 14:3 Tialima, menio. Tigidali augwaligo dwagi yai tų wali pabo tagalai. Tigidali tiwai naga yai, augwali dwai bidi mu pedelai dao. Tama augwali me deligo dwagi yai kolesaga me ebeo. Mu menio.
PSA 14:4 Genuai Bidigo te po wai, “Te bidi dabe augwaligo dwai kolesaga yai, augwaligo homu kolesaga meni, agawe? Augwaligo te eno we bidi dabe ela silibao, te augwaligo te bret tubo tiwai gilama te mu silibao. Tama augwaligo enaba gedu haluasa po wabo menio,” wali.
PSA 14:5 Tialima, te bidi dabe augwali wi mu yaibao. Magi basowe, God aga te agai po wali pabo bidi dabe augwali dali bidibao.
PSA 14:6 Te dwai sę ebo bage augwaligo te nai meni yai bidi dabego yainogo ebo sę dali gisugu mabo dao. Tiali goli, Genuai Bidigo te nai meni yai bidi dabe augwali bugagia tonalubo dao.
PSA 14:7 Eno homugo Genuai Bidigo Saion bulu bidi me deli tagala palama, Israel we bidi ma somainogo te homu ebao. Nosali Genuai Bidigo aga hani bidi tau selama, tama augwali bugagia ma bidimainogo yaibao, tialima, Israel hani augwali homu dwagi yai emainogo. Ao. Te Jekop aga hani bage augwaligo dwagi yai homu mu yaibao.
PSA 15:1 Te Devitgo asęani balia po me deli dao. Genuai Bidi, de nago dwagi yai bede bidibo usugowe? De nago te dwagi yai bulu du Saionde duagawe?
PSA 15:2 Bidigo God agai homu kolesaga tigidali wali painogo ebo bidi, tama sesemane sogo doloba pai kolesaga naga eyu, tama tigidali sogo mu po naga weyu ebo bidi, aga te Genuai Bidigo bede bidibo usu yaibao.
PSA 15:3 Agai gasa bidigo nogi doliyu, wialubo po wasiąbo bidi, tama abagi dabe augwali dali dwai sę isąma, tama agai te sabilibo po gasa bidi dabe dali me wasiąwai bidi dao.
PSA 15:4 Agai Godigo te tudiba muani bidi dabe augwali godolo isiąma, tama agai Godigo po wali pabo bidi dabego nogi ugwaba sabo dao. Tama agai te Godigo gedude eno te sę yaibao po obaso da, teda agai te po usu naibao. Ma, tebogo te sęgę agaba mobaso da, tagalao, agai te dąų walali po togogobeo.
PSA 15:5 Tama te agade negeli sali bidigo te negeli wei ponobo sogo, agai te giguai mone ma ugwadu daganobo mone mao olama, agai sogobeo. Te gasa bidi dabego te dwai sę isąwai bidi me deli dali po tų yainogo eyu, tama augwaligo homu augwaligo te doloba pai bidibolo mone meba geme menama, tama agai te po tų ebode te tibo po kisilibo po waibao. Tiali goli, agai te mone selama, agai te tibo po kisilibo po wagobeo. Bidigo te dwagi yai kolesaga ebo wali pabo bidi aga tulalugobeo.
PSA 16:1 Te Devitgo asęani balia po me deli dao. God, nago ena tonaluao. Magi baso meni, eno te nago ena bugagia tonalueibao homu eyu, tama ena nage dologoba bidagasobo dao.
PSA 16:2 Eno Genuai Bidi Godibolo te po wai, “Nage eno genuai bidi dao. Tigidali dwagi yai nai eno tolalubo, te nai nago naga mabo nai dao,” wali.
PSA 16:3 Augwaligo konealubo homu Godiba naga dąų wali we bidi, augwali e tǫde bididubadi, augwali te tedali gasagi yai we bidi hani dao. Eno dwagi yai homu mu elama, augwali dali bidaio homu ebo dao.
PSA 16:4 Tibo po wabo god pageba painogo udabo we bidi, augwali sęgę hauwa saibao. Ena augwali dali deliba sisinama, te tibo godibolo nai ula mabo ofa sę egobeo, tama eno augwaligo te tibo godiba lotu po wagobeo.
PSA 16:5 God, nage deli eno God mu, tama eno gasa nai me menio. Tama nago eno sǫą pali nai tigidali ena mawai. Eno bidibo ula nago tolalubo dao.
PSA 16:6 Eno dwagi yai nai tigidali nage dali naga olo sai. Mu tama, te nai dabe dwagi yai mu dao.
PSA 16:7 Eno Genuai Bidigo nogi ugwaba sobao, magi basowe, agai ena bugagia dodolobo dao. Tama hulide eno homu kolesagago te dwagi yai tų enabolo ola mabo dao.
PSA 16:8 Sesemane sogo eno homugo konebo, Genuai Bidi ena pąde bidibao, te eno dolo nogo badu, tama magi nai mego ena me degelegobeo.
PSA 16:9 Tama tibaso, eno homu dwagi yai eyu, tama eno po wabo mobo dwagi yai homu ebo dao. Tama eno magi nai me dali wi ebo menio.
PSA 16:10 Magi baso meni, nago ena te isai bidigo bulude bidimainu tagala palogobeo. Tama nago naga tedali gasagi yai bidi aga te gų pagede damua pomainao wagobeo.
PSA 16:11 Nago digi ena te bidibo ula te tų ola mawai. Nage ena dali pąde bidibaso, nago te eno dwagi yai homu mu ebo dao. Tama nago ena sesemane bidada pabo sogo tau sabo, eno dwagi yai homu mu ebo dao.
PSA 17:1 Te Devitgo asęani balia po me deli dao. Genuai Bidi God, nago eno gedu haluasa i wabo po odao. Ena bugagia dolo bilai, tama eno te po sela aselama nagebolo obao. Eno tibo po olama, gedu haluasa po wabe, tama nago eno te gedu haluasa po wabo odao.
PSA 17:2 Nago ena tau selama, tama eno po tų ebo aiyaba elaluaio. Magi basowe, nago koneai, mena kolesaga dwagi yai ebo.
PSA 17:3 Nago eno homude koneai. Nago ena hulide me suagasai, tama nago ena usu sai, tama nago eno homu kolesaga dwai elalubo nago me subeo.
PSA 17:4 Eno dwai po bidi mebago wabo po tiwai wabo menio. Eno nago po bomo elama dąų weyu, tama eno te wado po weyu, hwįbo po wabo kolesaga tudiba muai.
PSA 17:5 Eno sesemane sogo nago kolesaga wali peyu, tama eno sągą dwasianu me geda mubeo.
PSA 17:6 God, eno nagebolo gedu haluasa po wabo dao. Magi baso meni, nago eno gedu haluasa po wei ponobo dao. Nago olo eno gedu haluasa po wabo digi munama, odao.
PSA 17:7 God, nago dabolo dwagi yai homu elama, olo mu tau sabo genuai kolesaga ola mayu, tama ena tau sao. Da nage dali pąde bidiyu, tama boi bidi augwaligo da suidali weyu duala sai.
PSA 17:8 Ena tonaluao, nago naga gedu tonalubo tiwai ena tonaluao. Ena nago bugagia mu dualao, te ba kakaruk aga wai dabe bogogo mesega sabo tiwai ilama yao.
PSA 17:9 Tama dwai bidi dabe augwaligo ena dologobeo. Augwaligo ena dali boi bidi mu elama, tama augwaligo ena bobegelebao.
PSA 17:10 Augwaligo gasa bidi dali homu dene eyu, olo me tau sabeo. Augwaligo genuai po dągą weyu, tama augwa nogi naga ugwaba sabo dao.
PSA 17:11 Augwaligo ena pobeasa biliyu, tama megi augwaligo ena bobegelebao. Augwaligo ena aiyaba elaluainogo bodolu munama, tonalubo dao.
PSA 17:12 Augwali te laiongo hasa elainogo ebo tiwai, tama te bomai laion duala sela tonalubo tiwai ebo dao.
PSA 17:13 Genuai Bidi, nage aselama, eno boi bidi dali hwįnama, augwali aiyaba elaluao. Nago bobobage hwągo augwali dali hwįnama, tama ena dwai sę ebo bidi dabego nogode ma sao.
PSA 17:14 Mu tama, Genuai Bidi, nago bomogo ena tau siyu, tama bidi dabe augwaligo ena siligobeo. Ena te tǫde nai naga sisinibo bidi dabe augwaligo nogode ma sao. Nago te dwai sę ebo bidi dabego kolesaga wei ponainogo sisi yai, tialima megi augwalibolo te sę yao. Tama augwaligo wai dabe dali me tiwai, tama augwaligo wąį dabe nosali pedalubode me tama naga tiwai sę yao.
PSA 17:15 Tialima, ena da, eno augwalide dwai sę me deli isąma, tama nosali eno nage mu sueibao. Nosali ena piali tagalama, ena hodaluama, tama nage ena dali bidibo sulama, ena dwagi yai homu mu yaibao.
PSA 18:1 Te Devitgo asęani balia po me deli dao. Me sogo Genuai Bidi Godigo te Devit te Sol dali, gasa boi bidi dali augwaligo nogode ma sali sogo, te sogo Devitgo e balia po Genuai Bidibolo wai. God, eno nage wei mu ebao. Nago ena dąų walai.
PSA 18:2 Genuai Bidi agai ena tau sabo da. Aga te eno bomai obo tiwai da. Genuai Bidigo ena tonalubaso, tama te boi bidi dabego ena me dologobeo. Genuai Bidi te hwįbo sabele tiwai elama, tama ena geme seselalubo. Agai te ena ma selama, tama ena tonaluabo bomo elalubo dao.
PSA 18:3 Dago te Genuai Bidigo nogi ugwaba sao. Eno agaba gedu haluasa po weyu, usu da obaso, te agai ena tau selama, tama te boi bidi dabego dolainu yali usu ebeo.
PSA 18:4 Te pąde ena isainu yai, tama te bonogo ena bomonama kęnani tiwai yali. Te dwai sę ebo bidi dabego enaba bomonama hwįani, tama augwali te genuai tamu ąį sigo ena mesegelibo tiwai yali.
PSA 18:5 Te pąde ena isainu yali, te bonogo ena bomonama kęnani tiwai yali. Te gų pagego ena dalainu tonaluai.
PSA 18:6 Ena haliga sęgę dwai ebaso, tama eno Godiba i wai. Eno gedu haluasa po te ena Godiba weyu, te agai ena tau somainu yai. Aga te aga wiegi yai be mude bidiyu, tama eno po odali. Te eno gedu haluasa po wabo te agai oloba pedelali.
PSA 18:7 Tialima, megi da, Genuai Bidigo wado po elalubao. Tama agai te tǫ mali mu ilali. Tama te bulu du page dabe te mumunu ela silali.
PSA 18:8 Te hano aga gunide pedelali. Tama aga pedauwalide dabo siago te doado bage hauwa ulali.
PSA 18:9 Agai te pǫ dabe sela sąnama, tama aga aiyaba dulali. Tama husugu yai pǫ te aga sągą dologode elaluali.
PSA 18:10 Aga te ensel dabe daide ugwadu dugulasa, tama bola asai. Te bogo te ba dabego bogo tiwai elalubao, tama te God auwąsa polo mu asaibao.
PSA 18:11 Aga digi aga te hulia sigo haluali. Aga te tulubage umabo mu elalubo husugu yai pǫ tomoba duala sai.
PSA 18:12 Te pǫde be sele eyu, tama te bogoli mu elama, te agaba kisa sigi pali. Tama sia me talua ge tulubagego te husugu pǫ aluama, tama aiyaba dulai dao.
PSA 18:13 Tama Genuai Bidigo te dagalude bomonama mu i weyu, te pǫ kulukulu wabo tiwai yali. Tama te bidi dabego te Ugwade Mu Bidibo Godigo i wabo odali.
PSA 18:14 Agai te be selego te bidi dabeba ula enani, te bidigo te boi bidi dabe te enego enebo tiwai ebaso.
PSA 18:15 Genuai Bidi, nago te dwai sę ebo bidi dabeba wado ebo sogo, te bomai waligo augwali degelibo tiwai ebao. Tama te tamu ąį dologode tigidali tǫ te bulu ulaba hania pedelali, tama te tǫ page me te hania pedelalio.
PSA 18:16 Genuai Bidi te dagalude bidiyu, tama agai nogo te aiyaba muyu, tama ena tola sali. Ena te aiyanu mu yai węde te hagawainu ebo bidi tiwai ebadi, tama Godigo ena ma salio.
PSA 18:17 Agai ena te boi bidi dabego bomai nogode me, te ena wei isiąbo bidi dabego nogode ma salio. Te bidi dabe augwaligo bomogo te eno bomo aiyaba elaluai dao.
PSA 18:18 Polobadu, te dwai sęgo ena gegelama, tama augwaligo enaba hwįagasali. Tiali goli tagala, te Godigo ena tonaluali.
PSA 18:19 Agai ena tonalubaso, tama eno te boi bidi dabe tagalali. Agai ena wei mu elama, tama agai ena ma sai dao.
PSA 18:20 Eno te doloba pai kolesaga wali pobaso, tama Godigo wiegi yai sę enaba bugagia yai. Eno dwai me deli ebeo, tama tiyu, Godigo wiegi yai sę enaba mawai dao.
PSA 18:21 Magi baso meni, eno te Genuai Bidigo bomai po bugagia wali pai. Eno dwai sę me isiąma, tama ena God tudiba me mubeo.
PSA 18:22 Eno te agai doloba pai bomai po te sesemane homu kone paliyu, tama eno agai po tudiba me mabeo.
PSA 18:23 Te magi dwai sę me deli isiąbo te agai koneani, tama eno te magi nai me delide magi sę me ebeo.
PSA 18:24 Tama tiyu, Godigo te eno doloba pai kolesagade homu koneama, tama agai ena bugagia mu tonaluai. Magi baso meni, agai koneani, te eno magi sę me isiąwai.
PSA 18:25 Te bidigo nage wali mu asobaso da, teda nago te nago po dolo wali pelama, tama nago aga tonalubo dao. Te bidi dolasa biliyu, tama te magi naide te magi me deli isiąbaso, nago agade te wiegi yai homu ebo dao.
PSA 18:26 Te bidi me deligo te meda mu meni yai kolesaga ebaso da, teda nago me agaba te wiegi yai kolesaga ola mabo da. Tiali goli, te bidigo dwai kolesaga wali pobaso da, teda nago agaba te dwai kolesaga wei ponobo dao.
PSA 18:27 Nago te augwa digi te haliga aiyaba elalubo we bidi dabe augwali te ma sabo da. Tiali goli, nago te augwa digi augwa nogi ugwaba sabo we bidi te aiyaba elaluaibao.
PSA 18:28 Te enade digi te Genuai Bidigo ula elalubao. Awe, tama ena Godigo te enade hulia sai elalubo te sela sąbo dao.
PSA 18:29 Godigo te boi bidi dabe dali hwįbo bomo te enaba mawai. Tama agai enabolo te augwaligo seselalubo nai dabe dolobo te genuai bomo mawai dao.
PSA 18:30 Te God da, agai kolesaga te wiegi yai mu elama, tama dolo mu elalubao. Te Godigo te magi nai me delide po dąų obaso da, teda agai po te mu po naga wabo waibao. Te agaba pabo bidi tigidali te agai bugagia tonalu, tama te boi bidi dabede geme dualalubo da.
PSA 18:31 Genuai Bidi naga te God mu da. Agaduba deli naga te dago boma pai obo dao.
PSA 18:32 Agai naga ena dąų walama, tama ena bilibo sogode te bugagia tonalubo dao.
PSA 18:33 Agai ena te bulu uni kibu hasa bugagia bilimainu ebo tiwai eyu, tama ena te bulu du dabede bidibo sogo agai ena tau sabo dao, tama ena tulalu me ebo meni.
PSA 18:34 Agai enabolo te hwįbo ola mawai, tama eno te bomai kapago nigai enesigi kegebaso, usu yaibao.
PSA 18:35 Genuai Bidi, nago ena tonaluama, tama ena ma dobola sabo dao. Awe, nago dolo nogogo bomogo ena tau sabo dao. Nago ena tau selama, tama ena te we bidi dabego gedude genuai nogi elalubao.
PSA 18:36 Nago te eno sunumide tonalubaso, tama te boi bidi dabego ena pageabi eyu, te ena me tola sabeo. Tama eno sągą te me kikila pisąma, tama ena me tula mubeo.
PSA 18:37 Eno te boi bidi dabe pobelama, te augwali tola sali. Tama eno augwali polo me tagala palobeo. Menio. Eno hwįnama, te augwali aiyaba elaluyu yai.
PSA 18:38 Eno te enego augwali enama, tama augwali te ma hodaluainu ebaso, te usu meni yai. Augwali te isilama, tama te eno sągą pąde pila mubo tiwai yai dao.
PSA 18:39 Naga digi nago ena te boi bidi dabe dali hwįbo bomo dąų walai. Naga digi nago ena tau selama, tama eno augwali aiyaba elaluai.
PSA 18:40 Nago te boi bidi dabe tudi ola momainu ebaso, tama enade wi pai. Te enaba boi bidi yali bidi dabe te eno augwali ela muani.
PSA 18:41 Te augwali bidi me deli tau somainu te i wali, tiali goli dego augwali tau saibawe? Te me deli meni yai. Augwaligo te Godiba i wali, tiali goli agai augwaligo te gela wabo me odobeo.
PSA 18:42 Eno augwali mu dolama, tama augwali te waligo sela holobo tǫ hogomu tiwai pedelali. Eno te boi bidi dabe elaluama, eno te sunumide agabo pu tiwai gagawai dao.
PSA 18:43 Nago ena tau siyu, tama te hagoma ebo bidi dabego ena dolomainu me ebeo. Nago ena te we bidi hani dabego king pedalumainu ilali. Te eno konesiąwai we bidi augwali, te augwali aselama, tama eno sę yagasai.
PSA 18:44 Augwaligo eno po odolama, tama polo tama augwaligo wali pabo dao. Te digibulu bulu bidi dabego kidu sugunagasiyu, gagamu ebo dao.
PSA 18:45 Te augwaligo haliga nagamea pelama, tama augwali didibili elama, tama augwa bomai obo tomode bidali tagalama, tama augwali ena dologoba bidagasobo dao.
PSA 18:46 Genuai Bidi bididubadi gebao. Agai ena sesemane sogo bugagia seselalubo dao, te moni dobo dwai masigi tiwaigo ena mesegalobo dao. Tama tiyu, eno agai nogi ugwaba sabo da. God da, te ena tau sabo bidi da. Tama tiyu, eno agai genuai nogi ugwaba sobao.
PSA 18:47 Agai naga ena tau selama, tama eno te boi bidi dabe aiyaba elalubo dao. Tama agai deligo naga te haniani we bidi hani dabe ena dologoba mubo dao.
PSA 18:48 Genuai Bidi, naga digi ena tau selama, tama te boi bidi dabego ena me dolobeo. Mu tama, Genuai Bidi, nago naga ena te hwįbode tau selama, tama eno te boi bidi dabe aiyaba elaluai. Nago ena tau siyu, tama te hwįbo bidi dabego ena me ela mubeo.
PSA 18:49 Tama tiyu, te haniani tǫde bidibo we bidi hani dabe tomode eno nago nogi ugwaba siyu, tama eno nago nogi ugwaba sabo balia po waibao.
PSA 18:50 Genuai Bidigo ena Devit sa munama, tama ena te king bidibao. Tama agai eno te hwįbode sesemane sogo te boi bidi dabe aiyaba elalumainu ilali. Agai ena godolo mu elama, tama te eno wąį nǫų, te nosali pedalubo bagede me, te tama tiaibao. Agai te da godolo mu ebo kolesaga munu me siligobeo.
PSA 19:1 Te Devitgo asęani balia po me deli dao. Dagalugo dabolo ola mabo dao, God agai bomo dali, genuai nogi dali si mu elalubao. Awe, tigidali nai dagalu ugwadu elalubo naigo dabolo te Godigo digi augwali nigai, te hania ola mabo dao.
PSA 19:2 Tigidali bidibo sogo te nai dabego po naga hanilama, po wabo dao. Tama tigidali be hulibo sogo, augwaligo dabolo te po ma wabo dao.
PSA 19:3 Ulade me, be hulide dali, te dagalude elalubo nai dabego pedauwali meni yai dao, tama tiyu, po me wagobeo. Dago te ulade me hulide dali te nai dabego dogonide po me wabo dago odobo menio.
PSA 19:4 Tiali goli, ulade me, hulide me, te nai dabego da tigidali tǫde we bidi te Godigo bomo dali, genuai nogi dali si ola mabo dao. Tama augwaligo po tigidali buluba pelama, usu mu ebo dao. Tama dagalude Godigo giligago ugwa be me deli sę yai tiwai elalubao.
PSA 19:5 Siago buluba teda soai, te bidi we siyu, dwagi yai ebo gilama, tama aga bidibo be tagalama, buluba teda soai. Giligago aga dwagi yai homu eyu, aga pabo tų wali pabo dao, te bidi udawainogo sisi elama, dolalubo tiwai ebo dao.
PSA 19:6 Sia ge pedalobo te dagalu sesege badu pedalobo dao, tama gasa badu pabo dao, tama magi nai me agai posolo ebo digi me duala sogobeo.
PSA 19:7 Genuai Bidi Godigo bomo yai po te tigidali dolo mu naga ebo dao, tama dabolo bidibo bomo yai ula mabo dao. Genuai Bidi God agai pode dago bomo yai homu agabolo dąų olama, muyu da, te usu mu yaibao. Te pogo dwagi yai homu kolesaga agai po kuna konesiąwani bidi polo agai mabo dao.
PSA 19:8 Genuai Bidigo dabolo dwagi yai po mu ola mabo dao. Te pogo dago homu kolesaga dwagi yai pemene mu ebo dao. Genuai Bidigo tama tiao wabo po te dwagi yai mu dao, tama dabolo dwagi yai koneabo homu kolesaga mabo dao.
PSA 19:9 Bidigo Genuai Bidide wi eyu, aga dologode bidibo bidi, agai dwagi yai meda isiąwai kolesaga mu ebo dao. Tama te kolesaga sesemane sogo elalua peyu, mu elalua paibao. Genuai Bidi Godigo dago yabo kolesaga po tigidali wabo dao, tama te mu po tigidali dolo mu ebo dao.
PSA 19:10 Te tobage pogo te wiegi yai nai go te aiyaba elaluai, awe, te meda isiąwai te gol, te me te pogo aiyaba mu elaluai, tama dago agai te po mu godolo yao. Genuai Bidi God agai bomo yai po te pusu mu yai, tama te megego pusu ebo aiyaba elaluai. Agai te dwagi yai pusu mu ebo mege ąį tubo te aiyaba mu elaluai dao.
PSA 19:11 Nago bomo yai pogo naga sę bidi eno koneabo homu kolesaga mabo dao. Eno nago bomai po wali pobaso, tama nago ena dulalubo digi dwagi yai ilibo da.
PSA 19:12 Tialima, niwai bidigo aga yali dwai sę koneaibawe? Eno dwai sę meba yali te eno kuna konebeo, tama nago eno te dualai dwai sę yali pęą sąlama, ma sela sąyao.
PSA 19:13 Ena nago sę bidi dao, nago ena bugagia tonaluao, tama eno hagoma homu eyu, nago po sela sąyu, dwai sę ma idali weyu yao. Nago eno dwai kolesaga ebo nago sulama tonalugio. Tama tiyu, ena dolo bugagia bidiyu, eno dwai sę genuai me egobeo.
PSA 19:14 Genuai Bidi, eno homugo eno po dali, eno homu kolesaga dali, te nago gedude usu emainogo te homu yai. Genuai Bidi, nage bidibo digi ena duala selama, tama nago ena tau siyu, ma dobola sabo bidi dao.
PSA 20:1 Te Devitgo asęani balia po me deli dao. Devit, te Genuai Bidigo sę bidi, agai te balia po asęani. Agai te po Godiba wali te ula te bubugade Godigo aga tau selama, tama te boi bidigo aga aiyaba me elalusiąyu, tama te Solgo aga me dolobeo. Te po olama, te balia asęai dao. Dago king bidio, eno homugo te nage haliga sęgę ebo sogo, te Genuai Bidigo nage tau somainu yao. Mu tama, te Jekopgo Godigo nage seselaluaibao. Awe, agai nogigo bomogo tama tiao.
PSA 20:2 Aga te aga wiegi yai be mu te Saionde bidibao, tama agai nage tau selama, tama nage dąų walomainu yao.
PSA 20:3 Agai te nago ofa tigidaliba homu koneama, tama agai te nago tigidali te siaba ulubo ofa te wei elama, godolo yao.
PSA 20:4 Eno homugo Godigo te nago wei ebo nai tigidali momainu yao. Tama nago yainu homu yali sę tigidali te agai nage tau sobaso, tama nago te sę ebo usu yaibao.
PSA 20:5 Tama nosali nago te hwįani aiyaba elalubaso da, teda dago nago te yalide wiegi yai homu pemene eyu, bomonama i waibao. Tama dago te homu koneama, tama dili buduama, tama dago dobuali balia po weyu, dena Godigo nogi ugwaba saibao. Dago homugo te Genuai Bidigo nago te gedu haluasa po wabo po tigidali odaibao. Te kingo te po wei ponani po wali.
PSA 20:6 Megi da, eno koneanio, Genuai Bidigo ena tau sabo da, te king aga digi sa muani. Aga te aga wiegi yai tedali bulu dagalude bidibao, tama agai eno gedu haluasa po wabo odobo dao. Te agai bomode digi agai ena tau selama, tama eno hwįbo side te eno augwali aiyaba mu elalubo dao.
PSA 20:7 Te meba hanigo hagoma eyu, te hwįbo karis dabeba homu muani, tama gasa hani mebago te augwa hos dabeba homu muani. Tiali goli, dago te dena God Genuai Bidiba, Godiba, konealubo homu dąų wabo dao.
PSA 20:8 Te we bidi dabe augwali tulaluama, tama mu hagawaibao. Tiali goli, da te hodalu, tama bomonama dolaluaibao.
PSA 20:9 Genuai Bidi, nago ena king tau sobaso da, teda eno te hwįbo aiyaba elaluaibao. Te Genuai Bidigo te dago i wabo sogo te da tau sao.
PSA 21:1 Te Devitgo asęani balia po me deli dao. Genuai Bidi, nago te kingba bomo mobaso, te agai wiegi yai homu pemene yai. Te nago agai te hwįbode augwali aiyaba elalumainu yali sęde te agai homu pemene wiegi yai mu ebao.
PSA 21:2 Te agai wei eyu sainu yali nai, nago agaba manio. Awe, agai nageba hanalu wali nai, nago te agaba mani.
PSA 21:3 Nage agaba asiyu, te wiegi yai homu ilabo nai dali sela asai. Tama nago te wiegi yai kapa gol elalubo kingo madi aga toboluba muai.
PSA 21:4 Agai nageba te bidibo ula mao po hanalu obaso, tama nago aga mawai. Mu tama, nago aga bidibo ula te sesabi mu elama, bidimainu yai.
PSA 21:5 Nago aga tau selama, tama aga genuai nogi mu elalubao. Nago nogi me bomo digi nago aga mani.
PSA 21:6 Mu tama, te nago wiegi yai sę ebo kolesaga agade sesemane elaluaibao. Nage aga pąde bidiyu, tama tebogo aga wiegi yai homu pemene mu ilibo dao.
PSA 21:7 Te Ugwade Mu Bidibo Boma Pai God, kingo nageba konealubo homu dąų mu wali. Nago olo tau sabo wiegi yai kolesaga sesemane sogo te kingba ebaso, tama tiyu, te aga bomo elama, dolalu iduaibao.
PSA 21:8 Te kingo aga boi bidi tigidali nogogo touwaibao. Tama aga digi te aga wei homu isiąbo bidi dabe te kalabus yaibao.
PSA 21:9 Te aga hania te pepeli diliba pedalubo sogo da, teda agai te boi bidi dabe ela silibo da, te genuai siago te nai dabe ulubo tiwai gilama yaibao. Mu tama, te Godigo wado po weyu, tama augwali aiyaba elaluama, tama te siago augwali tigidali dela silaibao.
PSA 21:10 Te kingo augwaligo wai tigidali ela silaibao. Tama te augwali hanigo wai dabe te tǫde munu me bidigobeo.
PSA 21:11 Te boi bidi dabe augwa homude koneama, tama agaba dwai sę yabo miani. Tiali goli, augwaligo aga aiyaba elaluainu ebo usu me ebeo.
PSA 21:12 Magi baso meni, te agai ene te augwaliba eneyu, wi ilibaso te augwali wi paibao.
PSA 21:13 God, nage te naga bomo dali asao. Tama dago te nago naga bomogo yali genuai sę dabede balia po waibao.
PSA 22:1 Te Devitgo asęani balia po me deli dao. Eno God, eno God, magi baso nago ena tagaluwe? Magi baso nago ena tau sisąma ebawe? Magi baso eno gela wabo nago odobewe?
PSA 22:2 God, eno nageba te giligade i wabo da, tiali goli nago eno po odobeo. Eno nageba te hulide me i wali, tiali goli nago te po wei ponesiąbaso, eno dwasianu toma me nabeo.
PSA 22:3 Tiali goli, naga digi nage te tedali wiegi yai mu elalubao. Nage te king bidibaso, tama te Israel dabego nago nogi ugwaba sabo dao.
PSA 22:4 Polobadu dago wąį nǫų dabe augwaligo konealubo homu nageba dąų wali. Augwa konealubo homu dąų obaso, tama nago augwali tau selama, tama te boi bidi dabego augwali aiyaba me elalubeo.
PSA 22:5 Augwaligo nageba i weyu, gedu haluasa po obaso, tama nago augwali te boi bidi dabego nogode ma dobola sai. Awe, augwaligo konealubo homu nageba dąų wali, tama augwa te konealubo homu dąų wali te odolali me hagagobeo.
PSA 22:6 Tiali goli, bidigo gedude ena te tǫde osogani tiwai, ena te olo bage tiwai mu da. Tigidali bidigo enaba wado po weyu, tama ena tudiba muani.
PSA 22:7 Tigidali we bidigo ena sulama, tama augwaligo posobo po enaba wabo dao. Augwaligo hamena enaba diniyu, tama augwa tobolu peme eyu ebo dao.
PSA 22:8 Augwaligo te po weyu, “Nago konealubo homu te Godiba mubo da,” wabo. “Magi baso agai nage ma sabewe? Te Godigo nage wei homu eyu da, te magi baso agai nage tau sabewe?” Augwaligo te tobage po wabo dao.
PSA 22:9 Tiali goli, God, nago naga ena te idago haligade selama, tama ena bugagia pedelali. Tama ena te ame tubadi, nago ena tonaluai.
PSA 22:10 Eno konealubo homu nageba muani, te idago ena ame nani sogode dąį elasa, megi e sogoba su nagasobao. Idago ena gesi noma ame nabode, tama nage eno God bidai.
PSA 22:11 Te sęgę enaba megi pedalubao, tama tiyu, nago ena me tagaligio. Ena tau sabo bidi deli me menio.
PSA 22:12 Te boi bidi hauwago ena te bulmakau dabe pobeasa bilibo tiwai ebao. Augwali te Basan bulude omai bulmakau dabego bomo tiwai gilama ebo dao.
PSA 22:13 Te boi bidi dabe augwaligo te ena dolainu sisi elama, te laiongo dwai hwą wabo tiwai eyu, tama te uni hasa tuabo pedauwali nalubao.
PSA 22:14 Eno bomo tigidali silalio, augwa te tǫba wę gelama, te soa sabo tiwai gilama yai. Te dili ununani tigidali te guda pai. Eno homu te mu nagamea pali, te posolo yai ili wę pedalubo tiwai yali.
PSA 22:15 Eno dogoni te wa mu pali, tama eno hamena te pedauwalide agana sai. Naga digi ena tagalama, ama ena mu isainu ebao.
PSA 22:16 Te dwai bidi dabego ena te tigidali habu badu te yowigo uni hasa pobeasa bilibo tiwai gilama ebao. Augwaligo eno sągąde me nogode te augwaligo gąųgo kelebao.
PSA 22:17 Eno tigi dili tigidali te hania pedelali. Tama te bidi dabego ena sulama, tama ena dolali sęde te augwa wiegi yai homu pemene yai.
PSA 22:18 Augwaligo te eno ugwa dabe selama, augwa dobola sali, tama mena bidigo te eno ugwa dabe deli deli sabo bidi pedalumainogo eyu, augwaligo te satu gagali yai.
PSA 22:19 Genuai Bidi, nage enade digibulu me bidamuo. Nage da, te ena sesemane sogo tau sabo bidi dao. Nage polo tama asiyu, ena tau sagasao.
PSA 22:20 Nago ena ma dobola sali da, teda augwaligo ena te moni hwągo me ela mugobeo. Nago ena tau sobaso da, teda te yowi tiwai bidi dabe augwaligo ena ela muainu ebaso, te usu me egobeo. Menio. Te ena bidibo ula elalu, bidaibao.
PSA 22:21 Augwaligo ena te laiongo uni hasa ela tubo tiwai gilama silainu ebao. Nago ena te augwaligo nogode ma dobola sao. Eno magi sę me deli ebo te uni bulmakau dabe gesabidide me usugobeo.
PSA 22:22 Nago tama tiwai ebaso da, teda eno te ena hani bidi dabebolo nago yali sę po pusaibao. Augwali te lotu weyu, deliba sisinibo side, tama eno nago nogi te augwali tomode ugwaba saibao.
PSA 22:23 Eno tama po waibao, “Dage te Godigo hani da,” po waiba, “aga nogi ugwaba sao. Dage Jekopgo hani, te Genuai Bidigo nogi ugwaba sao. Awe, dage te Israel dabego hani, dagego agaba lotu wabo po wao.
PSA 22:24 Agai te magi doado bage meni yai bidi dabe tudiba me mubeo. Agai te augwalide sęgę me dene ebo te olo nai da homu me egobeo. Tama aga te augwalide digibulu me bidigobeo. Menio. Agai te augwaligo usu da weyu, gedu haluasa po wabo odobo dao.” Eno tama po waibao.
PSA 22:25 Te lotu wainu sisinibo genuai pesagede te eno nago nogi deli naga ugwaba saibao, te nago ebo sę tigidalide te tama tiaibao. Te polobadu eno yaibao po dąų wali ofa, te eno te nagede wi ebo we bidi gedude yaibao wali.
PSA 22:26 Te magi nai doado bage meni yai bidi augwali eno i obaso, augwali aselama, te nai tulama, haliga mu pągąna paibao. Tama te Godiba pabo bidi dabego, teda augwaligo aga nogi ugwaba saibao. Eno homugo Godigo augwali sesemane sogo bugagia wiegi yai ilama, bidimainu yao.
PSA 22:27 Te tǫde tigidali we bidigo augwaligo te Godiba homu koneama, tama augwa agaba ma asaibao. Te tigidali hani we bidi dabe augwaligo kidu sugunama, agaba lotu waibao.
PSA 22:28 Magi baso meni, Genuai Bidi te king bidiyu, tama agai te tigidali hani we bidi tonalubo dao.
PSA 22:29 Te dwai kolesaga eyu, hagoma ebo bidi dabego kidu sugunama, tama agaba lotu waibao. Te bidabo ula elalubo usu isiąyu, te isabo ąǫ ebo bidi dabego, te tigidaligo kidu sugunama, te Godiba lotu waibao.
PSA 22:30 Te nosali pedalubo we bidi hani, augwaligo te agai sę yaibao. Te bidi dabego te nosali pedalubo haniba te Godide po hania pusaibao.
PSA 22:31 Te hani augwali ame nisiąbadi, tiali goli augwali pedalubo si da, teda augwaligo te tama po augwaliba waibao, “God aga digi te aga we bidi dabe ma sai dao,” te po waibao.
PSA 23:1 Te Devitgo asęani balia po me deli dao. Genuai Bidi te ena tonalubo bidi da, tama ena te aga sipsip me deli tiwai dao. Tama tiyu, te magi nai me deli ena me sǫą pogobeo.
PSA 23:2 Agai ena te wiegi yai tuabo nosaide pila mumainu ebo dao. Tama agai ena te dwasianu wę ulu pedalubo madi odasa pelama, tama ena te wę tuyu, te ena toma nabo dao.
PSA 23:3 Agai enabolo gesi bomo mabo dao. Tama agai ena te doloba pai sunumidu odasa pabo dao, te agai tama tiaiba po polobadu wali gilama ebo dao.
PSA 23:4 God, ena te dwai bulu te be hulia sai madi bilibaso da, te tagalao, ena te dwai naide wi me egobeo. Magi baso meni, nage ena dali bidibao. Eno suali, nago te sipsip tonalubo bidigo dono tolasa bilibo suali, tama tibaso, eno homu nagame elama, bidibo dao. Ena me dologobeo.
PSA 23:5 Nago te eno wiegi yai nai te hania te tebol saide sisi ilama, tama eno boi bidi dabego suali goli, te augwaligo magi sę me yabo usugobeo. Nago ena selama, te nage dali duayagasobo, tama ena nago bugagia gesebo dao.
PSA 23:6 Genuai Bidi, eno mu koneani, te nago ena bugagia tonalu, tama nago enade homu dene eyu, tau sabo kolesaga, te kolesaga si te ena dali sesemane sogo bidaibao. Tama, Genuai Bidi, ena nago bede sesemane sogo bidada peyu, bidada paibao.
PSA 24:1 Te Devitgo asęani balia po me deli dao. Te tǫ dali, tigidali tǫde elalubo nai, te tigidali Godigo nai naga dao. Tigidali bulu me, te Godigo nigali nai dao. Tama tigidali bulude bidibo we bidi me, augwali me te Godigo hani we bidi naga dao.
PSA 24:2 Magi baso meni, agai tǫ ugwadu nigai, tama ąį aiyadu mu elalubo dao. Tama agai tǫ page tamu ąį tomode nigai.
PSA 24:3 Niwai bidi te Genuai Bidi Godigo bulu duba holobo usugowe? Niwai bidi agai dwagi yai be tomoba pogowe?
PSA 24:4 Dwai sę isąwai bidi, tama agai homu meda meni yai dwagi yai. Tibo god dalibolo lotu po wasiąwai bidi, tama bidigo gasa bidi tibo dąų wabo po me ola masiąwai bidi. Tiwai bidi aga te usu yaibao.
PSA 24:5 Te bidi dali te Genuai Bidigo dwagi yai sę yaibao. Awe, Godigo aga ma selama, tama te bidi dwagi yai bidi dao waibao.
PSA 24:6 Tiwai bidigo God subo dao. Aga te Jekopgo God pąba pabo dao.
PSA 24:7 Dage te tempel bede elalubo tų, dage dayao. Dage te augwaligo polobadu mu nigali tų, dage genuai gisiga dayao. Tama polalubo genuai tuni bidi king tomoba somainao.
PSA 24:8 Genuai polalubo bidi, aga de dawe? Aga te Genuai Bidi God deli dao. Agai genuai bomo elalubao, aga te boma pai king mu dao, tama bidigo aga dali hwįbo usu ebo menio.
PSA 24:9 Dage tų, dage dayao. Dage polobadu tų dao, dagego genuai tų gisiga dayao. Tama genuai polalubo tuni bidi king be tomoba somainao.
PSA 24:10 Genuai polalubo tuni bidi king aga de dawe? Aga te Genuai Bidi God dao, agai te genuai ami bidi hani tonalubo dao. Aga deli digi mu te polalubo tuni bidi king mu dao.
PSA 25:1 Te Devitgo asęani balia po me deli dao. Genuai Bidi, megi eno gedu haluasa po nageba obao, te eno ofa me deli tiwai mobao.
PSA 25:2 Nage eno God da, tama eno konealubo homu nageba naga dąų wabo da. Nago ena tau sao. Tiyu, eno konealubo po odolali elama, tama ena hale idalio. Nago te boi bidi dabego ena aiyaba elalumainu elama, tama augwaligo ena kęnę po omainu me igio.
PSA 25:3 Awe, nageba te konealubo homu ąų wabo bidi dabe, te augwaligo konealubo odolali dąų omainu elama, tama me tagaliyu me egobeo. Menio. Te nageba hagoma polo ebo bidi dabe, augwali naga te dwai dene somainu elama, tama augwa yali kolesagade hale yaibao.
PSA 25:4 God, nago te naga kolesaga enaba ola menama, tama nago sunumi enaba ola mao.
PSA 25:5 Te nago po mu eno wali pomainu ola mao, magi baso meni, nage te eno God dao, tama nago ena ma sabo dao. Te tigidali sogo nago ena tau somainu tonalubo dao.
PSA 25:6 Genuai Bidi, nago te naga olo mu tau sabo wiegi yai kolesaga, me homu dene ebo kolesaga te homu kone palao. Nago te kolesaga da dali ebo te polobadu digi yali te ela asudubadi, megi sogoba usu nagasobao.
PSA 25:7 Genuai Bidi, nago eno dwai sęgę sali, me dwai sę yali kolesagade homu kone me palamuo, te ena gesi bidide te sę yali. Nage te da godolo ebo Genuai Bidi God dao, tama nage te sesemane wiegi yai elalubo da. Nago enade homu koneama, tama nago ena te olo mu tau sabo wiegi yai kolesaga yao.
PSA 25:8 Genuai Bidi te wiegi yai elama, tama agai te po tų sesemane dolo naga ebo dao. Tama tiyu, agai te dwai sęgę sabo bidi dabeba te agai wei eyu, godolo homu yabo kolesaga wali pomainu ola mabo dao.
PSA 25:9 Te aga dologode bidibo bidi dabe te bilibo dodolaibao, tama augwa te doloba pai kolesaga wali pomainu ebo dao. Agai te aga sunumi me te augwaliba ola mabo dao.
PSA 25:10 Godigo te agai da dali dąų wali po, me bomai po te wali pabo we bidi tigidaliba te agai homu kęą peyu, godolo mu ebo dao. Tama agai homu me hasegeliyu me egobeo.
PSA 25:11 God, nago te naga dąų wali po wali peyu, tama eno yali dwai sę hauwa sela sąyao. Nago eno yali dwai sę tigidali sela sąbaso, tama eno nago nogi ugwaba saibao.
PSA 25:12 Te Genuai Bidigo po wali mu pabo we bidi, te Godigo augwaliba wiegi yai sunumi ola mayu, tama augwali te sunumidu pomainu tebo dao.
PSA 25:13 Te tobage bidi dabe augwali da te wiegi yai mu bidaibao, tama augwa wai dabe me te tǫde bugagia bididuaibao.
PSA 25:14 Genuai Bidi God aga te aga dologode bidibo we bidi dabe augwaligo abagi mu dao, tama augwali dali te dąų wali bomai po kontrak te augwaliba ma ola mabo dao.
PSA 25:15 Tigidali sogo te Genuai Bidigo ena tau somainu tonalubo da. Magi baso meni, te ena dolainu yali nai dabede te agai ena ma sabo dao.
PSA 25:16 Genuai Bidi, eno homugo nage ena ma aselama, tama nago te olo tau sabo wiegi yai kolesaga enaba yao, magi baso meni, enaduba deli tama eno bomo silalio.
PSA 25:17 Nago eno haliga sęgę elalubo tigidali sela sąyao, tama eno haliga te nagame yai dua bidimainu yao. Nago ena tau selama, tama te sęgę dabego ena elalumainu me egobeo.
PSA 25:18 Nago enade te haliga sęgę, me haliga dene ebo tigidalide nago homu kone palama, tama nago eno sęgę tigidali sela sąyao.
PSA 25:19 Nago te eno boi bidi dabe subao, augwali te hauwa mu tama. Augwaligo ena dali sębę mu genuai ebao.
PSA 25:20 Nago ena ma selama, tama ena bugagia seselaluao, tama te boi bidi dabego ena me dologobeo. Nago ena tonalumainu eyu, te ena nageba asobao.
PSA 25:21 Eno konealubo homu nageba elalubao, tama tiyu, nago eno te tigidali wiegi yai doloba pai kolesaga emainu eyu, tego te sesemane sogo ena tonalumainu ilao.
PSA 25:22 God, nago te naga we bidi tigidali ma dobola sao. Tama te tigidali haniani sęgęgo augwali aiyaba elalumainu me elamu dao.
PSA 26:1 Te Devitgo asęani balia po me deli dao. Genuai Bidi, nago ena doloba pai bidi nogi yao. Magi baso meni, eno te doloba pai kolesaga yali, tama eno konealubo homu nageba tigidali muani.
PSA 26:2 God, nago eno kolesaga tigidali usu sao. Tama nago eno haliga, me homu, te dagalao.
PSA 26:3 Magi baso meni, nago te olo tau sabo wiegi yai kolesaga enaba eyu, tama ena sesemane sogo dodolobo dao, tama nage te ena soabo madi sesemane poligi solama, tama nago ena me tagalubo menio.
PSA 26:4 Ena te dwai sę ebo bidi dabe dali me bilisiąwai. Ena te tibo po wabo bidi dabe dali me bilibeo.
PSA 26:5 Ena te dwai sę ebo bidi dabe dali bilabo te hagela homu mu ebo da. Eno augwali ela soabo dao.
PSA 26:6 Genuai Bidi, eno nogo wę telayu, te eno dwai sę me yali menibaso, te nageba ola mayu tiali. Tama eno nago alta bagulubo sę eyu, tama eno nageba lotu po wabo dao.
PSA 26:7 Eno tama tiyu, tama eno nageba usu da wabo tęąbi po me deli obao, tama eno te we bidiba te nago yali wiegi yai sę po pusubao.
PSA 26:8 Genuai Bidi, eno nago be te wei elama, godolo mu ebao, te nago genuai nogi dali, bomo dali si elalubo bulude.
PSA 26:9 Nago ena te dwai sę ebo bage dali me dologio. Nago ena te gasa bidi ela mubo bidi dabe dali me ela mugio.
PSA 26:10 Te bidi dabe augwaligo te dwai kolesaga sesemane sogo ebo dao, tama augwaligo te bidi meba te monego homu bega selama, te gasa bidiba dwai sę emainu tebo dao.
PSA 26:11 Tiali goli, ena digi eno da, te doloba pai kolesaga ebo dao. Nago te olo tau sabo wiegi yai kolesaga enaba elama, tama ena ma sao.
PSA 26:12 Ena bomonama dolalubao. Te magi nai me deligo ena dolomainu me egobeo. Te eno Genuai Bidi nago nogi te we bidi sisinama lotu wabo tomode te eno nago nogi ugwaba saibao.
PSA 27:1 Te Devitgo asęani balia po me deli dao. Genuai Bidi God aga te eno ula page da, tama agai ena tau sabo da. Tama tiyu, te bidi me delide ena midigi me egobeo. Genuai Bidigo naga ena seselalubao, te moni bomai obo tiwai te palialubao. Tama tiyu, te magi nai me delide ena wi me egobeo.
PSA 27:2 Te dwai sę ebo bidi dabe ena pąba aselama, tama dolainu usu sobaso da, te bidi dabe augwa digi sągą tǫ dedageba tuloliyu, habala paliyu, augwa digi augwa ma dolaibao.
PSA 27:3 Awe, te ami hani me deligo ena bagua sagasobaso da, teda ena wi me egobeo. Te boi bidi dabego enaba hwįagasobaso da, tagalao. Eno konealubo homu Godiba munama, tama ena ibaba me kila sogobeo.
PSA 27:4 Eno te nai me delide naga te Godiba hanalu wali, tama eno homugo agai te tama sę emainu homu yali. Eno agaba te tama po hanalu wali, te ena bidibo ula elalubo sogo ena te agai bede tigidali sogo bidainogo yai. Te agai enaba wiegi yai homu bugagia ebaso, te eno wiegi yai homu pemene agaba yaibao. Tama eno agaba hanalu, te enaba wiegi yai sunumi ola momainu homu ebo dao.
PSA 27:5 Te dwai sę enaba pedalubo sogo, teda agai ena te agai beba geme dualaibao. Te aga wiegi yai beba te sunumi paliama, tama ena geme bugagia mu dualaibao. Te agai ena te genuai masigi mu me deli te daiba dualama, tama ena bugagia bidaibao.
PSA 27:6 Tama tiyu, te ena bobegelalubo boi bidi dabe augwali eno aiyaba elaluaibao. Te eno wiegi yai homu pemene umabo mu elama, tama i weyu, te Godigo tedali wiegi yai bede ofa yaibao. Te eno aga nogi ugwaba sabo balia po waibao.
PSA 27:7 Genuai Bidi, te eno nageba i wabo sogo, nago enaba te olo mu tau sabo wiegi yai kolesaga yao. Tama nago eno gedu haluasa wabo po odao.
PSA 27:8 Eno homude eno te koneanio, nago enabolo te tama po wali, “Nage enaba asao,” wai. Tialima, Genuai Bidi, te ena paibao.
PSA 27:9 Naga digi nage te enade geme duala selamuo. God, te nago ena tau sabo da. Nago enade sębę elama, tama ena sela sągio, ena naga sę bidi da. Nago ena hauwa sogo tau sali. Nago ena me tagaligio. Nage enade wi me pigio.
PSA 27:10 Aya me ida sigo te ena tudiba mubaso da, tagalao, te Genuai Bidigo ena tonaluaibao.
PSA 27:11 Genuai Bidi, te nago enabolo te nago homugo emainu ebo sę ola mao. Nago ena te wiegi yai sunumiba odasa pao. Magi baso meni, eno boi bidi te hauwa elalubao.
PSA 27:12 Te boi bidi dabego ena somainu, te nago ena me tagaligio. Augwaligo te po tų ebode tibo po weyu, tama ena wi ilainu eyu, augwaligo ena elaibao po wabo dao.
PSA 27:13 Mu tama, nosali ena me bididubadi, eno te Godigo wiegi yai sę te aga we bidi dabeba ebo te eno sueibao.
PSA 27:14 Te nago konealubo homu dąų olama, tama te Genuai Bidigo nage tau sagasobo tonaluao. Bomo elama dolaluao, nago haliga sęgę me igio. Awe, nago konealubo homu dąų olama, tama te Genuai Bidigo nage tau sabo tonaluao.
PSA 28:1 Te Devitgo asęani balia po me deli dao. Genuai Bidi, nage da te ena seselalubo bidi dao, tama eno nageba i obao. Eno gela wabo odao. Te nago eno gedu haluasa po wabo wei ponisiąyu da, teda ena te isai we bidi dabe tiwai elama, tama te isali bidi dabego pesageba paibao.
PSA 28:2 Te eno nageba i weyu, nago ena tau sao wabo sogo, te nago eno gela wabo odao. Eno gedu haluasa po weyu, tama eno nogo ugwaba siyu, te nago wiegi yai be elalubo madiba nogo dų yaibao.
PSA 28:3 Nago ena te dwai sę ebo bidi dabe dali aiyaba me elalugio, tama te dwai kolesaga ebo bidi dabe dali me, te tama me tigio. Augwali da te wiegi yai pusu yai pogo homu bega sabo po wabo bidi dabe dao, tiali goli augwali homude te dwai sę ebo kolesaga pągąnalubao.
PSA 28:4 Te augwa yali kolesagade usu nama, te augwali dene mao. Te dwai dene augwaliba wei ponao. Te augwa yali sęgę tigidali usu nao.
PSA 28:5 Augwaligo te Genuai Bidigo genuai sę te homu konesiąyu, tama agai ebo sę dabede homu konebeo. Tama augwaligo tama tialigo da, teda agai augwaliba te dene mayu, tama augwali tigidali silimainu yaibao.
PSA 28:6 Eno te Genuai Bidigo nogi ugwaba sobao. Agai ena dali homu dene eyu, tama ena tau somainu, eno agaba gela wali, tama agai eno gela wabo odalio.
PSA 28:7 Godigo naga ena seselaluyu, tama ena bobegela sai elalubo dao. Tama tiyu, eno konealubo homu agaba muani da. Genuai Bidigo ena tau sobaso, tama eno wiegi yai homu pemene agaba ebao, tama eno aga nogi ugwaba sabo balia po dabe obao.
PSA 28:8 God Genuai Bidigo te aga we bidi dabe seselalubo dao. Aga te tudibadu daganalu, tama aga sa muani king tau sabo dao.
PSA 28:9 Genuai Bidi God, naga we bidi dabe tau siyu, tama naga te sa muani we bidi hani dabe bugagia wiegi yai ilao. Nage te augwali tonalubo bidi bidiyu, tama augwali te bidada peyu, bidada pabo sesemane sogo bugagia tonaluao.
PSA 29:1 Te Devitgo asęani balia po me deli dao. Dage te boma pai ensel mobo bidi dabe, dagego te Genuai Bidigo nogi ugwaba sao. Te agai genuai nogide me bomode te wiegi yai homu pemene yao.
PSA 29:2 Te Genuai Bidigo genuai nogi ugwaba sao. Agai magi sę isąma, wiegi yai mu bidiyu, tama dagego agaba lotu waiąo.
PSA 29:3 Genuai Bidigo po obadi, tama augwaligo te tamu ąį pedai tigidali badu odobo dao. God aga te genuai nogi me bomo elalu, tama agai i bomonama wabo te be kulukulu wabo tiwai ebo dao. Te agai po te genuai tamu ąį tigidali badu pedaide te po wabo dao.
PSA 29:4 Te Genuai Bidigo i wabo bomo te genuai elalubao. Tigidali bidigo Godigo i wabo odolama, tama augwali agade wi ebo dao.
PSA 29:5 Te Genuai Bidigo i wabogo te genuai ni sida dabe pedaibao, tama agai te Lebanon bulu du dabede ni sida dabe me peda sabo dao.
PSA 29:6 Agai te Lebanon bulu du dabe te bulmakau wai te sasamano pabo tiwai ilibo dao, tama te Hermon bulu du te ogwa bidi bulmakau omai sasamano pabo tiwai yaibao.
PSA 29:7 Te Genuai Bidigo i wabogo te be sele elibo dao.
PSA 29:8 Te agai dogonigo te wa pai bulu te gęǫ ilaibao. Agai te Kedes hanu wa pai bulu te gęǫ ilibo dao.
PSA 29:9 Te Genuai Bidigo i wabogo te uni hasa dabego wai sągąnobo tiwai yaibao, tama te tigidali ni yabe dabe sela sąbo dao. Tama te Genuai Bidigo wiegi yai bede tigidaligo te tiwai i weyu, “Godigo genuai nogi elalubao,” te po wabo dao.
PSA 29:10 Genuai Bidi te king bidiyu, tama te tigidali genuai tamu ąį tonalubao. Aga te king sesemane sogo bidibao.
PSA 29:11 Genuai Bidigo bomo te aga we bidi dabeba mabo dao. Agai augwaliba te wiegi yai sę yabo homu kolesaga menama, tama augwali homu nagame elama, bidibao.
PSA 30:1 Te Devitgo asęani balia po me deli dao. Genuai Bidi, nago ena ma selama, tama nago ena te boi bidi dabego aiyaba elaluama, te kęnę omainu me ebeo. Tama tibaso, eno nago nogi te ugwaba mu sobao.
PSA 30:2 Genuai Bidi, nage eno God da, tama eno gedu haluasa po nageba olama, tama nago ena usu ma ilai dao.
PSA 30:3 Genuai Bidi, ena isibo bidi tiwai yai digi, tama nago ena ma hodolali. Ena te isai bidi dabego pesageba dulali. Tiali goli, nago enaba te bidibo ula ma mawai dao.
PSA 30:4 Dage te Genuai Bidi dali homu kęą pai we bidi, dagego te aga nogi ugwaba sabo tęąbi po wao. Aga da, te dwai sę isąbo tedali gasagi yai God mu dao. Tama agade me, te agai yali sę tigidali homu koneama, tama agaba usu da po weyu, gedu haluasa po wao.
PSA 30:5 Magi baso meni, agai wado po te pęwadage sogo naga waibao. Tama agai homu wiegi yai daba elama, tama da bugagia wiegi yai ilaibao. Te tigidali sogo da tǫde bidibo sogo te tama tibo dao. Te hulide eno gedu ąį dulali, tiali goli te kigamu da, eno te wiegi yai homu pemene ma yaibao.
PSA 30:6 Polobadu te ena bugagia mu bidibaso, tama eno te tiwai po wali, “Te magi nai me deligo ena dwasianu degelainu ebaso, usu me egobeo,” wali.
PSA 30:7 Genuai Bidi, nago enaba wiegi yai sę mu eyu, tama ena te bomonama dolalumainu eyu, te bulu dude dolalubo bomai be tiwai gilama ilali. Tiali goli, nage geme duala sali sogo, te sogo ena wi elama, aiyaba mu dulai dao.
PSA 30:8 Tama Genuai Bidi, eno nageba i wali. Te nago ena tau somainu, te eno nageba bomonama usu da po weyu, gedu haluasa po wai dao.
PSA 30:9 Tama eno te po wai, “Te ena te isai madiba pobaso da, teda te mena wiegi yai nai pedelaibawe? Te ena gų pageba pobaso da, teda tebogo de tau sogowe? Te isali bidi dabego nago nogi ugwaba somainu te homu eba, agawe? Te augwaligo nageba pusuyu, te nago sesemane sogo augwali wiegi yai bugagia ilibo da homu ebo po waiba, agawe? Menio.
PSA 30:10 Genuai Bidi God, nago eno wabo po odao, tama te olo tau sabo wiegi yai kolesaga enaba yao. Genuai Bidi nago ena tau sao.
PSA 30:11 Nago eno homu sęgę elaluali te sela sąnama, tama nago ena te wiegi yai homu pemene tęąbi po omainu yali. Hasia ena te bidi isaide gela wabo bidi tiwai yali. Tiali goli, nago eno gela wabo hasegelama, tama eno homu pemene wiegi yai mu ilali.
PSA 30:12 Tama tialima, eno pedauwali me pania sogobeo. Te eno nago nogi ugwaba sabo tęąbi po waibao. Genuai Bidi, nage eno God da, te eno sesemane sogo nageba usu da weyu, gedu haluasa po waibao.
PSA 31:1 Devitgo te balia asęani. Augwaligo te balia po augwa te moni lotu be tempel te Godiba mani sogo wai tiwai po dao. Genuai Bidi, ena nageba asobaso, te nago ena tonaluao. Nago ena tau sao, nago te boi bidi dabego ena aiyaba elalumainu me igio. Nage te doloba pai mu da, nago ena ma selama, te ena me dolobeo.
PSA 31:2 Nago eno i wabo odolama, tama ena polo ma sao. Tama tiyu, nage te ena duala sabo madi te genuai masigi bulu du tiwai elalubao. Tama nago ena bugagia bobegelalu, te ena bugagia bidiyu, tama te boi bidi dabego ena aiyaba me elalugobeo.
PSA 31:3 Mu tama, nage te ena geme duala sabo pesage tiwai elama, tama nago ena tonalubo dao. Tama tibaso, nage ena asobodu poligi pelama, tama ena te wiegi yai sunumiba odasa pao, te nago polobadu te sę yaibao po wali gilama tiao.
PSA 31:4 Te boi bidi dabego ena tola somainu yabo bono gągą muani. Nago ena bugagia tonalubaso da, teda ena tede me dologobeo. Magi baso meni, nage naga te ena geme duala sabo pesage dao.
PSA 31:5 Ena te eno mobo nage nogoba mobao. Genuai Bidi, nage te mu kolesaga naga mu ebo God, nago ena ma sao.
PSA 31:6 Nago te tibo god dabede lotu wabo bidi dabe te wei mu me isiąwai. Tiali goli, eno konealubo homu nageba dąų wali.
PSA 31:7 Nago ena sesemane sogo homu dene yai, tama tiyu eno nageba wiegi yai homu pemene ebao. Nago eno te sęgę suali, tama nago enaba te pedalubo dwai ebo kolesaga te koneanio.
PSA 31:8 Nago ena te boi bidi dabego kalabus emainu me ebeo. Nago ena bugagia tau siyu, tama ena te dwagi yai madigi bugagia bidibao.
PSA 31:9 Genuai Bidi, nago te olo tau sabo wiegi yai kolesaga enabolo yao. Ena te genuai sęgę elalubao. Ena gela hauwa weyu, tama eno gedu bo dalio. Eno dili dabe te bomo kimi meni yani.
PSA 31:10 Te ena haliga sęgęgo digi ena bidabo ula pęwadage ilali. Ena gela mu udu gebaso, tama tiyu, te ena sesabi elama me bidigobeo. Eno genuai sęgę mu elalubao, tama tiyu, eno bomo silalio, tama eno dili tigidali dolobo sę ebao.
PSA 31:11 Te boi bidi dabego dwai posobo po enaba wali. Tama tibaso, te abagi dabego me enaba po dwai weyu, tama eno abagi dabego enade dwai wi mu yali. Ena te sunumidu pobadi, te bidi dabego ena sulama, augwali wi peyu ebo dao.
PSA 31:12 Tigidali bidigo ena homu kone ebo tagalali, augwaligo te isai bidi homu kone isiąbo tiwai gilama yalio. Ena te tǫgo nigali sospen sene alua pobaso sąbo tiwai gilama yai.
PSA 31:13 Eno odali, te boi bidi dabe hauwago ena posobo po odali. Augwaligo ena moni wi ilali. Tama augwa deliba sisinama, tama enaba dwai sę yabo po mia sai. Augwaligo ena ela muabo po wai.
PSA 31:14 Tiali goli, tagalao. Genuai Bidi, eno konealubo homu nageba dąų wabo da. Eno te tama wali, nage eno God da po wai.
PSA 31:15 Ena nago nogode sesemane sogo bidibao. Nago enade te boi bidi ebo bidi me, te ena pobeasa bilibo bidi dabego nogode ma dobola sao. Tiyu, augwaligo ena dolidalio.
PSA 31:16 Ena nago sę bidi da, nago olo tau sabo wiegi yai kolesagago ena tau sao. Nago ena godolo mu ebo kolesaga te siligobeo, tama tiyu, nago ena ma sao.
PSA 31:17 Genuai Bidi, eno nageba i wabo, te nago ena tau somainu obao. Nago ena te boi bidi dabego aiyaba elalumainu me igio. Tiali goli, te boi bidi dabe da, dolomainu yao. Augwali isimainu elama, tama augwa pedauwali te isibo bidi dabego pesagede pania sai elalumainu yao.
PSA 31:18 Te bidi dabe augwaligo te hagoma eyu, te posobo po weyu ebo da, tama doloba pai bidi dabeba po dwai weyu ebo dao. Augwaligo tibo po naga wabo da. Nago augwali dolama, tama augwa pedauwali te mu pania somainu yao.
PSA 31:19 Nago te nage dologode bidibo we bidi olo tau sabo wiegi yai kolesaga hauwa tolalubo dao. Nago te nageba konealubo homu dąų wabo we bidi bugagia tonalubo dao. Nago te augwali tau sabo te tigidali we bidi gedude umabo mu ebo dao.
PSA 31:20 Nago te konealubo homu dąų wabo bidi dabe te nage pąba geme dualubo dao, tama te augwali elainu te po mia sali bidi dabe, augwali usu me egobeo. Nago te nageba homu kęą pabo bidi dabe geme bugagia dualama, tama te boi bidi dabego tibo po kisilibo po wabogo te augwali aiyaba me elalugobeo.
PSA 31:21 Genuai Bidigo nogi ugwaba sao. Agai enaba dwagi yai sę umabo mu elama, tama agai ena tau sabo wiegi yai sę yali, te boi bidi dabego ena pobeasa biliyu, dolainu yali sogo te ena tau sai.
PSA 31:22 Genuai Bidi, polobadu ena wi mu elama, tama eno homugo te nago ena sela sąyu, tama ena nage pąde ma bidigobe homu yalio. Tiali goli, nago eno gela wabo odoyu, tama nago ena tau sali, te eno nageba i olama, enade homu dene eyu, tau sao po wali sogo te tama tiai dao.
PSA 31:23 Te Godigo we bidi dabe, dagego aga wei eyu, godolo mu yao. Agai te aga wali asobo we bidi dabe bugagia tonalubo da. Tiali goli, agai te hagoma ebo we bidi dabeba te dwai dene dolo wei ponobo dao.
PSA 31:24 Dage te Genuai Bidiba konealubo homu dąų wali we bidi tigidali, dage bomo elama dolalu, tama duga haliga sesemane bomo sao.
PSA 32:1 Te Devitgo asęani balia po me deli dao. Te Godigo bidi me deligo dwai sę yali sęgę tagaliyu, tama agai sęgę sela sąbo si da, teda te bidi aga wiegi yai homu pemene eyu, bugagia bidibao.
PSA 32:2 Te Genuai Bidigo te po weyu, te bidigo sęgę megi me elalubeo po weyu, tama te bidigo te tibo po wabo kolesaga wali me pabe da po obaso da, teda aga wiegi yai homu pemene eyu, bugagia bidibao.
PSA 32:3 Te eno ena dwai sę yali po te Godibolo pususiąbadi digi, eno te giligade me hulide dwai gela wali. Tama eno tigi bomo kimi mu meni yai.
PSA 32:4 Te giligade me hulide nago nogogo enaba dene mani. Eno bomo tigidali te hagawali, te genuai giliga tǫba naniyu, te tǫ wa pabo tiwai yai.
PSA 32:5 Nosali eno sęgę te eno nageba pusali. Eno ena yali dwai kolesaga geme me dualubeo. Eno te homu yali, eno te bomai po bolali kolesagade sali sęgę tigidali eno te Genuai Bidiba pusabo homu yali. Eno hania pusula silibaso, tama nago eno yali dwai sę me, eno sęgę me, sela sąwai dao. Tama tiyu, nago ena tede nosali elegobeo wali.
PSA 32:6 Tama tibaso, nage wali asobo tigidali we bidi, te augwaliba sęgę pedalubo sogo, te augwaligo gedu haluasa po nageba omainao. Tama te sęgę genuai mu pedaliyu, tama te ąį genuai asiyu, tama te bidi sainu ebo tiwai gilama ebaso da, teda te sęgęgo augwali aiyaba me elalugobeo.
PSA 32:7 Nagede naga ena duala sabo pesage elalubao. Nago ena tonalubaso, tama te sęgęgo ena aiyaba me elalugobeo. Awe, nago ena te sęgęde siyu yali, tama tede te eno balia po genuai mu wabo dao.
PSA 32:8 Genuai Bidigo te tama po wai, “Eno nage bugagia ola mayu, tama nage bilabo madi te sunumi nageba ola mawaibao. Te nago konemainu te nage eno ola mawaibao.
PSA 32:9 Nage te hos me donki tiwai pedelamuo. Te augwali sigo kolesaga me elalubeo. Nago te ain elalubo bobobage baklain te augwali sigo pedauwaliba munama, tama augwali si pabo ola mabo te baklaingo kegeyu, ola mabo dao. Te menibaso da, teda augwali sigo te nago homu wali me pogobeo.”
PSA 32:10 Te sęgę me dene hauwa te dwai sę ebo bidi dabeba pedalaibao. Tiali goli, Genuai Bidigo te agaba homu kęą pabo we bidiba te olo tau sabo wiegi yai kolesaga elama, tama augwali bugagia tonaluaibao.
PSA 32:11 Dage te doloba pai we bidi, dage te bugai haliga elama, tama te Genuai Bidigo wiegi yai sę tigidali yalide te wiegi yai homu pemene yao. Dage tigidali we bidi, dage te God gedude doloba pai mu yali, dage te wiegi yai homu pemene elama, tama hae weyu, nogo eleyu yao.
PSA 33:1 Te doloba pai we bidi dabe, dagego te Genuai Bidigo tigidali sę yalide te wiegi yai homu pemene yao. Dage te Godigo po wali pabo we bidi, dagego te Godigo nogi ugwaba siąo, te dolo naga dao.
PSA 33:2 Te musik po kulelego weyu, te Godigo nogi ugwaba sao. Te nogo si string elalubo gita eliyu, te musik agaba wao.
PSA 33:3 Te gesi tęąbi po wao. Te gita bugagia eliyu, tama wiegi yai musik mu weyu, tama bomonama i dali wao.
PSA 33:4 Magi baso meni, te Genuai Bidigo po da te mu po tama dao. Agai te doloba pai kolesaga wali peyu, te tigidali sę ebo dao.
PSA 33:5 Genuai Bidigo te wiegi yai kolesaga tigidali me, tama te doloba pai kolesaga tigidali te wei homu ebo dao. Sesemane sogo Genuai Bidigo te tǫde we bidi tigidali wei eyu, godolo ebo dao.
PSA 33:6 Genuai Bidi Godigo te po naga obadi, tama te giliga, me polua, me hǫ dabe te dagalude pedelai. Awe, agai po naga obaso, tama tigidali nai te ogwade pedelai dao.
PSA 33:7 Agai te tamu ąį selama, te deliba naga sisinani, te bidigo te deli sene sospende naga te wę tabibo tiwai gilama yali. Agai te tamu ąi page te aga pesagede aiyadu mu elalumainu yai.
PSA 33:8 Te tigidali tǫde bage te Genuai Bidide wi elama, tama aga dologode bidimainu yao.
PSA 33:9 Magi baso meni, agai po naga obaso, tama te tǫ pedelali. Agai bomai po waligo, tama tigidali nai elalubao.
PSA 33:10 Genuai Bidigo te we bidi hani dabego homu kolesaga te olo tama hagamainu yaibao. Mu tama, te bidi dabego po miyu, te magi nai me deli nigaiba wali, tama agai augwaligo te sę yabo paliyu, tama te sę mu egobeo.
PSA 33:11 Tiali goli, Genuai Bidigo te sę yao po wali da, teda agai po te sesemane bomo elaluaibao. Agai te mena sę me deli yabo homu eyu da, tama te homu yali te sesemane elalua peyu, elalua pabo dao.
PSA 33:12 Te hani dabe augwa God te Genuai Bidi bidibao, augwa te wiegi yai homu pemene iyąo. Te bage te aga da olama sa muani bage, te augwa wiegi yai homu pemene yao.
PSA 33:13 God te dagalude bidu, tama aiyaba tonalubao. Agai te tigidali tǫde we bidi subo dao.
PSA 33:14 Aga te king aga pesagede bidibao, tama te tigidali tǫde we bidiba aiyaba tonalubo dao.
PSA 33:15 Aga digi te tigidali we bidigo homu kolesaga pedalumainu ilibo dao, tama te augwaligo ebo kolesaga tigidali konebo dao.
PSA 33:16 Te hwįbode te we bidi hanigo kingo te boi bidi aiyaba elaluama, tama te genuai ami dabede naga te boi bidi dabe me sela sągobeo. Te ami dabe augwa bomogo digi te boi bidi aiyaba me elalugobeo.
PSA 33:17 Te hwįbo hos dabego te ami dabe tau sobaso, te hwįbo aiyaba elaluainu ebaso, usu egobeo. Tama te hosgo bomogo naga te ami te hwįbode hagabo ma sainu ebaso, usu me egobeo.
PSA 33:18 Tiali goli, odao. Genuai Bidigo te aga dologode bidibo we bidi tonalubo dao. Awe, te agai te da godolo ebo kolesaga ebo siligobeo homu ebo we bidi, te augwali agai bugagia tonalubo dao.
PSA 33:19 Agai te we bidi dabe augwali tonalu, te augwali me isigobeo. Tama agai augwali te nasi ebo sogo nai mayu yaibao, te augwali bidibo ula dali bidimainu yaibao.
PSA 33:20 Te da Genuai Bidigo tau sabo te dago tonalubao. Genuai Bidigo naga da tau sabo da. Aga te hwįbo sabele tiwai elama, tama da agade duala sabo dao.
PSA 33:21 Dago konealubo homu agai wiegi yai nogide dąų obao. Tama tiyu, dago agade wiegi yai homu pemene yao.
PSA 33:22 Genuai Bidi, dago konealubo homu dąų olama, tama nago da tau sabo tonalubao. Nago te olo tau sabo wiegi yai kolesaga daba sesemane sogo yao.
PSA 34:1 Devit te Abimelek dali bidiyu, tama Abimelekigo aga elidali weyu, aga te wabo pabo bidi tiwai bilibaso, tama te Abimelekgo aga sela sąwani. Te Devit pelama, nosali tama te e balia po asęai dao. 1 Sml 21:13-15 suao. Te eno Godiba usu da weyu, gedu haluasa po weyu, tama eno aga nogi sesemane sogo ugwaba sobao.
PSA 34:2 Te Godigo ena tau sali homu elama, tama eno agaba wiegi yai homu pemene ebo dao. Te sęgę tolobo we bidi augwa te po odama, tama augwa bugai homu mu emainao.
PSA 34:3 Dago te Godigo genuai nogide po pusubao. Dago agai nogi ugwaba sao.
PSA 34:4 Eno te Genuai Bidiba usu da weyu, te ena tau somainu gedu haluasa po wali, tama agai eno gedu haluasa po wabo odali. Agai te eno homude wi ebo tigidali sela sąnama, tama megi da, ena haliga nagame yai bidibao.
PSA 34:5 Te tigidali we bidigo sęgę elaluali, tiali goli te augwa Genuai Bidiba konealubo homu dąų weyu, te augwa wiegi yai homu pemene yaibao. Tama tiyu, te augwa konealubo homu dąų wali te me dolobeo, augwali tede hale munu me egobeo.
PSA 34:6 Te sęgę elalubo bidi dabego te Genuai Bidiba gedu haluasa po obaso, tama agai te augwaligo gedu haluasa po wabo odolama, tama augwa te tigidali sęgęde te augwali tau sali.
PSA 34:7 Te Genuai Bidigo mobo bidi ensel te Genuai Bidi dologoba pelama bidibo we bidi dabe pąde bidiyu, tama agai augwali tau sobaso, te augwali me dologobeo.
PSA 34:8 Genuai Bidigo wiegi yai kolesaga dabolo ebo dao. Duga digi te usu bugagia selama, suiąo, tama te dagego koneyu, te Genuai Bidi wiegi yai mu da waibao. Te Genuai Bidiba konealubo homu dąų mu wabo bidigo da, aga te bugai haliga mu elama bidaibao.
PSA 34:9 Te Genuai Bidigo we bidi dabe, dage te aga dologode bidao. Magi baso meni, te aga dologode bidibo bidi dabe da, te augwali magi nai deli me sǫą pogobeo.
PSA 34:10 Awe, te boma pai ogwa bidi laion dabe me sogo te bulu hasa dabe sǫą peyu, tama augwali nasi eyu, augwa bomo kimi isaibao. Tiali goli, te Genuai Bidi wali pabo we bidi dabe da, augwali te wiegi yai nai dabe me sǫą pogobeo.
PSA 34:11 Te dage konea sabo homu ebo bage, dage aselama, tama eno poba olo bugagia muagasao. Eno dage ola menama, tama dage te Genuai Bidi dali wi eyu, aga dologode sesemane bidimainu yaibao.
PSA 34:12 Magi ebowe, te nago homugo te nago bidibo ula bugagia pedalumainu homu ebawe? Tama nago homugo te nago bidibo ula te sesabi elama bidimainu eyu, tama nage te bugagia bidiyu, te wiegi yai pemene yabo homu ebawe?
PSA 34:13 Te homu nago wei eyu, godolo ebaso da, teda nago te po dwai me wagio, tama nago tibo po me olamuo.
PSA 34:14 Tama nago te dwai kolesaga ebo te tudiba muao, tama wiegi yai kolesaga naga wali pao. Nage te gasa we bidi dabe dali te bugagia bidabo sunumi gegeyu, tama te sunumi naga dolo wali pao.
PSA 34:15 Genuai Bidigo te doloba pai bidi dabe tonalubao, tama agai te augwaligo usu da weyu, gedu haluasa po wabo odobo dao.
PSA 34:16 Tiali goli, agai te dwai sę ebo bidi dabe wei isiąyu, tudi ola mabo dao. Tama agai te augwali ela muyu, tama te we bidigo augwali homu kone ma egobeo.
PSA 34:17 Te doloba pai we bidi dabego te Genuai Bidiba usu da weyu, gedu haluasa po obaso, tama agai augwaligo wabo po odobo dao. Agai augwali tau siyu, te sęgęgo augwali me elalugobeo.
PSA 34:18 God te sęgę elalubo we bidi dabe pąde bidaibao. Tama agai te we bidigo konealubo homu dąų wali te dolainu ebaso, te augwali tau sabo dao.
PSA 34:19 Mu tama, te sęgę hauwa te doloba pai bidiba pedelaibao, tiali goli, te Genuai Bidigo aga tau siyu, tama te sęgę dabego aga aiyaba me elalugobeo.
PSA 34:20 Genuai Bidigo aga mu tonaluaibao, tama agai tigigo dili me deli me togwa pogobeo.
PSA 34:21 Te dwai sę ebo bidi dabego haniani dwai kolesaga ebogo augwa digi isaibao. Tama Genuai Bidigo te doloba pai bidi dabeba dene mabo boi bidi dabeba dwai dene mu ilibo dao.
PSA 34:22 Godigo te aga sę bidi dabe ma selama, tama augwa bidibo ula dali bidaibao. Tama tigidali we bidigo homu agaba kęą pelama, te agai augwali tonalumainu eyu, te augwali me hagagobeo. Mu menio.
PSA 35:1 Te Devitgo asęani balia po me deli dao. Genuai Bidi, nago te ena dali wado yainu elalubo bidi dabeba te nago wado ilao. Te ena dali hwįbo bidi dabe dali te nago hwįao.
PSA 35:2 Nago te hwįbo doado bage, me te sabele dali selama, tama nago ena tau sagasao.
PSA 35:3 Nago te ene me hwą selama, tama ena te pobeasa bilibo bidi dabe dali hwįao. Nago te po enabolo wao, te ena nage tau sabo bidi da wao.
PSA 35:4 Te bidi dabego ena ela muainu ebao. Nago te hwįyu, augwali elaluama, tama augwali hale ilao. Augwaligo te ena dolabo po mia sali. Nago augwali pobelama, tama augwali kone tua pomainu mu yao.
PSA 35:5 Genuai Bidi, nago enselgo te dwai bidi dabe sela sąmainu ilao, te waligo te nosa kakali sela sąbo tiwai yao.
PSA 35:6 Te nago enselgo te augwali pobeasa pelama, tama augwaligo sunumi te hulia selama, tama dwai bedege mu pedalumainu ilao.
PSA 35:7 Eno dwai sę augwaliba me isiąwai, tiali goli tagalao, te augwaligo ena dolabo bono gągą dualali elalubao. Tama augwaligo ena tulalumainu yabo tǫ dedage me deli nigai dao.
PSA 35:8 Tiali goli, te augwaligo konesiąwai sogo, te augwaligo ena dolomainu te muani bono gągągo, nago te augwa digi polo dolomainu ilao. Tama augwa digi augwa te nigali dedageba tolalumainu yao.
PSA 35:9 Genuai Bidigo te tama tibaso, tama te eno wiegi yai homu pemene agaba yaibao. Te agai ena tau sobaso, te eno bugai homu agaba yaibao.
PSA 35:10 Tama te eno usu da po mu te Godiba waibao, “Genuai Bidi, te nage tiwai me deli elalubeo. Nago te bomo meni yai bidi dabe bugagia tau sabo dao, tama te bomo mu ebo bidi dabego augwali dolainu ebo te usu me egobeo.”
PSA 35:11 Te tibo po wabo bidi dabego enaba te eno isiąwani dwai sę meba po enaba kisilama wali.
PSA 35:12 Eno wiegi yai kolesaga augwaliba ebadi, tama augwaligo dwai kolesaga enaba wei ponani. Tama tibaso, eno haliga sęgę mu yai.
PSA 35:13 Tiali goli, eno augwaliba te tiwai sę me ebeo. Mu menio. Te augwali gasi elalubaso, eno homu dene mu elama, tama eno ugwa dwai gudali. Eno te nai tubo me habu selali, tama tego digi enaba sęgę mani. Tama eno usu da weyu, gedu haluasa po te nago augwali tau somainu wali.
PSA 35:14 Te eno abagi me ama teba homu sęgę ebo tiwai yali. Ena te ida isaide te homu dene eyu, gela wabo bidi tiwai bilali. Ena te haliga sęgę mu elama, tama ena te gela weyu, homu dene dali bidali.
PSA 35:15 Tiali goli, te sęgęgo ena gegebo sogo, augwali sisinama, te wiegi yai homu pemene yai. Augwali sisinama, ena elaluainu yali. Te eno konesiąwani bidi meba, augwaligo enaba te dwai po kisilibo sę te toma me nabeo.
PSA 35:16 Augwaligo posobo po umabo mu weyu, tama enaba sęgę mani. Augwaligo ena wei me isiąma, tama augwaligo enade gebo hulia sali.
PSA 35:17 Genuai Bidi, te nisu naga sogo nago augwali sula tagalogowe? Nago ena ma siyu, tama augwaligo ena me dologobeo. Augwaligo te laiongo ena ela muainu ebo tiwai ebao, tama ena nago te augwali nogode ma sao.
PSA 35:18 Te nago tama tibaso da, te eno nageba usu da wabo po te hauwa we bidi sisinibo tomode te po waibao. Mu tama, te eno nago nogi te genuai hani we bidi tomode ugwaba saibao.
PSA 35:19 Te bidi mebago ena dali odolali boi bidi ebao. Tiyu, augwaligo ena aiyaba elalu, te kęnę wabo te nago sula me tagaligio. Augwaligo odolali ena dali dwai homu ebao, tama tiyu, nago eno sęgęde te wiegi yai pemene emainu sula me tagaligio.
PSA 35:20 Augwaligo te gasa bidi dabe dali bugagia bidabo po dwasianu me migobeo. Augwaligo te bidibo bulude bugagia bidibo bidi dabe dolabo po weyu ebo dao. Augwa te wiegi yai bidi dabe tibo po ola mayu, dolabo po sisinama mibo dao.
PSA 35:21 Augwaligo enaba po kisilama, te genuai po dągą weyu, te tama po wabo dao, “Mu tama, dago te nago dwai kolesaga meba te ebo gedugo sualio,” te po wabo dao.
PSA 35:22 Tiali goli, Genuai Bidi, nago te bidi dabe augwali sualio. Tama tiyu, nago pedauwali panialuamuo. Genuai Bidi, nage enade te digibulu me bidilamu dao.
PSA 35:23 Nage God, me eno Genuai Bidi, nage hogodama, te ena tau sagasao. Nago ena hasegelama, tama ena tau sabo po hanilama pusao.
PSA 35:24 Genuai Bidi, eno God, nago te doloba pai kolesaga ebo dao. Nago ena tau sabo te boi bidi dabego koneama, eno te doloba pai kolesaga wali pabo da po omainao. Te ena dolomainu eyu, augwaligo te kęnę wabo te nago sula me tagaligio.
PSA 35:25 Nago te augwade digi augwa po mia siyu, te tama po wali, “Wiegi yai mu da,” te po wabo nago sula me tagaligio. “Te dago yainu yali sę, megi da te sę yalio.” Nago te po augwaligo omainu me igio, “Dago aga dolali dao.”
PSA 35:26 Augwaligo te enaba pedelali sęgęde wiegi yai homu pemene yali. Tama tiyu, nago augwali dwai hale emainu elama, tama augwaligo homu kone mu tuą pomainao. Augwa digi augwa nogi ugwaba siyu, te ena aiyaba elaluainu yali, tama tiyu, nago augwali te hale dwai mu emainu elama, tama augwaligo nogi te aiyaba elaluao.
PSA 35:27 Tiali goli, te gasa bidi dabego homugo nago ena te doloba pai bidi nogi emainu homu eyu, augwa wiegi yai pemene elama i weyu, tama bugai haliga elama bidimainu emainao. Sesemane sogo augwa te po omainao, “Genuai Bidi te polalubo bidi mu da,” waibao, “agai te aga sę bidi bugagia bidimainu godolo ebo dao,” omainao.
PSA 35:28 Tama tiyu, te eno nago doloba pai kolesagade po hanilama weyu, tama nago nogi tigidali sogo giligade me, hulide me ugwaba saibao.
PSA 36:1 Te Devitgo asęani balia po me deli dao. Agai dwai sęde sali sęgę te dwai bidigo haligade elalubao, tama te po meba agabolo mabo dao. Te bidigo te Godide wi me egobeo. Mu menio. Agai aga tudiba muaibao.
PSA 36:2 Agade digi aga hagoma eyu, te homu ebo da, “Ena te polalubo bidi mu da,” waibao. “Tama tibaso, Godigo te eno ebo dwai sę dabe te me gegegobeo elama, tama agai ena po tų me iligobeo,” wabo dao.
PSA 36:3 Sesemane sogo agai te dwai sę yabo po, me te gasa bidi tibo po ola mabo po weyu yaibao. Agai te wiegi yai kolesaga yabo homu te agade me elalubo menio.
PSA 36:4 Aga te betide pila mudu, tama te dwai sę yabo kolesaga te homu kone paludaibao. Agai te dwai sę ebo sunumi naga wali pidu, tama te dwai sę ebo kolesaga tudiba me mugobeo.
PSA 36:5 Genuai Bidi, nago te we bidi godolo ebo kolesaga te dwasianu meni, te godolo ebo dąį te dagaluba usu nigi pali. Nago te mu kolesaga naga wali pabo, tama te me te dwasianu menio. Te dąį te ugwadu mu elalubo pǫba usu nigi palio.
PSA 36:6 Te nago doloba pai kolesaga te genui mu elalubao, te bulu du dabe tobage tiwai elalubao. Dago nago te doloba pai po tų ebo page koneainu ebaso, te usu me egobeo. Te aiyanu mu dulali, te tamu ąį aiyanu mu ebo tiwai yai. Genuai Bidi, nago te bidi dabe me te hasa dabe bugagia tonalubaso, te augwali bugagia bidibo dao.
PSA 36:7 God, nago te da godolo ebo kolesaga te siligobeo, tama te wiegi yai mu yai, dago wei homu mu ebao. Tama te we bidi dabe te nageba pelama, duala sabo da, te kakaruk wai dabe te aga idago bogo dologoba duala sabo tiwai gilama ebo dao.
PSA 36:8 Nago bede te nai hauwa elalubao, tama tiyu, te we bidi dabe te nai me sǫą pabo menio. Te nago wiegi yai nai te umabo mu elalubao, te soabo genuai wę tiwai eyu, tama nago da te wę tumainu mabo dao.
PSA 36:9 Magi baso meni, nage te tigidali naigo bidibo ula page bidi dao. Tama nage te ulago page da. Dago te nagede naga ula siyu, tama da bugagia bidibao.
PSA 36:10 Sesemane sogo nage konebo we bidi te nago augwali wei eyu, godolo mu idu geao. Nago te doloba pai bidi dabe tau siyu, te augwali bugagia bidimainu tau sidu geao.
PSA 36:11 Nago ena te hagoma bidi dabego sągągo agamainu me elamuo. Tama ena te dwai bidi dabego sela sąmainu me igio.
PSA 36:12 Suao. Te dwai sę ebo bidi dabe te tǫba tulaluama, te pila mubao. Augwali te ma hodalugobeo.
PSA 37:1 Abagi, nago te dwai sę ebo bidi dabego te wiegi yai nai dabe sabode te nago homugo pesa me elamuo. Nago te dwai kolesaga ebo bidi dabego naide haliga dwai me elamuo.
PSA 37:2 Te dwasianu sogo naga tama, te dwai sę ebo bidi dabe dolaibao, te nosa wa pabo tiwai eyu, me te ni yabe wa pabo tiwai yaibao.
PSA 37:3 Nago konealubo homu Godiba munama, tama wiegi yai kolesaga yao. Nago tama tiali da, tama nage te naga tǫde sesabi elama bidaibao, tama magi nai me deligo nage me dologobeo.
PSA 37:4 Nago Genuai Bidiba wiegi yai pemene yao, tama agai te nago godolo homu ebo nai dabe mawaibao.
PSA 37:5 Nago te naga bidibo ula te Genuai Bidi nogoba muao. Te konealubo homu agaba dąų weyu, te agai nage tau saibao.
PSA 37:6 Tama tiyu, te agai nago wiegi yai kolesaga te hania pepeli diliba pedalumainu ilama, te giliga ula pedalubo tiwai yaibao. Tama agai te nago doloba pai kolesaga te bidi dabego gedude te pepeli diliba haniliyu, te nai tubode te giliga tomo yagasu ula ebo tiwai yaibao.
PSA 37:7 Nage dua digi te Genuai Bidi pąba pelama, bidao. Te dua digi bidiyu, te agai nage tau sabo tonaluao. Te bidi dabego augwa ebo kolesagade te wiegi yai nai dabe sabode te nago homugo pesa me elamuo. Mu tama, te haniani dwai kolesaga yabo homu ebo bidi dabego ebo homude nago homu kekeli eyu, tama te tiwai sę eyu, pedelabo homu me elamuo.
PSA 37:8 Nago wado po me wasiąyu, tama nago te haliga sębę ebo kolesaga me tagalao. Nago homu te nai dabede kekeli elama, homugo pesa me elamuo. Te kolesagago nage kekelama, te dwai kolesaga emainu yaibao.
PSA 37:9 Te dwai sę ebo bidi dabe mu dolaibao. Tiali goli, te konealubo homu dąų olama bidibo we bidi dabego te Genuai Bidigo augwali tau somainu tonaluali we bidi dabe da, te augwali te augwa tǫde bugagia bidaibao.
PSA 37:10 Te pąde tama digi sogo, te dwai sę ebo bidi dabe mu hagawaibao. Te nago augwa pesagede te augwali gegebo sę yaibao, tiali goli nago augwali me sugobeo.
PSA 37:11 Tiali goli, te augwa digi augwa aiyaba elalubo we bidi dabe, te augwali te tǫde bugagia bidaibao. Te augwali wiegi yai mu bidiyu, tama wiegi yai pemene elama, bidaibao.
PSA 37:12 Te dwai sę ebo bidigo te wiegi yai bidi dolabo homu eyu, te wado po wabo dao.
PSA 37:13 Tiali goli, Genuai Bidigo te sogo me deli te bodolu pedalubo koneyu, tama te sogo te dwai sę ebo bidi dabe dolaibao. Tama tiyu, Genuai Bidigo augwaliba gisugu mabo dao.
PSA 37:14 Te dwai sę ebo bidi dabego te bainat hwą dią siyu, tama te enesigi kegelama, te nai meni yai bidi dabe, me te magi doado bage sǫą pabo bidi dabe enainu yaibao. Augwaligo te doloba pai kolesaga wali pabo we bidi dabe ela muabo homu ebo dao.
PSA 37:15 Tiali goli, te augwa bainatgo te Godigo augwali isilaibao, tama Godigo te augwaligo enesigi togwa paibao.
PSA 37:16 Te doloba pai bidigo te dwasianu naigo te tigidali dwai bidigo nai hauwa te aiyaba elalueibao.
PSA 37:17 Magi baso meni, Genuai Bidigo te dwai bidi dabego bomo silama, tama agai te doloba pai bidi dabe tonalueibao.
PSA 37:18 Genuai Bidigo te aga po wali pabo we bidi bugagia tonalueibao. Tama te Godigo augwali mani doado bage, te augwa sesemane sogo tolalueibao.
PSA 37:19 Te dwai sogode te sęgęgo augwali me gegegobeo. Tama te nasi ebo sogo, te augwa nai hauwa elalu, te augwali nai me sǫą pogobeo.
PSA 37:20 Tiali goli, te dwai sę ebo bidi dabe, augwali da, mu dolaibao. Te Genuai Bidigo boi bidi dabe augwali te hagawaibao, te wiegi yai plauago, me nosaigo au tǫba tegaluama, te hagabo tiwai gilama yaibao. Mu tama, te augwali te sia hano te dwasianu sogo naga elaluama, tama te hano pela silibo tiwai gilama ebo dao.
PSA 37:21 Te dwai sę ebo bidigo te nai dabede negeli selama, tama agai te negeli sali wei me ponogobeo. Tiali goli, doloba pai bidigo te wiegi yai kolesaga eyu, tama agai te gasa bidi dabeba te nai olo mabo dao.
PSA 37:22 Te Genuai Bidigo wiegi yai po augwaliba wabo we bidi da, te augwali te bugagia tǫde bidaibao. Tiali goli, te Genuai Bidigo te dolomainao po wali we bidi dabe da, teda agai augwali sela sąwaibao.
PSA 37:23 Genuai Bidigo te we bidi bilibo dodolobo sę ebo dao. Te agai bidi me deligo kolesaga wei eyu, godolo ebaso da, agai te aga dolasa bilimainu dąų walaibao.
PSA 37:24 Tama te bidi tulalubaso, tagalao, aga te mu dologobeo. Magi baso meni, Genuai Bidigo te aga nogo tola selama, tama aga ma dolugulumainu ebo dao.
PSA 37:25 Polobadu ena gesi ogwa bidi bidali, tama megi da ena monu dabe yalio, tiali goli te Godigo doloba pai bidi me deli tudiba mubo te eno me subeo. Tama te doloba pai bidi dabego wai dabe te nai sǫą pabo te eno me susiąyu, tama te gasa bidigo augwali tau somainu i me wabeo. Mu menio.
PSA 37:26 Te sesemane sogo te doloba pai kolesaga ebo bidigo te olo mu tau sabo wiegi yai kolesaga eyu, tama te gasa we bidi dabeba nai hauwa mayu ebo dao, tama augwa wai dabego te aya ida wiegi yai homu pemene ilibo sę ebo dao.
PSA 37:27 Nago te tigidali dwai kolesaga tudiba munama, tama wiegi yai kolesaga naga yao. Te tiwai nago ebaso da, teda nago nosali pedalubo hani bage augwaligo te tǫde sesabi elama, bugagia bidada paibao.
PSA 37:28 Magi baso meni, Godigo te doloba pai kolesaga ebo we bidi wei eyu, godolo mu ebo dao. Agai te aga we bidi hagamainu me egobeo. Sesemane sogo Genuai Bidigo te we bidi dabe dolasa bilimainu tonalueibao. Tiali goli, te dwai bidi dabego wai dabe da, te mu dolaibao.
PSA 37:29 Tiali goli, te doloba pai bidi dabe da, te Godigo augwa mani tǫ saibao, tama augwa tede sesemane sogo bidada paibao.
PSA 37:30 Doloba pai bidigo te wiegi yai kolesaga koneani elalu, tama wiegi yai po naga pusaibao. Agai te doloba pai kolesagade po mibo dao.
PSA 37:31 Te Godigo bomai po aga homude elalu, tama agai God wali peyu, tama te bomai po me tagalogobeo.
PSA 37:32 Te dwai sę ebo bidi geme dualalu, tama te doloba pai bidi tonalueibao, tama aga ela muabo sunumi gegeyu tebo dao.
PSA 37:33 Tiali goli, Genuai Bidigo te doloba pai bidi te dwai bidigo ela mumainu me tagalogobeo. Mu menio. Tama te dwai sę ebo bidigo te doloba pai bidi po tų ilibaso da, teda Genuai Bidigo agai te doloba pai bidi te po tųde aiyaba elalumainu me sula tagalu me gogologobeo.
PSA 37:34 Nago konealubo homu Genuai Bidiba dąų olama, tama agai po dolo wali peyu, tama agai kolesaga wali pao. Nago te tiwai eyu da, teda agai nageba te genuai nogi mayu, tama nago te agai nageba mani tǫ tolalu bidaibao. Tama agai te dwai sę ebo bidi dabe dolobo te nago sueibao.
PSA 37:35 Eno suali, te dwai sę ebo bidigo genuai bomo elalubao, tama agai te we bidi dabe aiyaba elalu, te Lebanonde elalubo te moni ni sidago te gasa ni dabe aiyaba elalubo tiwai gilama ebo dao.
PSA 37:36 Tiali goli, nosali ena te badu ma pali, tama aga te munu ma elalubeo. Eno aga gegebo sę yali, tiali goli eno aga me subeo. Mu menio.
PSA 37:37 Nago te magi dwai sę me deli isąwai bidide homu kone paliyu, tama te doloba pai bidi suabo homu yao. Te gasa we bidi dabe dali dua digi bidibo bidi yaibaso da, teda aga hani te sesemane sogo bidaibao.
PSA 37:38 Tiali goli, Genuai Bidigo te dwai sę ebo bidi dabe te mu dolaibao. Te augwa hani wąį nǫų dabe augwali nosali te mu menia saibao.
PSA 37:39 Genuai Bidigo digi te doloba pai dabe ma sabo dao. Te sęgę augwaliba pedalubo sogo, augwali te udulama, agaba pobaso, tama agai augwali tonalubo dao.
PSA 37:40 Augwaligo konealubo homu agaba dąų wai. Tama tiyu, agai augwali tau siyu, tama agai augwali te dwai bidi dabego nogode dobola selama, tama augwa bugagia bidibo dao.
PSA 38:1 Te Devitgo asęani balia po me deli dao. Genuai Bidi, nago wado yabo homu elalubao, tiali goli nago enaba wado me iligio. Nago haliga sębę yai, tiali goli nago enaba dene me magio.
PSA 38:2 Nago ene dabego nago ena mu enama, tama naga nogogo nago ena aiyaba elaluali.
PSA 38:3 Nago enaba wado ebaso, tama ena dwai gasi yai. Eno sęgę elalubaso, tama eno tigi bomo mu meni yai.
PSA 38:4 Te ena sęgę dabego te ena mesegelama, tama te sęgę dabe te eno walu tolai sęgę tiwai elama, tama sęgę mu ebo dao.
PSA 38:5 Te eno tigide elalubo kenide te keni bole hauwa elalu, tama te kugumini mu ebao. Eno te geda mubo kolesaga mu eyu, tama te sę enaba pedelai.
PSA 38:6 Eno haligade te genuai sęgę mu elama, tama ena dolobao. Te tigidali side ena homu dene eyu, tama gela naga wabo dao.
PSA 38:7 Eno tigi te posolo mu eyu, te siago dabo tiwai ebao, tama ena genuai gasi mu elalubao.
PSA 38:8 Ena mu dolama, tama ena dwai bidali, te magi nai me deligo ena bomonama agabo tiwai gilama yali. Eno haligade te dwai homu mu yali, tama ena te genuai denede i me weyu yali.
PSA 38:9 Genuai Bidi, nago te eno bomai homu wei ebo koneani. Eno haligago dwai gela wabo, tama nagede tebo te geme me dualalubeo.
PSA 38:10 Te eno hoboludu sę bomo mu ebaso, tama eno bomo te mu sia salio. Te eno gedu hulia selama, tama eno bugagia ma tonosiąbo dao.
PSA 38:11 Te eno abagi, me hai namu dabe, te augwali ena pąba asabo homu isąwai. Augwaligo te eno keni suabo homu isąwai. Tama ena hani sibi dabe augwali te digibulu bidibao.
PSA 38:12 Te ena ela muainu ebo bidi dabe, augwaligo te ena tola somainu yabo bono gągą sisi elama, muani. Te ena dolainu ebo bidi dabe, augwaligo te enaba dwai sę yabo po miani. Tama sesemane sogo augwaligo enaba dwai sę yabo homu kolesaga ebo dao.
PSA 38:13 Tiali goli, ena te olo degai bidi tiwai elama, tama eno augwaligo wabo po me odobeo. Ena te pedauwali pania sai tiwai elama, tama eno pedauwali me a me wabeo.
PSA 38:14 Ena te po odisąbo bidi me deli tiwai gilama yali, tama eno augwaliba te po wei me ponobeo.
PSA 38:15 Tiali goli, Genuai Bidi, eno konealubo homu nageba dąų wali. Genuai Bidi, nage eno God da, te naga digi enaba te po wei ponomainu yaibao.
PSA 38:16 Eno te tama gedu haluasa po wali, “Nago te boi bidi dabego ena aiyaba elaluama, tede kęnę omainu me elamuo,” wali. “Te ena dwasianu tula mubo sogo, nago te augwali hagoma eyu, wiegi yai homu pemene emainu me igio,” wali.
PSA 38:17 Magi baso meni, te pąde ena tulaluainu eyu, tama ena sesemane sogo dene ebo dao.
PSA 38:18 Eno dwai sę yali po nageba pusali, tama ena yali sęgęde ena homu dene yai.
PSA 38:19 Te eno boi bidi tigidaligo te bomo mu ebao. Te bidi hauwa umabogo te enaba odolali boi bidi ebao.
PSA 38:20 Eno dwagi yai kolesaga augwaliba ebadi, tiali goli augwaligo enaba dwai kolesaga wei ponoyu yai. Eno te wiegi yai kolesaga wali pobadi, tama tede augwaligo homu koneama, tama enade augwa boi bidi pedelali.
PSA 38:21 Genuai Bidi, nago ena me tagaligio. Eno God, nage te enade digibulu me bidigio.
PSA 38:22 Genuai Bidi, nage da ena ma dobola sabo bidi da. Nago ena polo tama tau sao.
PSA 39:1 Te Devitgo asęani balia po me deli dao. Eno po te tama wali, “Eno te ena ebo kolesaga tigidali te bugagia tonalueibao,” po wali. “Tiyu, te ena wali pode sęgę sidalio. Te dwai sę ebo bidi dabe ena pąde bidibo sogo da, teda eno po deli me wagobeo,” wali.
PSA 39:2 Tialima, eno pedauwali pania selama, tama eno po deli me wabeo. Tama eno te wiegi yai naide me po me deli me wabeo. Tiali goli, eno haliga sęgę te genuai mu pedelalio.
PSA 39:3 Tama eno moni homu mu yai. Eno homu kone palubo sę idubadi, tama eno haliga te mu dwai yali. Tialima, megi da, eno pedauwali pania sobaso, usu egobeo. Menio.
PSA 39:4 Eno Godiba te tama po hanalu wai, “Genuai Bidi, te ena bidabo ulade te nisu naga kibu be elalubawe? Te mena sogo ena isigowe? Te eno bidabo ula te pęwadage sogo naga elalubo homu ebao. Nago enabolo pusa mao,” po wali.
PSA 39:5 Nago ena bidabo bodolu te pęwadage sogo mu muani elalubao. Te nago gedude ena te bidabo bodolu muani, te olo bage tiwai yali. Tigidali bidi te wali tiwai eyu, te bidi me deligo te pedauwalide ponobo tiwai gilama ebo dao.
PSA 39:6 Tigidali bidi te ni noma te giligade elalubo tiwai ebao. Augwa te doado bage hauwa sabo sę dene ebadi, tiali goli, augwa te sę dene odolali hagayu yai. Te bidi dabego doado bage hauwa sisinani, tiali goli, augwali isibo si, dego sogowe, te augwaligo me konebeo.
PSA 39:7 Tiali goli, Genuai Bidi, megi eno magi nai tonalubowe? Menio. Eno konealubo homu nageba dąų weyu, tama nago naga ena tau sabo tonalubao.
PSA 39:8 Nago ena ma selama, tama eno sęgę tigidali sela sąyao. Nago te kolesaga geda mubo bidi dabego te enaba posobo po omainu me elamuo.
PSA 39:9 Tiali goli, eno da po me wagobeo. Eno pedauwali pania saibao. Magi baso meni, nago digi te dene mabo sę enaba yali.
PSA 39:10 Nago ena me dolamuo dao. Nago ena dene mu menama, tama pąde ena isainu ebao.
PSA 39:11 Nago te bidi me deliba wado eyu, tama aga yali sę wei ponoyu ebo dao. Tama nago te agai godolo ebo nai te mu siliyu yaibao, te asobago te ugwa togobo tiwai eyu, tama te ugwa dolobo tiwai ebao. Mu tama, tigidali bidi pedauwalide te po mobo wali asobo tiwai ebo dao.
PSA 39:12 Genuai Bidi, nago eno gedu haluasa po odao. Nago te eno i waboba olo bugagia muao. Te eno nageba i wabo sogo, nago olo pania selamuo. Nago koneani, ena te dwasianu sogo nage dali te tǫde bidaibao. Ena te ena wąį nǫų dabe tobage tiwai dao, augwali me te pęwadage sogo naga te tǫde bidai dao.
PSA 39:13 Nago enaba te dene mabo sę me elamuo. Enabolo sula tagalu, te ena haliga wiegi yai ma emainu yao. Tama nosali ena isibaso, te tǫ mu taga paibao.
PSA 40:1 Te Devitgo asęani balia po me deli dao. Ena dua digi bidiyu, tama eno te Genuai Bidigo ena tau sabo tonalu bidai. Tama agai te olo tau sabo wiegi yai kolesaga enaba eyu, tama eno gedu haluasa po wabo odali.
PSA 40:2 Ena te aiyaba mu igulai genuai dedage tomode bidibo bidi tiwai bidiyu, tama ena dolainu ebaso, tama Genuai Bidigo ena kegelama, tama ena ugwaba holali. Ena te pu węde mu dąų olama, tama tego ena tola sai elalu, tama Genuai Bidi agai ena tedu gudulama, tama ena te masigi elalubo madiba dodolama, tama ena bomonama ma pai dao.
PSA 40:3 Agai te gesi tęąbi po me deli enaba mani, te agaba konealubo homu dąų wabo God nogi ugwaba sabo tęąbi po dao. Te bidi hauwago te agai enade yali sę po odolama, tama augwa wi elama, tama augwa te Genuai Bidiba konealubo homu dąų omainu yaibao.
PSA 40:4 Bidigo konealubo homu te Genuai Bidiba dąų wabo bidi da, te aga wiegi yai homu pemene yao. Te hagoma ebo bidi dabe wali pisąbo bidi tiwai, tama te Genuai Bidi me tagalisiąma, tama te tibo god dabeba lotu po me wagobeo. Mu menio.
PSA 40:5 Genuai Bidi, eno God, nago te da tau sabo sę wiegi yai hauwa yali. Te nage tiwai bidi me elalubeo. Nago augwali aiyaba mu elaluali. Eno te bidi dabeba po pusuyu, tama nago sę me homude po weyu da, ya tegobao! Te umabo umabo mu yaibao. Eno nedebaso, usu me egobeo.
PSA 40:6 Nago te augwaligo elama ofa ebo kibu dabe te wei ebeo. Te tobage augwaligo te siaba tigidali ulama domainu te sęgę sela sąbo ofa, te me nago wei me isiąwai. Tiali goli, nago eno homu hodolobaso, tama eno nago po wali pabo dao.
PSA 40:7 Tialima, megi eno e tama obao, “Suao. Ena asalio. Te nago bomai po elalubo bukude nago homugo te eno emainu yabo sę asęanio.
PSA 40:8 Eno God, eno te nago homu wali pabo wei mu ebao. Te nago bomai po te ena haliga tomode elalubao.”
PSA 40:9 Genuai Bidi, eno te nago bukude po pusubo sę te nago we bidi dabe sisinibo tomode wai dao. Eno te tama po wai, “Genuai Bidigo te da ma sabo dao.” Genuai Bidi, nago koneani, eno te po sesemane pusaibao. Eno pedauwali me pania sogobeo.
PSA 40:10 Nago ena tau selama, tama ena ma sali, tama te eno me geme dualubeo. Te nago naga mu po te wali pelama, tama te nago da ma sabo da po eno pusalio. Nago te tigidali we bidi wei mu eyu, tama nago mu kolesaga wali pobaso, tama eno te lotu wainu sisinibo we bidi dabeba eno me dualubeo. Menio, eno augwaliba wai dao.
PSA 40:11 Genuai Bidi, eno koneani, te nago homu dene eyu, tau sabo sę ebo te palia sogobeo. Menio, nago ena sesemane sogo homu ebo dao. Nago ena wei eyu, tama naga mu po te wali peyu, tama tebo kolesagade te nago ena sesemane sogo tonalubo dao.
PSA 40:12 Te sęgę hauwa enaba pedelali, tama te augwali eno nedebaso, usu egobeo. Te dwai kolesaga dabe eno yali, tego ena aiyaba elalualio, tama eno bugagia me tonono me ebeo. Te dwai kolesaga hauwa mu pedelama, tama te eno tobolude elalubo tobolu nisi namba te aiyaba elaluai. Eno homu kolesaga tigidali tuloluai, tama ena bomo meni yai dao.
PSA 40:13 Genuai Bidi, ao, te nago ena ma sao. Genuai Bidi, te nago ena polo tau sao.
PSA 40:14 Te bidi mebago ena ela muainu ebao. Nago augwali elalu, tama augwali homu kone mu tuą palama, te augwali dwai hale somainao. Te bidi dabego eno sęgęde wiegi yai pemene ebao, nago augwali ma sela sąnama, tama augwali te elaluao.
PSA 40:15 Te bidi dabego enaba posobo po weyu, kęnę wali. Nago augwali te hale mu elalumainu yao, te augwa yali kolesagade dwai midigi mu somainu yao.
PSA 40:16 Tiali goli, eno homugo te nage koneani bidi dabego da, augwa te nageba wiegi yai pemene eyu, tama bugai homu elama bidaibao. Te nage godolo mu idubo we bidi dabe, te nago augwali ma sao, augwa te po omainu yao, “Genuai Bidi te polalubo bidi mu da,” omainao.
PSA 40:17 Tiali goli, ena te bomo meni yai bidi, tama ena te tigidali doado bage sǫą pai elalubao. Tama nage, Genuai Bidi, nago ena homu koneani. God, nago digi nago ena tau sabo bidi da, tama nago ena ma sabo dao. Nago me tonalugio, nago ena polo tau sao.
PSA 41:1 Te Devitgo asęani balia po me deli dao. Bidigo te magi doado bage meni yai bidiba homu kone palama, tama augwali tau sabo bidi da, te bidigo homu wiegi yai pemene yao. Te sęgę agaba pedalubo sogode, te Genuai Bidigo aga tau saibao.
PSA 41:2 Godigo te aga tonalu, tama aga bidibo ula dąų walaibao. Tama Genuai Bidigo te aga pesagede bugagia bidimainu ilaibao. Tama te Genuai Bidigo te boi bidi dabego aga dolomainu me iligobeo.
PSA 41:3 Te bidi aga gasi elalubo sogo, te Genuai Bidigo aga tonalubao. Agai te aga gasi usu ma ilama, tama aga bomo ma somainu ebo dao.
PSA 41:4 Tiali goli, ena digi eno te po wali, “Genuai Bidi, eno nageba dwai sę yali,” po wai. “Tiali goli nago te olo tau sabo wiegi yai kolesaga enaba eyu, tama eno gasi silao,” wali.
PSA 41:5 Te eno boi bidi dabego enade dwai haliga eyu, tama augwa te po wai, “Te aga polo isibaso, te dago homu kone agade ebo tagalaibao.”
PSA 41:6 Te bidi mebago ena suagasu, tama augwa enade odolali po miani. Augwaligo te ena gasi dwai ebo po odainu yali. Tama nosali augwa buluba dią soyu, tama augwaligo ena te gasi ebo po te tigidali habude te po pusubo dao.
PSA 41:7 Tigidali bidigo ena wei me isąyu, te augwaligo eno gasi po geme wabo dao. Augwaligo homugo te dwai nai mugo ena dolomainu homu ebo dao.
PSA 41:8 Augwa te tama po wai, “Te dwai naigo aga salio,” wali. “Te aga ma hodalubaso, te usu egobeo. Te aga isaibao,” wai.
PSA 41:9 Eno abagi me deli elaluai, aga te eno hai namu mu tama, tama aga te ena dali nai tuyu yai. Tiali goli, aga me te eno boi bidi pedelali.
PSA 41:10 Genuai Bidi, nago te olo tau sabo wiegi yai kolesaga enaba eyu, tama e gasi silimainu yao, tama te eno te bidi dabe augwa yali kolesaga wei ponaibao.
PSA 41:11 Te boi bidi dabego ena dolisąbaso da, teda eno koneyu, te nago ena godolo eba homu yaibao.
PSA 41:12 Nago suali, te ena dolo bilibaso, tama nago ena tonaluali, tama nago ena te naga pąde sesemane dolaluaibao.
PSA 41:13 Dago te Genuai Bidi nogi ugwaba sao, aga te da Israel dabego God dao. Tama te nosali pedalubo hani augwa te tama naga tiaibao. Te mu dao.
PSA 42:1 Polobadu mu te dago megi wabo Tib 42 dali, Tib 43 dali te balia po me deli naga elaluali. Tiali goli, nosali augwaligo te balia po pedama, tama megi dago te balia po si badu elalubao. Tama te balia side elalubo po page te deli page dao, te bidi aga page bulude homu dene mu eyu, tama Genuai Bidi Godibolo aga gedu haluasa po obao. Te Kora hani dabego asęani balia po me deli dao. Uni hasa te węde nogene eyu, tama te tubo dwasianu węba udua pabo dao. Tama te tiwai naga, God, eno homu wei eyu, te nage pąde bidabo homu ebao.
PSA 42:2 God, nage te bidibo ula elalubo God da, tama eno nage wei homu mu ebao, te bidi aga dogoni wa pobaso, te wę tuainu ebo tiwai yaibao. God, mena sogo te ena nageba aselama, tama te moni lotu be tempelde nageba lotu wagowe?
PSA 42:3 Sesemane sogo te bidi dabego enaba te tama po wali, “Te nago God mena bidibawe?” Tama tibaso, ena sesemane sogo gela udubo sę yali. Te eno gedu ąį te eno siade me hulide nai tubo tiwai gilama yali.
PSA 42:4 Eno te polobadu wiegi yai homu elaluali sogo homu kone palama, tama eno haliga sęgę mu yali. Polobadu ena te hauwa we bidi dali bilali, tama ena poligi pelama, tama augwali te Godigo beba odasa pai. Da pelayu, tama wiegi yai pemene ebo i me wali, tama Godiba usu da wabo tęąbi po wali. Te sogo da tigidali te olo bidibo side sisinani.
PSA 42:5 Magi baso ena sesemane sogo te haliga sęgę ebawe? Magi baso eno haliga midigi ebawe? Eno konealubo homu te Godiba dąų olama, tama agai ena tau sabo tonalueibao. Aga te eno God da, tama ena tau sabo da. Tama tiyu, eno aga nogi ugwaba ma saibao.
PSA 42:6 Te boi bidi dabego ena te augwa buluba odasa asobaso, tama megi eno page bulu te digibulu mu elalubao. Tama tibaso, eno haliga sęgę mu ebao. Tama tiyu, God, eno homu kone nageba ebao. Nago te enaba te haniani genuai sęgę menama, tama augwaligo ena mesegelali, te moni soabo ąį tiwai dao. Tama te masigi yai madi soabo wę te aiyaba sabo duluyu, te węgo kulukulu umabo mu wabo dao. Te tiwai me te enaba pedelali sęgę dabego te eno homu kone tųą pali. Nago te biksi peda pomainu elama, tama pepeda pomainu yali, tama te nambisde tǫ mesegebo dao. Tama te tiwai naga nago enaba te muani sęgę tigidaligo te ena mesegelibo dao.
PSA 42:8 Tiali goli, eno homugo te Genuai Bidigo enabolo te olo tau sabo kolesaga te giligade emainu yali. Tama te hulide eno te agaba usu da weyu, gedu haluasa po wabo tęąbi po waibao, tama te ena bidabo ula mabo Godiba te usu da po wabo gedu haluasa po waibao.
PSA 42:9 God da, te ena seselalubo bidi mu dao, tama eno agaba te tama po obao, “Magi baso nago enaba homu kone ebo tagalubawe? Magi baso nago ena te boi bidi dabego elalumainu eyu, tama ena te haliga sęgę emainu ebawe?”
PSA 42:10 Te sesemane sogo te boi bidi dabego enaba te tiwai kęnę po weyu, “Te naga God mena bidibawe?” po wabo. Te pogo te ena tigide te ene enama, tama ena isainu ebo tiwai yai.
PSA 42:11 Magi baso ena haliga sęgę sesemane sogo ebawe? Magi baso eno haliga midigi ebawe? Ena te Godiba konealubo homu dąų olama, tama agai ena tau sabo tonalueibao. Aga te eno God da, tama ena tau sabo dao. Tama tiyu, eno aga nogi ugwaba ma saibao.
PSA 43:1 God, te bidi dabego nage tudiba muyu, te augwaligo ena aiyaba elaluainu homu ebao. Nago ena tau selama, tama augwaligo te dwai po wabo togolama, tama augwaliba eno ebo wiegi yai kolesaga naga ola mao. Augwali te tibo po wabo bidi dabe da, tama augwaligo kolesaga te dolo me isąwai. Nago ena tau selama, tama augwali nogode ena ma dobola sali.
PSA 43:2 Magi baso meni, nage naga, nage eno God da. Ena nageba aselama, tama te dwai bidi dabede geme duala sali. Tialima, magi baso nago ena homu ebo gegeda palubawe? Magi baso te boi bidi dabego ena aiyaba elaluama, tama ena haliga sęgę dwai mu iduaibawe?
PSA 43:3 Nago te naga mu po ola toliyu, tama nago ula me asiyu, tama enabolo sunumi ola mobaso da, teda ena te naga tedali bulu du dolo te Saionba pelama digi, tama te nage bidibo lotu be tempelba paibao.
PSA 43:4 Tama tialima, ena te God, nago alta sai teba paibao. Magi baso meni, nago ena wiegi yai haliga iliyu, te pemene ilibo dao. Nage eno God da, te eno gita selama, te musik weyu, tama nago nogi ugwaba sabo tęąbi po naga waibao.
PSA 43:5 Magi baso ena haliga sęgę sesemane sogo elalubawe? Magi baso eno haliga dwai midigi sobawe? Eno konealubo homu Godiba dąų weyu, tama te agai ena tau sabo tonalueibao. Aga te eno God da, tama ena tau sabo dao. Tama tiyu, eno aga nogi ugwaba ma saibao.
PSA 44:1 Te Kora hani dabego asęani balia po me deli dao. God, te dago wąį nǫų dabego te nago polobadu bomai sę yali po te dabolo pusali, te augwali tǫde bidali sogo. Tama dena digi te po wabo odai dao.
PSA 44:2 Nago digi te Israel hani isąwai bage te augwa tǫde sela sąnama, tama nago te tǫ te da Israel bagego wąį nǫų dabeba mani, tama augwali tede bomo elalu bidali. Nago te gasa hani dabego yali dwai kolesaga wei ponani, tiali goli nago te dena wąį nǫų dabe te bugagia bidimainu elama, tama hauwa umabo we bidi pedalumainu yai dao.
PSA 44:3 Te wąį nǫų dabego hwįani, tiali goli augwaligo te tǫ te hwįnama me sabeo. Te augwa digi augwa bomogo te hwįbo tau selama, te boi bidi aiyaba me elalubeo. Menio. Nago augwali wei mu yali, tama tiyu, nage augwali dali bidiyu, tama augwaliba ula mani. Tama nago bomogo digi te boi bidi aiyaba elaluai dao.
PSA 44:4 Nage eno king me eno God dao. Nago po obaso, tama te Jekopgo hanigo te boi hwįbode te boi bidi dabe aiyaba elalubo dao.
PSA 44:5 Te nago bomogo naga dago te boi bidi dabe sela sąyu ebo dao. Mu tama, nage da dali bidiyu, tama dago te da dali hwįbo bidi dabe aiyaba elaluyu, sągągo agabo dao.
PSA 44:6 Eno enesigi me ene elalubao, tiali goli eno homugo eno te hwįbode te nai dabego ena tau sabo homu me ebeo. Eno te bobobage bainat hwą elalubao, tiali goli tego me ena te hwįbode tau me sogobeo.
PSA 44:7 Menio. Nago naga da tau sobaso, tama te boi bidi dabego da aiyaba me elalubeo. Te bidi dabego da wei me isąbadi, tiali goli nago augwali dali hwįnama, tama nago augwali aiyaba elaluai dao.
PSA 44:8 God, sesemane sogo dago nago nogi ugwaba sobao. Tama dago nageba usu da weyu, geda haluasa po sesemane sesemane sogo wabo da.
PSA 44:9 Tiali goli, megi da, magi yaliwe? Nago da tudiba munama, tama nago dago nogi aiyaba muani. Tama nage te dago ami bidi dabe dali te hwįboba me pabeo.
PSA 44:10 Nago tama tibaso, tama da te boi bidi dabede wi sobadi, tama augwaligo te dago doado bage salio.
PSA 44:11 Nago da te augwaligo ela muabo kibu sipsip tiwai pedalumainu ilali. Tama nago da te dena tǫde bidali sela sąbaso, tama da tedela pelama, te gasa hani bage tomoba bidigi pai dao.
PSA 44:12 Nago te naga we bidi te gasa haniba tagala palama, tama nago augwalide dwasianu mone mu sai. Nago te augwalide gasa ugwadu daganobo profit mone me sabeo.
PSA 44:13 Nago dade te tiwai yali, tama te da pąde bidali hanigo te posobo po daba wali. Te we bidi dabego dwai gisugu mayu, tama dabolo hale ebo po wali.
PSA 44:14 Nago te hani bage dabe homu hodolubaso, tama augwaligo dago nogide hale yabo po wabo dao. Te daba pedalubo sęde augwaligo dwai gisugu mabo sę ebao.
PSA 44:15 Te bidi dabego posobo po, me dwai po enaba wali, tama te boi bidigo me te bidi dabego te dwai sę enaba wei ponobo eno suali. Tama ena sesemane sogo homu sęgę elalu, tama ena hale mu yai dao.
PSA 44:17 God, dago nage homu kone palubo me gegeda palisiąyu, tama dago nago dąų walali bomai po te me sela sąyu ebeo. Tiali goli, te sę dabe daba pedalubao.
PSA 44:18 Dago nage tudiba me musiąyu, tama dago nago sunumi wali asobo me tagalubeo.
PSA 44:19 Tiali goli, nago da te uni hasa dabego pesagede dolomainu ebao. Tama nago da te be hulia sai dwai madi mu te mesegelibo tiwai ebao.
PSA 44:20 Dago God, te dago nageba homu kone me isiąyu, tama dago te tibo godiba gedu haluasa po obaso da, teda nago koneaibao.
PSA 44:21 Nago te bidi dago haligade geme elalubo homu te tigidali konea pai elalubo dao.
PSA 44:22 Dago te nage naga wali pobaso, tama te tigidali sogo augwaligo da ela mubo dao. Augwaligo homugo te da ela muabo sipsip tiwai homu naga ebo dao.
PSA 44:23 Genuai Bidio, nage hodaluao. Magi baso nage pila mubawe? Nage hodaluao. Nago te sesemane sogo da tudiba mudamuo.
PSA 44:24 Magi baso nage dade geme duala sobawe? Te bidi dabego da dwai mu ilama, tama da te genuai sęgę mu tolobao. Nago dago te sęgęde homu kone me gegeda paligio.
PSA 44:25 Da te tǫba tula munama, tama dago tigi te isai bidigo tigi pila mubo tiwai elalubao.
PSA 44:26 God, nage hogodama, te da tau sagasao. Te nago da godolo ebo kolesaga te me elalua paibao. Tama nago tede homu koneama, tama da ma sobaso da, teda da me isigobeo.
PSA 45:1 Te Kora hani dabego asęani balia po me deli dao. Te wiegi yai po hauwa eno homude elalubao. Eno te tęąbi po asęnama, te kingba mawainu yali. Eno pedauwali da, te wiegi yai kuskus bidigo te po asębo hoda pen tiwai dao.
PSA 45:2 King bidi, nage te gasa sawi yai bidi mu dao. Te gasa bidi nage tiwai me menio. Nago po te wiegi yai naga elalubo. Tama te sesemane sogo Godigo nageba te wiegi yai homu ebo yai.
PSA 45:3 Nage te bomai king da. Nago au dobage te hauwa elalubao, tama nago genuai nogi te ugwanu mu yai. Nago te bainat hwą dią selama, te hwįabo sisi elaluao.
PSA 45:4 Nage te genuai nogi elalu, te polalubo king dao. Nage te hosde dugulasa, tama te hwįboba pelama, tama te hwįbo bage aiyaba elaluao. Nago hwįainu da, te bidi dabego nago po te aiyaba me elalugobeo. Tama nago hwįbo te bidi dabe dolasa bilimainu tau siyu hwįani. Te nago hwįbo te bomo yai pedelaibao, tama te dwai bidi dabe nagede wi mu emainu ebo dao.
PSA 45:5 Te nago ene dabe te mu poa pelama, tama te boi bidi dabe mu eneyu ebo dao. Nago hwįyu, te gasa hani dabe aiyaba elaluama, tama augwali te nage dologode bidibao.
PSA 45:6 Godigo nage te king nigilama, tama nage te king sesemane bidada peyu, bidada paibao. Nago te naga we bidi dabe te doloba pai kolesagade naga tonalubo dao.
PSA 45:7 Nago te doloba pai kolesaga wei eyu, tama nago te dwai kolesaga te wei isiąyu, hagela mu ebo dao. Tama tibaso, naga Godigo digi, agai te nage sa muyu, tama agai nago nogi ugwaba mu muyu, tama nago nogi te gasa king dabego nogi aiyaba elalubo dao.
PSA 45:8 Te nago gudubo bobage ugwade te wiegi yai denami ebo haniani nai, te sanda tiwai mea, me kasia te denami elalubao. Augwaligo te kingo be te haniani au ilibo naigo te au ilali, augwa te elefan kelego nigali, tama augwa te nage wiegi yai homu pemene ilibo musik weyu ebo dao.
PSA 45:9 Te gasa tǫ pedai kantri tonalubo king dabego wegi dabe, te genuai nogi elalubo we dabe dali, te nago bede bidibao. Kwin we te nago dolo nogo badu dolalubao. Augwa te bulu Ofirde sali wiegi yai golgo nigai au ilibo naigo te agai au elama, bidibao.
PSA 45:10 Nage te gesi wegi te king dali bidi painu, nago te eno po odolama, tama tede homu kone palao. Nago te naga bulude bage te homu kone ebo gegeda palama, tama naga deli kaneme bage me te homu kone ebo tagalao.
PSA 45:11 Nago tama tebo te kingo subaso da, te nage sawi yai we da weyu, tama te nage godolo mu yaibao. Aga te nago genuai bidi da, tama tiyu, nago agai po wali pao.
PSA 45:12 Te Tair bulu we bidi augwaligo te nageba wiegi yai homu ilibo nai dabe sesaibao, tama te mone hauwa elalubo bidi dabego me te nageba wiegi yai homu ebo nai dabe mawaibao.
PSA 45:13 Te kingo gesi we te aga be habude bidibao, tama aga te gasa sawi yai mu. Agai te ugwa augwaligo te nigilama, tama te golgo nigai hobigo au ilai ugwa muai.
PSA 45:14 Agai te ugwa kala te dodobolo pali te hauwa elalubao. Megi da, augwaligo te we te kingba odasa pobao. Tama te gesi wegimani te aga hai namu dabe augwali te aga wali pali.
PSA 45:15 Augwali te wiegi yai haliga pemene elama, tama augwa te kingo wiegi yai genuai be tomoba palio.
PSA 45:16 Tama king, nago da, te nago wai ogwa te hauwa elaluaibao, tama augwaligo te nago wąį nǫų dabe bidali pesage hasegeliyu, tama king dabe pedelaibao. Te nago augwaliba genuai namba mayu, tama augwaligo te tigidali bulu tǫ pedai we bidi dabe tonaluaibao.
PSA 45:17 Te nago genuai nogide po eno hanilama pusuyu, tama te nosali pedalubo hani tigidaligo te nage sesemane sogo homu kone paibao. Tama tiyu, te me badu we bidi dabego te nago nogi sesemane sogo ugwaba siyu yaibao.
PSA 46:1 Te Kora hani dabego asęani balia po me deli dao. God aga te da seselalubo bidi da, tama agai sesemane sogo da bomo mabo dao. Aga te pąde bidiyu, te dago genuai sęgę sabo sogo tau sainu sisi elalubo dao.
PSA 46:2 Tama tiyu, te haniani sę dabe pedalubo side, te dago wi me elamuo. Tǫ te mali eyu aluaibao, tama te bulu du dabe te tamu ąį tomoba degasa dulaibao.
PSA 46:3 Tama genuai tamu ąį te bomonama, kulukulu weyu, tama pepeda pelama, tama te dini pedaliyu, tama genuai tamu ąį bǫį samanu, tama te bulu du dabe degelaibao. Te tobage genuai sę pedaligi sogo da, teda da wi munu me igi meni.
PSA 46:4 Te Godigo hanu da, te magi dwai sę meni yai wiegi yai bulu, te Ugwadu Mu Bidibo Godigo hanu dao. Te genuai soabo wę me deli te tomode elalubao, tama te węde te we bidi dabego wiegi yai pemene ebo dao.
PSA 46:5 God te taunde bidibao, tama tiyu, te taun munu me dologobeo. Te be posisąbadi, tama te Godigo aga tau saibao.
PSA 46:6 Te haniani tǫ pedai kantri we bidi hani dabe augwali dwai midigi selama, tama hwįyu dali yai, tama te king dabe dali, te augwa we bidi dabe me, te augwali dolaibao. Godigo genuai po dągą mu obaso, tama tǫ te olo wę tiwai pedelaibao.
PSA 46:7 Te Tigidali Bomo Elalubo Genuai Bidi aga te da dali bidibao. Te Jekopgo God aga te dago duala sabo pesage elalubao.
PSA 46:8 Ae, tegobao! Dagego te Genuai Bidigo yali sę suagasao. Te dagego haliga te agai te tǫde gasa tobage bomai sę hauwa ebaso, midigi saibao.
PSA 46:9 Agai te tigidali tǫ pedai badu te hwįbo togolobo dao. Agai te tigidali enesigi me ene togolama, tama te sabele dabe te siaba ulubadi ebo dao.
PSA 46:10 Agai te po wai, “Dage munu ma hwįnamuo,” wali. “Dagego ena bugagia koneiąo, ena God mu dao. Ena ugwadu mu elalu, tama te tigidali tǫ pedai kantrigo we bidi hani dabe ena dologode bidibao. Te tigidali bulu pedai tǫde ena te polalubo bidi bidibo dao.”
PSA 46:11 Te Tigidali Bomo Elalubo Genuai Bidi da dali bidibao. Te Jekopgo God aga te da seselalubo bidi mu da.
PSA 47:1 Te Kora hani dabego asęani balia po me deli dao. Dage tigidali we bidi, te wiegi yai pemene elama, nogo elao. Dagego wiegi yai pemene ebo i weyu, tama Godigo nogi ugwaba sabo tęąbi po wao.
PSA 47:2 Dago te Genuai Bidide wi yao, aga te Ugwade Mu Bidibo God dao. Aga te tigidali tǫde we bidi tonalubo polalubo king dao.
PSA 47:3 Agai te tigidali Israel hani isąwai we bidi aiyaba elaluama, tama da Israel bage te augwali daide ugwadu bidibao. Agai te gasa hani dabe te da dologode bidimainu ilali.
PSA 47:4 Godigo digi te tǫ me deli dąį ilama, tama dabolo mawai dao. Da te Jekopgo hani da, Godigo da godolo mu eyu, tama dago te dena tǫde wiegi yai pemene ebo dao.
PSA 47:5 God te dagaluba pali. Te Genuai Bidi ugwaba holali sogo, te we bidi dabe wiegi yai homu pemene elama, tama bomonama i weyu, tama biugel bu weyu dali yai.
PSA 47:6 Ae, tegoba, dago te God nogi ugwaba sabo tęąbi po hodolama, waiąo. Dago te tęąbi po hodolama weyu, tama agaba wiegi yai pemene inao, aga te dago king dao.
PSA 47:7 God te king bidiyu, tama tigidali tǫ pedai tonalubao. Dago te aga nogi ugwaba sabo tęąbi po wao.
PSA 47:8 God te king bidiyu, te tigidali hani we bidi tonalubao. God te aga sia kingde dulaluyu, te aga magi sę meni yai wiegi yai mu bidibo dao.
PSA 47:9 Te haniani we bidi hanigo te tobolu bidi dabe augwali te Abrahamgo God wali pabo we bidi dabe dali sisinama, bidibao. Godigo bomogo te tigidali ami dabego bomo aiyaba elalubo dao. Aga te polalubo king dao.
PSA 48:1 Te Kora hani dabego asęani balia po me deli dao. Genuai Bidigo genuai nogi elalubao. Da te Godigo bulu duba holinao, tama agai taun tomoba pelama, tama dago agai nogi ugwaba mu sinao.
PSA 48:2 Godigo te bulu du te wiegi yai mu, tama te ugwanu mu elalubao. Te tigidali tǫde we bidi augwaligo te Saion bulu du godolo mu ebo dao. Te bulu du te not badu elalubao, tama te polalubo kingo taun dao.
PSA 48:3 God te taun tomode bidiyu, tama agai te we bidi dabego hwįbo sogo tau siyu yai. Tama tiyu, augwali bugagia bidai.
PSA 48:4 Polobadu te king dabego te Saionba hwįgi painu yai. Augwali te deliba sisinama, tama te taun pąba asai.
PSA 48:5 Tiali goli, augwaligo te taun sulama, tama augwali polo tama dwai midigi sali. Tama augwali wi umabo mu ebaso, tama augwali wi pai dao.
PSA 48:6 Augwali te dwai noma mu selama, tama augwali genuai dene sali, te wego wai ame nayu ebo dene tiwai gilama yai.
PSA 48:7 Godigo te genuai wali te giliga asobo badu asomainu elama, tama te Tasis hanu bidi dabego genuai sip dabe dolali.
PSA 48:8 Te sę te polobadu Godigo yali po odolama, tama megi dago subo me agai te tiwai ma yai. Da te Genuai Bidigo taunde bidibao. Dago God, te Tigidali Bomo Elalubo God dao, tama agai te sę ebo dago suai. Godigo te aga taun dąų walama, tama te taun sesemane sogo elalua pomainu yai dao.
PSA 48:9 God, da te nago tempel bede bidibao, tama dago te nago da sesemane godolo ebo kolesagade te homu kone palubo dao.
PSA 48:10 Te tigidali tǫ habu badu te we bidi dabe augwaligo te nago nogi ugwaba sabo dao. Te tigidali habu badu we bidi dabego te nago genuai nogide wiegi yai pemene ebo dao. Nago te tigidali bage te doloba pai kolesagade naga tonalubao.
PSA 48:11 Tama tialima, te Saion bulu dude bidibo we bidi tigidaligo te augwa wiegi yai pemene yao. Nago te tigidali we bidigo ebo kolesaga te dolo dagalubo dao. Tama tibaso, eno homugo te Juda taun we bidi dabe augwa te wiegi yai pemene mu emainao.
PSA 48:12 Dage we bidi, dage te Saion bulu dude biliyu, tama te taun obo baguliyu, tama tede elalubo bobobage be taua dabe nedao.
PSA 48:13 Dagego te Saion bagulali obode bugagia homu kone palao, tama agai te bomai be dabe bugagia suiąo. Tama tiyu, dagego te nosali pedalubo hani dabeba te po pusagameo.
PSA 48:14 Dagego augwaliba te tama waiyagameo, “Te Godigo da tonaluai da,” po wao, “Aga te dago sesemane sogo bidada peyu, bidada pabo God dao. Tama sesemane sogo te aga poligi soyu, tama dabolo te sunumi ola mawaibao,” te po wao.
PSA 49:1 Te Kora hani dabego asęani balia po me deli dao. Dage tigidali we bidigo, odao. Dage tigidali tǫde bidibo we bidigo, eno wabo poba olo bugagia muao.
PSA 49:2 Dage nogi yai bidi me, dage olo bidi me, dage masigi hauwa munalubo bidi me, dage magi nai meni yai bidi me, dagego te po odao.
PSA 49:3 Eno homu kolesagade wiegi yai kolesaga koneama,. tama eno dwagi yai po dagego konemainogo pusubao.
PSA 49:4 Eno po digi po begelama, hasia meba pusaibao. Tama eno dwagi yai tęąbi gita dali elama, tama dagebolo te po begelama wali po page pusaibao.
PSA 49:5 Bidi dabe augwaligo masigi hauwa munalubo, te homugo augwali dąų omai te homu elama, tama augwa digi genuai po dągą ola bilibo dao. Augwaligo nai hauwa munalubo homu elama, te bidi dabe augwaligo ena dolainogo bobegelali. Tialima, eno augwali dali wi egobeo.
PSA 49:7 Dago koneai, bidi mego aga masigigo aga digi aga ma abelama, ma dobola sabo menio. Tama agai Godibolo aga bidabo ula abeliyu, mone masigi Godibolo magobeo. Mu menio.
PSA 49:8 Bidigo mone masigigo God abelama, tama Godigo aga te bidibo ulade bidao omainogo, tama aga isidali weyu, dago tama tiali usu munu me egobeo.
PSA 49:10 Da tigidaligo koneai, kolesaga koneai bidi, augwali me isibo dao. Tama dwai kolesaga ebo bidi, te kolesaga meni yai bidi me, augwali isibo dao. Te bidi dabe augwaligo walu me mone masigi tigidali nai isu, taga peyu, tama gasa bidi dabego te nai sabo dao.
PSA 49:11 Hasia te bidi dabe augwaligo tǫ me elaluai, tialima megi te gų page augwaligo tǫ tiwai elama, augwali tede sesemane sogo bidada peyu, bidada pabo dao.
PSA 49:12 Dago genuai nogi sabo tego dago te isibo tų dąų wagobeo. Menio. Da te hasa dabe isibo tiwai yaibao.
PSA 49:13 Te sę ebo te bidi dabe augwa digi tǫde tigidali nai homugo dąų wabo bidide pedelebo dao. Tiwai bidi dabego dwagi yai homu kolesaga menio. Te bidi dabe augwaligo e tǫde tigidali nai dali osogo dwagi yai elama, tama augwali isibo dao.
PSA 49:14 Godigo agai bodolu muyu, augwali te kibu sipsip isibo tiwai elama, augwali te isali bidigo buluba paibao. Tama te isibo tego augwali tonalubo bidi tiwai bidai. Augwaligo tigi tigidali polo damua pabo si, tama augwali te isibo bidigo bulude augwaligo be tiwai elama bidaibao. Tama te dwagi yai doloba pai we bidigo augwali aiyaba elaluama, tonalueibao.
PSA 49:15 Tiali goli, Godigo ena ma saibao, tama isibo bidigo bulude te agai bomogo ena dąų wabo usu egobeo.
PSA 49:16 Niwai bidi me agai masigi hauwa selama, tama genuai be sęnama, tama te bede dwagi yai nai hauwa elaluai, tagalao, nago te nai sulama, godolo igio.
PSA 49:17 Nago koneai, nosali te bidi aga isibode, tama agai te tigidali nai me sela pogobeo. Be me, te au ebo nai me, masigi me, te nai tigidali aga dali te isibo bidigo buluba selasa pogobeo.
PSA 49:18 Tama aga e tǫde bidibo sogo te bidi agai te tigidali nai dali dwagi yai homu yai. Agai sę bomo elama, nai hauwa sai, tama bidi augwaligo te po wai, “Aga dwagi yai bidi dao.”
PSA 49:19 Tialima, aga isilama, tama te hasia isali wąį dabe augwali dali te giliga ula isąwai bulude bidada peyu, bidada paibao.
PSA 49:20 Dago genuai nogi siyu da, tego dago isibo tų dąų wagobeo. Menio. Da te bulu hasa dabe isibo tiwai yaibao.
PSA 50:1 Te Tigidali Bomo Elalubo God, aga te dago Genuai Bidi da, megi da agai po weyu, tama te giliga pedaluboba, me te giliga dega siguluboba usu nama, te tigidali we bidiba i obao. Agai te tigidali bulu tǫ we bidiba i wabo dao.
PSA 50:2 God te Saionde bidiyu, te taun te polalubo taun mu, tama te gasa sawi yai mu elalubao, tama Godigo ula te pepeli diliba pedelali.
PSA 50:3 Dago God aga megi da te asobao. Tama pedauwali me pania sabeo. Mu menio. Te tigidali nai dabo sia bogoli te aga asobodu polasa paibao, tama genuai wali me, tulubagego me, aga bagulama, elalubo dao.
PSA 50:4 Agai te dagalu me tǫ asomainu i olama, augwali sigo agai te aga we bidi dabego ebo kolesaga te bugagia dagalobo suagasamainu eyu, agai augwali si i obao.
PSA 50:5 Godigo te tama po obao, “Te eno we bidi dabe, dagego ena dali te bomai po dąų walali, tama dagego te dąų walali po dąų waliyu, te kibu hasa dabe ofa yai. Dage te ena dali deliba sisinagasao,” po wai.
PSA 50:6 Te dagalugo digi te tama po obao, “God te doloba pai mu dao. Aga digi te po tų odobo bidi jas bidibao,” wabo.
PSA 50:7 Godigo te po wali, “Dage te eno we bidi da, odao. Eno po elalubao. Dage Israel dabe, eno dage po tų ilaibao. Ena naga, ena te God mu da, tama ena te dagego God dao.
PSA 50:8 Eno te dagego yali ofade te eno dageba wado po weyu me wabeo. Menio. Te sesemane sogo dagego te ofa te siaba tigidali ulubo te eno suai dao.
PSA 50:9 Tiali goli, eno te dagego obo tomode te omai bulmakau, me ma meme omai te dagego ofade sabo homu ebo meni.
PSA 50:10 Magi baso meni, te tigidali buside bidibo uni hasa, tama te tigidali bulu dude bidibo bulmakau me, te tigidali te eno naga dao.
PSA 50:11 Te tigidali ba, me te busi hasa dabe me, te kala nosa bulude bilibo ba sibi me, te tigidali eno muai nai naga dao,” Godigo te po wai.
PSA 50:12 “Ma, te ena nasi ebaso, te eno dageba po me wagobeo. Magi baso meni, te tǫ dali, tigidali elalubo nai, te eno naga dao.
PSA 50:13 Te eno omai bulmakau mi tubo homu ebawe? Eno te meme kaneme tubo homu yaiba, agawe? Menio.”
PSA 50:14 “Te dagego enaba usu da mu waiyąo, tebo te dagego yabo ofa tiwai tama. Te dagego te enaba olo mabo tigidali nai maiyabo po wali, te Ugwadu Bidibo God Mu te enaba dagego maiyąo.
PSA 50:15 Dagego tama tibo si, tama te sęgę pedalubo sogo, dagego enaba i waiyą, tama te eno dage tau mu siyu, tama dagego eno nogi ugwaba sagameo,” po wali.
PSA 50:16 Tiali goli, Godigo te dwai sę ebo bidi dabeba te tama po wali, “Magi baso te dagego eno bomai po tigidali nogibo dawe? Tama magi baso te dagego eno dąų wali bomai pode te po mibo dawe?
PSA 50:17 Te eno dage dodolobo te dagego hagela homu eyu, tama dagego eno po sesemane sela sąbo sę ebo dao.
PSA 50:18 Dagego te nai wi sabo bidi dabe sulama, tama dage augwa abagi pedelali. Tama dage te we sabo sę dolama, tama te penani sę ebo we bidi dabe dali munasa, biliyu yai.
PSA 50:19 Dagego te dwai po, me te tibo po sesemane sogo wabo sę ebo dao.
PSA 50:20 Tama dagego te duga ama dabe po tų ilibo sę eyu, tama dagego augwaliba te posobo weyu ebo dao.
PSA 50:21 Dagego te tiwai yali, tama eno po deli me wabeo. Tama dagego te ena te dage tiwai tobage da homu yai. Tiali goli, mu menio. Megi eno dageba wado po olama, tama dage te pepeli diliba sela munama, te po tų ilaibao,” wali.
PSA 50:22 “Te ena tudiba mubo we bidi, dagego odao. Te dage te tiwai tama bididubaso da, teda eno dage dolaibao, tama te bidi me deligo dage ma sainu ebaso, te usu me egobeo.
PSA 50:23 Te enaba usu da weyu, gedu haluasa po weyu, te enaba ofa mabo tiwai ebo bidi, agai te eno nogi ugwaba sobao. Tama eno te po wali pabo bidi dabe te eno ma dobola saibao,” po wai.
PSA 51:1 Te Devitgo asęani balia po me deli dao. Agai te gasa bidigo we nogi Batseba dali penani yai, tama te profet bidi Natan aselama, “Nago dwai sę yalio,” te tobage po wali. Tama Devitgo ge neyu, e balia po weyu asęani. 2 Samuel Dąį 11, 12:1-15 suao. God, nage hobede ebo page bidi, nago ena olo mabo sęgo ena tau sao. Nago olo mabo sę hauwa mu elaluai, tama eno homugo nago eno dwai kolesaga tigidali sela sąyao.
PSA 51:2 Nago ena tigidali ąį telayao, tama dwai kolesaga enade ma elaludalio. Eno sęgę sela sąnama, ena dwagi yai pedelama bidaio.
PSA 51:3 Eno koneai, eno dwai sę yai. Tama ena yali sęgęde eno homugo konealubo tagalobeo.
PSA 51:4 Eno dwai sęgę nage deli dali naga yai. Eno dwai kolesaga nago gedude yai. Tama nago ena po tų ela menama, tama nago doloba pai kolesaga naga yao. Nago eno sęgę wei siyu, tama nage da, dwai sę isiąwai bidi.
PSA 51:5 Nago koneai, idago ena ame nani sogo, ena dwai sę ebo bidi pedelai. Mu tama, ena idago haligade bidibadi, ena sęgę sai bidi dao.
PSA 51:6 Nago homugo te eno nage dolo naga wali asiyu, tibo kolesaga igio homu ebao. Tama tibaso, nago ena dwagi yai homu kolesaga ola mao.
PSA 51:7 Nago eno sęgę sela sąnama, ena meda meni yai pedelaio. Nago ena ąį tedelama, ena meda isiąwai mu pedelaio, tedela yai kedau ebo nai sno te tiwai pedelaibao.
PSA 51:8 Nago eno homu dwagi yai ma ilao. Mu tamao, nago ena aiyaba elaluai, tama nago eno sęgę wei ponai, tialima, megi eno dwagi yai homu ma yaibao.
PSA 51:9 Nago eno dwai sę yaliba ma tonono igio. Tama eno homugo nago eno dwai sę yali te nago tigidali sela sąyao.
PSA 51:10 God, nago eno homu kolesaga tomode meda meni yai dwagi yai gesi kolesaga ilibo sę ma yao. Awe, ena nage dali homugo kęą pai bidi pedalumainu yao.
PSA 51:11 Nago ena sela sąyu, tama ena nage digibulu bididalio. Nago ena dali bidibo mobo bidi naga ma sidalio weyu.
PSA 51:12 Polobadu nago ena ma sobaso, te ena dwagi yai homu yai, nage dali. Tama megi eno te homu yai, nago ena te dwagi yai homu kolesaga enabolo ma mao. Nago eno homu kolesaga hodolama, tama nago po eno wali paibao. Eno tama homu kolesaga emainogo nago ena dąų walagameo.
PSA 51:13 Tama eno nago kolesaga te sęgę sai we bidi augwalibolo ola mawaibao, tama te we bidi augwali nage bidibo digi ma asaibao.
PSA 51:14 God, nage te God nago ena ma sabo bidi dao, nago ena dali olo mabo sę tigidali dwagi yai eyu, tama nago ena ma elegio. Tama eno nago nogi ugwaba siyu, nagebolo tęąbi hauwa waibao, nago doloba pai kolesaga naga ebo dao.
PSA 51:15 Genuai Bidi, nago ena tau siyu, mu po dolo hanilama, enabolo wao, tama eno nago nogi ugwaba saibao.
PSA 51:16 Ma, te nago eno yali dwai sę sela sąmainu eyu, eno te kibu sipsip nagebolo ofa mobaso, nago sogobeo. Nago te sabo homu igi sogo da, teda eno te ofa magasigi da. Eno kibu sipsip me elama, siaba ulama, tigidali mu dela peyu da, te nago te ebo sęde dwagi yai homu egobeo.
PSA 51:17 Tialima, God, ena digi ena aiyaba elaluama, nage dologode ena bidaibao. Te tobage kolesaga ebo da, te nago gedude te nago sabo ofa mu tiwai dao. Eno koneai, bidi aga yali dwai sęde aga ma koneyu, aga digi aga aiyaba elaluai magi basowe? Aga te yali dwai sęde homu dene eyu, tebo dao. Te tobage kolesaga ebogo te nagebolo ofa mabo sę hasegelama, te nago gedude te usu mu dao.
PSA 51:18 Naga homu kolesagago digi, te Saion we bidi dwagi yai homu ma ilao. Naga digi Jerusalem genuai hanu moni masigigo nigali obo ma dodolao.
PSA 51:19 Tama te sogo nago dwagi yai doloba pai te usu da olama, ela mabo kibu sipisip ofa nago godolo yaibao, tama meba siago tigidali dela pabo nai dabe. Tama dago bulmakau omai selama, nagebolo usu da olama, siaba tigidali ulama, tama siago tigidali dela paibao, te nagebolo nai ula ofa mabo sawali sai altade te sę yaibao.
PSA 52:1 Devitgo te balia po asęani, te dago homu konemainogo yai. Hasia bolo te Idom bidi Doek te Solba pelama, tama agabolo te tama po walali, “Devit te Abimelekgo bede bidibao,” po wai. Tama tede Devitgo homugo ma kone palama, te balia po asęani. 1 Samuel 21:7, 22:9-10 tede elalubo po suao. Nage te bomai bidi, te magi baso nago te genuai po dągą weyu, tama nago te Godigo we bidi augwaliba dwai kolesaga elama, tama tede nago odolali te wiegi yai homu pemene ebo dawe? Te sesemane sogo Godigo te olo tau sabo wiegi yai kolesaga augwaliba ebo dao.
PSA 52:2 Nage te tibo po wabo bidi da, te nago po te resa te mu poa pai tiwai elalu, tama nago po wabogo te gasa bidi dolobo dao. Tigidali side nago te gasa bidi dolabo homu elalubo dao.
PSA 52:3 Nago te wiegi yai kolesaga wei me isiąyu, nago te dwai kolesaga naga wei ebo dao. Nago te mu po wabo kolesaga wei meni yai. Nago te tibo po wabo kolesaga naga wei ebo dao.
PSA 52:4 Nage te tibo po wabo bidi dao. Nago te gasa bidi dolabo homu ebo po wei mu ebo dao.
PSA 52:5 Tiali goli, odao. Godigo te nage mu doloyu, tama nage te tiwai elalua paibao. Agai te nage pageabi elama, tama naga bede te nage sela sąwaibao. Tama nage mu sia somainu ilama, tama nage te tǫde ma bidimainogo me elalugobeo.
PSA 52:6 Te doloba pai bidi dabego te tiwai pedalubo sulama, te augwali wi yaibao. Te augwaligo nage gisugu mayu, te tama po waibao,
PSA 52:7 “Suao. Te bidi te Godigo aga tau sabo homu wei isiąyu, te aga dąų me walobeo. Agai te aga mone, me doado bage hauwade teba homu munama, tama aga homugo te dwai kolesagago aga bugagia bidimainu ilaibao, te homu yali,” te po waibao.
PSA 52:8 Tiali goli, eno te tiwai me ebeo. Ena te Godigo be pąde elalubo ni oliv tiwai dao. Eno konealubo homu Godiba munama, te Godigo olo tau sabo wiegi yai kolesaga te sesemane bidada peyu, bidada pabo sogo te enaba te kolesaga emainu ebo dao.
PSA 52:9 God, nago ena tau sali, tama tiyu, eno sesemane sogo nageba usu da weyu, gedu haluasa po wabo dao. Tama te nago we bidi dabego gedude te eno nago nogi ugwaba siyu, tama eno te po waibao, “Godigo te wiegi yai kolesaga enaba ebo da,” po waibao.
PSA 53:1 Te Devitgo asęani balia po me deli dao. Te kolesaga meni yai dwai sę ebo bidi dabego augwa digi te tama po wabo dao, “Te God me bidibeo,” wabo da. Te bidi dabe te augwali bidi dwai naga dao. Augwaligo kolesaga te dwai mu ebo dao. Te bidi me deligo wiegi yai kolesaga me ebo menio. Mu menio.
PSA 53:2 God te dagalude bidiyu, te we bidi dabe bidalubo madi aiyaba tonalubo dao. Agai te kolesaga koneai bidi me deli gegeyu, te God gegebo sę ebowe naga suainu tebo dao.
PSA 53:3 Tiali goli, menio. Tigidali mugo te sunumi tagalalio. Tigidali te deli tobage tiwai naga elalubao, augwali te dwai bidi dabe mu elalubao. Te bidi me deligo wiegi yai kolesaga me ebeo. Mu menio.
PSA 53:4 Godigo te tama po wali, “Te bidi dabego te dwai kolesaga ebao, te augwaligo kolesaga koneai me elalubo homu meni da, agawe? Augwaligo te eno we bidi dabe te augwaligo te bret tubo tiwai gilama te mu silibao. Tama augwaligo enaba gedu haluasa po wabo menio,” wali.
PSA 53:5 Tiali goli, te augwali wi umabo mu yaibao. Polobadu augwa te tiwai wi me ebeo. Mu menio. Magi baso meni, te Godigo dagego boi bidi tigidali silimainu yaibao. Agai augwali ela munama, tama agai augwaligo dili dabe są są paibao.
PSA 53:6 Eno homugo Godigo te Saion bulu bidi me deli tagala palumainu elama, te Israel dabe ma sagasomainu homu yai. Nosali Godigo te aga bage tau selama, tama augwali bugagia ma bidimainu yaibao, teda te Israel hani augwali wiegi yai pemene yaibao. Ae, te Jekop aga hani augwali bugai haliga mu yaibao.
PSA 54:1 Devitgo te balia asęani, te Sifde sę yali bidi dabego te Solba po waligi peyu, te Devit augwali tomode geme dualalubo po waligi pai, te sęde agai homu kone ma paliyu, e balia po asęai dao. 1 Samuel 23:19, 26:1 tede elalubo po suao. God, te nago bomogo, nago ena te dwai bidi dabego nogode ma sao. Te nago genuai bomogo nago ena te olo mu bidimainu ebo bidi pedalumainu ilao.
PSA 54:2 God, eno homugo nago eno gedu haluasa po wabo odomainu homu ebao. Eno homugo nago eno wabo poba olo mumainu homu ebo dao.
PSA 54:3 Te hagoma ebo bidi dabe aselama, te augwaligo ena dali hwįainu ebao. Te homu dene isiąbo bidi dabe augwaligo ena ela muainu ebao. Te bidi dabe augwaligo homugo te God olo nai tiwai da homu ebo dao.
PSA 54:4 Tiali goli, Godigo digi ena tau sabo bidi dao. Mu tama, Genuai Bidigo te ena tonalubaso, tama ena bugagia bidibo dao.
PSA 54:5 Te Godigo eno boi bidi dabeba te tiwai dene mawaibao. Te augwaligo enaba ebo kolesagade, tego augwa digi dolaibao. Godigo ena me tagalogobeo, tama tiyu, agai te boi bidi dabe mu silaibao.
PSA 54:6 Genuai Bidi, eno te nageba ofa maiyabo homu wei ebao. Nage te wiegi yai mu da, tama tiyu, eno nageba gedu haluasa pode usu da mu obao.
PSA 54:7 Nago ena tau selama, tama enaba te pedelali tigidali sęgęgo te ena aiyaba me elalubeo. Tama eno suali, te nago eno boi bidi dabe aiyaba elalubo subo dao.
PSA 55:1 Te Devitgo asęani balia po me deli dao. God, nago eno gedu haluasa po wabo odao. Nago eno gela wabode olo me pania sigio.
PSA 55:2 Ae, nago eno gedu haluasa po bugagia odolama, tama enaba po wei ponao. Te sęgęgo ena mu dolainu ebo dao.
PSA 55:3 Te boi bidi dabego ena dolabo po bomo mu yai. Te dwai bidi dabego ena aiyaba mu elalu yali. Tama tiyu, eno haliga te dwai sęgę mu yai. Augwaligo te sęgę hauwa enaba muyu, te wado po dali weyu yai, tama augwaligo enaba boi bidi mu ebao.
PSA 55:4 Ena te augwalide wi umabo mu eyu, tama ena isabo homu elama, tama tego ena haliga sęgę mu ilibo dao.
PSA 55:5 Awe, ena wi mu elama, tama eno tigi te didibili dwai mu ebao. Te wigo ena aiyaba mu elaluai.
PSA 55:6 Tialima, eno te tama po wali, “Hobede ya, te eno homugo te ba dabego bogo tiwai sigi da homu yai. Tama ena bola pelama, te toma nabo pesage me deli gegelama, tama ena tede dugulalu dabo homu ebao,” wali.
PSA 55:7 “Te ena digibulu mu bola pelama, tama ena te bidi meni yai pesageba mu bidigi paibao,” wali.
PSA 55:8 “Te ena asesa bola peyu, tama geme duala sigi pelama, bidabo pesage me deli gegelama, bidainu yaibao, tama ena te bomai walide me tulubagede geme duala selama, bidaibao,” wali.
PSA 55:9 Eno suali, te bidi dabego te taun tomode hwįbo suali. Tama tialima, Genuai Bidi, nago augwaligo po kone tuą palumainu elama, tama augwali mu silimainogo yao.
PSA 55:10 Te giligade me hulide augwali te taun bagulali obo dąįde bilalu ebo dao. Tama te taun we bidi dabego te dwai sęgę sabo kolesaga ebo sę hauwa eyu ebo dao.
PSA 55:11 Te taun pedai tigidali badu te bidi dabego gasa bidi dabe me, doado bage dabe me doloyu ebao. Te sunumi sesegede, me te bidi sisinibo pesagede, te bidi dabego te gasa bidi dabe aiyaba elalu ebao, tama augwali tibo po ola mayu, te augwaligo doado bage sainu ebo dao.
PSA 55:12 Te boi bidi me deligo po dwai enabolo wagi sogo da, tagalao, eno te agai wabo pogo sęgę bugagia toligi da. Ma, ena wei isiąwai bidigo enaba kęnę po wagi sogo da, teda ena agade geme duala sabo usugi da.
PSA 55:13 Tiali goli, menio. Te nage naga dao. Nage te eno polalubo abagi da, tama nage te eno hai namu mu da. Nago digi te dwai po wabo kolesaga ebo dao.
PSA 55:14 Polobadu da si hodobo biliyu, tama po dali bugagia miyu, ela bilai, tama te Godigo moni lotu be tempelba te gasa bidi dabe dali peyu yali.
PSA 55:15 Eno homugo te eno boi bidi dabego haligade me, te augwa bede me, te dwai kolesagago pągąnaluao. Tialima, eno homugo te augwali polo isimainu homu yai. Te augwali bidibo elalubadi, tama augwali te isibo bidi dabego pesageba pomainu ebao.
PSA 55:16 Tiali goli, te Godigo ena tau somainu te gedu haluasa po obao. Tama aga digi ena ma saibao.
PSA 55:17 Te kigamude me, te genuai giliga nanobode me, te hulide me, te sęgę dabego ena dolobaso, tama eno agaba gela wabo da. Tama agai eno gedu haluasa po odoyu yaibao.
PSA 55:18 Te bidi hauwago ena dali hwįbao. Tiali goli, ena me dolobeo. Magi baso meni, Godigo ena tonaluyu, tama ena ma odasa asaibao.
PSA 55:19 Polobadu mu God king bidali, tama megi me aga te king bidibao. Te aga digi eno gedu haluasa po wabo odama, tama agai te boi bidi dabe te hwįbode aiyaba elaluaibao. Augwali te agade wi me isąwai, tama tiyu, augwaligo te dwai sę ebo kolesaga tagalogobeo.
PSA 55:20 Eno te abagigo agai te aga abagi dabe dali digi hwįani. Tama agai te augwali dali polobadu te dąų walali bomai po bolalio.
PSA 55:21 Te pedauwalide agai pusai po wali, tiali goli te haligade agai te boi bidi enade elaluali. Te agai pogo dago tabi nagame ilama bidibao. Tiali goli, te po te bobobage bainat hwą tiwai mu poa pelama, tama da togobao.
PSA 55:22 Tigidali sęgę nago tolobao, te nago Genuai Bidiba mao. Te agai tolama, tama te agai nage dąų walaibao. Te agai te magi nai me deligo te doloba pai bidi dabe dolomainu me iligobeo.
PSA 55:23 Tiali goli God, te nago te bidi ela mubo bidi dabe sela sąyu, tama te tibo po wabo bidi dabe me sela sąyu elama, tama augwali te dwai pesageba pelama, tama augwali hagawaibao. Te augwaligo bidabo sogo bodolu te me elalubadi, tama te augwali isaibao. Tiali goli, ena digi, teda eno konealubo homu nageba mu sesemane kęą paibao.
PSA 56:1 Te Filistia dabego Devit te Get taunde pageabi elama, tola sobaso, tama Devitgo te gedu haluasa po weyu, te Godiba gela wali. 1 Samuel 21:10-15 tede elalubo po suao. God, nago te olo tau sabo wiegi yai kolesaga enaba yao. Te bidi dabego ena pobeasa biliyu, tama ena dali hwįyu ebao. Te boi bidi dabego sesemane sogo dwai enaba ebao.
PSA 56:2 Tigidali sogo giligade te boi bidi dabego ena dali hwįai. Te bidi hauwago enaba boi bidi ebo dao.
PSA 56:3 Te Tigidali Bomo Elalubo God Mu, te ena magi nai me delide wi ebo sogo, eno konealubo homu nageba dąų mu wabo dao.
PSA 56:4 Eno konealubo homu Godiba kęą pelama, tama eno agai mu poba homu konealubao. Tama tiyu, eno agai nogi ugwaba sobao. Eno konealubo homu Godiba munama, tama ena te magi nai mede wi me egobeo. Te bidi dabego mena sę enaba yaibawe? Menio.
PSA 56:5 Tigidali sę eno yainogo ebadi goli, te boi bidi dabego dolobo sę yai. Te sesemane sogo augwaligo homugo te ena dolabo sunumi gegebo sę yai.
PSA 56:6 Augwa deliba sisinagaselama, geme dualalubo dao. Te augwaligo ena bilibo bugagia tonalu, tama ena augwaligo ela muabo homu eyu, te tama tibo dao.
PSA 56:7 God, nago te augwa ebo kolesagade dwai dene mao. Nago augwalide haliga sębę eyu, tama augwali mu dolama, aiyaba mu elaluao.
PSA 56:8 Nago ena te sęgę toliyu, tama ena te dwai dene me eyu, tama ena te gela udubo te nago koneai. Tialima, nago tede homu konealu elama, tama te naga bukude te nago asęai dao.
PSA 56:9 God, eno nage koneanio. Nago ena tau sainu yai. Tama tialima, nosali eno nageba gedu haluasa po waibao, te nago te boi bidi dabe pobebaso, tama augwali wi paibao.
PSA 56:10 Eno te Godiba homu konealu, tama eno agai dąų wali poba homu konealuai. Tama tiyu, eno agai nogi ugwaba sabo dao. Mu tama, eno te Genuai Bidigo dąų walali poba homu kone palama, tama eno aga nogi ugwaba sabo dao.
PSA 56:11 Eno konealubo homu te Godiba dąų obaso, tama tiyu, te eno magi naide wi me egobeo. Te bidi dabego mena sę enaba yaibawe? Menio.
PSA 56:12 God, te polobadu eno yaiba olama po dąų wali sę, te sę eno yaibao wali. Nago ena ma dobola saligo tama, ena me isibeo. Nago ena tau saligo te boi bidi dabego ena me aiyaba elalubeo. Tama tialima, God, ena te nage dali sesemane sogo bilibao, tama ena te nago ulade bilidubadi, te ena isiboba usu naibao. Tama eno nageba usu da mu weyu, tama eno te usu da wali po dąį iliyu, te eno ofa me deli yaibao.
PSA 57:1 Devit te Solde wi pelama, tama te bulu du odua beba bidigi pai. Te 1 Samuel 22:1; 24:1-3 tede elalubo po suao. Agai te dabolo kolesaga konemainu ola mayu, te balia asęai dao. God, nago te homu dene eyu, tau sabo kolesaga enaba yao. Magi baso meni, nago ena tonalumainu eyu, ena nageba asobao. Ena nage dali bidibaso, te ena bugagia bidibao, te ba kakaruk wai dabe te aga idago bogo dologode bugagia geme dualalubo tiwai gilama ebao. Ena te tiwai tama bididu, te ena dolainu yali nai tigidali silibo sogoba usu nigi paibao.
PSA 57:2 Eno te Ugwadu Mu Bidibo Godigo te ena tau somainu i wabo dao. Tama agai te ena sǫą pabo nai tigidali mabo dao.
PSA 57:3 Aga te dagalude bidiyu, tama agai eno gedu haluasa po wabo odama, tama ena ma dobola saibao. Agai te ena dolainu ebo bidi dabe te aiyaba elalueibao. Godigo te sesemane sogo ena wei mu eyu, godolo elama, tama agai ena munu me tagalugobeo. Mu menio.
PSA 57:4 Te dwai hasa laion tiwai bidi dabe augwaligo ena bobegelali, tama augwaligo te we bidi dabe tuainu sisi yali. Te augwaligo kele te ene me sesemone poa pai mu tiwai elaluali. Te augwaligo hamena te bainat hwą poa pai mu tiwai elaluai dao.
PSA 57:5 God, nago magi sę me deli te dagalude te tigidali we bidiba te tiwai ola mao, naga digi te polalubo bidi mu da olama, tama nage te augwali daide ugwadu bidibao. Te nago bomo te tigidali bulu tǫ pedaide pepeli diliba hanilama, pedalumainu yao.
PSA 57:6 Te boi bidi dabego ena tola somainu ebo bono gągą muani. Tama tiyu, genuai sęgęgo ena aiyaba mu elaluai. Augwaligo eno sunumide te tǫ dedage dogolama, teba ena tula mumainu yai. Tiali goli, ena tula mubeo. Augwa digi te dedageba ma tulaluali.
PSA 57:7 God, te eno haligade da, eno konealubo homu nageba dąų wali. Awe, eno konealubo homu nageba mu mubao. Tama tibaso, te eno nago nogi ugwaba sabo tęąbi po waibao.
PSA 57:8 Te ena pila mubo tagalama hodaluaibao. Eno te gita me, kulelego me, te musik waibao. Te be posa pabode, teda eno te musik waibao.
PSA 57:9 Genuai Bidi, te eno nageba usu da wabo po te gasa hani tomode waibao. Te ena tigidali tǫde bidibo we bidiba pelama, te nago nogi ugwaba saibao.
PSA 57:10 Magi baso meni, nago da sesemane godolo ebo umabo mu ebao. Te dago usu sainu ebaso da, teda te dąį te dagaluba usu nigi paibao. Nago da tonaluabo po dąų walama, tama nago da me tagalubeo. Te nago da tonalubo sogo tigidali te dago nedebaso da, teda dąį te dagaluba usu nigiluaibao.
PSA 57:11 God, nago magi sę me deli te dagalude te tigidali we bidiba te tiwai ola mao, naga digi te polalubo bidi mu da olama, tama nage te augwali dąįde ugwadu bidibao. Te nago bomo te tigidali bulu tǫ pedaide te pepeli diliba hanilama, pedalumainu ilao.
PSA 58:1 Te Devitgo asęani balia po me deli dao. Dage te tobolu bidi dabe, dagego te doloba pai po te po tųde wabo da, agawe? Te dagego tigidali bidigo po bugagia dagalubo da homu eba, agawe?
PSA 58:2 Mu menio. Te dagego homu te dwai kolesagaba naga kęą pai elalubao. Tama dagego te tigidali badu te bidi dabe dolobo sę ebao.
PSA 58:3 Te dwai sę ebo bidi dabe te augwa tigidali sogo bilibode te wiegi yai sunumi tagalali. Te augwali wąį bǫųde digi gagalali, te augwa monu dabe eboba usu nigi peyu, te augwaligo tibo po wabo sę naga yalio.
PSA 58:4 Te augwaligo wabo po te bidi gąų kelebo hasamanigo kelede elalubo te bidi isibo nabi tiwai dao. Augwa olo pania siyu yali, te hasamanigo ebo tiwai, te aga olo pania selama, te aga po te me odobeo.
PSA 58:5 Te hasamanigo te kolesaga koneai bidigo po me odisiąwaibao, te agai musik wabo sogo te hasamani hodaluama, tęąbi emainu yai. Te agai ona elaidu geani, tama te hasamanigo me odogobeo.
PSA 58:6 God, nago te dwai bidi dabe dolao. Genuai Bidi, te augwali te dolama hwįbo laion tiwai ebao, tama tialima, nago augwali kele togolama, tigidali guda sąyao.
PSA 58:7 Augwali te wę pelama, tama te tǫde odolali menia siyu, hagabo tiwai emainao. Nago augwali agayu, tama te bidigo nosa agalama, te isibo tiwai gilama emainao.
PSA 58:8 Eno homugo augwali te ma damubo tiwai gilama emainao, moni dwai kukumini emainao. Tama augwali te wai idago haligade isibo tiwai emainao. Nosali idago aga ame nenama, tama te waigo giliga susiąbo tiwai emainu yao.
PSA 58:9 Te polo mu tama, Godigo augwali dolaibao, te bidigo dwasianu ni gelibo tiwai gilama yaibao. Augwali te bidibo ula elalubadi, tama Godigo augwalide haliga sębę mu elama, tama agai augwali te pobele bage sąbo tiwai gilama ebo dao.
PSA 58:10 Te doloba pai bidi dabego te Godigo te dwai sę ebo bidi dabebolo te dwai dene mabo subo si, te augwali wiegi yai pemene yaibao. Te doloba pai bidi dabego sągą te dwai bidi dabego kanemego sągą wę telaibao.
PSA 58:11 Tama gasa bidi dabego te tama po waibao, “Mu dao, Godigo te doloba pai bidi dabeba wiegi yai sę wei pona mawai. Mu tama, God bidibao, tama agai te tigidali bage te doloba pai po tųgo dagalaibao,” waibao
PSA 59:1 Polobadu Solgo bidi meba tagala palama, te Devitgo beba tonalugi pai. Augwaligo aga ela muainu yai. Te 1 Samuel 19:11 tede elalubo po suao. Tialima, Devitgo megi te balia asęyu, te dabolo bugagia ola mawai. Eno God, nago ena te boi bidi dabego nogode ma dobola sao. Nago ena bugagia seselalubaso, te augwaligo ena me dolisiąwaibao.
PSA 59:2 Nago ena te dwai bidi dabego nogode dagala sao. Tama ena ela muainu ebo bidi dabede nago ena ma dobola sao.
PSA 59:3 Augwali suao. Augwali geme dualalu, te ena ela muainu ebao. Augwali te dwai hwįbo bidi dabe, tama augwali sisinama, te ena dali hwįainu ebo dao.
PSA 59:4 Genuai Bidi, augwali dali eno dwai sę me isiąyu, tama eno nago bomai pode hagoma me ebeo, tama eno magi nai me delide magi dwai sę me ebeo. Tiali goli, augwali asesa pelama, te ena dali hwįainu pąba bidagasai elaluali.
PSA 59:5 Genuai Bidi, nage te Tigidali Bomo Elalubo God dao. Nago polo tama ena tau sagasao. Nage te Israel dabego God, te bidi dabe suao. Nage polo aselama, tama te Israel hani isąwai we bidiba dwai dene magasobo sę yagasao. Nago augwalide homu dene me elamuo. Te bagego wiegi yai kolesaga yaiba po wali, tiali goli, augwaligo te dwai kolesaga yabo homu naga elaluai. Te augwali wei ponobo sę nago mu yao,
PSA 59:6 Te hulide augwali te genuai hanuba ma aselama, tama augwali te taun bobegelali obo sesege badu bagula biliyu, tama te yowi dabego wabo tiwai i ola bilai.
PSA 59:7 Odao. Te augwaligo po te dwai mu weyu, te bainat hwą poa pai mu tiwai yali. Tiali goli, augwaligo te po wali, “Dego dago te po odomainu yagawe?”
PSA 59:8 Tiali goli, Genuai Bidi, nago augwaliba dwai gisugu mu mabo dao. Nago te tigidali Israel hani isąwai we bidi haniba te kęnę po wabo dao.
PSA 59:9 Nago naga ena dąų waliyu, tama ena tonalubao. God, ena te nageba naga pelama, tama ena te boi bidi dabede geme duala sabo dao.
PSA 59:10 Te eno God agai ena wei eyu, godolo mu elama, tama aga aselama, ena tau sagasali. Godigo te agai eno boi bidi dabe te aiyaba elalubo te enabolo sumainu yaibao.
PSA 59:11 God, te nago augwali ela mugio. Magi baso meni, te eno hani bage augwaligo te naide homu kone ebo tagalidalio. Genuai Bidi, nage da tonalubo bidi dao. Te nago bomogo naga, nago te boi bidi dabe sela sąnama, te augwali tedela pomainao.
PSA 59:12 Sesemane sogo augwaligo te dwai sę yabo po naga weyu ebo dao. Te augwa hagoma ebo kolesagade te augwa dolomainu sula tagalao. Augwaligo te nago nogide po dwai weyu, tama sesemane sogo tibo po wabo dao.
PSA 59:13 Tama tialima, te nago haliga sębę augwalide eyu, te augwali elao. Te dwai sę ebo bidi dabe mu silao. Nago te tibaso da, tama te we bidi dabego koneama, nage te God, nage te da Israel dabego king bidi me, tama nage te tigidali bulu tǫde bagego king da olama, te augwaligo konemainao.
PSA 59:14 Tama hulide te eno boi bidi dabe te taunba ma aselama, tama augwali te bagula biliyu, tama te yowi dabego go wabo tiwai ebo dao.
PSA 59:15 Augwali te yowi tiwai biliyu, te uga peyu, eda asiyu, te nai gegebo ebao, tama te augwali haliga pągąsiąbaso, augwali te i dwai mu weyu ebo dao.
PSA 59:16 Tiali goli, eno te nago genuai bomode te tęąbi weyu yaibao. Te tigidali sogo kigamude te eno tęąbi genuai weyu, te nago ena sesemane sogo godolo ebode te homu paliyu tiaibao. Magi baso meni, te haniani sęgę dabe polobadu enaba pedelali, tama nago ena bugagia tonalu, tama nage te eno obo tiwai elalubo dao.
PSA 59:17 God, nage naga te ena seselalubo bidi dao. Eno te nago nogi ugwaba sabo tęąbi po wainogo ebao. God, nago ena godolo mu ebao, tama nage te eno bomai obo elalubao.
PSA 60:1 Devitgo te da ola mayu yai. Agai te polobadu te Mesopotemiatǫde bidali bage, me Soba tǫde bidali bage, te Siria dabe dalihwįani sogo, te hani kone ma palali. Tama agai te bidi Joapte ma geasa asiyu, tama te Tamu Elalubo Tǫ Malude bidali, te Idom bidi dabe te 12,000 bidi ela muani, teba agai homu konema palama, te balia po asęai dao. Te 2 Samuel Dąį 8; 1 Stori Dąį 18, tede elalubo po suao. God, nago da tagalama, tama da te hwįbode aiyaba elalumainu sula tagalalio. Nago dade wado homu elalu, tama nago te tiwai yali. Tiali goli, megi te nage ma asiyu, te da ma tau sagasao.
PSA 60:2 Nago dago tǫ mali emainu ilama, tama nago te alumainu elama, tama genuai tǫ dedage pedelalio. Megi da, te tǫ mu dolainu ebao. Tialima, nago ma dodolao.
PSA 60:3 Nago te sęgę hauwa te naga we bidi dabolo mawai. Tama nago dabolo te wain ąį menama, tumainu ebo tiwai yai. Dago tulama, tama da te umuna pai mu pedelali.
PSA 60:4 Nago te wi pao po te nageba lotu wabo we bidiba pusai, te boi bidi dabego augwali dolidali weyu, augwali wi pomainogo yali.
PSA 60:5 Da te nago bomogo ma sao, magi baso meni, te nago da godolo mu ebo dao. Tama tibaso, nago dago gedu haluasa po wabo odolama, tama da te boi bidi dabego nogode ma sao.
PSA 60:6 God te aga wiegi yai bulude bidiyu, tama aga te po wai dao, “Te eno hwįbo boi bidi dabe aiyaba elaluama, tama eno wiegi yai pemene mu yaibao. Megi da, eno te Sekem bulu tǫ pedaibao, tama te Sukot tǫ malu bulu pesagede me, tama eno te ena we bidi dabeba dobawaibao.
PSA 60:7 Te Gileat tǫ pedaide bidibo we bidi me, te Manase hani dabe me, te eno bage dao. Te Efraim hani we bidi te eno kapago nigai tobolu madi tiwai elalubao, tama eno king te eno bage Judade munama, elalubao.
PSA 60:8 Te eno te Moap dabe te eno sę yabo bidi pedalumainu elama, tama eno te Idom dabe te eno sę olo ebo bidi dabe nigilaibao,” wali. “Te eno te Filistia dabe te hwįnama, aiyaba elalubaso, tama eno homu pemene eyu, tama i waibao,” po wai.
PSA 60:9 God, dego ena te Idomba odasa pogowe? Tama dego ena te bomai obo elalubo taunba odasa pogowe?
PSA 60:10 God, te nago da te tudiba muani homu eba, agawe? Nage te dago ami dabe dali pisąma eba, agawe?
PSA 60:11 Nago da tau sobaso, tama dago te boi bidi dabe dali hwįaibao. Magi baso meni, te bidi dabego naga da tau sobaso da, te olo nai tiwai naga dao.
PSA 60:12 Tiali goli, te God da dali bidibaso da, teda dago te hwįbode te boi bidi dabe elaibao. Mu tama, Godigo te dago boi bidi dabe aiyaba elaluaibao.
PSA 61:1 Te Devitgo asęani balia po me deli dao. O God, te eno nageba i wabo te nago odao. Te nago eno gedu haluasa po waboba bugagia olo muao.
PSA 61:2 Ena te ena bulu pesage digibulu bidibao, tama eno haliga te sęgę mu ebao. Tama tibaso, te eno nageba i weyu, te nago ena tau somainu ebo dao. Nago ena te geme dualabo pesage me deliba odasa pobaso da, teda te boi bidi dabego ena me dologobeo.
PSA 61:3 Magi baso meni, nago naga ena te bugagia seselalubo dao. Nage naga te eno bomai obo elalubao, tama tiyu, te boi bidi dabego ena me dolainu ebaso, te usugobeo.
PSA 61:4 Eno homugo te godolo mu eyu, ena te nago bede bididubadi, te ena isibo sogoba usu nabo homu ebao. Tama ena nage pąde bugagia bidiyu, te kakaruk wai te aga idago bogo dologode bugagia bidibo tiwai gilama yaibao.
PSA 61:5 God, te tigidali naide eno nageba te po dąų walali, te nago odalio. Tama nago te nai dabe enabolo mawai, te nago nogi ugwaba sabo we bidi augwaliba mabo tiwai gilama yalio.
PSA 61:6 Nago te king te bidibo ula dali te hauwa kibu be bidimainu yao. Nago aga te tǫde sesabi elama, bidimainu yao.
PSA 61:7 God, nago gedude te aga sesemane sogo te king bidimainu ilao. Nago aga sesemane godolo mu ebaso, tama te nago aga sesemane sogo bugagia tonaluao.
PSA 61:8 Nago tama tibaso da, teda te tigidali side te eno polobadu te po nageba dąų walali po, te eno wali peyu, tama eno nago nogi ugwaba sabo tęąbi po te sesemane bidada pabo sogo udaibao.
PSA 62:1 Te Devitgo asęani balia po me deli dao. Mu tama, eno konealubo homu te God deliba naga dąų weyu, tama sagia siyu, tama eno te agai ena tau sabo tonalubo dao. Aga deligo naga te ena ma selama, tama ena bidibo ula dali bidibo dao.
PSA 62:2 Agai deligo te ena tonalu, tama ena tau siyu ebao. Tama aga deli naga eno bomai obo elalubao. Tama tiyu, te hwįbo side ena me hagagobeo. Mu menio.
PSA 62:3 Ena dali boi homu ebo bage, nisu naga sogo dagego ena dali hwįyu, te ena dolainu ebawe? Dagego homugo ena te obo tomage me deli te tulaluama, te mu togwa pabo tiwai gilama emainu ebao.
PSA 62:4 Eno genuai nogi elalubadi, tiali goli, te dagego eno genuai nogi dolainu ebao. Dagego te tibo po wabo godolo homu mu ebo dao. Dagego te Godigo enaba wiegi yai sę yabo po pusai, tiali goli dagego haligade dagego te tama weyu wali, “Dago homugo te Godigo aga dolomainu homu ebao,” po wali.
PSA 62:5 Eno konealubo homu te God deliba naga dąų wabo dao. Tama eno te agai deligo ena tau sabo tonalubo dao.
PSA 62:6 Agai deligo naga ena tonalu, te ena tau sabo dao. Tama aga deli naga eno bomai obo elalubao. Tama tiyu, ena te hwįbo side me hagagobeo. Mu menio.
PSA 62:7 God deligo naga ena ma sali, tama aga digi enaba te genuai nogi mani. Aga te ena tonalubo bomai bidi te bidibao. God aga digi aga te eno bomai obo elalubaso, tama te boi bidi dabego ena me dologobeo.
PSA 62:8 Eno hani dabe, sesemane sogo dagego te Godiba konealubo homu dąų waiyąo. Dagego te duga tigidali sęgę me, te tigidali homu te agaba pusao, awe, bidigo te wę gelibo tiwai eyu yao. Magi baso meni, da te agaba pelama, bugagia bidainu te tama tiao.
PSA 62:9 Te we bidi da, augwali e tiwai dao. Te olo we bidi dabe te pedauwalide olo mobo pedalubo tiwai te ebao. Tama te genuai namba elalubo bidi dabe augwali me, te olo nai tiwai naga yai. Te augwali dago dagalobaso da, teda augwali te sęgę mu elalusiąbo te dago me suaibao. Te augwaligo sęgę te pedauwalidu pedalubo mobogo sęgę dali usu egobeo.
PSA 62:10 Tama tibaso, dagego te tama homu igimio, “Te hwįbo kolesaga me, te nai dabe wi sabo kolesaga me, te wiegi yai kolesaga da weyu, tama da te mone bidi pedalubaso, te usu yaiba,” homu me igio. Ma, te dagego mone me doado bage te hauwa pedalubaso da, teda dagego te nai dabeba naga duga homu mugio. Te usu egobeo.
PSA 62:11 Godigo te tama po wabo te eno odali, “Ena God, eno te genuai bomo elalubo dao,” wali. Me ma, e tama po wabo eno hauwa sogo odali,
PSA 62:12 “Tama sesemane sogo eno te tigidali we bidi godolo mu ebao.” Te po wabo si eno mu odalio. Genuai Bidi, nago te da tigidali we bidigo ebo kolesagade usu nama, te sę wei si ma ilibo dao.
PSA 63:1 Devitgo te balia asęani, te aga te Juda bagego te bidi meni yai bulude bidali sogo, teba kone paliyu, te balia asęai. Te 2 Samuel 15:23-28, tede elalubo po suao. O God, nage eno God dao. Eno nage gegebo sę bomo ebao. Te eno homu ogwa waigo te nage dali bidabo homu godolo mu ebao. Eno tigigo me, te nage dali bidabo homu godolo yali, te bidi te wę meni yai wa pai bulude te wę nogonego sabo tiwai gilama yai.
PSA 63:2 Eno nage te naga mena wiegi yai bede mu suabo homu elama, tama eno homugo te nago genuai bomo te enabolo ola momainu homu yali, tama nago genuai nogi yai ula me te ola momainu yai.
PSA 63:3 Te e tǫde bidibo ula te wiegi yai yai, tiali goli nago te da sesemane godolo ebo wiegi yai kolesaga te polalubo dao. Tama tiyu, eno nago nogi ugwaba sabo dao.
PSA 63:4 Te eno nageba usu da weyu, tama nago nogi ugwaba sidubadi, te ena isibo siba usu naibao. Te eno nogo ugwaba selama, tama nageba gedu haluasa po waibao.
PSA 63:5 Te eno homu ogwa wai mobo te wiegi yai mu elalubao, te bidigo wiegi yai nai dabe tulama, tama te usu yai tiwai gilama yai. Tama ena wiegi yai pemene elama, tama nage nogi ugwaba sabo dao.
PSA 63:6 Te ena betba pigilubo sogo, te eno nageba homu kone palu ebo dao. Te hulide eno homu kone nageba naga ebo dao.
PSA 63:7 Magi baso meni, nago ena sesemane sogo tau sali. Ena nage pąde bidali, te kakaruk wai te aga idago bogo dologode bidibo tiwai gilama eyu, tama eno te wiegi yai pemene ebo balia po wali.
PSA 63:8 Ena nage dali bilibaso, tama nago ena bugagia tonalubo dao.
PSA 63:9 Tama te ena ela muabo homu ebo bidi dabe, teda augwali te isibo bidi dabego pesageba dulaibao.
PSA 63:10 Te hwįbo side augwali isibaso, tama te uni yowi dabego augwaligo tigi te pesela tuaibao.
PSA 63:11 Tiali goli, ena king da, te eno wiegi yai pemene te nage Godiba yaibao. Te bidi dabego nogo guni sisu muyu, tama nago nogi weyu, tama augwa po dąų wabo bidi dabe, te augwaligo nage wali pabo bidi dabe, augwa te wiegi yai pemene mu emainao. Tiali goli, nago te tibo po wabo bidi dabego pedauwali pania somainu yaibao.
PSA 64:1 Te Devitgo asęani balia po me deli dao. O God, eno sęgę te genuai elalubao. Nago eno gedu haluasa po wabo odao. Ena te boi bidi dabede wi ebao. Nago ena tau sobaso da, te ena augwaligo ela muainu ebaso, te usu me egobeo.
PSA 64:2 Te dwai sę ebo bidi dabego te ena ela muabo sunumi gegebao, tama augwali sisinama, te elainu ebao. Tama te nago ena seselalubaso da, teda augwaligo enaba te dwai sę me egobeo.
PSA 64:3 Te bidi dabego po te mu poa pelama, tama te bainat hwągo ena togobo tiwai ebao. Te augwaligo dwai pogo enaba ponama wali, te bidigo enesigiba ene nanama, te bidi usu sabo tiwai gilama ebo dao.
PSA 64:4 Augwali te geme duala selama, tama te wiegi yai bidiba enego enani. Augwaligo te gagamua siyu, te wi me isiąma, tama augwaligo polo eneyu ebo dao.
PSA 64:5 Augwaligo augwa digi dąų waliyu, tama te dwai kolesaga ebo dao. Augwaligo te gasa bidi tola somainu yabo te bono gągą muabo po miani. Tama augwa te tama homu yali, “Te mena bidi me deligo te da me sugobeo,” wai.
PSA 64:6 Augwaligo te dwai kolesaga meba yabo po mia selama, tama augwa te po wai. “Dago yabo te dwai kolesaga me deli te homugo koneanio, tama te dago yainu ebo sę te bidi me deli gegeyu, koneainu ebaso, usu egobeo,” te po wai. Dago te bidi dabego haligade elalubo homu kolesaga te koneabo usu egobeo, te geme mu dualalubao.
PSA 64:7 Tiali goli, te Godigo augwali te agai enego enebaso da, tama polo mu tama, te genuai keni pedelaibao.
PSA 64:8 Augwaligo te gasa bidi dolabo po wai, tama tibaso, te Godigo augwali dolaibao. Te augwali subo bidi dabego te augwaliba te augwaligo dwai gisugu mu mayu, tama tobolu peme yaibao.
PSA 64:9 Te tigidali we bidigo Godiba wi yaibao. Tama augwaligo Godigo te yali sę dabede po mimi peyu, tama tede sesemane homu kone palaibao.
PSA 64:10 Te tigidali doloba pai we bidi augwaligo te Genuai Bidigo yali sęde wiegi yai pemene yaibao, tama augwali agaba pelama, te dwai sęde geme wi duala sigi paibao. Tama te tigidali doloba pai we bidi augwaligo te Genuai Bidigo nogi ugwaba saibao.
PSA 65:1 Te Devitgo asęani balia po me deli dao. O God, da te Saionba pelama, tama nago nogi ugwaba saibao. Te kolesaga ebo te usu mu yaibao. Tama dago te po dąų waliyu, te polobadu yaiba wali sę tigidali usu nama yaibao.
PSA 65:2 Nago dago gedu haluasa po wabo odobo dao. Tama tibaso, da tigidali we bidi te nageba asobao.
PSA 65:3 Dago te dena yali dwai sęde homu kone palu tama tiali. Te dena dwai sęgo da aiyaba mu elaluali, tiali goli, dago koneani, te nago dago dwai sę te dagala sąwaibao wabo dao.
PSA 65:4 Te nago sa munama, tama nago pąba odasa pabo bidi dabe, augwa te wiegi yai pemene emainao. Te tigidali wiegi yai sę yabo kolesaga nago dabolo te moni lotu be tempelde, te nago wiegi yai tedali bede mawai, tego da mu usu naibao.
PSA 65:5 God, nago naga te nago da te boi hwįbode ma selama, tama da bugagia bidibo dao. Nago dago gedu haluasa po wabo odao. Te nago da ma sainu yali sę te sę mu yai. Te dade te digibulu mu te tigidali tǫ habude bidibo bage dabe, tama te augwa pesageba sabolainu, te tamu ąį nogeali, augwaligo konealubo homu nageba dąų mu wabo dao.
PSA 65:6 Te nago bomogo te bulu du dabe pedalumainu elama, tama augwali te augwa pesagede elalubao. Nago bomo te genuai mu dao.
PSA 65:7 Nago naga te tamu ąį moni dini ebo, te wę kulukulu wabo me isimainu ilibo dao, tama nago te bidi dabego hwįbo me togolobo dao.
PSA 65:8 Te tigidali tǫde bidibo we bidi dabego nago te ebo sę dabe sulama, tama tigidali te nagede wi ebao. Te giliga pedalubo badu, me te giliga dega sigilubo badu bidibo we bidi augwaligo te nago ebo sę tigidalide homu kone palama, tama augwaligo te wiegi yai homu pemene elama, te nageba i wabo dao.
PSA 65:9 Nago te tulubage tagala palu, te tama tebogo naga nago te tǫ bugagia tonalubao. Tama nago te tǫ ili hauwa pedalumainu ilama, tama te nai bugagia holobao. God, nago te wę dabe tigidali badu muai elalubao, tama augwali te me sula sabeo. Tego te nai hauwa pedalumainu ilama, tama te we bidi dabego sobao. Te sę nago digi ebo dao.
PSA 65:10 Nago te tulubage hauwa te tigidali giba tulumainu elama, tama wę te tǫ tomode elalubao. Węgo te tǫ nagame ilibaso, tama nai bugagia holobo dao.
PSA 65:11 Nago wiegi yai sę daba eyu, tama nago te nai hauwa pedalumainu yai. Te nage gasa me deli pobaso me, nago tede me te nai wiegi yai hauwa pedalumainu ebo dao.
PSA 65:12 Te tigidali bulu pesagede te bulmakau me sipsip dabego tuabo nosa te pągąnaluali. Tama te dwasianu bulu du dabede te gigo pągąwai elalubao.
PSA 65:13 Te sipsip hauwa mu te nosa elalubo pesagede mu pągąnalubao. Te bulu dabe odogo tomode te wit nai mu pągąnalubao. Tama tigidali nai te wiegi yai pemene ebo dao.
PSA 66:1 Te tigidali tǫde we bidi, dago wiegi yai pemene elama, tama bomonama i weyu, tama Godigo nogi ugwaba sao.
PSA 66:2 Te balia po weyu, te agai genuai nogide po pusao. Te agai genuai nogi te ugwaba mu sao.
PSA 66:3 Dago te tama po Godiba wainao, “Te nago ebo sę tigidali te wiegi yai mu ebao. Te nago bomo genuai ugwanu mu igulai elalubao, tama nago boi bidi dabe te wi mu elama, tama augwali te nago gesabidiba pibia sagaselama, te kidu sugunagasobo dao.” Te tobage po wainao.
PSA 66:4 Te tǫde we bidi tigidaligo nageba lotu waibao. Augwa te balia po weyu, nago nogi ugwaba sabo dao.
PSA 66:5 Dage aselama, te Godigo yali sę suiąo. Te genuai genuai sę dabe agai te we bidi dabe tomode yai dao.
PSA 66:6 Agai te tamu ąįgo pesage te wa pai pedalumainu ilama, tama dago wąį nǫų dabe tedu pelayu, tama te wę nogegi pai. Tede te augwaligo Godiba wiegi yai homu pemene yai dao.
PSA 66:7 Agai te genuai bomo elalu, tama aga te king sesemane bidada peyu, bidada pobao. Tama agai te we bidi hani tigidaligo ebo sę tigidali te bugagia subao. Tama tiyu, te meba hanigo te Godide hagoma yabuo.
PSA 66:8 Dage tigidali hani, dagego te dena God nogi ugwaba siąo. Dagego te God nogi ugwaba sabo, tama te we bidi dabego odaibao.
PSA 66:9 Agai da tonalubaso, tama da te bidibo ula dali bidibao, tama agai da te dwai sęgęba tulalumainu me sula tagalubeo.
PSA 66:10 God, nago da usu siyu, te bidi dabego te wiegi yai kapa silva te siago ulama, tama te hogomu kakali sela sąbo tiwai ebo dao.
PSA 66:11 Nago da te bono gągągo tola selama, tama nago genuai sęgę daba muani.
PSA 66:12 Nago te boi bidi dabego da mu agala somainu ilali. Tama da te sia dobadi te sia dabo tomodu bilali tiwai eyu, tama te asobo wę tomodu pabo yali. Tiali goli, megi nago da te wiegi yai pesageba odasa aselama, bidibao.
PSA 66:13 Polobadu te sęgę enaba pedalubaso, tama eno nageba po dąų weyu, te siaba tigidali ulama, domainu ebo ofa mawaiba po wai. Eno te dąų walali po me konealuyu, tama tialima, eno te ofa dabe nageba selasa asaibao. Te eno nago tempel beba te hasa dabe sela aselama, te siaba ulumainu yaibao.
PSA 66:15 Te eno te nisali kibu hasa dabe te altade ulama, tama eno nageba te ofa mawaibao. Awe, eno te omai sipsip dabe ulama, tama nago te ofago te denami ebo te wiegi yai odaibao. Tama eno te omai bulmakaugo, me te omai memego te ofa yaibao.
PSA 66:16 Dage te God dologode bidibo we bidi dabe, dage aselama, te eno po odagasiąo. Te eno dagebolo te tigidali sę po te Godigo ena tau selama, yali sę po waibao.
PSA 66:17 Polobadu te eno agaba i weyu, te ena tau sao olama, tama eno aga nogi ugwaba sabo balia po wainu sisi ilali.
PSA 66:18 Tiali goli, eno homugo te eno dwai sę ebo kolesaga te olo nai tiwai da wagi sogo da, teda Genuai Bidigo te eno gedu haluasa po wabo te me odogi menigi dao.
PSA 66:19 Tiali goli, Godigo eno wabo po odalio. Mu tama, agai eno gedu haluasa po wali odai dao.
PSA 66:20 Eno God nogi ugwaba sobao. Magi baso meni, agai eno gedu haluasa po te tudiba me musiąwai, tama agai te enade godolo mu sesemane ebo te me dagala sabeo.
PSA 67:1 God, nago te olo tau sabo wiegi yai kolesaga dabolo elama, tama daba te wiegi yai sę yao. Nago daba homu kone palama, tama da tau sao.
PSA 67:2 Tama tiyu, te tigidali we bidigo nago kolesaga te konemainu elama, tama tigidali hanigo te nago augwali ma saiba weyu, te augwaligo konemainao.
PSA 67:3 God, eno homugo te tigidali bagego nageba wiegi yai pemene elama, tama nago nogi ugwaba somainu yao.
PSA 67:4 Tigidali hani we bidi te bugai haliga elama, tama wiegi yai pemene ebo tęąbi emainu yao, magi baso meni, te nago tigidali we bidigo kolesaga te doloba pai po tų ebogo dagalaibao, tama nago te we bidi hani dabe te wiegi yai sunumidu bugagia bilimainu dodolobo dao.
PSA 67:5 God, eno homugo te tigidali bagego te nageba wiegi yai pemene elama, tama nago nogi ugwaba somainu yai dao.
PSA 67:6 Te wiegi yai nai hauwa dago tǫde pedelalio. God, aga te dago God, agai te dabolo wiegi yai sę bugagia mu yai.
PSA 67:7 Mu tama, Godigo te wiegi yai sę dabolo bugagia yai. Te tigidali tǫde we bidite aga dologode bidaluao.
PSA 68:1 God te polo asomainu elama, tama aga boi bidi dabe sela sąmainu yai. Te Godiba boi bidi ebo bidi dabe, augwali te agade wi pabo dao.
PSA 68:2 Waligo te hano sela sąbo dao, te tama tiwai gilama naga Godigo te boi bidi dabe sela sąyu tiaibao. Siago te kandel ili posolo ilibaso, tama ili te wę tiwai pedelaibao. Te tama tiwai naga te dwai sę ebo we bidi dabe te augwali God gedude dolaibao.
PSA 68:3 Tiali goli, te doloba pai bidi dabe da, te wiegi yai pemene elama, tama augwa te God gedude bugai haliga yaibao. Augwa te wiegi yai pemene umabo mu yaibao.
PSA 68:4 Dago te Godigo nogi ugwaba sabo tęąbi po wao. Aga te pǫ dabede dugulasa, tama pabo dao. Agai sunumi dodolao. Aga nogi te Genuai Bidi dao. Dago aga gedude wiegi yai pemene yao.
PSA 68:5 God te aga gasa wiegi yai bede bidiyu, tama agai te aga aya ida isai wai puluba dabe tonalubao. Tama agai te wilawe we dabe, te agai tau sabo dao.
PSA 68:6 Agai te bidi me we agaduba deli bidibaso, te be menama, tama augwa tede bugagia bidimainu ebo dao. Tama agai te kalabus bidi dabe augwa te kalabus silimainu elama, tama augwa pesagede te bugagia bidimainu ebo dao. Tiali goli, te sę hagoma ebo bidi dabe, teda dwai pesageba mu bidigi paibao.
PSA 68:7 God, polobadu te naga we bidi dabede nage poligi sulama, tama nago augwali odasa asiyu, tama nage te magi nai meni yai te tǫ wa pai bulude bilali.
PSA 68:8 Te sogo te tǫ gęǫ elama, tama tulubage genuai aiyaba tulali, magi baso meni, God, nage asalio. Mu tama, te da Israel dabego God nage asobaso, tama te Sainai bulu du gęǫ umabo mu yai dao.
PSA 68:9 God, nago te moni tulubage te naga tǫba tulumainu elama, tama nago te e tǫ dwali te wiegi yai ma pedalumainu ilai dao.
PSA 68:10 Te naga we bidi augwali bidabo pesage te tǫde nigilama, bidai. Nage te wiegi yai mu, tama te nago te magi nai doado bage meni yai bidi dabe te nai mayu yai dao.
PSA 68:11 Genuai Bidigo te aga we bidi dabeba po mawai, tama we hauwago te po pusugi pai.
PSA 68:12 Te po e tama wali, “Te king dabe dali te tigidali ami dabe me, tigidali te wi palio,” po wai. Tama te augwa bidali pesagede bidali we dabego te augwa bidi dabego hwįyu sali doado bage te dobayalio.
PSA 68:13 Te we dabe te silvago, me golgo te gasagi yai au mu elama, tama augwa te tonani te gasa wiegi yai ba sawi yai tiwai yali, tama aga te silvago ula tiwai yali, tama aga bogo te golgo gegemani ebo tiwai ebao. Tiali goli, magi baso bidi meba te sipsipgo obo tomode bidibawe?
PSA 68:14 Te Tigidali Bomo Elalubo Godigo agai te king dabe te Salmon bulude sela sąnama, wi pelawali sogo, teda agai te talua ge ais tulubage te bulu duba tulumainu yai dao.
PSA 68:15 Te Basango bulu du te moni bage mu dao. Aga te sau pado hauwa mu elalubao.
PSA 68:16 Nage te sau pado hauwa dalubo bulu du da, magi baso nago te God aga dugulaluainu ebo bulu du sulama, tama nago homugo te olo nai tiwai da homu ebawe? Genuai Bidi da, te bulu dude bidada pidu, bidada paibao.
PSA 68:17 Genuai Bidi te hwįbo bomai hauwa tausen karisde dugawali ami bidi dabe dali asaibao. Aga te Sainai bulu duba aselama, tama aga te gasa wiegi yai be mu tomoba bula sagasaibao.
PSA 68:18 God te ugwanu mu yai bulu duba holama, tama agai te kalabus bidi hauwa sela pai. Agai te hagoma ebo bidi dabego te aga dali hwįani bagego nogode te haniani wiegi yai nai sela peyu, aga dali pali. God, Genuai Bidi, te bulu dude bidaibao.
PSA 68:19 Dago te Genuai Bidi nogi ugwaba sao. Tigidali side agai dago sęgę tolobo dao. God deligo naga da ma siyu ebo dao.
PSA 68:20 Dena Godigo digi te da tau siyu, tama da bugagia bidibao. God, dena Genuai Bidigo, te da tau sobaso, tama da me isibeo.
PSA 68:21 Mu tama, Godigo te aga boi bidi dabe mu dolaibao, te dwai kolesaga sesemane wali pabo bidi dabe te tama tiaibao.
PSA 68:22 Genuai Bidigo te tama po wali, “Te eno dagego boi bidi dabe te Basande selama, ma odasa asaibao,” wali. “Tagalao te tamu ąi dologode mu bidibo, tede eno augwali ma odasa asaibao,” wai dao.
PSA 68:23 “Te dagego duga boi bidi dabeba te dwai dene mobaso, tama dage bugai haliga yagameo. Tama duga yowi dabego te boi bidi dabego kaneme te homu usu nama wali peyu, te kaneme tuaibao.”
PSA 68:24 God, me eno king, tigidali we bidigo suali, nago te hwįbode ugaba ela holama, tama nage wiegi yai pemene dali asobo suali. Tigidaligo nage te naga gasa tedali wiegi yai be tomoba soabo suai.
PSA 68:25 Te tęąbi wabo bidi dabe augwali poligi soali, tama te musik elibo bidi dabe augwali nosali asali, tama te dwasianu habidi elibo gesi wegi ogwa we dabe, augwali te tomodu palio.
PSA 68:26 Augwaligo tęąbi po te tama tiwai po wai, “Da Godigo we bidi, da sisinanio, tialima, dago te Godigo nogi ugwaba sao,” po wai. “Da te Israel hani dabe, dago te Genuai Bidi nogi ugwaba sao,” wai dao.
PSA 68:27 Te Benjamingo dwasianu hani dabe augwali polasa pai. Tama te Juda tobolu bidi dabe dali, te Juda we bidi dabe dali, augwali te Benjamin wali pai. Tama te Sebulungo tobolu bidi dabe me, te Naptaligo tobolu bidi dabe me, te augwali nosali pali.
PSA 68:28 God, nago te naga bomo dabolo ola mao. Polobadu nago te bomogo naga da tau sai dao.
PSA 68:29 Te king dabe nageba te wiegi yai olo maiyabo nai presen dabe seselama, tama nageba menama, te nago moni lotu be tempel te Jerusalemba mawai dao.
PSA 68:30 Nage te naga tempel bede bidiyu, tama nago te Isipba wado ilao, te uni hasa te wę pude bidibo tiwai ebao. Nago te we bidi hani dabe wado ilama, augwali te omai kibu bulmakau te augwa wai puluba dabe dali bidibo tiwai ebao. Te augwaliba wado iliyu, te augwaligo nageba kidu sugunama, tama augwa silva dabe te nageba momainao. Nago te hwįabo homu ebo we bidi dabe te sela sąyu, ela gudulao, tama augwa wi tedela pomainao.
PSA 68:31 Te Isip kingo te polalubo bidi dabe te Jerusalemba tagala palama, te nago po odomainu yaibao. Tama te Itiopia dabego nogo ugwaba siyu, tama nageba gedu haluasa po waibao.
PSA 68:32 Dage te gasa hani we bidi dabe, dagego te tęąbi po dabe te Godiba weyu, te aga nogi ugwaba sao.
PSA 68:33 Agai te dagalude bilibao, tama te dagalu polobadu digi elaluai. Odao. Godigo te be kulukulu wabogo i bomonama mu wabo dao.
PSA 68:34 Dage tigidali we bidigo te Godigo genuai bomode po haninama pusao. Aga te Israel dabego king dao. Dago agai genuai bomo te dagalude subo dao.
PSA 68:35 Te Israelgo God te aga wiegi yai tedali bede bidibao, tama dago te Godide wi yao. Agai te aga we bidi dabeba te genuai bomo mobao. Te God nogi ugwaba sao.
PSA 69:1 God, ena tau sao. Wę te pedelama, te eno dogoniba usu igulalio.
PSA 69:2 Ena te genuai ąį pu tomoba hoa sigiluai. Te ena doligiluabo madi te tǫ dili yai me elalubeo. Ena te wę ge bo delama, te aiyanu mu igulai madi bilibao, tama te ge bo dali węgo ena mesegelainu mu ebo dao.
PSA 69:3 God, eno nageba te i wedu wedu gebo sę edubadi, tama eno bomo te silalio. Tama eno dogoni wa pelama, tama eno gedu dene yai, magi baso meni, eno te sesabi elama gana nago ena tau sabo tonaluai.
PSA 69:4 Te enaba odolali boi bidi ebo bidi dabe, augwali te hauwa umabo mu dao, te eno tobolu nisigo namba te augwalide usu isąwai. Te boi bidi dabego enaba dwai sę yainu yali, tama augwaligo te ebo kolesaga pagede tibo po wali. Te bidi dabego bomo mu elama, te ena ela muabo homu yali. Eno te augwaligo nai doado bage me deli te eno wi me sabe, tiali goli augwaligo te po hauwa enaba kisilama wali. Tama tialima, eno ena doado bage digi te augwaliba mawai.
PSA 69:5 God, nago ena koneanio, ena te kolesaga geda mubo bidi naga dao. Te eno dwai sę yali dabe te nago gedude geme me duala sabeo.
PSA 69:6 Genuai Bidi, nage te Tigidali Bomo Elalubo God da, nago eno te kolesaga meba emainogo eyu, te konealubo homu dąų wali bidi dabe hale somainu elamuo. Te da Israelgo God, nago eno te kolesaga meba emainu eyu da, te bidi dabego te nageba lotu po wabo we bidi dabeba te po dwai omainogo elamu dao.
PSA 69:7 Eno nage wali pobaso, tama te bidi dabego posobo po enaba weyu, tama augwaligo ena hale emainu ebo dao.
PSA 69:8 Te eno ama dede augwaligo ena te gasa hani bidi tonobo tiwai yai. Tama ena hani we wai sibigo ena te augwaligo digibulu bidi tonobo tiwai gilama yai dao.
PSA 69:9 Eno te nago tedali wiegi yai be te godolo mu elama, tama eno te be wiegi yai bugagia elalumainu, te sę bomo ebao. Te bidi dabego nageba wabo dwai po, tama te po enaba me boaga sobao.
PSA 69:10 Eno te nai me habu seliyu elama, tama te kolesaga ebogo te nago gedude ena digi te ena aiyaba elalubao. Tiali goli, te we bidi dabego enaba po dwai wai.
PSA 69:11 Eno te homu dene ebo ugwa gudali, tiali goli, te bidi dabego enaba dwai po weyu, tama posobo po enaba wai dao.
PSA 69:12 Te bidi dabe sunumiba sisinama, tama enade po miani. Tama te wain wę tulama, te gęǫ ebo bidi dabego te balia mebade te dwai po enaba weyu yali.
PSA 69:13 Tiali digi tagalao, eno te nage Genuai Bidiba gedu haluasa po waibao. God, te me sogo deli nago digi te sa muani sogo, nago te eno gedu haluasa po wali wei ponao. Nago tama tiaibao, te magi baso meni, nago te ena godolo mu elama, tama nago ena ma sabo po dąų walali, tama nago tibo po me wagobeo. Mu menio.
PSA 69:14 Nago ena te wę pude ma sobaso da, teda ena te tomoba hoa selama, tama tede me hagagobeo. Nago ena tonalubaso, te boi bidi dabego ena me dologobeo, tama te pu aiyanu igulali węgo te ena me mesegeligobeo.
PSA 69:15 Nago ena te ge bo dali węgo somainu me elamuo. Tama nago ena te wę ge bo aiyanu igulali węde hagamainu me elama, te isibo gų pagego ena elalumainu me elamu elao.
PSA 69:16 Genuai Bidi, sesemane sogo nago ena godolo mu ebo tama te wiegi yai mu da, tama tiyu, te nago eno gedu haluasa po wali wei ponao. Nago te olo tau sabo wiegi yai kolesaga umabo mu enaba eba wida, teda nago ena tau sagasao.
PSA 69:17 Ena naga sę bidi da, tama tiyu, nago enade geme me duala selamuo. Eno sęgę genuai elalubao, tama tiyu, nago asesa polo tama te eno gedu haluasa po wali wei ponao.
PSA 69:18 Nage ena pąba aselama, tama ena ma sagasao. Nago ena te ena boi bidi dabego nogode ma sao.
PSA 69:19 Te bidi dabego enaba po dwai wabo te nago koneanio. Tama augwaligo te ena hale emainu eyu, tama ena nogi aiyaba elalubo me, te nago koneai dao.
PSA 69:20 Te po dwai wabogo eno homu kolesaga dolama, tama ena haliga sęgę umabo mu elalumainu yai. Tama eno bomo meniyu, me elalubeo. Eno homugo te bidi mebago ena homu dene yaiba homu yali, tiali goli me deli meni yai. Tama eno homugo te bidi mebago te enabolo te haliga dąų walobo wiegi yai po meba mayu, waiba homu yali, tiali goli, te menio.
PSA 69:21 Te eno nasi ebo sogo, augwaligo te dwai marasin ena mani. Te ena dogoni wa pobaso, tama augwaligo te ha ebo ąį nogi viniga naga ena mayu yai dao.
PSA 69:22 Tialima, nosali augwali te genuai nai tuboba sisinani sogo, eno homugo tego augwali dolomainu yao. Tama augwaligo te ofa me nai dabe sesebaso da, teda tego te augwali tulaluama, hagamainu emainao.
PSA 69:23 Te augwali gedu hulia somainu elama, te augwaligo ma tonono yainu ebaso, te usu munu ma egobeo. Te augwali tudi dili dolobaso da, te augwali bomo elama dolalubaso, te usu me egobeo.
PSA 69:24 Nago augwaliba te wado umabo mu eyu, tama augwaliba dwai dene mao. Tama nago haliga sębęgo te augwali selama, tama augwali hagamainu yao.
PSA 69:25 Te augwali bidalubo pesage te olo elalumainu elama, tama nago augwali me deli te bede bidibo ula dali bidimainu me elamuo.
PSA 69:26 Te bidi mebabolo nago hasiabolo te augwa yali dwai sę wei ponani bidi dabe, te dwai sę ebo bidi dabego augwaliba dwai dene mabo sę idubao. Nago te bidi meba tigiwali togolama, te augwaliba dene mani bidi dabe, tama te dwai sę ebo bidi dabego posobo po weyu, tama augwaliba sęgę mayu ebo dao.
PSA 69:27 Nago te dwai sę ebo bidi dabego dwai sęde te homu kone ebo me gegeda paligio. Tama nago te naga hani tomoba asomainu me igio.
PSA 69:28 Nago augwali nogi te bidabo ula elalubo bukude elalubo nogi sela sąyao. Tama nago te augwali nogi te doloba pai we bidi dabego nogi dali elalumainu me elamu dao.
PSA 69:29 Tiali goli, ena te genuai sęgę me dene tolali. God, nago ena ma selama, tama ena usu ma ilao.
PSA 69:30 Te eno tęąbi weyu, tama God nogi ugwaba sai, tama te eno agaba usu da po weyu, tama agai genuai nogide po hanilama pusaibao.
PSA 69:31 Tama Genuai Bidigo te kolesaga wei mu ebao. Agai te bulmakaugo ofa ebo te wei eyu, godolo me ebeo.
PSA 69:32 Te sęgę tolali we bidi dabe augwaligo te sulama, tama wiegi yai pemene yaibao. Tama te Godiba lotu wabo we bidi dabe, augwaligo te bomo ma saibao.
PSA 69:33 Genuai Bidigo te doado bage sǫą pabo we bidi dabego gedu haluasa po wabo odali, tama agai te aga we bidi dabe te kalabuside bidibo bage te homu kone ebo me tagalugobeo.
PSA 69:34 Dagalu dali, tǫ dali, tamu ąi, me te tamu węde elalubo tigidali sųgų dabe, dage tigidaligo te God nogi ugwaba sao.
PSA 69:35 Magi baso meni, Godigo te Saion we bidi dabe te boi bidi dabego nogode ma dobola selama, tama agai te Juda dabego taun ma nigaibao. Agai tama tiyu, tama te Godigo hani bage augwa te taunde bugagia bidiyu, tama te tǫ tigidali somainu yaibao.
PSA 69:36 Te Godigo sę bidi dabego wai te nǫų dabego te tǫ te augwaligo saibao, tama te God godolo mu elama, wei ebo we bidi dabe da, teda augwali te tǫde sesemane sogo bidada peyu, bidada paibao.
PSA 70:1 Devitgo te balia po asęai. Te Godigo olo tau sali wiegi yai kolesaga yalide, te augwaligo homu kone ma palubo sogo da, teda augwaligo te balia wai dao. God, nago ena ma sao. Genuai Bidi, nage polo aselama, ena tau sagasao.
PSA 70:2 Bidi mebago ena ela muainu ebao. Tama tialima, nago augwali homu puna palama, tama augwali aiyaba mu elaluao. Tama bidi mebago eno sęgęde wiegi yai pemene yali. Nago augwali ibaba ma kilasa pomainu elama, tama dwai hale somainu yao.
PSA 70:3 Bidi mebago enaba posobo po wali. Tialima, nago augwali mu dwai ilama, tama augwali hale mu emainao.
PSA 70:4 Tiali digi, te nageba asobo we bidi augwali da, augwa te bugai haliga elama, tama nageba pemene emainu yao. Te tigidali we bidi nago augwali ma sali, tama te nago augwaliba yali sęde te augwaligo wei mu yai, augwa te tiwai po omainu emainao, “Godigo nogi ugwanu mu elalubao.”
PSA 70:5 God, eno bomo meniama, tama ena digi ena ma tau sabo usu isąwai. Tama tialima, nage polo enaba asao. Genuai Bidi, nago naga nago ena tau selama, ena ma sali bidi dao. Tama tialima, nago sesabi gana elama, me tonalugio. Polo asao.
PSA 71:1 Genuai Bidi, ena nage dali bidibaso, tama te boi bidi dabego ena me dologobeo. Nago ena te augwaligo elalumainu me sula tagaligio.
PSA 71:2 Nage doloba pai mu da, tama tiyu, nago ena tau selama, tama ena te boi bidi dabego nogode ma sao. Nago eno gedu haluasa po wabo odama, tama ena ma sao.
PSA 71:3 Nage te bomai obo tiwai elalu, tama te bomai be tiwai elalubaso, teda ena te tomoba aselama, tama nago ena tonalubao, magi baso meni, ena te nageba naga aselama, te ena duala sai. Nago naga ena bugagia tonalubaso, tama ena bugagia bidibao.
PSA 71:4 Ena God, nago ena te dwai bidi dabego nogode ma sao. Augwaligo bomo mu eyu, tama augwaligo kolesaga dwai mu ebao.
PSA 71:5 Genuai Bidi, eno konealubo homu nageba naga muani. Polobadu ena gesi ogwa bidide digi, te nageba konealubo homu dąų wali, tama eno konealubo homu dąų ola asali, megiba usu nagasobao.
PSA 71:6 Sesemane sogo ena nago nogode naga bidiyu bilali. Idago ena ame nabode, te nago ena tonalua asali, te megiba usu nagasobao. Tama tialima, te eno sesemane sogo nago nogi ugwaba saibao.
PSA 71:7 Te we bidi hauwago ena sulama, tama eno ebo sę dabede te augwali homu hauwa dogia pai. Tiali goli, te eno bomogo me ebeo. Menio. Nago naga te ena tonalubo bomo mu ebo dao.
PSA 71:8 Te tigidali sogo te eno nago nogi ugwaba siyu, tama nago genuai nogi te we bidi dabeba hanilama, pusubo dao.
PSA 71:9 Megi da, ena monu dabe ebaso, te eno bomo me menio, tialima tiyu, nago ena tagalama tudiba muidalio.
PSA 71:10 Te boi bidi dabego ena ela muainu, tama augwali sisinama, tama po dąų waliyu, ena dolaibao po wai.
PSA 71:11 Augwa te tama po wali, “Ae, tegoba, dago aga pobelama, tama tola sinao,” wali. “Te aga tau sabo bidi me deli menio. Godigo aga tagalai dao,” wali.
PSA 71:12 Tialima, God, nage enade digibulu me bidigio. Eno God, nage polo tama aselama, ena tau sagasao.
PSA 71:13 Te enaba po kisilama wabo bidi dabe, nago augwali elaluama, tama augwali mu silao. Augwaligo ena dolainu yali, tialima, nago augwaligo homu kolesaga puna palama, tama augwali hale dwai mu emainu yao.
PSA 71:14 Tiali goli, eno sesemane konealubo homu nageba dąų olalu, tama eno nago ena tau sabo tonalubao. Te eno nago nogi ugwaba mu saibao.
PSA 71:15 Te eno te we bidi augwaliba te nago doloba pai kolesaga ebo po te pusaibao. Eno te nago ebo sę page tigidali te bugagia konesiąbadi digi, tiali goli tagalao, te tigidali side eno te augwaliba weyu, te nago ena ma sali po waibao.
PSA 71:16 God, Genuai Bidi, te eno nago genuai bomode homu kone palu, tama te eno nago nogi ugwaba sobao. Eno te tiwai po waibao, “Genuai Bidi naga, aga te doloba pai dao,” waibao.
PSA 71:17 God, nago ena te sogo te dwasianude digi ola mani, tama megi e sogoba usu nagasobao, tama eno nago te wiegi wiegi yai sę dabe ebo po pusudu gebo dao.
PSA 71:18 Megi da, ena monu dabe elama, te ena tobolu nisi ayadeba yalio, tiali digi God, nago ena me tagagio. Nage ena dali bidiyu, tama eno nago genuai bomode po te nosali pedalubo we bidi dabe pusaibao.
PSA 71:19 God, nago doloba pai kolesagago te tigidali badu usu nani, tama te tigidali we bidigo gedude te pepeli dilide elalubao. Nago genuai sę mu yai. Te tǫde bidi me deli te nage tiwai me elalubeo. Menio. Nago tigidali mu elaluai dao.
PSA 71:20 Nago te deli tigi poai sęgę enaba tagala palali. Tiali digi, eno koneai, te nago ena ma dąų walainu yai. Te ena gų pageba pidali weyu, te nago ena ma hodolaibao.
PSA 71:21 Te nago eno nogi te genuai mu igi pomainu yali, tama nago eno haliga te dua nagame ma emainu yai dao.
PSA 71:22 Te eno gita me musik eliyu, te eno nago nogi ugwaba sobao. Eno God, nago ena me tagalisiąwai, nago po te mu naga dao, tama tialima, te eno nago nogi ugwaba sobao. Te Israelgo God, nage tedali wiegi yai elalubao. Te eno gita eliyu, tama tęąbi weyu, nago nogi ugwaba sabo dao.
PSA 71:23 Eno te musik weyu, te ena wiegi yai pemene elama, i waibao. Te eno nageba tęąbi po wabo, te pedauwaligo naga me wagobeo. Menio. Te homu kolesaga tigidaligo me, haliga daligo me obao, magi baso meni, nago ena ma sai dao.
PSA 71:24 Tama tialima, tigidali sogo te eno te we bidi dabeba te nago doloba pai kolesagade po hanilama pusaibao. Magi baso meni, te bidi dabego ena dolainu usu sali, tiali goli, nago augwali aiyaba elaluama, tama augwali hale mu ilali.
PSA 72:1 God, nago te king doloba pai kolesaga bugagia ola mao. Tama agai te we bidi dabe po tųde bugagia dagalumainao. Nago po tų te doloba pai naga ebo dao, tama nago te king tau sobaso da, teda agai me te doloba pai po tų emainao.
PSA 72:2 Tama agai te nago we bidi dabe me, te dwai bidi dabe me, te doloba pai kolesagago tonaluaibao.
PSA 72:3 Nago te wiegi yai sę hauwa te augwaligo sęde pedalumainu yao. Tama nago te we bidi dabego te doloba pai kolesaga sesemane sogo emainu yao.
PSA 72:4 Kingo te dwai bidi dabego sęgę bugagia dodolama, tama agai te doado bage sǫą pabo bidi dabe tau somainu yao. Tama agai te gasa bidi dabeba te dwai sę yainu ebo bidi dabe elalumainu yao.
PSA 72:5 Te giliga me polua ula elalubadi, te naga we bidi dabego nageba lotu po omainu yao.
PSA 72:6 Nago te king wiegi yai bidi pedalumainu ilao, teda agai kolesaga wiegi yai eyu, te tulubage te gi nasi dabeba tulama, tama te nai wiegi yai pedalubo tiwai emainu yao.
PSA 72:7 Tama aga bidibo sogo te bidi dabego te doloba pai kolesaga naga wali pomainu yao. Tama te wiegi yai nai hauwa te tigidali sogo te polua pedelama elalubo sogo te pedalumainu yao.
PSA 72:8 Aga te king bidiyu, tama te tamu ąi pąbadu bidalubo tigidali we bidi me, te tamu ąį digibulu badu bidalubo we bidi me, te tonaluaibao. Tama agai tǫ dąį te wę Yufretisde gagalasa palama, te tigidali bulu tǫ pedaiba usu nigi paibao.
PSA 72:9 Te masigi kemi tǫ yai bulude bidalubo hani bage dabe, teda augwali te king dologode bidaibao. Tama aga boi bidi dabe te tǫba dolo pigulaibao.
PSA 72:10 Te Spen king, me te tamu ąį tomo bulu ailan king dabego, teda augwaligo agaba te wiegi yai nai presen dabe mawaibao. Tama te Arebia king me, Itiopia kingo me, teda augwaligo agaba takis mawaibao.
PSA 72:11 Tigidali kingo agaba kidu sugunaibao. Tama tigidali hani we bidigo te agai sę yaibao.
PSA 72:12 Agai te magi nai meni yai bidi dabego agaba i obaso, te agai augwali tau sabo dao. Tama te we bidi dabe te doado bage sǫą pelama, tama te tau sabo menibaso da, teda aga digi te augwali tau saibao.
PSA 72:13 Agai te bomo meni yai we bidi dabe te dwai bidibo, te agai augwali homu dene ebo dao. Tama te magi doado bage meni yai we bidi dabe agai augwali ma sabo dao.
PSA 72:14 Te dwai sę ebo bidi dabego augwali elaluama, tama augwali dolainu ebaso da, agai augwali ma siyu ebo dao. Agai augwali godolo elama, wei ebaso te tiwai eyu ebo dao.
PSA 72:15 Eno homugo te king te sesabi gana elama, bidimainu yao. Te Arebia dabego agaba te gol momainao. Tama te we bidi dabego Godiba gedu haluasa po weyu, te Godigo aga sesemane tau somainu yao, tama Godigo agaba te wiegi yai sę agaba emainao po wai.
PSA 72:16 Te yuyu me wit hauwa te we bidi dabego gide pedalumainu yao, te Lebanonde pedalubo usu tiwai. Tama te we bidi dabe te taunde hauwa pedalumainu yao, te nosa hauwa te tigidali pedaide pedalubo tiwai emainao.
PSA 72:17 Tama te bidi hani bagego te kingo nogi homu kone me gegeda palu tagaligio, tama agai genuai te sesabi gana elama, te giliga nanalubo sogo usu nama elalumainu yaibao. Tama tigidali hani we bidigo aga nogi ugwaba sao. Tama augwa te Godiba hanalu, te augwali wiegi yai homu ilibo nai momainu yao wao, te agai te king wiegi yai homu ilali tiwai emainu yao.
PSA 72:18 Te God nogi ugwaba sao, te Israel dabe augwa Genuai Bidi dao. Agaduba deligo naga te wiegi yai sę dabe ebo dao.
PSA 72:19 Te agai wiegi yai nogi te sesemane sesemane sogo ugwaba sao. Te agai Genuai nogigo te tigidali tǫ badu usu nai dao. Te mu tama dao.
PSA 72:20 Te Jesigo ogwa, Devitgo wali te gedu haluasa po dabe te megi eba tama siminagasobao.
PSA 73:1 Godigo te Israel dabeba wiegi yai mu yai. Godigo te wiegi yai haliga elalubo we bidi dabeba te wiegi yai sę mu ebo dao.
PSA 73:2 Tiali goli, pąde ena te dwai sęgęba tulaluainu yali. Ena te sągą pasega muyu, tama ena tagalainu ebo tiwai yali.
PSA 73:3 Magi baso meni, eno suali, te dwai sę ebo bidi dabe te moni bidi pedalubaso, tama eno te hagoma ebo bidi dabego nai dabede pesa yali.
PSA 73:4 Augwali te augwa tigide te dene me sisąwani. Augwali te bomai bidi dabe, tama augwa tigi te wiegi yai naga elalubao.
PSA 73:5 Augwali te sęgę meba tolisiąyu, te gasa bidi dabego sęgę tolobo tiwai me ebo meni. Te gasa bidi dabe augwali te haniani sęgę tolali, tiali goli te tobage sę augwaliba me pedalisiąbo.
PSA 73:6 Tama augwali te odolali hagoma elama, tama augwa tigi pemene dogia pabo dao. Tama augwaligo gasa olo bidi dabe elama, tama aga doliyu ebo dao.
PSA 73:7 Te augwa haligade homugo, augwa yainu homu ebo te haniani dwai kolesaga augwaligo ebaso, te pedelali.
PSA 73:8 Augwaligo te posobo po gasa bidi dabeba weyu, tama augwaligo te bidiba te dwai sę yabo po wabo dao. Augwa te hagoma mu eyu, tama augwa te gasa we bidi dabe dolabo sunumi gegebo po mia sabo dao.
PSA 73:9 Augwaligo po dwai te dagalude bidibo Godiba wabo dao. Tama augwa digi te augwa nogi ugwaba selama, tama augwaligo te we bidi dabede bomo eyu, te augwaligo homu wali pao po weyu ebo dao.
PSA 73:10 Tama te Godigo we bidi dabego te hagoma ebo bidi dabego po wei elama, tama augwaligo te poba homu kęą pai.
PSA 73:11 Te dwai sę ebo bidi dabego te tiwai po wabo, “Godigo te dago ebo sę te mena tama me konegobeo,” wai. “Te Ugwade Mu Bidibo Godigo te dago ebo kolesaga te gegelama hanilama sunumi me elalubeo,” wabo dao.
PSA 73:12 Te dwai sę ebo bidi dabego te tama tibo dao. Augwaligo doado bage te hauwa elaluali, tiali goli augwaligo umabo mu sabo sę ebo dao.
PSA 73:13 Ena bugagia tonalubaso, tama eno haliga te wiegi yai elaluali, tama eno te dwai sę meba me ebeo. Te tiali sę te odolali hagawaibao, agawe?
PSA 73:14 Magi baso meni, te giligade me hulide God, nago dene enaba mani, tama tigidali kigamude nago te dene enabolo mawai.
PSA 73:15 Eno te bidi dwai dabego wabo po tiwai, te nago we bidi dabeba wagi da, teda eno augwali tibo po ola mayu, te augwali homu puna palagi dao.
PSA 73:16 Eno homu hauwa elama, tama eno te sę page konemainu ebao, te dwai sę ebo bidi dabego ebo sę page. Tiali goli, te enade sesabo sę mu ebo dao.
PSA 73:17 God te eno usu sesa pidubadi, te ena nago be tomoba peyu, usu nigi pai. Ena te nago bede bidiyu, tama eno homu peda pelama, tama te dwai sę ebo bidi dabeba mena nai pedelabo te eno koneai dao.
PSA 73:18 Nago augwali bilabo sunumi te bedege mu emainu ilama, tama nago augwali tula mumainu elama, tama augwali mu dolomainu ilaibao.
PSA 73:19 Augwali te polo tama dolali. Tama augwali te isibo te dwai mu ebo dao.
PSA 73:20 Genuai Bidi, augwali te na ebo bidi tiwai elama, tama te na yali te kigamu be posobode silaibao. Bidigo te kigamu hodaluama, tama te na yali te agai homude me ma elalugobeo.
PSA 73:21 Te sogo eno homu te midigi selama, tama eno haligago te dwai mu yai.
PSA 73:22 Tama eno homu te pania selama, tama eno nago kolesaga me konesiąwai. Eno te nago gedude kolesaga yali, te uni hasago homu kolesaga umuna pabo tiwai ilali.
PSA 73:23 Tiali goli, ena nage dali sesemane bidibaso, tama nago ena nogo tolalubo dao.
PSA 73:24 Nago ena bugagia bilimainu ebo po mawai, tama nosali nago ena sobaso, tama ena nage dali te dagalude bidaibao.
PSA 73:25 Te gasa de te dagalude bidiyu, tama ena tonalubo dawe? Te gasa bidi me meni, naga deli naga dao. Tialima, God, eno nage godolo mu ebao. Eno te tigidali tǫde nai wei ebo tiwai gilama me ebeo.
PSA 73:26 Te eno tigi, me homu kolesaga, te bomo me elalusiąbaso da, teda God, nago digi nago ena dąų walao. Tama nage ena dali bidiyu, tama ena sesemane bidada peyu, bidada pabo sogode te ena usu mu elaluaibao.
PSA 73:27 Mu tama, te nage tudiba mubo we bidi dabe, teda augwali mu hagawaibao. Tama nage polobadu te wali pali bidi dabe, tama megi te augwaligo nage tagalubaso da, teda nago augwali dolaibao.
PSA 73:28 Tiali goli, ena, te ena nage pąde bidibaso, tama te wiegi yai mu ebao. God, Genuai Bidi, nago ena mu seselalubo da, tama eno nago yali sę po tigidali hanilama, pusainu ebo dao.
PSA 74:1 God, magi baso nago da tudiba mubawe? Te nago wado po sesemane te naga we bidi daba ududa, agawe?
PSA 74:2 Nago te naga hani bage dabolo te homu kone ma palao. Polobadu mu nago te naga we bidi da sa muai. Nago da ma abelama, tama da naga hani bidimainu yai. Nago te Saion bulu duba homu kone ma paliyu, te polobadu tede nage bidai dao.
PSA 74:3 Te dago boi bidi dabego te dago moni lotu be tempelde doado bage tigidali dolalio. Te doado bage dolali elalubo, te nage aselama, suagasao.
PSA 74:4 Te nago boi bidi dabego te tempel be selama, tama augwali te nago tedali te wiegi yai pesage elalubo madi tomode dolalu, tama augwaligo win yai da olama, i wali.
PSA 74:5 Augwaligo te nago bede ni name togwali, te bidi dabego te buside ni togobo tiwai yalio.
PSA 74:6 Te ni name dabe augwa nigilama, tama te wiegi yai nai dabego au ilai, te boi bidi dabego te sigi hwą me sęgę yai hamago aluai dao.
PSA 74:7 Augwaligo te nago tedali wiegi yai be te siago ulali. Augwaligo te tedali wiegi yai pesage elaluali dolali, te nago we bidi dabego nageba lotu wabo madi, te dolai. Augwaligo aluama, tigidali mu dolai dao.
PSA 74:8 Augwaligo te da mu dolabo homu yalio. Tama tialima, augwaligo te Godigo lotu be tigidali dago tǫde elalubo, te siago ulai.
PSA 74:9 Te nago dabolo mani te tigidali sa muani nai, te augwaligo sela sąwanio. Tama dago profet megi me bidibeo. Te da me deligo te sęgę te mena sogo silabo, te dago me konebeo.
PSA 74:10 God, nisu sogo naga te boi bidi dabego dabolo te posobo po udumainu yaibawe? Te augwaligo naga nogide te sesemane sogo po dwai omainu yaibawe?
PSA 74:11 Magi baso nago da tau sisąma ebawe? Magi baso nage odolali naga dulalubo dawe?
PSA 74:12 Tiali goli God, polobadu mu nage dago king bidali, tama megi me nage dago king bidibao. Tama hauwa sogo nago da tau selama, tama da te hwįani digi da me dolobeo.
PSA 74:13 Te nago bomode naga, nago te genuai tamu ąį togolama, tama me badu buga siyu, meba buga siyu elama, dolaluali. Tama nago te Isip we bidi dabe dolali. Augwali te tamu ąįde moni sųgų tiwai yalio.
PSA 74:14 Tama nago te genuai pukpuk dabego tobolu aluali, te Isip tobolu bidi dabe da, tama nago agai tigi te augwali te kemi tǫ wa pai bulude bidibo uni hasa dabeba menama, tama augwa tuai dao.
PSA 74:15 Nago te wę dabe te tǫde pedalumainu elama, tama te wę dabe tedu palio. Tama nago te genuai wę dabe tigidali mu sula somainu ilai dao.
PSA 74:16 Nago te be posobo me be hulibo nigali, tama nago te giliga me polua te ugwadu muai elalubao.
PSA 74:17 Tama nago te tigidali tǫgo dąį muanio. Tama nago te tigidali kibu bede giliga nanobo sogo muyu, te tulubage tulubo sogo muyu yai elalubo dao.
PSA 74:18 Genuai Bidi, nago homu kone ebo me tagaligio. Te nago boi bidi dabego te posobo po nageba obao. Augwali te esela pabo kolesaga meni yai bidi tiwai eyu, tama augwa homugo nage te olo bage me tiwai da homu ebo dao.
PSA 74:19 Te nago hani bage te augwali bomo meni yai. Tama tiyu, nago da tagalubaso, tama te boi bidi dabego daba te dwai sę mu elama mu dolaibao. Te boi bidi dabego te naga we bidi dabolo te dwai dene mabo sę ebao. Iya, nago da homu kone me gegeda paligio.
PSA 74:20 Te tigidali tǫ pedaide, te dago tǫde me te bidi dabego wabi hwį hwį pai. Tama tialima, nago da dali te dąų walali bomai po te homu kone ma palao.
PSA 74:21 Nago te dwai bidi dabego te gasa bidi dabe agalama, tama augwali aiyaba mu elalumainu me sula tagaligio. Nago te magi doado meni yai te nai dabe sǫą pabo bidi dabe tau sobaso da, teda augwaligo te nago nogi ugwaba somainao.
PSA 74:22 God, nage aselama, te boi bidi dabe dali po bomo elama wagasao. Nago te hagoma ebo bidi dabego te tigidali sogo posobo po nageba wabo, te nago homugo koneao.
PSA 74:23 Te nago boi bidi dabego te genuai po dągą ola biliyu, nageba po dwai weyu ebao. Augwaligo te sesemane genuai i naga wabo dao. God, nago te augwaligo kolesagade homu kone me gegeda paligio.
PSA 75:1 God, dago usu da olama, tama nago nogi sesemane ugwaba sabo dao. Tama dago nago genuai nogide po hanilama pusuyu, tama augwaliba te nago haniani wiegi yai sę ebo po pusubo dao.
PSA 75:2 Godigo te tama po wali, “Eno te po tų yabo sogo bodolu me deli te dąį ilai elalubao. Tama eno po tų te dolo mu paibao. Te me kone tua pogobeo.
PSA 75:3 Tǫ dali tede bidalubo nai tigidali te hagawaibao. Tiali goli, te tǫ page da, te eno tolalu, tama bomo elalueibao.
PSA 75:4 Eno te hagoma ebo bidi dabebolo po walali, ‘Dagego te hagoma me igio,’ po wali. Tama eno te dwai sę ebo bidi dabebolo walali, ‘Dagego te duga nogi ugwaba me sigio,’ po wai.
PSA 75:5 ‘Dagego duga bomogo digi te wiegi yai pemene me igio, tama dagego po dągą genuai weyu, tama ena posoyu me elamu dao,’ wali.”
PSA 75:6 Te we bidigo kolesaga dagalubo sę te giliga asobo badu, me te giliga dega sabo badu, ma te not badu me, saut badu me pedalubeo. Menio.
PSA 75:7 God agaduba deligo naga dago kolesaga dagalaibao. Agai te bidi me deli aiyaba elalu, tama te gasa bidi ugwaba sagoa sabo dao.
PSA 75:8 Genuai Bidigo te bomo yai gesi wain wę te kap me delide pągąwai tolaluai. Agai gea palama, tama tigidali bidi dwaigo tulama, tama mu siminanio. Te tama tiwai naga te dwai sę yali we bidi dabe te Godigo po tųba pedelama, tama te augwali mu hagawaibao.
PSA 75:9 Tiali goli, eno te Jekopgo God po te sesemane hanilama pusaibao, tama eno agai nogide te tęąbi umabo mu udubadi geaibao.
PSA 75:10 Te Godigo te dwai sę ebo bidi dabego bomo silimainu yaibao, tiali goli, agai te doloba pai bidi dabebolo te genuai bomo mu mawaibao.
PSA 76:1 Te Juda dabego God bugagia koneai. Tama te Israel dabego agai genuai nogi ugwaba salio.
PSA 76:2 Aga be te Jerusalemde elalubao. Tama aga sesemane sogo te Saion bulu dude bidibo dao.
PSA 76:3 Te bulude agai te boi bidi dabego enesigi ene dabe me, te sabele delage me tologali, tama augwaligo bainat hwą me togwai. Godigo te hwįbo doado bage tigidali dolai dao.
PSA 76:4 God, nago genuai nogi elalu, tama nage te polalubo king dao. Nage ugwanu mu elalu, tama nago genuai nogigo te genuai bulu du dabego genuai nogi aiyaba mu elaluai. Te bulu du pesagede nago te boi bidi dabe dali hwįnama, tama nago augwali elaluama, tama nage ma begasa asai dao.
PSA 76:5 Augwaligo te augwa bomai ami dabego wiegi yai doado bage dagala siyu yai. Tama megi da, te ami dabe isalio. Tama augwaligo te hwįani doado bage sabo bidi dabe meni yanio.
PSA 76:6 Te Jekopgo God, nago augwali wado ilama palialio. Tama tibaso, te hos dabe dali, te hosde dugawali bidi dabe me, tigidali isila silama, tama tǫde te pila mubao.
PSA 76:7 Tiali goli, God, te bidi dabego nagede te wi umabo mu ebo dao. Te nago augwaliba wado po obaso da, teda de te nago gedude dolalubo sogo usu egowe? Te me deligo usu me egobeo.
PSA 76:8 Nage te dagalude bidiyu, tama nago te tigidali we bidi po tų ela mawaibao. Te sogo nage dolugulama, tama nago te bidi dabe augwaba te augwa po tų yabo po pusaibao, tama nage asiyu, te gasa bidi dabego dolali we bidi dabe tau sagasaibao. Tama tigidali we bidi wi mu ebaso, tama po me wagobeo. Augwa pedauwali pania siyu naga yaibao.
PSA 76:10 Te bidi dabego haliga sębę yali, tiali goli, te tebogo te gasa bidi dabego nago nogi ugwaba somainu ebao. Tama te hwįbode dolisawąni bidi dabego te genuai lotu wabo sogode te nageba lotu waibao.
PSA 76:11 Nago te naga Genuai Bidi Godiba te bomai po dąų walali, teda nago te dąų walali po wali pao. Nago tibo po me wagio. Dago te Genuai Bidide wi elama, tama tiyu, te tigidali we bidigo te agaba wiegi yai olo maiyabo nai dabe selasa pao.
PSA 76:12 Agai te hagoma ebo king dabe te aiyaba elalueibao. Agai te tǫde king dabe te wi mu ilibo dao.
PSA 77:1 Eno Godiba i bomo elama obao. Eno homugo te agai eno gedu haluasa po wabo odomainu ebao.
PSA 77:2 Te sęgę ebo sogo, eno te Genuai Bidiba gedu haluasa po agaba weyu yali, tiali goli, eno te nagame pai homu ebo me sabeo.
PSA 77:3 Eno homugo Godiba kone palama, tama eno haligade gela wali. Eno homu konealubode tama eno haliga sęgę elaluai.
PSA 77:4 Godigo ena godege pimainu me ebeo. Eno haliga te sęgę mu ebaso, tama tiyu, eno po wabo usu me ebeo.
PSA 77:5 Eno te polobadu yali wiegi yai sogoba homu kone palali. Mu tama, eno te bidali kibu be dabe tede homu kone ma yalio.
PSA 77:6 Te hulide eno homu kone paludubo sę yali. Eno homu hauwa elama, tama enaba digi ena te tiwai hanalu wai.
PSA 77:7 “Te Genuai Bidigo ena te sesemane sogo tudiba muba homu ebawe? Te agai ena godolo homu mu me isiąbo homu ebo agawe?
PSA 77:8 Agai megi ena homu dene me ebewe? Te aga dąų wali po te tulalumainu eba, agawe?
PSA 77:9 Te Godigo homu kone gegeda paliyu, tama te olo tau sabo wiegi yai kolesaga dabolo me egobe homu eba, agawe? Te agai wado ebogo te olo tau sabo wiegi yai kolesaga te palia sali homu ebawe?”
PSA 77:10 Eno te tama homu eyu, tama eno te po wali, “Te Ugwade Mu Bidibo Godigo te ena megi me tau sabeo. Tama tialima, eno tede te haliga sęgę mu ebao,” wali.
PSA 77:11 God, te eno nago te genuai sę dabe yaliba te homu kone ma palobao. Awe, te eno nago polobadu te haniani sę dabe yaliba te homu kone ma palubo dao.
PSA 77:12 Te eno nago yali tigidali sęba ma homu kone palaibao. Nago te bomai sę dabe yali, tama eno te me homugo koneaibao.
PSA 77:13 God, nago kolesaga tigidali te tedali wiegi yai naga dao. Te tibo god me deligo nage dali usu me egobeo. Nago augwali aiyaba mu elaluai dao.
PSA 77:14 God, nagaduba deligo naga te bidi mego isąwai bomai sę ebo dao. Polobadu nago genuai bomo te tigidali we bidi haniba ola mawai dao.
PSA 77:15 Te naga bomogo digi nago te naga we bidi dabe ma sali, te Jekop de Josep sigo wąį nǫų hani dabe, te augwali si tudi badu nosali pedelali bage dao.
PSA 77:16 God, te polobadu te wę dabego nage sulama, augwali wi mu yali, tama te aiyadu mu elaluali tamu ąį me te gęǫ yai dao.
PSA 77:17 Genuai tulubage mu tuluyu, tama pǫ bomonama kulukulu weyu, tama te pǫgo be sele ula edaba asiyu, uba peyu yai.
PSA 77:18 Nago te pǫ te popoge ebo wali tomode kulukulu omainu ilali. Te pǫgo be sele eyu, ula ebo te tigidali tǫ pedaiba ula yali, tama tǫ aga digi te mumunu mumunu yai.
PSA 77:19 Nage wali te tamu wę tomode bilali. Nago sunumi te genuai tamu ąį tomode elaluali. Tiali goli, dago te nago sągą pasalu me susiąbo dao.
PSA 77:20 Nage te tonalubo bidi mu tiwai elama, tama nage polasa pobaso, tama te we bidi dabe nage wali pelawai. Nago sę te Moses de Aron sibolo menama, tama augwali sigo te augwali tonaluai dao.
PSA 78:1 Eno hani bage dabe, dagego eno po bugagia odao. Dagego eno wainogo ebo poba olo bugagia muao.
PSA 78:2 Eno dageba te po dabe pusainu ebao. Eno te haniani sę dabe te polobadu geme dualaluali sę me te megi e sogoba usu nagasu, te po pusaibao, tama eno te po dabego page dagebolo pusaibao.
PSA 78:3 Polobadu te wąį nǫų dabego dabolo te tiali sę dabe po wali, tama dago odolama, tama dago te koneai dao.
PSA 78:4 Dago te po te dena wai dabeba geme me dualugobeo. Menio, te dago te gesi tamadi ame nabo wai dabeba te po waibao. Te dago Godigo genuai bomogo yali sę po pusaibao, tama te bomai sę dabe me agai yali, tama te bidigo isiąwai sę te haniani bomai sę agai yai dao.
PSA 78:5 Godigo aga bomai po te aga we bidi Israel dabebolo mawai. Agai po te Jekipgo wąį nǫų dabebolo menama, te augwa wali pomainu yai. Agai te polobadu wąį nǫų dabebolo te tama po wai, “Dagego te duga wai dabeba te eno bomai po tigidali te bugagia ma mao,” po wai.
PSA 78:6 Tama tialima, te nosali pedalubo hani wai dabego te nosali augwa me ola mayu, tama te hanigo te augwa wai dabeba te po omainao, te po wai.
PSA 78:7 Te augwa te tiwai eyu da, teda te hani dabego me te Godiba konealubo homu dąų waibao, tama agai te yali sę dabe te augwaligo homu kone gegeda pidali weyu, te tiwai yao. Tama te augwa agai bomai po tigidali wali pomainu yao.
PSA 78:8 Tiyu, augwali te augwa wąį nǫų dabe tobage tiwai pedelabuo. Te wąį nǫų dabego te hagoma eyu, tama Godigo po sela sąnama, tama augwa konealubo homu agaba dąų mu me wasiąwai, tama augwaligo te agai po sesemane wali me pabeo.
PSA 78:9 Polobadu te Efraim dabego hwįani, te enesigi enego te hwįai. Tiali goli, te sogo te wąbi hodolama hwįbaso, tama augwali wi pai dao.
PSA 78:10 Augwaligo te Godigo dąų walali bomai po wali pisąyu, tama augwaligo agai bomai po wali pabo homu isiąwai dao.
PSA 78:11 Augwaligo te agai yali sę dabe te homu kone gegeda pali, tama te bidigo isiąwai bomai sę agai te augwali gedude yai, te me augwaligo gegeda pali.
PSA 78:12 Te wąį nǫų dabego gedude Godigo bomai sę me deli te Soan bulu, te Isip tǫ pedaide, yai dao.
PSA 78:13 Godigo te tamu ąį togolama, tama tamu ąį te me badu buga siyu, me badu buga siyu elama, dolaluali, tama agai te Israel dabe tomodu odasa palio.
PSA 78:14 Te giligade aga te pǫdu polasa pali, tama hulide aga te sia ulade te augwali asobodu polasa pai.
PSA 78:15 Agai te masigi tǫ bulude te masigiba elama, tama te wę aiyadu pedalumainu elama, te augwaligo tuali.
PSA 78:16 Agai te masigide wę pedalumainu elama, tama wę te busidu soabo genuai wę tiwai soali.
PSA 78:17 Tiali goli, augwaligo te Ugwade Mu Bidibo Godiba dwai sę yali, tama augwali te kemi tǫ bulude bidiyu, agaba hagoma yalio.
PSA 78:18 Augwaligo God usu siyu, te tiwai yai. Augwaligo i bomonama agaba weyu, te augwaligo wei ebo nai agai momainu yai.
PSA 78:19 Augwaligo te tiwai posobo po Godiba wali, “Godigo dabolo te tǫ wa pai bulude te nai hauwa mabo usu yaiba, agawe?
PSA 78:20 Mu tama, hasiabolo agai te genuai masigiba elibaso, tama te wę pedelali. Tiali goli, magi ebawe? Agai dabolo te bret meba me te tubo mi magowe?” wali.
PSA 78:21 Tialima, Genuai Bidigo augwaligo po odolama, tama agai wado po wali. Agai te Jekopgo hani dabeba te sia tula palali. Tama agai wado po te genuai mu pedelalio.
PSA 78:22 Magi baso meni, augwaligo konealubo homu agaba musiąwai. Tama te agai augwali tau selama, te bugagia bidimainu yaibao, tede augwaligo agaba konealubo homu dąų me wabeo.
PSA 78:23 Tiali goli, tagalao, agai te ugwadu elalubo dagaluba po olama, tama te dagalu dalaluai dao.
PSA 78:24 Tialima, agai te nai mana tagala palama, tulalubosi, te augwaligo selama, tuali. Agai te dagalude nai te we bidi dabe augwaliba mawai dao.
PSA 78:25 Tama tialima, augwa te enselgo nai salio. Godigo te nai hauwa mu augwaliba menama, tama augwali usu mu yai.
PSA 78:26 Tama nosali agai te giliga pedalubo badu te wali hodolali, tama agai bomogo naga, agai te saut badu wali hodolali.
PSA 78:27 Tama agai te ba sibi hauwa mu te tǫ hogomu tiwai me, te nabis wę sande te kemi tiwai, te augwali tomoba tulalumainu yai dao.
PSA 78:28 Godigo te ba dabe te augwa bidalubo pesage tomoba tulalumainu ilali, tama augwaligo ugwa be bagua salio.
PSA 78:29 Tama tialima, te we bidi dabego tulama, tama augwa mu pągąna peyu, tabia palio. Te we bidi dabego sainu te gela wali nai, te Godigo augwali manio.
PSA 78:30 Augwa te nai tutubo sę yai. Mu tama, augwa te nai tula silisąbadi,
PSA 78:31 tama Godigo augwaliba wado po weyu, tama te bomai bidi dabe ela muani, te Israel wiegi yai ogwa bidi dabe dao.
PSA 78:32 Godigo te bidigo isiąwai te tobage bomai sę dabe yali, tiali goli, te we bidi dabego te dwai sę umabo mu idu geyu, tama augwaligo konealubo homu agaba dąų me wabeo.
PSA 78:33 Tialima, polo tama mu, te agai augwali dola silalio, te pedauwalide mobo pedelama, te polo pela silibo tiwai yalio. Agai augwali polo tama mu dolama, tama augwali isai dao.
PSA 78:34 Te Godigo meba ela mubo sogo, te gasa bage ge neyu, augwa homu begelama, tama agaba ma begasa aselama, tama agaba gedu haluasa po bomonama walio.
PSA 78:35 Te megi da, augwaligo homugo ma koneama, God te augwa tonalubo bidi dao homu yai. Te Ugwadu Mu Bidibo Godigo agai te augwali tau sabo bidi dao.
PSA 78:36 Tiali goli, augwa tibo po olama, tama agaba te odolali pedauwalide ąį soabo tiwai elama, daganobo po walio.
PSA 78:37 Augwaligo agai po wali me pabe, tama augwaligo te aga dali dąų walali bomai po bolama, togalio.
PSA 78:38 Tiali goli, Godigo te olo tau mabo wiegi yai kolesaga augwaliba elama, tama augwaligo te dwai sęgę sela sąwani, tama agai augwali me dolobeo. Hauwa sogo te agai wado yali, te palia selama elalu, tama augwaliba haliga sębę me ebeo.
PSA 78:39 Agai te tama tiwai homu augwaliba yai. Augwali te we bidi naga tama tiwai, augwali te wali aselama pabo tiwai ebao.
PSA 78:40 Hauwa sogo augwa hagoma eyu, agai po sela sąyu, te bidi meni yai tǫ wa pai bulude bidiyu tiali. Tama hauwa augwaligo aga haliga sęgę ilali.
PSA 78:41 Te Israel dabego God te tedali gasa wiegi yai mu dao. Tiali goli, hauwa sogo augwaligo aga usu sabo sę eyu, tama agai wado yabo sę ilali.
PSA 78:42 Augwaligo te agai genuai bomo teba homu konesiąwai, tama agai augwali te boi bidi dabego nogode ma sali, te sogoba augwaligo homu kone me palobeo.
PSA 78:43 Te sogo agai te bidigo isiąwai bomai sę dabe te Soan bulude yali, te Isip tǫ pedaide dao.
PSA 78:44 Godigo te wę dabede te kaneme pedalumainu elama, tama te Isip dabego tuainu yali usu me ebeo.
PSA 78:45 Tama agai te bolia hauwa, me te gedeli hauwa te augwaliba tagala palai. Tama te bolia dabego augwali gąų kela tuyu yali, tama te gedeli dabego te Isip bagego gide nai dabe hauwa dolali.
PSA 78:46 Tama Godigo te suma digi me, kauwa bidi dabe me, te kuli mano dabe dali tagala palama, tama augwaligo te augwa gide nai dabe tula silai.
PSA 78:47 Agai te talua ge tulubage tagala palama, tama tego te augwaligo wain ni dabe dolali. Tama agai te talua ge tulubagego te augwaligo ni kaya dolomainu yai dao.
PSA 78:48 Agai te genuai tulubage, te talua ge tulubage, tagala palama, tama augwaligo bulmakau dabe ela muai dao.
PSA 78:49 Agai augwaliba te wado umabo mu udubadi udubadi genama, tama augwaliba te dene mu mawai. Tama agai te ensel bidi meba tagala palama, te augwali doligi pali, tama augwali te sęgę genuai mu salio.
PSA 78:50 Agai augwaliba haliga sębę elama, tama agai augwali me gogolobeo. Menio. Agai te genuai gasi tagala palama, tama augwali isila palio.
PSA 78:51 Agai te Isip hani tigidaligo te gomunai ogwa dabe ela muna silali.
PSA 78:52 Tama agai te sipsip tonalubo bidi tiwai elama, tama aga polasa peyu tama, aga we bidi dabe tonaluali. Tama te tǫ wa pai bulude agai augwaliba te sunumi ola mawai.
PSA 78:53 Agai augwali odasa peyu, tama augwali bugagia bidali, tama tiyu, augwali wi me ebeo. Tiali goli, te tamu ąįgo augwa boi bidi dabe mesega salio.
PSA 78:54 Agai augwali te aga tǫba digi odasa asali. Te bulu du te pesage te aga digi bomogo sali bulu dao.
PSA 78:55 Agai te gasa hani dabe te aga hani dabe asobo si, te augwali sela sąwani. Tama agai te tǫ te Israel hani dabeba doba yali. Tama agai augwali te augwa ugwa be dabede bugagia bidimainu yai dao.
PSA 78:56 Tiali goli, te Israel dabego te Ugwadu Mu Bidibo God usu selama, tama agaba hagoma yai. Augwaligo agai bomai po wali me pisąwai.
PSA 78:57 Augwa hagoma elama, agai po sela sąwani, te augwa wąį nǫų dabego te polobadu yali tiwai yalio. Augwali te gagea pai enesigi te enebo dolo pisąbo tiwai yai dao.
PSA 78:58 Augwaligo te tibo godigo alta dabe nigali, tama te tebogo te Godigo wado po omainu ilali. Augwaligo te tibo god dabe nigilama ebaso, tama Godigo augwaliba dwai haliga yai dao.
PSA 78:59 Godigo augwaligo te tebo kolesaga sulama, tama agai augwaliba haliga sębę dwai mu yai, tama tibaso agai te Israel dabe tudiba mu muanio.
PSA 78:60 Tama agai te aga Silode elaluali ugwa be tagalalio. Te bede aga te we bidi dabe tomode bidali.
PSA 78:61 Tama agai te boi bidi dabego te dąų walali bomai po muani halobage, te bokis kontrak, sela pomainu ilali. Te bokis halobagede augwaligo te agai bomo me ula suali.
PSA 78:62 Agai te aga we bidi dabeba wado po olama, tama te boi bidi dabego augwali ela mumainogo yai dao.
PSA 78:63 Te gesi ogwa bidi dabe te genuai boi hwįani madi isali, tama te gesi ogwa we wegi dabe te augwali sabo bidi dabe meni yai dao.
PSA 78:64 Te boi bidi dabego te pris dabe ela mubaso, tama augwa we dabego te augwalide homu dene eyu, tama gela wainu ebo te usu ebeo.
PSA 78:65 Tialima, megi da, Genuai Bidi hodaluali, te bidi betde pilama hodalubo tiwai gilama yali, tama te bomai bidigo te wain wę hauwa tulama, tama te i hai ola bilibo tiwai gilama yali.
PSA 78:66 Tama agai te boi bidi dabe dali hwįnama, tama augwa asaliba ma pobeasa pali. Agai augwali aiyaba mu elalubaso, tama augwali hale dwai mu yali, tama augwaligo ma hwįabo usu ebeo.
PSA 78:67 Tiali goli, agai te Josepgo wąį nǫų hani bage te wei isiąwai, tama agai te Efraimgo hani bage te sa me mubeo. Menio.
PSA 78:68 Agai te Juda hani bage dali, te Saion bulu dali sa muani, te bulu du te agai wei mu ebo bulu dao.
PSA 78:69 Agai te aga genuai tempel be te bulu dude nigali, te aga dagalude elalubo be tiwai. Tama agai te tempel be sesemane te bomo dali elalumainu yali, te e tǫ dili dąų elalubo tiwai gilama emainu yai dao.
PSA 78:70 Godigo Devit sa muani, te aga sę bidi, tama aga selama, te genuai sipsip dabe tonalubo sę me, te sipsip wai dabe tonalubo sę emainu sa muai dao.
PSA 78:71 Tama Godigo aga te Israel king bidi mubaso bidali, tama aga te Godigo we bidi tonalubo bidi bidai dao.
PSA 78:72 Devitgo te aga sęba naga homu kone palama, tama augwali bugagia tonaluai. Tama aga te augwaligo wiegi yai polalubo bidi bidai dao.
PSA 79:1 God, te gasa hani dabe dago tǫba asalio, tama augwaligo te naga we bidi dabe da dali hwįani ebao. Augwaligo te nago tedali wiegi yai be dwai ilama, tama meda mu pedelali. Tama augwaligo te Jerusalem dwai mu ilama, dolalio.
PSA 79:2 Augwaligo te we bidi dabe ela muyu, tama nago sę bidi dabe me ela tagalali, tama te ba dabe dali, te uni hasa dabe daligo te augwaligo tigi tualio.
PSA 79:3 Te boi bidi dabego nago we bidi dabe ela munama, tama augwaligo kaneme gelama, tama te wę tiwai te Jerusalem tomodu pai. Tama augwaligo tigi dabe pubulabo bidi deli me bidibeo.
PSA 79:4 Te da pąde bidalubo we bidi hani dabe, augwa te posobo po weyu, te gisugu weyu, tama te po dwai dabolo wali.
PSA 79:5 Genuai Bidio, nisu naga sogo nago dade wado po wabo me elalu, elaibawe? Te nago wado po wabo te sesemane elaluabo homu eba, agawe? Te nago wado ebo me elalu, tama te sia bogoli elalubo tiwai eyu, tama me sula sogobe da, agawe?
PSA 79:6 Te nageba lotu po wasiąbo we bidi dabeba nago te wado po wao, te we bidi dabe augwaligo te nage tudiba mubo dao.
PSA 79:7 Magi baso meni, te hani dabe augwaligo te nago hani we bidi dabe ela muani, tama augwaligo te nago tǫ mu dolai dao.
PSA 79:8 Tiyu, nago daba te dago wąį nǫų dabego dwai kolesaga yalide te dabolo dene maidalio. Megi da, nago te olo tau mabo wiegi yai kolesaga dabolo yao, magi baso meni, te dago konealubo homu te bomo kimi meni yanio.
PSA 79:9 God, nage te da ma sabo God dao. Nago te naga genuai nogi sabode koneama, te da tau sao. Nago da ma siyu, tama dago dwai sęgę tigidali te sela sąyao, tama dago te nago nogi ugwaba saibao.
PSA 79:10 Magi baso te gasa hani dabego dabolo te tiwai hanalu, “Te dagego God mena bidibo?” waibawe? Dago nago te gasa hani dabeba te dago kaneme gelali wei ponoyu, te dene mabo dago suabo homu ebao, magi baso meni, augwaligo te nago sę bidi dabe ela muai dao.
PSA 79:11 Nago te kalabuside bidibo bidi dabego gela wabo odao. Tama te nago genuai bomogo, nago te bidi dabe te boi bidi dabego po weyu, te isimainao po wali bidi dabe, augwali ma sao.
PSA 79:12 Te boi bidi dabego nageba te dwai po wali. Tama tialima, Genuai Bidi, nago te augwaligo yali dwai kolesaga te nogo a naga olama, me badu si sogo te wei ponao.
PSA 79:13 Nago te tama tibaso da, teda da naga we bidi dabe, da te nago sipsip wai tiwai yaibao, teda dago nageba te usu da weyu, gedu haluasa po sesemane sesemane sogo waibao. Tama te nosali nosali pedalubo wąį nǫų dabego, teda augwaligo me te nago nogi ugwaba saibao.
PSA 80:1 Te Israel dabe tonalubo bidi, nago te naga sipsip dabe da bilibo dodolobo dao. Te dago gela wabo odao. Nage te ensel dabe daide ugwadu king bidibo dao.
PSA 80:2 Nago te Efraim dabe, me Benjamin dabe, me te Manase hani bage augwali homu dene yao. Nago te homu dene ebo te pepeli diliba hanilama, pedalumainu ilao. Te nago genuai bomo dabolo ola mayu, tama aselama, da tau sagasobaso da, teda da me dologobeo.
PSA 80:3 God, nago da selasa, te nagaba ma pao. Nago te olo tau sabo wiegi yai kolesaga dabolo eyu, tama da tau sobaso da, teda da munu me hagagobeo.
PSA 80:4 Genuai Bidi, nage te Tigidali Bomo Elalubo God dao, nisu naga sogo digi te nago naga we bidi dabego gedu haluasa po wabode te wado po me nago elalu odaibawe?
PSA 80:5 Nago da te gela mu udumainu elama, tama dena gedu ąį te tubo nai, me te genuai tubo ąį tiwai ebao.
PSA 80:6 Nago te gasa hani we bidi dabe te da pąba asomainu ilama, te augwaligo dago tǫ sainu hwįbao. Tama te boi bidi dabego dabolo te posobo po weyu, gisugu mayu, ebo dao.
PSA 80:7 Te Tigidali Bomo Elalubo God, nago da edaba ma sao. Nago te olo tau sabo wiegi yai kolesaga dabolo eyu, tama da tau sobaso da, te da me hagagobeo.
PSA 80:8 Polobadu nago te ni wain deli te Isipdu selasa asali. Tama nago gasa hani dabe te tǫde sela sąnama, tama nago te ni wain te augwaligo tǫde bulai dao.
PSA 80:9 Nago aga tǫ delide peda selama, tama nago bulalio. Aga holama, tama aga sele te aiyanu mu dulalio, tama aga genuai mu holama, tama te tigidali tǫ pedai mesega sai dao.
PSA 80:10 Tama te ni wain nologogo te tigidali bulu du me, tama te moni dobo dwai ni sida dabe mesegelai dao.
PSA 80:11 Te aga nologo pali, te genuai tamu ąį Mediterenian si, te dąį igi pelama, tama giliga asobo badu me pali, te wę Yufretisba usu nigi pai dao.
PSA 80:12 Tiali goli, magi baso nago te wain gi bagulali obo dabe alualiwe? Megi da, te sunumidu soabo we bidi dabe augwaligo te wain gi du dabe wi saibao.
PSA 80:13 Tama te uni kibu dabego agayu, tama te uni hasa dabego tubo dao.
PSA 80:14 Te Tigidali Bomo Elalubo God, nago daba homu kone ma palao. Nage te dagalude bidiyu, tama nago daba aiya tonaluao. Tama nage aselama, da tau sagasao, da naga nago ni wain tiwai dao.
PSA 80:15 Nago da tau sagasao, naga digi nago te naga bomogo da bulali. Da te gesi ni wain tiwai nago te bomonama mu pedalumainu yai dao.
PSA 80:16 Te dago boi bidi dabego togolama, tama siaba ulalio. Te nago augwaliba wado eyu, tama augwali mu dolao.
PSA 80:17 Tiali goli, nago da we bidi dabe tau sao, nago te naga da weyu, sa munama, tama da tonalubao. Nago da genuai pedalumainu elama, tama bomo ilali.
PSA 80:18 Nago tama tibaso da, teda dago nage ma tagalugobeo. Nago da bugagia bidimainu eyu, tau sobaso da, tama te nageba gedu haluasa po weyu, tama nago nogi ugwaba saibao.
PSA 80:19 Genuai Bidi, nage te Tigidali Bomo Elalubo God dao, nago da te nagaba ma sao. Nago te olo tau mabo wiegi yai kolesaga dabolo eyu, te da tau sao, te da me hagagobeo.
PSA 81:1 Te wiegi yai pemene elama, te Godiba i wao, te da tau seselalubo bidi dao. Te Jekopgo God nogi ugwaba sabo tęąbi po wao.
PSA 81:2 Te wiegi yai musik te tobage temborin dali, wiegi yai gita dabego, me te kulelede wao.
PSA 81:3 Te biugel bu wabo te genuai side te gesi polua nanama, tama te polua genuai pedalubo sogode, te biugel bu waiyąo.
PSA 81:4 Te da Israel dabego bomo yai po elaluai. Te Jekopgo Godigo te bomo yai po dabolo mawai dao.
PSA 81:5 Te polobadu Godigo te Isip dabe dali hwįgi pali sogo, agai te bomo yai po da Israel dabeba mawai dao.
PSA 81:6 Eno te bidi me deligo dogonide po odolama, tama te dego dogoni te eno konesiąwai. Agai te tama po wali, “Eno te dagego nagede elaluali sęgę tigidali tega sąwanio,” wali. “Tama eno dagego te sę ebo basket dabe te tǫba mumainu yai dao.
PSA 81:7 Te dagede genuai sęgę elalubaso, tama enaba i wabo sogo, eno dage tau selama, tama dage bugagia bidai. Ena te geme dulalubo pesagede te pǫ kulukulu wabo tomode ena bidibao, tama eno dagego gedu haluasa po wabo odali. Polobadu dage te Meriba wę ulu pedalubode bidibadi, tama eno dage usu sai dao.”
PSA 81:8 “Eno we bidi dabeo, eno dageba te bomai po mawainu ebao. Mu tama, te Israel dabe, eno homugo te dagego eno po odomainu homu ebao.
PSA 81:9 Dagego te gasa hani dabego tibo god wali me pigio. Tama dagego gasa godiba lotu me wagimio. Dagego ena deliba naga lotu waiyąo.
PSA 81:10 Ena naga ena Genuai Bidi da, ena dagego God dao. Ena digi dage selama, te Isip taga soyu asai. Dagego pedauwali a olalubadi, tama eno te dage pedauwaliba nai muaibao,” walio.
PSA 81:11 “Tiali goli, eno we bidi dabego te eno po me odisąwai. Mu tama, te Israel dabego eno po wali homu me isiąwai dao.
PSA 81:12 Tama tibaso, eno te augwa hagoma ebo kolesagade wali bilimainu sula tagalali, tama augwa te mena augwa homugo ela palio.
PSA 81:13 Eno wei mu ebaso, tama eno hani bage augwaligo te eno po odomainu homu yali. Tama eno homugo te Israel dabego te eno homu sesemane wali pomainu homu ebao.
PSA 81:14 Te augwaligo tama tibaso da, teda polo tama eno te augwaligo boi bidi dabe doligi da. Te eno boi bidi dabe augwali dali hwįnama, tama augwali aiyaba mu elalualigi da.
PSA 81:15 Te ena wei homu isiąbo we bidi augwali, teda augwali wi mu dwai elama, tama enaba kidu sugunagasaibao. Tama eno augwaliba te sesemane sogo dene magi dao.
PSA 81:16 Tiali goli, eno wiegi yai nai mu dageba maiyabo homu eyu, tama dage te buside elalubo tubo nai te hani menama, tama dagego haliga te pągąna peyu igi da,” wali.
PSA 82:1 God te dagalude genuai kaunsel miting po mibo polalubo bidi bidibao. Te tobolu bidi dabe sisinama, tama God agai homude elalubo po pusubo dao.
PSA 82:2 Agai te tama po wali, “Dagego te tibo po tų eyu, te po me bugagia dodolobeo. Tama dagego te bidi dwai dabe te po tųde tau sabo sę eyu yali. Te tobage dwai kolesaga ebo tagaliąo.
PSA 82:3 Dagego te magi nai meni yai bidi dabe, me te tiana wai dabe tau sao. Tama te sęgę toloyu, bugagia bidisąbo bidi dabe, dagego augwali bugagia wiegi yai ilao.
PSA 82:4 Tama te dwai bidiyu, te doado bage sǫą pai bidibo we bidi dabe, dagego augwali te dwai bidi dabego nogode ma dobola sao,” po wai.
PSA 82:5 “Dagego kolesaga me konebeo, tama dage kolesaga me konesiąyu, tama umuna pai mu dao. Dage te hulide biliyu, tama te we bidi dabego doloba pai kolesaga wali me pabeo.
PSA 82:6 Eno te po wali, ‘Dage tigidali deli deli te god dao. Dage te Ugwanu Mu Bidibo Godigo wai dao.’
PSA 82:7 Tiali goli, dage te isibo bidi dabe tobage tiwai gilama, te dage me isaibao. Te dagego bidibo ula te silaibao, te kingo wai dabe te bidali ula tagalu, te isibo tiwai gilama te silaibao.”
PSA 82:8 God, nage aselama, tama te tǫde we bidi tigidali tonaluagasao. Te tigidali bage te naga hani naga dao.
PSA 83:1 God, nago pedauwali me pania sigio. Nage odolali me dualalugio. God, nage odolali me bidigio.
PSA 83:2 Suao. Te nago boi bidi dabego te hwįbao. Augwa te nage wei me isiąyu, te nageba hagoma ebo dao.
PSA 83:3 Augwa te geme duala selama, tama nago we bidi dabeba te dwai sę yabo po mia salio. Nago te we bidi dabe augwali bugagia tonaluali, tiali goli, te boi bidi dabego augwali dolabo po mia sai dao.
PSA 83:4 Augwa te po wai, “Ae, tegobao. Dago te Israel dabe mu silinao, teda te we bidi dabego te augwaliba homu kone munu me ma egobeo,” wali.
PSA 83:5 Augwa te deli homu elama, te sę yalio. Tama augwa te nage elaluainu, te hai namu dali ola sai dao.
PSA 83:6 Augwali te hani dabego te tiwai yainu yali, te augwali Idom dabe me, Ismael dabe me, tama te Moap dabe me, te Hakri dabe me dao.
PSA 83:7 Tama te Gebal dabe me, te Amon dabe, tama te Amalek dabe me dao. Te hani bage dabe, augwali te augwali te Filistia badu, me Tair badu bidali.
PSA 83:8 Siria me te augwali dali sisinani. Te bomai hani augwali te Lotgo hani tau salio.
PSA 83:9 Nago te tobage tiwai kolesaga te augwaliba yao, te polobadu nago te Midian dabeba yali tiwai, me te Sisera, me Jabin dabe, te genuai wę Kisonde yali tiwai yao.
PSA 83:10 Te sogo nago augwali te Endor bulude dolama, tama augwa tigi te tǫde munaluama, tama damua pai dao.
PSA 83:11 Nago te augwa ami dabego kepten bidi dabebolo te dwai dene mao, te polobadu nago te Orep de Sep side yali tiwai gilama yalio. Nago te augwaligo tobolu bidi dabe aiyaba elaluao, te nago te Seba de Salmuna side yali tiwai gilama yalio.
PSA 83:12 Te bidi dabe augwaligo te tama po wai, “Dago Godigo te tǫ sobaso da, teda te dena tǫ mu naga tama pedelaibao,” wali.
PSA 83:13 Eno God, nago augwali te tǫ hogomu tiwai sela sąyu, tedela palao. Augwali sela sąyao, te waligo te wit bo sela sąyu, tedela palubo tiwai yao.
PSA 83:14 Siago te kala dobaso, tama te kala elalubo bulu dude te sia genuai dabo dao.
PSA 83:15 Te tiwai naga gilama, nago te genuai tulubage tagala palama, tama te hani bage te pobeasa pobaso, te augwali wi paibao. Tama nago te bomai wali mu augwaliba tagala palubaso, te augwali wi yaibao.
PSA 83:16 Genuai Bidi, nago augwali aiyaba mu elalubaso, tama augwali hale dwai mu eyu, tama augwaligo nage wali pabo homu yaibao.
PSA 83:17 Eno homugo te nago augwali elalubaso, tama augwali te sesemane wi dwai mu yaibao. Nago augwali hale ilama, tama augwali ela muao.
PSA 83:18 Eno homugo nago te tiwai yao homu ebao, teda augwa mu konemainu ebao, nagaduba deli naga, nage te Genuai Bidi, tama nage te Ugwade Mu Bidibo God da, tama nago te tigidali tǫ tonalubo dao.
PSA 84:1 Te Tigidali Bomo Elalubo God, eno nago be wei mu ebao.
PSA 84:2 Ena tede bidabo homu wei mu ebao. Te eno homu kolesaga tigidaligo te nago be wei mu ebao. Te tigigo, me homu tigidaligo, eno te wiegi yai pemene ebo tęąbi po nageba obao, God te bidabo ula elalubo God dao.
PSA 84:3 Genuai Bidi Te Tigidali Bomo Elalubao, nage te king, me eno God dao. Te dwasianu ba dabe te nago alta pąde be sęnama, tama augwaligo te augwa wai dabe tonalubo dao.
PSA 84:4 Te nago bede bidalubo we bidi dabe augwa te bugai homu mu elama bidibo dao, tama sesemane sogo augwa te tęąbi po weyu, tama nago nogi ugwaba sabo dao.
PSA 84:5 Te we bidi dabe augwa te nagede bomo selama, tama te Saion bulu duba pabo homu wei elama, augwa te sesemane pemene yabo homu ebo dao.
PSA 84:6 Augwa pelayu, te wa pai bulu odogo pesageba dulama, tama te bulude te wę ulu hauwa pedalubo pesage elalubao. Tama te kigamu tulubage tulama, tama te dedageba te węgo pągąbo dao.
PSA 84:7 Te bidi dabe bilama, te bomo yai pedelaibao. Te augwali pelama, te Saionba sabolama, tama te God bidibo sueibao. Aga te tigidali tibo godide te ugwadu elalubo God dao.
PSA 84:8 Genuai Bidi, nage te Tigidali Bomo Elalubo God, te eno gedu haluasa po wabo odao. Nage te Jekopgo God, te olo bugagia munama, eno po odao.
PSA 84:9 God, nago dago kingba wiegi yai sę yao. Naga digi aga sa mubaso, tama aga te king bidibao.
PSA 84:10 Te ena deli sogo naga te nago tempel bede bidibaso da, tego te 1,000 sogo te gasa bulude bidibo te aiyaba mu elaluai. Ena te ena Godigo be sunumide dolaluabo homu wei mu ebao. Tiali goli, ena te dwai bidi dabego bede bidabo hagela homu ebo dao.
PSA 84:11 Genuai Bidi, te da seselalubo bidi, te dago genuai nogi elalubo king dao. Agai te olo tau sabo wiegi yai kolesaga dabolo eyu, tama daba genuai nogi mayu yali. Agai te bugagia dolasa bilibo we bidi dabede te mena nai me deli me dąų me ela sogobeo.
PSA 84:12 Godigo Te Tigidali Bomo Elalubao, te nageba konealubo homu dąų wabo we bidi dabe, augwa te wiegi yai pemene sesemane emainu yagameo!
PSA 85:1 Genuai Bidi, nago naga tǫba wiegi yai yali. Nago da Israel dabe ma tau selama, tama da bugagia mu bidibao.
PSA 85:2 Nago naga we bidi dago dwai sęgę dagala sąnama, tama dago yali sęgę sela sąwai dao.
PSA 85:3 Polobadu nago daba wado yali, tiali goli, megi nago wado po ma wabeo. Mu tama, nago daba haliga sębę yali, tiali goli megi da, menio wali.
PSA 85:4 God, nago da ma selama, megi da, nago da te nagaba odasa ma pao. Ya, nago dabolo wado ma igio.
PSA 85:5 Magi yaliwe, te nago dabolo sesemane wado iduaibawe? Te nago wado po me sia sogobe da, agawe?
PSA 85:6 Nago dago bidibo ula ma dąų walao, te nago we bidi dago te wiegi yai pemene elama, tama nago nogi ugwaba saibao.
PSA 85:7 Genuai Bidi, nago dabolo te nago da sesemane wei ebo ola mao, tama da ma selama, te da bugagia bidaibao.
PSA 85:8 Eno te Genuai Bidi Godigo pusubo poba olo muani. Agai te wiegi yai nagame yai homu, me te da bugagia bidabo po wali, te dago polobadu yali dwai kolesagaba da ma begasa pisąbaso da te tama tiaibao wali.
PSA 85:9 Mu tama, agai te agaba lotu weyu, agai homu wali pabo we bidi dabe ma sainu te sisi yalio. Tama agai da ma selama, tama aga digi da dali dago tǫde bidaibao.
PSA 85:10 Te sogo da, te we bidi dabego te gasa bage wei mu elama, tama wiegi yai kolesaga augwaliba yaibao. Tama augwa dolasa bidiyu, tama haliga nagame elama, tama hodobo bugagia bidaibao.
PSA 85:11 Te tǫde te we bidi dabego te Genuai Bidi wali mu paibao, tama te dagalude Godigo augwali doloba pai pedalumainu ilaibao.
PSA 85:12 Genuai Bidigo te da bugagia bidimainu tau saibao, tama dago ebo sę dabe te wiegi yai pedelaibao. Tama dago tǫde te nai hauwa walaibao.
PSA 85:13 Genuai Bidigo te we bidigo doloba pai kolesaga wali pomainu elama, tama te tebogo te aga asabo sunumi dodolubo dao.
PSA 86:1 Te Devitgo asęani gedu haluasa po me deli dao. Genuai Bidi, ena bomo meniama, tama ena digi ena tau sabo usu ebeo. Tama tialima, eno homugo nago eno gedu haluasa po wabo odolama, te ena tau sao.
PSA 86:2 Nago ena ma siyu, tama ena me isigobeo, magi baso meni, ena nage wali asai. Nage da, te eno God dao. Ena naga sę bidi da, tama eno konealubo homu nageba muai, tama tiyu, nago ena tau sao.
PSA 86:3 Naga digi nage eno God dao. Ya, nago ena homu dene eyu, tau mabo kolesaga enaba yao. Tigidali sogo, giligade me hulide, eno gedu haluasa po nageba wabo dao.
PSA 86:4 Genuai Bidi, nago eno haliga wiegi yai pemene mu ilao, te naga sę bidi dao. Magi baso meni, eno gedu haluasa po nageba naga wabo dao.
PSA 86:5 Genuai Bidi, nago te wiegi yai sę mu elama, tama nago eno dwai sęgę sela sąbo dao. Nago te nageba gedu haluasa po wabo we bidi tigidali wei mu eyu, tama naga homugo augwali dali kęą pai dao.
PSA 86:6 Genuai Bidi, nago eno gedu haluasa po wabo bugagia odao. Eno nageba i wabo, te nago ena dali homu dene eyu, tau somainu wali. Eno i wabo odao.
PSA 86:7 Te eno nageba i wabo sogo, te nago ena tau sabo dao. Tama tiyu, tigidali sogo ena sęgę tolobaso, eno te nageba gedu haluasa po waibao.
PSA 86:8 Genuai Bidi, te God nage tiwai me deli elalubeo. Te Israel hani isąwai dabego augwa god wabo nai dabe da, augwali te tibo god dabe naga dao. Nago augwali aiyaba elaluai. Tama te bidi me deligo te nago ebo sę tobage tiwai me elalubeo.
PSA 86:9 Tigidali hani we bidi nago augwali nigali, te augwaligo lotu po wainogo eyu, nageba kidu sugunagasaibao, tama augwaligo te nago nogi ugwaba saibao.
PSA 86:10 Magi baso meni, nago naga te genuai bomo elaluyu, tama nago te we bidigo isiąbo genuai sę dabe ebo dao. Tama nago naga te haniani wiegi wiegi yai sę ebo dao. Nagaduba deli naga, nage God mu dao.
PSA 86:11 Genuai Bidi, eno homugo te nago eno emainu ebo kolesaga te ena bugagia ola mao, tama eno te nago mu po wali sesemane paibao. Te ena bugagia ola mayu, te eno nageba naga konealu, tama eno nago sę sesemane sogo yaibao.
PSA 86:12 God, eno Genuai Bidi, eno te usu da wabo te eno homu sesego nageba mobao. Tama eno nago genuai nogi te sesemane bidada pabo sogo ugwaba saibao.
PSA 86:13 Magi baso meni, nago sesemane sogo ena wei mu ebo dao. Nago ena te isabode ma dobola selama, tama ena te isibo bidi dabego pesageba pabeo.
PSA 86:14 God, megi te hagoma ebo bidi dabe meba aselama, tama ena dali hwįainu ebao. Te dwai sę ebo bidi dabego te bidi hasi homu dene eyu, tau sabo kolesaga eyu, me sogobeo, tama augwali sisinama, ena ela muainu yali. Augwaligo te nago po wali me pisąwai, augwaligo te sela sąyu naga ebo dao.
PSA 86:15 Tiali goli, Genuai Bidi, nagede te homu dene ebo, me olo tau mabo wiegi yai kolesaga pągąnalubao, tama nage da, te bobobage guni yai bidi dao. Nago da wei mu eyu, tama nago homugo da dali kęą mu pai dao.
PSA 86:16 Nage enaba ma aselama, ena homu dene eyu, tau sao. Ena bomo mao, tama ena ma sao, magi baso meni, eno nago sę ebo te ena idago yali tiwai ebo dao.
PSA 86:17 Genuai Bidi, eno homugo te nago ena wei ebo da homu ebo te nago enabolo ola mao. Tama te boi bidi dabego suyu, te nago ena tau siyu, te dąų walobo te augwa konemainu yao. Tama augwa ebo kolesagade te augwa hale mu somainu yao.
PSA 87:1 Godigo aga taun te aga bulu dude digi nigali.
PSA 87:2 Genuai Bidigo Israelde gasa tigidali elalubo bulu te wei homu yali, tiali goli agai te Jerusalem te wei mu yai dao.
PSA 87:3 Te Godigo taunde we bidi dabego, odao. Godigo te wiegi wiegi yai sę dageba ebo dao.
PSA 87:4 Godigo te tama po wali, “Te eno ena po wali pabo hani bage augwali nedebo sogo da, teda eno te Isip me Babilon te augwali dali nedaibao. Tama eno te Filistia, me Tair, me Itiopia bulu dabeba te tama po waibao, augwali me te Jerusalem bage dao, waibao.
PSA 87:5 Te eno Jerusalemba te tama po waibao, ‘Te bulu te tigidali hani we bidigo bulu da.’ “Tama te Ugwadu Mu Bidibo God, aga digi te Jerusalem dodolama, tama bomai mu elaluaibao.
PSA 87:6 Te Genuai Bidigo te gasa hani we bidi dabe augwaligo nogi asęnama, tama augwali sisinama, tama augwali dali nedeyu, te Jerusalem we bidi dali nedaibao.
PSA 87:7 Tama te Jerusalemde bidali we bidi dabe, te augwaligo tęąbi weyu, wiegi yai pemene yaibao. Tama augwa te tama po waibao, “Jerusalem da, te nago dolo mu tama, tama nage te wiegi yai kolesaga tigidali ebo page mu dao,” waibao.
PSA 88:1 God, Genuai Bidi, nago ena tau sabo da. Te giligade eno nageba i weyu, te ena nago tau somainu yai, tama hulide me eno nageba gedu haluasa po wabo dao.
PSA 88:2 Nago eno gedu haluasa po wabo odao. Te nago ena tau somainu, eno nageba i wabo odao.
PSA 88:3 Te sęgę hauwa enaba pedalubaso, tama te tebogo naga ena pąde isabo homu ebao.
PSA 88:4 Ena te gasa bidi dabe isainu ebo tiwai gilama yai. Te eno bomo tigidali mu silalio.
PSA 88:5 Augwa ena tagalubaso, tama ena te isali bidi dabe dali bidibao. Ena te gasa bidigo ela muai bidi tiwai gilama, tama te gų pagede munaluai. Ena te bidi dabe nago te homu kone mu gegeda palubo bidi dabe tiwai gilama yali, tama te nago augwali munu ma tau sisąbo tiwai yai dao.
PSA 88:6 Nago ena te aiyanu mu yai dedage pageba sąnama, tama ena te be hulia sai mude, te aiyadu dologode mu bidai.
PSA 88:7 Nago haliga sębęgo ena mu elaluama, tama te moni tamu ąį dinigo ena mu mesegelibo tiwai yai dao.
PSA 88:8 Nago te ena abagi dabego ena tudi ola momainu ilali. Nago ena te dwai mu pedalumainu elama, tama augwaligo enade wi mu yai. Tego ena kalabus ilama, tama eno pedelabo usu meni yai dao.
PSA 88:9 Ena dene tolu, tama eno gedu dolama, tama eno bugagia suabo usu isąwai. Tama tigidali sogo eno gedu haluasa po nageba weyu, te nago ena tau somainu yali.
PSA 88:10 Nago te isali bidi dabe tau sabo bomai sę ebo da, agawe? Te isali bidi dabe ma hodaluama, tama nago nogi ugwaba saibawe?
PSA 88:11 Te gų pagede te isali bidi dabego nage dali po miyu, te nago augwali sesemane wei mu ebo da po wabo da, agawe? Te dolabo bulude augwaligo nageba po weyu, te nago augwali bugagia tonaluai dao po wabo dawe?
PSA 88:12 Te gų pagede bidibo bidi dabego te nago bomai sę ebo subo dawe? Tama te dolabo pesagede bidalubo bidi dabe, augwaligo nago te wiegi yai kolesaga subo da, agawe?
PSA 88:13 Genuai Bidi, eno nageba i wabo, te nago ena tau somainu ebao. Te tigidali sogo kigamu eno gedu haluasa po wabo dao.
PSA 88:14 Tiali goli, Genuai Bidi, magi baso ena nago tudiba mubawe? Magi baso nage enade geme duala sobawe?
PSA 88:15 Te ena gesi ogwa bidide digi gagalasa, te e sogoba megi usu nagasobao, ena te sęgę tolu, tama pąde ena isainu ebao. Nago enaba te dene mabogo te ena nogo sągą dili kimi isalio.
PSA 88:16 Genuai Bidi, nago haliga sębęgo ena mesegelali. Nago ena dodolagia mu elama, tama ena mu dolai dao.
PSA 88:17 Nago enaba te tiwai te giligade me hulide dali yai, tama te bidi dabego ena te tigidali pedai badu pobeasa bilali, te wę ge bo deyu, te tǫ tigidaliba mesega sabo tiwai yai dao.
PSA 88:18 Nago te eno wiegi yai abagi dabego ena tagalumainu ilali. Te be hulia sabo naga te eno abagi bidalio.
PSA 89:1 Etan te Sera hani bidi me deligo asęani balia po me deli dao. [1 Kin 4:31] Genuai Bidi, nago da sesemane sogo godolo homu ebo dao, tama te kolesaga ebode eno e balia udaibao. Mu tama, te nosali ame nabo bagego konemainu eyu, te eno nago po te me hasegelibo meni da po olama, te po hanilama pusaibao.
PSA 89:2 Eno koneani, nago da sesemane bidada pabo sogo wei homu ebo koneani. Awe, te nago mu po te me hasegeligobeo, te dagalu bomo elalubo tiwai gilama elaluaibao.
PSA 89:3 Nago te tama po wali, “Eno te bidi me deli sa muai da,” wali, “tama eno dąų wabo po me deli aga dali wai dao,” po wai. “Eno ena sę bidi Devitba po dąų walalio,” po wai.
PSA 89:4 “Tama eno te po wali, ‘Te king dabe nago hanide naga pedelaibao,’ wali. ‘Mu tama, sesemane sogo eno te nago hani bidi me deli te king bidi mudaibao,’ te po wai.” Nago te po wai dao.
PSA 89:5 Genuai Bidi, te ensel dabego te nago ebo wiegi yai sę dabe balia po wabo dao, tama augwaligo te nago nogi ugwaba sabo dao. Me te dagalude konealubo homu dąų wai mobo bidi dabego te nageba balia po weyu, tama nago po wali mu pabo dao.
PSA 89:6 Genuai Bidi, te dagalude nage tiwai tobage me deli me elalubeo. Te ensel me te nage tobage tiwai deli me menio.
PSA 89:7 Te ensel dabe augwa polalubo dabe te po miting ebo sogo augwali te nagede wi ebo dao. Tama te nage bagualubo gasa ensel tigidali, augwali te nagede wi mu ebo dao.
PSA 89:8 Genuai Bidi, nage te Tigidali Bomo Elalubo God dao, te me deligo nago te genuai bomo tiwai me elalubeo. Nago naga po sesemane sogo wali peyu yaibao. Nago po me hasegelama eyu, me egobeo.
PSA 89:9 Nago te bomai tamu ąį tonalubao. Te ąį dini hogodobo sogo, nago aiyaba elalubaso, tama memenege me eyu me egobeo.
PSA 89:10 Nago te Isip dabego genuai bomo togolama, tigidali mu dolalio. Tama nago nogogo genuai bomogo, nago naga boi bidi dabe aiyaba elalualio.
PSA 89:11 Dagalu me tǫ te nago naga dao. Nago tǫ nigali, te tǫde tigidali nai me bugagia nigali.
PSA 89:12 Nago te not badu, me saut badu dali, te nigai. Te Tabor bulu du, me Hermon bulu du sigo te wiegi yai pemene eyu, nageba balia po obao.
PSA 89:13 Iya, tegoba. Nago bomo genuai mu elalubao. Nago bomo te umabo mu dao.
PSA 89:14 Nage te king bidiyu, tama nago te we bidi dabe doloba pai kolesagade tonalubao. Tama nago po tų dolo naga ebao. Nago te tigidali we bidi wei mu elama, tama nago naga po sesemane wali peyu yali, tama nago po hasegelama eyu, me egobeo. Te tobage kolesaga ebo da, te nago naga we bidi tonalubo sę page mu dao.
PSA 89:15 Te we bidi dabego nageba balia weyu, lotu po weyu yali, tama nago te olo tau mabo wiegi yai kolesagade biliyu, te augwa te ulade bilibo tiwai ebao, te augwa wiegi yai pemene emainao.
PSA 89:16 Augwaligo te nago wiegi yai kolesaga augwaliba ebo te homu kone palu, tama tigidali sogo giligade me hulide augwa te wiegi yai pemene eyu, tama nago nogi ugwaba sabo dao.
PSA 89:17 Magi baso meni, nage naga te nagede dago bomo elalubaso, tama dago wiegi yai pemene nageba ebao. Nago te olo tau sabo wiegi yai kolesaga dabolo elama, tama da te hwįbode tau selama, te boi bidi aiyaba elaluai dao.
PSA 89:18 Awe, nago digi te da seselalubo bidi sa muai. Nage te da Israelgo Tedali Wiegi Yai God, nago te dena king dabolo mawai dao.
PSA 89:19 Te ugwadu sogo polobadu, nago te nage wali pabo bidi dabe muba te na menama, tama nago augwaliba te tama po wali, “Eno te polaluabo ami bidi me deli sa munama, tama eno agaba te kingo hat madi muai. Eno aga te we bidi dabe tomode selama, tama aga te king munama bidai.
PSA 89:20 Eno Devit nigilalio, ena sę bidi da, tama eno aga te dagego king pedalumainu yai dao.
PSA 89:21 Tama tiyu, eno bomo te aga dali sesemane bidaibao. Mu tama, eno bomogo aga tau saibao.
PSA 89:22 Te aga boi bidi dabego te hwįbode aga aiyaba elaluyu, mone mao me wagobeo, tama te dwai sę ebo bidi dabego aga me elalugobeo.
PSA 89:23 Te ena digi eno agai boi bidi dabe agala selama, tama te aga wei isiąbo bidi dabe ela muyu yaibao.
PSA 89:24 Te eno aga wei mu elama, tama ena aga dali sesemane sogo bididuaibao. Te aga boi bidi dabe dali hwįbo sogo, te eno agai tigidali sogo augwali aiyaba elalumainu ilaibao.
PSA 89:25 Te eno elama, tama agai tonalubo tǫ te genuai tamu ąį Mediterenian tedu gagalasa peyu, te wę Yufretis elalubo madiba usu nigi paibao.
PSA 89:26 Tama agai enabolo te tama po waibao, ‘Nage Aya me eno God dao. Nago ena tonalu, tama ena sesemane tau sabo dao.’
PSA 89:27 Tialima, te eno polalubo gomunai wai aga munama, tama aga te polalubo king pedelama, te tigidali tǫde king aiyaba elalueibao.
PSA 89:28 Te eno sesemane sogo aga wei mu iduaibao. Tama eno te po dąų wabo kontrak aga dali elama, tama te dąų walali po kontrak te sesemane elalua peyu, elalua paibao po wai dao.
PSA 89:29 Sesemane sogo te aga hani bidi me deli te king pedalu, ela piduaibao wali. Tama aga hani king me deligo te Israel dabe sesemane tonaluaibao, te dagalu ugwadu sesemane elalubo tiwai gilama yaibao.”
PSA 89:30 “Tiali goli, te agai wąį nǫų hani dabego te eno bomai po sela sąnama, tama augwaligo eno kolesaga wali me pisąma,
PSA 89:31 tama augwaligo eno po tudiba munama, tama augwaligo eno bomai po wali me pisąbaso da,
PSA 89:32 teda eno augwaligo dwai sęba homu kone paliyu, tama augwaliba te dene mawaibao. Tama eno te augwa yali dwai sęde homu kone palu, te augwali keloago elaiba wai.
PSA 89:33 Tiali goli, te sogo me te Devit te eno wei mu elaludaibao. Tama eno aga me tagalogobeo, tama eno agade te dąų walali po mu me tagalogobeo.
PSA 89:34 Tama eno aga dali te dąų walali bomai po te kontrak me tagalisiąma, tama eno te ena po deli me hasegeliyu me egobeo. Mu menio.”
PSA 89:35 “Eno dąų walubo po te deli sogo naga weyu, tama eno ena digi tedali wiegi yai nogi nogilama weyu, te po dąų walali, tama te sesemane sogo me elalua pidu, elalua paibao. Eno te tama wai. Eno te tibo po Devitba me wagobeo wai.
PSA 89:36 Te aga hani wąį nǫų dabe me sia sisąma, te sesemane me elaludaibao wai. Tama aga hanigo te we bidi dabe sesabi elama, mu tonalu, te giliga me elalubo tiwai gilama yaibao.
PSA 89:37 Te augwali sesemane elaludu, te polua dagalude elalubo tiwai eyu, tama te we bidi dabeba te eno po mu da weyu, te ola mawaibao,” wali.
PSA 89:38 Genuai Bidi, nago te po Devit dali polobadu dąų walai goli, megi nago te sa muani kingba nago wado po wali. Nago aga tagalama, aga tudiba muani.
PSA 89:39 Nago te naga sę bidi dali dąų walali te kontrak po togwali. Nago agai te kingo tobolude mubo madi te tǫba sąnama, tama meda yali.
PSA 89:40 Nago agai taun bagulali obo dabe togolama, tama agai te ami bidi dabego bomai be dabe te dolalio.
PSA 89:41 Te pądu soabo bage tigidaligo te agai doado bage dabe wi sabo dao. Tama te abagi dabego agaba posobo po wabo dao.
PSA 89:42 Nago aga te boi bidi dabego elalumainu ilali, tama nago augwali deliba sisinama, te dili bubo sę emainu yai.
PSA 89:43 Nago agai ami bidi dabego te hwįbo nai dabe usu isąbo sę ilali, tama nago aga te hwįbo side aiyaba elalumainu ilalio.
PSA 89:44 Nago aga elaluama, tama aga te king ma bidibeo, tama agai te we bidi munu ma tonalubeo. Tialima, agai genuai nogi dali, bomo dali si silalio.
PSA 89:45 Nago aga monu dabe polo tama pedalumainu ebaso, tama hale genuai mugo aga mesegelalio.
PSA 89:46 Genuai Bidi, nisu naga sogo te nage dualaludaibawe? Te sesemane sogo usu nama da, agawe? Nisu naga sogo te nago haliga sębę te sia posolo mu ebo tiwai elaluaibawe?
PSA 89:47 Genuai Bidi, iya, nago te pęwadage sogo naga bidabo bidiba homu kone palao. Nago da nigali, tiali goli da te isaibao. Nago odolali da nigali da, agawe?
PSA 89:48 De mu te sesemane bidada pidu, bidada pelama, tama te me isigobe dawe? De te bomo elama bididu, te aga gų pageba me pogobewe? Te mena bidi deli me tegobeo, mu menio.
PSA 89:49 Genuai Bidi, magi yaliwe? Nago megi da, da wei me ebe da, agawe? Te nago Devit dali te dąų walali pode menagi yaibawe?
PSA 89:50 Genuai Bidi, nago naga sę bidi, ena homu kone palao. Te bidi dabego enaba posobo po obao. Eno te gasa hani dabego te kęnę po wabo sęgę tolobo dao.
PSA 89:51 Genuai Bidi, te nago boi bidi dabego enaba po dwai wali, te naga sa muai king dao. Te ena tigidaliba pabode te augwaligo dwai po enaba weyu ebo dao.
PSA 89:52 Dago te Genuai Bidigo nogi te sesemane bidada pabo sogo ugwaba sao. Te mu tama dao.
PSA 90:1 Genuai Bidi, sesemane sogo nage te dago be mu tiwai dao. Te wąį nǫų dabe nage dali bidali, tama megi da me te tiwai bidibo dao.
PSA 90:2 Te sesemane bidada peyu, bidada pabo sogo, nage te God bidibao, te polobadu me bidali, nosali me bidaibao. Tigidali bulu du pedalisąbadi, tama nago te tǫde nai tigidali nigisąbadi, tiali goli, nage God bidai dao.
PSA 90:3 Nago te we bidi dabe isimainu elama, tama augwali te tǫ ma pedalumainu ebo da. Tama nago te tama po wali, “Dage tǫde we bidi, dage isilama, tama te tǫ ma gagawaibao,” wai dao.
PSA 90:4 Nago homu kone palu, tama te kibu be 1,000 dąį yabo homu te deli sogo bubugade tiwai naga elama, tama te polo tama pela silaibao, te pilama hodalu, te do bidali sogo tiwai gagawaibao. Awe, te kibu be 1,000 te hulide pęwadage sogo naga tiwai ebo dao.
PSA 90:5 Nago te bidi dabe sela sąbo, te wę asiyu, bidi selama, tama augwali isibo tiwai yaibao. Augwali te pęwadage sogo bidiyu, te naa tiwai naga ebao. Augwali te gesi nosa te kigamu pedalubo tiwai elama,
PSA 90:6 tama te genuai holama, tama duduli pedelai. Tiali goli, te piode te sasia pelama, tulalubo dao.
PSA 90:7 Nago dade wado elalubaso, tama nago da dolobo dao. Nago dade haliga sębę ebaso, tama da wi mu ebo dao.
PSA 90:8 Nago dago dwai kolesaga tigidali subo da. Tama dago geme dualama ebo sęgę tigidali, te nago pepeli diliba hanilama, munama, tama nago sualio.
PSA 90:9 Nago wado ebogo te da tǫde bidibo bodolu pęwadage ilali. Mu tama, te dago bidibo sogo polo silali, te dago mobo deli sogo naga sabo tiwai ebo dao.
PSA 90:10 Da bidibo kibu be te 70 usu naga bidaibao. Tama dago bomo elalubaso, da te kibu be 80 usu naga bidaibao. Tiali goli, te tigidali kibu bede da te sę dene naga eyu, tama sęgę naga gegaibao. Te tigidali kibu be polo silama, tama da me pela silaibao.
PSA 90:11 Dego te nago wado ebo genuai bomo te bugagia konebawe? Tama nago augwaliba te wado ebo homu ebode genuai wi te we bidi augwaliba pedalubo te koneaniwe?
PSA 90:12 Nago da bugagia ola mobaso, te dago koneaibao, da te tǫde sesabi elama me bidigobeo. Tama tiyu, dago wiegi yai kolesaga koneama elaluaibao.
PSA 90:13 Genuai Bidi, nisu naga nago haliga sębę ebo me elaludaibawe? Nago naga sę bidi da homu dene yao.
PSA 90:14 Nago da sesemane sogo wei yali, tama tego te tigidali sogo kigamu te da pągąnumainu yao. Tama tiyu, te tigidali sogo da te bidibo ula dali bidiyu, dago homu wiegi yai pemene elama, te bugai haliga yaibao.
PSA 90:15 Hasiabolo nago daba sęgę mawai. Tialima, megi da, nago da te wiegi yai pemene yabo usu nao, te sogo dabe da te sęgę tolali. Mu tama, hauwa kibu bede te da dwai bidali, tama nago da te wiegi yai pemene ilibo te tigidali kibu bede dwai bidali usu nama, tama tiwai yao.
PSA 90:16 Nago te naga bomai sę dabe te naga sę bidi dabolo ola mao. Nago te wiegi wiegi yai bomo te dago nosali pedalubo wąį nǫų dabebolo ola mao.
PSA 90:17 Genuai Bidi, nage dago God da, dago homugo te nago olo tau sabo wiegi yai kolesaga dabolo eyu, tama da wiegi yai bugagia ilao. Tama dago ebo sę tigidali te wiegi yai pedalumainu ilao. Mu tama, nago te dago ebo sę tigidali dąų walama, tama te bugagia elalumainao.
PSA 91:1 Bidi te Ugwade Mu Bidibo Godiba pelama, te agai aga tonalumainu yali, aga te Tigidali Bomo Elalubo God pąde bidiyu, tama agai aga mesegalubo dao.
PSA 91:2 Te bidigo te tama po Genuai Bidiba waibao, “Nago ena bagualu, tama nago ena bugagia seselalubo dao. Nage eno God dao. Eno konealubo homu nageba muai dao.”
PSA 91:3 Mu tama, te Godigo nage bugagia tonalu, tama te geme dualalubo naigo nage me dologobeo. Tama agai nage bagualubaso, tama te dwai gasi dabego nageba me sogobeo.
PSA 91:4 Te agai nage bugagia mesegalu, te kakarukgo aga wai dabe te bogogo mesega sabo tiwai yaibao. Nage te bugagia Genuai Bidigo bogo dologode dualaluaibao, tama agai nage tonalubao. Agai nage tonaluabo po te tibo po me wagobeo. Tama tiyu, nage Genuai Bidi dali bidiyu, te bidi aga te hwįbo sabelede duala sabo tiwai ebo dao.
PSA 91:5 Nago te magi nai me deli nageba te hulide pedelaiba homu eyu, wi me egobeo. Tama te giligade nage te magi nai me delide wi eyu, te nage dolabo nai me deli te polo pedelabo homu wi me elamu dao.
PSA 91:6 Tama te genuai gasi nageba te hulide pedelabo te wi me igio, tama te giliga tomode me te dwai nai nageba pedaliyu, tama nage dolainu me egobeo.
PSA 91:7 Te 1,000 bidi nage pąde isibaso me, tama te 10,000 bidi nago dolo nogo badu isibaso, te tagalao, te dwai nai nage pąba me asogobeo.
PSA 91:8 Te naga digi te Godigo te dwai sę ebo bidi dabe augwa yali sęde wei ponobo te nago suaibao.
PSA 91:9 Nage te Godiba pelama, te dwai nai dabede geme duala sao, tama te Ugwadu Mu Bidibo Godigo te nage mu seselalubo bidi dao.
PSA 91:10 Tama tiyu, te dwai nai nageba me pedalugobeo. Tama genuai gasi te nago be pąba me asogobeo.
PSA 91:11 Te Genuai Bidigo aga ensel dabeba te nage menaba pabo madi tigidali badu te nage tonalubo sę mawaibao.
PSA 91:12 Tama te ensel dabego nogogo nage tolalu, tama tiyu, te masigigo nago sągąde me dologobeo.
PSA 91:13 Te nago laion me hasamani agayu, tama te gesi ogwa bidi laion, me genuai hasamani dwai mu me agayu, yaibao.
PSA 91:14 Godigo te tama po wali, “Te eno te ena wei mu ebo bidi dabe augwali ma saibao, tama te eno te ena mu koneani bidi dabe seselalubo dao.
PSA 91:15 Te augwaligo enaba gedu haluasa po wabo sogo, te eno augwaligo wabo po odaibao. Tama te sęgę augwaliba pedalubaso da, te ena augwali dali bidaibao. Tama eno augwali ma selama, tama augwaliba te genuai nogi mawaibao.
PSA 91:16 Te augwaligo bidabo ula te ibanu gana bobage kidilama, te augwa gasa ugwadu me daganobo tiwai yaibao. Tama eno augwali ma selama, tama augwali ena dali bidaibao,” wali.
PSA 92:1 Genuai Bidi, nage Ugwadu Mu Bidibo God da, te eno nageba usu da wabo te wiegi yai da, tama te nago nogi ugwaba sabo tęąbi dabe waibao.
PSA 92:2 Tama te tigidali kigamude te eno nageba te nago ena wei ebo po hanilama wabo, te wiegi yai ebao, tama tigidali sogo hulide te nago ena bugagia tonalubo da po hanilama, nageba waibao.
PSA 92:3 Eno te wiegi yai musik te gitade weyu, te nage nogi ugwaba saibao.
PSA 92:4 Eno te nago bomai sęba homu kone palama, tama ena bugai haliga mu elama, tama eno te wiegi yai homu pemene ebo tęąbi ebo dao.
PSA 92:5 Genuai Bidi, nago te genuai sę mu ebo dao. Nago homu kolesaga te genuai mu elalubao.
PSA 92:6 Te homu kolesaga meni yai bidi, te umawai bidigo, te tama sę ebo dabe me koneainu ebaso, usu me egobeo.
PSA 92:7 Te dwai bidi dabe te wiegi yai nosa tiwai ma pedaliyu, tama te dwai kolesaga ebo bidi dabego te doado bage hauwa selama, tama augwa bugagia bidaibao, tiali goli, nago augwali mu dolaibao.
PSA 92:8 Magi baso meni, Genuai Bidi, naga digi te sesemane king bidada peyu, bidada paibao.
PSA 92:9 Dago koneai, te nageba boi bidi ebo bidi dabe te augwali isaibao, tama nago te dwai sę ebo bidi dabe aiyaba elaluaibao.
PSA 92:10 Nago enaba genuai bomo mawai, te uni bulmakau omaigo bomo tiwai mawai. Nago enaba wiegi yai sę ebaso, tama ena wiegi yai pemene mu ebo dao.
PSA 92:11 Eno te ena boi bidi dabe dolobo sulama, tama eno te dwai bidi dabego gela wabo odali.
PSA 92:12 Te doloba pai kolesaga ebo we bidi dabe te wiegi yai pedalu, te nigo wiegi yai du walubo tiwai yaibao, tama te genuai holama, te Lebanonde te wiegi yai ni sida dabe tiwai yaibao.
PSA 92:13 Augwali te Genuai Bidigo bede bulai ni dabe tiwai yaibao. Augwali te dena Godigo be tomode te wiegi yai mu pedalubo tiwai dao.
PSA 92:14 Te augwali monu dabe pedalubo sogo, te augwa nai du me waludaibao. Augwali te bomo elalu, tama augwali me sasia pabeo. Te augwa yabe te ni yabe gesi sogo elalubo tiwai sesemane elaluaibao.
PSA 92:15 Te kolesaga augwaligo te we bidi augwaliba ola mabo dao, Genuai Bidi te mu doloba pai dao. Agai te ena seselalubo bomo elalu, tama agade dwai sę ebo me elalubeo. Mu menio.
PSA 93:1 Genuai Bidi king bidibao. Agai genuai nogi mu elalubao, tama genuai bomo me elalubo. Agai e tǫ te aga bidibo pesagede bomo elama, mu elalumainu yai dao.
PSA 93:2 Genuai Bidi, te tigidali nai me pedalisąbadi, nage bidali. Nage sesemane bidada peyu, bidada pali, tama nage te king sesemane bidada peyu, bidada pabo dao.
PSA 93:3 Genuai Bidi, tamu ąį ge bo dali aiyanu mu igulali, te kulukulu umabo mu waibao. Te bomonama, mu kulukulu wabo dao.
PSA 93:4 Genuai Bidi, te nago genuai bomogo nago te dagalude tigidali nai tonalubao. Te tamu ąįgo kulukulu wabo bomo te dwasianu naga ebao. Tiali goli, nago bomo te genuai mu elalubao. Te tamu ąį dini peda peyu, te nambisde bomonama kulukulu wabo, tiali goli, te ąį dini dabego bomo te nago bomo dali tiwai si me usugobeo.
PSA 93:5 Te nago tigidali bomai po te sesemane elalua peyu, elalua pobao. Mu tama, Genuai Bidi, te nago tempel be te tedali wiegi yai sesemane elalubo dao.
PSA 94:1 Genuai Bidi, nage da te dwai sę ebo we bidi augwaliba wei ponobo God dao. Megi nago sębę ebo augwaligo sumainogo waselao.
PSA 94:2 Nage hogodama, nago po tųba tigidali we bidi pedelaibao. Megi nage aselama, hagoma eyu dwai sę ebo bidi augwaligo ebo kolesaga wei ponao.
PSA 94:3 Nisu naga sogo dwai sę ebo bidi augwaligo ebo kolesagade dwagi yai homu egowe? Genuai Bidi, augwaligo bidabo sogo nisu naga elalubawe?
PSA 94:4 Nisu naga sogo elaluai dwai sę ebo bidi dabe augwaligo dwai kolesaga ebo dali dwagi yai homu te dwai sę dali yaibawe?
PSA 94:5 Genuai bidi, augwaligo nago we bidi aiyaba elaluama, tama genuai sęge augwalibolo mabo dao.
PSA 94:6 Augwaligo te wilawe we dabe, augwali ela muyu, tama te tiana wai dabe me ela muyu, tama gasa bulu we bidi dago tǫde bidibadi, augwaligo ela muyu ebo dao.
PSA 94:7 Tama augwaligo te po wabo, “Genuai Bidi agai da subo menio. Israel bidigo God, agai dago te sę ebo agai tede homu palobo menio,” augwaligo te po wabo dao.
PSA 94:8 Dage eno we bidi, magi baso dagego gegeda pobawe? Dage kolesaga meni yai, nisu sogo dagego koneaibawe?
PSA 94:9 Godigo dago olo nigai. Tama agai odogobewe? Tama God agai dago gedu me nigai. Tialima, aga digi tonolo bilibo meniwe?
PSA 94:10 Agai te tigidali tǫde bidibo bidi hani tonalubo dao. Tialima, agai augwali dodolobo meniwe? Tama aga tigidali we bidigo po ola mabo bidi. Agai konebewe?
PSA 94:11 Genuai Bidi agai tigidali we bidigo homu koneai. Agai koneai, augwaligo homu kolesaga te olo magi nai me tiwai yaibao.
PSA 94:12 Genuai Bidi, nago te bidi me deli dodolomainu eyu, nago bomo yai po te bidi ola mayu da, te bidi aga dwagi yai homu emainao.
PSA 94:13 Nago te sę ebo aga olo bidimainogo tiwai, tama sęgego aga gegeidali weyu, tama te dwai bidi dabe isilama, gų pageba paboba usu nigi pabo dao.
PSA 94:14 Magi basowe, Genuai Bidigo aga we bidi augwali tagalobo menio. Mu tama, aga sa muani we bidi augwali tudiba me mugubeo.
PSA 94:15 Tama nosali bidi dabego po tų ebode, augwaligo sę dolo naga yaibao, tama dwagi yai doloba pai bidi augwaligo usu dao po weyu, te kolesaga wali paibao.
PSA 94:16 Niwai bidigo ena tau selama, tama te dwai sę ebo bidi aiyaba elaluaibawe? Niwai bidigo ena tau selama, te dwai sę ebo bidi sela sąwaibawe?
PSA 94:17 God agai ena tau sigi menigi sogo da, ena polobadu isai gų pagede polo pila mugi dao.
PSA 94:18 Eno te homu yai, “Eno sągą kikila peyu, ena tula muaibao,” wai. Tiali goli, menio. Genuai Bidi nago ena godolo mu eyu, tama nago ena nogo tola selama, ena te dwai sęgę ebo digi tulalubeo.
PSA 94:19 Tama eno homu sęgę yali sogo tama eno homu nai hauwa dali yai, nago eno homu dwagi yai eyu, tama nagame elama bidai, tama eno homu dwagi yai emainogo yai.
PSA 94:20 Te bomo yai po mubo bidi dabe augwaligo te we bidibolo augwaligo dwai sę emainao wai. Nago te tobage dwai sę ebo tobolu bidi dabe dali abagi homu ebo menio.
PSA 94:21 Augwaligo dwagi yai sę ebo bidi dwai sęgo aga dolainogo sisinama, po mibo dao, tama augwaligo dwai sę isąwai bidi dabe dali po tų ebo dao, augwali elainogo tiwai.
PSA 94:22 Tiali goli, Genuai Bidi agai bomo mu elama, ena tau sai. Ena agaba pelama, eno God agai ena bugagia tonalubo dao.
PSA 94:23 Augwaligo dwai kolesaga hauwa mu yai, tama agai augwaligo dwai sę yali wei begelaibao. Genuai Bidi dago God, megi agai augwali tigidali dolaibao.
PSA 95:1 Dage asiąo. Dago te Genuai Bidi nogi ugwaba sabo balia po wainao. Dago te bomai Godigo da ma sali, te homu koneama, tama dena balia weyu, tama agaba wiegi yai pemene yao.
PSA 95:2 Da te aga pąba pelama, tama agaba usu da po wao. Dago te wiegi yai pemene ebo balia po meba weyu, tama agai nogi ugwaba sinao.
PSA 95:3 Magi baso meni, Genuai Bidi aga te bomai God dao. Aga te bomai king, tama te tigidali tibo god daide aga ugwadu daide bidibao.
PSA 95:4 Agai te tigidali bulu tǫ pedai tonalubao, te aiyaba odogo gulali bulu tigidali, me te ugwanu igiluali bulu du tigidali, te agai naga tonalubo dao.
PSA 95:5 Aga digi te tǫ, me tamu ąį nigilama, tama tialima, agai augwali tonalubao.
PSA 95:6 Dage asiąo, dago tobolu basi gulama, tama agaba lotu wainao. Genuai Bidigo da nigai. Tialima, da aga pąba pelama, tama kidu sugunao.
PSA 95:7 Aga digi dago God dao. Aga digi da we bidi te sipsip wai tiwai tonalubao, tama agai da nai mobao. Te e sogo megi tama dagego agai pedauwalide po odiąo.
PSA 95:8 Genuai Bidigo te po wai, “Dagego te duga haliga bomonama dąų ola sigimio, te polobadu duga wąį nǫų dabego te bulu Meriba me Masa, te tǫ wa pai bulude yali homu tiwai igimio,” po wai.
PSA 95:9 “Te bulude augwaligo ena usu sali. Augwaligo te eno ebo tigidali bomai sę suali, tiali goli, augwaligo ena usu sai dao.
PSA 95:10 Eno te hani we bidide dwai haliga iduali, te kibu be bidi sese siba usu nai. Tama tibaso, eno te po wali, augwa hagoma mu yali. Augwaligo te eno wali pabo homu me isiąwai.
PSA 95:11 Tama tialima, te ena haliga sębę elama, tama augwaliba te tama po dąų weyu wali, ‘Mu tama, dage te bulu tomoba me pogobeo, eno te dage toma nomainu mawainu yali buluba me pogobeo,’ po wai dao,” wali.
PSA 96:1 Dagego gesi balia Genuai Bidiba waiyąo. Dage tigidali tǫde we bidigo te Genuai Bidiba balia po waiyąo.
PSA 96:2 Genuai Bidiba balia wao. Agai nogi ugwaba sao. Agai da ma sai. Te tigidali side dago te po te we bidi dabeba pusa maiąo.
PSA 96:3 Dagego agai genuai nogide po te tigidali tǫ pedai kantride bidibo we bidi hani dabe pusiąo. Te tigidali we bidiba te agai genuai wiegi yai sę dabe yali po pusa mao.
PSA 96:4 Genuai Bidigo te genuai nogi elalubao. Dago agai nogi ugwanu mu sidu geao. Da te tibo god dabe wi me igio. Dago te Genuai Bidide naga wi yao.
PSA 96:5 Magi baso meni, te gasa hani we bidi dabego tibo god dabe te augwali tibo god naga dao. Tiali goli, Genuai Bidigo te dagalu dali, te ugwadu elalubo nai tigidali nigai dao.
PSA 96:6 Genuai Bidi te genuai nogi elalu, te king bidibao. Te aga tedali wiegi yai tempel bede te tigidali doado bagego te agai bomo dąį ilama, tama aga gasa sawi yai au te elalubao.
PSA 96:7 Dage tigidali tǫde bidibo hani we bidi, dagego agai genuai nogi me bomo te ugwaba sao.
PSA 96:8 Dagego Genuai Bidigo genuai nogi ugwaba sao. Te ofa yabo nai me deli selasa, te agai tempel be tomoba pao.
PSA 96:9 Dage tigidali we bidi te tedali wiegi yai bidiyu, tama Genuai Bidiba lotu waiyąo, tama dage agade noma siąo.
PSA 96:10 Dagego te tigidali we bidi haniba te tama po waiyąo, “Genuai Bidi te king bidibao,” wao. “Agai te tǫ dąų walama, tama te tǫ bugagia bidiyu, tama te mumunu me egobeo. Nosali te Genuai Bidigo po tų eyu, tama tigidali bidi dolo dagalaibao.” Te po wao.
PSA 96:11 Dagalu, me tǫ, dage pemene yao. Tamu ąį, nage dali, te nage tomode bidibo tigidali nai, dagego kidagalo weyu, i hae waiyąo.
PSA 96:12 Tigidali gi me, dage dali te dagede elalubo nai tigidali, dage wiegi yai pemene mu iyąo. Tama te Godigo gedude, te buside tigidali nigo augwa te wiegi yai pemene ebo balia waibao.
PSA 96:13 Magi baso meni, Genuai Bidi te aselama, te tigidali tǫ tonaluagasaibao. Agai te tigidali tǫde we bidi te doloba pai kolesagade tonaluaibao. Tama agai augwali te mu pogo naga dagalaibao.
PSA 97:1 Genuai Bidi king bidibao! Tǫ, nage pemene yao. Tama te tamu ąį tomode elalubo bulu ailan dabe, dage bugai haliga iyąo.
PSA 97:2 Te pǫ dabe me hulia sabogo aga mesegelebo dao, tama agai te we bidi dabe te doloba pai kolesagade tonalubao.
PSA 97:3 Sia te aga pabodu polasa peyu, tama aga te pobeasa biliduali boi bidi dabe ulaibao.
PSA 97:4 Agai te be selego ula pedalumainu ilama, tama te tǫ ula ilibao. Tǫgo sulama, tama noma sabo dao.
PSA 97:5 God te tigidali tǫgo Genuai Bidi dao. Aga asobaso, tama te bulu du dabe te wę tiwai pedelaibao.
PSA 97:6 Te ugwadu elalubo dagalugo te agai doloba pai kolesaga po pusuyu, tama tigidali hani we bidigo agai te boma pai ula subo dao.
PSA 97:7 Te tibo god dabeba lotu weyu, te nogi ugwaba sabo we bidi dabe, augwali te hale dwai mu saibao. Genuai Bidigo te tibo god wabo nai tigidali aiyaba elalubo dao.
PSA 97:8 Te Saion we bidi tigidali, me te Juda taun we bidi dabe, augwa te bugai haliga elama, tama nago po tųde wiegi yai pemene yaibao.
PSA 97:9 Genuai Bidi, nage te Tigidali Bomo Elalubo God, nago te tigidali tǫ pedai tonalubao. Nago genuai nogi elalu, tama nago tigidali tibo god aiyaba elaluai dao.
PSA 97:10 Genuai Bidigo te dwai kolesaga wei isąbo we bidi dabe augwali te agai wei homu mu ebao. Agai te aga we bidi dabe bugagia tonalu, tama augwali te dwai bidi dabego nogode ma sabo dao.
PSA 97:11 Godigo te doloba pai we bidi dabeba ula mayu, tama augwali homu pemene ilibo dao.
PSA 97:12 Dage doloba pai we bidi, te Genuai Bidigo ebo sę dabede pemene yao. Te homu kone palama, tama agaba usu da weyu, aga te tedali wiegi yai da wao.
PSA 98:1 Dago gesi balia Genuai Bidiba wao. Agai te haniani wiegi yai sę yai. Te agai genuai bomogo, tama aga tedali wiegi yai kolesagade naga, agai te hwįbo boi bidigo bomo aiyaba elaluai.
PSA 98:2 Genuai Bidi agai te hwįnama, te boi bidi aiyaba elaluali po pusali, tama agai augwali ma dobola sabo bomo te aga hani we bidi dabeba ola mawai, te agai Israel dabe ma sali sogo tialio.
PSA 98:3 Agai te aga dąų walali pode homu konealuai, tama agai te Israel dabe homu dene eyu, tama augwali me tagalubeo. Tigidali bulu te tigidali we bidigo sualio. Te dena Godigo te boi bidigo bomo aiyaba elaluama, tama da ma sai dao.
PSA 98:4 Dage tǫde we bidi dabe i hae weyu, Genuai Bidiba pemene yao. Te bugai haliga ebo tęąbi hodolama weyu, tama agai nogi ugwaba sao.
PSA 98:5 Te gita eliyu, tama te tęąbi dabe weyu, te Genuai Bidi nogi ugwaba sao. Te gitago wiegi yai musik mu waiyąo.
PSA 98:6 Te biugel me ona eliyu, me bu weyu, tama i weyu, te wiegi yai pemene Genuai Bidiba yao, aga te king dao.
PSA 98:7 Tama tamu ąį, nage dali te nagede elalubo tigidali sųgų me, dagego te tęąbi waiyąo.
PSA 98:8 Te genuai soabo ąį dabe, dagego te nogo eliyąo. Tama te bulu du dabe, dagego tęąbi weyu, te Genuai Bidi gedude pemene yao.
PSA 98:9 Magi baso meni, aga te tigidali bulu tǫ tonaluainu asobao. Tama aga te king bidu, tama tigidali we bidi te doloba pai kolesagade tonaluyu, te po tų ebo dolo naga yaibao.
PSA 99:1 Genuai Bidi king bidibao. Te we bidi dabe wi elama, noma sai. Aga te sia kingde te ensel dabe daide dugulalubaso, tama te tǫ mali ebo dao.
PSA 99:2 Te Saionde Genuai Bidigo te genuai bomo mu elalubao, tama agai te tigidali tǫde bidibo hani bage tonalubao.
PSA 99:3 Tigidali we bidigo aga te polalubo king te genuai nogi elalubo homu koneaibao. Tama augwa aga genuai nogi ugwaba somainu yaibao. Aga te tedali wiegi yai mu dao.
PSA 99:4 Bomai king, nago te doloba pai kolesaga wei ebo dao. Nago da Israel we bidi dabeba te doloba pai me wiegi yai kolesaga menama, tama dago wali pali. Tama nago dago te gasa we bidi dabe te doloba pai kolesagade dagalumainu ilali.
PSA 99:5 Dagego te Genuai Bidigo nogi ugwaba siąo, aga te dena God dao. Dage pąba pelama, tama agaba lotu waiyąo. Aga te tedali wiegi yai mu dao.
PSA 99:6 Moses dali Aron si te Genuai Bidigo pris bidali, tama Samuel me augwalide te Godiba lotu wali bidi me deli dao. Augwa te Genuai Bidiba gedu haluasa po obaso, tama agai augwaligo gedu haluasa po wabo odai dao.
PSA 99:7 Aga te genuai dagalu pǫde bidama, tama augwaliba te bomai po mani. Tama te Godigo augwaliba mani bomai po tigidali te augwaligo wali pai dao.
PSA 99:8 God, dago Genuai Bidi, nago te naga we bidi augwaligo gedu haluasa po odali. Nago augwaliba ola mawai, naga digi nage te God, tama nago te augwaligo sęgę sela sąbo dao, tiali goli, nago te augwa ebo dwai sęde te dene mayu yai dao.
PSA 99:9 Te dena Genuai Bidi Godigo nogi ugwaba sao. Tama aga bulu dude te agaba lotu wao. God, dena Genuai Bidi, aga te tedali wiegi yai mu bidibo dao.
PSA 100:1 Tigidali tǫde we bidi, dagego God dali dwagi yai homu elama, tęąbi wao.
PSA 100:2 Dagego dwagi yai homu Genuai Bidi dali eyu, lotu po waiyąo. Dagego dwagi yai homu ebo tęąbi weyu, tama aga pageba pao.
PSA 100:3 Dagego Genuai Bidi homugo konebo tagaligio, aga deli te God mu dao. Aga deligo da nigai, tama da aga we bidi dao. Da agai we bidi, da agai te kibu sipsip tiwai dao.
PSA 100:4 Da agai dwagi yai be tomoba pelama, agabolo puba hwi po olama, gedu haluasa po weyu, aga nogi ugwaba sao. Dago aga dali usu da olama, gedu haluasa po weyu, tama agabolo genuai nogi mao.
PSA 100:5 Genuai Bidigo dwagi yai kolesaga naga ebo dao. Sesemane sogo agai da godolo mu ebo dao. Agai sesemane bidada pabo sogo mu po wabo wali pabo dao.
PSA 101:1 Genuai Bidi, eno te nage wali mu pabo kolesaga, me te doloba pai kolesagade tęąbi po obao. Genuai Bidi, eno nageba homu kone palama, tama eno te tęąbi po obao.
PSA 101:2 Te eno doloba pai kolesaga naga wali paibao. Genuai Bidi, mena sogo nago ena tau sagasaibawe? Eno te doloba pai kolesaga naga ena bede ebo dao.
PSA 101:3 Eno te dwai sę ebo kolesagade usu da me wagobeo. Mu menio. Eno te God tudiba mubo bidi dabego kolesaga wei me egobeo. Ena augwali dali me biligobeo.
PSA 101:4 Eno te tibo po wabo kolesaga me wali pogobeo. Tama eno te dwai sę ebo kolesaga dabeba homu kone me palogobeo.
PSA 101:5 Te eno te gasa bidi dabeba posobo po wabo bidi dolaibao. Tama eno te hagoma ebo bidi dabe bidimainu me sula tagalogobeo.
PSA 101:6 Te eno te God wei elama, te wali pabo bidi dabe augwali naga te eno genuai wiegi yai bede ena dali bidimainu yaibao. Tama te wiegi yai kolesaga sesemane ebo bidi dabe, te bidi dabe naga te eno sę emainu yaibao.
PSA 101:7 Te tibo po wabo bidi dabe, augwali te eno genuai bede me bidigobeo. Tama te tibo po wabo bidi dabe ena dali bidimainu me egobeo. Mu menio.
PSA 101:8 Tigidali side eno te dwai sę ebo bidi te dago bulu tǫ pedaide dolaibao. Eno te dwai sę ebo bidi dabe sela sąyu, tama augwali te Genuai Bidigo taunde bidimainu me egobeo.
PSA 102:1 Genuai Bidi, eno gedu haluasa po wabo odao. Eno nageba i wabo, te nago ena tau somainu ebao. Eno i wabo odao.
PSA 102:2 Te ena sęgę genuai tolobo sogo, nage enade geme me duala sigio. Eno gedu haluasa po odao. Tama eno nageba i wabo sogo, nago eno i polo odolama, tama ena tau sao.
PSA 102:3 Te eno bidibo ula te sia hano tiwai dao, te dwasianu sogo naga elaluama, tama pela silaibao. Tama eno tigi posolo mu dao, te genuai siago ulubo posolo tiwai ebo dao.
PSA 102:4 Godigo ena elalubo, te bidigo wa pai nosa agabo tiwai yali. Tama eno haligago te nai tuabo wei me ebeo.
PSA 102:5 Ena dene ebaso, tama eno i dwagilama mu wai. Tama eno tigi te me nisibeo, ena mu nomona salio.
PSA 102:6 Ena te wa pai bulude te ba kemodage bidibo tiwai bidibo, tama te hulide bilibo ba me deli te tolabo pesagede bidibo tiwai eyu, tama te bidi mu meni yai pesagede mu bidibao.
PSA 102:7 Ena te betde piali, tiali goli eno gedu pedaluali. Iya, enaduba deli te ba me deli te be pedu daide ugwadu dulalubo tiwai ebao.
PSA 102:8 Te giligade, me hulide, te boi bidi dabego enaba dwai po wabo. Augwaligo posobo po enaba weyu, tama ena nogi weyu, te ena dolobo sęgo gegebo sogo te dwai po wabo.
PSA 102:9 Nago wado po genuai enade elalubaso, tama ena te sia keli naga tudu, tama gedu ąį gela guga te kapba tulaluama, tama eno tuyu ebo dao. Nago ena selama, tama ena meba me te pobele bage sąbo tiwai yalio.
PSA 102:11 Eno bidibo ula te pęwadage sogo naga bidibao, te giliga pio dega sabo tiwai yali. Ena te nosa wa pai tiwai yai dao.
PSA 102:12 Tiali goli, Genuai Bidi, nage sesemane sogo king bidibao. Te nosali pedalubo hani we bidi tigidaligo te augwaligo nage koneaibao.
PSA 102:13 Megi da, nage aselama, tama nago te olo tau sabo wiegi yai kolesaga te Saion taunba yagasu, tama aga tau sao. Te nago aga homu dene yabo sogo te pedelalio. Megi naga tama, te tiwai sę ebo sogo dao.
PSA 102:14 Te Saion taun dolali, tiali goli te nago we bidi dabego aga wei mu ebao. Megi da, aga dolali, tiali goli augwaligo aga homu dene mu yai dao.
PSA 102:15 Tigidali hani bage te Genuai Bidide wi elama, tama aga dologode bidibao. Tama tigidali tǫde king dabe, te augwali agai bomode wi yaibao.
PSA 102:16 Nosali, Godigo te Saion taun ma nigibo sogo, agai te aga bomo te we bidi dabeba ola mawaibao.
PSA 102:17 Tama agai te aga we bidi dabego gedu haluasa po odaibao, te polobadu agai augwali tagalama, te augwali odolali bidali. Te agai augwaligo gedu haluasa po wabo te tudiba ma mugobeo.
PSA 102:18 Te sę Genuai Bidigo yali, dago te bukude asęnama muao, te nosali pedalubo te wąį nǫų dabe augwaligo konemainu yao. Nosali te idago augwali ame nabo side, teda augwaligo me te Genuai Bidigo yali sę po odolama, tama augwaligo me te aga nogi ugwaba somainu yai dao.
PSA 102:19 Dago te tama po asęaibao: Genuai Bidi te ugwadu aga tedali wiegi yai pesagede bidibao, tama aiyaba tonalubao. Aga te dagalude bidiyu, tama te tǫba aiya tonalubo dao.
PSA 102:20 Agai te kalabus bidi dabe augwa tolali sęgęde gela wabo odali. Tama agai te po tų silama tama augwa te kalabus silali bidi dabe tau siyu, te augwali me isidali weyu yalio.
PSA 102:21 Tama tibaso te Jerusalemde te we bidi dabego te Genuai Bidigo nogide po pusama, tama augwaligo agaba usu da po waibao.
PSA 102:22 Augwaligo te tama tiaibao, te we bidi hani dali, te augwa king dabe dali, te Jerusalemba sisinama, te Genuai Bidiba lotu wabo sogo te tama tiaibao.
PSA 102:23 Ena gesi ogwa bidide digi, tama Genuai Bidigo eno bomo dolali. Ena te eno bidibo ula sesabi elama, bidimainu ebeo. Agai ena bidabo sogo bodolu togwai dao.
PSA 102:24 Eno God, nage sesemane bidada peyu, bidada pobao. Nago megi ena me tagaligio. Ena monu dabe me ebeo, ena gesi bidi tigi me elalubao.
PSA 102:25 Polobadu mu nago te tǫ nigali. Tama naga nogogo digi nago te dagalu nigiyu, tama ugwade elalubo nai tigidali nigai dao.
PSA 102:26 Te tigidali nai te hagawaibao. Tiali goli, nage te sesemane bidaibao. Te augwali te poloba ugwa badia pabo tiwai pedelama, te dolaibao. Tama nago augwali hasegelama, te bidigo ugwa hasegelibo tiwai yaibao, tama augwali pela siliyu, tama me elalugobeo.
PSA 102:27 Tiali goli, nage da, me bididubadi, tama nage me isigobeo.
PSA 102:28 Tama nago dago wai dabe tonalu, tama augwali bugagia bidaibao. Tama nago te augwa wąį nǫų nosali pedalubo hani dabe selama, tama augwali te nage dali sesemane bidada pomainu yaibao.
PSA 103:1 Eno Genuai Bidigo nogi ugwaba saibao. Ao, eno tigi me homu kolesaga tomode elalubo nai tigidaligo Genuai Bidigo dwagi yai nogi ugwaba sainogo ebo dao.
PSA 103:2 Eno Genuai Bidigo nogi ugwaba siyu, tama agai dwagi yai sę ena dali ebo te eno homugo tagalogobeo.
PSA 103:3 Agai eno dwai sę ebo tigidali sela sąwai, tama eno gasi ebo tigidali usu yai.
PSA 103:4 Genuai Bidigo ena ma sai, tama ena isibeo. Agai olo ena tau sabo dwagi yai homu eyu, ena hobede mu ebo dao.
PSA 103:5 Tigidali sogo ena tǫde bidibo Genuai Bidi agai dwagi yai nai ena mabo usu mu ebo dao. Agai tama tiyu, ena gesi ma pedaliyu, tama te ba kemodagego bomo tiwai elalubo ena bidibao.
PSA 103:6 Genuai Bidigo dwagi yai sę we bidi augwali gasa dwai bidi dabego dwai sę dologode bidibadi tau sabo dao. Tama agai augwali ma hodolama, augwali bugagia bidibo dao.
PSA 103:7 Polobadu Moses dali agai yabo te sę po wai. Tama agai Israel we bidigo te agai bomo yai sę ebo sumainu yai.
PSA 103:8 Genuai Bidi agai dwagi yai homu eyu, da hobede mu elama, olo tau sabo dao. Agai sębę polo isąma, tama agai da sesemane godolo mu ebo dao.
PSA 103:9 Agai da dali odolali olo wado po me wabo menio. Tama agai sębę ebo hauwa sogo elalubo menio.
PSA 103:10 Dago dwai sę ebode da dene sabo digi, agai te dago yali dwai sę usu nama dene dabolo mabo menio. Dago dwai kolesaga hauwa yai, tama agai genuai sęgę dabolo wei begelaibao homu yai, tialima agai te sę ebo menio.
PSA 103:11 Aga dali wi ebo we bidi, agai augwali godolo mu ebo dao. Agai genuai godolo ebo homu augwali dali ebao, te dagadu digibulu ugwaba mu elaluyu, tǫ aiyadu mu elalubo tiwai dao.
PSA 103:12 Giliga pedalobo dali, te giliga iba dega sigi pabo dali, te si pąde elalubo menio. Te digibulu mu elalubao. Te tiwai Godigo dago dwai sę ebo aga digibulu bidiyu, te dwai sę sela sąbo dao.
PSA 103:13 Ayago aga wai dabe hobede ebo dao. Tiwai Genuai Bidigo aga dali wi ebo we bidi augwali hobede ebo dao.
PSA 103:14 Agai koneai, agai da tǫ selama nigai, tama agai homugo da te tǫ hogomu ebo tiwai dao homu ebao.
PSA 103:15 Da we bidi bidibo ula pęwadage mu, te nosa tiwai. Da pęwadage sogo bidilama, da te plaua nosa du walama, isibo tiwai yaibao.
PSA 103:16 Wali asu, te plaua memenege elama, tulalubo dao, tama bidi dabego te plaua elalubo ma subeo.
PSA 103:17 Tialima, Genuai Bidi agai nogi ugwaba sabo we bidi augwali sesemane bidada pabo sogo agai godolo mu ebo dao. Tama aga te dwagi yai aga wąį dabe augwali nosali pedalobo te dwagi yai yaibao.
PSA 103:18 Tama augwaligo Genuai Bidigo dąų olama muani po wali peyu, tama augwaligo agai te bomo yai po tigidali wali pai pobaso da, agai augwali dwagi yai we bidi nogi nogi yaibao.
PSA 103:19 Genuai Bidi dagalude tuni bidi bidiyu, tama aga tigidali nai tonalubo bidi dao.
PSA 103:20 Dage tigidali Genuai Bidigo ensel mobo bidi, dagego genuai bomo elalubao. Dagego agai po wali pabo bage, dagego olo agai po wabo digi bugagia mubo dao. Tialima, dagego Genuai Bidi nogi ugwaba sao.
PSA 103:21 Dage Genuai Bidigo sę bidi, dage dagalude bidiyu, agai homu wali pabo bage, dagego agai nogi ugwaba sao.
PSA 103:22 Dagego koneao, tigidali nai Genuai Bidigo nigai, tama tigidali tǫde elalubo, tama aga dagego tuni bidi bidibao, dagego Genuai Bidigo nogi ugwaba sao. Tama eno me agai nogi ugwaba saibao.
PSA 104:1 Eno Genuai Bidigo nogi ugwaba saibao. Genuai Bidi, nage eno God, nage ugwadu mu dao. Nage genuai polalubo tuni bidi, nago nogi genuai mu yai.
PSA 104:2 Nage naga ulago digi ma mesegelebo dao, te bidigo aga tigi ugwago mesegelebo tiwai ebo dao. Tama nago dagalu dali, tigidali hǫ munama elalubao, te bidigo ugwa be sęnama, tama baklain bonogo kekelama dąų elalubo tiwai yai.
PSA 104:3 Tama nago be ąį daide ugwadu sęwai. Dagalu pǫ te nago dulalubo nai karis tiwai, tama waligo nage selasa pabo dao.
PSA 104:4 Nago te wali tagala palama, tama waligo nago po sela pabo dao. Tama nago te be selego ula ebo te nago sę bidi pedalobo dao.
PSA 104:5 Nago te tǫ aga bulude munama elalubao, tama tǫgo bomo mu elalubo dao. Aga memenege me egobe. Menio.
PSA 104:6 Nago tamu ąį muani, te tǫ mesegelai elalubao. Tama ąįgo tigidali bulu du mesegelai.
PSA 104:7 Tialima, nosali nago tamu ąį dali po bomo elama wai, tama aga wi pai. Awe, tamu ąįgo odali, nago i bomo elama wai, tama aga bomonama mu pai.
PSA 104:8 Tama peyu, tamu ąįgo tigidali bulu du tagalama, tama aga tǫ odogo dwagi yai digi pai. Nago tamu ąį tede bidao wai, tama megi aga tede bidibo dao.
PSA 104:9 Nago dąį muai, tama tamu ąįgo te dąį muani bolobeo. Tama tamu ąįgo tigidali tǫ ma halugobeo.
PSA 104:10 Nago te ąį ulu bulu du odogo yai digi tomode asomainogo pedelao wai, tama nago te ąį dwagi yai digi dolo pomainogo yai.
PSA 104:11 Bulude bidibo uni hasa dabe, augwaligo te ąį tumainogo yai, tama te uni donki dabe augwaligo me te ąį tuyu, tama augwali dogoni wa pogobeo.
PSA 104:12 Ba dabe augwaligo pibo be te ąį sesegede elalubo nide be sę yai, tama augwali ni nologode dulaluyu, augwa po wabo dao.
PSA 104:13 Nage bulu ugwade bidiyu, nago tulubage bulu duba tulumainogo tagala palobo dao. Tama tiyu, nago te tǫde elalubo nai tigidali dali dwagi yai sę ebo dao.
PSA 104:14 Nago te kibu bulmakaugo tuabo nosa dabe pedalao wai, tama nai dabe meba da we bidigo bulama, sela tuabo nai me pedelai.
PSA 104:15 Tama dago bono ni du wain wai bulama, wain ąi tuyu, dago homu dwagi yai emainogo tiwai. Tama dago te ni oliv wel ąį selama, dago gesabidide pilama, tama gesabi ula emainogo yagameo. Tama dago te wit ge bulama, dago tigi dąų omainogo tubo nai bret nigibo dao.
PSA 104:16 Tulubage tuluyu, Lebanon tede elalubo sida ni dabe augwaligo ąį genuai sabo dao. Te ni sida Genuai Bidigo ni mu dao, polobadu aga bulai.
PSA 104:17 Ba dabe augwaligo te ni sidade be sę ebo dao. Tialima, dogoni bobobage yai bago be gasa nide sębo dao.
PSA 104:18 Uni meme dabe, augwali te genuai bulu dude bilibo dao, tama hasa kesebe me, hoiyu me, augwali te genuai masigi dedagede geme bidibo dao.
PSA 104:19 Nago polua nigai, tama agai tigidali kibu be koneabo dąį ela pabo dao. Tama giliga aga aiyaba dulabo sogo koneama, dulubo dao.
PSA 104:20 Nago be huliao wabo dao, tama hulide uni hasa dabe bilibo dao.
PSA 104:21 Gesi laion dabe augwaligo tuabo hasa dabe gegeyu, i bomonama ebo dao. Augwaligo hasa Godigo augwali momainogo gegebo dao.
PSA 104:22 Tama giliga asobode, augwa bidibo dedageba ma pabo dao.
PSA 104:23 Tama bidi dabe hodaluama, augwali sęba pabo dao, tama augwali sę idubadi, giliga iba dega sigi pabo dao.
PSA 104:24 Genuai Bidi, nago nai hauwa nigai! Nago genuai homu kolesagago koneama, te nai tigidali nigai. Nago nigali nai tigidali tǫde mu pągąwai.
PSA 104:25 Tamu ąį genuai mu yai, tama genuai sųgų, me dwasianu sųgų, me gasa nai meba hauwa te tamu ąįde bidibao. Dago nedebo usu egobeo.
PSA 104:26 Tama tamu ąįde sip geba dabe augwali uga soayu, eda soayu elama, bilibo dao. Tama polobadu nago nigali genuai sųgų, augwali me te tamu ąį tomode biliyu, posoga palu ela bilibo dao.
PSA 104:27 Tigidali sųgų augwali nage tonalubo dao, augwali nasi ebode nago nai momainogo ebo dao.
PSA 104:28 Nago nai augwali mobaso, te nai augwaligo tubo dao. Nago naga augwali nai mabo dao, tama augwaligo haliga pągąwai.
PSA 104:29 Nago augwali tudiba mubaso, augwali wi ebo dao. Tama nago augwaligo mobo sela sąwani da, te augwali isilama, tǫ tiwai ma gagawaibao.
PSA 104:30 Nago mobo augwali mobaso, augwaligo bidibo ula sabo dao. Nago tigidali nai tǫde gesi ma pedelabo dao.
PSA 104:31 Eno homugo Genuai Bidigo genuai nogi dali, ula dali, sesemane sogo bidada peyu, bidada pao. Tama Genuai Bidigo aga nigali nai tigidali dali dwagi yai homu yagameo.
PSA 104:32 Agai tǫba tonalubaso, te tǫ memenege eyu, mali ebo dao. Agai te bulu duba nogo mubaso, te bulu dude sia hano ebo dao.
PSA 104:33 Eno bidibo ula elalubo te sogo, eno Genuai Bidi dali tęąbi yaibao. Eno Godigo nogi ugwaba selama, tęąbi eyu, ena isiboba usu nigi paibao.
PSA 104:34 Agai ena dwagi yai homu ilai, tama eno homugo agai eno tęąbi ebo godolo emainogo ebao.
PSA 104:35 Genuai Bidi, nago te dwai sę ebo we bidi tigidali dolao. Eno homugo dwai sę ebo bidi dabe augwali mu haga yabo homu yai. Eno Genuai Bidigo nogi ugwaba sobao. Genuai Bidi agai nogi ugwaba mu saibao.
PSA 105:1 Dago Genuai Bidi dali usu da weyu, tama agai genuai nogi elalubo po hania pusao. Dago tigidali tǫde we bidi dali agai genuai sę yali po pusao.
PSA 105:2 Dago tęąbi po agabolo weyu, tama aga nogi ugwaba sao. Tama agai dwagi dwagi yai sę yali hania pusao.
PSA 105:3 Da Genuai Bidi aga hani, tama dago aga dali dwagi yai homu yao. Genuai Bidi wali pabo we bidi, augwaligo homu dwagi yai mu yao.
PSA 105:4 Da Genuai Bidi agai tau somainogo pinao. Tama da sesemane sogo aga dali pąde bidainogo.
PSA 105:5 Dage Abrahamgo wąį dabe, aga Genuai Bidigo sę bidi, dage Jekop agai wąį dabe nosali pedelai, te bidi Godigo dąį muani bidi, dagego homugo agai polobadu gasagi yai bomo yai genuai sę yali koneyu, tama agai te dwai sę ebo bidi dabe augwali dene mabo, te kolesaga dagego homugo koneao.
PSA 105:7 Genuai Bidi aga dago God dao. Agai bomo yai po te tigidali tǫde we bidibolo mabo po dao.
PSA 105:8 Agai dąų olama muani, te po sesemane sogo elaluaibao. Tama agai po me elaluama, nosali pedalobo bidi hanigo te po odaibao.
PSA 105:9 Polobadu agai Abraham dali te po augwali si dąų wai, tama agai te dąų wali po Aisak po wai.
PSA 105:10 Genuai Bidigo Israel hani dali po dąų wai, tama te dąų wali po sesemane sogo me elaluyu, bidada paibao. Agai te dąų wali po Jekopgo hani dali dąų wali, te po siligobeo.
PSA 105:11 Agai Jekop dali te po wai, “Nage eno te Kenan tǫ mawaibao,” wai, “tama te tǫ naga tǫ, te naga hani dali.”
PSA 105:12 Godigo we bidi augwali dwasianu hani, tama augwali gasa bulu we bidi te tǫde bidibo tiwai.
PSA 105:13 Augwali bugagia duabe, augwali dodolama biliyu, gasa bulude bilama, gasa buluba peyu yai. Augwali dwasianu sogo tuni bidi me deligo tǫde bidai, tama augwaligo te tǫ tagalama, gasa tuni bidi mego tǫba bidigi pai.
PSA 105:14 Tialima, Genuai Bidigo augwali gasa bidi dabego augwali me dolomainogo ebeo. Tama agai tuni bidi meba dali wado po weyu, augwali dali dwai sę me igio wai.
PSA 105:15 Agai te po wali, “Eno te we bidi augwali dąį muai, augwaligo eno sę emainogo. Dagego dwai sę augwali dali me elamo dao,” wai. “Tama dagego eno po pusubo bidi augwali dologio. Mu menio,” wai.
PSA 105:16 Genuai Bidigo augwaligo tǫde nasi emainao wai, tama augwaligo nai tigidali agai sela sąwai.
PSA 105:17 Tialima, agai Josep aga polasa pomainogo tagala palai. Tama aga te Isip bulude bidigi pai. Augwaligo Josep te olo mu sę ebo bidi abelebo tiwai yai.
PSA 105:18 Augwaligo te sen aga sągąde dąų olama kęai, tama aga sągą dene yai. Tama augwaligo te genuai ain aga dogonide dąų wai.
PSA 105:19 Tama te tiwai me bidaluai, tama agai pusali po te mu pedalobo suainogo yai. Genuai Bidigo po augwalibolo ola mayu, te Josepgo po mu dao wai.
PSA 105:20 Tialima, Isip tuni bidi agai bidi me deli tagala palai, Josep kalabuside bidali tagalama, buluba asomainogo tiwai. Awe, te gasa tuni bidi hani tonalubo bidi agai Josep kalabus yali silama, tagalai.
PSA 105:21 Tama tuni bidi agai Josep agai gavman tobolu bidi bidao wai. Tama Josep aga te Isip gavman polalubo bidi bidai.
PSA 105:22 Agai te tuni bidigo sę ebo ofisa bidi dabe augwali agai tonalubo sę yai, tama agai bomogo te tuni bidi homu kolesaga ola mabo bidi dabe agai augwali ola mawai.
PSA 105:23 Nosali Jekop te Isip buluba bidigi pai.
PSA 105:24 Tama nosali Genuai Bidigo aga we bidi tau selama, augwaligo wai dabe hauwa ame nai. Tama agai augwaligo bomogo boi bidi dabego bomo aiyaba elalumainogo yai.
PSA 105:25 Agai te Isip bidi dabego agai we bidi dali boi bidi emainogo yai, tama augwaligo tibo sę agai sę bidi dali yai.
PSA 105:26 Nosali Genuai Bidigo Moses, agai sę bidi dąį munama bidai, te Aron me agai sę bidi muani, tama augwali si Isip te buluba tagala palai.
PSA 105:27 Augwali sigo Godigo bomo yai sę yai, tama augwali sigo gasagi yai bomo yai sę Isip bulude yai.
PSA 105:28 Tama Godigo augwaligo tǫ be hulia siyu, mesega sai, tialima, Isip bidi dabego agai po sela sąwai.
PSA 105:29 Agai augwaligo ąį tigidali kaneme emainogo begelai, tama tigidali te ąįde bidali sųgų tigidali ela silai.
PSA 105:30 Tama gedeli dabe hauwa pedelama, augwaligo tǫ pągąna sai, tama genuai tuni bidigo be tomode me pągąna sai.
PSA 105:31 Godigo po olama, tama bolia me, dina me, hauwa pedelama, tigidali tǫ, me bulu dabe tigidali mu pągąna sai.
PSA 105:32 Agai te tulubage mu augwaligo tǫba tagala palobeo. Agai te tulubage te talua ge tiwai yai, te tǫba tulaluai, tama te be sele hauwa ula yai.
PSA 105:33 Agai augwaligo te bono ni du wain me, ni kaya me, dolai, tama tigidali ni dabe mu dola silai.
PSA 105:34 Agai po obadi, te kuli mano dabe pedelai, te hauwa mu pedelai, dago nedebo usu egobeo wai.
PSA 105:35 Te kuli mano dabe augwaligo tigidali nai yabe tula silai, tama augwaligo te bulali nai yabe me tigidali mu silai.
PSA 105:36 Tama Godigo Isip hanigo gomunai ogwa wai dabe tigidali ela muai.
PSA 105:37 Nosali agai Israel bidi hani augwali Isip bulu tagalama, augwali odasa pai. Augwaligo silva, me gol, te me sela pai. Tigidali Israel we bidi bugagia bidai, me deli dolobeo.
PSA 105:38 Isip hani augwali Israel hani dali wi yai. Tama Isip hani augwaligo suali, Israel bidi hani augwali paibaso, tama augwali dwagi yai homu yai.
PSA 105:39 Godigo pǫ hauwa ugwadu munama, aga hani bidi haluai. Tama hulide agai genuai sia ula munama, augwali te ulade bidai.
PSA 105:40 Augwaligo agabolo nai po hanaluai, tama agai ba dabe augwalibolo mawai, tama te ba augwali sela tuai. Agai dagalude giguai nai bret augwali mawai, tama augwali te nai tulama, haliga mu pągąwai.
PSA 105:41 Agai ąį masigide pedela wai. Tama genuai ąį te masigide pedelama, tama te ąį masigi kemi wa pai digi te ąį pai, te genuai ąį bulude asobo tiwai yai.
PSA 105:42 Agai homugo te polobadu aga sę bidi Abraham dali dąų wali bomo yai po homude me konealuai.
PSA 105:43 Tama tiyu, agai we bidi augwali agai te Isip buludu odasa pai. Tama augwaligo tęąbi ela peyu, dwagi yai homu dali pai. Te we bidi augwali aga digi dąį muyu sa muai, augwaligo i weyu, dwagi yai homu elama, augwali pai.
PSA 105:44 Gasa we bidi augwaligo tǫ agai augwalibolo te tǫ mayu, tama augwaligo te tǫde elaluali gi dabe me sai.
PSA 105:45 Agai tama tiwai, te Israel hani augwaligo agai tigidali bomo yai po wali pomainogo tiwai. Tama Genuai Bidi agai nogi ugwaba sao.
PSA 106:1 Genuai Bidigo nogi ugwaba sao. Dago agaba usu da waiyąo, magi baso meni agai te wiegi yai kolesaga sesemane ebo dao, tama agai da sesemane bidada peyu, bidada pabo wei mu ebo dao.
PSA 106:2 Dego te agai genuai sę dabe yali po pusaibawe? Tama dego agai te wiegi yai kolesaga yalide te agai nogi ugwaba saibawe?
PSA 106:3 Te agai po wali peyu, te doloba pai kolesaga ebo bidi dabe augwa te pemene yao.
PSA 106:4 Genuai Bidi, nago te naga we bidi dabe tau sabo sogo, nago ena me homugo koneao. Tama nago augwali ma sabo sogo, nago te ena me ma sao.
PSA 106:5 Eno te nago hani bage te bugagia dugulama, tama te wiegi yai nai dabe sabo suabo homu yai, tama eno augwali dali wiegi yai pemene yabo homu yali. Dago te pemene yaibao, magi baso meni, da te nago hani bidibao.
PSA 106:6 Dago te dwai sę yalio, te polobadu dago wąį nǫų dabego yali tiwai sę yalio. Dago te dwai sę haniani yai.
PSA 106:7 Te Isipde te wąį nǫų dabego te nago yali genuai sę dabe te bugagia me konesiąwai. Nago augwali hauwa sogo tau sali, te nago augwali wei mu ebo homu te augwaligo koneai. Tiali goli, augwa te homu tagalu, tama augwali te nosa elaluali tamu ąįba sabolali sogo, augwa te nage Tigidali Bomo Elalubo Godiba hagoma yai dao.
PSA 106:8 Tiali goli, Genuai Bidigo te aga genuai bomo augwaliba ola mawainu yali. Tama tiyu, agai augwali ma selama, tama augwali me dolobeo, te agai augwaliba dąų walali po tiwai gilama yali.
PSA 106:9 Agai te nosa elaluali tamu ąįba po bomonama obaso, tama tamu ąį te wa pai tǫ tiwai pedelali. Tama agai te we bidi dabe peyu, tama augwa te tamu ąį nogegi pali, te bidi te wa pai tǫdu pabo tiwai ąǫ yai dao.
PSA 106:10 Agai augwali te augwa boi bidi dabego nogode ma sali. Agai augwali tąu selama, tama te boi bidi dabego augwali me dolobeo.
PSA 106:11 Tiali goli, te węgo te boi bidi dabe mesega selama, tama augwali isai dao. Tama me deli te bidibo ula me elalubeo.
PSA 106:12 Genuai Bidigo tama tibaso, tama aga we bidi dabe augwaligo augwa te agai dąų walali poba homu kęą pelama, tama augwa tęąbi wabode te agai nogi ugwaba sabo po walio.
PSA 106:13 Tiali goli, polo tama mu, te augwaligo Genuai Bidigo yali sę dabede homu kone ebo tagalalio. Tama augwaligo te Godigo po bolo hasia me sabeo. Augwaligo yali sę dabe te augwa homugo digi nigilama yalio.
PSA 106:14 Te masigi tǫ wa pai bulude, augwaligo haliga te tuabo naiba homu hogodalu, tama augwaligo te God usu sai dao.
PSA 106:15 Augwaligo Godiba te nai po hanalubaso, tama agai augwaliba mawai, tiali goli, agai te genuai gasi augwaliba pedalumainu ilalio.
PSA 106:16 Augwali te wa pai bulu pesagede bidalu, tama bidi mebago te Moses de Aron sigo ebo sęde pesa homu yalio, te bidi si te Genuai Bidigo sę yali sę bidi si dao.
PSA 106:17 Tialima, genuai dedage te tǫde pedelama, tama Datan dali, Abiram, me te augwa si hani dabe dali, augwali te dedageba tulaluama, tama te tǫ pania selama, tama augwali mesega sai dao.
PSA 106:18 Tama augwali wali pali bidi dabeba te sia tulaluama, tama te siago te dwai sę yali we bidi dabe ulai dao.
PSA 106:19 Augwali te bulu du Horepde bidalu, tama augwa te bulmakau me deli te golgo nigilama, tama augwa te tibo godiba lotu wai dao.
PSA 106:20 Augwaligo te nosa tubo bulmakau piksa selama, tama augwa teba lotu wali. Te kolesagago augwaligo te Godigo genuai nogi aiyaba elalubo sę yali.
PSA 106:21 Godigo te Isipde bomai sę mu elama, tama te Israel dabe te Isip dabego nogode ma dobola sali. Tiali goli te Israel dabego te tiali sę te homu kone me palubeo.
PSA 106:22 Godigo te genuai polalubo bomai sę dabe te Isipde yali, tama te nosa yai tamu ąįde te agai gasagi yai sę mu yalio, tama te we bidi dabe dwai noma mu sai dao.
PSA 106:23 Tialima, me sogo nosali Godigo te aga we bidi augwali dolaibao po wali. Tiali goli, Moses, te Godigo dąį muani sę bidi, aga te God geduba doligi pelama, tama agai te Israel dabe tau siyu, tama Godigo haliga sębę yali togolama panibaso, tama Godigo augwali me dolobeo.
PSA 106:24 Tama nosali augwaligo te wiegi yai tǫ wei isiąwai, magi baso meni, augwaligo te Godigo dąų walali poba homu kęą pabeo.
PSA 106:25 Augwali te ugwa bede bidalu, tama Godiba wado po weyu yai, tama augwaligo te Genuai Bidigo po wali me pabeo.
PSA 106:26 Tialima, Godigo bomai po augwaliba mayu, tama augwali te tǫ wa pai masigi tǫ bulude isaibao po walio.
PSA 106:27 Tama agai te nosali pedalubo wąį nǫų dabe ela gudulama sela sąyu, te augwali gasa hani dabe tomoba bidigi pelama, tama augwali te gasa bulu tǫ pedaide isaibao, te po wai dao.
PSA 106:28 Nosali augwaligo te bulu Peorde te tibo god Bal dabeba lotu wai dao, tama augwa te bidibo ula elalusiąbo te god dabeba ofa mabo nai dabe tuai dao.
PSA 106:29 Te kolesagade te Genuai Bidigo augwaliba wado yabo sę ilibaso, tama agai te dwai genuai gasi augwaliba tagala palai dao.
PSA 106:30 Tiali goli, Finias hogodalu, tama te dwai sę ebo bidi dabeba te dwai dene mobaso, tama te genuai gasi silalio.
PSA 106:31 Tama megi sogoba usu nagasu dago agai te doloba pai kolesaga yali homu kone palubao, tama nosali nosali me, tigidali we bidigo te tiwai homu emainu ebo dao.
PSA 106:32 Te Israel dabego te Godigo wado te Meriba węde yabo sę ilali, tama Moses te augwaligo yali sęde sęgę salio.
PSA 106:33 Augwaligo te Moses haliga dwai mu yabo sę ebaso, tama te agai te dolo isąbo po wai.
PSA 106:34 Te Genuai Bidigo augwalibolo te gasa hani dabe tigidali ela muao po wali. Tiali goli, augwaligo te bage tigidali me ela mubeo. Menio.
PSA 106:35 Te Israel dabego te Godigo po odisąwani hani bagede we sali, tama augwaligo ebo dwai kolesaga wali palio.
PSA 106:36 Tama augwa te tibo godiba lotu obaso, tama tego te Godigo augwa dolomainu ilai dao.
PSA 106:37 Augwaligo te augwa wai ogwa me, wegi me, ela munama, te tibo god dabeba ofa yai dao.
PSA 106:38 Augwaligo te augwa ogwa me wegi dabe digi elalio. Te wai dabego te magi dwai sę me isiąwani, tiali goli, augwa te augwali elama, tama augwali te Kenan tibo god dabeba ofa tiwai elama mawai. Tama tialima, augwaligo kanemego te tǫ meda pedelai dao.
PSA 106:39 Te kolesagago augwali te God gedude meda yai pedelalio, tama augwaligo te God tudiba munama, tama augwaligo aga wali me pabeo.
PSA 106:40 Tialima, Genuai Bidigo aga we bidi dabeba te wado mu elama, tama agai augwali wei ma ebeo.
PSA 106:41 Tama agai augwali tagalama, te gasa hanigo augwali tonalumainu yali. Tama tiyu, augwali te boi bidi dabego dologode bidiyu, tama te boi bidi dabego nogode bidai dao.
PSA 106:42 Te boi bidi dabego augwaliba sęgę hauwa menama, tama augwali te augwaligo bomo dologode mu bidalio.
PSA 106:43 Te hauwa sogo mu Genuai Bidigo te aga hani bage tau sali, tiali goli, augwa digi te augwa homu wali ma peyu, tama augwa hagoma elama, tama agai po sela sąyu, tama augwa te dwai sę ebo kolesaga tomoba mu palio.
PSA 106:44 Tiali goli, augwa te Genuai Bidiba i weyu, gedu haluasa po wabo sogo, agai te augwaligo gedu haluasa po odolama, tama augwali te dwai bidibo te homu dene yalio.
PSA 106:45 Agai augwali homu dene mu elama, tama aga dąų walali poba homu kone ma palali. Tama aga homu ma hasegelalio.
PSA 106:46 Agai te Israel dabe kalabus yali boi bidi dabego homu hodolobaso, tama augwaligo te Israel dabe homu dene yalio.
PSA 106:47 God, dena Genuai Bidi, nago da te gasa hani dabego nogode ma sao. Tama nago da te dena tǫba ma odasa asao. Tama tiyu, dago nageba homu kone paliyu, te nage tedali wiegi yai mu da, te homu elama, tama dago nago nogi ugwaba siyu, tama nageba te usu da weyu, te wiegi yai pemene dali mabo dao po wagameo.
PSA 106:48 Dago te Genuai Bidigo nogi ugwaba sao, te da Israel dabego God, megi, me tigidali sogo nosali. Tama tigidali we bidigo te po waiyąo, “Mu dao,” wao. Genuai Bidi nogi ugwaba sao po wao.
PSA 107:1 Dago Genuai Bidiba puba hwi po wao. Magi baso meni, agai daba te wiegi yai mu ebao. Sesemane sesemane sogo agai da wei mu ebo dao.
PSA 107:2 Dage tigidali we bidi, Genuai Bidigo dage te boi bidi dabego nogode ma sali, dage dali, ena me, dago te Genuai Bidi nogi ugwaba sinao.
PSA 107:3 Agai dage we bidi dabe te gasa bulu tǫ badu, te giliga pedalubo badu, ma giliga dega sabo badu, me te not badu, ma saut badu, te ma sai dao.
PSA 107:4 Meba te genuai bulu te kemi tǫ wa pai bulude bilaluai dao. Te augwali bidigi pabo madi te taunba pabo sunumi me deli te me subeo.
PSA 107:5 Augwali te nasi mu elama, tama te wę nogonego siyu, tama augwa homugo te augwali dolaiba homu yai.
PSA 107:6 Augwali te tiwai dwai bidibaso, teda augwa te Genuai Bidiba i obaso, tama agai wiegi yai sę mu eyu, te augwali tau sai dao.
PSA 107:7 Agai augwali pabo dodolama, tama augwali odasa peyu, tama augwali te taun me deliba pedelama, te augwali tede bidai.
PSA 107:8 Tialima, augwaligo te Genuai Bidiba usu da mu waiyąo, te sesemane agai augwali homu dene mu elama, tama agai augwali tau sabo sę wiegi yai mu yalio.
PSA 107:9 Agai te wę nogonego dogoni wa sali we bidi dabeba te wę mayu, tama augwa te wę tulama mu usu yali. Tama agai te nai hauwa te nasi ebo bidi dabeba menama, tama augwa te dwagi yai nai tulama, tama augwa tabi pągąna pali.
PSA 107:10 Meba te be hulia sai madi, te kalabus be tomode bidali. Te bidi dabego augwali te sengo kalabus elama, tama augwaliba te sęgę mawai.
PSA 107:11 Magi baso meni, augwaligo te Tigidali Bomo Elalubo Godigo pode hagoma eyu, tama augwaligo agai po sela sąyu ebaso, te augwali kalabus eyu, sęgę mawai dao.
PSA 107:12 Augwali te tigi dene sę mu elama, tama augwa bomo tigidali sia sai. Tama augwali te tǫba degasa dulama, tama augwali tau sabo bidi meni yani.
PSA 107:13 Augwali te tiwai dwai bidibaso, teda augwa te Genuai Bidiba i obaso, tama agai augwali tau selama, tama augwalide elaluali te sęgę dagala sąwani.
PSA 107:14 Genuai Bidigo augwali selama, tama augwali te hulia saide bidali tagalu, tama agai augwaligo te sen togolama, tama augwali te kalabus ma elalubeo.
PSA 107:15 Tialima, augwa te usu da mu te Genuai Bidi wao. Sesemane sogo agai augwali homu dene mu elama, tama agai wiegi yai sę mu eyu, augwali tau salio.
PSA 107:16 Agai augwaligo te brasgo nigali sunumi dabe aluali, tama te kalabus be bagulali obo ain ba aluama, togogo pai dao.
PSA 107:17 Meba te augwa yali dwai kolesagade gasi sali. Augwa te dwai sę hauwa ebaso, tama tialigo augwa te sęgę tolai dao.
PSA 107:18 Augwa te nai tubo hagela yai, tama tiyu, augwa pąde isainu yali.
PSA 107:19 Augwa te tiwai dwai bidiyu, tialima augwa te Genuai Bidiba i obaso, tama agai augwalide te sęgę dagala sąyu yalio.
PSA 107:20 Aga digi po obaso, tama augwa tigi usu ma ilama, tama augwali te gų pagede ma dobola sai dao.
PSA 107:21 Tialima, augwaligo te Genuai Bidiba usu da mu waiyąo, sesemane sogo agai augwali homu dene mu elama, tama agai augwali tau selama, te wiegi yai sę mu yai dao.
PSA 107:22 Augwa te agaba usu da wabo ofa emainu yao. Tama augwa te pemene ebo tęąbi po weyu, tama te we bidi dabeba te agai wiegi yai sę yali po pusao.
PSA 107:23 Bidi meba te moni geba sipde boskru sę eyu, tama augwali te genuai tamu ąįdu te tigidali buluba tedelama pobao, tama te walu selasa pabo bisnis sę te bidi dabede ebo dao.
PSA 107:24 Te boskru dabego te Genuai Bidigo ebo sę dabe subao. Augwaligo agai te genuai tamu ąįde wiegi yai sę ebo subo dao.
PSA 107:25 Genuai Bidigo po weyu, tama agai te genuai boma pai wali te nai hodolama, tama tego te moni dobo dwai biksi hodolubo dao.
PSA 107:26 Te sip dabe ugwaba mu holama, tama aiyaba mu dulu ebao. Tama tiyu, te boskru dabego te augwali dolaiba homu elama, tama augwa wi dwai ebo dao.
PSA 107:27 Augwali te sipde umuna sai biliyu, te bomai wę tuai bidi tiwai ebao, tama augwaligo te sip tau siyu, te magi sę me deli ebaso, te usugobeo.
PSA 107:28 Augwali te tiwai dwai bididubaso, teda augwa te Genuai Bidiba i olama, tama agai augwali tau selama, tama augwalide te sęgę dagala sąwaibao.
PSA 107:29 Agai te moni wali me biksi silimainu elama, tama te tamu ąį ma hogodalugobeo.
PSA 107:30 Augwaligo te tamu ąį dua digi bidibo sulama, tama augwa wiegi yai pemene mu elama, tama Genuai Bidigo augwali odasa pelama, te taun sesege, te augwa painu yali madiba, sabalubo dao.
PSA 107:31 Tialima, augwa te Genuai Bidiba usu da wao, sesemane sogo agai augwali wei mu ebao, tama agai augwali tau siyu, wiegi yai sę mu ebo dao.
PSA 107:32 Te augwali Godigo we bidi dali sisinibo sogo, augwaligo te agai genuai nogide po pusa mao. Augwali te tobolu bidi dabe dali sisinama, tama augwaligo agai nogi augwa tomode ugwaba somainao.
PSA 107:33 Genuai Bidigo te genuai wę te mu sula somainu elama, tama te tǫdu pedalubo wę tigidali sula somainu ebo dao.
PSA 107:34 Te ili elalubo tǫgo te tamu elalubo tǫ pedalumainu elama, tama tede te magi nai deli me pedalisiąwai. Magi baso meni, te badu bidi dabego te dwai kolesaga ebaso, tama Genuai Bidigo te tama tiwai sę ebo dao.
PSA 107:35 Genuai Bidigo te tǫ wa pai bulude te wę hauwa pedalumainu elama, tama te wa pai bulude wę hauwa elalumainu yalio.
PSA 107:36 Tama agai te tubo nai meni yai bidi dabe tede bidimainu ilama, augwali tede bidalu, tama augwa te taun nigilama, tama augwa tede bidali.
PSA 107:37 Augwa te nai dabe, me te ni wain dabe bulama, tama augwa te nai me wain hauwa salio.
PSA 107:38 Genuai Bidigo te aga we bidi dabeba wiegi yai sę ela mani. Tama tiyu, augwa te wai hauwa ame neyu, tama agai te bulmakau dabe me hauwa pedalumainu ilalio.
PSA 107:39 Te boi bidi dabego augwali te hwįyu, aiyaba elaluama, te augwali hale emainu ebo sogo, tama augwali aiyaba mu elaluama, tama augwaliba dene mawai.
PSA 107:40 Genuai Bidigo te boi bidi dabego tobolu bidi dabe te olo nai tiwai naga pedalumainu elama, tama agai augwali te wa pai bulude te sunumi meni yai madi bilalumainu yalio.
PSA 107:41 Tiali goli, te magi doado bage meni yai bidi dabe te dwai bidibaso, agai augwali tau sali. Tama agai te augwaligo wai dabe te hauwa te sipsip dabe tiwai pedalumainu yai.
PSA 107:42 Te doloba pai we bidi dabego te sulama, tama augwa bugai haliga yalio. Tiali goli, te dwai bidi dabego po meni yani. Augwa pedauwali pania siyu naga yalio.
PSA 107:43 Tialima, dage te wiegi yai homu elalubo we bidi dagego te sę tigidali bugagia homu kone palao. Tama dagego te Genuai Bidiba po hanilama pusuyu, te sesemane sogo da wei mu ebo da po waiyąo.
PSA 108:1 God, eno homu te sisi ilama, dodolali elalubao. Megi da, te eno tęąbi weyu, tama nago nogi ugwaba saibao. Ena me pigobeo, te ena hogodama tama tiaibao.
PSA 108:2 Eno te gita me eliyu, tama musik waibao. Te kigamu mu te eno tęąbi waibao.
PSA 108:3 Genuai Bidi, te eno nageba usu da wabo po te gasa hani dabe tomode waibao. Te eno nago nogi te augwali tomode ugwaba saibao.
PSA 108:4 Te sesemane sogo nago da wei mu ebao. Te nago wei ebo homu te genuai mu dao. Tama nago te nago po sesemane wali pabo dao.
PSA 108:5 God, te dagalude nago te genuai bomo elalubo nago te tigidali we bidiba ola mao, tama tigidali bulude te tigidali we bidigo nago genuai nogi konemainu yao.
PSA 108:6 Nago da wei mu eyu, tama nago dago gedu haluasa po wabo odolama, tama nago genuai bomogo nago da ma selama, tama da bugagia bidimainu yao.
PSA 108:7 God te aga tedali wiegi yai bede bidiyu, te po wai, “Eno te hwįani aiyaba elalubaso, tama ena te pemene elama, tama te Sekem dobayu, tama te Sukot bulu odogo te ena we bidi dabeba dobawaibao.
PSA 108:8 Gileat dali Manase, te eno dao. Efraim te eno kapago nigai tobolu madi tiwai gagawali. Tama Juda te king bidigo wiegi yai dono tiwai dao.
PSA 108:9 Tiali goli, Moap te eno wę paubo dis pǫu gagawai tiwai, tama Idom te eno su mubo pesage tiwai dao. Tama ena pemene elama, tama eno te Filistia dabe aiyaba elaluali i waibao.”
PSA 108:10 God, dego ena augwaligo te bomonama bagulali te taun tomoba odasa pogowe? Tama dego ena te Idomba odasa pogowe?
PSA 108:11 God, nago da tudiba muani da, agawe? Te nago dago ami dabe te tau sogobe da homu ebo da, agawe?
PSA 108:12 Te dago boi bidi dabe dali hwįbo tau sao, magi baso meni, te bidi dabego naga da tau me sogobeo.
PSA 108:13 Te Godigo da tau sobaso da, teda dago te hwįbo ugaba ela holaibao. Tama aga digi te boi bidi dabe aiyaba elaluaibao.
PSA 109:1 God, eno nago nogi ugwaba sabo da. Iya, nago eno gedu haluasa po wabo odoyu, tama wei ponao.
PSA 109:2 Magi baso meni, te dwai bidi dabego, me te tibo po wabo bidi dabego enaba boi bidi eyu, tama gasa we bidibolo enade tibo po obao.
PSA 109:3 Augwaligo po dwai mu enade wali, tiali goli augwaligo po te odolali walio. Te po page menio.
PSA 109:4 Eno augwali wei elama, tama eno gedu haluasa po weyu, augwali tau sali, tiali goli augwaligo ena wei me ebeo.
PSA 109:5 Eno wiegi yai kolesaga augwaliba yali, tiali goli, augwaligo dwai kolesaga enaba wei ponani. Eno augwali wei mu yali, tiali goli, augwaligo ena wei homu meni yai.
PSA 109:6 Te bidi dwai me deli nigilama, te agai eno boi bidigo po te po tųde dagalumainu emainao. Te aga boi bidi me deligo digi aga po tų ela momainao.
PSA 109:7 Te po tų odobo bidigo te bidigo dwai sę yali hanila palama, tama aga te kalabusiba tagala palao. Tama agai te bidigo gedu haluasa po wali me te sęgę da homu yaibao.
PSA 109:8 Eno homugo te aga polo tama isimainu homu elama, tama gasa bidigo te agai sę yali pesage somainu yao po wai.
PSA 109:9 Tama eno homugo aga isimainu elama, tama aga wai dabego aya meniama, tama aga wego te bidi me te meni emainu yao.
PSA 109:10 Tama eno homugo te aga wai dabego be meniyu, tama augwa dwai mu bidimainu yao, wali. Augwaligo te augwa bidibo bede te tologa pali bede megi bidibadi te ela gudulama, sela sąmainu yao.
PSA 109:11 Te boi bidigo te bidi mebade negeli elalubaso da, eno homugo te bidi dabe aselama, tama te bidi dabego te agai tǫ dagala sagasomainu yao, te tigidali doado bage agai te bidigo abelimainu sę yali nai tigidali te somainu yao.
PSA 109:12 Eno homugo te bidi me deligo agaba te olo tau sabo wiegi yai kolesaga me egobe, homu yai. Tama te me deligo te aga aya meni yai wai dabe homu dene me egobe, homu ebao.
PSA 109:13 Eno homugo te agai wai dabe isimainu homu ebao, tama te nosali pedalubo hani dabego te bidigo nogide homu kone me isiąyu me egobeo.
PSA 109:14 Eno homugo Genuai Bidigo te dwai kolesaga te aga hani wąį nǫų dabego yali sęba homu kone palumainu ebao. Tama agai te aga idago sęgę sela sąmainu me egobe homu ebo dao.
PSA 109:15 Genuai Bidigo te augwa yali dwai sęba me konealudubaso, tama te we bidi dabego aga haniba te homu kone isiąmainu yao. Eno te homu ebao.
PSA 109:16 Te bidigo te gasa bidiba olo tau sabo wiegi yai kolesaga yabo homu isiąwani. Agai te magi doado bage meni yai bidi dabe, me te doado bage sǫą pai bidi dabe, me te bomo meni yai bidi dabeba boi bidi eyu, tama te bidi dabe haliga sęgę ilama, tama agai augwali ela muyu yai dao.
PSA 109:17 Polobadu agai te gasa bidi dolomainu dwai po wainu yali, teda megi da, aga digi te dolomainao. Agai te gasa bidi dabeba te wiegi yai sę yabo po te Godiba me hanalube, teda agai me te wiegi yai mabo sę me selamuo.
PSA 109:18 Agai te gasa bidi dolabo po wabo te sę dene tiwai me ebeo, te bidigo ugwa name te tigide bebo te sę dene me ebo menio. Eno homugo te agai te i ola mabo po te aga tigi tomoba pomainao, te wę tiwai yao, tama aga dili tomoba pabo te wel tiwai gilama emainao.
PSA 109:19 Tama aga te pogo aga te ugwago mesege sabo tiwai elama, tama aga haliga te kukulu gudubo tiwai elalumainao.
PSA 109:20 Eno homugo te Genuai Bidigo ena po tų ebo bidiba te tiwai dene momainu yaibao, magi baso meni, augwaligo te dwai po enaba walio.
PSA 109:21 Tiali goli, Genuai Bidi, eno God, eno homugo nago ena tau somainu homu ebao, te nago po dąų wali gilama yao. Nage wiegi yai mu eyu, tama nago ena sesemane wei homu elama, tama tiyu, nago ena ma sao.
PSA 109:22 Ena dwai bidi mu bidiyu, tama ena odolali bidibao, tama ena dwai dene mu ebao.
PSA 109:23 Ena te pabo tiwai eyu, te eno noma te giligade subo tiwai elama, tama te giliga dega sigilubo sogo, te pio ebode silaibao. Ena te tǫde bidalubo nai tiwai te waligo selasa pabo tiwai ebo dao.
PSA 109:24 Ena te nai habu selama, tama eno kidu te bomo meni yai. Ena te nomona selama, tama eno dili tigidali te kimi mu isalio.
PSA 109:25 Te we bidi dabego ena sulama, tama enaba posobo po wabo dao. Tama augwa tobolu bebegelu, tama ena gisugu mobao.
PSA 109:26 Genuai Bidi, eno God, nago ena sesemane wei mu ebao. Nago ena tau selama, tama ena ma sao.
PSA 109:27 Te boi bidi dabego konemainu elama, nago naga nago ena tau selama, tama ena ma sabo dao.
PSA 109:28 Augwa te po weyu, te Godigo ena dolaibao po wali, tiali goli nago enabolo wiegi yai sę yaibao. Eno homugo te enaba dwai sę ebo bidi dabe aiyaba elalumai homu yai, tama ena naga sę bidigo, eno bugai haliga yaibao.
PSA 109:29 Eno homugo te eno boi bidi dabe te genuai hale somainu yaibao, tama augwali te hale dwai mu ebo te we bidi dabego sumainu yao.
PSA 109:30 Tiali goli, eno genuai po dągą weyu, te Genuai Bidiba puba hwi po waibao. Te we bidi dabego lotu weyu sisinibo madi, teda eno nago nogi ugwaba saibao.
PSA 109:31 Magi baso meni, agai te magi nai meni yai bidi dabe tau selama, tonalu ebao, te bidi dabego augwali po tų eyu, tama te augwali isimaina obaso, te usu me egobeo.
PSA 110:1 Te Devitgo asęani balia po me deli dao. Yawe Genuai Bidigo eno genuai bidiba te tama po wali, “Nago eno dolo nogode dugulalu, te nago boi bidi dabe te eno nage dologoba mubo sogoba usu naibao.”
PSA 110:2 Yawe Genuai Bidi te Saionde bidiyu, tama agai nago te bulu hauwa tonalumainu nigilama, tama agai te po waibao, “Nago naga boi bidi dabe tonaluao,” waibao.
PSA 110:3 Te nago te boi bidi dabe dali hwįainu ebo sogo, te naga hani bidi dabego usu da, pinao po weyu, te nage dali pelama, tama nage tau somainu yaibao, tama dage te Godigo bulu duba ugwaba holaibao. Tigidali sogo hulide tulubage wę segeni te nosade pedalu, tama te nosago gesi bomo siyu ebo dao. Tama nage me nage te tigidali sogo bomo saibao.
PSA 110:4 Yawe Genuai Bidigo nageba po dąų waliyu, te tiwai wali, “Nage te pris sesemane bidada peyu, bidada pagameo,” wali. “Nage te pris Melkisedek tobage tiwai dao.” Genuai Bidigo te mu po naga weyu, tama agai te aga po me hasegeligobeo.
PSA 110:5 King bidi, Yawe Genuai Bidi nage dali dolalu, te dąų walainu yaibao. Te aga haliga sębę ebo sogo agai te king dabe dali hwįnama, te agai hwįbo te ugwaba ela holama, tama augwali aiyaba mu elaluaibao.
PSA 110:6 Agai te we bidi hani dabego dwai sę yali wei ponama, tama te hwįbo pesagede agai te bidi hauwa ela muaibao. Agai te tigidali tǫ pedai badu te king dabe aiyaba elaluyu, agawaibao.
PSA 110:7 Agai te sunumi pąde elalubo te dwasianu ąį gamiade elalubo wę tuaibao. Tama tialima, aga te bomo selama, tama te hwįbo ugwaba ela holaibao.
PSA 111:1 Genuai Bidi nogi ugwaba sao. Eno wei ebo homu te bomo elalubao, tama tiyu, eno agaba usu da po wabo genuai mayu, te aga we bidi tigidali sisinibo madi tiaibao.
PSA 111:2 Genuai Bidigo te polalubo sę dabe mu ebo dao. Te we bidi dabego te Genuai Bidigo ebo sę te wei mu yali, augwaligo te sę dabe te bugagia koneainu homu yalio.
PSA 111:3 Tigidali sę agai ebo te aga genuai nogi pedalumainu yai, tama te wiegi yai mu yali. Te agai doloba pai kolesaga te sesemane elalua pidu, elalua pabo dao.
PSA 111:4 Genuai Bidigo te we bidigo homu hodolama, te augwaligo agai ebo wiegi yai sę dabe te sesemane sogo homu konealumainu yai. Sesemane sogo Genuai Bidigo te olo tau sabo wiegi yai kolesaga eyu, tama da homu dene eyu, tau sabo dao.
PSA 111:5 Agai te agade wi ebo we bidi dabe tubo nai mabo dao. Agai te aga hani bage dali dąų walali pode te homu kone gegeda peyu me egobeo.
PSA 111:6 Agai te meba hanigo tǫ te aga hani we bidi dabeba mawai. Tama tiyu, te kolesagade agai te aga bomo te aga te augwaliba ola mawai dao.
PSA 111:7 Agai kolesaga te mu elalu, te dolo mu elalubao. Dago te agai bomai po tigidaliba homu kęą pelama, wali pobaso, te usu dao.
PSA 111:8 Te Godigo bomai po sesemane elalubao. Godigo te wiegi yai doloba pai kolesaga naga elama, tama te bomai po dodolama, elalubo dao.
PSA 111:9 Agai aga we bidi augwali ma abelali. Tama agai augwali dali te bomai po me deli dąų walali, tama te dąų walali bomai po te sesemane elalua peyu, elalua pobao. Genuai Bidi aga te tedali wiegi yai da, tama agai te tigidali bomo elalubao.
PSA 111:10 Te bidi te kolesaga koneai bidi pedelainogo eyu da, aga te Godide wi yao. Agai te wiegi yai homu kolesaga te agaba homu mubo we bidiba mabo dao. Dago aga nogi sesemane bidada pabo sogo ugwaba sao.
PSA 112:1 Genuai Bidigo nogi ugwaba sao. Genuai Bidi dali wi eyu, agai bomo yai po wali pabo bidi, agai dwagi yai homu yaibao.
PSA 112:2 Agai wai dabego genuai nogi augwali we bidi tomode elaluaibao. Godigo te dwagi yai bidigo hani dali dwagi yai sę yaibao.
PSA 112:3 Agai we wai augwaligo mone dali nai hauwa siyu, tama augwali bugagia sesemane sogo bidaibao.
PSA 112:4 Hulia sai elaluai, tialima ula pedelama, dwagi yai bidi dabe augwali te ulago tau sabo dao. Dwagi yai bidigo gasa we bidi dali dwagi yai sę eyu, augwali bugagia olo tau sabo homu elama, dolo bugagia bilibo dao.
PSA 112:5 Dwagi yai kolesaga ebo bidi aga dali gasa bidigo nai negeli aga dali somainogo ebo, tama aga masigi sabo sę bisnis ebo tigidali bugagia dolo pabo, te bidigo homu dwagi yai yao.
PSA 112:6 Dwagi yai bidi aga tula mugobeo, tama we bidi augwaligo homugo aga gegeda pogobeo.
PSA 112:7 Agai te sęgę pedelabo po odolama, aga wi homu me egobeo. Agai Genuai Bidi dali konealubo po bomo elama, dąų wabo dao.
PSA 112:8 Agai te magi nai dabe dali wi eyu, moni homu me ebo menio. Tama agai koneai, te boi dabe augwali hwįbo digi hagabo dao.
PSA 112:9 Agai nai hauwa nai meni yai bidi dabe augwali mabo dao. Agai dwagi yai kolesaga sesemane sogo ebo dao. Tama agai genuai nogi agai bulude elaluaibao, tama augwaligo aga nogi ugwaba saibao.
PSA 112:10 Dwai sę ebo bidi dabe, augwaligo te sę ebo sulama, wado po wabo dao. Augwaligo te dwagi yai bidi dali dwai homu ebo dao, tama nosali augwali mu dolobo dao. Tama augwaligo te dwagi yai nai sainogo tonaluali nai mu sogobeo.
PSA 113:1 Genuai Bidigo nogi ugwaba sao. Dage Genuai Bidigo sę bidigo, te Genuai Bidigo nogi ugwaba sao.
PSA 113:2 Da tigidaligo te wiegi yai pemene te Genuai Bidigo nogide yao, megi, me tigidali bidada pabo sogo nosali, te tama tiao.
PSA 113:3 Te giliga pedalubo badu, me giliga dega sigulubo badu, teba usu nigi peyu, da tigidali we bidigo te Genuai Bidi nogi ugwa sao.
PSA 113:4 Genuai Bidigo te tigidali hani bage tonalubao. Te aga genuai nogigo te tigidali dagalude nai aiyaba elaluai dao.
PSA 113:5 Dago God Genuai Bidi tiwai bidi me deli elalubeo. Aga te ugwadu mu bidibao.
PSA 113:6 Agai te dagalu me tǫ dali suainu, aiyaba tonalubao.
PSA 113:7 Agai te magi nai meni yai bidi dabe tau sobaso, tama augwali dwai me ma bidibeo. Augwali bugagia naga bidibao. Agai te doado bage sǫą pali bidi dabe tau selama, tama augwa usu nama sabo dao.
PSA 113:8 Agai te aga bage tobolu bidi dabe dali munama, bidibo dao.
PSA 113:9 Tama agai te wai ame nisąbo we dabeba bugai sę elama, tama augwa te wai hauwa ame nomainu ebaso, tama te we dabe augwa pemene mu ebo dao. Te Genuai Bidigo nogi ugwaba sao.
PSA 114:1 Polobadu Israel dabego te Isip tagalama pelawalio. Te Jekopgo hani dabego te gasa hani dabego bulu taga soai dao.
PSA 114:2 Te augwaligo tama tiali sogo, te Juda te Genuai Bidigo tedali gasagi yai hani bage pedaliyu, te Israel dabe me tama tiali.
PSA 114:3 Te nosa elalubo tamu ąį agai te tonono elama, tama wi palio, tama te wę Jordan dolalu, tama te wę ma soabeo.
PSA 114:4 Te genuai bulu du dabe te meme sasa mano pelabo tiwai eyu, tama te dwasianu bulu du dabe te sipsip dabe sasa mano pelabo tiwai yalio.
PSA 114:5 Tamu ąį, magi nai pedalubaso, nage wi paliwe? Jordan wę, magi baso tama nage ma soabewe?
PSA 114:6 Te bulu du dabe, magi baso dage te meme sasa mano pelabo tiwai ebawe? Te dwasianu bulu du dabe, magi baso dage te sipsip sasa mano pelabo tiwai ebawe?
PSA 114:7 Tǫ, megi da Genuai Bidi asobaso, tama nage mumunu yao. Te Jekopgo God asalio, tama nage mumunu yao.
PSA 114:8 Agai te masigigo ulu wę pedalumainu ilali, tama te bulu du masigigo te genuai soabo wę pedalubo dao.
PSA 115:1 Genuai Bidi, sesemane sogo nago da wei mu ebo da, tama nago da me tagalubo menio. Tama tialima, dago nago genuai nogi naga ugwaba saibao. Dago digi dena nogi ugwaba me sogobeo.
PSA 115:2 Magi baso te gasa hani dabego dabolo te tiwai po hanalu obawe, “Te duga God menade bidibawe?”
PSA 115:3 Dago God te dagalude bidibao. Te agai magi sę me deli yabo homu ebaso da, teda agai te sę eyu naga ebo dao.
PSA 115:4 Te gasa hani dabego te augwa tibo god dabe te gol me silvago nigali. Te bidi dabego naga te augwali nigibo dao.
PSA 115:5 Te tibo god dabe pedauwali elalubao, tiali goli augwaligo po obaso, usu me egobeo. Augwaligo gedu elalubo, tiali goli augwa tonono bilibaso, usu me egobeo.
PSA 115:6 Augwa olo elalubao, tiali goli augwa po me odogobeo. Augwa guni elalubo, tiali goli augwa te nai denami odogobeo.
PSA 115:7 Augwa nogo elalubao, tiali goli augwa te nai me tola sogobeo. Tama augwa sągą me elalubo, tiali goli augwali me biligobeo. Tama augwaligo te i me deli weyu, ma gela deli me wagobeo.
PSA 115:8 Eno homugo te bidi dabego te tibo god nigibaso, augwali te augwa tibo god tobage tiwai nigali god dabe pedelaibao. Tama te tibo god dabeba homu kęą pabo we bidi dabe, augwali me te tiwai pedelaibao.
PSA 115:9 Dage Israel we bidi, dagego konealubo homu te duga Genuai Bidiba muiąo. Agai dage tau siyu, tama dage tonalubo dao.
PSA 115:10 Dage te Godigo pris te Arongo hani, dagego homu te Genuai Bidiba kęą pao. Agai dage tau siyu, tama dage tonalubo dao.
PSA 115:11 Dage te Genuai Bidide wi ebo we bidi, dagego konealubo homu agaba dąų wao. Agaduba deligo naga dage tau selama, tama dage tonalubo dao.
PSA 115:12 Genuai Bidigo te sesemane sogo dade homu kone paliyu, tama agai da wiegi yai bugagia ilaibao. Agai te Israel dabe bugagia wiegi yai ilama, tama te Godigo pris haniba tama tiaibao.
PSA 115:13 Genuai Bidigo te agade wi ebo we bidi bugagia wiegi yai ilaibao, te nogi yai we bidi, me te nogi meni yai we bidi dabeba, te tama tiwai sę yaibao.
PSA 115:14 Eno homugo te Genuai Bidigo dageba te wai hauwa momainu homu yai, tama te duga wąį nǫų nosali pedalubo haniba me, te tama temainu yaibao.
PSA 115:15 Genuai Bidigo te dagalu de tǫ si pedalumainu ilali, tama eno homugo agai te wiegi yai sę ebo kolesaga dageba emainao.
PSA 115:16 Dagalu te Godigo pesage naga elalubao, tama agai te tǫ da we bidiba mawai dao.
PSA 115:17 Te isibo bidi dabe te augwa isali bidi dabego pesageba pobao, augwaligo te Genuai Bidigo nogi ugwaba me sogobeo.
PSA 115:18 Tiali goli, da bidibo bagego digi, teda te Genuai Bidiba usu da po wabo, te megi me nosali waiyąo. Te Genuai Bidigo nogi ugwaba sao.
PSA 116:1 Genuai Bidigo eno i wabo odobo dao. Tama tibaso, eno aga wei mu ebao. Mu tama, agai eno gedu haluasa po wabo odobo dao.
PSA 116:2 Agai eno i wabo tigidali odali. Tama tialima, tigidali sogo ena bidibo ula dali bidibo sogo te eno agaba gedu haluasa po waibao.
PSA 116:3 Isibogo te bonogo ena kębo tiwai yali. Eno te isibo bidi dabego pesageba homu kone ebode, tama tego ena wi mu ilama, tama ena gasa homu tedali mu yai dao.
PSA 116:4 Tama tibaso, eno Genuai Bidiba i olama, tama eno te tama po wali, “Genuai Bidi, eno i wabo te nago ena somainu ebao, tiyu ena isidalio,” wali.
PSA 116:5 Genuai Bidigo te olo tau sabo wiegi yai kolesaga elama, tama dabolo wiegi yai sę ebao. Te dena God agai da homu dene eyu, tau sabo dao.
PSA 116:6 Genuai Bidigo te bidi dabe augwa digi augwa tau sabo usu isąbo bidi dabe seselalubo dao. Polobadu gasa bidi augwaligo ena dolainu ebadi, tama agai ena ma dobola sai dao.
PSA 116:7 Megi da, eno homu dua digi ma tegalubao, magi baso meni, Genuai Bidigo enaba wiegi yai sę mu yalio.
PSA 116:8 Genuai Bidi, nago ena ma selama, tama me isigobeo. Nago eno gedu gela gua wa palama, tama nago ena tonalubaso, tama ena me tulalubeo.
PSA 116:9 Tama ena te Genuai Bidi dali te tigidali sogo ena te tǫde bidibo bilaibao.
PSA 116:10 Eno tama po wabo sogo, te eno homu Godiba kęą pali, “Te genuai sęgęgo mu ena mesegelalio.”
PSA 116:11 Tama ena wi eyu, eno te po wabo sogo, “Eno konealubo homu te mena bidi me deliba me mugobeo,” te sogo me eno konealubo homu te Godiba muanio.
PSA 116:12 Genuai Bidigo enaba wiegi yai sę mu yalio. Tama tialima, eno magi nai agaba mawaibawe?
PSA 116:13 Te eno kap wain wę me deli te Genuai Bidi selasa paibao, te Godigo ena ma salio weyu, te dąį ebo ofa tiwai dao. Eno te tama tiyu, te Genuai Bidigo ena ma salide te puba hwi wabo tiwai dao.
PSA 116:14 Te aga we bidi tigidali sisinibo madi te eno po dąų wali gilama te tama tiwai yaibao.
PSA 116:15 Te Godigo we bidi dabe aga gedude te usu mu elaluali. Tama me deli isibaso da, te aga magi homu me ebe, te olo nai da homu ebeo.
PSA 116:16 Genuai Bidi, ena naga sę bidi dao. Eno nago sę ebao, te polobadu idago yali tiwai. Nago ena te kęąluali bono pisigina sąnama, tama ena magi naigo me dąų wasiąma, te olo wiegi yai pedelama bidibao.
PSA 116:17 Te eno nageba usu da wabo ofa eyu, tama eno nageba gedu haluasa po waibao po wali.
PSA 116:18 Polobadu eno po nageba dąų walali, tama megi da, eno te sę nago we bidi tigidali gedude yaibao.
PSA 116:19 Genuai Bidi, eno te tama sę te Jerusalemde, te nago tempel be tomode, te sę yaibao. Dago te Genuai Bidigo nogi ugwaba sao.
PSA 117:1 Dage tigidali tǫde bidibo hani bage, te Genuai Bidi nogi ugwaba sao. Awe, dage tigidali we bidi, aga nogi ugwanu sao.
PSA 117:2 Agai bomonama, da sesemane godolo mu ebao. Agai te aga po sesemane wali peyu, tama agai da me tagalogobeo. Te Genuai Bidigo nogi ugwanu sao.
PSA 118:1 Dago te Genuai Bidiba usu da wao, agai dabolo wiegi yai sę yai. Sesemane bidada peyu, bidada pabo sogo agai da godolo mu ebo dao.
PSA 118:2 Da Israel dabego te tama po waiąo, “Agai da sesemane bidada pabo sogo godolo mu ebao.”
PSA 118:3 Te Godigo pris dabego me te tiwai po wao, “Agai da sesemane bidada pabo sogo godolo mu ebo dao,” po waiyąo.
PSA 118:4 Te Genuai Bidide wi ebo we bidi tigidali, augwaligo te tiwai po waiyąo, “Agai da sesemane bidada peyu, bidada pabo sogo godolo mu ebo da,” waiyąo.
PSA 118:5 Eno sęgę genuai elalubaso, tama eno Genuai Bidiba gedu haluasa po wali, tama agai eno te wabo po odolama, tama te sęgę dagala sąwani.
PSA 118:6 Genuai Bidi ena dali bidibaso, tama ena wi me egobeo. Te bidi dabego enaba magi sę deli me yainu usu egobeo.
PSA 118:7 Genuai Bidigo digi ena tau sabo dao. Tama te Genuai Bidigo te boi bidi dabe elaluama, tama augwali dolobo te eno suaibao.
PSA 118:8 Te dago konealubo homu te Genuai Bidiba muani, te wiegi yai da, tama dago te olo bidi dabeba te konealubo me usugobeo.
PSA 118:9 Te dago konealubo te Genuai Bidiba mubaso, te wiegi yai ebao, tama dago te konealubo homu te king dabeba, me te tobolu bidi dabeba muyu, me usugobe dao.
PSA 118:10 Te boi bidi hauwago ena bagua sali, tiali goli, te Genuai Bidigo bomogo eno augwali silalio.
PSA 118:11 Augwaligo ena te tigidali badu bagua sali, tiali goli, te Genuai Bidigo bomode eno augwali ela silalio.
PSA 118:12 Augwaligo ena te bulude elalua pabo hauwa nai tiwai bagua sali. Tiali goli, augwali te kala sia polo sula sabo tiwai eyu, isalio. Te Genuai Bidigo bomode eno augwali ela silalio.
PSA 118:13 Augwaligo ena dali bomonama mu hwįani, tama ena hagawainu yali. Tiali goli, Genuai Bidigo ena tau salio.
PSA 118:14 Genuai Bidigo ena bomai mu pedalumainu ilalio. Agai digi ena tau siyu, ma dobola sai dao.
PSA 118:15 Te Godigo we bidi dabe te augwa ugwa be tomode i wabo odao. Augwa te po obao, “Te Genuai Bidigo bomogo naga te tiwai ebo dao,” wali.
PSA 118:16 “Genuai Bidigo genuai bomogo da tau selama, tama dago te boi bidi dabego bomo aiyaba elaluai dao,” wali.
PSA 118:17 Ena me isisąbadi tegobeo. Menio, te ena bidibo ula elalu, tama eno te Genuai Bidigo yali sę po dabe pusaibao.
PSA 118:18 Eno dwai sę ebaso, Genuai Bidigo enaba te dene mabo sę mu yali, tiali goli, agai ena isimainu me ebeo.
PSA 118:19 Te tempel be sunumi dabe dalao, tama ena te tomoba pelama, tama Genuai Bidigo nogi ugwaba saibao.
PSA 118:20 Te e da te Genuai Bidigo sunumi dao. Te doloba pai we bidi dabe naga te tomoba pabo usu yaibao.
PSA 118:21 Genuai Bidi, nago eno gedu haluasa po wabo odolama, tama nago ena tau selama, te ena bugagia bidibao. Tama tiyu, eno nago nogi ugwaba sobao.
PSA 118:22 Te masigi te kamda dabego te dwai da homu elama, tama augwaligo sela sąwani, te masigi da te be daga dąų elalu, polalubo masigi pedelali.
PSA 118:23 Genuai Bidigo digi te tiwai elama, tama dago suali, te wiegi yai mu yai dao.
PSA 118:24 Genuai Bidigo te wiegi yai side dabolo mawai. Dago wiegi yai pemene elama, tama agaba bugai haliga yao.
PSA 118:25 Genuai Bidi, dago nageba hanalu, te da ma sao. Nago da tau sobaso, tama dago ebo sę tigidali te wiegi yai pedelaibao.
PSA 118:26 Godigo te Genuai Bidigo nogide asali bidiba wiegi yai sę emainao. Dago aga nogi te Genuai Bidigo lotu be tempelde ugwaba sao.
PSA 118:27 Genuai Bidi naga aga te God mu dao. Agai da bugagia tonalubao. Te ni nologo dabe tulama, tama peyu, te alta sai bagua sigi pao.
PSA 118:28 Nage eno God da weyu, tama eno nageba puba hwi waibao. Nage eno God, tama te eno nage nogi ugwaba saibao.
PSA 118:29 Dagego Genuai Bidiba usu da po wao. Agai daba wiegi yai sę yai. Agai da wei mu elama, tama dabolo te olo tau sabo wiegi yai kolesaga sesemane idubo dao.
PSA 119:1 Niwai bidi dabe augwaligo magi sę me isiąma, bugagia biliyu, tama augwaligo Genuai Bidigo oda mabo bomo yai po wali pali bidi, augwaligo homu dwagi yai yaibao.
PSA 119:2 Homu si isiąwai bidi dabe, augwali Godigo po tigidali wali pabo bidi dabe, augwaligo homu dwagi yai yao.
PSA 119:3 Mu tama, te bidi dabe augwaligo dwai kolesaga wali pabo menio. Augwaligo Genuai Bidigo bilibo kolesaga tiwai wali bilibo dao.
PSA 119:4 Genuai Bidi, nago bomo yai po tigidali dabolo mayu, tama nago te po wai, da dua bugagia bidiyu, nago bomo yai po wali pabo dolo tama yao.
PSA 119:5 Eno homugo godolo mu elama, bomo eyu, nago po tigidali wali painogo ebo dao.
PSA 119:6 Tama tiyu, eno hale homu me isąwai, magi basowe, eno homugo nago bomo yai po naga konealuai.
PSA 119:7 Eno nago da dagalabo doloba pai kolesaga tigidali konea sainu idubadi, eno homu dolo elaluyu, tama eno nago nogi ugwaba sainogo ebo dao.
PSA 119:8 Eno nago bomo yai po tigidali wali pabo homu ebao. Tama nago ena tagaligio.
PSA 119:9 Mena tama tiyu, gesi bidigo dwagi yai kolesaga dali biligowe? Agai nago po wali peyu da, aga magi sę me isiąma, dwagi yai bidaibao.
PSA 119:10 Eno homu deli naga elalubao. Tama eno homugo nago sę yainogo ebo dao. Eno nago bomo yai po wali pabo tagalidali weyu, nago ena tau sao.
PSA 119:11 Eno nago po eno homude munama, tama eno konealuai. Magi baso meni, eno nage dali dwai sę idali weyu tibao.
PSA 119:12 Genuai Bidi, eno nage nogi ugwaba sobao. Nago dwagi yai bomo yai po ena ola mao.
PSA 119:13 Nago bomo yai po tigidali dabolo pusa mabo po, eno te we bidi augwaliba te po nedama, tama te po augwa homude dąų omainogo tiaibao.
PSA 119:14 Te eno nago po wali pabo homu ebogo te mone hauwa saibao homu ebo aiyaba elalubo dao.
PSA 119:15 Eno homugo nago eno te sę emainogo ebo homu eno kone palobo dao, tama nago dabolo mabo te po eno bugagia osola subo dao.
PSA 119:16 Nago bomo yai po eno godolo mu ebao. Tama eno homugo te po gegeda peyu, tagalogobeo.
PSA 119:17 Naga sę bidi ena bugagia bidimainogo, nago dwagi yai sę ena dali emai homu ebao. Tama ena bidibo ula dali bidiyu, nago po eno wali paio.
PSA 119:18 Nago eno homu dwagi yai iliyu, tama nago dwagi dwagi yai bomo yai po tigidali eno bugagia koneaibao.
PSA 119:19 Ena hauwa sogo e tǫde bidigobeo. Tama nago te bomo yai po ena dali dualigio.
PSA 119:20 Eno homugo eno te nago tigidali dwagi yai kolesaga dolo wali pabo homu ebao, tama tede eno moni nasi tiwai elalubao.
PSA 119:21 Nago te dwai sę ebo bidi augwali dali wado ebo dao. Tama te bidi dabe augwaligo nago bomo yai po tudiba muyu, tama augwa homu kolesaga wali pai, tebo bidi dabe augwali hagawaibao.
PSA 119:22 Augwaligo ena dali posobo po weyu, tama dwai po me weyu yai. Magi basowe, nago bomo yai po eno wali peyu, dwagi yai kolesaga ebaso, augwaligo dwai po ena dali wabo dao. Augwaligo ena dali te tiwai po ma waidalio, nago augwaligo te po wabo sula tagaligio.
PSA 119:23 Tobolu bidi augwaligo po miyu, ena elabo tų gegebo dao. Tiali digi, ena nago sę bidi, te eno homugo sesemane sogo nago dwagi yai bomo yai po koneaibao.
PSA 119:24 Eno sągą geselebo po nago enabolo mabo, te pode eno homu godolo mu ebao. Nago po ena sesemane sogo eno konemainogo ola mabo dao.
PSA 119:25 Augwaligo ena dolama, tǫba aiyaba elaluai. Nago ena hodolama, bomo ma mawai, te nago wali po wali pelama tiwai.
PSA 119:26 Eno tigidali kolesaga te po eno nage dali obadi, tama nago eno po wei ponai. Nago tigidali bomo yai po ola mawai.
PSA 119:27 Nago ena ola mayu, nago bomo yai po wali pao weyu, tama eno nago tigidali dwagi dwagi yai homugo koneaibao.
PSA 119:28 Tialima, eno homude sęgę mu ebadi. Nago te wali po wali peyu, ena bomo mabo dao.
PSA 119:29 Nago ena tonaluali da, te nago tų eno tagalogobeo. Nago dwagi yai kolesaga ena dali nago dwagi yai po ena ola mawai.
PSA 119:30 Eno homugo nage mu wali paibao wai. Sesemane sogo nago dwagi yai po eno homugo konebo dao.
PSA 119:31 Genuai Bidi, nago enabolo mabo po te eno wali pabo dao. Te nago magi sę me ena dali ebode, ena te sęde hale mąidali homu ebo dao.
PSA 119:32 Eno nago po polo wali painogo yaibao, magi basowe, nago dwagi yai kolesaga meba enabolo momainogo eno te homu ebo dao.
PSA 119:33 Genuai Bidi, nago dwagi yai po ena bugagia ola mayu, tama tigidali sogo eno te po wali paio.
PSA 119:34 Nago te dwagi yai po enabolo hania bugagia ola mayu da, te eno wali paibao. Eno homugo ena hodolobaso da, te eno te dwagi yai po tigidali wali paibao.
PSA 119:35 Nago eno sągągo bilibo tų dodoliyu, tama eno nago dwagi yai po wabo wali bilainogo yai, magi basowe, eno te dwagi yai po godolo mu ebo dao.
PSA 119:36 Nago eno homu hodoloyu da, te eno nago po wali pabo homu yaibao. Tama eno homugo te mena gasa bidigo nai dabe suyu, homu hodolidalio.
PSA 119:37 Nago ena tau selama, te dwai sę ebo tudiba muaibao. Nago ena dwagi yai bugagia ilao, te nago ena dali wali po wali pao.
PSA 119:38 Nago te bidi nage dali wi ebo bidi augwalibolo te po mabo dao. Tialima, naga sę bidi, ena dali, nago tiwai yao.
PSA 119:39 Eno te dwai po wabo dali wi ebaso da, nago ena tau sali da, te pogo ena aiyaba elalugobeo.
PSA 119:40 Eno homugo nago po tigidali wali painogo ebo dao. Nage dwagi yai mu, tama nago bidibo ula ena mawai dao.
PSA 119:41 Genuai Bidi, nago ena ola mani, nago ena godolo mu eyu, nago ena ma sai. Polobadu nago po weyu, tama tiaiba wai dao.
PSA 119:42 Nago ena tau siyu, te dwai bidi dabego ena dali wabo po wei ponomainogo yai, magi basowe, eno nago po koneama dąų wabo dao.
PSA 119:43 Nago ena bomo mayu da, te nago mu po tigidali sogo eno pusainogo yaibao, magi basowe, eno nago doloba pai po koneama dąų wai.
PSA 119:44 Te nage dwagi yai po eno sesemane bidada pabo sogo wali paibao.
PSA 119:45 Eno usu selama, nago po wali painogo yai, tama te badi te dwai kolesgago ena dąų wagobeo.
PSA 119:46 Nago po te eno tuni bidi augwali dali waibao. Eno te sę ebo ena hale me egobeo.
PSA 119:47 Eno dwagi yai dali nago po wali painogo yai. Magi basowe, eno te dwagi yai po godolo mu ebo dao.
PSA 119:48 Eno homugo nago po dwagi yai eyu, tama eno godolo mu ebao. Tama sesemane sogo eno homugo te nago dwagi yai po eno koneaibao.
PSA 119:49 Nago te naga sę bidi enabolo hasia mani, te dąų walali po nago ma koneao. Te tiali eno te pode konealubo po dąų wai dao.
PSA 119:50 Ena te homu sęgę ebo sogo te eno homu nagame yai, magi basowe, nago wali po wali peyu, ena bidibo ula mawai.
PSA 119:51 Dwai kolesaga ebo bidi augwaligo dwai po ena dali dwai posobo po wai, tama augwaligo ena dali te po obadi, eno nago dwagi yai po tudiba mubo menio.
PSA 119:52 Genuai Bidi, nago polobadu enabolo mani te po eno homugo koneyu yai, tama te pogo ena bomo mabo dao.
PSA 119:53 Eno suali, dwai bidi dabego nago dwagi yai po bolai, tama eno augwali dali wado po wabo dao.
PSA 119:54 Ena eno bulu digibulu bidiyu, tama eno nago dwagi yai po koneama, te eno tęąbi po wabo dao.
PSA 119:55 Genuai Bidi, hulide eno homugo nage koneyu, tama nago dwagi yai po eno wali pabo dao.
PSA 119:56 Eno nago dwagi yai po tigidali wali painogo eyu, tama tego ena homu dwagi yai ilibo dao.
PSA 119:57 Genuai Bidi, nage mu nage enade usu yaibao. Eno nagebolo po dąų olama weyu, tama wai, eno nago bomai po tigidali wali paibao.
PSA 119:58 Eno nage bomonama hanalubao, nago ena homu dene eyu tau sao, magi baso meni, nago po dąų weyu tama wai.
PSA 119:59 Eno te ena bilibo kolesagade homugo kone palama, tama megi da, eno po nage dali dąų weyu, tama ena nago po wali paibao.
PSA 119:60 Eno tonalugobeo. Eno polo nago bomai po wali paibao.
PSA 119:61 Te dwai bidigo usu sabo homugo ena paliyu, tama ena augwaligo kolesagaba oda sainogo ebao, tiali digi eno nago bomai po tagalobeo.
PSA 119:62 Te hulide mu ena hodaluama, nago nogi ugwaba siyu, te me badu doloba pai po nago po tų ilibode wali tiai.
PSA 119:63 Ena te nago sę ebo bidi dabe dali biliyu, te nago bomo yai po wali bilibo bage te eno abagi dabe dao.
PSA 119:64 Genuai Bidi, nago te tǫde we bidi tigidali godolo mu ebao. Nago tigidali bomo yai po enabolo ola mao.
PSA 119:65 Genuai Bidi, nago wiegi yai kolesaga naga sę bidi, enabolo yai dao. Nago naga dąų wali po wali mu pabo dao.
PSA 119:66 Nago bomo yai po tigidalide eno homu dąų mu obaso, tama tiyu, nago wiegi yai kolesaga te ola mabo sę ena dali yao.
PSA 119:67 Nago dene me enaba wasiąbadi digi, te eno nago sunumi wali asobeo. Tiali goli, megi da, eno nago po wali pabo dao.
PSA 119:68 Nago wiegi yai mu eyu, tama nago olo mu tau sabo kolesaga enade ebao. Nago bomo yai po ena bugagia ola maduao.
PSA 119:69 Te dwai hagoma ebo bidi dabego tibo po hauwa enade te gasa we bidibolo weyu ebao. Tiali goli, eno gasa homu me isąyu, te eno nago bomai po naga tigidali wali pabo dao.
PSA 119:70 Te bidi dabe augwaligo wiegi yai homu kolesaga me elalubeo. Tiali goli, eno te nago bomo yai po godolo homu mu ebo dao.
PSA 119:71 Te wiegi yai mu da, te nago dene mabo sę enabolo yali. Te tiali sęgo nago bomo yai po wali pomainogo ena bugagia ola mawai dao.
PSA 119:72 Eno te mone godolo homu me egobeo, te eno nago bomo yai po godolo ebo tiwai gilama me egobeo.
PSA 119:73 Nago digi nago ena nigali, tama nago ena bugagia tonalubao. Nago wiegi yai homu kolesaga enaba mao, te eno nago bomo yai po tigidali bugagia konea sabo sę emainogo yao.
PSA 119:74 Te we bidi augwali nagede wi eyu, nage dologode bidibo bage, te augwaligo ena sulama, homu pemene yaibao, magi baso meni, eno nago dąų wali pode homu dąų wabo dao.
PSA 119:75 Genuai Bidio, eno koneani, nago bomo yai po tigidali te dolo naga mu elalubao. Nago eno ebo kolesaga deli naga dodolabo homu eyu, tama nago enabolo sęgę mawai dao.
PSA 119:76 Nago dąų wabo po walio, te nago sesemane sogo ena godolo eyu, te naga sę bidi ena haliga dąų walabo po wai. Tialima, megi da, eno homugo nago tama sę emainogo homu ebao.
PSA 119:77 Nago ena megi hobede eyu da, te ena bidabo ula saibao, magi baso meni, eno nago bomo yai po godolo mu ebao.
PSA 119:78 Te hagoma ebo bidi dabe augwaligo tibo po weyu, ena olo po tų ilaibao. Augwa te ebo kolesagade hale mu ebo sę ilao. Tiali digi ena, te eno sesemane sogo nago bomo yai po homu konealueibao.
PSA 119:79 Mena bidi dabe te nagede wi eyu, tama te bidi dabego nago bomo yai po koneyu, te augwali enaba asomainao.
PSA 119:80 Te eno homugo nago ena tau sobaso, te nago bomo yai po tigidali eno wali peyu, tama ena te ena ebo kolesagade hale sabo sę me egobeo.
PSA 119:81 Nago ena ma sogowe weyu tonalu, te ena haliga sęgę mu ebao, tama eno bomo tigidali silibao. Tiali goli, eno nago pode konealubo homu dąų wai mu elalubo dao.
PSA 119:82 Eno te nago dąų wali po mu usu nugowe weyu, nage tonalubadi, te eno gedu magane eyu, hagela mu ebao. Tama eno te po weyu, “Nisu sogo nago eno haliga dua digi nagame iligowe?” eno te po wabo dao.
PSA 119:83 Ena te kibu meme wale te augwaligo wain ąį bulama, te dobaso, badia pai sąbo tiwai yali. Tiali digi te eno nago bomo yai po te eno homude gegeda pabo menio.
PSA 119:84 Nisu naga sogo eno tonalueibawe? Nisu sogo mu enabolo te dwai dene mabo bidi dabeba nago augwaliba dene magowe?
PSA 119:85 Te dwai hagoma ebo bidi dabego te nago bomo yai po wali pabo meni. Augwaligo geme dualubo kolesaga me badu eyu, te ena tola sainu ebao.
PSA 119:86 Da we bidigo nago bomo yai po tigidali dąų wabo homu ebao. Tama nago po te tulalugobeo. Te bidi dabe augwaligo tibo po dabego ena dolobao. Tama tibaso, nago ena tau somainu homu ebao.
PSA 119:87 Pąde tama te augwaligo ena ela mueinu yai. Tiali goli, te eno nago bomo yai po tagala homu me ebeo.
PSA 119:88 Nago ena bugagia tonalubao, magi baso meni, nago sesemane sogo ena godolo homu ebao. Tama tibaso, eno nago bomo yai po tigidali wali mu pabo dao.
PSA 119:89 Genuai Bidi, nago po da, sesemane sogo elalua pidu elalua paibao. Te nago bidibo bulude nago pogo bomo munu me siligobeo.
PSA 119:90 Nago sesemane sogo naga wali po wali pidu bidibao. Nago e tǫ naga gesabidi badu munama elalubao, tama elalubo tiwai tama elalu, te ibaba me kila sesa me pabeo.
PSA 119:91 Naga digi nago po wali gilama te tigidali nai sibi te polobadu elalua asali, megi e sogoba usu nagaselama, megi me elalubao. Magi baso meni, tigidali nai sibigo nago sę naga ebao.
PSA 119:92 Te eno nago bomo yai po godolo menigi sogo da, teda nago enaba dene mabo sę ebaso, te isigi dao.
PSA 119:93 Eno nago bomo yai po me tagalogobeo, magi baso meni, eno te po dabe wali pobaso, te nago ena bidabo ula mobaso ena bidibao.
PSA 119:94 Ena naga nai mu tama, tama tiyu, nago ena ma sao. Sesemane sogo eno nago po wali pabo homu ebao.
PSA 119:95 Te dwai sę ebo bidi dabe geme duala sagaselama, ena ela mueinu ebao. Tiali goli, eno nago bomo yai po tigidali konealubaso, te tama sę eno homu si me egobeo.
PSA 119:96 Eno megi konebao, te mena nai te wiegi yai deli mu me elalubeo. Tialima, te nago po te mu polalubao, tama tego te tigidali nai usu elama, te tigidali side elalua pidu, elalueibao.
PSA 119:97 Eno nago bomo yai po godolo mu ebao! Eno tede homu kone palobo sę te siade me hulide ebo dao.
PSA 119:98 Nago bomo yai po ena dali sesemane sogo elalu, tama te konebo homu kolesaga enabolo mabo dao. Tama tebo sęgo te ena kolesaga koneai bidi mu tiwai elama, tama eno te ena boi bidi dabe koneani homu kolesaga aiyaba elaluai dao.
PSA 119:99 Te sesemane sogo eno nago mu poba naga homu kone palobo dao, tama tiyu, eno wiegi yai homu kolesaga mu selama, tama eno ena po ola mabo tisa bidi aiyaba elaluai dao.
PSA 119:100 Tama eno koneani kolesagago te monu dabego koneani kolesaga te aiyaba elaluali, magi baso meni, eno nago doloba pai bomo yai po wali mu pobaso, tebo dao.
PSA 119:101 Ena dwai kolesaga wali pabo homu eyu, iba kila sabo dao, magi baso meni, eno homugo nago po naga wali pabo homu ebo dao.
PSA 119:102 Naga digi nago po dabe ena ola mani. Tama tiyu, eno te po me tagalobo menio.
PSA 119:103 Te bunu ge nai hani eno pedauwalide tubo pusu yaibao, tiali goli, nago po pusu ebo te umagi mu yaibao.
PSA 119:104 Nago bomai pogo enabolo te wiegi yai homu kolesaga mawaibao, tama tialima, eno te dwai kolesaga tigidali ebo te eno homu hagela mu ebao.
PSA 119:105 Nago po te lam sole ula tiwai eyu, te ena tau sobaso, dolo paibao, tama te ula tiwai eyu, ena sunumi ola mabo dao.
PSA 119:106 Eno po dąų weyu, te eno nago doloba pai po tigidali wali paibao po walio. Tialima, eno te tiwai tama yaibao. Eno tibo po me wagobeo.
PSA 119:107 Genuai Bidio, odao. Genuai dene mugo ena mesegelali. Nago ena te bidibo ula elalumainogo te nago po dąų tiwai gilama yao.
PSA 119:108 Genuai Bidio, eno gedu haluasa po weyu, te nageba puba hwi obao. Nago eno puba hwi wali po selama, tama ena nago po bugagia ola magameo.
PSA 119:109 Sesemane sogo eno ena bidibo ula tagalabo sisi elalubao. Tiali goli, eno nago bomai po homu kone ebo me tagalobeo.
PSA 119:110 Te dwai bidi dabego ena tola sabo bono gągą po diliginama, dalubao. Tiali goli, eno nago po me tagalobeo.
PSA 119:111 Eno nago po sesemane sogo totalua pidubo dao. Tama te pogo eno haliga pemene ilibo dao.
PSA 119:112 Eno po dąų weyu, te eno nago bomo yai po tigidali wali pidubadi, te ena isibo sogoba usu naibao po wai dao.
PSA 119:113 Nage wali paibao weyu, tibo po wabo bidi dabe te eno godolo me egobeo, tiali goli, eno nago bomo yai po wali pabo homu eyu, godolo ebao.
PSA 119:114 Nage naga tama ena seselalubo bidi elalubao, te eno bomai obo elalubo tiwai dao. Eno nago dąų wali pode konealubo homu dąų wai elalubao.
PSA 119:115 Dage dwai sęgę sabo we bidigo ena tagalao. Eno ena Godigo bomai po wali painogo homu ebo dao.
PSA 119:116 Genuai Bidi, nago po dąų weyu, te nago ena dąų walama, te ena bidibo ula elalueibao po wali, tama eno nago dąų wali pode homu konealuyu bidali. Nago te bomo enabolo mao, tiyu eno konealubo homu odolali tagalidalio.
PSA 119:117 Ena nogo tolalubaso, te ena bugagia bidaibao. Tama sesemane sogo eno olo nago poba bugagia munama elalu, te eno wali paibao.
PSA 119:118 Te nago bomo yai po wali pisąma tagalobo we bidi tigidali te nago tudiba mubo dao. Te augwaligo tibo po wabo dabe te odolali waibao.
PSA 119:119 Nago homugo te dwai sę ebo we bidi dabe te pobelebage tiwai naga homu ebo dao, tama tibaso, eno nago po godolo mu ebo dao.
PSA 119:120 Ena nagede wi mu elama, tama ena didibili ebao. Eno nago po tų ebode homu kone palama, te wi ebo dao.
PSA 119:121 Eno te wiegi yai doloba pai kolesaga ebao. Eno homugo nago ena tagaligi homu ebao, tiyu te boi bidi dabego enaba dwai sę idalio.
PSA 119:122 Eno homugo te nago naga sę bidi ena tau sabo bomai po dąų omainogo homu ebao. Te nago te dwai hagoma ebo bidi dabego enabolo te sęgę momai hagede sula tagaligio.
PSA 119:123 Te nago ena te dwai bidi dabego nogode ma dobola sogowe weyu, te nageba tonalu tonalu ebao, te nago polobadu tama tiabo po dąų wai dao. Tiali goli, ena tonalubadi digi, te ena dwai dene mu ebo dao.
PSA 119:124 Eno homugo nago ena godolo ebo kolesaga wali peyu, te nago mu po te bugagia ola magameo.
PSA 119:125 Ena nago sę bidi da, tibaso enabolo wiegi yai homu kolesaga mobaso da, te eno nago po page koneaibao.
PSA 119:126 Te we bidi dabe augwaligo nago bomo yai po bolobao. Tama tibaso, megi da te nago dene augwaliba mabo sogo dao.
PSA 119:127 Eno nago bomo yai po godolo mu ebao. Eno te polalubo nai te mone gol eno godolo homu elalubeo, tialima te eno nago po godolo homu ebo dao.
PSA 119:128 Tama tiyu, eno nago po tigidali wali pobao. Eno homugo te gasa sunumi dabego te nago sunumi ela soabo te eno homugo hagela homu mu ebao.
PSA 119:129 Nago po te wiegi yai mu elalubao. Tama tiyu, eno homu si isiąyu, eno te po tigidali wali pabo dao.
PSA 119:130 Te bidi me deligo gasa bidi tau siyu, te nago po page konemainogo tibaso da, teda aga haligaba ula mabo te saibao. Tama te pogo te homu kolesaga bugagia konesiąwani bidibolo te homu kolesaga mabo dao.
PSA 119:131 Eno nago bomo yai po homu godolo mu ebao, tama eno haliga umagia hogodaluyu, wali pabo homu ebao.
PSA 119:132 Nage aselama, te nago homu dene eyu, tau sabo kolesaga enabolo yao. Te nage godolo homu ebo we bidi tigidaliba te tiwai sę nago ebo dao.
PSA 119:133 Te nago tonalubaso da, teda ena te dwai sęgęba tulalugobeo, te nago tama tiabo sę po polobadu dąų wai. Te dwai kolesagago ena aiyaba elalu idali weyu, te nago tona tagaligio.
PSA 119:134 Te ena aiyaba elalubo sę bidi dabego, te ena augwaligo dolidali dabego, te nago ena ma sao. Tama tiwai sę augwaligo enaba isąbaso, te eno nago po wali paibao.
PSA 119:135 Eno homugo te nage ena pąba bidagaselama, te nago bomo yai po tigidali enabolo ola mayu, te ena bugagia wiegi yai ilao.
PSA 119:136 Eno gela hauwa weyu, tama eno gedu ąį gela gigua umagi mu yaibao, magi baso meni, te bidi dabe augwaligo nago bomo yai po wali pisąbaso, te ena gela wabo dao.
PSA 119:137 Genuai Bidi, nage doloba pai mu tama elalubao, tama nago bomo yai po tigidali te doloba pai mu naga elalubo dao.
PSA 119:138 Nago dabolo mani bomo yai po tigidali doloba pai elalu, tama wiegi yai naga elalubo dao.
PSA 119:139 Te eno boi bidi dabe augwaligo nago pode homu kone palobo sę me ebo menio. Tama tibaso, eno haliga te isi dabo posolo tiwai ebo dao.
PSA 119:140 Nago po dąų wabo te mu po naga waibao, te eno usu sela suai dao. Tama ena, nago sę bidigo, eno homugo nago te tiwai dąų wabo po godolo homu naga ebo dao.
PSA 119:141 Ena olo bidi da, te bidi dabe augwaligo enabolo posobo po obadi, tiali goli, te eno nago ola mabo po homu kone palobo me tagalogobeo.
PSA 119:142 Te nago doloba pai kolesaga sesemane sogo elalua pidu bidaibao, tama sesemane sogo nago bomai po te mu naga dao.
PSA 119:143 Te sęgę hauwa enaba pedelai, tiali goli, eno nago bomo yai pode homu pemene yaibao.
PSA 119:144 Nago po doloba pai sesemane sogo elalubao. Nago ena tau sobaso da, teda eno te po page koneama, tama ena te bidabo ula dali bidaibao.
PSA 119:145 Genuai Bidi, eno gedu haluasa po bomonama mu nageba obao. Eno gedu haluasa po odao, tialima te eno nago po tigidali wali paibao.
PSA 119:146 Megi eno nageba i obao. Ena ma dobola sao, tama tibaso da, te eno nago bomo yai po tigidali wali paibao.
PSA 119:147 Te be posisąbadi digi, te eno nageba gedu haluasa po weyu, ena tau sao po obao. Eno nago dąų wali poba homu dąų wagasai elalubo dao.
PSA 119:148 Te hulide ena godege me pigobeo. Eno sesemane sogo nago poba naga homu kone elalubo dao.
PSA 119:149 Genuai Bidio, nago sesemane sogo ena godolo ebaso, tama nago eno gedu haluasa po wabo odao. Nago ena homu dene eyu, tau sao. Tama tiyu, nago ena bugagia tonalubaso da, te ena bidibo ula dali bidaibao.
PSA 119:150 Te dwai homu elalubo bidi dabego te ena dolabo homu eyu, te augwali pąba asobao. Augwaligo nago bomo yai po wali pabo homu munu me ebeo.
PSA 119:151 Tiali goli, Genuai Bidi, nage ena pąde bidibao, tama nago hasegelesiąbo bomo yai po tigidali te mu po naga elalubao.
PSA 119:152 Te bidada asali sogo polobadu mu eno nago po konea salio. Nago te wali pogo te sesemane sogo bidada pabo po wai dao.
PSA 119:153 Nago suali, ena te genuai sęgę elalubo, tama tialima, nago te sęgę sela sąyao. Eno nago bomo yai po homu kone me gegeda palobo menio.
PSA 119:154 Ena tau siyu, ena ma selama, te ena bidabo ula mao, te nago tama tiabo po dąų wai dao, te tiwai yao.
PSA 119:155 Te dwai kolesaga ebo bidi dabego nago doloba pai po wali pisąbaso, tama tiyu te nago augwali ma sogobeo po wali.
PSA 119:156 Tiali goli, Genuai Bidio, nago olo tau mabo wiegi yai kolesaga te genuai mu elalubao. Nago ena ma sabo po dąų walai elalubao, tialima, eno homugo nago te sę megi tama yao homu ebao.
PSA 119:157 Bidi hauwago ena dolobo sę eyu, te enaba boi bidi ebao, tiali goli, eno nago wiegi yai mu bomai po me tagalogobeo.
PSA 119:158 Te bidi dabego konealubo homu dąų wali te eno suali sela sąbaso, te eno augwaliba wado po wabo dao, magi baso meni, augwaligo nago po wali pisąbaso tebo dao.
PSA 119:159 Nago ena subao, eno nago ola mabo po godolo mu ebao. Nago ena godolo ebo kolesaga me hasegelegobeo, tama tiyu nago ena ma sao.
PSA 119:160 Nago bomo yai po page da, te mu po naga tama elalubao. Tama nago doloba pai bomo yai po tigidali te sesemane sogo elalua pidu, elalua pabo dao.
PSA 119:161 Te tobolu bidi dabego enabolo dwai sę ebo, tama augwaligo te tiwai sę kolesaga page menio. Tiali goli, eno nago poba homu kone palobo sę elalubao.
PSA 119:162 Eno te nago dąų wali pode homu dąų weyu, wiegi yai pemene homu umagi mu ebao, te bidi me deligo te gol mone hauwa sobaso, pemene ebo tiwai ebao.
PSA 119:163 Eno te tibo po wabo kolesaga hagela homu mu eyu, tama tede eno haliga dwai ebo dao. Me ma, eno te nago po godolo homu mu ebo dao.
PSA 119:164 Te nogo a naga olama, me badu si wabo side, tigidali sogo eno nageba puba hwi weyu, te nago po tųde ebo doloba pai po naga obaso, tebo dao.
PSA 119:165 Te we bidi augwaligo nago bomo yai po godolo mu eyu, tama augwali bugagia mu bidibao, te magi nai me deligo augwali tulaluabo sę me ilibeo.
PSA 119:166 Genuai Bidio, te nago ena ma sogowe weyu, te nage eno tonaluyu, te nago po weyu, nago enabolo yao wali kolesaga eno ebao.
PSA 119:167 Eno nago bomai po dabe wai pabo dao. Eno te bomo yai po dabe wali pabo homu godolo ebo dao.
PSA 119:168 Eno nago bomai po dabe tigidali, me te nago po tigidali me wali pabo dao, tama eno tama tebo kolesaga tigidali nago subo dao.
PSA 119:169 Genuai Bidi, eno nageba i wabo odama, te ena tau sao. Te wiegi yai homu kolesaga enaba mao, te nago polobadu enabolo po dąų wali tiwai gilama yao.
PSA 119:170 Eno gedu haluasa po waboba olo muao, tama nago polobadu po wali gilama ena ma sao.
PSA 119:171 Te nago tigidali bomo yai po enaba bugagia ola mobaso, tama te eno nago nogi sesemane sogo ugaba mu saibao.
PSA 119:172 Te eno nago bomo yai po nogi ugaba sabo balia po waibao, magi baso meni, te nago bomo yai po tigidali te doloba pai naga elalubo dao.
PSA 119:173 Eno nago bomo yai po tigidali wali paibao, tama tiyu, nago ena sesemane sogo tau sabo sisi elaluao.
PSA 119:174 Genuai Bidi, eno haligago nagede gela obao, te nago ena ma sao. Nago bomo yai pogo ena homu pemene ilibo dao.
PSA 119:175 Eno te nago nogi ugwaba somainogo, nago enaba te bidabo ula mao. Eno homugo te nago pogo ena tau somainogo homu ebaso.
PSA 119:176 Eno te sunumi tagalama olo bilibao, te kibu sipsip wai hagabo tiwai ebao. Tama tibaso, nago ena naga sę bidi gegagasao. Magi baso meni, eno nago bomo yai po homu kone palobo, me gegeda pabo meni dao.
PSA 120:1 Te sęgę enaba pedalubo sogo, eno te Genuai Bidiba i wali, tama agai eno gedu haluasa po odoyu, tama wei ponani.
PSA 120:2 Eno gedu haluasa po te tiwai wali, “Genuai Bidi, ena tau sao. Tiyu, te tibo po wabo bidi dabego ena dolidalio,” wali.
PSA 120:3 Dage tibo po wabo bidi dabe da, Godigo mena sę dageba egowe? Agai dageba te magi dene mawaibawe?
PSA 120:4 Te agai dage te ami bidi dabego poa pai enego enaibao, tama posolai sia te dage tigiba gea palaibao.
PSA 120:5 Ena dage tomode dwai dugulalu, tama te ena te bulu Mesek, me te Kedar dabe tomode dwai dugulaluali tobage tiwai ebao.
PSA 120:6 Ena te gasa we bidi dabe dali bugagia wei elama dugulalu, te sesabi elama dugulaluama bidabo tiwai ebeo.
PSA 120:7 Te eno augwali bugagia dugaya wabo sogo, augwaligo hwįainu naga yai dao.
PSA 121:1 Eno te bulu du dabeba tonono ebao. Tiali goli, ena tau sabo bidi menadu pedelaibawe?
PSA 121:2 Menio. Genuai Bidigo dagalu dali, tǫ dali nigali, agai deligo naga ena tau sabo dao.
PSA 121:3 Te agai nage tulalumainu me egobeo. Te agai nage tonalu, tama aga me pigobeo.
PSA 121:4 Bugagia odao. Agai te Israel dabe tonalubo dao, tama aga dwasianu me pibeo. Mu menio.
PSA 121:5 Genuai Bidi agai te nage tonalubo bidi dao. Aga te nage pąde dolalu, tama nage tonalubo dao.
PSA 121:6 Te giliga sesani te nago tigide me egobeo, tama te hulide te poluago nage me dologobeo.
PSA 121:7 Genuai Bidigo te nage tonalu, tama te dwai naigo nage dolidali weyu tiaibao. Agai nage tonaluaibao.
PSA 121:8 Te nago be taga pabo sogo, te Genuai Bidigo nage tonaluaibao. Tama te nago ma asobo sogo me, te agai nage tonalubao, tama megi me, te tigidali sogo nosali bidibode me, te tiaibao.
PSA 122:1 Augwaligo enabolo walali, “Iya, tegoba, da te Genuai Bidigo beba pinao.” Augwaligo te tiwai po obaso, te ena bugai haliga mu yalio.
PSA 122:2 Tialima, megi da, da sabolama, tama te Jerusalem bagulali obo tomode dolalubao.
PSA 122:3 Augwaligo te Jerusalem ma nigilama, tama te wiegi yai mu dodolama elalubao.
PSA 122:4 Te Israel hani dabe teba aselama, te Genuai Bidiba puba hwi po wagasobo dao, te polobadu agai augwaliba wali po tiwai gilama ebo dao.
PSA 122:5 Te pesagede te po tų ebo be elalubao, tama Israel king dabego te we bidigo po tų odolama, tama po dodoliyu ebo dao.
PSA 122:6 Dagego te gedu haluasa po waiyąo, te Jerusalem dabe bugagia dugulalumainogo yao. Dagego te tiwai gedu haluasa po waiyąo, “Te Jerusalem wei ebo we bidi dabe augwa bugagia bidimainao.
PSA 122:7 Te Jerusalem obo tomode bidibo we bidi dabe augwa te bugagia dugulalu, te hwįbo menia somainao. Tama king dali, te tobolu bidi dabe me, te bugagia dugulalumainao,” wao.
PSA 122:8 Eno te abagi me hai namu homu koneama, tama eno te tiwai po Jerusalemba obao, “Eno homugo naga te bugagia bidiyu, tama te hwįbo meni yaibao.”
PSA 122:9 Eno te dena Genuai Bidi, Godigo beba homu kone paliyu, tama eno te gedu haluasa po obao, te nago tigidali nai te bugagia mu pedalumainao.
PSA 123:1 Genuai Bidi, nage te dagalude king bidibaso, tama eno konealubo homu nageba muani.
PSA 123:2 Te sę ebo bidigo te aga tonalubo bidiba homu muyu, tama te sę ebo wego me te aga tonalubo weba homu muaibao. Te tiwai naga gilama, dago konealubo homu me nageba muyu, Genuai Bidi, te dago God dao, te nago olo tau sabo wiegi yai kolesaga dabolo ebaso, te usu dao.
PSA 123:3 Genuai Bidio, nago te homu dene eyu, olo tau sabo kolesaga daba yao, magi baso meni, te we bidi dabego daba te dwai sę hauwa sogo ilibo dao.
PSA 123:4 Te sesabi elama bidibo sogo, te mone bisnis sę ebo bidigo dabolo te posobo po wali, tama te hagoma ebo bidi dabego da aiyaba elalubo dao.
PSA 124:1 “Te Genuai Bidigo da me tau sigi menigi sogo da, teda magi igi dawe?” Te Israel dabego te hanalubo wei ponao.
PSA 124:2 “Polobadu te bidi dabego dabolo haliga sębę elama, tama augwaligo da dali hwįani. Tama Genuai Bidigo da tau sigi menigi sogo da, te boi bidi dabego augwa haliga sębęgo da mu doligi dao.
PSA 124:4 Te da węgo bomogo sabo tiwai elama hagagi da, tama te węgo da mesegelibo tiwai igi dao.
PSA 124:5 Tama te wę bomo yai asiyu, da sigibaso, tama da isigi dao. Tiali goli, me tebeo menio.”
PSA 124:6 Dago Genuai Bidiba usu da mu wao. Agai te boi bidi dabego da silimainu me ebeo.
PSA 124:7 Dago augwali tagalali, te ba te bidi me deligo muani wade tola sali te tagalubo tiwai elama, tama bola pali. Te wa alua pelama, tama da tede ma dąų me elalubeo.
PSA 124:8 Te dagalu dali, tǫ dali nigali Genuai Bidigo, aga digi te da tau sabo dao.
PSA 125:1 Te Genuai Bidiba homu kęą pali we bidi dabe, augwali te Saion bulu du tiwai dao. Te bulu du mumunu me isiąma, tama aga page dąų mu elalubao.
PSA 125:2 Te Jerusalem bagualu elalubo bulu du dabe, te tiwai naga megi, me nosali tigidali sogo telaluaibao, te Genuai Bidigo aga we bidi bagualubo dao.
PSA 125:3 Te dwai bidi dabego te Godigo we bidi dabego tǫ te sesemane me tonaludugobeo. Te tiwai augwaligo igi sogo da, teda te Godigo we bidigo me te dwai kolesaga eba homu igi da.
PSA 125:4 Genuai Bidi, nago wiegi yai kolesaga te wiegi yai we bidiba yao, te naga bomai po wali pabo we bidi dabe dao.
PSA 125:5 Tiali goli, nago te augwa digi augwa dwai kolesaga wali pabo we bidiba te dwai dene mabo sogo da, teda nago kolesaga tagalubo we bidi tigidaliba nago te dene mao.
PSA 126:1 Te Genuai Bidigo da te Saionba ma odasa asali sogo, dago homugo te dago olo nade ebo tiwai homu yai.
PSA 126:2 Tama dago gisugu kisu selama mu wali, tama dago pemene umabo mu ebo tęąbi wali. Tama te Genuai Bidigo po konesiąbo bidi dabego te tiwai po wali, “Genuai Bidigo te genuai sę mu ebogo te Israel dabe tau sabo dao,” wali.
PSA 126:3 Mu dao, Genuai Bidigo te genuai sę mu da tau siyu yai dao. Tama tibaso, da bugai haliga mu ebo dao.
PSA 126:4 Genuai Bidi, nago da tigidali dena tǫba ma odasa asao. Te tama tiali, te buside wę gamia soabo te wa pomainu ebo tiwai bolo yali, tiali goli, nago te tulubage tulumainu elama, tama wę te ąį gamiade pągąmainu yao.
PSA 126:5 Te gela wabo sę eyu, te nai bulali bidi dabe, te augwa wiegi yai pemene elama, te inayu tau yali nai nosali saibao.
PSA 126:6 Mu tama dao. Te gela weyu, te nai wai sela pelama, bulugi pali bidi dabe, nosali augwa te wiegi yai pemene ebo tęąbi weyu, tama te tau yali nai dabe selama, asaibao.
PSA 127:1 Te Genuai Bidigo te be me deli sę igi menigi sogo da, te kamda dabego sę odolali igi dao. Te Genuai Bidigo taun me deli tonalugi menigi sogo da, teda te tonalubo bidi dabe augwali te odolali tonalugi dao.
PSA 127:2 Da te kigamu digi mu hodaluama, tama sę dene ela pidubadi, te be hulia saboba usu nani, te mone me nai dabe sabo sę eyu tebao. Tiali goli, teyu, te da odolali sę dene yabuo. Magi baso meni, Godigo te aga wei ebo we bidi dabeba te toma nabo sogo mabo dao.
PSA 127:3 Godigo dabolo dwagi yai sę eyu, tama te wai dabe te wiegi yai nai mu tiwai mabo dao. Te wiegi yai nai dabe mu dago te Godide sabo dao.
PSA 127:4 Te gesi bidigo wai ogwa te ami bidi me deligo nogode te enesigi ene tolalubo tiwai ebao.
PSA 127:5 Te wai ogwa hauwa elalubo bidi, aga te wiegi yai pemene yao. Te agai te aga boi bidi dabe dali te po tų ebo pesagede te po tų ebo sogo, te augwaligo aga tau saibao. Tama aga te po tųde hagamainu me egobeo.
PSA 128:1 Te Genuai Bidide wi elama, tama agai po wali pabo we bidi dabe, augwali te wiegi yai pemene ebo dao.
PSA 128:2 Tama te naga yali sęde te mone selama, te nago sǫą pali doado bage abelibaso, te usu yaibao. Tama nago ebo sę tigidali te wiegi yai pedelama, tama nage pemene yaibao.
PSA 128:3 Te nago we da, te wain bonogo te nai hauwa walubo tiwai yaibao. Tama nago wai dabego te nago nai tuabo tebol sai bagua selama, te gesi ni oliv dugo bagua sabo tiwai yaibao.
PSA 128:4 Mu tama, te Genuai Bidigo po wali pabo bidi da, te aga te tiwai wiegi yai nai sabo dao.
PSA 128:5 Genuai Bidi te Saionde bidibao, eno homugo agai te nage wiegi yai sę ilaibao. Me eno homugo te tigidali sogo nage te tǫde bidibo sogo te nago te Jerusalemde tigidali nai te bugagia mu pedalubo suaibao.
PSA 128:6 Eno homugo nage sesabi elama, bidimainu homu elama, te nago naga wąį nǫų dabe sumainu ebo dao. Te Israel dabe bugagia dugulalumainu elama, tama te hwįbo menia somainu yao.
PSA 129:1 Israel, nago dabolo te boi bidi dabego nage dwai mu ilibo sę ebo po pusali, te nage gesi bidide gagalasa, megiba te usu nagasobao.
PSA 129:2 Nago te tiwai po wali, “Te boi bidi dabego enaba dwai sę mu yali, te ena gesi ogwa bidide gagalasa, megiba usu nagasobao. Tiali goli, augwaligo ena aiyaba me elalubeo,” po wai.
PSA 129:3 “Augwaligo ena dodolagia mu elama, tama elali bįgo ena tigiwali tudi badu togwali. Augwaligo te bobobage keni hauwa te gide wę gamia tiwai pedalumainu ilali.
PSA 129:4 Tiali goli, Genuai Bidi te doloba pai mu da, tama agai ena tau selama, tama ena te dwai bidi dabego nogode tagalama, tama ena te olo sę ebo bidi ma bidibeo,” wali.
PSA 129:5 Eno homugo dago te Saionba boi bidi ebo bidi aiyaba elalumainu homu yai, tama augwali pobeasa te augwa buluba ma pao.
PSA 129:6 Te tialima, augwali te be daide ugwadu pedalubo nosa tiwai ebao. Augwaligo te nosa togosiąbadi, tama polo sasia pabo dao.
PSA 129:7 Te bidi me deligo te nosa me sisinama, tama dunama, tama me tolasa pabeo.
PSA 129:8 Tama te we bidi dabe augwali pąba pobaso, te augwaligo te tama po me wagobeo, “Te dago homugo Genuai Bidigo nage wiegi yai sę yaibao. Te Genuai Bidigo nogide, dago dagebolo te tobage wiegi yai po mobao,” augwaligo te tobage po wagobeo.
PSA 130:1 Genuai Bidi, ena haliga sęgę dwai mu ebaso, tama eno nageba i obao.
PSA 130:2 Genuai Bidi, eno gela wabo odao. Te nago ena tau sao olama, te eno nageba i wabo odao.
PSA 130:3 Te nago dago yali dwai sę tigidali nedebaso da, teda dego nago te po tų ebo ugwaba ela holobo usu egowe?
PSA 130:4 Tiali goli, nago dago dwai sęde sali sęgę sela sąbo da, tama tiyu, dago nagede noma siyu, wi ebo dao.
PSA 130:5 Eno homugo te Genuai Bidigo ena tau somainu homu elama, tama eno aga tonalubao. Tama eno konealubo homu agai poba dąų mu wabo dao.
PSA 130:6 Eno te Genuai Bidi tonalu, tama eno homugo te agai ena tau somainu homu mu ebao. Tama tego te be posobo tonalubo bidi dabego wei ebo homu te aiyaba elalubao. Te bagego hulide te taun bugagia tonalubo sę ebo dao, tama augwaligo homugo te be posobo polo asao homu ebo dao.
PSA 130:7 Da Israel dabe, dago konealubo homu te Genuai Bidiba muiyąo, magi baso meni, agai da sesemane wei mu idubao. Tama sesemane sogo te agai da tau sabo homu eyu, te da dolidali olama tebo dao.
PSA 130:8 Agai aga we bidi dabe te ma saibao, te da Israel, tama dago yali dwai sęde sali sęgę tigidali sela sąwaibao.
PSA 131:1 Genuai Bidi, eno te hagoma yali kolesaga tagalama, tama eno te ena digi te nogi ugwaba me sabeo. Eno te genuai nai dabede homu kone me isiąma, tama te eno konesiąwai nai dabede me eno homu kone me ebo menio.
PSA 131:2 Tiali goli, ena te bugagia duagulama, tama ena homu dua tegaluai. Ena te wai bǫų aga idago nogode digi pagealubo tiwai elalubao. Tama tiwai naga, eno haliga me te dua digi elalubao.
PSA 131:3 Te Israel dabe, dagego konealubo homu Genuai Bidiba muiyąo, megi me, tigidali sogo nosali me, te tama tiao.
PSA 132:1 Genuai Bidi, nago te Devit homu kone ebo me tagaligio, tama te tigidali sęgę agai bugagia tolali, te homu kone tagaligio.
PSA 132:2 Te Israelgo Bomai God, nago te Devitgo nageba te dąų walali po meba koneao.
PSA 132:3 Agai te tama po wali, “Ena te beba me pisąma, tama ena te betba me pigi pogobeo,” wali.
PSA 132:4 “Ena toma neyu, tama me pila mudugobeo.
PSA 132:5 Hasiabolo eno te Genuai Bidigo pesage me deli nigaibao, te Israelgo Bomai God, te aga bidimainu yabo pesage nigilaibao. Tama nosali te ena toma naibao,” wai.
PSA 132:6 Te Betlehemde dago te Genuai Bidigo Dąų Wali Bomai Po Munalubo Halobage po odali. Tama dago te Kiriat Jearim tǫde elalubo gegelama suai.
PSA 132:7 Tama dago te po wai, “Iya, tegoba, da te Genuai Bidigo beba pinao,” wali. “Dago te aga sia king pąba lotu wagi pinao,” wai dao.
PSA 132:8 Genuai Bidi, nage te naga toma nabo pesageba dulao, tama te Dąų Wali Bomai Po Munalubo Halobage nage dali selasa asao. Te nago genuai bomo dąį ilali te dao. Tama nage aselama, tama tede bidada peyu, bidada pao.
PSA 132:9 Te nago naga pris dabe tau selama, tama augwaligo te doloba pai kolesaga naga tigidali sogo emainao. Tama naga we bidi dabe augwa wiegi yai pemene elama, i omainao.
PSA 132:10 Genuai Bidi, nago te naga sę bidi Devitba te bomai po me deli dąų walali elalubao. Tama tiyu, nago te naga sa muani king te tudiba me mugio.
PSA 132:11 Polobadu nago Devitba bomai po me deli dąų walali, tama nago te naga po me hasegeligobeo. Nago te tama po wai, “Te eno nago ogwa me deli te king pedalumainu yaibao,” wali, “tama agai te nage hasegelaibao.
PSA 132:12 Te nago ogwa dabego eno dąų wali po kontrak wali peyu, tama eno augwaliba mani bomai po tigidali wali pobaso da, teda nago wąį nǫų dabego te augwa ogwa dabe augwali me te king pedelaibao, te tigidali sogo tama tede piduaibao,” wali.
PSA 132:13 Genuai Bidigo te Saion sa muanio, tama aga tede sesemane bidainu yai.
PSA 132:14 Agai te po wali, “Te ena te taunde sesemane bidada peyu, bidada paibao,” wali. “Eno te pesage te ena king bidabo madi sa muai dao.
PSA 132:15 Eno te Saionba usu nama nai mayu, tama te we bidi dabe te nai me sǫą pogobeo. Tama eno te magi nai meni yai bidi dabe nai menama, tama augwa mu pągąwaibao.
PSA 132:16 Eno te Saion pris dabeba sę menama, eno te tǫde we bidi ma sabo po te pusumainu ebao. Tama te Saion we bidi dabe augwa tęąbi weyu, tama pemene elama, tama i omainu yaibao.
PSA 132:17 Te eno te Devitgo hanide bidi me deli selama, tama aga te bulude king pedalumainu elama, tama aga hani te sęde me hagagobeo.
PSA 132:18 Te eno agai boi bidi dabe te dwai hale mu somainu ilaibao, tiali goli, te agai tonalubo we bidi dabe da, te augwali wiegi yai pedelama, tama bomo elalu bidaibao,” po wai dao.
PSA 133:1 Te Godigo we bidi dabe deliba bugagia dugulalu, tama te deli haliga elama, te ama dabe tiwai mu elama bidiyu ebaso da, te wiegi yai mu dao, tama augwa bugai haliga elama bidimainu yao.
PSA 133:2 Te kolesaga te oliv ni dugo te wiegi yai wel tiwai ebao, augwaligo te Arongo toboluba gelama, tama te naboge tobolu nisiba dulama, tama aga bobage gudali ugwa sabiba usu nugulali.
PSA 133:3 Te deli haliga ebo kolesaga te hulide genuai wę segeni te Hermon bulu duba, me te Saion bulu du dabeba tulalubo tiwai ebao. Te bulude Genuai Bidigo te bidi dabe bugagia mu te deli haliga elama, bidimainu ebo dao. Agai augwaliba te bugagia mu bidada peyu, bidada pabo ula augwaliba mawaiba.
PSA 134:1 Dage Genuai Bidigo sę bidi tigidali, te agai tedali wiegi yai tempel bede te hulide sę ebo da, dagego agai nogi ugwaba siąo.
PSA 134:2 Dagego te tempel be tomode gedu haluasa po bomo elama weyu, tama Genuai Bidigo nogi ugwaba sao.
PSA 134:3 Genuai Bidigo te dagalu me tǫ nigali, tama te Saionde bidiyu, eno homugo agai dage dali wiegi yai sę emainao.
PSA 135:1 Genuai Bidi nogi ugwaba sao. Te Genuai Bidigo sę bidi dabe, dagego aga nogi ugwaba sao.
PSA 135:2 Dage te Genuai Bidigo be tomode dolalubao, te dena Godigo tedali wiegi yai tempel be dao.
PSA 135:3 Aga nogi te ugwaba sao, magi baso meni, agai wiegi yai sę daba ebao. Agai te olo tau sabo wiegi yai kolesaga dabolo ebao, tama tiyu, dago te tęąbi dabe weyu, agai nogi ugwaba siąo.
PSA 135:4 Genuai Bidigo Jekop te aga mu da weyu, te sa muani, tama tialima, te Israel dabe te Godigo hani mu gagawai dao.
PSA 135:5 Eno koneani, Genuai Bidigo nogi te genuai mu elalubao, tama aga te tibo god tigidali daide ugwadu aga bidibao.
PSA 135:6 Genuai Bidigo mena sę te dagalude me, te tǫde me, te tamu węde me, te tamu wę pagede yabo homu ebaso da, teda agai te sę ebo dao.
PSA 135:7 Agai te tulubage tulubo pǫ te tigidali tǫ badu pedalumainu elama, tama be sele te tulubage dali pedalumainu ebo dao, tama te wali hodolama, te tedela palobo dao.
PSA 135:8 Te Isip tǫ pedai kantride agai te Isip dabego gomunai ogwa dabe ela mubadi, te augwa kibu bulmakau omai dabe me ela silali.
PSA 135:9 Tama te Isipde agai te bidigo me isiąwai bomai sę dabe te kingba me, aga ofisa dabeba dali, te dene mawai dao.
PSA 135:10 Genuai Bidigo te bulu tǫ pedai hauwa dolama, tama te bomai king meba ela muai dao.
PSA 135:11 Agai te Sihon elali, te Amor dabego king, tama Ok, te Basan bulu king da, tama te Kenan tǫ king tigidali ela silai dao.
PSA 135:12 Tama agai te king dabego tǫ te aga hani bageba mani, te Israel dabebolo mawai dao.
PSA 135:13 Genuai Bidi, sesemane sogo te we bidi dabego te nage koneama, te naga digi nage te God da homu yaibao. Tama te nosali pedalubo hani dabe, augwaligo me te nage homu konealuaibao.
PSA 135:14 Tama Genuai Bidigo te seselalubo kolesaga te aga we bidi dabeba eyu, tama aga te sę bidi dabeba homu dene yaibao.
PSA 135:15 Te gasa hani dabe augwaligo te augwa tibo god dabe te silva me golgo nigali. Te bidi dabe augwa nogogo digi te tibo god dabe nigai.
PSA 135:16 Te tibo god dabe augwa pedauwali elalubao, tiali goli augwa po wabo usu meni yai. Tama augwa gedu elalubao, tiali goli augwa nai dabe me subeo.
PSA 135:17 Tama augwa olo elalubao, tiali goli augwa po wabo me odosiąwai, tama augwa mobo sabo usu meni yai.
PSA 135:18 Eno homugo te tibo god nigibo bidi dabego tama augwa homu te nai dabeba mubaso, augwa te tibo god dabe tobage tiwai pedelaibao.
PSA 135:19 Dage Israel we bidi dabe, te Genuai Bidi nogi ugwaba siąo. Dage Genuai Bidigo pris dabe, te Genuai Bidigo nogi ugwaba sao.
PSA 135:20 Te Livai hani dabe, te Genuai Bidigo nogi ugwaba siąo. Dage te Genuai Bidide wi eyu aga dologode bidibo we bidi dabe, te aga nogi ugwaba sao.
PSA 135:21 Te Saionde bidalubo we bidi dabe, te Jerusalem, te Genuai Bidigo pesage mu da, te agai nogi ugwanu sao. Genuai Bidigo nogi ugwanu mu sao.
PSA 136:1 Dago Genuai Bidiba usu da wao, magi baso meni, agai dabolo wiegi yai sę yai. Sesemane bidada pabo sogo agai da wei mu ebao.
PSA 136:2 Dago Genuai Bidiba usu da waiyąo. Agai te tigidali tibo god aiyaba elaluai. Sesemane sesemane sogo agai da wei mu ebo dao.
PSA 136:3 Dago usu da po te Genuai Bidiba wao. Agai te tǫde genuai bidi tigidali aiyaba elaluali. Agai da sesemane bidada pabo sogo wei mu ebao.
PSA 136:4 Agaduba deligo te genuai sę te bidigo me isiąwai bomai sę dabe ebo dao. Agai da sesemane bidada pabo sogo wei mu ebo dao.
PSA 136:5 Te aga koneani kolesagade digi agai te dagalu nigilama, te ugwadu elalubo nai dabe me nigalio. Sesemane bidada pabo agai da wei mu ebao.
PSA 136:6 Agai te tǫ ugwadu munama, tama te wę dabe aiyadu elalubao. Agai da sesemane bidada pabo sogo wei mu ebo dao.
PSA 136:7 Agai te giliga me, polua me, nigali. Sesemane bidada pabo sogo agai da wei mu ebo dao.
PSA 136:8 Agai te be posobo sogo te ulade te giligago tonalumainu ilali. Agai da sesemane bidada pabo sogo wei mu ebao.
PSA 136:9 Agai te polua me hǫ dabego te be hulia sabo sogode tonalumainu ilali. Agai da sesemane bidada pabo sogo wei mu ebo dao.
PSA 136:10 Agai te Isip dabego gomunai ogwa dabe ela muani. Te sesemane bidada pabo sogo agai da wei mu ebo dao.
PSA 136:11 Agai te Israel dabe odasa peyu, tama augwaligo te Isip taga palio. Agai da sesemane bidada pabo sogo wei mu ebo dao.
PSA 136:12 Te agai genuai bomogo digi, agai augwali odasa palio. Sesemane bidada pabo sogo agai da wei mu ebo dao.
PSA 136:13 Agai te nosa elaluali tamu ąį te si badu peda somainu bugulali. Agai da sesemane bidada pabo sogo wei mu ebo dao.
PSA 136:14 Aga polasa peyu, tama aga we bidi dabe odasa peyu, tama augwali te tamu ąį nogealio. Agai te sesemane bidada pabo sogo da wei mu ebo dao.
PSA 136:15 Agai te Fero me, aga ami bidi dabe dali, te wę tulama tama isimainu ilalio. Agai sesemane bidada pabo sogo da wei mu edubao.
PSA 136:16 Te aga we bidi dabede aga te wa pai bulude polasa palio. Agai da sesemane bidada pabo sogo wei mu ebao.
PSA 136:17 Agai te bomai king dabe ela muani. Agai da sesemane sogo wei mu eyu, tama tialio.
PSA 136:18 Tama agai te genuai nogi elalubo king dabe ela muai. Agai da bidada pabo sogo sesemane wei mu eyu, tiali.
PSA 136:19 Agai te Sihon ela muai, te Amor dabego king dao. Te sesemane bidada pabo sogo agai da wei mu ebo dao.
PSA 136:20 Tama agai te Ok elali, te Basan bulu king bidi dao. Te agai sesemane bidada pabo sogo da wei mu ebo dao.
PSA 136:21 Tama agai te king dabego tǫ te aga we bidi dabeba mawai. Te agai sesemane bidada pabo sogo da wei mu ebo dao.
PSA 136:22 Agai te tǫ te Israel dabeba mawai, te aga sę bidi dabeba mawai dao. Agai te bidada pabo sogo sesemane te da wei mu ebo dao.
PSA 136:23 Te boi bidi dabego da aiyaba elalubo sogo, agai dade homu kone me elaludalio. Te agai bidada pabo sogo sesemane da wei mu ebo dao.
PSA 136:24 Tama agai da te boi bidi dabego nogode ma salio. Agai te bidada pabo sogo sesemane da wei mu idubo dao.
PSA 136:25 Agai te tigidali we bidiba nai mayu, tama te tigidali kibu hasa dabe me nai mabo dao. Agai te bidada pabo sogo sesemane te da wei mu ebo dao.
PSA 136:26 Tama tialima, dago te dagalude bidibo Godiba te usu da po waiyąo. Te sesemane bidada pabo sogo agai da wei mu ebo dao.
PSA 137:1 Da te Babilon dabego wę sesegede bidalu, tama dago te Saionba homu kone palubao. Tama tiyu, da gela udubao.
PSA 137:2 Dago dena gita dabe te pąde elalubo ni nologode walama, elaluali.
PSA 137:3 Tama da te kalabus yali bidi dabego te tama po wali, “Dago homugo te dagego da bugai haliga yabo tęąbi meba omainu homu ebao,” wali. “Te Saion tęąbi me deli waiyąo,” po walio.
PSA 137:4 Tiali goli, magi baso dago te Genuai Bidiba tęąbi te dago bulude wabo ąǫ te mena bulude waibawe? Te usu mu me egobeo.
PSA 137:5 Jerusalem, te eno nageba homu kone isiąyu da, teda eno te gita ma elainu ebaso, te usu me egobeo.
PSA 137:6 Jerusalem, te eno nageba homu kone me isiąyu, tama te eno polalubo pemene ebo homu nageba sa munama, bidisąbaso da, teda eno dogoni dolobaso, tama eno tęąbi ma wainu ebaso, usu me egobeo.
PSA 137:7 Genuai Bidi, nago te Idom dabego yali kolesaga homugo ma kone palao, te augwa hwįani sogo te Jerusalem sai. Augwa te wali po ma homude koneao. Augwaligo te tama po wali, “Te Jerusalemde tigidali be me te tigidali aluama, tama tigidali dolao,” po wai dao.
PSA 137:8 Babilon, odao. Te nage dolaibao. Te nago dabolo yali dwai sę wei ponobo bidi da, te bidi aga pemene yagameo.
PSA 137:9 Te bidigo te nago dwasianu wai puluba dabe selama, tama augwali te masigiba aiya sąnama tama augwali mu dolagameo.
PSA 138:1 Genuai Bidi, te eno haliga tigidali mugo nageba usu da obao. Te tigidali tibo godigo gedude te eno nago nogi ugwaba sabo tęąbi po obao.
PSA 138:2 Eno te nago tedali wiegi yai tempel bego gedude kidu sugunama, tama nago nogi ugwaba sobao. Magi baso meni, nago ena sesemane sogo godolo mu elama, tama nago ena bugagia tonalubo dao. Nago dabolo ola manio, nage dali, te nago po dali, te mu polalubo dao.
PSA 138:3 Te eno nageba i wabo sogo, nago eno gedu haluasa po wabo odolama, tama nago naga bomo digi enaba menama, tama ena bomo mu elalu bidalio.
PSA 138:4 Te tigidali tǫde kingo nago dąų walali po odola silama, tama tiyu, augwa te nago nogi ugwaba saibao.
PSA 138:5 Tama augwaligo te nago yali sę dabede te augwa tęąbi po weyu, tama nago genuai nogide te tęąbi po me waibao.
PSA 138:6 Genuai Bidi, nage te ugwadu mu bidiyu, tama nage polalubao, tiali goli, nago te hagoma homu isiąbo we bidi dabeba homu kone ebao. Tama te hagoma ebo bidi dabe me te nagede geme me duala sogobeo.
PSA 138:7 Te sęgę hauwa enaba pedalubo sogo, nago ena tonalubaso, tama ena bugagia bidibao. Te boi bidi dabego enaba wado ebo dao, tiali goli, nago augwali dali hwįyu elama, tama nago bomogo naga nago ena ma sabo dao.
PSA 138:8 Genuai Bidi, eno koneani, te nago enabolo po dąų walali gilama te tigidali sę yaibao. Tama nago ena te sesemane bidada pabo sogo godolo mu ebo dao. Eno homugo nago te hodolali sę tigidali silimainu homu ebao.
PSA 139:1 Te Devitgo asęani balia po me deli dao. Genuai Bidi, nago eno homu osola sulama, tama nago ena mu konea pai dao.
PSA 139:2 Nago te eno ebo sę tigidali mu konea pali. Nage digibulu bidibao, tiali goli nago eno homu kolesaga tigidali konea pai dao.
PSA 139:3 Nago ena te sę ebadi, me te godege pibo sogo, te subo dao. Nago eno kolesaga tigidali koneanio.
PSA 139:4 Tama eno te po me deli wainu ebaso da, nago te po polo koneanio.
PSA 139:5 Nago ena tigidali mu bagua selama, tama te nago bomogo te nago ena tonalubo dao.
PSA 139:6 Nago te koneani homu kolesaga te ena daide ugwanu mu elalu, tama eno homu kolesaga te aiyaba elaluai dao.
PSA 139:7 Te ena menaba peyu, tama eno te nago hoboludu ogwa wai taga pogowe? Tama ena menaba wi pelama, te nagede geme duala sigi paibawe? Woo, te duala sigi pabo bulu menio.
PSA 139:8 Ma, te ena dagaluba ugwaba holama, bidainu ebaso, nage te dagalude bidibao. Ma, ena te isali bidi dabego pesageba bidigi pobaso da, nage te bulude me bidibao.
PSA 139:9 Te ena te giliga pedalubo badu te digibulu bola pigi sogo da, ma ena te giliga dega sigilubo badu digibulu bidigi peyu da,
PSA 139:10 teda nage te pesagede me bidiyu, te ena bilibode te sągą dodolu, tama te ena tau sigi dao.
PSA 139:11 Tama eno te po weyu, “Te hulia sabogo ena geme duala sao,” po obaso, “tama te giliga ulago ena bagua selama, te hulia somainu yao,”
PSA 139:12 tiali goli, tagalao, te nago gedude te be hulia sabo te be mu hulia sabo tiwai egobeo. Tama hulide te ula mu eyu, te giliga ula tiwai yaibao. Be hulibo, me be posobo, te nago gedude te deli tigi tiwai naga dao.
PSA 139:13 Nago eno tigi pedai tigidali badu nigali. Nago ena tigidali te idago haliga tomode nigai dao.
PSA 139:14 Ena nagede wi ebaso, tama eno nago nogi ugwaba sobao. Tigidali nai nago nigali, tede eno midigi sabo dao, te tedali gasagi yai mu elama, tama te wiegi yai sawi yai mu dao. Nago te ena mu bugagia koneama, tama ena mu konebao.
PSA 139:15 Te ena idago haliga tomode geme dua dua pedalubo sogo, nago te eno tigi dili ununama, te deliba dąų wabo te nago tigidali suai dao.
PSA 139:16 Ena te haga piligai wai idago haligade bidibadi digi, nago ena suai. Ena te tǫde pedalisiąbadi, tiali goli, nago te naga bukude asęani te nago homugo te tigidali sogo ena te tǫde sesabi elama, bidabo bodolu asęai dao.
PSA 139:17 God, te eno nago homu kolesaga tigidali koneabo te ena kone tųa pobao. Iya, tegobao. Nago homu kolesaga te dwasianu me menio.
PSA 139:18 Te augwali eno nedebaso da, teda nambago te nabisde wę kemi masigi sane te aiyaba mu elaluaibao. Te ena pilama, hodalubo sogo te ena nage dali me bidibao.
PSA 139:19 God, eno homugo nago te dwai sę ebo bidi dabe ela mumainu homu ebao. Tama eno homugo te hwįbo bidi dabego ena tagalumainu homu ebo dao.
PSA 139:20 Te bidi dabego te nageba po dwai wali. Tama augwaligo te haniani dwai po nago nogide wabo dao.
PSA 139:21 Genuai Bidi, eno te nage wei homu isiąbo bidi dabe augwali te eno wei homu me ebeo. Tama eno te nageba hagoma homu ebo bidi dabede te dwai haliga mu ebo dao.
PSA 139:22 Mu tama, eno haliga augwalide pania selama, tama eno te bidi dabe wei mu me ebeo. Eno augwali te ena boi bidi dabe subo tiwai ebao.
PSA 139:23 God, eno homugo nago ena bugagia dagala sulama, tama nago te enade elalubo homu kolesaga tigidali koneao. Ena usu siyu, tama nago te eno homu kolesaga tigidali bugagia koneao.
PSA 139:24 Nago ena bugagia dagalao, tiyu te tibo homu meba enade elalu idalio. Tama nago ena te bidada pabo ula sabo sunumidu odasa pao.
PSA 140:1 Te Devitgo asęani balia po me deli dao. Genuai Bidi, nago ena te dwai sę ebo bidi dabego nogode ma sao. Awe, te dwai hwįbo bidi dabego enaba boi bidi me idali weyu, nago ena tau sao.
PSA 140:2 Te sesemane sogo augwaligo dwai kolesaga yabo homu ebo dao. Tama te sę edelama, sesemane sogo augwaligo te we bidi dabe tomode konila po hodolama, wabo dao.
PSA 140:3 Te augwaligo po wabo te hasamanigo kele poa pai tiwai mu elama, tama augwaligo pedauwalide te bidi dolabo po te hasamanigo dwai nabi tiwai elalubo dao.
PSA 140:4 Genuai Bidi, nago ena bugagia tonaluao. Tama tiyu, te dwai sę ebo bidi dabego bomogo ena aiyaba elaluainu ebaso, usu me egobeo. Nago ena bobogela selama, tama te hwįabo bidi dabego ena dolabo po miani, te augwaligo te tama me tegobeo.
PSA 140:5 Te hagoma ebo bidi dabego te ena tola somainu ebo bono gągą munama, elalubao. Te bono gągą augwa te bomai kedoago nigai, augwaligo te ena bilibo sunumide gebelama, te ena te hasa tiwai gilama sainu yali.
PSA 140:6 Eno Genuai Bidiba te tama po walali, “Nage eno God dao,” obao. Genuai Bidi, nago ena homu dene eyu, tau sao. Eno i wabo odao.
PSA 140:7 Genuai Bidi, eno God da, nage te ena ma sali bomai bidi dao. Te polobadu dago te boi bidi dabe dali hwįani sogo, nago ena bugagia tonaluai dao, bidigo sabelego aga tigi seselalubo tiwai gilama yali.
PSA 140:8 Genuai Bidi, nago te dwai sę ebo bidi dabeba te augwaligo sainu ebo nai dabe munu me magio. Tama augwali hagoma idali weyu, nago augwaligo te dwai sę yainu po mia sali sę emainu me elamu dao.
PSA 140:9 Nago te eno boi bidi dabego te ena aiyaba elalumainu me igio. Augwaligo te ena silabo wado po wali. Tiali goli, augwaligo enaba te yainu yali sę, nago augwaba digi ma pedalumainu ilao.
PSA 140:10 Awe, te nago augwaliba te dabo sia tulalumainu ilao. Tama nago augwali te genuai tǫ dedageba aiya sąnama, tama augwa edaba ma holainu ebo te usu me egobeo.
PSA 140:11 Te gasa bidi odolali po tų ilibo bidi dabe, nago augwaligo te po tųde gasa bidi aiyaba elalumainu me elamuo. Tama eno homugo te dwai nai te hwįbo bidi dabeba pedelama, tama bomonama eyu, augwali mu silimainu homu ebao.
PSA 140:12 Genuai Bidi, eno te tama koneani, nago te nai meni yai bidi dabe te po tų ebode tau siyu, tama te magi doado bage sǫą pali bidi dabe tau sabo dao, te bidi dabego augwaliba dwai sę ebo sogo tama tibo dao.
PSA 140:13 Mu tama, te doloba pai we bidi dabego te nago nogi ugwaba siyu, tama te augwali nage dali sesemane bidada paibao.
PSA 141:1 Te Devitgo asęani balia po me deli dao. Genuai Bidi, megi eno nageba gedu haluasa po obao. Eno homugo nago ena polo tama tau somainu homu ebao. Eno nageba i obao, tama eno homugo nago eno gedu haluasa po odomainu homu ebo dao.
PSA 141:2 Eno homugo nago eno gedu haluasa po wabo te nageba denami ebo nai hano asobo tiwai emainao. Awe, te eno nogo si ugwaba siyu, nagebolo gedu haluasa po wabo si, eno homugo te ebo te nago gedude te piode mabo ofa tiwai emainao.
PSA 141:3 Genuai Bidi, nago eno pedauwali bugagia tonaluao, tama eno po wabo me bugagia tonaluao.
PSA 141:4 Ena te dwai kolesaga ebo tomoba pidali weyu, nago ena hageao. Tama nago ena te dwai sę ebo bidi dabe dali deliba sisinama, tama te dwai sę meba emainu me elamuo. Ena te augwali te moni nai daa tuboba pelama, te augwali dali deliba dugamainu me idali weyu, nago ena togolao.
PSA 141:5 Wiegi yai bidigo te ena homu dene elama, tama ena sesanobo sę eyu, te enaba wado ilaibao. Awe, usu dao, po menio, te kolesaga ebogo agai ena tau sabo dao. Tiali goli, eno te dwai sę ebo bidi dabe dali abagi me wagobeo. Magi baso meni, te sesemane sogo eno te augwa ebo dwai kolesaga tagalomainu, te gedu haluasa po wabo dao.
PSA 141:6 Te bidi mebago te dwai sę ebo bidi dabego tobolu bidi dabe selama, tama augwali te bobobage sauba sąwaibao. Te augwali te tiwai dolobo sogo da, teda te dwai sę ebo bidi dabe augwaligo koneama, te eno polobadu wali po te mu po da waibao.
PSA 141:7 Tama augwaligo te bidi dabe augwaligo dili te gų pageba sąwaibao, te bidigo te ni dage kakali miminama, te sąsąbo tiwai gilama yaibao.
PSA 141:8 Tiali goli, Tigidali Nai Tonalubo God, Genuai Bidi, eno konealubo homu nageba beagasalio. Nago ena bugagia tonaluao, nago ena isimainu me igio.
PSA 141:9 Te ena te dwai sę ebo tomoba painu eyu, te dwai bidi dabego ena kegebo dao, bidigo te bulu hasa sabo kę geme dualama mubo tiwai ebo dao. Tiali goli, nago ena bobogela selama, te kę dabede ena dąų me wagobeo.
PSA 141:10 Meni. Nago te dwai sę ebo bidi dabe te augwa muani kęde digi te augwa ma tola somainu mu yao. Tiali goli, ena menio. Ena te augwali bugagia ela soayu, tama te magi nai me deligo ena me dologobeo.
PSA 142:1 Te Devit aga te Solde wi pelama, tama ola be tomode geme dualali sogo, te sogo agai e gedu haluasa po wabo balia po asęani. [1 Sml 22:1; 24:3] Eno te Genuai Bidiba bomonama i weyu, te agai ena tau somainu ebao. Eno agaba te hanalubo sę bomonama weyu, te agai homu dene eyu, ena tau somainu ebao.
PSA 142:2 Eno agaba te enade elalubo te homu dogia pabo homu tigidali, me te enaba pedalubo tigidali sęgę po walali.
PSA 142:3 Te eno haliga sęgę mu ebo sogo, tama eno homugo ena dolaiba homu yai, te eno pabo tų te nago koneanio. Te eno sunumide te bidi dabego ena tola sabo bono gągą geme dualama, elalubao.
PSA 142:4 Eno ena pąde tonono bilali, tiali goli, te ena tau sabo bidi me elalubo te eno me subeo. Ena menaba wi pogowe? Te enade homu kone palobo bidi meni.
PSA 142:5 Tama tialima, Genuai Bidi, eno i nageba weyu, te nago ena tau somainu ebao. Nage naga te ena tonalubo bidi dao. Te ena bidibo ula elalubo sogo digi eno homugo te nagaduba deli naga te ena dali bidimainu homu ebo dao.
PSA 142:6 Te nago ena tau somainu, te eno nageba i wabo odao. Magi baso meni, eno haliga te sęgę mu ebao. Te enaba dwai sę yainu ebo bidi dabe augwaligo te bomo mu ebaso, tama eno augwali aiyaba elaluainu ebo usu egobeo. Tama tiyu, nago ena te augwaligo nogode ma dobola sao.
PSA 142:7 Awe, nago ena te sęgęde ma selama, tama ena te bugagia bidimainu yao. Tama tiyu, te doloba pai we bidi dabe sisinibo pesagede te eno nago nogi ugwaba saibao. Magi baso meni, nago enaba wiegi yai sę ebo dao.
PSA 143:1 Te Devitgo asęani balia po me deli dao. Genuai Bidi, eno homugo nago te eno gedu haluasa po wabo odomainu homu ebao. Te eno gela waboba nago olo muao. Nage doloba pelama, tama nago sesemane sogo mu po wabo da, iya, nago eno gedu haluasa po wabo odao, tau sao.
PSA 143:2 Te nago po tųde te ena naga sę bidi me dagaligio. Magi baso meni, te mena bidi me deligo te nago gedude magi dwai sę me ebeo.
PSA 143:3 Te eno boi bidigo te ena pobeasa bilama, tama ena aiyaba mu elalualio. Agai ena te be hulia sai pesageba kalabus elama, tama ena polobadu isai bidi tiwai gana yalio.
PSA 143:4 Tama tialima, eno homu kolesaga te dolobaso, tama eno haliga te sęgę mu elalubadi geani.
PSA 143:5 Megi da, eno te polobadu pedelali nai dabeba homu kone ma ebao. Tama eno te nago yali sę dabe, me te nago wiegi yai sę dabeba te eno homu kone ma ebao.
PSA 143:6 Eno nogo si ugwaba siyu, gedu haluasa po nageba weyu, tama eno homu noma ogwa waigo te nage wei mu elama, te bidigo dogoni wa selama, tama aga te wę nogone mu ebo tiwai ebao.
PSA 143:7 Genuai Bidi, nago eno gedu haluasa po polo odao. Magi baso meni, te eno konealubo homu te dolali. Nage enade geme me duala sigio, tiyu ena isilama, te ena isali bidi dabego pesageba pidalio.
PSA 143:8 Eno konealubo homu nageba muani. Tialima, eno homugo te tigidali sogo kigamu nago eno homu te nago ena godolo ebo kolesagade ma homu kone palomainu ilao. Eno gedu haluasa po nageba naga wabo dao. Tama tiyu, nago enaba te sunumi ola mobaso, te eno wali paibao.
PSA 143:9 Genuai Bidi, ena nageba asiyu, te nago ena tonalumainu ebao. Nago ena te eno boi bidi dabego nogode ma sao.
PSA 143:10 Nage eno God da, eno homugo te nago ena bugagia ola momainu homu eyu, te eno nago homu wali pabo homu ebao. Eno homugo te nago homu mobo bidigo ena bugagia wiegi yai ilimainu homu elama, tama ena te wiegi yai sunumiba pabo dodolumainu ebo dao.
PSA 143:11 Genuai Bidi, nago ena ma sao, te nago po dąų walali tiwai gilama yao. Nage doloba pai bidi mu da, tama tiyu te nago nogi aiyaba pidali weyu, te tigidali sęgę enaba pedalubode te nago ena ma sao.
PSA 143:12 Nago ena tigidali sogo wei mu ebo dao, tama te kolesaga ebo sia sogobeo. Tama nago te boi bidi dabe, me te ena dolabo bidi dabe ela muao, magi baso meni, ena te nago sę bidi bidibaso, te tama tiao.
PSA 144:1 Te Devitgo asęani balia po me deli dao. Eno te God nogi ugwaba sobao. Agai ena bomo elama, tonalubo dao. Agai enabolo te hwįbo kolesaga bugagia ola mobaso, tama agai eno te hwįabo sisi elalumainu yalio.
PSA 144:2 Agai te ena godolo ebo God da, tama ena sesemane bobegelalubo dao. Tama aga te geme duala sabo pesage elalu, te ena ma sali. Eno konealubo homu agaba kęą pobaso, tama agai ena bugagia bidimainu ebo dao. Agai te Israel hani isąwai we bidi dabe aiyaba elaluama, ena dologoba munama, bidibo dao.
PSA 144:3 Genuai Bidi, da we bidi te magi nai da weyu, tama nago dade homu kone ebawe? Da te olo bage tiwai, tialima magi baso tama nago dade homu wei ebo dawe?
PSA 144:4 Da te pedauwalide mobo deli sogo naga te pedalubo tiwai ebao. Da te pęwadage sogo naga bidibao, te giligade noma pedelama, tama te polo hagabo tiwai ebao.
PSA 144:5 Genuai Bidi, nago te dagalu buga sąnama, tama dulao. Te nago nogo te bulu du dabeba mubaso, tama te hano genuai pedelaibao.
PSA 144:6 Te dagalu be sele pedalumainu elama, tama te boi bidi dabe sela sąyu, tedela palao. Awe, te nago ene baso, tama te augwali wi pomainu yao.
PSA 144:7 Nago nogo aiyaba munama, tama nago ena te Israel hani isąwai we bidi dabego bomode ma sao, te bidigo nogo aiyaba munama, tama gasa bidi ugwaba keka selama, tama aga te moni wę gede mu bidali tagalobo tiwai yalio.
PSA 144:8 Te bidi dabego te mu po me wasiąwai, augwaligo te nogo guni sisu muyu, mu po da weyu, tama tibo po dali wabo dao.
PSA 144:9 God, megi da, eno te gesi balia po nageba waibao. Te eno gita eliyu, tama nageba balia waibao.
PSA 144:10 Nago te Israel hanigo king dabe te hwįbode tau siyu, tama augwaligo te boi bidi dabe aiyaba elalubo dao. Tama dwai boi bidigo ena te moni hwągo elidali weyu, nago naga sę bidi, ena Devit, ma sabo dao.
PSA 144:11 Te dwai sę mu ebo boi bidi dabego nogode nago ena ma sao. Tama ena te Israel hani isąwai dabego nogode ma sao. Augwa te mu po me wasiąma, tama augwa te nogo guni sisu muyu, te mu po da weyu, te tibo po dali wabo dao.
PSA 144:12 Dago homugo te dago ogwa dabe te gesi ogomani te augwali te bomo yai ni dabe tiwai pedalumainu homu ebao. Tama dago homugo te wegi dabe te kingo te genuai be pos au ilibo wiegi yai piksa noma tiwai pedalumainu homu ebao, augwali sawi yai wegi dabe pedalumainao.
PSA 144:13 Dago homugo te gi dabede te nai hauwa walomai homu elama, tama te nai mubo be mu pągąmainu homu ebao. Tama te sipsip dabego te wai dabe umabo umabo mu ame nomainu homu ebo dao.
PSA 144:14 Tama te bulmakau dabego me te wai dabe hauwa umabo ame nenama, tama te wai dwai me pedalisiąma, tama te me deli isiyu, me eyu egobeo. Dago homugo te dena hanu tomode bidibo bidi me deligo, ma we me deligo me, te sęgę me dene te hanu tomode pedelamuo.
PSA 144:15 Te tiwai wiegi yai nai sabo we bidi hani, augwa te wiegi yai pemene yao. Awe, te we bidi dabego te Genuai Bidi augwa God da homu elama bidibo we bidi dabe, augwali me te wiegi yai pemene yao.
PSA 145:1 Te Devitgo asęani balia po me deli dao. God, me eno tuni bidi, te eno nago genuai nogi po pusaibao. Tama sesemane sogo bidada peyu, eno nagebolo usu da po waibao.
PSA 145:2 Tigidali sogo eno nagebolo usu da po waibao. Tama sesemane sogo bidada peyu, eno nago nogi ugwaba saibao.
PSA 145:3 Genuai Bidigo genuai nogi elalubo, tama dago agai nogi ugwaba mu sidu geao. Agai ugwanu mu elaluyu, tama dago agai genuai nogi tigidali koneainogo ebo te usu me egobeo. Magi baso meni, dago homu kolesaga te habuge dao.
PSA 145:4 Megi bidalubo we bidi hani augwaligo te gasa nosali pedalubo hanibolo nago ebo sę po pusuyu, tama augwaligo nago nogi ugwaba saibao. Tama augwaligo nago genuai sę yali po miaibao.
PSA 145:5 Te bidi dabe augwaligo nago bomo elalubo po weyu, tama nage genuai tuni bidi mu da waibao. Tama eno digi te eno nago dwagi dwagi yai sę ebo da homu ebo dao.
PSA 145:6 Tama te we bidi augwaligo nago bomo yai sę ebo po weyu, te bidigo isiąbo sę naga dao, tama eno nago genuai sę yali po pusaibao.
PSA 145:7 Te augwaligo nago wiegi yai kolesaga hauwa ebo po pusuyu, tama nago olo mu tau sabo kolesaga po olama, wiegi yai homu pemene eyu, balia po waibao.
PSA 145:8 Genuai Bidigo da godolo mu eyu, homu dene eyu, tama da olo tau sabo sę ebo dao. Agai wado po polo wasiąma, tama sesemane sogo agai da wei mu ebo dao.
PSA 145:9 Agai wiegi yai sę tigidali we bidi dali eyu, tama agai nigali nai tigidali homu dene eyu, dolo mu tau selama, mabo dao.
PSA 145:10 Genuai Bidi, nago nigali nai tigidaligo nago nogi ugwaba saibao. Tama nago we bidi augwaligo nagebolo usu da po waibao.
PSA 145:11 Te augwaligo nago genuai nogi te nago tonalubo bulu tigidalide elalubo po weyu, tama nago genuai bomo elalubo po waibao.
PSA 145:12 Tama tibaso, tigidali we bidi augwaligo nago genuai sę ebo konemainogo yaibao. Tama nage bomo yai tuni bidi bidibo te augwaligo konemainogo, tama nago nogi genuai mu dao.
PSA 145:13 Tama nage te tuni bidi bidiyu, tama tigidali we bidi sesemane sogo nago tonaluyu, bidada peyu, bidada paibao. Genuai Bidi Godigo agai aga we bidi dali dąų wali po wali naga pabo dao. Te agai me deli tagalobo menio. Agai wiegi yai sę naga eyu, da tau siyu ebo dao.
PSA 145:14 Agai te tigidali sęgę elalubo we bidi, me te gasa bidi dabego aiyaba elalubo we bidi, augwali tigidali agai ugwaba siyu, tau sabo dao.
PSA 145:15 Tama te bidibo ula elalubo nai tigidaligo agaba tonono ebo dao, tama agai augwali nasi ebo sogo nai mabo dao.
PSA 145:16 Awe, agai augwali usu elama, bugagia bidimainogo tigidali nai mabo dao.
PSA 145:17 Godigo doloba pai kolesaga naga wali peyu, tama agai da olo mu tau sabo kolesaga mayu, te agai tigidali ebo sęde tebo dao.
PSA 145:18 Tigidali we bidigo homu agaba mu munama, i weyu da, teda aga augwali pąde bidibo dao.
PSA 145:19 Te agade wi ebo we bidi, te augwali nai meni baso, teda agai augwali nai mabo dao. Tama agai augwali gela wabo odolama, te augwali ma sabo dao.
PSA 145:20 Agai te aga godolo mu ebo we bidi bugagia tonalubao. Tiali goli, te dwai kolesaga ebo we bidi, augwali dolaibao.
PSA 145:21 Te eno Genuai Bidigo nogi sesemane sogo ugwaba saibao. Tama tigidali nai agai nigali, dagego aga wiegi yai olo bugagia bidibo nogi sesemane bidada pabo sogo ugwanu mu sao.
PSA 146:1 Te Genuai Bidigo nogi ugwaba sao. Ena digi eno te aga nogi ugwaba sabo dao.
PSA 146:2 Te ena tǫde bidibo tigidali sogo, te eno aga nogi ugwaba saibao. Te eno ena Godigo nogi ugwaba sabo balia po odubadi, te ena isiboba usu nigi paibao.
PSA 146:3 Te king dabego, me te tǫde bidi dabego nage me dobola sogobeo. Tama tiyu, nago homu te nosali isabo bage augwaliba me muidalio.
PSA 146:4 Te augwali isibo sogo, augwali te begelama, te tǫ ma pedalubao. Tama te sogo augwaligo te yaibao po wali sę tigidali te me egobeo.
PSA 146:5 Te bidi me deligo te Jekopgo Godiba homu kęą pelama, te agai aga tau siyu, te God dali kęą pelama, te aga Genuai Bidi da homu eyu da, teda aga pemene emainao.
PSA 146:6 Godigo te dagalu, me tǫ, me tamu ąi, me te tigidali elalubo nai pedalumainu yali. Tama sesemane sogo te Godigo aga dąų walali po tigidali wali pabo dao.
PSA 146:7 Te boi bidi dabego dologode dwai mu bidibo te we bidi dabe te Genuai Bidigo tau sabo dao. Tama agai te nai sili bidalubo we bidi dabe nai mabo dao. Genuai Bidigo te kalabuside bidibo bidi dabego kalabus silimainu ebo dao.
PSA 146:8 Tama agai te gedu widai bage te ma tonono yabo usu ma elama, tama te sęgęgo augwali aiyaba elalubo bidi dabe te sęgę augwalide dagala sąyu ebo dao. Genuai Bidigo te aga doloba pai we bidi dabe wei mu ebo dao.
PSA 146:9 Agai te dago tǫde bidibo te gasa bulu bidi dabe tau sabo dao. Tama agai te wilawe we dabe tau siyu, tama te tiana wai puluba me tau sabo dao. Tiali goli, agai te dwai sę ebo bidi dabego yainogo ebo sę dabe te augwali homu kone tųą palobo dao.
PSA 146:10 Genuai Bidi te sesemane sogo king bidada peyu, bidada paibao. Te Saion we bidi dabe, dage Israel dabe, te duga God te sesemane king bidada peyu, bidada paibao. Te Genuai Bidigo nogi ugwanu sinao.
PSA 147:1 Te Genuai Bidigo nogi ugwaba sao. Te dago balia po weyu, tama te dena God nogi ugwaba sabo te wiegi yai dao. Te agai nogi ugwaba sabo te wiegi yai doloba pai kolesaga dao.
PSA 147:2 Genuai Bidigo te Jerusalem ma dodolama, tama te boi bidi dabego sela pelama, te kalabus igi pali we bidi dabe te ma odasa asai dao.
PSA 147:3 Te dwai sęgęgo te augwali homu dolama, te augwa dwai dene ebo we bidi dabe, te agai usu ma ilibo dao. Tama agai te augwaligo keni sįsįbo dao.
PSA 147:4 Agai augwaligo namba te hǫgo dąį ilama, tama mu tama, agai te augwali deli deligo nogi nodigi pabo dao.
PSA 147:5 Te dago Genuai Bidigo nogi me te tigidali bomo elalubao. Dago agai koneani kolesaga te usu me siyu, dąį me iligobeo.
PSA 147:6 Agai te augwa digi augwa haliga aiyaba tegaluama bidibo bidi dabego nogi ugwaba saibao, tiali goli, agai te dwai sę ebo we bidi dabe augwali te bomonama mu agala sabo dao.
PSA 147:7 Puba hwi po weyu, te Genuai Bidigo nogi ugwaba sabo balia po dabe waiyąo. Te dena Godiba te gita me musik wao.
PSA 147:8 Agai te dagalude pǫ pedalumainu elama, tama te tulubage tagala palama, tama te bulu du dabede te nosa pedalumainu ebo dao.
PSA 147:9 Agai te tigidali kibu hasa dabeba nai mobao, tama te gesi tamadi dilibo ba tagadi dabego i wabo sogo, te agai augwaliba nai mabo dao.
PSA 147:10 Genuai Bidigo te bomai hos dabede, me te bomai ami bidi dabe te wiegi yai pemene me egobeo.
PSA 147:11 Menio, agai te wiegi yai pemene te agade wi ebo we bidiba yaibao, tama te agai da sesemane godolo ebo dao homu eyu, agaba homu kęą pabo we bidi dabede, te agai augwalide dwagi yai homu ebo dao.
PSA 147:12 Te Jerusalem dabeo, te Genuai Bidigo nogi ugwanu siąo. Awe, dage Saion dabe, te duga God nogi ugwaba sao.
PSA 147:13 Agai te nago Jerusalem obo bagulali sunumi te dąų walama elalu, tama te naga we bidi dabeba te wiegi yai nai mayu ebo dao.
PSA 147:14 Te boi bidi dabe asidali weyu, agai te dagego tǫ me tonaluyu, tama te gide wiegi yai wit mu holomainu elama, tama dagego tulama, tama pągąna pabo dao.
PSA 147:15 Te agai po me deli obaso da, teda polo tama te po te tǫba dulubo dao.
PSA 147:16 Agai te talua ge tulubage hauwa te aiyaba tagala palama, tama te tǫ mesega sigulobo dao.
PSA 147:17 Agai te talua ge tulubage hauwa te wę sane kemi tiwai tagala palama, tama te mena bidi me deligo te talua ge tulubagego kedau te aiyaba me elaluainu ebaso, usu me egobeo.
PSA 147:18 Tialima, nosali te agai po ma obaso, tama te ais te wę ma pedalobo dao. Agai te wali asomainu iliyu, tama te aisde pedelai wę pabo dao.
PSA 147:19 Agai aga po te Jekopba mawai. Awe, te po dabe me, bomai po me, agai te Israel dabeba mawai dao.
PSA 147:20 Agai te tiwai sę te gasa hani dabeba munu me isiąwai. Augwaligo te aga bomo yai po dabe me konesiąwai. Dago te Genuai Bidigo nogi ugwaba sinao.
PSA 148:1 Te Genuai Bidigo nogi ugwaba sao. Dage tigidali dagalude, ugwa badu bidibo bage, te Genuai Bidigo nogi ugwaba sao.
PSA 148:2 Dage tigidali ensel, te Genuai Bidigo nogi ugwaba siąo. Dage tigidali dagalude ami dabe, te agai nogi ugwaba siąo.
PSA 148:3 Giliga me polua, dage sigo me te aga nogi ugwaba sao. Tama te ula mu ebo hǫ tigidaligo te agai nogi ugwaba sao.
PSA 148:4 Te ugwanu mu elalubo dagalu, te agai nogi ugwanu sao. Te dagalude ugwadu elalubo węgo, te agai nogi ugwaba sao.
PSA 148:5 Te nai dabego te Genuai Bidigo nogi ugwaba sao, magi baso meni, agai digi po obaso, tama augwali pedelama bidibao.
PSA 148:6 Agai te po wali gilama tama augwa te bidimainu yali pesagede mu sesemane sogo bidibao, tama te agai po munu me siligobeo.
PSA 148:7 Dage tǫde bidibo bage tigidali, dagego Genuai Bidigo nogi ugwaba siąo. Te moni dobo dwai sųgų dabe, me te tamu ąį aiya badu mu pagede bidibo nai dabe,
PSA 148:8 tama te pǫde elalubo be sele, tama te talua ge tulubage me, te pǫ dabe, te bomai waligo me, te Genuai Bidigo po wali pabo bage, dagego agai nogi ugwaba siąo.
PSA 148:9 Awe, dage genuai bulu du dabe, me dwasianu bulu du dabe, tama nai du walobo ni dabe me, tama te buside ni dabe,
PSA 148:10 tama te bidi dabego tonalubo kibu hasa dabe, me te bulu uni hasa dabe, tama te hasamani dabe, me te ba dabe, te dagego Genuai Bidigo nogi ugwaba sao.
PSA 148:11 Te king dabe, me tigidali hani bage, tama te gavman dabe me, tama te tigidali gasa tobolu bidi dabe me,
PSA 148:12 tama te gesi bidi, me gesi wegimani dabe, tama te monu dabe, me te wai puluba dabe, dage tigidaligo te Genuai Bidigo nogi ugwaba sao.
PSA 148:13 Mu tama, tigidaligo te Genuai Bidigo nogi ugwaba sao. Te agaduba genuai nogigo deli te tigidali we bidigo genuai nogi aiyaba mu elalubao. Agai genuai nogi te ugwanu mu elalu, te dagalu me tǫ aiyaba elaluai dao.
PSA 148:14 Agai te Israel dabe wei mu eyu, tama aga we bidibolo bomo mabo dao, tama tiyu, augwaligo agai nogi ugwaba sabo dao. Te Genuai Bidigo nogi ugwaba sao.
PSA 149:1 Te Genuai Bidigo nogi ugwaba sao. Te gesi balia Genuai Bidiba waiyąo. Tama te we bidi dabego aga sesemane sogo wali peyu, augwa te lotuba sisinibo sogo, dago agai nogi ugwaba sao.
PSA 149:2 Dage Israel dabe, te Godigo dage nigalide te dagego bugai haliga iyąo. Awe, te Saion we bidi dabe, te duga kingba wiegi yai pemene yao.
PSA 149:3 Dagego tęąbi weyu, aga nogi ugwaba sao. Mu tama, te habidi dabe, me taborin, me gita, te tama eliyu, te agai nogi ugwaba sao.
PSA 149:4 Magi baso meni, Genuai Bidigo aga we bidi dabe wei eyu, augwalide dwagi yai homu ebo dao. Tama agai te augwa digi te augwa nogi aiyaba elalubo bidi dabego nogi ugwaba siyu, tama augwa te hwįbode ugwaba ela pabo dao.
PSA 149:5 Te Godigo we bidi dabe augwa te edelebaso, te wiegi yai pemene emainao. Tama augwa te nai tuainu sisinibo sogo, augwa te wiegi yai pemene ebo tęąbi wagameo.
PSA 149:6 Augwa te i weyu, tama te Godiba pemene elama, tama te poa pai bainat hwą mu tolalumainao.
PSA 149:7 Tama augwa te gasa hani dabe dali hwįnama, tama augwaliba te dwai dene mu mayu, te augwali aiyaba elalumainao.
PSA 149:8 Tama augwa te augwaligo king dabe, me tobolu bidi dabe, te augwa aingo nigali sen dabego te kęnama, elalumainao.
PSA 149:9 Tama augwa te hani dabeba te Godigo wali po tiwai gilama te dene mabo sę emainao. Te Godigo we bidi dabego augwa te tiwai elama, te augwa genuai nogi dali bomo dali si saibao. Te Genuai Bidigo nogi ugwaba sao.
PSA 150:1 Te Genuai Bidigo nogi ugwaba sinao. Te Godigo nogi te aga tempel bede ugwaba sao. Dago te aga genuai bomo te dagalude elalubaso, te aga nogi ugwaba mu sao.
PSA 150:2 Agai te genuai sę dabe yai. Tama tibaso, dago aga nogi ugwaba sao. Aga te mu polalu, tama te genuai nogi ugwadu mu elalubao. Dago aga nogi ugwaba sao.
PSA 150:3 Te biugel bu weyu, te aga nogi ugwaba sao. Te gita dabe me, musik me eliyu, tama te aga nogi ugwaba sao.
PSA 150:4 Te tamborin eliyu, te tęąbi weyu, tama aga nogi ugwaba sao. Te gita eliyu, tama te ona eliyu, tama aga nogi ugwaba sao.
PSA 150:5 Te simbol eliyu, tama te aga hwą ola peyu, tama te Genuai Bidigo nogi ugwaba sao. Te simbol bomonama weyu, te hwą wabo genuai pedaliyu, tama te hwą wabogo Genuai Bidigo nogi ugwaba siąo.
PSA 150:6 Dage te bidibo ula elalubo tigidali nai, dagego te Genuai Bidigo nogi ugwaba sao. Te Genuai Bidigo nogi ugwaba sinao.
PRO 1:1 E po da, te Solomongo wiegi yai po dabe dao, te Devitgo ogwa, tama te Israel king bidi dao.
PRO 1:2 Te wiegi yai pogo agai dabolo te wiegi yai homu kolesaga mayu, te dabolo te tigidali sę bugagia dolo mu naga ebo kolesaga ola mawaibao. Tama dago te nai dabede po page odobaso da, teda dago te tobage po page elalubo te koneaibao.
PRO 1:3 Te bukugo wiegi yai pogo da ola mayu, te wiegi yai kolesaga koneai bidi tiwai, me te wiegi yai doloba pai kolesaga wali peyu, te tobage deli tigi poai kolesaga te tigidali bidi dali ebo te kolesagade bilao po elalubao.
PRO 1:4 Tama te bidi mebago te koneai kolesaga dwasianu naga elalubaso da, teda te e pogo te augwali tau selama, te gasagi yai bidi me pedalu, tama agai te koneani wiegi yai kolesaga te gesi bidi dabeba mayu, tama augwaliba te bilibo wiegi yai kolesaga ola mawaibao.
PRO 1:5 Tama te bukugo te kolesaga koneai bidi dabe tau selama, tama augwaligo kolesaga geninama mu selama, tama agai te gasagi yai bidi dabe te wiegi yai sunumi ola mayu, te augwa wali pomainu ebo dao.
PRO 1:6 E bukude elalubo pogo te da tau sobaso, te po digi po begelama wali po, me te po piksa ola mabo po, me te wiegi yai po me te kolesaga koneai bidi dabego geme dualama wabo po page te dago koneaibao.
PRO 1:7 Te God Genuai Bidide wi eyu, aga dologode bidibo bidi, agai te dwagi yai homu kolesaga page konebo gagalai dao. Me ma, te wiegi yai homu kolesaga elalusiąbo bidi dabe augwaligo te kolesaga konebo skul olama, te wiegi yai kolesaga sabo te hagela homu mu ebo dao.
PRO 1:8 Ogwa o, nago te naga ayago mobo mabo po odolama, tama nago idago po me sela sągio.
PRO 1:9 Te augwaligo pogo nage te wiegi yai bidi pedalumainu ilaibao, te nago tobolude te wiegi yai sawi yai au tiwai elama, tama nago magede te sawi yai beli elalubo tiwai yaibao.
PRO 1:10 Ogwa o, te dwai bidi dabe, ma te nai wi sabo bidigo te nagebolo te homu bega sabo po weyu, te dwai kolesaga meba inao po obaso da, teda nago te augwaligo po wali me pigio.
PRO 1:11 Te tobage bidigo te tama po waibao, “Ae, tega, nage da dali aselama, tama da pelama, te bidi meba ela mugi pinao. Da pelama, te sunumi sesegeba geme duala sigi pelama, tama niwai bidi me asobaso, tama dago augwali ela muaibao. Te augwaligo magi dwai sę me isiąbadi digi, te dago homu weigo te naga wali pelama, tama te augwali ela muaibao.
PRO 1:12 Te dago te polo tama mu pedalu, te augwali ela muaibao, te isibo te bidi dabeba polo tama pedelama, tama augwali te isali bidi dabego pesageba pabo tiwai ebo dao.
PRO 1:13 Tama dago te bidi dabego doado bage hauwa selama, tama da deli deligo te dena be pągąnaibao.
PRO 1:14 Nage daba kisasa sagaselama, tama nago me te doado bage hauwa sagameo,” augwaligo te po wabo dao.
PRO 1:15 Ogwa, te dwai bidi dabego te tobage po nageba obaso da, teda nago te augwaligo me odolama, te augwali wali me pelamuo.
PRO 1:16 Te tobage bidi dabego te dwai sę ebo wei mu elama, tama te bidi ela mubao. Augwa te tiwai sę sesemane polo idu, tama augwa toma me nogobeo.
PRO 1:17 Te tobage dwai kolesaga ebo bidi dabe augwa te dwai dene mu saibao. Te augwa digi augwa ma tola somainu yabo wa mubo tiwai gilama ebao. Te ba dabe augwa te wiegi yai homu kolesaga elalubao. Te ba me deligo te bidigo wa muani suali da, teda aga tede me habela sogobeo. Tiali goli, te dwai bidi dabe te tiwai egobeo. Augwaligo te dwai kolesaga ebo bomo mu yaibao, tama tiyu, te augwa digi augwa dolobo dao.
PRO 1:19 Te hwįbo bidi dabego, ma te nai wi sabo bidi dabego te kolesaga wali pabo dao, tama tiyu, augwa digi dolaibao. Te augwa wi sali nai dabego te augwali dolobo ąǫ ebo dao.
PRO 1:20 Te wiegi yai doloba pai homu kolesaga te tiwai, te we me deli te sunumi tunu mage dabeba doligi pelama, me te maketba pelama, tama te we bidi dabeba po olama, i wabo tiwai ebo dao.
PRO 1:21 Tama me aga te bidi sisinibo pesage te taunba pabo genuai obo bagulali sunumi pąde doligi pelama me, tama te tigidali pesage te we bidi hauwa bidalubo madi doligi pelama, tama agai te tiwai i wabo,
PRO 1:22 “Dage te homu kolesaga meni yani hani, dage te tiwai sesemane bidabo homu eba, agawe? Dage te wabo pabo bidi dabe tiwai ebao. Dagego te wiegi yai kolesaga sabo homu wei me isiąma, tama dagego tede posobo po wabo dao. Mena sogo dagego te kolesaga ebo tagalaibawe?
PRO 1:23 Eno dagebolo po bomonama weyu, dagego te dwai kolesaga ebo tagalao po obao. Dagego eno po wali pigi sogo da, teda eno dage ola mayu, tama dageba wiegi yai homu ebo kolesaga magi dao.
PRO 1:24 Eno dage i wali, te enaba asomainu yali, tiali goli dagego hagela yai.
PRO 1:25 Dagego eno wiegi yai po tudiba munama, tama eno dage dodolainu ebo sogo te dagego hagoma ebo dao.
PRO 1:26 Dagego tama tialigo da, teda te eno me eno te dagego ebo kolesaga tobage tiwai yaibao. Tama te genuai sęgęgo dage gegebo sogo, tama dage dolobaso, teda ena gisugu genuai gilama mu weyu, tama dageba dwai posobo po waibao.
PRO 1:27 Te dwai sogo te dageba te bomai wali aselama, te pedalubo tiwai eyu, tama te sęgę me dene tego dage doliyu, te wę gegi page pobegebo tiwai bomai waligo ebo tiwai gilama yaibao.”
PRO 1:28 “Te tama tebo sogo te eno dage tau somainu te dagego ena i waibao, tiali goli eno po wei me ponegobeo. Tama dagego ena gegebo sę ebadi, tiali goli te dagego ena me susiąwai.
PRO 1:29 Dagego te wiegi yai homu kolesaga sabo homu te wei me isiąma, tama dagego te Genuai Bidi dologode bidabo homu me ebeo.
PRO 1:30 Dagego te eno wiegi yai po sela sąnama, tama te eno dage dodolainu ebaso, te dagego ena tudiba muai dao.
PRO 1:31 Tama tialigo da, megi da, te dagego duga yali dwai kolesagago walali du dabe tuao. Awe, dagego haniani dwai sę yabo homu kolesaga yai dao. Megi da, dagego te kolesagago du dabe tulama, tabi pągąwaibao.
PRO 1:32 Magi baso meni. Te wiegi yai homu kolesaga meni yani we bidi dabe augwaligo te ena tudiba munama, tama augwa te kolesagago digi te augwa ela munama, augwa isaibao. Te bidi dabego homugo augwaligo te tigidali nai koneani homu yali, augwali te wabo pabo bidi dabe tiwai ebao. Augwa te homu kolesagade te augwa digi augwa dolobo dao.
PRO 1:33 Tiali goli, te eno poba olo bugagia mubo we bidi da, te augwali bugagia bidaibao. Tama augwa te sęgę me wi me isąwaibao, magi baso meni, augwa koneani, te dwai nai augwaliba me pedalugobe da homu ebo dao,” te wiegi yai homu kolesaga da, te tobage po wabo we me deli tiwai dao.
PRO 2:1 Wai, nago eno po odama, tama naga homuba bugagia muao.
PRO 2:2 Nago te nageba wiegi yai homu kolesaga mabo poba te nago olo bugagia muao. Tama nago te wiegi yai kolesaga sabo sę bomo yao.
PRO 2:3 Tama nago te wiegi yai homu kolesaga konebo te nageba asomainu te hanalu wao, te bidi me deligo nage tau sagasomainu i wabo tiwai yao.
PRO 2:4 Tama nago te wiegi yai homu kolesaga gegebo sę eyu, te bidigo te silva mone te tǫ tomode gegebo tiwai eyu, me te augwaligo mone geme dualai te bidigo gege sę ebo tiwai gilama yaibao.
PRO 2:5 Nago te sę dabe ebaso da, teda nago te Genuai Bidide wi eyu, aga dologode bidibo kolesaga page te mu koneama, tama nago te God bugagia koneaibao.
PRO 2:6 Magi baso meni, Genuai Bidide digi agade te wiegi yai homu kolesaga page elalubao. Tama agai te wiegi yai homu konebo kolesaga te dabolo mabo dao.
PRO 2:7 Agai te doloba pai bidi dabego homu kolesaga dodoliyu, tama augwaligo te augwa wali pabo kolesaga te bugagia dagalaibao. Tama agai augwali bugagia seselalubaso, te augwali me dologobeo.
PRO 2:8 Godigo te doloba pai kolesaga ebo bidi dabe bobegela selama, tama te agade homugo kęą pali bagego wali pabo sunumi agai te tonalubo dao.
PRO 2:9 Waio, te nago wiegi yai homu kolesaga bomonama gegegi peyu da, teda nago te bilibo wiegi yai sunumi tigidali koneaibao. Te nago te wiegi yai doloba pai kolesaga wali peyu, tama te tigidali bidibolo te tobage deli tigi poai kolesaga naga yaibao.
PRO 2:10 Te nago wiegi yai homu hauwa selama, tama naga te koneani kolesagade te wiegi yai homu bugagia yaibao.
PRO 2:11 Te bugagia homu kone palubo kolesaga tego nage bobogela selama, tama wiegi yai kolesaga koneanigo te nage tonaluaibao.
PRO 2:12 Tama nago te dwai kolesaga ebo bidi dabe, me te po dolo wasiąbo bidi dabego kolesaga wali me pogobeo.
PRO 2:13 Te bidi dabe augwaligo te dolasa pabo sunumi tagalu, tama te hulia sai sunumidu bilibo dao.
PRO 2:14 Augwaligo te haniani dwai kolesaga ebode te wiegi yai homu pemene yaibao.
PRO 2:15 Te bidi dabego ebo kolesaga te dolo mu me ebeo.
PRO 2:16 Tama gasa bidigo we me deligo te nago aga dali penani ebo kolesaga yainu nage muma sabo po obaso da, teda te wiegi yai homu ilibo pogo nage bobogela selama, tama nago te wego po wali me pogobeo.
PRO 2:17 Te tobage wego te aga gesi wegi ogwa we bidibo sogo sali bidi tagalaibao. Tama agai te God gedude dąų wali po te wali munu ma pogobeo.
PRO 2:18 Te nage te we dali agai beba pali da, te nage te isai bidi dabego buluba pabo sunumidu wali pabo tiwai gilama ebao.
PRO 2:19 Te aga sugi pabo bidi dabe, te augwali ma geasa asogobeo. Tama augwali te bidibo ula elalubo bidi dabe bidibo sunumidu wali me pogobeo.
PRO 2:20 Te nago homu kolesaga wiegi yai elaluyu da, teda nage te wiegi yai bidi dabe bilibo sunumidu peyu, tama te doloba pai kolesaga ebo bidi dabego ebo kolesaga wali paibao.
PRO 2:21 Te wiegi yai doloba pai bidi dabe da, te dago tǫde bugagia sesemane bidaibao.
PRO 2:22 Tiali goli, Godigo da te aga wali pisiąma te dwai kolesaga ebo bidi dabe sela sąwaibao. Te agai augwali magadu digayu, te bidigo aga gide te nai digabo tiwai gilama yaibao.
PRO 3:1 Waio, eno nage ola mawainu ebao, tama nago homude te po munu me tagaligio. Menio. Te sesemane sogo nago bugagia homu kone palao.
PRO 3:2 Nago te po wali peyu da, te nage bobobage sogo sesabi elama tǫde bididu, tama nage bugagia mu dualalu bidaibao.
PRO 3:3 Nago te gasa bidi godolo ebo kolesaga, me te gasa bidi dali te mu kisa sabo kolesaga ebo me te munu me tagaligio. Nago te kolesaga si wali pelama, tama te nago dogonide au ilibo nai tiwai pedelaibao. Tama nago naga homuba bugagia dąų olama muao.
PRO 3:4 Te nago tama tibaso da, te Godigo nage godolo ebadi, te bidi dabego me nage godolo homu yaibao, tama nago sę te wiegi yai pedelaibao.
PRO 3:5 Nago konealubo po Genuai Bidiba bomonama dąų wao. Nago te homu eyu, te naga digi koneani kolesagago te naga tau sabo usu yaibao homu munu me elamu dao.
PRO 3:6 Te tigidali sę nago ebo, nago bomai homu Genuai Bidiba elama, tama nago te sę yao, tama agai nagebolo te wali pabo doloba pai sunumi ola mawaibao.
PRO 3:7 Te nago homugo tiyu, te nago koneani kolesaga te mu nai da homu elamuo. Menio. Nage te Genuai Bidi wi eyu, aga dologoba pelama, tama dwai kolesagaba tudi ola mao.
PRO 3:8 Nago tama tiyu da, teda nage tego mu tau siyu, te marasingo nage tigi tau sabo tiwai yaibao, tama nage bugagia bidimainu ilaibao, te dili dǫgai hauwa elalubo hasa tiwai bidaibao.
PRO 3:9 Nago te naga gide te polasa ina yani nai te selama, tama te ofa tiwai ilama, te Genuai Bidiba mao, te tama tebogo te agaba genuai nogi mawaibao.
PRO 3:10 Te nago tama tiyu da, te Genuai Bidigo nago gide te nai hauwa umabo walama elalumainu ilaibao. Tama naga nai mubo be te naigo mu pągąnama, tama nago te wain ąį tabiali te moni tank pągąyu, tama te wain ąį meba te olo buluba gelaibao.
PRO 3:11 Waio, te Genuai Bidigo nage dodolainu ebo sogo, nago wado po olama, te haliga dwai me igio. Agai nagede po elaluyu da, nago aga dali sębę igio.
PRO 3:12 Magi baso meni, Genuai Bidigo te agai godolo homu ebo bidi dabe dodolaibao, te aya dabego te aga godolo homu ebo wai dabe dodolobo tiwai gilama ebo dao.
PRO 3:13 Te wiegi yai homu kolesaga koneama sabo bidi, aga te wiegi yai homu pemene mu yaibao.
PRO 3:14 Magi baso meni, te wiegi yai doloba pai homu kolesaga ebogo te silva, me gol,
PRO 3:15 me te wiegi yai masigi dabe te aiyaba mu elaluaibao. Tama nago te godolo homu ebo tigidali nai me te aiyaba elalubo dao.
PRO 3:16 Te wiegi yai homu ebo kolesagago te nage tau selama, tama nage te tǫde bobobage sogo sesabi elama bidaibao. Tama agai nageba genuai nogi mayu, tama nageba doado bage hauwa mawaibao.
PRO 3:17 Te wiegi yai homu kolesagago te nage sesemane sogo te nage bugagia wiegi yai haliga ilama, tama homu tegaluama, nage bidibo te wiegi yai mu pedelaibao.
PRO 3:18 Wiegi yai homu ebo kolesaga te bidibo ula mabo ni tiwai yaibao. Tama te wiegi yai homu ebo kolesaga te dali kęą pabo bidi dabe, augwa te bidabo ula wiegi yai mu elalubaso, tama augwa wiegi yai homu pemene yaibao.
PRO 3:19 Te Genuai Bidigo digi te wiegi yai homu kolesaga elama koneyu, tama agai te tǫ de dagalu si nigilama,
PRO 3:20 tama agai te tǫba wę pedalumainu iliyu, te agai te dagalude elalubo pǫ dabe sisinimainu ilama, tama te tulubage tulubo dao.
PRO 3:21 Wai, nago te bugagia tonalu, te nago naga wiegi yai homu kolesaga, me koneani kolesaga te bugagia dąų olama, tolaluao. Tiyu, nago tagalabuo.
PRO 3:22 Te wiegi yai homu ebogo, me te koneani homu kolesaga dali, tego nage ula mayu, tama nago wiegi yai au elalubo tiwai gilama yaibao.
PRO 3:23 Tama nage te sunumidu bugagia biliyu, tama te magi nai me deligo te nago sągąde me selegobeo.
PRO 3:24 Tama te pibo sogo te nage wi me isiąma, tama nage bugagia mu piaibao. Awe, nage pila muyu, tama bugagia bidaibao.
PRO 3:25 Nago konealubo po te Genuai Bidiba bomonama dąų wali da, tama te agai nage bobogela selama, te nago tonalu, tama te boi bidi dabego augwa wade te nage me kęą sogobeo. Tama te dwai sę ebo sogo te dwai bidi dabeba pedelama, te augwali dolobaso da, nage wi me elamuo. Te tobage dwai sę pedalubo sogo te augwaliba polo tama pedalu, te genuai wali me tulubage asobo tiwai ebo dao.
PRO 3:27 Te bidi me deli aga te doado bage sǫą pobaso, tama agai nagebolo mao olama, hanalu obaso da, nago te po me sela sągio, nago agabolo te po “Menio,” wagio. Te nage usu elalubaso da, nago aga mao.
PRO 3:28 Te abagi agai nageba hanalubo sogo, te nago aga tau sabo homu usu ebaso da, teda nago agabolo te tiwai po weyu, “Tonalu bolo yao. Te do nage ma aselama, te nage eno mawaiba,” te po wagio.
PRO 3:29 Te naga abagi dabe te nage pąde bidalu, tama augwaligo homugo te nage augwa abagi da homu yaibao. Tama tibaso, nago augwali dwai me ilamuo.
PRO 3:30 Te nage dali dwai sę me isiąbo bidi dali te nago odolali po konila me wagio.
PRO 3:31 Te hwįbo bidi dabego kolesaga wali painu te nago haliga me hodalugio, tama nage te augwaligo sunumidu me bilamu dao.
PRO 3:32 Magi baso meni, Genuai Bidigo digi te tobage bidi wei me isąwai. Te doloba pai kolesaga ebo bidi dali agai abagi homu ebo dao.
PRO 3:33 Genuai Bidigo te po wali, te dwai sę ebo bidi dabe te augwa we wai puluba dabe dali dolaibao, wai. Tiali goli, Genuai Bidigo te doloba pai bidi te aga we wai hani dabe dali te bugagia bidimainu elama, tama agai augwali tonalubo dao.
PRO 3:34 Te bidi dabego te posobo po gasa bidiba obaso da, teda Godigo te tobage tiwai kolesaga te augwaliba wei ponaibao. Tiali goli, agai te augwa digi augwa aiyaba elalubo bidi dabeba te wiegi yai sę bugagia ebo dao.
PRO 3:35 Te we bidi dabego te wiegi yai homu elalubo bidi dabeba te genuai nogi mawaibao. Tiali goli, te wiegi yai homu kolesaga meni yai bidi dabego te augwa digi augwa nogi doloyu, moni hale yaibao.
PRO 4:1 Te wai dabe o, dagego te duga aya eno po bugagia odao. Olo bugagia mubaso da, te dagego wiegi yai homu kolesaga saibao.
PRO 4:2 Te eno nagebolo mabo po, te wiegi yai mu, tama tibaso, dagego munu me sąnamu dao.
PRO 4:3 Te idago gasa wai me ame nabe, te ena deli naga, tama agai homugo ena godolo mu yali.
PRO 4:4 Tama ena dwasianu ogwa bidibadi, te eno ayago ena ola mani. Agai enabolo te tiwai po wali, “Te nago homuba eno po bugagia munama, tama dolo wali pao, tama nage bugagia mu bidaibao,” po wali.
PRO 4:5 “Nago homu wiegi yai elama, te nago wiegi yai kolesaga koneama sao. Nago eno po te munu me sela sąyu, ma homugo gegeda pelama, tagalu me elamuo.
PRO 4:6 Nago wiegi yai homu kolesaga ebo me tagaligio. Menio. Nago aga godolo mu ebaso da, te agai nage tonaluaibao.
PRO 4:7 Te polasa nago sabo nai, te wiegi yai homu ebo kolesaga. Mu tama, te nago gasa nai hauwa sainu ebadi, tiali goli wiegi yai homu kolesaga da, te polalubo hasia nai mu dao.
PRO 4:8 Nago te wiegi yai homu ebo kolesaga godolo homu elama, tama bomonama dąų ola weyu, tola selama, te agai nageba te genuai nogi mawaibao.
PRO 4:9 Te wiegi yai homu kolesaga nago tobolude sawi yai au tiwai pedelama elalu, tama te kingo mubo wiegi yai madi tiwai elaluaibao,” ayago te po ola mani.
PRO 4:10 Ogwao, nago eno po bugagia odoyu, wali pao, tama tiyu da, nage te tǫde sesabi elama bidaibao.
PRO 4:11 Eno nage te wiegi yai homu kolesaga wali pomainu ola mayu, tama eno nage bilibo dodoliyu, tama nage te doloba pai sunumidu pomainu ebo dao.
PRO 4:12 Nage te sunumidu pali da, te magi nai me deligo te sunumi me pania sisąma, tama nage me tulalugobeo.
PRO 4:13 Sesemane sogo nago eno te wiegi yai po dąų ola sao. Te naga bidibo ulago page tiwai da, tama tiyu nago bugagia tonaluao.
PRO 4:14 Nage te dwai bidi dabego sunumide me biligio, tama nago augwaligo kolesaga wali me pigio.
PRO 4:15 Nago te sunumi mu ela solama, tama te digibulu mu bidigi pao
PRO 4:16 Magi baso meni. Te dwai sę ebo bidi dabego te dwai sę me isąbadi da, teda augwali me pigobeo. Te augwali gasa bidiba te dwai sę bolo elama da, teda augwali te bugagia pibaso usu ebo dao.
PRO 4:17 Te dwai kolesaga ebo, me te gasa bidi dolobo kolesaga, te augwa tubo nai me wę tubo tiwai gilama ebo dao.
PRO 4:18 Te dwai sę ebo bidi dabego wali pabo sunumi te be hulia siyu, mu hulia sai dąų mu wabo tiwai ebao. Augwali te tula muyu, tama te magi naigo te augwali sągąde dolali te augwa me konegobeo. Tiali goli, te doloba pai bidi dabego sunumi da, te giliga kigamu nanobo tiwai elama, tama te giliga nanobo sę bomonama pedelama, te giliga tomo yagasoboba usu nubo dao.
PRO 4:20 Ogwa, te eno poba olo bugagia muao. Mu tama, olo sugunama, odao.
PRO 4:21 Nago eno te po bugagia homude kęą selama, tama nago homuba bugagia muao. Tiyu, nago tagalabuo.
PRO 4:22 Magi baso meni. Te nago eno te po sali da, teda te pogo nageba te bidabo ula mawaibao. Te pogo te nage bugagia mu bidimainu yaibao.
PRO 4:23 Te nage bidabo wiegi yai ula dodolabo wiegi yai homu kolesaga, te naga homude pedelaibao, te wę te idu wę gomo pedalubo tiwai ebo dao. Tama tiyu, tigidali sogo nago te naga homude ebo te bugagia mu tonaluao.
PRO 4:24 Nago te tibo po me weyu, me te tobage po dwai dabe me wagio.
PRO 4:25 Nago te naga painu ebo sunumiba dolo si tonalua pao. Nago gasa tedaliba me tonono pigio.
PRO 4:26 Te nage pabo madiba homu kone bugagia palao, tama tiyu te nago kolesaga tigidali te wiegi yai yaibao.
PRO 4:27 Nago te naga bugagia bilali te wiegi yai sunumi te me tagaligio. Nage te dolo nogoba, me te pobase nogoba me pelamuo. Menio. Nago te tobage dwai kolesaga dabe ebo te edelama pao.
PRO 5:1 Ogwa, te eno mobo mabo poba olo bugagia muao. Eno te wiegi yai homu me kolesaga nageba mawainu ebao.
PRO 5:2 Tama tibaso da, teda nage te doloba pai kolesagade bilaibao, tama te nago po tigidali te wiegi yai kolesaga koneai bidigo po tiwai yaibao.
PRO 5:3 Nago tama tiao, magi baso meni, te we me deligo aga bidi tagalama, tama nage dali te gedu ebaso da, teda agai te nage homu bega sabo pusu yai po hauwa nage dali waibao. Awe, agai po wabo dwagi yai dao, te wel bugagia bilibo tiwai dao.
PRO 5:4 Tama nago agai po wali pali da, teda nosali nago aga te dwai nai tiwai ąǫ eyu, te ha ebo nai gagawai eyu, tama te dene ebo te hwą bainatgo nage enebo tiwai dene tilama yaibao.
PRO 5:5 Te tobage wego nage te isali bidi dabego pesageba dolo mu odasa paibao. Nago aga wali pobaso da, nage te gų pageba mu paibao.
PRO 5:6 Agai te bidibo ula elaluabo doloba pai sunumidu wali me pogobeo. Menio. Te dwai sunumi dabedu wali pobao weyu, te agai me konegobeo, tama tiyu, te aga subigila naga pabo dao.
PRO 5:7 Tialima, ogwa, eno poba bugagia olo muao. Nago te po me sela sągio.
PRO 5:8 Nage te tobage wede te digibulu mu bidibo tiwai yao. Nage te agai be sunumi pąba me pigio.
PRO 5:9 Tiyu, te nago wiegi yai nogi elaluali te tagalabuo. Te agai bidigo te nageba wiegi yai homu eyu, nago te sę yali te wiegi yai yali da homu elama, nage tau sabo homu me egobeo. Menio. Te nage te gesi ogwa bidi elalubadi, te agai nage ela muaibao.
PRO 5:10 Tama nago te sainogo sę dene yali wiegi yai nai dabe te gasa bidi dabego nogoba pelama saibao.
PRO 5:11 Te gasigo nage selama, tama nage te nomona saibao. Tama te nage isainu ebo sogo, te nage betde pila mudu te dwai gela mu udaibao.
PRO 5:12 Tama nago te tama po waibao, “Eno te augwaligo enabolo mobo mabo po wabode hagela homu yali. Magi baso eno te hagoma eyu, tama ena te bidi dabego dodolomainu ebedawe?
PRO 5:13 Eno te ena tisa dabego po wali me pabeo. Te mobo mani bagego po te eno odobeo.
PRO 5:14 Megi da, ena te mu tama dolama, tama ena te tigidali we bidigo gedude dwai mu yalio.” Nago te po waibao.
PRO 5:15 Nage te gasa bidigo ulu węba tugi pigio. Nage te naga we dali bugagia bidao, tama aga deli dali naga piao, te bidigo wę te aga ulu węde digi naga te wę tubo tiwai gilama yao.
PRO 5:16 Te nago subigila we dabede penani sę elama wai ame nobaso da, teda te wai dabego nage te nosali badu me tau sogobeo. Tama tiyu, te naga wego naga te naga wai dabe naga mu ame nomainao.
PRO 5:17 Te naga wai dabe te we dabego hani dali bididali weyu da, te nago gasa subigila we dabe dali penani ebo sę te igio.
PRO 5:18 Godigo te nago webolo te wiegi yai sę bugagia emainao. Te nage gesi bidi bidiyu dali we te nago ulu wę tiwai da, tama nago agade wiegi yai pemene yao.
PRO 5:19 Te gasa sawi yai mu ebao, tama agai kolesaga te wiegi yai mu da. Agai te nage wei mu ebao, tama sesemane sogo nago agaba homu kone palama, tama aga wei mu yao. Tama nago sesemane sogo te agai ame side wiegi yai pemene yao.
PRO 5:20 Ogwao, nago te gasa bidigo weba homu kone eyu, tama nago te agai amede homu palamuo.
PRO 5:21 Magi baso meni. Genuai Bidigo te dago ebo sę tigidali te sulama, tama agai te dago ebo kolesaga tigidali te bugagia osola subo dao.
PRO 5:22 Te dwai bidi aga sęgęgo digi te aga te wago kalabus elama, te bonogo kęąlubo tiwai ebao.
PRO 5:23 Te tobage tiwai bidigo te aga homugo digi ebo kolesaga te aiyaba me elalugobeo. Menio. Agai te wabo pabo bidigo ebo kolesaga tiwai eyu, tama te kolesagago aga ela mubo dao.
PRO 6:1 Ogwao, te gasa bidigo me negeli sai madi, tama nago te negeli elalubo te wei ponaiba po dąų walama, te aga digi te wei ponabo usu isąbaso teyu da, teda nago te kolesaga te wiegi yai me ebeo.
PRO 6:2 Nago te dąų walali pogo te naga digi kalabus ilibao, te naga digi kekelama, te muani wago te naga ma tola sabo tiwai gilama ebao.
PRO 6:3 Ogwao, nage te kalabus elalubo polo tama tagalao. Tiyu, nage te bidi dologode bidabuo. Nago te dąų walali po sela sąwainu te agaba hanalugi pao. Te kolesagago nage nogi elaluama, te nage hale elalubo te tagalao, nage peyu naga yao.
PRO 6:4 Nage me pila mudigio, nage asesa elama pao.
PRO 6:5 Nage te kalabus elalubo tagalao, te uni hasago ma te bago te wa tagalama, wi pabo tiwai yao.
PRO 6:6 Dage hagela bidi dabe, eno te tama po dagede elalubao. Dage pelama, te sagado dabego kolesaga bugagia sugi pobaso da, tama teda dage te kolesaga konea pai bidi pedelaibao.
PRO 6:7 Te sagado dabe da, te augwa tonalubo polalubo tobolu bidi, ma genuai bidi, ma te ofisa, te me elalubeo.
PRO 6:8 Te nai hauwa elalubo sogo, te sagado dabego te nai sǫą pabo sogo tuabo nai sisinama, te sabobo dao.
PRO 6:9 Tiali goli, dage hagela bidi dabe, te dage sesabi gana elama, pila mudabo homu eba, agawe? Mena sogo te dage duga betde pila muani te hogodaluaibawe?
PRO 6:10 Dagego te tama po wai, “Tagalao, da dwasianu gana godege manu piaibao,” wai. “Da te dwasianu sogo naga tama te toma tulama, tama te da hogodaluaibao,” wali.
PRO 6:11 Dagego te tiwai ebaso da, teda polo tama te dagego doado bage tigidali silama, tama dage te magi nai doado bage meni yai bidi tiwai pedelaibao, te nai wi sabo bidigo te dagego doado bage tigidali wi sela pabo tiwai yaibao.
PRO 6:12 Te dwai bidi mu dabego te tibo po wabo dao.
PRO 6:13 Augwaligo te tama po geme dualama wali. Augwaligo te gedu aluama, tama te nogogo po miyu, tama sągągo te usu sabo sę ebo dao.
PRO 6:14 Sesemane sogo augwaligo te dwai sę yabo homu kolesaga kone paludu, tama augwaligo te bidi dabego te gasa bidi dabeba dwai haliga yabo sę eyu ebo dao.
PRO 6:15 Tiali digi, polo mu tama te dolobo genuai sęgęgo te augwaliba pedalubaso da, teda augwali te usu ma ilabo sunumi me elalugobeo.
PRO 6:16 Genuai Bidigo te bidi dabego te e 7 kolesaga dabe ebo da te godolo homu mu meni isąwanio, agai tede sębę ebo dao. Augwali e dao.
PRO 6:17 Te hagoma ebo kolesagago te gasa bidi dabe tonobo te olo bage tiwai ebo kolesaga. Me te tibo po wabo kolesaga. Me te gasa bidi dabe olo dali ela mubo kolesaga ebo.
PRO 6:18 Te dwai sę yabo homu ebo kolesaga. Tama me te dwai sę asesa polo ebo kolesaga.
PRO 6:19 Te tibo po tų yainu ebo kolesaga. Me, te bidi dabego te augwa ama hasi te dwai haliga ilibo kolesaga ebo dao.
PRO 6:20 Ogwao, nago te naga ayago po wali pao, tama nago idago po me sela sągio.
PRO 6:21 Nago te augwaligo po te naga homude munama, tama sesemane bugagia wali pobaso da, tama teda te nago tobolude me magede te wiegi yai au tiwai te pedelabo dao.
PRO 6:22 Te nage bilibo sogo, te pogo te nageba sunumi ola mawaibao. Tama nage te pibo sogo, teda te pogo te nage tonaluaibao. Tama nage hodalubo sogo da, teda te pogo te nageba wiegi yai homu kolesaga mawaibao.
PRO 6:23 Magi baso meni. Te aya idago po te lam ula me deli te wiegi yai eyu, te nageba sunumi ola mabo tiwai ebao. Tama augwaligo te nage dodolobo sogo, te nage bidibo ula elalubo tau sabo wiegi yai kolesaga wali pomainu yaibao.
PRO 6:24 Te augwaligo te pogo nage tau siyu, tama te dwai sę ebo we dabego te nage tibo po me ola masiąbo po me wasiąyu, tama nago te gasa bidigo wego pusai po wabo me odogobeo.
PRO 6:25 Nago te wego te sawi yai tigi subaso, te nago pesą ebo homu me igio. Tama agai te nage kekainu te nageba tonono ebaso da, teda nage te agaba me pigio.
PRO 6:26 Te bidi te penani we dali bidibaso da, te dwasianu monego naga abelebo dao. Tiali goli, bidigo te gasa bidigo we dali pagela pibaso da, te genuai sęgę mu ebao. Te aga bidabo ula tede tagalainu te ebao.
PRO 6:27 Te nago te sia dage te hobolu badu pąde tolalubaso da, teda te naga holobo ugwa te siago dogobe da, agawe?
PRO 6:28 Ma, nage te sia dobadi te daidu bilali da, te siago nago sągą dogobe da, agawe?
PRO 6:29 Te tama tiwai gilama naga, te nage gasa bidigo we dali pigi pali da, te augwaligo nageba te genuai dene me sęgę mabo te nago me geda mugobeo.
PRO 6:30 Te bidi me deli aga nasi ebaso, te nai meba wi sali da, teda te bidi dabego te agaba dwai po me wagobeo.
PRO 6:31 Tiali digi, augwaligo agai te yali sę augwaligo te pepeli deliba hanilani da, teda augwaligo aga te po tų ilama, tama agai te nai hauwa mu wei ponomainu yaibao, te aga bede elaluali doado bage te tigidali te mu siliboba usu naibao.
PRO 6:32 Tiali goli, te bidigo gasa bidigo we dali pibaso da, te mu geda munama, tama te esela peyu, te mu umuna pabo bidi tiwai ebao. Te kolesaga ebo bidi aga digi aga dolobo dao.
PRO 6:33 Te bidi dabego aga eliyu, te agaba po dwai weyu ebaso, te aga sesemane sogo hale dwai mu yaibao.
PRO 6:34 Te haliga sębę dwai mu ebo bidi dabe, te augwaligo we dali te gasa bidigo me pagela piali. Te tama tiwai naga te wego bidigo haliga te dwai sębę mu elama, tama te bidigo yali te dwai sę wei ponoyu, tama agaba te dwai dene mu mawaibao. Te wego bidigo sębę te dęą sogobeo. Agai te agaba wiegi yai homu eyu, te sabo homu ebo kolesaga yabo homu me egobeo. Mu menio.
PRO 6:35 Tama agai te haliga sębę ebo sia somainu te genuai mone menama, te sia somainu ebaso, te usu me egobeo. Te sębę me elalubo dao.
PRO 7:1 Ogwao, nago eno po dąų olama, tola selama, tama nago homude munaluao.
PRO 7:2 Te nago eno po bugagia wali pobaso da, teda nage bugagia bidaibao. Te eno po bugagia tonaluao, te nago naga digi te naga gedu tonalubo tiwai gilama yao.
PRO 7:3 Bidigo po pepade asęyu elalubo tiwai eyu, nago te eno po te naga homuba munama, tama te sesemane nage dali elalua pomainao, te nago nogode te ring sesemane elalubo tiwai gilama emainao.
PRO 7:4 Te wiegi yai koneani homu kolesaga te nage dali sesemane bidimainao, te nago abe mu tiwai, ma abagi mu tiwai elalumainu yao.
PRO 7:5 Tama te gasa bidigo wego nage homu bega somainu eyu, te nage aga dali pagela pimainu ebaso, teda te wiegi yai homu kolesagago nage bagua selama, tama nago te wego po wali painu ebaso, usu me egobeo.
PRO 7:6 Me sogode ena te ena be windo tede dolalu, tama eno te sunumiba tonaluali.
PRO 7:7 Tama eno suali, te gesi bidi dabe te sunumidu iba soyu, oba soyu ebo suali. Augwaligo te wiegi yai koneani homu kolesaga me elalusiąwai. Tiali goli, me deli te agai mu geda muanio.
PRO 7:8 Te gesi bidi te dwai penani sę ebo we me deligo be pąba pelama, bilali.
PRO 7:9 Te giliga dega sigulama, tama pąde be hulia sainu ebadi dao.
PRO 7:10 Te we te sunumide bilibo wego au tiwai elama, tama aga homugo te bidi homu begelabo homu yai. Tama tiyu, te we pelama, te bidi dali deliba gesabidi ununama, po miani.
PRO 7:11 Te we te hagoma ebo we mu da, tama te bede bugagia me dugulalugobeo. Agai po wabo si, po bomonama wabo dao.
PRO 7:12 Sesemane sogo aga te sunumide, me maketde bilidu geyu, te bidi gegebo sę ebo dao.
PRO 7:13 Eno suali, te wego te gesi bidi tola selama, tama agaba te gesabidi nono nabo suali. Tama wego te aga geduba dolo mu tonalu, te tama po wai,
PRO 7:14 “Te megi eno te God dali deli homu ebo ofa me deli yali, te eno polobadu wali po tiwai gilama, tama te ofa yali nai me dage te eno bede munalubao,” wali.
PRO 7:15 “Tama eno te ena be tagalama, tama eno te nage gege asali. Megi da, te eno nage sualio.
PRO 7:16 Tama me eno bede te piabo wiegi yai bet dodolai elalubo. Eno te sawi wiegi yai sitbet te au yai te betde muani. Te sitbet dabe te Isipdu digibulu asai dao.
PRO 7:17 Tama eno te haniani wiegi yai denami ebo pauda te betde gelali.
PRO 7:18 Nage ena dali aselama, tama da si te gagali, me wiegi yai pemene sę ebo homu me idubadi, te be posolaibao,” wali.
PRO 7:19 “Nage te eno bidide wi me igio. Aga te digibulu mu pelama, bidigi palio,
PRO 7:20 tama aga te polo tama me ma asogobeo. Magi baso meni, agai te mone hauwa aga dali sela peyu pai. Te Sande si pelama, tama te polua tomode, te aga ma asabo homu ebao.” Te wego te po wali.
PRO 7:21 Te wego te aga homu bega sabo pusu yai po hauwa agabolo olama, tama aga haliga polo hodolali.
PRO 7:22 Te bidigo te wego po odolama, tama polo tama agai te we wali peyu, te beba pali, te augwaligo te bulmakau te elabo pesageba odasa pabo tiwai yali. Ma, te esela pabo kolesaga meni yai bidi te kalabus beba odasa pabo tiwai ebo dao.
PRO 7:23 Te bidigo te ene me deligo te aga dini homu enabo te agai me konebeo. Aga te ba me deli te wa elalubo pesageba bola pabo tiwai yali. Tama te bago me konesiąyu, te wago aga tola selama, tama aga te isabo te me konebeo.
PRO 7:24 Tialima, te ogomani dabe, dagego eno poba olo bugagia muiąo.
PRO 7:25 Dagego te duga haliga hogodama, te tobage we wali pomainu me igio. Augwali dali subigila pigio.
PRO 7:26 Magi baso meni, te bidi hauwa mu te tobage wego nogode isama, dolobo dao. Awe, augwali da, te genuai hani mu dao.
PRO 7:27 Te agai beba pabo sunumi te gų pageba pabo sunumi tiwai elalubao. Tama dagego te sunumi wali pobaso da, teda dage te isali bidi dabego pesageba paibao.
PRO 8:1 Wiegi yai doloba pai homu kolesaga te we me deli dolugulama, te da i wabo tiwai ebao.
PRO 8:2 Aga te bulu du elalubo pesage te sunumi dabe pąde, me te sunumi tulu mage si dabede dolalubo dao.
PRO 8:3 Tama aga te genuai taun hanu bagulali obo te sunumi dabe pąde dolalu, tama te tiwai i wabo sę iduaibao,
PRO 8:4 “Eno dage tigidali we bidi bomonama i obao.
PRO 8:5 Dage kolesaga konesiąwani bidi, te kolesaga koneiąo. Dage te homu kolesaga siąo.
PRO 8:6 Te eno dagebolo mawainu ebo te wiegi yai doloba pai poba olo bugagia muiąo.
PRO 8:7 Te sesemane sogo eno te mu po naga weyu, tama eno te tobage dwai po dabe wabo te hagela homu ebo dao.
PRO 8:8 Eno po tigidali te doloba pai naga dao. Eno te gagea pai tibo po deli me wagobeo.
PRO 8:9 Te pogo page te homu kolesaga koneani bidigo te mu konea pelama, tama augwa koneyu, te po te dolo po mu wali homu ebo dao.
PRO 8:10 Te eno dagebolo te dage wiegi yai koneabo kolesaga ola momainu eyu, dagego te usu da po wao, magi baso meni, te eno mobo mabo pogo te wiegi yai silva me gol aiyaba elalubo dao.”
PRO 8:11 “Ena digi ena te wiegi yai me doloba pai homu elama, tama eno te gasagi yai sawi yai tobage masigi dabe, me te dagego wei mu ebo nai tigidali me te aiyaba elaluai dao.
PRO 8:12 Tama eno te bugagia bilibo kolesaga koneani. Eno te koneani kolesaga elalu, tama eno te haniani nai dagalabo te usu yaibao.
PRO 8:13 Te Genuai Bidide wi eyu, aga dologode bidibo bidi da, agai te dwai kolesaga dabe te wei mu me egobeo. Eno te hagoma ebo kolesaga me, te bidi aga digi aga nogi ugwaba sabo kolesaga me, tama te tobage dwai sę ebo kolesaga me, te tibo po wabo kolesaga me, te eno wei mu me ebeo. Menio. Eno te tobage kolesaga ebo hagela mu ebo dao.
PRO 8:14 Eno te wiegi yai homu kolesaga te we bidi dabeba mayu, tama eno augwali te tau siyu, te wiegi yai sę ebaso, usu igi dao. Ena digi eno te wiegi yai homu elalu, tama eno genuai bomo elalubo dao.
PRO 8:15 Eno te king dabe me, te tobolu bidigo me te bulu tǫ pedai kantri bugagia tonalumainu tau siyu, tama te wiegi yai bomai po me munama, te bulu tǫ pedai kantrigo te doloba pai kolesaga wali pomainu tau sabo dao.
PRO 8:17 Tama mena we bidi dabego ena gegebo sę bomo eyu da, teda augwaligo ena sueibao. Mena we bidigo ena wei yali da, eno me te eno augwali wei mu yaibao.
PRO 8:18 Eno te genuai nogi, me mone, me doado bage hauwa te we bidi dabeba mabo usu igi da. Tama augwaligo te doloba pai kolesaga wali peyu, te wiegi wiegi yai nai dabe somainu tau sobaso, te usu yaibao.
PRO 8:19 Eno te augwalibolo mabo nai dabego te wiegi yai gol, me wiegi yai silva dabe te aiyaba mu elalubo dao.
PRO 8:20 Sesemane sogo eno te doloba pai kolesaga naga wali peyu, te po tų dolo odobo kolesaga naga wali pabo dao.
PRO 8:21 Eno te wiegi yai nai hauwa mu te ena wei mu ebo bidi dabego sabobo madiba te pesage mu holaibao. Tama augwaligo te madi mu pągąna saibao.”
PRO 8:22 “Poloba polobadu mu, te Genuai Bidigo te nai dabe nigainu yali sogo, agai te ena bolo nigali. Tama nosali agai te gasa nai tigidali nigai dao.
PRO 8:23 Polobadu mu, te Genuai Bidigo tǫ nigisiąbadi, agai ena nigilama, tama ena bididuali.
PRO 8:24 Ena pedelali sogo, te Genuai Bidigo te tamu ąį me te ulu ąį dabe nigisiąbadi,
PRO 8:25 tama agai te genuai bulu du dabe me, te dwasianu bulu du dabe me nigilama augwa pesageba musiąbadi, te sogo ena pedelai dao.
PRO 8:26 Te ena pedelali sogo, Genuai Bidigo te tigidali tǫ pedai nigisiąwai, tama tiyu, te gi dabede te nai meni yai dao. Te sogo te tǫ hogomu me elalubeo.
PRO 8:27 Te ena Genuai Bidi dali bidibadi, te sogo agai te dagalu nigilama, te tamu ąį te dąįgo bagulali,
PRO 8:28 tama agai te dagalude te pǫ dabe muyu, te ąį dabe te genuai tamu ąį dologodu pedalumainu iliyu, te tamu ąį pągąnumainu yali sogo, te ena me bidai dao.
PRO 8:29 Tama ena aga dali bidibo sogo agai te tamu ąį sesegedu dąį iliyu, tama tamu ąį dali po bomonama weyu, te tamu ąįgo te dąį ilali boligio po olama, tama agai te tǫ muabo pesage dąį mubo sogo, te ena aga dali bidai dao.
PRO 8:30 Te Genuai Bidigo te sę dabe yali sogo, ena aga dali bidali, tama agai ena te kolesaga konea pai bidigo te sę tonalubo bidi tiwai nigilali. Tigidali side eno aga wiegi yai homu pemene ilali, magi baso meni, eno te agai nigai nai dabe suyu, te wiegi yai homu pemene yali. Eno te tǫ sulama, te we bidi dabe bidalubode te wiegi yai homu pemene yali, tama ena te Genuai Bidigo gedude sesemane sogo wiegi yai homu pemene elama bidibao,” wiegi yai doloba pai homu kolesagago te po wali.
PRO 8:32 Tama wiegi yai doloba pai homu kolesagago po wadolama weyu, te tama po wali, “Te wai dabeo, dagego eno po bugagia odama, tama eno kolesaga dabe wali pao. Te tiwai dagego ebaso da, te dage wiegi yai homu pemene yaibao.
PRO 8:33 Te dage eno ola momainu elama, tama dagego wiegi yai homu ebo me kolesaga saibao. Dagego te sęba tudi me ola magio.
PRO 8:34 Te eno po bugagia odobo bidi dabe te augwa wiegi yai homu pemene ebo dao. Tigidali side augwali te eno be sunumi pąba dolagaselama, tama ena tonaluali, tama eno po augwaliba mabo dao.
PRO 8:35 Te ena sabo bidi dabe, te augwa bidibo ula sali, tama Genuai Bidigo augwaliba wiegi yai haliga ebo dao.
PRO 8:36 Tiali goli, te ena sisąbo bidi dabe, augwa digi augwa dolaibao. Awe, te ena hagela homu mu ebo bidi dabe augwa isibo sogo godolo ebo dao,” wali.
PRO 9:1 Wiegi yai doloba pai homu kolesagago aga be sę yani. Agai te pos nogo a naga olama, me badu nogo si te dodolama, te dąų walama, te be au ilali.
PRO 9:2 Agai te kibu hasa dabe elama, tama ulama, tama te pusai wain wę pedalumainu ilali. Tama agai te nai tuabo tebol sisi ilama, dodolai.
PRO 9:3 Agai te aga sę ebo we dabe tagala palama, te taun pesage tomoba doligi pelama, tama augwaligo te tiwai i wali,
PRO 9:4 “Dage wiegi yai homu kolesaga meni yai bidi, me dage kolesaga umuna sai bidi dabe, dage te wiegi yai doloba pai homu kolesaga yai bidigo beba asiąo.
PRO 9:5 Dage aselama, aga dali te nai, me te pusu yai wain ąį agai sisi yali, te tuagasiąo.
PRO 9:6 Te duga umuna sai kolesaga ebo tagalama, tama aselama, te bidabo ula sagasiąo. Dagego te wiegi yai homu kolesagago sunumi wali piąo,” augwaligo te po wabo dao.
PRO 9:7 Nago te posobo po wabo bidi dodolobo si da, teda agai te dwai po nageba wei ponaibao. Tama nago te dwai sę ebo bidi dodolainu ebaso da, teda agai nage elama, tama nago tigi dolaibao.
PRO 9:8 Tama tiyu, te dwai posobo po wabo bidi me dodoligio, tagalao. Agai te nage dali boi bidi naga yaibao. Tiali goli, nago te wiegi yai homu kolesaga elalubo bidi dodolobaso da, te agai nage wei homu yaibao.
PRO 9:9 Nago te wiegi yai homu kolesaga elalubo bidiba po mani da, teda agai homu kolesaga te wiegi yai mu pedelaibao. Tama nago te doloba pai bidi ola mobaso da, teda nago agai kolesaga te kuna mu ma konemainu tebao.
PRO 9:10 Te Genuai Bidide wi eyu, aga dologode bidibo bidi, agai te dwagi yai homu kolesaga page konebo gagalai dao. God te Tedali Gasagi Yai mu dao. Tama nago te wiegi yai kolesaga sainogo da, teda hasia bolo nago aga bugagia konea sao.
PRO 9:11 Te wiegi yai homu kolesagago da, te da nage te tǫde sesabi elama bidimainu yaibao, tama nago kibu be te hauwa mu bidaibao.
PRO 9:12 Te nago wiegi yai homu kolesaga sobaso da, teda naga digi te naga wiegi yai bugagia ilibao. Tiali goli, nage te hagoma ebo bidi da, teda naga digi naga ma te dolobo dao.
PRO 9:13 Te umuna sai kolesaga te we me deligo po dągą subigila ola bilibo tiwai ebao. Agai homu kolesaga te wiegi yai me elalusiąyu, tama te wiegi yai kolesaga me konebeo.
PRO 9:14 Agai be te taun pesage tomode ugwadu elaluali, tama aga te sunumi pąde elalubo sia saide dugulalubao.
PRO 9:15 Agai te we bidi dabe augwa sęba soabo sulama, tama agai augwali asela yao olama, i wabo dao. Agai te tama po obao,
PRO 9:16 “Dage te wiegi yai homu kolesaga meni yani bidi, me te dage umuna sai bidi me, dage te eno be tomoba asiąo,” wali.
PRO 9:17 “Te nago wę wi saibaso, te wę te tuabo wiegi yai wę mu dao. Tama nage te geme wi duala selama, te nai wi saibaso da, te nai da, te pusu umabo mu ebo dao,” te po obao.
PRO 9:18 Te agai po odobo bidi dabe da, te agai be te gų page tiwai elalubo te augwaligo me konebeo. Te bidi dabe agaba pelabo, te augwaligo me konesiąwai, augwali te isali bidi dabego pesagede megi bidalubo dao.
PRO 10:1 Te e da te Solomongo pęwadage te wiegilama bidibo kolesagade po wali. Agai tama tiwai po wai. Te ogwago wiegi yai homu ebo kolesaga koneai elalubaso da, teda aga aya de ida si wiegi yai homu pemene ilaibao. Tiali goli, te ogwago te esela pabo kolesaga wali pobaso da, teda aya de ida si haliga sęgę mu ilaibao.
PRO 10:2 Te nago kolesaga dwai wali pidu, tama te mone hauwa elalubo bidi pedalubaso da, teda naga te monego te nage wiegi yai ilama bidimainu ebaso, usu egobeo. Tiali goli, nago te doloba pai kolesaga wali pali da, te nage dolabo sęgo gegelama, me dologobeo.
PRO 10:3 Genuai Bidigo te doloba pai kolesaga ebo bidi dabe te nai sǫą pomainu ilama gogologobeo. Tiali goli, agai te dwai kolesaga ebo bidi dabego te nai dabe somainu me iligobe, te augwaligo sainu te sę dene gesoai mu ebo dao.
PRO 10:4 Te nago sę ebo hagela eyu da, te nage magi nai meni yai bidi pedelaibao. Tiali goli, nago sę bomo yali da, teda nago doado bage hauwa elaluaibao.
PRO 10:5 Te bomai bidigo da, te nai inilama tau ebo sogo te sisinaibao. Tiali goli, te bidi pila muyu, tama te sogo sę me isiąwani da, teda aga hani sibi we wai bidi te genuai hale saibao.
PRO 10:6 Godigo te doloba pai bidi dabeba te wiegi yai sę bugagia yaibao. Tiali goli, te dwai bidigo pogo te gasa bidi dolabo homu eyu, te aga dwai kolesaga te geme dualalubo dao.
PRO 10:7 Te wiegi yai bidi me deli isibo sogo da, te we bidi dabego aga homu kone palama, tama pemene umabo mu yaibao. Tiali goli, te dwai sę ebo bidi dabe isibo sogo, te we bidi dabego aga polo homu kone ebo gegeda paibao. Te ni mobia pabo tiwai eyu, te bagego nogi silaibao.
PRO 10:8 Te wiegi yai homu elalubo bidigo te gasa bidi dabego po odaibao. Tiali goli, te pedauwalidu ąį bole tulalubo bidigo te odolali tama wabo pogo te dolaibao.
PRO 10:9 Te doloba pai bidi dabe te bugagia bidaibao. Tiali goli, te dwai sę ebo bidi dabe te geme me duala sobaso, te usu me egobeo.
PRO 10:10 Te poli po niga selama wabo bidi dabego te dwai sę hauwa yaibao. Tama te po pedauwalide dogia pabo bidi dabe te dolaibao.
PRO 10:11 Te wiegi yai bidi dabego po te bidibo ula mabo wę tiwai ebao. Tiali goli, te dwai bidi dabego pogo te augwa dwai homu ebo kolesaga te geme dualama, te gasa bidi dolainu tebo dao.
PRO 10:12 Te haliga dugulubo po wabo kolesagago te we bidi hani augwa hasi peda sabo tiwai ebo dao. Tiali goli, te homu dene ebo kolesagago te dwai sęde sali sęgę hauwa sela sąbo dao.
PRO 10:13 Te wiegi yai homu kolesaga elalubo bidigo agai te wiegi yai homu kolesaga po pusaibao. Tiali goli, augwaligo te wiegi yai homu elalusiąbo bidi dabe tudide te keloago elibo dao.
PRO 10:14 Te wiegi yai homu elalubo bidigo te gasa tobage kolesaga sabo sę eyu, te polo tama te koneani kolesaga me hanilama me pusugobeo. Tiali goli, te kolesaga meni yai bidigo pedauwalide odolali po wabo sogo, te sęgę tama polo pedalubo dao.
PRO 10:15 Te mone bidigo hauwa doado bagego augwali bagua selama, tama augwali bugagia bidibao, te taunde bomai dili yai obogo bagulai elalubo tiwai elalubao. Tiali goli, te magi nai meni yai bidi dabe augwa te doado bage sǫą pelama, tama augwali te dolaibao.
PRO 10:16 Te doloba pai bidigo te aga bidibo ula te aga mone sabo tiwai yaibao. Tiali goli, te dwai sę ebo bidi dabego da, te dwai sę hauwa pedalumainu ebo dao.
PRO 10:17 Te bidi mego te gasa bidi dabego aga dodolomainu ebaso da, teda aga te bidibo ula sabo sunumide bidibao. Tiali goli, te bidi dabego aga dodolainu ebadi, te hagoma ebo bidi yai baso da, teda agai te sunumi geda muyu ela pobao.
PRO 10:18 Te bidigo dwai haliga te gasa bidiba elama, tama te haliga dwai te geme dualainu ebaso da, teda agai te tibo po sesemane obao. Me ma, te bidigo te gasa bidiba geme posobo po obaso da, teda aga te kolesaga umuna sai bidi mu tiwai ebao.
PRO 10:19 Te po hauwa wabo bidigo, agai te aga pode te sęgę sabo po weyu tebao. Tiali digi, te po hauwa me wasiąbo bidi da, agai homu kolesaga te wiegi yai elalubao.
PRO 10:20 Te doloba pai bidigo po te wiegi yai nai silva tiwai mu dao. Tiali digi, te dwai bidigo homu kolesaga te olo bage tiwai eyu, tama te dwai mu dao.
PRO 10:21 Te doloba pai bidigo pogo te bidi hauwa tau saibao. Tiali digi, te wiegi yai homu isąwani bidi dabe da, teda augwali te isaibao, magi baso meni, te augwaligo augwa bidibo kolesagade homu kone paliyu, dolo dagalobo menio.
PRO 10:22 Te Genuai Bidigo digi dabolo te wiegi yai doado bage hauwa mayu, agai te doado bagego dabolo te sęgę momainu me ebo menio.
PRO 10:23 Te wiegi yai homu elalusiąbo bidi dabe, augwaligo te tobage dwai kolesaga yabo pemene ebo dao. Tiali digi, te wiegi yai homu elalubo bidi dabego da, augwa te wiegi yai doloba pai kolesaga yabo pemene ebo dao.
PRO 10:24 Te dwai sę ebo bidi dabe te nai hauwade wi yaibao, tama te nai dabe te augwaliba pedelaibao. Tiali digi, te doloba pai bidi dabego wei homu ebo nai dabe Godigo mabo dao.
PRO 10:25 Te dwai sę ebo sogo te dwai sę ebo bidi dabeba pedaliyu da, te tebogo te augwali mu silaibao, te genuai sigi ąį asiyu, tama te pobele bage doado bage te tolasa pabo tiwai ebo dao. Tiali goli, te doloba pai bidi dabe te augwa bomo mu eyu, tama augwa sesemane sogo bugagia bidibo dao.
PRO 10:26 Nago te hagela bidi nago sę emainu me sigio. Tiyu, nage agade hagela mu yabuo, te nago te pedauwalide te ha ebo nai tiwai eyu, tama te sia hanogo te gedu ąį mu pela silibo tiwai ebo dao.
PRO 10:27 Te nage Genuai Bidide wi eyu, aga dologode bidiyu, tama nago aga sesemane sogo wali pidu da, teda nage te tǫde sesabi elama bidaibao. Tiali digi, te dwai sę ebo bidi dabe te pęwadage sogo bidama, tama te augwali isaibao.
PRO 10:28 Te doloba pai bidi dabe te Genuai Bidigo augwaliba te wiegi yai sogo menama, tama te augwa sulama, te augwa wiegi yai pemene yaibao. Tiali goli, te dwai sę ebo bidi dabe da, te odolali tonalueibao. Augwaligo te wiegi yai sogo me sugobeo.
PRO 10:29 Te doloba pai bidi dabego Genuai Bidigo po wali pobaso, agai augwali bugagia tonaluaibao. Tiali goli, te dwai kolesaga ebo bidi dabego agai po wali pisąbaso, augwali dolaibao.
PRO 10:30 Te doloba pai bidi dabe te augwa bulu tǫ pedaide bugagia bidaibao. Tiali digi, te dwai sę ebo bidi dabe augwali te tiwai gilama me bidigobeo. Menio.
PRO 10:31 Te doloba pai bidi dabego te wiegi yai homu hauwa elalubao, tama augwaligo te we bidi dabeba pusaibao. Tiali goli, te po dwai wabo bidi te dolaibao.
PRO 10:32 Te doloba pai bidigo po da, te dolo usu dao, tama te we bidigo olode pusu yaibao. Tiali goli, te dwai bidi dabego pogo da, te we bidi dabego haliga dolobo dao.
PRO 11:1 Genuai Bidigo homugo te bidi dabego te skel dąį hasegelibo homu te agai hagela mu ebo dao, te we bidi tibo po ola menama, tama augwaligo mone anoma elama sobao. Tiali goli, te bidi dabego te doado bage te dąį ilalidu dolo dobabo bidi dabede te agai wiegi yai homu pemene ebo dao.
PRO 11:2 Te augwa digi augwa nogi ugwaba sabo bidi dabe te hale genuai saibao. Te augwa digi augwa aiyaba elalubo we bidi augwaligo te wiegi yai homu kolesaga tama sabo dao.
PRO 11:3 Te doloba pai we bidi dabego doloba pai kolesaga ebogo te dwagi yai sunumi augwalibolo ola mabo dao. Tiali goli, te tibo po wabo bidi dabe da, te augwa tibo po wabo kolesagade digi te augwa dolaibao.
PRO 11:4 Te nago masigi hauwa elalubadi digi te tagalao, tego te Genuai Bidigo nageba te dwai sę yali wei ponainu ebo sogo te nage tau me sogobeo. Tiali goli, nago te doloba pai kolesaga wali pali da, tego te nage tau selama, tama nage polo me isigobeo.
PRO 11:5 Te doloba pai kolesagago te doloba pai bidi dabe augwa tau siyu, tama te doloba pai sunumi wali pabo usu yaibao. Tiali goli, te dwai kolesagago te dwai bidi dabe augwa digi tula mumainu ilibo dao.
PRO 11:6 Te doloba pai kolesagago te doloba pai bidi dabe augwa tau siyu, tama augwa bugagia bidaibao. Tiali goli, te Godiba homu kęą pisąwai bidi dabe augwa te dwai kolesagade dolaibao.
PRO 11:7 Te dwai sę ebo bidi dabego te tama homu yai, te augwa doado bage hauwa te augwa bomogo digi sabo da homu yali. Tiali digi, nosali augwali isibo si da, tama augwa te nai dabe me sogobeo.
PRO 11:8 Te dwai sę ebo me te sęgę meba te doloba pai bidi dabeba pedalubaso da, teda te Genuai Bidigo augwali ma siyu, tama te dwai sę yali sę me te sęgę te dwai sę ebo bidi dabeba muaibao.
PRO 11:9 Te dwai kolesaga ebo bidi dabego po obaso da, te pogo te gasa we bidi dabe dolaibao. Tiali goli, te doloba pai bidi dabego te wiegi yai homu kolesaga ebogo te augwa digi tau siyu, tama augwa bugagia bidaibao.
PRO 11:10 Te doloba pai bidi dabego bidibo kolesaga te wiegi yai pedalubo sogo, te hanude bidibo we bidi dabego wiegi yai pemene ebo dao. Tiali goli, te bidi me deligo dwai kolesaga sesemane sogo ebaso da, teda te aga isibo sogo, te we bidi dabe augwa wiegi yai pemene mu eyu, hae wabo dao.
PRO 11:11 Te doloba pai bidi dabego te augwa taun tomode wiegi yai kolesaga ebaso, te tebogo te taun wiegi yai pedelaibao. Tiali goli, te dwai kolesaga ebo bidi dabe, augwaligo te dwai po haniani weyu, tama tego te taun dolobo dao.
PRO 11:12 Te bidigo gasa bidi dolama, te po dwai wabo bidi, aga te kolesaga umuna sai bidi tiwai ebao. Tiali goli, te wiegi yai homu elalubo bidigo pedauwali te pania selama, tama te tobage po me wagobeo.
PRO 11:13 Te subigila po hauwa wabo bidigo te aga abagigo geme dualubo po pusaibao. Tiali digi, te mu po wabo bidigo te aga abagigo geme dualalubo po me hanilama pusugobeo.
PRO 11:14 Te gavman sę tobolu bidi dabego te we bidi dabeba wiegi yai sunumi dodolobo sę usu isiąyu da, teda te bulu tǫ kantri dolaibao. Tiali goli, te wiegi yai homu mabo bidi hauwa elalubaso da, teda te kantri bugagia dolalu bidaibao.
PRO 11:15 Te bidi me deligo negeli sai madi, te aga digi te negeli wei begelabo usu isąbaso, tama nago te nai negeli sali wei ponabo po dąų walaibaso da, teda nosali te nage genuai sęgę elaluaibao. Tiali goli, te nage bugagia bidabo homu eyu da, nago te kolesaga tudiba muyu, gasa bidigo negeli wei ponabo po dąų wagio.
PRO 11:16 Te gasa we bidi tau sabo kolesaga ebo we dabe, augwali te we bidi dabego gedude genuai nogi elalubo dao. Tiali goli, te gasa we bidi dali homu dene isiąbo bidi dabego te mone hauwa siyu te doado bage naga sabo homu ebo dao.
PRO 11:17 Te nago gasa bidi homu dene elama, tama nago aga wiegi yai ilibaso da, teda te kolesagade te naga digi naga wiegi yai ilibao. Tiali goli, nago gasa bidiba dwai dene mabo sę eyu da, te nagaba digi naga te dwai sę ma ilibo tiwai dao.
PRO 11:18 Te doado bage te dwai bidi dabego sali, te augwali tau sabo mu usu me egobeo. Te olo bage nai naga tiwai yaibao. Tiali goli, te doloba pai kolesaga ebo bidi dabego te wiegi yai nai mu saibao.
PRO 11:19 Te doloba pai kolesaga sainu bomo ebo bidi dabe te augwa bidibo ula saibao. Tiali goli, te dwai kolesaga yainu bomo ebo bidi dabe te augwali isaibao.
PRO 11:20 Te sesemane sogo dwai homu ebo bidi dabede te Genuai Bidigo tede homu mu godolo isiąwai. Agai te bagede sębę mu ebo dao. Tiali goli, agai te dolo bilibo bidi dabe te wiegi yai homu pemene ebo dao.
PRO 11:21 Mu tamao, Genuai Bidigo te dwai kolesaga ebo bidi dabeba po tų ilama, tama agai augwaliba dene gesoai mu ilaibao. Tiali goli, te wiegi yai kolesaga ebo bidi dabego hanigo te po tų ebo ugwaba igulaibao.
PRO 11:22 Te we deli te gasa sawi yai mu bidali, tiali goli agai te bilibo wiegi yai kolesaga te konesiąwai baso da, teda aga te kibu gunide te wiegi yai gol ring elalubo tiwai ebao.
PRO 11:23 Te doloba pai we bidi dabego homu wei ebo homu kolesagago te dwagi yai sę pedalumainu ebo dao. Tiali digi, te dwai kolesaga ebo bidi dabe, augwaligo te dwai homu elalubao, tama tibaso Genuai Bidigo augwali dali sębę genuai mu ebo dao.
PRO 11:24 Te bidi mebago te augwa mone me doado bage te gasa bidi dabe tau siyu mabode te wiegi yai homu pemene yalio, tiali goli, augwa digi te umabo mone te augwa sęde sali. Tama bidi mebago te gasa bidi dabe tau saibao homu yali, tiali goli augwaligo hagela homu yali. Augwa mone me doado bage gea sali, tiali goli nosali augwa digi augwa te mone te mu sǫą pali.
PRO 11:25 Te gasa bidi tau siyu, te doado bage nai mabo bidi da, aga digi da te doado bage hauwa saibao. Te nago gasa bidi dabe tau sali da, te augwaligo nage me tau saibao.
PRO 11:26 Te bidigo aga nai te we bidi dabego abelainu ebadi te gea sobaso da, teda augwaligo te po dwai agaba waibao. Tiali digi, te bidigo te we bidigo agai nai abelimainu ebaso da, teda augwaligo agaba te wiegi yai pemene ebo dao.
PRO 11:27 Te bidigo wiegi yai kolesaga wali pabo sę bomo ebaso da, teda te we bidigo agaba bugai haliga yaibao. Tiali goli, te bidigo dwai sę ebo kolesaga idubaso da, teda te dwai sęgo aga gegaibao.
PRO 11:28 Te bidigo homugo te aga monego naga aga tau siyu bugagia bidibao homu ebaso da, teda aga te mu tuloluaibao. Tiali goli, te doloba pai bidi dabe da, te bugagia mu bidiyu, te gesi ni yabe elalubo tiwai yaibao.
PRO 11:29 Te bidigo aga we wai te bugagia tonalusiąwani da, teda aga doado bage te tigidali hagawaibao. Tama tiwai naga te wiegi yai homu kolesaga meni yai bidi dabego, te augwa doado bage tigidali tagalama, tama augwali te wiegi yai homu kolesaga ebo bidi dabego olo sę ebo bidi pedelaibao.
PRO 11:30 Te doloba pai bidigo kolesaga te bidibo ula mabo ni tiwai ebao. Tama te wiegi yai homu kolesaga ebo koneani elalubo bidigo, agai te gasa bidi dabe aga dali aselama, bidagasamainu ebo dao.
PRO 11:31 Dago koneai, te doloba pai bidi dabego wiegi yai kolesaga te augwa tǫde bidibo sogo yali kolesagade te augwa wiegi yai nai saibao. Tama dago te homu me igio, te dwai kolesaga ebo bidi dabe te augwa yali dwai kolesagade dwai dene sabo te ela soabo homu me egobeo. Menio. Genuai Bidigo te augwaliba dolo wei ponaibao.
PRO 12:1 Te wiegi yai homu kolesaga godolo homu ebo bidi dabe, augwaligo dwai sę yali te gasa bidigo augwali dodolobo sogo te augwali wiegi yai homu pemene yaibao. Tiali goli, te gasa bidigo agai dwai sę dodoligi homu ebo bidigo da, aga te esela pabo bidi mu tiwai dao.
PRO 12:2 Te bidigo wiegi yai kolesaga wali pobaso da, teda Genuai Bidigo aga dali pemene homu eyu, bugai haliga eyu dwagi yai sę yaibao. Tiali goli, bidi mego te gasa bidi dali muma sabo kolesaga ebaso da, teda Genuai Bidigo po agaba wabo si, teda aga dolaibao.
PRO 12:3 Te dwai kolesaga ebo bidi da, tego aga bomo elama, bugagia bidimainu tau sabo usu me egobeo. Tiali goli, te doloba pai kolesaga ebo bidi da, aga te ni sele aiyanu mu dulama elalubo tiwai, tama bidi dabego gudainu ebo usu me egobeo.
PRO 12:4 Te bidi me deligo wego te wiegi yai kolesaga ebaso da, teda te tebogo te aga bidiba te genuai nogi mobao. Tiali goli, wego te dwai kolesaga haniani eyu, tama aga bidi hale ilibo we yai baso da, teda te wego te dwai gasigo te aga bidigo dili te dolobo sę tiwai ebao.
PRO 12:5 Te doloba pai bidi dabego sę yabo homu kolesaga te dolo naga dao. Tiali digi, te dwai sę ebo bidi dabego da, te sesemane sogo te we bidi tibo po ola maiabo haniani kolesaga yabo homu ebo dao.
PRO 12:6 Te dwai sę ebo bidi dabego po te bidi geme dualuagaselama, tama te bidi ela muainu sisi elalubo tiwai gilama ebao. Tiali goli, te doloba pai bidi dabego pogo te we bidi dabe te sęgę elalubo sogo tau siyu, tama te we bidi dabe augwa bugagia bidimainu ebo dao.
PRO 12:7 Te dwai kolesaga ebo bidi da, te aga dolama tama silaibao. Tiali goli, te doloba pai bidigo hani da, te bugagia ma dolalubao.
PRO 12:8 Te wiegi yai homu elalubo bidi yai baso da, teda te we bidi dabego aga nogi ugwaba saibao. Tiali goli, te homu kolesaga gagea pai bidi da, augwaligo te aga nogi aiyaba elalubo dao.
PRO 12:9 Tama te olo bidi me deligo te aga sę bidi me deli te aga bede bidibaso da, te wiegi yai da, tama te bidigo aga genuai bidi da homu ebo bidi te aiyaba elaluali, tiali goli te aga nai sǫą pali.
PRO 12:10 Te doloba pai bidi dabego te augwa kibu hani sibide te augwalide olo tau sabo kolesaga eyu, tama augwali bugagia tonalu negebo dao. Tiali goli, te dwai bidi dabego da, te augwa kibu dabe dali dene mabo sę eyu, mu dolobo dao.
PRO 12:11 Bidigo te aga gi bugagia tonalubaso da, teda agai nai hauwa saibao. Tiali goli, te wiegi yai homu kolesaga meni yani bidi da, aga te sę dene odolali eyu, te haniani sęgo aga me tau sainu ebaso, usu me egobeo.
PRO 12:12 Te dwai sę ebo bidi dabego te bidi mebago te dwai sę elama, tama te nai hauwa sabo sulama, tama augwali te nai dabede te pesą mu ebo dao. Tiali goli, te doloba pai bidi dabego te nai hauwa te augwa wiegi yai kolesaga ebode sabo dao.
PRO 12:13 Te dwai bidi dabego te dwai pogo te augwa digi te kalabus ebo dao. Tiali goli, te dwai sęgo te doloba pai bidi dabe gegebaso da, augwaligo te ela soaibao.
PRO 12:14 Te nago po wabo me, nago sę ebo me, te wiegi yai eyu da, teda tego nage nai sobaso, te nage bugagia bidaibao.
PRO 12:15 Te wiegi yai homu meni yai bidi dabego, te augwa koneani te augwa kolesaga naga te wiegi yai naga da homu ebo dao. Tiali goli, te wiegi yai homu kolesaga elalubo bidi dabego da, te gasa bidi dabego augwaliba te wiegi yai homu kolesaga momainu ebo dao.
PRO 12:16 Te wiegi yai homu kolesaga elalusiąbo bidi dabego te bidi mego magi sę me deli augwaliba ebo si, te augwali haliga sębę polo eyu yaibao. Tiali goli, te wiegi yai homu elalubo bidiba te dwai po obaso da, teda agai te pode homu elama, sula tagalobo dao.
PRO 12:17 Te sę ebo suali bidi, te witnes bidi, te mu po wabo bidi yai baso da, teda agai doloba pai po naga te po tų ebode pusaibao. Tiali goli, aga te tibo po wabo bidi tiwai eyu da, agai te po tų ebo te tibo dali waibao.
PRO 12:18 Te bidi mego aga po homu kone palama, bugagia me wasiąbaso da, teda agai te subigila wabo pogo te gasa bidigo haligade te bainat hwągo enebo tiwai ebao. Tiali goli, te wiegi yai homu elalubo bidigo pogo te bidi tau sabo, te wiegi yai marasingo tau sabo tiwai gilama ebo dao.
PRO 12:19 Te ili po wabo po te pęwadage sogo mu elaluama, tama bidi dabego te po homugo gegeda palaibao. Tiali goli, te mu po da, te sesemane sogo mu elaluaibao.
PRO 12:20 Te dwai kolesaga yabo homu ebo bidi dabego, augwa digi augwa tibo po ola mabo dao. Tiali goli, te we bidi dabe tau siyu bugagia bidimainu homu ebo bidigo da, teda aga digi te pemene ebo dao.
PRO 12:21 Te doloba pai bidi dabe augwaliba te dobo sę pedalugobeo. Tiali goli, te dwai sę ebo kolesaga ebo bidi dabe da, augwaligo te dwai sęgę hauwa elalubo dao.
PRO 12:22 Genuai Bidi te haliga sębę mu eyu, tama te tibo po wabo bidi tigidali dali te boi bidi homu ebo dao. Tiali goli, agai te mu po naga wabo bidi dabe dali te agai pemene ebo dao.
PRO 12:23 Te wiegi yai sę yabo kolesaga koneai bidigo, agai te aga wiegi yai homu elalubo te polo tama me pusugobeo. Tiali goli, te wiegi yai homu meni yai bidigo da, agai po te ąį bole tulalubo tiwai umabo yaibao. Tiali goli, te agai po odobo we bidi dabe da, te augwaligo koneama, te aga kolesaga umuna sai bidi tiwai da wabo dao.
PRO 12:24 Te sę dene ebo bidi da, te tonalubo bidi pedelaibao. Tiali goli, te hagela bidi dabe te olo sę naga ebo bidi pedelaibao.
PRO 12:25 Te bidigo homu gone te sesemane kone tua pabo bidi da, teda aga te haliga sęgę mu elama, tama aga homu dolaibao. Tiali goli, aga abagigo te bidi dali te wiegi yai po obaso da, teda aga te bugai haliga ma ebo dao.
PRO 12:26 Te doloba pai bidi dabego te wiegi yai sunumi te augwa abagi dabeba ola mawaibao. Tiali goli, te dwai kolesaga ebo bidi dabego te wiegi yai sunumidu pabo tagalu, tama gegeda pabo dao.
PRO 12:27 Te hagela bidigo te hasa enegi peyu da, te augwaligo gegebo me sugobeo. Tiali goli, te sę dene ebo bidi da, augwali te dwagi yai bidi dabe mu dao.
PRO 12:28 Te doloba pai kolesaga wali pabo bidi te aga bidabo ula selama, bugagia bidaibao. Te tobage kolesaga da, te gamonabo kolesaga mu dao.
PRO 13:1 Te wiegi yai homu kolesaga elalubo waigo da, agai te aga ayago po odaibao. Tiali goli, hagoma homu ebo bidigo da, te gasa bidigo aga dodolobo kolesaga ebo te aga homude hagela homu ebo dao.
PRO 13:2 Te we bidi dabeba te po dolo yai po wabo bidi agai te wiegi yai nai saibao. Tiali goli, te tibo po weyu, te dąų walali po bolobo bidi dabe, augwaligo te gasa bidi dolabo homu wei mu ebo dao.
PRO 13:3 Te bidigo aga po te sali selasa wabo bidi yai baso da, teda aga bugagia bidiyu, tama aga me dologobeo. Tiali goli, te po hauwa dogia pabo bidi dabe da, te dolaibao.
PRO 13:4 Te hagela bidigo te doado bage hauwa sabo homu wei yali, tiali goli agai me sogobeo. Tiali digi, te sę dene ebo bidi dabego da, te augwa homugo te doado bage hauwa sabo homu yaibao.
PRO 13:5 Te doloba pai bidi dabego te tobage tibo po wabo te hagela homu mu ebo dao. Tiali digi, te dwai sę ebo bidi dabego da, te tobage dwai hale ebo kolesaga dabe ebo dao.
PRO 13:6 Te bidigo doloba pai kolesaga ebaso da, teda aga te kolesagago aga bobogela selama, tama aga bugagia bidibo dao. Tiali goli, te dwai sę ebo bidi dabego kolesagago te augwa digi dolobo dao.
PRO 13:7 Te dwai sę ebo bidi mebago te tibo po weyu, tama augwa te mone hauwa elalubo tiwai yaibao. Tama te mone bidi mebago te tibo po weyu, tama augwali te mone meni yai bidi te tiwai gagawaibao.
PRO 13:8 Te boi bidi dabego te mone bidi dolainu ebaso da, teda aga monego digi te augwali abelibaso, usu yaibao. Tiali goli, te boi bidi dabego te magi mone me doado bage meni yai bidi dolainu ebaso da, teda te magi walu doado bage meni yai bidigo augwaligo te po homu si me egobeo.
PRO 13:9 Doloba pai bidi te lam sole ula wiegi yai ebo tiwai ebao. Tiali goli, te dwai sę ebo bidi dabe te lam sole sula sainu ebo tiwai ebo dao.
PRO 13:10 Te hagoma kolesagago te wado po me hwįbo po pedalubo sę ebo dao. Tiali goli, te bidi aga te gasa bidigo agaba te wiegi yai homu momainu ebo bidi da, teda te bidigo homugo koneani kolesaga te wiegi yai elalubao.
PRO 13:11 Tama te bidigo sę me isiąma, tama te odolali te mone hauwa sobaso da, teda agai te mone polo tama sia saibao. Tiali goli, te sę ebo bidigo tama te dwasianu dwasianu mone sisini peyu da, teda agai mone te hauwa pedalubo sę eduaibao.
PRO 13:12 Te bidigo te nai me deli sabo homu elama, tama te odolali tonalubadi te sesabi mu ebaso da, teda aga homu sęgę eyu, bidaibao. Tiali digi, agai te nai sobaso da, teda aga te tiwai homu eyu, te aga bidibo ula te wiegi yai mu da homu elama, tama aga pemene umabo mu yaibao.
PRO 13:13 Te bidi dabego agabolo te wiegi yai homu kolesaga mawainu ebadi, te aga hagoma ebo bidi yai baso da, teda aga te aga digi dolobao. Tiali digi, te bidigo te agabolo te wiegi yai homu ebo kolesaga mawainu ebaso, te po agai wali pobaso da, teda aga bugagia bidaibao.
PRO 13:14 Te wiegi yai homu koneani kolesaga elalubo bidigo po te bidibo ula mabo wę tiwai yai. Te pogo te bidi tau siyu, te aga dolainu yali nai te ela paibao.
PRO 13:15 Te bidigo homu wiegi yai elalubaso da, teda te bidi dabe aga wei homu yaibao. Tiali goli, te tibo po wabo bidigo te dąų walali po bolama, aga te dwai sunumidu bilibo dao.
PRO 13:16 Te wiegi yai homu elalubo bidi tigidali, augwaligo homu kone bolo palama, tama te sę yaibao. Tiali goli, te wiegi yai homu meni yai bidi dabe, augwaligo te augwa umuna sai kolesaga te pepeli diliba hania hanilibo dao.
PRO 13:17 Te tibo po sela asiyu, te po hasegelebo bidi yai baso da, teda te sęgęgo agaba gegaibao. Tiali goli, te po sela asiyu, te po dolo mu pusubo bidi da, teda agai te we bidi tau siyu, te augwali bugagia bidimainu ebao.
PRO 13:18 Te gasa bidi dabego te bidi aga dodolomainu isiąbo bidi da, aga te dwai mu bidiyu, te aga dwai hale mu yaibao. Tiali goli, te gasa bidi dabego aga dodolomainu ebo bidi yai baso da, teda te we bidigo agaba te genuai nogi momainu ebo dao.
PRO 13:19 Te bidigo agai magi nai me deli sabo homu elama, tama nosali agai te nai sobaso da, teda aga bugai haliga elama, tama pemene mu yaibao. Tiali goli, te wiegi yai homu meni yani bidi dabego da, augwaligo te dwai kolesaga ebo sę te tudiba me mugobeo.
PRO 13:20 Te bidi te wiegi yai homu kolesaga elalubo bidi dali bilali da, teda agai me te wiegi yai homu kolesaga saibao. Tiali goli, te bidi te wiegi yai homu meni ebo bidi dabe dali kisasa bilibaso da, teda te sęgęgo aga gegaibao.
PRO 13:21 Te dwai sęgęgo te dwai sę ebo bidi dabe deliba gesabidi ununaibao. Tiali goli, te doloba pai bidi dabego augwa te wiegi yai nai te augwa mone sabo tiwai ebo dao.
PRO 13:22 Te wiegi yai bidi isibo sogo, te aga hani ogwa dabego te agai doado bage hauwa saibao. Tiali goli, te dwai bidigo sisinibo sę yali mone yai baso da, teda nosali te doloba pai bidi dabego te agai sisinani nai dabe sabo dao.
PRO 13:23 Te doado bage sǫą pai bidi dabego gide te nai hauwa holali, tiali goli te genuai bidi dabego anoma eyu, augwali aiyaba elaluama, tama te nai sabo dao.
PRO 13:24 Te ayago aga wai te keloago eliyu dodolisiąyu da, teda agai te wai godolo homu meni isiąbo tiwai ebao. Tiali goli, te ayago te wai homugo godolo homu ebaso da, teda agai bomo elama, aga bugagia dodolao.
PRO 13:25 Te doloba pai kolesaga elalubo bidi dabego te nai hauwa elalueibao, tiali goli te dwai kolesaga ebo bidi dabe te sesemane nasi elaludaibao.
PRO 14:1 Te wiegi yai homu kolesaga elalubo wego da, teda agai te aga bede te wiegi yai sę eyu, tama aga wai puluba sibi te boma pai pedalubo sę yaibao. Tiali goli, te wiegi yai homu kolesaga meni yani wego da, teda aga digi te aga be doliyu, te aga wai puluba sibi dali dolobo dao.
PRO 14:2 Te doloba pai kolesaga wali pabo bidi, aga te Genuai Bidi wi eyu, aga dologode bidibao. Tiali goli, te tibo po wabo kolesaga wali pabo bidi dabego homugo te Genuai Bidi te olo nai me tiwai da, te homu ebo dao.
PRO 14:3 Te wiegi yai homu kolesaga meni yani bidigo po, te we bidi dabeba te tiwai ola mawaibao, aga digi te aga nogi ugwaba sabo homu elama, te po wali. Tiali goli, te wiegi yai homu elalubo bidigo pogo, te aga digi aga seselaluama, tama te bugagia bidibo dao.
PRO 14:4 Te gi tǫ pepedebo kibu bulmakau omai te meni yani da, teda te nai mubo be te odolali elalueibao. Tiali goli, te sę yabo bulmakau elalu baso da, teda te gide nai hauwa elalueibao.
PRO 14:5 Te suali po pusubo bidigo te po mu po da weyu da, teda agai te po tųde doloba pai po naga pusaibao. Tiali goli, aga te tibo po wabo bidi yai baso da, teda agai po tigidali te dolo me egobeo.
PRO 14:6 Te hagoma bidi dabego te wiegi yai homu kolesaga sabo homu eyu da, teda augwaligo usu me egobeo. Tiali goli, te wiegi yai homu elalubo bidigo da, te agai da te sę dene isiąyu, te gasa wiegi yai kolesaga sabo dao.
PRO 14:7 Te wiegi yai homu kolesaga meni yani bidi dabede digibulu bidao. Te augwaligo nageba te wiegi yai homu kolesaga me magobeo.
PRO 14:8 Te wiegi yai homu elalubo bidigo te aga bilibo homu kolesaga te bugagia homu kone palaibao. Tiali goli, te wiegi yai homu meni yani bidi dabe te augwa digi tibo po ola mawaibao, magi baso meni, te augwaligo homu kolesaga te geda mubo dao.
PRO 14:9 Te wiegi yai homu meni yani bidi dabego, augwa te deli haliga elalubao, te dwai sęgę sabo kolesaga dao. Tiali goli, te doloba pai bidi dabego augwade digi te wiegi yai kolesaga eyu, tama augwa deli haliga naga elama bidibo dao.
PRO 14:10 Te bidigo agade digi haliga sęgę ebo koneama, tama aga digi te pemene yabo koneani, tama agai te gasa bidiba me hanilibaso, usu egobeo.
PRO 14:11 Te bidi dwaigo we wai hani sibi te mu dolama, tama sia saibao. Tiali goli, te doloba pai bidigo hani da, te bomai hani mu pedelaibao.
PRO 14:12 Bidi mebago te homu eyu, te augwa kolesaga te wiegi yai da homu elama, tama augwa te wiegi yai sunumi wali poba homu yai. Tiali goli, menio. Augwa te sę elala pidubadi genama, tama nosali augwa isaibao.
PRO 14:13 Te dago gisugu obadi goli tagala, te haliga sęgę elalubogo te da me tagalogobeo. Tama te wiegi yai pemene ebo homu silai madi, te haliga sęgę ebo te me elaludaibao.
PRO 14:14 Te dwai sę ebo bidi dabego te augwa ebo dwai kolesagade augwa dene dolo saibao. Tiali digi, te wiegi yai bidi dabego da, te augwa digi ebo wiegi yai kolesagade pemene ebo dao.
PRO 14:15 Te kolesaga dwasianu koneai elalubo bidi dabe augwaligo te haniani po tigidali homuba dąų ola saibao. Tiali goli, te wiegi yai homu kolesaga elalubo bidigo, te aga ebo kolesaga dabe bugagia osola suyu ebo dao.
PRO 14:16 Te wiegi yai homu kolesaga elalubo bidigo da, te Genuai Bidide wi eyu, te bugagia tonalu, tama te sęgę sabo sę dabe te agade ela soaibao. Tiali goli, te wiegi yai homu elalusiąbo bidi, agai te homu eyu, te tobage tigidali sę yabo homu elama, tama agai te ebo kolesagade te homu bugagia me egobeo.
PRO 14:17 Te haliga sębę polo ebo bidi dabego te esela pabo bidigo kolesaga ebo tiwai yaibao. Te bidigo aga homugo ebo kolesaga digi te usu nabo homu ebo bidi te we bidi dabego homude godolo mu me egobeo.
PRO 14:18 Te dwasianu kolesaga koneai elalubo bidi dabego kolesaga, te kolesaga umawai bidigo kolesaga ebo tiwai yaibao. Tiali goli, te wiegi yai homu kolesaga koneani elalubo bidigo kolesaga te augwa tobolude te wiegi yai au tiwai elalubo dao.
PRO 14:19 Te dwai kolesaga ebo bidi dabe da, te doloba pai bidi dabego dologode bidiyu, tama augwaliba te olo tau sabo kolesaga eyu, te augwali tau sao po hanalu waibao.
PRO 14:20 Te bidi dabego te doado bage sǫą pabo bidi dabe tau sabo homu wei me isiąyu, te augwa abagi hasi goli te wei isiąyu te tagalaibao. Tiali goli, te mone bidi dabego da, te augwa abagi hauwa elalubo dao.
PRO 14:21 Te bidigo gasa bidiba dwai po weyu dolobo bidi da, teda aga te dwai sę dolo ebo bidi mu yali. Tiali goli, te doado bage meni yai bidi dabe te bidigo wiegi yai homu elama, te olo mu tau sabo kolesaga ebo bidi da, te aga wiegi yai homu pemene yao.
PRO 14:22 Te dwai kolesaga yabo homu ebo bidi dabe da, teda augwa homu da te mu geda mubao. Tiali goli, te bidi dabego wiegi yai kolesaga emainu homu wei ebo bidi da, te augwaligo agaba te bugai haliga mu ebo dao. Tama augwaligo agaba homugo kęą pabo kolesaga ebo dao.
PRO 14:23 Te nago sę dene ebo sę eyu da, teda nago wiegi yai mone saibao. Tiali goli, te nage olo bididu, tama nago po naga udali da, te nage magi nai meni yai mu bidaibao.
PRO 14:24 Te wiegi yai homu elalubo bidigo sali mone me doado bage, tego da ola mobao, augwali dwagi yai homu kolesaga elalubao. Tiali goli, te wiegi yai homu kolesaga elalusiąbo bidi dabe, augwaligo te umuna sai homu kolesaga naga elalubo dao.
PRO 14:25 Te suali sę po dolasa te po tų ebode wabo bidi yai baso da, teda te po tųgo te magi sę isąwani bidi me ela po me wagobeo. Tiali goli, te sę suali bidi te witnesgo po te dolasa wasiąwani da, teda aga te tibo po wabo bidi dao.
PRO 14:26 Te Genuai Bidide wi eyu, aga dologoba pelama bidibo bidi da, aga da te boma pai madide bidibao, tama te magi nai me delide wi me isąwaibao, tama aga wai puluba dabe me te bugagia bidaibao.
PRO 14:27 Te Genuai Bidide wi elama, aga dologoba pelama bidibo kolesaga te bidibo ula mabo ulu wę tiwai ebao. Te kolesagago te bidi tau siyu, te aga dolainu ebo naigo te aga ela soaibao.
PRO 14:28 Te kingo te bulu bidi hani hauwa tonalubaso da, teda te bidi dabego te agaba genuai nogi mawaibao. Tiali goli, te kingo dwasianu hani mu tonalubaso da, teda aga te olo bidi tiwai pedelaibao.
PRO 14:29 Te haliga polo sębę isiąbo bidi, agai wiegi yai homu elalubao. Tiali goli, te haliga sębę polo ebo bidi aga homugo te punasi kolesaga te polalubo kolesaga da homu ebo dao.
PRO 14:30 Te nagame yai homu elalubo bidigo da, teda te bidi aga tigi te bugagia elaluaibao. Tiali goli, te mena nai sabo homu eyu, tama te gasa bidiba te dwai haliga te sesemane ebo bidi da, te kolesaga ebo bidi te dwai gasigo te aga dili dǫgai dabe dolobo tiwai ebao.
PRO 14:31 Godigo tigidali bidi nigali, tama tiyu, te bidi me deligo te magi doado bage meni yai bidi dabe aiyaba elalubaso da, agai te God aiyaba elalu dolobao. Tiali goli, te magi doado bage meni yai bidi dabe bugagia wiegi yai ilibo kolesaga ebo bidi da, agai te Godiba genuai nogi mabo dao.
PRO 14:32 Te dwai sę ebo bidi dabe te augwa dwai kolesagago digi te dolobao. Tiali goli, te doloba pai bidi dabe te magi nai me delide homu si me egobeo. Te augwa isibo sogo pedalubo si da, te augwa konealubo po te me dąų elalueibao.
PRO 14:33 Te wiegi yai homu elalusiąbo bidi dabego, augwa koneani, te wiegi yai homu koneabo kolesaga te elaluba homu ebo koneai. Tiali goli, aga te wiegi yai homu elalubo bidi dabe dali sesemane bidibo dao.
PRO 14:34 Te we bidigo doloba pai kolesaga wali pobaso da, teda te tǫ bulu kantri bidi hani nogi te genuai elaluaibao. Tiali goli, te augwaligo dwai sę eyu da, te augwali hale genuai yaibao.
PRO 14:35 Kingo te sę bidi dabego wiegi yai sę ebaso, te wiegi yai pemene yaibao. Tiali goli, te sę bidi dabego te dwai sę eyu, tama te king hale yabo sę eyu da, teda te king haliga sębę umabo mu ebo dao.
PRO 15:1 Te bidigo nage dali haliga sębę ebaso da, teda agaba po wei dua digi ponao, tama aga haliga sębę yali isigulaibao. Tiali goli, nago pogo te gasa bidi doliyu, dwai po wabo sę eyu da, te agai nageba te dwai haliga sębę mu ebo sę ilibao.
PRO 15:2 Te wiegi yai homu kolesaga elalubo bidi agai po pusainu yali, agai te bidi dabego te wiegi yai homu wei ebo kolesaga konemainu homu ebo dao. Tiali goli, te wiegi yai homu elalusiąbo bidigo po pusubo sogo, agai pedauwalide te odolali po naga te ąį bole tulalubo tiwai ebo dao.
PRO 15:3 Genuai Bidigo te tigidali we bidigo ebo sę te tigidali habu badu pedalubo te subo dao. Agai te wiegi yai bidi me, dwai bidi me, subo dao.
PRO 15:4 Te bidigo te wiegi yai po te we bidiba pusubaso da, te po te bidibo ula mabo ni tiwai elama, tama te we bidi bugagia bidimainu te tau sabo tiwai ebao. Tiali goli, te bidigo te we bidiba te po dwai wabo bidigo, agai te augwaligo homu ogwa wai agabo tiwai eyu ebo dao.
PRO 15:5 Te wiegi yai homu kolesaga meni yani bidigo te aga ayago po sela sąwaibao. Tiali goli, te bidigo te aga gasa bidigo dodolomainu ebo bidi da, teda agai homu wiegi yai elalubao.
PRO 15:6 Te doloba pai bidi dabego augwa bede te doado bage hauwa elalueibao. Tiali goli, te dwai sę ebo bidi dabego monede te augwaba sęgę pedelaibao.
PRO 15:7 Te wiegi yai homu elalubo bidi dabego te wiegi yai homu te we bidi dabeba mabo dao. Tiali goli, te wiegi yai homu elalusiąbo bidi dabego te tiwai me egobeo.
PRO 15:8 Genuai Bidigo te dwai kolesaga ebo bidigo ofa ebo te wei mu me egobeo. Menio. Agai tede dwai homu mu ebo dao. Tiali goli, agai te doloba pai bidigo gedu haluasa po wabo te wei mu eyu, wiegi yai pemene mu ebo dao.
PRO 15:9 Genuai Bidigo te dwai kolesaga ebo bidigo ebo kolesaga te wei mu me isiąyu, tede dwai homu mu ebo dao. Tiali goli, agai te doloba pai kolesaga wali mu pabo sę ebo bidi dabe wei mu ebo dao.
PRO 15:10 Te doloba pai sunumi tagalobo bidi da, teda dwai dene mu saibao. Tama te gasa bidi dabego aga dodolomainu isiąbo bidi da, teda aga isaibao.
PRO 15:11 Genuai Bidigo te isali bidi dabe te augwali bidibo pesage me subo dao. Te tiwai usu yaligo da, teda agai te da tǫde we bidigo homu kone palobo kolesaga te tigidali me konea silibo dao.
PRO 15:12 Te hagoma ebo bidigo te gasa bidigo aga dodolainu ebo hagela homu yaibao, tama agai te wiegi yai homu elalubo bidiba hanalu, te agabolo te wiegi yai homu kolesaga momainu me egobeo.
PRO 15:13 Te bidigo haliga te wiegi yai pemene ebaso da, teda agai gesabidi me te wiegi yai eyu, pisigina paibao. Tiali goli, te bidigo haliga te sęgę elalu da, teda aga dwai bidibao.
PRO 15:14 Te wiegi yai homu elalubo bidigo te tobage wiegi yai kolesaga koneabo sę bomo idu gebo dao. Tiali goli, te wiegi yai homu meni yai bidi, agai te geda mubo po sesemane bomo elama, udaibao.
PRO 15:15 Te doado bage sǫą pabo bidi da, aga te dwai bididu, tama te genuai sęgę sesemane elaluaibao. Tiali goli, aga te bugai haliga eyu, pemene ebo bidigo da, teda te tigidali side te genuai nai da tubo side tiwai elalueibao.
PRO 15:16 Te nago doado bage dwasianu naga elalu, tama nage te Genuai Bidide wi eyu, aga dologoba pelama bidibaso da, teda nago bidibo ulago te genuai mone pesage holai elalubo, me te dwai sę ebo doado bage hauwa elalubo bidigo bidibo ula te aiyaba elaluaibao.
PRO 15:17 Te bidi godolo homu ebo kolesaga, te polalubo homu kolesaga dao. Tama tiyu, nage te naga abagi dabe dali bidiyu, tama dagego te donai naga tubaso da, te dwagi yai dao. Ma, nage te godolo homu isiąbo bidi dabe dali bidiyu, tama dagego te bulmakau kibu mi tubao, te dwagi yai menio.
PRO 15:18 Te haliga sębę polo ebo bidigo te gasa bidi dabego wado po omainu ilaibao. Tiali goli, haliga nagame ebo bidigo da, te bidi dabego wado po wabo te homu aiyaba elaluama, tama augwa deli homu ma elama bidibo dao.
PRO 15:19 Te hagela bidigo te aga bidibo ula te dwai mu da, te homu yaibao, te aga busi sunumidu pabo tiwai yali. Tiali goli, te doloba pai bidigo koneai, te aga bidibo ula te wiegi yai mu da wali, te aga genuai sunumidu pabo tiwai ebo dao.
PRO 15:20 Te ogwago wiegi yai homu me kolesaga elalubaso da, teda aga aya ida wiegi yai homu pemene yao. Tiali goli, ogwago te esela pabo bidigo kolesaga tiwai ebaso da, teda agai te aga aya ida godolo homu menisiąyu tebao.
PRO 15:21 Te wiegi yai homu elalusiąbo bidigo te tobage dobo homu ebo kolesagade pemene yaibao. Tiali goli, te doloba pai homu kolesaga elalubo bidigo te doloba pai kolesaga sesemane sogo wali pabo dao.
PRO 15:22 Te nago sę meba yainogo da, teda hasia bolo nago te homu kolesaga te gasa bidi hauwade sao, tama nago sę te wiegi yai pedalumainao. Nago te tiwai sę isiąwani da, teda nage odolali sę dene yaibao.
PRO 15:23 Te bidi dabe po mibadi, tama nago te wiegi yai sogo ebo te tonaluama, tama nago te wiegi yai po me deli weyu da, teda nage pemene yaibao. Awe, nago pode te gasa bidi dabe me dwagi yai homu yaibao.
PRO 15:24 Te wiegi yai homu elalubo bidigo da, te sunumidu ugwaba holama, te aga bidabo ula saibao. Tama tialima, aga te isali bidi dabego pesageba me dulugobeo.
PRO 15:25 God Genuai Bidigo te bidi aga digi aga nogi ugwaba sabo bidigo be dolaibao. Tiali goli, agai te wilawe we agai tau siyu, tama te gasa bidigo te wego tǫ sidali weyu te tama tiaibao.
PRO 15:26 Te tobage dwai homu kolesaga ebo dabe te Genuai Bidigo gedude te dwai kugumini nai tiwai ebao. Tiali goli, te wiegi yai meda menisąwai we bidigo homu kolesaga te aga gedude te dwagi yai dao.
PRO 15:27 Te monede pesą eyu ebo bidigo tama te mone sainu te tobage haniani dwai kolesaga ebaso da, teda agai te dwai sęgę te aga we wai dabede te pedalubao. Tiali goli, te gasa bidi dabego te haniani dwai sęde te mone mabo sisąbo bidi da, teda aga te bugagia bidaibao.
PRO 15:28 Te doloba pai bidigo te homu kone bolo palaibao, tama nosali agai te gasa bidiba po wei ponaibao. Tiali goli, te dwai sę ebo bidigo po wabo sogo, agai te dwai po naga polo subigila wabo dao.
PRO 15:29 Genuai Bidi te dwai kolesaga ebo bidi dabede te digibulu bidibao. Tiali goli, agai te doloba pai bidi dabego gedu haluasa po waboba olo mubo dao.
PRO 15:30 Te nago bidigo gesabidi te wiegi yai elalu, tama aga te gisugu udubo subaso da, teda nage bugai haliga yaibao. Tama nago te dwagi yai gesi po odobaso da, teda tego te nago tigi dąų walubao.
PRO 15:31 Bidigo te bidi dabego aga dodolainu ebaso, te bugagia olo munama, tama aga bugagia bidabo tau somainu ebo bidi da, agai te wiegi yai homu kolesaga elalubao, tama aga te gasa wiegi yai homu kolesaga elalubo bage dali kisasa bilibo usu yaibao.
PRO 15:32 Te bidi te bidi dabego aga dodolainu ebadi, te po sela sąbo bidi da, teda te aga digi aga dolobao. Tiali goli, te bidi dabego te aga dodolainu ebaso, te po odobo bidi da, teda aga homu me konebo kolesaga te wiegi yai pedelaibao.
PRO 15:33 Te Genuai Bidide wi eyu, aga dologode bidibo kolesagade, te tebogo te wiegi yai homu me kolesaga sabo sunumi elalubao. Te nago naga digi naga aiyaba elalubo kolesaga bolo elama, tama nosali nago genuai nogi saibao.
PRO 16:1 Dago te tama sę dabe yabo homu ebo dao. Tiali goli, Genuai Bidigo te po hasia bolo usu da olama da, tama dago te sę dabe ebaso, usu yaibao.
PRO 16:2 Dago te homu eyu, te dago tigidali kolesaga te God gedude magi meda isiąwai wiegi yai mu da homu yaibao. Tiali goli, Genuai Bidigo te dago homude ebo kolesaga tigidali dagala sulama, tama agai te dago ebo kolesaga page tigidali te bugagia konebo dao.
PRO 16:3 Te tigidali sę nago yainu homu eyu da, te nago Genuai Bidi nogoba te sę muao. Tama agai te sę dabe wiegi yai pedalumainu ilaibao.
PRO 16:4 Genuai Bidigo te tigidali nai nigilama, tama augwalide te sę dabe elalubao. Tama tiwai naga, Genuai Bidigo te dwai kolesaga yabo bidi dabe nigilali, tama agai augwali nigali te po tųde hagamainu nigalio.
PRO 16:5 Genuai Bidigo te hagoma ebo bidi dabe, me te augwa digi augwa nogi ugwaba sabo bidi dabe, te agai wei mu me isiąyu, augwali dali dwai homu ebo dao. Dago e tama koneao, Genuai Bidigo augwali te odolali me tagala palogobeo. Menio. Te agai augwaliba te tigi dene mawaibao.
PRO 16:6 Te bidigo Genuai Bidi godolo homu mu elama, tama aga dali mu kęą pobaso da, teda Genuai Bidigo te agai sęgę sela sąwaibao. Tama te bidi Genuai Bidide wi eyu, aga dologode bidibaso da, teda te bidigo te dwai sę ebo kolesaga te ela sobaso, usu yaibao.
PRO 16:7 Te bidigo te Genuai Bidigo wei homu yabo tobage kolesaga dabe ebaso da, teda te Genuai Bidigo aga tau siyu, te tigidali bidi, me te aga boi bidi dabe dali, te augwali aga dali bugagia bidimainu tau saibao.
PRO 16:8 Te nago dwasianu nai naga elalu, tama nago doloba pai kolesaga wali pobaso da, teda nago te tebo ulago te moni mone pesage hauwa umabo elalubo bidigo te dwai sę ebo kolesaga ebo bidi te aiyaba elalueibao.
PRO 16:9 Dago te dago yainogo homu ebo sęde homu kone palobo dao. Tiali goli, Genuai Bidigo te da bilibo dolasa bilimainu ebo dao.
PRO 16:10 Te kingo po te bulude bidibo bidi dabebolo wabo sogo, te agai te Genuai Bidigo agabolo mani po pusubo tiwai ebao. Tama tibaso, te bidi te po tų ebode dagalubo sogo, agai te doloba pai po tų naga yao.
PRO 16:11 Genuai Bidigo homugo te tigidali skel me usu sabo nai meta te dąį wali dolo pomainu homu eyu, tama te we bidi ili po ola momainu igio.
PRO 16:12 Te king dabego te dwai kolesaga ebo te hagela homu mu ebao, magi baso meni, te gavmanigo doloba pai kolesaga eyu da, teda te bomo elalueibao.
PRO 16:13 Kingo te mu po naga wabo bidi wei mu ebo dao. Awe, te tobage bidi te kingo gedude te dwagi yai bidi mu dao.
PRO 16:14 Te kingo bidi me delide haliga sębę eyu da, teda te kingo aga ela muaibao. Tiali goli, te wiegi yai homu elalubo bidigo da, agai te king dua digi te haliga nagame ma ilaibao.
PRO 16:15 Te kingo bugai haliga pemene te bidi me deli dali ebaso da, teda agai te bidiba wiegi yai sę eyu, tama aga te bugagia bidaibao. Kingo te tebo kolesagago te pǫgo tulubage selasa aselama, tama te nai tau emainu ebo tiwai ebo dao.
PRO 16:16 Te nago wiegi yai homu kolesaga te koneama sobaso da, teda tego te gol hauwa me silva te aiyaba mu elalubo dao.
PRO 16:17 Te doloba pai hani bidigo te dwai kolesaga ela soabo sunumi wali paibao. Te bidigo aga bilibo te bugagia tonalu bilibaso da, te aga bugagia bidaibao.
PRO 16:18 Te hagoma ebo kolesaga eyu, tama naga digi naga nogi ugaba siyu da, te nage tulaluama tama dolabo sę ilaibao.
PRO 16:19 Te bidi te magi nai meni yai bidi mu elama, tama aga digi aiyaba elalubaso da, te kolesagago te hagoma bidi dabego te gasa bidi dabego doado bage hauwa wi selama, te augwade digi te dobola sabo kolesaga ebo bidi dabe te aiyaba mu elalubao.
PRO 16:20 Te bidi dabego aga ola mabo poba olo bugagia munama te po odobaso da, teda aga bugagia bidibo kolesaga elaluaibao. Tama bidigo konealubo po Genuai Bidiba dąų obaso da, te aga wiegi yai homu pemene yaibao.
PRO 16:21 Te bidi dabego koneani, te wiegi yai homu kolesaga elalubo bidi yai baso da, teda agai te tobage homu kolesaga dabe dagalobaso, te usu yaibao. Tama aga te wiegi yai po wabo bidi yai baso da, teda te bidi dabego agai po odobo wei mu yaibao.
PRO 16:22 Te dwagi yai homu kolesaga bidi elalu da, teda te agaba te bidibo ula mabo ąį tiwai ebao. Tiali goli, te dwagi yai homu elalusiąbo bidi dabe, augwaligo te dobo kolesaga eyu, tama tego augwa digi dolobo dao.
PRO 16:23 Te wiegi yai homu elalubo bidigo, agai te hasia bolo bugagia homu kone palama, tama nosali agai wiegi yai po waibao. Tama tebogo te bidi dabego agai po odabo godolo homu yaibao.
PRO 16:24 Te wiegi yai po te tubo nai hani tiwai yaibao, te pusu mu elama, tama te we bidigo tigi bomo ilibo dao.
PRO 16:25 Te bidi mebago te homu yai, te augwa kolesaga te wiegi yai da olama, tama augwaligo te wiegi yai sunumi wali poba homu yai. Tiali goli, menio. Augwaligo te elala pidu genama, tama nosali te augwali isaibao.
PRO 16:26 Te sę ebo bidi dabego koneani, te augwaligo sę bomo isiąyu da, teda augwali tubo nai meni yaibao, tama tego augwali te sę dene mu yaibao.
PRO 16:27 Bidi dwai mugo te haniani sunumi gegelama, te dwai sę te gasa we bidi dabeba yainu tiaibao. Agai po da, te genuai sia bogoli tiwai eyu, tama te augwali dolobo dao.
PRO 16:28 Te dwai kolesaga ebo bidigo te augwa hasi digi tomode te po konila ebo kolesaga ilaibao. Tama te posobo po wabo bidigo te bidi aga abagi dali te wado po wabo sę ilaibao.
PRO 16:29 Te hwįbo bidigo te aga abagi haliga hodolobo sę eyu, tama aga te dwai sunumiba odasa pabo sę ebo dao.
PRO 16:30 Te nago suali, te bidigo te gasa bidiba te gedu gagamu ebo subaso da, teda nago koneao, te bidigo te dwai kolesaga yabo homu eyu te ebao. Tama nago suali, te bidigo aga pedauwali gagamunu baso da, teda nago koneao, agai te dwai kolesaga ebao.
PRO 16:31 Te bidi dabego te monu dabego ayadeba tobolu nisi sulama, tama augwa koneaibao, te monu dabe augwa te doloba pai kolesaga wali paligo tama augwa te tǫde sesabi elama bidibao. Tama tiyu, te augwaligo te genuai nogi augwaliba mabo dao.
PRO 16:32 Te haliga sębę polo isiąbo bidi, te agai kolesaga wiegi yai ebao. Te kolesagago te ami bidi tiwai elama, te bomonama hwįbo kolesaga te aiyaba elalubao. Tama te bidi aga digi aga bugagia tonalubo bidi, agai te boi bomonama hwįnama, te hanu me deli sabo bidi te aiyaba elaluaibao.
PRO 16:33 Te bidi dabego te satu gagali eyu, te augwaligo mena sę yabo te hanilibo sę ebao. Tiali goli, Genuai Bidi deligo da, te satugo augwaligo te hanalubo po wei ponobo dao.
PRO 17:1 Te bidigo aga we wai dali haliga nagame elama bidiyu, tama augwa dwasianu te dwai tubo nai delage dabe elalubaso da, teda tego te genuai nai da te we bidi dabe dali tuyu, te wado eyu, hwįyu ebo kolesaga te aiyaba mu elalubo dao.
PRO 17:2 Te sę bidi me deligo homu te wiegi yai elalu, tama agai sę bugagia yai baso da, teda aga te aga tonalubo bidigo wai tiwai pedelaibao. Tama te tonalubo bidigo dwai wai te sę bidigo dologode bidaibao. Tama te tonaluali bidi isibo si da, teda augwaligo te mone me doado bage dabe te aga wai dabeba dobayu, tama te sę bidiba me mawaibao. Magi baso meni, aga te wai dabego ama me deli tiwai dao.
PRO 17:3 Genuai Bidigo te tiwai sulama koneainu yai, da te wiegi yai bidi ma dwai bidi, tama agai te dago haliga usu sula soyu, te gol me silva te siade usu sela subo tiwai ebo dao.
PRO 17:4 Te dwai kolesaga ebo bidi dabe, me te po nigasa pusubo bidi dabego te tobage po dwai waboba te olo mubo dao.
PRO 17:5 Godigo tigidali bidi nigali. Tama tiyu, te bidi me deligo te magi doado bage meni yai bidi dabeba te dwai posobo po obaso da, te agai Godiba te dwai posobo po obao. Te bidigo suali, te gasa bidi dolai baso, te aga homu wiegi yai pemene ebaso da, te aga digi dwai dene saibao.
PRO 17:6 Te bidi monu dabe pedelama, tama te aga ogwago wai te wąį elalubaso da, teda aga pemene yaibao, magi baso meni, te tebogo te we bidigo agaba te genuai nogi momainu ebao. Tama te wai dabego te augwa aya idade wiegi yai pemene eyu, gawebo dao.
PRO 17:7 Te wiegi yai po wabo kolesaga te wiegi yai homu elalusiąbo bidigo homu kolesaga tiwai me elalugobeo. Tama mu tama, te tibo po wabo kolesaga te genuai bidigo kolesaga te tama me telalubeo.
PRO 17:8 Te homu bega sabo mone mabo bidi, agai te homu yai, te homu bega siyu mabo mone te aga tau sabo mone tiwai da weyu, te tobage magi sę dabe aga digi homugo yainogo tebo dao.
PRO 17:9 Te bidi aga abagi dabe dali bugagia bidimainu homu ebaso da, teda agai te augwaligo yali dwai sę haniligobeo. Tiali goli, te bidi me deligo te dwai sę yai po me deli po ola bilibaso da, teda agai te bidigo aga abagi dali wado po omainu ebao.
PRO 17:10 Te nago te wiegi yai homu elalubo bidi dodolabo homu ebaso da, teda nago te deli sogo naga agaba obaso, tama teda agai te genuai kolesaga mu saibao. Tiali goli, nago te wiegi yai homu elalusiąbo bidi dodolabo homu eyu da, teda nago aga te bidi sese a naga te 100 sogo te aga elibo sę eyu dodolaibao, tiali goli te agai kolesaga me hasegeligobeo.
PRO 17:11 Te dwai kolesaga ebo bidigo, agai te hagoma eyu, tama te wąbi hwįbo sę hodolaibao. Tiali goli, te augwaligo te homu dene isąbo bidi me deli tagala palama, tama agaba te dene mabo sę umabo mu yaibao.
PRO 17:12 Te augwaligo te bea hasa kimigo wai dabe wi selasa sobadi, te bea kimi te sunumide gesabidi pogolu da, teda te nai te dwai dao. Tiali goli, te wiegi yai homu elalusiąbo bidigo te dobo kolesaga geda mubo sę eyu, tama nago aga te gesabidi pogolu da, teda te nai te dwai mu dao.
PRO 17:13 Tama augwaligo te bidi me deli dali wiegi yai kolesaga ebadi, tama te bidigo dwai kolesaga augwaliba wei ponobaso da, teda sesemane sogo te aga we wai bidalubo kolesaga te dwai elaluaibao.
PRO 17:14 Bidigo te wado po me deli wali, te tobage te bidigo te obo agebelidu te dwasianu dedage nigilama, te genuai wę gebo domainu palibo tiwai ebao. Te tama tebo kolesaga agai tagalu da, tama te genuai wado me pedalugobeo.
PRO 17:15 Genuai Bidigo te kolesaga si te hagela homu mu ebo dao. Te dwai kolesaga ebo bidi dabe olo tagalubo kolesaga, me te dwai kolesaga isiąwai bidi dabeba dene mabo sę, te kolesaga si agai gedude dwai mu dao.
PRO 17:16 Te wiegi yai homu kolesaga elalusiąbo bidi, te agai tobolu te dąų ola sigi pelama, tama agai te kolesaga me konegobeo. Tama tialima, magi baso agai te skul fi mone sela asaliwe?
PRO 17:17 Te wiegi yai abagi dabego te da sesemane sogo wei homu yaibao. Mu tama, te ama dabego te da ama dabego te da sęgę ebo sogo tau sainu tonalubo dao.
PRO 17:18 Te homu kolesaga meni yai bidi dabe, augwaligo naga te gasa bidigo nai wei ponabo bidi usu meni ebaso, te gasa bidigo nai wei ponabo po dąų wabo dao.
PRO 17:19 Te dwai kolesaga yabo wei homu ebo bidigo, agai te konila po wabo hodolobo sę me wei yaibao. Tama te bidi aga digi aga nogi ugwaba sabo bidi, aga te dolobo sę iduaibao.
PRO 17:20 Te dwai homu idu, te dwai tibo po sesemane odubo bidi da, aga te bugagia me bidigobeo. Menio. Agai te dwai sę naga iduaibao.
PRO 17:21 Te ogwago homu wiegi yai me elalusiąbaso da, teda aga aya te haliga sęgę mu yaibao. Awe, te bidi aga ogwade dwagi yai homu egobeo.
PRO 17:22 Te bugai haliga ebo kolesaga te bidi bugagia bidimainu mabo marasin tiwai ebao. Tiali goli, te bidigo homu dolobaso da, te dwai gasigo te bidigo tigi dili dabe tomode te dolobo sę ebo tiwai ebao.
PRO 17:23 Te dwai kolesaga ebo bidi dabe, augwaligo te po tų yabo sę elalubaso da, teda augwaligo te po tų dolabo homu ebo dao. Tama tiyu, augwaligo te homu bega sabo mone mabo te bidi dabego susiąbadi te sogo geme saibao.
PRO 17:24 Te kolesaga koneai bidi, agai te wiegi yai doloba pai kolesaga sabo sę bomo yaibao. Tiali goli, te wiegi yai homu kolesaga elalusiąbo bidigo, agai te haniani nai dabe sesa bilabo sę bomo ebo dao.
PRO 17:25 Te bidigo te esela pabo bidigo kolesaga tiwai wali pobaso da, te aga aya ida te dwai haliga elama, tama haliga sęgę mu ebo dao.
PRO 17:26 Te po tųde te po weyu, te dwai sę isiąwai bidigo te po tų ebo abelao po wabo te po dolo wabeo. Tama te genuai bidi dabego te doloba pai kolesaga yai digi da, te augwali keloago elibo sę, te dolo meni.
PRO 17:27 Te genuai kolesaga koneai elalubo bidi, te agai po hauwa me midugobeo. Tama te wiegi yai homu kolesaga elalubo bidi, te aga iminasa bidibo dao.
PRO 17:28 Te wiegi yai homu kolesaga elalusiąbo bidigo, agai pedauwali pania sobaso da, teda te bidi dabego homugo agai te wiegi yai homu kolesaga koneai elalubo homu yaibao.
PRO 18:1 Te abagi homu isiąbo bidigo, agai homu te agade digi naga elaluaibao. Te gasa bidi dabego te wiegi yai homu elalubo te tagalu, te bidigo te augwaligo ebo homuba wei eyu godolo me egobeo.
PRO 18:2 Te wiegi yai homu elalusiąbo bidigo te wiegi yai homu kolesaga koneainu wei me egobeo. Menio. Agai te hagoma yabo homu naga eyu, tama aga homugo digi ebo kolesaga pusubo dao.
PRO 18:3 Te dwai kolesaga ebo bidigo, agai homugo te olo bidi dabe te olo bage tiwai homu yaibao. Tama agai augwali nogi dolama, tama augwali hale ebo sę ilibo dao.
PRO 18:4 Te wiegi yai homu elalubo bidigo po weyu da, teda agai po te nai mu elama, tama te wiegi yai homu kolesaga hauwa te pode pągąnalu, te wę te ulu węde pedalubo tiwai elama, te wę geliyu soyu, te pabo tiwai ebo dao.
PRO 18:5 Te bidigo dwai sę elama, te po tųba doligi pobaso da, teda nago aga tau me sigio. Tiyu, nago te dwai sę isiąwani bidigo sunumi te palibaso, tama agai te po tųde ugwaba ela holobo yabo usu isąyabuo.
PRO 18:6 Te wiegi yai homu kolesaga elalusiąbo bidigo te gasa bidi dabe dali te konila po waibao. Tama augwaligo agai po odainu ebo sogo, augwaligo te aga keloago elabo homu ebo dao.
PRO 18:7 Te wiegi yai homu kolesaga me elalusiąbo bidigo, agai te po obaso da, teda aga pogo digi aga dolaibao. Awe, te aga digi te wa kekelama, tama te wago aga tola siyu, tama aga dolaibao.
PRO 18:8 Dago te bidigo gasa bidiba te posobo po wabo odobo te wei mu ebo da. Te tobage po te pusai nai tiwai eyu, tama polo tama dago tubo dao.
PRO 18:9 Hagela bidi da, te doado bage dabe dolobo bidi tiwai tobage bidi dao.
PRO 18:10 Genuai Bidi te bomai be me deli elalubo tiwai ebao. Te doloba pai kolesaga ebo bidi dabe augwa te beba udula sobaso, tama bugagia bidaibao.
PRO 18:11 Tiali goli, te mone hauwa elalubo bidi dabego te homu eyu, te augwa mone dabego te augwali bagulalu, tama augwali bugagia bidiyu, te bomai obo elalubo taun tiwai da homu ebo dao.
PRO 18:12 Te bidigo hagoma eyu, te aga digi aga nogi ugwaba sobaso da, teda te nosali aga dolaibao. Te hasia bolo naga digi naga aiyaba elalusiąbaso da, teda nago te genuai nogi me sogobeo.
PRO 18:13 Te hasia bolo bugagia olo munama, tama nosali nago te po wei ponao. Nago tiwai isiąyu da, teda nago te dobo kolesaga eyu, tama nage hale saibao.
PRO 18:14 Te bidi gasi elalu, tama aga homu kolesaga te bomo elalubaso da, teda agai te gasi aiyaba elalueibao. Tiali goli, te bidigo homu kolesaga dolali da, teda magi elama te wiegi yai ma pedelaibawe?
PRO 18:15 Te wiegi yai homu kolesaga elalubo bidigo, agai te haniani nai dabede homu konea sabo sę bomo ebo dao. Agai olo te aga ola mawainu ebo bidiba bugagia mubo dao.
PRO 18:16 Te nago te genuai bidi me deli dali po miainogo da, teda nago te agaba te wiegi yai homu ilabo nai me deli selasa pobaso, tama te agai te nage agaba asomainu yaibao.
PRO 18:17 Te bidi me deli te po tųba doligi pelama, te po mibo sogo, te agai po te ugwaba ela holobo ąǫ yai. Tiali goli, te gasa bidigo agaba hanalu, te po page hanilama wao po wabo sogo, te bidi dabego te dego mu ela hologowe, te me konebeo.
PRO 18:18 Te po tųde te genuai bidi si te tomode dodolabo te usu isąbaso da, teda te po tųgo e satu gagali elama, tama te po tų ugwaba ela holabo bidi dolo ponaibao.
PRO 18:19 Nago te naga amago dwai haliga nage dali emainu ilai baso da, teda agai te aga homu bea selama, tama nage wei homu isiąyu, te bulu bagego te taun obo tomoba pabo obo sunumi te palia selama, tama te gasa bidi dabe te tomoba pabo usu isiąbo tiwai yaibao. Te bidi si te konila po wado olama, tama te nogo masiąwani da, teda tego te augwa si sunumi palialubo tiwai eyu, tama augwa si te deli haliga pedalisiąma, te bomai sunumigo te bidi soabo sunumi panialubo tiwai ebao, tama aga te be tomoba pabo usu me egobeo.
PRO 18:20 Te nago po wiegi yai obaso da, te nago haliga wiegi yai pemene yaibao.
PRO 18:21 Te nago pogo bidi bugagia bidabo bomo elalubao. Me ma, nago pogo te bidi dolabo bomo me elalubao. Tama tiyu, nago wiegi yai po wabo kolesaga wei eyu da, te nage bugagia bidaibao.
PRO 18:22 Te nago we deli siyu da, te wiegi yai mu da. Te tama tiwai ola mani, Godigo te wiegi yai pemene elama, tama nageba te bugai haliga emainu tebao.
PRO 18:23 Te magi nai doado bage meni yai bidigo te nagame yai po dua digi te mone hauwa elalubo bidi dali weyu, tama agaba hanalu te aga tau somainu yali. Tiali goli, te mone hauwa elalubo bidigo te sesanobo po bomonama agaba wei ponobo dao.
PRO 18:24 Te abagi hauwa elalubo bidi da, te aga dolaibao. Tiali goli, te bidi mebago te gasagi yai abagi mu elalu, tama te abagigo augwali dali te bugagia mu kęą pelama, te deli haliga mu yaibao. Te abagigo ebo kolesagago te ama nami augwa si tomode ebo kolesaga te aiyaba elalubo dao.
PRO 19:1 Te bidi te doado bage sǫą pobaso, tiali digi aga te doloba pai bidi, agai te wiegi yai homu elalusiąbo bidi me, te tibo po ola bilibo bidi me, te aiyaba mu elalubo dao.
PRO 19:2 Tama te bidi me deli agai te sę me deli yabo bomo eyu, tama agai te yabo sę te bugagia konesiąbadi tiyu da, te wiegi yai me egobeo. Tama te bidi mego te sę me deli asesa ebaso da, teda agai te sę te wiegi yai me pedalugobeo.
PRO 19:3 Te meba hani bagego te esela pabo bidigo kolesaga eyu, tama augwa digi dolama, tama nosali te sęgę Genuai Bidiba munama, tama agaba wado ilibo dao.
PRO 19:4 Te mone hauwa elalubo bidigo da, te agai abagi hauwa elaluaibao. Tiali digi, te mone hauwa elalusiąbo bidi da, teda aga abagigo aga tagalu, tama aga abagi ma elalugobeo.
PRO 19:5 Te bidigo po tųde te tibo po weyu da, teda aga dene dwai saibao. Augwaligo aga me gogologobeo.
PRO 19:6 Bidi hauwago te nogi elalubo bidibolo homu bega sabo po weyu, ta agai augwali wei emainu tibao. Te bidi me deligo te wiegi yai homu ebo nai mabo bidi yai baso da, teda te bidi dabego te aga dali abagi wabo bidi pedelabo homu ebo dao.
PRO 19:7 Te bidi te doado bage sǫą pai baso da, teda te aga ama dedego te wei homu me egobeo. Te tiwai eyu da, te aga abagi dabego me te aga tudiba muaibao. Te agai augwali homu bega sabo po obadi digi tagalao, te aga po odolali waibao.
PRO 19:8 Te bidi agai digi tau sabo homu ebo bidi, aga te wiegi yai homu kolesaga koneabo sę bomo yaibao. Tama bidigo te koneani kolesaga te aga homude dąų weyu tolaluyu da, teda te aga bugagia bidabo bomo te elalubo dao.
PRO 19:9 Te bidigo po tųde tibo po obaso da, teda aga dwai dene saibao. Augwaligo te tobage tibo po wabo bidi ela muaibao.
PRO 19:10 Te wiegi yai homu elalusiąbo bidi bidibo, te tiali goli agai te mone hauwa elalubaso da, teda te dolo ebeo. Tiali goli, te olo sę ebo bidi te tobolu bidi pedelama, tama te genuai nogi elalubo bidi dabe tonalubaso da, teda te dwai mu ebao.
PRO 19:11 Te wiegi yai homu elalubo bidi, te agai wado po polo me wagobeo. Te agai polasa ebo kolesaga te tama tiwai. Te gasa bidigo agabolo dwai sę ebo te agai homu kone me palogobeo.
PRO 19:12 Te kingo wado weyu, te haliga sębę eyu ebo, aga te laiongo bomonama te gaa wabo tiwai ebao. Tiali goli, agai te bugai haliga elama, tama te we bidi dabe tau sabo homu eyu da, te segeni tulubage tuluyu, te nai bugagia holomainu ebo tiwai te ebao.
PRO 19:13 Te ogwago wiegi yai homu elalusiąyu da, teda agai te genuai sęgę mu te aga ayabolo mobao. Te bidi me deligo wego, te wego te wado po me te po hauwa wedu gebo we yai baso da, teda te be pedudu te be tomoba tulubage tuluyu, tama sesemane sogo te dwasianu dwasianu tetebo tulubo tiwai ebao.
PRO 19:14 Te aya idago te be, me mone, te doado bage dabolo mawaibao. Tiali goli, God deligo agai te dabolo wiegi yai homu kolesaga elalubo we da mawaibao.
PRO 19:15 Te hagela bidi dabe te sesemane godege pila mudaibao. Te olo naga bidibo bidi da, teda te nai meniama, te nai sili bidaibao.
PRO 19:16 Te bidi te Godigo bomai po wali pabo bidi da, teda aga bugagia bidiyu, te me dologobeo. Me ma, te Godigo kolesaga dabe te tudiba mubo bidi da, te aga isaibao.
PRO 19:17 Te magi nai doado bage meni yai bidiba nago te olo tau sabo wiegi yai kolesaga eyu, tama te doado bage mobaso da, te Genuai Bidigo negeli nageba ilibo tiwai ebao, tama nosali Genuai Bidigo nageba wei ponaibao.
PRO 19:18 Te naga ogwago hagoma ebaso da, nago aga dodolao, tama agai wiegi yai kolesaga wali paibao. Tiali goli, te nago agai te dwai kolesaga wali pomainu sula tagalu gogolobaso da, te nago aga isimainu usu da wabo tiwai ebao.
PRO 19:19 Te wado po polo weyu ebo bidi da, teda aga dwai sę yali sęgę te aga tolomainao. Te nago aga tau selama, tama te sęgę silibo si da, teda nosali te nago aga ma tau somainu homu yaibao.
PRO 19:20 Te bidigo nage ola momainu eyu, tama nago te wiegi yai homu kolesaga momainogo eyu da, teda nosali nago te wiegi yai homu koneani kolesaga me elaluaibao.
PRO 19:21 Da we bidi dabe dago te sę hauwa yabo homu ebo dao. Tiali digi, te Genuai Bidigo yabo homu yali sę te naga te pedelaibao.
PRO 19:22 Te bidi dabego te homugo mu kęą pai bidi te wei mu ebo dao. Awe, te bidi doado bage meni yai bidibaso, te wiegi yai me egobeo. Tiali goli, te magi nai doado bage meni yai bidi da, agai te tibo po wabo bidi aiyaba mu elalualio.
PRO 19:23 Te nage Genuai Bidide wi eyu, aga dologode bidibaso da, te kolesagago te nage bidibo ula mobao. Tama nage sesemane bugagia bidiyu, tama dwai nai nageba me pedalugobeo.
PRO 19:24 Te hagela bidigo te pou pletba nogo muyu, te nai sainogo yaibao. Tiali goli, agai nogo te ugwaba sagulama, tama te nai pedauwaliba me mugobeo.
PRO 19:25 Nago te hagoma bidi te keloago mobo po weyu te elibaso da, teda te homu kolesaga elalusiąbo bidigo sulama, tama koneaibao, aga digi te wiegi yai kolesaga wali pabo homu yaibao. Tiali goli, nago te wiegi yai homu elalubo bidi dodolobaso da, teda te augwaligo homu kolesaga te wiegi yai mu pedalubo dao.
PRO 19:26 Te ogwago aga ayago nai wi sabo sę ilama, tama aga ida te bede bidibo ela gudulubaso da, teda agai aga te we wai sibi te dwai hale ilibo sę mu ebo dao.
PRO 19:27 Ogwao, te nago wiegi yai homu kolesaga te skul weyu sabo homu ma isiąyu da, teda nago te sunumide geda muyu, te homu kolesaga elalusiąbo bidigo homu tiwai te wali paibao.
PRO 19:28 Te dwai kolesaga ebo bidi te po tų ebo witnes bidi pedalubaso da, teda agai te po tų tibo eyu, te dolabo homu pemene ebo dao. Te dwai kolesaga ebo te tobage bidigo te tubo nai tiwai ebo dao.
PRO 19:29 Te po dwai weyu, posobo po wabo bidi dabe te dwai dene mu saibao. Tama te bidi dabego te dobo kolesaga wali pabo sę ebo bidi dabe te keloago elaibao.
PRO 20:1 Te bomai wę hauwa tubo bidigo te posobo po weyu, te dwai po me weyu, te hwįyu yaibao. Te bomai węgo aga tonalumainu ebo bidi da, teda aga wiegi yai homu me elalubeo.
PRO 20:2 Te kingo wado eyu, te haliga sębę ebogo te bidi wi ilaibao, te laiongo genuai gaa wabo tiwai yaibao. Nago te king haliga sębę yabo sę ebaso da, teda nago bidibo ula te hagawaibao.
PRO 20:3 Bidigo te hwįbo kolesaga tudiba mubaso da, teda agai genuai nogi elalueibao. Tiali goli, te wiegi yai homu me elalusiąbo bidi da, agai te konila po sesemane sogo polo subigila wabo dao.
PRO 20:4 Te hagela bidigo te aga giba te nai wai bulainu te tǫ eligi pabo sę me egi pogobeo. Tama tialima, te nai inilama, te tau yai sabo sogo, teda aga te giba odolali mu pelama gegegi paibao.
PRO 20:5 Te bidigo homu kolesaga te wę ulu aiyaba mu odoga sigulai tiwai ebo dao. Tiali goli, te wiegi yai kolesaga koneani bidigo, agai te homu kolesaga ugwaba ma kekasa holobaso usu yaibao.
PRO 20:6 Te bidi hauwago te po weyu, te augwa abagi dabe wei mu ebo wabo dao. Tiali goli, te bidi deli deligo naga te aga abagiba te homu mu mubo haliga ebo dao.
PRO 20:7 Te doloba pai bidigo te dwai sę me deli isiąyu, bididu dao. Tama tibaso, aga wai dabe nosali bugagia bidaibao.
PRO 20:8 Te king po tų odainu dugulalubo sogo, agai te po tųba asobo bidi dabego kolesaga te bugagia dagala subo dao.
PRO 20:9 Dego te tama po weyu, “Eno te ena digi te magi dwai sę me isiąwai mu, te ena wiegi yai mu te God geduba pedalu, tama megi eno te dwai sę me deli ebeo,” po obaso, te usu egowe? Bidi meni.
PRO 20:10 Te augwaligo abelainu ebo doado bage dagalobo sogo te bidigo te we bidi dabe tibo po ola maiabo homu ebaso da, teda Genuai Bidigo te kolesaga hagela homu eyu, sębę mu ebo dao.
PRO 20:11 Dago te bidigo kolesaga sulama konebo dao, aga te wiegi yai doloba pai bidi, ma aga te dwai bidi, te kolesagade konebo dao. Tama te tobage kolesaga delide naga, dago me te wai dabego kolesaga me sulama konebo dao.
PRO 20:12 Genuai Bidigo dago te tonabo gedu dabolo mawai, tama dago ologo te po dabe odomainu yai.
PRO 20:13 Te nage sesemane sogo godege pibo gedu magane idubaso da, te nage mone menia selama, tama nage magi doado bage meni yai bidi pedelaibao. Tiali goli, nage hogodama, sę ebaso da, te nago nai hauwa elaluaibao.
PRO 20:14 Te bidigo nai me deli abelainu ebo sogo, agai te abelainu ebo naigo mone ugwadu elalubaso, te nai page bidi dali homu bega sabo po hauwa waibao. Tiali goli, agai te nai abela selama da, agai te aga abagi dabeba wagi peyu, te mone aiyaba mu dulali po wagi paibao.
PRO 20:15 Te bidigo pogo te wiegi yai homu kolesaga te we bidi dabeba mobaso da, te nai mu da, tama te gol aiyaba elaluama, tama te gasagi yai tedali sawi yai masigi dabe te aiyaba mu elaluaibao.
PRO 20:16 Te bidi me deligo te gasa bidigo negeli sali te wei ponaiba po dąų wai, te gasa bidi me aga usu isąbaso da, teda agai te wiegi yai kolesaga me ebeo. Tama tiyu, te bidi me deligo nage dali negeli sabo homu elama, tama nago koneani, agai te tobage po dąų obaso da, teda nago te agai nai me deli sabo po bomo eyu, te agai negeli sabo te wei ponabo dąį ilibo tiwai te sao.
PRO 20:17 Te nago tibo sę ebo kolesagade sabo nai, te nago homugo te wiegi yai pusai nai tiwai mu yaibao. Tiali goli, nosali te dwai mu pedelaibao, te masigi kemi nago pedauwalide pągąnalubo tiwai yaibao.
PRO 20:18 Te wiegi yai homu kolesaga bolo selama, te nago sę te bugagia dolasa paibao. Tama nago te boi bidi dabe dali hwįainu da, nago te homu kone bugagia paliyu bolo yao, te nago mena tama hwįabo te kone palao.
PRO 20:19 Nage te po subigila ola bilibo bidi dali kisasa me bilamuo. Te tobage bidi te posobo po wabo bidi da, tama nago po geme dualama agaba obaso da, agai te po te gasa bidiba pusaibao.
PRO 20:20 Te bidigo i ola mabo po te aga aya idabolo wali da, teda aga isaibao, te lam sole isiyu, te be hulia sabo tiwai gilama yaibao.
PRO 20:21 Te bidigo te aga aya de ida si bidibadi digi te augwaligo doado bage asesa sainu ebaso da, teda te doado bage bugagia me elalugobeo.
PRO 20:22 Nago homugo te gasa bidigo nageba ebo dwai sę wei ponabo homu me igio. Menio. Nago te Genuai Bidi tonaluyu da, te agai nage tau saibao, tama agai nago te sęgę silaibao.
PRO 20:23 Te bidigo te we bidi dabego te doado bage abelainu ebaso, te agai dagalubo sogo te we bidi tibo po ola mayu, te nai te dwai skelgo usu sobaso da, teda Genuai Bidigo te kolesaga wei mu me isąyu, sębę me yaibao.
PRO 20:24 Genuai Bidigo te da tǫde bidibo sogo te dago sunumi tigidali te dąį ilali. Magi elama tama dago te sunumi dabe te menaba pabo sunumi elaluba wagowe?
PRO 20:25 Nago bugagia homu kone bolo palama, tama nago te Genuai Bidiba ofa maiabo po dąų walao. Tiyu, nago asesa subigila po dąų walai madi tama nosali nago te dąų walali pode homu hauwa dogia pabuo. Te nago te tiwai ebaso da, teda naga digi naga dolaibao.
PRO 20:26 Te wiegi yai homu elalubo kingo, agai po tų ebo side tama te dwai kolesaga ebo bidi dabego ebo kolesaga te bugagia dagalaibao. Tama tilama, te agai augwaliba te dwai dene dolo mabo dao.
PRO 20:27 Te da deli delide elalubo mobo bidi te lam sole tiwai te Genuai Bidigo dabolo menama, te dago homude ebo kolesaga tigidali te sumainu elama, tama dena te bugagia dagala sumainu tebo dao.
PRO 20:28 Te kingo aga we bidiba te homu mu munama, tama augwaliba te olo tau sabo kolesaga eyu, te augwali tau sobaso da, teda aga te bugagia bidiyu, tama te king sesabi elama bidaibao.
PRO 20:29 Te gesi bidi dabego te bomo elalubaso, tama tego te we bidigo augwaliba pemene emainu ebao. Tiali goli, te monu dabe te ayadeba nisi yai elalubaso, tama te we bidigo tede te homu koneama, tama augwaliba te genuai nogi mabo dao.
PRO 20:30 Te nago te dwai sę ebo bidi aga te homu begelimainu te keloago aga elibaso da, teda te tebogo agai te dwai kolesaga ebo tudiba munama, tama aga wiegi yai bidi pedelaibao.
PRO 21:1 Genuai Bidigo te kingo homu kolesaga dodolobaso, tama kingo te Genuai Bidigo homu wali peyu, te ąį te ąį gamiadu wali pabo tiwai ebo dao.
PRO 21:2 Dago tigidali kolesaga te wiegi yai da, te homu dago ebo dao. Tiali goli, Genuai Bidigo te dago homu kolesaga dagala sulama, tama agai te kolesaga page dabe bugagia konebo dao.
PRO 21:3 Dago te wiegi yai doloba pai kolesaga wali pao. Te Godigo gedude te tobage kolesagago te dago agaba ofa mabo te aiyaba mu elalubo dao.
PRO 21:4 Te dwai kolesaga ebo bidi dabego te sę me edu, tama sesemane hagoma yaibao. Tama tiyu, te augwa bidibo ula doliyu, te dwai sęgo pągąnalubo dao.
PRO 21:5 Te sę ebo bidi dabego te bugagia homu kone palama, te sę yaibao, tama peyu, te augwa sę wiegi yai pedelama, tama augwa doado bage hauwa elaluaibao. Tiali goli, te bidi dabego sę subigila asesa yainogo eyu da, teda augwa te sę wiegi yai me pedalisiąma, tama augwali te doado bage sǫą paibao.
PRO 21:6 Tama te bidigo tibo kolesaga wali peyu, te doado bage hauwa sobaso da, teda aga te isabo sunumide bidibao. Tama te bidigo mone me doado bage te dagalude pǫ te pęwadage sogo naga elalubo tiwai elama, tama te mu tigidali sia sabo dao.
PRO 21:7 Te dwai kolesaga ebo bidi dabego te wiegi yai kolesaga ebo hagela homu ebo dao. Augwaligo te gasa bidi dabe dolobo sę idu gebo dao. Tama tialima, augwa te kolesagago digi te augwa silabo sę ebo dao.
PRO 21:8 Te dwai sę ebo bidigo te tibo kolesaga yali. Tiali goli, te magi dwai sę me isąwani bidi dabe, augwaligo te doloba pai kolesaga yaibao.
PRO 21:9 Te bidi agaduba deli te be pedude dulaluali bidi da, te kolesagago te be tomode te wado po wabo me te po hauwa wabo we dali bidibo kolesaga te aiyaba elalubao.
PRO 21:10 Te dwai kolesaga ebo bidi dabe, augwali te dwai sę hauwa yabo te nasi tiwai ebao. Augwaligo te bidi me deliba te homu dene eyu tau mabo kolesaga me egobeo.
PRO 21:11 Te augwaligo te hagoma ebo bidiba te dwai dene mobaso da, teda te homu kolesaga elalusiąbo bidigo sulama, tama agai te wiegi yai homu me kolesaga saibao. Tiali goli, augwaligo te wiegi yai homu kolesaga elalubo bidi ola mobaso da, teda agai konebo kolesaga te wiegi yai mu pedelaibao.
PRO 21:12 Te Genuai Bidigo kolesaga te dolo mu ebao, tama agai te dwai kolesaga ebo bidi dabego te augwa be tomode te tigidali sę ebo te agai koneanio. Tama Genuai Bidigo te bidi dabe dolaibao.
PRO 21:13 Te nago olo pania selama, tama te doado bage meni yai bidi dabego augwali tau somainu nageba i wabo nago odisąbaso da, teda nosali me te bidi dabe augwaligo te nago i wabo me odogobeo.
PRO 21:14 Te bidi me deligo gasa bidiba wado po obaso da, teda te we bidi dabego aga susiąbadi te sogo agai agabolo te wiegi yai homu pemene ebo nai mobaso, tama te agai wado po wali te silaibao.
PRO 21:15 Te we bidi dabego te po tų ebode wiegi yai doloba pai kolesaga wali pabo sogo, te wiegi yai we bidi dabego sulama, tama pemene yaibao. Tiali goli, te dwai kolesaga ebo bidi dabego sulama, te augwali wi mu ebo dao.
PRO 21:16 Bidigo te wiegi yai homu kolesaga ebo sunumi te tagalubo bidi da, te isilama, tama te isali bidi dabe dali bidigi paibao.
PRO 21:17 Te bidigo te wiegi yai nai me wę tuabo homu wei ebo kolesagade pemene homu ebaso da, teda te aga mone silama, tama aga te doado bage sǫą paibao.
PRO 21:18 Te sęgę te doloba pai bidiba pedelainu ebaso da, teda te dwai kolesaga ebo bidi dabego augwali hasegelama, tama te sęgę augwaligo sabo dao.
PRO 21:19 Te bidi te olo masigi kemi pesagede bidibaso, te kolesagago te wado po wabo me te po hauwa wabo we dali bidibo kolesaga te aiyaba elalubao.
PRO 21:20 Te wiegi yai homu elalubo bidigo, agai te aga beba te tobage wiegi yai nai dabe saboyu, sisinaibao. Tiali goli, te wiegi yai homu elalusiąbo bidigo, augwaligo te augwa doado bage dabe silibo dao.
PRO 21:21 Te bidigo doloba pai kolesaga wali peyu, tama te bidi dabe godolo homu mu ebaso da, teda aga bugagia bidiyu, tama augwaligo doloba pai kolesaga agaba eyu, tama genuai nogi aga mawaibao.
PRO 21:22 Te wiegi yai homu elalubo bidigo te ami bidi dabeba te taun sabo wiegi yai sunumi te ola mobaso, usu yaibao. Te taun tomode bidibo bidi dabego te homu eyu, te taun bagulali obo te bomai obo elalubo homu eyu, tama te boi bidi dabego aluagasu, te dolobo usu me egobe da, te homu yali. Tiali goli, te ami bidi dabego hwįgi pelama, te taunde bidali bomai ami dabe aiyaba elaluama, tama te taun selama, te taun bagulali obo dolobadi yaibao.
PRO 21:23 Te bidigo aga wabo po bugagia tonalubaso da, teda te sęgęgo aga me gegegobeo.
PRO 21:24 Te gana pabo bidigo te hagoma eyu, tama te posobo po gasa bidiba waibao. Sesemane sogo te aga digi aga nogi ugwaba sabo bomo ebo dao.
PRO 21:25 Te hagela bidigo te doado bage sabo homu wei sabo dao, tiali digi aga te sę isiąbo bidi dao. Tama tialima, aga te wei ebo homugo te aga ela muaibao.
PRO 21:26 Agai te tobage nai dabe te sesemane aga sabo homu eyu, bidibao. Tiali digi, te sę bomonama yali doloba pai bidi agai te doado bage hauwa te nai meni yai bidi dabeba mobaso, te usu dao.
PRO 21:27 Genuai Bidigo te dwai kolesaga ebo bidigo ofa te wei mu me egobeo, aga tede sębę ebo dao. Tama te bidigo te tibo kolesaga wali peyu, te ofa ebaso da, teda Genuai Bidigo te dwai kugumini yai kolesaga mu da homu ebo dao.
PRO 21:28 Te sę ebo suali bidi te witnes bidigo te po tųde tibo po weyu da, teda te sę ebo suali te witnes bidi te isimainu yaibao. Tiali digi, te po bugagia odobo bidi, agai te po wainu ebaso da, teda te bidi dabego agai poba te bugagia olo munama, te po odobo dao.
PRO 21:29 Te dwai kolesaga ebo bidigo tibo po weyu, tama aga te wiegi yai bidi tiwai gagawaibao. Tiali digi, te doloba pai bidigo homugo te aga bilibo kolesaga te sesemane bugagia pedalumainu ebo dao.
PRO 21:30 Te nago wiegi yai homu elalubo, me te wiegi yai kolesaga koneani me, te nago mena sę ebo kolesaga wiegi yai koneani elalubo, te tagalao, tego nage dwasianu tau sainu ebo usu me egobeo, te nago Genuai Bidiba boi bidi ebaso da, te tama tiaibao.
PRO 21:31 Te ami bidi dabego te hwįbo sogo te hwįabo hos dabe dodolaibao. Tiali goli, te Genuai Bidigo naga te augwaligo te hwįbode ugwaba ela holomainu ebo dao.
PRO 22:1 Te bidi dabego nage te wiegi yai bidi da homu elama, tama augwaligo genuai nogi nageba mobaso da, teda tego te tigidali mone me, te silva dali gol dali si te aiyaba mu elaluaibao.
PRO 22:2 Genuai Bidigo tigidali bidi nigali, te mone hauwa elalubo bidi dabe, me te magi nai meni yai te olo bidi dabe me nigali. Tama tibaso, te hani si te tiwai si dao.
PRO 22:3 Te wiegi yai homu elalubo bidi, agai te tiwai koneyu, te sęgę agaba pedalubo si, te agai ela soaibao homu yai. Tiali goli, te wiegi yai homu elalusiąbo bidigo, agai suali, te dwai sęgę te agai sunumide elalubaso, tama aga peyu, tama gesabidi deliba unulama, tama te sęgę tolobo dao.
PRO 22:4 Te nago naga digi naga aiyaba elaluama, te Genuai Bidide wi eyu, aga dologode bidibaso da, teda nago mone hauwa, me doado bage, me genuai nogi elalu, tama nage te bugagia bidaibao.
PRO 22:5 Te bidi tulalu, tama te dolobo tobage nai dabe, te dwai kolesaga ebo bidi dabego sunumide elalubao. Te bidi bugagia bidabo homu ebaso da, aga bilibo te bugagia tonalu, tama te tobage dwai nai dabe ela somainu yao.
PRO 22:6 Te naga waigo te wiegi yai kolesaga wali pomainu ola mao, tama aga te sunumidu bilidubadi, te aga monu dabe mu ebo sogoba usu naibao.
PRO 22:7 Te mone hauwa elalubo bidi dabego te doado bage sǫą pabo bidi dabe tonaluaibao. Tama te negeli elalubo bidi dabe augwali te negeli mani bidi dabego olo sę ebo bidi tiwai bidaibao.
PRO 22:8 Te bidigo dwai kolesaga ebaso da, teda te dwai sogo ebogo te aga gegebaso, tama agai te dwai sę te gasa bidi dabeba munu ma me egobeo.
PRO 22:9 Genuai Bidigo te bidigo gasa bidiba te tubo nai mabo bidiba te wiegi yai sę eyu, tama aga pemene yaibao. Magi baso meni, te tobage bidigo te magi wali doado bage meni yai bidi te nai mabo dao.
PRO 22:10 Te hagoma ebo bidi dabe sela sąbaso da, tama te tobage konila po wabo, me te dwai po wabo te sia saibao.
PRO 22:11 Te bidi God gedude te magi sę me isąwai te wiegi yai bidabo homu eyu, tama agai po wiegi yai obaso da, teda te king aga abagi pedelaibao.
PRO 22:12 Genuai Bidigo te tobage wiegi yai koneani kolesaga elalubo we bidi te bugagia tonalu, tama agai te tibo kolesaga ebo bidi dabego po te aiyaba elalubo dao.
PRO 22:13 Te sę igi pabode hagela homu ebo bidi te be tomode olo dali bidai. Agai te tiwai po waibao, “Te laion hasa me deli te sunumide bidibao,” wai. “Tiyu, ena buluba soade tama te laiongo ena elidalio,” waibao.
PRO 22:14 Te penani sę ebo wego te bidi homu bega sabo po weyu, tama te tǫ dedage aiyanu mu igulai tiwai me deli ebao. Te Genuai Bidigo te bidi me deligo dwai kolesaga wei ponabo homu ebaso da, teda te bidi te tǫ dedageba tulaluaibao.
PRO 22:15 Te wai dabego te homu kolesaga meni yai kolesaga dabe ebo dao. Tiali digi, nago te augwali keloago elibaso da, teda augwaligo te kolesaga tagalaibao.
PRO 22:16 Te bidigo te magi nai doado bage meni yai bidi dabego nai dabe sainogo te augwaliba dwai sę ebaso da, ma te bidigo te mone hauwa elalubo bidiba te wiegi yai homu ilibo nai mobaso da, teda te aga digi te magi nai doado bage meni yai bidi tiwai pedelaibao.
PRO 22:17 Megi eno nagebolo te wiegi yai homu kolesaga koneai bidi dabe dalubo po nageba ola mawainu ebao. Nago homu te poba bugagia munama, tama tede bugagia homu kone palao.
PRO 22:18 Te po nago homude elaluyu, tama nago gasa bidiba pusubaso usu yabo ąǫ ebaso da, teda nago haliga te bugagia tegaluao.
PRO 22:19 Megi naga eno te po pusainu ebao, te naga digi odolama, tama nago konealubo homu te Genuai Bidiba dąų mu omainu yaibao.
PRO 22:20 Eno te 30 wiegi yai po asęyu, te nage bugagia ola mayu, tama te wiegi yai homu konebo kolesaga te nageba mobao.
PRO 22:21 Tama tialima, nago te po page mu konemainu ebao. Tama te bidi dabego nage tagala palu, te mena po te mu po yaliwe naga konea pomainu ebo sogo da, teda nago te mu koneama, tama te po dolo augwaliba ponaibao. (1)
PRO 22:22 Nago homugo te magi nai doado bage meni yai bidi dabe, augwali te olo bidi naga da homu elama, tama nago augwaligo doado bage odolali me kekelama sigio. Tama augwali te po tųba sabalubo sogo da, teda nago te augwali aiyaba elaluabo po tų me igio,
PRO 22:23 magi baso meni, Genuai Bidigo augwali tonaluyu, tama augwali tau saibao. Tama te bidigo te magi nai doado bage meni yai bidi dabeba te dwai sę ebaso da, teda Genuai Bidigo te bidi agaba te dwai sę wei ponobo dao. (2)
PRO 22:24 Nago te wado po polo wabo bidi dabe dali, me te sębę polo ebo bidi dabe dali abagi me wagio.
PRO 22:25 Tiyu, nago augwaligo ebo kolesaga selama, tama nosali te dwai nai dabego nage dolabuo. (3)
PRO 22:26 Te bidi me deligo negeli sabo sogo, te negeli sali bidi aga digi ponabo te usu isąbaso, te nago te negeli sali wei ponabo po dąų waligio.
PRO 22:27 Tiyu, nago begelabo usu isąbaso, tama augwali aselama, te nago doado bage sigidali, me te nago bet me sagasabuo. (4)
PRO 22:28 Nago te naga wąį nǫų dabego te nago tǫ polobadu dąį ilali te ma kidiligio. (5)
PRO 22:29 Te bidigo wiegi yai sę ebaso da, teda aga te kingo sę bidi pedelaibao. Te tobage bidi te nogi meni yai bidigo sę bidi me pedalugobeo.
PRO 23:1 Te nage genuai bidi me deli dali dugulama nai tubo sogo, nago te nai augwaligo nage mabo naiba homu kone kone yao.
PRO 23:2 Tama nage te nai hauwa tubo bidi yai baso da, teda naga homude ebo kolesaga te aiyaba elaluao.
PRO 23:3 Nago te genuai bidigo wiegi yai naide te nago homu pesą igio. Tiyu, agai naigo nage homu puna palama, tama nago te agai wei isiąbo kolesaga yabuo. (7)
PRO 23:4 Nage te mone hauwa elalubo bidi pedelabo sę dene mu igio. Te nage wiegi yai homu elalubaso da, teda nago te tiwai me igio.
PRO 23:5 Te nago mone hauwa sobadi goli, te tagala, te polo tama sia saibao. Te mone te ba bogo tiwai elama, tama te ba kemodage tiwai ugwaba bola holobo dao. (8)
PRO 23:6 Nago te aga doado bage dabe dąų ola sabo nai yogo bidi dali nai me tugio. Nago agai te wiegi yai naide pesą me igio.
PRO 23:7 Magi baso meni. Te nage aga dali nai tubaso da, teda agai te tiwai po nagebolo waibao, “Ae, nago nai me wę tubo te naga homugo tuao,” waibao. Tiali digi, agai po te mu po menio. Te aga homude, agai te nisu naga nai nage maiabo te aga konea palio.
PRO 23:8 Te nago te bidigo ebo kolesaga te nago mu konea pabo sogo da, teda nago te tuali nai dabe te bugulabo homu yaibao. Tama nago agaba te homu bega sabo wali po tigidali, te odolali hagala saibao. (9)
PRO 23:9 Nago te wiegi yai homu elalusiąbo bidi dali po me migio. Te nago wiegi yai homude elaluali po agaba pusu baso da, teda agai dwai mu naga ilaibao. (10)
PRO 23:10 Polobadu mu augwaligo te tǫ dąį muani, tama nago te dąį ilali ma kidiligio. Tama nago te tiana wai dabego tǫ me sigio.
PRO 23:11 Genuai Bidigo digi te wai puluba tau sabo sę te deli kaneme tiwai elalubao. Te bomo mu elaluyu, tama agai augwali tonaluyu, tama augwali te po tųde tau sabo dao. (11)
PRO 23:12 Te augwaligo nage ola mobaso, nago te nai dabe bugagia kone sao. Tama nago olo te tigidali poba munama, te wiegi yai koneai kolesaga elalubo sao. (12)
PRO 23:13 Nago te wai elibo wi homu me igio. Te nago keloago aga mobo mayu elibaso da, teda aga me isigobeo. Menio.
PRO 23:14 Te kolesagago aga tau selama, tama aga te isali bidi dabego pesageba painu ebaso, te usu egobeo. (13)
PRO 23:15 Ogwa, te nago wiegi yai homu kolesaga konebaso da, teda eno haliga te wiegi yai mu yaibao.
PRO 23:16 Tama eno da, te nago doloba pai sę ebo po odobaso, te ena moni pemene ugwadu mu yaibao. (14)
PRO 23:17 Nago te dwai sę ebo bidi dabego ebo kolesaga wei me igio. Menio. Sesemane sogo nage te Genuai Bidigo dologode bidabo bomo mu yao.
PRO 23:18 Te nago tama tiyu da, teda nage te nosali bidabo wiegi yai sogo elaluaibao, tama nage polo tama me isigobeo. (15)
PRO 23:19 Eno ogwao, eno po odolama, tama wiegi yai homu kolesaga sao. Nago te naga biliboba bugagia homu kone palao.
PRO 23:20 Nage te wę hauwa me nai hauwa tubo bidi dabe dali hai namu olama, me kisasa biligio.
PRO 23:21 Te bomai wę tulama, te gęǫ page ebo bidi te wabo pabo dabe, me te nai hauwa tubo bidi dabe da, te magi doado bage meni yai bidi mu pedelaibao. Te bidigo te nai tulama, te godege piyu naga eyu da, te pąde sogo tama digi te aga tigi mesegelibo te dwai ugwa badi naga elaluaibao. (16)
PRO 23:22 Naga ayago nage pedalumainu ilali, tama nago agai po odao. Tama naga ida mosi dabe yai madi, nago agade dwai homu igio.
PRO 23:23 Nago te mu kolesaga sainu bomo eyu, tama te wiegi yai homu, me te tobage wiegi yai kolesaga dabe sabo bomo yao. Nago te wiegi yai kolesaga tagalabo homu me igio.
PRO 23:24 Te wiegi yai homu elalubo bidigo te doloba pai kolesaga wali pobaso da, teda aga aya te wiegi yai homu pemene ebo dao.
PRO 23:25 Nago te wiegi yai kolesaga wali pali da, teda naga aya ida dede te wiegi yai haliga mu yaibao. Awe, te nage ame nani idago wiegi yai homu pemene yaibao. (17)
PRO 23:26 Ogwao, nago eno po bugagia odolama, tama eno kolesaga suyu, wiegi yai pemene yao.
PRO 23:27 Te penani sę ebo we te aiyanu mu igulai tǫ dedage me deli tiwai ebao, tama te bidi dabe teba tulalubaso da, te dolaibao.
PRO 23:28 Te tobage wego te nai wi sabo bidigo tonalubo tiwai eyu, tama te bidi dabe asobo tonaluaibao. Tama agai te bidi hauwa kekelama, tama augwa te we sabo kolesaga te boliyu togobo dao. (18)
PRO 23:29 Te genuai sęgę elaluyu, tama augwade digi homu dene ebo bidi dabede te nago magi homu ebawe? Tama te mena bidi dabego te hauwa umabo po weyu, te wąbi hwįbo dawe? Tama mena bidi dabe augwali tigide te keni keni sai elalubawe? Tama mena tobage bidi dabe gedude te sesemane sogo te gedu kaneme yaibawe?
PRO 23:30 Te wain me bia wę te hauwa tubo te bidi dabe, te bidi dabe augwali naga tama dao.
PRO 23:31 Tiyu, nage te wain węgo kekemainu elamuo, te aga au te sawi yai elama, tama aga te mubo glas tomode te ula bugagia elalubo, tama nago tubaso da, te nago dogonide wiegi yai mu ebo dao.
PRO 23:32 Nosali nago te dwai nabi elalubo hasamanigo nage gąų kelibo tiwai te nago te dene ebo odaibao.
PRO 23:33 Te nago homu dolobaso, tama nago homugo te nago haniani nai dabe suali homu nago yaibao. Tama nago te tobage nai dabede te nago pedauwalide po hauwa dogia paibao.
PRO 23:34 Te nage pila mubo sogo, te nago te tiwai te sip genuai sigo sabilibo te nage ugadu te sipgo genuai name ugwa walobo ni te daide bilibo tiwai ebo te nago odaibao.
PRO 23:35 Tama nago te tiwai po waibao, “Te augwaligo ena elali goli, te dene ebo eno odobeo,” po waibao. “Magi baso te ena hodaluabo usu ebewe? Ena hodaluama te wę me ma deli tuabo homu yai,” nago te tobage po waibao.
PRO 24:1 Nago te dwai kolesaga ebo bidi dabego ebo dwai kolesaga wei homu me elamuo. Tama nago augwali dali kisa sabo homu me elamu dao.
PRO 24:2 Augwaligo te bidi dolabo homu naga elama, tama augwaligo te sesemane sogo po miyu, te dwai sę pedalubo kolesaga ebo dao. (20)
PRO 24:3 Te wiegi yai kolesaga koneani homu elalubo bidigo aga be te wiegi yai elaluyu, tama aga we wai te boma pai pedelaibao.
PRO 24:4 Te tobage bidigo te wiegi yai gasa bomai nai dabe te abelama, tama aga beba muaibao. (21)
PRO 24:5 Te wiegi yai kolesaga koneani homu elalubo bidigo, tama agai te aga bulu tǫ pedai me te bomo yai pedalumainu ebo dao.
PRO 24:6 Te kingo gasa bulu tǫ pedai bage dali hwįainogo eyu da, teda hasia bolo te hwįbo kolesaga koneani bidi dabede te homu kolesaga konea saibao. Te king agabolo homu kolesaga mabo bidi hauwa elaluyu da, teda agai te hwįbode ugwaba ela holaibao. (22)
PRO 24:7 Te wiegi yai homu kolesaga koneani te ugwanu mu elaluyu, tama te wiegi yai homu kolesaga konesiąwani bidigo kolesaga te aiyaba elaluaibao. Tama te bidi dabe dugulama, te genuai naide po mibo konila obaso da, teda te wiegi yai homu kolesaga konesiąwani bidi da, te olo dugulalu, tama pedauwali panialubo dao. (23)
PRO 24:8 Te bidigo te sesemane sogo dwai kolesaga yabo homu ebo bidi yai baso da, teda augwaligo aga te tibo kolesaga ebo bidi nogi poaibao.
PRO 24:9 Te wiegi yai homu kolesaga meni yani bidi dabe, augwaligo te dolo isiąbo tobage kolesaga dabe yabo homu elama, tama te kolesaga tigidali te dwai sę ebo kolesaga ebao. Te bidi dabego te hagoma ebo bidi dabe subo, te dwai bidi mu subo tiwai ebo dao. (24)
PRO 24:10 Te dwai sogogo nage gegelama, tama nago tigi dili te kimi isilibaso da, teda nago bomo te mu meni ebao. (25)
PRO 24:11 Te po tųde te po olama, tama augwaligo te bidi ela muainu ebaso da, teda nage pelama, te bidi ma sigi pao.
PRO 24:12 Tiyu, nago te po weyu, “Dago sę menio,” po wabuo. Genuai Bidigo te nage bugagia tonaluyu, tama nago ebo homu kolesaga tigidali te dagalubao. Tama agai nago te po page koneai. Tama agai te tigidali bidi deli deligo ebo kolesaga te augwa yali sęde wei usu nama ponobo dao. (26)
PRO 24:13 Eno waio, nago te bunu ge hani tuao, te wiegi yai nai tama te nago pedauwalide pusu mu yaibao.
PRO 24:14 Tama eno homugo nago te konemainu yai, te wiegi yai homu konebo kolesaga me te wiegi yai eyu, tama pusu mu yaibao. Te nago sobaso da, teda nago wiegi yai sogo nosali gegaibao, tama nage polo tama me isigobeo. (27)
PRO 24:15 Nage dwai bidi, nage geme duala selama, tama te doloba pai bidigo bede tonalugio, te agai be aluama, tama agai doado bage dabe sainogo te tiwai me elamu dao.
PRO 24:16 Te doloba pai bidi hauwa sogo tulalubadi digi tagala, te sesemane sogo aga ma hodaluaibao. Tiali digi, te dwai sogogo te dwai kolesaga ebo bidi dabe gegebaso da, teda augwali mu dolobo dao. (28)
PRO 24:17 Te nago boi bidi te dwai sęgo dolobo subo sogode, te nago homu wiegi yai pemene igio. Tama agai te nai me deli sągąde enama, te tulaluainu ebaso da, teda nago gisugu me olamu dao.
PRO 24:18 Tiyu, nago wiegi yai homu pemene ebo Genuai Bidigo sulama, te agai nageba dwai haliga eyu, tama agai te boi bidi dali wado po ma wagobeo. (29)
PRO 24:19 Nago te dwai kolesaga ebo bidigo kolesaga te nago homu si me elamuo. Tiyu, naga homu kolesaga dolabuo. Tama nago augwaligo ebo kolesaga me te homu godolo me elamuo.
PRO 24:20 Magi baso meni, te bidi dabe augwali te wiegi yai sogo bidibo gegebo usu me egobeo. Menio. Te augwali te lam sole isibo tiwai gilama yaibao. (30)
PRO 24:21 Eno waio, nage te Genuai Bidide wi eyu, aga dologode me bidiyu, te kingde wi eyu, aga dologode me bidao. Nage te Genuai Bidide me kingde te hagoma ebo we bidi augwalide digibulu bidao.
PRO 24:22 Te tama tebo tobage we bidi te dolobo sęgo polo tama gegaibao. Te Genuai Bidigo me kingo te mena tiwai sęgę augwaliba maiabo, te dago me konebeo.
PRO 24:23 Te wiegi yai homu kolesaga elalubo bidi dabego me te po pusali. Te bidi dabe te po tųba asobo sogo, te jasgo te meba tau siyu, meba aiyaba elalubo, te dolo me ebeo.
PRO 24:24 Te bidi me deligo dwai sę ebaso, augwaligo aga po tų ilali, tiali goli te jasgo aga odolali pomainu tagala palobaso da, teda te tigidali bulu tǫ pedaide bidalubo we bidigo te jas bidi wei homu me isiąma, tama augwaligo agaba te i ola mabo po waibao.
PRO 24:25 Tiali digi, te jasgo augwaliba te po weyu, te dwai sę ebo bidiba te dene mayąo po obaso da, teda te jas bugagia bidiyu, tama God Genuai Bidigo aga dali haniani dwagi yai sę yaibao.
PRO 24:26 Te bidigo doloba pai po nageba wei ponobaso da, aga te nago abagi mu dao.
PRO 24:27 Hasia bolo nago te naga tǫ dodolama, tama te gi dabe bulao, tama nosali nago te be sę ebaso, te usu dao.
PRO 24:28 Te nage te po tų ebode te witnes bidi pedalubaso da, nago tibo po me olama, tama te magi dwai sę me isąwani bidigo nogi aiyaba odolali me aiyaba elalugio.
PRO 24:29 Nago te tiwai po weyu, “Megi da, eno te agai dwai sę yali wei ponaibao,” po wagio. “Te eno agai ena dali te yali tobage sę tiwai kolesaga te aga dali yaibao,” po me olamu dao.
PRO 24:30 Eno biliyu, tama eno te bidi me deligo gi suali. Te bidigo homu te wiegi yai elalusiąwai, te hagela bidi dao.
PRO 24:31 Te sesane yai bonogo, me te dwai dosago te gi mesega sai elaluai. Tama te gi bagulali masigi obo te degasa pai yalio.
PRO 24:32 Eno te gi sulama, tama eno homu hauwa elama, tama eno te wiegi yai kolesaga me salio.
PRO 24:33 Te hagela bidi dabego te po wai, “Tagalao, da godege manu gana piaibao,” wali. “Da te dwasianu sogo naga toma nenama, tama da hodaluaibao,” wali.
PRO 24:34 Augwaligo te tama tiyu, tama polo tama augwa doado bage tigidali te sia siyu, tama augwali te dwai mu te magi doado bage meni yai bidi pedelaibao. Awe, te nai wi sabo bidi dabego te augwaligo doado bage tigidali sela pai tiwai ąǫ ebo dao.
PRO 25:1 Te po da, te Solomongo meba ma wali pęwadage po dao. Te Juda king bidi Hesekaiago kuskus bidi dabego augwaligo te po dabe ma asęai dao.
PRO 25:2 God Genuai Bidi aga homude digi te nai hauwa geme dualaluai. Tama tiyu, dago genuai nogi agaba mayu yali. Tiali goli, kingo te dade geme dualalubo homu kolesaga page hauwa te page hanilainu gegebo sę ebo dao. Tama tiyu, dago genuai nogi agaba mabo dao.
PRO 25:3 Dago te kingo homu kolesaga tigidali me koneainu ebaso, usu me egobeo, te dago te mena nai te dagalude elalubo konesiąbo tiwai, me tama mena nai te tamu ąį page dologode elalubo konesiąbo tiwai ebo gilama ebo dao.
PRO 25:4 Te augwaligo silva kakali sela sąbaso da, teda te silva wiegi yai pedelama, tama bidigo te wiegi yai pou plet nigibo dao.
PRO 25:5 Tama tiwai naga, te augwaligo te dwai kolesaga ebo bidi dabe sela sąyu, tama augwali te king dali munu ma bididali weyu tibaso da, teda te kingo doloba pai kolesaga mu eyu, tama te bulu tǫ pedai kantri te bomai bulu pedelaibao.
PRO 25:6 Te nage king dali bidibaso da, teda nago te nage genuai bidi da homu eyu, tama nago te genuai bidi dabego ebo kolesaga tobage me igio.
PRO 25:7 Tiyu, nage te genuai bidi dabe dali bidibadi, tama nosali te genuai bidi me deli sabolama, tama augwaligo nage sela sąyabuo. Te tiwai pedalidali weyu, hasia bolo nage olo bidi dabe dali bidibaso, tama nosali te augwaligo nagebolo weyu, te genuai bidi dabe dali bidigi pao waibao. Te bidi me deligo te kolesaga me deli ebo subaso,
PRO 25:8 nago homugo agai te dwai kolesaga eba homu elama, tama nago asesa polo te aga po tųba sela mugio. Te gasa bidigo te sę ebo mu koneama, tama nosali agai nago po aiyaba elalubaso da, teda nago magi yaibawe?
PRO 25:9 Te nago magi nai me delide te naga abagi dali te po elalubaso da, teda nage pelama, naga te abagi dali digi dodolao. Tiali goli, nago te naide te geme wali po odolama, nago te po aga dali me pusugio.
PRO 25:10 Tiyu, te bidi dabego nosali odoyu, nago te geme dualubo po wabo meni da po obaso, te augwaligo nage hale ebo sę ilabuo. Tama augwaligo homu dwai nage dali sesemane yabuo.
PRO 25:11 Te bidigo te wiegi yai homu kolesaga me deli te hanilama, mu pusubaso da, teda agai po te wiegi yai piksa te augwaligo te golgo nigilama, tama te silvago au ilali tiwai ebo dao.
PRO 25:12 Te wiegi yai homu elalubo bidigo, agai te aga abagi dodolobo sę ebaso, tama te abagigo homugo te wiegi yai po da homu ebaso da, teda te abagigo te wiegi yai au ebo gol sabo tiwai ąǫ ebao.
PRO 25:13 Te po selasa asobo bidi, agai te aga tonalubo bidi dabego agabolo mani po dolo pusubaso da, teda agai augwali te wiegi yai pemene ilibao, te kedau yai węgo te bidi te augwa gide te nai sabo sę ebo sogo te pemene ilibo tiwai ebao.
PRO 25:14 Te bidi dabego te nai me deli mawainu te po me deli dąų wali, tama augwaligo te nai masiąbaso da, teda augwali te pǫ me wali asobo tiwai yali, tiali goli te tulubage me tulubeo.
PRO 25:15 Te nago po dua digi weyu, tama nago wado po polo wasiąbaso da, teda nago te nago po odisąbo homu ebo bidi dabego haliga begelaibao. Tama nago te hagoma ebo bidi dabego homu hasegelibaso me, te usu yaibao.
PRO 25:16 Nago te tubo nai bunu ge hani meba te nide elalubo subaso da, teda nago te naga usu naga tuao. Tiyu, nago nai hauwa tuyu, te nage haliga pągąna pelama, tama nage bugabuo.
PRO 25:17 Tama nage te naga abagigo beba sesemane sogo me pidugio. Tiyu, agai nage hagela eyu, tama agai nage wei homu me egobeo.
PRO 25:18 Te bidigo aga abagiba te tibo po kodilama obaso da, teda te bidigo te abagi te bainatgo me sesemonego enebaso, ma aga te wąbi dagego elibo tiwai ebo dao.
PRO 25:19 Te nago koneani, bidi me deli aga te tibo po wabo bidi, tiali goli nago homugo te dwai sogode agai nage tau saiba homu yali da, teda nage te kele dwai bidigo nai tuainu ebo te tiwai ebao, ma te nage sągą dwai bidi bilibo te tiwai yainu homu ebao.
PRO 25:20 Te nage pelama, te homu sęgę mu elalubo bidi sugi peyu, tama nago te wiegi yai homu pemene ebo balia po wagi pobaso da, teda nago te bidi dwasianu me tau sabeo. Mu menio. Nage te agai holobo ugwa te kedau sogo nago peda sabo tiwai ebao. Ma, nago te aga tigi selali elalubadi te bidigo te selali keniba tamu gelibo tiwai ebao. Nago agai homu sęgę ma gininibo tiwai ebao.
PRO 25:21 Te naga boi bidi nasi ebaso da, teda nago aga nai mao. Te aga wę nogone ebaso da, teda nago aga ąį mao.
PRO 25:22 Te tiwai nago ebaso da, te nago aga yali kolesagade hale mu ilibaso, tama te Genuai Bidigo te nageba wiegi yai sę mu bugagia ilaibao.
PRO 25:23 Te posobo po wabogo te bidigo gesabidi tuluga siyu yaibao, te waligo te tulubage sela asobo tiwai ebo dao.
PRO 25:24 Te bidi agaduba deli te be pedude dugulaluali da, te kolesagago te be tomode te wado po me po hauwa wabo we dali bidibo kolesaga te aiyaba elaluali.
PRO 25:25 Te wiegi yai po odali bidi me deli te digibulu badu asai baso da, teda aga te wiegi yai pemene eyu, te bidi te bulu pali madi te tigi mu poma pobaso, te kedau yai ąį tubo tiwai ebo dao.
PRO 25:26 Te doloba pai bidi aga te dwai bidigo te dwai sęba kekemainu eyu da, teda te wiegi yai ulu wę dunugu pedalubo tiwai ebao.
PRO 25:27 Te bidigo te tubo nai hani hauwa mu tubaso da, te wiegi yai mu me ebeo. Tama te bidi dabego te genuai nogi agaba momainu ebo sę dene ebaso me, te kolesaga me te wiegi yai me ebeo.
PRO 25:28 Te bidigo aga haliga sębę ebo te pania sisąbaso da, teda te gasa bidi dabego aga aiyaba elaluaibao. Te tobage bidi te obo bagulisiąwai elalubo hanu me deli tiwai elalubaso, tama te boi bidi dabe te tomoba pelama, tama dolaibao.
PRO 26:1 Te wiegi yai homu kolesaga elalusiąbo bidiba te genuai nogi mawainu ebaso, usu dolo me egobeo. Te talua ge tulubage te poi pibo sogo tulubo tiwai si, ma te tau yali nai te tulubage tulubo sogo sabo tiwai ebo dao.
PRO 26:2 Te bidigo dwai sę isąbadi, tiali goli te bidi dabego po weyu, te i ola mabo po obaso da, teda te po dolo mu me pedalugobeo. Te po te ba meba sesemane bola pidu geyu, te gasaba me duagi pisąbo tiwai ebo dao.
PRO 26:3 Te bidi dabego te hos dabe dila pai bįgo eliyu, tama te donki dabego pedauwalide te ain munama, te augwali pabo dolasa pomainu ebo dao, tama augwaligo te dobo kolesaga ebo bidi dabe augwali te keloago elaibao.
PRO 26:4 Te wiegi yai homu elalusiąbo bidigo, agai te geda mubo po nage dali obaso da, teda nago agai po wei me ponogio. Tiyu, nage aga tiwai pedelabuo.
PRO 26:5 Te wiegi yai homu elalusiąbo bidigo, agai te geda mubo po nageba obaso da, teda nago agaba dodolabo po wei ponao. Tiyu, agai homugo, te aga koneani kolesaga te genuai mu da homu yabuo
PRO 26:6 Te nago te wiegi yai homu elalusiąbo bidibolo te gasa bidiba po selasa pomainu tagala palobaso da, teda naga digi naga te dolobao, te naga sągą naga digi togolama sela sąbo tiwai ebao.
PRO 26:7 Te wiegi yai homu elalusiąbo bidigo te wiegi yai po me deli wainogo ebaso da, teda aga usu me egobeo, te sągą dwai bidi te bilabo usu isąbo tiwai ebo dao.
PRO 26:8 Te bidigo te wiegi yai homu elalusiąbo bidiba te genuai nogi mawainu ebaso da, teda te agai te gumi katapelde te dwasianu masigi munama enainu tama te dąų ola sabo tiwai ebao.
PRO 26:9 Te wiegi yai homu kolesaga elalusiąbo bidigo te wiegi yai po me deli pusainogo eyu da, teda aga te bomai ąį tulama, te gęǫ eyu, te wabo pabo bidigo te sesane yai bonoba te nogogo tola sigi pabo tiwai ebao, tama te sesanego aga nogode dolobo dao.
PRO 26:10 Te sę tonalubo bosman bidigo te homu kolesaga elalusiąbo bidi dabeba, me te subigila bidi dabeba te sę mobaso da, teda te bidigo enesigi balibi dolama, tama te ene dabe subigila enebo tiwai eyu, tama te bidi hauwa dolobo tiwai ebo dao.
PRO 26:11 Te wiegi yai homu kolesaga meni yai bidigo te aga polasa yali esela pabo bidigo ebo kolesaga tobage me iduaibao, te yowigo bogulai bogu te ma begasa pelama, tugi pabo tiwai gilama ebao.
PRO 26:12 Te bidi me deli aga wiegi yai homu elalusiąbaso da, teda dago aga te konemainu tau sobaso, te usu yaibao. Tiali goli, te bidigo homugo te aga tigidali nai koneani homu ebaso da, teda te dago aga tau sabo sę te dene mu yaibao.
PRO 26:13 Hagela bidi te be tomode olo dugulalu bidaibao. Agai te tama po waibao, “Te laion me deli te sunumide bidibao,” wabo. “Tama tibaso, ena te buluba me teda soagobeo,” wabo dao.
PRO 26:14 Te hagela bidi aga betde pila mudu te tigi bebegeludaibao. Aga te hinsis muai be sunumi me deli ugwa peyu, eda asiyu ebo tiwai ebo dao.
PRO 26:15 Hagela bidigo nogo te pou pletba muyu, te nai sainu yai. Tiali goli, aga te nogo ugwaba selama, te pedauwaliba nai muabo te bomo meni yaibao.
PRO 26:16 Hagela bidigo te homu yai, te agai koneani kolesagago te nogo a naga olama, me badu nogo si wali bidigo te augwa bugagia konea pai te hania mu pusubo wiegi yai homu kolesaga te agai aiyaba elaluali homu ebo dao.
PRO 26:17 Te bidi si wado po wabo sę ebadi, tiali goli te gasa bidi me pelama, te augwali sigo po wabo tau sabo po obaso da, teda te bidigo te yowi pabo sulama, tama aga pelama, te yowigo olo tola sigi pabo tiwai gilama ebao.
PRO 26:18 Te bidigo aga abagi te tibo po ola mayu, tama nosali agai te po wali, “Eno te gagali po naga wali da,” po obaso da, teda te homu kolesaga meni yai bidi me deligo te ene dabe te subigila enebo tiwai eyu, tama te sia dabo sia dage dabe elalubadi, te subigila sąsąbo tiwai ebao.
PRO 26:20 Te augwaligo siaba te sia munama nogosiąbaso da, teda te sia disąma, sula saibao. Tama te tiwai me te bidi dabego te posobo po wasiąbaso da, teda te tigidali wado po wabo te sia saibao.
PRO 26:21 Te sia nogobaso, te sia bugagia domainu ebao, tama te tiwai me te konila po wabo bidigo te hwįbo kolesaga genuai pedalumainu ilibo dao.
PRO 26:22 Te bidigo gasa bidiba posobo po wabo odobo te dago godolo mu yaibao. Te tobage po te pusu ebo nai tiwai ebaso, tama polo mu tama dago tubo dao.
PRO 26:23 Te bidigo wiegi yai kolesaga yaibao wabo po bomo elama wali, tiali goli aga homude elalubo page, te dwai kolesaga naga yainu ebaso da, teda te tǫgo nigali sospen sene me deli augwaligo te silvago haluama, tama te tonobo sawi yai mu tiwai ebo dao.
PRO 26:24 Te gasa bidi dabe wei homu isąbo bidigo, agai te augwali homu bega sabo po weyu, te augwaligo homugo te agai augwali wei homu eba homu emainu tiaibao. Tiali goli, agai te augwali tibo po naga ola maiabo homu ebo dao.
PRO 26:25 Te tobage bidigo po dabe te nago olode pusu yaibao, tiali goli nago agai po nago homuba dąų me ola sigio. Magi baso meni, te gasa tobage dwai homu dabe te agai haligade pągąnalubao.
PRO 26:26 Agai aga te homu geme dualubaso, usu yaibao wali, tiali goli te we bidi dabego agai te dwai kolesaga konea pabo dao.
PRO 26:27 Te bidigo dwai kolesaga yabo homu ebaso da, teda aga digi dolaibao. Awe, te bidigo tǫ dedage dogolama, te gasa bidi teba tulalumainu yali, tiali goli te bidi aga digi aga teba ma tulaluali. Tama te bidigo te masigi te bulu du bageba ugwaba hogogobele pabo tiwai ebadi, tama te masigi edaba ma hogobeasa dulu, tama aga mesega sigulaibao.
PRO 26:28 Te bidigo te gasa bidi dabeba tibo po obaso da, teda te tiwai ola mobao, agai augwali wei homu isąbaso, tama augwali dolainu ebao. Tama te bidigo homu bega sabo po sesemane sogo obaso da, teda tego te gasa bidiba dwai sę mu ilibo dao.
PRO 27:1 Nago te hagoma homu eyu, tama nago te magi sę me deli te do yaibao olama, te po dąų me waligio. Magi baso meni, te mena sę te sogode pedelabo te nago me konebe dao.
PRO 27:2 Te gasa bidi dabego nago nogi ugwaba sobaso da, te usu dao. Tiali goli, naga digi te tama tiabuo. Te sę te nago pedauwaligo yabo sę menio.
PRO 27:3 Te wiegi yai homu me elalusiąbo bidigo dobo kolesagago, agai te genuai sęgę dabolo mawaibao, tama te sęgęgo te genuai masigigo sęgę, me te masigi kemi pesage holali te aiyaba elalubo dao.
PRO 27:4 Te haliga sębę elama, te wado po wabo bidigo te gasa bidi dabeba odolali te dene mayu, tama augwaliba dwai sę mu ilibo dao. Tiali goli, te mena nai sabo homu eyu, tama te gasa bidiba dwai haliga ebo, te dwai mu elama, tama te haliga sębę me wado po wabo kolesaga aiyaba elalubo dao.
PRO 27:5 Te nago abagigo dwai sę ebaso da, teda nago aga dali te dodolobo sę ebo kolesaga yao. Meni baso da, agai te nago agade te abagi homu ebo menio, agai te homu yaibao.
PRO 27:6 Te abagi dabe mu dede augwaligo te nageba dene mabo te nage tau somainu ebao. Tiali goli, boi bidi dabego nageba te abagi kolesaga eyu da, dua dao, augwaligo te tibo po ola naga ola mayu tebo dao.
PRO 27:7 Te bidi aga nai tulama, te haliga pągąna peyu, tabia pabo sogo, agai te nai ma tubo hagela homu yaibao, te hani tiwai te pusu mu ebo nai me te tagala homu yaibao. Tiali digi, te bidi nasi ebo sogo, agai te tigidali nai te wiegi yai da homu yaibao. Te ha elalubo nai me tagalao, te me te aga pedauwalide pusu naga ebo dao.
PRO 27:8 Bidigo te aga page bulu tagalama, te subigila bilibo, te ba me deli aga be tagalama, tama te subigila bola bilibo tiwai gilama ebao.
PRO 27:9 Sanda me te tobage wel dabe te wiegi yai denami elalubo, augwaligo dabolo te wiegi yai pemene ilibao. Tama te abagi dabego dabolo te wiegi yai pemene ilaibao, magi baso meni, augwaligo te da tau sabo homu mu elama, tama augwaligo wiegi yai mobo mabo po dabolo mabo dao.
PRO 27:10 Nago naga abagi dabe, me naga we wai sibi te homu gegeda palama, tama augwali tudiba me munamuo. Tama te dwai sę mego nage gegebaso da, teda naga amago nage tau somai da homu elama, te nage digibulu pelama, agaba munu me hanalugi pelamuo. Te nage pąde bidibo bidigo te nage tau sabo usu yaibao.
PRO 27:11 Eno ogwao, nago te wiegi yai kolesaga konea sabo homu sobaso da, teda ena bugai haliga mu yaibao. Tama te bidi me deligo enaba te kisilibo po obaso da, teda eno agaba te po wei ponobaso, usu yaibao.
PRO 27:12 Te wiegi yai homu elalubo bidigo, agai te tiwai koneani, te sęgę agaba pedelainu ebaso, tama agai te geda sali. Tiali goli, te wiegi yai homu elalusiąbo bidigo, aga te aga sunumide te dwai sę edubo sulama digi, tama aga pelama, tama gesabidi si deliba unulama, tama te sęgę tolobo dao.
PRO 27:13 Te bidi me deligo te gasa bidigo dali nai negeli wei ponaibao wai, te gasa bidigo wei ponabo usu meni baso da, teda agai wiegi yai kolesaga me ebeo. Tama te bidi me deligo nageba nai negeli sabo homu elama, tama nago koneani, agai te tobage dąų wabo po obaso da, teda nago bomo elama, te agai nai me deli siyu, te agai te negeli sali naide wei ponabo te sa mubo tiwai ebo nai sao.
PRO 27:14 Te nago genuai po dągą olama, tama naga abagiba te kigamu mude te siade dao po obaso da, te nago agaba te po dwai wabo tobage po tiwai obao.
PRO 27:15 Te bidi me deligo we aga te wado po weyu, po hauwa wabo we yai baso da, teda te be pedudu te dwasianu tulubage tobo sesemane tomoba asobo tiwai ebo dao.
PRO 27:16 Agai bidigo agai te kolesaga tagalumainu ebo usu me ebeo. Te tiwai te bidigo te wali asobo te panibo tiwai, ma te wel aga nogode sela pabo tiwai ebao.
PRO 27:17 Augwaligo te ain dulabo nai te aingo nigali. Te tiwai naga, te bidi me deligo te gasa bidigo homu te wiegi yai pedalumainu tau sabo dao.
PRO 27:18 Te bidigo aga bulali nedu du tuabo homu eyu da, aga te ni te bugagia tonaluao. Tama te bidigo aga tonalubo bosman bidi te bugagia tonalubaso da, teda te tonalubo bosman bidigo aga nogi ugwaba sabo dao.
PRO 27:19 Te bidigo te wę geba aiya tonobaso da, teda digi aga gesabidi subo da. Tama bidigo aga homu me, te tigidali homu me, te aga ebo kolesaga bugagia homu kone palali da, teda te aga mena tobage bidi da wabo te agai koneaibao.
PRO 27:20 Te bidi hauwa isibadi goli te tagala, augwaligo te isali bidi dabego bidibo pesage pągąna sobaso usu egobeo. Te tiwai gilama naga, te bidigo aga homugo wei ebo te usu nainu ebaso, te usu meni yaibao.
PRO 27:21 Siago te gol me silva usu sabo dao. Tama teyu, augwaligo te dwai pobele bage sela sąbo dao. Te tiwai gilama naga, te bidi dabego te bidigo ebo kolesaga sulama, te augwa koneainogo yai, aga te wiegi yai bidi, ma dwai bidi yaliwe naga te koneainogo tiaibao. Tama aga te wiegi yai bidi yai baso da, teda augwaligo te aga nogi ugwaba sabo dao.
PRO 27:22 Te nago te wiegi yai homu kolesaga me elalusiąbo bidi me deli te genuai gilama mu elebaso, te pąde isabo homu ebadi goli te tagalao, agai aga te dwai sę ebo kolesaga me tagalogobeo.
PRO 27:23 Nago te naga sipsip dabe me te meme bugagia tonaluao,
PRO 27:24 magi baso meni, te nago mone te sesemane me elalugobeo, tama te kingo hani me te sesemane sesabi elama, me bidigobeo.
PRO 27:25 Te nosai bobobage igulubo sogo da, teda nago te naga kibu dabego tuabo nai togolama te sisinao. Tama te gesi nosai hogonu ma pedalubo dao.
PRO 27:26 Nago te sipsip dabego nisi selama, tama naga gudabo ugwa dabe nigabo te sao. Tama nago te meme mebade mone selama, te tǫ abelainu yao.
PRO 27:27 Tama nago te naga meme ame pę dabe siyu, tama te naga dali, te nago we wai dabe dali tumainu yao, tama nago te naga sę ebo we dabeba me mayu ebo usu yaibao.
PRO 28:1 Te dwai kolesaga ebo bidi dabe te odolali wi elama, tama wi paibao. Tiali goli, te doloba pai kolesaga ebo bidi dabe da, te hasa laion tiwai gilama te bomo elama, dolalubo dao.
PRO 28:2 Te bulu tǫ pedaide bidibo bidi dabego te gavman hasegelibo sęde hwįbo sę ebaso da, teda te gesi tobolu bidi hauwa sesemane pedelaibao. Tiali goli, te wiegi yai homu kolesaga elalubo tobolu bidigo da, teda agai te bulu tǫ pedai kantri bugagia bidimainu yaibao.
PRO 28:3 Te bidi me deli aga te doado bage sǫą pobaso, tama agai te magi nai doado bage meni yai bidi dabe aiyaba elalubaso da, te da te genuai dwai tulubagego te gide nai dabe dolobo tiwai ebo dao.
PRO 28:4 Te bomai po tudiba mubo bidi dabe augwaligo te dwai kolesaga ebo bidi dabe nogi ugwaba saibao. Tiali goli, te bomai po wali pabo bidi dabe, augwaligo te dwai sę ebo bidi dabe aiyaba elalubo sę ebo dao.
PRO 28:5 Te dwai kolesaga ebo bidi dabego, te doloba pai kolesaga te magi nai da te homu elama, te augwaligo konesiąyu ebao. Tiali goli, te Genuai Bidi wali pabo homu ebo bidi dabego da, augwaligo te doloba pai kolesaga page mu konebo dao.
PRO 28:6 Te bidi te doado bage dabe sǫą pobaso da, tiali goli te aga doloba pai bidi, agai te mone hauwa umabo elalubo bidigo te tobage dwai kolesaga ebo te agai aiyaba mu elaluaibao.
PRO 28:7 Te gesi ogwa bidigo te bomai po wali pabo, agai te wiegi yai homu kolesaga elalubao. Tiali goli, agai te sesemane sogo te nai umabo da tubo bidi dabe dali abagi weyu, kisasa bidiyu ebaso da, teda agai te aga aya te hale dwai mu ilibo sę ebao.
PRO 28:8 Te bidigo te bidi dabego agaba te nai negeli somainu elama, tama agai te augwalide gasa ugwadu daganobo profet mone genuai dali sobaso da, teda agai te mone tolalubaso, usu me egobeo. Menio. Te mone te magi nai meni yai bidi dabe tau sabo bidigo nogoba pelama, tama te magi nai meni yai bidi dabe tau somainu ebo dao.
PRO 28:9 Te bidigo te Godigo bomai po tudiba mubaso da, teda Godigo agai gedu haluasa po wabo me odogobeo. Te Godigo te gedu haluasa po wabo te kukumini ebo nai subo tiwai yaibao.
PRO 28:10 Te bidigo te doloba pai kolesaga ebo bidi dabe geagano bilibo tiwai ebaso da, teda aga te dwai kolesagago te aga digi aga dolaibao. Tiali goli, te bidi te nai me delide magi sę isiąwai bidi da, te aga wiegi yai nai dabe te Godigo nogode saibao.
PRO 28:11 Te mone hauwa elalubo bidi dabego te homu yai, te augwaligo koneani kolesaga te hauwa elalubo homu yai. Tiali digi, te wiegi yai homu elalubo magi nai meni yai bidigo, agai te augwaligo kolesaga page mu konebo dao.
PRO 28:12 Te doloba pai bidi dabe te bulu tǫ pedai tonalubo bidi pedalubo sogo, te tigidali bulu tǫde bidibo bidi hani te bugai haliga elama, wiegi yai pemene mu yaibao. Tiali digi, te dwai bidi te tonalubo bidi pedalubaso da, teda te we bidi dabe augwalide geme wi duala sabo dao.
PRO 28:13 Te bidigo aga dwai sę yali geme dualabo homu ebo bidi da, teda aga bugagia me bidigobeo. Tiali goli, te bidigo aga dwai sę yali tigidali pusulama, tama te dwai sę dabe tudiba mubaso da, teda Godigo te olo mu tau sabo wiegi yai kolesagago aga bugagia tau saibao.
PRO 28:14 Te bidi Genuai Bidide wi eyu, aga dologode sesemane sogo bidibaso da, teda aga wiegi yai homu pemene yao. Tiali goli, te bidigo hagoma elama, tama Genuai Bidigo po sela sąbaso da, te agaba dwai sę agaba gegagasaibao.
PRO 28:15 Te bulu tǫ kantri tonalubo bidi aga te dwai kolesaga ebo bidi, tama te bomo meni yai bidi dabe aiyaba elalubo bidi yai baso da, teda aga te laiongo bomonama te gaa weyu, te i wabo tiwai ebao, tama te boma pai bea hasa me deli te nai gegeyu bilibo tiwai ebo dao.
PRO 28:16 Te bulu tǫ kantri tonalubo bidigo homu te wiegi yai me elalusiąbo bidigo da, agai te bulude bidi hani bage te aiyaba agalama dolaibao. Tiali digi, te bulu tǫ kantri tonalubo bidigo te we bidi dabego nai anoma eyu, kekebo homu te hagela homu ebo bidigo da, teda aga te sesabi sogo elama, te aga bugagia bidaibao.
PRO 28:17 Bidigo te gasa bidi ela mubaso da, teda aga dwai dene mu saibao. Tama aga te bidibo me te bugagia me dugulalusiąyu, te aga isibo sogoba usu naibao. Bidigo aga tau selamuo.
PRO 28:18 Te bidigo doloba pai kolesaga wali peyu da, te Godigo aga tonaluyu, aga bugagia bidaibao. Tiali goli, te bidigo dwai kolesaga yali da, te polo mu tama aga dolaibao.
PRO 28:19 Te bidigo gi sę ebaso da, te agai gide nai hauwa elaluaibao. Tiali goli, te bidigo te aga page elalusiąbo haniani sę yali da, teda aga magi doado bage meni yai dwai mu bidaibao.
PRO 28:20 Te bidigo doloba pai kolesaga wali pobaso da, teda te Godigo agaba wiegi yai sę mu yaibao. Tiali goli, te bidi aga polo mu tama te mone hauwa elalubo bidi pedelabo homu ebaso da, teda te Genuai Bidigo aga odolali me pomainu egobeo. Menio. Te agaba te dwai dene mabo sę yaibao.
PRO 28:21 Te bidigo bidi me deli te po tųde tau siyu, te gasa bidi aiyaba elalubo te dolo sę me ebeo. Tiali goli, te dwasianu homu bega sabo monego naga te bidi meba te dwai kolesaga ebo sęba kekebo dao.
PRO 28:22 Te aga doado bage yogo ela sabo bidigo, aga te mone hauwa elalubo bidi pedalubo sę bomo polo yaibao. Tiali goli, aga te magi nai meni yai dwai mu pedelabo te agai me konebeo.
PRO 28:23 Nago te bidi me deligo kolesaga dodolobaso da, teda agai nagede wiegi yai pemene mu yaibao. Te kolesagago agabolo te homu bega sabo ili po wabo kolesaga te aiyaba mu elaluaibao.
PRO 28:24 Te bidigo aga aya idago doado bage wi selama digi, tama te po weyu, “Eno te dwai kolesaga me ebeo,” po obaso da, teda aga te doado bage dabe dolobo tobage bidi tiwai dao.
PRO 28:25 Te bidigo homugo te doado bage hauwa sabo homu ebo bomo ebaso da, teda agai kolesagade te bidi hauwago te wado po omainu ilibao. Tiali goli, te Genuai Bidiba konealubo homu bomo eyu dąų wabo bidi da, te aga bugagia bidiyu, tama doado bage hauwa elaluaibao.
PRO 28:26 Te bidigo te homu eyu, te aga koneani kolesagago digi te aga tau selama, te tigidali sę ebo usu yaiba homu yali da, teda agade te wiegi yai homu kolesaga me elalubeo. Tiali goli, te bidigo te wiegi yai homu ebo kolesaga wali pobaso da, teda aga bugagia mu bidaibao.
PRO 28:27 Te magi doado bage meni yai bidi dabe nai mabo bidi da, te agade te doado bage dabe te munu me sǫą pogobeo. Tiali goli, te bidigo te magi doado bage dabe meni yai bidi dabe sulama, tama augwali tau sabo homu meni yai da, teda te bidi dabego te aga dwai bidi da po waibao.
PRO 28:28 Te dwai kolesaga ebo bidi dabe te bulu kantri tǫ pedai tonaluabo tobolu bidi te pedalubo sogo, te we bidi dabe augwalide geme duala saibao. Tiali goli, te bidi dabe isai madigi da, te doloba pai bidi dabego hani te genuai bidi pedelaibao.
PRO 29:1 Te bidi me deli augwaligo hauwa sogo dodolali, tiali goli te aga hagoma ebo sę te umabo pedaludubaso da, teda polo tama mu te aga dolama, tama augwaligo aga tau sabo sunumi menia saibao.
PRO 29:2 Te doloba pai bidi dabe te bomai hani pedalubo sogo, te tigidali we bidi wiegi yai homu pemene yaibao. Tiali goli, te dwai kolesaga ebo bidigo te gavman sę ebo polalubo bidi bidiyu, te tǫ tigidali tonaluali da, teda tigidali we bidi te haliga sęgę mu eyu, tama dwai gela wabo dao.
PRO 29:3 Te wiegi yai homu kolesaga sainu homu ebo bidi, agai te aga aya wiegi yai homu pemene ilibao. Tiali goli, te penani we wali pabo bidi da, agai te aga mone tigidali besela sąna silaibao.
PRO 29:4 Te gavman polalubo bidi kingo te doloba pai kolesagago te tigidali we bidi bidibo tǫ tonubaso da, teda te tǫ kantri bomo elaluaibao, tama te we bidi dabe bugagia bidaibao. Tiali goli, te gavman bidi kingo te we bidigo mone sabo homu naga eyu da, teda agai te aga tonalubo tǫde bidibo we bidi te aiyaba mu elaluyu, augwali dolaibao.
PRO 29:5 Te bidigo tibo homu bega sabo po obaso da, te tiwai agai te wa kekelama, te aga abagi tola somainogo ebo tiwai ebao.
PRO 29:6 Te dwai kolesaga ebo bidi da, te aga tola somainu te aga digi te wa me deli mubo tiwai ebao. Tiali goli, te doloba pai kolesaga ebo bidi dabe, augwa te wiegi yai pemene elama, tama te balia po dabe wabo dao.
PRO 29:7 Te doloba pai bidi dabego te magi nai meni ebo bidi dabe tau sabo homu ebo dao. Tiali goli, te dwai kolesaga ebo bidi dabe, augwaligo te kolesaga ebo hagela mu ebo dao.
PRO 29:8 Te hagoma ebo bidi dabego te taun bidi dabego te hale sębę ilama, tama augwade digi te dwai wado homu emainu yaibao. Tiali goli, te wiegi yai homu elalubo bidi dabe, augwaligo te bidi dabego wado homu ebo te isilama, tama te bidi dabe augwa haliga nagame ma igulubo dao.
PRO 29:9 Te wiegi yai homu elalubo bidigo te wiegi yai homu elalusiąbo bidi me deli te po tų ilibaso da, teda te wiegi yai homu elalusiąbo bidigo, agai te wado po me weyu, te posobo po naga waibao, tama te pedauwali me pania sogobeo.
PRO 29:10 Te gasa bidi ela mubo bidi, agai te doloba pai kolesaga ebo bidi dabe te wei homu mu me egobeo. Tiali goli, te doloba pai kolesaga ebo bidi dabego homugo da, te gasa doloba pai kolesaga ebo bidi dabe te bugagia bidimainu homu eyu, augwali seselalubo sę ebo dao.
PRO 29:11 Te wiegi yai homu kolesaga meni yai bidigo te aga haliga sębę ebo te hanilama pedalumainu yaibao. Tiali goli, te wiegi yai homu elalubo bidigo da, te aga haligade sębę ebo te palia sabo dao.
PRO 29:12 Te kantri tonalubo tobolu bidi aga te bidi dabego tibo po ola momainu eyu da, teda te dwai kolesaga naga ebo bidi dabe te aga sę ebo ofisa bidi naga bidaibao.
PRO 29:13 Genuai Bidigo te gedu tigidali we bidiba mawai, tama augwa tonobaso, usu yaibao. Agai te magi nai meni ebo bidi dabeba me mayu, tama me agai te magi nai meni ebo bidi dabe aiyaba elalubo bidi dabeba me mayu yalio.
PRO 29:14 Te kingo te magi nai meni ebo te bidi dabego po tų dolo dagalobaso da, teda te sesemane te king te aga hani sibide pedelama elaluaibao wali.
PRO 29:15 Te nago naga wai dodoliyu, te keloago elibaso da, teda aga wiegi yai homu sabo kolesaga koneaibao. Tiali goli, te waigo aga homu kolesaga digi te sesemane sogo wali pidubaso da, teda agai te aga ida hale emainu te ebao.
PRO 29:16 Te dwai kolesaga ebo bidi dabe, augwaligo te bulu tǫ kantri pedai tonalubo sogo, te dwai kolesaga mu ela pabo te i badu mu igi paibao. Tiali goli, te bidi dabe te sesabi sogo elama me bidigobeo, tama te doloba pai kolesaga ebo bidi dabego te augwali dolobo sueibao.
PRO 29:17 Te nago naga ogwa dodolobaso da, te agai wiegi yai kolesaga ebaso, tama nago homu nagame igulama, tama nage wiegi yai homu pemene yaibao.
PRO 29:18 Te Genuai Bidigo po te we bidibolo masiąwai menigi sogo da, teda augwaligo te haniani dwai kolesaga igi da. Tiali goli, te bidigo Godigo bomai po wali pali da, teda aga wiegi yai homu pemene eyu, bugagia bidaibao.
PRO 29:19 Te nago naga sę bidi dali te pogo naga po obaso da, teda nago te agai kolesaga me dodolobaso, usu me egobeo. Agai nago te po odali digi te tagalao, agai wali me pogobeo.
PRO 29:20 Te bidi me deli aga te wiegi yai homu me elalusiąbo bidi yai baso da, teda dago aga tau selama, te aga wiegi yai kolesaga konea somainu homu yao. Tiali goli, te bidigo po homu kone palama, bugagia po wasiąbo bidi yai baso da, teda dago aga tau sabo sę ebo dene mu yaibao.
PRO 29:21 Te nago naga sę bidiba te aga dwasianu elalubo sogo gagalasa, te doado bage madubadi geai baso da, teda nosali te aga nago ogwa mu tiwai pedelaibao.
PRO 29:22 Te haliga sębę polo ebo bidigo te gasa bidi dabego te wado po omainu ilibao, tama aga digi te dwai sę hauwa ebo dao.
PRO 29:23 Te bidigo hagoma homu eyu, tama aga digi aga nogi ugaba sobaso da, te augwaligo aga nogi aiyaba elaluaibao. Tiali goli, te bidi aga digi aga nogi aiyaba elalubo bidi da, te genuai nogi saibao.
PRO 29:24 Te bidigo te nai wi sabo bidi tau sobaso da, teda agaba digi te boi bidi ebao. Te agai te augwali sigo ebo kolesaga hanilibaso da, te augwaligo aga po tų ilaibao. Tiali goli, te agai geme dualubaso da, teda Godigo aga dolaibao.
PRO 29:25 Te aga gasa bidi dabede wi ebaso da, te wa me deli kekelama, tama aga digi te tubo te tiwai ebao. Tiali goli, te bidigo homu Genuai Bidiba bomo elama dąų obaso da, te aga bugagia bidaibao.
PRO 29:26 Te bidi hauwago te bulu tǫ kantri tonalubo tuni bidi dali te homu bega sabo po weyu, te agai augwali wei homu emainogo tebao. Tiali goli, Genuai Bidi agaduba deligo naga te dago po dolo dagaluyu, tama da tau sabo dao.
PRO 29:27 Te doloba pai kolesaga ebo bidi dabego te dwai kolesaga ebo bidi dabe wei homu me egobeo. Tama te dwai kolesaga ebo bidi dabego te wiegi yai doloba pai kolesaga wali pabo bidi dabe wei homu mu me egobeo.
PRO 30:1 Godigo te po Agurba mawai, te Jakego ogwabolo, agai te Itiel me Ukal te bulu side te sęgę yai po pusumainogo yai dao.
PRO 30:2 Agurgo te tama po wali, “Ena te bidi tiwai isąwai, magi baso meni, eno homu te bidigo homu tiwai me isąwai. Eno homu kolesaga te mu dwai dao.
PRO 30:3 Eno te wiegi yai homu kolesaga me konea sabeo. God te tedali wiegi yai doloba pai mu dao, tiali goli eno aga me konebeo.
PRO 30:4 De te dagaluba ugwa holama, te tǫba aiya ma dulaliwe? Tama dego te asobo wali te nogogo tola saliwe? Tama dego te pǫde wę muani, te bidigo nai me deli te name ugwade munama, tama halubo tiwai yaliwe? Dego te tǫ habu ununani tigidali dąų walama, tama megi tǫ elalubawe? Aga nogi, me aga ogwago nogi de dawe? Te nago koneba, agawe?”
PRO 30:5 “Godigo po te mu po naga dao. Te agai yaibao po wali sę tigidali, te mu pedelai. Tama agaba pabo bidi tigidali te agai bugagia obo elaluyu, te hwįbo sogo te ami bidi te sabelego bugagia tigi bea sabo tiwai ebo dao.
PRO 30:6 Naga po digi nago te po weyu, te po te Godigo po dao me wagio. Tiyu, agai nage wado iliyu, tama nosali tigidali we bidigo koneyu, nage te tibo po wabo bidi da po wabuo,” wali.
PRO 30:7 “God, eno te nai si po nageba hanaluabo homu ebao, tama eno homugo nago enabolo momainu homu ebao, te ena tǫde bidibo tigidali sogo
PRO 30:8 nago ena tau somainu eyu, tama eno te tobage tibo po wabo kolesaga dabe te tudiba munama, tama nago ena te mone hauwa elalubo bidi pedalumainu eyu, ma te magi nai meni ebo bidi tiwai pedalumainu eyu me egio. Menio. Nago te ena usu nama nai tama mobaso, te usu dao.
PRO 30:9 Tiyu, eno doado bage hauwa mu elalubaso, tama eno nage tudiba muyu, tama eno te po waidalio, ‘Genuai Bidi de dawe?’ Tama tiyu, ena te magi nai meni yai bidi pedaluyu, tama eno te nai dabe wi siyu, tama eno God nago nogi aiyaba elaluidalio,” wali.
PRO 30:10 “Nage te sę tonalubo bosman bidiba pelama, tama agai sę ebo bidiba posobo po me wagi pelamuo. Tiyu, te sę bidigo nageba te dwai sę emainu i ola mabo po obaso da, tama te nage sęgę elaluabuo.”
PRO 30:11 “Te meba bidi dabego te po wabo dao, Godigo te augwa aya idabolo te dwai sę emainao wabo dao.
PRO 30:12 Te meba bidi dabego te homu ebo dao, augwa te magi nai me delide te magi dwai sę me ebeo homu yali. Tiali goli, augwa sęgę te elalubadi, tama augwali te God gedude meda mu yai bidibao.
PRO 30:13 Te meba bidi dabego homugo augwali te wiegi yai mu da homu elama, tama gasa bidi dabe te olo bage te olo tiwai da homu ebo dao.
PRO 30:14 Te meba bidigo te magi nai meni yai bidi dabeba te dwai sę mu ilaibao. Te hwą bainat me ge hwą me te augwa pedauwalide pągąnalubo tiwai eyu, tama augwaligo te magi nai meni yai bidi dabe tulama, tama tigidali silabo homu ebo dao.”
PRO 30:15 “Te bidi kaneme sabo dwasianu hasamani te benago te wegi si elalubao. Augwa si nogi sabi si tobage elalubao, te tiwai, Ena Mao.” “Te nai selago te augwa sabo naide te usu dao po munu me wagobeo. Awe, te nai me si me sigo te augwa homu wei ebo, te siminabo me elalubao. Augwali e dao:
PRO 30:16 Te isali bidi dabego gų page dao, me te bidigo sali te wai ame nisiąwai we, me tama tǫgo te wę sali, tiali digi aga te wę hauwa mu sabo homu ebao, me te siago te nai dabe dela siliyu, tiali digi te nai dabe te agade usu meni yaibao.”
PRO 30:17 “Te aga aya idago po sela sąbo bidigo, tama te posobo po augwali siba obaso da, teda aga te isibo sogo te aga tigi me pubalugobeo. Teda te gedeli dabe, me te genuai kemodage ba dabe aselama, aga gedu gudulama, tama aga tigi mi tuaibao.”
PRO 30:18 “Te ena midigi sabo ilibo nai sela te elalubao. E, sela naga meni, te gasagi yai nai mu me si me si te eno augwali konesiąbo nai te elalubao.
PRO 30:19 Te ugwadu bola soabo kemodage bago kolesaga, tama te mone masigi daide ugwadu soabo hasamanigo kolesaga me, tama te genuai tamu ąįdu bilibo sipgo kolesaga me, tama te bidigo we wei homu ebo kolesaga me, te tama te eno augwali konesiąbo nai me si me si elalubao,” wali.
PRO 30:20 “Te wego te we sabo togobo penani ebo kolesaga te tiwai. Aga nai tulama, tama pedauwali tedelama, tama nosali agai te po wai, ‘Eno te magi dwai sę me ebeo,’ wabo dao.”
PRO 30:21 “Te kolesaga sela, woo, te me si me si te tǫde pedelama elalubao. Te kolesaga dabe te dwai mu elama, tama te tǫ aga digi te kolesaga dabe wei isiąbo homu elama, tama te didibili umabo mu ebao.
PRO 30:22 Te kolesaga dabe te tama telalubao. Te olo sę bidigo aga te king pedalubo sogo ebo kolesaga me, tama te homu kolesaga menisąwai bidigo te aga nai hauwa tubo sogo ebo kolesaga me,
PRO 30:23 tama te bidi me deligo te we bidi dabego wei menisąwai we siyu, te we aga dali bidibo kolesaga ebo, tama te sę ebo wego te aga tonaluali wego sę yali pesage hasegelama sabo sogo ebo kolesaga, te tama telalubao.”
PRO 30:24 “Te e tǫde te tobage hasa me si me si tama dwasianu hasamani me elalubao, tiali goli augwa te homu kolesaga te wiegi yai mu elalubo dao. Augwali e dao.
PRO 30:25 Te sagado dabego bomo me elalubeo, tiali goli augwa te nai sǫą pabo sogo tuabo nai te sabobo dao.
PRO 30:26 Te gesia dabe te masigi gabalode bidibao, augwaligo me te bomo meni yai, tiali goli augwa te genuai masigi dabe tomode te bidabo be nigilama bidibao.
PRO 30:27 Te kuli mano dabe augwa tobolu bidi king te menibadi goli, tiali te augwa lain bugagia wasilama bilibo dao.
PRO 30:28 Te dwasianu yalawai yoganu dabe, dago nogogo sabo usu goli, tiali digi augwa te kingo genuai bede bidibo dao.”
PRO 30:29 “Te gasa boma pai mu bilibo nai te sela, ma me si me si elalubao. Augwali e dao.
PRO 30:30 Te laion dabe te boma pai mu elaluyu, te gasa hasa sibi aiyaba elalubo dao. Te augwali bilibo sogo, augwali te magi nai me delide wi me eyu me egobeo.
PRO 30:31 Me te omai ba kakaruk dabego te tobolu ugwaba dodolama bilibo dao, tama te omai kibu meme dabe me tama tibo dao. Me te kingo te aga bomo mu eyu ebo sogo te boi bidi dabego agai aiyaba elaluainu ebaso, usu me egobeo.”
PRO 30:32 “Te nago dobo sę ebo kolesaga eyu, tama nago hagoma eyu, naga digi nogi ugwaba siyu, ma nago dwai kolesaga yabo homu ebaso da, teda nago pedauwali pania selama, tama te kolesaga tagalao.
PRO 30:33 Te nago bulmakaugo ame tola selama, tama nago pepegane da, teda te ame pę bata pedelaibao. Tama te tiwai me nago te bidi me deligo guniba elibaso da, teda te kaneme pedelaibao. Te tama tiwai naga, te nago te bidi dabe wado po omainu ilibaso da, teda te hwįbo dao,” wali.
PRO 31:1 Godigo te sęgę yai po te king Lemuel aga idabolo olama, tama agai te po te kingba pusali.
PRO 31:2 “Eno ogwao, ena digi nage ame nani, tama eno nage wei homu mu ebao. Eno Godiba hanalubaso, tama nage enaba mawai dao.
PRO 31:3 Nago te we dabede gagali me isiąyu, tama nago bomo tigidali me tagalabuo. Magi baso meni, augwaligo te king dabe me dolomainu ebo dao.
PRO 31:4 Lemuel, te king dabego te wain wę tulamuo. Ma, augwaligo te bomai ąį bia tuabo homu bomonama ebaso da, te dwai mu dao.
PRO 31:5 Tiyu, augwaligo te wę tubaso, tama augwa te bomai po dabe, me tama augwaligo te doloba pai kolesaga te magi nai meni yai bidibolo ebo, te kolesaga dali homu kone tua peyu, tagalabuo.
PRO 31:6 Te bomai ąį me wain ąį te isabo homu ebo bidigo dabego tubo ąį, ma te genuai sęgę elalubo bidigo tubo ąį dabe dao.
PRO 31:7 Te augwa tuabo homu wei ebaso da, augwa te tumainu eyu, tama augwa te magi nai meni yai bidabo te homu kone me isiąyu, tama augwa te genuai sęgę elalumainogo eyu, te tama tebo dao.”
PRO 31:8 “Te bidi dabego augwa sęgę po pusisąbo bidi dabe te nago augwali tonaluyu, tama nago te augwali tau sabo po weyu yao. Tama nago te magi nai meni ebo bidi dabede te po tų ebo tau sabo po weyu, te doloba pai kolesaga ebo sę bomo yao.
PRO 31:9 Tama naga digi te po tų odobo sogo, nago te doloba pai kolesaga eyu yao. Tama nago te magi nai meni yai te hobedagia bidibo bidi dabe tau sao,” te po wali.
PRO 31:10 Te bidigo te wiegi yai kolesaga mu ebo we sabo homu ebo da, agawe? Teda aga gegebo sę dene mu yaibao. Te tobage tiwai wego te tobage te gasa sawi yai masigi dabe te aiyaba elalubo tiwai ebo dao.
PRO 31:11 Te tobage we aga bidigo te wego wiegi yai kolesaga sesemane sogo wali pabo te bugagia koneaibao, agai tede homu si ebo menio. Tama wego aga tau siyu, te aga doado bage hauwa elalubo dao.
PRO 31:12 Te wego te wiegi yai kolesaga naga aga bidiba sesemane sogo ebo dao.
PRO 31:13 Te agai te sipsip nisi dali, gasagi yai nisi dali siyu, tego haniani hobi nigilama, tama agai te tobage haniani ugwa hobolobo sę eyu, te aga wiegi yai homu pemene ebo da.
PRO 31:14 Te aga wai dali, aga bidi dali, augwa te tobage nai hauwa elalubao, magi baso meni, aga te nai sigi peyu, te digibulu mu peyu ebo dao, te genuai sip dabego ebo tiwai gilama tama tibo dao.
PRO 31:15 Te wiegi yai wego da, te be posisąbadi digi hodaluama, tama aga wai me bidi te nai ulama, tama aga tau sę ebo we dabe sęba dobabo dao.
PRO 31:16 Te bomai wego da, te agai abelainu ebo tǫ te hasia bolo bugagia osola sulama da, tama nosali aga bisnis yali sęde te mone selama, tama te gesi ni wain wai abelama bulaibao.
PRO 31:17 Te deli sogo aga hagela me ebeo. Aga te bomai we me ebaso, tama aga bomo deliba sisina siyu, tama te sę yaibao.
PRO 31:18 Te aga lam sole habude te wel ąį pągąnaluyu, te ula edubao, tama aga sę ela pidubadi te be huli tomoba mu igi peyu, te aga dobu si ebo bisnis sę ebo te bugagia ebo subo sogo tiaibao.
PRO 31:19 Te tobage tiwai wego te aga digi te hobi dabe nigilama, tama te ugwa dabe hobolobo dao.
PRO 31:20 Te agai suali, te bidi dabe te doado bage menia siyu ebo sogo, agai augwaliba te doado bage mabo dao. Awe, agai te nai sǫą pai bage tau sabo dao.
PRO 31:21 Te talua ge tulubage tulubadi digi, agai te aga wai puluba me bidide te homu si me isiąma te sę yaibao, magi baso meni, agai te augwaligo ugwa dabe te wiegi yai name ugwago nigibo dao.
PRO 31:22 Tama aga digi te aga bede selama piabo blanket dabe me nigaibao. Tama agai te wiegi yai tedela yai name ugwa, me te mama yai name ugwa wiegi yai me selama, tama aga gudubo ugwa dabe nigaibao.
PRO 31:23 Te bulude bidalubo polalubo bidi dabego te genuai nogi agai bidiba mawai. Tama aga bidi te polalubo bidi dabe bidalubo digi te aga me te polalubo bidi bidibo dao.
PRO 31:24 Hauwa sogo te wego te wiegi yai ugwa dabe me, te kukulu dabe me nigiyu ebo dao, tama te bisnis bidi dabe aselama, abelagasu ebo dao.
PRO 31:25 Te aga sę eyu, mone sabo te genuai nogi te aga ugwago sę tiwai elaluyu, tama aga bomo elaluali. Agai te agaba nosali pedelabo sęde te homu si me isiąwaibao.
PRO 31:26 Agai te we bidi ola mayu, agai po dua digi naga wabo dao. Tama agai tigidali po wabode te wiegi yai homu me kolesaga pedaluyu yai.
PRO 31:27 Te aga bede doado bage dali, sę ebo dali si tonalubo sogo, aga hagela me egobeo. Menio. Agai sę bomo eyu, tama wiegi yai sę ebo dao.
PRO 31:28 Te wego wai dabego te we bidi dabego gesabidide augwa idago ebo kolesagade dwagi yai po wabo dao. Tama aga bidigo me aga nogi ugwaba mu siyu, tama po wali,
PRO 31:29 “Te da bidibo bulude te wiegi yai kolesaga mu ebo we elalubadi, tiali goli nago augwali aiyaba elaluama, te nage uganu mu ela holalio.” Aga bidigo te po wai.
PRO 31:30 Te we me deligo dabolo te pusu yai po waibao, tiali goli agai kolesaga te gasagi yai tedali elaluai. Te gasa sawi yai we mu subo, aga sesemane sogo te tiwai me bidigobeo. Tiali goli, Genuai Bidide wi eyu, aga dologode bidibo wego nogi te dago ugaba sabo usu yaibao.
PRO 31:31 Dago te wego ebo wiegi yai kolesaga, me te agai ebo wiegi yai sę ebo, tede te dago homugo koneama, tama agaba genuai nogi mao. Te tigidali we bidi te sisinibo pesageba aselama, tama aga nogi uganu sao.
ECC 1:1 Te kolesaga mu konea pai bidi me deligo po pusali. Te kolesaga koneani bidi te Devitgo ogwa da, tama polobadu aga Jerusalemde king bidi bidai dao.
ECC 1:2 Te kolesaga mu konea pali bidigo te tama po walio, tigidali nai te olo nai tiwai mu elalu, te nai dabego aga page mu me elalubeo.
ECC 1:3 Dago sę dene mu te kibu be hauwade ebao. Tialima, dago mena wiegi yai nai dabe te sę dene yalide sabo dawe?
ECC 1:4 Te we bidi dabe augwali isibaso, te gesi we bidi hani ma pedelama, te augwali bidali pesage ma hasegelibao. Tiali digi te tǫ da, me hasegelibeo. Sesemane sogo aga elalubo tiwai naga me tama elalubo dao.
ECC 1:5 Tigidali sogo giliga nanudu gebao, tigidali sogo aga iba dega siguludubao, tama ma geasa pelama, te gasa sogo bubugade ma nanabo sisi elalubao. Sesemane sogo te giliga ge aga tama naga tidubadi, aga homu hę mu wabo dao.
ECC 1:6 Wali te not badu hogodama, te saut badu pedaiba solama, te ma begelama, te not badu soabo da. Te tama kolesaga eyu, te wali sesemane sogo bagula bilibo dao.
ECC 1:7 Te tigidali asobo ąį te tamu ąįba udula pobao, tiali goli te tamu ąį me pągąbeo. Nosali, te ąį dabe te asaliba ma begasa holaibao, tama ma dulubo dao.
ECC 1:8 Dago e tǫde tigidali naide homu kone paludu, te dago augwalide hagela mu ebo da. Dago te hagela ebo po hanilama pusubaso, usu me egobeo. Dago te tobage nai dabe sulama, te tobage po dabe odobadi yali, tiali goli te tebo sęgo da haliga pemene ilama, mu usu nabo me ebo menio.
ECC 1:9 Te polobadu pedelali nai dabe da, te nosali ma pedalubo da. Te bidi dabe augwaligo te polobadu yali sę dabe, te sę dabe gasa bidi dabego ma yaibao. Te e tǫde gesi sę me elalube dao.
ECC 1:10 Te me sogo te bidi dabego te tama po obao, “Te e da, te gesi noma nai me deli da,” po wali. Tiali goli, te menio. Polobadu mu digi te nai me elaluali, te da e tǫde ame nenama bidisąbadi te nai elaluai dao.
ECC 1:11 Te bidi me deligo te polobadu bidali bidi hani, te wąį nǫų dabe augwalide te homu ma kone palobo menio. Tama da tudi badu pedelabo bage, te nosali badu mu pedalubo bidi dabe augwaligo te bagede homu kone me palogobe da.
ECC 1:12 Ena te kolesaga koneai bidi, ena te Israel dabego king bidu, te ena Jerusalemde bidai dao.
ECC 1:13 Eno te e tǫde pedelali nai tigidalide homu kolesaga koneabo homu mu yali, tama eno te page hania mu bugagia dagala sigi da homu kone palali. Tiali goli, te sę Godigo dabolo mani te genuai sęgę mu elalubo dao.
ECC 1:14 Eno te tǫde pedalubo nai tigidali sula silali, te mu tama, te nai dabego page mu me elalusiąwai, te bidi me deli udayu, te wali nogogo tola sainu ebo tiwai ebo dao.
ECC 1:15 Te gagea pali nai dabe, te dago dodolainu ebo usu egobeo. Te elalusiąwani nai dabe, te dago me nedegobeo.
ECC 1:16 Eno te tama homu yali, eno te genuai homu kolesaga mu koneani, tama te polobadu Jerusalemde king bidali bidi dabego koneani homu kolesaga tigidali aiyaba elaluali. Eno wiegi yai homu kolesaga mu koneai dao.
ECC 1:17 Eno te wiegi yai homu kolesaga hanilabo sę bomo yali, te kolesaga umuna pabo tobage sę page me gegabo sę bomo yalio. Tiali goli, ena odolali sę dene yali, te bidi me deligo te wali tola sainu pobebo tiwai yalio.
ECC 1:18 Mu tama, te homu kolesaga hauwa koneani bidigo, te aga homu kone kolesaga konebo te genuai uga uga ela holobo sogo, te agai haliga sęgę genuai mu pedalubo dao.
ECC 2:1 Eno te tobage pemene homu yabo kolesaga usu sabo homu yali. Tama ena godolo homu simina ela silaibao homu yali. Tiali goli, te tama kolesaga me page meni yai dao.
ECC 2:2 Eno gegelama, te tiwai koneani, te gisugu wabo kolesaga te dobo kolesaga da homu yali. Te homu pemene ebo kolesagago te da dwasianu tau sabo usu meni yaibao.
ECC 2:3 Eno te wiegi yai homu kolesaga page gegelama, suainu ebo sę yali, eno te wain ąį tubo kolesaga usu siyu, te tobage pemene homu ebo kolesaga dabe yali. Eno te gegelama koneainu yali, te mena sę mu te we bidi augwali te dwasianu pęwadage sogo e tǫde wiegi yai bidabo te koneainogo yai dao.
ECC 2:4 Eno te genuai sę hauwa yali. Eno ena be te genuai genuai be dabe sęnama, tama eno te wain gi dabe bulali.
ECC 2:5 Eno te gide bulali nai dabe me, tama te gide te tobage du walobo wiegi yai ni du dabe elaluai dao.
ECC 2:6 Eno te dwasianu sigi ąį ge dabe nigilama, te ni du gi dabeba ąį sagaduabo nidigili palio.
ECC 2:7 Eno sę olo yabo sę bidi, me sę olo yabo we me hauwa abelali. Tama te olo sę ebo bidigo wai dabe, me te olo sę ebo wego wai dabe te eno sę olo yabo we bidi pedelali. Te eno bulmakau me sipsip hani hauwa mu elaluali. Te Jerusalemde polobadu bidali bidi dabego te bulmakau me sipsip eno elalubo nai tiwai me elalubeo.
ECC 2:8 Eno te silva me gol hauwa elaluali, me te eno tonalubo tǫ kantri pedai king dabego me augwa wiegi yai dila pai nai dabe enaba mayu yali. Eno te we bidi meba sisinama, te augwaligo enaba wiegi yai homu pemene ilabo tęąbi po omainu yali. Te eno te me badu hani we hauwa selama, te ena homu pemene mu ilibo sę yai dao.
ECC 2:9 Eno te tama nai dabe doado bage saligo te ena genuai bidi mu pedelali. Te Jerusalemde polobadu bidali bidi dabego nai te eno megi elalubo nai tiwai me elalubeo. Tama te sogo ena te homu kolesaga mu konea pai bidi me bidai dao.
ECC 2:10 Te eno homugo godolo yali naide homu dwasianu me geą sabeo. Mu menio. Te eno homude nai me deli godolo ebo sogo da, teda te nai eno siyu naga yali. Te eno ena ebo sę tigidalide wiegi yai homu pemene mu eyu, te pemene yali te sęgo mone sabo tiwai yali dao.
ECC 2:11 Tialima, nosali ena te sę dene elama sali nai dabeba homu kone palama, eno te tiwai koneanio, te tigidali nai te olo nai tiwai da, te homu eyu, te nai dabego ena dwasianu tau sogobe da homu yalio. Te bidi udulama, te soabo wali nogogo tola sainu ebo olo sę tiwai ebo dao.
ECC 2:12 Eno te sę dabe ela silama da, teda te gasa bidigo ena hasegelama, te king pedalubo sogo da, teda agai mena tobage gasa sę yaibawe? Mu menio. Tama te nosali pedalubo sę page dago kuna konesiąbaso, eno te wiegi yai homu kolesaga ebo page me, te wabo pabo bidigo ebo kolesaga page me homu kone palobo sę eyu yai dao.
ECC 2:13 Eno homu kone palama, te tiwai tama koneani, te wiegi yai homu kolesaga te dwai wabo pabo bidigo ebo kolesaga aiyaba mu elaluama, te be posobo ula ebogo te be hulia sabo aiyaba elalubo tiwai ebo dao.
ECC 2:14 Te homu kolesaga mu konea pai bidi dabego te augwa wali pabo sunumi bugagia sueibao, tiali goli te wabo pabo homu kolesaga tiwai ebo bidi dabe te hulide bilibo tiwai yaibao. Te mu da wali, tiali goli eno gasa nai me koneanio. E tiwai da. Te homu kolesaga konea pai bidi silagasobo gilama tiwai, te wabo pabo homu kolesaga ebo bidi me te tiwai gilama silagasu ebo dao.
ECC 2:15 Eno te tiwai homu ebao, te wabo pabo homu kolesaga tiwai elalubo bidi dabeba pedelainu ebo nai tiwai, te enaba me pedelaibao homu yali. Tialima, eno te koneani homu kolesagago te ena magi elama tau sogowe? Te eno homu kone ma palobo te tiwai ebao, te koneani homu kolesaga elalubo bidi me te olo nai tiwai da te homu ebo dao.
ECC 2:16 Magi baso meni. Te nosali sogo, te we bidi augwaligo da homu kone ebo mu gegeda palaibao. Te da wabo pabo homu kolesaga elalubo bidi, ma te homu kolesaga mu konea pali bidi me tagalao, te augwaligo homu kone palobo sę munu ma egobeo Te isibo sogo, te homu kolesaga konea pali bidigo te wabo pabo homu kolesaga tiwai bidi aiyaba me elalugobeo. Menio. Da tigidali isaibao.
ECC 2:17 Tialima, te ena bidabo ula te eno hagela ilibao, magi baso meni, te tǫde pedalubo nai tigidaligo ena genuai sęgę mobao. Te nai dabego page me elalubo menio. Te bidi uduyu, te asobo wali nogogo tola sainu ebo tiwai ebo dao.
ECC 2:18 Eno koneanio, eno te sę dene elama pedelali nai dabe taga paibao, te ena bidali sę hasegelama sabo bidigo saibao. Tibaso, eno te nai dabede hagela homu ebo dao.
ECC 2:19 Tama ena te bidali pesage hasegelibo bidi da, eno konebeo, aga te homu kolesaga mu ula tega pai bidi mu, ma te wabo pabo homu kolesaga elalubo bidi tiwai yaliwe? Konebeo. Tialima, agai eno te wiegi yai konea pali homu kolesagade sę dene elama pedelali nai tigidali tonalueibao. Te tama kolesaga me aga page meni yai elalubao.
ECC 2:20 Tialima, eno ena te sę dene yali dabede homu kone palu, te ena dwai haliga mu yai dao.
ECC 2:21 Eno te tiwai homu ebao, te bidi mebago te sę bugagia yabo skul olama, te wiegi yai homu kolesaga koneani elalu, te augwa sę dene elama, te nai hauwa sali. Tama nosali augwali isibaso, te gasa bidi dabego te nai dabe olo saibao. Te kolesaga dwai mu ebao, tama te page meni yai mu elalubao.
ECC 2:22 Da e tǫde bidiyu, sesemane sogo dago sę dene eyu, te nai dabede homu hauwa dogia paibao, tiali goli tego magi nai mu dabolo wei ponaibawe?
ECC 2:23 Da e tǫde bidibo sogo, tigidali naigo da homu kone tųą palama, mone homu sęgę hauwa ilaibao. Te hulide dago homu kone palubo sę hauwa dogia pidubadi, te dago toma me tusiąwaibao. Te tebo kolesaga me page meni yai elalubao.
ECC 2:24 Dago nai me ąį me tuyu, te dago yali sęde wiegi yai homu pemene eyu bidibaso da, teda usu dao. Po meni. Te sę da bidigo naga me ebeo. Menio. God agade digi te page elalubao.
ECC 2:25 Magi baso meni. Te Godigo dabolo te nai tuyu, pemene homu yao wagi menigi sogo da, mena tama dago te tama kolesaga igi dawe?
ECC 2:26 Te we bidi mebago te Godigo homu wali pobaso, tama agai augwali dali dwagi yai homu ebo dao. Agai augwaliba te wiegi yai homu kolesaga menama, te augwali pemene ilibo dao. Tiali goli, te tobage kolesaga isąwai bage, te dwai sę ebo bage yaibaso da, teda agai augwaliba te sę dene menama, te sali nai hauwa te sisinama, te Godigo dwagi yai homu ilibo we bidi augwaliba momainu ebo dao. Te sę dene eyu, doado bage hauwa sabo kolesaga me te page meni yai elalubao, te bidi udayu, te wali nogogo tola sainu ebo tiwai ebo dao.
ECC 3:1 Tigidali nai e tǫde pedelama elalubo, te aga bodolu muani sogode digi pedalu ebo dao. Awe, te tigidali haniani sę deli deli te dolo si kadu walio.
ECC 3:2 Godigo bidi da e tǫde ame nabo sogo bodolu dąį muani, te isabo sogo bodolu me muanio. Agai te nai wai bulabo sogo bodolu dąį ilibadi, te nai gudabo sogo me bodolu muai dao.
ECC 3:3 Agai te bidi ela muabo sogo bodolu mubadi, agai gasi ebo bidi ma usu ilabo sogo bodolu mubadi yali. Agai te nai dabe hųgiabo sogo bodolu muyu, te nai dabe nigabo sogo bodolu muyu yai dao.
ECC 3:4 Agai te gela wabo sogo muyu, te gisugu wabo sogo bodolu muyu yali. Agai te hobede yabo sogo muyu, te tęąbi po wabo sogo muyu yalio.
ECC 3:5 Agai te dago te masigi dabe sela sąbo sogo bodolu muyu, me te masigi dabe dago deliba sisinabo sogo bodolu muyu yai dao. Agai te bidigo aga we dali pagela piabo sogo bodolu muyu, te we dali pagela pisąbo sogo bodolu muyu yai dao.
ECC 3:6 Agai te nai hagawai gegabo sogo bodolu muyu, te hagawai nai tagalabo sogo bodolu muyu yali. Agai te nai doado bage bugagia muabo sogo bodolu mubadi, te nai dabe sela sąbo sogo bodolu muai dao.
ECC 3:7 Agai te ugwa pisą yabo sogo bodolu muyu, te hobolabo sogo muyu yali. Agai te bidi dago pedauwali panibo sogo muyu, te po wabo sogo mubadi yai dao.
ECC 3:8 Agai te bidi dago gasa bidi godolo mu yabo sogo bodolu muyu, te bidi dago gasa bidi hasi godolo menisąbo sogo bodolu muyu yali. Agai te hwiąbo sogo muyu, te bugagia bidabo boi pibo sogo bodolu muyu yalio.
ECC 3:9 Te sę ebo bidi dabe, augwaligo te mena wiegi yai nai dabe augwa te ebo sęde sabo dawe?
ECC 3:10 Te tobage sęgę tigidali Godigo dabolo mubo eno mu konea palio.
ECC 3:11 Godigo digi te tigidali nai pedelabo sogo bodolu muani, tama augwali te wiegi yai sogo bodolu muanide mu pedelaibao. Tama me agai dago homu hodolama, tama dago te polobadu pedelali nai dabe konemai da homu eyu, tama te nosali pedelabo nai me konemainu homu eyu tama tiali. Tiali goli, Godigo aga polobadu digi ela pali sę tigidali te nosaliba mu usu nama, te dago mu konemainu ebo sę ebeo.
ECC 3:12 Eno te naide homu kone palama, tama eno koneani, te uganu ela holobo kolesaga me deli elalubao. Te kolesaga e tiwai dao. Dago wiegi yai pemene eyu, te wiegi yai kolesaga da e tǫde bidadubadi ebaso, te usu yaibao.
ECC 3:13 Tama me, dago nai me ąį me tuyu, te dago ebo sę tigidalide wiegi yai homu pemene emainao. Te Godigo dabolo te tobage wiegi yai homu pemene ilibo sę dabolo mabo dao.
ECC 3:14 Eno koneanio, te Godigo kolesaga me hasegeligobeo. Menio. Te sesemane sogo elalua pidu, elalua paibao. Niwai bidi me deligo kolesaga te Godigo kolesaga dabeba wadolobaso, usu me egobeo. Te niwai bidi me deligo te Godigo kolesaga me hųgią sąyu, sela sągobeo. Godigo te tiwai sę yali, te we bidi dabe augwali agade wi eyu, aga dologode naga bidimainu yai dao.
ECC 3:15 Te megi pedalubo nai tigidali, augwali te polobadu pedelalio. Te nosali pedelabo nai tigidali, augwali me polobadu pedalali. Godigo te polobadu pedelali nai tigidali te me tama elalua pomainogo iligobeo. Menio. Agai te nai dabe ma holomainu ilibo sę ma ebo dao.
ECC 3:16 Eno te tǫde gasa kolesaga me elalubo suali. Te wiegi yai doloba pai kolesaga wali pabo sę elalubo bidi dabe, augwaligo te kolesaga wali ma pabo meni. Menio. Augwaligo dwai kolesaga mu wali pabo dao.
ECC 3:17 Eno tede te tama homu yalio, te Godigo we bidi dabe augwali po tų ilibo sogo, agai te doloba pai kolesaga tigidali yali bidi dabe, me dwai kolesaga yali bidi dabe dagalobo sogo dąį ilali elalubao. Magi baso meni, te tigidali sę yabo si te elalubao, te tigidali yali kolesaga ma dodolobo sogo me elalubao.
ECC 3:18 Tama me eno te tama homu yali, te da bidi dabe da, Godigo da usu siyu, dabolo te tiwai ola mobao, da bidi dabe te kibu hasa dabe tobage tiwai si naga elalubao.
ECC 3:19 Magi baso meni, da bidi silibo te hasa dabe tiwai si ebao. Te hasa dabe isaibao, te da bidi me isaibao. Bidi me, hasa me, te mobo kekebo da, te tama tebo te si dali sigo bidibo ula elalubao. Tibaso, te bidigo bidibo ulago te hasago bidibo ula aiyaba me elalugobeo. Menio. Augwali sigo bidibo ula te olo nai tiwai si tiwai dao.
ECC 3:20 Godigo tǫ selama, augwali si nigali, tialima augwali si isibo si da, te augwali si tǫ tiwai ma pedelaibao.
ECC 3:21 Bidi mebago homugo te bidigo noma mobo te ugwaba holobo homu, te hasa dabego mobo noma te tǫba aiyaba dulubao homu ebao. Tialima, dego mu te sę page koneabo usu yaibawe?
ECC 3:22 Tama tibaso, eno te tama sęde homu kone palama, eno koneani, te kolesaga me deligo uganu igulai mu elalubao. Te kolesaga e tiwai elalubao. Te da isibo si, te nosali e tǫde pedalubo sę te dago konegobeo. Tama tibaso, dago megi ebo sę tigidalide wiegi yai homu pemene inao. Magi baso meni, Godigo dago te sę emainu bodolu muai dao.
ECC 4:1 Te tobage dolo isąwai kolesagade eno homu kone ma palali, te tǫde we bidi augwaligo ebo kolesaga da. Te dwai sę ebo bidi dabego te we bidi hauwa aiyaba elalubaso, tama te we bidi augwali dwai mu gela wali. Tiali goli, augwali tau sabo bidi meni yai. Magi baso meni, te dwai sę ebo bidi dabego bomo hauwa elalubao.
ECC 4:2 Eno te tama homu yali, te isali bidi dabe augwali da, te usu mu yalio. Magi baso meni, augwali da, te sęgę meni ebao, te da tǫde bidibo bidi dabego sęgę sabo tiwai me ebo meni.
ECC 4:3 Tialima, e tǫde ame nisiąwani we bidi hani dabe, augwali ugwanu ela holama, te isali bage dali, te megi bidibo bage dali si aiyaba elalubo dao. Magi baso meni, augwaligo te bidi dabego dwai kolesaga e tǫde ebo munu me subeo.
ECC 4:4 Tama me eno gasa kolesaga sualio. Te bidi dabe augwali sę dene mu elama, te tobage wiegi yai nai dabe nigibao. Tialima, te page e tiwai elalubao. Augwaligo homude te augwa abagi dabego genuai nogi elalu, te nai hauwa elaluba homu yali. Tama tibaso, augwaligo me te sę dene hauwa eyu, te abagi dabe augwali genuai nogi elalubo tiwai augwali me bidabo homu yali. Te wabo pabo homu kolesaga tiwai mu ebao, te bidigo wali nogogo tola sainu udabo tiwai gilama ebo dao.
ECC 4:5 Te bidi dabe augwaligo te tiwai po obao, Te bidi olo dugulalu, sę isąbo bidi da, aga te wabo pabo bidi tiwai ebao. Te agai bomo sia siyu, te aga isaibao.
ECC 4:6 Tialima, eno tama homu ebao, ma, bidigo dwasianu nai elaluyu, tama aga haliga nagamea pai eyu bidibaso da, teda te bidi bugagia bidibao. Tiali goli, te doado bage hauwa elalubo bidi, aga tede moni homu eyu, aga sę sesemane sogo bomonama ebo bidi da, aga dwai bidibao. Agai te wali nogogo tola sainu ebo tiwai ebo dao. Te dwalio.
ECC 4:7 Eno te gasa page meni yai kolesaga me suali. Te kolesaga e tama tiwai elalubao.
ECC 4:8 Te yǫya pai bidi deli bidali. Aga wai me, aga ama me meni yai, tiali goli, sesemane sogo agai sę naga ela pidubadi geani, te aga dwasianu toma me nabeo. Agai doado bage hauwa elaluali, tialima te nai dabe aga usu meni homu yali. Agai te tiwai homu ebeo, “Magi baso ena odolali sę dene eyu, te eno pemene meni ebawe?” te homu ebeo. Te tobage bidigo kolesaga te hobedagia mu elalu, te aga page meni yai elalubao.
ECC 4:9 Te bidi agaduba deli bidibaso, te wiegi yai me ebeo. Te bidi si bidibaso, te wiegi yai da. Te bidi si kisasa sę ebaso da, teda augwali sigo sę te wiegi yai mu pedelaibao.
ECC 4:10 Ma, te bidi me deli te tulalubaso da, teda gasa mego aga ugwaba ma sagolobaso, usu yaibao. Tialima, te bidi agaduba deli bidali bidi te tulalubaso, te hobede mu ebao. Te aga tau sabo bidi meni ebao.
ECC 4:11 Te augwali si kedau ebaso da, teda augwa si deliba pageasa piao, tama augwa si kedau me egobeo. Tialima, te deli naga bidali da, te magi elama aga digi aga tigi posolo ilaibawe?
ECC 4:12 Te boi bidigo deli dali hwįbaso, te boi bidigo aga aiyaba elaluabo homu ebao. Tiali goli, boi bidigo bidi si dali hwįbaso te aga usu meni da homu yaibao. Awe, te tiwai me, te augwaligo dila pai hobi sela selama, te haliga tubaso da, teda te haliga polo me togwa pogobeo.
ECC 4:13 Te magi nai meni yai bidi me deli, ma kalabus bidi me deli, te tobage bidi si te tǫ kantri pedai tonalubo bidi king pedelali. Tialima, te king monu dabe pedalubo sogo, te bidi dabego agaba te wiegi yai homu kolesaga momainu yali goli, agai augwaligo po odobeo. Teda aga dwai king dao. Me ma, te wiegi yai homu kolesaga elalubo gesi bidi, aga magi nai meni yai goli, te bidi agai te tobage monu dabe king bidi aiyaba elalubo dao.
ECC 4:15 Eno suali, te monu dabe king bidi isibaso da, te gesi ogwa bidigo agai pesage selama, te king pedelali. Tama te tigidali tǫ pedai we bidigo te gesi king bidi wali pai, te eno suali.
ECC 4:16 Agai te genuai hani we bidi mu tonaluai, te bidigo augwali nedabo usu meni yaibao. Tiali goli, aga te isiyu da, augwaligo te agai yali genuai sę dabe homu kone ma palogobeo. Te kolesaga me aga page meni yai elalubao, te bidi udulama, te wali tola sigi painu ebo tiwai ebo dao.
ECC 5:1 Nago te Godigo beba pabo sogo, naga yali kolesaga bugagia homu kone palama pao. Tiyu nage odolali pabuo. Te nago kolesaga sainu pobaso, te wiegi yai da, tiali goli te odolali ofa ebo tagalao, te kolesaga sisąwai bidi dabego elalubo kolesaga tiwai igio. Te tobage bidi dabe augwaligo te mena sę te Godigo gedude dolo elalusiąbo da, te homu konebeo.
ECC 5:2 Homu kone bugagia bolo palama, tama nosali nage hogodama, po pusao. Te nago God dali po mibo sogo, nago po hauwa odolali wagio. Magi baso meni, dagalude bidibo Godigo bomo genuai elalubao, tama da olo bidi e tǫde naga bidibao. Tibaso, nago po hauwa aga dali me olamo dao.
ECC 5:3 Te nai hauwade nago moni homu hauwa dogia peyu da, te nago na hauwa yabuo. Te nago po me hauwa obaso da, teda nago po gani bole odolali weyu, te wabo pabo bidigo po wabo tiwai igio wali.
ECC 5:4 Te nago Godiba po dąų wai digi, nago te dąų wali po polo usu nao. Godigo te dwagi yai homu kolesaga sabo hagela homu ebo bidi dali dwagi yai homu egobeo. Tama tibaso, nago te dąų walali po polo usu nao.
ECC 5:5 Ma, nago te dąų walobo po wasiąbaso da, teda te usu dao. Tiali goli, nago God dali bomai po me deli dąų walobo po wai digi, tama nago te dąų wali po wali pisąbaso da, teda te dwai mu dao.
ECC 5:6 Tiyu, nago po odolali dąų wali digi te nage sęgę sabuo. Te nago po me deli dąų waibaso da, teda nago nosali prisba te tama po ma waligio, nago bugagia homu kone palisąma, nago te po dąų wali. Magi baso te Godigo nage dali haliga sębę ilibaso, te agai nago sę dene elama sali nai dabe dolabuo.
ECC 5:7 Nago te na hauwa ebo bidi goli, ma nage te po hauwa wabo bidi, odao. Te tobage kolesaga ebo te page meni yai kolesaga naga dao. Nage te God dologode sesemane sogo bidao.
ECC 5:8 Gavman bidigo te magi nai meni yai bidi dabeba sęgę mabo nago subaso, te nage homu dwagila hogodigio. Ma, te po tų ebode augwaligo po bugagia dodolisąma, te olo bidi bugagia dugulaluabo sę isiąbaso da, teda tede noma sigio. Magi baso meni. Te kolesaga page e tiwai elalubao. Te ofisa dabego te tobage kolesaga ebao, augwali te augwa bos tonalubo bidigo osolama, te augwaliba sęgę muani. Tama te bos tonalubo bidi dabe augwali tobolu ugadu elalubo bidi dabe bidibaso, te augwaligo me te tobage deli tigi poai kolesaga ebo dao.
ECC 5:9 Te tama kolesagade te ofisa dabe augwaligo te we bidi dabe augwa tǫde sali mone te ugwadu gasa daganobo mone dali saibao. Tama te ofisa dabego te sali mone dabe augwa hasi tomode digi dobola sali. Tama king bidigo me te we bidi dabede sali mone te gasa ugadu daganama sabo dao.
ECC 5:10 Te bidigo haligade te mone hauwa sabo homu hogodalobaso da, teda sesemane sogo aga homude aga mone sǫą pabo homu idueibao. Te mone bidi pedelabo homu ebo bidi yaibaso da, teda agai te sali nai sibi tigidaligo aga usu nisąbo homu eyu ebao. Tialima, te mone godolo ebo homu kolesaga iduali da, te aga page meni yai elalubao.
ECC 5:11 Te bidigo sabo mone ugaba holobaso da, teda te abagi hauwa asudu gebo sę elama, aga dali bidagasaibao. Tialima, te bidigo aga mone dabe elalubo suali, tiali goli agai aga doado bage abela usu meni yaibao.
ECC 5:12 Te sę bidi dabe augwa bugagia hulide godege pibo dao, te augwaligo nai hauwa elaluali, ma te augwa nai sǫą paibaso me tagalao. Tialima, mone bidi da, te tiwai me egobeo. Agai aga te nai doado bage homu hauwa dogia pelama, tibaso aga godege bugagia me pigobeo.
ECC 5:13 Eno suali, e tǫde dwai kolesaga mu me deli elalubao. Te kolesaga e tiwai dao. Bidi me deligo aga mena nai godolo homu mu aiyaba elaluama, te nai dabe me abeligobeo. Menio. Agai aga mone bugagia mu sabodu tonalubo dao.
ECC 5:14 Tiali goli nosali, aga mone sabo sę yali bisnis tulaluama, tama aga mone tigidali te hagawaibao. Tialima, agade te nai me deli elalusiąma, te aga isibo si, teda aga ogwago sabo nai meni yaibao.
ECC 5:15 Te idago da ame nani sogo, dago nai me deli meni yai elaluali. Dago tigi habu olo naga elaluali. Te tiwai naga, da isibo sogo, da olo naga mu paibao. Mu tama, dago te nai hauwa sabo sę dene yali, tiali goli dago te nai deli me sela pogobeo.
ECC 5:16 Te me te dwai kolesaga mu elalubao. Da te tǫdu nai meni yai bage naga pedelali. Te tiwai naga dago te dago te tǫ tagalobo te tobage deli kolesaga naga yaibao. Te da tǫde bidibo sogo, da te odolali sę dene ebao, te bidi udulama, te wali nogogo tola sainu ebo tiwai ebo dao.
ECC 5:17 Da e tǫde dugulalubo page te wiegi yai me elalubeo, te sesemane sogo dago haliga sęgę eyu, wado po weyu, gasi siyu, idubo dao.
ECC 5:18 Eno te sęde homu koneama, tama eno koneani, te kolesaga me deli uga ela holai elalubao. Te kolesaga e tiwai da. Dago nai tuyu, ąį tuyu eyu, te dago tigidali naide sę dene yali te wiegi yai pemene eyu, te pęwadage sogo Godigo dabolo e tǫde bidimainu bodolu mani side dago te tama sę emainao. Magi baso meni. Godigo dago te sę emainu dąį ilai dao.
ECC 5:19 Te Godigo bidi me deliba te mone hauwa menama, tama te bidi aga te nai dabede wiegi yai pemene emainu sula tagalali, te aga ebo sęde me, te sula tagalu, te bugagia dugulalubo me te bugai haliga ilibaso da, teda te wiegi yai da. Magi baso meni, te nai dabe te Godigo agabolo te wiegi yai homu pemene ilibo sę eyu, te bidibolo mabo dao.
ECC 5:20 Godigo aga te sesemane sogo dugulalu, wiegi yai pemene ebo sę sula tagalali, tialima te bidi aga e tǫde pęwadage sogo bidabo elalubo homu elama, te aga bidibo moni homu hauwa dogia pelama, me bidigobeo.
ECC 6:1 Eno suali, te kolesaga dwai me deligo te genuai sęgę te tǫde bidi dabe augwaliba mobao. Te kolesaga e tiwai dao.
ECC 6:2 Godigo te genuai nogi, me te mone doado bage hauwa te bidibolo mawaibao, tama te bidi aga godolo ebo nai me deli agade me sǫą pogobeo. Tiali goli, Godigo te bidi aga te nai dabede wiegi yai pemene emainu sula tagalobeo. Tama nosali, te gasa hani bidi me deligo te nai dabe saibao, tama aga te naide wiegi yai pemene dogia paibao. Te tebo kolesaga te dwai mu elama, te aga page meni yai mu elalubao.
ECC 6:3 Te bidi me deligo wai dabe te bidi sese a naga, te 100 elaluali bidi te kibu be hauwa bidali. Tiali goli, aga wiegi yai doado bagede wiegi yai pemene isąyu, tama te aga isibo sogo augwaligo aga bugagia me pubalusiąyu da, teda te dwai mu yali. Eno mu po tama obao, te wai bǫų me deli aga idago haligade isali waigo, agai te bidi aiyaba elalualio, te bidi te umabo hauwa kibu be te tǫde bidali digi tagalao.
ECC 6:4 Te tobage wai da, te olo nai tiwai da, aga nogi menio, te augwaligo aga pubulali sogo, augwaligo aga homu kone ma ebeo.
ECC 6:5 Te wai bǫųgo te giliga ula me subeo, te mena nai me deli agai me konebeo. Tiali goli, megi aga bugagia toma neyu bidibao, tialima te waigo dugulalubo pagego te nai doado bage hauwa elaluali bidigo dugulalubo page agai aiyaba elaluali.
ECC 6:6 Magi baso meni, te bidi agai aga te nai doado bagede wiegi yai pemene homu menisąwai. Te bidigo kibu be te bidi sese umabo, te 1,000, ma 2,000 kibu be bidali goli, agai te wai bǫų aiyaba me elalubeo. Da tigidali isilama, te bulu deli naga paibao, te mu da, agawe?
ECC 6:7 Dago nai tuabo homu elama, te dago sesemane sogo sę ebo dao. Tialima, dago te sela tubo naigo, te dago godolo yali homuba me usu nugu pogobeo.
ECC 6:8 Magi baso te kolesaga koneani bidigo te kolesaga konesiąwai bidi aiyaba elalubo dawe? Te magi nai meni yai bidigo wiegi yai kolesaga te we bidi augwaligo gedude ebaso da, teda tego aga magi elama tau saibawe?
ECC 6:9 Te dago dena elalubo naide dwagi yai homu pemene eyu bidao. Te kolesaga ebogo te haniani naide pesą ebo kolesaga aiyaba elalubo dao. Te naide pesą ebo kolesaga aga page me elalubeo, te bidi udayu, te wali nogogo tola sainu ebo tiwai naga ebao. Te dago sali nai dabede wiegi yai homu pemene ebaso, usu yaibao.
ECC 6:10 Tigidali nai pedalubo, te odolali me pedalubeo. Menio. Polobadu mu Godigo po weyu, te augwali pedelao wali gilama, te augwali pedalubo sę ebao. Te Godigo da bidigo kolesaga koneanio. Tibaso, dago aga dali konila po me wagobeo. Magi baso meni, te agai bomogo dago bomo aiyaba elaluai dao.
ECC 6:11 Dago bobobage po wabosi, te tagalao, te usugobeo, dago aga aiyaba elalugobeo. Dago po olo tama waibao, tama tebogo da tau mu sogobeo.
ECC 6:12 Da bidi te pęwadage sogo naga te tǫde bidibao, te ni noma elaluali te pǫgo giliga ge sesela sąbo si te polo menia sabo tiwai ebao. Te dago bidibo ulago page meni yai elalubao. Tialima, mena wiegi yai kolesaga dago wali pabo usu yabo te dego koneaibawe? Te da isai madigi, te magi nai mu e tǫde pedelabo dego mu koneaibawe?
ECC 7:1 Te bidi dabego homugo nage wiegi yai bidi da homu ebaso da, teda te wiegi yai mu da, te genuai mone mugo abelebo wiegi yai denami ebo tigide pibo wel aiyaba mu elaluali. Me, nage isibo side, tebogo te nago idago nage ame nani sogo te aiyaba elalueibao.
ECC 7:2 Da te bidi isaide te bidi dabe gela wabo beba me paibaso, te wiegi yai kolesaga ebao, tama te genuai nai da tubo beba pabo kolesaga ebo te aiyaba elalubao. Magi baso meni, da tigidali bidi isaibao. Tialima, da tǫde bidibo sogo yaibaso, dago tede bugagia homu kone paliąo.
ECC 7:3 Te dago nai me delide haliga sęgę ebaso, te wiegi yai da, te gisugu wabo kolesaga aiyaba elalubao. Mu dao, te haliga sęgę ebaso, te dago gesabidi hulia sali, tiali goli te tama tebogo da tau sobaso, te tǫde kolesaga tigidali bugagia homu kone palumainu ebo dao.
ECC 7:4 Te nago wiegi yai homu kolesaga elalubaso, teda nage te isali bidide diligi weyu bidibo bidi dabe dali bidabo homu yali. Tialima, te wiegi yai homu elalusiąbo bidi dabe, augwali te haniani dobo kolesagade pemene ebo bidi dabe dali bidabo homu ebo dao.
ECC 7:5 Te wiegi yai homu kolesaga elalubo bidi dabego nage dali wado po weyu, te nage dodolobo po obaso da, teda te wiegi yai kolesaga ebao, tama te wiegi yai homu kolesaga elalusiąbo bidi dabego balia weyu, nageba mani genuai nogi te aiyaba elalueibao.
ECC 7:6 Te wiegi yai homu kolesaga elalusiąbo bidi dabego gisugu obaso da, teda augwaligo gisugu wabo te page meni yai elalubao. Awe, te kolesaga te sesane yai bono te siade ulali te podila sabo tiwai yali, tiali goli agai te sene sospen posolo mu ilabo usu egobeo.
ECC 7:7 Te wiegi yai homu kolesaga elalubo bidi bidali, tiali goli agai bomonama eyu, gasa bidigo mone sobaso da, teda aga te wabo pabo bidigo homu kolesaga tiwai elalubao. Me, te bidi mego te po tų odoyu, te bidi agai gasa bidigo nogode geme mone sabogo te kolesagago agai te wiegi yai homu kolesaga dolai dao.
ECC 7:8 Te bidi mego sę me deli hodolobaso da, teda te wiegi yai kolesaga ebao. Tialima, agai te yali sę siminibaso da, teda te sę uganu ela holali dao. Te magi nai pedalubo bugagia tonalubo bidigo ebo kolesagago te hagoma homu ebo kolesaga aiyaba elalubo dao.
ECC 7:9 Nago gasa bidi dali haliga sębę polo mu igio, magi baso meni, haliga sębę polo ebo te wiegi yai homu kolesaga elalusiąbo bidi dabego homu kolesaga dao.
ECC 7:10 Nago te po wagio, “Magi baso polobadu sogogo te megi sogo aiyaba elalubawe?” Nago te tobage po obaso da, te nago wiegi yai homu kolesaga elalubeo.
ECC 7:11 Te tǫde bidibo tigidali we bidigo te wiegi yai homu kolesaga elalubaso, te usu yaibao. Te wiegi yai mu ebao, te wiegi yai nai dabe te aya isainu dabolo mabo tiwai ebo dao.
ECC 7:12 Wiegi yai homu kolesaga te mone tiwai elalu, tama te dwai sogo pedalubaso, da tau saibao. Tialima, wiegi yai koneani homu kolesagago te mone aiyaba elaluali, te da umabo sogo mu tau siyu, te da bugagia bidibao.
ECC 7:13 Te Godigo yali sę tigidalide bugagia homu kone palao. Te Godigo nai me deli nigali te gagea pai elalubaso da, teda dego mu ma dodolaibawe?
ECC 7:14 Te nago bidibo ulade sę dabe te bugagia dolalubaso da, teda nage wiegi yai homu pemene yao. Te dwai sogo nageba pedalubaso da, teda nago te tama homu yao, Godigo te wiegi yai sogo dabolo tagala palu, te dwai sogo me dabolo asomainu tagala palaibao. Tibaso, magi sę nosali daba pedelabo, te dago konebe dao.
ECC 7:15 Eno bidibo ula te olo nai tiwai elalubao, tialima ena te tǫde bidibo sogo eno te haniani kolesaga ebo suali. Eno suali, bidi mebago doloba pai kolesaga wali pali, tiali goli te bidi dabe augwali isalio. Te bidi mebago dwai kolesaga ebo eno suali, tiali goli augwali bobage sogo sesabi elama, bidibo dao.
ECC 7:16 Tibaso, dago doloba pai kolesaga wali pabo bomo mu eyu, te wiegi yai homu kolesaga sabo sę igimio. Tiyu, dago dena digi dolobo dao.
ECC 7:17 Te me, dago te tobage dwai kolesaga me te wabo pabo bidi dabego ebo homu kolesaga wali pabo bomo mu igio. Tiyu, dago dena isabo sę asesa selebo sę bomo ebo dao.
ECC 7:18 Nage te tobage kolesaga si tomode bilao. Te God dologoba pelama bidibo bidi yaibaso da, teda agai te magi sę yali te tagalao, te wiegi yai naga pedelaibao.
ECC 7:19 Te taunde tobolu bidi nogo si elalubaso, augwaligo te taun bomo yai pedelabo tau somainu yaibao. Tialima, wiegi yai homu kolesagago te bidi me deli boma pai mu pedelama, te taungo tobolu bidi dabego bomo aiyaba elalubo usu yaibao.
ECC 7:20 Te doloba pai bidi me deligo wiegi yai kolesaga sesemane sogo me idugobeo. Menio. Me sogo agai me sęgę sabo dao.
ECC 7:21 Nago te we bidi augwaligo mibo po tigidali me odogio. Te nago augwaligo wabo poba bugagia olo mubaso da, te naga sę bidigo nage posobo po dwai wabo te nago odobo homu yaibao.
ECC 7:22 Magi baso meni, nago te tiwai koneao, hauwa sogo naga digi nago gasa bidi posobo dwai po wabo dao.
ECC 7:23 Eno te tama homu ebo tigidali bugagia homu kone palali, te aga page mu gegela suainu yali, magi baso meni, ena te homu kolesaga mu konea pabo bidi mu pedelainu yali. Tiali goli, eno homu kolesaga te usu ebeo.
ECC 7:24 Te tigidali nai pedalubo page hanilama gegainu ebo sę te genuai mu dao. Dago te digibulu uganu mu elalubo nai, ma te aiyanu mu elalubo nai, te dago sueinu gegebo tiwai ebao. Tialima, dego mu te nai dabe page elalubo gegelama sueibawe?
ECC 7:25 Tialima, eno sągą dili bomo mu selama dolalu, te eno sę bomo eyu, te tobage wiegi yai homu kolesaga tigidali sabo sę bomo yali. Tama eno te tobage dwai kolesaga page me gegelama, koneabo sę bomo eyu, te wabo pabo bidigo homu kolesaga tiwai ebo gegebo sę bomo ebo dao.
ECC 7:26 Eno te tiwai page gegelama suali, te isibo kolesaga te ha ebo nai tiwai dao. Tiali goli, te bidi dali dwai sę yainogo sinabo we te bidi bolo tubo kę tiwai dao. Te da te ha mu ebao. Te tobage we da, te sųgų hagane togobo wa tiwaigo da bidi tola sobao. Te agai nogo te sen tiwaigo da kalabus ebao. Godigo te bidi me deli godolo ebaso da, teda te bidigo te tobage hagane togobo wa gedelama, wi paibao. Tialima, te hagane togobo wago te sęgę sabo bidi dabe tola sobaso, te augwali me geda muyu, ela soagobeo. Mu menio.
ECC 7:27 Homu kolesaga mu konea pali bidigo te tiwai po wali, mu tamao, eno te tigidali sę page koneainu sę dua dua ela pelama, tama megi da, eno te we dabe sibigo kolesagade koneai dao.
ECC 7:28 Eno te wiegi yai we me deli gegebo sę yali, tama eno gegebo gegebo sę yali, menio. Te bidi sese umabo hauwa te tausen we bidi dabe tomode, eno suali, te deli deli wiegi yai bidi bidali. Tialima, eno te wiegi yai we deli bidibo me subeo.
ECC 7:29 Godigo te we bidi dabego sunumi dąį ilali, te augwaligo wali pabo sę dene ebeo. Tialima, augwa digi te tobage homu kolesaga hauwa pedelali, te tama teyu, te augwali bilibo sinabo sę mu ebo dao.
ECC 8:1 Te kolesaga page mu konea pali bidigo naga te mena ebo page mu koneaibao. Tialima, dego mu te kolesaga page mu koneai bidi aiyaba elalueibawe? Te bidigo gesabi hulia sobaso da, teda wiegi yai homu kolesaga igulubaso, te aga gesabidi ula ma ebo dao.
ECC 8:2 Eno te tama po obao, nago te kingo po wali pao. Nago te Godigo gedude te bomai po dąų waliyu, nago te kingo wabo po wali paibao po wai dao. Nago te bomai po dąų wali te homu kone palama, tama nago te kingo po me sela sąnamu dao.
ECC 8:3 Nage te king dali bidibaso da, teda nago asesa polo te king tagaligio. Te nago king dali po konila obaso da, teda nago bomo elama mu wagio, magi baso meni, king aga digi aga homu wali pabo dao.
ECC 8:4 Te kingo mena po me obaso da, teda tigidali bidigo te po wali pabo dao. Te niwai bidi deligo agabolo me hanalugobeo, “Magi baso nago te tiwai yaibawe?” te wagobeo.
ECC 8:5 Te kingo po tigidali wali pabo bidi yaibaso, te aga bugagia bidaibao, me tede te konea pai bidi mugo te magi sę yabo sogo bodolu munama, te sę yabo sunumi konealueibao.
ECC 8:6 Magi baso meni. Te da bidi dabego sęgę genuai mu pedelali digi tagalao, te tigidali sę dodolabo sogo dąį ilali elalubao.
ECC 8:7 Te mena sę nosali pedelabo dago konebeo. Te sę dabe yaibao po mena bidigo dabolo me wagobeo.
ECC 8:8 Te isibo sogo, te dago tigide homu ogwa wai tomode bidali mobo bidi tagalainu ebaso, te dago palibaso, usu egobeo. Te dago isibo sogo bodolu hasegelainu ebaso, usu egobeo. Te hwįbo sogo, te ami tobolu bidi ofisa bidigo te aga ami bidi dabego te boi hwįbo pesage tagalama, te augwa buluba ma begasa pomainu sula tagalogobeo. Te tiwai me, te bidi mego dwai kolesaga wali pobaso da, teda aga te kolesagaba mu dagana selama, te tagalainu ebaso, usu me egobeo.
ECC 8:9 Te we bidi augwaligo te tobage sę tigidali te tǫde ebo sogo eno sulama, te sogo eno homu kone palobo sę yai. Te sogo eno suali, te genuai bidi dabego te gasa we bidi dabe aiyaba elalubo sę ebo suali. Tama te dwai sę ebogo augwa digi aiyaba elaluali, te me eno suai dao.
ECC 8:10 Me sogo te bidi dabe augwaligo te dwai bidi me deli isali te gų pageba pubaligi pabo eno suali. Tama te we bidi augwa te gų page tagalama, te dwai bidigo dwai kolesaga eyu bidali taunba ma begasa asali. Te augwali aselabo sogo, te we bidi augwaligo te dwai sę yali bidi nogi ugaba sali. Te tama tebo kolesaga me aga page meni yai elalubao.
ECC 8:11 Me sogo te bidi me deligo dwai sę elama, tama augwaligo agade po tų elama, te agaba mabo dene po dodolama elalubao. Tiali goli, augwaligo sesabi elama, te dene agaba mabeo, aga olo bidali. Tama tibaso, te tama tebo sęgo te we bidi dabe augwali homu hodolama, te augwaligo dwai kolesaga ebo bomo elama yaibao.
ECC 8:12 Me sogo te dwai sęgę sabo sę ebo bidi dabego te dwai sę hauwa yali, tiali goli augwali bobobage sogo sesabi elama, te tǫde bidu, te augwali polo me isibeo. Eno koneani, te bidi dabego te tama po waibao, “Te God dologoba bidigi pali bidi, te bugagia bidibo dao,” po wabo dao.
ECC 8:13 “Te dwai kolesaga ebo bidi da, te aga bugagia me bidigobeo. Te aga pęwadage sogo naga te tǫde bidaibao, magi baso meni, aga te God dologoba pelama bidibeo.”
ECC 8:14 Mu tama, augwaligo te tama po wabo dao, tiali goli eno suali, te gasa kolesaga pedalubo eno suali, te augwaligo po wali tiwai gilama pedalubeo, tama te kolesaga mu geda muani. Me sogo te doloba pai kolesaga ebo bidi te dwai dene sali, te dwai bidi dabego sabo sę usu te doloba pai bidigo saibao. Tialima, te dwai sę ebo bidi dabego te doloba pai bidi dabego sabo sę usu te augwaligo sali. Te tama tebo kolesaga te aga page meni yai elalubo dao.
ECC 8:15 Tialima, eno homugo te wiegi yai da homu ebaso, te dago wiegi yai pemene ebo kolesaga wali pabo homu ebao. Te dago wali pabo gasa wiegi yai sunumi me elalubeo. Tibaso, dago te nai me ąį tuyu, te nai dabede dago wiegi yai pemene inao. Mu tama, dago sę ebo sę dene mu yali, tialima dago te pemene ebo kolesaga wali peyu, te tigidali side Godigo da e tǫde bidimainu sula tagalali sogo, te dago wiegi yai pemene inao.
ECC 8:16 Eno te wiegi yai homu kolesaga sabo sę bomo eyu, te tobage sę dabe te bidi dabego te giligade me hulide ebo sueinu yalio.
ECC 8:17 Tama eno te Godigo yali sę tigidali sulama, te eno koneai, dago e tǫde pedelali nai dabe page gegainu yali usu isąwani. Te dago sągą dili budulama, te dago gegelama suabo sę dene yali digi, tagalao, dago usu egobeo. Te homu kolesaga konea pali bidi dabego po weyu, augwaligo te nai dabego page konea pali po obaso, te tagalao, augwaligo te mu po me wabeo. Augwaligo me te page koneainu gegebo usu meni ebo dao.
ECC 9:1 Eno te nai dabede bugagia homu kone palama, tama te tiwai eno koneanio, Godigo digi te doloba pai bidi dabeba pedelabo nai dabe dąį ilali, te wiegi yai homu kolesaga elalubo bidi dabeba me tama tialio. Agai te nai dabe godolo yabo sogo dąį iliyu, te nai dabe godolo isiąbo sogo dąį iliyu yali. Te magi nai nosali pedelabo te dago konegobeo. Ma, dwagi yai sę pedelaibawe, ma dwai sę daba pedelaibawe, te da bidigo konebeo.
ECC 9:2 Tialima, te nai me deli da tigidaliba pedelabo elalubao, te da doloba pai bidi, ma dwai bidi, ma da wiegi yai bidi me, ma da meda meni yai bidi me, ma da God gedude meda yai bidi me, ma ofa yai bidi, ma ofa isąwai bidi yaibaso, te tagalao. Deli tigi poai sę te wiegi yai bidiba me dwai sę ebo bidiba pedelaibao. Te deli tigi poai sę te Godiba po dąų wali bidiba eyu, te Godiba po dąų wasiąwani bidiba pedelaibao.
ECC 9:3 Deli tigi poai sę da tǫde bidi tigidaliba pedelaibao, tama te sę dolo me elalubeo. Te we bidi augwali tǫde bidibo sogo, dwai sę ebo kolesaga dali, te wabo pabo bidigo kolesaga tiwai dali, te augwaligo haligade pągąnalubao. Tama nosali, augwali isiyu, tama te polobadu isali bagego hani tomoba pabo dao.
ECC 9:4 Te bidibo ula elalubo yowigo te isali hasa laion aiya elalualio. Te te tiwai naga, te bidibo ula elalubo bidigo te isali bidi augwali aiyaba elalubao. Magi baso meni, te nai me deli augwaliba pedelabo te augwaligo koneanio. Augwaligo koneani, te augwali isaibao. Tialima, te isali bidi dabego, augwaligo magi nai deli me konebeo. Te augwaligo wiegi yai nai munu me sogobeo. Te bidi dabego augwali homu kone gegeda palali dao.
ECC 9:6 Te we bidi augwali isibo sogo, te mena nai godolo yali, me te wado homu yali, me te augwaligo mena nai pesą yali, te tigidali silalio, tama te we bidi dabe augwaligo magi sę deli munu me te tǫde me egobeo.
ECC 9:7 Tegao, nage pelama, nai tulama, wiegi yai pemene yao. Nago te wain ąį tulama, te bugai haliga yao. Godigo te kolesagade usu da po wai dao.
ECC 9:8 Sesemane sogo nage bugagia au elama, pemene yao.
ECC 9:9 Dago bidibo ula te olo nai tiwai ebao, te aga page meni yai elalubao. Tialima, nago te we deli godolo homu mu ebaso da, teda tigidali side te Godigo nage da olama, dąį ilali te tǫde bidibao, nago te we dali wiegi yai homu pemene yao. Godigo te kolesaga yabo sę nageba dąį ilali, te nage tǫde bidibo sogo nago te sę emainogo yali.
ECC 9:10 Te nago sę me deli ebaso da, teda nago sągą dili tǫde dąų walama dolalu, te sę mu tama yao. Magi baso meni, te nago sę me isiąyu, ma homu kolesagade kone paliyu, ma te wiegi yai homu kolesaga konea sabo sę te isali bidi dabego bulude me egobeo, te nage pabo bulude te tama sę dabe me egobe dao.
ECC 9:11 Tama eno nai me deli ma te tǫde sualio. Te bomonama mu udabo bidi dabego te sainu uda yali nai me sogobeo. Te boma pai ami bidigo te boi bidi dali hwįnama, ugaba boi bidi hani me aiyaba elalugobeo. Te wiegi yai homu kolesaga me, ma te genuai kolesaga sai bidi dabe, augwaligo te mone hauwa me sogobeo. Te haniani sę ebo kolesaga usasai bidi dabe, augwaligo te genuai sę me sogobeo. Te magi magi sę dabe te da tigidaliba pedalubo dao.
ECC 9:12 Te magi genuai sęgę daba pedelabo dago konebeo. Te dwai sęgęgo da polo tama mu deli sogo gegaibao, te hagane mubo nai wago te sųgų ma ba tola sabo tiwai ebo dao.
ECC 9:13 Te sę me deli pedalubo eno suali. Te wiegi yai homu kolesaga elalubo bidigo te wiegi yai sę ola mobao, eno te tama homu yali. Eno te tiwai sę ebo sualio.
ECC 9:14 Te dwasianu hanu taun me deli elaluali, tama we bidi hauwa te taunde bidibeo. Te bomai king me deli te aga ami bidi dabe hauwa dali aselama, te boi hwįnama, te taun sainu yai. Te ami bidi dabego te taun bagulama, tama te taun bagulali masigi obo aluabo nai dabe nigalio.
ECC 9:15 Tialima, te taunde magi nai meni yai bidi me deli bidali, tama te bidigo koneani homu kolesaga wiegi yai mu elaluali. Te agai wiegi yai homu kolesagago, agai te taun te boi bidi dabego nogode ma sabo sunumi gegelama sualio. Tiali goli, nosali te bidi dabego te magi nai meni yai bidi homu kone munu ma ebeo.
ECC 9:16 Te tiwai dabolo ola manio. Wiegi yai homu kolesagago te genuai bomo aiyaba elalualio. Tialima, te we bidi dabe augwaligo te tama homu yali, te bidi me deli magi nai meni yai bidi bidibaso da, teda agai wiegi yai homu kolesaga elalubo te olo nai tiwai da homu ebo dao. Tibaso, augwaligo agai po odoba homu ebeo.
ECC 9:17 Te wiegi yai kolesaga elalubo bidigo dua dua wabo po dago odobaso, te wiegi yai dao. Te tobage bidigo pogo te wiegi yai homu kolesaga elalusiąbo bidi hanigo tobolu bidigo genuai hae wabo bidi aiyaba elalubo dao.
ECC 9:18 Wiegi yai homu kolesagago te boi hwįbo nai aiyaba elalubo dao. Tiali goli, bidi me deligo dolo meni yai kolesaga ebaso, agai te wiegi yai kolesaga hauwa dolobo sę ebo dao.
ECC 10:1 Te bolia dabe te wiegi yai denami ebo wel elalubo botol tomoba pelama, te augwali isibaso da, teda te wel tomode dwai kugumini yaibao. Te tiwai naga, te bidi me deligo te wabo pabo homu kolesaga dwasianu ebaso da, agai te aga wiegi yai homu kolesaga dolama, tama aga digi genuai nogi dolaibao.
ECC 10:2 Te wiegi yai homu kolesaga elalubo bidi agai wiegi yai kolesaga ebo dao. Tialima, te wiegi yai kolesaga elalusiąbo bidi, agai te dolo isąwai kolesaga ebo dao.
ECC 10:3 Te bidi te sunumidu naga bilali goli tagalao, agai kolesaga te tiwai gasa bidi dabeba ola mani, aga wiegi yai homu kolesaga elalusiąbo bidi dao.
ECC 10:4 Te naga tobolu bidigo nageba wado po obaso da, teda nago naga sę me tagalamuo. Te nago sali sęgę genuai elalubadi digi, tagalao, te nage bugagia dua digi bidibaso da, teda agai nago sali sęgę te tagalaibao.
ECC 10:5 Eno suali, genuai sęgę me deli te bidi dabe mebago yali, te sę yabo page te tobolu bidide naga elalubao. E tiwai dao.
ECC 10:6 Te tobolu bidi dabego te genuai sę te wiegi yai homu kolesaga elalusiąbo bidi dabeba mawai, tama te mone hauwa elalubo bidi dabego sę sali, te wiegi yai sę me sabeo.
ECC 10:7 Tama me eno suali, te olo sę ebo bidi dabe te hos kibu daide ugadu dugulasa pabo suali, tiali goli te genuai bidi dabe te sągągo pali, te olo sę ebo bidi dabe pabo tiwai yali.
ECC 10:8 Te bidi mego genuai tǫ dedage dogobaso da, teda aga digi te dedageba tulalueibao. Ma, te bidigo te masigigo bagulali obo alubaso da, teda te hasamanigo aga gąų kelaibao.
ECC 10:9 Ma, bidigo te be sę yabo masigi togobo sę ebaso da, teda me sogo te masigi dabego aga tigi selaibao. Te ni pedebo sę ebo bidi, me sogo te nigo aga dolaibao.
ECC 10:10 Te bidigo puna pai sigi hwą agai dulusiąwai yaibaso da, teda agai te ni gelebo sinabo sę dene mu yaibao. Me ma, te wiegi yai kolesaga elalubo bidigo da, te agai te ni gelebo sę wiegi yai yaibao.
ECC 10:11 Te bidi mego te hasamani dua digi bidimainu ebo kolesaga elalubo bidi yaibaso, te wiegi yai da. Tialima, te hasamanigo aga gąų kelemainu ilibo bidi yaibaso da, teda aga te koneani kolesagago aga magi elama tau saibawe?
ECC 10:12 Te wiegi yai homu kolesaga elalubo bidigo aga wabo pogo digi te agaba genuai nogi mawaibao. Tialima, te wiegi yai homu kolesaga elalusiąbo bidi te aga pogo digi aga dolaibao.
ECC 10:13 Te tobage bidigo po gagalama wabo sogo, agai wabo po geda mueibao. Te agai po silainu ebo sogo, te po dwai mu pedelali, te kolesaga umuna sai bidi mugo wabo po tiwai yaibao.
ECC 10:14 Te wiegi yai homu kolesaga elalusiąbo bidigo po oda pidu gebo dao. Te magi sę nosali pedelabo dago konebeo. Te da isai madigi, magi sę e tǫde pedelabo dago konebe dao.
ECC 10:15 Te wiegi yai homu kolesaga mu elalusiąbo bidigo agai te aga beba pabo sunumi gegebaso, usu meni yaibao, te tobage bidigo odolali sę dene eyu, te aga bomo sia sabo dao.
ECC 10:16 Hobede yao! Te tǫ kantri pedai king me deli te ogomani homu tiwai elalubadi, tama te kantrigo polalubo bidi dabego te kigamu digi hodolama, te nai da naga tueinogo ebaso da, teda genuai sęgę te tǫ pedai kantriba pedelali.
ECC 10:17 Me ma, te gasa tǫ pedai kantri king me deli te genuai bidigo ogwa yaibaso, tama te tǫ kantri polalubo bidi dabego te genuai nai da tuyu, te ąį tuyu yali te sogo, te tigi naga dąų walobo sę naga eyu, te gęǫ page isąbaso da, teda te tǫ kantri bugagia mu bidai dao.
ECC 10:18 Te bidigo aga sę ebo hagela eyu da, te aga be walawala ni dabe gaga paibao. Awe, aga olo naga bidibaso da, teda te be pedu tologa pelama, te tulubage be tomoba pelama, te be dolobo dao.
ECC 10:19 Naigo te bidi pemene ilibo sę ebao, te wain ąįgo te bidi bugai haliga ilibo dao. Tiali goli, mone da, te wiegi yai nai te tobage sę tigidali ebo dao.
ECC 10:20 Te naga pibo be habu badu geme dualalu pila muani, te tagalao, nago te dwai posobo po te kingbolo ma te mone elalubo bidibolo me olamuo. Tama me, nago augwaliba dwai homu me igio. Tiyu, te ba me deligo nago te wabo po selama, te augwaliba wagi pidali weyu.
ECC 11:1 Nago sę tigidali pedai badu ebaso, te nosali nago yali sęgo dwagi yai du walaibao.
ECC 11:2 Nago konebe, mena sogo dwai sę e tǫba pedelabo elalubao, tialima nago mone sabo bisnis sunumi te nogo a naga olama, me badu si, ma a naga olama, me badu sela, te badu munama elalumainao.
ECC 11:3 Te haowade ąį pągąna pobaso da, teda tulubage te tǫba tulaibao. Te ni degali saut badu elalubaso, me not badu elalubaso, te tagalao, teda aga te ni degali pesagede munalubo dao.
ECC 11:4 Nago te wali me tulubage wiegi yai asobo tonalubo sogo yaibaso da, teda nago te gi sę elama, te inawai nai sela tugobeo.
ECC 11:5 Godigo tigidali nai nigali. Tialima, te waligo wali pabo tų menadewe, te dago konebe. Ma, magi elama te gesi wai bǫų te idago haliga tomode bidibo ula elaluali, te me dago konebeo. Te tiwai naga te Godigo ebo sę dabe te dago koneabo usu meni ebo dao.
ECC 11:6 Nago te nai wai hani te kigamu meba wasilama buliyu, te pio meba wasilama buliyu yao. Nago konesiąwaibao, te nago kigamu wasilama bulali nai wai, ma te pio naga bulali nai wai bugagia holobowe, ma te nani si dali bugagia holobo, te konegobeo.
ECC 11:7 Ula te wiegi yai nai dao. Te dago giliga ula sulama, dago wiegi yai pemene ebo dao.
ECC 11:8 Da tǫde bidalubo tigidali kibu bede dago wiegi yai pemene yao. Te dago kibu be hauwa bidali digi, tagalao, dago te sęde homu kone gegeda paligio. Te da kibu be hauwa mu te da isali bidi dabego hulia sai bulude bidaibao. Tigidali sę nosali pedelabo elalubao, te augwali olo nai dabe tiwai naga dao.
ECC 11:9 Dage gesi ogwa bidi dabe, dagego te dage gesi tigi elalubadi, wiegi yai pemene yao. Dagego te duga homugo godolo homu wali pobao. Tiali goli, dua da, Godigo dagego yali kolesaga te agai po tųde dagalaibao.
ECC 11:10 Te dago gesi bidi bidibo te sesabi elama, bobage sogo mu bidigobeo. Menio. Te olo nai tiwai elalubao. Tialima, dageba te nai dabego sęgę mobaso, te dagego homu hauwa igio. Tama dagego te duga tigiba dene mabo kolesaga wali pelamo dao.
ECC 12:1 Godigo da tigidali nigali. Tibaso, dage gesi ogwa bidi bidibadi digi dagego aga homu kone palao. Tiyu, dagego aga homu kone gegeda paligio, tama nosali dage monu dabe pedalubo side te dwai sęgęgo dage gegebaso, te dage deli deligo te tiwai po waibao, “Eno ena bidabo ulade wiegi yai homu pemene ebeo,” po waidali weyu.
ECC 12:2 Te sogo dagego gedu dwai elalubaso, dagego te tiwai homu yaibao, giliga, me polua, me te hǫ dabe, te bugagia ula isiąyu, tama te haowa tulubage sesemane sogo elalubao po waibao.
ECC 12:3 Te sogo dagego nogo bomo munu ma isiąma, te midigi saibao. Te dagego sągą bomo menisąma, gagea paibao. Te dagego kele me deli deli naga elalueibao, tama dagego te dila pai nai me tugobeo. Te dagego gedude me dwai elama, te dagego nai dabe bugagia tonono bilibo usu egobe dao.
ECC 12:4 Tama dagego olo te palia selama, tama te be bulu badu kilikili wabo odisiąyu, te masigigo wit pęgębo tiwai eyu, tama te musik haniani u wabo tiwai yali. Tialima, te dage godege piai digi yaibaso da, teda te ba po wabogo naga dage hodolaibao.
ECC 12:5 Te bulu dabe daide ugwadu dage bidalu, tama dage te sunumidu bilabo wi yaibao. Dagego tobolu nisi te tedela yai pedelama, tama dage te sunumidu bilibo sę dene yaibao. Tama te nai dabego dage haliga hogodolabo sę me iligobeo. Te dage isilama, tama duga sesemane sogo bidada peyu, bidada pabo buluba bidigi paibao. Te duga taunde bidibo we bidi dabego, te augwaligo gela weyu, hobede ebo balia po waibao.
ECC 12:6 Dage isisąbadi, dagego Godiba homu kone paliąo. Dage isibo sogo, te wiegi yai lam sole ula sia sabo tiwai yaibao, te silvago nigai sen toga peyu, ma te golgo nigai pou dis alua pabo tiwai yaibao. Tama te ulu ąį dedagede ugaba kekebo dwasianu nai winis toga peyu, tama te ąį tuali tǫgo nigali sospen tulaluama, alua pabo tiwai ebo dao.
ECC 12:7 Tama dagego tigi te tǫ ma pedelaibao, tama Godigo dagebolo te mani homu ogwa wai mobo bidi, te God agaba ma paibao.
ECC 12:8 Kolesaga mu koneani bidigo te tama po walio, “Tigidali nai te olo nai tiwai naga elalu, tama aga page mu meni yai elalubao,” wali.
ECC 12:9 E buku asęani bidigo koneani kolesaga wiegi yai mu elalubaso, tama agai te we bidi dabe augwali ola manio. Agai te tobage wiegi yai po dabe me begelama pusubo po bugagia dagalama wali, tama agai homugo te po dabe mu po da homu ebaso da, teda agai te po dabe e buku asęai dao.
ECC 12:10 Agai te bidi dabego ologo odolama, pusu yabo po dabe gegebo sę dene elama, tama agai te mu po dabe naga bugagia gegelama, asęai dao.
ECC 12:11 Te kolesaga mu konea pali bidi dabego po te poa pali dono dabe tiwai elalueibao, te sipsip kibu dabe gasaba bogeasa soyu ebaso, ela palu, ela soabo dono te sipsip tonalubo bidi dabego sabilaibao. Te kolesaga konea pali bidigo te buku me delide wiegi yai po elalubo subaso da, teda te po sesabi elama, sesemane sogo elalueibao, te nili dabe te ni namede dąų elalubo tiwai yaibao. God, da tigidali tonalubo bidigo, te po dabe dabolo mawai dao.
ECC 12:12 Eno waio, eno po me deli mu ma nagebolo wabo homu ebao. Te buku asębo bidi dabego te buku hauwa mu asębo dao, tama te tobage sę silabo me elalubeo. Te nago te buku sesemane sogo nedebo sę ebaso da, teda nago tigi hagela yaibao. Tibaso, nage te kolesaga ebode dua dao.
ECC 12:13 Te tigidali po siminagasu, eno te tiwai po obao, te da bidigo bidibo ulade polalubo sę te tiwai elalubao. Dago God naga dologode bidiyu, tama agai bomai po dabe wali pao.
ECC 12:14 Godigo dago ebo kolesaga tigidalide da po tų ilaibao, te wiegi yai kolesaga dabe me, dwai kolesaga dabe me, te geme dualama ebo kolesaga dabede me, da po tų ilaibao.
SOL 1:1 Te e bukude asęani elalubo balia po te wiegi yai balia da, te balia pogo te tigidali balia po aiyaba elalualio. Solomon aga digi te balia po asęai dao.
SOL 1:2 Hauwa sogo nago ena nono nani, tama eno homugo nago te tiwai sę ebo genuagia mu emainu homu ebao. Nago ena godolo elama, te nage enade mu isibao. Te polalubo nai mu da, tama te wiegi yai wain ąįgo pusu aiyaba elalubo dao.
SOL 1:3 Nago tigi denami wiegi yai ebao. Eno nago nogi odolama, te ena wiegi yai pemene ebao, te eno denami ebo sandade wiegi yai pemene ebo tiwai yali. Te we dabe sibi augwaligo nage godolo mu ebo dao.
SOL 1:4 Nago ena selama, da udayu pinao. Nage eno king bidi tiwai, te nago ena selama, te nago be habuba pinao. Te da si pemene yaibao. Nago ena godolo mu ebaso, tama da pemene mu ebao. Dago wiegi yai pemene ebogo te bidi dabego wain ąįde pemene homu ebo aiyaba elalubo dao. Nage uganu mu elalubao. Tibaso, tigidali we dabe nagede mu tulalubo dao.
SOL 1:5 Dage Jerusalem we dabego, odao. Eno tigi husugu yali, tiali goli ena sawi yai pai mu da. Eno tigi husugu yali, te Kedar dabego wa pai bulude te sel ugwa be dabe husugu yai tiwai dao. Tiali goli, ena gasa sawi yai mu, te sawi yai name ugwa dabe te king Solomongo bede walalubo tiwai dao.
SOL 1:6 Mu tama, eno tigi husugu yali, tiali goli dagego homugo ena te olo sę ebo we tiwai da homu elamuo. Giliga ena tigide dolama, tama eno tigi te tiwai pedelali. Te eno abe dedego ena dali wado po obaso, tama ena te wain gi dabe tonalugi pabo sę idualio. Tama tialigo eno tigi ena digi bugagia tonalusąwani.
SOL 1:7 Nage wiegi yai abagi da, eno nage godolo mu ebao. Te nago naga sipsip kibu dabe menaba odasa paibawe? Te augwali mena badu pedaiba pelama, te tuabo wiegi yai nosai gegegi paibawe? Te genuai giliga nanobode augwali menaba tiwai madi duala sigi pogowe? Nago enabolo obaso da, te eno nage gegebo sę dene me egobeo. Te nago enabolo wasiąbaso da, teda eno nage eno te gasa sipsip tonalubo bidi dabe tomode gegebo sę eyu da, augwaligo ena te penani ebo we da homu yaibao.
SOL 1:8 Eno abagio, nage gasa sawi yai we mu da. Te nago ena suabo homu ebaso da, teda nago te sipsip dabego sągą pasalu wali poanao. Nago wali pobaso da, teda naga meme dabego tuabo wiegi yai nosai elalubo sueibao. Te nosai te sipsip tonalubo bidi dabego sel ugwa be pąde elalubao.
SOL 1:9 Ae, nage eno sawi yai abagi da, nago au yali wiegi yai da, te Isip king bidigo karis dabe kekebo hos kibu dabe au yali tiwai dao.
SOL 1:10 Nago tobolu niside gedelali au dobagego te nago gesabidi ula ilali. Tama nago magede domoani wiegi yai beli dabego te nago magede ula mu elalubao.
SOL 1:11 Tialima, dago te golgo au dobage meba nigiyu, te gasa au dobage dabe te silvago nigibadi elama, tama dago nagebolo mawaibao.
SOL 1:12 Eno king bidi aga betide pila muyu, tama agai eno au yali wiegi yai sanda denami odobao.
SOL 1:13 Eno abagi, eno godolo mu ebao, pauda me deli wiegi yai denami ebo tiwai ebaso, te ena baude ugadu pila mubao.
SOL 1:14 Tama aga te wiegi yai denami ebo plaua dabe tiwai elalubaso, te Engedi wain gi dabe pedalubo tiwai ebo dao.
SOL 1:15 Nage gasa sawi yai we mu bidibaso, eno nage godolo mu ebao. Tama nago me nago ena godolo eyu, te nago ena dali gedu ebao.
SOL 1:16 Eno abagi, nage wiegi yai mu bidibao. Nago sawi yali gasa ugadu mu igulalio, tama eno nage wiegi yai pemene mu ebao. Te wiegi yai nosai te da sigo pibo bet sai tiwai elalubao.
SOL 1:17 Te sida ni dabe te nologo dabe me te dago be tobolu mubo pilo me walawala ni tiwai elalubao. Tama te ni pain dabe te bego pedu ni tiwai dao.
SOL 2:1 Tialima, ena te bulude elalubo plaua me deli tiwai te Saron tǫ malu bulude pedelali. Tama ena te sawi yai plaua tiwai, te odogo bulu te bulu du dabe tomode elalubo dao.
SOL 2:2 Eno abagi wali we te gasa we dabe tomode bidali, te plaua te sesane elalubo nosai tomode elalubo tiwai yali.
SOL 2:3 Eno abagi te gasa gesi bidi dabe tomode bidibao, te wiegi yai nai du walai ni me deli te gasa buside elalubo olo ni dabe tomode elalubo tiwai ebao. Te genuai giliga nanobo side, ena te ni dologo madi dugulaluabo homu godolo ebo dao. Te ni du walali wiegi yai mu elalubaso, te eno pedauwalide pusu mu ebo dao.
SOL 2:4 Agai ena te genuai nai da tubo madi sela pali, te agai genuai beba pali. Agai ena godolo mu ebo dao, te eno agaba wiegi yai homu pemene ebo dao, eno te nai da tuali be au ilali name ugwade wiegi yai pemene ebo tiwai gilama yalio.
SOL 2:5 Eno abagi wali bidi, eno nage godolo homu ebao, tama eno dili kimi isalio. Te bageo, dagego te nedu du wai dabe ena maiyąo, tama te wain du wai dabe augwaligo olali elaluali. Te eno tulama, te ena bomo saibao.
SOL 2:6 Eno abagi wali bidigo agai pobase nogo eno tobolu dologoba aiyadu muani. Tama agai dolo nogogo, agai eno tigi tola salio.
SOL 2:7 Te Jerusalem we dabe, dagego te homu ebao, te wiegi yai bulu uni hasade homu eyu, te bomai po ena dali dąų walali homu elama, te dagego da sigo homu hodolo sę me elamuo. Te dena si sę digi dao.
SOL 2:8 Edao! Eno abagi wali bidi enaba asobao. Suao! Aga sasa mano dulu te bulu dabedu ugaba udada asobao, tama eno aga dogonidu wabo po odalio.
SOL 2:9 Aga te umagia mu uda wali, te bomai bulu uni hasa me deli udabo tiwai yali. Aga aselama da, te be bulu badu dolagaselama, te be dedage windodu tomoba tonanio.
SOL 2:10 Tama agai ena dali e po wali. “Eno abagi we sawi yai we mu, nage buluba teda asao, te nage ena wali asao.
SOL 2:11 Nage te tulubagede wi me elamuo. Te tulubage be yali sogo silalio.
SOL 2:12 Megi da, tigidali badu plaua dabe pedela silalio, te balia po wabo sogo pedelali. Te ba hi dabego bulude balia po ola pabo sę ebao.
SOL 2:13 Te ni kaya du walobo gagalali. Te buside tigidali bonogo duduli pedelama, tama te plaua dabego wiegi yai denami ebao. Eno sawia pai we abagi mu, nage buluba teda asao, tama nage ena dali asao.
SOL 2:14 Nago naga be tomode bidali, te ba te bulu du dwai madi dedage dwasianu tomode geme dualalubo tiwai elaluali. Te buluba dįą soao, te eno nago sawi yai gesabidi sulama, tama nago wiegi yai dogonigo po wabo eno odaibao.
SOL 2:15 Te dwasianu bulu uni yowi dabe nogo pageabi elama, tola sao. Tiyu, augwali dago gi tomoba aselama, te wain ni duduli walobo plaua dolidalio,” wali.
SOL 2:16 Te abagi eno bidi da, tama ena agai we da. Agai te aga meme kibu dabe te sawi yai plaua dabe tomoba sela pelama, tama augwali te nosai tubo sę ebo dao.
SOL 2:17 Te agai augwali tonalubadi, te giliga dega siguluboba usu nama, te bulu kedau ebo dao. Eno wiegi yai abagi, eno homugo nage polo ma asomainu homu ebao, te wiegi yai bulu uni hasa me deli te genuai bulu duba uga udada asobo tiwai ebo dao.
SOL 3:1 Tigidali sogo hulide ena godege pibo sogo, eno te godolo ebo abagide na naga ebo dao. Te eno nade aga tigidali habude gegali, tiali goli eno aga me subeo.
SOL 3:2 Te nade ena hodaluama, te ena taun tomode biliyu, te eno aga gegeyu ebo dao. Ena te taun pedai habu tigidali badu bilibo dao. Tama eno te godolo mu ebo abagi gegebo sę ebo dao, tiali goli, eno aga dali deliba gesabidi me unulubeo.
SOL 3:3 Te taun tonalubo bidi dabego augwa bilibo sę eyu, augwaligo ena suali. Te eno augwaliba hanalu wali, “Dagego eno abagi sualiwe, ma meniwe?”
SOL 3:4 Eno augwali tagalama, ena pobadi, te polo mu tama eno ena abagi suali. Ena aga pageba pelama, eno aga pagea selama, te agai ena taga pidali homu eyu, eno hagela yali. Eno aga ena idago beba odasa pelama, tama da si te eno idago be habu tomoba palio, te eno te na te tiwai ebo dao.
SOL 3:5 Te Jerusalem we dabe, dagego te wiegi yai bulu uni hasa dabede homu kone palama, te bomai po dąų wai baso da, teda dagego da sigo haliga hodoligio. Te sę dena side digi elalubao.
SOL 3:6 Magi naigo te wa pai bulude bidali tagalama, asaliwe? Augwaligo te denami wiegi yai ebo tobage plaua dabe ulubo sogo pedalubo hano tiwai nai pedelali. Te aga denami ebo te bisnis bidi dabego te mone sabo paudago denami ebo tiwai yali.
SOL 3:7 Suao. Te wiegi yai dugabo sia sai me deli te bidi dabego tolasa asali. Tama Solomon aga digi tede dugawali. Te bidi sese sela 60 ami bidi dabe aga dali asali. Augwali te bomai ami dabe da, te Israel ami dabe dao.
SOL 3:8 Tigidaligo hauwa sogo polobadu boi hwįani. Tama augwaligo te bainatgo hwįbo mu konea pai. Tigidali deli deligo augwa bainat tola sesa asalio. Te augwaligo sisi elalu tonaluali, tiyu te boi bidi dabe hulide aselama, hwįagasidali weyu tialio.
SOL 3:9 Augwaligo te tǫ kantri Lebanonde wiegi yai ni dabe selama, tama te kingo dugabo sia sai nigali, te dwasianu be me deli tiwai.
SOL 3:10 Augwaligo te sia nigabo ni tigi te silvago nigali, tama aga kekabo bono te golgo nigali. Te dugabo pesage, augwaligo te kingo mama yai name ugwago mesegelali. Te Jerusalem we dabe augwaligo te sia bugagia au ilalio. Augwaligo kingo te sę ebo godolo mu yai dao.
SOL 3:11 Dage Jerusalem we dabe, dage aselama, king Solomon suagasao. Te kingo mubo madi agai tobolude muani elalubao. Te king Solomon aga we sabo side aga idago te madi aga toboluba muani. Tama te tiali side aga wiegi yai pemene umabogi mu yai dao.
SOL 4:1 Eno we abagi, nage gasa sawi yai dao. Nago te name ugwa pedai tobolude bea selama, te nago gesabidi geme dualiyu tiali, tialima nago gedu eno suali ula yali, magi baso meni, nago ena godolo mu ebaso tiali. Nago gesabidi badu hauwagasali tobolu nisi da, te kibu meme hani me deligo wiegi yai pemene ebo tiwai eyu, te Gileat bulude te dwasianu bulu du dabedu aiyaba sasa mano dulubo tiwai ebo dao.
SOL 4:2 Nago kele tedela mu yali, te tedela sipsip tigi wali augwaligo tigi nisi poalama, te augwali megi tama ąį telawai tiwai yali. Nago kele deli me degebeo. Menio. Tigidali bugagia elalubao.
SOL 4:3 Nago pedauwali te mama name ugwa tiwai mu yali. Nago pedauwali te gasa sawia pai mu da. Te name ugwago nago gesabidi sesela sali, tiali goli eno nago gesabidi ula elalubo suali.
SOL 4:4 Nago dogoni te gasa sawi yai mu, te king Devitgo uganu sę yani wiegi yai bobobage be taua tiwai dao. Te nago magede domane sawi yai beli da, te ami bidi dabe hauwago sabele dabe tiwai te uganu mu sę yani bobobage be tauade paide wawalo pali tiwai elalubao.
SOL 4:5 Nago ame si da, te wiegi yai bulu uni hasa sigo te plaua dabe tomode nosai tudubo tiwai elalubao.
SOL 4:6 Nage te denami ebo wiegi yai nai dabego te bulu du me delide pągąnąlubo tiwai dao. Tama ena te bulu duba bidigi pelama bididubadi, te giliga dega sigulama, te bulu kedau ebo sogoba usu naibao.
SOL 4:7 Eno abagi, nage gasa sawia pai mu da. Te nago tigide masalu deli me elalubeo.
SOL 4:8 Eno we o, nage ena dali asobaso, da sigo te Lebanon bulu du dabe tagalama, da si pinao. Nago te bulu du Amana, me te bulu du Senir, me te bulu du Hermon tagalama, te nage aiyaba dulao. Te laion dabe, me gasa bulu uni hasa dabe te bulu du dabede bidibao.
SOL 4:9 Nage eno we, te nage eno hobolu du mu da. Nago ena dwasianu naga suali, te nago eno hobolu du togalualio. Eno nago magede domoani beli sulama, tama ena nagede mu tulaluali.
SOL 4:10 Nage da eno we, te nage eno hobolu du mu da, nago ena godolo mu ebaso, te ena wiegi yai pemene mu ebao. Nago te godolo homu ebo pusu mu ebao, tama te wain ąįgo pusu aiyaba elaluali. Te nago au yali sanda denamigo te tobage wiegi yai pauda dabego denami aiyaba mu elaluali.
SOL 4:11 Nage eno wiegi yai we da, nago po eno olode odobo pusu mu ebao, te hani pusu pedauwali ebo tiwai yali. Nago wabo po wiegi yai ebao, te tubo ame pę tiwai da. Nago gudali ugwa dabe wiegi yai denami elalubao, te Lebanonde bulu du dabego denami ebo tiwai yali.
SOL 4:12 Eno we, nage eno hobolu du mu da. Nage te obo baguai gi me deli tiwai elalubao, tama te tomoba niwai bidi me pisąwani. Nage te ulu wę me deli tiwai te gi tomode elalubao.
SOL 4:13 Nage te wiegi wiegi yai ni du dabe te wiegi yai gide elalubo tiwai da. Te ni mebade wiegi yai nai elalu, te meba nedu dude wiegi yai denami elalubao. Mebago te wiegi yai sanda nigiyu, te mebago naiba munama, pusu ilaibao. Mebago te tobage au dogia pabo nai dabe nigibadi, te mebago wiegi yai denami hano ilibo pauda nigaibao.
SOL 4:15 Nage te ulu ąį pągąnama, te buluba gelama, tama peyu, te giba ąį mabo tiwai ebao. Nage te dwasianu ąį gomo dabe tiwai te Lebanon bulu dude ulu pedelama, tama te giba aiya dulubo tiwai ebo dao.
SOL 4:16 Not badu wali, nage asao. Saut badu wali, nage aselama, eno gi waligo mesega sagasobaso, te tigidali pesage te gi habu te wiegi yai denamigo pągąną saibao. Tama eno te godolo mu ebo abagite aga giba aselama, tama te wiegi yai nedu du dabe tuagasomainao.
SOL 5:1 Eno we, nage eno hobolu du mu da, ena te ena giba asalio. Tama eno te wiegi yai denami ebo nai dabe sisinagasali. Eno te wiegi yai pusu yai nai hani tuali. Te eno ame pę me wain dali tuali. Dage si abagi wali wiegi yai mu da, dage si nai me ąį tuao, dage si mu pągąną pao.
SOL 5:2 Te hulide ena godege pila mudu digi, tialima, eno homu kone palobo sę iduali. Te eno nade suali, te eno bidigo eno be sunumiba bebego udalio. Eno we da, te eno hobolu du mu dao, nago be sunumi dalama, ena tomoba asabo nigilao. Te hulide segeni ąį te eno tobolu niside pągąwai elalubao.
SOL 5:3 Eno ena gudali ugwa peda muani, tama eno te ugwa ma gudubo hagela ebao. Eno ena sągą ąį telawali, te ena hogodama biliyu, te sągą meda ma ilibo te ena hagela ebuo.
SOL 5:4 Tialima, eno abagi wali bidigo te sunumide daganama, uga siyu, edaba tola siyu ebo nai handelba nogo tola sagasida wabo eno odama, tama eno haliga hogodalu, te eno wiegi yai homu pemene yalio.
SOL 5:5 Ena hodalu, sunumi dawainu yali. Eno nogo te sunumide daganani uga tola siyu, eda tola siyu ebo nai handelba nogo diąbadi, tama ena nogode elaluali te sandago te sunumide daganani nai handelde te sanda dagana sali.
SOL 5:6 Eno ena abagi sunumi dalali. Tiali goli, aga pai yalio, tama eno aga subeo. Eno agai wali pode homu kone palama, tama eno haliga dwai mu yalio. Te eno aga gegebo sę yali, tiali goli eno aga me subeo. Eno aga i wali, tiali goli agai eno i weyu me ponobeo.
SOL 5:7 Te taun bagulali moni obo tonalubo bidigo ena suali. Te augwaligo ena elama, te eno tigi dolama, tama augwaligo eno bulali ugwa saket sali.
SOL 5:8 Te Jerusalem we dabe, te dagego eno abagi wali bidi subaso da, dagego te tiwai po dąų walama, agabolo wao, eno aga homu godolo mu elama, te eno nogo sągą dili kimi meni yai elalubo po walao.
SOL 5:9 Nage gasa sawi yai we, tama nago tigidali we aiyaba elalualio. Nago te bidi aga mena tobage bidi dawe? Te da gasa we dabego bidi aiyaba elaluali homu ebaso, tama nago homugo dago te tiwai po dąų omainogo ebawe?
SOL 5:10 Eno abagi wali bidi te aga bomai bidi mu da, te agai gesabidi gasa sawia pai mu da, tama te tǫde bidi nedabo usu isiąbo te hauwa tausen bidi mu aiyaba elaluai dao.
SOL 5:11 Agai gesabidi ula te gol tiwai. Agai tobolu nisi te husugu yai mu, te husugu bago tigi nisi tiwai elalubo.
SOL 5:12 Agai gedu begelebo sę umabo mu iduali, te ąį pauwai ba te ąį sesegede tolalubo tiwai gilama yai.
SOL 5:13 Te agai naboge badu tobolu nisi te wiegi yai, te gide wiegi yai denami yai plaua dabe elalubo tiwai yalio. Agai pedauwali te sawi yai plaua tiwai elaluali. Agai wabo po wiegi yai mu ebaso, te denami ebo wiegi yai sanda tiwai elalualio.
SOL 5:14 Agai nogo te wiegi yai mu tama. Tama agai te gasa tedali au gasagi yai ring dabe te aga nogo dani au ilama muani. Agai tigi tedela mu yai, te tigi ula umabo mu yalio. Tama agai kukulu augwaligo te sisi dugusu yai te gasa au tedali yai masigigo au ilalio.
SOL 5:15 Agai sągą si augwaligo te wiegi yai tedela yai masigigo nigali pos si tiwai elama, tama te mu udula pai gol pedai si elalubo pedai badu dolaluali. Te noma yai polalubo mu te ni sida wiegi yai dabe tiwai, me te Lebanon genuai bulu du dabe elalubo tiwai yalio.
SOL 5:16 Agai ena dali naboge si dilibo sogo da, eno te pusu umagi mu yalio. Agai tigi pedai tigidali badu usu nama, te wiegi yai naga yali. Dage Jerusalem we dabe, eno bidi da te tama tiwai tobage bidi me dao.
SOL 6:1 Nage gasa sawi yai we, tama nago tigidali we aiyaba elaluali. Nago abagi wali bidi mena paliwe? Dago nage tau selama, aga gegaibao. Tiali goli, aga mena sunumidu wali paliwe?
SOL 6:2 Eno abagi wali bidi aga giba pali. Te gide te wiegi yai denami ebo nai dabe pągąnąlubao. Te aga meme dabego te nosai dabe tubo sę eyu, tama agai te au sawia pai plaua dabe sisinibo sę eyu ebao.
SOL 6:3 Te aga eno bidi da, tama ena agai we dao. Agai aga meme kibu dabe te sawi wiegi yai plaua dabe tomoba sela pelama, tama te meme dabe augwa te nosai tubo sę eyu bidibao.
SOL 6:4 Eno abagi, nage gasa sawi yai mu da, te wiegi yai taun si Tirsa me Jerusalem tiwai da. Eno suali, nage gasa sawi yai mu yaibaso, tama eno homu dąų wali, te bidigo te ami bidi genuai hani te ugwa plak dali asobo subaso, agai gedu tede dąų wabo tiwai yali.
SOL 6:5 Eno homugo nago enaba tonogi homu yali. Nago enaba tonobaso da, te ena nagede mu tulalubo dao. Nago gesabidiba hauwagasai elalubo tobolu nisi te kibu meme hani wiegi yai pemene eyu, te Gileat bulu du dabedu aiyaba sasa mano dulubo tiwai ebao.
SOL 6:6 Nago kele dabe tedela mu yali, te augwaligo megi tama ąį paluai tedela sipsipgo tigi nisi tiwai yali. Nago kele deli me degebeo. Menio. Tigidali bugagia mu elalubo dao.
SOL 6:7 Name ugwago nago gesabidi mesega sali goli, tialima eno nago gesabidi ula ebo suali.
SOL 6:8 Kingo we hauwa elalubao. Bidi sese sela 60 we te kwin bidibao, te tudi badu si wali daganaluali we dabe te bidi sese me si me si 80 bidibao. Agai te gasa gesi we dabe hauwa me elalubao.
SOL 6:9 Tiali goli, ena da, eno abagi deli naga elalubao. Aga te polalubo mu bidibaso, tama eno aga godolo mu ebao. Aga idago aga deli naga ame neyu, tama agade wiegi yai pemene eyu, tama aga godolo mu ebo dao. Tigidali gesi wegigo aga sulama, te augwaligo aga nogi ugaba sali. Te kwin we dabego, me te kingo gasa we dabego te balia po weyu, te agaba wiegi yai pemene yali.
SOL 6:10 Dego mu enaba tononalubo dawe? Agai gesabidi te giliga pedelainu ebo tiwai elama, te giliga ula genuai nanobo tiwai eyu, tama agai gesabidi mu udula pali, te polua ula tiwai yali. Eno aga sulama, tama eno homu dąų wali, te bidigo genuai ami hani te augwa plak dali asobaso sulama ebo tiwai yalio.
SOL 6:11 Ena dulama, tama ena te du wiegi yai walobo ni dabe elalubo giba asali. Ena asali, te gesi kulubi dabe te ni dabede te bulu odogode holobo sueinogo asali. Eno te ni waingo gesi kulubi dabe, me te nai du walali wiegi yai elalubo te eno sueinu yali.
SOL 6:12 Eno abagi we, eno nage sulama, ena noma sali. Eno kone palali, ena te genuai bidi mu deligo karisde bidibo tiwai yalio.
SOL 6:13 Sulam we, ma asao, ma asao. Dago nage suainogo, nage geasa ma asao. Te eno bidi dabe gedude bebegelibo danis ebo, te magi baso dagego ena suabo homu ebawe?
SOL 7:1 Eno abagi we, nage te kwin we me deli tiwai mu polalubao. Nago sągą nadoba bulali, tama nago sągą meda meni yai mu elalubao. Nago sągą te sawia pai mu da, te piksa noma me deli te kolesaga konea pai bidigo te masigi togolama, nigali piksa noma tiwai mu yali.
SOL 7:2 Nago mosogobe te kap tiwai te wain pągąwai pusu yai pauda dali taluai tiwai yali. Nago pamene si te gasa sawi yai mu te wit me deli pesage holali tiwai, augwaligo te sawia pai plaua dagego au ilali tiwai dao.
SOL 7:3 Nago ame si te wiegi yai bulu uni hasa si tiwai da, augwa idago augwali si deli sogo ame nani.
SOL 7:4 Nago dogoni magete tedela yai taua me deli tiwai. Nago gedu te genuai taun Hesbon sunumi pąde elalubo dwasianu sigi ąį ge tiwai yali. Nago guni wiegi yai mu tama, te Lebanon tonalubo bidi dabego taua tiwai, te augwaligo Damaskus pedai badu tonalubo dao.
SOL 7:5 Nago tobolu ugaba mu igulali, te Karmel bulu du tiwai. Nago tobolu nisi udula pali, te kingo sawia pai name ugwa tiwai yali. Tama te tobolu nisigo te king tulaluabo sę mu ilibo dao.
SOL 7:6 Eno abagi we, nage gasa sawi yai we mu da. Eno nage godolo mu ebao, te nago tigidali naigo ena pemene ilibo dao.
SOL 7:7 Nage wiegi yai mu te doloba pai ni kokonas tiwai. Te nago ame te aga du dabe tiwai da.
SOL 7:8 Ena te kokonas nidu ugaba holama, te nai aga du saibao. Eno nago ame suali, te du hauwa walai wain nologo elalubo tiwai yali.
SOL 7:9 Eno nago pedauwali denami odali, te wiegi yai nedu du laulau denami ebo tiwai. Nago ena dali nono nani, te wain ąį pusu mu ebo tiwai yali. Awe, eno abagi wali bidi, eno te wain nage mawaibao. Te godege pibo sogo me te tobage wain wiegi yai ebo da.
SOL 7:10 Ena te ena abagi wali bidigo we da, te agai ena godolo mu ebo dao.
SOL 7:11 Eno abagi wali bidi, nage ena dali asao. Tama da te dwasianu bulu dabeba bidigi pinao.
SOL 7:12 Te kigamu digi mu te da hogodasa peyu, te wain ni dabe sueibao. Te augwali kulubi pedelama, te augwa yabe diligi naniwe, ma meniwe, te homu ebao. Tama dago te nai du wiegi yai walobo ni dabe sueibao. Te augwa plaua dabe diligi naniwe, ma meni yaliwe? Da te wain gide bidalu, te eno te tiwai nagebolo ola mobaso, te eno nage godolo mu eba homu yagameo.
SOL 7:13 Eno abagio, eno te wiegi wiegi yai ni du wai naga selama, te be sunumi pąde muai elaluali, te nago tumainogo yali. Meba eno polobadu sali, tama meba megi naga eno sali. Tama dago te wiegi yai bono dabe denami ebaso, te dago godolo ebo homu hodolomainu ebao.
SOL 8:1 Te eno idago nage ame neyu, te nage ame manigi sogo da, te wiegi yai igi da. Te tiwai ebaso da, teda eno nage te genuai sunumide deliba gesabidi unulubo sogo, eno nage dali nono nobaso, te niwai bidi me deligo tede dwai homu me ebo usugobeo.
SOL 8:2 Te eno nage selama, te dena si idago beba pobaso usu da, tama nago ena bugagia ola magameo. Te eno wain selama, eno te wiegi yai wain nedu dugo te gasa pusu yai pauda dali taluama, nage mawaibao.
SOL 8:3 Nago pobase nogo eno tobolu dologo badu muao. Tama nago dolo nogogo, te nago eno tigi tola sao.
SOL 8:4 Te Jerusalem we dabe, dagego bomai po ena dali dąų walobaso da, te dagego da sigo haliga hodolobo po me olamuo. Te sę dena side digi elalubao.
SOL 8:5 Te wa pai bulude bidali tagalama asali, te mena we dawe? Agai aga abagi wali bidi nogo tolasa, augwa si asobao. Da te ni laulau tįwai madi dologode bidalu, tama eno nage hodolali. Naga idago nage te ni dologode ame nai dao.
SOL 8:6 Nago ena deli naga godolo homu yao, te nago gasa we godolo homu me elamuo. Nago nogogo te gasa we nogo me me diągio. Nago ena naga nogo diąyąo. Magi baso meni. Eno godolo homu ebo nagede bomo mu eyu, tama eno haliga nagede bomonama hogodu, te isibogo bomogo bidi aiyaba elalubo tiwai ebao. Eno godolo homu ebo, te umabo digi mu yali, te isi bogoli dabo genuai mu ebo tiwai ebao.
SOL 8:7 Aįgo te tobage isi sula sawainu ebaso, usu me egobeo. Te bidi me deligo aga mone tigidali te wego aga godolo emaina homu elama mobaso da, te aga nai mu meniama, tama te wego aga dwai mu bidabo sę ilaibao.
SOL 8:8 Dago ama dwasianu weginu bidibaso, te aga ame pedalubeo. Te aga genuai ebo si da, te dago mena sę agade egowe, te gesi ogwa bidi me deligo aga saiba homu ebawe?
SOL 8:9 Te ama bugagia bidu, te taun bagulali obo tiwai elalubaso da, teda dago te taua silva te bagulali obode nigaibao. Tialima, aga te taun sunumi tiwai elalubaso da, teda dago aga te dila pai ni sida ni namego paliaibao.
SOL 8:10 Ena te obo me deli tiwai da, tama eno ame te taua si tiwai da. Eno abagi wali bidigo te tiwai tama koneani, te ena aga dali bidali sogo ena bugagia mu bidu, te eno haliga dua tegaluama bidalio.
SOL 8:11 King Solomongo wain gi te bulu Balhamonde elaluali. Te bidi dabe augwaligo te gi sę yabo homu ebaso da, te mone hauwa tausen te umabo 1,000 kina silva te kingbolo mobaso usu dao.
SOL 8:12 Solomongo aga te mone 1,000 kina somainao. Tama te gi sę ebo bidi dabego te mone bidi sese nogo si 200 kina somainao. Tialima, eno augwalide moni homu hauwa me ebeo. Ena da, te ena wain gi elalubao.
SOL 8:13 Eno abagi, nage gide bidibaso, eno homugo nago po omainu homu ebao, tama eno hai namu dabego te nago dogonigo po wabo odomainao wali.
SOL 8:14 Eno wiegi yai abagi da, eno homugo nage polo ma asomainu homu yali, te wiegi yai bulu uni hasa me deli tiwai te bulu du dabeba eda udada holu, te wiegi yai nai dabe denami pągąną pabo tiwai ebo dao.
ISA 1:1 E bukude te profet Aisaiago po elalubo, aga te Emosgo ogwa dao. Te nade ebo tiwai Genuai Bidi God agai po te Aisaiabolo mani, te Aisaiago te Juda we bidibolo, me Jerusalem we bidibolo pusa momainu. Aisaiago te po te tuni bidi king Usia, me Jotam, me Ahas, me Hesekia, tama bage deli deli te Juda dabe tuni bidi bididubadi pusai dao.
ISA 1:2 Dagalu, olo saganama, odao. Tǫ, nago me odao. Magi baso meni, Genuai Bidigo te po wai dao, “Te wai dabe eno tonaluama, genuai yali. Eno augwali bugagia negali. Tiali goli, augwali da, augwaligo eno po sela sąbo dao.
ISA 1:3 Te kau kibu dabego augwa aya konebo dao, me te donki kibu dabego augwa ayago nai mabo pesage konebo dao. Tiali goli, eno Israel we bidigo kolesaga menio. Te kau kibu de donki kibu sigo kolesagago augwaligo kolesaga edelalio,” wali.
ISA 1:4 Tega, te we bidi dage dolama, dagego kolesaga me mu doali. Tigidali sogo dagego dwai sęgę sabo dao. Te duga dwai sęgęgo dage aiyaba kegebo dao. Dage Israel dabego duga Genuai Bidi tagalai dao, aga te Dwagi Yai Doloba Pai Kolesaga Naga Ebo God dao. Tama dagego aga tudi ola manio.
ISA 1:5 Magi baso dagego Godigo po me sela sądubawe? Dage tigidali sogo dene sabo hagela meniwe? Israel, nage te bidi me bidi dabego elai bidi tiwai dao, te agai tigi sese mu dolama, bomo mu meni yai. Agai tobolu keni kenigo pągąna pai.
ISA 1:6 Te kenigo agai toboludu gagalama, sągąba usu nigi pali, tama agai tigiwali olo me elalubeo. Te haniani kenigo agai tigide pągąnama, tama agai tigi deda pali. Augwaligo agai tigi penama agai keni sįsibeo. Te augwaligo madasin me pilibeo.
ISA 1:7 Awe, te boi bidi dabego dagego bulu polo dola silai dao. Tama augwaligo dagego hanu dabe ulali dao. Te dagego tonalubadi, augwaligo dagego gi nai dabe sai dao. Te gasa bulu bidi dabego bulu mu dolama, tama dagego tǫ olo mu elalubao.
ISA 1:8 Hobedagia! Jerusalem deli naga augwaligo tagalali. Agaduba deli naga elaluyu, tama bomo mu meni. Aga te bidi dabego olo gi be sę yai ąǫ elalubao, te bobi gide sę yani dwasianu be tiwai naga elalubao. Aga te boi bidi dabe bagua sai hanu ąǫ elalubao.
ISA 1:9 Ma, Genuai Bidi Tigidali Bomo Elalubo Bidigo da meba bidimainu sula tagalisąma menigi sogo da, mu tama, teda da polo dolama siligi dao, te hanu Sodom de Gomora si dolali yali tiwai gilama, polo dologi dao.
ISA 1:10 Dage tobolu bidi dabe, me dage Jerusalem we bidi dabe, dage te bidi dwai dabe te hanu Sodom de Gomora side polobadu bidali bidi dabe tiwai mu tama dao. Megi da, dagego olo bugagia munama, tama Godigo bomai po odao, dago Genuai Bidi. Agai dabolo mawainu ebo po bugagia odao.
ISA 1:11 Genuai Bidigo te po odu gebao, “Dagego homugo, dagego haniani ofa enabolo mabo te eno godolo ebawe, homu ebowe? Mu menio. Dagego te sipsip kibu dabe hauwa dagego seselama, te isigo ula silabo ofa yainogo ebo dao. Tiali goli, ena mu hagela mu yali. Tama eno dagego dwagi yai genuai dagego sesebo hasa ili dabe eno godolo ebeo. Ena te kau kibu omai kaneme me, me te sipsip kibu gǫųgo kaneme, me meme kibu omai kaneme dabego enabolo usu yai dao.
ISA 1:12 Magi baso meni. Te dage lotuba asobo sogo, dage dua aselama, eno obo tomoba asobo menio. Menio. Dage asobo yaide, duga olo bilagasu, kulukulu genuai wainu asobo dao.
ISA 1:13 Dage odolali bomai sę elama, ofa nai dabe enaba sesigimio. Magi baso meni. Eno augwalibolo hagela yai dao. Tama me, dagego ulubo pauda denami eno gunide dwai denami pedalobo dao. Eno dagego gesi poluade, me Sabatde, me gasa lotu dabe dagego wabo eno me subo, hagela ebo. Magi baso meni. Duga dwai sęgęgo duga lotu dabe dolali.
ISA 1:14 Eno dagego te gesi poluade lotu wabo, me gasa bodolu mani lotu dabe dagego wabo eno godolo mu menio. Te nai dabe tigidaligo enabolo sęgę mabo. Tama eno tolobo mu hagela ebo.
ISA 1:15 Te dagego nogo ugwa selama, gedu haluasa po enabolo wabo si da, teda eno dage sugobeo. Tagala, dagego gedu haluasa po hauwa sogo obadi, me teda ena olo palia saibao. Magi baso meni. Te bidi dabe dagego elali bidi dabego kaneme dagego nogode me daganalubao.
ISA 1:16 Eno dage suali mu doali. Dage wę paugi pįa, tama duga digi duga pęnama, tama dwai sęgę dage elalubo sela sąyao. Tama dwai sę ma igio.
ISA 1:17 Te dwagi yai doloba pai kolesaga ebo kolesaga konea sao. Tama te tobage dwagi yai kolesaga ugwa ela holomainu yao. Tama eyu, te gasa bidi dabego aiyaba elaluali bidi dabe tau mao. Te po tų ebode te tiana wai dabe bugagia tau sao. Tama me te wilawe we dabe te po tų ebode tau sao. Te tama bidi dabego augwali dali dwai sę ebaso da, dagego augwali tau sao.”
ISA 1:18 “Odao. Da deliba sisinama, po mimainao. Dagego sęgę hauwa elalubadi me, tagala. Te dage te nala ugwa tiwai bidai goli, hoda naigo polo dolai dao. Ena Genuai Bidi, eno te po obao, eno te dage te tedela ais tiwai ma ilaibao. Awe, te hoda nai mu dąų wai goli, eno dage te tedela yai sipsip kibu nisi tiwai ma ilaibao.
ISA 1:19 Ma, dagego eno po mu odama, tama te homu kolesaga wali peyu da, teda dage bidibo me bugagia bidiyu, me duga gide bulubo wiegi yai nai dagego tuyu, bidaibao.
ISA 1:20 Tiali goli, dagego hagela elama, eno po sela sąyani da, teda boi bidi dabego dage ela muagasaibao. Ena Genuai Bidi, eno po polo wali.”
ISA 1:21 Mena tama te pedalaliwe? Hanu Jerusalem, polobadu nago eno po wali dolo pai dao. Tiali goli, megi da, nage penani we gaga wali. Tega! Polobadu nagede bidali bidi dabego te po tų dodolobo kolesaga dolo yai dao. Awe, polobadu nage te dwagi yai doloba pai kolesaga ebo bidi dabego pągąwai dao. Tiali goli, megi da, nage bidi ela mabo bidigo pągąyani.
ISA 1:22 Polobadu nage dwagi yai silva tiwai da. Tiali goli, megi da, nage yaba yai kapa tiwai dao. Polobadu da, nage pusai wain tiwai goli da. Tiali goli, megi da, nage olo wę tiwai dao.
ISA 1:23 Jerusalem, nago genuai bidi me, tobolu bidi me, augwali te po odisiąwai dabe bidiyu, tama nai wi sabo bidi dabego abagi dao. Tigidali sogo augwaligo te mone pesą eyu, augwaligo te bidi dabe augwali dali mone dabe sainogo ili po wabo bidi dabe tau sabo homu ebo dao. Tama te po tų odobo sogo, augwali te tiana wai dabe tau sabo homu ebo menio. Tama me, augwaligo te wilawe we dabego homu sęgę ebo dodolobo odama, dodolabo homu ebo menio.
ISA 1:24 Tama tibaso, Jerusalem, Godigo po dabe megi odao. Tigidali Bomo Elalubo Genuai Bidi te Israel dabego boma pai God dao. Agai te po wali, “Ena Genuai Bidi, eno te ena boi bidi dabebolo dwai dene wei ponaibao. Usu dao. Tama augwaligo enabolo sęgę ma magobeo.
ISA 1:25 Jerusalem, eno bomai sę me deli nagede yaibao, te nago dwai sę yali dodoliyu, eno nage posolai isigo ulaibao. Te bidi dabego te kapa nogi silva iside ulama, tama dwai pobele bage dagana saibaso, te sela sąwainu isi ulubo tiwai yaibao, te posolai iside.
ISA 1:26 Tama eno dwagi yai tobolu bidi me, po tų dodola mu odabo bidi dabe ena digi dąį ilaibao, te polobadu nago bidali bidi dabe yali gilama. Tama bidi dabego nage nogi te doloba pai kolesaga ebo hanu dao waibao. Tama Godigo po dolo wali pabo hanu dao waibao.”
ISA 1:27 “Genuai Bidigo Jerusalem bugagia doloba pai kolesaga dali aselama, tama te bulu ma dobola saibao. Tama te dwagi yai kolesagade naga agai Jerusalem we bidi ma oda saibao, te augwaligo augwa yali te dwai sęde ge neyu, homu begelama, tama augwa yali dwai sęde hobede ebaso.
ISA 1:28 Tiali goli, te we bidi dabego po sela sąnama, dwai sę elama, God tudi ola mabo we bidi, agai augwali dolama, tama agai augwali mu silaibao.”
ISA 1:29 “Magi baso meni, dagego genuai ni silide te tibo god dabeba lotu olama, tama tede dwagi yai homu eyu bidai dao. Tama me te gi elama, tama lotu wabo digi dao olama, hage yai dao. Tiali goli, dage te yali kolesaga dabede hobede elama, tama hale genuai mu yaibao.
ISA 1:30 Te dage te genuai ni kali sasilama, mobia pabo tiwai yaibao. Tama dage te gi wę meni yai gi tiwai dage tama tiaibao.
ISA 1:31 Te kala sasia pai da, te isi deli sogo tama dela pabo dao. Tama te tiwai sę te doado bage hauwa elalubo bomai bidi dabede yaibao. Augwa digi dwai kolesaga ebogo augwali deli sogo tama dolaibao, sia saibao. Tama te sogo augwali tau sabo bidi meni yaibao.” Genuai Bidigo te po wali.
ISA 2:1 Te Aisaiago nade ebadi tiwai, Genuai Bidigo agai po Aisaiabolo mani, te Emosgo ogwabolo, te agai te Juda de Jerusalem we bidi dabebolo pusa momainu. Te po e tama dao.
ISA 2:2 Te me sogo nosali, te Genuai Bidigo be dolalubo te bulu du, te genuai ugwanu ma dolaluyu, tama gasa bulu du dabe aiyaba elaluai elaluaibao. Tama tigidali we bidi hani teba sisinagasaibao.
ISA 2:3 Te tigidali bulu badu we bidi hanigo te po waibao, “Asiąo. Da bulu du Saionba pinao, Genuai Bidigo bulu duba. Te Israel dabego Godigo beba pinao. Te agai dabolo dago emaina homu ebo te kolesaga ola momainu. Tama da aga digi sa muani sunumidu pogo o.” Augwaligo te tama po waibao. Magi baso meni, Genuai Bidigo bomai po te bulu du Saionde gagalasa, tama tigidali buluba paibao. Awe, Jerusalem te Genuai Bidi agai bulu elaluama, tama agai po we bidibolo ola mabo digi elaluaibao.
ISA 2:4 Genuai Bidigo tigidali hani we bidigo po tų dodolama, tama augwali bugagia deliba bidaibao. Tama augwali hwįbo bainat te gi tǫ elebo ain tiwai gagawaibao. Tama augwa hwą gagawai sesemone te hamago elama, gi sę yabo hwą tiwai pedalaibao. Tama tigidali we bidi hanigo me hwįgobeo. Tama augwaligo te boi hwįbo kolesaga munu ma konea sagobeo.
ISA 2:5 Asao, Jekopgo wąį dabe dage, da Genuai Bidigo da mani uladu pinao.
ISA 2:6 Genuai Bidi, nago naga we bidi tudi ola mawai dao. Nago augwali Jekopgo wąį dabe tagalali. Magi baso meni. Augwaligo tǫ haniani pobigo pągąna pali, te Filistia bagego tǫ tiwai yali gilama. Augwaligo te dwai kolesaga dabe sia asobo badu sai dao. Megi da, nago we bidi hanigo gasa we bidi hanigo kolesaga wali pabo.
ISA 2:7 Te Israel dabego tǫ te silva, me gol, me hos, me karis dabego mu pągąna pali. Tama bidigo nedebo usu egobeo.
ISA 2:8 Tama me ma, augwaligo tǫ tibo god dabego piksago pągąna pali. Tama augwaligo augwa te nogogo nigali nai dabeba lotu po wabo dao.
ISA 2:9 Tama tibaso, Genuai Bidi, nago tigidali we bidi aiyaba elaluama, tama tigidali we bidi hale dwai mu yaibao. Genuai Bidi, nago augwaligo sęgę sela sągio.
ISA 2:10 Te we bidi dabe, dage wi pelama, masigi dudulaweba dabe duala sigi piąo. Dage tǫde dedage nigilama, duala siąo. Tiyu, dage Genuai Bidi aga ula me bomo dali asobaso, dage wi elama, dolabuo, Genuai Bidi asobode.
ISA 2:11 Te Genuai Bidi sabalobo sogode da, agai te dene mabo kolesaga elama, augwa nogi ugwa sabo bidi dabe aiyaba elaluaibao. Tama augwali hale mu yaibao. Tama te sogo Genuai Bidi deli naga genuai nogi saibao.
ISA 2:12 Genuai Bidi Tigidali Bomo Elalubo Bidigo bodolu elalubo, te augwa nogi ugwa sabo bidi dabe aiyaba elaluabo sogo. Tama te sogo agai te bidi dabego genuai nai dabe me augwaligo godolo elama, gawebo nai dabe dolaibao.
ISA 2:13 Te agai te Lebanon bulude elalubo dwagi yai bobobage ni bǫ dolaibao. Me, te Basande bomai ni dabe me.
ISA 2:14 Te agai genuai bulu du dabe me agai dolaibao.
ISA 2:15 Me, te bobobage taua dabe, me te tigidali hanugo bomai obo dabe me.
ISA 2:16 Te agai te genuai dwagi yai sawi sip dabe me dolaibao.
ISA 2:17 Te Genuai Bidi sabalobo sogo da, agai te dene mabo kolesaga elama, augwa nogi ugwa sabo bidi dabego nogi aiyaba elaluaibao. Tama augwali hale mu yaibao. Tama me te tibo god dabe mu sia saibao. Tama te sogo Genuai Bidi aga deli naga te sogo genuai nogi saibao.
ISA 2:19 Tama te sogo Genuai Bidigo te tǫ mali iliyu, tama e tǫde nai dabe wi mu ilaibao. Tama te we bidi dabe me wi mu elama, tama masigi dudulaweba me, tǫ dudulaweba me, wi duala sigi paibao. Te augwaligo Genuai Bidi aga bomo dali, genuai ula dali, asobo augwaligo suidali weyu.
ISA 2:20 Tama te sogo te we bidi dabego te tibo god dabe augwa lotu wabo god dabe saibao, te augwaligo silva de gol sigo nigali nai dabe. Tama augwaligo te bologo buluba me bogwą bidibo buluba dabe tama sąwaibao.
ISA 2:21 Tama te sogo da, Genuai Bidigo te tǫ mali iliyu, tama tǫde wi mu yabo sę dabe yaibao. Tama te we bidi dabe me wi mu elama, te masigi ola beba me, bulu du dologode elalubo masigi dedageba dabe wi duala sigi paibao. Te augwaligo te Genuai Bidi aga ula dali, bomo dali, asobo augwaligo suidali weyu.
ISA 2:22 Dagego homugo bidi mego da tau saiba homu elamuo. Mu menio. Da bidi da olo nai mu dao. Magi baso meni. Da pęwądage sogo bididama, tama da isaibao.
ISA 3:1 Odao. Tamadi tama God, Tigidali Bomo Elalubo Bidigo te we bidi dabe ugwaba sagualu tonalubo nai dabe sela sąwaibao. Te Jerusalem me Juda bulu we bidi dabe bidibo wiegi yai ilibo nai dabe, te agai tigidali nai me, wę me, sese silaibao.
ISA 3:2 Agai te hwįbo bomai bidi dabe, me olo ami bidi dabe, me po tų odobo bidi dabe, me profet bidi dabe, me sogo yesi bidi dabe, me hanude genuai bidi dabe, agai sela sąwaibao.
ISA 3:3 Tama me, agai te ami ofisa, me gavman ofisa bidi dabe, me tuni bidibolo wiegi yai kolesaga mabo bidi dabe me, agai sela sąwaibao. Tama me, agai te bidi dabe haniani nai dabe nigibo koneai bidi dabe me agai sela sąwaibao, me te bidi dabe te haniani sogo yesi pobi koneai bidi dabe me, agai sela sąwaibao.
ISA 3:4 Tama Genuai Bidigo te olo ogwa dabe te Juda bulu me Jerusalem bulude genuai bidi dabe nigimainu sula tagalaibao. Awe, te wai dabe augwa homugo digi te bulu tonaluaibao. Tama haniani kolesaga dabe yaibao.
ISA 3:5 Te tigidali bidi dabego aga hasi me aiyaba elaluainu sę bomo yaibao. Te gesi ogomani wegi manigo te augwa bolo monu dabego po obaso, sela sąnama, dagą waibao. Tama dwai kolesaga homu pągąna pai bidi dabego te dwagi yai homu kolesaga yai bidi dabego po sela sąwaibao.
ISA 3:6 Tama te sogo bidi dabe augwali augwa ama mu deli me bidibo digi pelama, tama agabolo te po waibao, “Nago deli naga te gudabo ugwa te elalubao. Te nage dago genuai bidi nigilama, tama da e dwai sogo nago tau sao,” waibao.
ISA 3:7 Tiali goli, agai te po waibao, “Eno dage tau sabo sunumi menio. Ena me ena nai me ugwa menio. Dagego ena dagego genuai bidi nigimainu dagego ena sa mugimio,” te po waibao.
ISA 3:8 Jerusalem de Juda si te dwai sogoba sabolama, tulalubo gagalali. Magi baso meni. Augwaligo tigidali pogo me, sęgo me, augwaligo Genuai Bidigo nogi aiyaba elalubo dao. Augwaligo te dwai kolesaga agai gedude ma ebo dao.
ISA 3:9 Te po tų odobode augwaligo augwa godolo ebo bidi dabe naga tau sabo dao, tama gasa bidi dabe aiyaba elalubo dao. Tama te kolesagago augwa digi augwa ma po tų ela mabo dao. Augwali te we bidi dabego gedude dwai sę ebode augwali hale me ebeo, te Sodom bagego polobadu yali gilama. Augwali dolaibao. Augwa dagede augwa dolaibao.
ISA 3:10 Te dwagi yai doloba pai kolesaga ebo we bidibolo te dwagi yai homu yao po walao. Magi baso meni, augwali dwagi yai pe saibao, augwa yali dwagi yai sęde.
ISA 3:11 Tiali goli, dwai bidi dabe da, dolaibao. Augwali te dwai pe te augwa yali dwai sęde saibao.
ISA 3:12 Hobede mu da, dage eno we bidi dabe. Te gesi we bidigo dage te tonalubao. Te tobolu bidi dabego dage halubaso, tama dagego augwaligo dwai sunumidu dage wali te pobao.
ISA 3:13 Genuai Bidigo tigidali we bidigo po tų odainu no sealuba.
ISA 3:14 Agai aga we bidi dabego tobolu bidi me genuai bidi dabe po tų ela mani. Tama agai te po wali, “Te we bidi dabe te eno wain gi tiwai dao. Tiali goli, dage da, dagego tama te gi dolama, tama te gide elaluali nai dabe dagego wi salio. Dagego bidi nai dabe habuge yai bidi dabe dagego hobede ebo menio. Mu menio. Dagego augwaligo dwasianu nai dabe kegelama, tama duga bede pesage holobo dao.
ISA 3:15 Dego dagebolo obaso, dagego eno we bidi agalama, tama nai meni yai bidi dabe dolaliwe? Ena Genuai Tigidali Bomo Elalubo Bidi, eno dagebolo dolo obao. Dagego dwai kolesaga mu yali.”
ISA 3:16 Genuai Bidigo te po wali, “Jerusalem we dabe, suiąo. Augwaligo homugo augwali dwagi yai mu dao homu eyu, hagoma homu ebao. Te augwali bilibo sogo, augwaligo augwa sągą aulama, tama augwa sągąde hǫą omainu ebo dao. Augwaligo augwa tobolu sagolama, augwa dogoni dodolobo dao. Tama augwaligo gedu subigila bidi gedu tonobo dao.
ISA 3:17 Tama tibaso, ena Genuai Bidi eno te Saion hanu we dabe dene mawaibao. Eno augwaligo tobolude keni pągąna pomainu yaibao. Tama augwaligo tobolu nisi ma menia saibao,” wali.
ISA 3:18 Tama te sogo Genuai Bidigo te Jerusalem we dabego dwagi yai aubo nai dabe sela sąwaibao. Agai te sągąde, me nogode, me dogonide, me olode aubo nai dabe agai sela sąwaibao. Me te tobolu aubo nai dabe me, me te tobolu halubo ugwa dage dabe me sela sąwaibao.
ISA 3:20 Agai te tobolu nisi dųbo mǫ, me tobolu nisi tomagebo name ugwa, me te ugwa pedai te kukulu gudubo ąǫ ebo nai, me te dwasianu paus augwaligo sanda wel me te pobi nai dabe te dogonide kebo nai agai sela sąwaibao.
ISA 3:21 Agai te nogo danide me gunide mubo ring agai sela sąwaibao.
ISA 3:22 Agai te sawi yai ugwa dabe sela sąyu, me agai augwaligo haniani dwagi yai ugwa dabego nigai gudubo ugwa dabe me, paus dabe me, hankasip dabe me, agai sela sąwaibao.
ISA 3:24 Tama te sogo te Jerusalem we dabego polobadu auwali tiai me egobeo. Te augwaligo sanda wel meniama, tama augwaligo tigi kugumini dwai mu yaibao. Te augwaligo sawi yai ugwa me, ugwa name me augwaligo kukulu gudabo ugwa name menia saibao. Tama tibaso, augwali dwai ugwa dabe gudama, tama dwai bonogo augwaligo ugwa dąų walaibao, te bono te kukulu gudubo ąǫ yaibao. Te augwaligo augwa tobolu au me iligobeo. Magi baso meni. Te boi bidi dabego augwaligo tobolu nisi sese poala sąnama, tama augwaligo tobolu wane yaibao. Tama me augwaligo sawi gesabidide da, te boi bidi dabego kalabus bagego magi augwaligo gesabidide togaibao.
ISA 3:25 Jerusalem, boi bidi dabego nago bomai ami bidi dabe hwįbode ela muaibao, me gasa olo bidi dabe ela silaibao.
ISA 3:26 Tama augwaligo nago nai tigidali saibao. Nage te we me augwaligo agai ugwa dabe sese sela sąwai tiwai yaibao. Tama aga tǫde habu olo dulalubo tiwai yaibao. Tama te obo sunumi dabego te nai dabe nage tigide pedalobo sulama, tama augwali hobede elama, gela waibao.
ISA 4:1 Tama te sogo te nogo a naga olama, me badu nogo si we dabego bidi me deli tola selama, te waibao, “Da dena digi nai me ugwa dabe da dena digi sela tuyu yaibao. Tiali goli, dago bidi mu menio. Tama da hale mu ebo. Tama tibaso, te hale silimainu eyu, nage dago bidi bidibo ąǫ yaibao,” te po waibao.
ISA 4:2 Te me sogo nosali pedalaibao, Genuai Bidigo te ni me deligo gesi nologo ma kolimainu yaibao. Tama tǫgo dwagi dwagi yai nai dabe holiyu yaibao. Tama te Israel we bidi dabe dolisąma me bidibo bage, augwaligo te nai dabe wiegi yai holobo sulama, augwali dwagi yai homu ela paibao.
ISA 4:3 Te Saion hanude bidibo we bidi dabe, augwali te Jerusalemde me bidibo we bidi dabe da, Genuai Bidigo augwali bugagia bidimainu sa polo muai dao, augwali bugagia bidimainu. Tama agai augwali nogi agai bukude asęai dao. Tama megi da, agai augwali aga we bidi mu dao waibao.
ISA 4:4 Genuai Bidigo bomai homu kolesaga mu yali, te Jerusalem bulu dolama, tama nosali ma te Jerusalem bulu ma usu ma ilama, wiegi yai bulu ma ilainu. Te aga genuai bomogo agai te Jerusalem bulu wę tedalama, tama tigidali meda elalubo sela sąwaibao, te hanude daganaluali meda dabe. Agai te we dabego yali dwai kolesaga dabe sese sela sąwaibao. Me te bidi dabego gasa bidi dabe dolainu yali dwai kolesaga dabe me sela sąwaibao, te Jerusalem wiegi yai pedalobo si da.
ISA 4:5 Tama Genuai Bidigo bobobage yai pǫ me deli te bulu du Saionde elalumainu elama, me te we bidi lotu wabo pesageba sisinalubo madi. Te giligade Genuai Bidigo te pǫ elalumainu yaibao. Tama hulide da, agai bobobage yai hano dali, genuai isi bogoli dali elalumainu yaibao. Te pǫ me, hano me, isi me, Genuai Bidigo bogwą wali yali gilama, aga te bulu dude me aga dwagi yai nai dabede ugwadu walaluaibao.
ISA 4:6 Te bogwą waligo te Jerusalem bulu haluama, tama bomai giliga posolo palialuaibao. Tama me, agai Jerusalem te mone tulubage sogo bugagia bidimainu yaibao.
ISA 5:1 Eno ena abagi me delide balia po waibao. Te baliago aga wain gi po pusali. Te ugwadu bulu du dwasianu mede tǫ ili hauwa me elaluali. Tede eno abagigo wain gi tede yali.
ISA 5:2 Agai tǫ elama, tama masigi tigidali sela sąwai dao. Tama dwagi dwagi yai wain nologo bulali. Te gi tomode agai be sęani, te aga tede bidiyu, te gi tonaluainu. Tama te masigi pesage me delide agai te wain du mimiabo digi te nai nigali, tǫ dedage nigali. Tigidali sę silibo si, agai te homu yali, ‘Eno ni wain du bugagia mu walaibao,’ homu yali. ‘Tama wain du pusu mu yaibao.’ Tiali goli, meni. Te ni dabe du bugagia me walobeo. Tama te du dabe dwasianu mu elama, tama pedauwalide ha yali.
ISA 5:3 Tama tibaso, eno abagigo te po wali, “Dage Juda we bidi, me Jerusalem hanu we bidi, dagego enabolo walao. Te dego tiabo sę yaliwe? Enawe? Ma, eno wain gigo dawe?
ISA 5:4 Eno koneani. Eno dwagi yai sę yali, te gide dwagi yai wain du walaiba weyu, tiali goli magi baso mu te wain du dwasianu mu walama, tama pedauwalide ha yaliwe? Te gi tonalubo sę me deli te eno bugagia dolo ebewe?
ISA 5:5 Megi da, dagebolo ena wain gide yaiba homu yali po dagebolo eno pusa mawaibao. Te eno wain gi obo hųgia sąwaibao. Awe, te obo dolama, tama te bulu hasa dabe te gi tomoba pelama, tama te wain ni tulama, dolomainu yaibao.
ISA 5:6 Te eno te tǫ dolama, tama busi holama, nosai holiyu, tama te sesane ni dabe holama, te gi halua somainu yaibao. Tama eno te wain ni ma tonalubo sę ma egobeo. Te me eno te gi tǫba tulubage me tulamo olama, habu selaibao,” eno abagigo te po wali.
ISA 5:7 Te Juda we bidi, me Israel we bidi, te Genuai Bidigo Tigidali Bomo Elalubo Bidigo wain gi tiwai dao. Agai godolo mu elama, agai augwali bugagia mu tonalubo dao. Te we bidi dabego wiegi yai doloba pai kolesaga naga emaina homu ebo dao. Tiali goli, augwaligo dwai kolesaga ebo dao. Agai homugo augwaligo gasa we bidi dabe dali wiegi yai kolesaga emai homu ebo dao. Tiali goli, augwaligo gasa we bidi aiyaba elaluama, tama augwaligo augwali dali boi bidi homu kolesaga ebo dao. Tama te aiyaba elaluali we bidi dabego i wabo agai odali.
ISA 5:8 Dage te tǫ dabe, be dabe hauwa abelama, duga naga pesage hola sabo bage, dage dolaibao. Te tamadi tama dagego tigidali tǫ me, bulu me, sese sela silaibao. Tama gasa bidi dabe meba bidabo bulu menia saibao. Tama dage naga tama bidaibao.
ISA 5:9 Eno odali, Genuai Bidi Tigidali Bomo Elalubo Bidigo te po wabo eno odali, “Mu tama, te genuai dwagi yai be dabe dolama, te olo elaluaibao. Awe, bidi dabe te wiegi yai be dabe me bidigobeo.
ISA 5:10 Tagala, augwaligo wain gi hauwa bulu badi goli, me wain du dabe hauwa me walogobeo. Tama augwaligo dwasianu wain ąį naga nigaibao. Tagala me, augwaligo nogo si begi te wit ge augwaligo te gide bulai. Tama te wit ininama, augwaligo togolama, te begi deli digi bueibao,” Genuai Bidigo te po wabo eno odali.
ISA 5:11 Dage dolaibao. Dage te kigamu hulide hodaloama, wain wę tuyu, te haniani bomai wę tubo bage, dage dolaibao. Dagego te wę tulama, polodubadi be huli sesabi edelebo dao.
ISA 5:12 Te nai daa tuyu, wain wę tuyu, me haniani musik gitago eliyu, genagego eliyu, hąbidigo eliyu ebo, te dagego mu koneani. Tiali goli, Genuai Bidigo yainu ebo, te sę dabe dagego munu me konebeo. Dagego te sę dabe te olo nai dabe da homu ebo dao.
ISA 5:13 Tama tibaso, Genuai Bidigo te po wali, “Mu tama, eno we bidi dabe dagego ena konebo hagela yali. Tama tibaso, boi bidi dabego dage gasa buluba me kalabus elama, odasa paibao. Te genuai bidi dabe nai menia saibao. Te olo we bidi dabe te ąį nogone eyu bidaibao. Tama augwali mu dolaibao.
ISA 5:14 Megi dage wiegi yai homu elama, gana paide dagego daa hauwa mu te tubao. Tiali goli, mu tama, te gų pagede te kele ą olama, tama te Jerusalem bulu genuai bidi dabe, me olo we bidi dabe dalainu polo no munalubao,” Genuai Bidigo te po wali.
ISA 5:15 Te tigidali we bidi hale mu yaibao. Tama te we bidi augwa digi augwa nogi ugwa sabo we bidi dabe augwali nogi mu menia saibao.
ISA 5:16 Te agai doloba pai kolesagago Genuai Bidi Tigidali Bomo Elalubo Bidigo te we bidi dabego bomo aiyaba elaluaibao. Tama aga deli naga genuai nogi saibao. Tama agai te dwagi yai doloba pai kolesaga naga ebogo agai te we bidibolo ola mawaibao, aga te tedali gasagi yai mu dao.
ISA 5:17 Te hanu dabe sese dolaibao. Tama nosai dabego bulu mesega saibao. Tama sipsip kibu de meme kibu sigo te mone hauwa elaluali bidi dabego be elaluali pesageba nosai tuagasaibao.
ISA 5:18 Te dage dolaibao. Dagego te gasa bidi dabe ili po walama, sęgę te soba. Te sęgę dabe dage tigi dagana selama, tama dagego sela sąbo usu egobeo.
ISA 5:19 Dagego te po wabo dao, “Dago odobo Israel dabego God, aga te Dwagi Yai Doloba Pai Kolesaga Naga Ebo God dao. Ma, agai dabolo magi sę me yabo homu ebaso da, teda agai polo emainao. Tama tibaso, dago sulama, tama dago aga homu kolesaga koneaibao. Awe, agai te sę polo emainao,” wabo.
ISA 5:20 Dage dolaibao. Te dagego haniani nai hasegelama, tama te po wabo dao, “Dwai kolesaga te wiegi yai dao, te wiegi yai kolesaga te dwai dao,” wabo dao. Me, dagego te po wabo dao, “Te hulia sali te ula dao. Me, te ula ebo te ma huli sali dao,” wabo dao. Tama me dagego te po wabo dao, “Te ha ebo nai te pusu ebo, ma te pusu ebo nai te kelede ha ebo,” po wabo dao.
ISA 5:21 Dage dolaibao. Te dage bidi duga homugo dagego kolesagago gasa bidi dabego kolesaga aiyaba elaluali dao homu ebo bidi dabe, dage.
ISA 5:22 Dage te bomai wę tubode genuai nogi elalubo bidi dabe, dage dolaibao, te dagego bomo de kolesaga si da, te haniani wę sįsįbo delide naga dao.
ISA 5:23 Te dagego po tų odobo sogo da, dagego te augwaligo nogode te ili po wabo po tų abelebo masigi dagego selama, tama te dwai sę yali bage olo taga palobo dao. Tiali goli, dagego te po sęgę meni yai bidi dabego po bugagia osola subo menio.
ISA 5:24 Tama tibaso, dage te ni sasia pabo tiwai elama, tama te ni pedali mobia pelama, tama te ni yabe dabe tau elama, tegalubo tiwai yaibao. Te dwai sę dage tigiba polo tama pedalaibao, te isigo nosai delama, silibo tiwai tama yaibao. Magi baso meni. Dagego te Genuai Bidi Tigidali Bomo Elalubo Bidigo bomai po sela sąbaso, dagego Israel dabego God tudi ola mabo. Aga te Dwagi Yai Doloba Pai Kolesaga Naga Ebo God dao.
ISA 5:25 Tama tibaso, Genuai Bidi agai aga we bidi dabe dali sębę eyu, te sębę posolo mu ebao. Tama megi da, agai nogo ugwa sagua selama, dolainu no munalubao. Agai nogogo deli sogo elebaso, te tigidali tǫ dabe bulu du dabe elebaso, memenege elama, bulu du dabe aluasa dulaibao. Tama we bidi hauwa isila paibao. Tama augwaligo tigi dabe te hanu sunumi dabede olo pobele bage dabe munalua pabo ąǫ yaibao. Genuai Bidi agai tama tiaibao. Tiali goli, te tama tibogo Genuai Bidi agai sębę siligobeo. Menio. Agai nogo me ugwaba me dodolalubao.
ISA 5:26 Genuai Bidigo te digibulu ami bidi dabe aga we bidi dolagasomainu i wabo sa muaibao. Awe, te digibulu mu bidibo bage asomainu eyu, agai ho bomonama waibao. Tama te ami bidi dabe bomona togwa asaibao.
ISA 5:27 Te ami bagego bidi dabe da, te bomai bidi dabe naga dao. Te augwali me deli sągą dili telega elama, tulaluainu yai me menio, o te agai gedu godege magana pai me menio. Augwaligo kibu waligo te gudali ugwa bugagia kęnama, asaibao. Augwaligo bomai su sągą sendol guda sesa paibao. Te togwa pabo ąǫ isąwai me gudugobeo.
ISA 5:28 Augwaligo ene da, mu poa pai. Tama augwaligo enesigi dolama, tama enabo no sealubuo. Augwaligo hos dabe da, boma pai mu dao. Tama te hos dabego sągąde kapa dabe te dila pai masigi tiwai, tama togwa pogobeo. Augwaligo karis dabe bomona mu pabo dao. Tama te karis wili dabe da, te wali ebo ąǫ ebo dao.
ISA 5:29 Te ami bidi dabego te hai wabo te laion yowigo bulu hasa ela munama, dągą wabo tiwai waibao. Augwaligo boi bidi dabe toulama, tama sela paibao, te laion yowigo bulu hasa elama, sela pabo tiwai yaibao. Tama bidi mego augwali ma sogobeo.
ISA 5:30 Tama te sogo boi bidi dabe aselama, Juda bulu dolagasaibao. Tama augwaligo kulukulu genuai mu waibao, te tamu wę holama, wę kemi saneba asiyu, u wabo tiwai yaibao. Tama te bidi dabego te buluba tonagasobo si da, teda augwaligo te bulu sisi pǫgo mesega selama, giliga ula sininai suaibao. Tama te bulu mu hulia sai suaibao.
ISA 6:1 Te king tuni bidi Usia isali kibu bede, eno Genuai Bidi aga tuni bidi saide dualalubo suali. Agai tuni bidi sia ugwanu mu elaluali. Tama tuni bidigo ugwa agai gudali da, moni bobobage mu elama, aga be mu usu nai suali.
ISA 6:2 Tama geninama ensel sibigo aga bagua sai elaluali. Te tigidali deli deli ensel dabego bogo a naga olama, me badu nogi deli naga elaluali. Tama deli deligo augwa bogo me sigo augwa gesabidi halua siyu, ela pai suali. Tama gasa bogo me sigo augwa tigi mesega siyu yai yali. Tama gasa bogo me sigo da, augwali bola peyu yali. Te ensel sibi da, te isi ula tiwai.
ISA 6:3 Tama augwa digi augwa hasi ma i weyu, te po wali, “Genuai Bidi aga tedali gasagi yai mu dao. Aga tedali gasagi yai mu dao. Aga tedali gasagi yai mu dao. Genuai Bidi Tigidali Bomo Elalubo Bidi aga tedali gasagi yai mu tama dao. Agai genuai ula de bomo sigo tǫ tigidali mu usu nani,” te po wali.
ISA 6:4 Ena yaide be sunumide bidali, tama tigidali sogo augwali deli mego hae wabo sogo da, eno suali, te moni masigi me augwaligo be sę yali, te masigi tigidali mobodo yali. Tama eno suali, hano bede pągąna pabo suali.
ISA 6:5 Tama tibaso, ena wi ebaso, te po wali. “Mu tamao, ena mu dolaibao. Tigidali sogo eno pedauwalidu dwai po wabo dao. Tama ena dwai po wabo we bidi dabe tomode bidibo dao. Ena dwai sęgę wa abibo bidi dao. Tama megi da, eno te tuni bidi polo suali, aga Genuai Bidi Tigidali Bomo Elalubo Bidi. Tama tibaso, ena isaibao,” eno te po wali.
ISA 6:6 Tama te ensel dabe me deligo ala gagawai naide isi dage tolasa, ena pageba bola asali. Agai te isi dage te altade sali.
ISA 6:7 Agai te isi eno pedauwalide munama, agai te po wali, “Eno te isi nago pedauwalide muani dao. Tama nago dwai sęgę sia selama, tama megi Genuai Bidigo nago yali dwai sę sela sąwai dao,” wali.
ISA 6:8 Tama eno Genuai Bidigo ensel sibi hanaluyu, te po wabo odali, “Dago de tagala palaibawe? Dego eno po sela paibawe?” Tama eno te po wali, “Nago ena tagala palao.”
ISA 6:9 Tama tibaso, Genuai Bidigo enabolo te po we bidibolo pusugi pao po wali, “Dagego po hauwa sogo odaibao. Tiali goli, dagego te page kuna konegobeo. Dagego gedugo hauwa sogo tonono bilaibao. Tiali goli, dagego magi sę pedelali me konea sogobeo.
ISA 6:10 Magi baso meni. E we bidi hanigo homu kolesaga te puna pai dao. Tama augwaligo odogo po odobo hagela eyu, tama augwaligo augwa gedu palia sai. Tiyu, augwaligo gedugo te magi nai me deli suidali weyu tiali, tama augwaligo odogo po odidali weyu tiali, tama augwaligo homude te po page ma koneama, tama augwali begasa, enaba ma aselama, tama eno augwali usu ma ilidali weyu, augwaligo tama kolesaga yai dao,” wali.
ISA 6:11 Tama tibaso, eno aga e tama po hanalu wali, “Genuai Bidi, eno te sę ela pelama, mena sogoba usu nigi paibawe?” Tama agai po wei ponoyu, te po wali, “Te tigidali hanu dabe, me tǫ dabe, me be dabe sese dola silama, be dabe olo elalua pabo sogode. Tama bidi dabe te bede dabe bidi me bidisąma ebo sogoba usu nigi paibao.
ISA 6:12 Ena Genuai Bidi. Eno te we bidi tigidali augwali augwa bulu pąde eno augwali te digibulu buluba sela sąwaibao. Tama te bulu we bidi menia saibao.
ISA 6:13 Tama ma dwasianu we bidi hani te tǫde me bidibaso da, augwali me silaibao. Tiali goli, tagala, te bulude we bidi meni baso me, te nosali ena we bidi me ma pedalaibao, te ni age te bidigo polo gelai ni tanede age ma dalasa holobo tiwai ma yaibao,” wali.
ISA 7:1 Te Ahas te Jotamgo ogwa, aga wąį Usia, aga te Juda dabego tuni bidi bidibadi, hwįbo sogo pedalali. Resin, Siria bulu tuni bidi, me Peka, te Ramaliago ogwa, Israel dabego tuni bidi, augwali sigo Jerusalemba hwįgi pali. Tiali goli, augwali sigo te hanu sabo usu ebe. Te hwįbo Jerusalemba sabolisąma ebadi da,
ISA 7:2 te Juda dabego tuni bidigo te e tama po odali, te Siria ami bidi dabe te Israel bagego tǫba polo asai dao wabo po odali. Tama tuni bidi aga we bidi hani dali augwali wi mu eyu, haliga midigi sali, te bomai waligo te ni silide elalubo ni yabe dabe memenege ilibo tiwai yali.
ISA 7:3 Tama Genuai Bidigo Aisaiabolo te po walali, “Naga ogwa Searjasup oda selama, tuni bidi Ahas sugi pao. Dage te wę sabo wę gamia Jerusalem ugwa badu piąo. Tama dage sigo te tuni bidi te name ugwa wę telabo pesageba pabo genuai sunumide te tuni bidi tiąba pao.
ISA 7:4 Te tuni bidibolo aga homu dąų olama bidao, tama te haniani po dabego agai homu elalumainu elamo dao po walao. Aga yaide dua bidama, tama te tuni bidi Resin aga hani dali, me te Israel dabego tuni bidi dabe dali, wi igio po wao. Te tuni bidi sigo sębę te isi pąde sula sainu dabo tiwai ebao. Te sula sainu hano naga holobo tiwai te ebao.
ISA 7:5 Te mu tama, te Siria dabe augwaligo te Israel dabego tuni bidi dali augwaligo po mia sali, te Ahas aiyaba elaluaio olama,
ISA 7:6 augwaligo te po wali, augwali te Juda buluba hwįagasaibao po wali. Tama we bidi wi ilama, tama te bulu selama, tama te bidi Tabelgo ogwa tuni bidi bidimainu sa muaibao, augwaligo te po mia sali,” wali.
ISA 7:7 “Tiali goli, ena God, Genuai Bidi, eno te po te obao, te nai dabe te me pedalogobeo. Mu tama, augwaligo te sę ebo usugobeo.
ISA 7:8 Magi baso meni. Te tobolu bidi Resin agai bomogo naga te genuai hanu Damaskus tonalubo dao. Tama Damaskusgo bomogo te Siria tǫ kantri tonalubo dao. Tiali goli, te Resin da, te aga bidi naga dao. Te tiwai me, Ramaliago ogwa Peka agai bomogo naga te Israelgo genuai hanu Samaria tonalubo dao. Tama te Samaria hanugo bomogo te Israel tǫ pedai kantri tonalubo dao. Tiali goli, te Peka da, aga bidi naga dao. Te 65 kibu be tomode te Israel bulu dolama, tama te we bidi sese besela pelama, tama augwaligo nogi mu tama sia saibao. Tama ma, te Juda dabe dagego eno pode homu dąų wasiąma yali da, teda dage me bobobage sogo me bidigobeo,” Genuai Bidigo te po wali.
ISA 7:10 Tama Genuai Bidigo Ahasbolo gasa po me wali.
ISA 7:11 Agai Aisaiabolo te Ahasbolo te po wao po wali, “God naga Genuai Bidibolo hanalu wao, te nagebolo bidigo gedugo susiąwai bomai sę me ola momainu. Nago agabolo mena tama bomai sę, me nago suabo homu ebo sę me, nago agabolo hanalu wao. Ma, nago te bomo yai sę te bidi gų pagede suabo homu ebaso me, o ma nago dagalude bomai sę pedalobo suabo homu ebaso, o ma menade me naga homugo godolo me ebo digi te tobage sę suabo homu ebaso da, nago Godibolo hanalu wao, tama Godigo nage ola mawaibao,” wali.
ISA 7:12 Tiali goli, Ahasgo te po wali, “Menio. Te eno agabolo bomai sę me suainu me hanalugobeo. Eno Genuai Bidigo bomo usu sabo hagela ebo,” wali.
ISA 7:13 Teda Aisaiago po wei ponoyu, te po wali, “Dage tuni bidi Devitgo wąį dabe, dagego bugagia odao. Dagego ebo kolesagade da te bidi dabego dage hagela mu yali. Tama megi ma eno Godigo tonalubo kolesaga te dagego usu sogowe?
ISA 7:14 Teda Genuai Bidi aga digi dage bomo yai sę me deli ola mawaibao. Te sę da e tama tiwai dao. Te gesi wegi me tabi elama, tama agai ogwa ame naibao, tama agai nogi Emanuel poaibao.
ISA 7:15 Tama nosali te ogwa aga te homu kolesaga elama, te mena kolesaga dwai yaliwe, ma mena kolesaga wiegi yai yaliwe wabo sogode, tama te sogo agai hani bunu ąį, me sis augwaligo kau kibu ame pęgo, me sipsip kibu ame pęgo nigai nai, tuaibao,” wali.
ISA 7:16 “Ahas, megi da, nago te tuni bidi side nage wi ebo dao. Tiali goli, augwali sigo bulu dolama, tama augwaligo tǫ olo elaluaibao. Tama te nai sę da, te ogwa wai bǫųgo mena kolesaga dwai yaliwe, ma mena kolesaga wiegi yai yali homu konesiąbadi, te sę yaibao.
ISA 7:17 Tama Genuai Bidigo dwai sogo taga palama, tama nage me, naga we bidi me, naga ayago togali seseba taga palaibao. Te sęgęgo da, te polobadu yali te sęgę mu edelama, mu yaibao, te Israel dabego Juda tagalama, taga palidu gagalasa, megiba usu nagasali. Te sęgę e dao, Genuai Bidigo Asiria tuni bidi Juda buluba sela asaibao,” Aisaiago te po wali.
ISA 7:18 Tama te sogo Genuai Bidigo Isip dabeba ho obaso, augwali augwa bulu tagalama, tama augwali te dinai sibi asobo ąǫ yaibao. Tama agai te Asiria haniba ho wabo si, tama augwali te mano sibi isidigi asobo tiwai asaibao.
ISA 7:19 Tama augwali te bulu Juda tǫde mu pągą yaibao. Tama augwali te tigidali dwai pesage me, masigi dedage me, dwagi yai nosai elalubo pesage me, sesane yai bono elalubo pesage me, mu usu naibao.
ISA 7:20 Tama te sogo Genuai Bidigo te Asiria tuni bidi te wę Yufretis u badu oda saibao. Aga te Genuai Bidigo nisa tiwai elama, dagego nisi poawaibao, te dage Juda dabego tigi nisi. Agai dagego penane nisi me, tobolu nisi me, tigi nisi me, tigidali agai poawaibao.
ISA 7:21 Tama te sogo da, te boi bidi dabego dagego kibu bulmakau dabe, sipsip kibu dabe sese ela silaibao. Tiali goli, bidi me deligo kau kibu deli bidiyu, me meme kibu si me bidibaso da,
ISA 7:22 augwaligo ame pę hauwa mu nigilaibao. Tama agai te ame pę selama, tama te tubo nai sis geselaibao. Tama te dwasianu we bidi bidibo bage augwaligo te sis dali, hani bunu ąį dali si tuyu yaibao.
ISA 7:23 Te sogo da, dagego gi dabe dola silaibao. Megi te dagego dwagi yai wain ni gi deli delide te 1,000 wain ni bono elalubo, tama te ni dude dagego masigi 1,000 kina te sabao. Tiali goli, te dwai sesane ni me, sesane bono si holama, te ni mesegelaibao, te dwagi yai gi dabe, tama bidi dabe olo bilibo wi yaibao. Ma, bidi dabe augwali teba poloba painu da, teda augwaligo enesigi me selama, hasa kegegi paibao.
ISA 7:25 Megi da, bidi dabego te dwasianu bulu dude dabe te augwa gide nai sabo dao. Tiali goli, te ni sesane yai ni dabe holiyu, bono dabe holiyu elama, te gi mesegelaibao. Te bidi dabe augwali te sesane dabe wi ebaso, teba pelama, gi dabe ma egobeo. Menio. Te da, augwaligo te kau kibu de sipsip kibu naga te pesageba bilama, nai teba gegegi pomainu sula tagalaibao.
ISA 8:1 Genuai Bidigo enabolo walali, “Te po tede asęabo genuai nai me sao, tama ugwadu nago te po asęao, ‘Polo wi sa, polo sela pa.’ Nago bugagia asęao, tama te bidi dabego bugagia nedebo usu yaibao.
ISA 8:2 Tama te po sagoa maiabo bidi si nago sao, te dwagi yai bidi pris Uria, me Sekaraia, te Jeberekiago ogwa,” wali. Tama eno te tama yali.
ISA 8:3 Nosali ena ena we dali piali. Tama aga haliga elama, ogwa ame nani. Tama Genuai Bidi enabolo te po wali, “Nago te nogi agabolo mao, ‘Polo wi sa, polo sela pa’.
ISA 8:4 Tama te waigo ida aya wabo gagalisiąbadi da, te Asiria bagego te Damaskus de Samaria sigo wiegi yai nai dabe tigidali wi sagasaibao, tama augwa tuni bidiba sela paibao,” wali.
ISA 8:5 Genuai Bidigo enabolo te po ma wali,
ISA 8:6 “Ena Genuai Bidi, ena te wę Jerusalemde gebo dabo tiwai dao. Aga tigidali sogo dua soabo dao. Tiali goli, te Juda we bidi dabego homugo eno bomo meni da homu ebo. Tama augwaligo homugo te Aram tuni bidi Resin dali, te Israel dabego tuni bidi Peka, augwali sigo bomo te genuai mu dao homu ebo.
ISA 8:7 Tama tibaso, ena Genuai Bidi, te eno te wę Yufretis genuai mu ilama, tama te wę gisigiluyu, tigidali pesage mesega sigi pomainu yaibao. Te węgo tigidali bulu mesega saibao. Te wę Yufretisdu gagalama, tama Juda buluba sabolagasaibao. Tama te wę gebo dabo te bidigo dogoni dąį yagasaibao. Te wę Yufretis te Asiria tuni bidigo piksa tiwai dao, te aga ami bidi dabe dali sigo tiwai. Te bage augwali aselama, te Emanuel nago tǫ usu nagasaibao.” Godigo te po wali.
ISA 8:9 Bugagia odao, dage te we bidi digibulu bidibo me, pąde bidibo me, dage Israel hani isąwai bage. Dagego hwįabo no muyu, bomo selama elalubo sę yao. Tiali goli, dagego bomo da, toga paibao. Tama dage noma selama, kone tųą pebela waibao.
ISA 8:10 Duga homugo mena sę yabo homu yali po duga maiąo. Tiali goli, dagego te sę ebo usu egobeo. Dagego te po da, aga nai meni yaibao. Magi baso meni. God da dali bidibao.
ISA 8:11 Eno Genuai Bidigo bomo enaba asobo gagama yali. Tama agai enabolo te po wali, “Nago te we bidi dabego homu dali deli igio. Tama nago augwaligo ebo kolesaga wali pigio,” wali.
ISA 8:12 “Te we bidi dabego te po obaso da, ‘Bidi hani mebago Juda bulu dolaibao po mia salio,’ po obaso, nage dali, naga hani dali, dagego te po mu dao homu igimio. Tama me, te we bidi wi elama, noma sobaso da, dage augwali ebo gilama wi elama, noma selamuo.
ISA 8:13 Dagego e tama koneao. Ena Genuai Bidi Tigidali Bomo Elalubo Bidi, ena te wiegi yai doloba pai kolesaga naga tigidali sogo ebo God dao. Dagego ena deli naga wi elama, noma sao.
ISA 8:14 Ena te we bidigo geme duala sabo bomai pesage dao. Tiali goli, ena te Israel de Juda sigo we bidigo sunumide masigi tiwai bidibao. Tama augwali te masigide sągą dani tuą palama, tama tulaluama, tama augwali dolaibao. Tama te Jerusalem we bidide da, te ena te kę tiwai, augwali tola sabo bidibao. Tama augwali hauwa te kęde tola saibao,” wali.
ISA 8:16 Te ena skul ogomani gesabidide eno te Genuai Bidigo enabolo mani po mesegelama, haluali. Tama eno asęnama, tama eno dąį tede ilali.
ISA 8:17 Megi da, eno te Genuai Bidi agai yaibao wali te sę ebo deli naga tonaluaibao. Agai Israel we bidiba polo tudi ola mawai dao. Tama agai augwaliba te begela ma tonogobeo. Tiali goli, eno agai bomo deli naga konealuaibao.
ISA 8:18 Genuai Bidi Tigidali Bomo Elalubo Bidi aga te Saion bulu dude bidibao. Agai ena te wai dabe mawai dao. Tama agai da te Israel we bidide yabo sę dąį tiwai ilali.
ISA 8:19 Te we bidi dabego dagebolo te isai bidi dabego noma dali po wabo we bidiba pao po waibao, tama augwaligo homu kolesaga sigi pao po waibao. Te isai bidi dabego noma dali po wabo bagego augwaligo pedauwalidu pomu po weyu, keledude haniani dwasianu po waibao. Tiali goli, te isai we bidi dabego te bidibo we bidi dabe homu kolesaga mabo usu egobeo. Te tama tiali goli, magi baso mu augwali te isai we bidiba udalama, tama augwalide te kolesaga sabo dawe? Augwali augwa Godiba pomainao.
ISA 8:20 Te augwaligo te augwa Godiba pelama, tama agai homu kolesaga siyu, agai bomai po sigi peyu eyąo. Ma, augwaligo tama tisąma yali da, teda augwali hulia sai madi me bididuaibao. Tama wiegi yai sogo me sugobeo.
ISA 8:21 Menio. Augwali dwai dene mu saibao. Te augwali genuai homu sęgę mu elama, nasi elama, tama augwali subigila te bulude bilaibao. Nasigo augwaligo haliga sębę mu elama, tama augwaligo augwa tuni bidibolo, me augwa Godibolo dwai po waibao. Te augwaligo dagaluba tonoyu,
ISA 8:22 tǫba tonoyu yaibao. Tiali goli, augwaligo dwagi yai nai dabe me sugobeo. Menio. Te augwaligo te dwai sęgę, me dwai sęgęgo augwali tigidali bulude bilibo digi te hulia saigo augwali mesegasa bilibo tiwai yaibao. Tama augwali wi pelama, te dwai sęgę gedelabo sunumi mu meni yaibao.
ISA 9:1 Polobadu Genuai Bidigo te Naptaligo hanigo bulu pesage, me Sebulungo hanigo bulu dolai dao. Tama augwali hale dali mu bidai dao. Tiali goli, me sogo nosali da, te badu dabe te tamu węba pabo sunumide bida bida pabo bulu, me te wę Jordan ugwa bulu badu bulu dabe, me te Galili distrik bulu tigidali, me te Israel hani isąwai bidi dabe hauwa bidibo madi, te bulu dabe sese genuai nogi saibao. Tama augwaligo dwai sogo sia saibao.
ISA 9:2 Te we bidi augwali moni hulia sai madi bilai goli, megi augwali genuai ula suali. Augwali hulia sai madi bidai goli, megi da, augwaliba genuai ula pedalali.
ISA 9:3 Genuai Bidi, nago naga we bidi genuai hani pedalomainu yalio. Tama nago augwali wiegi yai homu emainu geninanio. Augwali naga gedude wiegi yai homu yalio. Te augwaligo augwa gi nai hasia inawai siyu ebo homu tiwai yalio. Tama me, te ami bidi dabego wąbi hwįnama, gasa bidi dabe aiyaba elaluama, te augwaligo sali nai dabe dobayu ebo homu tiwai yalio.
ISA 9:4 Te we bidi dabe wiegi yai homu yali. Magi baso meni. Nago augwaligo boi bidi dabego bomo polo toga sąyai da weyu, te polobadu nago Midian hanigo bomo toga sąyani yali gilama. Te boi bidi dabego naga we bidi tonaluama, tama augwali genuai sęgę tolalumainu yai dao, te bidigo sęga pai ni name kau kibu dogoniba munama, tama te kau kibugo sę emainu wąbi dagego elama, tonalubo tiwai yai dao. Tiali goli, nago te ni name dabe, me te wąbi dage dabe, nago polo toga sąyai dao. Te boi bidi dabego nai tama, te boi bidi dabego nago we bidi dabe dali dwai sę megi me egobeo. Te boi bidi dabego gudama, hwįgi pabo nai dabe sese isigo dela silaibao. Te augwaligo moni su dabe, me hwįyu gudubo ugwa te bidi kaneme dagana sali, te isigo delama, silaibao. Te tigidali sęgę dabe sese silaibao. Tama wiegi yai sogo ma asaibao.
ISA 9:6 Magi baso meni. Ogwa me ame neyu, daba polo sabolali. Te wai me deli Godigo dabolo mani. Aga dago tuni bidi bidaibao. Tama agai tama nogi dabe elaluaibao, te Dwagi Yai Kolesaga Mu Mabo Bidi dao, tama God Tigidali Bom o Elalubo Bidi, tama Tigidali Sogo Bida Bida Pidu Bidibo Aya, tama Bugagia Bidibo Page Sela Mayu, me Tabi Nagame Ilibo Tuni Bidi. Agai te tobage nogi dabe elaluaibao.
ISA 9:7 Te tuni bidi te tuni bidi Devit hasegelama, bidaibao. Tama aga te Devitgo tuni bidi siade dualaluyu, te we bidi dabe tonaluaibao. Te agai gavmanigo bomo tigidali sogo genuai holudaibao. Tama hwįbo me menia pelama, bugagia tigidali sogo bidaibao. Magi baso meni. Te tuni bidi aga te tigidali sogo dwagi yai doloba pai kolesaga naga ebo dao. Tama agai te kolesagago aga te bomai tuni bidi bidaibao, te megi me, tigidali sogo nosali me. Genuai Bidi Tigidali Bomo Elalubo Bidigo homugo bomo mu elama, we bidi dabe dali wiegi yai sę yabo homu ebao. Tama tibaso, agai te sę dabe me elama, pedalaibao.
ISA 9:8 Genuai Bidigo polo wali, te agai te Israel bulu dolaibao wai dao. Te Jekopgo wąį hani dabe, tama te dwai sogo augwaliba pedalobo sogo da.
ISA 9:9 Te genuai hanu Samaria we bidigo, me gasa tigidali Efraim hani bidi dabe, augwaligo koneaibao, Genuai Bidigo te sę augwaliba te yali dao po waibao. Te megi da, augwaligo homugo augwali geninama mu dao olama, augwa nogi ugwaba te sobao. Augwaligo te po wali,
ISA 9:10 “Te boi bidi dabego dago brikigo sęani be augwaligo hųgiyu, me dago fik ni geliyu yali goli, te dago tede moni homu egobeo. Te olo nai dao. Dago masigi togolama, wiegi yai bomai be dabe sę yaibao. Tama dago wiegi yai ni bǫ wai bulaibao, te ni fikigo pesage hasegeleyu,” te po wali.
ISA 9:11 Genuai Bidigo Israel dabe dali sębę yali. Tama tibaso, agai te boi bidi dabego homu hodolali, te augwaliba wąbi hwįagasomainu. Agai te Siria dabe te giliga asobo badu bidigo homu hodolali, te tuni bidi Resingo hani, tama me agai giliga dega sabo badu bulu Filistia hanigo homu me hogodolama, hwįagasomainu yali, Israel dabe aiyaba elalumainu. Genuai Bidigo te tama tiali goli, tego agai sębę siligobeo. Menio. Agai nogo me dodalubao.
ISA 9:13 Te Israel we bidi homu begelebeo. Genuai Bidi Tigidali Bomo Elalubo Bidigo augwali dene mani. Tiali goli, augwali agaba ma asobeo.
ISA 9:14 Tama tibaso, Genuai Bidigo te bulu Israel dene mawaibao. Te deli sogo tama agai Israel dabego tobolu dali, danu dali, si togaibao. Me po begelama weyu, agai te wiegi yai ni pam nologo dali, te olo sigi dali si togaibao.
ISA 9:15 Tobolu te polo monu dabe de genuai nogi yai bidi sibolo wali. Te danu te tibo po we bidibolo pusali profet bidi dabebolo wali.
ISA 9:16 Te tobolu bidi dabego we bidi dabebolo wiegi yai sunumi dali kolesaga si ola mawai menio. Tama tibaso, we bidi polo hagawali.
ISA 9:17 Tigidali we bidi God tagalama, God dologode bidisąbo bidi polo gagawai dao. Augwaligo tigidali po dabe, kolesaga dabe mu dwai mu dao. Tama tibaso, Genuai Bidigo tigidali mu dolaibao. Agai te gesi bidi me bidimainu me sula tagalogobeo. Tama agai te we sibi me hobede me egobeo. Wilawe we dabe, me te tiana wai dabe, agai hobede me egobeo. Genuai Bidi agai te tama tiaibao. Tiali goli, tego agai sębę siligobeo. Menio. Agai nogo me balalubao.
ISA 9:18 Te we bidi augwa haniani dwai kolesagago augwa ma dolali. Te dwai nosaide isi dola selama, te genuai nide dela selama, moni busi dabo tiwai yali. Tama genuai hano ugwaba holali.
ISA 9:19 Genuai Bidi Tigidali Bomo Elalubo Bidigo sębę genuai mu elama, tama agai tǫde we bidi tigidali dene mani. Tama augwali silali, te isigo mone busi delama, tigidali nai dabe dela silibo tiwai yali. Te deli deli we bidigo homu kolesagago da, gasa we bidi aiyaba elaluabo homu elalubo.
ISA 9:20 Tama augwaligo nai anoma elama, sabo sę ebo dao. Tiali goli, tego augwaligo homu kolesaga pągąnabeo. Augwali te bidi nai hauwa tuai goli, augwali tabia pisąma ebo tiwai dao. Tama augwaligo te kolesaga augwa deli hani dali me ebo dao.
ISA 9:21 Te Manase hanigo Efraim hani aiyaba elaluainu yaibao. Tama Efraimgo Manase hani aiyaba elaluabo homu yaibao. Tama te hani sigo Juda dabe aiyaba elaluabo homu yaibao. Genuai Bidigo augwa digi augwa hasi ma dolomainu yaibao. Tiali goli, tego agai sębę ebo siligobeo. Menio. Agai nogo me balalubao.
ISA 10:1 Dage te gesi gesi bomai po mubo bage, dage dolaibao. Te gesi bomai pogo te po tų ebode gasa bidi dabe aiyaba elaluama, tama nai meni yai bidi dabego nai sainu. Tama tiyu, te nai meni yai bidi dabe po tų ebo sogo asobaso da, te bomai pogo augwali tau sabo meni. Tama augwali po tų ebode geda mubo dao. Tama te dolo meni yai kolesagago dagego Genuai Bidigo we bidi dabe aiyaba elaluama, tama dagego te wilawe we dabe, me tiana wai dabego nai dabe dagego wi sabo dao.
ISA 10:3 Te Godigo dagego dwai kolesaga wei ponabo sogo bodolu muani, te sogoba sabalobo si, dagego magi sę yaibawe? Te agai gasa bulu me te bomai wali tiwai aselama, dage dolomainu ebaso, dagego magi sę yaibawe? Dage te deba udalama, dage tau somainu yaibawe? Tama te nai dabe hauwa dagego sali, te nai dabe dagego menade mugi paibawe?
ISA 10:4 Dagego magi sę me ebo usu egobeo. Mu menio. Te boi bidi dabego dage ela wialobo, o dage deli deli pibia sidubadi, augwaligo dage sela pelama, kalabusiba tagaligi pabo sę yaibao. Genuai Bidigo sę dabe dageba pedalumainu yaibao. Tiali goli, tego agai sębę siligobeo. Menio. Agai nogo me balaluaibao.
ISA 10:5 “Ena Genuai Bidi, eno te po obao, te bulu tǫ kantri Asiria dolaibao. Megi da, te Asiria te wąbi tiwai nigilama, tama eno we bidigo ena sębę ilibo we bidi te elebao.
ISA 10:6 Te we bidi dabego ena tagalama, tama God dologode bidisąbo bidi gagawali. Tama augwaligo ena sębę ilali. Tama tibaso, eno Asiria bage taga palama, augwali elama, tama augwaligo nai dabe selama, tama augwali aiyaba elaluama, agalama, tagalomainu yai dao, te bidi dabe tǫ nagamea pai pudu pabo tiwai emainu yai dao.”
ISA 10:7 “Tiali goli, Asiria tuni bidigo homu kolesaga, eno kolesaga dali side gasa me tali. Agai te gasa bulu hauwa me dolabo homu elalubao. Tama augwali sese silabo homu ebo.
ISA 10:8 Agai dwai homu tali eyu, te po wali, ‘Eno bulu hauwa me elaluama, tama augwaligo genuai hanu dabe eno polo sai dao,’ po wali. ‘Tama me, te tuni bidi dabe eno augwali aiyaba elaluali, te bidi dabe augwali eno ami bidi tomode ofisa bidi bidimainu, eno augwali te sę mani. Te eno te hanu dabe aiyaba elaluali hanu dabe te Karkemis, me hanu Kalno, me Arpat, me Hamat, me Damaskus, me Samaria, tama dao.
ISA 10:10 Eno te bulu dabe dolama, elama, tagalai dao. Te bulu dabede te tibo god dabe piksa hauwa mu elalubo hanu dabe augwaligo elaluali. Tama augwa te tibo god dabego augwali tau sabeo. Te tibo god dabego te Jerusalem me Samaria sigo tibo god dabe aiyaba elaluali.
ISA 10:11 Eno te Samaria dabe augwa tibo god dabe dali eno dolai dao. Tama tibaso, eno te kolesaga tiwai te Jerusalem augwa tibo god dabe dali me yaibao,’ te Asiria tuni bidigo te homu ebao.”
ISA 10:12 “Te tuni bidigo te po wali. Tiali goli, ena Genuai Bidi eno te po obao. Te Asiria dabe tuni bidigo eno agabolo te bulu du Saion me Jerusalem side yao wali sę ela silibo si da, teda aga tigide eno sę yaibao. Magi baso meni. Agai homugo aga genina mu dao homu elama, tama aga nogi ugwaba mu sabo.
ISA 10:13 Agai tobolu tali eyu, agai te po tama wali, ‘Ena bomo de ena homu kolesaga sigo eno te sę dabe yalio,’ po wali. ‘Magi baso meni. Eno dwagi yai homu kolesaga mu elaluali, te sę dabe yabo. Eno te bulu dabe dąį ilali, eno polo sela sąwani dao. Tama tigidali ena dologode naga bidibo. Tama eno augwaligo wiegi wiegi yai nai dabe augwaligo sisiniduali nai dabe eno sai dao. Ena bomai bidi mu dao. Tama tiyu, eno te bulu we bidi dali, me augwaligo king bidi dabe dali agalama, tama eno augwali aiyaba mesegelai dao.
ISA 10:14 Te e tǫde kantri dabe tigidali te ba be tiwai dao. Tama augwaligo wiegi yai nai dabe eno sali, bidigo te ba ge sabo tiwai yalio. Awe, te ba kimi dabego augwa ge dabe tagalama, tama bidigo olo sabo tiwai gilama, eno te kantri dabe sisinani. Tama te ge tagalali ba kimigo te ge sabo bidibolo hwa wasiąwai tiwai eyu, te kantri dabego bomo elaluali bidi dabego enabolo tagala po me wabeo. Mu menio.’ Te tuni bidigo te po wali.”
ISA 10:15 “Tuni bidigo te po tama wali. Tiali goli, ena Genuai Bidi eno hanalu waibao, ‘Te sigi hwą me deligo te po waibawe, “Te ena genuai dao, tama bidigo nogo toulama, nigilibo te enaduba bomogo edelalio,” po waibawe? Te so mego “Ena te bidigo nogo toulama, ni togobo bomo te eno edelalio,” po waibawe? Te hwįbo ni dage dabego bidi nogo toulama, hwįgi pabo meni. Menio. Te bidigo te ni dage dabe nogo toulama, hwįgi pabo dao.’” Genuai Bidigo te po wali.
ISA 10:16 Megi da, Genuai Bidi Tigidali Bomo Elalubo Bidigo te Asiria dabebolo genuai gasi me deli augwalibolo menama, tama augwali bomo sia somainu yaibao. Tama me ma, bidigo magi nai dolainu sia nogebo tiwai eyu, agai te Asiria bagego bomo me, genuai nogi dali, mu dolaibao.
ISA 10:17 Genuai Bidi aga te Tigidali Wiegi Yai Doloba Pai Kolesaga Naga Ebo God dao. Tama aga te Israel dabego ula dao. Tiali goli, Asiria dabe dali da, aga te isi gagalama, augwaligo bulu isi ulaibao. Te deli bubagade naga agai te tigidali dwai nosai dabe isi ulaibao.
ISA 10:18 Tama bogi peyu, moni genuai genuai ni dabe dela pelama, tama gi yabo wiegi yai tǫ me dela paibao. Genuai Bidigo Asiria dabe dolama, tama augwali mu tama silaibao, te gasigo bidi me deligo tigi bomo doloyu, ela silibo tiwai yaibao.
ISA 10:19 Te Asiria bulude tigidali nai dabe mu silaibao, tama deli deli ni naga dolaluaibao, te dwasianu wai bǫų dabego me nedabo usu nama.
ISA 10:20 Genuai Bidigo bodolu me polo muai dao wali, te Israel hani dwasianu te Jekopgo wąį tomode bidibo hanigo i agabolo omainu. Te Israel dabe augwali augwa boi bidi dabede wi ebaso, tama augwaligo gasa bulu bidi dabego augwali tau somainu i wali. Tama te bulu bidigo augwali tau somainu tonaluali. Tiali goli, te bulu bidigo begelama, augwali ma dolaibao. Tama te sogo augwaligo te Israel dabego Genuai Bidiba i waibao. Aga te Wiegi Yai Doloba Pai Kolesaga Naga Ebo God dao. Tama augwaligo agai tau somainao olama, tonaluaibao.
ISA 10:21 Tama te dwasianu Israel we bidi bidibo dabe augwali te God Tigidali Bomo Elalubo Bidi pageba ma asaibao.
ISA 10:22 Megi da, te Israel we bidi hauwa mu te bidibao, te tamu węde kemi sane tiwai dao. Tiali goli, augwali dolaibao, tama dwasianu we bidi naga ma pedalaibao. Genuai Bidi Tigidali Bomo Elalubo Bidigo te bulu sese tama dolabo po polo wai dao. Tama da agai dolaibao. Tama agai doloba pai kolesaga genina mu ma haninaibao, tama te we bidi dabego sueibao.
ISA 10:24 God, Genuai Bidi Tigidali Bomo Elalubo Bidigo te po wali, “Eno we bidi dage Saionde bidibo, dage te Asiria dabede wi igimio. Augwaligo dage te wąbigo elama, dage dali dwai sę ebadi me tagalao. Te Isip bagego polobadu yali tiwai ebadi goli.
ISA 10:25 Megi da, eno dage Asiria dabego dage dolomainu sula tagalobao. Magi baso meni. Eno sębę dage dali me ebaso. Tama tamadi tama ena ma begelama, Asiria dabe dolaibao.
ISA 10:26 Ena, Genuai Bidi, Tigidali Bomo Elalubo Bidi, eno augwali bįgo elaibao, eno te Midian dabe te Orepgo Masigi nogi wabo bulude dali tiwai elali. Eno nogo ugwa selama, tama elaibao, te polobadu eno Isip dabe te tamu węde elali tiwai yaibao.
ISA 10:27 Megi da, dage te Asiria dabego dage tonaluyu, te kau kibu magede ni name munama, tama sę emainu selebo tiwai te ebao. Tama te Asiria dabe bugagia dualalubao. Tama augwaligo te ebo kolesagago ena sębę te ilibao. Tama tibaso, te eno bodolu muani sogode da, te eno te Asiria dabego bomo silama ebode da, te bagego dage sęgę ma mayu egobeo. Awe, dage te boma pai hani pedalubaso, dagego te tolobo sęgę mu tagalaibao.”
ISA 10:28 Te boi bidi dabe bolo hanu Aiba sabolagasali. Augwali te hanu Miklondu sa asali. Tama augwaligo nai dabe meba te hanu Mikmasde osogo muani.
ISA 10:29 Augwali aiya dulama, wę odogo nogegi pali. Tama augwali ugwaba holama, hanu Gebaba pigi pali. Te Rama hanu we bidi wi genuai mu eyu, midigi sali. Tama te hanu Gibea, te tuni bidi Solgo hanu, augwali hanu tagalama, wi pepelawali.
ISA 10:30 Te hanu Galim we bidi dagego i bomonama wao. Olo saganama, odao, te Laisa be nani we bidi, dagego odao. Hobede mu dao, dage te hanu Anatot we bidi.
ISA 10:31 Te bulu Matmena we bidi, me te hanu Gebim we bidi, wi pepelawali, te duala sabo pesage gegegi pali.
ISA 10:32 Megi da, te boi bidi dabe te hanu Nopba polo sabolali. Augwaligo te bulu du Saionba edaba tonagasali. Tama augwaligo nogo sugunani, te hanu Jerusalem dolabo polo no muanio olama, ola mobao.
ISA 10:33 Te agai genuai bomogo da, God, Tigidali Bomo Elalubo Genuai Bidigo agai te genuai bomai genuai nogi elalubo bidi dabego nogi aiyaba elaluaibao. Megi augwali te genuai bobobage ni dolalubo tiwai ebao. Tiali goli, agai augwali gelama, degelaibao.
ISA 10:34 Tagala augwali te Lebanonde genuai bobobage ni tiwai, me te buside genuai bobobage ni tiwai me. Agai augwali gelama, tǫba degelaibao.
ISA 11:1 Te Jesigo hani te ni bidi dabego gelai ni tane tiwai bididuali. Tiali goli, gesi age te ni tanede ma kolibo tiwai yaibao. Awe, te ni tanedu te gesi ni tigi holama, tama nologo me deligo du walaibao.
ISA 11:2 Te Genuai Bidigo Spirit Mobo Bidi aga dali bidagaselama, tama aga te wiegi yai homu kolesaga dabe magasaibao. Tama agai aga we bidi tonalubo homu kolesaga wiegi yai mu saibao. Tama aga bomai tuni bidi bidiyu, tama agai aga we bidi tonalubo kolesaga wiegi yai mu elaluaibao. Agai te Genuai Bidigo homu kolesaga koneaibao. Tigidali sogo aga te Genuai Bidi dologode naga bidaibao.
ISA 11:3 Tama te kolesagago aga wiegi yai homu ilibo geninaibao. Tama agai te po tų odobode da, agai te bidi dabego po wabode naga o gedugo suali pode naga osola suyu egobeo. Menio.
ISA 11:4 Te po tų odobo dolo naga agai te nai meni yai bidi dabego homu sęgę elalubo po odama, te bagenu tau saibao. Te gasa bidi dabego augwali aiyaba elaluama, augwali dolama, dwai sę yali dabede agai pode te tiabo sę yali we bidi dabe dene saibao. Tama te dwai sę ebo bidi dabe da isaibao.
ISA 11:5 Te tama doloba pai kolesagago tama aga we bidi tonaluaibao. Aga bomo elama bidiyu, aga sę bugagia yaibao.
ISA 11:6 Te bulu yowi de sipsip kibu gǫų si aga bugagia deliba bilaibao. Tama te lepat moni hasa dabe te meme kibu gǫų dali piyu yaibao. Te kau kibu gǫų dabe, me te laion yowi gǫų dabe dali, deli hodobo nai tudu bilaibao. Tama dwasianu wai dabego augwali tonaluaibao.
ISA 11:7 Te kibu bulmakau de te bulu hasa bea aga si nai deliba tuaibao. Tama augwa wai dabe augwa hasi deliba piaibao. Tama te laion dabego te bulmakau kibugo nosai tubo tiwai yaibao.
ISA 11:8 Te wai bǫų dwasianu ame tubo dabe augwali te dwai gula manego tǫ dedage pąde gagali yaibao. Awe, te waigo aga nogo te bidi gąų kelebo hasamanigo pibo madiba muaibao, tiali goli te hasamanigo aga gąų kelegobeo.
ISA 11:9 Te Genuai Bidigo bulu du ugwadu te tigidali nai dabe augwa hasi bugagia deliba bidaibao. Te mego me dali dwai sę me egobeo. Magi baso meni. Te tigidali tǫde nai dabe sesego Genuai Bidi mu konea pela silaibao. Te kolesaga te tigidali tǫ mu usu nigi paibao, te tamu ąįgo aga dąįba usu nani tiwai yaibao.
ISA 11:10 Tama te sogo Genuai Bidigo gesi tuni bidi me sa muaibao, te Jesigo hani bidi me deli dao. Agai te tigidali we bidi deliba ma sisinabo dąį tiwai bidaibao. Augwali te tigidali tǫ pedai kantri tedu augwali agaba asaibao, te Israel hani isąwai bage. Tama agai hanu da, genuai nogi mu elaluaibao.
ISA 11:11 Tama te sogo Genuai Bidi agai bomo te si wabo sogo ma ola mayu, tama aga we bidi hani augwa buluba ma odasa asaibao. Te we bidi dabe te bulu Asiria, me Isip, me Sudan, me Elam, me Babilon, me Hamat, me te Mediterenian tamu ąįde ailande bidibo dabe me dao.
ISA 11:12 Te Genuai Bidigo dąį me deli dodolaibao te tigidali tǫ pedai kantri we bidigo sumainogo. Tama agai te Israel me Juda we bidi dabe ma sisinaibao, te boi bidi dabe kalabus elama odasa pali we bidi dabe. Megi augwali tigidali tǫde bida bida pabo. Tiali goli, Genuai Bidigo augwali ma odasa asaibao.
ISA 11:13 Te bulu Israelgo te bulu Juda dali dwai homu me egobeo. Tama Juda dabego Israel dabe dali boi bidi homu me egobeo. Menio.
ISA 11:14 Augwali si talua selama, tama augwaligo te giliga pabo badu buluba hwįgi peyu, te Filistia dabe dali hwį yaibao. Tama me, augwali sigo te giliga asobo badu we bidi dabego nai dabe hwįgi pelama, augwaligo nai dabe saibao. Te augwali sigo te bulu Idom we bidi, me Moap, me Amon we bidi dabe augwali sigo elaluaibao. Tama augwali sigo te bulu dabe tonaluaibao.
ISA 11:15 Genuai Bidigo tamu wę Retsi sula somainu yaibao. Tama agai bomai posolai wali pedalomainu yaibao. Tama te waligo te wę Yufretis sula selama, dwasianu emainu yaibao. Te wę te a naga olama, me badu nogo si wę gamiadu pomainu yaibao. Tama tibaso, we bidigo te wę nogebo usu yaibao. Tama tiali, te sogo te sunumi genuai bage mu yaibao, te we bidi dabe te Asiria tagalama, asela yabo. Te yaide te Genuai Bidigo te Israel dabe Isip tagalama, asomainu sunumi genuai yali tiwai yaibao.
ISA 12:1 Tama te sogo dage Israel dabego te balia po waibao. “Genuai Bidi, eno nago nogi ugwabo sobao. Nago ena dali sębę yali, tiali goli nago sębę silalio, tama nago ena wiegi yai sę ilalio. Tama megi da, eno homu bugagia bidibao.
ISA 12:2 Mu tama, Godigo ena ma oda sai dao. Tama megi da, eno agaba homu dąų ola saibao. Tama ena wi me egobeo. God, Genuai Bidigo ena bomo ilibo dao, tama tibaso, eno balia po obao, te agai nogi ugwaba sainogo. Magi baso meni. Agai ena ma oda salio.”
ISA 12:3 Tǫ dedagede wę sia sabo menio. Agai te wę te nai dabebolo mabo dao. Tama augwali bugagia bidibo dao. Genuai Bidi te sia sisąbo wę tiwai dao. Tigidali sogo agai dage tau sabode dage bugagia dąų olama, bidimainu ebo dao. Tama tibaso, dage agaba wiegi yai homu dali pelama, tama Genuai Bidibolo dage tau somainu hanalugi paibao.
ISA 12:4 Tama te sogo dagego balia weyu e tama waibao, “Genuai Bidigo nogi wao. Tama agaba i weyu, tama agabolo buba hwi wao. Te tigidali we bidi hani dabebolo pusao, te genuai sę dabe agai yalide. Tama augwalibolo pusao, aga genuai nogi elalubao.
ISA 12:5 Te tęąbi po weyu, Genuai Bidigo nogi ugwaba sao. Magi baso meni, aga genuai nogi salio, te agai yali wiegi wiegi yai sę yalide. Agai wiegi wiegi yai sę yali po tigidali tǫde we bidibolo pusao.
ISA 12:6 Israel dabego God aga te Wiegi Yai Doloba Pai Kolesaga Naga Ebo God dao. Aga genuai nogi elalubo. Tama aga dage Saion we bidi dabe dali bidibao. Tama tibaso, dage wiegi yai homu iyąo. Tama i bomona weyu, agaba balia po wao.” Te aga hani we bidi ma sisinibo sogo dagego te balia po waibao.
ISA 13:1 Godigo Babilon bulu dolabo homu yali, tama te po te nade ebo tiwai agai te po Aisaiabolo walalio, te Amosgo ogwabolo.
ISA 13:2 Genuai Bidigo e tama po wali, “Dagego te ni meni yai bulu dude te plak me dodolao. Tama te ami bidi dabego sulama, sisinagasomainao. Teba augwali polo asomainu i wao. Nogo tų elama, te Babilon hanugo sunumi magi yao. Tama augwali te hwįgi pomainu taga palao.
ISA 13:3 Eno Babilon dabe dali sębę mu ebao. Tama eno ena digi ena bomai ami bidi dabe dąį ilali. Tama eno augwali i olama, te Babilon dabe dolomainu i wali. Te ami bidi dabe augwali Babilon dabeba hwįgi pabo wiegi yai homu mu yali, magi baso meni, augwaligo koneani, eno te hwįbode ugwa ela holaibao,” te po wali.
ISA 13:4 Dagego odao, te kulukulu te bulu dude dabe wabo odiąo. Te geninama bidi dabego kulukulu te obao. Te tigidali bulu hauwa badu ami bidi dabe te sisinagasali dao. Tigidali Bomo Elalubo Genuai Bidigo aga bomai ami bidi dabe sisinagasali dao, te hwįabo bidi dabe.
ISA 13:5 Augwali te digibulu bulu dabe te asalio, tama augwali te Genuai Bidigo enesigi de ene si tiwai dao. Genuai Bidi aga sębę mu elama, tama augwali sabolama, te tǫde bulu dabe sese dolama, silimainu yaibao.
ISA 13:6 Dage gela bomonama wao. Magi baso meni. Te Genuai Bidigo aga tigidali we bidi po tųde dodolabo bodolu pąba polo yagasalio. Tama te sogo God Tigidali Bomo Elalubo Bidigo te genuai dolabo sę taga palaibao.
ISA 13:7 Tama tibaso, tigidali we bidigo dili naga mialuaibao. Tama augwaligo bomo mu menia saibao.
ISA 13:8 Tigidali wi mu yaibao. Tama augwali genuai dene mu saibao, te wego wai sainu dene ebo tiwai yaibao. Te tigidali bagego gesabidi augwali tigidali dene ebao wabo gesabidi ola mawaibao. Tama augwaligo gasa bidi dabego gesabidiba tonobo sogo da, augwali wi mu yaibao.
ISA 13:9 Mu tama, te dwai sogo megi te pedalobao. Te da te Genuai Bidigo polo bodolu muani, te sogo te agai genuai sębę dali asiyu, tigidali tǫ dabe doliyu, tama te dwai sę ebo we bidi dolama, silaibao.
ISA 13:10 Te sogo te tigidali hǫ dabego ula sula saibao. Tama giliga pedalaibao, tiali goli agai ula hulia sigi paibao. Tama polua munu me nanogobeo.
ISA 13:11 Genuai Bidigo te po wali, “E tǫ te we bidigo dwai sęgęgo pągąna pali. Tama tibaso, eno augwali dene mawaibao, te augwaligo dwai sę yali wei ponoyu yaibao. Te bidi dabe augwa digi augwa nogi ugwaba sabo bidi dabego nogieno aiyaba elaluaibao. Me, homu dene isiąyu, te augwaligo gasa bidi dabe aiyaba elalubo bidi dabe me.
ISA 13:12 We bidi hauwa mu isaibao. Tama eno deli deli naga bidimainu talagalo paibao. Tama augwali hauwa mu ma sugobeo, te Ofir bulude sabo wiegi yai gol susiąbo tiwai yaibao.
ISA 13:13 Tama te sogo ena Tigidali Bomo Elalubo Genuai Bidi, ena te eno genuai posolai sębę dali mu asaibao. Tama eno dagalu dali, tǫ dali si mali ilaibao. Tama tǫ iba kila selama, tama aga pesage taga paibao.”
ISA 13:14 “Tama te sogo we bidi dabe wi pabo te bulu hasa dabe bidigo enainu ebaso, wi pabo tiwai yaibao. Me, te sipsip kibu dabe augwa tonalubo bidi meniama, gegede bilibo tiwai yaibao. Te augwali augwa bulu muba dabe wi ma paibao. Awe, augwali augwa page buluba dabe polo wi soaibao.
ISA 13:15 Tiali goli, mena bidi me boi bidi dabego touwali, teda augwaligo hwą bainatgo enama, isilaibao. Mu tama, te boi bidi dabego augwali bobobage hwągo elaibao.
ISA 13:16 Me, te boi bidi dabego te dwasianu wai bǫų dabe augwa idago nogode kega selama, tama augwa ida aya sigo tonalubadi, augwaligo te wai bǫų dabe tǫba sąbo side, te wai dabe isaibao. Tama boi bidi dabego augwaligo be dolama, augwaligo nai dabe wi saibao. Tama me, augwali we dabe me penani sę yaibao.”
ISA 13:17 Genuai Bidigo te po wali, “Suao! Eno te Midia dabego homu hogodolama, Babilon dabeba hwįagasomainu yaibao. Augwaligo Babilon bagego silva de gol si homu kone elama, te buluba wąbi hwįagasobeo. Menio.
ISA 13:18 Augwaligo te Babilon dabe mu sia sayabo homu bomo mu yalio. Augwali gesi bidi dabe augwaligo enesigigo elama, isilaibao. Tama me augwaligo genuai me dwasianu wai bǫų dabe augwaligo elama, isilaibao. Augwaligo augwali dali homu dene mu egobeo,” wali.
ISA 13:19 Genuai hanu Babilon te genuai mu elama, tama sawi mu elama, tama tigidali gasa hanu dabe aiyaba elaluali. Te Babilon bulu we bidi dabego augwa hanugo wiegi yai nogide mu gana pabo dao. Tiali goli, Godigo Babilon dolaibao, te agai Sodom de Gomora si dolali tiwai dolaibao.
ISA 13:20 Te bulude bidi munu me ma bidigobeo. Tama me ma, te Arap dabe augwaligo sel be teba sę yagasogobeo. Tama te sipsip kibu tonalubo bidi dabego te sipsip kibu teba nosai tumainu teba me tonaluagasogobeo.
ISA 13:21 Te bulu te olo bulu gagalama, tama te bulu hasa dabe naga teba bidagasaibao. Te hulide bilibo ba dabe te bede dabe bidaibao. Te haniani dwai ba dabe me bidaibao. Tama bulu meme dabe te dolali hanude ugwaba samanuyu, edaba samanuyu, ela bilaibao.
ISA 13:22 Tama me, te tuni bidigo bede, me genuai bidi dabego bede dabe te bulu yowi dabe bidagaselama, go weyu yaibao. Mu tama mu, te Babilon dolabo sogo bodolu pąba polo yagasalio.
ISA 14:1 Genuai Bidigo aga Israel we bidi hobede ma elama, augwali tau siyu, tama augwali aga we bidi tiwai dąį ma ilaibao. Tama agai augwali augwa tǫba ma odasa paibao. Tama gasa hani we bidi augwali dali bidagaselama, tama augwali te Jekopgo hani dali taluama, augwali Israel we bidi mu pedelaibao.
ISA 14:2 Awe, Genuai Bidigo te Israel hani isąwai we bidigo te Israel dabe augwa buluba ma asomainu tau somainu ilaibao, te Genuai Bidigo augwalibolo sa muani tǫ dao. Tama te we bidi dabe te Israel dabego olo sę ebo we bidi tiwai pedalaibao. Te bidi hani polobadu Israel dabe kalabus elaluali bage, megi da augwali Israel dabego kalabus bidi dabe bidaibao. Te polobadu te Israel dabe aiyaba elaluama, augwali dali dwai sę yali. Tiali goli, megi da, Israel dabego augwali tonaluaibao.
ISA 14:3 Genuai Bidigo dage Israel dabego dene me dwai sogo silama, tama dage Israel dabe bugagia bidaibao. Te gasa bagego dage aiyaba elaluama, tama augwaligo dage tonaluai dao. Tama dage bomai sę mu yai dao. Tiali goli, te tigidali sęgę dabe sia saibao.
ISA 14:4 Tama Genuai Bidigo te tama tibo si da, dagego te Babilon tuni bidide elalubo po page hanilama waibao. Te hanilabo po da, e tama dao. “Suao. Bomai tuni bidi polo tulalualio. Mena tama tibaso te tobage bomai sę ebo bidi dolaliwe? Genuai Bidigo tama te we bidi dabe dwai sę ilali bagego bomo silalio. Tama te augwali wi mu ilali bidi dolalio.
ISA 14:6 Te tuni bidigo gasa we bidi dali odolali genuai sębę eyu, tama dwai sę elama, tama augwali dolai dao. Tama agai gasa bulu dabe dolobo sę me hodo me dolobeo. Agai te sę mu tagalobeo.
ISA 14:7 Tiali goli, megi da, tigidali bulu tǫ dabe bugagia ma bidaibao. Tama tigidali we bidi wiegi yai homugo i weyu, balia po obao.”
ISA 14:8 “Te ni pain de sida si te Lebanon bulu du ni dabe augwaligo me te wiegi yai homu yaibao, te Babilon tuni bidi aga isalide. Augwaligo te po obao, ‘Te da gelagasabo bidi me menio, agai da ma gelagasogobeo.’”
ISA 14:9 “Te isai bidi dabego bulude augwaligo te homu pemene ebo po wainogo dodalubao, magi baso meni, te tuni bidi asobao. Te gų pagego tede bidibo bagebolo te po waibao, ‘Te genuai bidi dage hodaloao. Me, dage tuni bidi dabe duga tuni bidi sia sai tagalao. Dage tigidali aselama, e bidi asobo suagasiąo, tiąba asiąo,’ waibao.
ISA 14:10 Babilon king, augwali tigidaligo nage dali te tobage po naga waibao, ‘Tegoba, dago homugo tiai dao, nago bomogo da tigidaligo bomo aiyaba elaluai dao homu yai dao. Tiali goli, megi da, nago bomo sia selama, tama nage da tiwai te pedalali dao.
ISA 14:11 Polobadu nago haniani aubo nai dabe muai dao. Tama te we bidigo gita dabe eliyu, nago genuai nogi ugwaba sainu yai dao. Tiali goli, megi da, te sawede nago pibo sai tiwai dao. Tama te osogane dabego nage tigi bolama, tama te ugwa banunobo ąǫ yaibao,’ te gų pagede bidibo bagego te po waibao.”
ISA 14:12 “Nage genuai nogi mu elaluai dao. Te tigidali tǫde we bidi dabego gedude nage te kigamu dagalude nanebo hǫ tiwai bidai dao. Tiali goli, megi da, Godigo nage polo tǫba sąwai dao. Nage boma pai hwįbo bidi dao, nage tǫ pedai kantri hauwa aiyaba elaluali bidi dao. Tiali goli, megi da, mu menio.
ISA 14:13 Nago te tama homu elaluai dao, ‘Eno te hǫ dabe ela pelama, tama ena dagaluba mu paibao,’ homu yai dao. ‘Tama eno tuni bidi sia te Godigo hǫ daide muaibao. Tama me ma, ena te god dabe sisinagasabo not badu bulu dude dualaluaibao.
ISA 14:14 Te ena te pǫ dabeba ugwaba mu holama, tama ena God tiwai ogwade mu bidaibao,’ nago te homu yai dao.”
ISA 14:15 “Tiali goli, hobede mu dao. Nage polo tulaluali, tama nage aiyaba aba mu tulaluama, tama isai bidi dabego bulu paibao. Tama nage dologode mu bidaibao.
ISA 14:16 Te isai bidigo bulude, te isai bidi dabe noma mu saibao, te nage subode. Tama augwaligo nage dolo si mu tonaluama, tama augwaligo augwa hasi nagede hanalu waibao, ‘Aga tama te bidi da, agawe, te tǫ mali ilali bidi, me te gasa bulu tuni bidi dabe wi elama, noma selali bidi aga dawe?
ISA 14:17 Aga tama dawe, te hanu dabe dolama, tama te bulu dabe olo bulu nigilali bidi dawe? Te tama dao, te bidi agai te aga kalabus ilali bidi dabe hobede elama, tama agai augwa buluba ma pomainu sula tagalai menio,’ augwaligo te tobage po augwa hasi hanalu waibao.”
ISA 14:18 “Te gasa tuni bidi dabe isibo sogo, te we bidi dabego wiegi yai sę elama, tama augwaligo te wiegi yai gų pageba pubaligi pabo dao.
ISA 14:19 Tiali goli, nage da, menio. Augwaligo nage sąyani, te bidi dabego ni nologo togalama, damumainu sąbo tiwai mu yalio. Nago tigi te masigi elalubo tǫ dedagede munalubo, te meba bidi dabego tigi dologode munalubo, te wąbi hwįani sogo isali bidi dabe tigi dologode. Tama bidi dabego agayu ebo, te augwali ugwa eda udula bilibode.
ISA 14:20 Te augwaligo nago tigi wiegi yai sę elama, pubalogobeo, te meba tuni bidi dabego tigi yali gilama. Magi baso meni. Naga digi naga bulu dolama, tama naga we bidi naga digi ela silai dao.” “Te wiegi yai mu dao, te tuni bidi dwaigo hani sese e tǫde sia siyu da, usu dao.
ISA 14:21 Tama tibaso, agai wai bǫų dabe odasa aselama, ela muagasao, te aga ayago yali dwai sę, me augwa wąį dabego yali dwai sę wei ponoyu tama yao. Tama augwali deli me bidama, tama tuni bidi nigilama, tama bulu dabe tonaluyu, tama hanu dabe tigidali bulude dabe ma nigilamuo.”
ISA 14:22 Tigidali Bomo Elalubo Genuai Bidigo te po wali, “Ena Genuai Bidi, ena digi te Babilon dabe dali hwįnama, tama eno augwali sese mu dola silaibao. Te eno augwali me deli bidimainu me sula tagalogobeo. Mu menio. Te tigidali we me bidi me, wai dabe me, sese mu tama silaibao.
ISA 14:23 Te eno te Babilon eno te hogomu poabo naigo poabo tiwai yaibao, te tigidali nai dola silibo hogomu poabo nai dao. Tama eno te Babilon sele pu bulu nigilaibao. Tama te dwai ba dabe naga bidagasaibao. Ena Tigidali Bomo Elalubo Genuai Bidi, eno po polo walio,” wali.
ISA 14:24 Tigidali Bomo Elalubo Genuai Bidigo bomai po me deli e tama wali, “Mu tamao. Sę me eno yabo homu yali, te sę eno yaibao. Sę me eno pedalabo homu yali, te sę mu pedalaibao.
ISA 14:25 Te Asiria dabe eno tǫba aselama, tama eno we bidi sęgę tolomainu yaibao. Te Israel dabe te bulmakau kibu tiwai bidibao. Te bidigo sęgai ni name magede munama, tama sę emainu tonalubo tiwai yaibao. Tiali goli, te Asiria dabe Israel dabego bulu dude dabe bidibadi yaide, teda eno augwali agalama, mimieibao. Tama te genuai sęgę Israel dabego tolali, te sęgę dabe sese mu tama silaibao,” wali.
ISA 14:26 Te tobage kolesaga naga Genuai Bidigo tigidali tǫde elalubo kantride yabo homu yalio. Tama tibaso, agai nogo ugwa sagulama, tama augwali dolabo no sealubao.
ISA 14:27 Magi baso meni. Tigidali Bomo Elalubo Genuai Bidigo te tama sę yabo homu kolesaga polo yali. Tama dego aga paliaibawe? Agai nogo dolalubao. Tama mego agai nogo aiyaba mubo usu egobeo.
ISA 14:28 Te tuni bidi king Ahas isali kibu bede, Genuai Bidigo po me mani. Te po da e tama dao.
ISA 14:29 “Te Filistia bage, dage tigidaligo odiąo. Te dage elali wąbi dage polo toga pali dao. Tiali goli, dagego homugo dage bugagia bidaibao homu igimio. Te dwai gula mane me isibosi, te gasa dwai gula mego agai pesage sabo dao. Tama te gula manego gasa dwai gula mane mu me ame nabo dao. Aga te iba, eda bola bilibo bogo yai gula mane dao.
ISA 14:30 Te nai meni yai Israel bidi dabe augwaligo nai selama, bugagia homu tegaluama, bidaibao. Tiali goli, dage Filistia dabe da, ena Genuai Bidi eno dagebolo dwai nasi si taga palaibao. Tama te nasigo dage elama, dage mu silaibao,” wali.
ISA 14:31 “Dage te genuai Filistia dabego hanu, me dage te hanu dabede bidibo we bidi, dage sese wi dwai mu elama, gela dwai olama, i bomona waiąo. Magi baso meni. Te ami hani me deli te not badu asobao. Tama augwali nosali badu hano holobao. Te ami bidi dabe augwali tigidali hwįbode boma pai bidi dabe mu da weyu, tama augwali deli me nosali me dua dua asobeo.”
ISA 14:32 Te dago mena po wei ponaibawe, te Filistia dabe augwaligo dago augwali tau somainu hanaluagasobaso? Te dago augwaligo po wei e tama ponaibao, “Te hanu Saion te dago Genuai Bidigo digi duala sabo bulu tiwai nigilai dao. Tama aga we bidigo genuai sęgę elaluyu, me sęgę yai sę eyu ebaso da, augwali teba pelama, tama augwali bugagia bidaibao,” wali.
ISA 15:1 Te bulu Moap polo dolalio. Tama Genuai Bidigo te po mani. Te hulide boi bidi dabe aselama, te hanu Ar me hanu Kir dolagasali, tama megi da, Moap mu tama sese dolalio.
ISA 15:2 Tama tibaso, te genuai hanu Dibon we bidi augwali te augwa tibo god dabeba lotu wabo pesageba dabe pelama, tama gela wagi pali. Te Moap dabego te hanu Nebo, me hanu Medeba polo dolai yaibaso, gela wali. Augwali hobede mu elama, tama augwa tobolu nisi me penane nisi poala sąyanio.
ISA 15:3 Tama augwaligo hobede yai ugwa dabe gudama, tama te hanu sunumi dabede bilaluali. Tagala, augwali augwa be pedude bidibo me, o deliba sisinibo pesagede bidibo me. Tigidali gela genuai mu wali. Tama gela ųga hauwa mu augwaligo gedudu tulalualio.
ISA 15:4 Te hanu Hesbon we bidi, me hanu Eleale we bidi, augwali me moni gela mu wali. Tama te hanu Jahasde bidibo we bidi augwaligo te bage augwaligo gela wabo odali. Te bomai ami bidi dabe me gela olama, i hae wali. Te Moap dabego bomo sese sia sali.
ISA 15:5 Eno Moap dabe hobede ebaso, gela obao. Magi baso meni. Augwali augwa bulu tagalama, wi te hanu Soarba peyu, te hanu Eklat Selisia wi peyu ebaso. Augwali gela genina mu olama, tama augwali te sunumidu ugwa hanu Luhitba holobao. Tama me, augwali gela elali te Holonaimba pabo sunumidu ugwaba holoyu, tama augwaligo geda genuai mu obao.
ISA 15:6 Magi baso meni, te wę Nimlim sese mu sula selama, tama te nosai da, te wę sesegede elaluali me sasia pali. Tama te pesagede tonali, te nosai me, ni dabe me, me holabo badi tonobo ąǫ ebeo.
ISA 15:7 Tama tibaso, te Moap dabe augwa wiegi yai nai dabe augwa hanude saboduali nai dabe augwaligo sela, te nai dabe dali wi pali. Augwali te ni sili bulu aiya dulai sunumidu pelama, te bulu Moap taga pali.
ISA 15:8 Te hanu Eklaimde bidibo we bidi, me te hanu Bedelimde bidibo we bidi, me te bulu Moap tomode bidibo we bidi, augwali gela obao. Tama augwaligo gela genuai pedalali.
ISA 15:9 Te mu tama, te wę Dimon te Moap dabego kanemego pągąna pali. Tiali goli, Genuai Bidigo te po wali, agai te Moap dabe dene genuai genina mu ma mawaibao, wali. Agai te bulu yowi laionbolo polo walai dao, te Moap dabe wi pali, me te Moap dabe meba te bulude bidibo bage dola silimainu agai polo wali dao.
ISA 16:1 Da te Moap we bidi da, te Idom dabe genuai hanu nogi Selade bidibo bage, dago te kibu sipsip gǫų te Juda dabego tuni bidi pageba Jerusalemba tolinao. Te sipsip kibu te agabolo te takis ma mawainu gagaliyu, ola mabo tiwai eyu, te bidi dabego te sipsip kibu sela pomainao. Augwali te wa pai buludu pelama, tama te Saion bulu duba saboligi paibao.
ISA 16:2 Tama augwaligo tuni bidibolo elama, po omainu yao, “Tuni bidi, te boi bidi dabego da dena hanu dabede, me dena bulu dabede pobeasa bilibaso, tama da wi pelama, te wę Arnon sesegeba bidigi pali. Tama da dodola mu bidibao. Da te bulude te ba gǫų aga bede tulaluama, tama subigila bilibo tiwai, da subigila bilibao, te ba buside bilibo tiwai ebao. Te da gela dali biliyu, tama tibao.
ISA 16:3 Tama tibaso, dago homugo dagego homu dago po osola sulama, tama da tau sao. Tama da dagego buluba pelama, tama te bidi dabego te posolai giligade te tįwai digi duala sigi pabo tiwai, nago buluba duala sagasaio. Te boi bidi dabego da dena buludu pobeasa bilama, tama da te adalalubo bidi bidibao. Tama tibaso, nago augwaligo da ma dolagasomainu me tagalamuo.
ISA 16:4 Da nago tǫba bidagasomainu sula tagalao. Nago da tonaluama, tama te boi bidi dabego da dolagasogobeo,” te Moap bage augwaligo te po obao. Dago koneani, te sęgę dabe daba pedalali, te sęgę dabe sia selama, tama boi bidi dabego dago bulu tagalama, tama da dali dwai sę me isąma ebaso da,
ISA 16:5 teda te sogo te Devitgo hani me deli me tuni bidi pedalaibao. Tama agai aga we bidi godolo mu elama, tama agai aga we bidi te doloba pai kolesagago naga tonaluaibao. Agai aga we bidigo homu sęgę elalubo po odama, tama agai polo dodolaibao. Tama agai wiegi yai kolesaga ebo bomo mu yaibao.
ISA 16:6 Te Juda dabe augwaligo te Moap dabego po odobo si da, augwaligo augwa hasi tomode po weyu, e tama po wali, “Dago te Moap dabego dwai kolesaga ebo po dago polo odai dao. Augwaligo haniani po olama, augwaligo augwa nogi ugwaba sabo dao. Augwaligo homugo augwali wiegi yai mu dao homu elama, tama augwaligo gasa we bidi aiyaba elalubo po olama, tama gasa we bidi posobo po wabo dao. Tiali goli, te Moap dabe augwali ili po wabo bage dao. Te augwaligo po mu dao homu igimio,” Juda dabego te po wali.
ISA 16:7 Te Moap we bidi dabego augwali te dene sali dali, te sęgę sali dali side gela obao. Polobadu augwali Kirheres hanude bidiyu, augwaligo te wain augwaligo olai te wain du tuyu, yai dao. Tama megi augwaligo te wiegi yai nai homu kone palali. Tama augwali augwa ma hobede mu elama, augwali gela obao. Magi baso meni. Augwaligo wiegi yai nai dabe sese dola silai dao.
ISA 16:8 Augwaligo wain gi me, te hanu Hesbonde elaluali wiegi yai wain gi me, te hanu Sipmade elaluali wiegi yai wain gi me, kone palali. Tama augwali hobede genuai mu ebao. Te polobadu te gasa bulu tuni bidi dabego te gide wain dabe tubo godolo mu yai dao. Tama te wain tulama, augwali poloyu yai dao. Tiali goli, megi da, te gi dabe sese mu dola silai dao. Augwaligo wain gi hauwa mu elaluai dao. Te hanu Hesbondu me Sipmadu gagalama, tama hanu Jaserba usu nigi pelama, tama te not usu nigi pelama, me te wa pai bulu te giliga asoboba usu nigi pai elaluai dao, te wę Detsiba saboligi pelama, tama giliga paboba usu nigi pai dao.
ISA 16:9 Ena te hanu Jaser de Sipma si wain gi hagede gela obao. Tama me eno gela ųga te hanu Hesbon me Eleale buluba tulalubao. Magi baso meni, dage sese dola silalio. Tama dagego we bidi augwa wain giba pelama, tama augwali te wain du tau yali sainu wiegi yai homu elama, hai dali iba, eda egobeo.
ISA 16:10 Te wain gi dabe augwaligo wain du dabe hauwa mu walai dao. Tama te we bidi dabe augwaligo sabo sogo da, augwali wiegi yai homu elama gana pai dao. Tiali goli, megi te wiegi yai homu elama, hai wabo kolesaga sia sali dao. Tama te we bidi dabego te wiegi yai homu ebo tęąbi me wabeo. Tama me te bidi dabego te wain nigibo madide te wain du te sągągo me agagobeo. Genuai Bidigo tama augwaligo penane paninama, tama augwaligo hai wabo silalio.
ISA 16:11 Tama tibaso, ena te Moap dabe me hanu Kirheres we bidide haliga dene genuai mu ebao. Ena hobede e tama tibo, te bidigo hobede ebaso, gita eliyu, te hobedai balia wabo tiwai ebao.
ISA 16:12 Te Moap we bidi augwali te tibo god dabeba te bulu duba holama, lotu po wagi pabo dao. Tama augwaligo te tibo godiba aga lotu bede gedu haluasa po odu gebo dao. Augwaligo te bage augwaligo te sę dabe yabo bomo dabe silai dao. Tiali goli, augwa te kolesagago augwali tau me sai menio.
ISA 16:13 Te Moap dolaibao wabo po te Genuai Bidigo polobadu digi wai dao.
ISA 16:14 Tiali goli, megi Genuai Bidigo po genina ma weyu, e tama obao, “Kibu be sela digi mu elalubao, te Moap dabe augwa wiegi yai nai dabe dali dolabo. Eno te sela kibu bego deli deli bubuga me polua bugagia mu nedebao. Tama te kibu be selago dei dolo mu tama eno te yaibao wali sę eno yaibao. Te we bidi hauwa mu megi te Moapde bidibao. Tiali goli, te bulu dolobo side, te bidi hani dwasianu naga te bulude bidaibao, tama augwali bomo mu meni yaibao,” wali.
ISA 17:1 Genuai Bidigo te hanu Damaskus dolaibao po mani. Agai e tama po wali, “Te boi bidi dabego te Damaskus dolaibao, te Siria dabego genuai hanu, tama olo pobele bage pesage naga pesage holaluaibao.
ISA 17:2 Te Aroer dabego hanu dabede we bidi me bidigobeo. Tama tibaso, te bulu dabe te olo sipsip kibu dabego bulu pesage gagawaibao. Tama te sipsip kibu dabe bugagia bidaibao. Magi baso meni. Te augwali wi ilabo bidi mu menia saibao.
ISA 17:3 Te boi bidi dabego te Israel dabego bomai hanu dabe dolaibao. Tama me ma, augwaligo te Damaskus we bidi tonaluaibao. Megi da, Israel de Siria si genuai nogi elama, genuai we bidi hani hauwa te bidibao. Tiali goli, te bulu si dolama, tama dwasianu we bidi hani naga tede bidaibao. Ena Tigidali Bomo Elalubo Genuai Bidigo eno po polo wai dao,” wali.
ISA 17:4 “Te sogo te Israel dabego genuai nogi sia saibao. Tama augwaligo wiegi yai nai dabe me augwaligo we bidi hauwa sia selama, tama te bulu dwai mu bidaibao. Te gasigo te tigi genuai yai bidi gegelama, tama te bidi nomona selama, dili pulu ha ebo tiwai yaibao.
ISA 17:5 Megi te Israel dabe te wit nai hauwa te odogo malu Refaimde bulubo wit hauwa holobo ąǫ te ebao. Tiali goli, augwali boi bidigo dabego elebo si da, teda augwali te wit dili bidigo togai deli deli dolalua pabo tiwai yaibao, te wit gide.
ISA 17:6 Te we bidi deli deli naga me elaluaibao, te ni oliv du bidigo wąbi dagego elama, tama sai digi te nedu du deli deli ni abude walalubo, me si sela te nologode dabe walalubo tiwai yaibao, te hauwa bidigo siyu tagalai dabe. Ena Genuai Bidi, Israel dabego God, eno po polo wai dao,” wali.
ISA 17:7 Tama te sogo te we bidi dabe homu begelama, tama Israel dabego Godiba lotu po waibao, te aga te augwali nigali God dao. Tama aga da te Israel dabego Dwagi Yai Doloba Pai Kolesaga Naga Ebo God dao.
ISA 17:8 Tama augwaligo te alta augwa digi nigali teba lotu weyu, me augwaligo we piksa tibo god Aseraba lotu weyu, me egobeo. Me, augwaligo te wiegi yai denami ebo pauda altade lotu po me wagobeo. Te augwaligo augwa digi augwa nogogo nigai naiba lotu wabo sia saibao.
ISA 17:9 Tama te Godigo te Israel bulu dolobo sogo da, te augwaligo bomai hanu dabe dola silama, tama augwali olo bidaibao. Te hasia te tǫde bidali bidi hanigo hanu tiwai yaibao. Te hani augwali Israel dabego hwįagasainu asobaso, augwali augwa hanu taga peyu, augwali wi pai dao. Tama te hanu dabe olo te bulu dude dabe elaluyu ebadi, te busi hola paibao.
ISA 17:10 Magi baso meni. Israel dabe, nago te God nage ma oda sabo God nago homu kone ebeo. Aga te genuai masigi te dwai sogo duala sigi pabo masigi tiwai dao. Tiali goli, mu tama, nago aga mu gegeda pali. Tama nago gasa hanigo godiba lotu po wali. Tama nago homugo tibo te god dabego nage tau selama, tama nage bugagia bidiba homu ebo. Tiali goli, nage dolama, tama nage usu ma yabo sunumi mu menia saibao. Te naga gide ni wain wai bulama, tama kulubi polo holama, tama aga du walainu duduli ebo sulama nage wiegi yai homu ebo tiwai dao. Tiali goli, nago agai du sogobeo. Menio. Deli sogo polo tama te wain ni dolama, sasi elama, te wain gi dolaibao.
ISA 17:12 Tega, te kulukulu genuai wabo odao. Te tigidali bulu ami bidi dabe sisinagasabo kulukulu dao. Tama augwaligo kulukulu te tamu wę holama, degeyu wabo kulukulu tiwai dao, te tamu wę saneba.
ISA 17:13 Te boi bidi dabe asali, te tamu wę aluasa asobo tiwai yali. Tiali goli, Godigo augwali sesanobaso, tama augwali augwa buluba ma wi pela wali. Te Godigo augwali sela sąyani, te waligo ni yabe dabe subigila sela sąbo tiwai eyu, me te hogabo waligo te hogomu dabe pobele bage ugwaba sela holobo tiwai yaibao.
ISA 17:14 Polo tama te boi bidi dabego te bulu pio bagua sagasobo si da, te we bidi dabe wi dwai mu ebo dao. Tiali goli, kigamu da, boi bidi dabe menia saibao. Tama te tobage kolesagago Godigo te boi bidi dabego da dolama, dago nai dabe wi sela pai badi te sunumi palibo dao.
ISA 18:1 Te Sudan bulu wę u badu bidibo we bidi hobede mu dao, te haniani mano dabe hauwa ugwaba, edaba bola biliyu ebo tǫde.
ISA 18:2 Augwaligo augwa po sabilibo bidi dabe taga palama, tama augwali te wę Nail dulu te augwaligo wę sesegede holobo nosaigo nigai geba tiwai nai, te naidu ibaba dulubo dao. Dage Sudan dabego po sabilibo bage, dage te po polo sela asobo bage dao, dage duga bomai buluba ma piąo, te wę hauwa elalubo bulu dao. Te bulu we bidi dabe augwali bobobage elama, tama augwaligo tigi sawi yai mu elalubo dao. Tama dagego te bulu te wąbi hwįbode genuai nogi elaluyu, tama gasa bulu dabego dage mu wi ebo dao.
ISA 18:3 Dage te tigidali tǫde bidibo we bidi, dagego odao. Te dagego bulu dude magi me dodolai yaibaso da, dagego bugagia suiąo. Tama bu wabo nai biugel po wai da wabo si da, dagego olo saganama, bugagia odiąo.
ISA 18:4 Magi baso meni, Genuai Bidigo enabolo e tama po walali, “Ena Genuai Bidi, ena ena bulu dagalude bidiyu, tama eno we bidi dabego ebo kolesaga subo sogo da, ena haliga nagame elama, tama eno olo tama tonaluaibao. Eno homu polo hogodama, augwali polo dolabo homu ebo menio. Meni. Eno dua tonaluyu, tama te giliga nanama, tama masigi sanede bomona nanebo tiwai elama, tama te agai posolo ugwaba dua holobo ąǫ ebo dao. Tiali goli, isi mu dadala sabe. Tama me ma, ena te hulide te nai ininama, sabo magąde te tulubo u meni yai tulubage tulubo tiwai ebo dao.”
ISA 18:5 Te mu tama, megi te bulu te ni wain bomona holama, tama dudili elama, tama telega pelama, te wain du tau yabo magą ebo tiwai dao. Tialigo Genuai Bidigo te bulu dolaibao, te bidigo sębę elama, te ni wain nologo te wain du tau isąbadi toga sabo tiwai yaibao, te nedu du sabo magą isąbadi toga sabo tiwai yaibao.
ISA 18:6 Genuai Bidigo te gasa bulu bidi dabego te bulu dolagasomainu elama, tama te bulu ami bidi dabego tigi dabe te tǫde dabe olo munalua paibao. Tama giligade da, te ba kemodage dabego tuagasaibao, ma te kedau ebo sogo da, te bulu hasa dabego tuagasaibao, te tigi pulu dabe.
ISA 18:7 Te sogo augwaligo te Tigidali Bomo Elalubo Genuai Bidibolo te olo maiabo wiegi yai nai sela asaibao, te boma pai kantridu. Te bulu te wę hauwa elalubo bulu dao. Te bulu we bidi dabe augwali bobobage mu elama, tama augwaligo sawi yai tigi mu elalubo. Tama te bulu te wąbi hwįbode genuai nogi mu elalubaso, te gasa bulu dabego agade wi mu ebo dao. Te bage augwaligo augwa olo maiabo nai dabe te bulu du Saionba sesaibao, te Genuai Bidigo te we bidi aga pąba aselama, tama agaba lotu weyu emainu dąį ilai pesage dao.
ISA 19:1 Genuai Bidigo te Isip bulu dolaibao wabo po mani. Te po e dao. Suao. Genuai Bidi te pǫde ugwadu dualaluyu, tama te bulu tǫ kantri Isipba polo sabolaibao. Tama te sogo pedalobo si da, te Isip dabego tibo god dabe noma genuai mu saibao, tama te Isip we bidi noma selama, tama augwali wi mu elama, tama augwaligo bomo mu sia saibao.
ISA 19:2 Tama Genuai Bidigo te po wali, “Te eno te Isip dabego homu hogodolama, tama Isip dabe augwa hasi ma hwįaibao. Te ama hasi ma hwįyu, tama yaibao. Te Isip hanu dabe aga hasi ma hwįyu, tama yaibao. Tama te provins dabe aga hasi tomode ma hwįyu, tama yaibao.
ISA 19:3 Te eno te Isip we bidigo homu kolesaga paninama, tama augwaligo bomo sia sanama, tama augwaligo yainu yali sę dabe augwaligo egobeo. Te augwaligo augwa tibo god dabebolo augwali tau somainu hanaluyu yaibao. Tama augwaligo te isai bidi dabego noma dali po wabo bidi dabe dali po wagi paibao. Tama augwaligo homu kolesaga hanaluyu, mena sę augwaligo yagawe waibao.
ISA 19:4 Eno te Isip dabe te tuni bidi dwai me dologode tagalaibao. Aga te sesena pai bidi mu, tama agai augwali bomona mu tonaluaibao. Ena God Genuai Bidi, Tigidali Bomo Elalubo Bidi, eno po polo walio.”
ISA 19:5 Te wę Nail sula selama, aiya dulama, tama tǫ pedalama, tama mu sula saibao. Te tǫ te gebo pai tǫ pedalaibao.
ISA 19:6 Te ąį gamiade te wę dua dua sula sesa duludubadi da, te dwai denami holaibao. Tama te nosai, me te sigi dili dabe węde elaluali nai dabe sese mobia paibao.
ISA 19:7 Tama me ma, augwaligo te wę sesegede bulali nai dabe me sese sasilama, tama waligo sela paibao, te nai dabe me elalugobeo.
ISA 19:8 Tama te wę Nailde sųgų sabo bidi dabe augwali homu dwai elama, tama augwali gela waibao. Te augwaligo huk dabede me umben wa dabego siyu yabo sųgų menia saibao. Tama te bidi dabe homu sęgę dali bidaibao.
ISA 19:9 Tama me, te name ugwa nigibo hobi nigibo we bidi augwali me homu sęgę mu yaibao. Magi baso meni. Te hobi nigibo nai dabe me te gide me holisąma ebaso.
ISA 19:10 Te hobi meni baso, te name ugwa nigibo sę ebo bidi dabe dolama bidaibao.
ISA 19:11 Te hanu Goan genuai bidi dabe te kolesaga meni yai bidi dabe naga dao. Tama te Isip tuni bidibolo wiegi yai kolesaga mabo bidi dabe augwa geda muai kolesaga agabolo mani. Isip tuni bidi, augwali te kolesaga sai bidi dabego nagebolo te tama po wabo dao, augwali te polobadu kolesaga sai bidi dabe, me te wiegi yai kolesaga hauwa elaluai bidi dabego hanidu asai dao po waibao.
ISA 19:12 Tiali goli, augwaligo kolesaga menade dualaliwe? Te Tigidali Bomo Elalubo Bidi Godigo te Isip dabe dali yabo sę po geme dualaliwe, te agai nage dali yabo sę po wabewe?
ISA 19:13 Te hanu Soan, me genuai hanu Mempis genuai bidi dabe, augwali te kolesaga meni yai bidi dabe naga dao. Tama me ma, te Isip bulu tobolu we bidi dabe augwaligo te bulu bugagia tolasa sę ebeo.
ISA 19:14 Genuai Bidigo te Isip dabego homu kolesaga polo dolai dao. Te pagede te Isip dabego ebo sę dabe dolo me pabeo, te geda mubao, te polobo bidigo aga bogu agalama, tulaluainu ebo tiwai te ebao.
ISA 19:15 Te bulu Isip bugagia bidimainu tau sabo bidi menio, tagala, aga te genuai bidi, o aga olo bidi.
ISA 19:16 Tama te sogo te bulu Isipgo te tama sęgę tolalubaso da, augwaligo suaibao. Te Tigidali Bomo Elalubo Genuai Bidigo augwali dolainu nogo dolalubo sueibao. Tama augwali te we dabe wi elama, noma sabo tiwai yaibao.
ISA 19:17 Tama te Isip we bidi dabe augwaligo te bulu Juda nogi ebo si da, tego augwali te Tigidali Bomo Elalubo Genuai Bidiba homu kone yaibao. Me, te augwaligo agai augwalibolo yai ebo sę dabe kone yaibao. Tama augwali wi genuai mu yaibao.
ISA 19:18 Te sogo te Isip dabego a naga hanu we bidi dabego te Hibru pogo po waibao. Tama te hanu we bidi dabego te Tigidali Bomo Elalubo Genuai Bidigo nogide augwali te aga dologode bidai olama, augwaligo mu po waibao. Te hanu me deligo nogi augwaligo te nogi nogi yaiba, Giligago Hanu.
ISA 19:19 Tama te sogo te Genuai Bidigo te alta me te bulu Isip hanude elaluaibao. Tama me te masigi pos me elaluaibao. Augwaligo Genuai Bidigo mu dąį ilama, elaluaibao. Te bulu Isip dąį side elaluaibao.
ISA 19:20 Te alta de masigi pos si te we bidigo Tigidali Bomo Elalubo Genuai Bidi sulama, homugo konebo te dąį tiwai elaluaibao. Tama te boi bidi dabego augwali dolainu asobaso da, teda augwaligo Genuai Bidiba i olama, tama Genuai Bidigo augwali tau somainu bidi me augwaliba taga palaibao, te augwali tau selama, augwali ma somainu.
ISA 19:21 Tama Genuai Bidigo te Isip dabego aga deli naga te Genuai Bidi dao olama, konemainu tagalaibao. Tama agai tama tibo sogo da, te Isip dabego bugagia mu koneama, agaba lotu po weyu, agaba ofa nai dabe sela peyu yaibao. Tama augwaligo agaba bomo yai pogo dąų olama, tama augwaligo yaibao wali sę dolo tama augwaligo yaibao.
ISA 19:22 Te mu tama, Genuai Bidigo Isip dabe dene mawaibao. Tiali goli, agai te ebo kolesagago da, teda augwaligo dwai kolesaga ebo dodolaibao. Tama augwali homu begelama, tama augwali agaba ma paibao. Tama agai augwaligo gedu haluasa po wabo odama, tama augwali bugagia tau saibao.
ISA 19:23 Tama te sogo da, te mone sunumi te Isip dali Asiria si tomode elaluaibao. Tama te Asiria dabe Isip buluba peyu, me te Isip dabe te Asiria buluba asiyu yaibao. Tama te bulu si we bidi dabe augwali te Genuai Bidi deliba naga lotu waibao.
ISA 19:24 Tama te sogo te Israel dabe, me te bulu Isip, me Asiria sigo hai namu si pedalaibao. Tama te we bidigo te gasa tǫde we bidigo dabebolo dwagi yai mobo mawainu da, augwaligo te tama po waibao, “Eno homugo Godigo te sela bulu bidi dabe dali yali sę tiwai dage dali me emainao, te Isip ebadi, me Asiria ebadi, me Israel, te tama sela bulu yali gilama.”
ISA 19:25 Tigidali Bomo Elalubo Genuai Bidigo dwagi yai mobo po mayu, te po waibao, “Dage Isip dabe, ena we bidi dabe dage dali eno wiegi yai sę yaibao. Tama eno te Asiria dabe dage dali me eno wiegi yai sę yaibao. Tama me eno dage Israel dabe dali me, eno wiegi yai sę yaibao. Te Israel we bidi da, ena we bidi bidimainu yali we bidi.”
ISA 20:1 Te Asiria tuni bidigo pode te aga polalubo ami ofisa bidigo aga ami bidi dabe selama, te hanu Asdotba me bulu Filistiaba hwįgi pali.
ISA 20:2 Te kibu be sela polasa, te Asiria dabego te Filistia hanu dabe sabode, Genuai Bidigo Aisaiabolo hasia po wai dao, te Amosgo ogwabolo te kolesaga yabo po. Aisaia aga hobedai ugwa me aga sągą nadoba me gudubo tagalama, olo bilao po wali. Tama Aisaiago Genuai Bidigo po odama, tama tiai dao.
ISA 20:3 Tama te Asiria dabego te hanu Asdot polo sabo sogo da, Genuai Bidigo te po wali, “Te kibu be sela tama, Aisaia eno sę bidi aga ugwa me sągą nadoba gudisąma olo bilai dao. Teda te dwai sę te Isip dali Sudan side pedalabo sę dąį tiwai aga bidali dao.
ISA 20:4 Te Asiria tuni bidigo te Isip dali Sudan bulu siba hwįgi paibao. Tama agai te bulu sigo gesi bidi me, monu dabe me, kalabus elama, gasa buluba sela paibao. Tama augwali pabo sogo da, augwali ugwa me, sągą nadoba me, me gudasa pogobeo, mu meni yaibao. Augwali habu olo bidiyu, augwali hale mu yaibao.
ISA 20:5 Te Filistia we bidi dabego te Sudan dabego augwali hwįbode tau siyu, me te augwaligo genuai nogi ugwaba sabo Isip dabe, te augwaligo te sę sulama, tama augwali noma selama, tama augwali homu dwai yaibao.
ISA 20:6 Tama te sogo, te nambis we bidi, te Filistia dabe, augwali augwa hasi tomode po miyu, te po waibao, ‘Iya, tegoba! Dago te bomai bulu bidi dabebolo da tau somainu no munaluao po hanalu wai goli dama, tiyu Asiria dabego da dolagaidali weyu. Tiali goli, suao, augwa digi dolalio. Te da te Asiria dabego bainat hwą geda muabo sunumi menio,’ te po waibao.”
ISA 21:1 Genuai Bidigo Babilon bulu dolaibao wabo po mani. Te genuai sęgę me, dene me, te nai meni yai wa pai bulude pedalaibao, te tǫ te bidi dabe wi elama, pąba pisąma ebo bulude. Agai te polo asaibao, te nai menia pai madi pobegebo wali tiwai bomai wali.
ISA 21:2 Eno te sę te God ena mani na me deli dwaide suali. Eno Godigo te po wabo odali, “Te Babilon dabe te ili po olama, geagano bilibo sę eyu, tama gasa we bidi hani dali dwai sę ebo bage dao. Tama augwaligo te kolesaga genuai mu pedalomainu ebo. Tama tibaso, te Elam ami bidi dabe, dagego te Babilon buluba hwįagasao. Tama Midia ami bidi dabe, dagego te hanu bobegela sagasiąo. Eno te Babilon dabego gasa we bidi dabebolo mani sęgę silaibao,” wali.
ISA 21:3 Te nade suali naigo ena wi ilama, didibili ilali. Tama eno tigide dene genuai me yali, te we sibigo wai sainu dene ebo tiwai yali. Eno wi mu elama, eno homu mu doali. Tama eno magi nai me suyu, me po me odoyu yabo homu me ebe.
ISA 21:4 Eno tobolu gęǫ elama, tama wigo eno tigi didibili yali. Eno te pio giliga iba dega siyu, hulia sagasabode, eno godolo mu ebo dao. Tiali goli, te sogo hulide te naigo ena wi mu ilalio.
ISA 21:5 Eno te bidi dabego genuai nai sisi ebo suali. Tama augwaligo moni ugwa name tǫba mubo suali. Tama bidi dabe dualama, nai tuyu, wę tuyu ebo suali. Tiali goli, deli sogo tama bidi mego hąį olo e tama po wagasali, “Te genuai bidi dabe, te boi bidi dabe polo asalio. Te duga hwįbo awa name polo selama, no muao,” wali.
ISA 21:6 Tama Genuai Bidigo enabolo te po walali, “Nago bidi me nage tonalumainu tama, nago dąį ilao, agai tonalumainu. Tama agai te mena tama nai agai suali agai nagebolo omainao.
ISA 21:7 Te agai te bidi dabe hos dabede dualama si si asobo sulama, me agai te bidi dabe te donkidu, me kameldu dabe dulasa asobo sulama, teda agai olo saganama, bugagia mu odama, mena sę egowe bugagia odaibao. Tama agai bugagia sumainao,” wali.
ISA 21:8 Tama te tonalubo bidigo laion yowigo wabo tiwai iyu, agai te po bomona wali, “Genuai bidi, ena te boi bidi dabe tonalubo pesagede tede bidama, tama ulade me, hulide me, eno bugagia tonaluai dao.
ISA 21:9 Tama eno te bidi dabe te hosde dulama si si asobo suali.” Tama tonalubo bidigo te po wali, “Babilon polo dolalio, aga polo dolalio. Tama augwaligo tibo god dabego piksa dabe tulaluama, tologa palio,” wali.
ISA 21:10 Eno we bidi dabe, hobede ya, te boi bidi dabego dage te bidi dabego wit elebo tiwai yalio. Tiali goli, megi da, eno te God Tigidali Bomo Elalubo Bidigo mani po dagebolo pusubao. Aga te Israel dabego God dao.
ISA 21:11 Te Genuai Bidigo te nai dabe me te hanu Dumade pedalabo po mani. Te bulu Idomde bidibo bage augwaligo i olama, hanaluyu, te po wali, “Tonalubo bidi, me sogo te hulialubo silaibawe? Mena sogo mu aga silaibawe?”
ISA 21:12 Tama eno te po wei ponoyu, te po wali, “Te be da posaiba, tiali goli hulia siyu me yaibao. Tama dagego ma hanaluabo homu ebaso da, teda dage ma aselama, ma hanaluagasiąo,” wali.
ISA 21:13 Genuai Bidigo te Arebia dolaibao wabo po mani. Te Dedan dabe dage, te dage biliyu, nai abelama dobu si eyu ebo bidi dabe dao. Dage pelama, te Arebia dabego nai meni yai wa pai buluba duala sigi pabo dao.
ISA 21:14 Te teba wi asali we bidi augwali wę nogonego mu isibao, tama tibaso, dagego nai magasao. Tama te tǫ Tema we bidi dagego te nai me augwaliba sela piąo.
ISA 21:15 Augwali wi pai dao. Magi baso meni, te boi bidi dabe hwįbo bainat hwą me enesigi enego augwali dali bomo elama, hwįbaso.
ISA 21:16 Genuai Bidigo enabolo e tama po wali, “Te kibu be deli elalubao, te hanu Kedar we bidi dabe dali augwaligo wiegi yai nai dabe dolama silabo. Te kibu be bubuga deli deli sogo eno bugagia nedebao. Tama te kibu bego bubuga dolo mu sia sigi pabo si da, teda eno augwali dali yaibao wali sę dabe eno yaibao.
ISA 21:17 Te Kedar dabe augwali bomai ami bidi dabe augwali enesigi dali hwįbo bugagia mu koneai dao. Tiali goli, augwali dolaibao. Tama dwasianu bidi hani ami dabe naga bidaibao. Ena Genuai Bidi, Israel dabego God, eno po polo wali.”
ISA 22:1 Genuai Bidigo te Na Yabo Odogo Bulu tede na dabe pedalabo po mani. Te genuai hanu Jerusalem we bidi dabe, dagego mena homu mu eyu, dagego hai olama, wiegi yai homu ebawe? Tama dage duga be peduba hola pelama, tama hai bomona mu olama, tama te kulukulu tigidali te hanu usu nubao. Naga te bidi dabe isali da. Augwali te bomai ami bidi dabe tiwai e hwįnama, isai menio. Te boi bidi dabego augwali moni hwągo elebeo. Menio.
ISA 22:3 Dagego genuai bidi dabe augwali digibulu mu wi peyu, tedela pai dao. Tiali goli, boi bidi dabego augwali sulama, tama augwali dua dua tola sai dao. Magi baso meni, te genuai bidi dabego ene dabe me te hwįabo nai dabe meni baso. Te boi bidi dabe dali hwįabo nai dabe meni yaide.
ISA 22:4 Tama tibaso, eno dagebolo te walobao. Dagego eno haliga nagame elama bidimainu igimio. Dagego enaduba deli naga bidimainu tagalao. Magi baso meni. Eno we bidi mu dolai baso, ena homu sęgę elama, ena gela weyu ebao.
ISA 22:5 Magi baso meni. God, Tigidali Bomo Elalubo Genuai Bidi, agai te haniani sęgę dabe dage te Na Yabo Odogo Bulu pedalabo sogo me polo bodolu muai dao. Te boi bidi dabe hauwa mu aselama, tama augwaligo hae dali iba, oba bomona ela bilaibao, te udula biliyu. Tama dage noma selama, gegede bilaibao. Augwaligo te hanu obo dabe hųgiyu yaibao. Tama dage wi yaibao. Tama dagego i wabo da, digibulu mu paibao, te tigidali bulu du usu naibao.
ISA 22:6 Te bulu Elam ami bidi dabego enesigi dali, ene dali si tolasa asaibao. Tama augwali te hwįbo kibu hos, me te hwįbo awa dali tama asaibao. Tama te hanu Kir ami bidi dabe da, augwali te hwįbo sabili dabe dali asaibao.
ISA 22:7 Te hwįbo nai o awa da dagego sawi yai odogo bulu pągąwaibao. Tama te hos kibude duabo ami bidi dabe augwali te hanu sunumide doligi pelama, tama hwįabo no munaluaibao.
ISA 22:8 Te boi bidi dabego te sę dabe yaibao. Magi baso meni, Genuai Bidigo te bulu Juda me tonalusiąma ebaso. Tama te sogo dagego koneama, te boi bidi dabego dageba hwįagasaibao homu ebaso da, teda dagego te hwįbo nai dabe te Moni Ni Sili Lebanon Be nogi ebo tede munalubao homu eyu da, teda dage agai bugagia bidibo tau saibao.
ISA 22:9 Tama dagego suai dao, te hanu Jerusalem obo hauwa dolai elalubo suai dao. Tama tibaso, dagego Jerusalemde be dabe tigidali nedai dao, te tuni bidi Devitgo hanu. Tama dagego te be dabe hųgilama, te be dabego masigi dabe te obo sę ma yainogo sai dao. Tama dagego tǫ dedagede wę sainu, te wę gamia dabe geselai dao.
ISA 22:11 Tama dagego genuai dedage deli te hanu bobegelali obo si tomode nigai dao, te tigidali uludu asobo wę ge bo dąį elalumainogo. Dagego te tama sę dabe yai dao. Tiali goli, dagego God me kone me ebeo. Agai deligo naga te nai dabe dageba pedalabo po polobadu digi bodolu muai dao.
ISA 22:12 Tama te sogo God, Tigidali Bomo Elalubo Bidigo homugo dage homu dene elama, gela omaina homu ebao. Tama dage duga tobolu nisi gudama, tama hobede ebo ugwa gudumainu homu ebao.
ISA 22:13 Tiali goli, dagego te hobede yabo sę yai menio. Meni. Dage gisugu olama, gana pelama bidalio. Tama dagego bulmakau kibu me sipsip kibu elama, tama moni daa mu tuai dao. Tama dagego wain wę dabe tama tuali. Tama dagego e tama po wai dao, “Asao. Da wę dali nai dali tuinao,” wali. “Magi baso meni, do da isaibao,” tama po wali.
ISA 22:14 Tigidali Bomo Elalubo Genuai Bidi aga digi ena pageba mu aselama, eno olode te po mu tama walio, “Eno dagego te dwai sęgę gegeda sągobeo, te dage isiboba usu nigi paibao,” wali. Te da, te Godigo po dao, Tigidali Bomo Elalubo Genuai Bidigo po.
ISA 22:15 Tigidali Bomo Elalubo Genuai Bidigo enabolo Sepna sugi pao po wali. Te bidigo te tuni bidigo bede tigidali nai tonalubo dao. Tama eno te po agabolo pusa mawaibao,
ISA 22:16 “Sepna, nago naga hani me nago tǫ ede menio. Te nago homugo nage de dao homu eyu, nago te bidi dabebolo te bulu du dologode dilai masigi dedage dogwao po waliwe? Tama te masigi dedage nago dwagi yai gų page tiwai elaluaibawe?
ISA 22:17 Nago homugo nage bomai bidi dao homu ebawe? Mu menio. Genuai Bidigo nage tola selama, gosegelama, miminama, tama dwasianu kiki tiwai yaibao. Tama agai nage tǫ me genuai digibulu me elalubo madi digibulu mu sąwaibao. Tama nage te bulude isaibao. Tama nago te tagalobo sawi yai karis tagalaibao. Nage da, te tuni bidigo sę ebo bidi dao, tiali goli nago tuni bidigo haniba nago hale sela asobo bidi dao.
ISA 22:19 Genuai Bidigo nage nago ebo sęde sela sąnama, tagalaibao. Tama nage nai meni yai bidi bidama, tama nage dwai mu bidaibao. Tama nage nogi meni yai bidi mu bidaibao,” wali.
ISA 22:20 “Genuai Bidigo Sepna nagebolo te tama po wali, ‘Te nai dabe pedalobo sogo da, teda eno sę bidi i olama, asaibao. Aga te Eliakim dao, te Hilkiago ogwa dao.
ISA 22:21 Tama eno te nago te tuni bidigo ofisa bidigo gudubo wiegi yai ugwa me kibu wali selama, te Eliakim gudulaibao. Tama agai nago megi ebo sę saibao. Tama agai te Jerusalem we bidi, me te Juda we bidi, tigidali tonaluaibao. Tama aga augwaligo aya tiwai bidaibao.
ISA 22:22 Tama eno agai nogoba te tuni bidi Devitgo be ki agai nogoba muaibao. Tama mena nai agai dabo si da, teda bidi dabego ma palibo usu egobeo. Tama me tama nai dabe agai paliali da, bidi dabego dabo usu egobeo.
ISA 22:23 Te eno aga te sęde bomo elama, mu bidimainu ilaibao, te huk augwaligo be tomode dąų walai tiwai yaibao. Tama agade aga hani tigidaligo genuai nogi sela silaibao.’”
ISA 22:24 “‘Tama aga hani tigidali aga pageba sisagaselama, tama agabolo augwali tau sao po waibao. Te augwali te sene dabe, me meba nai dabe te hukude walalubo tiwai yaibao.
ISA 22:25 Ena Tigidali Bomo Elalubo Genuai Bidi, eno te tama po wali. Tama te sę pedalobo sogo da, te si wali huk hala pelama, tulaluaibao. Tama agade walaluyu, aga sęgę mani hani dolama, tulaluaibao. Ena Genuai Bidi, eno polo wai dao.’”
ISA 23:1 Genuai Bidigo te hanu Tairde pedalabo sę dabe po mani. Te genuai sip dabe, dage tamu węde bilibo sip dabe, dage hobede elama, gela waiąo. Magi baso meni. Dagego bulu Tair sese tigidali polo dolai dao. Tama tede be me dolalubeo, te bulude. Me, te sip dabe tubo pesage tede dolai dao. Nago te sę te ailan Saiprus tagalama, ma asobode dagego koneaibao.
ISA 23:2 Te dage Tair bage, te tamu wę sesegede bidibo Tair bidi dabe, dage, me te hanu Saidonde bisnis bidi dabe, dage hobede elama, po wasiąyu, dua bidiąo. Hanu Saidon, te sip dabego haniani dabe hauwa mu nageba sela asai dao.
ISA 23:3 Tama nage te nai abeliyu, te nai maketde muyu ebo genuai nogi sabo bulu tiwai yai dao. Te sip dabe te Isipba, te wę Nail elalubo badu pelama, tama te wit nai dabe nageba sesai dao. Tama nago te nai dabede bisnis sę elama, te naide mone hauwa sai dao.
ISA 23:4 Hanu Saidon, nage hale yao. Magi baso meni. Te bomai hanu te tamu ąįde elaluali hanu polo dolalio. Tama te tamu ąįgo te po walio, “Hobede mu dao. Eno wai dabe ame nabe. Tama ena te wego wai ame nainu dene isąwai ąǫ yalio. Tama eno sawi ogwa wegi ame nisąwai ąǫ elama, negisąwai ąǫ yalio,” wali.
ISA 23:5 Tama te Isip dabego te sę dabe te hanu Tairde pedalali po odobosi da, teda augwali wi mu elama, augwaligo bomo mu sia saibao.
ISA 23:6 Dage te tamu wę sesegede bidibo we bidi dabe, dage hobede elama, gela olama, te Tarsis buluba poloba tama wi pao.
ISA 23:7 Magi nai mu te Tairde pedalaliwe? Te polobadu bomai hanu mu, te dage tigidali wiegi yai homu elama gana pai madi dao. Polobadu te hanude we bidi dabe meba te gasa digibulu buluba taga palama, te gasa gesi hanu geseligi pomainu yai dao. Tiali goli, magi baso te hanu dolama elalubawe?
ISA 23:8 Dego pode mu te hanu Tair dolaliwe? Te hanugo te gasa hanu dabe tonalumainu sa muai hanu dao. Tama agai bisnis bidi dabe te genuai bidi mu tiwai bidama, tama te tǫde we bidi dabego augwali nogi ugwaba siyu, genuai nogi mu mabo dao.
ISA 23:9 Te da te Tigidali Bomo Elalubo Genuai Bidigo pode te bulu tama dolai dao. Genuai Bidigo te tama tiali da. Magi baso meni. Agai te bidi hani augwa bomo de augwa genuai nogi dabe ugwa siyu, me augwa homu gana peyu ebo bidi dabego nogi aiyaba elalubo dao. Tama me, agai te bidi dabe genuai nogi yai bidi dabe me agai aiyaba elalubo dao.
ISA 23:10 Dage te Tarsis badu bidibo we bidi, dage duga homu duga haniani sę dabe iyąo. Magi baso meni. Te hanu Tair bidi dabego dagego homu kolesaga tolalugobeo.
ISA 23:11 Genuai Bidigo nogo te tamu wę daide balalubao, te tamu wę sesegede elalubo bulu dabe dolainu. Tama tibaso, te bulu we bidi dabe augwali didibili dwai mu ebao. Agai te Fonisia bulude bomai hanu dabe dolainu po polo mawai dao.
ISA 23:12 Agai e tama po wali, “Sawi yai hanu Saidon, nage wiegi yai homu me ma elama, bidigobeo. Magi baso meni. Nage dolama, mu dolama elaluaibao. Tama tibaso, dage hanu Saidon we bidi, dage hogodama, te ailan Saiprusba piąo. Tama tiali goli, tede me dage bugagia me bidigobeo,” wali.
ISA 23:13 Te Babilon dabego tǫ suiąo, te bidi dabe me tede bidibeo. Magi baso meni. Te Asiria dabego augwaligo bulu dolai dao. Tama augwaligo bulu te bulu hasa dabego bulu gagalai dao. Te Asiria dabego te augwaligo hanu obo bobegelama, sai ela pai dao. Tama augwali te sai dabede dolaluyu, tama augwali dali hwį yai dao. Tama augwaligo te hanu dabego bomai obo dabe hųgiai dao. Tama te hanu dabe sese tama dolai dao.
ISA 23:14 Te genuai sip dabe, dage tamu węde bilalubo sip dabe, dage hobede elama, gela waiąo. Magi baso meni. Dagego te bomai hanu polo dolai dao.
ISA 23:15 Tama te sę dabe pedalobo sogo da, te we bidi dabego te hanu Tair te kibu be 70 tama gegeda pelama, bidaibao. Te hanu Tair te penani sę ebo we te bidi dabego te we tagalama tęąbi wabo we tiwai bidaibao. Te tęąbi wabo po e tama edao,
ISA 23:16 O penani sę ebo we. Augwaligo nage homu kone gegeda palalio. Tama tibaso, nage gita selama, hanuba biligi pao. Tama nago te tęąbi po wao. Tama wiegi yai musik elao. Tama te bidi dabego nage ma koneaibao.
ISA 23:17 Tama te 70 kibu be silibo si da, Genuai Bidigo te hanu Tair te we bidigo nai dabe abeliyu, nai maketde muyu ebo bulu ma emainu sula tagalaibao. Tama te hanu Tairgo te gasa tǫde bulu dabe sese aga dali bisnis sę yagasomainu kegaibao, te penani sę ebo wego agaba asomainu kegebo tiwai yaibao.
ISA 23:18 Tiali goli, te mone dabe agai sabo da, aga sabo sabogobeo. Menio. Te nai dabe te God Genuai Bidigo nai dabe tiwai pedalaibao. Tama te Genuai Bidigo we bidigo te hanu Tairgo sisinani nai dabe saibao. Tama augwaligo tuabo nai hauwa mu elaluaibao. Tama wiegi, wiegi yai gudubo ugwa me elaluaibao.
ISA 24:1 Genuai Bidigo tǫ mu dolama, tama tǫ olo mu elaluaibao. Agai te tǫ agalama, tama tǫ bebegelama, tama te tǫ gasagi yai mu pedalaibao. Tama agai te we bidi dabe subigila wi tedela pomainu yaibao.
ISA 24:2 Tagala, augwali mena tiwai we bidi yaibaso me, augwali deli sę tiwai naga suaibao. Te pris bidi dabe dali, me te olo we bidi dabe me, tama me te tonalubo bidi dabe me, olo sę bidi me, olo sę we dabe me. Tama me te bisnis bidi dabe, me te augwalide nai dabe abelebo bidi dabe me, tama me te nai negeli sabo bidi dabe dali, te nai negeli mabo bidi dabe dali me. Tama me te moni bidi dabe dali, me nai meni yai bidi dabe dali me. Augwali tigidali sese tama te dwai dene saibao.
ISA 24:3 Tǫ tigidali mu dolama, tama te tǫ olo mu elaluaibao. Genuai Bidigo te sę dabe yabo po polo walio.
ISA 24:4 Tǫ wa pelama, tama agai bomo polo sia salio. Tama aga hobedai gela obao. Tama te genuai nogi elalubo we bidi augwaligo bomo me sia salio.
ISA 24:5 Te tǫ te we bidigo dwai meda yai kolesagago meda ilalio. Augwaligo te Godigo bomai habu selali poba tudi ola menama, tama agai po sela sąnama, tama augwaligo God aga dali dąų walali po toga sąyu yai dao. Teda te aga dali tigidali sogo bidiabo dąų wali po augwaligo sela sąwai dao.
ISA 24:6 Tama tibaso, Godigo pode te dwai sogo mu te tǫde pedalama, te we bidi hauwa mu dwai kolesagadu wali pao olama, i ola mawai dao. Tama dwasianu we bidi hani naga bidaibao. Agai tama tiali. Magi baso meni. Te we bidi dabe augwa dwai kolesagago augwa sęgę tolaibao.
ISA 24:7 Te gesi ni wain du me walisiąbadi, te ni wain me sasia mobia pai dao. Tama te we bidi te wain wę tubo bage augwali megi da homu sęgę mu yali.
ISA 24:8 Augwali wiegi yai homu elama, tama augwa te bagwa pai wiegi yai musik po wabo te temborin me elebeo. Tama augwaligo haniani gitago wabo dabe sese mu tama sia sali.
ISA 24:9 Augwaligo te wain wę tubo sogo augwaligo te tęąbi po me wabeo. Augwa sęgęgo yali sęde augwaligo te wain augwaligo tubode augwaligo pedauwalide pusu me ebeo, te ha ebao.
ISA 24:10 Te genuai hanude nai dabe sese mu dola silalio. Tama tigidali be sunumi dabe palialua pali. Te bidi me tomoba me pabo usu ebeo.
ISA 24:11 Tama te we bidi dabego te tuabo wain wę menia salio. Tama augwali te hanu sunumi dabede dolalua peyu, augwaligo te wain gogono bilibao. Te we bidi dabego wiegi yai homu elama, gana pali dabe mu sia sali. Tama homu sese elama, hobede ela pabo sę naga te tigidali tǫde ebao.
ISA 24:12 Genuai hanu sese mu tama dolali, tama agai genuai obo sunumi tulaluama, tama pebeda pali.
ISA 24:13 Te tobage dwai sę naga te tigidali tǫde we bidide pedalaibao. Tama dwasianu we bidi hani mu naga bidaibao. Te ni oliv du te bidigo sela silaide te deli deli walalua pabo tiwai elaluaibao. Me te ni wain du te bidigo siyu, deli deli tagalai te elalubo tiwai yaibao.
ISA 24:14 Tiali goli, te me bidibo dwasianu we bidi hani augwali wiegi yai homu elama, tęąbi po waibao. Te tamu wę sesegede bidalubo we bidi augwaligo te Genuai Bidigo bomode me genuai nogide augwaligo wiegi yai homu elama gana paibao.
ISA 24:15 Tama tialima, dage tigidali tǫ habu badu bidalubo we bidi dabe, te giliga asobo badu, me te tamu ąį sesegede elalua pabo bulude bidalubo bage, dage tigidaligo te Genuai Bidigo nogi ugwanu sao, te Israel dabego Godiba genuai nogi maiąo.
ISA 24:16 Te we bidi te tǫ sesegede digibulu bidibo bage augwali wiegi yai homu elama, tama augwaligo wiegi yai homu ebo tęąbi po wabo. Tama augwaligo te tęąbi po da e tama dao, “Genuai Bidigo nogi ugwaba sao. Agai tigidali sogo wiegi yai kolesaga mu ebo dao.” Tiali goli, eno e tama po wali, “Hobede mu dao. Ena wiegi yai homu mu egobeo. Eno haligade moni sęgę mu elama, eno olo dali mu sia sabo homu ebo. Magi baso meni. Te eno suali, te dwai sę eyu, ili po weyu tama ebo bidi dabego gasa bidi dabe ili po ola mani, augwali dali dwai sę yali, eno te po wali.
ISA 24:17 Te tǫde we bidi, dage hobede mu dao. Te dwai sogo me, tǫ dedage me, sųgų sabo wa tamago dage tonalubao, dage tola sainu.
ISA 24:18 Tama bidigo te dwai sogo te asobao wabo po odama, wi pobaso da, aga te tǫ dedageba tulaluaibao. Tama aga te tǫ dedagede ma hola aselama, ma wi painu yali da, teda aga te sųgų sabo wade ma tola saibao. Te dagalude sunumi dabe dala pelama, tama te wę e tǫba gealuaibao. Tama tǫ pagede mali yaibao.
ISA 24:19 Te tǫ mali genuai mu elama, tama te tǫ tomode peda pelama, tama te tǫ dedage olo dala pai elaluaibao.
ISA 24:20 Aga te polobo bidi ugwaba edaba ebo tiwai eyu, me te dwasianu be te bomai wali ebo sogo uba edaba ebo tiwai yaibao. Te tǫde we bidi dabe augwa dwai sęgęgo yaligo te tǫgo tolobo usu egobeo. Tama tibaso, te tǫ tulaluama, tama te tǫ ma hodalobo usu me egobeo,” eno te po wali.
ISA 24:21 Polobadu digi Genuai Bidi aga digi po bodolu muai dao. Agai te dagalude bidibo bomo elalubo bage dene mayu, me te tǫde tuni bidi dabe dali dene mawaibao.
ISA 24:22 Genuai Bidigo augwali sisinama, augwali kalabus ilaibao, te bidi dabego te kalabus bage tǫ dedage deliba tagalobo tiwai mu yaibao. Tama agai augwali kalabuside bobobage sogo tonaluaibao. Tama nosali augwaliba agai homugo yainu yali sę augwaliba yaibao.
ISA 24:23 Tama te giliga ula de polua ula si, te olo nai tiwai yaibao. Magi baso meni. Tigidali Bomo Elalubo Genuai Bidi aga bomo dali, me aga bomai ula dali, asaibao. Tama aga te bulu du Saionde we bidi tonaluaibao. Tama te we bidi dabe augwa genuai bidi dabego aga suaibao.
ISA 25:1 O Genuai Bidi, nage eno God dao. Tama eno nago nogi ugwaba saio. Magi baso meni. Nago te bidigo isąwai bomai sę dabe mu ebo dao. Da tau sainogo, nago tigidali nai dabe mu usu nani, te polobadu digi nago yaibao po wali gilama.
ISA 25:2 Nago te genuai hanu dabe te pobele bage pesage holai dao. Tama te bomai obo dabe elaluai hanu dabe sese dola silai dao. Tama te Israel hani isąwai bagego bomai hanu dabe te boi bidi dabego sese mu dola silai dao. Tama augwaligo ma hodolobo usu egobeo.
ISA 25:3 Te bomai bulu we bidi dabego nagebolo genuai nogi mawaibao. Te tǫ pedai kantri meba we bidi dabego gasa we bidi dali homu dene isąwai goli, te tobage kantrigo moni hanude bidibo we bidi dabego nage wi eyu, nage dologode bidaibao
ISA 25:4 Nage te nai meni yai bidi dabe duala sabo bulu tiwai nage bidai dao. Tama augwali sęgę ebo sogo augwali bugagia bidai dao. Te dwai bidi dabego homu sębę te bomai waligo te be daga tigiba hudula palobo tiwai dao, me te sesana pai giliga te kemi tǫ wa pai bulude nanebo tiwai dao. Tiali goli, te tulubage sogo, me wali ebo sogo, nago augwali mesegelama, tonaluai dao. Te nai meni yai bage nago tonaluai dao. Tama bomai giligago augwali ulumainu sula tagalai menio. Genuai Bidi, nago te boi bidi dabego pedauwali paninama, tama te dwai bidi dabego i hae wabo tama sia sabo dao. Te pǫgo te sesana pai giliga dualobo tiwai ebo dao. Tama te bulu kedaua pabo dao.
ISA 25:6 Te bulu du Saionde, Tigidali Bomo Elalubo Genuai Bidigo geninama nai mu sisi yaibao. Te wiegi wiegi yai hasa dabe me, tuabo wain ąį dabe me elaluaibao. Tama tigidali bulu we bidi dabe te nai tuboba sisinagasaibao.
ISA 25:7 Megi da, te we bidi hani augwali homu sęgę elama bidibao, te augwali te isibo kolesagade homu dene elama, te bidibao. Tama augwali te sęgęgo te ugwa tiwai augwali mesega sai dao. Tiali goli, te Saion bulu dude da, Genuai Bidigo augwaligo homu sęgę me hobede ebo dabe sese sia sąwaibao.
ISA 25:8 Agai te isibo me silama, tama augwali me isibo sę me egobeo. God Genuai Bidigo augwaligo gela ųga sia sąnama, tama augwaligo gedu ąį wa sąwaibao. Te we bidigo gedu ąį menia saibao. Tama agai aga we bidi tigidali tǫde bidibo we bidigo hale me sia sąwaibao. Genuai Bidigo te sę yabo po polo wai dao.
ISA 25:9 Te sę dabe pedalobo sogo, te we bidi dabego te e tama po waibao, “Mu tama dao, Genuai Bidi dago God dao. Dago homu agade dąų olama, tonaluai dao. Tama agai da ma oda sai dao. Aga deli naga Genuai Bidi dao. Tama agai da tau sai dao. Tama tibaso, da wiegi yai homu penene genina mu inao. Magi baso meni. Agai da polo ma oda sai dao,” te po waibao.
ISA 25:10 Genuai Bidigo Saion bulu du bugagia tonaluaibao. Tiali goli, agai te Moap dabe mu dolaibao. Agai te boi bidi dabego augwali dolama, mesegelama, agayagasomainu yaibao. Te kau kibu dabego nosai augwa diba agalama, ela bulubo tiwai yaibao.
ISA 25:11 Te Moap dabe te bidi moni tamu wę tomode hagayabo ąǫ ebaso, te wę saneba painu paulama, nogo ąį togobo tiwai yaibao. Te augwaligo dolidali weyu, haniani sę mu yaibao, te augwali dolobo side. Tiali goli, Genuai Bidigo augwaligo bomo dali kolesaga si aiyaba elaluaibao. Tama mena sę augwaligo yali te sę dabego augwali tau me sogobeo.
ISA 25:12 Tama agai augwaligo hanu bomai obo dabe hųgia sąwaibao. Megi da, te obo dabe sigide ugwanu mu te elalubao. Tiali goli, agai te obo dabe tǫba mu tulalumainu yaibao.
ISA 26:1 Te sogo nosali pedalobaso, te Juda tǫde bidalubo we bidi dabego te balia po waibao. Dago hanu mu boma pai mu dao. God aga digi dago bomai obo bidalio. Agai da ma polo oda sai dao, tama tebogo agai da bugagia bagulali, te hanu me deligo bomai obo tiwai yalio.
ISA 26:2 Te homugo genuai sunumi dabe dayao. Te doloba pai we bidi tomoba tula asomainao. Tigidali sogo te bage augwali Genuai Bidi dologode naga elalubo dao.
ISA 26:3 Genuai Bidi, augwali nage dologode naga bidibo dao, tama augwaligo homu nage delide naga dąų olama, elalubo dao. Tama tibaso, nago augwali dali homu nagame ebo kolesaga augwali mu pągąmainu ebo dao.
ISA 26:4 Tigidali sogo Genuai Bidi dago bomai duala sabo pesage dao, te moni dobo masigi tiwai dao. Tama aga tigidali sogo tama bidada peyu, bididuaibao. Tama tibaso, dago agade homu dąų mu olama, tama aga dologode tigidali sogo bidinao.
ISA 26:5 Genuai Bidigo te we bidi genuai nogi yali we bidigo nogi aiyaba elalubo dao. Tama agai te bomai hanu dabe hųgibo dao. Tama augwali tǫba sese tama tulalubo dao, te tǫ hogomude elalubo dao.
ISA 26:6 Te we bidi dabe augwaligo te nai meni yai we bidi dabe dali dwai sę mu yali. Tama te bagenu augwali nai dabe mu menia pali. Tiali goli, megi da, te nai meni yai bidi dabe augwali te dolama, tagalali hanu pobele bage daide agaga bilibao.
ISA 26:7 Te sunumi te doloba pai we bidi dabe bilalubo sunumi da dolo naga te elalubao. Genuai Bidi, nage doloba pai God dao. Tama nago augwali bilibo sunumi dodolobo dao.
ISA 26:8 Awe, Genuai Bidi, da nago bomai po wali peyu, bilibo dao. Tama dago nage deli naga tonaluyu, tonalubo dao. Dago nago genuai nogi godolo mu ebo dao.
ISA 26:9 Te hulide eno homu nage delide naga elalubo dao. Tama kigamude ena nage dali bidibo godolo mu ebo. Magi baso meni. Nago te tǫde we bidi po tų ela mabo dao, te augwali nago doloba pai kolesaga ola mawainogo.
ISA 26:10 Tiali goli, nago dwai we bidi hobede igi sogo da, teda augwaligo te nago doloba pai kolesaga konea sigi menio. Augwali doloba pai we bidigo te tǫde bidibo me tagala, augwaligo te dwai kolesaga me ebo sę yaibao. Tama augwaligo nago genuai nogi koneyu, me augwaligo nago bomo me koneyu, me augwali nage dologode me elalugi menio.
ISA 26:11 O Genuai Bidi, nago nogo polo balalubao, te dwai we bidi dene mawainogo. Tiali goli, augwaligo subeo. Genuai Bidi, te nago naga we bidi godolo mu elama, tau sabo kolesaga te augwaligo sumainao. Tama te dwai bidi dabe augwali hale dwai mu yaibao. Tama nago naga boi bidi dabe ulabo isi, te isigo augwali mu ula silaganio.
ISA 26:12 Genuai Bidi, nago da tomode wiegi yai homu nagamea pai ebo sogo pedalomainu ilibo dao. Nago dago tigidali sę dabe dodolama, tama wiegi yai pedalumainu ilibo dao.
ISA 26:13 O Genuai Bidi, dago God, te gasa genuai bidi dabego da tonalubadi goli, dago nage deliba naga genuai nogi mabo dao.
ISA 26:14 Megi da, te genuai bidi dabe polo isila palio. Augwali me bidibeo, tama augwali ma hodalobo usu me egobeo. Nago augwaligo bomo aiyaba elaluama, tama nago augwali dolama, tama nago augwali mu dolai dao. Tama te we bidi dabego augwaligo nogi me kone ebeo.
ISA 26:15 Genuai Bidi, nago dago hani genina mu ilalio. Awe, nago we bidi hani moni hani mu pedelalio. Tama dago bulu genuai mu pedalumainu eyu, nago dago tǫ dąį ibanu mu kidilalio. Tama te tialigo naga genuai nogi genuai mu pedalumainogo yalio. Awe, dago bulu genuai mu pedalomainu ilalio.
ISA 26:16 Genuai Bidi, nago naga we bidi dodolomainogo eyu, dene mu mani, tama augwaligo bomo mu sia salio. Tiali goli, augwali moni homu dene dali nage pageba aselama, nageba gedu haluasa po walio.
ISA 26:17 Te nago gedude da te wego wai ame nainu dene ebo tiwai elama, bidai dao. Da te genuai dene dali, sęgę dali tolama, dago homugo tiali, dago wiegi yai nai dago me sugowe homu yali. Tiali goli, te menio. Dago magi nai me haninibeo. Dago te boi bidi dabe aiyaba elalubo bomo mu meni sai dao. Tama dago tǫde bugagia bidabo meni yai dao.
ISA 26:19 Tiali goli, naga te hani polo isila pali, tama augwali megi hulia sai madi bidibao. Te augwali ma hodaloama, te ula ma sueibao. Nago te isai bidi dabe bidibo ula ma mabo dao, te hulide tulubage segeni elama, te tǫ wa pai madi te gesi noma nosai hogonu ma holomainu ebo tiwai ebo dao. Dage te gų pagede pila mubo bage, dage hodaloama, dage wiegi yai homu elama, po hae waiąo.
ISA 26:20 Eno we bidi dabe, dage duga be tomoba dabe pelama, duga be sunumi dabe palia siąo. Dage pęwądage sogo dualaluama, tama Genuai Bidigo sębę silibo side tagalao.
ISA 26:21 Suao, Genuai Bidi aga bulu dagalu tagalama, e tǫba te asobao, te e tǫde we bidi dene mawainu, tama augwa yali dwai sę wei ponainu. Tama tǫgo te bidi dabego kaneme me geme dualogobeo, te gasa bidi dabego augwali ela wialali dabe. Menio. Agai te bidi dabego yali dwai kolesaga dabe sese tama haninaibao.
ISA 27:1 Te sogo te Genuai Bidigo agai genuai bomo olamayu, te Leviatan, te tamu węde bulu hwą bidigula mane elaibao. Genuai Bidi agai aga poa pai genuaiboma pai ge hwą selama, tama te bulu hwą bidi gula, tegagela bilibo gula mane toga sąwaibao.
ISA 27:2 Tama te sogo Genuai Bidigo balia po me e tama waibao, “Te wiegi yai wain gi balia po wao. Ena Genuai Bidi, eno te gi bugagia tonalubo dao. Tama tigidali sogo eno aga wę mabo dao. Eno aga te giligade me hulide bugagia tonalubo dao. Tiyu, te bidi dabego dolagasidali weyu.
ISA 27:4 Megi da, eno te wain gi hagede wado po me wabeo. Ma, eno te gide te sesane yai nosai me gasa dwai nosai dabe tede holobaso da, teda eno augwali doliyu yaibao. Teda eno isi tulama, augwali sese ula silaibao.
ISA 27:5 Tiali goli, te boi bidi dabe augwaligo homugo augwali enaba aselama, augwali eno tonalumainu homu eyu da, teda augwaligo ena dali bugagia bidainu po deli dąų olama, asomainao. Awe, augwaligo te boi pimainao homu eyu, po deli dąų olama, ena dali bidagasomainao,” wali.
ISA 27:6 Te me sogo nosali, te Israel dabe te Jekopgo wąį auwa bidi dabe, augwali te ni wain pedali tǫba pelama, dudili hauwa walama, du hauwa walama, dili elama, dolalubo tiwai yaibao. Tama augwaligo nologode da, Genuai Bidigo augwalibolo wiegi yai sogo me tǫde we bidibolo mawaibao.
ISA 27:7 Genuai Bidigo te Israel dabebolo dene me mawai menio, te agai augwaligo boi bidi dabebolo mabo dene tiwai me mabeo. Tama me agai te gasa hani we bidi elama, isilali tiwai aga we bidi hauwa me elama, isilibeo. Menio.
ISA 27:8 Genuai Bidigo aga we bidi agai augwali kalabusiba tagala palali sogo, augwali dene mawai dao. Agai te bomai wali te giliga asobo badu asiyu, te haniani nai dabe selasa pabo tiwai yali gilama, agai aga we bidi aga bomai waligo augwali sela sąyagasai dao.
ISA 27:9 Tiali goli, tebogo agai te Israel dabe augwa digi yali te sęgę mu tama sia sąwainu da. Teda augwaligo te tibo godigo alta dabe sese toga sąyao. Tama te alta masigi dabe te olo hogomu gagalao. Tama me, augwaligo te tibo god we Asera piksa elalubo ni pos gelama tagaliyu, me augwali te dwagi yai hano denami ebo pauda ulubo alta doliyu emainao.
ISA 27:10 Te hanu da, polobadu bomai obo elaluai dao. Tama megi da, sese mu tama dolama, elalubao. Megi da, olo kala sili bulu te we bidi te bulude me bidisąwai bulu ąǫ ebao. Te bulude we bidi me bidibeo. Tama te kau kibu dabe naga te buluba sisinagaselama, tama me te dwasianu ni yabe dabe tuyu, tede bidibao. Tama augwali tede toma tuyu bidibao.
ISA 27:11 Tama te ni nologo dabe sasia pabo si da, te ni nologo dabe mobia pelama, tǫba tulalubo si da, te we dabe sibigo isi nogainu gigila sagasobo dao. Te tobage dwai sogo pedalali. Magi baso meni. Te hanu we bidi augwali bidi po sela sąbo we bidi mu. Tama tibaso, God, te aga te God augwali deli we bidi hani pedalomainu ilai goli, agai augwali godolo elama, augwali me hobede me yai menio.
ISA 27:12 Tama te sogo Genuai Bidigo aga we bidi gasabulude dabe bidibo we bidi ma oda saibao. Te węYufretisdu gagalama, te Isip buluba usu nigi paibao. Agaiaugwali deli deli saibao, te bidigo aga wit dili dali bo dalisela sąnama, te du naga elalubo tiwai yaibao. Tama tewiegi yai wit du selama, te tǫgo nigai senede mubo tiwaiyaibao.
ISA 27:13 Tama te sogo te bu wabo nai biugel bu genuaimu waibao. Teda te Israel dabe i weyu, te boi bidi dabegoaugwali te bulu Asiriaba sela sąyu, me te bulu Isipba selasąyu yali bage dabe. Tama augwali Jerusalem buluba maaselama, tama augwaligo Godiba ma lotu po waibao, teaga tedali gasagi yai bulu dude.
ISA 28:1 Hobede mu dao, te Israel bagego sawi yai taun nage. Nage mu dolaibao. Te naga genuai bidi dabego wain wę hauwa mu tulama, poliyu, tama nago nogi ugwaba mu sabo dao. Augwaligo te po wabo dao, nage te bomai hanu mu dao, po wabo dao. Nage te nai bula tuabo tǫ wiegi yai bulu dude te bidibao. Tama nage te naga genuai bidi dabego tobolude mubo plaua kula wai bono elalubo ąǫ te elalubao. Tiali goli, nage pąde tama te plaua bono sasia pelama, dolobo tiwai nage dolaibao.
ISA 28:2 Mu tamao. Genuai Bidigo te bomai hani me deli polo nage elalumainu sa muanio. Te hani te bomai wali tiwai asaibao, tama me te tulubage te talua ge tulubage tulubo tiwai yaibao, tama augwaligo nage togolama, tǫba tula palaibao.
ISA 28:3 Tama te hanigo nage agalama, nage daidu augwali bilaibao, nage te genuai bidi dabe poliyu, nago nogi ugwaba sabo hanu dao.
ISA 28:4 Nage te nai wai bulabo tǫde te dwasianu bulu du elalubo madi nage te bidibao. Tama nage sawi yai plaua bono tiwai elalubo ąǫ te ebao. Tiali goli, nage te plaua bono mobia pelama, dobo tiwai yaibao. Tama nage deli sogo tama silaibao, te ni fik du me deli hasia tau ebo tiwai, tama bidi me deligo sulama, polo sela tubo tiwai yaibao.
ISA 28:5 Te sogo te Godigo we bidi hani dwasianu naga bidiyu da, teda augwaligo Tigidali Bomo Elalubo Genuai Bidiba wiegi yai homu yaibao. Genuai Bidi aga digi aga wiegi yai tuni bidigo madi tobolude bulai, me te wiegi yai plaua bono augwaligo tobolude mubo tiwai bidaibao.
ISA 28:6 Genuai Bidigo te po tų odobo bidi dabebolo wiegi yai kolesaga menama, tama augwaligo po tų bugagia osola sueibao. Tama agai te hanude ami bidi dabe bomo mawaibao. Tama augwaligo te boi bidi dabe te hanu tomoba we bidi dabe dali hwįagasomainu sula tagalogobeo.
ISA 28:7 Te profet dabe, me pris dabe, augwaligo te wain wę me bia wę hauwa tulama, polobo homu yabo homu elama, dodolama, wa bilabo homu eyu, dodola bilabo homu ebo dao. Augwaligo homu kolesaga menia pabo dao. Tama augwaligo augwa sę bugagia ebo menio. Tama me, te pris bidi dabe augwaligo te we bidi dabego sęgę bugagia dodolobo menio.
ISA 28:8 Augwa bogu te augwa bugulama, wę tubo tebol saide pesage holobo dao. Tama dwasianu wiegi yai me elalubo menio.
ISA 28:9 Te augwaligo eno po odobo si da, augwaligo e tama po wabo dao, “Te bidigo homugo de mu agai skul ola mawainu homu eyu ebowe? Agai pogo de mu ola mawainu ebowe? Da dwasianu wai bǫų dabe meni. Tamadi tama, da ame tubo tagalama bidibe.
ISA 28:10 Tigidali sogo agai dedeli po naga wabo, te bidigo wai bǫų dabe te leta dabe dolo nogi eyu emainu, me po dage deli me hani deli deli dolo nogimainu ola mabo ąǫ ebo,” augwaligo te tobage po enade wabo dao.
ISA 28:11 Te we bidi dabe augwaligo eno po odobo hagela mu ebo. Tama tibaso, Genuai Bidigo augwalibolo te gasa po wabo bagego pedauwalidu augwali po ola momainu, te gasa bidi dabebolo te agai po ola mawaibao.
ISA 28:12 Aga digi aga we bidi te tǫ badu tagalai dao. Tama agai augwalibolo te po wai dao, “Te bulude dage toma tuyu, bugagia dua bidiaganio. Tama te bidi dabe, augwaligo tigi boma pelama, augwaligo tigi hagela pobaso da, augwali hodo doliyu, te bulude dua bidagameo,” wai dao. Tiali goli, augwaligo agai po odobo hagela mu yali.
ISA 28:13 Tama tibaso, Genuai Bidi aga digi augwali deli deli leta dabe dolo nogi ebo, me deli deli po nogi ebo, me deli deli lain nogi ebo me, te tiwai Genuai Bidi aga digi augwali ola mawaibao. Te dwasianu wai dabe ola mabo tiwai aga digi yaibao. Tama augwali homu kone tua pelama, dene mu saibao. Tama te boi bidi dabego augwali nogo bono dunama, augwali kalabus elama, odasa paibao.
ISA 28:14 Dage e Jerusalemde we bidi tonalubo we bidi, dagego Genuai Bidigo po odiąo. Dagego homugo Genuai Bidigo po olo nai dao homu ebo.
ISA 28:15 Tama dagego e tama po wabo dao, “Dago te isibo kolesaga dali dago polo po dąų ola selama, tama dago te gų page dali dago po polo dąų ola sai dao. Tama tibaso, augwali sigo da me dologobeo. Te dwai sę da dolo pedalubadi me tagala, teda da geda muaibao. Magi baso meni. Dago te ili po olama, te hasegelu hasegelu ebogo da tau siyu, tama da bugagia bidaibao,” dagego te po wabo dao.
ISA 28:16 Tiali goli, God, Genuai Bidigo te po wali, “Odao. Eno te be page dąų walabo masigi dila pai deli me polo dąį ilai dao. Te aga te dwagi yai boma pai mu dao. Tama eno te masigi te bulu du Saionde muaibao. Te bidi dabego agaba homu dąų wabo bidi dabe da, teda augwali wi elama, didibili me egobeo.
ISA 28:17 Te ena te doloba pai skel te dagego kolesaga skel ebo te skel tiwai bidaibao. Tama te doloba pai kolesaga naga te eno usu ni tiwai elaluyu, tama tego eno dage usu saibao. Dagego homugo te tibao, te dagego dwai kolesaga ebo te kolesagago dage tau saibao homu te ebao. Tiali goli, eno te dwai sogo dageba pedalomainu yaibao. Tama dage te bidi dabe te genuai talua ge tulubage asiyu, ela silibo te tiwai yaibao. Tama dage pelama, duala sigi pabo pesage mu menia saibao.
ISA 28:18 Tama eno dagego te isibo kolesaga dali, me te isibo bidi dabego bulu dali, dagego dąų olama yali po eno tomode togolama, mu silaibao. Tama te dwai kolesaga mu dagede pedalama, tama dage mu isila paibao.
ISA 28:19 Te dwai kolesaga dabego dage munu me taga pogobeo. Menio. Te augwali geninama mu dageba tigidali sogo hulide me ulade dageba me pedalidu geaibao,” wali. Ma, dagego Godigo te wiegi yai po page dagego bugagia mu koneyu da, dage noma selama, wi mu yaibao.
ISA 28:20 Dage te dwai dene mu saibao. Te bidi pibode te dene dene hauwa ebo tiwai dagego tigide yaibao. Magi baso meni. Te pibo sai te pęwądage mu elama, agai sągą olo pobialuali. Me, te banua pibo blanket te dwasianu mu elama, agai banua pibo usu sisąbaso, o agai tigi sese usu isąbaso.
ISA 28:21 Genuai Bidi aga bomo dali hogodasa asaibao, te agai polobadu te bulu du Perasimde, me te Gibeongo odogo malu bulude yali tiwai yaibao. Tama agai yainu yali sę agai yaibao. Tiali goli, dagego te sę ebo sulama, tama dagego te gasagi yai mu da, te homu yaibao.
ISA 28:22 Tama tiali, dagego te Genuai Bidigo po dolobo kolesaga tagaliąo. Ma, meniyu da, dagego sęgę dabe genuai mu pedalaibao. Magi baso meni. Eno odali, God Tigidali Bomo Elalubo Bidigo te bomai po tama wabo suali. Agai e bulu tigidali pesage mu dola silaibao.
ISA 28:23 Dagego olo saganama, eno po bugagia odiąo.
ISA 28:24 Te bidi mego te nai wai bulainu agai te tǫ elebo sę naga ebo yali bogo,
ISA 28:25 tama agai te nai wai dabe bulubo meniwe? Meni ma. Agai tǫ elama, silibo si, agai te ono ge tede bulubo dao. Agai te dola pai lainde agai te nai wit wai dabe bulama, tama me du dage badu agai te nai bali wai tede bulubo dao. Tama agai gasagi yai wit me agai te gi homu badu me bubula bilibo dao.
ISA 28:26 Godigo digi aga te nai wai bulama, sela tubo kolesaga ola mani dao.
ISA 28:27 Te ono ge dabe dwasianu sabo usu yai de da, te bidigo agai te ni name selama, tama te nai ono agabo menio. Tama agai te wit ge dabe sainu, te wilkar dabe me te nai wit ge sainu, ugwadu kegebo yaligila ebo menio. Mu meni. Agai te dwasianu wąbi dage dabe naga selama, tama te ono dabe elebo dao, te augwaligo dwasianu ge dabe sainu.
ISA 28:28 Agai te nai wit ge dabe sabo kolesaga agai mu koneani, te agai te nai dwasianu ge dabego bret nigabo. Te agai te hos dali, me te wilkar si agai te nai wit aga dilide sela sąwainu da, teda agai te hos kibu dali, te wilkar sigo te wit dolama, mia saidali weyu agai bugagia tonalubo dao.
ISA 28:29 Te tigidali sę ebo kolesaga Godidu naga asalio. Tigidali Bomo Elalubo Genuai Bidi agaduba deli naga tigidali haniani wiegi yai kolesaga dali, homu kolesaga mu pągąna pai dao.
ISA 29:1 Genuai Bidigo e tama po wali. “Jerusalem, megi da, nage eno alta tiwai bidibao. Tiali goli, nage dolaibao. Nage te genuai hanu polobadu tuni bidi Devit bidali madi, nage dolaibao. Kibu be deli o si bolo pomainu yao, te tigidali lotu po wabo genuai sogo me.
ISA 29:2 Tiali goli, ena Genuai Bidi, eno te sęgę nageba sela asaibao. Nage eno alta tiwai bidali. Tiali goli, nage gela olama, hwą dwai mu waibao. Tama kaneme nagede pągąna paibao, te bidi dabego te alta saide te hasa dabe elama, te kaneme alta saide pągąbo tiwai yaibao.
ISA 29:3 Eno boi bidi dabe odasa aselama, nage bagua sagasomainu yaibao. Tama augwaligo pu diganama, nago obo pąde munama, te tǫ unana pelama, te pągąwai, te daide doligiluama, tama augwali nage dali hwįabo yali gilama.
ISA 29:4 Tama nage mu tama tulaluama, tama tǫgo nage mu mesega saibao. Tama nago po dabe te isi bidigo po te tǫ dologode dua dua wabo tiwai tǫdu pedalaibao.
ISA 29:5 Tiali goli, te gasa bidi dabe nageba hwįagasobo bage da, augwali te tǫ hogomu tiwai hauwa mu yaibao. Tama augwali sese polo tama gasaba paibao, te bidigo te wit haluama, agai nai sainu ebode te yabe dabe hauwa bola bilibo tiwai yaibao,” wali. Tiali goli, deli sogo tama,
ISA 29:6 Tigidali Bomo Elalubo Genuai Bidi te bomai wali dali, tǫ mali dali asaibao. Tama te be kulu weyu, te genuai kulukulu dwai mu waibao. Tama agai te tigidali nai dabe ulabo isi dwai dali sesaibao.
ISA 29:7 Tama te gasa genuai bulu dabe te Jerusalemba hwįagasainu asali da, te Godigo altaba, teda augwali munu me bidigobeo. Tama augwaligo te hanu sainu yali sę olo dali hagawaibao. Te sę dabe sese sia saibao, te Jerusalemgo nade suali tiwai yaibao.
ISA 29:8 Tama te tigidali bulu ami bidi dabe, te bulu du Saionba hwįagasali bidi dabe, augwaligo magi nai me sogobeo. Mu menio. Te bidi pila muyu, nade nasi ebaso, nai tubo tiwai yaibao. Tama ma hodalobode da, nasi me elaluaibao. Te nai tabi egobeo. Te tiwai yaibao. Tama me bidi agai wę nogonego mu isai, tama nade te wę ma tuali, tiali goli, aga ma hodalobode te wę nogone me elaluaibao. Te tibo tiwai yaibao.
ISA 29:9 Te Juda we bidi, me Jerusalem we bidi, dage te gedu hwidai we bidi yali gilama, me tama subigila paliyu, me tama bidiagameo. Dage te bidi dabego wain wę tuyu, me bia wę tulama, subigila bilibo tiwai me tama bidiagameo. Tiali goli, dage te wain me bia tulama, polobeo. Menio.
ISA 29:10 Genuai Bidigo dagego gedu sęgę ilali. Tama dage te bidi godege mu pilama, isai tiwai bidali. Tama Genuai Bidigo te profet bidi dabego augwaligo suabo nai dabe goli augwaligo susiąmainu yaibao.
ISA 29:11 Tama tibaso, Jerusalem, nago te Genuai Bidigonage ola mawainu ebo sę dabe page nago munu mekonegobeo. Te da, te buku augwaligo bomonama haluaibuku nage nedao olama, mawai buku tiwai dao. Tamanagebolo nedao po wali. Ma, nago te buku te nedebobidibolo menama, te bukude elalubo po nedao obaso da, teda agai te po waibao, “Eno usu ebeo. Buku me dąųolalubo.”
ISA 29:12 Tama ma, nago te buku nedisiąwai bidibolo nago te bukude elalubo po dabe nedao obaso da, teda agai te po waibao, “Eno te buku nedebo konebeo.”
ISA 29:13 Genuai Bidigo te po wali, “Te we bidi hani dabe augwaligo eno nogi augwaligo pedauwalidu naga ugwaba sabo dao. Tiali goli, augwaligo homu dali, homu kolesaga si enade digibulu mu elalubao. Augwaligo enaba mu lotu po wabo menio. Augwaligo te bidigo digi muai bomai po, te po naga augwali ola mani po, augwaligo te po naga wali pabo dao.
ISA 29:14 Tama tibaso, eno gasa sę dabe mu te we bidiba pedalumainu yaibao. Tama augwali mu noma mu saibao. Eno te bidi dabego augwalibolo wiegi yai kolesaga mabo bidi dabego homu kolesaga sela sąwaibao. Tama eno augwaligo kolesaga sai bagego kolesaga eno mu silaibao,” wali.
ISA 29:15 Te we bidi dabego augwa dwai kolesaga dabe Genuai Bidigo gedude dualainu usu sabo dao. Te augwali da, mu dolaibao. Augwaligo te kolesaga dabe augwaligo sesąwai madi, me hulia sai pesagede augwaligo te kolesaga dabe ebo dao. Tama augwaligo te po wabo dao, “Dego mu da sulama, dego mu koneaibawe?”
ISA 29:16 Augwaligo te tigidali nai dabe hasegelama, tigidali nai dabe dolobo dao. Te augwaligo wali po tiwai tama, “Te tǫ sene nigibo bidi te sene nigibo tǫ tiwai dao.” Mena tama tialiwe? Te olo nai mego te aga nigali bidibolo te tama po waibawe, “Nago ena nigai menia?” Ma, te tǫ senego te aga nigali bidibolo te tama po waibawe, “Nago mage nai me konebeo,” te po waibawe?
ISA 29:17 Te pęwądage sogo tigidali nai dabe hasegelaibao. Te Lebanonde moni busi te gi yabo tǫ wiegi yai pedalaibao. Tama wiegi yai gi dabe te moni busi mu gagawaibao.
ISA 29:18 Tama te sogo da, te olo degai dabego te bidigo te bukude nedebo po augwaligo odaibao. Tama te gedu hwidai dabe megi augwali moni hulia sai madi bidibo, te bidi dabe augwaligo ma gedu peda paibao, tama nai dabe ma suaibao.
ISA 29:19 Tama te we bidi augwa digi augwa aiyaba elalubo we bidi dabe augwali te Genuai Bidiba wiegi yai homu yaibao. Tama te nai habuge yai we bidi dabe augwali me te Israel Dabego te Dwagi Yai Doloba Pai Kolesaga Naga Ebo Godiba wiegi yai homu yaibao.
ISA 29:20 Tiali goli, te gasa bidi dali homu dene isąbo dwai bidi dabe, me te Godigo po olo nai dao homu ebo bidi dabe, me te dwai kolesaga hauwa yabo homu ebo bidi dabe, augwali sese dolama, hagala silaibao.
ISA 29:21 Tama te deli tobage dene me te ili po olama, gasa bidi dabe po tų ela mabo bidi dabe me, dene saibao. Te gasa bidi dabe olo dali po tų ela mabo bidi dabe tiaibao. Te dwai sęgę elalubo bidi dabe tau sela menama, te sęgę meni yai bidi dabego po dolobo bidi dabe, te dedeli dene naga saibao. Te augwaligo po tų dolama, tama doloba pai bidi dabego te po tų dolama, tama doloba pai bidi dabego te po tų ugwa ela hologobeo.
ISA 29:22 Tama tibaso, te Genuai Bidi te polobadu Abraham te dwai sogo ma oda sali, te Godigo te tama po walio, te Israel we bidi dagebolo, “Dage Jekopgo we bidi wąį hani, dage hale me elama, tama dage gesabidi huli me egobeo.
ISA 29:23 Te dagego eno sę dabe dagego tomode te sę ebo subo si da, teda dagego ena mu koneaibao. Ena te Dwagi Yai Doloba Pai Sę Ebo God dao homu koneaibao. Tama dagego eno nogi ugwaba selama, tama dage wi eyu, ena dologode naga bidaibao.
ISA 29:24 Tama te bidi dabe homu kolesaga megi umuna pabo bidi dabe, augwali te wiegi yai homu kolesaga ma saibao. Tama te konila po dabe hauwa olama, tama po sela sąbo bidi dabe, augwali te wiegi yai homu elama, eno po ola mabo odaibao,” te po wali.
ISA 30:1 Genuai Bidigo te po wali, “Te Juda hani, te da augwali eno wai bǫų hani dabe, augwali dolaibao. Magi baso meni. Augwali bidi po odisiąwai hani mu dao. Augwaligo eno homu kolesaga wali me pabeo. Menio. Augwaligo augwa homu kolesaga wali naga peyu, augwaligo gasa bulu bidi dabe dali abagi me olama, bidibao. Tama tiyu, augwaligo dwai sęgę hauwa augwa hasi tigide pesage holalio.
ISA 30:2 Augwaligo eno homu kolesaga hanalusiąma, tama augwaligo Isip tuni bidi dali po wali pali dao. Te Isip dabe dolaluama, augwali tau selama, tama augwali me dolidali weyu.
ISA 30:3 Tiali goli, augwaligo homu kolesaga geda munama, tama augwali geda mubode augwali hale mu yaibao. Te Isip tuni bidigo augwali te dolainu ebo me togologobeo.
ISA 30:4 Te mu tama. Te Isip tuni bidigo aga po sabilibo bidi dabe, me aga ofisa bidi dabe aselama, tama Juda hani deliba sisinagasali. Te hanu Soanba, me hanu Hanesba sisinagaselama, tama te teba asali Juda dabe dali po wagasalio.
ISA 30:5 Tiali goli, Juda dabego augwa hobede mu yaibao. Magi baso meni. Te Isip dabego magi sę me elama, augwali tau me sogobeo. Mu menio. Augwaligo moni hale mu te Juda dabeba sesaibao,” Genuai Bidigo te po wali.
ISA 30:6 Genuai Bidigo te po te bulu hasa dabe te nai meni yai kemi sane bulu, te saut badu bulu nogi Negeb, tebolo te po wali. Genuai Bidigo te tama po wali, “Te Juda dabego genuai bidi dabe te olo kemi sane yai saut badu bulu badu bilali. Te da te dwai pesage badu mu, te bidi dabe te genuai sęgę sabo pesage mu. Te pesagede te laion dabe, me bidi gąǫ kelebo dwai gula mane, me bola bilibo gula mane, me gasa bulu hasa dabe me, te bulu badu bidibo. Tiali goli, te genuai bidi dabego te wiegi yai homua pai nai dabe te augwa kibu kamel daide munama, me donki kibu daide munama, tama bomai sę mu elama, te wiegi yai nai te gasa bulu te augwali tau sabo usu isąyabo buluba sela pali dao.
ISA 30:7 Te Isip dabego te gasa bulu bidi dabe ili ili po olama, tau saibao po wabo dao. Tiali goli, agai te sę ebo menio. Tama tibaso, te Isip te gesi nogi te nogi ebao, ‘Te Olo Dulalubo Gula Mane dao,’ wabo,” te po wai.
ISA 30:8 Genuai Bidigo enabolo te we bidigo ebo kolesaga po te bukude asęao wali, me te po me te masigi togalama, asęao wali. Te da te po te tigidali sogo mu elaluama, tama te we bidigo sulama, tama augwali te po sela sąbo we bidi yabo omainu.
ISA 30:9 Magi baso meni. Augwali te bidi po mu sela sąbo we bidi mu dao. Tigidali sogo augwaligo Genuai Bidigo po sela sąbo dao, te augwa Aya. Te tigidali sogo augwaligo ili po olama, tama augwaligo agai po oda mabo po odobo hagela ebo dao.
ISA 30:10 Tama augwaligo Genuai Bidigo po ola mabo profet bidi dabe dali e tama po wabo dao, “Dage pedauwali pania siąo. Dagego dabolo wiegi yai doloba pai kolesaga wali pomainu da ola magimio. Te dago odainu ebo po naga pusa mao. Teda te dwai nai dabe munu me pedalogobeo.
ISA 30:11 Dage digibulu mu bidiyu, tama dago sunumi paligimio. Dago te Israel dabego Godigo po odobo da hagela ebao. Aga te Wiegi Yai Doloba Pai Kolesaga Naga Ebo God dao,” wali.
ISA 30:12 Tama tibaso, Israel dabego God te Wiegi Yai Doloba Pai Kolesaga Naga Ebo God, agai e tama po wali, “Dagego eno dua dao wali po sela sąnama, tudi ola manio. Tama dagego te ili po olama, te dolobo kolesaga dage tau saiba homu ebo te mu dagego dąų walio.
ISA 30:13 Tama tibaso, dagego dwai kolesaga polo yalio. Tama te dwai kolesagago dage mu tama dolaibao. Te da te dwasianu dedage te obo ugwadu tobolude elaluamo, te genuai elasa pabo tiwai dao. Tama deli sogo tama, te obo togwa pelama, degasa pali.
ISA 30:14 Mu tama, dage te tǫ sene te alua pelama, tama olo genuai me elalusiąma ebo tiwai yaibao. Te isi dage tomode muabo, o te wę te tuabo tiwai genuai olo me elalugobeo,” wali.
ISA 30:15 God, Israel dabego Genuai Bidi, aga te Wiegi Yai Boma Pai Kolesaga Naga Ebo God dao. Agai e tama po wali, “Dage bugagia bidabo sunumi da, e tama dao. Dage enaba ma aselama, tama dage bugagia homu nagame elama, bidiąo. Tama dagego ena deli naga wali asiąo. Tama eno deli naga dage tau saibao. Tama eno dage ma aselama, tama dage bugagia tigidali sogo bomo elama, bidaibao.” Godigo te tama po wali. Tiali goli, dagego agai te po wali pabo hagela mu yali.
ISA 30:16 Tama dagego te po wali, “Tagalama, dago bomonama udabo kibu hos bidibao. Tama da te kibu hosde dualama, tama da wi paibao,” wali. Te dagego te boi bidi dabede wi paibao wabo po da, teda mu tama dao. Tiali goli, tagala, dagego kibu hos bomonama udabo da, tagalao. Te boi bidi dabego hos kibu bomonama mu dagego kibu hos nosali wali pobeasa asaibao.
ISA 30:17 Te dagego 1,000 ami bidi dabe augwali boi bidi me deli aselama, hwįaibao po wagasobo si da, teda augwali wi mu elama, augwali wi paibao. Tama ma, te boi bidi dabego ami bidi a naga aselama, hwįaibao hae wagasobo si da, teda dage hani tigidali wi ogodama, wi peyu, te hanu taga paibao. Tama te bidi me deli me bidigobeo. Tama te hanu te bidi dabego bulu dude plak ugwa walobo ni te bulu dude tula ma elalubo tiwai yali gilama tama agaduba elaluaibao.
ISA 30:18 Tiali goli, Genuai Bidi da, tigidali sogo doloba pai kolesaga naga ebo God dao. Tama tibaso, agai dage homu dene elama, agai hobede ebo dage ola mawainu te tonalubao. Te we bidi dabego Genuai Bidiba homu kolesaga dąų olama, tama agai augwali tau somainao olama, tonaluali we bidi dabe da, augwali wiegi yai homu pemene mu yaibao.
ISA 30:19 Te Jerusalemde megi bidalubo we bidi, tega, dage hobede elama, gela me wagobeo. Megi te Genuai Bidigo dage hobede elama, dage tau sabo deli naga no munalubao. Te dagego aga i olama, gedu haluasa po wabo si da, polo tama agai dagego i wabo odama, dage olo mu tau saibao.
ISA 30:20 Te mu tama, Genuai Bidigo dage moni sęgę somainogo yaibao. Tama dage te bidi nai me wę meniama, habuge yai bidi tiwai bidaibao. Tiali goli, aga digi dage dali bidama, tama dage bugagia elama waibao. Tama dagego aga munu me gegegobeo. Menio. Dagego aga duga gedugo ma sueibao.
ISA 30:21 Tama dage peyu, te mena sunumide geda muainu ebaso da, te dolo nogo badu sunumi badu, o pobase nogo badu sunumi badu me, teda agai dage tudi badu bidama, tama mena sunumidu painu yali, agai dage ola mawaibao.
ISA 30:22 Tama da, dagego duga tibo godigo piksa dabe saibao. Te da te bidi dabego nigilama, silva dali, gol dali sigo haluai piksa. Tama dagego te piksa dabe te dwai damua pai nai tonobo tiwai tonama, e tama po waibao, “Gedao. Dago nage subo hagela ebo.”
ISA 30:23 Tama Godigo tulubage te dagego bulali nai wai dabeba mawaibao. Tama te węgo dagego nai wai dabe bugagia mu holaibao. Tama dagego nai dabe hauwa mu elaluaibao. Tama te sogo dagego kau kibu dabego tuabo nosai dabe hauwa me elaluaibao.
ISA 30:24 Tama me, dage duga gide nai selama, tama duga gi tǫ elebo kau kibu dabe, me donki kibu dabe bugagia mawaibao.
ISA 30:25 Te Genuai Bidigo te dwai sogo te dagego boi bidi dabeba pedalomainu ebode, teda augwali subigila isila paibao. Tama augwaligo bomai obo dabe sese dola silaibao. Tama te sogo te wę dabe bulu dudu dabe asiyu, tama dage wę me habuge me egobeo.
ISA 30:26 Te sogo te polua te giliga tiwai bomo elama, mu nanaibao. Tama te sogo te giligago ula te bomo yai mu nanama, tama megi tama ula ebo edelama, mu nanaibao, te tigidali sogo ula ebo edelaibao. Te a naga olama, me badu nogo si sogo nanebo giliga deliba sisinama, deli bubugade nanebo tiwai yaibao. Te sę dabe te Genuai Bidigo aga we bidibolo mani sęgę dabe, me dene dabe mani sela sąbo sogo, te sę dabe yaibao. Tama agai augwali usu ma ilaibao.
ISA 30:27 Suama. Genuai Bidi digibulu hogodoma, aga bomo dali, ula dali te asobao. Agai wado elama, tama moni isi dali, hano si, te pedalobao, te agai sębę ebo ola mayu, te agai po wabo si da. Te tigidali nai dabe ulubo isi agai keledu pedalobo.
ISA 30:28 Agai mobogo tigidali nai dolobo dao, te wę asiyu, tigidali nai dabe mesegelama, bidigo dogoniba usu ni pabo tiwai dao. Genuai Bidigo te tigidali bulu tǫ kantri dabe agai nogogo toulama, pępębo dao, te augwali dolomainu. Tama agai augwaligo homu kolesaga dolama, tama augwaligo pabo hagela ebo buluba odasa pabo dao, te bidigo hosgo kelede ain dage mubo tiwai dao, te hos kibu bugagia dolasa pomai ebo gilama.
ISA 30:29 Tiali goli, Genuai Bidigo we bidi dagego da, te sę dabe ebo subo sogo da, teda dagego homu gana pabo balia te genuai lotu wabo sogo wabo tiwai waibao. Dagego te bidi dabe te Genuai Bidigo bulu duba holama, tama wiegi yai homu eyu, te genagego ona dabe elebo tiwai yaibao. Genuai Bidi da, te genuai bomai masigi tiwai dao. Tama aga te Israel dabego duala sabo pesage tiwai dao.
ISA 30:30 Genuai Bidigo bomonama mu hae olama, tama agai bomonama i hae wabo aga we bidi tigidaligo odama, augwaligo agai sębę ebo mobo augwaligo tigide dolomainu yaibao. Aga te moni bomai isi te tigidali nai dabe dabo isi, me moni genuai tulubage, me wali, me talua ge tulubage dali, tama aga asaibao. Tama te be kulu obaso, te tigidali we bidigo agai sębę ebo sueibao.
ISA 30:31 Genuai Bidigo dagą wabogo te Asiria dabe wi mu ilaibao. Tama agai aga keloa toulama, te Asiria dabe genina mu elaibao.
ISA 30:32 Tama te Genuai Bidigo te Asiria dabe elebo sogo da, te Genuai Bidigo we bidigo wiegi yai homu gana pelama, tama augwaligo haniani hąbidi me gita dabe te Genuai Bidigo nogo toulama, te Asiria dabe eliyu, poge wabo te wali pelama, augwaligo te nai elaibao.
ISA 30:33 Augwaligo te Asiria tuni bidi ulabo isi tǫ dedage polo dodolama, elalubo. Augwaligo te tǫ dedage genuai mu elama, tama aiyanu mu dulai mu nigali, tama augwaligo isi dabe hauwa mu polo sela muani. Tama Genuai Bidi agai mobogo pona palebo si da, te polo tama isi bogoli dala saibao. Magi baso meni. Genuai Bidigo mobo te posolai isi tiwai dao.
ISA 31:1 Dage te Isip buluba pelama, tama augwaligo dage tau somainu hanalugi pabo bage, hobede ya, dage dene saibao. Dage te Isip dabego hwįbo hos kibu hauwa elaluyu, me karis dabe me hauwa, me te ami bidi dabe hosde dualama hwįbo ami bidi dabe hauwa elalubo sulama, tama dagego homugo Isip dabego dage tau somaina homu ebao. Tiali goli, dagego Israel dabego Genuai Bidiba tonalubeo. Aga te Wiegi Yai Doloba Pai Kolesaga Naga Ebo God dao. Tama dagego agai tau sao po hanalubeo
ISA 31:2 Tiali goli, agai me wiegi yai homu kolesaga elalubao. Tama agai dwai dene te dwai we bidibolo me dene ilaibao. Tigidali sogo Genuai Bidigo aga wali po wali naga pabo dao, hasegelegobeo. Agai te dwai bidi dabe dali, me te bidi dabe te dwai kolesaga ebo bidi dabe wali bilibo dabe dali, hwįaibao.
ISA 31:3 Tiali goli, te Isip dabe, augwali te god menio. Augwali te olo bidi dabe dao. Me augwaligo hos dabe me te hos mu naga dao, te tigi mi dali, dili dali elalubao. Tama te Genuai Bidi agai bomo ola mabo si da, teda te bomai bulu tulaluaibao, tama me te agai tau sali da, te bulu dabe me tulaluaibao. Tama si dali si tama, mu tama dolaibao.
ISA 31:4 Genuai Bidigo enabolo e tama po wali, “Te bulu yowi laiongo sipsip kibu me elama, tudubadi da, teda aga wi elama, tama te sipsip taga peyu, wi me pogobeo. Te sipsip kibu tonalubo bidi hauwa aselama, aga tonaluyu, hae mobadi goli, aga wi me egobeo. Menio. Agai augwali dali wado elama, tama te sipsip kibu bugagia tonaluaibao. Te tama tiali goli, ena Tigidali Bomo Elalubo Genuai Bidi, te eno te bulu du Saionba hwįagasaibao, te Jerusalem bulude. Tama magi nai dabe mego ena togolobo usu me egobeo.
ISA 31:5 Te ba dabe augwali ugwadu bola biliyu, augwa wai dabe bugagia tonalubo dao. Te tama tiali goli, ena Tigidali Bomo Elalubo Genuai Bidigo da, teda eno Jerusalem bugagia tonaluaibao. Te tigidali sogo ena augwali pagede bidiyu, tama eno augwali ma oda selama, tama eno aga bugagia tonaluaibao.” Te po wali.
ISA 31:6 O dage Israel dabe, dagego Genuai Bidigo po sela sąbo dao. Tiali goli, dage mu begelama, tama agaba ma asiąo.
ISA 31:7 Te Genuai Bidigo bodolu pąba yagasobo si da, teda te sogo dagego te dwagi yai silva de gol sigo nigali tibo god piksa dabe sąwaibao. Te nai dabe duga nogogo digi nigai dao. Tama te kolesaga yaligo dage sęgę sai dao.
ISA 31:8 Genuai Bidigo te po wali, “Te hwįbo hwą bainat mego te bulu Asiria dolaibao. Tama te Asiria dabe mu silaibao. Te bainat hwą ena Genuai Bidi ena digi tagala palaibao, te bidi dabe mego menio. Te Asiria dabe te bainatde wi paibao, tama te Asiria dabe gesi bidi dabe da kalabus sę yaibao.
ISA 31:9 Te Asiria dabede genuai wi mu pedalaibao. Tama augwaligo bomai genuai hanu tulaluaibao. Tama te augwaligo ami ofisa dabego eno hwįbo plak ugwa walai subaso, augwali noma selama, augwaligo dili nagamea pelama, tama augwali wi paibao.” Te da te Godigo po dao. Te agai bomai isi te bulu du Saion te Jerusalem bulude elalubao.
ISA 32:1 Odao, te tuni bidi me deli pedalaibao. Tama te tuni bidi dali, tigidali tǫ pedai kantrigo genuai bidi dabe dali, augwaligo wiegi yai doloba pai kolesaga naga elama, te we bidi dabe tonaluaibao.
ISA 32:2 Te deli deli genuai bidi dabego te we bidi dabe augwali tau somainu asali bidi dabe, augwaligo tau saibao. Augwali da, te we bidi augwali te genuai wali dali tulubage dabe ebo side, augwali te duala sabo pesage tiwai dao. Tama me, augwali te wę te hogomua pai pesageba pabo tiwai, me te moni masigigo te hogomua pai pesage te masigigo seselalubo tiwai dao. Tama te bidi dabe te tįwai madi duala selama, toma tubo tiwai dao, te boma pai giligade.
ISA 32:3 Tama megi e tibo sogo, te we bidi augwaligo gedugo tigidali nai dabe subo usu mu yaibao. Tama me augwaligo olo bugagia dala pelama, tama augwaligo tigidali po bugagia odaibao.
ISA 32:4 Tama te bidi dabe te homu kone bugagia palisąma, te dwai dwai sę dabe yali bidi dabe, te bage augwali wiegi yai homu kolesaga selama, te sę dabe tama yaibao. Tama te bidi dabe te augwa hasi po wabo pedauwali sęgę yali bidi dabe, augwali bugagia po mu waibao.
ISA 32:5 Tama te dwai bidi dabebolo genuai nogi me te dwai polobo kolesaga dabe yali da, te sę dabe mu sia saibao.
ISA 32:6 Te polobo sę ebo bagego te subigila po dabe wabo dao. Tama tigidali sogo augwaligo dwai polobo sę naga ebo dao. Augwaligo Genuai Bidigo godolo yabo sę dabe ebo menio. Tama ili po hauwa Genuai Bidide ela palobo dao. Tama augwaligo te nai meni yai bidi dabebolo nai masiąma eyu, me augwaligo te wę nogone ebo bidi dabe wę mayu ebo menio.
ISA 32:7 Tama te dwai bidi dabego te dwai homu kolesaga hauwa augwaligo tobolude pągąna pabo dao. Augwaligo homu kone palama, tama augwaligo haniani ili po wabo homu kolesaga dabe gegelama, tama augwaligo te nai meni yai we bidi dabego po tų ebode dolama, aiyaba elaluabo sunumi dabe gegebo dao.
ISA 32:8 Tiali goli, bidi wiegi yai dabe augwali genuai nogi elaluaibao. Te tigidali sogo augwaligo doloba pai kolesaga naga ebo dao, tama augwaligo wiegi yai kolesaga naga yabo homu bomo ebo dao.
ISA 32:9 Te Jerusalem we dabe, dagego homugo da, dage wiegi yai bidiba homu te ebao. Tama dage tigidali sogo bugagia bidaiba homu te ebao. Tiali goli, dagego olo saganama, eno po bugagia odiąo.
ISA 32:10 Te usu, megi dage homu tegaluama bidiagameo. Tiali goli, dage tonaluiąo. Te 13 o 14 polua bolo pomainao. Teda dage wi elama, noma saibao. Magi baso meni. Dagego te wain gi dabe te du me walogobeo.
ISA 32:11 Megi da, dage wiegi yai te bidibao, tama dagego homugo dage wiegi yai te bidiba homu ebao. Tiali goli, dage noma selama, wi elama, tama duga wiegi yai ugwa dabe peda sąnama, tama hobedai ugwa dabe gudiagameo.
ISA 32:12 Dagego duga hagawiade nogo sawaligo elama, tama dage hobedai gela duga wiegi wiegi yai gi dabe, me duga wiegi yai sawi yai wain gi hagede dage hobedai gela waiagameo.
ISA 32:13 Tama dagego eno we bidigo tǫ hagede dage hobedai gela waiagameo. Magi baso meni. Te dwai sesane bono me dwai nosai dabe te bulu tǫde koliaibao. Awe, dagego duga te gana peyu ebo te be dabe homu kone elama, tama dage hobedai gela waiąo. Tama me, dage te duga te gawelama bidibo te hanu dabede me hobeda gela waiąo.
ISA 32:14 Magi baso meni. Te tigidali we bidi dabe augwali te hanu taga pelama, tama augwali te hanude ugwa eda iyu, augwali te hanude sę dabe me egobeo. Te tuni bidigo be, me te ami bagego bomai obo, me te ami bidi dabe bidama boi bidi dabe asobo tonalubo te bobobage sigi be dabe, sese olo elaluama, tama dolaibao. Tama te bulu yowi donki dabe tede biliyu, wiegi yai homu yaibao. Tama me, te sipsip kibu dabe aselama, teba nosai tuagasaibao.
ISA 32:15 Tiali goli, Genuai Bidi aga mobo bidi daba ma tagala palaibao, bidigo wę gelebo tiwai yaibao. Tama te nai meni yai kemi sane nai meni yai olo elalubo bulu wiegi yai bulu tǫ ma yaibao. Tama haniani nai dabe tede holaibao. Teda te mone buside te ni dabe olo holobo tiwai holaibao.
ISA 32:16 Te wiegi yai doloba pai kolesagago naga te tigidali tǫ dabe tonaluaibao. Te po tų dolo naga dodolobo kolesagago te we bidi dabe bugagia dodolaibao.
ISA 32:17 Tama te doloba pai kolesagago te bidi hasi godolo ebo kolesaga ilaibao. Tama te we bidi wi me isąma elama, tama augwali tigidali sogo bugagia dili elama, dolaluaibao.
ISA 32:18 Tama Genuai Bidigo e tama po wali, agai we bidi dabe augwali bugagia bidiyu, augwali augwa bulude bugagia homu tegaluama, toma tuaibao. Tama augwali magi naide wi me egobeo.
ISA 32:19 Te genuai talua ge tulubage tulama, te mone buside moni ni dabe me dolobadi me, tagala. Tama tigidali hanude be dabe tǫde wiala pai goli,
ISA 32:20 te Genuai Bidigo we bidi, dage bugagia bidaibao. Tama dagego te nai dabe te wę elalubo bulu badu dagego nai bulaibao. Tama dagego duga kibu bulmakau dabe, me donki kibu dabe, augwali augwa digi nai tumainu sula tagalaibao.
ISA 33:1 Dage te gasa bulu dabe dolobo hani, dage dolaibao. Te mu tama, dage me dolobe dao. Tiali goli, dagego gasa bulu dabe dolobo bodolu sia saibao. Tama duga digi duga dolaibao. Dagego te gasa hani dabe ili po walama, tama dagego te po mia selama, tama dagego augwali te boi bidi dabego nogoba mubo dao. Te mu tama, te gasa hanigo da dage me ili po me ola masiąbadi goli. Tiali goli, dagego te gasa bidi dabe ili po wabo sogo te sia saibao. Tama te gasa bidi dabego dage ili po olama, tama dage te boi bidi dabego nogoba muaibao.
ISA 33:2 O Genuai Bidi, dago homu kolesaga nage deliba naga elalubao. Nago da hobede elama, tama tigidali sogo da bugagia tonaluagameo. Tame te sęgę ebo sogo, nago da ma selama, tama dago augwali aiyaba elalumainu ilao.
ISA 33:3 Te bomai bulu bidi dabego nago te be kulukulu tiwai i wabo odobo sogo, me nago augwali dali hwįainu hogodasa asobo si da, augwali we bidi sese wi paibao.
ISA 33:4 Tama augwaligo te taga pabo nai dabe da, te gasa bidi hani dabego polo sagasaibao. Teda te gide mano dabego gide nai dabe tula silibo tiwai yaibao.
ISA 33:5 Genuai Bidi aga genuai nogi mu elaluyu, tama aga bulude ugwade mu bidibao. Tama agai aga doloba pai kolesaga dali, agai po tų dolo naga ebo kolesaga dali, te tigidali Jerusalem tǫde pągąna paibao.
ISA 33:6 Tama tigidali sogo agai aga we bidi dage bugagia tonaluyu, tama agai dage bomo elama, tigidali sogo bidimainu yaibao. Tama agai dagebolo dwagi yai homu kolesaga dabe, me kolesaga dabe hauwa mu mawaibao. Tama dagego mu tobolu dįa holai elalumainu yaibao. Te wi elama, Genuai Bidi dologode elalubo kolesagade, Genuai Bidi agai wiegi yai nai dabolo maiabo dao.
ISA 33:7 Suama, te Jerusalemde genuai bidi dabe te sunumi dabede bidiyu, gela dabe obao. Tama te bidi dabego te boi pibo sogo pedalomai ebadi, augwali gela bomonama me oduali.
ISA 33:8 Te genuai sunumi dabe olo elalubao, te we bidi te sunumidu ugwa eda me bilibo menio. Te boi bidi dabego augwa dąų walali po bogi pelama, tama augwaligo gasa hani bidi dabego hanu dabe dolali. Augwaligo gasa bidi dabe tonobo da, te olo nai dabe tonobo tiwai ebao.
ISA 33:9 Te tǫ hobedai gela weyu, tama aga bomo sia sali. Tama te Lebanon genuai busi hale yali. Magi baso meni. Agai ni dabe sasiyu, ela pobaso. Te Sarongo odogo malu bulu wiegi yai te tǫ wa pelama, tama wę meni yai kemi nai elalubo bulu tiwai yaibao. Tama me, te ni yabe dabe te Basan distrikde holali, me te bulu du Karmelde holali dabe, augwali bogwa pelama, telega peyu yali.
ISA 33:10 Genuai Bidigo e tama po wali, “Megi da, ena hogodama, sę yaibao. Tama te we bidigo ena sulama, tama augwaligo eno genuai nogi ugwaba somainao.
ISA 33:11 Te bidi hani dagego ena dali boi bidi elaluali bage, dage da te olodali bomai sę mu elama, masigi meni yai nai dabe dagego sabo dao. Te bidigo aga gide wit genina soba homu ebo tiwai dao. Tiali goli, agai olo nosai dabe salio. Tama duga bomai sęgo te isi bogoli tiwai pedalama, tama dage mu sia sąwaibao.
ISA 33:12 Tama dage te augwaligo kambang isi ulai hogomu tiwai, me augwaligo sesane bono isi ulama, keli hogomu ebo tiwai yaibao.
ISA 33:13 Te dage pąde bidalubo we bidi, me dage digibulu bulu bidalubo we bidi, dagego eno bomai sę yali po odao, me dagego eno genuai nogi po pusa maiąo,” wali.
ISA 33:14 Te Saionde te dwai kolesaga ebo we bidi augwali wi elama, noma sali. Tama augwaligo e tama po obao, “Genuai Bidigo sębę da, te da te bomai isi tigidali sogo dabo isi tiwai, tama tigidali nai dabe dela silibo tiwai dao. Te da tomode de mu te isi dali bidaibawe?”
ISA 33:15 Te doloba pai kolesaga eyu, me mu po naga weyu, me gasa bidi dabego doado bage sabo homu isąyu, dwai kolesaga isąbo bidi dabe, augwali te Genuai Bidi dali bidibo usu yaibao. Tama augwaligo te ili po wabo mone sisąma eyu, me te dwai kolesaga ebo bidi dabe dali dagana sisąma eyu, me te gasa bidi dabe ela mubo bidi dabe dali kisa selama ebo menio.
ISA 33:16 Augwali te tobage bidi dabe augwali bugagia bidaibao. Augwali te bidi me te bugagia wiegi yai boma pai bulu dude geme dualalubo ąǫ yaibao. Tama nai dabe mego augwali aiyaba me elalugobeo. Tama tigidali sogo augwaligo tuabo nai elaluyu, wę elaluyu yaibao.
ISA 33:17 Dagego duga tuni bidigo aga sawi yai tuni bidigo ugwa ma gudama, tama te bulu ma tonalubo sueibao. Tama dagego duga bulu genuai ma pedalobo sueibao.
ISA 33:18 Tama dagego te dwai sogo dagede polobadu pedalali ma kone palama, tama dagego e tama ma hanalu waibao, “Te boi bidi dabe aselama, te takis moni sali bidi dabe augwaligo tobolu bidi megi menadewe? Tama me te boi bidi dabe aselama, te dago ami bidi dabego te boi bidi dabe asobowe weyu tonaluainu, te sęani bobobage bede tonaluyu yali, te tobolu bidi menawe? Augwali polobadu te dago hanu dabede elaluali bidi da. Megi augwali ede menio.” Te po waibao.
ISA 33:19 Dagego te tobolu gagea pelama, augwa digi augwa nogi ugwaba siyu yali boi bidi dabe dagego gesabidi me sugobeo. Tama dagego augwaligo dwai augwa wabo po me odogobeo. Te bidi mego te dagego konesiąwai po augwaligo wali po bidi mego me odogobeo.
ISA 33:20 Dagego Jerusalemba toniąo. Te da dago genuai hanu, te da tigidali genuai lotu po wabo sogo dabe sisinagasabo hanu dao. Te da te da bugagia bidiyu, toma tuyu ebo bulu dao. Aga te sel ugwa be te bidi dabego bono togolama, ni dabe gudasa, pisąma yabo sel be tiwai dolaluaibao.
ISA 33:21 Genuai Bidi te dago boma pai polalubo bidi tede bidaibao. Tama agai te Jerusalem te wiegi yai sawi yai genuai wę me, dwasianu wę me elalubo bulu nigilaibao. Tiali goli, te dwasianu geba kanu me, genuai hwįbo sip dabe me, te wę dabedu me asogobeo.
ISA 33:22 Magi baso meni. Genuai Bidi aga digi dago tuni bidi bidama, tama po tų dabe dodolobo sę elama, tama aga digi da bomai po dabe menama, da tonaluaibao. Tama agai da bugagia tonaluyu, tama da dwai dene me sogobeo.
ISA 33:23 Ma, te boi bidi dabego te Jerusalem sabo homu yali da, teda augwali usu me egobeo. Augwali te sip boskru bage te sip pomainu, te pobigisąma ebo boskru dabe tiwai bidaibao. Magi baso meni. Te sip tobolu bugagia dolalusiąma eyu, me te bono dabe bugagia bomalusiąma eyu, me te sel dinigalusiąma eyu isąma ebaso. Tama tibaso, boi bidi dabe wi peyu, te nai dabe hauwa tagalama paibao. Tama te Jerusalem dabe udala, te nai dabe sigi paibao. Tagala, te sągą dwai bidi dabe me, augwali me te gasa bidi dabe nosali aselama, augwaligo me te nai dabe hauwa mu saibao.
ISA 33:24 Tama te sogo te Jerusalemde bidibo we bidi dabego e tama po munu ma wagobeo, “Ena gasi ebo.” Tama Genuai Bidigo te Jerusalemde bidibo we bidigo dwai sę yali sęgę sela sąwaibao.
ISA 34:1 Dage tigidali tǫ habu we bidi dabe, asiąo. Dage sisinagaselama, te po odagasiąo. Tǫde me tigidali elalubo nai me, dagego me olo muiąo wai.
ISA 34:2 Genuai Bidigo te tigidali bulu tǫ kantri dali haliga sębę eyu, te augwa ami bidi dabe dali me sębę yali. Tama agai te po weyu, te augwali tigidali isaibao po wai dao. Awe, agai augwali sese mu dola silaibao.
ISA 34:3 Te augwali tigi dabe te bidi dabego pubalubo usugobeo. Menio. Te bulu tǫ dabede danamu pelayu, te bulude dwai kugumini mu yaibao wali. Te augwaligo kaneme dabe te bulu du dabede pągąnalueibao wai dao.
ISA 34:4 Giliga, me polua, me hǫ dabe hala pelama, te tutudulaluama, te mu tigidali silaibao. Tama dagalu da, te bidi dabego 1pepa yabe bebe pelama, kękę pabo tiwai yaibao. Te dagalu daide ula ebo hǫ dabe tigidali te ni wain yabe wa pai te tǫba tudulalubo tiwai eyu, te ni kaya fik yabe wa pai tudulalubo tiwai yaibao wai dao.
ISA 34:5 Genuai Bidigo te tama po wai, “Eno haliga sębę yali, eno te ena bainat hwą sisi elama, tama te bainatgo hwawa mu weyu, te dagalu tagalama, te Idom dabe eligi painu yali, te eno augwali dolaibao po wali hani dao. Te megi eno aga tagala palubo te augwali ela mugi pomainu yaibao,” wali.
ISA 34:6 Tialima, te Idom dabego kaneme me iligo te Genuai Bidigo bainat hwą halua saibao. Te sipsip me meme dabe te bidi dabego te ofa yainu elama, te ofa yainu ebo bidi dabego nogode kaneme piliga pabo tiwai yaibao. Genuai Bidigo te genuai hani we bidi dabe mu te taun Bosra te Idom bulu tǫ kantride elaibao wali, te aga digi genuai ofa ebo tiwai dao.
ISA 34:7 Genuai Bidigo te tobage bomai uni bulmakau dabe me elama, te augwaligo kaneme me ili te gea paliyu, te Idom bulu tǫ kantri mesegelaibao wali.
ISA 34:8 Te sę pedelaibao, magi baso meni, Genuai Bidigo te boi bidi dabeba te aga taun Jerusalem doliyu, aiyaba elalubo boi bidi dabebolo te dene mabo bodolu mawai dao wai.
ISA 34:9 Te Idom bulu tǫ kantri wę dabe te kolta tiwai pedelama, te hogomu dabe te bomai masigi dabe tiwai pedelaibao, te Idom bulu kantri tǫ te kolta sia dabo tiwai yaibao.
ISA 34:10 Te sia dabo munu me sia sogobeo. Menio. Te tigidali sogo ulade me hulide bomo elama, dedu, te hano sesemane sogo pedaliduaibao wai. Te Idom dabego tǫ olo sesemane sogo elalu, te bidi teba munu ma biligi pogobeo.
ISA 34:11 Te bulu tǫ te dwai ba dabe, te ba kemodage dabe, me sisi yai ba kotkot, me hulide bilalubo ba dabego bulu naga pedelaibao. Godigo te Idom dabego nai doado bage tigidali sia somainu elama, te Idom dabego tǫ olo elalumainu yaibao wali. Te polobadu digi agai te tǫ nigilama, te tǫ olo mu elaluali tiwai gilama pedelaibao wai dao.
ISA 34:12 Te tigidali genuai bidi dabe, me tobolu bidi hetman dabe, te munu me bidigobeo, tama te king mego te bulu tǫ kantri me tonalugobeo wali.
ISA 34:13 Te sesane yai bono me nosai dabego te kingo be, me gasa be dabe mesegelaibao. Te bulu uni yowi dabe bidagaselama, te badu i wagasobaso, te uni ba dabe te beba piagasaibao wali.
ISA 34:14 Te olo masigi bulu kemi tǫde te bulu uni hasa dabe teba sisinagasaibao wali. Te bulu uni meme dabe me te bidagaselama, i weyu, ga udaibao, te tobage hasamani dabe me, te hulide bilalubo hasa me, te aselama, te badu piabo pesage gegagasaibao wai dao.
ISA 34:15 Te hulide bilibo ba sibigo te be selama, te augwa ge dabe tede saganaibao, te augwa bogo dinigilama, te augwa gesi ogomani tonalueibao. Tama te omai ba kemodage me, so ba kemodage me, augwali aselama, tonaluagasaibao walio.
ISA 34:16 Te Genuai Bidigo buku tomoba sulama, nago te nai dabe elalubo po nedao. Tigidali hasa me ba dabe te bukude po wali gilama, te bulu Idomba bidagasaibao. Te me deli augwali me bidigobeo. Magi baso meni, Genuai Bidigo digi augwali asao wali. Te aga Mobo Bidigo augwali sisinama, te augwali odasa asaibao wali.
ISA 34:17 Te Genuai Bidigo digi te Idom tǫ pedaide deli delide dąį ilama, te augwaliba dobawaibao. Tama augwali te Genuai Bidigo dąį ilama, muani madi sesemane bidada paibao wai dao. Godigo tigidali nai wiegi yai ma pedalumainu ilaibao
ISA 35:1 Te masigi kemi bulu me, tǫ wa pai bulu dali, te augwali pemene wiegi yai mu yaibao, magi baso meni, te sawi mu yai plaua pedelama, te badu mesegelaibao.
ISA 35:2 Te wa pai bulu tǫ tonobo te sawi wiegi yai mu yaibao. Te aga genuai i hai dali weyu, genuai pemene yaibao. Te wiegi yai sawi yai nai hauwa mu pedaliyu, te bulu tonobo wiegi yai sawi me tedali eyu, te Lebanon genuai busi tonobo tiwai eyu, te Saron bulu odogo tonobo tiwai yaibao. Te we bidi dabego bomonama tonoyu, te genuai nogi, me te dago Genuai Bidi Godigo wiegi yai au dali elalueibao.
ISA 35:3 Dagego te bomo meni yai bidi dabe dąų waliyu, te haliga wi ebo bidi dabe, me didibili ebo bidi te dąų waliyu yao po wai dao.
ISA 35:4 Te tabi haliga homu kolesaga te bomo isąwai bidi dabebolo te tiwai po wao, “Dage te bomonama dolalu, te wi me elamuo,” wao. “Te dagego God ma asiyu, dage dobola ma selama, te boi bidi dabe dwai dene mu mawaibao,” wali.
ISA 35:5 Tialima, te gedu widai bidi dabego gedu ma pedaibao, te olo degai bagego po ma odaibao.
ISA 35:6 Te sągą dwai penelai bidi dabe gesa soyu, posoga palaibao, me te pedauwali pania sai bage te i weyu, pemene yaibao. Te wę dabe te masigi kemi tǫde pedaliyu, te tigidali habuba usu nama paibao.
ISA 35:7 Te olo kemi tǫ bulude te sigi ąį tiwai pedelaibao. Te wa pali tǫ dologode me wę ulu pedelaibao. Te polobadu te uni yowi dabe naga te wa pali tǫde bidali. Tiali goli, te sogo te nosai, me awi hauwa tede pedelaibao.
ISA 35:8 Tama genuai sunumi me deli te badu elalueibao. Te genuai sunumi nogi e tiwai waibao, “Godigo Tedali Gasagi Yai Genuai Sunumi Digi Dao,” wai. Te God gedude wiegi yai isąwani bidi dabe, augwali te sunumide me biligobeo. Mu menio. Te Godigo we bidi dabego sunumi naga elalueibao. Te homu kolesaga meni yai bidi dabe, te augwali te pąba me pogobeo.
ISA 35:9 Te dwai laion me, dwai hasa dabe me, te sunumidu me soagobeo. Menio. Te Godigo augwali ma sali we bidi dabe naga, augwali naga te sunumidu bilaibao.
ISA 35:10 Te Genuai Bidigo ma dobola sali we bidi dabe, te augwali wiegi yai pemene dali te Jerusalemba ma asaibao. Te augwa genuai po dagą weyu, balia weyu, te sunumidu aselawaibao. Te augwa wiegi yai bugagia mu dugulalu, te augwa pemene umabo mu yaibao. Augwa te wiegi yai pemene ebo munu me sia sogobeo. Te dene, me haliga sęgę, te augwalide munu ma me elalugobeo.
ISA 36:1 Te Hesekia king bidibadi, te kibu be nogo si olama, sągągo me si me si, te14 yia elalubo sogo, te Asiria king Senakerip te aga ami dabe dali aselama, te Juda dabeba boi hwįagaselama, te augwali aiyaba elaluama, te tigidali bomai obo elalubo hanu sali. Tiali goli, te Jerusalem augwaligo sisąbadi, te elalualio.
ISA 36:2 Senakerip te Lakisde bidiyu, agai aga amide polalubo namba wan ofisa dali, te genuai ami hani dali tagala palali, te Jerusalemba pomainu yai. Augwali te Jerusalemba sabolama, tialima te ofisa te Jerusalemba pabo te Ugwadu Elalubo Ulu Wę nogi wabo sabo wę pąba pelama, bidigi pali. Te ąį gamia te pelama, bidigi pali. Te ąį gamia te name ugwa nigibo madiba pabo genuai sunumi pąde elaluai.
ISA 36:3 Tialima, te Israel ofisa bidi selago aga sugi palio. Augwaligo nogi e tiwai, Eliakim, te Hilkiago ogwa, te kingo be tonalubo bidi da, tama Sepna, te kingo kuskus, me Joa, te Asapgo ogwa, aga te kingo ebo sę po page tigidali asębo bidi dao.
ISA 36:4 Augwali sela bidi te Asiria ofisa bidiba sabalubo si da, agai po bomonama, augwaliba te tiwai po wali, “Dage pelama, Hesekiaba te kingo bomai po magi pao, aga te Asiria king dao. Agai te tiwai po wali, ‘Hesekia, nago mena tobage tiwai bomo elalu, tama nage ena dologode bidisąyu ebawe?
ISA 36:5 Te odolali mibo pogo te boi hwįabo bomo usu elalueibao, agawe? Nago enade hagoma ebao. Nago homugo dego nage tau sagasaiba homu elama, te nago enade hagoma eba, agawe?
ISA 36:6 Eno koneani, nago te kantri Isipba tonaludu, te agai nago hwįbo tau sagasomainu tonalubao. Tiali goli, eno nagebolo obao, Isip te togwa pai awi dili tiwai elalubao. Te nago bilibo dono tiwai tola selama, pobaso da, teda te awi dili sagago nago nogode dolaibao. Te Isip king bidigo kolesaga te tobage tiwai elalubao. Tama nago te boi hwįbaso, te aga aselama, nage tau me sagasogobeo.
ISA 36:7 Tialima, nago te po weyu, te dage Israel dabego konealubo homu te Genuai Bidiba mubaso, te duga God, te agai dage tau saibao po obaso, eno homugo te me usugobeo homu ebao. Magi baso meni. Hesekia, nago te agai lotu wabo pesage dabe, me te gasade elalua pali alta dabe, dolali. Nago te Juda dabeba me Jerusalemba te po weyu, augwali te Jerusalemba aselama, tama te alta deliba naga lotu wagasao po wai dao.’”
ISA 36:8 “Te eno kingo gasa po elalubao. Hesekia, eno kingo nageba te 2,000 hos mawaibao wali, nago te hosde dugulama, te hwįabo ami bidi te 2,000 elalubaso da, te tama tiaibao. Tiali goli, eno koneani, nagede digi te tobage bidi tama me elalubeo.
ISA 36:9 Nago homugo te Isip ami bidi dabe te hosidu ma karisdu aselama, te nage boi hwįbo tau sagasaibao homu ebao. Tiali goli, mu menio, augwali me asogobeo. Tama tialima, nago bomogo te dago dwasianu ami hani aiyaba elalueiba homu ebaso da, te usu me egobeo.
ISA 36:10 Eno kingo te po wali, ‘Nago homugo ena homugo digi aselama, te nago bulu tǫ kantriba hwįagaselama, te dolagasali homu eba, agawe? Mu menio. God Genuai Bidigo digi enabolo te kantri dolagasao po obaso, ena asai dao,’ eno kingo te po wali.”
ISA 36:11 Eliakim, me Sepna, me Joa, augwali selago te po odama, tialima augwaligo te Asiria ofisa bidiba te po wali, “Nago te po dabolo te Siria pogo wao, magi baso meni, dago te bulu po koneai dao. Nago te Hibru po me wagio, tiyu te taun obo daide dodolalu bidibo bidi hani dabego nago te wabo po odabuo,” wali.
ISA 36:12 Tiali goli, te ofisago po wei ponoyu, te tiwai po wali, “Eno kingo ena tagala palali, te po dage dali, me dagego king dali naga omainu me tagala palobeo. Menio. Te obo daide dodolalubo hani bage, augwaligo me te po odomainao. Magi baso meni, te boi hwįbaso, dago te Jerusalem bagua sagasobo si da, teda te dwai sę ebo si dage tigidaliba pedelaibao. Tama te obo banisde dodolalubo hani bage te nai mu sǫą paibao, tama augwa di ma tuyu, poi wę ma tuyu yaibao, te tiwai dage me yaibao,” wali.
ISA 36:13 Tialima, te Asiria ofisa bidigo te obo daide bidibo hani bidiba tonalu, te Hibru pogo genuai po dagą olama, i weyu, te tiwai po wali, “Dagego te bomai kingo poba olo bugagia muiąo, aga te Asiria king dao.
ISA 36:14 Agai te tama po wai, dage te Hesekiago dage tibo po ola momainu me elamuo. Hesekiago dage tau selama, te dage bugagia me bidigobeo, wali.
ISA 36:15 Dagego te Hesekiago dage homu bega sabo po me odigio, dagego konealubo homu te Genuai Bidiba dąų wabo te agai dage tau selama, te da Asiria dabego dage aiyaba elaluama, te taun Jerusalem sogobeo wabo po, te po odogio.
ISA 36:16 Hesekiago po dagego odolama, te ena dali hwįabo homu me egio. Te tobage homu ebo tagalama, te hanu eno somainu buluba teda solama, tama da dali te poi pibo ilibo po minao. Tama tibaso da, teda dage bugagia bidiyu, te duga elalubo ulu węde wę tuyu, te ni wain du, me te ni kaya fik du, te duga gide digi tuyu bidaibao.
ISA 36:17 Te dage bugagia bididubadi, te ena ma asiyu, te dage gasa bulu kantriba selasa peyu, te duga bulu tǫ kantri tiwai buluba paibao. Te bulu kantride te wain gi, me bret nigibo wit gi, te hauwa elalubo dao,” te po wai.
ISA 36:18 “Hesekiago dage tibo po ola mayu, te po obao, ‘Genuai Bidigo da tau sobaso, te dago augwali aiyaba elalueibao,’ po wai. Tiali goli, te Hesekiago tibo po wabo po odogio. Dagego homugo te gasa hani dabe augwa godigo te augwali tau selama, te boi hwįani augwaligo da Asiria dabe aiyaba elaluali da, agawe? Mu menio.
ISA 36:19 Dago te taun Hamat, me Arpat, me Sefarvaim, teba boi hwįgi pali sogo, te augwa god menade bidiyu, te augwali tau sagasobewe? Te dago Samaria buluba boi hwįgi pali sogo, te Samaria augwa godigo augwali tau selama, te da aiyaba elalualiwe? Mu menio.
ISA 36:20 Dago te bulu tǫ kantri hauwaba boi hwįgi pali, te augwa god hauwa elaluali. Tiali goli, te god me deligo te aga bulu tǫ kantri me tau selama, te da hwįgi pali aiyaba me elalubeo. Tama tialima, magi baso dage Jerusalem bagego homugo te duga Genuai Bidigo dage tau saiba homu elama, te dago dage aiyaba me elalugobe da homu ebawe?” wali.
ISA 36:21 Te Asiria ami ofisago te aga wali po te siminani, tiali goli te genuai obo daide bidali hani bidi te augwa pedauwali pania selama, te po me deli wei me ponobeo, magi baso meni, king Hesekiago augwali habu seliyu, te augwaligo Asiria dabego po wei me ponamuo po wai dao.
ISA 36:22 Tiali goli, te Asiria ami ofisa bidigo wali pogo te Eliakim, me Sepna, me Joa te haliga sęgę mu ilali. Tama augwa gudali ugwa pįsilama, tama augwali pelama, te ofisago wali po tigidali te king Hesekiabolo pusigi palio.
ISA 37:1 Hesekiago te Asiria dabego po odobo si da, teda aga haliga sęgę mu elama, te aga ugwa pįsawalio. Te agai homu dene ebo ugwa gudama, te Genuai Bidigo tempel be tomoba palio.
ISA 37:2 Tama Hesekiago te Eliakim i wai, te kingo be tonalubo bidi dali, Sepna, te kingo kuskus bidi, te polalubo pris bidi dabe me i wai. Tama agai augwali tagala paliyu, te profet Aisaia sugi pomainu yali, te Amosgo ogwa dao. Te bidi dabego me te homu dene ebo ugwa gudasa pali.
ISA 37:3 Augwali pela sabolama, Aisaiabolo te tiwai po wagi pali, “Kingo te po walio, megi te genuai haliga sęgę ebo sogo elalubao. Te Asiria dabego dabolo te da begela dolobo dwai posobo po hauwa waligo te da hale genuai elalubao. Da te haliga yai we me deli elalubo tiwai eyu, te wai ame nabo sogo pąde pedelalio. Tiali goli, te wego wai ame nabo te bomo me elalubeo.
ISA 37:4 Te Asiria kingo aga ofisa tagala palama, te dago God Genuai Bidiba dwai po wagasomainu yalio, aga te sesemane sogo bidada pabo God dao. Dago homugo Genuai Bidigo te dwai posobo po dabe odama, tama agai te dwai po dabe pusagasali bidi dabeba te dwai dene ilaibao. Tama tiyu, dago homugo nago te Godiba gedu haluasa po weyu, te agai da dwasianu bidalubo hani bidi tau somainao,” po wali.
ISA 37:5 Te Aisaiago te Hesekiago po odobo si da,
ISA 37:6 tialima agai te po sela asali bidi dabeba te tiwai po wali, “Dage te kingba ma begasa pelama, te Genuai Bidigo po agaba pusugi pao. Genuai Bidigo te po wai, ‘Nage wi eyu, tama homu hauwa te wali dwai pode elamuo, te Asiria king bidigo olo sę ebo bidi dabego enade te po wali dao.
ISA 37:7 Magi baso meni, ena Genuai Bidi dao, eno te Asiria kingo homu kolesaga bega palama, agai te po me deli odobo sogo, te agai dage mu tagalama, te aga bulu kantriba geasa paibao. Tama aga te Asiriade bididubadi, eno aga te bidi mebago te moni hwągo ela mumainu yaibao,’” te po wai dao.
ISA 37:8 Te Asiria ami ofisa bidigo po odali, te king Senakeripgo te taun Lakis taga pali po odali. Tialima, te ami ofisago te Jerusalem taga peyu, ma begasa pelama, tama te king te taun Lipnade boi hwįdubadi suali, tama aga pelama, aga sugi palio.
ISA 37:9 Te Asiria dabego boi hwįdubadi, te bidi meba aselama, te king Senakeripbolo te tiwai po wagasali, “Te King Tirhaka te bulu kantri Itiopia bidi, te aga ami bidi dabe dali, augwaligo te nageba boi hwįagasainu asobao,” wali. Senakeripgo te po odama, te agai bidi meba tagala paliyu, te agai pas te Juda dabego king bidi Hesekiaba selasa pomainu yali, magi baso meni, agai te Jerusalem sabo homu dąų weyu, bomo elaluai dao.
ISA 37:10 Te Senakeripgo pasde te tiwai po wali, “Eno koneani, nago konealubo homu te dąų wabo god, agai te po weyu, te agai eno dage aiyaba elaluama, te Jerusalem sogobeo po obao. Tiali goli, agai tibo po obao, tiyu nago agai poba dąų wabo homu me mugio.
ISA 37:11 Naga digi nago te da Asiria king dabego ebo kolesaga koneai dao, te dago gasa bulu kantri hauwa mu dolali. Nago homugo eno nago bulu kantriba te tama tegobe da homu eba, agawe?
ISA 37:12 Polobadu eno wąį dabego te taun Gosen, me taun Haran, me taun Resep dolama, te taun Telasarde bidali Beteden hani dabe ela muani. Te augwa god dabego te hani augwali tau sabo ususąbaso, te augwali bugagia me bidibeo. Mu menio.
ISA 37:13 Te taun Hamat, me Arpat, me Sefarvaim, me Hena, me Iva, te tama moni taun king dabe bidiba, agawe? Menio, dago te augwali tigidali ela silai dao,” wali.
ISA 37:14 King Hesekiago te pas te Senakeripgo tagala palali bidi dabego nogode salio. Te pasde po agai nedama, tialima agai te Genuai Bidigo tempel be tomoba sela palio. Tama agai te pas te Genuai Bidi bidibo gesabidi badu pąde muani, te agai dinigilama, bugagia dodolama, muai.
ISA 37:15 Tama Hesekiago gedu haluasa po Genuai Bidiba weyu, te tiwai wali,
ISA 37:16 “Genuai Bidi, Tigidali Bomo Elalubo Bidi, nage da Israelgo God, nage te ensel mobo bidi daide ugwadu bidiyu, te naga king sia saide dugulalubao. Tiali goli, nage naga God mu da, tama nago te tigidali bulu tǫ habu tonalubao. Nago naga nago te tǫ me dagalu nigai dao.
ISA 37:17 Genuai Bidi, eno homugo nago olo eno gedu haluasa po waboba bugagia munama, te eno gedu haluasa po odolama, tama nago daba te pedalubo dwai sę dabe bugagia suao. Tama eno homugo nago te tigidali dwai po wabo odomainu hagede ilali, Senakeripgo nageba te sę yai, God nage te sesemane sogo bidada pabo dao.
ISA 37:18 Genuai Bidi, dago koneanio, te Asiria king dabego te we bidi hani dabe hauwa dolama, te augwa bulu tǫ kantri dabe dali dolali.
ISA 37:19 Tama te king augwaligo te hani we bidi dabe augwa god dabe sela sąyu, te tigidali siaba ulali. Te god dabe dolali, magi baso meni, augwali te tibo god naga dao. Te bidi augwa digi te ni me masigi selama, augwa nogogo nigai dao.
ISA 37:20 Te Genuai Bidi, dena God, eno homugo te megi nago da tau somainu homu eyu, tama da te king Senakeripgo nogode ma dobola sao homu yai. Tama te tigidali tǫde we bidi hanigo te tiwai bugagia koneyu, nage naga nage te Genuai Bidi da waibao,” po wai.
ISA 37:21 Tialima, profet Aisaiago Hesekiaba te tiwai po ola tolali, “Genuai Bidi, da Israel dabego Godigo te po wai, nago agabolo hanalu, dage te Asiria king nogode ma sao po wali.
ISA 37:22 Tama tialima, megi da, agai te Senakerip dali po elalubao, te Asiria king dao. Genuai Bidigo te tiwai po wali, ‘Senakerip, te Saion bulu dude bidibo we bidigo nageba gisugu mabo dwai mu eyu, tama te Jerusalem bagego nageba posobo dwai weyu, te nage begela dolobo dao.
ISA 37:23 Senakerip, nago posobo po weyu, te po dwai weyu, te naga digi naga nogi ugwaba siyu, hagoma po wali sogo, nago homugo te nago de dali yali da homu yaliwe? Nago ena dali tama yalio, te Israelgo God, ena te Wiegi Yai Doloba Pai Kolesaga Ebo God dao.
ISA 37:24 Nago po te naga ami tobolu bidi ofisabolo mayu, te augwaligo nago nogi ugwanu mu sali, tama te enaba posobo po wali. Te eno augwaligo pedauwalide te tiwai po odali, nage Senakerip, nage te naga karisde dolugulama, te nage ugwanu mu igulama, te Lebanon genuai bulu du dabeba te nago tobolu usu nama, nage te Lebanon genuai busi tomoba mu pali, te bidi me pisąbo buluba pali, tama nago te bobage bobage ni sida dabe, me te wiegi wiegi yai ni pain dabe togwali.
ISA 37:25 Tama nage gasa biligi pabo sogo nage te wę sǫą pabeo. Te bulu tǫ tigidali wa pai madi, te wę ulu dabe nago nigali, te mu pągąna pelama, te nago hani bidigo tumainu yali. Te nage te Isip genuai wę elaluboba pobaso, te nago sągągo te wę dabe wa pomainu yai dao.’”
ISA 37:26 “‘Senakerip, nago konebeo, te polobadu digi eno te sę ebode homu kone palama, tama nage te sę emainogo sa muyu dąį ilali. Eno nageba bomo menama, nago te bomai obo elalubo taun dolomainu yai. Te nage peyu, nago te taun dabe alubaso, te augwali degasa pelama, te masigi pesage genuai holama, tama te pobele bage hogomu genuai pesage igulali.
ISA 37:27 Te taunde we bidi dabe wi mu yali, te augwa homu kolesaga umuna pelama, te augwa bomo kimi menia pali. Augwali te sasia pabo nosai tiwai elalu, te posola pai wali asobo sogo dela pabo tiwai elaluali. Te be pedude holobo nosai dabe, me te gasa madi holobo nosai dabe te bomai wali pedalubo sogo te bugagia me hologobeo.
ISA 37:28 Tialima, eno nage bugagia mu koneanio. Eno nago homu kolesaga, me te eno nago ebo kolesaga te nage pabo bulu tigidali me konea pali. Tama nago enade genuai haliga sębę elalubo me, te eno koneai dao.
ISA 37:29 Eno te nago haliga sębę ebo po, me te hagoma ebo po tigidali te tama kolesaga ebo po odali, te nago tama tiyu, naga digi naga nogi ugwaba sali. Tiali goli, megi da, eno nagede bomai po elalubao. Eno te huk te bisigi ebo nai selama, te nago gunide munama, te eno ain dage augwaligo te hos pedauwalide mubo nai selama, te nago pedauwalide muaibao. Tama nosali eno nage te naga asali sunumidu ma kekasa paibao,’ Genuai Bidigo te po wai.”
ISA 37:30 Tama Aisaiago te Hesekiaba po me deli mayu, te Hesekiago te Genuai Bidigo yaibao wabo sę tigidali te Senakeripba mu pedelaibao, Genuai Bidigo te wali po dąį ebo tiwai te Hesekiago sulama, konemainu te sę ola mawai. Aisaiago te po wai, “Nago te tiwai dąį ilama, pedalubo sueibao. Te kibu bede, te nosali kibu bede me, te dagego nai me bulugobeo. Dagego gide te olo pedelai nai wit sela tueibao. Tiali goli, te sela wabo kibu bede, teda dagego te gide nai bulama, sela tueibao wali. Tama me, te dagego te ni wain bulama, te wain du sela tueibao.
ISA 37:31 Te Juda we bidi dabe, te boi bidi dabego augwali dolisąwani bage, te augwali bugagia bidiyu, te hauwa pedelama, te gide wit waigo pedali tǫ aba munama, tama te nai ge hauwa walobo tiwai yaibao.
ISA 37:32 Te boi bidi dabego te Jerusalem we bidi tigidali me dologobeo. Menio. Te augwali dwasianu hani me bididuaibao. Te Tigidali Bomo Elalubo Genuai Bidi, agai bomai homu kolesagade te sę dabe pedalumainu yaibao.”
ISA 37:33 “Tama Genuai Bidigo po ma weyu, te tiwai po wai, ‘Te Asiria king aga ami bidi dabe dali te Jerusalem tomoba me asogobeo, tama te ene deli te taun tomoba me enegobeo. Te ami bidi dabego te hwįbo sabele te taun pąba me tolasa asogobeo. Te taun pąde augwaligo te tǫdu me holama, augwa tede dolalu, hwįainu me tegobeo. Mu menio.
ISA 37:34 Ena Genuai Bidi, eno te Asiria king te aga asali sunumidu te begasa ma pomainu ilaibao. Tama tibaso, aga te Jerusalem tomoba me asogobeo.
ISA 37:35 Eno tama tiaibao, magi baso meni, eno ena genuai nogi homu kone palama, te polobadu eno dąų wabo po ena sę bidi Devit dali wali po koneyu, tama tiaibao,’ wali.”
ISA 37:36 Tialima, te sogo hulide naga, te Genuai Bidigo ensel mobo bidi me deli te Asiria dabe bidalubo pesageba pelama, te umabo bidi sese hauwa 185,000 ami bidi ela muai. Te kigamu mu Senakerip hodaluama, te ami bidi dabe isai tigi munalua pabo sualio.
ISA 37:37 Tialima, aga dali te meba bidibo ami bidi dali, augwali hogodama, te Asiria pabo sunumidu begasa wali palio. Tama Senakerip te moni hanu Niniveba pelama, bidigi pai dao.
ISA 37:38 Me sogo side deli sogo aga te aga tibo godigo lotu beba pelama, te aga god Nisrokba lotu udubo sę yali. Te aga ogwa sigo digi, te Adramelek me Sareser sigo, te bainat hwą selama, te lotu be tomoba pelama, te aga ela muanio. Te nosali augwa si wi pelama, te bulu tǫ kantri Araratba bidigi pai. Tialima, aga gasa ogwa me, aga nogi te Esarhadongo, te aga aya pesage hasegelama, te Asiria king pedelai dao.
ISA 38:1 Te Asiria dabego te Juda dabeba dwai sę idu doludali sogo, king Hesekia te genuai gasi selama, te aga pąde isainogo yai. Tialima, profet Aisaia, te Amosgo ogwago, aga sugi pelama, agaba te tiwai po wali, “Genuai Bidigo te po wali, nago gasi te me siligobeo, nage te isaibao wali. Tama nago te naga bede bidibo bidi dabebolo po olama, te nago sę tigidali dodolao po wao,” te po wai.
ISA 38:2 Hesekiago te po odobo si da, teda aga gesabidi te be habu daga badu begegi sulama, gedu haluasa po te tiwai wali,
ISA 38:3 “Genuai Bidi, ena nage wali mu aselama, te nago sę yalio. Sesemane sogo eno te nago homu wali pai. Tama tialima, nago eno te yali sę dabe homu kone palama, tama nago ena isimainu me elamuo.” Aga te gedu haluasa po ola silama da, te aga gela umabo mu walio.
ISA 38:4 Tialima, Genuai Bidigo Aisaiabolo te tiwai po ma wai,
ISA 38:5 “Nago Hesekiabolo te tiwai po wagi pao, ena Genuai Bidi, te aga bulai wai Devitgo God, eno agai gedu haluasa po wali odolama, te aga gela genuagia wabo sualio. Tama tialima, eno aga te kibu be nogo si olama, sągągo a naga bidimainu yaibao wai dao.
ISA 38:6 Tama me, te eno aga te Asiria kingo aiyaba elalumainu elama, te taun Jerusalem somainogo me iligobeo. Mu menio. Ena digi te dage seselalubo bidi bidaibao.
ISA 38:7 Tama ena Genuai Bidi eno nageba te dąį ilibo sę me deli menama, te nageba eno te yaibao po dąų wali sę te nageba ola mawaibao.
ISA 38:8 Te dąį ilibo te tiwai yaibao. Nago suali, te togobili polobadu te king Ahasgo nigali, te togobili dagego te be posali ulade te aua nedebo togobili elalubao. Te eno giliga noma bidi te togobilide te asesa polo nogo si dąįba begasa somainu ilaibao,” wali. Tama tibaso, te giliga nomago te polo asesa begasa ma pomainu ilama, te dąį nogo siba usu nigi pali.
ISA 38:9 Tialima, te Hesekia usu ma igulali sogo, agai te po asęani,
ISA 38:10 “Eno homugo tama tiali, hobede ya, te megi tebogo ena gesi bidi tigi elalubadi, te ena isiyu, te tǫ taga paibao homu yai. Tama ena te isali bidigo bulu pesageba bidigi paibao.
ISA 38:11 Ena te bidibo ula elalubo we bidi dali ma bidigobe da homu yali, te eno Genuai Bidi ma sugobeo wali. Ena te bidibo ula me elalusiąbo bulu pesageba bidigi paibao homu yai, tama eno te bidibo ula elalubo we bidi ma sugobe homu yai dao.
ISA 38:12 Ena te isai bidi tiwai yalio. Eno bidibo ula te sel ugwa be bidigo aluama, dolasa pali tiwai yalio. Te eno bidibo ula te bidigo tigi ugwa dinigilibo sę tiwai yalio. Eno homugo te bobobage igi paibao homu yali, tiali goli polo tama augwaligo togolama, te masinde ugwa hobolainu ebo tiwai yali. God, polo tama nago eno bidibo ula silimainu yalio.
ISA 38:13 Eno kone palali, nago eno nogo sągą dili te hasa laion dili tologobo sę ebo tiwai iduama, te kigamuba usu nigi pabo tiwai yali. Te polo tama nago eno bidibo ula silainu yai dao.
ISA 38:14 Ena dene genuai eyu, te ena gela weyu, i wali, eno gela wali te ba higo po wabo tiwai yai. Te eno dagaluba ugwa tonaludu, sesabia pai elaluai, te nago ena tau somainu yali, te ena gedu dene elama, te gedu ąį pągąna pai dao.”
ISA 38:15 “Te eno magi po wagowe? Genuai Bidigo te ena tau sabo po dąų wali, te megi aga digi te sę dabe mu pedalubao wali. Tama tibaso, enaba te pedelali genuai sęgę te homu kone palaibao, te ena digi ena aiyaba elaluama, te dua digi bidiyu, te ena isibo sogoba usu naibao wali.
ISA 38:16 Genuai Bidi, te tobage sę pedalubo te we bidi dabego kolesaga hasegelama, te gesi bidibo ula somainu yali. Te enaba pedelali sę te gesi bidibo ula mawainu yai. Nago eno gasi sia somainu elama, te ena wiegi yai ma pedalumainu ilali dao.
ISA 38:17 Megi da, eno konebao, te sęgę dabe pedelali, te ena tau sainogo naga yai. Nago ena godolo mu elama, te nago ena te isali bidi dabego pesageba pomainu me ilibeo. Te nago eno yali dwai sę sęgę dabede homu kone me isąyu, tagalai dao.”
ISA 38:18 “Te isali bidi dabego pesagede bidibo hani dabe, augwaligo te nago nogi ugwaba me sogobeo. Te nago naga we bidi dabe tau sabo wiegi yai sę ebo te augwaligo me sugobeo.
ISA 38:19 Te bidibo ula elalubo bidi dabe, augwaligo naga nago nogi ugwaba siyu, te megi eno ebo tiwai yaibao. Te aya dabego te augwa wai dabeba te nago wiegi yai sę sesemane sogo ebo po waibao.”
ISA 38:20 “Genuai Bidigo ena usu ma ilali. Te tigidali side da te Genuai Bidigo tempel beba pelama, te balia po weyu, musik weyu, te agai nogi ugwaba saibao. Dago te tiwai sę te da bidibo ula elalubo sogo tiwaibao,” te po wai.
ISA 38:21 Tama Hesekia te gasi me elaludubadi, Aisaiago te tiwai po wai dao, “Te kingo sę ebo bidi dabego te ni kaya fik du dabe te augwaligo olali te selama, te seselama, te Hesekiago bomai keniba magasao, te usu elama, ma pedelaibao,” wali.
ISA 38:22 Tama me, te sogo me Hesekiago Aisaiabolo te tiwai po hanalu wai dao, “Genuai Bidigo te magi dąį ilibo sę enabolo ola mayu, te ena agai beba lotu ma wagasomainu egowe?” wali.
ISA 39:1 Merodak Baladan, te Baladango ogwa, aga te Babilon king dao. Agai te tiwai po odali, Hesekia te genuai gasi elalubao po odali. Tiali goli, aga usu ma yali. Tama agai te pas asęnama, te agai agaba tolabo, te wiegi yai homu ilabo nai me deli dodolama muani, te bidi mebabolo menama, te augwaligo sela pelama, Hesekiabolo magi pomainu yai.
ISA 39:2 Hesekiago te bidi dabego po odolama, tialima megi da, agai te bidi dabeba te mone dabe, me te aga gasa nai dabe augwaliba ola mawai. Te agai mone mubo bede te tigidali silva me gol suali, te wiegi yai denami ebo pauda me sanda dabe, me te hwįbo nai tigidali, te gasa nai tigidali te aga bakstuade munolubo me, te ola mena silalio. Hesekiago te nai deli me dualubeo. Menio. Agai augwaliba te kingo moni be tomode elalubo nai tigidali ola mawai, me te aga tonalubo bulu tǫ kantri pedai tigidali ola mena silai dao.
ISA 39:3 Te Babilon bulu bidi dabe ma pela silai madi te sogo, teda te profet Aisaia aselama, te king Hesekia suagasali, te agaba te tiwai po hanalu wali, “Te aselawali bidi dabe, augwali te mena bulu bidi dawe? Te augwaligo mena po nageba waliwe?” Tama Hesekiago agaba te tiwai po wei ponani, “Augwaligo ena suagasu asali, augwali te digibulu buludu mu asalio, te bulu tǫ kantri buludu mu asalio, te bulu tǫ kantri Babilon dao.”
ISA 39:4 Tama Aisaiago te po wai, “Augwaligo te mena mena nai mu te nago genuai wiegi yai be tomode sualiwe?” Tama Hesekiago agaba po wei ponoyu, te tiwai po wali, “Eno te tigidali nai doado bage mu augwaliba ola mawai, te eno magi nai deli augwalide geme me dualubeo,” wali.
ISA 39:5 Tialima, Aisaiago Hesekiabolo te tiwai po wali, “Megi da, te eno nagebolo te Tigidali Bomo Elalubo Genuai Bidigo po obao.
ISA 39:6 Genuai Bidigo te po wali, te nosali sogo me sogo deli pedalubo si da, te Babilon dabe aselama, te kingo bede munalubo nai doado bage, te naga bulai wąį dabego te bakstuaba sisinama muani nai saibao. Te nai me deli te augwaligo me sula tagalogobeo. Mu menio. Augwaligo te tigidali nai doado bage Babilonba selasa paibao.
ISA 39:7 Te nago hanide digi te augwaligo te ogwa meba selama, augwali te Babilonba odasa paibao. Tama augwaligo sogoli te augwaligo dinama, tama augwali te kingo bede olo mu sę ebo bidi pedelama bidaibao,” Aisaiago te po wai.
ISA 39:8 Hesekiago te po odolama, tama agai Aisaiabolo te tiwai po wali, “Te Genuai Bidigo po nago enaba pusubao, te wiegi yai po dao.” Hesekiago te po wali, magi baso meni, te aga homu kolesaga tomode, agai te tama homu elaluali, ‘Megi sogo ena te king bidibadi, te dwai sę dabe me pedalugobeo,’ homu yalio. ‘Te da bugagia bididubadi, te me hwįgobeo,’ wai dao.
ISA 40:1 Duga Godigo te po odubao, “Eno we bidigo haliga dąų walama, te augwa haliga dua nagame ilibo po pusao.
ISA 40:2 Te wiegi yai po te Jerusalem we bidi dabeba mao,” wali. “Augwaliba te tiwai po wao, te augwali kalabus bidali sogo te silalio. Ena Genuai Bidi, eno te augwaliba te augwa yali dwai sęde wei ponoma, te dwai dene mawai dao. Awe, eno augwaligo yali dwai sę dolo usu nama, tama te tiwai si naga te dene mawai dao. Tama tialima, megi da, eno augwaligo dwai sęgę tigidali sela sąwai dao.”
ISA 40:3 Odao. Bidi me deligo te tiwai i wali, “Te Genuai Bidigo sunumi te wa pai bulu tǫ pesagede dodolao,” wali. “Te bulude dena Godigo genuai sunumi pebeli diliba ilao.
ISA 40:4 Te tǫ odogo igulali pesage tigidali pągąniyu, te bulu du tigidali pebela aiyaba tulao. Te dolo si elalusiąwani pesage te dolo si elama, te du du yali pesage te malu tǫ naga pedelaibao.
ISA 40:5 Tama genuai ula me te Genuai Bidigo bomo te pebeli diliba hanilama pedelaibao, tama tǫde we bidi tigidaligo sueibao. Te po te Genuai Bidigo pedauwalidu digi asai dao,” wali.
ISA 40:6 Bidi me deligo te tiwai i wali, “Po pusao.” Te eno po me wali, “Mena po eno pusagawe?” Te agai te tiwai po wei ponani, “E po pusao. Tigidali we bidi te tǫde sesabi elama, bobobage sogo mu me bidigobeo. Augwali te nosai me plaua te polo tama wa pelama, te sia sabo tiwai ebo dao.
ISA 40:7 Te Genuai Bidigo posolai wali augwaliba tagala palobo si, te nosai wa peyu, te plaua telegasa dulubao. Mu tama, te we bidi dabe te nosai tiwai polo sia sabo dao.
ISA 40:8 Te nosai wa pelama, te plaua dabe boga selama, tulalueibao. Tiali goli, te dena Godigo po da, te sesemane elalua pidu, elalua paibao. Te po pusao,” wali.
ISA 40:9 Jerusalem, nage te genuai bulu duba holama, te bulude po pusao. Saion, nago bomonama, i hai weyu, te bulude po pusao. Nago po hanilama pusao, nage wi me igio. Nago te tiwai po te Juda dabego taunba walao, “Suao, te duga God asobao,” po wao.
ISA 40:10 Suao. Tigidali nai tonalubo Genuai Bidi aga bomo dali asobao. Agai te boi bidi dabe aiyaba elaluama, te aga we bidi dabe ma dobola sali, te aga boi hwįnama, te wiegi yai nai sabo tiwai yalio.
ISA 40:11 Agai te aga we bidi dabe bugagia tonalubao, te sipsip tonalubo bidi dabego te aga sipsip bugagia tonalubo tiwai ebao. Te tonalubo bidigo te sipsip wai dabe te hagawiade pageasa bilaibao. Te aga dua digi pidu, te dwasianu wai dabe elalubo sipsipba te sunumi ola mayu, ela pidubo dao.
ISA 40:12 Te me deli bidibo bidi agai nogode te tamu ąį tigidali sabua sabo bidi bidiba, agawe? Te dagalu daide ugwadu usu siyu ebo bidi me deli elaluba, agawe? Te tǫ tigidali kabude bubo bidi me deli elaluba, agawe? Te bulu du dabe te skelba munama, skel ebo bidi me deli bidibawe?
ISA 40:13 Dego te Genuai Bidiba te nai dabe nigibo kolesaga ola mawaibawe? Te agaba homu kolesaga ola maiabo usu elalubo homu ebo bidi me deli bidiba, agawe?
ISA 40:14 Tama dego agabolo te wiegi yai doloba pai kolesaga ola mawai dawe? Tama dego agaba te wiegi yai konea pabo homu kolesaga tigidali ola mawai dawe? Bidi deli me mu menio.
ISA 40:15 Genuai Bidigo te haniani kantri tǫde we bidi suali, te olo nai gagawai tiwai ebao. Augwali te tǫ hogomu tiwai elama, te dwasianu ąį tedebo tudulalubo tiwai ąǫ ebao. Tama agai te tigidali bulu tǫ ailango sęgę usu selama, te tǫ hogomugo sęgę tiwai elalubo dao.
ISA 40:16 Te we bidi dabego te tigidali kibu hasa elali, me te Lebanon genuai ni silide te tigidali ni togolama, te augwaligo genuai sia nogolama, te kibu hasa tigidali te ofa tiwai eyu, te siago tigidali domainu igi da, te tagalao, augwaligo te ofa te God gedude olo nai tiwai igi dao.
ISA 40:17 Te tigidali tǫ pedai kantride bidibo we bidi augwali te Genuai Bidi gedude olo bage tiwai elalubao. Augwali te olo nai mu tiwai dao.
ISA 40:18 Tama tialima, God te de mu tiwai dawe? Te elalubo nai me deli te God tonobo tiwai ebo da, agawe?
ISA 40:19 Aga te bidigo nogogo nigai tibo god piksa noma elalua pabo tiwai da homu ebawe? Te tibo god piksa noma dabe da, te sę ebo koneai bidi dabego te piksa kapago nigilama, te golgo mesegelaibao. Te augwaligo silva selama, te sen dabe nigilama, te piksa nomaba daganainu ebo dao.
ISA 40:20 Ma, te doado bage meni yai bidi dabego te tibo god piksa nigainu te damua pisąbo bomai ni selama, nigaibao. Tama augwaligo te ni dulubo mu koneai bidibolo olama, te augwa tibo god piksa nigao po waibao. Te bidigo te piksa bugagia dulaibao, tiyu te piksa tulaluidali weyu tiaibao.
ISA 40:21 Te dagego konebe, agawe? Te dagego odobe da, agawe? Te polobadu mu te bidi dabego dagebolo te tigidali nai mena tama pedelali te po wasiąwai meni da, agawe?
ISA 40:22 Te Genuai Bidi aga naga te dagalu daide te sia kingde dugulaluali, agai te tigidali nai nigai dao. Agai te dagalu te name ugwa tiwai dinigina palama, te aga sel ugwa be sęalubo tiwai elaluai. Te agai gedude, te tǫde we bidi te olo nai kuli mano tiwai dao.
ISA 40:23 Agai te king dabe te olo bidi tiwai pedalumainu ebo dao. Tama agai te bomai bidi dabe aiyaba elaluama, te augwa nogi me elalubo menio.
ISA 40:24 Augwali te plaua dabe te bidigo tamadi tama bulama, te augwa sele aiyaba dulusiąwai tiwai elalubao. Te Genuai Bidigo bomai posolai wali tagala palobo sogo, augwali te deli sogo polo tama sasia pelama, te baguasa pabo waligo augwali te hogomu sela pabo tiwai ebo dao.
ISA 40:25 “Ena Genuai Bidi, ena te Wiegi Yai Doloba Pai Kolesaga Tigidali Ebo God dao, tama ena tiwai de dawe? Te eno kolesaga ebo tobage kolesaga ebo bidi tiwai me deli elalu, bidibawe?”
ISA 40:26 Dagego te dagaluba ugwa tonama, te ugwade elalubo hǫ dabe suiąo. Dego augwali nigai dawe? Te Genuai Bidigo naga nigali. Te nai dabe te Genuai Bidigo ami hani tiwai elalubao. Agai augwaligo namba koneani, te agai augwali deli deli nogi koneama, tama agai augwali nogi nogi yaibao. Agai tigidali bomo mu elalubo, tama tibaso, te nai dabe te augwalide me deli me hagagobeo.
ISA 40:27 Dage Israel, dage te Jekopgo hani dabe, magi baso dagego po hauwa dogia pobawe, “Dago Genuai Bidigo te dago sęgę subeo,” po wai. “Te dwai sę ebo sogogo da gegali, tiali goli agai da tau sabo homu ebeo,” po wabo dao.
ISA 40:28 Te dagego konebe da, agawe? Te dagego odobe da homu eba, agawe? Genuai Bidi te sesemane bidada pabo God dao, tama agai te e tǫ tigidali badu sese nigai bidi dao. Te mena bidi mego agai homu kolesaga tigidali me konea siligobeo. Agai bomo kimi te meniama, te me sia sogobeo.
ISA 40:29 Genuai Bidigo te bomo meni yai bidi dabe dąų walobaso, te dili bomo kimi silai digi, te agai augwali bomo selama, bidimainu ebo dao.
ISA 40:30 Te gesi ogwa bidi dabego te bomai bomo elaluali, te kimi meniama sia sabo dao.
ISA 40:31 Tiali goli, te Genuai Bidiba konealubo homu dąų olama, te agai augwali tau sabo tonalubo we bidi dabe, augwali te bomo sesemane elalu bidaibao. Tama augwali bomonama eyu, te ba kemodage bola pabo tiwai yaibao. Te augwali udalama, te augwali homu hę me egobeo, te augwali bilidu, te bomo kimi me isigobeo.
ISA 41:1 Godigo te po wali, “Dage we bidi dabe, te pąde elalubo tǫ kantri dabe, me te digibulu elalubo tǫ kantri dabe me, dage tigidali pedauwali pania selama, eno po odiąo. Dagego po bugagia sisila dodola selama asiyu, te duga po te po tų eboba pusagasao. Te da deliba sisinama, te po dagalama sueibao, te dego po mu po yabowe naga konebo dao.
ISA 41:2 Dego mu te giliga pedalubo badu king hodolama, te aga pabo usu nama, tigidali habu badu te hwįbode aga ugwanu igulumainu yaliwe? Tama dego te bulu tǫ kantri aga nogoba munama, te agai te gasa king dabe aiyaba elalumainu ilaliwe? Te agai bainatgo me enesigi ene sesemonego te augwali mu silama, te augwali tǫ hogomu tiwai pedelali, te pobele bage waligo sela pabo tiwai yai dao.
ISA 41:3 Aga te deli sogo naga polo tama augwaliba pedelama, te augwali doliyu yali, tama augwaligo agaba magi sę yabo te usu meni yai. Te waligo digi aga sela pabo tiwai eyu, agai te tǫ me dwasianu diąbeo.
ISA 41:4 Dego mu te sę dabe pedalumainu ilaliwe? Te Genuai Bidi, eno naga dao. Te eno tǫ gagalama pedalumainu yali sogo, sesemane sogo eno tigidali nai te tǫde pedalumainu dodoludalio. Ena Genuai Bidi ena hasia polasa mu bidali. Te ena nosali badu sogo me bidaibao.”
ISA 41:5 “Te tigidali tǫ kantri we bidi dabego te eno yali sę dabe sulama, te augwali wi elama, noma sali. Te augwali deliba sisinagaselama,
ISA 41:6 te augwade digi haliga dąų walabo po dabe minama,
ISA 41:7 tama augwa te tibo godigo piksa nigalio. Te nigo piksa dulubo bidi dabego te golgo nai nigibo bidi dabeba te po wali, ‘Dagego te wiegi yai sę mu ebao.’ Te gol haluama dodolobo bidi dabego te aingo nai nigibo bidi dabeba te po wali, ‘Iya, tegobao, dagego te nai bugagia mu dąų walobao.’ Te nosali augwaligo te piksa dabe bugagia enani, tiyu te augwali tulaluidali weyu tiai dao.”
ISA 41:8 “Tialima, dage Israel, dage te Jekopgo hani da, eno dage sa muyu, dąį ilama, te dage eno sę bidi bidibao. Dage te bulai wai eno abagi Abrahamgo hani dao.
ISA 41:9 Eno dage te digibulu bulude mu, te tǫ sesege badu mu selama, tama dage odasa asali. Te eno te tiwai po dagebolo wali, dage eno sę bidi bidibao wai. Eno dage dąį iliyu, dage te ena dao wali, te eno dage hagela eyu, te dage tudiba me mubeo. Menio.
ISA 41:10 Dage wi igio, magi baso meni, ena duga God da, ena dage dali bidibao. Te eno dage boma pai pedalumainu ilama, te dage eno tau saibao. Te dage eno bugagia tonalu, te eno genuai bomogo te eno dagego boi bidi aiyaba elalueibao wali.
ISA 41:11 Te dagede haliga sębę elama, te dage po tųba odasa pobaso da, te dage augwaligo aiyaba elalusiąbaso, te augwali hale dwai mu yaibao. Te augwali olo nai tiwai mu pedelama, te augwali mu hagawaibao.
ISA 41:12 Te dage dali hwįnama, te dage dolainu homu yali hani dabe, te augwali olo nai tiwai mu pedelama, te augwali tǫde mu hagawaibao.
ISA 41:13 Ena Genuai Bidi, te duga God dao, eno dage ugwaba sagualu tonalu, te eno te tiwai po dageba obao, dage wi me igio. Te eno dage tau saibao, te po wai dao.”
ISA 41:14 Genuai Bidigo te tama po wali, “Te dage Israel te dwasianu hani da, te dagego bomo meni da wagio, ena dage ma sabo bidi, te eno dage ugwaba sagualu tonalu, tau saibao. Ena dage Israelgo God dao, ena te Wiegi Yai Doloba Pai Kolesaga Mu Ebo God dao, eno te dage ma dobola saibao wali.
ISA 41:15 Te eno dage te wit agayabo te gesi ni nami tiwai pedalumainu ilama, te dageba sęgę mayu, te dage sunumi palialuali boi bidi dabe te dagego aiyaba elalueibao. Te augwali te bulu du tiwai bidali goli, dagego te bulu du dabe pepedama, te wit bo yalala pai nai tiwai pedalubo bomo elalubo tiwai yaibao.
ISA 41:16 Dagego te sęgę elalusiąyu, te bidigo te bo dabe ugwaba sąnama, te waligo tolasa pabo tiwai yaibao. Tialima, dagego wiegi yai pemene te Genuai Bidi enaba yaibao. Te dagego ena nogi ugwaba saibao, te Israel God da, ena te Wiegi Yai Doloba Pai Kolesaga Ebo God dao,” wali.
ISA 41:17 “Te eno we bidi dabe te ąį mu sǫą pelama, te augwali dogoni te ąį tuabo wa pali sogo, te augwaligo ena i obaso, tialima ena, Genuai Bidi, te eno augwaligo gedu haluasa po wabo odaibao. Ena, te Israelgo God, te eno dage homu kone me gegeda palogobeo.
ISA 41:18 Eno te wa pai bulu du dabede te ąį pedalumainu ilaibao, te ulu ąį te odogo malu tǫde pedelaibao. Tama eno te sigi ąį te wa pai pesagede pedalumainu ilaibao. Tama te ąį meni yai pesagede, te ąį hauwa elalueibao wali.
ISA 41:19 Tama eno te dwagi yai ni sida dabe, me ni wuli dabe, me te bulu ni oliv dabe, me te ni saipres dabe, te gasa tobage ni dabe, te olo masigi kemi tǫde pedalumainu yaibao.
ISA 41:20 Tama te we bidi dabego sulama, tama augwa te tiwai koneaibao, ena God, te Israelgo Genuai Bidi, ena te Wiegi Yai Doloba Pai Kolesaga Ebo God dao, ena digi eno te sę pedalumainu ebo dao,” te po wali.
ISA 41:21 Genuai Bidi, te Israelgo king dao, agai te tama po wai, “Dage te gasa bulu tǫ kantri god dabe, dage te po tų eboba asiąo, te po tų ebode dagego po odomainu yaibao. Te dagego pusabo po bugagia dodolao, tama te po tų eboba asao.
ISA 41:22 Te po tųde dagego te polobadu pedelali sę po weyu, te yali sę dabego po page dabolo pusao, te dago hania koneaibao. Tama dagego te nosali badu pedelabo nai po me wao.
ISA 41:23 Tama te nai dabe pedalubo sogo, te dago koneyu, te dage god mu da te homu yaibao. Dagego te da wi yabo sę me deli iyąo te wiegi yai nai, ma dwai nai, te sę yao. Tama tialima, te dago dagego bomo sueibao.
ISA 41:24 Tiali goli, menio. Iya, tegoba! Dagego magi sę me deli yabo usu isąwai, magi baso meni, dage tibo god dabe te olo dwai nai naga dao. Tama te dagebolo lotu po wabo we bidi, augwali me eno gedude te dwai nai mu pedela silai dao.”
ISA 41:25 “Eno te giliga pedalubo badu bidi me deli hodolali. Te bidigo enaba genuai nogi mobao, tama megi eno te not badu sela aselama, tama agai te king dabe aiyaba elaluama, agayu, te tǫgo sospen sene nigibo bidigo te tǫ agalama, te sospen nigibo tiwai ebao.
ISA 41:26 Dage te gasa bulu tǫ kantri god dabe, te dage tomode dego te nai pedelaibao po waliwe? Te dage tomode me deligo te tobage po wali wida, teda dago te po weyu, agai mu po wali da po waibao. Tiali goli, dage me deligo te nai pedelaibao po me wabeo. Tama dage me deligo te po wabo bidigo me odobeo.
ISA 41:27 Ena, Genuai Bidigo naga eno te bulu du Saionba weyu, te nai pedelaibao wai. Tama megi da, suiąo, te nai dabe pedelalio. Te megi me, eno te bidi me deli tagala palama, te Jerusalemba wiegi yai po sela pomainu yai dao.”
ISA 41:28 “Eno te tibo god dabe gegali sogo, te eno suali, augwaligo te po deli me wasiąwai. Augwaligo homude te wiegi yai homu kolesaga elalubo po pusabo homu meni yai. Te me deligo eno hanalubo po wei me ponabo usugobeo.
ISA 41:29 Suao. Augwaligo te mena sę me deli ebaso usugobeo, magi baso meni, augwa digi te olo nai naga dao. Te tibo god dabe te olo piksa dabe naga elalubao. Augwaligo te magi sę me deli yabo bomo me elalubeo,” te po wai dao.
ISA 42:1 Genuai Bidigo e tiwai po wai, “Suao, eno sę bidi e dao. Sesemane sogo eno aga dąų walobao. Ena eno aga sa munama, dąį ilali, tama sesemane sogo eno agade wiegi yai homu pemene geninama, idubao. Eno ena mobo noma bidi agaba muani, tama agai te doloba pai kolesaga naga igidali te tǫde we bidi haniba selasa asaibao wali.
ISA 42:2 Te agai po wabo sogo, te genuai po dagą i hai olama, po me wagobeo. Tama aga te sunumi dabede doligi pelama, te agai po bomonama me pusugobe.
ISA 42:3 Tama te agai te bomo meni yai, te togwa painu ebo awi dili, te agai tigidali me togwa sągobeo. Tama agai te ula bugagia isiąbo lam sula somainu me iligobeo. Menio. Agai te bomo meni yai we bidi tau sabo kolesaga yaibao. Agai te doloba pai kolesaga pedalumainu bomo ilaibao, agai te sę ebo me tagalogobeo.
ISA 42:4 Te aga haliga sęgę me isiąyu, te sęgęgo aga aiyaba elalumainu me iligobeo. Agai sę bomo elama eyu, agai doloba pai kolesaga ebogo te dwai kolesaga ebo kolesaga aiyaba elaluaibao, te tigidali tǫ habu usu nama bomo elalumainu ilaibao. Te digibulu bulu we bidi dabe te aga tonaluaibao, te agai augwali bugagia dugulalu bidabo kolesaga ola momainu yaibao.”
ISA 42:5 God Genuai Bidigo te dagalu me tǫ nigilama, te augwa pesageba munama, elalubao. Tama agai te tǫde haniani nai ni me nosai pedalumainu ilali. Tama agai te bidibo ula te tǫde we bidi dabeba mobo ponama, mawai. Te Godigo aga sę bidiba te tiwai po wali,
ISA 42:6 “Ena Genuai Bidigo digi, eno nage i olama, te eno doloba pai kolesaga ola momainu yai. Te nage eno ugwaba pogalu bugagia tonalueibao. Te nagede naga, te eno te Israel hani we bidi dali bomai po dąų walaibao. Tama nage eno te Israel hani isąwai hani dabego ula tiwai ilama, bidaibao.
ISA 42:7 Te nago te gedu hwidai bage dabe te ma tonomainu ilaibao. Nago te kalabuside bidibo bidi dabe, me te be hulide bidibo bage me, te magi naigo me tonalusiąma, te olo mu bidimainu ilaibao,” te po wali.
ISA 42:8 “Ena naga ena Genuai Bidi. Genuai Bidi, te eno nogi dao, tama dagego genuai nogi ena deliba naga maiąo. Dagego te tibo god dabego nogi ugwaba me sigio, te bidi dabe augwa digi nigai dao.
ISA 42:9 Dagego suiąo. Te polobadu eno po weyu, te pedelaibao wali nai dabe, megi augwali pedelalio. Te megi eno dagebolo te gasa nosali badu pedelabo nai po walobao, te augwali pedalisiąbadi, te dagego konealumainogo te tiwai po obao,” wali.
ISA 42:10 Dage tǫde we bidi tigidali, dagego gesi balia po weyu, te Genuai Bidi nogi ugwaba sinao. Dage te sipidu bilibo bidi dabe, me te tamu ąįde bidibo hasa dabe, dagego agai nogi ugwaba siyąo. Dage te digibulu tǫ kantride bidibo we bidi dabe, dagego te gesi balia po waiyąo.
ISA 42:11 Dage te bulu taun wa pai pesagede bidalubo we bidi dabe, me dage te Kedar hani we bidi dabe, dagego te i bomo elama weyu, te aga nogi ugwaba siyąo. Dage te taun Sela we bidi dabe, dage te bulu du dabe bageba holama, te wiegi yai homu pemene dali i waiyąo.
ISA 42:12 Tama dage te pąde bidibo we bidi dabe, me digibulu bidibo we bidi dabe, dage tigidaligo te Genuai Bidi nogi ugwaba selama, te agaba genuai nogi maiąo.
ISA 42:13 Genuai Bidi te bomai ami bidi tiwai elalu, te megi agai hwįgi painu paibao. Agai te po dagą genuai olama, i weyu, te ami dabego ebo kolesaga tiwai te aga haliga sębę hodolama, te hwįabo sisi elalubo tiwai yaibao. Te agai aga boi bidi dabe dali hwįnama, te augwali aiyaba mu elaluaibao.
ISA 42:14 Genuai Bidigo te tama po wai, “Te bobobage sogode eno pedauwali pania selama, te ena dua digi bidali. Eno ena haliga sębę te palia selama, te eno magi deli me ebeo. Tiali goli, megi eno te gela bomonama weyu, te wego wai ame nainu dene ebo sogo gela wabo tiwai obao. Ena te homu hę weyu, te homu hę wabo bomo elama, kekebo dao.
ISA 42:15 Te eno bulu du dabe dolama, te nosai dabe me ni dabe sasia pomainu ilaibao. Tama eno te genuai soabo wę dabe dali, te sigi ąį me, sula somainu ilaibao.
ISA 42:16 Te eno ena we bidi dabe te polobadu augwali bilisąwai sunumidu odasa asaibao. Megi augwali gedu halua sai hulide bidibao, tialima te be hulia sai elalubo te eno sela sąnama, te augwaliba ula mawaibao. Tama eno te dwai pesage elaluali te dodolama, te dolo yai pesage ilama, te augwali bilabo madi tiaibao. Eno te sę dabe te mu pedalumainu yaibao, te eno te sę yaibao wali po tiwai gilama yaibao. Te eno magi nai me delide homu kone ebo me kegeda palogobeo.
ISA 42:17 Tialima, te tibo god piksa dabeba lotu weyu, te nai augwa god dao tiwai po wabo we bidi dabe, eno augwali sela sąwaibao. Tama augwali hale dwai mu yaibao,” wali.
ISA 42:18 Genuai Bidigo te po wai, “Dage Israel te olo degelama, te gedu mu widalio. Dagego olo dala pelama, po odoyu, te gedu peda pelama, tonao.
ISA 42:19 Dage eno sę bidi tiwai bidimainu elama, tama eno dage sa muyu, dąį ilama, te dagego eno po sela pomainu yali. Tiali goli, dage te olo degelama, te gedu mu widali, tama te olo degeyu, gedu widiyu yai bidi dabe, te augwali aiyaba mu elalualio.
ISA 42:20 Dagego te nai hauwa sulama, te po hauwa odali, tiali goli, dagego te nai dabe bugagia tonosiąyu, te poba olo bugagia me mubeo,” wali.
ISA 42:21 Genuai Bidigo te doloba pai kolesaga naga eyu, tama agai te we bidi dabe ma dobola sabo kolesaga ebode dwagi yai homu ebao. Tama tibaso, aga bomo yai po dageba mobao, te gasa bage dabego sulama, te tiwai konemainu ebao, te bomo yai po te wiegi yai mu, te mu polalubo dao.
ISA 42:22 Tiali goli, megi dage Israel dwai mu bidibao. Te boi bidi dabego dage dolagaselama, te dagego doado bage wi sela palio. Te augwaligo dage me sela pelama, tama dage te be dabede, me tǫ dedage dabede kalabus elama, elaluali. Te dage augwaligo nogode ma dobola sabo bidi deli me meni yai elalubao.
ISA 42:23 Tialima, dage tomode dego te poba olo muaibawe? Megi gagalasa, te dagego eno po bugagia odaibawe?
ISA 42:24 Dego mu te sę yao po obaso, te boi bidi dabe aselama, te da Israel dabego nai dolama, wi sagasaliwe? Dego mu te da Jekopgo hani bage te augwaligo nogoba muaniwe? Te Genuai Bidigo naga dao. Magi baso meni, dago aga tudiba munama, te dwai sęgę sabo sę yai. Dago te agai wei homu ebo kolesagade dolo bilisąma, tama dago agai bomo yai po sela sąwai.
ISA 42:25 Tama tibaso, agai te boi bidi dabego daba hwįagasomainu tagalama, te dago agai haliga sębę ebo page konemainu yali. Agai haliga sębę te sia dabo tiwai elama, te Israel mu ulali. Tiali goli, dago tede kolesaga selama, te dago kolesaga me hasegelebeo.
ISA 43:1 Dage Israel dabe, dage Jekopgo hani, Genuai Bidigo dage deli hani pedalumainu ilali, agai te tiwai po wai, “Dage wi igio, magi baso meni, eno dage ma sali dao. Eno dageba nogi menama, tama dage te ena da olama, sa muyu dąį ilai dao.
ISA 43:2 Dagego te ąį gebo aiyanu dulai te nogebo sogo, te ena dage dali bidaibao, tama te ąįgo dage me dologobeo. Awe, dage te soabo ąį nogebo si, te ąįgo dage mesegelegobeo. Tama dage te posolo yai sia tomoba mu pabo sogo, te siago dage me dogobeo. Te sia bogoligo dage dogobeo.
ISA 43:3 Magi baso meni, ena Genuai Bidi, ena te Israel dabe duga God, te eno dage tau saibao. Ena te Wiegi Yai Doloba Pai Kolesaga Ebo God dao, eno naga eno dage ma dobola sobao. Dage te boi bidi dabego nogode bidibo sogo, eno te Isip dabe, me Sudan dabe, me Seba dabe menama, dobu si eyu, dage Israel bage ma saibao.
ISA 43:4 Tama eno te gasa hani we bidi dabe me siyu, te dage ma dobu si yaibao, te dage bugagia bidimainu yaibao. Magi baso meni, dage eno godolo homu ebo umabo mu idu, te eno dageba genuai nogi mawainu ebao.
ISA 43:5 Ena dage dali bidibao, dage wi me igio. Dage hani dabe te giliga pedalubo badu, me giliga dega sabo badu bidibo, te augwali eno ma odasa asaibao.
ISA 43:6 Eno te bidi dabe te not badu, me saut badu bidibo bidi dabebolo olama, te dage ma asomainu ilao waibao. Te eno we bidi dabe te digibulu mu, te tǫ sesege badu bidali me, te augwali eno ma odasa asaibao.
ISA 43:7 Dage te eno nogi elalubo hani mu da, te ena digi eno dage nigali, te gasa hani dabego dage sulama, te enaba genuai nogi momainu ebo dao,” wali.
ISA 43:8 Godigo te po wai, “Te eno we bidi dabe i olama, sisinagasomainao. Te mu tama, augwaligo te nai subo gedu elalu, te po odobo olo elalubao. Tiali goli augwali gedu widai me olo degai tiwai bidibao.
ISA 43:9 Te gasa bulu tǫ kantri we bidi dabe te po tų yabo pesageba sisingasalio. Te augwaligo mena godigo te mena sę nosali pedelaibao wabo po hania pusaliwe? Te augwaligo mena godigo polobadu po weyu, te pedelaibao wali nai megi pedalubowe? Te augwaligo ebo sę suali mena bidi hani dolugulama, te tiwai po weyu, agai te god me deligo te nai me pedelaibao po wali, tama nosali agai suali, te wali sę mu pedalubo dawe?”
ISA 43:10 “Tialima, dage Israel, dage te eno po odolama, pusubo bage dao. Eno dage sa muyu, dąį ilama, te ena sę bidi bidimainu yalio. Tama tiyu da, te dagego ena koneama, enaba homu dąų weyu, tama te tiwai dagego bugagia koneyu, te ena deli naga te God mu da omainu ebao. Polobadu te god me deli me pedalisiąma, te aga polasa bidiyu, te ena nosali badu me elalubeo. Tama nosali me, te god me deligo ena bidali pesage me hasegelegobeo.
ISA 43:11 Ena naga ena Genuai Bidi dao, tama sesemane sogo eno dage ma sabo dao. Te gasa god dage dali me bidiyu, te dage tau me sabeo. Menio.
ISA 43:12 Eno naga enade po hanilama weyu, eno dage ma dobola saibao, te eno dage ma saibao po wali gilama yaibao. Te dage eno po odolama, pusubo bage elalubao, tama dagego e po pusaibao, te ena deli naga ena God, Genuai Bidi dao.
ISA 43:13 Megi me, tigidali sogo, ena te God mu bidibao. Te eno we bidi me deli te bonogo kębo tiwai eyu da, te niwai bidi me deligo te eno bomo sela sąnama, te augwali eno nogode ma dobola sogobeo. Te sę me deli eno ebaso da, te mena bidi me deligo eno te sę ebo me paligobe,” te po wai.
ISA 43:14 Genuai Bidi, aga te dage Israel Dabego te Wiegi Yai Doloba Pai Kolesaga Naga Mu Ebo God, te aga dage ugwaba sagoalu, te dage ma dobola sabo bidi, agai te po wali, “Te eno we bidi dabe dage tobade eno te ami bidi dabe te Babilonba hwįagasomainu tagala palaibao. Te Babilon dabe tigidali augwa te wiegi yai homu pemene ebo te sip dabe daiba holama, te augwa bidali bulu pesage tagalama, wi paibao.
ISA 43:15 Ena naga ena Genuai Bidi, ena dagego te Wiegi Yai Doloba Pai Kolesaga Naga Ebo God dao. Eno dage Israel dabe te deli hani we bidi pedalumainu ilama, te megi ena duga king bidibo dao.”
ISA 43:16 “Polobadu ena Genuai Bidi, eno te tamu ąį tomode sunumi nigai dao. Awe, eno te bomai ąįdu soabo tų nigai dao.
ISA 43:17 Tama eno te boi bidi hauwa dali, te augwa karis me hos dabe dali, augwa te tamu ąį sunumi tomodu wali asobadi, te augwali mu dolama, te munu ma hogodalubeo. Augwali te polo tama mu isila pali, te lam sole bidigo pona palobode isibo tiwai yalio.
ISA 43:18 Tialima, megi eno te po obao, dagego eno te polobadu yali sęde naga homu kone paligio. Menio.
ISA 43:19 Dagego te gesi sę eno eboba tonono yao. Te megi pedaludubo sę te dagego sube da, agawe? Te wa pai pesage badu te eno sunumi nigilama, tama eno te ąį dabe tebadu pomainu ilaibao.
ISA 43:20 Te bulu uni hasa dabe te uni yowi dabe tiwai, te ba uni dabe me, te augwaligo ena genuai nogi mawaibao, eno te ąį te wa pai bulu pesageba asomainu ilama, pedalubo side, te ena digi eno sa muyu dąį ilali we bidi, augwa te ąį tumainu tiaibao.
ISA 43:21 Eno te we bidi dabe te ena hani we bidi digi pedalumainu ilali, te augwa wiegi yai pemene eyu, te eno genuai nogi po pusumainu te tama tiaibao wali.” Genuai Bidigo te po wali.
ISA 43:22 Genuai Bidigo te po wai, “Dage Israel dabe, dage te Jekopgo hani, eno dage te eno hani we bidi digi pedalumainu ilali goli, dagego eno nogi wasiąyu, enaba lotu wabeo. Tama magi naigo tibaso, te dagego enaba hagela eyu, te dagego ena godolo mu isiąyu ebawe?
ISA 43:23 Te dagego haliga homu kolesaga enaba beaga sisąma, te dagego haniani ofa ebo sogo tama tibao. Te dagego te sipsip dabe te tigidali siaba mu uluyu, ofa tiwai ebo sogo, tama dagego te tobage awi te denami ebo nai abelama, te agaba ofa ebo sogo, te dagego te kibu hasa ili hauwa pesage holama, te ofa tiwai eyu ebo sogo, te dagego enaba homu kone palama, te ofa dabe ebeo. Eno dageba te sęgę mayu, te dageba po bomo eyu, dagego te wit ofa me, te wiegi yai denami ebo hano ebo ofa me, sesao po wabe, tama te sę dene ebaso, te dagego enade hagela homu ebeo. Mu menio. Tiali goli, dagego genuai sęgę enabolo menama, tama ena dagego te dwai sę ebode, me haniani dwai kolesaga ebode hagela mu ebo dao.
ISA 43:25 Tialima, ena Genuai Bidi, ena genuai nogiba digi homu kone palama, te eno dagego dwai sę ebo sęgę tigidali sela sąbo dao. Tama eno te dwai sę dabeba homu kone me palogobeo,” te po wali.
ISA 43:26 “Tialima, dagego homu kone palao, te dagego dwai sę me ebe homu eba wida, teda dagego eno homu dodolama, te da tede po minao.
ISA 43:27 Tiali goli, menio. Te dagego hasia wąį nǫųgo te dwai sę yali, te dagego tobolu bidi dabego me eno po sela sąwai dao.
ISA 43:28 Tama tibaso, eno te het pris dabe eno gedude meda yai pedalumainu ilali. Te eno dage Israel dąį ilali, te Jekopgo hani dabe, te tigidali mu dolomainu yaibao. Tama eno te gasa hani we bidigo te posobo po weyu, te dageba gisugu momainu yaibao,” wali.
ISA 44:1 Genuai Bidigo te po wali, “Awe, eno dage dolomainu yaibao. Tiali goli, dage Israel dabe, dage Jekopgo hani, dagego odiąo. Ena digi eno dage dąį ilama, te dage eno sę bidi bidibao.
ISA 44:2 Eno dage te deli hani we bidi pedalumainu ilali. Eno dage sisi ilama, dage dąį iliyu, te dage tǫde pedalisiąbadi, te sogo te dage ena hani da olama, dąį ilibo tiwai yali. Te eno dage negeyu, tonalua asali, te megi e sogoba usu nagasobao. Ena digi eno dage dąį ilama, tama dage eno doloba pai sę bidi bidibao. Tama tialima, ena Genuai Bidi, eno te po obao, dage wi me elamu dao.
ISA 44:3 Te ąį sǫą pabo tǫba eno te ąį gelaibao, tama te wa pai tǫde te ąį somainu ilaibao. Te eno mobo bidi te dagego wai dabeba gelaibao. Te eno dagego waigo ame nabo wai dabeba wiegi yai bugagia ilaibao.
ISA 44:4 Tama augwali te wę ili hauwa elalubo nosai bugagia holobo tiwai yaibao, te ąį sesegede ni dabe holobo tiwai puapi holaibao.
ISA 44:5 Te meba gasa Israel hani isąwai we bidigo konealubo homu enaba dąų waibao. Augwali mebago te tiwai po waibao, ‘Ena Genuai Bidigo bidi dao,’ waibao. Te mebago te po weyu, ‘Ena te Jekopgo hani da,’ waibao. Te me badugo eno nogi te augwa nogode asęaibao. Te me badugo te po weyu, ‘Ena te Israel hani da,’ po waibao,” wali.
ISA 44:6 Tigidali Bomo Elalubo Genuai Bidi, aga te Israel king da, te dage tudibadu pogalu, te dage tau sabo bidi, agai te po wai, “Ena Genuai Bidi, ena hasia polasa mu bidali, tama ena nosali te sabi badu mu bidaibao. Te gasa god munu me bidibeo, enaduba deli naga bidibo dao.
ISA 44:7 Te ena tiwai god me deli bidibawe? Te aga bidiba wida, teda aga digi te daba pedalubo sueibao. Tama agai me dabolo te aga polobadu polobadu mu yali sę po omainu yaibao, te eno gagalama, te we bidi pedelali po tiwai wabo odaibao. Tama agai te nosali pedelabo sę po me omainao. Awe, te aga hanilama pusao, te da tigidaligo te nosali yabo sę po hania pusubo odaibao.
ISA 44:8 Eno we bidi dabe, dage wi elama, dili tidibi igio. Polobadu digi eno dageba weyu, te sę pedelaibao po wali. Tama dage te eno ebo sę po te mu po da wabo bage dao. Te ena tiwai gasa god me bidiba homu eba, agawe? Eno te me deli munu me konebeo. Ena deli naga te dagego toma nabo bomai pesage tiwai elalubo dao.”
ISA 44:9 “Te tibo god piksa noma nigibo bidi dabe, augwa digi te dwai mu ilibao. Te sawi wiegi yai piksa augwa wiegi yai pemene ebo, augwali te olo nai tiwai ebao. Te tibo godiba lotu wabo bidi dabe, tiwai bidibao. Tiali goli, te augwali hale mu yaibao, magi baso meni, augwaligo te tibo godigo magi sę me deli ebo me sugobeo. Augwali te homu kolesaga mu umuna sai bidi tiwai dao.
ISA 44:10 Augwaligo mena tobage homu kolesaga elalubo, augwaligo te tiwai tibo godigo piksa nigibawe? Te tibo god dabego augwali dwasianu munu me tau sogobeo. Mu menio.
ISA 44:11 Te tibo godiba lotu wabo bidi dabe te hale dwai mu yaibao, magi baso meni, te bidi dabe augwa digi te tibo god nigibao. Eno homugo te augwa tigidali sisinagaselama, te augwa dolugulama, te augwa tibo godigo mena sę ebo po te pusumainu yaibao. Mu tama, te eno augwali wi mu ilibaso, te augwali hale dwai mu yaibao.” Te po wai.
ISA 44:12 “Te aingo nai nigibo koneai bidi dabego te ain selama, siaba munama, nagamea pabo si, tama augwa te tibo god piksa nigibo dao. Augwa te hama nogogo tulama, te ainba elibaso, te augwa bomogo digi te piksa nigilama pedelali. Te augwa sę ebo sogo, te augwa nai me wę tusiąwani da, te augwa bomo tigidali sia sabo dao.”
ISA 44:13 “Te nigo piksa noma nigibo koneai bidi dabego, augwa te wiegi yai ni dage selama, usu selama, te bugagia mu dodolama, te piksa nigainu ebo dao. Tialima, te pensilgo te piksa noma asęnama, te piksa togwabo bugagia usu nama usu sali. Nosali augwa te ni togobo nai sisel selama, te asęani dąįdu wali pelama, te piksa togoyu, sawi mu elama, te sawi gesi ogwa bidi me deli tonobo tiwai ebo dao. Tialima, augwa te nigo dulama nigali tibo god, te augwa lotu be tomoba muyu ebo dao.
ISA 44:14 Augwa te sę yainogo te dwagi yai ni sida togwali. Tama augwa te busi tomoba pelama, te wiegi yai ni kali dabe gegegi pelama, habu selama, dąį ilali, augwa te ni genuai igulubo sogo togwainu tiali. Te augwa te ni wuli wai me bulali, te tulubagego te ni genuai ilibo tonaluali, augwa te ni selama, te sę yainu tiai dao.
ISA 44:15 Augwa te ni dabe togolama, te me badu togwa sabo ni dage te tigi posolo ilabo nogabo sia sali, tama te togwa sabo delage me badu te bret ulabo sia sali. Tiali goli, te ni dage me deli augwa selama, te augwa tibo god piksa nigilama, augwa lotu po teba wai dao.
ISA 44:16 Augwa te tama kolesaga te ni dabede yalio. Augwa te sia nogolama, te nai me hasa ula tuainu yali, te augwa nai tulama, haliga pągąnani. Tama me, te augwa tigi posolo iliyu, te po wali, ‘Sia wiegi yai mu dao, te eno tigi bugagia mu posolo ilibo dao,’ wali.
ISA 44:17 Tama te ni dabego naga te augwa tibo god nigiyu yali. Te augwa kidu sugunama, te augwaliba lotu wabo dao. Te augwa te tiwai gedu haluasa po weyu, ‘Nago ena tau sao, magi baso meni, nage eno god dao,’ te po wabo dao.”
ISA 44:18 “Mu tamao, te tobage we bidi dabe te homu kolesaga mu umuna selama, te augwa homu kolesaga mu meni yai. Te magi nai me deligo augwa gedu paliama, te augwa tonono bilibo usu isąbo tiwai ebo dao. Te magi nai me deligo augwa homu kone tuą palobaso, tama augwa te homu kone tuą pabo kolesaga ebo dao.
ISA 44:19 Te homu kolesaga elalubo bidigo da, te kolesaga dagalama, te po weyu, ‘Eno te ni delagego te sia me badu nogoyu, te eno bret me kibu mi ulama tubao homu igi dao. Magi elama eno te ni dagego me deli selama, te piksa dwai nai me deli nigilama, kidu sugunama, teba lotu oba, agawe?’ te po wagi dao. Tiali goli, te homu kolesaga kone tuą pai we bidigo homu kolesaga menisąyu, tama te tobage po augwaligo me wagobeo.
ISA 44:20 Augwa homu kolesaga te mu kone tuą palio, tama augwa te geda mubo homu kolesaga mu eyu, te bidigo sia keli tubo tiwai yalio. Te we bidi dabe me deligo homu kolesaga dolo ma siyu, te po wabo sunumi deli me menio, ‘Te eno dolo nogode tolalubo nai, te ni dage naga, te god meni,’ te po wagobeo.’” Te po wai.
ISA 44:21 Genuai Bidigo te tama po wali, “Dage Israel, dage te Jekopgo hani, dage eno sę bidi dao, dagego ena homu kone gegeda paligio, te eno dage deli hani we bidi pedalumainu ilama, te dage eno sę ebo we bidi bidibao. Tama eno dage homu kone me gegeda palogobeo.
ISA 44:22 Eno dagego dwai sę yali sęgę sela sąwanio, tama augwali te pǫ waligo selasa pabo tiwai yalio. Te dagego yali dwai sę te kigamu pǫ te giliga pedalubode sia sabo tiwai yalio. Eno dage ma salio, tama tialima, dage enaba ma asiąo,” wali.
ISA 44:23 Dagalu, nage wiegi yai pemene elama, i wao, tama te tǫ dologode aiyadu elalubo nai dabe, dagego i waiąo. Dage bulu du dabe me, dage te genuai ni silide elalubo tigidali ni dabe, dagego wiegi yai pemene elama, i wao. Tigidali nai i wao, magi baso meni, Genuai Bidigo bomo me genuai nogi te dage Israel dabe ma sali sogo ola mawai dao.
ISA 44:24 “Ena Genuai Bidi, ena dage tudibadu pogwalu, te dage ma dobola sabo bidi, eno naga eno sisilama, dage dąį ilali, te ena hani da olama, te dage e tǫba pedalisiąbadi tama tiali. Eno te tiwai po dageba wainu ebao. Enaduba deligo naga eno te tigidali nai pedela silimainu ilali. Eno naga eno te dagalu me tǫ nigilama, te augwali bidabo pesageba munama, te megi elalubo dao.
ISA 44:25 Eno te magi nai me deli te nosali pedelaibao po wabo bidi dabego po te homu kone tuą palama, tama te augwaligo po geda mueibao. Tama te mena sę aga nade konea pai bidigo po homu kone tuą palaibao. Te po page konea pai bidigo homu kolesaga te eno umuna palobo bidi tiwai pedalumainu ilibo dao.
ISA 44:26 Te eno sę bidigo magi sę yabo po me deli pusubo sogo, tama te sę nosali badu pedelaibao, te po eno wabo sogo da, teda eno te po mu naga pedalumainu ebo dao. Te megi eno te tiwai po obao. Te we bidi dabe te Jerusalemde ma bidigi pelama, bidaibao. Me te Juda dabego taun augwa ma nigaibao. Te megi dolama elalubo hanu dabe te eno ma wiegi yai nigilaibao.
ISA 44:27 Eno te po wabo sogo, ‘Tamu ąį, nage sula sao,’ obaso da, teda aga te sula sabo dao.
ISA 44:28 Tama eno te tiwai po wali, ena digi eno te Sairus te Persia bagego king tiwai nigilali, te eno homugo emainu ebo sę tigidali agai emainu homu yali. Agai te po obaso, augwaligo te Jerusalem ma nigaibao, me augwaligo eno be sę yabo sę gagalaibao,” te po wali.
ISA 45:1 Genuai Bidigo te tiwai po wali, “Eno te Sairus sa munama, te Persia bulu tǫ kantri king pedalumainu yali, te agabolo eno te gasa bulu tǫ kantri dabe aiyaba elaluama, te gasa kingo bomo dabe silimainu yabo bomo mawai. Ena digi eno te taun obo sunumi dala palama, te Sairus tomoba pelama, te taun somainu elali. Te Sairusbolo eno te tiwai po wai dao,
ISA 45:2 ‘Te nage pabodu ena polasa peyu, te bulu du pesage dabe me alula tagalama, te doloba pai pesage nigilaibao. Eno augwaligo te brasgo nigai genuai hanu sunumi aluama, te boma pai ba aingo te dąų walali sunumi te me aluama, dala sąwaibao.
ISA 45:3 Eno te mone nageba mayu, te hani dabego te bidigo susąyabo pesagede dualali wiegi yai dila pai nai dabe te nageba mawaibao. Tama tialima, te nago koneaibao, ena naga Genuai Bidi da waibao. Te nago koneyu, te Israelgo Godigo naga te nago nogi olama, te nage i wabo da homu koneaibao.
ISA 45:4 Te eno sę bidi Israel hani tau sagasao po olama, eno nage i wali, te Jekopgo hani we bidi te ena digi sa muani. Mu tama, nago ena konesiąwai, tiali goli eno nage nogi olama, te genuai nogi nageba mawai dao.’”
ISA 45:5 “‘Enaduba deli naga ena Genuai Bidi da, te gasa god me bidibeo. Sairus, nago ena konesiąwai, tiali goli te eno naga te bomo nageba mabo dao.
ISA 45:6 Eno tama tibaso, te tigidali tǫ habu pedai we bidigo te tiwai konemainu yali, ena deli naga ena Genuai Bidi, te gasa god munu me bidibeo.
ISA 45:7 Eno naga eno te po obaso, te be posoyu, be huliyu ebao. Te eno naga te we bidi bugagia bidimainu ebao, te eno augwali te genuai sęgę somainu yaibao. Genuai Bidi eno naga, eno te sę tigidali pedalumainu ebo dao.’”
ISA 45:8 “Dagalu, nage te dage pǫ dabe me, dagego te wiegi yai sogo augwaliba ilibaso, te tulubage tǫba tulumainao. Te augwa bugagia bidimainu, te wiegi yai doloba pai kolesaga bomo elama, pedalumainu ebao, te tǫgo tulubage selama, te gide nai dabe bugagia holobo tiwai emainao. Ena Genuai Bidigo digi, eno te sę dabe pedalumainu tebo dao,” te po wali.
ISA 45:9 Mena bidigo te Godigo aga nigalide wado po wabo bidi da, te bidigo kolesaga te umuna sai mu yali, magi baso meni, da bidi te olo nai gagawai dao. Da te tǫgo nigibo sene pepeda pelama, e tǫde tedali munalua pabo tiwai elalubao. Te tǫgo nigibo senego te nigibo bidiba te tiwai po hanalu, “Nago magi nai nigibawe?” po wagawe? Menio. Te tǫgo te po wabo homu yaibao, “Nago te nai nigibo konesiąwai dao,” te tobage po wabo usugowe? Mu menio.
ISA 45:10 Mena bidigo te aga aya idabolo te tiwai po hanalu, “Te magi nai dage sigo ame nani dawe?” te po wabo bidigo kolesaga te umuna sai mu dao.
ISA 45:11 Genuai Bidi, Israelgo Wiegi Yai Doloba Pai Kolesaga Mu Ebo God da, te God agai te Israel deli hani we bidi pedalubo sę ilali, agai te tama po wai, “Te nosali pedelabo nai po wabode dagego te eno ena wai puluba tonalubo sę po munu me wagio, te mena kolesaga te eno ena sę eyu, wali pabo po me wagio.
ISA 45:12 Eno naga eno te tǫ nigali, te bidalubo we bidi dabe me nigali. Te ena digi eno te giliga, me polua, me hǫ dabe tonalubo dao.
ISA 45:13 Te eno digi eno te king Sairus hodolama, te eno ena sę wiegi yai doloba pai emainu yali. Te eno aga painu ebo sunumi tigidali dodolaibao. Te agai eno taun Jerusalem ma nigimainu yaibao. Te agai eno we bidi dabe kalabuside bidali te olo tagala palama pomainu yaibao. Te sę dabe ebo te bidigo aga me abeligobeo. Menio. Aga olo mu sę yaibao. Ena, te Tigidali Bomo Elalubo Genuai Bidigo, eno te po wai dao.”
ISA 45:14 Genuai Bidigo te po wai, “Te Isip tǫ kantrigo mone doado bage tigidali, me te tǫ kantri Sudango doado bage tigidali me, te dage Israelgo saibao. Te boi bidi dabego te tǫ kantri Seba bobobage bidi dabe te kalabus ilama, te augwali dageba tagala palaibao. Tama augwaligo nogo te sen dabego dunama, augwali dage wali asu, te augwali dagego olo sę ebo bidi dabe pedelaibao. Te augwaligo dageba kidu sugunama, tama wi eyu, te tiwai po waibao, ‘Mu tamao, God dage dali bidibao,’ waibao. ‘Aga deli naga te God mu, te gasa god me bidibeo,’ waibao.
ISA 45:15 ‘Nage te Israelgo God, nago te naga we bidi dabe ma sabo God dao, te gasa we bidi dabede nage te naga digi geme duala selama elalubo dao.
ISA 45:16 Te tibo god piksa nigibo bidi dabe, te augwali hale mu yaibao. Awe, te augwali tigidali te hale ebo kolesaga tomoba mu paibao.
ISA 45:17 Tiali goli, Genuai Bidigo dage Israel ma selama, te sesemane sogo agai dage ugwaba igulama, ugwa ela holomainu ilaibao. Te dage gasa we bidi hani dabede munu ma hale me isąma, te dage sesemane sogo bugagia bidada peyu, bidada paibao.’ Te Seba tǫ kantri bagego te tobage po waibao,” Genuai Bidigo te po wai.
ISA 45:18 Genuai Bidi naga te God. Agai te dagalu dali, tǫ dali si nigali bomo mu pedelali. Agai te tǫ olo elalumainu nigibeo. Menio. Agai te tǫ page bugagia dodolama, tama tigidali nai tede elalumainu nigali. Agai te tiwai po obao, “Enaduba deli naga ena Genuai Bidi, te gasa god munu me bidibeo.
ISA 45:19 Ena geme dualalu, digibulu me bidibeo, ena te be hulia sai pesagede, digibulu geme me dualalu, te eno po pusubeo. Te eno ena we bidi dabe, te Israel dabeba, te tiwai po weyu, ‘Dagego ena te olo bulu pesagede gegebo sę odolali yao,’ wabeo. Menio. Ena Genuai Bidi, eno te mu po naga pusubo dao, te eno po tigidali dolo wabo dao,” wali.
ISA 45:20 Genuai Bidigo te tiwai po wali, “Te tigidali tǫ kantri we bidi dabe, dage sisinagasiąo. Te hwįani sogode dolisąma bidalubo we bidi dabe, dage tigidali te po tųba asiąo. Tama dego te tibo god piksa dali sela asobo bidi, aga homu kolesaga mu meni ebao. Aga te tibo godiba gedu haluasa po weyu, aga tau somainu tiaibao, tiali goli te god te bidigo nigo dulama naga nigali, tama agai te bidi tau sabo usu me egobeo.
ISA 45:21 Dage tigidali we bidi, dage aselama, dagego po te po tųba pusagasao. Dagego duga haside digi hanalu, te gega suyu bolo yao, mena god mugo te polobadu mu po wali sę po te megi tama pedalubo dawe? Ena Genuai Bidi, ena deligo naga eno te nai dabe pedelaiba po pusali. Tama suao. Te gasa god munu me bidibeo. Ena te doloba pai kolesaga naga ebo God, eno te ena we bidi dabe ma dobola sabo God da, enaduba deli naga ena bidibo dao.”
ISA 45:22 “Dage tigidali bulu tǫ habu we bidi dabe, dage enaba asiąo, te dage bugagia bidaibao, magi baso meni, enaduba deli ena God, te gasa god munu me bidibeo.
ISA 45:23 Ena Genuai Bidi, ena nogide digi daide ugwadu mu po obao, te eno pedauwalide wali po te me hasegelegobeo. Eno te tama po wali, te tǫde tigidali we bidi enaba aselama, te enaba kidu sugunagasaibao, te augwali tigidaligo ena dologode naga bidabo po dąų waibao, te po wai.
ISA 45:24 Te augwaligo te tama po waibao, ‘Genuai Bidigo naga te da tau siyu, te da dąų waliyu, te doloba pai kolesaga ugwa igulama, ugwa ela holomainu yaibao,’ te po augwaligo waibao,” wali. Tigidali we bidi agaba asobaso, te agaba haliga sębę ebo hani dabe te augwali dwai hale mu yaibao.
ISA 45:25 Tialima, te Jekopgo bulai hani wąį dabe, te augwa ugwa ela holama, te genuai nogi elalumainu elalide, te augwa wiegi yai pemene Genuai Bidiba yaibao.
ISA 46:1 Genuai Bidigo te tiwai po wai, “Dage Babilon dabego te Bel me Nebo si nogi ugwaba sobao, te si duga tibo god si elalubao, te augwali si dagego tolasa, te genuai lotu wabo side sabilibao. Tiali goli, te augwali sigo genuai nogi te sia saibao, te dagego te tiwai sueibao, te augwa digi tau sabo bomo meni yaibao. Te boi bidi dabego te Babilon taun dolagasobaso, te dagego augwali si te donki dabede kęnaibao. Te donki dabego te hobedagia, te augwali si te kalabus dage dali sela pabo sę dene yaibao,” te po wai.
ISA 46:3 “Tialima, dage dwasianu Israel te bidibo hani, dage te Jekopgo hani, dage hani eno selama, te bugagia negeyu tonaluali, te dage gesi hani we bidi pedelali sogo gagalasa, tama tiali, dagego odao.
ISA 46:4 Ena duga God dao, te eno dage tonalua pidubadi, te dage monu dabe eboba usu nama, te ayadeba nisi elaluaibao. Ena digi eno dage deli hani we bidi pedalumainu ilali, te sesemane sogo eno dage auąlu, te tonalu, te dage ma dobola saibao.”
ISA 46:5 “De mu ena tiwai dawe? Te dagego eno kolesaga te de dali mu dagalaibawe? Te eno kolesaga tiwai gagawai ebo bidi deli bidiba, agawe?
ISA 46:6 Tiali goli, bidi mebago te gol me silva hauwa pesage holama, te augwa tibo god piksa nigainu dagalaibao. Tialima, te nai dabego te augwa tibo god nigali. Tialima, augwa te tibo god augwa nageba munama, te tolasa pelama, te augwa muabo nigilali pesageba mugi pabo dao. Augwa teba kidu sugunama, lotu wabo dao. Te tibo god te mugi pali pesage delide naga munaluali, magi baso meni, aga digi te gasaba bilabo usu isąwai. Te agai te bidi dabego aga gedu haluasa po weyu, i wabo wei ponabo usu meni yai, agai augwali te dwai sogode tau sabo me usu egobeo. Mu menio.”
ISA 46:8 “Dage hagoma eyu, po sela sąbo bidi dabe, dagego eno te pusubo po bugagia homu kone palao. Tama tiyu, te dage bomo elama, dolalueibao.
ISA 46:9 Tama dagego eno te polobadu mu yali sę homu kone palao, magi baso meni, enaduba deli naga ena te God, te gasa god me bidibeo. Ena naga ena God, te ena tiwai god me bidibeo.
ISA 46:10 Te magi deli me pedalisiąbadi, eno te tama sę pedelaibao po weyu, te mena tama siligi pabo po waibao. Polobadu digi eno te sę pedelabo po olama, tama nosali te nai dabe te eno po wali gilama pedelaibao. Te eno mena sę me deli yainogo da, teda te sę eno eyu naga yaibao. Te magi nai me deligo eno te sę yabo sunumi me paligobeo.
ISA 46:11 Eno te giliga pedalubo badu bidi me deli asao olama, i wali, agai te ba kemodage bola asobo tiwai yaibao, te agai eno yabo homu yali sę yaibao. Eno te sę yao po walio, te eno po wali tiwai gilama te tama pedelaibao. Te eno yaibao olama, dąį ilali sę, eno te sę ebo dao.”
ISA 46:12 “Dage hagoma bidi dabe, eno po odao. Dagego homugo te eno dage sa munama, ma saibao wali sogo, te digibulu elaluba homu eba, agawe?
ISA 46:13 Menio. Te pąba pedelalio. Te eno munu ma tonalugobeo. Te eno dage Israel dabeba boi bidi ebo bidi dabeba dene mu menama, te dage bugagia ma bidaibao. Te Jerusalem taun me wiegi yai bugagia ma ilaibao, te eno ena genuai nogi me bomo te dage Israel dabe tomode hania pepeli diliba pedalumainu yaibao,” wai dao.
ISA 47:1 Genuai Bidigo te tiwai po Babilonba wali, “Babilon, nago genuai nogi mu elalubo, te kwin we aga sia kingde dugulalubo tiwai ebao. Tama nage te gesi wegi bidigo sisąwai bugagia mu bidibo tiwai ebao. Tiali goli, megi da, te nage sia kingde bidali tagalama, te nage olo tǫ bulude dugulalueibao. Te nago tigi te polobadu elaluali tiwai gilama sawi yai me elalugobeo. Tama te bidi dabego nage te au bugagia elama, bilibo ma sugobeo. Mu meni yaibao.
ISA 47:2 Te nage olo mu sę ebo we tiwai gilama sę yaibao. Te nago tobolude ugwadu banualuali ugwa nami, me te nago sawi yai ugwa dabe me dagala sąnama, nago te wit halubo masigi dabe hogogo belebo sę yao. Tama nago gudali ugwa sugua selama, te ąį dabe nogwaibao.
ISA 47:3 Te bidi dabego nago ugwa peda sąnama, te nago habu olo elalueibao. Te eno nageba dwai dene wei ponabo sę mu ebaso, te mena bidigo ena me togologobeo,” te po wali.
ISA 47:4 Te Israelgo God, te agai da tudi badu pogwalu ma dobola sabo bidi, aga te Wiegi Yai Doloba Pai Kolesaga Mu Ebo God dao. Agai nogi da, te Tigidali Bomo Elalubo Genuai Bidi dao.
ISA 47:5 Genuai Bidigo Babilonba te tiwai po wali, “Babilon, nago te naga pedauwali pania selama, te be hulia sai pesageba duagi pao, magi baso meni, te gasa hani we bidigo nageba te nogi munu ma wasiąyu, ‘Te tigidali bulu tǫ kantri kwin da,’ po me wagobe.
ISA 47:6 Eno wado po dwai mu te ena we bidi dabeba wali, te eno augwali te ena we bidi da te tiwai homu kone munu ma ebeo. Te eno nage aselama, augwaliba dwai sę yagasomainu ilali, te nago augwaliba homu dene dwasianu me ebeo. Menio. Nago augwaliba dwai dene mu ilama, te augwaliba genuai sęgę mawai. Te nago monu dabeba me te augwali genuai sęgę mu tolomainu ilalio.
ISA 47:7 Nago homugo nage te kwin sesemane sogo bididuaiba homu yali, tama tiyu, nago te nageba nosali pedelabo sę te bugagia homu kone palobeo. Mu tama, tede nago homu kone palobeo.”
ISA 47:8 “Nage te wiegi yai sogo naga gegelama bidabo homu ebo we, te po odao. Nago homugo nage bugagia bidaiba homu eyu, te dwai sę nageba me pedalugobe da homu elama, te naga digi nago te po wali, ‘Enaduba deligo eno tigidali bomo elalubao, te ena tiwai gasa me meni,’ wali. ‘Te ena te tiwai we, te aga bidi isama, te aga wai puluba me isai, te tiwai me pedalugobeo,’ homu yalio.
ISA 47:9 Tiali goli, hobede ya, te deli sogo naga te sę si nageba pedalaibao. Naga bidi dali, naga wai puluba tigidali me, te deli sogo naga isaibao. Nago te naga digi naga tonalubo haniani bomai pobi po elaluba homu yaibao, tiali goli te pobi pogo nage tau me sogobeo. Menio. Te dwai sęgo isaboba kegebao.”
ISA 47:10 “Nago tama homu yali, te naga dwai kolesaga dabego te nage dąų walama, bidaiba homu yai. Tama nago homugo te nago ebo sę te bidi dabego sube da homu yai. Te nago koneani tobage hauwa kolesagago, te nago homu kone tuą palama, te nagaba digi nago te tiwai po wali, ‘Enaduba deligo naga tigidali bomo elaluba,’ homu yali, ‘te ena tiwai gasa me elalubeo,’ wali.
ISA 47:11 Tiali goli, te dwai sogo mu nageba pedelaibao, te nago geda muabo bomo meni yaibao. Deli sogo tama mu te dolabo genuai sę nageba pedalubaso, te magi sę me deligo nago te dolobo sę paliabo usu meni yaibao. Te dwai nai dabe te nago homugo nageba pedalugobe da homu yali, te pedaliyu, nage mu dolaibao.
ISA 47:12 Wiegi yai da, nago te haniani bomai pobi usu sidu, te nage gesi sogo gesi tigi elalubo sogo usu selama, konea sali. Te augwaligo nage tau sabo homu yali. Te augwaligo nago boi bidi dabe wi ilama, wi paibao homu yali.
ISA 47:13 Te kolesaga koneani bidi hauwago te nageba homu kolesaga mayu, te nago homu mu dąų walali. Tiali goli, nago te kolesaga koneai bidi dabego te hǫba tonomainu i ola suali, te bidi dabe te tigidali poluade nageba aselama, te nageba mena sę pedelabo po wali. Te augwaligo nage tau sabo homu egobewe?
ISA 47:14 Tiali goli, menio. Augwali te sasia pai nosai tiwai elalubao, te nage dolainu ebo siago te augwali tigidali daibao, te augwa digi augwa tau me sogobeo. Mu tamao, nago homugo nage te isi pąba duagi pelama, sia gogo naiba homu me egobeo. Menio. Te siago nage tigidali daibao.
ISA 47:15 Mu tamao, nageba te homu kolesaga mani bidi dabe, te nage gesi tigi elalubo sogo te bidi dabego nage tau sali bidi dabe, te augwali homu kolesaga umuna palama, te me deligo nage tau me sogobeo,” Genuai Bidigo te po wai dao.
ISA 48:1 Dage Jekopgo hani dabe, dage we bidi nogi Israel elalubao, dage te Judago bulai wąįgo wai dabe, dagego odao. Dagego po dąų waliyu, nogo guni sisu muyu, dagego te Genuai Bidigo nogide mu po dao po wabo dao. Tama dagego te tiwai po weyu, dagego te Israelgo Godiba lotu obao po wali, tiali goli dagego aga dologoba mu pelama, te doloba pai me ebeo wali.
ISA 48:2 Tama duga digi duga nogi ugwaba siyu, te po weyu, dage te God aga digi sa muyu, aga da wali, te taungo hani we bidi da, po wabo dao. Tama dage te Israelgo Godide tau mabo sainu tonalubo dao. Aga nogi da, te Tigidali Bomo Elalubo Genuai Bidi dao.
ISA 48:3 Agai e tiwai po dage dali elalubao wali, “Polobadu mu eno te po dageba pusuyu, te nai dabe pedelaibao po wali, tama eno polo naga tama te sę dabe pedalumainu ilali.
ISA 48:4 Magi baso meni. Eno te tiwai bugagia koneani, dagego tobolu te masigi me ain dila pai tiwai elalu, tama dagego eno po wali me pisąwai dao.
ISA 48:5 Tama tialima, polobadu mu eno te dageba pedelabo nai po hanilama pusali, tiyu dagego te po waidali, te dagego tibo god dabego, te piksa dabe dagego te nigo me aingo nigibo nai dabego te nai dabe pedalumainu yali da po waidali,” te po wai.
ISA 48:6 “Te nai dabe te eno polobadu te pedelaibao po wali, te augwali pedalubo dagego sualio. Te megi dagego te tama po waiyąo, ‘Genuai Bidigo mu po wabo da po wao.’ Tialima, megi te eno dageba te gesi noma nai pedelali po obao, te geme dualaluali nai dabe, te nai po eno polobadu me wabeo.
ISA 48:7 Megi eno te po obaso, te gesi noma nai mu pedelaibao, te polobadu me pedalisiąwai nai dabe. Tama te nai te dagego munu me konesiąwai, tama dagego te tama po me wasiąma, dagego te nai dabe koneai da po me wagobeo.
ISA 48:8 Eno te tama koneani, te eno gagalama, dage te deli hani we bidi pedalumainu ilali sogo, dage te po sela sąyu, hagoma ebo hani mu pedelali. Tama tibaso, eno te nai dabe po dageba hanilama, me pusubeo.”
ISA 48:9 “Eno dageba haliga sębę mu elama, eno dage silabo homu yali, tiali goli sesemane sogo eno ena genuai nogiba homu kone palama, te eno haliga sębę homu aiyaba tamugulali, te we bidi dabego eno nogi ugwaba somainu tiai dao.
ISA 48:10 Eno dage wiegi yai pedalumainu homu yali, tialima eno dage te siaba me ulusiąma, te bidi dabego silvade ebo tiwai eyu, te aga meda yali sela sąwainu ebo tiwai ebeo. Menio. Eno dageba te haniani sęgę pedalumainu ilali, te dagego dwai kolesaga ebo tagalomainu yai dao.
ISA 48:11 Eno ena genuai nogiba homu kone palama, eno te kolesaga dageba yalio. Eno homugo te bidi dabego eno nogi elaluama, begela dolidali homu elama, te gasaba genuai nogi me magobeo. Menio. Augwaligo te ena deliba naga genuai nogi momainogo ebo dao,” te po wali.
ISA 48:12 Genuai Bidigo te tiwai po wai, “Dage Israel, eno i wali we bidi dabe, dage Jekopgo hani dabe, dagego eno po odiąo. Enaduba deli naga God dao. Ena polasa mu bidai, te nosali ena sabi badu nosali mu elalueibao.
ISA 48:13 Te ena nogogo digi eno nigilama, te tǫ page eno dąų walali, te eno dolo nogogo te dagalu diniginama, elalubao. Eno te dagalu de tǫ si i wabo sogo, te polo tama augwali si aselama, te eno geduba dolagasobo dao,” wali.
ISA 48:14 “Dage tigidali, dage sisinagaselama, eno po odao. Te tibo god me deligo dageba te tiwai po me pusai menio, ‘Te Genuai Bidigo godolo homu mu ebo bidi te aselama, te Genuai Bidigo sę yagasu, te Babilonba hwįaibao. Te aga bomogo digi, Genuai Bidigo te Babilon dabe aiyaba elaluaibao,’ te tibo god me deligo te po wabe.
ISA 48:15 Menio. Ena deligo naga eno dageba weyu, te bidi asaibao po wali. Ena digi eno aga asao olama, i wali. Te eno aga odasa aselama, te agai te boi bidi dabe aiyaba elalumainogo yai dao,” wali.
ISA 48:16 “Megi da, dage ena pąba aselama, eno po odiąo. Polobadu digi gagalasa asali, megi sogoba usu nagasu, ena te sesąwai pesagede geme dualalu, augwaliba te nai pedelaibao po pusubeo. Menio. Te sę dabe pedalisiąbadi, eno te tonalu, te sę mena tama pedelabo te eno digi dodolobo sę yali,” te po wali. God Genuai Bidigo aga bomo yai mobo bidi dali ena tagala palai dao.
ISA 48:17 Genuai Bidi, aga te Israelgo Wiegi Yai Doloba Pai Kolesaga Mu Ebo God, aga te dage tudibadu posolalu, te dage tau sabo bidi, agai te tiwai po wali, “Ena Genuai Bidi, te duga God dao. Sesemane sogo eno te doloba pai kolesaga dagego wali peyu, dage bugagia bidimai hagede ola mabo dao.
ISA 48:18 Te dagego eno po odigi sogo da, teda dage bugagia megi bidiyu, te sesemane sogo dagego bidabo ula te wiegi yai pemene ebo pągąnalugi da, te ąį sesemane sogo sodu, te sula sisąbo tiwai igi da. Te dagego doloba pai kolesaga te bomo elama, sesemane sogo pedaludu, te tamu ąį nambisde peda pabo tiwai igi da.
ISA 48:19 Te dagego wai dabe te hauwa mu, te nambis ąį masigi kemi sane tiwai pedeligi da. Te eno augwali bugagia tonalu, te augwa nogi te e tǫde mu sia sigi menigi da.,” te po wali.
ISA 48:20 Dagego te tǫ kantri Babilon tagalama, tama te bulu we bidi dabede wi soao. Te duga pemene elama, genuai po dągą weyu, te tigidali tǫ habuba po tagala palu, te tiwai po wao, “Genuai Bidigo te aga sę bidi Israel ma dobola salio,” po wao.
ISA 48:21 Polobadu, Genuai Bidigo aga we bidi dabe te bulu tǫ wa pai pesageba odasa pali, tiali goli augwali wę nogonego me isibeo. Menio. Agai te masigide ąį pedalumainogo ilali. Agai te masigi dalama, te ąį buluba asobode te augwa tuali.
ISA 48:22 Genuai Bidigo te tiwai po wali, “Te dwai kolesaga ebo we bidi dabe, te augwa bugagia wiegi yai bidabo sogo me gegegobeo,” te po wai dao.
ISA 49:1 Dage te bulu tǫ kantri pąde, me digibulu bidalubo we bidi dabe, dagego eno po odiąo. Te idago ena ame nisąbadi, te Genuai Bidigo ena sa muyu, dąį ilama, enaba te nogi mawai dao.
ISA 49:2 Te agai ena sisi ilama, te eno po bugagia miyu, te eno pogo te we bidi dabego haligade mu enama, te bainat poai tiwai mu yaibao wali. Te agai nogogo ena bugagia geme dualali. Tama agai ena te poa pai ene mu tiwai te polama, muani tiwai yai dao.
ISA 49:3 Te agai te tiwai po wali, “Israel, nage eno sę bidi da. Te nagede naga, te eno bomo, me eno genuai nogi te tigidali we bidiba ola mawaibao,” wai dao.
ISA 49:4 Tiali goli, eno enade digi te tiwai po obao, “Eno sę dene mu elama, te eno bomo tigidali sia salio. Tiali goli, te nai me pedalisiąma, te ena odolali sę dene yalio.” Tiali goli, tagalao, Genuai Bidigo te eno yali sęde koneama, tama eno tede sabo nai aga nogode elalubao. Awe, te eno Godigo ena te sę yalide wei ponabo nai sisi elama, munolubao.
ISA 49:5 Genuai Bidigo ena te idago haligade sa munama, te ena agai sę bidi bidimainu yali. Te agai te po enaba weyu, te Israel dabe sisinama, te augwali agaba odasa asomainu yali, magi baso meni, God eno Genuai Bidigo enaba te genuai nogi menama, te aga digi ena bomo mawai. Te megi da, Genuai Bidigo enaba te tiwai po walio,
ISA 49:6 “Hasiabolo eno nageba te boi bidi dabego ela musiąwai Jekopgo hani dabe ma hodolabo sę mawai. Eno te Israel bage meba hagea sai dao, tama eno nageba te augwali sisinama, enaba odasa asabo sę mawai dao. Tialima, te sę ebogo te nago bomogo dęą me sogobeo. Eno te gasa sę me mawaibao. Eno nage te Israel hani isąwai we bidi hani tigidaligo sole ula tiwai nigaibao. Awe, nago te eno te tigidali bulu tǫ habu we bidi ma dobola sabo sę yaibao,” te po wali.
ISA 49:7 Genuai Bidi, aga te Israelgo Wiegi Yai Doloba Pai Kolesaga Tigidali Mu Ebo God dao, aga te Israel tudibadu posolalu, tau sabo bidi elalubao, agai te po aga sę bidiba wali. Aga da te gasa we bidigo godolo homu isiąbo bidi, te gasa bulu tǫ kantri we bidigo te aga dwai nai mu tiwai tonani, te aga te genuai bidi dabego olo sę ebo bidi tiwai bidali. Genuai Bidigo te tiwai po wali, “Te king dabego nage sulama, te augwali dolagaselama, te genuai bidi dabe augwa gesabidi te tǫba basigulama, te nageba genuai nogi mayu tiaibao. Augwaligo tama tebo, magi baso meni, ena Genuai Bidi, te Israelgo God, ena te Wiegi Yai Doloba Pai Kolesaga Mu Ebo God da, nage sa muani, te eno sę emainu yali, te eno dąų wali po te eno me bologobeo,” wali.
ISA 49:8 Genuai Bidigo aga sę bidiba te tiwai po wali, “Eno digi eno nage ma selama, te nage wiegi yai ilabo sogo bodolu muani, te sogo mu dolo eno nago i wabo odolama, nage tau saibao. Te nage eno bugagia tonaluaibao, te nagede naga eno te tǫde we bidi tigidali dali bomo yai po dąų waibao. Tama eno te Israel tǫ kantri wiegi yai ma pedalumainu ilaibao, tama te Israel hani augwa te megi olo elalubo tǫde ma bidaibao.
ISA 49:9 Te eno te kalabuside bidibo, me be hulia side bidibo bidi dabeba te tiwai po weyu, ‘Asao,’ po waibao. ‘Dage te kalabus tagalama, olo mu bidaibao,’” te po wali. “Tama augwa te kalabus tagalama, augwa tǫba ma asaibao. Te augwali sunumidu pebelayu, me bulu dudu pabode, te augwa tubo nai hauwa elalueibao.
ISA 49:10 Te augwali nai me, wę me sǫą pogobeo, te posolai giligago me waligo te augwali tigi posolo me egobeo. Magi baso meni, te augwali olo mu tau mabo wiegi yai kolesaga ebo bidigo te augwali bugagia tonalu, te sipsip tonalubo bidigo te sipsip dabe te nosai hauwa elalubo pesageba, me wiegi yai wę elalubo madiba odasa pabo tiwai gilama ebo dao.”
ISA 49:11 “Te eno nigali bulu du dabe te pepedama, dodolaibao, te eno ena genuai sunumi pedalumainu yaibao.
ISA 49:12 Tialima, eno te digibulu bidalubo we bidi dabe, te not badu me, te giliga dega sigulubo badu me, asaibao. Te augwali te taun Aswan badu me asaibao,” wali.
ISA 49:13 Dagalu, nago te wiegi yai homu pemene eyu, i wao. Te tǫ, nage pemene elama, genuai po dągą wao. Dage bulu du dabe, dagego me te pemene ebo balia wao. Magi baso meni, Genuai Bidigo olo mu tau mabo wiegi yai kolesaga aga we bidiba ebo dao. Augwa te sęgę hauwa tolali, tiali goli, megi da, Genuai Bidigo augwaliba wiegi yai sę elama, te augwa haliga dua tamugulama ma bidaibao.
ISA 49:14 Te Jerusalem we bidi dabego te tiwai po wali, “Genuai Bidigo da tudi ola mobao, te agai da homu kone mu gegeda palobao,” wali.
ISA 49:15 Tiali goli, Genuai Bidigo augwaligo po wei ponoyu, te tiwai po wali, “Te idago aga digi ame nai wai homu kone ebo tagalama, te agai aga te ame mani wai homu dene ebo meni da, agawe? Te ida me deligo tama me tiabo homu yali goli, eno dage homu kone palobo me tagalogobeo. Mu menio.
ISA 49:16 Jerusalem, eno nageba homu kone ebo me gegeda palogobeo. Eno nage noma bidi piksa nigali, tama eno nogo sawali si daide nago nogi dali piksa dali si asęani. Te sesemane sogo eno sulama, nage homu kone palobo dao.
ISA 49:17 Te nago wai dabe ma asaibao, te hanigo dabe nage dolali, te augwaligo nage tagalama, wi paibao.
ISA 49:18 Nago tobolu ugwaba sagulama, tonono bilao, te nago naga wai dabe deliba sisinama, te nageba asobo sueibao. Ena Genuai Bidi, ena sesemane sogo bidibao, eno mu po obao, te nago wai dabe te nago au yabo nai dabe tiwai elalueibao, te we bidiba painu te sawi yai ugwa au ebo tiwai elama elalueibao.”
ISA 49:19 “Awe, nage mu dolobaso, olo bidali. Nago tǫ te dwai madi pedelali. Tiali goli, megi da, te wai dabe te nageba pągąna sagaselama, te nago tǫ augwali usu egobeo. Te nage dolali hani, te nagede digibulu mu bidaibao.
ISA 49:20 Nago te wai dabe te nago we bidi dabe kalabuside digibulu bidali sogo pedelali, te augwaligo nageba te tiwai po waibao, ‘Te tǫ dwasianu mu dao. Dago bidabo tǫ dwasianu mu dao. Dago bidabo tǫ pedai genuai tǫ sabo homu ebao,’ waibao.
ISA 49:21 Te nago nagade digi te tiwai po waibao, ‘Dego enaba te tigidali wai maniwe? Eno wai dabe te hagawai, te eno wai ma ame nogobeo homu yali. Te boi bidi dabego ena kalabus elama, sela pali. Dego mu te wai dabe ame nenama, negeduama, te genuai eboba usu naniwe? Enaduba deli bidai, tiali goli te wai dabe menadu asela wai dawe?’ nago te po hanalu waibao,” God Genuai Bidigo te po wali.
ISA 49:22 God, Genuai Bidigo te taun Jerusalemba te tiwai po wali, “Eno te dąį me deli dodolama, te eno nogo me, te dąį me deli tiwai ugwaba siyu, te gasa tǫ kantri Israel hani isąwai we bidi dabego sulama, te nago wai dabe ma sela asomainu yaibao. Te nago wai dabe te augwa nagede auwasa, tama sela asaibao wali.
ISA 49:23 Te king dabego, me kwin dabego, te nago wai dabe negeyu, te augwa aya idago ebo tiwai yaibao. Augwa kidu sugunama, te augwa tobolu te nago sągą page tǫba basigulama, te nageba genuai nogi mayu tiaibao. Nago te tiwai koneyu, ena tama te Genuai Bidi da waibao. Enaba homu kęą pelama, te eno augwali tau somainu tonalubo we bidi, te augwali odolali me tonalugobeo,” God Genuai Bidigo te po wali.
ISA 49:24 Te bomai boi bidigo hwįagaselama, te bidi me deligo hani kalabus elama, te aga wiegi yai doado bage sali, te aga hani dali, te aga doado bage dali, ma saiba, agawe?
ISA 49:25 Tiali goli, Genuai Bidigo Jerusalemba te tiwai po wali, “Mu tama, te eno nago hani dali ma siyu, te nago wiegi yai doado bage te bomai boi bidi dabe me te dwai king dabego nogode ma dobola saibao. Eno te nageba hwįani bidi dabeba te hwįbo wei ponaibao, te eno nago wai dabe ma saibao.
ISA 49:26 Te eno nago boi bidi dabe augwa haside digi tomode hwįmainu yaibao. Te augwa hasi digi elebo sę umabo eyu, te bidi dabe te wain wę tulama, gęǫ page ebo tiwai yaibao. Tama te tǫde we bidi tigidaligo eno te ebo sę sulama, te augwa te tiwai koneaibao, ena naga ena te Genuai Bidi da homu yaibao. Ena te ena we bidi ma sabo God dao, te eno nage tudibadu posolalu, tonalu, te nage tau siyu ebao, ena te Jekopgo hanigo bomai God elalubo dao,” wali.
ISA 50:1 Genuai Bidigo te Israel we bidi dabeba te tiwai po wali, “Taun Jerusalem te duga ida tiwai elalubao. Dagego homugo eno aga tudiba mubao homu eyu, te bidigo we sabo kolesaga bolama, te sai we mu sela sąbo tiwai homu eba, agawe? Te dagego tama homu ebaso da, teda te tama po wali pepa mena elalubawe, eno aga mu sela sąwaniwe? Tama me, te eno bidi me delide negeli sali me elalubeo. Te tama homu dagego magi baso ebawe, eno wai dabe eno dage te gasa bidi dabeba te olo sę ebo bidi tiwai ilama, tagala paliyu, eno te negeli sali dodolabo mone saliwe? Mu menio. Te dagego dwai sę hauwa ena haliga sębę ilibaso, eno te Jerusalem tudiba munama, tama eno dage te gasa bidi dabego nogoba muai dao.”
ISA 50:2 “Eno dage gegagasali sogo, magi baso eno te bidi me deli bidibo subewe? Te eno dage i wali sogo, magi baso dagego eno i wali wei ponobewe? Dagego homugo te eno dage ma sabo bomo meni da homu yali da, agawe? Odao. Eno te po obaso, te tamu ąį tigidali mu sula saibao. Eno te po obaso, te genuai soabo ąį te masigi sane olo elalueibao. Te sųgų dabe isilama, kugumini dwai yaibao.
ISA 50:3 Tama eno te dagalu me sisi mu emainu eyu, te aga bidi isaide te wego homu dene ebaso gudubo ugwa tiwai yaibao. Mu tama, eno te tobage sę yabo homu elalubao,” Genuai Bidigo te po wali.
ISA 50:4 God Genuai Bidigo enabolo te wiegi yai po wabo kolesaga ola mawai, tama eno te wiegi yai po te bomo meni yai we bidi dabego haliga dąų walu, waibao. Tigidali sogo kigamude agai enabolo te wiegi yai gesi sę po ola mawainu ebo po odabo homu godolo mu ebo dao.
ISA 50:5 Genuai Bidigo eno olo dalama, te agai po odomainu yali, te eno agade hagoma eyu, te agai enaba mawainu ebo sęde te habu bulu me kilasa pabeo.
ISA 50:6 Ena te bidi dabego keloago tudide elama, eno penane nisi gudumainu yalio. Te augwaligo enaba dwai posobo po weyu, eno gesabidiba pesą sąyu yali, eno ena gesabidi te augwaliba dualubeo.
ISA 50:7 Te augwaligo dwai po wabogo ena aiyaba me elalugobeo, magi baso meni, God Genuai Bidigo ena tau sabo dao. Te ena digi ena dąų walama, te ena sę yali. Eno te tiwai koneani, eno ebo sęde te ena hale me sogobe homu ebao.
ISA 50:8 God pąde bidiyu, te agai te po waibao, eno dwai sę me ebeo. Te bidi me deligo ena po tų ilabo homu eba, agawe? Teda agai ena te po tųba odasa pelama, te agai ena po tų ilabo po pusumainao wali.
ISA 50:9 God Genuai Bidigo ena tau siyu, tama dego te po weyu, eno dwai sę me yalio waibawe? Ena po kisilama wali hani bage, augwali te ugwa asobago togolama silibo tiwai mu yaibao.
ISA 50:10 Dage te Genuai Bidi dologoba pelama, te agai sę bidigo po wali pabo hani dabe, dage wi me igimio. Te dage hulide biliyu, te dage ula meni yai, te dage konealubo homu Godiba dąų wao, te Genuai Bidigo dage tonalu, agai dage tau saibao.
ISA 50:11 Tiali goli, dage te Genuai Bidiba konealubo homu dąų wasiąbo hani dabe, te duga digi isi ula ilama, te dage be hulia side bidibo bage, dagego te sole dabe domonama, tego duga pabo sunumidu te sole uladu pao. Tiali goli, Genuai Bidigo te dage bidigi pabo pesage dąį ilali, te genuai dene sabo pesage dao.
ISA 51:1 Genuai Bidigo te tiwai po wali, “Dage te eno homu kolesaga wali pabo sę dene eyu, te doloba pai kolesaga ebo hani dabe, dage eno po odiąo. Dagego te Abraham de Sarai siba ma homu kone palao, aga te duga wąį aya monu, me duga ida auwa mosi si dao. Augwali si te dage hani bulali wąį nǫų mu dao. Te eno Abraham i wali sogo, aga wai meni yai, tiali goli eno augwali siba te wiegi yai sę bugagia elama, te augwa si wai elaluai, tama augwali sigo hani wai dabe te genuai hani we bidi mu pedelai dao.”
ISA 51:3 “Ena Genuai Bidi, eno te Jerusalemde homu dene mu yali, te taun dolai elaluali, te eno agai sęgę tigidali sia somainu yaibao wali. Megi te olo masigi sane pesage elaluai, tiali goli eno te wiegi yai sę hauwa pedalumainu elama, tama te tonobo gasa sawi mu eyu, te eno nigali Iden gi tonobo tiwai yaibao. Te wiegi yai homu genuai pemene ebo pesage pedelama, te sesemane sogo aga we bidigo te enaba usu da wabo balia po waibao.”
ISA 51:4 “Dage eno we bidi dabe, eno po odao. Eno te wiegi yai bugagia bidabo kolesaga te tigidali hani we bidiba ola mayu, te eno te po tų dodolobo doloba pai kolesaga te tigidali bulu tǫ kantride ula tiwai elalueibao wai dao.
ISA 51:5 Te eno augwali tau siyu, ma sabo sogo, te pąba pedelalio. Te ena bomogo digi eno te tigidali tǫ kantri tonalueibao. Te digibulu bulu pesage we bidigo te eno bomoba homu dąų weyu, te eno augwali tau sabo tonalueibao.
ISA 51:6 Dagego te dagaluba ugwaba tonoyu, te tǫba aiyaba tonoyu yao. Te dagalu tigidali te hano sia sabo tiwai mu yaibao, tama tǫ te gudubo ugwa dolobo tiwai yaibao. Te tigidali we bidi te dinai sibi isila pabo tiwai yaibao. Tiali goli, eno te we bidi tau siyu, ma sabo kolesaga, te sesemane sogo elalua pidubadi, te me sia sogobeo,” wali.
ISA 51:7 “Dage te doloba pai kolesaga bugagia koneama, te eno bomo yai po dąų ola sabo hani dabe, dage te bidi dabego dwai po weyu, dage dolobo po obaso, te dage wi me igio.
ISA 51:8 Te hani dabe te ugwa asobago tologolama, te silibo tiwai eyu dolaibao. Tiali goli, eno te we bidi dabe tau siyu ma sabo kolesaga, te me sia sogobeo. Menio. Te sesemane sogo elalua pidu elalueibao,” wali.
ISA 51:9 Genuai Bidi, nage hogodao. Nage hogodama, te nage genuai bomo dali aselama, te da tau sagasao, te nago polobadu yali tiwai yao. Nago tama nago te Rehap enani, te tamu ąįde bidali moni hasamani, te nago dwasianu dedelege miani.
ISA 51:10 Nago tama nago te tamu ąį sula somainu ilama, te sunumi tomodu pedelali, te nago ma sali we bidi dabe soabo sunumi nigilai dao.
ISA 51:11 Te naga ma sali hani dabe tau sali, te augwa wiegi yai pemene elama, te Jerusalemba ma aselama, te augwa balia po weyu, genuai po dagą te sunumidu ola asaibao. Te augwa bugagia mu bidiyu, te augwa pemene umabo mu yaibao, augwa te pemene ebo me sia sogobeo. Te dene me haliga sęgę augwali dali me elalugobeo.
ISA 51:12 Genuai Bidigo aga we bidiba te tiwai po wali, “Ena digi eno dagego haliga dąų walama, te dagego tigidali sęgę sia somainu ilibo dao. Tama magi baso dage te gasa bidi dabede wi ebo dawe? Augwa bomo me elalubeo. Tigidali bidi isama, te nosai polo sia sabo tiwai gilama ebo dao.
ISA 51:13 Te dagego Genuai Bidi, enaba homu kone gegeda palali homu yali. Eno tama eno dage nigali. Eno te dagalu aga pesagede muani, te eno nigilama, eno te tǫ page dąų walali. Magi baso dage te elaluama, te dolainu ebo dwai bidi dabede wi ebawe? Te bidi dabego dageba magi sę me egobeo. Augwa haliga sębę te odolali silaibao.
ISA 51:14 Te kalabuside bidali hani, augwaligo pibia selama, wi ebo bage, augwali te kalabus sęgo me isigobeo. Menio. Te augwali kalabuside polo silama, te augwali olo bidaibao. Te augwa tuabo nai hauwa elalueibao.”
ISA 51:15 “Magi baso meni. Ena da Genuai Bidi, duga God. Eno te tamu ąį hodolama, te genuai ąį dini pedelama, te genuai mumunu ebao. Eno nogi te tiwai, Te Tigidali Bomo Elalubo Genuai Bidi dao.
ISA 51:16 Eno po te dageba mawai, te dagego pedauwalidu te po pusumainu yali. Te eno nogogo dage bugagia geme dualali. Ena Genuai Bidi, eno te dagalu diniginama, elalubao. Tama eno me tǫ aga bidabo pesageba munama, dąų walama, elalubao, eno dage te Jerusalem we bidi dabeba te tiwai po wali, dage te eno we bidi hani dolo mu dao, wai.” Te po wali.
ISA 51:17 Jerusalem, nage hogodao. Nage hogodama, bomonama ma dolugulao. Genuai Bidigo haliga sębę te wain ąį me deli te nageba mani tiwai ebao. Te agai nago te ąį tulama, silainu ebo tiwai yali. Te naga gęǫ page mu elama, umuna palali dao.
ISA 51:18 Te nago ogwa dabe deli me bidisąwai, te nago nogo tolasa, te nage dolo somainu ilabo te meni yai.
ISA 51:19 Nago sęgę genuai mu tolama, te dego nage homu dene elama, te nago haliga wiegi yai usu ma iligowe? Te boi bidi dabego aluama, nage dolagasali. Te augwaligo nago we bidi me hauwa te bainatgo elali. Te genuai nasi nageba pedelali sogo tiali. Te eno mena sęgo nage tau selama, nago te haliga sęgę elalubo siligowe?
ISA 51:20 Te nago we bidi dabego bomo meni yai, te augwa gedu gęǫ page elama, te augwa degasa dulama, te augwali tigidali sunumi bagude pila muna muna palio. Augwali te hasa bade tuali tiwai elaluali. Augwa te magi sę yabo usu me ebeo. God, Genuai Bidigo te augwaliba wado po olama, te aga haliga sębę ebo kabude te ąį tumainu ilali, te augwali dodolo pelama, elaluai dao.
ISA 51:21 Odao. Jerusalem, nago te sęgę hauwa tolama, tama nage te ąį tuai gęǫ page yai we bidibo tiwai yali. Tiali, nage te wain ąį tulama, gęǫ page ebeo. Menio. Te Genuai Bidigo haliga sębęgo naga nage gęǫ page yai dao.
ISA 51:22 Nago Genuai Bidi, te Godigo nago te boi bidi dabe dali hwįbo tau selama, dage ugwa ela holobo ilali, agai te tama po wali, “Suao. Eno te haliga sębę yali kabu te eno nageba menama, te nago tulama, te gęǫ page dwai mu elama, te umuna sali. Tiali goli, megi da, eno te kabu nago nogode ma sali. Te eno nosali nage te kabude ąį ma tumainu me egobeo.
ISA 51:23 Tiali goli, eno te kabu te nage dolobo bidi dabe nogoba mueibao. Augwaligo nage te tǫde pimainu ilama, te augwaligo nage agalama, te nage tudi daide biliyu, te augwa olo tǫ bulude bilibo tiwai yai dao,” te po wali.
ISA 52:1 Jerusalem, nage te God aga da olama, sa muani hanu, nage hogodao. Nage hogodama, bomonama dolugulao. Nago au dobage te gasa sawi yai sawi yai munama, te nage tonobo gasagi me mu yaibao. Te Godigo po odisąbo bidi dabe, me te God gedude wiegi yai isąbo hani bidi dabe, te augwali nage tomoba me asogobeo.
ISA 52:2 Hobede ya, Jerusalem, tiali te nage hogodama, te nago tigide tǫ sela sąyao. Awe, Saion hanu, te nago dogonide kęnani sen peda sąnama, te naga sia kingba duagi soao.
ISA 52:3 Magi baso meni. Genuai Bidigo te tama po wai, “Te bidigo ena me abelisąma, te nago we bidi te olo sę bidi me sę ebo we tiwai elama, sela pali. Te eno augwali ma sainu, te mone menama, me sogobeo. Menio. Te augwali eno olo mu saibao.
ISA 52:4 Magi baso meni. Ena God, Genuai Bidi, eno te tama po wali. Polobadu, te eno we bidi dabe te Isipba pelama, bidigi pali sogo, te augwa homugo digi palio. Te nosali, te Asiria dabe aselama, te augwali olo sę ebo bidi me sę ebo we tiwai sela pali, augwaligo ena abelama, te augwali sela pabeo.
ISA 52:5 Te Babilon dabego me te tobage deli kolesaga nosali yalio. Augwaligo te eno we bidi olo mu selama, te augwali kalabusiba sela pali, te eno hanigo tobolu bidi dwai gela mu wali. Te eno magi nai deli me sabeo. Menio. Sesemane sogo te bidi dabego te posobo po weyu, ena nogi aiyaba elalubo sę yai dao.
ISA 52:6 Te ena digi eno dąį ilama, te ena we bidi ma saiba wabo sogo, te augwaligo ena nogi bugagia koneaibao. Augwaligo te tiwai koneyu, ena Genuai Bidi, eno tama te augwaliba tigidali pedalubo sę po polobadu wai dao. Suao, ena bidibao,” wali.
ISA 52:7 Te we bidi augwaligo bidi me deli te bulu du pesagedu udada asobo sulama, te wiegi yai pemene mu yaibao, te wiegi yai po Jerusalemba selasa asali. Agai te tiwai po waibao, “Saion, te wiegi yai sogo pedelalio. Godigo te boi bidi dabe aiyaba elaluama, te agai nage bugagia bidimainu ilalio. Megi da, nago Godigo te tigidali nai tonalubo dao,” agai te po waibao.
ISA 52:8 Te tonalubo bidi dabe te masigigo nigali bobobage be taua daide bidali, te Genuai Bidi te Saion badu ma asobo sueinu yali, te augwa tigidaligo te genuai pemene dali eyu, te i bomonama mu waibao.
ISA 52:9 Dage te Jerusalem badu dolalio, dagego te pemene elama, i waiąo, magi baso meni, Genuai Bidigo te Jerusalem ma selama, te agai aga we bidi dabego sęgę silalio.
ISA 52:10 Genuai Bidigo agai bomo hania ola mayu, te tigidali tǫ kantrigo sumainu yaibao. Dago Godigo te aga we bidi dabe ma saibao, tama te tigidali tǫde we bidigo sueibao.
ISA 52:11 Dage tigidaligo te Babilon tagalama, asiąo. Te bugagia dua dao, tiyu dage te God gedude wiegi yai isąwani naide pania sabuo. Dage te hanigo te pou dis dabe, me pou dabe, te Genuai Bidigo bede nai sela paibao, dagego duga digi te God gedude wiegi yai pedalubo kolesaga wali pao. Dage tigidali te magi meda meni yai bidama, asiąo.
ISA 52:12 Tiali goli, dage asesa polo me te Babilon tagalama, me wi polo soyu, te dagego polobadu te Isipde yali tiwai me egobeo. Menio. Te dage dua digi asaibao. Te God, duga Israel dabego Genuai Bidi, te dage pabodu polasa paibao, te aga dage nosali badu me asaibao, te agai dage tonalua asiyu, odasa asaibao.
ISA 52:13 Genuai Bidigo te tiwai po wali, “Suao, bugagia konea sao. Tigidali sę eno sę bidigo ebo te bugagia mu pedelaibao. Te bidi dabego agaba genuai nogi mayu, te aga nogi ugwanu mu saibao.
ISA 52:14 Polobadu te bidi dabego dwai sę mu agaba yali, te aga tigi me gesabidi te dwai mu tonani, te aga bidi tigi tonobo tiwai me ebeo. Te we bidigo aga subo, wi yai dao.
ISA 52:15 Tiali goli, nosali da, te bulu tǫ kantri hauwa we bidi dabe te agade dwai noma midigi mu selama, te king dabe pedauwali pania selama, te bomonama tononalu, te augwa po deli me wagobeo, magi baso meni, te augwaligo polobadu po odisąwani nai suali. Te augwa dwasianu me konesiąwani nai te hania koneaibao,” wali.
ISA 53:1 Te Israel hani we bidi dabego te tiwai po wai, “Dego te megi dago odali pode konealubo homu dąų waibawe? Tama dego Genuai Bidigo te megi yali bomai sę tiwai ebo suai dawe?
ISA 53:2 Genuai Bidigo aga sę bidi te olo ni me deli tiwai te tǫ pesagede pedalumainu ilali. Awe, aga te ni me deli te wa pai tǫdu pedalubo tiwai pedalali. Te sę bidigo nogi meni yai, magi baso meni, te bidi dabego gedude tonobo sawi isiąwai. Te agade te bidi dabego godolo elama, tonabo nai me deli elalusąwai.
ISA 53:3 Te bidi dabego aga tudi ola menama, te aga begela dolama, te aga godolo mu me isąwai. Sesemane sogo agade te homu dene me haniani sęgę pągąnaluali. Augwaligo aga tudiba mu muanio. Te dago aga te olo bidi me tonobo tiwai yai dao.”
ISA 53:4 “Te dago tama homu yali, te Godigo agaba dwai dene mawainu eba homu eyu, te dwai sę agaba pedalainogo ebao homu yali. Tiali goli, menio. Te sę bidigo dago sęgę me dene te agai tolali dao.
ISA 53:5 Te dago yali dwai sęgęde naga aga dolali. Te augwaligo aga dodagia mu elama, te aga tigi tologola pali, agai te tolali sęgęde aga da usu ma ilama pedelali, te da bugagia mu bidibo dao.
ISA 53:6 Da tigidali te sipsip besela palama, bilibo tiwai yali, te da deli deligo te dena digi homu wali bilali. Tama tibaso, Genuai Bidigo daba te dene mabo sę yabo usu igi da, te dena yali dwai sęde wei ponainu yali, tiali goli aga te tama me tebeo. Menio. Te dena digi tolabo sęgę te agai aga sę bidiba te sęgę menama, tolomainu yai dao.”
ISA 53:7 Genuai Bidigo te tiwai po wali, “Te bidi dabego te sę bidiba dwai sę ilali, tiali goli aga digi aga aiyaba elaluama, te dene tolali. Te agai po me deli wabeo. Agai pedauwali pania sali, te augwaligo sipsip wai sela pelama, elainu ebo tiwai eyu, te sipsip augwaligo te nisi poawainogo sela pabo tiwai yai dao.
ISA 53:8 Augwaligo aga odolali mu kalabus elama, te aga po tų odoboba odasa pali, te po tųde aga isimainao po wai. Te augwaligo aga ela muai. Tama tibaso, aga nosali pedelabo hani we bidi me pedalugobeo. Agai te eno we bidi dabego pesage siyu, hasegelama, te augwa digi tolabo sęgę te agai tolama, te augwaligo yali dwai sęgę dodoliyu, te aga isai dao.
ISA 53:9 Te augwaligo aga te haniani dwai kolesaga yali bidi dabe dali me, te mone doado bage hauwa elaluali bidi dabe dali, pubulali. Tiali goli, te aga digi dwai kolesaga deli me isąwai, te agai tibo po me deli me wabeo,” te po wali.
ISA 53:10 Tiali goli, Genuai Bidigo digi aga sę bidi aiyaba elaluama, tama agai te dene selama, tolomainu yali, magi baso meni, te sę bidigo digi aga bidibo ula mayu, te we bidi dabego sęgę sela sąbo ofa tiwai ebaso da, teda aga bidibo sogo te bobobage mu igi pelama, te aga bulai wąį nǫų wai dabe sueibao. Te aga yali sęde, te sę bidigo te Genuai Bidigo homugo yao homu ebo sę ebaso, te agai te sę bugagia pedalumainu ebo dao.
ISA 53:11 Te aga genuai sęgę tolama da, nosali te aga wiegi yai nai hauwa pedalubo sulama, te aga wiegi yai pemene umabo mu yaibao. Genuai Bidigo te tiwai po wali, “Eno te doloba pai sę bidi, agai ena bugagia koneai. Agai te hauwa we bidigo dwai sę yali sęgę tolama, te kolesagade agai te augwali doloba pai we bidi pedelaibao.
ISA 53:12 Te we bidi dabego aga te dwai bidi me deli tonobo tiwai yai. Tiali goli, aga bidibo ula digi te olo wę mu gelebo tiwai eyu, agai te hauwa we bidigo dwai sę yali sęgę tolalio. Tama augwali dolidali weyu, agai te dwai sę ebo we bidi tau siyu, gedu haluasa po wai dao. Tama tibaso, eno agaba te genuai bidi dabe tomode te agaba genuai nogi mawaibao. Eno te bomai ami bidi dabego te boi hwįnama, te sali nai dabe agaba dobolama mawaibao,” wali.
ISA 54:1 Genuai Bidigo te tiwai po wali, “Jerusalem, nage te hobedagia wai ame nesiąbo we tiwai eyu, nage te wai ame nabode dene isiąbo we tiwai ebao. Tiali, megi da, nago te balia po weyu, pemene elama, i wao, magi baso meni, te nago wai dabe hauwa mu umabo elalueibao, te aga bidi dali bidibo wego wai te aiyaba mu elalueibao.
ISA 54:2 Nago genuai tǫ pedai dąį elama, te nago ugwa be tede sę yao. Nago ugwa be ugwade eda si dedelasa pelama, te bono bobobage tagalama, te ni tǫba bomonama tulama, te bono dabe bomonama kekelama, te nide kęao.
ISA 54:3 Magi baso meni, nago tǫ dąį te ugwa de eda si pedegasa pelama, genuai igi pelama, te dolo nogo badu tiyu, te pobase nogo badu me tiao,” wali. “Te nage hani wai dabego te gasa tǫ kantri hani we bidi aiyaba elalueibao, tama augwali te augwaligo megi olo elalubo hanu dabede bidalueibao.”
ISA 54:4 “Jerusalem, nage wi me igio. Te nage hale munu ma egobeo. Te bidi dabego posobo po nageba munu ma wagobeo. Te nage gesi ogwa bidi elalubadi hale sali, te nago homu kone mu gegeda palama, te sogo nagaduba te bidibo we tiwai homu ebo kone me isiąyu, te aga bidi isai we tiwai egobeo.
ISA 54:5 Magi baso meni. Ena, nage nigali God, ena te nago bidi tiwai bidaibao. Eno nogi da, te Tigidali Bomo Elalubo Genuai Bidi dao. Ena, te Israelgo God, ena te Wiegi Yai Doloba Pai Kolesaga Mu Ebo God da, te ena nage tudi badu posolalu tau sabo bidi, eno naga eno te tigidali tǫ habu tonalubo God dao.”
ISA 54:6 “Ena God, Genuai Bidi, eno te tiwai po wali, te nage eno enaba ma asomainu i waibao. Nage te bidigo sai gesi we tiwai te aga bidigo tagalama, wi palio, te aga hobolu du peda pelama, te aga genuai homu dene dali bidalio.
ISA 54:7 Ena Genuai Bidi, te nage eno tudi badu posolalu, tau sabo bidi, eno nage pęwądage sogo tagalali, te eno genuai homu dene nagede elalueibao. Tama te nage enaba ma asomainu saibao. Te eno nageba wado po dwai mu te pęwądage sogo olama, te eno ena gesabidi geme duala sali. Tiali goli, sesemane sogo te eno nage dali homu dene eyu, te nage godolo mu eyu, te nageba wiegi yai sę bugagia yaibao.”
ISA 54:9 “Te Noa bidali sogo, eno te tiwai bomai po dąų weyu, te eno genuai ąįgo te tǫ ma dologobeo wali. Te megi eno te tobage bomai po dąų walaibao. Eno mu po weyu, te eno haliga sębę ma isiąma, te nageba wado iliyu, te nage me dene mabo sę egobeo wai.
ISA 54:10 Te bulu du dabe pedasa pelama, degaibao, tiali te eno nagede homu godolo ebo te sesemane sogo elalueibao. Te da si bugagia dugulalu, te eno bugagia bidabo sogo maiabo po weyu, te dąų walali bomo yai po te eno me bologobeo. Ena Genuai Bidi, te eno nagede homu dene mu eyu, te nage godolo homu mu yai, eno te sę dabe yaibao te po nageba wai dao,” wali.
ISA 54:11 Genuai Bidigo te tiwai po wai, “Hobede ya, Jerusalem, nage te hauwa dolali taun, te nage homu dene elama, tau sabo bidi meni yai. Tiali goli, eno te wiegi wiegi yai masigi te gasagi yai mu selama, te nage ma nigaibao, te nage gasa sawi yai taun mu pedelaibao. Eno te gasagi yai tedali masigi dabe selama, te tǫde wasilama, te ugwadu daide taun ma nigaibao. Te eno te haniani wiegi yai dila pai masigi selama, nago be sę ebadi, te bomai obogo nage bagulama, te obo sunumi dabe me, te genuai masigigo nigai obo daide elaluabo taua, te dabe nigaibao.”
ISA 54:13 “Te ena digi eno nago wai dabe ola mayu, te augwa bidabo pesage bugagia mu elalueibao.
ISA 54:14 Te eno doloba pai kolesagade te eno nage bomai pedalumainu ilaibao. Te nage aiyaba elaluama, te dwai sęgo dolabo bidi me menio, te nage magi nai me delide wi me egobeo. Te nago wi ebo tigidali silaibao.
ISA 54:15 Te hani mebago nage dali hwįai olama, asobaso da, te nago te tiwai koneao, te augwali eno tagala palobaso me asobeo. Menio. Te augwa homugo digi asali. Tama augwali te eno nago nogoba mueibao,” wali.
ISA 54:16 “Suao, bugagia konea sao. Ena digi eno te haniani nai te aingo nigibo bidi dabe nigali. Augwa te ain siaba munama, te ain dabo posolo yai sia mu nogani. Augwa te ain selama, te hamago elama, te bidigo hwįabo haniani nai dabe nigibo dao. Tama eno te ami bidi dabe me nigali, tama augwa te nai dabe selama, te boi hwįnama, te gasa bulu tǫ kantri dolobo sę ebo dao.
ISA 54:17 Tiali goli, te hwįbo nai dabe me deligo nage me dologobeo. Te nage bomonama dolalu, te bidi dabego nageba haniani po kisilama wabo po te wei ponoyu, aiyaba elalueibao. Eno te kolesagade ena sę bidi dabe tigidali bugagia tonalu, te augwali doloba pai we bidi pedelaibao. Ena Genuai Bidi, eno te po wai dao.”
ISA 55:1 Genuai Bidigo te po wai, “Tega, dage te ąį nogonego sabo we bidi dabe, dage enaba aselama, dage wę tuagasao. Dage te mone meni yani hani dabe, dage enaba aselama, te dage nai sela tuagasao, te aselama te ąį wain me hasa bulmakaugo ame pę ąį sagasao, te monego me abeligobeo.
ISA 55:2 Magi baso dagego te duga mone te dage tau sisąyabo nai dabede odolali silama, te dage nai sili bidaiwe? Magi baso dagego te tubo nai sabo sę dene elama, tama tede sabo monego magi baso te dwai olo nai naga abelebo dawe? Te eno poba bugagia olo muao, te eno wabo po tiwai gilama yao, te dagede eno mabo haniani nai mu pągąnalueibao. Awe, dagego homugo tede wiegi yai pemene mu yaibao.”
ISA 55:3 “Odao, dage eno we bidi dabe dao. Dage bugagia bidimainu eyu, enaba asiąo. Te eno dage dali bomo yai po dąų walama, tama te dąų wali bomai po sesemane elalueibao. Te sesemane sogo eno dage godolo homu mu elama, te dageba wiegi yai sę yaibao. Te polobadu eno te bomo yai po te king Devitba dąų wali tiwai gilama yaibao wali.
ISA 55:4 Konea sao, eno aga genuai bidi pedalumainu ilama, te agai gasa bulu tǫ kantri tonalumainu yai. Te agade, te eno bomo augwaliba ola mawai dao.
ISA 55:5 Mu tama, te dagego polobadu konesiąwai te bulu tǫ kantri we bidi dabe augwali i wabo sogo, te augwaligo me dage me konesiąwai, te augwali dageba polo udada asaibao. Magi baso meni, ena Genuai Bidi, dage Israelgo God, ena te Wiegi Yai Doloba Pai Kolesaga Mu Ebo God, eno dage te genuai nogi dali bomo dali si mu elalumainu ebao,” Genuai Bidigo te po wali.
ISA 55:6 Megi da, Genuai Bidi te dage pąde bidiyu, dage tonalubao, tama megi sogo te dagego agaba gedu haluasa po weyu, te aga pąba pabo sogo dao.
ISA 55:7 Te dwai kolesaga ebo we bidi dabego te augwa ebo dwai kolesaga tagalama, tama augwa te kolesaga me yabo homu kone me paligio. Te augwali augwa Genuai Bidiba ma asiąo. Agai te agaba ma asobo bidi dabeba te olo mu tau mabo wiegi yai kolesaga umabo mu yaibao. Awe, Godigo augwaligo dwai sęgę tigidali mu sela sąwaibao.
ISA 55:8 Genuai Bidigo te po wai, “Eno homu kolesaga te dagego homu kolesaga tiwai elalubeo. Te eno kolesaga te dagego kolesaga tiwai meni, te gasa tedali mu elalubo dao.
ISA 55:9 Te tǫ aiyadu elalubode te dagalu ugwadu mu elalubao, te tiwai naga te eno homu de eno homu kolesagago te dagego kolesaga me homu kolesaga te aiyaba mu elaluai dao.”
ISA 55:10 “Te dagaludu tulubo tulubage, aga odolali te dagaluba ugwaba ma hologobeo. Menio. Agai te tǫba ąį mayu, te gide nai holomainogo elama, te bidi dabego saibao. Me badu augwa tuyu, me badu wai selama, ma buluyu ebo dao.
ISA 55:11 Te tiwai naga eno po me te enaba odolali ma asogobeo. Menio. Agai te eno wali po tiwai gilama pedelaibao. Te agai eno homugo pedalumainogo homu yali sę pedalubo dao.”
ISA 55:12 “Te dage wiegi yai pemene elama, Babilon taga somainu elama, te dage eno odasa asiyu, te dage wi ilabo magi sę deli me pedalugobeo. Te bulu du dabego wiegi yai pemene ebo tęąbi po weyu, te ni dabego pemene homu elama, augwa nogo elaibao.
ISA 55:13 Te ni wuli dabe te megi dwai ni dabe elalubo madi pedelaibao. Te gasa sawi yai dwasianu ni dabe te megi sesane bono elalubo pesagede pedelaibao. Tama sesemane sogo te tobage ni dabe te pesagede pedelama, te sesemane sogo te dąį ilali tiwai te we bidi dabego sulama, te Genuai Bidi, eno yali bomai sę homu kone palomainu yaibao,” wali.
ISA 56:1 Genuai Bidigo te po wali, “Dage eno we bidi dabe, odao. Eno dagebolo te eno bomai po polobadu mawai dao. Tama eno dage dali te sesemane elaluabo po me dąų walai dao. Dagego te po si bugagia wali peyu, te wiegi yai doloba pai kolesaga naga iyąo, magi baso meni, te eno dage tau selama, ma sabo sogo, te pąba pedelai dao. Awe, dagego eno doloba pai kolesaga ebo tamadi sueibao.
ISA 56:2 Te we bidi dabego wiegi yai doloba pai kolesaga wali peyu, te Sabat sogode bomo yai po bugagia wali peyu, te dwai kolesaga isąbo we bidi, augwa wiegi yai pemene yao. Eno augwaliba wiegi yai sę yaibao,” Genuai Bidigo te po wali.
ISA 56:3 Te gasa tǫ kantri we bidi dabe augwaligo te agai po wali pabo homu dąų olama, te Genuai Bidigo we bidi dali bidali, augwade digi te tiwai po wagio, “Te Genuai Bidigo da te agai we bidi dabe dali bidimainu me iligobeo.” Augwaligo te tiwai po wagio. Te augwaligo aga domo diani bidi, agai te tama homu me elamuo, “Te ena wai meniama, te ena nogi meni yaibao,” wagio. “Ena te sasia pai ni me deli tiwai da,” homu igio. Menio.
ISA 56:4 Genuai Bidigo te tiwai po wali, “Te tobage tiwai bidi dabego te Sabat side bomo yai po wali peyu, te eno godolo homu ebo kolesaga wali peyu, te eno ena we bidi dabe dąų wali bomai po tigidali wali pobaso da,
ISA 56:5 teda eno te dąį me deli tiwai te augwaligo nogi te eno tempel be tomode muai elalueibao. Tama sesemane sogo te we bidi dabego sulama, te augwali homu koneaibao. Te augwaligo genuai nogigo te wai dabe ame nai elaluali bidi dabego nogi aiyaba mu elalueibao. Te eno augwali nogi mu silimainogo me iligobeo,” wali.
ISA 56:6 “Te gasa tǫ kantri we bidi dabe augwaligo te eno po wali pabo homu dąų olama, te eno we bidi dali bidalubo, te augwali ena dologoba aselama, te ena godolo homu mu elama, te enabolo lotu po weyu, te Sabat side bomo yai po wali peyu, tama te eno we bidi dali po dąų wali po tigidali te wali pali da,
ISA 56:7 augwa wiegi yai yaibao. Te eno bulu du Saionba te augwali eno odasa paibao, te augwali eno bede bidiyu, wiegi yai pemene yaibao. Te augwa te siago tigidali domainu ebo ofa dabe eyu, te gasa tobage ofa dabe eno altade yaibao. Te eno augwaligo ebo ofa godolo homu yaibao, magi baso meni, eno be da te tigidali bulu tǫ kantri we bidi aselama, te enaba gedu haluasa wagasabo be elalubo dao.”
ISA 56:8 “Ena God, Genuai Bidi, eno te Israel we bidi ma sisinibao, te boi bidi dabego sela pelama, kalabus igi pai, eno te tiwai po obao. Te eno gasa we bidi dabe me selama, te eno sisinani hani we bidi dali bidimainogo odasa asaibao,” te po wai dao.
ISA 56:9 Te Israel polalubo bidi dabego te we bidi dabe bugagia me tonalusiąbaso, te Genuai Bidigo te po wai, “Asiąo, dage boi bidi dabe. Dage te uni hasa dabe te bulu du buside bidalubo asiąo,” wai. “Dage aselama, te Israel polalubo bidi dabe dolagasao. Te polalubo bidi dabego te tǫ kantri dwai sęgo elalagasainu ebo po te we bidi dabeba wabo sę elalubao. Tiali goli, augwa sę bugagia me ebeo. Menio. Augwali te gedu widai bage tiwai te taun tauade te boi bidi asobo tonalubo tiwai bidali. Tama augwali te pedauwali pania sai yowi tiwai te nai wi sabo bidi asobode gągą wabo usu isąwai bidali. Te augwa tobolude dwasianu kolesaga me elalubeo.
ISA 56:11 Augwali te nai hauwa tuabo homu ebo yowi tiwai bidali, te dwasianu pągąsiąbo ąǫ yai. Augwali te sipsip tonalubo bidigo aga sę ebo konesiąbo tiwai yali. Deli deligo te augwa homu wali pelama, te aga tau sabo nai naga homu koneai dao.
ISA 56:12 Te augwali sisinibo sogo, augwali mebago te tiwai po wali, ‘Ae, tegobao, eno te wain ąį selama, te da tųdu pelama, te dena godolo yaliba usu nigi paibao. Te do da wabo sogo, da ma sisinama, te umabo mu ma tueibao,’ wabo dao.”
ISA 57:1 Te bidi dabego te wiegi yai we bidi dabe isibo sogo, te augwa homu si me ebeo, tede homu kone palobo menio. Tama augwa te tiwai homu me sabeo, ‘Genuai Bidigo te bidi dabe isimainogo ilama, te augwaliba pedelainu yali dwai sę te geda mumainogo ebao,’ te homu egobeo.
ISA 57:2 Te doloba pai kolesagade bilali bidi dabe, te augwa isibo sogo, te augwa gų pagede pila muyu, te toma nabo wiegi yai sogo sai, magi baso meni, te dwai sę ebo sogo augwaliba pedelabo usu egobeo.
ISA 57:3 Genuai Bidigo te tiwai po wali, “Dage te dwai kolesaga haniani ebo we bidi dabe, dage edaba asiąo, dage te pobi bidi dabe, me penani bidi dabe, me penani ebo we dabe te augwaligo wai dabe dao.
ISA 57:4 Dagego po dwai deba wali, dage te hagoma ebo bidi dabe, me te po geagano pabo bidi, me tibo po wabo bidi te augwaligo wai dabe dawe? Dagego gesabidi dwai eyu, te dagego hąę hąę elama, deba wabo dawe?
ISA 57:5 Te duga haligade dwai homugo te bomonama hodolobaso, te genuai ni dologo te lotu wabo pesageba pelama, te penani ebo kolesaga ebao. Dagego te duga wai puluba dabe elama, te ofa tiwai eyu, te odogo tǫ pesagede te genuai masigi elalubo tomode ulubo dao.
ISA 57:6 Tama tede dagego te masigi dabe selama, te augwa god tiwai pedelali. Te augwali te masigi dabe duga god tiwai naga elama, te dagego ofa eyu, te wain geliyu, te wit ofa me augwaliba yali. Te kolesaga ebo sę dagego elama, te dagego homugo eno hasegelama, dageba homu dene yaibao weyu ebawe? Mu menio.
ISA 57:7 Dage te lotu wabo bulu du bageba holama, te ofa eyu, penani kolesaga yalio.
ISA 57:8 Dagego ena tudiba mu muanio. Dagego te duga tibo godigo piksa dabe te duga be tų dabo tomo badu bogo side muani. Tama dagego te duga abagi wali weba te mone menama, augwali dali piainu yali, tama dagego te duga nigali genuai bet sai daide te penani kolesaga ebo dao.
ISA 57:9 Dagego au ebo, te sanda me pauda, te wiegi yai denami ebo naigo au elama, te dage tibo god Melekba lotu wagi pali. Dagego te bidi dabe digibulu buluba tagala palali, te dagego lotu wabo god gegemainu yali. Tama dagego te gų pagede me te tibo god dabe gegebo kolesaga ebo dao.
ISA 57:10 Dage te god dabe gegebo sę dene mu eyu, te dagego bomo silibao. Tialima, dage tede gę neyu, te tiwai po me weyu, ‘Dago bomo te odolali silibao,’ po wabeo. ‘Dago te tebo kolesaga tagalinao,’ dagego te po wabeo. Menio. Te duga dwai homu ebo kolesaga te bomonama mu pedaliyu, te dage kekasa mu pobao wabo dao.”
ISA 57:11 “Dage dede mu wi elama, te dagego ena ili po ola mayu, te ena tudiba munama, te ena homu kone mu gegeda palobawe? Te bobobage sogo eno dageba wado po wabe, tama tiyu dagego enaba wi ebeo.
ISA 57:12 Tiali goli, te eno dagego ebo kolesaga te pebeli diliba hanilaibao, tama dagego homugo te wiegi yai da olama wali pabo sę ebo kolesaga dabe, te augwaligo dage dwasianu tau me sogobeo. Mu menio.
ISA 57:13 Te dwai sęgo dage dolobo sogo, dagego te pesage holama elalubo godigo te dagego augwaliba i obaso, te augwali aselama, dage tau sagasaiba, agawe? Mu menio. Augwa bomo me elalubeo, te dwasianu waligo naga augwali sela paibao. Tialima, te bidi dabe enaba aselama, te eno augwali tau siyu, tonaluainu ebo bidi da, augwaligo te tǫ eno sa muyu, te eno we bidi dabego somainu yaibao, te augwali me eno digi te sa muani bulu dude bidimainu yaibao,” wali.
ISA 57:14 Genuai Bidigo te tama po wali, “Te eno we bidi dabe enaba ma asomainu yaibao. Te augwa sunumi bugagia dodolama, te sunumi paliabo nai tigidali sela sąwaibao, tiyu te nai dabego augwali sągąde dolama, te augwali tula muidalio,” wali.
ISA 57:15 “Ena digi ena God, te ena sesemane sogo bidibao. Eno nogide te magi meda mu meni yai elalubao, ena te Wiegi Yai Doloba Pai Kolesaga Mu Ebo God dao. Ena te ena wiegi yai bulude digi ugwadu bidibao. Tiali, ena te augwa digi augwa aiyaba elaluama bidiyu, te augwa yali dwai sęde homu dene ebo we bidi dali bidibao. Te eno augwa haliga dąų waliyu, te augwa bidibo ula te wiegi yai ma pedalumainu ebo dao.
ISA 57:16 Eno ena we bidi dabeba sesemane sogo wado eyu, haliga sębę idugobeo. Te eno tama tiyu da, eno koneani, te augwa bidibo ula dolama, te mu silaibao, te bidibo ula ena digi eno augwaliba mawai dao.
ISA 57:17 Eno wado po dwai mu augwaliba wali, magi baso meni, te augwa haniani dwai kolesagade te augwaligo doado bage hauwa mu sabo homu yali. Tama tialima, te eno augwaliba dene mayu, te eno gesabidi augwaliba geme sesela sali. Tiali goli, augwa me hagoma idu gęyu, te augwa homu kolesaga wali piduai dao.”
ISA 57:18 “Eno te augwaligo ebo dwai kolesaga suali, tiali goli te eno augwali me dologobeo. Menio. Te eno augwaligo dwai sęgę sela sąnama, te augwa usu yai ma pedelaibao. Te ena digi eno augwali bilibo dodoliyu, te augwali haliga dąų walaibao. Tama te homu denede bidiyu, gela wabo we bidi,
ISA 57:19 te eno augwa te homu dene ebo tagalomainu elama, te augwa enaba usu da olama, wiegi yai pemene ebo po mimainogo ilaibao. Ena Genuai Bidi, eno te po obao, te eno nagame yai haliga ebo homu te pąde bidibo we bidi dali, me te digibulu bidalubo hani dabe dali me ebao. Te augwali eno usu ma ilama, te augwaliba wiegi yai sogo mawaibao wai dao.
ISA 57:20 Tiali goli, te dwai kolesaga ebo we bidi dabego, augwa te dwai kolesaga ebo me tagalogobeo. Augwali te tamu ąį sesemane sogo dinigo te haniani pobele bage me dwai nai sela asu, te nambis dolagasobo tiwai ebo dao.” Genuai Bidigo te po wai.
ISA 57:21 Eno Godigo te tama po wali, “Te dwai kolesaga ebo we bidi dabe, te augwa bugagia bidabo wiegi yai sogo me elalugobeo,” wali.
ISA 58:1 Genuai Bidigo enabolo te tiwai po wali, “Nago genuai po dągą mu olama, i wao, dua digi i me wagio. Nago bomonama i wabo, te bu wabo nai biugel bu wabo tiwai yao. Te eno we bidi dabeba weyu, te Jekopgo hani dabe, te augwa dwai sęgę me dwai kolesaga po wao,” po wali.
ISA 58:2 “Mu tama, te tigidali sogode augwa te enaba lotu wabo kolesaga eyu, te eno homu kolesaga osola sueinu yali. Te augwaligo enaba hanalu, te augwaliba doloba pai kolesaga yao weyu, te augwali pąde bidibaso, te augwali wiegi yai pemene yaibao wali. Tiali goli, te hani dabego tibo po mu wai. Augwaligo te eno bomo yai po tudiba munama, te augwa dwai kolesaga naga ebo sę yai dao.
ISA 58:3 Augwaligo enaba te tiwai po wali, ‘Genuai Bidi, dago te nai habu selama, te dena digi aiyaba elalubo nago suali, tiali goli magi baso nago te da tau sabo sę isąbawe?’” “Tiali goli, ena Genuai Bidi, eno augwaliba te tiwai po wei ponani, ‘Te tigidali side dagego te nai habu selebo sogo dąį ilali, dagego te duga naide digi naga homu kone palama, te dagego duga sę ebo bidi dabeba dwai sę ebo dao.
ISA 58:4 Dagego te po weyu, te dage nai habu selama, enaba gedu haluasa po waibao wai. Tiali goli, dagego kolesaga te gasagi yai tedali mu yalio. Dagego te wado elama, hwįyu, nogo sugunama, te gasa bidi gesabidide eliyu ebo dao. Dagego te dwai kolesaga te dagego nai habu selama, bidibo sogo ebaso da, teda eno dagego gedu haluasa po wabo me odogobeo.
ISA 58:5 Te dagego homugo eno dagego te tigidali side nai habu selebo kolesaga ebode te eno dage godolo eba homu eba, agawe? Dagego te homu dene ebo ugwa munama, te duga tobolu te tǫba basigulu, te waligo awi dili basiasa pabo tiwai eyu, te dage sia keli daide piyu, te duga digi aiyaba elalu, te gasa tobage kolesaga me yali. Tama dagego homugo dagego te tobage kolesaga ebode eno dageba bugai haliga eba homu yaibao, agawe? Mu menio.”
ISA 58:6 “Eno te tobage kolesaga godolo homu me ebeo. Eno homugo dagego te haniani dwai kolesaga mu ebo habu selama, te gasa we bidi dabe elaluama, te dolobo kolesaga me habu selao. Te we bidi dabe te hobedagia kalabuside bidiyu, dagego augwali te bono me sengo kęnani, tama augwali te bulmakau tiwai dagego te ni nami augwa dogonide kęnama, te duga sę emainu ebo tiwai eyu tonalubao. Te dagego augwaliba wiegi yai kolesaga eyu, te augwali olo pomainu tagala palao.
ISA 58:7 Eno godolo homu ebo kolesaga e tiwai dao. Eno homugo dagego te nasi ebo bidi dabeba nai mao homu ebao. Te magi nai doado bage meni yai bidi te dagego aga piabo be meni yai subo sogo, eno homugo dagego augwali te duga beba odasa pao homu ebao. Te dagego te bidi aga tigi bea sabo ugwa meni yai subaso, te eno homugo dagego augwaliba ugwa maiąo homu yali. Tama eno homugo te duga deli kaneme sibi te augwa sęgę elalubo sogo, te augwali tudiba munamo dao.”
ISA 58:8 “Te dagego eno godolo homu ebo kolesaga ebaso da, teda polo tama te eno dagede elalubo dwai sęgę sia somainu yaibao, te kigamude nanobo giliga ulago te hulia sai elaluali hola sabo tiwai yaibao. Te eno dage usu ma ilaibao. Te ena, doloba pai kolesaga ebo God, ena dage asobodu polasa paibao. Te ena dage tudibadu nosali me te eno genuai bomo ula dali asu, te dage bugagia tonalueibao.
ISA 58:9 Te dagego enaba gedu haluasa po weyu, i wabo sogo, te ena Genuai Bidi, eno te dagego gedu haluasa po wabo odoyu, tau saibao. Te ena dage dali bidibo, dagego koneaibao. Te dagego gasa bage dabe aiyaba elaluama, te augwaliba nogo tų eyu, po dwai wabo tagalama,
ISA 58:10 te dagego suali, te bidi dabe te doado bage me nai dabe sǫą pai elalubo subaso, te dagego augwali homu dene mu elama, te augwali sǫą pali nai mobaso da, teda eno dage wiegi yai bugagia ilaibao. Te eno dageba wiegi yai sogo pedalumainu elama, te bomo yai giliga ula tiwai eyu, te be hulialuali hola sabo tiwai ebo dao.
ISA 58:11 Te ena Genuai Bidi, te sesemane sogo eno dage bugagia tonalu, te dage bilibo dodolama, te dagego homugo wei homu ebo nai dabe usu nama mawaibao. Megi dage te ąį meni yai tǫde bidibo tiwai ebao, tiali goli eno dage wiegi yai bomai we bidi pedalumainu yaibao. Tama dage te gi tǫ ili ąį hauwa elalubo tiwai elama, te sula sisąbo ulu ąį tiwai elalueibao.
ISA 58:12 Tama te dolali taun dabe dagego ma nigaibao. Dagego te be dabe te polobadu sę yai elaluali pesagede ma sę yaibao. Tama dage nogi augwaligo te tiwai waibao, ‘Te taun obo dabe ma dodolobo hani dabe’, me ‘Te augwali te sunumi dabe me be dabe bugagia ma dodolobo hani dabe dao,’ waibao,” wali.
ISA 58:13 Genuai Bidigo te tiwai po wali, “Dagego te Sabat side bomo yai po boligio, te eno side ena digi dąį ilali. Te dagego duga sę dabe digi te side yabo homu me igio. Dagego te Genuai Bidi eno side, te ena godolo homu mu elama, te duga genuai side da homu kone palao. Te dage me tedela pįsama, te duga sę me isiąma, te haniani olo po me minamo dao wali.
ISA 58:14 Dagego te tobage yabo kolesaga dolo wali pobaso da, teda te Sabat side dagego Genuai Bidi, enade wiegi yai pemene umabo mu yaibao. Te eno dage te polobadu te duga bulai wąį nǫųba bomai po dąų weyu, te bidao wali bulu du pesagede bugagia bidaibao, te Jekop, te aga haniba dali mawai. Te dage nai hauwa elalu, te dage bugagia mu bidiyu, te magi nai deli me sǫą pogobeo.” Te po te Genuai Bidigo pedauwalide digi asai dao.
ISA 59:1 Genuai Bidigo te dage ma sabo bomo meni da, dagego te homu me igio. Dagego te homu eyu, te aga olo degelama, te dago gedu haluasa po wabo odobeo homu egobeo. Menio.
ISA 59:2 Te duga sęgęgo naga tama tiyu, te God aga gesabidi seselasa elalu, te dagego gedu haluasa po wabo odobeo. Te duga dwai sęgęgo te duga tomode te duga God dali te obogo dąį elalubo tiwai ebao.
ISA 59:3 Magi baso meni. Te dagego haniani tibo po weyu, te wado po, me po dwai wali. Te dagego dwai kolesaga eyu, te bidi dabe ela munama, te augwa kaneme dagego nogode dagana sai elalubao.
ISA 59:4 Dagego te doloba pai po tų me ebeo. Menio. Dagego te tibo po dabe weyu, te po tų odoboba gasa bage dabe kekasa pali. Te dagego tibo po haniani weyu, te po tų ebo dagego po naga odomainu elama, te gasa bage aiyaba elaluai. Te dagego homu kolesagade te dwai sę ebo kolesaga hauwa mu pągąnalu, te dagego dwai sę haniani ebo dao.
ISA 59:5 Te dagego dwai homu kolesaga elalubo, te dwai nabi elalubo hasamanigo ge tiwai elalubao. Te bidi me deligo te hasamani ge tubaso da, hobede yao, te aga isaibao. Te tama tiwai dagego dwai homu kolesagade dagego te haniani dwai sę pedalumainu elama, te gasa bagego bidibo ula dolobao. Te ababua dabego be sę ebo da, te augwa te dwasianu nai dabe tola sabode te augwa tueinu ebao. Te bidi dabego te ababua be selama, te ugwa nigilama gudugobeo. Te tama tiwai naga dagego te ebo sęgo te gasa bage tau me sogobeo. Menio. Augwa te gasa bage tola selama, te augwali elaluama, te augwaliba dwai sę ebo dao.
ISA 59:7 Sesemane sogo dagego te dwai kolesaga yabo homu godolo mu ebao. Te sesemane sogo dagego te magi dwai sę me isąwai bidi dabe ela muabo homu hogodali. Dagego te dwai sę dabe yabo homu naga ebao. Te dage udayu, te gasa we bidi dabego bidibo ula dolabo sę ebo dao.
ISA 59:8 Dagego te haliga nagame elama, dua digi bidibo kolesaga konesiąma, te dagego te Genuai Bidigo godolo ebo doloba pai kolesaga me ebeo. Menio. Te dagego kolesaga dabe dolo me isąwai, te bidi dabego dage te bilibo sunumi wali pobaso da, teda augwali te bugagia haliga nagame elama, bidabo pesage me gegelama, bidabo usu me egobeo.
ISA 59:9 Tialima, te we bidi dabego te tama po wali, “Genuai Bidi, nago naga doloba pai kolesaga ola mayu, te tau selama da ma sabeo. Megi da, te kolesaga page dago koneani. Da te be hulia saide bidibo we bidi tiwai elalu, tama dago homugo te wiegi yai sogo daba pedelama, te giliga bomonama nanobo tiwai elama, te be hulia sai silimainu homu godolo mu yali. Tiali goli, menio. Da te genuai be hulia saide bilibo tiwai eyu, te da haniani sęgęgo gegebo dao.
ISA 59:10 Te sęgę dabego da te gedu widai tiwai biliyu bidibao, te da pabo sunumi gege gege bilibo dao. Te genuai giliga nanalubode digi, da te be hulia saide bilibo bidi dabe tiwai bilalubo, te dago sągą dani te masigiba tųą palobaso, da tula mubo dao. Dago homugo te da bugagia bidaiba homu yali, tiali goli menio. Da te isai bidi bidibo tiwai yai dao.
ISA 59:11 Te sęgę dabego da dwai dene mu ebaso, te dago te genuai hasa bea dabego gani gani wabo tiwai weyu, te dago gela wali te ba higo po wabo tiwai yali. Tama dago te nageba tonalu, te nago doloba pai kolesaga ola mayu, te da tau selama, ma sabo tonalubo dao. Tiali goli, menio. Te nago doloba pai kolesaga dade digibulu elalubo dao,” wali.
ISA 59:12 “Genuai Bidi, te dago dwai sęgę nago gedude hauwa mu elama, te sęgę dabego da po tų ilali. Tama dena digi dena yali te dwai sę tigidali bugagia koneai dao. Mu tama, dago dago dwai sę hauwa yali dao.
ISA 59:13 Dago te dena Genuai Bidi, God, nageba dwai sę yali, te dago nage tudiba munama, nago po sela sąwani. Dago nage dologode bidibo te hagela homu yai dao. Dago te gasa bage elaluama, te haniani hagoma kolesaga yali. Dago te gasa bage dabe tibo po ola mayu, po geagano bilama, haniani sunumi nigibo po wali.
ISA 59:14 Tama tibaso, dago te kolesaga dabego te nago doloba pai kolesaga te dade digibulu elaluai, tama tiyu, te nago da tau selama, ma sabeo. Te dago te doloba pai kolesaga me mu po wabo, te da tomoba aselama, elalumainu ebeo. Te da sisinibo side me, te augwali si me bidagasobeo.
ISA 59:15 Te doloba pai kolesaga deli dade me elalubeo. Te bidi me deligo aga dwai kolesaga tagalobaso da, teda te gasa bage dabego te aga dolabo haniani sunumi gegebo dao,” wali. Genuai Bidigo te we bidi dabego doloba pai kolesaga ebo me susiąbaso, te agai augwaliba dwai haliga yalio.
ISA 59:16 Te aga dwai midigi siyu, te tiwai suali, te gasa bagego dolali bidi dabe te tau sabo bidi elalubo subeo. Tama tibaso, te aga bomogo digi, te aga doloba pai kolesagago digi, te Genuai Bidigo augwali ma selama, te augwali bugagia bidimainogo ilai dao.
ISA 59:17 Agai te doloba pai kolesaga te kapa holobo ugwa mubo tiwai eyu, te aga hagawiade mesega sabo tiwai yali. Te aga te we bidi ma sabo bomo te hwįbo madi kapa tiwai muani. Te aga ugwa gudubo tiwai bomonama dąų ola selama, te dwai sę ebo bidi dabeba dene mawainu tiaibao. Te aga haliga sębę ebo te bobobage ugwa aiyaba tagalalubo tiwai yaibao.
ISA 59:18 Te agai haliga sębęde, te aga boi bidi dabeba dwai dene mayu, te augwa yali dwai sę dolo usu wei ponaibao. Te agai te pąde elalubo bulu tǫ kantri we bidi dabeba, me te digibulu tǫ kantri dabe, te dwai dene mabo sę mu yaibao wai dao.
ISA 59:19 Genuai Bidi te genuai wę asobo tiwai eyu, te Genuai Bidigo ponobo sogo te dąų walali wę gisigilama, te wę asesa mu pomainu yaibao. Te tigidali tǫ asesa mu pomainu yaibao. Te tigidali tǫ habu we bidi dabe, te giliga pedalubo badu gagalasa pelama, te giliga degegi paboba usu nigi paibao, te augwaligo Genuai Bidigo bomo me genuai nogi koneama, te aga nogide wi elama, te augwali aga dologoba aselama, bidimainogo yaibao.
ISA 59:20 Genuai Bidigo te po wai, “Ena te dage posolalu, te dage tau sabo God, ena te Jerusalemba aselama, te tigidali we bidi te Jekopgo hani te augwa dwai kolesaga ebo tagalali bage ma sagasaibao.
ISA 59:21 Te ena da, eno bomai po augwali dali dąų walama, te augwaliba eno te tiwai po waibao, ‘Te eno mobo noma bidi me, te eno dagebolo mani po me, te dagede bidiyu, te dagego pedauwaligo eno po pusaibao. Dagego sesemane sogo tama tiaibao, te nosali dagego wai dabego me te duga bulabo wąį dabego me te tama tiyu, te sesemane sogo augwaligo me eno po elalua peyu, pusaibao,’” te po wai dao.
ISA 60:1 Genuai Bidigo te po wali, “Jerusalem, nage hogodama, te giliga nanobo ula tiwai yao, magi baso meni, megi eno genuai ula me bomo, Genuai Bidigo ula te nage daide ugwadu yaibao.
ISA 60:2 Suao. Te sisi yai pǫ, me te genuai be hulia sabogo, te tǫde tigidali gasa hani we bidi mesegelaibao. Tiali goli, ena Genuai Bidi, ena nageba aselama, te eno genuai ula te bomonama, nage daidu ula elalueibao.
ISA 60:3 Te Israel hani isąwai we bidi dabego nago te ula sulama, te augwali nageba asaibao. Te king dabego me nago te bomai ula sulama, te augwali hogodama asaibao,” wali.
ISA 60:4 “Nago tobolu ugwaba selama, tonono bilao. Te naga wai dabe augwali deliba sisinama, asobo sueibao. Te nago ogwa dabe te digibulude bidai asaibao. Te gasa bulu tǫ kantri bidi dabego te nago wegi dabe augwa hagawiade munama, tolasa asaibao.
ISA 60:5 Nago te tebo sulama, te nago gesabidi ula umagia mu yaibao. Te nago hoboludu dali pua pelama, genuai pemene yaibao. Te genuai sipidu wiegi yai nai hauwa nageba sesaibao. Te nago mone hauwa mu te tigidali tǫ kantride saibao.
ISA 60:6 Te Israel hani isąwai Midian bage me Efa bage, te augwaligo gesi kamel hauwa mugo te walu dabe nageba sesaibao. Augwali te tǫ kantri Seba teba pelama, te gol me, te wiegi yai hano denami ebo pauda me, te selasa asaibao. Te we bidi dabego Genuai Bidi, eno genuai nogi ugwaba saibao.
ISA 60:7 Te Kedar me Nebaiot dabego te tigidali wiegi yai sipsip hani nageba sesaibao. Tama ena we bidigo te sipsip dabe seselama, te eno alta daiba ofa ebaso, te ena wiegi yai pemene ebao wali. Te eno be te polalubo be mu pedelama, te genuai nogi elalueibao,” te po wai dao.
ISA 60:8 “Te magi tedela yai nai asesa mu asu, te dagalu pǫ waligo te tamu ąį daidu selasa asobo tiwai yali, te ba hi dabe augwa beba ma bola asobo tiwai ebawe? Te magi nai dawe?
ISA 60:9 Te digibulu buludu asobo sip dabe dao. Mu tama, te digibulu bulu we bidi dabego te eno augwali tau sabo tonaluai. Augwaligo te genuai sip dabe tagala palali, te nago ogwa dabe nageba ma sesalio. Te we bidi dabego te hauwa silva me gol te sip dabego sela somainu tolali. Augwa tama tiali, magi baso meni, augwaligo te eno nageba wiegi yai sę bugagia eyu, genuai nogi elalubo sulama yali, te augwaligo Israelgo Genuai Bidi, te ena Godiba genuai nogi mayu yali, ena te Wiegi Yai Doloba Pai Kolesaga Mu Ebo God dao,” te po wai.
ISA 60:10 “Jerusalem, te gasa bulu tǫ kantri bidi dabego nago genuai obo te masigi dabego ma nigagasaibao. Te augwa king dabego nago sę yaibao. Hasia eno wado po dwai nageba wali, te eno dene nageba mawai. Tiali goli, megi eno bugai haliga eyu, te nageba olo tau sabo wiegi yai kolesaga ebao.
ISA 60:11 Te nago genuai obo sunumi dabe te giligade me hulide dalalueibao, magi baso meni, te gasa bulu tǫ kantri we bidi dabego te augwa mone sesemane sogo nageba sesaibao. Te augwaligo augwa king dabe me te nageba olo mu sę ebo bidi tiwai emainu odasa asaibao.
ISA 60:12 Tiali goli, te nage dologoba aselama, nago sę isąbo bulu tǫ kantri dabe, te augwali dolama, mu silaibao,” wali.
ISA 60:13 “Te bidi Lebanon genuai busiba holama, te bobage bobage sawi yai ni wuli, me saipres, me te gasa wiegi yai ni dabe togolama, te augwaligo nageba sesaibao. Te ni dabe dali, te bidi dabego eno be ma sęnama, te be gasa sawi wiegi yai mu pedelaibao. Ena te ena duabo sia kingde dugulalu, tama te be da eno sągą teba manama elalubo tiwai elalueibao. Tama te be eno polalubo be mu pedelama, tama aga genuai nogi elalueibao.
ISA 60:14 Te polobadu nageba dwai sę eyu, te nage godolo homu isąwani hani dabe, te augwa tobolu basiasa nageba asaibao. Te augwa kidu sugunugulama, te nago sągą pąde augwa tobolu basigulama, te nageba genuai nogi mawaibao. Te augwa nage nogi te tiwai weyu, ‘Genuai Bidigo Taun da,’ te ‘Saion da,’ waibao, ‘te Israel Godigo Taun, aga te Wiegi Yai Doloba Pai Kolesaga Ebo God mu dao.’”
ISA 60:15 “Jerusalem, nage ololama, olo elalu, te nago sunumi dabede bidi iba oba soyu me isąwai. Nage te we tiwai bidiyu, te aga bidigo aga godolo isąma, tagalobaso, aga wi pali. Tiali goli, te eno nage te gasa sawi wiegi yai pedalumainu ilama, te nage polalu, polalubo mu pedalubaso, te we bidi dabego nageba wiegi yai homu pemene mu yaibao. Tama nage te tiwai naga sesemane sogo bidada pidu, bidada paibao.
ISA 60:16 Te nago wiegi wiegi yai nai te gasa kantride siyu, te king dabego augwa wiegi yai sawi yai nai nageba mawaibao. Tama nago te tiwai koneama, ena naga te Genuai Bidi da waibao. Ena te ena we bidi ma sabo God dao, ena te nage posolalu, tonalu, tau sabo God, ena te Jekopgo hani dabego bomai God dao,” wali.
ISA 60:17 “Te eno nago bras hasegelama, tama nago gol munolueibao. Me nago ain hasegelama, tama nago silva munolueibao. Te eno nago ni nami dabe me hasegelama, tama nago bras elalueibao, me nago masigi dabe hasegelama, nago ain elalueibao. Te eno wiegi yai bugagia haliga nagame homu elama, dugulaluabo kolesaga nigilaibao, te doloba pai kolesagago nage bilibo dodolaibao. Te niwai bidi mego nage tonalu, nageba dwai sę me egobeo.
ISA 60:18 Te nago tonalubo tigidali tǫ habu badu te bidi dabe munu me ma hwįgobeo. Awe, nago tǫde me te doado bage alubo kilikili me egobeo. Te nago genuai obo nogi te tiwai elalueibao, ‘Genuai Bidigo aga we bidi dabe ma salio,’ waibao. Te nago genuai sunumide te tiwai nogi elalueibao, ‘Genuai Nogi Mao,’” wai.
ISA 60:19 “Te giligago nageba te bubugade ula mayu, elalubo tiwai munu me elalusiąyu, te poluago me nageba ula mayu, me egobeo. Menio. Genuai Bidi ena digi ena te giliga tiwai, me polua tiwai ula elalu, te eno sesemane nageba ula maduaibao. Te ena, nago God, ena te genuai ula elalu, te nago au ilibo nai elalubo dao.
ISA 60:20 Nago te giliga me polua iba dega sigi pelama, te be hulia siyu ebo me pedalugobeo, magi baso meni, ena Genuai Bidi, sesemane sogo ena te nago ula tiwai elalueibao. Tama nago sęgę dali homu dene ebo sogo me tigidali silaibao.
ISA 60:21 Te sogo te nago we bidi tigidaligo doloba pai kolesaga naga eyu, te eno augwa tǫ da olama, sa muani tǫ te augwa saibao, tama augwa tede sesemane bidada paibao. Te ena nogogo digi eno augwali te deli hani we bidi pedalumainu ilali, tama augwali te eno bulai ni nologo tiwai pedelali. Eno tama tiali, te gasa hani we bidi dabego sulama, te enaba genuai nogi momainogo tiai dao.
ISA 60:22 Jerusalem, te nagede bidibo mena bidi aga nogi me elalusiąbaso, te tagalao, aga te genuai hani wai dabego aya mu pedelaibao. Te dwasianu mu yali hani dabe te augwali umabo pedalu, te augwali genuai bomai kantri we bidi tiwai pedelaibao. Ena Genuai Bidigo eno te po obao, te sę dabe te eno bodolu muani sogo polo asesa pedelaibao,” te po wai dao.
ISA 61:1 Tigidali Bomo Elalubo Godigo Mobo Noma Bidi enaba bidagasali, magi baso meni, Genuai Bidi aga digi eno toboluba wel gelali, te ena dąį sa muyu, te aga wiegi yai po te magi doado bage meni yai bidi dabe selasa pomainu yai. Te agai ena tagala palali, te haliga sęgę genuai elalubo bidi dabego sęgę silimainu yai, te kalabuside bidibo bidi dabeba po pusu, te augwa kalabus tagalama, olo pao po omainogo yai.
ISA 61:2 Agai ena tagala palu, te tama po pusao wali, te dago Genuai Bidi, Godigo sę yabo sogo pedelalio, te aga we bidiba wiegi yai sę bugagia ilama, te boi bidi dabeba dwai dene mawaibao, wai. Te agai ena tagala palali, te homu dene eyu, gela wabo we bidi dabego haliga dąų walomainu tagala palai dao.
ISA 61:3 Te Saionde gela udubo we bidi dabeba eno te nagame yai haliga dua eyu, pemene ebo homu me selasa asaibao, te augwa bomo silali bageba tama tiwaibao. Augwali homu dene ebaso, te sia keli augwa toboluba muani. Tiali goli, eno te nai hasegelama, tama dwagi yai au yabo nai augwaliba mueibao. Awe, eno augwaligo tigiba te wiegi yai denami ebo wel mawaibao, tama augwali homu dene ebo tagalama, dwagi yai homu pemene eyu bidaibao. Te augwa bomo ma selama, te Genuai Bidiba pemene ebo balia waibao. Augwa tigidali te doloba pai kolesaga naga ebo sę bomo yaibao. Te gasa bidi dabego sueibao, augwali te Genuai Bidigo digi bulali ni kali tiwai elalubao, tama augwaligo Genuai Bidigo nogi ugwaba saibao.
ISA 61:4 Te dage we bidi dabego te polobadu dolali taun ma nigiyu, tama dagego te kibu be hauwa dolai elaluali nai tigidali ma dodolaibao.
ISA 61:5 Te gasa bulu tǫ kantri bidi dabe aselama, dagego sę yagasaibao. Te dagego sipsip dabe augwaligo tonalu, te augwa tǫ elama, nai bulaibao. Tama augwaligo te dagego wain gi me tonaluaibao.
ISA 61:6 Tiali goli, duga digi dage te Genuai Bidigo pris bidiyu, te augwaligo dage nogi weyu, te dena Godigo sę bidi da waibao. Te duga nai hauwa elaluaibao, te gasa tǫ kantri bidi dabego sela asai. Te augwaligo wiegi yai nai hauwa dageba mobaso, te dage wiegi yai homu mu pemene yaibao.
ISA 61:7 Polobadu te dage hale dwai mu elama, duga gesabidi seselaluali. Tiali goli, dage te duga tǫde digi bidaibao, te dagego nai hauwa mu siyu, te dagego polobadu elaluali nai mu edelaibao, te dage pemene umabo mu yaibao. Tama dagego te ebo homu pemene sesemane sogo elalua paibao.
ISA 61:8 Magi baso meni. Genuai Bidigo te po wai, “Eno te doloba pai kolesaga naga godolo ebao. Eno te bidi elama nai wi sabo kolesaga, me te gasa bageba dwai sę ebo kolesaga, te hagela mu ebao. Te eno we bidi dabe te gasa bidi dabego augwaliba mani dwai sę ebo sęgę hauwa tolali, te mu tama te megi eno augwaliba wiegi yai nai mu mawaibao. Te eno bomo yai po me deli augwali dali dąų walaibao, tama te dąų walali bomo yai po sesemane elalua paibao.
ISA 61:9 Te eno we bidigo bulai wąį wai dabe te gasa tǫ kantri hani we bidi tomode genuai nogi elalueibao. Te augwali subo we bidi dabe, te augwa te tiwai koneaibao, te hani dabe te eno hani dabe dao, Genuai Bidi, ena digi eno augwali wiegi yai ilaibao,” wali.
ISA 61:10 Te eno pemene ebo wiegi yai balia Godiba waibao, eno Genuai Bidi dao. Te eno pemene umabo mu yaibao, magi baso meni, agai ena ma sali. Te aga wiegi yai sogo te aga doloba pai kolesagago ena te bobobage wiegi yai ugwago mesega sabo tiwai yali, te ena te we sabo bidigo au ebo tiwai eyu, te we aga bidigo aga kębo sogode au ebo tiwai yai dao.
ISA 61:11 Magi baso meni. God, Genuai Bidigo doloba pai kolesaga dali, te aga nogi ugwaba sabo kolesaga dali, te we bidi dabe tomode pedelaibao, te gide bulali nai wai kulubi pedelama, te genuai ebo tiwai yaibao. Tama te gasa Israel hani isąwai we bidi dabe tigidaligo sumainogo yaibao.
ISA 62:1 Jerusalem, nage tobade te eno po hanilama, bomo elama weyu, te Genuai Bidigo nageba wiegi yai sę yao po obao. Te eno pedauwali me pania sogobeo. Mu menio. Te eno Genuai Bidiba i udu, te Genuai Bidigo te bugagia wiegi yai doloba pai kolesaga nageba eyu, te kigamu nanobo giliga ula tiwai eyu, te hulide domanobo sole ula ebo tiwai teba usu numainogo yaibao.
ISA 62:2 Tama te gasa tǫ kantri we bidi dabego nago te doloba pai kolesaga ebo sulama, te augwa king dabego te nago bomo me genuai nogi elalubo sueibao. Te augwa nage gesi noma nogi nogi yaibao, te nogi Genuai Bidigo digi nageba mawaibao.
ISA 62:3 Nage te gasa sawi yai kingo madi te Genuai Bidi aga nogode tolalubo tiwai yaibao. Awe, nage te aga nogode tolalubo wiegi yai au yabo nai tiwai yaibao.
ISA 62:4 Tama te bidi dabego nageba te tiwai nogi ma nogisąyu, “Genuai Bidigo aga tagalai da,” me wagobeo. Te nago tǫ augwaligo te tiwai nogi me wagobeo, “Hobede ya, te tǫ dolama, olo elalubao,” wagobeo. Menio. Te augwaligo nage gesi nogi te tiwai waibao, “Eno wiegi yai homu pemene agaba ebo dao.” Te nago tǫ augwaligo te tiwai nogi yaibao, “We bidigo salio,” magi baso meni, Genuai Bidigo bugai haliga eyu, wiegi yai pemene umabo nageba ebao. Te nago tǫ bugagia ma elalu, te we tiwai, te bidigo aga ma sabo tiwai yaibao.
ISA 62:5 Te naga wai dabego nage selama, te nage dali bugagia bidibo tiwai yaibao, te gesi ogwa bidigo te gesi wegi selama, te augwa si bugagia mu bidibo tiwai ebao. Te Genuai Bidigo wiegi yai pemene nageba yaibao, te gesi noma sogo bidigo we selama, te aga weba wiegi yai homu pemene ebo tiwai ebo dao.
ISA 62:6 O Jerusalem, te nago masigigo nigai genuai obo ugwadu daide eno te tonalubo bidi muai, tama augwaligo pedauwali te giligade hulide me pania sogobeo. Eno augwaliba te tiwai po wali, “Dage te Genuai Bidiba i wabo bidi dabe, dagego toma me nogobeo. Menio.
ISA 62:7 Dagego bomo elama, agaba i ola pidu, agai te Jerusalem bomo ma iliboba usu nao, tama Jerusalem te tigidali tǫde we bidi gedude polalu mu pedelaibao,” eno te po wali.
ISA 62:8 Genuai Bidigo nogo guni sisu muyu, bomai po dąų wali, te aga genuai bomode agai te dąų wali po mu pedelaibao. Agai po te tiwai, “Ena Genuai Bidi, te eno te boi bidi dabego nago we bidi dabego te sę dene elama, bulubo wit dabe munu ma sagasomainu me iligobeo. Tama eno te gasa tǫ kantri dabego te nago we bidigo nigibo wain ąį sagasomainogo me egobeo. Menio.
ISA 62:9 Te nago we bidi augwa digi naga te inayu tau yali wit selama, te bret nigilama tueibao. Te augwaligo ena Genuai Bidi, te enaba genuai nogi mawaibao. Te nago we bidi dabe augwa te inawani wain du dabe selama, te wain ąį nigaibao. Tama augwa te eno be obo tomoba sela aselama, te ąį augwa tuyu, te wiegi yai pemene enaba yaibao,” te po wai.
ISA 62:10 Dage te megi Jerusalemde bidibo hani dabe, dage tigidaligo taun tagaliąo. Te taun tagalama, sunumi bogoba pelama, te sunumi bugagia dodolao, te duga we bidi dabe ma asobao. Te augwa sunumi bugagia sisilao, te sunumide elalubo masigi dabe sela sąyao. Tama te tigidali tǫ kantride bidibo hani we bidigo suabo plak me deli nide walao.
ISA 62:11 Nage Jerusalem, nago te tiwai koneao, Genuai Bidigo te tigidali tǫde we bidiba weyu, nageba te po pusumainogo yali, “Saion, suao. Te nago we bidi dabe ma sabo bidi, aga asobao. Suao. Te agai aga we bidi dabe odasa asu, te aga te boi hwįnama, te wiegi yai nai sali tiwai yali dao,” te po wao.
ISA 62:12 Te augwaligo nago we bidi te tiwai nogi poaibao, “Te Genuai Bidigo tedali gasagi yai we bidi dao,” me “Te we bidi dabe te Genuai Bidigo ma salio.” Te augwaligo nage nogi te tiwai waibao, “Genuai Bidigo godolo mu ebo taun da,” me, te “Genuai Bidi ma aselama, bidibo taun dao,” waibao.
ISA 63:1 Te king bidi tiwai bugagia mu au elama, te taun Bosra te tǫ kantri Idom badu tagalama asobo bidi de dawe? Te aga genuai bomo dali wele sesa asobo bidi de dawe? Te aga gudali ugwa tonani te mama mu yalio. “Te ena, Genuai Bidi tama dao. Eno te we bidi dabe ma sabo bomo elalubao, tama eno te tiwai po obao, te eno doloba pai kolesagade, eno te augwaligo boi bidi dabe aiyaba elaluaibao,” wali.
ISA 63:2 Magi elama te nago gudali ugwa dabede mama kaneme mu yali, te bidi te wain nigibo tomoba pali tiwai elama, te wain wai agabo digi pabo tiwai yali da, agawe?
ISA 63:3 “Eno bulu tǫ kantri dabe agawali, te bidigo wain du wai te masigi pou tomode agabo tiwai yali, te gasa tǫ kantri bidi me deligo ena tau me sabeo. Eno augwaliba haliga sębę eyu, wado dwai mu olama, te eno augwali bomonama mu agawali madi te augwa kaneme gela tagalu, te eno gudali ugwa dabede kaneme dagana salio.
ISA 63:4 Eno te ena sainu sa muani we bidi dabe sabo sogo pedelalio, tama tiyu, megi sogo te eno augwaligo boi bidi dabeba dene mabo sogo dao.
ISA 63:5 Ena dwagila mu midiga sayu tonani, te tiwai te ena tau sabo bidi me elalubeo. Tialima, te ena bomogo digi te eno genuai haliga sębęgo me, eno te ena we bidi dabe ma siyu, te eno augwaligo boi dabe aiyaba elaluai dao.
ISA 63:6 Te eno genuai haliga sębęgo, eno tigidali we bidi dabe agala salio. Te eno haliga sębę ebo kabude te ąį augwa tumainao, te augwali aiyoge page dwai mu yalio. Te eno augwaligo kaneme tǫba gelu tiai dao,” wali.
ISA 63:7 Te eno Genuai Bidigo wiegi yai olo mu tau sabo kolesaga po pusubao. Te eno aga nogi ugwaba siyu, te agai da tau siyu, wiegi yai kolesaga hauwa yali po pusaibao. Awe, te aga genuai olo mu tau sabo wiegi yai kolesaga, me homu dene ebogo, agai te Israel haniba wiegi yai sę mu yalio.
ISA 63:8 Genuai Bidigo te po wali, “Te hani dabe, augwali te eno hani we bidi dabe mu da, te augwa hagoma elama, eno po me sela sągobeo.” Tama te aga augwali ma sali bidi pedelai dao.
ISA 63:9 Te augwali dene me sęgę tolali sogo, Genuai Bidi me augwali dali te dene me sęgę tolali. Te agai haliga augwalide homu dene ebaso, te agai augwaliba te olo mu tau sabo wiegi yai kolesaga yali, tama aga digi te mobo bidi ensel tiwai pedelama, te augwali ma sali. Te tobage sogo sesabi mu elama, te agai augwali tolalu, te augwali bugagia mu tonaluai dao.
ISA 63:10 Tialima, te augwaligo agaba hagoma eyu, te agai homu ogwa wai mobo te haliga sęgę mu ilali. Tama tibaso, aga digi augwaliba boi bidi elama, te augwaliba hwįani.
ISA 63:11 Tialima, nosali augwa te polobadu yali sogoba homu kone palali. Augwa te Moses me aga we bidi dabeba homu kone ma palama, augwa te tiwai po wai, “Te Genuai Bidi mena bidibawe? Polobadu agai te polalubo bidi aga we bidi dabe dali odasa asu, te tamu ąį nogeali Genuai Bidi mena bidibawe? Polobadu agai homu ogwa wai mobo te augwali dali bidimainu yai dao.
ISA 63:12 Agai te aga genuai bomo te Mosesba mawai. Agai te tamu ąį si badu peda somainu elama, te aga we bidi dabe te ąį nogelama, u badu pedaiba sabolali, tama te kolesagade aga genuai nogi sali, te sesemane elalumainu yai dao.
ISA 63:13 Te augwali asobodu aga polasa peyu, augwali te tamu ąį dologo badu mu elalubo tǫdu pali. Te augwali te bulu wa pai pesagede bidibo bulu uni hos dabe pabo tiwai bomonama asesa pali, te augwali me tula mubeo.
ISA 63:14 Te Genuai Bidigo Mobogo digi te aga we bidiba nagame yai homu mayu, te augwali toma nomainu ilali, te bulmakau dabe te nosai hauwa elaluboba pelama, nai tuyu, toma nomainu ebo tiwai yalio,” augwaligo te tiwai po wai. Genuai Bidi, nago te bomai sę dabe yali, tama te kolesagade nago te naga we bidi dabe pabo sunumi dodolali, te tigidali we bidigo nago genuai nogi me bomo konemainu yai dao.
ISA 63:15 Genuai Bidi, nage te naga bulu pesage dagalude bidibao, te tedali gasagi yai mu dao, te bulu pesagede te nago genuai ula me bomo pągąnalubao. Tiali goli, te nago aiyaba tonoyu, te da suao. Magi baso nage hogodama, te nago genuai bomo daba waselisąma ebawe? Nago homu dene eyu, olo tau sabo wiegi yai kolesaga te dabolo me ola mabeo. Te nago da godolo homu me isiąyu ebo da, agawe?
ISA 63:16 Tiali, nage te dago aya dao. Te da bulai wąį monu aya, Abraham me Jekop augwali te da dali me bidibe, te augwaligo da konesiąwai. Tialima, nage Genuai Bidi, nage dago aya mu dao. Tama nago nogi te tiwai elalubao, “Te da tudibadu tonalu, polobadu digi tau sesa asali bidi dao.”
ISA 63:17 Genuai Bidi, magi baso nago da te besela palama, bilalumainu eyu, te dago nago doloba pai sunumi wali pisąmainogo ebawe? Magi baso nago dago haliga me homu kolesaga dąų weyu, te dago nageba wi isąma, te nago dologode bidisąmainu ebawe? Nago naga sę bidi dabe da homugo koneama, te nage ma aselama, da dali bidagasao, te naga digi nago sa muai hani dabe dao.
ISA 63:18 Te pęwądage sogo naga nago digi te sa muani be te nago we bidi dago nogode elaluali, te nosali dena boi bidi dabe asu, dolama, te nago be mesegelama, agala dolali.
ISA 63:19 Tama megi da, da we bidi hobedagia mu bidibo tiwai ebao, polobadu nago tonalu, tolalusąwai tiwai bidibao. Tama da hani dabe te nago nogi augwalide musiąwai bage tiwai bidibao.
ISA 64:1 O Genuai Bidi, dago homugo nage te dagalu buga sąnama, dulao homu ebao, te bulu du dabe nage asobo sogo dwai midigi mu saibao.
ISA 64:2 Augwali te siade ulalubo sene sospende tomode te posolo ąį punuguna tagalobo tiwai yaibao. Nage te naga genuai bomo dali asobaso, te boi bidi dabego nago nogi konemainao, te nage augwaliba pedalubo sogo te tigidali tǫ kantri we bidi dabe wi elama, noma saibao.
ISA 64:3 Polobadu nage asobode, te gasagi yai nai tedali mu pedelali, tama dago te suyu, dwai noma mu sali. Te bulu du dabe nage asali sogo, te dwai midigi mu sai dao.
ISA 64:4 Polobadu te bidi mego te god me deli tobage bomai sę yali po odobeo, te we bidi tau siyu, te konealu tonaluabo sę. Ma, bidigo aga gedugo te god me deligo te tobage bomai sę ebo subeo. Menio. Genuai Bidi, nago naga te tiwai bomai sę ebo dao.
ISA 64:5 Nago pemene eyu, te doloba pai kolesaga mu elama, nago te godolo homu ebo kolesaga wali pabo bidi dabe tau sagasobo dao. Tiali goli, nago daba wado po wai goli, te dago kolesaga me hasegelebeo. Dago te dwai sę yabo bomo iduai dao.
ISA 64:6 Da tigidaligo dwai sę eyu, te da nago gedude meda yai mu elalubao. Te kolesaga dabe dago homugo doloba pai kolesaga da olama, te kolesaga dabe te dago gawea pai nai tiwai dao, tiali goli dago te ebo, augwali nago gedude dwai mu eyu, te ugwa meda dwai mu tiwai ebao. Te dena ebo dwai sęgo te pąde da mu haga yabo homu yai, te wa pai ni yabe te waligo sela pabo tiwai yaibao wali.
ISA 64:7 Te nageba gedu haluasa po weyu, te nage nogi wabo bidi meni yai, te nage pąba asu, nageba homu kolesaga kęą pabo bidi meni, magi baso meni, nago naga gesabidi daba geme dula selama elalu, te nago dena sęgęgo da dodolomainu ilama, te da dwai mu bidibao.
ISA 64:8 Tialima, Genuai Bidi, nage dago aya dao. Nage te sospen sene tǫgo nigibo bidi tiwai, tama da nago te sene nigainu sabo tǫ tiwai elalubao. Te nago nogogo digi da tigidali nigibo dao.
ISA 64:9 O Genuai Bidi, nago dade haliga sębę mu idu, te sesemane sogo dago ebo dwai sęde homu kone paludigio. Menio. Da tigidali te naga we bidi da homu elama, te nago daba olo mu tau sabo wiegi yai kolesaga yao.
ISA 64:10 Te nago tedali gasagi yai taun dabe te olo bulu dwai tǫ pesage tiwai elalubao, te Jerusalem me mu dolama, tede bidi me bidibeo.
ISA 64:11 Tama nago tempel be da, nago te po weyu, da teba pelama, nageba lotu waibao wali, te me siago delama, tigidali dolali. Polobadu te be te gasa sawi yai mu elalu, te da bulali wąį dabe teba pelama, te nago nogi ugwaba sali. Tiali, megi da, te dolali, te dago godolo homu yali gasa wiegi yai pesage dabe, augwali me te dolama elalubao wai dao.
ISA 64:12 Genuai Bidi, nago te sę dabe sulama, nago haliga hogodiyu, te magi sę me deli yabo homu ebo meni da, agawe? Te nago homugo dago te sęgę hauwa tolodumaina homu elama, tama nago dago gedu haluasa po wabo wei ponisąma eba, agawe?
ISA 65:1 Genuai Bidigo te po wali, “Ena, Genuai Bidi, te eno augwali tau somainu gedu haluasa po wasiąbo we bidigo gedu haluasa po wabo odainu, te tonalu sisilalubao. Te ena bidibo augwali enaba asobo tonalubao, tiali te augwaligo ena gegabo homu isąwani. Eno te po wali, ‘Sesemane sogo ena bidibo, te dage tau sainu ebao,’ tiali goli augwali te enade digibulu bidiyu, te eno nogi augwalide musiąwai hani bidibo tiwai ebo dao.
ISA 65:2 Te tigidali side eno nogo dinigalubao, tama eno te eno po sela sąbo we bidi ma sainu tonalubao, te dwai kolesaga ebo sunumidu augwa homugo digi wali bilibo we bidi te ma sainu tebo dao.
ISA 65:3 Te eno gedude augwa te eno haliga sębę elama, wado po wabo tobage kolesaga ebao. Augwa te Godigo po odisąbo bidi dabego ebo kolesaga yai. Augwa te lotu wabo pesage te gide elalubo te sisinama, ofa eyu, tama augwa te tibo god dabego altaba pelama, te wiegi yai denami yabo hano ilibo pauda ulubo dao.
ISA 65:4 Tama hulide augwa te gų pageba bidalugi pelama, te isai bidi dabede po sainogo ebo dao. Tama augwa te kibu mi tulama, te gasa tobage hasa te eno gedude wiegi yai isąbo sup nai ąį me tubo dao.
ISA 65:5 Te augwa gasa bageba te tiwai po weyu, ‘Dage dade digibulu bidao, magi baso meni, dago tigide habu selali. Tama tibaso, dage da dali me kisalugobeo,’ te po wabo dao. Eno te hani dabego te tobage kolesaga ebo te eno homude hagela yali. Augwa te tama tebode te eno haliga sębę dwai mu augwaliba ebao. Augwalide eno te haliga sębę ebo te mu siligobeo, te sia bogoli gamonama dabo tiwai ebo dao,” wali.
ISA 65:6 “Suao. Ena Genuai Bidi, eno te dage dwai we bidi dabego ebo dwai sę tigidali te eno bukude asęani. Tede eno sagia sogobeo. Menio. Te eno dageba dwai dene mayu, te duga yali dwai sę tigidalide dolo mu wei ponaibao.
ISA 65:7 Te eno duga yali sęgo sęgę dali, te duga bulai wąį nǫų dabego yali sęgę dali tolomainu yaibao. Te duga bulai wąį nǫų dabe te lotu wabo pesage te bulu du bageba holama, tama augwa te wiegi yai hano denami ilibo ofa eyu, tama augwa te haniani dwai kolesaga ena gedude yali. Tama eno augwa yali dwai sę tigidali usu nama, dolo mu te wei ponaibao,” wali.
ISA 65:8 Genuai Bidigo te po wai, “Te bidi me deligo te bono du wain te du pa elalubo nogogo sąwainu ebaso, gasa bidigo te po wagi da, ‘Tonalu bolo yao,’ wai. ‘Eno te wiegi yai wain wai du meba te pąde elalubo suali. Dago selama, te tuabo wain ąį meba nigibaso, usu yaibao,’ wai. Te tiwai tama, ena Genuai Bidi, eno te tigidali Israel we bidi me dologobeo, magi baso meni, augwali eno sę bidi dabe dao.
ISA 65:9 Te eno Juda dabeba wiegi yai sę eyu, te tigidali Israel haniba me tiaibao. Eno augwali te genuai we bidi hani pedalumainu ilaibao, te augwali eno bulu du pesagede bidalumainu yaibao. Te hani we bidi dabe eno augwali sa munama, te eno sę bidi bidimainogo yai, te tǫde augwali bidimainu yai dao.
ISA 65:10 Te augwa sipsip dabe, te bulmakau me, te tǫde pągąnalueibao, te Saron te giliga dega sigulubo pedai te odogo pesagede gagalasa pali, te Akor giliga pedalubo badu te odogo tǫba usu nigi paibao. Te augwa nosai hauwa elalu, te nai tuyu, toma neyu, bidaibao. Eno te sę dabe ebo te ena gegebo homu elalubo we bidi dabeba tiaibao,” te po wali.
ISA 65:11 “Tiali goli, dage da, te dage ena tudiba muyu, te eno bulu du, te Saionba asisąma, te enaba lotu wagasisąbo hani dabe, dage te dwai dene mu saibao. Dagego te Gat me Meni, te siba nai me wain ąį mayu, lotu wabo dao. Te tibo god dabe te augwaligo dage tau somainu ebo da homu elama, te duga wiegi yai sogo elalueiba homu yalio.
ISA 65:12 Tiali goli, eno gasagi yai sogo dageba sa muai. Te boi dabego dageba hwįagaselama, te dage augwa bainat hwą dabego ela mueibao. Te duga kidu sugunama, te tobolu tǫba basigulama, te boi bidi dabego dage tobolu mage togwaibao. Te sę dabe pedelaibao, magi baso meni, eno dage i wali, te dagego eno i wabo wei ponobeo. Te eno po me dageba pusali, tiali dagego wali pabeo. Menio. Dagego eno po sela sąyu, te eno gedude dwai kolesaga naga yali, te eno godolo homu isąwai kolesaga dabe mu ebao wali.
ISA 65:13 Tama tibaso, ena God, Genuai Bidi, eno te tama po obao. Te eno sę bidi dabego te nai me ąį hauwa elalueibao. Tiali, dage te ena tudiba mubo hani dabe, te dage nai sili bidu, te tuabo ąį meni yaibao. Te eno hani dabe, te augwa wiegi yai pemene yaibao, tiali te dage dwai hale mu saibao.
ISA 65:14 Te eno sę bidi dabego haligade te wiegi yai homu pemene pągąnalu, te augwa homu pemene ebo tęąbi po waibao. Te dagego haligade te homu dene ebo pągąnalu, te dagego homu kolesaga kone tųą pelama, te dage gela bomonama mu waibao.
ISA 65:15 Te eno hani dabe, te augwa gasa bageba po dwai wabo sogo da, teda augwa te tiwai po waibao, ‘God, Genuai Bidigo dage dolomainu yaibao, te agai te dwai hani dabe dolali tiwai yao,’ waibao. Tama te bidi dabego dage nogi te dwai nai homu tiwai yaibao, tiali goli eno te wiegi yai gesi nogi te ena sę bidi dabeba mawaibao.
ISA 65:16 Tama te tigidali tǫ habu pedai badude, te bidi dabego gedu haluasa po enaba weyu, te mu po naga wabo God da po weyu, te augwali wiegi yai bugagia ilao po enaba hanalueibao. Te bidi dabego augwa po dąų walabo homu elama, augwa te eno nogi delide naga te mu po dao waibao. Tama augwa te polobadu elaluali haliga sęgę me dwai sę yali dabe te homu kone gegeda palaibao, te ena, Genuai Bidi, te eno augwa te polobadu yali dwai sę dabeba homu kone mu gegeda palaibao,” wali.
ISA 65:17 Genuai Bidigo te tiwai po wali, “Suao, eno gesi dagalu me tǫ nigaibao. Te bidi dabego te polobadu pedelali naiba homu kone me palogobeo. Augwaligo te nai mu gegeda paibao.
ISA 65:18 Dagego te eno megi nigali gesi naiba bugai haliga eyu, wiegi yai pemene sesemane sogo yao. Magi baso meni. Te eno nigainogo ebo gesi Jerusalem te we bidi dabego godolo elama, wiegi yai pemene yabo pesage pedelaibao, te aga we bidi dabe te bugai haliga mu elama bidaibao.
ISA 65:19 Ena digi me eno wiegi yai pemene te Jerusalemba elama, te ena we bidi dabeba bugai haliga yaibao. Te gesi nigali Jerusalemde te bidi dabe gela wabo kulukulu munu me elalugobeo, te genuai dene elalubo bidi dabego te i wabo sę me elalugobeo.
ISA 65:20 Te dwasianu ogomani dabe me te ogomani bidi elalubo sogo me isigobeo. Menio. Tigidali we bidi te bobobage sogo sesabi elama, mu bidama, te monu dabe mu pedelaibao. Te augwa kibu be bidi sese a naga 100 yia bidali, te tagalao, augwali te gesi tigi elalubo we bidi bidaibao, tiyu augwali me deli te kibu be bidi sese a naga 100 yia bidisiąbadi isibaso, te gasa bagego homugo te Genuai Bidi eno aga isimainu yai da, te homu yaibao,” te po wai dao.
ISA 65:21 “Te eno we bidi dabego te be dabe sęnama, tede bidalueibao. Te augwa te wain gi dabe bulama, te wain du tabila tuyu, bidaibao.
ISA 65:22 Te boi bidi dabe munu ma aselama, te eno we bidi dabe sela sąyu, ela gudulama, te augwaligo beba bidagaselama, te augwa wain gi selama, te wain du tabilama tuyu, me tegobeo. Te eno we bidi dabe sesabi elama, bobobage sogo mu bidaibao, te bomai dila pai ni tiwai elalueibao. Awe, tama augwa digi sę dene elama, pedalubo naide wiegi yai homu pemene elama, bidaibao.
ISA 65:23 Augwa ebo sę te odolali me ela tagalogobeo. Te augwa wai dabe me doloyu, me egobeo, magi baso meni, augwaliba eno te wiegi yai sę bugagia yainu, te sa muani hani dabego wai dabe dao. Te eno augwaliba bugagia wiegi yai sę eyu, te augwa wai dabeba me, te augwa nosali bulabo wąį nǫų wai dabeba te tama tiaibao wali.
ISA 65:24 Te augwa godolo homu eyu, te sabo homu ebo nai po te enaba gedu haluasa po weyu, hanalusiąbadi, te eno augwaligo hanalubode wei ponaibao. Te augwa gedu haluasa po wabo sogo da, teda eno te nai dabe augwaliba mawaibao.
ISA 65:25 Te bulu uni yowi dabe me te sipsip wai dabe augwali hodobo deliba nai tueibao. Te laion dabego te bulmakau dabego nosai tubo tiwai yaibao. Tiali goli, te hasamani dabego da, te tǫ hogomu naga tueibao. Te Genuai Bidi, eno buludu pesage tigidalide, te tigidali nai bugagia elalueibao, te bidi me deligo gasa bidi meba dwai sę iliyu me tegobeo. Ena Genuai Bidi, eno po wai dao,” wali.
ISA 66:1 Genuai Bidigo te po wai, “Dagalu da, te ena dugabo sia king tiwai elalu, te tǫ eno sągą ugwadu mubo pesage dao. Tega. Te dagego eno be sę ebo usugowe? Te mena badu ena toma nabo pesage elalueibawe?
ISA 66:2 Genuai Bidi ena digi, eno te dagalu me tǫ tigidali nai nigilama, te augwali pedelama, megi elalubao. Eno te tobage bidi dabeba bugagia haliga yaibao, te augwa digi aiyaba elaluama, te augwa yali dwai sęde homu dene eyu, enaba wi elama, te eno po dologoba aselama, bidibo bidi.”
ISA 66:3 “Tiali goli, te augwa digi dobo homu wali pabo we bidi dabego augwa te haniani dwai kolesaga godolo mu eyu, tama augwa te enaba lotu mu obao, te homu ebao. Tiali goli, augwaligo enaba te ofa ebo tigidali te eno godolo mu me isąwai. Te augwaligo bulmakau elama, enaba ofa ebo sogo, eno suali, augwa te bidi elali tiwai ebao. Te augwa sipsip wai elebo sogo, eno suali, augwa te yowi elama, te enaba ofa tiwai yali. Augwa te wit dabe ofa ebo sogo, eno suali, augwa te kibu kaneme ofa ebo tiwai yali. Te augwa wiegi yai denami ebo hano ebo ofa ebo sogo, eno suali, augwa te tibo god piksa me deliba ofa ebo tiwai yai dao.
ISA 66:4 Te pagede tama te augwaligo tolabo sęgę eno sa muani, augwa te wi mu ebo sęgę dao. Magi baso meni, eno augwaliba i obadi, te eno i wabo augwaligo wei ponobeo. Te eno po me augwaliba pusubadi, tiali goli augwa wali me pabeo. Menio. Augwa eno po sela sąyu, te eno gedude dwai kolesaga naga yali, te eno godolo homu isąbo kolesaga dabe mu dao.”
ISA 66:5 “Dage te wi elama, te Genuai Bidi, eno po dologoba asobo hani dabe, dagego te megi eno dageba pusainu ebo po odao. Dage ena wali asobo bomo yai, tama te duga deli hani dabego te dage godolu mu me isąma, te augwaligo dage tudiba muai. Te augwaligo dageba posobo po weyu, dageba te tiwai po wali, ‘Te Genuai Bidi aga genuai bomo dali asomainu eyu, te dage pemene ilimainao, te tebo dago sueibao.’ Tialima, eno te po obao, te dagego augwali dwai hale mu sabo sueibao, te po wali.
ISA 66:6 Te taun tomode genuai i weyu, te eno be tomode kulukulu wabo odao. Te eno i me kulukulu weyu ebao, te Genuai Bidi dao. Eno te ena boi bidi dabeba dwai dene mayu, te augwa yali dwai kolesaga wei ponaibao,” wali.
ISA 66:7 “Ena, Genuai Bidi, eno te po obao, eno taun te wego wai deli sogo polo tama ame nabo tiwai yaibao. Aga te wai ame nabo tigi dene isąbadi, tama te wai polo pedelali.
ISA 66:8 Dagego te tobage sę polobadu sulama, odai da homu eba, agawe? Te bulu tǫ kantri me deli te deli sogo pedalubo da, agawe? Te genuai hani we bidi me deli te deli sogo tama me pedalubo homu eba, agawe? Tiali, Saion aga te wai ame nabo tigi dene ebo gagalobo sogo, te polo tama aga te wai ame naibao.
ISA 66:9 Ena God, Genuai Bidi, ena digi eno aga te wai ame nabo dene ilali. Tama tibaso, te magi elama eno agai haliga paniama, eno aga wai somainu iligobe dawe? Ena da, ena dagego God dao.”
ISA 66:10 “Dage te Jerusalem godolo mu ebo hani dabe, dagego aga dali wiegi yai pemene yao. Dage agade te homu dene elama, gela weyu yali hani dabe, megi da, dagego aga dali wiegi yai homu pemene yao.
ISA 66:11 Magi baso meni. Aga bugagia bidibaso, te duga wiegi yai pemene elama, agade te wiegi yai nai hauwa saibao. Aga te dagego ida me deli tiwai elama, tama dagego aga ame tuyu, te dage bugagia mu pągąnama, te haliga nagame yai bidaibao,” wali.
ISA 66:12 Genuai Bidigo te tiwai po wali, “Magi baso meni. Eno te Jerusalem bugagia mu elalumainu yaibao, te sesemane sogo agai te gasa tǫ kantrigo wiegi yai nai dabe hauwa saibao. Te aga magi deli me sǫą pisąma, te wę sesemane sogo asudu, te sula sisąbo tiwai yaibao. Te dagego te nai dabe siyu, wiegi yai pemene mu yaibao, te waigo idago ame tuyu, pemene ebo tiwai yaibao, te waigo aga idago sabilibaso, pemene ebo tiwai eyu, te idago aga telede pilama, aga dali gagali ebo tiwai ebo dao.
ISA 66:13 Te eno dage bugagia mu tonalu, te idago aga wai bǫų bugagia tonalubo tiwai eyu, te aga waigo haliga dua nagame ilibo po wabo tiwai yaibao. Dage te Jerusalemde bidiyu, te duga haliga nagame elama bidaibao.
ISA 66:14 Eno te tama sę dageba ebo subaso, te duga haliga pemene mu elama, te dage genuai bomai hani mu pedelaibao. Te dage eno sę bidi dabego te duga Genuai Bidi eno bomo bugagia koneaibao. Tiali goli, eno boi bidi dabego te eno haliga sębę koneyu, gę naibao.” Genuai Bidigo te po wai.
ISA 66:15 Te dagego Genuai Bidi te sia dali asobo sueibao, te aga karisde dugulama, bomonama, umagia mu udayu, te bomai wali asobo tiwai yaibao. Te aga haliga sębę ebo siago te aga boi bidi dabe ulama, te augwali mu silaibao.
ISA 66:16 Magi baso meni. Te Genuai Bidigo isigo te we bidi uluyu, te agai hwą ge bainatgo te we bidi hauwa mu ela mueibao, te augwa yali dwai sę wei ponoyu, tiaibao.
ISA 66:17 Genuai Bidigo te tama po wali, “Te tibo godiba lotu wabo hani dabe, augwa te tibo godigo gedude wiegi yai pedalumainu ebo kolesaga wali peyu, augwa te lotu wagi pabo pesage giba pelama, te augwa polalubo bidi dabego ebo kolesaga wali pelama, augwa te kibu mi, me bolo mi tuali, te gasa nai dabe eno gedude wiegi yai isąbo nai tuali, augwa tigidali dolama, mu silaibao,” wai dao.
ISA 66:18 Genuai Bidigo te po wai, “Eno te we bidi dabe homu kolesaga sulama, tama eno konebao, te megi da, eno te tigidali we bidi dali sisinibo sogo dao, te mena po haniani wabo bage me sisinaibao. Te augwali sisinagasobo sogode, teda augwaligo te eno genuai ula me bomo sueibao.
ISA 66:19 Te eno augwali tomode te dąį me deli pedalumainu ilaibao.” “Tialima, eno te hani meba, te dolisąwani hani bage, te digibulu tǫ kantri we bidiba tagala palama, te eno genuai nogi me bomo te eno genuai bomo ebo po odisąwani we bidi dabeba pusugi pomainu yaibao. Te augwali eno te hani dabe Tarsis, me Pul dabe, me Lidia, te haniba tagala palaibao, te Lidia bage augwali enesigigo ene enebo mu konea pai bidi dabe mu, te Tubal me Gris dabeba, te digibulu bidalubo gasa we bidiba me tagala palaibao.
ISA 66:20 Tama te tǫ kantri we bidi dabego te duga deli hani dabe duga abagi te augwa bulu kantridu enaba te ofa tiwai elama, odasa asaibao. Augwa te augwali te hos dabede, me donki dabede, me kamel dabede, me karisde dugulasa asomainu ilaibao, te augwaligo augwali te eno bulu du Jerusalemba odasa asaibao. Augwaligo augwali enaba odasa asobo, te dage Israelgo te ofa yabo wit te wiegi yai pou dis te eno gedude wiegi yai yaide wit munama, te eno beba sela asobo tiwai yaibao.
ISA 66:21 Tama te augwali meba eno te pris pedalumainu ilaibao, te meba Livai hani bidimainu yaibao,” Genuai Bidigo te po wali.
ISA 66:22 “Ena Genuai Bidi, eno te po obao, te gesi dagalu me gesi tǫ eno nigaibao, te eno gedude sesemane bomo elalueibao, te tiwai duga wai dabe te sesemane sogo bomo elalu, te dagego nogi me sia sogobeo.
ISA 66:23 Te genuai si tigidalide, te gesi poluade nanobo side, me tigidali Sabat side, te tigidali tǫ habu we bidi te asiyu, te ena geduba kidu sugunama, enaba lotu waibao, Genuai Bidi dao.
ISA 66:24 Te augwa eno be tagalobo sogo, te augwa hagoma elama, eno po sela sąwani hani dabe tigi, te tǫde pila muna muna pabo sueibao. Te dwasianu sawi dabego augwa tigi dabe tuyu, te bidada paibao. Te isigo augwa tigi deyu, te me siligobeo. Te tigidali we bidigo te bidi hani dabego tigi sueibao, te damua pai dwai nai mu tiwai yaibao,” God Genuai Bidigo te po wai dao.
JER 1:1 Te e da Jeremaiago po, te Hilkiago ogwa dao. Hilkia te pris hani dabe me deli te Anatot taunde te Benjamin hanigo tǫde bidai.
JER 1:2 Te Josaiago kibu be nogo si, sągągo sela, 13 kibu be wabode, te Emongo ogwa, te Juda king bidali sogo, Genuai Bidigo po Jeremaiabolo mabo gagalai dao.
JER 1:3 Te sogo gagalama, tama bidama nosali, Genuai Bidigo po meba te Jeremaiabolo mayu, te Jehoiakim, te Josaiago ogwa, te king bidali sogo te po mawai. Genuai Bidigo po te Jeremaiabolo maduali, te king Sedekaiago kibu be nogo si, sągągo deli teba usu nigi palio, te Josaiago ogwa dao. Te wabo kibu bede te a naga wabo poluade, te boi bidi dabego te Jerusalem we bidi dabe selama, te gasa tǫ kantriba kalabus sę igi pai dao. Te sę pedalisiąbadi, Genuai Bidigo agai po te Jeremaiabolo maduali.
JER 1:4 Genuai Bidigo ena, Jeremaiabolo te po mabo gagalali sogo, agai te tiwai po wali,
JER 1:5 “Te eno nage naga idago haligade ame nisąbo sogo, eno nage koneai. Te nage naga idago ame nisąbadi, eno nage sa munama, te gasa bulu tǫ kantri dabe tomode te profet sę ela bilabo bidi da homu yai dao,” wali.
JER 1:6 Eno te Genuai Bidigo wali po odolama, te eno agai po wei ponoyu, te tiwai po wali, “Hobede ya, God, Genuai Bidi, ena gesi ogwa bidi mu elalubaso, eno te po pusabo kolesaga konebeo,” po wali.
JER 1:7 Tiali goli, Genuai Bidigo e tama po enabolo wali, “Nago te tiwai po weyu, nage gesi ogwa bidi mu naga da wagio. Menio. Te eno nage gasa bidi hani meba bidiboba tagala palobo sogo da, teda nage augwaliba pagameo. Te eno nageba maiabo po tigidali, te po nago pusao,” wali.
JER 1:8 “Nage augwalide wi me elamuo, magi baso meni, ena nage dali bidiyu, te eno nage augwaligo nogode ma saibao. Ena Genuai Bidi, eno po wai dao,” wali.
JER 1:9 Te po olama, Genuai Bidigo agai nogo eno pedauwaliba munama, tama enaba te tama po wali, “Odao, megi eno po te nago pedauwaliba mubaso, te po nago pusaibao.
JER 1:10 Megi e side eno nageba te gasa bulu tǫ kantri hauwa hani we bidi tonalubo bomo mobao. Eno nageba te kantri dabego gavman gudabo po wabo bomo, me te gavman dolabo po wabo bomo me mayu, te augwaligo gavman ma dodoluyu, ma bulabo po wabo bomo me mawaibao,” te po wai dao.
JER 1:11 Genuai Bidigo enaba te tama po hanalu wali, “Jeremaia, nago magi nai subawe?” Eno agabolo te tiwai po wali, “Eno te ni amon nologo subao.”
JER 1:12 Tama Genuai Bidigo enabolo te tama po wai, “Nago po te dolo obao. Te tiwai naga, eno ena po te bugagia tonalu, te mu po naga pedalumainu ilalibao,” wali.
JER 1:13 Tama Genuai Bidigo enaba te tiwai po ma hanalu wali, “Nago magi nai subawe?” Tama eno te po wai, “Eno te sene sospen me deli te not badu kulugulu weyu ebo subao. Tama te sospen sene te saut pedai badu gea palainu ebao,” wali.
JER 1:14 Tialima, Genuai Bidigo enabolo te tiwai po wali, “Te dolabo genuai nai me deli te not badu tagalama asiyu, tama agai te e Juda dabego tǫde bidibo we bidi tigidali dolaibao,” te po wai.
JER 1:15 “Magi baso meni, ena Genuai Bidi, megi da, eno te not badu tigidali king i olama, augwali te augwa ami bidi dabe dali asaibao. Te king dabe aselama, te augwa king dugabo sia sai te Jerusalem taun tomoba pabo sunumi pąba muagasaibao, tama augwaligo bomogo te taun bagua saibao. Tama augwaligo te tobage deli kolesaga naga te Juda dabego gasa taun dabeba me te tama tiwai yaibao.
JER 1:16 Tama eno ena we bidi dabe po tų kot ilama, te augwali dene mawaibao. Magi baso meni, augwaligo ena tudiba munama, te augwa digi tibo god nigilama, te augwaliba ofa eyu, te lotu augwaliba wai. Te kolesagade augwaligo te dwai sęgę saibao.
JER 1:17 Tiali goli, nage da, nage sisi elama, hogodama pao. Te tigidali po eno nageba mani, te nago augwaliba pusao. Nage wi me isiąma, augwalide habu bulu me kila sigio. Nage tama tiyu da, teda te ena digi eno nage wi iliyu, te augwali gedude habu bulu kila somainu yaibao.
JER 1:18 Jeremaia, odao. Megi da, eno nage te bomai obo elalubo taun tiwai bomonama dolalumainu yaibao, te ain pos tiwai, me te brasgo nigali obo tiwai elalueibao. Te Juda king dabego, me te kingo ofisa dabego, me te pris dabego me, te tigidali we bidigo te nage aiyaba me elalugobeo.
JER 1:19 Te bidi dabego nageba boi bidi ebadi, tiali goli, te augwaligo nage aiyaba me elalugobeo. Magi baso meni, ena digi ena nage dali bidiyu, te eno nage tau siyu, ma dobola saibao. Ena Genuai Bidi, eno te po wai dao,” wali.
JER 2:1 Genuai Bidigo te tiwai po enabolo wali,
JER 2:2 “Nage pelama, Genuai Bidi eno te po te Jerusalem dabeba pusugi pao,” wali. “‘Eno homugo dage homu konealudu, dage eno we bidi hani pedelali sogo dagego duga homu enaba kęą pai. Te sogo dagego ena godolo mu yali, te gesi tamadi sai wego aga bidi godolo mu ebo tiwai yali. Te Isip tǫ kantri tagalama, dagego te dwai masigi kemi olo tǫ bulude, te bidi dabego gi bulusiąwai pesagede bilali goli, te dagego ena wali piduai dao.
JER 2:3 Te sogo dage Israel te eno gasagi yai tedali we bidi mu bidali. Dage eno gide te nai hasia mu inilama, te tau ebo tiwai elaluai. Te gasa hanigo eno te nai sobaso da, augwaligo te dwai sę yali da weyu, te eno augwalibolo dwai dene mawai dao.’ Genuai Bidi eno te po wai dao.”
JER 2:4 Dage Jekopgo bulai wąį wai puluba dabe, dage tigidali te Israel hani dao, dagego te Genuai Bidigo te tiwai po odiąo.
JER 2:5 Genuai Bidigo te tiwai po wai, “Eno mena dwai sę ebaso, te dage bulai wąį dabego te ena tagalama, digibulu mu paliwe? Waa? Koneao. Augwa te olo naiba lotu obaso, tama tiyu, augwa digi te olo nai tiwai pedelai dao.
JER 2:6 Augwaligo ena homu kone me ebeo. Augwaligo te eno augwali tau sali sęde homu kone me ebeo. Eno augwali te tǫ kantri Isipde selama odasa asiyu, augwaligo te genuai olo bulu pesage tǫ nogeai. Te pesagede te olo masigi kemi tǫ elaluali, tama te dwai bulu pesage dabe elalua pai. Te buluba tulubage tulisąwai pesage elaluai, te bidi dolobo pesage elaluali. Te bidi dabe bilisąwai bulu, te bulude bidi bidisąwai bulu dao.
JER 2:7 Eno te bulai wąį dabe odasa asiyu, te olo tǫ bulu tagalama, tama eno augwali te wiegi yai ili elalubo tǫba odasa asai. Tama megi dage te tǫde bidibao, te dage Israel te wiegi yai nai sela tuyu, te wiegi yai nai elalubo digi bidibao. Tiali goli, dage eno te tǫde bidibadi, dagego te dwai kugumini yai kolesaga ebao, te eno dageba mani tǫ te eno gedude dwai nai mu pedalubao,” wali.
JER 2:8 “Te pris dabego me enaba homu kone me palobeo. Te eno bomai po page koneai bidi dabe, augwaligo ena me konebeo. Te bulu tǫ kantri tonalubo polalubo bidi dabego enaba hagoma ebao. Te profet dabego te tibo god Bal nogide profetgo wabo po tiwai weyu yali. Augwaligo te augwa tau sisąbo naiba lotu wai dao,” wali.
JER 2:9 Genuai Bidigo te tiwai po wai, “Dagego te tobage dwai kolesaga ebaso, tama ena Genuai Bidi eno te po obao, te eno dage po tų ma ilaibao. Te eno dagego wai dabe dali, duga wąį dabe me po tų eyu, te dagego nosali pedalubo hani dabe me po tų yaibao wali.
JER 2:10 Edao. Dage sip sela pelama, te ailan Saiprus te giliga dega sabo badu pelama, te Saiprus dabego kolesaga suao. Tama te bidi dabe dagego te bulu Arebia dabego tǫba te giliga pedalubo badu tagala palama, te augwaligo kolesaga bugagia osola suao. Te dagego subadi, te hani me deligo te duga ebo tobage dwai kolesaga tiwai ebo suaibawe? Mu menio.
JER 2:11 Te hani bagego augwa god te god mu menio. Tiali goli, te hanigo augwa te god hasegelama, te gesi god wali me pabeo. Ena God, eno te genuai nogi dali bomo dali si elalubao, tiali goli dage we bidigo te ena hasegelama, te dage tau sisą yabo dwai god dabe wali pidubo dao.
JER 2:12 Tialima, ena Genuai Bidi, eno te po obao, ‘Dagalu, nage te Israel dabego ebo dwai sę ebo kolesagade dwai midigi mu sao. Te nage hale elama, didibili eyu, te dwai haliga mu iduao,
JER 2:13 magi baso meni, eno we bidi dabego te dwai sę si yali. Hasia augwaligo ena tudiba muai. Ena te ulu wę tiwai te augwali bidabo ula maiabo wę elaluali, tiali goli, augwaligo ena tagalali. Tama me, tǫ diganama, augwa digi te wę sabobo nai nigali. Tiali goli, te wę sabobo nai te alua pelama, te ąį augwalide elalubo usu ebeo.’”
JER 2:14 Genuai Bidigo te tama po wali, “Te Israel dabe te bidi me deli magi sę isąma olo mu bidibo tiwai elaluali. Augwali te olo sę ebo bidi tiwai me elalubeo. Te aga aya me te olo sę ebo bidi tiwai gilama me elalubeo. Tama tilama, magi baso te boi bidi dabego augwali bomonama siyu, te hwįbode doado bage sabo tiwai yaliwe?
JER 2:15 Te boi bidi dabego te laiongo bomonama i wabo tiwai yai dao. Augwaligo agai taun siago deyu dolama, tede bidi me bidibeo. Te agai tǫ augwaligo te olo tǫ pesage bulu tiwai pedelai.
JER 2:16 Israel, nage we me deli tiwai, te taun Memfis bidi dabego, me te taun Tapanes te tǫ kantri Isip bagego nage dwai hale iliyu, te nago tobolu nisi tigidali poalama, sela sąwai.
JER 2:17 Te naga digi yali sęgo te sę nageba pedelali. Magi baso meni, ena Genuai Bidi, naga God, eno nage te sunumidu odasa asainu yali, tiali goli, naga hagela eyu, ena tudiba muai dao wai.
JER 2:18 Magi baso nage te tǫ kantri Isipba pelama, te wę Nail tugi paiba obawe? Magi baso nago homu kone paliyu, te bulu tǫ kantri Asiriaba pelama, te wę Yufretis tugi pabo homu eyuwe? Te kolesagago nage dwasianu tau sainu ebaso, usu mu egobeo. Mu menio.
JER 2:19 Naga digi ebo dwai kolesagade te nageba dwai dene mawaibao. Nago ena tudiba mubaso, tama naga te kolesagade nageba wado ilaibao. Nago ena Genuai Bidi tagalu, te nago God, te nago ena dologoba me bidagasobe. Tama nago bugagia homu kone palama, koneao, nago te dwai kolesaga dabe mu ebogo te nageba dwai dene mobao. Ena God, Tigidali Bomo Elalubo Genuai Bidi, eno te po wai dao.”
JER 2:20 God, Genuai Bidigo po ma weyu, te tiwai po wai, “Israel, odao. Polobadu digi nago enaba hagoma eyu, tama nago eno nageba mani sę tagalai, tama nago te po wali, ‘Eno nago sę munu ma egobeo,’ wai. Mu tama, nage te tigidali bulu duba holoyu, tama te tigidali genuai ni dologoba sisinama, te nago tibo god dabeba lotu wali, te wego bidi hauwa dali penani igi pabo tiwai yalio.
JER 2:21 Hasia nage te wiegi yai wain ni eno bulai tiwai elaluali. Nage te ni wain polasa mu wiegi yai yano mu pedalubo tiwai yali. Tiali goli, magi baso megi da, nage begelama, enaba tudi ola menama, te buside dwai wain ni tiwai pedelaliwe?
JER 2:22 Nago naga tigi te meda sela sąbo boma pai naigo teleyu, me te wiegi yai sobu hauwago wę telabadi, te tagalao, tego nago yali dwai sę me sela sągobeo. Menio. Te dagego yali dwai kolesaga te meda dagede mu dagana sai tiwai mu dao. Ena God Genuai Bidi, eno nago yali dwai sęgę elaludubadi gebo subao.
JER 2:23 Tiyu, mena tama nage te eno gedude meda me pedali sabe da homu elama, nago te god Bal dabeba lotu wabe homu egowe? Waa? Israel, nago te bulu tǫ odogo pesagede nago te dwai sę yali homu kone ma palao. Nage te tigidaliba peyu, biliyu, te tibo god gegali, te so kibu kamelgo te tigidaliba pelama, udada peyu, te omai kibu kamel gegebo tiwai yalio.
JER 2:24 Tama nage te so uni donkigo te tǫ wa pai pesagede sesemane sogo bilidubo tiwai ebao. Aga te homu hę wai bilidu, te donki bidi gegali te aga guni ugaba sagolama, te omai donki menade bidibowe, te denami odada bilali. Te aga tama tebo sogo, dego agai tų palibo usu egowe? Bidi menio. Te sogo te omai donki dabego te so donki aga gegebo sę dene me egobeo, te augwa godolo ebo homu sia somainu tiaibao.
JER 2:25 Israel, nage udada biliyu, te tibo god wali pigio. Tiyu, nage sągą dolidali weyu, tama naga dogoni mu wa pabuo. Eno te tobage po wai goli, nago te tiwai po weyu, ‘Tagala,’ wali, ‘eno Genuai Bidigo po me odogobeo. Eno te gasa bidi hanigo god dabe godolo mu ebao. Eno augwali me wali pabo homu ebao,’ dagego te po wai,” wali.
JER 2:26 Genuai Bidigo po ma weyu, te tiwai po wali, “Te nai wi sabo bidi me deli augwaligo dąų ola sobaso da, teda te bidi hale dwai mu saibao. Te Israel hani te tiwai me bidibao. Te augwa king dabe, me augwa tobolu bidi dabe, me pris dabe, me profet dabe, me te tigidali we bidi dabe, te hale yaibao.
JER 2:27 Augwa te tama po obao, ‘Ni, nage da, te dena aya da, te masigi, nago da ame nani.’ Augwaligo ena tudiba naga muyu, te augwali ena pąba me asisąwai. Tiali goli, te sęgę pedalubo si da, augwaligo te tiwai i wabo dao, ‘Genuai Bidi, nago da tau sagasao,’ tama wabo dao.
JER 2:28 Tiali goli, tega! Juda te dage tau somainogo duga digi te nigali god dabe mena bidibawe? Augwa namba te duga taun dabe namba tobage gagawai yali. Te dageba sęgę me pedalubo sogo, augwaligo digi dage tau somainao, te augwali usu elalubaso da, te emainao,” wali.
JER 2:29 Genuai Bidigo po ma weyu, te tiwai po wai, “Dage tigidali enade hagoma ebao. Tama tialima, magi baso dagego po enaba wei ponoyu, eno dwai sę yali po obawe?
JER 2:30 Eno dagego wai puluba dabeba dwai dene mabo sę yali, te dage dodoliyu yali, tiali digi ena odolali sę dene yai. Dagego duga kolesaga me hasegelebeo. Menio. Iya! Dagego te eno dageba tagala palali profet dabe deli deli ela muna muna pela silali, te nasi yai boma pai laiongo hasa elebo tiwai yai.
JER 2:31 Dage megi bidibo Israel, te Genuai Bidi eno poba olo bugagia muao. Dagego homugo ena te masigi kemi olo pesagede te dwai nai da homu ebo dawe? Ma, ena te be hulia sai pesage me deli mu tiwai da obawe? Te tiwai isąyu da, teda magi baso eno we bidi dagego enabolo te tiwai po weyu, ‘Megi te dena homu wali peyu, tedela paibao. Da te nageba munu ma asogobeo,’ wali.
JER 2:32 Dagego homugo te gesi wegigo aga au ebo wiegi yai au dobage gegeda pabo homu yaibawe? Te we dabego te augwa bidigo kębo sogo au yali wiegi yai au dobage gegeda pabo homu yaibawe? Menio. Augwaligo gegeda painu ebaso, usu mu me egobeo. Tiali goli, tega! Dage eno we bidigo enaba hauwa sogo homu kone gegeda paludu gebo dao, bidigo nedebaso, usu egobeo” wali.
JER 2:33 “Israel, nago te penani kolesaga bugagia koneama, te bidi gegabo sunumi homu kone bugagia palobao. Nago koneani kolesagago te tigidali penani ebo wego koneani homu kolesaga te aiyaba elaluai, tama nago augwali te tobage dwai kolesaga ola mobaso usu yaibao.
JER 2:34 Te walu doado bage meni yai bidi dabego nago be alusiąbadi, tiali goli nago augwali odolali elama, tama augwaligo kaneme te nago ugwa dabede dagana sai elalubao. Nago te tobage dwai kolesaga dabe eyu,
JER 2:35 tiali goli, nago te tiwai po wabo dao, ‘Eno magi dwai sę me ebeo,’ wai. ‘Tama tiyu, te Genuai Bidigo enaba wado genuagia mu wagio.’ Odao. Nago te mu po me wabeo. Tama tialima, te eno nage po tų ilaibao wai.
JER 2:36 Nago sunumi me deli wali pali, te polo tagalama, te nago gasa sunumi wali pobao. Te Isip dabego nage tau sisąbaso, te nage dwai hale siyu, te nage Asiria dabego tau sisąbaso, te sogo te dwai hale yali tiwai gilama yaibao.
JER 2:37 Te nago Isip dabe me tagalu, te sogo nage hale elama, te haliga sęgę dwai yaibao. Nago koneani, te hani dabego nage tau saiba homu yali, tiali ena, Genuai Bidi, eno augwali tudiba muanio, tama tiyu, augwaligo nage tau me sogobeo. Mu menio.” Te po wai dao.
JER 3:1 Genuai Bidigo te tiwai po wai, “Te bidigo aga we sela sąbaso, te wego aga tagalama, te gasa bidiba pali, teda te polasa sali bidigo te we ma sogobeo. Te we agai ma siyu da, teda agai bulu kantri te dwai meda mu eno gedude pedelaibao. Israel, nage te bidi hauwa dali penani ela bilama, tama megi da, te nage enaba ma asainogo, ebawe?
JER 3:2 Nago te ni meni yai bulu du dabeba tonao. Te bulu du me deli elalu, tama nage teba pelama, te penani kolesaga ebe da homu eba, agawe? Nage te sunumi sesegede dugulalu, te bidi dabe asobo tonaluali, te Arebia bidi dabe te bulu tǫ wa pai pesage te sunumi sesegede tonalu, augwa te sunumi wali asobo bidi dabego nai wi sainu tama tiali. Te nago dwai kolesaga dabego, me te penani ebo kolesagade, te nago bulu tǫ kantri dwai meda mu yai eno gedude pedalubao wali.
JER 3:3 Te pagede naga te eno tulubage paliama, tama te tulubage nago tǫba tulubeo. Awe, te gi tau sabo tulubage asobeo. Tialima, nago te penani wego hagoma ebo tiwai eyu, te nage dwasianu hale me ebeo.
JER 3:4 Megi tama nago enaba i weyu, te tiwai po wali, ‘Genuai Bidio, nage eno Aya dao, te nago ena gesi ogwa wegi elalubadi godolo elama, tama megi e sogoba usu nani,’ wali.
JER 3:5 ‘Te nago enaba sesemane haliga sębę elaluduabo homu igio. Te nago wado ebo te silao homu ebao.’ Israel, nago tama tiwai po wali, tiali goli, nago te tobage dwai kolesaga dabe idu, te nago homude ebo kolesaga simanigi pabo dao,” wali.
JER 3:6 Te Josaia king bidali side, Genuai Bidigo enabolo te tiwai po wali, “Nago te enaba homu kęą pabo kolesaga tagalali we Israelgo ebo dwai kolesaga suyu digi eba, agawe? Aga te tigidali bulu duba holama, me te tigidali genuai ni dologoba pelama, te dwai penani kolesaga ebo dao.
JER 3:7 Eno e tama homu yali, agai te hagoma kolesaga eyu bolo elama, tama enaba ma asaibao. Tiali goli, menio. Aga te ma asobeo. Te aga ama, Juda, te we sabo kolesaga togobo we, agai te Israelgo kolesaga suai.
JER 3:8 Israelgo we bidi dali bidibo tiwai elaluali, te togwali sogo te penani kolesaga hauwa mu ebaso, eno te bidigo we tagalobo pepa asęnama, te eno agaba menama, te aga sela sąwai. Aga ama, Juda da, agai tebo suali, tiali goli, aga wi dwasianu me ebeo. Menio. Tama eno suali, aga me pelama, te penani sę ebo kolesaga ela bilali.
JER 3:9 Agai te penani kolesaga olo nai da homu eyu, te agai masigi me ni dabeba lotu wali. Tama te kolesagade agai te penani ela bilibo tiwai yalio. Tama agai te tǫ eno gedude meda dwai mu ilali dao.
JER 3:10 Judago ena tagalama, te dwai kolesaga ela biliyu, tiali te agai haliga munu ma begelama, enaba ma begasa asobeo. Menio. Agai haliga tibo begelainogo ebo tiwai yagasali. Ena Genuai Bidi, eno te po wai dao,” wali.
JER 3:11 Tama Genuai Bidigo enabolo po ma weyu, te tiwai po wai, “Israel me Juda, augwali si te bidi tagalubo we si tiwai yali. Augwaligo te enaba homu kęą pabo kolesaga tagalai dao. Tiali goli, te Judago yali dwai sę te genuai mu elama, te Israelgo ebo dwai sę aiyaba elaluai dao,” wali.
JER 3:12 “Tama Jeremaia, nage dolugulama, te not badu bidibo Israel haniba i wao. Nago Genuai Bidi eno po te tiwai pusao, ‘Israel, nage da, te aga bidiba homu kęą pabo kolesaga tagalobo we da,’ wao, ‘nage enaba begasa ma asao. Ena Genuai Bidi, eno te po obao, eno nageba haliga sębę munu ma egobeo. Magi baso meni, ena te olo mu tau sabo wiegi yai homu kolesaga ebo God dao, te eno haliga sębę ebo te sesemane sogo elalua pidugobeo.
JER 3:13 Israel, nago te tiwai po dolasa hanilama pusao, “Eno te dwai sę yai da,” po wao. “Eno God, nage ena Genuai Bidiba hagoma yali, te ena tigidali genuai ni dologoba pelama, te tibo god dali dwai kolesaga yali. Te eno nago po sela sąwani.” Israel, ena Genuai Bidigo, eno te po nageba mobao,’” wali.
JER 3:14 “Ena Genuai Bidi, ena digi eno te po dolo obao. Dage ena tagalali we bidi, dage enaba ma begasa asao, magi baso meni, dage da, dage te eno Kęąni we tiwai elaluyu, tama ena da, te dagego bidi tiwai dao. Te dage deli deli eno te boi bidi dabego hanu taun dabede, te duga hanide selama, te eno dage Saionba ma odasa asaibao, te eno bulu dao.
JER 3:15 Tama eno wiegi yai tonalubo bidi te ena kolesaga tiwai wali pabo bidi dabe nigilaibao. Augwaligo wiegi yai homude koneani kolesaga elalubao, te augwaligo dage bugagia tonalueibao,” wali.
JER 3:16 “Te ena Genuai Bidi, eno te po obao. Nosali dage te duga tǫ kantride hauwa mu pedelaibao. Tama te sogo dagego te Genuai Bidi, eno Dąų Wali Bomai Po Munolubo Halobage po me wagobeo. Tama te bokis kontrakde po me wasiąma, tama dagego tede homu hauwa me egobeo. Tama dagego gesi te tobage Halobage me nigigobeo. Menio.
JER 3:17 Te sogo te we bidi dabego te tiwai po waibao, ‘Jerusalem digi te Genuai Bidigo dugabo sia sai tiwai dao,’ waibao. Te tigidali kantri tǫde bidibo hani we bidi te Jerusalemba asiyu, te enaba genuai nogi magasaibao. Te munu ma augwa te hagoma isiąma, te augwa homude digi ebo dwai kolesaga wali munu me pelamu dao,” wali.
JER 3:18 “Te sogo te Juda dabe augwali te Israel augwali dali deliba sisinama, te augwa kantri te not badu, te megi bidibo madi tagalaibao. Tama augwali te eno duga wąįba mani tǫba bidagasaibao, te augwa hanigo te tǫ sesemane elalua pidu bidaibao,” wai.
JER 3:19 Genuai Bidigo po ma weyu, te po walio, “Israel, polobadu eno homugo nage ena wai puluba mu bidiyu, eno dage dali te ayago ebo kolesaga elama, tama eno nage wiegi yai tǫ mu me deli mawaibao, te gasa tigidali hani we bidigo tǫ aiyaba mu elaluali. Eno te homu yali. Tama me eno te homu yali, nago enaba Aya nogi yaiba homu yali. Tama nago ena sesemane sogo wali asiyu, tama nago ena munu me tagalogobeo, te homu yali.
JER 3:20 Tiali digi, menio. Dage Israel we bidi hani, dagego ena tagalama, te wego aga bidi tagalobo tiwai yali. Ena Genuai Bidi, eno te po wai dao.”
JER 3:21 Genuai gela te ni meni yai bulu du bagede wali. Te Israel we bidi dwai gela weyu, Godiba i olama, te Godigo olo tau mabo wiegi yai kolesaga augwaliba emainu wali. Magi baso meni, augwaligo te Genuai Bidi augwa Godiba homu kone palobo gegeda palama, te dwai sunumidu wali pai dao.
JER 3:22 Genuai Bidigo te po wai, “Dage te hagoma ebo wai puluba dabe, dage enaba ma asiąo. Te eno dagego ena te duga tudiba mubo kolesaga dodolama, te dage ena dali bugagia bidimainu yaibao.” Tama te we bidi dabego po wei ponoyu, te po wai, “Awe, megi da, da nageba ma asaibao, magi baso meni, nage God, te dago Genuai Bidi dao.
JER 3:23 Mu tamao, te bulu du dabede penani sę ela bilibo kolesagago te da tau sabo usugobeo,” wali. “Genuai Bidi, dago God, nage deligo naga da Israel ma sobaso usu mu yaibao,” te po wai dao.
JER 3:24 “Tiali goli, dago te Balba lotu wali, te hale ebo god dao, tama te tebo kolesagade dago tigidali sipsip, me bulmakau, me wai ogwa dabe, me wegi dabe, me te tigidali wiegi yai nai te wąį nǫų dabego sę dene elama sali nai tigidali odolali sisai dao. Tama te tibo god Balgo te nai dabe sese dalama tuali. Dago te kolesaga te da gesi ogwa bidide gagalama yali, te megi e sogoba usu nagasobao,” te po wali.
JER 3:25 “God, Genuai Bidi, da me, dena wąį nǫų dabe dali, dago te nageba dwai sę yai, te da gesi ogwa bidide digi usu nama, megi sogoba usu nagasobao. Dago nago po wali me pisąwai. Tama tiyu, da dwai hale mu selama, te gesabidi tǫba mu mugulaibao,” wai.
JER 4:1 Genuai Bidigo te tama po wai, “Dage Israel, te dage ma begasa asabo homu ebaso da, teda dage enaba naga asiąo. Dagego te dwai kugumini yai tibo god eno gedude mubo te sela sąyao. Tama dagego ena sesemane sogo wali asiąo,” wai dao.
JER 4:2 “Te dagego wabo po dąų waliyu, te tama po obao, ‘Te sesemane sogo bidada pabo Genuai Bidigo nogide mu da,’ po wainogo eyu da, teda dagego mu po tama naga weyu, te wiegi yai doloba pai kolesaga wali peyu, te po wao. Te dagego tama tibaso da, teda gasa hani dabego enaba hanalu, te eno augwaliba wiegi yai sę ebaso, te augwaligo enaba genuai nogi mawaibao,” te po wai.
JER 4:3 Genuai Bidigo te Juda me Jerusalem augwaliba te tiwai po wai, “Dagego te dwai kolesaga tagalama, te enaba ma aselama, te gesi homu kolesaga sagasiyu, te bidigo gesi noma gi tǫ elama, te nai bulubo tiwai yaibao. Tama dagego te nai te sesane bono elalubo digi tomode me bulugio. Dage Juda me Jerusalem, te duga poloba badia pai dwai homu kolesaga sela sąnama, te eno we bidi dabe dolo pedelao. Te dage tama me tisąbaso da, teda ena te dagego dwai homu kolesagade haliga sębę eyu, te dageba dwai dene mawaibao. Eno haliga sębę te genuai sia dabo tiwai eyu, tama te bidi mego sula sąwainu ebaso, usu me egobeo,” wali.
JER 4:5 Genuai Bidigo enabolo te po weyu, te Juda dabeba me, Jerusalemba me, te po pusao wali. Agai po e tiwai, “Dage pelama, te tigidali tǫ habu kantri pedaiba te biugel bu ola biligi pao,” wali. “Te we bidi dabeba te tiwai i omainu yao, ‘Dage sisinagaselama, te dage bomai obo elalubo taunba geme duala sigi piąo,’ wai dao.
JER 4:6 ‘Te we bidi dabe te Saionba pomainu po walobo plak ugwa ugwaba sao,’ wali. ‘Dage me bidigio. Dage wi pelama, duala sigi pao. Magi baso meni, eno digi te tǫ boi bidi dabe not badu bidali tagalama, te dage mu dolagasomainu ebao,’ wali.
JER 4:7 Te boi bidi dabe augwa bulu tagalama asali, te laiongo aga geme dualaluali pesage taga soabo tiwai yali. Augwali te tǫ kantri hauwa dolobo bidi dabe da, te augwali asiyu, dagego tǫ kantri dolagasaibao. Te dagego taun dabe mu dolaibao, tama te taun dabede te bidi me bidigobeo. Ena Genuai Bidigo eno te po wai dao.”
JER 4:8 Tama tialima, dage te homu dene ebo sogo gudubo ugwa dabe munama, te gela weyu, hobede ebo tęąbi po waiyąo. Magi baso meni, Genuai Bidigo dade haliga sębę umabo eyu, tama agai te haliga sębę ebo me tagalobeo.
JER 4:9 Genuai Bidigo e tiwai po wali, “Te sogo, te king dali aga ofisa dabe te wi umabo mu eyu, tama te pris dabe dali, te profet dabe me, dwai noma mu saibao.”
JER 4:10 Tialima, eno te po obao, “God, Genuai Bidi, nago te Juda me Jerusalem we bidi nago te augwali bugagia bidaibao po wali sogo, te nago augwaliba tibo po wabo tiwai yai dao,” te po wai. “Tiali goli, megi da, te boi bidi aselama, te da ela muainu ebao,” te po wali.
JER 4:11 Te boi bidi dabe asobo sogo, Genuai Bidigo te Juda me Jerusalem we bidi dabeba te tiwai po mawaibao wali, “Te posolai wali dabe te tǫ wa pai bulu du dabede hogodaibao, tama wali te eno we bidi dabeba asaibao. Tialima, te wali asobo te dwai kolesaga sela sąwainogo naga me asobeo, te waligo te wit pobele bage hogomu sela sąbo tiwai me egobeo. Menio.
JER 4:12 Te wali te bomai wali, tama te waligo augwali mu dolaibao. Ena digi eno po obaso, te wali asaibao, magi baso meni, eno te we bidi dabe po tų ilama, te megi da eno augwaliba dwai dene mawaibao,” wali.
JER 4:13 Tialima, ena Jeremaia, eno te we bidi dabeba te po wali, “Suao. Te boi bidi dabe te pǫ husugu yai tiwai mu yaibao. Te ami bidi dabego karis udada pabo te pobege ebo wali asobo tiwai yaibao, te augwaligo hos dabe te ba kemodage bola asobo tiwai asesa asaibao. Hobede mu dao. Megi da mu tama dolainu ebao waibao.
JER 4:14 Dage Jerusalem bage, mena sogo dagego te tobage dobo homu kolesaga tagalaibawe? Te dagego duga dwai kolesaga tigidali tagalama, te dage wiegi yai pedalubaso, teda Genuai Bidigo dage ma saibao.
JER 4:15 Te taun Dan me te Efraimgo bulu du elaluali te taga soali bidi dabego te genuai sęgę pedelalio wabo po sela soalio.
JER 4:16 Genuai Bidigo te bidi dabeba te tiwai po wali, ‘Dagego te gasa tǫ kantri bulu bidi dabeba wayąo, te boi bidi dabe te tǫ kantri Judaba pedelali,’ po wao. Te Jerusalemba tama tiwai po me walao, ‘Te boi bidi dabego bulu digibulu taga solama, te Juda dabego taunba hwįagasainu asali,’ wao. ‘Augwaligo te taun bagua sagaselama, te i hai bomonama weyu, te we bidi dabeba po dągą genuagia mu waibao,’ wali.
JER 4:17 Dage Jerusalem dabego ena Genuai Bidide hagoma yali. Tama tibaso, boi bidi dabego te Jerusalem bagua sagaselama, te tonalubo bidi dabego te gi bagua sabo tiwai yagasaibao, te po wali.
JER 4:18 Dagego te dwai kolesaga eyu, dage te dwai sunumidu bilibaso, tama dageba te pedalubo sęgęgo page dabe te dao. Te duga dwai sęgęgo digi duga te dene tolobao, tama te duga homu enelawe togwalubo dao,” wali
JER 4:19 Eno haliga dwai mu ebao. Eno te genuai dene tologobeo. Agai ena aiyaba mu elalubao, te eno homu kolesaga tigidali me dologobeo. Eno pedauwali me pania sogobeo, magi baso meni, eno odali, te ami bidi dabego te bu wabo biugel bu weyu, te i bomonama wabo odobao.
JER 4:20 Augwaligo te tigidali tǫ kantri badu te we bidi dabe mu dolama, te tǫ kantri dwai mu pedelali. Polo mu tama, augwaligo te dago ugwa be dabe dolai dao.
JER 4:21 Nisu sogo te boi bidi dabego da tagalama, te augwa buluba ma begasa peyu, tama dago te niba walobo ugwa plak ugwaba sabo kolesaga me, te biugel bu wabo me tagalaibawe?
JER 4:22 Genuai Bidigo tama po wali, “Eno we bidigo homu kolesaga wiegi yai me elalubeo. Augwaligo ena me konebeo. Augwali te homu kolesaga konesiąwai wai puluba tiwai elalubao, te augwali umuna pai elalubao. Augwaligo te dwai sę ebo mu konea pai elaluali, tialima augwaligo te wiegi yai kolesaga ebo me konebeo,” wali.
JER 4:23 Ena Jeremaia, eno te tǫ dolai olo mu tama elalubo suali. Te eno dagaluba tonono ebadi, te magi me deli ula me ebo subeo.
JER 4:24 Te eno suali, te bulu du dabe gęǫ page mu elama, te augwa tobolu ugwa peyu, eda asu yalio.
JER 4:25 Te eno tonono bilibadi, te bidi me deli bidibo me subeo. Te ba dabe tigidali mu pela silai yalio.
JER 4:26 Eno suai, te tigidali tǫ pedai te tǫ ili elaluali, tiali goli megi da, te olo masigi kemi tǫ naga elaluali. Te tǫde tigidali elaluali taun, augwali te dolai yalio. Genuai Bidigo haliga sębę umabo mu eyu, te sę dabe pedalumainogo ilali.
JER 4:27 Genuai Bidigo te tama po wai, “Te tǫ tigidali te olo nai tama pedelaibao,” wali, “tiali goli, te eno aga tigidali mu me dologobeo.
JER 4:28 Te pagede naga tama, te tǫgo hobede ebo tęąbi weyu, te dagalu husuga sai pedelaibao. Eno homu kone palama, te sę emainu yali, te eno homu me hasegelabo homu me egobeo. Mu menio,” wali.
JER 4:29 Ena Jeremaia dao, eno suali, te ami bidi dabe te hosde ene sesemoni tolalu dulalubo suali, te tigidaligo Judaba hwįagasali. Te we bidigo augwali asobo odolama, te augwa taun tagalama, te wi paibao. Me badu te bulu buside duala siyu, me badu te masigi ola bede duala sali. Te taun tigidali olo elalueibao, tama te taun dabede te bidi menia sai mu elalueibao.
JER 4:30 Jerusalem, nage dolobo sogo da, te nago magi yaibawe? Te wiegi yai mama ugwa muani tagalao, te nagade digi te golgo nigai beli au yali. Te naga gedu au ilibo tagalao. Te tobage au ebogo nage tau me sogobeo. Magi baso meni, te naga abagi dabego nage godolo homu munu ma isiąma, te nage ela muabo homu naga yaibao, te po wai dao.
JER 4:31 Eno odali, te wego wai ame nainogo te gela wabo tiwai odali. Te wego hasia wai ame nabo sogo, te aga genuai dene yaibao. Te taun Saiongo gela obao. Aga homu hę mu weyu, te aga nogo bomo sainu debalu te tiwai po waibao, “Hobede mu dao, ena mu dolobao. Te boi bidi dabego ena elama, ena isainu ebao,” wai dao.
JER 5:1 Genuai Bidigo te tiwai po wali, “Dage Jerusalem we bidi, dage udulama, te taun sunumi dabeba, me te sisinibo pesageba tedela pelama, te doloba pai bidi meba bidibowe, ma meniwe, suainu tama tiao. Te dagego bidi me deli te doloba pai kolesaga wali peyu, te dolo yali kolesaga sę mu bomo ebo bidi subaso da, teda eno dage Jerusalemgo ebo dwai sę tigidali tagalaibao,” wali.
JER 5:2 “Te dagego bomo yai po me deli dąų weyu, po wabo sogo, dagego Genuai Bidi, eno nogide mu po obao po wabo dao. Tiali goli, dagego tibo po naga weyu, te odolali po wabo dao,” wali.
JER 5:3 Genuai Bidi, nago godolo ebo homugo te tigidali bidigo te dolo yai kolesaga mu wali pomai homu ebao. Nago te we bidi dabe elebadi goli, tialima augwali te dene ebo gę nabeo. Nago augwali elaluali, tiali goli te augwali nago dodolomainu me ebeo. Augwa tobolu te masigi dila pai mu tiwai elalu, te augwa haliga begelibo hagela mu yali.
JER 5:4 Tialima, eno te homu yali, ‘Te hani dabe, augwali te bidi mu dwai dabe naga tama, te augwa homu kolesaga konesiąyu ebao. Augwa te tobage kolesaga me bomai po, God Genuai Bidigo te augwa homude wali pomainu ebo te augwaligo konesiąyu ebo dao.
JER 5:5 Tialima, eno te genuai bidi dabe sugi pelama, te augwali dali po miaibao. Augwa te tobage kolesaga me bomo yai po, God, Genuai Bidigo homugo augwa wali peyu, konemainu ebao.’ Eno te homu yali. Tiali goli, te genuai bidi dabe tigidaligo me te Genuai Bidigo po sela sąnama, te agai homu kolesaga wali me pabeo.
JER 5:6 Tialima, te laion dabe te genuai buside bidali tagalama asu, te augwali ela muagasaibao, te uni yowi dabe te wa pai bulu pesagede bidali taga soyu, te augwali dolagasaibao. Te genuai uni pusi dabe te aselama, te Juda dabe augwa taun pąba tonaluagasaibao. Te bidi me we me deli te taun tomode bidali tagalama, buluba teda soabode, te uni pusi agaba pasuga sigi pelama, te aga tigi pepeda tueibao. Te sę augwaliba pedelaibao, magi baso meni, te augwa dwai sę hauwa eyu, te hauwa sogo augwaligo te Genuai Bidi tudiba mubo dao.
JER 5:7 Genuai Bidigo po Jerusalemde elalu te tiwai po wali, “Eno nago dwai sę sela sągobeo, magi baso meni, te nago we bidi dabego ena tudiba munama, tama te mu nai ąǫ isąwai tibo god wali pai. Tama augwaligo te tibo godigo nogide bomai po dąų wai dao. Eno te we bidi dabeba nai hauwa mani, tiali goli, augwaligo ena tagalama, te tibo god wali pobao, te bidigo aga we tagalama, te penani ebo wego beba pabo tiwai ebo dao.
JER 5:8 Te bidi dabego haliga te gasa bidigo wede hogodobao, te bomai hos kibu omaigo te so kibu hos sulama, haliga hogodobo tiwai ebao.
JER 5:9 Ena Genuai Bidi, eno dolo po obao, mu tama eno te we bidi dabeba dwai dene mawaibao, augwa te yali dwai kolesaga wei ponoyu tiaibao,” wali.
JER 5:10 “Dage Israel dabego boi bidi dabe, dage te tǫ kantri Israelgo wain gidu aselayu, te gi dabe doliąo. Tiali goli, dagego mu siligio. Te wain nologo dabe naga sela sąyao, magi baso meni, te nologo dabe te eno nai menio.
JER 5:11 Te Israelgo Juda dabego ena tudiba mu muai. Ena Genuai Bidigo eno te po wai dao,” wali.
JER 5:12 Te Israel dabego Genuai Bidi tibo wali peyu, augwa te tama po wali, “Genuai Bidigo magi sę me egobeo. Agai te dwai nai daba me tagala palomainu me iligobeo. Te boi bidi dabego me hwįagasisąyu, te genuai nasi me pedalugobe dao,” te po wai.
JER 5:13 Mu tamao, te profet dabego te tobage po pusali, tialima te augwa digi poli po pusali. Genuai Bidigo augwaliba po me masiąwai. Tialima, te aga digi augwali dolaibao.
JER 5:14 Dagego te tobage po weyu, te dagego Godigo po odobao, Genuai Bidi te Tigidali Bomo Elalubo dao. Agai enaba te tiwai po wali, “Te eno nageba menama pusabo po da, te sia tiwai pedelaibao. Tama te we bidi dabe te nogobo sia tiwai elalubao, tama te siago augwali ulama daibao.
JER 5:15 Ena Genuai Bidi, eno dage Israel we bidiba te tama po obao, eno te digibulu bidi hani bage selama, odasa aselama, te dage dali boi hwįmainu yaibao. Augwali te bomai hani bidi te augwa tǫ kantride polobadu mu bidali. Dagego te augwaligo wabo po page me konegobeo, magi baso meni, dagego augwaligo po konebe dao.
JER 5:16 Augwa ami bidi dabe te hwįbo bomai bidi dabe, te augwaligo ene enebo mu konea pelama, te bidi hauwa ela mubo dao,” te po wali.
JER 5:17 “Te augwaligo dagego gide elalubo nai, me bede elalubo nai sia saibao. Te augwaligo dagego wai puluba tigidali ela mubadi, te sipsip hani tigidali me, te dagego bulmakau me ela muaibao. Tama te augwaligo dagego wain du ni, me ni fik kaya, te dolaibao. Dagego homugo te dage bomai obo taun tomode bugagia bidaiba homu ebao, tiali goli, te menio. Te boi bidi dabego hwįagasiyu, te taun dabe dola silaibao,” wali.
JER 5:18 Tialima, Genuai Bidigo te tiwai po enabolo ma weyu, te po wai, “Te boi bidi dabe aselabo sogo, te eno dage Israel tigidali silimainogo me egobeo,” te po wai.
JER 5:19 “Tama nosali, te we bidi dabego nageba te tiwai po hanalu waibao, ‘Magi baso Genuai Bidi dago Godigo te sę dabe dabolo yali dawe?’ Tama Jeremaia, nago eno te po augwaliba pusa mao, ‘Dagego ena tudiba munama, te duga tǫde digi dagego te gasa hani dabego god dologoba pali. Tialima, dage te gasa hani dabego tǫba bidigi pelama, tama te hani bage dabe dologode bidagameo,’ te po pusa mao,” Genuai Bidigo te po wai dao.
JER 5:20 Genuai Bidigo te tiwai po wali, “Te Jekopgo hani te Judade bidibo bageba te po mao,” wali.
JER 5:21 “Dage we bidi dabe te wiegi yai homu kolesaga meni yai. Duga gedu elalubao, tiali goli te elalubo nai dagego me susiąwai. Te dagego olo elalubao, tiali te dagego po me odobeo. Tiali te dagego olo eno te poba bugagia muiąo,
JER 5:22 Magi baso dage enade wi elama, midigi ebo meniwe? Eno te nambis wę sane muani, te tamu ąįgo dąį tiwai nigilali, tama te nambis ąį sane te sesemane te obo tiwai elalubao. Te genuai si pedalu, te bomonama bugusu obadi, agai te dąį ilali me bogi soagobeo.
JER 5:23 Tiali goli, dage we bidi te gasagi yai mu ebao. Dagego enaba hagoma mu eyu, te duga homu kolesaga te mu tomaga sobao. Tama dagego ena tudiba munama, te tedela pabo dao.
JER 5:24 Dagego ena Genuai Bidi duga God dologoba me pisąma tebao. Dagego te homu isąbao, ena digi eno te tulubage te dagego nai wai bulubo sogo tagala paliyu, te nai inabo sogo tagala palu ebao. Te ena digi eno te nai aga inayabo sogode inamainu eyu, te tigidali kibu bede dagego sela tumainu tebo dao.
JER 5:25 Tialima, dagego te haniani dwai sę ebo kolesaga ebao, tama duga te ebo kolesagago te wiegi yai nai sabo te paliama, te dagego sabe dao,” wali.
JER 5:26 “Te meba eno we bidi dabe, augwaligo te dwai kolesaga ebao. Augwaligo te gasa we bidi dabeba dwai sę yainu tonalueibao, te bidigo umben wa muai madi te ba tomoba soabo tonalubo tiwai ebo dao.
JER 5:27 Augwaligo te tibo kolesaga elama, te gasa bidigo nai hauwa sainu tiaibao, te bidigo ba hauwa selama, te aga basket wa pągąbo tiwai yaibao. Te kolesagade augwali bomai mu pedelama, te augwa doado bage me mone hauwa elalubo dao.
JER 5:28 Augwali te nai hauwa tulama, te tabi buai bidi pedelali. Augwaligo te tobage dwai kolesaga ebo gagamu yabo homu me egobeo. Augwaligo te doloba pai kolesaga te augwa aya isai bidigo wai pulubade me egobeo. Te doado bage meni yai bidi dabego sęgę elalubo sogo, augwaligo te augwali tau selama, te sęgę silimainu ebo meni.”
JER 5:29 “Ena Genuai Bidi, eno dolo yai po obao. Mu tamao, eno te bidi dabeba dwai dene mabo sę yaibao, te augwa ebo kolesaga wei ponoyu, tama tiaibao.
JER 5:30 Dwai nai mu te tǫba pedelai dao.
JER 5:31 Te profet dabego augwade digi pusali pogo digi te we bidi dabe tibo po ola mani. Te pris dabego te we bidi tonaluali sogo, te pris dabego te profet dabego po wali pali. Tama eno we bidi dabego te kolesaga godolo mu yali. Tialima, eno dwai dene mabo sę dageba ebaso, tama duga te dwai kolesaga silaibao. Tama te sogo dagego magi yaibawe?” wali.
JER 6:1 Genuai Bidigo te po wai, “Dage Benjamingo hani we bidi, dagego te Jerusalem tagalama wi pao. Tiyu dage dolabuo. Dagego te Tekoa taunde te bu wabo nai biugel bu weyu, te plak te bulu Bet Hakeremde ugwaba siąo, te bidi dabego te biugel bu wabo odoyu, te walobo plak sulama, te augwali wi pao omainao. Magi baso meni, te dwai nai mu te not badu tagalama asiyu, te dage mu dolainu ebao.
JER 6:2 Taun Saion te tigi dene ilibo sę munu me isąwai sawi yai we mu me deli tiwai te homu wali sesemane piduali. Tialima, Genuai Bidigo te taun mu dolaibao.
JER 6:3 Te king dabe augwa ami bidi dabe dali aselama, te Jerusalemba hwįagasainu ebao. Augwaligo te taun bobegela sagaselama, te augwa bidabo pesage nigaibao. Te ami bidi dabe umabo mu te genuai sipsip hani tiwai dao. Tama te ofisa dabego augwali tonaluyu, deli deligo augwa sę yabo madi elaluaibao.
JER 6:4 Te ofisa dabego te tiwai po waibao, ‘Dago te boi hwįbo kolesaga sisi ela sinao. Awe, te hwįbode naga homu kone paluyu, tama tinao. Tegoba, da te giliga tomode mu te belo wabode hogodama, augwaliba hwįgi paibao.’ Te nosali augwa te tama po waibao, ‘Hobede ya, te dago sisi isąbadi te be hulibao,’ po waibao.
JER 6:5 ‘Tagalao. Augwaligo augwa digi seselalumainogo eyu, augwaligo te masigigo nigai boma pai genuai be dabe elaluali goli, dago hulide pelama, te be dabe dolinao,’ te po waibao,” wali.
JER 6:6 Tigidali Bomo Elalubo Genuai Bidi, agai te po wai, “Dage ami dabe, te Jerusalem pąde ni dabe togolama, te tǫ dabe dali te bobobage obo pąde pesage holao, te daide dolalu, te taunba hwįagameo. Te taun aga dwai dene umabo somainao, magi baso meni, te taunde we bidi dabego te augwaligo abagi dabe dolobo sę mu ebo dao.
JER 6:7 Dwai kolesaga sesemane te Jerusalemde pedalubao, te ulu wę sesemane sogo pedalubo tiwai ebo dao. Tama augwaligo te taunde doado bage dolama, te gasa we bidi dabe eliyu ebao, te eno suali, te bage hobedagia te keni eyu gasi me elalubo dao.
JER 6:8 Jerusalem, nago po odao. Te meni baso da, te eno nage tudiba muaibao. Te eno nage te olo bulu pesage tiwai pedalumainu ilama, te nagede bidi deli me bidibo usu egobeo,” wali.
JER 6:9 Tigidali Bomo Elalubo Genuai Bidi, agai enabolo e tama po wali, “Te boi bidi dabego te Israel hani me badu elaluali te mu silaibao,” wali, “te bidi dabego te wain giba pelama, te hasia tagalali wain du tigidali sabo tiwai yaibao,” wali. “Te hasia nage bolo pelama, te po Jerusalemba pusugi pao, te bidi wain giba pelama, te wain du deli deli elalua pali te gegegi pabo tiwai yao. Te bidi deli deligo nago po odomainu homu yao.”
JER 6:10 Tialima, eno tama po wei ponani, “Genuai Bidi, eno te nago po deba pusaibawe? Tama dego eno po odogowe? Augwaligo olo te mu palia sali. Augwali tego Godigo po odisąbo hani bage tiwai elama, te nago po odobo hagela homu ebao. Augwaligo homu nago po te augwali hale ilibo po dao, nago po te olo bage te dwai nai tiwai ebao. Augwaligo tede wiegi yai homu pemene me ebeo.
JER 6:11 Tiali goli, Genuai Bidi, nago augwaliba dene mabo haliga sębę enade me pągąnalubao, tama eno homude te dene mabo haliga sębę te palia saiba homu ebaso, usu egobeo.” Tialima, Genuai Bidigo enabolo e tama po wai, “Eno te haliga sębę ebo eno te sunumi dabe bidalubo wai puluba dabeba gea paliyu, te gesi bidi dabe sisinaluboba me tiao. Te bidi dabe augwa we dabe dali, me te monu dabeba me, eno te haliga sębę gea palao,” wai dao.
JER 6:12 “Eno te tǫ kantride bidibo we bidi dabeba te dwai dene sabo sęgę mawaibao, tama eno te gasa hanigo te be dabe, me tǫ, me we dabe somainogo yaibao,” Genuai Bidigo te po wai.
JER 6:13 “Tigidali we bidigo te dwai kolesaga haniani eyu, te mone hauwa sabo homu eyu tama tiali. Te olo bidi dabe me, genuai bidi dabego me te kolesaga naga wali pali. Te pris dabego me, te profet dabego me te we bidi tibo po ola mayu yalio.
JER 6:14 Eno we bidi dabe te genuai keni elaluali, tiali goli te pris dabe me profetgo te keni sulama, te olo nai tiwai sula tagaliyu, te augwaligo bugagia marasin me mubeo. Augwaligo te tama po te we bidi dabeba weyu, ‘Dagego moni homu me igio. Da bugagia bidibao.’ Tialima, menio. Augwa te bugagia me bidibeo.”
JER 6:15 “Te Israel dabe augwa te kugumini yai kolesaga ebode te hale me yaliwe? Mu menio. Augwa hale dwasianu me ebeo. Augwa te tobage dwai sę ebo kolesagade ge neyu, hale me ebeo. Tama tibaso, te eno augwaliba dwai dene mayu, te augwali mu dolaibao, te gasa hani dabe dolo tiwai yaibao. Ena Genuai Bidi, eno te po wai dao,” wali.
JER 6:16 Genuai Bidigo aga we bidi dabeba e tama po wai, “Te dagego mena sunumi wali pabo homu ebaso da, te bugagia homu kone palao. Dagego te duga wąį nǫų dabego wali te wiegi yai sunumi gegao. Te dagego me te sunumi wali pobaso, tama te nai dabego dageba sęgę masiąyu, te duga haliga te toma nomainu ilao,” wali. Tialima, te Israel dabego te po wai, “Dago te sunumi wali me pogobeo,” wali.
JER 6:17 Tama Genuai Bidigo te po wai, “Eno te dage tau sabo tonalubo bidi nigilai dao. Tama eno te po wali, te sęgę pedelainu ebo sogo augwaligo te bu wabo nai biugel bu wai da obaso da, teda dagego bugagia odaluiąo.” Tialima, augwa te po wali, “Dago te tonalubo bidi dabego po me odogobeo,” po wai dao.
JER 6:18 Tialima, Genuai Bidigo te po wali, “Dage gasa hani we bidigo, odiąo. Dage sisinagasobaso, te eno dagebolo eno te Israel dabeba yabo sę dabe po walaibao,” te po wali.
JER 6:19 “Tǫ, nago me odao. Eno ena te we bidi dabe dolainu ebao, te augwa yali dwai sę wei ponainogo ebao. Magi baso meni, augwaligo eno po sela sąyu, te augwaligo eno bomo yai po wali me pabeo.
JER 6:20 Augwali te Sabea hani bidi dabeba pelama, te wiegi yai denami ebo hano yabo pauda abeligi pali. Tama augwa te tobage awi te wiegi yai denami ebo nai abelali, te digibulu bidi dabede abelai. Augwaligo homugo te nai dabego te augwa lotu wabo te wiegi yai eno gedude pedelaibao homu eyu tiali. Tialima, menio. Tama me, eno te augwaligo siaba ulama tigidali domainu ebo ofa, me te gasa ofa dabe augwaligo enabolo ebaso, te eno wiegi yai homu pemene ebo menio.
JER 6:21 Tialima, ena Genuai Bidi eno te po obao, eno te we bidi dabe tulalumainu yaibao. Te augwali mu dolaibao. Te aya dabe augwa wai puluba dali isaibao, tama te we bidi dabe te augwa hai namu dabe dali isiyu, te augwa abagi dabe dali isaibao,” wali.
JER 6:22 Genuai Bidigo te tama po wai, “Suao. Te ami bidi dabego te not badu pedai tagalama, asaibao. Augwali te bomai hani mu te augwali digibulu mu bidai. Tialima, megi da, augwa te hwįbo doado bage sisi ebo sę ebo dao.
JER 6:23 Augwali te gasa bidide homu dene eyu, olo tau saibao homu ebo bidi dabe me menio. Augwaligo te gasa bidi dabe dolobo godolo homu ebo bidi dabe elalubao. Augwaligo te enesigi me ene tolalubao. Augwa te hosde dugulasa asaibao, tama te hos dabego sągą bada genuai wabo te nambisde genuai tamu ąį gisigi asobo tiwai yaibao. Augwa te lainde wasilama, te nage, Jerusalemba hwįabo sisi elalueibao. Hobede ya!” wali.
JER 6:24 Te Jerusalem we bidi dabego te tiwai po wali, “Dago te boi bidi asabo po sabilibo po odolama, te da wi eyu, te dago nogo sągą dili kimi meni ebao. Da hobede mu elama, dwai dene mu ebao, te wego aga wai ame nainu ebo sogo te genuai tigi dene ebo tiwai gilama ebo dao.
JER 6:25 Te boi bidi te dwai bidi dabe mu, tama augwali te tigidali habu usu nama bidiyu, te da dali hwįainu sisi elalu, te da wi ilibao. Tialima, da te gi dabeba munu me pisąma, te sunumi dabeba me biligi pigio,” wali.
JER 6:26 Tialima, Genuai Bidigo te po wai, “Dage eno we bidi dabe, dagego te homu dene ebo ugwa dabe gudulama, te sia kelide pila mudu bebegeliduao. Dagego genuai gela weyu, hobede ebo tęąbi wao, te aya ida wai deli naga elaluali, augwa te wai isibo sogo homu dene ebo tiwai yao. Magi baso meni, te polo mu tama te boi bidi dabe dageba pedeliyu, te dage dolaibao,” wali.
JER 6:27 Genuai Bidigo te tama po enabolo wali, “Jeremaia, eno nage te wiegi yai kapa silva dagalabo bidi tiwai nigilai dao. Tama eno we bidi da, te silva tiwai dao. Te eno nagebolo sę mani, te eno we bidi usu selama, te augwa kolesaga dagalomainogo yali, te bidigo silva te siaba ulubo tiwai elama, te usu selama koneainu yai, te silva mu yaliwe koneainu tebo dao,” wali.
JER 6:28 Tialima, eno e tama po wei ponani, “Augwali te hagoma elama, po sela sąbo we bidi, te augwa abagi dabeba posobo po wabo dao. Augwaligo kolesaga tigidali te dwai naga elaluali. Augwali te ain hogomu pobele bage pedalubo tiwai, te sę bidi dabego te silva siaba ulama, usu sabo sogo te hogomu pedalubo tiwai ebo dao.
JER 6:29 Masingo te sia ponobo sę ebadi, te sia posolo umagia mu pedalu, te silva ulama, tede daganalubo ain hogomu sela sąwainu tiaibao. Tialima, te sę bidi dabe odolali sę dene yaibao. Siago te ain hogomu daganalubo me sela sągobeo. Te tiwai te dwai kolesaga ebo bidi sela sąbo sunumi meni yaibao, te nago we bidi dabe te wiegi yai ma pedalumainu ebaso usu egobeo.
JER 6:30 Augwali te dwai tagalabo silva tiwai naga elaluali, magi baso meni, nage Genuai Bidigo, nago augwali tudiba muai dao,” eno te po wali.
JER 7:1 Genuai Bidigo Jeremaiabolo te tiwai po wali,
JER 7:2 “Nage pelama, ena Genuai Bidigo tempel be sunumiba doligi pelama, tama eno po te enaba lotu wagi soyu tomoba soabo te Juda dabeba pusao. Nago augwaliba te po weyu, ena Genuai Bidigo poba olo bugagia muao po wao. Eno po e tiwai dao.
JER 7:3 Ena duga Israelgo God dao, ena te Tigidali Bomo Elalubo Genuai Bidi, eno po obao, dagego duga bilibo, me duga kolesaga dolasa elalubaso da, teda eno dage te duga bulu tǫde bugagia bidimainu yaibao.
JER 7:4 Sesemane sogo augwaligo te tiwai po dageba obao, ‘Te da, te Genuai Bidigo be dao. E da, te Genuai Bidigo be da. Te e be da, Genuai Bidigo be dao,’ po wabo dao. Tialima, dage te homu igimio, te bego dage wiegi yai bugagia ilama bidaibao homu igio. Tiyu, duga digi duga tibo po ola mabo dao.
JER 7:5 Dagego bilibo me ebo kolesaga bugagia dola sao. Te dagego duga abagi dabeba doloba pai kolesaga yao.
JER 7:6 Dagego te gasa tǫ kantri bidi dabe duga dali bidibo te aiyaba elalugio, te wai dabe, augwa aya isai, te wilawe we dabe, te augwaliba tama kolesaga igio. Tama te duga tǫ kantri te we bidi dabe odolali me ela mugio. Te dagego tibo godiba lotu weyu, te duga digi dolamu dao.
JER 7:7 Te dagego eno te tobage po tigidali wali pobaso da, teda dage eno te duga wąį nǫų dabeba mani tǫde bugagia bidimainu ilama, te augwa hani dabego tǫ sesemane elalua pomainu yaibao,” te po wai.
JER 7:8 “Dagego te tibo poba homu dąų wabo dao. Tialima, te pogo dage tau me sogobeo.
JER 7:9 Te dagego nai wi siyu, te bidi dabe ela muyu, te penani sę ebo kolesaga te bidi dabe me bidigo sai we dali eyu yali. Te dagego bomai po dąų wabo sogo te tibo po obao. Te dagego wiegi yai denami hano ebo ofa te tibo god Balba ebao, te dagego polobadu lotu me wasiąwai tibo god dabeba lotu wabo dao.
JER 7:10 Dagego te tama kolesaga dabe ela selama, tama dagego te enaba lotu omainu, te dąį ilali be tomoba dage asobao. Te dage ena pageba asiyu, dagego te po obao, ‘Da bugagia bidibao,’ wali. Tialima, te nosali dagego eno be tagalama, te dage peyu, te kugumini yai kolesaga umabo igi pobao. Dagego homugo te wiegi yai kolesaga da homu eba, agawe?
JER 7:11 Eno te be sa muyu, dąį ilali, te dagego enaba lotu omainu yali. Tialima, dagego homugo te nai wi sabo bidi geme dula sigi soabo pesage da homu eba, agawe? Ena Genuai Bidi, eno po dolo obao, eno te dagego ebo kolesaga tigidali subo dao.”
JER 7:12 “Dage te Siloba pelama, eno te taunde yali sę suao. Hasia eno te Silo dąį ilali, te enaba lotu wabo pesage elalumainu yali, tiali goli, nosali eno suali, te Israel dabego dwai kolesaga ebaso, eno te taun dolai dao.
JER 7:13 Te megi me, dagego te tobage dwai kolesaga ebao. Hauwa sogo eno dagebolo te dwai kolesaga tagalao po wali, tiali goli dagego te po odobo hagela yali. Te eno dageba i wabo sogo, dagego eno i wabo wei ponobeo.
JER 7:14 Mu dao, eno te tempel be dąį ilali, te dagego enaba lotu weyu, te dagego konealubo homugo te bego dage tau selama, bugagia bidimainu homu yali. Tialima, ena, Genuai Bidi, eno po dolo dagebolo obao, eno te be dolaibao, eno te Silode ena te be dolali tobage kolesaga tiwai yaibao. Tama me, te eno duga wąį nǫų dabeba mani tǫ me dolaibao.
JER 7:15 Tama eno dage sela sąwaibao, eno te Israel dabe sela sąwani tiwai yaibao, te duga deli hani dao. Te dagego ena tagaliyu, te eno dage munu ma sugobeo,” wali.
JER 7:16 Genuai Bidigo po ma weyu, te tiwai po wali, “Jeremaia, nago gedu haluasa po enaba me wagio, te we bidi dabe tau somainu. Nage te gela weyu, te enaba bomonama i me wagio. Magi baso meni, eno nago te gedu haluasa po wabo me odogobeo.
JER 7:17 Te nago te kolesaga augwaligo te Juda dabego taunde ebo, me te Jerusalem sunumi dabede ebo susąyu eba, agawe?
JER 7:18 Te wai pulubago nogąbo sia sisinibaso, tama te aya dabego sia nogoyu, tama ida dabego te bisket nigabo plaua begelaibao, tama augwa te bisket dabe te nogi ebo tibo god weba ofa ebao, te nogi Dagalude Kwin dao wali. Tama me, augwa te haniani godiba wain gelebo sę me ebo dao. Te tama tebo dwai kolesagade augwaligo te ena sębę ilainu ebo dao.
JER 7:19 Tialima, ena Genuai Bidigo, eno te po obao, augwaligo te dwai sę enabolo me ebeo. Te augwa digi dwai sę ebao, augwa te ebo kolesagade augwa hale dwai mu saibao.
JER 7:20 Te ena God Genuai Bidi, eno te tama po obao. Eno haliga sębę dwai mu eyu, te tǫ kantriba me, te we bidiba me, te tubo kibu hasa me, te ni dabeba me, te naiba me dwai sę mu yaibao. Eno haliga sębę te genuai sia dabo tiwai eyu, te bidi mego sula sąyabo usu me egobeo,” te po wai.
JER 7:21 “Ena dage Israelgo God, ena da Te Tigidali Bomo Elalubo Genuai Bidi, eno te tiwai po obao. Te dagego te tigidali siaba ulama domainu ebo ofa enabolo mobadi goli, te tagalao. Te duga digi te ofa ebo nai mi tubao, te dagego gasa ofa ebo kibu mi tubo tiwai dao.
JER 7:22 Te eno duga wąį nǫų dabe te Isip bulu tagalama, odasa asali sogo, eno te tama po augwaliba weyu, te siago tigidali domainu ebo ofa yao po naga me wasiąwai, te tobage gasa ofa dabe me yao po naga me wabeo. Menio.
JER 7:23 Eno augwaliba te tiwai po me wali, ‘Dagego eno po wali asobaso da, te ena dagego God bidiyu, te dage eno hani we bidi bidaibao. Te eno dagebolo te wali pao po wabo kolesaga tigidali, te dagego wali piąo, tama te dage bugagia bidaibao.’
JER 7:24 Eno te tama po wali, tiali goli, augwaligo te po odama, te augwaligo wali me pabeo. Augwa te dwai kolesaga naga yabo homu elalu, te augwa hagoma eyu, te augwa homugo digi ebo sę wali piduali. Tama te ebogo augwali tau me sabeo. Menio. Augwa digi augwa aiyaba elalubo sę yali.
JER 7:25 Te duga wąį nǫų dabego te Isip tagalama asali sogo, tede gagalasa, te megi e sogoba usu nagasobao, eno sesemane sogo ena sę bidi dabe tagala palobo sę idubao, te profet dabe, te augwali aselama, te po dageba pusagasobao
JER 7:26 Tialima, dagego hani dabego eno po odolama, wali me pabeo. Menio. Augwa te dwai hagoma naga eyu, te dwai kolesaga hauwa eyu, te wąį nǫų dabego yali dwai kolesaga aiyaba elalubo dao.”
JER 7:27 “Tialima, Jeremaia, nago te po tigidali te Israel dabeba pusao, tiali goli, augwaligo te po me odogobeo. Nago augwaliba i udao, tiali goli, augwaligo nago i wabo wei me ponogobeo.
JER 7:28 Te nago augwaliba te tiwai po wao, ‘Te dage hanigo te Genuai Bidi, duga Godigo po wali me pisąyu, te Godigo augwali dodolomainu me ebeo. Augwaligo te mu po wabo kolesagadu munu me wali pabeo. Augwaligo te kolesaga mu tagalobo dao.’ Te po wao,” wali.
JER 7:29 Jerusalem, nago naga tobolu nisi togola sąyu, te nago hobede ebo ola mao. Te nage bulu duba holama, te hobede ebo tęąbi wao, magi baso meni, te nago we bidi dabego te Genuai Bidi haliga sębę dwai mu ilibao. Tama tialima, Genuai Bidigo te hani we bidi dabe homu godolo munu me isiąma, te augwali tudiba muai dao.
JER 7:30 Genuai Bidigo te tama wai, “Te Juda dabego dwai kolesaga hauwa eno gedude yali dao. Augwaligo te kugumini yai tibo god noma piksa dabe te augwaligo enaba lotu omainogo eno sa muani be tomode te tibo god piksa noma dodolama lotu wali. Te tama tebo kolesagade te be eno gedude meda ilibao.
JER 7:31 Augwaligo te lotu wabo pesage nigali nogi Tofet poali, te Hinom Odogo Bulude nigali. Te augwaligo augwa wai puluba dabe digi te isiba ulali, te tibo godiba ofa tiwai yali. Tialima, eno augwaliba te kolesaga yao po me wabeo. Tama me, te eno te tobage bomai po dageba maiabo homu munu me ebeo.
JER 7:32 Tama tibaso, ena Genuai Bidi, eno te po obao, nosali te augwaligo te bulu nogi munu ma nogi isąyu, te Tofet ma Odogo Bulu Hinom wagobeo. Menio. Te augwaligo te tiwai nogi yaibao, te bidi hauwa ela muai pesage dao waibao. Magi baso meni, te boi bidi dabego te Juda we bidi hauwa ela muaibao. Tama te Tofet te Juda dabego gų page bulu pedelaibao, tama augwaligo tigi te pesagede pągąnalueibao.
JER 7:33 Te tigi hauwa tǫde olo munalua pobadi, te ba sibigo me hasa sibi aselama, mi tuagasaibao. Tama te ba dabe me hasa dabe aselama tubadi, te sela sąyabo bidi meni yaibao.
JER 7:34 Te Judago taun dabede te we bidi dabe me bidisiąyu, te Jerusalem sunumide me bidigobeo. Eno te tigidali sę pedalumainogo yaibao, te bugai haliga wiegi yai homu pemene ebo kolesaga, me te we sabo sogo genuai nai daa tubo dabe me, te dabe tigidali silaibao. Tama te tǫ kantri tigidali pedai badu dolama, olo elalueibao,” wali.
JER 8:1 “Te ena Genuai Bidi, eno po te tiwai ma obao. Te tama side te boi bidi dabe te isali bidi dabe pubulali gų pageba pelama, te Juda dabe king dabe me tobolu bidi dabe, te augwaligo dili dabe hodaibao, te pris dabego dili, me profet dabego dili, me te tigidali Jerusalem we bidigo dili te hodaibao.
JER 8:2 Te Juda dabego te giliga, me polua, me hǫ dabe, te godolo homu mu yalio. Tama augwa te nai dabeba kidu sugunama, gedu haluasa po augwaliba weyu, te augwali tau somainu augwaliba hanalu wali. Te augwaligo te tobage kolesaga dabe augwaliba lotu weyu ebo sę dabe yali. Tama tibaso, te boi bidi dabego te Juda dabego tigi dili dabe selama, te tǫba sąyu, te yowigo di tabo tiwai yaibao. Te giligago, me poluago, me hǫ dabego te tigi dili sueibao. Tama te dili dabe selama, te ma pubulabo bidi dabe meni yaibao.
JER 8:3 Te dwai we bidide te Juda hani dwasianu bage naga elaluali, tama te tǫba kantri dabeba ela gudulaibao. Tama te Juda dabego augwa bidabo wiegi yai ula te godolo homu me egobeo. Te augwali isabo homu naga yaibao. Ena Tigidali Bomo Elalubo Genuai Bidi, eno te po wai dao,” wali.
JER 8:4 Genuai Bidigo enabolo weyu, te po te we bidi augwaliba pusao po wali, “Ena, Genuai Bidi, eno te po obao,” wali. “Te bidi dabe augwali tula mubo sogo, te augwali ma hodalubo meni da, agawe? Te bidi dabe sunumidu pobadi, te pabo sunumi geda mubo sogo, te augwali begelama, ma geasa pabo meni da, agawe? Menio. Augwa te tama tiwai ebo dao.
JER 8:5 Tialima, te Jerusalem we bidigo ena tagalama, te augwali ma begasa asobeo. Augwaligo ena sesemane sogo tudiba muyu ebao. Te augwa tibo kolesaga wali pabo bomo eyu, te augwali enaba ma begasa asabo homu me ebeo.
JER 8:6 Eno augwaligo poba olo bugagia mubadi, tiali goli eno augwaligo mu po wabo me odobeo. Te bidi me deligo homu begeligi soyu, te po weyu, ‘Tegobao, eno genuai sęgę mu sali,’ po wabeo. Menio. Tigidaligo augwa homu naga wali pabo homu yali, te ami dabe hosde dugulama, te hwįgi painogo udabo tiwai ebo dao.
JER 8:7 Te tobage genuai ba me dwasianu bago te augwa me badu me bidagasobo sogo koneama, te taga pabo sogo me konebo dao. Tiali goli, eno we bidi augwaligo te ena Genuai Bidi eno bomai po homugo konebeo,” wali.
JER 8:8 “Magi baso dage Juda dabego te tiwai po weyu, ‘Dago te wiegi yai homude koneani kolesaga elalubao,’ po weyu, ‘magi baso meni, te Genuai Bidigo agai bomai po dabolo mawai da,’ obao. Dagego te tama po wagio, magi baso meni, te bomai po ola mabo tisa dabego te bomai po hasegelama, te tibo po naga asębo dao.
JER 8:9 Te kolesaga koneai bidi dabego Genuai Bidi ena tudiba mubao. Magi baso augwa te homu eyu, augwa koneani kolesaga genuai elaluba homu ebawe? Te augwa hale dwai mu selama, te dwai sogo gegeyu, te hasa bade tola sabo tiwai yaibao. Tama augwa homu kolesaga dolaibao.”
JER 8:10 “Tialima, eno te gasa bidi dabego te Juda dabego we me tǫ sagasomainogo ilaibao. Magi baso meni, tigidali we bidigo dwai sę haniani eyu, te doado bage hauwa sainu yali. Te olo bidi dabego me, te genuai bidi dabego me, te kolesaga wali pali. Te pris dabe me, profetgo me, te we bidi dabe tibo po ola mayu yai dao.
JER 8:11 Eno we bidi dabe genuai keni dabe elaluali, tiali goli, te pris dabe me profet dabego te keni dabe sulama, te olo nai subo tiwai yalio, tama augwaligo bugagia sisibeo. Augwaligo te tiwai po te we bidi dabeba weyu yali, ‘Dage homu kone tuą pigio. Da bugagia bidibao.’ Tiali goli, menio. Augwali bugagia me bidibeo.
JER 8:12 Te Israel dabe augwa yali dwai damuai kugumini tiwai ebo kolesagade dwai hale yaliwe? Mu menio. Augwa dwasianu hale me ebeo. Augwa te tobage kolesagade hale me ebeo. Tama eno augwaliba dwai dene menama, te augwali mu dolaibao, te gasa hani dolali tiwai yaibao. Te po ena Genuai Bidigo po dao.”
JER 8:13 “Ena Genuai Bidi, eno po dolo obao, te eno augwali mu silimainu yaibao. Augwali te ni wain, me ni fik, te du munu me walisiąma, te augwa yabe sasia pabo tiwai yaibao. Tialima, eno te boi bidi hani dabe tagala palama, augwali aiyaba elalumainu yaibao.”
JER 8:14 Te Juda dabego te tama po waibao, “Magi baso da olo dugulalubawe? Da sisinama, te bomai obo elalubo taun dabeba geme duala sigi pelainao, tama da te taun dabede isigi pinao. Dago te Genuai Bidi, dena Godiba dago dwai sę yali, tama agai te po weyu, da isimainao wali. Te agai dabolo te bidi dolabo marasin mabo tiwai menama, te dago tumainu yali.
JER 8:15 Te da bugagia bidaibao homu dago yali, tiali goli, te da bugagia me bidibeo. Te da bugagia usu ma elama bidabo sogo pedelaiba homu yali, tiali goli, te boi bidi dabe aselama, da wi dwai mu ilai dao.
JER 8:16 Te boi bidi dabe te Dan hanigo tǫ te not badu pedelama, te dago odali, te augwaligo hos dabe te homu hę bomonama mu wabo odali. Te hos dabe ga wabogo te tigidali tǫ pedai mumunu yalio. Te boi bidi dabe asiyu, te taun Jerusalem dolama, tede bidibo we bidi me dolainu yali, te dago tǫde elalubo tigidali nai mu dolama, silainu yai dao.”
JER 8:17 Te Genuai Bidigo te tiwai po wali, “Odao. Te eno dwai hasamani dageba tagala palama, te dage gąų kelaibao. Tama dagego te hasamani dabe nagamenama, dua bidimainu eyu, te dage tagalomainu ebaso, usu egobeo. Mu menio,” te Juda dabego te po wali.
JER 8:18 Eno hobede elama, tama haliga sęgę dwai mu elama, tama eno homu kolesaga tigidali dolalio.
JER 8:19 Hobede dao, te eno hani dabe tigidali tǫ kantride bidalu, te augwa gela weyu, te tama i obao, “Te Genuai Bidi te taun Saionde king munu ma bidigobe homu yaiba, agawe? Magi baso agai da tau sabewe?” Tialima, Genuai Bidigo po wei ponoyu, te tiwai po wali, “Magi baso eno we bidi dagego te gasa tǫ kantri dabego tibo dwai godigo piksa nigilama, te augwaliba lotu waliwe? Duga te tama tebo kolesagago te ena dwai haliga sębę ilali.”
JER 8:20 Te we bidi dabego te tiwai i wali, “Wiegi yai sogo te siminama, te augwaligo gide tau yali nai tigidali salio. Tiali goli, Godigo da ma sisąbadi dao.” Te po wali.
JER 8:21 Ena Jeremaia, eno suali, ena hani dabe dolali, tibaso eno homu dwalio. Eno haliga sęgę dwai mu elama, te eno gela umagia mu wai dao.
JER 8:22 Te tǫ Gileatde te wiegi yai marasin me munalusiąyu eba, agawe? Te augwa dokta me menisiąyu, ebawe? Magi baso te eno we bidi hobedagia te usu ma pedalugobewe?
JER 9:1 Idao! Te eno tobolu te ulu wę me deli tiwai elaluyu, tama te eno gedu sidu te ąį hauwa geligi da, teda eno homu dene dwai mu eyu, gela wabo usu igi da. Te eno giligade me hulide gela udigi da, magi baso meni, te boi bidi dabego te eno hanigo we bidi dabe ela muai dao.
JER 9:2 Te olo masigi kemi tǫde te eno bulu tolu yabe be me deli elalugi da, te wiegi yai igi da. Teda ena te hani bidi digibulu taga pelama, ena te beba bidigi pabo usu igi dao. Magi baso meni, tigidaligo God tagalali, te bidigo aga we tagalama, te gasa penani we dabe wali bilibo tiwai ebao. Tama augwali te nai wi sabo genuai tiwai dao.
JER 9:3 Genuai Bidigo te tiwai po wali, “Sesemane sogo eno we bidi dabego te tibo po wabo sisi elalubo tiwai eyu, te bidigo enesigide te ene nanalubo tiwai ebao. Te mu po wabo kolesaga te augwaligo tǫ kantriba genuai pedalubeo. Te tibo po wabo ugwaba ela holalio. Augwaligo te haniani dwai kolesaga umabo mu ela pidubadi, te augwa konealubo homu enaba me mubeo.”
JER 9:4 “Dage we bidigo te duga abagi dabede bugagia osola suao, tiyu augwaligo dageba posobo po wabuo. Te duga ama dabego poba homu kęą pigio, magi baso meni, tigidali amago te gaga munubo sę te Jekopgo yali tiwai ebo dao.
JER 9:5 Tigidali bidigo te augwa abagi dabe tibo po ola mayu ebao, te mena bidi me deligo te mu po me wabeo. Te augwa tibo po wabo te konea selama, te augwa homu me begelisiąma, te augwa haniani dwai kolesaga ebo me tagalogobeo.
JER 9:6 Te we bidi nage augwali tomode bidibo bage, augwaligo te gasa bidi aiyaba elalubo sę bomo eyu, te tobage tibo po wabo kolesaga eyu ebao. Tama augwa te ena Genuai Bidiba homu kęą pabeo,” Genuai Bidigo digi te po wali.
JER 9:7 “Tama ena, Tigidali Bomo Elalubo Genuai Bidi, eno te po obao, suao, te eno ena te we bidi usu saibao, te bidigo silva te siaba ulubo tiwai eyu, te silva aga hogomu pobele bage sela sąbo tiwai yaibao. Te eno we bidi hanigo dwai sęgę sabo sę ebaso, mena gasa sę eno augwaliba yabo me elalubawe? Menio.
JER 9:8 Augwaligo wabo pogo te augwa abagi dabe dolaibao, te bidigo bidi ela muabo ene enebo tiwai ebao. Augwali te tibo po wabo bidi dabe dao. Te augwa pedauwalide te augwa abagi dabeba dwagi yai po obao, tiali goli, te haligade augwaligo te augwali dolabo homu ebo dao.
JER 9:9 Mu tamao, eno te we bidiba dwai dene mawaibao, augwa te yali dwai sę wei ponaibao. Ena Genuai Bidi, eno te po wai dao.”
JER 9:10 Tialima, ena, Jeremaia, eno te bulu du dabe, me te kala elaluali pesage dolali, tede homu kone ebao, tama ena dwai gela weyu, hobede ebo balia obao. Te pesage badu te bidi munu me bilisiąma, te bulmakau dabe te kala pesageba te nosai me tugi pogobeo. Te ba dabe me hasa dabe wi pela siliyu, te pesage taga pai dao.
JER 9:11 Genuai Bidigo te po wali, “Te eno Jerusalem dolama, te masigi pesage holali naga elalueibao. Tama te uni yowi dabego pesage pedelaibao. Tama eno te Judago taun tigidali dolama, te taun dabe olo elalu, te bidi meni yaibao.”
JER 9:12 Tialima, ena, Jeremaia, eno te po obao, “Magi baso te tǫ dolama, tama te olo masigi kemi pesage elalu, tama tede bidi me bidibewe? Mena wiegi yai homu kolesaga mu yai bidigo aga te sę yali page konegowe? Genuai Bidigo mena bidibolo te po pusulama, tama te bidigo te sę yali page te we bidiba pusugowe?”
JER 9:13 Tama Genuai Bidigo te tama po wei ponani, “Te sę page e tiwai dao. Te we bidi augwaligo eno augwaliba mani bomo yai po wali pisąma, tama augwa eno po sela sąwani, tama eno augwaliba ola mani sunumidu te augwali pabeo.
JER 9:14 Augwa hagoma mu elama, augwa homu wali pali. Te augwa te god Balba lotu wali, te augwa wąį nǫųgo ola mayu, te sę yao wali ebo sę tiwai yalio.
JER 9:15 Tama ena Israelgo God, ena Tigidali Bomo Elalubo Genuai Bidi, eno po dolo obao, eno te we bidiba genuai dene mawaibao. Te eno augwaliba te ha ebo doanai te augwa pedauwaliba munama, te augwa tumainu tiwai eyu, te eno augwaliba te dwai marasin menama, te augwa tubo tiwai emainu yaibao.
JER 9:16 Te eno augwali ela gudulama, te augwa gasa tǫ kantriba tedela pelama, bidimainu elama, te augwa wąį nǫų dabe me, augwali me, te polobadu pisąwai bulu tǫba paibao. Te eno digi te bidi dabego augwaliba boi bidi eyu, te augwali ela mumainu yaibao, te tama tede pidubadi, te tigidali isila siliboba usu naibao,” te po wali.
JER 9:17 Tigidali Bomo Elalubo Genuai Bidigo te tiwai po wali, “Dagego te dugaba pedalubo te sęde homu kone bugagia palao. Tama duga te hobede ebode te tęąbi mu koneai we dabe i olama, te augwali asomainao.”
JER 9:18 Tialima, te we bidi dabego te tiwai po wali, “Awe, te augwali polo asesą aselama, te daba hobede ebo tęąbi wagasomainao, te da gela umagia weyu, te dago gedude gela guai tulaluyu, te dago gesabidiba dulumainu yaibao,” te po wali.
JER 9:19 Te Saionde te we bidi gela weyu, hobede ebo tęąbi te tiwai wali, “Hobede ya, da mu dobao. Da hale dwai mu ebao, magi baso meni, te boi bidi dabego dago be dabe dolalio, tama dago dena tǫ dabe tagalobao,” wali.
JER 9:20 Dage Jerusalem we dabe, Genuai Bidigo po enaba dageba po pusao wali, tama dagego agai poba olo bugagia muao. Dagego duga wegi dabeba te hobede ebo tęąbi wabo kolesaga ola mao. Tama dage we deli deligo te hobede ebo tęąbi wabo kolesaga te gasa we dabeba ola mao.
JER 9:21 Magi baso meni, isibo daba pedelalio, te dago be sunumidu tomoba asali. Te da genuai bidigo bede bidibadi me, ma te olo bidigo bede bidibadi me, te tagalao. Te isibogo da me ela soagobeo. Isibogo te wai puluba sunumide gagali idubo, me te gesi ogwa bidi te bidi sisinibo pesageba sabolama, te isaibao.
JER 9:22 Te isai bidi dabe tigi te tǫde wilalua paibao, te yowigo di tiwai elaluali, tama te gide wit dunu pali tiwai elalua paibao. Te augwali sisinabo bidi meni yaibao. Genuai Bidigo enabolo te po pusao wali.
JER 9:23 Genuai Bidigo te tama po wali, “Te po page koneai bidigo aga koneani kolesaga wiegi yai homu pemene igio. Tama bomai bidigo aga bomode homu pemene igio. Te mone bidigo aga monede wiegi yai homu pemene egio. Menio.
JER 9:24 Te bidi aga pemene yabo homu ebaso, aga te nai delide naga pemene yao. Agai ena Genuai Bidi koneani da homu elama, wiegi yai pemene yao. Agai enade e tiwai koneao, sesemane sogo eno tigidali tǫde we bidi homu godolo eyu, te eno wiegi yai doloba pai kolesaga augwaliba ebo dao. Ena Genuai Bidi, eno te tobage kolesaga ebode wiegi yai homu pemene ebo dao,” Genuai Bidigo te po wali.
JER 9:25 “Ena Genuai Bidi, eno te tama po obao. Te hani bidi dabe te augwa hale ebo tigiwali togobo bidi dabe eno dene ilabo sogo bodolu muai elalu, te kolesaga wali pomainu yali, tiali goli, augwa eno po wali pabeo.
JER 9:26 Te e bage te Isip dabe, me Juda dabe, me Idom dabe, me Amon dabe, me Moap dabe, me te olo masigi kemi tǫde bidalubo bage me, te augwa gesabi badu tobolu nisi pęwadage sugą sobao. Te hani augwali te Genuai Bidigo po odisąbo bage, te Israel dabe augwaligo me te hani bagego kolesaga wali palio. Te Israel dabe me, augwa hale ebo tigiwali togosiąwai ąǫ tiwai yai dao,” wali.
JER 10:1 Dage Israel, te Genuai Bidigo poba olo bugagia muao.
JER 10:2 Agai te tiwai po obao, “Dagego te gasa tǫ pedai kantride bidibo hani dabego kolesaga wali pigimio. Augwaligo te gasagi yai nai te dagalude pedalubo sulama, te augwa wi mu yaibao. Tialima, dage da, wi me elamuo. Menio.
JER 10:3 Suao. Te hani dabego mu kolesaga me ebeo. Augwaligo ebo kolesagago augwali tau sabo usu egobeo. Augwa te ni me deli buside gelama, tama te ni piksa dulubo konebo bidi dabego te ni selama, tama tego tibo god dulama, nigali.
JER 10:4 Te bidi dabego te gol me silva selama, te piksa au ilaibao. Te nosali, augwa te hama selama, te god me badu me te nide enaibao, te aga tulaluidali weyu tebo dao.
JER 10:5 Te god dabe te olo nai dao, te bidi dabe piksa noma tiwai, te gi page bidigo te ba dabe wi iliyu, te gide muaibao. Te god dabego po me wagobeo. Te augwali bilibaso usu egobeo, tiyu te bidigo augwali tolaibao. Dage augwalide wi igio, magi baso meni, augwaligo dwai sę me deli yabo usu egobeo. Te augwa wiegi yai kolesaga me yabo usu egobeo,” te po wai dao.
JER 10:6 Genuai Bidi, te nage tiwai gasa me menio. Nago genuai bomo, me genuai nogi elalubao. Te nago naga bomo waseliyu, te tobage sę dabe ebo dao.
JER 10:7 Nage te tigidali hani we bidigo king bidibao, tiyu tigidaligo nagede wi elama, te nage dologode bidibaso usu yaibao. Te nago koneani wiegi yai homu kolesagago te king dabego koneani homu kolesaga, me te po page konea pai bidi dabego homu kolesaga, me te tigidali hani we bidigo kolesaga me, te aiyaba mu elaluai dao.
JER 10:8 Te bidi dabego homu kolesaga te geda muyu, te augwali umuna pai mu elalubao. Magi baso meni, augwali te nigo nigali naiba naga pelama, te kolesaga sabo dao.
JER 10:9 Te bidi dabego te silva te tǫ kantri Spende siyu, me gol te tǫ kantri Ufasde sobadi elama, tama te gol me silva sę ebo bidi dabeba menama, te augwa god dabe augwaligo mesegelimainu tebao. Te wiegi yai nami ugwa nigibo bidi dabego, augwa te sisi ugwa me mama yai nigilama, te god dabe au ilainu tiaibao.
JER 10:10 Tialima, Genuai Bidi, nage God mu dao. Nage sesemane bidibo God, te nage sesemane sogo king bidaibao. Te nago haliga sębę ebo sogo da, te tǫ mali eyu, te we bidi hani bugagia me bidigobeo.
JER 10:11 Dage Israel, dagego te Genuai Bidigo po odisąbo bidi hani augwaliba te tiwai po wao, “Te dagego godigo te tǫ me dagalu nigibeo, tama te god dabe dolobaso da, te munu ma tǫde me dagalu dologode me bidigobeo,” te po wao.
JER 10:12 Te God da, aga bomogo digi te tǫ nigai dao. Awe, aga wiegi yai koneani homu kolesagade agai te tǫ dodolama muai dao. Aga homu kolesagade agai te dagalu nigiyu elama, diniga palali.
JER 10:13 Agai po obaso, te dagalu pǫ dabego te be kulu bomonama obao, te pǫ hauwa umabo hogodama, te gasa gasa badu asu, te deliba sisinibao. Agai te dagalude be sele emainu elama, te tulubage tulubao. Agai te wali hodolama, te aga bidibo pesage tagalama, asobo dao.
JER 10:14 Bidi dabe te tiwai ebeo. Tigidali te umuna pelama, te koneani homu me elalubeo. Te tibo god golgo nigibo bidi dabe dao, te augwali hale yaibao, te augwa nigali nai dabede. Te god dabe te mu nai menio. Augwa te bidibo ula me elalubeo.
JER 10:15 Augwali te olo nai mu tiwai elalubao, te bidi dabego posobo po augwaliba waibao. Te god dabe da dolama, te mu sia saibao.
JER 10:16 Tialima, Jekopgo God te tama me tegobeo. Aga te tedali gasagi yai mu dao. Agaduba deligo naga te tigidali nai nigali. Tama agai te Israel dabe dąį elama, sa muani, te aga hani tiwai da wali. Aga nogi te e dao, Tigidali Bomo Elalubo Genuai Bidi dao.
JER 10:17 Dage Juda, te boi bidi dabego Jerusalem bagua salio. Tialima, dagego duga doado bage sisinama, tolasa piąo.
JER 10:18 Magi baso meni. Genuai Bidigo te tiwai po wali, “Te sogo eno dage Juda tǫ we bidi gasaba sela sąwaibao, bidigo te masigi du te kukulu tede belama, te hogolama, tama sąbo tiwai yaibao. Te eno genuai sęgę dageba menama, te dage dene mu ebaso, gę mu naibao.”
JER 10:19 Tama te Juda dabego te tama po waibao, “Hobede mu ebao, da dolalio. Te dago sęgę genuai mu elalubao, te genuai keni pedela sisąbo tiwai ebao. Tiali goli, tagalao, te sęgę daba pedelama, te dago tolobo dao,” te po wali.
JER 10:20 Jerusalem dolama, te olo mu elalubao, te ugwa be me deli pisila pelama, te degasa dulali tiwai elalubao. Tama te ugwa be ma sę yabo bidi me deli meni yaibao, magi baso meni, tigidali we bidigo te Jerusalem tagalama, pela silai dao.
JER 10:21 Te tǫ kantri tonalubo tobolu bidi dabego wiegi yai homu kolesaga elalusiąyu, augwa te Genuai Bidiba hanaluama, te augwa homu kolesaga dodolomainu te homu me ebeo. Tiyu, augwaligo te wiegi yai sę me isiąbaso, te boi bidi dabe aselama, te we bidi dabe tedela pali, te uni yowigo te sipsip tonalubo bidigo te sipsip bugagia tonalusąbaso, te tedela palobo tiwai yali dao.
JER 10:22 Odao. Augwaligo te po sela asalio. Te genuai po dągą u wabo te not badu pedelalio, te boi bidi dabe augwa pesage tagalama, te Judago taunba hwįagasu asobao. Te taun dabe te mu dolama, te uni yowigo pesage naga pedelaibao.
JER 10:23 Genuai Bidi, eno koneani, te bidi dago dena bilibo tonalubo usu isąyu, te dena godolo homu ebo sunumi dabe wali painu ebaso, usu egobe dao.
JER 10:24 Genuai Bidi, nago da dodolao, tiali goli, nago da selebo sę igio. Tiyu, nago da dali haliga sębę eyu, nago da mu dolidalio.
JER 10:25 Te nageba lotu wasiąyu, te gedu haluasa po wasiąbo we bidi hani dabeba dene mao. Te hani dabego te dago we bidi dabe te Jekopgo hani ela muai. Augwaligo da mu silama, te dago tǫ me be mu dolai dao.
JER 11:1 Genuai Bidigo ena Jeremaiabolo te tiwai po wali,
JER 11:2 “Te eno dąų wabo bomo yai poba olo bugagia muao. Tama nage pelama, te Juda me Jerusalem we bidi dabeba te tiwai po
JER 11:3 wagi pao. ‘Ena Genuai Bidi, eno duga Israelgo God, eno te po obao, mena bidigo eno bomai dąų wabo po me wali pisąbaso da, teda aga dolaibao.
JER 11:4 Te dąų wabo bomai po te eno duga wąį nǫų dabe te Isipdu odasa asali sogo mawai dao. Augwaligo te Isip taga soali sogo, te sia posolo tiwai mu yali bulu, te eno augwaliba te tama po wali, “Dagego eno po tigidali wali pobaso da, teda dage eno we bidi hani bidiyu, te ena dagego God bidaibao.
JER 11:5 Tama eno te duga wąį nǫų dabe dali dąų wali po wali peyu, usu naibao. Eno te dagego wąį nǫų augwaliba te wiegi yai tǫ me deli mawaibao po wali, te ili hauwa elalubo tǫ da,” wali. Tama megi dage te tǫde bidibao.’” Genuai Bidigo po walio, tialima, eno te tiwai po wei ponai, “Mu tamao, Genuai Bidi, nago wabo po gilama tama tiagameo.”
JER 11:6 Tialima, Genuai Bidigo enabolo te tama po wali, “Nage te Juda dabego taun dabeba pelama, me te Jerusalem sunumi tulumage dabeba pelama, eno te tigidali po pususu pao. Eno po e tama dao. Dage we bidi dabe, te eno dąų wali bomo yai po odama, wali piąo,” te po wai.
JER 11:7 “Te eno duga wąį nǫų dabe te Isipde selama, odasa asali sogo, eno augwaliba bomai po mayu, te tiwai po wali, te eno po augwaligo wali pao wali. Te sesemane sogo eno te tobage deli po naga dagego hani dabeba udali, te megi e sogoba usu nagasobao.
JER 11:8 Tiali goli, wąį nǫų dabego te po odama, wali me pabeo. Menio. Augwa te dwai homu kolesaga naga elaludu, te augwa hagoma elama, augwa homu kolesaga wali naga pali. Eno augwaliba te dąų wali bomo yai po wali piąo wali, tiali goli, augwa hagela homu yali. Tialima, eno augwaliba te dene mabo sę yali, te dąų wali bomo yai pode wali gilama te tama tiai dao,” wali.
JER 11:9 Te Genuai Bidigo po enaba ma weyu, te tiwai po wali, “Te Juda dabego me, Jerusalemgo me, te Genuai Bidi, eno po sela sąyabo po mia sai yalio.
JER 11:10 Augwaligo ena tagalama, te augwa wąį nǫų dabego dwai kolesaga wali ma pobao. Te augwaligo eno po sela sąyu, te augwa wąį nǫų dabego yali tiwai ebao. Te Israel hani me, Juda hanigo me, te tibo godiba lotu weyu, tama eno augwa wąį nǫų dabe dali dąų wali bomo yai po te bolobo dao.
JER 11:11 Tama tibaso, ena Genuai Bidigo, eno po dolo tama obao, te eno augwali dwagilama mu dolaibao, te sę augwaliba ebo me ela soagobeo. Te augwaligo enaba i weyu, tau somainu yaibao, tiali goli, eno augwaligo i wabo me odogobeo.
JER 11:12 Te Jerusalem dabe me te gasa Juda bage te augwa wiegi yai denami hano holobo ofa ebo tibo godiba paibao. Tama augwa te god dabeba i waibao, tialima, te god dabego augwaliba te dwai sę ebo sogo ebo side tau sainu ebaso, usu me egobe dao,” wali.
JER 11:13 “Tegoba! Dage Judago, te dagego tibo godigo namba dabe te dagego taun dabego namba tobage tiwai elalubao. Te dagego wiegi yai denami yabo ofa te Balba yabo alta hauwa nigibao, te hale ebo god dao. Te alta dabego namba te Jerusalem sunumi dabego namba tiwai si elalubao.
JER 11:14 Jeremaia, te we bidi dabe te dwai sęgo gegebaso, te augwaligo enaba i weyu, te eno augwali tau sao po waibao. Tialima, te eno augwaligo i wabo me odogobeo. Tama te augwali tau somainu te nago gedu haluasa po enabolo me olamuo. Te nago gela me weyu, te enaba bomonama i weyu, te eno augwaligo sęgę silao po me olamu dao,” te po wai.
JER 11:15 “Dage eno we bidi dabe, eno dage godolo homu mu ebao. Tiali goli, duga te tobage dwai kolesaga ebao. Tialima, magi baso dage te eno beba pabo dawe? Dagego te kibu hasa dabe enaba ofa yainu sela pali, te dagego homude te ebo ofago te dage tau siyu, te dwai sogo ebo dagede ela somaina homu eyu tebao. Tiali goli, te menio. Te dwai sogo dageba pedelaibao. Te dage wiegi yai pemene yaibao homu eyu eba, agawe?
JER 11:16 Polobadu eno te po wali, dage Israel dabe te wiegi yai du walobo ni oliv me deli tiwai elalubao, wali. Tiali goli, megi da, eno dage dolaibao, te dagalude bomonama kulukulu weyu, te be sele eyu, te ni oliv doliyu, te siago dabo tiwai elama, te nologo togwa pabo tiwai yaibao.
JER 11:17 Ena Tigidali Bomo Elalubo Genuai Bidi dao, eno te ni bulali, tialima, megi eno te po obao, aga dolomainao. Dage Israel hani dabe me Juda hanigo te god Balba lotu weyu, te wiegi yai denami ebo ofa me ebao. Dagego te dwai kolesagago te ena haliga sębę dwai mu ilibo dao,” wali.
JER 11:18 Ena Jeremaia, eno gedu haluasa po e tiwai wali, “Genuai Bidio, te bidi mebago enaba dwai sę yainu ebao, te augwaligo ena dali te sę yainogo ebaso, te enabolo nago te po pusali dao.
JER 11:19 Hasia eno te sę yabo konesiąwai. Ena te sipsip wai me deli tiwai te bidi dabego selasa pelama, ena eligi pabo tiwai yaibao. Te bidi dabego te tiwai po mia salio, ‘Tegobao, dago megi tama ela muinao, te bidigo te ni du walobadi togobo tiwai yaibao. Dago aga mu silama, te bidi dabego aga homu kone ma egobeo.’ Augwaligo tama po wali,
JER 11:20 tiali goli, nage Tigidali Bomo Elalubo Genuai Bidi dao, nago te we bidi dabego haliga me homu kolesaga dagalobo dao, te nago po tų dolo mu ebo dao. Eno te sęgę nago nogoba mubao, te eno homugo nago te bidi dabeba dwai sę ebo dene mabo sueibao,” te po wali.
JER 11:21 Te Anatot bidi dabego ena ela muaiba olama, enaba te tiwai po wali, “Nago te Genuai Bidigo nogide te profet po wagio,” wali. “Nago te tobage po obaso da, te dago nage ela mueibao,” wali. Tialima, Genuai Bidigo eno gedu haluasa po wali odama, agai enabolo te tiwai po wali,
JER 11:22 “Ena Genuai Bidi Tigidali Bomo Elalubao, eno po dolo obao, eno te Anatot hani bidi dabeba dwai sę mu yaibao. Eno te boi bidi dabe tagala palama, te ogwa bidi dabe ela mumainu yaibao. Tama te sogo te Anatot dabe te nai menia selama, te augwa wai dabe isila paibao,” te po wali.
JER 11:23 “Eno te Anatot dabe dolabo sogo bodolu muai. Eno te tama tebo sogo, te augwali deli me bidigobeo. Menio. Tigidali isaibao,” te po wai dao.
JER 12:1 Genuai Bidio, nago doloba pai kolesaga sesemane sogo ebao, te eno nage dali po konila eyu wabeo. Tialima, te meba kolesaga eno konesiąwani, tama eno te nagebolo hanalu obao. Magi baso te dwai kolesaga ebo bidi dabe, te augwa sesemane sogo bugagia bidibo dawe? Magi baso te gagamu selibo bidi, me tibo po wabo bidi dabe, te augwa ebo sę bugagia mu ela pidubo dawe?
JER 12:2 Nago augwali te tǫba munama, augwali te wiegi yai pedelali, te bidigo bulali ni tiwai elama, te ni sele tǫ tomoba pelama, te ni genuai holama, te nai walobo tiwai ebao. Sesemane sogo augwaligo nago nogi nogi eyu ebao, tialima, te augwa homu nagede digibulu elalubo dao.
JER 12:3 Tialima, Genuai Bidi, nago ena koneama, te eno tigidali kolesaga me konebao. Te nago eno homu kolesaga dagalubao, eno nageba haliga mu mubo, te nago konebo dao. Te eno homugo eno boi bidi dabe nago sela sąyao homu ebao, te bidi dabego sipsip elainogo sela pabo tiwai ebao. Te nago bodolu muani sogo, nago augwali ela muao.
JER 12:4 Genuai Bidi, nago dago tǫba genuai sęgę muani, te tigidali nosai sasia pali. Nisu sogo te sia selama, te tǫ wiegi yai ma pedalugowe? Te hasa me, ba dabe me, isila pobao, magi baso meni, te tǫde we bidi dabego dwai kolesaga me idubo sę ebao. Tama me, te we bidi dabego te po obao, “Jeremaiago daba te pedalubo sę dabe me suagasogobe dao,” po wabo dao.
JER 12:5 Tialima, Genuai Bidigo enabolo te tiwai po wei ponani, “Jeremaia, megi nago te gę nabo sęgę, te nosali pedelabo sęgę tiwai me egobeo. Te nage bidi dabe dali ususu si ebode te homu hę obaso da, teda magi elama nago te hos dabe dali udabo ususu si yaibawe? Te nage dua digi te wiegi yai sogo naga tǫ kantride bidibaso da, teda nage te Jordan wę genuai aselama, aluasa soabo sogo, te nage magi elama, bidaibawe?
JER 12:6 Te sęgę dabede te me deli te tiwai elalubao. Te naga hani dabego digi te nageba dwai sę yabo po mia salio. Te nage augwaligo nage pobeasa pabo tiwai elama, te pąde nage pageabi yainu ebo tiwai yaibao. Te augwaligo nage dali wiegi yai po obadi, te tagalao, nago augwaligo poba homu kęą pelamu dao,” wali.
JER 12:7 “Ena Genuai Bidi, eno tama po obao. Eno Israel tudiba muaibao, te ena we bidi da olama, sa muai. Eno te we bidi dabe godolo homu mu yali, tiali goli, megi da, eno te boi bidi dabego augwali aiyaba elalumainu ebo dao.
JER 12:8 Eno te we bidi dabe, augwaligo enaba boi bidi yali. Augwaligo ena aiyaba elaluainu i bomonama weyu, te laion me deligo genuai buside i wabo tiwai yali. Tialima, te eno augwali godolo homu munu me egobeo.
JER 12:9 Eno we bidi augwali te ba me deli tiwai gilama, te ba kemodage dabego te ba bagua sagaselama, te aga dolobo sę yalio. Te uni hasa dabe me i olama, te augwali me aselama, te ba tuagasomainao,” wali.
JER 12:10 “Te gasa tǫ kantri polalubo bidi dabe aselama, te eno wain gi dolaibao. Te augwaligo eno wiegi yai gi agalama, te gi te wa pai pesage naga ilaibao.
JER 12:11 Tama te tǫ te bidi meniama, olo bulu mu elalueibao. Tama te tǫ hobede yai gela wedu, te eno agai gela odomainu tiaibao. Te bidi mego te tǫde sęgę homu kone me palogobeo.
JER 12:12 Te tǫ wa pai bulu pesagede te boi bidi hauwa pedaliyu, te augwaligo tigidali nai doado bage dolabo homu yaibao. Magi baso meni, te eno dagego tǫ kantri we bidi tigidaliba dene maiabo homu ebao. Tama te bidi me deli bugagia bidainu ebaso, usu me egobeo.
JER 12:13 Dage Israelgo te wit wai ge bulaibao, tialima te inayani nai tau yali sabo sogo, dagego te sesani yai bono naga elalubo sueibao. Dage odolali sę dene elama, te magi nai me deli dagego me sogobeo. Dagego te Genuai Bidi eno haliga sębę naga saibao. Tama dage dwai hale mu siyąo,” wali.
JER 12:14 Genuai Bidigo te tama po wali, “Te Israel dabe pąde bidibo hani dabe, augwalide eno po elalubao,” wali, “augwali te dwai kolesaga ebo bidi dabe tiyu, te augwaligo eno we bidi dabeba mani tǫde dwai sę ebao. Odao. Te eno te hani boi bidi dabe te augwa tǫba digi ela gudulaibao. Te Juda dabe augwa tǫde digi te boi bidi dabego tǫ tomode bidibao, tialima eno te Juda dabe me sela sąwaibao.
JER 12:15 Tiali goli, eno augwali sela sąnama da, teda nosali eno te olo tau mabo wiegi yai kolesaga augwali hani tigidaliba ma yaibao, te eno augwali te augwa page buluba ma odasa paibao.
JER 12:16 Tama te sogo te gasa hani augwaligo te eno we bidi dabego kolesaga bugagia konea sabo sę yaibao. Polobadu te hani dabego eno we bidiba te god Bal nogide mu po waiyąo wabo po ola mawai. Tiali goli, te sogode te augwa digi eno nogide mu po dao waibao, te sesemane sogo bidada pabo Genuai Bidi dao. Te kolesaga augwaligo wali pobaso da, teda augwali me eno we bidi hani pedelaibao.
JER 12:17 Tiali goli, mena we bidi hani me deligo eno po odobo hagela homu ebaso da, teda eno augwali sela sąnama, te augwali mu dolaibao. Ena Genuai Bidi, eno te po wai dao,” wali.
JER 13:1 Genuai Bidigo Jeremaia enabolo te tiwai po pusali, “Nage pelama, te wiegi yai name ugwa me deli abeligi pelama, tama kukulu tiwai gudao. Tama nago te ugwa te ąįba munu me munamo dao,” wali.
JER 13:2 Tialima, ena pelama, te name ugwa me deli abeligi pali, te Genuai Bidigo wali po gilama, te eno gudali.
JER 13:3 Tialima, Genuai Bidigo enabolo e tiwai po ma wali,
JER 13:4 “Nago te abelali name ugwa gudama, te nage hogodama, te bulu Peratba pelama, te ugwa te masigi dedageba geme dualigi pao,” wai dao.
JER 13:5 Tialima, eno Genuai Bidigo po wali pali, te ena pelama, te bulu Peratba te name ugwa geme dualigi pelama, tama ma aselama, eno bulude bidali.
JER 13:6 Hauwa sogo bidama, tialima Genuai Bidig o enabolo te tiwai po ma weyu, te po wali, “Nage hogodama, te bulu Peratba ma pelama, te ugwa ma sigi pao, eno nagebolo te po obaso nago dualigi pai dao.”
JER 13:7 Tialima, ena te Peratba pelama, eno te ugwa dualali pesagede te digawani. Tama eno te ugwa selama suali, te dolai baso, te magi sę me yabo homu me ebeo.
JER 13:8 Genuai Bidigo enabolo te tiwai po ma wali,
JER 13:9 “Ena Genuai Bidi, eno te po obao. Te eno Juda dabe me Jerusalemgo hagoma ebo kolesaga aiyaba elalueibao, te augwa genuai nogi dolaibao, te name ugwa dolali tiwai yaibao.
JER 13:10 Te dwai kolesaga ebo we bidi dabe, augwa olo pania selama, te eno po odobo hagela homu yali. Augwa hagoma eyu, augwa homu kolesaga wali pabo dao. Augwa tibo god wali peyu, te augwaliba lotu wabo dao. Te we bidi dabe dolaibao, te ugwa dolali tiwai elama, te bidi dabego agade magi sę me egobeo.
JER 13:11 Hasia ena Genuai Bidi, eno te Israel hani me Juda hani enaba bomonama kęą pagasai elalu, te name ugwa bidigo tigide kukulu tiwai dąų olama bealubo tiwai yali. Eno tama tiali, te augwali eno we bidi hani bidiyu, te augwa eno nogi ugwaba siyu, te ena wiegi yai pemene eyu, te enaba genuai nogi momainogo yali. Tiali goli, augwaligo eno po odobo hagela homu yai dao,” wali.
JER 13:12 Genuai Bidigo po ma weyu, te tiwai po wali, “Jeremaia, nago te Genuai Bidi eno po te Jerusalem dabeba pusao. ‘Ena Genuai Bidi, Israel duga God dao, eno te tama po obao. Te bidi dabego te wain tǫgo nigai sospen senede tabiaibao.’ Te Jerusalem dabego te po odama da, teda augwa te tiwai po nageba waibao, ‘Nago homugo dago te sę konebe da homu eyu oba, agawe?’
JER 13:13 Tialima, nago te po augwaliba pusao, ‘Ena Genuai Bidi, eno te tiwai po walio,’ po wao. ‘Te dage tǫde we bidi tigidaliba wain mu pągąnaibao, te dage gęǫ page dwai mu yaibao. Te Devitgo king hani dabe, me te pris dabe, me profet dabe, me te Jerusalem we bidi tigidali badi, eno waingo pągąbo te tǫgo nigai sospen senede pągąwai tiwai gilama yaibao.
JER 13:14 Tama te we bidi dabe eno dolama, te bidigo tǫgo nigali sospen sene manama elebaso, te tigidali alua paibao. Te tigidali we bidi dolaibao, te ida aya me, wai puluba dabe me, dolaibao. Eno olo mu tau sabo wiegi yai kolesaga eyu, hobede eyu, augwali gogoliyu, sula tagalama bidimainu me egobeo. Mu menio. Eno te augwali dolaibao.’ Ena Genuai Bidi, eno te po wai dao,” wali.
JER 13:15 Dage Juda, Genuai Bidigo po dageba walio, te dagego agai poba bugagia olo muiąo. Dagego hagoma munu me elamu dao wali.
JER 13:16 Dagego Godiba genuai nogi mao, duga Genuai Bidi dao. Tiyu, agai dagego bulu be huli elama, te duga bulu duba bilibo sogo, te dage tula muna muna paibao. Te giliga dageba nanomainao homu godolo ebadi, tialima, Genuai Bidigo te be posali ula hasegelama, te dwai be hulia sai pedelaibao.
JER 13:17 Tialima, te dagego po odisąma, te dagego hagoma idubaso da, teda te boi bidi dabego dage Genuai Bidigo we bidi sagaselama, te gasa tǫ kantriba kalabus mugi paibao. Tama tibaso, ena Jeremaia, te enaduba bididu, te dagede gela wedu gedubadi, te eno gedude gela guai gealuama, te eno gesabidiba dualibao wali.
JER 13:18 Genuai Bidigo enabolo te tiwai po wali, “Nage pelama, te king dali, aga idaba me, waligi pao, ‘Dage sigo te duga si dugulalubo sia king tagalao, magi baso meni, te dage sigo kingo gudali madi te olo nai tiwai pedelali, te dage sigo tonalubo tǫ kantri dabe me tonalugio,’ wali.
JER 13:19 ‘Augwaligo te taun dabe obo sunumi paliaibao, te tǫ distrik Negev te Juda pedai te saut badu elaluai, te augwali sunumi dayabo bidi meni yaibao. Magi baso meni, te boi bidi dabego te tigidali Juda selama, te gasa tǫ kantriba kalabus sę igi paibao.’”
JER 13:20 “Taun Jerusalem, nago gedu pedama, tama te not badu pedai tagalama, te nageba asobo bidi hani te nago tonao. Te nago augwaliba wiegi yai pemene eyu, te tonalubo we bidi augwali mena bidibawe?
JER 13:21 Nago te naga abagi meba pedalumainu ebo sę dene yali. Tiali goli, nosali augwaligo nage aiyaba elaluama, te nage tonalubaso, tama te sogo nago magi po waibawe? Te nage dene genuai saiba homu yaibao, te wego wai ame nainu dene sabo tiwai yaibao.
JER 13:22 Te nago te magi baso te dwai sę nageba pedalubo te nago koneainogo homu ebaso da, teda nago koneao, te pedalubo te nago dwai sę yali wei ponoyu tebao. Te naga yali dwai sęde naga nago ugwa augwaligo peda sąnama, te augwaligo nageba dwai sę yali.
JER 13:23 Te husugu bidi augwa tigiwali hasegelama, te mamamonu tigiwali hasegelaiba, agawe? Ma, te uni husugu yai pusi te augwa tigi dodobolo pali sela sąwaiba, agawe? Mu menio. Te tiwai tama, te nago naga dwai kolesaga me hasegelama, te wiegi yai kolesaga wali painogo ebaso, usu me egobeo.
JER 13:24 Jerusalem, te eno nago we bidi dabe sela sąwaibao, te waligo te wa pai pesage taga soyu, te witgo hogomu sela sąyagasobo tiwai yaibao.
JER 13:25 Ena Genuai Bidi, eno te sę dabe nageba pedalumainogo dąį ilali, magi baso meni, nago enaba konealubo homu tagalama, te nago konealubo homu te tibo god dabeba mubo dao.
JER 13:26 Tialima, te ena digi nago gudalubo name ugwa ugwaba dagala palama, te naga gesabidi dualaibao. Tama te bidi dabego nago ugwa olo elalu, hale ebo sę sueibao.
JER 13:27 Eno nago ebo kugumini yai kolesaga sualio. Nago te tibo god dabe wali pabo sę bomonama eyu, te augwaliba te bulu du dabeba lotu weyu, me te kala pesage dabede lotu weyu ebao. Nage te we me deli tiwai aga sali bidi mu tagalama, te gasa bidi dabe dali pigi pelama, te penani sę umabo mu yali. Tama nage te so hosgo te omai hos dabeba bomonama i wabo tiwai ebao. Hobede muo, Jerusalem, nage te meda yai mu bididu, te nage wiegi yai meda meni yai pedelabo homu ebeo. Nage te tiwai tama bidada pidubadi, te mena sogoba usu naibawe?” te po wai dao.
JER 14:1 Genuai Bidigo te po te Jeremaiabolo tǫde te tulubage meni yani sogo te po mawai dao,
JER 14:2 “Juda kantri tǫde te genuai sęgę elalu gela udali. Te aga hanu dabe dwai mu elalubao. Te aga we bidi dabe tǫ bulu pila munana peyu, te dwai gela mu udubao. Tama te Jerusalem dabe umagia gela u waibao.
JER 14:3 Te genuai bidi dabe augwa sę ebo bidi dabe tagala palama, te ąį tugi pao wali. Augwali te ulu wę dabeba pali, tiali goli ąį me elalubeo. Tama augwa te sospen sene olo ma sela pai. Te we bidi dabe augwa homu kone palali dwai mu ebaso, te augwa hale ebaso, augwa gesabidi halua siyu yai dao.
JER 14:4 Te Juda tǫ kantride te tulubage munu me tulisąbadi, te tǫ gebo pai tǫ pedelali. Tama te gide nai bulubo hani dabe, augwa haliga husugu dwai mu eyu, te augwa gesabidi halua sali.
JER 14:5 Te uni hasa dabe wai ame nani, tiali goli, tuabo nosai meni yai. Tibaso, augwa peyu, te wai dabe olo tede elalubadi taga pali.
JER 14:6 Te uni donki dabe te bulu dude dolalu, te augwa homu hę obaso, te bomonama mobo ma kekali, te uni yowi dabego ebo tiwai yai. Augwa te tuabo nosai meni baso, te augwali gedu kimi isalio,” Genuai Bidigo te po wali.
JER 14:7 Te we bidi dabego gedu haluasa po weyu, te tiwai wali, “Mu tamao, Genuai Bidi, dago nage tudiba muyu, te nago gedude dwai sę hauwa yali. Tama dena te yali dwai sęgo dena ma po tų ilalio. Tialima, Genuai Bidi, te naga genuai nogide digi homu kone palama, te nago da hobede yao.
JER 14:8 Sesemane sogo da Israelgo nageba konealubo homu dąų weyu, te nageba tonalu, te nago da tau somainu yali. Te sęgę me sabo sogo, nago da ma siyu yai. Tialima, megi da, magi baso te nago da konesiąbo homu ebawe? Magi baso nage te digibulu bidi asai bidi te da dali deli pilama pabo tiwai yai dawe?
JER 14:9 Magi baso nage te bidi tiwai, nage te homu umuna sai bidi tiwai ebawe? Magi baso nage te ami bidi te aga boi bidi aiyaba elaluabo bomo meni yai tiwai elalubawe? Tialima, menio. Genuai Bidi, nage da tomode bidibao. Tama nago te da naga we bidi mu da olama, dąį iliyu, sa muai. Tama tialima, nago da me tagaligio,” wali.
JER 14:10 Tialima, Genuai Bidigo te tiwai po wali, “Te we bidi hani, augwa te wau bilabo homu godolo ebao. Te augwa bilibo bugagia me tonalubeo. Tama tibaso, ena, Genuai Bidi, eno wiegi yai homu pemene augwaliba me ebeo. Megi da, eno augwa ebo dwai kolesagaba kone palama, te eno augwaliba te tigi dene mabo sę yaibao,” wali.
JER 14:11 Genuai Bidigo enabolo te tama po wali, “Jeremaia, nago te we bidi dabe bugagia bidimainu tau sao po me hanalugio,” po wali.
JER 14:12 “Te augwaligo nai habu selama, enaba gedu haluasa po obadi goli, te tagalao, eno augwaligo i wabo munu me odogobeo. Te augwaligo sia ulama, tigidali dela pabo ofa ebadi goli, te tagalao, te wit ulubo ofa ebo me, eno te we bidi augwaliba wiegi yai pemene me egobeo. Menio. Te eno boi bidi dabe tagala palama, augwali elagasomainu yaibao. Te eno augwali nai menia somainu ilama, te augwali isaibao. Tama genuai gasi augwaliba pedalumainu elama, te augwali isila paibao. Tama tebo kolesagade te eno augwali silimainu yaibao,” wali.
JER 14:13 Tialima, eno po wei ponoyu, te tiwai po wali, “Nago po te dolo obao. Tialima, God, Genuai Bidio, te profet dabego gasagi yai po te we bidi dabeba pusudu gebao. Augwaligo nago po e tiwai pusali, ‘Te boi bidi dabego dage me ela mugobeo. Te dage nai me menia sogobeo. Menio. Mu tama, ena Genuai Bidi, eno dage te tǫde sesemane sogo bugagia bidimainogo ebo dao,’ te profet dabego te po pusali,” eno te po wai.
JER 14:14 Tama Genuai Bidigo enabolo te tiwai po wai, “Te profet bidi dabego eno nogide tibo po pusubao. Eno augwali me tagala palobeo, tama eno po augwaliba me mabeo. Te po profet dabego dageba pusali po, te tibo po augwa homude digi pusali. Augwa te po wali, augwa te nade subo tiwai yali po wali, tiali goli, augwa tibo po wai. Tama augwa te nai dabe pedelaibao po wali, tiali goli, augwa te tibo po pusubao homu yai dao.
JER 14:15 Tama tialima, ena, Genuai Bidi, eno po dolo tama obao. Te profet dabego po eno nogide pusali goli, tialima eno augwali me tagala palobeo. Augwa te tama po wali, ‘Hwįbo me nasi ebo te tǫ kantriba me pedalugobeo,’ wai. Tialima, hwįbo me, nasi ebo me, te profet dabe augwaba digi pedelama, te augwa mu silaibao.
JER 14:16 Tama te profet dabego po odali we bidi dabe, augwali me te hwįbogo me nasigo dolaibao. Tama boi bidi dabego te we bidi me wai puluba selama, te Jerusalem sunumiba sąsą paibao. Tama augwali tigi pubulabo bidi meni yaibao. Te Jerusalem dwai sę mu ebo we bidi dabe, tiyu te eno augwali mu dolaibao,” wai dao.
JER 14:17 “Tama Jeremaia, eno homugo te nago naga po digi te we bidi dabeba pusao. Nago te tama po wao, ‘Ena Jeremaia, te ena gela umabo mu udubadi gęyu, te eno gedudu gela guwa gealudaibao. Eno te tebo kolesaga te ulade me, hulide me, tagalogobeo, magi baso meni, te boi bidi dabego eno we bidi dabe dwagilama mu eliyu, te we bidi hobedagia mu dolali.
JER 14:18 Te ena hanu bulu badu bilibadi, eno te hwįnama elali bidi tigi dabe suali. Tama ena te hanu sunumi dabedu pobadi, eno te nai mu meni yai we bidi te augwa tigi dolali elalubo suali. Te pris me profet dabe olo bilibao, te augwa mena sę ebowe, te augwa me konesiąwai dao,’ nago te po pusao,” wali.
JER 14:19 Genuai Bidi, nago te tǫ kantri Juda tudiba mu muani da, agawe? Te nago Saion hanu godolo homu mu meni ebawe? Magi baso nago da dwagila mu elama, te da usu ma yabo ąǫ isąbawe? Dago homu te da bugagia bidaiba homu yali. Tiali goli, te da bugagia me dugulalubeo. Te dago homugo te da usu ma yabo sogo pedelaiba homu yali, tiali goli, te boi bidi dabe aselama, te wi dwai mu ilibo sę ebo dao.
JER 14:20 Genuai Bidio, mu tamao, dago dali, te dena wąį nǫų dabego me, te nago gedude dwai sę hauwa yali dao.
JER 14:21 Tialima, nago te naga genuai nogide homu kone palama, te nago naga be homu koneao, te naga wiegi yai king duabo sia sai tiwai elalubao, tama te boi bidi dabego te be dolomainogo sula tagaligio. Tama nago te bomo yai po da dali dąų wali homu kone palama, tama naga te dąų wali bomo yai po boligio.
JER 14:22 Te Godigo po odisąbo bidi dabego te dwai tibo godigo te tulubage tulao obaso, usu yaiba, agawe? Ma, te dagalu aga digi te tulubage da mobaso usu yaiba, agawe? Mu menio. Genuai Bidi, dena God, nagaduba deli te usu mu ebo dao. Tama tibaso, nago te tobage sę dabe yaibao, tama tiyu, dago nage tonalu, te nago da tau somainu ebo dao.
JER 15:1 Tialima, Genuai Bidigo enabolo te tiwai po wali, “Jeremaia, odao. Te Moses de Samuel si te ena pąba asama, te enaba hanalu, te we bidi dabeba te olo mu tau sabo wiegi yai kolesaga yao wagi sogo da, te tagalao, eno usu menigi da. Te we bidi dabe sela sąyao! Eno augwali subo, te ena hagela homu mu ebo dao.
JER 15:2 Te augwaligo nageba e tiwai hanalu, ‘Da mena pagawe?’ obaso da, teda nago te tiwai po augwaliba wei ponao, ‘Ena Genuai Bidi, eno te tiwai po obao. Eno te bidi meba dwai gasi selama, isimainu dąį ilali. Te augwa dwai gasi sigi pomainogo yaibao. Te bidi meba te boi hwįgi pelama, isimainogo dąį ilali. Tama augwa te hwįgi pelama, isimainao. Te eno bidi meba nai sǫą pelama, isimainu muani. Te augwa nai sǫą pai pomainu yaibao. Te eno bidi meba sa muyu, te gasa tǫ kantriba kalabus igi paibao wali. Tialima, augwali te kalabus igi pomainogo yaibao.’ Te po wei ponao.
JER 15:3 Ena Genuai Bidigo, te eno nai me si me sigo te we bidi dabe mu silimainogo tagala palaibao. Augwali te boi bidi dabego ela mumainogo sa muaibao. Te eno yowi dabego augwali tigi mi pepedela tumainogo sa mueibao. Me te ba dabe, me uni hasa dabego te tigi mi mu tulama, silimainu sa mueibao wai dao.
JER 15:4 Te gasa tǫ kantri we bidi dabego eno te sę te Juda dabeba yali po odama, te augwali wi elama, dwai noma mu saibao. Eno te dwai sę te bidi Manasego yali wei ponaibao, te Hesekiago ogwago, te Jerusalemde te sę yali, te aga Juda king bidali sogo tama tiai dao.”
JER 15:5 Genuai Bidigo te tiwai po wali, “O Jerusalem, dego nage hobede yaibawe? Te nagede dego gela udaibawe? Te dego nage bugagia bidibowe, te gegela suagasogowe?
JER 15:6 Ena Genuai Bidi, eno po dolo tama obao, naga digi ena tudiba mudu, te ena digibulu pali. Tama tibaso, te ena digi ena nogogo te nage elama dolobao. Hauwa sogo eno nage hobede yali, tiali goli megi ena hagela pai dao.
JER 15:7 Eno te tigidali we bidi te taun Judade selama, te augwali eno ela gudulali, te waligo wit wali hogomu sela sąbo tiwai yai. Eno ena we bidi dabe dolama, te augwa wai dabe ela muani, magi baso meni, augwa dwai kolesaga ebo me tagalobeo.
JER 15:8 Eno te ami bidi hauwa ela muani, tama augwa we dabe te augwa naga olo bidali. Te we dabe namba umabo mu bidai, te nambisde masigi sane aiyaba elaluali. Te giligade digi eno te boi bidi dabe tagala palama, te ami bidi dabego ida dabe ela muagasali. Deli sogo mu tama eno augwaliba te genuai dene menama, te augwali wi dwai mu ilai dao.
JER 15:9 Te we me deligo te wai nogo a naga olama, me badu si te ame nai ogwa elaluali, te tagalao, te ogwa tigidali mu isila silali. Tama te waigo ida te dwai dene mu elama, aga tigi kimi meni yai. Te idago wiegi yai sogo elaluali te dwai polo sogo pedelama, te aga genuai hale salio. Awe, te bubuga tomode te giliga ge polo tama degasa pai dao. Te Juda meba bidalubaso da, te eno boi bidigo augwali ela muagasomainu ilaibao. Ena Genuai Bidi, eno te po wai dao,” wali.
JER 15:10 Ena Jeremaia, eno te po wai, hobede mu da, magi baso idago ena ame nenama, te eno wado ebo sę, me po konila te tǫ kantri tigidali bidi odubawe? Eno gasa bidide negeli me elalusiąyu, tama te bidi dabego me enaba negeli mawai me elalubeo. Tialima, tigidaligo te po weyu, te Genuai Bidigo ena dolomainao wabo dao.
JER 15:11 Tialima, Genuai Bidigo enabolo te tiwai po wali, “Haliga sęgę ebo tagalao. Te eno nage tau siyu, te nage bugagia bidaibao. Te eno boi bidi dabe nageba asomainu eyu, te nago augwali sęgę ebo sogo, me te dwai sogo, augwali gegebo sogo te nago augwali tau somainu hanalu wagasomainogo ilaibao,” wali.
JER 15:12 Genuai Bidigo te we bidi dabeba te tiwai po weyu, te po wai, “Mena bidigo te ain me bras togwaibawe? Te not badu asobo boi bidi dabego bomo te ain tiwai dao.
JER 15:13 Te eno dagego tigidali mone me wiegi yai doado bage tigidali te boi bidi dabeba mawaibao. Magi baso meni, te dagego duga tǫ kantri tigidali habuba usu nama, te dwai sę hauwa ebo dao.
JER 15:14 Eno haliga sębę te posolo yai sia dabo tiwai mu ebao, tama te siago dage ulaibao. Te eno dage te duga boi bidi dabego olo sę ebo bidi pedalumainu ilama, tama dagego me konesiąwai tǫ kantriba dage pelama, bidigi paibao,” wali.
JER 15:15 Te ena Jeremaia, eno te tiwai po obao, “Genuai Bidi, nago eno sęgę koneanio. Te nago enade homu kone palama, te nago ena tau sao. Tama nago ena te dolobo bidi dabeba dwai dene sabo wei ponao. Tiyu, nago te boi bidi dabede dua nagame yai sę ebaso, te augwaligo ena ela muidalio. Nago koneani, eno nago sę ebaso, te augwaligo enaba dwai po wabo dao.
JER 15:16 Nago po enabolo mobaso, te eno sali, te bidigo nai sabo tiwai yali. Tama nago te pogo ena pemene eyu, wiegi yai haliga mu yai, magi baso meni, ena nagaba elalubao, God Genuai Bidi Tigidali Bomo Elalubo Dao.
JER 15:17 Ena te bugai haliga eyu, gisugu wabo bidi dabe dali munu me bidibeo. Tama eno augwali dali wiegi yai pemene munu me ebeo. Menio. Enaduba naga bididuali, magi baso meni, eno koneani, te nago bomo enade elalu, te nago haliga sębę enade pągąnalubo dao.
JER 15:18 Magi baso ena dene ebo silibewe? Eno keni genuai mu elalubao. Magi baso aga te pedelasiąbewe? Mu tamao, nago ena tau me sabeo. Ena ąį tueinu ąįba pabo bidi tiwai ebao, tiali goli, aga te wę sula sai subaso, te aga ąį tusiąwai tiwai ebo dao.”
JER 15:19 Tialima, Genuai Bidigo enabolo po wei ponoyu te tiwai wali, “Te nage haliga begelama, enaba ma begasa asobaso da, teda nage eno ma selama, te nago eno sę ma yagameo. Te nago dwai po pusubo tagalama, te nago wiegi yai po naga pusubaso da, teda nage eno pedauwalide po sabo bidi bidagameo. Tama te we bidi dabe nage wali pomainogo yaibao, tialima nage augwali wali me pelamu dao.
JER 15:20 Te eno nage te bomai obo brasgo nigai dolalubo tiwai eyu, te we bidi dabego gedude tama tiaibao. Te augwaligo nage dali boi bidi yaibao, tiali goli te augwaligo nage aiyaba me elalugobeo. Magi baso meni, ena digi ena nage dali bidaibao. Te eno nage tau selama, eno nage ma saibao. Te ena Genuai Bidi, eno po dao.
JER 15:21 Te eno nage tau siyu, nagede te dwai kolesaga ebo bidi dabego nogode, me te wiegi yai homu elama, olo tau sisąbo bidi dabego nogode, ma dobola selama, tama augwaligo nage me dologobeo.” Te po wai dao.
JER 16:1 Genuai Bidigo ena, Jeremaiabolo, te tiwai po pusali,
JER 16:2 “Nage te bulude bidibo sogo, nago te we selama, wai me ame neyu me igio,” wai dao.
JER 16:3 “Magi baso meni. Ena Genuai Bidi, eno nagebolo te tǫ kantride ame nai wai dabeba me te augwa aya idaba pedelabo sę po wainogo ebao,” wali.
JER 16:4 “Tigidali te isaibao. Me badu te dwai gasi selama, isaibao. Te boi bidi asama, me badu ela mueibao. Te me badu nai sǫą peyu, isaibao. Tama augwalide hobedai gela olama, te augwali pubulabo bidi me elalugobeo. Menio. Augwaligo tigi dabe te tǫde yowi di munalua pabo tiwai yaibao. Tama te ba dabego me uni hasa dabego augwali tigi tuagasaibao,” wai dao.
JER 16:5 “Magi baso meni. Ena Genuai Bidi, eno te tama po ma obao. Jeremaia, nage te we bidi dabe bidalubo digi pelama, te isali bidi dabede gela munu me wagi pigio. Te naga digi gela weyu, hobede yai balia me olamuo, magi baso meni, eno te we bidi bugagia bidimainu me iligobeo. Te eno wiegi yai haliga augwaliba me isąyu, te olo tau sabo wiegi yai homu kolesaga augwaliba me magobeo. Te Genuai Bidi eno po dao.
JER 16:6 Te kantri tǫde bidali tigidali genuai bidi me, olo bidi me, te isaibao. Te augwali pubulabo bidi menia saibao. Te augwalide homu dene eyu, gela wabo bidi meniama, te aga digi aga tigi wali tologoyu, te aga tobolu nisi poawaibao, te aga homu dene ebo ola mayu, te tama tegobeo.
JER 16:7 Tialima, te isali bidi dabede te bidi mebago homu denede gela wagasobaso, te bidi dabeba nai me tuabo ąį sela asabo bidi dabe meni yaibao, te augwali homu nagame ilabo sę yabo me tegobeo. Te augwa aya ma ida isali, te tagala, te hani dali hobede elama bidagasabo bidi meni yaibao,” te po wai.
JER 16:8 “Tama nage te genuai nai daa tubo beba pelama, te augwali dali deliba kisalu, te nai tuyu, ąį tuyu me tigio.
JER 16:9 Magi baso meni, ena, dage Israelgo God dao, ena te Tigidali Bomo Elalubo Genuai Bidi, eno po dolo obao, te tǫde we bidi dabe me bidigobeo. Te bugai haliga ebo me, pemene homu ebo kolesaga me, te bidi dabego gesi we sabo kolesaga me, te tigidali mu silaibao. Dage megi tama bidibo we bidi hani, te dagego te sę pedalubo sueibao,” te po wai.
JER 16:10 “Jeremaia, nago te po te we bidi dabeba pusubo sogo, te augwaligo nageba te tiwai po waibao, ‘Magi baso Genuai Bidigo te dwai sę tigidali dabolo pedalumainu yaibawe? Dago mena kolesaga dwaliwe? Dago mena dwai sę te God, dena Genuai Bidiba, ebo dawe?’ Te po waibao.
JER 16:11 Te we bidi dabego te tama po obaso da, teda nago e po augwaliba wei ponao, ‘Ena Genuai Bidi, eno te kolesaga dagego nǫų wąį dabego ena tudiba munama, te tibo god dabe wali peyu, augwaliba lotu wali. Augwaligo ena tagalama, te eno bomo yai po wali me pabeo.
JER 16:12 Tama dagego dwai kolesaga ebogo te duga wąį nǫų dabego dwai kolesaga yali aiyaba mu elalualio. Dage tigidaligo hagoma homu elama, te duga homude dwai kolesaga wali pali. Tama dagego eno po odobo hagela homu ebo dao.
JER 16:13 Tama tialima, eno dage e tǫ kantride ela gudulama, te dage gasa tǫ kantriba bidigi paibao, te tǫ kantri te dagego me duga wąį nǫų dabego polobadu me konesiąwai. Tama te gasa tǫ kantride eno te wiegi yai olo mu tau sabo kolesaga dageba me egobeo. Tama te giligade me hulide te dagego gasa god dabeba lotu udaibao,’” te po wai dao.
JER 16:14 “Ena Genuai Bidi, eno te tama po obao. Eno te we bidi dabe ela gudulaibao, tiali goli, nosali eno augwali te eno augwa wąį nǫų dabeba mani tǫba ma odasa asaibao. Megi da, augwa po dąų wabo kolesaga te tiwai yali. Augwa te tama po wali, ‘Sesemane sogo bidada pabo Genuai Bidigo nogide eno nogo guni sisu mubao, te eno mu po obao’ wali. ‘Agai da Isipde selama, odasa asali.’ Tialima, te eno augwali ma odasa asali sogo, te kolesaga hasegelaibao weyu, augwa te tama po waibao, ‘Te sesemane sogo bidibo Genuai Bidigo nogide eno nogo guni sisu mubao, te eno mu po obao. Agai da te tǫ kantri not badu sela asali, me gasa kantri tǫde agai da sela sąnama, agai da te dena page buluba ma sela asai dao,’ augwaligo te tiwai po waibao,” Genuai Bidigo te po wali.
JER 16:16 “Ena Genuai Bidi, eno te tama po obao, te eno Juda dabeba boi bidi tagala palama, te we bidi dabe augwaligo saibao, te bidigo aga hagani togobo wade te sųgų hauwa sabo tiwai yaibao. Tama nosali eno gasa boi bidi dabe tagala palama, te we bidi gegegi paibao, te bidigo buside hasa gegegi pabo tiwai yaibao. Tama te boi bidi dabego te we bidi dabe te geme bulu dude, me ola bede, dulalua pobadi, te tola saibao,” wai dao.
JER 16:17 “Magi baso meni, eno te Juda dabe tigidaligo ebo kolesaga subao. Augwa ebo dwai kolesaga te augwaligo dualainogo ebo usu me egobeo.
JER 16:18 Tama tibaso, hasia bolo eno augwa ebo dwai kolesaga wei ponoyu, te gasa ugwadu daganama, wei ponaibao. Magi baso meni, augwali te kugumini yai tibo god piksa noma hauwa nigilama, te eno augwaliba mani tǫ tigidali badu pągąnobao. Te god dabego bidibo ula me elalubeo, te isai bidi dabego tigi tiwai elalubao. Tama te god dabego eno gedude te tǫ meda ilibo dao,” wali.
JER 16:19 Genuai Bidi, nago ena dąų walama, ena obogo bagualubao, te nago ena te sęgę ebo sogo tau sobao. Te tigidali digibulu tǫ habu we bidi hani te nageba asama, augwa te tiwai po waibao, “Te dago wąį nǫų dabego tibo god, augwali te mu god menio. Augwali te olo bage tiwai elalu, te da tau sabo usu me ebe dao.
JER 16:20 Te bidi aga digi aga god nigibaso, usu yaiba, agawe? Menio. Te bidigo nigibo nai dabe augwali te god mu menio.” Augwaligo te po waibao.
JER 16:21 Tialima, Genuai Bidigo te tiwai po wei ponani, “Odao. Deli sogo naga eno te tigidali hani we bidi bugagia ola mawaibao, tama te sogo augwaligo eno genuai bomo bugagia koneaibao. Te augwaligo eno nogi te tiwai koneama, ena Genuai Bidi dao waibao,” te po wai dao.
JER 17:1 Genuai Bidigo te tama po wai, “Dage Juda dabego duga sęgę me sela sągobeo. Dagego tabi haliga te masigi togwai dage tiwai elalubao. Te bidigo te masigi dagede po asębo nai nogi kolsisis selama, te dagego yali dwai sę dabe po te masigi dagede togogo pelama, elalumainu ebo tiwai yali. Tama me te bidigo duga alta nigali gąų tede te po asębo babaga pabo tiwai yali dao.
JER 17:2 Sesemane sogo dage hanigo wai pulubago me te tibo god altaba homu kone kone eyu, te tibo god we Asera piksaba kone palu ebao, te dagego genuai ni dabe dologode muyu, me te tigidali bulu du bagede mubo dao.
JER 17:3 Dage te bulu du dabeba pelama, lotu wagi pabo dao. Tama tialima, eno te dagego mone tigidali, me te wiegi yai doado bage dabe, te boi bidi dabeba mawaibao. Dagego dwai sę hauwa te duga tǫ kantri tigidali usu nama ebao. Tama eno te boi bidi dabego dagego te lotu wabo pesage somainogo ilaibao wai dao.
JER 17:4 Duga digi duga yali dwai sęde te eno dageba mani tǫ taga paibao. Ena digi dage te duga boi bidi dabego olo sę ebo hani pedalumainogo ilaibao. Te dagego konesiąwai tǫ kantriba pelama, bidigi paibao. Eno haliga sębę te sia me deli dabo tiwai ebao, tama dagego te sia ponama, tama te sia sesemane mu elaluduaibao,” wai.
JER 17:5 Genuai Bidigo e tiwai po wali, “Te bidigo ena tudiba munama, te homu eyu, te bidigo naga bomo elalu, te augwaligo aga tau sobaso, bugagia bidaiba homu eyu da, teda te bidi dolobo dao.
JER 17:6 Te wa pai pesage bulu me delide dwasianu ni me deli holai tiwai yaibao. Te pesage bulude te ąį meniama, tǫ te tamu hauwa elalubaso, te ni me nosai tede me hologobeo. Te tobage bidi te bugagia dugulalubo pesage me sogobeo,” wali.
JER 17:7 “Tiali goli, bidigo konealubo bomai po Genuai Bidi, enaba elama, tama eno naga aga tau sabo te homu konebaso da, teda eno te bidiba wiegi yai sę bugagia mu yaibao.
JER 17:8 Aga da, te augwaligo wiegi yai ni te ąį pagede bulali tiwai ebao. Te nigo bono sele te aiyaba dulama, te ąį sigulali. Te genuai giliga nanobo side, te nigo wi me egobeo. Menio. Aga yabe te kebasi yai sesemane elalueibao. Te tulubage menibo sogo, aga homu si me egobeo. Menio. Aga nai sesemane waludubo dao,” wali.
JER 17:9 Genuai Bidigo te tama po wali, “Tigidali bidigo haligade tibo kolesaga sesemane yabo homu kone kone iduaibao. Bidigo homude dwai mu elalubo dao. Tama dego te page mu konegowe?
JER 17:10 Ena Genuai Bidi, eno te tigidali bidigo homude me haligade ebo kolesaga osola sueibao. Tama eno tigidali bidi deli deligo kolesaga dagalama, tama eno te augwa yali kolesaga usu nama wei ponobo dao,” wali.
JER 17:11 Te bidigo kolesaga dolo isąbadi, te mone hauwa sobaso da, te aga te ba me deligo te gasa bago ge wi selama, tama te gede pedelali wai dabe sabo tiwai ebao. Te bidigo mone tigidali te aga monu dabe isąbadi hagawaibao. Tama nosali, te bidi dabego koneaibao, aga te homu kolesaga meni yai bidi tiwai yalio.
JER 17:12 Dena Godigo be da, te God aga dugulalubo sia king tiwai elama, te wiegi yai mu elalubao. Polobadu mu aga genuai nogi elaluai, tama tiwai me elalubo dao.
JER 17:13 Genuai Bidio, sesemane sogo da Israelgo konealubo po nageba dąų olama, te nago da tau sabo tonalubao. Te bidi dabego nage tudiba muani, augwali hale dwai mu yaibao. Polo tama te bidi dabego augwali homu kone palubo tagalu, te nogi me deli homu kone gegeda pabo tiwai eyu, bidigo te tǫ hogomude asęai po polo hola pabo tiwai yaibao. Genuai Bidi, nage te ąį ulu tiwai dabolo ula mabo tiwai ąį elalubao. Tiali goli, te bidi dabego nage tagalobo dao.
JER 17:14 Genuai Bidi, eno homugo nago ena gasi usu ilama, te ena wiegi yai ma pedelaio. Nago ena me selama, te ena bugagia bidainogo yao. Eno nageba naga genuai nogi mabo dao.
JER 17:15 Te Israel dabego enaba posobo po te tiwai odu gebao, “Magi baso te dwai sę dabe te Genuai Bidigo yabo po wabo da, agawe? Te sę agai yabo homu ebaso da, teda aga megi tama ebaso usu dao,” wabo.
JER 17:16 Genuai Bidi, nago enabolo naga te we bidi hani tonalubo sę mawai, tama eno te sę me tagalobeo. Te nago koneai, eno te dwai sę te we bidi dabeba tagala palao po olama, me wabeo. Eno pusubo po tigidali nago bugagia konebo dao.
JER 17:17 Nago ena wi dwai mu me iligio. Menio. Te dwai sogo nage te ena geme bugagia dula sabo pesage tiwai ebo dao.
JER 17:18 Tama megi eno homugo nago te enaba dwai posobo po sę ebo bidi dabeba hale ilama, te augwa homu dolomainao. Tialima, nago ena homu dolobo sę me isąyu, te ena hale me iligio. Eno homugo nago te dwai sę ebo sogo augwaliba pedalumainogo ilao, te nago augwali dwagila augwali mu doloyu da yao, ena Jeremaiago te po wai.
JER 17:19 Genuai Bidigo enabolo te tama po wai, “Jeremaiao, nage pelama, te taun obo bagulali pabo genuai sunumiba doligi pao, augwa nogi eyu te We Bidi Dabego Sunumi dao wali. Te Juda king dabe te sunumidu tomoba soyu, bulu teda soyu ebo, te sunumi te taun bagulali genuai obo te badu elalubao. Tama me te Jerusalem gasa genuai sunumi deli deliba nage pelama, doligi pao.
JER 17:20 Tama nago te tiwai po pusao, ‘Dage Juda king dabe, me dage tigidali Juda, me Jerusalem, dage tigidali te sunumidu eda asu, iba soyu ebo we bidi dabe, dagego Genuai Bidi eno poba bugagia olo muyąo.
JER 17:21 Ena Genuai Bidi, eno te tiwai po obao, te dage bugagia bidabo homu ebaso da, teda dage te Sabat side walu me tolisąma, te dagego walu tolama, te side Jerusalem tomoba me aselamu dao.
JER 17:22 Tama me, dagego duga bede te doado bage dabe selama, te Sabat side te gasa tolasa peyu me igimio. Te side te dagego te sę ebo habu mu selibao. Dagego te Sabat sogo te eno side da olama, dąį ilao, te eno duga wąį nǫų dabeba te tiwai tama po wai dao.
JER 17:23 Tialima, duga wąį nǫų dabego eno po me odama, wali me pabeo. Menio. Augwa hagoma naga eyu, tama augwa te eno wiegi yai kolesaga ola mabo hagela homu yai dao.
JER 17:24 Tiali goli, dagego da, Genuai Bidi eno po wali peyu, tama dagego walu dabe te Jerusalem tomoba te Sabat side me sela asigimio. Menio. Te Sabat sogo dagego eno side da olama, dąį ilao, tama te side sę ebo habu mu sao. Te dagego eno po wali pobaso da,
JER 17:25 teda sesemane sogo te king hani te Devitgo hanide naga pedelama, te augwali Jerusalemde king bidaibao. Tama te king dali, te ofisa bage dali, augwali te hos dabede dualama, te karisde dolalua peyu, te Jerusalem sunumidu eda asu, iba soyu iduaibao. Te sesemane sogo Jerusalemde te we bidi bidaluyu, te Juda me Jerusalem dabe te sunumidu eda iba soyu iduaibao.
JER 17:26 Te we bidi dabego te tigidali tǫ kantri pedai taga soyu, te Genuai Bidi, eno beba ofa sela asaibao. Te Juda taun we bidi dabego, me te Jerusalem pąde, me te Benjamin hani tǫ bage me, te bulu du bagede bidibo bage me, te giliga degasa dulubo pedai dwasianu bulu du badu bidibo bage me, te Juda te saut pedai badu bidibo bage me, tigidali te enaba asaibao. Tama augwa te siaba tigidali domainogo ulubo ofa, me te gasa ofa dabe kibu hasa, me te wit ulubo ofa dabe, me te wiegi yai denami holomainogo ulubo ofa, me te enaba usu da wabo, te tama ofa dabe sesaibao.
JER 17:27 Tialima, dagego eno po wali me pisąma, te dagego Sabat side te eno side da olama, bodolu te side munama, tama dagego te Jerusalem tomoba te Sabat side da wali sogo te walu doado bage sesebaso da, teda eno te sunumi siago domainogo ilama, tama te sia genuai domainogo elama, te Jerusalemde elalubo genuai bomai be dabe domainogo yaibao. Tama te isi dabo polo sula sogobeo,” te po wai dao.
JER 18:1 Genuai Bidigo ena, Jeremaiabolo, te tama po walio,
JER 18:2 “Nage hogodama, te tǫgo sene nigibo bidigo beba pobaso, te eno po nagebolo mawaibao.”
JER 18:3 Genuai Bidigo te tama obaso da, teda ena te tǫgo sene nigibo bidigo beba dulama, tama eno te bidigo sene me deli nigidu sualio.
JER 18:4 Tialima, te sene wiegi yai me pedalubeo. Tama te bidigo te sene mu dolama, te agai nigali tǫgo digi te gasa sene aga homugo digi me nigalio.
JER 18:5 Tialima, Genuai Bidigo enabolo te po mawai,
JER 18:6 “Ena Genuai Bidi, eno dage Israel we bidi dabe dali po elalubao. Te eno dageba te sene nigibo tǫde yali sę tiwai egobe da homu eba, agawe? Dage Israel dabeo, dage eno nogode elalubao, te tǫ te sene nigibo bidigo nogode elaluali tiwai elalubo dao.
JER 18:7 Me sogo eno te we bidi hani me deliba hanilama weyu, ma te tǫ kantri we bidi augwali me te eno ela gudulama, te aiyaba elaluyu, te dolabo po hanilama, augwaliba wabo dao.
JER 18:8 Tialima, te hani we bidigo augwa te dwai kolesaga ebo tagalobaso da, teda eno homu me hasegelama, tama eno te dwai kolesaga augwaliba yaibao wali te sę eno me ebo meni dao.
JER 18:9 Me ma, te me sogo eno te we bidi hani me deliba po hanilama weyu, ma te tǫ kantri me deli eno te augwali dąų waliyu, bomo mayu, tama augwali bugagia bidaibao po hanilama wabo dao.
JER 18:10 Tialima, te augwaligo eno gedude dwai kolesaga idu, te eno po odisąbaso da, teda eno homu hasegeliyu, te eno wiegi yai sę augwaliba yaibao po wali sę, te eno ebo meni dao,” wali.
JER 18:11 “Tama tiyu, Jeremaia, nago te Juda dabe me Jerusalemba te tama po walao, ‘Ena Genuai Bidi, eno te po obao, odiąo. Eno te dageba dwai sę yabo sisi ela mubao, awe, tede eno homu kone palobao. Tama tiyu, dage deli deligo te duga dwai kolesaga ebo tagalama, te wiegi yai kolesaga naga wali pao,’ te po wao.
JER 18:12 Tialima, Jeremaia, te we bidi dabego nago po wei ponoyu, te tama po waibao, ‘Tagalao, da hagela ebuo. Dago dena homu kolesaga digi wali paibao. Da deli deligo hagoma eyu, te dena dwai homu naga wali piduaibao,’ augwaligo te po waibao,” wali.
JER 18:13 Tama tibaso, Genuai Bidigo po ma weyu, te tama po wai, “Ena Genuai Bidi, eno po dolo obao. Te gasa we bidi dabeba hanalu wagi pao. Te augwaligo te we bidi mebago dwai kolesaga mu yali po odali, te Israel dabego yali tiwai eba, agawe? Eno te Israel hani mu sai dao, bidigo te bidi dali pagela pisąwai gesi we sabo tiwai yali. Tiali goli, augwaligo dwai sę mu yali.
JER 18:14 Te me sogo te bobobage masigi bulu du pesage te Lebanonde ais menibo homu eba, agawe? Te bulu dude kedau yai wę sula sabo homu eba, agawe? Mu menio.
JER 18:15 Tialima, ena we bidi augwaligo ena homu kone me isąma tagalali. Tama augwa te wiegi yai denami ilibo hano ebo ofa te tibo godiba ebao. Tama tebo kolesagade augwali tulaluama, te polobadu wiegi yai sunumi wali pabo tagalali. Te megi da, augwa te dwai sunumi wali pabo dao.
JER 18:16 Tialima, te augwa tǫ dolama, te olo pesage bulu tiwai pedelaibao. Tama te gasa hani we bidi te badu asobo sogo, augwa sulama, dwai midigi siyu, te wi umagi ebo dao.
JER 18:17 Tama te boi bidi dabego eno we bidi dabeba hwįągasobo sogo da, teda eno augwali te boi bidi dabede wi pomainogo ilaibao, te wali giliga asobo badu asiyu, te nai dabe sesela sąbo tiwai yaibao. Te augwali eno tudiba munama, tama te augwali dolainogo ebo sogo eno tau me sogobe dao,” te po wali.
JER 18:18 Te we bidi dabego te tama po wali, “Tegobao, dago te Jeremaiabolo magi sę yabo sunumi gegeinao. Agai po te mu po me wabeo. Te pris dabego augwa bomo yai po dabolo pusubo sę me tagalogobeo. Te wiegi yai homu kolesaga me koneai bidi dabe, augwa wiegi yai po me tagalogobeo. Tama te profet dabego me, te augwa profet po pusubo sę me tagalogobeo. Tama tialima, dago te Jeremaiago poba olo me mugobeo. Menio. Dago aga po tų naga inao,” te po wali.
JER 18:19 Tialima, ena, Jeremaia, eno gedu haluasa po te tiwai wali, “Genuai Bidi, eno gedu haluasa po odao. Eno homugo nago eno boi bidi dabego enaba wabo pode homu kone palomainogo ebo dao.
JER 18:20 Te wiegi yai kolesaga ebo bidiba, te bidi dabego dwai kolesaga agaba wei ponobaso usu da, agawe? Menio. Tialima, te boi bidi dabego ena dolainogo ebao, augwali te tǫ dedage dogobo bidi tiwai ebao, te hasa dabe teba tulalumainogo tiaibao. Nago te eno polobadu yali kolesaga homu kone palao. Te ena nage pąba aselama, te nageba hanalu, te nago haliga sębę tagalama, te bidi dabeba wiegi yai sę bugagia yao po wai dao.
JER 18:21 Tialima, megi da, eno homugo nago te augwaligo wai dabe te nai sǫą pelama, nasi eyu, isimainogo ilao homu ebao. Tama te boi bidi tagala palomainogo elama, te bidi dabego meba ela mumainogo ilao. Tama te bidi meba dwai gasi selama, isimainogo yao. Tama te gesi ogwa bidi dabe da, te boi hwįgi pabode isimainu yao. Tama te augwa we dabe sibi te wai meniama, te bidi me meni yaibao.
JER 18:22 Te polo tama mu nago te boi hwįbo bidi dabe te hwįagasomainu tagala palama, te augwali dolomainogo ilao, te augwa wi mu genuai eyu, te dwai gela mu omainao. Te eno boi bidi dabego ena pageabi elama, ena dolainogo ebao. Augwali te bidigo hasa tulalumainogo te tǫ dedage nigibo tiwai ebao, te bidigo sųgų sabo wa munama, te hasa tumainogo ebo tiwai ebo dao.
JER 18:23 Tiali goli, Genuai Bidi, nago koneai, augwaligo ena ela muabo po mia salio. Tama tiyu, nago te sęgę me sela sąyu, te augwaligo yali dwai sę sela sągio. Menio. Nago augwalide haliga sębę elama, te gasa bidi dabego augwali aiyaba elalumainu yao,” te po wai dao.
JER 19:1 Genuai Bidigo enabolo te tama po wai, “Jeremaia, nago te tǫgo nigai sospen sene me deli abeligi pao. Nago abela selama da, teda nago te sospen sene selama, te nage pelama, te we bidi dabe augwa tobolu bidiba wagi peyu, tama te pris dabe nage dali pomainogo tama tiao,” wali.
JER 19:2 “Tama dage te Odogo Bulu Pesage te Hinomba dulao, te Jerusalem moni obo sunumi pąde augwa te nogi e tiwai waibao, te Sospen Sene Dabe Alua Pai Sunumi Dao wali. Tama nago eno po e tama pusao,
JER 19:3 ‘Dage te Juda king dabe, me dage Jerusalem we bidi dabe, dagego eno po odiąo. Ena dage Israelgo God dao, ena te Tigidali Bomo Elalubo Genuai Bidi, eno po dolo tama obao, te eno dwai nai mu te pesagede pedalumainogo yaibao. Tama tigidali bidigo te sę pedelali po odolama, augwa te dwai noma mu saibao,’ wali.
JER 19:4 ‘Eno te tiwai yaibao, magi baso meni, te eno we bidi dabego ena tudiba munama, tama augwa te gasa tibo god dabeba te wiegi yai denami ilibo hano ebo ofa ebao. Te we bidi augwa digi, me te augwa wąį nǫų dabego me, te Juda king dabego me, te god polobadu me konebeo. Tiali goli, megi augwaligo te god dabeba lotu weyu ebao, tama tebo kolesagade augwaligo te pesage dwai meda mu eno gedude ilibao. Tama me, te augwaligo magi sęgę meni yai bidi hauwa ela muyu, tama augwaligo kaneme te pesagede geą sąbo dao.
JER 19:5 Augwaligo te tibo god Balba lotu wabo pesage dabe nigilama, tama augwa wai dabe digi te siaba ulali, te Balba ofa ebo tiwai yali. Tialima, eno augwalibolo te kolesaga yao po me wabeo. Te eno bomo yai pode me tebeo, tama me te eno te tobage bomo yai po maiabo homu me isąwai dao.
JER 19:6 Tama tialima, ena Genuai Bidi, eno te po obao, nosali munu me augwaligo te bulu pesage nogi ma wagobeo, Tofet, ma Odogo Bulu Hinom me wagobeo. Menio. Augwa te tiwai nogi yaibao, te bidi hauwa ela muai bulu dao, po waibao.’”
JER 19:7 “‘Te Juda dabe me Jerusalemgo te haniani sę te bulu pesagede yabo homu elaluali, tiali goli eno te sunumi paliama, tama augwaligo te sę me egobeo. Te eno boi bidi dabe tagala palama, augwali ela mueibao. Tama eno te ba dabe, me hasa dabe aselama, te augwali tigi tuagasomainogo yaibao wai dao.
JER 19:8 Tama te Jerusalem dolaibao, te gasa badu bidi hani dabe teba asiyu subo sogo, te augwa te dwai sę Jerusalemde pedelali sulama, te augwa dwai midigi mu selama, nogo hogwayu, te wi umabo mu yaibao.
JER 19:9 Te boi bidi dabe Jerusalemba boi hwįagasobo sogo da, te augwaligo hanu bagua sagasaibao. Te tama tebogo te Jerusalemba genuai sęgę mayu, te augwali nai mu sǫą paibao. Tama tialima, te we bidi dabego augwa wai dabe digi ma ela tueibao. Te we bidi dabego augwa abagi hasi ma elama, tuiebao,’ wai dao.”
JER 19:10 “Jeremaia, nago te po pusulama da, teda te bidi dabego nage subaso, nago te tolaluali tǫgo nigai sospen sene alua sąyao.
JER 19:11 Tama nago eno po augwaliba te tama po pusao, ‘Ena Tigidali Bomo Elalubo Genuai Bidi, eno te po obao, te eno Juda we bidi dabe dolama, te eno taun Jerusalem dolaibao, te tǫgo nigali sospen sene dolali tiwai elama, te bidigo ma dodolabo usu me egobeo. Tama te bulu Tofet te Juda dabego gų page pedelaibao, tama augwali tigi dabe te pesagede pągąna sai elalueibao.
JER 19:12 Ena Genuai Bidi, eno po dolo obao, te kolesaga eno te tǫde eyu, tama te bidalubo we bidide me yaibao. Tama te Jerusalem taun eno gedude meda yai mu pedalama, te dwai bulu Tofet yali tiwai yaibao. Te Juda king dabego be me, Jerusalem be dabe tigidali me, te eno gedude meda yai pedelaibao. Magi baso meni, te Jerusalem dabe te be peduba holama, te wiegi yai denami ebo hano holobo ofa dabe te hǫ dabeba elama eyu, te wain ofa te gasa tibo god dabeba ebo dao.’ Nago te po augwaliba pusao,” Genuai Bidigo te po wai.
JER 19:14 Tialima, ena Jeremaia, eno te Genuai Bidigo po wali pelama, tama ena te bulu Tofetba pelama, tama agai te po pusali. Te nosali, eno te bulu Tofet tagalama, ena Jerusalem hanu tomoba pelama, te Genuai Bidigo beba peyu, tama ena te bidi sisinibo genuai pesageba doligi palio. Tama eno te tigidali we bidiba te tama po pusalio,
JER 19:15 “Da Israelgo God, aga te Tigidali Bomo Elalubo Genuai Bidi, agai te tama po walio, ‘Bugagia odiąo. Dage Jerusalem we bidi, me te Jerusalem pąde bidibo we bidi, dage tigidaligo te hagoma eyu, te dagego eno po odobo hagela homu yali. Tama tialima, eno te dwai sę tigidali dageba pedalumainogo yaibao, eno te tiwai sę yaibao,’ po wai dao,” eno te po wali.
JER 20:1 Jeremaiago te po pusali sogo, pris me deligo odai. Te pris nogi, te Pasur. Pasur aga te Imergo ogwa, tama aga te Genuai Bidigo be tonalubo bidi hanide te polalubo ofisa bidi dao.
JER 20:2 Tama Pasurgo po obaso, te augwaligo keloago te Jeremaia elama, te augwaligo aga te Genuai Bidigo be obo sunumi pąde aga kalabus ilali, augwa te nogi poali, te Benjamingo Sunumi Ugwaba Dao wali.
JER 20:3 Te do kigamu Pasurgo te Jeremaia kalabusiba muani tagala palobo si, te Jeremaiago agabolo te tiwai po wali, “Genuai Bidigo nage nogi Pasur wagobeo. Menio. Agai nago nogi te tiwai nogi yaibao, te Tigidali Badu Bidi Wi Ilibo Nai Dao, waibao.
JER 20:4 Tama Genuai Bidigo nage dali te tiwai po elalueibao, ‘Te eno dwai sę nageba pedalumainogo ilama, tama nage dali, te naga abagi dabe dali, te wi dwai mu yaibao. Te nago naga abagi dabe te boi bidi dabe aselama, elagasobo sueibao. Te eno Juda dabe tigidali te Babilon kingo nogoba mueibao. Te agai meba ela muyu, te meba sela pelama, te Babilonba kalabus igi paibao.
JER 20:5 Tama eno te boi bidi dabego te taunde tigidali mone somainogo ilaibao, te we bidi dabego wiegi wiegi yai tigidali doado bage, me te Juda king dabego mone doado bage saibao. Te boi bidi dabego hwįbo bomo elama, te tigidali nai gigilama, te Babilonba selasa paibao.
JER 20:6 Tama Pasur, odao. Nage dali, naga bede bidibo hani me, dage te Babilonba kalabus igi paibao. Nago te tibo profet po te naga abagi dabebolo pusubao, te nage me, nage te abagi dabe dali, te Babilonde isaibao. Tama augwaligo dage te tǫ kantride pubulaibao.’” Te po wali.
JER 20:7 Genuai Bidio, nago ena homu bega siyu, te nago sę emainogo yali, tama eno nago te homu bega sabo po odali. Nago bomo mu ebaso, te eno nago po aiyaba elaluabo usu meni yai. Tama megi da, te tigidali we bidigo enabolo posobo po weyu, te augwaligo ena sesemane sogo gisugu mabo dao.
JER 20:8 Tigidali sogo eno nago po pusubaso, nago enabolo te genuai po dagą weyu, te tiwai i omainogo yaibao, “Hwįbo pedelaibao. Dage dolaibao.” Te bidi dabego te po odolama, te augwaligo ena hale ilibo dwai po sesemane sogo udubo dao.
JER 20:9 Te ena digi eno te nageba homu kone me egobe weyu, tama eno nago nogide po me pusugobe obaso da, teda eno koneani, te nago po te genuai isi tiwai eno haligade elalu, te eno dili dogwai tomode te isi bogoli edubo tiwai ebao. Eno nago po paliabo sę ebadi goli, tiali te eno usu meni ebo dao.
JER 20:10 Eno odali, te bidi hauwa augwa hasi pomu po dua digi mia siyu, te tiwai po obao, “Jeremaia aga te po wabo bidi, ‘Te bidi dabe wi ilibo sę eyu, te tigidali badu bidaibao.’ Tegoba, dago aga po tų ilaibao. Te megi tama po tų ilinao,” augwaligo te po wabo. Te eno hai namu tigidaligo homu te dwai sę enaba pedelama, te ena aiyaba elalumainao homu ebao. Tama augwa te tiwai po wali, “Te dago aga gaga munama, te dago aga aiyaba elaluama, te agai yali dwai kolesaga wei ponaibao,” te po wai.
JER 20:11 Tialima, Genuai Bidi, nage te bomai ami bidi me deli tiwai elalu, te nago ena tialu tau sainu elalubao. Tama te bidi dabego enaba dwai sę pedalumainogo yali, te dwai sęgo augwa aiyaba ma elaluama, te augwaligo ena aiyaba elalueinogo ebaso, usu me egobeo. Mu menio. Te augwa dwai hale mu eyu, tama augwa te hale te tigidali sogo elaludubadi, te me siligobeo.
JER 20:12 Te Tigidali Bomo Elalubo Genuai Bidi, nago te doloba pai we bidi bidi dabe osola subo dao, tama nago te dago homu dali homu kolesaga dagalobo dao, te nago po tų dolasa ebo elalubao. Tialima, eno te sęgę nago nogoba mubao, tama nago te we bidi dabeba dwai dene mayu dolobo sę eno sueibao homu ebo dao.
JER 20:13 Te Genuai Bidiba balia po weyu, agai nogi ugwaba saibao. Magi baso meni, agai te walu doado bage meni yai bidi dabe tau siyu, tama te dwai sę ebo bidi dabego aga aiyaba me elalugobeo.
JER 20:14 Te ena idago ena ame nani sogo, te sogode eno megi dwai homu mu ebao. Eno homu te wiegi yai sę me deli te sogo pedalobeo, te dwai bubuga me deli dao.
JER 20:15 Te side bidi me deligo eno ayabolo po selasa pelama, agabolo te tiwai po waligi pai, “Nago wego ogwa ame nanio.” Ayago odama, aga wiegi yai homu pemene mu yalio. Tialima, eno ayaba po sela pali bidiba te Godigo dwai sę emainao homu ebao.
JER 20:16 Eno homugo te bidi dolomaina homu yali, te Genuai Bidigo te taun dabe dolali tiwai gilama emainogo yai. Genuai Bidigo te taun dabeba te olo mu tau mabo wiegi yai kolesaga me elamu da homu yalio. Menio. Te kigamu mu te we bidi dabego te boi bidi sulama, te augwali dwai gela mu wali. Tama te giliga tomo yagasobode, te boi bidi dabe te taun tomoba aselama, te i bomonama weyu, hwįnao wali. Eno homugo te bidi te yali deli kolesagago dolomainogo homu yali.
JER 20:17 Magi baso meni, agai ena te idago haligade ela mubeo. Te agai te tama tigi sogo da, teda idago haliga te eno gų page tiwai pedaligi da, te idago haliga me elalu digi dao.
JER 20:18 Magi baso ena te idago haliga tagalaligo te tobage dwai sę me sęgę enade elalu, te sesemane sogo ena hale ebo sę idubo dawe? Ena Jeremaia eno te homu ebao.
JER 21:1 Genuai Bidigo po Jeremaiabolo mawai, te king Sedekaiago bidi si agaba tagala palali sogo. Te bidi si nogi e tiwai, Pasur, aga te Malkiago ogwa, te pris Sefanaia, aga te Maseago ogwa. Augwali sigo Jeremaiabolo e tiwai po walio,
JER 21:2 “Nebukatnesar, te Babilon kingo, te da dali hwįbo sę ebao. Tama tialima, dago homugo te nago Genuai Bidiba hanaluama, te da tau somainogo yao. Te Genuai Bidigo bomai sę te da tau siyu emainogo homu yaibao, te agai dago hani dabeba polobadu yali sę tiwai emainao. Tama tibaso, te Nebukatnesargo da tagalama pomainogo yaibao,” augwali sigo te po wai dao.
JER 21:3 Tialima, Jeremaiago augwali sigo po wei ponoyu, te tama po wali, “Dage sigo te po Sedekaiabolo magi pao,” wali.
JER 21:4 “Genuai Bidi, dena Israel hanigo God, agai te tiwai po wali po wao, ‘Megi da, te Babilon kingo aga ami dabe dali te Jerusalem bagulubo sę ebao. Tama dage Israel ami dabe te obo buluba dinama, te augwaliba hwįbao. Tialima, eno te Babilon dabe, te Kaldia dabego, te dage Israel aiyaba elalumainogo elama, te eno dagegoami bidi dabe te hwįbo nai dabe tolama, te taun tomobasomainogo yaibao.
JER 21:5 Ena digi eno wado eyu, te haligasębę dwai mu dageba eyu, te eno dageba hwįbo bomomu elama, te dage mu dolobo sę yaibao.
JER 21:6 Eno te webidi dabe me te taunde hasa sibi dolaibao. Te eno dwaigasi augwaliba pedalumainogo ilama, tama augwaliisila paibao.
JER 21:7 Te ena Genuai Bidi, eno te tiwai po maobao. Hauwa we bidi te gasigo isiyu, me te hwįbode, me te nai menia siyu me isaibao. Tama nosali te enoking Nebukatnesar me aga ami bidi dabego dali, te king Sedekaia dali, aga ami ofisa dabe me, te bidaluali webidi dali, sela paibao. Te boi bidi dabego dage elainogotonalubao. Te Nebukatnesargo po obaso, te augwaligodage te bainat hwągo ela mueibao. Te agai dage homudene me isąyu, te olo tau sabo kolesaga yaiba homume egobeo. Te agai dage me deli bidimaina olama mesula tagalogobeo.’”
JER 21:8 Tama Genuai Bidigo te tama po ma wai, “Jeremaia, nago eno te po me te we bidi dabeba mao. Ena Genuai Bidi, eno te tama po obao, megi eno dagebolo te sunumisi ola mobao. Me gasa sunumi te bidabo ula elaluabosunumi, me sunumi te isabo sunumi dao.
JER 21:9 Te tauntomode bidaiba homu ebo we bidi dabe, te augwaliisaibao. Te boi bidi dabego augwali ela muyu, ma augwalite nai sǫą pelama isaibao, ma te dwai gasigo augwalidolama, isiyu yaibao. Te augwali bidabo ula elalueibahomu ebo we bidi da, augwali te taun tagalama, te taunbagua sagasobo Babilon bageba pabo usu dao. Tamaaugwali te Babilon dabego nogo pageabi emainu yao, tiyu da, te augwali me isigobeo.
JER 21:10 Ena Genuai Bidi, eno po dolo obao, eno te Jerusalem bugagia elalumainaohomu me egobeo. Menio. Eno te taun dolabo homu ebao. Eno te Babilon kingo te taun somainogo yaibao, te agaiaga ami dabebolo te taun isigo ula olama, tama te tauntigidali mu dolaibao,” te po wai dao.
JER 21:11 Genuai Bidigo po ma weyu, te tama po wali, “Jeremaia, nago te Juda kingo aga deli kanemeba te tamapo pusao. Dage te king Devitgo hani dabeo, dagego ena Genuai Bidigo po odao. Eno e tama po obao. Tigidali kigamude te po tų ebo sogo, dagego po tų dolo mu yao. Te bidi me deligo gasa bidigo nai wi selama, agaba sęgę mawai yaibaso da, teda dagego hobedai bidi aga tau selama, te sęgę silao. Dagego te tisąbaso da, teda ena dagego te dwai kolesagade haliga sębę mu elama, te eno dageba dwai dene umabo mawaibao. Eno haliga sębę te genuai isi dabo tiwai eyu, te bidi mego sula sąyabo usu me egobe dao.”
JER 21:13 “Jerusalem, ena Genuai Bidi, eno po dolo nageba obao, eno nageba boi bidi ebao. Nage ugwadu bidu, nago te bulu odogoba aiyaba tononobo dao. Nage te daide ugwadu mu elalubo genuai masigi tiwai elalubao. Te dage Jerusalem we bidi, dagego te po obao, ‘Dego daba hwįagasaibawe?’, tama ‘De te dago taun tomoba asaibawe?’
JER 21:14 Ena Genuai Bidi, eno po dolo obao, te eno dwai dene dageba mawaibao, te duga yali dwai kolesaga wei ponaibao. Te eno te Jerusalem taunde sia pedalumainu ilaibao, te moni bulu tomode isi dabo tiwai eyu, tama te isigo kingo be deyu, te Jerusalem tigidali be daibao,” te po wai dao.
JER 22:1 Genuai Bidigo te tiwai po wali, “Jeremaia, nage te Juda kingo beba dulama, te po pusao,” wali.
JER 22:2 “Nago te tama po wao, ‘Nage te Juda king, nage te king Devitgo duayali sia kingde dulalubao, nago te Genuai Bidigo po odao. Nage, te naga ofisa dabe dali, te nago we bidi dabe dali, dage tigidaligo te po odao.
JER 22:3 Genuai Bidigo e tama po walio. Dagego te wiegi yai doloba pai kolesaga naga iyąo. Te bidi me deligo gasa bidigo nai wi selama, agabolo sęgę mawai yai baso da, teda dagego aga tau selama, agai te sęgę silimainao. Dagego te tiana wai dabeba dwai sę igimio, te wilawe we dabeba dwai sę igio, te dage dali bidibo gasa tǫ kantri we bidiba me te dwai sę igio. Tama dagego te bulu we bidi dabe odolali me ela munamu dao.
JER 22:4 Te dagego eno po wali pobaso da, teda sesemane sogo te king dabe Devitgo hanide pedaludaibao. Tama te king dabe te hosde me karisde dugulama, te kingo be oboba iba soyu, eda asiyu yaibao, te augwa sę eyu tiaibao. Te ofisa dabe me te we bidi dabe te king dali bilaibao.
JER 22:5 Tialima, dagego eno po wali pisąbaso da, teda ena Genuai Bidi, eno mu po ena nogide digi obao, teda eno te nago genuai wiegi yai be mu dolaibao,’ te po te Juda king bidibolo pusao,” te po wai dao.
JER 22:6 “Ena Genuai Bidi, eno te Juda kingo bede po elalubao. Be, eno suali, te wiegi yai mu yai, te distrik Gileat me te bulu du pesage Lebanon tiwai elalubao. Tiali goli, eno nage te olo tǫ pedalubo tiwai yaibao, te tǫ wa pai pesage, me te bidi mu meni yai taun tiwai elalueibao.
JER 22:7 Te eno bidi dabe tagala palama, te nage dolagasomainogo yaibao. Augwaligo te sigi hwą dabe seselama, te nago wiegi yai ni nami sida gelama, tama te ni nami dabe te siaba sąwaibao,” wali.
JER 22:8 “Tama nosali, te gasa tǫ kantri we bidi dabe hauwa te badu bilagasaibao. Tama augwaligo te Jerusalem sulama, augwa haside hanalua peyu, te tiwai po waibao, ‘Magi baso Genuai Bidigo te tobage kolesaga te genuai taunba yaliwe?’
JER 22:9 Te augwade digi po wei ponoyu, te tiwai po waibao, ‘Te page e tama elalubao. Te hanigo te Genuai Bidi augwa Godigo dąų walali bomo yai po tudiba munama, tama augwa te gasa god dabe wali pelama, augwaliba lotu obaso, te tiwai sę yai dao.’ Augwaligo te po waibao.”
JER 22:10 Dage Juda, te king Josaia isalio, tiali goli dagego agade hobede ebo gela wagimio. Te dagego aga ogwa Joahasde dwai gela obaso, te usu yaibao. Magi baso meni, Joahasgo da tagalalio, te aga page buluba ma begasa me asogobe dao.
JER 22:11 Joahasgo gasa nogi Salum, agai te Josaiago pesage hasegelali, te aga aya, tama te Juda king pedelali. Tialima, Joahasgo te Jerusalem taga soalio. Genuai Bidigo Joahasde homu kone palama, te tiwai po wali, “Te bidi ma begasa asogobeo.
JER 22:12 Te boi bidi dabego aga te gasa tǫ kantriba sela palio. Te agai aga tǫ kantri me sugobeo. Menio. Te aga te gasa tǫ kantride isaibao,” te po wali.
JER 22:13 Genuai Bidigo po ma weyu, te tama po wali, “Te aga wiegi yai genuai be sę yabo homu ebo bidi agaba te Genuai Bidigo sęgę pedalumainogo yaibao, magi baso meni, agai dwai kolesaga te we bidi dabeba yali. Aga be te genuai mu, tama te be habu ugwadu elalubao. Te aga abagi dabego agai te sę yali. Tiali goli, agai mone augwalibolo me mabeo. Menio. Augwaligo sę olo naga yai dao.
JER 22:14 Agai te tama po waibao, ‘Eno te be moni bage sę yaibao. Tama te bede te genuai be habu ugwadu elalueibao.’ Agai te be windo genuai nigilama, te agai te wiegi yai ni nami sida dabe selama, te be daga badu payali. Tama aga te wiegi yai mama yai pengo au ilibo dao.”
JER 22:15 “King, nago te ni nami sida hauwa elalu, tama tego nage te wiegi yai king pedelaiba homu eba, agawe? Nago aya aga te nai me ąį tuyu, pemene yali. Tialima, agai doloba pai kolesaga te we bidi dabeba yalio. Tama tibaso, aga bidali wiegi yai yai dao.
JER 22:16 Te doado bage meni yai bidi, me te doado bage sǫą pali bidi dabe, te sogo augwali te po tųba pedalubaso, agai augwaligo po te doloba pai kolesagade dagalali. Tama te tigidali we bidi te bugagia dugulaluali. Ena Genuai Bidi, eno po dolo obao, te ena konea pali bidigo ebo kolesaga mu te tama dao.
JER 22:17 Tialima, nagade digi, naga homu elama, te nago sesemane sogo te tobage nai dabe pesa elama, tama nago te nai dabe sainogo tibo kolesaga ebao. Tama nago te magi dwai sę isąwai bidi dabe odolali elibao. Tama nago te we bidi elaluama, te augwaliba dwai sę ebo dao,” wali.
JER 22:18 Te pagede naga tama Genuai Bidigo homude te Jehoiakim kone palali, te Josaiago ogwa, te Juda king bidai. Tama Genuai Bidigo te tama po wali, “Te Jehoiakim isibaso da, teda te we bidi dabego agade te homu dene ebo gela me wagobeo, te po weyu, ‘Hobede mu ebao, eno amao,’ te ‘Hobede mu ebao, eno abeo,’ te wagobeo. Te augwa homu dene ebo gela weyu, te po me wagobeo, ‘Te eno genuai bidi hobede mu ebao,’ ‘Te dago king homu dene mu ebao,’ po me wagobeo.
JER 22:19 Menio. Te augwaligo agai tigi te bidi dabego te isai donki tigi sela sąbo tiwai yaibao. Te augwaligo aga kekasa pelama, aga te Jerusalem genuai obo bulu badu olo sągi paibao,” wai dao.
JER 22:20 Genuai Bidigo te tiwai po wali, “Jerusalem, nage te Lebanon genuai bulu du dabeba holobadi, te bulu Basanba, me te bulu du Abarimba me holama, te bomonama i weyu, hobedai gela wao. Magi baso meni, te nago abagi da wali bidi tigidali, te augwali dolali dao.
JER 22:21 Te nage bugagia bidibo sogo, te nago doado bage hauwa elalubo sogo, eno po nagebolo mobadi, tialima, nago te tama po wai, ‘Eno nago po odobo hagela ebao,’ wali. Sesemane sogo nago eno po sela sąwani. Nago kolesaga te tiwai, te nage gesi ogwa bidide dąį elasa, te megi e sogoba usu nagasali dao.
JER 22:22 Te boi bidi dabe te bomai wali asobo tiwai elama, te nago tobolu bidi dabe sela paibao. Tama te boi bidi dabego nago abagi dabe selama, te digibulu buluba kalabus igi paibao. Te tama tebo sogo, te naga yali dwai kolesagade hale dwai mu yaibao.
JER 22:23 Augwaligo nago be te wiegi yai Lebanon ni sidago sę yani, tama nage bugagia dugulaluali. Tialima, hobede ya, te nago dene te wego wai ame nainogo dene ebo tiwai ebaso, te nage dwai gela mu waibao,” wali.
JER 22:24 “Ena sesemane sogo bididubo Genuai Bidi, eno po dolo nage Jehoiakinba obao, te Jehoiakimgo ogwa, te Juda king dao. Te nage eno dolo nogode mubo ring me deli tiwai te eno nage godolo mu igi da, tagala, te eno nage sela sągi da.
JER 22:25 Tama nage dolabo bidi dabeba nage mawaibao, te nago augwalide wi ebo bidi dabeba mawaibao. Te Babilon king Nebukatnesar me, aga ami bidi daliba maiabo po obao.
JER 22:26 Eno te nage naga ida dali selama, te dage si gasa tǫ kantriba sąwaibao. Te tǫ kantri te dage sigo page bulu mu meni ebadi, tialima, dage si tede bididubadi, te dage si isiboba usu naibao.
JER 22:27 Dagego te duga page buluba asabo homu godolo mu yaibao, tialima, dage usu munu ma egobe dao,” wali.
JER 22:28 Jeremaiago te tiwai po wai, “Magi basowe? Te bidi Jehoiakin te tǫgo nigai dwai tagalai sospen sene alua pai tiwai te bidigo godolo isąbo homu ebo ąǫ eba, agawe? Magi baso Genuai Bidigo aga, te aga wai puluba dabe dali, te augwaligo konesiąwai tǫ kantri me deliba sąwaibawe?
JER 22:29 Israel tǫ, Israel tǫ, nago Genuai Bidigo po odao.
JER 22:30 Genuai Bidigo te tama po wali, ‘Te bidide po te tiwai asęao. Te bidi te wai meni yai bidi tiwai elaluali. Tigidali sę agai ebo te wiegi yai me pedalugobeo. Magi baso meni, te aga wai hani dabe me deligo te aga sę yali pesage selama, te Devitgo sia kingde dulalu, te tǫ kantri Juda tonalugobeo,’” wai.
JER 23:1 Genuai Bidigo te tiwai po wali, “Genuai sęgę te eno we bidi dolobo tobolu bidi dabeba pedelaibao. Augwali te dwai tonalubo bidigo te sipsip dabe dolama, te augwali subigila tedela palobo tiwai ebao.
JER 23:2 Tama tibaso, ena Genuai Bidi, ena duga Israelgo God, eno po dolo te dage eno bidi tonalubo sę ebo bidi dabeba obao. Dagego eno sipsip dabe ela gudulama, te augwali pobelama, besela palio. Dagego augwali bugagia me tonalubeo. Tibaso, ena Genuai Bidi, eno po dolo obao, te dage eno bugagia tonalu, te dagego yali dwai kolesaga wei ponainogo tebo dao.
JER 23:3 Tama ena digi eno te dwasianu elalubo sipsip hani te eno augwali sela sąwani tǫ kantride sisinaibao. Tama eno te augwali te augwa obo tomoba ma odasa asaibao. Tama augwaligo te wai hauwa ame nenama, te umabo hauwa pedelaibao.
JER 23:4 Te ena Genuai Bidi, te eno gesi noma tonalubo bidi nigilama, tama augwaligo te sipsip dabe bugagia tonalueibao. Tama te sipsip dabego magi nai me delide wi me egobeo. Tama te sipsip deli me hagagobe dao,” wali.
JER 23:5 “Ena Genuai Bidi, eno te po obao. Eno te wiegi yai bidi mu me deli te Devitgo hanide pedelabo sogo bodolu mueibao, te ni nologode gesi ni kulubi holobo tiwai yaibao. Te bidi te king bidiyu, agai te wiegi yai doloba pai homu kolesaga wali paibao. Tama agai te tǫde we bidi tigidaliba doloba pai kolesaga mu yaibao.
JER 23:6 Te aga king bidibo sogo, te Juda dabe me Israel dabede te sęgę mu meni yaibao. Te eno augwali ma selama, te augwali bugagia bidaibao. Tama augwa te king nogi te tiwai waibao, Genuai Bidi aga te dago doloba pai kolesaga ebo page bidi da, waibao,” te po wai dao.
JER 23:7 “Ena Genuai Bidi, eno te tiwai po obao. Eno te we bidi dabe sela sąwani, tialima, te eno augwali te augwa tǫba ma odasa asabo sogo bodolu muani elalubao, te augwa bugagia bidaibao. Megi augwa po dąų walobo kolesaga e tiwai ebao. Augwaligo te po wali, ‘Te sesemane sogo bidada pabo Genuai Bidigo nogide eno nogo guni sisu mobao, te eno mu po obao,’ wali. ‘Agai da te Isipde selama, odasa asalio.’ Tialima, te eno augwali odasa asali sogo, te kolesaga hasegelaibao weyu, augwa te tama po waibao, ‘Te sesemane sogo bididubo Genuai Bidigo nogide eno nogo guni sisu mubao, te eno mu po obao. Agai da Israel hani dabe te tǫ kantri not pedai badu, me gasa tǫ kantri badu selama, agai da te badu sela sąnama, tama agai da te dena page buluba ma selasa asai dao.’ Augwaligo te tobage po waibao,” Genuai Bidigo te po wali.
JER 23:9 Jeremaiago te tiwai po wali, “Eno te Genuai Bidigo wiegi yai doloba pai po eno koneai, tama eno te profet dabede homu kone palobo sogo, eno homu doloyu, te ena wi elama, te eno dili dabe didibili mu ebo dao. Ena te bomai ąį wain hauwa tuai bidi tiwai pedelama, te gęǫ elama, te wabo pabo tiwai ebo dao.
JER 23:10 Te tǫ kantri we bidi dabego te Genuai Bidi tagalama, te we sai bidigo me bidigo sai wego te subigila penani ela bilibo tiwai dao. Te we bidi dabego dwai kolesaga ebaso, te Genuai Bidigo aga po wali peyu, te tǫ dolai dao. Tigidali kala tǫ bulu wa pai yaibaso, te tǫgo hobedai gela obao. Sesemane sogo te me profet dabego dwai sunumi wali peyu, tama augwa te dolo isąwai kolesaga ebo sę bomo ebo dao,” wali.
JER 23:11 Genuai Bidigo te po wai, “Te profet dabego me, pris dabego me, te Genuai Bidigo po konesiąwai bidi dabe ebo kolesaga tiwai yali. Te eno be tomode digi dwai sę ebadi, te tagalao, augwa te dwai kolesaga ebo me geana sogobeo.
JER 23:12 Tama tibaso, te eno augwaligo sunumi te mu kikila palama, te hulia sabogo augwali mesegalueibao. Te eno augwali bomonama pogwa palama, te augwali tula mueibao. Ena Genuai Bidi, eno te augwali dolabo sogo bodolu muai elalubao, tama te sogo eno dwai dene augwaliba mawaibao,” wali.
JER 23:13 “Polobadu eno te Samaria profet dabego te tiwai dwai kolesaga ebo suali. Augwaligo te tibo god Balgo nogide profet po pusulama, tama augwaligo eno we bidi dabe te dwai sunumiba odasa pali.
JER 23:14 Tialima, megi eno subo, te Jerusalem profet dabego dwai kugumini yai kolesaga mu ebao. Augwaligo te we sabo kolesaga doloyu, te tibo po wabo kolesaga me ebao. Augwaligo te dwai kolesaga ebo bidi dąų walaibao. Tama tiyu, te mena bidi mego te tobage kolesaga tudiba me mubeo. Eno suali, tigidali Jerusalem we bidi te dwai mu, te Sodom dabe me Gomora dabe tiwai mu elalubo dao.”
JER 23:15 “Tama tialima, ena, Tigidali Bomo Elalubo Genuai Bidi, eno te profet dabeba homu kone palama, te po obao, Te eno genuai dene augwaliba mawaibao. Te eno ha ebo marasin augwaliba menama, te augwaligo tumainogo ebo tiwai yaibao, tama eno te bidi dolobo dwai wę mabo ąǫ yaibao. Magi baso meni, te Jerusalemde bidali profet te haiden kolesaga wali pelama, megi da, te kolesagago te tǫ tigidali usu nubo dao,” te po wali.
JER 23:16 Te Tigidali Bomo Elalubo Genuai Bidigo te Jerusalem dabeba te tiwai po wali, “Dagego te profet dabego dageba pusubo po me odogio. Augwaligo dage tibo po ola mayu, dage bugagia bidaibao po obao. Augwaligo te augwa homude digi te na yali po pusaibao. Eno augwaliba te po me mabeo.
JER 23:17 Te we bidi augwaligo eno po sela sąbaso, te profet dabego augwaliba te tiwai po waibao, ‘Te dage bugagia bidaibao.’ Te hagoma elama, augwa homu wali pabo we bidiba, te profet dabego augwaliba te tiwai po waibao, ‘Te dwai nai dageba me pedalogobeo.’”
JER 23:18 Tama Jeremaiago te tiwai po wali, “Te profet dabe me deli te Genuai Bidigo po sisinama mibo pesagede bidama, te po me sagasobeo. Te augwali me deligo te Genuai Bidigo poba bugagia olo me mubeo.
JER 23:19 Odao. Genuai Bidigo haliga sębę te dwai bidi dabeba pedalubo, te bomai wali me tulubage polo asobo tiwai yaibao, tama te poboge ebo genuai waligo te augwali tobolude agabo tiwai yaibao,” wali.
JER 23:20 “Genuai Bidigo haliga sębę elaludu, te agai homude yaibao wali tigidali sę ela siliyu, usu naibao. Te bodolu muani sogo asobo side, dage we bidigo te sę dabe page bugagia koneaibao,” wali.
JER 23:21 Genuai Bidigo te po wali, “Eno te profet dabe me tagala palobeo, tiali goli, augwaligo po asesa pusugi pobao. Eno po augwaliba me mabeo, tiali goli, augwaligo te profet po pusubo dao.
JER 23:22 Te augwali eno sisinama po mibode bidigi sogo da, te augwaligo eno we bidiba te mu po dolo pusugi pobao homu igi da. Tama te pogo te we bidi dabe dwai sunumi bilali tagalu, te augwa yali dwai kolesaga tagaligi da homu ebo dao.”
JER 23:23 “Ena Genuai Bidigo, eno dageba te tiwai hanalu wabo homu ebao, dagego homugo ena te pedai badu God naga da homu eba, agawe? Menio. Ena te tigidali badu God elalubao. Ena pąde bidiyu, te ena digibulu me bidiyu ebo dao.
JER 23:24 Te bidi me deli gasa badu me dula sigi pobaso, te ena Genuai Bidigo, eno aga sugobe homu ebawe? Te eno aga sueibao, magi baso meni, ena Genuai Bidi, ena te tigidali badu te dagalude me tǫde bidibo dao,” wali.
JER 23:25 “Te profet dabego eno nogide te tibo po pusubo eno odalio. Augwaligo te tiwai po wabo dao, ‘Eno na yalio! Eno na yai dao!’ te po wabo dao.
JER 23:26 Nisu sogo mu te profet dabe augwa digi te tibo po te we bidi dabeba pusubo kolesaga tagalaibawe?
JER 23:27 Augwaligo te augwaba digi te na yali po pusuyu, te augwaligo homugo te tebogo te eno we bidigo te enaba homu kone ebo kegeda paloba homu ebao, te polobadu augwa wąį nǫų dabego te tibo god Balba lotu weyu, te enaba homu konesiąwai tiwai yaibao homu ebo dao.
JER 23:28 Ena Genuai Bidi, eno po dolo obao, te profetgo odolali na yali da, agai te na yali po miaibao. Tialima, eno te bidi me deliba po mawai ebaso da, teda agai eno te po dolo pusao. Eno po da, te wiegi yai nai wit ge wai tiwai elalubao, tama te profet dabego po wit aga bo ma wali tiwai olo nai dao.
JER 23:29 Ena Genuai Bidi, eno po dolo obao, eno po te isi tiwai elalu, tama te genuai hamago te masigi dabe haluama, te kakali pedalubo tiwai ebo dao.”
JER 23:30 “Tama tialima, odao. Ena Genuai Bidigo, eno po dolo obao. Te augwa deli sę ebo profet dabede po wi selama, te po enade sai dao wabo profet dabe dali eno boi bidi yabo homu ebo dao.
JER 23:31 Mu tama, ena Genuai Bidi, eno te tiwai po odolali wabo profet dabeba boi bidi yaibao, ‘Te e po Genuai Bidigo po da,’ wabo dao.
JER 23:32 Ena Genuai Bidi, eno te profet dabego augwa tibo na yali po selama, te augwaligo te we bidi dabeba pusa mayu, te eno augwaliba mawai po da wabo, te profet dabeba eno boi bidi yabo homu ebao. Augwaligo te haniani tibo po pusulama, te tama tebogo te we bidi digibulu kegasa pabo dao. Eno augwali me tagala palisąma, te eno sę augwaliba me mabeo. Tama te we bidi augwaligo tau me dwasianu me sisąwai. Mu menio. Ena Genuai Bidigo, eno te po wai dao,” wali.
JER 23:33 Genuai Bidigo Jeremaiabolo te tiwai po walali, “Te we bidi dabego, ma profet me deligo, ma te pris me deli, te aselama, nageba te tiwai po hanalu waibao, ‘Genuai Bidigo sęgę yai po meba elalubo, ma meniwe?’ obaso da, teda nago eno te po agabolo pusao, ‘Ena Genuai Bidigo, eno po dagede elalubao. Dagego enabolo sęgę mawai. Tialima, te eno dage sela sąwaibao.’ Nago eno te po agabolo pusao.
JER 23:34 Te profet me deligo, ma te pris me deligo me, ma te olo bidi me deligo te po weyu, ‘Genuai Bidigo po sęgę mu elalubao,’ obaso da, teda eno te bidiba me, te aga haniba dali, dwai dene mawaibao. Tama te tobage po wagio. Menio.
JER 23:35 Te dagego duga abagi dabe dali, me duga ama dabe dali, po mibo sogo da, teda duga te tama po wao, ‘Genuai Bidigo mena po wei ponaniwe?’, ma ‘Genuai Bidigo mena po pusaliwe?’ te po wao.
JER 23:36 Tialima, dagego te tama po ma wagimio, ‘Genuai Bidigo po sęgę mu elalubao,’ wagio. Menio. Duga pogo digi duga sęgę mobao. Te duga digi eno po selama, tama po yalelebo po wabo sę ebao, ena sesemane sogo bidibo God, ena Tigidali Bomo Elalubo Genuai Bidi, ena duga God dao.
JER 23:37 Te bidi me deligo te profet me deliba hanalu wainu eyu da, teda agai te tiwai po wao, ‘Genuai Bidigo magi po nageba wei ponaniwe?’, ma ‘Genuai Bidigo mena po pusaliwe?’
JER 23:38 Tialima, dagego te po weyu, ‘Genuai Bidigo po te sęgę mu elalubo,’ obaso da, teda ena Genuai Bidi, eno po dolo dagebolo obao. Eno dageba te tobage po pusubo habu selali, tiali goli, dagego eno po sela sąnama, dagego te po ma weyu, ‘Genuai Bidigo po sęgę mu ebao,’ wabo dao.
JER 23:39 Tama tialima, mu tamao, te dage eno selama, te enade digi sągi paibao. Eno dageba tama tilama, te eno dagego wąį nǫų dabeba mani tǫ taun me te dageba digi te eno digibulu tagala palaibao.
JER 23:40 Eno dage te hale dwai mu ilama, tama te hale sesemane sogo elalua paibao, tama dagego tede homu kone palobo te ma tagalogobe dao,” wali.
JER 24:1 Te Babilon king Nebukatnesargo te Jerusalem aiyaba elalubo si da, teda agai te Juda dabe Babilonba odasa palio. Agai te king Jehoiakimgo ogwa sali, aga te king Jehoiakin, aga gasa nogi me Jekonia. Tama agai te Juda genuai bidi dabe me, te tobage wiegi yai nai nigibo koneai bidi dabe me, sela pali. Tialima, te tudi badu nosali, Genuai Bidigo ena Jeremaiabolo ola mawai, te nade nai me deli ola mabo tiwai yali, tama te nade eno te basket wa side te ni kaya fik wai du dabe elalubo suali. Te basket wa si te Genuai Bidigo be sunumi pąde elalualio.
JER 24:2 Me basketde te ni kaya fik du wai wiegi yai mu elaluali, te ni fik du te gide polasa inawai elalubo tiwai yali. Te gasa basket wa mede te ni kaya fik du wai te dwai mu elaluali, te bidigo tuabo ąǫ isąwai dao.
JER 24:3 Tama Genuai Bidigo enabolo te tiwai po wali, “Jeremaia, nago magi nai sualiwe?” Tama eno te tiwai po wei ponani, “Eno te ni kaya fik du wai sualio. Te wiegi yai fik du te wiegi yai mu elalubao, te kaya fik du dolali te mu dwalio, te bidigo tuabo usu egobeo,” wali.
JER 24:4 Tialima, Genuai Bidigo po e dali enabolo manio. Te po e tiwai,
JER 24:5 “Ena Genuai Bidi, ena duga Israelgo God, eno po obao, eno te Juda meba sela sąnama, augwali te Babilon tǫ kantriba pali, tialima, eno homugo augwali te wiegi yai ni kayago du tiwai dao.
JER 24:6 Te eno augwali bugagia tonalu, te augwaliba wiegi yai sę yaibao. Tama augwali eno te e tǫba ma odasa asaibao. Te eno augwali dąų walama, te eno augwali aiyaba me elalugobeo. Te eno augwali bulama, te eno augwali me digągobeo.
JER 24:7 Te eno augwaliba homu kolesaga mobaso, augwa te tiwai koneaibao, ena digi ena Genuai Bidi bidibao. Te augwali enaba ma asiyu, te enaba homu kęą peyu bidaibao. Te augwali eno hani we bidi mu pedalaibao, te ena augwa God bidaibao,” wali.
JER 24:8 “Te ena Genuai Bidi, te eno Juda king Sedekaia dali, te aga ofisa dabeba me dwai sę eyu, te Jerusalem augwa page bulude bidalubo we bidi dabeba me, ma te Isipba pali hani bidiba dwai sę yaibao. Te hani dabeba eno dwai sę ilaibao, te bidigo ni kaya fikbolo dwai sę ilama, te bidigo tusąbo dwai mu ilali tiwai yaibao.
JER 24:9 Te gasa bulu tǫ kantri tigidali we bidigo te sę eno te Juda dabeba yali po odolama, te augwali wi elama, nogo hogwayu, te dwai noma saibao. Tama eno te boi bidi dabe tagala palama, te augwali ela muagasaibao, te augwali nasigo isiyu, me te dwai gasigo augwali dolama isaibao. Tama eno augwali meba te tǫ kantri dabeba tedela palaibao. Te tama tebo kolesagago te eno augwaliba me te augwa wąį nǫų dabeba mani tǫde bidibadi mu silaibao. Tama eno te Juda dabe sela sąbo te tǫ kantri we bidi dabego, te augwali Juda dabeba dolama posobo po waibao. Me te gagali po wabo tiwai yaibao. Tama te we bidi dabego te augwa boi bidiba digi i ola mabo po wabo sogo, te augwa te tiwai po waibao, ‘Dage te Juda dabe dolali tiwai gilama dolomainao,’ te po waibao,” wali.
JER 25:1 Genuai Bidigo po te Juda tigidalide elalubaso, tama agai te po Jeremaiabolo mawai, te Josaiago ogwa Jehoiakim te kibu be me si me side te Juda king bidali. Te sogo te Nebukatnesar te Babilonde te kibu be delide mu te king bidibo sogo dao.
JER 25:2 Profet Jeremaiago te po te tigidali Juda me Jerusalem we bidiba pusali. Agai te tiwai po augwaliba wai dao.
JER 25:3 “Josaiago kibu be nogo si olama, sągągo selade gagalama, te Emongo ogwa, te Juda king bidali, tama megi e sogoba usu nagasu, te kibu be bidi sese deli olama, sela elalubao. Tama te kibu be dabede ena Jeremaia, eno te Genuai Bidigo enabolo mani po pusudu geali. Tialima, dagego odobo hagela yai dao.
JER 25:4 Hauwa sogo polobadu Genuai Bidigo profet dabe, te aga sę bidi dabe, dageba tagala paludu geai, tialima, dagego hagoma eyu, te augwaligo poba olo sagana mubeo.
JER 25:5 Te profet dabego te tiwai po wali, ‘Dage deli deligo homu begelama, te dagego dwai sunumi wali pabo tagalama, te dagego dwai kolesaga ebo me tagalao. Dagego te kolesaga tagalobaso da, teda Genuai Bidigo duga wąį nǫų dabeba te polobadu mu mani tǫde bugagia bidimainogo ilaibao, te tǫ te dage Israelgo tǫ sesemane sogo elaludaibao, te po wai dao.
JER 25:6 Dagego te gasa god wali me pisąma, te augwaliba lotu weyu, te augwaliba sę me elamuo. Tama dagego te tibo god dabe piksa me nigiyu, te ena haliga sębę ilibo sę me igio. Te dagego eno po wali peyu da, teda eno dwai sę dageba me egobeo.’
JER 25:7 Te profet dabego eno te po pusali, tialima, ena Genuai Bidi, eno po dolo dagebolo obao, dagego eno po me odobeo. Menio. Dagego te tibo godigo piksa dabe nigiyu, te dagego ena haliga sębę ilai dao. Tama tebo kolesagade, te duga digi duga dolobo sę ebo dao,” wali.
JER 25:8 “Tama tibaso, ena Tigidali Bomo Elalubo Genuai Bidi, eno te po obao, dagego eno po wali me pabeo.
JER 25:9 Tama tialima, odao. Ena Genuai Bidi, eno te not badu bidibo Israel hani isąwai bage hani tigidali i waibao. Tama me, te eno ena sę bidi i waibao, te king Nebukatnesar, te Babilon bidi dao. Tama eno te hani dabe odasa aselama, te e Juda dabego tǫ dolama, te tǫ pąde bidalubo gasa we bidi hani dabe me dolaibao. Eno te not badu hani dabego augwali mu dola silimainogo elama, tama augwali sesemane sogo doludaibao. Te gasa hani we bidi dabego subo sogo da, te augwali dwai noma mu siyu, wi umabo mu yaibao.
JER 25:10 Tama eno te bugai haliga ebo me, pemene homu ebo kolesaga me, te bidi dabego we sabo kolesaga me mu silimainogo yaibao. Tama te wit halulu pabo sę ebo me meniama, te wit halubo masigi dabe kidagalo wali mu meni yaibao. Tama te pesagede te lam sole ula me egobeo.
JER 25:11 Te tǫ tigidali dolama, te dwai olo pesage naga elalueibao. Tama te hani we bidi dabe te kingo sę olo ebo bidi tiwai te Babilonde bidaludubadi, te kibu be bidi sese sela olama, nogo si, te 70 yia bidaibao,” wali.
JER 25:12 “Te bidi sese sela olama, nogo si kibu be, te 70 yia silibo si da, teda ena Genuai Bidi, te eno te Babilon kingba me te aga we bidi dabe dwai dene mawaibao, te augwaligo yali dwai kolesaga wei ponaibao. Tama eno te Babilon tǫ kantri dolaibao, te tǫ Kaldia dao, tama te Babilon tǫ sesemane olo mu elalua paibao.
JER 25:13 Jeremaiago te eno Babilonba yabo sę po tigidali pusali, te augwaliba dwai dene mawaibao wali. Te sę dabe yabo po te Jeremaia bukude elaluai. Te eno tigidali tǫ kantriba yabo po te bukude wai elalubo dao.
JER 25:14 Te eno Babilon dabeba dwai dene mawaibao, te augwa yali dwai kolesaga wei ponaibao. Te tǫ kantri hauwa bomai kingo te augwali aiyaba elaluama, te augwalibolo kalabus sę mawaibao,” Genuai Bidigo te po wali.
JER 25:15 Genuai Bidi, Israelgo God, agai enabolo te tamapo wali, “Jeremaia, te eno tolalubo kap waingo, te enohaliga sębę usu sai elalubao. Te kap selama, te nageeno te tigidali tǫde bidibo we bidi hani hauwaba tagalapalama, nago augwali te kapde ąį tumainogo ilagameo.
JER 25:16 Augwa tubo si da, teda augwali te wabo pabo bidi tiwaipedalama, te dwagila mu bilaibao. Magi baso meni, enote boi bidi tagala palama, augwaliba hwįagasomainogoelama, augwali dolaibao,” wali.
JER 25:17 Tialima, eno te kap wain Genuai Bidigo nogodeselama, ena te haniani we bidi hani dabeba pelama, teaugwaligo tumainogo yai dao.
JER 25:18 Hasia bolo ena te Jerusalemba pelama, te Juda tigidali taunba me peyu, teking dabeba me tobolu bidi dabe dali pali, te augwaligoąį tumainogo yali, te tǫ kantri Juda mu dolama, te tǫolo mu tama elalumainogo yaibao. Te gasa Israel haniisąwai we bidigo te kantri tǫ Juda sulama, te augwalidwai midigi mu selama, te wi umabo yaibao. Tama te webidi dabego augwa boi dabeba dwai i ola mabo po wabosogo, augwa te tama po waibao, “Dage te Juda dabe dolalitiwai yagameo,” te sę dabe pedelai dao.
JER 25:19 Tama enote kap te Isip kingba me mayu, te aga sę bidi dabeba, me te aga ofisa dabeba mayu, te aga we bidi dabebamawaibao,
JER 25:20 tama te Isip tomode bidali gasa hani webidi tigidaliba mawaibao. Tama eno te tǫ kantri Us kingtigidaliba me mayu, te tǫ kantri Filistia king tigidalibamawaibao. Filistiade te tama tǫ pedai distrik elalubao, Askelon, me Gasa, me Ekron, me tǫ pedai distrik Asdottede me bidali we bidibolo mawaibao.
JER 25:21 Tama eno tekap wain ąį te tǫ kantri Idom, me tǫ kantri Moap, mete Amon we bidi dabe me, tama mawaibao,
JER 25:22 tamame te tigidali Tair kingba, te Saidon king, me te tamuąį u badu pedai badu bidibo hani dabebolo mawaibao, wali.
JER 25:23 Tama eno te Dedan dabeba mayu, me te Temadabeba, me te Bus dabebolo me mayu, tama te tobolunisi duasabo we bidi dabeba mayu yaibao.
JER 25:24 Tamaeno te tigidali Arebia king hani dabe mayu, te hanianiking dabeba, me te olo tǫ masigide bidibo we bidi dabemawaibao,
JER 25:25 te tigidali Simri king dabeba, me te tǫkantri Elam, me kantri Midia dabeba mobadi,
JER 25:26 tama tetigidali not badu bidibo tǫ kantri king dabeba me mobadiyaibao, te augwali digibulu bidibo, ma te pąde bidibome, te tagalao. Eno te tigidali king te tigidali tǫ kantribamenama, te augwali tumainogo yaibao. Tama nosali, te Babilon kingo me tumainogo yaibao.
JER 25:27 Tialima, Genuai Bidigo enabolo te tiwai po wali, “Jeremaia, nago te we bidi hani dabeba te po mao. Ena Israelgo God, ena Te Tigidali Bomo Elalubo Genuai Bidigo eno te tama po dagebolo obao, ‘Dagegotuįyao. Te umabo hauwa tulama, te dage gęǫelama, buguyu, te tǫba tulaluama, te dage munu mahodalugobeo. Magi baso meni, eno te boi bidi dabedageba hwįmainogo tagala palama, te dage dolaibao,’ wali.
JER 25:28 Tialima, Jeremaia, te augwaligo te kap nago nogodesisąbaso da, teda nago te tiwai po augwaliba wao, ‘Ena Tigidali Bomo Elalubo Genuai Bidi eno te po obao, dagegoselama, tuįyao.
JER 25:29 Eno te tigidali tǫde we bidiba dwaidene mabo sę yaibao. Tama eno te sę te Jerusalemdegagalaibao, te eno taun elalubao. Tama dage Jerusalembage, dagego homugo te eno dage ela soaibao homueba, agawe? Mu menio. Ena Tigidali Bomo Elalubo Genuai Bidigo eno te po obao, eno te boi bidi tagalapalama, te tǫ hani we bidi tigidaliba boi hwįgi pomainogoyaibao.’ Nago te po augwalibolo pusao,” Genuai Bidigoenabolo te po wai.
JER 25:30 “Jeremaia, nago eno nagebolo te mani po tigidali pusao. Nago te we bidi dabeba te tama po walao, ‘Genuai Bidi aga bulu dagalude digi bidama, tama aga we bidi dabeba genuai po dagą mu waibao. Awe, aga gasagi yai tedali bulude bidiyu, tama agai i wabogo dogoni te be kulukulu wabo tiwai yaibao. Agai te tigidali tǫde we bidi i bomonama weyu, te bidigo te wain wai agawaide i wabo tiwai yaibao.
JER 25:31 Agai te i wabo te tigidali tǫ habu mu usu naibao. Te i wabo page e tiwai dao. Genuai Bidigo te tǫde we bidi tigidali po tų ilaibao. Agai te boi bidi dabe tagala palama, te dwai kolesaga ebo we bidi dabe ela muagasaibao. Te Genuai Bidigo po dao.’”
JER 25:32 Tigidali Bomo Elalubo Genuai Bidigo po ma weyu, te po wai, “Odao, tigidali tǫ kantri dolaibao. Te sę te tǫ kantri me delide gagalasa, pidubadi genama, te tigidali tǫ kantri mu usu naibao. Te dolobo sę te wali moni bage tiwai, me te tulubage tiwai digibulu bulude hogodama, te tigidali tǫ pedai habu usu nama bilaibao,” wali.
JER 25:33 Tama te sogo Genuai Bidigo te we bidi hauwa ela munama, tama augwa tigi dabe te tigidali tǫ badu munalua paibao. Tama augwalide hobede elama gela wabo bidi meni eyu, te augwali tigi pubulabo bidi me bidigobeo. Menio. Te tigi dabe te tǫde yowi di munalua pabo tiwai yaibao.
JER 25:34 Dage tobolu bidi dabe, me we bidi tonalubo bidi dabe, dage gela weyu, hobede dwai mu yao. Te dage tǫba degasa dulama, hogogobe paibao. Magi baso meni, megi da, te boi bidi dabe aselama, te dage ela munama, te bidalubo we bidi dabe sela sąbo sogo elalubao. Te dage tulaluama doloyu, te wiegi yai tǫgo nigai sospen tǫba tulaluama dolobo tiwai yaibao.
JER 25:35 Tama dage tonalubo bidi dabe, te dage wi pelama, geme dula sigi pabo pesage meni yaibao, te dolobo sę dageba ela somainogo te tama tebo usu me egobe dao.
JER 25:36 Megi da, te sipsip tonalubo bidi dabe gela weyu, homu dene dwai mu yaibao. Magi baso meni, Genuai Bidigo te augwa sipsip dabe nosai tubo pesage dolai baso.
JER 25:37 Genuai Bidi te haliga sębę umagia elama, te sipsip dabe dua tegaluama bidibo te wiegi yai kala koliai pesage dolaibao wali.
JER 25:38 Genuai Bidi hogodasa asali, te laion aga geme dulaluama asobo tiwai yali. Genuai Bidi te haliga sębę mu elama, te boi bidi Juda dabeba hwįagasomainogo yaibao. Tama tialima, te tǫ kantri mu dolama, te dwai olo pesage pedelaibao.
JER 26:1 Te Jehoiakim, te Josaiago ogwa, te Juda king pedelali sogo, Genuai Bidigo Jeremaiabolo te tiwai po wali,
JER 26:2 “Ena Genuai Bidi, eno po obao, nage te eno be mesalo obo tomoba pelama, te bidi sisinibo pesageba doligi pelama, te Juda taun we bidi dabe tigidaliba po pusao, augwali te eno be tomoba lotu wainogo asaibao. Eno nagebolo mani po tigidali, te nago augwaliba pusao. Nago po deli me tagalamu dao.
JER 26:3 Te nago eno po tigidali bugagia pusubaso da, teda te we bidi deli deligo nago poba olo bugagia munama, te homu begelama, te augwa ebo dwai kolesaga tagalaibawe, te dago sueibao. Augwaligo tama tiyu da, teda eno homu hasegelama, te eno augwaliba yainogo yali sę tagalaibao, te augwa yali dwai kolesaga wei ponainu tiaibao.
JER 26:4 Nago te po augwaliba mao, ‘Genuai Bidigo dagede te tiwai po elalubao. Dagego Genuai Bidi eno po odama, tama eno dageba mani bomo yai po wali pao,’ wali.
JER 26:5 ‘Te eno sę bidi, te eno profet dabego, dagebolo mabo po tigidali te wali pao. Hauwa sogo eno te profet dabe tagala palama, te dageba po pusagasali, tiali goli, dagego augwaligo po wali me pabeo.
JER 26:6 Te dagego eno po wali pisąbaso da, teda eno te eno e be dolaibao, te eno polobadu te Silo taun be dolali tiwai yaibao. Tama te gasa tǫ kantri we bidi dabego augwa boi bidi dabeba dwai po wabo sogo, augwa te tiwai po waibao, “Dage dolobaso, te Jerusalem dolali tiwai yao.” Augwaligo te po waibao.’ Nago te po te Juda we bidibolo pusao,” Genuai Bidigo Jeremaiabolo wali.
JER 26:7 Tialima, Jeremaia hogodama, te Genuai Bidigo beba pelama, tama Genuai Bidigo agai te we bidi dabeba pusumainogo yali po tigidali pusali. Tama te pris dabe, me profet, me te we bidi dabego te po odali. Tama Jeremaiago te po ola silibo si da, tigidaligo aga pageabi yagaselama, te po walio, “Nage isaibao,” wali.
JER 26:9 “Magi baso nago te dwai po te Genuai Bidigo nogide pusubawe? Te Silo dolali tiwai gilama, te be dolaibao po nago me wagio. Te taun dolama, tama tede bidi me bidigobeo, te po me nago obao, te tiwai po nago me wagio,” wali. Te Genuai Bidigo bede bidali we bidi tigidali, augwaliaselama, te Jeremaia bobegela sagasalio.
JER 26:10 Te sogo Juda tobolu bidi dabe te kingo bede bidalu, te sę yali po odalio. Tialima, augwali hogodasa pelama, te Genuai Bidigo beba ugwa holali. Tama augwali te augwa bulu pesagede dugawali, te nogi Gesi Sunumi da wabo sunumi pąde elaluai dao.
JER 26:11 Tialima, te pris dabego me, profet dabego me, te po te tobolu bidiba, me te we bidi dabe tigidaliba te tiwai po wali, “Te bidi isimainao, magi baso meni, agai te po wai, te taun dolaibao. Duga digi agai te profet po wali odai dao,” wali.
JER 26:12 Tialima, Jeremaiago te tobolu bidi dabe me te tigidali we bidi dabego po wei ponoyu, te po wali, “Genuai Bidigo digi ena tagala palama, eno dagego te odali profet po pusagasali. Aga digi po weyu, te be me te taun dolaiba po wai dao.
JER 26:13 Tama tialima, megi da, dagego te duga bilibo kolesaga dodolao. Tama dagego te Genuai Bidigo po wali pao, te dena God dao. Te dagego tama tibaso da, teda Genuai Bidigo homu hasegelama, tama agai dage dolabo sę me egobeo, te agai po weyu, te sę yaibao po wali.
JER 26:14 Tialima, ena da, te duga nogode bidibao. Tama dagego enade magi sę me deli yainogo, tama dagego homugo te kolesaga wiegi yai doloba pai da homu ebaso da, teda dagego te sę eyu naga yao.
JER 26:15 Tialima, eno homu dagego te tiwai konemainogo ebao. Mu tamao, Genuai Bidigo digi ena tagala palobaso, te ena aselama, te eno pusali po dageba pusagasalio. Tama te ena dagego ela mubaso da, dagede te magi dwai sę deli me isąwai bidi odolali elali, te sęgę elalueibao. Tama te dwai sę yali te taunde elalu, te tigidali taun we bidi dabede te sęgę elalueibao,” Jeremaiago te po wai.
JER 26:16 Jeremaiago po ola silibo si da, teda te tobolu bidigo, me te tigidali we bidigo te pris dabeba me te profetba te tiwai po wali, “Te bidigo te dago God Genuai Bidigo nogide te po pusalio. Agai dwai sę me elalubeo, tama tialima, dago aga me ela mugobe dao,” te po wai.
JER 26:17 Tialima, te Juda genuai bidi meba dolugulama, te we bidi augwaliba te tiwai po walio,
JER 26:18 “Polobadu, te Hesekia Juda king bidali sogo, te profet Maika te taun Moreset bidigo te Juda dabeba te tiwai po pusai, ‘Tigidali Bomo Elalubo Genuai Bidigo te po wai, te Jerusalem nai tigidali dolama, te pobele bage du holobo tiwai pedelaibao,’ wai dao. ‘Te Saion olo tǫ bulu pedelama, te bidi dabego tede gi bulaibao. Tama te bulu dude ni dulu pedelaibao, te Genuai Bidigo be elaluali madi te tama tiaibao.’
JER 26:19 Maikago te tiwai po obaso, te Hesekiago me tigidali Judago aga ela muai da, agawe? Mu menio. Hesekia wi elama, te Genuai Bidi dologoba pelama, te Genuai Bidiba hanaluama, te agaba te olo mu tau sabo wiegi yai kolesaga emainogo yali. Tama Genuai Bidigo homu hasegelama, te agai augwaliba yaiba po wali sę te ebeo. Tialima, megi dago te Jeremaiabolo yainogo ebo kolesagago da, te daba digi genuai sęgę sesaibao,” te tama po wai.
JER 26:20 Nosali bidi me deli, aga nogi Uriago, te Genuai Bidigo nogide po pusali. Uria aga te Semaiago ogwa, aga te taun Kiriat Jearim bidi da. Agai te po weyu, te Jerusalem me Juda dolaibao po wali, te Jeremaiago wali po tiwai wai dao.
JER 26:21 Tama te king Jehoiakim dali, te tobolu bidi dabe me, aga ami bidi dabego dali Uriago te po odolama, tialima, te kingo aga ela muabo sunumi gegali. Tialima, Uriago kingo te sę yabo po odolama, te aga wi ebaso, te Isipba wi pai dao.
JER 26:22 Tialima, king Jehoiakimgo Elnatan tagala palali, te Akborgo ogwa, te bidi meba dali, Isipba palio.
JER 26:23 Augwaligo te Uria selama, aga te king Jehoiakimba odasa asai. Tama kingo po obaso, te bidi dabego Uria te bainat hwągo elama, tama augwaligo aga tigi te olo bidi dabego gų pageba sąwai dao.
JER 26:24 Tialima, te we bidi augwaligo te Jeremaia ela muainogo yali sogo, Ahikam, te Sefango ogwago, te Jeremaia tau selama, te augwaligo agade dwai sę me ebeo.
JER 27:1 Te Sedekaia, te Josaiago ogwa, te Juda king pedelama bidali sogo, Genuai Bidigo ena Jeremaiabolo
JER 27:2 te tama po wali, “Te ni nami pedai selama, te kukulu delage sobadi elama, tama te nigilama, te bidi dabego te sę ebo bulmakau mageba mubo tiwai yao, tama te nai dabe te naga magede digi domao.
JER 27:3 Tama nago te po te Idom kingba toliyu, me te Moap kingba, me Amon kingba, me Tair kingba, me Saidon king dabe me po ola tolao. Te king dabe augwa ofisa bidi dabe te Jerusalemba aselama, te Sedekaia dali po miagasaibao. Tama te sogo nago te eno po augwaliba pusao, tama augwaligo te augwa kingba wagi paibao.
JER 27:4 Te bidi dabeba te po walao. Ena te Israel Godigo obao, ena Tigidali Bomo Elalubo Genuai Bidigo eno e tama po dagego genuai bidi dabe dali elalubao,
JER 27:5 ena digi eno e tǫ ena genuai bomogo nigali, tama me te eno te we bidi dabe nigali, me te tǫde bidalubo hasa sibi nigai. Eno digi ena homu wali peyu, eno te bidi dabe augwaliba tǫ dobabo dao.
JER 27:6 Megi da, eno te dagego tǫ kantri dabe te ena sę bidi mawaibao, te Babilon king Nebukatnesarbolo mobao. Tama me te eno tigidali bulu uni hasa sibi me agaba menama, te aga dologode bidaibao.
JER 27:7 Tigidali hani we bidi te aga dologode elaluama, te nosali augwali aga ogwa dologode bidama, te agai waigo wąį nǫų dabe dologode me bidaibao. Augwali te Babilon dologode bidada pedubadi, te eno Babilon dolabo bodolu muani sogoba usu naibao. Tama te sogo te tigidali tǫ kantri bomai king dabego te Babilon aiyaba elaluama, te augwa olo sę ebo bidi dabe tiwai mu pedelaibao,” te po wai dao.
JER 27:8 “Tialima, te tǫ kantri we bidi me deligo te king Nebukatnesargo augwali tonalubo hagela homu eyu, te bidigo bulmakau tonalu, te ni nami pedai aga mageba munama, te aga sę emainogo ilibo hagela ebaso da, teda tǫ kantriba eno dwai dene umagia mu mawaibao. Te Genuai Bidi eno te boi bidi tagala palama, augwaliba hwįagasomainogo yaibao. Te augwa nai sǫą pelama, te augwali dwai gasi me saibao. Te tama kolesagade eno te king Nebukatnesargo te augwali te tǫ kantri we bidi mu silimainogo ilaibao.
JER 27:9 Tama tialima, dage king dabego te profet dabego poba me te osola subo bidigo po, me te na yali po page pusubo bidigo poba, me te mada bidigo poba me olo munama igio. Te bidi dabego te tiwai po weyu, dage te Babilon king dologode bidigobeo waibao.
JER 27:10 Tiali goli, augwaligo dage tibo po ola mobao, tama dagego augwaligo po homu dąų obaso da, teda eno dage te duga page bulu mude digibulu sela sąwaibao. Tama dage mu dolaibao.
JER 27:11 Tialima, te tǫ kantri bidi hani dabe me deligo te Babilon kingo augwali tonalumainogo eyu, te bulmakau te bidigo aga magede te ni nami pedai munama, te aga sę ebo tonalumainogo ebo tiwai ebaso da, teda eno te we bidi dabe te augwa tǫde bugagia bidimainogo eyu, augwa gi sę emainogo yaibao. Ena Genuai Bidigo eno te po wai dao.”
JER 27:12 Tama ena Jeremaiago, eno te tobage deli po naga te Juda king Sedekaiabolo me pusali. Eno agabolo te tiwai po wai, “Dage Juda te dagego mage te ni nami pedaiba mubo tiwai elama, te king Nebukatnesar, me aga we bidi dabe, augwaligo dage tonalumainogo ilao. Te dagego te tiwai eyu da, te dage bugagia bidaibao,” wali.
JER 27:13 “Genuai Bidigo te po walio, te we bidi hani me deli te Babilon king dologode bidibo hagela homu ebaso da, teda te boi bidi dabego augwali ela muagasomainogo yaibao, tama augwali te nai meniama, isibadi, te dwai gasi selama isiyu yaibao. Tiyu, nage te naga we bidi dabe dali hagoma ebaso, tama te sę dabego dage dolobo dao.
JER 27:14 Tama tialima, dagego te dage Babilon king dologode bidigobeo po wabo profet dabego po me odogio. Augwaligo dage tibo po naga ola mabo dao.
JER 27:15 Ena Genuai Bidigo, eno po dolo obao, eno augwali me tagala palobeo, tiali goli, augwaligo eno nogide tibo po pusubao. Te dagego augwaligo po wali pobaso da, teda eno dage te duga tǫ kantride sela sąnama, te dage mu dolaibao. Tama dagebolo te profet po pusali bage, augwali me dolaibao,” eno te po te king Sedekaiabolo wali.
JER 27:16 Tama eno te Genuai Bidigo po te pris dabeba, me te tigidali we bidiba, te tiwai pusali, “Ena Genuai Bidi, eno po dolo obao, dagego te tama tiwai po wabo profet dabego poba olo me mugio, ‘Te pąde tama augwaligo te Genuai Bidigo bede tigidali nai sela pali, te Babilonde munolubo nai dabe, tamadi tama augwaligo te Jerusalemba ma selasa asaibao.’ Te profet dabego dage tibo po naga ola mobao.
JER 27:17 Dagego augwaligo po me odogio. Tiyu, te taun tigidali mu dolabuo. Te dage Babilon king dologode bugagia bidibaso da, te dage bugagia bidaibao.
JER 27:18 Te augwali profet mu tama te Genuai Bidigo po augwaliba mabo da wida, teda augwaligo te Tigidali Bomo Elalubo Genuai Bidiba hanalu, agai te boi bidi dabego te Genuai Bidigo bede me munalubo doado bage, me te kingo bede munalubo doado bage dabe, me te Jerusalem tigidali pedai habu badu elaluali doado bage selama, te Babilonba me sela pigio po wao,” eno te po wali.
JER 27:19 “Magi baso meni. King Nebukatnesar te Jerusalemba aselama, te king Jehoiakin sali, te Jehoiakimgo ogwa, tama agai te Juda tobolu bidi dabe me, te Jerusalem tobolu bidi dabe me selama, tama agai augwali Babilonba kalabus igi peyu odasa pali. Tialima, agai te wiegi yai nai meba te Jerusalemde elalumainu yalio. Agai te brasgo nigali genuai pos dabe sabeo, tama augwa te brasgo nigai tang ąį tubo genuai nai me sabe, tama augwa te brasgo nigai te dwasianu ąį tubo tang dabe gasaba bilabo nai dabe, te me sabeo. Tama me agai te eno bede gasa nai dabe me sabeo, te kingo bede me, te tigidali Jerusalem pedai badu elaluali nai me sabeo. Tialima, ena God, dage Israelgo Genuai Bidi, ena Tigidali Bomo Elalubo Genuai Bidigo, eno te tiwai po dageba wabo dao.
JER 27:22 ‘Te boi bidi dabego te nai dabe doado bage selama, te Babilonba selasa paibao. Tama te nai te doado bage te Babilonde munalubadi, tama eno augwaliba homu kone ma palobo sogo me deli teba ma yagasaibao. Tama tebo sogo te eno augwali ma sela aselama, te augwali Jerusalemde ma munalueibao,’ te po Genuai Bidigo wai dao,” wali.
JER 28:1 Te kibu be me si me si wabo te Sedekaia te Juda king bidali, tama te kibu be te polua a naga wabode, te taun Gibeon bidi me deli, aga te profet Hanania, te Asurgo ogwa, aga te Genuai Bidigo beba asama, tama po me deli te Jeremaiabolo me, te pris dabeba me te we bidi dabego gedude pusalio. Agai te tiwai tama po wai,
JER 28:2 “Da Israelgo God, aga Tigidali Bomo Elalubo Genuai Bidigo, agai te tiwai po walio, ‘Te Babilon kingo dage tonalubo, te bidigo ni nami pedai te bulmakau mageba munama, te bulmakau tonalubo tiwai ebao. Tialima, eno te ni nami pedai dage magade munalubo togola sąwaibao, te agai dage mu ma tonalugobeo.
JER 28:3 Te kibu be si silisąbadi, tama te eno bede tigidali nai te eno ma saibao, te Nebukatnesargo Babilonba sela pali nai dabe selama, tama eno te Jerusalemba ma sesaibao.
JER 28:4 Tama me eno te king Jehoiakin saibao, te Jehoiakimgo ogwa, te gasa Juda dabe te Babilonba kalabus igi pali bage me selama, tama eno augwali ma odasa asaibao. Magi baso meni, eno te Babilon kingo dage mageba muani ni nami pedai togwa sąwaibao. Ena Genuai Bidi, eno te po wai dao,’” te bidi Hananiago te po wali.
JER 28:5 Tialima, profet Jeremaiago te profet Hananiago po te pris dabego gedu, me te Genuai Bidigo be pąde dolalubo we bidi dabego gedude, te agai po wei ponai dao.
JER 28:6 Jeremaiago te tiwai po wali, “Mu tamao, eno homugo Genuai Bidigo nago wabo po tiwai emainu yali. Genuai Bidigo te profet po wabo mu pedalumainogo homu yalio. Tama aga bede nai dabe te somainogo, tama te Babilonde bidibo we bidi dabe ma odasa asaiba homu ebo dao.
JER 28:7 Tialima, megi da, nago me te tigidali we bidigo te eno gasa po wabo odao.
JER 28:8 Te polobadu digi gagalasa, te megi e sogoba usu nagasobao, te da i badu elalubadi, te polasa pedelali profet dabe, augwaligo te tiwai po wai, te hwįnama dolobo sę genuai me, dwai gasi me, te we bidi hani hauwaba pedelama, te genuai tǫ kantri dabeba me pedelaibao wali.
JER 28:9 Tialima, te profet me deligo te we bidi bugagia dugulalueibao po obaso da, teda te mu po wabowe, ma meniwe, te dago konebeo. Tialima, te nosali, te po mu pedalubaso da, teda dago koneaibao, mu tamao, Genuai Bidigo po te profetba menama, te aga tagala palobaso asai yali homu ebo dao,” wali.
JER 28:10 Jeremaiago te po obaso, tialima, Hananiago te ni nami pedai, te Jeremaiago magede domoalubadi digi te peda salio. Tama Hananiago te magede domoaluali ni nai pedai pepeda sąwai dao.
JER 28:11 Tama aga te we bidi dabego gedude dolugulama, te po walio, “Genuai Bidigo te tiwai po walio, ‘Te tama deli kolesagade naga te Nebukatnesargo, te we bidi dabeba me te tigidali tǫ kantriba domonani ni nami pedai te eno alua sąwaibao. Te kibu be si silisąbadi, eno te tiwai yaibao,’ Genuai Bidigo te po wai,” Hananiago wali. Jeremaiago te po odolama, aga palio.
JER 28:12 Te profet Hananiago te ni nami pedai te profet Jeremaiago magede domoaluali te alua sąwani te sogo me badu bidama gana nosali, Genuai Bidigo Jeremaiabolo te tiwai po mawai,
JER 28:13 “Nage pelama, te po Hananiabolo pusugi pao, ‘Genuai Bidigo te tiwai po walio, “Nago te augwaligo ni nami pedaigo nigali ni nami alua sąwani. Tiali goli, te tobage nai augwaligo aingo nigilama, te nago aluali ni nami hasegelama, elalueibao.
JER 28:14 Ena te Israel God, ena Tigidali Bomo Elalubo Genuai Bidi, eno te tiwai po obao. Ena digi eno augwaligo aingo nigai domabo nai selama, eno te we bidi dabeba, me te tǫ kantri dabeba, muna muna paibao, te augwali Babilon king Nebukatnesargo olo sę ebo bidi bidalueibao. Tama eno te bulu uni hasa sibi tigidali me agaba mani, te augwali me aga dologode bidaibao,” Genuai Bidigo te po wai.’ Nago te po Hananiabolo pusigi pao,” Genuai Bidigo Jeremaiabolo wali.
JER 28:15 Jeremaiago te po pusulama da, tama agai Hananiaba te po ma wali, “Hanania, nago odao. Genuai Bidigo nage me tagala palobeo. Tialima, nago te we bidi dabe tibo po ola mobaso, te augwaligo nago po homude dąų wali.
JER 28:16 Tama tialima, Genuai Bidigo te tiwai po wali, ‘Mu tamao, te eno nage te tǫde mu silaibao. Te kibu bede naga nage isaibao, magi baso meni, nago pogo te we bidi dabe kekebaso, te eno po sela sąwainogo ebo dao.’” Te po wali.
JER 28:17 Te kibu bede digi te polua a naga olama, me badu si wabo side, te profet Hanania isai dao.
JER 29:1 Jeremaia te Jerusalemde bididu, agai te pas asęnama, te Babilonba kalabus igi pelama bidalubo te Jerusalem tobolu bidi dabeba me, pris dabebolo me. te profet dabeba me, te Babilonde bidibo gasa we bidi dabeba me tolali. King Nebukatnesargo te we bidi dabe te Jerusalemde selama, te Babilonba kalabus igi pai dao.
JER 29:2 Jeremaiago te pas asęna tolali sogo, te Babilon dabe te Jerusalemba aselama, te king Jehoiakin dali, te genuai we bidi hani dabe, te augwali Babilonba odasa pali sogo te pas asęai. Augwaligo te king me aga ida dali sobadi, te aga bede bidali ofisa dabe, me te Juda tobolu bidi dabe, me te Jerusalem tobolu bidi, me te tobage wiegi yai nai dabe nigibo koneai bidi dabe, te selasa pai dao.
JER 29:3 Te sogo te Juda king Sedekaiago te Elasa tagala palali, te Safango ogwa, dali Gemeria, Hilkiago ogwa, te Babilon king Nebukatnesarba sela pali. Jeremaiago agai te asęani pas te bidi sibolo mawai, te augwali sigo te Babilonde bidalubo hani dabeba sela paibao. Te pasde te tiwai po wai dao,
JER 29:4 “Ena dage Israelgo God, ena Tigidali Bomo Elalubo Genuai Bidigo, eno te po obao. Dage Juda dabego, odao. Eno dage te Jerusalemde sela sąnama, te Babilonba tagala palai dao.
JER 29:5 Dagego duga be dabe sęnama, te gi dabe bulama, te gide nai sela tuyu, bidao.
JER 29:6 Te dagego we selama, te wai dabe ame nao. Tama nosali, dagego wai dabego we selama, te augwade digi wai pedalumainao. Dage te genuai hani pedelao. Dagego duga digi te dwasianu hani pedalumainogo ilamu dao.
JER 29:7 Eno dage te megi bidibo buluba odasa pali. Tama dagego te bulu tau sabo sę eyu, bugagia bidao. Tama dagego Genuai Bidi enaba gedu haluasa po waiyąo, te eno te bulu wiegi yai ilaibao. Magi baso meni, te bulu bugagia elalubaso da, teda dage me bugagia bidaibao,” te po wai.
JER 29:8 “Ena dage Israelgo God, ena Tigidali Bomo Elalubo Genuai Bidi, eno po dolo obao, dagego te duga profet, me te osabo bidi dabego dage tibo po ola momainu igio. Te bidi dabeba waliyu, te dagego naa elama, te naa page dabolo pusao po wabo tagalao.
JER 29:9 Te profet po augwaligo eno nogide pusaibao, te tibo po naga obao. Ena Genuai Bidi, eno po dolo obao, eno po augwaliba me mabeo,” wali.
JER 29:10 “Ena Genuai Bidi, eno dageba mani po page e tiwai elalubao. Eno te 70 yia, te bidi sese sela olama, nogo si kibu bede te dage Babilonde bugagia bidaibao, te tama dąį ilali. Tama te tudi badu nosali, te Babilon dolaibao. Te sogo te eno homugo dage koneama, te dage eno Jerusalemba ma odasa paibao, te eno dąų wali tau sabo poba usu naibao.
JER 29:11 Ena Genuai Bidigo, eno te dageba tau sabo sę te homude konea pali. Eno dageba wiegi yai bugagia ilaibao. Eno dageba dwai sę ebo hagela homu ebao. Dagego te eno yabo sę homu koneama, tama dagego te sę pedelabo tonaluao.
JER 29:12 Te sogo te dage ena pąba aselama, te enaba i weyu, enaba gedu haluasa po waibao, te eno dagego gedu haluasa po odaibao.
JER 29:13 Te sogo te dagego homu kolesaga sesego, me dagego kolesagago te ena gegebo sę bomo mu eyu da, teda te dage ena pageba asobo usu yaibao.
JER 29:14 Ena Genuai Bidi, eno po dolo obao, te dage ena pąba asomainogo ilaibao. Te eno dage bugagia wiegi yai ma bidimainogo yaibao. Tama eno dage tigidali habu badu te dage eno sela sąnama, bidada pali tǫ kantri usu nama, sesa bilaibao. Tama eno dage ma oda selama, te duga polobadu bidali buluba odasa asaibao,” wali.
JER 29:15 “Dagego te po obao, Genuai Bidigo te profet dabe dage te Babilonde bidibo sogo mani po wabo dao.
JER 29:16 Tialima, Genuai Bidigo megi te tǫ kantri Juda tonalu. te Devitgo sia kingde dugulaluabo kingde homu kone palama, te agai duga abagi hani dabe, te dage dali kalabus pisąwani hani dabede homu kone palama, tama Genuai Bidigo te tiwai po walio,
JER 29:17 ‘Ena Genuai Bidigo, Tigidali Bomo Elalubo, eno te po obao, eno te Juda tǫ kantride bidalubo hani bidi dabeba boi bidi tagala palama, hwįagasaibao. Tama eno te nai dage menia sobadi elama, te dwai gasi saibao. Tama augwali te dwai ni kaya fik du walama, te bidigo tusą yabo tiwai yaibao.
JER 29:18 Tama te gasa tǫ kantri we bidi dabego eno te dwai sę te Juda dabeba yali po odolama, te augwali wi elama, dwai noma mu saibao. Tama eno te Juda dabe te gasa tǫ kantriba tedela palaibao. Tama te bulu kantri we bidi dabego te Juda dabe augwaliba dolobo sę eyu, posobo po waibao. Tama te we bidi dabego augwa boi bidi dabeba dwai po wabo sogo, augwa te tiwai po waibao, “Dage te Juda dabe dolali tiwai gilama dolaibao,” waibao.
JER 29:19 Ena Genuai Bidi, eno te sę augwaliba yaibao, magi baso meni, augwaligo eno po sela sąwani. Hauwa sogo eno te profet dabe tagala palama, te eno sę bidi dabe, dage Israelba tagala palali, tiali goli, dagego augwaligo po me odobeo.’”
JER 29:20 “Dage tigidali we bidi eno Jerusalemde sela sąnama te Babilonba tagala palali, dagego ena Genuai Bidigo po bugagia odao.
JER 29:21 Ena dage Israelgo God, ena te Tigidali Bomo Elalubo Genuai Bidi dao, eno homu te tibo profet si, me te Ahap, te Kolaiago ogwa, me te Sedekaia, te Maseago ogwa, te eno te tiwai po obao. Augwali sigo te eno nogide tibo po dageba pusubao. Tama tibaso, eno te augwali si te Babilon king Nebukatnesar nogoba mueibao. Tama agai te po waibao, te augwaligo te bidi si te augwa gedude digi ela mueibao.
JER 29:22 Tama te dage Babilonde bidibo Juda dabe, te dagego abagi me deliba te dwai po wabo homu eyu da, dagego te tiwai po waibao, ‘Genuai Bidigo nage dolomainao, te agai Sedekaia de Ahap dali siba yali tiwai elama, te Babilon kingo augwali si te isiba ulai dao.’
JER 29:23 Eno augwali si dolaibao, magi baso meni, augwali sigo te dwai kolesaga mu dage Israel tomode yalio. Augwali sigo te augwa abagi dabego we dabe dali pagela pilama, tama augwali sigo tibo po eno nogide pusali. Eno augwaliba te po me mabeo. Ena Genuai Bidi, eno augwali sigo kolesaga koneama, tama eno tede po pusubo dao. Eno po tama dao,” wali.
JER 29:24 Genuai Bidigo te tiwai po wali, “Jeremaia, nago te po te Semaia te Nehelam bidiba pusao.
JER 29:25 Ena Israelgo God, ena te Tigidali Bomo Elalubo Genuai Bidi, eno te po obao. Semaia, nago te pas dabe asęnama, te Jerusalemba toloyu, te pris Sefanaiabolo me tolali, te Maseago ogwa, te tigidali gasa pris dabeba me tolali. Nago asęani pasde te tiwai po wali,
JER 29:26 ‘Sefania, Genuai Bidigo nage dąį ilama, nago te pris Jehoiada hasegelama, te Genuai Bidigo be tonaluao. Tama tialima, te esela pabo bidi me deligo te profet po pusubaso da, teda nago aga kalabus yabo sę elalubao, te aga nogo sągą dunama, te ain me deli aga dogonide domonao.
JER 29:27 Tama tialima, magi baso nago Jeremaia te Anatot bulu bidi hage yai meniwe? Te bidi agai dage tomode te po me pusubo dao.
JER 29:28 Agai da te Babilonde bidalubo bidi dabeba pas tolama, agai te tiwai po wali, “Dage te bobage sogo kalabus bidaibao, te dagego be sęnama, te duga gi dabe bulama, tama te gide nai sela tuao.” ’
JER 29:29 Pris Sefanaiago te Semaiago pas sali, tialima, aga te Jeremaiaba pelama, te pas nedali.
JER 29:30 Agai nedela silalio, tialima, Genuai Bidigo po Jeremaiabolo mayu, te tiwai po wali,
JER 29:31 “Jeremaia, nago te tigidali Juda dabe te Babilonde kalabus bidibo haniba te pas tolao. Augwaliba te tiwai po wao, Genuai Bidigo te Semaia te Nehelam bidide homu kone palama, te po wali, eno te Semaia dageba me tagala palobeo, tialima, agai te profet po dageba pusubaso, dagego te tibo po homuba dąų omainogo yai.
JER 29:32 Ena Genuai Bidi, eno po dolo obao, Semaia te Nehelam bidigo dage kekelama, eno po sela sąwainogo ebao. Tama tialima, eno te dali aga haniba me te dwai dene mabo sę mu ilaibao. Te eno wiegi yai sę te ena we bidi dabeba pedalumainogo ebo sogo da, te aga hani bidi deli me bidigobeo, te sę dabe sumainu tiaibao. Ena Genuai Bidi, eno te po wai dao,” wali.
JER 30:1 Genuai Bidigo Jeremaiabolo po mayu, te tama po wali,
JER 30:2 “Ena Genuai Bidi, ena Israelgo God, eno te po obao, nago te buku me deli selama, te eno nagebolo mani po tigidali asęao.
JER 30:3 Ena Genuai Bidi, eno te ena we bidiba yabo sę dąį ilali sogo elalubao, te Israel dabe me Juda te bugagia ma bidaibao. Te eno augwali te tǫ te augwa wąį nǫų dabeba polobadu mani tǫba ma odasa aselama, te augwa tǫ mu ma pedelaibao,” wali.
JER 30:4 Genuai Bidigo te Israel dabe me Judade homu elama, agai te tiwai po wali,
JER 30:5 “Ena Genuai Bidi, eno te po obao, te we bidi dabe haliga dua tegaluama bidibeo. Menio. Augwali wi umagia mu elama, te augwali dwai gela mu wai dao.
JER 30:6 Magi basowe? Te bidi dabego wai ame nabo dawe? Tialima, magi baso eno suali tigidali bidigo augwa haligaba nogo mubawe? Augwaligo te tama tebo te wego wai ame nainogo dene genuai ebaso ebo tiwai ebao. Magi baso augwaligo gesabidi te gasagi yai tedali dwai mu pedaliyu, te bidigo wi umabo ebo tiwai ebawe?
JER 30:7 Homu dene mu ebao, te dwai sogo mu me deli pedelaibao. Te dwai sogogo te gasa dwai sogo ebo tigidali aiyaba elalueibao. Eno we bidi dabe, te Israel dabe, augwali te sogo genuai sęgę elalueibao. Tiali digi, te eno augwali ma saibao.
JER 30:8 Ena Tigidali Bomo Elalubo Genuai Bidigo, eno te po obao, te eno te boi bidi dabego te Israel dabe mageba domonani ni nami pedai alua sąnama, te eno augwali kalabus elaluali silimainogo yaibao. Tama augwali te gasa hani dabego olo sę ebo bidi bidali tiwai munu ma me bidigobeo. Menio.
JER 30:9 Te augwali ena Genuai Bidi, augwa God dologode bidaibao. Me eno te Devitgo hani bidi me deli augwaligo king nigilama, tama augwali aga dologode me bidaibao,” te po wai.
JER 30:10 Genuai Bidigo te tiwai po wali, “Dage Israel, dage Jekopgo hani dabe, dage eno sę bidi me sę ebo we, dage wi me elama, midigi igio. Mu tama, eno dage digibulu bulude te kalabuside bidibadi ma saibao. Tama dage te duga tǫba digi ma aselama, te bugagia dugulaluagameo. Te niwai hani me deligo dage wi me iligobeo.
JER 30:11 Ena Genuai Bidi, ena dage dali bidibao, te dage tau saibao. Dagego te dwai sę yali dao. Tama eno dage dodolobo sę igi menigi da, te dolo menigi da. Tama tibaso, eno dage e tǫde sela sąwaibao. Te eno dage augwali tomoba te tagala palobaso bidigi pali tǫ pedai kantri dabe te mu silaibao. Tialima, te dage eno me silimainogo egobeo. Mu tama, te eno dwai dene dagebolo mawaibao, tialima, eno te doloba pai kolesaga naga wali peyu, te eno dage dodolaibao,” wali.
JER 30:12 Genuai Bidigo te tiwai po wali, “Israel, te augwaligo nage dwagilama mu elama, te nago genuai keni pedela sabeo.
JER 30:13 Te nage tau somainogo enaba gedu haluasa po wabo bidi meni yai. Te nage tigi usu ma ilabo marasin te menia sai dao.
JER 30:14 Te nago polobadu abagi wali bidi hani dabe, augwaligo nage homu kegeda palama, te homu godolo me ebeo. Nago te dwai sę hauwa yali te genuai sęgę elalubao. Tama nage eno dolama, te sesena pai bidigo aga boi bidi dali ebo kolesaga tiwai yali.
JER 30:15 Nago te keni halubaso, te gela hauwa wabo tagalao. Te keni me pedela sogobeo. Nago dwai sę hauwa yali, tama nago sęgę genuai elalubao. Tama tiyu eno te kolesaga nageba ebo dao.
JER 30:16 Tialima, mu tama, te hani dabego nage dolobo sę ebao, te augwa digi dolaibao. Te nago boi bidi dabe augwali te digibulu buluba kalabus paibao. Te nageba dwai sę eyu, te nago doado bage tigidali wi sali hani dabe, te boi bidi dabego dwai sę augwaliba elama, te augwa doado bage dabe wi saibao.
JER 30:17 Te nago boi bidi augwaligo te tiwai po waibao, ‘Saion te olo nai tiwai elama, te mu dwaibao. Te bidigo agade homu me egobeo,’ te po waibao. Tialima, ena Genuai Bidi, eno te tiwai po obao, eno digi nago tigi usu ma ilama, te nago keni pedela somainogo yaibao,” wali.
JER 30:18 Genuai Bidigo te tiwai po wali, “Eno te olo mu tau sabo wiegi yai kolesaga te Jekopgo haniba elama, augwali tau saibao. Te augwaligo augwa bidabo be dabe sęnama, te augwa tǫde bugagia ma bidaibao. Tama augwa te Jerusalem taun ma dodolama, te polobadu elaluali pesagede ma nigaibao. Tama augwa te kingo be aga elaluali pesagede ma sę yaibao.
JER 30:19 Tama te Israel dabego enaba buba hwi wabo tęąbi po waibao. Te augwa tęąbi weyu, wiegi yai pemene yaibao. Te eno augwali hani genuai pedalumainogo elama, te augwali dwasianu hani me bidigobeo. Tama te gasa we bidigo augwali haniba te genuai nogi momainogo elama, tama te hani dabego augwali nogi aiyaba elalumainogo me egobe dao.
JER 30:20 Te Israel dabe augwali te bomai hani elalu, te polobadu bidali tiwai yaibao. Te eno augwali tau selama, te augwali te augwa tǫde bugagia bidaibao. Te eno augwaliba dwai sę yainogo ebo hani dabeba dwai dene mawaibao.
JER 30:21 Te augwa bidi dabe digi me deli te augwa tobolu bidi pedelama, te augwa tonalueibao. Ena Genuai Bidi, eno te po obao, te ena digi eno te bidi ena pageba oda saibao. Magi baso meni, te bidi dabe augwa homugo digi te ena pąba asobo usu egobeo.
JER 30:22 Tama dage Israel te eno we bidi hani mu pedelama, te ena dagego God bidaibao,” te po wai dao.
JER 30:23 Odao. Genuai Bidigo haliga sębę te dwai sę ebo bidi dabeba pedelainogo ebo, te bomai wali me tulubage te augwaliba pedalubo tiwai yaibao, tama te poboge ebo bomai waligo te augwali tobolu aiyaba agabo tiwai yaibao wali.
JER 30:24 Genuai Bidigo haliga sębę me elaludu, te agai yaiba homu yali sę tigidali ela siligi paboba usu naibao. Te nosali dagego te sę page koneaibao wai dao.
JER 31:1 Genuai Bidigo te tama po wai, “Te eno bodolu muani sogo yagasobode, teda ena te Israel hani tigidali augwa God bidaibao, te augwali eno we bidi hani mu pedelaibao.
JER 31:2 Ena Genuai Bidigo, eno te po obao, te Israel dabe te boi bidide wi pelama, te masigi tǫ kemi bulude bidali. Tialima, eno augwali godolo elama, te eno augwaliba wiegi yai sę ebaso, te augwali toma nabo buluba soaibao,” wali.
JER 31:3 Genuai Bidi te digibulu buludu aselama, te ena, Jeremaiaba pedelama, te tama po wali, “Dage Israel, eno dage sesemane sogo godolo elama, te eno wiegi yai kolesaga dageba ebao, te dage ena pageba asomainogo tebo dao.
JER 31:4 Dage Israel, eno gedude dage te bidi dali pagela pisąwai gesi we tiwai dao. Tama te eno dage bomai hani we bidi ma pedalumainu yaibao. Te gesi ogwa wego pemene elama, hąbidi eleyu, te tęąbi wabo hani dabe dali pemene ebo tiwai dagego yaibao.
JER 31:5 Tama dagego gesi wain gi te Samaria bulu du bagede nigaibao. Tama duga digi te wain dabego ge du saibao.
JER 31:6 Te sogo te Efraim hanigo bulu dude bidibo tonalubo bidi dabego, augwa te tama i waibao, ‘Tegoba, da te Saion bulu duba pinao. Da Genuai Bidiba pobao, dena God dao.’”
JER 31:7 Genuai Bidigo te tiwai po ma wali, “Te Jekopgo haniba wiegi yai pemene ebo tęąbi po wao, te hanigo te tigidali gasa hani dabe edelama, polalubo mu dao. Te enabolo genuai nogi mabo tęąbi weyu, te tiwai po wao, ‘Genuai Bidi, naga we bidi dabe ma sao, te me badu bidali hani Israel pedai dao,’ te po wao.
JER 31:8 Mu tama, ena Genuai Bidigo eno te ena we bidi dabe te tǫ kantri not badu, me tigidali tǫ pedai badu selama, te augwali ma odasa asaibao. Te gedu widai dabe, me sągą dwai, me te haliga elalubo we dabe, me te wai tega painogo ebo we dabe, augwali me asaibao. Te Israel genuai hani mu pedelama, te augwali augwa tǫba digi ma asaibao.
JER 31:9 Te eno augwali odasa asobo sogo, augwa gela weyu, enaba gedu haluasa po weyu, tama asaibao. Te eno augwali dodolo asu, te augwali eno wiegi yai wę elalubo pesageba pedelama, te eno augwali doloba pai sunumidu odasa asu, te augwali me tula mugobeo. Eno te tama tiwai yaibao, magi baso meni, ena te Israel hani dabego Aya bidibao, tama Efraim te eno gomunai wai tiwai dao,” wali.
JER 31:10 “Dage te me badu tǫ kantri hani we bidi dabe, dagego ena Genuai Bidigo poba bugagia olo muao. Tama dagego eno te po te digibulu bidibo we bidiba pusao, te tamu ąį u badu bidibao. Dagego te tiwai po augwaliba wao, ‘Genuai Bidigo te Israel dabe sela sąnama, tedela palali, tiali goli, agai augwali ma odasa asaibao. Te agai augwali bugagia mu tonalu, te tonalubo bidigo aga sipsip dabe tonalubo tiwai ebo dao.’ Te po wao.
JER 31:11 Ena Genuai Bidi, eno augwali te Jekopgo hani dabe ma saibao. Awe, te boi bidi dabego bomogo augwaligo bomo edelai goli, eno augwali te bomai boi bidi dabego nogode ma dobola saibao.
JER 31:12 Tama augwali te Saion bulu duba dolugulama, te augwali wiegi yai pemene mu elama, te i umabo mu udaibao. Te ena Genuai Bidigo augwaliba te wiegi yai nai mu mobaso, te augwali wiegi yai pemene yaibao. Te augwaligo wiegi yai pemene ebo te nai witba, me wain, me oliv wel, me te kibu sipsip dabeba, me eno mabo bulmakau dabeba te augwaligo homu pemene yaibao. Te wiegi yai mu pedalama, te gi wę usu elalubo gi tiwai dao. Te augwali dwai munu ma bidibeo.
JER 31:13 Te sogo te wegi ogwa we wiegi yai homu pemene elama, te tęąbi po weyu, te gesi bidi me, monu dabe me, pemene yaibao. Eno augwali homu dene ebo silama, te augwali bugagia haliga tegalumainogo yaibao. Te eno augwali haliga nagame elama, dua digi bidiyu, pemene emainogo yaibao.
JER 31:14 Te we bidi dabego ofa hauwa enaba selasa asaibao. Tama tibaso, te pris dabe augwa nai hauwa elalueibao. Tama eno te wiegi yai nai hauwa te eno we bidi dabeba mawaibao. Ena Genuai Bidi, eno te po wai dao,” wali.
JER 31:15 Genuai Bidigo te tiwai po wali, “Genuai gela wabo me, te hobede ebo po me, te Rama taunde pedelaibao. Te we Reselgo aga wai dabe isaide te hobedai gela waibao. Te aga te we bidi dabego wiegi yai haliga penebo aga hagela homu yali, magi baso meni, aga wai dabe tigidali te munu me bidibeo.
JER 31:16 Tialima, ena Genuai Bidi, eno po obao, Resel, nage gela munu ma wagio. Nago gedude gela ąį hola sąyao. Nago gela odolali me wabeo. Menio. Te nago hani wai dabe augwaligo boi bidi dabego tǫ kantri tagalama, nageba ma asaibao.
JER 31:17 Ena Genuai Bidigo eno te po obao, nago homu te pedelainogo ebo naiba kone palama, tama te naga te hani wai dabe te augwa page buluba ma asobo sogo tonaluagameo.
JER 31:18 Te Efraim hani dabego gela wabo eno mu odalio. Augwa gela weyu, te tiwai po wali, ‘Genuai Bidi, nago da keloago elali, te nago da dodolali, te bidigo te hagoma ebo ogwa bidi bulmakau elibo tiwai yai. Genuai Bidi, nage naga dago God, te da nageba ma asabo homu ebao. Tama tialima, nago da odasa asao.
JER 31:19 Dago nage tagalali, tiali goli, megi da, dago haliga begelalio. Te dago dena yali dwai sę koneama, da hale mu elama, dago tobolu basi gulali. Polobadu dago hani dabe augwali te gesi we bidi tiwai bidalu, te dwai kolesaga hauwa yali. Tialima, megi da, da dena te dwai kolesaga yalide hale dwai mu ebo dao.’ Te Efraim hani bagego te po wabo eno odali.
JER 31:20 Ena Genuai Bidi, eno te po obao, eno Efraim te godolo mu yali, aga eno ogwa dao. Tigidali sogo eno aga nogi wedu, eno agade homu kone yai. Eno haliga agaba mu mudubadi ebao. Tialima, eno olo tau sabo wiegi yai kolesaga agaba yai dao.”
JER 31:21 “Dage Israel, eno gedude dage te bidi dali pagela pisąwai dwagi yai gesi we tiwai dao. Tama dagego te duga page bulu tagalabo sogo, te dagego wali pabo sunumi bugagia koneao, tede te dąį dabe ilao. Magi baso meni, nosali te dage ma asobo sogo dagego te duga sunumide muani dąį sulama, te sunumi bugagia wali pomainogo tama yao. Dage Israel, megi da, dage te duga taunba ma asao.
JER 31:22 Dage te ena wegi wai tiwai, tiali goli, dagego ena tudiba muani. Mena sogo te dagego haliga si ebo tagalama, te enaba ma asaibawe? Ena Genuai Bidi, eno gesi noma kolesaga te tǫde yaibao. Te kolesaga e tama dao. Wego digi te bidi pageabi elama, te agaba hanalu, te aga godolo eba waibao,” wali.
JER 31:23 Israel hanigo God, aga Tigidali Bomo Elalubo Genuai Bidi, agai te tiwai po wali, “Nosali eno te kantri Juda bugagia elalumainogo yaibao, te Juda dabe augwatǫ te augwa taunde bidaibao. Te augwa te po waibao, ‘Nage Genuai Bidigo bulu du, Genuai Bidi nagede bidiyu, te wiegi yai doloba pai kolesaga mu ebao. Genuai Bidigo nageba wiegi yai sę bugagia mu emainao,’ te po waibao.
JER 31:24 Te gide sę ebo bidi dabe, me te sipsip tonalubo bidi dabe me, augwali te Juda dabego tǫde bidiyu, te taun dabede me bidaibao.
JER 31:25 Te bidi me deligo tigi bomo silibaso da, teda eno aga dąų walaibao. Tama te bidi aga haliga sęgę elalubaso, te eno agai haliga usu naibao,” wali.
JER 31:26 Tialima, ena, Jeremaia, ena hodaluama, tononobilibadi, te ena bugagia godege piali homu ebo dao.
JER 31:27 “Ena Genuai Bidi, eno te tiwai po wai, eno tebodolu me deli munama elalubo, tama te sogo eno te webidi dabe, me te hasa sibi hauwa, te Juda tǫde me Israeltǫde pedalumainogo ilaibao, te bidigo gide sę elama, naihauwa pedalubo tiwai yaibao.
JER 31:28 Polobadu augwali enotonaluali, te gudumainu, me augwali alumainogo eyu, meaugwali aiyaba elalumainogo eyu, augwali dolomainuelama, te dwai sę augwaliba emainogo yai. Tialima, megi da, ena Genuai Bidi, eno te po obao, te augwali enotonalu, te augwali nigilama, te augwali bulama, te augwalibugagia bidaibao wai dao.
JER 31:29 Tama te sogo da, dagewe bidi dabego te tiwai po begelama, munu me wagobeo, ‘Te aya idago te wain du tau isąwai tuali. Tialima, te augwa wai puluba pedauwalide ha yalio,’ me wagobeo.
JER 31:30 Menio. Te sogo da, te bidigo dwai sę me ebaso da, te aga digi naga isaibao, te aga wai dabe tede isigobeo. Te bidigo te tau isąwai wain du tuali tiwai ebaso, te aga pedauwalide digi naga ha yaibao,” wali.
JER 31:31 Genuai Bidigo po ma weyu, te tiwai po wai, “Odao, eno te sogo bodolu me deli muai, tama eno gesi noma dąų wabo po te Israel hani dali, me Juda dabe dali dąų waibao.
JER 31:32 Te dąų wabo bomo yai po te polobadu eno duga wąį nǫų dabe dali yali tobage tiwai meni, te eno augwali te Isipde selama, te augwali nogo tolasa odasa asai. Augwali te eno we tiwai bidibaso, te ena, Genuai Bidi, ena te augwa bidi tiwai bidali. Tiali goli, augwaligo te polasa dąų wai elaluali bomo ya i po te bolai dao.
JER 31:33 Tialima, eno te Israel we bidi dali dąų wainu ebo bomo yai po e tiwai elalubao. Te eno bomo yai po augwaligo homude munama, te augwaligo haligade te bomo yai po asębo tiwai yaibao. Te ena augwaligo God bidiyu, te augwali eno we bidi hani dabe bidalueibao.
JER 31:34 Te ena Genuai Bidi, eno po dolo obao, te sogo te bidi dabego te augwa abagi dabe, me augwa ama dede, te po ola mabo po weyu, te tiwai po weyu, ‘Dagego Genuai Bidi koneiąo,’ po me wagobeo. Menio. Te nogi meni yai bidi, me nogi elalubo dabe, tigidaligo ena koneaibao. Magi baso meni, te eno augwa sęgę tagalama, te eno augwaligo yali dwai sę homu kone munu me egobeo,” wali.
JER 31:35 Genuai Bidigo giliga muani te ula momainogo yali, tama agai polua me hǫ dabe dąį ilali, te hulide ula momainogo muani. Agai te tamu ąį hodolobaso, te genuai ąį dini pedalu, te genuai u wabo. Aga nogi e tiwai, Tigidali Bomo Elalubo Genuai Bidi dao. Agai te tama po wai,
JER 31:36 “Ena Genuai Bidigo, eno po dolo obao, te Israel hani dabe sesemane bidada paibao, te giliga, me polua, me hǫ dabe elalubo tiwai yaibao. Tama te giliga, me polua, me hǫ dabe, te augwaligo eno augwaliba mani sę isąbaso da, teda te sogo naga te Israel hani dabe sia sigi dao.
JER 31:37 Ena Genuai Bidigo, eno te po obao, te bidigo dagalu tigidali badu habu usu sobaso, usu yaibao weyu, te bidi mego te tǫ bulali pageba mu aiya dulama, te tigidali habu badu subaso, usu yaiba obaso da, teda te sogo naga tama eno te Israel we bidi tigidali tudiba mueibao, te augwa yali dwai kolesaga wei ponoyu, tiaibao. Ena Genuai Bidigo, eno te po wai dao,” wali.
JER 31:38 Genuai Bidigo po ma weyu, te po wai, “Eno te bodolu muani sogo, te augwaligo Jerusalem ma nigaibao, te eno taun dao. Te Jerusalem genuai obo dąį te not badu, te Hananel te Tauade gagalama, te Dagebadu Sunumiba usu nigi paibao.
JER 31:39 Tama dąį ebo te giliga dega sigilubo badu, te dwasianu bulu du Garep teba usu nigi pelama, te begelama, te bulu Goaba pedelaibao wali.
JER 31:40 Tama te tǫ bogo me saut badu, te bulu odogode te gų page me elalu, te keli sąbo pesage me elaluali, te taun dąį yali tomode elalueibao. Te giliga pedalubo badu, te tigidali tǫ pedai te odogo bulu te ąį Kidron sesegeba usu nigi paibao, te me te taun tomode elalueibao. Te dąį pabo te Hos Dabego Sunumi te not badu usu naibao. Tama te taun tomode tǫ tigidali te gasagi yai tedali tǫ dao, te ena Genuai Bidigo tǫ elalueibao. Te boi bidi dabe aselama, te taun dolama, te aluama, te doado bage me sagasogobeo. Menio. Te taun te sesemane sogo bugagia elalueibao,” Genuai Bidigo te po wali.
JER 32:1 Te kibu be nogo si te Sedekaia Juda king bidali side, Genuai Bidigo Jeremaiabolo po mawai. Te sogo te Nebukatnesar te Babilon king bidali, te 18 yia bidai elalubo sogo dao.
JER 32:2 Te sogo te Babilon kingo ami bidi dabego te Jerusalem taun bagulubo sę yali, tama profet Jeremaia te ami dabe badu kalabus elama bidibadi, te Juda kingo genuai obo tomode bidai dao.
JER 32:3 Jeremaiago profet po te tiwai pusai, “Genuai Bidigo te tama po walio, ‘Mu tamao, te eno te Babilon kingo te taun somainogo yaibao,’ wali. ‘Te Sedekaia te Kaldia dabede, te Babilon ami dabede wi me pogobeo. Menio. Ena Genuai Bidi, te eno te Babilon kingo aga pageabi emainu elama, tama Sedekaia te Nebukatnesargo gesabidiba doligi pelama, tama Nebukatnesargo hanalubo po dabe dolo ponaibao. Tama Nebukatnesargo te Sedekaia Babilonba sela pelama, tama Sedekaia te bulude bididubadi, te eno aga homu kone ma palabo sogo dąį ilaliba usu naibao. Te dagego Babilon dabeba hwįyu da, teda dagego augwali aiyaba me elalugobeo. Ena Genuai Bidigo, eno te po wai dao.’ Agai te po wali,” Jeremaiago te po wali. King Sedekaiago te po odolama, agai te Jeremaia dali wado eyu, te tiwai po wali, “Dego nagebolo obaso, nago te tobage profet po pusaliwe?” Tama Sedekaiago Jeremaia te kalabusiba muai dao.
JER 32:6 Te Jeremaia aga po digi obao. Te ena, Jeremaia, te kalabuside bidali sogo, Genuai Bidigo enabolo te tama po wali,
JER 32:7 “Odao. Hananel, te nago aya aga ama Salumgo ogwa, aga nageba asaibao. Te agai nagebolo hanalu, te agai Anatot taunde elalubo tǫ abela waibao. Magi baso meni, nage da te aga pąde mu elalubo ama dao, tama nage te tǫ abelibo polalubo bidi dao,” te po wai.
JER 32:8 Tialima, nosali Hananel te ena kalabus bidibo pesageba asali, te ami dabe bidibo madi aselama, ena suagasali, te Genuai Bidigo po wali gilama yai. Te Hananelgo enaba te tiwai hanalu wali, “Eno homugo nago eno tǫ te Anatot taunde elalubo abelao, te Benjamin hanigo tǫde elalubao, magi baso meni, nage eno ama, tama nage te tǫ abelibo polalubo bidi. Nago abelama, te naga tǫ elaluagameo,” wali. Hananel aga digi dao te po ola silibaso, eno koneai, Genuai Bidigo homugo eno te Hananelgo wabo po tiwai gilama emainogo homu yai dao.
JER 32:9 Tama te tǫ eno abelali. Eno te tǫ abelibo bomo yai po kontrak asęnama, te eno haluama, tama tede eno dąį ilali, te bidi mebago gedude muai. Tama eno te silva bidi sese nogo si 200 gram sęgę yai silva usu nama, tedali dagalama, eno te Hananelbolo mawai, te tǫ pedai mone usu nama mawai dao.
JER 32:11 Eno te pepa si asęai, te tǫ abelali bomo yai po, me da sigo dąų wali po me, te pepa side elaluai. Pepa me deli te eno bebelali, te gasa pepa me eno bebelibeo.
JER 32:12 Tama eno te pepa si selama, te bidi Barukbolo mawai, te Neriago ogwa, te wai te Maseago wąį nǫų. Tama bidi hauwago eno te tǫ abeliyu ebo sę suali. Eno ama, Hananel, tama augwa te bomo yai pode nogi asęani bidi dabe me, tede dulaluali, te gasa Juda dabego me, tigidaligo eno te sę ebo suai dao.
JER 32:13 Te bidi dabego tononalubadi, eno te Barukbolo te tiwai po walio,
JER 32:14 “Israelgo God, aga Tigidali Bomo Elalubo Genuai Bidigo, agai te tiwai po wali, ‘Baruk, nago te bomo yai po asęani pepa si selama, te si te sospen sene me deliba muao, te si dali si sesabi elama, bugagia munalumainao,’ wali.
JER 32:15 Magi baso meni, Israel God, aga te Tigidali Bomo Elalubo Genuai Bidi, agai te po wali, nosali te bidi dabego te be, me tǫ, me wain gi dabe te abelibo sę ma gagalaibao, e tǫ kantride,’ agai te po wai,” eno te po Barukbolo wali.
JER 32:16 Baruk, te Neriago ogwago, te asęani bomo yai po sali dao, tialima, eno Genuai Bidiba te tiwai gedu haluasa po wai dao,
JER 32:17 “O God, Genuai Bidi, te nago genuai bomogo nago te dagalu me tǫ nigai dao. Te nago isą yabo sę deli me elalube dao.
JER 32:18 Sesemane sogo nago olo tau sabo wiegi yai kolesaga te umabo tausen we bidiba ebao. Tialima, te bidi me deligo dwai sę ebaso da, teda nago dwai dene mabo sę agabolo eyu, te aga wai dabeba yaibao, te aga yali dwai sę wei ponoyu tebao. God, nage polalubao, te nago bomo umabo elalubao, nago nogi e tiwai, Tigidali Bomo Elalubo Genuai Bidi dao.
JER 32:19 Nago te wiegi yai sę dabe yabo homu kolesaga elalubao. Nago bomo elalu, te nago genuai sę dabe ebao. Nago te tigidali we bidigo ebo sę subo dao. Nago te bidi tigidali deli deligo ebo kolesaga dagalama, te augwa yali kolesagade usu nama, wei ponobo dao.
JER 32:20 Polobadu nago genuai bomai sę dabe te tǫ kantri Isipde yai. Tama nago te tobage deli kolesaga naga te da Israel tomode idubadi, te gasa hani we bidi tigidaliba me ebao. Tama tigidali hanigo nagebolo genuai nogi mabo dao.
JER 32:21 Nago genuai bomogo, nago bomai sę elama, te tobage genuai sę hauwa te Isip dabe wi iliyu yalio. Tama te kolesagade nago da Israel dabe sai, te naga hani dabe, te Isipde selama, da odasa asai dao.
JER 32:22 Tama nago te tǫ dabolo mani, te nago dago wąį nǫų bomai po dąų wali gilama yali. Te tǫ ili hauwa elalubaso, te nai dabe wiegi yai bugagia mu holai dao.
JER 32:23 Da hani dabego te tǫ selama, tede bidali. Tialima, te nago augwaliba mani tigidali po, me bomo yai po, te augwaligo wali me pabeo. Menio. Augwaligo nago po sela sąyu, te nago bomo yai po bolalio. Tama tibaso, nago te dene mabo sę dabe da haniba yai dao.”
JER 32:24 “Tibaso, te Babilon dabego te Jerusalem bagua sagaselama, te da dali hwįbo sę yai. Augwaligo te taun obo pąde tǫ du holama, te augwa tede dolalu boi hwįnama, te taun sainu yai. Te boi bidi dabe da dali hwįbaso, te da nai sǫą pelama, te dwai gasi daba pedelali. Tialima, te Babilon dabego te Jerusalem saibao. Te nago po wali sę dabe, te pedelalio, te megi nago subao.
JER 32:25 Mu tama, te Babilon dabego te taun sainogo yali. Tialima, God, Genuai Bidi, naga digi te tǫ abelao obaso, eno abelali, tama te bidi dabe seselama, augwa te dąų wabo bomo yai pode nogi asęmainogo yai dao.” Ena Jeremaia eno te gedu haluasa po wai dao.
JER 32:26 Tialima, Genuai Bidigo te tiwai po Jeremaiabolo wali,
JER 32:27 “Ena digi ena Genuai Bidi, ena te tǫde we bidi hani tigidaligo God dao. Eno tigidali sę ebo usu dao.
JER 32:28 Tama ena Genuai Bidi, eno te taun Jerusalem te Nebukatnesarba mayu, te Babilon ami dabe dali mawaibao, te augwali Kaldia dabe dali mawaibao, te augwali Kaldia dabe augwaligo te taun selama,
JER 32:29 te augwaligo isi nogolama, te taun siago tigidali ulaibao. Tama te isigo te we bidi ugwaba holama, augwa be pedude te wiegi yai denami ilibo ofa te tibo god Balba iduali alta isigo daibao, te gasa god dabeba te wain ofa geludali. Tama te kolesaga idualigo te we bidi augwaligo ena haliga sębę dwai mu iliduai dao,” wali.
JER 32:30 “Te Israel me Juda augwali te gesi hani elalubo sogo gagalama, te megi e sogoba usu nagasobao, te eno suali, augwaligo dwai kolesaga naga iduali. Ena Genuai Bidi, eno po dolo obao, sesemane sogo augwaligo te tibo god nigibo kolesagago ena haliga sębę iliduai dao.
JER 32:31 Te augwaligo Jerusalem nigali sogo gagalasa, megi e sogoba usu nagasu, te Jerusalem augwaligo ena dwai haliga sębę ilalio. Tama eno te taun dolabo homu elama, te eno munu me sugobe dao.
JER 32:32 Te tigidali Israel me Juda we bidigo ena dwai haliga sębę umagia mu ilama, te augwaligo dwai kolesaga haniani yali. Tigidali olo we bidigo me, te king dabego me, tobolu bidi dabe me, pris dabe me, profet dabego me, tigidali Juda we bidi me, Jerusalemgo me, te dwai kolesaga ebo dao.
JER 32:33 Augwaligo ena tudiba naga munama, te augwali ena pageba me asobeo. Eno hauwa sogo augwali ola mani, tiali goli, augwaligo eno po odisąyu, ma eno augwali ola momainogo ebeo.
JER 32:34 Augwaligo te kugumini yai tibo god piksa te bede ugwaba dodolali, te Israel dabego enaba digi lotu omainogo yai be dao. Tama te kolesagade augwaligo te be eno gedude meda mu ilibo dao.
JER 32:35 Tama augwaligo te tibo god Balba lotu wabo pesage te odogo bulu Hinomde nigai. Tama augwa wai dabe digi te tibo god Molekba ofa ilali. Tiali goli, eno augwalibolo te kolesaga yao po me wabeo. Tama me eno te tobage bomo yai po augwaliba maiabo homu munu me ebeo. Eno homugo augwaligo te kugumini yai kolesagago te Juda dabe hodolama, te dwai sę emainogo ilibo te eno hagela homu ebo dao,” wali.
JER 32:36 Genuai Bidigo te tiwai po wali, “Te we bidi augwaligo te po waibao, ‘Te boi bidi dabego daba hwįagaselama, te da nai sǫą palio. Tama dwai gasigo da dolobao. Tama tebo kolesagade te Genuai Bidigo te Babilon kingo te taun somainu ilalio.’ Augwaligo te po waibao. Tialima, ena Genuai Bidi, ena dage Israelgo God, eno te taunde homu koneama, eno te gasa po me elalubao.
JER 32:37 Mu tama, eno augwalide dwai haliga sębę mu elama, wado genuaigia mu elama, eno te we bidi dabe te tigidali tǫ kantriba sela sąwaibao. Tama eno augwali e tǫba ma odasa aselama, te augwali ede bugagia bidimainogo yaibao.
JER 32:38 Tama augwali eno we bidi hani dabe bidiyu, te ena augwaligo God bidaibao.
JER 32:39 Te eno augwaliba deli homu kolesaga naga mobaso, te augwaligo deli sunumi naga wali paibao. Te augwali ena dologode sesemane sogo bidibaso, te eno wiegi yai sę augwaliba eyu, tama augwa hani wai dabe me bugagia bidaibao.
JER 32:40 Te eno gesi noma dąų wabo bomo yai po te augwaliba yaibao. Tama te dąų wali bomo yai po sesemane elalueibao. Eno te augwali wiegi yai bugagia ilibo kolesaga me tagalogobe po dąų walaibao. Te eno wiegi yai homu kolesaga augwaliba menama, te augwali ena dologode bidiyu, te augwaligo ena munu ma tagalogobeo.
JER 32:41 Tama eno me te homu kolesaga deli naga elalu, te eno augwalide wiegi yai pemene elama, te augwaliba wiegi yai sę eyu, tama eno augwali te tǫde bugagia bidimainogo ilaibao,” wali.
JER 32:42 “Ena Genuai Bidi, eno po ma te tiwai po obao. Hasia te eno dwai sę hauwa augwaliba pedalumainogo ilama, te augwali dolali. Tiali goli, nosali da, te eno wiegi yai sę augwaliba pedalumainogo ilama, te augwali bugagia mu tegaluama bidiyu, te eno augwaliba bomo yai po dąų wali tiwai gilama yaibao.
JER 32:43 Te we bidi augwaligo te po wali, ‘Te tǫ dolama, tama tede te bidi me hasa sibi me bidisiąwai, magi baso meni, Genuai Bidigo te tǫ te Babilon dabeba mawai.’ Augwaligo te po wali. Tialima, ena Genuai Bidi, eno te po obao, nosali te Juda dabe te augwa tǫba ma bidagaselama, te augwa abeliyu, te tǫ bidibolo menama abelebo mone ma siyu yaibao.
JER 32:44 Te bidi dabego tǫ abelama, te tǫ abelali dąų wabo bomo yai po asęaibao. Tama te bidi mebago gedude te augwa dąų wali po bebelama, te augwa dąį te mueibao. Te bidi dabego tǫ abelama, bidibolo mayu ebo te Benjamin hanigo tǫ me, te Jerusalem pąde tǫ me, Juda gasa taun dabe badu me, te bulu dude me, te Juda pedai saut badu me, te giliga degasa dulubo dwasianu bulu badu me, te tǫ abelama bidibolo mabo sę eyu yaibao. Te tama te sogo eno te Juda tǫ kantri bugagia ma bidimainu yaibao. Ena Genuai Bidigo, eno te po wai dao,” wali.
JER 33:1 Jeremaia kalabus elalu, te ami dabe pedai badu, te kingo genuai obo tomode bidibadi, tama Genuai Bidigo gasa po me mayu, te agabolo te tiwai po wali,
JER 33:2 “Ena Genuai Bidi, te eno te tǫ nigilama, tama dodolama, aga elalubo madide dąų walai dao. Genuai Bidi wabo te eno nogi dao, te eno te tiwai po obao.
JER 33:3 Te nago enaba i wao, tama eno nago te gedu haluasa po wabo wei ponaibao. Te geme dualalubo genuai nai dabe, te nago konesiąwani nai dabe po te nagebolo pusaibao.
JER 33:4 Magi baso meni, ena Genuai Bidi, ena dage Israelgo God dao, eno te Jerusalem be dabe, me te Juda kingo be dabe me homu kone palobao. Te boi bidi dabego Jerusalem bagua sagaselama, tǫ du holali, te augwa tede dolalugulama, te taunba aiya hwįainogo tialio. Te Jerusalem dabego augwa be dabego digi aluama, te masigi me ni nami selama, taun genuai obo aluali madi mugi pali, te obo dąų waliyu tiai dao.
JER 33:5 Tama augwa te Babilon dabe dali hwįgi pali. Tiali goli, eno wado po umagia mu weyu, te eno haliga sębę dwai mu te Jerusalem augwaligo ebo dwai kolesagade ebaso, te eno augwali tau sabo hagela yali. Tama tialima, te boi bidi dabego augwali ela munama, tama te isai bidigo tigi dabego te taunde be dabe pągąna saibao,” wali.
JER 33:6 “Tialima, nosali eno te taun tau selama, tama te taun dali, te we bidi dabe me, wiegi yai ma pedelaibao. Te eno wiegi yai sogo mu augwaliba menama, te augwali bugagia mu bidiyu, tama te boi bidi dabego augwaliba me hwįagasogobeo.
JER 33:7 Te sogode, eno te Juda hani dabe me, Israel dabe me, bugagia ma bidimainogo yaibao. Tama eno augwali bomai hani pedalumainogo elama, te polobadu tiwai yaibao.
JER 33:8 Augwaligo enade hagoma elama, dwai sę yali. Tialima, eno augwaligo te dwai sę sela sąnama, te augwali eno gedude wiegi yai ma pedelaibao.
JER 33:9 Tama tigidali tǫde we bidi hanigo eno te wiegi yai sę tigidali te Jerusalemba ebo sulama, tama tebogo te hani dabe wiegi yai pemene elama, enaba bugai haliga eyu, enabolo genuai nogi mawaibao. Te hani dabego te Jerusalem bugagia dugulalubo sulama, te eno wiegi wiegi yai nai dabe te Jerusalemba mobaso, te augwali dwai noma mu selama, midigi umabo yaibao,” wali.
JER 33:10 Tama nosali Genuai Bidigo te tiwai po wali, “Megi da, te we bidi dabego te po obao, ‘Te taun dolama, te bidi me hasa te meni yalubao. Te Judago taun dabe, me te Jerusalem sunumi dabe olo elalubao, te bidi me hasa tede me elalubeo.’ We bidigo te po obao. Tialima, ena Genuai Bidi, eno po obao, nosali te we bidi dabe te bulu pesagede ma bidaibao,
JER 33:11 tama augwa bugai haliga elama, pemene eyu, tama augwa te we bidi we sabode nai ulubo sogo te nai tuyu, wiegi yai homu pemene yaibao. Tama te we bidi dabego buba hwi wabo ofa selama, te Genuai Bidi, eno beba sesaibao. Tama augwa te ofa nai sela asobo sogo da, teda augwa tęąbi po e tiwai waibao, ‘Dago buba hwi te Tigidali Bomo Elalubo Genuai Bidiba wainao. Agai dabolo wiegi yai sę mu ebo dao. Sesemane sesemane sogo agai da godolo mu ebo dao.’ Augwaligo te tobage balia po te sogo waibao. Magi baso meni, te sogo ena Genuai Bidi, te eno te tǫ te polobadu elaluali tiwai wiegi yai ma elalueibao,” te po wai dao.
JER 33:12 “Ena Tigidali Bomo Elalubo Genuai Bidigo enote po obao. Megi da, te tǫ me taun dabe dolali elalubao, tama bidi me hasa dabe tede me bidibeo. Tialima, nosalite we bidi dabe te bulude ma bidaibao. Te wiegi yai nosaima pedelama, te sipsip tonalubo bidi dabe te tigidalitǫ kantride te sę ma ela paibao. Augwa te sipsip dabete wiegi yai nosai elalubo madi odasa pelama, tomanomainogo yaibao.
JER 33:13 Tama augwa sipsip nedaibao. Tesę te bulu dude elalubo taun dabede, me te dwasianu buludu dabede, me te tǫ pedai Negev te saut Juda badu eyu, tama augwa te sę Benjamin hanigo tǫde, me te Jerusalempąde elalubo bulude, me te tigidali Juda taunde, te sęyaibao. Te ena, Genuai Bidigo po dao,” wali.
JER 33:14 Genuai Bidigo te tiwai po wai, “Eno te sogo medeli dąį elama, eno te Israel me Juda we bidi dabe dalidąų wali po usu naibao.
JER 33:15 Te sogo eno te wiegi yai bidime deli te Devitgo hanide pedelaibao, te ni nologode gesini hogodo holobo tiwai yaibao. Tama te bidigo wiegi yaidoloba pai kolesaga mu te tǫde we bidi tigidaliba yaibao.
JER 33:16 Tama te sogo Juda dabe me Jerusalemde me sęgęmeni yaibao. Te augwali bugagia dugulalueibao. Tamaaugwa Jerusalem nogi te tiwai waibao, ‘Genuai Bidi agate dago doloba pai kolesaga page bidi dao.’
JER 33:17 Ena Genuai Bidi, eno te po obao, sesemane sogo te Israel hani dabede te king bidi te Devitgo hanide nagapedaludaibao.
JER 33:18 Tama sesemane sogo te Livai hanide te pris dabe elalu, te tobage ofa dabe enaba yaibao, te siaba tigidali uluboofa, me te wit ulubo ofa, me te gasa ofa dabe ebo sęyaibao,” wali.
JER 33:19 Genuai Bidigo Jeremaiabolo te tiwai po wali,
JER 33:20 “Ena Genuai Bidi, eno po dolo obao, eno bomo yai podąų wali po te giligade me hulide dali yali, te augwa sisesemane sogo eno augwa siba dąį ilali sogo pedaliyuyaibao. Tama eno te dąų wali bomo yai po bidi medeligo me hasegelabo usu egobeo.
JER 33:21 Te tiwai naga, te niwai bidi me deligo te eno bomo yai po ena sę bidi Devit dali dąų wali po me togogobeo, te king dabe agaihanide sesemane pedaludaibao. Tama me te Livai hani tepris dabe dali dąų wali bomo yai po, te niwai bidi megotogologobeo, te eno sę bidi dabe dao.
JER 33:22 Te bidi dabegote hǫ dabe me nambisde masigi sani nedainu ebaso, usumu me egobeo. Te tiwai naga, te eno sę bidi Devitgo hanidali, te Livai hani dabe me, te hauwa umabo pedelama, te bidigo nedabo usu egobeo,” wali.
JER 33:23 Genuai Bidigo te tiwai po Jeremaiabolo wali,
JER 33:24 “Te we bidi augwaligo te po wabo dao, ‘Polobadu Genuai Bidigo te Israel hani me Juda hani, te hani si teaga hani da olama, dąį ilama elaluai. Tialima, megi da, agai augwali tudiba muanio.’ Te we bidi augwa te tobagepo weyu, te augwaligo eno we bidi dabe dolama, tamaaugwa homugo te eno hani we bidi hagawali homu ebodao.
JER 33:25 Tialima, ena Genuai Bidi, eno po dolo obao. Eno dąų walali bomo yai po te giligade dali, hulide meeno bomo yai po tigidali te dagalude me tǫde muai dao.
JER 33:26 Mu tamao, eno te dąų walali bomai po te eno togogisogo da, teda eno te Jekopgo hani me, te eno sę bidi Devitgo hani me, tudiba mugi da. Tiali goli, te kolesagamu egobeo. Menio. Te eno king te Devitgo hanidepedalumainogo elama, te Abraham, me Aisak, me Jekop, te hani dabe tonalumainogo yaibao. Te eno olo tau sabo wiegi yai kolesaga te hani dabeba eyu, te augwali bugagia ma bidimainogo yaibao,” wai dao.
JER 34:1 Genuai Bidigo po Jeremaiabolo mani, te Babilon king Nebukatnesar aga ami dabe daligo te Jerusalemba me Judago taun dabe hwįagasali. Nebukatnesargo amigo te tigidali tǫ kantri bidi dabe dali, te tigidali we bidi dabe dali, te king Nebukatnesargo tonaluai. Tialima, Genuai Bidigo Jeremaiabolo te tiwai po wali,
JER 34:2 “Ena Genuai Bidi, ena dage Israelgo God, eno te po obao, nage te king Sedekaiaba pelama, agabolo te tiwai po wao. Ena Genuai Bidi, eno te taun te Babilon kingba menama, siago ulumainogo yaibao.
JER 34:3 Sedekaia, te nage agade wi me pogobeo. Menio. Te augwaligo nage pageabi elama, te nage agaba sela pelama, te duga si dolalu, po miaibao. Tama augwaligo nage te Babilonba odasa paibao.
JER 34:4 Tialima, Juda king Sedekaia, te Genuai Bidi eno gasa po bugagia odao. Eno e tiwai po nagede elalubao. Augwaligo nage me ela mugobeo.
JER 34:5 Menio. Te nage bugagia bidama, te nage isaibao. Te nage isali sogo da, te augwaligo wiegi yai denami ilibo hano holobo pauda te nageba genuai nogi mayu ulaibao, te polobadu nago wąį nǫų dabe te Juda king bidali sogo yali tiwai nageba yaibao. Te augwa hobedai gela weyu, te po waibao, ‘Dago genuai bidi, hobede mu ebao,’ tama waibao. Ena Genuai Bidigo, eno te bomo yai po dąų wali tiwai gilama tiwai pedelaibao,” wali.
JER 34:6 King Sedekaia te Jerusalemde bidibadi, tama profet Jeremaiago te po tigidali agabolo pusugi pali.
JER 34:7 Te sogo te Babilon kingo ami bidi dabego te Jerusalemba hwįagasobo sę elama, te taun Lakis me Aseka taun side hwįani. Te boi bidi dabego te tǫ kantri Judade te tigidali gasa taun te bomai obo elaluali te salio, tama te taun sela naga elaluai dao, te Jerusalem, me Lakis, me Aseka, te taun dabe.
JER 34:8 Te king Sedekaia dali, te Jerusalem we bidigo dali, te bomo yai po dąų weyu, te augwalide olo sę ebo bidi dabe, olo sę ebo we dabe tagala palama, olo pomainao po wai dao.
JER 34:9 Augwa te tama po dąų wai. Te Israel dabe me deli augwa abagide olo sę ebo bidi me olo sę ebo we bidibaso da, teda aga tonalubo bidigo aga olo pomainogo tagala palao. Te Juda dabego te augwa abagi dabe te olo sę ebo bidi me olo sę ebo we bidimainogo me elamu dao.
JER 34:10 Te tobolu bidi hauwago me, te gasa we bidi hauwago me, te dąų wali po te usu da wali, tama tigidali dąų weyu, augwa te olo sę ebo bidi me, olo sę ebo we me tolalugobeo wali. Augwa po mia selama da, teda augwa olo pomainu tagala palai.
JER 34:11 Tialima, nosali augwa homu hasegelama, te bidi dabe me we dabe ma selama, tama augwali te olo sę ebo bidi me, olo sę ebo we pedalubo sę ma yalio.
JER 34:12 Tialima, te sogo Genuai Bidigo po Jeremaiabolo te tiwai wali,
JER 34:13 “Ena Genuai Bidi, ena te Israelgo God dao, eno bomo yai po dagego wąį nǫų dabe dali dąų wali. Eno augwali te Isipde sali, te kalabus sę yali bulude, tama eno augwali odasa aselama, tama nosali eno te bomo yai po augwali dali dąų wali. Te dąų wali bomo yai pode te tiwai po wali,
JER 34:14 ‘Te a naga olama, me badu si te kibu be tigidalide, dagego te duga abagi dabe te olo sę ebo bidi me we dabe te tagala palama, te augwa olo pomainao. Te abagi dabe dagego olo sę ebo bidi, me olo sę ebo we dabe, te dagede olo sę ebaso da, teda augwaligo dagego sę ebo te kibu be a naga me badu delide naga sę emainao, tama nosali dagego augwali olo tagala palao.’ Te dagego wąį dabego te po koneani, tiali goli, augwaligo eno po odama, te augwaligo wali pabeo,” wali.
JER 34:15 “Hasia dagego me te po wali me pisąwai. Tialima, te sesabi elama gana bidisiąbadi, te dagego haliga begelama, te doloba pai kolesaga eno gedude yalio. Te dage deli deligo te abagi dabeba weyu, augwali munu me te olo sę ebo bidi me sę ebo we bidigio wali. Tama me, dage te eno bede dolalu, te eno gedude bomo yai po dąų wali, te abagi dabe augwali olo pomainao olama, tagala palai dao.
JER 34:16 Tialima, megi da, dagego homu ma hasegelama, tama te we bidi dabe augwa homu wali pelama, te olo bilali, dagego augwali ma selama, te augwali dagego olo sę ebo bidi me sę ebo we ma pedelali. Te kolesaga yaligo te dagego eno genuai nogi aiyaba elaluali tiwai yali dao,” wali.
JER 34:17 “Te pagede, ena Genuai Bidi, eno te tama po obao. Dagego eno po wali me pisąma, te dagego te ama dabe, me abagi dabe, augwaligo dage tagalama, pomainao po wabeo. Tama tialima, odao. Ena Genuai Bidi, eno dagebolo weyu, te eno dage tagala palaiba po odubao. Awe, te dage tagala palama, isigi pagameo. Te boi bidi dabego dage ela mueibao, te dage dwai gasi selama isaibao, te dage nai me sǫą pelama, nasigo isaibao. Tama te gasa tǫ kantri we bidi dabego eno te sę dageba yali po odolama, te augwali wi elama, nogo hogwayu, midigi dwai mu yaibao.
JER 34:18 Dagego te bomo yai po eno gedude dąų wali sogo, dagego te bomo yai po dąų wabo kolesaga wali pelama, tama dagego te bulmakau me deli elama, te pedali asegai si pedelai. Tama dage te bulmakau pedali asegai si badu tomode bilali. Tialima, nosali dage we bidi hauwago te dąų wali bomo yai po bolali. Tama tialima, eno augwali dagego te elali bulmakau yali tiwai pedelaibao.
JER 34:19 Eno te bulmakau pedai asegai si tomode bidali we bidi tigidalide te tiwai sę yaibao. Te Juda me Jerusalem tobolu bidi dabe, me te kingo bede bidibo ofisa bidi dabe, me pris dabe, me te gasa we bidi dabe tigidali dao.
JER 34:20 Te augwali eno te boi bidi dabego nogoba munama, te boi bidi dabego augwali ela mueibao, tama te ba dabe me hasa dabego te augwaligo tigi tuagasaibao.
JER 34:21 Tama me, eno te king Sedekaia dali, te aga ofisa dabe dali, te augwali ela muabo boi bidi nogoba mueibao, te Babilon kingo ami dabe nogoba mueibao. Mu tamao, te Babilon dabego dage tagalama palio,
JER 34:22 tialima, ena Genuai Bidi, te eno po obaso, te augwali ma aselama, te Jerusalemba hwįnama, te taun saibao. Tama augwaligo te taun siago ulaibao. Tama eno te Juda taun tigidali dolama, tama te taun dabe olo elalu, tama bidi tede me bidigobe dao,” wali.
JER 35:1 Te Jehoiakim, te Josaiago king ogwa, te Juda king bidali sogo, Genuai Bidigo ena Jeremaiabolo te tiwai po wali,
JER 35:2 “Nage pelama, te Rekap hani bidi sugi pelama, te augwali dali po minama, te augwali ena Genuai Bidi, eno be habu me deliba odasa asao. Tama nago te wain augwaliba menama, te augwaligo tumainogo yao,” te po wali.
JER 35:3 Genuai Bidigo po obaso da, teda ena pelama, te Rekap hani me deli sugi pali, aga nogi te Jasania dao. Aga da, te gasa bidi Jeremaiago ogwa, te Habasiniago wąį nǫų. Te eno aga dali, aga ama dabe me, aga ogwa dabe me sobadi, te gasa Rekapgo hani bidi tigidali me selama,
JER 35:4 tama eno augwali te Genuai Bidigo beba odasa pali. Tama eno augwali te Hanango hanigo be habuba odasa pali, te Ikdaliago ogwa dao. Hanan te Godigo po wali pabo bidi me deli bidai. Te be habu te Genuai Bidigo bede bidibo ofisa bidi dabego be habu pąde elaluali, te Maseago be habu ugwadu daide elaluali, te Salum ogwa. Masea te Genuai Bidigo bede te polalubo ofisa bidi me deli dao.
JER 35:5 Tialima, eno te kap wain selama, te Rekapgo hani dabeba mani, tama eno te tiwai po augwaliba wali, “Tegoba, dage tuiąo,” te po wai.
JER 35:6 Tialima, augwaligo po wei ponoyu, te tiwai po wali, “Hobede yao, dago te wain tugobeo. Magi baso meni, dago wąį nǫų Jonadap, te Rekapgo ogwa, agai bomo yai po me deli dabolo menama, tama dabolo dali te dago haniba habu selama, dago te wain ąį tugio wai dao.
JER 35:7 Tama me agai te po weyu, dago te be me sę igio olama, te gi dabe bulugio wali, te dago wain gi dabe me bulugobeo. Menio. Sesemane sogo da te ugwa bede naga bidalueibao. Dago te po wali pobaso da, teda da polo me isigobeo. Menio. Te da bobobage sogo sesabi elama, te tǫde bidaibao.
JER 35:8 Tama sesemane sogo dago te po tigidali wali paibao, dena wąį nǫų Jonadapgo dabolo mawai. Dago dali, te we wai dabego me, dago te wain tubo menio.
JER 35:9 Tama dago te be me sę isąma, tama dago te wain gi dabe me, gasa gi dabe me, elalubeo. Menio.
JER 35:10 Da te ugwa bede bidalu, tama tebo kolesagade dago te Jonadapgo dabolo mani po tigidali wali pabo dao.
JER 35:11 Tiali goli, Nebukatnesar, Babilon kingo, te tǫ kantriba hwįagasali sogo, da te Kaldia me Siria ami dabede wi elama, tama dena po mia selama, te Jerusalemba bidagasaibao wali. Tialima, megi da te Jerusalemde bidibo dao,” te po wali.
JER 35:12 Augwa po ola silibo si da, teda Genuai Bidigo Jeremaiabolo te tiwai po wai dao,
JER 35:13 “Ena Israelgo God, Tigidali Bomo Elalubo Genuai Bidi, eno po obao, nage pelama, te Juda dabeba me Jerusalemba te tama po wagi pao. ‘Ena Genuai Bidi, eno dagebolo te eno po wali pabo kolesaga ola mawainogo ebo dao.
JER 35:14 Polobadu Jonadap, te Rekapgo ogwago, aga hani dabeba te po weyu, augwaligo te wain tulamuo wali. Te megi tama me, te Rekap dabego te augwa wąį nǫųgo wali po bugagia wali pelama, tama augwa te wain me tubeo. Tiali goli, eno dageba hauwa sogo po madu geai, te dagego eno po me odobo menio.
JER 35:15 Hauwa sogo eno sę bidi, te profet dabe, te dageba tagala palidu geai. Tama augwa te po wali, dage deli deligo te duga homu begelama, dwai kolesaga tagalama, te duga kolesaga dodolao. Te dagego tibo godiba tibo po ola mayu, te augwaliba lotu me wagimio. Dagego eno te po wali pobaso da, teda dage te eno duga wąį nǫų dabeba me dugaba me mani tǫde bugagia bidaibao. Te profet dabego te tobage po pusali, tiali goli, dagego eno po me odisąyu, te wali me pabeo.
JER 35:16 Te Jonadap hani, te Rekapgo ogwa te bage, augwaligo te augwa wąįgo po bugagia wali pali. Tiali goli, dage we bidi dabego eno po wali me pabeo.
JER 35:17 Tama tialima, ena Genuai Bidi, ena Tigidali Bomo Elalubo God, ena Israelgo God, eno te po obao. Dage Juda me Israel we bidigo, odao. Polobadu eno po dageba pusali, tiali goli dagego te poba olo me mubeo. Eno dage i wali, tiali goli dagego eno i wali wei me ponobeo. Tama tibaso, eno te dwai dene mabo sę tigidali dageba pedalumainogo ebao, eno te sę yaibao po wai dao,’ te po te Jerusalem bage dali te Juda bagebolo pusigi pao,” Genuai Bidigo Jeremaiabolo wali.
JER 35:18 Tialima, nosali Jeremaiago te Rekap dabeba te tiwai po wali, “Tigidali Bomo Elalubo Genuai Bidi, te Israelgo God, agai te po wali, ‘Dagego te duga wąį Jonadapgo po odama, tama dagego agai po tigidali wali peyu, tama dagego te agai dagebolo yao po wali sę tigidali ebo dao.
JER 35:19 Tama tialima, ena, Tigidali Bomo Elalubo Genuai Bidi, eno te po obao, sesemane sogo Jonadapgo hani, Rekapgo ogwade, te eno sę yabo bidi dabe augwali hanide elalueibao,’ Genuai Bidigo te po dagede wali,” Jeremaiago te po wai dao.
JER 36:1 Te Jehoiakimgo kibu be me si me si elalubadi, te Josaiago ogwa, te Juda king bidali sogo, Genuai Bidigo Jeremaiabolo mayu te tiwai po walio,
JER 36:2 “Te buku me deli selama, te eno nagebolo mabo po tigidali asęao, te sę dabe te Israel, me Juda, me gasa bulu tǫ kantri dabeba pedelaibao. Nago te po tigidali asęao, te hasia sogode mu gagalama, te eno nagebolo mawai, te king Josaiade gagalasa, te megi e sogoba usu nagasobao.
JER 36:3 Te tigidali Judago eno te dwai sę augwaliba yaiba po wabo odobaso da, teda augwa homu begelama, te bidi deli deli augwa dwai kolesaga tagalomainao. Tama tiyu da, eno te augwa yali dwai sę yali sęgę elaluali sela sąwaibao,” po wai dao.
JER 36:4 Tialima, Jeremaiago te Neriago ogwa, Baruk i olama, asali. Tama Jeremaiago te Genuai Bidigo agabolo mani po tigidali pusama, tama Barukgo te po buku me delide asęai dao.
JER 36:5 Tama nosali Jeremaiago Barukbolo te tama po wali, “Ena digi ena te Genuai Bidigo beba me pogobeo.
JER 36:6 Tialima, eno homugo eno nagebolo te asęao wali buku nago selama, tama te Genuai Bidigo beba nage pelama, tama Genuai Bidigo te po te we bidi dabeba nedao. Nage te nai habu selebo genuai side me deli pagameo, magi baso meni, te Juda taun we bidi dabe Genuai Bidigo beba te side pelama bidibadi, tama augwaligo me te po odomainao.
JER 36:7 Genuai Bidigo wado eyu, haliga sębę umabo mu te we bidi dabeba ebao, tama agai dene mabo sę augwaliba yaiba wali. Tialima, te we bidi deli deli augwa te dwai sę ebo kolesaga tagalaiba homu eyu, te Genuai Bidiba gedu haluasa po obaso da, teda agai augwaligo gedu haluasa po wabo odaibao,” wali.
JER 36:8 Tialima, te polua 9 wabode, te kibu be a nagade te Jehoiakim te Juda king bidali sogo, te we bidi dabe augwa te nai gisilama, te Genuai Bidiba lotu weyu bidabo sogo dąį me deli ilali. Tama tigidali Jerusalem we bidi me, te Juda taun we bidi dabe me, te Genuai Bidigo beba sisinagasali. Te side Barukgo te Jeremaiago agabolo wali po gilama tigidali sę yali. Agai te Genuai Bidigo po elalubo buku selama, aga te Genuai Bidigo beba palio.
JER 36:10 Aga te Genuai Bidigo be tomoba doligi pelama, tama Jeremaiago po te bukude elalubo po tigidali nedelama, te tigidali we bidigo odali. Barukgo te buku nedebo sogo, aga te be habu sunumi me deliba doligi pali, te Gemariago be habu, te Safango ogwa. Polobadu Safan te kingo kuskus sę ebo bidi bidali. Te be habu te sisinibo pesage ugwadu elaluali, te Genuai Bidigo be sunumi pąde, augwa nogi eyu Gesi Sunumi Dao wai.
JER 36:11 Mikaia, te Gemariago ogwa, te Safango bulali wąį, aga te Genuai Bidigo bede bidai, tama Barukgo Genuai Bidigo po te bukude nedebo odalio.
JER 36:12 Tialima, aga te kingo beba aiya dulali. Tama aga te kingo kuskusgo be habu tomoba pali, te tigidali kingo tobolu bidi ofisa dali, te kuskus Elisama te sisinama, po mibo be habu elaluali. Te ofisa dabego nogi e tiwai dao, Delaia, te Semaiago ogwa, Elnatan, te Akborgo ogwa, me Gemaria, Safango ogwa, me Sedekaia, Hananiago ogwa dao. Te gasa ofisa tigidali me bidalio.
JER 36:13 Tama Mikaiago te Barukgo te we bidi augwaliba te po nedebadi, agai odali po te augwaliba pusali.
JER 36:14 Te ofisa dabego te Mikaiago po odama, tialima augwaligo te bidi me deli tagala palama, te Baruk sigi pai. Te bidi aga nogi Jehudi, te Netaniago ogwa, te Selemiago bulali wąį da. Tama Selemia te Kusigo ogwa. Tialima, Jehudigo Barukba te tiwai po wagi pali, “Nago te we bidiba nedali buku selasa asao.” Tialima, Barukgo te buku selama, te ofisa dabeba sesalio.
JER 36:15 Aga sabalobo si da, teda te ofisa dabego agabolo te tiwai po wai, “Nage duagulama, te buku nedama, dago odaibao,” wali. Tama Barukgo te bukude po augwaliba nedalio.
JER 36:16 Augwaligo te bukude nedali po tigidali odama, te augwali wi elama, te midigi dwai mu siyu, te augwa hasiba digi tonono palio. Tama augwaligo Barukbolo te tama po wali, “Mu tama dao, dago kingba te sę yabo po dabe pusugi paibao,” wali.
JER 36:17 Tama augwaligo Barukba te tiwai po hanalu wali, “Nago dabolo wao. Magi elama nago te po asęai dawe? Te Jeremaiago po odubadi, nago asęai dawe?”
JER 36:18 Tama Barukgo te po wai, “Te dolo dao. Jeremaiago enabolo te tigidali po mobaso, tama eno te asębo nai medabu selama, te eno agai po te bukude asęai dao,” wali
JER 36:19 Tialima, ofisa dabego Barukbolo te tiwai po wali, “Nage pelama, Jeremaia selama, dage si geme dula sigi pao, tiyu genuai bidi dabego te po odama, te dage si dali wado yabuo. Te dage si dula sigi pabo pesage te bidi me deligo konemainogo me elamu dao,” wali.
JER 36:20 Tialima, te ofisa dabego Barukgo nogode te buku selama, te Elisamago be habuba muani, te kingo kuskus dao. Tama augwali hodasa pelama, king te bidi sisinibo pesageba sugi pelama, tama augwaligo agabolo te sę pedelali po pusalio.
JER 36:21 Kingo te po odama da, teda agai te Jehudi tagala palama, te buku sigi pali. Jehudigo te buku te Elisamago be habude selama, te kingba dali, te king pąde dolaluali ofisa dabeba me nedalio.
JER 36:22 Te polua 9 wabode te sę dabe pedelali, te kedau sogo ebadi. Te sogo te king aga te kedau sogo bidibo bede bidibadi dao. Aga te isi pąde dugulalu, te aga tigi posolo iliyu, isi gogo neduai.
JER 36:23 Jehudigo te buku nedebo ebadi, te agai po meba nedela silibo si da, teda kingo te dwasianu hwą ge selama, tama te Jehudigo nedela silali pepa pedai te hwą gego tologolama, te isiba sąwai, kingo te tama sę ela pidu pidu genama, te buku tigidali ula silai dao.
JER 36:24 King dali, aga ofisa dabego me, te bukude po tigidali odali, tiali goli augwa te wi dwasianu me isąma, te augwa ugwa dabe pisilama, te augwa yali kolesaga homu dene ebo me ola mabeo.
JER 36:25 Elnatan, me Delaia, me Gemaria, te bidi selago te buku isiba ulugio po bomo yali, tiali goli kingo augwaligo po me odobeo.
JER 36:26 Tama kingo aga ogwa, Jeremelbolo bomo yai po muani, me te Seraia, te Asrielgo ogwa, me Selemia, te Apdelgo ogwa, te augwali pelama, te profet Jeremaia, me kuskus Baruk, te augwali si pageabi igi pomainogo tagala palali. Tiali goli, Genuai Bidigo augwali si geme dualama, tama augwaligo te bidi si me subeo.
JER 36:27 Kingo te Barukgo asęani buku siaba ulali tudi badu nosali, Genuai Bidigo Jeremaiabolo te tiwai po wali,
JER 36:28 “Gasa buku me selama, te king Jehoiakimgo isiba ulali bukude asęani po tobage tiwai naga ma asęao,” wali.
JER 36:29 “Tama me, nago kingba te tiwai po asęao, ‘Ena Genuai Bidi, eno te po obao, king Jehoiakim, naga digi te buku isiba uluyu, nago te tiwai po wali, “Dego te Jeremaiabolo obaso, te Babilon king te aselama, te tǫ kantri dolama, te tigidali we bidi ela muyu, te hasa sibi me ela mueiba po asęai dawe?”
JER 36:30 King Jehoiakim nago te tobage po wali, tama ena Genuai Bidigo, eno nageba homu koneama, eno te po obao, te nago hani bidi me deli te king pedelama, te Devitgo sia kingde me dugulalugobeo. Te Jehoiakim nage isibo si da, teda augwaligo nago tigi te tǫba sąnama, te giligago posolo ilama, te hulide ais agaba tulalueibao.
JER 36:31 Te eno nagebolo me, te nago wai dabeba me, te nago ofisa dabeba me, te dwai dene mu ilama, te dagego dwai kolesaga yali wei ponaibao. Te eno dwai dene me sęgę mabo sę te Jerusalem me Juda we bidi dabeba yaibao, te eno yaibao po wali gilama te sę yaibao. Eno te bukude asęani po augwaliba mani, tiali goli augwaligo me odobeo,’ te po te king Jehoiakimbolo asęao” Genuai Bidigo Jeremaiabolo wali.
JER 36:32 Tialima, Jeremaiago gesi buku selama, te kuskus Barukbolo mawai. Tama Jeremaiago te king Jehoiakimgo isiba ulali bukude elaluali po tigidali ma pusai. Tama me agai te gasa po te po tobage tiwai naga pusali. Tama Barukgo te tigidali po te gesi bukude asęai dao.
JER 37:1 Te Babilon king Nebukatnesargo te Sedekaia dąį ilali, te Josaiago ogwa, te Juda king pedalumainogo yali, te Jehoiakimgo ogwa hasegelimainogo yai, te Jehoiakin, agai gasa nogi me Konia dao.
JER 37:2 Jeremaiago Genuai Bidigo agabolo mani po pusali, tiali goli, Sedekaia dali, aga ofisa dabego me, te tigidali we bidi me, te poba bugagia olo me mubeo.
JER 37:3 Me sogo deli sogo king Sedekaiago Jehukal tagala palali, te Selemiago ogwa, te pris Safanaia dali, te Maseago ogwa, te profet Jeremaia sugi pelama, agabolo te tiwai po wali, “Kingo homugo nago te Godiba gedu haluasa po omainogo yali, te dago Genuai Bidi dao, te agabolo hanaluama, te da tigidali bugagia bidainogo obao,” wali.
JER 37:4 Te sogo te Jeremaia augwaligo kalabus isąbadi, te aga homugo ugwa peyu, eda asu yai dao.
JER 37:5 Tama me, te sogo te Babilon ami dabego te Jerusalem taga palio, magi baso meni, augwaligo te tiwai po odali, te Isip kingo ami dabe te Isip tagalama, te Jerusalemba asobo sunumidu asobao wali.
JER 37:6 Tialima, Genuai Bidigo po Jeremaiabolo menama, tama Jeremaiago Jehukal me Sefanaiabolo pusali. Genuai Bidigo po te e tiwai dao,
JER 37:7 “Ena Genuai Bidi, ena dage Israelgo God, eno te po obao, te Juda kingo dage si enaba tagala palama, te eno dage tau sogowe, ma meniwe, koneainogo yai. Tialima, nago kingba te tiwai po walao. Te Isip kingo dage tau sainogo te Isip ami dabe asali. Tiali goli, augwali dageba me pedalugobeo. Menio. Augwali te sunumide begelama, augwa page buluba ma paibao.
JER 37:8 Tama te Babilon dabe ma aselama, te Jerusalemba hwįnama, te taun saibao. Tama augwa taun te isigo ulaibao.
JER 37:9 Ena Genuai Bidi, eno po dolo obao, duga digi duga tibo po ola mayu, te po wagio, ‘Te Babilon dabe Jerusalemba me asogobeo, augwali gasaba mu soaibao’ te tobage tibo homu me igimio. Augwali geasa ma asaibao.
JER 37:10 Te dagego Babilon dabe dali hwįnama, te augwaligo ami tigidali aiyaba elaluama, te dagego augwali ami bidi dabe hauwa ela mugi sogo da, teda tagalao, te hwįnama tigi dabe dolali ami dabe te augwa ugwa bede bidaluama, tialima, te bagego digi hogodama asiyu, te taun isigo ulubo usigi da,” te po wai dao.
JER 37:11 Te Babilon ami dabego te Isip kingo ami bidi dabe asobo po odali. Tama tibaso, te Babilon dabego Jerusalem tagalama, augwali dali hwįgi pai dao.
JER 37:12 Tama te sogo Jeremaiago te Jerusalem tagalainu yali, te Benjamingo hanigo tǫba pelama, te aga deli hani dabede tǫ me deli sigi pabo homu yali.
JER 37:13 Aga pelama, te Jerusalem genuai obo sunumiba sabaligi pali, augwa nogi eyu Benjamingo Sunumi da wali. Tama ami augwa tobolu bidi ofisa me deligo te we bidi ugwa peyu, eda asu ebo sunumide tonaluali. Te ofisa bidi nogi, Iriya, te Selemiago ogwa, te Hananiago bulali wąį. Tialima, Iriyago Jeremaia pageabi elama, te po wai, “Eno koneani, nage wi pelama, te Babilon dabe dali bidigi painogo ebao,” te po wai.
JER 37:14 Tialima, Jeremaiago po wei ponoyu, te po wali, “Nago tibo po obao. Ena te Babilon dabeba pabo menio.” Tiali goli, Iriyago agai poba homu mubeo. Tialima, agai te Jeremaia pageabi elama, aga te tobolu bidi dabeba selasa pai dao.
JER 37:15 Te tobolu bidi dabego Iriyago po odama, te augwaligo Jeremaia dali wado po dwai mu wali. Te augwaligo aga keloago elama, te aga kalabus ilama, te kuskus Jonatango beba muani, magi baso meni, te Jonatango be augwaligo te kalabus be tiwai pedelama elaluai dao.
JER 37:16 Te bede te kalabus be tǫ dologode elaluali, tama augwaligo Jeremaia te habuba munama, te aga sesabi sogo elama, tede bidai dao.
JER 37:17 Tama nosali, Sedekaiago augwaliba walama, te Jeremaia odasa aselama, te kingo beba suagasao wali. Tialima, Sedekaiago agai yali sę augwaligo sumainogo me ebeo. Augwaduba si naga bididu, te Sedekaiago Jeremaiabolo te tiwai po hanalu wali, “Genuai Bidigo nagebolo po me deli maniwe, ma meniwe?” Tama Jeremaiago te po wali, “Awe, Genuai Bidigo po me deli mawai. Te po e tiwai dao. Augwaligo nage te Babilon kingo nogoba mueibao.”
JER 37:18 Tama Jeremaiago Sedekaiabolo te tiwai po hanalu wai, “Eno nageba dwai sęgę yai sę ebaso, te dagego ena kalabusiba muai dawe?
JER 37:19 Nago profet dabego te profet po te tiwai pusali, ‘Te Babilon kingo nageba me, te tǫ kantriba me, hwįagasogobeo,’ wali. Tialima, megi da, te profet dabe mena bidibawe?
JER 37:20 Tiali goli, genuai bidi, eno te nai me deli nagebolo hanalu obao. Eno homugo nago olo tau sabo wiegi yai kolesaga enaba elama, te nago ena te kuskus Jonatango beba ma tagala palamuo. Tiyu, ena agai bede bidu da, te ena isaibao,” wai.
JER 37:21 Jeremaiago po ola silibaso da, teda king Sedekaiago dąų wabo po olama, te augwaligo Jeremaia kalabus elama, te ami dabe badu te kingo be mesalo obo tomode bidali. Te kingo me te po wali, te tigidali sogo augwaligo te bret deli te bret nigibo bede selama, te Jeremaiabolo magasu yali. Te tigidali bret te taunde silibaso, te tama me tegobeo. Tama Jeremaia kalabus elama, te ami dabe pedai badu bidai dao.
JER 38:1 Jeremaiago te tiwai po te we bidi dabeba pusali, “Genuai Bidigo te po wai, te taun tomode bidibo we bidi dabe, te augwali isaibao. Te boi bidi dabego augwali ela munama isiyu, ma augwali te nai sǫą pelama isiyu, ma te dwai gasigo augwali dolama isiyu yaibao. Te augwali bidibo ula dali bidabo homu eyu da, augwali te taun tagalama, te Babilon ami dabeba pao. Augwali te Babilon dabego tola somainogo elama, te augwali isidali weyu tiao. Tama me, Genuai Bidigo te tiwai po wali, ‘Eno te Babilon kingo ami bidi dabego te taun somainogo yaibao,’ te po wai,” Jeremaiago wali. Tama kingo ofisa bidi mebago Jeremaiago te po wabo odali. Augwali nogi e dao, Sefatia, te Matango ogwa, te Gedalia, te Pasurgo ogwa, me Jehukal, te Selemiago ogwa, te gasa Pasur, te Malkiago ogwa dao.
JER 38:4 Te kingo ofisa dabe mebago kingba te tiwai po waligi pali, “Jeremaia isimainao,” wali, “magi baso meni, agai pogo te taunde bidalubo ami bidi dabe me, we bidi dabe dali, bomo kimi tamunai. Te bidigo augwali bugagia bidimainogo me ebeo. Menio. Agai augwali dolomainogo ebo dao,” wali.
JER 38:5 Tialima, king Sedekaiago augwaliba te tiwai po wei ponani, “Te dage nogode bidibao. Eno dage me paligobeo,” wali.
JER 38:6 Tialima, te ofisa dabego Jeremaia te ąį ulu me deliba sela pali. Tama augwaligo aga nogode te baklain bono gebelama, tama te baklain bono te dedage pageba tatagalo dulali. Tialima, te dedagede wę meni yai elaluai, tǫ pu naga elaluali. Tama Jeremaia te dedagede dolaluali sogo, agai sągą te tǫ tomoba pali. Te Malkiago dedage, te kingo ogwa, te ami dabe pedai badu te kingo obo tomode elaluai.
JER 38:7 Ebetmelek, te tǫ kantri Sudan bidi, aga te kingo bede ofisa bidi me deli da, agai odali, augwaligo Jeremaia te dedageba muani po wali. Te sogo king aga te moni obo sunumi me delide bidali, augwaligo te Benjamingo sunumi wabo, aga tede dugulalu, te we bidi dabego po tų odolubadi dao.
JER 38:8 Tama Ebetmelek te kingo be tagalama, te kingba po waligi peyu, te tiwai po walio,
JER 38:9 “Edao, genuai bidi, te bidi dabego dwai kolesaga mu Jeremaiabolo yalio. Augwaligo aga te dedage me deliba sąwanio. Tama aga te dedagede bididubaso da, teda aga nai menia selama, te aga isaibao. Nago koneani, te taunde nai mu sǫą pai dao,” wali.
JER 38:10 Kingo te po odama, te agai Ebetmelekbolo te tiwai po wali, “Nago te ena dali bidibo bidi dabe bidi sese deli olama, nogo si bidi selama, te dagego Jeremaia te tǫ dagede ugwaba kekegi pao. Tiyu, aga isiamu dao,” wali.
JER 38:11 Tialima, Ebetmelekgo te bidi dabe te kingo beba sela pelama, tama augwali te kingo mone mubo be habu me deli te dologode elaluali teba pali. Tama augwa te poloba badi ugwa selama, tama augwa te Jeremaia bidibo tǫ dedageba pali. Ebetmelekgo te ugwa nami dabe te baklain bonode kęnama, te Jeremaia bidibo madi aiyaba tagalaluali.
JER 38:12 Tama aga Jeremaiabolo te tiwai po wali, ‘Te ugwa nami dabe nago nogo auguli dologoba munama, te baklain bono nago tigiba keka sao. Te dago nage ugwaba kekebo sogo, te baklaingo nage tigi togoidali weyu obao,” wali. Tama Jeremaiago Ebetmelekgo wali po tiwai yalio.
JER 38:13 Tialima, augwaligo Jeremaia ugwaba kekalio. Tialima, augwaligo Jeremaia te ami dabe badu kalabus bidimainogo yai dao.
JER 38:14 Tama nosali, Sedekaiago te bidi dabe tagala palama, te profet Jeremaia sigi pomainogo elama, te augwaligo aga odasa aselama, tama agai king te Genuai Bidigo be te sela wali sunumide deliba gesabidi ununani. Augwaduba si naga tede bididu, kingo te tiwai po Jeremaiabolo wali, “Eno nagebolo te nai me deli hanalu wabo homu ebao. Te nago dolo ponao. Nago po geme me dualigio,” wali.
JER 38:15 Tama Jeremaiago te tiwai po wei ponani, “Te eno po nagebolo pusubaso da, te mu tamao, te nago ena ela mueibao. Te eno wiegi yai homu kolesaga ebo po nageba mobaso da, teda nago eno po me odogobeo,” wali.
JER 38:16 Tialima, king Sedekaiago e tiwai bomo yai po me deli dąų walali, “Mu tama, te Sesemane Sogo Bidibo Genuai Bidigo nogide obao, aga te bidi da bidibo ula page bidi, eno nage me ela musiąma, te eno nage te dolainogo ebo bidi dabego nogoba me mugobeo,” wali.
JER 38:17 Tialima, Jeremaiago Sedekaiabolo te tiwai po walali, “Genuai Bidi, aga te Tigidali Bomo Elalubo God dao, aga te da Israelgo God, agai te tama po wali, te nago hwįbo tagalama, te Babilon king ofisa dabego nage somainogo eyu da, teda augwaligo nage ela musiąma, te taun me augwaligo isigo ulugobeo. Te nage dali, naga we wai me, bugagia bidaibao.
JER 38:18 Tialima, te Babilon dabego nage somainogo isąbaso da, teda Genuai Bidigo augwaligo te taun somainogo ilama, te augwaligo isigo ulaibao. Tama nage digi te augwalide wi pabo usu egobeo,” wali.
JER 38:19 Tama Sedekaiago Jeremaiabolo te tiwai po wali, “Ena te Babilonba wi pelama, bidigi pali Juda dabe mebade wi ebao. Tiyu, te Babilon dabego ena te Juda dabe nogoba munama, te augwaligo enaba dwai sę idalio,” wali.
JER 38:20 Tialima, Jeremaiago te po wai, “Augwaligo nage te Juda dabego nogoba me mugobeo. Menio. Nago te Genuai Bidigo nageba mayu, eno pedauwalide wabo po tigidali wali pali da, teda nage bugagia bidiyu, te augwaligo nage me ela mugobe dao.
JER 38:21 Tialima, te Babilon dabego nage somainogo isąwani da, te dwai nai dabe nageba pedelaibao. Genuai Bidigo enabolo te ola mani te nade ola mabo sę me deli ebo tiwai yai dao.
JER 38:22 Te nade eno suali, te Babilon dabego te nago bede bidali we dabe selama, tama augwali te Babilon kingo ofisa dabeba odasa pali. Tama eno odali, te we dabego te tiwai po wai, ‘King Sedekaia, nago naga abagi dabego poba homu begi pali, tialima, augwaligo nage tibo po olama, nage aiyaba elalualio. Megi da, te dwai sęgo nage gegelama, te nago sągą te pu tǫ tomoba bida sigulai tiwai yalio. Tama te abagi dabego nage tagalali dao,’ te po wai.
JER 38:23 Eno te na subaso, te eno koneani, mu tama, te Babilon dabego nago we wai tigidali sela paibao. Te nage me augwalide wi pabo me usu egobeo. Menio. Te Babilon kingo nage pageabi yaibao. Nago te Genuai Bidigo po sela sąbaso da, teda Babilon dabego te taun siago ulaibao,” Jeremaiago te po wai dao.
JER 38:24 Tialima, Sedekaiago Jeremaiago po wei ponoyu, te tiwai po wali, “Da sigo te po miani po te gasa bidiba me olamuo. Nago te po hanilama pusali da, te nage isaibao.
JER 38:25 Da si po miani po, te ofisa dabego te po odama, te augwaligo nageba te tiwai hanalu wagasaibao, ‘Nago magi po te kingba waliwe? Te kingo nageba magi po waliwe? Nago dabolo walao. Nago te po geme me dualigio. Tiyu, dago nage ela muabuo.’ Te tobage po augwaligo obaso da,
JER 38:26 teda nago te tiwai po augwaliba wei ponao, ‘Menio. Eno king dali po miani, te agabolo hanalu wali, te agai ena te Jonatango beba kalabus ma tagala paligio, te po wali. Tiyu, ena te beba pobaso da, te ena isidalio wali.’ Nago te po augwalibolo wao,” Sedekaiago te po wai.
JER 38:27 Tama nosali, te ofisa tigidali te Jeremaiaba aselama, hanalu wai. Tama agai augwaliba po wei ponoyu, te kingo agaba wali po tiwai wali. Te king Jeremaia dali wali po te bidi deli mego me odobeo. Tama te ofisa dabego sunumi menia sobaso, te augwaligo Jeremaia tagalama, palio.
JER 38:28 Tialima, Jeremaia te ami dabe badu kalabus elaludubadi, te boi bidi dabego te Jerusalem sagasobo sogoba usu nai dao.
JER 39:1 Te nogo si polua, te kibu be 9 te Sedekaia Juda king bidali sogo, te Babilon king Nebukatnesargo aga ami tigidali selama, te augwali aselama, Jerusalem bagulama, te taun sainogo boi hwįanio.
JER 39:2 Augwaligo hwįnama, hwįnama, te waiya si me deli, te polua a naga me deli bidali, tama te kibu be 11 te Sedekaia king bidali, te polua me si me si, te polua dei te 9 wabode, augwaligo te masigigo nigai moni obo pedai me badu deli aluama, te Jerusalem tomoba pai dao.
JER 39:3 Tialima, nosali te Babilon kingo ofisa tigidali te taun tomoba pai. Tama augwali obo genuai sunumiba pali, augwa te nogi Tomo Sunumi dao, augwali teba duagi pelama, te taun tonaluai. Te ami dabe augwa polalubo ofisa bidi dabego nogi e tiwai dao, Nergal Sareser, me Sangar Nebo, me Sarsekim, me gasa sabi Nergal Sareser.
JER 39:4 King Sedekaia dali te tigidali ami dabego te Babilon dabe asobo sulama, te augwali wi pai. Te hulide augwali te kingo gi badu pelama, tama augwa te moni obo si ununani te sunumidu te wi pai. Tama augwa te Jordan wę odogo pesagedu pabo sunumi wali pali.
JER 39:5 Tiali goli, te Babilon ami dabego te augwali pobeasa pelama, te malu tǫ pesage dolo te Jeriko taun pąde Sedekaia pabo madi pedelai. Te augwaligo aga pageabi elama, te king Nebukatnesarbolo odasa pali. Te sogo king Nebukatnesar te taun Riplade bidai, te tǫ pedai Hamat tǫ tomode bidalio. Tama Nebukatnesargo Sedekaia sulama, te po walio, Sedekaia te aga yali dwai sęde dwai dene saibao wali.
JER 39:6 Te Babilon dabego te Sedekaiago ogwa dabe me te Juda tobolu bidi dabe selama, tama augwaligo augwali te Ripla teba odasa asali. Tama te bulude Nebukatnesargo te po obaso, te Sedekaiago ogwa dabe te Sedekaiago gedude augwaligo ela muai. Tama te Juda tobolu bidi dabe me augwaligo ela muai dao.
JER 39:7 Te kingo po obaso, te augwaligo Sedekaiago gedu si gudama, te augwaligo aga nogo sągą te brasgo nigai sengo kęąnio, te augwaligo aga te Babilonba sela painogo tiai dao.
JER 39:8 Tama Jerusalemde te Babilon ami bidi dabego te kingo be me, we bidi dabego be me, isigo ulalio. Tama augwa te Jerusalem bagulali genuai masigigo nigai obo me pebe delama, sąwai dao.
JER 39:9 Te Nebusaradan, aga te Babilon ami dabego polalubo ofisa bidi te Jerusalemde bidali, agai te Jerusalemde bidaluali we bidi tigidali selama, te augwali Babilonba kalabus igi painu odasa pali. Te Jerusalem tagalama, agaba polobadu wi asali Juda dabe me selama, te agai augwali me te Babilonba kalabus igi peyu, odasa pai dao.
JER 39:10 Tama agai te doado bage meni yai bidi dabe naga te Juda tǫde bidimainogo yalio. Te tǫ mu meni yai we bidi dabe, me agai wain gi dabe, me te gasa gi dabe te augwaliba mawai dao.
JER 39:11 King Nebukatnesargo Jeremaia homu kone palama, te Jerusalemba te aga polalubo ofisa bidi Nebusaradanba po ola tolali. Nebukatnesargo po te tiwai wali,
JER 39:12 “Nago Jeremaia sigi pelama, bugagia tonaluao. Nago agaba dwai sę me igio. Te agai magi sę me yainogo nageba hanalu obaso, te nago agai homu wali pao,” wali.
JER 39:13 Tama tialima, Nebusaradan dali te polalubo ofisa si aga dologoba pali, te Nebusasban, me Nergal Sareser, te gasa Babilon ofisa dabego me te tiwai homu deliba munama,
JER 39:14 augwaligo te bidi dabe te ami dabe pedai badu tagala palama, te Jeremaia sigi pali. Tama augwa Jeremaia te Gedaliago nogoba muani, te Ahikamgo ogwa, te Safango bulai wąį dao. Tama augwaligo Gedaliabolo po walama, te Jeremaia agai beba sela pao wali. Tama tialima, Jeremaia Juda tǫde te we bidi dali bidalio.
JER 39:15 Te Jeremaia ami dabe badu kalabus bidibadi, te Genuai Bidigo agabolo te tiwai po mawai,
JER 39:16 “Nage te Ebetmelekba pao, te Sudan bidi dao, agabolo e tiwai po wao, ‘Tigidali Bomo Elalubo Genuai Bidi, aga Israelgo God, agai te tiwai po wai. Polobadu eno te taun dolaibao po wali, te megi da, eno te po usu naibao. Eno te taun wiegi yai bugagia me iligobeo. Tama naga digi nago eno te sę ebo sueibao.
JER 39:17 Tialima, ena Genuai Bidi, eno te po obao, eno te sę dabe ebo sogo da, teda eno nage tau saibao, te augwaligo nage te nago wi ebo bidi dabe nogoba me mugobeo.
JER 39:18 Eno nage bugagia tonalubaso, te nage augwaligo me eligobeo. Nago homu enaba dąų obaso, te nage me isigobeo. Ena Genuai Bidi eno te po wai dao,’” wali.
JER 40:1 Nebusaradango Jeremaia olo pomainogo tagala palama, te tudi badu nosali Genuai Bidigo Jeremaiabolo po mawai. Te Babilon dabego te Jeremaia dali, te Juda we bidi dabe me, Jerusalem me selama, augwali te sengo kęnani, te augwali Babilonba kalabus odasa painogo tialio. Tialima, augwali te Rama taunba sabalobo sogo, te polalubo ami tobolu bidi ofisa Nebusaradango Jeremaia te augwali dali bidibo suali, te agai aga te olo tagala palu pao wali.
JER 40:2 Tama te sogo Nebusaradango Jeremaiabolo te tiwai po wali, “God, nago Genuai Bidigo, te po hanilama weyu, te dwai nai te tǫ kantriba pedelaibao wali.
JER 40:3 Tama megi da, Genuai Bidigo po wali gilama te sę pedalubao. Dage Israelgo te Genuai Bidigo po sela sąnama, te agai gedude dwai sę yalio. Te pagede naga tama, te sę dabe dageba pedalubo dao.
JER 40:4 Tialima, odao. Megi da, te eno augwaligo nage nogode kęąni sen pisigina sąbao, te nage olo bidagameo. Te nage ena dali Babilonba asabo homu ebaso da, teda nage asao, te eno nage bugagia tonalueibao. Tialima, te nago hagela homu ebaso da, te usu da, nage bidao. Te tǫ kantri pedai mena badu te nage pabo homu yali da, te nage peyu naga yagameo,” wali.
JER 40:5 Jeremaiago te po odali, tiali digi agai te Nebusaradan taga pisąbadi, tama Nebusaradango Jeremaiabolo po ma weyu, te tiwai po wali, “Te meni baso da, teda nage te Gedalia bidibo madi pao, aga te Ahikamgo ogwa, te Safango bulai wąį dao. Te Babilon kingo aga dąį ilama, te Judago taun dabe tonalumainogo yali. Aga ede te we bidi dabe dali bidaibao, tama nage aga dali bidao. Te nago homugo te nage menaba pabo homu eyu da, te nage pagameo,” wali. Tama Nebusaradango te Jeremaia wiegi yai homu pemene ilibo wiegi yai nai me deli olo mobadi, te nai me menama, te Jeremaia pomainogo yai dao.
JER 40:6 Tialima, Jeremaia te Gedalia bidibo madi te taun Mispa teba pai. Tama Jeremaia aga dali te we bidi hani tomode te Juda tǫde bidalio.
JER 40:7 Te Juda ami bidi meba dali, te augwa ofisa dabe me, augwali te tǫ kantri pedai mebade bidali. Augwaligo te tiwai po odali, Babilon kingo Gedalia te Juda tǫde polalubo gavman dąį ilama, bidibao wali, tama agai te magi walu doado bage meni yai bidi dabe, te Babilonba kalabus sela pisąwani bidi dabe tonalubo sę ebo dao wai.
JER 40:8 Tialima, te ofisa dabe augwa ami bidi dabe selama, tama augwaligo Gedalia te Mispa teba sugi pali. Te ofisa nogi dabe e tiwai, Ismael, Netaniago ogwa, te Johanan me Jonatan, te Kareago ogwa si, te Seraia, te Tanhumetgo ogwa, te Netofa bulu bidi Efaigo ogwa dabe me, te Jesania, te Maka tǫ bidi dao.
JER 40:9 Gedaliago augwali sulama, augwaliba te tiwai po wali, “Nogo guni sisu weyu, eno mu po obao, dage te Babilon dabe dologode bidibo wi me igimio. Menio. Dage te tǫde bidalu, te Babilon king dologode bidali da, te dage bugagia mu bidaibao.
JER 40:10 Ena digi ena te Mispade bidaibao. Te Babilongo da suagasobo sogo da, te ena dago Judade po pusubo bidi tiwai bidaibao. Tialima, dage te duga sali taun dabeba ma begasa pelama, te dagego ni du wai dabe selama, te wain me, wel me nigilama, te nosali sogo tuabo munalumainao,” wali.
JER 40:11 Te sogo te Juda dabe me badu te tǫ pedai Moap, me Amon, me Idom, me gasa tǫ kantri badu bidaluali. Augwaligo te tiwai po odali, te Babilon kingo te dwasianu hani we bidi te Juda tǫde bidimainogo elama, te kingo Gedalia dąį ilama, augwali tonaluao po wai.
JER 40:12 Tialima, te Juda dabego te boi bidigo augwali sela sąwani tǫ kantri tagalama, te augwali Judaba ma asalio. Tama augwaligo Mispa teba Gedalia sugi pali. Tama nosali, augwaligo te gide haniani nai sali, te augwaligo wain me wiegi yai nai hauwa elaluai.
JER 40:13 Me sogo deli Johanan, te Kareago ogwa, te Juda ami bidi te gasa ofisa dabe, augwali te Gedalia bidibo madi te Mispa teba asali.
JER 40:14 Tama augwaligo agabolo te tama po wali, “Te tǫ kantri Amon king Balisgo te Ismael tagala palali, te Netaniago ogwa, aselama, nage ela muagasaibao. Nago te koneaniwe, ma meniwe?” wali. Tialima, Gedaliago te augwaligo poba homu muyu, te mu po da wabeo.
JER 40:15 Tama te Johanan dali Gedalia augwa si bidudali sogo, Johanango Gedaliabolo te tiwai po walio, “Te nago enabolo te Ismael eligi pao po obaso, te usu egowe, ma meniwe? Te sę ebo te mena bidigo me konegobeo. Tiyu, nago aga gogolobaso, te agai nage ela muabuo, te megi nage dali sisinagasali Juda dabe, te augwali tedela palama, tama dago dwasianu hani te mu dolaibao,” wali.
JER 40:16 Tialima, Gedaliago Johananba te tiwai po wei ponanio, “Nago te tiwai kolesaga me elamuo. Nago Ismaelbolo te wabo po mu po me wabeo,” wali.
JER 41:1 Ismael te Netaniago ogwa, te Elisamago bulai wąį, tama aga Juda king dabede hani bidi me deli dao. Aga te kingo polalubo ofisa bidi me deli tiwai bidali. Babilon kingo Gedalia te Juda gavman polalubo bidi pedalumainu dąį ilali, te polua a naga olama, me badu si te kibu bede digi, Ismaelgo nogo si bidi selama, te Gedalia Mispa teba suagasali. Tama augwali Gedalia dali dugulama, nai tudali sogo, Ismael dali te nogo si bidi hodasa holama, te augwa bainat hwą selama, te Gedalia ela muai dao.
JER 41:3 Tama Ismaelgo te Mispade te Gedalia dali bidali Juda hani me elali, te agai Babilon ami dabe Mispade te sogo bidali, te me ela muai dao.
JER 41:4 Te nosali side, te bidi dabego te Gedalia isali konesiąwani sogo,
JER 41:5 te bidi sese me si me si te taun Sekem, me Silo, me Samaria, te bulu bidi dabe te sunumidu aselama, te Mispa pąba yagasali. Augwaligo te nai wit meba badi, te wiegi yai denami ebo pauda me selama, augwali te Genuai Bidigo be te Jerusalemba selasa aselama, te ofa yainogo yali. Te bidi dabe augwa penani nisi poalama, te augwa ugwa pisilama, te augwa tigi tologolama, te augwa polobadu yali dwai sęde homu dene ola mayu tiai dao.
JER 41:6 Ismaelgo augwali asobo sulama, aga te Mispa tagalama, te sunumidu pai. Te bidi dabe augwaliba homu dene eyu, gela oba homu emainogo te aga gela wali, te aga augwali dali gesabidi deliba yali. Te agai augwaliba te tiwai wali, “Gedaliago dage suagasomainogo homu ebao,” wali.
JER 41:7 Tialima, augwali te taun tomoba pelama, te Ismael aga hani dabe daligo te genuai hani bidi ela munama, te augwali tigi dabe te ąį ge doso nigilai dedageba tudulai dao.
JER 41:8 Tialima, te genuai hanide nogo si bidigo Ismaelbolo te tiwai po wali, “Nago da me ela mugio. Dago nage nai hauwa mawaibao, te kala bulu du pesagede geme dualama elalubao. Dago te nai wit, me rais bali, me oliv wel, me pusu nai hani me elalubao,” wali. Ismaelgo augwaligo po odama, agai te nogo si bidi me ela mubeo.
JER 41:9 Te wę gebo dabo dedage, polobadu te Juda king Asago nigai, te Israel king Basago augwaliba hwį yagasali sogo. Te Basago te taun bagua selama, te Mispa dabe ąį sǫą pidali weyu nigilali. Tialima, Ismaelgo hanigo te augwaligo Gedalia ela muani sogo elali bidi dabe tigi selama, tama augwaligo te wę dąų wali dedageba tudulama, te dedage pągąwai dao.
JER 41:10 Tama nosali, Ismaelgo te Mispade bidali gasa we bidi tigidali selama, te aga dali odasa pai. Augwali te Mispa tagalama, augwali te Amon tǫ kantriba pabo sunumidu pali. Te we bidi dabe te Nebusaradan hani dabego, te Babilon ami polalubo ofisa bidigo, te Gedaliago Mispade tonalumainogo taga pali we bidi dabe dao. Tama te Juda kingo wegi dabe augwali dali bidai dao.
JER 41:11 Johanan, Kareago ogwa, te gasa ofisa dabe me Juda ami daligo, te Ismaelgo dwai kolesaga tigidali yali po odalio.
JER 41:12 Tama tialima, augwa ami hani dabe selama, te augwaligo Ismael wali pobelama, aga dali hwįainu yali. Tama augwali agaba sabolali, te taun Gibeon te genuai sigi ąį pąde elalubo madi pedaligi palio.
JER 41:13 Tialima, Ismaelgo te Mispade selama aga dali odasa asali we bidi dabe, augwaligo Johanan dali gasa ofisa dabe me sulama, te augwali wiegi yai homu pemene yalio.
JER 41:14 Tama augwa te Ismael tagalama, te Johananba uda walio.
JER 41:15 Tama Johanango hanigo te Ismael tola sainogo yali, tialima, aga te nogo a naga olama, sela bidi dali wi pelama, te augwali te tǫ kantri Amonba pai dao.
JER 41:16 Tama nosali, Johanan dali, gasa ofisa dabe me, augwaligo te Mispa we bidi dabe te Ismaelgo nogode ma selama, te augwa Gibeon taga palio. Te ami dabe, me te gasa bidi dabe, me te we wai, me te sę bidi, me te kingo hani bage, augwali me te hanide elaluai dao.
JER 41:17 Johanango augwali te Isipba odasa painogo yali, magi baso meni, te Ismaelgo Gedalia ela muani augwaligo homu koneani, te bidi Babilon kingo dąį ilama, te Juda tǫ tonalumainogo yai. Te augwa wi eyu, te homu yali, tiyu te Babilon dabego te sę homu yali, tiyu te Babilon dabego te sę pedelali po odama, augwali dolagasidalio. Tialima, augwali te Isipba pabo sunumidu pali. Te augwali te bulu Gerut Kimham, te Betlehem taun pąde, teba pedelama, augwali tede osogo bidai dao.
JER 42:1 Tama nosali, Johanan, me Jesania, te Hosaiago ogwa, te gasa ami ofisa dabe me, tigidali we bidi me, te genuai bidi dabe me, olo bidi dabe me, augwali hogodama,
JER 42:2 te Jeremaia bidibo madiba pali. Te augwaligo agabolo te tiwai po wali, “Edao, te nago Genuai Bidi Godiba nago gedu haluasa po weyu, te agabolo hanalu, te da dwasianu hani we bidi tau somainogo yao. Polobadu da hauwa elaluali, tiali goli megi nago suali, da dwasianu hani naga bidibao,” wali.
JER 42:3 “Dago homugo te Genuai Bidi nago God te dago mena sunumi wali pelama, te mena sę dago yabo po dabolo omainao,” wali.
JER 42:4 Tama profet Jeremaiago augwaliba te tiwai po wali, “Te dagego wabo pode eno usu da po obao. Te dagego enabolo hanalu wali po wali gilama, te dagego Genuai Bidi Godiba gedu haluasa po weyu, hanalu waibao. Te Genuai Bidigo enaba mena po wei ponobaso da, te eno dagebolo pusaibao. Eno te po me deli dagede geme dualugobeo,” wali.
JER 42:5 Tialima, te we bidi augwaligo Jeremaiabolo te po wali, “Mu dao, te Genuai Bidi nago Godigo dabolo mabo po, tigidali dago wali paibao. Genuai Bidigo mu kolesaga eyu, sesemane sogo doloba pai elalubao, te dago agai po wali pisąbaso da, teda agai da po tų ilimainogo yaibao.
JER 42:6 Genuai Bidigo te wei ponobo pogo da pemene ebaso, ma meni ebaso me tagalao, te dago hanalu wali pode te agai nagebolo mani po tigidali dago wali paibao. Dago Genuai Bidi dena Godigo po wali paibao, tama tiyu, da bugagia bidaibao,” te we bidigo te po wai.
JER 42:7 Te nogo si sogo bidama, nosali Jeremaiago gedu haluasa po gagalama wali, Genuai Bidigo po agabolo mawai dao.
JER 42:8 Tama Jeremaiago Johanan, me te gasa ami ofisa tigidali, me te tigidali we bidi me i wali, te gegunai bidi dabe me, olo bidi dabe me i olama, te augwali asai dao.
JER 42:9 Te agai augwaliba te tiwai po wali, “Dagego enabolo hanalu, te Genuai Bidiba gedu haluasa po omainogo yali, da Israelgo God dao. Tialima, Genuai Bidigo te tiwai po wali,
JER 42:10 ‘Dage te Judago tǫde bidibaso da, teda ena, Genuai Bidi, te eno dage dąų walama, te dage eno aiyaba me elalugobeo, magi baso meni, eno te dene mabo sę dageba yali, tego ena haliga sęgę mu ilai dao.
JER 42:11 Dage te Babilon kingde wi ebao, tialima, ena Genuai Bidi, eno po dolo obao, dagego agade wi ma elamu dao, magi baso meni, ena dage dali bidibao. Te eno dage tau selama, te dage agai nogode ma saibao.
JER 42:12 Eno olo mu tau sabo wiegi yai homu kolesaga dageba eyu, te eno digi agai me dageba te olo tau sabo wiegi yai homu ebo kolesaga emainogo yaibao. Tama agai dage te duga page buluba pomainogo tagala palaibao,’ Genuai Bidigo te po wai,” Jeremaiago te po wai.
JER 42:13 “‘Tialima, dagego Genuai Bidi eno po sela sągio, duga Godigo po sela sąyu, te po olamu dao, “Da te Juda tǫde me bidigobeo.
JER 42:14 Menio. Da Isipba paibao. Da te Isipde naga bidibadi, te boi bidi dabego da dali me hwįagasogobeo. Te bidi dabego hwįgi painogo biugel bu weyu da, i me wagobeo. Te nai me da me sǫą pogobeo.”
JER 42:15 Te tobage po dagego obaso da, teda ena Genuai Bidi, eno dage te dwasianu Juda hani we bidide po elalubao. Ena Tigidali Bomo Elalubo Genuai Bidi, ena Israelgo God, eno te po obao, te dage Isipba bidigi pabo bomo mu ebaso da,
JER 42:16 teda dagego wi ebo sę dabe te Isipde dageba pedelaibao. Te boi bidi dabego dage ela munama, te dage nai sǫą peyu, isaibao.
JER 42:17 Te Isipba bidigi painogo bomo ebo bidi tigidali, te augwali isaibao. Te boi bidi dabego augwali ela muyu, te augwali nai sǫą pelama isiyu, me dwai gasi selama, te augwali isaibao. Eno te dene mabo sę dabe augwaliba pedalumainogo elama, te augwali hani mu silaibao, te deli me bidigobeo.’”
JER 42:18 “‘Ena Tigidali Bomo Elalubo Genuai Bidi, ena Israelgo God, eno po dolo obao, polobadu eno haliga sębę umabo mu te Jerusalemba elama, te eno augwali mu dolai dao. Te tiwai naga, te dage Isipba pobaso da, teda eno haliga sębę umabo mu elama, te dage dolaibao. Te gasa bulu hani we bidi augwaligo eno te dwai sę dageba yali po odolama, te augwali wi elama, nogo hogwabo tiwai eyu, midigi dwai mu yaibao. Te augwaligo dage dolama, posobo po waibao. Te augwa boi bidi dabeba dwai po wabo homu ebo sogo da, augwa te tiwai po waibao, “Dage te Juda dabe dolali tiwai dolagameo,” te po waibao. Tama dagego duga te tǫ ma sugobeo,’ Genuai Bidigo te po wai,” Jeremaiago te po te Juda we bidi dabebolo wali.
JER 42:19 Jeremaiago te Genuai Bidigo po pusula silibo si da, teda agai te tiwai po wali, “Dage dwasianu Juda hanigo, odao. Genuai Bidigo dage te Isipba pigio wali. Tama tialima, eno dageba te mani bomai po bugagia homu kone palao.
JER 42:20 Dagego enabolo te Genuai Bidiba gedu haluasa po omainogo hanalu wagasali, dena God, te enabolo dagego e tiwai po wali, ‘Jeremaia, Genuai Bidiba gedu haluasa po wao, dago God, te agai po dabolo momainogo hanalu wao. Te agai mena po nagebolo mobaso da, teda nago dabolo olama, te dago wali paibao,’ dagego tama wali. Tiali goli, megi dagego gasa kolesaga yainu ebao, te kolesaga mu geda mubao, te tama tebogo dage dolaibao.
JER 42:21 Megi naga te Genuai Bidi dagego Godigo pusali po tigidali, eno te po dageba mao walio. Tialima, dagego te po wali me pabe dao.
JER 42:22 Tialima, dagego e tiwai tama dolo koneao, dage te bidigi painogo ebo badu, te boi bidi dabego dage ela mueibao, te dage nai sǫą pelama, nasigo isaibao, te dwai gasi dageba pedelama, te dage isaibao,” Jeremaiago te po wai dao.
JER 43:1 Jeremaiago te tigidali po God Genuai Bidigo agabolo weyu, te we bidi dabeba mao wali pusalio. Agai po ola silibo si da,
JER 43:2 tialima, Asaria, te Hosaiago ogwa, me Johanan, Kareago ogwa dali, te gasa hagoma ebo bidi dabe dali, augwaligo Jeremaiabolo e tiwai po wali, “Nago tibo po obao. God, dago Genuai Bidigo dabolo te po wagasu, te da Isipba me pigio olama, te nage me tagala palobeo. Mu menio.
JER 43:3 Te Baruk, Neriago ogwa naga te nago homu hodolobaso, te da aiyaba elalumainu ebao. Nago homugo te Babilon dabego da selama, da ela muyu, ma da Babilonba kalabus igi pomainogo odasa pomainogo ebo dao,” wali.
JER 43:4 Augwaligo te tama po olama, te Johanan, me gasa ofisa dabego, me te tigidali we bidigo te Genuai Bidigo po sela sąnama, augwali te Juda tǫde bidibeo. Menio.
JER 43:5 Johanan dali te ofisa dabego te Judade bidali we bidi tigidali selama, te augwali palio. Augwaligo te bidi, me we, me wai dabe, te polobadu te boi bidi dabego gasa tǫ kantriba ela gudulai, te augwali Juda tǫba ma bidagasai. Tama me, augwaligo te Juda kingo wegi dabe dali, te gasa we bidi dabe me, te Nebusaradan, te Babilon amigo polalubo ofisa bidigo, te Gedalia dąį ilama, augwali tonalumainogo yali. Tialima, Johanan me, gasa ofisa dabego dali, te tigidali Juda, me profet Jeremaia, me Baruk te Neriago ogwa dali selama,
JER 43:7 tama augwa tigidali te Isipba odasa pali. Te tama tiali kolesagade augwaligo te Genuai Bidigo po sela sąwai. Tialima, augwali pelama, te taun Tapanesba sabolali, te tǫ kantri Isip dao.
JER 43:8 Augwali te Tapanesde bidibadi, te Genuai Bidigo Jeremaiabolo te tiwai po walio,
JER 43:9 “Isip kingo be te taunde elalubao. Te Juda dabe mebago nage subo sogo, nago te genuai masigi dabe sigi pelama, tama augwali te tǫde elalubo brik dabe pagede pubulao, te mama tǫde, te Isip dabego kingo be sunumi pąde tama tiao.
JER 43:10 Tama te Juda dabeba nago te tiwai po wao, ‘Tigidali Bomo Elalubo Genuai Bidi, aga te Israelgo God, agai te tama po wai, “Ena Genuai Bidi dao, te eno ena sę bidi, te Babilon king Nebukatnesar i waibao, tama aga te buluba asaibao. Tama aga duabo sia king te pubulali masigi dabe daide mueibao. Te agai ugwa be pasugulama, te masigi munalubo tǫ pedai badu mesegelaibao.
JER 43:11 Agai te Isip tǫ kantri dolagasaibao. Eno te dwai gasi selama, isabo bidi meba dąį ilaibao. Tama te sogo augwali dwai gasi saibao. Te gasa tǫ kantriba kalabus igi pabo bidi meba eno dąį ilaibao. Te sogo augwali kalabus yaibao. Te boi hwįgi pelama isabo bidi meba eno dąį ilaibao. Tama te dąį yali side hwįgi pobaso, te augwali isaibao.
JER 43:12 Te eno Isip dabego lotu be siago ulaibao. Te lotu be dabede te Isipgo tibo god piksa dabe elalubao. Te Nebukatnesargo te piksa meba siaba ulama, te meba aga tǫ kantriba sela paibao. Te agai Isip kantride nai tigidali sela sąwaibao, te sipsip tonalubo bidigo aga gudali ugwade te kibu tugunu sela sąbo tiwai yaibao. Te agai Isip dabe mu elalueibao. Tama aga te tǫ kantri tagalama, paibao.
JER 43:13 Aga te Isipde bidibo sogo, agai te we bidi dabego bede te giliga augwa god dao olama, lotu udali bobage masigi pos aluaibao. Tama agai te Isip dabe tibo godigo lotu be dabe tigidali siago ulaibao,” Israelgo God Genuai Bidigo te po wali,’ te po te Juda dabeba pusao,” Genuai Bidigo te po wai.
JER 44:1 Genuai Bidigo po Jeremaiabolo mawai, te agai Isipde bidibo Juda dabeba pusumainogo yai. Augwali te taun Mikdol, me Tapanes, me Memfis, tede bidali, te saut Isip badu me bidai. Jeremaiago te tiwai po wai,
JER 44:2 “Tigidali Bomo Elalubo Genuai Bidi, aga da Israelgo God, agai te tiwai po wali, ‘Duga digi te tigidali dene mabo sę ena Genuai Bidigo te Jerusalemba me te tigidali Juda taunba yali sę suai dao. Megi augwali dolama elalubao, tede bidi me bidibe dao.
JER 44:3 Eno augwali dolali, magi baso meni, te Juda dabego dwai kolesaga hauwa yali, te tama tialigo te eno augwaliba haliga sębę yabo sę ilali. Augwaligo te gasa godiba lotu weyu, te augwaliba wiegi yai denami ilibo hano ebo ofa yali. Augwaligo te god dabe polobadu me konesiąwai. Te dage ede bidibo Juda dabe, te dagego wąį nǫų dabego me te god dabe polobadu me konebeo.
JER 44:4 Hauwa sogo eno ena sę bidi dabe, te profet dabe, te dage Juda dabeba tagala palai. Te augwaligo eno po e tiwai pusali, “Dagego eno homu godolo isąbo te kugumini yai kolesaga dabe igimio,” wali.
JER 44:5 Tialima, te Juda dabego te poba olo musiąma, te augwaligo wali me pabeo. Te augwa dwai kolesaga ebo me tagalisąma, te augwa tibo godiba lotu wabo me tagalobeo.
JER 44:6 Te eno haliga sębę umabo mu augwalide elama, te eno Juda taun dabeba, me Jerusalem sunumi dabeba me dolobo sę eyu, te augwali eno dwagila mu dolali. Te augwali doludubadi geąį dao,’ da Israelgo Godigo te po wai,” Jeremaiago te po wali.
JER 44:7 “‘Tialima, ena God, Tigidali Bomo Elalubo Genuai Bidi, ena Israelgo God dao, megi eno te tiwai po obao. Magi baso dagego te duga digi dolabo homu ebawe? Te kolesaga dagego ebaso da, teda dage Juda bidi, me we, me wai puluba dolama, te dage deli me bidigobeo.
JER 44:8 Dage Isipba bidagaselama, dagego te tibo god dabegopiksa nigilama, te wiegi yai denami ebo ofa te god dabebaebo dao. Dagego te tebo kolesagade ena haliga sębę dwaimu ilibao. Tibaso, te dage dolaibao. Te gasa tǫ kantribulu we bidi dabego dageba dwai posobo po waibao. Te augwa boi bidi dabeba dwai po wabo sogo da, tedaaugwaligo te po waibao, ‘Dage te Juda dabe dolali tiwaigilama yagameo,’ te po waibao.
JER 44:9 Te duga wąį nǫųdabego me, te king dabego me, te kingo we dabego medwai kolesaga yali. Te dage me, duga we dabe dali, tedwai kolesaga ebao. Dage tigidaligo te kolesaga te Judatǫ pedai tigidali badu eyu, te Jerusalem sunumi dabedeme yali. Dagego te homu kone gegeda palai da, agawe?
JER 44:10 Megiba usu nagasu, te duga ebo dwai kolesagadehale elama, te dage ena dologoba me asobeo, te dagegoeno bomo yai po, me eno po te dagebolo me duga wąįnǫų dabebolo mani po, te wali me pabe dao,’ Godigote po wai,” wali.
JER 44:11 “‘Tibaso ena, Tigidali Bomo Elalubo Genuai Bidi, ena Israelgo God, eno te po obao, eno dage Judadabeba boi bidi homu elama, dage dolabo homu elalubao. Te dage deli me bidigobeo.
JER 44:12 Eno dage te Isipbabidagasainogo bomo yali dwasianu Juda hani te musilaibao. Te dage te Isipde bidibo sogo, dage isaibao. Teboi bidi dabego dage ela munama isibadi, te nai sǫą peyu, nasigo isibadi yaibao. Dage tigidali isaibao, te gegunaibidi dabe me, olo bidi dabe dali isaibao. Te gasa bulu webidi dabego eno dagede te yali sę po odama, te augwaliwi mu elama, midigi saibao. Te dage dolama, posobo powaibao. Te augwa boi bidi dabeba posobo po wabosogo da, augwa te tiwai po waibao, “Dage te Judadabe dolali tiwai gilama yagameo,” waibao.
JER 44:13 Enodagebolo dene mabo sę te Jerusalem dali yali sę tiwaiyaibao. Te dage boi bidigo ela muyu, te dage nai sǫąpelama isibadi, te dwai gasi selama, isibadi yaibao.
JER 44:14 Dage megi Isipde bidibo dwasianu Juda hani, dagego te Juda tǫba ma pabo homu godolo ebao. Tiali goli, te dageme deli te dolabo sęgo geda munama, te duga tǫba mepogobeo. Dage tigidali dolaibao, te deli deli bidi naga wipeyu, ma paibao,’ Genuai Bidigo te po wali.” Jeremaiagote Isip tǫde bidali Juda dabebolo te po pusali.
JER 44:15 Genuai Juda hani sisinagasai elalubadi, tama Jeremaiago te po pusali. Te tigidali Juda te Isip saut badu bidibo Juda dabe, augwali me bidali. Te sisinibo madi asali bidi tigidaligo, augwa te tama koneani, augwa we dabego te wiegi yai denami ebo ofa te gasa god dabeba ebo da homu yali. Tialima, te bidi dabe augwa we dabe daligo Jeremaiago po wei ponama, te tama po wali,
JER 44:16 “Nago te Genuai Bidigo nogide dabolo po pusali. Tiali goli, dago te po me odogobeo. Menio.
JER 44:17 Dago te dena yaibao olama, po dąų wali sę tigidali yaibao. Dago te wiegi yai denami ebo ofa te god weba idu geaibao, augwa te tama nogi yali, Te Dagalude Kwin We dao wali. Te dago agaba te wain ofa gelidu geaibao. Polobadu dena digi me, dago wąį me, king dabego me, te tobolu bidigo me, dago te tobage ofa Te Dagalu Kwin Weba yali. Dago te ofa te Juda taunde, me Jerusalem sunumi dabede yalio. Te dago tama tiali sogo, te dago nai hauwa elalu, te da bugagia bidiyu, te dwai me deli dabolo me pedalubeo,” te po wali.
JER 44:18 “Te dago Dagalu Kwin Weba ofa ebo tagalali tede gagalasa, te megi sogoba usu nagasu, te da tigidali nai mu sǫą pelama, te boi bidi dabego da ela muyu, te nai sǫą pelama, nasigo isiyu ebo dao,” Juda dabego te po walio.
JER 44:19 Te we dabe sibigo po wadolama weyu, te po wali, “Dago te Dagalu Kwin Weba ofa ebo sogo, te dago bisketgo aga piksa tiwai nigali, dago te wain ofa agaba gelali, te dena bidi dabego te dago te kolesaga ebo koneani. Nago te konebe, agawe?” Te we dabe sibigo te po wali.
JER 44:20 Jeremaiago te po odama, tama agai te we bidi tigidaliba te tiwai po wei ponani,
JER 44:21 “Te dage, me duga wąį nǫų dabe, me king dabe, me tobolu bidi dabe, te Juda tǫde tigidali we bidi te Juda taun dabede bidali, me Jerusalem sunumi dabede bidali, te wiegi yai denami ebo ofa yali, te Genuai Bidigo dagego te yali kolesagade homu kone isąwai da, agawe? Menio. Agai bugagia homu kone palai dao.
JER 44:22 Dagego te dwai kugumini yai kolesaga ebaso, tama nosali Genuai Bidi dagego te kolesagade hagela mu yai. Tama agai te tama sę elama, te dagego tǫ dolama olo elalubadi, te bidi bidisiąbadi, te megi e sogoba usu nagasobao. Te gasa tǫ kantri we bidi dabego te augwa boi bidi dabeba dwai po wabo sogo, augwa te tiwai po waibao, ‘Dage te Juda tǫ dolali tiwai gilama dolagameo,’ wabo dao.
JER 44:23 Dagego te tibo godiba te wiegi yai denami ebo hanoilibo ofa mobaso, te dagego Genuai Bidi gedude sęgęsobao. Te dagego agai bomai po sela sąnama, te agaite tobage bomai po dabe wali me pabeo. Tama tibaso, dageba te dwai sę pedalumainu elama, te megi tama meelalubo dao,” Jeremaiago wali.
JER 44:24 Tialima, Jeremaiago po meba te tigidali Judabolo pusali. Agai po te we dabeba kisilama wainogo, te tiwai po wali, “Dage Isipde bidalubo tigidali Judago, te Genuai Bidigo poba bugagia olo muao.
JER 44:25 Tigidali Bomo Elalubo Genuai Bidi, aga da Israelgo God dao, agai te po wali, ‘Te dage bidi dabe te duga we dabe daligo te dagego dąų wali po usu nainogo ebao. Dage te tama po dąų wali, “Dago te wiegi yai denami ebo ofa eyu, te wain gelibo ofa te Dagalu Kwin Weba yabo po dąų wali, mu tama dago te dąų wali po usu naibao.” Tialima, tegoba, dagego te po dąų weyu, te yaibao wali sę dagego iyąo,’ Genuai Bidigo dagebolo te po wali,” Jeremaiago wali.
JER 44:26 “Te Genuai Bidigo te me me wali, ‘Tialima, dage te Isipde bidalubo tigidali Judago, dagego Genuai Bidi eno poba bugagia olo muao. Eno mu po ena genuai nogide obao, te dage Isipde bidibo Juda dabe me deligo eno nogide bomai po dąų obaso, usu egobeo. Te dagego te tiwai po munu ma wagobeo, “Te sesemane sogo bidibo Genuai Bidi Godigo nogide mu dao,” munu me wagobeo.
JER 44:27 Ena Genuai Bidi, eno po dolo obao, eno dage bugagia wiegi yai me iligobeo. Menio. Eno dage dolainogo tonalubao. Te eno boi bidi tagala palama, te dage Isipde bidibo Juda dabe ela muagasaibao. Te dage nai menia siyu, isaibao. Te dage tigidali mu silaibao.
JER 44:28 Dage bidi deli deli naga te hwįbode me dologobeo, te augwa Isip tagalama, te Juda tǫba ma paibao. Te sogo dage Isipba bidagasali dwasianu Juda hani dabe, te dagego te dego pogo bomo mu elalubo koneaibao, eno pogo, ma dagego po, te sogo koneaibao.’ God Genuai Bidigo te po wai,” wali.
JER 44:29 “‘Ena Genuai Bidi, eno po dolo obao, te eno dagebolo te nai me delide te tiwai ola mawaibao, te eno dene mabo sę dage te bulude bidibo sogo yaibao. Te sę ebo dagego suyu da, teda duga koneaibao, eno me geda mugobeo. Menio. Te eno po wali gilama, eno te dene mabo sę dageba yaibao.
JER 44:30 Te sę te ena Genuai Bidi, eno yabo homu ebao, te e tiwai dao. Eno te Isip king Hofra te aga ela muabo boi bidigo nogoba mawaibao, te eno Juda king Sedekaiade yali tobage kolesaga tiwai yaibao. Te Babilon king Nebukatnesargo te Sedekaiade boi bidi elama, ela muainogo ebaso, te eno Nebukatnesar aga nogoba muai dao.’ Te po da, te Genuai Bidigo po dao,” Jeremaiago te po wali.
JER 45:1 Jeremaiago po Barukbolo mawai, te Neriago ogwa, te kibu be me si me si te Jehoiakim, te Josaiago ogwa, te Juda king bidali. Jeremaiago te Genuai Bidigo agabolo mani po pusubo sę ebadi, tama Barukgo buku me delide asęani. Tama augwali si te sę idubo sogo, Jeremaiago Barukbolo te tiwai po walali,
JER 45:2 “Baruk, odao. Nago te tama po wai, ‘Hobede dao, enade sęgę hauwa me dene elalubao, tama Genuai Bidigo eno sęgę didigili pabo sę mu ebao. Ena gela wabo sę ebogo te ena hagela mu ebao. Eno sęgę sia siyu me ebeo. Te me tama elaludu gębo dao,’ nago te po wai. Tialima, Baruk, odao. Genuai Bidi da Israelgo God, te eno nagebolo te po pusa mao wali, ‘Ena Genuai Bidi, eno po dolo obao. Megi eno te ena nigali nai dabe alubo sę yaibao. Te ena bulali nai dabe gudaibao. Te nai dabe eno aluama, guda sabo sę ebo, te tigidali tǫ habu pedaiba usu nama, te tama sę yaibao.
JER 45:5 Tama tialima, nago homugo te wiegi yai nai naga nageba pedalumaina homu ebawe? Nago te tama homu kolesaga ebo tagalao, magi baso meni, ena Genuai Bidigo eno te tigidali tǫde we bidi dabebolo dwai dene mabo sę ebao. Tiali goli, te eno nage tau saibao, te nage menaba pobaso te tagalao, te nage augwaligo me ela mugobeo,’ agai te po nagebolo pusa mao wali,” Jeremaiago te po wai.
JER 46:1 Genuai Bidigo po te haniani tǫ kantri dabede elalubaso, tama agai te po Jeremaiabolo mawai dao.
JER 46:2 Po me deli Isipba palio. Te po te Isip king Neko tego ami dabeba po ola tolali. Te ami dabe te taun Karkemisba sabolali, te wę Yufretis pąde dao. Te kibu be me si me si wabode te Jehoiakim, te Josaiago ogwa, te Juda king bidibo sogo, te Babilon king Nebukatnesargo ami dabego te Isip ami dabe dali boi hwįagaselama, tama te hanu Karkemisde augwali aiyaba elaluali. Te Isip ami tobolu bidiba pusabo po e tiwai dao,
JER 46:3 “Dage Isip dabe, dagego te awa sabele dabe selama, te boi hwįabo sisi yao,” te po wai.
JER 46:4 “Dagego kibu hos dabe dodolao. Te dage hosde dugulama, hwįabo ami dabe, dage te duga hos dabede dugayao. Dagego duga kapago nigai madi munama, te lainde wasilama, te hwįabo sisilaluao. Te duga ene dabe dodolama, te dage deli deligo te kapa holobo ugwa gudama, bidao,” wali.
JER 46:5 “Tialima, megi da, magi ebawe? Ena Genuai Bidi, eno suali, te Isip dabe wi mu elama, te edaba wi ma begasa asobao. Te boi bidi dabego augwaligo bomai ami bidi dabe aiyaba mu elalubaso, te Isip dabego boi hwįani tagalama, te umagia mu ma begasa asobao. Augwaligo begelama, tudiba me tonobeo. Magi baso meni, te bidi dabe wi ilibo nai dabe te augwali tigidali badu elalua pabo dao.
JER 46:6 Te asesa polo mu udabo bidi, ma te hwįbo bomai bidi tagalao, augwali te boi bidi dabede wi painu ebaso, usu me egobeo. Menio. Augwali esela pabo bidi tiwai umuna palama, te wę Yufretis pąba tulalueibao, te not badu tama tiaibao,” wali.
JER 46:7 Mena hani dabe te wę Nail tiwai te tǫ kantri Isipde pedelama, te genuai wę bomo elama, asobo tiwai ebawe?
JER 46:8 Te Isip hani dabe tama dao. Augwali te genuai ąį Nail tiwai pedelama, tama te genuai ąį bomo elama asobo tiwai ebao. Kantri Isipgo te tiwai po wai, “Ena te genuai pedelama, te tigidali tǫ habu mesega saibao. Tama eno te taun dabe dali, tede bidalubo we bidi dabe dali dolaibao.
JER 46:9 Dage eno hos dabe, dage udayao. Dage eno karis dabe, dage umagia mu udayao. Dage eno bomai ami bidi dabe, dage te tǫ kantri Sudan me Libia ami dabe, dage te hwįbo sabele tolasa pabo bidi dabe, dage Lidia ami dabego, dage te enesigigo enebo koneai bidi, dage tigidali te boi hwįgi pao,” te po wai.
JER 46:10 Isipgo te tama po wai, tialima, te hwįbo sę te Godigo sę tama, te Tigidali Bomo Elalubo Genuai Bidi dao. Te sogo aga boi bidi dabeba dwai dene wei ponaibao. Te bomai boi mu hwįnama, te bidi dabe isila paibao. Te bainat hwągo nasi mu ebaso, te bidi dabe tigi tuyu, te kaneme tueibao, tama te bainat mu pągąna paibao. God, Genuai Bidi Tigidali Bomo Elalubo dao, te hani dabe elama, te aga te wę Yufretis badu pąde te ofa ebo tiwai yaibao, te not badu dao.
JER 46:11 Genuai Bidigo te tama po wali, “Kantri Isip, nago te gesi wegi aga tigide te keni me deli pedelai tiwai elaluai. Nage te Gileat badu pelama, te wiegi yai marasin me deli gegegi pao. Tiali goli, nage te haniani marasin sabo sę dene odolali yaibao. Te marasin me deligo nago keni me deli pedela somainogo ebaso, usu me egobeo.
JER 46:12 Te nago ami dabe wi tedela peyu, te augwa tigide digi hudula palama, te augwa deliba tula muaibao. Nage te boi hwįani tulalubaso, te nage hale mu elama, te gasa tǫ kantri dabego nage hale yali po odaibao. Te nago gela wali te tigidali tǫ pedai usu naibao,” te po wai.
JER 46:13 Genuai Bidigo po me deli te profet Jeremaiabolo mawai, te Babilon king Nebukatnesargo te Isipba hwįagasali sogo. Te po e tama wai dao,
JER 46:14 “Dagego te taun Mikdol, me Memfis, me Tapanes, me te gasa Isip pedai badu, teba te po hanilama, pusao. Augwaliba te tiwai po wao, ‘Dage Isip te hwįabo sisilama, dolaluao. Magi baso meni, te boi bidi pedelama, te dage ela mubo sę yaibao.
JER 46:15 Te magi elama te Apis, te bulmakau omai tiwai tibo god me deli dagego nigali, aga te wi pelama, te bomo elama, dolalube dawe? Te page e tiwai elalubao. Genuai Bidigo digi te aga tula paliyu sąwaibao.
JER 46:16 Te Genuai Bidigo te Isip hani hauwa tulalubo sę ilaibao. Te gasa bulu kantri we bidi augwade digi te tama po waibao, “Te bageo, dago te Isip tagalama, te dena hani we bidi dabeba ma pelainao. Te boi bidi dabego te bulu kantri dolobo sę ebaso, tama da dena page buluba ma pinao.” ’
JER 46:17 Te augwa buluba ma sabolama, tama te Isip kingba te tiwai gesi nogi mawaibao, Odolali Po Dagą Olama, Hagoma Eyu, Te Sę Yabo Sogo Hagawai dao, te nogi poaibao.”
JER 46:18 Tialima, te king mu bidibo kingo nogi, te Tigidali Bomo Elalubo Genuai Bidi dao, te agai te tiwai po wali, “Ena Genuai Bidi, ena sesemane sogo bidada paibao, eno po dolo obao, bidi me deli asaibao, tama te bidigo bomogo te gasa bidi dabego bomo aiyaba elalueibao, te bulu du Taborgo te gasa bulu du dabe aiyaba elalubo tiwai yaibao, tama te bulu du Karmel te tamu ąį nambisde ugwadu mu elalubo tiwai yaibao,” wali.
JER 46:19 “Dage Isip dabe, dage gasa kantriba kalabus igi paibao, te duga doado bage sisi ela muao. Te boi bidi dabego te taun Memfis dolama, tama te taun olo elalu, bidi tede me bidigobeo,” te po wai.
JER 46:20 Genuai Bidigo te tama po wai, “Isip te sawi yai gesi so bulmakau me deli tiwai elaluai. Tiali goli, te dwai bolia me deligo te not badu tagalama asu, te aga gąų kelagasobao.
JER 46:21 Te Isip dabego te gasa hani bidi dabe te augwa ami bidi pedalumainogo abelali. Te Isip dabego augwali bugagia tonalubaso, te augwali bugagia mu bidali, te nisai bulmakau tiwai yali. Tialima, te boi bidi pedelabo sogo, te bidi dabe te hwįbo tagalama, wi paibao, te gasa Isip ami dabego me te tiwai yaibao. Augwali te bomo elama, dolalu me hwįbeo, magi baso meni, te dwai sę ebo sogo mu augwaliba pedelama, te augwali dolaibao. Te sogo te augwa yali dwai kolesagade usu nama, te augwali dwai dene mu saibao.
JER 46:22 Te genuai boi bidi hani asobaso, te Isip dabe wi elama, wi pelama, te augwa genuai posolu me wagobeo. Augwa te posolu wabo te hasamani wi peyu, kili kili wabo tiwai yaibao. Te boi bidi dabego te hwągo ni dabe gelainogo asobo tiwai elama, augwa sigi hwą tolasa asaibao.
JER 46:23 Te Isip dabe hauwa ebaso, te bomo umabo elaluali, te bulu tomode ni dabe benegelama elalubo tiwai mu elalu, te bidi dabe tomoba pabo usu meni yai. Tialima, te boi bidi dabego namba te umabo mu elalubaso, te kuli mano genuai hani dabe aiyaba elaluali. Tibaso, ena Genuai Bidi, eno te po obao, te boi bidi dabego te Isip dabe mu silaibao, te bidi dabego te bulu tomode ni dabe gela silibo tiwai yaibao.
JER 46:24 Te Isip dabe eno te not badu hani bidi dabe nogoba mubaso, te Isip dabe hale dwai mu yaibao,” wali.
JER 46:25 Tigidali Bomo Elalubo Genuai Bidi, aga te Israelgo God, agai te tiwai po wali, “Odao. Eno dwai dene te Emonba tamadi mawaibao, te Tebes taunde tibo god dao, te Isip king dali, te we bidi dabego me, te homu eyu, te kingo augwali tau selama, bugagia bidaibao homu ebao. Eno te dwai dene mabo sę te Isip kantri we bidi dabe dali, te augwa god dabe, me te aga kingba te dwai dene mabo sę yaibao.
JER 46:26 King Nebukatnesargo aga ofisa dabe daligo te Isip dabe ela muainogo yaibao. Tama eno te Isip dabe te Babilon dabego nogoba mawaibao,” wali. “Tialima, nosali da, te we bidi dabe te Isipde polobadu bidali tiwai ma bidaibao. Ena Genuai Bidigo, eno te po wai dao,” wali.
JER 46:27 Genuai Bidigo te tama po wali, “Dage Israel, dage Jekopgo hani, dage eno sę bidi me sę ebo we dabe, dage wi me elama, dwai noma me sigio. Mu tama, te eno dage kalabuside bidibo digibulu bulude bidibadi, te eno dage ma saibao. Te dage duga tǫba ma aselama, bugagia bidagameo. Te mena hani me deligo dage wi me iligobe dao.
JER 46:28 Dage Israel, dage eno hani, dage eno sę bidi, me sę ebo we dabe, dage wi me igimio, magi baso meni, ena Genuai Bidi, ena dage dali bidibao. Eno dage sela sąnama, te augwali dali dage bidigi pali hani dabe te eno augwali mu silimainogo yaibao. Dagego te dwai sę yali dao. Tama eno dage dodolobo sę igi menigi da, te dolo meni da. Tama tibaso, eno dage e tǫde sela sąwaibao. Tiali goli, dage da, eno me siligobeo. Mu tama, eno dwai dene dagebolo mawai, tialima, te eno doloba pai kolesaga wali peyu, te eno dage dodolobo sę yai dao,” te po wali.
JER 47:1 Genuai Bidigo te kantri Filistia dali po elaluai, tama agai te po te Jeremaiabolo mawai, te Isip kingo te Gasa buluba boi hwįsiąbadi, te Filistia dabego genuai taun me deli dao.
JER 47:2 Genuai Bidigo te tiwai po wali, “Suao. Te not badu ąį genuai pedalubao. Te augwali bomonama udayu, te boma pai mu dao. Te wę asobo bomo tiwaigo te tǫde elalubo nai dali tigidali mesegelaibao. Tama agai taun dali, te taunde bidali we bidi dabe dali, mesega saibao. Te tǫ kantri we bidi tigidali wi ebaso, bomonama i weyu, dwai gela mu waibao.
JER 47:3 Augwaligo te hos dabe udayu, sągą pidi bu wabo odaibao. Te augwaligo karis dabe bomonama kekeyu, te wil dabego kidagalo wabo odaibao. Tibaso, te we bidi dabe wi umabo ebaso, wi paibao. Te ayago te augwa wai puluba dabede homu kone palama, te augwali tau siyu, me tonalugobeo. Augwa nogo bomo kimi mu isiyu bidaibao.”
JER 47:4 “Magi baso meni, te Filistia tigidali dolabo sogo, te pedelalio. Eno augwali sunumi paliama, te augwaligo Tair me Saidon dabe tau me sogobeo. Polobadu mu te Filistia dabe augwa wąį nǫų dabego te ailan Krit tagalama, te genuai buluba bidagasali. Tialima, megi da, Genuai Bidi eno te dwasianu bidalubo Filistia hani dabe dolainogo homu ebo dao.
JER 47:5 Te Gasa hanude bidibo bidi dabe augwa haliga sęgę dwai mu elama, augwa tobolu nisi pola sąwaibao. Tama te taun Askelon mu dolaibao. Dage te odo malu bulude bidalubo dwasianu hani, nisu sogo dagego homu dene ebo silama, te dagego duga tigiwali togobo kolesaga tagalaibawe?
JER 47:6 Dagego e tama tiwai i wali, ‘Genuai Bidigo bainat hwą, nisu sogo nago te da dolobo sę silaibawe? Bainat, te naga bulubo be tomoba ma bula sao. Nago te sę tagalama, toma nao,’ dagego te po wali.
JER 47:7 Tialima, ena, Genuai Bidi, eno te sę ena bainatba mawai. Tama tibaso, bainatgo te sę ebo me tagalogobeo. Eno te hwą bainatgo te bulu Askelonba boi hwįgi pomainogo, me te nambisba te gasa we bidiba boi hwįgi pomainogo tagala palai dao,” wali
JER 48:1 Genuai Bidigo kantri Moap dali po elaluai. Tigidali Bomo Elalubo Genuai Bidi, aga Israel dabego God, agai te tiwai po wali. “Hobede mu dao, te boi bidi dabego te Nebo taun mu dolaibao. Te boi bidi dabego te Kiriataim elaluama, te bomai obo elaluali taun, te dolaibao. Tama te taunde we bidi tigidali hale dwai mu saibao.
JER 48:2 Te Moapgo genuai nogi elaluali, te tulaluaibao. Te boi bidi dabe te taun Hesbonba sabolama, te augwa Moap dolabo kolesaga yabo po miaibao. Augwa te tiwai po waibao, ‘Te bageo, dago te we bidi hani mu siligi paibao, tama te kantri Moap munu ma elalugobe dao,’ waibao.” “Dage te taun Matmen we bidi tigidali, te boi bidi dabego dage dolama, tama dage tigidali te gų pageba paibao.
JER 48:3 Te taun Horonaimde genuai gela wabo odao. Augwa te tiwai i waibao, ‘Tigidali nai mu dolali dao.’
JER 48:4 Moap dolobaso, te augwaligo wai dabego gela ogolu holobo genuai mu pedelai dao.
JER 48:5 Te Moap dabe wi paibao. Te augwa gela umagia mu weyu, te taun Luhitba te sunumidu ugwaba holiyu, te taun Horonaimba aiya dulaibao. Tama augwaligo gela u wabo, te genuai mu pedelai dao, magi baso meni, augwa bulu mu dolai dao.
JER 48:6 Augwaligo te tama po obao, ‘Polo wi pao. Tiyu, dage dolabuo. Dage te olo masigi kemi buluba pelama, geme dualalugi pao,’ augwaligo te po obao.”
JER 48:7 “Moap, nago te yali sę dabede me, mone dabe me, homu kone palobo sę bomo elalu, te nago homugo te nai dabego nage tau selama, te nage bugagia bidaiba homu ebao. Tialima, nago te homu ebo te wiegi yai menio. Tibaso da, te boi bidi dabego te boi hwįbaso, te nage aiyaba elalueibao. Tama nago tibo god Kemos te augwaligo selama, te gasa bulu kantriba kalabus igibu sela paibao, te aga pris bidi dabe me, te Moap tobolu bidi dabe dali sela paibao.
JER 48:8 Te boi bidi dabego tigidali taun dolagaselama, te taun me deli te bugagia me elalugobeo. Augwaligo te odogo malu bulu me dolobadi, te ugwadu doloba pai bulu me dolaibao, te ena Genuai Bidigo, eno po wali gilama yaibao.”
JER 48:9 “Te Moap aga te ba tiwai te bogo elalugi sogo da, te wiegi yai ebaso, te dolobo sę agaba asidali weyu, bola pigi da. Te aga taun tigidali dolama, te olo elaluaibao. Tama te taun dabede bidi me bidigobeo.”
JER 48:10 Eno homugo Genuai Bidigo mabo sę te sę ebo hagela ebo bidi dabe te Genuai Bidigo dolainogo yaibao. Te agai te bidibolo weyu, te gasa bidi bainatgo elao po wali, te bidigo te isąbaso da, teda Genuai Bidigo aga dolaibao.
JER 48:11 Genuai Bidigo te tiwai po wali, “Te Moap kantri gesi sogo dąį elasa, te megi e sogoba usu nagasobao, te mena sogo me deli te boi bidi dabe aselama, me dolagaselama, te we bidi dabe gasa kantriba kalabus me sela pisąwai. Moap te bidi dabego nigilama, te elalumainogo yali wiegi yai wain ąį tiwai dao. Te augwa te me botoldu te gasa botolba tabia sisąwai tiwai elaluai. Te aga pusu me tama elaluali, te aga denami wiegi yai dao.
JER 48:12 Tiali goli, ena Genuai Bidi, eno po dolo obao, eno te bodolu muani sogo me deli elalubao, tama te sogo eno te bidi dabe tagala palama, te Moap dolagasaibao, te bidi dabe te wain tǫba gea palagaselama, te wain buali sospen subigila gea palama, alua sąbo tiwai yaibao.
JER 48:13 Tama te sogo te Moap dabego te god Kemosde hale mu yaibao, te tibo god Betel bulude elaluai Israel dabe hale yali tiwai, te sogo te godigo augwali tau saiba homu yai dao.
JER 48:14 Dage Moapgo, magi baso dagego te po weyu, dage te bomai ami dabe te dagego hwįbo mu koneai da wabo dawe?” Genuai Bidigo te po wai.
JER 48:15 Te king, aga nogi te Tigidali Bomo Elalubo Genuai Bidi, agai te tama po obao, “Te boi bidi dabego te Moap dolagaselama, te taun dabe saibao. Augwaligo te Moap wiegi yai gesi ogwa bidi dabe ela mubo sę umabo yaibao.
JER 48:16 Te Moap dolabo sogo pąde yalio. Te dolabo sę polo tama mu pedelaibao.
JER 48:17 Dage Moap pąde bidibo hani tigidali, te dage hani tigidaligo te aga genuai nogi koneai, dagego aga hobede elama, te tama po waiyąo, ‘Hobede mu dao, te bulu kantrigo bomo me genuai nogi elaluali, te tulaluali dao,’ po wao.”
JER 48:18 “Dage te taun Dibon we bidi, dagego te duga genuai nogide homu kone elalubo tagalama, te wa pai tǫde olo bidi bidibo tiwai yao. Magi baso meni, te Moap dolobo sę yabo bidi, te dageba pedelama, te duga bomai obo elalubo hanu dabe dolaibao.
JER 48:19 Dage te taun Aroer we bidi dabe, dage te sunumi sesegeba doligi pelama, te wi asobo we bidi augwali suao. Te augwaliba dagego hanalu wao, ‘Mena sę pedalubaso, dage wi asobawe?’
JER 48:20 Te augwaligo te tiwai po wei ponaibao, ‘Kantri Moap dolobaso, te megi da, aga dwai hale mu ebao. Te dagego hobede mu elama, i olama, te gela bomo elama wao. Dage te wę Arnon pąba pelama, te we bidi augwaliba te tama po walao, Moap dolai dao po wao.’ Te wi asobo we bidigo te po waibao.”
JER 48:21 “Te doloba pai bulu pesagede ugwadu elaluali taun dabe, augwaliba te dwai dagalabo sogo pedelai dao. Te e tama taun dabe dao, Holon, me Jasa, me Mefat,
JER 48:22 me Dibon, me Nebo, me Bet Diplataim,
JER 48:23 me Kiriataim, me Betgamul, me Betmeon dao,
JER 48:24 me Keriot, me Bosra dao. Te Moap gasa taun dabe tigidali me dwai dene salio, te pąde elaluali, me digibulu elaluali, te tiwai sę naga pedelalio.
JER 48:25 Te boi bidi dabego Moapgo bomo aiyaba elaluama, te Moapgo aga tau sabo mena sę me deli yabo usu meni yai. Ena Genuai Bidigo, eno te po wai dao,” wali.
JER 48:26 Genuai Bidigo te tiwai po wali, “Moapgo ena dali hagoma ebaso, te eno homugo te boi bidi dabego aga elalumainogo homu elama, te aga bomai ąį tulama, gęǫ page ebo bidi tiwai pedalumainogo ilimainao. Te aga bugali bogu daide pila mudu, bebegeludubaso, te bidi dabego aga gisugu momainogo yaibao.
JER 48:27 Moap, polobadu nago posobo po olama, te Israelba dwai gisugu mawai Magi yaliwe? Nago homugo Israel te nai wi sabo hani tiwai me deli bidibaso, te nago agaba posobo po weyu, te nago aga nogi aiyaba elaluai da, agawe?
JER 48:28 Dage Moap, dage te masigi dedage buluba geme duala sigi piąo. Dagego te ba dabego augwa be te sau dagede sę ebo tiwai gilama tama dage me tiąo.”
JER 48:29 “Da tigidaligo te Moapgo hagoma kolesaga ebo po odali. Te bageo, Moapgo hagoma mu ebao. Agai aga digi nogi ugwaba siyu, te subigila hagoma mu yali. Te agai te aga polalubo mu dao homu yali dao.
JER 48:30 Ena Genuai Bidi, eno agai hagoma kolesaga ebo koneani. Tialima, agai odolali te agai yali sę tigidali te hagawaibao.
JER 48:31 Te tigidali Moapde eno hobedai gela waibao. Te Kirheres we bidi augwalide eno homu dene mu ebo dao.
JER 48:32 Te taun Jaser dolobaso, ena gela obao. Tialima, te taun Sipma, nage dolobaso da, te ena gela wabo ogolu mu yaibao. Sipma, te nago wain gi hauwa umabo mu elalubao, te sigi ąį Detsi, me sigi ąį Jaser, teba usu nigi pai elalubao. Te boi bidi dabego te wiegi yai ni wain me, te nago gasa ni dabe me dolaibao.
JER 48:33 Te Moapgo tǫde wiegi yai nai hauwa pedalubaso, te bidi dabego te nai siyu, wiegi yai pemene yai. Tiali goli, te wiegi yai pemene elama, gisugu wabo kolesaga te silaibao. Eno te tama tilama, te wain du agabo masigi poude te wain augwaligo munu ma nigigobeo. Augwa te i olama, pemene eyu, te wain agabo sę yali me egobeo. Mu tama, te augwa i weyu da yaibao, tiali goli, te augwa pemene elama, i me wagobeo.”
JER 48:34 “Te Moap dabe dwai gela waibao, te taun Hesbonde gagalasa pelama, te taun Eleale, me taun Jahas, te notba usu nigi paibao, tama te taun Soarde gagalasa pelama, te taun Horonaim, me taun Eklat Selisia, te sautba usu nigi paibao. Magi baso meni, te tama kantri tǫ dolaibao. Tama me, te wę Nimrim tigidali mu sula saibao.
JER 48:35 Ena Genuai Bidigo eno po dolo obao, eno te Moap dabego te bulu duba holama, te lotu wagilu, te wiegi yai denami yai ofa dabe ebo pesage, me te augwa gasa godiba lotu wabo pesage, tigidali dolaibao wai dao.
JER 48:36 Tibaso, eno te Moap, me te taun Kirheres we bidi, augwaliba homu dene mu ebao. Eno hobede ebo te bidigo genuai hobede elalu, te ona elibo tiwai yai. Te Moap dabego sali wiegi yai nai tigidali hagawaibao.
JER 48:37 Augwa homu dene mu elama, augwa tobolu nisi me penane nisi poawaibao. Te augwa nogo dabe togoyu elama, te hobede ebo ugwa gudaibao.
JER 48:38 Ena Genuai Bidi, eno te kantri Moap dolaibao, te bidigo te sę meni yai te tǫgo nigai sospen dabe alubo tiwai yaibao. Te Moap habu tigidali badu, te genuai gela u wabo pedelaibao. Te augwa bede ugwadu bidali me, bidi sisinibo pesagede bidali me, tagalao, tigidali te gela wabo umabo mu yaibao.
JER 48:39 Mu tama, Moap tigidali mu togwa pelama, te we bidi augwali dwai gela waibao. Moap da, te dwai hale mu ebo bidigo aga gesabidi halua sabo tiwai gilama yaibao. Te Moap pąde bidali hani dabe augwaligo te sę dabe te Moapba pedalubo sulama, te augwali wi dwai mu elama, te Moapba posobo po waibao,” Genuai Bidigo te po wali.
JER 48:40 Genuai Bidigo te tiwai po wali, “Suao. Te boi bidi dabe umagia udayu, te Moap dolainogo ebao, te ba kemodagego te hasa bolo elainogo ebo tiwai yali, te tobolu nisi diligina pelama, te aga bogo nisi diligina pabo tiwai ebo dao.
JER 48:41 Te boi bidi dabego te taun dabe me, te bomo elama, boi hwįbo pesage me saibao, tama te sogo te Moap ami dabe wi elama, homu si yaibao, te we dabe augwali te wai ame nainogo ebo sogo tigi dene ebo tiwai yaibao.
JER 48:42 Moapgo Genuai Bidi ena dali hagoma ebaso, te Moap mu dolaibao, te Moap hani da, te munu me bidigobeo.
JER 48:43 Ena Genuai Bidi, eno po dolo obao, te bidi wi ilibo nai dabe me, te genuai tǫ dedage me, hagani mubo wa dabe te elalubao, te Moap we bidi dabe dage dolabo nai dabe dao.
JER 48:44 Te bidi wi ilibo naide te bidi me deli wi pobaso da, teda aga te genuai dedageba tulalueibao. Te aga dedage tagalama, te buluba teda holobo si da, teda aga te hagani mubo wago tola saibao. Ena Genuai Bidigo te Moap dabe dage dolabo sogo bodolu te tama muai, tama tiyu, eno dage doalibao,” wali.
JER 48:45 “Te Moap we bidi dabe te boi bidi dabede wi elama, te taun Hesbonba geme duala sigi painogo yali. Tiali goli, menio. Augwaligo te Hesbon sia dabo suai, te polobadu te king Sihon bidali sogo sia dali tiwai yai. Tama augwali te taun tomoba pabo usu meni yai. Augwaligo te mena sę yabo bomo me elalubeo. Te siago te kantride elaluali nai tigidali dela silali, te bulu kantri dąįde elalubo, ma te hwįbo bidi dabego bulu du ugwadu elaluali me, te tagalao, te siago dela silai dao.”
JER 48:46 “Dage Moap, dagede hobede mu ebao. Dage te tibo god Kemosgo we bidi, dagego bomo te hagawalio. Te boi bidi dabego dage pageabi elama, te dage selama, te gasa kantriba kalabus igi paibao.”
JER 48:47 “Tialima, te nosali sogode eno te Moap wiegi yai ma pedalumainu yaibao. Ena Genuai Bidi, eno te po walio.” Genuai Bidigo te Moap bage dagalabo po tigidali wali, te silali dao.
JER 49:1 Genuai Bidigo po te Amon dabede elalubao. Agai te tiwai po wali, “Magi yaliwe? Te Israel dabego ogwa dabe meni yani homu elama, te augwa aya dabego tǫ dabe doado bage sogobe da, agawe? Te augwali elalubadi yaibaso da, teda magi baso te Amon dabe, te tibo god Molekgo hani dabego, te Gat hanigo tǫ saliwe? Te magi baso te Amon dabe te Gat hanigo taun dabeba bidigi pai dawe?
JER 49:2 Ena Genuai Bidi, eno te po obao, mu tama eno bodolu muani sogo me deli elalubao, tama te sogo eno te boi bidi dabego te taun Raba teba hwįgi pomainogo tagala palaibao, te kantri Amongo genuai taun dao. Augwaligo te taun dolama, te olo pobele bage du holali tiwai elalueibao. Te boi bidi dabego te genuai taun pąde elalubo bulu dabe siago ulaibao. Tama nosali, te Israel dabego te Amon dabego sali tǫ ma saibao. Te Genuai Bidi, eno po dao.”
JER 49:3 “Dage Hesbon hanu Amon hani we bidi dabe, dagego bomonama gela wao, magi baso meni, te taun Ai dolalio. Dage Raba taun we bidi dabe, dagego gela waiyąo, dagego te hobede ebo ugwa gudama, te hobede ebo tęąbi wao. Te dage wi painogo, me badu udayu, gelama, gasa badu udayu yao. Magi baso meni, te boi bidi dabego Molek saibao, duga te tibo god, te gasa kantriba sela pelama, kalabus igi paibao, te aga pris dabe dali me, dage Amon tobolu bidi dabe me, te kalabus paibao,” te po wali.
JER 49:4 “Amon, nago koneai, te nago odogo malu bulu te mu polalubao, te nago sesemane sogo nago te bulude wiegi yai nai hauwa pedalubo po minama, te pemene ebao. Nage hagoma ebo we, magi baso nago te tiwai po wabo dawe? Nago te naga mone me doado bagede homu kone palama te po wali, ‘Dego ena dali hwįagasaibawe?’ wali.
JER 49:5 Tialima, odao. Ena God, Tigidali Bomo Elalubo Genuai Bidi, eno po dolo obao, te nage pąde bidibo hani tigidali eno hodolama, te augwaligo nage wi dwai mu ilagasaibao. Te augwaligo dage Amon dabe sela sąbaso, te dage tigidali tǫ habuba wi tedela pelawaibao. Te dage ma sisinabo bidi meni yaibao,” wali.
JER 49:6 “Tialima, nosali eno dage bidibo te wiegi yai ma pedalumainogo yaibao. Ena Genuai Bidi, eno te po wai dao,” wali.
JER 49:7 Genuai Bidigo te Idom kantride po elalubao. Tigidali Bomo Elalubo Genuai Bidi, agai te tiwai po wali, “Magi yaliwe? Te Teman hanu we bidi dabego te wiegi yai homu kolesaga munu me elalubo homu meni da, agawe? Te augwaligo wiegi yai homude koneani kolesaga te hagawali da, agawe?
JER 49:8 Dage Dedan we bidi dabe, dage te taun tagalama, wi peyu, tama te masigi ola be dabeba geme bugagia duala sigi pao. Magi baso meni. Ena Genuai Bidigo eno te dene mabo sę ebo sogo mu te Idomba pedelaibao, dage Isogo hani, te dage dolaibao. Te sogo eno te dagego dwai kolesaga yali wei ponaibao,” wali.
JER 49:9 “Te bidi dabego te wain du ina yani tau yai sagasobo sogo, te augwaligo tigidali me sogobeo. Menio. Te meba augwaligo ela soaibao. Te nai wi sabo bidi hulide asu, te augwaligo godolo yali nai naga sabo dao.
JER 49:10 Tialima, eno te Isogo wąį nǫų hani dabeba dwai dene mabo sogo, eno dagego nai doado bage tigidali dolaibao. Eno dagego geme duala sabo pesage tigidali dolama, te dage geme ma duala sogobeo. Te dage Idom badi, te dage pąde bidibo hani dabe, dage tigidali dolaibao. Tama te Idom hani tigidali mu silaibao.
JER 49:11 Tialima, dage Idom dabego duga wai puluba dabede homu si me igio. Te aya dage isibaso da, te ena digi eno dagego wai puluba dabe tonalueibao. Te dagego we dabe augwa digi ena nogoba mumainogo yaibao,” wali.
JER 49:12 Genuai Bidigo te tama po wali, “Eno te hauwa we bidi dabeba te dwai dene mabo sę yaibao. Te augwaligo dwai sę genuai me isąbadi tagalao, te eno dene augwaliba mawaibao. Te Idom, nago homugo eno nage ela soaiba homu eba, agawe? Mu menio. Eno nage me ela soagobeo. Eno nageba me te dene mawaibao.
JER 49:13 Ena Genuai Bidi, te ena nogide digi eno te tiwai mu po obao, eno te dagego polalubo taun Bosra dwagila mu dolaibao, te aga olo bulu pesage tiwai pedelaibao. Te gasa hani we bidi dabego eno te sę te taun Bosraba yali sę po odama, te augwa wi elama, dwai midigi saibao. Te augwa te Bosrabolo te dwai posobo po waibao. Te hanigo te augwa boi bidi dabede dwai posobo po wabo sogo da, augwa te tiwai po waibao, ‘Dage te Bosra taun dolali tiwai gilama yagameo.’ Eno te tǫ kantri Idom taun tigidali dolama, te dolali te tiwai sesemane elaludaibao,” wali.
JER 49:14 Genuai Bidigo ena Jeremaiabolo walali, te agai te we bidi hani dabeba te po magi po omainogo te bidi me deli tagala palu, te tiwai po walio, “Dage tigidali sisinama, te Idomba hwįgi pao. Hogodama, te boi hwįgi pabo sisi yao,” wali.
JER 49:15 Genuai Bidigo te tǫ kantri Idomba waliyu, te po wai, “Idom, odao. Eno nage te olo nai me tama tiwai te gasa hani we bidi dabe tomode pedalumainogo ilaibao. Te augwaligo nage begela mu dolaibao.
JER 49:16 Nago te gasa hani we bidi dabe wi mu ilama, te nago nage te polalubo mu da homu yali. Tialima, naga digi tibo po ola mawai. Nago genuai taun te bulu du pesage daide ugwadu elaluali. Tialima, te nago taun te ba kemodagego be daide ugwadu sę ebo tiwai elalubo, te tagalao, te nage eno aiyaba kekasa duleibao. Te Genuai Bidi, eno po dao.”
JER 49:17 Genuai Bidigo te tiwai po wai, “Idom dolama, te bidi dabe wi ilibo nai pedelama, elalueibao. Te gasa hani we bidi dabe te badu aselabo sogo, te augwa Idom sulama, te augwa midigi dwai mu selama, nogo hogwayu, te wi umagi mu yaibao.
JER 49:18 Polobadu eno te taun si Sodom me Gomora dolobadi, te pąde elaluali taun dabe me dolali, tama te bulu pesage dabe olo mu tama elaluai. Te ena Genuai Bidi, eno te po obao, te tobage sę naga te Idomba pedelama, tede bidi deli me bidigobeo.
JER 49:19 Te genuai uni hasa laiongo aga bulu tomo buside te wę Jordan tagalama, te sipsip dabe augwa te wiegi yai nosai tubo sę ebo madi pedelaibao. Tama pedelama, polo mu tama te laiongo te sipsip dabe daboa sabo dao. Te tiwai me, deli sogo naga mu tama, eno te Idom dabe augwa tǫde bidali ela gudulaibao. Tama eno te tǫ tonaluabo bidi me deli nigilaibao,” wali. “Eno tama tebo sogo, mena bidigo ena dali konila po waibawe? Te dego eno bomo tobage elalubawe? Te mena tobolu bidigo enaba boi bidi yaibawe?
JER 49:20 Te eno te tǫ pedai Teman we bidi dabeba yabo sę, me te gasa Idom kantri pedai badu yabo sę, te eno homu kone palai elalubo, te bugagia olo muao. Eno te we bidi dali, wai puluba dabe me, tigidali sela sąwaibao, te laiongo te sipsip tigidali ela munama, te augwa tigi kekasa pabo tiwai yaibao. Te Idom tǫgo digi eno te ebo sęde dwai midigi mu yaibao.
JER 49:21 Te kantri tǫ Idom degasa dulubo sogo da, te bugusu wabo genuai pedelama, te tǫ mumunu ilama, te mali ebo tiwai ilaibao. Tama te Idom dabego gela u wabo te genuai pedalubo sę eyu, te mama yai tamu ąį Retsi wabo tamu ąį dąįba usu nugi paibao.
JER 49:22 Te boi bidi dabe umagia aselama, te Bosra taun dolainogo ebao, te ba kemodage ugwaba bola holama, te tobolu nisiba mage bula selama, aiyaba dulama, te aga bogo diligasa dulu, te hasa bolo elibo tiwai yaibao. Tama te sogo te Idom ami dabe wi elama, homu si yaibao, te we dabego wai ame nainogo tigi dene ebo tiwai yaibao,” wali.
JER 49:23 Genuai Bidigo te kantri tǫ Damaskusde po elalubao. Agai te tiwai po wali, “Te taun Damaskus taun si Hamat me Arpat we bidi augwaligo te dwai nai augwaliba pedelabo po odama, te augwali midigi dwai mu yalio. Augwali wi ebaso, te bugagia me dugulalubeo. Augwali te tiwai te nambisde genuai ąį dini asu, te bugagia bidisąbo tiwai ebo dao.
JER 49:24 Te Damaskus taun we bidi dabe te bomo mu meni yani. Augwali te we me deli wi painogo ebo tiwai yali, tialima aga te wi dwai mu elama, te aga usu ebeo. Augwali te genuai dene me sęgę elaluali, te wego wai tega painu dene ebo tiwai yai dao,” wali.
JER 49:25 Te taun Damaskusde bidali bidi me deligo te po wali, “Te taun da, genuai nogi elalubaso, te ena wiegi yai pemene yali. Tiali goli, te boi bidi dabe teba pedalubaso, te magi baso te we bidi augwali te taun tagalama, wi pabewe?” te po wali.
JER 49:26 “Ena Tigidali Bomo Elalubo Genuai Bidi, eno po dolo obao, te sogo te boi bidi dabego te Damaskus gesi ogwa bidi dabe ela munama, te augwali bidi sisinama, po mibo pesagede degasa pai munalua paibao. Te boi bidi dabego te Damaskus ami bidi dabe tigidali ela muaibao.
JER 49:27 Eno te taun Damaskus bagulali obo isigo ulama, tama te isigo te king Benhadatgo bomai be dabe me siago daibao,” wai dao.
JER 49:28 Genuai Bidigo po te Kedar hanide me te wa pai tǫ pedai Hasorde elalubao. Te Babilon king Nebukatnesargo boi hwįnama, te hani dabe aiyaba elaluai. Hasia bolo God Genuai Bidigo te Kedargo boi bidi dabeba te po walali, “Dage hogodama, te Kedarba boi hwįgi pao. Te giliga pedalubo pedai badu te we bidi mu silao.
JER 49:29 Te ugwa be dabe, me te augwaligo sipsip dabe, me te ugwa bede mubo ugwa dabe, me te augwaligo gasa nai dabe selama, te sela pao. Te augwaligo kamel dabe me sela pao. Te augwaliba e tama i wao, ‘Te dage wi ilibo nai, te tigidali badu elalubao.’ Te po augwaliba i wao,” Genuai Bidigo te po wali.
JER 49:30 Tama Genuai Bidigo te taun Hasor we bidi augwaliba te tiwai po wali, “Dage wi peyu, te digibulu mu masigi ola be dabeba geme bugagia duala sigi pao, magi baso meni, te Babilon king Nebukatnesargo agai dage dolabo sę yabo nai dabe te homu konea sai elalubo dao,” wali.
JER 49:31 Genuai Bidigo te Babilon dabeba te tiwai po wai, “Dage hogodama peyu, te bugagia dugulalu, te magi nai me delide homu kone isąbo hani we bidiba boi hwįgi pao. Augwaligo taun obo meni dao. Te gasa hani we bidi dabe augwali pąde me bidibeo.
JER 49:32 Dagego augwaligo te kamel dabe, me genuai bulmakau hani dabe, me sipsip dabe tigidali me sagameo. Te augwa gebo badu tobolu nisi pęwadage togobo bidi hani dabe eno sela sąnama, te augwali tedela paibao. Ena Genuai Bidigo, eno te tǫ pedai tigidali badu boi bidi pedalumainogo ilama, tama te dene mabo sę ebo sogo mugo te Hasor dabe gegaibao.
JER 49:33 Tama Hasor te uni yowigo bulu pesage pedelama, te aga dolali sesemane tama elalueibao. Tama te taun olo mu elalu, tede bidi me bidigobeo,” wali.
JER 49:34 Genuai Bidigo te tǫ kantri Elamde po elalubaso, tama agai te po te profet Jeremaiabolo mawai, te Sedekaia te Juda king bidali sogo dao.
JER 49:35 Tigidali Bomo Elalubo Genuai Bidi, agai e tama po wali, “Enesigi da, te Elam dabego boma pai nai dao, te augwaligo boi bidi dabe aiyaba elalubo bomo mu yai. Tiali goli, te eno augwaligo enesigi togwaibao.
JER 49:36 Eno te boi bidi dabe tigidali badu hodolama, te augwaligo Elam dabeba boi hwįagasaibao, te bomai waligo augwali dolagasobo tiwai yaibao. Te Elam dabe eno te tigidali tǫ pedaiba tedela pelama, te tigidali tǫ kantride te Elam dabe meba bidada paibao.
JER 49:37 Te augwali ela muabo boi bidi dabe subo sogo, eno te Elam dabe augwali wi mu ilaibao. Ena Genuai Bidigo, eno te dwai nai mu te Elamba pedalumainu elama, te eno haliga sębę ola mawaibao. Te bidi dabego augwaliba boi bidi ilibo sę eyu, augwali ela mumainogo yaibao, te tigidali isiboba usu naibao.
JER 49:38 Ena Genuai Bidi, ena dugabo sia king te Elamba munama, te eno Elam king dali, te aga ofisa dabe dali ela muaibao.
JER 49:39 Tialima, te nosali sogo eno te Elam bugagia ma dugulalubo sę pedelaibao. Ena Genuai Bidi, eno te po wai dao,” wali.
JER 50:1 Genuai Bidigo te kantri Babilonde po elalubao, te Kaldia dabego tǫ kantri, tama agai te po profet Jeremaiabolo mawai. Tama Jeremaiago te tiwai po pusali,
JER 50:2 “Tigidali we bidi haniba pelama, te po pusao. Te ugwa plak ugwaba sao, te bidi dabego sulama, te po odagasomainao. Te po geme dualubo tagalao. Augwaliba te tama po wao, ‘Te boi bidi dabego Babilon salio. Bel, te Babilon dabego tibo god, aga hale dwai mu yaibao. Te god Marduk me te midigi dwai mu saibao. Te Babilon dabego dwai tibo god dabe te hale dwai mu elama, te midigi dwai mu saibao.’”
JER 50:3 Babilon dolaibao, magi baso meni, bidi hani me deli te not badu pedai tagalama, te Babilonba hwįagasu asaibao. Te boi bidi dabego te Babilon mu dolama, te olo bulu pesage pedelai elalueibao, tama tede bidi me bidigobeo. Tigidali bidi me hasa te Babilon tagalama, te wi paibao.
JER 50:4 Genuai Bidigo te tiwai po wali, “Te sę dabe te Babilonba pedalubo sogo, te Israel we bidi me Juda te sisinama, gela weyu, te augwa Genuai Bidi, God ena gegaibao.
JER 50:5 Augwali te Saion bulu duba painogo da, teda augwa teba pabo sunumi hanalu waibao. Te augwa te tiwai po waibao, ‘Tegoba, da pelama, te Genuai Bidi dali po dąų wagi pelainao, te da aga hani we bidi bidaibao. Tama te dąų wali bomo yai po sesemane elalueibao, te bidigo agade homu kone me gegeda palama tagalamu dao.’ Augwaligo te sogo te po waibao.”
JER 50:6 “Eno we bidi dabe augwali te hagawai sipsip hani tiwai bidali. Te augwali tonaluali bidigo augwali te wiegi yai sunumi tagalomainogo ilama, te bulu du pesagede tedela palama, bilaluali. Augwali te bulu dude bilalu, te augwali toma tuabo madi te homu kone me ebeo.
JER 50:7 Te subigila bidi hanigo augwali sulama, te augwali dolali. Tama te boi bidi dabego te tiwai po wali, ‘Te dago augwali dolabo page elalubaso, me dolobeo. Magi baso meni, augwa digi te Genuai Bidiba dwai sę yali. Genuai Bidi da, te augwali bugagia toma neyu, bidabo pesage tiwai elalubao. Te augwa wąį nǫų dabego konealubo homu dąų olama, te agai augwali tau somainogo tonaluai. Aga te augwaligo Genuai Bidi dao,’ te boi bidi dabego te po waibao,” wali.
JER 50:8 Genuai Bidigo po ma weyu, te tama po wali, “Dage Israel me Juda, dagego te Babilon tagalama, wi piyąo. Dage poligibu te gasa kalabus bidi dabe tudiba ilao, te omai meme poligibu te gasa meme dabe geanobo tiwai yao.
JER 50:9 Dagego Babilon tagalao, magi baso meni, eno te not pedai badu te haniani tǫ kantride bomai bidi hauwa hodolama, te augwali odasa aselama, te Babilonba hwįagasomainogo yaibao. Augwali te lainde wasilama, te hwįnama, te Babilon dabe aiyaba elalueibao. Te boi bidi hani augwaligo te enesigigo hwįbo mu konea pai bidi, te augwaligo ene enebo sogo da, te munu me geda mugobeo.
JER 50:10 Te augwaligo te Babilonde wiegi yai nai dabe umabo saibao. Te deli deli bidigo te nai hauwa mu selama, te augwa homu godolo yali te mu siminaibao,” te po wai.
JER 50:11 Genuai Bidigo e tiwai po wali, “Dage Babilon, dagego eno tǫ kantri dolama, te eno we bidi hani augwaligo doado bage sali. Te dage pemene umagi mu yai, te bulmakaugo agai te wit dili ge agaga pabo sogo te nai meba tuyu, aga pemene ebo tiwai yali. Te dagego i wabo dagą genuai weyu, te omai hos dabe gą wabo tiwai yali dao.
JER 50:12 Tialima, dage Babilongo tǫ kantri te hale dwai mu elama, te aga genuai nogi elaluali mu tulalueibao. Te aga tǫ kantri dwai mu elalu, te gasa hani we bidi tigidali tomode nogi elalugobeo. Te tǫ wa pai bulu pesage te olo bulu pesage elalueibao.
JER 50:13 Ena Genuai Bidi, eno dageba haliga sębę umagi mu elama, eno te tiwai sę ilibaso, te dagego tǫ kantri dolama, tede bidi me bidigobeo. Te gasa hani bidi dabe teba pedalubo sogo, te augwaligo dage Babilonba pedelali dwai sę sulama, te augwali midigi dwai mu elama, nogo hogwayu, te wi umagi mu yaibao,” te po wali.
JER 50:14 Genuai Bidigo te Babilongo boi bidi dabeba e tiwai po wali, “Dage te enesigigo ene enebo mu konea pai hani dabe, dagego te genuai taun Babilon bagulama, te lain wasilama, boi hwįao. Dagego enesigi umagia kekelama, te ene hauwa agaba enao. Dagego te taunba umabo sę mu yao, magi baso meni, te Babilon dabego ena Genuai Bidiba dwai sę ebo dao.
JER 50:15 Te dagego agai bomai bagulali obo aluali sogo, te agai ma hwįabo hagela ebaso, te dagego aga somainogo gogola tagalali, tialima, dagego te tigidali pedai habuba genuai dagą olama, i waiyąo. Tialima, megi da, dagego aga mu dolao, te agai gasa hani dabe dolali tiwai yao. Dagego agabolo te dwai dene mabo sę umagia mu ilao, magi baso meni, te kolesagade ena Genuai Bidi, eno agabolo te dwai dene mabo sę ilibo dao.
JER 50:16 Dagego te Babilon tigidali silao, te nai wai bulabo bidi deli me bidisąma, te inayani nai sabo bidi me meni yaibao. Te Babilonde bidali gasa hani we bidi tigidali, augwali te dage Babilon dolobo sę ebo bidi dabede wi mu yaibao. Te augwa Babilon tagalama, te augwa page buluba ma pelama, te augwa hani we bidi dabe dali digi bidigi paibao,” te po wai.
JER 50:17 Genuai Bidigo e tiwai po wai, “Israel te sipsip me deli tiwai, te gasa tǫ kantri dabe te laion tiwai elama, aga dolainogo elama, te augwaligo aga pobeali. Hasia te Asiria kingo aga pageabi elama, tuali. Te nosali, te Babilon king Nebukatnesargo te agai nogo sągą dili dabe halua tuai dao.
JER 50:18 Tama tibaso, ena Tigidali Bomo Elalubo Genuai Bidi, ena te Israelgo God dao, eno obao, eno te Babilon kingba dwai dene mabo sę te agai bulu tǫ kantriba yaibao, te eno polobadu te Asiria kingba dwai dene mani tiwai gilama yaibao,” wali.
JER 50:19 “Eno te sipsip Israel te aga page buluba ma odasa asaibao, aga te bulu du Karmel, me te tǫ pedai Basan, me te Efraim bulu du pesage, me te tǫ Gileat pedai, te bulu dabede wiegi yai nosai tumainogo yaibao,” wai.
JER 50:20 “Te ena Genuai Bidi, eno te po obao, te sogo eno te dwasianu hani Israelgo sęgę sela sąyu, te augwali bugagia bidimainogo yaibao. Tama me, eno te Judago yali dwai sę sese sela sąwaibao. Tama te dwai sęgę ma dwai sę te augwalide me elalugobeo. Te bidi dabego augwali hani siba po kisilama obaso da, te usu me egobeo,” Genuai Bidigo te po wai.
JER 50:21 Genuai Bidigo te Babilongo boi bidi dabeba e tama po wali, “Dagego te Babilon augwaliba hwįgi pao. Te Merataim tǫ, me Pekot tǫ, te bulu si we bidi dabeba hwįao. Te augwali elibo sę umabo eyu, te augwaligo nai doado bage dolao. Dagego eno po tigidali wali piąo.
JER 50:22 Odao! Te hwįbo u wabo genuai pedaluali, te tǫ kantri mu dolobao.
JER 50:23 Babilon te hama me deli tiwaigo te gasa tǫ kantri dabe pepeda sąbo tiwai yali. Tialima, megi da, dage te Babilongo boi bidi dabe, dagego te Babilon pepeda sąnama dolao. Te gasa tǫ pedai kantri hani we bidi augwaligo aga subo sogo da, te augwali midigi dwai mu saibao,” te po wai dao.
JER 50:24 Genuai Bidigo e tiwai po wali, “Babilon, eno nage tola sabo hagani mubo wa me deli muani, tialima, aga menade elalubo nago me konebeo. Nago ena Genuai Bidiba boi bidi yali, tibaso, nago tede konesiąbadi te hagani muani wago nage polo tola saibao,” te po wai.
JER 50:25 Genuai Bidigo Babilonde haliga sębę elama, te agai hwįbo nai mubo be te agai sunumi dalama, te boi hwįbo nai doado bage sali. Magi baso meni, God, Tigidali Bomo Elalubo Genuai Bidi, agai te genuai sę me deli te Babilonde yabo elalubao.
JER 50:26 Dage tigidali pedai badu bidibo boi bidi dabe, dagego te Babilonba hwįagasiąo. Dagego te wit nai mubo be dabe tigidali aluao. Tama te Babilongo nai doado bage tigidali selama, te bidigo wit dabe pesage du holobo tiwai gilama yao. Tama te nai dabe dagego mu dolao. Dagego te bidi deli me elalumainogo me sula tagalamu dao.
JER 50:27 Te Babilon bomai ami tigidali ela silao, te bidi dabego te bulmakau omai dabe ela wialubo tiwai yao. Tigidali dolomainao, magi baso meni, te Genuai Bidigo augwaliba dwai dene mabo sogo te pedalubao.
JER 50:28 Te Israel me Juda meba te Babilon taga soyu, te Saionba wi ma asali. Odao! Augwa e tiwai po obao, “Genuai Bidi dena God, agai be dolali hani dabeba te dwai dene wei ponama, mabo dao,” wabo.
JER 50:29 Genuai Bidigo Babilon augwa boi bidi dabe e tiwai po walali, “Dage te enesigigo enebo mu koneai bidi dabe, dagego te Babilonba hwįagasao. Dagego te Babilon bugagia odogolama, bagua sao. Dagego te Babilon dabe me deli wi pomainu me elamuo. Te augwaliba dwai dene mayu, dagego ela munama, mu dolao, te augwaligo gasa hani dabe dolali tiwai yao. Magi baso meni, Babilongo te enaba hagoma eyu, te hasamani tigi gagea pabo tiwai mu yali, te Israel dabe augwa Genuai Bidi dao, ena te magi dwai sę munu me isąwai te wiegi yai doloba pai kolesaga ebo God dao.
JER 50:30 Ena Genuai Bidigo, eno po dolo obao, te sogo dage boi bidi dabego te Babilon gesi ogwa bidi dabe ela munama, te bidi sisinibo bulu pesagede pągąnalua paibao. Te dagego Babilon ami bidi augwali tigidali ela mueibao,” te po wai dao.
JER 50:31 “Babilon, nage te hagoma ebo tǫ kantri, ena te Tigidali Bomo Elalubo Genuai Bidi, eno po dolo nageba obao, eno nageba boi bidi ebao. Te eno nagebolo dwai dene menama, nage ela muyu ebo sogo, te pedelai dao.
JER 50:32 Nage te hagoma ebo bulu tǫ kantri, te nage tula munama dolaibao, te nage ma hodolabo bidi deli me meni yaibao. Te eno nago taun dabe isigo ulama, tama te siago nago doado bage tigidali daibao,” te po wai.
JER 50:33 Tigidali Bomo Elalubo Genuai Bidi, agai te tama po wai, “Te boi bidi augwaligo te Israel me Juda aiyaba mu elaluai. Te boi dabego augwali kalabus ilama, augwali tagala palabo homu me ebeo, tede hagela homu ebao.”
JER 50:34 Tialima, te augwali ma sabo bidigo, agai bomo elaluai, agai nogi e tiwai dao, Tigidali Bomo Elalubo Genuai Bidi dao. Agai bomonama eyu, augwali tau selama, te augwa boi bidi dabe aiyaba elaluaibao. Te agai tigidali bulu tǫ kantri we bidi augwaliba te bugagia homu tegaluama bidabo sogo mawaibao, tiali goli, te Babilon dabe me tegobeo. Menio. Agai augwali te dwai mu tama bididumainogo yaibao.
JER 50:35 Genuai Bidigo e tiwai wali, “Te bulu tǫ kantri Babilon dolomainao. Te Babilon we bidi augwali te augwa tobolu bidi dabe me, kolesaga koneai bidi dabe dali, bobobage hwągo dolomainogo yao.
JER 50:36 Te Babilon tibo profet bidi dabe dolama, augwali te esela pabo bidi tiwai pedalumainao. Te Babilon ami bidi dabe dolobaso, te augwa wi dwai mu yaibao.
JER 50:37 Te Babilongo hos me kekebo karis dabe te dolomainao. Te gasa hani ami bidi dabego te Babilon tau sali, te ami tigidali dolaibao. Augwali te we dabe tiwai elama, bomo meni yaibao. Te Babilongo wiegi wiegi yai doado bage tigidali dolao. Te boi bidi dabego sagaselama, sela paibao.
JER 50:38 Te poi pibo sogo bobobage sesabi elama, te Babilonde elaluama, te agai wę tigidali sula somainao. Magi baso meni, te tibo god dabego piksa te tǫ kantride pągąnaluali. Te Babilon augwaligo te tibo god dabe wali pidubaso, augwali te esela pelama, wabo pabo bidi tiwai pedelaibao.
JER 50:39 Tama tialima, te Babilonde bidi munu me bidisiąbadi, te nosali sogoba me usu nama, tama tiwai elaludaibao. Te uni hasa dabe, me uni yowi dabe, me te dwai ba dabe naga bidalueibao.
JER 50:40 Polobadu eno te taun Sodom me taun Gomora dolali, te taun dabe augwali pąde elaluali me, te megi da, te bulu dabe olo pesage elalubao. Te ena Genuai Bidi, eno obao, te tobage deli sę naga te Babilonba pedelama, tama tede bidi me bidigobe dao,” te po wai.
JER 50:41 “Suao! Te ami dabego te not badu bidali tagalama, asainogo ebao. Augwali te bomai hani mu te king hauwa elalu, te digibulu mu bidibao. Megi da, augwaligo te boi hwįabo nai sisi ebo dao.
JER 50:42 Augwali te homu dene eyu tau sabo kolesaga me isąbo bidi dao. Augwaligo te gasa bidi dolabo homu godolo yaibao. Augwaligo te enesigi me ene tolalubao. Augwali te hos dabede dugulasa asaibao, tama te genuai kulukulu pedelaibao, te nambisde genuai ąį dini dabe bugusu wabo tiwai yaibao. Augwali te lainde wasilama, te dage Babilon bageba hwįainu sisi elalueibao.
JER 50:43 Babilon kingo te boi hwįabo boi bidi dabe asobo u wabo odama, aga te wi mu elama, te aga nogo sągą dili kimi meni yaibao. Aga wi elama, te kone palobo dwai mu yaibao, te wego wai ame nainu tigi dene ebo tiwai mu pedelaibao,” te po wai.
JER 50:44 “Te polo tama naga, te eno Babilon dabe augwa tǫde sela sąyu, te laingo sipsip dabede ebo tiwai yaibao. Laion aga te wę Jordan busi tomode bidali tagalama, te sipsip dabe nosai tubo pesageba polo mu pelama, pobeasa bilibo tiwai yaibao. Tama eno te tǫ tonaluabo bidi me deli nigilaibao. Eno te tama tebo sogo, mena bidigo ena dali konila po waibawe? Te dego eno bomo tiwai elalubawe? Te mena tobolu bidigo ena dali boi bidi yaibawe?
JER 50:45 Eno te tǫ kantri Babilonba yabo sę homu kone palali elalubo, tede elalubo po te bugagia olo muao. Eno te tigidali we bidi me wai puluba dabe sela sąwaibao, te laiongo sipsip tigidali ela munama, te augwa tigi kekasa pabo tiwai yaibao. Te Babilon tǫ digi eno te ebo sęde dwai noma mu saibao.
JER 50:46 Te boi bidi dabego te Babilon sabo sogo, te genuai u pedelama, te tǫ mumunu yaibao. Tama te Babilongo gela wabo te genuai umagia mu pedelama, te gasa hani we bidi augwaligo odaibao,” wai dao.
JER 51:1 Genuai Bidigo e tiwai po wali, “Suao! Eno te bidi hani mebago homu hodolama, te nai hauwa dolomainogo yaibao, augwali te bomai wali tiwai asama, te tǫ kantri Babilon me aga we bidi dabeba hwįaibao.
JER 51:2 Eno te gasa badu tǫ kantri bidi hani dabe tagala palama, te Babilonba hwįagasama, te augwaligo aga doado bage me sela sąwaibao, te bidigo wit bo hogomu sela sąbo tiwai yaibao. Tama te Babilon dolobo sogo, mu tama, te augwali tigidali tǫ habu badu aselama, aga dali hwįagasaibao,” te po wali.
JER 51:3 “Dage Babilongo boi bidi dabe, dage boi hwįabo te hagawia seselalubo nai sisilama, te duga enesigi kekelama, te Babilon ami gesi bidi tigidali enao. Dagego augwali me deli gogologobeo. Menio. Augwali tigidali mu ela silao.
JER 51:4 Dagego enebo enego te Babilon dabe dolama, te augwali isama, te Babilon hanu sunumi dabede degasa pai munalua paibao,” wali.
JER 51:5 Te Israel me Juda augwa tǫde bidali sogo, augwaligo te dwai sę hauwa te Israelgo God gedude yali, aga magi dwai sę deli munu me isąwai wiegi yai doloba pai kolesaga elalubo God dao. Tiali goli, God, Tigidali Bomo Elalubo Genuai Bidi, agai augwali tudiba mu me musiąma, te wilawe we bidibo tiwai me ebeo.
JER 51:6 Dage Israel me Juda, dage te Babilon tagalama, wi pao. Dage deli deli te wi pobaso da, te dage dologobeo, dage bugagia bidaibao. Tiyu, dage te kantri Babilon dali dolabuo, magi baso meni, megi da, Genuai Bidigo te Babilon aga yali dwai kolesagade dwai dene mabo wei ponobo sogo dao.
JER 51:7 Polobadu Genuai Bidigo te tigidali tǫ kantriba dwai dene momainogo yali, tama te tǫ kantri Babilongo agai te sę yalio. Babilon te kap gol me deli tiwai Genuai Bidigo nogode munama, tama Genuai Bidigo digi te gasa hani dabe te kapde wain tumainogo yai. Augwali te ayoge elama, te augwali umuna pai tiwai yai dao.
JER 51:8 Tialima, te Babilon aga digi te tulaluama, dolaibao. Tibaso, dagego agade hobedai gela waiyąo. Dagego te aga keni dabe pedela sabo marasin sigi pao. Te aga usu ma yaibao homu ebao.
JER 51:9 Te Israel me Juda augwaligo e tiwai po waibao, “Da te kalabus bidi dabego te Babilon usu ma ilabo homu yali, tialima, aga usu yai me pedalubeo.” Nosali augwa te po wali, “Tagalao, dago te Babilon tagalama, da deli deli te dena page buluba ma pinao. Magi baso meni, te Babilongo yali dwai sę genuai mu elalu, te dagaluba usu nigi holali. Tibaso, Genuai Bidigo te Babilonba dwai dene mabo sę umagia mu yai dao.
JER 51:10 Genuai Bidigo te Babilon dolobaso, tama te kolesagade agai te da dali yali kolesaga te doloba pai kolesaga naga dao, te hania ola mani. Tegobao, da te Saionba pelama, te dena Genuai Bidi, Godigo yali sę tigidali hanilaibao,” augwaligo te po waibao.
JER 51:11 Dage Babilongo boi bidi dabe, duga ene dabe dulama, te hwįabo sabele dabe sao. Genuai Bidigo te Babilon dabego agai be dolaliba homu kone palama, te agai dwai dene augwaliba wei ponainogo ebao. Agai te Babilon mu dolainogo, tama agai te bulu kantri Midia homu hodolama, te Babilonba hwįagasomainogo yai dao.
JER 51:12 Dage boi bidigo, dagego plak ugwa ugwanu sagulama, te boi bidi dabego hwįbo bomo eyu, te Babilon genuai obo alumainao. Te taunde tonaluabo ami bidi dabe muao, te augwaligo sę bugagia mu yao. Te ami dabe geme duala sigi pomainogo tagala palama, te augwaligo Babilonba hwįabo sisi yao po walao. Genuai Bidigo te Babilon we bidi dabeba dwai dene mabo sę umagia mu yaiba wali, te megi da, agai te sę yainogo ebao wali.
JER 51:13 Babilon, te nago tǫ kantride te ąį hauwa me wiegi wiegi yai nai hauwa elalubao. Tialima, nage dolabo sogo te pąba yagasalio. Nage bidibo ula te ugwa hobolobo hobi tiwai elaluali, te megi da, augwaligo togwainogo ebo dao.
JER 51:14 Tigidali Bomo Elalubo Genuai Bidi aga nogide digi mu po weyu, te sę yaibao po wali. Agai e tiwai po wali, “Babilon, te eno genuai hani bidi odasa asu, nageba hwįagaselama, te nage aiyaba elalueibao. Te augwaligo nago tǫ pągąna sagasaibao, te genuai kuli mano hanigo ebo tiwai yaibao. Te augwaligo nage aiyaba elalubo si da, teda augwali wiegi yai pemene elama, te bomonama i waibao,” te po wali.
JER 51:15 Te aga bomogo digi Genuai Bidigo te tǫ nigai dao. Awe, aga wiegi yai koneani homu kolesagade agai te tǫ dodolama muai dao. Aga homu kolesagade agai te dagalu nigiyu elama, diniga palali.
JER 51:16 Agai po obaso, te dagalu pǫ dabego te be kulu bomonama obao, te pǫ hauwa umabo hogodobao, te gasa badu gasa badu asama, deliba sisinagasobao. Agai te be sele ula ilibaso, te tulubage aiyaba tulubao. Agai te wali hodolobaso, te wali aga bidali badu tagalama, asobo dao.
JER 51:17 Bidi augwali te tiwai ebeo. Tigidali te umuna pelama, te kolesaga konesiąwai elaluai. Te golgo tibo god dabe nigibo bidi augwali augwa te nigibo naide augwa hale yaibao. Te god dabe augwali te god mu menio. Augwa bidibo ula me elalube dao.
JER 51:18 Augwali te olo nai tama, te bidi dabego posobo po augwaliba waibao. Te god dabe dolama, te mu silaibao.
JER 51:19 Tialima, Jekopgo God te tiwai me tegobeo. Aga te gasagi yai tedali mu dao. Agaduba deligo naga te tigidali nai nigali. Te agai Israel dabe sa munama, te aga hani mu tiwai elaluai. Aga nogi e dao, Tigidali Bomo Elalubo Genuai Bidi dao. Babilon te Genuai Bidigo egebe wąbi tiwai dao.
JER 51:20 Genuai Bidigo e tiwai po wali, “Babilon, nage eno egebe wąbi tiwai bidibao, te eno hwįainu sabo nai tiwai dao. Eno nage selama, te hauwa we bidi hani dabe me te bomai kantri tǫ dolai dao.
JER 51:21 Eno nage selama, te hwįbo hos dabe me ami bidi dabe duabo hos dabe dolai. Eno nage siyu, te ami dabe dugulama, boi hwįbo karis dabe dali dolai dao.
JER 51:22 Eno nage siyu, tigidali we me, bidi me, te monu dabe me, wai puluba dabe me, te gesi bidi dabe, me gesi we dabe dolai dao.
JER 51:23 Eno nage siyu, te sipsip dabe dali, te sipsip tonalubo bidi dabe dali dolali. Eno nage selama, te ain kekeyu, te gi tǫ elala pabo bulmakau dabe dali, te augwali tonalubo bidi dali dolali. Te eno nage siyu, te gavman dabe me, tobolu bidi dabe me dolai dao,” wali.
JER 51:24 “Tialima, ena Genuai Bidi, eno te Babilon dabe augwaliba dwai dene mawaibao po obao, te augwaligo Saionba dwai kolesaga tigidali yali wei ponaibao. Te dage Israel me Juda, te eno ebo sę dagego suagameo,” te po wai.
JER 51:25 “Babilon, nago bomo te genuai bulu du tiwai elalubao, nago te tigidali tǫ pedai badu dolobo sę yali. Tialima, mu tama, ena Genuai Bidigo, eno nageba boi bidi eyu, te eno nogo dili bomo selama, te nage tola selama, nage te tǫba sąnama, te isigo nage mu dela silaibao.
JER 51:26 Te bidigo selama, aga be sę yabo wiegi yai masigi usu, te nago bulu pesagede deli me elalugobeo. Menio. Te nage mu dolama, te nage tama tiwai sesemane me elaludaibao,” wali.
JER 51:27 Te plak ugwaba selama, te hauwa tǫ kantri we bidi hani dabe tomode biugel bu wao, tama augwa te Babilonba hwįagasabo sisi emainao. Te hani dabe augwali te Ararat, me Mini, me Askenas, te augwali asomainu i wao. Te hwįbo tonaluabo ofisa bidi me deli nigilao. Te ami hani bidi dabe augwa hosde dugulama, te genuai kuli mano hani tiwai asomainao.
JER 51:28 Te tǫ kantri Midia king dabe, me gavman bidi dabe, me augwa tobolu bidi dabe me, te tǫ kantri Midiago tonalubo tǫ kantri we bidi hani tigidali i wao. Te tǫ kantri we bidi hani augwali hauwago te Babilonba boi hwįagasabo sisi yao.
JER 51:29 Genuai Bidigo te Babilon dolabo po mia selama, te olo tǫ bulu pesage elalueibao, tama tede bidi me bidigobeo. Genuai Bidigo te sę ebaso, te tǫ mali umagi mu yaibao.
JER 51:30 Te Babilon ami dabe augwaligo te boi hwįbo tagalama, te hwįbo bomai be tomode bidibao. Tama augwali te we dabe sibi tiwai pedelama, te augwaligo bomo menia sai. Te boi bidi augwaligo te Babilon be dabe isigo ulama, te aga bomai sunumi dabe elaluali, te aluama besela sai dao.
JER 51:31 Te po sela pabo bidi dabe deli deli udulama, te Babilon kingba waligibu, te boi bidi dabego agai taun pedai tigidali badu sai dao, te po pusudu gebao.
JER 51:32 Te boi bidi dabe augwaligo te ąį nogebo pesage badu selama, te ąį pude sigi dili dabe isi ulali. Tama te Babilon ami bidi dabe wi dwai mu elama, te esela pabo bidi tiwai elama, umuna sai dao. Te po sela pabo bagego te sę yali po te kingba wagi pidu gebao.
JER 51:33 Tigidali Bomo Elalubo Genuai Bidi, aga Israelgo God, agai e tiwai po wali, “Te boi bidi dabego Babilon agabo te bidigo tubo nai wit agabo tiwai yaibao. Bidigo te tau yali nai togobo tiwai eyu, te boi bidi dabego Babilon togolama, dolaibao. Tama te sę yabo sogo pąba pedelalio,” wali.
JER 51:34 Taun Jerusalemgo te tiwai po wali, “Babilon king Nebukatnesargo ena tulama, te ena mu silalio. Aga te bulu gula mane me deli tiwaigo ena mu dalali. Te agai haliga eno wiegi yai naigo pągąnai. Agai te nai tula silama, te ena te moni pou disde te nai habu deli me munalu sąbo tiwai ilali. Nosali agai ena mu peą sąwanio. Te Babilon dabego eno tigi mu dolama, te eno kaneme gelali. Te augwa dwai sę yali dao, te eno homugo te Genuai Bidigo augwa te dwai sę yali wei ponao,” po wai dao.
JER 51:36 Tialima, Genuai Bidigo te tiwai po wai, “Jerusalem, odao. Mu tama, te eno nage tau selama, te Babilon dabego nageba yali dwai sę dabe wei ponaibao. Eno te Babilonde elalubo wę tigidali sula somainogo yaibao.
JER 51:37 Eno te Babilon dolama, te masigi du holali pesage naga elalueibao. Te uni yowi dabego bulu pesage dabe naga elalueibao, te bidi tede meni yaibao. Te gasa hani bidi dabego subo sogo da, te augwali dwai noma mu selama, te wi umabo mu yaibao. Augwaligo te Babilonba kęnę po waibao.
JER 51:38 Tama te Babilon dabego i dwai mu weyu, te gesi hasa laiongo i wabo tiwai gilama ebo dao.
JER 51:39 Tialima, ena Genuai Bidi, eno po dolo obao, te augwaligo dwai kolesaga yabo haliga hogodobo sogo da, te eno genuai nai tuabo daa me deli pedelama, te augwa ąį hauwa tulama, gęǫ eyu, pemene eyu, i hae weyu yaibao. Te nosali augwali mu godege pilama, te augwali munu ma hodalugobeo.
JER 51:40 Te eno augwali te ela muabo pesageba odasa paibao, te bidigo te omai sipsip dabe, me meme dabe, augwaliba ebo tiwai gilama yaibao,” po wai dao.
JER 51:41 Genuai Bidigo e tiwai po wai, “Tigidali tǫde we bidi hanigo Babilonba genuai nogi mawai, tiali goli, te boi bidi dabego hwįagaselama, saibao. Te gasa hani we bidi dabego subaso da, te augwali midigi dwai mu saibao.
JER 51:42 Te boi bidi augwaligo Babilon halua saibao, te tamu ąį dinigo te ąį sane mesega sabo tiwai yaibao.
JER 51:43 Te agai taun dabe tigidali mu dolama, te bulu tǫ kantri olo masigi kemi bulu pesage tiwai pedelaibao. Tama bidi me bidalugobeo, tama bidi augwali tede munu me biligobeo.
JER 51:44 Eno te Babilongo tibo god, te Belba dwai dene mabo sę eyu, te eno agai te dalali nai dabe bugulabo sę ilaibao. Tama te tǫ kantri we bidi augwali agaba me asogobeo. Tama te Babilon bagulali genuai obo te tigidali pepeda paibao,” te po wai dao.
JER 51:45 “Dage eno we bidi dabe, duga te Babilon tagalama, wi pao. Dage deli deli wi pobaso da, te dage bugagia bidaibao. Ena Genuai Bidigo eno haliga sębę dwai mu te Babilon dabeba ebao, tama tiyu, eno dage augwali dali dolabuo.
JER 51:46 Dagego haliga dwagila midigi selama, dage te tǫde haniani po dabe sabilibo odama, te dage wi me igio. Te kibu be me delide gasa po pedalu, te gasa kibu bede gasa po pedalu yaibao. Te genuai boi hwįbao weyu, te king mego te gasa kingba hwįbao te po augwaligo waibao.
JER 51:47 Magi baso meni. Eno bodolu muani sogo me deli elalubao, tama te sogoba pedalubo si da, eno te tǫ kantri Babilongo tibo god piksa dabego elalubo nogi dolaibao. Te tǫ kantri Babilon hale dwai mu yaibao. Te boi bidi dabego te Babilon bidi hauwa ela munama, augwaligo tigi te Babilon bulu tǫde munalua paibao.
JER 51:48 Te ena Genuai Bidi, eno obao, te sogo dagalu dali tǫ sigo te augwalide elalubo tigidali naigo te Babilon tulalubaso, wiegi yai pemene mu yaibao. Te haniani nai dabe dolabo bidi, augwali te not badu bidali tagalama asu, te Babilonba hwįagasaibao,
JER 51:49 tama Babilon dolabo sę ebo te aga digi dage Israelbolo yali, me te gasa tǫ badu hani dabe yali kolesaga tiwai si te agabolo wei ponaibao,” te po wai dao.
JER 51:50 Tialima, te Babilon augwaligo dage dolisąwani Israel, dage polo asesą Babilon tagalama, wi pao. Mu tama, duga page bulu digibulu elaluali, tiali goli, te dagego Genuai Bidiba homu kone palama, te dagego Jerusalem homu kone ebo homu me gegeda paligio.
JER 51:51 Megi da, dagego e tiwai po obao, “Da hale dwai mu yalio. Magi baso meni. Te bulu tǫ kantri bidi dabe augwali te Genuai Bidigo Tedali Gasagi Yai Mu Be Habu tomoba pai. Te augwaligo dabolo po dwai wali. Tibaso, da hale dwai mu ebao.” Megi dagego te tobage po obao.
JER 51:52 Genuai Bidigo e tama po wai, “Awe, megi te tiwai elalubao. Tiali goli, eno bodolu muani sogo me deli elalubao, tama te sogo pedalubaso da, teda te sogo eno te tǫ kantri Babilon tibo god piksa dabego elalubo nogi dolaibao. Te tigidali Babilon habu badu te boi hwįyu, bidi hauwa dolobaso, te augwali gela wabo umagi mu yaibao,” te po wai dao.
JER 51:53 “Babilon te dagaluba ugwanu dąį mu igulama, te boi hwįbo bomai pesage nigali da, tagalao, eno te nai dabe dolabo bidi augwali tagala palama, te augwaligo aga doligi dao. Ena Genuai Bidi, eno te po wai dao,” wali.
JER 51:54 Te Babilonde genuai gela u pedelaibao. Te boi bidi dabego te tǫ kantri mu dolama, te genuai u wabo pedelaibao.
JER 51:55 Genuai Bidigo te Babilon mu doliyu, te Babilongo genuai u wabo mu silaibao. Te boi bidi hauwago te Babilonba hwįagaselama, te kulukulu genuai mu pedelama, te genuai tamu ąį dini dabego bugusu wabo tiwai yaibao.
JER 51:56 Te nai doado bage dolabo bidi dabe, augwaligo te Babilonba boi hwįagaselama, augwali aiyaba elaluaibao. Tama augwaligo te Babilon ami bidi dabe kalabus elama, te augwaligo enesigi dabe tologwaibao. Magi baso meni. Genuai Bidi aga te dwai sę ebo dolo wei ponobo God dao. Tama tibaso, mu tama, agai te Babilon dabego dwai kolesaga usu siyu, dolo mu wei ponaibao.
JER 51:57 Te king, agai nogi da Tigidali Bomo Elalubo Genuai Bidi dao, agai te tama po wali, “Eno te Babilon genuai bidi dabe gęǫ page ilaibao, te ofisa bidi dabe, me kolesaga koneai bidi dabe, me gavman bidi dabe, me tobolu bidi dabe, me ami bidi dabe, te kolesaga umuna palobo sę ilaibao. Te augwali mu godege pilama, te munu ma hodalogobeo.
JER 51:58 Ena Genuai Bidi, eno tigidali bomo elalubao, eno obao, te boi bidi dabe augwaligo te Babilon bagulali obo tai nidigi pali alulama, te deli me elalugobeo. Tama augwaligo te taun tomoba piduali genuai bobobage sunumi isigo ulaibao. E tiwai dao. Tigidali hani we bidigo odolali sę dene yali. Te augwaligo nigali nai tigidali te isigo daibao,” te po wai dao.
JER 51:59 Te kibu be me si me side te Sedekaia Juda king bidali sogo, Jeremaiago po me deli Babilonba ola tolali. Te sogo king Sedekaia Babilonba pai hagede yali, te Seraia, aga ofisa me deli, te aga dali painogo yali. Seraia aga te Neriago ogwa, te Maseago wąį nǫų dao. Tama Jeremaiago po Seraiabolo mawai dao.
JER 51:60 Jeremaiago te dwai sę tigidali Babilonba pedelabo po asęai, te Genuai Bidigo agaba mani po dabe dao.
JER 51:61 Tialima, Jeremaiago Seraiabolo e tiwai po wai, “Nage te Babilonba sabalobo sogo, nago te po tigidali te we bidiba nedao,” wali.
JER 51:62 “Tama nago e tiwai gedu haluasa po wao, ‘Genuai Bidio, nago te po wai dao, nago te tǫ kantri dolama, te bidi me deli, ma te hasa me bidigobeo. Te sesemane sogo te bulu olo elaludaibao, nago te po wali,’ tama wao.
JER 51:63 Seraia, nago te buku nedebo sogo, te nago gedu haluasa po ola silama da, tialima, masigi me deli te bukude tomode gebelama, te buku te wę Yufretisba sąyao.
JER 51:64 Tialima, Genuai Bidigo po nago e tiwai po pusao, ‘Babilon da, te e buku tulaluali tiwai yai elama, te aga ugwaba ma pedalugobeo, magi baso meni, ena Genuai Bidi, eno aga dwagila mu dolaibao. Te Babilon we bidi augwali mu tulaluaibao,’ nago te po wao,” Jeremaiago te po Seraiabolo wali. Te Jeremaiago po eba silagasobao.
JER 52:1 Te Sedekaia Juda king pedelali sogo, agai kibu be te 21 yia elalubadi, tama aga te Jerusalem king bidali te kibu be 11 kibu be bidai. Aga ida, te Hamutal, te gasa Jeremaiago wegi, aga te Lipna taun we me deli dao.
JER 52:2 Sedekaiago te king Jehoiakimgo kolesaga wali pelama, tama agai Genuai Bidi gedude dwai kolesaga yai dao.
JER 52:3 Te Juda dabe me Jerusalemgo dwai kolesaga ebogo te Genuai Bidigo haliga sębę dwai mu ilali, tibaso Genuai Bidigo te we bidi dabe augwali hagela ebaso, te augwa bulu tǫde sela sąnama, digibulu pai dao. Sedekaiago homu te Babilon aga tonalubo hagela mu yai, tibaso aga munu me aga dologode me bidibeo.
JER 52:4 Tialima, te nogo si poluade te kibu be 9 te Sedekaia king bidai, tama te polua dei nogo si wabode, king Nebukatnesar te Babilondu aga ami dabe dali aselama, te Jerusalem bagua sagaselama, te taun sainogo boi hwįani. Augwaligo te Jerusalem bagulama, tama te taun bobogelali masigigo nigai genuai obo pagede te tǫ selama, du holama, tama augwali tede dolalu, boi hwįainogo yai dao.
JER 52:5 Augwaligo te Jerusalem bagulali elaludubadi, te kibu be deli olama, polua a naga, me nogo deli tama bidai. Te kibu be 11 Sedekaia te bidai,
JER 52:6 tama te kibu bede digi, te polua 4 wabode, te dei 9 wabo side, te Jerusalem we bidi augwali nasigo mu salio, magi baso meni, augwaligo nai tigidali silai dao.
JER 52:7 Tama te dei wabo side Babilon augwaligo te masigigo nigai genuai obo habu me deli badu aluama, te Jerusalem tomoba pali. Tialima, te king Sedekaia dali, aga ami bidi dabe me, te Jerusalem tagalama, wi palio. Te hulide augwali pelayu, te kingo giba sabolama, tama augwa te obo ununani sunumidu taun taga soali. Te hauwa Babilon augwaligo te Jerusalem obo bagulali sę elalubadi, te Jerusalem ami bidi dabego Jerusalem tagalama, wi pelayu, te ąį Jordan odogo malu pesage buluba pabo sunumi wali pai dao.
JER 52:8 Tiali goli, te Babilon ami bidi dabego te king Sedekaia pobeasa pelama, te augwali agaba te malu tǫ bulu te Jeriko taun pageba sabolai. Te Sedekaiago ami bidi dabego aga tagalama, wi tedela palio.
JER 52:9 Tialima, te Babilon dabego te Sedekaia pageabi elama, aga te Babilon kingba odasa pali. Te sogo Babilon king te taun Riplade bidali, te Hamat tǫ tomode dao. King Nebukatnesargo Sedekaia sulama, te po wai, Sedekaia te aga yali dwai kolesagade dwai dene somainu yaibao, wai dao.
JER 52:10 Te Babilon dabego te Sedekaiago ogwa dabe me, te Juda tobolu bidi dabe me selama, te augwaligo augwali te Riplaba odasa asai. Tama te bulude Nebukatnesargo po obaso, te augwaligo te Sedekaiago ogwa dabe te Sedekaia aga gedude ela muai. Te augwaligo Juda tobolu bidi dabe me ela muai dao.
JER 52:11 Te kingo po obaso, te augwaligo Sedekaiago gedu si guda sąwai. Te augwaligo aga nogo sągą te bomai aligabo bono sengo dunama, te aga Babilonba sela palio. Te augwaligo aga tede kalabusiba munama, te aga kalabuside bididubadi, te aga isibo sogoba usu nai dao.
JER 52:12 Te Nebukatnesar te Babilonde king 19 yia bidali, te waiya side, te a naga polua, te dei nogo si wabo te deli kibu bede naga, Nebusaradan, te Babilon king aga boi bidigo elidali weyu tonalubo bidi hani dabe augwa polalubo ofisa bidi, te Jerusalemba asali, te Babilon kingo sę tonaluagasai dao.
JER 52:13 Tama agai te augwaligo Genuai Bidiba lotu wabo tempel be, me te Juda kingo be, me te Jerusalem gegunai bidi dabego be, tigidali isigo ula silali. Te genuai dila pai be me deli digi te Babilon dabego me ulubeo.
JER 52:14 Te Nebusaradan dali bidali hani dabe, te Babilon ami tigidaligo te masigigo nigali genuai obo alulama, dolai dao.
JER 52:15 Tama Nebusaradango te Jerusalemde bidaluali doado bage meni yai we bidi meba te augwali Babilonba kalabus igibu odasa palio. Te hwįani sogo te Juda bage mebago Jerusalem tagalama, te Babilon dabego bidagasali pesageba wi pelama, bidigi pali. Te bage me agai te Babilonba kalabus igibu odasa pali. Tama te haniani nai dabe nigibo mu koneani kolesaga koneai bidi dabe, augwali te Jerusalemde bidalubadi, te agai augwali me sela pai dao.
JER 52:16 Tialima, meba Juda te tigidali nai mu sǫą paibaso, augwali bidalumainogo tagalama, te wain gi dabe me gasa gi dabe tonalumainogo yai dao.
JER 52:17 Tama te Babilon dabe te Genuai Bidigo genuai tempel beba pelama, te brasgo nigai genuai bobobage pos si tologali, te bidi dabego brasgo nigai wilkar te ąį ugwadu daide pobegabo nigali nai elaluali me tologolama, sali. Te genuai ąį sabo nai augwaligo te brasgo nigali nai me tologali. Tama augwa te bras tigidali te Babilonba sela pai dao.
JER 52:18 Tama te Babilon dabego te sospen dabe, me savol dabe, me lam sula sabo nai dabe, me te genuai pou te ofa ebo kaneme mubo dis dabe, me te wiegi yai denami emainogo ulubo pauda ulubo dis dabe, me te tigidali gasa nai te polobadu Juda dabego brasgo nigilama, te Genuai Bidigo be tomode sę emainogo muani nai me, te sela pai dao.
JER 52:19 Tama Nebusaradango te bidi dabego gol me silvago nigali nai dabe me sali, te dwasianu pou dis dabe, te sia sela pabo pou plet dabe, te ofa ebo nai kaneme mubo pou dis, me sospen dabe, me te ni dilide udalubo lam dabe, me te wiegi yai denami ebo pauda ulubo pou plet dabe, me te ofa ebo wain dabe muani pou dis dabe, te tama tigidali nai sela palio.
JER 52:20 Polobadu te king Solomongo sę bidi dabego te bras selama, te genuai bobobage pos si nigali, te genuai tang wę nigilama, tama te nogo si olama, sągągo si bulmakau piksa dabe nigilama, te genuai ąį tang dologode elaluali te dwasianu daide ugwadu muabo nai wilkar elaluai. Te Solomongo po obaso, augwaligo te nai dabe Genuai Bidigo beba muani, polobadu mu. Tialima, megi da, te Babilon dabego te nai dabe alulama, te nai nigali bras sainogo tiali. Te brasgo sęgę te genuai mu, te bidigo skel me egobeo.
JER 52:21 Te bras si nigali genuai bobobage pos augwaligo te deli tigi tobage sabi si naga nigai. Te nai sigo usu sabo bobage te 8 mita, te nai ugwade eda si genuai usu sabo te 5 mita me 30 sentimita dao. Augwaligo te pos si te genuai paip bras tiwai nigali, te bras tomoba bulubaso da, te usu nama te 7 me hap sentimita tiwai. Augwa te pos tobolu brasgo nigali, te tobolu dwasianu genuai gana yai. Te tobolu ugwaba igulali, te 2 mita me 20 sentimita elaluai. Te augwaligo bras selama, te au wiegi yai wa tiwai nigali, me te pomigranet ni du wai tiwaigo au yali. Tama augwaligo te ni du pomigranet te wade mubo tiwai yai. Tama augwaligo te pos tobolu si bagulama, te au tiwai ilai dao.
JER 52:23 Te pos deli delide te pomigranet du wai bidi sese a naga 100 te aga tobolude munama, elaluai. Te 96 pomigranet du te tobolu me si me si badu bagulama te gasa pomigranet du aiyadu geana selama, dologoba bugulama elaluai dao.
JER 52:24 Nebusaradan, te Babilon dabego ami polalubo ofisa bidi, agai te tobolu bidi pris Seraia sobadi, me Sefanaia sali, te Seraia tudi badu daganalu sę ebo bidi, te gasa pris sela te Godigo tempel be sunumide tonalubo bidi me sela pali.
JER 52:25 Tama te Jerusalemde agai te Jerusalem ami bidi dabe tonalubo ofisa bidi me sali. Tama agai te Juda kingba te wiegi yai homu kolesaga mabo bidi dabe te a naga olama, me si te sobadi yai. Te hani dabe te Jerusalemde bidaludubadi, te agai augwali pageabi yai. Tama agai te ami bidi dabego polalubo ofisa bidigo sę ebo kuskus bidi sali, te ami bidi pedalumainogo skul ola mabo sę iduali bidi. Te agai te kuskus bidigo sę ebo bidi te bidi sese sela te 60 bidi Jerusalemde bidibo sulama, tama agai te bidi dabe me sai dao.
JER 52:26 Tialima, Nebusaradango te bidi tigidali selama, te Babilon king bidibo madi te taun Ripla,
JER 52:27 te Hamat tǫba odasa pai. Te kingo po obaso, augwaligo te bidi dabe tede ela muai. Te Babilon dabego tama kolesaga elama, te nosali augwaligo te gasa Juda dabe selama, tama digibulu mu pelama, te Babilonba kalabus igibu sela pai dao.
JER 52:28 Te Nebukatnesargo kalabus igibu sela pali we bidi namba, e tiwai dao. Te kibu be 7 aga king bidali sogo, agai te 3,023 Juda we bidi sela pai dao.
JER 52:29 Te aga kibu be 18 te king bidibo sogo, agai te 832 Jerusalem we bidi sela palio.
JER 52:30 Te kibu be 23 aga te king bidali sogode, te polalubo ofisa bidi Nebusaradango te 745 Juda we bidi selama, te augwali kalabus igibu odasa pai. Te kalabus igi pali bage dabego namba e tiwai dao, te 4,600 mu dao.
JER 52:31 Te Juda king Jehoiakin te Babilonde kalabus elaludubadi, te 37 yia bidai, tama te waiya si tomode Evil Merodak te Babilon king pedelai. Te 12 polua, te dei 25, te wabo kibu bede, Evil Merodakgo te Jehoiakin homu dene eyu, te aga kalabus bidali tagala palai dao.
JER 52:32 Evil Merodakgo agabolo wiegi yai kolesaga elama, te agaba genuai nogi menama, tama te tiali kolesagade te Jehoiakin aga dali te Babilonde kalabus bidali king dabego genuai nogi aiyaba elaluai dao.
JER 52:33 Tama tialima, te Jehoiakingo te kalabus bidi dabego mubo ugwa munu ma mubeo. Te tigidali sogo aga te Babilon king dali deli madi dugulama, nai tudu genama, te Jehoiakin aga isibo sogoba usu nigi pai dao.
JER 52:34 Te Babilon kingo po obaso, te augwaligo tigidali side Jehoiakinba mone maduali, te Jehoiakin aga bugagia bidimainogo tiali. Te augwaligo te tiwai sę ela pidubadi, te Jehoiakin aga isibo sogoba usu nai dao.
LAM 1:1 Jerusalem da, hobede mu dao, aga te yǫya pai we me deli tiwai bidibao. Polobadu da, agai we bidi hauwa mu elaluai dao. Tiali goli, tegoba, megi da, aga olo mu te elalubao. Awe, polobadu agai gasa tǫ kantri dabe we bidi tomode genuai nogi elaluai da. Tiali goli, megi da, aga sęgę genuai elalubao, te wilawe we me tiwai dao. Polobadu aga te polalubo kwin we tiwai bidama, agai provins hauwa tonaluai dao. Tiali goli, megi da, te boi bidi dabego aga aiyaba elaluama, tama aga olo sę ebo we tiwai te bidibao.
LAM 1:2 Polobadu da, tigidali kantri dabego aga abagi wai dao, tiali goli megi da, te gasa kantri mego agade hobede me ebeo. Te abagi dabego aga dali ili po olama, tama augwali agai boi bidi pedelali. Tialima, tigidali sogo hulide Jerusalemgo gela dwai mu weyu idubo, mu tama agai gela gųgai nabogedu aiyaba tulalubo dao.
LAM 1:3 Te boi bidi dabe augwaligo te Jerusalem pąde bidali Juda dabe dali dwai sę elama, augwali dene manio. Tama megi da, augwaligo te Juda dabe gasa kantriba kalabus elama, odasa palio. Te kantri Juda te meba Israel hani isąwai kantri tomode elalubo dao, tiali goli agai bugagia dulalubo meni dao. Te boi bidi dabego aga pobeasa pelama, aga bagua sai elaluai dao. Tiali goli, aga wi pabo usu meni yai dao. Tama augwaligo aga pageabi yai dao.
LAM 1:4 Te taun Saionba pabo sunumi dabe olo elaluyu, hobedai gela oduali. Magi baso meni, te augwalide te genuai lotu wabo genuai sogo dabede te bidi dabe me augwalidu te moni lotu be tempelba me soayu isąma ebaso. Te taun tomoba pabo sunumi dabe olo elalua pali. Tama te pris dabe augwali homu sęgę mu elama, te bidigo dene sobaso gela wabo tiwai elama gela wabo. Te Saion bulu gesi wegi mani sęgę genuai mu tolobao, tama augwaligo te tempel bede balia po me wabo menio. Tama me te taun Saion aga me te dwai dene mu siyu elalubao.
LAM 1:5 Te boi bidi dabego ugwa ela holobaso, augwaligo Jerusalem tonalubo dao. Tama augwaligo magi naide moni homu me ebo meni. Magi baso meni. Te Jerusalem dabego augwalibolo sęgę maiabo usu isąbaso. Jerusalemgo Genuai Bidi tudi ola mayu, tama dwai sę hauwa mu yali. Tama tibaso, Genuai Bidigo agai te genuai dene tolomainu tagalali. Tama te boi bidi dabego te Jerusalemgo wai bǫų dabe te hwįbode selama, kalabus elama, tigidali digibulu buluba dabe kalabus elama, odasa pali.
LAM 1:6 Saiongo polobadu elaluali genuai nogi polo tulaluai dao. Tama agai tobolu bidi dabe te boi bidi dabede wi painogo eyu, augwaligo bomo sia sali, te nai tusiąwai bulu hasa dabego augwali dili bomo kilabo tiwai yalio.
LAM 1:7 Megi da, te Jerusalem dolai elalubadi, aga we bidi dabe digibulu sese mu tama usu nama, wau bilibo dao. Tama agai polobadu mu munolua asali wiegi wiegi yai nai dabeba homu kone ma palobo dao. Te boi bidi dabego Jerusalem we bidi sali sogo, te meba gasa hanigo aga me tau sai menio. Tama te boi bidi dabego aga dolobo suali, tama augwali gisugu dwai mu wali. Awe, aga tulalubaso, augwaligo kęnę po wali.
LAM 1:8 Jerusalemgo dwai dwai sę hauwa yai madi, tama te dwai sę ebogo aga te dwai meda yai nai pedelali. Polobadu da, te gasa hanigo agabolo genuai nogi mawai dao. Tiali goli, megi da, augwaligo agai hale sulama, tama augwaligo agabolo posobo po weyu, gisugu mabo dao. Tama te Jerusalem hale eyu, aga gesabidi duala selama, genuai dene ebaso, hwąwa wabo tiwai yali.
LAM 1:9 Polobadu aga dwai kolesaga te pepeli dilide mu elaluai dao. Tiali goli, agai aga dolabo homu kone me ebeo. Tama tialigo aga mu dolama, mu dolali, tama bidi mego aga hobede eyu, tau sabo me egobeo. Tama Jerusalem agai e tama tiwai po i obao, “Genuai Bidi, eno e sęgę suao. Te boi bidi dabego ena aiyaba mu elalualio. Tama augwaligo ena dolalide wiegi yai homu pemene elama, gana pali dao,” wabo.
LAM 1:10 Polobadu te God Genuai Bidi te habu selebo po weyu, te Israel hani isąwai bage te moni lotu be tempel tomoba pelamuo po wai dao. Tiali goli, te Jerusalem we bidigo suali, te tobage boi bidi dabe te bomo yai po boliyu, augwali tomoba pelama, tama tede elaluali wiegi wiegi yai nai dabe sese tama wi salio.
LAM 1:11 Te Jerusalem we bidi augwali nasi genuai mu ebaso, tama augwali nai gegebo bomai sę mu te ebao, tama augwali hwąwa dwai mu obao. Augwa tigi bomo ma sainu eyu, augwaligo augwa wiegi wiegi yai nai dabego te dobu si ebo sę eyu, te nai sela tubo dao. Tama Jerusalemgo i weyu, te po obao, “Genuai Bidi, sulama, koneao, ena dwai bidu, te olo nai tiwai naga bidibao,” wabo.
LAM 1:12 Jerusalemgo aga pąde elalubo sunumide soabo we bidi dabeba i wabo sę ebao. Agai te po obao. “Suiąo, ena genuai sęgę genuai mu elama, tama Genuai Bidi agai ena dene genuai mu manio, te aga sębę moni posolo tiwai mu yali sogode. Te polobadu te bidigo te tobage dene me sai meni yali bogo, tiali goli, dagego homugo te olo nai da weyu ebao.
LAM 1:13 Genuai Bidigo isi tagala palama, tama eno dili isi ulama, tama eno bomo tamunanio. Agai ena hagani wa gebelai digi, ena tola sali. Tama agai ena sąna palali digi, ena tudiba degali. Tama agai ena mu tama tagalali digi, tigidali sogo ena dene dwai mu doliyu ebao.
LAM 1:14 Genuai Bidigo digi eno yali dwai sę sese sisinama, tama agai dąų olama, kęnama, tama agai eno magede kęnani. Tama te dwai sę dabe sęgę mu elama, eno bomo sese mu silalio. Tama Genuai Bidigo ena boi bidigo nogoba muani, tama eno augwali dali hwįabo bomo menio.
LAM 1:15 Genuai Bidigo eno bomai ami bidi dabeba tudi ola manio. Agai ami i olama, ena dali hwįagasomainu elama, tama eno gesi bidi dabe dolalio. Genuai Bidigo kantri Juda we bidi dabe aiyaba agayalio, te bidi dabego wain wę nigainu, te wain du agabo masigi poude te wain agabo tiwai yalio.
LAM 1:16 Te tialigo eno gela uga selama, aiyaba dulumainu ilali. Tama ena dali hobede elama, tama ena ma dili ilabo bidi menio. Te boi bidi dabego ena aiyaba polo elaluai madi. Tama tibaso, eno wai puluba augwali dodolama mu bidibao,” Jerusalemgo te po obao.
LAM 1:17 Saiongo bidi mebago aga tau somainu homu eyu, aga nogo balalubao, tiali goli, te bidi aselama, aga dali hobede eyu, tau siyu me yagasobeo. Genuai Bidigo boi bidi dabe tigidali bulu badu i olama, tama te Israel hani dali hwįagasali. Tama te boi bidi dabego te Jerusalem te dwai damua pai pesage tiwai mu tonobo ąǫ yali.
LAM 1:18 Tiali goli, Jerusalemgo te po wali, “Genuai Bidigo ena dali te yali kolesaga te dolo mu dao. Magi baso meni. Eno agai po sela sąwai dao. Tega, dage tigidali kantri we bidi, dagego eno te po odiąo. Eno te genuai sęgę tolali suao. Te boi bidi dabe augwaligo eno gesi bidi me gesi wegi dabe selama, tama augwali digibulu tǫ kantri dabeba mu kalabus igi palio.
LAM 1:19 Eno abagi dabego ena tau somainu i wai dao. Tiali goli, augwali eno boi bidi pedelalio. Eno pris dabe, me tobolu bidi dabe, augwali nasi genuai mu yali. Tama augwali bugagia bidabo tubo nai gegebo bomai sę mu yalio. Tiali goli, augwali nai meniama, tama augwali eno sunumi dabede isai dao.”
LAM 1:20 “Genuai Bidi, ena suao. Ena genuai sęgę mu selama, tama ena dolama mu bidibao. Tama eno homu dwai mu elalubao. Magi baso meni, eno hagoma genuai mu elama, tama nago po sese tama sela sąwai dao. Te boi bidi dabe augwaligo eno we bidi dabe eno sunumi dabede ela wiala silalio. Tama me te bede bidaluali we bidi augwali nasi eyu, gasi me eyu, isai dao.
LAM 1:21 Te meba gasa we bidi hanigo eno ena te dene ebaso, gela wabo po odali. Tiali goli, ena dali hobede yabo bidi meni yai. Te eno boi bidi dabego nago enabolo te mani te genuai sęgę po odali. Tama augwaligo nago te yali sędę augwali wiegi yai homu pemene genuai mu ebao. Polobadu nago enabolo dwai dene maiabo bodolu muai dao. Tama te bodolu polo pedelalio. Tiali goli, megi da, eno homugo nago eno boi bidi dabeba me deli tiwai kolesaga me yao.
LAM 1:22 Nago eno yali dwai sę kone palama, tama nago ena dene manio. Tama tialima, nago megi da, te boi bidi dabego dwai kolesaga koneama, tama nago ena dali yali te kolesaga tiwai elama, tama nago te boi bidi dabe dene mao. Magi baso meni. Ena gela dwai odubao, tama eno bomo tamunaluyu, didibili elama, tulolueibao.”
LAM 2:1 Hobede mu dao, te wiegi yai taun Saion. Genuai Bidigo aga dali sębę genuai mu yali. Tama agai sębę da, te hulia sai haowago taun mesega sai tiwai dao. Polobadu da, te Jerusalem te kantri Israel bagego gawe ebo wiegi yai taun elaluama, tama megi da, agai te Jerusalem aiyaba elaluama, aga olo pobele bage tiwai elalubao. Mu tama Genuai Bidigo te taun Jerusalem dolobo sogo, agai aga tempel be te taunde elalubao olama, homu kone me ebeo. Menio. Agai taun sese tama mu dolalio.
LAM 2:2 Genuai Bidi agai te Israel dabe hobede me ebeo. Menio. Agai augwaligo be nani sese tama dolali. Agai augwali dali sębę elama, tama agai wiegi yai kantri Judago bomai taun dabe aluama, tagalalio. Agai te kantri me, aga tobolu bidi dabe dali, sese tama dolalio, tama augwali hale dwai mu yalio.
LAM 2:3 Genuai Bidi aga sębę dwai mu elama, tama agai Israel dabego bomo aluama, tagalali. Tialima, te boi bidi dabe asali sogo, agai te Israel dabe tau me sabeo. Menio. Agai Israel mu dolalio, te isigo tigidali nai dabe dela silibo tiwai yalio.
LAM 2:4 Agai te wiegi yai taun Saion dali boi bidi elama, tama agai aga we bidi enainu enesigi balibiba tulalubo tiwai yali. Awe, aga bomogo aga digi te Jerusalemgo gawe yai we bidi sese tama ela silalio. Agai sębę te posolai isi tiwai elalu, agai te isi te taun Jerusalemba muani, bidigo wę gelebo tiwai yali.
LAM 2:5 Genuai Bidigo Israel dabe dali boi bidi homu elama, tama augwaligo kantri mu dolama, tagalalio. Awe, agai bomai taun dabe doliyu, me augwaligo te wiegi yai bomai be dabe aluama, tagaliyu yalio. Te tigidali Juda bulu sese tamade agai te we bidi homu sęgę emainu mu ilama, tama augwali gela geninama mu uduali.
LAM 2:6 Genuai Bidigo aga tempel be mu dolama, mu tagalali, te bidigo te gi be dolama, hųgila tagalabo tiwai tama yalio. Agai te Israel dabe augwali teba pelama, tama agaba augwaligo lotu po wagi pabo digi dolama, tagalalio. Tama te tiali kolesagago te Genuai Bidigo te lotu po wabo genuai sogo, me Sabat, si tama silalio. Tama te we bidi, augwali te Jerusalemde bidali we bidi, augwaligo agaba te lotu wabo sogo dabe ma lotu weyu ebeo. Genuai Bidigo te king me, pris dabe dali, agai sębę genuai mu yalio, tama agai augwali augwa sęde sela sąwanio.
LAM 2:7 Genuai Bidigo te aga tempel be, me tede elaluali ofa maiabo altaba tudi mu ola mani. Agai te boi bidi dabego te Jerusalem taun siyu, me agai tempel be hųgiyu emainu sula tagalalio. Tama me te boi bidi dabe augwali te Genuai Bidigo tempel be tomoba pelama, tama augwaligo te be tomode subigila hae me po dabe wali. Polobadu dago tede wiegi yai homu eyu, Godiba lotu po wedu geai goli, megi da, augwaligo hae bomonama wedu geai. Magi baso meni, augwaligo te be sai dao.
LAM 2:8 Genuai Bidigo te genuai wiegi yai taun Saiongo masigigo nigai boma pai obo aluama, tagalabo homu yalio. Agai te obo bugagia mu usu sai, te obo dolai hagede. Tama agai te sę ebode gagamua sabeo. Agai te tigidali badu te obo dabe dali, te bobobage taua be dabe dali, te sese tama mu dolama, tagalali, tama sese tama mu dolama, mu elalubao.
LAM 2:9 Tama agai te obogo sunumi dabe hųginama, sąnama tagaliyu, me te sunumi palibo ain dili mimia sąnama, tagaliyu yalio. Tama te dolali nai dabe augwali tǫde munalubadi, te dwai olo masigi hogomu dabego augwali mesegelama elalubao. Te boi bidi dabe augwaligo te king aga tobolu bidi dabe dali selama, tama augwali gasa kantriba kalabus elama, odasa pali. Te pris dabe augwaligo te we bidibolo te Godigo bomai po me ola mabo meni. Me te profet sibigo te nade subo nai tiwai ma susiąyu, tama augwaligo Genuai Bidigo po ma sabo menio.
LAM 2:10 Te Saion monu dabe, augwali olo dali tǫde dulaluyu, tama augwali pedauwali pania selama, bidalubao. Augwaligo augwa tobolude tǫ hogomu munama, tama augwaligo hobede side gudubo ugwa gudama bidibao. Tama te Jerusalemde gesi wegi mane augwali homu sęgę mu elama, tama augwaligo tobolu tǫba basi gulama, elalubao.
LAM 2:11 Eno te Jerusalemde pedelali nai dabe homu kone palama, tama ena gela waligo eno gedu dene mu ebao. Eno te hobedai we bidi dolama elalubo sulama, ena gasa homu dwai mu ebo dao. Eno homu dene dwai mu yalio. Magi baso meni, eno suali, te nai tusiąwai wai puluba dali, wai bǫų dabe dali suali. Augwaligo bomo kimi meniama, tama didibili elama, te Jerusalem sunumi dabede tuloluama, munalua pabo sualio.
LAM 2:12 Te wai bǫų dabe augwali nasi ebaso, augwa idabolo nai me ąį momainu gela weyu ebao. Augwali te taun sunumi dabede subigila tuloluama, munalua pabo suali, te ami bidi dabe te boide sili wąbi dolama, munalua pabo tiwai elalualio. Tama augwa ida dabego te wai bǫų dabe nogo daide muna sabo si da, te wai bǫų dabe augwaligo bidibo ula sia salio.
LAM 2:13 Jerusalem, eno nage hobede mu dwalio. O Jerusalem, te meba taun dabe nago te sali dene tiwai me sai menio. Tialima, eno mena po mu olama, nago homu dąų walaibawe? Nage dolali, te ene genuai mu tomoba pali tiwai yalio, te tamu ąį ge te aiyana mu dulali tiwai yalio. Tama nage dego wiegi yai ma pedelemainu egowe? Woo, bidi menio.
LAM 2:14 Te nago profet sibigo te nade subo nai tiwai suali po olama, tama augwaligo nage dali ili po naga walio. Tama augwaligo nage ili po ola mayu, augwaligo nago yali dwai sę hanilai menio. Te nage tau selama, te dwai sę tagalama, tama nage bugagia bidimainu tau me sabeo. Menio. Augwaligo Godigo po pusubode ili po walio. Tama augwaligo pogo nage kegasa bilama, mu tagalalio.
LAM 2:15 O Jerusalem, te Israel hani isąwai we bidi augwali tedu ela soyu, augwaligo nage dolali elalubao sualio. Tama augwali noma siyu, nogo hogwayu, tobolu pęyu, kęnę po ola mayu, e tama po obao, “Te taun tama te bidi dabego te wiegi yai sawi yai taun dao,” wali, “te taun te da, agawe? Te taun tama te tigidali tǫ kantri we bidigo gawe yai taun da, agawe?” Augwaligo te tobage hale ilibo po wabo dao.
LAM 2:16 Te naga boi bidi dabego nagede kęnę po weyu, posobo po wabo dao. Augwali gisugu dwai mu weyu, e tama tiwai po obao, “Dago bomogo mu dao, dago te taun mu dolama, tagalali dao. Te taun Jerusalem dolali dao, dago. Tega! Dago te si tonaluali, megi da, te si polo megi pedelali dao,” boi bidi augwaligo te tobage po wabo.
LAM 2:17 Te Genuai Bidigo polobadu mu te yainogo yali te sę polo megi yali dao. Polobadu mu Genuai Bidigo te po wai dao, te Israel dabego agai po sela sąbaso da, teda agai Jerusalem dolaibao po wai dao. Tama tialima, megi nage hobede me ebeo, Jerusalem, agai nage aiyaba polo elaluali dao. Agai nago boi bidi dabe bomo mu ilama, tama augwaligo nage aiyaba elalumainu ilali dao. Tama augwaligo nage dolalide wiegi yai homu pemene elama, gana pali dao.
LAM 2:18 Te nago we bidi augwaligo Genuai Bidigo augwali tau somainogo hwą te waiyąo. Hobedai, Jerusalem, nage hulide me giligade gela genina mu elama, tama nago gela uga te ąį sabo tulubo tiwai emainao. Nage hodo me doligio. Nage gela wabo sę naga idu geao.
LAM 2:19 Hulide nage hauwa sogo mu hodalu, tama Genuai Bidiba gela hwą wao. Nago agabolo gedu haluasa po bomonama weyu, te nago sęgę agabolo pusuyu, me nago homu sęgę po agabolo pusao. Magi baso menio, naga wai bǫų dabe augwali nasi elama, tama augwali bomo kimi isibaso, augwali te naga sunumi dabe sesegede te dedege pabo dao. Tialima, nago nogo ugwaba selama, tama Genuai Bidibolo augwali hobede emainu hanalu wao.
LAM 2:20 Jerusalemgo e tama gedu haluasa po wali, “Genuai Bidi, nago te naga hani digi muba te yali te dene mabo sę suao. Te we dabe sibi augwaligo augwa wai bǫų dabe godolo mu eyu, negeyu yai dao. Tiali goli, megi da, augwaligo augwa te wai bǫų dabego tigi tubao. Tama te boi bidi dabe augwali naga digi tempel be tomoba pelama, tama tede augwaligo naga pris dabe, me profet bidi dabe, ela silali dao.
LAM 2:21 Te boi bidi dabego augwa moni ge hwągo te gesi wegi ogwa me, monu dabe me, ela silalio. Awe, augwaligo te we sasiąwai gesi bidi dabe dali, te bidigo sasiąwai gesi we dabe dali te ela muani. Tama augwaligo tigi dabe eno sunumi dabede subigila wilalua pabo. Genuai Bidi, nago eno te we bidi dabe dali sębę mu yalio. Tama nago augwali dali hobede me ebeo. Menio. Nago augwali elama, isilai dao.
LAM 2:22 Nage sębę mu elama, tama nago te boi bidi dabe tigidali badu i olama, tama augwali aselama, ena dali dwai sę yali dao. Tama boi bidi dabe hauwa mu asai dao, te we bidi dabe te lotu wabo genuai sogo asobo tiwai yalio. Tialima, boi bidi dabego eno we bidi sese ela silali, tama eno we bidi me deli wi sana peyu, te augwaliba pedelali sę po pusabo bidi mu menio. Eno ena we bidi godolo mu yai dao, tama eno augwali bugagia mu tonaluai dao. Tiali goli, megi da, te boi bidi dabego augwali megi mu silalio.” Te Jerusalem hanugo te gedu haluasa po wali.
LAM 3:1 Ena e po asębo bidi, eno te dene tolobo kolesaga konebo dao. Genuai Bidigo ena dali sębę yalio, tama ena dene manio. Tama eno genuai dene mu tolalio.
LAM 3:2 Agai ena mu hulia sai sunumidu mu pomainu ilalio.
LAM 3:3 Tama tigidali sogo agai ena deli naga dene madu gebo dao.
LAM 3:4 Te agai ena elai tiwai elama, tama eno dili dabe tigidali mu togwa pelama, tama eno tigi aboga sai.
LAM 3:5 Agai enabolo haniani sęgę mayu, dene mayu elama, tama te nai dabego ena bagua selama, kalabus ilalio.
LAM 3:6 Agai ena hulia sai madi bidimainu ilalio, te polobadu mu isai bidi dabe tiwai mu tama tiali.
LAM 3:7 Agai ena polo kalabus ilali, tama ena wi pabo usu egobeo. Te agai eno nogo sągą te sęgę yai sen bonogo kęai tiwai elama, tama ena bilabo usu menio.
LAM 3:8 Eno i olama, Genuai Bidibolo ena tau sao po olama, hanalubo dao. Tiali goli, agai eno gedu haluasa po waboba olo saganama, odobo menio.
LAM 3:9 Te tigidali badu ena painu yali madi, agai polo palia sesa bilalio. Te genuai masigi sunumide paliai tiwai ąǫ yalio, te ena pabo sunumide.
LAM 3:10 Genuai Bidigo ena dolainu tonaluali, te bulu hasa bea me laion sigo te hasa dabe soabo tonaluyu, dualalubo tiwai yalio.
LAM 3:11 Genuai Bidigo eno sunumi tagalomainu elama, tama agai ena dolalio, te laion de bea sigo hasa pobeasa peyu, te hasago tigi togola tagalobo tiwai yalio. Tama tialigo ena dolama mu bidibao.
LAM 3:12 Genuai Bidigo aga ene enesigiba tulama, tama ena enani.
LAM 3:13 Tama agai ena haligade genuai mu enani, agai te ene dabego.
LAM 3:14 Megi da, eno we bidi hani tigidali augwali gisugu dwai mu olama, tama ena kęnę mayu, balia po wabo dao. Awe, kigamu me, giligade me, pio me, tigidali sogo balia po wabo dao.
LAM 3:15 Agai ena sęgę hauwa mu mani, tama ena mu pągąna palio. Te agai ena dene dali sęgę dali si mayu, ena pągąnobo tiwai mu yalio, te ha ebo ąį sigo pągąnobo tiwai yalio.
LAM 3:16 Agai ena dali dene mabo sę mu yalio. Te agai eno tobolu tǫba aiya tųbo tiwai elama, eno kele degela tagalobo tiwai yalio.
LAM 3:17 Eno homu nagame elama, wiegi yai homu elama me bidibeo. Tama eno bugagia bidibo kolesaga te gegeda palalio.
LAM 3:18 Tama tibaso, eno te Genuai Bidigo ena tau somainogo tonalubo sę ebo, te usugobeo. Tama ena tǫde bobobage sogo bidigobeo, te homu ebao.
LAM 3:19 Ena te subigila wau bilibo bidi tiwai bidiyu, tama eno ena genuai sęgę dabe kone ebao. Tama tego enabolo dene mobao, te dwai ha ebo ąį tuai dene tiwai ebao.
LAM 3:20 Tigidali sogo eno te sę dabeba kone ebo digi, eno homu sęgę mu ebao.
LAM 3:21 Tiali goli, eno gasa nai me homu kone yali, tama tialigo te tibogo eno Genuai Bidigo ena tau somainu bomo elama, mu tonalubao. Te nai dabe da e dao.
LAM 3:22 Tigidali sogo Genuai Bidigo da homu dene eyu, tau sabo sę elama, tama agai daba homugo kęą peyu, da godolo mu ebo dao. Tama agai te kolesaga munu me siligobeo.
LAM 3:23 Menio. Te agai te kolesaga tigidali bubugade gesi noma pedalobo tiwai ebo dao. Genuai Bidi, nago te homugo kęą pabo kolesaga da dali tigidali sogo ebo dao. Nago te kolesaga te wiegi yai mu dao.
LAM 3:24 Eno homugo eno meba nai dabede moni homu igi homu ebao. Genuai Bidi deli tama ena usu dao. Tama tibaso, eno agai ena tau somainu bomo elama, tonalubao.
LAM 3:25 Genuai Bidigo te aga gegelama, tama agai augwali tau somainu tonalubo we bidi dali wiegi yai sę ebo dao.
LAM 3:26 Te we bidi augwali dua bidiyu, Genuai Bidigo augwali te boi bidi dabego nogode ma oda somainu tonalubo kolesaga eyu da, te wiegi yai dao.
LAM 3:27 Tama me ma, te bidi dabe augwali gesi bidide gagalama, te kolesaga ebo eyu da, te usu dao.
LAM 3:28 Te Genuai Bidigo te bidi me delibolo sęgę mabode da, teda te bidi agaduba bidigi pelama, penane pania sai elaluao.
LAM 3:29 Teda Godigo aga tau sabo homu yali bogo. Tama tiyu, agai aga digi aiyaba elaluama, tama tonaluao.
LAM 3:30 Te bidi dabego aga nabo gede nogo sawaligo elebaso da, tama aga dali dwai po waiyu ebaso da, teda agai augwaligo te tama sę emainu sula tagalamainao.
LAM 3:31 Genuai Bidigo aga tigidali sogo tudi ola magobeo.
LAM 3:32 Agai te bidi dabebolo sęgę mabo dao, tiali goli nosali agai augwali hobede ebo dao. Magi baso meni, aga da, te we bidi godolo mu ebo God dao.
LAM 3:33 Tama agai augwali dene me sęgę mabode agai wiegi yai homu me ebo menio.
LAM 3:34 Tama tibaso, bidigo te da kalabuside bidibo Juda bage dali dwai sę ebaso da, teda Genuai Bidigo te koneaibao. Ma, bidigo te Ugwadu Mu Bidibo God dali hagoma eyu, tama gasa bidi dali doloba pai kolesaga isąbaso da, teda Godigo te sę ebo bidi sugobe da, agawe? Ma, bidigo te po tų ebo kolesaga doloyu, gasa bidiba dene mobaso da, teda Genuai Bidigo tede hagela homu mu yaibao.
LAM 3:37 Te Genuai Bidigo usu da hasia wasiąyu da, teda bidigo magi sę pedalumainu ebo usugobeo.
LAM 3:38 Te Ugwadu Mu Bidibo Godigo naga te we bidi bugagia bidimainu ebo dao, ma augwali te genuai sęgę somainu ebo dao.
LAM 3:39 Tama tibaso, bidi me bididubadi, te Godigo agai yali dwai sę wei ponoyu, dene mobaso da, teda te bidigo Godibolo wado po olamuo.
LAM 3:40 Dago dena kolesaga, me dena bilibo kolesaga dagalama, bugagia suao. Tama dago dwai kolesaga tagalama, tama da Godiba ma aselainao.
LAM 3:41 Te dago te Ugwadu Mu Bidibo Genuai Bidiba gedu haluasa po wabo si, dago dena homu ugwadu daide naga elaluyu, gedu haluasa po wagimio. Tama dago e tiwai po wao,
LAM 3:42 “Dago nage dali hagoma elama, tama dago sęgę sai dao. Tama nago dago sęgę sela sąsiąyu, tama da te nago gedude dwagi yai ma pedalubeo.
LAM 3:43 Nago da dali sębę dwai mu elama, tama nago da dali hobede me yai menio. Menio. Nago da pobeasa pelama, tama nago da elama, isilai dao.
LAM 3:44 Nago da dali sębę elama, tama nago naga olo palia sai dao. Te nago naga digi te genuai pǫgo halua selama, tama dago gedu haluasa po wabo nage pageba sabolabo usu emainogo tiwai me yai menio.
LAM 3:45 Nago da aiyaba elaluai dao. Tama te meba Israel hani isąwai gasa hanigo da te olo dwai nai tonobo tiwai elama, meda mu yai dao.
LAM 3:46 Dago boi bidi dabe tigidaligo da posobo po hauwa wai dao.
LAM 3:47 Te boi bidi dabego da elama, te da wi elama, me da tulalumainu yabo nai dabe ilalio. Tama da sese tama dolama, tagalainu yali.” Dago te tobage gedu haluasa po wainao.
LAM 3:48 Eno te hobedai we bidi dolama elalubo sulama, tama ena hobede mu elama, tama ena gela waligo gela ųga tǫba tulalubo dao.
LAM 3:49 Eno gela wabo togogobeo. Tama tiyu, gela ųga sesemane sogo aiyaba dulaibao, te sula sisąma soabo ąį tiwai yaibao.
LAM 3:50 Ena gela odubadi, te Genuai Bidigo aba tonama, tama da homu kone eboba usu naibao.
LAM 3:51 Eno ena taun we dabe augwali dwai mu bidibo suali. Tialima, ena homu sęgę genuai mu ebao.
LAM 3:52 Te bidi mebago ena dali olo dali boi bidi homu elama, tama ena olo dali elama, isilainu yali. Tama augwaligo ena bidigo ba pobeasa pabo tiwai yai.
LAM 3:53 Te augwaligo ena te genuai tǫ dedageba sąnama, tama ena dedagede bidibadi masigi ugwadu sąbo tiwai yali, te ena ela muainu.
LAM 3:54 Tama me te genuai ąįgo ena mesegelama, tama eno homugo ena poma peyu isigowe homu yali.
LAM 3:55 Genuai Bidi, ena dolama mu bidiyu, tama ena isai bidigo bulude bidibo tiwai bidibo ąǫ yali. Tama nago ena tau somainu, eno nage i wali.
LAM 3:56 Eno e tama po olama, i wali, “O Genuai Bidi, nago eno gela wabo odao, nago olo pania sigio,” wali. Tama nago eno te i wabo po odai dao.
LAM 3:57 Tama nage ena pageba aselama, tama nago enabolo “Wi igio,” po wai dao.
LAM 3:58 Genuai Bidi, nago ena tau selama, tama nago te eno boi bidi dabe aiyaba elaluai dao. Nago ena augwaligo nogode ma oda selama, tama ena bugagia bidibao.
LAM 3:59 Genuai Bidi, nago te bidi dabego ena dolobo sę ebo nago suai dao. Tama tibaso, nago augwaliba po tų elama, nago ena tau selama, te bage augwali aiyaba elalubo sę yao.
LAM 3:60 Genuai Bidi, nago koneani, augwaligo ena dali boi bidi homu genuai mu ebao. Augwaligo ena dali haniani dwai kolesaga geme yabo homu hauwa ebao, tama me augwaligo ena dali dwai po te obao.
LAM 3:62 Tigidali bubugade augwali po minama, posolu weyu, ena dolabo po gegeyu ebao.
LAM 3:63 Suao! Te augwaligo sę elama, tama augwali toma tubo sogo da, augwaligo ena posobo balia po wabo dao.
LAM 3:64 Genuai Bidi, nago augwaligo te dwai kolesaga koneama, tama augwa te dwai kolesaga dolo ma wei ponao.
LAM 3:65 Nago augwaligo homu kolesaga dolama, i ola mabo po olama, tama augwali sese tama dolao.
LAM 3:66 Nago augwali dali sębę elama, tama augwali sese pobeasa pelama, tama augwali sese tama mu silao, te augwali e tǫde deli me bidigobeo.
LAM 4:1 Hobede mu dao. Te Saion we bidi dolama elalubao. Polobadu augwali te sawi yai gol tiwai sawi yai mu elaluai dao. Tiali goli, te gol dabe augwali ula me isąma, megi da dolama mu elalubao. Polobadu da, te Genuai Bidigo genuai be tempel augwaligo te wiegi yai masigi dabego nigilama elaluai dao. Tiali goli, augwali megi da hagayali dao, te masigi dabe subigila tulaluama, te tigidali taun sunumi dabede munalua pabo dao. Megi da, te we bidi augwali nogi ma elalubeo. Augwali te dwai pobele bage sene dage te bidi dabego nigai, te sene dage tiwai dao.
LAM 4:3 Te uni yowi dabe augwali wiegi yai hasa dabe menio. Tiali goli, augwaligo augwa wai bǫų dabe koneama, tama augwaligo augwa wai bǫų dabe ame mabo dao. Tiali goli, eno we bidi hani augwaligo te uni yowigo ebo tiwai wiegi yai kolesaga ebo menio. Menio. Augwaligo te nai meni yai wa pai bulude bidibo genuai bago ebo kolesaga tiwai ebo dao. Te bago subigila ge sasagano bilama, tagalobo dao. Te tiwai me eno we bidi augwaligo augwa wai bǫų dabe hobede homu me ebo menio. Menio. Augwaligo augwali tudi ola mabo dao.
LAM 4:4 Te dwasianu wai bǫų dabe augwali tuabo ame menio. Tama augwaligo dogoni dolama, mu aloa pabo dao. Te wai bǫų dabe augwali biliyu, te we bidigo augwali nai momainu biliyu, hanalua bilalio. Tiali goli, te bidi mego augwali nai me mabeo.
LAM 4:5 Megi da, te moni bidi dabe me te nai sǫą palio. Polobadu da, augwali nai wiegi wiegi yai nai dabe hauwa elaluai dao. Tiali goli, megi augwali nasi elama, augwali subigila te taun sunumi dabede isila peyu yalio. Polobadu augwaligo nai dabe hauwa mu elaluyu, tama augwaligo wiegi wiegi yai au ebo nai dabe gudiyu yai dao. Tiali goli, augwali megi da, nai mu menia pelama, tama megi da, augwali te dwai pobele bage sabo pesagede nai te gegebao.
LAM 4:6 Te Jerusalem dabe, eno we bidi, augwaligo dwai sę yalide sali sęgęgo te Sodom we bidigo sęgę edelalio. Tama tibaso, Genuai Bidigo Jerusalem dabebolo dene genuai mu te mani dao. Tiali goli, Genuai Bidigo te Sodom dabe dolali sogo da, te taun agai deli sogo mu tama te taun dolai dao. Tama te boi bidi dabego megi te Jerusalem dabe dali ebo tiwai te Sodom dabe dali yai menio.
LAM 4:7 Polobadu te Jerusalem dabego tobolu bidi dabe augwali bugagia bidiyu, augwaligo tigi wiegi yai mu elaluai dao. Augwali bomai bidi dabe mu dao, tama augwaligo tigiwali te wiegi yai homugo dąų wabo masigi tiwai ula elalubo ąǫ yai dao.
LAM 4:8 Tiali goli megi da, augwaligo tigi dolama, tama meda mu yalio. Tama augwali te sunumi dabede bilibo sogo da, te bidi dabego augwali tonobo konebeo. Augwali dili pulu hą elama, tama augwaligo tigi wa pai mu elaluali.
LAM 4:9 Te boi hwįbode isali bidi dabe augwali godolagi mu elama, te nai habuge yai bidi dabe aiyaba elalualio. Magi baso meni, augwali polo isalio. Tiali goli, gasa bidi hani augwali nasi mu elama, tama sęgę bobobage sogo tolama, tama augwali dili pulu hą elama, tama augwali isalio.
LAM 4:10 Te augwa wai godolo homu yai ida dabe augwaligo augwa wai bǫų dabe isibo sogo da, te ida dabego te wai bǫų dabego tigi selama, augwaligo ulama tualio. Te tobage kolesaga te eno hobedai we bidi augwaliba te boi bidigo te boi hwįani sogo te sę pedelai dao.
LAM 4:11 Genuai Bidigo te Saion dali haliga sębę dwai mu yalio. Tama tibaso, agai aga dene genuai mu manio, bidigo ąį te tǫba gelebo tiwai yali. Te agai te Saion isi tulama, tama te taun sese dela silibo tiwai yalio.
LAM 4:12 Te gasa tǫ pedai kantrigo king dabe, me te haniani tǫde we bidigo homugo te boi bidi dabego te Jerusalem aiyaba elaluama, tama te taun sogobe homu yai dao.
LAM 4:13 Tiali goli, Godigo te boi bidi dabe tagala palama, te Jerusalem dolai dao. Magi baso meni. Te profet dabe, me pris dabe, augwaligo dwai sę elama, tama augwaligo te Jerusalemde dwai sę meni yai we bidi ela mubaso tiai dao.
LAM 4:14 Te we bidigo kaneme te pris dabego ugwade, me profet bidi dabego ugwade dagana sai tiwai elama, tama Godigo gedude te pris dabe dali, profet dabe dali, augwali meda yai tiwai dao. Tama augwaligo genuai sęgę mu salio. Megi da, te pris dabe, me te profet dabe, augwali te sunumi dabede popolo palio. Tama tibaso, te we bidi augwali te bage augwali pageba pabo hagela yalio.
LAM 4:15 Te we bidi dabego augwali hai mayu elama, tiwai po wali, “Dage gedao. Dage polo meda yali dao, tama dage da pąba asigio. Dage gediąo,” wali. Tama tibaso, te pris dabe me profet dabe augwali gasa kantriba wi peyu, te olo wau bilibo bage tiwai bidali. Tiali goli, te kantri we bidigo te bidi dabe augwali te kantride bidimainu sula tagalobeo.
LAM 4:16 Genuai Bidi aga digi augwali subigila pomainu sela sąwani, tama agai augwali homu kone me ebeo, te pris dabe, me tobolu bidi dabe, augwali te we bidigo gedude genuai nogi me elalubeo.
LAM 4:17 Dago tonaluama, tama dago te gasa tǫ kantri bidi hani me deligo da ma oda sagasomainu tonaluali. Dago te sunumi dabeba gedu tonono ela bilibadi, tama dago gedu dene yali. Tiali goli, dago olo dali tonalualio. Augwali me asobeo. Augwaligo da tau sabo menio.
LAM 4:18 Te boi bidi dabego da dolainu no munalubaso, tama da te sunumi dabede bilibo usu me ebeo. Te da dolabo sogo te polo pedelalio. Tama tibaso, da sese tama mu dola silalio.
LAM 4:19 Da wi pobadi, tama te boi bidi dabego da pobeasa asalio. Awe, augwali bomonama mu, te ba kemodagego te hasa ela sainu bogo pobeasa aiyaba tulalubo tiwai yalio. Augwaligo da bulu du dabedu pobeasa bilama, tama augwali te nai meni yai wa pai bulude dualaluyu, da tonalualio. Te da asobo suainu, tama augwaligo da tola siyu, ela palio.
LAM 4:20 Tama augwaligo da bugagia bidimainu tonaluyu, da tau sali bidi me augwaligo tola salio. Te da te Genuai Bidigo sa muani te king dao. Dago homugo da te king dologode bidiyu, tama da bugagia bidiyu yaiba homu yali, te meba gasa kantri dabe ebo gilama bidigowe homu yalio.
LAM 4:21 Kantri Idom, megi nage Usgo tǫde bidibao. Megi da, nage gisugu dwai olama, tama nage Saion dolaibaso, wiegi yai homu pemene megi yao. Genuai Bidigo sębę te wain wę kapu deli tiwai dao. Tama agai te Saiongo te kapude tumainu ilalio. Tiali goli, agai nagebolo nosali me maiwaibao. Tama nage dolama mu polaibao. Tama nago naga tigide ugwa peda sąnama, tama nage hale genuai mu yaibao.
LAM 4:22 Saion, nago sęgę saibaso, Genuai Bidigo nago sęgę wei ponani dao. Tialima, agai nago kalabus yali silaibao. Te nago we bidi kalabus yali pįsigina sąwaibao. Tiali goli, Idom, Genuai Bidigo nago yali dwai sęde sali sęgę haninaibao, tama agai nage me dene mawaibao, te sęgę wei ponoyu.
LAM 5:1 Genuai Bidi, nago dabolo te dwai nai pedelali kone elama, tama nago da hobede yagameo. Suao, da dolama mu bidiyu, tama da meba we bidi hanigo gedude da hale dwai mu te ebao.
LAM 5:2 Dago tǫ te gasa kantri bidi dabego nogode te elalubao. Tama augwali dago be dabede bidibao.
LAM 5:3 Da olo mu bidibao, te tiana wai bǫų dabe tiwai bidibao. Me, te we dabe te wilawe we tiwai bidibao.
LAM 5:4 Polobadu da, te isi dabe me te ąį dabe te dena nai dabe elalualio. Tiali goli, megi da, dago te ąį me isi sainogo da, teda dago abeliyu naga ebao.
LAM 5:5 Te boi bidi dabe augwaligo da selebo genuai mu ebao, bidigo aga sę yabo donki ma kamel selebo tiwai ebao. Tama da tigi hagela dwai mu ebao. Tiali goli, augwaligo da toma tumainu sula me tagalobeo.
LAM 5:6 Da nai mu sǫą palio. Tama tibaso, dago te Isip dabebolo me Asiria dabebolo da tau somainu hanalu walio.
LAM 5:7 Dago wąį dabe augwaligo polobadu te dwai sę yai digi, augwali polo isila palio. Tama megi da, da augwaligo dagede da sęgę tolobao.
LAM 5:8 Te Babilon dabego olo sę bagego da tonalubao, tama da augwaligo nogode ma dobola sabo bidi menio.
LAM 5:9 Da dolabo bidi dabe, augwali dago kantride bida bida pobao. Tama da nai gegegi painu pabode da, augwaligo da ela muainu tonalubo dao.
LAM 5:10 Da nasi genuai mu ebao, tama da posolo dwai mu ebao. Tama dago tigi posolo te stov posolo ebo tiwai mu ebao.
LAM 5:11 Te Saion bulu dude digi, me te Juda dabego taun dabede, te boi bidi dabe augwaligo dago we dabe, me dago wegi mani dabe kegelama, tama augwaligo penani sę dabe yalio.
LAM 5:12 Augwaligo dago tobolu bidi dabe selama, tama augwali pobila walalio. Tama augwaligo dago monu dabe dali me augwaligo wiegi yai kolesaga me ebeo.
LAM 5:13 Augwaligo dago gesi bidi dabego wit gosegebo sę bomai sę emainu eyu, me te ogomane dabego genuai isi pobi genuai elama, tolomainu ilalio.
LAM 5:14 Megi da, te genuai bidi dabe augwali te taun genuai sunumi dabe pąde me dualalubeo. Tama te gesi bidi dabego te gita gagali ma ebeo.
LAM 5:15 Dago wiegi yai homu pemene yali sia salio. Dago te tęąbi wabo kolesaga hasegelama, megi dago hobedai gela naga obao.
LAM 5:16 Dago genuai nogi polo tulalualio, te dago gawe yali nai dabe dolai dao. Da hobede mu yao. Magi baso meni, dago yali dwai sęde sali sęgę dwai yalio.
LAM 5:17 Dago homu te Saion bulu du te dolali dao, homu yali. Tama te bulu uni yowigo bulu pedelali dao, homu yalio. Tama dago dwai homu mu elama, tama da gela wali madi dago gedu dene mu yalio.
LAM 5:19 Tiali goli, Genuai Bidi, nage sesemane sogo king bidada pidu bidibao.
LAM 5:20 Tialima, nago da magi baso tudi ola menama, tama da magi baso sesemane sogo gegeda pobawe?
LAM 5:21 Genuai Bidi, nago da tudi ola menama, tama nago da dali sębę genuai mu yalio. Tiali goli, da nage pageba ma asaio. Tama tialima, nago da ma odasa asao. Tama nago da polobadu bugagia bidali tiwai ma bidimainu ilao.
EZE 1:1 Ena Esekiel, ena te Juda dabe dali te wę Kebar pąde bidai, te Babilon tǫ kantri pedaide. Te Babilon dabe augwaligo da kalabus elama, tama da te augwa page bulu tǫba sela pai dao, polobadu. Tama te nanobo me si me si wabo polua, dei a naga wabo side, te kibu be bidi sese deli olama, nogo si wabo 30 yiade, te dagalu buga pabo side eno te nade ebo tiwai te God sualio.
EZE 1:2 Te sę pedelali, te Babilon dabe te Juda tǫ kantriba pelama, te hwįagaselama, te Jerusalem king bidi Jehoiakin augwa tǫ kantriba kalabus igi pomainu selasa pabo kibu be a naga nosali elalubo sogo te sę pedelai dao.
EZE 1:3 Ena Esekiel, ena te pris Busigo ogwa da, ena te tǫ kantri Babilonde bidali, te ąį Kebar pąde da, tama enaba te Godigo po wabo eno odama, te Godigo bomo enaba asida walio.
EZE 1:4 Eno ugwaba tonobadi, eno te genuai wali me haowa te not badu asobo suali, te be sele hauwa dali asobo suali. Te genuai ulago te haowa mu bagua selama, tama te ula te isi dabo tiwai bomo umagi mu yali, tama te haowago ula tomode te tigidaliba usu te brasgo ula ebo tiwai yalio.
EZE 1:5 Te genuai wali me haowa si tomode eno te bidi tiwai nai me si me si elalubo suali. Augwaligo tigi te bidigo tigi tiwai elaluali,
EZE 1:6 tiali goli te tigidali deli delide te gesabidi me si me si badi, te bogo me si me si elaluali.
EZE 1:7 Augwali sągą te doloba pai elaluali, te augwaligo sągą dani te gesi kibu bulmakaugo sągą dani tiwai si elaluali. Te augwaligo sągąde ula ebo te umabo mu eyu, te bras augwaligo meda holali gegemane tiwai yalio.
EZE 1:8 Te tigidali bogo deli deli dologode te bidigo nogo ąbo tiwai elaluali. Te augwaligo bogo te tama tiwai elaluai.
EZE 1:9 Tigidali deli deligo augwa bogo si diniginani, te deli deligo bogo sabigo te gasa mego mego bogo sabiba pomono pelama, tama augwali te halobage me deli tiwai te nogo habu me si me si pedelai. Te augwali gasaba me painogo ebo sogo da, augwa te tama tiwai naga elalubadi palio. Augwa tigi begelibo sę eyu me ebeo.
EZE 1:10 Tigidali deli deligo te tobage gesabidi me si me si elaluali. Te edaba begelama elalubo badu te bidigo gesabidi elaluali, te dolo nogo badu gesabidi te hasa nogi laiongo gesabidi tiwai yali. Te pobase nogo badu gesabidi te kibu bulmakau omai gesabidi tiwai elaluali, te tudi badu gesabidi te genuai ba kemodage gesabidi tiwai yalio.
EZE 1:11 Te augwa gesabidigo kolesaga te tama da. Tigidaligo augwa bogo si diliginama, te deli deligo bogo te gasa mego mego bogo sabiba pomono palio. Te augwa gasa bogo me sigo, te augwa tigi mesega salio.
EZE 1:12 Tigidali deli deligo gesabidi te me si me si gesabidigo te me si me si pedaiba tononaluali. Tama augwali deli homu naga elalubaso, augwali gasaba me painogo da, te augwaligo gesabidi gasaba me begeligobeo. Augwali paboba naga tama paibao.
EZE 1:13 Te nai dabego kolesaga te tama elalubao. Eno suali, te nai dabego ula te isi ula me sole tiwai ula te bidi tiwai nai me si me si tomode iba peyu, eda asu yali. Tama te sia bogoli genuai pedelama, te be sele ula te isi pedelama, te pepeda pabo sę ela palio.
EZE 1:14 Tama te me si me si bidi tiwai nai dabe te polo asesa iba peyu, eda asu yalio, te be selego ula tiwai yai dao.
EZE 1:15 Eno te bidi tiwai nai dabe subo sę elama, te eno suali, tigidali deli deligo te tǫde augwa sągą pąde te wil me deli dolalubo suai dao.
EZE 1:16 Te tigidali wil deli tigi poai naga elalu, te ula umagia mu yali, te sęwa yai tedali gasagi yai masigi mu tiwai yalio. Te wil tigidali deli deligo te gasa gasa wil te augwa tomode elalu, te gasa tononalua palio.
EZE 1:17 Tama tialima, te wil dabe te tigidali me si me si pedai badu te iba soyu, eda soyu emainu ebo dao.
EZE 1:18 Eno suali, te wil dabe moni dobo dwai mu yai baso, ena wi yalio. Te wil tigidali deli deli sabi badu te tononalubo gedu hauwa mu elalualio.
EZE 1:19 Te bidi tiwai nai dabe iba soyu, eda soyu ebo sogo da, teda te wil dabe me augwali dali iba soyu, eda asiyu yali. Tama te nai dabego te tǫ tagalama, ugwaba holobo si da, teda te wil dabe me ugwaba holoyu yalio.
EZE 1:20 Te nai dabe augwa menaba pabo deli homu ebaso da, teda augwali pelawaibao. Tama te wil dabe me augwali dali paibao, magi baso meni, te me si me si nai dabego me, te wil dabego me te deli homu naga elalubo dao.
EZE 1:21 Te nai dabe augwali gasa me pabo homu ebaso da, teda te wil dabe me paibao. Tama te nai dabe te me badu pedaide bidibaso da, teda te wil dabe doligi pai elalueibao. Te nai dabe augwali hogodama, ugwaba holobaso da, teda te wil dabego me tama tiaibao, magi baso meni, te me si me si nai dabe dali te wil dabe dali augwaligo deli homu naga elalubo dao.
EZE 1:22 Tama eno suali, te dagalu ugwadu tede te genuai dąį tiwai elalubo suali. Eno suali, te nai ula mu yali, te wiegi yai dula tiwai elalubaso, ena wi yali. Te nai te bidi tiwai nai me si me si te nai daide ugwadu munalubo suali.
EZE 1:23 Te me si me si nai dabe te genuai bagua sai nai dologode elaluali, te augwaligo bogo si diligina palalio. Te me deli deligo bogo sabi badu ununulu palio. Te augwa tigi dabego digi te augwa bogo sigo mesega salio.
EZE 1:24 Te augwali bola pabo sogo eno odali, te augwaligo bogo kulukulu wali, te tamu ąį genuai ąį dini holama, degasa dulu bugusu wabo tiwai yali, tama te genuai ami bidi hanigo pesagede bidu posolu dala sabo tiwai yalio. Te augwaligo bogo u wabo te Tigidali Bomo Elalubo Godigo i wabo tiwai yalio. Te augwali me badu pedai badu doligi pelama, te augwa bogo bea sali. Tialima megi da, te bagua sai naide ugwadu daide te bidigo po wabo odai.
EZE 1:26 Te bagua sai nai daide ugadu te nai me deli king dugabo sia sai tiwai augwaligo te gasa tedali sisi dagalu tiwai masigigo nigai elalualio. Tama bidi te dugabo sia kingde dugulalubo tiwai elaluai.
EZE 1:27 Te bidigo tigi ugwadu te bras pedai me deli ula te tomode elalubo tiwai yali. Te tigi pedai aiyadu te sia ula tiwai yali. Te genuai ulago aga bagulai elaluali.
EZE 1:28 Tama te ula te dagalude unigi bidi elalubo tigi poai tiwai hauwa elaluali. Te ula ebo eno suali, te ula te God agade digi genuai ula asobo tiwai yai dao.
EZE 2:1 Eno te tama tebo sulama, ena kidu sugunama, te gesabidi tǫba pǫgulali. Tama eno odali, Godigo enabolo te tiwai po wali, “Tǫde bidio, nage hogodao. Eno po nage dali wainogo ebao,” wali.
EZE 2:2 Te Godigo enaba te po wabo sogo, te agai Mobo Noma Bidi enaba aselama, te ena hodolobaso, ena dolugulali. Tama eno odali, Godigo enabolo te tiwai po ma wabo odalio,
EZE 2:3 “Tǫde bidio, megi eno nage te Israel dabe augwaliba tagala palaibao, te augwali eno po sela sąyu, hagoma eyu, te ena tudiba mubo we bidi dabe da. Augwali te augwa wąį nǫų dabego hagoma ebo tiwai yai bidi dabe dao.
EZE 2:4 Augwa tobolu dili dagana sigi pelama, te augwaligo eno po me odobeo. Megi da, eno te nage augwaliba pomaina homu elama, te eno po augwaliba magi pao. Te augwaliba te tiwai po walao, ‘Te e da Tigidali Bomo Elalubo Godigo po digi eno dageba obao.’
EZE 2:5 Te augwaligo nago po odobaso, ma odisąbaso da, te tagalao, teda te hagoma ebo hani we bidigo te tiwai konemainao, te eno profet bidi me deli augwali dali bidiba homu yaibao,” te po wai dao.
EZE 2:6 “Tialima nage, te tǫde bidi, nage augwalide wi elama, te augwaligo nageba wabo pode nage wi me igio. Te augwaligo nago po aiyaba elaluama, nage begela dolaibao. Te nage augwali tomode bidiyu, te tiwai dwai haliga yaibao, nage te dwai sesane elalubo bono sili tomode bidibo tiwai yaibao. Ma, nage te dwai marasin elalubo hwą dabe tomode bidibo tiwai elalueibao. Tiali digi tagalao, nage augwalide wi eyu, te augwaligo pode me wi igio. Menio.
EZE 2:7 Nago koneani, augwali te hagoma bidi naga elalubao. Te augwaligo nago po odisąbadi goli, tagalao, te eno nageba mabo po tigidali te nago augwaliba walao,” te po wai.
EZE 2:8 “Tǫde bidi, eno te po bugagia odao. Te gasa Israel bidi dabego ebo tiwai nago hagoma elamuo. Nago pedauwali diliginama, eno nageba te mabo nai nago tuao,” wali.
EZE 2:9 Agai te po ola silama da, teda eno te nogo me deligo te buku me deli ena pąde tolalubo sualio.
EZE 2:10 Te buku te pepa me deli tiwai augwaligo te bebe pelama, te kęąį elaluai. Tialima, nogo te buku diliginama, tama eno suali, te bukude te si badu po asęai elaluali. Te bidi dabe augwali te haliga sęgę eyu, dwai gela weyu, homu dene ebo tęąbi ebo po dabe augwaligo asęai elalubo suali. Te tobage po te pepade asęani pągąnalualio.
EZE 3:1 Te Godigo enabolo te tiwai po wali, “Tǫde bidio, nago te buku tuao. Tama nosali nage pelama, te bukude po te Israel we bidi augwaliba pusugi pao,” wai dao.
EZE 3:2 Tialima, eno pedauwali a olama, agai te buku enabolo mawai dao.
EZE 3:3 Tama agai te tiwai po wali, “Tǫde bidio, megi eno nagebolo te mabo buku nago tuao. Nago haliga tego pągąnao,” wali. Te eno tuali, te eno pusu mu yali, te ganima bunu ge pusu ebo tiwai yalio.
EZE 3:4 Nosali Godigo enabolo te tiwai po wali, “Tǫde bidio, nage te Israel we bidi augwaliba pelama, te eno nagebolo pusali po tigidali pusao.
EZE 3:5 Eno nage te haniani gasa gasa po wabo we bidi haniba me nage tagala palobeo. Menio. Eno nage te Israel we bidi augwali naga bidiboba tagala palobao.
EZE 3:6 Te eno nage te genuai genuai tǫ pedai kantri te nago konesiąwai we bidi hani augwaliba nage eno tagala paligi sogo da, teda te tǫ pedai kantri we bidi augwaligo nago po wali pigi dao.
EZE 3:7 Tiali digi, te Israel dabego da, me tegobeo. Te augwali me deligo nago po wali me pogobeo. Augwaligo te eno wabo po digi me odisąwaibao, te magi elama augwaligo nago po odaibawe? Magi baso meni, augwaligo tobolu te masigi dila pai tiwai elalu, te tigidaligo po naga sela sąbo bidi dao.
EZE 3:8 Tiali goli, megi te eno nago homu kolesaga te augwaligo homu kolesaga dila pai elalubo tiwai ilama, te nage augwalide didibili homu me egobeo.
EZE 3:9 Te eno nage te masigi daimon dila pai tiwai pedalomainu yaibao, te nago bomogo te augwaligo bomo aiyaba elalueibao. Te nage augwalide wi elama, didibili me igio. Menio. Augwali te po sela sąbo bidi dabe naga dao,” te po wali.
EZE 3:10 Te Godigo gasa po me weyu, te tiwai wali, “Tǫde bidio, te eno nageba wainogo ebo po tigidaliba olo bugagia muao, te nago po me deli homugo me gegeda pelamu dao.
EZE 3:11 Tialima, nage te nage abagi dabe te boi bidi dabego Babilonba sela asali bageba pelama, tama nago te tigidali po ena Genuai Bidi, eno nageba mani po te nago pusao. Te nago augwaliba te tama po wao, ‘Te po God aga po digi dao.’ Nago eno po augwaliba mao, te augwaligo olo bugagia munama odobaso, ma menisąbaso, te tagalao, te nago eno po augwaliba pusa mao.” Te po wali.
EZE 3:12 Nosali Godigo Mobo Noma Bidigo ena ugaba sagoasa holali. Te ena tudi badu, te pedauwali me delidu te tiwai i bomonama wabo odali, “Genuai ula me bomo te dagalude bidibo Genuai Bidi elalubao. Te aga nogi ugaba sao,” walio.
EZE 3:13 Te me si me si nai te bidi tiwai te bola pabo gagalali, te deli deligo bogo sabi ununulu pelama, te mego bogo sabigo mego bogo sabi badu elali, tama eno te gosege wabo odali. Tama eno te wil kidagalo wabo odalio. Te tigidaligo te kidagalo wabo genuai mu pedalama, te genuai wali u wabo tiwai pedelai dao.
EZE 3:14 Tama Godigo Mobo Noma Bidigo ena ugaba sagoa selama, te ena tolasa palio. Te Godigo genuai bomo enaba pedelama, te ena dwai dene ebaso, ena sębę eyu palio.
EZE 3:15 Te Godigo Mobo Noma Bidigo ena te taun me nogi Telabipba odasa pali, te ąį Kebar pąde da, te Israel augwali te taunde kalabus bidali. Eno te suali nai dabego ena haliga sęgę dwai mu ilibaso, ena te taunde dugulalu bididualio, tama eno te magi sę me deli yabo bomo meni baso bididubadi, te Sarere deli, te a naga olama, si sogo tama bidai dao.
EZE 3:16 Te a naga olama, si, te Sarere deli tiwai wali sogo silibo si da, teda Godigo po enabolo ma mawai dao.
EZE 3:17 Agai te tiwai po enabolo wali, “Tǫde bidio, eno nage te Israel dabe tonalubo bidi pedalumainu ilalio. Te eno augwaliba pusabo bomai po elalubaso da, teda eno nageba munama, te nago augwaliba pusagameo.
EZE 3:18 Te eno suali, bidi me deligo dwai kolesaga ebaso, eno te po weyu, aga isimainao po obaso da, teda nago te dwai kolesaga yali bidi agabolo pusao. Nago agabolo waliyu, te aga homugo ebo kolesaga hasegelibaso, te aga me hagagobeo. Te nago agabolo walisąbaso da, teda aga sęgę te tiwai naga elalubadi, te aga isaibao. Tialima, te eno gedude da, te aga isabo page nagede elalubaso te aga isali dao.
EZE 3:19 Tialima, nago te dwai sę yali bidi agabolo te po pusao, tama aga te dwai kolesaga tagalisąbaso da, teda te dwai kolesagago aga dolama, te aga isaibao. Tiali goli, te page nagede me elalubeo, tiyu nage me isigobeo,” wali.
EZE 3:20 “Te eno magi usu sabo sę me deli te wiegi yai bidiba pedalumai hagede sula tagalabaso, tama agai te doloba pai kolesaga tagalama, te dwai kolesaga ebaso da, teda te tebo sogo nago te bidibolo te dwai kolesaga ebo tagala po walao. Te nago agaba wasiąbaso da, teda aga dolama isaibao. Eno agai polobadu te yali wiegi yai kolesagade homu kone me palogobeo. Menio. Te eno agai megi te ebo dwai kolesaga sulama, te eno aga dolomainu sula tagalobaso, te aga dolama isaibao. Tialima, eno gedude te aga isabo page te nagede elalubaso aga isali dao.
EZE 3:21 Tialima, nago te wiegi yai bidi me deliba te po bomonama, te dwai sę igio po obadi, tama agai te po wali pelama, te dwai sę me isąbaso da, teda aga me isigobeo. Te nage me nage bugagia bidaibao.” Godigo te po enabolo wali.
EZE 3:22 Ena te bulude bididubadi, tama te Genuai Bidigo bomo enaba asida walio. Tama agai enabolo te tama po wali, “Nage hogodama, nage te odogo buluba pao,” wali. “Nage teba sabalobo si da, teda eno po nage dali waibao.”
EZE 3:23 Tialima, ena hogodama, ena te odogo bulu pali, tama te badu eno te Godigo genuai ula pedalubo suali, eno te wę Kebar pąde suali sę tiwai yalio. Tama tibaso, eno gesabidi te tǫba pǫgulai dao.
EZE 3:24 Tialima, te Godigo Mobo Noma Bidi enaba aselama, ena hodolobaso, ena dologulali. Tama Genuai Bidigo enabolo te tiwai po wali, “Tǫde bidio, naga buluba pelama, te naga be tomoba bula sigi pelama, te sunumi paliao,” wali.
EZE 3:25 “Tama nosali bidi mebago te dila pai haliga seselama, tama tego nage kęnaibao. Tama nago te be tagalama, te we bidi dabe augwali sugi painu ebo usu me egobe dao.
EZE 3:26 Te eno nago pedauwali pania somainogo ilama, tama te po sela sąbo bidi dabeba te nago po bomo elama, augwaliba me weyu, augwaligo te dwai kolesaga tagalao po bomo elama me wagobeo.
EZE 3:27 Tiali digi me sogo eno homugo nago eno po te we bidi dabe augwaliba pusumainogo ebo sogo da, teda te eno nago po wabo usu ilaibao. Te nago augwaliba te tama waibao, ‘Te po da, te Genuai Bidi God aga po da.’ Te nago po augwaliba pusubo si da, te mebago nago po odaibao. Tiali digi, mebago nage tudiba mueibao, magi baso meni, augwali te po sela sąbo we bidi dabe naga bidibao,” te po walio.
EZE 4:1 Te Godigo te tiwai tama po wali, “Tǫde bidio, nago te brik me deli sigi pelama, te tǫba munama, te Jerusalem piksa noma tiwai te daide ugadu todogo pao,” wai dao.
EZE 4:2 “Tama te brik pąde, nago te amigo te taun me deli bagua selama, te we bidi augwali dali boi hwįnama, te taun sainu eyu, te tigidali sę yabo nai piksa nigibo tiwai yao. Te tǫ te taun obo pąde te tǫ du tiwai me nigao, te ami bidi dabe augwa te daiba bugagia dolugulama, boi hwįabo pesage tiwai piksa nigao. Te ami dabego bidabo pesage te taun pąde nigibadi, te taun aluabo masin dabe piksa me nigao,” wali.
EZE 4:3 “Nigila silama da, teda te aingo nigai nai ulubo pou me deli selama, te nage dali te brik dali tomode ugaba dodolama, te obo dodolao. Tama nago te taunba tonaluao. Te Israel we bidi augwaligo nago te tebo sę sulama, te augwaligo konemainao, nosali te ami bidi dabe asama, te Jerusalem aiyaba elalueibao,” wali.
EZE 4:4 “Nosali nage te naga pobase nogo badu pigusao, te nago naga we bidi Israel augwaligo sęgę ebo koneaibao. Nage pilamubadi, te 390 dei te sogoba usu naibao. Te 390 dei wali, te 390 yia dąį ilama obao, te tama kibu bede usu nama, te Israel tǫ kantri we bidi augwa yali sęde sęgę tolaibao,” po walio.
EZE 4:6 “Te nago silibo sogo da, teda nage te naga dolo nogo badu te 40 dei piao. Tama nago te naga we bidi Juda tǫ kantri dabego sęgę pedalubo koneao. Te 40 dei wali, te kibu be 40 yiade te Juda dabe augwa yali dwai sęde sęgę tolaibao,” te po olama, wai dao.
EZE 4:7 “Te nage pila mubo sogo da, teda nago te boi bidi dabego te Jerusalem sainu ebo piksa nomaba tonaluao. Tama nago te hwįabo sisi elalubo tiwai elalu, te nago te tiwai po wao, ‘Te taun da dolaibao,’ wao.
EZE 4:8 Te nago tigi te eno haligago kęnama, te nago tigi begelainu ebaso usu egobeo. Nage te tiwai tama me pila mudubadi, te eno nage dąį ilali sogoba usu nubaso da, te usu dao.”
EZE 4:9 “Megi da, nago te wit meba sobadi, te rais bali me, te tobage tęgabi si me sobadi elama, te wit tiwai nai si me sao. Te nai tigidali deliba sisinama, te belegelama, bret nigao. Nago te tobage bret naga pibo badu munama tudubadi, te 390 dei wali sogoba usu nubo sogoba usu naibao,” te po walio.
EZE 4:10 “Nago te tiwai 200 gram tobage bret te deli deli sogo tudao, te wali nago edelamu dao.
EZE 4:11 Te nago ąį tuabo me dąį elalueibao. Nago te ąį kap delide deli deli sogo tuao.
EZE 4:12 Tama nago te bidigo di selama, elaluao. Tama te di wa pabo si da, teda nago selama, te nago isi tiwai elaluyu, tego te bret ulao. Tama nago te tama sę ebo te we bidi augwaligo sumainao,” wali.
EZE 4:13 Te Genuai Bidigo po te tiwai ma walio. “Nago te tama tebo kolesaga te Israel dabego yabo kolesaga dąį ilibao. Nosali eno te boi bidi dabe te Jerusalemba hwįgi pomainu sula tagalaibao, tama te Israel dabe augwali te gasa tǫ kantriba sela paibao. Tama augwali te tǫ kantri dabede bidalu, augwaligo te eno gedude dwagi yai isąwai meda yai nai dabe tueibao,” Genuai Bidigo te po wali.
EZE 4:14 Ena Esekiel eno te tama po odama, eno te tiwai po wei ponani, “God Genuai Bidi, hobede mu ebao. Eno te tama kolesaga munu me ebeo. Mu menio. Eno digi eno meda yai sę nago gedude me ebeo. Te ena dwasianu ogwade bidali sogo, te eno te kibu aga digi isai kibu me, ma hasa mi, te uni hasa dabego ela muani tusiąbadi, te megi bidibo sogoba usu nagasobao. Te bomo yai pode habu seleyu, te nago gedude meda yai nai, te tiwai nai deli eno me tubeo,” eno te po wali.
EZE 4:15 Godigo te po wabo odama, te po wali, “Te nago tama homu ebaso da, teda nago bret te bidigo di olali iside te nai ulugobeo. Menio. Nago te kibu bulmakau dide naga ulagameo,” te po wai dao.
EZE 4:16 Te Godigo po ma weyu, te tiwai po wali, “Tǫde bidio, eno te Jerusalem dabe te nai mu sǫą pabo sę ilaibao. Tama te we bidi augwali dwai midigi selama, te sęde haliga sęgę mu yaibao. Tama te we bidi dabe augwa te nai me wę bugagia dagalaibao, te augwaligo deli deli side tuabo nai dagalobo sę eyu, tama yaibao.
EZE 4:17 Awe, te augwali nai me wę mu sǫą paibao, tibaso te augwali haliga sęgę dwai mu yaibao. Augwali te dwai sę ebo bidi naga da, tibaso te eno augwaligo nai sǫą palaibao, tibaso augwali mu nomona selama, dili pulu hania mu pedelaibao,” te po wai dao.
EZE 5:1 Godigo te tama po ma walio, “Tǫde bidio, nage pelama, te bainat hwą poa pai mu me deligo te nago penane nisi poayao, me tobolu nisi tigidali poayao. Tilama, nago te penane nisi me tobolu nisi te skelba muao, te dobolama, sela badu dagala muao,” walio.
EZE 5:2 “Eno nage te pila muao wali sogo tigidali silibaso da, teda nage hodolaluao. Te tama tebo sę ebogo te we bidi augwaliba te tiwai ola mawaibao, te boi bidi dabego te Jerusalem sagasali tiwai ebao. Nage hodalubo si da, teda nago te tobolu nisi me penane nisi hasia me badu te Jerusalem dąį ilali brik daide munama, nago te nisi dabe isi ulao. Te nago si wali pedai tobolu nisi selama, tama te brik baguasa bilama, nago te bainat hwągo te penane nisi me tobolu nisi togwa sąsą pao. Tama te sela wali tobolu me penane nisi selama, te sąsąyao, tama waligo sela paibao. Tama eno te bainat hwą selama, te sąwani tobolu me penane nisi pobeasa paibao.
EZE 5:3 Tiali goli, te nago dwasianu tobolu nisi me penane nisi elalumainao, te nago naga ugwa sabi badu munama, te kęnao.
EZE 5:4 Tialima, nago te kęnani nisi deli deli selama, te isiba sąnama, te siago domainao. Tama nosali te isi genuai deyu, te Israel tigidali daibao,” wali.
EZE 5:5 Te God Genuai Bidigo enabolo te tiwai po wali, “Nago te Jerusalem taun suao. Eno aga selama, te tigidali tǫ pedai kantri tomode mu munama elaluali, tama genuai nogi elaluali.
EZE 5:6 Tialima, te Jerusalem dabego eno po sela sąnama, te augwali dwai we bidi mu pedelalio. Te Jerusalem dabe augwaligo yali dwai kolesagago te gasa tǫ kantri we bidi augwaligo ebo dwai kolesaga te aiyaba mu elaluali. Te Jerusalem augwaligo eno po me eno bomai po dabe te tudiba mu muanio.
EZE 5:7 Tibaso, eno augwaliba te tama tiwai po wainogo ebao, ‘Dage Jerusalem dabego odao. Ena God Genuai Bidi, eno dagede po elalubao. Dagego eno po odisąma, te dagego eno bomai po dabe sela sąnama, te dage pąde bidibo tǫ kantri pedaigo ebo dwai kolesaga wali pai dao. Tialima, te dagego hagoma kolesaga hauwa elama, tama dagego dwai kolesagago te dage pąde bidibo tǫ kantri dabego dwai kolesaga aiyaba elaluai dao.
EZE 5:8 Tama tialima, ena God Genuai Bidi, eno te tiwai po dageba obao, eno dageba wiegi yai homu pemene me ebeo. Menio. Eno dageba boi bidi ebao. Tama dage eno te tigidali tǫde we bidi gedude po tų ilaibao.
EZE 5:9 Dagego eno godolo isąbo kolesaga hauwa yalio, te tama tibaso, te eno dageba polobadu isąwani kolesagago te eno dageba dwai dene mu mawaibao. Te tudi badu nosali, eno te tobage dwai dene mabo sę ma egobeo.
EZE 5:10 Te eno dwai dene dageba mabo sogo da, te aya ida mebago te augwa digi wai dabe elama tueibao, me te wai dabe mebago te augwa aya ida ela tubadi yaibao. Te eno dwai dene mabo sęgę dageba ebaso, te dage hauwa isaibao. Te me badu bidibaso da, teda eno augwali te gasa bulu tǫ pedai tigidaliba tedela palaibao,’ eno te tiwai po waingo ebao,” Genuai Bidigo te po wali.
EZE 5:11 Tama po ma weyu, agai te po wai, “Eno augwalibolo te po obao, ‘Ena God Genuai Bidi, ena sesemane sogo bidada paibao, eno po dolo dagebolo obao, te eno dage mu dolaibao. Magi baso meni, dagego te tibo god dabego dwai piksa noma dabe elaluyu, dwai kugumini ebo kolesaga hauwa elama, tama tebo kolesagago te eno gedude dagego eno be meda mu ilai dao. Tama tiyu, te eno dage olo tau sabo wiegi yai kolesaga eyu, te hobede me egobeo. Te eno dageba dwai sęgę mabo sę eyu, te bidigo tobolu nisi tigidali togolama poala sąwani tiwai yaibao.
EZE 5:12 Te eno dage hani sela dobawaibao. Te polalubo hanide te nai sili mu bidu, te gasi genuai saibao, tama augwali te taun tomode isaibao. Tama te si wali hani, te boi bidi dabego te taun bulu badu te bainat hwągo ela wialaibao. Te sela wali hani we bidi, te augwali eno te tigidali bulu tǫ pedaiba ela gudulama, tedela palaibao. Te eno boi bidi dabe tagala palama, te pobeasa pelama, te augwali ela mueibao.
EZE 5:13 Te tama tebo kolesagade te eno sębę genuai eyu, te haliga sębę yali kolesaga silaibao. Te tigidali sę pedalubo sogo da, teda dagego eno te wali po homude kone palagasu, te dagego koneaibao, ena Genuai Bidi, te tibo god me deligo ena hasegelemainogo me ebo menio.
EZE 5:14 Dage dolobo si da, teda te dage pąde elalubo tǫ kantri pedai we bidi augwaligo dage te tama tebo sę sulama, te augwaligo te tama po waibao, “Suao. Augwali dwagila mu dolalio. Genuai Bidigo te augwaligo dwai kolesaga ebo sulama, te agai augwali dolali dao,” augwaligo te po waibao.’ Eno te po obao,” Genuai Bidigo te po walio.
EZE 5:15 “Ena Genuai Bidi, eno te po obao. Eno dageba dwai haliga sębę mu elama, te eno dageba dwai sęgę umagia mu yaibao. Tama dage pąde bidalubo tigidali we bidigo te dage te tama tebo sulama, te augwali homu hauwa elama, te wi dwai mu yaibao. Te augwaligo dage begela dolobo posobo po obaso, te dage hale yaibao.
EZE 5:16 Te we bidi augwali eno te nai sǫą palobo sę mu elama, te dage nai nasi mu yaibao. Tama dage te sęgę sabo dene ebo te enesigigo te ene dageba enama, te dage dolobo tiwai yaibao.
EZE 5:17 Tama me, eno te bulu uni hasa dageba tagala palama, te augwaligo dagego wai dabe ela mueibao. Te eno dageba gasi dwai pedelabo sę ilaibao. Te eno dageba boi bidi tagala palama, hwįagaselama, te dage ela mueibao. Ena Genuai Bidi, eno te po wai dao,” wali.
EZE 6:1 Genuai Bidigo enabolo te tama po wai,
EZE 6:2 “Tǫde bidio, nago te Israel dabe augwaligo bulu du dabeba tonono eyu, te eno po augwaliba pusao.
EZE 6:3 Te Israel dabe augwaligo bulu du dabe, me odogo bulu dabeba te tama po wao, augwaligo te ena God Genuai Bidigo, eno augwaliba wainogo ebo po odiąo po wao. Eno te boi bidi dabe tagala palama, te Israel dabe augwaligo te tibo godiba lotu wagi pabo bulu du dabe dolaibao.
EZE 6:4 Te boi bidi dabe augwaligo te kibu dabe ofa ebo alta tigidali, me te wiegi yai denami ilibo ofa ebo alta me tigidali dolaibao. Tama augwaligo te Israel we bidi hauwa ela munama, te augwali tigi dabe te augwa te tibo god dabego piksa noma elalubo pąba sąsąwaibao. Tama te augwali dili dabe augwa te alta tǫde pąde wilalua paibao,” te po wai dao.
EZE 6:6 Agai po ma weyu, te po wai, “Te boi bidi dabe augwaligo te Israel tǫ kantri taun tigidali dolobadi, te tibo godiba lotu wabo pesage tigidali me dolaibao. Augwaligo te dagego alta tigidali dolama, te duga gedude meda yai mu elalueibao. Te augwaligo te dagego tibo godigo piksa noma dabe mu dola silama, te wiegi yai denami ebo pauda ulubo pesage dabe aluama, besela sąwaibao. Tama te Israel dabego yali dwai kolesaga tigidali te sia saibao,” po wali.
EZE 6:7 “Te boi bidi dabe te Israel tǫ kantri pedai tigidaliba pelama, te we bidi hauwa ela mueibao. Tama te gasa Israel dabego te tama tebo sę bugagia te tiwai koneyu, ena digi ena te Genuai Bidi dao po waibao,” wali.
EZE 6:8 “Tiali goli, te boi bidi dabego te we bidi tigidali ela mumainogo me egobeo. Me badu we bidi bidalubadi, te eno gasa tǫ kantriba ela gudulama, tedela palaibao.
EZE 6:9 Augwali te digibulu bulude bidibo sogo augwaligo ena homu kone palaibao, tama augwa te tiwai koneaibao, te augwaligo tibo godiba gedu eyu, te wali pali kolesagago ena haliga sęgę mu ilama, tama ena augwaligo mu tagalalio. Tama augwa te yali dwai kugumini yai kolesagade hale dwai mu eyu, tama tiai sę yai dao.
EZE 6:10 Tama augwa te tiwai tama koneagasu, ena digi ena augwa Genuai Bidi bidibadi konesiąma iduai yabo po waibao. Tama augwa te tiwai koneama, eno megi e wabo bomai po, te olo po me ola tagalu wabe da homu yaibao,” te po walio.
EZE 6:11 Tama God Genuai Bidigo te tama tiwai po enabolo ma walio, “Nogo hogwayu, te haliga sęgę ebo iliyu, te tiwai po wao, ‘Hobede mu ebao, te Israel augwaligo dwai kolesaga hauwa mu yalio,’ te po wao. Awe, augwaligo te tobage kolesaga ebaso, tama tiyu, te boi bidi dabe aselama, augwali ela muagasaibao. Tama te nasigo me gasigo augwali dolaibao.
EZE 6:12 Te tigidali isimainu yaibao. Te boi bidi dabego augwali ela muagasaibao. Tiali goli, te me badu digibulu bidali da, augwali te gasi selama isaibao. Te we bidi me badu bidalubadi yai baso da, te augwali me te nai mu sǫą pelama, te nasi elama isaibao. Te tebo kolesaga ebogo te eno haliga sębę yali mu usu naibao.
EZE 6:13 Te boi bidi dabego te Israel dabe augwaligo tigi te augwa tibo god dabe me te alta dabe pąba sąsąwaibao, tama te lotu wabo pesageba me, te bulu du dabe daide me, te tigidali genuai ni dabe dologoba me, te augwa tibo god dabeba te ofa dabe ula mabo pesage tigidaliba te augwali isasa pali bidi dabego tigi sąsą paibao. Te sogo te tigidali Israel dabego koneama, ena digi ena Genuai Bidi bidibao po waibao.
EZE 6:14 Awe, te eno augwaligo tǫ kantri pedai mu dolaibao. Te eno augwaligo tǫ pedai tigidali te olo bulu pesage tiwai pedalubo yaibao, te tǫ wa pai bulu Diplatde gagalaibao. Eno te Israel dabe bidibo bulu pesage deli me sula tagalogobeo. Menio. Te eno tigidali dolama, te tigidali olo bulu pesage naga elalueibao. Tialima, te we bidi tigidaligo bugagia koneama, ena digi ena Genuai Bidi mu bidibo yabo po omainu yai dao,” te po wai.
EZE 7:1 Genuai Bidigo enabolo te tiwai po wali,
EZE 7:2 “Tǫde bidio, ena God Genuai Bidi, eno te tiwai po Israel augwalide elalubao. Te e side da, te tigidali Israelgo bodolu sia sabo side elalubao, te augwaligo tǫ pedai tigidali badu te tama tiaibao.
EZE 7:3 Dage Israelgo, odiąo. Te dąį yali bodolu pedelalio. Eno haliga sębę dwai mu elalubo, te megi eno dwai dene dageba pedalubo sę ilaibao. Dagego te tama dwai kolesaga ebaso, tama tialima, megi eno dage po tų ilaibao. Te eno dagego dwai kugumini yai kolesaga dabe te dolo dageba wei ponaibao,” wai dao.
EZE 7:4 “Te eno dage bugagia bidimainu me sula tagalogobeo. Te eno dagede olo mu tau sabo wiegi yai kolesaga me egobeo. Menio. Dagego te dwai kolesaga dabe ebaso, tialima te eno dageba dwai dwai dene mabo sę yaibao. Tama dagego te tiwai bugagia konemainu ebao, te ena digi ena Genuai Bidi da waibao,” te po wali.
EZE 7:5 God Genuai Bidigo te tiwai po wali, “Te gasa tobage dolobo sę mu dageba pedelaibao. Tama te dolobo sęgo te dage tigidali silabo sę pedelaibao.
EZE 7:6 Megi da, te dage dolabo bodolu side te pąba pedelalio. Te sogo pedalubo si da, te pąde mu tama pedelaibao.
EZE 7:7 Dage Israel tǫ kantri we bidi dabego odiąo. Te dage dolabo si te sabi badu pąba pedelalio, te dage dolaibao. Te dage te bulu du dabeba sisinama, te wiegi yai pemene eyu lotu wali tiwai ma egobeo. Menio. Te dage megi da sisinama wi umagia naga eyu, wabo pabo bidi tiwai yaibao,” walio.
EZE 7:8 “Eno haliga sębę dwai mu dageba ebao, bidigo wę gelebo tiwai yaibao, tama tibaso megi da eno dageba te dwai tigi dene mabo sę te eno haliga sębę ebo usu nama yaibao. Dagego te dwai kolesaga ebaso, te dage eno po tų ilaibao. Eno te dagego dwai kugumini yai kolesaga ebo dolo wei ponaibao.
EZE 7:9 Te dage eno gogolama, bugagia bidimainu me sula tagalogobeo. Te eno olo mu tau mabo wiegi yai kolesaga dageba me egobeo. Menio. Dagego te tama dwai kolesaga ebaso, te eno dwai sęgę mabo dene dageba mawaibao. Tama dagego te tiwai bugagia konemai hagede ebao, ena digi ena Genuai Bidi, te eno tama eno te dwai sęgę mabo sę dageba tagala palobo dao,” te po wali.
EZE 7:10 Tama Genuai Bidigo po enabolo ma weyu, te tama po wali, “Te dolabo genuai sę pedelabo bodolu pąba yagasalio. Sesemane sogo te Israel dabe augwa abagi dabe dali dwai sę idualio. Tama augwaligo te hagoma ebo kolesaga ebo sę bomo yai dao.
EZE 7:11 Tama augwaligo te dwai kolesaga genuai mu pedelai. Tialima, eno te augwali tigidali ela silaibao, te dwai kolesaga yali bage tigidali dolaibao. Te eno augwaligo nogi aiyaba elaluama, tama augwaligo gana pai nai dabe dolama, tama augwaligo te dwai kolesaga dabe ma egobeo,” wali.
EZE 7:12 “Te dolabo sogo pąde yagasalio. Te sogo te nai doado bage abelebo bidi dabe augwaligo homu pemene me egio, te nai doado bage maketde mubo bidi dabego me haliga sęgę me elamuo, magi baso menio, eno te sęgę mabo sę te tigidali bageba yaibao.
EZE 7:13 Te bidi mego te gasa bidi me deligo agaba te nai me deli abelemainogo yali bidi, aga te sesabi elama, bobobage sogo bidali goli, te tagalao, agai te nai wei ma sainu ebo usu egobeo. Magi baso meni, eno te tiwai po wai dao, eno te tigidali bidi dolaibao, te eno po me hasegelegobeo. Tigidaligo dwai kolesaga ebaso, tialima tigidali te dolaibao.
EZE 7:14 Augwaligo te hwįabo sisi ebo biugel bu obaso, te tigidali ami bidi dabe sisi ebo da. Tiali goli, te bidi me deli hwįgi pogobeo, magi baso meni, eno te hani tigidaliba haliga sębę elama, te augwali eno wi dwai mu ilai dao,” te po walio.
EZE 7:15 Genuai Bidigo po ma weyu, te tiwai wali, “Boi bidi dabego te Jerusalem bagua salio. Te taun bulu badu bidali we bidi dabe augwali te boi bidi dabego bobobage hwągo ela mueibao. Te taun moni obo tomode bidali we bidi augwali da, te augwali nai menia selama, te haniani gasi selama, te augwali isaibao.
EZE 7:16 Te me badu usu yali da, te augwali bulu duba wi pelawaibao. Tama te tigidali wi pali we bidigo te augwa yali dwai kolesagade homu kone palama, te augwa haliga sęgę elama, dwai gela waibao, tama augwaligo gela wabo te odogo bulude bidibo ba dabego gela tiwai pedelaibao.
EZE 7:17 Te augwaligo nogo bomo kimi meniama, te augwaligo sągą didibili dogia paibao.
EZE 7:18 Tama augwa te homu dene ebo ugwa dabe gudama, te augwali didibili umagi mu yaibao. Tama te tigidali te hale ebaso, te augwa tobolu nisi poala sąwaibao.
EZE 7:19 Tama augwa te gol me silva dabe te olo nai pobele bage tiwai te sunumiba sąsąwaibao, magi baso meni, te Genuai Bidigo haliga sębę augwaliba pedalubo sogo te gol me silvago augwali tau sogobe homu yaibao. Augwaligo te gol me silva tuabo usu egobeo, tama me te gol me silvago te magi sę me delide augwali tau me sogobe homu yai. Augwaligo te gol me silva gedugo suali godolo ebaso, te kolesagade augwali kekebaso, te augwaligo dwai sę yali dao.
EZE 7:20 Polobadu augwaligo te gol me silvago nigali au dobage elalu, tama augwa te naide gana pai mu bidaluai dao. Tama augwaligo te gol me silva selama, tama te haniani tibo god dabe piksa noma nigali. Te kolesaga eno godolo homu mu meni baso, tama tialima megi da, eno te gol me silva dabe te augwa gedude dwai nai tiwai mu pedalumainu yai dao,” wali.
EZE 7:21 Te Genuai Bidigo po te tiwai ma wali, “Eno te bidi dwai dabe mu hodolama, te augwaligo augwa tǫ kantri pedai tagalama asu, te Israel dabego nai doado bage wi saibao. Te augwaligo sela pelama, tede augwa dwai sę haniani yaibao.
EZE 7:22 Te augwali eno te wiegi yai genuai be tomoba pomainogo sula tagalama, tama eno gedude te be dwai meda pedalubo sę ilaibao. Te augwali eno me paligobeo. Mu menio,” wali.
EZE 7:23 “Te Israel we bidi augwaligo subigila sę yali. Te augwa tǫ kantri tigidali pedai badu augwaligo te gasa we bidi dabeba dwai sę eyu, te hauwa we bidi ela muani. Tama tialima, te augwali kęnabo sen dabe nigibo sogo da po wai dao.
EZE 7:24 Tama tialima, eno Genuai Bidigo po odisąbo hani bidi dabe sesaibao, augwali te bidi dwai mu dabe, tama augwali te Israel tǫ kantriba aselama, te Israel dabe augwa be dabede sela sąnama, te be dabe saibao. Tama augwaligo te Israel dabego lotu wabo pesage dabe dolaibao. Te Israel bomai bidi dabe augwali te wi naga elama, te augwaligo hagoma me ma egobeo.
EZE 7:25 Te dwai sogo mu te Israel augwaliba asaibao. Te augwa haliga nagame elama bidabo homu godolo yaibao, tiali goli augwaligo te tiwai ebaso usu egobeo. Mu meni yaibao.
EZE 7:26 Te dolobo sę haniani augwaliba pedaludu geaibao, tama augwaliba te dwai nai dabe hauwa pedelabo po odu geaibao. Tialima, augwali wi ebaso, augwali te geme nosali pedelabo sę po pusubo bidi profet dabeba pelama, tama augwaliba hanalu te eno homude ebo yabo sę po hanilabo po koneai hagede yaibao, tiali goli te eno po augwaliba me magobeo. Te pris dabego augwali ola mabo po meni yaibao, te tobolu bidi dabe augwaligo te wiegi yai homu kolesaga augwaliba maiabo meni yaibao.
EZE 7:27 Tama augwa king da, te haliga sęgę elama, te aga homu kolesaga da te tigidali dolaibao. Tama te we bidi augwali da wi elama, noma saibao. Eno augwaligo ebo dwai kolesaga tigidalide homu kone palama, te eno augwaliba dwai sęgę mabo dene mawaibao. Te augwaligo gasa we bidi dabe po tų ilali kolesaga tiwaigo te eno augwali po tų ilaibao. Te tiwai augwaligo bugagia konemai hagede yaibao, ena digi ena Genuai Bidigo te sę yai dao,” te po obao.
EZE 8:1 Te 6 wabo kibu bede da te Babilon tǫ kantride kalabus bidali sogo, te polua 6 wabo, te dei namba 5 wabo side, ena te ena bede dugulalu bididubadi, te Juda tobolu bidi dabe ena dali dugayagaselama bidali. Te da bidaludubadi, te God Genuai Bidigo bomo enaba asalio.
EZE 8:2 Te nade subo tiwai nai me deli eno ugaba tonono ebadi, tama te bidi tiwai naigo te ula isi dabo ula tiwai suali. Te aga tigi aiya badu te isi ula ebo tiwai yali. Te tigi ugaba te bras pedai augwaligo te meda hola sąwai gegemane yai ula tiwai yalio.
EZE 8:3 Eno te aga nogo tiwai suali, agai te nogo debelama te ena tobulu nisi tola selama, ugwaba kegai dao. Tama te nade subo tiwai yali nai dabe, te Godigo Mobo Bidigo ena ugwaba mu sagoasa holama, ena te Jerusalemba sela palio. Tama agai ena te Godigo beba odasa pali, tama ena te be bagulali obo te not badu elalubo sunumi tomode doligi pali. Te pesagede te Israel augwaligo te tibo god piksa noma dodolai elaluai, tama Godigo haliga sębę dwai mu te naide yai dao.
EZE 8:4 Te da Israelgo Godigo genuai ula eno suali. Ena te wę Kebar pąde bidali sogo eno te suali tiwai tobage ula yalio.
EZE 8:5 Tama Godigo enabolo te tiwai po wali, “Tǫde bidio, nago te not badu pedaiba tonono bilao,” wali. Tialima, eno tonono bilibadi, tama eno te tibo god piksa noma suali, te sunumi pąde elalubo alta pąde dolalubo sualio. Tama Godigo haliga sębę dwai mu te dwai nai dali yai dao.
EZE 8:6 Godigo enabolo te tiwai po walio, “Tǫde bidio, nago te Israel we bidi augwaligo dwai kolesaga ebo suao. Te tebo kolesagade augwaligo ena te eno bede ela gudulama, te ena augwalide digibulu bidabo sę ilibao. Te nosali nago augwaligo te gasa dwai kolesaga mu ebo sueibao, te nago megi subo dwai kolesaga te aiyaba mu elalueibao,” te po wai dao.
EZE 8:7 Godigo po ola simanobo si da, teda agai ena selama, te Godigo be obo bagulali te bulu badu solama, tama agai ena te genuai sunumi oboba odasa pali. Tama agai enabolo te obode elaluali dedage me deli ola manio.
EZE 8:8 Godigo enabolo te tama po wali, “Tǫde bidio, nago te obo aluama, te dedage genuai pedalubo sę ilao.” Tialima, eno aluama suali, te sunumi me deli elalualio.
EZE 8:9 Godigo te tiwai po enabolo walio, “Nage te tomoba pelama, augwaligo te dwai kugumini yai kolesaga ebo suao,” te po wai.
EZE 8:10 Agai po ola siminibo si da, teda ena te be habu me deli tomoba pelama, te eno tonaludalio. Iya, eno te hasamani dabe piksa noma, me te God gedude meda yai gasa tobage hasa dabe augwali te obo tigidali habude pągąnalubo sualio. Tama te Israel dabego lotu wabo tibo god piksa noma dabe me elalubo suai dao.
EZE 8:11 Te Israel tobolu bidi dabe augwali te 70 bage te be habude bidibo suali, tama Jasania, te Safango ogwa, te augwali bidibo tomode aga deli bidali. Tigidaligo te wiegi yai denami ebo pauda ulubo plet pou tolalubadi, eno suali, te hano ugaba holali. Tama te bidi dabe augwaligo te piksa noma dabeba lotu udalio.
EZE 8:12 Te Godigo enabolo te tiwai po wali, “Suao,” wali. “Te Israel tobolu bidi dabe augwali geme dualalu, te dwai kolesaga ebao. Tigidali augwa te be daga habude te dwai piksa noma haniani elalubo madi aselama, augwa te lotu obao. Augwa po waibao, ‘Genuai Bidigo da me sugobeo. Menio. Agai dago tǫ kantri tagalalio, tama agai da homu kone me ebeo.’ Augwaligo tama po olama, tama augwa te dwai kolesaga yai dao,” wali.
EZE 8:13 Te Genuai Bidigo enabolo te tama po ma wali, “Te megi nago subo augwaligo gasa dwai kolesaga mu eyu, te megi nago suali dwai kolesaga aiyaba elalueibao,” te tama po wai dao.
EZE 8:14 Tialima, agai ena selama, te Godigo be bagulali obo sunumi elalubo te not badu pali. Tama te we mebago augwa tibo god agai enabolo ola mawai, aga nogi Tamus, te isali homu elama, te augwa agade homu dene ebo gela walio.
EZE 8:15 Godigo enabolo te tiwai po wali, “Tǫde bidio, nago te suali, agawe? Tialima, megi da, nago suali te gasa dwai kolesaga dabe mu ebogo te nago megi suali dwai kolesaga aiyaba mu elalueibao,” wali.
EZE 8:16 Tialima, agai ena te aga be sunumi dolo pąba sela palio. Te pesagede, te alta me sunumi si tomode, te 25 bidi bidali. Augwaligo te be tudiba ilama, te giliga pedaluboba tonalualio. Te augwa bogoli sugunama, te gesabidi tǫba pǫgulama, te giliga geba lotu wabo sę eyu tama yalio.
EZE 8:17 Tialima, Genuai Bidigo te tiwai po enabolo wali, “Tǫde bidio, nago te sę ebo suali da, agawe? Te Juda we bidi augwaligo te dwai kolesaga dabe mu eyu, te augwaligo te tigidali Israel habu badu gasa we bidi augwaliba boi ebo kolesaga ebao. Tibaso, eno augwaliba haliga sębę yali. Tiali goli, augwaligo te kolesaga olo nai da homu elama, te augwa dwai sę umabo sę elama mu ebao. Augwali eno be pąba aselama, te megi nago subo dwai kolesaga yali. Te bidi dabego ena te olo nai tiwai da homu elama, tama augwa te dwai kugumini yai kolesaga yalio. Tialima, odao. Augwaligo ebo dwai kolesagade eno haliga sębę dwai mu ebo dao.
EZE 8:18 Tibaso, eno augwaliba dwai dene umagia mabo sę eyu, te eno haliga sębę yaliba usu naibao. Te eno augwali bugagia bidimainu me sula tagalogobeo. Te eno olo mu tau sabo wiegi yai kolesaga te augwaliba me egobeo. Te eno augwali tau somainu i bomonama obadi goli, tialima eno te augwaligo gedu haluasa po wabo me odogobeo,” te po wai dao.
EZE 9:1 Godigo ena dali wali po silama da, agai bomonama i weyu, te tama wali, “Te taunde bidaluali we bidi dabe elibo sę yabo bidi dabe, dage asiąo. Te bainat hwą dabe dali sesao,” po wai.
EZE 9:2 Te polo mu tama, te not badu te Godigo be obo bagulali badu te bidi nogo a naga, me deli te tomoba asalio. Tigidaligo te bainat hwą, me te bidi elabo gasa nai dabe sela asali. Te gasa bidi me augwali dali asali. Aga te wiegi yai ugwa bea selama, tama aga dwasianu gamugi dage te kukulude kęą salio. Te asęabo doado bage te gamugi dage tomode elaluali. Te tigidali bidi aselama, augwaligo te brasgo nigali alta sai pąba dolagasalio.
EZE 9:3 Tialima, te Israelgo Godigo genuai ulago te bidi tiwai me si me si nai tagalama, te ula hogodasa pelama, te Godigo be sunumi pąba palio. Tama Genuai Bidigo te wiegi yai ugwa elalubo bidi i olama,
EZE 9:4 tama agabolo te tama i walio, “Nage te Jerusalem taun pedai tigidaliba pelama, te augwa abagi dabego te taun tomode dwai kolesaga ebaso, te dwai haliga eyu, te moni homu ebo we bidi tigidalide nago te augwali gesabidide te dąį muna muna pao,” po walio.
EZE 9:5 Tialima, eno odali, Godigo te bainat hwą tolalubo bidi a naga, me deli bageba te tama po wabo odali, “Dagego aga wali pelama, te tigidali we bidi ela muao. Dagego te me delide te olo tau mabo wiegi yai kolesaga eyu, me sula tagalama me bidimainu elamu dao.
EZE 9:6 Tigidali monu dabe ela muao, te tigidali gesi ogwa bidi me, gesi wegi ogwa we me ela mubadi yao, te ida dabe, te wai puluba me, tigidali mu elao. Tiali goli, dagego te eno augwali gesabidide dąį ilali bidi ma we me deli, te munu me elamuo. Te eno bede bidibo bidi dabe augwali bolo hasia ela muao,” wali. Tama tialima, augwaligo te sę gagalama, hasia augwaligo te Godigo be pąde bidibo tobolu bidi dabe ela muai dao.
EZE 9:7 Tama Godigo te nogo a naga me deli te bidi dabebolo te tama po wali, “Te eno be bagulali obo tomode bidibo bidi tigidali ela muao,” po wali. “Te tama tibaso da, eno be ena gedude meda yai mu pedelaibao. Te sę silama da, teda dage te taunde bilaluama, te tigidali we bidi ela muao. Ae, dagego sę iyąo,” te po wali. Tialima, augwali pelawalio.
EZE 9:8 Tama augwaligo te we bidi elala pali sogo, ena deli naga te Godigo be pąde bidai. Te eno kidu sugunama, te eno gesabidi tǫba pogulama, te eno i te tiwai wali, “God Genuai Bidio, nago te Jerusalem we bidi augwaliba wado po genuai mu ebao, bidigo wę gelebo tiwai ebao. Te tiwai homu ebaso, tama te Israelde bidalubo we bidi tigidali silaiba homu eyu eba, agawe?”
EZE 9:9 Tama Godigo te tiwai po wei ponani, “Te Israel me Juda we bidi dabe augwaligo dwai sę hauwa mu elama, te augwaligo yali sę page genuai mu elalubao. Augwaligo tǫ kantri te eno augwali tagalali da homu elama, te eno augwali homu kone munu ma ebe homu eyu, te augwali eno sube homu yali. Tama tiyu, augwa te dwai kolesaga hauwa mu ebaso, te Jerusalem we bidi ela mubadi, te gasa tǫ kantri pedai bage me tigidali ela muai dao.
EZE 9:10 Tama tibaso, eno augwalide te homu dene elama tau sabo kolesaga eyu, te eno augwali me deli gogola sula me tagalogobeo. Menio. Te augwaligo gasa bidi dabe augwaliba yali dwai kolesaga tiwai te eno augwaliba me yaibao,” te po wai dao.
EZE 9:11 Genuai Bidigo po ola silibo si da, teda eno suali, te wiegi yai nami ugwa elalubo bidi ma aselama, te Genuai Bidiba te tiwai po wali, “Eno te nago enabolo mani sę siminani dao,” te po wai dao.
EZE 10:1 Tama eno te dagalu ugwadu tede te genuai dąį tiwai nai ma suali, tama te bidi tiwali nai me si me si te dąį dologode elalubo eno suali. Tama te ugwadu dąįgo ugwadu daide eno te bidi dugulalubo nai sia king me deli augwaligo te sisi dagalu masigi te gasa sawi yai mugo nigai sualio.
EZE 10:2 Tama Godigo te wiegi yai nami ugwa bea sali bidibolo te tiwai po walali, “Nage te bidi tiwai nai me si me sigo elalubo te wil me si me si tomodu pelama, nago nogo sigo te sia meba selama, nage pelama, te taunba sąsą biligi pao,” wali. Godigo wali po silibaso da, teda eno suali, te bidi te me si me si nai dabe dologo badu palio.
EZE 10:3 Augwali te saut badu te Godigo bede dolaluali. Tama te genuai haowa me deligo te Godigo be bagulali obo pedai badu tigidali mesega selama, elaluai dao.
EZE 10:4 Tialima, Godigo genuai ulago te me si me si bidi tiwai nai taga soyu, te be sunumi pąba dolagasalio. Tama Godigo te genuai ulago te be bagulali obo tigidali una selama, te ula umabo mu elaluai dao.
EZE 10:5 Te bidi tiwai nai dabego bogo dabego pala pala wabo bomo yali, te genuai obo badu bidali we bidi augwaligo te augwali odobo usu yalio. Tama te pala pala wali, te Tigidali Bomo Elalubo Godigo i wabo tiwai yalio.
EZE 10:6 Tama Godigo te wiegi yai nami ugwa bea sali elalubo bidiba te tama po waliyu, te pelama, isi meba sigi pao wali sogo da, teda te bidi pelama, te wil tiwai nai me deli pąba doligi palio.
EZE 10:7 Te me si me si wali bidi tiwai nai dabe me deligo te augwali tomode elalubo isiba nogo munama, agai te isi meba selama, te bidigo nogo siba muanio. Tama te bidigo te isi selama, palio.
EZE 10:8 Eno te me si me si nai dabe suali, te bidi nogo ąbo tiwai te augwa bogo dologode elaluai suai dao.
EZE 10:9 Tama eno suali, te me si me si nai dabe pąde te wil deli delide elalua palio. Tama te me si me si wil dabede te ula umabo te sęwa yai tedali sawi yai masigide tama elalubo suai dao.
EZE 10:10 Tigidali deli deli wil te deli tigi poai elalu, te gasa tomode me elalubo wilgo te gasaba me tononaluali.
EZE 10:11 Tibaso, te tigidali wil te tigidali pedai iba peyu, eda asu yali. Te bidi tiwai me si me si nai te menaba pabo homu yali da, teda augwali te peyu naga yalio, te augwali begeleyu me ebeo.
EZE 10:12 Te bidi tiwai me si me si nai dabego tigi, me tudi, me nogo, me bogo dabe, te tigidali te augwa wil dabego me, te tonobo gedu hauwa elaluali.
EZE 10:13 Augwaligo te wil dabe nogi te tiwai polali eno odali, “Te bebege ebo wil dabe da,” po walio.
EZE 10:14 Te tigidali me si me si nai deli deligo te me si me si gesabidi tobage elaluali. Te polalubo gesabidi te ensel me deli gesabidi tiwai yali, te si wali te bidigo gesabidi tiwai elaluali. Te sela wali te hasa laiongo gesabidi tiwai, te me si me si wali gesabidi te ba kemodagego gesabidi tiwai yai dao.
EZE 10:15 Eno te megi suali me si me si nai dabe augwali, te me si me si nai dabe polobadu eno te wę Kebar pąde suali. Augwali hogodasa pabo sogo,
EZE 10:16 te wil dabe augwa dali palio. Te me si me si nai olo dolalubo si da, te wil dabe me olo dolalueibao. Te me si me si nai ugaba bola holobo sogo da, te wil dabe me augwa dali ugaba paibao, magi baso meni, te me si me si nai dabego te wil dabe tonalubo dao.
EZE 10:18 Tialima, te Godigo genuai ulago te Godigo be sunumi tagalama, te ma geasa pelama, te bidi tiwai me si me si nai daide ugadu bidalio.
EZE 10:19 Eno tonalubadi, te me si me si nai dabe augwa bogo diniginama, te ugaba bola holali. Te me si me si wil augwa dali palio. Augwali te giliga pedalubo badu te Godigo be bagulali obo sunumi pąba dolalugi pali. Te Godigo genuai ula augwali daide ugadu elalualio.
EZE 10:20 Eno koneani, eno te nai dabe suali, tialima augwali te Israelgo God dologode te ąį Kebar pąde bidali. Te megi da, eno koneanio, te nai dabe augwali te Godigo mobo ensel tobage me deli dao.
EZE 10:21 Tigidali deli deli mobo enselgo gesabidi me si me si elalu, bogo me si me si elalualio. Te nai me deli te bidigo nogo ąbo tiwai te augwa bogo dologo deli delide elaluai.
EZE 10:22 Ena te ąį Kebar pąde bidali sogo polobadu eno te mobo bidi ensel dabe suali. Te eno megi ma suali, te augwali polobadu elaluali gesabidi tiwai yalio. Te me si me si mobo bidi ensel dabe te augwali me badu deli painu ebo sogo, augwali peyu naga yaibao. Augwa tigi begeleyu me egobeo.
EZE 11:1 Te tudi badu nosali da, te Godigo Mobo Noma Bidigo ena ugaba sagoa selama, tama ena te sia asobo badu te Godigo be bagulali obo sunumiba odasa pali. Tama eno suali, te 25 bidi te sunumi pąde bidali. Eno augwali sulama, eno koneani, te bidi dabe bidibo tomode te bidi si te Israel augwaligo polalubo bidi bidali bidi si da. Augwali si nogi da te Jasania, te Asurgo ogwa, me te Pelatia, te Benaiago ogwa dao.
EZE 11:2 Tama Godigo te tiwai po enabolo wali, “Tǫde bidio, te bidi dabe augwaligo dwai kolesaga yabo sunumi nigabo homu ebao. Tama augwaligo te we bidi dabeba te geda muai mobo mabo po mabo dao.
EZE 11:3 Augwaligo te tiwai po wabo dao, ‘Da te wiegi yai we bidi da, tialima dago te be dabe sęnama, te dena e taunde bugagia dugulalu, te wiegi yai kibu mi sene tomode elalubo tiwai yalio.’ Augwaligo te tama po wabo dao.
EZE 11:4 Tialima, tǫde bidio, nago te tama po wao, augwali te wiegi yai we bidi dabe meni, tibaso te augwali dolaibao,” wali.
EZE 11:5 Genuai Bidigo Mobo Noma Bidi enaba bomonama pedelali, tama Genuai Bidigo enabolo te po manio, “Dage Israel we bidi dabe, eno te dagego mobo mabo po wabo odali. Me eno dagego te elalubo homude te dagego yabo sę tigidali koneai dao.
EZE 11:6 Dagego te taunde we bidi hauwa ela muani, te augwaligo tigi dabe te sunumi tigidalide pągąna sai dao,” wali.
EZE 11:7 “Tama tibaso, ena God Genuai Bidi, eno dageba te tiwai po obao. Mu tama, te e taun te sene me deli tiwai da, tiali goli dage te wiegi yai kibu mi tiwai elalubeo. Menio. Te wiegi yai mi da, te dagego ela muai we bidi dabe tama dao. Tama dage da, te eno dage te taun bulu badu ela gudulaibao.
EZE 11:8 Eno koneani, dage te boi bidi dabede, me te bainat hwąde dali wi ebao. Tialima, ena God Genuai Bidigo, eno po dolo dageba obao, eno te augwaligo dage elagasomainogo tagala palaibao,” wali.
EZE 11:9 “Te eno dage te taun buluba sela pelama, tama dage te gasa tǫ kantri bidi dabego nogoba menama, te augwaligo dage dolaibao. Te tama kolesagade eno te dwai dene dagebolo mawaibao.
EZE 11:10 Te augwaligo dage te duga tǫ dąįde digi ela mueibao. Te tiwai ebaso, dagego koneama, ena digi ena Genuai Bidi omainu tiaibao.
EZE 11:11 Dage te senede elalubo wiegi yai kibu mi tiwai elalubeo. Menio. Te eno dage ela gudulama, tama dage te duga tǫ dąįde digi ela muaibao,” po wali.
EZE 11:12 “Eno te tama tiwai ebo dagego bugagia konemainu ebao, ena digi ena Genuai Bidi da. Dagego te yali kolesagago te hania hanilai dao, dagego ena me konebeo. Dagego eno bomai po bolama, te eno po dagego wali me pabeo. Dagego te gasa tǫ kantri dabe augwaligo bomai po dologoba pelama, te augwali dologode naga dage bidibao,” wali.
EZE 11:13 Eno Godigo te po pusubo sę ebadi, tama eno te polalubo bidi Pelatia isibo suali. Tialima, eno kidu sugunama, te tǫba gesabidi pǫgulama, tama eno i te tama po wali, “God Genuai Bidio, magi yaliwe? Nago homugo te Israel bidi tigidali silaiba homu eyu eba, agawe?” Eno te po hanalu wali.
EZE 11:14 Genuai Bidigo enabolo te tiwai po wali,
EZE 11:15 “Tǫde bidio, te Jerusalemde bidalubo Israel dabego te nagede me, te nago we wai dabede homu koneama, te bulude kalabus bidibo gasa Israel dabe augwalide te homu eyu, augwaligo te tiwai po wali, ‘Genuai Bidigo augwali ela gudulama, tama augwali te digibulu buluba pelama, bidigi palio. Genuai Bidi augwali dali me bidibeo. Menio. Agai e tǫ dabolo mawai.’ Te Jerusalemde me bidibo bage augwaligo te tiwai po wali,
EZE 11:16 tialima, nago augwaliba te tiwai po walao,” walio, “‘Ena Genuai Bidigo, ena digi eno te dagego abagi dabe te gasa tǫ kantriba besela palali. Mu tama, te pęwadage sogo augwali kalabuside bidali, te enaba dolo augwaligo lotu wabo be meni yai. Tialima, ena digi ena augwali dali bidali, tialima augwaligo enaba lotu udubo usu igi dao,’ nago te po augwalibolo pusao,” wali.
EZE 11:17 “Tǫde bidio, nago eno po te nage dali kalabuside bidibo abagi dabe augwaliba pusao. Ena God Genuai Bidi, eno te dage tedela palama bidibo tǫ pedai kantride bidalubo te eno ma selama, te eno dage te duga tǫ kantriba ma odasa aselama, tama te tǫ kantri pedai dugaba ma mawaibao.
EZE 11:18 Te dage ma asobo sogo, teda dagego te tibo god tigidali sela sąbadi, te tǫde elaluali dwai kugumini yai gasa nai tigidali sela sąyagameo.
EZE 11:19 Tama eno gesi homu kolesaga me gesi homu dageba mawaibao. Polobadu dagego tobolu te masigi dila pai tiwai elaluali. Te elalubo homu kolesaga eno sela sąnama, te eno gesi wiegi yai homu kolesaga dageba mawaibao. Tama eyu, dagego enade te homu si ma egobeo, te duga homugo enaba kęą peyu bidaibao.
EZE 11:20 Tialima, dagego te eno bomai po, me eno po dali te dagego bugagia wali paibao. Tama dage eno we bidi hani dabe dolo mu pedelebaso da, teda ena dagego God bidaibao.
EZE 11:21 Tiali goli, eno te dwai dene mabo sę ebo kolesaga te tibo godiba lotu olama, te dwai kugumini ebo kolesaga wali pabo we bidi augwaliba te tama sę yaibao. Ena God Genuai Bidi, eno te po wai dao,” wali.
EZE 11:22 Te tudi badu nosali, te bidi tiwai me si me si nai dabe te bola pabo gagalali, te wil dabe augwa dali palio. Te Israelgo Godigo genuai ula augwalide ugadu elaluai dao.
EZE 11:23 Tialima, Godigo ulago te Jerusalem taun tagalama, te bulu du elalubo badu te giliga asobo badu te bulu duba pai.
EZE 11:24 Tialima, te nade ebo sę tiwai nai te Godigo Mobo Noma Bidigo ena ugaba sagoa selama, tama ena odasa, te Israel dabe kalabus bidibo pesage te bulu Babilonba ma sela asali. Tama te na silalio.
EZE 11:25 Tama te tigidali sę Genuai Bidigo enabolo ola mani po tigidali te eno augwaliba pusai dao, Esekielgo te po walio.
EZE 12:1 Genuai Bidigo enabolo te tama po wali,
EZE 12:2 “Tǫde bidio, te abagi dabe augwali megi nage dali bidibo bage, augwali te hagoma elama, po sela sąbo bidi dabe da. Augwaligo gedu elalubadi, tiali goli te augwaligo bugagia me tonogobeo. Augwaligo olo elalubadi digi, tiali digi augwa bugagia me odobeo, magi baso meni, augwali te hagoma elama, po sela sąbo bidi dabe bidibaso tebo dao.
EZE 12:3 Tialima, megi da, tǫde bidio, nago doado bage sisi ilama, te bidi aga bidali page bulu tagalama, te digibulu buluba kalabus igibu pabo tiwai yao. Te nage be hulia sisąbadi pabo gagalama pobaso, te tigidali we bidigo nage sueibao. Eno homugo nago te sę ebo page te augwaligo konemainu ebao. Tialima, augwali te hagoma ebo bidi dabe da, tama augwaligo te sę ebo page konegobe, eno te homu ebo dao.
EZE 12:4 Te giliga nanalubadi te nago doado bage dodolao, te tiwai ebaso augwaligo nage sueibao, augwaligo tononalubadi, teda nago te naga be paialide dedage dogolama, tama te dedagedu te naga doado bage selasa buluba teda soao. Te be pio mu ebadi, te nago doado bage te nagede tolasa te bidibo pesage tagalao, te nage digibuluba kalabus painu ebo tiwai yao. Tama nago ebo sę dabe te we bidi augwaligo sumainu yao. Nage pabo sogo da, naga gesabidi mesega selama, te nago sunumi susąbo tiwai yao. Nago te tama tebo sę dabe ebogo, te we bidi augwaligo homu hodolobo sę ebo dao,” wali.
EZE 12:7 Genuai Bidigo po ola simini baso da, teda eno agai enabolo te po wali tiwai sę yali. Te siade eno doado bage dodolali, tama te be pio mu ebo side te eno be paialide te dedage dogali. Eno te nai me deli tolalu te dedage dogobeo. Menio. Eno nogogo naga sę yali. Tialima, ena te dogali dedagedu buluba dįą soalio. Tama te be huliainu ebo sogo, eno ena doado bage selama, te nąba munama, tolasa palio. Tama te we bidi augwaligo eno tama tebo suai dao.
EZE 12:8 Te kigamu Genuai Bidigo enabolo te tiwai po walali,
EZE 12:9 “Tǫde bidio, te hagoma ebo Israel we bidi augwaligo nagebolo nago te yali sę po page nageba me hanaluba, agawe?
EZE 12:10 Tialima, nago te God Genuai Bidigo po augwaliba mao. Eno te kingba dali, te Jerusalemde bidalubo we bidi dabeba pedelabo sę po elalubao.
EZE 12:11 Nago te nage dali bidalubo we bidi dabe augwaliba te tama po walao. Nago te tiali sę page te Jerusalem dabeba pedelabo piksa begelama, ela mabo sę yali. Boi bidi dabe te Jerusalemba pelama, te augwali selama, te augwali gasa tǫ kantriba odasa pelama, te kalabus bidi dabe pedelabo sę tiwai page ola mani dao.
EZE 12:12 Tama te hulide te Juda king bidi aga doado bage dabe selama, wi paibao. Tama te bidi dabego te taun bagulali obo badu te king bidi te taundu buluba dįą soabo obo dedage dogaibao. Te aga gesabidi mesega selama, te aga pabo sunumi naga sulama paibao.” Te po wai dao.
EZE 12:13 “Tiali goli, eno ba bono gaga kekelama, tama king tego tola saibao. Tialima, eno aga te Babilon taunba sela paibao, tiali goli agai e bulu gesabidi me sugobeo. Aga te Babilonde bididubadi aga isibo sogoba usu naibao.
EZE 12:14 Te eno aga dali bidali bidi tigidali ela gudulama, te augwali tedela paibao, te aga ami polalubo ofisa dabe, me aga tonaluali ami bidi dabe me, te aga gasa ami bidi dabe me. Eno te boi bidi dabe tagala palama, te augwali pobeasa pelama, te augwali ela muna muna pelawaibao,” po wai dao.
EZE 12:15 “Tialima, te hwįbogo me, nasigo me, gasigo me, te Juda tigidali me isila siminigobeo. Menio. Te eno dwasianu hani bidimainu sula tagalama, te augwali eno gasa tǫ kantriba tagala palaibao. Augwa te tiwai tama konemainu yaibao, ena digi ena Genuai Bidi da. Tama te Juda dabego augwa te yali dwai kolesaga po te gasa hani dabeba po mimi paibao. Tama me, te eno tama augwaliba te dwai dene mani po te gasa hani augwaliba pusaibao. Te hani augwaligo me odama, te tiwai augwaligo me bugagia koneama, ena digi ena te Genuai Bidi da omainao,” wali.
EZE 12:17 Tialima, nosali Genuai Bidigo enabolo te tama po walali,
EZE 12:18 “Tǫde bidio, nage te nai tuyu, ąį tuyu ebo sogo nage midigi yao, tama nago te nage wi dwai mu ebo tiwai mu yao.
EZE 12:19 Te nago naga abagi dabeba te tiwai po walao, ena God Genuai Bidi, eno te Jerusalemde bidalubo we bidi dabe augwalide pedelabo sę po obao. Te we bidi augwaligo te augwa abagi dabeba sesemane sogo dwai sę ebao. Tama tialima, te dwai sę ebo bidi dabe augwali te nai me wę tubo sę ebadi, te augwali wi dwai mu elama, midigi saibao, magi baso meni, te boi bidi dabego hwįagaselama, te augwaligo doado bage tigidali te tǫ kantride elalubo da selama saibao.
EZE 12:20 Tama augwaligo te taun dabe mu dolama, te tǫ kantri olo pesage tiwai pedelaibao. Te tebo sogo te Israel dabego te tiwai koneama, ena digi ena Genuai Bidi da, augwa te po waibao,” wali.
EZE 12:21 Genuai Bidigo enabolo te tama po wali,
EZE 12:22 “Tǫde bidio, te Israel dabego sesemane sogo wabo po me deli elalubao wali. Te po e tiwai da, ‘Te profet dabego te po weyu, te nai dabe pedelaibao wali. Tialima, te kibu be hauwa palima, te dago subo augwaligo te wali po mu po menio, geda mubao,’ wali. Tialima, eno te Israel dabego wabo po eno godolo me egobeo.
EZE 12:23 Megi nago God Genuai Bidi, eno po augwaliba mao. Te eno augwaligo te wabo po tigidali tagalomainu elama, augwaligo te tama po ma omainu me egobeo. Nago te po hasegeleyu, augwaliba te gesi po me deli mao. Gesi po e tiwai wali, ‘Te profet dabego po weyu, te nai dabe pedelabo po wali. Te megi da, augwaligo po mu pedelaibao,’ wai dao.”
EZE 12:24 “Megi da, te Israelde bidalubo profet dabe augwaligo te nade subo tiwai wabo te tibo po obao, te augwaligo we bidi tibo po ola mabo po pusubao. Tialima, eno te kolesaga ebo mu siminaibao,” te po wai.
EZE 12:25 “Te ena God Genuai Bidi, ena digi eno te Israel dabeba te po menama, tama eno te po wali sę dabe polo tama pedelaibao. Dage hagoma ebo bidigo, odiąo. Te dage bidibo sogo, eno te sę dabe yaibao. Ena God Genuai Bidi, eno te po wai dao,” wali.
EZE 12:26 Te Genuai Bidigo enabolo te tama po ma wali,
EZE 12:27 “Tode bidio, te Israel dabego te tama po wai, ‘Esekielgo te nade subo nai tiwai sulama, tama agai te nai dabe pedelabo po pusali. Tialima, agai te po wali nai dabe, augwali te me pedalubeo. Menio. Augwali te nosali mu pedelai dao.’ Augwaligo te po wai.
EZE 12:28 Tialima, ena God Genuai Bidi, eno te Israel dabe augwaligo po te tiwai wei ponaibao,” wali, “‘Te eno ma tonalubo sę me egobeo. Eno dageba te po wali nai augwali megi naga eno te sę yaibao.’ Ena God Genuai Bidigo, eno te po wai dao,” wali.
EZE 13:1 Genuai Bidigo enabolo te tiwai po wali,
EZE 13:2 “Tǫde bidio, nago te Israelgo profet dabe wado ilao. Te profet augwaligo te nosali nai dabe pedelabo po obao. Tiali goli, augwaligo tibo po obao. Te po augwa homude nigilama wali. Nago augwaliba te po walama, te augwaligo ena Genuai Bidi eno poba naga olo bugagia muao wao.
EZE 13:3 Ena God Genuai Bidi, eno te po obao. Te wabo pabo po wabo tiwai ebo profet dabe te dolaibao. Augwaligo te nade subo nai tiwai me sugobeo. Menio. Augwaligo te pusubo po dabe, te augwa homude digi augwaligo nigilama, pusai dao.
EZE 13:4 Dage Israel dabego odiąo. Dagego te profet dabe te uni yowi dabe te dolali taun me delide bilalu wabo po tiwai po obao wali.
EZE 13:5 Augwaligo te taun bagulali obo alula pai elalubo te bugagia tonalusiąma, tama te obo ma nigibo sę egobeo. Tialima, ena Genuai Bidi, eno dwai dene maiabo sę dageba pedalubo sogo, tama eno te boi bidi dabe tagala palobo sogo da, teda dage Israel te boi hwįbode bomonama me dolalugobeo.” Te po wai.
EZE 13:6 “Te profet dabe augwaligo ną ebo mu menio, te nai dabe pedelaibao po augwaligo obaso da, te tibo naga waibao. Augwaligo te tama po weyu, ‘Dago te Genuai Bidigo po pusubao,’ wali. Tiali goli, eno augwaliba te po me mabeo. Tialima, magi elama augwaligo te homu eyu, te augwaligo po mu pedalugowe homu yaliwe?”
EZE 13:7 “Megi eno te tiwai po dage profet dabeba obao, dagego te po weyu, dagego te nade subo nai tiwai suali po olama, tama dagego te nai dabe pedelaiba po obao. Tialima, dagego te wabo mu po me wabeo. Te tibo po naga obao. Dagego te we bidi augwaliba te tiwai po waliyu, ‘Te e po da, Genuai Bidigo po obao,’ wali, tialima ena God, eno po me deli dageba me mabeo.
EZE 13:8 Tama tibaso, megi ena God Genuai Bidi eno dage profetba te tama po obao, dagego te we bidi augwaliba tibo po ola mobaso, te eno dageba wabo po ebo homu genuai elalubao.
EZE 13:9 Megi da, te we bidi augwaliba tibo po ola mabo profet dabe dageba eno dwai dene mabo sę yaibao. Te eno we bidi dabe augwali deliba sisinibo sogo, dage augwali dali me bidigobeo. Tama dagego nogi te tigidali Israel we bidigo nogi elalubo bukude me elalugobeo. Eno dage ela gudulama, tama dage te Israel tǫ kantri pedaiba ma begasa asogobeo. Te tiwai ebo dagego bugagia koneama, ena digi ena God Genuai Bidi da po waibao,” wali.
EZE 13:10 “Dage eno we bidi dabe tibo po ola mani tibo profet bidi dabe da. Dagego te tama po augwaliba walali, ‘Tigidali nai bugagia elalubao.’ Tiali goli, te tama me telalubeo. Tigidali nai bugagia me elalubeo. Te eno we bidi augwaligo dwai sę eyu, te augwaligo bomo meni yai obo te masigigo nigai tiwai yali. Te nosali dage profet dabe aselayu, dagego augwalibolo te ‘Dagego dwai sę yali,’ te po wasiąwai dao. Tede dagego te tedela yai pen te dwai obode pilama, tama te obo tonobo gasa sawi yai ebaso, te augwaliba dagego tama po walali, te obo boma pai elalubao wali.
EZE 13:11 Tialima, megi eno dage profet dabeba te tama po walobao, te obo da, alua paibao. Eno te genuai tulubage tagala palama, te ais talua ge tulubage te oboba tulama, te bomai waligo te obo degelebaso,
EZE 13:12 tama te obo toga pelama, tulalueibao. Tama tigidali we bidigo dageba te tama po waibao, ‘Te dila pai obo da, agawe? Mu menio. Dagego te tedela yai pen pilaligo naga da tibo po ola mani dao,’ te we bidi dabego te po waibao,” wali.
EZE 13:13 “Tama tibaso, ena God Genuai Bidi, eno te tama po obao. Eno haliga sębę dwai mu elama, eno te genuai tulubage, me te talua ge ais tulubage, me bomai wali tagala palama, te obo dolomainu yaibao.
EZE 13:14 Tama eno te dage profet bagego te obode pilali pen tigidali aluama, dolaibao. Tama te obo dolaluali madi te pesage olo elalueibao. Te obo alubo sogo, te dageba degasa dulama, te dage tigidali ela mueibao. Tama dage tigidaligo te tama tebo sę ebo te bugagia konemainu yali, ena digi ena Genuai Bidi dao,” wali.
EZE 13:15 “Dage Israel we bidi dabeba eno haliga sębę dwai mu ebao, tama eno te obo dolama, tama te obode pen pilali profet dabeba dwai dene mawaibao. Tebogo te eno haliga sębę usu naibao. Tialima, eno te tama po dageba walobao, te obo dolali, tama te pen pilali profet dabe, augwali me dolaibao.
EZE 13:16 Te profet dabego te Jerusalemba te tama po wali, tigidali nai bugagia elalubao, te megi te boi pibo sogo dao, te po walio. Tialima, te sogo te tigidali nai bugagia me elalugobeo. Tibaso, eno augwali dolaibao. Ena God Genuai Bidigo, eno te po wai dao,” wali.
EZE 13:17 Genuai Bidigo te tama po wali, “Tǫde bidio, nago te Israel we dabeba wado ilao, augwaligo te nosali pedelabo nai dabede po obao. Magi baso meni, te po da, augwa homude digi koliasa wabo dao.
EZE 13:18 Ena God Genuai Bidi, eno po te we dabede elalubao. Eno po te tiwai, ‘Dage we dwai dabe, te dage dolaibao. Dagego te yesi bubo sęgo te nogo mo ebo tiwai elama, te we augwali nogoba mubao. Tama dagego te yesi bubo ugwa hobolama, te augwali toboluba mubao. Augwaligo te nai dabe mubo te gasa we bidi augwali tonaluabo bomo somainu ebo dao. Dage we dabego dugade digi naga homu koneama, tama dagego we bidi dolobo dao. Dagego homugo te wiegi yai kolesaga da homu eba, agawe?’ te po wao,” wali.
EZE 13:19 “Dagego tibo po weyu, te we bidi augwaliba waliyu, dago te Godigo po pusubao po wali. Tiali goli, menio. Dagego eno nogi aiyaba elaluyu ebao. Dagego yesi bubo sę ebo kolesagade te we bidi meba ela muyu, te meba tau sobao. Te bidi meba eno homugo augwali isigobe da homu yali, te bidi dabe dagego ela mubao. Te eno homugo meba isimaina homu yali bidi dabe, te dagego augwali tau sobaso, te augwali bugagia bidali. Tama te we bidi augwaligo dagego te tama tebo kolesaga godolo ebao. Augwaligo dage te bret delagego abelebaso, me te dwasianu sasabi rais baligo abelebo si da, tama te kolesaga dagego yai dao,” wali.
EZE 13:20 “Tama tibaso, ena God Genuai Bidi, eno te po obao, dagego te we bidi augwali tonaluabo te yesi bubo mobo nigibo sę ebo dabe te eno homugo hagela elama, godolo me ebeo. Dagego te sę tonaluabo we bidi dabe gegebao, te bulu tomode te bidi dabego ba gegebo tiwai ebao. Te dagego nogode eno te mo dabe todoga sąnama, dagego te yesi bubo kolesaga me egobeo. Tama dagego te tonaluali we bidi dabe, augwali te dage dologode munu me bidigobeo.
EZE 13:21 Tama te yesi bubo ugwa dabe dagego tobolude kęąlubo, te tigidali eno peda sąwaibao. Te dagego bomo eno we bidide elaluali tagalomainu elama da, te dagego augwali tonalubo sę munu ma egobeo. Tama dagego te tiwai sę ebo bugagia koneama, ena digi ena Genuai Bidi da po waiyąo,” wali.
EZE 13:22 “Dagego te tibo po hauwa weyu, te dagego wiegi yai bidi dabego homu kolesaga dolobao. Tama dagego te dwai bidi dabe tau sobaso, te augwaligo dwai kolesaga ebo me tagalobeo. Te augwaligo dwai kolesaga tagalobaso da, teda augwali bugagia bidigi dao.
EZE 13:23 Tama tibaso, dagego te we bidi augwali tibo po ola mabo po te tiwai weyu, dagego te nąde subo tiwai nai suali po me wagobeo. Eno te ena we bidi dabe augwali dagego nogode ma selama, tama augwali te dagego bomo dologode munu ma bidigobeo. Tama dagego te tiwai tama bugagia koneama, ena digi ena Genuai Bidi da po omainu ebao,” te po wai.
EZE 14:1 Te Israel tobolu bidi dabe mebago te homu sęgę me deli elaluali. Tibaso, augwali ena pąba duayagaselama, enabolo hanalu, te Genuai Bidigo mena homu elalubo, te hania koneainu yai dao.
EZE 14:2 Tialima, Genuai Bidigo enabolo te tama po wali,
EZE 14:3 “Tǫde bidio, te bidi dabe augwaligo te tibo god dabeba sesemane homu kone elama, te augwaligo sęgę genuai pedelali. Tialima, augwaligo te tibo god dabe homu godola pelama, te augwali tagalabo homu me ebeo. Tialima, augwali odolali naga asali. Eno augwaligo hanalubo po wei me ponogobeo,” te po wali.
EZE 14:4 “Augwaligo te kolesaga ebaso, megi nago ena God Genuai Bidigo e po te tobolu bidi augwaliba mao. Te Israel bidi me deligo te tibo god dabeba naga homu kone elama, tama agai te sęgę page elalubo kolesaga tagalobo homu isąbadi, te aga profet me deliba aselama, te eno homu kolesaga koneainu enaba hanalu wagasobaso da, teda eno po agade elalubao. Te agai tibo god hauwaba lotu wabo eno homugo te koneama, te eno homu kolesaga mu te agaba ola mawaibao,” po wai dao.
EZE 14:5 “Te Israel dabe augwaligo eno homu kolesaga mu konebo si da, augwaligo te tibo god dabeba homu konebo homu ebo tagalama, te augwaligo ena deliba naga homu konealuaibao. Augwaligo tama timainu eno megi e po obao.”
EZE 14:6 “Tama tialima, eno homugo nago te Israel dabe augwaliba te tama po walao. Ena God, Genuai Bidi, eno dagego te tibo god dabe wali pabo te eno hagela homu mu ebao. Tialima, dagego ge neyu, te dwai nai dabe tagalama, tama dage enaba ma begasa asiąo,” wali.
EZE 14:7 “Te dage Israel bidi me deligo, ma te dage dali bidagasali gasa tǫ kantri bidi me deligo me, agai ena tudiba munama, te tibo god dabeba naga homu kone elama, tama aga sęgę sali sę page tagalabo homu isąbadi, te nosali aga pelama, te profet me deliba eno homu kolesaga koneainu hanalugi pobaso da, teda ena Genuai Bidigo eno homu kolesaga mu ola mawaibao,” po wali.
EZE 14:8 “Te eno agade boi bidi elama, te eno hani we bidide aga ela gudulaibao. Tama dage Israelgo eno te sę agaba ebo sulama, tama dagego te po waibao, ‘Genuai Bidigo te tiwai sę aga tudiba mubo bidi daba yalio.’ Eno te tiwai sę ebo si da, teda dagego te tiwai bugagia koneaibao, ena digi ena Genuai Bidi da po waibao” wali.
EZE 14:9 “Te tobage bidi me deligo te profet homu bega sabo po obaso, te profetgo po me deli agaba pusa mawai baso da, teda te sę page e tiwai, ena digi eno te profet bidigo homu kone tuą palobaso, agai te po pusubao. Tama te profet bidibolo eno dwai dene menama, te eno hani we bidide aga ela gudulaibao,” te tiwai po wali.
EZE 14:10 “Eno te deli tigi poąi dwai dene mabo sę te profetba eyu, te profetba pali bidiba me te tiwai dene mabo dwai sę yaibao,” te po wai dao.
EZE 14:11 “Eno te tama tiwai sę ebogo te dage Israelgo sunumi palibao, te dagego ena tudiba munu me musiąma, te dagego sęgę sabo sę me isąma, tama dage eno gedude meda yai me pedalugobeo. Te dage eno we bidi dolo pedelama, te ena dagego God bidaibao. Ena God Genuai Bidigo eno te po wai dao,” wali.
EZE 14:12 Genuai Bidigo enabolo te tama po wali,
EZE 14:13 “Tǫde bidio, te tǫ kantri me deli we bidi dabego te sęgę selama, te augwaligo haliga enaba mu musiąbaso da, teda eno te tǫ kantriba dwai dene mayu, te eno augwali nai sǫą pabo sę mu ilaibao. Te eno tigidali we bidi dabe, me te hasa sibi te nasi dwai mu ebo sę ilama, te augwali isaibao.
EZE 14:14 Te Noa, me Danel, me Jop, te wiegi yai bidi sela te tǫ kantride bidigi sogo da, te tagalao, eno te sela bidide homu kone elama te dwai sę ebo we bidi augwaliba eno olo tau mabo wiegi yai kolesaga me igi menio. Menio. Te doloba pai bidi sela naga bugagia bidimainu eno sula tagalaibao, tama te we bidi augwali da isimainao homu igi dao. Ena God Genuai Bidigo eno te tama po wai dao.”
EZE 14:15 “Ma, eno te bulu uni hasa dabe te tǫ kantriba tagala palama, te we bidi dabe augwali ela mumainu yaibao. Tama te badu pabo homu yali bidi meni yaibao,” te po wai.
EZE 14:16 “Tama te Noa, me Danel, me Jop te tǫ kantride bidigi sogo da, te tagalao, eno te sela bidide homu kone palama te olo mu tau mabo wiegi yai kolesaga te dwai sę ebo we bidi dabeba me egobeo. Te bidi selago augwa wai dabe digi tau me sigi menigi dao. Menio. Eno te sela bidi naga sula tagalama, bugagia bidaibao, te we bidi augwali da, isimainao. Tama te tǫ da, olo bulu pesage elalu, te genuai dulu bulu elalueibao. Ena God Genuai Bidi, ena te sesemane sogo bidada paibao, tama eno te po da mu po wabo dao,” wali.
EZE 14:17 “Ma, eno boi bidi dabe te tǫ kantriba hwįgi pomainu tagala palama, tama augwaligo te we bidi dabe mu ela siminama, te hasa dali elaiba,” wai dao.
EZE 14:18 “Tama te Noa, me Danel, me Jop te tǫ kantride bidibadi goli, tagalao, te augwali selago augwa wai dabe digi tau me sogobeo. Eno te bidi sela naga bugagia bidimainu sula tagalu, te we bidi augwali da isaibao. Ena God Genuai Bidi, ena da sesemane sogo bidada paibao, tama eno te wabo da mu dao,” te po wai.
EZE 14:19 “Ma, eno te dwai gasi te tǫ kantriba tagala palama, te eno haliga sębę yali usu nainu, te we bidi dabe me, te bulu hasa dabe dali elabo homu ebao.
EZE 14:20 Tialima, tagala, te Noa me Danel me Jop te tǫ kantride bidibadi, te bidi selago augwa wai dabe digi tau me sogobeo. Menio. Te wiegi yai bidi sela naga bugagia bidimainu yaibao. Ena God Genuai Bidi, ena sesemane sogo bidibao, tama eno te wabo po te mu po dao.”
EZE 14:21 “Tialima, ena God Genuai Bidi, eno tama po obao. Eno te tobage dwai nai me si me si tigidali te Jerusalemba tagala palama, te Jerusalemba dwai dene mabo sę elama, te augwali mu dolomainu ilaibao. Te boi bidi dabe eno augwaliba hwįgi pomainu tagala palama, te eno augwali nai sǫą palobo sę mu ilama, tama eno te bulu uni hasa dabego augwali elemainu tagala palaibao, tama eno te dwai gasi augwaliba tagala palaibao. Te tama tebo kolesagade eno te we bidi dabe augwali me, te hasa dabe dali, ela silaibao,” te po wai dao.
EZE 14:22 “Tialima, te sogo te dolisąwani Jerusalem bage meba, te boi bidi dabego augwali te dage bidibo buluba odasa asaibao. Tama augwali dage dali bidibo sogo, te dagego augwaligo dwai kolesaga ebo bugagia osola suao. Te dagego augwalide hobede me egobeo. Menio. Te dagego koneama, te Jerusalem augwaligo kolesaga dwai mu ebaso, te eno augwali dolai yabo, te homu dagego yaibao,” wai dao.
EZE 14:23 “Dagego te tiwai tama koneama, eno odolali augwali me dolobeo. Menio. Te eno augwalide yali sę page mu elalubao. Ena God Genuai Bidi, eno te po wai dao,” wali.
EZE 15:1 Genuai Bidigo enabolo te tama po wali,
EZE 15:2 “Tǫde bidio, te wain bono ni wiegi yai me elalusiąwai, te gasa ni dabe tiwai ebeo.
EZE 15:3 Te bidigo te wain bono ni delage selama, te magi nai me deli nigainu ebaso, usu egobeo. Awe, te wa walabo bonomai nigibo te usu egobeo.
EZE 15:4 Te sia naga nogąbo wiegi yai yaibao. Te isigo te wain ni deli te si dali badu delama, te aga tomo badu dwasianu isi dali da, teda dego mu te nai me deli nigibaso usu yaibawe?
EZE 15:5 Te isigo disąbadi, te ni wain dwai elaluali. Te isigo dabo si da, te ni dwai mu pedelai dao,” wali.
EZE 15:6 “Tialima, ena God Genuai Bidi, eno tama po obao. Te wain ni da, te gasa buside elalubo ni dabe wiegi yai tiwai elalubeo. Tama tialima, eno aga te isi sabo homu naga elama, sa muai. Tama eno e tobage deli tigi poai tiwai kolesaga te Jerusalem taun we bidi augwaliba yai dao.
EZE 15:7 Eno augwaliba boi bidi elama, dwai dene mawaibao. Mu tama, te hasia siago augwali ulusiąwani, tiali goli megi gasa isi dabogo te augwali mu ulaibao. Te eno augwaliba dwai dene mena silama da, tialima nage dali, te Israel nage dali bidibo bage, te dagego te tiwai bugagia koneaibao, ena digi ena Genuai Bidi dao.
EZE 15:8 Te Jerusalem dabe augwaligo enaba haliga mu mubeo, tibaso eno augwaligo tǫ te olo pesage tiwai pedalumainu yaibao. Ena God Genuai Bidi, eno te po wai dao,” wali.
EZE 16:1 Genuai Bidigo enabolo te tama po ma walio,
EZE 16:2 “Tǫde bidio, nago te Jerusalem dabeba po dolo weyu, te augwaligo dwai kolesaga haniani augwa digi ebaso, te po augwaliba bugagia walao.
EZE 16:3 Eno po da e tiwai, Jerusalem, ena God Genuai Bidigo, eno po nagede elalubao. Nage te we me deli tiwai. Nago aya ida te dwai kolesaga wali pabo hani dabedu asali. Nago aya te Amor hani dabe da, tama nago ida te Hit hani dabe da. Tama naga nage te Kenan tǫde ame nai dao.
EZE 16:4 Te idago nage ame nani sogo augwaligo nage mosogobe togobeo. Te augwaligo nage ąį telabe, ma nago tigide tamu mubeo. Te nage augwaligo ugwa namego belama mubeo.
EZE 16:5 Te mena bidi me deligo nagede dwasianu hobede elama, te tama sę dabe nagede me ebeo. Nage pedelali sogo, augwaligo nage godolo isąma, augwaligo nage te kala dasuba sąwai dao.”
EZE 16:6 “Tialima, te ena asu, eno nage suali. Eno suali, te kanemego nage mesegasa elaludu, te nage uga begelu, eda begelu iduali. Eno homugo nage isidali te homu elama, te eno tama po wali, ‘Nage bugagia bidali da,
EZE 16:7 te genuai pedelama, te sawi wiegi yai plaua tiwai yao.’ Tialima, nage genuai pedelama, te boma pai elalu, te nage gasa wiegi yai sawi yai wegi pedelalio. Te nage ame elama, aguli nisi holai. Tiali digi nage habu olo bidai dao,” wali.
EZE 16:8 “Tialima, te sogo ena ma aselama, tama eno nage te bidigo sabo usu yai elalubo suali. Tialima, eno nageba dilapi holobo ugwa saket bulama, te nage tigi mesegelali. Te ena God Genuai Bidi, te eno bomai po nage dali olama, te eno nage sabo po dąų olama, te nage eno we pedelai dao.”
EZE 16:9 “Eno ąį selama, te nage tigide elalubo kaneme ąį telawali. Tama eno nago tigiba te oliv wel muani.
EZE 16:10 Tama eno nage te gasa sawi yai te haniani au dogia pai ugwa augwaligo hobigo au yai ugwago te eno nage au ilalio. Tama eno nage te wiegi yai su te nadoba dabe mawai. Tama eno nage toboluba te wiegi yai ugwa nami muani. Tama eno nagebolo te gasa sawi yai dila pai holobo ugwa saket me deli mawai dao
EZE 16:11 Tama eno te tobage wiegi yai au dobage dabe nagebolo mawai. Eno nagebolo te nogode holabo nogo mo dabe mayu, te magede domabo beli dabe me mawai dao.
EZE 16:12 Tama eno nage te gunide me olode walabo ring mani, tama wiegi yai sawi yai tobolu madi, te kwin wego madi tiwai mawai dao.
EZE 16:13 Tama nago au yabo gol me silva hauwa elaluali. Tama nago te wiegi yai sawi yai ugwa dabe augwaligo te hobigo hobolama nigali ugwago nageba au ilama muani. Tama augwa te wiegi yai plaua mugo nigai bret eno nage mawai. Tama eno nage te pusu ebo bunu ge hani me te oliv ni du mani. Te nai dabe nago tuali. Tama nage te gasa sawi wiegi yai mu pedelama, nage te nogi yai we kwin pedelai dao.
EZE 16:14 Tama te tigidali bulu tǫ pedai we bidi augwaligo te tama po odali, nage te gasa sawi yai we deli mu pedelali. Nage polalubo we mu da, magi baso meni, ena God Genuai Bidigo, eno nage au ilai dao.”
EZE 16:15 “Tialima, nage sawi yai mu da, nago te tama homu yali. Tigidali bidigo nage godolo yai. Tialima, nage hagoma eyu, nago pemene elama, te nageba asali tigidali bidi dali pagela piali dao.
EZE 16:16 Te nago naga ugwa dabe meba selama, tama nago te tibo godiba lotu wabo pesage dabe au ilalio. Te kolesagade nago te bidi dabego homu bega selama, tama augwali nage dali te pesage dabeba piagasali. Te tobage kolesaga dwai mu yai dao.
EZE 16:17 Eno naga au yao olama mani te silva me gol nago te selama, tama nago te bidi piksa noma dabe nigilama, tama nago augwali dali penani sę ebo kolesaga ebao wali.
EZE 16:18 Tama te au hauwa dogia pai elalubo ugwa name nago te selama, tama nago te piksa noma dabe au ilali. Tama nago te oliv wel me, te wiegi yai denami ebo hano ilibo pauda me sali, te nage eno mani, tama nago te piksa noma dabeba ofa yai dao.
EZE 16:19 Eno te wiegi yai nai nage mani, te wiegi yai plaua mu tiwai, te oliv wel me, te pusu nai bunu ge hani me mani. Tialima, nago te nai dabe da selama, tama te tibo god dabe piksa nomaba ofa ilali, te augwali homu bega sabo sę yali. Tama Jerusalem nago te kolesaga ela pidu, me ela pai dao.”
EZE 16:20 “Nago te wai dabe ame nani, tiali goli nosali nago te ena God Genuai Bidi eno te wai dabe selama, te nago augwali ela munama, te tibo god dabeba ofa yalio. Nago koneao, nago penani ebo kolesaga te wiegi yai me ebeo. Tialima, te kolesaga usu meni da, nago te homu elama,
EZE 16:21 tama nage te we dwai mu pedelabo homu yali. Tialima, nago eno wai dabe ela munama, tama augwali te tibo god dabeba ofa tiwai yali dao.
EZE 16:22 Nago te penani sę ebo kolesaga me, te dwai kugumini yai kolesaga wali peyu ebao, tama nage te dwasianu wai bǫųde elalubadi, te nageba pedelali sęgę po, te eno nageba mani po nago homu kone palisąwani. Te sogo nage te habu olo mu elalu, te kanemego nage mesega sai elaludu, te nage tǫde bulude uga bebege, eda bebege iduai dao.” Genuai Bidigo te po wai.
EZE 16:23 Genuai Bidigo po te tama ma wali, “Ena God Genuai Bidigo, eno te tiwai po nageba walobao, nage mu dolaibao. Nago te dwai sę tigidali yaligo da,
EZE 16:24 teda nosali nage te tigidali sunumidu pelama, te tibo god dabeba lotu wabo pesage dabe me te penani ebo kolesaga yabo pesage dabe nigaibao po wai dao.
EZE 16:25 Nago homugo nage sawi yai we da homu elama, tama te bidi me deli te sunumidu asobo nago subaso da, teda nago aga i olama, nage dali piagasali. Tama nago penani ebo kolesaga umabogia mu pedaludu geai dao.
EZE 16:26 Isip dabe, te augwali pąde bidali bidi dabe, augwali te haliga hogodalubo bidi dabe mu da, tama nago augwali nage dali pagela piagasomainu yalio. Nago ena hagela sębę ilibo sę eyu, te nago penani sę yali kolesaga te umabogia mu ela palio.”
EZE 16:27 “Tialima, polobadu eno dwai dene nageba menama, te eno nageba mani wiegi yai nai hauwa sela sąwani. Tama te Filistia dabego nageba dwai sę yagasomainu eno nage sula tagalai. Augwaligo nage homu godolo mu isąma, tama nago dwai kolesaga tigidali ebaso, te augwaligo nagede haliga dwai yalio,” wali.
EZE 16:28 “Te bidi dabe nage dali piagasali, te augwaligo nago godolo ebo homuba usu nusiąbaso, tama nago penani sę ebo kolesaga te Asiria bidi dabe dali yali. Tialima, augwaligo me nago godolo ebo homuba me usu nubeo homu yali.
EZE 16:29 Tibaso, nage te Babilon bidi dabego penani we pedelali, te augwali mone sabo bisnis sę ebo bidi dabe da. Tiali digi, augwaligo me te nago wei ebo homuba me usu nubeo.”
EZE 16:30 “Tialima, ena God Genuai Bidigo, eno po nagede elaluali. Nago naga te homu godolo ebo wali pidu, tama nage te hale menisąbo we me deli tiwai pedelai dao.
EZE 16:31 Te tigidali sunumide nago te tibo god dabeba lotu wabo pesage nigiyu, te penani ebo kolesaga ebao. Tialima, nage da, te gasa penani we dabego ebo kolesaga tiwai ebeo. Menio. Nago te kolesaga ebadi, tiali goli nago augwaligo te sabo mone tiwai me sabo homu ebeo.
EZE 16:32 Nage da, te tiwai we me deligo aga bidi tagalama, te gasa bidi dabeba penani igi pabo we tiwai ebo dao.
EZE 16:33 Tigidali penani ebo wego mone saibao. Tialima, nago me tebeo. Nago te tigidali badu bidiba te wiegi yai homu ilibo nai tiwai mayu, te nage dali piagasomainu homu bega sabo sę ebo dao.
EZE 16:34 Nage gasagi yai tedali penani we mu da. Te bidi me deligo nage homu bega sabo sę ebaso, nage te penani we pedalubeo. Tama nago te mone me siyu ebeo. Menio. Nago mone augwaliba mobao. Awe, nage tedali gasagi yai mu dao,” te po wai.
EZE 16:35 Genuai Bidigo po ma weyu, te tama po wali, “Jerusalem, nage penani we da, ena God Genuai Bidigo po odao. Nago naga ugwa dabe pepeda sąnama, tama naga digi naga tigi te godolo ebo tigidali bidiba mobao. Tama nago te kugumini ebo kolesaga wali peyu, te tibo god dabeba lotu obao. Te nago naga wai dabe ela munama, te tibo god dabeba ofa tiwai mabo dao.
EZE 16:37 Tialima, eno te nago godolo yali abagi augwali me, nago godolo isąwani me tagalao, te tigidali eno deliba sisinaibao. Te eno augwali odasa aselama, te augwaligo nage bagua sagasaibao. Tialima, eno nago ugwa peda sąnama, te nage habu olo elalubo augwaligo sueibao.
EZE 16:38 Nago te penani kolesaga ebo we tiwai bidiyu, tama nago te we bidi meba ela muani. Tama tibaso, eno nago yali dwai sę dagalama, tama tede sębę posolo mu eyu, nage dolo mu wei ponoyu, dwai dene mawaibao.
EZE 16:39 Naga te abagi dabego nageba dwai sę ilibo eno sula tagalaibao. Tama augwaligo nago te tibo godiba lotu weyu, te aga dali penani kolesaga ebo pesage dabe aluaibao. Te augwaligo nago ugwa dabe, me beli, me ring te au dobage pepeda sąnama, te nage habu olo elaluaibao.”
EZE 16:40 “Te abagi dabego te we bidi dabe homu hodolobaso, te augwaligo nageba masigi sąyagaselama, tama augwaligo te bainat hwą selama, te nago tigi dwasianu denegene mimiaibao.
EZE 16:41 Tama te abagi dabego nago be dabe isi ulaibao. Tama te we hauwago nageba te ebo sę augwaligo sueibao. Nago te dwai kolesaga ebo eno mu silimai hagede ebaso, tama nago te bidi dabe nage dali piagasomainu homu bega sabo sę me egobeo.
EZE 16:42 Tialima, te tama tebo kolesagade te eno wado genuai ebo po me eno haliga sębę ebo silaibao. Te ena dua digi bidaibao. Te eno nageba wado po me haliga dwai munu ma egobeo, te po wai dao.
EZE 16:43 Te nage gesi wegi elalubo sogo eno wiegi yai sę nagebolo yali. Tialima, te nago homu kone gegeda palama, nago te tobage dwai kolesaga dabe ebao. Tibaso, eno wado po nagebolo wali, te ena God Genuai Bidi, te eno nago dwai sę tigidali wei ponoyu, te nageba dwai dene mu ilaibao. Nago dwai kolesaga hauwa yalio. Magi baso nago te penani yabo homu kolesaga me elalubo dawe?” te po wai.
EZE 16:44 Genuai Bidigo po te tiwai ma wali, “Jerusalem, nosali te we bidi dabe augwaligo nage sulama, te tama po waibao, ‘Wegigo te aga idago kolesaga wali pabo dao,’ waibao.
EZE 16:45 Mu tamao, nago kolesaga te naga idago, me naga ama dabego kolesaga tiwai tobage ebao. Augwaligo augwa bidi dabe me, augwa wai puluba dabe dali homu godolo me isąwai. Nago ida te Hit hani we me deli da, nago aya te Amor hani bidi dao,” wali.
EZE 16:46 “Te Samaria taun te not badu elaluali, te nago ama genuai we me deli tiwai da. Te aga pagede elaluali bulu dabe augwali te aga wegi dabe tiwai yali. Tama te taun Sodom polobadu te saut badu elaluali, te nago abe gesi ogwa bidi tiwai da. Tama te aga pąde elaluali bulu dabe te aga wegi dabe tiwai dao.
EZE 16:47 Polobadu te wegi ama nami sigo dwai kolesaga mu yali, tama nago augwali sigo te kolesaga wali pali. Tiali goli, tego nago godolo ebo homuba usu nubeo. Menio. Te sesabi menisąbadi, te pąde sogo te nago kolesaga te dwai mu umagi elama, tama te wegi ama nami sigo yali dwai kolesaga aiyaba elaluai dao.”
EZE 16:48 “Ena God Genuai Bidi, ena sesemane sogo bidaibao, eno te tama tiwai po dolo dageba obao. Nago ama Sodom, te aga wai dabe dali, augwaligo te nago naga wai dabego dali ebo kolesaga tiwai me ebeo.
EZE 16:49 Aga te aga wai dabe dali augwaligo te nai hauwa elalubaso, te augwa bugagia dugulalu te me hwįbeo, tibaso augwali te hagoma elama, te augwaligo nai sǫą pali bidi dabe bugagia tonalubeo.
EZE 16:50 Augwali te hagoma elama, te augwaligo tobolu te masigi dila pai tiwai elalu, tama augwaligo te eno godolo menisąbo sę yali. Eno augwaligo te kolesaga ebo sulama, te eno augwali dolai dao,” wali.
EZE 16:51 “Samariago me te nago ebo kolesaga tiwai te dwai sę hauwa me ebeo. Te nago dwai kugumini yai kolesaga mu ebogo te nago ama dabego ebo dwai kolesaga te aiyaba elalubao. Eno te dage selago dwai kolesaga ebo subao, te tonobo nago kolesaga naga te dwai mu ebaso, tama naga ama dabego dwai kolesaga da, te olo bage tiwai ebao.
EZE 16:52 Nage hale umagi mu yao, magi baso meni, te eno nago kolesaga dali, te naga ama sigo kolesaga me dagalobo sogo, eno suali, nago kolesaga te dwai mu eyu, te nago ama dabe augwali te sęgę meni yai we dabe tiwai pedelali. Tialima, megi da, naga te hale ebo kolesaga yali sęgęde te sęgę tolobaso, te nage dwai haliga yagameo,” wali.
EZE 16:53 Genuai Bidigo po ma weyu, te tiwai po wali, “Jerusalem, megi da, Sodom me Samaria te augwa si wai dabe dali dolali elaluai. Tialima, eno naga te ama si tau selama, te augwali si bugagia bidaibao. Te nage eno dolaibao, tiali goli nosali nage me eno tau selama, te augwali dali bugagia bidaibao.
EZE 16:54 Tama naga te yali dwai kolesaga dabede nage hale ebo sę yaibao. Te ama sigo nage sulama, tama augwali sigo te homu elama, augwaligo sęgę te genuai ebe homu yaibao, te po waibao.
EZE 16:55 Te eno augwali talu si tau selama, te augwa polobadu bidali tiwai bugagia ma bidaibao, te nage naga wai dabe dali, dage bugagia bidaibao.
EZE 16:56 Te nage eno dolisąwani sogo, nago hagoma elama, nage te wiegi yai we da homu yai, tama nago Sodom te we dwai mu da homu yai dao.
EZE 16:57 Tialima, megi da, nago dwai kolesaga te hanilama, hania pedelai. Tama te gasa hani we bidi augwaligo nage gisugu mani, te nago Sodom gisugu mani tiwai yali. Te Siria me Filistia we dabego, me te nage pąde bidali gasa hani dabego, augwaligo te nage magi nai meni yai we da augwa te homu eyu, te augwaligo posobo po nage dolo wai dao.
EZE 16:58 Te tama kolesagade ena Genuai Bidigo te eno naga te penani ebo kolesaga, me te tobage gasa dwai kolesaga ebo sęgę te naga tolomainu yai dao,” po wali.
EZE 16:59 Genuai Bidigo po ma weyu, te tama po wali, “Jerusalem, ena God Genuai Bidi, eno nageba maiabo gasa po me elalubao. Te nage gesi ogwa bidi bidali sogo, te eno nage dali dąų wali bomai po wali paibao po wai. Tiali, nago te dąų wali po olo nai da homu elama, te nago bolalio. Tialima, eno nago te yali dwai kolesaga wei dolo ponani.
EZE 16:60 Tialima, eno digi nago te bolali bomai po dąų wali te eno homu kone me gegeda palogobeo. Tialima, eno gesi bomai po nage dali dąų walama, tama te dąų wali gesi bomai po te sesemane elalua paibao,” wali.
EZE 16:61 “Tama eno te we ama nani si te nageba ma asobo sę ilaibao, tama eno augwali si te naga wegi si dolo tiwai pedelaibao. Mu tamao, eno te yainogo ebo kolesaga te dąų wali bomai pode elalubeo, tiali te ena digi homugo yaibao. Eno te tama tebo sogo, te nago naga yali dwai kolesaga haniani te homu kone paligisu, te nage hale umagi mu yai dao,” po wai.
EZE 16:62 “Eno te gesi bomai po nage dali dąų walobaso, te nago te tiwai bugagia koneaibao, ena digi ena Genuai Bidi da po waibao.
EZE 16:63 Tama eno nago te yali dwai kolesaga dabe sela sąnama, tama tede homu kone ma palogobeo. Tiali digi, te nago te nago yali dwai kolesagade ma kone paliyu, hale dwai mu ebaso, te nago po me deli wagobeo. Ena God Genuai Bidi, eno te po wai dao.”
EZE 17:1 Genuai Bidigo enabolo te tama po wali,
EZE 17:2 “Tǫde bidio, eno homugo te po me deli begelama, te nago te Israel dabeba po digi po pusumainu homu ebao,” wali.
EZE 17:3 “Ena God Genuai Bidigo po te augwaliba mao. Te moni dobo dwai ba kemodage me deli bidali, aga boma pai bogo da, te bobobage mu elama, te aga nisi da, te dodobolo pai hauwa elalu, te sawi yai mu da. Aga te Lebanon bulu du dabeba bola pelama, tama agai te dwagi yai ni sida tobolu bubu me deli toga sigi palio.
EZE 17:4 Tialima, agai te ni tobolu te mone sabo bisnis sę ebo bidi dabego bulu tǫ kantriba tolasa pelama, tama agai te magi nai dobu si ebo bidi dabego taun me deliba buligi pai dao.
EZE 17:5 Tama aga te tǫ kantri Israelba bola pelama, te hogodo nai me deli sigi palio. Tama agai te nai wai te tǫ ili hauwa elalubo digi bulali. Tama te badu te ni genuai holabo ąį mabo wę hauwa elaluai.
EZE 17:6 Tialima, te nai genuai bono pedelama, te aga nologo tigidali te bobobage mu pedelali. Te ni nologo tigidali te ba kemodage bidibo pesageba gealu tononaluai. Te aga pedali dabe te tǫ tomoba mu dulalio. Tama te bono nologo me yabe hauwa elaluai dao,” wali.
EZE 17:7 “Tiali goli, te gasa moni dobo dwai ba kemodage me bidali. Agai me te boma pai bogo bobobage elalu, te nisi hauwa elaluali. Megi da, te bonogo aga te bidali tǫ hagela mu ebaso, te aga pedali dabe me nologo dabe te gasa ba kemodage bidibo badu begeligi soabo sę ilali. Te bonogo te gasa ba kemodagego aga ąį hauwa mawaiba homu yalio.
EZE 17:8 Tialima, te bono hasia elaluali tǫ da, te wiegi yai mu da. Te ąį me ili hauwa elalubo tǫde da, te bono wiegi yai holama, te nologo hauwa pedelama, te ni du hauwa walama, te polalubo ni mu pedalumainu eyu, te hasia ba kemodagego aga tede bulai dao.”
EZE 17:9 “Tialima, ena God Genuai Bidi, eno hanalubo po me deli te tiwai elalubao, te bono bugagia elalu, te genuai pedalubo da, agawe? Menio. Te hasia ba kemodagego wado ebo homu elama, te bono pedali dali gudulama, agai te du dabe sela sąnama, te gesi pedalubo honu dabe te siago boga sabo sę ilaibao. Bomo meni yai bidigo, ma dwasianu hanigo naga, augwaligo gudubaso, usu yaibao. Tama tialima, te bomai ba kemodagego te gudubo sę dene me egobeo,” wai.
EZE 17:10 “Te bono wiegi yai tǫde elaluali, tiali goli aga bugagia elalu, te genuai holabo usu ebeo. Te posola pai wali te sia ge asobo badu asama, te bono aiyaba elalubaso, tama te bono aga elaluali pesagede sasia paibao,” te po walio.
EZE 17:11 Te Genuai Bidigo po enabolo te tiwai ma wali,
EZE 17:12 “Te po sela sąnama, hagoma ebo bidi dabeba hanalu wao, augwaligo te po page koneaniwe, ma meniwe? Te po page e tiwai da. Babilon king te Jerusalemba aselama, tama agai te Juda king dali, te ami ofisa bidi dabe dali selama, te Babilonba kalabus sela pai dao. Aga da te hasia asali ba kemodage tiwai dao.
EZE 17:13 Aga te tǫ kantri Judade bidali sogo, te Babilon kingo te dąų walobo po me deli te Juda king aga hani bage me deli dali te po dąų wali. Agai tama po wali, te bidi Juda gesi king bidi pedalumainao wai. Te Juda king da, te bono tiwai dao. Agai te gesi kingba bomai po dąų waliyu, aga te aga dologode bidaibao wali. Te Babilon king aga tǫ kantriba ma pali sogo, agai te Juda dabe genuai polalubo bidi dabe aga dali sela pai dao.
EZE 17:14 Te Babilon king bidigo tama po wali, te gesi kingo te dąų wali bomai po wali pisąma, te aga tǫ kantri bomai ma pedalubo sę elama, te Babilon dali ma boi hwįainu ebaso da, teda Babilon kingo te genuai bidi dabe dolaibao.
EZE 17:15 Tialima, te Juda kingo agai dąų walali bomai po wali pabeo. Agai te Isipba po ola tolama, te hos dabe me te genuai ami bidi hani dabe aselama, aga tau sagasao wali. Te Isip king bidi da, te si wabo ba kemodage tiwai dao. Tialima, te king aga bugagia bidaiba homu elama yali da, agawe? Menio. Agai te Babilon kingo po sela sąbaso, tialima te Babilon king aselama, te agabolo dwai dene mawaibao,” wali.
EZE 17:16 “Ena God Genuai Bidi, ena sesemane sogo bidibo da, eno po dolo tama obao, te Juda king da, Babilon tǫ kantriba kalabus igi pelama, tede bidibadi, aga isaibao,” wali. “Te page te tiwai elalubao. Te Babilon kingo aga te king pedelao obaso pedelali, tialima agai te dąų wali bomai pode hagela homu eyu, te po sela sąyu, te agai te Babilon king dąų wali bomai po bolai dao.
EZE 17:17 Tialima, te Babilon ami bidi dabe asama, te hwįbo nai hauwa nigilama, te Jerusalem bagua sabo tǫ du holaibao. Tama augwaligo te Jerusalem dabe dali boi hwįnama, te we bidi hauwa ela mueibao. Te sogo, te Isip kingo bomai ami bidi dabe, augwaligo te Juda king tau sabo usu meni yaibao.
EZE 17:18 Te Juda kingo te eno nogi weyu, te Babilon kingba nogo mayu elama, tama agai po dąų walali. Tama agai te Babilon king dali dąų walali po, te bomai po bolaligo te aga dene saibao. Tialima, aga bugagia bidabo usu meni yaibao,” te po wali.
EZE 17:19 “Ena God Genuai Bidi, ena sesemane sogo bidibao, eno mu po tama obao, eno te Juda kingba dwai dene mawaibao. Agai te po dąų wali sogo agai eno nogide bomai po dąų weyu, te dąų wali po wali paibao wali, tiali goli agai wali pabeo.
EZE 17:20 Tama tialima, eno aga tola sabo ba bono gaga mueibao. Tola selama, te aga eno Babilonba sela pelama, te agabolo dwai dene mawaibao, magi baso meni, agai ena dali dąų walali bomai po wali pabeo.
EZE 17:21 Te boi bidi dabego te aga hani ami bidi dabe augwa geme duala sigi pabo pesage dolaibao. Te isisąwani ami bidi dabe, augwali te gasa pedai tigidaliba wi tedela paibao. Tama dage Israelgo te tama sę ebo bugagia koneama, ena Genuai Bidigo digi, eno wali me po da te homu yaibao,” te po wali.
EZE 17:22 God Genuai Bidigo te tama po wali, “Ena digi te bobobage ni sida honu me deli toga saibao. Tama eno te Israel bulu du uganu igulai bulu dude bulaibao, te Israelde elalubo gasa bulu du tigidali aiyaba elaluai bulu du da. Tama te ni genuai holaibao. Te agai nologo bobobage elama, tede te wai du walaibao. Te aga polalubo ni sida mu pedelaibao. Te haniani ba dabe te ni tiwąį madi aga nologoba geme duala sagasaibao. Tama augwa be dabe te ni nologo dabede sę yaibao.
EZE 17:24 Tama te tǫde elalubo ni dabe tigidaligo te tiwai bugagia konemainu yaibao, ena Genuai Bidi, eno te bobobage ni gela mubo dao, me eno te dwasianu ni dabe bobobage pedalumainu ilibo dao. Eno te yabe elalubo ni dabe sasia palobo sę ilibo dao. Me te sasia pali ni dabe da, te augwali yabe ma holobo sę ilibo dao. Ena Genuai Bidi, eno te po walio, tama eno te wali po gilama te tigidali sę ela silaibao,” wali.
EZE 18:1 Genuai Bidigo enabolo te po pusao po walali,
EZE 18:2 “Dage Israelgo godolo ebo po begelama wabo po me deli e tiwai da, ‘Te aya idago te tau isąwai ni wain du tubo da. Tiali goli, te augwaligo wai dabego pedauwalide ha ebo da.’ Magi baso dagego te tobage po wabo dawe?
EZE 18:3 Ena God Genuai Bidi, ena sesemane sogo bidaibao, eno mu po dagebolo obao, eno dagego te wabo po mu tagalabo sę ilaibao,” wali.
EZE 18:4 “Te aya idago bidibo ula tigidali, me te wai dabego bidibo ula eno nogode naga elalubao. Tama tibaso, te bidi deligo te sęgę sabo dwai sę ebaso, te bidi naga isaibao,” te po wai.
EZE 18:5 “Te wiegi yai bidi me deli elalu, te aga kolesaga doloba pai mu elalubaso da, teda te bidi bugagia mu bidaibao.
EZE 18:6 Te tobage bidigo te Israel dabego tibo god dabeba lotu me wasiąma, tama agai augwaligo te tibo godiba ofa tiwai elama mabo nai dabe me tugobeo. Tama agai te gasa bidigo we penani me isiąma, tama agai te we poluago elali gasi ebo sogo te we dali me pigobeo.
EZE 18:7 Agai gasa bidi dabeba dwai sę ilama, te augwaligo nai dabe wi sabeo. Te gasa bidi dabego agaba negeli ilama, te agai we ponabo usu nama augwaligo mani nai, agai te nai dabe tolalubo sę mu egobeo. Menio. Agai te agaba negeli ilali bidi dabeba ma mabo dao. Agai te nasi ebo bidi dabe nai mayu, te ugwa meni yani bidi dabeba te ugwa mabo dao.
EZE 18:8 Te abagi me delibolo agai negeli ilibo sogo, te negeli wei ponobaso da, teda agai te gasa ugadu daganobo mone dali me sogobeo. Te agai po tų odobo sogo, agai doloba pai kolesaga naga eyu, tama agai te po tųba asali bidi dabe dali po bugagia dodolobo dao.
EZE 18:9 Tama agai te eno po tigidali bugagia wali pelama, te eno bomai po me wali peyu, te doloba pai kolesaga naga yaibao. Te tobage bidi te doloba pai bidi da, tialima mu tama, aga bugagia bidaibao. Ena God Genuai Bidi, eno tama po obao,” walio.
EZE 18:10 “Tama te tiwai bidigo ogwa me deli elalu, te ogwa genuai pedelama, te agai nai wi dabe siyu, te bidi dabe ela muyu, ma tobage dwai kolesaga me deli te aga ayago isąwani sę me ebaso da, teda aga isimainao. Te ogwago te augwaligo tibo god dabeba ofa yali nai dabe tubo dao, te agai gasa bidi dabego we dabe penani ebo dao.
EZE 18:12 Agai te magi nai doado bage meni yai bidi dabeba dwai dwai sę eyu, te agai nai wi siyu, tama te gasa bidi dabego agabolo mani nai dabe dąų olama tolalu, te augwaligo mani negeli ponabo dąįba usu nubo tiwai yali. Tama agai te tibo god dabeba lotu weyu, tama te lotu wabo pesagede te tobage dwai kolesaga dabe mu eyu ebo dao.
EZE 18:13 Tama aga abagi dabego te negeli wei ponobo sogo, agai te gasa ugadu daganobo mone dali sabo dao. Te tobage bidi da, te bugagia bidaibao homu eba, agawe? Mu menio. Agai te yali kolesaga dabe eno godolo homu mu isąbaso, te aga isimainao,” wali. “Te aga yali kolesaga pagede te aga isaibao po wai dao,” wali.
EZE 18:14 “Tama te tomo bidigo te ogwa me deli ame nani, te wai genuai pedelama, te aga ayago yali dwai kolesaga tigidali suali goli, aga ogwago te kolesaga wali pisąbaso da, teda aga bugagia bidaibao.
EZE 18:15 Te tobage bidigo te Israel dabego tibo god dabeba lotu wagobeo, tama agai augwaligo te tibo god dabeba ofa yali nai dabe me tugobeo. Agai te gasa bidi dabego we dali penani me isąma,
EZE 18:16 te gasa bidi dabe dolobo sę isąyu, te gasa bidi dabego nai dabe wi siyu me ebo meni. Agai te bidi dabego wei ponabo usu nama nai deli me sabeo. Agai te nasi ebo bidi dabe nai mayu, te ugwa dabe meni yani bidi dabe te ugwa dabe mayu ebo dao,” wali.
EZE 18:17 “Agai te magi nai meni yai bidi dabe dolobo sę me isąyu, tama agai te abagi dabede te wei ponobo mone gasa dali ugadu daganama me sabo menio. Agai eno tigidali bomai po, me eno gasa po dali wali pobaso, te tobage bidi te bugagia bidaibao. Mu tama, aga ayago te dwai sę hauwa yali, tiali goli wai da, te ayago yali dwai sęgęde me isigobeo.
EZE 18:18 Aga ayago te gasa we bidi dabeba dwai sę eyu, te anoma bomonama eyu, te augwaligo nai siyu, te tobage dwai kolesaga dabe yali. Tialima, aya aga yali sę dagede te aga isimainao,” wali.
EZE 18:19 “Tiali goli, dage Israelgo enabolo te tama po hanalu wali, ‘Magi baso ogwago te aga ayago sęgę tolabo usu egobe da po obawe?’ Tialima, eno dagego po te tiwai wei ponobao. Te ogwago doloba pai kolesaga eyu, te eno bomai po tigidali wali pobaso da, teda aga bugagia bidaibao.
EZE 18:20 Te sęgę sali bidi, te aga naga isaibao. Te ayago sęgę sai baso da, teda te ogwago mena dwai sę me isąwani, tama agai te ayago yali sęgę tolabo usu munu me egobeo. Te ogwago dwai sę ebaso da, teda ayago te magi dwai sę me isąbaso, te ogwago sęgę agai me tologobeo. Doloba pai bidigo te aga yali doloba pai kolesagade te wiegi yai mone sabo tiwai eyu, te dwai sę ebo bidigo te aga yali dwai kolesagade sęgę tolobo dao,” wali.
EZE 18:21 “Tiali goli, te dwai bidi me deligo aga dwai sę yali tagalama, te agai eno bomai po wali peyu, te doloba pai kolesaga naga ebaso da, teda mu tama, aga tede me isigobeo. Menio. Aga bugagia bidaibao.
EZE 18:22 Te agai polobadu yali dwai sę eno homu kone ma palogobeo. Megi da, agai doloba pai kolesaga ebaso, te aga bugagia bidaibao.
EZE 18:23 Ena God Genuai Bidi, eno dageba hanalu wabo homu yali, te dwai bidi me deli isibo sogo eno homu pemene eba homu dagego eba, agawe? Mu menio. Te bidi me deligo aga dwai sę ebo tagalama, bugagia bidibaso, tede eno wiegi yai pemene yaibao,” wali.
EZE 18:24 “Tiali goli, te doloba pai bidi me deligo te doloba pai kolesaga tagalama, te tobage eno godolo menisąbo dwai dwai kolesaga eyu, te dwai bidi dabego ebo kolesaga tiwai ebaso da, teda aga bugagia bidaiba homu ebo da, agawe? Mu menio. Te eno agai wiegi yai kolesaga yalide homu kone munu ma palogobeo. Agai te enaba homugo kęą pai kolesaga togolama, tama ena tudiba munama, te dwai sę yali, tibaso te aga isimainao,” wai dao.
EZE 18:25 “Tiali goli, dagego te tama po obao, ‘Genuai Bidigo ebo te kolesaga, te dolo menio,’ wali. Tialima, dage Israelgo, eno po wabo bugagia odao. Dagego homude eno kolesaga te dolo meni da homu eba, agawe? Menio. Te dagego ebo kolesaga da, te dolo me ebe dao.
EZE 18:26 Te doloba pai bidigo te doloba pai kolesaga yali tagalama, te dwai kolesaga ebaso da, teda aga te yali dwai kolesaga pagede te aga isabo elalubao.
EZE 18:27 Ma, te dwai sę yali bidi aga te yali dwai kolesaga tagalu, te doloba pai kolesaga ebaso da, teda aga me isigobeo. Menio. Te aga bugagia bidaibao.
EZE 18:28 Agai koneanio, te agai kolesaga wiegi yai isąbaso, tibaso aga te dwai kolesaga tagalama, te wiegi yai kolesaga wali pali. Tiali da, te aga me isigobeo. Menio. Aga bugagia bidaibao.
EZE 18:29 Tiali goli, eno te kolesaga wali pobaso, te dage Israelgo te po obao, eno kolesaga dolo meni po wali. Dagego eno kolesaga dolo meni da homu eba, agawe? Menio. Dagego kolesaga naga te dolo ebe dao,” wali.
EZE 18:30 “Megi da, ena God Genuai Bidi, eno dage Israelde po elalubao. Te eno dage po tų ilibo sogo te dage deli deligo kolesaga eno dagalaibao. Tama tibaso, dage homu begelama, ge neyu, dagego te ebo dwai kolesaga tigidali tagalao. Te dagego tama tibaso da, teda duga te yali dwai kolesagago dage me dologobeo.
EZE 18:31 Magi baso dage Israel isainu ebawe? Te dagego ebo dwai kolesaga tigidali te dagego tagaliąo, te dagego poloba meda haliga elalubo kolesaga hasegelama, te dagego gesi noma haliga, me gesi noma mobo bidi sao.
EZE 18:32 Ena God Genuai Bidi, eno te bidi me deli, ma we, ma wai, te isibaso eno homu pemene me ebeo. Tama tibaso, dagego te ge neyu, dwai sę tagalama, te haliga begelama, te dage bugagia bidiąo,” te po walio.
EZE 19:1 Godigo po enabolo walali, te Israel king side homu dene ebo e balia po wao po wali.
EZE 19:2 “Nago ida te wiegi yai hasa laion sou mu da. Aga te hasa laion omai dabe tomode bidu, tama agai aga wai dabe negelama, te augwali genuai pedelalio.
EZE 19:3 Aga ogwa me deli te wiegi yai ogwa bidi laion pedelali. Idago agabolo te hasa gegebo kolesaga ola mani, tama nosali aga te bidi ela tubo hasa laion pedelalio.
EZE 19:4 Te tǫ kantri bidi dabe hauwago te hasa laiongo ebo kolesaga po odali. Augwaligo te tǫ dedage dogagaselama, tama laion te tǫ dedageba tulaluali. Augwaligo agai penane dilide te gąų yai nai huk munama, tama aga te tǫ kantri Isipba kekasa palio.”
EZE 19:5 “Te aga idago aga ma asobo tonaluali sesabi mu yali, tiali goli te wai ma begasa me asisąbaso, aga homu sęgę yali. Tialima, agai gasa ogwa me dąį ilali, tama aga me te wiegi yai boma pai hasa laion tiwai pedelali.
EZE 19:6 Aga genuai pedelama te aga gasa hasa laion dabe dali uda wali, tama idago agabolo te hasa gegebo kolesaga ola mani, tama nosali aga te bidi ela tubo hasa laion pedelai dao.
EZE 19:7 Agai augwaligo te bomai be dabe koneama, tama aga pelama, te boi bidi dabego taun dabe dolali. Agai i hae umagia bomonama mu obaso, te tigidali we bidi wi yai dao.
EZE 19:8 Te tigidali pąde elaluali tǫ kantri pedai bidi dabego te hasa laion dali boi hwįagasali. Augwaligo te ba bono mubo wa munama, aga tola salio.
EZE 19:9 Augwaligo agai penane dilide te gąų yai huk munama, te aga kekasa pali. Augwaligo aga te halobage me delide kalabus elama, tama augwaligo aga te Babilon kingba odasa pali. Augwaligo aga te bomai kalabusiba muani, te aga te Israel bulu du dabeba wi ma painu ebo usu egobeo. Tama te we bidi dabe augwaligo agai i wabo ma odogobeo.”
EZE 19:10 “Dage si, duga ida aga te wain ni tiwai augwaligo te ąį sesege pąde bulali. Tama te ni genuai pedelama, tama nologo hauwa elama, te nai du hauwa walali.
EZE 19:11 Te ni nologo dabe boma pelama, tama augwaligo te nologogo te kingo tolasa bilibo dono nigibaso, usu yaibao. Te ni bobage mu holama, te pąde dagalu diągulainu yali. Tigidali we bidigo suali, aga bobage mu holali, te nologo me yabe hauwa elaluai dao.
EZE 19:12 Tiali goli, te bidi dabego wado po weyu, aga maga gudulama, te aga tǫba degelai. Te giliga asobo badu te posolai wali aselama, te agai wai dabe tigidali boga pai. Te bidi dabego te ni nologo tigidali tologolama, tama te ni nologo dabe sasia pali te augwaligo isiba ulai dao.
EZE 19:13 Tama augwaligo te ni te wa pai buluba mu sela pelama, tama augwaligo te ąį meni yai tǫde bulalio.
EZE 19:14 Isi te ni pedelama, te ni nologo tigidali dobadi, te ni wai du dabe me dalio. Tama te bomai nologo me elalusiąwai, te kingo tolasa bilibo dono tiwai pedelabo ni nologo tiwai me pedalubeo. E po da, te homu dene ebo balia po da. Te balia po augwaligo hauwa sogo odu geaibao,” wali.
EZE 20:1 Da te Babilonde bidibadi te kibu be 7 wabode, tama te kibu bede, te polua a naga, te dei nogo si wabode, te Israel tobolu bidi dabe augwali ena Esekiel pageba duayagasali. Augwaligo homude po me deli elalubaso, te augwaligo enaba hanaluama, te Genuai Bidigo homu mena tama elalubo page koneainu yai dao.
EZE 20:2 Tialima, Genuai Bidigo enabolo te tama po walio,
EZE 20:3 “Tǫde bidio, nago eno e po te Israel tobolu bidi dabe augwaliba mao. ‘Ena God, Genuai Bidi, eno dage tobolu bidiba te tama po obao. Dagego eno homu mena tama elalubo koneainu asali po oba, agawe? Ena te Sesemane Bidibo God da, eno po dolo dagebolo obao, dage odolali naga asalio. Eno dagego hanalubo po deli wei me ponogobeo. Ena God Genuai Bidi, eno te po wai dao.’ Te po augwalibolo mao,” wali.
EZE 20:4 “Tǫde bidio, nago augwali po tų ilaibawe? Awe, eno homugo nago te bidi dabe po tų ilao. Te augwa wąį nǫų dabego dwai kugumini yai kolesaga yali ma homu kone palao, nago te po augwaliba walao.
EZE 20:5 Augwaliba tama po wao, ‘Ena God Genuai Bidi, dage Israel dabe ena hani we bidi dabe pedalumainu dąį ilali sogo, te eno duga wąį nǫų dabe dali dila pai bomai po dąų wali. Augwali te Isipde bidibadi, ena digi ena augwaliba ola menama, te eno tama po wai, “Ena digi ena God, dagego Genuai Bidi dao,” te po wai dao.
EZE 20:6 Tama te sogo eno dila pai bomai po augwali dali dąų olama, te augwali eno Isipde selama, te eno augwaliba maiabo te dąį ilali tǫba odasa asali. Te tǫ te polalubo sawi yai tǫ mu elaluali, te gasa badu tǫ pedai tigidali aiyaba elaluali. Te tǫgo ili hauwa elalu, te nai wiegi yai mu holai dao.
EZE 20:7 Te eno augwaliba te tama po wali, tigidaliba te tama po wali, tigidali deli deligo te augwaligo godolo mu ebo te Isipgo tibo god dabe sela sąyao wai. Eno te po augwaliba waliyu, augwaligo te dwai nai dabeba lotu weyu, te ena God, augwa Genuai Bidi, eno gedude augwa digi meda ilibao wali.
EZE 20:8 Eno augwaliba te tama po walali, tiali goli te bidi me deli mego te po me odobeo. Menio. Tigidaligo eno po sela sąyu, tama augwaligo te Isip dabego tibo god dabe sela sąbeo. Tama tibaso, te augwali Isipde bidali sogo te eno haliga sębę dwai mu augwaliba eyu, te pąde eno haliga sębę yali usu nama, augwaliba te dwai dene magi dao.
EZE 20:9 Tialima, eno te sę isąwani, magi baso meni, tego eno nogi aiyaba elaluidali weyu yali. Eno te Israel augwaliba te tama bomo yai po dąų walama, te eno augwali eno Isipde selama, odasa asaibao wali. Tama eno te dąų wabo bomai po te gasa hani we bidi gedude dąų wali, te Israel augwali tomode bidali. Eno te dąų wali bomai po wali pisąbaso da, teda ena digi ena nogi te augwaligo gedude aiyaba elalueibao,’ te po wao,” wali.
EZE 20:10 “Tama tibaso, eno te Israel dabe te Isipde selama, te tǫ wa pai buluba odasa asai dao.
EZE 20:11 Te eno po augwaliba mayu, te eno bomai po augwali ola mawai. Te bugagia bidabo homu ebo we bidi dabe da, augwaligo te bomai po wali peyu, bugagia bidaibao.
EZE 20:12 Tama eno te Sabat side bodolu muani, te eno po dąų walobo dąį tiwai augwali dali yali. Augwali te side toma neyu, tama augwa te tiwai konemainu yali, ena Genuai Bidigo eno augwali ena wiegi yai we bidi dabe pedalubo sę yalio.
EZE 20:13 Tiali goli, te masigi tǫ wa pai bulude me, augwaligo eno po sela sąwani. Augwaligo eno po wali pabo hagela homu elama, te augwaligo eno bomo yai po dabe sela sąwani, te bomo yai po dabe augwaligo wali peyu, te augwali bugagia bidimainu yali. Tama te Sabat side bomo yai po mu augwaligo bolalio. Tama tibaso, haliga sębę dwai mu augwaliba elama, te pąde eno augwali te masigi tǫ wa pai bulude dwai dene menama, te augwali tigidali dolainu yai digi dao.
EZE 20:14 Tialima, eno te tiwai sę isąwani, magi baso meni, te tama sęgo eno ena nogi te gasa hani dabe gedude aiyaba elalueiba homu yali. Eno te Israel dabe augwali te Isipde selama, odasa asobo augwaligo suali, tialima eno te Israel dabe me dolobeo.
EZE 20:15 Tialima, Israel dabe augwali te masigi tǫ wa pai bulude bidali sogo, te eno po bomo yai augwaliba weyu, eno augwali dąį ilali, te wiegi yai sawi yai tǫba augwali odasa pabo usu mu me egobeo wali. Te polalubo tǫ mu te tǫ ili hauwa mu elalu, te gasa tǫ dabe aiyaba mu elaluai dao,” te po wai.
EZE 20:16 “Eno te po page e tiwai da, augwaligo eno po wali pabo homu me ebeo. Menio. Augwaligo te augwa tibo god dabeba naga lotu wabo homu yali. Tialima, augwaligo eno bomo yai po bolobo sę eyu, tama te Sabat side bodolu muani bomo yai po me sela sąyu yai dao.”
EZE 20:17 “Tiali goli, eno augwali homu dene me ebaso, te augwali masigi tǫ wa pai bulude bidali sogo te eno augwali mu sia somainogo ebeo.
EZE 20:18 Tialima, eno te augwa hani wai dabeba te tama po walali, ‘Dagego te duga aya dabego yali dwai kolesaga wali peyu, tama dagego te augwaligo tibo god dabeba lotu weyu, te duga digi eno gedude meda pedalubo sę elamu dao.
EZE 20:19 Ena digi ena God, duga Genuai Bidi da, tama eno tigidali po, me eno bomo yai po dali bugagia wali pao,’ te po walio.
EZE 20:20 ‘Dagego te haniani Sabat bodolu side bugagia homu kone palama, te gasagi yai tedali sogo da homu eyu, te eno bodolu side tiwai mu dąį ilao. Te bodolu side te eno dage dali bomai po dąų walobo dąį tiwai yali. Dage te bodolu side toma neyu, tama dagego te tiwai bugagia koneama, ena digi ena God, dagego Genuai Bidi da,’ eno te po wai dao,” wali.
EZE 20:21 “Eno te tiwai po augwaliba wali, tiali goli te we bidi hanigo me ena dali hagoma yali. Te augwaligo eno po wali me pisąma, te augwaligo eno bomo yai po dabe bolali, te bomo yai po dabe te augwaligo wali pigi sogo da, te augwali bugagia bidigi da. Tama augwaligo te Sabat side bomo yai po mu bolali. Tialima, eno haliga sębę dwai mu augwaliba elama, te pąde eno dwai dene menama, te augwali tigidali mu dolabo homu yai dao.
EZE 20:22 Tiali goli, eno tama tebeo, magi baso meni, te tiwai eyu da, te gasa hani we bidi dabego gedude te eno nogi aiyaba elaluidali homu yali. Te hani dabego eno te Israel dabe Isip tǫ kantride selama, odasa asobo suali, tibaso eno te Israel dabe dolainu yali homu hagela yai.
EZE 20:23 Tialima, eno te tiwai po bomonama wali, te eno augwali sela sąnama, te tǫ pedai tigidaliba tedela palaibao walio.
EZE 20:24 Eno te po wali, magi baso meni, augwaligo eno po sela sąwani. Tama augwaligo te Sabat side bomo yai po, me gasa bomai po dabe dali bolama, tama augwaligo te augwa wąį nǫų dabego tibo god dabeba lotu wabo homu bomonama mu yali,” wali.
EZE 20:25 “Tama me, eno gasa tobage po me te dwai bomai po meba augwaliba mani, te bomai pogo augwali tau selama, bugagia me bidigobeo wali.
EZE 20:26 Te eno augwa te tibo god dabeba ofa emainu sula tagalu, te augwa eno gedude meda pedalubo sę ilali. Te augwa gomunai ogwa dabe te tibo godiba ofa tiwai yainu te elebo eno sula tagalali. Te augwa tama sę emainu eno sula tagalali, magi baso meni, augwa te tebo kolesagade te augwa dwai noma siyu, hagela mu yabo sę eno digi ilali. Te augwa te tiwai bugagia koneama, ena digi ena Genuai Bidi da omainu yai dao,” wali.
EZE 20:27 Genuai Bidigo po te tiwai ma wali, “Tǫde bidio, eno homugo nago eno po te Israel dabeba momainu yali. Te po e tiwai dao, ‘Ena God Genuai Bidi, eno po dage Israelde elalubao. Te duga wąį nǫų dabego gasa dwai kolesaga me eyu, te augwaligo eno po sela sąnama, te eno nogi aiyaba mu elaluali. Te kolesaga te tiwai dao.
EZE 20:28 Te eno augwali mawaibao olama po dąų wali tǫba te augwali odasa asali sogo, augwaligo te genuai ni dabe te genuai bulu du dabe sulama, te augwaligo te homu eyu, te tibo god dabeba lotu wabo pesage dabe wiegi yai elaluba homu yali. Tama augwaligo te hasa dabe me wain dabe hauwa seselama, augwaligo ofa yali, te tiali kolesagade augwaligo ena haliga sębę dwai mu ilai dao.
EZE 20:29 Tialima, eno te tiwai augwaliba hanalu wali, “Magi baso dage te bulu du ugaba mu pelama, te tibo god dabeba lotu wagulubawe?” Tialima, te Israel dabego te lotu wabo pesage dabe augwaligo te tiwai nogi yali, “Te uganu elalubo pesage mu dao,” augwaligo te po walio,’ eno po te Israel dabeba mao,” wali.
EZE 20:30 “Megi da, dage Israelde eno po elalubao. Dagego te duga wąį nǫų dabego tibo god dabe wali pobao. Magi baso dagego augwaligo te dwai kolesaga wali pabo dawe?
EZE 20:31 Dagego te tibo god dabeba ofa ebo sę me idubao. Dagego me te duga wai dabe elama, augwaliba ofa ebo dao. Te tebo kolesagade dage eno gedude meda yai mu pedelebao. Tialima, dage Israel hale dwasianu me isąma, te eno mena homu elalubo te hania koneainu dage enaba asobo sę idubao. Tiali goli, dage odolali asobao. Ena God Genuai Bidi, ena sesemane sogo bidaibao, eno po dolo mu megi dagebolo obao, eno dagego hanalu wali po deli wei me ponogobeo,” wali.
EZE 20:32 “Dage te gasa tǫ kantri we bidi dabe tiwai mu pedelabo homu godolo eyu, te bagego te ni dabeba me masigi dabeba lotu obao. Tialima, eno dage te tiwai pedalumainu me egobeo. Mu menio.
EZE 20:33 Ena God Genuai Bidi, ena sesemane sogo bidaibao, eno dageba te tiwai po bomonama obao. Eno dagede haliga sębę eyu, ena digi ena dagego king pedelama, te eno dageba dwai dene mayu, te dage eno bomonama umagia tonalueibao.
EZE 20:34 Megi dage te tǫ kantri hauwade te kalabus bidada pobao, tialima eno dage te bulu dabede bidali ma oda selama, te deliba sisinaibao. Te eno haliga sębę ebo bomo dali, te eno dageba dene mabo kolesaga dali dageba pedalubo koneagameo.
EZE 20:35 Dage te sisinabo pesage da, te masigi kemi wa pai bulu da, aga nogi e tiwai elaluali, ‘Te Tigidali We Bidi Hanigo Wa Pai Bulu Pesage dao.’ Tama tede eno dage te duga yali dwai kolesagade po tų ilaibao,
EZE 20:36 te eno duga wąį nǫų dabe te masigi kemi tǫ wa pai bulu du Sainaide bidali sogo, te augwali eno po tų ela mani tiwai yaibao. Ena God Genuai Bidi, eno tama po wai dao,” wali.
EZE 20:37 “Tama te bulude te dagego eno bomo yai dąų wali po wali pomainogo yaibao. Te eno dage deli deligo kolesaga dagalaibao.
EZE 20:38 Tama eno te hagoma ebo bidi dabe me, te dwai sęgę elalubo bidi dabe me sela sąnama, te augwali dage tomode munu ma bidimainu me egobeo. Te eno dage Israel tigidali te kalabus bidali bulude selama, dage te po tų ebo madi odasa asaibao, tiali goli te hagoma eyu dwai sę ebo bidi dabe, augwali Israelgo te tǫba me pogobeo. Eno te tiwai ebaso, te dagego bugagia koneama, ena digi ena Genuai Bidi da waibao,” wali.
EZE 20:39 “Te dage Israel hani da, ena, God Genuai Bidi, eno te tama po te dageba obao, te dagego homu godolo ebo wida, dagego duga te tibo god dabe wali pao. Tegobao, te dagego godolo yali homu simina ela siminao. Tiali goli, dagego te tiwai ebaso da, teda nosali dagego eno po odoyu, mu wali paibao. Dagego te duga tibo god dabeba ofa eyu, eno nogi da aiyaba munu me elalugobe dao,” wali.
EZE 20:40 “Magi baso meni. Te ena God Genuai Bidi, eno tama po obao. Te po tų yali tudi badu, dage eno we bidi te Israel eno tǫba ma pelama, te dage tigidaligo enaba te genuai tedali gasagi yai bulu dude digi lotu obaso, te eno dageba wiegi yai homu pemene yaibao. Te dagego enaba wiegi yai homu eyu, polasa inayai wiegi yai ofa yabo nai dabe selasa aselama, te dagego enabolo maiagameo,” te po wai dao.
EZE 20:41 “Te dage bidali tǫ kantri dabede eno dage selama, tama dage ena te bulu duba odasa asobo sogo da, teda eno bugai haliga pemene dageba eyu, te eno wiegi yai ofa ebo denami ebaso pemene homu ebo tiwai yaibao. Te gasa hani bagego eno te tama sę dageba ebo sulama, te tiwai augwaligo koneyu, eno kolesaga te dolo mu ebao po waibao.
EZE 20:42 Te eno duga wąį nǫų dabeba mawaiba olama, te bomo yai po dąų wali tǫde dage te dugulalubo sogo da, teda dagego te tiwai bugagia koneaibao, ena digi ena Genuai Bidi da po waibao.
EZE 20:43 Tama dagego duga te tobage dwai kugumini yai kolesaga dabe eyu, dage te eno gedude meda pedelali teba homu kone palaibao. Tama duga te yali dwai kolesaga dabede dage hale mu yaibao.
EZE 20:44 Dagego te tiwai bugagia koneaibao, eno dagego te dwai kolesaga yali sę pagede wei ponobo sę dolo me ebeo. Menio. Eno ena wiegi yai nogide homu kone palama, te eno dageba wiegi yai sę mu yali. Tama dagego te tiwai bugagia koneaibao, ena digi ena Genuai Bidi da. Ena God Genuai Bidigo, eno te po wai dao,” wali.
EZE 20:45 Genuai Bidigo enabolo te tiwai po walio,
EZE 20:46 “Tǫde bidio, eno homugo nago te saut pedai badu tonalu, nago te tǫ kantri dali, te buluba me, wado ilao,” po wai.
EZE 20:47 “Nago te buluba po walu, te Genuai Bidi, ena Godigo poba olo bugagia muao po walao. Eno po e tiwai, ‘Odao. Eno isi nogobao, te siago nago ni tigidali daibao, te sasia pai dabe, ma sasisąwai me, tagalao. Te mena nai me deligo te isi sula sawainu ebo usu egobeo. Te isi dabo te saut badu gagalama, te not badu pedaiba usu nigi pelama, te isigo tigidali we bidigo tigi posolo yaibao.
EZE 20:48 Tigidaligo te tiwai ebo koneama, ena Genuai Bidi, eno te isi nogali, te mena bidi me deligo te isi sula sąwainu ebo usu me egobeo,’ te po wao,” te po wai dao.
EZE 20:49 Genuai Bidigo po ola simanobo si da, tialima eno te tama po wei ponani, “Hobede ya, God Genuai Bidio, eno te po augwalibolo pusubo si, magi yaibawe? Tigidali we bidigo eno te tobage begelama pusubo po odobo hagela ebo dao.” Ena Esekiel eno te po wali.
EZE 21:1 Genuai Bidigo enabolo te tiwai po wali,
EZE 21:2 “Tǫde bidio, nago te giliga degasa pabo badu te Jerusalemba tonama, te Israel we bidi augwali po tų ilibo po weyu, augwali te dwai sę ebo we bidi da po wao. Tama me augwaligo te tibo god dabeba lotu wabo pesage dabe eno godolo homu me egobe dao, te po me wao.
EZE 21:3 Ena Genuai Bidigo te po augwaliba mao, ‘Ena dage Israelgo boi bidi pedaliyu, te eno bainat hwą aga bulubo bedu selama, te dage tigidali elaibao, te dage dwai we bidi, ma dage dwagi yai we bidi, te eno me sula tagalogobeo.
EZE 21:4 Te eno bainat hwągo dage enama, dage tigidali ela mueibao, te saut badu gagalasa, te not badu pedaiba usu nugi paibao.
EZE 21:5 Tama tigidali we bidi te tiwai koneagameo, ena Genuai Bidigo digi, eno ena bainat hwą selama, tama eno te bainat hwą aga bulubo beba ma bulugobeo. Menio. Te eno dage dene mayu, ela silaibao,’ eno te po nago augwalibolo pusao,” Genuai Bidigo enabolo te po wai.
EZE 21:6 Genuai Bidigo po wadolama, te tiwai wali, “Tǫde bidio, nage te pepeli diliba pelama, te bomonama, hwąwa wao, te nago homu hobolu du alua pabo tiwai yao, te tigidali bidigo sumainao.
EZE 21:7 Te augwaligo nage hanalu magi baso nago te tiwai hwąwa obawe po obaso da, teda nago augwaliba te tiwai po walao, ‘Genuai sęgę mu pedelainu ebaso, te ena hwąwa obao,’ po wao. ‘Te sogo dage wi dwai mu eyu, te dagego sągą didibili elama, te dage bomo mu meni yaibao. Te dwai sogo megi da pedelainu ebao. Te Genuai Bidi Godigo po dao.’ Nago augwalibolo te po wao,” wali.
EZE 21:8 Tialima, Genuai Bidigo enabolo te tiwai po ma wali,
EZE 21:9 “Tǫde bidio, megi eno nagebolo te po digi po begelama ela mani po pusao. Ena Genuai Bidi, eno tama po obao. Bainat hwą me deli elalubao. Augwaligo te hwą elego bugagia dulama, te meda bugagia holali.
EZE 21:10 Te hwą poa pai mu pedelali, te gegemani ula emainu augwaligo meda holali, te dagalu ula tiwai yali. Dage eno we bidi dabe, dagego homugo te dage bugagia bidaiba homu eyu, te wiegi yai pemene eba, agawe? Mu menio. Eno dila pai po dageba mani, tiali goli dagego hagoma ebo sę me iduai dao.
EZE 21:11 Megi tama augwaligo te bainat hwą meda holobao, te agai bidi elabo sisi elalueibao. Augwaligo te elego dulama, meda hola silai elalubao, tialima augwaligo te we bidi dabe elabo bidi nogoba muaiba.
EZE 21:12 Tǫde bidio, nago i hae weyu, hobede ebo gela wao, magi baso meni, te bainat hwągo te Israel dabe polalubo bidi dabe eleyu, te eno we bidi dabe dali elaibao. Nago gela weyu, te bidigo hobede mu yabo kolesaga yao.
EZE 21:13 Megi da, eno ena we bidi dabe usu sabo sę mu yaibao. Te augwaligo augwa dwai sę ebo kolesaga me tagalisąbaso da, teda ena God Genuai Bidi, eno po dolo obao, te tigidali sę augwaliba pedelaiba,” po walio.
EZE 21:14 “Tǫde bidio, eno po te tiwai pusao. Nago nogo bada elu, megi da te bainat hwągo te we bidi dabe elebo gagalobao. Te bainat hwągo augwali pobelama, te hauwa elebo dao.
EZE 21:15 Te bainat hwągo te taun sunumi tigidalide tonalu, te we bidi dabe wi ilama, te hauwa ela mubao. Te bainat hwą gegemani umagi mu eyu, te dagalu be sele ula tiwai eyu, te bidi dabe ela muabo sisi elaluai dao.
EZE 21:16 Nage bainat hwą, nage te tigidali badu pelama, te we bidi dabe ela muao.
EZE 21:17 Te eno digi me, eno nogo bada elama, te eno haliga sębę yali usu naibao. Ena Genuai Bidigo eno tama po wai dao,” wali.
EZE 21:18 Genuai Bidigo enabolo po weyu, te tama po wai dao,
EZE 21:19 “Tǫde bidio, nago te tǫ kantri me deliba asabo sunumi dąį ilao, te bulu me delide te sunumi tunu mage si badu pedasa palio. Te Raba teba pabo sunumi me deli elaluaibao, te Amon dabego genuai taun da. Te sunumi me deli te Jerusalemba pabo elaluaibao, te masigigo nigai bomai obo elalubo taun, te tǫ Juda kantrigo genuai taun da. Tialima, nago te sunumi age side te koneabo po asęao. Te Raba taunba pabo sunumidu te gasa dąį ilibo po asęyu, te Jerusalem taunba pabo sunumidu te gasa dąį ebo po asęao. Te Babilon king aga ami bidi dabego dali te bainat hwą selama, tama augwaligo te sunumi wali asu, tama te sunumi mage siba sabolaibao.
EZE 21:21 Tama kingo aga te mena sunumidu pabo konesiąwai, tibaso agai te hanilibo sę ebo kolesaga yaibao. Hasia bolo agai te ene beledide elaluali ene dabe memenege ilaibao. Gasa enego te Raba taunba nogo tų eyu, te gasa ene mego te Jerusalem taunba nogo tų iliyu, te kingo deli naga sabo homu yaibao. Te aga tibo god dabeba me hanalu olama, tama nosali agai te elali kibu hasago homu hobolu duba bugagia tonaluama, te augwa ofa yainu elali hasa dao.
EZE 21:22 Tialima, kingo te dolo nogo badu sali enego, te taun Jerusalem dąį eyu, nogo tų ilaibao, tama agai te tiwai koneyu, augwaligo te Jerusalem taunba boi hwįgi paiba homu yaibao. Tama augwali te Jerusalemba dolo pelama, te taun bagulali sunumi aluabo masin dabe nigilama, augwali peyu, te we bidi dabe elainu yaibao. Te masin nigali simanobo si da, teda te ami dabego i hae bomonama weyu, te taun sunumi alumainu te masin pogolobo sę yaibao. Augwaligo te obode tǫ du holama, te Jerusalem bagulama, te moni hanude bidibo bage dali haniani hwįbo kolesaga yaibao,” wali.
EZE 21:23 “Nago te po Israel dabeba pusaibao, tiali goli augwaligo te po da te tibo po oba homu elama, te Babilon kingo augwaliba boi hwįagasogobe da homu yaibao, magi baso meni, augwali te aga dologode bidabo bomo yai po dąų wai da, te homu yali. Tialima, augwaligo dwai kolesaga hauwa ebaso, te king asama, augwali kalabus yagasomainu eno sula tagalaibao. Te aga asobo augwaligo subo sogo da, teda augwa te tiwai koneaibao, augwa digi yali sę dage te dwai sę pedaluba homu yaibao,” te po wali.
EZE 21:24 “Tialima, dage Israelde, ena God Genuai Bidigo eno po dagede elalubao. Sesemane sogo dagego dwai sę ebaso, te eno dagego te ebo kolesagade homu kone me gegeda palobeo. Tigidali bidigo dagego dwai sę ebo koneani, magi baso meni, dagego te kolesaga bulu ulade hanilama ebao. Dage dwai sę ebo sęgę genuai elalubaso, tialima eno te boi bidi dabego boi hwįagasomainu sula tagalama, te dage kalabus emainu yaibao,” wali.
EZE 21:25 “Israel king, nago eno po sela sąyu, dwai kolesaga mu ebo bidi da. Te eno nago ebo dwai sę tigidali wei ponabo sogo megi pedelalio.
EZE 21:26 Ena God Genuai Bidi, eno te po obao, nage te king munu me bidilamuo. Tialima, nago te kingo madi me, te tobolude bagulali ugwa nami me, peda muao. Megi da, eno te tigidali nai hasegelebo sę ebao. Te olo bidali bidi dabe te genuai bidi pedalu, te genuai bidi bidali bidi da, te olo bidali bidi tiwai pedelaibao.
EZE 21:27 Te dwai mu dolai elalubao! Te bidi dabego polobadu susąwani kolesagade, te Jerusalem mu dolaibao. E bulu pesage olo tama elalubadi, te bidi me deli asobo sogoba usu naibao. Eno te bidi sa munama, agai te Jerusalem tonalumainogo, eno te taun agabolo mawaibao,” wali.
EZE 21:28 Genuai Bidigo po ma weyu, te tama wali, “Tǫde bidio, eno homugo nago po me deli te Amon dabe pusao homu ebao, te augwaligo Israel dabeba dwai po wabo bidi dabe da. Ena God Genuai Bidigo eno te tama po augwaliba obao. Augwaligo eno bainat hwą meda bugagia mu holama, te gegemani ula gasagi yai eyu, te dula gegemani ula tiwai yali. Tama agai te bidi elabo sisi elalubao,” wai dao.
EZE 21:29 “Dage Amon dabego te nade subo nai tiwai sulama, tama dagego te tama po pusali, dagego digi te bainat hwą nogo tolama, te eno po sela sąyu dwai kolesaga ebo bidi dabe elaiba wali. Tialima, te yali na tigidali, me te profet po wali, te tibo po naga po walio. Te mu da, te bidi dabego yali dwai sę wei ponabo sogo te pedelalio, tialima te sę dagego me egobe dao,” wali.
EZE 21:30 “Nebukatnesar, nago te bainat aga bulali beba ma bulao. Te eno dage te duga page bulude digi dolo po tų ilaibao.
EZE 21:31 Eno dagede haliga sębę ebaso, te dage eno dolaibao, te genuai isi bogoligo te kala isi dala sabo tiwai yaibao. Tama eno te bidi dabe dolobo koneai bidi dabe tagala palama, te augwali aselama, dageba dwai dene magasaibao. Te bidi dabego te gasa bidi dabeba dwai kolesaga ebo godolo mu ebo dao.
EZE 21:32 Tama dage te isigo sia ulama, te dela silibo tiwai yaibao. Dagego kaneme te duga tǫde digi gelaibao. Te mena bidi deligo dage homu kone ma palogobeo. Ena Genuai Bidi, eno te po wai dao,” te po wali.
EZE 22:1 Genuai Bidigo enabolo te tiwai po wali,
EZE 22:2 “Tǫde bidio, eno homugo nago te Jerusalem we bidi po tų ila homu ebao. Augwaligo te bidi hauwa ela muani. Nago augwa te yali dwai kugumini yai kolesagade augwali po tų ilagameo po wao.
EZE 22:3 Eno po te tiwai obao, ‘Ena God Genuai Bidi, eno dage Israelde po elalubao. Dagego duga we bidi digi hauwa ela muani. Te dagego te tibo god dabeba lotu weyu, te duga digi eno gedude meda yai mu pedalubao. Tialima, te dage dolabo sogo pąba yagasai dao.
EZE 22:4 Dagego te dwai kolesaga dabe yaligo, te dagede sęgę elalubao. Tialima, dwasianu sogo naga elalubao, tama dage dolaibao. Te pagede naga tama, te gasa hani we bidi dabego dage gisugu mayu, te dageba posobo po omainu te eno sula tagalaibao.
EZE 22:5 Te gasa hani te digibulu bidibo, me pąde bidibo bage dabe, augwaligo koneani, dage te tobage dwai kolesaga ebo we bidi da homu eyu, te augwaligo dageba posobo po waibao,’ te po augwalibolo wao,” wali.
EZE 22:6 “‘Te Israel polalubo bidi dabe, augwali tigidaligo te augwa bomode tigidali sę ebo usu da homu yali. Tiyu, augwaligo te bidi dabe ela mubo sę yai dao.
EZE 22:7 Te Jerusalem taunde mena bidi me deligo te aga aya idago po dologoba me pabeo. Te dage dali bidibo gasa tǫ kantri bidi dabeba dagego dwai sę ebao. Te wilawe we dabeba te dagego dwai sę yali, te tiana wai dabeba me te tiwai dwai sę ebo dao.
EZE 22:8 Dagego te homu eyu, enaba te lotu wabo nai dabe te olo nai da homu ebao. Tama me, dagego te Sabat bodolu muani side bomo yai po mu bolobo dao.
EZE 22:9 Dage bidi mebago tibo po gasa bidi dabeba kisilama weyu, te po tųde augwali isimaina po omainu tebao. Te meba te tibo god dabeba lotu wabo pesageba pelama, te ofa ebo kibu mi dabe tubo da. Te mebago te lotu wabo pesagede penani sę ebo dao.
EZE 22:10 Mebago te augwa ayago we dali pagela piali. Te meba bidi dabego te augwa we dabe te poluago elali gasi elalubadi bomo elama, pagela piai dao.
EZE 22:11 Te mebago gasa bidigo we dali penani eyu, te mebago hale isiąyu, augwa ogwago we dabe dali pagela piyu yali, te mebago augwa ayago wegi dali pagela pialio.
EZE 22:12 Te mebago augwa abagi dabe ela muabo mone sabo dao. Te mebago augwa abagi dabego te negeli ilali wei augwaliba ponobo sogo te gasa ugwadu daganobo mone dali sabo dao. Te mebago augwa abagi dabe wi ilibo sę elama, te augwaligo mone kekebo sę yalio. Dagego te ena God Genuai Bidi homu kone isąma, kegeda pali da,’ te po augwalibolo wao,” wali.
EZE 22:13 “‘Eno wado po te dage nai wi sabo bidi dabeba, me te gasa bidi ela mubo bidi dabe, dageba eno wado ilaibao. Tialima, eno nogo bada bomonama eleyu, te eno dwai dene dageba mawaibao.
EZE 22:14 Te sogo dage wi dwai mu eyu, te dage dili elama, me dolalugobeo. Mu menio. Ena Genuai Bidi, eno te ena wali po tiwai gilama yaibao.
EZE 22:15 Te dage eno tigidali tǫ kantri pedaiba tagala palaibao. Tama eno dagego duga te dwai kolesaga tigidali tagalomainu ilaibao.
EZE 22:16 Dagego te ebo kolesagago te duga nogi aiyaba elalubaso, tama te tiwai dagego bugagia koneyu, ena digi ena Genuai Bidi da po wagameo,’ nago te po te we bidibolo pusao,” Genuai Bidigo te po wali.
EZE 22:17 Genuai Bidigo te tiwai po enabolo ma weyu, te tama wali,
EZE 22:18 “Tǫde bidio, te Israel we bidi dabe augwali eno hagela mu ebao. Te bidi dabego te kapa nogi silva elalubo masigide te silva sainu eyu, te genuai isiba ulama, te dwai hogomu sela sąbo dao. Te Israel we bidi dabe augwali te sela sąbo dwai nai naga tiwai dao, eno gedude. Bidi dabe augwaligo te tiwai pobele bage hogomu selama, sąyu naga ebo dao.
EZE 22:19 Tialima, dage Israel, te ena God Genuai Bidigo e po odiąo. Dage da, te bidi dabego te silva isiba ulama, te pobele bage hogomu tiwai ebao. Tialima, eno dage tigidali te Jerusalemba odasa pelama, te dwai dene dageba mawaibao.
EZE 22:20 Eno haliga sębę da, te genuai isi dabo tiwai ebao. Te dage eno ulaibao, te bidi dabego te masigi dabe genuai isiba ulama, te silva sainu ebo tiwai ebao. Augwaligo te isi ponobaso, te isi bogoli umagi posolo yai mu pedelama, tama silva te ąį tiwai pedalubo dao. Tama eno dageba te tiwai yaibao.
EZE 22:21 Mu tamao, eno dageba haliga sębę ebao. Tialima, dage eno te Jerusalemba sisinama, te dageba dwai dene ilaibao. Eno haliga sębę te genuai isi dabo tiwai pedelama, te dage mu ulaibao.
EZE 22:22 Te dagego eno bomo asobo hania mu sueibao. Te sogo dagego te tiwai bugagia koneyu, ena digi eno dageba dwai dene mabo dao,” Genuai Bidigo te po wali.
EZE 22:23 Genuai Bidigo po ma wadolama, te tiwai po wali,
EZE 22:24 “Tǫde bidio, nago te Israel dabeba te po walao, augwaligo dwai kolesaga hauwa eyu, te augwaligo tǫ eno gedude meda pedelali. Tialima, eno haliga sębę dwai mu augwaliba eyu, eno te tulubage paliama, te kalaba tulubage me paliama, te dene mabo sę augwaliba mobao.
EZE 22:25 Te profet dabego dwai kolesaga po mia selama, augwali te laion dabego te hasa ela munama, te hasa dili tologa tuyu i wabo tiwai yali. Te bidi dabego te augwa abagi dabe hauwa ela munama, tama augwa te abagi dabego mone me doado bage sali. Tama te isali bidi dabego we dabe sibi, augwaduba odolo bidibao.
EZE 22:26 Te pris dabego eno bomai po bolama, tama augwaligo homugo enaba te lotu wabo nai te olo nai tiwai da homu yali. Augwaligo te tobage deli kolesaga eno nai dabeba eyu, te augwaligo eno nai da weyu, sa musiąwai naiba ebo kolesaga tiwai yalio. Tama eno gedude te mena nai dabe te meda meni yai, me te mena nai dabe te meda yai da, te po te we bidi dabeba bugagia me ola mabo meni. Tama tiyu, augwaligo te Sabat side bomo yai po me wali pabo meni. Tama augwaligo te tama tebo kolesaga tigidalide te ena nogi aiyaba elaluai dao,” wali.
EZE 22:27 “Te gegunai bidi dabe augwali te bulu uni yowi dabe tiwai eyu, te hasa elama, te tologolama tubo sę tiwai yali. Te gegunai bidi dabe augwaligo te mone me doado bage hauwa sabo homu eyu, te bidi dabe augwali ela munama, te augwaligo doado bage sabo dao.
EZE 22:28 Te we bidi dabe augwaligo dwai kolesaga ebaso, te profet dabego wado po augwaliba wabeo. Menio. Augwa te tama po wabo dao, te we bidi dabego wiegi yai kolesaga naga ebao wabo. Te wabo pogo te we bidi dabego dwai sę ebo geme dualubo dao. Te profet augwali da, te dila pisąwai obo nide te tedela yai pen pilibo bidi dabe tiwai elama, te bidi dabego te dila pai obo da homu emainu yalio. Augwaligo na dabe yali, te tibo na naga yali, augwaligo te pedelaiba po wali nai dabe, te me pedalubeo. Te profet dabego te po weyu, te God Genuai Bidi eno po pusabao wali, tiali goli eno po me deli augwaliba me mabeo.
EZE 22:29 Te bidi dabego augwa abagi dabe wi ilama, te augwaligo mone doado bage bisigi elama sabo dao. Te augwaligo nai dabe me wi siyu ebo dao. Augwaligo te magi nai meni yai bidi dabe, me gasa tǫ kantri bidi dabe te Israelba bidagasali bidi me, augwali dolobo sę dwai mu ebo dao,” wali.
EZE 22:30 “Te eno po pusulama, te we bidi dabe enaba ma odasa asabo bidi deli me eno gegebo usu sali. Tialima, eno gegebo sę ela pali, menio. Te tobage bidi bidigi sogo da, aga te taun dolainu asobo boi bidi dabe asobo sunumi paligi da, te taun bagulali obo tiwai pedaligi da. Tama aga te obo alua pali badu dolalu, te boi bidi dabe taun tomoba asainu ebo sogo, te hwįbo bidi tiwai pedaligi da. Ena digi eno te Israelgo boi bidi tiwai pedelali, te eno augwaligo tǫ kantri dolainu yali, tiali goli te tobage bidi bidigi sogo da, eno tama sę igi menio. Tialima, eno te tiwai bidi me subeo. Mu menio.
EZE 22:31 Tialima, eno augwalide haliga sębę ebaso, te augwali eno mu dolainu ebao, te isi dage kalaba munama, dala sabo tiwai yaibao. Te eno augwa yali dwai kolesaga dolo mu wei ponaibao. Ena God Genuai Bidi, eno te po wai dao,” wali.
EZE 23:1 Genuai Bidi te tama po enabolo walio,
EZE 23:2 “Tǫde bidio, polobadu we si bidali. Augwaligo ida deli naga elaluali.
EZE 23:3 Te augwali wegi ogwa we elalubadi, augwali si te Isipde bidali. Te bidi dabego augwali sigo tigide gagali eyu, augwali si dali penani elama, augwali si te penani we pedelalio.
EZE 23:4 Te gomunai wegi nogi Ohola, te Samariade po kisilama wali, te Israel tǫ not badu kantrigo genuai taun da. Te tomo wegi nogi da, Oholiba, te Jerusalemde po kisilama walio, te Juda tǫ kantride saut badu elalubo genuai taun dao,” wali. “Tialima, eno te wegi si sali, te augwali sigo eno wai dabe ame nanio.
EZE 23:5 Ohola aga eno we da, tiali goli agai penani ebo kolesaga eyu, te agai te Asiria dabe dali gedu elama, te augwali agai abagi dabe pedelalio.
EZE 23:6 Te abagi dabe augwali te gegunai Asiria gavman bidi dabe da, augwali te ami polalubo ofisa bidi dabe augwaligo te wiegi yai husugu ugwa gudali. Te sawi yai ami dabe augwa te hosde dugulama boi hwįani. Ohola agai te gesi ogwa bidi dabe sulama, te aga haliga hogodasa holalio.
EZE 23:7 Tama aga te polalubo Asiria bidi dabego penani we pedelali. Tama agai augwaligo te tibo god dabe lotu wabo sę yali, tama aga eno gedude meda yai mu pedelai dao.
EZE 23:8 Agai te penani sę te aga Isipde bidu, te gesi ogwa bidide bidali sogo yali tiwai yali. Te sogo te bidi dabego aga ame tolama, te gagali eyu, aga penani elama, te augwa homu godolo yali te silalio.
EZE 23:9 Agai te dwai kolesaga Asiria dabe dali yali, te agai godolo mu yali abagi dabe mu da. Tama eno te Asiria dabe aselama, aga dolagasomainu ilai dao.
EZE 23:10 Te augwaligo agai ugwa peda sąnama, te aga habu olo mu bidali. Tama augwaligo Ohola te bainat hwągo ela munama, te agai wai naga tigidali sali. Te we dabe sibigo te tiwai sę te we Oholaba pedelali po mibo odama, tama augwa te po wali, ‘Agai te aga yali dwai kolesagade sęgę tolobo sę yai dao.’ Augwaligo te po wali.”
EZE 23:11 “Te tomo wegi Oholibago te sęgę dabe te Oholaba pedalubo suali, tiali goli agai tede homu kone palobeo. Menio. Agai te penani sę ebo bomo umagi mu eyu, tama agai te Oholago yali dwai kolesaga aiyaba elaluai dao.
EZE 23:12 Oholibago me te Asiria gegunai bidi dabe me, ofisa dabe dali gedu eyu yai. Tigidali te sawi yai gesi ogwa bidi, tama te wiegi yai ugwa gudai au elalu, tama augwali hwįbo hos kibu dabede dugulama hwįani. Tama Oholibago haliga augwalide hogodama, te aga augwali dali pagela pidu geai dao.
EZE 23:13 Eno suali, agai aga amago yali kolesaga tobage yalio. Augwali sigo kolesaga te meda yai mu yai dao,” wali.
EZE 23:14 “Tiali goli, Oholibago dwai kolesaga yali te umabogi mu yalio. Agai te Babilon gegunai bidi dabego piksa noma suali. Te bidi dabego te piksa te bagulali be dagade te mama yai pengo pilalio.
EZE 23:15 Te piksa dabe da, te gegunai bidi dabego te kukulu gudama, te augwaligo wiegi yai au yai ugwa dabe selama, te augwa tobolude bagulali. Oholibago te Babilon ami polalubo ofisa dabe piksa suali, te gasa sawi yai mu ebaso,
EZE 23:16 te aga haliga augwalide mu hogodaluali. Tibaso, agai te Babilonba po ola tolama, te aga dali piagasomainu augwaliba hanalu wai dao.
EZE 23:17 Tialima, augwali asama, aga dali pagela pilama, tama te augwa godolo yali homu silalio, tama augwaligo Oholiba te meda mu ilali. Augwaligo te tama sę ela pidu ela pali, te nosali agai augwalide hagela mu yai dao.
EZE 23:18 Oholiba aga te we dwai mu da. Agai dwai kolesaga te hania hanilama ebaso, tigidali bidigo koneani, aga te penani we da homu yalio. Te eno agade hagela mu yali, te eno agai ama hagela homu yali tiwai yalio.
EZE 23:19 Tiali digi, aga penani yali kolesaga genuai eyu, umabo mu yalio. Aga te Isipde bidu te penani yali te sogoba homu kone palama ebo tiwai yai dao.
EZE 23:20 Tede polobadu bididubadi aga te Isip bidi dabede haliga hogodali. Te augwaligo nai da, te kibu donkigo nai tiwai genuai elalu, te augwaligo tigi ąį te umagia mu pedalu, te kibu hosgo ąį tiwai yalio,” wali.
EZE 23:21 “Augwali te tiwai bidibaso, Oholiba, nago te nage Isipde te gesi wegide bidali sogo yali kolesaga tobage yabo homu godolo ebao. Te sogo te bidi dabego nago ame tolama, te gagali eyu, te nage dali pagela pidu geai dao,” Genuai Bidigo te po wali.
EZE 23:22 Genuai Bidigo po te tiwai ma wali, “Oholiba, nago te tobage dwai kolesaga ebaso da, teda ena God Genuai Bidi, eno po nage dali elalubao. Eno koneani, nago naga te abagi dabe nosali hagela homu yali, tiali digi augwaligo te nagede wado yabo sę eno ilibaso, te augwali tigidali badu asama, nageba dwai sę yagasaibao.
EZE 23:23 Eno te gegunai gavman bidi dabe dali, te ami polalubo ofisa dabe dali te bulu tǫ kantri Babilonde, me Kaldia, me te Pekot hani dabe, me Soa, me Koa, me Asiria, te tama bulu bidi dabe selama, tama augwali te kibu hos dabede dugulama, te augwali eno odasa asaibao. Polobadu nago te bidi dabe te ogwa bidide bidibo suali, te gasa sawi yai mu bidibaso, te nago augwalide gedu yai dao.
EZE 23:24 Tiali goli, megi da, augwa te not badu tǫ pedai bidali taga soyu, te nage dali boi hwį yagasaibao. Augwali te genuai ami hani dabe dali asu, te augwa hwįbo karis dabe me, te walu doado bage tolobo karis dabe dali asaibao. Augwa te hwįbo doado bage me selama, te hwįbo kapa madi munama, te sabele dabe dali, awa dabe dali tolasa asu, te augwaligo nage bagua sagasaibao. Te augwaligo nage aiyaba elalubo sę eno ilama, te augwaligo nage te augwa kolesagade digi po tų elama, te augwaligo nageba dwai dene mawaibao.
EZE 23:25 Nago ena tudiba mubaso, te eno nage dali wado po wali. Tialima, te bidi dabego nageba dwai sę mu yabo sę eno ilaibao. Te augwaligo nago guni me olo togolama, te nago wai dabe me saibao. Te nago tǫ kantride me badu bidali we bidi dabe, te bidi dabego augwali te bainat hwągo ela muyu, ma te augwali isiba ulaibao.
EZE 23:26 Te bidi dabe augwaligo nago ugwa pepeda sąnama, te nago wiegi yai beli me nogode muani ring dabe saibao.
EZE 23:27 Eno te sę dabe ebaso, te nago penani sę ebo kolesaga munu ma isąma, te nage Isipde bidu yali gagalasa, te tiwai megi e sogoba usu naga nagasalio. Te nago naga te tibo god dabeba lotu munu ma wasiąyu, tama nago te Isip dabeba homu kone ma egobe dao,” wali.
EZE 23:28 “Magi baso meni. Ena God Genuai Bidi, eno te tama po nagebolo obao, te nago godolo isąma hagela homu yali bidi dabe, te nageba dwai dene mabo sę yagasomainu eno tamadi tama sula tagalaibao.
EZE 23:29 Te bidi dabego nage godolo isąwai, te bidi dabe augwaligo nago doado bage tigidali saibao. Te nage olo mu bidaibao, te penani we aga bolu olo bidibadi te bidi dabego aga subo tiwai ebao. Nago penani dwai kolesaga hauwa ebaso,
EZE 23:30 tama nageba te sęgę dabe pedelaibao. Nago te gasa tǫ kantri dabego tibo god dabe tigidali wali peyu, te naga digi eno gedude meda ilali, te penani we aga yali kolesagago meda ilibo tiwai yalio.
EZE 23:31 Nago naga amago dwai kolesaga ebo wali pobaso, te eno nageba dwai dene mabo te agabolo mani dwai dene tiwai mawaibao,” walio.
EZE 23:32 “Ena God Genuai Bidigo te tama po obao, Oholiba, te eno nageba dwai dene mu mawaibao, te naga amabolo mani dwai dene tiwai tobage nageba me mawaibao,” te po wai. “Te eno nage te bomai wain ąį te genuai kabude tumainu ebo tiwai ilama, te nage wabo pabo bidi tiwai yaibao. Te gasa hani we bidi tigidaligo nage sulama, te nage gisugu mayu, te nageba dwai posobo po waibao.
EZE 23:33 Te wain ąį eno te Samaria mani tobage wain tiwai da, te naga nagebolo mawaibao. Nago tulama, te nage gęǫ page eyu, te nage haliga sęgę eyu, te wi dwai mu elama, te nage dolaibao.
EZE 23:34 Ena God Genuai Bidigo eno po dolo obao, nago tulama, te wain mu siminama, tama te kabu nago aluama, te aga pepedai me badu selama, te naga digi naga ame togaibao,” wai dao.
EZE 23:35 “Ena God Genuai Bidigo eno te tiwai po nagebolo obao, nago ena homu konebo tagalama, te ena tudiba munama, te tobage dwai kolesaga dabe mu yali. Tibaso, naga te yali dwai penani kolesaga dabede sęgę tolao,” wali.
EZE 23:36 Tialima, Genuai Bidigo enabolo te tama po wali, “Tǫde bidio, eno homugo nago te Ohola me Oholiba sigo dwai kugumini yai kolesaga yalide dagalama, tama po tų ilao,” wali.
EZE 23:37 “Augwali si te penani we da, te bidi me ela muai dao. Augwali sigo te tibo god dabe dali penani tiwai yali. Augwali sigo eno wai dabe ame nani, tiali digi augwali sigo augwali elama, te tibo god dabeba ofa eyu yalio.
EZE 23:38 Te kolesaga naga me ebeo. Menio. Augwali sigo te tiwai gasa dwai kolesaga me yali. Augwali sigo eno be te eno gedude meda mu ilali. Te augwali sigo te Sabat bodolu muani side bomai po bolali, te eno bodolu muani side digi mu dao.
EZE 23:39 Augwali sigo te wai dabe te tibo god dabeba ofa ela silama da, teda augwali si te sogo naga hogodasa aselama, te eno beba lotu wagasali. Te tiali kolesagago augwali sigo eno be meda mu ilalio. Augwali sigo te kolesaga dwai mu eno bede digi yai dao,” wali.
EZE 23:40 “Te augwali sigo gasa dwai kolesaga mu me yali. Augwali sigo te digibulu bulu bidi dabeba po ola tolama, hanaluama, augwali asao wali. Tialima, augwaligo te po odama, te augwali asali. Te we si ąį paluama, te gedu au ilibo pen pilama, te beli dabe me nogode ring dabe muanio.
EZE 23:41 Te augwali sigo bet me deli au ilama, tede dugulalu, tama augwali sigo te tobage wiegi yai nai dabe te bet pąde elalubo tebolo sai me deliba muani. Tama augwali sigo te eno augwali siba mani te wiegi yai denami ilibo hano ebo pauda me, te oliv wel me, augwali sigo te tebolo saiba muanio.
EZE 23:42 Augwaligo te tǫ wa pai bulude bidali bidi dabe hauwa selama, te augwali odasa aselama, tama te we si dali augwaligo nai da tuali. Te augwa wiegi yai pemene eyu, i hae subigila wali. Te bidi dabego te we sigo nogoba ring muyu, te augwali sigo toboluba te kwin wego madi muanio.
EZE 23:43 Eno sulama, eno te homu yali, te sesabi mu elama, te we sigo bidi tagalobo kolesaga elama, te megi da augwali si te penani we pedelama, tama te bidi dabe augwali siba naga pai dao.
EZE 23:44 Augwaligo te Ohola me Oholiba siba penani sę igi piduali, te penani we si da po wai dao.
EZE 23:45 Augwali sigo te sali bidi dali bidali tagalobo kolesaga eyu, bidi dabe ela muani, tibaso te doloba pai bidi dabego augwali po tų ilama, te tama po weyu, te augwali si isimainao,” po wai dao.
EZE 23:46 “Tialima, ena God Genuai Bidi, eno te tiwai po obao. Te genuai hani bidi i olama, te we si penani yagasomainao. Te augwaligo augwali si wi dwai mu ilabo sę elama, te augwa te augwali sigo doado bage bisigi elama, sainu yaibao.
EZE 23:47 Te augwaligo te we siba masigi sąnama, te augwali si bainat hwągo enama, te augwali si isaibao. Te augwali sigo wai dabe augwaligo ela munama, te augwali sigo be tigidali isigo domainao,” wai dao.
EZE 23:48 “Te tiali kolesagade eno te tǫ kantride penani yali kolesaga mu sela sąwaibao, tama tigidali wego eno te sę ebo sulama, augwa te tiwai konemainu yaibao, te we sigo penani kolesaga yali tiwai sę te augwaligo munu me egobe dao waibao.
EZE 23:49 Dage ama nami we sigo, odao. Dage sigo penani sę hauwa eyu, tama dage sigo te tibo god dabeba lotu po wali. Tibaso, eno te dwai dene dage siba mawaibao. Te tiwai dage sigo bugagia koneao, ena digi ena God Genuai Bidi, eno te po wabo dao.” Te po wali.
EZE 24:1 Te kibu be 9 da te kalabuside bidali, te dei 10 wabode, te 10 poluade, te bidali kibu bede, Genuai Bidigo enabolo te tiwai po wali,
EZE 24:2 “Tǫde bidio, te side naga gagalasa, te Babilon kingo te Jerusalem bagulubo sę yali. Tialima, nago te side te Israel dabego koneyu, te nago po te mu po yabo te po wabo dei asęao,” wali.
EZE 24:3 “Nago te Israel hagoma bidi dabeba nago te po digi po begelama, augwaliba pusao. Te God Genuai Bidi eno po da e tiwai, ‘Nai ulubo bidi, nago sospen te isiba ugadu munama, te sospenba ąį tabilao.
EZE 24:4 Te sipsip me deli wiegi yai mu me deli selama, elama, te togao. Te agai polalubo mi me badu sao, te wiegi yai na mi, me sągą mi da, te wiegi yai dili dabe selama, te sospenba tigidali buao. Te dili dabe te mi dologode munama, te kibu mi me dili dabe bugagia posolo ąįba ulao,’ eno te tiwai po asęao,” wai.
EZE 24:6 “Ena God Genuai Bidi, eno te po obao. Jerusalem taun te brasgo nigai sene me deli tiwai elalu, te aga tomode meda mu elaluali, te bidi dabego aga wiegi yai pedalumainu yabo usu egobeo. Te senede kibu mi pedai tigidali, me kibu dili me teda muao, te senede deli me elalusiąwai. Magi baso meni. Te Jerusalem dabego gasa bidi dabe ela muani, tialima te augwali mu dolaibao,” wali.
EZE 24:7 “Augwaligo te augwa dwai kolesagade homu kone me tųą pabeo. Menio. Augwaligo hanilama, bulu ulade yali. Te augwaligo te bidi dabe elama, te kaneme te masigi elalubo pesage daide gealu tiwai yali. Augwaligo kaneme te tǫba gealumainu me ebeo, te tǫgo geme dualumaina wabeo.
EZE 24:8 Tiali digi, ena eno te masigi elalubo pesagede augwaligo kaneme gealumainu ilali, te eno sumainu yali. Te eno augwaligo yali dwai sęde homu kone palama, te augwaliba eno haliga sębę eyu, te eno augwaliba dwai dene mawaibao,” wali.
EZE 24:9 “Tialima, ena God Genuai Bidi, eno te tama po obao, eno te kaneme pągąnalubo taun mu dolaibao. Te taun ulabo isi ena digi pesage holaibao.
EZE 24:10 Isi hauwa pesage holama, te sia nogolama, ula ilao. Te sene posolo ąį kulukulu olala pidu genama, wa pelama, te kibu mi dabe me dili te isigo mu tigidali dela pelama, te senede mu silao.
EZE 24:11 Tialima, te bras sene te iside ulalumainu elama, te posolo hobulu mu yai pedalumainao. Te sene meda mu yali, te eno homugo te isigo te dila pai pobele bage hogomu silimainu elama, te sene wiegi yai meda meni yai ma pedalumainu yao.
EZE 24:12 Tiali goli, ena odolali sę dene yali. Isigo te pobele bage dela silabo usu meni yai dao.
EZE 24:13 Dage Jerusalem, te yaba yali po wali page te dagego dwai meda yai kolesagade dąį elasa walio. Eno dagego dwai kolesaga sela sąbo usu sali, tiali goli dagego hagela yali. Dage meda dali bidabo homu naga yali. Tialima, te ena haliga sębę ebaso, te eno dageba dwai dene mabo sę ebaso, te eno dageba dwai dene mabo sę mu yaibao. Tama dage te meda dali me tama bidaludubadi, te eno haliga sębę yali silibo sogoba usu naibao,” wai dao.
EZE 24:14 “Ena Genuai Bidi, eno mu po obao, te dage eno dolaibao. Te dagego meda yai kolesaga ebode te tigidali eno homu kone ebo gegeda palogobeo. Te dage eno homu dene me isąma, te eno dageba olo mu tau sabo wiegi yai kolesaga me egobeo. Mu menio. Te eno dage po tų ilama, te dagego yali dwai kolesaga tigidali dolo wei ponaibao. Ena God Genuai Bidi, eno te po wai dao,” wali.
EZE 24:15 Genuai Bidigo enabolo te tama po wali,
EZE 24:16 “Tǫde bidio, eno koneani, nago naga we godolo homu mu yai, tiali goli te polo tama eno te we dagala selama, te nage olo bidaibao. Tiali goli, nago agade gela weyu, te hobede ebo balia me olamu dao,” wali.
EZE 24:17 “Nago haligade naga hwąwa wao. Te bidi dabego nage odomainu me ilamuo. Tama nago te isai bidi dabede hobede ebo kolesaga dabe tiwai me elamuo. Te nago tobolude mubo ugwa name belama, te sągąde nadoba gudao, te naga sesemane sogo au ebo tiwai yao. Te nago pedauwali panigio. Te abagi dabego hobede ebo kolesaga wali peyu, te nageba nai sela asobo sę tiwai nago me elamuo dao.” Genuai Bidigo enabolo te po wali.
EZE 24:18 Te kigamu te we bidi dabe dali eno po miani, te pio eno we isalio. Te do tama kigamude, eno te Genuai Bidigo enabolo po wali sę dabe yai dao.
EZE 24:19 Te we bidi augwaligo ena sulama, te augwaligo enabolo te tiwai hanalu wali, “Magi baso nago te homu dene ebo kolesaga wali pabewe? Te nago magi nai me deli dabolo ola maiabo homu eyu eba, agawe?” te po wali.
EZE 24:20 Tama tibaso, eno augwaliba te tama po wei ponani, “God Genuai Bidigo enabolo waliyu,
EZE 24:21 te dage Israelba te po pusao wali, Godigo te tama po wali, ‘Dagego God eno moni tempel bede wiegi yai homu pemene eyu, tama dagego te po weyu, te bomai dila pai be mu da, wali. Tama te be dagego godolo mu ebao. Tiali goli, eno te be dolaibao. Te dage hani wai dabe te Jerusalemde me bidalubo te boi hwįnama dolaibao.
EZE 24:22 Tialima, te Esekielgo yali kolesaga tobage te dagego me yaibao. Te dagego duga pedauwali me panigobeo. Tama te duga abagi dabego te hobede ebo kolesaga eyu, te dageba nai dabe sela asobo sę dagego iligobeo.
EZE 24:23 Te dagego ugwa tobolude belama, te sągąde nadoba bulama, paibao. Dagego te isali we bidide homu dene elama, gela wabo homu eyu tigobeo. Magi baso meni, te dagego duga digi yali sęgęde homu kone hauwa tųą pelama, te dagego tigi dabe te nomona saibao. Tama dagego duga haside digi hwąwa weyu tiaibao.
EZE 24:24 Esekiel te dagego dąį tiwai ilali, magi baso meni, dagego me agai te yali kolesaga tobage naga yaibao. Te tigidali sę pedalubo si da, dagego te tiwai tama koneagameo, ena digi ena Genuai Bidi dao.’ Godigo te po dagebolo pusao po wai dao,” eno te po wai.
EZE 24:25 Te Genuai Bidigo po enabolo weyu, te tama po ma wali, “Tǫde bidio, eno be augwaligo be tomode elaluali, tialima te augwali bomo elama, dolalueiba, te homu augwaligo yali. Augwaligo te be godolo homu elama, tede wiegi yai pemene eyu, teba sesemane homu kone elaluali. Tiali goli, eno ena te be dolama, tama eno augwaligo wai dabe ela muaibao,” te po wai dao.
EZE 24:26 “Eno te tama sę ebo sogo, te bidi me deli te Jerusalemdu wi aselama, te sę dabe pedelali po nageba walagasaibao.
EZE 24:27 Te bubugade naga, te eno nago pedauwali usu ma ilama, te nage pedauwali pania sai munu me elalugobeo. Tialima, te nageba po sela asali bidi dali te nago po ma miaibao. Te Israel augwaligo sueibao, te nago po ma obaso, te Israel dabego te tiwai koneama, ena digi ena Genuai Bidi bidibo dao,” po wai dao.
EZE 25:1 Genuai Bidigo enabolo te tama po wali,
EZE 25:2 “Tǫde bidio, nago te Amon dabego tǫba tonao, te augwali dolabo po wao.
EZE 25:3 Augwaliba te tama po walao, ‘Dage Amon dabego ena God Genuai Bidigo poba bugagia olo muao. Dagego eno be dolali, me te boi bidi dabego te Israel dabego tǫ dolali me, dagego suali, te Juda dabe selama, te digibulu buluba kalabus igi pali. Tama dagego te sę dabe ebo sulama, tega weyu, wiegi yai homu pemene eyu, dili elebo kolesaga yai dao.
EZE 25:4 Tialima, eno te bidi hani me deli te giliga asobo badu asomainu ilama, te augwaligo dage dali boi hwįagaselama, te dagego tǫ saibao. Te augwaligo sel ugwa be dabe te dagego tǫde sę elama, tede bidaibao. Te augwaligo nai dagego tǫde sela tuyu, te dagego bulmakau ame pę dabe sela tuyu yaibao.
EZE 25:5 Te eno taun Raba, te dagego genuai taun, te dolama, te kibu kamel dabego nosai tubo pesage pedelaibao. Te tǫ kantri Amon te kibu sipsip dabego obo dabe nigibo pesage pedelaibao. Tama dagego te tiwai koneyu, ena digi ena Genuai Bidi mu da po wagameo,’ te po te Amon bagebolo wao,” te po wali.
EZE 25:6 “‘Te eno te sę dage dali magi baso yaibawe? Te ena God Genuai Bidigo te tama po obao. Eno koneani, dagego te Israel dabe godolo homu meni isąwani, te Israel tǫ kantri dolali sogo, dage wiegi yai pemene elama, nogo bada eliyu, wele siyu, kęnę wai dao.
EZE 25:7 Dagego te tama kolesaga yali, tibaso te eno dageba dwai dene momainogo te gasa hanigo dage sagasomainu elama, te dageba dwai dene momainu yali. Te eno dage dolobo sę mu elama, tama dage te tǫ kantri me deli bidibo tiwai me egobeo. Te tiwai dagego bugagia koneyu, ena digi ena Genuai Bidi da po waiagameo,’ te po te Amon we bidiba pusao,” Genuai Bidigo enabolo te po wai dao.
EZE 25:8 Genuai Bidigo po ma weyu, te tama po wai, “Ena God Genuai Bidi, eno po obao, te Moap dabe me Seir dabe, augwaligo te homu yali, te Juda dabe te gasa hani bidi dabe tiwai si da homu yai dao.
EZE 25:9 Tialima, eno te boi bidi dabe aselama, te tǫ kantri dąį pąde elalubo te Moap dabego bomai taunba hwįagasomainu yaibao. Te augwaligo te wiegi yai taun dabe dolaibao, te taun Bet Jesimot, me taun Balmeon, me taun Kiriataim dao.
EZE 25:10 Te boi bidi dabe te giliga asobo badu asama, te Moap dabeba me, Amon dabeba dali siba boi hwįnama, te augwali aiyaba elaluama, te augwaligo tǫ saibao. Tama te Amon dabe te tǫ kantri pedai tiwai me deli ma bidigobeo.
EZE 25:11 Awe, eno te dwai dene mabo sę te Moap dabeba ebaso, tama augwa te tiwai bugagia koneama, ena digi ena Genuai Bidi mu da po omainu yaibao,” wali.
EZE 25:12 Genuai Bidigo te tama po wali, “Ena God Genuai Bidi, eno po obao, Idom dabego dwai kolesaga mu te Juda dabeba wei ponani, tialima te Idom dabego yali dwai sę te genuai mu igi pai dao.
EZE 25:13 Te eno megi te po obao, eno te Idom dabeba dwai dene umabo mu menama, te tigidali we bidi ela munama, te augwa kibu sibi dabe tigidali me elaibao, te not badu te distrik Temande gagalama peyu, te saut badu te taun Dedanba usu naibao. Te tǫ kantri Idom olo mu elaluaibao.
EZE 25:14 Eno te Idom dabego dwai kolesaga wei ponabo homu yali, tibaso te eno ena we bidi augwali te Israel dabe, te augwali elali boi hwįgi pomainu tagala palaibao. Te kolesagade te Idom dabego eno haliga sębę genuai ebo koneaibao. Tialima, te Idom dabego te tiwai bugagia koneaibao, ena digi eno augwaligo dwai sę yali wei ponobao homu yaibao. Ena God Genuai Bidi eno te po wai dao.”
EZE 25:15 Genuai Bidigo po ma weyu, te tama po wali, “Ena God Genuai Bidi, eno te po obao, te bobobage sogo te Filistia dabego te Israel dabe godolo homu me isiąma, te augwaliba boi bidi ebo sę yalio. Te Filistia dabe augwaligo dwai sę wei ponobo sę umabo mu eyu, te augwali mu dolai dao.
EZE 25:16 Tibaso, megi da, eno te po obao, eno te Filistia dabe augwaliba dwai dene mabo sę mu elama, tama eno te nambisde bidibo we bidi tigidali mu silabo sę yaibao.
EZE 25:17 Eno haliga sębę dwai mu augwalide elama, tama augwaligo yali dwai kolesaga tigidali dolo wei ponaibao. Tama augwaligo te tiwai bugagia koneama, ena digi ena Genuai Bidi dao,” te po wai dao.
EZE 26:1 Te da Babilon tǫde kalabuside bidibadi te kibu be 11 wabode, tama te poluade deli wabo side, Genuai Bidigo enabolo te tiwai po pusalio,
EZE 26:2 “Tǫde bidio, eno te tamu ąį tomode elalubo tǫde elalubo taun Tair we bidide po elalubao, te tǫ te tamu ąį sesege pąde elalubao. Te Tair taunde bidibo we bidigo homu pemene eyu, e tiwai i hae obao, ‘Jerusalem dolobaso, te gasa tǫ kantri bidi dabe teba pelama, te mone sabo bisnis sę yali te ma igi pabo usu me egobeo. Megi da, te augwali aselama, da dali naga te nai dabe dobu si ebo bisnis sę yagasaibao, tama tiyu dago doado bage hauwa saibao,’ po wabo dao, te Tair we bidi.”
EZE 26:3 “Tama tibaso, megi God, ena Genuai Bidi, eno te po obao, ena dage Tair hanu bidi dabego boi bidi pedelaibao. Te eno bidi hani hauwa odasa aselama, dage dali boi hwįagasomainogo yaibao, te tamu ąį genuai pepeda pelama, dini gisigilibo tiwai yaibao.
EZE 26:4 Tama te augwaligo dagego taun bagulali bomai masigigo nigali obo dolama, tama augwaligo te obo bagulali bobobage be taua dabe tigidali pepedama, aiyaba tudulaibao. Tama eno dagego taunde elalubo tǫ dabe tigidali sela sąnama, tama masigi bulu naga olo tede elalueibao.
EZE 26:5 Tama te sųgų sabo sę ebo bidi dabe aselama, te ąį tomode elalubo masigi bulude sųgų sabo wa dinigina munama, te giligago te wa omainogo yaibao. Te ena God Genuai Bidigo po obao. Te gasa hani bidi dabego dage sagaselama, te dageba dwai sę mu yaibao.
EZE 26:6 Tama te boi bidi dabe aselama, te genuai bulu te taun dabe bidalubo we bidi dabe ela mueibao, te taun Tair elalubo pąde bulu dabede bidibo we bidi me ela mueibao, te nambisde bidibo bage. Tama dage Tair hani, dagego bugagia te tiwai page kone peyu, ena Genuai Bidigo digi eno te tama sę eba homu yaibao,” wali.
EZE 26:7 “Magi baso meni. Ena God Genuai Bidi, eno te tama po obao. Eno te bomai king me deli odasa asaibao, te king Nebukatnesar te tǫ pedai Babilon king dao, tama agai te gasa tǫ pedai kantri dabego king dabe tonalubo dao. Tama agai dage Tair dabe dali boi hwįaibao. Te aga not badu pedaide bidali tagalama, te genuai ami hani dabe dali aselayu, tama te boi hwįbo nai kibu hos dabe, me karis dabe dali asiyu, te kibu hos dabede dugulama boi hwįbo ami hani bidi dabe dali asaibao.
EZE 26:8 Tama augwali aselama, te nago nambisde elalubo taun bidi hani dabe dali hwįagaselama, te taun dabe dolaibao. Tama te tamu ąį tomode elalubo tǫba aselama, augwaligo te taun Tairgo obo bulu badu te tǫ du holama, te dagego taun tomoba hwįainogo tiwaibao. Tama augwa awa dabe te augwa seselalubo obo tiwai elalu, te augwaligo hwįaibao.
EZE 26:9 Tama augwaligo genuai masin selama, tama te taun bagulali obo pepedelama tulaibao. Tama te ain tigi dage selama, te bagulali obo aluama, pebedama mueibao.
EZE 26:10 Tama te ami bidi dabe te kibu hos dabede, me te kibu hosgo kekebo nai karis dabede dugulama, te taun bagulali obo sunumi dabedu tomoba paibao. Te augwaligo genuai kulukulu wabo sę eyu, te bagulali obo mumunu yaibao. Augwaligo te kibu hos dabe te taun sunumi dabe tigidalidu udabaso, te tǫ hogomu genuai pedelama, te taun tomode be dabe halueibao. Tama te ami bidi dabego te bainat hwą nogo tulama, te taunde we bidi tigidali ela mueibao. Tama augwaligo te taunde dila pai pos dabe tologolama, te tǫba sąwaibao.
EZE 26:12 Te boi bidi dabe augwaligo te dagego mone dabe me doado bage tigidali sobadi, tama dagego mone sabo bisnis sę ebo nai dabe tigidali saibao. Tama augwaligo te taun bagulali obo dabe aluama, te dagego wiegi wiegi yai be dabe mu dolaibao. Tama augwaligo te masigi dabe me, ni dabe me, tǫ dabe me, tigidali selama, te tamu ąįba sąwaibao.
EZE 26:13 Tama dagego te tęąbi po wabo me, te gita elebo sę ebo me, te ma egobeo.
EZE 26:14 Te eno dagego bulu tǫde te masigi dabe naga elalumainu yaibao. Tama te sųgų gegebo sę ebo bidi dabego te sųgų hagane togobo wa te masigiba manama, te wa dabe giligago omainogo tiaibao. Tama bidi dabego te taun ma nigainu ebaso, usu egobeo. Magi baso meni. Ena God Genuai Bidi, eno te po wai dao,” wali.
EZE 26:15 “Ena God Genuai Bidi, eno te Tair dabeba te tama po obao. Te boi bidi dabego dagego taun dabe dolobo sogo, te gasa taun te tamu ąį pąde bidalubo we bidi dabego te ami bidi dabego te tama kulukulu wabo odaibao. Tama te ami bidi dabe augwaligo dage te taunde elama, tama te tigi selai bagego hwąwa wabo genuai mu pedelama, tama te gela u wabo te gasa taunde bidibo bage augwaligo odaibao. Tama te we bidi dabe augwali wi eyu, dwai noma mu saibao.
EZE 26:16 Tama te tigidali tǫ pedai kantri te tamu ąį pąde bidibo king bidi dabego dagede te pedalubo sę dabe sulama, wi dwai mu eyu, te augwa king sę eyu, te dugulalubo sia sai tagalama, aiyaba duagulu, tama augwa te king sę eyu gudubo sawi yai ugwa dabe pepeda sąnama, tama olo te tǫba duagulama, tama didibili eyu bidaibao.
EZE 26:17 Tama augwali te king dabego te dagego taun dolali sęde te e tiwai hobede ebo balia po waibao, ‘Hobede mu da, genuai nogi yai taun, nage dolalio. Te taun nago we bidi dabe te tamu ąįba asai, te polobadu augwaligo sip hauwa elalu, te augwali tamu ąįde sę yali polalubo hani dabe bidali. Tama te tamu ąį pąde bidalubo taun we bidi dabe, te augwali nago taun we bidide wi dwai mu yali. Tiali goli, megi da, nago sip dabe iba soyu, eda asiyu eyu, te bisnis sę iduali munu ma egobe dao.
EZE 26:18 Magi baso meni, te side naga nage dolalio, tama te tamu ąį tomo bulude bidalubo we bidi dabego sulama, tama augwali wi dwai umagi mu eyu, tama didibili ebao,’ augwaligo te balia po waibao,” wali.
EZE 26:19 “Ena God Genuai Bidi, eno te tama po obao. Tair, te eno nage te olo bulu pesage nigilaibao, te bidi meni yai taun tiwai elalueibao. Tama eno nage te genuai tamu ąįgo mesegelama, te nage aiyadu dologode mu bidimainu yaibao.
EZE 26:20 Te sogo eno nage te isai bidi dabego bulu pesageba tagala palaibao, tama nage te polobadu bidi dabe dali bidaibao. Te eno nage te tǫ dologode te dolali taun dabe dali sesemane sogo bidimainogo yaibao. Tama nagede te bidi dabe bidimainogo me egobeo. Tama nage te tǫde wiegi yai taun ma pedelama bidainogo ebaso, te usu munu ma egobeo.
EZE 26:21 Te eno nage mu dola silama, tama gasa we bidi hanigo nage sulama, wi emainu yaibao. Te eno nage mu silimainogo ilama, tama te we bidi dabe augwaligo nage sueinu gegebo sogo da, te augwaligo nage me sugobeo. Ena God Genuai Bidi, eno te tama po wai dao,” wali.
EZE 27:1 Genuai Bidigo te tiwai po enabolo wai,
EZE 27:2 “Tǫde bidio, Tair taun dolaibao, tama tibaso, nage gela weyu, tama hobede ebo balia po wao.
EZE 27:3 Te taun tamu ąį pąde elalu, te tamu ąį pąde elalua pabo tǫ pedai kantri dabe dali te mone me doado bage dobu si eyu, bisnis sę iduali. Ena God Genuai Bidi, eno homugo nago te balia po agaba pusao homu ebao,” wali. “Tair, nago te tama po weyu, nage te wiegi yai sawi yai polalubo taun mu da homu ebo dao.
EZE 27:4 Te taun nigibo bidi dabego, te augwaligo nage te wiegi yai sip mu tiwai pedalumainu ilali, tama te tamu ąį te nago bidibo pesage tiwai elaluali.
EZE 27:5 Augwaligo te ni pain te bulu du Hermonde selama, tama te sip nigai. Tama augwaligo te wiegi yai ni sida te Lebanon tǫde selama, tama te name ugwa walobo ni te bobobage dulai dao.
EZE 27:6 Tama augwaligo te ni kali te bulu Basande selama, te ąį togobo habesege dabe nigai. Tama augwaligo te sip aiyaba mubo soiyame ni te tobage wiegi yai ni me deli te bulu Saiprusde selama, nigali. Tama augwaligo te genuai kibu nogi elefango genuai kele dabe selama, te sip aiyaba sabo soiyame saidu au ilali.
EZE 27:7 Tama augwaligo te gasa sawi yai name ugwa pedai te bulu Isipde selama, tego te waligo pogolabo sel nigai. Te name ugwa pedai te haniani augo dodobolo pai selama, te sel nigai. Te sel te sipde walobo ugwa plak tiwai muani. Tama augwaligo te husugu yai me mama yai name ugwa te bulu Saiprusde selama, te sip guni tolasa pabo bidi dulalubo madi seselalumainu muani.
EZE 27:8 Tama te sip tomode sę eyu, habesege togobo bidi dabe, augwali te bulu Saidon taun bidi dabe, me te bulu Arvat taun bidi dabe da. Tama me badu te taun Biblos bidi dabe te sip tomode sę eyu, te sip aiyaba paliali ni name agebeledu te ąį sip tomoba holobaso te sebelebo sę eyu yai. Taun Tair, te sipba po kisilama wali, te taun Tair nageba digi po olama walio. Te nago kolesaga koneai bidi dabe te sip tomode tau sabo ebo bidi dabe tiwai da. Te gasa tǫ kantri sip dabe tigidali nageba asali, tama te sipde sę yai bidi dabe te taun tomoba pelama, te doado bage nago stua dabede abeleyu yai dao.
EZE 27:10 Te tǫ kantri Persia, me Lidia, me Libia bulu bidi hani dabe, augwali te nago ami bidi dabe bidali. Tama augwaligo te hwįbo sabele dabe, me tobolude mubo kapago nigai madi dabe me, te nago taun bagulali obode walali. Te hani dabe augwaligo te boi hwįnama, nage tau sabo sę eyu, te nago genuai nogi somainu yai dao.
EZE 27:11 Te taun Arvat ami bidi dabe augwali te nago taun obo bagulali obode dolalu, tama augwaligo te boi bidi dabe asobo suainu tonaluali. Tama te taun Gamat ami dabe te obo bobobage nigali taua dabe tede dolalu, te boi bidi dabe asobo suainu, no bidibo. Tama augwaligo hwįbo sabele dabe te nago obode walali. Te hani dabe augwaligo naga nage tau sobaso, te nage wiegi yai sawi yai taun mu pedelai dao.” Genuai Bidigo enabolo te tama balia po te taun Tairbolo wao, wali.
EZE 27:12 “Tair, te nago mone sabo bisnis sę te bulu tǫ kantri Spen dali yali. Tama augwaligo nagebolo te silva, me ain, me kapa, me soda, te tama nai mani, te augwaligo nagede te nai hauwa sainogo tiai dao.
EZE 27:13 Tama nago mone sabo bisnis sę te kantri tǫ pedai Grik dali, me Tubal, me Mesek, te tama bulu dabede bisnis sę yali, tama nago nai dabe augwaliba mayu yali, te olo mu sę yabo bidi dabe me, te tobage gasa nai dabe me, te hanigo te brasgo nigali nai dabe mayu yai dao.
EZE 27:14 Tama nago mone sabo bisnis sę te taun Togarma dali yali. Nago nai doado bage augwaliba mayu, te nago te hos dabe, me donki dabe, me te boi hwįbo hos dabe dobu si eyu yai.
EZE 27:15 Tama te taun Dedan bidi dabego me te nage dali mone sabo bisnis sę yali. Tama te tamu ąį pąde bidibo bulu tǫ kantri bidi dabe hauwago te mone sabo bisnis sę ebaso, tama augwaligo nageba te elefango kele dabe mayu, te augwaligo nageba nago doado bage sainu te husugu yai ni ebonigo dobu si yalio.
EZE 27:16 Tama te bulu Siria we bidi dabe, augwaligo nageba te wiegi yai mama yai name ugwa dabe mayu, te augwaligo haniani au yai hobolai name ugwa dabe mayu yali, tama te wiegi yai tedela yai name ugwa dabe me, te haniani au ilai mobadi, te haniani gasagi yai dila pai masigi dabe me mayu yali, te augwaligo nagede doado bage hauwa sainogo tama tiai dao,” wali.
EZE 27:17 “Tama Tair. te Juda me Israel dabego nageba te wit hauwa mayu, te pusu nai hani, me te ni oliv wel, me te tobage gasagi yai marasin, me gasa nai dabe mobadi yali, te augwaligo nagede sabo nai dobu si abeleyu, tama tiai dao.
EZE 27:18 Te taun Damaskus bidi dabego te mone sabo bisnis sę nage dali eyu, te augwaligo wain ąį dabe nageba mani, te augwaligo te taun Helbonde sali, tama te sipsip nisi dabe augwaligo te bulu Saharde sai dao.
EZE 27:19 Te bulu Wedan, me Grik, te hani dabego me, te hani Usal hani dabego me, te mone sabo bisnis sę nage dali yali. Augwaligo te ain, me sanda te tobage ni me deligo nigai wel, me te tobage nai nogi awi diligo nigai te wiegi yai denami ebo nai, te tama nai dabe sesali, te augwaligo nage dali dobu si ebo hauwa sainu tama yali.
EZE 27:20 Te Dedango hani bagego nagebolo te hos dabe tudi dilide dugabo nai satel dologode munama dugayabo ugwa blanket dabe mani, te nago augwali maiabo nai dabe dali dobu si eyu tiali.”
EZE 27:21 “Te bulu kantri Arebia bidi dabego me, te tǫ kantri Kedar tobolu bidi dabego me, te augwaligo nagebolo te kibu sipsip wai dabe me, te omai kibu sipsip me, te meme kibu dabe me mobadi yali, te augwaligo nago mabo nai dabe sabo homu eyu, tama tiai dao.
EZE 27:22 Te bulu Sebade bisnis sę ebo bidi dabe me, te taun bulu Rama bidi dabego me, te gol me, te wiegi yai denami ebo tobage nai nogi pauda me, te wiegi yai sawi yai masigi dabe me sesali, te nage dali dobu si eyu, nago mabo nai dabe sabo eyu, tama sę yai dao.
EZE 27:23 Te taun Haran, me Kane, me Iden, te tama bulu bidi dabego me, te kantri Seba me, Asur me, Kilmat me, te tama bulude te mone sabo bisnis sę ebo bidi dabego nage dali te mone sabo bisnis sę yai dao.
EZE 27:24 Tama augwaligo sesali nai dabe te sawi wiegi yai ugwa dabe me, te sisi yai name ugwa me, te augwaligo wiegi yai au ilama hobolai name ugwa dabe me, te tobage wiegi yai dila pai haliga bono, me te tobage au hauwa yai ugwa blanket dabe, me te be soiyameba salobo dodobolo pai somo ugwa dabe augwaligo sesali. Te tobage blanket dabe au wiegi yai hauwa elaluali. Tama augwaligo te nai dabe nagebolo mayu, te nago nai doado bage dabe augwaligo siyu yainogo te tiwai dobu si yalio.
EZE 27:25 Te genuai sip dabego te nago walu dabe gasa bulu tǫ kantriba sela peyu yalio,” wali. “Tama naga digi nage te genuai sip me delide te doado bage hauwa pągąnalubo tiwai nagede elaluai dao.
EZE 27:26 Tama te wę habesege bomo elama togobo bidi dabego te ąį bomonama togobaso, te nage genuai tamu ąį tomoba tugi pali. Tiali goli, bomai wali pedaliyu, tama nage dolaibao.
EZE 27:27 Tama nago mone tigidali me, au doado bage me, te tigidali sip guni tubo tau sabo bidi me, te sip tomode sę ebo kamda bidi me, te tigidali bisnis sę ebo bidi me, te nago ami bidi tigidali me, te nage dali bidali gasa bidi tigidali, augwali me nage dolali side te tamu ąįde hagawaibao.
EZE 27:28 Tama te sip guni tubo bidi dabego i dwagila mu i waibao, tama augwali dolobo sę yali te tǫ mumunu yali sęgo te tamu ąį sane nambis me mumunu yaibao,” wali.
EZE 27:29 “Tama tialima, te gasa sip te sip tugi pabo madi tugi pelama, tama te sip guni tubo bidi dabe me, te sip tomode sę ebo bidi dabe dali, augwa sip dabe tagalama, tama augwali tigidali pelama, te tamu ąį saneba doligi paibao.
EZE 27:30 Te tigidaligo nagede haliga hobede eyu, dwai gela nagede waibao. Tama augwa te homu dene ebo kolesaga wali peyu, te augwa tobolude pu pilama, tama kelide pila muyu, tama te kelide ugwa begelu, eda begeleyu iduaibao.
EZE 27:31 Tama augwa tobulu nisi poala sąnama, te wane ilaibao. Tama augwa te homu dene ebo side mubo ugwa gudama, te augwali dwai haliga mu eyu, te gela oladu bidaibao.
EZE 27:32 Tama augwa te bidi isaide wabo balia po waibao. Tama augwaligo e tiwai balia po waibao, ‘Tair, te taun me deli te nage dolali tiwai gilama me ebeo. Nage te tamu ąį tomode elaluali,
EZE 27:33 tama nago naga walu doado bage te gasa tǫ pedai kantriba te tamu ąįdu tolali. Te we bidi dabe augwaligo te nai dabe doado bage siyu, te augwa wiegi yai homu pemene yalio. Te king dabe augwaligo mone sabo bisnis sę nago te naide yali, tama augwali te mone sabo bidi mu tiwai pedelali.
EZE 27:34 Tiali goli, megi da, nage te tamu ąįde dolobao. Tama nage te tamu ąį tomoba mu dulali. Te nagede bidali bidi tigidali, me te nago doado bage walu dabe dali, tigidali te ąįde hagawai dao.’ Augwaligo te tiwai balia po waibao.
EZE 27:35 ‘Te tamu ąį pąde bidibo taun we bidi dabe, augwaligo nage dolali po odama, te augwali dwai noma mu salio. Tama augwaligo king dabe me wi umagi mu eyu, te augwaligo gesabidi gasagi yai mu hasegelali.
EZE 27:36 Nage dwagila mu dolali, tama nage te tǫde mu ma bidigobeo. Tama nage te tigidali mone sabo bisnis sę ebo te tigidali tǫ pedaide bidibo bidigo nage sulama, te augwali wi mu eyu, tama augwaligo te homu yaibao, “Tiyu, te tiwai sę daba me pedalidali,” homu yaibao,’ augwaligo te balia po waibao.”
EZE 28:1 Genuai Bidigo enabolo te po wali,
EZE 28:2 “Tǫde bidi, eno homugo nago Tair kingbolo ena God Genuai Bidigo eno po aga dali pusainogo ebo po pusigi pao. Eno po e dao. Tair king bidi, nago naga nogi ugwaba siyu, te po wali, nage god me deli dao, wali. Tama nago bulu te god dabego bulu yali gilama tamu ąį tomode elalubao. Mu tama, nago te po wali, tiali goli, nage god menio, nage olo bidi dao.
EZE 28:3 Awe, nago homugo nago wiegi yai homugo Danelgo wiegi yai homu kolesaga edelai da homu te ebao. Tama nago homugo tigidali geme dualali po dabe nago koneaiba homu te ebao.
EZE 28:4 Te nago genuai homu kolesagago naga mone bidi pedaliyu, me nago gol me silva hauwa mu elaluyu, te homu ebao.
EZE 28:5 Tama nago wiegi yai bisnis sę elama, tama nago tede mone hauwa nago salio. Tama tibaso, nago naga te mone dabe me te nai hauwade homu elama, tama nago hagoma genuai mu ebao,” wali.
EZE 28:6 “Tama tialima, ena God Genuai Bidi, eno nagebolo megi e obao. Nago hagoma eyu, nago homugo nago homu kolesaga te god dabego homu kolesaga tiwai dao homu te ebao.
EZE 28:7 Tama tibaso, eno te homu dene isąbo boi bidi dabe dwai mu teba tagala palama, tama nage dali boi hwįmainogo yaibao. Tama augwaligo nago naga homu kolesagago sali wiegi wiegi yai nai dabe tigidali dolagasaibao. Awe, nago gawebo nai dabe sese augwaligo dolaibao.
EZE 28:8 Tama augwaligo nage dolama, mu tagalama, tama nage naga bulude elama muaibao, te tamu ąį tomode. Tama nage aiyaba isai bidigo buluba aiyaba dulaibao.
EZE 28:9 Te augwaligo nage elainogo ebode nago augwalibolo po weyu, ‘Te ena god me da,’ nago te po waiba homu eba, agawe? Mu menio. Te nago koneaibao, nage olo bidi yabo homu yaibao. Tama nage te gasa tǫ kantridu asali bidi dabego nogode elalubadi, nage god menio homu yaibao.
EZE 28:10 Te boi bidi dabego nage dolama, tama nage dwai olo nai meni yai bidi tiwai isibo ąǫ yaibao. Ena God Genuai Bidi, eno po polo wali.”
EZE 28:11 Tama God Genuai Bidigo enabolo po genina ma weyu, te po wali,
EZE 28:12 “Tǫde bidi, nago te Tair king bidide hobedai balia po olama, tama agabolo e tama po wao. ‘Tair bulu king bidi, ena God Genuai Bidigo po nago odao. Polobadu nage wiegi yai bidi mu bidiyu, tama nago tigidali bidi aiyaba elaluama bidai dao. Tama nago homu kolesaga genuai mu elama, tama nage tonobo sawi mu yai dao.
EZE 28:13 Te nage te Iden gide bidai bidi tiwai ąǫ yai dao, te Godigo wiegi yai gi. Tama nage te wiegi yai sawi yai masigigo au yai dao, te augwaligo te masigi daganabo nai dabe te golgo nigai. Te masigi dabe e dao, rubi, me topas, me daimon, me beril, me kanilian, me jaspa, me sapaia, me emeral, me ganet dao. Te nai dabe tigidali eno dodolagalali, te nage eno te tǫde pedalobode somainogo eyu.
EZE 28:14 King, eno nage tonalubo ensel bidi tiwai sa muai dao, tama nage dolaluyu, tama naga bogo dinigalu dolaluai dao. Tama nage eno bulu dude bidiyu, tama nage sawi yai udula pai masigi tomode bilai dao.
EZE 28:15 Te eno nage tǫde pedelemainu yali sogo da, nago kolesaga te dwagi yai mu yali, tama nago nai mede me geda mubeo. Tiali goli, nago nosali dwai kolesaga elama, tama nago eno gedude sęgę elaluali.
EZE 28:16 Nago bisnis sę bulu hauwaba yali. Tama nago te we bidi dabe dali hwįnama, tama nago bisnis sę tau somainogo yali, tama nago sęgę sali. Mu tama, nage tonalubo ensel bidi tiwai dao, tiali goli nage eno gedude meda mu yai pedelai dao. Tama eno nage sela sąnama, tama nago eno bulu du taga soali. Tama nage te udula pai masigi tomode ma me bidibeo.
EZE 28:17 Nago homugo tiali, nago gesabidi sawi yai mu dao homu yali, tama nago hagoma mu elama, tama naga nogi ugwaba salio. Nago genuai homu kolesaga elaluali, tama nago homugo te homu kolesagago te genuai nogi sabo dao homu yali. Tiali, te po page delide naga tama eno nage aiyaba te tǫba sąwai dao, te gasa meba king dabego nage sulama, tama augwaligo nage gisugu dwai mu momainogo yali.’
EZE 28:18 ‘Tair bulu king bidi, nago te bisnis sę yali sogo, te nago dwai kolesaga hauwa mu yalio, tama nago te sęgęgo te lotu be dabe dwai meda yai mu pedelalio. Tama tibaso, eno te isi te taun tomode pedelemainu elama, tama sese ula silali, tama te isi sisi dulu keli hali naga te elaluali. Tama gasa tigidali bidi hanigo suali.
EZE 28:19 Nage dolama, mu dolai elalubadi, nage tǫde munu me ma bidigobeo. Tama tigidali we bidigo te dwai sę dabe nagede pedelali po odama, tama augwali noma dwai mu salio.’ Nago te po te Tair king bidibolo pusao,” Genuai Bidigo enabolo te po wai.
EZE 28:20 Genuai Bidigo enabolo te po wali,
EZE 28:21 “Tǫde bidi, nago te taun Saidonba ugwa tonama, tama te po wao, te aga dolaibao po wao.
EZE 28:22 Nago te Saidon dabebolo God Genuai Bidi eno augwalibolo yabo po pusao. Augwalibolo walao, ena God, eno augwali dali boi bidi homu elama, tama eno augwalibolo eno tedali gasagi yai kolesaga augwalibolo ola mawaibao. Tama augwaligo enabolo genuai nogi mawaibao. Tama gasa hani dabe mebago eno te Saidon dabebolo yabo te kolesaga augwaligo sulama, tama augwaligo eno bomo koneaibao. Tama te sogo naga te Saidon dabe augwaligo koneaibao, ena deli naga ena Genuai Bidi dao homu yaibao.
EZE 28:23 Te eno augwaliba genuai gasi dwai tagala palaibao. Tama eno tigidali badu boi bidi dabe hogodolama, tama augwali dali hwįnama, tama augwaligo we bidi hauwa ela silimainu yaibao. Tama te Saidon dabego kaneme dabe te taun sunumi dabedu kegelo soaibao. Tama te Saidon dabego bugagia mu koneama koneaibao, ena deli naga ena Genuai Bidi dao homu yaibao,” wali.
EZE 28:24 “Ena Genuai Bidi, eno po genina ma weyu, te po obao. Te bidi hani dabe augwali Israel dabe pąde bidalubo bidi dabego Israel dabe dali boi bidi mu elama, tama augwali dali dwai sę mu yali, te sesane yai bonogo bidi tigide enebo tiwai yali. Tiali goli, augwaligo te kolesaga nosali ma elamo dao. Tama te sogo te Israel dabe augwaligo koneaibao, ena deli naga ena God Genuai Bidi dao homu yaibao,” wali.
EZE 28:25 “Ena God Genuai Bidi, eno te po obao. Te eno wiegi yai doloba pai kolesaga te Israel dabe tomode ola mobaso, tama gasa hani bidi dabego sueibao. Te sogo eno te Israel dabe augwali eno te gasa gasa buluba sela sąwani bage deli deli ma oda selama, ma odasa asaibao, tama eno augwa kantriba ma odasa asaibao. Tama augwali augwa tǫde mu tama mu bidaibao, te eno Jekopbolo mani, te tǫ dao, eno sę bidibolo.
EZE 28:26 Tama augwali bugagia bidiyu, augwa be dabe sę eyu, augwa wain gi buluyu yaibao. Tama eno gasa hani bidi dabebolo eno dene mawaibao, te augwaligo te Israel dabe dali dwai sę yali bage. Tama te sogo te Israel dabe augwali bugagia bidiyu, tama augwaligo e tama koneaibao, ena deli naga God augwaligo Genuai Bidi dao homu yaibao,” te po wai.
EZE 29:1 Te da kalabus bulude bidibadi te kibu be nogo si, te 10 wabode, te polua nogo si, te 12 deide, Genuai Bidigo enabolo te po wali,
EZE 29:2 “Tǫde bidi, nago Isip king bidiba ugwaba tonao, tama te po wao, ena God eno aga dali, aga Isip we bidi dabe dali sese dolaibao po wao.
EZE 29:3 Nago te God Genuai Bidi eno po agabolo pusuyu, te po walao, ‘Isip king bidi, ena nago boi bidi pedalobao. Nage te pukpuk me genuai deli te Isip dabego wę dabede pila mubo tiwai dao. Nago te po wabo dao. Nago naga digi naga ma geselai dao olama, tama te ąį Nail te naga ąį dao wabo dao.
EZE 29:4 Tama tialima, eno huk nago penanede munama, tama te sųgų dabe nago abolode dagana somainu yaibao. Tama eno nage kegelama, tama te sųgų dabe dali dage ąį tagalama, dage buluba soaibao.
EZE 29:5 Tama eno nage te sųgų dabe dali dage selama, te wa pai bulu besela sąwaibao. Tama nago tigi te tǫde pila mubadi, tama nago tigi pubulabo bidi meni yaibao. Tama eno te bulu hasa dabe, me ba dabego nago tigi tumainogo sula tagalaibao.
EZE 29:6 Tama tialima, dage Isip dabego koneagameo, ena deli naga ena God Genuai Bidi dao homu yagameo.’ Te po te Isip king bidibolo wao,” wali. “Te po me agabolo pusao, ‘Te Israel dabego homugo tiai da, dage Isip dabego augwali tau sogowe homu yai da, te boi hwįbode. Tiali goli, dagego augwali me tau sai menio. King, te Israel dabe augwaligo homugo tiali, nage te nogo tolasa pabo bomai dono tiwai dao homu yali. Tiali goli, menio.
EZE 29:7 Te augwaligo nage nogo tola selama, bilainogo ebode da, nage te sigi dili tiwai bomo togwa pelama, bidigo punali badu enebo tiwai yali. Augwaligo nage dąų olama touwali, tiali goli nage togwa pali, tama augwali tula munama, augwaligo tudi dolali. Tiyu, nago augwali tau sabeo.
EZE 29:8 Tama tibaso, ena God Genuai Bidi eno te po obao. Te eno boi bidi dabego dage Isip dabe dali boi hwįagasomainu odasa asaibao. Tama augwaligo te we bidi eleyu, me hasa dabe eleyu yaibao.
EZE 29:9 Tama te kantri Isip dolama, tama te kantri te olo tǫ bulu mu elaluaibao. Tialima, dagego bugagia mu e tama koneaibao, ena deli naga ena Genuai Bidi dao homu yaibao,’ te po agabolo wao,” wali. “‘King, nago te po wai dao, naga digi te wę Nail nigilai dao po wai dao. Tama nago te po wali, te naga ąį dao, wali.
EZE 29:10 Te po te dwai mu dao. Tama tialima, ena nago boi bidi me te ąį Nailgo boi bidi pedalibao. Tama eno tigidali Isip bulu badu olo tǫ mu pedalomainu ilaibao. Te taun Mikdol not badu gagalama, tama pelama, taun Aswan te saut badu usu nigi paibao, te Sudan tǫ dąį pąba usu nigi paibao.
EZE 29:11 Tama te kibu be 40, bidi sese si kibu bede, te nai dabe me deli te kantri Isip tomode me elalugobeo. Tama tede bidi ma hasa dabe tede me biligobeo.
EZE 29:12 Tama eno e kantri Isip geninama mu dolaibao. Te Isip taun dabe, me te tǫ sese dali, mu dwai dolai elalueibao, te gasa dolali tǫ dali taun dabe dali aiyaba elalueibao. Tama eno te Isip dabego taun dabe mu dolama tagalama, tama augwali kibu te bidi sese si kibu be mu tiwai tama me bidaibao. Tama eno te Isip dabe augwali augwa kantride sela sąwaibao, tama augwali gasa hani we bidi tomode bida bida paibao,’ agabolo te po wao,” wali.
EZE 29:13 “‘Ena God Genuai Bidi, eno te po wali dao. Tama te 40 kibu be silibo si, teda eno te Isip dabe augwali eno sela sąnama pali te kantride ma oda saibao, tama augwali augwa bulu tǫ muba ma odasa asaibao.
EZE 29:14 Te augwali asela silama da, teda augwali u badu te saut badu te Isip dabego tǫde bidaibao. Tama Isip bulu te polobadu bomai kantri bidali tiwai ma bidigobeo.
EZE 29:15 Te eno augwali olo nai tiwai ilama, tama augwaligo polobadu te tobolu gagea pelama, meba kantri dabe tonaluali yali gilama me egobeo. Augwaligo te gasa tǫ pedai kantri tonaluabo bomo me elalugobeo.
EZE 29:16 Tama te Israel dabe augwaligo te sę te Isip dabede pedelali sę suaibao, tama augwaligo koneaibao, augwaligo te Isip dabego augwali tau sao walide augwaligo sęgę sali koneaibao. Tama te Israel dabe augwaligo te kolesaga ma egobeo. Tama te Israel dabe augwaligo e tama bugagia koneaibao, ena deli naga ena God Genuai Bidi da homu yaibao.’ Esekiel, nago te po te Isip king bidibolo wao,” Genuai Bidigo te po wai.
EZE 29:17 Te deli wabo polua, te deli wabo dei te da kalabuside bidibadi kibu be 27 wabode, Genuai Bidigo enabolo e tama po walali.
EZE 29:18 “Tǫde bidi, odao. King Nebukatnesar aga ami bidi dabe dali, augwaligo te taun Tair dali boi hwįbo sę te yali. Kingo aga ami bidi dabebolo sęgai hwįbo nai dabe tolomainu ilama, tama te tialigo augwali tobolu wane ilama, tama augwaligo nage wali dagala palio. Tiali goli, king aga ami dali augwali olodali bomai sę yali. Augwaligo te hwįbode augwaligo wiegi yai nai me siyu ebeo.
EZE 29:19 Tama tialima, megi da, God Genuai Bidi eno te po obao. Eno te Isip dabego tǫ te king Nebukatnesarbolo mawaibao. Agai dolama, tama Isip dabego mone dali, doado bage dali sese sela paibao, te aga ami bidi dabego bomai sę yali pe tiwai saibao.
EZE 29:20 Te eno Isip agabolo, me aga ami dabe, augwalibolo mawaibao. Te augwa bomai sę yali te pe tiwai saibao. Magi baso meni, te boi augwaligo hwįanide te eno sę dao. Te da God Genuai Bidi eno po dao,” wali.
EZE 29:21 “Tama te sę pedalobo sogo da, teda eno Israel dabego bomo ma pedalumainu ilaibao. Tama tǫde bidi, ena nago Israel tomode po bomonama omainu ilaibao. Tama augwaligo bugagia koneaibao, ena deli naga te Genuai Bidi dao homu yaibao,” te po wali.
EZE 30:1 Genuai Bidigo enabolo e tama po walali,
EZE 30:2 “Tǫde bidi, eno homugo nago ena God Genuai Bidigo po pusumainu homu ebao. Nage gela bomonama mu olama, tama hobede mu dao e po wao,
EZE 30:3 ‘Pąde tama dwai sogo pedelaibao. Te da, te Genuai Bidigo tigidali we bidibolo dene mabo sogo pedelaibao. Te da te pǫ pedalobo genuai sogo yaibao, tama te sogo te we bidi hauwa dolobo sogo pedelaibao.
EZE 30:4 Tama te sogo te boi bidi dabego te Isip dabe dali boi hwį yagasaibao. Tama genuai sęgę te Sudan we bidiba pedelaibao, te Isip saut badu elalubo distrik dao. Te boi bidi dabego Isip we bidi hauwa elama, isila silama, tama te kantri dolama, tama Isip dabego mone me doado bage selama, tama augwa kantriba selasa paibao,’ te po wao,” wali.
EZE 30:5 “Tama te hwįbode me Isip amigo abelali bage, te Sudan hani ami bidi hauwa, me Lidia, me Libia, me Kup, me gasa hani bidi me, augwali te hwįbode te Isip bage dali isaibao,” wali.
EZE 30:6 “Tama ena Genuai Bidi eno po genina ma weyu, te po obao, ‘Te u not badu taun Mikdoldu gagalama, tama taun Aswan te saut badu elalubo buluba usu nigi paibao, te boi bidi dabego te Isip dabe tau siyu, hwįbo bidi dabe sese tama ela silaibao. Te Isip dabe augwaligo augwa bomode wiegi yai homu pemene mu ebo dao. Tiali goli, te bomo te mu tama sia saibao. Te da God Genuai Bidi eno po dao.
EZE 30:7 Te eno Isip dabego tǫ dolaibao, te dolobo sę genuai mu yaibao, tama eno agai taun dabe mu dolaibao.
EZE 30:8 Te eno Isip dabego nai dabe sese tama isi ulama, tama te Isip dabe tau sabo sę ebo bidi dabe me dolaibao. Tama te Isip dabe augwaligo e tama bugagia koneaibao, ena deli naga ena Genuai Bidi te yaba homu yaibao,’ te po obao,” wali.
EZE 30:9 “Te Sudan dabe augwali bugagia bidiyu, augwaligo homugo magi sę me augwalide pedalogobe homu te ebao. Tiali goli, eno te Isip bulu dolobode, teda eno te bidi dabe Sudanba te geba sipdu pomainu tagala palaibao. Augwali te Nail ąį daide te sipdu pelama, tama augwaligo te we bidibolo eno te Isip dabe dali yali sę po pusaibao. Tama te Sudan dabe augwali noma dwai mu saibao. Te tamadi tama eno te te tama tiaibao,” wali.
EZE 30:10 “Ena God Genuai Bidi, eno po genina ma weyu, te po obao, te eno te king Nebukatnesar aga ami dali augwali aselama, augwali Isip dabego mone me tigidali nai dabe somainu sula tagalaibao.
EZE 30:11 Te Babilon dabe augwali te bidi hani dwai mu dao, te homu dene isąbo bage dao. Tama augwali aselama, tama Isip mu tama dolagasaibao. Te augwaligo augwali te bainat hwągo elama, tama isai bidi dabego tigi te Isip bulu tǫde mu pągąna paibao.
EZE 30:12 Tama eno te wę Nail sula somainogo ilaibao. Tama eno gasa kantri bidi dabego Isip bulu sese dolomainu ilaibao. Tama bidi dwai dabego augwaligo te Isip dabego tǫ saibao. Te da Genuai Bidi eno po dao.”
EZE 30:13 “Ena Genuai Bidi eno po genina ma weyu, te po wali. Te eno te taun Memfis te Isip bulude te tibo god dabe piksa noma sese tama mu silaibao. Te eno Isip dabego king sela sąnama, tama Isip dabego king meni emainu yaibao. Tama eno te Isip dabe augwali wi dwai mu emainu ilaibao.
EZE 30:14 Tama Isip bulu sese tama isi ula silaibao. Tama eno u saut badu te Isip bulude te olo bulu pedalomainu yaibao. Tama taun Soan te not badu te bulu sese tama isi ula silaibao. Tama te boi bidi dabego te taun Tebes bagulali obo aluama, tagalaibao. Tama we bidi hauwa elama, silaibao. Eno taun Pelusium sębę ebao, te da te Isip dabego bomai taun dao, tama eno aga dene genuai menama, tama augwali sęgę me dene genuai mu saibao. Tama eno Memfis dabebolo sęgę sesemane sogo dene mawaibao.
EZE 30:17 Tama te boi bidi dabe augwaligo te taun Heliopolis me Bubastis taun gesi bidi dabe sese tama ela silaibao. Tama augwaligo te taun side we bidi dabe sese nogo bono dunama, tama gasa kantriba kalabus igi paibao.
EZE 30:18 Te Isip dabe augwa bomode augwali gana peyu yai da. Tiali goli, eno augwaligo bomo sese silimainu yaibao. Tama te sogo naga te taun Tapanesde hulia saibao. Tama genuai pǫgo te Isip bulu tigidali tama mesega saibao. Tama te boi bidi dabego te Isip bulude tigidali taunde we bidi dabe selama, tama augwali gasa kantriba kalabus igi peyu, odasa paibao.
EZE 30:19 Tialima, te tama kolesagago eno Isip dabe dene mawaibao. Tama augwaligo e tama bugagia koneaibao, ena deli naga te Genuai Bidi te yabao olama koneaibao.” Genuai Bidigo te po wali.
EZE 30:20 Te hasia wabo poluade, te dei namba 7de, te kibu be 11 wabo, te kibu bede da kalabuside bidibadi Genuai Bidigo enabolo te po walali,
EZE 30:21 “Tǫde bidi, eno Isip bulu king bidigo nogo aboai dao. Tama bidi mego agai nogo pobilibeo, me te ni name munama, kębeo. Te nogo bomo ma elama, tama te bainat ma nogo tulama hwįmainu me ebeo.
EZE 30:22 Tama tialima, God Genuai Bidi eno e po te obao, eno Isip king bidi dali boi bidi te ebao. Tama eno agai nogo si tama togolama tagalaibao, te hasia aboai nogo dali, te wiegi yai nogo dali tama togwa paibao. Tama te bainat agai nogode honoga pelama, tulaluaibao.
EZE 30:23 Tama eno te Isip we bidi dabe tedela palama, te gasa kantri dabeba sela sąwaibao.
EZE 30:24 Tama tialima, eno Babilon king bidigo nogo si bomo ilama, tama ena bainat hwą te agai nogoba muaibao. Tiali goli, eno Isip king bidigo nogo si tama togwa sąwaibao, tama aga genuai dene mu saibao. Tama Babilon king bidigo gedude aga hwąwa dwai mu waibao, te bidi me isainogo wabo tiwai yaibao.
EZE 30:25 Mu tamao, eno agai bomo sela sąnama, tama eno Babilon king bidigo bomo emainu ilaibao. Eno ena bainat te Babilon kingbolo mawaibao, tama agai Isip bidi dabe elama isilaibao. Tama te sogo te Isip dabe augwaligo bugagia koneaibao, ena deli naga ena Genuai Bidi da olama, koneaibao.
EZE 30:26 Tama eno te Isip dabe sela sąnama, tama augwali te tedela pelama, augwali te gasa kantri dabeba subigila bidigi paibao. Tama te sogo augwaligo bugagia koneaibao, ena deli te Genuai Bidi dao, te koneaibao,” wali.
EZE 31:1 Te namba 11 wabo kibu bede da kalabuside bidali kibu bede, te sela wabo poluago deli wabo deide, Genuai Bidigo enabolo te po walali,
EZE 31:2 “Tǫde bidio, eno homugo nago eno po te Isip king bidi dali, aga we bidi dabe dali, augwalibolo eno po pusumainu ebao. Te po da, e dao, ‘Dage Isip dabe, dage bomai bidi hani mu dao. De mu dagego elalubo bomai bomo tiwai elalubowe?
EZE 31:3 Te Asiria dabede homu kone palao. Augwali te kantri Lebanonde elalubo te bobobage ni bǫ o sida tiwai bomonama mu dolaluai dao. Te nigo te wiegi yai bobobage nologo dabe elaluyu, me agai dologode wiegi yai kedau elaluyu yai dao. Te ni bǫ te bobobage mu elama, tama meba ni dabe aiyaba elaluai elaluali.
EZE 31:4 Tama tǫ tomode elaluali węgo te ni sida genuai mu holomainu ilali. Te wę te tǫ daide ugwadu pedaliyu, tama te ni page pąde te ąį biliyu yali, tama tilama nosali te ąį te gasa meba ni dabeba pali.
EZE 31:5 Te wę hauwa mu elaluyu, tama te ni genuai mu holali, tama gasa meba ni dabe aiyaba elaluali. Tama agai nologo dabe genuai mu elama, tama bobobage mu yali.
EZE 31:6 Tama te haniani ba dabe augwaligo augwa be te ni nologoba sę yagasai dao. Tama me te bulu hasa dabe augwali te ni nologo dologoba bidagaselama, tama augwaligo augwa gǫų te ni nologo dologode sai da. Tama tigidali kantri we bidi augwali te ni dologoba duayagasiyu yai dao.
EZE 31:7 Te mu tama dao, te ni da, te polalubo sawi yai mu dao. Agai te bobobage nologo mu elalubao, tama agai pedali te tǫ dologode elalubo węba dulubo dao.
EZE 31:8 Te eno gi Idende te ni tiwai wiegi yai ni me elalubeo. Agai te tigidali te gide sida ni tiwai me edelai elalubeo. Tama te ni sidago nologogo te ni paingo nologo aiyaba elaluai elalubao, me te eno gide meba gasa ni dabe aiyaba elaluai elalubao.
EZE 31:9 Ena digi te ni nologo hauwa holomainu ilama, tama aga wiegi yai ni holomainu ilai dao. Tama tialima, eno te gi Idende tigidali ni dabe augwaligo te ni pęsą yalio,’ te po pusao,” wali.
EZE 31:10 “‘Te bobobage ni sida bǫ, te Asiria tǫ kantri da, agai hagoma dogia pelama, tama aga tobolu gagea pabo sę ebo genuai mu yai dao. Magi baso meni, aga ugwanu bobobage mu holama, meba ni dabe aiyaba elaluai baso. Tialima, megi God Genuai Bidi, eno agade pedelali nai dabe po pusaibao.
EZE 31:11 Eno aga tudi ola mawai dao. Tama eno aga gasa bomai king mego nogoba mani. Tama te kingo te ni agai yali dwai kolesaga wei ponoyu, dene mawai dao.
EZE 31:12 Tama homu dene isąbo bidi hani dwai mu dabe mu aselama, tama te ni bǫ gelama, tǫba degelama, tama olo tǫde elalumainu yali. Tama agai nologo dabe da, te bulu du dabeba, me malu buluba, me bulu bubiabi togoaluai madi totogaluai dao. Tama te we bidi hani augwali polobadu te ni nologode polobadu duala sagasiyu yali, te bage augwaligo tagalama, subigila pepelawai dao.
EZE 31:13 Te ni tǫde pila mubadi, te ba dabe aselama, tama agaba ma duayagasai dao. Tama te bulu hasa dabe auwali me aselama, tama te ni nologo page te ni tigiba teba bidagasai dao.
EZE 31:14 Tama tibaso, nosali da, eno te ni tiwai bobobage me holomainu sula tagalogobeo. Te augwaligo wę hauwa sobadi me tagalao, augwali ugwanu bobobage me hologobeo. Menio. Augwali sese isimainu yaibao. Te bidi dabe yali gilama tama augwali te isai bidi dabego buluba aiyaba dulaibao,’ te po te Isip bageba pusao,” Genuai Bidigo enabolo te po wali.
EZE 31:15 “‘Ena God Genuai Bidi, eno te po obao. Tama te ni isilama, tama te isai bidigo buluba polo pai digi da, te da eno te tǫ dologode wę dabego aga hobede emainu ilama, tama aga mesega somainu yaibao, tama eno te wę dabe paliama, tama augwali ugwaba tǫba ma holomainu egobeo. Tama tiyu, te ąį dabe hauwa sula siyu yai dao. Tama eno te Lebanon bulu du dabede be hulia siyu emainu yali. Tama meba gasa ni dabego te nide hobede elama, tama augwali me sasia pai dao.
EZE 31:16 Te eno te ni te isai bidi dabego buluba polo sąwai madi da, aga moni busugu wabo odama, teda tigidali kantri tǫ mobodo yai dao. Tama te me gasa wiegi wiegi yai ni dabe te isai bidigo bulude polo bidali ni dabe, augwaligo te ni dolai sulama, tama augwali me wiegi yai homu dwasianu yai dao. Te augwali te ąį hauwa sali ni dabe, augwali Iden gi ni dabe dao, me augwali te kantri Lebanonde wiegi wiegi yai ni dabe me dao.
EZE 31:17 Te ni bǫ o sida nologo dologode dualalu yali bidi dabe augwali me, te ni tau siyu yali te bidi dabe dali, augwali te ni dali te isai bidi dabego buluba pai. Tama augwali te boi bidi dabego bainat hwągo elai bidi dabe dali bidaibao,’ te po pusao,” wali.
EZE 31:18 “‘Te Isip king, aga we bidi umabo mu dali, augwali te ni bǫ sida tiwai dao. Te Iden gide te ni bobobage wiegi yai te ni tiwai me holai menio. Tiali goli, megi da, te ni aga te Iden gide ni tiwai pedelama, tama aga te isibo bidigo buluba aiyaba dulaibao. Tama aga te wiegi yai kolesaga wali pisąbo bidi dabego bidi hani dali bidaibao, me te boi bidi dabego boide elali bidi dabe dali bidaibao, te gų pagede.’ Ena God Genuai Bidi, eno po polo wali dao,” wali.
EZE 32:1 Te hasia wabo dei, te namba 12 polua, te namba 12 kibu bede da kalabuside bidali sogo, Genuai Bidigo enabolo e tama po walali,
EZE 32:2 “Tǫde bidi, nago Isip king bidide hobedai gela weyu, e tama balia po wao, ‘King, nago homugo nage te meba kantri tomode te boma pai laion yowi da homu ebo dao. Tiali goli, menio. Nage te moni pukpuk me deli te węde bidiyu, sągą subigila sąyu ebode wę dunugu ilibo pukpuk tiwai dao.
EZE 32:3 Tama tialima, ena God Genuai Bidi eno e tama po e obao, te eno we bidi hani hauwa mu odasa asaibao. Tama eno tola sabo wa nageba sąnama, tama nage tola saibao, tama augwaligo nage wę kemi saneba ugwaba kegasa asaibao.
EZE 32:4 Tama nage eno tǫba ugwa sana palaibao, awe, te pepeli diliba muaibao. Tama eno tigidali ba dabe, me eno tigidali bulu tǫde hasa dabe odasa aselama, nage tumainogo yaibao. Tama augwaligo haliga mu pągąna paibao.
EZE 32:5 Tama eno nago te tigi meba selama, tama bulu duba sąnama, tama nago te mi dabe me dili dabego te odogo malu bulu me pągąna paibao.
EZE 32:6 Tama eno nago kaneme digibuluba gea palaibao. Tama te kaneme agai tigidali ąį dabe usu elama, tama tigidali bulu du dabe mesega sigi peyu yaibao. Tama te odogo malu bulu dabe te nago tigi migo pągąna mu paibao.
EZE 32:7 Te eno nage silibo sogo da, teda eno dagalu halua selama, tama tigidali hǫ dabego ula sula somainogo yaibao. Tama me eno te pǫgo te giliga mesega somainu elama, tama te giliga ula munu ma me egobeo. Tama te polua me ula me egobeo.
EZE 32:8 Awe, eno tigidali dagalude ula dabe geme dualaibao. Tama nago kantri mu hulia saibao.’ Te da God Genuai Bidi eno po dao,” wali.
EZE 32:9 “‘Te we bidi hauwago eno nage polo dolali po odama, tama augwali wi dwai mu yaibao. Tama te po da, te kantri dabe nago susiąma yali te bulu dabeba usu nigi paibao.
EZE 32:10 Te nage eno bainat hwągo dolobo sogo, te king dabe, me te tigidali kantri we bidi dabego sulama, tama augwali wi dwai mu selama, didibili elama, tama augwali noma mu saibao. Awe, te sogo tama te king dabego te homu yaibao, tiyu Godigo da dali te tiwai sę da dali idali homu yaibao.’”
EZE 32:11 “Te po wao, ‘Isip king, ena God Genuai Bidi, eno te tama po wali dao. Te Babilon kingo nage dali hwį yagasaibao.
EZE 32:12 Te eno te dwai kantrigo te homu dene isiąbo ami bidi dabe dwai mugo nago we bidi dabe sese ela silagasomainu yaibao. Tama augwaligo dage Isip dabego wiegi yai homu gana pabo te nai dabe tigidali mu dolagasaibao.
EZE 32:13 Tama eno nago tigidali kau kibu dabe augwali tigidali wę tubo pesagede ela silaibao. Tama te bidi me kau kibu te ąįde biliyu, te ąį dunugu ilabo ma meni yaibao.
EZE 32:14 Tama tialima, eno te tigidali ąį dabe wiegi yai elaluyu, tama bugagia soayu ilaibao. Te God Genuai Bidi eno po dao.
EZE 32:15 Te eno nago we bidi ela silama, tama nago kantride tigidali nai dabe sela sąna silai madi da, teda te kantri te olo tǫ mu pedalaibao, tama da, dage Isip dabego bugagia koneaibao, ena deli naga ena Genuai Bidi dao homu yaibao.’ Te tama balia po pusao,” wali.
EZE 32:16 “Tama te gasa kantri we sibigo augwaligo te hobedai balia po waibao, augwaligo te dage Isip dabe homu dene eyu, gela wabode te balia po waibao. Ena God Genuai Bidi eno po polo wali dao,” te po wali.
EZE 32:17 Te da kalabus te Babilon bulude bidibadi, kibu be namba 12 wabo sogo, te namba 15 deide, te namba 12 poluade, te kibu bede God Genuai Bidigo enabolo e tama po walali.
EZE 32:18 “Tǫde bidi, nago hobedai gela te genuai Isip we bidi hanide wao. Tama nago augwali te meba gasa bomai kantri we bidi dabe bidibo pesageba, te isai bidigo buluba talua sigi pomainu nago tagala palao.
EZE 32:19 Te Isip dabebolo e tama po walao. ‘Dagego homugo dagego ugwaba ela holama, tama dagego gasa we bidi aiyaba elaluai dao homu eba, agawe? Mu menio. Polo tama dage te gasa hani bidi dabe, te dwai kolesaga ebo we bidi hanigo bidi dabe bidalubo isai bidigo buluba bidigi piąo, te wiegi yai kolesaga wali pisąbo bidi hani dali bidigi piąo,’ te po te Isip dabebolo wao,” te po wali.
EZE 32:20 “Tǫde bidio, bainat hwą te Isip tǫde ami bidi dabe polo elabo dola muai elalubao. Augwali isimainu sula tagalama, tama augwali te gasa hani meba te boide isali bage dali bidigi pomainu yao.
EZE 32:21 Te isai bidi dabego bulude da, te boi hwįbode genuai nogi yai bidi dabego te Isip dabe, me augwali sali bidi dabe subode augwali wiegi yai homu yaibao. Augwali te buluba aiyaba dulama, tama augwaligo te Isip dabeba hae weyu, e tama po waibao, ‘Te wiegi yai kolesaga wali pisąma ebo hanigo bidi dabe, te augwali e buluba dulama, tama augwali e bulude te bidibao. Te boi bidi dabego augwali elama, isilai dao,’ te gų pagede bidibo bagego augwalide te po waibao,” wali.
EZE 32:22 “Kantri Asiria aga ami bidi dabego gų page dali te bulude te elalubao. Te boi bidi dabego augwali boide ela silai dao.
EZE 32:23 Tama augwaligo gų page te bulu aiya badu mu elalubao. Tama Asiria kantri aga gų page te tomode, te Asiria dabe augwali isisąma ebadi da, augwaligo hauwa we bidi wi mu emainu ilai dao,” wali.
EZE 32:24 “Tama kantri Elam me te bulude naga te elalubao, me te ami bidi dabe te boide isali bidi dabego pesage badu te elalubao. Tama te Elam kantri ami bidi dabego gų pagego te kantri Elam bagua sai elalubao. Te boi bidi dabego te ami bidi dabe boide elai dao. Te Elam dabego wiegi yai kolesaga wali me pai menio. Tama me ma, augwali isisąma ebadi da, augwaligo we bidi hauwa wi emainu ilai dao. Tiali goli, augwali megi da, isai bidi dabego buluba bidigi pali. Tama tibaso, augwali hale dwai mu ebao,” wali.
EZE 32:26 “Te kantri Mesek me kantri Tubal si, me augwa ami bidi dabe dali, te buluba naga bidigi pali. Tama te kantri sigo gų page te ami bidi dabego gų page tomode elalubao. Te boi bidi dabego augwali ela silai dao. Te kantri Mesek me Tubal sigo te wiegi yai kolesaga me yai menio. Tama me ma, augwali isisąma isąbadi, augwaligo kantri hauwa wi emainu ilai dao.
EZE 32:27 Te bidi dabego te ami bidi dabe augwali te dwai bidi dabe pubalobo tiwai tama pubalai dao. Augwaligo te polobadu bidali genuai nogi yai ami bidi dabe pubalobo tiwai kolesagago pubulai menio. Augwaligo te nogi yai polobadu bidali bage pubaluyu, augwaligo augwa bainat augwa tobolu dologode muyu yai dao. Te Mesek me Tubal dabe augwali augwa dagede augwali isalio. Magi baso meni. Te augwali bidibadi, augwaligo te we bidi hauwa wi mu iliyu yai dao,” wali.
EZE 32:28 “Tama kantri Isip me dolama, tama aga me te boi bidi dabego elali bidi dabe tomoba bidigi paibao. Te bidi dabe augwali te dwagi yai kolesaga isąwai bidi hanigo bidi dabe dao,” wali.
EZE 32:29 “Tama kantri Idom me te isai bidigo bulude te bidibao. Aga te aga king dabe, me augwa tobolu bidi dabe dali te bidibao. Polobadu te Idom dabe augwali bomai ami bidi dabe mu bidai dao. Tiali goli, megi da, augwali isilama, tama augwali te hwįbode boi bidi dabego ela muai bidi dabe dali teba bidigi paibao. Te bidi dabe augwali te wiegi yai kolesaga wali pisąma yai bidi hanigo bidi dabe dao,” wali.
EZE 32:30 “Tama u not badu king dabe me te bulude te bidibao. Tama me te Saidon dabe me augwali dali te bidibao. Polobadu augwali bomai bidi hani bidiyu, augwaligo bidi hani hauwa wi ilai dao. Tiali goli, megi da, augwali polo isila pelama, augwali hale dwai mu ebao. Magi baso meni. Augwali te buluba bidi meba dali bidigi pali, te boi bidi dabego boide elai bidi dabe dali bidigi pali. Te bidi dabe augwali te wiegi yai kolesaga wali pisąma yai bidi hani bidi dabe dao. Augwaligo me te isai bidi buluba aiyaba dulali bidi dabego sali hale tiwai naga salio,” wali.
EZE 32:31 “Te Isip king bidi aga ami bidi dabe dali, augwali te buluba dulubo sogo da, teda agai me te meba hani te hasia bidali bage bidibo suaibao. Tama agai homu dwasianu wiegi yai elama, tama aga hale genuai ganama egobeo, te aga ami dabe dali, te boi bidi dabego augwali elai bidi dabe dao. Te da God Genuai Bidi eno po dao.
EZE 32:32 Ena digi te Isip king bidi aga ami dali augwali hodolama, tama augwaligo we bidi hauwa wi dwai mu emainu ilai dao. Tiali goli, megi da, boi bidi dabego Isip dabe augwali boide elama, tama augwali te isai bidi dabego buluba bidigi paibao. Tama augwali te boi bidi dabego boide elai bidi dabe dali isai bidigo buluba bidigi paibao. Te bidi dabe augwali te wiegi yai kolesaga wali pisąbo bidi hanigo bidi dabe dao. Ena God Genuai Bidi eno po polo wali dao.” Te po wali.
EZE 33:1 Genuai Bidigo enabolo e tama po wali,
EZE 33:2 “Tǫde bidio, nago naga hani bage, te Israel bage dali, te Juda we bidi dali si, augwalibolo te bidi tonalubo bidigo ebo sę po pusa mao. Te eno boi bidi dabe me te kantri me dali hwįmainu taga palobaso da, teda te kantri we bidigo augwa tonaluabo bidi me deli sa mubo dao.
EZE 33:3 Tama te tonalubo bidigo boi bidi dabe asobo sulama da, teda agai te biugel bu wabo dao, te we bidibolo boi asobao olama mayu, te po wabo dao.
EZE 33:4 Tama tialima, te bidi me deligo te biugel bu wabo odama, tama aga wi pelama, tama duala sabo pesage gegegi pisąma yai digi, tama te boi bidi dabego aga elama isilali da, teda te bidi aga dagede aga isai dao. Magi baso meni. Ma, aga duala sigi pigi sogo da, teda aga me isigi menio.
EZE 33:6 Tiali goli, te tonalubo bidigo te biugel bu wasiąma yali da, teda te boi bidi dabego te we bidi sese tama ela silaibao. Te mu tama goli da, te we bidi augwaligo dwai sęgę elama, isali goli dao. Tiali goli, eno gedude da, te tonalubo bidi dabego geda muanigo da, te augwali te isali dao. Tama eno aga dali te po tų yaibao,” wali.
EZE 33:7 “Tǫde bidio, eno nage Israel dabe tonalubo bidi nigilibao. Te eno bomai po augwalibolo pusabo po elalubaso da, teda eno nagebolo menama, tama nago augwalibolo pusa magameo.
EZE 33:8 Tialima, eno bidi mego dwai kolesaga ebo subaso da, tama eno aga isaibao obaso da, teda nago agabolo pusao. Nago agabolo agai homu kolesaga, me agai ebo kolesaga hasegeleyu yao po wao. Tialima, nago agabolo wasiąma yali da, teda agai sęgę me tama elaluaibao, tama aga isaibao. Tiali goli, eno gedude da, teda nago dagede aga isaibao.
EZE 33:9 Tiali goli, nago te sęgę sabo bidibolo po walai digi, tama agai te dwai kolesaga tagalisąma ebaso da, teda te dwai kolesagago aga dolama, tama aga isaibao. Tiali goli, nago te sę yalide sęgę me sogobeo, tama nage me isigobeo,” wali.
EZE 33:10 Genuai Bidigo enabolo po geninama ma weyu, e tama po wali, “Tǫde bidi, nago eno te po te Israel we bidibolo pusa mao, ‘Dagego e tama po wabo dao, “Dago sęgę hauwa sabo da,” po wali, “tama tialima, da homu sęgę genuai mu ebao,” po wali, “tama dago tigi dili pulu ha mu ebao, mena tama tiyu, da bugagia bidigowe?” Dagego te po wabo dao.’
EZE 33:11 Te Israel dabebolo e tama po walao, ‘Ena God Genuai Bidi, ena tigidali sogo bidibo dao, tama mu tama dao, te dwai kolesaga ebo bidi dabe isibaso, eno tede wiegi yai homu pemene egobe dao. Menio. Eno te dwai kolesaga dabeba tudi ola menama bidibo bidi dabeba eno wiegi yai homu pemene ebo dao. Dage Israel dabego odao. Ma begasa asao. Dagego duga ebo dwai kolesagaba tudi ola menama, tama dage enaba ma asiąo. Magi baso dagego isabo sę idu gebawe?’ Nago augwalibolo te po wao,” wali.
EZE 33:12 “Tǫde bidi, nago te naga hani Israel dabebolo walao, ‘Tialima, te doloba pai bidi mego dwai sę ebaso da, teda agai polobadu yali doloba pai kolesaga aga me bugagia bidimainu tau me sogobeo. Tialima, bidi me dwai sę iduai bidigo dwai kolesaga tagalama, wiegi yai kolesaga ebaso da, teda agai aga yali dwai kolesagaba tudi ola mayu te ebao. Teda eno aga dologobeo. Tama tialima, te doloba pai bidi me deligo dwai sę ebo gagalobaso da, teda eno agai yali doloba pai kolesaga koneama, tama eno aga bugagia bidimainu me sula tagalogobeo. Menio.
EZE 33:13 Eno te doloba pai bidi dabebolo augwali bugagia bidaibao po wabo dao. Tiali goli, bidi mego homugo agai yali wiegi yai kolesagago aga tau saibao olama, tama agai doloba pai kolesaga tagalama, tama agai dwai sęgę sabo sę eyu da, teda God eno agai polobadu te yali doloba pai kolesaga kone me egobeo. Menio. Megi aga dwai kolesaga yai baso da, teda aga isimainao.
EZE 33:14 Tama eno bidi dwai dabebolo augwali isimainao po wabo dao. Tiali goli, te dwai kolesaga ebo bidigo aga yali dwai kolesagaba tudi ola menama, tama agai doloba pai kolesaga naga idu baso da,
EZE 33:15 teda aga munu me isigobeo. Tialima, te bidi agai te bidi me delibolo agai te negeli yali te tonalubo nai ma wei mobaso, o agai wi sali nai ma wei ponobaso, me agai eno tigidali bomai po wali pelama, tama agai dwai kolesaga isąma eyu da, teda te bidi munu me isigobeo. Menio. Aga bugagia mu bidaibao.
EZE 33:16 Tialima, eno agai polobadu yali dwai kolesaga kone me palogobeo. Megi da, agai doloba pai kolesaga ebaso da, teda aga bugagia bidaibao.’ Te po augwalibolo pusao,” wali.
EZE 33:17 “Tiali goli, tǫde bidio, naga abagi dabego te po wabo dao, Genuai Bidi eno kolesaga dolo menio po wabo dao. Tiali goli, menio, te Israel dabe augwa kolesaga te dolo menio.
EZE 33:18 Tialima, te doloba pai bidigo aga te doloba pai kolesaga tagalama, tama dwai kolesaga ebaso da, teda aga isaibao.
EZE 33:19 Me ma, te dwai kolesaga ebo bidi me deligo aga yali dwai kolesaga tudi ola menama, tama agai doloba pai wiegi yai kolesaga wali peyu da, teda aga bugagia bidaibao.
EZE 33:20 Tiali goli, dage Israel dabego te po wabo dao, Genuai Bidi eno kolesaga dolo meni po wabo dao. Teda odao. Nosali eno dage po tų elama, tama dagego kolesaga osola sulama, tama dage deli deligo ebo kolesaga dagalaibao,” Genuai Bidigo enabolo te po wai.
EZE 33:21 Te da kalabuside bidibadi kibu be namba 12 wabode, tama te dei namba 4, te namba 10 poluade, te sogo pio te eno Genuai Bidigo bomo ena tigiba asobo gagama yali. Tama te sogo kigamu Genuai Bidigo eno pedauwali ma usu ilama, tama eno po ma wabo usu ilali. Tama elama, tama bidi me deli aselama, tama enabolo te po wali, “Jerusalem polo dolalio,” te po wali. Te boi bidi dabego te Jerusalem hanu dolobo sulama, tama te bidi aga ena bidibo madi asali.
EZE 33:23 Genuai Bidigo enabolo e tama po wali,
EZE 33:24 “Tǫde bidio, Israel dabego taun polo dolalio. Tiali goli, te we bidi te taunde me bidibao. Augwaligo e tama po wabo dao, ‘Abraham aga te bidi deli goli dao, tama Godigo te tǫ tigidali tama agabolo mawai dao. Tiali goli, megi da, dago we bidi hauwa te elalubao. Tama tilama, Godigo te tǫ mu tama dabolo mawai yali bogo.’ Augwaligo te po wabo dao.
EZE 33:25 Tama tibaso, megi da eno homugo nago te po augwalibolo pusa mao. Ena God Genuai Bidi eno te po e obao. Dagego dwai kolesaga hauwa ebo dao. Te dagego te hasa dabe tuainogo elebo sogo, dagego kaneme dabe sela sąbo menio. Me, dagego tibo god dabeba lotu po weyu ebo dao. Me, dagego bidi dabe ela muyu ebo dao. Mena tibaso dagego te tǫ saiba homu ebawe?
EZE 33:26 Tigidali sogo dagego subigila hwįyu ebo dao. Tama me, dagego dwai damua pai kolesaga dabe ebo dao, me dagego duga abagi sologo we dabe dali penani sę eyu ebo dao. Dagego homugo mena tama tiyu, dagego te tǫ saiba homu ebawe? Dagego usu munu ma me egobeo,” wali.
EZE 33:27 “Tialima, eno homugo nago ena God Genuai Bidigo po augwalibolo pusa mao. Ena God dao, tama ena tigidali sogo bidibo dao, tama eno mu po e tama obao. Te boi bidi dabego te dolai taunde bidalubo we bidi sese tama ela silagasaibao. Tama me, te bulu hasa dabego te taunde bidisąma, olo bulu badu bidalubo we bidi elama, tuagasaibao. Tama me, te dualaluabo pesage wiegi yai digi duala sali we bidi, me masigi dudulawede duala sali we bidi, augwali genuai gasi mu selama, isaibao.
EZE 33:28 Tama eno te tǫ dolama, tama te tǫ olo tǫ mu pedelaibao. Te Israel dabe augwaligo augwa bomode mu gana pabo dao. Tiali goli, eno augwaligo te bomo mu silaibao. Tama te Israel dabego bulu du te dwai bulu dasu mu pedelaibao, tama te bidi dabe augwali tede bilibo hagela yaibao.
EZE 33:29 Te augwaligo te dwai damua pai kolesaga ebaso da, eno te we bidigo bulu tǫ te olo bulu tiwai pedelemainu ilaibao. Te tiwai ilibo si da, teda augwaligo e tama bugagia koneaibao, ena deli naga te Genuai Bidi te yabo homu yaibao,” wali.
EZE 33:30 Genuai Bidigo enabolo e tama po wali, “Tǫde bidio, te naga abagi dede augwali te taun obo pąde sisinibo sogo, me augwa be sunumi pąde sisinibo sogo augwaligo nage koneama, augwaligo e tama po wabo dao. ‘Polo pinao, da pelama, Genuai Bidigo mena po aga profet bidibolo megi maniwe odigi pinao,’ wabo dao.
EZE 33:31 Tama tialima, eno we bidi augwali nago po odainu sisinagasobo dao. Awe, augwali nago gesabidide dualama, nago po odobo dao. Tiali goli, augwaligo olodali tama odobo dao. Augwaligo te po wali pabo menio. Augwaligo te timainao po wabo dao. Tiali goli augwaligo te mone hauwa sabo homu naga ebo dao.
EZE 33:32 Augwaligo nago po odabo homu ebao, te bidigo gita eleyu, te wiegi yai musik wabo tiwai odabo homu ebo dao. Tama me, te bidigo wiegi yai dogoni elaluyu, tama bidigo we godolo eyu, te wiegi yai balia po wabo odabo homu ebo tiwai ebo dao, augwaligo nago po tigidali tama odobo dao. Tiali goli, augwaligo dwasianu wali me pabo menio.
EZE 33:33 Tiali goli, mu tama, nosali nago wali po sese tama mu pedalaibao. Tama te sogo augwaligo koneaibao, te nago te pusali po dabe, te eno po mu te yabao homu yaibao.” Genuai Bidigo te po wali.
EZE 34:1 Genuai Bidigo enabolo e tama po walali,
EZE 34:2 “Tǫde bidio, nago te Israel dabe tobolu bidi dabe po tų ela mayu, nago e tama po wao, ‘Dage Israel dabego tobolu bidi dabeo, odiąo. Ena God Genuai Bidi, eno po dage dali elalubao. Dage dolaibao. Te Israel dabe augwali da, te sipsip kibu dabe tiwai dao, tama dage da, te sipsip tonalubo sę elalubo bidi dabe tiwai dao. Tiali goli, dagego duga naga ma tonaluyu ebo dao, tama dagego te sipsip dabe tonalubo menio.
EZE 34:3 Dagego te sipsip ame pę tuyu, te augwaligo sipsip kibu nisigo nigai gudubo ugwa gudubo dao, tama dagego wiegi yai tumona pai sipsip kibu elama, te ili dali mi dali tubo dao. Tiali goli, dagego te sipsip kibu tonalubo menio.
EZE 34:4 Dagego te bomo meni yai sipsip dabe tau sabo menio. Tama me dagego te gasi yai sipsip dabe usu ilibo menio, me dagego te tigi selai sipsip kibu dabe keni dagego sįsįbo menio. Tama me dagego te hagawai sipsip gegegi pelama, tama dagego augwali ma oda sabo menio. Te dagego bomogo da, dagego augwali dali selebo sę eyu, tama sesanobo bidigo ebo kolesaga tiwai ebo dao.
EZE 34:5 Te sipsip dabe augwali tonalubo bidi meniama, augwali augwa digi subigila bilibo tiwai ebo dao. Tama te bulu hasa dabego augwali elama tubo dao.
EZE 34:6 Eno sipsip kibu dabe augwali te bulu du dabeba wi pobao, tama augwali tigidali tǫba tigidali polo pepelawalio. Tama augwali gegabo bidi meni yanio. Mu menio.’ Te po augwalibolo pusao,” Genuai Bidigo enabolo te po wai.
EZE 34:7 “Te po me pusao, ‘Tialima dage te tonalubo bidi dabe, dagego Genuai Bidi eno po odao.
EZE 34:8 Ena God Genuai Bidi, eno tigidali sogo bidibo dao, tama eno po mu tama e obao, eno sipsip kibu dabe augwali bugagia tonaluabo bidi menio. Tama tibaso, te bulu hasa dabego te sipsip kibu dabe ela wialama, augwali tuali dao. Tama te eno sipsip kibu tonalumainu sa muani bidi dabe augwaligo te hagawali sipsip dabe gegebeo. Augwaligo augwa naga ma tonalubo sę eyu, tama augwali te sipsip dabe tonalubeo.
EZE 34:9 Tama tibaso, dage tonalubo bidi dabe, dagego eno po odiąo.
EZE 34:10 Ena God Genuai Bidi, eno po te obao, eno dage dali boi bidi te ebao, tama eno dagede te po tų yaibao. Tama ena sipsip kibu dabe dagego nogode ma dobola selama, tama dage augwali tonalubo bidi me bidigobeo. Eno dage tonalubo bidi dabego duga digi duga ma tonalubo kolesaga silaibao. Te eno ena sipsip kibu dabe ma selama, tama dagego tuabo sipsip kibu meni yaibao,’ te po pusao,” Genuai Bidigo te po wali.
EZE 34:11 “‘Ena God Genuai Bidi, eno te po te obao, te ena digi ena sipsip dabe gegelama, tama augwali ma oda selama, tama ena digi augwali bugagia tonaluaibao.
EZE 34:12 Te eno te sipsip tonalubo bidigo te sipsip kibu tonalubo tiwai elama, tama eno te sipsip dabe subigila pali dabe gegaibao. Te eno sipsip kibu dabe augwali te genuai pǫ elama, hulia sali sogo augwali subigila tedela pai dao. Tiali goli, ena pelama, tama eno augwali pali pesageba tigidali gegegi paibao.
EZE 34:13 Te eno augwali gasa kantriba ma oda sigi pelama, tama augwali te kantri Israelba ma odasa asaibao, te augwa tǫ mu dao. Tama augwali tigidali sogo bulu du dabede bidiyu, me wę pąde bidiyu yaibao.
EZE 34:14 Tama augwali Israel dabego bulu du dabede bidiyu, te wiegi yai nosai dabe tuyu bidaibao.
EZE 34:15 Tama ena digi te ena sipsip tonalubo bidi bidaibao, tama eno augwali toma tuabo bulu wiegi yai madi odasa paibao. Te da God Genuai Bidi eno po dao.
EZE 34:16 Tialima, sipsip kibu meba hagabaso da, teda eno augwali gegegi pelama, tama eno augwali ma oda saibao. Ma, te sipsip dabe meba subigila pepelawai baso da, teda eno augwali gegegi oda sigi paibao. Tama meba dolama, keni elalubaso da, teda eno augwaligo keni sisaibao. Tama meba augwali gasi elalubaso da, te eno augwaligo gasi usu ma ilaibao. Tiali goli, eno te tumona pai boma pai sipsip dabe dolaibao. Magi baso meni, eno sipsip dabe tonalubo doloba pai kolesaga naga ebo dao,’ eno te po te tobolu bidi dabebolo obao,” wali.
EZE 34:17 “‘Tialima megi dage eno sipsip hani, ena God Genuai Bidi, eno dagebolo e tama po e obao, eno dage deli deligo kolesaga osola suyu, tama dagalaibao, te dage meba te omai sipsip tiwai dao, meba te meme tiwai dao.
EZE 34:18 Dage mebago wiegi yai nosai hauwa tulama, tama dagego tabi pągąna pabo dao. Tama dagego te meba elalubo nosai dabe subigila agalama, tagalobo dao. Tama me dagego wiegi yai ąį subaso da, dagego tuyu ebo dao, tama nosali dage te ąįde subigila bilama, tama te wę dunugu ilainu ebo dao.
EZE 34:19 Tama eno meba sipsip dabego dagego te agayu yali nosai, me te dunugu iliyu yali ąį tuyu ebo dao. Dagego te kolesaga dolo menio.’ Te po pusao,” God Genuai Bidigo te po wai.
EZE 34:20 “‘Tama dagego ebo kolesaga dolo meni baso, God Genuai Bidi eno te po obao, te ena digi dagego tumona pai me boma pai sipsip, me bomo meni yai sipsip dabego kolesaga dagala sueibao.
EZE 34:21 Dage bomai sipsip dabego te bomo meni yai sipsip dabe gąųgo elama, buluba sela sąbo dao. Me dagego duga tigigo augwali pogolobo peyu, tama augwali bogoba pomainu ilibo dao. Tama dagego augwali eno sipsip hanide sela sąwai dao.
EZE 34:22 Tiali goli, eno ena te sipsip hani dabe ma oda selama, tama eno augwaliba te dwai nai dabe augwaliba ma asomainu sula tagalogobeo. Tama eno ena sipsip dabego kolesaga osola sulama, tama wiegi yai sipsip dabe meba muyu, me dwai sipsip dabe meba muyu yaibao.
EZE 34:23 Tama eno ena sę bidi Devitgo hanide bidi me deli sa munama, tama aga eno sipsip dabe tonaluabo bidi nigilama, tama agai eno sipsip dabe augwali bugagia tonalumainu yaibao.
EZE 34:24 Tama ena Genuai Bidi da, augwaligo God bidaibao, tama te Devitgo hani bidi te augwaligo king bidaibao. Te da God Genuai Bidi eno po dao.
EZE 34:25 Tama eno augwali dali deli homu eyu, augwali dali bidabo po dąų walaibao, te augwali bugagia bidimainu. Tama eno te sipsip dabe elebo te bulu hasa dabe tigidali badu sela sąnama, tama augwali te bulude munu me ma bidigobeo. Tama tibaso, te sipsip dabego te wa pai tǫ dali, te ni sili elalubo bulu dali si te sipsip dabe bidabo bulu wiegi yai tiwai elaluaibao,’ eno te po obao” wali.
EZE 34:26 “‘Tama eno te bulude wiegi yai sę iliyu, me eno bulu du bagualubo tǫ wiegi yai ilaibao. Tama tulubage side da, eno te tǫba tulubage hauwa te tǫba tulumainu yaibao, tama te tulubagego te tǫ wiegi yai mu pedelemainu ilaibao.
EZE 34:27 Tama te ni dabe te du walobo ni dabe augwaligo du dabe hauwa mu walaibao. Tama nai dabe hauwa gide holaibao. Tama eno ena we bidi te boi bidi dabego nogode ma dobola saibao, te boi bidi dabego augwali dąų olama, augwali kalabus ilali pesagede ma oda saibao, tama eno augwali ma odasa asaibao. Tama augwali augwa tǫde bugagia mu bidaibao. Tama augwaligo bugagia mu koneaibao, ena deli naga ena Genuai Bidi te yabao homu yaibao.
EZE 34:28 Tama te gasa kantri haiden bidi dabego augwali dali dwai sę munu me ma egobeo. Tama te bulu hasa dabego augwali munu me ma ela tugobeo. Te we bidi augwali bugagia bidibadi, te gasa we bidigo augwali wi me iligobeo, te meni yaibao.
EZE 34:29 Tama eno augwaligo tǫ ili hauwa emainu ilama, tama nai dabe hauwa tede holomainu ilaibao. Tama augwaligo kantri nai habuge me egobeo. Tama te gasa meba kantri we bidigo koneaibao, te kantride nai hauwa elalubao olama, tama augwaligo te posobo po me wagobeo.
EZE 34:30 Tama te Israel dabe augwaligo e tama bugagia koneaibao, ena God Genuai Bidi, ena augwali dali bidiyu, tama augwali eno we bidi hani bidaibao. Te da God Genuai Bidi eno po dao.
EZE 34:31 Dage eno we bidi, dage eno sipsip kibu tiwai dao, tama dage ena tǫde bidiyu, tama eno dagebolo nai mabo dao. Tama ena dagego God bidibao, Genuai Bidi eno po polo wali.’ Te po augwalibolo pusao,” God Genuai Bidigo te po wali.
EZE 35:1 Genuai Bidigo enabolo te po walali,
EZE 35:2 “Tǫde bidio, nago kantri Idomba tonama, tama nago te po wao, te kantri Idom dolaibao po wao.
EZE 35:3 Nago kantri Idombolo e tama po wao, ‘Ena God Genuai Bidi, eno dage Idom dabego bulu du dabe dali boi bidi homu ebao,’ po walao. ‘Te eno dage dali bomonama eyu, dolama, tagalama, tama dagego tǫ olo tǫ tiwai pedalumainu ilaibao.
EZE 35:4 Tama eno dagego taun dabe dolaibao, tama dagego tǫ dwai olo elaluaibao. Tama tiyu, dagego koneaibao, ena deli naga ena Genuai Bidi yabao homu koneaibao.’ Te po wao,” wali.
EZE 35:5 “Te po me augwalibolo wao, ‘Polobadu mu dage Idom dabego Israel dabe dali boi bidi elaluai dao, me eno te Israel dabe dolali sogo, me eno te boi bidi dabe tagala palama, augwali dali hwįagasali sogo me, dagego te Israel dali boi bidi elaluai dao. Te sogo asali boi bidi dabe dage Idom bagego tau selama, te Israel dabe elama, isilai dao.
EZE 35:6 Tama tibaso, ena tigidali sogo bidibo God eno mu po mu e obao. Te boi bidi dabego dage elama, isilaibao. Te augwaligo dage munu me ma geda mugobeo. Dagego bidi dabe ela mubo kolesaga ebode hagela homu ebeo. Tialima, boi bidi dabego dage ela mubo kolesagade gagamua sogobeo.
EZE 35:7 Te eno te kantri Idom we bidi sese ela silama, tama te kantri Idom te olo bulu mu pedalaibao.
EZE 35:8 Te eno te boi bidi dabego dage Idom dabe elemainu ilaibao, tama dagego tigi dabego te bulu du dabe, me odogo malu dabe mesega siyu yaibao.
EZE 35:9 Te eno dagego kantri olo bulu elalumainu ilama, tama te tiwai tigidali sogo tama elalua paibao. Tama dagego taun dabede bidi munu me ma bidigobeo. Tama tiyu, dagego e tama bugagia koneaibao, ena deli naga ena Genuai Bidi dao homu yaibao.’ Te po me pusao,” wali.
EZE 35:10 “‘Dage Idom dabe, dagego ena God Genuai Bidi eno te kantri si Israel de Judade bidiba homu me yai menio, te augwali eno we bidi dao. Megi da, dagego te po wali dao, dagego augwali hani sigo tǫ saibao po te wali dao.
EZE 35:11 Tama tibaso, ena God Genuai Bidi, ena tigidali sogo bidibo da, tama eno mu po tama dage dali obao, eno dagego dwai kolesaga wei ponaibao. Dagego Israel dabe godolo munu ma me ebeo, tama dagego augwali dali sębę elama, tama dage augwali dali haliga dwai mu yai dao. Tama tialima, eno dagego te augwali dali yali dwai kolesaga wei dolo ponaibao. Tama te Israel dabe augwaligo ena bugagia mu koneaibao.
EZE 35:12 Tama dage Idom dabego e tama bugagia koneaibao, ena Genuai Bidigo dage Idom dabego Israel tǫba dwai po e tama wabo odali da homu yaibao, “Te Israel dabego bulu du dabe polo dolai dao. Tama megi da, da Idom bage dago te tǫ kantri selama, tonaluaibao.” Dagego te po wabo eno odali.
EZE 35:13 Dage Idom dabego ena dali hagoma elama, tama dagego ena posobo po olama, tama dagego ena dali dwai po wai dao. Tama eno dagego te po odai dao.
EZE 35:14 Tialima, ena God Genuai Bidi eno te po e obao, eno dage sese tama mu dolama, tama gasa meba kantri we bidigo sulama, tama augwali wiegi yai homu pemene yaibao.
EZE 35:15 Dagego te eno we bidi Israel dabe dolobode dage wiegi yai homu pemene yai dao. Tialima, eno dage Idom dabeba me deli tiwai sę naga elama, dage Idom dabe me dolaibao. Tama te bulu du Seir, me te gasa bulu dabe te kantride elalubo bulu dabe te olo bulu mu pedelaibao. Tama te Israel dabe augwaligo e tama bugagia koneaibao, ena deli naga ena Genuai Bidi dao homu yaibao.’ Te po te Idom bagebolo wao,” Genuai Bidigo enabolo te po wali.
EZE 36:1 Genuai Bidigo ena dali e tama po wali, “Tǫde bidio, nago te Israel dabego bulu du dabebolo eno augwalibolo wainogo ebo te poba bugagia olo saganama odao po walao.
EZE 36:2 Ena God Genuai Bidi, eno e tama po wainu ebao. Te Israel dabe augwaligo boi bidi dabego e tama po wai dao, ‘Wiegi yai mu dao. Megi da, te genuai bulu du dabe dago bulu du dao,’ wai.”
EZE 36:3 “Tama tialima, nago ena God Genuai Bidigo e po pusao, ‘Te gasa hani bidigo dage Israel dabe dali hwįagasai dao. Tama te kantri tigidali badu mu tama dolama, tama te dagego kantri sai dao. Tama augwaligo te kantri Israel dwai po walama, tama augwaligo posobo po walai dao.
EZE 36:4 Tama tialima, dage Israel dabego bulu du dabe, me malu bulu dabe, dagego ena God Genuai Bidigo po odao. Tama me dage dolali taun dabe, me te meba gasa te kantride bulu dabe, dagego me odao, te dage boi bidi dabego dolali bulu dabe, dagego odao.’ Te po pusao,” wali. “‘Eno koneani, te dage pąde elalubo kantri bidi dabego dage dali dwai sę elama, tama dage dali posobo po wai dao.
EZE 36:5 Tama tialima, God ena Genuai Bidi ena haliga sębę posolo tiwai eyu, eno bomai po te kantri Idomba, me kantri dage pąde elalubo, te kantri dabeba te obao. Augwaligo homugo ena te olo nai dao tiwai homu elama, tama augwaligo eno tǫ sainu homu mu gana pai dao. Magi baso meni. Augwaligo te tǫ me badu te augwaligo kau kibu dabe me sipsip kibugo nosai tede tumainao homu yali.
EZE 36:6 Tama tialima, tǫde bidi, nago eno e tama po pusa mao. “Dage te Israel tǫde elalubo bulu du dabe, me odogo malu bulu dabe, dagego odiąo. Ena God Genuai Bidi, eno te meba gasa kantri dabe dali sębę dwai mu ebao. Magi baso meni, augwaligo dage dali hale yabo po wai dao.
EZE 36:7 Tialima, ena God Genuai Bidi, eno mu po mu te obao, eno te kantri dabe aiyaba elaluama, tama augwali hale ilaibao.
EZE 36:8 Tiali goli, te ni dabe te dagego bulu du dabede ma holaibao. Tama augwaligo yabe hauwa solama, tama augwali du hauwa walaibao. Dwasianu sogo mu tama, eno we bidi dage Israel dabe dage te kantri Israelba ma asaibao. Tama dagego te wiegi yai ni du dabe tuaibao.
EZE 36:9 Eno dage bulu du dabe dali wiegi yai sę yaibao. Tama tialima, eno te Israel dabe augwaligo dagede gi dabe ma emainu yaibao.
EZE 36:10 Tama eno Israel we bidi hauwa mu pedelemainu ilama, tama augwali dagede bidimainu yaibao. Tama augwaligo te taun dabe ma geseleyu, me te boi bidi dabego dolali bulu dabe ma dodoliyu yaibao.
EZE 36:11 Tama te we bidi dabe me dagede bidibo hasa dabe hauwa mu pedelaibao. Tama te we bidi tigidali pesage badu polobadu bidali yali gilama yaibao, tama eno dage dali wiegi yai kolesaga mu yaibao. Tama te kolesagago da, eno polobadu yali kolesaga edelama mu yaibao. Tama dagego bugagia mu koneaibao, ena deli naga ena Genuai Bidi dao homu yaibao.
EZE 36:12 Tama eno ena we bidi Israel dage bulu du dabede bugagia bidimainu yaibao. Tama dage augwaligo tǫ elaluaibao, tama augwaligo te tǫ augwa wai dabebolo nosali mawaibao. Tama dagego te Israel dabego wai bǫų dabe munu me ma dologobeo.” Te tama po te bulu du dabe dali, me odogo malu bulu dabebolo tama pusao,’ ena Genuai Bidi eno te po obao,” wali.
EZE 36:13 “Ena God Genuai Bidi, eno te po te obao. Te we bidigo te po wabo dao, ‘Dago kantri tǫgo te bidi dabe siliyu, me te wai bǫų dabe doliyu ebo dao,’ po wabo dao.
EZE 36:14 Augwaligo te tama po obao, tiali goli, ena God Genuai Bidi eno te po obao, dage bulu du dabego Israel dabe dali dwai sę ma elamo dao.
EZE 36:15 Tama te gasa meba hani bidigo posobo po olama, tama dage Israel dabego bulu du hale me iligobeo. Tama dage bulu du dabego eno we bidi dwai sęde me tulalumainu iliyu me egobeo. Ena God Genuai Bidi, eno po polo walio,” te po wai.
EZE 36:16 Genuai Bidigo enabolo po ma weyu, e tama po wali,
EZE 36:17 “Tǫde bidi, te Israel dabe augwa tǫde polobadu bidali sogo augwaligo dwai kolesaga meda yai mu yai dao, tama augwaligo te tǫ dolai dao. Tama augwali eno gedude meda yai mu bidai dao, te we me aga poluago elai we tiwai ąǫ yai dao.
EZE 36:18 Augwaligo bidi hauwa mu elai dao. Tama augwaligo tibo god dabeba lotu olama, tama tebogo augwaligo kantri Israel eno gedude meda dwai mu pedelai dao. Tama tibaso, eno augwali dali sębę genuai mu elama, tama eno augwali dene genuai mu mawai dao,
EZE 36:19 te augwaligo tigidali dwai kolesaga dabe wei ponainu. Tama eno augwali gasa kantri dabeba sela sąwai dao.
EZE 36:20 Te gasa meba hanigo Israel dabe augwali tomode dwai mu bidalubo suali. Tama te tialigo eno nogi aiyaba elalualio. Tama te hani augwaligo homugo ena olo nai dao homu yalio, tama augwaligo te po wabo dao, ‘Te Israel dabe augwali te Genuai Bidigo hani dao. Magi baso augwaligo agai tǫ taga soaliwe? Te agai augwali tau sabo usu isąbaso yali, agawe?’
EZE 36:21 Eno te po dabe te Israel dabe pali bulu tigidalide wabo eno odali. Tama eno homugo tiali tiyu, te hani augwaligo eno nogi aiyaba elaluidalio,” wali.
EZE 36:22 “Tama tibaso, eno homugo Esekiel, nago eno te po Israel dabebolo pusa mao, ‘Ena God Genuai Bidi, eno po te tama te wali dao. Te gasa meba hanigo dage augwali tomode bidibo sulama, tama augwaligo eno nogi aiyaba elaluali. Tama tialima, eno te megi yainogo ebo sę dabe te eno dage Israel dabe kone palama, me yainu ebeo. Eno dage tobade te sę egobeo. Menio. Eno ena genuai nogiba kone palama, tama eno nogi tobade eno te sę yaibao.
EZE 36:23 Tama tialima, eno te gasa meba hani e tama kolesaga ola mawaibao. Te eno kolesaga wiegi yai doloba pai mu dao olama, ola mawaibao. Tama augwaligo enabolo genuai nogi mawaibao. Dage Israel dabego dagede te hani bidigo megi eno nogi aiyaba elalubao. Tiali goli, eno dage tau sabo sę bomai mu ebo si da, te gasa meba hanigo sulama, tama augwaligo te e tama koneaibao, ena tedali gasagi yai dao, tama eno kolesaga wiegi yai doloba pai te yabao olama, koneaibao. Tama augwaligo e tama bugagia koneaibao, ena deli naga te Genuai Bidi dao homu yaibao. Te da God Genuai Bidi eno po dao.’ Esekiel, nago te po pusao,” wali.
EZE 36:24 “Nago te eno po me augwalibolo pusao, ‘Eno dage dali yabo sę po da, e dao. Eno dage te bidibo te kantri sese tamade oda selama, tama dage duga tǫ muba ma odasa asaibao.
EZE 36:25 Tama eno wiegi yai meda meni yai ąį selama, dage tigiba gelaibao, te dage eno gedude wiegi yai ma pedalomainu. Awe, eno dagego dwai damua pai kolesaga, me dagego tibo god dabe me sela sąwaibao, tama dage eno gedude wiegi yai pedelaibao.
EZE 36:26 Tama eno dagebolo gesi kolesaga me gesi homu mawaibao, te eno poba begi pabo homu kolesaga dao. Polobadu dagego tobolu te masigi tiwai dila pai dao. Tiali goli, eno te dwai homu kolesaga sela sąnama, tama eno dagebolo gesi homu kolesaga mawaibao.
EZE 36:27 Tama eno dagebolo ena mobo bidi dagebolo mawaibao, tama aga dagego homude bidaibao. Tama eno dage homu hogodolama, tama dagego eno bomai po, me eno gasa po wali bugagia pomainu ilaibao.
EZE 36:28 Tama dage eno duga wąį dabebolo mani te tǫde bidaibao. Tama dage ena we bidi dolo mu pedelaibao, tama ena dagego God mu bidaibao.
EZE 36:29 Tama eno dage tau selama, tama dagego dwai meda yai kolesaga munu ma me egobeo. Tama eno dagego gide dabe nai dabe hauwa holomainu ilaibao. Tama te ni du walobo ni dabego te ni du dabe hauwa mu walaibao. Tama tiyu, dage nai me habuge me egobeo. Tama tibaso, gasa meba hanigo dage posobo po te nai sǫą pabode me wagobeo.
EZE 36:31 Tama te sogo da, dagego duga yali te dwai damua pai kolesaga dabe sęgę dabe kone palaibao, me te dagego yali eno godolo mu isąwai sę dabe kone paliyu, tama dage hale genuai mu yaibao.’ Te po me pusao,” wali.
EZE 36:32 “‘Awe, dage Israel we bidi, dagego God Genuai Bidi eno po bugagia odiąo. Te sę page mu eno yainu ebo sę eno dage tobade egobeo. Menio. Eno homugo ena genuai nogiba kone palama yaibao. Tama eno te sę dabe ebo sogo da, eno homugo dagego duga yali dwai kolesaga kone palama, tama dage hale dwai mu yaibao.’ Te po wao.”
EZE 36:33 “E po me augwalibolo pusao, ‘Ena God Genuai Bidi, eno po genina ma weyu, e tama po obao. Te eno dagego sęgę sela sąnama, tama dage eno gedude wiegi yai pedalubo sogo da, teda eno dage sula tagalama, tama dagego duga taun dabe, me duga bulu dabe bugagia ma dodolomainu ilaibao. Te boi bidi dabego dolali hanu dabe ma dodolama, tama dage te taun dabede ma bidaibao.
EZE 36:34 Te bidi dabe dagego tǫde biliyu ebo dao, tama augwaligo dagego gi dabe dasu hola pai suyu ebo dao. Tiali goli, eno dagego te gi dabe ma emainu sula tagalaibao.
EZE 36:35 Tama te gasa hani bidi dabe augwaligo e tama po waibao, “Polobadu te tǫ dasu hola pai goli dao. Tiali goli, megi da, te gi Iden yali gilama wiegi yai mu te ilai yabo. Tama polobadu da, te taun dabe da dolama mu elaluai dao. Tiali goli, megi da, te Israel dabe augwaligo sę ma elama, tama augwaligo deli deli taun bagulama bomai obo te ma gesela silai dao. Tama te we bidi te taunde ma te bidibao.” Augwaligo te po waibao.
EZE 36:36 Tama dage Israel dabe duga tǫde ma bidibo sogo da, te meba gasa hani dage pąde bidibo bidi dabe auwaligo e tama bugagia koneaibao, ena Genuai Bidi ena digi te dolali taun ma nigiyu, me eno te dasu dwai mu holai gi ma eyu yai dao. Ena Genuai Bidi eno te sę yabo po dąų walaio, tama eno te tama sę yaibao.’ Te po tigidali nago te Israel bagebolo pusao,” Genuai Bidigo enabolo te po wai.
EZE 36:37 “Ena God Genuai Bidi eno te po obao. Te Israel dabe augwaligo enabolo te augwa we bidi hauwa ilao po hanalubo sogo da, teda eno augwaligo te gedu haluasa po wabo me odaibao.
EZE 36:38 Te augwali hauwa pedelaibao, te sipsip kibu dabe augwaligo te genuai sogo me eno augwalibolo sa muani te sogo te ofa yainu sesebo, te sipsip kibu hauwa tiwai yaibao. Tama te Israel dabe augwa ma te nigali te taun dabede bidigo pągąna paibao. Tama te sę dabe pedalobo sogo da, teda augwaligo e tama koneaibao, ena deli naga ena Genuai Bidi dao homu yaibao,” wali.
EZE 37:1 Genuai Bidigo bomo enaba aselama, tama Genuai Bidigo Mobo Bidigo ena oda selama, tama ena odasa pelama, odogo malu bulu mede bidi dili dabe kisu delalubo madi odasa pali.
EZE 37:2 Tama agai ena te bulu odogode odasa bilibadi suali da, eno bidi dili dabe hauwa mu suali. Tama tigidali dili dabe mu wa pai elalubo suali.
EZE 37:3 Tama Genuai Bidigo enabolo te po wali, “Tǫde bidi, nago homugo te bidi dili dabego we bidi mu ma gagabo usu yaibawe, ma meniwe?” Tiali goli, eno te po wali, “God Genuai Bidi, nagaduba deli naga koneanio, eno da, menio,” wali.
EZE 37:4 Tama Genuai Bidigo enabolo te po wali, “Eno homugo nago eno po te dili dabebolo pusao. Te dili dabebolo e tama po pusao, ‘Dage dili mu wa pai dabe, dagego Genuai Bidi eno po odao.
EZE 37:5 Ena God Genuai Bidi, eno te po e obao, eno dagebolo bidibo mobo menama, tama dage we bidi ma pedelaibao.
EZE 37:6 Awe, eno dage kigibili ma mayu, me tigi mi dabe ma mayu elama, tama dage tigi waligo ma halua saibao. Tama eno dagebolo bidibo mobo menama, tama dage bidibo ula selama, tama dage ma bidaibao. Tama tiyu, dagego bugagia mu koneaibao, ena deli naga ena Genuai Bidi dao homu yaibao.’ Te po te dili dabeba pusao,” agai enabolo wali.
EZE 37:7 Tama tibaso, eno Genuai Bidigo enabolo pusao wali po tiwai tama pusali. Eno te po pusubo sę idubadi, tama eno kilikili wabo odali. Te da te dili sibi kidagalo wabo po odali. Tama eno tonalubadi, te dili aga digi pąba kigigili pabo suali, te aga elaluali pesageba ma pabo suali, tama augwali bidi mu ma pedalobo suali.
EZE 37:8 Tama eno suali, te tigi kigibili me tigi mi dabe te diliba ma wadoa selama, tama tigi wali ma halua sagaselama, tama augwali we bidi tiwai ma pedalobo suali, tiali goli augwaligo mobo kegebo subeo.
EZE 37:9 Tama nosali Genuai Bidigo enabolo te po wali “Tǫde bidi, nago eno po te walibolo e tama po pusao, ‘Godigo te po wali, wali, nage tigidali badu aselama, tama nago te boi bidigo elai bidi dabe te mobo mao, tama augwali bidibo mobo ma somainu yao.’ Te po wao,” wali.
EZE 37:10 Tialima, eno Genuai Bidigo te po pusali, tama te wali te bidi tigiba dabe asali, tama augwali sese tama bidibo mobo selama, tama augwali sese tama hodalubo suali. Augwali te genuai ami bidi hani tiwai mu elaluali.
EZE 37:11 Tialima, Genuai Bidigo enabolo te po wali, “Tǫde bidi, te kalabuside megi bidibo Israel dabe tigidali augwali da, te bidi dili dabe wa pai tiwai dao, tama augwaligo te po wabo dao, ‘Te dago dili dabe mu wa pai dao, tama bugagia munu ma me bidigobeo. Tama da mu tama mu hagawaibao.’ Augwaligo po da te tama goli dao.
EZE 37:12 Tiali goli, eno homugo nago eno po augwalibolo pusulama, tama augwalibolo e tama po augwalibolo pusao, te ena Genuai Bidigo po, ena God Genuai Bidi, eno dagego gų page tų dalama, tama dage buluba odasa aselama, tama dage kantri Israelba ma odasa paibao, te duga tǫ mu dao.
EZE 37:13 Tama eno dage gų pagede hodolobo sogo da, teda dage eno we bidigo e tama bugagia koneaibao, ena deli naga ena Genuai Bidi dao homu yaibao.
EZE 37:14 Tama eno dagebolo eno mobo bidi dagebolo menama, tama dage bidibo ula saibao. Tama eno dage duga tǫ muba ma odasa paibao, tama dage tede bugagia bidaibao. Tama eno te sę ebo sogo da, dagego e tama bugagia koneaibao, te da ena po mu dao homu elama, tama eno ena po dąų walali gilama yali. Ena Genuai Bidi eno po polo wali. Te po te Israel dabebolo pusao,” wali.
EZE 37:15 Genuai Bidigo enabolo te po wali,
EZE 37:16 “Tǫde bidi, nago ni dage me deli sigi pelama, tama nago te po ugwadu daide asęao, ‘Te Juda hanigo ni dage, me te meba Israel hani we bidigo ni dage dali augwali deliba elalubao.’ Tama tialima, nago te ni dage me deli selama, tama nago te po tede asęao, ‘Te Josep hanigo ni dage, me te Efraim hanigo ni dage dali, me Israel hani mebago ni dage dali deliba elalubao.’ Te si wali ni dagede te po asęao,” wali.
EZE 37:17 “Nago asęna silama da, teda nago te ni dage sabi si deliba waloluyu, teda te ni dage si te deli ni gagawaibao, nago nogode.
EZE 37:18 Tama naga abagi dedego nago te sę yali page po hanalubo sogo da,
EZE 37:19 teda nago augwalibolo e tama po walao, ‘Ena God Genuai Bidi eno obao, eno te Josepgo ni dage, te ni dage te Efraim hani, me te meba Israel hanigo ni me da, eno te ni me Juda hanigo ni dage si selama, deliba walolaibao. Tama eno te ni dage si te eno nogode ni dage deli elaluaibao.’ Te po wao,” wali.
EZE 37:20 “Tǫde bidi, nago te po asęani ni dage si nogo tola sao, tama te we bidigo sumainu ugwaba sao.
EZE 37:21 Tialima, nago augwalibolo e tama po walao, ‘Ena God Genuai Bidi, eno te po obao, eno te tigidali Israel dabe augwali te bidibo te tigidali kantri dabede oda selama, sisinama, tama augwali augwa tǫ muba eno odasa paibao.
EZE 37:22 Tama tialima, eno augwali kantri deli te tǫde pedelemainu ilaibao, te Israel dabego bulu dabede. Tama augwali king deligo augwali tigidali tonaluaibao. Tama augwali bugulama, king bidi si elalubo kantri si munu me ma bidigobeo.
EZE 37:23 Tama augwaligo tibo god dabeba ma lotu po weyu, me dwai damua pai kolesaga wali peyu, me dwai sęgę sabo kolesaga wali me peyu me egobeo. Tama tiyu, augwali eno gedude meda yai me pedalogobeo. Augwali me habu badu bidi augwaligo sęgę saibaso, tagalao, eno augwali tau selama, tama augwali wiegi yai pedalaibao. Tama augwali eno we bidi bidaibao, tama ena augwaligo God bidaibao.
EZE 37:24 Tama eno sę bidi Devitgo hani bidi me deli augwaligo king bidaibao. Tama aga deli naga augwaligo tonalubo bidi bidaibao. Tama augwaligo eno bomai po me, eno gasa po wali peyu yaibao.
EZE 37:25 Tama dage hani bidi dabe tigidali sogo polobadu duga wąį dabe bidali te tǫde bidada paibao. Te da, te eno ena sę bidi Jekopbolo mani te tǫ dao. Tama Devitgo hani bidi me deli augwaligo tomode king tigidali sogo bida bida peyu bidaibao.
EZE 37:26 Tama eno augwali dali kontrak po dąų walama, tama augwali tigidali sogo bugagia bida bida peyu bidaibao. Tama eno augwali augwa tǫde bidimainu sula tagalama, tama augwali we bidi hani genuai hauwa mu pedelaibao. Tama eno be augwali tomode tigidali sogo mu elalua paibao.
EZE 37:27 Tama eno bidibo madi augwali dali bidaibao. Tama ena augwaligo God bidaibao, tama augwali eno we bidi bidaibao.
EZE 37:28 Te eno be Israel dabe augwali tomode sesemane elalubo sogo da, teda gasa hani we bidigo sumainu yaibao. Tama augwaligo e tama bugagia koneaibao, ena Genuai Bidi, eno te Israel dabe augwali ena we bidi mu ilali kolesaga augwaligo sueibao.’ Te po te we bidibolo pusao,” God Genuai Bidigo te po wali.
EZE 38:1 Genuai Bidigo enabolo e tama po walio,
EZE 38:2 “Tǫde bidi, eno homugo nago te Gokba tonao, te tǫ Magok bidi dao, te kantri Mesek me kantri Tubal sigo polalubo king dao. Nago te Gok dolaibao po wao.
EZE 38:3 Nago agabolo e tama po wao, ‘Gok, Mesek me Tubalogo polalubo king, odao, ena God Genuai Bidi, eno nage dali boi bidi ebao.
EZE 38:4 Te eno nage begelama, tama nago te saut badu edaba tonaibao. Tama eno nago penane dilide huk gebelama, tama nage dali, naga ami hani hauwa dali, eno edaba eba kegaibao. Nago ami bidi umabo tigidaligo hwįbo ugwa gudiyu, me ni nami awa dabe dali, me sabele dabe dali toliyu, me bainat hwą dabe nogo tuyu ebo dao, tama augwali hos dabede duabo dao.
EZE 38:5 Te kantri hauwago ami bidi geninama nage dali bidiba. Te kantri Persia, me kantri Sudan, me Libia ami bidi dabe nage dali te bidibao. Tama augwali sesego te hwįabo kapa madi gudiyu, me hwįabo ni nami sabele toliyu yaibao.
EZE 38:6 Tama me te kantri Gomer me taun Togarma ami bidi dabe me nage dali te bidibao. Te taun Togarma te u badu not badu digibulu bulu badu mu elalubao.
EZE 38:7 King Gok, nago hwįabo kegaluao. Me nago te tonalubo te ami dabe augwaligo me te hwįabo kegalumainao. Tama nago te polalubo bidi pedaliyu, augwali bugagia tonaluao.
EZE 38:8 Nago kibu be hauwa tonaluyu bolo yao. Te Israel hani eno augwali polobadu te haniani gasa tǫ kantri dabeba sela sąwai dao. Tama augwali tede kalabus te kibu be hauwa bididubadi, te augwa page bulu tǫ te dwai dolai elaluai dao. Tiali toli, eno augwali ma odasa aselama, tama augwali Israel bulude elalubo bulu du dabede bugagia te bidibao. Te we bidi augwaligo te augwa kantride nai dabe tigidali bugagia dodolama, tama augwali bugagia dulalubao. Tama te nosali kibu be hauwa silama, tama eno nage te kantriba hwįgi pomainu tagala palaibao.
EZE 38:9 Tama eno nage naga ami bidi dabe, me gasa kantri hauwago ami bidi dabe, dage te we bidi dabe dali hwįmainu eno dage tagala palobo sogo, teda dage te genuai wali me tulubage tiwai elama, dagego augwaligo tǫ te pǫgo mesega sabo tiwai yaibao.’ Nago te po te king bidi Gokbolo pusao,” wali.
EZE 38:10 “E po me pusao, ‘Ena God Genuai Bidi eno te po obao. Gok, te nago augwali dali hwįgi pabo sogo da, teda homu hogodama, tama augwaligo nai nai dabe sabo homu mu yaibao.
EZE 38:11 Te nago homugo tiaibao, te hani augwaligo hwįsama eyu, me augwaligo magi dwai sę ebeo homu yaibao. Tama augwaligo taun dabe obogo bagua sai me elalubeo, te genuai sunumi paliabo nai me elalubeo. Me te augwali seselalubo nai dabe menio, te homu yaibao. Tama tialima, nago homugo augwali dali hwįgi pabo homu yaibao,
EZE 38:12 tama augwaligo wiegi yai nai dabe sabo homu yaibao. Te we bidi augwali gasa bulu tagalama, tama augwali ma aselama, tama augwa te taun dabe ma geselai dao. Tama augwaligo kau kibu hauwa elaluyu, me sipsip kibu hauwa elaluyu ebao, me haniani nai dabe hauwa tama elalubao. Tama augwaligo kantri te tigidali tǫde kantri dabe tomode mu te elalubao.
EZE 38:13 Tama te sogo te kantri Seba me Dedan hani, me te kantri Spen taun bisnis bidi dabe augwaligo dage asobo sulama, tama augwaligo dagebolo hanaluyu, te po waibao, “Te nago naga ami hauwa sisinama, tama augwali dali hwįnama, augwaligo wiegi yai nai dabe hauwa sainogo yai da, agawe? Tama dago homugo dagego gol me silva hauwa saibawe, me augwaligo kau kibu, me te meba nai dabe hauwa sainogo homu eba, agawe? Te wiegi yai mu dao,” augwaligo te po nagebolo hanalu waibao.’ Te po king Gokbolo wao,” te po wali.
EZE 38:14 “Tama tialima, tǫde bidi, nago eno po te king Gokbolo pusa mao. Eno po da e dao, ‘King Gok, odao. Te God Genuai Bidi eno we bidi augwali augwa tǫde bugagia bidibo sogo da, teda nago te koneaibao.
EZE 38:15 Tama nage naga genuai ami hani dali, dage duga kantri u not badu tagalama, tama dagego te we bidi augwali dali hwį yagasaibao. Te ami bidi dabe augwali kantri hauwadu asaibao. Tama augwali sese tama augwali hosde dualama, tama augwali nage dali asaibao. Augwali umabo mu asaibao, bidigo augwali nedebaso, usu me egobeo.
EZE 38:16 Te eno dage ena we bidi te Israel we bidi dabe dali hwįgi pomainu tagala palaibao. Tama augwaligo dagego te tǫ te pǫgo mesega sabo tiwai ebo augwaligo sueibao. King Gok, nosali sogode nago te sę dabe emainogo eno nage hodolaibao, te gasa hani dabego sulama, konemainogo, te ena tedali gasagi yai bidiyu, tama eno kolesaga te wiegi yai mu elama, tama doloba pai mu dao olama konemainu. Tama augwaligo ena bugagia mu koneaibao.
EZE 38:17 Ena God Genuai Bidi, eno po te ena sę bidi dabebolo polobadu mu mawai dao, te augwali te Israel dabego profet dabe dao. Tama kibu be hauwade augwaligo po pusuyu, e tama po wai dao, nosali God eno te bidi me seselama, tama te Israel dabe dali hwįmainu yaibao. King Gok, te bidi te nage tama dao.’ Te po te king Gokde pusao,” Genuai Bidigo enabolo te po wai.
EZE 38:18 “Ena God Genuai Bidi, eno te po obao. Te king Gokgo te Israel dabego tǫba aselama, hwįagasobo si, teda eno te Gok dali, te aga dali asali bage dali, augwali dali sębę dwai mu yaibao.
EZE 38:19 Tama eno sębę genuai mu pedelaibao, te posolai sia dabo tiwai yaibao. Tama Gokgo te Israel dabe dali hwįbode, ena te Israel dabego tǫba asaibao, tama te tǫ mali dwai genuai mu yaibao. Tama tialima, tigidali sųgų dabe, me ba dabe, me bulu hasa dabe, me bidigo negebo haniani hasa dabe, me te tigidali tǫde bilibo gasa nai dabe, me te tigidali tǫde bidibo we bidi dabe, tigidali wi elama, noma dwai mu saibao. Tama te bulu du dabe alua paibao. Tama me te sao pado bulu dabe te degaibao. Tama te tigidali taun obo dabe hųgia pelama, tama degaibao.
EZE 38:21 Tialima, ena God Genuai Bidi, eno te po obao, te eno te Israel dabego bulu du bulude dabe te eno genuai wąbi hwįmainogo ilaibao, te king Gok dolainogo. Te aga ami bidi dabe augwali te augwa hasi ma hwįnama, tama augwa hasi ma ela wialaibao.
EZE 38:22 Tama eno agaba haniani gasi pedalomainu iliyu, me boi agaba pedalomainu eyu yaibao, te agabolo dene mayu tama tiaibao. Te eno te tulubage, me talua ge tulubage, me posolai masigi te isi dabo te gea paliyu yaibao, tama te nai dabe aga tigiba tulaluyu, me aga dali asali ami bidi dabe tigiba me tulalueibao, me te aga dali asali haniani kantri bidi dabeba tulalueibao.
EZE 38:23 Tialima, eno te tebo kolesagago tigidali we bidibolo eno genuai bomo ola mayu, me eno kolesaga wiegi yai me doloba pai kolesaga mu ola mawaibao. Tama augwaligo ena mu konea paibao, ena tedali gasagi yai mu dao, te koneaibao. Tama augwaligo bugagia mu konea paibao, ena deli ena Genuai Bidi dao homu yaibao,” wali.
EZE 39:1 God Genuai Bidigo po geninama ma weyu, e tama po wali. “Tǫde bidi, nago eno po te Gokbolo pusao Tama agabolo e tama po walao, ‘King Gok, nage te kantri Mesek me Tubal bidi dabego polalubo king dao, tama eno nage dali boi bidi homu ebao.
EZE 39:2 Te eno nage begelama, tama nago edaba te sautba begelaibao, tama eno nage kegaibao. Tama eno nage naga kantri u not badu mu tagalamainu elama, tama nage eno te Israel dabego bulu du buluba odasa aselama, tama nago Israel dabe dali hwįmainu ilaibao.
EZE 39:3 Tama eno nago enesigi te pobase nogo badu tuali te nogoba eno elama, tama te enesigi tulalueibao. Tama eno nago dolo nogo badu tuali ene dabeba elebo si, te ene dabe me tulalueibao.
EZE 39:4 Tama nage me, nage dali asali ami dabe, te haniani kantridu nage dali asali bage me, dage sese tama te Israel dabego bulude bulu dude isaibao. Tama dagego tigi dabe te pepeli dili tǫde olo munalua paibao. Tama te ba kemodage dabe, me bulu hasa dabego dagego tigi dabe tuagasaibao. Te da God Genuai Bidi eno po dao.’ Te po king Godbolo pusao,” wali.
EZE 39:6 “E po me agabolo pusao. ‘Tama eno isi te tǫ Magok bulude pedalumainu ilaibao, me te tamu ąį pąde dua bidibo we bidi tigiba me te isi pedalumainu yaibao. Tama te hani augwaligo te tama bugagia koneaibao, ena deli ena Genuai Bidi dao homu yaibao.
EZE 39:7 Te sę dabe eno ena we bidi Israel dabe dali yainogo ebo te sę dabe da, te augwaligo gasa we bidi hanigo eno wiegi yai nogi konemainu ola mawaibao. Tama augwaligo eno genuai nogi munu me aiyaba elalugobeo. Tama augwaligo e tama bugagia koneaibao, ena deli ena Genuai Bidi, tama ena te Israel dabe dali bidiba homu yaibao. Tama ena te tedali gasagi yai da, te eno kolesaga te wiegi yai doloba pai mu dao, augwaligo te homu yaibao.’ Te po me pusao,” wali.
EZE 39:8 “‘Ena God Genuai Bidi, eno te po obao. Mu tamao, te sogo mu pedalaibao. Tama eno wali sę dabe sese tama eno te sogo yaibao.
EZE 39:9 Tama te Israel we bidi dabe augwaligo augwa taun dabe tagalama, tama augwaligo te boi bidi dabego hwįbo nai dabe tǫde subigila tagalai wilalua pabo nai dabe sigi paibao. Te augwaligo te sabele dabe me te awa dabe siyu, me enesigi siyu, me ene dabe siyu, me hwįbo wąbi dage dabe siyu, me te bobobage sesemone dabe siyu yaibao. Tama augwaligo te nai dabe sisinama, tama augwaligo te isi pulu dabe ulubo tiwai yaibao. Tama tiyu, augwaligo ulabo isi te kibu be nogo a naga olama, me badu nogo si, te 7 kibu bede nogabo isi usu elaluaibao,
EZE 39:10 tama te kibu be a naga olama, me badu nogo si te kibu bede augwaligo buside o kala sili bulude isi gegebo sę meni yaibao. Menio. Te augwaligo te hwįbo nai dabe naga augwaligo isi ulubo sę eyu yaibao. Tama te kolesagago da, te Israel dabe augwaligo augwa boi bidi dabe augwaligo dwai kolesaga wei ponaibao. Te boi bidi dabego Israel dabe doado bage dabe wi sai, tama megi da, te Israel dabego te boi bidi dabego nai dabe saibao. Te da, God Genuai Bidi eno po dao,’ nago te po te bidi Gokbolo pusao,” wali.
EZE 39:11 “Ena Genuai Bidi eno po genina ma weyu, e po obao. ‘Te sę dabe tigidali pedalobo sogo da, teda eno te kantri Israelde te king Gok aga ami dabe dali augwali pubulabo gų page tǫ deli me sa muaibao. Te gų page da, te Osogo Bidagasali Bidi Dabego Odogo Malu Bulude elaluaiba, te u badu te giliga asobo badu te tamu ąį Detsi te sigi ąį badu. Tama te we bidi augwali te badu munu me ma biligobeo. Magi baso meni. Te Gokgo ami bidi dabego gų page te bulu badu mu pągąna paibao. Tama augwaligo te odogo malu bulu nogi e tama nogi nogi yaiba, Gokgo Ami Bidi Dabego Odogo Malu Bulu dao waibao.
EZE 39:12 Tama te Israel dabe augwaligo te Gokgo ami bidi dabego tigi pubalobo sę idubadi, te 7 polua bidaibao. Tialima, augwaligo augwali polo pubala silibo si, teda augwaligo tǫ eno gedude wiegi yai ma yaibao.
EZE 39:13 Te Israel dabe sese tamago te sę yaibao. Tama bidi dabego enaba genuai nogi mabo sogo da, teda augwali te sę yali bidi dabebolo me genuai nogi mawaibao. Te da God Genuai Bidi eno po dao.
EZE 39:14 Tama te a naga olama, si, te 7 polua silibode da, te Israel dabe augwaligo bidi dabe sa munama, tama augwali tigidali Israel tǫba pelama, tama te bidi dili dabe me munalubo gege biligi paibao. Tama augwaligo te dili dabe pubalaibao, te tǫ wiegi yai pedalomainu.
EZE 39:15 Tama te bidi dabe augwali biligi pelama, te bidi dili dabe elalubo subaso da, te bidi dabe augwaligo te dili elalubo pąde sa munagaliyu yaibao. Tama gasa bidi dabe mebago te dili dabe sagaselama, tama augwaligo te Gokgo Ami Bidi Dabego Odogo Malu Buluba pubaligi paibao.
EZE 39:16 Augwaligo te dabe sese pubala silibo si, teda Israel dabego tǫ sese tama wiegi yai ma pedelaibao. Tama taun me deli te gų page pąde elaluaibao. Tama augwaligo te taun nogi e tama nogi yaibao, Genuai Ami Bidi Hani nogi yaibao.’ Eno te po obao,” wali.
EZE 39:17 “Ena God Genuai Bidi eno te po me obao. Tǫde bidi, eno homugo nago e tǫde ba dabe me bulu hasa dabe asomainu i ola kegelao. Eno e po augwalibolo pusao, ‘Dage te Israel dabego bulu du buluba dabe sisinagaselama, tama dagego eno dagebolo ofa nai mawainu ebo te ofa nai tuagameo. Te eno dagebolo tuabo mi hauwa mayu, me tuabo kaneme hauwa mu mayu yaibao.
EZE 39:18 Te dagego te king hauwago bomai ami bidi dabego tigi mi me kaneme hauwa tuyu yaibao, te bidi dabego mi dabe te Basan bulude sabo wiegi yai tumona pai genuai sipsip kibu, me meme kibu, me kau kibu ofa ebo mi tiwai tueibao.
EZE 39:19 Te eno te ami dabe te ofa tiwai elebo si da, dage te ba dabe me bulu hasa dabe dagego te tigi ili dabe tudubadi genama, dagego tabi pągąbo tagalama, tama augwaligo kaneme tudu pelama, dage polobo bidi tiwai ebo si tagalaibao.
EZE 39:20 Awe, eno dagego genuai nai da mu mawaibao. Tama dagego te hos dabego tigi dabe tuyu, me te hosde duabo ami bidi dabego tigi, me te hwįbo bomai bidi dabego tigi me tuyu yaibao. Tama dagego tabi mu pągąna paibao.’ Te da God Genuai Bidi eno po dao.”
EZE 39:21 Genuai Bidigo po bomonama ma weyu, te po wali, “Te eno te we bidi tigidali augwa dwai dwai kolesaga wei ponoyu, augwali dene mawaibao. Eno te tama tibo sogo da, teda augwaligo eno genuai bomo sulama, tama augwaligo enabolo genuai nogi mawaibao.
EZE 39:22 Tama tialima, te sogo me, nosali bidibo tigidali sogo me, te Israel dabe augwaligo te tama bugagia koneaibao, ena deli ena Genuai Bidi, tama ena augwa God dao waibao.
EZE 39:23 Tama gasa tǫ kantride bidibo we bidi hani bidi eno te Israel dabe dali yali sę page mu koneaibao. Te eno te Israel dabe digibulu buluba kalabus sę emainu tagala palali sogo, eno te tama tiai dao. Magi baso meni, te Israel dabe augwaligo eno po sela sąnama, sęgę sobaso tiai dao. Tama tialima, eno augwalibolo tudi ola mawai dao. Tama te boi bidi dabego augwali aiyaba elaluama, tama augwali sese ela isila silimainu sula tagalai dao.
EZE 39:24 Eno augwaliba tudi ola menama, tama augwaligo dwai meda yai sę dabe elama, sęgę sę dabe yali wei ponoyu, tama tiai dao, augwa dagede,” wali.
EZE 39:25 “Ena God Genuai Bidi, eno te po obao, eno te Israel dabe dene polo mawai dao. Tama tialima, eno megi augwali ma homu dene ma yaibao. Tama bidi mego eno genuai nogi aiyaba elalubo usu me egobeo.
EZE 39:26 Te augwali augwa tǫde bugagia bidiyu, tama bidi mego augwali wi ma ilisąma ebaso da, teda augwaligo augwa polobadu yali dwai kolesagaba kone palama, tama augwali hale dwai mu yaibao.
EZE 39:27 Eno augwali augwa boi bidi dabego kantride selama, tama augwali augwa kantri muba ma odasa asaibao. Tama te gasa hani bidi dabego eno te Israel dabe dali yali sę sulama, tama augwaligo e tama koneaibao, te ena tedali gasagi yai dao, tama eno kolesaga wiegi yai doloba pai mu augwaligo suaibao.
EZE 39:28 Tama te Israel dabego eno augwali dali yali sę kone palaibao. Te augwaligo eno augwali gasa kantriba kalabus igi pomainu tagala palali, me augwali augwa kantriba ma odasa asali kone paliyu yaibao. Tama augwaligo e tama bugagia koneaibao, ena deli ena Genuai Bidi augwaligo God dao homu yaibao.
EZE 39:29 Tama eno ena mobo bidi augwalibolo mawaibao. Tama eno augwali tudi munu me ma ola magobeo. Ena God Genuai Bidi, eno te tama po te wali dao,” te po wali.
EZE 40:1 Te da kalabuside bidibadi kibu be 25 wabode, tama te kibu bede te dei namba 10 wabo sogo eno Genuai Bidigo bomo enaba asobo gagama yali. Te da te boi bidi dabego te taun Jerusalem selama, 14 kibu be polo pai nosali badu dao. Tama te sogo tama Genuai Bidigo ena tolasa pali.
EZE 40:2 Tama te nade ebo sę dabe tiwai elama, Godigo ena tolasa pelama, Israel dabego tǫba odasa pelama, tama bulu du ugwanu mu yai bulu duba me tagaligi pali. Tama eno u sautba tonobadi, eno be dabe elalubo suali, tama te ma te taun me elalubo tiwai subo ąǫ yali.
EZE 40:3 Tama Godigo ena pąba odasa pali, tama eno bidi me bidibo suali, tama aga te bras ula tiwai ebo suali. Te bidi te taun obo sunumide dolaluali, tama agai te bobobage nai usu sabo haliga bono elaluyu, me te gasa nai usu sabo ni tolaluyu, dolalubo suali.
EZE 40:4 Tialima, te bidigo enabolo e tama po walali, “Tǫde bidi, eno nagebolo waselainu ebo nai dabeba bugagia mu tonaluao. Me nago odainu ebo poba bugagia olo saganama odao. Magi baso meni. Godigo nage odasa asali, te nagebolo eno te nai dabe ola momainu, tama nosali nago Israel dabebolo eno te pusa mani po pusao,” te bidigo enabolo te po wali.
EZE 40:5 Eno Godigo tempel be suali, tama masigigo nigai genuai obogo te be bagulai suali. Tama te bidigo te usu ni sabo eno suali. Te usu ni bobobage te 3 mita usu nama elaluali. Tama agai te Godigo be bagulali genuai obo usu sali. Tama te obo bobobage ugwaba te 3 mita usu nama elaluyu, me ugwade edasi dedawali te 3 mita usu nama elaluali.
EZE 40:6 Tama te obogo bobobage sunumi sela elaluali. Tama te deli deli sunumi u badude te be habu dabe si badu elalua peyu, tama elaluali. Tama bidi dabe augwali Godigo beba painogo da, augwali te be habu elalubo sunumi me delidu peyu yao. Tama be sunumi tagalama, saboligi pao. Te deli deli sunumide te ugwa holoyu, eda asiyu yabo togobili te elalubao. Tialima, te usu ni elalubo bidi aga te giliga asobo badu elalubo obo sunumi badu pali. Tama te bidi aga te sunumi togobilidu ugwaba holoyu, agai te obo sunumi ugwanu dedawali usu nigo usu sesa holali. Tama dąį te usu ni da, te 3 mita usu nama elaluali. Te hasia wali sunumi dąį te 3 mita usu nama tama elaluali.
EZE 40:7 Te be te sunumigo talua sai elaluali. Te be sunumide te u badu me e badu te tonalubo bidi bidabo be habu dabe me elaluali. Tama bilabo sunumi bobobage te tomode elaluali. Tama te bidigo te be habu genuai me bobobage usu nigo usu sabo suali. Tama augwali sese tama deli dąį yai naga elalubo suali, te 3 mita usu nama naga, tama agai tama te be habu tomode ugwanu edanu dedawali te usu nigo usu sali. Te be habu todogo pali tomode tama te dagago genuai dąį te 2 mita me hap mita elalua pali. Te pesage te genuai be habuba deli ugwa peyu, eda asiyu ebo pesage deli tama naga dao. Tialima, te bidi aga pelama, te be habu sunumiba saboligi pali. Tama agai te sunumi sabi badu daga ugwanu edanu dedawali te usu ni sabo suali. Tama te badu te daga dąį te 3 mita usu nama elaluali.
EZE 40:8 Tama aga te genuai be habuba pelama, tama agai te be habu usu nigo usu sabo suali. Te be habu genuai dąį te 4 mita usu nama elaluali. Te be habu u badu te gasa sunumi me elaluali. Te sunumi te Godigo beba pabo sunumi elaluali. Tama te bidigo te be habugo sunumi sabi badu daga usu nigo usu sigi pali. Tama agai dąį te wan mita usu nama elaluali.
EZE 40:10 Te be tonalubo bidi dabe bidibo be habu dabe da, te 6 tama elaluali, te genuai sunumi bogo badu elalubo be habu dabe. Te me badu sela, me badu sela elaluali. Tama tigidali be habu dabe deli usu ni naga elaluali.
EZE 40:11 Tama nosali te bidi aga genuai sunumi dedawaliba pelama, tama agai te pesage usu nigo usu sesa bilali. Te sunumi dedawali te 6 olama hap mita tama usu nama naga elaluali. Tiali goli, augwaligo te be sunumi dabo si da, teda te dąį pąba 5 mita tamaba usu nigi pali.
EZE 40:12 Tama te tonalubo bidi dabego be habu gesabidi badu te pęwadage be daga ugwaba bobobage te 50 sentimita elaluyu, me ugwade eda si dedawali me te 50 sentimita tama usu nama tama elaluali. Tama te be habugo bobobage me genuai yali me te deli mita naga elaluali, te 3 mita tama naga elalua pali.
EZE 40:13 Tialima, te bidi aga te tonalubo bidi me deligo be habu tomoba pelama, tama usu nigo usu siyu yali. Agai te be habu tudi badu dagade gagalama, tama pelama, te soabo sunumi ela solama, gasa dolo si be habu tudi badu dagaba pelama, te usu nigi pali. Tama te tiwai usu selama, te usu te 12 mita olama hap mita yali. Te da te bego genuai dąį namba dao.
EZE 40:14 Tama nosali te bidigo te dedawali sabide elalubo genuai be habu usu nigo usu sigi pali. Te be habu aga bobobage da, te 10 mita usu nama dao. Te genuai be habu u badu te sunumi te Godigo be bagulai genuai sisinibo pesageba pabo sunumi dao.
EZE 40:15 Te genuai sunumi bulu badu gagalama, tama te dedawali usu selama, tama te sabi badu elalubo sunumiba usu nigi pelama, te usu te 25 mita usu nama dao.
EZE 40:16 Te tigidali be habu si si tomode te windo elalua pali. Tama te tonalubo bidi dabego be habu tudi badu daga elalua pabo, te daga dabede me te windo dabe elalua pali. Tama augwaligo te ni det noma te be dagade te windo pąde elalua pali.
EZE 40:17 Tama tialima, te bidigo ena oda selama, tama da sigo te be habu tagalama, tama te obo tomode genuai sisinibo pesage te Godigo be bagulama tomode elalubo, teba pesageba pali. Tama eno 30 be habu te sisinibo pesagede bogo badu elalua pabo suali, te sisinibo pesage bogo badu selade naga. Tama augwali te masigigo nigai genuai oboba ugwa mu dagana sai elaluali. Tama te be habu dabe gesabidi badude augwaligo masigi du dabe wasilama, tama bilibo pesage nigai suali, agai te pedu elalubo suali. Te bilibo pesage te tigidali be habu gesabidi badu naga elalua pabo suali.
EZE 40:18 Te bilibo pesage aiyadu elalubadi, te Godigo be bagulai sisinibo pesage te ugwadu tama elaluali.
EZE 40:19 Te sisinibo pesage obogo te gasa obo me bagulai. Te da te namba 2 obo te Godigo tempel be bagulai obo mu dao. Te namba 2 obo tomode te gasa sisinibo pesage me elaluali. Tama te sisinibo pesage te ugwanu ganama elaluali. Te namba 2 obo te giliga asobo badu, te sunumi me deli elaluali. Tama te bidigo te obo si agebele tomode elaluali tǫ usu nigo usu sali. Agai te genuai obo sunumide gagalama, tama pelama, tama te namba 2 obo sunumiba saboligi pali. Tama te tǫ mita te 50 mita usu nama tama dąį yali. Tama tialima, te bidi aga u not badu pali,
EZE 40:20 tama agai te not badu elaluali be obo sunumi usu nigo usu sali.
EZE 40:21 Te tomo habu dabe te giliga asobo badu genuai obo tomode te be habu dabe tiwai mu dao. Tama tialima, te sunumi genuai dąį te 12 mita hap usu nama dao. Tama te sunumi dedawali bobobage da, te 25 mita usu nama dao. Tama te sunumi togobili te agalama ugwaba te genuai obo tomoba pabo te a naga olama, si, te 7 te bede elalubao.
EZE 40:23 Te u badu not badu te Godigo be bagulali namba 2 genuai obode, te sunumi me deli elalubo. Te da te giliga asobo badu te sunumi tiwai si mu dao. Tialima, te bidigo te sunumi si agebele tomode te tǫ usu nigo usu sali. Te agai te giliga asobo badu yali kolesaga tiwai tama yali. Tama te tǫ dąį me te 50 mita usu nama tama elaluali.
EZE 40:24 Tialima, te bidigo ena u saut badu odasa pali. Tama dadi si te obo sunumide beba sabolali. Te genuai obo sunumiba tama agai te be usu nigo te be usu sali. Te be habu dabe te deli tiwai si naga elalua pali, te gasa me be si tiwai yali gilama naga elaluali. Tama tialima, te be bobobage te 25 mita elaluali, tama te aga genuai da, te 12 mita olama hap mita tama elaluali. Tama te sunumide te ugwa genuai be habuba holobo togobili te a naga olama si, te 7 agabo madi elaluali.
EZE 40:27 Tama te e saut badu me te 7 namba 2 obo badu te sunumi me deli elaluali. Tama te bidigo agai giliga asobo badu te yali kolesaga tiwai te obo sunumi si tomo agebele tǫ usu nigo usu sali. Tama te tǫ dąį te 50 mita usu nama tama elaluali.
EZE 40:28 Tama tialima, te bidigo ena te namba 2 obo sunumi elalubo madi odasa pali, te saut badu. Tama dadi si te sunumidu tomoba pelama, te sisinibo pesage, te Godigo tempel be gesabidi badu elalubo, te pesageba saboligi pali. Tama te namba 2 obo sunumide me be elaluali. Te bidigo te saut badu te sunumi usu nigo usu sali, tama te be habu dabe sese tama te gasa genuai be habu te usu sali tiwai si tama naga elaluali.
EZE 40:29 Te tempel be tonalubo bidi dabego be habu dabe me, te genuai be habu me, te be habu tomode daga dabe sese tama te gasa meba be habu usu sali usu ni tiwai naga elaluali. Tama te sunumi dedawali bede me te windo dabe me elaluali. Tama te dedawali bobobage magi te 25 mita usu nama elaluyu, me ugwanu edanu dedawali te 12 mita olama hap mita elaluali.
EZE 40:30 Tama te be tomode te genuai be habu te si dali si badu elaluali. Tama te be habu bobobage te usu ni te 12 mita olama, ugwadu hap mita dao. Tama te be genuai ugwanu dedawali da, te 2 mita olama hap mita dao.
EZE 40:31 Te bede genuai be habu aga gesabidi te genuai sisinibo pesage badu elalubao. Tama te tempel be tonalubo bidi dabego be habu dabe te Godigo tempel be pąde elaluali. Tama te ni detgo piksa dabe te windo dabe pąde elalua pali. Tama te be sunumi te a naga olama sela, te 8 agabo togobili ni aiyaba te genuai sisinibo pesageba dulubo digi elaluali.
EZE 40:32 Tialima, te bidigo ena te giliga asobo badu te namba 2 obo tomode elalubo sisinibo pesageba teba odasa pali. Me te tonalubo bidi dabego be habu te Godigo be gesabidi badu pąde elaluali. Tama agai te namba 2 obo badu elaluali be sunumi usu nigo usu sali. Tama te be habu dabe, me te tigidali nai dabe te meba be habu dabe usu ni sali tiwai naga elaluali. Te bego genuai be habu te genuai sisinibo pesage pąde elaluali. Tama te tonalubo bidi dabego be habu dabe te Godigo be pąde tama elaluali, te Godigo be gesabidiba polobadu. Tama te ni detgo piksa noma te windo pąde dabe elalua pabo suali. Tama te be togobili te a naga olama sela, te 8 aiyaba te genuai sisinibo pesageba dulubo digi elalubo suali.
EZE 40:35 Tialima, te bidigo ena oda selama, tama not badu te namba 2 obo sunumi beba odasa pali. Tama agai te be usu nigo usu sali. Tama te be habu dabe usu sali, te gasa meba be habu dabe tiwai si naga elalua pali. Tama tede te ni detgo piksa noma te piksa tama elaluali. Tama te tonalubo bidi dabego be habu dabe te Godigo be pąde elaluali. Tama te be sunumi togobili te aiyaba genuai sisinibo pesageba dulubo madi te togobili ni te a naga olama sela elaluali.
EZE 40:38 Te not badu te bede te gasa be habu me elaluali. Te be habu te genuai be habu sesege badu elaluali. Tama te be habugo sunumi te genuai be habu dedawali sunumi badu elaluali. Tama te be habude augwaligo te iside mu dela silabo ofa yabo hasa dabego mi ąįgo telabo digi dao.
EZE 40:39 Te genuai be dedawali bogo badu si badu te tebol sai elaluali. Te me si u badu elaluyu, me si te me badu polo badu elaluali. Tama te tebol sai dabede augwaligo te iside mu dela silabo ofa yabo kibu eleyu, me sęgę sela sąyabo ofa yabo kibu eleyu, me sęgę dabe dodolabo ofa yabo kibu dabe tama eleyu ebo tebol dabe dao.
EZE 40:40 Te bulu badu te genuai be habude te genuai be habu muba pabo te togobili pagede te me si me si tebol tede munaluali. Te tebol me si te togobili elalubo badu elaluyu, me si te u badu elaluyu yali.
EZE 40:41 Tialima, te ofa ebo kibu dabe elebo tebol te a naga olama sela, te 8 tebol elaluali. Te me si me si te genuai be tomode elaluali, tama me si me si te bulu badu elaluali.
EZE 40:42 Tama gasa me si me si tebol me elaluali, te augwaligo masigigo nigai. Te tebol dabe ugwaba dąį te 50 sentimita dao. Tama agai bobobage elama, genuai te usu ni da, te 75 sentimita dao. Tama te tebol daide augwaligo te sese dela ulubo ofa yabo kibu dabe elebo kągo hwą dabe tede munalubo dao.
EZE 40:43 Augwaligo te be habu dagade te genuai huk dabe munama bagulai elaluali. Te huk bobobage usu ni te 7 hap sentimita dao. Tama augwaligo te ofa ebo kibu mi dabe te tebolde muyu ebo dao.
EZE 40:44 Tialima, te bidigo ena te namba 2 obo tomode elalubo te bidi dabe sisinibo pesageba odasa pali, te Godigo tempel be gesabidi badu. Tama eno te balia po wabo bidi dabego be habu si suali. Te be habu me te not badu be sunumiba polo badu elaluali, tama u sautba tonoyu ebo suali. Tama me be habu te saut badu obo sunumi be sesegede elaluali, tama u notba tonoyu ebo elaluali.
EZE 40:45 Tama te bidigo enabolo e tama po walali, “Te not badu te elalubo be habu te Godigo be tomode sę ebo bidi dabego be habu dao. Tama te saut badu elalubo be habu te altade
EZE 40:46 sę ebo bidi dabego be habu dao,” wali. “Te tigidali pris dabe te Sadok hani wai, tama augwali te Livai hani dao. Te Sadok hani pris bidi dabe naga te Genuai Bidi pageba paibao, agai sę yainogo,” te po wali.
EZE 40:47 Tama tialima, te bidigo Godigo be gesabidi badu sisinibo pesage badu usu nigo usu sali. Tama te sisinibo pesage tigidali badu te deli tiwai dąį naga elaluali, te 50 mita usu nama naga elaluali. Tama te alta te Godigo tempel be gesabidi badu te sisinibo pesage tomode elaluali.
EZE 40:48 Te usu ni tolalubo bidi agai ena te Godigo be sunumidu odasa pelama, tama dadi si te be mabo tiwai habuba me pali. Agai te be sunumi ugwanu edanu dedawali te usu nigo usu sali. Te sunumigo bobobage tama te dąį te 2 mita olama, hap mita elaluali. Tama agai te sunumigo genuai te usu nigo usu sali, tama agai magi te 7 mita usu nama elaluali. Tama te dwasianu daga te be habu badu elaluali te daga usu ni da, te mita deli olama, hap mita yali.
EZE 40:49 Te sunumi dedawaligo bobobage te 10 mita elaluali. Tama agai genuai te 5 mita olama, hap mita elaluali. Tama te sunumide togobili elaluyu, tama aiyaba te sisinibo pesageba dulubo togobili elaluali. Tama te togobili bogo badu si dali si badu te genuai pos si dolaluali.
EZE 41:1 Te Tedali Gasagi Yai Be Habu te be mabo tiwai be habu tudi badu elalubo. Tama te bidigo ena te Tedali Gasagi Yai Be Habu sunumiba odasa pali. Agai te sunumi usu nigo usu sali. Tama te sunumi sesegede te obo ugwanu dedawali te 3 mita elaluali.
EZE 41:2 Tama te sunumi aga te dedawali te 5 mita elaluali. Tama me te obo dage te bugai te sunumi habu badu gagalama, te me habuba te 2 mita me hap mita elaluali. Tama te obo dage me te be sunumi me badu pedai badu te usu ni si te tiwai si naga yali. Tama agai te Tedali Gasagi Yai Be Habu usu nigo usu sali. Tama te be habu te bobobage te 20 mita usu nama elaluyu, me te be habu genuai te 10 mita usu nama elaluali.
EZE 41:3 Tialima, nosali aga te Tedali Gasagi Yai Be Habu tudi badu te gasa be habu sunumi me deliba pali. Tama agai te be sunumi usu nigo usu sali. Te sunumi sesege badu obo ugwanu dedawali te wan mita elaluali. Tama te be sunumi mu da, te 3 mita usu nama elaluali. Tama te be sunumidu te obo te sunumidu gagalama, te be habuba te 3 mita olama, hap mita elaluali. Te obo me badu sunumi sesege badu te deli tiwai dąį naga elaluali.
EZE 41:4 Tialima, agai te be habu usu nigo usu sali. Tama te be habu tigidali pedai badu te deli tiwai dąį naga elaluali, te 10 mita usu nama naga tama elaluali. Tama agai enabolo e tama po wali, “E da te Tedali Gasagi Yai Mu Be Habu mu dao,” wali.
EZE 41:5 Te Godigo tempel bede te Tedali Gasagi Yai Be Habu, me te Tedali Gasagi Yai Mu Be Habu, augwali si te dwasianu dwasianu be habu dabego bagua sai mu elaluali. Tama te usu ni tolalubo bidigo te be habu tomode elalua pabo obo dabe genuai yali usu nigo usu siyu, me Tedali Gasagi Yai Be Habu, me Tedali Gasagi Yai Mu Be Habu te usu nigo usu sali. Te daga dabe aiya badu te dąį te 3 mita usu nama elaluali. Tiali goli, te habu tomode me te daga tomode te dąį te deli tiwai si menio. Magi baso meni. Augwaligo te be daga bulu badu te habu sugunani si daganani. Tama te be habu dabe te sai yali selade wasilama elaluali. Te aiyadu be habu lain te aiyadu tǫde elaluali. Tama me te tomo ugwadu be habu dabe te tomo menename ni daide elaluali. Tama te menename ni te hasia manani kau ni daide elaluali. Tama te ugwadu daide te be sai ni te si wabo manani kau ni daide elaluali. Augwaligo te tobage kolesagago nigai elaluali. Magi baso meni. Augwaligo Godigo be dagade dedage nigibo hagela ebaso, te soiyame ni aiyadu be saiba muainogo. Tigidali be saide te be habu 30 elaluai. Tama aiyadu be habu dabe te 2 mita usu nama elaluali.
EZE 41:7 Te tomode be habu dabego te 2 mita genuai edelama elaluali. Tama ugwadu be habu dąį dabego tomode be habu dabe edelai elaluali. Tama te be tomoba holobo togobili me, te ugwaba holobo me, te togobili elaluali.
EZE 41:8 Te Godigo be obo genuai me te habu u badu elaluali. Te obo dedawali da, te 2 mita usu nama elaluali. Tama te obode te sunumi si te bidi dabe ugwa eda yabo elaluali. Te sunumi me te saut badu elaluyu, me te not badu elaluyu yali. Tama eno suali, te bilibo pesage te Godigo be bagulama elalubo suali. Te ugwaba genuai yali da te 2 mita olama, hap mita elaluali. Te ugwadu te bilibo te be sai te ugwaba te Godigo be habu dąį tiwai elaluali. Tama te dąį da te 3 mita usu nama elaluali. Tama te bilibo pesage aiyadu te olo pesage me elaluali, te Godigo be bagulama elaluali. Tama agai genuai usu yai te 10 mita elaluali. Te olo tǫ elalubo digi te be dabe meba te bogode elaluali.
EZE 41:12 Te giliga dega sabo badu te Godigo be tudi badu genuai be me deli elaluali. Tama agai edaba te Godigo be bagulama elalubo te olo pesage o tǫ elalubo digi edaba tonaluali. Te be bobobage te 45 mita usu nama elaluali. Tama te be ugwanu edanu dedawali te genuai te 35 mita usu nama elaluali. Tama te be daga dedawali da, te 2 mita olama, hap mita elaluali.
EZE 41:13 Tialima, te be tagalama, te bidigo Godigo tempel be bobobage usu nigo usu sali. Tama te dąį te 50 mita usu nama elaluali. Tama nosali agai te olo tǫ, me te giliga pabo badu te be dali si agai usu nigo usu sali. Agai Godigo tempel be tudi badu gagalama, tama te be tudi badu tagaligi pali. Te dąį me te 50 mita tama yali.
EZE 41:14 Tialima, agai Godigo be gesabidiba usu siyu, me olo tǫ dabe u badu elaluali, me e badu elaluali olo tǫ elalubo pesage agai usu nigo usu sali, tama te dąį me te 50 mita usu nama naga elaluali.
EZE 41:15 Tama agai te tempel be tudi badu elalubo be bobobage me te be habu bobobage si u badu me elaluali, te tama usu nigo usu sali. Tama te dąį me te 50 mita naga elaluali. Augwaligo te Godigo tempel be sunumi dedawali dali, te Tedali Gasagi Yai Be Habu dali, te Tedali Gasagi Yai Mu Be Habu dali, augwali sela te dodolai masigi dabego nigai dao. Tama te be habu selago tomode elaluali be daga dabe augwaligo te ni namigo dagawani. Me te sunumi pąde elalubo daga dabede, me dwasianu windo dabede, me te be sunumi genuai pesage badu me, te ni namigo daganai elaluali. Te ni nami dabego te daga mesega sai elaluyu, te aiyadu soiyamedu gagalama, tama holama, te windoba usu nigi pali. Tama me te windo halubo ni nami dabe me elaluali.
EZE 41:17 Augwaligo te Tedali Gasagi Yai Be Habude augwaligo piksa togobadi, me te Tedali Gasagi Yai Mu Be Habu me ugwa badu be habu badu daga, me te be habuba pabo sunumi daga me augwaligo te piksa togwai elaluali.
EZE 41:18 Tama te piksa dabe te ni det piksa, me te bogo me si me si yai ensel dabe piksa dao. Tama te deli deli ensel bidigo piksa te ni det piksa tomo tomode elalua pali. Te ensel dabego gesabidi si te e tama tiwai si elaluali.
EZE 41:19 Te me da, te bidigo gesabidi, me te laion yowigo gesabidi elaluali. Tama te piksa sigo te ni det u badu elalubo me e badu elalubo piksaba ugwa tonoyu, edaba tonaluyu yali. Te tiwai tigi poai piksa te tigidali be daga elalubo madi elalua pali,
EZE 41:20 te be aiyadu gagalama, tama te sunumi ugwadu toboluba tama usu nigi pai elaluali.
EZE 41:21 Te Tedali Gasagi Yai Be Habu badu te sunumi pos te me si me si badu elaluali. Tama augwali dąį te deli tiwai si naga elalua pali. Te Tedali Gasagi Yai Mu Be Habu pąde augwaligo
EZE 41:22 ni namigo nigai alta sai elaluali. Te nai ugwa badu dąį te 1 wan mita olama, hap mita elaluali. Te nai dage badu me, bogo badu me, page badu me, augwaligo ni namigo nigai elaluali. Tama te usu ni tolalubo bidigo enabolo e tama po walali, “Te nai da, te Genuai Bidi gesabidide elalubo tebol sai dao,” wali.
EZE 41:23 Te Tedali Gasagi Yai Mu Be Habuba tula pabo sunumi si elaluali. Te be sunumi si deliba ununu pelama, elalua pali. Tama deli deli sunumi te ununama, deli sunumi elalubo tiwai yali. Tama me te Tedali Gasagi Yai Be Habu badu me te deli tiwai be sunumi naga elaluali.
EZE 41:25 Tama te Tedali Gasagi Yai Be Habu sunumi bulu badude me augwaligo te ni det piksa, me te ensel piksa tiwai si naga togwai elaluali, te be dagade elalua pali piksa tiwai naga elaluali. Te Godigo be tomoba pabo be sunumi bulu badu mabode te be pedu dwasianu deli elaluali. Augwaligo te be pedu te ni namigo nigai.
EZE 41:26 Tama te be mabo u badu me, e badu me, te dagade te dwasianu windo dabe elalua pali. Tama te be mabo dagade te ni det piksa elaluali, te windo dabe bogo badu side elaluali.
EZE 42:1 Tialima nosali te usu ni tolalubo bidigo ena u not badu odasa pali. Tama da si te genuai sisinibo pesageba saboligi pelama, tama eno u not badu te Godigo be not badu te be me elalubo suali. Te be te Godigo be tudi badu te not badu te genuai be tudi badu pąde elaluali.
EZE 42:2 Te be sunumi te u not badu gesabidi elaluali. Te be bobobage te 50 mita elaluyu, me agai genuai te 25 mita usu nama elaluali.
EZE 42:3 Te be tudi te olo tǫ dage te Godigo be bogo badu elaluali, te tǫba dagana sai elaluali. Tama te be gesabidi te genuai sisinibo pesage elalubo, tama ugwaba te bidi bilibo sunumiba ugwaba tonaluali. Tama augwaligo te bede sai sela yai elaluali. Augwaligo namba 2 me namba 3 plua be sai ugwanu tomoba pelama, gana nigai elaluali. Tialima, te bego agabo togobili sela elalubo ąǫ yali.
EZE 42:4 Tama te bede te bilibo pesage bobobage te namba 3 saide elaluali, te olo tǫ dage pąde. Te bilibo pesage ugwanu dedawali da, te 5 mita usu nama elaluali. Tama te bilibo pesage me te be bagulama pelama, tama u badu te not badu sunumi dabeba saboligi pai elaluali. Tama te bilibo sunumi te 50 sentimita usu nama elaluali.
EZE 42:5 Te namba 3 be sai te namba 1 wan me namba 2 be sai magi magi genuai usu nama tiwai si menio. Magi baso meni. Augwaligo namba 3 plua sai ugwanu mu nigai dao.
EZE 42:6 Augwaligo te be sai dabe augwaligo pos saide ugwadu nigai menio. Te meba sisinibo pesagede be dabe tiwai menio. Menio. Te badu tǫ te dwasianu bulu du tiwai dao, tama tialima augwaligo te be sai dabe te tǫde nidigili pai dao. Tama tialigo te namba 2 me namba 3 sai ugwanu mu gana pai elaluali.
EZE 42:7 Te namba 1 be sai usu sali bobobage te 25 mita tama naga usu nama elaluali. Tiali goli, meba be sai dabe te 50 mita usu nama elaluali. Tama augwaligo namba 1 wan be saide augwaligo be daga deli yai elaluali. Te daga bobobage te 25 mita usu nama dao, te namba 1 be sai tiwai mu dao.
EZE 42:9 Te obo tomode bilabo sunumi elaluyu, me te namba wan be saide me tiwai si elaluali, te bilabo pesage. Tialima, bidi te be tomoba painogo da, teda te bidi agai giliga asobo badu aselama, tama aga te bilibo sunumidu aselama, tama te be tomoba pomainao. Tama u saut badu te Godigo be elalubo pąde te be me deli elaluali. Tama aga me te genuai be Godigo be tudi badu elalubo be pąde elaluali.
EZE 42:11 Te saut badu te be gesabidi badu te bilibo pesage me deli elaluali. Tama te da te not badu elalubo te bilibo pesage tiwai dao. Tama te be si dąį deli tiwai si tama dao, tama te be sunumi me tigidali nai dabe deli tiwai si naga dao.
EZE 42:12 Tialima, bidi u saut badu elalubo beba painogo yali da, teda aga giliga pedalubo badu aselama, tama te bilibo sunumi wali pelama, te be tomoba pao, te not badu elalubo be dali tiwai si tama dao.
EZE 42:13 Tialima, te usu ni tolalubo bidigo ena dali te po wali, “Te be si te Godigo be mu dao, tama tedali gasagi yai mu dao. Te pris dabe augwali te Genuai Bidigo beba augwa sę igi pabo dao. Augwali da te be siba pomainao, tama augwaligo te we bidigo Genuai Bidibolo mani te wiegi yai tedali polalubo ofa yali nai tumainao. Te be si te Genuai Bidigo be si mu dao, augwali tedali gasagi yai mu dao. Tama tialima, te pris dabe augwaligo te we bidigo mani tedali polalubo ofa nai dabe te be side muyu emainao. Te da te wit ulubo ofa, me we bidigo sęgę sela sabo ofa, me dwai kolesaga dodolobo ofa yali, te ofa mubo be si dao,” wali.
EZE 42:14 Tama agai te po me wali, “Te pris dabe augwali Godigo bede sę yali bidi dabe, augwaligo te be side augwaligo gudubo ugwa hasegelebo ugwa te be side hasegeleyu emainao. Te pris sę yabo gudubo ugwa te Genuai Bidigo nai ugwa dabe naga dao. Tama tiyu, augwaligo pris sę ebo ugwa hasegelama, tama augwaligo meba olo ugwa hasegelama, gudumainao. Tama elama, augwali te be si teda solama, genuai sisinibo pesageba pomainao, te da te olo we bidigo pesage dao,” te usu ni tolalubo bidigo te po wali.
EZE 42:15 Te bidigo Godigo tempel be dali, me te genuai obo tomode elaluali te nai dabe sese tama usu nigo usu sali. Tama agai ena te giliga asobo badu te genuai obo sunumi badu odasa pelama, tama te genuai obo usu nigo usu sigi pali.
EZE 42:16 Agai te usu ni selama, tama agai te badu te obo usu nigo usu sali, te giliga asobo badu. Tama agai usu sali te 250 mita usu nama elaluali.
EZE 42:17 Tama nosali agai not badu obo usu nigo usu siyu, me saut badu, me giliga dega sabo badu obo usu nigo usu siyu yali. Tama augwali deli deligo dąį te 250 mita usu nama naga elalua pali.
EZE 42:20 Te Genuai Bidigo tempel be bagulali obo te me si me si bogo badu elaluali. Tama te dąį tigidali bogo badu te deli tiwai si naga yali, te 250 mita usu nama naga yai yali. Te genuai obo te Genuai Bidigo tedali gasagi yai nai dabe dali, te olo nai dabe dali si tomode dąį elalubo obo dao. Te Godigo tedali gasagi yai nai dabe te obo tomode elaluyu, tama te olo nai dabe bulu badu elaluyu elaluali.
EZE 43:1 Te haniani nai usu sali bidigo ena te giliga asobo badu obo sunumiba odasa pali.
EZE 43:2 Tama eno Israel dabego Godigo moni ula elalubo suali. Tama te ula te giliga asobo badu asobo suali. Tama te ula pedalobo si da, eno agai po wabo dogoni te genuai tamu ąį kulukulu wabo tiwai tama eno odali. Tama Godigo ulago tǫ ula genuai mu yali.
EZE 43:3 Tama te sę yali eno nade megi ebo eno subo ąǫ yali. Te da te eno polobadu suali te na yali te na tiwai mu ma yali, te aga te Jerusalem dolainu asali sogo, tama te eno te Babilon bulu ąį Kebarde polobadu suali na tiwai ma suali. Eno te ula sulama, tama eno bogoli sugunama, tama eno gesabidi tǫba pogulama elaluali.
EZE 43:4 Tama Genuai Bidigo te ula te giliga asobo badu te sunumiba dula pelama, tama Genuai Bidi Godigo be tomoba dula pali.
EZE 43:5 Tialima, Genuai Bidigo Mobo Bidigo ena ugwa daboa selama, tama ena odasa, te dwasianu sisinibo pesage Godigo be gesabidi badu te sisinibo pesageba odasa pali. Tama eno Genuai Bidigo boma pai ulago te be pągąna pai suali.
EZE 43:6 Tama te bidi ena pagede me dolalubadi, eno po me te Godigo be tomode po wabo odali.
EZE 43:7 Te da te Genuai Bidigo pedauwalidu po wali. Tama agai enabolo e tama po walali “Tǫde bidio, eno sia king te be tomode te elalubao. Tama te pesage da, te we bidi augwali aselama, enaba lotu wagasabo madi dao. Ena tigidali sogo ede bidada paibao, te ena we bidi Israel dabe tomode. Tama nosali Israel dabe, me augwa king dabe, augwaligo nosali eno wiegi yai nogi aiyaba munu ma me elalugobeo. Polobadu te we bidi dali, te king bidi dabe dali, augwaligo ena tagalama, te tibo god dabeba lotu po odu geai dao, we bidigo dwai penane sę ebo tiwai yali. Tiali goli, megi da, te augwaligo te tibo godiba lotu po te ugwanu elalubo madide me weyu egobeo. Tama te king dabe augwaligo eno tempel be pąde mu augwaligo be me ma sę yagasiyu me egobeo. Polobadu augwaligo be te tama elaluai dao, tama te king dabe augwali augwa bede isibo sogo augwaligo eno be meda iliyu yai dao. Tama me augwaligo dwai damua pai kolesaga eyu, augwaligo eno nogi aiyaba elaluyu yai dao. Tama tibaso, eno augwali dali sębę elama, tama augwali dolai dao.
EZE 43:9 Megi da, te Israel dabe augwaligo tibo godiba lotu me wabo tagalao. Tama augwaligo augwa king eno be pąde isimainu sula tagalamo dao. Tialima, augwaligo eno po wali peyu da, teda ena augwali dali tigidali sogo mu bidaibao,” te po wali.
EZE 43:10 Genuai Bidigo ena dali po genina ma weyu, e tama po wali, “Tǫde bidio. Nago Israel dabebolo po weyu, ‘Godigo tempel be e tiwai elalubo eno suali,’ te po olama, tama nago te tigidali suali naide po pusao. Tama augwaligo te be te tiwai elalubo bugagia konemainu eyu, tama augwaligo augwa yali dwai kolesagade hale dwai mu emainu yao.
EZE 43:11 Augwali hale eyu da, teda nago augwalibolo eno bede tigidali be habude, me te doado bage dabede po augwalibolo wao. Augwalibolo tigidali te nai dabe magi po weyu, me te sunumi dabe muabo pesage ola mayu, me te be sę ebo kolesaga sese ola mayu yao. Tama augwalibolo te be tomode sę yabo bomai po dabe ola mao. Augwaligo te be te nago suali tiwai dolo mu sę yainogo eyu, me augwaligo te bede elalubo bomai po dabe bugagia wali pomainu eyu, nago te po sese te bukude asęnama, augwali mao.”
EZE 43:12 “Eno bego bomai po da e dao. Te be da, te aga pesage te bulu dude tama elalueibao. Tama te be mesalo bagulama elalubo te tǫ te eno tǫ mu elaluaibao, tedali gasagi yai mu elaluaibao. Te eno bego hage yai bomai po dao,” wali.
EZE 43:13 Genuai Bidigo po genina ma weyu, te po wali, “Te alta dabego dąį dabe da, te e tama dao. Te wę gamiago e alta bagulai elaluali. Te wę gamia aiyanu dulali te 50 sentimita usu nama dao. Tama aga genuai yali me te 50 sentimita usu nama tama dao. Te wę gamia te dwasianu obogo bogo badu bagulai elaluali. Te obo ugwaba bobobage te 25 sentimita usu nama dao. Te alta dabe nigibo magi te ugwaba mu holai dao. Augwali te e tama tiwai dao.
EZE 43:14 Altago bugai sela elalubao. Te aiya badu bugai badu te wan mita usu nama tama dao. Tama tomode te dąį ugwaba holobo te dąį te 2 mita usu nama dao. Tama dage ugwa badu te ofa ebo nai dabe ulabo alta sai dao. Te ugwanu holali te 2 mita usu nama dao.” “Te tomo tigi genuai me bobobage yali, te aiyadu bobobage me genuai tiwai si menio. Magi baso meni. Tomo tigi te tomoba te 50 sentimita usu tomoba ugwa pai dao, te aga tigidali bogo badu. Tama ugwa badu tigi te uganu mu genina 50 sentimita usu nama mu pai dao. Te tigidali bogo badu usu nama, tama te alta ugwadu saide te me si me si dage badu da, te kau kibu gąų tiwai nai te dolalubao.
EZE 43:16 Te alta ugwadu daide te genuai yali me, bobobage yali me, te deli tiwai dąį naga yali, te 6 mita usu.
EZE 43:17 Tama te alta tomode te genuai yali me, bobobage yali me, te deli dąį usu nama naga dao, te 7 mita usu. Tama te alta tomo tigi bogo badu te dwasianu obo dolaluali. Te obo ugwaba bobobage te 25 sentimita usu nama dao. Te obo te alta tomo tigide te bagulali te ąį gamia bogo badu elalubao. Tama te gamia te genuai te 50 sentimita usu nama dao. Tama te giliga asobo badu te alta daiba ugwa holobo te togobili me deli elalubao,” wali.
EZE 43:18 Genuai Bidigo enabolo e tama po wali, “Tǫde bidi, nago ena God Genuai Bidigo po odao. Augwaligo te alta nigibo sę silibo si da, tama augwaligo tede te sese delabo ofa yainu, tama te hasa kaneme dabe te daiba sąbo si da, teda nago e tama bomai po wali pao.
EZE 43:19 Nago kau kibu omai me deli selama, tama Sadok hani pris dabebolo mao. Ena God Genuai Bidi eno te po obao. Te Livai hani bidi dabego naga augwali deli naga ena pageba aselama, tama augwali eno sę emainao. Tialima, te pris dabe augwaligo naga te kau kibu elama, tama augwaligo naga te sęgę sela sąbo ofa uluyu emainao.
EZE 43:20 Tama nago te kau kibugo kaneme meba selama, tama te altago gąų me si me side munama, tama me alta me si me si dage badu tomode, me te dwasianu obo te alta tomode bagulali tede mubadi yao. Tama nago te ebo kolesagago te altago meda sela sąyu, tama te alta eno gedude wiegi yai pedalaibao.
EZE 43:21 Tama nago te kau kibu tigi mi selama, tama nago augwaligo te sa muani te pesagede ulao, te eno tempel be bulu badu elalubo, te pesage.
EZE 43:22 Tama pilama, nosali te si wabo sogo da, te sogo da, teda nago meme kibu omai kenigo agai tigi me dolisąwai selama, tama sęgę sela sąbo ofa yao. Tama nago te meme kibugo kaneme selama, tama nago kau kibu kanemego yali te kolesaga tiwai ma yao, te alta meda sela somainu yao.
EZE 43:23 Nago te sę polo elama da, teda nago gesi kau kibu omai me deli, me sipsip kibu omai me deli te kenigo augwaligo tigi me dolisąma yai selama,
EZE 43:24 tama nago augwali si ena pageba sesao. Tama te pris dabe augwaligo tamu te ela muani kibu si tigi miba nogogo telala pelama, tama augwaligo isigo mu dela silibo ofa ulumainao.
EZE 43:25 Tama te sogo gagalama, te dei namba 7 wabo sogoba usu nama, nago te meme omai me deli sesao, te sęgę sela sąyabo ofa tiwai. Tama me kau kibu omai, me sipsip kibu omai deli me te isigo mu dela silabo ofa tiwai sesao. Nago wiegi yai hasa dabe naga sesao, te keni dabego augwaligo tigi dabe me dolisąma yai dabe sesao.
EZE 43:26 Te a naga olama si sogo te pris dabego te tobage ofa idubadi geaibao, te alta meda sela sąyu, te eno gedude wiegi yai pedalobo siba usu naibao. Tialima, augwaligo te ebo kolesagago te alta te eno mu dao olama, augwaligo sa muaibao.
EZE 43:27 Tama te Sarere silibo si da, teda te alta aga sę yabo polo kegalubao. Tama te dei namba 8de te pris dabe augwaligo dage Israel dabego ofa ebo gagalomainao. Augwaligo te isigo mu dela silibo ofa eyu, me ena dali haliga deli ebo ofa eyu emainao. Tama augwaligo te tama tibode da, teda eno dage dali wiegi yai haliga yaibao. Ena God Genuai Bidi, eno po polo wali dao,” te po wali.
EZE 44:1 Tama te bidigo ena te lotu be tempelgo te giliga asobo badu genuai sunumiba ma odasa pali. Tama eno sunumi paliai elalubo suali.
EZE 44:2 Tama Genuai Bidigo ena dali e tama po wali, “Te sunumi palialuama, tama bidigo dabo usu me egobeo. Tama bidi me deli te sunumidu tula asobo usu me egobeo. Magi baso meni. Ena God Genuai Bidi, dage Israel dabego Genuai Bidi, te sunumidu tula asai sunumi dao. Tialima, te sunumi tigidali sogo me palialuaibao.
EZE 44:3 Tama king deli digi agaduba naga te be sunumi elalubo dolo naga asomainao. Tama aga eno gedude te ofa nai tumainao. Tama aga te sunumidu tula aselama, tama aga te be sunumidu buluba ma tula pomainao,” wali.
EZE 44:4 Tialima, te bidigo ena odasa, te not badu te obo badu sunumidu odasa pelama, tama te Godigo be gesabidi badu doligi pali. Tama eno Genuai Bidi Godigo ulago te aga be pągąna sai suali. Tama tibaso, eno bogoli sugunama, tama eno gesabidi tǫba elama basi giluali.
EZE 44:5 Tama Genuai Bidigo enabolo e tama po walali, “Tǫde bidio, nago eno nagebolo ola mawainu ebo te nai dabe bugagia tonaluao. Tama eno nagebolo wainogo ebo te po bugagia odao. Eno nagebolo te eno tempel bego bomai po, me te bego kolesaga po nagebolo pusaibao, eno te bego po dabe. Bidi meba augwali te eno tempel be tomoba pabo te usu yaibao, tiali goli gasa meba eno habu mu selai dao. Tama eno tede po wainu ebao, tama nago te po waboba bugagia olo saganama odao,” wali.
EZE 44:6 “Nago te hagoma ebo Israel we bidibolo e tama po walao. Ena God Genuai Bidi, eno te po dage Israel dabe dali te elalubao. Dagego te dwai damua pai te kolesaga yali mu tagalao. Dagego te dwai damua pai kolesaga elama, tama dagego e dwai kolesaga me yali dao,
EZE 44:7 dagego te gasa meba kantri bidi hani dabe eno be tomoba asomainu sula tagalai dao. Te dagego te kibu ili me kaneme ofa eyu, te eno nai mu dao olama, ulubo sogo tama tiai dao. Te Israel hani isąwai bulu badu bage, augwaligo augwa tigi hale ebo nai togisąwai bidi dabe dao. Tama augwaligo ena homugo me konebo menio. Augwali eno be tomoba aselama, tama augwaligo eno gedude te be meda ilai dao. Dagego te dwai damua pai kolesaga tama yaligo dao, teda dagego eno dąų walali po hųgia sąwai dao.
EZE 44:8 Tama elama, dagego duga digi eno bede sę yai menio. Menio. Dagego te Israel hani isąwai bulu badu bidi dabego dagego sę emainogo sula tagalai dao,” wali.
EZE 44:9 “Ena God Genuai Bidi eno te po obao. Te gasa meba kantri bidi dabe augwali te augwa hale ebo nai wali togisąwai bulu badu bage dao. Tama augwaligo enaba homu dąų me wabo bage menio. Te bage augwali eno tedali gasagi yai beba me tula pelamo dao. Augwali Israel dabe tomode bidai me tagalao. Augwali te be tomoba me pogobeo,” wali.
EZE 44:10 Genuai Bidigo enabolo e tama po walali, “Te Israel dabe augwaligo ena tudi ola mani sogo te Livai dabe augwaligo ena tagalama, tama augwaligo tibo god dabeba lotu po wai dao. Tama augwaligo te we bidi te tibo god dabeba lotu omainu tau sai dao. Tama te kolesagago te we bidigo homu hogodolama, tama augwali dwai kolesaga yai dao. Tama tialima, ena God Genuai Bidi eno mu po mu e obao, eno te Livai dabe dene mawaibao, augwaligo te dene dali sęgę dali tolaibao. Megi eno te Livai dabe augwali pris sę emainu me sula tagalogobeo. Augwali ena pageba me, ma eno tedali gasagi yai nai mu dabe pageba augwali asomainu me sula tagalogobeo. Eno augwali pris sę idali weyu habu selebao. Tama augwaligo augwa damua pai kolesagade hale dwai mu yaibao. Tiali goli, eno augwali eno tempel be sunumi dabe tonalubo sę emainu sa muaibao. Tama me te tempel be tomode meba sę dabe emainu sa muaibao. Tama me augwaligo isigo mu dela silabo ofa yabo hasa dabe eleyu, me te we bidi dabego sesebo ofa ebo nai dabe meba augwaligo eleyu emainao. Tama augwaligo we bidi lotu wabode tau siyu emainao,” te po wali.
EZE 44:15 “Ena God Genuai Bidi eno e tama po e obao. Te gasa Livai hani bagego te eno pris sę me egobeo. Tiali goli, te Sadok hani Livai dabego naga te pris sę emainao. Te Israel dabe augwaligo ena tudi ola mani sogo, te hani deligo naga eno be tomode sę dolo idu geai dao. Tialima, megi da, te Sadok hani deli naga ena pąba asiyu, me eno sę dabe eyu, me hasa ili dabe me kaneme dabe seselama, tama enaba ofa yagasiyu emainao.
EZE 44:16 Te Sadok dabe augwali naga ena be tomoba asiyu, me eno tebol pąba asiyu, me eno sę eyu, me eno nai dabe tonalubo sę eyu emainao.
EZE 44:17 Te pris dabe augwali eno namba 2 obo tomoba eno be bagulali obo tomoba pabo si da, augwaligo te pris ugwa wiegi yai name ugwago nigai ugwa gudumainao. Te augwali te obo tomode bidibo sogo augwaligo te sipsip kibu nisigo nigai ugwa guda magio, te habu selai dao.
EZE 44:18 Augwaligo trausis, me name ugwa tobolude gudubo gudumainao, te augwaligo wiegi yai name ugwago nigai. Tiali goli, augwaligo kukulu gudamo dao. Tiyu posologo augwaligo tigi dolabuo.
EZE 44:19 Tama augwaligo te pesage tagalama, tama augwali genuai we bidi sisinibo pesageba painu da, teda augwaligo eno bede sę yainu, te gudubo ugwa dinama, tama gasa olo ugwa guduyu emainao. Tama augwaligo te ugwa dabe te Tedali Gasagi Yai Be Habu pąde elalubo be habu side dinama mumainao. Magi baso meni, te we bidi augwali te prisgo te ugwa dabe pąba asama, te we bidi tede dene sidali weyu tama tiao,” wali.
EZE 44:20 “Te pris dabe augwali augwa tobolu nisi togobo sogo augwaligo tobolu nisi sese togwa sąnama, tama augwaligo tobolu wane diliba nigilamo dao. Me ma, augwaligo tobolu nisi bobobage mu holomainao sula tagalamu dao.
EZE 44:21 Te pris dabe augwali namba 2 obo tomoba painu peyu, augwaligo wain ąį tulamu dao. Te eno tempel be bagulali obo tomoba painu te wain tulamu dao.
EZE 44:22 Tama me pris bidi dabego te we aga bidigo sela sąwai we selamu dao. Augwaligo te we bidi dali pisąma yai deli naga somainu yao, ma augwaligo te pris bidi me isai bidigo we siyu tama emainao. Tiali goli, augwali gasa olo bidi dabe isai bidigo we me somainu elamuo,” wali.
EZE 44:23 “Te pris dabe augwaligo te we bidibolo mena nai dabe eno gedude te tedali gasagi yai meda meni yai nai mu augwalibolo ola mayu, me mena nai dabe eno gedude te olo da wabo nai dabe augwalibolo ola mayu yao. Tama me augwaligo mena nai eno gedude meda yai augwalibolo ola mao.
EZE 44:24 Te we bidigo nai me delide wado po weyu ebaso da, teda te we bidi augwaligo po te pris bidi dabe augwali tomode bidiyu eno bomai po wali peyu, augwaligo po osola sumainao. Te pris dabe augwaligo eno bodolu muani genuai sogo dabe augwaligo te bomai po wali peyu emainao. Te eno lotu wabo sogo bodolu muani bugagia wali peyu emainao. Tama me te pris dabe augwaligo Sabatde bugagia koneama, tama te sogo te eno si mu dao olama, sa mumainao,” te po wali.
EZE 44:25 “Te pris bidi dabe augwali te isai bidi pageba pigio. Tialima, augwali pąba pali da, teda augwali eno gedude meda yai pedelaibao. Tiali goli, augwa deli kaneme bidi me isali da, te aga aya, ma ida, ma wai bǫų, ma ama, ma abe bidigo sisąma yai isibaso da, teda te deli kaneme bidi aga te isai bidi pageba pomainao. Tiali te ebo kolesagago augwali eno gedude meda yai pedelaibao.
EZE 44:26 Tialima nosali augwaligo te wiegi yai ma pedalobo kolesaga wali pelama ma yao. Tama te pris bidi me ma wiegi yai ma pedelai yai baso da, teda aga a naga olama si, 7 sogo bolo ma tonalumainao.
EZE 44:27 Tama nosali aga te eno be bagulali namba 2 obo tomoba pomainao, te eno Tedali Gasagi Yai Be Habude sę emainu. Tiali goli, agai bolo hasia aga sęgę sela sąyabo ofa bolo deli me emainao. Tama nosali agai eno tempel be tomode sę emainao. Te da God Genuai Bidi eno po dao,” wali.
EZE 44:28 “Te pris dabe augwali te meba hani dabego yali gilama te kantri Israel tomode tǫ dage me sogobeo. Menio. Ena da, te augwaligo wiegi yai nai dabe augwaligo tigidali sogo tolaluainu sabo nai dabe tiwai dao.
EZE 44:29 Te pris dabe augwaligo te we bidigo mabo wit ulubo ofa tuyu, me sęgę sela sąwainu ulubo ofa me tuyu, me dwai kolesaga geda muani dodolobo ofa tuyu emainao. Tama augwaligo te we bidigo eno nai mu dao olama, sa muani te nai dabe me tuyu emainao.
EZE 44:30 Te we bidigo te gide hasia inayali nai dabe te pris dabebolo magasomainao. Me te pris dabego meba tedali gasagi yai nai dabe te we bidigo ena magasabo, te nai dabe me augwali tumainao. Tama te we bidigo bret ulubo sogo da, augwaligo hasia ulali te bret selama, tama te pris dabebolo te ofa tiwai momainao. Tialima, te we bidi augwaligo te tama tiali da, teda eno augwaligo be me we wai dabe dali wiegi yai sę eyu yaibao,” wali.
EZE 44:31 “Tiali goli, te ba o hasa dabe me olodali isiyu, ma te bulu hasago me ela muai baso me, te pris dabe augwaligo te ba o hasa dabego mi tulamu dao,” Genuai Bidigo te po wai.
EZE 45:1 Genuai Bidigo po ena dali genina ma weyu, e tama po wali. “Te dage kantri Israelba ma peyu, tama deli deli haniba tǫ dobabo sogo da, teda dagego ena Genuai Bidibolo tǫ genuai pedai me dąį ilao. Te tǫ bobobage te 12 kilomita usu nama, me genuai yali te 10 kilomita usu nama dąį ilao. Tama te tǫ pedai te eno tedali gasagi yai tǫ dao.
EZE 45:2 Tama dagego eno te tǫ tomode deli me dąį yao, te eno tempel be tede sę yabo digi. Te tǫ me si me si bogo badu te deli tiwai usu naga emainao, te 250 mita usu nama. Tama dagego te tempel be sę yabo pedai tǫ bagulali tǫ me dąį ilao. Tama agai genuai te 25 mita usu nama magi yao. Tama te namba 2 tǫ pedai te olo tǫ elaluaibao.
EZE 45:3 Tialima, dagego eno pedai genuai si pedao, tama te si te deli usu tiwai si naga emainao. Tama te tǫ bobobage si te deli deli te 12 kilomita usu nama, me genuai yali te si te 5 kilomita usu nama dąį emainao. Te tǫ pedai te me te pris dabego tǫ dao. Te ena be elalubo pesage te tǫ dao. Te pris dabe augwali ena pąba asobo dao, augwali eno be tomode sę yainogo, augwaligo augwa be te tǫde sę emainao, te eno augwali dąį ilali te eno tǫde. Tama te tǫ pedai te ena obode dao. Te da te ena tǫ mu dao. Tama te tǫ te tedali gasagi yai mu dao. Tama eno tǫgo namba 2 pedai te eno Livai dabego tǫ dąį ilibao. Te Livai dabe augwaligo eno tempel bede sę meba ebo dao. Tama augwaligo augwa taun tede nigimainao, te tǫ pedaide,” wali.
EZE 45:6 “Dagego pris dabego tǫ bogo badu gasa tǫ me ma dąį ilao. Te tǫ bobobage te 12 kilomita usu nama dąį iliyu, me agai genuai te 2 olama, hap kilomita usu siyu yao. Te tǫ da, te tigidali Israel we bidi dabego tǫ dao. Te augwaligo genuai taun te tǫde nigimainao,” Genuai Bidigo te po wali.
EZE 45:7 Genuai Bidigo po genina ma weyu, e tama po wali, “Dagego kingo tǫ pedai si dąį iliąo. Te hasia wabo tǫ pedai te giliga asobo badu elaluaibao. Te eno tǫ me dagego genuai taun bogo badu tǫ bogode tama pelama, te giliga asobo badu tama usu nigi paibao, te kantri sabi simanigi paliba usu nigi paibao. Tama si wabo pedai te giliga dega sabo badu elaluaibao. Te eno tǫ me genuai taun pedai bogo badu, tama te kingo tǫ pedai sigo te kantri mesegela saibao. Te giliga asobo badu gagalama, tama te giliga dega sabo kantriba tama usu nigi paibao. Te tǫ pedai te deli deli Israel hani dabego augwa we bidi dobabo tǫ pedai dao.
EZE 45:8 King aga tǫ tali elaluaibao, tama agai te we bidi dali dwai sę me egobeo, te king dabe augwalibolo eno polobadu mani king dabego yali gilama, tama agai Israel dabego tǫ sidali weyu,” wali.
EZE 45:9 “Ena God Genuai Bidi eno te tama po wali. Dage Israel dabego tobolu bidi dabego dwai kolesaga tagaliąo. Dagego we bidi dabe dali bomonama dwai sę elama, tama dagego augwali aiyaba elaluai dao. Tama tialima, dagego te dwai kolesaga dabe tagalama, tama dagego doloba pai kolesaga naga dolo iyąo. Tama dagego eno we bidi augwa tǫde sela sąbo kolesaga tagalao. Ena God Genuai Bidi, eno te tama po wali dao,” wali.
EZE 45:10 Genuai Bidigo po genina ma weyu, e tama po wali, “Dage Israel dabego tigidali nai dabe dolo tiwai si naga dobola siąo.
EZE 45:11 Efa te wa pai nai dabe skel ebo nai dao, tama bat te ąį dabe skel ebo nai dao. Tama te efa me bat si te deli tiwai usu si naga elaluyu emainao. Tialima, nogo si efa te homa nogi wabo usu sabo nai me deli usu nama dao. Tama te nogo si bat te homa ma kor usu nama dao. Homa te tigidali haniani nai dabe skel ebo nai dao.
EZE 45:12 Te nai nai dabego sęgę skel ebo skel da, e tama da. Te 20 gera te skel deli usu nama dao. Me te 60 sekel te mina deli usu nama dao,” wali.
EZE 45:13 “Te dagego te nai dabe enabolo ofa tiwai sesebo sogo da, dagego te tama nai dabe skel eyu yao. Dagego tigidali 60 kilo wit me bali bugwai deli ofa eyu yao.
EZE 45:14 Tama me dagego 100 lita ni oliv du wel bugwai deli ofa eyu yao.
EZE 45:15 Tama me dagego te tigidali 200 sipsip kibugo dagego wę hauwa elalubo tǫde nosai tubo te sipsip bugwai, me deli dagego ofa eyu yao. Dagego te nai dabe te wit ulubo ofa yainu, me isigo mu dela silabo ofa yabo nai, me ena dali haliga deli yabo ofa yabo nai tama seseyu yao. Dagego te ofa eyu da, teda eno dage Israel dabe sesego sęgę sela sąwaibao. Te da God Genuai Bidi eno po dao,” wali.
EZE 45:16 “Tigidali we bidigo te ofa yabo nai dabe tigidali tama Israel dabego king pageba sesiąo.
EZE 45:17 Tama kingo te sesali naigo te isigo sese dela silibo ofa mayu, me wit ulubo ofa mayu, me wain gelebo ofa mayu yao. Kingo te ofa dabe te genuai sogo dabe, te gesi polua nanibo sogo, me Sabat side, me gasa meba genuai bodolu muani sogo eno Israel dabe augwalibolo mani, te si pedalobaso augwaligo te ofa yabo nai dabe seseyu yao. Tama me, agai Israel we bidigo sęgę sela sąyabo ofa me mayu emainao. Te da te sęgę sela sąbo ofa dabe, me wit ulubo ofa dabe, me isigo sese dela silibo ofa, me ena dali deli haliga ebo ofa mayu yao,” te po wali.
EZE 45:18 “Ena God Genuai Bidi, eno e tama po obao, te hasia wabo dei te hasia wabo poluade nago te gesi kau kibu omai agai tigi kenigo me dolisąma yai selama, ofa yagasao. Te ofa ebo te eno tempel be te eno gedude wiegi yai pedelemainu yaibao.
EZE 45:19 Tama pris bidigo te sęgę sela sąbo te ofa ebo te kau kibu kaneme selama, tama eno tempel be ni posde pilaibao. Te eno be sunumi si badu elalubo pos nide, me te alta me si me si te dage badu piliyu, me te eno be bagulali te si wabo obo sunumi te pos ni dabede piliyu tama yao.
EZE 45:20 Tama nago deli tiwai kolesaga naga te hasia wabo poluago te 7 wabo deide nago te tiwai kolesaga naga yao. Tialima, bidi mebago augwa kolesaga bugagia homu kone palisąma, tama augwaligo sęgę saibaso da, ma augwaligo augwa sęgę sali konesiąwai baso da, teda te augwaligo te kolesagago eno be meda ilibo dao. Tama te ofago eno be wiegi yai ma pedelaibao,” wali.
EZE 45:21 “Te hasia wabo poluago 14 deide da, dagego Godigo Israel Dabe Augwali Olo Bugagia Bidimainu Sula Tagalali Sogo dąį ilao, te Pasova bodolu muani sogo dao. Tama a naga olama, si sogo bididubadi, dagego te yis musiąwai bret tuiąo.
EZE 45:22 Te genuai sogo dabego hasia wabo deide da, dagego kingo te kau kibu omai me deli te pris dabebolo menama, tama te kingo me te tigidali we bidigo sęgę sela sąbo ofa emainao.
EZE 45:23 Tama te Yis Meni Yai Bret tubo sogo da, te Sarere me deli dao, te kingo ena Genuai Bidibolo agai a naga olama, si kau kibu omai, me a naga olama, si sipsip kibu omai mayu emainao, te isigo sese dela silibo ofa tiwai dao. Agai wiegi yai hasa dabe naga somainao. Te hasa dabe augwaligo tigiwali te kenigo me dolisąma yai sao. Tama me tigidali sogo kingo meme kibu omai te sęgę sela sąbo ofa tiwai eyu yao,” te po wai.
EZE 45:24 “Tama me kingo 14 kilogram wiegi yai plaua, me 3 lita oliv wel te deli deli kau kibu me sipsip kibu dabe dali mayu yao. Tama te pris bidigo te kau kibu o sipsip kibu ofa ebo sogo, agai te plaua me, wel me ofa eyu emainao,” wali.
EZE 45:25 “Te Osogo Bidabo Bede Bidibo Genuai Sogo te 7 wabo poluago 15 deide gagalama, tama a naga olama, si sogo tama bidaibao. Tama te sogo te king agai te Yis Meni Yai Bret tubo sogo sesebo ofa tiwai mu sesemainao. Te tigidali sogo agai deli namba tiwai kau kibu me sipsip kibu ofa yabo sesemainao, te isigo sese dela silabo ofa, me te sęgę sela sąyabo meme kibu deli. Tama agai deli tiwai skel yai witgo nigai plaua me, oliv wel me sesao, te ofa yabo,” God Genuai Bidigo te po wali.
EZE 46:1 “Ena God Genuai Bidi eno te po obao. Te tigidali wikde te giliga asobo badu te namba 2 obo sunumi te a naga olama, deli, te 6 tama sogo te sę ebo sogo te be sunumi palialumainao. Tiali goli, augwali te sunumi te Sabat side, me gesi poluago genuai sogo naga dayu emainao.
EZE 46:2 Tialima, te lotu po wabo sogo te king aga eno obo tomoba tula asomainao. Tama king aga genuai sisinibo pesage tagalama, tama aga te giliga asobo badu te si wabo obo sunumi tomoba pomainao. Tama aga sunumi pąde dolaluyu, tama agai altaba ugwaba tonomainao. Tama te pris dabe augwaligo kingo sesali te nai dabe ofa emainao. Te da te isigo sese dela silabo ofa, me homu ena dali deliba yabo ofa dabe dao. Tama king aga bogoli sugunama, tama agai mage basi giluama, tama enaba lotu po omainao. Tama nosali agai te pesage tagalama, tama genuai sisinibo pesageba pomainao. Tiali goli, te pris dabe augwaligo te sunumi dalalubadi, be pioba usu nigi pomainao, tama piode ma paliao.
EZE 46:3 Tama te lotu wabo genuai sogo dabe te we bidi augwali te bede sisinibo pesage genuai te si wabo obo bulu badu sisalumainao, te eno gesabidide. Tama augwali bogoli sugunama, enaba lotu omainao,” wali.
EZE 46:4 “Te tigidali sogo Sabatde kingo a naga olama, deli, 6 sipsip kibu wai, me sipsip kibu omai te isigo mu dela silabo ofa eyu emainao. Agai te sipsip kibu dabe te augwaligo tigiwali kenigo me dolisąma yai te wiegi yai kibu naga sao.
EZE 46:5 Agai te 14 kilogram wiegi yai plaua te sipsip kibu omai dali seseyu emainao. Tama me agai te sipsip kibu gǫų dabe dali aga homugo plaua sesemainao. Tama agai te plaua sesali tiwai skel te oliv wel me sesemainao. Tialima, agai 14 kilogram plaua seseyu da, teda agai 3 lita oliv wel dali sesemainao,” wali.
EZE 46:6 “Te gesi poluago genuai sogo te king agai te e tama ofa yabo nai dabe naga seseyu emainao. Te kau kibu omai deli, me a naga olama, deli, 6 sipsip kibu gǫų, me sipsip kibu omai deli tama seseyu emainao. Agai te hasa dabe te keni dabego augwaligo tigiwali dabe me dolisąma yai seseyu emainao.
EZE 46:7 Agai te 14 kilogram wiegi yai plaua te kau kibu omai dali seseyu, me 14 kilogram plaua wiegi yai te sipsip kibu omai dali sesemainao. Tama me agai aga homugo plaua te sipsip kibu gǫų dabe dali sesemainao. Tama agai te sesebo plaua skel usu te oliv wel me agai sesemainao. Skel da e tama dao. Ma, agai 14 kilogram plaua seseyu da, teda agai 3 lita oliv wel seseyu emainao.
EZE 46:8 Te king agai enaba lotu po wainu da, teda aga te genuai sisinibo pesage tagalama, tama aga te giliga asobo badu be sunumi namba 2 obo badu tomoba pomainao. Tama pelama, te sunumi pąba bidigi pomainao. Tama agai lotu ola silama da, teda aga te asali te sunumidu ma teda solama, tama aga te genuai sisinibo pesageba ma asomainao,” wali.
EZE 46:9 “Te we bidi augwali ena Genuai Bidiba augwaligo te lotu wabo sogo naga lotu wagasiyu yaibao. Tialima, augwali u not badu genuai obo sunumi badu tomoba asai baso da, teda augwali lotu ola silama, tama augwali u saut badu te genuai obo sunumi badu buluba ma pomainao. Tialima, augwali saut badu obo sunumi badu tomoba aselama, lotu wagasai baso da, teda augwali te not badu te obo sunumidu buluba ma somainao. Augwali augwa te asali sunumidu deli naga augwali ma pelamo, menio. Augwaligo te obo gasa sunumidu taga pao.
EZE 46:10 King aga eno obo tomoba te we bidi tomoba tula pabo sogo tula peyu emainao. Tama agai te we bidigo te obo taga soabode, agai me taga somainao.
EZE 46:11 Te lotu po wabo sogo dabe da, te we bidi augwaligo ofa nai mawainogo da, augwaligo 14 kilogram wiegi yai plaua te kau kibu omai deli deli dali mayu, me te sipsip kibu omai deli deli dali te 14 kilogram wiegi yai plaua dali mayu emainao. Tama augwaligo augwa homugo plaua meba selama, tama augwaligo te sipsip kibu gǫų dabe dali sesemainao. Tama augwaligo te sesebo plaua skel usu nama, te oliv wel me tama sesemainao. Te skel da e tama dao. Ma, augwaligo 14 kilogram plaua sesaibaso da, teda augwaligo 3 lita oliv wel seseyu emainao,” wali.
EZE 46:12 “Tialima, king aga homugo ena Genuai Bidiba ofa yabo nai dabe sesebaso da, te isigo dela silabo ofa, ma ena dali homu deli yabo ofa yabo nai seseyu da, teda te pris bidi dabe augwaligo te giliga asobo badu te si wabo obo sunumi badu sunumi dayao. Tama king aga te pris dabego agai ofa ebode te obo sunumide bidimainao, te agai te Sabat side ebo tiwai tama yao. Agai lotu ola silibo si da, aga te be taga solama, tama te pris dabe augwaligo te sunumi ma palimainao,” wali.
EZE 46:13 Genuai Bidigo po genina ma weyu, e tama po wali, “Tigidali sogo kigamu dagego sipsip kibu gǫų deli agai tigi kenigo me dolisąma yai, tama agai kibu be deli yai tama seseyu yao. Tama dagego ena Genuai Bidibolo te siago mu dela silibo ofa mayu yao. Dagego te tama tobage ofa tigidali be posobo sogo eyu yao.
EZE 46:14 Tama me ma dagego tigidali sogo kigamu dagego wit ulubo ofa te siago mu dela silabo ofa dali uluyu yao. Dagego 2 kilogram plaua selama, tama 1 lita oliv wel dali begelao, te wit ulubo ofa yainu. Te tigidali sogo kigamu ofa ebo bomai po te tigidali sogo nosali me ma elalua paibao.
EZE 46:15 Tigidali sogo kigamu dagego sipsip kibu gǫų, me plaua, me oliv wel seseyu yao, te siago sese dela silabo ofa tiwai tama,” te po wai.
EZE 46:16 “Ena God Genuai Bidi, eno e tama po obao. Tialima king aga ogwa me delibolo aga tǫ me togwa mani da, teda te tǫ te wai aga tǫ elaluyu, tama aga hani we wai tǫ nosali me elaluaibao.
EZE 46:17 Tiali goli, kingo agai tǫ meba aga sę bidibolo me mani da, teda te tǫ kibu be 50 wabode te tǫ king aga tǫ ma gagawaibao. Te kibu be da, te nai dabe ma wei ponobo kibu be dao. Te tǫ te king aga wai puluba dali augwa tǫ dao. Te king aga hani mu augwali te tǫ aya mu dao.
EZE 46:18 Tama me ma king agai te we bidigo tǫ wi me selamu dao. Tialima, agai aga wai puluba bolo tǫ pedai me mawainu da, te agai aga tǫ pedai mu naga momainao. Tama tiyu da, eno we bidi augwa tǫ elaluyu, tama augwali tǫ sǫą pai me elalugobeo,” God Genuai Bidigo te po wai.
EZE 46:19 Te bidi agai ena odasa, te pris dabego be gesabidi badu bilibo sunumiba odasa pali, te Godigo tempel be not badu. Tama te bilibo pesage te pelama, te tǫ dage me te giliga dega sabo badu elalubo suali.
EZE 46:20 Te bidigo enabolo e tama tiwai po walali, “Te da, te pris dabe aselama, tama te kibu mi senede uluyu yabo digi dao, te sęgę sela sąyu, me dwai kolesaga dodolabo ofa nai uluyu yabo pesage dao. Tama augwaligo wit ulubo plaua ofa siyu elama, tama augwaligo tede ulaibao. Te pris dabe augwaligo te ofa te genuai sisinibo pesageba sela pigio. Tiyu, augwaligo te ofa maiabo naigo te we bidi dolidali weyu,” wali.
EZE 46:21 Tialima, te bidigo ena te tempel be bulu badu elalubo te bidi sisinibo pesage genuaiba odasa pali. Tama dadi si te sisinibo pesage me si me si dage badu odasa pali. Tama eno te dage badu deli deli badu te tǫ dage elalubo suali.
EZE 46:22 Tama te tǫ dage te deli tiwai usu ni naga elaluali, te bobobage te 20 mita usu nama, me genuai yali te 15 mita usu nama dao.
EZE 46:23 Tama te tǫ me si me si deli delide te masigigo nigai sai bagulai elaluali. Tama te sai dologode te sia nogobo pesage dabe elaluali.
EZE 46:24 Tialima, te bidigo enabolo e tama tiwai po walali, “Te Godigo tempel bede sę ebo bidi dabe augwali te kibu mi ulubo te pesage dabeba te we bidigo ofa yabo nai sesebo teba ulugi pomainao,” wali.
EZE 47:1 Tialima, te bidigo ena Godigo tempel be polalubo sunumiba ma odasa asali. Tama eno te ąį te sunumi dologodu pedelama, tama giliga asoboba geasa pabo suali. Magi baso meni. Godigo be giliga pedaloboba gesabidi tonalubo suali. Tama te ąį te sunumi saut badu pedelama, tama te ąį te saut badu te alta sesegedu peyu, te alta edelebo suali.
EZE 47:2 Tialima, te bidigo ena te u badu not badu elalubo sunumi elaluboba da si pali. Tama da si Godigo be bagulali genuai obo bulu badu pali. Da si biligi pelama, tama da si giliga asobo badu sunumiba saboligi pali. Tama eno te ąį te saut badu te sunumi dologode pedelama, tama pabo suali.
EZE 47:3 Tama te bidigo aga usu sabo haliga bono selama, tama te ąį wali peyu, usu sesa pelama, te 500 mita usu nigi pali. Tama agai enabolo ąį nogeao po wali. Tialima, eno ąį nogelama, tama te ąį ugwanu eno sągą aiyadu sągą sawali bogoli dąį yali.
EZE 47:4 Tialima, agai te ąį wali 500 mita ma pali, tama agai enabolo te ąį ma nogeao po wali. Tialima, eno te ąį nogeali. Tama te ąį gebo delama, tama eno bogoli ugwadu dąį igiluali, te ena sągąde. Tama agai te ąį 500 mita ma pali. Tama te ąį tede eno tigi tomoba ugwa holama, tomo dąį yali.
EZE 47:5 Tama agai te węį dulu ma dulama, tama 500 mita ma pali. Tama te wę gebo dąį elalubaso, tama ena nogeabo usu meni yani. Te pesagedu te bidi dabe wę paluama, nogeabo usu elaluali.
EZE 47:6 Te bidigo enabolo e tama po walali, “Tǫde bidi, nago te sę yali dabe po sula silaliwe?” Agai po ola silibo si, da si te ąį dulu ugwaba ma holali.
EZE 47:7 Te da si ma geasa pabo sogo eno te ąį u badu me, e badu me, te ni dabe hauwa dolalua pabo suali.
EZE 47:8 Tama agai enabolo e tama po walali, “Te ąį te giliga asobo badu pelama, tama Jordan ąį odogo malu badu pelama, tama sigi ąį Detsiba dolo pabo dao. Megi da, sigi ąį Detsi tamu hauwa elalubao. Tiali goli, te ąįgo te sigi ąį wiegi yai ma ilaibao.
EZE 47:9 Tigidali haniani ąį hasa dabe te ąį pabo pesagedu tama bidaibao. Tama te ąįde sųgų hauwa mu bidaibao. Magi baso meni. Te ąįgo sigi ąį Detsigo tamu ąį wiegi yai ilaibao. Tama te ąį pabo pesage tigidali badu da, te tigidali nai dabe holoyu naga yaibao.
EZE 47:10 Te sųgų sabo sę ebo bidi dabego te sigi ąį Detsi kemi sane badu dolaluyu, sųgų sabo wa te ąįba sąnama, tama sųgų saibao, te bulu Eneklaimdu gagalama, pelama, bulu Engediba usu nigi paibao. Tama augwaligo sųgų sabo sę siliyu, augwa wa dabe ąį kemi sanede muaibao, te wa dabe te kemi sanede omainogo. Te Detsi ąįde elalubo haniani sųgų dabe te Mediterenian tamu ąįde bidibo sųgų tiwai mu bidaibao.
EZE 47:11 Tiali goli, te sele pu ąį dabego ąį dabe te sigi ąį pąde elalua pabo te ąį dabe wiegi yai me egobeo. Menio. Te pu ąį dabe te tamu sabo ąį tiwai elaluaibao.
EZE 47:12 Tama te Godigo tempel bedu pedelali ąį bogo si badu te wiegi yai ni du walobo ni holaibo. Te ni yabe dabe te me sasi egobeo. Tama augwaligo gesi noma nai tigidali poluade waliyu yaibao. Magi baso meni. Te ąį te Godigo bedu asobo ąį da, tama te ąį pagede elalubo ni dabe sa weyu, tama tiaibao. Te bidi dabego te ni du tuaibao, tama te ni yabe dabe selama, tama augwa haniani gasi dabe usu iliyu yainu saibao,” te bidigo te po wai.
EZE 47:13 God Genuai Bidigo e tama po wali, “Eno dage Israel dabego wąį dabe dali bomai po mu dąų walai dao. Te eno dagebolo te Israel tǫ dagebolo menama, tama te tǫ dagego tǫ tigidali sogo elaluaibao. Dagego te tǫ dage Israel hani nogo si olama, sągą me badu si haniba dobola siąo. Tigidali wąį hanigo te tǫ pedai deli badu siyu yaibao. Tiali goli, Josepgo hanigo da, te tǫ pedai si badu saibao. Te tǫ dąį da, e tama dao,” wali.
EZE 47:15 “Te u not badu te tǫ dąį te genuai tamu ąį Meditereniande gagalama, tama pelama, giliga asobo badu te taun Hetlon usu nigi pelama, tama taun Hamat me taun Sedatba pabo sunumiba usu nigi pelama, tama ma pelama, taun Berota me taun Sibraim usu nigi pabo dao. Te Sibraim te tǫ pedai Damaskus me tǫ pedai Hamat si tomode elalubo dąįde elalubao. Tama dagego tǫ dąį pelama, taun Tikonba usu nigi pali dao. Te taun te distrik Hauran tǫde dąį dao.
EZE 47:17 Tialima, te kantri Israel tǫ dąį te genuai tamu ąį Mediterenian badu gagalama, pelama, taun Enon usu nigi pali dao. Te not badu tǫ dąį te dąį te saut badu te Damaskus me Hamat tǫ dąįde elalubao,” wali.
EZE 47:18 “Tama giliga asobo badu tǫ dąį te Damaskus taun me distrik Hauran tǫdu pelama, Jordan ąį dulu pelama, tama saut badu Israel dabego tǫdu me distrik Gileat tǫdu pali dao. Tama pelama, sautba saboligi pelama, te sigi ąį Detsiba usu nigi pali,” wali.
EZE 47:19 “Tama me te saut badu tǫ dąį te taun Tamardu gagalama, tama giliga degebo badu tama peyu, te ąį elalubo bulu du peyu, te bulu augwaligo Kades Meriba wabo buluba usu nigi pali. Tama obanu gana holama, tama ąį dulu holama, Isip dabego dąįdu pelama, genuai tamu ąį Mediterenianba usu nigi pali dao.”
EZE 47:20 “Tama giliga dega sabo badu tǫ dąį te not badu pelama, tama genuai tamu ąį Mediterenian kemi sanedu pelama, tama u not badu te dąį gagalali pesageba usu nigi pali,” wali.
EZE 47:21 “Dagego te dąį dabe tomode elalubo tǫ duga deli deli hani dabeba dobola siąo.
EZE 47:22 Tama te deli deli hanigo tǫ te augwa wai dabe nosali pedalobo bagego tǫ elaluaibao. Tama dagego tǫ dąį elama, dobayu da, teda dagego gasa hani bidi dabe augwa we dabe dage dali bidiyu, wai ame nani bagego tǫ me dąį elama maiąo. Dagego homugo e tama tiao, te bidi dabe augwali te Israel dabe naga dao olama, tama augwaliba me te tǫ togwa maiąo.
EZE 47:23 Te deli deli Israel hanigo augwa dali bidibo gasa hani bidi dage dali bidibo bage tǫ togwa maiąo. Te da, God Genuai Bidi eno po dao,” te po wai.
EZE 48:1 Genuai Bidigo po genina ma weyu, e tama po wali, “Te kantri Israel tǫ dąį te genuai tamu ąį Mediterenian kemi sane pąde te not badu gagalaibao. Tama giliga asobo badu pelama, taun Hetlonba tama peyu, tama te taun Hamatba pabo sunumi toboluba tama paibao. Tama te dąį pelama, te Damaskus usu nigi peyu, me Hamatba usu nigi peyu yaibao. Tama dąį pelama, taun Enonba usu nigi paibao. Tama Damaskus hanudu peyu, Hamatba usu nigi paibao. Te Dan hanigo te not badu tǫ saibao. Te kantri dąį sabi badu augwaligo tǫ dąį te kantri dąį dagedu tama gagalama, te giliga asobo badu gagalama, pelama. tama a badu giliga dega saboba aselama, tama genuai tamu ąį Mediterenianba usu nigi paibao.
EZE 48:2 Te Aser hanigo te saut badu te Dan hanigo tǫ badu saibao. Te Naptali hanigo te Aser hanigo tǫ saut badu saibao. Te Manase hanigo te Naptali hanigo tǫ saut badu tǫ saibao. Tama te Efraim hanigo te Manase hanigo tǫ saut badu tǫ saibao. Tama te Ruben hanigo te Efraim hanigo tǫ saut badu saibao. Tama me Ruben hanigo tǫ saut badu te Juda hanigo saibao. Te tigidali hanigo tǫ dąį te giliga asobo badu gagalama, pelama, genuai tamu ąį kemi sane Mediterenian nambisba usu nigi peyu yaibao,” Genuai Bidigo te po wali.
EZE 48:8 Genuai Bidigo po genina ma weyu, e tama po wali, “Te tǫ pedai te Juda hanigo tǫ saut badu elalubo tǫ te gasa sę me elalubao, te tedali gasagi yai tǫ dao. Te tǫ genuai dąį te not badude gagalama, saut badu usu nigi peyu, te 12 olama, hap kilomita usu nama dao. Tama te tǫ te kantri dąįdu gagalali, te giliga asobo badu gagalama, tama pelama, genuai tamu ąį Mediterenian nambis kemi sanedu tama pali dao. Te deli deli Israel hanigo tǫ dąį tiwai tama dao. Tama Genuai Bidi eno tempel be te tǫ pedaide elaluaibao,” wali.
EZE 48:9 “Te tǫ tomode dagego eno tǫ mu deli me dąį iyąo. Te tǫ u not badu me saut badu te bobobage dao. Tama te si dali si badu te deli tiwai dąį naga elalumainao, te 12 kilomita usu nama elalumainao. Tama me badu bogo badu si badu me, te deli dąį tiwai si naga elalumainao, te 5 kilomita usu nama. Te da, te pris dabego tǫ dao. Tama Genuai Bidi eno tempel be te tǫ tomode mu elaluaibao.
EZE 48:11 Te tǫ tedali gasagi yai mu dao. Tama te tǫ te Sadok hanigo pris bidi dabego tǫ dao. Te Israel dabe augwaligo ena tudi ola mani sogo, polobadu mu, te sogo te Sadok hanigo augwali wali pai menio. Te Livai dabego yali tiwai me yai menio. Menio. Te pris dabe augwaligo ena wali mu pelama, tama augwaligo eno sę mu yai dao.
EZE 48:12 Tama tibaso, eno ena te tǫ pedai te pris hanibolo te mobao. Te wiegi yai nai presen tiwai te olo mobao. Tama augwaligo te tǫ te tedali gasagi yai mu dao,” wali.
EZE 48:13 “Te Livai dabe augwali te pris dabego tǫ pedai me badu bogo badu saibao. Te tǫ bobobage dąį te 12 kilomita olama, hap kilomita usu nama, tama te tǫ genuai dedawali te 5 kilomita usu nama dao.
EZE 48:14 Te tǫ dabe dagego eno tǫ dąį yali te wiegi yai polalubo tǫ mu dao, tama tedali gasagi yai mu dao. Tama tialima, te pris dabe, ma Livai dabe augwaligo te tǫ te gasa hani mebago te tǫ mayu o abelemainu me sula tagalama dao,” wali. “Tama te pris bidi dabe tǫ bogo me badu dagego tǫ pedai me
EZE 48:15 dąį iyąo. Te tǫ bobobage te 12 kilomita olama, hap dao. Tama te tǫ genuai te 2 kilomita olama, hap kilomita dao. Te da, te we bidi augwaligo tǫ dao, tama te we bidi augwaligo genuai taun tede nigaibao, te tǫde. Tama augwaligo augwa be te tǫde sę eyu emainao. Tama me badu bugai te olo tǫ elaluaibao.
EZE 48:16 Te taun me si me si bogo badu te obogo bagulai elaluaibao, tama tigidali bogo badu deli tiwai dąį naga elaluali, te 2,250 mita usu nama elaluaibao.
EZE 48:17 Tama te taun te olo tǫgo te taun bagua sai elalumainao. Tama te tǫ genuai te 125 mita usu nama elalumainao.
EZE 48:18 Augwaligo augwa taun te we bidigo tǫde nigimainao. Tama tiyu, te taungo te tǫ tomode togwai elaluaibao. Me badu pedai te giliga asobo badu elaluyu, me badu pedai te giliga dega sabo badu elaluaibao. Te tǫ pedai si te taun we bidigo gi tede eyu emainao. Te tǫ pedai si bobobage te deli tiwai si naga dao, te 5 kilomita naga dao. Te tigidali Israel hani we bidi augwali te taunba sę yagasiyu da, augwaligo te tǫde gi eyu emainao,” wali.
EZE 48:20 “Te we bidigo tǫ, me eno tǫ pedai te pris dabe me Livai dabe augwali bidibo, te tǫ te genuai tǫ tiwai me pedelali. Te tǫ dąį me si me si badu te deli dąį tiwai naga dao, te 12 kilomita olama, hap kilomita usu nama naga dao.
EZE 48:21 Eno tǫ me, te we bidigo tǫ te genuai tǫ tomode te elalubao. Te da eno gasa sę me yainogo dąį yai dao. Tama tǫ me badu pedai badu elaluyu, me badu pedai badu elaluyu, te ebao. Te da, te kingo tǫ dao. Tǫ pedai me deli te giliga asobo badu te elalubao. Te da te eno tǫ dąį bogo badu gagalama, pelama, giliga asobo badu te kantri dąį badu dąį igi pali dao. Tama me badu tǫ pedai te giliga dega sabo badu te elalubao. Te da eno tǫ bogo badu gagalama, pelama, genuai tamu ąį Mediterenian nambis sesegeba tama usu nigi pali. Tama tialima, te we bidigo tǫ, me eno tǫ si te kingo tǫ tomode mu elalubo. Te eno tǫ me badu te eno be elalubo, tama te tǫ me badu bogo te eno Livai dabebolo dąį ilai dao. Tama te we bidigo tǫ te genuai taun te elalubo badu dao. Te Juda dabego tǫ te kingo tǫ not badu te elalubao. Tama Benjamin hanigo tǫ saut badu te elalubao,” te po wai.
EZE 48:23 Genuai Bidigo po genina ma weyu, e tama tiwai po wali, “Te Israel hani mebago tǫ e tama dao. Te Benjamin hanigo tǫ te gasagi yai sę elalubo tǫ saut badu saibao. Tama Simeon hanigo tǫ te Benjamin hanigo tǫ saut badu saibao. Tama Isakar hanigo tǫ te Simeon hanigo tǫ saut badu saibao. Tama te Sebulun hanigo tǫ te Isakar hanigo tǫ saut badu saibao. Tama Gat hanigo te Sebulun hanigo tǫ saut badu tǫ saibao. Te tigidali hanigo tǫ dąį te giliga asobo badu gagalama, tama pelama, genuai tamu ąį Mediterenian nambis kemi saneba usu nigi peyu yaibao.
EZE 48:28 Te Gat hanigo tǫ dage badu te kantri dąį dao, te Gat hanigo tǫ saut badu. Tama te taun Tamardu gagalama, pelama, te giliga dega sabo badu tama peyu, te ąį elalubo odogo bulu augwaligo Kades Meriba wabo buluba usu nigi pali. Tama ugwanu dwasianu holama, tama te ąį dulu te Isip dabego bulu dąįdu pelama, genuai tamu ąį Mediterenianba usu nigi pali.
EZE 48:29 Dagego ena God Genuai Bidi eno po wali piąo. Te dagego te tǫ Israel hani duga hasi dobola sabo side tama tiao. Te Israel hani deli deli duga hasi dobola sabode tama tiao,” Genuai Bidigo te po wali.
EZE 48:30 Genuai Bidigo po genina ma weyu, e tama po wali, “Te genuai taun bagulali obo sunumi nogo si olama si sunumi elaluaibao. Te deli deli obo bogo badu te sunumi sela sela elalua paibao. Te deli deli sunumi dabede te Israel hani deli deli wąįgo nogi elalua paibao. Te sunumi nogi Ruben elaluyu, me nogi Juda, me nogi Livai elalubo sunumi sela te not badu elalua paibao. Tama te sunumi nogi Josep, me nogi Benjamin, me nogi Dan elalubo te sunumi sela te giliga asobo badu elaluaibao. Tama me nogi Simeon elalubo sunumi, me nogi Isakar, me nogi Sebulun elalubo sunumi sela te saut badu elaluaibao. Tama me nogi Gat, me nogi Aser, me nogi Naptali elalubo sunumi sela te giliga dega sabo badu elaluaibao. Te obo deli deli badu te obo bobobage te 2,250 mita usu tama elaluaibao.
EZE 48:35 Tialima, te taun sese bagua sali obo te bobobage dąį te 9,000 mita usu nama dao. Tigidali sogo augwaligo te taun nogi e tama nogi eyu yaibao, ‘Genuai Bidi ede bidibao,’ te nogi waibao,” Genuai Bidigo te po wai.
DAN 1:1 Te Jehoiakim te Juda dabego tuni bidi king pedelai, tama kibu be sela bidai madigi, tialima Nebukatnesar te Babilon bulu kingo te Jerusalemba hwįagasainu aselama, tama agai ami bidigo te taun tigidali bagulali.
DAN 1:2 Godigo te Nebukatnesargo te Jehoiakim me te Juda we bidi hauwa somainu elama, tama te Godigo bede muani wiegi yai nai, te kap, me plet pou dabe meba salio. Tama agai te aga tibo godigo beba digibulu sela pali, te be te tǫ pedai Sinarde elaluali, te Babilon hanude digi dao.
DAN 1:3 Tama king Nebukatnesargo te Aspenasbolo walali, te aga bede sę ebo bidi dabego polalubo ofisa bidi dao, te Juda tomode te gesi ogwa bidi meba somainu yabo po wali. Agai te king Jehoiakimgo hani sibi, me te polalubo genuai bidi dabego hani sibi, te tomode gesi ogwa bidi dabe sao po wai dao.
DAN 1:4 Agai te gesi ogwa bidi dabe te wiegi yai gesabidi, me tigi wiegi yai yai naga sao po wali. Tama te tigi me badu dolali te me sigio, tama te wiegi yai kolesaga hauwa koneama, tama te wiegi yai skul olama, te kolesaga polo konea pabo bidi dabe naga sao, wali. Tama tiyu, augwaligo te kingo bede sę ebaso, usu yaibao. Tama Aspenasgo digi te augwaliba te nedebo me asębo sę te Babilon pode ola mayu, tama te Babilon bagego polobadu asęani wiegi yai kolesaga tigidali me ola momainogo yai dao.
DAN 1:5 Tama kingo te tiwai po me wali, te tigidali side augwaligo te kingo bede nai sabo bidi dabego ebo kolesaga tiwai eyu, te nai me wain wę tumainu yaibao wali. Augwali te skul sabo te kibu be selade waibao, tama nosali augwali te kingo sę bidi pedelaibao, wai dao.
DAN 1:6 Te Juda hani gesi ogwa bidi dabe tomode te Aspenasgo te bidi me si me si sai elaluai. Augwa nogi e tiwai, Daniel, me Hanania, me Misael, me Asaria dao.
DAN 1:7 Tama Aspenasgo gesi noma nogi augwaliba mawai. Agai te Danielgo nogi te Beltesasar polali, te Hananiago nogi te Satrak poali, tama Misael agai te Mesak poali, tama Asaria nogi te Abetnego poai dao.
DAN 1:8 Danielgo te kingo bede te nai me wain wę te augwaligo mabo nai tubo te aga hagela yali. Te kingo bede elalubo tobage nai dabe, te Godigo Juda dabeba habu selai. Tama tiyu, Daniel aga te mabo nai me wę tuabo hagela homu yali, tiyu aga te God gedude meda idali homu yai. Tialima, agai te polalubo ofisa bidi Aspenasba hanalu wali, te augwaligo agaba te gasa tobage nai mobaso usu egowe po hanalu wai dao.
DAN 1:9 Tama Godigo te Aspenasgo te Daniel homu dene emainu ilali,
DAN 1:10 tiali goli Aspenasgo Danielba te tiwai po wali, “Ena te kingde wi ebao, magi baso meni, agai te dagego tuabo nai me wę te sa muani. Tama dage tigi nomona selama, tama te dagego te duga dali asali gesi bidi dabego tigi tiwai tobage pedalisąbaso da, teda te king bidigo po olama, augwaligo ena ela muaibao,” wali.
DAN 1:11 Aspenasgo te Daniel, me Hanania, me Misael, me Asaria, te me si me si bage tonaluabo bidi me deli nigilali. Tama Danielgo te tonalubo bidiba te tiwai po wagi pali,
DAN 1:12 “Nago da e tiwai usu sao. Dabolo te gide sabo tubo nai doanai dabe naga mao,” wali, “tama tuabo kedau yai wę mayu iduao,” po wali, “te nogo si sogoba usu nagasao,” te po wai.
DAN 1:13 “Tialima, nosali te nogo si wali side, te gasa gesi bidi dabe te kingo be tomode nai tuali bidi dabe sulama, te da me suagameo, tama te nago koneaibao, te dago tigi te augwaligo tigi tiwai wiegi yai pedalugowe, ma meniwe? Te sulama, tama nosali nago mena sę dabolo yabo homu ebaso da, teda te po menio, nago te sę yagameo,” wali.
DAN 1:14 Te tonalubo bidigo te Danielgo pode usu da po olama, tama agai te Danielgo wali po tiwai gilama te sę yai dao.
DAN 1:15 Tialima, te nogo si wali sogo te silama, tama te bage tonalubo bidigo te augwali tigi wiegi yai mu pedalubo sulama, tama augwaligo tigi te mu boma pelama, te kingo bede nai tumainu te sa muani gesi bidi dabego tigi mu edelai sualio.
DAN 1:16 Tama tibaso, te tonalubo bidigo te Daniel dali, te aga abagi sela bageba dali, te kingo wiegi wiegi yai nai te augwaliba me mabeo. Agai te doanai, te nai dabe naga augwaliba mawai dao.
DAN 1:17 Tama Godigo wiegi yai konebo homu kolesaga te Danielba me, te aga abagi sela daliba menama, tama augwaligo koneani kolesaga te genuai mu elalu, te bukude elalubo po dabe me te mu konea pelama elaluai, tama augwaligo gasa nai dabe konebo kolesaga hauwa mu elaluali. Tama me, te Godigo Danielba te na ebo page dabe pusa mabo konebo kolesaga wiegi yai mani.
DAN 1:18 Te tigidali gesi bidi te kibu be sela te skul wabo silali, te king Nebukatnesargo dąį ilali gilama yali, tama te Aspenasgo augwali te kingba odasa pepela yali.
DAN 1:19 Tama te kingo augwali dali po mibo sogo, te agai te tiwai suali, te Daniel, me Hanania, me Misael, me Asaria, te bagego koneani kolesagago te gasa gesi bidi dabego koneani kolesaga aiyaba elaluai. Tama agai augwali te kingo sę yabo bidi pedalumainu ilalio.
DAN 1:20 Kingo augwaliba te tobage hauwa naide po hanalu obadi, te agai te tiwai suali, te augwaligo koneani kolesagago te tigidali aga tonalubo tǫ pedaide bidali kolesaga koneani bidi dabe aiyaba mu elaluai suali. Te kolesaga koneani bidi dabego kolesaga dali, te Juda me si me si bidigo koneani kolesaga dali usu mu isiąbo ąǫ isąwai dao.
DAN 1:21 Danielgo te king bidigo aga nogoba muani sę bobobage sogo yalio. Aga te sę idubadi, te gasa tuni bidi nogi te Sairus te Babilon king bidi pedelali sogoba usu nai dao.
DAN 2:1 Te me deli sogo hulide te si wabo kibu bede te Nebukatnesar king bidibadi, agai na yai. Te na yaligo te aga haliga sęgę mu ilama, tama aga piabo ąǫ ma ebeo.
DAN 2:2 Tama tibaso, agai po te gedugo tonama konebo bidi dabeba me, te pobi wabo bidi dabeba me, te dagalu hǫ dabe suyu nosali pedelabo sę konebo kolesaga koneai elalubo bidi dabe, te augwaliba po ola tolali. Augwali aselama, te agai na yali po page pusagasomainu yalio. Te augwali aselama, kingo geduba dolagasobo sogo,
DAN 2:3 agai te tiwai po augwaliba weyu yai, “Eno na yalio, tama te na yaligo ena homu sęgę tama elalubao,” wai. “Tama tibaso, eno te na yali page koneainu ebao,” wai.
DAN 2:4 Tama augwaligo te kingba po wei ponoyu, te Aram pogo begelama, te tiwai po wai, “King o, eno homugo nage te sesemane sogo sesabi elama, bugagia bidagameo. Te nago dabolo te nago nade suali nai po bolo pusao,” wali, “tama dago te na page nageba pusa mawaibao,” te po wai dao.
DAN 2:5 Tama kingo te bidi dabe augwaliba te tiwai po wai, “Eno mu po dageba obao, te dagego enaba te eno nade suai nai dabede po pusisąyu, tama te na yali page enaba te dagego pusa masiąbo usu isiąbaso da, teda te eno ena ami bidi dabeba walama, te dagego tigi tologolama, dolama, tama dage isimainu yaibao,” wali. “Tama augwaligo dagego be dolama, te olo nai kakali hogomu tiwai pedelaibao,” te po wai.
DAN 2:6 “Tiali goli, te dagego enabolo te eno nade suali nai dabe dali, te na yali page dali si pusa mobaso da, teda eno dageba te doado bage hauwa mayu, tama eno dagego nogi genuai pedalubo sę ilaibao. Tialima, megi da, dagego enabolo te eno na yali po page pusa maiyąo,” te po wali.
DAN 2:7 Tama augwaligo kingba te po ma wai, “Nago te nade suali nai po bolo dabolo pusa mao,” po wai, “tama dago te page pusaibao,” wali.
DAN 2:8 Tama kingo te po wali, “Eno te dagego tibo po wabo koneanio. Te dagego gesege gana eyu, te sesabi yaibao, magi baso meni, te dagego homugo eno te u wali po hasegelaibao homu yali. Tiali goli, te usu me egobeo.
DAN 2:9 Te dagego enabolo te eno nade suali naide po wasiąbaso da, dage tigidali te deli dolobo sę tobagego naga te dage dolaibao. Dage tigidaligo deli homu elama, te eno homu hasegelibo usu egowe weyu, te dagego ena tibo po ola mobao. Tialima, te eno nade suali nai po te enabolo waiąo. Dagego tama tibaso da, teda eno koneaibao, te dagego te na yali po page dali pusubo usu yaibao,” te po wai.
DAN 2:10 Te bidi dabego te kingo po wabo odolama, tama augwaligo te tiwai po wei ponani, “King, te nago dabolo te yao po wabo sę hanalubo po wali, te tǫde bidi me deligo nagebolo te po nageba obaso, te usu egobeo. King, te bidi osola subo bidi, me te gasa kolesaga koneai bidi dabeba me, te genuai bomai king bidigo te tobage hanalubo po polobadu munu me hanalu wai menio.
DAN 2:11 King, te nago dabolo hanalu wali nai po da kone tųą palio, tama te bidi me deligo yainogo ebaso, usu me egobeo. Te god dabego naga usu yaibao. Tama te god dabe te bidi dali me bidibeo,” wali.
DAN 2:12 Kingo te po odolama, te aga sębę eyu, agai wado po dwai mu wali. Tama agai te ami bidi dabeba po ola tolama, te augwaligo te Babilonde te po page koneai bidi tigidali ela silaibao, wali.
DAN 2:13 Tama te kolesaga konea pai bidi dabe ela muao wabo po augwaligo ola tolama, tama augwali meba pelama, te Daniel me, aga abagi dabe sela dali, te augwali me ela muainu yali.
DAN 2:14 Tialima, Ariok, te kingo ami bidi dabede te polalubo ofisa bidi, te hodolama peyu, te Babilonde kolesaga konea pai bidi dabe ela mugi painu yai. Tama Danielgo te homu kone bugagia palama, te Ariok dali miabo po sunumi dodolali.
DAN 2:15 Tama agai Ariokba te tiwai po hanalu wali, “Magi baso kingo te sesena pai bidi tiwai eyu, tama bomai po weyu, te kolesaga po page konea pai bidi dabe ela muaiba po waliwe?” Tama Ariokgo Danielba te tama sę pedelali po wai.
DAN 2:16 Tama Daniel te kingba polo pelama, tama agabolo hanalugi pelama, agai te po page koneani bidi dabe te polo asesa ela mugio olama, tama agai te na yali po page pusaibao po wai dao.
DAN 2:17 Kingo te pode usu da po obaso, tama Daniel aga beba ma begasa pelama, tama aga abagi selabolo te po walali, te Hanania, me Misael, me Asaria, te tama sę pedelali po wali.
DAN 2:18 Tama agai augwaliba te tiwai po wai, “Dago te dagalude bidibo Godiba gedu haluasa po wainao, te Godigo olo tau mabo wiegi yai kolesagago te dabolo te geme dualali nai page ola momainu elama, tama da te gasa po page koneani bidi te Babilon bulu bidi dabe dali isidali weyu, te dago tama tinao,” wai.
DAN 2:19 Tialima, te sogo hulide naga, te Daniel aga na tiwai ebadi, tama Godigo Danielba te kingo na yali page ola mawai. Tama Danielgo te po wei ponoyu, tama te Godigo nogi ugwaba siyu,
DAN 2:20 tama te tiwai po wai, “God, eno nago nogi sesemane sogo ugwaba saibao. Tigidali bomo me koneani kolesaga te nagede naga elalubao.
DAN 2:21 Nago te giliga side, me tulubage side te tonalubao, tama nago digi te bidi dabe king pedalumainu elama, tama nago te king dabe augwa sęde sela sąyu ebo dao. Tama nago te wiegi yai konebo homu kolesaga te we bidi dabeba mabo dao.
DAN 2:22 Te nai hauwa geme dualalubo te bidi dabego konesiąwai. Tiali goli, God, nago te nai dabe te bidi mebabolo ola mabo dao. Te nanobo ula te nagede elalubao, tama nago te be hulia side elalubo nai te konea pai dao.
DAN 2:23 Te eno wąį nǫų dabego God, eno nageba gedu haluasa po weyu, usu da olama, te nage nogi ugwaba sobao. Magi baso meni, nago enabolo te konebo kolesaga me te bomo enaba mawai, tama nago eno gedu haluasa po wabo odolama, tama enabolo te dago nageba hanalu wali nai ola mawai. Tama nago dabolo te dago te kingba aga nade pusabo po meba mawai dao,” Danielgo te gedu haluasa po wai.
DAN 2:24 Daniel te Ariokba pali, te bidi te kingo nogo tų dąį ilama, te Babilon po page koneai bidi dabe elimainu yali bidi da, tama Danielgo agaba te tama po wai, “Nago te po page koneai bidi dabe munu me eligio,” wai. “Nago ena te kingba sela pao, tama eno agaba te na yali po olama, tama te na yali page agaba pusaibao,” wali.
DAN 2:25 Tialima, polo asesa Ariokgo te Daniel kingba sela pelama, tama agabolo te po walali, “Eno te dago te augwaligo page bulude sesali Juda bidi me deli gegalio, tama agai nageba te na yali po page pusa mabo usu yaibao,” wali.
DAN 2:26 Tama kingo Danielba hanalu wali, “Beltesasar, te nago enabolo te eno na yali po weyu, tama te na yali po page pusubaso usu mu yaibawe?” te po wai.
DAN 2:27 Tialima, Danielgo kingba te tama po wai, “King o, te kolesaga page koneai bidi me deligo te geme dualali nai page po pusainu ebaso, usu me egobeo, te gedugo tonama konebo bidi dabe me, te pobi wabo bidi dabe me, augwali usu me egobeo.
DAN 2:28 Tiali goli, te dagalude bidibo God deli elalubao, tama agai te geme dualalubo nai page hania hanilaibao. King, Godigo nageba te nosali pedelabo nai dabede te na nagebolo ola manio. Megi da, te eno nageba te nago na yali po waibao.
DAN 2:29 King, nage pilamubadi, tama nago te nosali pedelabo sęde homugo kone paluyu, tama te nade Godigo nageba te nosali pedelabo nai dabe ola mani. Te God, te geme dualalubo nai dabe hanilibo God dao, tama agai nageba te nai dabe pedelaibao olama, te ola mani dao.
DAN 2:30 Tama te Godigo enabolo te geme dualaluali nai ola mawai. Te eno koneani kolesaga genuai da homu eyu, tama eno te gasa kolesaga koneani bidi dabe aiyaba elaluali da, te homu me egobeo. Menio. Godigo te sę enaba ola mobaso, te nago na yali po page te nago konemainogo ebo dao,” wali.
DAN 2:31 “King, te nago nade te moni dobo dwai bidi me deli piksa noma suyu, bididuali. Tama te nai te bomo elama, te ula mu yai. Nago sulama, te nage wi dwai mu yai.
DAN 2:32 Augwaligo aga tobolu te wiegi yai golgo nigai, te ula mu elaluali. Te hagawia me te aga nogo si augwaligo te silvago nigai, tama aga tabi me sągą tele si te brasgo nigai.
DAN 2:33 Te aga sągą pąno me sugu mi te aingo nigali, tiali goli te aiyadu sągą sawali si te ain me tǫgo dali nigai.
DAN 2:34 Nago te piksa nomaba tonaludubadi, tama masigi me deli aga digi te bulu dudu gebu aluasa dulu, te piksa sągą augwaligo te tǫgo me aingo nigali pedai badu elali. Tama te sągą si dwasianu mimia pelama, kakali nigilali. Bidigo te masigigo te dolobo sę me ebeo.
DAN 2:35 Tama te tigidali ain, me tǫ, me bras, me silva, me gol, tigidali te pepeda pelama, tama te wit tigiwali bo te dago sela sąbo tiwai pedelali. Tama te waligo te kakali hogomu selasa pelama, tama te dwasianu hogomu dabe me elalubeo. Tiali goli, te piksa noma elali masigi, te genuai bulu du pedelama, tama te tǫ pedai tigidali mesega salio,” wali.
DAN 2:36 “King, te tama na nago suali. Tialima, megi da, eno nageba te na yali po page pusaibao.
DAN 2:37 King, nage te polasa mu polalubao, tama nago te tigidali gasa king aiyaba elaluai. Te dagalude bidibo Godigo agai nage sa munama, tama agai nageba te genuai bomo, me genuai nogi mawai dao.
DAN 2:38 Agai nago te tigidali tǫde bidibo we bidi hani, me tigidali hasa sibi, me ba sibi, te tonalumainu ebo bidi nigali. Te nade te augwaligo te tobolu golgo nigali tiwai, te nage digi dao.
DAN 2:39 Te nage tudi badu gasa king bidi hani pedelaibao, tiali goli te augwaligo bomo te nago bomo tiwai me egobeo. Tama nosali te sela wabo king bidi hani pedalubo sogo, te tigidali tǫ pedai tonalueibao. Te king hani te bras tiwai dao.
DAN 2:40 Nosali te me si me si wabo king bidi hani pedelaibao. Agai bomo te aingo bomo tiwai yaibao. Aingo te tigidali nai elibo si, te kakali mu elama, te hogomu tiwai ebo dao. Tialima, te tiwai te king hanigo te kantri bulu tǫ pedai te tigidali mu dolama siliyu, te polobadu yali king bidi hani ela silaibao.
DAN 2:41 Te nago nade te tiwai suali, te naigo sągą sawali me sągą ge dabe augwaligo te tǫ de ain si taluama, nigali. Te page te tiwai. Te kingo tonaluali we bidi te pepeda pelama, te hani si pedelaibao. Tiali goli, te hani si te bomo elaludaibao. Ain te tǫ dali sągą side elaluali, tama te da te tiwai ola mawai, augwaligo bomo tigidali te polo tama me siligobeo.
DAN 2:42 Te sągą ge dabe augwaligo te ain me tǫgo nigali te tiwai ola mawai, te king bidi hani me badu te aingo bomo tiwai elalueibao, tiali goli te gasa pedai badu te tǫgo dwasianu bomo naga tiwai me elalueibao.
DAN 2:43 Augwaligo te piksa sągą nigainogo te ain me tǫ dali taluama, nigali. Te page te tiwai dao. Te king dabego homugo te pepeda pali hani dabe ma sisinabo homu elama, tama te augwaligo te gasa king dabego wegi dabe sabo homu elama, tama tiaibao. Tiali goli, te augwali deliba bugagia me dagana sogobeo, magi baso meni, ain te tǫ dali bugagia me dagana sabo menio,” wali.
DAN 2:44 “Tama te king dabe bidalubadi, te Godigo te we bidi tonalubo bomo te tomo hodolama, tama te tonalubo bomo te sesemane bidada peyu, bidada paibao. Te gasa king dabego te Godigo tonalubo bomo te elalueinu ebaso, usu me egobeo, te gasa bagego te bomo me sogobeo. Tiali digi, te agai da te augwali aiyaba elaluama, tama te gasa king dabe mu dola silama, tama agai tonalubo bomo te sesemane elaluaibao.
DAN 2:45 Nago suali, te masigi olodali aluasa dulu te tulaluama, tama te piksa augwaligo te ain, me bras, me tǫ, silva, gol, te tama naigo nigali piksa elibo suai. Te masigi te Godigo bomo tiwai nigali. Te Godigo genuai nogi elalubao, agai nageba te nosali pedelabo nai dabede sę ola mawai. Te nade nago te suali nai dabede te sę te eno nagebolo wali po gilama te tiwai sę dolo mu pedelaibao,” Danielgo te po wai.
DAN 2:46 King Nebukatnesargo te Danielgo po odolama, tialima agai Daniel pąba kidu sugunama, tama te po weyu, te augwa tibo godiba ofa ebo tiwai me te denami ebo nai me te Danielba ofa yao po wali.
DAN 2:47 Tama kingo Danielba te tama po wali, “Mu tama dao, nago Godigo te gasa god tigidali aiyaba elaluai. Aga te tigidali kingo Genuai Bidi, tama agai te geme dualali nai page ola mabo bidi dao. Megi eno te koneai, magi baso meni, nago te geme dualaluali na page te hania hanilalio,” wali.
DAN 2:48 Tama kingo Daniel dąį ilama, te Babilon Provinsde polalubo tuni bidi nigali, tama aga te kingba wiegi yai homu mabo bidi tigidali tonalubo bos bidi nigilali. Tama me te kingo te wiegi yai homu pemene ilibo nai hauwa te Danielba menama, tama Daniel genuai nogi elaluai dao.
DAN 2:49 Kingo te Danielgo po wali pelama, tama te Satrak, me Mesak, me Abetnego, te augwali sa munama, te Babilon Provins tǫ pedai tonalubo sę mawai. Tama Daniel aga digi te kingo bede bidalio.
DAN 3:1 Nebukatnesargo te po obaso, tama augwaligo te bidi piksa noma me deli te golgo nigai, te aga bobobage usu sali, te 27 mita teba usu nani, tama aga genuai usu nama usu sali, te 3 mita. Tama augwaligo te piksa te dolo tǫ pesage augwaligo te nogi Dura nogi yai, te Babilon Provins tǫ pedaide dodolai dao.
DAN 3:2 Kingo te po weyu, te aga gavman ofisa tigidali te piksa noma gudainogo eyu, sisinagasao wai. Tialima, te hetman dabe me, tama te polalubo tuni bidi, me si wabo tuni bidi, me te mone tonalubo bidi dabe, me te jas bidi dabe, tama te tǫ pedaide gasa ofisa dabe me, te augwali sisinagasai. Tama kingo augwaliba weyu, augwaligo te golgo nigali piksaba lotu waiyąo po walio.
DAN 3:3 Tama te po obaso, te tigidali gavman genuai bidi te piksa elalubo pesageba sisinama, te lotu wainogo yalio, augwali tede dodolali.
DAN 3:4 Tama te gavmango po pusubo bidi me deligo te i bomo elama weyu, te tiwai wali, “Dage tigidali bulu tǫ pedai kantri we bidi me, te tigidali hani me, te po haniani wabo we bidi dabe dao.
DAN 3:5 Dagego te biugel bolo hasia bu wabo odaibao, tama nosali augwaligo te gasa tobage musik hauwa waibao. Tialima, dagego te musik wabo odobaso da, te dagego kidu sugunama, tama te king Nebukatnesargo dodolali piksa teba lotu waiyąo.
DAN 3:6 Te bidi me deligo te piksaba kidu sugunama, lotu po wasiąbaso da, teda polo tama dago aga selama, tama aga te genuai stov sia posolo mu elalubo te tomoba aiya sąwaibao,” te gavmango po pusubo bidigo te po wali.
DAN 3:7 Tama augwaligo te musik wabo odobo sogo, te tigidali bulu tǫ pedai kantri bidi dabe, me te tigidali hani, me te tigidali haniani po wabo we bidi dabe, augwa te kidu sugunama, tama te piksaba lotu wali, king Nebukatnesargo dodolali piksaba lotu po wai dao.
DAN 3:8 Kingo te tama po wai, tigidali bidigo te piksaba lotu waiyąo po wali, tialima te Babilon bidi meba te kingba aselama, tama te Juda bidi sela po tų ilagasai.
DAN 3:9 Augwaligo kingba te tiwai po walio, “Genuai bidi, nage sesemane sogo bugagia bidagameo.
DAN 3:10 King o, nago bomo yai po te tiwai ilali, te augwaligo musik wabo sogo, tigidali we bidigo te kidu sugunama, tama nago te dodolali piksaba lotu po waiyąo po wai.
DAN 3:11 Tama bidi me deligo te muani bomai po wali me pisąbaso da, teda nago aga te genuai sia daboba aiyaba sąwaibao po wali.
DAN 3:12 Tiali goli, te Juda bidi sela, Satrak, me Mesak, me Abetnego, nago augwali sa munama, te Babilon tonalumainu yali bage, augwaligo te nago po sela sąwai. Augwaligo te nago god dabeba lotu me wasiąwai, tama me nago te dodolali piksaba kidu sugunama, lotu me wabeo,” wali.
DAN 3:13 Kingo te tama po odolama, tama aga wado po dwai mu olama, tama te po weyu, augwaligo te bidi sela agaba odasa asao wai.
DAN 3:14 Te sela bidi sabalubo sogode, kingo augwaliba te tama po hanalu wai, “Satrak, me Mesak, me Abetnego, augwaligo te po weyu, dagego te eno godiba lotu po me wasiąyu, tama me dagego eno te dodolali piksaba kidu sugunubeo po wali. Te mu da, agawe?
DAN 3:15 Tialima, dagego te musik odobo sogo, dagego kidu sugunama, tama te piksaba lotu waiyąo. Tama dagego te tiwai isąbaso da, megi naga tama eno te bidi dabeba walama, tama augwaligo dage te genuai sia daboba sąmainogo yaibao. Tama dagego homugo te dage tau sabo god me deli elaluba homu eba, agawe?” kingo te po wai.
DAN 3:16 Tialima, Satrak, me Mesak, me Abetnego, te bagego te po wali, “King, te nago da selade yainu ebo sęde te dago magi po me menio.
DAN 3:17 Dago lotu po te God muba wabo dao. Dago te God agai da tau sabo usu elalu, te nago bomo, me te siago bomo geda mubaso da, teda te Godigo sę dao,” wali.
DAN 3:18 “Tiali goli, agai da tau sisąbaso da, te tagalao, dago te nago god dabeba lotu po me wagobeo, tama me dago nago te dodolali gol piksaba me kidu sugunugobeo,” augwali selago te po wai dao.
DAN 3:19 Nebukatnesargo haliga sębę te Satrak, me Mesak, me Abetnego, te bageba eyu, tama agai guni buyu, gedu me gesabidi me pęgo sela pali. Tama agai te aga sę bidi dabeba olama, te sia nogonama, te bogoli mu dwai pedalumainu ilao wali. Polobadu augwaligo sia nogani posolo ebo te tiwai posolo yai me pedalubeo, te genuai mu.
DAN 3:20 Tama agai te bomai ami bidi dabeba walama, te Satrak, me Mesak, me Abetnego te nogo sągą baklaingo dunama, te siaba sąyao po wali.
DAN 3:21 Tama tialima, te bidi sela te augwa gudalubo ugwa dali kęnama, tama augwali te genuai siaba sąwai dao.
DAN 3:22 Kingo te po obaso, tama augwaligo te sia nogani te posolo genuai mu pedelali, tama te ami bidi dabego te Juda bidi sela pelama, te siaba sągi pali sogo, te siago te ami bidi dabe delama, te augwali isai dao.
DAN 3:23 Tama tialima, te Satrak, me Mesak, me Abetnego te sia tomoba tulaluai, tama augwaligo te augwali kęnani bono baklain, te kęnani tiwai tama elaluai.
DAN 3:24 Nebukatnesargo te augwali tama tebo sulama, tama polo tama agai dwai midigi selama, dolugulali. Tama agai bolo te wiegi yai homu kolesaga ola mabo bidi dabeba hanalu wali, “Dago te bidi sela nogo sągą dųnama, te siaba sąwani, ma meniwe?” Tama augwaligo agabolo te po wai, “Awe, genuai bidi, dago te tama tiwai dao.”
DAN 3:25 Tialima, agai te po wali, “Magi elama tama eno suali, te bidi me si me si te sia tomode bilibowe? Tama te dago augwali kęnani baklain bono, te augwali tigide elalubo ma me subeo. Tama siago me augwali me dabeo. Tama te me si me si wali bidi te god me deli tonobo ąǫ ebao,” te po wai.
DAN 3:26 Tama Nebukatnesar te stov sia nogani pąba pelama, tama i wai, “Satrak, me Mesak, me Abetnego, dage te Ugwade Mu Bidibo Godigo sę bidi dabe dao, dage buluba dią soao.” Tialima, polo tama augwali buluba dią asalio.
DAN 3:27 Tama te kingo genuai bidi dabe, augwali te pąba pąba aselama, te siago disąwani Juda bidi sela suagasalio. Tama augwaligo te tiwai suali, te siago augwa tobolu nisi me, te augwa gudali ugwa me, te siago disąwai, tama te sia hano kugumini me te augwali tigide me elalubeo.
DAN 3:28 Tama kingo te po wai, “Da tigidaligo te Satrak, me Mesak, me Abetnego, te augwaligo God nogi ugwaba sinao,” wali. “Agai te aga mobo bidi ensel tagala palama, tama te agaba lotu weyu, te konealubo homu dąų wabo bidi sela tau sali. Augwaligo te eno bomo yai po sela sąyu, te augwali isabo wi me ebeo. Tama augwaligo gasa godiba lotu me wabeo. Menio. Augwaligo te augwa Godiba digi naga lotu wai dao.
DAN 3:29 Te niwai god me deligo te aga we bidi tau siyu, te Satrak, me Mesak, me Abetnego, te augwa Godigo yali tiwai me egobeo. Tama megi eno te po wainu ebao. Te bidi dabego te Godiba posobo po wabo te habu mu dao. Te mena bulu kantri tǫ bidi dabego, me te mena hani bidi, ma te mena tobage po wabo bidi hani, augwaligo te tama tiwai po obaso da, teda eno te augwali tigi tologolama, miminama, te augwali isaibao. Tama eno te augwaligo be me te pobele bage tiwai pedalumainu ilaibao,” wali.
DAN 3:30 Kingo po ola silama da, teda agai te Satrak, me Mesak, me Abetnego, te augwali sela bageba te gesi sę te Babilon bulu tǫ pedaide mawai, te augwaligo polobadu yali sę mu edelama mu yali.
DAN 4:1 Te King Nebukatnesargo po te tigidali bulu tǫ pedai we bidi dabeba me, te tigidali haniba me, te tigidali haniani po wabo bidi haniba te po ola tolali. Agai po te tiwai, “Dage tigidali bugagia bidaluiąo,” walio.
DAN 4:2 “Megi ena dwagi yai homu eyu, tama eno dageba te Ugwadu Mu Bidibo Godigo enaba ola mani bomo yai sę dali, te bidi noma sabo genuai sę dabede po obao,” wali.
DAN 4:3 “Godigo te tobage genuai sę ebo mu dabolo ola mawaibao. Tama aga digi te boma pai mu elalubao. Aga te king sesemane bidada pidu, bidibo dao. Agai te tigidali nai tonalubo sę te sesemane sogo elalua pidu, mu elalua paibao.”
DAN 4:4 “Ena Nebukatnesar, eno te tigidali nai sulama, tama eno sę dabe sese te wiegi yai pedalubaso, tama ena wiegi yai pemene elama, te ena bede bidai dao.
DAN 4:5 Tiali goli, me sogo deli sogo hulide eno na elama, tama ena wi dwai mu yalio. Ena te eno bet saide pila mubadi, tama te eno homude suali nai dabe augwaligo ena wi dwai mu ilalio.
DAN 4:6 Tama tibaso, eno te tigidali Babilonde te po page koneai bidi dabe asiąo olama, enabolo te na yali page pusagasiąo po wali.
DAN 4:7 Tama te tobage po page koneai bidi dabe dali, te pobi wabo bage dali, te tama bidi dabe tigidali asalio. Eno augwaliba te na yali po walali, tiali goli augwaligo te na yali po page pusabo usu meni yai dao.
DAN 4:8 Nosali Daniel asai. Eno agaba te nogi Beltesasar polama mawai, te nogi te eno god nogi dao. Te bomai god dabego te homu kolesaga Danielba mawai baso, tama tialima, eno na yali po te agabolo walio. Eno agaba te tama po wai,
DAN 4:9 ‘Beltesasar, te kolesaga koneai bidi dabego tobolu bidio, eno koneani, te bomai god dabego nageba te homu kolesaga menama, tama te magi nai me deli nagede geme dualalubeo. Tialima, eno na yali po megi odama, tama nago te nade yali po page pusao,’ wali.”
DAN 4:10 “Eno agabolo te po wali, ‘Ena piali sogo, eno na te tiwai yali. Eno suali, te tigidali bulu tǫ tomode te bobobage ni me deli dolalubo suali.
DAN 4:11 Te genuai pedelama, tama te ni bobage holali tobolu te dagaluba usu nu giluainu yali, te tigidali bulu tǫ pedai bidi tigidaligo sumainu ebo tiwai yai.
DAN 4:12 Te nigo te wiegi yai yabe elalu, tama te nai hauwa walali, tama te tigidali bidigo, me hasa sibigo te tuabo usu elaluai. Te bulu uni hasa sibi dabe aselama, te ni dologoba toma tuagasu yagasai, tama te ba dabego aga nologode be nigali, tama te tobage tigidali nai sibigo te aga du tuagasalio.
DAN 4:13 Eno te na yali homu kone paludubadi, tama eno suali, te mobo bidi ensel me deli te dagaludu dulubo suai, te mobo bidi ensel dabede te nai dabe tonalubo ensel me deli dao.
DAN 4:14 Agai i bomonama weyu, te tiwai po wali, “Te ni degemainu, te gelao,” wali. “Tama te aga nologo dabe togwao, tama te yabe dabe selama, subigila tedela palao,” wai. “Te ni dologode bidibo kibu hasa sibi dabe sela sąyu, te ni nologode dugulalubo ba sibi dabe te sela sąyao.
DAN 4:15 Tiali goli, te aga page da, te nosai elalubo tǫ tomode elalumainu yao, tama te genuai ring ain me bras te me deli selama, tama te aga pageba muao. Te hulide tulubage segeni ebo te aga daiba tulalumainu elama, tama aga te kibu hasa dabego te tuabo nosai gegebo tiwai emainao.
DAN 4:16 Agai te bidi dabego homu kolesaga ebo tiwai ma egobeo, tiali goli aga homu kolesaga te kibu hasa sibi dabego homu kolesaga tiwai elalua pidubadi, te kibu be 7 bidaibao,” wali.
DAN 4:17 “Te nai dabe tonalubo mobo bidi ensel dabe, augwaligo te nai dabe pedalumainao po obaso, te tigidali bidigo konemainu yali, te Ugwadu Bidibo God Mugo te tigidali we bidi tonalubo dao. Te agai homugo digi te bidi dabe king pedalumainu sa mubo da, te genuai nogi elalubo bidi me, te olo bidi tama me, te tagalao, te agai digi sa mubo dao.” Te ensel mobo bidigo te po wai,’ eno te po Danielba wali.
DAN 4:18 Tama eno Danielba te tiwai po ma wali, ‘Eno nageba te eno na yali po wai dao. Megi da, Beltesasar, nago enabolo eno te na yali po page pusao, magi baso meni, te eno po page koneai bidi me deligo enabolo te po wainu ebaso, te usu ebeo. Nage naga usu da, magi baso meni, te bomai god dabego te nageba homu kolesaga mawai dao,’ eno Danielbolo te po wali,” Nebukatnesargo te po wai dao.
DAN 4:19 Danielgo te na page koneai, tama agai te homu si eyu, tama te kingba pusabo wiegi yai homu pemene isąwani. Tama aga te po polo wei ponebeo. Tiali goli, kingo agaba te po wai, “Beltesasar, tama nago homugo te na elalumaina homu elama, tama te na yali pagede nago haliga sęgę emainu egio,” wali. Tialima, Beltesasargo te po wai, “King o, eno homude te nade yali sę nageba pedalubo te eno hagela homu yai. Eno homugo te nago boi bidi dabe augwaliba naga pedalumainu homu yai dao.
DAN 4:20 Nago te genuai ni me deli suali. Te aga tobolu te dagaluba mu usu nu gulali, tama tǫde bidi tigidaligo suali.
DAN 4:21 Te agai yabe te wiegi yai dabe naga elaluai, tama te nigo du wai te hauwa elaluali, te tigidali bidigo me hasa dabego te tuabo usu elaluai. Te bulu uni hasa dabe te ni dologoba toma nagasali, tama te ba dabego te aga te ni nologoba be sęnama bidai dao.
DAN 4:22 King o, te ni da, te nage tama dao. Nago genuai nogi mu te we bidi tigidaligo gedude elalubao, tama nago bomogo te tigidali bulu tǫ habu usu nama tonalubo dao,” wali.
DAN 4:23 “Tama nago suali, te nai dabe tonalubo ensel mobo bidi me deli te dagaludu dulama, te po wali, ‘Te ni gelama, dolao,’ wali, ‘tiali goli, te tǫde page te nosai dabe elalubo page tomode elalumainu sula tagalao. Tama te genuai ring ain me bras deli selama, tama te aga pageba muao,’ wali. ‘Te hulide tulubage segeni ebo te aga daiba ugwadu tuluyu, tama kibu hasa dabe dali te kibu be 7 tama bidimainu ilao,’ te ensel mobo bidigo nagebolo te po wali.”
DAN 4:24 “King, te na yali page te tiwai. Te Ugwadu Bidibo God Mugo te nageba pedelabo naide po wali dao.
DAN 4:25 Nago te we bidi dabe bidibo pesage tagalama, tama nage pelama, te uni hasa dabe dali bidigi paibao. Nage te kibu bulmakau dabego nosai dabe tubo tiwai eyu, tama nage bulude piaibao, tama te hulide tulubage segeni tulubo te nageba idubadi, te kibu be 7, teba usu nigi paibao. Nage te tiwai bididubadi, te nago te tiwai te Ugwadu Mu Bidibo Godigo te tigidali we bidi tonalubo homu konebo teba usu nigi pabo teba usu naibao. Te aga homugo digi, agai te bidi dabe te king pedalumainu ebo dao.
DAN 4:26 Nago odali, te enselgo te ni page te tǫde elalumainao wali. Te wali po page te tiwai. Te God deligo naga te tigidali tǫde nai tonalubo da, te tama tiwai bugagia konebo sogo da, teda nage te king ma pedalaibao.
DAN 4:27 Tama eno homugo te megi eno nagebolo wabo po tiwai yao. Nago te sęgę munu ma sigio,” wai. “Nago te doloba pai kolesaga naga yao, tama nago te olo tau sabo wiegi yai homu te magi nai sǫą pabo we bidi dabeba yao. Dago konebeo, te nago te tama tibaso da, teda nage te bugagia bidiyu, tama nago ebo sę tigidali te wiegi yai naga pedalaibao, te nago nade suali sę nageba asogobeo,” Danielgo king bidibolo te po wai.
DAN 4:28 Tama nosali, te tigidali wali sę te king Nebukatnesarba te Danielgo wali tiwai gilama pedelai dao.
DAN 4:29 Te polua nogo si olama, sągągo si, te 12 polua silibo si da, tialima te me sogo deli sogo te king aga te be mabo nigalidu te Babilon bede te daide bidali.
DAN 4:30 Tama agai te tama po wali, “Iya, Babilon te genuai taun mu, tama te polalubo mu da. Te ena king bidi ede bidimainu eyu, te eno bomogo digi, eno te taun hodolali, te eno genuai bomo me genuai nogi te tigidali hani we bidiba ola mani dao,” kingo te po wai.
DAN 4:31 Agai te po odubadi, tama agai po me deli te dagaludu asobo odali. Te po e tiwai wali, “King Nebukatnesar, nago eno po odao. Te nago te haniani bulu tonalubo genuai bomo, megi tama te eno nago nogode sela sąwaibao.
DAN 4:32 Tama te augwaligo nage sela sąnama, tama nage te we bidi dabe dali munu ma bidigobeo. Te nage bulu uni hasa dabe dali naga bidaibao. Nago te kibu bulmakau dabego nai tubo tiwai ela bilidubadi, te kibu be a naga olama, me nogo badu si yaibao. Te nage te tiwai bididubadi, ‘Te Ugwadu Mu Bidibo Godigo te tigidali we bidi tonalubo da,’ te tiwai homu konebo sogo usu naibao. ‘Te God aga homugo digi, agai te bidi dabe te king pedalumainu ebo dao,’ nago te homu yaibao.” King bidigo te po wabo odali.
DAN 4:33 Tama polo mu te sę dabe te king Nebukatnesarba te enselgo wali po tiwai gilama pedelali. Augwaligo aga te we bidi dabe tomodu sela sąnama, tama aga te kibu bulmakau dabe tiwai gilama te nosai tuduai dao. Te hulide tulubage segeni ebo te aga tigi daiba tulali. Tama aga tobolu nisi te ba aiwai nisi bobage ebo tiwai pedelali, tama aga nogo dani bobage te bago dani bobage tiwai pedelalio.
DAN 4:34 “Te kibu be a naga me si wali silibo sogo da, ena Nebukatnesar, eno te dagaluba ugwa tonaluama, tama eno homu kolesaga te wiegi yai ma pedelai. Tama eno wiegi yai homu pemene te Ugwadu Bidibo Godiba mu yalio. Te sesemane bidada pidu bidibo God, tama eno aga nogi ugwaba mu siyu, kekene nanio. Tama eno te tama po wai, ‘God te king sesemane sogo bidada peyu, bidibo dao.
DAN 4:35 Agai suali, te tǫde bidi dabe te olo nai tiwai yali. Te dagalude ensel mobo bidi dabe, me tǫde bidi dabe, te aga dologode bidiyu, tama agai augwali tonalubao. Te agai magi sę me deli yainu ebo sogo, te niwai bidi me deligo te paligobeo. Tama te niwai bidi mego agaba te tama po me hanalu, “Nago magi yainu ebawe?” te po me wagobeo.’ Eno te po wai.”
DAN 4:36 “Eno te po wali sogo da, teda polo tama te eno homu wiegi yai ma pedelama, tama eno te ena genuai nogi ma sali, tama te polobadu eno te tonaluali bulu tǫ kantri tonaluabo bomo ma sai. Te enaba wiegi yai homu kolesaga mabo bidi dabe, me te ena genuai bidi dabe, augwali te ena dali ma bidagasalio. Tama ena te king ma bidiyu, tama ena nogi genuai mu elaluali, te eno polobadu elaluali te genuai nogi aiyaba elaluai dao.
DAN 4:37 Megi da, ena Nebukatnesar, eno wiegi yai homu pemene te dagalude kingba eyu, tama eno aga nogi ugwaba siyu, tama agaba genuai nogi mawai. Tigidali sę agai ebo te wiegi yai pedelama, tama doloba pai naga yali, tama agai te bidi dabego augwa nogi augwa digi ugwaba sainu ebo bidi dabe te aiyaba elalubo dao,” king Nebukatnesargo te po wali.
DAN 5:1 Te Belsasar Babilonde king bidali sogo, agai genuai nai da me deli tuali. Agai te aga gegunai bidi dabe te nai tuboba asomainu i olama, tama augwali aga dali te wain ąį tuali, te kingo wiegi yai genuai be tomode. Te sisinani gegunai bidi dabe nedali namba, te tiwai, te 1,000 bidi dabe dao.
DAN 5:2 Augwali te wę tudubadi, tama Belsasargo te aga sę bidi dabeba walama, te gol kap dabe, me silva me selama, sesao wali. Te kap dabe te aga wąį Nebukatnesargo te Godigo be, te moni lotu be tempel te Jerusalemde selama, tama te Babilonba selasa asai. Kingo homugo aga dali, te gegunai bidi dabe me, te aga we mu dabe dali, me te i badu daganalubo si wali we hani dabe dali, augwali te kapudu wain wę tuainu yai.
DAN 5:3 Tialima, te sę ebo bidi dabego te kap dabe seselama, tama tigidali bidi me we dabe augwaligo te kapde wę tualio.
DAN 5:4 Augwaligo te wain wę tuduladu, tama augwaligo te gol, me silva, me bras, me ain, me ni, me masigi, te nai dabego nigali god dabe augwaligo te nogi ugwaba sabo sę yali.
DAN 5:5 Tialima, polo tama bidi me deligo nogo te be habu togwa sali pai tede pedelama, tama te nogogo nogo ge me deligo te pai ugwadu tede po asębo sę yali. Te badu te lam sole ula genuai ebadi, tama kingo te nogo gego asębo te hania mu sualio.
DAN 5:6 King te wi mu yali, tama aga gesabidi te hasegelama, tedela yai pedelali, tama aga bomo me silali, tama aga tigi dili dabe te mumunu eyu, didibili yalio.
DAN 5:7 Agai te bidi dabe augwaliba te i bomo elama weyu, augwaligo te sę ebo page konea pelama, te osabo bidi dabe, me te po page kolesaga koneai bidi dabe te sę pedalubaso, te augwali i wali, te augwali asomainu yai. Augwali asobo si da, teda kingo augwaliba te tama po wali, “Te bidi me deligo te po nedelama, tama enaba te po page pusubaso da, teda eno agaba te kingo mubo mama yai name ugwa muaibao. Tama eno te sen gol aga mageba domonama, tama aga genuai nogi elaluaibao,” wali. “Tama aga te eno gavmande te sela wali ofisa bidi pedelaibao,” wai.
DAN 5:8 Kingo te po aga te po page koneai bidi tigidaliba wali, tiali goli niwai bidi me deligo te be paide asęani po me nedesiąwai. Tama te augwali me deligo kingba te asęani po page me wabeo.
DAN 5:9 Tialima, king Belsasar te wi dwai mu elama, tama aga gesabidi te tedela mu hasegeligi palio. Tama te gegunai bidi dabe te moni homu mu yai, magi baso meni, te augwaligo magi sę deli me yabo usu me isąwanio.
DAN 5:10 Te king dali, aga genuai bidi dabe daligo posolu wali. Te kingo idago te posolu wabo odama, tama aga te nai tubo be habu tomoba pali. Tama agai te po wali, “King, nage te sesemane sogo bugagia bidagameo. Te sę ebogo te nage homu poma peyu, tama nago gesabidi tedela eyu, nago haliga te dwai me emainu iligio.
DAN 5:11 Odao. Te nago bulu tǫde te bidi me deli bidibao, tama te bomai god dabego agaba te wiegi yai homu kolesaga mawai. Te naga wąį king bidali sogo, agai te bidigo te wiegi yai homu kolesaga koneai elalubo suali, tama agai koneani kolesaga te genuai mu, te god dabego koneani kolesagaba usu nani. Tama nago wąį, king Nebukatnesargo, aga te bidi osabo tama aga te gasa kolesaga koneani bidi dabego tobolu bidi nigilama bidali. Te naga wąįgo te tama tiali,
DAN 5:12 magi baso meni, te bidigo koneani kolesaga te tedali gasagi yai mu elalu, tama agai te na ebo page dabe, me te po begelama wabo po me, tama te geme dualali po page me, pusuyu yali. Tama nago te bidi Danielba po ola tolao, king Nebukatnesargo aga nogi te Beltesasar poali, tama agaba hanalugi pelama, te aga aselama, te nageba te be habu paide elalubo asęani po page pusagasomainogo yao,” te king aga idago te po wai.
DAN 5:13 Tama tialima, augwaligo Daniel te tomoba sela aselama, tama aga te king pąba doligi pali. Tama kingo agabolo te tama po wai, “Nage Daniel, nage te Juda bidi me deli da, agawe? Nage te eno wąį king Nebukatnesargo polobadu sela asali hani bidi me deli da homu ebao.
DAN 5:14 Eno te tiwai odali, te god dabego nageba wiegi yai homu kolesaga menama, tama nago koneani kolesaga te genuai elalubao wali.
DAN 5:15 Eno te po page koneai bidi dabe i olama, te be habu paide elalubo po nedagaselama, te enabolo page pusao wali, tiali goli augwali usu me isąwai.
DAN 5:16 Tiali goli, eno odali, te nago da te tobage po page koneama, tama te geme dualali po tiwai me te nago konebo dao, wali. Tialima, nago te po page nedabo usu elama, tama enabolo nago te po page pusubaso da, teda eno nageba te kingo mubo mama yai ugwa name munama, tama eno nago mageba te sen gol munama, te nago nogi genuai elalueibao. Tama nage te eno gavmande te sela wabo ofisa bidi pedalumainu nigilaibao,” te po king Belsasargo wali.
DAN 5:17 Tialima, Danielgo te tama po wei ponama, te po wali, “Tagalao, eno nagede te wiegi yai nai me deli me sogobeo. Te nago homugo wei homu ebaso da, teda nago gasa bidiba mao. Tiali goli, king, megi da, eno te po nedama, tama nagebolo te po page pusaibao.”
DAN 5:18 “Odao. Te Ugwadu Mu Bidibo Godigo te nago wąį Nebukatnesar te bomai genuai king pedalumainu ilali. Tama agai genuai nogi elalu, te ugwanu egulama, tama ugwadu daide mu elaluai dao.
DAN 5:19 Agai bomo genuai mu elaluali, tama teyu te tigidali bulu tǫ kantri we bidi dabe, me te tigidali hani, me te tigidali haniani po wabo hani bidi dabe te agade wi mu elama, tama augwali didibili yai. Te agai bidi me deli ela muabo homu eyu da, agai elai dao. Tama te bidi me deli aga bidibo ula elalumainu homu eyu da, agai te bidimainu sula tagalali. Te agai bidi me deligo nogi ugwaba sabo homu ebaso da, agai te tama tiali. Te agai aiyaba elalu, te bidi me deli dolainu homu ebaso da, teda agai te tama tiai dao.
DAN 5:20 Tiali goli, nago wąįgo homugo te aga umabo ugwanu mu da homu elama, tama aga hagoma eyu, haniani dobo kolesaga subigila ebaso, tama Godigo aga sela sąnama, tama aga te king me bidibeo, tama aga genuai nogi elaluali te tulaluai dao.
DAN 5:21 Godigo agai homu kolesaga te kibu hasa dabego homu kolesaga tiwai pedalumainu ilali, tama te we bidi dabego aga sela sąwani. Tama aga te bulu uni yowi donki dabe dali bidigi pelama, tama aga te bulmakau dabego nosai tubo tiwai yaligia agai me tuali. Tama hulide tulubage segeni aga tigiba tulaluai. Tama nosali agai te tiwai koneani, te Ugwadu Mu Bidibo Godigo te tigidali we bidi tonalubo king bage tonalubo dao homu yalio. Te God agai homugo digi, agai te bidi dabe king pedalumainu ebo dao, te nago ayago aya king Nebukatnesargo te tiwai konea sai dao,” Danielgo te po wai.
DAN 5:22 “Te Belsasar, nage te Nebukatnesargo wąį ogwa, tama nago te yali sę dabe koneai. Tiali goli, naga digi naga aiyaba elalubeo. Menio.
DAN 5:23 Nago naga digi naga nogi ugwaba sabo homu elama, tama dagalude Genuai Bidigo nogi aiyaba elaluabo homu yai. Nago te sę bidi dabeba olama, tama augwaligo te nago wąįgo te Godigo bede sela asali kap dabe seselama, tama nage dali, te naga genuai bidi dabe dali, me te nago we mu dabe dali, me te nago si wali hani we dabe dali, dage tigidaligo wain ąį te kapde tuali. Tama dagego te bidi dabego te gol, me silva, me bras, me ain, me ni, me masigi, te tama nai dabego nigali tibo god dabego nogi ugwaba salio. Te god dabego te tonono me bilisąyu, tama po me odisąma, tama te magi sę me konesiąwai. God deligo naga te nago bidibo ula, me nago ebo sę tigidali te tonalubao. Tiali goli, nago agai nogi ugwaba me sabeo.
DAN 5:24 Tama tibaso, Godigo te nogo tagala palama, te be paide po asęagasali.”
DAN 5:25 “Te asęani po te tiwai, ‘Nedao, Nedao, Dagalao, Pepedao.’
DAN 5:26 Tama te ‘Nedao’ wali po page te tiwai, Godigo nage te king bidabo nisu naga sogo te nedalio. Megi nago silibo side dao.
DAN 5:27 Tama te ‘Dagalao’ wali po page te tiwai, Godigo nago kolesaga dagalalio, tama te ola mayu dagalali, te nago wiegi yai kolesaga me elalubeo.
DAN 5:28 Tama te ‘Pedao’ wali po page, te tiwai, Godigo te nago tonaluali tǫ kantri pedelama, tama me badu te Midia dabeba doba yali, te me badu Persiaba doba yalio,” Danielgo te po wali.
DAN 5:29 King Belsasargo te po odolama, tialima agai te bidi dabeba walama, te mama yai ugwa name te Danielba munama, tama te sen gol aga mageba muao, wali. Tama kingo Daniel te gavman ofisa bidi te sela wabo bidi nigilali.
DAN 5:30 Tialima, te sogo hulide naga tama, te Midia dabe aselama, te Belsasar ela muagasali, te Babilon king dao.
DAN 5:31 Tama Darius te Midia tǫ pedai bidi te king pedelama, tama te bulu tǫ kantri tonaluai. Dariusgo kibu be te bidi sese sela, te me si, 62 kibu be elalubadi, te sogo aga te Babilon king pedelama, bidai dao.
DAN 6:1 Darius te king pedelama da, teda agai te 120 ofisa bidi nigilama, te augwaligo agai bulu tǫ pedai kantri dabe tonalumainu yalio.
DAN 6:2 Tama agai Daniel me, gasa bidi si dali, te sela bidigo te ofisa dabe tonalumainu yali, me te kingo sę bidi dabego sę tonalumainu yai dao, te aga gavmango mone te olodali hagaidali weyu yali.
DAN 6:3 Kingo suali, te Danielgo sę wiegi yai mu eyu, te ofisa dabego sę, me te aga dali deli sę ebo bidi sigo sę ebo te augwali agai aiyaba elaluali. Tama tibaso, kingo homugo agai Daniel te tigidali bulu tǫde te polalubo ofisa bidi nigilabo homu yalio.
DAN 6:4 Tama tibaso, te gasa ofisa dabe me, te aga dali deli sę yali bidi sigo me, te tama homu yali, te hagela homu yai. Tama te augwaligo Danielgo te dwai sę meba ebo te sunumi gegebo sę yali, te augwaligo aga po tų ilainu tialio. Tiali goli, augwaligo te dwai sę me deli ebo gegebo usu isąwani, magi baso meni, Daniel te doloba pai bidi, tama agai sę te wiegi yai naga yai. Agai te tibo po me wasiąyu, te dolo isąwai kolesaga me ebeo.
DAN 6:5 Tialima, augwa haside digi po miyu, te tiwai po wali, “Dago te Danielgo sę ebode te dwai sę ebo kolesaga gegebo usu egobeo, te dago aga po tų ilainu. Dago te aga Godibolo agai lotu wabo kolesagade suinao, tama te dago aga po tų ilabo sunumi gegebo homu ebo dao,” augwaligo te po wali.
DAN 6:6 Tama augwaligo te king sugi pelama, agabolo te po wali, “King Darius, nage bugagia sesemane sogo bidagameo,” wali.
DAN 6:7 “Da tigidali ofisa te bulu tǫ kantride nago sę ebao, da te polalubo gavman ofisa dabe, me tigidali gasa ofisa, dago te po mia selama, te bomo yai po me deli muagameo wai. Dago homugo nago te we bidi dabeba te tiwai po omainu homu yai, te bidi sese deli olama, nogo si, te 30 dei wabo side usu nama, bidi me deligo te god me deliba, ma te bidi me deliba, gedu haluasa po me olamuo. Menio. Augwaligo te nageba naga gedu haluasa po omainao. Te mena bidi me deligo te po bolobaso da, teda nago aga te moni hasa laion dabe bidibo tǫ dedageba sąyu, tula palagameo wai dao.
DAN 6:8 Tialima, king, nago te bidi dabeba walama, te bomo yai po te pepaba asęao olama, tama te nago nogi me asęao, te muani po dąų waliyu tiao, tama te tigidali we bidigo wali pomainu yaibao. Te bomai po te da Midia me Persia bagego bomai po me deli pedalaibao, tama te bidi me deligo hasegelimainu ebaso, usu me egobeo,” augwaligo te po wai.
DAN 6:9 Te po odobaso, tama king Dariusgo te bidi dabego te po asęao wali, tama agai te aga nogi te pepade asęai dao.
DAN 6:10 Tama Danielgo te po dąų walali po odobo sogo, aga te aga beba hogodasa palio. Tama aga te ugwa badu elaluali be habu dai badu holama, tama te windo pąde kidu sugunama, te Jerusalemba tonono yalio. Tama agai te sesemane sogo gedu haluasa po weyu, te nage usu da po te Godiba wabo tiwai yali. Agai te deli deli sogo bubugade te gedu haluasa po sela sogo weyu yai dao.
DAN 6:11 Tialima, nosali te Daniel po tų ilainu yali te ofisa dabe, augwa hasi po mia selama, tama augwali te Danielgo beba polo pai, tama augwaligo te aga Godiba gedu haluasa po wabo suai.
DAN 6:12 Tama subaso, augwali kingba pelama, te tiwai po wali, “King o, nago te tama po wali, te 30 dei, te tama side te tigidali we bidigo nageba lotu po waiyąo po wai. Tama te augwaligo god me deliba, ma gasa bidiba, te lotu po obaso da, teda nago augwali te laion bidibo tǫ dedageba tula palaibao wai,” augwaligo kingbolo te po wai. Tama kingo te po wai, “Te dolo po dao. Te muani po te boma pai mu elama, te hasegelabo usu isąwai, magi baso meni, te da Midia me Persia dabego dąų walali po dao,” te po wai.
DAN 6:13 Tialima, augwaligo kingba te tiwai po wai, “Daniel, te Juda hani bidi me deli, agai te nago po sela sąnama, tama nago te muani po wali me pabeo. Sesemane sogo agai te aga Godiba gedu haluasa po te sela sogo te deli bubugade weyu ebo dao,” te po wai.
DAN 6:14 Kingo te po odama, tama aga haliga sęgę mu ebaso, tama te Daniel tau sabo sunumi gegebo sę yalio. Aga homude te Daniel tau sabo sunumi gegebo sę bomo mu idubadi, te giliga dega sigulali, tiali goli aga te sunumi me deli gegebeo.
DAN 6:15 Te be pio igi pabode, te ofisa dabe te kingba ma begasa aselama, tama agabolo te tiwai po wagasali, “King, nago te da Midia me Persia dago ebo kolesaga koneani. Te kingo te po me deli dąų walai ebaso da, te dąų wali po me hasegeligobeo,” wali.
DAN 6:16 Tialima, kingo te gasa bidi dabebolo te Daniel sao po olama, tama aga te laion dabe bidibo tǫ dedageba tula palali. Tama agai Danielba te tiwai po wai, “Eno homugo te nago konealubo homu dąų mu olama, agaba sesemane sogo te lotu po udubo Godigo, agai nage tau somainao,” te po wai dao.
DAN 6:17 Augwaligo Daniel te tǫ dedageba tula palama, tama augwaligo te genuai sawali masigi me deli selama, tama te dedage pania palali. Tama king dali, te ofisa dabego dali, te augwa nogode elaluali ringo dąį te masigide ilama muani, te bidi dabego te Daniel tau siyu, te magi sę me idali weyu, te habu selali.
DAN 6:18 Nosali king te aga beba ma pali. Tama te sogo hulide aga te nai me tusiąma tama agai te we bidi dabe i olama, aga wiegi yai homu pemene ilagasomainu me ebeo. Tama me, te aga godege piabo ąǫ me ebeo. Mu menio.
DAN 6:19 Te kigamu digi mu king te hodaluama, te tǫ dedageba polo palio.
DAN 6:20 Te siligi pelama da, teda aga haliga sęgę mu elama, tama te tiwai i wali, “Daniel, nage te sesemane sogo bidibo Godigo sę bidi, odao. Nago te wali pelama, te agaba sesemane sogo lotu udubo God, agai te laion dabego pedauwali paniama, te nage gąų kelama tubewe, ma meniwe?” te po wai.
DAN 6:21 Tama Daniel te tǫ dedage tomode bidiyu, tama te tiwai po wei ponani, “King, eno homugo nage sesemane sogo sesabi elama bidao.
DAN 6:22 Godigo te aga mobo bidi ensel tagala palama, tama te laion dabe pedauwali paniama, tama augwaligo ena me dolobeo. Agai koneani, eno magi dwai sę me isiąwai, tama eno dwai kolesaga nageba me ebeo. Tama tibaso, agai ena tonalubo dao,” Danielgo te po wali.
DAN 6:23 King te wiegi yai homu pemene umabo mu eyu, tama te bidi dabeba weyu, te Daniel te tǫ dedagedu ugwaba kegao po wali. Augwaligo aga kegelama da, tama augwaligo te tiwai suali, te aga tigi me dolisiąwai elaluali, magi baso meni, agai konealubo po te Godiba dąų mu wai dao.
DAN 6:24 Tialima, kingo te Daniel po tų ilali bidi dabe augwali sao po olama, tama te augwali dali, te augwa we wai dabe dali, augwali te laion bidibo tǫ dedageba tula palalio. Augwali te tǫba tulalusiąbadi, te laion dabe posoga palama, tama augwali daboa sigulama, tama augwali tigi pepeda tulama, te mu dolai dao.
DAN 6:25 Tama nosali king Dariusgo te tigidali bulu tǫ pedai we bidi dabe, me te tigidali haniba, me tigidali haniani po wabo hani we bidi te pas asęna tolalio. Agai te tama po wai, “Dage tigidali te bugagia bidiąo,” wali.
DAN 6:26 “Dage eno bulu tǫ pedai kantri dabe we bidi dabeo, eno te po odiąo. Dage tigidaligo genuai nogi te Danielgo Godiba menama, tama te God dologoba pelama bidao. Te God te sesemane sogo bidada pobao. Aga te king sesemane sogo bidada pidu, bidada paibao, tama aga te we bidi tonalubo bomo te me siligobeo.
DAN 6:27 Agai te we bidi dabe dolainu ebo sogo te augwali ma sabo dao. Tama agai te tobage te genuai bomai sę te dagalude me tǫde ebao. Te Godigo te Daniel tonalu, tama te laion dabego aga me dolobeo,” te po wai dao.
DAN 6:28 Tama te Darius king bidali sogo, me te Sairus te Persia king bidali sogo me, Daniel te moni nogi yai genuai bidi mu pedelama, bidai dao.
DAN 7:1 Te hasia mu wabo kibu bede te Belsasar te king Babilonde bidali, ena Daniel eno te na ebo tiwai nai te hulide suali. Tama eno te na yali po te buku me delide asęani. Na te tiwai dao.
DAN 7:2 Wali te tigidali badu asiyu, tama te genuai tamu ąį dini hodolali.
DAN 7:3 Tama gasagi gasagi yai moni hasa te kibu tiwai dabe me si me si te tamu ąį bikside pedelai.
DAN 7:4 Hasia pedelali te laion yowi tiwai, tama te genuai ba kemodagego bogo tiwai elaluali. Eno tonono ebadi, tama eno suali, augwaligo aga bogo sela sąnama, tama augwaligo aga te bidi yaligia sągą sigo dodolobo suali. Tama augwa te bidigo homu kolesaga tiwai agaba mawai.
DAN 7:5 Tialima, eno suali, te si wali te kibu tiwai hasa te aga pilamubo suali, tama te genuai hasa me deli te nogi augwa te bea wali. Agai te gasa hasa me deligo punali dili sela te aga pedauwalide habilaluali. Tama te po me deli agade pedalu, te tiwai po wali, “Iya, tegoba, holaluao, te mi hauwa tulama, nago tabi pągąyao,” wai.
DAN 7:6 Eno me tonono ebadi, tama eno gasa genuai hasa te uni pusi te nogi lepat tiwai suali. Te naigo bogo te me si me si aga tudide elaluali, tama aga tobolu te me si me si elaluali. Tama augwaligo agabolo te tigidali nai tonaluabo bomo mawai, te eno suali.
DAN 7:7 Eno te sogo hulide ma tonono ela bilibadi, tama eno te me si me si wali te hasa suali. Iya, aga gesabidi te mu dwai elama, tama aga bomo genuai mu elaluai, tama ena agade wi dwai mu yalio. Agai genuai ain kele elalu, tama agai te tigidali bage tulama, dolobo sę mu yai. Tama nosali aga agalama, tama mimia sabo kakali tulaluali. Te kibu tiwai moni hasa te gasa eno suali hasa dabe tobage tiwai meni, magi baso meni, aga tobolude te nogo si gąų elaluali.
DAN 7:8 Eno te gąų dabede homu kone paluyu ebadi, gedu dolo mu ponama, te nogo si gąųba tonalubadi, tama eno te dwasianu gąų me deli te augwali tomode pedalubo suali. Te gesi pedelali gąųgo te polasa elaluali gąų sela guda sąwai. Tama te gesi gąų te komgo te bidi gedu ge dali, pedauwali dali, si elaluai. Tama aga hagoma eyu, te aga digi aga nogi ugwaba sabo po wabo eno odalio.
DAN 7:9 Tama nade eno suali, augwaligo te king duayabo sia sai meba sela aselama, muagasai. Tama te Polobadu Polobadu Bidada Aselama, te Megi Me Bidada Peyu, Bidada Pabo Bidi aselama, te duabo sia kingde dugayagasobo suali. Agai gudali ugwa dabe te nala nisi poai mu yai, tama agai tobolu nisi te tedela mu, te meda meni yai kibu sipsip nisi tiwai yai. Tama te dugabo sia king te wil dabe elaluali, tama te dugabo sia sai tigidali badu te isi bogoli genuai elama,
DAN 7:10 tama besela palalio. Te bidi sese umabo mu, te hauwa tausen we bidigo te Bidigo sę yali, tama te umabo hauwa milion we bidi aga pąde dolaluali. Tama mebago te buku dabe dagalama, te po tų kot hodolainu yai.
DAN 7:11 Eno tonono ebadi, tama eno odali, te me si me si wali te dwasianu kom gąų hasago te aga digi aga nogi ugwaba sabo sę yali. Tama eno suali, augwaligo te me si me si wali hasa elama, tama aga tigi te siaba sąwani, tama siago te aga gąų kom dali tigidali dela silalio.
DAN 7:12 Tama te bidali hasa sela, augwa bomo te augwaligo silama, tama te nai dabe te augwaligo tonalumainu ma sula tagalobeo. Tiali goli, te augwaligo te augwali polo me elisąwai. Augwaligo te augwali dwasianu sogo gogolama, bidimainu sula tagalalio.
DAN 7:13 Eno te hulide yali nade, eno te bidi me deli te da tǫde bidi tiwai tobage suali. Aga te dagalu pǫ dabe tomode bidiyu, tama ena pąba asali. Tama augwaligo aga te Polobadu Polobadu Bidada Aselama, te Megi Me Bidada Peyu, Bidada Pabo Bidiba sela palio.
DAN 7:14 Te Polobadu Polobadu Mu Bidali Bidigo digi aga te king pedalumainu elama, tama agaba te bomo me genuai nogi mawai. Tama aga te sesemane sogo bidada pabo te bomo elalua pabo king bidiyu, tama aga king sę ebo te munu me sia sogobeo. Tama te tigidali bulu tǫ kantri we bidi me, tigidali hani bidi me, tigidali haniani po wabo hani bulu bidi, te aga dologode naga bidaibao.
DAN 7:15 Eno te nai dabe te nade sulama, tama ena midigi mu selama, tama homu hauwa dogia palio.
DAN 7:16 Tialima, ena te sia king pąde dolalubo bidi dabe me deliba pelama, tama eno agaba hanalu, te na yali po page pusao wali. Tama agai enabolo te tama po wai,
DAN 7:17 “Te genuai hasa me si me si tego dąį ilali, te bomai bulu tǫ kantri pedai me si me si pedelaibao,” po wali.
DAN 7:18 “Tiali goli, nosali te Ugwadu Mu Bidibo Godigo we bidi augwali te king dabe tiwai pedelama, tama augwali te sesemane sogo bidada peyu, bidibo tiwai gilama yaibao,” te sia king pąde dolalubo bidigo enabolo te po wai.
DAN 7:19 Eno te po odobo si da, tama eno te me si me si wali hasa te kuna mu ma koneabo homu yali. Aga te gasa hasa dabede te tedali gasagi yai ebaso, tama ena agade wi dwai mu yali. Agai ain kele genuai elalu, tama te aga sągąde dani dabe te bras tiwai elaluai. Tama agai te nai hauwa aluama, tama tuyu, tama te tigidali kakali agalama, te tudulaluali.
DAN 7:20 Tama me eno te nogo si kom gąų te tobolude elaluali, te kuna mu ma koneabo homu yai, tama te dwasianu nosali pedelali kom te gąųgo te polasa elaluali gąų sela guda sąwani. Te kom gąųgo te gedu me pedauwali elalu, tama genuai po dagą mu weyu, tama aga digi aga nogi ugwaba sali. Eno te dwasianu kom gąų suali sogo, tama ena wi dwai mu yai. Eno te kom gąųde wi ebo tiwai yaligia te gasa kom gąų dabede me tebeo.
DAN 7:21 Tama te na yalide, eno suali, te kom gąųgo te Godigo we bidi dabe dali hwįnama, tama augwali dolobo sę ebo sualio.
DAN 7:22 Tama te Polobadu Polobadu Digi Bidali Bidi pedelama, tama te kom gąų dali kot po tų elama, te tama po wali, komgo te dwai sę genuai te Ugwadu Mu Bidibo Godigo we bidide yali dao. Tama te Godigo we bidi te king tiwai pedalabo sogo te usu niyu te pedalubao wali.
DAN 7:23 Eno te bidiba eno te koneainu yali nai dabede po hanaluama, tama agai enabolo te tama tiwai po wali, “Te na yali po page te e tiwai dao. Te me si me si wali hasa, te e tiwai, te me si me si wali tǫ kantri pedai tama elalueibao, tama aga te gasa tigidali bulu tǫ kantride te gasagi yai tedali me elalueibao. Agai te tigidali gasa bulu tǫ kantri aiyaba elaluama, tama augwali agalama, tama augwali silimainu yaibao.
DAN 7:24 Te kom nogo si te nogo si king augwali te bulu tǫ kantride digi pedelaibao. Nosali te gasa king pedaliyu, tama aga te polasa pedelali king dabego kolesaga tiwai egobeo, te tedali gasagi yai yaibao. Agai te king sela sela sąwaibao.
DAN 7:25 Tama agai te Ugwadu Mu Bidibo Godiba po dwai mu olama, tama aga we bidi dabe aiyaba elalueibao. Tama agai te lotu pode bomai po hasegeliyu, te genuai side wabo te hasegelaibao. Tama agai te Godigo we bidi tonaludubadi, te kibu be sela olama, te kibu be me badu pedaiba usu nigi paibao,” wai.
DAN 7:26 “Aga te sogo bodolu silibaso, tama Godigo te po tų kot hodolama, tama agai te kingo bomo silama, tama aga mu dolaibao,” wali.
DAN 7:27 “Tama te Ugwade Mu Bidibo Godigo te tigidali tǫde kingo genuai nogi me bomo te aga we bidi dabeba mawaibao. Tama augwali te sesemane sogo king bidada peyu, bidada paibao. Tama tigidali bulu tǫ kantri we bidi dabe te Godigo we bidi dologode bidiyu, tama augwaligo po wali paibao,” walio.
DAN 7:28 Te eno nade suali po tigidali te tama dao. Ena Daniel, ena wi dwai mu elama, tama eno gesabidi te hasegelama, tedela yali. Tama eno te nai dabede homu kone palobo homu mu yalio.
DAN 8:1 Te sela kibu be wabode te Belsasar king bidali side, eno te gasa nai te nade subo ąǫ yalio.
DAN 8:2 Te nade polo tama ena pelama, te bulu tǫ pedai provins Elamba sabolama, tama ena te genuai taun Susa tomode dolaluali. Te taun te masigigo nigai genuai boma pai obo elaluali. Ena te moni ąį gamia nogi Ulai pąde dolaluai.
DAN 8:3 Ena tonalubadi, te omai sipsip me deli te wę pąde dolalubo suali. Agai te gąų si elaluali. Te podolali kom gąų te bobobage yai elaluali, tiali goli te si wali kom gąų te polasa pedelali kom gąų nosali badu pedelai, tama te bobobage mu dao.
DAN 8:4 Eno suali, te omai sipsipgo tobolu gąų aiyaba basi gulama, tama udulama peyu, te agai gąų komgo hudula palu ela palio. Aga te giliga degasa dulubo badu pali, tama te not badu me, saut badu me palio. Te niwai hasa me deligo aga paliabo usu me isąwai, tama te me deli agade wi painu ebo usu meni yai. Aga te sę dabe te aga homugo digi eyu, tama te boma pai mu pedelali.
DAN 8:5 Eno te yali sę pagede homu kone pidubadi, tama eno suali, te omai meme me deli te giliga dega sabo badu bidali tagalama, polo asobo suai. Aga udabo te umaboba pai mu asiyu, tama agai nogo sągągo te tǫ me dįąbe. Agai kom gąų te moni dobo dwai me deli naga te aga gedu page si badu tomode elaluai.
DAN 8:6 Eno te wę pąde dolalubo suali sipsip te memego subo si da, teda te meme sębę eyu, te bomonama udabo bomo mu elama, te sipsip bidibo madi palio.
DAN 8:7 Tama agai te sipsip dali hwįbo eno suali. Te memego wado mu dwai eyu, tama nogo sągą dili bomo dede pelama, tama dolo udayu, tama te omai sipsipba hudula paligi pali, tama agai gąų kom si togwa sąwani. Te omai sipsipgo aga degelabo bomo meni yani, tama te memego aga te tǫba aiya daboasa sąnama, tama aga dolagila mu agaga pali. Tama te magi nai me deligo te sipsip tau sabo usu me ebeo.
DAN 8:8 Tialima, nosali te memego hagoma umabo mu eyu, tama aga bomo ola mawai. Tiali goli, te aga bomo genuai mu pedalubo sogo, agai gąų kom te togwa palio. Tama te togwa pali kom elaluali pesagede te gasa kom me si me si pedelali. Te me si me si kom te moni dobo dwai mu yali. Te kom me deligo te not badu tonalubo tiwai yali, tama gasa mego te saut badu tonalubo tiwai yali, tama gasa mego te giliga pedalubo madiba tonalu, tama gasa mego te giliga dega sabo badu tonalu yalio.
DAN 8:9 Tama gesi kom dwasianu te ni honu pedalubo tiwai eyu, te me si me si elaluali kom tomodu pedelali. Te gesi komgo bomo te genuai pedelai. Tama agai te saut badu, me giliga pedalubo badu, me te Godigo aga we bidiba te wiegi yai mani tǫde bidali we bidi dabe augwali aiyaba elalualio.
DAN 8:10 Te kom te boma pai mu pedelama, tama te hǫ dabe dali hwįani. Te hǫ dabego hwįani te dagalude ami bidi dabego hwįbo tiwai yali. Tama komgo te hǫ dabe meba te tǫba aiya tula palama, tama augwali agayalio.
DAN 8:11 Tama te komgo te dagalu ami king me aiyaba elalueinu usu sali. Agai te kingba ofa ebo kolesaga te silimainu elama, tama agai te we bidigo te kingba lotu wabo be dolalio.
DAN 8:12 Te we bidi dabego dwai kolesaga ebaso, tama te komgo te dagalude ami bidi dabe aiyaba elaluabo bomo selama, tama te tigidali side ofa ebo kolesaga silainogo yali. Te Godigo po da, te mu po naga wali, tiali goli, te komgo te po begela dolali, te we bidi dabego wali pomainu me idali weyu tama tialio. Tama me, tigidali sę te komgo yainu homu yali, te agai eyu naga yali.
DAN 8:13 Tama eno odali, te ensel mobo bidi me deligo po wabo odali, tama gasa ensel bidigo te tiwai po agaba hanalu wali, “Megi dago te subo dwai nai dabe, nisu sogo augwali siligowe? Nisu sogo mu te we bidi dabego te Godiba ofa ebo ma gagalama eyu, tama nisu sogo te tigidali nai mu dolobo dwai kolesaga silaibawe? Nisu sogo te komgo bomo silama, tama agai munu ma te lotu wabo be me, te dagalude ami bidi dabe te agai sągągo agalu, te ma dologobewe?”
DAN 8:14 Tama te po miani enselgo, agai te tama po ena dali wali, “Te dwai sę ebo nai te elaludubadi, te umabo sogo, te 2,300, te sogoba usu naibao,” wali. “Te tama bidibo side dabe te augwaligo ofa dabe te augwa polobadu yali tiwai te kigamu me pio me egobeo. Te side tama silama da, teda augwaligo te Godigo be ma dodolama, tama te ofa dabe ma yaibao,” po wali.
DAN 8:15 Ena te Daniel, eno te yali naba tonaluabo homu idubadi, tama eno te na page gegabo homu bomo yali. Tama polo tama te eno bidi me deli te ena pąde dolalubo suali.
DAN 8:16 Tama eno te bidi me deligo i wabo te ąį gamia Ulai tomode i weyu, te tama po wabo eno odali, “Ensel Gebriel, nago te Danielgo suali sę po page pusao,” wali.
DAN 8:17 Tialima, Gebriel te ena pąba dolagasali, tama ena agade wi dwai mu elama, tama ena degasa dulama, tama eno gesabidi te tǫba aiya pogulai. Tama Gebrielgo enabolo te tama tiwai po wali, “Nage olo bidi tama da,” wali, “tiali goli, eno homugo nago te na page konemainu ebao. Te nade yali sę te tigidali dagalu dali, tǫ dali si silabo sogo pąde te pedalubo sę po te elaluali dao,” po wai.
DAN 8:18 Agai po odubadi yaide, ena gedu gęǫ page elama, tama ena tǫba mu degasa dulali. Tiali goli, agai ena nogo tola selama, te ena ugwaba sagolama, tama ena dolugulai.
DAN 8:19 Tama agai te po wai, “Eno nagebolo te Godigo haliga sębę yali silainu ebo sogo te pedelabo sę dabede po wainu ebao,” wali, “te Godigo dagalu de tǫde muani nai dabe silainu ebo bodolu muani sogo pąde te tama tiaibao. Te tiali sę dabe nago te nade suali sę tiwai mu pedelaibao,” wali.
DAN 8:20 “Nago te omai sipsip me deligo te gąų kom si elalubo suali. Te bulu tǫ kantri si, Midia me Persia sigo king bidi side po wai dao.
DAN 8:21 Tama nago te meme suali, te bulu tǫ kantri Grikde dąį iliyu wali, tama te aga gedu page si badu tomode elaluali te moni bage kom dolaluali, te Grik dabego hasia polalubo king bidi te da, wali.
DAN 8:22 Nago te moni bage kom togwa pabo suali, tama aga te pesagede gasa gesi kom me si me si pedelali. Te page e tiwai dao. Te kantri Grik te peda pelama, te gesi kantri me si me si pedelaibao. Tiali goli, te kantri bulu peda pisąbadi, te bomo elaluali, te tiwai gilama nosali me elalugobeo,” wali.
DAN 8:23 “Te bulu tǫ kantri dabe te tulaluainu ebo sogo, te augwali we bidigo dwai sęgę sabo sę mu pedalubaso, teda te sogo naga, te king me deli pedelaibao. Aga te bidi dwai mu dao. Aga te hagoma ebo bidi, tama tibo po wabo bidi dao.
DAN 8:24 Aga te bomai pedaliyu, tama te nai hauwa dolaibao wali, tiali goli te aga bomo digi egobeo. Tama agai homugo yainu ebo sę, te mu eyu naga yaibao. Agai te bomai bidi dabe doliyu, tama te Godigo we bidi dabe dolaibao.
DAN 8:25 Agai te we bidi dabe tibo po ola mabo sę ebo tomoba mu pabo bidi pedelama, tama aga te tibo po homu hauwa dogia pabo kolesaga tigidali te ugwanu mu igulaibao. Tama aga haligade digi, aga te polalubo bidi mu da homu yaibao. Te we bidi dabego homude augwali te bugagia bidiba homu yaibao, tiali goli te polo tama mu te aga homu hogodalu, te augwali hauwa dolaibao. Aga te hagoma eyu, te tigidali king aiyaba elaluali, te genuai King God dali hwįabo homu yaibao. Tama te sogo te mena bidi mego te aga me dologobeo, tiali goli te aga dolaibao.
DAN 8:26 Eno te pio ma kigamu ebo sę elalubo te na yali po page pusali. Te suali nai dabe te pedelaibao. Tiali goli, nago te na yali po gasa we bidi dabeba me pusugio, magi baso meni, te sę dabe te polo tama me pedalugobeo,” te genuai ensel bidi Gebrielgo enabolo te po wai.
DAN 8:27 Eno te po oda selama, tama ena haliga sęgę mu yali, tama meba sogode ena gasi tiwai yali. Gasi silama da, te ena hogodama, tama ena te king Belsasargo mani sęba ma palio. Tama te nade eno homu hauwa ebo sę yali, tiali goli eno te na page kuna koneabo usu meni yanio.
DAN 9:1 Darius, te Serksisgo ogwa, aga te bulu tǫ kantri Midia bidi dao, tama aga te kantri Babilonde king pedelali.
DAN 9:2 Te hasia kibu bede aga te king bidali, ena Daniel, eno te Godigo buku dabe nededuali. Tama eno te Genuai Bidigo te profet Jeremaiaba mani pode homu kone palali. Agai te po weyu, te Jerusalem dolama elalubadi, te kibu be bidi sese sela olama, te nogo si, te 70 yiaba usu naibao walio.
DAN 9:3 Tialima, eno gedu haluasa po te God Genuai Bidiba wabo gagalali. Eno haliga hobede mu yali, tama eno nai munu me tusiąma, tama eno te homu dene ebo ugwa bea selama, tama sia keli eno tigide muani. Ena te tiwai bidiyu, tama eno gedu haluasa po bomonama te Genuai Bidiba wali.
DAN 9:4 Tama eno te Israel we bidi dabego sęgę te Godiba pusali, eno Genuai Bidi da. Eno te tama po wali, “God, Genuai Bidi, nage polalubao, tama dago nago nogi ugwaba sobao. Sesemane sogo nago te naga da dali dąų walali po wali pai. Tama eyu, sesemane sogo te nage godolo elama, tama nago po wali pabo we bidi dabe te nago augwali godolo mu ebo dao,” wali.
DAN 9:5 “Da te dwai we bidi mu dao. Dago te sęgę sabo sę eyu, dwai sę nageba yai. Dago nago po sela sąyu, tama dago te nago dabolo yao wali te wiegi yai doloba pai kolesaga me isiąwai.
DAN 9:6 Dago te nago sę bidi dabego po odisąwai, te augwali profet dabe. Augwaligo te nago po te king dabeba me, tobolu bidi dabeba me, te bulali wąį dabe me, te da tigidali we bidi dabeba te po pusali.
DAN 9:7 Genuai Bidi, naga duba deligo naga te doloba pai kolesaga ebo God da, tiali goli te dena dwai kolesagago te hale genuai da tigidali Israelba sela asali. Tagala, da Judia tǫde bidibadi, ma Jerusalemde bidibadio, ma tigidali buluba te nago da tagala paliyu ela bilibo da, te dago nago po me sela sąbaso, nago da tagala palai dao. Tama megi te dwai halego da mesegelai dao.”
DAN 9:8 “Genuai Bidi, te dago king dabego me, tobolu bidi dabe me, dago wąį nǫų dabego dwai kolesaga elama, tama nageba dwai sęgę yai sę dabe nagebolo yai dao.
DAN 9:9 Dago nago po sela sąwani, tiali goli nage te olo mu tau mabo wiegi yai kolesaga elalubo God, tama nago dago dwai sę yali sęgę sela sąbo dao.
DAN 9:10 God, Genuai Bidi, dago nago po odisąma, tama dago te nago homugo dago wali pomainu homu yali kolesaga te wali pisąwai, te nago dabolo te profet dabego pedauwalide wali po tiwai gilama, te nago sę bidi dabe dao.
DAN 9:11 Te bomai po dabe te Moses te nago sę bidigo dabolo mayu, nago bomai po te tiwai wali, dago te bomai po bugagia wali pisąbaso da, te nago dwai sę daba yaibao po wali. Tiali goli, da tigidali Israelgo nago te bomai po togoyu bolama, tama dago nago po odisąbo homu yalio. Dago dwai sę nageba ebaso, tama nago te wali po gilama te dabolo dwai dene mabo sę yai dao.
DAN 9:12 Nago te sę yaibao wali gilama tama te sę nago te dabolo me, dago tobolu bidi dabeba me yali. Nago te Jerusalemba te dwai sę mu elama, tama mu dolali. Te gasa taun me deli te Jerusalem taun dolali tiwai munu me ebeo.
DAN 9:13 Nago te Mosesgo bomai po tomode wali po gilama dago te sęgę tigidali sali. Tiali goli, megi me dago te sęgę sabo kolesaga me tagalisiąma, tama dago nageba hanalu, te dabolo bugai haliga yabo po me hanalusiąwai, tama dago nago mu po wali me pisąwai.
DAN 9:14 God, dago Genuai Bidi, nago te dago yali dwai sę wei ponainu sisi elama tonaluali. Tama megi da, te sę nago yalio, magi baso meni, nage te doloba pai kolesaga naga ebo God dao. Tiali goli, dago te nago po me odobeo.”
DAN 9:15 “God, te dago Genuai Bidi, te nago bomo te dabolo ola mayu, te da te bulu Isip kantride kalabus sę yali sogo, te nago da sela asali. Tama megi me, te gasa bulu tǫ kantri we bidi dabego nago te yali bomai sęde homu kone palama, tama augwaligo nageba genuai nogi mawai. Mu tama, dago dwai sę elama, tama dago dwai kolesaga hauwa yai dao.
DAN 9:16 Tama nago dago dwai sę, me dwai kolesaga dabe te dago wąį nǫų dabego me ebo sulama, tama nago dabolo dwai dene sabo menama, tama te taun Jerusalem dolali. Tama te Jerusalem pąde elaluali bulu tǫ kantri we bidi tigidali, augwaligo te Jerusalemba me, te nago we bidi dabolo me, posobo po weyu, gisugu mabo po wali. Tiali goli, megi te dago homugo te nago wado po te Jerusalemba munu ma wagi homu yali, magi baso meni, te nago taun da, tama te naga bulu dude digi ugwadu elalubao. Te polobadu nago da tau sabo wiegi yai sę hauwa yali, tama dago homugo nago te tiwai ma emainu homu ebo dao.
DAN 9:17 God, te eno gedu haluasa po me hanalubo po odao. Eno homugo te naga genuai nogide homu kone palama, tama te augwaligo dolali be te nago ma dodolabo homu yao.
DAN 9:18 God, te dago gela wabo odama, tama da suao. Te dade elalubo sęgę, me te naga taunde elalubo sęgę, suao. Da te doloba pai we bidigo tama dago nageba hanalubeo. Menio. Dago koneani, nage te homu dene eyu, olo tau sabo wiegi yai kolesaga elalubo God, tama tiyu dago nageba hanalu obao.
DAN 9:19 Genuai Bidi, dago gedu haluasa po wabo odama, tama dago sęgę sela sąyao. Genuai Bidi, dago wabo po polo odama, te da tau sao. Te taun Jerusalem dali, te we bidi dabe dali, te naga dao. Tama tiyu, te nago me tonalugio. Te naga genuai nogide homu kone palama, te da polo tau sao,” eno te tama gedu haluasa po wai.
DAN 9:20 Ena Daniel, eno gedu haluasa po odubadi, tama ena sęgę, me eno we bidi dabego sęgę, te hania pusubo sę yali, te Israel dabe dao. Tama eno Godiba hanalu wali, ena Genuai Bidi, te aga be te bulu dude ma sę emainu yali.
DAN 9:21 Eno gedu haluasa po odubadi, tama te ensel Gebriel, eno te hasia yali nade suali, te aga bola dulu, te ena bidibo pesageba asali. Tama te sogo, te dago polobadu iduali te pio ofa ebo sogo dao.
DAN 9:22 Agai eno homu ula tega sawainu, tama agai te tama po wali, “Daniel, ena te nage homu ula tegelainu asalio, te nago wiegi yai homu kolesaga hauwa elalueibao.
DAN 9:23 Daniel, Godigo nage godolo mu ebao. Tama nago gedu haluasa po wabo gagalubo sogo, agai te po me deli pusali, te eno nageba magasu asali. Megi te nago olo bugagia munaluao, tama eno nago te nedali po page pusaibao,” ensel bidi Gebrielgo te po wai.
DAN 9:24 “Godigo dąį ilali te 70 taims 7 kibu be dabe silibo si, te agai nago we bidi dabe dali, me Jerusalem te wiegi yai ma ilabo po wali, tama aga taun dao. Agai te tigidali we bidigo sęgę sela sąnama, tama augwa yali dwai kolesaga tigidali siminaibao. Tama agai te sesemane bidada pabo sogo pedalumainu ilaibao. Tama aga te Gasagi Yai Tedali Mu pesage me deli nigilaibao. Godigo te sę dabe te nade wali sę me, te profet dabego wali po me, te usu nagasu, te tama yai dao.
DAN 9:25 Nago odama, te tiwai koneao, te Jerusalem taun ma gagalama nigaibao wabo po pedalubo sogo, te 7 taims 7-pela yia, te tama kibu be siliyu bolo yaibao, tialima te Godigo Sa Muani Genuai Bidi, aga te sabolaibao. Te augwaligo te Jerusalem dali, te taun tomode sunumi dabe, me te taun bagulali genuai masigi obo dabe, te ma nigaibao. Tama te Jerusalem elalubadi te 62 taims 7-pela yia, teba usu naibao, tiali goli te kibu be dabede te sęgę elalubo sogo dao.
DAN 9:26 Te 62 taims 7-pela yia wali, te silibo si da, teda augwaligo te Godigo Sa Munama Nigilali Genuai Bidi ela mubaso, tama aga nai deli me elalugobeo. Tama te bomai king me deligo genuai ami hani aselama, tama Jerusalem me Godigo be dali dolaibao. Te hwįnama dolobo sę me te genuai wę asiyu, te pobele bage daseasa soabo tiwai yaibao. Tama te genuai boi hwįbo te elalua pidubadi, te tigidali nai sia sabo sogoba usu nama, tama tigidali nai te Godigo wali po gilama te dolaibao.
DAN 9:27 Te kingo te dąų wabo bomai po te hauwa we bidi dali eyu, te agai po augwaligo wali pomainu yaibao. Tama te dąų wali po kontrak te elalua pidubadi, te kibu be a naga olama, me si teba usu naibao. Tama nosali te sela kibu be, me te kibu be pedai me badu siminigi pabo si da, teda agai te we bidi dabego te Godiba ebo tobage ofa tigidali te paliaibao. Tama te king bidi agai te dwai nai mu me deli te Godigo be pedu daide ugwadu munama, tama te doado bage me nai dabe dolabo dwai nai tede munaluyu, te Godigo te king dolabo sogo bodoluba usu nagasaibao,” ensel Gebrielgo te po wai dao.
DAN 10:1 Te sela wabo kibu bede te Sairus te Persia king bidali side, Godigo po me deli te Danielba mawai, agai gasa nogi te Beltesasar dao. Tama te genuai dwai sogo mu pedelaibao wali, te mu po dao. Te po te na ebo tiwai agaba pedelali, tama agai te na suali sogo, agai te po page koneai.
DAN 10:2 Te sela wabo kibu bede Sairus te king bidali side, ena Daniel, eno te haliga sęgę dwai mu elama, tama eno te gela naga wabo sę idu, te Sarere selaba usu nani.
DAN 10:3 Te Sarere selade, eno te wiegi yai nai me tusiąyu, ma te wiegi yai nai hasa me deli te me tubeo. Eno te wain wę tusiąma, tama eno tobolu nisi dwasianu me dodolobeo.
DAN 10:4 Tialima, te namba wan polua te deli polua te dei 24de, te kibu be, ena te genuai wę Taigris sesegede dolaluai.
DAN 10:5 Eno te ugwaba tonobadi, tama eno te bidi me deli te nami ugwa wiegi yai beali bidi suali, tama augwaligo te wiegi yai golgo nigali kukulu muai.
DAN 10:6 Aga tigi te ula mu yali, te wiegi yai sawi yai masigi me deli te ula mu yai tiwai. Aga gesabidi te dagalude elalubo be sele ula tiwai eyu, tama agai gedu te sole ula tiwai yali. Agai nogo me sągą te ula mu yali, te augwaligo te brasgo nigali nai bugagia penai ula ebo tiwai yai. Tama eno odali, agai wabo po te genuai mu, te genuai we bidi hani dabego po wabo tiwai yalio.
DAN 10:7 Ena deligo naga eno te nai te nade subo tiwai yai. Te ena dali bidali bidi dabe augwaligo te magi nai deli me subeo, tiali goli augwali wi dwai mu elama, tama augwali wi pelama, duala sigi pai.
DAN 10:8 Tama ena duba deli naga bidiyu, tama eno te nai suali te gasagi yai sę tedali mu yai. Eno te nai te nade subo tiwai elama, tama eno bomo tigidali te sia selama, te eno gesabi te mu gasa me hasegelai.
DAN 10:9 Tialima, eno te bidigo po wabo odali, tama eno agai dogonide po wabo odobo sogo, eno gedu gęǫ page elama, tama ena te tǫba degasa dulama, te ena isai bidi tiwai elama, tama ena gesabi tǫba ponama, pila muai.
DAN 10:10 Tama eno odobadi, te bidi me deligo nogogo ena nogo tulama, te ena ugwaba hodolali, tama eno nogo me sągą si te tǫde poąluyu, dolaluali. Tiali goli, ena wi edubadi, tama ena didibili idualio.
DAN 10:11 Tialima, te bidigo enabolo te tama po wali, “Daniel, Godigo nage godolo mu ebao,” wali. “Nage hodaluama, te eno nageba wainu ebo poba te nago olo bugagia muao. Godigo digi ena tagala palobaso, tama ena nageba asali,” te po wai. Agai po ola simanobo si, tama ena dolugulali, tiali goli ena didibili me idualio.
DAN 10:12 Tama agai po ma weyu, te tama po wai, “Daniel, nage wi igio. Te nago gagalu, te naga digi naga aiyaba elaluama, te Godigo nageba yabo sę koneainu tiali sogo, Godigo nago te gedu haluasa po wabo odama, tama ena tagala palai dao.
DAN 10:13 Ena polo asainu homu yai, tiali goli te bulu tǫ kantri Persia tonalubo dwai enselgo te ena geąlubadi, te dei tolaluai. Agai te tama tiali, tama te polalubo ensel me deli, Maikel, te ena tau sagasu asainu yali, magi baso meni, agai te enaduba deli naga te bulu tǫ kantri Persia king dabe dali bidibo suali, tama ena tau sabo bidi me meni yai.
DAN 10:14 Ena nageba te po wagasiyu asali, te nago we bidiba te tigidali nai sibi sia sabo sogo te pąde te sę pedelaiba po wagasalio. Nago suali, meba nai te sogo pedelali, tiali goli megi eno nageba te gasa sę nosali pedelabo po ola magasali,” agai te po wai.
DAN 10:15 Agai te po wabo sogo, eno te tǫba tonono elama, tama eno pedauwali pania sai dao.
DAN 10:16 Tialima, te bidi te da tǫde bidi tiwai da, agai te aga nogo te eno pedauwaliba muai. Tama eno pedauwali dagayu, tama eno agaba te tiwai po wali, “Genuai bidi, eno te na sulama, tama ena wi dwai mu elama, tama eno bomo tigidali silalio.
DAN 10:17 Tama tiyu, eno magi po nageba waibawe? Ena te sę bidi me deli te genuai bidigo gedude dolalubo tiwai ebao. Eno bomo meni baso, tama eno po wabo mobo meni yai,” eno te po wai.
DAN 10:18 Tialima, te bidigo ena ma tola selama, te ena bomo pedelali.
DAN 10:19 Tama agai enabolo te tiwai po wai, “Godigo nage godolo mu ebaso, tama nago haliga nagame igulama bidao, tama nage wi me igio. Nage bomo elama, dolaluao,” wali. Agai po ola siminama, tama eno bomo genuaiba mu eyu, te agabolo te po wali, “Genuai bidi, megi nago enaba te nai dabede po wao, magi baso meni, nago ena bomo ilali dao.”
DAN 10:20 Tama agai te po wali, “Nago koneani, magi baso ena nageba asaliwe? Ena asali, eno te Mu Po Wabo Bukude Asęani Po meba pusagasu ula tegelagasalio. Tiali goli, eno sesabi elama me bidigobeo. Te ena polo ma pelama, tama te bulu tǫ kantri Persia tonalubo dwai ensel dali hwįgi paibao. Tama te hwįbo silibo si da, te bulu tǫ kantri Grik tonalubo dwai ensel sabolaibao. Te de me deligo ena tau me sabe, Maikel, te dage Israel dabe tonalubo ensel, te agai deligo naga ena tau sabo dao,” te po wai.
DAN 11:1 “Magi baso meni, te hasia kibu bede mu Darius, te bulu tǫ kantri Midia bidi, te aga te Babilon king bidali side, eno te Maikel tau sali.” Te bidi tiwai bidi te po enabolo tama wali.
DAN 11:2 Tialima, te bidigo po ma weyu, agai enaba te tiwai po wali, “Daniel, odao. Eno te nageba po wainu ebo sę dabe, te mu tama pedelaibao. Te king sela me ma pedelama, tama te bulu tǫ kantri Persia tonalueibao. Tama nosali te king me deli ma pedelaibao. Te me si me si wabo kingo te mone me doado bage hauwa elalueibao, te Persiade bidibo gasa king dabe aiyaba elalueibao. Tama agai bomo te genuai pedalubo sogo, agai doado bage hauwa elalueibao, agai te tigidali Grikba haliga dwai yabo sę ilama, tama te augwaligo agaba hwįabo homu ilaibao.
DAN 11:3 Nosali te gasa bomai king me deli pedelama, te agai te bulu tǫ kantri hauwa, me te we bidi hauwa tonalueibao. Tama mena sę agai homugo yainu homu yali sę, te sę agai eyu naga yaibao,” wai.
DAN 11:4 “Tiali goli, aga bomo te genuai pedalubo sogo da, teda agai tonaluali bulu tǫ kantri te peda pelama, tama te kantri bulu tǫ me si me si pedelaibao, tama aga wai te ogwa dabego digi te bulu tǫ kantri me tonalubo sę egobeo. Menio. Te gasa bidi dabego augwali tonalueibao,” wali, “tiali goli, augwaligo bomo te bomai kingo bomo tiwai si me elalusiąwaibao,” wali.
DAN 11:5 “Te sogo te saut badu bidali te bulu tǫ kantri king, te Isip tǫ da, te bomo elalueibao. Tiali goli agai polaluali ami ofisa bidi me deli te gasa bulu tǫ kantri te not badu king pedelaibao. Tama agai bomo te genuai mu elama, tama te Isip kingo bomo aiyaba elalueibao. Tama te ofisago tonalubo bulu tǫ kantri te genuai mu pedalugulaibao.
DAN 11:6 Te kibu be mebade nosali te Isip kingo te agai wegi te bulu tǫ kantri not badu bidibo kingo somainu mawaibao, te kantri te Siria dao. Te tama tiali, te bulu tǫ kantri si te bugagia bidainu yaibao. Tiali goli, te wego bomo te sesabi sogo elama bidibeo, tama aga bidigo bomo me te silaibao. Te augwaligo te we ela muyu, te aga dali pali hani me eleyu, tama aga aya me, aga bidi me elaibao.
DAN 11:7 Nosali dwasianu bidama gana, te we aga dali deli kaneme bidi me deli te Isip bulu tǫ kantri king pedelaibao. Tama te king pelama, te Siria tǫ kingo ami bidi dabe dali hwįgi pelama, tama te taun bomai obo banis elalubo tomoba pelama, tama te Siria dabe dali hwįnama, te augwali aiyaba elalueibao.
DAN 11:8 Agai te augwaligo tibo god dabego piksa dali, te tibo god augwa wiegi yai doado bage dabe dali, tigidali saibao, te augwaligo gol me silvago nigali. Tama agai te tigidali nai doado bage te Isipba sela paibao. Te hwįsąbadi kibu be meba bidaibao,
DAN 11:9 tama nosali te Siria king te Isipba pelama, te Isip dabe dali hwįaibao. Tama aga bulu tǫ kantriba ma geasa paibao,” agai te po wai.
DAN 11:10 Tama po ma weyu, agai te po wai, “Te Siria kingo ogwa dabego te ami hauwa umabo selama, te sisinagaselama, te augwaligo hwįabo sisi yaibao. Tama polo tama te kingo ogwa dabe me deligo te ami dabe selama, te augwali asesa polo pelama, te bulu hauwa aiyaba elalu, te wę genuai asobo tiwai yaibao. Tama augwaligo te bomai obo banis elalubo taunba hwįgi paibao, te Isip kingo tonalubo bulu tǫba pelama, hwįgi paibao.
DAN 11:11 Tialima, te Isip kingo te wado ebo homu sębę genuai mu elalu, te aga pelama, te Siria kingba hwįgi pelama, tama agai te genuai ami aiyaba elaluama, tama augwali kalabus yaibao,” wali.
DAN 11:12 “Agai te hwįanide te aga wiegi yai homu pemene yaibao. Agai te ami bidi hauwa umabo mu elaibao, tiali goli agai te yali bomo tiwai te sesabi elama gana me elalugobeo,” wali.
DAN 11:13 “Siria kingo te genuai ami hani mu sisinaibao, te polobadu hwįgi pali ami dabego namba te aiyaba elalueibao. Tama nosali kibu be mebade, agai te genuai bomai ami selama, te augwaligo te Isip king dali hwįgi paibao. Tama augwa te hwįgi pabo sogo, te augwa te nai hauwa dali sela paibao.
DAN 11:14 Te sogo te bidi hauwa te Isip king dali boi bidi yaibao. Tama te Daniel, nago hanide te hwįbo bidi mebago te nai me deligo po te nade wabo po tiwai odaibao. Tama augwaligo te Isip dabeba hwįyu, te nade wali po te mu pedalumainu yaibao. Tiali goli, augwali te hwįbo side menia saibao.
DAN 11:15 Tama te Siria tǫ king te aga ami dabe dali aselama, te bomai taun me deli bagulama, te augwaligo hwįnama, te taun saibao. Tama te Isip ami dabego te munu me ma hwįgobeo. Te augwa wiegi yai bomai ami dabego me te bomo meni yaibao.
DAN 11:16 Tama te Siria tǫ kingo te magi sę yainu, te aga homugo digi ebaso, te mena bidigo aga me paligobeo. Agai te Godigo aga we bidi dabeba te wiegi yai mani tǫ saibao, tama agai te nai dabe dolobo sę yaibao,” wali.
DAN 11:17 “Nosali te Siria kingo aga ami dabe tigidali umabo mu selama, te Isip bulu tǫ kantriba hwįgi pabo homu yaibao. Agai te wiegi yai sę meba yabo homu elama, tama agai te tama tiaibao. Tama me, agai te aga wegi te Isip kingba tagala palama, somainu yaibao. Agai te tama tebo sunumide te Isip kantri bulu tǫ aiyaba elaluabo usu yaibao homu yaibao. Tiali goli, agai te tama homu yali te geda mueibao, tama te nai me deli agai me sogobeo.
DAN 11:18 Tama nosali agai te tamu ąį sesegede elalubo bulu tǫ kantri dabeba hwįgi pelama, te agai hauwa bulu tǫ kantri aiyaba elalueibao,” wali. “Tiali goli, te gasa bulu tǫ kantri ofisa me deligo te aga hagoma kolesaga silimainu yaibao, tama te hagoma kolesagago aga digi aga mu dolaibao.
DAN 11:19 Tama te Siria king te aga bulu tǫ kantriba ma geasa pelama, tama te bomai obo banis elalubo taunde bidaibao. Tiali goli, aga te tulalu dolama, tama te bidi dabego aga munu ma me sugobeo.
DAN 11:20 Tialima, te gasa kingo agai bidali pesage selama, tama agai te takis mone sabo bidi me deli tagala palaibao, te takis mone somainogo. Magi baso meni, agai homugo te agai te king bidi bididubadi, agai te wiegi yai doado bage elalueibao homu yaibao. Tiali goli, te king te Pęwadage sogo naga tama bidama, tama te aga isaibao. Agai te hwįbode me isigobeo, tama me te mena bidigo te wado po aga dali olama, te aga me ela mugobeo. Tama te bidi dabego te magi pagede mu aga isali, te page me konegobeo,” wali.
DAN 11:21 Tama te bidi te da tǫde bidi tiwaigo te enaba po ma wali, Danielba, te tama po wali, “Nosali te gasa Siria king pedelaibao, tama aga te dwai bidi mu yaibao. Te bidi aga te king pedelabo bidi tiwai ąǫ isąwaibao, tiali goli polo tama te aga pedelama, tama te haniani homu bega sabo po me tibo po weyu yaibao, tama aga digi te Siria king bidimainu ilaibao,” wai.
DAN 11:22 “Te genuai ami hanigo hwįagasali te tagalao, agai te augwali aiyaba elaluama, tama augwali mu silaibao. Tama me, agai te Godigo we bidigo hetpris aiyaba elalueibao.
DAN 11:23 Te agai bulu tǫ kantri te dwasianu yali, tiali goli agai te bulu tǫ kantri bidi meba dali te tibo po dąų walama, te agai homugo te augwali dali bugagia bidabo homu yainu ebo tiwai yaibao. Tiali goli, te agai augwaligo hwįabo homu meni yai elalubadi, te agai polo tama augwali dali hwįaibao. Tama tebo kolesagade te aga bomai king pedelaibao. Te agai augwali dali te hwįani bulu tǫ kantri dabe, te mone doado bage me hauwa elalubo bulu tǫ kantri dali hwįaibao. Tama agai te hwįnama sali wiegi yai nai dabe te aga abagi solo dabeba dobawaibao. Te aga wąį nǫų dabego te tobage kolesaga polobadu isąwai. Agai te boi hwįabo homu elama, tama te bomai obo banis elalubo taun sainu tiaibao, tama meba saibao. Tiali goli, agai te tobage kolesaga te pęwadage sogo naga yaibao.”
DAN 11:25 “Te kingo te Isip kingde wi me egobeo. Tama tiyu, agai te genuai ami me deli sisinama, te Isip dabe dali hwįaibao. Tama te Isip kingo te genuai bomai ami selama, tama augwaligo me te Siria king dali hwįabo sisi elaluali. Tiali goli, Isip kingo ugwaba ela me hologobeo, magi baso meni, te bidi mebago aga geanabo po minama, tama aga tibo po mu ola mawaibao.
DAN 11:26 Te aga ofisa dabego digi te aga dolaibao. Tama te Siria dabego agai ami dabe mu dolama, tama te bidi sese hauwa tausen ami ela mueibao.
DAN 11:27 Tama nosali te king augwa si te deliba dugulama, nai tueibao. Tiali goli, te augwa si homu te dwai elalu, te augwa si po dogia pabo po te pedauwalidu weyu, te augwali siba digi tibo po waibao. Tama augwali sigo te yainu homu yali sę te me egobeo. Magi baso meni, te Godigo te sę emainu sa muani sogo bodolu te pedalisąbadi digi ebao.
DAN 11:28 Tama te Siria kingo te agai hwįyu sali doado bage tigidali selama, tama te aga bulu tǫ kantriba ma paibao. Agai te Godigo lotu po wabo we bidi augwali dolabo homu bomo yaibao. Tama agai yabo homu yali sę tigidali te agai eyu naga yaibao, tama nosali aga te aga bulu tǫ kantriba ma paibao,” te po wai dao.
DAN 11:29 “Te Godigo sa muani sogo, te Siria king te Isipba pelama, te Isip dabe dali ma hwįgi paibao, tiali goli agai te polobadu augwali aiyaba elaluali tiwai gilama me egobeo.
DAN 11:30 Tama te giliga degasa dulubo badu bidi dabe te Isipba gebadu aselama, tama aga dali hwįbaso, tama aga wi yaibao. Tama agai te wado po dwai mu olama, ma begasa peyu, tama agai te Godiba lotu wabo we bidi dabe dolaibao. Agai te God tudiba mubo bidi dabe dali dwagi yai sę yaibao.
DAN 11:31 Te agai ami bidi mebago te Godigo be te God gedude meda ilaibao. Tama te Israel dabego te Godiba tigidali sogo ofa ebo te habu selaibao, tama augwaligo te dwai nai mu te Godigo be tomode dodolai elalueibao,” te po wai.
DAN 11:32 “Tama kingo te God tudiba mubo bidi dabe bega sabo po olama, tama te augwaligo aga wali paibao. Tiali goli, te God dologoba mu pelama bidali we bidi da, teda augwali te bomonama dolalu, te king bidigo po wali pogobeo.
DAN 11:33 Te Israel dabe augwa polalubo bidi dabego te koneani kolesaga wiegi yai elaluai, tama augwaligo tau siyu, te we bidi hauwa dodolu, tama augwaliba te wiegi yai homu kolesaga mawaibao. Tiali goli, te boi bidi dabego te polalubo bidi dabe meba te bainatgo elama, te meba siaba ulama, isaibao. Tama augwaligo te polalubo bidi dabego doado bage meba wi selama, tama te polalubo bidi meba kalabus yaibao. Tiali goli, augwaligo te tebo kolesaga te bobobage sogo sesabi gana elama me egobeo.
DAN 11:34 Te boi bidi dabego te Israel polalubo bidi dabe elebo sogo, te bidi mebago te polalubo bidi dabe tau saibao. Tiali goli, te augwali hauwago te augwade digi tau sabo homu elalu, te polalubo bidi dabe tau sabo sę yaibao.
DAN 11:35 Te boi bidi dabego te polalubo bidi meba dolaibao,” wali, “tiali goli, augwaligo te sęgęgo te gasa polalubo bidi meba dąų waliyu, te doloba pai kolesaga emainu yali, tama te augwali God gedude magi meda isąwai mu pedelaibao. Te tobage kolesaga te me siligobeo. Te tama elalua pidubadi, te Godigo te tigidali nai sia sabo bodolu muani siba usu naibao,” wali.
DAN 11:36 “Te kingo te mena sę dabe te aga homugo digi yaibao. Aga te hagoma eyu, te aga digi aga nogi ugwaba siyu, e tama po waibao, ‘Eno te tigidali god elalualio,’ te po waibao. Tama agai te tobage posobo po dabe te Ugwadu Bidibo Godigo nogi aiyaba elalu, tama waibao. Agai te tama tobage kolesaga ela pidubadi, te Godigo haliga sębę yaliba usu naibao, magi baso meni, Godigo agai te yaibao homu yali sę tigidali ebo dao.
DAN 11:37 Te kingo te aga wąį nǫų dabego tibo god te wei elama, godolo me eyu egobeo, tama te tibo god te we dabego wei elama godolo ebo god dabe me, te godolo meni yaibao. Tama agai te tigidali god tudiba muaibao, magi baso meni, aga homugo te aga polalu, te augwali aiyaba elaluali homu yaibao.
DAN 11:38 Te agai te genuai nogi te tibo god me deliba naga mayu, te bomai obo banis elalubo hanu tonalubo god da homu yaibao. Te kingo wąį nǫų dabego polobadu te godiba lotu me wasiąwai. Tiali goli, te kingo te silva, me gol, me te sawi yai masigi, tama te gasa wiegi yai nai dabe te godiba te ofa tiwai elama, mawaibao.
DAN 11:39 Tama agai te bomai obo banis elalubo taun sigi painu hwįgi pabo sogo, agai te gasa tedali hanigo godiba hanalu, te aga tau somainu yaibao. Tama aga te bidi dabe augwaligo king bidimainu godolo ebo bidi dabeba te genuai nogi mawaibao. Tama agai augwali te polalubo bidi dabe pedalumainu elama, te tǫ dage augwaliba mawaibao, te agai augwalide te aga tau sali wei ponobo tiwai yaibao,” wali.
DAN 11:40 “Te tigidali dagalude me tǫde nai sia sabo sogo da, teda te saut tǫ badu te Isip kingo te Siria bulu tǫ te not badu bidali king dali hwį yagasaibao. Te polo tama te Siria tǫ kingo te hwįbo nai karis dabe, me hos, me te hwįbo sip dabe selama, tama asesa polo pelama, te Isip king dali te bomo elama, hwįgi painu yaibao. Agai te bulu tǫ kantri hauwa te ąį genuai asobo tiwai elama, aiyaba elalueibao.
DAN 11:41 Te ami dabe te Godigo aga we bidiba mawainu yali wiegi yai tǫba sabolaibao, tama augwaligo te genuai hani we bidi ela mueibao. Tiali goli, te amigo te bulu tǫ kantri Idom, me Moap, me te genuai bulu tǫ kantri Amon, te badu me sogobeo.
DAN 11:42 Te kingo te bulu tǫ kantri hauwa aiyaba elalu, me te Isip tǫ kantri bugagia sula tagalu elalumainu me egobeo. Menio.
DAN 11:43 Agai te gol, me silva, me te gasa wiegi yai doado bage dabe te Isip dabego genuai monego abelibo nai dabe saibao. Tama te bulu tǫ kantri Libia me Itiopia sigo te aga tau saibao.
DAN 11:44 Tiali goli, nosali te bidi dabego agaba te giliga pedalubo badu, me te not badu te nai dabe agaba pedelabo po obaso, tama te pogo aga wi ilaibao. Tama aga haliga dwai mu elama, te hwįbo bomo mu igi pelama, tama te we bidi hani hauwa mu silaibao,” walio.
DAN 11:45 “Tama agai te aga genuai ugwa be sę yaibao, te genuai tamu ąį Mediterenian edaba togoliyu, te Godigo polalubo bulu du ugwaba togoliyu elama, tomode agai te genuai wiegi yai name ugwa be dabe sę yaibao. Tiali goli, te aga dolama, tama te mena bidi me deligo aga tau me sogobeo,” te bidi te da tǫde bidi tiwaigo te po wai.
DAN 12:1 Tama te bidi te da tǫde bidi tiwai, agai te Danielba te tama po ma wali, “Te sogo te polalubo ensel Maikel te pedelaibao, te dage Israel dabe tonalubo ensel dao. Te sogo te genuai sęgę mu pedelaibao. Polobadu te tobage sęgę tiwai te bulu tǫ kantri me delide pedalubeo. Te sęgę pedalubo sogo, teda te Godigo dage te Israel we bidi tigidali dobola ma saibao, augwali nogi te agai bukude elalualio, tama te augwali bugagia bidaibao.
DAN 12:2 Tama Godigo te genuai hani isali we bidi ma hodolaibao. Meba augwaligo te sesemane sogo bidada peyu, bidada pabo wiegi yai ula saibao. Tiali goli, mebago te hale genuai mu elaluyu, tama augwali te sesemane sogo bidada peyu, bidada paibao.
DAN 12:3 Te wiegi yai kolesaga koneai elaluai bidi dabe, te augwalide ula ebo te dagalu ula mu te hulide ebo tiwai yaibao. Augwaligo te we bidi hauwa te doloba pai kolesaga wali pomainu dodolali, tama augwa ula te sesemane elalu, te hǫ ula tiwai yaibao.
DAN 12:4 Tialima, megi da, Daniel, nago te po dabe elalubo buku te haluao. Tama nago dąį tede muao, te bidi dabego te buku habu seliyu, tama tiao. Te buku te halualudubadi, te tigidali dagalude me tǫde nai silibo si te pąba usu naibao. Tama we bidi hauwago te po page koneainu, iba soyu, eda soyu eyu, sę dene mu yaibao. Tiali goli, te augwali usu me egobeo,” te bidigo te po wali.
DAN 12:5 Nosali ena, Daniel, eno te gasa bidi si te wę sanede dolalubo suali. Me deli te ena dolalubo badu dolaluai, tama me deli te wę u badu dolalualio.
DAN 12:6 Te dolaluali bidi si te bidi me deligo te wiegi yai nami ugwa belama, te wę tomo daide ugwadu dolaluali bidibolo te po walio. Agai te tiwai po wai, “Nisu sogo mu te gasa tobage noma sabo sę dabe pedelama, te mu siligowe?”
DAN 12:7 Tialima, te wiegi yai nami ugwa beali bidigo, agai te aga nogo si dali te dagaluba nogo tų elalu, tama agai te tama po wali, “Te Sesemane Sogo Bidibo Godigo nogide, eno mu po obao, te gasagi yai pedelali te tobage nai dabe te elalua pidu, te kibu be sela olama, me kibu be pedaiba usu naibao. Tama te Godigo we bidigo bomo te mu sia sigi pabo sogo, te augwali mu dolobaso da, teda te sę dabe me te sia saibao,” wali.
DAN 12:8 Eno agai te po wabo odali, tiali goli eno kuna mu bugagia konebeo. Tama eno agaba te tama po hanalu wali, “Tiali goli, genuai bidio, te sę dabe te magi elama silaibawe?”
DAN 12:9 Tiali goli, agai po wei ponoyu, te tiwai po wali, “Daniel, nage pao. Magi baso meni, te buku te halualio, te ma dagabo te habu selali, magi baso meni, te po page te geme dualaludubadi, te dagalu me tǫ silibo sogoba usu naibao,” wali.
DAN 12:10 “Te sęgę dabe pedelali te hauwa we bidi dąų waliyu, te doloba pai kolesaga emainu yai, tama augwa te magi meda meni yai wiegi yai mu te God geduba pedalumainu yaibao. Tama te wiegi yai homu kolesaga koneai elaluali we bidi, te augwaligo naga te sę dabe page koneaibao. Tiali goli, te dwai we bidi dabego te sę page koneainu ebaso, usu me egobeo, tama te augwaligo dwai kolesaga hauwa mu ebo sę yaibao,” wali.
DAN 12:11 “Te boi bidi dabego te Israel dabeba te Godibolo tigidali sogo ofa ebo kolesaga tagala weyu, tama augwa te doado bage me nai dabe dolabo dwai nai mu te Godigo be tomode dodolobo side gagalama, tama te 1,290 bodolu sogo wali te siligi pomainao,” walio.
DAN 12:12 “Tama te we bidi bomo elalu bidibaso, tama te God tonalu, te 1,335 bodolu sogode usu nama te siligi pabo side, augwa wiegi yai homu pemene emainao.
DAN 12:13 Tama Daniel, megi nage te bomo elama dolalu, te dagalu me tǫ silibo siba usu nao. Te nage isaibao, tiali goli nosali te nage ma hodaluama, tama te tigidali nai siligi pabo side, te Godigo nageba sa muani nai dabe saibao,” te wiegi yai name ugwa beali bidigo te po wali.
HOS 1:1 Te Usia, me Jotam, me Ahas, me Hesekia, te bage deli deli augwali te Juda dabego king dabe bida bida pali sogo, God Genuai Bidigo agai po Hoseabolo mawai. Hosea da te Berigo ogwa dao. Tama Jeroboam, te Jehoasgo ogwa, te Israel king bidai dao. Te bidi dabe king pedelama bididubadi, tama Genuai Bidigo Hoseabolo te po maduai.
HOS 1:2 Hasia sogo Genuai Bidigo te Israel dabeba maiabo po te Hoseago pedauwaliba muani, agai Hoseabolo te tiwai po wai, “Eno we bidi dabe augwaligo ena homugo wei me ebeo, tama augwaligo te tibo godiba lotu wagi pobao, te bidigo sai wego penani igi pabo tiwai ebao. Te usu siyu, nago te we me deli sigi pao, tama nosali te wego penani yaibao. Tama agai wai dabego me te aga ebo kolesaga tiwaiba peyu, te penani sę yaibao,” wali.
HOS 1:3 Tialima, Hoseago te we Gomer sali, te Diplaimgo wegi. Nosali Gomer haliga elama, te ogwa me deli ame nai.
HOS 1:4 Tama Genuai Bidigo te po wali, “Nago aga nogi ‘Jesril’ poao,” wali, “magi baso meni, te Israel king bidigo wąį nǫų Jehugo te king bidi si polobadu ela muai, te Jesril bulude. Tama te ogwa nogi Jesril poabogo eno te megi bidibo Israel kingba dąį ilibo sę tiwai ebao, te eno agaba dwai dene tamadi tama mawaibao, te Jehugo yali dwai sę wei ponoyu tiaibao, te aga wąį nǫų dao. Tama eno te Jehugo hani king pedalumainu me egobeo.
HOS 1:5 Tama te sogo eno te Israel hanigo amigo bomo dolaibao, te Jesril odogo bulude tiaibao,” te po wai.
HOS 1:6 Nosali Gomer te haliga ma elama, te wegi ame nai. Tama Genuai Bidigo Hoseabolo te tiwai po wai, “Aga nogi e tiwai nogi yao, ‘Eno Aga Godolo Ebo Menio’. Magi baso meni, eno te Israel dabe godolo homu me egobeo, tama eno augwaligo sęgę me sela sągobeo.
HOS 1:7 Tiali goli, eno te Juda we bidi dabe godolo ebao. Tama ena God, te augwa Genuai Bidi, te eno augwali tau saibao. Tiali goli, eno te hwįbode te bainatgo me enesigi sesemonego te augwali tau selama, me hwįgobeo. Tama eno te ami dabe me hos dabe dali tagala palama, te Juda we bidi tau sagasomainu me egobeo. Menio. Eno gasa sunumi me elalubao,” wali.
HOS 1:8 Nosali te Eno Aga Godolo Ebo Menio wali wegi agai te ame tubo tagalubo side, teda te Gomer te haliga ma elama, tama gasa ogwa ame nani.
HOS 1:9 Tama Genuai Bidigo Hoseabolo te tiwai po wai, “Nago aga nogi e tama poao,” wali, “‘Eno Menio’. Magi baso meni, dage Israel dabe eno we bidi menio. Tama ena dagego God bidigobeo,” wali.
HOS 1:10 Te Genuai Bidigo po ma weyu, te po wai, “Te Israel dabe te nabisde masigi sani tiwai hauwa umabo ma pedelaibao, tama te augwaligo augwali te nedainu ebaso, usu egobeo. Megi da, te ena Godigo augwaliba te tiwai po wali, ‘Dage te eno hani we bidi menio,’ wali. Tiali goli, me sogo deli sogo, te eno augwaliba te po waibao, ‘Ena te sesemane bidibo ula elalubo God dao, tama dage eno wai dabe da,’ waibao.
HOS 1:11 Tama te hani Juda me Israel hani si te ma gesabidi deliba elama, tama te bulu tǫ kantri dedeli naga pedelaibao. Tama augwa polalubo bidi deli naga te nigilaibao, tama augwali te bomai kantri pedelama, tama augwaligo ebo sę tigidali te wiegi yai naga pedelaibao. Augwali te Godigo nigali wiegi yai gi tiwai pedelaibao. Mu tama, Godigo te sę ebo sogo, te genuai side mu yaibao,” wali.
HOS 2:1 “Megi dagego duga deli kaneme hani Israel dabe nogi eyu, e tama tiwai waiąo, ‘Dage te Godigo We Bidi Dao, tama Godigo Dage Godolo Mu Yai Dao,’ te po wao,” Genuai Bidigo Hoseabolo te po wai.
HOS 2:2 Godigo te tiwai po begelama, te aga we bidiba wali, “Eno wai dabeo, dagego ida te eno we da homu me elalugobeo, tama ena te agai bidi ma elalubeo. Tiali goli, dagego aga dali konila po weyu, agaba bomonama hanalu, te penani ebo kolesaga tagalao po wao.
HOS 2:3 Te agai tagalisąbaso da, teda eno aga gudali ugwa tigidali peda sąnama, tama aga tigi olo gagolama, te aga ame nani sogo tiwai tigi olo bidiyu, tama aga hale dwai mu yaibao. Tama eno aga te tǫ wa pai pedalubo tiwai elama, te ni meni ebo tiwai ilaibao, tama te tuabo wę me meni yaibao, tama tebo kolesagago te eno aga dolaibao.
HOS 2:4 Te eno agai wai dabe homu dene me egobeo, magi baso meni, augwali te hale meni isąwai penani we me deligo wai dabe dao.
HOS 2:5 Te wego te tama po wali, ‘Te eno wei eyu, godolo homu ebo bidi dabe wali paibao,’ wai. ‘Augwaligo ena te nai me wę mayu, te gudabo ugwa dabe me mayu yali, tama te oliv wel me wain mayu ebo dao,’ te po wai.
HOS 2:6 Tama te homu ebaso, te eno ni sesane dabe selama, te we bidibo pesage bagulama elalueibao. Te eno aga soabo sunumide obogo togwa palama, tama aga te bidi dabeba ma pobaso, te usu me egobeo.
HOS 2:7 Te agai godolo homu ebo bidi dabeba painogo pali goli, tiali goli aga te augwaliba me pedalugobeo. Te agai augwali gegegi paibao, tiali goli, agai augwali me sugobeo. Tama tibaso, agai te po waibao, ‘Polobadu ena eno bidi dali bugagia bidalio, tiali goli, megi menio. Tama tibaso, te ena bidi muba dolo ma paibao,’ te po waibao.”
HOS 2:8 “Agai te tiwai kone sabo homu isąwai, eno digi eno aga tigidali nai mawai, wain me wel mani, tama te hauwa silva me gol mawai. Tama agai te silva me gol te naigo te tibo god Balba lotu wabo sę yai.
HOS 2:9 Tama tibaso, te gide nai inilama sabo side, eno te nai dabe me wain agabolo mani nai te eno ma saibao. Tama aga tigi bolo olo elalu idali weyu, eno te gudubo ugwa dabe polobadu mani. Eno agabolo te mani gudubo wiegi yai ugwa dabe me ma saibao,” wali.
HOS 2:10 “Tama eno agai gudali ugwa dabe te agai godolo homu ebo bidi dabego gedude pepeda sąwaibao, te aga tigi bolu olo bidaibao. Tama te bidi me deligo aga eno nogode me dobola sogobeo.
HOS 2:11 Te eno agai te wiegi yai homu pemene ebo te genuai side wabo te tigidali mu silimainu yaibao. Te genuai side da wabo te tiwai, te lotu wabo genuai side te deli deli kibu bede pedalu, te deli deli poluade pedalu yai, tama te Sabat side lotu wabo me, te gasa tobage lotu dabe me, te tama tiwai yai.
HOS 2:12 Te eno te wain ni dabe, me te ni fik kaya ni dabe te bidi dabego aga wei elama, aga mani, te aga mone mabo tiwai yai, te nai dabe eno mu dolaibao. Tama te uni hasa dabego te wain gi dolagaselama, tama te ni kaya fik gi me dolama, te olo bus tiwai pedelaibao,” wali.
HOS 2:13 “Agai ena hauwa sogo homu kone gegeda palali, tama te tibo god Balba te wiegi yai denami ebo ofa iligi palio, tama agai te wiegi yai au dobage munama, te aga godolo ebo bidi wali bilali. Tama tibaso, eno te dwai dene agaba mawaibao. Ena Genuai Bidi, eno te tama po wai dao,” wali.
HOS 2:14 Genuai Bidigo te po begelama wabo pode te tiwai po wali, “Tialima, eno te wiegi yai po te we Israel dali olama, tama aga te masigi kemi pesageba ma kekasa paibao. Tama eno aga homu bega sabo po weyu, agabolo te tiwai po waibao, ‘Eno nage godolo mu ebao,’ waibao.
HOS 2:15 Te eno te wain gi dabe agaba ma menama, tama eno augwaligo te odogo nogi yali pesage Te Dwai Sęgę nogi poali pesage te hasegelaibao, tama te wiegi yai nai pedalubo pesage pedelaibao,” wali. “Te pesagede agai te eno po wali peyu, te aga gesi wegi ogwa wede te Isip tǫ taga soyu asali sogo tiwai kolesaga yaibao.
HOS 2:16 Tama agai enaba te tama po waibao, ‘Nage eno bidi da,’ waibao. Tama agai homugo ena te tibo god Bal da, te homu munu me ma isąyu, tama enabolo te tobage po weyu, ‘Nage Bal, nage eno genuai bidi da,’ te homu me egobeo.
HOS 2:17 Te eno agai te nogi Bal ma omainu me egobeo. Mu menio.”
HOS 2:18 “Tama te sogo eno te dąų wabo bomai po kontrak te buside tigidali uni hasa, me hasamani dabe dali, me ba dabe dali te po dąų walaibao,” po wai. “Tama augwaligo te eno we bidi dabe me dologobeo. Tama eno te hwįbo doado bage tigidali sela sąwaibao, te bobobage bainat ge hwą, me enesigi ene sesemone, tama eno we bidi dabe te tǫde dua digi tegaluama bidiyu, te augwali wi munu me egobeo,” wali.
HOS 2:19 “Israel, te eno nage te eno we tiwai pedalumainu yaibao, tama te nage sesemane sogo bidada pomainu yaibao. Te eno doloba pai kolesaga nageba eyu, tama eno nage me tagalugobeo,” wai. “Tama eno nage sesemane sogo godolo mu eyu, tama nagebolo eno te olo wiegi yai homu kolesaga yaibao,” wali.
HOS 2:20 “Eno te ena dąų wali po wali peyu, tama nage te eno we tiwai sesemane bidaibao. Tama nago te tiwai koneyu, ena tama te naga Genuai Bidi da homu yaibao,” wali.
HOS 2:21 “Tama te sogo ena Genuai Bidi, te eno ena we bidi te Israel dabego gedu haluasa po wabo te eno odaibao. Tama eno te tulubage tǫba tulumainu elama, tama augwaligo te bulali nai tigidali, te wain me wel, te hauwa holomainu yaibao.
HOS 2:23 Tama eno te ena we bidi te tǫba munama, tama augwali te eno nigali wiegi yai gi tiwai pedelaibao. Polobadu eno ena we bidibolo te tama wali, ‘Eno Dage Godolo Me Ebeo,’ wai. Tiali goli, nosali te eno augwali godolo mu yaibao. Polobadu eno augwaliba te tiwai po wali, ‘Dage Eno Menio,’ wali. Tiali goli, nosali eno te tiwai po waibao, ‘Dage Te Ena We Bidi Mu Dao,’ waibao. Tama te augwaligo te tiwai po wei ponaibao, ‘Nage dago God mu dao,’ waibao.”
HOS 3:1 Genuai Bidigo enabolo te tama po ma wali, “Nago te naga we godolo ma yao, megi da agai te gasa bidi dali penani yali te palia salio. Nago aga godolo mu eyu, te eno ena we bidi Israel dabe, augwali godolo mu ebo tiwai gilama yao. Mu tama, te augwaligo ena tagalama, te tibo godiba pelama, tama augwaligo te olali wain wai dabe te tibo godiba ofa yainu sali. Tiali goli, tagalao, eno te Israel dabe godolo mu idubo dao,” wali.
HOS 3:2 Tialima, eno te we te 150 kinago, me te bali naigo pągąwai beg a naga olama, me deligo eno te we ma abelali.
HOS 3:3 Tialima, te eno agabolo wali, “Mu tama, nage te eno we dao, tiali goli, te megi tebode ena nage dali me pigobeo,” wali. “Hasia bolo te nage ena dali hauwa sogo elama bidao, tama te sogo nage te sunumide bilibo we tiwai me bidilamuo. Tama te eno nage naga tonalueibao,” eno te po wali.
HOS 3:4 Te tiwai naga te Israel dabe te hauwa sogo olo bidaibao. Tama te augwali tonalubo te polalubo bidi, me king bidi te meni yaibao. Te augwaligo te tibo godiba ofa me isąyu, te augwaligo masigi pos ni me dualisąma, lotu me wagobeo. Te augwaligo te haniani tibo god dabe tagalaibao, tama te piksa dabe augwa te nosali pedelabo sę konemainu ola mabo nai dabe, te tagala silaibao.
HOS 3:5 Te tiali sogo silibaso da, teda te Israel dabe te Godiba ma aselama, te Genuai Bidi deliba naga lotu waibao. Te augwaligo te king Devitgo wąį nǫų deli naga wali paibao. Tama augwa te Genuai Bidigo po dologoba naga pobaso, tama agai te haniani wiegi yai nai augwaliba mayu yaibao.
HOS 4:1 Genuai Bidigo te kantri tǫde bidibo we bidi dabeba po kisilama wali. Dage Israel, te Genuai Bidigo po odao. Agai te tama po wai, “Te bulu tǫ kantride bidibo we bidi dabego te mu po wabo kolesaga konesiąma, tama augwa abagi dabe digi te godolo homu me ebeo. Augwaligo te ena augwa Genuai Bidi da homu me isąwai.
HOS 4:2 Augwaligo te po dąų wali, tiali goli augwaligo wali me pisąwai. Augwaligo tibo po olama, tama bidi ela muyu, te nai doado bage wi siyu, tama penani eyu ebo dao, tama augwa te bidi ela mubo sę ela pabo dao. Tama te dwai kolesaga te genuai mu pedelama,
HOS 4:3 tama tibaso, te tǫ wa pai. Tama te tǫde elalubo nai tigidali, te hasa dabe, me ba dabe, me sųgų dabe, te tigidali isibo dao,” wali.
HOS 4:4 Genuai Bidigo po ma weyu, te tiwai po wai, “Te mena bidi me deligo te we bidi dabe po tų me iligobeo, magi baso meni, te dwai kolesaga page augwalide me elalubeo. Meni. Te dage prisde po elalubao, tama tiyu eno dage dali po elalubao,” wali.
HOS 4:5 “Tigidali sogo dagego sę yali, tiali goli dagego sę besela palama eyu, tama dagego geda mubo dao. Tama te profet dabego me tama naga tibo dao. Tama tibaso, eno te Israel dolaibao, te dagego ida tiwai dao.
HOS 4:6 Te we bidi dabego ena bugagia konesiąbaso, augwaligo ena wali me asobeo, tama teyu, te augwali dolaibao,” wai. “Dage pris dabego ena wali me asisąyu, tama dagego eno po sela sąwanio. Tama tiyu, te eno dage sela sąwaibao. Tama eno te dagego wai dabe me te eno pris pedalumainu me egobeo,” wai dao.
HOS 4:7 “Dage pris te hauwa mu pedelali, tama tiyu dagego dwai sę hauwa mu yali. Megi dage genuai nogi elalubo, tiali goli te eno dage aiyaba elaluama, tama dage dwai hale mu yaibao,” te po wai.
HOS 4:8 “Te eno we bidi dabego dwai sęgę selama, tama tede te hasa dabe ofa mayu, tama te ofa nai te dagego tubo nai tiwai ebao. Tama tiyu, dagego te tobage ofa nai hauwa somainu eyu, dagego te we bidigo dwai sę umabo emainao homu mu ebao,” wai dao.
HOS 4:9 “Tama tibaso, eno te we bidiba dwai dene mayu, te augwali dolaibao, tama dage pris dabe me te sabo dene tiwai saibao,” wali, “te eno dwai dene mabo sę dageba eyu, te dagego yali dwai kolesaga wei ponoyu tiaibao,” wai dao.
HOS 4:10 “Te dagego wiegi yai nai tueibao, tiali goli, te dage tabi elama pągągobeo. Te dagego tibo god dabeba lotu weyu, tama te wai hauwa ame naibao homu elama, te penani ebo kolesaga yaibao, tiali goli te dage wai meni yaibao. Magi baso meni, te dagego ena tudiba munama, tama dagego te tibo god naga wali pabo dao,” Godigo te po wai.
HOS 4:11 Genuai Bidigo te po wali, “Te haniani bomai wain ąįgo te eno we bidi dabego homu kolesaga ayana palama, dolobo dao.
HOS 4:12 Tama augwaligo te olo ni dagego nigali tibo god hanaluama, te geme dualali po page pedalumainu yali. Iya, tegoba, augwaligo homugo te ni dage dabego te augwaligo koneainu ebo nai dabe ola momainu homu elama tiali. Awe, augwaligo ena tagalalio, tama augwaligo te tibo god dabe wali pai, te penani ebo we me deligo aga bidi tagaliyu ebo tiwai yalio.
HOS 4:13 Augwali te bulu duba holama, te tibo god dabeba ofa eyu, tama te wiegi yai denami ebo ofa me, te habu selali pesage te genuai ni page dologode te ofa ebo dao, magi baso meni, te ni dologode te wiegi yai tiwąi madi elalubaso yai.” “Tama tiyu, duga wegi dabe te sunumide bilalubo we dabe tiwai ebao,” wai. “Tama duga wąį we dabe me te penani ela bilibo dao.
HOS 4:14 Tiali goli, te eno augwaligo ebo dwai kolesaga wei me ponogobeo,” wali. “Magi baso meni, dage bidi dabe duga digi me te tibo godigo lotu beba te penani ebo we dabeba pabo dao. Tama dage augwali dali deliba sisinama, tama te tibo godiba ofa ebo dao. Tama eno po dolo dageba te tiwai wali, ‘Dage te we bidi te wiegi yai homu kolesaga elalusiąbo we bidi, te dage dolaibao.’ Eno te po wali.”
HOS 4:15 “Dage Israel we bidi te penani we tiwai elama, tama dagego ena tagalalio. Tiali goli, tiyu dage te Juda we bidigo te tobage kolesaga tiwai igimio. Dage munu me te tibo lotu te Gilgalba ma te Betelba me wagi pelamuo. Dagego te tebo kolesagago te Betel te dwai pesage pedalubo tiwai ebao. Tama teyu, te eno be tiwai ąǫ me egobeo. Tama te bulu pesage side, dagego te po dąų walobo po te eno nogide me wagio, ‘Genuai Bidi te sesemane bidada pabo dao.’
HOS 4:16 Te Israel dabe augwali te hagoma ebo bulmakau dabe tiwai yai. Augwaligo homugo te eno augwali te sipsip tonalubo bidigo te aga sipsip dabe tonalubo tiwai yaibao homu yali. Tiali goli, augwali te hagoma mu eyu, te eno usu me egobeo.
HOS 4:17 Te tibo godigo te Israel dabe kegalio. Tagalao, te augwa homu wali pomainao.
HOS 4:18 Augwaligo te bidi dabego augwalide dwagi yai homu yao, te homu me ebeo. Menio. Augwaligo te hale ebo kolesaga naga godolo ebo dao. Tama tiyu, augwa te ąį hauwa tulama, tama gęǫ page yali, tama nosali augwa penani ela palio.
HOS 4:19 Tialima, odao. Te eno augwali te bomai waligo te pobele bage hogomu tolasa pelama sągi pabo tiwai eyu, tama augwali dolaibao. Tama augwa te tibo godiba ofa yali homu kone palama, tama te augwali hale dwai mu yaibao,” Genuai Bidigo te po wai.
HOS 5:1 “Dage pris dabe, dagego te po odiąo. Dage Israelgo, eno poba olo bugagia muiąo. Tama dage kingo hani, dagego odiąo. Dagego te doloba pai po tų odobo sę elalubao, tiali goli dagego tama me tibeo. Tama tiyu, duga digi te po tųba dodolobao. Dage prisgo tibo lotu te Mispade hodolama, tama te bulu du Taborde, me te Sitim taunde tiai. Tama te dagego te we bidi dabego homu kolesaga dolali. Tama tiyu, dage te hasa kę, me te hasa waba bulubo tǫ dedage tiwai elaluali. Tama eno dage dodolomainogo eyu, te dwai dene dage tigidaliba mawaibao,” walio.
HOS 5:3 “Eno te dage Israelgo dwai kolesaga koneai dao. Dage enade geme me duala sogobeo. Dage ena wali me asisąma, tama dage tigidali eno gedude meda yai pedelai, te penani ebo we tiwai yai dao,” wali.
HOS 5:4 “Te Israel dabego te tibo godiba lotu weyu yali, tama te kolesagago augwaligo homu kolesaga dąų walama, tama augwaligo te Genuai Bidi wali me pabo meni, te usu egobeo. Tama augwa te yali dwai kolesagago te augwali paniama, tama augwali te augwa Godiba ma asabo usu isąwai dao.
HOS 5:5 Te Israel dabe augwa hagoma kolesagago digi augwa ma po tų ilali. Te augwa dwai sę yali sęgęgo digi te augwa tulaluama, tama te Juda dabe me te augwali dali tulaluai dao.
HOS 5:6 Augwaligo sipsip me bulmakau te Genuai Bidiba ofa yainu sali, tiali goli augwaligo te ofa olodali yali. Magi baso meni, Genuai Bidigo augwali tagalali, tama tiyu augwaligo aga munu ma susiąbo ąǫ yai.
HOS 5:7 Augwaligo te Genuai Bidi tagalali, te wego aga bidi tagalama, te penani ela bilibo we tiwai yai. Tama augwa wai dabego te tama konebe, God te augwa aya mu da homu ebeo. Tialima, te dwasianu sogo gana, tama te boi bidi dabego augwali dolagasaibao, tama augwa tǫ dabe dali dolaibao,” wai.
HOS 5:8 “Dage Gibea, dage Rama, dage Betel, dage Benjamin, te bu wabo nai biugel bu waiąo. Bomonama i wao. Udada peyu, te boi hwiąo.
HOS 5:9 Te dwai sę wei ponobo side naga te Israel dabe mu dolaibao. Eno te po dage Israel haniba pusubao, mu tamao, te eno wali gilama te sę pedelaibao,” wali.
HOS 5:10 Genuai Bidigo te po wai, “Odiąo. Te Juda polalubo bidi dabego te Israel dabego tǫ me badu wi sai. Tama eno wado po dwai mu augwaliba wali. Tama eno augwali dolainu ebo te wę asiyu, te nai dabe dolobo tiwai yaibao,” wali.
HOS 5:11 “Te Juda dabego genuai sęgę te Israelba mawai. Te Israel dabe te gasa king meba bidiboba pali, tama augwaligo te augwali tau saibao homu yali. Tiali goli, te king dabe te olo bidi tiwai, tama augwali tau sabo usu meni yai.
HOS 5:12 Tama eno digi te Israel dabe me Juda dabe dolaibao, te dwai osogani me sumadigi dabego te nai dolobo tiwai yaibao,” wali.
HOS 5:13 “Te Israel dabe augwali te tiwai te gasi dwai mu ebo koneani, tama te Juda dabego augwa keni dabe ebo sulama, tialima te Asiria bulu tǫ kantri genuai kingba pelama, te augwali tau somainu hanalugi pali. Tiali goli, te Asiria dabego augwaligo gasi usu ilama, tama augwaligo keni pedela somainu ilabo usu me ebeo.
HOS 5:14 Megi da, ena te bomai laion tiwai pedalama, tama eno te Israel me Juda si dali hwįaibao,” wai. “Te ena digi eno augwali pepeda palama tagalaibao, tama augwali te tiwai bidimainu yaibao. Te eno augwali kekasa pelama, te bidi me deligo augwali tau siyu, eno nogode ma sainu ebo usu me egobeo,” wali.
HOS 5:15 “Te ena te ena buluba ma pelama, te ena we bidi tagaligi pelama da, tama te augwali te augwa yali dwai sęgęde te dene me sęgę sabo sogoba usu somainu yaibao. Tiali goli, nosali te augwali enaba ma asaibao. Te augwali dwai dene siyu bolo elama, te augwali enaba ma asaibao,” wai dao.
HOS 6:1 Te Israel we bidi dabe augwaligo te e tama po wai, “Iya, tegoba, da te Genuai Bidiba ma pinao. Agai da dolali, tiali goli, te agai da bugagia wiegi yai ma ilaibao. Agai da elama, te keni pedelali, tiali goli, te keni agai ma pedela somainu yaibao.
HOS 6:2 Nosali te si sogo, ma sela sogo bidama, tama te agai da hodolama, tama te aga dali bugagia bidaibao.
HOS 6:3 Dago te Genuai Bidi koneabo sę bomo inao. Dago koneani, tigidali sogo kigamu te giliga pedalubao. Tama dago koneani, te tigidali sogo tulubage tulubo, tulubage te tǫba tulubao. Tama te tiwai naga dago koneao, Genuai Bidi te aselama, te da wiegi yai bugagia ma ilaibao,” augwaligo te po wai.
HOS 6:4 Tialima, Genuai Bidigo te tiwai po wei ponani, “Dage Israel, me dage Juda, te eno mena sę dageba yagawe? Te dagego ena godolo homu ebadi, tiali goli dagego sesabi gana elama, te ena godolo homu ebeo. Menio. Te dagego godolo ebo homu te polo tama mu sia siyu yali, te kigamu dagalude te pǫ me hawa pedelama silibo tiwai ebao. Tama te hulide tulali tulubage segeni te nosade elaluali, te giliga nanu te polo wa pabo tiwai ebo dao.
HOS 6:5 Tama tibaso, te eno profet bidi dabe tagala palama, te dage po tų yabo po augwaligo dageba bomonama weyu, tama te dage dwai dene mu saibao. Dagego odalio, te mena sę eno dageba yabo te dagego koneai. Te hania mu elalubao. Tama te sę dabe e tama telalubao.
HOS 6:6 Dagego te hasa elama, tama enabolo olo mabo kolesaga, te tobage ofa sę ebo te eno godolo homu mu egobeo. Menio. Te dagego gasa we bidide homu dene eyu, tau sabo kolesaga ebo, te eno godolo mu ebo dao. Eno godolo ebo homu te dagego homu kolesaga te enaba sesemane momainu homu ebao, tama tiyu, te dagego ena bugagia konemainu homu ebo dao,” wali.
HOS 6:7 “Te we bidi dabe augwaligo te bulu Adam pesagede te wę Jordan nogelama, tama eno augwaliba te mani tǫba sabolali. Tama polo tama te eno augwali dali polobadu dąų walali po augwaligo togolama, bolai dao.
HOS 6:8 Te dwai sę ebo bidi dabe, me te gasa bidi dabe ela mubo bidi dabe, augwali te moni taun Gileatde pągąnalubao.
HOS 6:9 Te pris dabe te nai wi sabo bidi dabe tiwai elama, te sunumide geme dualaluyu, te bidi dabe dolama, te augwaligo doado bage wi sainu ebo dao. Tama te augwaligo te bidi dabe te Sekemba pabo sunumi tunu magede ela muyu yali, te lotu wagi pabo pesage dao. Augwali te bidi dwai dabe mu dao.
HOS 6:10 Eno te Israel dabego te dwai kolesaga mu me deli ebo suai. Te eno we bidi augwaligo te tibo godiba lotu weyu, tama augwali eno gedude dwai meda yai mu pedelalio.”
HOS 6:11 “Tama dage Juda me, te eno dagego yali sęde te dwai dene maiabo sogo bodolu muai dao,” Genuai Bidigo te po wai.
HOS 7:1 “Eno te Israel dabe usu ma ilama, te augwa sę tigidali te wiegi yai pedalumainu ebo sogo, tegoba, eno te augwaligo dwai kolesaga naga suali, tama te Samaria bage augwaligo yali dwai sę dabete pebeli dilide elalubo suali. Augwaligo te abagi dabe tibo po ola mayu, tama augwaligo te be aluama, te doado bage wi siyu yai. Tama augwaligo te bidi dabego doado bage te taun sunumide anoma eyu, kekelama siyu yai.
HOS 7:2 Eno augwaligo ebo kolesagade homu kone me gegeda palogobeo. Menio. Tiali goli, augwaligo te sę yali homu kone palisąwai. Te augwa ebo dwai sęgęgo te augwali mesegelali, tama sesemane sogo eno te sęgę naga sudu gebo dao.” Genuai Bidigo te po wai.
HOS 7:3 Genuai Bidigo te po wali, “Te meba we bidigo te haniani dwai kolesaga yabo po minama, tama augwaligo te king, me aga ofisa dabe dali homu bega sabo po weyu, tama augwali tibo po ola mabo dao.
HOS 7:4 Augwali te tibo po wabo bidi dabe, tama augwaligo haliga te kingba mu mubeo. Tama augwaligo haliga sębę ebo te geme dualama, te sia ula dwasianu idubo tiwai iduali. Te bret ulubo bidigo te sia ula ilama, te bret bo domainu elalueibao. Bret bo dabo si da, teda agai te sia ponama, tama te sia ula genuai yaibao. Augwaligo haliga sębę te tiwai elalubo dao.
HOS 7:5 Te kingo nai daa tubo side, augwaligo te king aga ofisa dabe dali te bomai wę hauwa tumainu yaibao. Tama king me, aga ofisa dabe dali, te gęǫ page elama, te tobolu kolesaga meni yaibao.
HOS 7:6 Te u bidi dabe augwa dwai sę yabo homu kolesaga te sia posolo ebo tiwai ebao. Te hulide augwaligo haliga sębę ebo te sia dwasianu dabo tiwai ebao, tama te hano naga pedalu dali. Tiali goli, te kigamu te bogoli ula genuai elama, ebo dao.”
HOS 7:7 “Augwaligo te wado po olama, te deli deli pedalubo king ela muyu iduali, te augwa tobolu bidi dabe dali te tama tiai. Te dwai kolesaga augwa bulu kantri tǫde elaluali, tama te bidi me deligo enaba gedu haluasa po weyu me ebeo,” Genuai Bidi Godigo te po wai.
HOS 7:8 Genuai Bidigo te po wai, “Te Israel dabe gasa hani dali kęą pelama, te augwa kolesaga wali pali. Te augwaligo kolesaga te usu ebo meni, te bret bugagia disąbo tiwai yai.
HOS 7:9 Te Israel dabe augwa te kolesagago te augwa digi bomo tamunani, tiali goli augwaligo te konesiąwai. Awe, augwali te monu dabe bomo meni yai tiwai yali, tiali goli augwaligo te me konebeo.
HOS 7:10 Te Israel dabe augwa hagoma ebo kolesagago digi augwa po tų ilali, tiali goli te augwa homu begelama, te augwa Genuai Bidi, God enaba ma asobeo. Mu tama, augwaligo ena kegasa asobeo.
HOS 7:11 Israel te kolesaga meni yai umunaluai ba hi subigila bola bilibo tiwai ebo dao,” wai. “Hasia bolo augwali pelama, te Isip dabego augwali tau sogowe weyu, hanalugi pali, tama nosali augwali pelama, te Asiria dabeba me hanalugi pai dao.
HOS 7:12 Tama augwali te bola pabo sogo, teda eno ba sabo wa te ugwaba sąwaibao, augwali tola somainu yaibao. Te augwaligo dwai sę emainu deliba sisinibo si, te eno augwaliba te augwa yali kolesagade dene ilaibao,” wali, “te augwaliba eno polobadu wali po gilama tiwai yaibao,” wai.
HOS 7:13 “Odiąo. Te augwali dolomainu yaibao. Augwaligo ena tagalama, te enaba hagoma yali. Tama tibaso, eno augwali dolaibao,” wali. “Hasia bolo eno augwali tau sainu yali, tiali goli augwaligo tibo kolesaga enaba yalio.
HOS 7:14 Augwaligo tibo gedu haluasa po enaba wabo dao. Tama augwali te tǫba degasa dulama, tama te dwai gela te Genuai Bidigo po odisąbo bidi haiden dabego wabo tiwai ebo dao. Te augwaligo nai me wain ąį sainu gedu haluasa po wabo sogo, te augwa digi augwa tigi dabe ge hwągo togobo, te haiden eno po wali pisąbo bidi dabego ebo tiwai ebo dao. Augwaligo ena dali hagoma mu ebo dao.
HOS 7:15 Mu tama, ena digi eno augwali tau sali, te augwali genuai elama te dili emainu ilali, tiali goli augwaligo te enaba dwai sę wei ponabo po mia salio.
HOS 7:16 Ena da te Ugwadu Mu Bidibo God mu dao. Te sęgę pedalubo sogo te augwali enaba aselama, te eno augwali tau somainu ebeo. Menio. Augwa te bomo meni yai nai dabeba naga pali. Augwali te dwai enego te nai enani geda mubo tiwai yali. Te augwa polalubo tobolu bidi dabego te augwa bomogo digi te boi bidi aiyaba elalueibao tiwai po wai. Tiali goli, te menio. Te hwįbo side augwali isibaso, te Isip dabego augwali dwai gisugu mawaibao,” Genuai Bidigo te po wai dao.
HOS 8:1 Genuai Bidigo enabolo te po wai, “Te boi hwįmainu biugel bu wao,” wali. “Te boi bidi dabe polo aselama, te eno tǫba hwįagasaibao, te ba kemodage polo te tǫba bola dulama, te hasa bolo ela sigulubo tiwai yaibao. Magi baso meni. Eno te ena we bidi dabe dali dąų walali po te augwaligo togolama, te bolama, tama augwaligo eno bomai po sela sąwani.
HOS 8:2 Augwaligo te po wabo dao, ‘Nage dago God da, da Israel dabe, tama dago nage koneai da,’ obao.
HOS 8:3 Tiali goli, menio. Augwaligo te wiegi yai doloba pai kolesaga tagalubaso, te boi bidi dabego augwali pobeasa bilaibao,” wai.
HOS 8:4 “Eno we bidi augwa digi augwa dolaluaibao homu eyu, augwa king bidi dali polaluabo tobolu bidi dali nigilibao, tibaso eno augwaliba usu da homu ebeo. Augwaligo te tibo god te augwa silva me golgo nigali. Tibaso, eno te we bidi augwali dolaibao,” wai.
HOS 8:5 “Eno te bulmakau gol te Samaria dabego nigali te lotu wabo eno hagela mu yai. Eno wado po dwai mu augwaliba wali. Eno homu augwa te dwai kolesaga polo tagalomainu yai. Tiali goli, te me tebeo.
HOS 8:6 Te Israel sę bidi me deligo te tibo god nigali. Te God meni, te olo piksa noma naga dao. Eno te bulmakau piksa noma alua sąnama, te pobele bage kakali pedelaibao,” wai.
HOS 8:7 “Augwaligo ebo dwai kolesaga te dwasianu naga dao, te dwasianu wali asobo tiwai naga dao, augwaligo te homu ebo dao. Tiali goli, nosali te kolesaga ebode augwali dolaibao, te pobegebo wali genuaigo te bidi dolobo tiwai yaibao. Tama augwali te wit gide te nai walisąbo tiwai eyu, tama te bret nigabo wit meni yani. Tialima, te dwai witgo nai me pedai badu waligi sogo da, tagalao, te gasa badu tǫ kantri bidi dabego naga tuagasigi da,” wai dao.
HOS 8:8 “Te Israel dabe te wiegi yai mu me isąwai. Te gasa tǫ kantri dabego augwali dalali tiwai elama, tama te Israel dabe te bage tiwai pedalali. Megi da, augwali te olo nai me deli tiwai elama, tama augwaligo te eno sę yainu ebaso, usu me egobeo.
HOS 8:9 Augwaligo hagoma te bulu uni yowigo ebo hagoma tiwai yali, tama augwa homu kolesaga wali pai. Te augwali pelama, te Asiria dabego augwali tau somainu hanalugi pai, tama augwaligo te mone tolama, te gasa tǫ kantri king homu begelama, augwali tau somainu yai.
HOS 8:10 Tialima, megi da, augwali te gasa kantri dabe tiwai pedalali goli, te augwali dali eno deliba sisinama, te dwai dene mawaibao,” wai. “Tamadi tama te Asiria kingo augwali aiyaba mu elaluama, te dwai genuai sęgę augwaliba muaibao,” wai dao.
HOS 8:11 “Te Israel dabego te augwa dwai sę yali sęgę sela sąyabo alta hauwa nigali, tialima te yali ofa dolo me isąwai, tama tiyu augwaligo te dwai sę hauwa yalio.
HOS 8:12 Eno augwalibolo te eno bomo yai po hauwa asęani. Tiali goli, augwaligo te bomo yai po suali, te gasa hanigo ebo tobage kolesaga naga yali, te augwaligo ena wali me asobeo,” wai.
HOS 8:13 “Augwaligo te ofa hauwa eyu, te ofa ebo mi tubo dao. Tialima ena, Genuai Bidi, eno augwaliba te wiegi yai homu pemene me ebeo. Tibaso, megi da, eno augwa yali dwai sęde homu kone palama, te dene mawaibao,” wali. “Te eno augwali Isipba ma kalabus igi pomainu tagala palaibao,” wai.
HOS 8:14 “Te Israel dabego homugo te kingo bomogo augwali tau sabo usu yaiba homu yai, tama tiyu augwaligo te kingo bomai be sę yani. Tiali goli, augwaligo te naide homu kone isąwai, ena God, eno te we bidi nigai dao. Tama te Juda dabego me te dwai sę yai elaluali, magi baso meni, augwa taun dabe bagulabo te bomai obo dabe nigali, tama augwa homugo te augwali bugagia bidaiba homu yai. Tiali goli, tagalao, eno sia te taunba tula palama, te kingo be dabe dali siago dela silimainu yaibao,” Genuai Bidigo enabolo te po wai.
HOS 9:1 Israel dabe, dagego te wiegi yai kolesaga wali pisąbo te haiden bidi dabego ebo kolesaga te dagego te genuai nai daa tuyu, te lotu wabo sogo ebo kolesaga tagaliąo. Magi baso meni, te dagego duga God tudiba munama, te dagego aga wali me pabeo. Te tigidali badu, dagego te Balba lotu weyu, te sunumide penani ela bilibo wego ebo kolesaga tiwai ebao. Tama te penani ebogo te mone sabo sę tiwai ebo dao.
HOS 9:2 Tiali goli, pąde sogo dage te nai sǫą peyu, te oliv wel me wain meni yaibao.
HOS 9:3 Tama dage Israel te Genuai Bidigo mani tǫde me bidigobeo. Tama dage te Isipba kalabus ma igi peyu, te Asiria bulu tǫba me kalabus igi paibao. Tama te bulude te Godigo dageba te habu selali nai dabe tueibao.
HOS 9:4 Dage te gasa hani dabego bulu tǫ kantride bidibo sogo da, teda dagego Genuai Bidiba te wain me, kibu hasa me, te ofa me magobeo. Tama duga naigo digi te dage God gedude meda ilaibao wali, te bidi dabego te bidi isaide te diligide gela weyu bidibo sogo te ulama tubo naigo, te augwali meda pedalubo tiwai yaibao wali. Tama te naigo te dagego haliga pągąnobo tiwai naga yaibao. Te dagego te nai me badu te Genuai Bidigo tempel beba sela aselama, te ofa yagasainu ebaso, usu me egobeo. Mu menio.
HOS 9:5 Tama te Godigo genuai bodolu side da, teda dagego magi sę yaibawe? Te moni nai daa tubo side, te dagego magi yaibawe? Te sunumi menio.
HOS 9:6 Nosali te genuai sęgę yai sę, te dage dolabo sę te pedalubaso da, teda dage wi tedela paibao. Tama te Isip dabego dage suyu da, te dage selasa peyu, te Isipba kalabus iligi paibao. Tama tede dage bidaludubadi, te dage isibo siba usu nama, te augwaligo dage te Mempisde pubulaibao, te augwa genuai taun dao. Dage te duga pesage buluba ma asogobeo. Menio. Tama te duga be dabe, me mone silva, me te wiegi yai doado bage te olo bulu tomode elalubadi, te genuai bus holama, te tigidali mesegelaibao.
HOS 9:7 Te Godigo dageba dwai dene maiabo sogo pedelalio. Tama duga te yali dwai kolesagade usu nama, te dene saibao. Te sę pedalubo sogo da, teda Israel, duga koneaibao, te dwai dene dao. Dagego enabolo te po wali, “Te profet aga te kolesaga meni yai umuna sali da,” wali. “Te Godigo bomo elalubo bidi, aga te kolesaga geda mubo bidi da,” wai. Dage we bidigo ena godolo homu me isąwani, magi baso meni, dagego dwai sęgę te genuai umabo yai dao.
HOS 9:8 Godigo digi te dage aga we bidi dabeba te profet bidi nigilama, te bomai po pusagasomainu tagala palali. Tiali goli, te ena bilibo badu te tigidali badu, dagego ena te umbengo te ba tola sabo tiwai emainu homu yai. Te Godigo tǫde digi dagego enaba boi bidi ebo dao.
HOS 9:9 Dagego te dwai kolesaga sesemane sogo ebao, te duga wąį nǫų dabego polobadu te bulu Gibeade yali sę tiwai yai. Tama te Godigo dagego yali dwai sęgę te homu kone paliyu, te agai dageba dwai dene mu mawaibao.
HOS 9:10 Genuai Bidigo te po wai, “Hasia mu eno dage Israel suali, te dwagi yai mu elaluali, te bidi me deligo te wain ni te wa pai tǫde pedelama, te nai walali subo tiwai yali. Dagego te wąį nǫų dabe augwali te podolali hani wai te ni kaya fik te tau hasia ebo tiwai yai, dwagi yai bidali. Tiali goli, nosali augwali te bulu du Peorba sabolali sogo, tama hasia sogo augwaligo te tibo god Balba lotu wali, augwa te tibo god godolo mu elama, tama augwali dwai pedelali, te Bal tiwaigo mu pedelai dao.
HOS 9:11 Te Israelgo bomo te ba bola pabo tiwai elama, augwaligo bomo hagawaibao, tama silaibao. Tama te we dabe sibigo te haliga me isąma, te wai me ame nogobeo,” wali.
HOS 9:12 “Tiali goli, te mebago wai elalubaso da, teda te wai dabe eno ela mueibao, tama eno te me deli sula tagalama, elalumainu me egobeo. Eno te we bidi tagalobo sogo, te dwai nai haniani augwaliba pedelaibao,” Genuai Bidigo te po wai dao.
HOS 9:13 Tama Hoseago te po wali, “Genuai Bidi, eno suali, hasia bolo te taun Tair te dwagi yai madi mu te bidaluali, tiali goli nosali te boi bidi dabego augwali dolagasai dao. Tama eno suali, te tobage sę te Israel haniba me pedelaibao, te boi bidi dabego te Israelgo hani wai dabe pobeasa biliyu, ela muaibao, te eno sualio,” po wai.
HOS 9:14 “Tama tialima, eno nageba hanalu obao, te nago magi sę te Israel dabeba yaibawe? Nago te we dabe sibigo te wai ame nomainu me iligio. Te dwasianu wai dabe elalubo we dabego ame te nago ame pę wa palama, te augwa wai dabeba te ame mabo usu meni emainu ilao,” po walio.
HOS 9:15 Tama Genuai Bidigo po ma wai, “Polobadu augwali te Gilgalde bidiyu, tama augwa te dwai kolesaga ebo gagalali, tama te sogo naga eno me eno augwaliba haliga sębę ebo gagalali. Te we bidi dabego dwai sę hauwa yai, tama augwa polalubo tobolu bidi dabego me eno po sela sąwani. Tama tialima, eno tǫde te augwali eno sela sąnama, tama eno augwali godolo homu munu ma egobeo.
HOS 9:16 Te Israel dabego wai ame nabo usu isąwaibao, augwali te ni me deli te ni sele ąį wa pelama, te nai walisąbo tiwai yaibao. Tialima, te mebago wai ame nobaso da, teda augwaligo te godolo homu mu ebo wai dabe te eno ela muaibao,” te po wai dao.
HOS 9:17 Eno aga sę ebo God, te Godigo te aga we bidi tudiba mueibao, magi baso meni, augwaligo agai po wali pisąbaso tiali. Tama augwali te bulu tǫ kantride te tǫ meni yai bidi dabe tiwai bidaibao walio, augwali te bulu wau bilibo bage naga bidaibao.
HOS 10:1 Te Israel dabego doado bage hauwa elalu, tama augwali te nai hauwa mu walobo wiegi yai ni wain tiwai yalio. Augwaligo te wiegi yai nai doado bage umabo mu pedelama, tialima augwa te tibo godigo alta, me ni pos te umabo umabo digi nigilama, tama augwa te ni pos bugagia mu me au ilai dao.
HOS 10:2 Augwali te tibo po naga wabo bidi tiwai yali, tialima megi da, te augwa yali dwai sęde te dwai dene saibao. Godigo te augwaligo alta ela besela sąnama, tama agai te augwaligo bulu hǫą bidi noma nigali pos ni te dolaibao.
HOS 10:3 Te pąde sesabi gana bidisąbo gana elama bidisiąbadi, te Israel dabego te tama po waibao, “Dago te Genuai Bidigo po wali pisąbaso, tialima te Genuai Bidigo dago king sela sąwani da,” waibao. “Te dago king elalugi sogo da, teda agai da magi elama tau sigi dawe? Mu menigi dao.
HOS 10:4 Te king dabego da tau sabo po olo gani bole tiwai yali. Te augwaligo olodali dąų walobo po hauwa olama, tama augwaligo te olodali naga te gasa tǫ kantri king bidi dabe dali po minama, dąų walobo dao,” augwaligo te po waibao. Te Israel dabego te doloba pai kolesaga tagalu, te tobage dwai kolesaga naga ebo dao. Tama te tobage dwai kolesagago te dwai nosaide te bidi dolabo nai elalubo tiwai ebo dao. Tama tiyu, augwali tomode te po tų hauwa pedalobo dao.
HOS 10:5 Te bulmakau gol Betelde elaluali te dolaibao, tama te taun Samariade bidali we bidi te augwali wi elama, te bulmakaude homu dene yaibao. Te tibo godide sę ebo we bidi, me pris dabe, augwali agade te homu dene eyu, gela waibao, magi baso meni, te Asiria dabego aga au dobage hųgia sąnama, te aga dolaibao.
HOS 10:6 Tialima, te Asiria dabego te bulmakau te Asiriaba sela pelama, tama augwa te kingba te takis mabo tiwai yaibao. Te Israel dabego te po page koneai bidi dabego po wali pai, tama te bidi dabego po te geda muanio. Tialima, te boi bidi dabego augwali aiyaba elaluama, tama te Israel dabe hale dwai mu saibao.
HOS 10:7 Te Israel king te hagawaibao, te dwasianu dedelage kakali hogomu tiwai eyu, te wę asu, tolasa pabo tiwai yaibao.
HOS 10:8 Te Israel dabego te tibo godiba lotu weyu, te bulu du ugwadu bagede te lotu wabo pesage elaluali, tama Godigo te pesage dabe dolaibao. Tama nosai me te sesane yai bono dabe pedelama, te alta dabe mesegelaibao. Tama te sogo te boi bidi dabede geme duala sainu yali we bidi dabe, tama augwaligo te bulu du dabeba hanalu, te augwali mesega sao po waibao.
HOS 10:9 Tialima, Genuai Bidigo te po wali, “Polobadu te Israel dabego te Gibeade enaba dwai sę yali, tama augwaligo te kolesaga tagalobeo. Tialima, te boi bidi dabego te Israelba hwįagaselama, tama te hwį hwį pali, te Gibeaba usu nigi paibao.
HOS 10:10 Tialima, eno te sę yabo homu ebaso da, teda te tiwai naga eno te bidi dabeba hwįyu, te augwaliba dene ilaibao. Augwaligo te genuai dwai sę si yali. Augwaligo ena tagalama, tama augwaligo te tibo god dabeba lotu po odu geai dao. Tama tibaso, eno te augwali dali gasa bulu tǫ kantri bidi dabe deliba sisinama, te augwaliba hwįagasomainu ilaibao,” wai dao.
HOS 10:11 “Polobadu Israel te ogwa we bulmakau so me deli tiwai bidali, te agai te wit bugagia agabo koneani, te nai wit te we bidi dabego somainu yalio. Tama agai te sę godolo mu elama yali. Hasia agai te sinabo sę dene me isąwai, tiali goli megi te eno agaba te sina yabo sę mawai. Megi da, eno te Juda me Israel te bulmakau tiwai sę dene emainu ilali, bidigo te sę yabo bulmakau magede te ni nami pedai kęnama, tama agai te tǫ elibo masin kekasa bilaibao. Aga te nai kekasa bilibo sę dene elama, te ni nami pedaigo aga dogoni me mage me dilama, dolalio.
HOS 10:12 Eno te Israel me Juda augwaliba te tama po walio, ‘Dagego te dwai kolesaga tagalama, te doloba pai kolesaga wali peyu, te enaba lotu waiąo,’ wali, ‘bidigo te gesi gide tǫ elama, te nai bulama, te nai bugagia holama, te hauwa walobo tiwai yaibao,’ wai. ‘Megi te dage ena God duga Genuai Bidiba ma asobo sogo dao. Te dage enaba ma asali da, teda eno dage bugagia mu wiegi yai sę ilaibao.’ Eno dagebolo te po wai.
HOS 10:13 Tiali goli dagego te tama me tibeo. Menio. Dage te gi sę ebo bidi tiwai yali, tiali goli dagego gide, dagego te dwai kolesaga me dwai tibo kolesaga naga bulali. Tama tialima, dagego gide te nai dwai naga pedelama, te dagego tubo sę ebao.” “Dagego homugo te duga genuai ami hanigo te dage tau sabo usu yaibao homu yali.
HOS 10:14 Tialima, te boi bidi dabego dageba hwįagaselama, te augwaligo dagego te bomai obo banis elalubo tigidali taun dolagasaibao,” wali. “Te dolobo sę te polobadu te king Salmango agai te taun Betarbelba hwįgi pelama, te nai mu dolali tiwai yaibao,” wali. “Tama aga hani dabego te augwaligo we wai dali selama, te augwali subigila sąsąnama, te augwali isai dao.
HOS 10:15 Dage te Betel dabe, dagego te dwai sę hauwa yali, tama duga te yali sęgo sęgę tiwai dageba pedelaibao,” wali. “Te hwįbo sogo, te augwaligo te Israel king ela munama, te mu isilaibao,” te po wai dao.
HOS 11:1 Genuai Bidigo po wadolama weyu, te tiwai wali, “Te Israel dabe te dwasianu ogwa wai tiwai digi, eno aga godolo mu elama, te eno aga i olama, te Isip taga soao olama, te eno ogwa bidalio.
HOS 11:2 Eno te hauwa sogo augwali i weyu, te ena wali asao po wai. Tiali goli, sesemane sogo te augwaligo ena tudiba muani. Eno we bidi augwaligo te tibo god Balba ofa yalio. Augwaligo te wiegi yai denami ebo hano ilibo ofa te haniani tibo godiba yai dao.
HOS 11:3 Ena digi eno te Israel dabe ola mawai, te ayago te wai sunumi ola mabo tiwai yali. Te eno nogogo augwali tolasa asai. Eno augwali usu ma ilali, tiali goli augwaligo eno digi eno te sę augwalide yali homu me ebeo,” wali.
HOS 11:4 “Eno augwali homu dene elama, te eno augwali godolo mu yai, tama eno augwali enaba sali. Eno te augwalide elaluali genuai sęgę sela sąnama, te augwali bugagia wiegi yai ilama, te augwali nai manio.”
HOS 11:5 “Tiali goli, augwali enaba me asisąwai. Tialima, augwa te Isipba ma pomainu ebowe, ma te Asiria dabego augwali tonalumainu egowe yaibao.
HOS 11:6 Genuai boi hwįyu, te boi bidi dabego te taun obo sunumi aluama, tama augwali te taun tomoba pelama, hwįaibao. Te boi hwįbogo te eno we bidi silaibao,” wali, “magi baso meni, te augwaligo augwa homu kolesaga naga wali pai.
HOS 11:7 Sesemane sogo augwaligo bomonama, ena tudiba muani, tialima eno augwaliba te mawainu ebo dwai dene te augwali me geda mugobeo. Te genuai sęgę augwalide elalubaso, te augwali dwai gela waibao. Tama te mena bidi me deligo te sęgę me sela sąwainu ebaso, usu me egobeo,” wai dao.
HOS 11:8 “Dage Israel, te eno dage tagalu da me egobeo,” wali, “te ena dagede wi me pogobeo. Tama eno dage te bulu Atma me Seboim, te bulu si bidi hani mu silali tiwai gilama da me tegobeo,” wai. “Eno dage tigidali mu doloyu da me egobeo, magi baso meni, eno dage godolo homu mu ebo dao,” wali.
HOS 11:9 “Eno dageba haliga sębę yali, tiali goli eno dageba te dwai dene da me magobeo. Magi baso meni, eno kolesaga te bidigo kolesaga tiwai menio. Ena God, te eno kolesaga tedali gasagi yai elalubao, tiali goli ena te dage dali bidibao. Eno wado elama, te eno dage doloyu da me egobeo,” wabo dao.
HOS 11:10 “Te eno ena we bidi dabego boi bidi te i bomonama weyu, te hasa laiongo ga weyu, i wabo tiwai eyu, te eno augwali wi ilaibao. Tama eno we bidi dabego te giliga dega sigulubo badu tagalama, tama didibili ebo dali te polo asesa, ena wali asaibao.
HOS 11:11 Te augwaligo Isip tagalama, tama te polo asesa asu, te ba bola asobo tiwai yaibao. Awe, augwali me Asiria tagalama, te ba hi dabe tiwai bola asaibao. Tama eno augwali te augwa page buluba ma odasa asaibao. Ena Genuai Bidi, eno te po wai dao,” wali.
HOS 11:12 Genuai Bidigo po ma weyu, te po wai, “Te Israel we bidi augwaligo enaba tibo po hauwa sogo mu wai. Te Juda dabego eno po sela sąbo sę mu idualio. Tiali goli, ena God, ena augwali tiwai menio. Ena doloba pai, te eno homu hasegelama, te eno tibo po me wagobeo, te we bidide eno homugo mu kęą pai God dao,” te po wai.
HOS 12:1 Genuai Bidigo te po wai, “Te Israel dabego tigidali sę te giligade me hulide yali, te augwa digi dolabo dwai sę yalio. Te tibo po wabo kolesaga, me hwįbo kolesaga te augwali tomode genuai pedelali. Augwaligo te Asiria dabe dali sę yabo po mia sali. Me ma, augwa te bisnis sę te ni oliv welgo elama, te Isipba tolama, te Isip dabego abelali.”
HOS 12:2 Genuai Bidigo te Juda dabe dali po elalubao. Tama agai te Israel dabeba dwai dene mayu, te augwa yali sęde usu nama tiaibao wai.
HOS 12:3 Augwa wąį nǫų Jekopgo te aga ama dali hwįani, te augwa si idago haligade bidibadi tialio. Nosali Jekop te genuai igulama, tama agai te God dali hwįai dao.
HOS 12:4 Te hwįani side, agai te Godigo ensel mobo bidi dali pagelama, tǫba pinayu hwįai, te aga usu si igulama, ugwaba ela holali. Tama Jekopgo gela hauwa weyu, te Godiba hanalu, te aga olo tau sabo wiegi yai homu kolesaga yao po wali. Tama gasa sogo Jekopba te Betelde God pedelama, tama aga dali po miai dao.
HOS 12:5 Te Jekop dali po miani God, aga te Tigidali Bomo Elalubo Genuai Bidi dao. Dago aga nogi te tiwai wao, Genuai Bidi dao.
HOS 12:6 Tialima, dagego duga Godiba konealubo po dąų olama, ma begasa asiąo. Tama dagego aga naga wali mu asiyu, te po tų ebode te doloba pai kolesaga naga eyu, tama agai dage tau sabo tonaluiąo.
HOS 12:7 Genuai Bidigo te po wai, “Te Israel dabe bisnis bidi nigali, tiali goli augwaligo te bisnis sęde doloba pai kolesaga me ebeo. Augwali te Kenan bisnis bidi dabe tobage tiwai pedelai. Te bidi dabego te augwaligo nai dabe abelagasobode, te augwali tibo po ola maiabo homu eyu, tede augwa homu tomode gisugu weyu, puba hwi po wabo dao. Augwaligo te nai dabe dolo si me dagalubeo.
HOS 12:8 Tialima, augwaligo te tama po wabo dao, ‘Da te mone bidi pedelalio,’ wabo. ‘Dago doado bage hauwa elalubao. Tama niwai bidi me deligo te po weyu, dago te nai wi sabo kolesagade te mone bidi pedelali me wagobeo.’ Augwaligo te po tama wabo dao.
HOS 12:9 Tiali goli, ena God, te duga Genuai Bidi, eno te dagego tibo po koneai. Polobadu eno dage te Isipde selama, odasa asai. Tialima, eno dagego te wiegi yai be dabe tagalumainu elama, te dage ugwa bede ma piagameo wali, te polobadu eno dage dali te masigi kemi tǫde te moni nai daa tuabo sogode deliba gesabidi ununiyu yali tiwai gilama emainu ma yaibao,” po walio.
HOS 12:10 “Eno po te profet dabeba olama, tama te eno nade wabo tiwai te hauwa nai po augwaliba wali. Te profet dabego pedauwalidu eno te Israel dabeba weyu, te augwaligo dwai kolesaga ebo te tudiba muiąo po wai dao.
HOS 12:11 Tiali goli, augwaligo te po me odobeo. Menio. Te Gileatde augwaligo dwai kolesaga hauwa yali, tama te augwali mu hagawaibao. Te taun Gilgalde augwaligo te bulmakau dwai alta dabede ofa yai. Tialima, te alta dabe te besela sąnama, te masigi pesage holali te pepeli delide hania olo elalueibao,” po wai dao.
HOS 12:12 Polobadu mu dago wąį nǫų Jekop aga ama Isode wi ebaso, aga te tǫ kantri Mesopotemiaba wi pai. Tama aga te we sabo homu eyu, tama tiali, tialima aga te gasa bidigo sipsip tonalubo sę yali, te bidi aga wegi ma abelainu tama tiai dao.
HOS 12:13 Tama te Israel dabe Isipde bidali sogo, Genuai Bidigo te profet me deligo augwali sigi pomainu tagala palama, tama augwaligo te Isip taga soali, te kalabus yali bulu da. Tama te profetgo augwali bugagia tonaluai dao.
HOS 12:14 Tiali goli, te Israel dabego dwai kolesaga hauwa ebaso, tama Genuai Bidigo wado po dwai mu wai. Tama augwali isimainao wai. Te Israel dabego Genuai Bidigo nogide hagela homu eyu, aiyaba elalubaso, tialima te agai augwaligo dwai sęgę sali te sela sągobeo wai.
HOS 13:1 Polobadu te Efraimgo hanigo po obaso, tama te Israel gasa hani wi elama, te po odali. Tiali goli, te Efraim hanigo te tibo god Balba lotu po obaso, augwaligo sęgę salio. Tama tialima, te augwali isaibao po wai dao.
HOS 13:2 Tama megi me, augwaligo te dwai sę me idubo sę ebao wali. Augwa te tibo god te silvago nigilama, augwa teba lotu wabo dao. Te bidi dabe augwa homugo digi koneama, te tibo god noma piksa dabe te augwa nogogo digi nigali. Tama augwa te po weyu ebo, “Dagego te piksa nomaba ofa yao,” wabo dao. Ae, tegoba, augwaligo te bulmakau nomaba te nono nani! Augwali te menagi yai bidi mu dawe?
HOS 13:3 Tama tialima, te we bidi dabe augwali te kigamu pedalubo dagalu pǫ te olo sia sabo tiwai gilama yaibao wali. Augwali te hulide tulali tulubage segeni te nosade elaluama, te giliga nanu polo sia sabo tiwai ąǫ yaibao. Augwali te wit bo te waligo sela pelama, te besela palobo tiwai yaibao. Tama augwali te sia hano te be pedudu ugwaba holama, te polo silibo tiwai yaibao wali.
HOS 13:4 Genuai Bidigo te tiwai po wali, “Ena God, duga Genuai Bidi da, eno dage te Isipde selama, tedu eba odasa asai. Ena deli naga, ena duga God dao. Te gasa me menio. Enaduba deligo naga eno dage ma sabo dao.
HOS 13:5 Dage te kemi tǫ wa pai bulude bidali sogo, eno dage bugagia mu tonaluai dao.
HOS 13:6 Tialima, nosali dage te wiegi yai tǫba sabalubo sogo, te dage nai pągąna pelama, te dage tigidali nai usu yali. Dagego te nai sela selama da, tama dagego te homu yali, te duga bomogo digi dagego te nai sali homu yai. Tama tiyu, dagego ena homu kone gegeda palubao,” wai.
HOS 13:7 “Tialima, ena te dage soabo sunumide geme duala selama, tama eno dage te laion me gasa genuai uni pusigo te bidi elibo tiwai gilama yaibao,” wali.
HOS 13:8 “Te ena samonama, posoga palu, te dage hagawia aluaibao, te hasa beago te aga wai hagawaide sębę eyu, gasa hasa dali ebo tiwai gilama yaibao,” wali. “Tama eno dage subigila miminama, tama dage te polo dalaibao, te laion me gasa uni hasa dabego augwa tubo hasade ebo tiwai yaibao,” wai dao.
HOS 13:9 “Te Israel dabe, te ena deli naga te dage tau sabo usu yaibao. Tiali goli, dagego hagela ebaso, tama eno dage dolaibao. Tama dego dage tau sogowe? Te bidi dabe menio.
HOS 13:10 Polobadu dagego enabolo hanalu, te king me polalubo tobolu bidi dabe mao po odu geani, tiali goli augwaligo dage mena tama tau sogowe? Augwali usu munu me egobeo.
HOS 13:11 Polobadu eno wado elama, te eno dageba king mawai. Tama megi me, eno te wado po umabo mu olama, te eno augwali sela sąwai dao,” wali.
HOS 13:12 “Eno te Israelgo tigidali dwai sę yali sęgę te eno bukude asęnama, te eno munalubao, eno homu kone gegeda me pogobeo.
HOS 13:13 Te Israel augwali bugagia bidimainu yali, tiali goli augwali te homu kolesaga meni yai umuna pelama, augwa hagela homu yai. Augwali da, te wai bou me deli tiwai dao. Te wai bou te idago haliga tomode elaluama, te idago ame nainogo ebo tiwai yali, tiali goli te wai tega pabo homu ebeo.
HOS 13:14 Tiali goli, nosali eno te Israel bage te isali bidi dabego pesagede ma saibao. Isibo, ena te dwai nai tiwai pedelama, tama nage ela mu silaibao. Te isai bidigo pesage, ena te moni dwai gasi tiwai pedelama, tama nage dwai mu dolaibao. Eno te Israel dabeba te olo tau sabo wiegi yai homu kolesagago tau me sogobeo,” wali.
HOS 13:15 “Te Efraim dabe hauwa mu pedelama, tama te gasa Israel hani aiyaba elaluali, tiali goli eno te posolo yai bomai wali mu te giliga asobo badu tagala palama, tama te waligo augwaligo te ulu wę sula somainu ilaibao. Tama te waligo augwa dwagi yai doado bage sela pela silimainu yaibao,” wali.
HOS 13:16 “Te Samaria dabego enade hagoma mu yali, tama augwali te dwai dene bolo somainao. Te bomai wali tiwai eyu, te boi bidi dabego augwaliba hwįagaselama, te augwali ela munama, tama te dwasianu wai puluba tigidali te tǫba sąsąnama, te augwali me isaibao. Tama augwaligo te haliga elalubo we dabego tabi togwaibao,” po wai dao.
HOS 14:1 Te Israel dabe, dage te Godiba ma asiąo, te duga Genuai Bidi dao, magi baso meni, te duga dwai sęgęgo dage tulalumainu yali dao.
HOS 14:2 Dage te Genuai Bidiba ma aselama, tama te gedu haluasa po dagego Godiba te ofa tiwai iyagameo. Dagego gedu haluasa po e tiwai wagameo, “God, nago dago sęgę tigidali sela sąyu, tama dago gedu haluasa po wabo odao. Tama dago te bulmakau elama, tama nageba ofa ebo usu egobeo. Menio. Te dago te dena polobadu dąų walali po wali gilama, te dwagi yai kolesaga naga yaibao.
HOS 14:3 Te Asiria dabego da ma dobola sogobeo, usu egobeo, tama te hwįbo hos dabego me da tau me sogobeo. Te usu egobeo. Dago te tibo god nigali, te dago te tiwai po augwaliba ma weyu, ‘Dage te dago god da,’ me wagobeo. Genuai Bidi, nago dabolo te homu dene eyu, tau sabo wiegi yai kolesaga ebo dao, magi baso meni, da te aya meni yai wai puluba bidibao, te tau sabo usu meni yai bidibo dao.” Dagego tama gedu haluasa po agabolo wao.
HOS 14:4 Genuai Bidigo te po wai, “Tialima, ena te tagalali we bidi dabe eno ma dobola saibao. Te eno haligago augwali godolo mu eyu, te eno augwaliba wado yabo homu begelama, munu me egobeo.
HOS 14:5 Te eno Israel dabeba wiegi yai sę ilaibao, te tulubage segeni te wa pai tǫba tulama, te telabo tiwai yaibao. Te augwali te gasa wiegi yai sawi yai plauwa tiwai pedaliyu, tama te tǫ kantri Lebanonde te genuai bomai ni dabe tiwai pedaliyu yaibao. Te ni dabe sele te tǫ aya tomoba mu dulali tiwai ebo dao.
HOS 14:6 Te augwali wiegi yai mu te gesi ni yabe pedalubo tiwai eyu, te oliv ni wiegi yai pedalubo tiwai yaibao. Tama te we bidigo augwalide wiegi yai homu pemene eyu, te augwaligo te Lebanon wiegi yai ni sida dabe te wiegi yai denami ebo tiwai yaibao.
HOS 14:7 Te augwali ena dali ma bidagasobaso, te eno augwali tonaluaibao. Tama augwa gide te nai umabo hauwa walama, elalueibao. Te augwa wai hauwa ame naibao, te gide wiegi yai ni wain augwa nai wai ge hauwa walobo tiwai yaibao. Tama augwa te genuai nogi elalu, te Lebanonde polalubo wain tiwai gilama elalueibao.
HOS 14:8 Tama te sogo te Israel dabego te tibo godiba lotu munu me wagobeo. Te enaduba deligo naga augwaligo gedu haluasa po wabo odaibao. Te eno augwali bugagia tonalu, tama augwali te ena dologode bidiyu, te bidi te genuai ni wuli dologo tiwąi madi te giliga nanu posolo ebaso bidibo tiwai yaibao. Ena digi ena te tigidali wiegi yai nai augwaligo sabo page bidi dao,” God Genuai Bidigo te po wai.
HOS 14:9 Te wiegi yai homu kolesaga elalubo bidi dabe, augwaligo te e bukude elalubo po konea sao. Tama eno homugo te augwaligo homu kone palama, tama te po wali pomainao. Te Genuai Bidigo kolesaga te dolo naga elalubao, tama te doloba pai bidi dabego te kolesaga wali peyu bidaibao. Tiali goli, te dwai sę ebo bidi dabe, te augwaligo Genuai Bidigo kolesaga wali pogobeo. Tama tiyu, augwali tulalubo dao.
JOE 1:1 Te e po da, Genuai Bidigo Joelbolo mawai, te Petuelgo ogwa dao.
JOE 1:2 Dage monu dabe we bidigo, odiąo. Te dage tigidali Judago, odao. Eno dageba megi te pedelali nai po hanalu obao. Te tobage nai te polobadu dage bidali sogo me pedelai dawe? Te duga wąį nǫų bidali sogo me pedelai dawe? Eno homugo te menio.
JOE 1:3 Dagego duga wai dabebolo te sę yali po waiąo. Augwaligo te augwa wai dabeba te po omainao, tama te wai dabego te nosali pedalubo haniba omainao.
JOE 1:4 Te me si me si te tobage kuli mano hani pedelama, tama te tigidali nai yabe mu silalio. Tama hasia te polasa pali kuli mano hanigo te taga pali nai yabe, te si wali nosali asobo kuli mano hanigo tula silali. Tama te sela wali, me te me si me si wali hani, te hani sigo te tama tiwai naga yali, tama te tigidali nai mu silalio.
JOE 1:5 Dage te bomai ąį tulama, gęǫ page ebo bidi dabe, hogodama gela waiąo. Dage te wain wę tubo bidi dabe, dage me gela waiąo, magi baso meni, te kuli mano dabego dagego te gesi wain ąį nigabo bono du tigidali te dolali dao.
JOE 1:6 Genuai kuli mano hani te genuai ami hani me deli tiwai yali, te dago tǫ kantri tigidali mu halua sigulali. Augwali bomai mu, te hauwa umabo, te nedabo usu egobeo. Te augwaligo kele te laiongo kele tiwai te mu poa pai dao.
JOE 1:7 Augwaligo te dago ni wain dabe dolama, te dago ni kaya fik me tula silali. Augwa te tigidali ni kaya wale me ni nologo tula silama, wa pelama, te tedela yai elaluai dao.
JOE 1:8 Dage we bidi dabe, dage gela waiąo, te gesi wegi aga sainu yali bidi isibaso, te aga gela wabo tiwai iyąo.
JOE 1:9 Te nai me wain te God aga beba ofa yabo nai meni yai. Te pris dabe augwa Genuai Bidiba ofa yabo nai meni baso, tibaso te augwali gela obao.
JOE 1:10 Te gi dabede nai meniama, olo mu elalubao. Tama tǫ digi me gela obao, magi baso meni, tigidali gide nai dolali, te wain du wai tigidali sasia pelama, te oliv ni dabe me sasia palio.
JOE 1:11 Dage te gide sę ebo bidi dabe, dage te homu dene eyu, gela waiąo. Tama dage te wain gide sę ebo bidi dabe, dage gela waiąo. Magi baso meni, tigidali wit, me bali, me tigidali nai dolalio.
JOE 1:12 Te ni wain dabe dali, te ni kaya fik dabe me, sasia palio. Tama te gasa tobage du walobo ni dabe tigidali, augwali mu sasia pali. Tialima, te we bidi dabego wiegi yai homu pemene ebo tigidali te sia salio.
JOE 1:13 Dage te altaba ofa ebo pris dabe, dagego te homu dene ebo side gudubo ugwa gudama, tama dage gela waiąo. Te hulide dagego te homu dene ebode gudubo ugwa gudama, te Godigo be tomoba pelama, tama gela udubadi, te be posoboba usu nao. Magi baso meni, te dena Godiba ofa yabo nai me wain meni yai dao.
JOE 1:14 Dagego te tigidali we bidiba wao, augwa te nai habu selemainao. Tama tigidali we bidi sisinagasomainu i olama, te lotu wagasomainao wali. Te polalubo tobolu bidi, me tigidali Juda we bidi, tama dage te Godigo be tomoba pelama, te dena Genuai Bidi, agaba i waiąo.
JOE 1:15 Magi baso meni, te Genuai Bidi asabo side bodolu te pąba yagasalio, tama te bodolu side te Tigidali Bomo Elalubo Godigo te dolabo genuai sę daba tagala palaibao. Hobede da, te side te dwai mu dao.
JOE 1:16 Te nai dabe dolali, te dago magi sę deli me egobeo. Te Godigo beba da paibao, tiali goli dago wiegi yai homu pemene me egobeo.
JOE 1:17 Tǫde wę meni yai, tama tiyu, te tǫ tomode nai wai dabe isila pelama, te nai me holobeo. Tialima, te nai mubo be olo elaluama, te dolalio.
JOE 1:18 Hobede dao, te bulmakau dabe nasi dwai mu ebaso, te hou weyu, ga walio. Augwali te homu kolesaga meni yani, magi baso meni, te tuabo nosai me elalubeo. Te sipsip hani me nasi eyu, te nomona salio.
JOE 1:19 Genuai Bidio, eno gedu haluasa po bomonama obao, magi baso meni, te tigidali nosai me, ni me, te sasia pelama, te augwali isigo ulali tiwai yali dao.
JOE 1:20 Te uni hasa dabego me nageba i obao, magi baso meni, tigidali ąį sula siyu, tigidali nosai me wa pai dao.
JOE 2:1 Genuai Bidigo te dwai sę ebo we bidiba dene maiabo bodolu, te pąba megi yagasoba wali. Tialima, dagego te biugel bu weyu, te Godigo bulu dude digi, te Saionde belo dabe elao. Tama te side te tigidali Juda we bidi noma somainao wali.
JOE 2:2 Genuai Bidigo te wabo side te be mu hulia saibao, tama te husugu yai pǫgo te dagalu mesega saibao. Te genuai kuli mano hani te ami tiwai elama, te bulu du dabe mesega sagaselama, te kigamu te be posobo asobo tiwai pedelaibao wali. Te polobadu te tiwai sę deli me pedalubeo, tama te tiwai sę me te nosali me pedalugobeo, wai dao.
JOE 2:3 Augwaligo te nai yabe me, nosai me, tula silaibao, te kala siago dabo tiwai yaibao. Te augwali te pedalisąwani pesagede digi te wiegi yai te Iden gi tiwai elaluali, tiali goli augwaligo te nai yabe tigidali tula silali pesagede, te bulu tǫ wa pai pedelali. Augwaligo te yabe deli me elalumainu me sula tagalubeo. Augwaligo mu silalio.
JOE 2:4 Te kuli mano dabe te boi hwįabo hos dabego udada asobo tiwai ebao.
JOE 2:5 Te augwali bulu duba samanobo sogo, augwali te karis masigiba samanu kidagalo wabo tiwai ebao, tama te kala siago deyu, podo podo wabo tiwai ebao. Augwali te genuai ami hanigo te boi hwįainu wasibo tiwai yaibao.
JOE 2:6 Te augwali pąba asobo sogo, tigidali tǫde bidibo we bidi hani wi dwai mu elama, te augwali bomo mu menia sai dao.
JOE 2:7 Te kuli mano dabe te hwįabo bidi dabe udada asobo tiwai elama, augwali te taun bagulali obo banisba holali. Te augwali dolo naga peyu, te ami dabego nogo sągą sąyu, mas ebo tiwai ebo dao. Te augwali gasaba begelama, me tonono me ebeo,
JOE 2:8 tama augwa pabo sunumi digi me palia sabeo. Augwa te tigidali obo banis aluama, tomoba pobao, te mena nai me deligo augwali me palibeo.
JOE 2:9 Augwali te taun dabeba udada pelama, tama augwa te obo banis bolama, te u badu aiya dulubao. Tama augwali te be dabeba holama, tama te be pola sali dedage windodu te nai wi sabo bidi tiwai elama, te be tomoba pabo dao.
JOE 2:10 Augwali pobadi, te tǫ dali, dagalu dali si mumunu yaibao. Tama giliga dali, polua si, te hulia saibao, tama te hǫ ula ma egobeo.
JOE 2:11 Genuai Bidigo te aga ami bidi dabeba i bomonama wali, te agai pedauwalide te dagalu kulukulu wabo tiwai yali. Te agai po wali pabo bomai ami hauwa elaluali. Idaya, tegobao! Te Genuai Bidigo bodolu side te dwai mu dao. Tialima, de aga te bugagia bidiyu, te aga me dologobe dawe?
JOE 2:12 Tialima, Genuai Bidigo te po wai, “Mu dao, te tigidali sę pedelaibao, tiali goli megi dage haliga begelama, enaba ma asiąo,” wai. “Tama duga te nai habu selama, tama haliga hobede elama, gela weyu, enaba ma asiąo.
JOE 2:13 Te duga homu dene ebo ola mayu, te dagego ugwa dabe olodali pisagimio. Te duga haligade digi te duga yali dwai sęde homu dene mu yao,” Genuai Bidigo te po wali. Dage te Godiba ma asiyu, te dena Genuai Bidi dao. Agade te olo mu tau sabo wiegi yai pemene ebo homu kolesaga pągąnalubao, te dade wiegi yai sę ebao. Godigo dabolo te dua dua eyu, sębę polo egobeo, te da sesemane sogo godolo mu ebao. Sesemane sogo agai dago dwai sęgę sela sąyabo sisi idu, te dabolo dwai dene ilabo homu ebe dao.
JOE 2:14 Dego konegowe? Te dage dena Genuai Bidi Godiba ma asigi sogo da, teda agai homu te ma hasegelama, te dabolo wiegi yai sę eyu, te da nai hauwa magi da. Tama tiyu, te dago te ofa yabo nai hauwa me, te ofa yabo wain me, elalueibao.
JOE 2:15 Dagego te bulu du Saionde te biugel naigo bu wao. Te we bidi dabeba weyu, te augwa nai habu selao, tama dagego augwali sisinama, lotu omainu yao.
JOE 2:16 Tigidali we bidi sisinama, te augwali genuai lotu omainu sisinao. Te tigidali monu dabe, mosi dabe me, tigidali wai puluba me, te idago ame tubo dwasianu wai bǫų dabe me, sela asiąo. Te tamadi gesi selama bidibo we bidi dabe me, tigidali we bidi te be tagalama, asiąo wai dao.
JOE 2:17 Te pris dabego Genuai Bidigo sę eyu, te aga be sunumi me alta tomode yali, augwa te gela weyu, te gedu haluasa po te tiwai waiąo wali, “Genuai Bidi, nago naga we bidi dabe da homu dene yao,” wao. “Te nago da homu dene isąbaso da, teda te gasa hani we bidi dabego da tudiba muyu, tama daba posobo po te tiwai waibao, ‘Te dagego God mena bidibawe?’ te po waibao.” Te pris dabego te po waiąo.
JOE 2:18 Tialima, augwali homu begelibaso, te Genuai Bidigo aga tǫde homu hauwa elama, tama agai te aga we bidi dabeba te olo mu tau sabo wiegi yai homu kolesaga eyu, tau sai dao.
JOE 2:19 Agai te po wai, “Megi da, eno dageba te wain me, ni oliv wel me mawaibao, tama dagego hauwa elalueibao. Eno tama tibode te gasa we bidi dabego dage tudiba mubo po munu me ma wagobeo.
JOE 2:20 Tialima, eno te kuli mano dabe te not pedaiba gudulaibao, meba te wa pai tǫ bulu pesageba sela sąwaibao. Te hasia mu asali kuli mano hani eno te sigi ąį Detsiba gudulaibao, te nosali asali hani eno te genuai tamu ąį Mediterenianba sela sąwaibao,” wali. “Tama te kuli mano hani tigi te isila pelama, te damubo kugumini yaibao. Eno te tama tebo te augwaligo dageba yali dwai sę tigidali wei ponoyu, tama tiaibao,” Genuai Bidigo te po wai.
JOE 2:21 “Tǫ, nage wi me igio. Nage wiegi yai homu pemene elama, te bugai haliga yao, magi baso meni, ena Genuai Bidi, eno te wiegi yai sę hauwa nageba ebo dao.
JOE 2:22 Te kibu hasa sibi dabe, dage wi me igimio. Magi baso meni, te nosai ma pedelali. Te ni dabego nai ma walali, te ni kaya fik me, ni wain me, te du hauwa walama elaluali.”
JOE 2:23 “Te Saion we bidi dabe, dage wiegi yai pemene iyąo. Dagego te duga Genuai Bidi ena Godigo dage tau sali sęde wiegi yai pemene yao,” wai. “Eno dageba te tulubage te nai bulabo sogo usu nama mawai, tama dageba te polobadu yali tiwai te tulubage hauwa mawai.
JOE 2:24 Te wit bo wali sela sąbo pesagede te wit ge pągąnalueibao, te wain me ni oliv wel nigibo dedagede, te wain me wel pągąna pelama gelaibao,” wali.
JOE 2:25 “Ena digi eno te kuli mano dabe dageba te ami bidi tiwai elama tagala palali. Tama tialima, te dagego nai tigidali te kibu bede te genuai hani kuli mano dabego te tula silali nai tigidali te eno wei pona silaibao,” wai dao.
JOE 2:26 “Megi da, te dagego tuabo nai hauwa elalu, te dage mu pągąna paibao. Tama dagego te ena God nogi ugwaba saibao, te duga Genuai Bidi dao, magi baso meni, eno te wiegi yai bomai sę hauwa dageba yalio. Tama te gasa we bidi hanigo te eno we bidi dabe dage hale munu ma ilimainogo me egobeo.
JOE 2:27 Tialima, dage Israel, te ena dage dali bidibo te dagego koneaibao, te ena Genuai Bidi, ena naga ena duga God dao. Te gasa hani we bidi dabego te eno we bidi dageba te hale ilabo sę me emainu munu me ma egobeo,” wai.
JOE 2:28 Te Genuai Bidigo po ma weyu, te po wali, “Nosali te eno Mobo Bidi te tigidali we bidiba tagala palaibao,” wali. “Tama te dagego ogwa dabe me, wegigo me, te eno po te profet dabego po pusubo tiwai yaibao,” wali. “Te dage monu dabe bidi dabego te na eyu, te gesi ogwa bidi dabego me te na tiwai yaibao,” wali.
JOE 2:29 “Te tama tebo sogo te eno Mobo Bidi te eno sę bidiba, me sę ebo we dabeba tagala palaibao,” walio.
JOE 2:30 Genuai Bidigo po ma weyu, te po wai, “Te eno te e side dąį ilali sogo bodolu te tǫde me dagalude mueibao,” wali. “Te tǫde genuai boi hwįabo si pedalubode, te bidi hauwago kaneme gelaibao. Te sia dabo augwa taunde pedelama, te hano genuai hano ugwaba holaibao,” wali.
JOE 2:31 “Tama te dagalude da, te giliga ge be hulia selama, te poluade mama yai pedelama, te bidi kaneme tiwai yaibao. Dagego te nai subo sogo da, te dagego koneyu, te Genuai Bidigo sogo bodolu te pedalubao homu yaibao. Te genuai side te tigidali tǫde we bidi wi mu yaibao.
JOE 2:32 Tialima, niwai we bidi te augwali tau somainu enaba hanalubaso, teda te eno augwali tigidali ma saibao,” wali. “Ena Genuai Bidi da, eno te sęde te tiwai po walio, te Jerusalemde bidibo we bidi meba te me hagagobeo. Te we bidi dabe ena digi te sa munama dąį ilali, te augwali bugagia bidaibao wai dao,” wali.
JOE 3:1 Genuai Bidigo te po wai, “Te sogo, te side, eno te Jerusalem we bidi dabe me, te gasa badu Juda pedai dabe me, augwali te bugagia ma dugulalumainao po waibao.
JOE 3:2 Te eno tigidali we bidi hani selama, te odogo malu tǫ pesageba sisinagasali, augwaligo God Te Po Tų Odobo Jas Dao nogi polali tǫba. Te pesagede eno te po tų elama, tama te Israel hani isąwai bage augwaligo te eno we bidi dabeba yali tigidali kolesaga dagalaibao. Te hani dabego eno tǫ pepedama, te augwa hasi dobola sali, tama augwaligo te Israel dabe te gasa bulu tǫ kantriba wi tedela pomainu ilalio.
JOE 3:3 Te hani augwa te satu gagali elama, dego te Israel we bidi deli deli sesa pabo te hanilibo sueinu yali. Tama tiyu, augwa te Israel dabego wegi ogwa dabe te maketde munama, augwaligo te mone salio. Tialima, te monego augwa te penani we dabe abeliyu, te wain abeliyu yai dao.” Genuai Bidigo te po wai.
JOE 3:4 “Dage te Tair me Saidon hani bage, me tigidali Filistia pedai badu me, dagego enaba mena sę yainu ebawe? Dagego homugo eno te dwai sę yalide homu eyu, te wei ponainu eba, agawe? Te dagego tama homu ebaso da, teda eno te polo dageba te wei ponaibao,” wali.
JOE 3:5 “Dagego te silva me gol sobadi, te gasa sawi yai nai hauwa sela pelama, te dagego tibo godiba lotu wabo beba mugi pai dao,” wali.
JOE 3:6 “Dagego te Jerusalem we bidi sobadi, te Juda pedai gasa badu me selama, te augwali digibulu mu odasa pelama, te Grik dabego augwali abelai dao.
JOE 3:7 Tiali goli, megi da, eno augwali ma sela aselama, te dagego augwali tagala palali bulu taga soaibao. Te dagego augwaliba yali tobage kolesaga tiwai te eno dageba yaibao,” wali.
JOE 3:8 “Te eno te Juda dabego te dagego wai ogwa dabe me wegi somainu ilaibao. Tama te Sabea dabe, te digibulu bidi dabego, te Juda dabeba aselama, te dagego ogwa me, wegi me, abelagaselama, te augwali digibulu sela paibao. Ena Genuai Bidi, eno te po wai dao,” wali.
JOE 3:9 Godigo Joelbolo weyu, te po te tigidali hani we bidiba wao po wali. “Dage te boi hwįabo sisi elaluao. Te tigidali ami sisinagasomainu i olama, te hwįgi pao,” walio.
JOE 3:10 “Te gi tǫ pedebo genuai ain te bainat tiwai pedalumainu halua,” wali, “me te ni nologo togobo hwą haluama, te sesemone tiwai pedalumainu yao,” wai. “Te bomo meni yai bidi me te hogodama, te hwįbo bidi tiwai yao,” wali.
JOE 3:11 “Dage bulu tǫ kantri pąde bidibo tigidali hani bage, dage asesa polo te odogo malu tǫ pesageba sisinagasao,” wai. Tama Genuai Bidi, eno homugo nago te naga bomai ami bidi dabe te boi bidi dabeba hwįagasomainu tagala palao.
JOE 3:12 Godigo te po wai, “Te we bidi hani dabe te sisi elama, te odogo malu tǫba dulao,” wali, “augwaligo te God Te Po Tų Odobo Jas Dao nogi poali tǫba dulao. Ena Genuai Bidi, ena te pesagede dugulalu, te Israel pąde bidibo tigidali gasa hani we bidi te po tų ilaibao,” wai dao.
JOE 3:13 “Te hani we bidi dabe te dwai mu dao. Te augwali te bidigo inawai tau yai wit nai togobo tiwai togwao. Te augwali bomonama agawaibao, bidigo te wain wai ge du te sągągo agabo tiwai yao. Te halobage tiwai nai te mu pągąna pelama, te wain ąį buluba gelaibao. Tialima, te hani dabe mu dolaibao,” wai dao.
JOE 3:14 Te hauwa umabo we bidi te odogo malu buluba sisinama, po tų yaibao. Te dwasianu sogo te Genuai Bidi te buluba pedelabo bodolude te pedelaibao.
JOE 3:15 Tama te giliga me polua te hulia siyu, te hǫ dabe me ula ma egobeo.
JOE 3:16 Genuai Bidi te Jerusalem te Saion bulu dude bidiyu, te po dagą genuai mu waibao. Agai i wabo te dagalu kulukulu wabo tiwai obaso, te tǫ dali dagalu si mumunu yaibao. Tiali goli, Genuai Bidigo te aga we bidi tigidali tonalu, te augwali me dologobeo.
JOE 3:17 Agai te tama po wai, “Te sogo te Israel dagego koneiagameo, ena tama ena God, te duga Genuai Bidi da waibao. Ena te Saionde bidibao, ena bulu du deli digi dao. Te Jerusalem eno te ena taun naga pedelama, te gasa hani dabe augwaligo boi bidi homu eyu, te tomoba ma pogobeo.
JOE 3:18 Te sogo wain gi pedalama, te bulu du mesega sigulaibao, te bulmakau hauwa te dwasianu bulu du dabede bidalueibao. Te Juda we bidi dabego wę hauwa elalueibao. Wę me deli te Genuai Bidigo bedu gomo gudama, te Odogo Bulu Tǫ Te Ni Akas Elalubo madiba dulaibao,” wai.
JOE 3:19 “Te Isip dabego tǫ te wa pai bulu pedelaibao, te Idom dabego tǫ da, te olo bulu tiwai pedelama, bidi tede me bidigobeo. Magi baso meni, te hani sigo te Juda dabe dali hwįnama, tama te magi dwai sę isąwai we bidi olodali elali.
JOE 3:20 Tialima, eno te we bidi elali bidi dabeba te tobage kolesaga yali wei ponama, te augwali elaibao,” wai. “Eno te dwai sę yali bidi deli me gedelegobeo. Tialima, te Jerusalemde sesemane bidibo we bidi dabe me, te Juda gasa badu pedaide bidibo me, ena Genuai Bidi ena te Saion bulu dude bidiyu, te sesemane tonalueibao,” po wai dao.
AMO 1:1 E po da, te bidi Amosgo pusali po dao. Amos aga te Tekoa taun bidi da, tama aga te sipsip kibu hauwa page bidi me deli bidai dao. Godigo agabolo te Israel hanide e po mani sogo, aga te nade subo nai tiwai gilama yali. Te sogo Usia te Juda tǫ kantri king bidibo sogo, me te Jeroboam, te Joasgo ogwa, te Israel tǫ kantri king bidali. Te sogo Amosgo te nade subo nai tiwai sulama da, teda nosali badu te kibu be si bidama da, te genuai tǫ mali yai.
AMO 1:2 Te Amosgo e bukude wabo po page e tiwai dao, Genuai Bidi te Saion bulu dude bidiyu, te agai i hai genuagia mu udubao. Awe, aga tede te Jerusalem moni taunde bidiyu, sębę ebaso, te agai dogonigo hwą bomonama obao. Tama tibaso, te sipsipgo tuabo wiegi yai nosai dabe sasia pobao, me te Karmel bulu dude elalubo ni yabe dabe, tigidali wa pobao.
AMO 1:3 Genuai Bidigo wabo po e dao, “Hauwa sogo te Damaskus hanu we bidi, te Siria tǫ kantri bage, augwaligo dwai sęgę sabo sę idu geai. Tebode augwaligo dwasianu toma me nabeo. Menio. Augwaligo te Gileat tǫ we bidi dabe dali dwai sębę eyu mu dolali, tialima, mu tama, eno te Damaskus dabeba dwai dene mu mabo sę yaibao,” wali.
AMO 1:4 “Awe, eno isi te king Hasaelgo sę yani genuai wiegi yai beba te sia tula palaibao, tama te isigo te king Benhadatgo taun ulaibao, te bomai obo elalubo taun dao.
AMO 1:5 Eno te Damaskus genuai taun te genuai sunumi dąų walobo ain ba dabe te togolama, mimia sąwaibao. Tama eno te Odogo Bulu Avende bidali we bidi tigidali sela sąnama, ela gudulubadi, tama eno te tǫ kantri Beteden king bidi me ela gudulaibao. Tama te Siria hani bage te tǫ kantri Kirba kalabus paibao, te giliga pedalubo badu elalubao.” Te po da, Genuai Bidigo po dao.
AMO 1:6 Genuai Bidigo wabo po e dao, “Hauwa sogo te taun Gasa we bidi dabe, te Filistia tǫ kantri bage, augwaligo dwai sęgę sabo sę idu geai. Augwaligo te tebode dwasianu toma me nabeo. Menio. Te Gasa dabego te bulu hani bage me deli sese selama, te kantri tǫ Idomba kalabus sę emainogo sela pali. Tialima, mu tama, eno te Gasa dabe augwaliba dwai dene mu mabo sę yaibao.
AMO 1:7 Tialima, eno te isi Gasa taun obo tomoba tula palaibao, tama te isigo te taunde bomai be dabe ulaibao.
AMO 1:8 Te Filistia tǫ taun dabede eno tama tiaibao, eno te taun Asdot hani bage tigidali ela gudulama, tama eno te Askelon king me ela gudulaibao. Tama eno te taun Ekronba me te dwai sęgę mabo sę ilama, tama te Filistia tǫde bidali we bidi dabe sese eno ela mu silaibao.” Te po da, Genuai Bidi Godigo wai po dao.
AMO 1:9 Genuai Bidigo wabo po e dao, “Hauwa sogo te taun Tair we bidi dabego dwai sęgę sabo sę idu geai. Augwaligo tebode dwasianu toma me nabeo. Menio. Augwaligo te Israel we bidi hani me deli sese ela gudulama, te tǫ kantri Idomba kalabus sę emainogo sela palio. Polobadu augwaligo te Israel hani bidi augwali dali te po me deli dąų walama, te augwa hodobo deliba bugagia bidinao wali, tiali goli augwaligo te dąų walali po bolali. Tama tialima, te mu tama, eno te Tair dabeba dwai dene sęgę mabo sę yaibao.
AMO 1:10 Eno te Tair taun obo dabeba te isi tula palama, tama te taunde bomai be dabe te isigo dela silaibao,” te po wai.
AMO 1:11 Genuai Bidigo wabo po e dao, “Hauwa sogo te Idom tǫ kantri we bidigo dwai sęgę sabo sę idu geai. Augwaligo te tebode dwasianu toma me nabeo. Augwaligo te Israel hani we bidi dabe pobeasa pali, te augwa ama dabe digi te augwali bobage hwą ge bainatgo elalio. Te augwali hobede eyu, tau sabo homu eyu, tama augwali tagalabo homu dwasianu me ebeo. Mu menio. Augwaligo haliga sębę ebo wado yabo homu sębę genuai mu elama, posolo mu yai, tama te haliga sębę yali me silibeo. Te me elalualio. Tialima, mu tama, eno te Idom dabe augwaliba dwai sęgę mabo dene mu ilaibao.
AMO 1:12 Eno te isi aiyaba tula palama, tama te Teman taun, me Bosra taun sigo elalubo bomai be dabe te isigo domainu ulaibao,” te po wai dao.
AMO 1:13 Genuai Bidigo wabo po e dao, “Hauwa sogo te Amon we bidi dabego dwai sęgę sabo sę idu geai. Augwaligo te tebode dwasianu toma me nabeo. Menio. Augwaligo te tǫ dage me badu sainu, boi hwįbo sę ebadi, te tǫ Gileat bulude augwaligo te wai haliga elalubo we dabe haliga hwągo aluali. Tama tialima, mu tama, eno te Amon dabeba dwai sęgę mabo dene mawaibao.
AMO 1:14 Eno te moni taun Raba aiyaba isi tula palama, tama te taun bomai be dabe isi ulaibao. Te ami bidi augwa boi hwįbo sogo, te i hai bomonama weyu, tama te hwįbo bomai pedalu, te bomai wali me deli te dwai sogo pedalubo tiwai yaibao.
AMO 1:15 Te boi bidi dabego te Amon king aga ofisa bidi dabe dali, augwali te gasa buluba kalabus igi painu sela paibao.” Te po da, Genuai Bidigo po dao.
AMO 2:1 Genuai Bidigo wabo po e dao, “Hauwa sogo te Moap kantri we bidi augwaligo dwai sęgę sabo sę idu geai. Augwaligo te tama sęgę sabo sę me edu gęyu, tama augwaligo dwasianu toma me nabeo. Augwaligo te Idom kingba dwai sę iduama, te aga ela muanio. Tama nosali aga nogi mu dolainogo eyu, augwaligo aga dili dabe te gų pagede ma guda selama, te isiba ulama, te buai dali tubo keli kambang tiwai pedelali. Tialima, mu tama, eno te Moap dabe augwaliba te dwai dene mabo sęgę mawaibao.
AMO 2:2 Eno isi te Moap kantri tǫba tula palama, te Keriot taunde elalubo bomai be dabe te isigo daibao. Tama te genuai boi hwįaibao, te ami bidi dabego i hai weyu, te bu wabo nai biugel bomonama ponaibao. Te tama tebo sogo te Moap dabe ela silama, isaibao.
AMO 2:3 Eno te Moap king ela mubadi, te aga ofisa dabe dali tigidali ela mueibao.” Te po da, Genuai Bidi aga po dao.
AMO 2:4 Genuai Bidigo wabo po e dao, “Hauwa sogo te Juda tǫ kantri we bidi dabe augwaligo dwai sęgę sabo sę idu geai. Augwaligo te tama tibo sęde augwaligo dwasianu toma me nabeo. Menio. Ena da, Genuai Bidi dao, tiali goli augwaligo eno bomo yai po sela sąyu, te eno augwali ola mani po augwaligo wali me pabeo. Augwaligo homu kolesaga umuna selama, geda muyu, ena wali munu ma pabeo. Magi baso meni, augwa te tibo god dabe wali pidu, te augwa wąį nǫų dabego yali sę tiwai yali. Tialima, mu tama, eno te Juda dabe augwaliba te dwai sęgę mabo dene ilaibao.
AMO 2:5 Tialima, eno isi te Juda tǫba tula palama, te Jerusalemde bomai be dabe isigo dela silimainu ilaibao,” te po wai dao.
AMO 2:6 Genuai Bidigo wabo po e dao, “Hauwa sogo te Israel we bidi dabe augwaligo te dwai sęgę sabo sę idu geai. Augwaligo te tama tibo sęde dwasianu toma me nabeo. Tialima, mu tama, eno augwaliba te dwai dene mabo sę mu yaibao. Magi baso meni, te Israel dabe augwa abagi dabego augwaliba negeli somainu ilali, tialima augwa te abagi dabego te negeli sali wei ponabo usu meni baso, te negeli mani bidi dabego augwa te abagi dabe pageabi ilama, tama augwali te gasa bidigo olo sę ebo bidi me olo sę ebo we pedalumainu yali. Tama tebogo te Israel dabe mebago meba bidi dabede augwa negeli mani mone wei ponama salio. Hobede ya, te abagi dabego te magi dwai sę me isąwai, te augwaligo sali negeli te dwasianu tama, te olo sągą nadoba su abelibo mone usu nama goli, tialima te meba Israel dabego augwali homu dene me ebeo. Menio.
AMO 2:7 Augwa te bomo kimi meni yai bidi, te augwa digi augwa tau sabo usu meni yai bidi dabe, te augwali aiyaba elaluama, tama augwa te magi nai meni yai bidi dabe ela gudulubo dao. Bidigo me, aga ayago me, te olo sę ebo we deliba naga penani igi pabo dao, te tama tiali kolesagade augwaligo eno genuai nogide hale mu ilibo dao.
AMO 2:8 Te tigidali lotu wabo bede te augwa abagi dabede negeli sali name ugwade godege piyu ebo dao. Augwa te name ugwa sabo, te augwa abagigo augwalide negeli sali wei ponomainu dąį ilibo sę tiwai eyu ebo, tiali goli augwaligo te sali name ugwa te augwa abagi dabeba ma mabo meni. Tama augwaligo te augwa negeli sali wei ponabo usu meni yai abagi dabe po tų ilama, te augwa wain wę sali, te po tų abelibo tiwai ebo dao. Tama augwa te wain wę te augwa Godigo be tomode tubo dao,” wali.
AMO 2:9 Tama Genuai Bidigo te po me obao, “Dage Israel bage, eno we bidi dabe, eno digi dage tau sabo homu elama, eno te Amor dabe dolali. Te hani bidi dabe augwali te bobobage mu, te bobobage ni tiwai elama, augwa bomo te ni kaligo bomo tiwai yai goli, tama eno te Amor dabe mu silai dao.
AMO 2:10 Hasia bolo eno digi dage te Isipde selama, te dage odasa asai. Ena dage asobadu polasa peyu, te masigi kemi tǫde bididubadi, te kibu be bidi sese si, 40 yia yali, tama te tudi badu eno te Amor dabe dolama, dageba te augwaligo tǫ mawai dao.
AMO 2:11 Eno dagego ogwa dabe meba sa muyu, te profet bidi pedalumainu ilali, tiali goli dagego augwali habu seleyu, te augwaligo eno po pusulamuo po wali. Tama eno te gesi ogwa bidi meba sa muyu, te Nasa bidi pedalumainu yai. Tiali goli, dagego te Nasa bidi dabeba po bomo yai obaso, augwaligo te dąų walali po togolama, te wain wę tumainu ebo sę ilali. Te mu dawe, ma meniwe? Eno homu te mu dao. Ena Genuai Bidigo, eno te po wai dao.”
AMO 2:13 Genuai Bidigo po ma weyu, te po wai, “Tialima, megi da, eno dage aiyaba elaluaibao. Tama dagego te genuai sęgąį nai tolai bidigo tigi dene ebaso, gela wabo tiwai mu yaibao, te aga tudi badu dene ebaso wabo po waibao.
AMO 2:14 Te sogo te bomonama udabo bidi dabe, te augwali wi painu ebo usu me egobeo. Te bomai bidi dabego bomo mu meni yaibao. Te ami bidi dabe augwa digi bugagia bidainu tau sabo me usu egobeo.
AMO 2:15 Te enesigigo boi hwįbo bidi dabe te augwa bomo elama dolalu, hwįainu ebaso, usu me egobeo. Te bomo elama polo udabo bidi dabe augwa wi painu ebaso, usu egobeo. Te hosde dugulama boi hwįbo bidi dabe, augwali me wi me pogobeo. Menio. Te boi bidi dabego augwali ela mueibao.
AMO 2:16 Tama te eno po tų ebo side, te wi munu me isąwani ami bidi dabe me, te augwa boi hwįbo doado bage kidilama, olo tama wi paibao. Ena Genuai Bidigo eno te po wai dao.”
AMO 3:1 Dage Israel, dage tigidali hani Genuai Bidigo dage Isipde ma dobola selama, odasa asali, dagego agai dagebolo mabo po odiąo.
AMO 3:2 Agai te tiwai po obao, “Te haniani we bidi hani hauwa te tigidali tǫde elalubao. Tiali goli, eno dage Israel hani deli naga te ena hani da wainu dąį ilama, dią selama, te eno dage bugagia tonalubao. Tama tialima, eno suali, dagego dwai sę ebo kolesaga te genuai ebaso da, teda eno dagego te dwai sę tigidali wei ponoyu, te dageba dene mabo sę yaibao,” te po obao.
AMO 3:3 Te hasia bolo bidi si dugulama, po mia sisąwai, magi ilama te bidi augwa si talua gasaba pobaso usu yaibawe? Menio.
AMO 3:4 Te bomai hasa laiongo te hasa me deli te buside sisąbaso, magi baso agai i waibawe? Te ogwa bidi bomai hasa laion me deli te masigi dedage tomode bididu, te aga hasa me ela tusiąbadi, agai i waibawe? Mu menio.
AMO 3:5 Te bidigo te ba kę hanisiąbadi, te ba te kę tomoba pogowe? Woo, pogobeo. Te hasa me deli te kę tomoba pisąbadi, magi ilama te kę pedegalugowe? Woo, tegobeo.
AMO 3:6 Te bu wabo nai biugel te taun me deli tomode bu obaso, te boi hwįabo bidi asobao po pusubo tiwai ebo si da, te hanu we bidi augwa wi homu yaibao, agawe? Magia, wi yaibao. Te tiwai naga, te taun me deli dolobaso, dagego homugo Genuai Bidi Godigo te dolabo nai tagala palai dao homu ebo da, agawe? Magia, tagala palai dao.
AMO 3:7 Mu tamao, tigidali sę God Genuai Bidigo yabo homu ebo sę, agai aga sę bidi dabebolo hasia po pusaibao, te profet dabeba waibao, tama nosali agai wali po gilama te sę ebo dao.
AMO 3:8 Te bomai hasa laiongo i bomonama wabo odobo si da, te bidi aga wi homu ebo meni da, agawe? Awe, aga wi yaibao. Te God Genuai Bidigo po bidi me deliba pusubaso, te bidigo te po pusubo meni da, agawe? Menio. Agai pusaibao. Te Amosgo wali po dao.
AMO 3:9 Te taun Asdot king bidi bidibo pesage genuai bede bidalubo bidi dabeba, me te kantri tǫ Isipba i waliyu, te augwaliba te tama po walao, “Dage tigidali pelama, te Samaria hanu pąde elalubo bulu duba sisinigi pelama, te subigila tedelama bilalubo we bidi suao, te augwaligo ebo te tobage dwai kolesaga dabe sueibao.”
AMO 3:10 Genuai Bidigo te tama po wali, “Te Samaria we bidi augwaligo te nai wi siyu, hwįbo kolesaga eyu, te nai hauwa selama, te augwa bomai be dabe pągąnani. Augwa te doloba pai kolesaga me konebeo. Mu menio.
AMO 3:11 Tama tibaso, te boi bidi hani me deli asama, te Samaria bagego tǫ kantri tomode bilama, tama te taun bomai obo dabe dolama, tama augwaligo te genuai bomai be dabe aluama, tama tomode elalubo nai doado bage tigidali saibao,” po wai dao.
AMO 3:12 Te Genuai Bidigo po ma weyu, te po wai, “Te bomai hasa laiongo sipsip kibu me deli ela tubaso, te sipsip tonalubo bidigo te sipsip ma dobola sainu ebaso da, teda agai te tigi pedai naga munalubo sueibao, te sągą dili si, ma olo pedai, te tama sueibao. Te Godigo te tobage kolesaga tiwai te Samaria hanude bidibo Israel we bidiba yaibao, te hanu te Israelgo genuai tǫ kantri elalubao. Te we bidi augwa wiegi yai homu pemene elalu bidai, augwali te dolaibao. Te augwali dwasianu hani dabe naga te bugulama me bidaibao. Te taun wiegi yai doado bage tigidali dolai tiwai elalu, te pibo sai bet nigali sągą me badu naga elalubo tiwai yaibao,” wai dao.
AMO 3:13 God, Genuai Bidi Tigidali Bomo Elalubo Bidigo, agai te tiwai po wai, “Dagego olo bugagia munama, te Jekopgo bulai wąį nǫų dabe augwaliba te po walao.
AMO 3:14 Eno te Israel dabeba augwa yali dwai sę wei ponobo sogo, teda eno te taun Betelgo alta sai dabe dolaibao. Tama eno te tigidali altade elalubo gąų yai nai kom dabe alueibao, tama te kom gąų dabe te tǫba tutula palaibao.
AMO 3:15 Te eno te bidi dabe augwa te kedau sogo bidainu sę yani wiegi yai be dabe dolaibao, te augwa giliga posolo ebo side bidainu sę yani, te tobage sawi yai be me dolaibao. Te be dabe augwa te moni hasa elefan kelego au ilali, augwaligo te tigidali alulama, olo nai hogomu tiwai pedelaibao. Te tigidali genuai be dabe me mu dolaibao,” Genuai Bidigo te po wai dao.
AMO 4:1 Dage Samaria we dabego, te po odiąo. Dage mu nisalio, te Basan bulude elalubo wiegi yai bulmakau dabego nosai hauwa tulama, nisibo tiwai pedelali. Dagego te bomo kimi meni yai we bidi dabeba dwai sę ebo dao. Tama dagego te magi nai doado bage meni yai bidi dabeba sęgę menama, te dagego augwali dwasianu hobede me ebeo. Menio. Dagego te duga bidi tonalu, te augwaliba e tiwai i weyu, “Te tubo bomai ąį hauwa sesao. Da gęǫ page yaibao,” wabo dao.
AMO 4:2 Genuai Bidi Tigidali Bomo Elalubo Bidi aga te wiegi yai doloba pai kolesaga ebo God dao, tama tibaso agai te tama bomai po dąų walali, “Mu tama, me sogo deli pedalubo si da, te boi bidi augwaligo dage te gąų yai bisigigo kekelama, dage sela paibao. Awe, dage tigidali te pis sųgų daboasa holobo gąų yai nai hukgo sųgų sabo tiwai yaibao.
AMO 4:3 Te augwaligo dage te moni hanu taungo obo banis aluali madi dabedu buluba sela pelama, tama augwaligo dage te pesage Harmon habuba sągi paibao,” Genuai Bidigo te po obao.
AMO 4:4 God, Tigidali Bomo Elalubo Genuai Bidigo te tama po wali, “Dage Israel we bidi dabeo, tegoba, dage polo pepela yao. Dagego dwai sęgę sabo sę te lotu wabo pesage taun Betelba egi piąo. Te dage te lotu wabo pesage te taun Gilgalba pelama, te dwai sęgę sabo sę genuagia umabo sę egi piąo. Tama tiyu, tigidali sogo kigamude dagego te ofa yabo hasa dabe sela piąo. Te sela wabo sogo tigidali side, dagego te nogo si wali naide te me deli togolama, enaba mawainu sesao.
AMO 4:5 Tegoba, dagego te eno bomai po boloyu, dagego te yis elalubo bret enaba ofa eyu, te buba hwi wabo ofa tiwai yao. Te dagego duga homugo enaba ofa yainu, te nai hauwa sesebo sogo, tegobao, tebode duga digi duga nogi ugwaba sobao. Dagego te tama tebo tobage kolesaga wei homu ebo dao,” te po wali.
AMO 4:6 Genuai Bidigo te tama po wali, “Awe, dagego tama tebo dao. Tama tibaso, eno tama, eno te genuai nasi te dagego taun tigidaliba pedalumainu ilama, te tigidali bulude dage nai meni yai. Tiali goli, te dage enaba ma geasa asobeo. Mu menio.”
AMO 4:7 Genuai Bidigo te po wali, “Ena digi eno te tulubage paliali, te tulubage tulubo sogo te nai wiegi yai pedalumainu ilibo tulubage te eno paliali. Eno te tulubage te taun mebaba tagala palali, te gasaba me tebeo. Menio. Te gi mebago tulubage sali. Tialima, te gasa gi dabego me sabeo, menio, tama tigidali te sasia palio.
AMO 4:8 Te taun me badu we bidi augwali wę nogonego mu salio. Tama tialima, bomo meni baso, dwai biliyu, augwa te gasa taun dabeba wę gege palio. Tiali goli, wę sǫą palio. Eno te tama sę me yali, tiali goli te dage enaba ma geasa asobeo. Mu menio,” wali.
AMO 4:9 Te Genuai Bidigo te tama po wai, “Hauwa sogo eno te dagego gi dolomainu eyu, eno te posolai wali tagala palai. Me, te hauwa sogo eno te dagego gi nai yabe aminawai holomainogo ilai. Te kuli mano dabego dagego gi nai dabe, me wain gi dabe, me ni kaya fik, me oliv ni dabe tula silimainu yai. Tiali goli, dage enaba ma geasa me asobeo. Mu menio,” wali.
AMO 4:10 Genuai Bidigo po ma weyu, te tama wali, “Eno dage dolabo dwai gasi mu tagala palali, eno te Isip dabe augwaliba yali tiwai yalio. Te boi hwįbode eno dage gesi ogwa bidi ela muyu, eno dagego hwįbo hos dabe te boi bidi dabego somainu ilalio. Te eno dagego te hwįbode isali bidi dabego tigigo te dage bidibo pesagede te dwai kugumini ebo dagego denami odomainu ilalio. Tiali goli, tede me dage enaba ma geasa me asobeo. Mu menio,” wali.
AMO 4:11 Te Genuai Bidigo te po wai, “Eno dage meba dolali, eno te taun si Sodom me Gomora dolali tiwai yali. Me ma, te dage me bidalubo hani, dage te isi dage me te isigo uludubo tiwai ebadi, tialima bidi dabego te iside sela sąwai. Tiali goli, dage enaba ma geasa me asobeo. Mu menio. Tama tibaso, eno dage Israel dabeba dwai dene mabo sę yaibao. Eno te tama tiaibao, tialima dage eno po tųba sabolabo sisi elaluao, dagego God da. Ena Genuai Bidi, eno te po wai dao.”
AMO 4:13 Godigo naga te bulu du dabe nigali, te wali me pedalumainu ilibao. Agai aga homu kolesaga te we bidibolo haniliyu, ola mabo dao. Agai bomogo naga te be posobo ula hasegeleyu, tama be hulibo dao. Aga te bulu du dabe daide ugwadu biliyu, te tǫ habu tigidaliba tonalubao. God, Tigidali Bomo Elalubo Genuai Bidi, aga digi te kolesaga ebo dao.
AMO 5:1 Dage Israel hani dabe, dagego te isai bidide wabo balia odao. Megi ena, Amos, eno dageba te balia obao, magi baso meni, dage te isai bidi tiwai yaibao.
AMO 5:2 Te tiwai balia obao, “Te gesi wegi Israel, aga degasa dulalio, ela mubaso, te ma hodalubo usu ebeo. Aga te aga tǫde pila mubao, te aga tau selama hodolabo bidi deli me meni dao.”
AMO 5:3 Magi baso meni, God Genuai Bidigo te Israel hanibolo te tama obao, “Te Israel taun me deligo te ami bidi dabe bidi sese umabo 1,000 te boi hwįboba tagala palama, te bidi sese a naga 100 ami bidi naga ma geasa asaibao. Te gasa taungo te bidi sese a naga 100 ami bidi tagala palu, te ami bidi nogo si naga ma geasa asaibao.”
AMO 5:4 Te Genuai Bidigo Israel dabeba te tiwai po obao, “Dage isidali weyu, tama bidimainogo eyu, dage enaba geasa asiąo.
AMO 5:5 Dage te gasa tǫ kantri taun Berseba iba pelama, lotu me wagi pelamuo. Dagego ena te Betelde gegebo sę me elamuo, magi baso meni, te taun da mu dolaibao. Dage te u taun Gilgalba pelama, lotu me olamuo, magi baso meni, te Gilgal we bidi augwali gudulama, te gasa buluba kalabus paibao,” wali.
AMO 5:6 Dage te Genuai Bidiba pobaso da, te dage isisąma iyu bidaibao. Tiali goli, te dage agaba pisąbaso da, teda aga te genuai isi tiwai asama, te dage Josep aga bulali hani ulaibao. Tama te isigo te Betel hanu bidi dabe daibao. Te bidi me deligo te isi sula sawainu ebaso, usu me egobeo. Dage te Genuai Bidiba piąo, tama dage peyu da, teda dagego te bidada peyu, bidada pabo ula saibao
AMO 5:7 Ae, hobede ya, dage po tų ebo dolobo bage, me dage te doloba pai kolesaga aiyaba elalubo bidi dabe, te dage tigidali mu dolaibao.
AMO 5:8 Godigo te hǫ dabe pedalumainu ilama, tama tigidali ula ebo nai ugwadu elalubao. Agai te be huliali hasegeleyu, tama te be posobo dao, te ula elalubo hasegeleyu, tama be hulibo dao. Tama agai te tamu ąį asomainu i ola asama, tama agai te tǫba ugwadu gea palagasaibao. Agai te bomai bidi dabe me doliyu, te augwa bomai be dabe me dolobo dao. Godigo digi te tobage tigidali sę ebo dao, tama aga nogi e tiwai elalubao, Genuai Bidi dao.
AMO 5:10 Te doloba pai bidi dabe augwali te po tųba sabalobo sogo, te mu po naga weyu, te dage dwai kolesaga ebo bidi dabeba wado po obaso da, teda dagego te doloba pai bidi dabe wei homu me ebo meni.
AMO 5:11 Me, dagego te magi nai meni yai bidi dabego nai sainu anoma eyu, te dagego augwaligo tubo nai wi sabo dao. Tama tiyu, dagego augwali agabo dao. Tama tibaso, dagego dwagi yai be dabe masigigo sę yani goli, dage te bede bidigobeo. Te dagego wiegi yai wain gi bulali goli, dagego te gi dabede wain ąį me tugobeo.
AMO 5:12 Magi baso meni. Dagego sęgę dabe dwai mu elalubo eno koneani, tama eno koneani, dagego sęgę hauwa mu elalubao. Dagego dwai sę te wiegi yai bidi dabeba ebao. Dagego te dobo sę ebo bidi dabego nogode te mone ge dabe sabo dao. Tama te po tų ebo si, te magi nai meni yai bidi dabego gasa bidi dabe aiyaba elaluidali weyu, dagego te po tų dolobo dao.
AMO 5:13 Te we bidi augwaligo te tobage dwai kolesaga ebo sogo, te kolesaga koneai bidi, doloba pai bidi, agai pedauwali pania sai elalu, te agai po me deli augwaliba me wagobeo.
AMO 5:14 Dagego ma geasama, te dwai kolesaga wali pabo tųdu pabo tagalao, tama dagego te wiegi yai kolesaga naga wali piąo Tibaso, te dage bugagia bidaibao. Dagego te tama po wabo dao, “God, Tigidali Bomo Elalubo Genuai Bidi, aga da dali bidibao,” wabo. Dagego te wiegi yai kolesaga ebaso da, teda mu tamao, te God dage dali mu bidagameo.
AMO 5:15 Dwai kolesaga ebo tudiba muao, te wiegi yai kolesaga naga godolo eyu, wali pao. Dagego doloba pai po tų naga yao. Te dagego tama tiyu da, te Genuai Bidigo dage dolisąwai dwasianu me bidibo Josepgo hani bage homu dene eyu, tau saibao.
AMO 5:16 Tialima, dagego te dwai kolesaga ebaso, tialima eno Genuai Bidigo aga Tigidali Bomo Elalubo God, agai te tiwai po obao, “Eno dwai dene mabo sę dageba yagasaibao,” wali. “Tama tialima, augwaligo dagede taun sunumi dabede gela bomo elama, ela paibao. Te we bidi deliba sisinibo madide me, te we bidi augwali noma dwai mu siyu, gela udaibao, te taun dabe tomode. Tama me augwa te taun bulu badu bidalubo olo we bidi dabeba i weyu, te balia ebo mu konea pai bidi dabego te bidi isaide te homu dene elama, balia wabo tiwai tau sagasomainu yaibao, dagede. Me te wain gi dabede bidaluali bidi dabe wiegi yai homu pemene ebo tagalama, te augwa dwai gela mu waibao.” Genuai Bidigo te po obao.
AMO 5:18 Dage tigidaligo homugo te Genuai Bidigo Bodolu Side asesa pedalumainao homu ebao. Tiali goli, dage hobede mu ebao. Mena wiegi yai sę mu dageba te side pedelaibawe? Dagego homugo te be posobo si da homu eba, agawe? Mu menio. Te be hulialubo side naga dao.
AMO 5:19 Te si asobo, dage geda mugobeo. E tiwai yaibao. Te bidi me deli te dwai hasa laionde wi pabo tiwai elama, tama aga te laion hasa tagalama, wi pobadi, te gasa moni dwai hasa me nogi bea te aga deliba gesabidi si unulama, tama beago aga gąų kelainogo yali. Tama te bidi te hasa bea wi pelama, tama aga be tomoba wi peyu, sana pabo homu elama, bugagia bidaiba homu yai. Tama toma tumainogo, aga te be dagaba nogo tola sigi pabo tiwai yali, tiali goli, tegoba, te be dagade bidali dwai hasamanigo aga gąų kelai dao, tama te bidi isai dao.
AMO 5:20 Awe, te tiwai me, te Genuai Bidigo muani bodolu side te be posobo ula me dwasianu pedalugobeo. Mu menio. Te be hulia sabo genuai sę pedelaibao. Te Amosgo po wabo silalio.
AMO 5:21 Genuai Bidigo te tama po obao, “Eno dagego te genuai lotu wabo si dabede homu pemene isąma, te eno augwali homu godolo me egobe dao. Hagelabo homu mu ebao.
AMO 5:22 Dagego te isiba tigidali ulama dabo ofa yabo nai sesebaso, me wit me ofa ebo goli, te ofa denami ebo eno me odogobeo. Dagego te bulmakau dabeba nai madubaso, te augwali nisalio. Tama dagego te bulmakau dabe te enaba ofa tiwai eyu, buba hwi wainogo sesali goli, eno te ofa dabe me sula tagalaibao.
AMO 5:23 Dagego lotu wabo balia munu me elamuo. Tama dagego te gita dabe me eligio. Ena odobo hagela ebao.
AMO 5:24 Tialima, eno homugo dagego te po tų ebo kolesaga dolo naga eyu, te gasa wiegi yai doloba pai kolesaga dabe naga eyu, tama te kolesaga sesemane sogo mu elaludu, te me sula sisąbo genuai wę me deli elalubo tiwai elalubaso, usu dao,” wali.
AMO 5:25 “Dage Israel dabe, te kibu be bidi sese si, te 40 yia ena dage dali te masigi kemi tǫ bulu pesagede bilali sogo, eno dagebolo hanalu, enabolo dagego te haniani ofa yao po wai menio.
AMO 5:26 Tialima, megi da, dagego ena tagalalio, tama dagego duga digi te nigali dwai god dabe piksa noma siba lotu obao. Tama dagego te me deli nogi king Sakut nogi yali, te me deli te nogi Kaiwan nogi yai, te aga piksa noma te dagalu hǫ tiwai nigai. Tialima, te eno dage te gasa tǫ pedai kantri me deliba kalabus igi pomainu tagala palaibao, te Damaskus taun pedai u badu. Eno dage te buluba tagala palobo sogo, dagego te tibo god si tolasa paibao.” Genuai Bidi aga te tama po obao. Aga nogi da, e tiwai, Tigidali Bomo Elalubo God dao.
AMO 6:1 Amosgo po e dao. Hobede dao, dage Jerusalemde bugagia dugulalubo we bidi, me te Samaria taunde bidibo we bidi, dagego te tiwai homu ebao, te magi nai me deligo dage me dologobe da homu ebo dao. Te hobede ebao, dage te polalubo kantri tǫ Israel gegunai bidi dabe, te dagego augwali tau somainogo te we bidi dageba asidu gebo dao. Hobede mu ebao, dage tigidali dolaibao.
AMO 6:2 Dage pelama, Kalne taun sugi pao. Tama nosali dagego te Hamat genuai taun sugi pao, te dage ma bilama, te Get taun me sugi pao, te kantri Filistia tǫde elalubao. Dagego homugo te taun dabego bomo te dage Juda me Israel dabego tǫ kantrigo bomo edelai da homu eba, agawe? Te dagego homugo augwaligo tǫ te genuai mu elama, te dagego tǫ kantri tiwai si meni da homu eba, agawe? Awe, tiali goli augwali dolai dao.
AMO 6:3 Hobedagia mu. Dagego homugo te dolobo sę dageba pedalugobe da homu ebao. Tialima, hobede mu ebao, te dagego ebo dwai sę dabego te dwai sogo pąba pedalumainu sesebo sę ebo dao.
AMO 6:4 Dage mone hauwa elalubo bidi dabe, te wiegi yai pibo bet sai mude olo pila mubadi, te wiegi yai nai bulmakau me nisai sipsip mi tubao, dage dua dao. Te dwai sogogo dageba gesabidi si unulaibao.
AMO 6:5 Dagego te gesi olo balia nigibo sę ebo wei ebo dao, te Devitgo yali tiwai eyu, dagego te wiegi yai musik gagali eyu, te gita gagali me ebo dao.
AMO 6:6 Dagego te genuai kap wain wę hauwa tubo dao. Te dagego denami ebo sawi yai sanda, me ili yai nai te duga tigide denami iliyu mubo dao. Tiali goli, dagego te tǫ kantri Israel nosali dolabo homu dene dwasianu me ebo menio.
AMO 6:7 Tama tialima, dage Israel bage te gasa buluba kalabus sela pabo sogo, dage naga te polasa pabo hani mu tiwai pedaluyu paibao. Tama duga te genuai nai daa tuali tiwai munu ma tugobeo.
AMO 6:8 God, Tigidali Bomo Elalubo Genuai Bidi, Tigidali Nai Tonalubo Bidi, agai te tiwai bomai po dąų wali, “Eno te Israel dabego gagea peyu, te hagoma ebo kolesaga ebo, te eno hagela homu ebao. Te eno augwaligo genuai boma pai be dabe eno haliga sębę yaibao. Tama tialima, eno te augwaligo polalubo taun dali, te tomode elalubo tigidali nai te augwa boi bidi dabego nogoba mawaibao,” te po wai dao.
AMO 6:9 Te nogo si we bidi naga te deli bede geme me bidiyu da, teda tigidali isaibao.
AMO 6:10 Te bidi me deli isali sogo, te aga deli kaneme bidi me deli asama, te aga tigi selama, ulugi painu yaibao. Tama te deli kaneme hani bidigo te be tomode geme dualalubo bidi i weyu, te tiwai waibao, “Te gasa bidi dabe me bidibawe, ma meniwe?” Te geme dualalubo bidigo te tiwai po wei ponaibao, “Menio,” wali. Tialima, te deli kaneme hani bidigo te tama po waibao, “Pedauwali pania sao. Dago Genuai Bidigo nogi munu me nogi ilamo dao,” te po waibao.
AMO 6:11 Magi baso meni. Genuai Bidigo po obaso, te tigidali genuai be me, dwasianu be dali, te subigila todogola pelama, olo pobele bage hogomu pedelaibao.
AMO 6:12 Dagego homugo te hos kibu dabe te genuai masigi dabe daidu ugwadu udada pabo usu yaiba, agawe? Te menio. Ma, dagego homugo te genuai masigi ugwadu daide te bulmakau dabego te gi tǫ elebo dono kegebo usu yaiba homu eba, agawe? Menio. Te kolesaga dabe mu geda mubao. Tiali goli, te dagego te tobage deli tigi poai kolesaga naga ebao. Dagego te po tų ebo doloba pai kolesaga te bidi isilibo nabi tiwai pedalubao. Tama dagego te wiegi yai kolesaga te dwai ha ebo nai tiwai pedalubo dao.
AMO 6:13 Dagego te taun Lodebar aiyaba elaluali da homu elama, pemene eyu, te dage hagoma eyu, bidibao. Tama dagego duga nogi ugwaba siyu, te po me obao, “Te dena bomogo digi te taun Karnaim sali,” homu ebao.
AMO 6:14 Tiali goli, Tigidali Bomo Elalubo Genuai Bidi agai te tama po wai, “Te eno gasa bidi hani me deli tagala palama, te dage Israelba boi hwįagasomainu yaibao. Augwaligo te dage dali hwįbo sę umabo mu eyu, genuai sęgę mawaibao, te Hamat taun te not badu gagalasa pabo, te wę Araba te saut badu usu nigi paibao,” te po wai dao.
AMO 7:1 Me sogo God Genuai Bidigo te nai me deli te nade tiwai enabolo ola mawai. Eno suali, Genuai Bidigo te kuli mano hani genuai me deli pedalumainu ilali. Te sę bidi dabego te kingo bulmakau dabeba maiabo nosai togolama, te gesi nosai kulubi ma pedalubo sogo da, teda te kuli mano dabe me pedelalio.
AMO 7:2 Te nade eno suali, te kuli mano dabego te tǫde nosai dabe me ni yabe tigidali silai yalio. Tibaso, tede noma siyu, eno te tama po i wali, “God, Genuai Bidio, nago naga we bidi dabe augwaligo dwai sęgę sela sąyao, te Israel dabe dao. Augwali dwasianu hani naga dao, te augwali bomo meni yai. Te nago te kuli mano dabe tagala palama, te Israel dabego dwai kolesaga te tiwai wei ponogi sogo da, tede augwali magi ilama bugagia bidaibawe?” wali.
AMO 7:3 Te po obaso, Genuai Bidigo homu hasegelama, agai te tama po wai, “Nago te nade suali nai, te pedalumainu me egobeo,” te po wai.
AMO 7:4 God Genuai Bidigo enabolo gasa nai me te nade ebo tiwai ola mani. Te nade eno suali, te Genuai Bidigo te isi dodolama, te aga we bidigo dwai sę yai baso, agai augwaliba dene mawainu ebo suai. Tama te isigo te aiyanu mu dulai tamu wę te isi delama, te wę sula selama, te nosali te isigo te gi bulabo tǫ me dabo sę gagalalio.
AMO 7:5 Tialima, megi da, eno tama po wai, “God, Genuai Bidi, woo, nago te sę me elamuo. Nago we bidi dabe te dwasianu hani naga elalubao, te augwaligo bomo elalubo menio. Te nago augwaliba te tobage dwai dene mabo sę ebaso da, teda augwali mena gilama bugagia bidaibawe?”
AMO 7:6 Tama tibaso, Genuai Bidigo homu ma hasegelama, te po wai, “Te sę me, pedalugobeo,” wali.
AMO 7:7 Te Genuai Bidigo enabolo te gasa nai ma te nade tiwai ola mawai. Eno suali, Genuai Bidi te be me deli daga pąde dolaluali. Te be sę yani bidi dabe, augwaligo te be sę idubadi, augwaligo te dwasianu ain walobo hobi tolalu, te be daga dolo dolalubowe, ma meniwe, tama usu sainu yai dao. Tama te be daga dabe dolo tama dolaluali. Tama eno suali, Genuai Bidigo te hobi tolaluai.
AMO 7:8 Tama agai enabolo te tiwai po hanalu wai, “Amos, nago magi nai sualiwe?” Tama eno te po wali, “Te be dodolabo ain elalubo hobi me deli suali.” Tama agai enabolo te tiwai po wali, “Odao. Eno te hobi tolalubo sę ebo te eno ena we bidi augwaligo ebo kolesaga sueinu ebao, te eno augwali suali, te be daga dolo dolalusąbo tiwai suali. Tama tibaso, eno augwaligo dwai kolesaga wei ponaibao homu eyu, te eno homu ma hasegelabo usu egobeo.
AMO 7:9 Te bulu te Israel dabe, te augwali Aisakgo wąį nǫų hani dabe, te augwaligo lotu wabo pesage dabe te mu dolaibao. Tama eno te king Jeroboamgo hani dabe mu silimainu ilaibao,” te po wai dao.
AMO 7:10 Te Amasia, aga te Betel taun pesagede lotu wabo pris bidi dabego tobolu bidi, agai te Israel king bidi Jeroboamba po ola tolali. Agai te tiwai po wali, “Te nago tonalubo tǫ tomode digi te Amosgo te Israel we bidi augwali haliga hodoliyu, dianobo sę eyu, nageba augwaligo boi bidi homu emainogo ebao. Te nago aga sula tagaludubaso da, teda agai pogo te tǫ kantri dolaibao.
AMO 7:11 Amosgo te tama tiwai po obao, ‘Jeroboam te genuai boi hwįbo side me isibaso, tama te Israel dabe te digibulu bulu me deliba kalabus igi paibao.’ Te po wabo dao,” Amasiago te po wali.
AMO 7:12 Tialima, Amasia pelama, Amosbolo te tama po waligi pali, “Profet, nago e Betelde bidibo gudama, wi pao. Nage Juda tǫba ma geasa pao. Nago profet po te Juda we bidiba wagi pobaso, te Juda dabe augwa digi nage mone momainao.
AMO 7:13 Nago te profet po e bulu Betelde pusubo te dago hagela homu ebao. Magi baso meni, kingo te pesagede lotu wabo dao. Tama ede elalubo lotu wabo be da, te tigidali Israel hanigo be dao,” te po wali.
AMO 7:14 Tama Amosgo te tiwai po Amasiabolo wei ponani, “Ena te gasa profet dabe meba tiwai meni, tama eno te profet po wabo sęde mone sabo sę me ebeo. Ena te sipsip dabe tonalubo bidi me deli naga tama, tama eno te ni kaya fik dabe tonalubo sę iduai dao.
AMO 7:15 Tiali goli, eno ena sę idu bidibadi, tama Genuai Bidigo ena tedu selama, enabolo te tiwai po wali, ‘Nage pelama, nago eno po te eno we bidi Israel dabeba pusigi pao,’ wali. Tama tibaso, ena asai dao.
AMO 7:16 Tialima, Genuai Bidigo po odao. Agai te Israel dabede wado po elalubao, tiali goli nago enabolo te profet po augwaliba pusubo te habu selibo dao.
AMO 7:17 Amasia, nago te po wai dao. Tialima, Genuai Bidigo po nage dali megi elalubao. Agai nageba te po obao, ‘Nago we da, te taunde penani sę ebo we pedelaibao. Tama te boi bidi dabego boi hwįagaselama, te nago wai dabe ela mueibao. Te augwaligo nago tǫ selama, gasa bidi dabeba dobawaibao. Te augwaligo nage te dobo kolesaga ebo haiden kantriba sela pelama, tama nage te bulude bidama, isaibao. Tama te boi bidi dabego te Israel we bidi sela peyu, te Israel tǫ taga peyu, te gasa tǫ kantriba kalabus igi peyu, sela paibao,’ Genuai Bidigo nageba te po wai dao,” Amosgo te po wai.
AMO 8:1 Te na ebo tiwai Genuai Bidigo enabolo te basket wa me delide te haniani tau yai nedu du hauwa tede pągąnalubo tiwai ola mani.
AMO 8:2 Te Genuai Bidigo enabolo te tiwai hanalu wali, “Amos, nago magi nai sualiwe?” Eno te tiwai po agabolo wali, “Eno te basket wa me delide haniani tau yai nedu du hauwa pągąnalubo sualio,” wali. Tialima, Genuai Bidigo enabolo te tiwai po ma wali, “Te eno ena we bidi Israel dabe dolabo sogo, te bidi dabego te gide tau inawai nai dabe tuabo sogo pedalubo tiwai yalio. Megi da, te eno augwaliba dwai dene mawaibao. Eno te ena homu munu ma hasegeligobeo.
AMO 8:3 Te sogo te tempel lotu bede bidali we bidi dabego te balia munu me egobeo. Menio. Te augwa gela wabo sę naga yaibao. Magi baso meni. Te isali bidi dabego tigi te tigidali pedai badu subigila munolua paibao. Augwaligo te tigi dabe buluba sela sąbo sogo da, teda te bidi dabego po deli me wagobeo,” wali.
AMO 8:4 Amosgo po e dao. Dage Israel bisnis sę ebo bage, dagego te magi nai sǫą pai meba bidi dabe agayu, aiyaba elaluama, tama dagego te magi nai meni yai bidi dabe te dagego tǫ kantride bidibo dolabo homu ebo bage, dagego odao.
AMO 8:5 Duga digi dagego te tiwai po obao, “Dago homugo te genuai lotu wabo side polo silao homu ebao, tama dago te dena nai dabe te maketba mugi pelama, te bidi dabego abelimainu homu yaibao. Nisu sogo te toma nabo Sabat si siligowe? Da asesa te maketba pabo homu eyu, te dago nai dabe maketba mugi paibao. Tama tibaso, dago mone mubo ugwaba igulama, te dago tibo dąį ilibo sę elama, tama te nai abelibo bidi dabe muma sabo usu sabo skel mueibao.
AMO 8:6 Te dago dwai wit maketde munama, te bidigo abelibo si, te dago genuai mone saibao. Dago te magi nai meni yai bidi mu me deli gegaibao, te dago agaba mabo mone wei ponabo usu meniabo tiwai bidi dao. Agai negeli te genuai meni, te sągą nadoba abelibo mone tiwai naga. Tiali goli, dago aga pageabi elama, aga te gasa bidide olo sę mu ebo bidi pedalumainu yaibao. Tama te bidigo dabolo mone mayu, te magi nai meni yai bidiba mani mone negeli elalubo wei ponodumainu yaibao,” dagego te tiwai po wabo dao.
AMO 8:7 E po odao. Genuai Bidi, te Israelgo aga nogi ugwaba sabo God, agai nogo guni sisu muyu, te tiwai bomai po dąų wai, “Eno dage Israel dabego dwai kolesaga ebode homu kone me gegeda palogobeo.
AMO 8:8 Tama tialima, eno te tǫ mali ilama, te tǫ kantri we bidi tigidali wi dwai mu ilama, gela ola paibao. Te tǫ kantri tigidali badu dwai noma saibao. Te tǫ ugwadu samonama, ma tulalu, te Isip wę Nail asama, te wę bo dabo tiwai elama, te ma kekasa pabo tiwai yaibao.
AMO 8:9 Te sogode eno te giliga tomo yagasu, te nai tubo belo dolo ebo side te giliga iba dega sigulubo tiwai ilama, te be hulia sabogo te giliga tomo elalubadi mu halueibao. Ena God, Genuai Bidi, eno te tama po obao.
AMO 8:10 Te genuai lotu wabo bodolu side, eno te isai bidide homu dene ebo sę pedalubo tiwai ilaibao. Te dagego wiegi yai pemene ebo balia te eno hasegelama, te augwaligo haliga sęgę elalu wabo balia pedalubo tiwai ilaibao. Te dage haliga sęgę elama, gela waibao, te aya ida aga ogwa deli elaluai, te isaide homu sęgę elalu, gela wabo tiwai yaibao. Te augwa we de bidi si te homu dene ola mabo ugwa gudama, te augwa si tobolu nisi tigidali poala sąwani, te augwali sigo homu dene ebo ola momainu yali. Tama eno dage te tobage kolesaga tiwai naga wali pomainu ilaibao. Te dwai sę ebo sogo, te dageba genuai sęgę mu pedalu, te dwai sę ebo silibo sogoba usu naibao,” wali.
AMO 8:11 God, Genuai Bidigo, te tiwai po ma wali, “Nosali eno te dagego tǫ kantri pedaiba genuai nasi pedelabo sę ilaibao. Tama te tigidali we bidi nasi mu yaibao, tiali goli augwali te tuabo naide nasi me egobeo. Te augwa dogoni wa paibao, tiali goli augwa wę tuabo homu egobeo. Magi baso meni, te nasi ebo te naide nasi eyu, wę nogone eyu tobage si menio. Augwali te eno po naga odabo homu naga eyu, te nasi ebo tiwai yaibao. Ena God, Genuai Bidi, ena digi eno tama po obao.
AMO 8:12 Te we bidi augwaligo ena Genuai Bididu asobo po sabo homu godolo yaibao, te augwa tigidali badu tedelama, digibulu wau bilalu, eno po pusubo bidi gegaibao. Tialima, te augwa sainu ebaso, usu me egobeo.
AMO 8:13 Te sogode te sawi yai gesi wegi dabe, me te bomai gesi ogwa bidi dabe te gedu ąįyo page elama, degasa dulaibao, te wę nogonego mu isibo we bidi dabe tiwai yaibao.
AMO 8:14 We bidi mebago te Samaria dabego tibo god dabego nogide po dąų walobo dao. Augwa nogo guni sisu muyu, augwaligo te tiwai po wabo, ‘Mu da, te taun Dango tibo god nogide,’ wabo, ma, ‘Te Berseba taungo tibo god nogide mu da,’ po tiwai wabo dao. Tialima, te we bidi augwali da isama, te augwali ma hodalugobe dao,” Genuai Bidigo te po wai dao.
AMO 9:1 Eno suali, Genuai Bidi te aga be pąde elalubo alta pąde dolalubo suali. Te agai te tiwai po wali, “Te eno be bobobage pos dabe tobolude elao, te be mabo tigidali badu memenege yaibao. Te pos dabe gaga nigilama, te be tomode elalubo we bidi tobolu ugwadu daiba degasa dulama, te augwali ela mumainao. Te isisąwani hani bidi dabe yai baso da, teda eno te boi bidi dabe tagala palama, ela muagasomainu yaibao. Te me deli wi pelama, bugagia bidainu yabo usu me egobeo. Mu menio.
AMO 9:2 Te bidi meba enade wi pelayu, te isai bidi dabego pesagede te tǫ dedage aiyaba dogobaso, te tagalao, te augwali eno pageabi yaibao. Te augwali dagaluba ugwa holainu ebaso, me tagalao, te augwali eno aiyaba kekasa dulaibao.
AMO 9:3 Te augwali pelama, te Karmel bulu duba geme duala sigi pobaso da, teda eno augwali gegelama, te pageabi yaibao. Te augwali tamu wę page dologoba mu geme duala sigi pobaso da, teda eno te tamu ąįde bidibo dobo dwai hasamani kauwabidibolo walama, te augwali ela tueibao.
AMO 9:4 Te boi bidi dabego augwali kalabus igi painu gasa tǫ kantriba sela pobaso da, teda eno te boi bidi dabeba walama, te augwali ela mumainu yaibao. Eno augwali mu silabo homu ebao. Eno augwali tau me sogobeo,” Genuai Bidigo te po wali.
AMO 9:5 God, Tigidali Bomo Elalubo Genuai Bidigo, agai nogogo te tǫ diąnubaso, te tǫ memenege yaibao. Tama tigidali tǫde bidalubo we bidi, augwali te haliga sęgę elama, gela waibao. Tigidali pedai badu tǫ te ugwaba samanu posogą palama, te ma degasa dulaibao, te wę asobogo te wę Nail ge bo delama, te nosali ma keka sabo tiwai yaibao.
AMO 9:6 Genuai Bidigo aga togobili te dagalude nigilama, tama agai dagalu te tǫ ugwadu muani, te bagua sai be pedu nigai tiwai yalio. Agai te tamu ąį i ola aselama, tama agai te tǫ daiba ugwadu gelebo dao. God deligo naga te sę dabe ebo dao, tama agai nogi da te tiwai elalubao, Genuai Bidi dao.
AMO 9:7 Tialima, Genuai Bidigo te tiwai po wali, “Dage Israel dabe, te Itiopia dabe me eno bugagia tonalubao, te eno dage tonalubo tiwai ebao. Awe, me eno te Filistia dabe te bulu Kritde selama, te augwali odasa asali, tama eno te Siria dabe me te tǫ kantri Kirde sela asai, te eno augwali odasa asali, te dage eno Isipde selama, odasa asali tiwai gilama yalio.
AMO 9:8 Ena God, Genuai Bidigo, eno dage Israel we bidi dabego kolesaga bugagia subo sę idubao, magi baso meni, te dwai sęgę dagede mu pągąnalubao. Tama tialima, te eno dage dolama, te dage mu silaibao. Tiali goli, eno te Jekopgo hani me badu naga bidimainu sula tagalaibao. Eno augwali tigidali mu me dologobeo,” wali.
AMO 9:9 “Te eno pogo naga weyu, eno te Israel dabe augwali dagalaibao, te bidi dabego te wit ge bo hogomu te waia saide munama, dagalama, hogomu sela sąbo tiwai yaibao. Te Israel dabe bidi dwai dabe te gasa tǫ kantri tomoba tulalu, te wit dwali hogomu sela sąbo tiwai yaibao.
AMO 9:10 Te dwai bidi dabego megi te tama po obao, ‘Te Godigo magi nai me deligo da dolomainu me iligobeo.’ Tiali goli, nosali eno te boi bidi dabego augwali ela mumainogo ilaibao,” Genuai Bidigo te po wai dao.
AMO 9:11 Genuai Bidigo te tama po wai, “Nosali te me sogo si pedalubaso, teda eno te Devitgo hanide king me deli hodolaibao. Megi da, te hanigo tǫ kantri te be me deli degasa pelama, dolai tiwai elalubao. Tialima, nosali eno te be ma sęnama da, teda eno te be daga dabe me dodola silama, te be polobadu elaluali tiwai ma pedelaibao.
AMO 9:12 Tama tilama, tama te Israel dabego boi hwįnama, te Idom tǫ kantri pedai badu elaluali tǫ tigidali ma sobadi, tama augwaligo te gasa tǫ kantri te eno augwaligo somainu dąį ilali kantri tǫ me ma sesa paibao.” Te Genuai Bidigo po dao, tama agai te aga wali po tiwai gilama yaibao.
AMO 9:13 Genuai Bidigo te Israel we bidi dali te tiwai po wali, “Me sogo deli pedalubo si da, teda te gide bulali nai dabe polo holama, te hauwa mu walaibao, te bidi dabego tigidali sela silabo usu egobeo. Te wain ni dabe polo mu holama, te nai umabo walaibao, tama te wain wę nigibo bidi dabego te silabo sę ebo usu egobeo. Tama te we bidi augwa pusu yai wain hauwa elalu, te bulu dude wę pągąnama, te aiyaba gealubo tiwai mu yaibao.
AMO 9:14 Eno te ena we bidi dabe augwa page bulu muba ma odasa paibao. Tama augwa te dolali taun dabe ma geselama, nigilama, tama augwa tede ma bidalueibao. Tama augwa te wain gi ma bulama, te tuabo wain ąį ma nigaibao. Tama augwa te gi nai dabe bulama, te gi dabede nai sela tueibao.
AMO 9:15 Te bidigo aga gide nai bulubo tiwai eyu, eno ena we bidi dabe te eno augwaliba mani tǫde bugagia tegaluama, dugulalumainu sula tagalaibao, te mena bidi deligo augwali ma ela gudulabo usu me egobeo.” God, dagego Genuai Bidi, agai te tiwai po wai dao.
OBA 1:1 God Genuai Bidigo te po te Idom bagebolo wali, tama agai te po Obadiabolo mawai. Genuai Bidigo bidi me deli te tigidali bulu tǫ kantriba tagala palali, tama dago agai po odalio. Agai te po wai, “Dage sisi elama, dago te Idom dali hwįgi pinao,” walio.
OBA 1:2 Genuai Bidigo te Idom dabeba te po wai, “Te eno dagego bomo aiyaba elalueibao, te tigidali bidi hani bagego te tudiba muyu, te dageba posobo po waibao.
OBA 1:3 Te duga hagoma ebo kolesagago naga, te dage tibo po ola mobao. Te bomai masigi obogo te dagego genuai taun bagua selama, te dage bulu du tomode bidibao. Tialima, dagego te tama po obao, ‘Dego da aiyaba elalueibawe? Mu menio,’ wabo.
OBA 1:4 Tialima, eno dageba te po obao, dage te ugwadu mu bola soabo ba kemodage tiwai elalubo te tagalao, tama te be ugwadu daide te hǫ tomode sę yani tiwai elalubo, teda eno dage aiyaba mu kekasa dulaibao.”
OBA 1:5 “Te nai wi sabo bidi hulide asobo sogo, augwaligo te mena nai doado bage te augwa homu wei ebo nai selama, te me badu elalubadi taga paibao. Me, te we bidi dabego te wain ge du wai sisinibo sogo, te augwaligo me badu elalubadi tagalaibao. Tiali goli, dage da, te boi bidi dabego dage mu silaibao,” wai.
OBA 1:6 “Augwaligo te dagego mone me doado bage tigidali saibao, te dage Isogo hani dabego geme dualali doado bage selama, te selasa paibao,” wai.
OBA 1:7 “Te dage dali homu munama kęalubo bulu tǫ kantri dabego te dage tibo po ola mawaibao. Te augwaligo dage sela sąbaso, te duga bulu tǫ kantri tagalama, pelawaibao. Te dage dali bugagia bidali bulu tǫ kantri hani bagego te hwįbo side augwaligo dage aiyaba elalueibao. Te dage dali nai tuali abagi dabego me, te augwaligo dage tola sabo kę bono gaga munama, tama augwa te po waibao, ‘Te Idom dabego koneani homu kolesaga menade elalubawe?’ waibao.”
OBA 1:8 “Te eno dage Idom dabeba dwai dene ilibo sę ebo sogo, teda eno te dagego kolesaga page konea pali hani tigidali silaibao, tama dagego koneani kolesaga page tigidali te sela sąwaibao.
OBA 1:9 Tama dage te Teman taun bidi dabego te boi hwįbo mu konea pali, tiali goli, te dage wi dwai mu yaibao. Tama eno dage te tigidali Isogo ami hani ela silaibao,” Genuai Bidigo te po wali.
OBA 1:10 Genuai Bidigo te tiwai po ma wali, “Dage Idom dabego te duga ama dede dabego nai doado bage dabe wi sali, augwali te Jekopgo hani dabe, te augwali ela muai dao. Tama tibaso, eno dage hale mu iliyu, tama dage mu ela silaibao, dage munu me ma pedalogobeo.
OBA 1:11 Te Juda dabego boi bidi dabe asiyu, te Jerusalem sunumi obo banis aluama, te Juda dabego mone me doado bage selama, te augwa hasi dobola sali sogo, dage te olo dolalugi pelama, te Juda dabe tau me sabeo. Tialima, dage me te augwaligo nai wi sali bidi dabe deli hani tiwai yali dao,” wali.
OBA 1:12 Genuai Bidigo te po me wali, “Dagego te duga ama dede te Juda dabeba yali sę hauwa te dolo yai sę me ebeo. Dagego te augwali dwai dene sabo sogo, te dagego bugai haliga eyu, wiegi yai homu pemene yali. Te dagego hagoma eyu, te augwali dwai dene ebadi, te gagali ilibo po wali. Te eno we bidi augwali dene sabo sogo, te dage augwaligo taun tomoba pelama, te augwali dene sabode te wiegi yai homu pemene elama, te augwaligo wiegi yai nai dabe elali. Dage te sunumi tumage age siba doligi pelama, te meba Juda wi painu sobadi, te pageabi elama tualio. Tama dagego augwali te boi bidi dabego nogoba muani. Dagego te yali sę dabe, te dolo yai sę mu me ebeo,” wai dao.
OBA 1:15 Tama Genuai Bidigo te tiwai ma wali, “Eno te tigidali we bidi hani po tų ilabo bodolu si, te pąba yagasalio. Te dage Idom dabego yali dwai sę te eno dageba dolo mu wei ponaibao. Te duga yali dwai kolesagade usu nama, te dage sęgę saibao,” wai.
OBA 1:16 “Eno te dwai dene ena we bidiba mani. Te tiwai naga, te eno te tigidali bulu tǫ kantriba yaibao,” wali, “te augwali te ha yai wę tubo tiwai yaibao. Te eno augwali mu silaibao,” wali.
OBA 1:17 Te Genuai Bidigo te tiwai po ma wali, “Tialima, meba te bulu du Saionde bidali te me dologobeo, tama te Saion bulu du te ena bulu mu pedelaibao. Tama te Jekopgo hanigo te eno augwali mani tǫ te augwa ma saibao.
OBA 1:18 Te Jekopgo we bidi dabe, me aga ogwa Josepgo hani bage, augwali te sia tiwai pedelama, te augwaligo Isogo hani silaibao, te siago te kala wa pai dela pabo tiwai yaibao. Te Iso hanide te bidi deli me bidigobeo. Ena Genuai Bidi, eno te po wai dao,” wali.
OBA 1:19 “Te Negevde bidibo Israel dabe, te Juda saut badu, te augwaligo Isogo bulu du te Idom tǫ kantride elaluaibao. Tama te dwasianu bulu du dabe te giliga dega sigulubo te Juda badu elalubo, te Filistia dabego tǫ augwaligo saibao,” wali. “Te Israel hani mebago te Efraim me Samariago tǫ saibao, te Benjamingo hanigo te wę Jordan bolama, te Gileat tǫ te giliga pedalubo badu saibao,” wai dao.
OBA 1:20 “Te not badu Israel bidi dabe, augwali te gasa tǫ kantriba kalabus igi pai, te augwali kalabus silama, ma asaibao,” wai. “Te augwaligo Fonisia tǫ saibao, te Sarefat te not badu usu nigi paibao. Te Sardis taunde kalabus yali Jerusalem bidi dabe, te augwali ma aselama, te Negev tǫ pedaide elalubo taun dabe saibao,” walio.
OBA 1:21 “Te Jerusalem dabego te boi hwįnama, augwali aiyaba elalubaso da, te augwali pelama, te Idom dabe dali hwįgi pelama, te augwaligo bulu tǫ kantri selama, te augwaligo augwali tonalueibao. Tiali goli, ena Genuai Bidi, te ena digi ena te augwa king bidaibao,” wai dao.
JON 1:1 Te Genuai Bidigo po Jonabolo mani, te Amitaigo wai dao.
JON 1:2 Agai te po wai, “Nage hogodama, digibulu pelama, tama nage te moni hanu Niniveba pelama, tama nago te augwaligo sęgę mu sali bomai po te we bidi augwalibolo magi pao. Eno te augwaligo ebo dwai sę hauwa sualio,” wali.
JON 1:3 Tiali goli, Jonago te Genuai Bidi tagalama, tama te hanu me deli nogi Tarsis teba wi painogo yai. Tialima, aga hogodama, te nambisde elalubo dwasianu hanu Jopa teba pelama, tama agai te hanu Tarsisba painu ebo te sip me deli gegali. Agai te sip abelama, teba holali. Agai te Genuai Bidi tagalama painu wi palio.
JON 1:4 Tiali goli, augwali pobadi, te Genuai Bidigo te bomai wali te tamu ąįde pedalumainu ilali. Tama te wali dali, kulubage si te bomo mu elama, tama te sip dolainu yalio.
JON 1:5 Tama te sip tomode sę ebo bidi dabe augwali dwai wi mu elama, tama tigidali deli deligo augwa god i ola palio. Tama augwaligo te sip sęgę mu idali homu elama, tama augwaligo te walu dabe meba te tamu ąįba sąwani. Tiali goli Jona da, te sip aiyadu dologo tomoba mu dulama, tama pila mudalio.
JON 1:6 Tama te sip guni tubo kepten bidi agai te Jona gegela sulama, tama agabolo te wado po wai, “Magi baso nage pila mubawe? Nage hodaluama, tama naga god i wao. Te agai da homu dene elama, tama da tau sabo homu eyu da, te da me isigobeo,” wali.
JON 1:7 Tama augwali si holama, te sip ugwadu daide bidiyu, tama te sip sę ebo boskru bidi dabe augwaligo tama po wali, “Tegoba, polo dao! Da deli deligo dena nogi tigidali te pepa dagede asęnama, tama waba bulama, tama dago nogi deli sao. Dago tama tilama, te da dolainu yali sę page te bidi dago koneaibao,” wali. Tialima, augwaligo tama tilama, tama Jonago nogi pedelalio.
JON 1:8 Tama augwaligo te po agabolo wai, “Te sęgę daba pedelali, te po page nago dabolo wao!” te po wali. “Nago magi sę ede yaliwe? Tama nage mena badu asai dawe? Nage mena bulu bidi, tama nage mena hani dawe?” wali.
JON 1:9 Tialima, Jonago po wei ponoyu, te po wai, “Ena te Hibru bidi hani, tama eno lotu po Genuai Bidibolo wabo da, aga te dagalude God dao. Agai te tamu ąį me, tǫ me nigai dao,” te po wai.
JON 1:10 Tama Jonago te sip tomode sę ebo boskru bidi dabe augwalibolo hasia bolo te po wai dao, “Eno te Genuai Bidi taga soyu, wi soai.” Tialima, augwaligo te po odama, tama augwali wi mu yai. Tama augwaligo Jonabolo te po wali, “Tegoba! Nago dwai sę genuai mu yalio!” po wai.
JON 1:11 Te wali bomo mu eyu, tama te ąį dini genuai umabo pedalubao. Tama te sip tomode sę ebo boskru bidi dabe, augwaligo Jonabolo hanaluyu, te po wai, “Te dago magi sę nagebolo ebaso, tama te ąį dini asobo silama, tama da bugagia bidaibawe?”
JON 1:12 Tama Jonago po wei ponoyu, te po wai, “Dagego ena selama, tama ena te tamu ąįba sąbaso da, tama te ąį dini silaibao. Ena koneani, ena digi ena te genuai ąį dini te dageba pedelabo page enade yalio,” Jonago te po wai.
JON 1:13 Tiali goli, te sip guni tolasa pabo bidi dabe augwaligo te sip te tamu ąį saniba tugi painu, tama augwaligo te ąį togobo sę bomo elama yali. Tiali goli, te genuai ąį dini bomo mu yali, tama augwali te tamu ąį saniba tugi pabo usu munu me ebeo.
JON 1:14 Tialima, augwaligo Genuai Bidibolo i wali, “O Genuai Bidi, dago nagebolo gedu haluasa po obao. Te dago e bidi te tamu ąįba sąbaso da, teda nago da isimainu me elamuo. Nago da po tų me iligio, te nago te bidigo gasa bidi ela mubaso, te po tų ebo tiwai igio. Genuai Bidi, nago te naga homu wali peyu, tama nago te sę ebao,” wali.
JON 1:15 Tama augwaligo te Jona selama, tama te tamu ąįba sąwani. Tama te ąį dini yali isalio.
JON 1:16 Tama tebo sulama, te sip guni tolasa pabo bidi dabe augwali Genuai Bidide wi mu elama, tama augwaligo agabolo ofa ilama, tama agabolo te augwaligo nosali yabo kolesaga po meba dąų walalio.
JON 1:17 Augwaligo Jona te ąįba sąnama, tama tiali goli, Genuai Bidigo te sųgų moni genuai me sa muyu, tagala palama, tama te sųgų agai Jona dalalio. Tama Jona te sųgų haligade sela sogo bidai, te ulade sela sogo, me te hulide sela sogo bidibadi yai dao.
JON 2:1 Jona te sųgų haligade bididu, tama agai Godibolo gedu haluasa po wali, agai Genuai Bidi dao.
JON 2:2 Agai te po wai, “Genuai Bidio, eno sęgę tolali, tama eno nagebolo i wali, tama nago eno i wabo odali. Ena te isibo bidi dabe dwai bulude bidibaso, tama eno nageba gela wali. Tama nago eno gela wabo odai dao.
JON 2:3 Nago ena sąnama, tama ena tamu ąį aiyaba mu dulalio. Te tamu ąįgo ena tigidali mesegelai. Tama nago te genuai ąį dini ena daide ugwadu pepeda pali.
JON 2:4 Eno te po wali, ‘Nago ena sela sąwanio. Tiali goli, eno nago genuai tedali lotu be tempel te ma sueibao homu ebao,’ eno te po wai.”
JON 2:5 “Te ąį dini ena daide ugwadu pepeda peyu, tama eno mobo sabo paliali. Tama tamu ąįgo ena tigidali mesegelalio. Te tamu ąįde nosaigo ena tobolu bagulai elaluali.
JON 2:6 Ena te tamu ąį tomoba te tigidali bulu du page aiyaba mu dulali. Te dwai bulugo ena kalabus mu ilai. Tiali goli, Genuai Bidi, nage eno God, nago ena ma dobola salio. Tama eno te dwai bulu tagalama, ena te bidibo ulade bidibao.
JON 2:7 Genuai Bidio, ena kone palali, te ena isabo homu yai, tama nage eno homugo ma koneani. Tama eno gedu haluasa po wali, te po nago genuai tempel lotu beba pedelalio.”
JON 2:8 “Te tibo godiba lotu po wabo bidi dabe, augwaligo te nago augwali homu dene eyu, tau sabo kolesaga te tudiba mubo dao.
JON 2:9 Tiali goli, eno te nago nogi ugwaba sabo balia olama, tama nagebolo ofa mawaibao. Te tigidali sę po eno nage dali dąų wali, te sę eno yaibao. Genuai Bidi, nagaduba deligo bomo eyu, naga te da ma dobola selama, tama da bidibo ulade bidibao!” Jonago te po wai.
JON 2:10 Tama Genuai Bidigo po te genuai sųgųbolo olama, tama sųgųgo Jona te tamu ąį saniba buguligi pai dao.
JON 3:1 Tama Genuai Bidigo Jonabolo po ma wai,
JON 3:2 “Nage hogodama, tama nage te moni hanu Niniveba pao,” wai. “Tama eno nagebolo mani po, te nago te we bidi augwalibolo pusao,” wali.
JON 3:3 Tama tialima, Jonago Genuai Bidigo penane wali pelama, tama aga hogodama, Niniveba pai. Ninive te moni genuai hanu mu dao. Te bidi te hanu gasa bogo badu sabolainu peyu da, te aga sela sogo pelama, te hanu me bogo badu sabalubo dao.
JON 3:4 Megi da, Jona pabo gagalama, te hanu tomoba pai. Te aga pali deli sogo sabolama, tama i bomo elama, te bidi dabe augwalibolo weyu te po wai, “Nosali te bidi sese si wabo bodolu sogo silibo si, tama te Ninive moni hanu e tigidali mu dolaibao!” Te po wai.
JON 3:5 Te moni hanu Ninivede bidibo we bidi augwaligo Godigo te poba homu dąų mu wali. Tama augwaligo te po wai, “Dago nai gisilao. Tama da genuai bidi me, te nogi meni yai olo bidi me, te dago homu dene ebo bobobage ugwa munama, te dago homu dene ebo dąį ilao,” wali.
JON 3:6 Te Ninive tuni bidigo te Jonago pusagasali po odama, tama aga te dualaluali gasagi yai wiegi yai duabo sai tagalali. Agai te wiegi yai au yali ugwa sela sąnama, tama homu dene ebo gudubo ugwa munama, tama aga te sia keli daide bidalio.
JON 3:7 Te tuni bidigo te Ninive hanude bidibo tigidali we bidibolo po ola tolai. Agai te po wai, “Te eno po, me te eno tobolu bidi dabe daligo po obao. Te bidi me deligo te nai tumainu me egobeo. Dage we bidi badi, te bulmakau sipsip dabe dali, dagego te nai me, wę me tuyu, me elamu dao.
JON 3:8 Dage tigidaligo te homu dene ebo ugwa munama, tama te tobage dwai name ugwa dabe te bulmakau sipsip dabe me munama, tama dagego bomo elama, Godibolo gedu haluasa po wao. Dage tigidaligo te dwai kolesaga tigidali badi, te dwai sę haniani ebo kolesaga, te tigidali dagego tagalao.
JON 3:9 Te dago tama tibaso da, te Godigo wado po wabo homu hasegelama, tama agai da tau sabo homu eyu da, teda da me isigobeo,” polalubo king bidigo te po wai.
JON 3:10 Tialima, augwaligo augwa dwai kolesaga ebo tagalali, tama Godigo augwaligo te tebo sę suai. Godigo agai homu hasegelama, tama agai te sę yaibao wali, tama te dwai dene mabo sę agai me ebeo.
JON 4:1 Jonago dwai homu te Godigo tama yali kolesagade elama, tama aga haliga sębę yalio.
JON 4:2 Tama agai Genuai Bidibolo gedu haluasa po weyu, te po wai, “Genuai Bidio, nago eno po odao. Eno bulu tagalama, e buluba asisiąbadi, tama eno koneani, te nago tama tiaibao naga wai. Tama ena wi peyu, tama ena te tǫ Tarsis teba painu yai. Eno koneani, nage te homu dene elama, olo tau sabo dwagi yai kolesaga ebo God da. Nago sębę polo me egobeo. Menio. Nago dade homu dene genilama mu ebao. Nago homu kolesaga hasegelama, tama nago te bidi dwai ebo wei me ponobeo.
JON 4:3 Tialima, Genuai Bidi, megi da, nago ena bidibo ula silao. Te ena isiyu da, te dwagi yai da. Tama ena isisąyu da, te dwagi yai me egobeo,” wali.
JON 4:4 Genuai Bidigo po wei ponoyu, te po wai, “Nago te wado po wabo te dolo da, agawe?”
JON 4:5 Tama Jonago te hanu tagalama, tama pelama, te giliga pedalubo badu bidigi palio. Agai te hobo yano be sęnama, tama aga tede bididuai. Agai te Ninive hanude magi nai pedalubowe naga suainu yalio.
JON 4:6 Tama God, Genuai Bidigo te bono me deli pedalumainu ilama, te Jona seselalumainu ilama, te giligago aga dolidali weyu, tama aga bugagia bidimainu yai. Tama Jona aga dwagi yai homu pemene mu te bonode yalio.
JON 4:7 Tiali goli, do kigamu mu Godigo te ni dolabo dwai nai me deli tagala palama, tama te bono sasia palio.
JON 4:8 Tama nosali giliga bomo elama pedelama, tama Godigo posolo yai wali te giliga pedalubo badu tagala palali. Tama Jona tobolude giliga doliyu, tama aga gedu ayǫge elama, tama aga tulaluainu yalio. Tama Jonago te homu yai, ‘Te isaio. Te ena isiyu da, te dwagi yai da. Tama ena isisąyu da, te dwagi yai egobeo,’ agai te homu yai.
JON 4:9 Tiali goli Godigo te tiwai po Jonabolo wali, “Te bono sasiaide nago wado po wabo. Nago te wado po wabo te dolo da, agawe?” Tama Jonago po wei ponoyu, te po wai, “Awe, eno wado ebo dolo ebao. Ena sębę mu ebao! Tagalao, te ena isimainu yaibao,” wai.
JON 4:10 Tama Genuai Bidigo agabolo te tiwai po wali, “Te bono te deli sogo hulide naga pedelama, genuai yali, tama gasa hulide aga sasia pai. Nago agade dwasianu sę me ebe, tama nago aga genuai me ilibeo. Tiali goli, nago te dwasianu olo naide homu dene yai.
JON 4:11 Tama eno me, eno te Ninive hanude bidibo we bidide homu dene mu ebao. Te genuai hanu, tama te we bidi hauwa elalubao, te augwali bidibo bage nedali te namba hauwa bidi sese elalubo, te 120,000 edelalio. Tama te kibu bulmakau dabe me hauwa elalubao. Eno augwali tigidalide homu kone palobao.” Genuai Bidigo Jonabolo te po wai.
MIC 1:1 Te Jotan, Ahas, me Hesekia, te bidi deli deli te Judade king bida bida piduali sogo, Genuai Bidigo te po Maikabolo mawai, te taun Moreset bidi me deli dao. Genuai Bidigo Maikabolo te Samaria me Jerusalemde nosali pedelabo sę dabe po wai dao.
MIC 1:2 Dage tigidali we bidi hani, te po odiąo. Dage te tǫde bidibo bidi tigidali, te Godigo poba olo muiyąo. God Genuai Bidigo dage po tų ilaibao. Dagego odao. Genuai Bidi aga be te dagalude bidiyu, te po walio.
MIC 1:3 Genuai Bidigo te aga wiegi yai bulu digi te tagalama, te asabo homu ebao. Aga dulama, te bulu du padode daidu bilagasaibao, wai.
MIC 1:4 Tama te bulu du dabe te aga sągą dologode ąį tiwai pedelaibao, te ula ebo nai kandel te ula eyu, te aga ili te wę pedalubo tiwai yaibao. Te bulu du dabe te odogo malu tǫ pesageba te gea paliyu, te bulu dudu wę sąbo samanobo tiwai yaibao.
MIC 1:5 Te tigidali sę pedelaibao, magi baso meni, te Israel dabego dwai sę eyu, te Godigo po sela sąwani. Te hagoma ebo kolesaga te Israelde elaluali, te sę page dego dawe? Te Samaria dabede naga dao. Te Juda tibo godiba lotu po wali kolesaga, te sę page dego dolai dawe? Te page Jerusalem dabede naga elaluai dao.
MIC 1:6 Tialima, Genuai Bidigo te po wai, “Te eno Samaria taun dolama, te pepeli dilide te pobele bage du holobo tiwai yaibao. Tama te ni wain du kulubi bulubo pesage pedelaibao. Te aga be dabe tigidali eno elama, dolaibao,” wali, “tialima, eno te be dabego masigi kakali hogomu, te odogo pesageba gea palaibao,” walio.
MIC 1:7 “Te eno te tibo god dabego noma haluama, te siaba sąwaibao,” wai. “Tialima, te god dabe te pobele bage hogomu pesage holobo naga tiwai pedelaibao. Te Samaria dabego te God tudiba munama, tama augwa te tibo godiba lotu po wai, te wego aga bidi tagalama, te subigila penani ela bilibo tiwai yali. Tialima, te meba hani aselama, te Samaria aiyaba elaluama, te Samaria dabego te dwai sę yalide sali doado bage gasa tǫ kantriba sela pelama, te doado bage te augwa tibo godiba magi paibao,” wai.
MIC 1:8 Tialima, Maikago te po wali, “Te sę dabe pedelaibao, tama tiyu, ena te haliga hobede eyu, gela waibao. Te eno sągą nadoba su me musiąma, te eno dwai pisila pai nami ugwa naga gudaibao,” wai. “Te eno homu dene eyu gela wabo, te yowigo goo wabo tiwai weyu, te haliga homu dene elama, te i wabo te ebigo dwai hwa wabo gilama yaibao,” po wai.
MIC 1:9 “Magi baso meni, te Samaria dabego keni pedela sabeo. Tama pąde Juda dabe me te tobage keni saibao,” wali. “Tama Jerusalem digi, te eno we bidi dabego pesage, te dwasianu sogo naga tama te me dolaibao,” wai.
MIC 1:10 Dagego te Get dabebolo olamuo, te dago boi bidi dabe, te Godigo da dolali po wagimio. Te augwaligo dage gela wabo te augwaligo sumainu me elamuo. Dage te Bet Leafra we bidi, dage te haliga sęgę mu elama, gela weyu, te duga tigide pu muiyąo.
MIC 1:11 Dage te Safir we bidi, dage hale elama, te pisila pai ugwa gudama, te gasa tǫ kantriba te kalabus igi pabo tiwai yao. Te Sanan dabe wi dwai mu elama, te augwa taun tagalama, te buluba me teda soagobeo. Dagego te Betesel we bidi dabe gela wabo odobaso da, te dagego koneagameo, te badu te geme duala sigi pabo pesage me elalubeo.
MIC 1:12 Te Marot we bidi dabe haliga sęgę elama, te bidi mebago augwali tau sagasobo tonalueibao, magi baso meni, te pąde Genuai Bidigo te Jerusalem dolaibao.
MIC 1:13 Dage te Lakis taun we bidi dabe, dagego te karis dabe selama, te udabo mu koneai hos dabeba gebelama, te wi pomainao. Magi baso meni, dagego te Israel dabego dwai kolesaga ebo wali pali, tialima dagego te Jerusalem tulalumainu yali dao.
MIC 1:14 Dage Juda dabe, dagego te taun Moreset Get homu dene iyąo, magi baso meni, te gasa hanigo selama, te dagego taun da ma wagobeo. Tama te Aksip we bidi dabego te Israel king dabe tau me sogobeo.
MIC 1:15 Dage te Maresa we bidi, te Genuai Bidigo dage te boi bidi dabego nogoba munama, te dagego taun augwaligo saibao. Tama te Israel polaluali tobolu bidi dabe te Adulam masigi ola beba geme wi duala sigi peyu, ela paibao.
MIC 1:16 Te boi bidi dabego te dagego homu godolo mu ebo wai dabe selama, te selasa paibao. Tialima, te duga wai dabede homu dene ebo gela weyu, tama te tobolu nisi tigidali poala sąnama, te tobolu wane kikili ilao.
MIC 2:1 Te dage dwai kolesaga yabo homu ebo bidi, te hobede ya, te dage dolaibao! Dage te hulide godege me pisąma, dagego te dwai kolesaga yabo homu naga eyu, te kigamu mu dage hodaluama, te sę ebo dao, magi baso meni, dagego te sunumi gegali dao.
MIC 2:2 Te dagego bidi me deligo gi sabo homu pesą eyu, dagego bomonama te siyu naga yaibao. Dagego te be sabo homu pesą ebaso da, dagego te siyu naga ebo dao. Dagego te tibo sę ebo kolesaga elama, te gasa bidi dabego be me, te augwa wąį nǫųde sali tǫ me, wi sabo dao.
MIC 2:3 Tialima, Genuai Bidigo te po obao, “Odiąo. Eno dage dolabo homu ebao, te wi pabo usu me egobeo. Te dage hagoma elama bilainu ebaso, usu me egobeo, magi baso meni, te dwai sogo mugo dage gegaibao.
MIC 2:4 Te dwai sę dabe pedalubo sogo da, te bidi dabego dage dolali po mimi pelama, te dageba posobo po waibao. Tama augwaligo te tibo homu dene eyu, te tiwai tibo gela wabo weyu, balia po waibao, ‘Da mu dolali dao. Genuai Bidigo dago tǫ salio. Agai te tǫ te da kalabus yali bidi dabeba dobayu, mawai dao.’ Augwaligo te po waibao,” Genuai Bidigo te po obao.
MIC 2:5 Tialima, nosali augwaligo te tǫ te Genuai Bidigo we bidi dabeba ma mabo sogo, dagego hanigo te me badu pedai deli me sogobeo.
MIC 2:6 Te we bidi dabego enabolo wali, “Maika, nago te tobage olo po dabolo me magio,” wali. “Nago te tobage sę po me migio. Godigo da aiyaba elaluyu, te da hale me egobeo,” wali.
MIC 2:7 Dage Israel dabe, dage Jekopgo hani bage da, dagego te tobage po obao, agawe? Dagego homugo te Genuai Bidigo dage dali homu sębę eyu, agai dageba magi dwai sę deli me egobeo oba, agawe? Genuai Bidigo dage dali e po elalubao, “Eno te nagame yai po dua digi te doloba pai bidi dabeba waibao, eno augwali me dolobo menio.
MIC 2:8 Tiali goli, odiąo. Duga digi ilama, tama eno hani te ena dali boi bidi pedalubao. Te bidi dabe augwa boi hwįani te ugwa ela holai, te ma aselama, beba bugagia dugulaluagasobo homu yai. Tiali goli, dagego augwaligo kedau side gudubo ugwa wi sabo dao.
MIC 2:9 Dagego te eno hani dabego wilawe we dabe te augwa godolo homu ebo bede ela gudulai. Te dagego eno te augwaligo wai dabeba mani wiegi yai nogi te doloyu, te wai dabe dwai bidibo dao.
MIC 2:10 Dage hogodasa pao. Te toma nabo pesage menio,” wali. “Dagego te dwai kolesaga eyu, te eno gedude dage dwai mu pedalubaso, tialima eno te dage dwai ilama, mu dolaibao,” wai.
MIC 2:11 “Te profet me deli aselama, te tiwai tibo po wagasiyu, ‘Eno te profetgo wabo po tiwai weyu, te dagego wain hauwa elalu, te bomai wę me elalueibao,’ po obaso da, te we bidi dabego te tiwai profet godolo yaibao,” Genuai Bidigo te po wai.
MIC 2:12 Te Genuai Bidigo po ma weyu, te po wali, “Tialima, nosali eno te dage te sogo me bidibo tigidali Israel we bidi sisinani elalueibao. Te eno dage ma sisiniyu, te sipsip tonalubo bidigo te sipsip dabe te oboba ma sela asobo tiwai gilama yaibao,” wali. “Tama te we bidi hauwa dagego tǫde pągąnalueibao, te sipsip dabe te wiegi yai nosai tubo madi pągąnalubo tiwai yaibao,” wali.
MIC 2:13 “Godigo te aga we bidi kalabuside bidali tagala palama, te augwali buluba dinaibao. Augwaligo te taun obo aluama, te buluba teda soaibao, te augwa king da, te Genuai Bidi digi da, te augwali asobodu polasa paibao,” Genuai Bidigo te po wai dao.
MIC 3:1 Te Jekop hani polalubo bidi dabe, dage Israel tobolu bidi dabe, odiąo. Dagego te doloba pai kolesaga godolo elama, yabo sę elalubao,
MIC 3:2 tiali goli dagego te dwai kolesaga godolo mu elama, te doloba pai kolesaga godolo homu me ebeo. Dagego te kolesaga dabego te dagego eno we bidi dabe bidibadi digi, te tigi wali dagala sabo tiwai ebao. Te dagego augwaligo tigi mi togobo tiwai elama,
MIC 3:3 tama dagego te tigidali tualio. Te dagego augwaligo tigi wali sela sąbo tiwai eyu, te augwaligo dili togobo tiwai elama, tama dagego te augwali mi te hwą gego todogolama, te sene sospende bubo tiwai yalio.
MIC 3:4 Nosali me sogo si te pedalubo side tama, dage te Genuai Bidiba gela waibao, tiali goli agai te dagego gela wabo me odogobeo. Agai te dagego gedu haluasa po wabo me odisąwaibao, magi baso meni, dagego te dwai kolesaga yalio.
MIC 3:5 Te tibo profet mebago te bidi dabego augwaligo mone momainu, te dąų wabo po waibao, te augwa wiegi yai sogo elalubaso tibo dao, tiali goli te augwaligo te augwali tibo po ola mawai. Tialima, te augwaligo augwali mone masiąbaso da, teda te profet dabego augwali wi iliyu, te boi bidi dabego augwali dali hwįagasaibao po waibao. Tama tibaso, Genuai Bidigo te tiwai po te profet dabeba obao,
MIC 3:6 “Dagego eno we bidi dabe tibo po ola mobaso, tialima megi da, dagego te profetgo te nade sabo po tiwai munu me ma sogobeo,” wali, “tama te nosali pedelaibao wabo nai po te dagego me wagobeo. Te dagego bodolu sogo megi silainu ebao. Te giliga iba dega sigulama, te be hulia sabogo dage mesega sabo tiwai gilama ebao,” walio.
MIC 3:7 “Tama te mena sę dabe te nosali pedelaibao po pusali profet dabe, te augwali hale elama, te augwali dwai haliga yaibao, magi baso meni, Godigo te augwaligo gedu haluasa po wabo me odisąma, te pedelao wali nai dabe pedalumainu me isąbaso, te tama tiai dao.” Genuai Bidigo te po obao.
MIC 3:8 Tiali goli, ena Maika da, te Genuai Bidigo Mobo Bidigo enabolo te bomo mobaso, tama eno homu kolesagade te doloba pai kolesaga yali. Te agai eno haliga dąų waliyu, te Israel dabe augwaliba te augwa sęgę tigidali pusa mabo po hanilibo dao.
MIC 3:9 Dage Israel tobolu bidi dabego odiąo. Dagego te doloba pai kolesaga godolo homu meni isąwai. Dagego te wiegi yai kolesaga te dwai kolesaga pedalumainu ilibo dao.
MIC 3:10 Dagego te we bidi dabe elibo kolesaga, me te tobage dolo isąwai kolesaga dabe yali, tama te kolesagade dagego homugo te Jerusalem we bidi dabe, te Godigo taunde, te bomai hani pedalubao homu ebo dao.
MIC 3:11 Te taun bidi dabego te tobolu bidi dabe homu bega sabo sę eyu, te augwaliba mone mayu, te augwa haniani dwai kolesaga emainu ebo dao. Te pris dabego te mone naga sainogo te Godigo bomai po page pusubo dao. Tialima, te profet dabego te mone sabo homu eyu, te geme dualali po pusali. Tigidaligo te tiwai eyu, augwa te po wali, “Genuai Bidi te da dali bidibao,” walio. “Tialima, te magi nai me deligo da me dologobeo,” wabo dao.
MIC 3:12 Tialima, te tobolu bidi dabe me, pris me profet, te duga yali sęde naga te Godigo Jerusalem dolaibao wali. Te Jerusalem tigidali nai doado bage te dolama, tama te pobele bage hogomu pesage holobo tiwai yaibao wali. Tama Saion te olo tǫ pedelama, te bidi dabego tede te gi nai bulaibao wali. Tama te bulu dude te dasu nosai pedelaibao, te Godigo be elalubo madi tiaibao wai dao.
MIC 4:1 Te me sogo si deli te nosali pedalubo side te bulu du, te Genuai Bidigo be elaluali madi, te daide mu elalu, te gasa bulu du tigidali aiyaba elalueibao wai. Tama we bidi hani hauwa teba sisinagasaibao.
MIC 4:2 Tialima, augwa te po waibao, “Asiąo, da te Saion bulu duba holinao, te Genuai Bidigo bulu du dao. Da te Israelgo Godigo beba pelama, te agai dago emainu homu ebo kolesaga ola momainao, tialima te aga digi sa muani sunumidu da bilaibao.” Augwaligo te po waibao. Te magi eyu, augwaligo te tama po waibawe, Jerusalem da, te Genuai Bidigo agai bomai po te we bidi dabe ola mayu, te agai po augwaliba pusa mabo pesage dao.
MIC 4:3 Genuai Bidigo te tigidali kantri we bidi hanigo po tų ebo dodolama, te augwa deliba bugagia bidimainu yaibao. Te agai te digibulu elalubo bomai tǫ kantri me, te Israel pąde elalubo tǫ kantri dali, te po tų dodolobo po miaibao. Tama te augwa moni bainat hwą dabe siade ulama, hamago haluama, te gi tǫ elibo ain tama nigilaibao. Me te augwa kapago nigai sesemone ene hamago haluama, te wain bono gi sę yabo hwą ge tama nigaibao. Tama tigidali we bidi hani augwa hasi te munu me ma hwįsąma, te hwįainu usu siyu ma egobeo.
MIC 4:4 Tama tigidali bidi deli deli te augwa wain bono gi, me ni fik kaya gi pąde bugagia bidalu, te mena bidi me deligo augwali wi ilabo sę me iligobeo. Te Tigidali Bomo Elalubo Genuai Bidigo te po dąų waliyu, wai dao.
MIC 4:5 Te tigidali hani bulu bage deli deli augwa te tibo godiba lotu weyu, te augwali wali pabo dao. Awe, tiali goli, te da Israelgo te lotu Godiba waibao, te dago sesemane bidada peyu, bidada pabo Genuai Bidi da, te aga deli naga wali pabo dao.
MIC 4:6 Genuai Bidigo te po wai, “Te eno augwali dwai dene menama, te gasa bulu tǫ kantriba te kalabus sę emainu tagala palali we bidi dabe, te nosali, te bodolu mani sogo pedalubo si, te augwali eno ma deliba sisinaibao,” te po wai.
MIC 4:7 “Te hani bidi te dwasianu naga dao, te augwali te augwa page bulu digibulu bidali, te bilabo usu meni yani, tiali goli te eno ma gagalama, te augwali bomai hani we bidi pedalumainu ilaibao,” wali. “Tialima, ena te augwa king te Saion bulu dude sesemane bidada peyu, bidada paibao,” wai dao.
MIC 4:8 Taun Jerusalem, God nagede bidiyu, te naga we bidi dabe tonalubao, te kibu sipsip page bidigo te sipsip dabe tonalubo tiwai ebao. Tialima, nosali nage te polalubo taun pedaliyu, te hasia polasa tǫ kantri elaluali tiwai ma pedelaibao.
MIC 4:9 Jerusalem, magi baso nage gela genuai obawe? Magi baso nage te wego wai ame nainu tudi eliyu, tigi dene ebo tiwai ebawe? Nago king meni da, agawe? Nago kolesaga page koneai bidi dabe isila pai da, agawe?
MIC 4:10 Tialima, dage Israel we bidi dabe, dage i hai weyu, gela weyu, tama te wego wai tega painu te tigi dene ebaso, subigila bebegeli bilibo tiwai yao. Magi baso meni, megi dage te taun tagalama, te kala elalubo pesagede bididuaibao. Te dage augwaligo te Babilonba sela paibao. Tiali goli, nosali Genuai Bidigo dage te boi bidi dabego nogode ma dobola saibao wali.
MIC 4:11 Megi da, te boi bidi hauwago te dage dali hwįainu sisinanio. Augwaligo posobo po te tiwai obao, “Tegobao, dago te Jerusalem mu dolama, tama suao, aga te tiwai naga me elalua pomainu yaibao,” obao.
MIC 4:12 Tiali goli, te hani bidi dabego te Genuai Bidigo homu kolesaga konesąwai. Te Genuai Bidigo augwali sisinama, te augwaliba dwai dene maiabo te augwaligo konesiąma wali, te bidigo te bo elalubo wit sisinama, te agaga pelama, te wit nai ge sainu ebo tiwai gilama yaibao.
MIC 4:13 Genuai Bidigo te po wali, “Dage Jerusalem we bidi dabe, dage pelama, te duga boi bidi dabeba dwai dene magi piąo. Te eno dage te bulmakau me deligo te gąų ain, me sągą bras te bomo elalubo tiwai pedalumainu ilaibao,” wali. “Tialima, dagego te we bidi hani hauwa agamainu yaibao. Te boi bidi dabego te hwįyu sali tigidali nai doado bage, te dagego selama, enaba mawaibao, te tigidali tǫde Genuai Bidi dao,” te po wai.
MIC 5:1 Dage Jerusalem dabe, hodaluao, te tigidali ami selama, sisinagasao. Te boi bidi dabego da bagua salio. Augwaligo te Israel tuni bidi nabogede te donogo eliyu, aga te genuai hale ebo ilaibao.
MIC 5:2 Genuai Bidigo te tiwai po wali, “Betlehem Efrata, te tigidali Juda taun tomode nage te dwasianu taun mu elalubao. Tiali goli, nagede te genuai tuni bidi me deli pedelama, tama agai te Israel hani tonaluabo bidi dao. Te polobadu mu aga hasia wąį monu nǫų me deli pedelali, tama aga hani bidi me bidibao,” te po wai.
MIC 5:3 Tialima, Genuai Bidigo aga we bidi dabe digi te boi bidi dabego nogode bidimainu ilama, te Godigo we me deli sa mubo sogoba usu niyu, te ogwa me deli ame naibao. Tialima, te sogo te bidigo abagi dabe augwali te gasa bulu tǫ kantride kalabus sę igi pali bidi dabe, te augwali ma aselama, te augwa hani dali deliba ma sisinagasaibao.
MIC 5:4 Te tobolu bidi pedalubo si da, te aga we bidi dabe aga tonalueibao, te God, aga Genuai Bidigo bomode me genuai nogide te tama tiaibao. Tama te we bidi dabe bugagia bidaibao, magi baso meni, te tigidali bulu tǫ kantri dabede bidalubo bidi hani dabego te agai bomo koneaibao.
MIC 5:5 Tama aga digi te nagame yai haliga ebo homu te tigidali we bidiba mayu, tama te boi bidi homu ebo kolesaga te munu ma me pedalugobeo. Te Asiria dabe dago tǫba asobo sogo, te dago taun bagulali masigi obo dabe aluama, dago te ami dabe tonaluabo bomai polalubo bidi dabe hauwa tagala palama, augwaligo te boi bidi dabe dali hwįmainu yaibao.
MIC 5:6 Te augwaligo Asiria dabe dali hwįbo bomo mu elama, te moni bobobage bainat hwągo te augwali aiyaba elaluama, te augwa bulu tǫ kantri nogi Nimrot te saibao. Tama tebogo te Betlehemde pedelali genuai tuni bidigo da te Asiria bagego nogode ma dobola saibao. Te Asiria bage dago tǫ dąį bolama, hwįagasobo sogo, agai tama tiaibao.
MIC 5:7 Tama te Israel hani meba te boi bidi dabego me dolisąwai bage, augwali te gasa hani hauwa tau sabo bidi pedelaibao, te Genuai Bidigo te hulide tulubage segeni wę te nosaiba tulumainu tagala palobo tiwai eyu, te olo tulubagego te ni dabe wiegi yai pedalumainu ebo tiwai yaibao. Tama augwaligo te sę te Genuai Bidigo bomode naga yaibao, te augwaduba bomogo digi te tegobeo.
MIC 5:8 Te Israel hani te gasa hani tomode bidiyu, te laiongo buside te hasa sibi ela tueinu gegebo sę tiwai eyu, ma te sipsip obode ela tueinu ebo tiwai yaibao. Aga te sipsip dabe tomoba pelama, te augwali daiba samonama, te augwali gąųgo subigila tologa sąsąbo tiwai eyu, tama te sipsip dabe tau sabo bidi me deli meni ebo ąǫ yaibao.
MIC 5:9 Te tiwai naga dage Israel dabego te dagego boi bidi tigidali aiyaba elaluama, te augwali mu silaibao. Tama augwali posoyu, dagego duga wele si ugwaba saibao.
MIC 5:10 Genuai Bidigo te Israel dabeba te po wali, “Te sogo eno te hwįbo doado bage dolaibao,” wali. “Te boi hwįabo hos dabe eno sela sąnama, te karis dabe dolaibao,” wai dao.
MIC 5:11 “Te eno dagego taun dabe dali, te taun bagulali masigi obo dabe tigidali dolama, tama dage tede geme duala sainu ebo usu me egobeo,” wai dao.
MIC 5:12 “Te eno dagego tibo pobi wabo nai me, sisi tomage tigidali sela sąyu, tama eno dagego te sogo nigibo bidi, te dabe te munu ma me elalumainu, me egobeo,” wali.
MIC 5:13 “Te eno te tigidali kapago nigai tibo god, me te lotu wabo masigi pos tigidali sela sąwaibao. Tama te duga digi nigali nai dabeba munu ma lotu omainu me egobeo,” wali.
MIC 5:14 “Te eno te god we Aserago noma elalubo pos dabe guda sąnama, te duga bidali pesagede sela sąnama, te dagego taun dabe eno dolaibao,” wai dao.
MIC 5:15 “Te eno haliga sębę mu elama, tama te eno po sela sąbo haniani we bidi hanigo te hagoma ebo kolesaga eno wei ponaibao,” po wai dao.
MIC 6:1 Genuai Bidigo te Israel po tų ilibo dagego odiąo. Genuai Bidi, nage aselama, augwali po tų yagasao, tama te bulu du dabe te po tų ebo odobo jas bidiyu, tama augwaligo te nago po dagalaibao.
MIC 6:2 Dage te bulu du dabe, dage te tǫ page dąų waliyu, te tǫ sesemane bidada pidu, bidada pabo nai dabe, dagego te Genuai Bidigo po tų ebo odiąo. Magi baso meni. Genuai Bidigo aga we bidide po olama, waibao. Agai po te Israel dabeba kisilama waibao.
MIC 6:3 Tialima, Genuai Bidigo te tiwai po obao, “Eno we bidi dabeo, eno mena dwai sę dageba yaliwe? Eno mena sę elama, dageba sęgę maniwe? Ae, tegoba, dagego enaba po wei ponao,” te po obao.
MIC 6:4 “Eno tama te eno dage kalabus togolama, te dage Isipde selama, te dage odasa asali. Tama eno te Moses nigilali, me Aron, me Miriam me, te tama bage polasa peyu, te dage sunumi ola mawai dao.
MIC 6:5 Eno we bidi dabeo, te dwai sę te polobadu Balak te Moap kingo te dageba dwai sę yainu yali, te homugo koneao,” wali. “Te Balam, te Beorgo ogwago wali po, te Balakbolo wei ponani po, te homu kone ma palao. Tama eno yali genuai sę tigidali me te homu koneao, te bulu Sitim dagego tagalama, te bulu Gilgalba sobadi, te sę yali. Dagego te eno sę yali dabe koneao, tialima, te eno dage tau siyu yali sę dabe, te dagego ma koneao,” God Genuai Bidigo te po megi obao.
MIC 6:6 Te ena te dagalude Genuai Bidi Godiba lotu wainu asobo sogo da, teda eno mena nai sesaibawe? Eno aga gesbidide kidu sugunama, eno magi maiabo nai elaluaibawe? Te eno wiegi yai bulmakau wai mu selama, te siaba ulugi pabo ofa yaibawe? Ma, eno te kibu be me deli elalubo dwagi yai kau kibu wai dabe sesiyu, tama siago dela silibo ofa mobaso da, teda te usugowe, ma meniwe?
MIC 6:7 Eno te hauwa umabo tausen tausen sipsip omai sela asiyu, ma te eno wel botol hauwa umabo mu tausen sela asobaso da, teda Genuai Bidigo wiegi yai homu pemene egowe, ma meniwe? Ma, te ena gomunai ogwa elama, te Godigo eno dwai sęgę sela sąmainu ofa ebaso, te usu egowe? Menio! Eno homugo yali sę dabe sela sąwainogo eyu, eno te ena tigigo sali wai te ofa mawaibawe? Menio!
MIC 6:8 Genuai Bidigo dabolo te wiegi yai kolesaga yabo po walio. Tama agai homugo dago te tiwai kolesaga naga emainu yai. Dago te doloba pai kolesaga wali pao, te gasa bidi dabe homu dene eyu, tau sao, te dena homu kolesaga digi tegaluama, te dena God dali deli haliga elama bidiyu, tama aga wali pabo usu dao.
MIC 6:9 Te dago Genuai Bidiba wi homu ebo, te wiegi yai homu kolesaga dao. Genuai Bidigo te Jerusalemba i weyu, te tama po wai, “Dage te taunde bidibo we bidi dabe, dagego odiąo, te dage dene mabo bomo elalubo bidigo wabo po sao,” wai dao.
MIC 6:10 “Te dwai sęgę sai bidigo bede te wiegi yai sawi yai nai hauwa elaluali, augwa te tibo sę ebo kolesagade augwaligo salio. Augwaligo maketde te nai dabe dolo si me dagalisąbaso, eno te dwai kolesaga hagela homu mu ebao,” wali.
MIC 6:11 “Eno te tibo sę eyu, te skel dagalubo sę ebo bidi dabego dwai sęgę me sela sągobeo,” wali.
MIC 6:12 “Te Jerusalemde bidibo mone hauwa elalubo bidi dabego te magi nai meni yai bidi dabego doado bage anoma elama, sali. Te dage tigidali te tibo po wabo bidi naga dao,” wali.
MIC 6:13 “Tama tialima, megi da, eno dagego te dwai sę ebo sęgęde homu kone palama, tama eno dage dolobo sę gagalama yaibao,” po wai dao.
MIC 6:14 “Te dage nai tuyu da yaibao, tiali goli, dage nai sili bidaibao, dagego tabi habuge yaibao. Tigidali nai dagego selama, te beba sisinani, te bugagia me munalugobeo. Te nai me deli bugagia elalubaso da, teda eno te boi bidi dabego hwįagasomainu elama, te augwali dolaibao.
MIC 6:15 Tama tibaso, te gi sę dagego yaibao, tiali goli, tede nai dagego me sogobeo. Te oliv wel sabo sę dagego yaibao, tiali goli dagego tigide me piligobeo. Te wain dagego nigaibao, tiali goli te wain wę dagego me tugobeo.
MIC 6:16 Dagego te king Omrigo dwai kolesaga wali pali, me aga ogwa king Ahapgo kolesaga me wali pai. Dagego augwali sigo polobadu te yali tobage kolesaga tiwai yali, tialima te eno dage dolaibao, te gasa bidi hani bagego dage tudiba muaibao. Te tigidali bulu pedaide bidibo hani bidigo te dageba gesabidi tuluga selama, tama dwai posobo po waibao,” wai dao.
MIC 7:1 Hobede ya, ena dwai mu bidibao. Ena te nasi ebo bidi tiwai elama, te tuabo wiegi yai nedu du me deli gegebeo. Te tigidali wain ni du me, ni kaya fik du me, augwa te tigidali sela silalio.
MIC 7:2 Te po digi wabo po page e dao. Te dago bulu tǫ kantride te doloba pai bidi me deli me bidibeo, te bidi me deligo te God wali me pabo meni. Mu menio. Tigidali bidigo te gasa bidi ela muabo sunumi naga gegebo dao. Te tigidaligo augwa abagi dabeba boi bidi ebo sę ebo dao.
MIC 7:3 Augwaligo te dwai sę ebo kolesaga mu koneani. Te ofisa dabego me jas dabego te bidi dabeba i weyu, te augwaliba te mone menama, te po tų dolainu ebo dao. Augwaligo deli homu ebo dao. Te genuai nogi elalubo bidi dabego te jas dabeba te homu wei godolo ebo po obaso, te po tų doloyu, te jas dabego te bidi dabego wabo po wali peyu ebo dao.
MIC 7:4 Te gasa bidi dabe mebago homugo te augwali wiegi yai doloba pai kolesaga ebo bidi da, te homu yali, Godigo suali, augwali te dwai bidi dabe da wali. Augwali te dwai nosai tiwai, te sesani elalubo bono tiwai yali. Te bodolu si pedalubo sogo, te Godigo aga we bidi dabeba te dwai dene ilaibao homu yali, te agai te profet dabego pedauwalide dąų wali po tiwai gilama yaibao. Godigo tama tibao, te augwa homu kolesaga kone tųą palama, te augwali umuna paibao.
MIC 7:5 Awe, te sogo te ogwa dabego te augwa aya dabeba posobo po dwai weyu, te wegi dabego augwa ida dabego po sela sąyu yaibao. Te bidigo sali we dabego te augwa auwa dabe dali konila po weyu yaibao. Te bidi aga we wai dali te boi bidi pedelaibao. Tibaso, nago te naga abagigo wabo po me, hai namugo po me, te osola suao, dua dao. Tama nago te naga we dali wabo po tigidali me, te bugagia tonalu te yao.
MIC 7:7 Tialima, ena da, ena digi dwagi yai homu eyu, eno konealubo homu Genuai Bidiba dąų walio. Te Godigo eno gedu haluasa po wabo odama, tama eno te eno God agai ena tau sagasobo tonalubo dao.
MIC 7:8 Te dago boi bidi dabego te dabolo posobo po omainu me ilamuo. Mu tama, da tulaluali, tiali goli, te da ma hodaluaibao. Da be hulia side megi bidibao, tiali goli te Genuai Bidigo ula dabolo mawaibao.
MIC 7:9 Dago dwai sęgę sabo sę te Genuai Bidigo gedude yali, tialima te dwasianu sogo naga tama te Genuai Bidigo haliga sębę elama, te dabolo dene mabo sę yaibao. Tiali goli, agai da tau saibao, tama te gasa bidi dabego da dali yali dwai sę agai dodolaibao. Te hulia side agai da selama, te da ulaba odasa asaibao. Te da bidibadi digi, te agai da boi bidi dabego nogode ma saibao, tama dago agai ebo doloba pai kolesaga sueibao.
MIC 7:10 Polobadu te boi bidi dabego dabolo te tiwai posobo po wali, “God, duga Genuai Bidi, menade bidibawe?” wali. Tiali goli, nosali te Genuai Bidigo da tau sabo augwa sulama, te augwali hale dwai mu saibao. Te Genuai Bidigo augwali aiyaba elaluama, te augwaligo te tǫ pu aiyana pai, te bidi dabego sągągo agabo tiwai ebo sueibao.
MIC 7:11 Dage te Jerusalem we bidi dabe, te sogo bodolu si pedalubo si da, te dagego te taun bagulubo masigi obo sę ma yabo bodolu si pedelaibao. Tama te sogo augwaligo te taun sesege badu te ibaba tegasa peyu, te genuai igi paibao.
MIC 7:12 Tama nago we bidi te gasa tǫ kantride kalabus igi pali, te augwali ma asaibao. Augwali te wę Yufretis pedai badu te tǫ kantri Asiria, te giliga pedalubo badu asaibao. Te augwali Isip te saut badu asaibao. Tama augwali te tigidali habude te digibulu bidali te asiyu, te tǫ kantri te nambis badu elaluai, te genuai tamu ąį, me te bulu du pesage dabede bidali tagalama, asaibao.
MIC 7:13 Tiali goli, te tǫ kantri dabe te olo masigi kemi tǫ pesage pedelaibao, magi baso meni, tede bidali we bidi dabego te dwai kolesaga hauwa yalio.
MIC 7:14 Genuai Bidi, naga digi te naga dąų olama, sa muani we bidi dabe te naga tonalubo bidi bidao. Augwali te moni genuai dulu te wiegi yai tǫ elalubo bulu du dabe bagede bidibao, tama te gi bulabo wiegi yai tǫ me aiyadu elalubao. Tialima, nago augwaliba te wiegi yai tǫ elalubo madiba te gi bulugi pomainu yao, te Basan me Gileatde, te polobadu yali tiwai yao.
MIC 7:15 Genuai Bidigo te po wei ponoyu, te po wai, “Te eno dage tau siyu, te bomai sę meba yaibao, te dagego sueibao, te eno dage Isipde selama, odasa asiyu yali sę tiwai yaibao,” po wai.
MIC 7:16 “Te gasa hani bage augwaligo te bomo elalubao, tialima te augwaligo eno bomo sulama, te augwali dwai noma saibao. Te augwali wi elama, te augwa nogogo pedauwali pania siyu, me olo si pania saibao,” wali.
MIC 7:17 “Te augwali eno gedude tǫba degasa dulama, te tabi bulu gigi paibao, te hasamani haliga bulu pabo tiwai yaibao. Te augwali wi elama, noma siyu, te augwali geme duala sali pesage tagalama, te pepeli deliba teda aselama, te dagego Genuai Bidi God enaba asaibao,” wali.
MIC 7:18 Genuai Bidi, te god me deli nage tiwai me menio. Nago te naga we bidi dabe, te augwali kalabus igi peyu, meba ma asali bage, te augwaligo sęgę nago sela sądubadi gebao. Nago wado po wabo homu sębę te sesemane me elaludubeo. Menio. Sesemane sogo nago wiegi yai pemene eyu, te da godolo mu eyu, tau sabo dao.
MIC 7:19 Te nago olo mu tau sabo wiegi yai kolesaga dabolo ma yaibao. Te nago dago sęgę aiyaba elalu, te magi nai me deli nago sągągo agabo tiwai ebao, tama te sęgę nago te tamu ąį ge aiyanu mu dulaliba te sąwaibao.
MIC 7:20 Te nago naga po tigidali wali pelama, te nago da Israel dabeba te olo mu tau sabo wiegi yai kolesaga yaibao, te Abrahamgo wąį nǫų hani, te nago we bidi dabe dao. Te nago polobadu dago wąį nǫų dabebolo te dąų walali po tigidali te mu usu nubo dao.
NAH 1:1 Godigo te genuai taun Ninivede po te profet Nahumbolo te nai nade subo tiwai ebo sogo te sęgę yai po mawai. Profet Nahum aga te Elkos bulu bidi dao.
NAH 1:2 Genuai Bidi naga te God dao, te agai te gasa god aga tiwai pedalumainu me egobeo. Te agai po sela sąbo bidi dabe agai koneanio. Genuai Bidigo te haliga sębę augwaliba eyu, te dwai dene augwaliba mu mabo dao.
NAH 1:3 Genuai Bidigo asesa wado po me wagobeo. Tiali goli, aga te bomo yai elalubao, te sesemane sogo agai te dwai sę ebo bidi dabeba te dene mawaibao. Te Genuai Bidi gasaba me deli pabo sogo da, te genuai wali me tulubage pedelaibao, te pǫ dabe te agai sągą dologode te pobele bage hogomu tiwai pedalubo dao.
NAH 1:4 Te agai tamu ąįba wado ilibaso da, teda te tamu ąį sula saibao. Tama agai te wę dabe me sula somainu ilaibao. Te agai tama po obaso, te wiegi yai nosai me gi me te nai yabe dabe sasia paibao. Te Basan badu gi dabe me, te Karmel bulu dude te nedu du walobo ni dabe me, te Lebanon bulu du dabede elalubo plauwa dabe me, te tagalao, tigidali te sasia pabo dao.
NAH 1:5 Tigidali bulu du te Genuai Bidigo gesabidide mumunu elama, te olo wę tiwai me pedelali. Te Genuai Bidi sabalubo sogo tǫ te mumunu yai, te tigidali we bidi me mumunu elama gęo page ebo dao, wali.
NAH 1:6 Te aga haliga sębę ebo sogo da, de mu te bugagia bidaibawe? Te de aga me dologobe dawe? Mu menio. Agai te we bidi dabeba wado eyu, te agai gedu te sia bogoli tiwai penelą pelama, te masigi dabe pepeda pelama, te hogomu pobele bage pedalubo dao.
NAH 1:7 Genuai Bidi agai wiegi yai kolesaga da dali ebao. Aga te aga we bidi dabe te sęgę sabo sogo geme duala sabo tiwąį madi tiwai elalu, tama te agaba pabo we bidi dabe tau sabo dao.
NAH 1:8 Te genuai ąį asobo tiwai elama, tama aga boi bidi dabe te Ninive bage te aiyaba mu elaluama, tama te agai po sela sąbo bidi dabe te ela muyu yaibao.
NAH 1:9 Dage boi bidi dabe, dagego te Genuai Bidiba magi dwai sę yabo po mianiwe? Dua dao, agai te dage tigidali silimainu yaibao. Te bidi me deligo si sogo hagoma ebaso usu egobeo. Mu menio.
NAH 1:10 Dage te bomai wę tuyu gęo page mu yali bage tiwai dao, dage dwai madi bidibao. Agai dage tigidali silaibao wali, te siago te sesani yai nosai me kala wa pai te isi tula palobo tiwai yaibao.
NAH 1:11 Dage Ninive bidi dabe me deligo te dwai homu kolesaga elalu, tama agai te Genuai Bidiba dwai sę yabo po mianio.
NAH 1:12 Tialima Genuai Bidigo aga we bidi dabe, te Juda dabeba, te tama po wai, “Te Asiria dabe te bomai bidi dabe te genuai abagi hani elalubao, tiali goli te augwali eno dolama te augwali mu silaibao. Eno we bidi Juda dabe, eno dageba genuai sęgę muani, tialima eno te munu me ma tegobeo. Mu menio.
NAH 1:13 Te Asiria dabego dage tonaluali, tiali goli megi da, te eno augwaligo bomo aiyaba elaluama, tama te augwaligo dage kalabus ma egobeo,” wali.
NAH 1:14 Tialima Genuai Bidigo te tiwai bomai po te Asiria dabeba wali, “Te dage hanigo wąį nǫų me pedalugobeo,” wali. “Te eno dagego lotu bede elalubo tibo god dabe, te nigo me kapago nigali noma piksa te tigidali dolaibao,” wali. “Te eno dagego gų page sisilaibao. Tama dage munu ma me bidigobeo. Magi baso meni, dage te dwai bidi mu dao,” wai.
NAH 1:15 Suao. Bidi me deli te bulu du sunumi dabedu asiyu, te wiegi yai po selasa asobao. Aga asobo te hwįani silali po pusagasu asobao. Tialima te Juda we bidi dabe, dage te genuai side sisinama, te Godiba lotu weyu, tama agabolo dagego te mawaiba po dąų wali nai maiąo. Tama te bidi dwai dabego te dagego tǫ somainu ma egobeo. Godigo augwali dolai dao.
NAH 2:1 Te boi bidi dabego te Israel dabe dolama, tama augwaligo te wiegi yai nai doado bage tigidali sela palio, tiali goli megi Genuai Bidigo homugo te Israelgo genuai nogi ma ilaibao, te polobadu tiwai yaibao. Te Ninive dabe, te boi bidi dabego dageba boi hwįagasai dao. Te dage dolabo bidi dabe asalio. Te duga ami bidi dabe te taungo genuai obode tonalumainu muao! Te sunumi dabede tonaluao! Dage te bomo elama dolalu, te hwįabo sisi elaluao!
NAH 2:3 Te boi bidi dabego sabele te mama yai tolalu, te au yali au te mama yai ugwa dabe munama, te augwaligo dage dali boi hwįagasobao. Augwali te hwįainu udayu, te augwa karis dabe te sia ula tiwai elasa asali, te sesemone ene dabe augwa te ni wiligo nigali, augwa te wele siyu tęąbi ebao.
NAH 2:4 Te karis dabe te sunumi dabedu te taunba asiyu, te udabo diluagi mu elama, tama te sisinibo pesageba ugwaba udayu, edaba udayu ebao. Augwaligo ula te sole udalobo tiwai eyu, tama te be sele ebo tiwai polo polo ebao.
NAH 2:5 Te ofisa dabego te po olama, te ami bage augwali asesa polo mu pali madi te masigigo augwali sągąde dolobao. Te boi bidi dabe te masigigo nigai genuai obo elaluboba udulama, te obo aluabo masin dualigi pobao.
NAH 2:6 Te masingo te wę pąde elaluali sunumi aluama te sunumi dala palio. Tialima te kingo bede bidali we bidi tigidali augwali wi mu dwai ebao.
NAH 2:7 Te boi bidi dabego te Asiria king bidi dolalumainu ilali. Tama augwaligo kwingo gudubo ugwa peda sąnama, tama kalabusiba odasa pali. Tama te kwingo sę ebo we dabe te dwai haliga eyu gela obao. Augwa te homu dene mu ebaso, te augwa hagawiaba nogo elebao.
NAH 2:8 Te we bidi dabe te Ninive taun buluba wi tedela sąwani, te wę palialuali dalubaso te wę pabo tiwai ebao. Te ofisa dabe augwaligo i bomonama weyu, te tiwai obao, “Dolaluiąo! Dolaluiąo! Wi pigimio!” wabo. Tiali goli te me deli doligi pelama, te ma geasa me pabeo. Menio. Tigidali wi naga pela silibao.
NAH 2:9 Te boi bidi dabe augwa hasiba digi te po obao, “Ae, tegobao, te tigidali silva me gol tigidali sao,” po obao. “Magi baso meni, te augwaligo taunde te wiegi wiegi yai sawi yai nai pągąnaluai dao,” wabo.
NAH 2:10 Te taun Ninive mu dolalio, te bidi dabego tagalama wi tedela pali. Tama taun te pobele bage yai olo tǫ mu elaluai. Te we bidi dabe wi dwai mu elama, te augwali nogo sągą didibili ebao. Augwa bomo kimi te isalio, tama augwa gedu te tedela dwai mu yai dao.
NAH 2:11 Hasia te genuai taun bomo mu elalu, te laion dabego be dabe tiwai elaluali, tiali goli megi da, menio. Polobadu Ninive te bomai ogwa bidi laion bugagia bidiyu, aga nai tuabo madi tiwai elaluali, te laion so me wai puluba te geme dualalu, te boi bidi dabego augwali dolomainu me ebeo. Te hasa elibo laiongo te hasa dabe te dwasianu aga kakali minama, aga so me wai dabe augwaliba mani. Aga beba te hasa pągąna palali. Tiali goli megi da, aga be mena elalubawe? Te be dolai dao.
NAH 2:13 Tigidali Bomo Elalubo Genuai Bidigo te Ninive dabeba te tiwai po wali, “Ena digi ena dagego boi bidi dao,” wali. “Te eno dagego karis dabe tigidali siago ulaibao,” wali. “Te dagego ami bidi dabe te hwįbaso isaibao. Te dagego gasa bagego nai sali tigidali te ena ma saibao,” wai. “Te gasa bulu tǫ kantri we bidi dabego te dagego po sela pelama, augwaliba wagi pomainu tagala palali bidi dabego pedauwalidu wabo po te augwaligo me odogobeo,” te po wai.
NAH 3:1 Hobede ya! Te Ninive we bidi dabego tibo po umabo mu weyu, te bidi dabe hauwa mu ela muani. Te augwaligo te gasa hanigo wiegi yai nai doado bage hauwa bomonama selama, te Ninive taun pągąnai. Tama tialima te Godigo augwali tigidali dolaibao wai.
NAH 3:2 Te wip bįgo te hos dabe tudi badu elibo kidagalo wabo odaibao, te hosgo sągą me karis wil te sunumidu pabode kidagalo wabo dao. Tama te hwįbo karis te sunumi masigide sasa mano soabo odaibao.
NAH 3:3 Te boi hwįabo bidi dabe te hosde dualama, te udada asiyu, te augwa bainat hwą me sesemone te dula gegemane ela asobo tiwai yaibao. Tialima augwaligo te bidi hauwa ela munama, te augwa tigi dabe pesage holaibao, te bidigo nedabo usu me egobeo. Te soabo bidi dabe augwaligo te isali bidi dabe tigi daide agaga soaibao wali.
NAH 3:4 Te Ninive taun te penani we tiwai yali, tama aga te dwai dene mu salio. Aga gesabidi te sawi yai mu elalubaso, agai te bidi dabe homu bega sabo sę ilali. Agai te we bidi hani dabego homu kekelama te agaba augwali pobaso, te agai augwali kalabus sę emainu ilalio.
NAH 3:5 Te Tigidali Bomo Elalubo Genuai Bidigo te po wali, “Ninive, nageba eno dwai dene ilaibao, nage penani we, te eno nago ugwa dabe pepeda sąnama, te nage tigi olo elalu, te ugwa meniama, tama te we bidi hanigo nage subaso, te nage hale saibao.
NAH 3:6 Te eno nage mu begela dolama, tama nage te dwai kugumini yai naigo haluaibao. Te tigidali bulu tǫ pedai kantri we bidi dabego nage sulama, wi yaibao.
NAH 3:7 Tigidaligo nage subaso, te habu bulu kilasa paibao. Augwa te po waibao, ‘Suao! Ninive dolalio. Te bidi me deligo agade homu dene mu egobeo. Te bidi me deligo aga tau sabo wiegi yai po wabo homu me egobeo,’ augwaligo te po waibao,” Genuai Bidigo te po wai dao.
NAH 3:8 Ninive, nago homugo nago bomogo te Tebes, te Isipgo genuai taungo bomo edelaibao homu eba, agawe? Agai me te genuai ąį me deli te aga obo banis tiwai elaluali wali. Te ąį te wę Nail dao.
NAH 3:9 Tebesgo te bulu tǫ kantri Isip me Itiopia tonaluali, te gasa bulu tǫ kantri me deligo agai bomo aiyaba me elalubeo. Te tǫ kantri Libiago te agaba hwįbode kisa selama, hai namu wai elaluali.
NAH 3:10 Tiali goli te boi bidi dabego te Tebes dabe aiyaba elaluama, te augwali sela pelama, kalabus igi pali. Augwaligo te wai dabe elama, augwali te tigidali sunumi tunu magede isasa palio. Tama augwaligo te Tebes genuai bidi dabe te sengo nogo duani, te augwa hasi dobola selama, te augwali sela palio.
NAH 3:11 Dage Ninive dabe, dage me te Isip dabe yali tiwai pedelaibao. Dage te bomai ąį tulama gęo page ebo bidi tiwai eyu, te dagego homu kolesaga te umuna pelama, te dage tulalueibao. Te dage duga boi bidi dabede wi painu yaibao.
NAH 3:12 Tama te boi bidi dabego te dagego bomai taun sainu sinabo sę me egobeo. Menio. Te bomai taun dabe te ni kaya fik tau yai tiwai elalubao. Te bidi me deligo te niba pemebaso da, te nai tau dabe te aga pedauwaliba dolo tudulalueibao.
NAH 3:13 Dagego ami bidi dabe te we dabe tiwai naga dao, tialima te mena ami bidi me deligo bomonama te boi bidi dali hwįnama, te augwali me sela sągobeo. Te siago te dagego taun bomai sunumi dabe nigali te bomai bǫ nami dabe daibao wai.
NAH 3:14 Dage Ninive dabe, te tuabo ąį te taunba sela asao, te boi bidi dabego te taun obo bagua sainu ebo te sisi elalu tonaluagameo. Te mama yai tǫ dagego sigi pelama, te agayu, pu aiyana palama, te bokisba munama, te brik nigaibao. Tama dagego te brik te hanu obode dąų waligi pao, wali.
NAH 3:15 Tialima te me usu egobeo. Te boi bidi dabe aselama, te dage dali te duga taun dali siago ulama, te dage isaibao. Te dage tigidali silaibao, te nai dabe te kuli mano dabego silibo tiwai yaibao. Polobadu dage te kuli mano tiwai pedelai dao.
NAH 3:16 Te bisnis bidi dagego hauwa mu elaluama, te dagalude hǫ dabego namba aiyaba elaluali. Tiali goli megi te tigidali pela silalio, te kuli mano dabego bogo diniga palama, bola pabo tiwai yai dao.
NAH 3:17 Te dagego tobolu bidi dabe deliba sisiniyu, te genuai hani kuli mano tiwai te kedau ebo sogo te masigigo nigai obo banisde te kuli mano dabe sisinibo tiwai yali. Tiali goli te giliga nanobo sogo te augwali bola peyu, te augwali menaba paliwe te bidi me deligo me konegobeo.
NAH 3:18 Te Asiria genuai king, nago odao, wali. Te nago polalubo bidi dabe me genuai bidi dabe te isalio. Te boi bidi dabego nago we bidi dabe sela sąnama, subigila te bulu duba tedela palama, tama augwali te augwa buluba ma sela asabo bidi deli te meni yanio.
NAH 3:19 Te nago keni dabe pedela somainu yabo marasin deli me elalubeo. Mu menio. Polobadu te nago augwaliba yali dwai kolesagade te bidi me deli wi painu ebaso usu ebeo. Tialima tigidali bidigo te nage dolali po sabilibo odolama, augwali te wiegi yai homu pemene mu elama, nogo elaibao.
HAB 1:1 Te Genuai Bidigo te sęgę yai po dabe te profet Habakukbolo te nade subo nai tiwai elama, ola mani.
HAB 1:2 Genuai Bidi, hauwa sogo mu eno nage i wabo dao. Nisu mu nago eno i wabo odama, tama nago da Juda dabe tau saibawe, tama te dwai nai dabe daba pedalobo naigo da dolidalio?
HAB 1:3 Eno sęgę hauwa mu te we bidiba pedalobo suali. Magi baso nago te sęgę pedalumainu sula tagalobawe? Mena tama tibaso nago te sę dabe te we bidiba te dwai sę dabe pedalobo sulama, tama nago magi sę me deli isąma ebawe? Te tigidali badu te dwai bidi dabe augwaligo te we bidi dolama, me augwa nai dabe me doliyu ebao. Tama te bidi dabe augwa hasi wado po olama, subigila hwįyu ebao.
HAB 1:4 Tama te we bidi augwaligo po tų ebo si, augwaligo te nago bomai po wali pisąma, tama augwaligo homugo te bomai po te olo nai dao tiwai homu ebao. Tama sesemane sogo te bidi dabego doloba pai kolesaga wali pabeo. Te dwai bidi dabego te doloba pai bidi dabe aiyaba elaluama, tama nago bomai po te hųgia sabo dao.
HAB 1:5 Tialima, Genuai Bidigo aga we bidibolo e tama po pusa mani. “Dagego meba gasa kantri we bidi bugagia suao, tama dage noma dwai mu saibao. Magi baso meni. Tamadi tama eno augwali tomode gasagi yai nai me pedelemainu elama, tama dagego te sę yali po odobode da, teda dagego homugo te mu dao homu me egobeo.
HAB 1:6 Odao. Eno te Babilon dabe augwali bomai hani mu pedelemainu ilaibao. Te bidi dabe augwali te bidi dwai dabe dao, tama augwali hwįbo bomai bidi dabe dao. Megi augwali ami bidi dabe tigidali kantri dabeba pelama, augwali polo aiyaba elaluama, tama augwali tonalubao.
HAB 1:7 Augwaligo tigidali bidi hani augwalide wi dwai mu emainu ilibo dao. Tama te dwai bidi dabego bomai po deli me wali pabo menio. Augwaligo augwa homu kolesaga wali naga pabo dao, tama augwa nogi naga ugaba sabo dao,” wali.
HAB 1:8 “Te Babilon bage augwaligo hos kibu dabe omagia polo udabo dao. Tama augwaligo meba tigidali bulu hasa dabe omagia udabo edelama, mu udabo dao. Tama te hos dabego dolama mu hwįyu ebo dao. Tama augwaligo hwįbo kolesagago te hulide bilibo te uni yowigo hwįbo kolesaga edelama mu ebo dao. Te hos kibu dabe augwali sasamano pelama, tama te hwįabo bidi dabe augwali te hosde dualama, tama augwali digibulu bulu mude hogodama, tama udulama, tama hwįainu pabo dao. Te bage augwali te ba kemodagego te hasa dabe ela tuainu te bogo si pobea selama, tǫba tulalubo tiwai elama omagia mu udawaibao,” wali.
HAB 1:9 “Te augwaligo ami dabego augwaligo te magi yali te kantri dolo pelama, tama te kantri dolama, tama bomonama, te we bidi selama, te kalabus sę igi pomainu ilibo dao. Te bage augwaligo te sali te kalabus dabego namba te hauwa kisu mu, te ąį sanede kemi sane tiwai dao, bidigo augwali nedemainogo ebaso, te usu egobeo.
HAB 1:10 Te Babilon bage augwaligo te king dabe, me te kantri ofisa bidi dabe gisugu mena tagalubo dao. Augwaligo te taun dabe dolabo homu ebaso da, tama te taun dabe bomai obo elalubaso da, tagalao, augwaligo gisugu mayu ebo dao. Tama augwaligo te obo sesegede augwaligo tǫ du holama, tama augwali tedu te oboba ugwaba holama, tama taun tomoba pelama, tama te taun me te taunde nai dabe sese tama sabo dao.
HAB 1:11 Augwaligo hwįbo silama, tama augwali deli sogo mu augwali gasaba omagia mu polo pabo dao, te wali soabo tiwai tama ebo dao. Te Babilon bidi dabe augwaligo god me deli wali pabo menio. Augwaligo augwa homu kolesaga me augwa bomo wali pabo dao. Tama augwaligo te tobage haniani dwai sę ebaso, augwaligo genuai sęgę mu elalubao,” Genuai Bidigo aga we bidibolo te po walali.
HAB 1:12 God, polobadu mu me, megi tama me, nage Genuai Bidi me te bidibao. Eno Genuai Bidi, nage te tedali wiegi yai doloba pai kolesaga ebo God dao, tama nago da isimainu sula tagalogobeo. God, nage eno Genuai Bidi dao, tama nage te bomai masigi tiwai dao, tama da te tudi badu te tiwąį madide duala sabo tiwai dao. Nago te Babilon dabe magi elama, tama augwali bomo ilama, tama augwaligo da tonalubo sę emainu magi ilai dao, te dago dwai sęgę wei ponoyu tiai dao.
HAB 1:13 Te Babilon dabe augwali te tibo po wabo bidi dabe dao, me augwali te haniani dwai sę ebo bidi dabe dao. Mena tama mu tibaso, nago augwali nago sę emainogo sula tagalobawe? Eno koneani, nage doloba pai mu elama, tama nago dwai kolesaga ebo bidi dabe po tų ela mayu, tama augwalibolo dwai pe wei ponobo dao. Tiali goli, te Babilon bidi dwai dabego te bidi meba dwasianu wiegi yai bidi dabe dolobao, tama nage ma olo dulaluyu tonalubao. Nago magi baso tama tibawe?
HAB 1:14 Te Juda we bidi augwali sųgų o sagado dabe meni. Menio. Tialima, nago magi baso augwali tagalama, tama augwali tobolu bidi meni yai bidiyu, olo te sųgų me sagado dabe tiwai bidimainu tagalobawe?
HAB 1:15 Tama te Babilon dabego te we bidi selama, kalabus ilibo dao, te bidi dabego te sųgų dabe tubo hukugo me sųgų sabo wa umbengo sabo tiwai ebao. Augwaligo augwali kalabus ela silama, tama augwali wiegi yai homu eyu, hae ulugu wabo dao.
HAB 1:16 Te tama tibo kolesagago augwaligo nai dabe hauwa mu selama, sisinibo dao. Tama augwaligo augwa bomo te augwa tibo god tiwai ilama, tama te tibo god nogi ugwaba selama, tama te bomogo nogi ugwaba sainu ofa eyu ebo dao.
HAB 1:17 Te Babilon dabego augwa boi bidi dabe hobede dwasianu me ebo menio. Tiali goli, Genuai Bidi, nago augwaligo hwįnama, tama meba kantri dabe dolomainu sesemane sogo sula tagalaiba, agawe?
HAB 2:1 Eno Genuai Bidiba te eno homude elalubo po walama, tama agai po enaba wei mabo tonalubao, te eno agai po wei ma ponainogo ebao. Eno aga tonalubo, te ami dabe te tauaba holama, te boi bidi dabe asobo tonalubo tiwai yaibao.
HAB 2:2 Tialima, Genuai Bidigo enabolo te tama po wali, “Eno nagebolo te po mobao, te nąde wabo tiwai po mawaibao. Tama nago te po te masigi pedai me delide bugagia asęnama, tama niwai bidigo nedainogo te agai bugagia sulama, nedemainao.
HAB 2:3 Te sę dabe pedelabo sogo, te menu gana elalubao. Tama tibaso, nago te po asęnama, munalumainao. Tiali goli, te sesabi gana bidisiąbadi, te pąde sogo digi tama, te eno nagebolo ola mawainogo ebo sę da, te pedelaibao. Nago homugo te sę polo pedalugobe da homu yaibao, tiali goli nago dwasianu sogo tonaluama gana te sę pedelaibao, te mani bodolu te geda mugobeo.
HAB 2:4 Te nago asęabo po e tama dao, ‘Te dwai sę yali bidi dabego hagoma eyu, tama augwaligo doloba pai kolesaga me ebeo. Tialima, te Godigo kolesaga wali mu pabo bidi dabe, augwali da te doloba pai bidi dabe yai baso, tama augwali te augwa bidabo ula dali bidaibao,’ te po asęao,” Genuai Bidigo enabolo te po wei ponai dao.
HAB 2:5 Tama ena Habakuk eno e po obao, te dwai sę ebo bidi dabe augwali te bomai ąį tulama, te gęǫ page dolama mu eyu, tama augwaligo dwai sę mu gasa bidi dabebolo ebo dao. Te doado bage hauwa sabo homu godolo ebo bidi dabe, augwali te hagoma ebo bidi dabe weyu, augwali bugagia me bidigobeo. Augwaligo te doado bage hauwa sabo homu ebao, te isibo sogogo te we bidi hauwa sabo tiwai ebao. Tama augwaligo te bulu hauwa tǫ pedai kantri dabe dali boi hwįnama, te augwali aiyaba elaluama, te augwaligo bomo dologode bidimainu ebo dao.
HAB 2:6 Tialima, te tǫ pedai kantri bulu we bidi augwaligo te augwali tonalubo Babilon bidi dabeba posobo po waibao. Te augwaligo te tiwai po augwaliba waibao, “Dage te gasa hani bidi dabego doado bage anoma elama sabo bidi dabe dao, te dage dolaibao. Nisu sogo te bidi dabego dagego nai negeli elalubo wei ponomainu selibo sę ebo kolesaga tagalaibawe?” te po waibao.
HAB 2:7 Deli sogo polo tama te gasa hani dabe aiyaba elalubo bidi dabe, te dugade digi genuai negeli elalueibao, tama gasa hani bidi dabe dageba aselayu, tama dagebolo te po weyu, te negeli elalubo polo tama wei ponao po waibao, tama dage wi eyu, tigi didibili yaibao. Awe, te boi bidi dabe aselama, bomonama, te dagego doado bage tigidali kegelama, tama sela paibao.
HAB 2:8 Dagego te tǫ kantri hauwa we bidi dabego doado bage kegelama sali. Tama dagego te we bidi hauwa ela munama, tama augwaligo taun dabe me dolali. Tiali goli, dagego bidi hani me badu gedelali, tama nosali augwali hogodalu, tama dagego augwali gasa hani bidi dabeba yali kolesaga tiwai dageba wei ponaibao.
HAB 2:9 Dage te bomonama eyu, te gasa hani dabego nai hauwa sali bidi dabe, dage dolaibao. Magi baso meni. Dagego te doado bage duga hani dabeba digi mawai. Tama dagego bomai be dabe sęnama, te duga doado bage bugagia obo tomoba bagua selama, tama dagego homugo te dagego te tiali kolesaga yaligo te dolabo sęgo dage ela soaibao homu yai dao.
HAB 2:10 Tiali goli, te duga dwai kolesagago digi te duga hani dabego nogi aiyaba elaluali dao. Dagego te bulu tǫ kantri hauwa ela tuali tiwai elama dolali, tama duga yali dwai sęgo te duga ma dolaibao.
HAB 2:11 Tama dagego te duga be dabe be paiyai masigi dabe augwaligo me te i weyu, te dage kisiliyu, po tų ąǫ ilaibao. Te duga be walawalago me te tobage po tiwai naga wei ponobo po waibao, dagebolo.
HAB 2:12 Dage te we bidi hauwa ela muani bidi dabe, dagego te augwaligo sę dene mu ilaligo te duga taun bomai taun dolalumai da homu yali, te dage me dolaibao. Dagego te duga taun dąų walabo homu elama, tama dagego dwai kolesaga haniani yai dao.
HAB 2:13 Dagego te tǫ pedai kantri bulu bidi dabe aiyaba elaluama, te we bidi dabe kalabus elama, tama augwaligo dagego nai doado bage dabe nigibo sę dene mu yali. Tiali goli, isigo te nai tigidali dela silibaso, tama te yali sę olodali tama ela tagalaibao. Te Tigidali Bomo Elalubo Genuai Bidigo te sę pedalomainu ilaibao. Te po wai dao.
HAB 2:14 Tama tigidali we bidigo me, tigidali tǫde nai sibigo me, te Genuai Bidigo genuai nogi dali bomo dali si konemainogo yalio. Te konebo kolesaga te tigidali tǫ pedai habu mu usu nigi paibao, te tamu ąį bo deyu, te dąį eboba usu nugulubo tiwai gilama mu yaibao.
HAB 2:15 Dage gasa bidi hani dabeba wado po genuagia mu po wali bidi dabe, te dage dolaibao. Dagego haliga sębę ebo te wain ąį kapde tabila tubo tiwai eyu, tama dagego te bidi dabego te abagi dabeba wain ąį hauwa menama, te augwali gęǫ page ilama, te augwa ugwa dabe pepeda sąnama, te augwali ugwa tigi olo bidiyu, te augwali hale dwai mu somainu ilibo tiwai sę ebao. Dagego te aiyaba elaluali bidi hani dabe augwali hale dwai mu ilalio.
HAB 2:16 Te tama tiwai gilama, te Genuai Bidigo dagego genuai nogi elaluali aiyaba elaluama, te dage hale dwai mu yaibao. Te agai digi dagebolo dwai dene mu mabo sę elama, te agai duga digi te wain ąį hauwa mu tumainogo ebo tiwai elama, te dage gęǫ page dwai mu yaibao. Te dage tigi habu olo bidibo te bidi dabego sulama, tama dagego genuai nogi elaluali aiyaba tula palama, tama dage hale dwai umagi mu yaibao.
HAB 2:17 Dagego te Lebanon bulu dulu ni subigila gela gela tagalabaso, tama megi da Godigo te tiwai deli kolesaga dageba yaibao. Te bulu uni hasa dabego te bulu hasa sibi hauwa elebo tiwai dagego tama yali dao, tialima megi da, te duga digi te dolaibao. Te tama sę pedelaibao, magi baso meni, dagego te haniani tǫde bidali we bidi dabe hauwa mu elama, munama, te augwaligo taun dabe dolai dao.
HAB 2:18 Dage bidi dabego te ni dage dabeba me, te masigi dabe me, te tiwai po waliyu, “Nage pila muani tagalama, hodaluao,” wabo. Dage dolaibao. Dagego homugo te nai hodaluama, te dagebolo magi me deli ola mawaiba homu eba, agawe? Tega, dage, te tibo god dabego dage magi ila tau saibawe? Augwaligo usu me egobeo. Tibo god nigibo sę da, te gol me, te ni dagego me selama, te bidigo digi nigibao. Tama tiyu, te nai dabego dage dali po me deli me wagobeo. Agai dage tibo po naga ola mawaibao, tama tiyu te dage dolaibao. Bidigo digi te tibo god nigo dulama nigali, tama agai homugo te naigo aga tau sabo usu yaiba homu yali. Tiali goli, agai usu munu me egobeo. Te tibo godigo mobo meni yai nai naga dao, tama po me wagobeo. Te dagego silvago me golgo bugagia mu au ilali goli, te tagalao. Agai magi sę me egobeo.
HAB 2:20 Tiali goli, Genuai Bidigo te tiwai egobeo. Aga te aga be tomode bidibao, tama dage tigidali tǫde we bidi, dage aga pąba aselama, te dage pedauwali pania selama, bidao.
HAB 3:1 Profet Habakukgo Genuai Bidiba gedu haluasa po weyu, e tiwai wali. Te gedu haluasa po wali te bidi dabego te balia pode ma usųbo po wabo si, teda augwaligo te hobede ebo kolesagade wali pabo balia po wali pomainu yao. Tama te musik wabo tonalubo bidigo te gita elibo bidi dabeba po walama, te gita eliyu balia po omainogo yao.
HAB 3:2 Genuai Bidio, te nago bomogo yali sęde po eno odolama, te ena noma siyu, nage dologode bidabo homu ebao. Te polobadu nago yali genuai genuai sę dabe, eno homugo nago te tiwai bomai sę dabe te nago da megi bidibo sogo ma emainu homu ebao, te megi e sogo bidibo bidi dabe augwaligo nago te tebo sę ebo kolesaga sulama konemainao. Mu tama, nago dade sębę ebo page elalubao, tiali goli, nago te hobede ebo God da, te eno nagebolo hanalubo, te nago da hobede elama, tama da tau sao.
HAB 3:3 Godigo te tǫ Idom bulude bidali tagalama, te aga ma asalio. God te wiegi yai doloba pai kolesaga tigidali mu ebo God, aga te Paran tǫ pedai bulu dude bidali hogodama, asali. Agai bomo te be posali ula tiwai pedelama, tama te dagalu tigidali pedai badu mesega salio. Tebogo te tigidali tǫde we bidigo agai te genuai nogi ugaba sabo homu ebo sę ilalio.
HAB 3:4 Te aga asidubadi, te agai nogode duala sali bomogo genuai ula te be sele tiwai eyu, tigidali habuba pelama, mu usu nanio.
HAB 3:5 Agai te haniani gasi dabe te pabodu polasa tagala palali. Me agai te we bidi dabe ela mubo genuai gasi te aga wali nosali asalio.
HAB 3:6 Te aga dolugulubo sogo da, tigidali tǫ midigi eyu, mumunu ebao. Agai te we bidi dabe augwali subo sogo da, augwali te ibaba kila sesa peyu, midigi sabo dao. Te genuai bomai bulu du dabe te alua pelama, tulaluaibao. Te polobadu aga bilali dwasianu bulu du dabe augwali te aiyaba kilasa dulubo dao. Genuai Bidigo ebo kolesaga dabe te sesemane sogo elalua paibao.
HAB 3:7 Te tǫ kantri Kusan name ugwa be dabe eno suali, te mu dolai elaluali. Te Midian dabego ugwa be dabe te degasa pai elalua palio.
HAB 3:8 Genuai Bidio, nago wali tagala palama, tama nago te ąį dabe me, tamu ąį dali, te bomo elama, pedalumainu yali. Te nago augwalide wado homu eyu, te tiwai yali da, agawe? Te nago naga we bidi dabe augwali tau siyu aselama, te boi bidi dabe aiyaba elaluali sogo, te pǫ de tulubo tulubage si te nago boi hwįbo nai, te kibu hos dabe me te karis dabe tiwai gilama yalio.
HAB 3:9 Nago naga enesigi dodola munama, tama nago te po obaso, tama nago ene dabe te nago enabo dąį ilali bulu dolo palio. Te bulu du dabego nage subo sogo da, augwali midigi yai dao. Nago genuai ąį te tǫba tula palobo sogo, tama agai te genuai ąį gamia nigai dao. Te ąį genuai bomo elama asalio. Te tǫ dologo badu elalubo ąį dabego me kidagalo weyu, te ge bo dabo ugwanu holama, te dagaluba usu nai dao.
HAB 3:11 Te nago ene dabe enama, augwali polo pabo side te gegemani eyu, ula mu ebo dao, tama giliga de polua si te dagalude bilisiąbadi, osogo olo dolaluali.
HAB 3:12 Nago wado homu ebo genuai mu te tigidali tǫ kantri bulu we bidi dali elaluali, tama nage te tǫ daide ugwadu biliyu, tama tigidali bulu we bidi agawalio.
HAB 3:13 Nago tama tiali, te naga we bidi dabe ma sainogo yali, te nago sa muani king dali sainogo yali. Nago te dwai sę ebo bidi dabego tobolu bidi bomonama elama, tama nago te agai bidi hani mu dolai dao.
HAB 3:14 Te boi bidi dabe, augwali te genuai wali asobo tiwai yali, te da gasaba tedela palainogo tiali. Augwaligo da aiyaba elalualide wiegi yai homu pemene yali, te dwai sę ebo bidi dabe geme duala selama, te magi nai meni yai we bidi augwaliba dwai sę yainu tonalubo tiwai ebao. Tiali goli, nago te boi bidi dabego ami tobolu bidi kepten te aga ene dabego digi ma enanio.
HAB 3:15 Nage te naga hos kibu dabe tudide dugulasali, tama augwali te tamu ąį daidu agaga palio. Tama tiali sęgo te tamu ąį dini genuai hogodomainu ilalio.
HAB 3:16 Eno te sę yali po tigidali odama, te ena midigi salio. Ena wi elama, te eno pedauwali me didibili yali. Eno nogo sągą bomo kimi meniama isali, te ena bomo meni yanio. Eno koneani, te God aselama, te da dolobo bidi dabe te dwai dene ilaibao, tibaso ena dua digi bidiyu, tama te sogo pedalubo tonalubao.
HAB 3:17 Te ni kaya fik dabego te du walisąbaso, me te ni wain dabego me te wain du walisąbaso, tama te ni oliv dabego me te du wai walisąma, tama te gide nai meni yai elalu, tama te kibu sipsip tigidali isibadi elama, tama te kibu bulmakau dabego be dabe me olo mu elaluyu da,
HAB 3:18 teda te sęgę tigidali pedalali goli, te tagalao, te eno Genuai Bidide wiegi yai homu pemene elama, bugai haliga yaibao. Magi baso meni, Genuai Bidi aga te God da, tama aga da, te ena ma dobola sabo bidi dao.
HAB 3:19 God eno Genuai Bidi da, agai enabolo bomo mobao. Agai eno sągą bomo ilali, te bulu du polo holobo uni hasa dia dabego sągą tiwai ilama, tama agai ena te bulu du dabe daide ugadu bugagia bilimainogo yai dao.
ZEP 1:1 Te Josaia, te Emongo ogwa, aga te Juda hani we bidigo king bidali sogo, te sogo Genuai Bidi Godigo e po Sefanaiabolo pusa mawai dao. Sefanaia aga te king Hesekia hani kanemede pedelai bidi dao. Kusi te Sefanaiago aya dao, tama Gedalia te Kusigo aya dao, tama Amaria te Gedaliago aya dao, tama Hesekia te Amariago aya dao.
ZEP 1:2 Te Genuai Bidigo Sefanaiabolo e tama tiwai po walalio, “Eno tigidali tǫde elalubo nai dabe mu dolaio.
ZEP 1:3 Te da, te tigidali bidi dabe, me hasa dabe, me ba dabe, me sųgų dabe, sese tama dao. Tama eno te we bidi tigidali dwai sę emainu ebo nai dabe sese tama silaibao. Te eno tigidali tǫde we bidi sese tama dola silaibao, tama deli me bidigobeo. Ena Genuai Bidi, eno po polo walio.”
ZEP 1:4 “Eno te Juda tǫ pedai we bidi, me Jerusalem hanu we bidi dene mawaibao. Tama teyu, eno te tibo god Balba lotu wabo nai dabe sese tama doliyu, me Balgo tigidali pris dabe sese tama doliyu yaibao. Tama te we bidi dabego augwali munu me ma homu kone egobeo.
ZEP 1:5 Te eno te we bidi augwali augwa wiegi yai dolaba pai be peduba pelama, tama augwaligo te polua, me giliga, me hǫ dabeba lotu wabo we bidi me dolaibao. Mu tama, we bidi hauwa augwaligo enaba lotu po weyu, e tama po wabo, ‘Mu tamao, dago Genuai Bidi wali pobao,’ po wabo dao. Tiali goli, augwaligo tibo god Molekba lotu wagi peyu, me augwaligo te po ‘Te mu tama,’ po wabo dao, ‘dago god Molek wali pobao,’ po wabo dao. Tialima, eno augwali dolaibao.
ZEP 1:6 Te we bidi augwaligo ena tudi ola menama, tama ena wali me asisąma iyu, tama enabolo augwali dodolomainu hanalubo menio. Te eno te we bidi augwali me dolaibao,” Genuai Bidigo te po wai.
ZEP 1:7 Tigidali Nai Tonalubo Genuai Bidi Godigo bubuga pąba polo yagasalio. Tialima, dage aga pageba aselama, tama pedauwali pania selama elaluao. Genuai Bidigo aga we bidi elabo dola selama elalubao, te bidi dabego ofa ebo hasa dabe elebo tiwai yaibao. Tama agai meba bidi dabe i wali, te agai ebo sę dabe suagasomainu. Tama agai augwalibolo agai gedude wiegi yai pedalobo kolesaga emainu yao po wali.
ZEP 1:8 Genuai Bidigo e tama po wali, “Te eno ena te we bidi ela wialobo bubugade, te eno te kingo ofisa dabe dene mayu, me te kingo wai ogwa dabebolo, me te bulu badu dwai kolesaga wali pabo bidi sese tama dene mena silaibao.
ZEP 1:9 Te eno te we bidi augwali te bulu badu we bidigo lotu wabo tiwai ebo we bidi, me nai wi siyu, me bidi ela muyu ebo we bidi sese dene mayu, me te nai wi sai nai dabego augwa genuai bidigo be pągąniyu ebo bidi dabebolo dene mawaibao,” wali.
ZEP 1:10 Genuai Bidigo te po wali, “Te bubugade dagego te we bidi augwali te Jerusalem sunumi obo pąde dolalubo suaibao. Augwaligo te Sųgųgo Sunumi wabo, tede tama dagego augwali gela wabo po odaibao. Te dagego te Jerusalemgo Niu Taun we bidigo gela odaibao. Tama dagego mage nai me bulu dude bomonama mu kulukulu wabo odaibao.
ZEP 1:11 Te dage te taunde odogo malu bulude bidiyu, te po dabe odobaso da, teda dage gela waibao. Magi baso meni, dagego duga tigidali bisnis bidi dabe isai subaso,” te po wai.
ZEP 1:12 “Tama te sogo eno lam selama, tama ena Jerusalem tomoba pelama, tama eno te bidi dabe eno kolesaga godolo isąma ebo bidi dabe bugagia gegegi paibao. Augwaligo homu augwa digi tigidali sę yaibao homu ebao. Tiali goli, menio. Augwaligo te po wali, ‘God da, olo bidibo dao,’ po wali. ‘Agai wiegi yai bidi dabe tau selama, tama agai dwai bidi dabebolo dwai pe mabeo. Tialima, aga tagalao,’ wali. Tialima, eno te bidi dabe augwali dolaibao.
ZEP 1:13 Te boi bidi dabego te bage augwaligo nai dabe wi saibao, tama augwaligo be dabe dolaibao. Augwaligo gesi be dabe sę yai goli, augwali te be dabede bidigobeo. Te augwaligo ni wain bulaiba, tiali goli augwaligo te ni du sogobeo, tama augwaligo te wain wę me geselegobeo,” Genuai Bidigo te po wai.
ZEP 1:14 Genuai Bidigo agai po tų yabo te bubuga te pąde dao, tama te sogo pąde polo pedelaibao. Te dwai bubugade da, te bomai ami bidi dabe tagalao, augwali me wi dwai mu elama, tama gela geninama mu waibao.
ZEP 1:15 Tama te sogo Genuai Bidigo moni sębę pebeli diliba mu pedelaibao, tama te we bidigo homu sęgę elama, tama augwaligo homu dwai yaibao, tama te nai dabe sese tama dola silaibao. Tama te pǫ dabego giliga halua siyu, te dwai tį be elama, tama geninama mu hulia saibao.
ZEP 1:16 Tama te bubugade te biugel bu weyu, me te ami bidi dabego hae weyu yaibao, te augwaligo te bomai obo elalubo taun obo aluyu, me te tonalubo bidi wasman dabego bobobage be dabe aluyu yaibao.
ZEP 1:17 Genuai Bidigo e tama po wali, “Te tǫde we bidi dabego ena Genuai Bidi dali dwai sę yalio. Tama tibaso, eno haniani dwai dene augwalide pedelemainu ilama, tama augwali te gedu widai bidi dabego sunumi gege bilibo tiwai bilaibao, tiali goli te wi pabo tų menio. Tama augwaligo kaneme te wę tiwai gelama, tama augwali isaibao. Tama augwaligo tigi dabe te tǫde te yowi di danamu pabo tiwai damuaibao,” Genuai Bidigo te po wai.
ZEP 1:18 Tama te bubugade Genuai Bidigo sębę hania haninama, mu suaibao. Tama augwaligo silva me gol dabego augwali tau me sogobeo. Mu menio. Genuai Bidigo sębę te dwai isi tiwai pedelama, tama tigidali tǫ dela silaibao. Tama deli sogo tama agai tǫde we bidi sese tama mu silaibao.
ZEP 2:1 Dage e kantri we bidi, dage deliba sisinao. Dagego duga dwai kolesagade dage hale dwasianu me ebo menio. Dagego homu bugagia kone palama, tama te dwai kolesagade hale iyąo.
ZEP 2:2 Tiyu, Godigo aga homu sębę haniniyu, dage deli sogo tama te plaua sasia pabo tiwai elama dolidali weyu iyąo. Tiyu, Genuai Bidigo sę yagasiyu, dage isi ulubo tiwai elama ulidali weyu iyąo.
ZEP 2:3 Dage we bidi hamaga isąnama Genuai Bidigo po sela sąsiama ebo we bidi, dage agaba asiąo. Dagego duga digi aiyaba elaluama, tama doloba pai kolesaga naga iyąo. Tialima, dagego te tama tiyu da, teda Genuai Bidigo sębę elama, tama te dwai pe te dwai we bidi dabebolo wei ponobo sogo dage da dologobeo.
ZEP 2:4 Te Genuai Bidigo te kantri Filistia dolobo sogo, te taun Gasade bidi deli me bidigobeo. Me te taun Askelonde me bidi meni yaibao. Te boi bidi dabego taun Asdot we bidi sese tama deli be posobo sogo sela sąwaibao, tama augwaligo te taun Ekron we bidi me sela sąwaibao.
ZEP 2:5 Tega, dage Kenan tǫde bidibo Filistia dabe, nambisde bidibo Keret bage, dage me dolaibao! Genuai Bidigo dage po tų ela mawai dao. Tama agai dage dolama, tama bidi deli me bidigobeo.
ZEP 2:6 Dagego tǫ dage te tamu ąį sabide te elalubao, teda te olo kala bulu pedelaibao. Tama te sipsip tonalubo bidi dabego tede dwasianu be dabe me sipsip obo te pesagede sę eyu yaibao.
ZEP 2:7 Tama te dwasianu Juda hani augwali dolisąma yali, te bage augwaligo dagego tǫ saibao. Tama augwaligo sipsip kibu dabego tede nai tulama, tama te Juda dabe augwali te Askelon taun bede piyu yaibao. Tama God augwa Genuai Bidi, augwa Juda dabego Genuai Bidi augwali dali bidiyu, tama agai augwali augwa kantride bugagia bidimainu ilaibao.
ZEP 2:8 Genuai Bidi Tigidali Bomo Elalubo Bidigo te tama po wali, “Te kantri Moap me kantri Amon bidi dabego eno we bidi posobo po olama, tama eno we bidi dali dwai po wabo eno polo odalio. Tama augwaligo hae olama, te po wali, ‘Augwaligo tǫ dago saibao,’ po wali.
ZEP 2:9 Mu tamao, ena Tigidali Bomo Elalubo Genuai Bidi ena bidalubao. Ena Israel dabego God, eno mu po weyu, te dąų obao. Te Moap dabe, me Amon dabe, augwali te taun Sodom de Gomora si dolali tiwai tama yaibao. Tama hae naga holama, tama augwaligo tǫ mesega saibao. Tama tamu sabo dedage dabe naga pedelama, tama te bulu dolama, te tama elaluaibao. Eno hani augwali me bidali da, te bidi dabe augwaligo augwali dali hwįnama, tama augwaligo nai dabe kegelama saibao, tama augwaligo tǫ me saibao,” te po wai.
ZEP 2:10 Te tama tiwai sę te Godigo te Moap dabe me Amon dabe dali me dene mawaibao. Magi baso meni. Augwaligo hamaga elama, tobolu gagea peyu ebo dao. Tama augwaligo Genuai Bidi Tigidali Bomo Elalubo Bidigo we bidi dabe dali dwai po wabo dao.
ZEP 2:11 Genuai Bidigo augwali wi dwai mu emainu ilaibao. Te agai te tigidali kantri dabego tibo god dabe olo nai pedelemainu ilaibao. Tama tigidali tǫ we bidi augwali augwa kantride bidiyu, Genuai Bidiba naga lotu po weyu yaibao.
ZEP 2:12 Dage kantri Kus we bidi, Genuai Bidigo dage boide ela muna silaibao.
ZEP 2:13 Tama aga bomogo naga Genuai Bidigo te kantri Asiria we bidi dola silaibao. Te kantri te not badu te elalubao. Tama agai augwaligo genuai taun Ninive dolaibao. Tama te taun te olo nai meni yai olo tǫ wa pai bulu elaluaibao, tama bidi te bulude me bidigobeo.
ZEP 2:14 Te kau kibu dabe, me sipsip kibu dabe, me meme kibu dabe, me bulu hasa dabe naga, augwali teba piagasiyu yaibao. Magi baso meni, te boi bidi dabego te wiegi yai ni bǫ name dabe dadalama, buluba sąsąwaibao. Tama te hulide bilalobo ba dabe augwali te bede bidaibao. Tama augwali te windo dabede dualama, te augwa po weyu yaibao.
ZEP 2:15 Te Ninive dabe augwaligo homugo augwali bomai bage dao homu elama, tama augwaligo homu augwali bidi dabego me dologobeo homu ebao. Tama tiyu, augwali wiegi yai homu pemene ebao. Tama augwaligo homugo augwaligo taun te hasia polalubo taun dao homu ebao, te tigidali kantri tomode. Tiali goli, mu menio. Te dwai nai dabe te Ninivede pedelaibao. Tama te bulu dolama, tama elaluaibao. Tama te bulu te bulu hasa dabego bulu gagawaibao. Te bidi dabe sese augwali te pąba pabo bage augwaligo posobo po weyu, eda ma kila siyu yaibao.
ZEP 3:1 Jerusalem, hobede ya, nage dolaibao, nago kolesaga Genuai Bidigo gedude dwai damua pai mu yalio. Nagede bidibo we bidi dabe augwaligo agai po sela sąbo dao. Tama augwaligo augwa hasi deli hani dali dwai sę ebo dao.
ZEP 3:2 Augwaligo bidi dabego po odisąwai, awe, augwaligo Genuai Bidigo po me odai menio. Tama augwaligo Genuai Bidigo augwali dodolomainu homu ebo hagela yai dao. Tama augwaligo agaba homu dąų olama, tama augwaligo Genuai Bidigo augwali tau somainu me hanalu wai menio.
ZEP 3:3 Te Jerusalem genuai bidi dabe augwaligo te olo we bidi dali dwai kolesaga ebode augwali te bulu laion sibi nasi ebaso bomona dagą wabo tiwai ebo dao. Tama te po tų odobo bidi dabe, augwali te uni yowi nasi genuai ebo tiwai iyu ebo dao. Tama augwaligo te hasa tulama, silama, tama augwaligo do tuabo dili me mubeo.
ZEP 3:4 Te profet dabe augwaligo augwa sę subigila eyu, bugagia ebo meni, tama augwaligo te bidi dabe augwali dolomainu ili po naga ola mayu ebo dao. Tama te pris dabe augwaligo te Godigo tedali gasagi yai be habu dabede dwai sę eyu ebo dao. Tama augwaligo Godigo bomai po hasegelama tagalali, te augwa digi augwa ma tau somainu.
ZEP 3:5 Tiali goli, Genuai Bidi Jerusalemde me bididuali. Agai doloba pai kolesaga naga ebo dao. Te agai dolo isąwai kolesaga da agai me ebo menio. Mu menio. Te tigidali sogo bubugade agai te we bidi dabe dali doloba pai po tų naga ebo dao. Agai te sę tagalobo menio. Tiali goli, te taunde bidibo dwai bidi dabego te dolo meni yai kolesaga naga ebo dao. Tama augwali tede hale dwasianu me ebeo. Mu menio.
ZEP 3:6 Genuai Bidigo e tama po obao, “Eno meba kantri dabe mu silama, te Juda hani isąwai bage, tama augwaligo genuai taun dabe dolama tagalai dao. Tama te bomai obo dabe me, be dabe me, te boi bidi tonaluyu no munalubo te sigide elalubo be dabe dolama, tagalai elalubao. Tama te bidi dabe augwali te taun sunumidu tomodu bidi dabe me bilibeo. Magi baso meni. Bidi deli me bidisąma ebaso.
ZEP 3:7 Eno homugo te eno we bidi dabe augwaligo eno te kolesaga sulama, tama augwali ena dologode bidigowe homu yali, tama eno augwali dodolomainu sula tagalogowe homu yali. Tialima, augwaligo eno augwalibolo polobadu ola mani nai dabe bugagia koneyu da, teda eno augwali me dologobeo. Me eno augwaliba dwai dene magi menigi da. Tiali goli, augwaligo eno ola mani po odobeo. Menio. Deli sogo tama augwali hogodama, tama augwaligo bomonama, augwa polobadu yali dwai kolesaga edelama mu yalio,” te po obao.
ZEP 3:8 Tialima, Genuai Bidigo aga wali asobo we bidibolo e tama po walali, “Dage homu hauwa igimio. Dagego eno te tigidali kantri we bidi po tų ela mabo te sogo deli naga tonaluiagameo. Magi baso meni. Eno augwali dali sębę elama, tama eno augwali deliba sisinagasomai elama, homu polo dąų olama, tama eno augwali dene mawaibao. Tama eno sębę te isi bogoli tiwai elama, tama eno tigidali tǫ dabe mu dolaibao,” wali.
ZEP 3:9 “Tama te sogo eno tigidali kantride we bidigo homu kolesaga hasesegele paibao. Augwaligo homu kolesaga gesi ma elama, tama augwaligo ena deliba naga gedu haluasa po weyu yaibao. Tama augwali homu deli naga elama, tama augwaligo eno po wali asaibao.
ZEP 3:10 Tama eno we bidi dabe augwali eno te digibulu kantri Kusba sela sąwani we bidi dabe, me gasa meba kantriba tagala palali, te we bidi augwaligo ena ofa dabe yabo nai sesaibao.
ZEP 3:11 Eno ede bidibo we bidi, te mu tama dao, dagego eno po mu tama sela sąwai dao. Tiali goli, eno te sę dabe pedelemainu ebo sogo da, teda dagego duga yali kolesagade hale me egobeo dao. Magi baso meni. Eno dagego te bidi dabe augwali te hamaga elama, gagea peyu yali bidi dabe sela sąwaibao. Tama dage Jerusalemde eno bulu dude bidaibao. Tama dagego tede ena dali hamaga ma eyu egobeo.
ZEP 3:12 Tama te we bidi augwali eno Jerusalemde bidimainu sula tagalaibao. Augwaligo nai dabe hauwa meniama, tama augwaligo augwa aiyaba elaluama elaluaibao. Tama augwali enaba aselama, tama augwali tau somainu enabolo hanalu waibao.
ZEP 3:13 Te Israel hani dwasianu augwali me bidibao, augwaligo gasa bidi dabe dali dwai kolesaga me egobeo. Tama augwaligo ili po olama, tama augwa abagi dabe ili po wabo sę me egobeo. Te augwali wiegila bidibo sę naga elaluaibao. Tama augwali wi ilabo bidi meni yaibao,” Genuai Bidigo te po wai.
ZEP 3:14 Dage Israel dabe, dage i olama, homu pemene ebo balia po waiąo. Dage Saionde bidibo bage, dwagi yai homu eyu, tęąbi po waiąo. Dage Jerusalem dabe, dage wiegi yai homu elama, homu pemene geninama mu iyąo.
ZEP 3:15 Magi baso meni. Genuai Bidigo te po wai dao, agai dage dene mawaibao po wai dao, tiali goli megi da, dagego dene sabo usu eyu silama, agai te po tagalali dao. Agai dagego boi bidi dabe sese sela sąwani dao. Genuai Bidi da, aga Israel dabego king dao, tama aga dage dali bidibao. Tialima, dage nai me delide munu ma wi igimio.
ZEP 3:16 Nosali bubuga me deli pedelaibao, tama te bubugade augwaligo Jerusalem dabe te tama po waibao, “Dage Jerusalem we bidi dabe, magi naide wi me elamo dao, tama dage olo dali noma sigio.
ZEP 3:17 God, duga Genuai Bidi, aga dage dali bidibao. Agai bomogo dage tau selama, tama dagego te boide dagego tobolu ela holali dao. Genuai Bidi aga dagede wiegi yai homu pemene elama, tama balia po waibao, te we bidigo lotu wabo genuai sogo ebo tiwai yaibao. Agai dage godolo mu ebao, tama agai po deli me wagobeo,” augwaligo te tobage po waibao.
ZEP 3:18 Genuai Bidigo po genina ma weyu, e tama po wali, “Eno dage Jerusalem dabe dene mawai dao, tama dagego te nai da tuyu lotu wabo genuai sogo te kolesaga dabe wali me pabo usu me ebeo. Dagego enabolo te haniani moni da tubo dali lotu po wabo sogo ebo kolesaga ebo usu me ebeo. Tama te tialigo dage hale geninama mu emainu ilalio. Tiali goli megi da, dagego hale eno silaibao.
ZEP 3:19 Suao, te sogo bubugade eno dage dali dwai sę elama, dage aiyaba elaluali te boi bidi dabe dene mawaibao. Dage meba Israel dabe gasa kantri dabeba subigila pelama, tama gasa kantride bidibao, te sipsip kibu hani subigila pelama, augwaligo sągą dola tagalali bage tiwai yali gilama yali da. Tiali goli, eno augwali duga bulu tǫba mu ma odasa asaibao. Megi da, dage meba hanigo gedude te hale mu te ebao. Tiali goli, eno te hale silama, tama dagebolo genuai nogi mawaibao. Tama digibulu tǫ we bidigo dagego nogi ugwaba saibao.
ZEP 3:20 Te asobo bubugade, eno dage te tigidali pesagede bidalubo te pesagede ma oda saibao, tama eno dage duga bulu muba ma odasa asaibao. Tama me eno dage genuai nogi menama, tama tigidali tǫde we bidigo dagego nogi ugwaba saibao. Tama te sogo eno dagego sę wiegi yai pedelemainu ilama, tama dage wiegila bidibo elaluaibao. Dagego te sę pedelebo te duga gedugo mu sueibao. Ena Genuai Bidi, eno po polo walio,” tama wali.
HAG 1:1 Te bidi Darius aga te Persia bulude king bidi nigilama bidibo sogo, tama te 6 wabo polua, te dei delide, te agai kibu be si 2 yia wabode, Genuai Bidigo te tama po te profet bidi Hagaibolo te po wai. Agai te e tama po te bidi Serubabelbolo pusa momainu yai, aga te Juda hanigo tobolu bidi da, tama te tobolu pris bidi Josua agabolo me pusao wali. Te bidi Serubabel aga te Sealtielgo ogwa da. Tama te bidi Josua aga te Jehosadakgo ogwa da.
HAG 1:2 Tama tialima Hagaigo te po te bidi sibolo pusama wai, “God Genuai Bidi, aga Tigidali Bomo Elalubo Bidi da, agai te po wai, ‘Te we bidi dabe augwaligo e tama po wabo dao, “Te Godigo tempel be ma sę ebo sogo, aga pedalisiąbo sogo,” augwaligo te po wabo dao.’ Genuai Bidigo te po wai,” Hagaigo augwali sibolo wali.
HAG 1:3 Tama te Genuai Bidi aga te Tigidali Bomo Elalubo Bidi, agai te we bidi dabe augwalibolo e tama po te profet bidi Hagaigo penanidu ma wali.
HAG 1:4 Agai e tama po wali, “Eno hani we bidi dabe, magi baso dage te dwagi dwagi yai bede naga bidibawe, tama te eno be da dolama elaluba, agawe?
HAG 1:5 Ena Genuai Bidi, Eno Tigidali Bomo Elalubo Bidi, eno dagebolo e tama po obao, dagego homu kolesaga hauwa agea peyu tama te duga tigiba te dwai nai pedelalide homugo kone palao.
HAG 1:6 Dagego te umabo nai bulalio, tiali goli te dwasianu nai naga holalio. Dagego te me badu nai elalubaso da, tialima te naigo da te dage usu egobeo wai. Dagego te tuabo wain ąį elalubao, tiali goli agai te dagego tuabo godolo eboba usu nagasogobeo. Dagego me badu holobo ugwa elalubao, tiali goli te holobo ugwago te dagego tigide kedau ebaso holobo usu menio. Tama te mone sabo sę ebo bidi dabe augwaligo mone sobadi, tiali goli te mone polo sia sabo, te e tama tiwai te mone mubo halobage dedage yai madigi mubo ąǫ yai dao.
HAG 1:7 Ena Genuai Bidi, Eno Tigidali Bomo Elalubo Bidi, eno dagebolo e tama po obao, dagego te e tama sę duga pagede pedelali sę bage dagego homugo bugagia kone paliąo.
HAG 1:8 Odao. Dage te ugwa bulu duba holama, tama dagego te eno be ma sę yabo ni dabe togolama sao,” wali, “tama dagego ma sę yao, tama eno bugai homu pemene elama gana paibao,” wali. “Tama dagego enaba naga lotu po weyu yao, tama tibo kolesagago ena genuai nogi saibao,” Genuai Bidigo te po wali.
HAG 1:9 “Dagego homugo duga gide bulali nai umabo sainu homu te yali, tiali goli nai umabo mu me pedalobeo. Tama dagego te nai dabe beba sesebaso da, te nai polo sia sabo bage e tiwai dao, te nai dabe te eno mobogo sela sąbaso peyu te yali,” wali. “Odao. Eno tama yali da, magi baso meni, dage tigidaligo te duga digi bidabo be sę ebo sęde dene mu yalio, tiali goli dagego te eno be tologa pai dwai mu elalubo da, tede dagego homugo kone palobeo.
HAG 1:10 Duga te tama tibo kolesagago da tama teyu te kulubage eba tulube dao,” wali, “tama te nai dabe te gide munu me holobe dao,” wali.
HAG 1:11 “Te eno naga te eno te kulubage tuludali weyu dąų wai dao. Tama teyu te moni giliga te bulu dude me, tama me te tigidali nai gide me, me te wain gide me, tama me te ni olivde me, te tigidali nai dabe te moni giliga nanai dao. Eno te tǫde holobo tigidali nai dabeba kulubage me tulumainu me sula tagalobe dao,” wali, “tama me te bidi dabe me, me te bulu hasa dabe me, tama me te tigidali haniani nai dabe te duga gide bulali nai dabede me,” Genuai Bidigo te po wai.
HAG 1:12 Tama te bidi Serubabel dali, te tobolu bidi pris Josua dali me badu Juda hani we bidi dabe augwali si dali bidai, augwali tigidaligo te Genuai Bidi augwa Godigo e tama po obaso augwali wi yai, tama augwaligo te profet bidi Hagaigo po wabode wali pai, te profet bidi Hagai te Godigo te augwali pageba tagala palai bidi dao.
HAG 1:13 Tama tialima, te bidi Hagai agai te we bidi dabebolo e tama po augwalibolo ola mani, “Godigo te po wai, ‘Ena Genuai Bidi, tama tigidali sogo ena dage dali bidada paibao,’ wali.” Hagaigo te po wai.
HAG 1:14 Tama te Genuai Bidi agai te bidi Serubabel dali, te Josua dali, te tigidali we bidi dali augwaligo homu hodolama, tama augwaligo agai be sę yainogo yali. Tama augwali aselama, te augwa Godigo be sę ebo sę gagalali, Genuai Bidi aga Tigidali Bomo Elalubo Bidi.
HAG 1:15 Augwaligo te be sę ebo sę hodolali te polua 6 poluade, te dei 24 wabode te be ma sę ebo sę gagalali. Te Persia king bidi Dariusgo aga te king bidi bidiyu te agai kibu be si wabode te be ma sę gagalali.
HAG 2:1 Te kibu bede tama, te polua 7 mun, dei 21 wabode, te bodolu side te Godigo te profet bidi Hagaibolo po ma ola mani.
HAG 2:2 Agai te Hagaibolo te po wali, “Nago te po te tobolu bidi Serubabel dali, te tobolu pris bidi Josua dali sibolo me, tede me bidalubo Juda we bidi dabebolo me e tama po augwalibolo hanalu wao,
HAG 2:3 ‘Te polobadu te eno be te dwagi yai mu da, tama duga hani me badu suali bidi augwaligo te be me konealuba wida. Tama tialima, te megi dagego suali ma te olo nai tiwai da olama oba, agawe?
HAG 2:4 Tagalao, dage tigidaligo haliga moni sęgę mu egimio. Dage hodaluama tama sę yao, magi baso meni, ena Tigidali Bomo Elalubo Genuai Bidi ena dage dali bidibao.
HAG 2:5 Polobadu mu dagego te Isip bulu tagalama tama dage eba asali, tama te sogo ena dage dali po bodolu siyu tama po wai, ena te dage dali tigidali sogo bidada paibao, te po wai. Tama me te eno Mobo Bidi me te tigidali sogo dage dali bidaibao wai dao, tama teyu dage tigidaligo wi egimio,’ eno te po wai,” wali.
HAG 2:6 “Ena Genuai Bidi, ena Tigidali Bomo Elalubo Bidi da, eno tama po obao, tama eno te pęwadage sogo tama te eno dagalude elalubo nai me, tama me te tǫde elalubo nai me, tama me te tamu ąįde elalubo nai me, te nai dabe tigidali me memenege ma eduaibao,” wali.
HAG 2:7 “Tama eno te tigidali bulude bidibo gavman bidi dabe augwali me midigi saibao,” wali. “Tama te we bidi dabe augwaligo te umabo mone me te doado bage me selama, tama augwaligo te bidibo madigi pesageba selasa aselama, tama te eno beba pągąnagasaibao.
HAG 2:8 Tama te silva me, tama me te gol me, te nai dabe me te tigidali bulude muani nai me, te eno nai naga dao.
HAG 2:9 Te eno gesi be wiegi wiegi yai mu pedelaibao, tama teyu te bego te polobadu be aiyaba elaluaibao. Tama te bulu pesagede da haliga dua tegaluama bugagia bidibo kolesaga menama, tama eno te umabo dwagi yai nai dabe te eno hani we bidi dabebolo mawaibao,” wali. “Ena God, Genuai Bidi, Tigidali Bomo Elalubo Bidi, eno mu po walio,” wali.
HAG 2:10 Te Darius aga te Persia kantride king bidi nigilama kibu be si da, te polua te 9 polua, dei 24, te e kibu bede Genuai Bidi aga Tigidali Bomo Elalubo, agai te gasa po me te profet bidi Hagaibolo ola mani. Agai e tama po wai, “Eno homugo nago te pris bidi dabe hanaluao, te eno bomai po page kegelama haninao,” wali.
HAG 2:12 “Tialima te bidi me deligo te aga dolo te ofa yali hasa mi dwasianu sali da, tama agai te bulubo ugwa tomoba munama selasa pobaso da, tama tibaso da, teda te agai te bulubo ugwade me te o gagawai nai bret me, ma te augwaligo te gasa nai me ulali naide me, ma te wainde me, ma te oliv welde me, ma te gasa nai dabe mede, te agai holobo ugwa dąų ola saibao,” wali. “Tama tialima te sę pedalobaso da, teda te ena nai mu dao olama tama habu selebao, ma meniwe?” te po wali. Tialima te Hagaigo aga pelama, tama te pris bidibolo hanalugi pelama, tama augwaligo te po wai, “Menio. Aga munu me ma usu egobeo,” wali.
HAG 2:13 Tama te bidi Hagaigo agai augwalibolo e tama po ma hanalu wali, “Tialima bidi me deligo agai nogo te isai bidi tigiba nogo mubaso da, tialima te dago koneao, aga digi aga te Godigo gedude aga medade sabao,” wali. “Tama tialima, nosali agai te tuabo nai agai nogo tubaso da, teda te nai me te meda mu te pedalobao, ma meniwe?” Tama te pris bidi dabego e tama po wei ponani, “Awe, te nai da teda mu tama meda pedelali dao,” wali.
HAG 2:14 Tama tialima, te Genuai Bidigo tempel be te kibu be hauwa dolai olo elaluyu, te augwaligo ma geselesiąma te isai bidigo tigi tiwai olo elalubaso, te bidi Hagaigo tede po digi po weyu te po wali, “Edao. Genuai Bidigo e tama po walio, ‘Te tama e bidibo we bidi dabe tigidali me, te augwa ebo sę dabe dali augwali mu meda elama bidibao,’ wali, ‘augwali te tama tiwai naga dao. Augwaligo kolesaga me mu meda yai dao, tama tialima te augwaligo te tigidali ofa altade ebo me, te tama tigidali eno gedude meda naga elalubao,’ Genuai Bidigo te po walio,” Hagaigo te po wali.
HAG 2:15 Genuai Bidigo e tama po wai, “Dagego te duga tigiba polobadu pedelali sę te dagego bugagia ma kone palao. Te sogo dagego te eno be tomode sę gagalama, tiali goli dagego te sę ebo tagalali.
HAG 2:16 Dage te pelama, te nai pesage me deliba pai, tama dagego homugo te me si me si tama begde nai bubo usu yaiba, tama tiali goli te nai da te beg si naga bubo usu yai dao. Tama dage te wain wę manobo tank wę elalubo madigi pelama, dagego homugo te nogo si sene genage wain wę pągąwaiba homu elama, tama tiali goli te wain węgo da, te sene genage me si me si tama pągąbo usu yai dao,” wali.
HAG 2:17 “Eno te posolo yai wali me deli tagala palama, tama te wali asu, te gasi me deli te wali dali asu, te dagego te gi nai dabe tigidali dolai dao,” wali, “tama te ais te kulubage tiwai aselama, tama te dagego gide bulali nai dabe tigidali dolai dao,” wali. “Dagego te sę dabe augwali pedalobo suai dao, tiali goli dagego sulama, te dagego te eno be sę ebode duga homu munu me begelebeo.
HAG 2:18 Megi e 9 polua, dei 24 wabode, te dagego te tǫ dodola silama, tama eno be sę ebo sę yaibao. Tama teyu, te megi dagego suao, eno homugo te eno dwagi yai sę dage dali yaibao.
HAG 2:19 Te mu tama, te tubo nai muabo bede te sia gagawai nai wit me elalubeo, tama ni wain me, me te ni kaya fik me, tama me te ni pomigranet me, te oliv me, te ni dabe augwali du walisąbadi, tiali goli megi eno te gagalama, tama dage dali eno dwagi yai sę ma ilaibao,” te po wali.
HAG 2:20 Te tama bodolu digi te si sogo wabo sogo, te Genuai Bidigo te profet bidi Hagaibolo te po me ola mawai.
HAG 2:21 Genuai Bidigo e tama po wali, “Te tobolu bidi Serubabelbolo te po wao, Juda hanigo tobolu bidi, e tama tiwai, ‘Eno homugo te dagalude elalubo nai me, te tǫde elalubo nai memenege ma eduaibao,’ wali.
HAG 2:22 ‘Eno te haniani tǫ kantrigo king bage augwaligo bomo dolama, tama augwaligo bomo munu ma egobeo. Tama eno te augwaligo te boi hwįbo karis dali, te tede dolalubo ami soldia bidi dabe dali, augwali dolaibao,’ wali. ‘Tama te tigidali te boi hwįbo hos kibu dabe me isaibao,’ wali, ‘tama te kibu hosde dugayali ami soldia bidi dabe, augwaligo augwa hasi te deli sę ebo bage augwa hasi ma elaibao,’ wali.
HAG 2:23 ‘Te sę pedalobo sogo, Serubabel, nage eno saibao, eno sę bidio, tama nage te ena sę bidi mu gagawai ilaibao, tama nago te eno hani we bidi dabe augwali te nago bugagia tonaluagameo. Eno nage deli tama dąį ilaibao, tama nage deli tama te nogode holobo nai te ring gagawai tama te eno nogode bidagameo. Ena God, Genuai Bidi aga Tigidali Bomo Elalubo Bidi, eno po olama silalio,’ te po te tobolu bidi Serubabelbolo pusao,” Genuai Bidigo te profet bidi Hagaibolo wali.
ZEC 1:1 Te king Darius aga kantri Persiade king bidali sogo, te aga king bidibadi kibu be namba 2 wabode, te 8 poluade, God Genuai Bidigo e po te profet Sekaraiabolo mani. Te Sekaraia aga te Berekiago ogwa dao, te Berekia te Idogo ogwa dao.
ZEC 1:2 Genuai Bidi Aga Tigidali Bomo Elalubo Bidigo Sekaraiabolo aga we bidibolo e tama po pusao po wali, “Ena Genuai Bidi, polobadu eno dagego wąį dabe dali sębę mu yai dao.
ZEC 1:3 Tiali goli megi da, eno dagebolo e tama po e walobao, dage enaba geasa ma asiąo, tama eno dage tau sagasaibao.
ZEC 1:4 Dagego duga wąį dabego yali sę tiwai igimio. Te eno poloba profet dabego augwalibolo te dwai kolesagaba tudi ola mao po obadi, augwaligo te dwai kolesagaba tudi ola mawai menio. Tiali goli augwaligo eno po odai menio.
ZEC 1:5 Megi da, dagego wąį dabe polo isila pai dao, tama te profet dabe augwali me isai dao.
ZEC 1:6 Tiali goli eno po te profet sibi dabego pedauwalidu eno pedelaibao wali te sę dabe duga wąį dabeba polo pedelai dao. Augwaligo eno augwalibolo mani te po wali pai menio. Tama tialigo augwali te dolali dao. Tama nosali augwali homu begelama augwaligo e tama po wai dao, ‘God, Tigidali Bomo Elalubo Genuai Bidi, agai dabolo wali gilama tama agai dabolo dene mawai dao. Te dena dagede tama dao,’ augwaligo te po wali,” God Genuai Bidigo te po wai.
ZEC 1:7 Te Darius aga king bidibadi namba 2 kibu be wabode, te namba 11 poluago namba 24 deide, te polua augwaligo polua nogi Sebat wabo poluade, Genuai Bidigo po enabolo mani.
ZEC 1:8 Te hulide eno nai me nade subo nai tiwai me suali. Tama eno Genuai Bidigo ensel bidi kaneme hosde dualasa asobo suali. Te hos te bulu odogo mede ni tomode dolalubo suali. Tama meba hos dabe aga tudi badu dolalubo suali. Te hos dabe meba te kaneme hos, meba te nala hos, meba hos dabe te popoi pai hos dabe suali. Tama te ensel dabe te hos dabede dualalubo suali.
ZEC 1:9 Tialima eno te namba wan enselbolo e tama po hanalu wali, “Te nai page mena tama dawe?” po hanalu wali. Tama ensel bidigo e tama po wali, “Eno nagebolo te na yali po page pusaibao.”
ZEC 1:10 Tama enselgo po genina ma weyu e tama po wali, “Genuai Bidigo te ensel dabe taga pelama, te tigidali tǫ dabe bugagia susa biligi pomainu taga palai dao,” wali.
ZEC 1:11 Tama te ensel dabego te namba wan enselbolo e tama po walali, “Da tigidali tǫde bilalio. Tama dago tigidali we bidi augwali sęgę menia suali, tama augwali bugagia naga bidibo suali,” wali.
ZEC 1:12 Tialima te polalubo enselgo te po wali, “Tigidali Bomo Elalubo Genuai Bidi, nago te kibu be 70 usu nama nago te Jerusalem we bidi dali me te Juda hanigo taunde bidibo we bidi dabe dali sębę yai dao. Nisu mu nago augwali dali homu dene eyu tau ma saibawe?” tama wali.
ZEC 1:13 Tama Genuai Bidigo wiegi yai po te ensel bidigo homu nagame elama dua bidabo po wei ponani.
ZEC 1:14 Tama te ensel bidigo enabolo Tigidali Bomo Elalubo Genuai Bidigo po te pusa mao po wali. Godigo te po wali, “Eno genuai homu dene mu te Jerusalem we bidi dabeba ebao, te eno genuai taun dao, tama eno augwaliba homu kone kone hauwa mu ebao.
ZEC 1:15 Polobadu ena we bidi dali sębę dwasianu yai dao, tama gasa hani bidi dabebolo augwali dene magasao po wai dao. Tialima augwali aselama, tama augwaligo eno we bidi dwasianu gana me dolobeo. Menio. Augwaligo te magi edelama, tama augwali mu tama mu dolama tagalalio. Tama tede megi te kantri dabe augwali bugagia bidiyu augwali sęgę meni yai goli, eno augwali dali sębę dwai mu ebao.
ZEC 1:16 Tialima, eno megi Jerusalemba ma aselama, tama eno agai we bidi dabe dali hobede homu ma yainu ebao. Tama augwaligo eno be ma sę eyu, me augwaligo taun Jerusalem ma dodoliyu yaibao,” te Tigidali Bomo Elalubo Genuai Bidigo te po wali.
ZEC 1:17 Tama ensel bidigo enabolo gasa me po me e tama pusao po walali, “Tigidali Bomo Elalubo Genuai Bidigo te po wali, te tigidali nai dabe agai taunde pągąna yaibao po wali, tama te we bidi wiagila mu bidimainu yaibao po wali. Tama agai Jerusalem aga taun mu tiwai ma magi ilaibao po wali. Tama agai te Jerusalem we bidi homu tegaluama bugagia bidimainu ilaibao,” wali.
ZEC 1:18 Eno nade subo nai tiwai ma suali, tama eno kau kibugo tobolu gąų me si me si elalubo suali.
ZEC 1:19 Tama te ensel ena dali po wali bidi asobo si, eno agabolo e tama po hanalu wali, “Eno te suali nai page mena tama nai dawe?” wali. Tama agai te po wei ponoyu, te po wali, “Te gąų dabe te Juda me Israel me Jerusalem dolali te kantri dabe te magi iyu te yali dao,” tama wali.
ZEC 1:20 Tama Genuai Bidigo enabolo me si me si sę bidi hama tolalubadi asobo ola mani.
ZEC 1:21 Tama eno agabolo hanalu wali, “Te bidi dabe augwali te magi yabo bidi dawe?” Tama agai te po wali, “Augwali te asobo da, te Juda dabe dolama gasa kantri dabeba besela sąyani, te kantri dabe wi ilama tama augwaligo bomo tamunabo bidi te asobao,” wali.
ZEC 2:1 Eno nade nai subo tiwai elama, tama eno bidi mego usu ni bono nogo tolalubo suali.
ZEC 2:2 Tama eno agabolo e tama po hanalu wali, “Nage mena pobawe?” Tama agai po wei ponoyu, te po wali, “Ena pabo da te Jerusalem usu nigo usu sainu pobao, te eno agai bobobage yali koneyu, me genuai iyu yali koneainu te usu ni bonogo usu sainu pobao,” wali.
ZEC 2:3 Tama eno suali, ena dali te po waduali ensel aga ugwanu gana pabo suali, tama gasa ensel me agaba hodola sagasali.
ZEC 2:4 Tialima namba wan enselgo namba tu enselbolo e tama po walali, “Nage te usu sabo bono string tolalubo te bidi pageba usayao, tama agabolo e tama po walao, ‘Te Jerusalemde te we bidi hauwa bidiyu, me kau kibu hauwa bidiyu yaibao. Tama te pesage genuai mu elama, tama augwaligo taun obo bagulabo usu me egobeo.
ZEC 2:5 Tama Genuai Bidigo te po wai dao, aga te isi tiwai pedalama, tama aga te taun bagulai obo tiwai te Jerusalem bagualuaibao, tama agai te taun tonaluaibao. Tama aga Jerusalemde bidaibao, tama agai genuai ula me bomo pepeli diliba haninaibao,’ te po te usu sabo bono string tolalubo bidiba walao,” te enselgo te po walali.
ZEC 2:6 Te Genuai Bidi aga we bidi dabebolo e tama po walali, “Asiąo. Eno dage tigidali badude elalubo buluba pomainu dobola palai dao. Dage meba te saut badu peyu, meba te giliga pedalubo baduba peyu, tama meba te giliga degasa pabo baduba peyu yali. Tialima, dage mebago megi da te not badu elalubo te taun Babilon wi tagalama, Jerusalem taunba polo ma asiąo,” wali.
ZEC 2:8 Tialima, Tigidali Bomo Elalubo Genuai Bidi aga te God aga genuai bomo ulade bidibo bidi dao. Agai aga we bidi dololali te kantri dabe homu kone ebao. Tama agai Jerusalem bagebolo e tama po walali, “Tialima bidi me deligo nage dolainu ebaso da, teda aga digi aga ma dolaibao.
ZEC 2:9 Tialima dagego eno we bidi dolobaso da, teda ena digi dage dali hwįaibao. Tama te we bidi polobadu dagego augwali dagego kalabus sę yali da, te augwa digi dage dolaibao,” wali. Tama te sę dabe pedalobo sogo te we bidi tigidaligo e tama koneaibao, Tigidali Bomo Elalubo Genuai Bidi aga digi ena tagala palama, eno agai po pusagasai yabo homu koneaibao.
ZEC 2:10 Tama Genuai Bidigo po ma weyu e tama po wali, “Dage Jerusalem we bidi, dage wiegi yai homu pemene eyu, tęąbi po wao. Magi baso meni, ena asobao, tama ena dage tomode bidaibao,” wali.
ZEC 2:11 “Tama te sogo kantri hauwa we bidi augwali Genuai Bidiba aselama, tama augwali eno we bidi bidaibao. Tama ena dage tomode bidaibao, tama dagego koneaibao, ena aga digi dage tomoba taga palama, dage tomode bidibo koneaibao.
ZEC 2:12 Tama te Juda dabe augwali God aga te kantride bidaibao, tama augwali Godigo gedude wiegi yai we bidi mu bidaibao. Tama agai Jerusalem godolo mu eyu, tiwai meba taun dabe godolo egobeo, tama agai Jerusalem da aga hanu mu da tama waibao.” Genuai Bidigo te po wai.
ZEC 2:13 Genuai Bidi aga bulu mu tagalama, tama aga daba asaibao. Tialima, da tigidali tǫ pedaide bidibo we bidi pedauwali pani selama tama tonaluinao.
ZEC 3:1 Te nade subo nai tiwai elama, Genuai Bidigo tobolu bidi pris Josua enabolo ola mani. Josua aga Genuai Bidigo ensel bidi pąde dolalubo suali. Tama dwai haubo bidi Satan te Josuago dolo nogo badu dolaluali, tama agai po tų ela mawainu kegaluali.
ZEC 3:2 Tama Genuai Bidigo Satanbolo e tama po walali, “Satan, eno nagebolo obao, nago po deli me olamo dao. Eno Jerusalem godolo mu ebao, tama eno nagebolo penane pania sao po te obao. Eno te bidi Josua ma salio. Te bidi mego te isi dage dolidali iside selama, agade te isi sula selama, te isi dage nogogo tolalubo tiwai, te aga dolidali weyu eno te bidi Josua te tama ma dobola salio,” wali.
ZEC 3:3 Te Josuago ugwa dabe sese meda mu elama, tama aga te ensel pagede dolaluali.
ZEC 3:4 Tialima te enselgo meba ensel dabebolo waliyu, e tama tiwai po walali, “Te bidi tigide elalubo dwai ugwa dabe sela sąyao,” wali. Tama agai Josuabolo e tama po walali, “Odao. Eno nago dwai sę sęgę me nago te dwai meda yai ugwa dabe sela sąwani dao. Tama megi da, eno nagebolo wiegi yai gesi ugwa dabe mawaibao.” Te ensel me deligo te po wali.
ZEC 3:5 Tama eno te po wali, “Te augwaligo wiegi yai tedela name ugwa augwaligo me selama, Josuago tobolude hadi tiwai baguligi sogo da, teda wiegi yai igi dao.” Tama augwaligo eno wali po gilama tama tiali. Genuai Bidigo ensel pąde dolaluali, tama meba ensel dabego Josua gesi ugwa dabe guduludali.
ZEC 3:6 Tialima enselgo Josuabolo e tama po walali,
ZEC 3:7 “Te Tigidali Bomo Elalubo Genuai Bidigo te po wali, ‘Tialima ma nago eno bomai po tigidali wali pelama, tama nago eno nagebolo mani sę tigidali eyu da, teda eno nage sa muyu, nago eno be tonalubo sę me te tigidali lotu wabo nai dabe tonalubo sę me idumainu sula tagalaibao. Tama eno nage ena pageba asomainu sula tagalaibao, te ensel dabego ebo gilama yaibao.
ZEC 3:8 Polalubo pris Josua, odao, me dage meba pris dabe me dagego me odao, dage te nosali pedalabo wiegi yai nai te magi tiwai me dage dao. Odao. Eno ena sę bidi odasa asaibao. Agai nogi da e dao, Ni Abu.
ZEC 3:9 Megi da, eno masigi me gedu a naga olama si, te 7 yai te masigi selama, Josua pąde muaibao. Tama eno te masigide po me asęaibao. Tama deli sogo tama eno ena kantri we bidigo sęgę sela sąwaibao.
ZEC 3:10 Tama te bubuga pedalobaso da, teda dage deli deli duga abagi dabe i olama, dage dali bidagasomainu yagameo. Tama dage duga wain gi dabede dulaluyu, me duga fik ni dologode dulaluyu yagameo. Tama dage tigidali homu nagame elama, tama bugagia mu bidiagameo,’ Genuai Bidigo te po wali,” ensel bidigo enabolo te Genuai Bidigo po tama pusali.
ZEC 4:1 Ena dali hasia te po wali te ensel bidi aga ma aselama, ena augwaligo te godege piai bidi hodolo ąǫ yagasali.
ZEC 4:2 Tama agai enabolo e tama po hanalu wali, “Nago magi nai subawe?” Tama eno te po wali, “Eno gol ni dage wel muabo dis ugwadu daide elalubo eno subao. Tama nogo a naga olama me badu nogo si, te 7 gol lam ni dage dagana sai elalubo subao. Tama tigidali lam deli deligo te disde wel sabo paip elalubao.
ZEC 4:3 Tama ni oliv si te gol lam ni dage pąde dolaluali, te me badu me badu me elalubao,” eno te po wali.
ZEC 4:4 Eno sulama tama eno enselbolo e tama po hanalu wali, “Genuai Bidi, eno te suali nai page magi nai mu dawe?”
ZEC 4:5 Tama agai enabolo e tama po walali, “Nago konebe, agawe?” Tama eno te po wali, “Genuai Bidi, eno konebeo.”
ZEC 4:6 Tama tialima enselgo enabolo Genuai Bidigo te po te polalubo gavman bidi Serubabelbolo pusa mao po wali. Genuai Bidigo te po wali, “Nago naga bomogo o naga ami dabego bomogo te sę dabe ebo usu egobeo. Menio. Eno Mobo Bidi Spiritgo bomo nage dali bidaibao, tama te bomo deligo naga nago te sę yaibao.
ZEC 4:7 Tialima, genuai nai dabe te bulu du tiwaigo nago sunumi palia sobaso da, teda eno tigidali sela sąwaibao. Tama nago eno be ma sę yaibao. Tama nago namba wan masigi aga pesagede mubo si da, teda te we bidigo hai bomona weyu e tama po waibao, ‘Te da, wiegi yai be mu dao,’ augwaligo te po waibao,” wali.
ZEC 4:8 Tialima Genuai Bidigo enabolo gasa po me pusa mani.
ZEC 4:9 Agai te po wali, “Serubabelgo eno be sę yabo digi tǫ polo dodolai dao, tama aga digi polo sę yaibao. Tama eno be sęa silibo si da, teda eno we bidi tigidaligo ena digi nage augwaliba taga palai yabao homugo koneaibao.
ZEC 4:10 Augwaligo sę polo siligi pisąma ebo suali, tama tibaso augwali homu sęgę yali. Tiali goli augwaligo Serubabelgo te be sę dodolabo ain yai string tolama, tama eno be sę gagalobo sulama, tama augwali wiegi yai homu pemene mu yaibao,” wali. Tama ensel bidigo enabolo e tama po wali, “Te nogo a naga olama me badu nogo si, te 7 lam te Genuai Bidigo gedu magi iliyu te yali dao. Agai tigidali tǫ sese tama subo dao,” wali.
ZEC 4:11 Tama eno agabolo hanalu wali, “Te ni oliv te lam si dali badu si bogo badu dolaluali, ma te page mena tama dawe?
ZEC 4:12 Tama te ni oliv nologo si te gol paip pąde munalubo te page magi nai dawe, me te oliv nigo wel te paip si tomoba geasa dulubao, te page mena tama dawe?” wali.
ZEC 4:13 Tama agai enabolo e tama po hanalu wali, “Nago konebe, agawe?” Tama eno te po wali, “Genuai Bidi, eno konebeo.”
ZEC 4:14 Tialima agai te po wali, “Te da, te Genuai Bidigo bidi si tigidali tǫde genuai bidi si te tǫde agai sę emainu magi ilai bidi si tiwai dao, te augwali si tobolude wel gelama, magi ilai bidi si tiwai dao, te agai sę emainogo,” te ensel bidigo te po wali.
ZEC 5:1 Tama eno ma tonobadi yaide, eno buku me bola pabo suali.
ZEC 5:2 Tama ensel bidigo enabolo e tama po wali, “Nago magi nai subawe?” Tama eno te po wali, “Eno buku me bola pabo subao. Tama te buku bobobage te 10 mita usu nama, me agai genuai te 5 mita usu nama,” wali.
ZEC 5:3 Tama agai enabolo e tama po walali, “Godigo te po wali, Juda bulude bidibo we bidi sese tama dene saibao po wali. Tama agai te po te buku elalubao. Tama te buku me badu bogo badu te po asęai elalubao, Godigo te kantride bidibo nai wi sabo bidi dabe sese sela sąwaibao po obao. Me ma, te buku me badu bogo badu te po asęani, augwaligo tibo po weyu mu tamao obao te bidi dabe sela sąwaibao wabo po wai te elalubao.
ZEC 5:4 Tigidali Bomo Elalubo Genuai Bidigo te po wali, agai te dwai bidi dolabo po toloyu, tama agai te nai wi siyu me tibo po weyu ebo bidi dabego be tomoba po ola tolaibao. Tama te po te bidi dabe augwa be tomode elaluyu, tama te bidi dabe dola silaibao,” wali.
ZEC 5:5 Te ensel aga me pedelama, tama agai enabolo e tama po me walali, “Suao. Gasa nai me te asobao.”
ZEC 5:6 Tama eno agabolo hanalu wali, “Te magi nai dawe?” Tama agai te po wali, “Te da, basket wa me dao, tama te basket wa te dagego kantri we bidi dabego homu godolo ebo dwai sę dabe magi elama te dao,” wali.
ZEC 5:7 Te basket po augwaligo aingo nigai dao. Eno tonalubadi augwaligo te basket po dabo suali, tama eno suali, te basketde we me tomode dualalubo suali.
ZEC 5:8 Tama ensel bidigo te po wali, “Te we da, te tigidali dwai kolesaga page tiwai piksa dao,” wali. Agai po ola silama, tama agai te we aiyaba ma pogolama, tama te basket po paliali.
ZEC 5:9 Eno ugwaba tonobadi yaide, eno we me si te genuai bago bogo tiwai elama, tama augwali si ena bidibo madi bola asobo suali. Tama augwali sigo te basket wa ugaba selama, sigiba bola pabo suali.
ZEC 5:10 Eno te nai sulama, tama eno te enselbolo e tama po hanalu wali, “Augwali sigo te basket wa menaba sela pabowe?”
ZEC 5:11 Tama ensel bidigo enabolo te po walali, “Augwali sigo te kantri Babiloniaba sela pelama, tama augwaligo tede genuai lotu be sę yainu te sela pobao. Augwali sigo te basket wa te be tomode muaibao. Tama te Babilonia we bidi dabego te basketba lotu po waibao,” wali.
ZEC 6:1 Tama nosali eno ma tonobadi yaide, hwįbo nai karis me si me si te bulu du si bras tomode pedelama edaba udabo suali.
ZEC 6:2 Te bedeba hos dabego te namba wan karis kegebo suali. Tama sisi yai hos kibu dabego si wabo karis kegebo suali.
ZEC 6:3 Tama nala hos dabego sela wabo karis kegebo suali. Tama te dodobolo pai hos dabego te me si me si wabo karis kegebo suali.
ZEC 6:4 Tama eno te ensel bidibolo e tama po hanalu wali, “Genuai Bidi, te karis dabe page te magi nai dawe?”
ZEC 6:5 Tama ensel bidigo te po wali, “Te me si me si karis te me si me si haniani wali magiyu te yali dao. Megi tama augwali tigidali tǫde tonalubo Genuai Bidi page tagalama, augwali te asali dao,” wali.
ZEC 6:6 Te sisi hos kibu dabego kegebo te karis da, te not badu elalubo kantriba te pobao. Tama me te nala hos dabego kegebo te karis, te giliga dega saboba te pobao. Tama te dodobolo pai hos dabego kegebo te karis te sautba te pobao suali.
ZEC 6:7 Te dodobolo pai hos dabe sabolobo si da, augwali polo pelama, te kantri dabe bugagia tonaluainu te ebao. Tama ensel bidigo te po wali, “Te usu dao, dage piagameo.” Tialima augwali udulama pali.
ZEC 6:8 Tama te ensel bidigo enabolo i weyu te po wali, “Te notba pali te hos dabego tebogo te Genuai Bidigo homu kedau iligi palio,” wali.
ZEC 6:9 Te Genuai Bidigo enabolo po me deli mayu, e tama po wali,
ZEC 6:10 “Te me si me si bidi, Heldai, me Tobiya, me Jedaia, te Sefaniago ogwa Josaia, te Babilon tagalama, augwali Jerusalemba polo asali dao. Megi tama nago augwaligo sesali wiegi yai maiabo nai dabe selama, tama nage Josaiago beba pao.
ZEC 6:11 Tialima augwaligo nagebolo te mani te silva me gol selama, tama nago kingo hadi me deli geselao. Tama nago te hadi sela pelama, tama nago het pris Josuago toboluba buligi pao, te Jehosadakgo ogwa dao.
ZEC 6:12 Tama nago agabolo e tama po walao, ‘Tigidali Bomo Elalubo Genuai Bidigo te po wali, Te Bidi Ni Abu wabo bidi aga bidibo pesagede wiegi yai mu pedelaibao. Tama agai eno be ma sę yaibao.
ZEC 6:13 Agai digi eno be sęnama, tama aga genuai nogi mu elaluaibao, te kingo nogi tiwai mu elaluaibao. Tama agai aga we bidi tonaluaibao. Tama te pris aga sia kingde dualaluaibao. Tama agai te prisgo yabo sęde dali te kingo yabo sęde dali si homu nagame elama bidiyu, te sę si bugagia mu yaibao,’ te po Josaiabolo pusao,” Genuai Bidigo enabolo te po wali.
ZEC 6:14 Tama te king hadi da, te Genuai Bidigo be tomode munaluaibao. Tama te we bidigo te hadi sulama, tama augwaligo te Heldai, me Tobiya, me Jedaia, me te Sefaniago ogwa Josaiago yali wiegi yai kolesaga kone palama te koneyu yaibao, te kegeda pogobeo.
ZEC 6:15 Te digibulu bidali bidi dabe augwali aselama, augwali tau selama, Genuai Bidigo be sę ebo tau sagasaibao. Tama augwaligo sęna silibo si da, teda dagego e tama koneaibao, Tigidali Bomo Elalubo Genuai Bidigo ena taga palama, ena dage dali bidiba, te homu koneaibao. Tialima, dagego God Genuai Bidigo po sese tama bugagia wali peyu da, teda te nai dabe sese tama mu pedelaibao.
ZEC 7:1 Te Darius king bidibadi te kibu be me si me si wabo, te kibu bede te namba 9 poluago namba 4 deide, te polua Kislev wabo, Genuai Bidigo po me deli enabolo mani.
ZEC 7:2 Tama te Betel we bidigo te Sareser me Regemelek me bidi meba ebadi augwaligo Tigidali Bomo Elalubo Genuai Bidigo beba tagala palali. Augwali pali da, Genuai Bidigo augwali dali wiegi yai sę emainu gedu haluasa po wagi pomai tagala palali.
ZEC 7:3 Tama augwaligo te pris dabe me profet bidi dabebolo e tama tiwai po hanalu wainu pali, “Genuai Bidigo be dolai elalubadi kibu be hauwa mu pali dao. Tama dago agaba me gela udubao. Tama dago tigidali a naga poluade nai habu selama gisilabo po bodolu muyu yalio. Tialima dago me tama tiduaiba, agawe?”
ZEC 7:4 Tialima, Tigidali Bomo Elalubo Genuai Bidigo enabolo te po walali,
ZEC 7:5 “Nago te kantri we bidi dabe me augwaligo pris bidi dabebolo e tama po walao, ‘Mu tamao, te kibu be 70 edubadi te tigidali 5 poluade me te 7 poluade dagego nai dabe habu selama, hobedai gela weyu yai dao. Tiali goli dagego te enade homu kone paliyu, te eno nogi ugwaba sabo kolesaga me yai menio. Mu menio.
ZEC 7:6 Tama me ma, dagego nai tubo sogo da, teda dagego duga tabi pągąnabo nai naga tuyu ebo dao,’ te po augwalibolo wao,” Genuai Bidigo te po walali.
ZEC 7:7 Polobadu Genuai Bidigo te deli tiwai po naga te profet sibigo pedauwalidu pusai dao, te we bidi dabebolo. Agai te po te Jerusalem wiegi yai elaluyu, wiegi yai nai dabe hauwa elalubadi agai te po mawai dao. Tama te sogo te we bidi hauwa te Jerusalem pągąna peyu, me te Jerusalem bogo badu elaluali taun dabede, me te saut badu taun dabede me we bidi pągąyu, me giliga dega sabo badu te dwasianu bulu du dabede me te we bidi hauwa pągąyu yai dao.
ZEC 7:8 Te Genuai Bidigo Sekaraiabolo po me pusa mayu, e tama tiwai po wali,
ZEC 7:9 “Polobadu eno te po ena we bidibolo mawai dao, ‘Te po tų ebo sogo te dagego tigidali wiegi yai doloba pai kolesaga naga iyąo. Tama dagego duga deli hani dabe dali hobede homu iyąo, tama augwali tau sabo sę yao.
ZEC 7:10 Dagego bidi isai wilawe we dabe dali dwai sę me elamo dao. Me dagego wai puluba augwa aya isai wai dabe dali me dwai sę me elamo dao, te digibulu bidi dage dali bidagasali te we bidi dabe dali me dagego dwai sę me elamo dao, me te nai dabe habuge yai we bidi dali me dwai kolesaga elamo dao. Tama dagego duga deli hani bidi dabe dolainu homu elamo dao,’ eno te po mawai dao,” Genuai Bidigo enabolo wali.
ZEC 7:11 “Tiali goli te we bidi augwali tobolu gagea pelama, augwaligo po odabo homu hagela yali. Augwaligo augwa homu kolesaga dąų ola selama,
ZEC 7:12 tama augwaligo homu masigi dila pabo tiwai yalio. Augwaligo Genuai Bidi ena Tigidali Bomo Elalubo Bidigo bomai po dali haniani po odobo hagela yalio. Eno Spirit Mobo Bidigo te profet sibigo pedauwalidu eno te po augwalibolo polobadu tolai dao. Tiali goli te we bidigo te po wali pabeo. Tama tibaso, eno sębę dwai mu yalio.
ZEC 7:13 Tama eno augwaligo gedu haluasa po wabo odai menio. Magi baso meni, augwaligo eno po odisąma ebaso.
ZEC 7:14 Tialima eno augwali te genuai waligo te nai dabe sela sąbo tiwai elama, tama eno augwali gasa kantri dabeba sela sąyu, tedela palai dao. Tama augwaligo dwai kolesaga ebogo te wiegi yai tǫ te dwai tǫ tiwai pedelali. Tama tede bidi me deli tede bidibeo,” Genuai Bidigo te po wali.
ZEC 8:1 Te Tigidali Bomo Elalubo Genuai Bidigo po te Sekaraiabolo mawai.
ZEC 8:2 Godigo te po wali, “Eno te Jerusalem dabe godolo mu ebaso, tama eno augwali tau sabo homu ebao. Eno augwali godolo mu elama, te augwaligo boi bidi dabede eno haliga sębę ebo dao.
ZEC 8:3 Te ena ma aselama, ena te Jerusalemde bidaibao, te eno taun mu da. Tama Jerusalem, te Genuai Bidi te Tigidali Bomo Elalubo Bidigo bulu du da, te augwaligo nogi eyu Te Genuai Bidigo Tedali Gasagi Yai Bulu da waibao. Te gasa hani we bidi augwaligo te eno we bidi dabe sulama, te augwaligo tama po waibao, ‘Suao, te Jerusalem augwaligo Genuai Bidi wali mu pabo dao,’ te tama po waibao.
ZEC 8:4 Te wąbi hwįbo me te sęgę dabe te taunde me pedalisąbadi, tama te we bidi dabe monu dabe mu pedelama, te dono dabe tolama bilalueibao. Tama augwali te taun pedai tigidali badu dugulalu toma nabo sę yaibao.
ZEC 8:5 Tama te dwasianu wai puluba dabe te taunde pągąna pelama bidalu, tama augwali e gagali eladu bidalueibao,” Genuai Bidigo te po wali.
ZEC 8:6 Te Tigidali Bomo Elalubo Genuai Bidigo e po me wali, “Te me bidibo we bidi dabe augwali te dwasianu hani naga bidibao, tama augwaligo homugo eno te po wali sę dabe pedalugobe da homu yali bogo. Tiali goli ena Genuai Bidi Tigidali Bomo Elalubo Bidigo, eno te tiwai homu me egobeo. Menio. Eno tigidali sę ebo usu yaibao.
ZEC 8:7 Te boi bidi dabego eno we bidi dabe augwali selama, te giliga pedalubo badu me te giliga dega sigulubo badu te tǫ kantri dabeba bidigi palali. Tama eno te we bidi dabe ma sigi pelama, te augwali ma odasa aselama, te augwali Jerusalemba ma bidagasaibao. Te augwali eno we bidi dabe bidalu, te ena augwaligo God bidaibao. Te augwali eno doloba pai kolesagago sesemane sogo tonalueibao,” wali.
ZEC 8:9 Te Tigidali Bomo Elalubo Genuai Bidigo e po me wali, “Dage dilibi budulama, sę bomo yao. Te eno be sę hodolobo sogo, te eno po pusubo bidi profet dabego eno po pusali. Augwaligo pedauwalide wali po homu kone palao. Tialima, megi me te tobage deli po naga odobao.
ZEC 8:10 Te profet bidi dabego po pusisąbadi yali sogo, te bidi dabe augwaligo te sę yabo bidi dabe abeliyu, ma te sę yabo kibu dabe me abelebo usu isąwai elaluali. Tama me eno augwa abagi hasi boi bidi ilibo sę ilama, te augwali bugagia bidabo usu meni yai elaluai dao.
ZEC 8:11 Tialima megi da, eno gasa tobage kolesaga te bidalubo dwasianu hani we bidi dali yaibao wali.
ZEC 8:12 Te eno augwali haliga dua tegaluama bidibo sę ilama, te augwa wai gi dabe bulumainu yaibao. Te tulubage hauwa tulama, te augwaligo wain ni du dabe walama, te nai dabe me wiegi yai holaibao. Eno te tigidali wiegi yai sę te dwasianu bidibo hani pedali dali yaibao.
ZEC 8:13 Dage Juda dabe me Israel dabego, odao. Polobadu te gasa hani dabego te dage dolobo sulama, tama augwaligo augwa boi bidi dabeba te tiwai po walali, ‘Dago homugo te dage mu dolomainao homu ebao. Te Juda dabe me Israel dabe dolali tiwai emainogo homu ebao.’ Tialima megi da, eno dage Juda me Israel dabe dobola ma selama, te dageba wiegi yai sę yaibao. Te gasa hani dabego dageba te tama tebo sę ebo sulama, te augwaligo augwa abagi dabeba te tama po walaibao, ‘Dago homugo dage te Juda dabe me Israel dabe bugagia bidibo tiwai gilama emainogo homu ebao,’ waibao. Tibaso dage wi me elamuo, dage bomo elama naga dolalubo usu dao,” Genuai Bidigo te po wali.
ZEC 8:14 Tigidali Bomo Elalubo Genuai Bidigo te tama po wali, “Polobadu dagego wąį nǫų dabego ena haliga sębę yabo sę ilibaso, te eno augwaliba dwai dene mabo homu elama, te eno homu me hasegelibeo. Menio. Eno augwali dolobo sę naga yai dao.
ZEC 8:15 Tiali goli megi da, eno te Jerusalem dabe me Juda dabe te wiegi yai bugagia ilabo homu ebao. Tibaso dage te bomo elalu, dolaluao,” te po wali.
ZEC 8:16 “Tama dagego e tobage kolesaga dabe iyąo. Dage tigidaligo te mu po naga gasa bidi dabe dali waiyąo. Tama dagego po te po tų kotde te mu po naga weyu, bugagia dodolobaso da, te po silaibao.
ZEC 8:17 Dagego dwai sę ebo kolesaga te gasa we bidi dabe augwaliba yabo homu me elamuo. Te dage po tų kotde dologi pabo sogo, dagego te tibo po munu me pusulamuo. Eno te tibo po wabo kolesaga, me te po tų kot po geme dualubo kolesaga, me te wado po weyu hwįbo kolesaga ebo te eno godolo mu me ebo meni dao,” wali.
ZEC 8:18 Tama Genuai Bidi Tigidali Bomo Elalubo Bidigo gasa po me ena Sekaraiabolo mawai dao.
ZEC 8:19 Agai te tama po wai, “Dagego me sogo side te polua me si me si 4 poluade, me te polua a nagade, me te polua a naga me si 7 poluade, me te nogo si poluade te nai tubo osogo habu selali, te dageba pedelali sęgę homu kone paliyu tiali. Tiali goli, te sęgę dabe kone palobo genuai side hasegelama, te tigidali Juda dabego wiegi yai homu pemene yabo si pedelaibao. Tialima dagego te mu po wabo godolo homu elama, te gasa we bidi dabe dali bugagia tegaluama bidibo kolesaga yao,” te po wai dao.
ZEC 8:20 Genuai Bidi Tigidali Bomo Elalubo Bidigo po me weyu, te tiwai po wali, “Nosali genuai taun hauwa we bidi dabe te Jerusalemba aselawaibao.
ZEC 8:21 Te taun me delide bidali we bidi dabe augwaligo te gasa taun we bidi augwaliba te tiwai po walaibao, ‘Da te Jerusalemba pelama, te Genuai Bidi Te Tigidali Bomo Elalubo Bidiba lotu wagi pelama, te agabolo hanalu, te dabolo wiegi yai sę bugagia ilao po wagi pobao. Dage da dali asiąo,’ waibao.
ZEC 8:22 Te genuai bomai tǫ kantri hauwa we bidi dabe te Genuai Bidi Tigidali Bomo Elalubo Bidiba lotu wagasu, te Jerusalemba asaibao, tama agabolo hanalu, te augwaliba me wiegi yai sę bugagia yao po waibao.
ZEC 8:23 Te sogo te nogo si bidi, te haniani po wabo bage, te digibulu dabedu asama, te Juda bidi me deli pageabi elama tolalu, tama augwaligo te tiwai po waibao, ‘Dago te tiwai odali, te God dage dali bidibao wali. Tibaso, da me dage Juda bage dali deli hani pedelaibao homu ebao,’ te po waibao,” Genuai Bidigo te po wali.
ZEC 9:1 Te Genuai Bidigo po enabolo mayu, te tama wali. Te tigidali tǫ kantri we bidi dabe augwali te Genuai Bidi dologode naga bidiyu, te Israel hani dabe bidalubo tiwai yaibao. Genuai Bidigo te tǫ pedai Hadrak me te taun Damaskus,
ZEC 9:2 me Hamat tonalubo sę yaibao, te tǫ pedai Hadrak distrik pąde elaluali. Tama agai te taun Tair me taun Saidon te tonalubao. Te Tair dabe me Saidon dabego augwaligo te kolesaga koneani bidi dabe hauwa elaluali digi goli, te Genuai Bidigo augwali me tonalueibao wai dao.
ZEC 9:3 Tair te bomai taun pedelali te augwaligo dila pai masigi banisgo te taun bagulali. Tama augwaligo te hauwa silva me gol sisinani, tama te silva me gol te augwaligo gedude olo nai tiwai elaluali.
ZEC 9:4 Tiali goli Genuai Bidigo augwaligo te nai doado bage tigidali dagala sąwaibao. Genuai Bidigo Tair dabego te nai dabe te tamu ąįba sąwaibao, tama te boi bidi dabego te taun siago ulama, te tigidali mu dolaibao.
ZEC 9:5 Tama te Askelon we bidi dabe augwaligo te tiwai sę tede pedalubo dabe sulama tama augwali wi yali. Tama augwali me dolama, tama nosali augwaligo bulude te bidi dabe meni yai. Te gasa bulu bidi dabego me te genuai sęgę augwaliba pedalubo sulama, te augwaligo king bidi isaibao. Te Ekron bulu bidi dabego sulama, te sęgę tiwai augwali me saibao. Augwaligo homugo te Tair dabego augwali tau saiba homu yaibao. Tiali goli, menio. Te augwali mu hagawaibao.
ZEC 9:6 Te gasa gasa hani augwali te taun Asdotba bidagasaibao, tibaso augwali deliba taluabo usu meni yai. Tama Genuai Bidigo te po obao, “Te Filistia dabe augwali hagoma ebo bidi dabe yai baso, tibaso eno augwali aiyaba mu elaluaibao.
ZEC 9:7 Te Filistia dabe me badu me bidalubo hani pedai, te augwali eno hani we bidi pedelaibao, tama augwali te dwasianu hani we bidi tiwai te Juda hani tomode bidaibao. Tama te Ekron dabe augwali eno hani we bidi pedelaibao, te Jebus dabe augwaligo polobadu yali tiwai. Tialima augwaligo te kibu hasa mi kaneme dali elalubo me tusiąma, te gasa nai dabe me te Juda dabego tusiąma habu selali nai dabe me tugobeo,” Genuai Bidigo te po wali.
ZEC 9:8 “Te eno ena tǫ kantri tonalu, eno te tǫba te ami bidi dabe uga peyu, eda asu ebo sę munu ma egobeo. Te boi bidi dabego eno we bidi dabe aiyaba elaluama, te augwaliba dwai sę ebo eno me gogolama sula tagalogobeo, magi baso meni, eno suali, te we bidi dabe augwali dene sabo suai dao.” Genuai Bidigo te po me wai.
ZEC 9:9 Dage Saion taun Jerusalem we bidi dabeo, dage homu pemene umagia mu eyu, hae wao. Suiąo. Dagego king te asobao. Te agai bidi dabe aiyaba elaluali genuai nogi elalubao. Tiali goli, agai nogi aga digi ugala me sabeo. Menio. Aga te nogi meni yai bidi asobo tiwai eyu, aga te donki kibu me deli daide ugadu dugulasa asaibao. Aga te ogwa bidi donki kibude dugulasa asaibao wali.
ZEC 9:10 Genuai Bidigo po ma weyu, te po wali, “Eno te boi hwįbo karis dabe me hos kibu dabe sela sąnama, tama augwali te Israel dabe bidibo tomode munu me elalugobeo. Tama augwaligo te hwįbo ene dabe te tigidali eno dolaibao. Te dagego kingo te tigidali tǫ kantride te boi hwįbo kolesaga tagalama, te deli haliga elama bidimainogo ilaibao, tama agai te genuai tǫ pedai badu bidibo we bidi tigidali tonalueibao. Te tǫ te genuai tamu ąį dage badu gagalasa pelama, te digibulu mu elalubo tamu ąįba mu usu nigi paibao. Te me te genuai ąį Yufretisde gagalasa pali, te u badu pedai digibulu mu usu nigi paibao,” Genuai Bidigo te po wali.
ZEC 9:11 Te Genuai Bidigo te tiwai po wali, “Eno dąų wabo po kontrak me deli dage Juda dali yali. Te wąį nǫų dabego te ofa yabo kibu dabe elama, te kaneme gealuali. Tialima, te gelali kanemego te da dali dąų wali po kontrak dąų walali. Tama tibaso, eno dage te gasa tǫ kantride kalabus sę ebo tagalomainogo ilaibao. Te kalabus sę dwai mu yali, te dage genuai tǫ dedage tomoba munama bidibo tiwai elalu, te dage tuabo ąį menia sali tiwai elaluai dao.
ZEC 9:12 Dagego koneani, te Genuai Bidigo dage tau saibao, tibaso dage te duga page buluba ma aselama, te dage bugagia bidaibao. Dage te sęgę genuai tolali, tiali goli eno te tiwai po obao, eno dage wiegi yai bugagia ilama, tama eno te ebo wiegi yai kolesagago te sęgę aiyaba mu elalueibao.
ZEC 9:13 Te Juda dabe augwali eno te enesigi tolalubo tiwai eyu, tama te Israel dabe augwali te eno enesigide ene daganalubo tiwai elalueibao, tama te Jerusalem bidi dabe augwali da te hwą ge bainat gelalubo tiwai elalu, tama eno te Grik dabe dali boi hwįaibao,” te po wali.
ZEC 9:14 Te Genuai Bidi aga we bidi augwali daiba ugadu hanilama pedelaibao, tama agai enesigi kekelama togolaibao, te agai enani ene dabe te be selego ula ebo tiwai yaibao. Tama God Genuai Bidigo te bu wabo nai biugel bu wabo si, te aga bomonama soyu, te aga bidali pesage saut badu tagalama, te wali dali tulubage si tomodu asaibao.
ZEC 9:15 Tama Genuai Bidi Tigidali Bomo Elalubo Bidigo te aga we bidi tudi badu tonalu posolalueibao, tama augwaligo augwa boi bidi dabe ela silaibao. Te boi hwįbo side te augwaligo i wabo te bomai ąį tuai bidigo i hae wabo tiwai eyu, tama augwaligo te boi bidi dabe ela mueibao. Te boi bidi dabego kaneme te augwaligo te ofa yainu te poude tabilama te altaba gealubo tiwai yaibao.
ZEC 9:16 Te tama tibo side Genuai Bidigo aga we bidi dabe augwali ma dobola saibao, te kibu sipsip tonalubo bidigo te aga sipsip dabe te hasa laiongo elama dolainu ebadi te ma dobola sabo tiwai ebao. Tama augwali dwagi yai mu agai tǫde bidiyu, te gasa sawi yai bugagia ula mu yai masigi te kingo tobolu madide elalubo tiwai yaibao.
ZEC 9:17 Te tǫ da, wiegi yai mu elalueibao. Tama te gesi wegi ogwa dabego te wit nai me wain hauwa elalueibao, tama augwali te genuai hani te bomai we bidi mu pedelaibao.
ZEC 10:1 Te gide nai dabe pedalubo sogo dagego te Genuai Bidiba hanaluyu, te agai tulubage tagala palomainu emainao. Genuai Bidigo te pǫ hauwa dabe tagala palama, te tulubage tulumainu ilibaso, tama te nai dabe pedelama holobo dao.
ZEC 10:2 Te bidi dabe augwaligo te augwa bede munalubo tibo god dabeba me, te mena sę page konea pabo bidi dabeba me hanalu te nosali mena sę dabe pedelabo po omainu ebo dao. Tiali goli, augwaligo tibo po wei ponoyu, te dwai po augwaliba wabo dao. Bidi mebago te na yali po page pusali, te augwaligo me dage tibo po ola mobao. Augwaligo te tama po weyu, te dage nagame yai homu saibao po wabo, tiali goli te menio. Te haliga sęgę me elaludalio. Tama tialima, te we bidi dabe tedela palama, te hagawai sipsip kibu wai tiwai yali. Augwa polalubo tuni bidi meni baso, tama augwali sęgę elaluai dao.
ZEC 10:3 Genuai Bidigo te po wali, “Te gasa tǫ pedai kantri bidi dabego eno we bidi dabe augwali tonalubo te eno hagela eyu haliga sębę ebao. Te eno augwaliba dwai dene mabo sę yaibao. Te Juda we bidi dabe augwali te eno we bidi dabe dao. Te ena Tigidali Bomo Elalubo Genuai Bidi, ena digi te eno augwali bugagia tonalueibao, te bidi mego aga kibu sipsip hani tonalubo tiwai gilama yaibao. Te Juda dabe da, te hwįbo bomai hos kibu tiwai pedelaibao.
ZEC 10:4 Tama te Juda hani augwaligo digi te tuni bidi king dabe me polalubo bidi dabe pedalu, te ami polalubo kepten bidi dabe me pedalu yaibao.
ZEC 10:5 Tama tibaso, te Juda dabego te boi bidi dabe aiyaba elalubo sę eyu, te ami bidi dabego te taun sunumi dabede te tǫ pude te boi bidi aiyaba agabo tiwai yaibao. Te Genuai Bidi augwali dali bidibaso, te augwaligo hwįbo bomo eyu, te hos kibude dugayali boi bidi dabe me augwali aiyaba elaluboba usu naibao,” wali
ZEC 10:6 “Te eno Juda we bidi augwali te bomai we bidi pedalumainu ilama, tama eno te Israel we bidi dabe ma dobola somainu yaibao. Eno augwali hobede mu ebaso, tama eno te tigidali we bidi ma selama, te augwa page buluba ma odasa asaibao. Te eno augwali sela sąsiąwai we bidi bidibo tiwai elama, te augwali bugagia bidalueibao. Magi baso meni, ena God te augwaligo Genuai Bidi dao. Tama tiyu, eno augwaligo gedu haluasa po wabo odaibao.
ZEC 10:7 Te Israel we bidi dabe augwali te bomai ami bidi dabe tiwai pedalubaso, te augwali te wain ąį tubo bidi dabego homu pemene ebo tiwai yaibao. Te augwaligo nosali ame nabo wai dabego te wiegi yai sę Genuai Bidigo augwa bulai wąį dabede yali sę homu kone ma palama, te wiegi yai homu pemene mu yaibao,” wali.
ZEC 10:8 “Te eno ena we bidi dabe augwali tigidali i ola bilama, te augwali sisinaibao. Te eno augwali ma dobola selama, te augwali polobadu bidali tiwai gilama hauwa mu pedelaibao.
ZEC 10:9 Mu tamao, eno augwali gasa tǫ kantriba gugula palama, teba bidigi pomainu ilali. Augwali te digibulude bidaluali, tiali goli augwaligo ena homu kone palobo sę me gegeda palogobeo. Te hani dabe augwa wai puluba dabe dali te augwali bugagia mu bidama, te tigidali deliba sisinama, te augwa page buluba ma asaibao.
ZEC 10:10 Te Isip tǫde me Asiria bulu tǫde bidali we bidi augwali, te eno augwali ma odasa aselama, te augwa bulu tǫba ma bidagasaibao. Eno te tǫ dąį kidilama, tama augwaligo te Gileat tǫ pedai me te Lebanongo tǫ pedai me sigi pomainogo yaibao. Tama te we bidi dabe hauwa mu te tǫde pągąnalueibao.
ZEC 10:11 Te eno augwali augwa page bulu muba ma odasa asaibao. Te Isip dabe me Asiria dabego te augwali asabo sunumi te moni ąį biksigo panibo tiwai ebaso da, teda eno augwali hani si aiyaba elalueibao. Te Isip dabego bomo menia selama, tama genuai pabo ąį Nail sula sabo tiwai yaibao. Tama eno te Asiria dabego genuai bomo aiyaba elalueibao.
ZEC 10:12 Te eno we bidi dabe augwali te bomai we bidi dabe pedalumainu ilaibao. Tama augwali ena dologode bidiyu, te eno po wali peyu bilibo sę yaibao. Ena Genuai Bidigo eno te po wai dao,” wali.
ZEC 11:1 Dage Lebanon, dagego da te isi aselama te dagego ni sida dabe ulagasomainogo sula tagalao.
ZEC 11:2 Te ni sida dabe delali dao. Te ni dabego genuai nogi elaluali, augwali dolalio. Tialima dage te wiegi yai ni wuli dabe, dagego gela waiyąo. Augwaligo moni genuai bulu busi togwalualio. Tialima dage Basan bulu boma pai ni kali dabe, dagego me gela waiyąo.
ZEC 11:3 Te king haliga sęgę mu ebaso augwali gela obao, magi baso meni, te augwaligo bomo me genuai nogi elaluali silalio. Dagego te king dabego i dwagila wabo odao. Augwali te hasa laion dabego ebo sę tiwai yali, augwaligo te wę Jordan sesegede te hasa laion geme duala siduali genuai busi togobaso te dwai hwą wabo tiwai obao.
ZEC 11:4 God ena Genuai Bidigo enabolo te tama po walali, “Nago sę te sipsip kibu dabe tonalubo bidigo ebo sę tiwai yao,” wali. “Te sipsip kibu dabe aga aya dabego te sipsip dabe ela tueinu ebo dao.
ZEC 11:5 Te sipsip kibu aga aya dabego te sipsip kibu dabe ela munama, te tama homu yaibao, ‘Dago dwai kolesaga ebe da,’ te homu ebo dao. Augwaligo te kibu migo mone selama, tama augwaligo te po wabo dao, ‘Te Genuai Bidigo nogi ugwaba sinao. Da te mone bidi pedelalio.’ Te sipsip kibu dabe tonalubo bidi dabego me te augwaligo sipsip kibu dabe elebo homu dene me ebo menio,” wali.
ZEC 11:6 Genuai Bidigo te tama po wai, “Te eno te tǫde we bidi dabe homu dene me egobeo. Te ena digi eno te tigidali deli deli te augwali te augwa kingo nogoba mueibao. Tama te king dabego augwali dolaibao, te sipsip kibu dabe aga ayago te sipsip kibu elebo tiwai yaibao. Te kingo augwali dolobo sogo da, teda eno augwali me tau sogobeo,” te po wai dao.
ZEC 11:7 Tama tialima ena te sipsip dabe meba tonalubo bidi pedelali, te magi nai doado bage meni ebo bidi dabego te ela tuabo sipsip kibu dabe da. Tama eno te sipsip kibu dabe tonaluali bidi dabego te kibu ososalo biliyu tolasa bilali dono si eno sali. Te dono me nogi, eno te tiwai nogi polali, te Olo Mu Tau Sabo Homu Ebo dono da, tama dono me nogi te tiwai nogi yali te Deli Madi Sisinibo nogi polali. Tama eno te dono si tolalu, te sipsip kibu hani dabe tonalua bilalio.
ZEC 11:8 Tialima te ena dali sę ebo abagi selago enaba godolo homu isąbaso, tama eno augwali sela te polua deli tomode sela sąna silalio.
ZEC 11:9 Tama eno te hani sipsipbolo te tama po walali, “Ena dage tonalubo bidi munu ma bidigobeo,” wali. “Te isabo sipsip dabe augwaligo dąį ilali, te augwali isimainu yaibao. Tama augwaligo te dolabo dąį ilali sipsip dabe da, augwali te dolomainu yao. Te meba mugai bidaluali hani yai baso da, teda augwa digi augwa dolobo sę emainao, tama tialima te augwali mu sia saibao,” wali.
ZEC 11:10 Tama eno te Olo Mu Tau Sabo nogi poali dono selama, te dono eno togwalio, tama tiyu te eno gasa tǫ pedai kantri dabe dali dąų walali po togwai dao.
ZEC 11:11 Tialima te dąų walali po te sogode mu silalio. Tama te doado bage nai dabe sǫą pali bidi dabego, eno te tiwai sę ebo augwaligo sulama, te tiwai augwaligo koneyu, te Genuai Bidigo po augwaliba mani da homu yali, te eno yali sęde te tiwai sę eba homu yai dao.
ZEC 11:12 Te eno augwaliba te tiwai po walio, “Te dagego mone enabolo maiabo homu ebaso da, teda mao. Te meni baso, tagalao. Duga homugo dao.” Tialima augwaligo enabolo te mone ge bidi sese deli, gasa nogo si, te 30 silva naga mawai.
ZEC 11:13 Te bidi dabe augwaligo ena te dwai sę bidi da homu ebaso, tama augwaligo ena te dwasianu mone naga manio. Te Genuai Bidigo enabolo te tiwai po walali, “Nago te mone te tǫgo sospen sęnę nigibo bidibolo mao,” wali. Tialima eno te mone Genuai Bidigo beba sela pelama, tama eno te mone te tǫgo sospen nigibo bidibolo mawai dao.
ZEC 11:14 Tialima nosali eno te si wali dono togwali, te dono nogi eno te tiwai nogi yali te Deliba Sisinibo dono nogi polali, tama te Juda me Israel si tomode pedelama, te hani si me pedelai dao.
ZEC 11:15 Tama Genuai Bidigo enabolo te tiwai po walali, “Nage te kibu sipsip tonalubo bidi ma pedelao,” wali, “tiali goli megi da, nage te sipsip kibu tonalubo dwai bidi mu tiwai pedelao.
ZEC 11:16 Magi baso meni, eno te ena hani we bidi dabe tonaluabo bidi me deli muani, augwali te sipsip hani dabe tiwai dao. Tiali goli te tonalubo bidigo te sipsip kibu dabe dolainu ebadi tau me sabeo, tama agai te hagabo kibu sipsip dabe gegeyu i ola bilibo sę me ebeo, tama agai te sipsip dabe keni yai sįsįbo sę me isąwai, tama agai te bugagia bidibo hani sipsip dabe nai mayu me ebeo. Menio. Aga digi te nisali kibu elama mi dabe tubo sę idu, te tigidali tula silibo sę yali, te augwaligo nogo sągą dani dabe dali tula siliboba usu nanio.
ZEC 11:17 Tialima te tonalubo dwai bidi dolomainao, magi baso meni, agai aga hani sipsip tonalubo tagalali. Te boi bidi dabego agaba boi hwįagaselama te agai bomo tigidali aiyaba mu tamunaibao. Tialima agai nogo kimi bomo isilama, tama agai dolo nogo badu gedu te mu halua somainao,” Genuai Bidigo te po wai dao.
ZEC 12:1 Te e po da, te Genuai Bidigo po da, aga te dagalu genuai kegelalma, me te tǫ dodolama nigali God dao, tama agai te we bidi dabe augwaliba bidibo ula mabo da. Agai po te Israel dabeba mayu, te tama wali,
ZEC 12:2 “Eno te Jerusalem te kap wain me deli tiwai pedalumainu ilaibao. Tama te Jerusalem pąde elalubo tǫ kantrigo aga dolainu ebaso, te tǫ kantri augwali te kapde wain ąį tuai bidi dabe te gęǫ page dwagila mu ebo tiwai pedelaibao. Te augwaligo Jerusalemba boi hwįgi pabo side, te augwali pelama, te bagulali obo banis taun bagua sigi pelama, tama augwaligo te Juda dabego gasa taun dabe tigidali me bagua sela silaibao.
ZEC 12:3 Te tama tiabo sogo pedalubaso da, teda eno te Jerusalem te sęgę yai masigi me deli mu tiwai ilaibao. Te tigidali bulu tǫ kantri bidi dabe te Jerusalem dali boi hwįainu teba sisinagasaibao, tiali goli augwa digi dolaibao, bidigo te moni sęgąį masigi ugaba sagulubo tiwai gilama mu yaibao.
ZEC 12:4 Te sogode eno te boi bidi dabego hos kibu dabe wi ilama, tama te hos kibude dugawali bidi dabe te homu kolesaga umuna palaibao. Eno te Juda dabe tonalueibao, tiali goli eno te boi bidi dabego hos kibu dabe gedu wilaibao.
ZEC 12:5 Tama te Juda dabego augwa polalubo bidi dabego te tama tebo sę ebo sulama, augwa homu tomode te tiwai po waibao, ‘Awe, God, te Tigidali Bomo Elalubo Genuai Bidi, agai Jerusalemde bidibo aga we bidi dabeba bomo mawai dao,’ Juda dabego te po waibao,” Genuai Bidigo te po wali.
ZEC 12:6 “Te sogo eno ilama, tama te Juda dabe polalubo bidi dabe te kalade te genuai isi bogoli dala sabo tiwai pedalu, ma te wa pai wit gide isi bogoli ula pedalubo tiwai yaibao. Tama augwaligo te augwali pąde elalubo bulu tǫ kantri bidi hani tigidali ela silaibao, tiali goli Jerusalem taun te aga elaluali pesagede tama elalueibao,” Genuai Bidigo te po wai dao.
ZEC 12:7 “Ena Genuai Bidigo te eno bomo mobaso, te Juda ami bidi dabego bomo bolo ugwa mu igulama, te augwa boi bidi aiyaba ilaibao, tama augwaligo genuai nogi saibao. Tama tibaso, te Devitde bulali wąį nǫų hani dabe me te Jerusalem we bidi dabego badi te gasa Juda we bidi tigidaligo genuai nogi aiyaba me elaluamo dao, te tiwai si naga elalueibao.
ZEC 12:8 Te tebo sogode Genuai Bidigo te Jerusalemde bidibo we bidi te obogo bagulubo tiwai yaibao, te boi hwįbo side mubo sabelego te tigi bea sabo tiwai gilama yaibao. Te eno augwali dąų walobaso, te boi hwįabo bomo meni yani bidi dabego me, augwali te polobadu bidali bidi king Devit tiwai bomai bidi pedelaibao. Tama te Devitgo bulali wąį nǫų dabe te nosali pedalubo hani bage te augwa polalubo bidi bidaibao, te Genuai Bidigo mobo bidi ensel tiwai, ma God aga tiwai digi bidibo tiwai yaibao.
ZEC 12:9 Tama te sogode eno te Jerusalem dali boi hwįainu yali te tigidali bulu tǫ kantri eno dolaibao,” Genuai Bidigo te po wai dao.
ZEC 12:10 Te Genuai Bidigo po geninama ma weyu te po wali, “Te eno te Devitgo bulali wąį nǫų hani dabego me te Jerusalem we bidi dabe augwaligo te homu dene eyu tau sabo kolesaga dali, te gedu haluasa po wabo kolesaga me, te si wali pomainu ilaibao. Te eno dwasianu naga egobeo. Tama augwaligo te augwa digi enego enama isali bidiba tononalu, te augwaligo aga gela usu mayu, te bidigo deli digi wai isaide dwai homu dene ebo gela wabo tiwai yaibao. Te augwaligo agade gela dwagila mu weyu, te bidigo aga gomunai ogwa deli isaide gela wabo tiwai yaibao.
ZEC 12:11 Te sogode te Jerusalemde genuai gela u mu waibao, te bidi dabego te tǫ malu dolo bulu te Megido pesagede te tibo god Hadatrimon dolaide te homu dene eyu gela usu mabo tiwai yaibao. Te augwali ayago togwali hani sibi deli delide te augwa homu dene ebo gela waibao. Te Devitgo bulali wąį nǫų hani bidi dabe me, te Natango bulali wąį hani dabe me, te Livaigo bulali hani wąį nǫų dabe me, te Simeigo bulali hani wąį nǫų dabe me, te gasa hanigo bulali wąį nǫų hani dabe tigidali me, te gela usu tigidaligo mawaibao. Te bulali wąį hani deli deli te deliba sisinama, te bidi dabe gasa badu bidiyu, te we dabe sibi tedali badu bidalu, tama tigidaligo homu dene ebo gela usu mawaibao, te augwaligo enani bidide,” Genuai Bidigo te po wai.
ZEC 13:1 “Te tiwai sę pedalubo si da, teda eno ulu ąį me deli munama elalueibao. Te Devitgo bulai wąį nǫų dabe me te Jerusalem we bidi dabe augwaligo te tibo god dabeba lotu olama, te sęgę hauwa sali. Tibaso, te ąįgo augwaligo te dwai sę yali sęgę tigidali sela sąwainogo yaibao,” Genuai Bidigo te po wai.
ZEC 13:2 Te Tigidali Bomo Elalubo Genuai Bidigo geninama ma weyu, te po wali, “Te sogo eno te eno we bidi hanigo tǫde tibo god dabe sela sąwaibao, tama te bidi dabego augwali homu kone mu ma palogobeo. Tama eno te tibo profet dabe me sela sąwaibao. Tama eno te we bidi dabego dwai homu kolesaga elalubo sela sąnama, tama augwaligo te tibo god dabe godolo homu munu ma egobeo.
ZEC 13:3 Te bidi me deligo tibo po ola mayu, te profet po obaso da, teda aga aya idago digi aga waibolo te tiwai po walao, ‘Naga digi nago tibo po pusubao,’ po wao. ‘Te Genuai Bidigo po me wabeo. Tibaso, nage isao,’ po wao. Te bidigo te tiwai tibo profet po pusubaso da, teda aga aya idago digi te hwą gego aga enama isilao.
ZEC 13:4 Te sogo te profet po wabo bidi me deligo te aga na dabe yaide digi te homu pemene eyu, ma te profetgo gudubo ugwa gudulama te profetgo ebo kolesaga tiwai eyu, te we bidi tibo po ola mayu me tegobeo. Menio.
ZEC 13:5 Te agai tama po weyu, ‘Ena profet menio,’ po waibao. ‘Ena te gi sę naga ebo bidi dao. Ena te bidi me deligo olo sę ebo bidi dao,’ tama po waibao.
ZEC 13:6 Te bidi me deligo te tiwai po agaba hanalu, ‘Nage magi ilama te nago hagawiade hwą dolaliwe?’ tialima agai tibo po weyu, te tiwai po waibao, ‘Ena te ena abagi me deligo bede te hwągo dolai da,’ po waibao,” Genuai Bidigo te po wai.
ZEC 13:7 Te Tigidali Bomo Elalubo Genuai Bidigo te tiwai po wali, “Bainat hwą, nage hodaluama, tama eno tonalubo sę ebo bidi dali hwįao, te bidi ena pąde bidibo bidi yali goli. Aga ela mubaso da, teda te sipsip dabe wi tedela sąwaibao. Te tama tiwai naga eno te ena we bidi dabe dali boi hwįaibao.
ZEC 13:8 Tama eno te bulu tǫ kantri we bidi dabe tigidali te hani sela bugulama, te hani si ela silaibao.
ZEC 13:9 Tama te me badu bugai elalubo te dwagi yai pedalabo sę usu sabo sę ilaibao, te bidi mebago te gol me silva te dwai hogomu sela sąmainogo te isiba ulubo tiwai yaibao. Tama augwaligo gedu haluasa po enaba obaso da, teda eno augwaligo gedu haluasa po wabo odaibao. Tama eno te tama po augwaliba walaibao, ‘Dage da, eno we bidi dabe da’ obaso, teda augwaligo te tama po waibao, ‘Nage God, dago Genuai Bidi dao,’ po waibao,” Genuai Bidigo te po wai dao.
ZEC 14:1 Te Godigo genuai bodolu si te pedelaibao. Tama te bodolu side te boi bidi dabe aselama, te dage Jerusalemgo mone dabe me doado bage sagasaibao. Te duga digi tononalubadi digi te augwaligo augwa hasi te doado bage dobola saibao.
ZEC 14:2 Te Genuai Bidigo digi te tigidali bulu tǫ kantri ami bidi dabe sela aselama, te augwaligo dage Jerusalem dali boi hwįmainogo yaibao. Te augwaligo Jerusalem dabe aiyaba elaluama, tama augwaligo bede elaluali doado bage tigidali saibao, tama augwaligo te we dabeba me dwai kolesaga yaibao. Te we bidi hani dabe me badu bugai te augwaligo selama, te gasa bulu tǫ kantriba kalabus iligi pali, tama te hani me badu bugai te Jerusalemde bidaibao.
ZEC 14:3 Tama Genuai Bidigo te bulu tǫ kantriba boi hwįgi paibao, te agai hwįbo sogo te ebo kolesaga tiwaigo te boi hwįaibao wali.
ZEC 14:4 Te sęgę pedalubo sogo Genuai Bidi te bulu du Oliv pąde te Jerusalem giliga pedalubo badu dolaluaibao. Tama te bulu du Oliv si badu pedasa pelama, tama genuai bulu odogo te tomode elaluaibao. Te bulu du me badu pedai te bugasa te not badu peyu, te me badu pedai te saut badu pedasa paibao.
ZEC 14:5 Te dage Jerusalem bage te bulu odogo kilasa pali te bulu Asalba dąį usu nigi peyu wi paibao. Te dage asesa polo tama wi peyu, te dage bulali wąį nǫų hani dabe te Juda king Usia bidali sogo te genuai tǫ mali yainu ebaso wi pelawali tiwai gilama yaibao. Tama te bodolu side God, eno Genuai Bidigo, te aga mobo bidi ensel tigidali selama, te nageba asaibao po wai dao.
ZEC 14:6 Tama te ula te giliga nanobo sogode naga me pedalubeo. Menio.
ZEC 14:7 Te be hulibo sogo pedalubo side, te ula da me tama te ula naga elaludaibao. Tama tialima, te giliga nanobo sogo me be hulibo sogo me elalugobeo. Genuai Bidi deligo naga te sę nisu sogo pedelabo te agai naga konealubao.
ZEC 14:8 Te sogo te wiegi yai ąį te Jerusalemde pedelama te soaibao. Te ąį me badu bugai te sigi ąį Detsiba peyu, te bugai me badu te genuai tamu ąį nogi Mediterenianba paibao. Te soabo ąį te tulubage tulubo sogo me te giliga nanobo sogo soaibao. Te ąį me sula sogobeo wali.
ZEC 14:9 Tama Genuai Bidi te tigidali bulu tǫ kantrigo king bidaibao. Tama tigidali we bidigo aga deliba naga lotu weyu, tama augwaligo aga nogi ebo nogi te e nogi deli naga nogi yaibao.
ZEC 14:10 Te Jerusalem pąde elalubo tǫ da, te doloba pai tǫ malu pedelaibao, te taun Geba te not badu gagalasa te pali, te taun Rimon te Jerusalem te sautba usu naibao. Te Jerusalem taun naga te bulu du me deli ugadu daide elalueibao. Te Jerusalem bagulali obo banis te polobadu elaluali tiwai dąįba usu naibao. Te Benjamingo taun sunumide gagalasa pelama, te Dagebadu Sunumiba te dąį usu naibao, te pesagede polobadu sunumi deli elaluali. Tama te dąį Hananelgo Tauade gagalasa pali, te kingo wain nigali pesageba usu nigi paibao.
ZEC 14:11 Tama te Jerusalem we bidi dabe bugagia bidaibao, te magi nai me deligo augwali munu me ma dologobeo.
ZEC 14:12 Te Genuai Bidigo dwai gasi me deli te Jerusalemba boi hwįani bulu tǫ kantri tigidali bidi dabe augwaliba te gasi pedalomainu ilaibao. Te gasi e tiwai da. Te bidi dabe bididubadi digi te augwaligo tigi wali me gedu me hamena me te damueibao.
ZEC 14:13 Tama Genuai Bidigo te hani bidi dabe wi ilibaso, te kolesaga umuna saibao. Tama tialima, te bidi dabego te augwali pąde bidali bidi dabe pageabi elama ela mueibao.
ZEC 14:14 Tama te Juda bidi hani dabego te Jerusalem tau selama, te boi hwįaibao, te Jerusalem we bidi dabe dolidali weyu tama tiaibao. Tama augwaligo te bulu tǫ kantri bidi dabego doado bage hauwa mu saibao, te gol me silva me ugwa dabe, tama nai dabe saibao.
ZEC 14:15 Tama te boi bidi dabe elali gasi dwai mu te boi bidi dabego pesageba te augwaligo hos dabede, me kamel dabeba, me donki dabeba te gasi pedelaibao.
ZEC 14:16 Te Juda dabe augwaligo te boi bidi aiyaba elalubo si da, teda te boi bidi dabego hani dabe bugai bidalubo bage te Jerusalemba tigidali kibu bede asiduaibao. Tigidali Bomo Elalubo Genuai Bidi te augwaligo king bidibaso, te augwaligo agaba naga lotu waibao, te Juda hani me Israel hani isąwai bage. Tama te augwaligo Osogo Bidabo Tolu Yabe Bede Te Genuai Bodolu Side wali pelama bidaibao.
ZEC 14:17 Te bulu tǫ kantri me deli te we bidi augwaligo te Tigidali Bomo Elalubo Genuai Bidi, te kingba lotu wagi pabo hagela homu ebaso da, teda te tulubage augwaligo tǫba me tulugobeo.
ZEC 14:18 Te Isip dabe augwaligo te Tolu Yabe Bede Osogo Bidibo Genuai Bodolu Muani Side te Jerusalemde lotu wabo hagela homu ebaso da, teda te deli tigi poai gasi te Genuai Bidigo te pisąbo homu meni yani te bidi dabeba tagala palali, te gasi Isipba me pedelaibao.
ZEC 14:19 Te tiwai genuai side lotu augwaligo wasiąwani da, te Isip dabe me gasa bulu tǫ kantri bidi dabeba me te deli tigi poai dene saibao wai dao.
ZEC 14:20 Te sogo augwaligo te tama homu eyu, te tigidali nai Genuai Bidigo nai naga da homu elama, te dwasianu nai belo te hos dabego magede domoani naiba usu nama yaibao. Tama te po me deli augwaligo te belode te tiwai asęani elaluaibao, “Te nai da Genuai Bidigo dao,” teda asęna elalueibao. Te olo sospen sęnę dabe tama me te Genuai Bidigo bede munaluali nai baso da, teda Genuai Bidigo nai mu pedelaibao, te ofa ebo kaneme gelebo genuai pou dis dabe tiwai yai baso te Genuai Bidigo dao.
ZEC 14:21 Tama te olo sospen dabe te Jerusalem dabe me Juda dabego be tigidalide munalubaso da, te nai augwali me te Genuai Bidigo nai pedelaibao. Nosali te bidi mego te sospen dabe te Genuai Bidigo beba sela pelama, te we bidi dabego ofa yabo kibu mi ulumainogo abelao po me wagi pogobeo. Menio. Te we bidi dabego augwa sospen dabe digi sesaibao, magi baso meni, tigidali sospen te Genuai Bidigo nai mu elalueibao homu eyu po waibao.
MAL 1:1 Te Genuai Bidigo te sęgę yai po Malakaiba menama, te Israel dabeba pusumainu yai dao.
MAL 1:2 Genuai Bidigo te tama po wali, “Te eno dage godolo mu eduali, tama megi me ebo dao,” wali. Tiali goli, te Israel dabe augwaligo e tama po wei ponani, “Nago da godolo ebo mena tama yaliwe?” Tialima Genuai Bidigo te po augwaliba wei ponani, “Odiąo. Polobadu Iso me Jekop te ama nami si dao. Te eno Jekop dali, dage te agai wąį nǫų dabe dali godolo homu yai dao.
MAL 1:3 Tiali goli eno te Iso dali te aga hani wai dabe dali godolo homu me isąwai, augwa te nogi Idom poali. Tialima eno te Isogo bulu du bage pesage dolama, te eno agai bulu tǫ dage te bulu hasa dabego dwai pesage pedalumainu ilali,” Genuai Bidigo te po wali.
MAL 1:4 Te Idom dabego te po weyu, “Te dago taun dabe dolalio, tiali goli te dago ma nigaibao,” wabo. Tialima Genuai Bidigo augwaliba te tiwai po wei ponaibao, “Duga ma da nigaibao, tiali goli te eno augwali ma aluama dolaibao,” wali. “Te gasa hani dabego te Idom dabe nogi te tiwai nogi yaibao, ‘Te dwai hani bage dao, te Genuai Bidigo sesemane sogo augwaliba wado po weyu, haliga sębę ebo hani bage dao,’ te po waibao,” wali.
MAL 1:5 “Dage Israel we bidigo te tebo sę te duga gedugo digi sueibao. Tama dagego te po weyu, ‘Genuai Bidigo bomo te umabo mu da Israelgo bulu tǫ kantride elalu, te dago bulu tǫ pedai bogo badu me te usu nai dao,’ po waibao,” Genuai Bidigo te po wali.
MAL 1:6 Te Tigidali Bomo Elalubo Genuai Bidigo te tiwai po te pris dabeba wali, “Ogwago te aga ayago po wali peyu, te aya dologode bidaibao, me te sę ebo bidigo me te aga tonalubo bidigo po wali paibao. Odiąo. Ena duga aya dao. Magi baso dage ena dologoba aselama bidisąbo meniwe? Ena duga tonalubo bos bidi dao. Magi baso dagego eno po wali pisąma ebawe? Dagego ena tudiba muyu, te eno nogi te olo nai dao homu eyu ebo dao. Tiali goli dagego enaba hanalu, ‘Dago magi ilama nage tudiba mubawe?’ te po wali.
MAL 1:7 Woo, megi eno dagego ebo kolesagade po obao. Dagego eno altade dwai ofa yali. Te nosali dagego enaba hanalu, ‘Dago nago nogi magi ilama aiyaba elalubawe?’ wali. Tialima megi eno dagebolo obao. Dagego eno alta te olo nai tiwai da homu elama, tialima dagego eno nogi aiyaba elalubo dao.
MAL 1:8 Te dagego gedu widai kibu hasa me deli te sela pelama, dagego enaba te ofa ebo sogo, dagego te dolo sę eba homu ebo, agawe? Dagego te gasi yai kibu me, sągą togwa pai kibu sela asiyu, dagego te dolo da homu eba, agawe? Te dagego te tiwai kibu me deli te duga gavman polalubo bidiba mobaso, te agai dageba wiegi yai homu pemene eba, homu yaibawe? Ma, dagego homugo te agai dageba wiegi yai nai me deli wei ponaibao homu yaibawe? Mu menio!” Tigidali Bomo Elalubo Genuai Bidigo te po wai.
MAL 1:9 Ae, dage pris, duga te Godiba hanalu te agai wiegi yai sę daba emainu homu yali. Tiali goli, te agai dagego gedu haluasa po me odogobeo, tama te sę yali page dego dawe? Te dugade digi dao. Magi baso meni, dagego agaba te dwai hasa dabe sesiyu, te ofa emainogo yali.
MAL 1:10 Te Tigidali Bomo Elalubo Genuai Bidigo te po wali, “Te bidi me deligo eno be sunumi dabe palibaso da, teda dage te tomoba me pisąma, tama eno altade te dwai ofa dabe yabo sia me udulugobeo. Te usu dao. Magi baso meni, eno dagego ebo kolesagade wiegi yai pemene homu me ebeo. Tama te dagego enaba sesebo ofa dabe eno me sogobeo,” wai dao.
MAL 1:11 “Te tigidali bulu tǫ kantri we bidi dabego enaba genuai nogi mawaibao. Te tigidali bulude bidi dabego te wiegi yai denami ofa hano iliyu, te tobage wiegi yai ofa dabe enaba mawaibao. Te tigidali we bidigo ena nogi ugwaba saibao.
MAL 1:12 Tiali goli, dagego eno alta te olo nai da po weyu, te dagego duga digi homugo godolo isąbo nai dabego enaba ofa yalio. Tialima dagego ena nogi ugwaba me sabeo.
MAL 1:13 Dagego te tama po wabo dao, ‘Iya, da te ofa ebo hagela ebao.’ Te po wabo dao. Tialima, dagego ena godolo homu meni isąwai. Dagego te bulu uni hasa dabego elai kibu hasa dabe te ofa yali. Dagego te kibu me hasa te gasi yai, ma te sągą dwai sela aselama, ofa ilali. Dagego homugo eno te nai saiba homu elama eba, agawe? Menio.
MAL 1:14 Ena Genuai Bidi, eno te po wali, te tibo po wabo bidi dolaibao wali. Te tobage bidigo te wiegi yai omai kibu te banisde elalu, te enaba mawaiba po dąų wali, tiali goli agai te dwai kibugo ofa ilali. Te kolesaga dolo me ebeo, magi baso meni, ena genuai king dao, te tigidali hani bidi enade wi elama, te ena dologoba pelama bidibo dao. Tama tibaso, te wiegi yai nai naga enaba te ofa eyu mao,” Genuai Bidigo te po wai.
MAL 2:1 Te Tigidali Bomo Elalubo Genuai Bidigo te pris dabeba te tiwai po wali,
MAL 2:2 “Eno dageba te bomo yai po me deli elalubao. Te dagego ebo sę tigidalide te eno nogi ugwaba siąo. Te dagego eno po odisąma, te dage hagoma naga ebaso da, teda eno po bomonama obaso, te dage dolaibao. Te duga sęde sabo te wiegi yai nai dabe te eno dolaibao. Te mu tama eno tiai dao, magi baso meni, dagego homude eno olo po te oba olama, te dagego eno po wali pabeo. Tialima eno dage dolai dao.
MAL 2:3 Te eno dagego wai dabeba dwai dene mayu, te eno dagego gesabidide te ofa ebo kibu dabego di pilaibao. Tama eno dage te kibu sibi dabe haliga sąbo pesageba sela sąwaibao.
MAL 2:4 Eno te tama tebode dagego koneagameo, eno te bomai po dageba mani homu yaibao. Dagego eno po wali pobaso da, teda eno dage te pris dabe dali dąų wali te bomai po, te Livai hani wąį nǫų dali yali po me bologobeo.” Te Tigidali Bomo Elalubo Genuai Bidigo te po wai dao.
MAL 2:5 “Eno te dąų wali bomai pode, eno te pris dabe hani tǫde sesabi elama bidimainu ilali, te augwaliba bugagia bidabo po mawai. Eno augwaliba tama tiali, te augwaligo ena nogi ugwaba somainu yalio. Hasia augwaligo ena nogi ugwaba siyu, te ena dologode bidali.
MAL 2:6 Augwaligo dolo yai kolesaga te we bidi ola mawai. Augwaligo te dwai kolesaga augwali me ola mabeo. Te augwali ena dali bugagia dugulaluali. Augwa te wiegi yai kolesaga wali peyu, te augwaligo gasa we bidi hauwa tau siyu, te augwa dwai kolesaga tudiba muai dao.
MAL 2:7 Te pris dabego sę dao, te we bidi dabego ena bugagia konemainu ola mabo sę yao. Te we bidi dabe augwaliba pelama, te eno homu bugagia konemainu yao, magi baso meni, te pris bidi dabego te Tigidali Bomo Elalubo Genuai Bidi eno po pusumainu ebo bidi dabe dao,” wali.
MAL 2:8 “Tiali goli dage pris dabego eno doloba pai sunumi tagalalio. Dagego te haniani skul wabogo te we bidi hauwa kekelama, te augwaligo dolo meni isąwai tobage kolesaga ebao. Mu tama, eno dage te Livai dabe dali dąų wali po te dagego bolali dao.
MAL 2:9 Dagego eno po wali pisąwai. Te eno po dagego te we bidiba ola mawainu ebo sogo, dagego te we bidi meba homu bega sabo po weyu, te meba wado po weyu, tama tebogo te po tų dolo bugagia dodolobo menio. Tama tibaso, eno digi te Israel dabego te dage hagela homu eyu, dage tudiba mumainu ilalio,” Genuai Bidigo te po weyu, tama Malakaigo pusali.
MAL 2:10 Da tigidaligo Aya te deli naga elalubao. Te God deli naga te agai da nigali. Tialima, magi baso dago te dena abagi dabe dali dąų wali po bolobo dawe? Tama magi baso dago te dena wąį nǫų dabe dali dąų wali kontrak po te dago wali pabewe?
MAL 2:11 Polobadu te Juda dabe me Israelgo te Godiba po dąų weyu, te augwaligo agai po wali paibao po wali. Tiali goli, augwaligo te dąų wali po bolalio, tama augwa te dwai sę mu me deli yalio. Te bidi dabego te tibo godiba lotu wabo gasa hani we dabe salio. Tama te tiali kolesagade augwaligo te Genuai Bidigo be meda mu ilalio.
MAL 2:12 Te Genuai Bidigo te kolesaga ebo bidi dabe te sela sąyu, te da Israel hani tomode bidimainu me elamuo wali. Tama tiyu, augwaligo te Tigidali Bomo Elalubo Genuai Bidiba te ofa sela pigio wai dao.
MAL 2:13 Tama eno dagebolo te dagego gasa dwai sę me ebo po obao. Genuai Bidigo te dagego agaba sela pabo ofa umabo hagela eyu, te me sogobeo wali. Tama tibaso, dagego gela weyu, te i dwai weyu, te gela kugai ąį te Genuai Bidigo alta daiba gealubo dao wali.
MAL 2:14 Tama nosali dagego te Godiba hanalu, te tiwai po wali, “Magi baso nago dago ofa sabo meniwe?” E tiwai ebao. Genuai Bidigo koneani, dagego te duga ogwa bidide sali we dabe sela sąwanigo te duga dąų wali bomai po bolalio. Te we dabe duga hai namu dao, tama duga te God gedude po dąų weyu, te dagego augwali munu me tagalogobeo wai. Tiali goli, dagego te bomai po bolali dao, wali.
MAL 2:15 Godigo te dage bidi me we deliba selama bidimainu eyu, te homu kolesaga tigi deli mu pedalumainu ilali. Godigo te sę yali kolesaga page magi baso yaliwe? E tiwai yai. Te dago wai ame nenama, tama augwa te Godigo hani mu pedalumainu yalio. Tialima te dage bugagia dua dao, te dage we de bidi si deliba daganani sogo te dąų walali po te dagego me bolamu dao, wai.
MAL 2:16 God, da Israel Genuai Bidigo, agai te po wai, “Eno homugo te wego bidi tagalama penani eyu, bidigo we tagalama penani eyu ebo kolesaga, te eno hagela homu mu ebo dao,” wali. “Eno homugo dage me deligo te tobage dwai kolesaga mu te aga wede ebo te eno hagela ebo. Te dage dua dao, te dagego duga we dabe dali bugagia bidainu dąų wali po te me bologio,” God Genuai Bidigo te po wai dao.
MAL 2:17 Dagego te haniani po hauwa obaso, tama Genuai Bidi te pode hagela yalio. Tiali goli, dagego te tiwai po hanalu wali, “Dago mena po obaso, te Genuai Bidigo dade hagela homu ebowe?” Dagego te tiwai po obao, “Genuai Bidigo homude te dwai sę ebo bidi te augwali wiegi yai bidi dabe da waibao, po meni, te agai augwali godolo eba homu yali.” Tama dagego e tiwai po weyu yali, “Augwa te po weyu, Godigo te doloba pai kolesaga ebo dao wali. Tiali goli, dago aga te dwai kolesaga ebo bagede te tama tebo subeo,” wali. Tama tibaso, agai dagego te wabo pode hagela homu mu ebo dao po walio.
MAL 3:1 Tialima, Tigidali Bomo Elalubo Genuai Bidigo po wei ponoyu, te tiwai wali, “Te eno po pusugi pabo bidi me deli te eno sunumi dodoligi pomainu polasa tagala palaibao. Dagego te Genuai Bidi asobo tonalubao, tialima polo tama aselama, te aga beba bidagasaibao. Dagego te eno po pusagasobo bidi suabo homu ebo wida, te suiąo. Tialima, aga asobo te eno dąų wali kontrak po pusagasaibao,” te po wai dao.
MAL 3:2 Tiali goli, Genuai Bidi aga asobo sogo, dego te po tų ebo ugwaba ela holobo usu egowe? Aga te pepeli diliba pedalubo sogo, de te me hagagobewe? Aga te sia posolo mu elasa asobo tiwai eyu, te silva me gol hogomu pobele bage sela sąbo tiwai yaibao. Tama aga te meda yai ugwa te sop dali wę dali sigo telabo tiwai yaibao, te meda mu sela sąwaibao.
MAL 3:3 Aga asobo te tigidali we bidigo kolesaga dagalainu asaibao, bidigo te silva siaba ulama, te dwai hogomu sela sąbo tiwai yaibao. Te tiwai te Genuai Bidigo sę bidigo te pris dabego dwai meda yai kolesaga sela sąnama, tama augwa te Genuai Bidiba wiegi yai ofa igi peyu selasa paibao wali.
MAL 3:4 Tama nosali te Jerusalem dabe me te gasa Juda pedai badu augwa te wiegi yai ofa Genuai Bidiba eyu, te polobadu yali tiwai ebaso, tama Genuai Bidigo te augwaligo ofade wiegi yai pemene ma yaibao wai dao.
MAL 3:5 Tigidali Bomo Elalubo Genuai Bidigo te po wai, “Eno dagego kolesaga dagalainu asaibao,” wali. “Te polo tama eno te we sali tomode dolobo sę eyu, te pobi wabo bidi dabe po tų iliyu, te tibo po kotde pusuyu, te tonalubo bidi dabego te augwa sę bidi bugagia me abeligobeo, te we dabego tigidali doado bage sabo bidigo te muma sabo po weyu, te augwa bidi isai we dabego doado bage me siyu, te augwa aya isai wai dabego doado bage me sali, te bomai po boloyu te gasa tǫ kantridu asai bidi dabego nai me sali. Te tigidali bidi ena dologode me bidibeo, tama tibaso te eno augwali po tų ilaibao,” wai dao.
MAL 3:6 Genuai Bidigo po ma weyu, te po wai, “Ena naga ena Genuai Bidi, tama eno homu kolesaga me hasegeligobeo. Tama tibaso, dage te Jekopgo bulai wąįgo wai dabe, dage tigidali me hagabe dao.
MAL 3:7 Dage te duga bulai wąį dabe te polobadu bidali tiwai tobage naga dao. Dagego eno bomai po tudiba munama, tama dagego wali pabeo. Tialima, te dagego dwai kolesaga tagalama, te enaba ma asobaso da, eno me eno te haliga sębę ebo tagalama, te dage ma saibao. Ena te Tigidali Bomo Elalubo Genuai Bidi, eno te po walio,” wali. “Dagego te po obao, ‘Dago mena sę elama, nageba ma asaibawe?’ te po wali.
MAL 3:8 Tialima eno dagebolo obao, dagego eno nai wi sali. Dagego homugo te dwagi yai kolesaga da homu eba, agawe? Mu menio. Tialima dagego e tama tebo dao. Nosali dagego enaba ma hanalu wai, ‘Magi ilama nago nai dago wi saliwe?’ Te bomai pode enaba mao wabo nai te dagego ma tolalubo dao.
MAL 3:9 Mu tama, eno po bomo ebao, dage tigidali dolaibao. Magi baso meni, dage tigidaligo eno nai wi sabo dao.
MAL 3:10 Dagego duga doado bage tigidali dobolama, te nogo si pedai elaluyu, te me deli te eno beba sesao wali. Tama eno sę bidi dabego nai hauwa elaluaibao. Dagego tama tibaso da, te eno wiegi yai doado bage hauwa umabo dageba mayu, te dage me sǫą pogobeo, te nai mubo madi te usu egobeo. Te sunumi wali pobaso da, te dagego koneyu, te eno po tigidali mu po dao waibao.
MAL 3:11 Dagego tama tibaso da, teda eno te dwai osogani dabe paniama, te dagego gi nai me dologobeo. Te ni wain du te dagego wain gide mu pągąna paibao wai dao.
MAL 3:12 Te gasa kantride bidibo bage tigidaligo dage sulama, tama te po waibao, ‘Augwali bugagia mu bidibao,’ waibao. ‘Augwali wiegi yai pemene umabo mu yaibao,’ waibao. Magi baso meni, te dagego tǫ te bugagia dugulalu bidabo pesage elalueibao.” Genuai Bidigo te po wali.
MAL 3:13 Genuai Bidigo te tiwai po wai, “Dagego te po dwai hauwa enaba wali. Tiali goli, dagego te po hanalu obao, ‘Dago mena po dwai nageba waliwe?’ Dagego te tiwai po walio, ‘Dago te Godiba lotu obadi goli, te Godigo da tau me sabeo,’ po wali.
MAL 3:14 ‘Magi baso dago agai po wali pobawe? Te Tigidali Bomo Elalubo Genuai Bidigo gedude dago dena yali dwai sęde homu dene yali, tiali goli agai daba te wiegi yai nai deli wei me ponobeo. Tialima, magi baso dago olodali homu dene yaibawe?’ te po walio.
MAL 3:15 ‘Dago te hagoma ebo bidi dabe bugagia bidiyu pemene ebo suali. Tama te dwai kolesaga ebo bidi dabego te doado bage hauwa elalubao, tama augwa te God usu sabo tobage kolesaga yalio, te augwaliba dene mabowe, ma meniwe, te suainu tiali. Tama Godigo augwali me dolisąwai. Mu menio.’ Dagego te po wai dao,” Genuai Bidigo te po wai.
MAL 3:16 Nosali te Genuai Bidi dologode bidama agai po odali we bidi dabe, augwa haside digi po miani, tama Genuai Bidigo augwaligo mibo po odalio. Tama Genuai Bidigo te po wai, tama te dagalude augwaligo te we bidigo nogi asęai elalubo buku me deli nigali, tede te Genuai Bidi dologode elalu, te agaba homu begi pai we bidi dabego nogi elaluali.
MAL 3:17 Tialima, te Tigidali Bomo Elalubo Genuai Bidigo te po wali, “Te hani dabe te ena hani naga bidaibao. Te genuai side bodolu eno muani, te hani dabe te eno we bidi mu bidaibao, te eno godolo ebo hani mu dao. Tama homu dene eyu, eno augwaliba te olo tau sabo wiegi yai kolesaga eyu, te aya me deligo te wai dabego ayago sę ebaso, te olo tau mabo wiegi yai kolesaga ebo tiwai yaibao.
MAL 3:18 Tama tiyu, te sogo te ena wali pabo doloba pai we bidiba eno ebo kolesaga ma suiyagameo, te eno dwai bidi dabeba ebo kolesaga, te augwaligo eno po sela sąbo dao, te bageba me eno ebo kolesaga suiyagameo,” wali.
MAL 4:1 Te Tigidali Bomo Elalubo Genuai Bidigo te po wai, “Bugagia odiąo,” wali. “Me sogo bodolu si pedaliyu, siago te hagoma ebo we bidi tigidali me dwai sę ebo we bidi ulaibao, siago te wa pai kala dabo tiwai yaibao. Te side te siago augwali dolama, tama augwali tigidali mu silaibao,” po wai dao.
MAL 4:2 “Tiali goli dage eno po wali pabo we bidi, te eno bomogo dage ma saibao. Eno bomo te giliga ulago bomo tiwai elalu, tama dage we bidi te giligago tigi dili ilibo tiwai yaibao. Te dage wiegi yai pemene eyu, te bulmakau wai dabe te banis tomode bidai te buluba dinibo side te sasa mano pabo tiwai ebo dao.
MAL 4:3 Eno te sę dabe ebo sogo te dwai sę ebo bidi dabe dagego aiyaba elalueibao, tama augwali te tǫ hogomu agabo tiwai yaibao,” wai dao.
MAL 4:4 “Dagego te eno sę bidi Moses nogoba te Sainai bulu dude mani po dabe me bomai po me te munu me tagaligio. Eno te po agabolo mani te tigidali Israel we bidigo wali pomainu yai dao,” Genuai Bidigo te po wai.
MAL 4:5 “Te dwai siago te dwai sę ebo bage dolabo bodolu side te eno side te genuai si ebaso, te we bidi tigidali te wi dwai mu yaibao. Tiali goli, hasia bolo te eno profet Elaija te dageba tagala palama, tama nosali te si pedelaibao,” wai dao.
MAL 4:6 “Tama agai te aya me wai dabe te deli haliga pedalumainu ilama, tama augwali tama meni eyu da, teda te eno dagego bulu tǫ kantri dolaibao,” Genuai Bidigo te po wai.
MAT 1:1 E te Jisas Kraisgo nǫų wąį hanigo nogi nedada pabo po e dao. Jisas aga te Devitgo hani, tama Devit aga te Abrahamgo bidi hani dao.
MAT 1:2 Te Abraham aga ogwa Aisak. Tama Aisak aga ogwa Jekop. Tama Jekop aga ogwa Juda te aga ama dede dali dao.
MAT 1:3 Juda aga ogwa Peres me Sera te si da. Te augwa si ida Tamar dao. Tama Peres aga ogwa Hesron. Tama Hesron aga ogwa Ram.
MAT 1:4 Tama Ramgo ogwa Aminadap. Tama Aminadapgo ogwa Nason. Tama Nasongo ogwa Salmon.
MAT 1:5 Tama Salmongo ogwa Boas, tama Boas aga ida te aga Rahap. Tama Boasgo ogwa Obet, tama Obet aga ida te Rut.
MAT 1:6 Tama Obetgo ogwa Jesi. Tama Jesi aga ogwa te tuni bidi Devit dao. Tama Devitgo ogwa Solomon, te Solomon aga ida te polobadu te bidi Uriago we dao.
MAT 1:7 Tama Solomon aga ogwa Rehoboam. Tama Rehoboam aga ogwa Abiya. Tama Abiya aga ogwa Asa.
MAT 1:8 Tama Asa aga ogwa Jehosafat. Tama Jehosafat aga ogwa Joram. Tama Joram aga ogwa Usia.
MAT 1:9 Tama Usia aga ogwa Jotam. Tama Jotam aga ogwa Ahas. Tama Ahas aga ogwa Hesekia.
MAT 1:10 Tama Hesekia aga ogwa Manase. Tama Manase aga ogwa Amos. Tama Amos aga ogwa Josaia.
MAT 1:11 Tama Josaia aga ogwa Jekonia te aga ama dede dali dao. Te sogo, te augwali bidibadi, te boi bidi dabe augwaligo te Israel dabe aiyaba elaluama, tama augwali te Babilon buluba kalabus sę emainogo sela pali.
MAT 1:12 Te augwali Babilon buluba kalabus egi pai, tialima Jekonia aga ogwa Sealtiel. Tama Sealtiel aga ogwa Serubabel.
MAT 1:13 Tama Serubabel aga ogwa Abiut. Tama Abiut aga ogwa Eliakim. Tama Eliakim aga ogwa Asor.
MAT 1:14 Tama Asor aga ogwa Sadok. Tama Sadok aga ogwa Akim. Tama Akim aga ogwa Eliut.
MAT 1:15 Tama Eliut aga ogwa Elesar. Tama Elesar aga ogwa Matan. Tama Matan aga ogwa Jekop.
MAT 1:16 Tama Jekop aga ogwa Josep. Tama Josep te we Maria aga bidi dao. Tama Mariago Jisas ame nai, augwaligo aga nogi te Krais da wabo dao. Te aga sa muyu asaiba wali bidi dao.
MAT 1:17 Tama te tiwai nedada pelama, tama Abrahamgo hani tigidalide gagalasa aselama Devitgo haniba sabolali, te nogo si olama sągą badu me si me si hani dao. Tama tigidali Devitgo hanide gagalama asali augwali te Babilon buluba kalabus egi pali sogo, te me te nogo si olama sągągo me si me si hani dao. Tama augwali Babilonba kalabus egi pali sogo, te Godigo sa muani bidi Krais pedalabo sogo me, te hani tigidali me te nogo si olama sągągo me si me si hani bidi dao.
MAT 1:18 Te Jisas Krais aga ame nani po, e tiwai dao. Aga ida Maria augwaligo Josepbolo noma po wai. Tiali goli augwali si taluama bidisiąbadi digi, tama Mariago suali aga te Godigo Tedali Mobo Bidigo sę yalima haliga yai elaluai.
MAT 1:19 Maria aga bidi Josep, aga te doloba pai bidi da, tama agai Maria haliga elalubo po odobaso, tama agai Mariabolo hale mabo hagela homu yai. Tama agai dua digi naga tama aga tagalai homu yai.
MAT 1:20 Tama Josepgo te homu idubadi, tama nade Genuai Bidigo ensel mobo bidi me deli agaba pedelai. Ensel bidigo te po wali, “Josep, Devitgo ogwa, nago naga we Maria sabo wi egio. Odao. Te wai aga haligade sali, te Godigo Tedali Mobo Bidigo aga mawai dao.
MAT 1:21 Te agai te wai ogwa ame naibao, tama nago aga nogi Jisas poao. Magi baso meni, agai te we bidi augwaligo sęgę elalubo sela sąnama tama augwali ma saibao,” te po wali.
MAT 1:22 Te tigidali pedelali sę te tiwai te po me deli te Genuai Bidigo te agai po pusubo profet bidigo pedauwalidu wali po usu nanio. Te po pusubo profet bidigo te polobadu mu pusai po e tiwai wai,
MAT 1:23 “Odao, wegi me deli te bidi dali me pisąwai, te wegi aga haliga elama, te wai ogwa ame naibao. Tama augwaligo te wai nogi Emanuel nogi yaibao,” te po wai. Tama te nogi page e tiwai dao, God aga da dali bidibao.
MAT 1:24 Te Josep godege pilama hodaluama, tama agai te Genuai Bidigo ensel mobo bidigo aga dali wali po gilama te tiwai sę yai. Agai aga we sai.
MAT 1:25 Tiali goli te wai ame nisiąbadi agai aga te we dali me pibe, tama aga te wego wai ogwa ame nabo te sogo pedelai. Tama agai te wai aga nogi Jisas poai.
MAT 2:1 Te Mariago Jisas te Betlehem bulude ame nani, te Judia tǫde. Tama te sogo te moni gavman tuni bidi nogi Herot aga bidali. Tama Mariago te wai Jisas ame nai digi, tama nosali te sia ge pedalobo badu bidali po page koneai bidi dabe augwali meba te Jerusalem moni hanuba sabolali. Tama augwali te dagalu hǫde haniani po page mu koneai dao. Tama augwali Jerusalem hanuba sabolama, tama augwaligo te po wai,
MAT 2:2 “Wai me deli aga te Juda dabego tuni bidi pedalainogo ame nani, aga menade bidibowe? Da te sia ge pedalobo badude bidibadi dago aga hǫ pedalobo sulama, tama agade kidu sugunama dago agade lotu po wainogo digibulu asai dao,” te po wai.
MAT 2:3 Tama te gavman tuni bidi Herotgo te po wabo odama, tama aga noma siyu moni homu mu yali. Tama tigidali Jerusalem we bidi augwali me noma siyu moni homu yai.
MAT 2:4 Tama Herot agai te pris tuni bidi dabe me, te Israel dabego bomai po page koneai bidi dabe dali deliba sisinama, tama agai augwalibolo hanalu wali, “Te Godigo sa muani nosali asaibao wali bidi Krais aga mena bulude ame naibawe?”
MAT 2:5 Herotgo te po wai. Augwaligo agabolo te po wali, “Te Betlehem bulude, te Judia tǫde dao. Te Godigo po pusubo profet bidigo po polobadu asęyu te po wai,
MAT 2:6 ‘Te Betlehem hanu, te Juda tǫ tomode, te Juda bagego tuni bidi dabego gedude nago nogi te dwasianunu elalugobeo. Te mu menio. Te nagede genuai tuni bidi me deli pedelaibao, tama agai eno hani Israel tonaluabo bidi dao,’ te po asęani,” augwaligo te po Herotbolo wai.
MAT 2:7 Tama te po odolama, tama Herotgo geme te sia ge pedalobo badu asali te po page koneani bidi dabe augwali i wai. Tama augwali aga pageba aselama, tama dua dua eyu agai augwalibolo “Te dagego suali hǫ te mena sogo pedalaliwe?” te po hanalu wali. Tama augwaligo agabolo te hǫ pedalali sogo pusali.
MAT 2:8 Tama tilama, agai augwali te Betlehem buluba tagala paliyu, tama te po wali, “Dage pelama, tama bomo elama te wai gegao. Tama dagego gegelama subaso da, teda dagego po enaba ma sela asao. Tama ena me pelama, agade kidu sugunama, eno agade lotu po wagi paibao,” Herotgo te po wai.
MAT 2:9 Te augwaligo te tuni bidigo po odama, tama augwali pai. Tama pobadi, te hǫ polobadu augwali te sia ge pedalubo badude bidibadi suali hǫ, te hǫ augwali asobodu polasa pelama, tama te wai bidibo be pedu ugwadu dolo dolaluai.
MAT 2:10 Tama augwaligo te hǫ sulama, tama augwali wiegi yai homu genuai pemene mu yai.
MAT 2:11 Tama augwali te be tomoba pelama, tama augwaligo te wai aga ida Maria dali suai. Tama augwali tobolu basi gulama, tama kidu sugunama, te waiba lotu po wai. Tama augwaligo augwa wa dabe dalama, tama augwaligo te waibolo wiegi yai nai meba olo mawai, te kapa nogi gol me, te wiegi yai denami ebo pauda nai me, te tigide wiegi yai denami ilibo nai, te tama nai te wai olo mawai.
MAT 2:12 Tama tilama, tama Godigo nade augwalibolo te po pusali, tama augwa te moni gavman tuni bidi Herot bidibo digi ma pigio te po wai. Tama augwali gasa tųdu peyu, augwa buluba ma pai.
MAT 2:13 Te Jisas suagasali po page koneai bidi dabe pela silai digi, tama Genuai Bidigo ensel mobo bidi Josepba nade pedalai. Ensel mobo bidigo te po wai, “Nage hodaluama te wai bǫų aga ida dali selama, tama Isip tǫba wi pao. Te genuai gavman tuni bidi Herot agai te wai bǫų te ela muabo homu eyu, aga gegebo tamadi gagalaibao. Tama tibaso, megi wi pao. Tama nage Isip tǫde bidibadi te eno ma asao obaso nage asao,” te po wai.
MAT 2:14 Tama Josep hulide digi hodaluama te wai aga ida dali selama, tama aga Isip buluba pabo gagalali.
MAT 2:15 Tama Josep te Isip tǫde bidibadi tama te moni gavman tuni bidi Herot isabo sogo tonaluyu bidali. Te pedalali sę te tiwai te po me deli te Genuai Bidigo te agai po pusubo profet bidigo pedauwalidu wali po usu numainogo yai. Agai te po wali, “Eno ogwa aga Isipde bidibadi, tama eno aga tedu asomainogo i wai dao.”
MAT 2:16 Tialima te genuai gavman tuni bidi Herotgo koneama, te giliga pedalobo badu asali po page koneai bidi augwaligo agai wali po tudiba munama, tama gasa tųdu geme pai homu yali, tialima aga sębę mu yai. Tama agai enesigi bidi dabe tagala paliyu, augwalibolo te po wai, “Dagego te Betlehem bulude me te pąde elalubo bulude me tede bidibo ogwa wai dabe te kibu be si yabo tomode augwali tigidali ela muao,” te po wali. Agai te po page koneai bidi augwalibolo te hǫ hasia pedelali sogode hanalu badi, tama augwaligo aga dali te wali po homugo ma koneama, agai kibu be si weyu tama tiwai dao.
MAT 2:17 Tama te sę ebogo te Godigo po polobadu pusali profet bidi Jeremaiago wali po me deli usu nanio. Agai te po wai,
MAT 2:18 “Augwaligo po me deli te Rama hanude odali. Augwaligo te genuai gela wabo me te hobede yabo i wabo me odali. Te we Resel aga wai dabe hagede gela obao, tama te we bidi augwaligo aga homu wiegi yai me ilibo usu ebe. Magi baso meni. Aga wai dabe augwali tigidali isalio.”
MAT 2:19 Te nosali te moni gavman tuni bidi Herot isai. Tialima Isip buluba te Genuai Bidigo ensel mobo bidi Josep bidibo digi nade pedelai.
MAT 2:20 Tama agai te po wai, “Nage hogodolama, te wai aga ida dali selama, tama nage te Israel tǫba ma pao. Te wai elainogo yali bidi dabe, augwali isai dao,” te po wai.
MAT 2:21 Tama tibaso Josep hogodolama, tama te ogwa wai aga ida dali oda selama, tama augwali te Israel tǫba pai.
MAT 2:22 Tiali goli agai odali, te bidi Arkelausgo te aga aya gavman genuai bidi Herotgo yali sę selama, tama te Judia genuai tǫde gavman tuni bidi sę eyu bidibo po wai. Tama aga te po odobaso, aga te Judia genuai tǫba bidigi pabo wi yali. Tama nade gasa po me Godigo agabolo olama, tama aga te Galili genuai tǫba pai.
MAT 2:23 Tama te tǫba sabolama, tama aga te hanu me nogi Nasaret te hanuba bidigi pai. Tama te sę yaligo da te Godigo po pusali profet dabego wali po usu nubao, “Tama augwaligo aga te Nasaret hanu te bulu bidi dao, te po waibao,” te po wali.
MAT 3:1 Te nosali augwali te Nasaret hanude bididubadi te Jon, te baptais mabo bidi aga pedelai. Aga te Judia tǫ tomode te bidi meni yai bulude bidali, tama agai te po augwalibolo pusali,
MAT 3:2 “Dage dwai kolesaga yalide ge neyu, homu geasa peyu bidiąo. Magi baso meni. Te dagalude bidibo bidi God agai we bidi tonalubo sę yabo bomo te pąba asai dao, dage te bomo dologoba asiąo,” te po wali.
MAT 3:3 Jon da, te agade Godigo te aga po pusali bidi Aisaia te profetgo pedauwalide wali po usu nani bidi dao. Aisaiago polobadu e po weyu asęani, “Te bidi meni yai bulude bidi me deligo i weyu, bomonama te po obao, ‘Genuai Bidigo asabo tų sisi ilao. Aga tų dabe dodolao,’” te po asęani.
MAT 3:4 Jongo te moni kibu kamel nisigo te augwaligo nigai bobage ugwa munama, tama agai tigide te kugulu gudai. Tama agai te mano tiwai nai me te mege ąį te nai si tuyu bidai.
MAT 3:5 Tama te sogo te Jerusalem moni hanude bidai we bidi dabe me, te Judia genuai tǫ we bidi me, te Jordan pabo ąį pąde bidali we bidi me, te augwali tigidali Jon bidibo digi asai.
MAT 3:6 Tama augwaligo augwa yali sęgę dabe pusuyu, tama Jongo augwali te Jordan ąįde baptais mani.
MAT 3:7 Tiali goli Jongo suali, te lotu po wabo bidi hani si te Farisi bage me te Sadyusi bage me te augwali me baptais somainogo asali, tama agai augwalibolo te sesanobo po weyu te po wali, “Dage te dwai hasamani dabego wai dabe, te Godigo te dwai sę yali we bidibolo dene ilabo sogo mu asaibao. Tama tialima mena bidigo dage dali po obaso, tama megi dage wi painogo ebawe?
MAT 3:8 Tama dagego homu kolesaga begelebaso da, teda dagego dwagi yai kolesaga naga yao. Tama tiyu da, dagego duga homu kolesaga mu begelali te dago hania koneaibao.
MAT 3:9 Dagego eno pode geda siyu, dagego homude te homu me egimio: ‘Te Abraham da, te dago aya da, tama tibaso da bugagia bidibao, te dago dena homu magi baso begelaibawe,’ te wagio. Eno dagebolo te po obao, God agai da e masigi dabego te Abrahamgo wai pedala wali da te pedalobo usu yaibao.
MAT 3:10 Tama megi te sigi hwą ni pagede muai elalubao, te ni gelemainogo. Tama te nigo wiegi yai nai du walisiąbaso da, te tobage ni tigidali augwaligo gelama siaba sąwaibao.”
MAT 3:11 “Te eno dage olo ąįgo baptais mabo te dage homu begelai elalubo te dąį tiwai dao. Tiali goli ena tudi badu nosali asobo bidi, te agai bomogo eno bomo aiyaba elaluaibao. Ena da, te wiegi yai bidi meni, tama tiyu eno agai sągą nadoba tolabo te usu egobeo. Agai dage te Godigo Tedali Mobo Bidi me te sia dali si dagebolo mawaibao, te baptais mabo sę tiwai.
MAT 3:12 Te nai dagalobo bidi tiwai agai aga savol te aga nogode tolalubao, tama agai te tubo nai wit ge dagalobo sę emainogo ebao. Tama agai te wit hogomu te tigidali sela sąwaibao. Tama agai te wiegi yai wit ge naga aga wit ge muabo beba sisinaibao. Tiali goli agai te dwai wit hogomu te isisąbo siaba ulaibao,” Jongo te po wai.
MAT 3:13 Te Jon agai te we bidi baptais mabo sogo Jisas aga te Galili genuai tǫ tagalama te Jordan węba pai. Aga Jonba pali, tama aga te Jon nogode baptais sainogo tiwai.
MAT 3:14 Tiali goli Jongo aga te paliainogo yali, tama te po wali, “Te ena nago baptais mabo te usu egi dao. Tiali goli nage enaba asalio,” te po wai.
MAT 3:15 Tiali goli Jisasgo agabolo po wei ponoyu te po wali, “Woo, te nago eno wabo po wali peyu, te sę yao. Tama tiyu, te dago doloba pai kolesaga naga usu nama inao,” te po wai. Tama tialima Jongo agai po wali pai.
MAT 3:16 Tama Jisas baptais selama, tama polo aga te wę tagalama te wę sesegeba holai. Tama dagalu tomode buga palima, te Godigo Mobo Bidi te aiyaba dulubo te agai suali, te ba hi tiwai tama aselama, te Jisasgo tigiba bidagasali.
MAT 3:17 Tama pedauwali me delide te dagaludu i weyu, te tiwai po wai, “Te aga eno Ogwa dao. Eno aga godolo mu ebao. Tama eno homu agade te pemene wiegi yai ebo dao,” te po wai.
MAT 4:1 Te sogo Jisas baptais selama, tama Godigo Mobo Bidigo Jisas te bidi meni yai buluba odasa pali, te Satango aga dwai sę yanama sinawainogo yai.
MAT 4:2 Tama Jisas nai tusiąbadi aga te bidi sese si siade me hulide me bidai. Tama nosali aga nasi yai.
MAT 4:3 Tama te usu sabo bidi agaba pedelama, tama aga dwai sę tomoba kegainu agai te po wali, “Nage te Godigo Ogwa da wida, teda nago po obadi e elalubo masigi dabego te begelama, te tubo nai bret pedalomainao, nago tumainogo yao,” te po wai.
MAT 4:4 Tiali goli Jisasgo e tiwai wali, “Godigo po bukude te po asęani, ‘Te tubo nai bretgo naga te bidi bidabo ula magobeo. Te bidigo bidibo ula te Godigo pedauwalide pedalobo tigidali pode sabo dao.’”
MAT 4:5 Agai te po obaso, tama Satango aga selasa te moni wiegi yai tedali hanuba pali, tama aga te Moni Lotu Be tempel pedu te ugwaba mu dodolali.
MAT 4:6 Tama agai agabolo po weyu te po wali, “Nage Godigo Ogwa da wida, teda nage te Moni Lotu Be pedu tedu aiyaba a tǫba samonao. Godigo po bukude te po wai, ‘Agai aga ensel mobo bidi dabebolo nagede po olama, tama nage augwaligo nogo daide ugwaba saibao. Tiyu te nago sągą te masigigo me selidali weyu tama tiaibao,’ te po asęani,” Satango te po wai.
MAT 4:7 Jisasgo agabolo te po wali, “Tiali goli te bukude te po ma wai, ‘Nago Genuai Bidi God olo subigila usu sigio, sinagio. Aga te nago God dao.’ Te po elalubao,” wali.
MAT 4:8 Te Satango Jisas ma selama, tama te bulu du me ugwanu yai me deli teba sela holai. Tama Satango agabolo te tǫde genuai ula yai bomo me, te tǫde tigidali elalubo wiegi yai nai dabe dali tigidali agabolo ola mani.
MAT 4:9 Tama agai Jisasbolo te po wali, “Tama nago kidu sugunama tama basi gulama, ena dologoba peyu enabolo lotu po obaso da, teda eno te tigidali nai nagebolo mawaibao,” wali.
MAT 4:10 Tama Jisasgo aga dali te po wali, “Satan, nage gedao. Godigo po bukude te po wai, ‘Nago naga Genuai Bidi God dali naga lotu po weyu, aga dologode bidao. Tama nago agai sę deli naga dąų olama yao.’ Te po elalubao,” Jisasgo te po wali.
MAT 4:11 Tama te Satango Jisas aga taga pali. Tama ensel mobo bidi dabe meba aselama Jisas tau sai.
MAT 4:12 Te Jisasgo te po odali, augwaligo Jon te we bidi baptais mani bidi kalabuside muani po wali, tialima aga Galili moni tǫ teba pai.
MAT 4:13 Tama aga te Nasaret hanude osogo bidama, tama tedu pelama, te Kaperneam buluba pelama bidigi pai. Te Kaperneam hanu te sigi wę sesegede elaluali, te Sebulun bidi hanigo tǫ me te Naptali bidi hanigo tǫ me te tǫ si te badu elalubo dao.
MAT 4:14 Tama tiyu, te po me deli te Godigo po polobadu pusali profet bidi Aisaiago pedauwalide wali po usu nani, tama Aisaiago te po wali,
MAT 4:15 “Tama te Sebulun hanigo moni tǫ badu, me te Naptali hanigo moni tǫ te badu me, te sigi węba pabo tų badu, te Jordan pabo ąį badu, te Juda hani isiąwai bidi dabe hauwa bidibo tǫ nogi Galili,
MAT 4:16 te tǫ tigidalide bidibo we bidi augwali hulide bidaluali, tama augwaligo te genuai ula nanobo suai dao. Te we bidi augwali te isabo be hulia sai digi bidaluali tama te wiegi yai ula augwaliba pedelai dao.”
MAT 4:17 Tama te sogo Jisasgo agai po pusubo sę ebo gagalai. Agai te po oduali, “Dage dwai kolesaga yalide ge neyu, homu geasa piąo. Te Godigo te we bidi tonalubo sę yabo sogo pąde dao.”
MAT 4:18 Te me sogo Jisas te Galili sigi wę sesegedu pobadi, tama agai te augwali ama name si suali, te bidi me nogi Pita, me aga ama, Andru, augwali sigo te sųgų sabo wa te sigi węba sąbo sę yai. Te augwali sigo te sųgų selama mone sabo bisnis sę yai dao.
MAT 4:19 Jisas agai augwali sibolo te po wai, “Dage si ena wali asao, tama eno dage si te bidi sabo sę ola mawaibao.”
MAT 4:20 Tama polo augwali sigo te sųgų sabo wa tagalama, tama Jisas aga wali pai.
MAT 4:21 Tama Jisas aga ma pobadi, tama agai gasa ama name si me suali, te Jems, te Sebedigo ogwa, te aga ama Jon dali. Te augwali si augwa si aya Sebedi dali te moni gebade bidibadi, tama augwa te sųgų sabo wa dodolobo sę iduai. Tama agai augwali si i wai.
MAT 4:22 Tialima tama polo augwali sigo te augwa si aya me te geba me tagalama, tama Jisas wali pai.
MAT 4:23 Te Jisas aga te moni tǫ Galili te tigidali sesege badu aga biligi pai. Agai aga ola mabo po te Juda dabego bomo yai po ola mabo be tomode te we bidibolo ola mawai. Tama ola mayu, agai augwalibolo te Godigo we bidi tonalubo sęde te gesi dwagi yai po pusali, tama te tigidali haniani gasi dabe me te tigidali dwai naigo te tigi dolai we bidi augwali tigi usu ma ilai dao.
MAT 4:24 Tama augwaligo agai te sę yali po tigidali te Siria genuai tǫde bidibo we bidibolo me te po pusai. Tama te po augwaligo odama, tama augwaligo te tigidali dwai gasi haniani eyu, te dwai dene sali bidi dabe me selasa asali, tama te dwai noma bidi elalubo bidi me, te esela pabo bidi dabe me, tama te sągą dili bomo isai bidi dabe me, te sela asai. Tama agai augwali wiegi yai ma ilai dao.
MAT 4:25 Tama te genuai we bidi hani hauwa, te genuai tǫ Galilide bidibo we bidigo me, te Dekapolis tǫde bidibo we bidigo me, te moni hanu Jerusalem we bidigo me, te Judia genuai tǫde bidibo we bidigo me, te Jordan pabo ąį te tǫ u badu bidibo we bidigo me, te tǫ tigidalide bidibo we bidi mebago naga te aga wali pai.
MAT 5:1 Te Jisasgo te genuai we bidi hani aga wali asobo suali, tama aga te bulu du me deli bageba holai. Tama aga te bulu dude dulalubadi, tama aga wali bilali bidi dabe augwali aga pageba asali.
MAT 5:2 Tama agai po augwalibolo weyu te po ola mani,
MAT 5:3 “Te kolesaga koneani we bidi augwali te Godigo gedude augwa digi usu elama aiyaba elaluama bidibo we bidi dabe, te augwali homu wiegi yai pemene ebao. Te Godigo obo tomode augwaligo bidabo madi elalubao.
MAT 5:4 Tama te gela udubo we bidi dabe, te augwali homu pemene yaibao. Te Godigo augwali mumanama homu wiegi yai pemene ma ilaibao.
MAT 5:5 Tama te nagamea pai homu eyu augwa dene bugagia tolobo we bidi, te augwali homu wiegi yai pemene emainao. Te Godigo tǫ tigidali augwalibolo mawaibao.
MAT 5:6 Tama te doloba pai kolesaga sainogo bomo eyu godolo ebo we bidi dabe augwali wiegi yai homu pemene emainao. Te homu tiwai ebo we bidi dabe augwaligo homu kolesaga te Godigo augwali mu usu nama te tiwai pedelaibao.
MAT 5:7 Te gasa bidi dabe augwali dali homu dene eyu augwali olo mu tau sabo we bidi dabe, te augwali homu pemene wiegi yai emainao. Te Godigo augwalibolo me te homu dene eyu olo mu tau sabo kolesaga yaibao.
MAT 5:8 Tama te wiegi yai kolesaga eyu, te meda isąma doloba pai we bidi dabe augwali, te augwali homu pemene wiegi yai emainao. Te augwaligo augwa gedugo God sueibao.
MAT 5:9 Tama te wado po wabo me te hwįbo po te isilibo bidi dabe, te augwali wiegi yai homu pemene emainao. Te tama tebo bidi dabe augwalibolo te augwali Godigo ogwa dabe da wabo nogi waibao.
MAT 5:10 Te bidi dabego te doloba pai kolesaga wali pabode sulama, te kolesagade te dwai sę ebo bidi dabego augwalibolo sęgę sobaso da, teda augwali homu pemene emainogo inao. Tama te Godigo obo tomode augwaligo augwa bidabo madi elalubao.”
MAT 5:11 “Tama dagebolo sęgę mabo bidi dabe augwaligo suali dagego ena wali pabo subaso da, te augwaligo dage dali dwai posobo po weyu, tama dene mobadi augwaligo te kedu meni yai tibo po haniani weyu ebaso da, teda dage homu pemene wiegi yai yao.
MAT 5:12 Tama dage homu bugagia wiegi yai elama, pemene mu eyu bidiąo. Te genuai wiegi yai nai mugo dage dagalude tonalubao. Te tiwai naga te bidi dabe augwaligo te Godigo po pusali profet bidi dabebolo hasia polobadu dene mawai tiwai dagebolo me tama tibao.”
MAT 5:13 “Te dage konealubo po dąų wabo we bidi dabe, dage e tǫde bidibo we bidi tomode bidiyu, tama dage te tamu aga sę ebo tiwai eyu bidiąo. Te tamu aga pusu te tubo naibolo mabo dao. Tama dagego dwagi yai kolesaga ebogo te gasa we bidi augwaligo ebo kolesaga dwagi yai ilao. Tiali goli, tamu halia peyu pusu ebo tagaliyu da, teda dago magi ilama te tamu aga pusu yali ma saibawe? Menio, te tamugo da, te sę ma egobeo. Te bidi dabego sela sąyu naga eyu, tama augwaligo sągągo agabo dao.”
MAT 5:14 “Te dage te tigidali tǫde ula tiwai dao. Te hanu me deli te bulu du bagede elaluyu, tama be hulide te augwaligo sole lam ula ebadi, tama te hanu aga duala sabo te usu egobeo.
MAT 5:15 Tama te bidi dabe augwaligo te sole lam domonama te baket dologoba me mubo menio. Te meni. Augwaligo te sole ula te tebol saiba munama, tama te sole ulago te bede bidibo we bidi ula mabo dao.
MAT 5:16 Tama te tiwai naga dagego wiegi yai kolesaga ebo te sole ula ebo tiwai dao. Tama tibaso dagego ebo dwagi yai sę te we bidigo sumainao. Tama augwaligo sulama, tama augwaligo duga Aya te dagalude bidibo bidi nogi ugwaba saibao.”
MAT 5:17 “Dagego homugo ena asali eno te Godigo bomo yai po me te Godigo po pusali bidi profet dabego ola mani po dali sela sąwainogo asali homu egimio. Menio. Te eno te po sela sąwainogo asobe, te eno te po mu usu nainogo ena asai dao.
MAT 5:18 Te eno mu po dagebolo obao. Te dagalu dali tǫ si silisąbadi da, tama te asęani bomo yai po dwasianunu me deli munu me siligobeo. Menio. Te po tigidali augwali elaluaibao. Tama elalubadi te bomo yai pogo aga sę tigidali silaibao. Tama aga sę silibaso da, te sogo naga te bomo yai po me silaibao.
MAT 5:19 Tama tibaso bidi me deligo te bomo yai po dwasianunu me deli tagaliyu, tama agai gasa bidi dabebolo te tiwai kolesaga ola mobaso da, teda te bidi aga nogi me te Godigo we bidi tonalubo sogode, te bidigo nogi dwasianu pedelaibao,. Tiali goli te bomo yai po wali pelama te we bidigo te po wali pomainogo ola mabo bidi, agai nogi da te Godigo we bidi tonalubo sogo genuai pedelaibao.
MAT 5:20 Tama tibaso, eno dagebolo obao, te dagego doloba pai kolesaga ebogo te bomo yai po koneani bidi me te Farisi dabe dali augwaligo kolesaga dagego aiyaba me elalusiąbaso da, teda dage te Godigo we bidi tonalubo obo tomoba pogobeo.”
MAT 5:21 Te Jisasgo te po wai, “Te Mosesgo dagego wąį dabebolo polobadu ola mani po te po dagego odai dao. Agai te po wai, ‘Te nago bidi me ela mugio. Tama bidi mego bidi me deli ela mubaso da, teda dagego te bidi aga te po tų ebo bidiba odasa pao,’ te po wai.
MAT 5:22 Tiali goli megi eno po dagebolo obao: Tama bidi mego aga ama dali sębę eyu da, te bidi aga po tuba odasa paibao, tama dene saibao. Tama bidi mego aga ama dali dwai po obaso da, teda te bidi aga te polalubo kaunsil bidibo digiba pelama, po tų emainogo yao. Tama bidi mego aga ama dali nogi posobo po weyu, nage sę isiąbo homu meni yai dwai bidi dao weyu da, teda te bidi aga te dwai madigi sia dabo dene sabo buluba paibao.
MAT 5:23 Tama tibaso, nago Godibolo maiabo nai ofa te Moni Lotu Be tempelba sela aselama, tama te maiabo nai muabo saide bidibadi, tama te sogo polo ma homugo koneani naga amago po me deli elalubo homu nago ebaso da,
MAT 5:24 teda nago te Godibolo mawainogo yali nai ofa tede munalubadi taga soao. Tama nage pelama, hasia naga ama dali po bolo dodolao. Te po dodola silama, tama megi da nage pelama, tama Godibolo ofa nai magi pao.”
MAT 5:25 “Tama bidi me deligo nage po tų ilainogo ebaso da, tama te po tų yabo sogo dage si tųdu pidubadi, tama polo nago po duga si te po dola sao. Te sogo nago aga dali dodola sisąwani da, te po tų yabo bidigo nage te po tų dodolobo bidi jasgo nogoba muaibao, tama jasgo nage enesigi bidigo nogoba munama, tama enesigi bidigo nage kalabusiba muaibao.
MAT 5:26 Tama eno mu po dagebolo obao, nago te po tųde sali negeli wei tigidali masiąbadi, teda nage kalabuside bidibo tagalogobeo,” Jisasgo te po wai.
MAT 5:27 Te Jisasgo te po wai, “Te Mosesgo dagego wąį dabebolo polobadu ola mani po te po dagego odai dao. Agai te po wai, ‘Penani egio.’
MAT 5:28 Tiali goli megi eno po dagebolo obao: Te bidi me deligo agai te we me deli olo naga agai homude godolo ebo homu eyu, tama te we dali penani sę yabo homu eyu tonono eyu da, te bidi agai homude te bomo yai po bolama, tama agai homude te penani sę ebo tiwai yali dao.
MAT 5:29 Tama tibaso, nago dolo nogo badu elalubo gedugo nage te dwai sęgęba kegebaso da, teda nage hagaidali weyu nago te gedu gudama sąyao. Tama nago tigi me badu te tiwai hagabaso, te dwai dao. Tiali goli nago tigi sese bidibadi tama nago dwai sę edubaso da, teda augwaligo nago tigi sese te dwai dene sabo madiba sąwaibao. Te dwai mu dao.
MAT 5:30 Tama nago dolo nogogo me nage te dwai sę ilibaso da, teda nago te nogo togolama sąyąo. Tama nago tigi me badu te tiwai hagabaso, te dwai dao. Tiali goli nago tigi sese bidibadi tama nago dwai sę edubaso da, teda nago tigi tigidali te dwai dene sabo madiba paibao. Te dwai mu dao,” Jisasgo te po wai.
MAT 5:31 “Po me polobadu augwaligo te po wai dao: ‘Te bidi me deligo aga we tagalobaso da, agai te we tagalobo po page asęnama, tama te pepa te webolo mao.’
MAT 5:32 Tiali goli megi eno dagebolo te po obao: bidigo aga sai we tagaliyu, tama te wego dwai penani sę me isąbadi, teda te bidigo te wego te penani sę ilibao, te we gasa bidigo siyu da. Tama te tobage we sabo bidi me agai te penani sę tama ebao.”
MAT 5:33 Jisasgo te po wai, “Te Mosesgo dagego wąį dabebolo polobadu ola mani po me te po dagego odai dao, agai te po wai, ‘Nago te Genuai Bidi Godibolo te eno te sę mu yaibao po weyu, tama nago te po dąų olama, tama nosali nago te dąų wali po togogio. Menio. Nago te po dolo wali peyu te sę yao,’ Mosesgo te po wai.
MAT 5:34 Tiali goli megi eno e po dagebolo obao: dagego te duga nosali yabo sęde po weyu, tama we bidi augwaligo te mu po dao homu emainogo dagego te po dąų wabo po munu me wagio. Mu menio. Dagego po me deli dąų waliyu, dagalu me nogi ilamuo. Magi basowe, dagalu da, te God dulalubo sia sai dao.
MAT 5:35 Tama dagego te tǫ nogi elama, te po me deli dąų waligio. Magi basowe, tǫ te dwasianu sai te Godigo sągą mubo madigi dao. Tama dagego te moni hanu Jerusalemde te po me deli dąų waliyu te nogi wagio. Magi basowe, te Jerusalem te genuai tuni bidigo moni tedali hanu dao.
MAT 5:36 Tama nago naga tobolu nogi elama te nago po wabo me deli te me dąų waligio. Magi basowe, te nago tobolu nisi me te tedela yai me te sisi yai te pedalainogo ilibo te me nage usu egobeo. Te Godigo sę naga dao.
MAT 5:37 Tama dagego ‘Awe’ obaso da, teda ‘Awe’ naga waiyąo. Me ma, dagego ‘Menio’ obaso da, teda ‘Menio’ naga waiyąo. Teda usu yaibao. Tiali goli dagego duga wabo po mu dąų omainogo te gasa po me obaso da, te po te dwai bidi Satan aga te po page bidi dao,” Jisasgo te po wai.
MAT 5:38 “Te Mosesgo dagego wąį dabebolo polobadu ola mani po me te dagego odai dao, te po e dao, ‘Te bidi me deligo nago gedu dolobaso da, teda nago agai gedu me dolao. Tama bidi me deli agai nago kele me deli togobaso da, teda nago aga kele me deli me togwao.’
MAT 5:39 Tiali goli megi eno dagebolo obao, te bidi mego dwai sę dagebolo ebaso da, te dagego agabolo te sę ebo wei ponogio. Menio. Te bidi me deligo nage nabo gede me badu nogogo elebaso da, teda nago gasa me badu nabo ge me te begelao, agai tede elemainao.
MAT 5:40 Tama bidi mego nage dali po tų elama, tama nago holobo ugwa sainogo ebaso da, teda nago holobo ugwa te agabolo mao, te nago kedau sogo gudubo kol siot te me mao.
MAT 5:41 Tama bidi me deligo bomonama nage dali nago agai walu te dąį deli te digibulu gana sela pina obaso da, teda nago agai walu te dąį deli wali tagalama tama nage aga dali te dąį si ugwanu gana mu pao.
MAT 5:42 Tama bidi me deligo nage dali te nai me deli po hanalu obaso da, teda nago te nai aga mao. Tama bidi mego nage dali negeli sainogo homu ebaso da, teda nago te bidi aga tudiba munama tama nage gesabi gasaba gegi pigio. Agabolo te nai osogo mao,” Jisasgo te po wai.
MAT 5:43 Jisasgo te po wai, “Te dagego odai, polobadu augwaligo te po wai dao, ‘Nago naga abagi godolo eyu, tama nago naga boi bidi dali dwai homu yao.’
MAT 5:44 Tiali goli megi eno dagebolo obao, dagego duga boi bidi dali dwagi yai homu eyu tama godolo eyu yao. Tama bidi meba augwaligo dagebolo dene mobaso da, teda dagego gedu haluasa po Godibolo wao, te agai augwali dali dwagi yai sę emainogo.
MAT 5:45 Tama tiyu da, dage te duga Aya dagalude bidibo bidigo wai puluba mu bidaibao. Agai te tobage dwagi yai sę naga eyu, tama agai sia nanobo te dwai sę ebo bidi dabeba me te dwagi yai sę ebo bidi dabeba dali si te sia nanobo ula ilibo dao. Tama te tulubage tulubo me te doloba pai bidi dabeba me, te doloba pesiąwai bidi dabeba me te tulubage tuluyu ilibo dao.
MAT 5:46 Tama te bidi dabe augwaligo dage godolo ebo bidi dabe te augwali dali naga dagego dwagi yai homu elama godolo eyu da, te Godigo dagebolo dwagi yai nai magi baso mawaibawe? Te takis mone sabo bidi dabe augwaligo te tiwai sę ebo dao. Tiali goli dagego homu augwali dwai bidi dabe dao.
MAT 5:47 Tama dagego duga abagi dedebolo naga te siade da po weyu da, teda dagego te sęde te gasa bidi augwali aiyaba elaluaibawe? Te menio. Te Godigo po odosiąwai we bidi augwaligo me te tiwai kolesaga ebo dao.
MAT 5:48 Tiali goli dage, te dage wiegi yai kolesaga dali bugagia doloba pai mu bidiąo, te duga dagalude bidibo Aya aga bugagia doloba pai mu bidibo tiwai gilama yao,” Jisasgo te po wai.
MAT 6:1 Te bulu du daide bididubadi, Jisasgo te po me wai, “Dage dua dao. Te we bidi dabe augwaligo dagego te wiegi wiegi yai kolesaga ebo sulama, tama augwaligo dagego nogi ugwaba somainogo te bidi dabe augwali gedude te duga wiegi yai kolesaga egimio. Te dagego tama kolesaga eyu da, te duga dagalude bidibo Aya agai te dage mawainogo sisi elama elalubo te wiegi yai nai te dagego me sogobeo.”
MAT 6:2 “Tama tibaso, dagego tama tiao. Nago te magi nai meni yai bidi tau siyu, te masigi madu gebo si, te nago polasa te bu wabo nai biugel bu wabo bidi bolo tagala paligio, te ugwadu homugo naga po wabo bidi dabego ebo tiwai egio. Te we bidigo augwali nogi ugwaba somainogo tama augwaligo te we bidi gesabidide te nai meni yai we bidibolo masigi mabo dao, te bomo yai po ola mabo bede me, te pabo tųde me te kolesaga augwaligo ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai mu me magobeo.
MAT 6:3 Tiali goli nago te magi nai meni yai bidi dabe augwali tau sabo si, teda te sę geme yao, tama nago pobase nogogo te dolo nogogo ebo sę koneabuo.
MAT 6:4 Tama tiyu da, nago augwalibolo nai mabo sę te geme dulaluao. Tama nago Ayago te nago geme dulalubo sę dabe subo dao, tama agai te wiegi yai nai wei nagebolo ponaibao,” Jisasgo te po wai.
MAT 6:5 “Tama dagego gedu haluasa po wabo sogo, dagego te ugwadu homugo naga po wabo bidi dabe augwaligo ebo kolesaga tiwai egimio. Augwaligo te bomo yai po ola mabo be tomode dolaluyu, gedu haluasa po wabo godolo eyu, me te genuai pabo tų bagu badu me, te we bidi dabego augwali sulama, tama augwali nogi ugwaba somainogo tiwai ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai mu me magobeo.
MAT 6:6 Tiali goli nago gedu haluasa po wainogo da, te naga be tomode dąį togali digi pelama, tama tų paliama, naga Ayaba gedu haluasa po geme te be tomode nagaduba wao. Tama naga Ayago te nago geme dulalubo sę dabe subo dao, te agai te wiegi yai nai wei nagebolo ponaibao,” wali.
MAT 6:7 “Tama dagego gedu haluasa po wabo sogo, te olo po hauwa widu geyu, te Godigo po odosiąwai bidi dabego wabo po tiwai egio. Augwaligo homu augwaligo po hauwa widu gebaso, te Godigo te po odama, tama agai augwalibolo te hanalu wali nai mawaibao.
MAT 6:8 Te dagego augwaligo ebo kolesaga wali pigio. Te sogo dagego duga Ayabolo po hanalu wasiąbadi, agai dage te tigidali nai habuge ebo te agai koneai dao.
MAT 6:9 Tama dagego gedu haluasa po e tama wao, ‘Dago Aya, nage dagalude bidibo bidi, dago homugo nago nogi wiegi yai tedali mu bideibao.
MAT 6:10 Dago homugo te nago te we bidi mu tonalubo sogo daba asomainao. Tama te dagalude bidibo bidi augwaligo nago homu kolesaga wali pabo tiwai gilama, tama nago homu kolesaga e tǫde bidibo we bidi augwaligo wali pao.
MAT 6:11 Dago homugo nago megi e sogode usu nama te da tuabo nai mao.
MAT 6:12 Tama dago homugo nago dago dwai sę yali sela sąyao. Te bidi dabe augwaligo da dali dwai sę elama, tama dago augwaligo te dwai sę yali sela sąbo tiwai yali gilama tama nago dago sęgę sela sąyao.
MAT 6:13 Te da te dwai sę yanama sinawainogo ebo sogo daba asidali weyu, nago te habu selao. Tama te dwai sę page bidi agai da dolidali weyu te nago da tau sao. [Tama nago te genuai bomo me ula, te genuai nogi me te nagede sesemane sogo bidada paibao. Mu dao, te tama tiwai pedalomainao, te dago homugo dao.]’ Te tiwai eyu, gedu haluasa po wao,” wali.
MAT 6:14 “Odiąo. Te dagego gasa we bidi augwaligo dage dali dwai sę ebo sela sabaso da, teda duga Aya dagalude bidibo bidi agai te dagego dwai sę ebo me te sela sąwaibao.
MAT 6:15 Tiali goli, dagego te gasa we bidi augwaligo dage dali dwai sę ebo sela sasiąbaso da, teda duga Aya agai me te dagego dwai sę te sela sagobeo,” Jisasgo te po wai.
MAT 6:16 “Te dagego Godibolo po wainu tama nai osogo gisilidu gebo si, teda dagego dwai gesabi siyu, te hulia sabo te tiwai te ugwadu homugo naga po wabo bidi dabego nai osogo gisilama gesabi hulia sabo tiwai egimio. Te menio. Augwaligo gesabi doloyu, hulia sabo te we bidigo augwaligo nai gisilali sulama konemainogo ebo dao. Eno mu po dagebolo obao, augwaligo te tobage sę elama, tama we bidigo augwaligo nogi ugwaba sai goli, te tama dao, te Godigo te sę ebode augwalibolo wiegi yai nai me magobeo.
MAT 6:17 Tiali goli dage da, te dagego God dali po wainu te nai osogo gisilidu gebo si, te dagego gesabi dologio, te dagego duga tobolude wel munama, tama dagego gesabi wę tela yao,
MAT 6:18 te we bidi augwaligo dagego tubo nai gisilibo koneidali weyu tama yao. Te duga Aya te bidigo gedugo susiąbo bidi agai naga dagego ebo sę sueibao. Tama duga Ayago te geme dulalubo nai subo dao, agai dagebolo te wiegi yai nai wei ponaibao,” Jisasgo te po wai.
MAT 6:19 “Dagego duga wiegi yai doado bage e tǫde sabogimio. E tǫde dwai asibago me te yaba ilibo nai dabego te nai doloyu, me te nai wi sabo bidi dabego te be tomode munalubadi aselama, nai wi sabo dao. Tama tibaso, te nai e tǫde sabogimio.
MAT 6:20 Te menio. Te dagalude te dwai asiba dabego me te doloyu, te dwai yaba ebogo te nai me dologobeo, tama te nai wi sabo bidi dabego te be aluama te nai wi me sagasogobeo. Tama tibaso, dagego duga wiegi yai doado bage te dagaluba naga saboama muiąo.
MAT 6:21 Te dagego wiegi yai doado bage elalubo bulu, te bulude naga dagego homu konea palaibao,” Jisasgo te po wai.
MAT 6:22 “Gedu da, te tigide lam tiwai dao. Tama nago gedu wiegi yai elalubaso da, teda nago tigi me te tigidali te ula yaibao.
MAT 6:23 Tiali goli nago gedu dwai yaibaso da, teda nago tigi me te tigidali be hulia saibao. Tama nage tomode elalubo ula te be hulia sabo tiwai yaibaso da, teda te hulia sali te genuai mu yaibao,” Jisasgo te po wai.
MAT 6:24 “Te bidi deligo genuai bidi sigo sę ebo usu egobeo. Agai me deli dali dwai homu eyu, tama me dali te agai wiegi yai homu yaibao. Te agai me deli wali peyu, tama agai gasa bidi me aga homude bo weyu, te tudiba muaibao. Te tiwai dagego te Godigo sę dali te mone sabo sę dali yainogo ebo te usu egobeo. Te dage te mone dali doado bage dali si sabo sę ebo homu dologode bidiyu da, teda dagego duga homu te Godigo sę ebode bugagia mugobeo,” wali.
MAT 6:25 “Tama tibaso, eno e po dagebolo obao, dagego duga bidibo ula tigi tau mabo naide homu hauwa eyu, te po wagimio, ‘Da magi nai tugowe?’ ma ‘Da magi wę tueibawe?’ Tama dagego duga tigi tau siyu gudabo ugwade homu hauwa elama te po olamuo, ‘Da magi ugwa gudugowe?’ Te bidabo ula elalubogo te tubo nai aiyaba elalubo dao. Me te tigi elalubogo te gudabo ugwa aiyaba elalubo dao.
MAT 6:26 Dagego te ba dabe suao, te dagalude bola pobao. Augwaligo nai bulusiąma, tama te nai sisinama te nai mubo beba me mubo meni goli, augwali nai te Godigo mabo dao. Tama tiyu, God agai gedude te ba dabe augwali genuai nai meni yai goli, agai augwali bugagia tonalubo dao. Tama dage da, dage agai gedude genuai dao. Tama tibaso, agai dage me bugagia tonaluaibao.
MAT 6:27 Mu tama dao, dage tomode niwai bidigo moni homu ebogo te aga digi aga bidabo bubuga bobobage ma ilabo usu yaibawe? Te menio, usu me egobeo.”
MAT 6:28 “Tama magi baso dagego homu hauwa te tigide gudubo ugwade ebawe? Dagego te gide holobo plaua noswai suiąo, te augwali da magi ilama pedalobo dawe? Augwali da te sę dene ebeo. Te augwaligo ugwa me nigibo menio.
MAT 6:29 Tiali goli eno dagebolo obao, polobadu te tuni bidi Solomon agai tigidali au dobage muyu, aga wiegi wiegi yai gudubo ugwa guduai goli, agai tigide muani au dobage te noswai plauago augo aga aiyaba elaluai dao.
MAT 6:30 Tama te gide megi elaluali noswai, tama do da te noswai augwaligo togolama, siaba sąwaibao. Tama te tiwai olo noswai te Godigo au ilibo dao. Tama dage te konealubo po dwasianu naga dąų wabo we bidi, dagego mu koneiąo. Godigo dage me bugagia tonaluyu, te ugwa dabe dagebolo me mu mawaibao.
MAT 6:31 Tama tibaso, dagego homu hauwa eyu te po wagimio, ‘Te da magi nai tugowe?’ ma ‘Da magi wę tugowe?’ ma ‘Dago gudubo ugwa dabe menade saibawe?’ Te dagego tama moni homu egimio.
MAT 6:32 Menio. Te kolesaga tigidali te Godigo po odisąbo we bidigo wali pabo homu kolesaga dao. Tama duga Aya dagalu bidi agai dage te haniani nai habuge ebo si agai koneyu, tama agai dage tau saibao.
MAT 6:33 Tama tibaso, te naide moni homu isiąma, tama dagego hasia bolo te Godigo we bidi tonalubo sę dali, me te wiegi yai doloba pai kolesaga sabo sę bolo wali piduama sao. Dagego te tama kolesaga ebaso da, te nosali agai gasa nai dabe tigidali me dagebolo mawaibao.
MAT 6:34 Tama tibaso, dagego do yabo sęde homu hauwa mu egio. Te do pedalabo sęgę te augwa digi do dodololaibao. Te deli sogo ebo sęgę te sogo naga usu nama yaibao,” Jisasgo te po wai.
MAT 7:1 “Te Godigo dage osola suidali weyu tama dagego gasa we bidi dabe augwali osola subo kolesaga ebo tagaliąo.
MAT 7:2 Te dagego gasa we bidigo ebo kolesaga osola sulama, tama augwali sęgę mabo tiwai gilama tama God agai dagego ebo kolesaga me osola sulama, tama dagebolo sęgę mawaibao. Dagego augwali usu sali usu nigo naga te Godigo dage me usu saibao.
MAT 7:3 Tama tibaso, magi baso nago naga amago gedude elalubo dwasianu pobele bage suai, tiali goli nago naga gedude elalubo genuai pobele bage te bǫ nami tiwai te nago magi baso subo meniwe?
MAT 7:4 Nago naga gedude te genuai bǫ nami tiwai elalubo pobele bage sela sasiąbadi, te nago magi baso naga amabolo te po weyu, ‘Ama, nago gedude elalubo pobele bage eno sela sąwaio,’ te po obawe?
MAT 7:5 Nage ugwadu homugo naga po wabo bidi, hasia bolo nago naga gedude te bǫ nami tiwai elalubo pobele bage guda sąyao. Tama tiyu nosali te nago gedu bugagia wiegi yai ebaso, teda naga amago gedude elalubo pobele bage sela sąyu guda sabode nage usu yaibao,” Jisasgo te po wai.
MAT 7:6 “Te dagego te wiegi yai tedali nai te yowi dabebolo magimio. Tama dagego duga wiegi wiegi yai au yabo bis tiwai nai dabe te kibu dabeba sągimio. Tiyu augwaligo te nai dabe sągągo agalama, tama augwali ma begeleyu, tama dage ma tuidali weyu tama egimio,” Jisasgo te po wai.
MAT 7:7 “Te dagego gedu haluasa po Godiba hanalu da, teda agai dagego te hanalubo nai te dageba mawaibao. Dagego te nai gegebo sę idu da, teda te nai dagego sueibao. Tama dagego be tuba eliyu bebego wedu da, teda Godigo dagebolo te tų dalaibao.
MAT 7:8 Magi baso meni. Tigidali bidigo gedu haluasa po God dali hanalubo po wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tuba elibo bidi, teda Godigo te bidibolo tų dalobo dao.
MAT 7:9 Tama dage tomode bidi me deligo waigo aga ayabolo te tubo nai bret mao po obaso da, teda aga ayago te waibolo te masigi me deli sela mawaibawe? Menio.
MAT 7:10 Tama te nasi ebo waigo aga ayabolo te sųgų mao po obadi da, teda aga ayago te waibolo te dwai hasamani me deli sela mawaibawe? Te me menio.
MAT 7:11 Tama dage dwai bidi dabe bidibo digi, tama dagego te wiegi yai nai duga wai dabeba mabo koneyu da, teda dagego mu koneiąo, te duga Aya dagalude bidibo bidi agai wiegi yai nai te agabolo gedu haluasa po wabo bidi dabebolo mu mawaibao. Tama agai te dwagi yai nai mabo kolesagago dagego mabo kolesaga aiyaba mu elaluaibao,” wali.
MAT 7:12 “Te dagego homugo te gasa we bidi dabe augwaligo dagebolo yabo dwagi yai kolesaga tiwai gilama tama dagego me augwali dali te tiwai dwagi yai kolesaga naga iyąo. Te Mosesgo polobadu asęani bomo yai po tigidali me, te Godigo po pusali profet bidi dabego pusali po tigidali me, te po tigidali te page deli naga elalubao, te eno megi tama wali po naga dao,” Jisasgo te po wai.
MAT 7:13 “Te da we bidi pabo tų si elalubao. Tama te sunumi me deli te dwasianu dao. Tama gasa sunumi te genuai dao, tama tedu pelama tama te pabo tų da te pobele bage meniama te noma yai dao. We bidi augwali te genuai tųdu pabo te hagela isiąwai tų dao. Tama we bidi umabo te tųdu wali pabo dao. Tiali goli te genuai tų te dwai sia elalubo madigi haga yabo tųba pabo tų dao. Tama tibaso, dage te gasa dwasianu sunumidu pao.
MAT 7:14 Tama te dwasianu sunumi tomodu pelama, tama te dwasianu tųdu peyu, tama te bidibo ula elalubo madigi painogo te sinabo sę ebo dao. Tama deli deli we bidigo naga te tų gegelama subo dao,” Jisasgo te po wai.
MAT 7:15 “Te tibo lotu po ola mabo po wabo bage augwali asidali weyu bugagia suao. Augwali dageba asobo si, te augwali kibu sipsip tiwai asaibao, te augwali dwai sę isąbo bage tiwai augwaligo dagede dwai sę yabo homu geme dualama, tama augwali dageba asaibao. Tiali goli, augwaligo homude dage mu dolabo homu kolesaga ebo dao, te dwai bulu yowi tiwai dao.
MAT 7:16 Tama augwaligo ebo dwai sę te dagego subo si da, te dagego augwaligo ebo homu kolesaga te kuna mu koneaibao. Te sesani yai bono te pusu ebo wain bono du dabe dali gelama walogobeo. Me te sesani yai bono elalubo digi te ni kaya du elalubaso te bidi dabego sabo dawe? Menio.
MAT 7:17 Tama te bugagia pua pai holai nigo aga dwagi yai du naga walobo dao. Me ma te ni bugagia holosiąwai haganawai nigo dwai du naga walobo dao.
MAT 7:18 Tama te bugagia pua pai holai nigo te dwai nedu du dabe walogobeo, te menio. Me ma, te bugagia holosiąwai haganawai nigo wiegi yai nedu du dabe me walobo menio, usu egobeo.
MAT 7:19 Tama te wiegi yai du walosiąwai ni te augwaligo gelama, tama siaba ulubo dao.
MAT 7:20 Tama tibaso, dagego te tibo lotu po ola mabo po wabo bage te dagego augwaligo ebo sę subo si da, te augwali dagego kuna mu koneaibao,” Jisasgo te po wai.
MAT 7:21 Te Jisas agai po me weyu, te po wai, “Te we bidi hauwa augwaligo enade bomonama te po wabo dao, ‘Dago Genuai Bidi, dago Genuai Bidi,’ te po augwaligo enade wabo dao. Tiali goli, augwali tigidali te Godigo we bidi tonalubo madi te dagalu tomoba pogobeo. Tigidali menio, meba we bidi naga tomoba paibao. Eno Aya aga bidibo madi dagalude bidibo dao. Tama niwai bidi agai eno Ayago homu wali pabo bidi, te bidi naga te Godigo we bidi tonalubo madi tomoba bidigi paibao.
MAT 7:22 Tama te genuai sogo asobo si, te we bidi hauwa augwaligo enabolo te po waibao, ‘Genuai Bidi, Genuai Bidio, dago nago nogi weyu, dago Godigo po te we bidibolo pusai dao. Nago nogigo bomogo dago te dwai haubo te we bidide elaluali sela sąwai dao, dago te we bidi noma sabo bomai sę yai dao,’ augwaligo te po waibao.
MAT 7:23 Tama te sogo eno augwalibolo te po hanilama waibao, ‘Eno dage munu me konebeo. Dage dwai sę ebo bage, dage piąo,’ eno te po te sogo waibao,” Jisasgo te po wai.
MAT 7:24 “Te niwai bidi agai eno e wabo po odama wali pabo bidi, teda te bidi me deli agai homu te wiegi yai tiwai elalubo bidi, tama agai be te masigi daide ugwadu sę yai dao, te be bugagia dąų omainogo yai.
MAT 7:25 Tama tulubage tuluyu, tama wę bomo yai asiyu, tama bomo yai wali pedaliyu, tama te nai dabego te be degelainogo yai dao. Tiali goli te be aga degebeo. Magi basowe, te be dąų mu walali te tǫ tomode genuai genuai masigiba dąų mu wai dao.
MAT 7:26 Tiali goli bidigo eno e po wabo odama wali pisąwani bidi, aga te esela pabo bidi tiwai elama, tama agai be tǫ dąų wasiąma, te kemi tǫde naga ugwadu sę yai dao.
MAT 7:27 Tama tulubage tuluyu, te wę bomo yai asiyu, tama bomai wali pedaliyu, tama te nai dabego te be degelama, tama te be degelai dao. Te be dolama mu degai dao,” Jisasgo te po wai.
MAT 7:28 Jisasgo wali po silagasu te po wali, tama tibaso te genuai we bidi hani augwaligo te po odama, augwali te pode noma mu siyu bidai dao.
MAT 7:29 Magi basowe, agai augwali ola mani po te augwaligo bomo yai po page koneai bidi dabego po wabo tiwai wabeo. Menio. Agai augwali po ola mani te po page bidi, bomo elalubo bidi bidiyu, te po augwalibolo ola mani.
MAT 8:1 Te Jisas aga te bulu dude bidali tagalama, tama aba dulama, tama we bidi hauwa aga wali asai.
MAT 8:2 Tama te tigiwalide dwai gasi yai bidi me deli aga Jisas pąba aselama, tama tǫba kidu sugunama, tama agai te po wali, “Nogi elalubo bidi, te nago homugo usu dao wida, teda nago ena wiegi yai ma ilama, tama ena te meda meni yai tiwai ma bidaibao,” te bidigo te po wai.
MAT 8:3 Te Jisasgo nogo te bidi tigiba munama, tama aga nogogo tigiba diąyu te po wali, “Ao, eno homugo nage gasi usu ilaibao. Tama nage wiegi yai pedalao, te meda meni yai bidi bidao.” Tialima, megi naga tama agai tigiwali dolali gasi silama, tama te bidi aga tigi wiegi yai yai.
MAT 8:4 Tama Jisasgo te bidi aga dali te po wali, “Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Tama tilama, tama polobadu Mosesgo wali po gilama Godibolo nai ofa yao. Tama tiyu te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai.
MAT 8:5 Jisas te Kaperneam hanu tomoba pobadi, tama te ami bidi hauwa 100 tonalubo genuai bidi aselama, agabolo bomo elama hanaluyu te po wali, “Nogi elalubo bidi, eno sę ebo bidi gasi yai bede pila mubao. Agai nogo sągą dili tigidali bomo isai, tama aga dwai mu bidibao,” te po wai.
MAT 8:7 Jisasgo te po wai “Te eno aga geseligi paibao,” wali.
MAT 8:8 Tiali goli te ami genuai bidigo po wei ponoyu, aga dali te po wali, “Nogi elalubo bidi, ena wiegi yai bidi meni, tama tiyu nage eno be tomoba pogobeo. Nago pogo naga po olama, tama eno sę ebo bidi aga gasi usu ilao.
MAT 8:9 Ena me te ena genuai nogi elalubo bidigo tonaluyu bidibo dao. Tama eno digi te ena ami bidi dabe te ena dologode augwali bidibo dao. Tama eno me delibolo te po weyu, ‘Nage pao’ obaso da, teda aga pabo dao. Tama eno gasa bidi me dali te po weyu, ‘Nage asa’ wali da, teda aga asobo dao. Tama eno ena sę ebo bidibolo te po weyu, ‘Nago te sę yao’ obaso, teda agai te sę ebo dao,” te ami genuai bidigo te po wai.
MAT 8:10 Jisasgo te po odama, tama aga homu noma siyu, tama agai aga wali asobo we bidi dabebolo te po wali, “Eno mu po dagebolo obao, eno te Israel we bidi hanide te tobage konealubo po dąų wai bidi tiwai me deli eno subeo. Menio.
MAT 8:11 Eno dagebolo obao, te sia pedalobo badu me, te sia aiyaba dega sigi pabo badu me, te si badu te we bidi hauwa aselama, tama augwali te polobadu e tǫde bidali bidi te Abraham me Aisak me Jekop te bidi dabe dali deliba dualama, tama dagalude te Godigo we bidi tonalubo madi tomode bidiyu moni nai tueibao.
MAT 8:12 Tiali goli, Godigo hasia bolo te dwai tigi dene sabo buluba muabo sa muani we bidi augwali da, te augwaligo te bulu badu te be hulia sai dwai madigi sela sąwaibao. Tede augwali dwai gela weyu, tama augwa kele ma halua tueibao.”
MAT 8:13 Tama Jisasgo te ami genuai bidibolo te po wai, “Naga beba pao. Eno homugo nago konealubo po dąų wali pode te sę nageba pedalaibao,” wali. Tama Jisasgo te po wali sogo naga tama te ami genuai bidigo sę ebo bidi gasi usu ma yai dao.
MAT 8:14 Tama Jisas Pitago be tomoba pobadi, tama Pitago we aga ida gasi eyu pila mubo suai. Aga tigi posolo gasi yai.
MAT 8:15 Tialima Jisasgo aga nogogo te wego nogo diąyu, tama te gasigo aga tagalali. Tama aga hodaluama, tama Jisasgo nai sisi ebo sę ebo gagalali.
MAT 8:16 Tama te sogo pio naga augwaligo te dwai haubo augwalide elalubo we bidi hauwa augwali odasa aselama, tama Jisas pageba pedalai. Tama agai pogo naga po obadi tama te dwai haubo noma bidi dabe sela sąwai. Tama agai tigidali gasi yai bidi dabe wiegi yai ilai dao.
MAT 8:17 Tama tiyu, agai te po me deli te Godigo po pusali bidi profet Aisaiago pedauwalidu wali po te usu nanio. Agai te po polobadu wai, “Aga digi dago gasi sai, tama agai dago tigi dolobo sęgę tolasa pai dao.”
MAT 8:18 Jisasgo te genuai we bidi hanigo aga bagulubo sulama, tama agai te aga wali asobo bidi dabebolo te po wai, “Da te sigi ąį u badu sesege badu te gebadu pinao,” te po wai.
MAT 8:19 Tama te Juda dabego bomo yai po ola mabo bidi me deli aselama, aga dali te po wali, “Po ola mabo bidi, ena nage pabo bulu tigidali te nage wali ena paibao,” te po wai.
MAT 8:20 Jisasgo te po agabolo wali, “Te uni yowi dabe da, augwali pibo dedage te tǫde elalubao, tama te ba dabe da, te augwali me pibo be elalubo dao. Tiali goli Godigo Bidi Mu da, te aga tobolu munama piabo digi te bulu pesage menio,” wali.
MAT 8:21 Tama Jisas aga wali pabo bidi me deligo agabolo te po wali, “Genuai Bidi, nago usu da po wai wida, teda ena pelama, te eno aya bolo pubuligi paibao, tama nosali ena nage wali ma asaibao,” te po wali.
MAT 8:22 Tiali goli Jisasgo agabolo te po wali, “Nage da, ena wali asao. Te Godigo po odisąbo isai bidi tiwai bidi dabe augwa digi te isai bidi dabe pubalomainao,” Jisasgo te po wai.
MAT 8:23 Jisas te gebaba holobaso, tama aga wali pabo bidi dabe me augwali aga wali pai dao.
MAT 8:24 Tama augwali te gebadu te sigi ąį daidu pobadi, te genuai wali mu polo tama hodaluama pedaliyu, tama te moni wę dini asobogo te geba haluainogo yai. Tiali goli Jisas aga da te gebade godege pila mudai dao.
MAT 8:25 Tama augwaligo aga pila mubadi hodoligi pali, tama augwaligo te po wai, “Genuai Bidi, nago da tau sao. Da megi e gebade dolama isiebao,” wali.
MAT 8:26 Tama agai augwalibolo te po wali, “Magi baso dage wi ebawe? Dagego homugo enade konealu po dąų wabo te dwasianu naga dao.” Tama aga hodaluama, te wali dali te moni wę dini te sia sao po wai. Tama te wali yali sia siyu, tama te wę memenege dwasianu me ebeo.
MAT 8:27 Tama augwali moni noma siyu, tama augwaligo te po wali, “E bidi da, aga te mena tiwai bidi weyu, tama te wali de te wę sigo agai po odali dawe?” augwa hasi te po hanalu wai dao.
MAT 8:28 Te Jisas te gebadu pelama, te sigi wę u badu sabolali, te Gadara bidi hanigo tǫba pedelai. Tama te sigi wę tagalama, tama tǫdu pobadi te dwai haubo bidigo dąų wai bidi si te bidi si aga tiąba asai. Te bidi si te gų page elalubo madide bidama asai. Te bidi si te dwai uni yowi bidibo tiwai ebaso, tama te we bidi augwali te tųdu bilainogo ebo te usu me yai menio.
MAT 8:29 Tialima, te bidi sigo bomonama i weyu, te po wai, “Nage Godigo Ogwa dao, nago magi sę da dali megi yainogowe? Te bodolu mani sogo me elalubadi digi, te nage eba asali te nago da dene mawainogo ebawe?” wali.
MAT 8:30 Tama tede genuai kibu hani augwali te dwasianu digibulu gana nai tuyu bidaluai.
MAT 8:31 Tama te bidi si dąų wabo te dwai haubo mobo bidi dabego Jisas dali bomonama i weyu, te po wali, “Nago da sela sąyu da, teda nago da te kibu dabe tomoba tagala palao.” Te po wai.
MAT 8:32 Tama agai augwalibolo te po wai, “Dage pao.” Tialima, te bidi si dąų olaluali te dwai haubogo te bidi si tagalama, tama augwali te kibu dabe tomoba pai. Tama te kibu hani dabe tigidali augwali bomonama udulama, tama te dwai saoba pai. Tama augwali te sigi węba tulaluama, tama augwali te wę tulama, poma peyu isila pai dao.
MAT 8:33 Tama te kibu tonaluali bidi dabe augwaligo te sę ebo sulama augwali wi pai. Augwali pelama, te hanuba sabolama, tama te po dabe tigidali pusai. Tama augwaligo te dwai haubogo dąų wali bidi side ebo suali sę po pusai dao.
MAT 8:34 Tialima te hanude bidali we bidi tigidali palima, Jisas tiąba pai. Tama augwaligo aga sulama, tama augwaligo po bomonama aga dali te po hanalu weyu, tama aga te tǫde bidibo tagalama, tama aga gasa buluba pao, te po wai dao.
MAT 9:1 Te Jisas te geba me deliba holama, tama te sigi wę e badu ma aselama, tama aga buluba ma pedelai.
MAT 9:2 Tama augwaligo gasi bidi me deli aga pageba tolasa asali, te bidigo sągą tigi dili tigidali mu isai, tama aga te gologobe wade pila muai. Tama augwaligo konealubo po agade dąų wali sulama, tama agai te gasi bidibolo te po wai, “Ogwa, nago homu ma tegaluama bidao. Eno nago yali dwai sę sęgę sela sąbao,” Jisasgo te po wai.
MAT 9:3 Tialima te Juda dabego bomo yai po page koneai bidi meba augwaligo augwa digi homude po weyu, te po wali, “Te bidi agai te Godigo nogide posobo po obao,” te po wai.
MAT 9:4 Tama Jisasgo augwaligo homude wabo po koneama, tama agai augwalibolo te po wali, “Magi baso dagego dwai homu eyu, te duga homude te dwai dwai po obawe?
MAT 9:5 Eno po bomo elalubo dagebolo ola mawainu, te eno magi po wagowe? Eno e bidibolo te po naga wabo si, ‘Nago dwai sę dabe sela sąbao,’ teda eno pogo bomo elalubo dagego hania konegobeo. Me ma, eno e bidibolo te po wabo si, ‘Nage hodaluama, bilao,’ tama aga hodaluama agai aga pibo somo selama bilibaso da, teda dagego eno pogo bomo elalubao waibao.
MAT 9:6 Ena da, te Godigo Bidi Mu da. Bidigo dwai sę sęgę e tǫde sela sąbo bomo eno elalubo, te dagego suiąo.” Tama weyu, agai te sągą dili tigidali isai bidibolo te po wai, “Nage hodaluama, naga somo selama, tama naga beba pao,” te po wai.
MAT 9:7 Tama te bidi aga hodaluama, tama aga beba pai dao.
MAT 9:8 Tama te hanude bidali we bidi augwaligo te tebo bomai sę sulama, tama augwali wi yai. Tama augwaligo Godigo nogi ugwaba sai. Magi baso meni, agai te tobage bomo yai sę yabo bomo te we bidibolo mawai dao.
MAT 9:9 Te Jisas te bulu tagalama, tama aga pobadi agai bidi me deli te nai sela asobo we bidide takis mone sabo bede dulalubo suali, te bidi nogi Matyu da. Tama Jisasgo agabolo te po wali, “Nage ena wali asao.” Tama aga hodaluama, sisi elama, tama aga wali pai.
MAT 9:10 Tama Jisas te be me delide dulaluyu nai tubadi, tama te we bidide takis mone sabo bidi dabe me, te Juda dabego bomo yai po bugagia wali pesiąwai bidi dabe me, augwali hauwa asai. Tama augwali Jisas me aga wali pabo bidi dabe dali dulaluyu nai hodobo tuai.
MAT 9:11 Tama te Farisi hani bidi dabe meba augwaligo sulama, tama augwaligo aga dali wali pabo bidi dabebolo te po wali, “Magi baso duga po ola mabo bidi agai te takis sabo bidi dabe dali, me te dwai sęgę sai bidi dabe dali hodobo nai tubo dawe?” te po wai.
MAT 9:12 Jisasgo te po wabo odoyu, tama agai te po wali, “Te gasi meni yai bidi dabe augwali te haus sikba dokta bidibo digi pabo menio. Menio. Te gasi yai bidi dabe naga te haus sikba pelama, te doktago munamuna mabo dao.
MAT 9:13 Tama dage pao, te Godigo po bukude asęani po me deli nedama, tama te po page bugagia koneiąo. Te po e dao: ‘Dagego te hasa elama tama enabolo olo mabo kolesaga, te tobage tebo ofa sę eno godolo menio. Te dagego gasa we bidide homu dene eyu tau sabo kolesaga te eno godolo ebo dao,’ te po asęani. Tama ena asali, eno te we bidi augwa digi augwa homugo da doloba pai we bidi dao wabo we bidi i wainogo asobeo. Menio. Ena asali te eno dwai sęgę sai bidi dabe i wainogo asai dao,” Jisasgo te po wai.
MAT 9:14 Tama te sogo te we bidi baptais mabo bidi Jon aga wali pabo bidi dabe augwali Jisas bidibo digi aselama, te po wali, “Te da me, te Farisi hani bidi dabe dali dago te nai osogo gisilibo dao. Tiali goli nage wali pabo bidi dabe augwali magi baso nai gisilibo meniwe?” te po hanalu wai.
MAT 9:15 Tama Jisasgo te po digi begelai po me deli augwalibolo weyu te po wai, “Te gesi we tamadi sai bidi te aga abagi dabe dali bidibaso da, teda augwali homu te sogo homu sęgę elaluaibawe? Menio. Tiali goli nosali te we sai bidi augwaligo selama, gasaba pabo sogo da, tama aga abagi dabe dali me bidigobeo. Tama te sogo augwali homu sęgę eyu nai osogo gisilaibao,” wali.
MAT 9:16 “Tama te bidi mego te gesi ugwa pedai selama, te poloba gudubo ugwa peda pali te me hobolobo menio. Ma agai tama tiyu da, teda te gudubo ugwa dedage hobolali te ugwa ma peda peyu, tama dedage genuai ma ebo dao.
MAT 9:17 Tama me, te bidi mego te gesi wain ąį te poloba kibu meme waligo nigai botol tomoba mubo menio. Ma agai tama tiyu da, teda nosali te wain wę du pągąna pelama, tama te meme wali botol peda peyu, tama te wain wę tǫba olo gea peyu, tama te meme wali me doyu hagawaibao. Tama tibaso augwaligo te gesi wain wę te gesi meme wali botolde buliyu, tama te si dali si te bugagia munalubo dao,” Jisasgo augwalibolo te po wai.
MAT 9:18 Te Jisasgo te Jon wali pabo bidi dabebolo te po odubadi yaide, tama te Juda hani genuai tobolu bidi me deli aselama, aga pageba kidu sugunagasu agai te po wai, “Te eno wegi megi tama isalio. Tiali goli nage eno beba aselama, tama nago nogo aga tigiba muagasiyu, tama eno wegi ma bidaibao.” Te Juda hani genuai bidigo te po wai dao.
MAT 9:19 Tama te po obaso, Jisas hodaluama, tama Jisas dali aga wali pabo bidi dabe me aga dali hodobo peyu, te bidi wali pai.
MAT 9:20 Tama augwali pobadi yaide, we me deli augwali wali asai. Tama te we aga moni kaneme pidubadi, kibu be 12 kibu be bidai. Te we Jisas aga pabo wali asiyu, tama aga homude te wego te po wali, ‘Te eno agai ugwa sabi badu nogogo diąyu da, teda ena usu yaibao,’ te wego te homu yai. Tama te homu elama, te we Jisas tudi badu pelama, tama agai ugwa sabi badu nogogo dią yani.
MAT 9:22 Te Jisas begelama, te we suali. Agai te webolo te po wai, “Eno wegi, nago homu te tegaluama bidao. Nago konealubo po enade dąų waibaso, nago tigi ma usu ilali.” Tama Jisasgo te po obadi yaide, polo tama te we dwagi yai ma yali.
MAT 9:23 Tama Jisas ma pelama, te Juda hani genuai bidigo beba sabolama, tama Jisas te be tomoba pai. Te be tomode agai te diligide ona elebo bage suali, te we bidi augwaligo moni gela weyu, genuai kiligili wabo agai odali.
MAT 9:24 Tama te sulama, Jisasgo augwalibolo te po wai, “Dage we bidi tigidali buluba piąo. Te wegi isibe dao, aga olo pila mubao.” Tama Jisasgo te po obaso, te bede bidali we bidi aga dwai gisugu mawai.
MAT 9:25 Tama te we bidi augwaligo te bedu buluba gudulama, tama te wegi tigi munalubo be dąį togali tomoba pelama, tama Jisasgo nogogo te wegigo nogo tubaso, tama te wegi ma hodaluali.
MAT 9:26 Tama Jisasgo te sę yali po polo odada pelama, tama te genuai tǫde bidali we bidi tigidali augwaligo te po polo odali.
MAT 9:27 Te Jisasgo te be tagalama pai. Tama aga pobadi te gedu widai bidi si aga wali asiyu, i olama po weyu, te po wai, “Nage Devitgo Ogwa dao, tama nago da si homu dene eyu tau sao.” Te po wai.
MAT 9:28 Tama aga pelama, be tomoba bidigi pali, tama te gedu widai bidi si agaba asali. Tama Jisasgo augwali sibolo te po wai, “Dage sigo duga homu tigidali enaba munama, tama eno te dage si tau sabo usu ebo te homu dagego ebawe?” Tama te bidi sigo agabolo te po wali, “Awe, Genuai Bidi.”
MAT 9:29 Tama agai te bidi si geduba nogo muyu te po wai, “Dage sigo konealubo po enade dąų wai. Tama tialigo da, te tiwai sę megi dage siba pedalomainao, te eno homugo.”
MAT 9:30 Tama te bidi sigo gedu widai elaluali te ma pedai. Tama Jisasgo bomonama te augwali sigo te yali sę po hogwa somainogo te po wai, “Te bidi me deligo te sę yali po koneidali weyu wagimio.”
MAT 9:31 Tiali goli agai te po wali digi te bidi si Jisas bidibo digi tagalama, tama buluba soyu, tama Jisasgo te bomai sę ebo po te genuai tǫde bidibo we bidi tigidalibolo pusali.
MAT 9:32 Te bidi si Jisas tagalama painogo ebadi, tama gasa bidi dabe augwaligo bidi me deli te pedauwali pania sai bidi te dwai haubo mobo elalubo bidi sela aselama, tama Jisas pageba sela asai.
MAT 9:33 Tialima, Jisasgo te bidide elalubo dwai haubo mobo te sela sąnama, tama polo te pedauwali pania sai bidi aga po wabo gagalali. Tama te tǫde bidali we bidi augwali noma selama, tama te po wai, “Polobadu te tiwai megi yali bomai sę te Israel tǫde munu me pedalai menio,” te po wai.
MAT 9:34 Tiali goli te Farisi hani dabe augwaligo te po wai, “Agai te dwai haubo mobo sela sąbo sę ebo te dwai haubo mobo tobolu bidi dabego bomode te dwai haubo mobo te sela sąbo dao,” te po wai.
MAT 9:35 Te Jisas te genuai hanuba me te dwasianu buluba me biligi piduai. Agai te we bidi augwali te augwa bomo yai po ola mabo be tomode te agai aga po ola mani. Agai te Godigo we bidi tonalubo sęde dwagi yai gesi po pusali, tama agai augwali tigide elalubo haniani gasi tigidali usu ma ilai dao, te tigi bomo meni yai gasi me silama, te we bidi dwagi yai ma ilai dao.
MAT 9:36 Tama bilidubadi, agai te genuai we bidi hani augwali sulama, tama agai homu dene augwalide genuai mu yali. Magi basowe, augwaligo homu dolo elalusiąwai baso, tama augwaligo augwa digi tau sabo usu isiąwai bidibo suali. Augwali dwai mu bidiyu, te kibu sipsip dabe augwa aya meni yai tiwai bidai.
MAT 9:37 Tama agai aga wali pabo bidi dabebolo te po wali, “Te nai hauwa mu te gide tau yai elalubao, tiali goli te tau yai nai sabo sę ebo bidi hauwa menio.
MAT 9:38 Tama tibaso, dagego te gi aga ayabolo gedu haluasa po waiyąo, tama agai aga sę bidi tagala palama, te gide elalubo nai sisinigi pomainogo wao,” Jisasgo te po wai.
MAT 10:1 Te Jisasgo aga wali pabo bidi dabe nogo si olama sągą badu si bidi asa olama i wali, tama agai augwalibolo bomo mani, te dwai haubo mobo bidi dabe sela sąmainogo, tama te we bidi tigidali te haniani gasi me, te tigi bomo meni yai gasi me usu ilimainogo yai dao.
MAT 10:2 Te 12 bidi nogi te e dao: hasia bidi aga nogi Saimon, te aga gasa nogi Pita, tama me aga ama nogi Andru dali. Tama Jems me aga ama Jon dali, augwali si te Sebedigo ogwa si dao.
MAT 10:3 Tama Filip me Bartolomyu dali. Me Tomas, me Matyu, te takis mone polobadu sai bidi. Me Jems, te Alfiusgo ogwa, me Tadius dao.
MAT 10:4 Tama gasa Saimon te Selot hani bidi, augwaligo te Rom gavman bidi dabe sela sąbo homu yai bage dao. Tama Judas te Keriot bulu bidi, te Jisas boi bidi augwali nogoba nosali muani bidi dao.
MAT 10:5 Te Jisasgo te 12 bidi sęba tagala palali, tama agai po augwalibolo ola mayu, te po wai, “Dage te Israel hani isiąwai bidi dabeba me pelamuo. Tama dage te Samaria dabego genuai hanu tomoba me pigimio. Menio.
MAT 10:6 Dage te Israel hani we bidiba naga pao, te augwali te hagawai kibu sipsip tiwai dao.
MAT 10:7 Dage pelama, te dagego e tiwai po wao, ‘Te dagalude bidibo God agai we bidi tonalubo sę yabo sogo pąba yagasai dao, megi e dao,’ te po waiyąo.
MAT 10:8 Dagego te gasi we bidi dabe augwali usu iligi pao, tama isai bidi dabe ma hodoliyu, tama oiyabe gasi sai bidi dabe wiegi yai meda isiąwai ma iliyu, tama dwai haubo mobo sela sąyu yao. Tama dage te sę yabo bomo te dagego olo sali, tama monego abelai menio. Tama tibaso, dagego te we bidi te bomogo olo tau sao, tama dagego augwalide mone sigio.
MAT 10:9 Tama dagego te nai abelabo nai gol me, te mone ge silva me, te kapa mone me te dagego mouwadagede sabiligio.
MAT 10:10 Tama dage bilibo sogo dagego te wa sabiligio, ma te holobo ugwa si me te sągą nadoba olo si me, te bilibo dono olo si me tolasa biligio. Menio. Te dagego tau sabo we bidi augwaligo dagebolo te tobage tigi tau sabo nai momainao.” wali.
MAT 10:11 “Tama dage si si te hanu me deliba ma te dwasianu bulu tomoba me pobaso da, teda dagego bugagia sulama koneyu, mena bidi aga te bulude wiegi yai ma te doloba pai bidibo weyu suao. Tama te tiwai bidigo bede dage bidao, tama tede bididubadi te dage te gasa buluba pabo sogode te usu yaibao.
MAT 10:12 Tama dage te be tomoba pobadi, dagego te bede bidibo we bidi augwalibolo dwagi yai homu eyu te po wao, ‘Te dago homugo te wiegi yai sogo mu dageba asomainao.’
MAT 10:13 Tama dagego te po olama, tama te bede bidibo we bidigo dage dali wiegi yai homu eyu usu da po obaso da, teda dagego wiegi yai po augwali dali bidimainao. Ma, augwaligo dagebolo wiegi yai homu me isąbaso da, teda te wiegi yai pogo augwali tau sisiąma te po dagebolo ma asaibao.
MAT 10:14 Tama bidi me deligo beba dage me sela pisąma, tama dagego po me odisąbaso da, teda te be dali te hanu si tagalama, tama dagego duga sągąde pu elalubo pobele bage sela sąyąo, te augwaligo konemainogo te Godigo me augwali tagalai.yabo te homu emainogo yao.
MAT 10:15 Eno mu po dagebolo obao, te tigidali we bidi po tų ebo bodolu muani sogo, te dagego po odobo hagela yai we bidi augwaligo sabo sęgę te genuai mu saibao, te sęgęgo te hanu si Sodom me Gomora side polobadu bidali dwai dwai kolesaga yali we bidigo sabo sęgę aiyaba elaluaibao,” Jisasgo te po wai.
MAT 10:16 “Odao, eno dage te sipsip tiwai te uni yowi augwali tomoba tagala palobao. Tama tibaso dagego te hasamanigo ebo kolesaga tiwai wali peyu, tama hasia bolo dagego yabo sę bolo homugo kone palao. Tama dagego te ba higo ebo nagamea pai kolesaga tiwai wali peyu, tama dwai sę me deli yabo homu kolesaga egimio.
MAT 10:17 Tama dage te dwai kolesaga ebo bidi dabede dua dao. Te augwaligo dage augwa kaunsil bidi dabede po tų ilainogo sela peyu, tama augwaligo dage te bomo yai po ola mabo be tomode te keloago elaibao.
MAT 10:18 Te dagego ena wali pobaso, dage augwaligo te gavman bidi dabebolo me te genuai tuni bidiba me selasa paibao, te po tų tede ilimainogo yaibao. Tama dagego augwali dali me, te Israel hani isąwai bidi dabe dali augwalibolo eno gesi wiegi yai po pusao.
MAT 10:19 Tama augwaligo dage po tųba odasa pabode, tama dage wi elama te homu egimio, ‘Dago po mena tama wagowe? Tama dago magi po wei ponogowe?’ te homu egimio. Menio. Te sogo naga digi te Godigo dagego pusabo po ola mawaibao.
MAT 10:20 Te duga digi naga te po pusugobeo. Menio. Te duga Ayago Mobo Bidigo, agai te po dagego pedauwalide ola mobaso, dagego te po waibao.” wali.
MAT 10:21 “Tama bidi mego aga ama te boi bidigo nogoba munama, tama augwaligo aga ela muaibao. Tama ayago aga ogwa dali tama naga tiaibao. Tama ogwa wegi dabe augwaligo augwa aya ida si dali boi bidi homu elama, tama augwali ela mumainogo te gasa bidi dabego nogoba muaibao.
MAT 10:22 Tama tigidali we bidigo dwai homu mu dage dali yaibao. Magi basowe, dage eno hani bidi mu bidibaso tiaibao. Tiali goli, te bodolu muani sogo tonaluyu bomonama bidibo bidi, teda te bidi aga te Godigo ma dobola siyu, tama te dwagi yai madiba muaibao.
MAT 10:23 Tama augwaligo dage te hanu me delide dene mobaso da, teda dage wi peyu, gasa hanuba pao. Eno mu po dagebolo obao, te tigidali Israel hanude te dagego sę ebo silisąbadi yaide, tama te Godigo Bidi Mu aga ma asaibao.” wali.
MAT 10:24 “Augwaligo ena dali yali dwai kolesaga, te kolesaga naga augwaligo dage dali me yaibao. Te skul ogomani agai aga po ola mabo tisa bidi te aiyaba me elalugobeo, tama te sę ebo bidi te aga ugwadu elaluyu te sę tonalubo bidi aga aiyaba elalugobeo.
MAT 10:25 Tama te skul ogomanigo te aga tisago ebo kolesaga tiwai ebo usu ebaso da, te usu dao. Tama te sę ebo bidigo aga tonalubo bidigo kolesaga tiwai ebo usu ebo si da, teda te me usu dao. Te augwaligo te nogi posobo po weyu, ‘Nage te dwai haubo bidigo tobolu bidi Belsebul dao’ po te hani tobolu bidibolo obaso da, teda dago koneao, te augwaligo dwai dwai nogi weyu posobo po wabo te aga dali bede bidibo bagebolo mu waibao,” Jisasgo te po wai.
MAT 10:26 “Te bidi dabe augwaligo dage dali te tobage sę nosali yaibao, te dagego konebaso, tama dagego te dwai sę ebo bidi dabe augwalide wi egimio. Te tigidali geme halualuali nai te bulu ulaba hania pedelaibao. Tama tigidali te geme dualaluali po te we bidigo hania koneaibao.
MAT 10:27 Tama te hulide eno dagebolo ola mabo po, te po dagego te giligade we bidibolo pusao. Tama dagego te olode duadigi odali po, te dagego te be daiba holama, te po augwalibolo pusao.
MAT 10:28 Dagego tigi naga ela mubo bidi dabe te dage wi egio. Augwaligo dagego po wabo mobo noma bidi te dali me ela mugobeo. Menio. Te Godigo dagego tigi me noma bidi dali te genuai dene sabo te siade mu dolobo bomo elalubaso, te dage agade naga wi yao.
MAT 10:29 Te we bidi augwaligo dwasianu bu ba tiwai si te mone ge deligo naga abelebo dao. Te ba dabe augwali dwasianunu olo nai dao. Tiali goli duga Aya God agai te tiwai ba bugagia tonalubo dao. Tama tonalubadi, te tiwai dwasianu ba me deli olo isigobeo, te Godigo bodolu mani isabo sogo naga te isaibao.
MAT 10:30 Tama dage da, te Godigo dage bugagia tonaluyu, te dagego tobolude elalubo tobolu nisi tigidali deli deli agai neda silai dao.
MAT 10:31 Tama tibaso, dage wi me egio. Agai gedude te dage te bu ba dabe aiyaba mu elalualigo da, teda agai dage mu tau saibao,” Jisasgo te po wai.
MAT 10:32 “Niwai bidigo eno nogi te we bidi augwali gedude pusuyu, ‘Te ena Jisas wali pabo bidi dao’ wabo bidi, te eno te bidi agai nogi me te eno Aya dagalude bidibo bidi gedude pusaibao.
MAT 10:33 Tiali goli mena bidi agai te we bidi augwali gedude ena nogi tudiba mubo bidi, te eno me eno Aya dagalude bidibo bidi gedude aga nogi tudiba muaibao.” Jisasgo te po wai.
MAT 10:34 “Dagego homugo ena asali te e tǫde wąbi hwįbo tigidali isilainogo asali homu dagego egio. Ena asali eno te hwįbo isilainu asobeo. Menio. Eno te bobobage ge hwą selasa asai tiwai dao, te we bidi dagalaibao.
MAT 10:35 Te deli hani augwa hasi boi bidi ebo kolesaga pedelainogo te ena asali. Tama bidigo aga aya dali boi bidi eyu, tama wegigo me aga ida dali boi bidi yaibao, tama we aga bidigo ida dali me boi bidi yaibao.
MAT 10:36 Tama bidi me deli aga bede bidibo we bidi dabe, te aga hani we bidi, augwali te bidi dali boi bidi eyu bidaibao.
MAT 10:37 Tama niwai bidi agai aga aya me ida naga mu godolo eyu tama ena kuna godolo me isąwani da, te bidi aga eno abagi bidigobeo, te usu menio. Tama bidi mego aga ogwa ma wegi naga godolo eyu, tama ena kuna godolo me isąbo bidi, te aga eno abagi bidigobe dao.
MAT 10:38 Tama bidi aga ena wali peyu, tama gasa bidi dabe augwaligo agabolo dene me sęgę dali mayu, tama te aga isilabo ni pedai tiwai dao. Tama agai te ni pedai selama, ena wali asisąwani da, teda te bidi aga eno abagi bidigobeo.
MAT 10:39 Tama niwai bidi aga tigi me aga tǫde bidibo ula dali naga bugagia tonaluyu bidibo bidi, te bidi aga nosali wiegi yai mu bidabo ula hagawai bidi pedelaibao. Me ma, bidi aga tigi me aga tǫde bidibo ula dali agai eno sęba munama tama aga isiyu da, teda te bidi te nosali wiegi yai bidabo ula mu saibao, te bidada paibao,” Jisasgo te po wai.
MAT 10:40 “Bidigo dagego eno sę ebo sulama, tama wiegi yai kolesaga dagebolo ebaso da, teda agai te tiwai kolesaga dagebolo naga ebo meni, te ena dali me ebao. Tama bidigo wiegi yai kolesaga ena dali ebo bidi, agai te God dali me te wiegi yai kolesaga ebao, te agai ena tagala palobaso ena asai dao.
MAT 10:41 Bidi mego te homu eyu, ‘Eno te Godigo po pusubo bidi profet bidi tau sabo’ homu elama, tama te profet bidi sela pelama, aga bede te bidi bugagia nai gesebo dao, te bidi agai te profetgo nosali sabo wiegi yai nai me badu agai buga selama saibao. Tama bidigo homugo ‘Te bidi doloba pai bidi bidibaso, eno aga tau saibao’ homu eyu, tama te doloba pai bidi aga beba sela pelama, nai mayu bugagia gesebaso da, teda te Godigo te doloba pai bidibolo nosali maiabo nai me badu te bidi agai buga selama saibao.
MAT 10:42 Tama bidigo te ena wali pabo olo nogi meni yai bidi me deli ąį nogone ebo sulama, tama aga tau siyu. tama te kedau wai wę naga mabo bidi da, teda eno mu po dagebolo obao, Godigo te bidibolo te wiegi yai nai mu mawaibao, te nai te munu me hagagobeo,” wali.
MAT 11:1 Te bidi Jisas aga wali pabo bidi nogo si olama sągą badu si bidi dabebolo te sę ebo po mawai. Te po silibode teda agai te bulu tagalama, te tǫ badu elalubo genuai hanu dabeba pelama, tama te we bidi augwalibolo agai po ola mayu, tama Godigo po pusai dao.
MAT 11:2 Tama Jon te we bidi baptais mani bidi, te bidi aga te kalabuside bidibadi tama te sa muyu asaiba wali bidi Kraisgo te tigidali sę ebo po odai. Tama tibaso, Jongo aga wali pabo bidi dabe meba te Jisas bidiboba tagala palai dao.
MAT 11:3 Tama augwaligo agabolo te po hanalu wagasai, “Nage da, nage te sa muyu asaibao wali te bidi dawe, ma dago gasa bidi asobo tonaluaibawe?” augwaligo te po hanalu wali.
MAT 11:4 Te po obaso, Jisasgo augwalibolo te wei ponoyu, te po wai, “Dage pelama, Jonbolo te tigidali sę dagego odali po me, te suali sę me, te po tigidali agabolo wagi pao.
MAT 11:5 Dagego e subao, te gedu widai bidi dabe augwali gedu usu ma iliyu, te sągą dwai bidi dabe augwali bugagia ma bilibo dao. Te oiyabe yai bidi dabe augwali tigi wiegi yai pedaliyu, tama olo degai bidigo po ma odobo dao. Te isai bidi dabe augwali ma hodoliyu, tama te magi nai meni yai bidi dabe augwaligo te Godigo wiegi yai gesi po odobo dao.
MAT 11:6 Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai.
MAT 11:7 Tama Jon wali pabo bidi dabe augwaligo te po odama, tama geasa ma pobadi yaide, tama Jisasgo te we bidi augwalibolo te bidi Jonde po wai, “Polobadu dage te bidi meni yai buluba pali, te bidi Jon dagego sugi pali, te dagego magi nai sugi paliwe? Ma, dagego te awi dili me deli te waligo memenege ilibaso sugi paliwe? Menio.
MAT 11:8 Dagego magi nai sugi pai dawe? Ma, dagego te bidi me deligo te wiegi wiegi yai ugwa tigide muai yaibaso sugi paliwe? Menio. Te wiegi wiegi yai ugwa muai bidi dabe augwaligo te tuni bidigo wiegi yai bede naga bidibo dao.
MAT 11:9 Tiali goli, dage magi baso pai dawe? Ma, te Godigo po pusubo profet bidi me deli sugi pai dawe? Awe, eno dagebolo obao, e Godigo po pusubo profet bidigo da, agai te gasa te Godigo po pusali profet bidi dabe te tigidali aiyaba elalualio.
MAT 11:10 Te Jon agade te gasa profet bidigo Godigo wali po polobadu asęai dao, ‘Suao, te eno po pusabo bidi tagala palobaso, tama aga nage asabo digi polasa paibao. Agai nago tų sisi iligi paibao.’
MAT 11:11 Eno mu po dagebolo obao, Jon te we bidi baptais mani bidi agai te tǫde pedelali tigidali bidi aiyaba elaluai dao. Tiali goli te Godigo we bidi tonalubo madide bidibo nogi meni yai olo bidi, te bidigo Jon aiyaba elalubao.
MAT 11:12 Tama te baptais mani bidi Jon agai aga sę ebo gagalali sogo dąį elama, tama aga sę edubadi megi asama, te Godigo we bidi tonalubo sę te bomonama tama pąba yagasai dao, tama te sesena pai bomai bidi dabe augwali tola sainogo ebo dao.
MAT 11:13 Tama te Jon aga pedalisiąbadi te Godigo po pusali bidi profet bidi dabe me, te bomo yai po me, te augwali tigidaligo te nosali yabo sę po pusai dao. Tama nosali Jon agai po pusagasali.
MAT 11:14 Tama dagego odai wida, teda te po odao: te polobadu bidali profet bidi dabe augwaligo te genuai profet bidi Elaija ma asaibao po wai dao. Tama Jon da, Jon aga te bidi Elaija dao po wali.
MAT 11:15 Tama te olo elalubo bidigo agai te po odao,” wali.
MAT 11:16 “Te eno te megi bidibo we bidi augwali magi nai tiwai dao wagowe? Augwali te wai puluba tiwai dabe te maket bulu tomode bidaluyu, tama gagali eyu, tama augwaligo te gasa wai puluba dabebolo i bomonama weyu, te po obao,
MAT 11:17 ‘Dago dage ona sulubadi, tiali goli dagego tęąbi ebo hagela ebao. Dago homu dene ebo tęąbi obadi, tiali goli dagego gela wabo hagela ebo dao.’
MAT 11:18 Tama tiwai, te Jon asali, tama agai te nai osogo gisiliyu, te bomai wain wę me tuai menio. Tama tibaso augwaligo agade te po wai, ‘Te dwai haubo mobo bidi agade bidibao,’ te po wai dao.
MAT 11:19 Me ma, te Godigo Bidi Mu asali, tama agai nai dali ąį dali tuyu yai, tama augwaligo agade te po wai, ‘Suao, aga te nai hauwa mu tubo bidi, tama agai te bomai wain wę me hauwa mu tubo dao. Aga te takis mone sabo dwai bidi dabe dali te sęgę sai bidi dabego kisasa bidibo abagi dao,’ te po wai dao. Tiali goli te God aga mu konebo homu kolesaga ebo po te we bidigo odama, tama te kolesagago yali sę nosali subaso da, teda augwaligo koneaibao, te homu kolesaga mu dao,” Jisasgo te po wai.
MAT 11:20 Te Galili tǫde Jisasgo te hanu mebade te bomai sę hauwa mu yali goli, te hanude bidibo hani augwaligo augwa dwai kolesaga yalide ge neyu, homu begelama dwai kolesaga yali tagalasiąbaso, te Jisasgo augwali sesanobo po weyu te po wali,
MAT 11:21 “Auo, dage Korasin dabe, homu deneo, te dwai dwai sogo dageba pedelaibao. Dage Betsaida hani bage me, homu deneo, te dwai dwai sogo dageba pedelaibao. Tama bidi me deligo bomai sę te hanu si nogi Tair dali Saidon te hanu side te eno dagego e bulude yali sę tiwai egi sogo da, teda te sogo digi polobadu te Tair hanude me Saidon hanu side augwaligo te beg dage te ugwa tiwai gudama, tama augwali te sia nogani kelide dualama, tama te sogo te hani sigo dwai sę yali tagalama, homu begelegi dao.
MAT 11:22 Tiali goli, eno dagebolo obao, te we bidi po tų yabo sogo bodolude, te Godigo dagebolo sęgę genuai mu mawaibao. Te dagego sabo sęgęgo te Tair me Saidon hanu sigo sabo sęgę aiyaba mu elaluaibao.
MAT 11:23 Tama dage Kaperneam hanude bidibo bage, te dagego homu te dagego nogi ugwaba siyu, te sigiba mu, te dagaluba paio, te homu yali. Tiali goli, mu menio. Te dage tigi dene ebo dwai sia dabo dedage pageba sąwaibao. Tama bidi me deli agai bomai sę dabe te eno dagego hanude yali bomai sę dabe tiwai te bomai sę te Sodom hanude egi sogo da, teda megi me te Sodom hanu elalugi dao.
MAT 11:24 Tiali goli eno dagebolo obao, te we bidi po tų ilabo sogo te Godigo dagebolo sęgę genuai mu mawaibao. Te dagego sabo sęgęgo te Sodom we bidigo sabo sęgę aiyaba mu elaluaibao,” Jisasgo te po wai.
MAT 11:25 Tama te sogo Jisasgo Godibolo te po wai, “Ayao, nage te dagalu dali tǫ dali nigila tonalubo Genuai Bidi dao. Eno nage dali deli homu eyu, nagebolo usu da po obao. Tǫde homu kolesaga koneai bidi dabe augwaligo koneidali weyu tama nago te eno tamadi pusali po page nago geme dualai dao. Tiali goli te tǫde elalubo homu kolesaga konesiąwai we bidi augwalibolo nago te po page ola mawai dao.
MAT 11:26 Awe, Aya, nago te tiwai yaibao homu elama, tama tede dwagi yai homu eyu, nago tama tiwai naga yai dao.” Jisasgo te po aga Ayabolo wali.
MAT 11:27 Te we bidibolo Jisasgo te po wai, “Eno Aya agai tigidali nai eno nogoba muai dao. Tama niwai bidi me deli agai te Ogwa mu konea silai menio. Aya agaduba deligo naga te Ogwa konea silai dao. Tama niwai bidi me deligo agai te Aya me konea silai menio. Ogwago naga konea silai dao, tama te we bidi dabebolo te Ogwa aga digi te Aya augwalibolo ola mobaso da, te augwaligo me te Aya konea silaibao,” wali.
MAT 11:28 “Dage we bidi dabe sę dene genuai eyu sęgę yai nai tolobo tiwai we bidi dabe, dage tigidali enaba asao, te eno dage tau siyu, tama dagego toma tueibao.
MAT 11:29 Dage ena dali hodobo wali asiąo. Tama dage ena dali bididubadi eno dagebolo po ola mawaibao. Tama dagego kolesaga enade sao. Magi basowe, eno nagamea pai kolesaga te bidi dabe augwali dali eyu, tama ena digi ena aiyaba elalubo dao. Tama dage enaba asobaso da, teda dagego homude te toma tuagameo.
MAT 11:30 Dage ena wali asiyu, tama eno dagebolo dene magobeo, te sęgę yai nai me eno dagebolo magobeo,” Jisasgo augwalibolo te po wai.
MAT 12:1 Te po olama nosali me sogo Sabatde Jisas te tubo nai wit gi tomodu pai. Tama aga wali pabo bidi dabe augwali nasi ebaso, tama augwaligo te wit ge selama, tama augwaligo tuai.
MAT 12:2 Tama te Farisi bage augwaligo te kolesaga ebo sulama, tama augwaligo agabolo te po wai, “Suao, te kolesaga nage wali pabo bidi dabe augwaligo ebo, te Sabat sogode habu selai dao,’ wali.’
MAT 12:3 Tama Jisasgo augwalibolo te po wai, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi ebaso, tama Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao, te bomo yai pode te po wai. Tiali goli te bret augwaligo me tuali digi Godigo gedude dwai sę ebeo. Dagego te asęani po nedebewe?
MAT 12:5 Ma dagego te bomai po asęani bukude elalubo po me deli nedebewe? Te po e dao, te pris bidi dabe, augwaligo te Moni Lotu Be tempel tomode te Sabat sogo tigidali me augwa sę ebo dao. Tama tiyu, augwaligo te Sabat sogo sę egio wabo bomo yai po augwaligo bolobo dao. Tiali goli Godigo augwalibolo sęgę magobeo. Dagego te po nedebewe?
MAT 12:6 Eno megi te Moni Lotu Be tempelde po wali. Tialima eno dagebolo obao, te ede megi elalubo nai, agai te Moni Lotu Be tempel te aiyaba elalubo dao.
MAT 12:7 Tama bukude Godigo wali po me deli augwaligo asęani, ‘Eno te dagego enabolo olo mabo nai ofa te godolo ebo menio. Dagego gasa we bidi dali homu dene eyu tau sabo kolesaga ebo, te eno godolo ebo dao.’ Tama dagego te po page bugagia konegi sogo da, teda dagego te dwai sę meni yai bidi dabebolo sęgę magi menigi dao.
MAT 12:8 Magi baso meni. Ena da, te Godigo Bidi Mu da. Ena da te Sabat sogode te genuai bidi dao. Tama tibaso, bidigo Sabatde mena sę yagameo wabo po te eno digi waibao,” Jisasgo te po wai.
MAT 12:9 Te Jisas aga te badu bidali tagalama, tama augwaligo Juda dabego bomo yai po ola mabo be tomoba pai.
MAT 12:10 Tama bidi me deli tede bididuai, te bidi aga nogo dili bomo isai elaluai. Tama bidi meba augwaligo Jisas po tų ilainogo homu elama, tama augwaligo aga hanalu wai, “Ma, dago te Sabat sogode te gasi yai bidi usu ilibaso, te bomo yai po bolaibawe ma meniwe?” te po wai.
MAT 12:11 Tama Jisasgo augwalibolo te po wai, “Te dage tomode bidi me deli agai kibu sipsip me deli elaluyu, tama te sipsip te dedageba Sabat sogode tulaluai yaibaso da, te bidigo te sipsip ugaba ma kegelama ma saibawe, ma meniwe? Ao, te Sabat sogo digi te ma saibao.
MAT 12:12 Tama te bidi da, bidigo da te sipsip aiyaba mu elalubo dao. Tama tialigo da, dago te Sabat sogode we bidi tau sabo dwagi yai sę eyu da, teda tama tiyu dago te bomo yai po bologobeo, te usu dao.” wali.
MAT 12:13 Tama te po olama agai te nogo dwai bidibolo te po wai, “Nago nogo dodolao.” Tialima agai nogo dodolali, tama nogo wiegi yai ma pedelai, te gasa me nogo tiwai yai.
MAT 12:14 Tiali goli te Farisi dabe augwali te be tagalama, tama augwali deliba sisinama po miyu, tama Jisas elabo po miai dao.
MAT 12:15 Tiali goli Jisasgo augwaligo te po wabo koneama, tama agai te bulu tagalama gasaba pai. Tama te we bidi hauwa aga wali pai, tama agai augwali tomode tigidali gasi we bidi usu ma ilai dao.
MAT 12:16 Tama augwali usu ma ilama, tama agai augwalibolo agai nogi me agai ebo bomai sę po te gasa we bidibolo pusidali weyu habu selai dao.
MAT 12:17 Tama tebogo te po me deli te Godigo te agai po pusali profet bidi nogi Aisaiago pedauwalide wali po usu nanio.
MAT 12:18 Te po e dao, “E bidi da, te eno sę ebo bidi dao, eno aga sa muai dao. Eno aga godolo mu elama, tama eno homu aga dali wiegi yai ebao. Te eno Mobo Bidi te agaba mubaso, tama agai te doloba pai kolesaga ebo te po te gasa Israel hani isąwai bidi dabe augwalibolo te po pusaibao.
MAT 12:19 Tiali goli agai te konila ebo po me te genuai po dagą me wagobeo. Te augwaligo agai pedauwalidu genuai dagą olama i wabo te genuai tųde me odogobeo.
MAT 12:20 Te awi dili me deli dwasianu togwa painogo yali, te tigidali me agai togwa pogobeo. Tama te lamde mubo hobi dwasianu bogoli idubo, te me agai tigidali te isiligobeo. Menio. Agai te tobage bomo kimi meni yai we bidi tau sabo sę iduaibao, tama bomonama elama, te doloba pai sęgo te dwai sę aiyaba elaluaibao.
MAT 12:21 Tama te gasa hani dabe, te Israel hani isąwai we bidi dabe augwaligo konealubo po agade dąų olama tonalueibao,” te bidi Aisaiago te po polobadu asęnama, tama Jisasgo te po usu nanio.
MAT 12:22 Tama te sogo augwaligo bidi me deli agaba sela asali, tama te bidide dwai haubo mobo bidi bidai. Aga gedu dali pedauwali dali te si pania sai. Tama Jisasgo aga usu ma ilali, tama te pedauwali pania sali bidi po ma weyu gedu ma pedeyu yai dao.
MAT 12:23 Tama tigidali genuai we bidi hani augwali noma mu sai, tama augwaligo te po wai, “E bidi da aga te Devitgo Ogwa yaliwe, ma meniwe?”
MAT 12:24 Tiali goli te Farisi dabe augwaligo te po odolama, tama augwaligo te po wai, “Woo, te dwai haubo mobo bidi te Belsebulgo bomode naga te bidigo te dwai haubo sela sąbo dao. Te Belsebul aga te dwai haubo mobo bidi dabego tobolu bidi dao,” te Farisi bagego te po wai.
MAT 12:25 Tama agai augwaligo homude ebo kolesaga koneama, tama agai augwalibolo te po wai, “Te tuni bidigo bomo tomode bidali bidi dabe augwali hani si te bugulama, tama augwa hasi wąbi hwįyu da, teda te hani si dolaibao. Tama te hanu me delide bidali bidi dabe, ma te deli bede bidali hani, te augwali te si bugulama, tama augwa hasi wąbi hwįani da, te hanu ma te be me elalugobeo, te tulolueibao.
MAT 12:26 Tama tibaso, Satango te Satan aga ma sela sąyu da, teda aga hani te buga sai elaluai dao. Tama agai tonalubo hani augwali bomo me elalusiąbaso, te dolaibao, te tulolueibao.
MAT 12:27 Te mu tama te Belsebulgo ena tau sobaso tama eno te dwai haubo mobo bidi augwali sela sągi sogo da, teda dego te dage wali pabo bidi dabe augwali tau selama, tama augwaligo te dwai haubo mobo bidi augwali sela sągowe? Tama tiyu da te duga digi duga hanigo po tų ilibo dao, te dage geda muani po hania ola mawaibao.
MAT 12:28 Tiali goli, Godigo Mobo Bidigo ena te dwai haubo mobo bidi sela sąyabo bomo mabo dao. Tama tibaso dagego koneiąo, te Godigo we bidi tonalubo kolesaga te dageba asai dao.
MAT 12:29 Tama te sę e tiwai dao. Te bidi me deli aga te bomai bidigo be tomoba pelama, tama agai bede elalubo doado bage sai hagede, agai te bomai bidi aiyaba elaluama, tama te dila pai bonogo te bidi kęyu bolo yao. Agai tama tilama, tama agai te bidigo bede munalubo nai dabe saibao,” wali.
MAT 12:30 “Bidigo ena dali abagi me wasiąbo, te bidi aga eno boi bidi dao. Bidigo nai ena dali sisinisąbo bidi, te bidi agai te nai subigila sąsą bilibo dao.
MAT 12:31 Tama tibaso, eno dagebolo obao, te Godigo te we bidi augwaligo dwai sęgę ebo te tigidali me te posobo po me, te sela sąbo usu yaibao. Tiali goli bidigo te Godigo Mobo Bidibolo posobo po obaso, te bidigo sęgę te Godigo me sela sągobeo.
MAT 12:32 Tama bidi mego dwai po me deli te Godigo Bidi Mu dali obaso da, teda Godigo te bidi agai sęgę te sela sąbo usu yaibao. Tiali goli bidigo dwai po te Godigo Mobo Bidi dali weyu da, te bidi agai sęgę te megi e tǫde bidibo sogo me te nosali me munu me te sęgę me sela sągobeo. Te sęgę me elalua peyu, bidada paibao,” Jisasgo te po wai.
MAT 12:33 “Te wiegi yai nigo da, te nai me wiegi yai walaibao. Ma, te dwai nigo da, teda te nai me dwai walobo dao. Tama te bidi dabe augwaligo te nai bolo sulama, tama augwaligo koneaibao, te ni wiegi yai yaliwe ma dwai yaliwe naga osola subo dao.
MAT 12:34 Dage te dwai bidi dabe, dage te dwai hasamani dabe tiwai dao. Tama tialigo da, magi ilama dagego wiegi yai po waibawe? Tama bidigo pedauwalidu te tiwai po aga homude elalubo po pusubo dao.
MAT 12:35 Wiegi yai bidigo homude te wiegi yai po hauwa elalubo dao. Tama agai kolesaga wiegi yai pedalobo dao. Bidi dwaigo agai homude dwai homu kolesaga hauwa elalubo dao. Tama tiyu, agai dwai kolesaga pedalobo dao,’ wali.’
MAT 12:36 “Eno dagebolo obao, te genuai po tų pedalobo sogo te Godigo te we bidi dabe augwaligo tigidali subigila wali dwagi yai sę isiąbo po te po tų ebode dagalaibao, tama te pode sęgę mawaibao.
MAT 12:37 Tama naga pode digi te Godigo nage doloba pai bidi nogi poaibao, te nago yali kolesagade te sęgę sisąwai bidi dao. Tama naga pode naga digi te agai nage dwai bidi nogi poaibao, tama nage sęgę mawaibao,” Jisasgo te po wai.
MAT 12:38 Tama agai te po obaso, te Juda dabego bomo yai po page ola mabo bidi meba me, te Farisi dabe meba dali augwaligo te po agabolo wai, “Po ola mabo bidi, dago homugo nago bomai sę me deli ebode, tama dago sumainogo nago te sę yao,” te po wai.
MAT 12:39 Tiali goli agai po wei augwalibolo ponoyu bomonama te po wai, “Te God tagalama tama dwai sę ela bilibo megi bidibo we bidi hani dabe, augwaligo te bomai sę ebo suainogo i wabo dao. Tiali goli, eno dagebolo te bomai sę me deli eno ola magobeo. Te polobadu Godigo po pusali bidi profet Jona agade pedelali bomai sę tiwai naga pedelama, tama dagego te sueibao.
MAT 12:40 Tama polobadu te tiwai yai te bidi Jona sela sogo giligade me sela sogo hulide te genuai sųgų haliga tomode bidai, tama te tiwai yali gilama naga te Godigo Bidi Mu aga me te sela sogo giligade me sela sogo hulide e tǫ tomode bidaibao, te isai we bidi bidibo madide.
MAT 12:41 Tama Godigo we bidi augwali dagalobo sogode te Ninive hanu we bidi dabe augwali te po tųde dolaluyu, tama dage megi bidibo we bidibolo te augwaligo dwai kolesaga yali po pusaibao. Magi baso meni. Polobadu mu Godigo po pusa mani bidi nogi Jona agai te Ninive we bidibolo Godigo po pusa mobadi yaide, augwaligo odama, dwai dwai sę yalide ge neyu, tama tagalama homu begelai dao. Tiali goli Jona aiyaba elalubo bidi me deli pedelama, tama megi dage tomode bidibao.
MAT 12:42 Tama polobadu bidali te genuai bidi nogi Solomongo wabo wiegi yai kolesaga ebo po odai hagede, digibulu bulude bidiyu genuai bulu tonalubo we asai dao. Tiali goli Solomon aiyaba elalubo bidi me deli pedelama, tama megi dage tomode bidibao. Tama dagego agai po odisąbaso, te Godigo te we bidi po tų ebo sogo te digibulu bulude asali genuai wego ‘Dagego te dwai sę yai dao’ po waibao,” Jisasgo te po wai.
MAT 12:43 Jisasgo te po ma gagaliyu, te po wali, “Te dwai noma haubogo bidi me tagalama, te dwai tulubage meni yai buluba toma nabo pesage gegegi pabo dao.
MAT 12:44 Tiwai pesage me susiąbaso da, aga homugo tama tebao, ‘Ena taga soali beba ma geasa paibao’ homu yaibao. Tama aga pelama, te be sugi pali, augwaligo bugagia dodolama, pobele bage meni yai au ma ilai beba ma pabo ąǫ te bidi pageba, dwai noma ma peyu tebo dao.
MAT 12:45 Tama aga pelama, gasa dwai noma te a naga olama me si sigi pali. Tama te gasa dwai noma haubo dabego te dwai dwai sę ebo kolesaga tebogo te hasia dwai mobo haubogo ebo dwai kolesaga aiyaba elalubo dao. Tama augwali aga dali aselama, tama augwali tomoba pelama, tama augwali te bede bidibo dao. Polobadu te bidi dwai bidai, tiali goli megi me te aga dwai mu bidibao. Te tiwai naga megi e sogo dwai sę eyu bidibo we bidi augwalibolo me te tiwai sę pedelaibao,” Jisasgo te po wai.
MAT 12:46 Jisasgo po te we bidi augwalibolo madubadi, tama aga ida ama dede dali augwali aselama, bulu badu dolaluagasai. Augwaligo aga dali po miainogo asai.
MAT 12:47 Tama bidi me deligo agabolo te po wai, “Odao, naga ida me naga ama dede augwali bulu badu aselama dolalubao, tama augwaligo nage dali po miai hagede ebao.” wali.
MAT 12:48 Tiali goli Jisasgo po wei te bidibolo ponoyu te po wai, “De aga eno ida dawe? De eno ama dawe?” Jisasgo te po wai.
MAT 12:49 Tama agai aga wali pabo bidi dabe nogo du eyu, te po wali, “Suao, eno ida me eno ama dede dali, te e dao.
MAT 12:50 Eno Aya dagalude bidibo bidi agai homu wali pabo we bidi da, te eno ama dabe me, abe dabe me ida dabe dao,” Jisasgo te po wai.
MAT 13:1 Tama Jisasgo te po ola silama, tama te sogo naga aga te be tomode bidali tagalama, te bedu buluba soai. Tama aga pelama, te sigi ąį sesege badu dulalugi pai.
MAT 13:2 Tama we bidi hani hauwa aselama. aga pageba sisinagasobaso tama aga te geba me deli daiba holama duagulali, tama te asali we bidi augwali tigidali te sigi ąį sani sesegede bidaluai.
MAT 13:3 Tama agai po digi po hauwa begelama augwalibolo wai. Agai te po wali, “Te bidi me deli pelama, te giba nai wai ge telala biligi pai.
MAT 13:4 Tama agai te nai wai ge telala pobadi, tama te nai wai ge me badu te soabo tųde tudulaluali. Tama te tųde tudulaluali nai ge te ba dabego tuagasai.
MAT 13:5 Tama te nai wai ge me badu te tǫ ili hauwa meni yai digi te masigi elalubo madigi daiba tudulalualio. Te tǫ aiyanu dulisąwai madi tama te tedelaluali nai wai ge polo holali.
MAT 13:6 Tiali goli giliga pedaliyu posologo te nai wai ge te giligago ulai. Tama te nai wai sele meniama, tama tigidali sasia pelama, tama isali.
MAT 13:7 Tama meba te tedelawali nai wai ge te sesane yai bono elalubo madi tomoba tudulaluali. Tama te sesane yai bono elalubo madi tomodu te nai wai ge holali digi, te sesani yai bonogo haluama, tama te nai isilali.
MAT 13:8 Tiali goli te telala pali nai wai ge me badu te wiegi yai tǫba tudulaluali, tama te nai du walali. Meba te 100, tama me badugo te 60 walali, tama me badugo 30 tama waliyu yai,” wali.
MAT 13:9 “Duga po odobo olo elalubo bidigo da, te po bugagia odiąo,” Jisasgo te po wai.
MAT 13:10 Te Jisas aga wali pabo bidi dabe aga pageba aselama, te po wai, “Magi baso nago po digi po begelama augwalibolo obawe?”
MAT 13:11 Agai po wei ponoyu te po wai, “Godigo agai we bidi tonalubo sę geme dualaluali po page haninama te agai dagebolo ola mawai dao. Tiali goli e bidi dabebolo te geme dualali po page te haninai menio.
MAT 13:12 Magi baso menio. Bidi me deligo nai meba elalubaso da, teda Godigo agabolo te nai umabo mayu, tama aga nai hauwa elaluaibao. Tama bidi me deligo te dwasianu nai naga elalubaso da, teda Godigo te dwasianu nai dagala sąwaibao.
MAT 13:13 Tama tebo sęde eno te po digi po begelama augwalibolo obao: augwaligo gedugo da tonono bilibadi, tiali goli augwaligo magi nai me deli subo menio. Augwaligo olo mubadi, tiali goli augwaligo po me odisąyu tama kolesaga sabeo.
MAT 13:14 Te tiwai sę ebo we bidi augwalide te po me deli te Godigo po pusali profet bidi Aisaiago wali po te usu nanio. Agai te Godigo wali po asęai dao: ‘Te dagego po odobo sę ebadi, tiali goli dagego te po page konegobeo. Te dagego tonono bilibo sę ebadi, tiali goli dagego magi nai me deli sugobeo.
MAT 13:15 Magi baso meni. E we bidi hanigo homu kolesaga te puna pai dao. Tama augwaligo ologo po odobo te hagela eyu, tama augwaligo augwa gedu palia sai. Tiyu augwaligo gedugo te magi nai me deli suidali weyu tiali, tama augwaligo ologo po odidali weyu tiali, tama augwaligo homude te po page ma koneama, tama augwali begesa enaba ma aselama, te eno augwali usu ma ilidali weyu augwaligo tama kolesaga yai dao,’ Aisaiago Godigo wali po augwalide tama asęai dao.
MAT 13:16 Tiali goli dage da, te wiegi yai homu pemene yao. Magi baso meni. Dagego gedugo te nai dabe te subo dao, tama dagego ologo po odobo dao.
MAT 13:17 Eno mu po dagebolo obao, polobadu te Godigo po pusali bidi hauwa dabego me, te doloba pai bidi hauwa augwaligo me te megi dagego te subo sę suainogo godolo yai, tiali goli augwaligo me subeo. Tama augwaligo me megi dagego te odobo po odainogo godolo yai, tiali goli augwaligo te po me odai menio,” Jisasgo te po wai.
MAT 13:18 “Te megi da dagego te bidigo nai wai ge te giba tededalo bilagasali po digi po page odiąo, bugagia koneao.
MAT 13:19 Te Godigo we bidi tonalubo kolesagade po wabo odobo digi te po page koneyu dąų wasiąwai bidi, te bidi te aga da te soabo tųba olo tudulaluali nai wai ge tiwai dao. Tama te Satan agaba aselama, tama polo te po Godigo aga homuba budali po te Satango te dagala sabo dao.
MAT 13:20 Tama te gi page bidigo te telala biligi pali nai wai ge meba te masigi elalubo madigi tudulaluali po wali da, te tiwai te bidigo te po odama tama polo selama, tama te pode wiegi yai homu pemene ebo.
MAT 13:21 Tiali goli aga da te sele meni yai nai tiwai dao. Tama tibaso, aga homu daide naga te odali po te dwasianu sogo naga elaluaibao. Tama nosali bidi mebago te Godigo po aiyaba elaluabo homu eyu da, teda te bidibolo augwaligo sęgę menama, tama dwai kolesaga agabolo eyu, tama agai konealubo po dąų wali te polo tagalama, tama tulalubo dao.
MAT 13:22 Tama meba te tedela palali nai wai ge te sesani yai bono elalubo madi tomoba tudulaluali, te bidigo po sabo tiwai yali, tiali goli agai homu hauwa te tǫde naiba pelama, tama agai mone dabe te doado bage hauwa sabobo homu hauwa yali, tama te homu ebogo te Godigo po mesegelama, tama agai nai ge walobeo.
MAT 13:23 Tiali goli te tedela palali nai wai ge te wiegi yai ili yai elalubo tǫba tudulaluali po wali da, te bidigo po odama tama te po page bugagia koneani dao. Te tobage we bidi augwaligo nai ge walaibao, te 100, ma 60, ma 30 tama walobo dao,” Jisasgo te po wai.
MAT 13:24 Te Jisasgo gasa po digi po begelama, augwalibolo te po wai, “Te Godigo we bidi tonalubo sę e tiwai dao. Te bidi me deligo aga wiegi yai nai wit wai ge te aga giba telala bilali.
MAT 13:25 Tama elama, tama me sogo hulide we bidi augwali godege piai digi yaide, te bidi aga boi bidi aselama, tama agai te nai wai telawali wit gi tomoba te dwai noswai wai ge sąsą bilagaselama, tama aga paialio.
MAT 13:26 Tama nosali te wit holama, tama nai ge walainogo ebadi, tama augwaligo te nai wai telawali gide te dwai noswai dali holobo suai.
MAT 13:27 Tama te gide sę ebo bidi dabe pelama, te gi aga ayabolo wagi peyu, augwaligo te po wai, ‘Genuai bidi, dago homugo nago gide wiegi yai nai wai ge naga tedelalo bilali homu yai dao. Tama magi ilama te tiwai dwai noswai dali pedalaliwe?’ te po wai.
MAT 13:28 Tama agai te sę bidi dabe augwalibolo te po wai, ‘Te boi bidi me deligo te tiwai sę yali dao.’ Tama te sę ebo bidi dabego agabolo te po wali, ‘Tama tibaso, nago homugo usu wida, teda da pelama, te dwai noswai gudama, sisinigi pabo te usu yaibawe?’
MAT 13:29 Tiali goli, agai augwalibolo te po wai, ‘Mu menio. Tiyu dagego te dwai noswai gudama sisinibo sę eyu, dagego te wit dali gudabuo,’ te po wai.
MAT 13:30 ‘Dagego te si dali si holomainao, te si holama, tama te nai sabo sogode te usu naibao. Tama te nai sabo sogo eno te nai togwa sabo sę ebo bidi augwalibolo te po waibao, “Dagego te dwai noswai bolo hasia sisinama, tama dunama, siade ulainogo kęnama muao. Tiali goli, dagego te wit da, te te sisinama te eno nai mubo beba muao,” eno te po waibao,’ te bidigo te po wali,” Jisasgo te po wai.
MAT 13:31 Te Jisasgo gasa po digi po begelama, augwalibolo te po wai, “Te Godigo we bidi tonalubo sę te nai wai me deli tiwai, te nai mastet wai tiwai dao. Bidi me deligo te nai wai selama, aga gide bulubo dao.
MAT 13:32 Te nai mastet wai ge da, te kemeni ge tiwai sabi si dwasianunu mu dao. Tiali goli nosali te nai ge genuai hola silama, agai te gide holali haniani nai tigidali te aiyaba elalubo dao. Te ni tiwai holama, tama te ni nologoba te ba dabe duayagasobo dao,” wali.
MAT 13:33 Tama agai gasa po digi po me ma begelama, te po augwalibolo wai, “Te Godigo we bidi tonalubo sę te bret bo dabo nai yis tiwai dao. Te we me deligo te dwasianu yis selama, tama te genuai dramde munalubo tubo plaua dali taluama begelaibao. Tama nosali te plaua tigidali te bo dai subo dao,” Jisasgo te po wai.
MAT 13:34 Te ola mabo po tigidali tama odubadi, Jisasgo te we bidi augwalibolo te po digi po begelama naga wai. Agai te po me deli haninama augwalibolo me pusubeo. Menio. Agai po digi po begelama naga augwalibolo te po wai dao,
MAT 13:35 te Godigo po pusali bidi profet me deligo pedauwalide pusali po usu numainogo. Te profet bidi agai polobadu te po wai, “Te eno augwalibolo po weyu, tama eno te po digi po wabo tiwai yaibao. Te eno augwalibolo te polobadu mu geme dualaluali po te megi e sogo me geme dualaluali po te po eno augwalibolo pusaibao,” te po wai.
MAT 13:36 Te sogo Jisasgo te we bidi augwali tagalama, tama aga te be tomoba pelama bidai. Tama aga wali pabo bidi dabe augwali agaba aselama, te po wai, “Nago te dwai noswai te gide pedalobo po olama po digi po begelama wali po page te dabolo haninama ola mao,” te po wai.
MAT 13:37 Te Jisasgo po wei ponoyu te po wai, “Te wiegi yai nai ge telala pali bidi po wali da, te bidi da te ena dao, Godigo Bidi Mu dao.
MAT 13:38 Tama te nai ge tedelalo pali gi da, te e tǫ dao. Tama te wiegi yai nai ge da, te Godigo obo tomode bidibo we bidi dao. Tama dwai noswai da, te Satango we bidi dabe dao.
MAT 13:39 Te boi bidigo dwai noswai ge tedela bilagasali, te bidi da Satan dao. Te nai sabo sogo bodolu wali, te e tǫ silabo sogo dao. Te gi nai sabo bidi dabe augwali da, te Godigo sę ebo ensel mobo bidi dabe naga dao.
MAT 13:40 Te gi sę ebo bidi dabe augwaligo dwai noswai sisinama siade ulubo, te tiwai naga augwaligo e tǫ silibo sogo muani bodolude te tiwai yaibao.
MAT 13:41 Te Godigo Bidi Mu agai aga sę ebo ensel mobo bidi dabe tagala palama, tama augwaligo te Godigo tonalubo we bidi tomode elalubo dwai dwai sę ilabo kolesaga me, te haniani gasa dwai sę ebo we bidi me, augwali tigidali sisinama
MAT 13:42 tama augwaligo te we bidi dabe augwali te moni tigi dene ebo siaba sąwaibao. Tama te siade te augwali dwai gela mu weyu, tama augwa kele gąųgo halua tuyu bidaibao.
MAT 13:43 Tama te sogo te doloba pai we bidi augwali augwa Ayago we bidi tonalubo madide bidiyu, tama augwali tigide te giliga ula tiwai eyu bidaibao. Odo elalubo bidi dabego te po bugagia odiąo,” Jisasgo te po wai.
MAT 13:44 “Te Godigo obo tomode bidibo kolesaga te wiegi yai mu dao, te gide geme dualaluali dila pai nai mu tiwai dao. Bidi mego te nai subaso, tama agai ma dualali. Agai wiegi yai homu pemene yai, tama aga pelama, aga doado bage tigidali te bidi dabebolo menama, mone selama, tama te gi tǫ abelegi paibao, te aga suali dila pai nai somainogo,” Jisasgo te po wai.
MAT 13:45 “Te po me e dao. Te Godigo obo tomode bidibo kolesaga te wiegi yai mu dao, e tiwai dao. Bidi me deligo aga mone sabo bisnis sę eyu, te wiegi yai bis gegi bilibo dao.
MAT 13:46 Agai te bis wiegi wiegi yai mu me deli subaso, te bis gasa bis tigidali aiyaba elalubaso, teda aga pelama, te aga doado bage tigidalide te mone sigi pelama, tama te wiegi yai bis abelegi paibao,” Jisasgo te po wai.
MAT 13:47 “Ma, te Godigo we bidi tonalubo sę e tiwai dao. Bidi dabe augwaligo te sųgų sainu te genuai sųgų sabo wa te sigi ąįba sąnama, tama haniani sųgų te wa tomoba pabo te tiwai dao.
MAT 13:48 Tama te sųgų sabo wa pągą baso, teda augwaligo te wa kegasa te ąį saniba tuagasobo dao. Tama augwali dualama, te wiegi yai sųgų naga te genuai pede mebaba sisinaibao. Tiali goli te dwai sųgų dabe da, te augwaligo te sela sąbo dao.
MAT 13:49 Tama e tǫ de dagalu si silibo sogo te tiwai gilama naga yaibao. Te Godigo sę ebo ensel mobo bidi dabe augwali aselama, te dwai kolesaga yali bidi dabe te doloba pai bidi dabe tomode bidibo te dagalama, sela sąwaibao.
MAT 13:50 Tama augwaligo augwali te genuai tigi dene yabo siaba sąwaibao. Tama te siade augwali dwai gela weyu, tama augwa kele gąųgo ma halua tueibao,” Jisasgo te po wai.
MAT 13:51 Te Jisasgo augwalibolo hanalu wali, “Te eno megi pusali po page tigidali dagego koneaniwe?” Tama augwaligo agabolo te po wai, “Awe.”
MAT 13:52 Agai augwalibolo te po wali, “Awe, te Juda dabego polobadu bomo yai po page koneani bidi aga te Godigo we bidi tonalubo kolesaga tede te po te skul wai tiwai pedalobaso da, teda agai te Godigo polobadu wali po me, te megi elalubo gesi wiegi yai po dali, te po si aga homude elaluaibao. Tama te dwagi yai po hauwago agai gasa we bidi ola mabo usu mu yaibao,” Jisasgo te po wai.
MAT 13:53 Jisasgo te po digi po wali te po dabe ola silama, tama agai te bulu tagalama pai.
MAT 13:54 Tama aga page buluba pali, tama Godigo po agai te augwa bomo yai po odobo be tomode ola mawai. Tama augwali noma mu siyu, te po augwa hasi wai, “Te kolesaga koneani, me te bomai sę tigidali, te bidi agai magi ilama te tigidali kolesaga saliwe?
MAT 13:55 Te bidi da te kamda bidigo ogwa naga dao. Aga ida nogi Maria dao. Agai ama dabe te Jems, me Josep, me Saimon, me Judas, te augwali dao.
MAT 13:56 Agai abe dabe tigidali da dali bidibao. Te kolesaga koneani me te bomai sę tigidali agai magi ilama saliwe?”
MAT 13:57 Augwaligo te po olama, tama augwaligo aga dali dwai homu yai. Tiali goli Jisasgo augwalibolo te po wai, “Te Godigo po pusubo bidi profet agai nogi te tigidali bulude elalubo dao. Tiali goli aga page bulude me, aga bede me, te aga nogi meni yai elalubo dao,” te po wai.
MAT 13:58 Augwaligo agade konealubo po dąų wasiąbaso, agai bomai sę hauwa te aga page bulude ebeo.
MAT 14:1 Te Jisas aga page bulude bidali sogo te Juda hani genuai gavman tuni bidi nogi Herot agai te Jisasgo sę ela bilibo po odai.
MAT 14:2 Tama agai aga sę ebo bidi dabe augwalibolo te po wai, “Te bidi aga te baptais mani bidi Jon dao. Aga te gų pagede ma hodaluali dao. Tama tibaso, te tobage genuai bomai sę te aga nogodu pedalobo dao,” te po wai.
MAT 14:3 Te tiwai pedelali. Polobadu te gavman tuni bidi Herotgo bidi dabe tagala palama, tama augwaligo Jon pageba pelama, tama aga bonogo nogo dųnama, tama “Aga kalabusiba muao,” po obaso, te aga kalabusiba muani. Te tuni bidi Herot aga ama Filipgo we nogi Herodias, te wego “Aga kalabusiba muao” po obaso, teba muani.
MAT 14:4 Magi baso meni. Polobadu Jon agai Herotbolo te po widu geai, “Nago te we sali sę te dolo menio.”
MAT 14:5 Tama Jongo te po obaso, Herotgo Jon ela muabo homu yali goli, aga te Juda we bidi augwalide wi yai. Augwaligo homugo te Jon aga da, te Godigo po pusubo bidi profet da te homu yai dao.
MAT 14:6 Tama me sogode bidi meba augwali te tuni bidi Herot dali aga beba sisinani, te aga idago aga ame nani sogo pedalobo koneama tiwai. Tama te sogo te we Herodiasgo wegi, te gesi we, te aga te augwali tomode tęąbi ela bilai. Tama Herotgo godolo mu ebaso,
MAT 14:7 tama agai po dąų weyu, te gesi webolo te po wai, “Mu tamao, magi nai nago enabolo hanalu obaso da, teda te nai eno nagebolo mawaibao,” te po wai.
MAT 14:8 Tama te wegi aga idago agabolo te homu kolesaga mani, tama agai te Herotbolo te po wai, “Nago te we bidi baptais mani bidi Jon elama, aga mage togolama, tama aga tobolu te pou me delide munama, tama selama, enabolo eba magasao,” te gesi wego te po wai.
MAT 14:9 Agai tama po wai, tama tuni bidigo homu sęgę yai. Tiali goli agai po dąų weyu po mu po da wali te homu elama, tama aga dali dualama nai tuali bidi dabe augwaligo me te po wabo odai. Tama tibaso, agai te po aga sę ebo bidi dabebolo wai, “Te nai agabolo mao,” te po wai.
MAT 14:10 Tama agai bidi me deli te kalabus beba tagala palama, tama Jongo tobolu togogi pai.
MAT 14:11 Tama augwali aga tobolu te pou me delide munama sela asali, tama augwaligo te wegibolo mawai. Tama agai aga ida bidibo digi selasa pai dao.
MAT 14:12 Tama Jon aga wali pali bidi dabe augwali aselama, aga tigi naga selama pubulai. Augwaligo pubulama, tama augwali pelama, Jisasbolo te po wagi pai dao.
MAT 14:13 Te Jisasgo te Jon isali po wabo odama, tama agai te bulu tagalama, tama geba me deli selama, tama ąį daidu peyu, aga te bidi meni yai bulu badu pali, aga wali pabo bidi dabe augwali naga aga dali pali. Tiali goli te we bidi augwaligo aga pali po odobaso, tama augwali te hanude bidali tagalama, tama augwali aga pali wali pai dao.
MAT 14:14 Tama nosali Jisas aga te gebadu pelama, te wę u badu tugi pelama, tama agai genuai we bidi bidalubo suali. Tama agai augwali homu dene mu ebaso, tama agai augwaligo gasi sai bidi dabe usu ma ilali.
MAT 14:15 Tama pio aga wali pabo bidi dabe augwali agaba aselama, te po wai, “Te ede bidi meni yai madigi dao, tama be pio yalio. Tama nago e we bidi augwali tagala palama, pomainao. Augwa te be nani dabeba tedela pelama, tama augwa nai abela tugi pomainao,” te po wai.
MAT 14:16 Tiali goli Jisasgo augwalibolo te po wai, “Magi baso augwali pomainogowe? Duga digi augwali nai mao.”
MAT 14:17 Tama augwaligo agabolo te po wai, “Dago nai hauwa ede munalubeo. Te a naga bret badi, te sųgų si naga munalubao,” te po wali.
MAT 14:18 Agai te po wai, “Te nai enabolo edaba sela asao.”
MAT 14:19 Tama agai te we bidi augwalibolo po olama, augwali te noswaide duada pao te po wai. Tama agai te a naga bret badi te sųgų si dali selama, tama agai dagaluba ugwaba tonaluyu, aga Ayabolo nage usu dao po wai. Tama agai te bret pedama, tama aga wali pabo bidi dabebolo menama, tama aga wali pabo bidi dabego te we bidi augwalibolo te nai dobaba pai.
MAT 14:20 Tama augwali tigidaligo te nai tulama, tama augwali te naigo tabiai. Tama augwaligo te nai meba munalubaso, tama te Jisas wali pabo bidi dabe augwaligo te munalubo nai sisinama, tama bonou wa 12 pągąwai dao.
MAT 14:21 Te tiwai te 5,000 bidi dabego te nai tuai. Augwaligo te we me te wai puluba dabe augwaligo te nai tuali goli, augwali nedebeo.
MAT 14:22 Tama te nai tula silama da, tama megi da Jisas aga wali pabo bidi dabe augwalibolo te po wali, tama augwali te gebaba holama, te augwali polasa te sigi ąį u badu pao wai. Tama agaduba digi te we bidi augwali tagala palainogo yai.
MAT 14:23 Agai te we bidi augwali tagala pala silama, tama agaduba deli naga te bulu duba holama, Godibolo po wainogo yai. Tama pio agaduba naga te bulude bidai.
MAT 14:24 Aga tede bidibadi, te geba te sigi ąį digibulu tomodu pobadi, tama moni bomai wali te geba sabi badu asiyu, tama te ąį dini ugwaba holoyu, tama augwaligo ąįdu todogo pabo sę dene yali.
MAT 14:25 Tama te be posabo magade Jisas te sigi ąį daidu pelama, aga wali pabo bidi dabe augwali bidibo gebaba pedalainogo pai.
MAT 14:26 Tama augwaligo aga te sigi ąį daidu asobo sulama, tama augwali moni wi mu yai. Augwaligo te po wali, “Te isi bidi me deli dao.” Augwali wi eyu, tama augwaligo hwa wali.
MAT 14:27 Tialima polo Jisasgo te po augwalibolo wali, “Dagego homu kęna sao. Te ena dao. Dage wi egimio.”
MAT 14:28 Pitago agabolo po wei ponoyu, te po wai dao, “Genuai Bidi, te nage tama da wida, teda nago enabolo olama, tama ena me te wę daidu nage pageba asao wao,’” te po wai.
MAT 14:29 Jisasgo te po wai, “Nage asao.” Tama te po obaso, Pitago te geba tagalama, tama te sigi ąį daidu te Jisas bidiboba pabo gagalali.
MAT 14:30 Tiali goli agai te wali asobo sulama wi yali, tama aga te ąį tomoba tigi dwasianu hoasainogo yai. Tama agai bomonama i weyu, te po wai, “Genuai Bidi, nago ena tau sao,” te po wai.
MAT 14:31 Tama polo mu Jisasgo nogo munama, Pita nogogo tola sali, tama agabolo te po wai, “Nago naga homu tigidali enaba mubeo, dwasianu naga mawai. Magi baso nago homu si ebawe?”
MAT 14:32 Tama augwali si te gebaba hola soabo side da, tama te moni wali sia sai dao.
MAT 14:33 Tama te gebade bidali bidi dabe augwaligo agabolo aga nogi ugwaba sabo po weyu, augwaligo te po wai, “Mu tama, nage te Godigo Ogwa dao,” wali.
MAT 14:34 Augwaligo te sigi ąį nogolama, tama augwali pelama, te Genesaret te badu tugi pai.
MAT 14:35 Tama te bulude bidibo bage augwaligo koneani, te aga Jisas dao. Tama augwaligo te pąde elalubo be nani tigidali dabeba po todolo pela silama, tama augwaligo haniani gasi yai we bidi dabe tigidali aga pageba selasa asai.
MAT 14:36 Tama augwaligo agabolo hanaluyu, te gasi yai we bidi augwaligo nogo naga te agai ugwa sesegeba mumainao wai. Tama te gasi yai we bidi dabe augwaligo te tiwai yali bage tigidali augwaligo gasi usu ma ela silai dao.
MAT 15:1 Te Farisi hani bidi meba me, te Juda dabego bomai po page koneani bidi hani bage me, augwaligo te moni hanu Jerusalem tagalama, Jisas agaba aselama, augwaligo te po hanalu wagasai dao,
MAT 15:2 “Magi baso nage wali pabo bidi dabe augwaligo te wąį nǫų dabego dabolo mani kolesaga te augwaligo bolobawe? Te augwaligo nai tuainogo ebo sogo, augwaligo te augwa nogo ąį me telabo menio, te dena wąį dabego nogo ąį telabo gasagi yai sę ebo augwaligo wali pabo menio.” Te bagego te po hanalu wali.
MAT 15:3 Jisasgo po wei ponoyu, augwalibolo bomonama te po wai, “Te dage, dage magi baso duga digi duga kolesaga wali peyu, tama dagego te Godigo bomo yai po bolobo dawe?
MAT 15:4 Te Godigo te po wai, ‘Nago naga aya de ida sigo nogi ugwaba siyu, augwali sigo po wali pao’ wali, tama me ‘Te bidigo aga aya de ida si dali dwai po obaso da, teda te bidi aga ela muao,’ Godigo te po si wai.
MAT 15:5 Tiali goli te bomo yai po geda siyu, dagego te po wabo dao, ‘Te bidi me deli agai aga aya me ida tau sabo mone me doado bage me elaluali digi, agai augwali sibolo “Eno e nai te Godibolo mawainogo sa muai nai dao” weyu da,
MAT 15:6 te usu da, te agai aga aya ida tau sabo tagalama, agai augwali sigo nogi ugwaba sabo bomo yai po bolobo sę te usu dao,’ te dagego te po ola mabo dao. Te tebo kolesagago dagego te Godigo po aiyaba elaluama, tama duga ebo kolesaga digi te ugwaba sabo dao, te naga wali pomainogo.
MAT 15:7 Dage homu ugwadu naga po wabo bidi dabe dao. Te Godigo po pusali profet bidi Aisaia agai dagede polobadu mu wali po te mu po tama dao. Agai dagede te Godigo po tama wai,
MAT 15:8 ‘Te hani we bidi augwaligo eno nogi te pedauwaligo naga ugwaba sabo dao, tiali goli augwaligo homu kolesagago augwaligo ena dali abagi homu ebo menio.
MAT 15:9 Augwaligo te bidi dabego ola mani bomo yai po naga pusuyu te po wabo dao, “E te Godigo po dao.” Tama tibaso augwaligo olo naga enabolo lotu po wabo dao,’ Godigo te po wali,” Jisasgo te po wai.
MAT 15:10 Te Jisasgo te po te tuni bidi dabebolo olama, tama te gasa olo we bidi augwali aga pageba asomainogo i olama, tama augwali aselama, tama agai augwalibolo te po wai, “Dagego e po bugagia odama, homude kuna koneao.
MAT 15:11 Te bidi deligo agai aga nogo wę telasiąbadi te agai nai sela tubaso da, te kolesagago te bidi meda me iligobeo, tebogo aga Godigo gedude dwai bidi me iligobeo. Menio. Tiali goli te po bidigo pedauwali tomodu te buluba soabo pogo, tego naga te bidi meda ilibo dao,” Jisasgo te po wai.
MAT 15:12 Tama te sogo te aga wali pabo bidi dabe augwali aselama, agabolo te po wagasai, “Nago te Farisi dabe augwaligo nago megi tamadi wali po odoyu, tama augwaligo dwai homu ebo koneaniwe?” te po wai.
MAT 15:13 Agai po wei ponoyu, te po digi po begelama te po wai, “Eno Aya dagalude bidibao, agai gi tiwai elalubao. Tama tigidali nai dabe te agai digi me bulusąwani nai da, te nai tigidali deli deli agai te sele dabe dali page guda sąwaibao.
MAT 15:14 Dagego te Farisi dabe augwali sula tagalama elaluao. Augwali te gedu widai, tama te gedu widai mego te gasa gedu widai bidi te pabo tų ola mawainogo ebao. Tiali goli, te me gedu widaigo te me gedu widai bidi te tų ola mayu da, teda bidi talua si te ąį gamia pageba tulaluaibao,” Jisasgo te po wai.
MAT 15:15 Pitago te po wai, “Nago te hasia wali po digi po begelama wali po page pusao, tama dago odaio.”
MAT 15:16 Jisasgo te po bomonama wai, “Dage me te homu kolesaga meni yai bidi dabe dawe?
MAT 15:17 Te dagego konebo meniwe? Te tigidali nai pedauwali tomodu te tabiba pelama, tama te tabigo nosali te di beba sela sągi pabo dao.
MAT 15:18 Tiali goli te po pedauwalide bidama tama te buluba asobo, te po te bidigo homu kolesagadu pedalobo dao. Tama te pogo naga te bidi meda ilibo dao, tebogo aga Godigo gedude dwai bidi ilibo dao.
MAT 15:19 Tama bidigo homu kolesagadu te haniani dwai sę ilabo homu pedalobo dao. Tama te tobage homu eyu, augwaligo po weyu, tama augwaligo te bidi ela mubo kolesaga me, te we sabo sę dolobo kolesaga me, te hale ilibo penani kolesaga dabe me, te nai wi sabo kolesaga me, te po tųde tibo po wabo kolesaga me, te bidi nogi posobo po wabo kolesaga me, te tobage dwai dwai sę ebo dao.
MAT 15:20 Tama te tebo kolesaga dabego te bidi Godigo gedude te dwai meda ilibo dao. Tiali goli bidigo duga wąįgo ola mani nogo wę telabo kolesaga isiąbadi te nai tubo, tebo kolesagago te bidi meda iligobeo,” Jisasgo te po wai.
MAT 15:21 Te Jisasgo te Genesaret tǫ tagalama, tama aga gasa tǫba pai, te hanu si nogi me Tair, me Saidon, te hanu si pąba pai.
MAT 15:22 Tama te Kenan tǫdu asai we me deli te bulude bidai, te we da te Israel hani isiąwai we dao. Tama te we Jisas pageba asama, tama te po wedu geai, “Genuai bidi, nage te polobadu bidali bidi Devit aga hani bidi, nage ena dali homu dene eyu, tau siyu yao. Eno wegi te dwai haubogo mu dagana sai, tama te dwai haubogo te wegibolo dene mu mabo dao,” te wego te po wedu geai.
MAT 15:23 Tiali goli Jisasgo te wego po wei ponobeo, sagia sai. Tama aga wali pabo bage augwali agaba aselama, tama aga homu begelemainogo te po wai, “Te we aga tagala palao. Aga da wali asiyu, da dali bomonama i weyu ebao,” augwaligo te po wai.
MAT 15:24 Tama Jisasgo augwalibolo po wei ponoyu, te po wai, “Te Israel we bidi hani augwali te hagawai kibu sipsip tiwai dao. Tama God agai ena tǫba tagala palali, te eno augwali naga tau somainogo asai,” Jisasgo te po wai.
MAT 15:25 Tiali goli te wego te po odolama, tama Jisas aga sągąde kidu sugunagaselama, tama yalima, te wego te po wai, “Genuai bidi, nago ena tau sao.”
MAT 15:26 Tama Jisasgo te wego po wei ponoyu, te po digi po begelama, te po wai, “Te wai pulubago tubo nai te nai dago te dwasianu yowi dabebolo menamuo, te dolo menio,” Jisasgo te po wai.
MAT 15:27 “Te po mu dao, genuai bidi,” te wego te po wai. “Tiali goli te yowi dabe me augwaligo te ni nami sai dologoba tulaluali tubo nai kagali, te nai te yowi dabego tubo dao, page bidigo bede,” te wego te po wai.
MAT 15:28 Tama Jisasgo te wego po wei ponoyu, te po wai, “We, nago naga homu tigidali enaba mani sę, enade konealubo sę, te sę genuai mu dao. Tama tibaso, nago ena dali hanalu wali nai po te pedalaibao,” te po wai. Tama Jisasgo te po wabo side, tama te sogo polo tama te wego wegi gasi sana pelama, bidai.
MAT 15:29 Te megi da, Jisasgo te hanu si tǫ tagalama, tama te sigi ąį Galili tǫ pąba pai. Tama aga te tǫde te bulu du me deliba holama, tama te bulu dude dulaluai.
MAT 15:30 Tama we bidi hani hauwa augwali aselama, aga pageba sisinagasai. Tama augwaligo te sągą dwai we bidi dabe me, te gedu widai bage me, te dili gagea pai bage me, te pedauwali pania sai bage me, te gasa gasi yai bidi dabe hauwa me, tama augwaligo te bidi dabe Jisas sągą pageba muagasai. Tama agai augwali ma usu ilama, gesela silai dao.
MAT 15:31 Tama te we bidi augwali noma siyu, augwali homu hauwa yai. Magi basowe, augwaligo suali, te pedauwali pania sai we bidi dabe po ma weyu, te dili gagea pali bage te usu ma eyu, tama te sągą dwai bage me te ma biliyu yai, tama te gedu widai bage te gedu pedeliyu yai. Tama tibaso, augwaligo te Israel bagego God nogi ugwaba mu sai dao.
MAT 15:32 Te Jisasgo aga wali pabo bidi dabe i olama asobode, tama agai te po wai, “Eno e we bidi augwali homu dene ebuo. Augwali sela sogo ena dali bidali, te augwa sesali nai tula silali. Te eno augwali nasi ebadi pao po weyu tagala palogobeo. Tiyu augwali tųde nasigo sidalio,” Jisasgo te po wai.
MAT 15:33 Tama aga wali pabo bidi dabe augwaligo agabolo te po wai, “Te ede te bidi meni yai digi dao. Te dago te tubo nai bret hauwa te menade selama, te e tiwai bidibo genuai we bidi hani hauwa magowe?” te po wai.
MAT 15:34 Jisasgo augwalibolo te po wai, “Dagego nisu naga bret elalubawe?” Augwaligo te po wai, “Dago bret nogo a naga me badu nogo si badi, tama dwasianu sųgų si sela badi tama dago munalubao,” te po wai.
MAT 15:35 Tama Jisasgo te we bidi augwalibolo te po olama, tama augwali te tǫde duda pai.
MAT 15:36 Tama agai te bret a naga olama me badu nogo si badi, te sųgų dabe sobadi elama, tama agai Godibolo nage usu da po olama, tama te nai pebedelama, tama aga wali pabo bidi dabebolo madubadi, tama augwaligo te we bidibolo te nai dobaba pai.
MAT 15:37 Tama tigidali augwaligo te nai tuali usu ela silai. Tama Jisas aga wali pabo bidi dabe augwaligo te me badu elaluali nai tigidali sisinani, tama te naigo te genuai bonou wa a naga olama me si pągąwai.
MAT 15:38 Tama te we dabe sibi me te wai puluba me augwaligo te nai me tuali goli, augwali nedebeo, te nai tuali bidi dabe naga nedali e tiwai te bidi sese hauwa 4,000 bidi dao.
MAT 15:39 Te augwaligo te nai tula silama, tama Jisasgo te we bidi augwa buluba tagala palama, tama aga te geba holama, tama aga te ąį daidu pelama, te Magadan tǫ badu pai dao.
MAT 16:1 Te Farisi hani dabe mebago me, te Sadyusi hani dabe mebago me, augwali Jisas pageba aselama, tama aga augwaligo usu sainogo yai. Augwaligo agabolo te dagalude bomai sę ebo me deli te augwaligo suainogo te sę yao te po wai. God agai te Jisasde dwagi yai homu egowe ma egobewe, te konemainogo augwaligo te po agabolo wai.
MAT 16:2 Tiali goli agai po wei ponoyu, bomonama te po wai, “Te be pio ebode dagego te po wabo dao, ‘Dagalu mama ebao, tama tibaso do te wiegi yai be posaibao,’ te po wabo dao.
MAT 16:3 Tama be posobode kigamu dagego te po wabo dao, ‘Te pǫ sisi elama tama dagalu mama ebao. Tama tibaso megi da, te wali me tulubage tulaeibao,’ te po wabo dao. Awe, dagego te dagalu sulama, tama te magi be nosali pedalabo be te dagego konebo dao, te dagego dagalobo dao. Tiali goli dagego megi e sogo da te bodolu koneama dagalobo menio.
MAT 16:4 Dage dwai we bidi hani, te aga bidi tagalai we agai penani sę ebo gilama, te dagego God tagaliyu ebo we bidi dabego te bomai sę suainogo i obao. Tiali goli eno bomai sę te dagego sumainogo me egobeo. Menio. Te dagego Jonago polobadu mu yali bomai sę naga suagameo,” wali. Tama Jisasgo augwali tagalama, gasaba pai.
MAT 16:5 Te augwali te sigi ąį nogali, tiali goli te Jisas wali pabo bidi dabe augwaligo te tubo nai bret meba dali sela asainogo yali te homugo kegeda pai.
MAT 16:6 Tama Jisasgo augwalibolo te po wai, “Dage dua bugagia dao. Dage te Farisi hani dabe me te Sadyusi hani dabe dali sigo bret bo dabo nai yisde dua dao,” wali.
MAT 16:7 Te augwa digi augwa hasi po miyu, te po wai, “Dago te bret sela asisąbaso, agai te po obao.”
MAT 16:8 Tama Jisasgo augwaligo wabo po koneama, tama agai te po wai, “Aua, dage da te enaba duga homu dwasianu muani bidi dabe da. Magi baso duga digi te po weyu, ‘Te da bret menio’ te po obawe?
MAT 16:9 Ma, dagego me konebo meniwe? Te bidi sese hauwa 5,000 bidigo te a naga bret sela tuali te augwali tabibaso, tama te bonou wa basket nisu naga pągąwai dawe? Te tiali sę dagego konesiąma gegeda pai dawe?
MAT 16:10 Ma, te a naga olama me si tama bret te bidi sese hauwa 4,000 bidi dabebolo menama tuali, te dagego homugo te naigo nisu naga basket wa pągąwani, te dagego gegeda pisiąma konealusiąyu ebawe?
MAT 16:11 Te eno bret po dagebolo wabe. Magi baso dagego te konebewe? Dage te Farisi hani dabe me te Sadyusi hani dabe dali sigo bret bo dabo nai yisde dua dao,” Jisasgo te po wai.
MAT 16:12 Tama te po odama, tama augwaligo koneai, agai augwalibolo te bret bo dabo nai yisde te po olama wabeo. Menio. Agai te po wali, te augwali te Farisi dabe me te Sadyusi dabe dali sigo ola mabo pode te bugagia dua dao te po olama wali.
MAT 16:13 Te Jisas te gasa tǫba pali, te tǫde te hanu me deli nogi Sisaria tede elaluali, te gavman bidi nogi Filip agai te bulu tonaluali. Tama te badu pelama, tama te sogo Jisasgo agade digi te aga wali pabo bidi dabe augwalibolo hanaluyu, te po wai, “Te we bidi augwaligo homu te Godigo Bidi Mude aga de dawe, augwaligo magi po agade wabo dawe?” Jisasgo aga digi te po wai.
MAT 16:14 Tama augwaligo te po wai, “Mebago te po wabo dao, te nage te baptais mani bidi Jon da po wabo dao. Tama mebago nage ma te polobadu bidali profet bidi Elaija da wabo dao. Tama mebago te po weyu, nage te Jeremaia da po weyu, ma gasa te Godigo po polobadu pusali profet bidi da te po wabo dao.”
MAT 16:15 Tama Jisasgo augwalibolo te po wai, “Tiali goli dagego da, te dagego homugo ma ena de da wabo dawe?”
MAT 16:16 Tama Saimon Pitago po wei ponoyu, te po wai, “Nage da, nage te Godigo te we bidi tau sabo sa muani bidi Krais dao, te nage bidibo ula elalubo Godigo Ogwa dao,” Pitago te po wai.
MAT 16:17 Jisasgo po wei ponoyu, agabolo te po wai, “Saimon, Jongo ogwa, God agai nage dali wiegi yai sę mu yai dao, tama nage wiegi yai homu pemene yao. E tǫde bidi me deligo te po nagebolo me ola mabeo. Menio. Eno Aya dagalude bidibo bidi agai te po nagebolo ola mani dao.
MAT 16:18 Tama eno nagebolo te po obao, nage Pita dao, te nogi page te masigi dao, tama eno ena po wali pabo we bidi hani te masigi daide pedalaibao, te be me deli te genuai masigi daide sę ebo tiwai. Tama te we bidi hani augwali te dwai mobo bidi Satango we bidi ela muabo bomogo augwali me aiyaba elalugobeo.
MAT 16:19 Te eno nagebolo te we bidi Godigo augwali tonalubo madi tomoba pabo tų dabo ki, te ki eno nagebolo mawaibao. Tama menama, tama nago te tǫde ebo niwai kolesaga dąų weyu habu selebaso da, teda Godigo me te aga bidibo madide te kolesaga dąų weyu habu selaibao. Tama nago e tǫde niwai kolesaga yoga sisąma pisigina sąbaso da, teda Godigo me te aga bidibo madide te kolesaga yoga sisąma pisigina sąwaibao,” Jisasgo te po Pitabolo wai.
MAT 16:20 Tama te po olama, agai po bomonama aga wali pabo bidi dabebolo wali, augwaligo gasa bidi dabebolo te aga digi te Godigo sa muani Krais bidi da wali po me wagio, hogwa sao, te po wai.
MAT 16:21 Tama te sogo, te Pitago nage Krais dao po wali sogo, te sogo Jisasgo gagalama, aga wali pabo bidi dabebolo te po haninama ola mawai, “Te mu tama, ena te moni hanu Jerusalemba paibao. Tama pelama, tama tede nosali te Juda dabe genuai bidi dabego me, te pris tobolu bidi dabego me, te Juda dabego bomo yai po page ola mabo bidi dabego me, te augwaligo ena dene genuai mu mawaibao. Augwaligo ena isilama, tama nosali te sela sogo wabo side ena ma hodalueibao,” Jisasgo te po wai.
MAT 16:22 Tama Pitago aga te gasaba odasa aselama, tama bomonama yoga sabo po wabo gagalai, “Genuai Bidi, mu menio. Eno homugo God agai nage dali homu dene eyu, tau siyu yao, te sę nageba pedalidali weyu. Te sę nageba me pedalogobe dao, te homu ebao,” Pitago te po wai.
MAT 16:23 Tama Jisas begelama, Pitabolo te po wai, “Satan, nage ena tudi badu soao. Nago eno pabo tųde tųą palobo nai tiwai dao. Nago Godigo homu kolesaga wali pabeo. Menio. Nago e tǫde bidigo homu kolesaga naga wali peyu, enabolo te po wai,” Jisasgo Pita dali te po wai.
MAT 16:24 Tama te sogo Jisas aga wali pabo bidi dabe augwalibolo te po wai, “Te ena wali niwai bidi me deli asainu da, aga tobade aga digi aga homu aiyaba elaluama, tama agaba asobo niwai sęgę bugagia tolalu ena wali asao.
MAT 16:25 Magi baso meni. Bidi me aga e tǫde bidibo sogo aga tobade aga tigi sese yai da homu eyu da, teda dwaibao, hagawaibao. Me ma, niwai bidi me deli agai homugo ena koneyu, tama ena tobade aga bidibo ula tagaliyu da, teda aga bidabo ula mu saibao.
MAT 16:26 Bidigo e tǫde elalubo tigidali nai aga sai goli, tama te nai sobadi aga mu bidabo ula doloyu da, teda te tigidali sali naigo aga tau sabo usu egobeo. Te bidigo te bidibo ula ma abelainu te mena nai mobaso, te usu me egobeo. Te menio.
MAT 16:27 Magi baso meni. Nosali Godigo Bidi Mu te aga Ayago genuai bomo me, ula me dali, te ensel mobo bidi dabe dali hodobo si asaibao. Te sogo te agai tigidali we bidigo yali kolesaga usu nama wei ponaibao.
MAT 16:28 Eno mu po dagebolo obao, dage megi ede bidalubo bidi dabe me badu isisąbadi, dagego te Godigo Bidi Mu aga we bidi tonalubo sę yabo bomo dali asobo sueibao,” Jisasgo te po wai.
MAT 17:1 Te nosali me sela sogo silama, tama Jisasgo Pita badi, te Jems de Jon ama name si badi, te bidi sela naga Jisasgo selama, tama aga polasa peyu, augwali te moni bobage bulu duba holai. Tede augwa naga bidaluai.
MAT 17:2 Tama augwali te bulu dude bidibadi, te bidi sela augwaligo gedugo Jisas tonalubadi yaide, tama Jisasgo tigi augwaligo gedude gasagi yai pedalai. Aga gesabidi te giliga ge nanobo tiwai yai. Aga ugwa dabe me te gegemani eyu, tama ba nala nisi tiwai mu pedalai dao.
MAT 17:3 Tama tilama, tama teba gasa bidi me si pedalali, te Jisas wali pabo bidi sela augwaligo te bidi si gedugo suai. Te polo pedalali bidi si me bidi nogi Moses, bidi me aga nogi Elaija, te tǫde polobadu mu bidai bidi si dao. Tama augwali si Jisas dali po mibo te bidi selago suali.
MAT 17:4 Tama tibaso, Pitago Jisasbolo te po wai, “Genuai Bidi, da ede bidibo te wiegi yai mu dao. Tama nage te homu eyu da, eno te osogo bidabo be sela sę yaibao, me nage bidabo be, me Moses bidabo be, me Elaija bidabo be tama sę yaibao,” Pitago te po wai.
MAT 17:5 Tama Pitago te po odubadi yaide, tama ula mu ebo pǫ me deligo augwali tigidali polo mesega sagasali. Te pǫgo augwali mesega sagaselama, tama te pǫ tomodu po me weyu te po wali, “E bidi da, eno Ogwa dao, te eno aga godolo mu ebo dao, eno aga dali dwagi yai homu mu ebo dao. Agai wabo po dagego mu odiąo,” te po wai.
MAT 17:6 Tama Jisas wali pabo bidi sela augwaligo te po wabo odobo si, augwali wi genuai mu eyu, augwa tigi tǫba basi guluyu, augwa gesabidi tǫba mugulama, tama augwali wi mu yai dao.
MAT 17:7 Tama Jisas augwali pąba asiyu, agai nogogo augwali diąyu, augwalibolo te po wai, “Dage hodaluao. Dage wi egimio,” te po wai.
MAT 17:8 Tama augwaligo ugwaba tonono holali, te bidi si subeo. Te Jisas agaduba naga dolalubo suali.
MAT 17:9 Te augwali te bulu dude bidali tagalama dulubadi, Jisasgo bomo elama, augwalibolo te po wai, “Dagego megi suali sę po te gasa bidi dabebolo wagio. Dagego te po osogo hogwa sao. Tama nosali te Godigo Bidi Mu aga isama, tama ma hodalobode, tama te sogo dagego megi suali sę po te we bidibolo wagameo,” Jisasgo te po wai.
MAT 17:10 Tama Jisas aga wali pabo bidi dabego agabolo hanalu wali, “Tiali goli, magi baso te da Juda dabego bomo yai po page koneai bidi dabe augwaligo te polobadu e tǫde bidali bidi Elaija bolo hasia asaibao po obawe?”
MAT 17:11 Tama agai po wei ponoyu, te po wai, “Awe, mu dao, Elaija aga ma asama, agai tigidali nai hasia dodolagasaibao.
MAT 17:12 Tiali goli eno dagebolo obao, Elaija aga asali goli, tama te bidi dabe augwaligo aga konebeo. Menio. Augwa digi augwaligo augwa ebo haniani dwai kolesaga wali peyu, aga dali dwai sę yai. Te tiwai kolesagago naga augwaligo te Godigo Bidi Mu dali me dwai sę eyu agabolo dene mayu yaibao,” te po wai.
MAT 17:13 Jisasgo te po tiwai po obaso, tama aga wali pabo bidi dabe augwaligo koneani, agai augwalibolo te baptais mani bidi Jonde po wai, te Jon aga Elaijago sę yagasai dao.
MAT 17:14 Te Jisas dali, aga wali pabo bidi me sela hodobo augwali te bulu du dulama, tama te genuai we bidi hani bidalubo madi sabolali. Tama augwali teba sabalobadi, tama bidi me deli Jisas pąba kidu sugunagaselama,
MAT 17:15 tama te bidi agai te po wai, “Genuai bidi, nago eno ogwade homu dene eyu tau sao. Aga te esela pelama, tama aga tigi dwai mu bidibao. Awe, hauwa sogo aga te siaba tulaluyu, tama hauwa sogo me aga te ąįba tulaluyu ebo dao.
MAT 17:16 Tama naga wali bilibo bidi dabego te aga usu ilimainogo eno aga augwali pageba sesai dao. Tiali goli augwaligo aga geselainogo yali usu isąbaso tagalai dao,” te po wai.
MAT 17:17 Te Jisasgo te po wei ponoyu, bomonama te po wai, “Dagego homu enaba begi pisąwai we bidi hani, tama dagego homu gagea pidubao. Ena dage dali nisu naga sogo me bidigowe? Nisu naga sogo eno dagego sęgę tologowe? Dagego te ogwa eba sesao,” wali.
MAT 17:18 Tama te ogwa sesama, tama Jisasgo te dwai haubo noma bidibolo wado ilibo po obaso, tama agai te ogwa dali bidali tagalama pabo si da, tama megi naga tama te ogwago gasi sia sai dao.
MAT 17:19 Te nosali te Jisas aga wali bilibo bidi dabe naga agaba aselama, te po wai, “Magi baso dago te dwai haubo sela sąwainogo ebo te usu ebewe?”
MAT 17:20 Tama agai te po augwalibolo wai, “Dagego homu Godiba dwasianu naga begi pobaso, dagego te sę yainogo ebo te usu meni dao. Awe, eno mu po dagebolo obe dao, te dagego Godiba duga homu begi pabo kolesaga te dwasianunu, te kemeni ge tiwai usu elalubaso da, teda dagego e bulu dubolo te po weyu da, ‘Nage hodaluama tama u badu pao’ wabo si da, tama aga teba paibao. Tama dagego te tiwai bomai sę tigidali ebo te usu yaibao.
MAT 17:21 [Tiali goli dagego te gedu haluasa po wabo me, te osogo nai gisilibo sę me, te sę si isiąbaso da, teda dagego te tobage gasa dwai haubo noma bidi sela sąwainogo ebo te usu egobeo. Menio.]” Jisasgo te po wai.
MAT 17:22 Augwali hodobo te Galili tǫde deliba sisinama, tama Jisas aga wali pabo bidi dabebolo te po wai, “Augwaligo ena te Godigo Bidi Mu e tǫde bidigo nogoba mawaibao.
MAT 17:23 Tama augwaligo aga ela muaibao. Tama sela sogo wabode te Godigo bomogo aga ma hodolobaso, te aga ma hodalueibao,” Jisasgo te po wai. Tama aga wali pabo bidi dabe augwali homu sęgę mu te pode yai dao.
MAT 17:24 Te nosali te sogo augwali te Kaperneam hanuba sabolama, tama te Moni Lotu Be tempel tau sabo takis mone sabo bidi augwali te Pita pageba aselama, agabolo te po wai, “Te dagego po ola mabo bidi agai te Moni Lotu Be tempelba te takis mone mubo dawe?” te po wai.
MAT 17:25 Tama Pitago te po wai, “Awe, magiai, te mabo dao.” Tama aga te po olama, tama aga beba palima, te be tomoba pelama, tama agai po wasiąbadi hasia bolo Jisasgo agabolo hanalu wai, “Saimon, nago magi homu ebawe? Te e tǫde tuni bidi augwaligo te mone sabo haniani takis sę niwai bidide sabo dawe? Augwaligo augwa hani we bidi dali siyu, ma gasa hani we bidide sogowe?”
MAT 17:26 Tama Pitago te po wai, “Te gasa we bidi hanide sabo dao.” Tama Jisasgo agabolo te po wai, “Awe, tama tibaso te tuni bidi aga hani bidi augwaligo te takis mone magobeo,” agai te po wai.
MAT 17:27 Aga homu agai te takis mone masiąbaso da, te usu da, te homu eyu tama agai Pitabolo po me wai, “Tiali goli, e takis sabo bage augwaligo da si dali dwai homu idali weyu, tama nage te sigi ąįba pelama, te sųgų sabo huk te ąįba sągi pao. Tama nago hasia sabo sųgų, te nago selama penane pedegao, tama nago te sųgų tomode te mone ge me deli sueibao. Te mone ge nago selama, augwalibolo mao, te dadi si talua sigo takis mone usu nama muaibao,” Jisasgo te po wai.
MAT 18:1 Tama te takis mabo po wali sogo aga wali pabo bidi dabe augwali Jisas pageba pelama, te po wai, “De mu te Godigo we bidi tonalubo madi genuai bidi mu dawe?”
MAT 18:2 Tama Jisas agai te wai bǫų me deli i olama asobo si, te wai bǫų agai augwali tomoba sela aselama dodolali.
MAT 18:3 Tama agai te po wai, “Eno mu po dagebolo obao, te dage e wai bǫų tiwai pedelama hasegelesiąbaso da, ta dage te Godigo we bidi tonalubo bomo tomoba munu me pogobeo.
MAT 18:4 Te mena bidi aga digi te aga ebo kolesaga dabe dali aga aiyaba elaluama aga nagamea homu eyu, e wai bǫų tiwai gagawali da, te tiwai kolesaga ebo bidi agai te gasa Godigo tonalubo we bidi dabe augwaligo yali kolesaga aiyaba elaluaibao.
MAT 18:5 Tama mena bidigo enade homu beagasu wiegi yai homu eyu, tama e tiwai wai bǫų me tau sobaso da, teda agai te wai bǫų naga tau siyu ebeo. Te ena agai tau siyu ebao.
MAT 18:6 Tiali goli bidi mego e tiwai wai pulubago enaba homu begagaselama, te konealubo po dąų wali te aga dwai sę ebo tomoba kegeyu tulaluyu da, tebo bidigo dwai sęgę mu saibao. Tama aga te dwai sę idali weyu, te bidi dabe augwaligo aga magede moni sęgę yai masigi te bonogo kęnama, te bidi te tamu ąį moni ge tomoba sela sąyu aga tede wę tuyu poma peyu elama isigi sogo da, teda te usugi dao. Te sę agaba pedaligi sogo da, aga te moni dene sigi menigi da.”
MAT 18:7 “Magi baso meni. Te tǫde bidi dabe augwaligo te bidi meba te dwai sę ebo kolesaga tomoba kegelama, te bidi meba tulalubo dao. Te augwali kegali bidi dabego moni dene mu saibao. Mu dao, te tobage haniani dwai kolesaga pedalaibao. Tiali goli te dwai sę ebo kolesaga tomoba gasa bidi kegebo bage, augwalide hobede mu yao, augwaligo moni dene mu saibao.
MAT 18:8 Me ma, te naga nogo ma sągągo te nage dwai sę eboba kegeyu tama nage te kolesagaba tulaluainogo idali weyu, tama nago te nogo ma sągą te togwa sąyao. Tama tiyu te nago nogo me deli naga elaluyu, ma nago sągą me te me deli naga elaluyu, tama nago te sesemane sogo bidada pabo ula sabo te usu dao. Tiali goli nago nogo si ma te nago sągą si me elaludu da tama augwaligo dwai sę eyu, nage te genuai dene mu siyu bidada pabo te isisąbo sia dabo madi teba peyu da, te dwai mu dao.
MAT 18:9 Tama me ma, naga gedu mego nage te dwai sę eboba kegeyu, tama nage tulaluainogo ebaso da, teda nago te gedu guda sąyao. Tama nago gedu deli naga elaluyu, te naga sesemane sogo bidada pabo ula sabo, te usu dao. Tiali goli nago gedu si elaluyu, tama augwaligo nage te dedage page sia dabo madiba sąyu da, te dwai mu dao.
MAT 18:10 Dage dua bugagia dao. Tiyu dagego te homu eyu, e dwasianu we bidi tomode me deli te olo nai tiwai da wagimio, augwalide tagala wagimio. Menio. Eno dagebolo te po obao, te Godigo bidibo madide bidibo ensel te mobo bidi dabe augwaligo sesemane sogo te eno Aya dagalude bidibo subo dao. Tama tiyu, te ensel mobo bidi dabego e tiwai dwasianu we bidi hani tonalubo dao.
MAT 18:11 [Magi baso meni. Te Godigo Bidi Mu agai te hagawai we bidi dabe augwali ma sagasu asai dao.]” Jisasgo te po wai.
MAT 18:12 Jisasgo te po wai, “Dagego magi homu ebowe? Ma, te bidi me deligo kibu sipsip te 100 sipsip elaluai baso da, tama te sipsip me deli hagabaso da, teda te bidigo magi yaibawe? Te agai te 99 sipsip te bulu dude nai tuyu bidibadi tagalama, tama agai te hagawali sipsip me deli gegebo sę gagalaibawe?
MAT 18:13 Awe, eno mu po dagebolo obao, te agai gegali sipsip subaso da, teda agai te hagasiąwani bidibo sipsip dali wiegi yai homu yai goli, agai te hagawai sipsip ma sali te sipsip delide wiegi yai homu pemene mu yaibao.
MAT 18:14 Tama te tiwai naga duga Aya dagalude bidibo bidi agai e dwasianu wai puluba me deli hagaidali homu ebo dao,” Jisasgo te po wai.
MAT 18:15 “Te nago ama agai dwai kolesaga nage dali ebaso da, teda nage pelama dugaduba si digi bidiyu, tama nago aga dwai sę yali kolesaga te agabolo haninama ola mao. Tama agai nago po odobaso da, teda naga ama te dwai sęba kegali te nago aga ma oda sabo tiwai ebo dao, te dage si deli homu naga yaibao.
MAT 18:16 Me ma, agai nago po wabo odobo hagela ebaso da, teda nago te gasa bidi deli ma bidi si selama, tama agaba ma pao. Magi baso meni. Te Mosesgo asęani bomo yai pogo te tama po wabo da, ‘Te dwai kolesaga dodolobo po te bidi si selago odiąo, augwaligo “Te mu po dao” nosali omainogo te tama yao.’
MAT 18:17 Tiali goli agai augwaligo po odobo me hagela ebaso da, teda dagego te Godigo po odobo we bidi hanibolo te po pusao. Tama agai te Godigo po odobo we bidigo po me odisąbaso da, teda dagego homugo aga te Godigo po odisąbo bidi, ma te takis mone sabo sę ebo dwai bidi tiwai da homu eyu, aga sula tagalao,” Jisasgo te po wai.
MAT 18:18 “Eno mu po dagebolo obao, dagego e tǫde dąų weyu habu selali nai te nai tigidali te Godigo me te aga we bidi tonalubo madide me dąų weyu habu selaibao. Ma, dagego e tǫde pisigina sąbo nai te nai tigidali te Godigo me te aga we bidi tonalubo madide me pisigina sąwaibao.
MAT 18:19 Tama eno po me dagebolo obao, e tǫde dage tomode bidi me sigo deli homu kolesaga eyu, tama nai me deli sainogo augwali sigo gedu haluasa po obaso da, teda eno Aya dagalude bidibo bidi agai te nai te bidi sibolo mawaibao.
MAT 18:20 Awe, te bidi si ma selago eno nogide bulu me deliba sisinabaso da, teda ena augwali tomode bidaibao,” Jisasgo te po wai.
MAT 18:21 Tama te sogo Pita Jisas pageba asama tama aga dali te po wai, “Genuai Bidi, nisu naga sogo ena amago dwai sę enabolo emainogo yai, tama agai enabolo dwai sę yali te sęgę eno nisu naga sogo sela sągowe? Ma a naga olama me badu nogo si tama sogo te sęgę sela sąbo usu egowe?” Pitago Jisas dali te po hanalu wai.
MAT 18:22 Tama Jisasgo Pita dali te po wai, “Eno nagebolo te a naga me badu nogo si tama sogo te po wabeo. Menio. Eno te po obao, nago naga amago dwai sę yali te nago sesemane sogo agai te dwai sęgę sela sąyao, eno te po nage dali obao.
MAT 18:23 Magi baso meni. Te God agai we bidi tonalubo sę e tiwai dao, te tǫde gavman tuni bidi me deligo aga sę tonalubo bidi dabego negeli sali nai dodolainogo yai.
MAT 18:24 Tama agai te nai negeli sali dodolobo sę ebo gagalama, tama augwaligo bidi me deli aga pageba sela asai, tama te sela asali bidigo negeli sali mone te genuai mu tama te mone nogi hauwa mu dao.
MAT 18:25 Tiali goli te bidi agai te negeli sali mone wei ponabo mone usu mu menio. Tama tibaso, te gavman tuni bidigo augwalibolo te po olama, ‘Te bidi me aga we wai dabe dali tama aga doado bage dali tigidali munama, tama gasa bidigo abelama, tama te negeli sali me badu ponabo mone sao. Aga gasa bidigo masigi sasiąbo sę ebo bidi bidaibao,’ te po wai.
MAT 18:26 Tama te sę tonalubo bidi aga te tuni bidigo sągą pagede tǫba kidu sugunama, tama te tuni bidigo homu bedegau iliyu, gonobo po weyu, te po widu geai, ‘Nago ena hobede elama, ena tonaluao. Tama eno nage dali negeli sali tigidali nagebolo wei ponaibao,’ wali.
MAT 18:27 Tama genuai bidigo te sę tonalubo bidi aga hobede ebaso tagalai, tama agai te olo negeli sali mone me tagalai.”
MAT 18:28 “Tama te sę tonalubo bidi buluba solama, tama aga te gasa sę tonalubo bidi me deli aga abagi me suali, tama agai te bidibolo negeli polobadu mane pololai masigi nogo si elaluai. Tama agai aga abagi te bidi dogoniba kęą sigi pelama, tama bomo eyu, te bidi poma peyu, tama agai agabolo te po wai, ‘Nago negeli sali mone tigidali wei enabolo ponao.’
MAT 18:29 Tama aga abagi te bidi tǫba kidu sugunama, tama agabolo homu bedegau ilibo po weyu te po wai, ‘Nago ena hobede elama tonaluao. Eno nago mone negeli sali wei ponaibao,’ wali.
MAT 18:30 Tiali goli te bidi aga hagela yai. Tama agai aga abagi te bidi kalabusiba mugi pai, tama te bidi tede bidibadi agai negeli sali wei usu numainogo tiwaibao.”
MAT 18:31 “Tama te tuni bidigo sę ebo bidi meba augwaligo te kolesaga ebo sulama, tama augwali dwai homu mu yai. Tama augwali pelama, augwa genuai bidibolo te po tigidali pusigi pai.
MAT 18:32 Tama tibaso, te genuai bidigo te bidi i olama, tama aga dali te po wai, ‘Nage dwai kolesaga ebo sę tonalubo bidi dao. Hasia nage ena dali gela obaso, tama nago te negeli sali nai tigidali eno olo mu tagalao po wai dao,’ te genuai bidigo te sę bidi dali te po wai.
MAT 18:33 ‘Tama te sogo eno nage hobede yai dao. Tama magi baso nago me naga abagi te gasa sę tonalubo bidi hobede yai meniwe?’ wali.
MAT 18:34 Tama genuai bidigo aga te dene maiabo bidi dabego nogode muai, te kalabuside, tama te bidi tede bidibadi agai nai negeli sali tigidali usu numainogo tiwaibao.
MAT 18:35 Te tiwai me, dagego homu mu esiąyu, dagego duga ama dabego dage dali yali dwai sę sela sąsiąwani da, teda eno Aya dagalude bidibo bidi agai me te dagego dwai sę ebo te aga sela sągobeo,” Jisasgo te po wai.
MAT 19:1 Te Jisasgo te sę tonalubo bidi dabede po digi po begelai po wali silama, tama agai te Galili tǫde bidali tagalama, tama te moni pabo ąį Jordan bolama, te Judia tǫ badu pai.
MAT 19:2 Tama we bidi hauwa augwali aga wali asai. Tama tede agai augwaligo gasi dabe usu ma ilai.
MAT 19:3 Tama te Farisi hani dabe meba agaba aselama, tama augwaligo agai geda mubo po wagowe te homu eyu, tama augwaligo aga usu sagasai. Augwaligo te po wai, “Nago magi homu ebowe? Ma, dago bomo yai pode te bidigo aga homu naga wali peyu, tama aga we te tigidali magi sęde sela sąbo te usu egowe?” te po wai.
MAT 19:4 Jisasgo po wei ponoyu, te po wai, “Te dagego polobadu te asęani po me nedai meniwe? Agai te po wai dao, ‘Polobadu mu Godigo tigidali nai nigali sogo agai te bidi me we augwali nigilama pedelai dao.’
MAT 19:5 Tama agai te po me wai, ‘Tama tiyu, bidigo aga aya ida tagalama, tama aga we dali mu kęą pelama, tama augwa si te deli tigi tiwai mu pedeliyu bidaibao,’ te po wai.
MAT 19:6 Tama tibaso, augwa si hasia tedali tedali bidali tiwai egobeo. Menio. Augwa si te dedeli tigi tiwai mu yaibao. Tama Godigo te dąų olama kęnani nai te bidigo me togolamuo,” Jisasgo te po wai.
MAT 19:7 Tama te Farisi dabe augwaligo agabolo te po wai, “Tama tiyu da, te magi baso Mosesgo polobadu te bomai po mayu, te bidigo we sela sąbo po te pasde asęnama te webolo menama, tama aga sela sąyao po magi baso wai dawe?”
MAT 19:8 Te Jisasgo augwalibolo te po wai, “Dage te masigi homu tomoba sąwai elalubo bidama dobaso, tama tiyu Mosesgo suali dagego te tiwai kolesaga ebaso, agai dagego wąį dabebolo te we sela sąbo po wai dao. Tiali goli te Godigo tigidali nai nigali sogo te tiwai kolesaga meni yai dao.
MAT 19:9 Eno, eno e tiwai po dagebolo obao, te bidi mego wego te dwai penani sę me isąbadi, tama bidigo te we aga sela sąnama gasa we sobaso da, teda te bidi aga digi te dwai penani sę ebo kolesagaba kekebo sę tiwai ebo dao,” Jisasgo te po wai.
MAT 19:10 Tama aga wali bilibo bidi dabego agabolo te po wai, “Te bidi aga we dali bidibo kolesaga te tiwai ebaso da, teda te bidigo we sabo sę te tagalabo digi dao, aga olo bidao,” te po wai.
MAT 19:11 Tiali goli agai augwalibolo te po wai, “Te bidi tigidaligo te we sisąbo po me sabo usu egobeo. Menio. Godigo te bidi mebabolo naga te po mabo dao.
MAT 19:12 Magi baso meni. Te haniani bidi augwali te we me sogobeo, te usu egobeo. Augwali meba bidi te augwa idago ame nani sogo te augwali tama tiwai naga ame nai, aga tigi dwali. Tama meba ma te gasa bidi dabego augwaligo domo ge dinama, tama augwaligo we me sogobeo. Tama mebago te Godigo we bidi tonalubo sę asomainogo tiyu, te we sabo sę habu selebo dao. Bidigo te po agai sainogo usu ebo bidi da, teda agai te po somainao,” Jisasgo te po wai.
MAT 19:13 Te sogo te we bidi augwaligo te dwasianu wai puluba meba te Jisas agaba odasa asai. Augwaligo agabolo te po wainogo te nago nogo te e wai puluba tobolude munama, bugagia bidimainogo gedu haluasa po wao. Tiali goli te Jisas wali pabo bagego te bidi dabego te po wainogo asobo sulama, tama te we bidibolo wado po weyu, te sę ebo tagalao te po wai.
MAT 19:14 Tiali goli Jisasgo te po wai, “Dagego te wai puluba augwali ena pageba asomainao,” po wali. “Dagego augwali dąų me wagimio. Menio. Te e wai pulubago ebo homu kolesaga tiwai ebo we bidi te augwali Godigo we bidi tonalubo madigi tomoba asagameo,” wali.
MAT 19:15 Tama agai nogo augwali tobolude munama, bugagia bidabo mobo mabo po wai. Tama nosali aga te bulude bidali tagalama, gasaba pai.
MAT 19:16 Te me sogo bidi me deli Jisas pageba sabolama, te po wai, “Po ola mabo bidi, eno mena tiwai wiegi yai kolesaga elama, tama ena te bugagia sesemane sogo bidada peyu, bidada pabo ula sogowe?” Te bidigo te po wai.
MAT 19:17 Tama Jisasgo agabolo te po wai, “Te enabolo magi baso nago te wiegi yai sęde hanalu obawe? Te me deli digi naga te aga wiegi yai dao, te God dao. Tama nage te wiegi yai bidabo ula sabo homu ebo wida, teda nago te Godigo bomo yai po wali pao.”
MAT 19:18 Tama te bidigo agabolo te po wai, “Mena bomai po dabewe?” Tama Jisasgo te po wai, “Te e po dabe dao: ‘Nago bidi ela mugio. Nago te penani sę egio. Nago nai wi sigio. Nago gasa bidide tibo po ola magio.
MAT 19:19 Nago naga aya idago po wali pao. Tama nago gasa bidi dabe dali dwagi yai homu eyu godolo yao, te nago naga digi naga dwagi yai homu eyu godolo ebo tiwai kolesaga te gasa bidi dabe dali me tama naga tiao,” wali.
MAT 19:20 Te gesi bidigo agabolo te po wai, “Te tigidali bomai po eno wali pela silai dao. Eno magi sę me deli yabo te habuge elalubowe?”
MAT 19:21 Tama Jisasgo agabolo te po wali, “Te nage doloba pai mu pedalabo homu ebaso da, teda nage pelama, nago doado bage tigidali te bidi dabego abelemainogo munama, tama nago te sali mone te magi nai meni yai we bidi augwalibolo te mone mao. Teda nago nosali sabo wiegi yai nai hauwa mu te Godigo bidibo madide sisi ilai elaluaibao. Tama tilama, nage ena wali asao,” Jisasgo te po wai.
MAT 19:22 Te gesi bidigo te po wali odolama, tama aga homu sęgę mu yali, tama aga beba ma pai. Magi basowe, te agai doado bage hauwa mu elaluai.
MAT 19:23 Tama Jisasgo aga wali pabo bidi dabebolo te po wai, “Eno mu po dagebolo obe dao, te mone hauwa munalubo bidi aga te Godigo we bidi tonalubo kolesaga te tomoba painogo te sinabo sę mu yaibao.
MAT 19:24 Eno dagebolo te po ma obe dao, te moni kibu kamel te ugwa hobolo medabu dedage tomoba painogo te sinabo sę yaibawe? Awe, tiali goli te mone hauwa elalubo bidi te Godigo we bidi tonalubo kolesaga tomoba painogo sinabo sę genuai mu yaibao,” te po wai.
MAT 19:25 Te aga wali bilibo bidi dabe augwaligo te po wabo odama, augwali te pode noma mu sali. Tama augwaligo te po wai, “Tama te tiwai ebaso da, teda de Godigo aga ma selama, tama aga te bugagia sesemane sogo bidada pogowe?”
MAT 19:26 Tama Jisasgo augwali dolo mu ponama tonalu, tama te po augwalibolo wali, “Te e tǫde bidi dabe augwaligo te sę ebo te usu me egobeo. Tiali goli God da, te tigidali sę ebo usu yaibao,” wali.
MAT 19:27 Jisas agai te po olama, tama Pitago agabolo po wei ponoyu, te po wai, “Da suao, te dago tigidali nai dabe tagalama, nage wali asobao. Te dago magi nai saibawe?”
MAT 19:28 Tama Jisasgo augwali dali te po wali, “Eno mu po dagebolo obao, te tigidali nai gesi noma ma pedalobo sogo, te Godigo Bidi Mu aga genuai nogi me bomo dali te sogo te tuni bidi duabo sia saide dulaluyu, te sogo te dage, dage ena wali asali bidi dabe me, dage tuni bidi dabe bidiyu, tama te 12 wali te duabo sia saide dualama, tama te 12 te Israel hani augwali tonalubo sę yagameo.
MAT 19:29 Tama tigidali we bidigo eno nogiba homu tia sagaselama, tama augwaligo augwa be dabe me, augwa ama dede me, abe dede me, te augwa ida aya me, augwa wai puluba me, gi dabe me tagalama, tama ena wali asali we bidi da, te augwaligo te tagalali nai wei genuai mu ma saibao. Augwaligo nosali sabo naigo te polobadu tagalali nai edelaibao. Tama te sesemane sogo bugagia bidada pabo wiegi yai ula me saibao.
MAT 19:30 Tiali goli, te megi polasa pali bidi dabe hauwa augwali nosali badu ma igisulama, te nosali badu asali we bidi dabe hauwa te pologi soaibao,” Jisasgo te po wai.
MAT 20:1 “Magi baso menio. Te Godigo we bidi tonalubo kolesaga te bidi me deligo tǫ hauwa elalubo bidigo yali kolesaga tiwai dao. Te kigamu digi mu te bidigo aga du walobo bono gide sę yabo bidi sesa biligi pai.
MAT 20:2 Te augwaligo te mone ge nogo si sabo usu da olama, te mone ge nogo si te sogode saiba po usu da obaso, tama agai wain bono du giba sę egi pomainogo augwali tagala palai.
MAT 20:3 Tama te giliga nanobode aga asiyu suali, te bidi meba olo te bidi sisinama bidibo digi dodolalubo suai.
MAT 20:4 Agai augwalibolo te po wai, ‘Dage me pelama, te wain giba sę egi piąo, tama te sę ebogo sabo mone tiwai usu nama, te eno dagebolo mawaibao,’ wali.
MAT 20:5 Tama po obaso, augwali pai. Tama te giliga tomode me te be pio ebode me aga ma peyu, tama naga tiwai.
MAT 20:6 Tama be pio giliga dega sabode aga ma pelama suali, te bidi dabe meba olo dodolalubo suai. Tama agai augwalibolo te po wai, ‘Magi baso dage moni e giligade olo mu dolaludubadi geaniwe?’ te po wai.
MAT 20:7 Tama augwaligo po wei ponoyu, te po wai, ‘Te dabolo sę maiabo bidi me menio.’ Tama agai augwalibolo te po wai, ‘Dage me te wain giba pelama, sę egi piąo.’
MAT 20:8 Tama te be pio yai digi, tama te wain bono du gi page bidigo te aga sę ebo bidi dabe tonalubo bidibolo te tiwai po wai, ‘Nago te sę egi pali bidi dabe augwali i olama, mone mao. Nago te nosali badu mu sę yagasali bidi dabe gagalasa, tama nago augwali mone mena mena pelama usu nigibu, tama te polasa kigamu sę egi pali bidi dabe mone simaniyu augwali mone nosali mao,’ te po wai.
MAT 20:9 Tama i olama, tama te giliga dega sigi pabode sę gagalama yali bidi dabe, augwali pedalama, tama augwali deli deligo te mone ge nogo si, nogo si mone ge sai.
MAT 20:10 Tama te sę kigamu digi polasa pelama sę gagaligi pali bidi dabe, te augwali aselama, te augwaligo homugo te augwali mone hauwa saibao homu yai. Tiali goli menio. Augwaligo me te mone ge nogo si, nogo si, mone ge naga sesa palio.
MAT 20:11 Augwaligo te mone selama, tama augwaligo te gi page bidi dali dwai homu eyu, po wabo gagalali.
MAT 20:12 Augwaligo dwai homu eyu, te po wai, ‘Te nosali mu aselama sę yagasali bidi dabe, augwaligo sę te hauwa sogo ebeo. Tiali goli dago kigamu mu sę egi pali te megi e sogoba usu nagasobao, tama giligago da tigide ulali dene yalio. Tama tiali digi nago augwalibolo mani mone te dabolo megi e mani mone tiwai si manio,’ wali.
MAT 20:13 Te gi page bidigo augwali tomode bidi me delibolo po wei ponai. Agai te po wai, ‘Abagio, eno nage dali dwai sę ilibeo. Te dadi sigo te mone ge nogo si sabo po dodolama, usu da po wai meniwe?
MAT 20:14 Nago naga mone selama, tama nage pao. Eno homugo te eno nagebolo mani mone, tiwai naga eno te nosali sę yagasali bidi agabolo mawainogo ebao.
MAT 20:15 Te mone te eno sę ebo nai dao. Ma, eno te ena monede digi te tiwai homu egobewe? Eno wiegi yai kolesaga aga dali ebaso, nago homu dwai ebawe?’ gi page bidigo te po wali,” Jisasgo te po wai.
MAT 20:16 Te Jisasgo te po silagasu wabo po weyu, te po wai, “Awe, tama tiwai te nosali mu yali bidi dabe augwali te pologi soaibao. Tama te polali bidi dabe augwali nosali badu ilaibao,” te po wai.
MAT 20:17 Te Jisas te moni hanu Jerusalemba pobadi, te aga wali pabo bidi dabe nogo si olama sągągo si bidi dabe augwali naga agai selama, tama olo we bidi tagalama tedali pai. Te tųdu pelayu, Jisasgo augwali dali po weyu, te po wai,
MAT 20:18 “Odiąo, te megi da te moni hanu Jerusalemba holobao. Tama tede augwaligo te Godigo Bidi Mu te pris tobolu bidi dabebolo badi, te bomo yai po page koneai bidi dabe dali, augwaligo bomoba aga mawaibao. Tama augwaligo aga po tų ilama, tama aga ela muabo po mia saibao.
MAT 20:19 Tama augwaligo aga te Juda hani isąwai bidi dabe augwaliba mawaibao, te bagego agabolo te dwai usubo sę eyu, te posobo po weyu, tama aga bigo eliyu elama, tama aga ni pedaiba daganama, te neligo enama isaibao. Tama bidama, te sela wali sogode te aga ma hodaluaibao.” Jisasgo te po agade tiaibao olama te po wai.
MAT 20:20 Tama te sogo te bidi Sebedi aga ogwa sigo ida, te we aga ogwa si dali te Jisas pageba asai. Tama te we aga te tǫba kidu sugunama, tama agabolo te nai me deli sainu te po agabolo te po hanalu wagasai.
MAT 20:21 Tama Jisasgo agabolo te po wai, “Nago magi nai godolo ebowe?” wali. Tama agai Jisasbolo te po wai, “Nago po obaso da, teda eno e ogwa si te nago we bidi tonalubo madigi nage pąde dulalumainogo, te me nago dolo nogo badu bidiyu, te me nago pobase nogo badu bidiyu emainao.” Te bidi sigo idago te po wai.
MAT 20:22 Agai te tiwai po obaso, tama Jisasgo te po wei ponoyu, te po wai, “Dage sigo te nai po page bugagia konesiąma dagego te hanalu obao. Dage sigo eno te ąį tuainogo ebo kapde te ąį dage sigo me tubo usubo gilama, te eno sabo dene tiwai gilama te dage sigo sabo usu egowe?” Tama augwali sigo agabolo te po wali, “Te da sigo tubo usu yaibao.”
MAT 20:23 Tama Jisasgo augwali sibolo te po wai, “Mu dao, te dage si eno kapde ąį tueibao. Tiali goli de mu te eno dolo nogode me pobase nogode me dua yabo, te sę eno egobeo. Menio. Te tobage bidi dabe bidabo bulu dabe te eno Ayago naga augwali dua yabo digi sisi yai elalubao,” Jisasgo te po wai.
MAT 20:24 Tama te nogo si bage augwaligo te po wabo odolama, tama augwaligo te ama name si dali dwai homu eyu, wado po weyu yai.
MAT 20:25 Tiali goli Jisasgo augwali i olama, tama aga pageba asobo si, tama agai te po wai, “Dagego koneani, te Israel hani isąwai bagego tuni bidi dabe augwaligo bomonama augwa hani we bidi dabeba sęgę muyu, tama naga tiyu augwali tonalubo dao. Tama me te genuai bidi dabe augwaligo bomo mu elama, te we bidigo augwaligo po wali pomainogo ebo dao.
MAT 20:26 Tiali goli te tobage sę ebo kolesaga dage tomode me elalugobeo. Menio. Te bidi mego aga te genuai bidi te dage tomode bidainogo da, aga te dagego sę ebo bidi bidao.
MAT 20:27 Tama bidi me aga te dagego genuai polalubo bidi bidainogo da, aga te dagego masigi sisąbo sę ebo bidi tiwai bidao.
MAT 20:28 Te tiwai naga gilama te Godigo Bidi Mu aga te bidi mego tau somainogo me asobeo. Menio. Aga asali te augwali digi tau somainogo asali, tama agai bidibo ulago te we bidi hauwa mu ma abelemainogo asai dao,” Jisasgo te po wai.
MAT 20:29 Te augwaligo te Jeriko hanu tagalama, te Jerusalem hanuba pabo ma gagalali. Tama we bidi hani genuai mu augwaligo Jisas wali aselawai.
MAT 20:30 Tama gedu widai bidi si te tų pąde dulalulai. Tama te bidi sigo Jisas asobo po odama, tama te bidi sigo bomonama i weyu te po wai, “Genuai bidi, nage te polobadu bidali bidi Devitgo hani bidi dao, nago dadi si dali homu dene eyu, da tau siyu yao,” wali.
MAT 20:31 Tama te we bidi augwaligo te bidi si hagea siyu, po bomonama penane pania sao po wai. Tiali goli te bidi sigo po dagą geninama mu weyu, bomonama te po wai, “Genuai bidio, nage te polobadu bidali bidi Devitgo hani bidi, nago dadi si homu dene elama tau sao.”
MAT 20:32 Tama Jisas pelama, sagia sigi pelama dolaluali, te bidi si i weyu te po wai, “Dage sigo homugo eno magi sę dage sibolo emainogowe?”
MAT 20:33 Tama te gedu widai bidi sigo agabolo te po wai, “Genuai bidio, da sigo homugo nago da si gedu ma pedalao,” wali.
MAT 20:34 Tama Jisasgo augwali si homu dene yali, tama agai nogo te bidi si geduba muani, tama megi naga tama te bidi sigo gedu pedama wiegi yai ma yai. Tama augwali sigo Jisas aga wali pai.
MAT 21:1 Te augwali Jerusalem pąba sabolama, te dwasianu hanu nogi Betfage teba sabolali, te Oliv bulu du pąde elaluai. Tama Jisas aga wali pabo bidi si tagala paliyu, tama augwali sibolo te po wai,
MAT 21:2 “Dage sigo te pąde elalubo dwasianu bulu tomoba pelama, suao. Tama polo dage sigo te kibu donki me deli augwaligo te bonogo gebelai dolalubo sueibao, tama te donki aga wai dali dao. Tama dage sigo te gebelali bono pisiginama, te kibu donki si ena pageba selasa asao.
MAT 21:3 Tama dage sigo te donki si sela sobadi, bidi me deligo dage si dali po me obaso da, te bidi dali dage sigo te po wao, ‘Woo, Genuai Bidigo sę e donki side elalubo’ po wao. Tama te po olama, tama polo agai te kibu donki si dage sigo sela piąo te po waibao,” Jisasgo te po wai.
MAT 21:4 Te sę pedalobo si te Godigo sę nosali pedalabo po pusali bidigo polobadu wali po usu numainogo yai. Agai te po wali, “Te Saion bulu we bidi dali te po wao, ‘Suao, dagego tuni bidi duga pageba asobao. Agai nagame yai kolesaga dali, te aga kibu donki daide naga dualasa asobao. Tama aga te walu sabilibo donkigo wai tede dualasa asobao,’ te po wao,” profet bidi me deligo te po polobadu wai.
MAT 21:6 Tama aga te wali pabo bidi sigo te Jisasgo augwali si dali wali po wali pelama tama tiwai.
MAT 21:7 Tama tega sigo te donki aga ida dali te wai dali me sela asai, tama augwa si gudubo ugwa te donki si tudiba muai. Tama Jisas aga te donki wai tudide dualasa pabo gagalai.
MAT 21:8 Tama aga pobadi we bidi hauwa augwaligo augwa gudubo bobobage ugwa dabe te tųde wawa sili pelama, muna muna pai. Tama bidi meba augwaligo yabe elalubo ni nologo togolama, tųde muna muna pai. Genuai bidi asobao homu eyu tama tiwai.
MAT 21:9 Tama te bidi Jisas tomoba ilama peyu, tama we bidi meba augwali polasa pabo bage dali, nosali asobo we bidi dali augwaligo bomo elama i weyu, te Jisasgo nogi ugwaba siyu, te po wai, “Dago nage dali dwagi yai homu pemene ebao, te nage Devitgo hani bidi dao. Godigo nage dali dwagi yai sę yao, te nage te Genuai Bidigo nogide asali bidi dao. Dagalude bidibo bage me augwaligo aga nogi ugwaba sao.”
MAT 21:10 Te aga te Jerusalem hanu tomoba pali, tama te hanu tomode bidali we bidi augwali noma mu selama, tama te po wai, “Te bidi aga te de dawe?” te po wai.
MAT 21:11 Tama aga dali asali we bidi augwaligo te po wai, “Aga te Jisas dao, te Godigo po pusubo profet bidi, te Nasaret hanudu te Galili tǫdu asai dao,” augwaligo te po wai.
MAT 21:12 Te Jisas aga te Jerusalem hanu tomoba pelama, tama aga te Moni Lotu Be tempel tomoba peyu suali, te nai muani bage dali me, te nai abelebo bage dali me sulama, tama agai augwali tigidali buluba sela sąwai. Tama agai te Godibolo ofa mabo gasagi yai masigi ge dobu si ebo bagego tebol sai dali mone ge dali gelali. Bidi meba augwaligo ba hi dabe te be tomode muagasai, te olo we bidi augwaligo te ba hi abelama, te Godibolo ofa olo mawainogo te ba dabe muani. Tama agai te bagego duabo sai dabe gea palali.
MAT 21:13 Tama tilama, agai te po augwalibolo wai, “Bukude Godigo e po asęai dao, ‘Eno be da, te we bidigo gedu haluasa po wabo be dao,’ te po elalubao. Tiali goli dagego te be te nai wi sabo bidigo be tiwai te ilibao,” Jisasgo te po wai.
MAT 21:14 Tama aga te Moni Lotu Be tempel tomode bidibadi, tama te gedu widai we bidi dabe me, te sągą dwai bidi dabe me augwali aga bidibo pąba asali, tama agai augwali wiegi yai ma ilali.
MAT 21:15 Tiali goli te genuai pris bidi dabe me, te bomo yai po page koneai bidi dabe me augwaligo agai te bomai sę ebo sulama, tama odali te wai puluba augwaligo te Moni Lotu Be tempel be tomode bomonama i weyu te po wai, “Te Devitgo hani bidi dali wiegi yai homu pemene yao,” te wai puluba augwaligo te po wai.
MAT 21:16 Tama tibaso, te genuai bage augwaligo homu dwai eyu, agabolo te po wai, “Te nago augwaligo te wabo po nago odaliwe?” Tama Jisasgo augwalibolo te po wai, “Ao, eno odalio. Tiali goli dagego te bidi me deligo te Godide polobadu asęani po me deli nedebewe? Te po e dao, ‘Nago te gilama, tama te dwasianu wai puluba augwaligo nago nogi ugwaba sabo wiegi yai po wai dao.’ Dagego te po nedebewe?”
MAT 21:17 Tama agai augwali tagalama, tama aga te moni hanu buluba pelama, tama te dwasianu hanu Betani te badu hulide bidigi pai.
MAT 21:18 Te sogo kigamu digi mu aga te moni hanu tomoba ma pobadi tama aga nasi yai.
MAT 21:19 Tama aga pelama, te tų sesegede elaluali ni kaya sulama, tama te ni pąba pali, aga du sela tuainogo yai. Tiali goli tede nai me deli walai elalubo subeo. Menio. Yabe naga elaluai. Tama agai te ni kayabolo te tiwai po wali, “Nago nai ma walogobeo. Mu menio.” Tama polo mu te ni kaya aga sasia pai dao.
MAT 21:20 Te aga wali pabo bidi dabe augwaligo te sę ebo sulama, tama augwali noma mu sai. Augwaligo te po wai, “Magi baso e ni kaya te polo sasia paliwe?”
MAT 21:21 Tama Jisasgo po wei ponoyu, augwalibolo te po wai, “Eno mu po dagebolo obao, dagego te Godide konealubo po mu dąų olama, tama dagego homu si me isąbaso da, teda dagego eno e ni kayade yali tiwai sę dagego me ebo te usu yaibao. Tama dagego te sę naga egobeo. Menio. Te dagego e elalubo bulu dubolo te po weyu, ‘Nage hodaluama, nage te tamu ąįba samonao’ po obaso da, teda agai te tiwai yaibao.
MAT 21:22 Tama dagego konealubo po dąų olama gedu haluasa po weyu da, teda te nai dagego sainogo gedu haluasa po wabo, te nai dagego saibao,” Jisasgo te po wai dao.
MAT 21:23 Te Jisas te Juda dabego Moni Lotu Be tempel tomoba pelama, te wiegi yai po te we bidibolo ola maduai. Tama te genuai pris bidi dabe dali, te Juda bagego tobolu bidi dabe augwali dali agaba aselama, tama te po wai, “Nago magi bomo elaluyu, nago naga ebo sę ebawe? Tama dego te bomo nagebolo mayu te sę yao weyu yaliwe?”
MAT 21:24 Tama Jisasgo po wei ponoyu, augwalibolo te po wai, “Eno me eno magi nai po me deli naga dagebolo hanalu waibao. Tama dagego eno po wei ponebaso da, teda eno me eno dagebolo te eno magi bomo elaluyu, eno e sę ebo te po dagebolo waibao.”
MAT 21:25 Tama agai te po wali, “Te Jongo we bidi baptais mani sę te menade pedalaliwe? Te Godigo te sę agabolo maniwe, ma bidi dabego mani sę nagawe?” wali. Augwaligo te po wabo odolama, tama augwa digi augwa hasi po miyu te po wai, “Ma, dago e tobage po wabo si, ‘Te Godigo te sę agabolo mani’ po obaso da, teda agai dabolo e tiwai tobage po waibao, ‘Teda magi baso agai wali poba dagego duga homu muyu dąų wabewe?’ Te po da dali waibao.
MAT 21:26 Tama te po obaso, dago te po waibao, ‘Bidi dabego naga te sę Jonbolo mani’ obaso da, teda da te e bidalubo we bidi wi yaibao. Magi baso meni, tigidali bage augwaligo te Jon aga te Godigo po pusali bidi profet da te homu naga ebo dao,” te po wai.
MAT 21:27 Tama tibaso, augwaligo te po wei ponoyu, Jisasbolo te po wai, “Dago konebeo.” Tama Jisasgo augwalibolo te po wai, “Eno me eno dagebolo te eno magi bomo elaluyu, eno e sę ebo po te dagebolo me wagobeo,” Jisasgo te po te Juda bage genuai bidi dabe dali wai dao.
MAT 21:28 “Tiali ma, dagego magi homu ebowe? Bidi deligo ogwa si bidai. Aga te me ogwa pageba pelama, agabolo te po wai, ‘Ogwao, te megi e sogode nage pelama, te wain bono du giba sę egi pao,’ te po wai.
MAT 21:29 Tama aga ogwago te po wai, ‘Ena hagela palio.’ Tiali goli nosali aga homu ma hasegelama, tama aga te sę egi pai.
MAT 21:30 Tama te bidi aga gasa ogwa pageba pelama, te wali po tiwai naga agabolo wai. Tama agai te po wai, ‘Awe, aya.’ Tiali digi aga pabeo.
MAT 21:31 Tama tilama, te ogwa sigo te mena ogwago mu te aga ayago homu kolesaga wali paliwe?” Jisasgo te po hanalu wai. Tama augwaligo te po wai, “Te aga hasia ogwago agai po wali pali.” Tama Jisasgo te Juda bage genuai bidi dabebolo te po wai, “Eno mu po dagebolo obe dao, te takis mone sabo dwai bidi dabe augwali badi, te penani yali we dabe dali, augwaligo ge neyu homu ma hasegelama, tama augwali dage aiyaba elaluama tama polasa te Godigo we bidi tonalubo kolesaga tomoba peyu, tama dage nosaliba ilalio.
MAT 21:32 Magi baso meni, Jon dageba pedalama, tama agai te doloba pai kolesaga ebo te po dagebolo ola mani, tama dagego aga wali poba homu dąų wabeo. Tiali goli te takis mone sabo dwai bidi dabe badi, te penani yali we dabe augwaligo homu te poba dąų wai. Tama te tama tebo dagego suali goli dagego ge neyu, homu hasegelama, agai wali poba homu dąų wabo kolesaga munu me ebeo,” Jisasgo te po augwali dali wai.
MAT 21:33 “Dagego te gasa po digi po begelama wali po me odao. Bidi me deligo genuai tǫ elalubo bidigo agai te bono du wain gi bulama, tama obo bagulali. Tama te gi tomode agai te wain bono du agayabo te tank nai nigilali, tama te gi tonalubo bidigo bobobage be me me deli sę yani. Tama agai te gi te sę yabo bidi meba augwaligo nogoba muani, te augwaligo te gi tonalubo sę eyu, te gi nai meba naga somainogo yai. Tama te gi page bidi aga digi digibulu bulu me deli teba pai.
MAT 21:34 Nosali, te wain bono wai sisinabo sogo bodolu pąba yagasali, tama agai te sę bidi dabe augwali tagala palama, augwali te wain bono giba pelama, te gi page bidigo nai sigi pomainogo yai.
MAT 21:35 Tama te gide sę yali bidi dabego te tagala palali sę bidi dabe selama, tama augwaligo me deli ela tagaliyu, tama gasa sę bidi me te mu ela muani, tama gasa sę bidi mebolo te masigigo naga elainu te masigi sąyani.
MAT 21:36 Tama te gi page bidigo te sę bidi meba ma tagala palali. Agai sę bidi hauwanu gana tagala palali, te polobadu yali tiwai ebeo. Tama te gide sę ebo bidi dabego te hasia yali kolesaga tiwai naga augwali dali yai.
MAT 21:37 Tama nosali agai aga ogwa mu te augwalibolo tagala palai. Ayago e tiwai po wai, ‘Te augwaligo eno ogwago po mu odaibao,’ te homu yai.
MAT 21:38 Tiali goli te gide sę ebo bidi dabe augwaligo te ogwa asobo sulama, tama augwa hasi po miyu te po wai, ‘Te aga aya isibo si, e bidigo te aga ayago nai tigidali saibao. Asao, te dago aga ela muiąo, tama dago agai sabo gi saibao,’ te gide sę ebo bidi dabe augwaligo te po wai.
MAT 21:39 Tama augwaligo aga selama, tama aga augwaligo te gidu te buluba ma sela sąyani, tama augwaligo aga ela muai dao.
MAT 21:40 Tama tibaso, nosali te wain bono du gi page bidi asiyu, tama mena tiwai kolesaga te gide sę yali bidi dabe augwali dali egowe? Dagego magi homu ebawe?” Jisasgo te po wai.
MAT 21:41 Te augwaligo agabolo te po wai, “Teda augwali te dwai sę yali bidi dabe bidibaso, agai augwali dwagila mu dolaibao. Tama agai te wain gi gasa hanigo te gi sę tonalumai hagede mawaibao, tama te gide nai sabo sogo augwaligo aya agabolo nai mawaibao,” augwaligo te po wai.
MAT 21:42 Te Jisasgo augwalibolo te po wali, “Te bukude polobadu asęani te po te dagego nedebewe? E tiwai dao, ‘Te masigi be sę yabo masigi me deli te sę bidi dabego sela sąyani masigi, megi da polalubo masigi pedalama, te be dąų walali elalubao. Genuai Bidigo agai te tiwai sę elama pedalali, tama dago suali te wiegi yai mu dao.’
MAT 21:43 Tama tibaso eno e po dagebolo obao, te Godigo we bidi tonalubo sę dagede elaluali dagalama, tama te Godigo we bidi tonalubo sęde doloba pai kolesaga ebo we bidi augwaliba eno te nai mawaibao.
MAT 21:44 [Tama bidi te masigi daiba ugwadu tulalubo bidi da, teda te bidi aga te dwasianu dwasianunu mu pebeda paibao. Ma, te masigi te bidi deli daiba ugwadu tulalu baso da, teda agai aga mu dolama, tama pobele bage naga tiwai pedalaibao.]”
MAT 21:45 Te genuai pris bidi dabe badi, te Farisi dabe dali, augwaligo Jisasgo te po digi po begelama wabo po odama, tama augwaligo koneani, agai te po augwalide wai.
MAT 21:46 Tama augwaligo aga dąų wabo tų kegali, tiali goli augwali te we bidi augwalide wi yali. Te we bidi augwaligo homugo Jisas aga te Godigo po pusubo bidi dao te homu yalio.
MAT 22:1 Te Jisasgo po digi po begelama augwalibolo te po ma weyu te po wai,
MAT 22:2 “Te Godigo we bidi tonalubo kolesaga te tuni bidi me deligo yali kolesaga tiwai dao. Te aga ogwa we sainogo ebaso, tama tuni bidigo te genuai nai da sisi elama muai dao.
MAT 22:3 E me te tiwai yainogo tama hasia bolo agai te bidi meba te we sabode nai tuagasomainogo i wai. Tama te nai tubo sogode te aga sę ebo bidi dabe tagala palama, te nai tuagasiyu asomainogo i wagi pali. Tiali goli augwali asobo hagela elama me asobeo.
MAT 22:4 Tama agai gasa sę ebo bidi meba ma tagala paliyu, augwalibolo te po wai, ‘Dage eno te asomainu i wali bidi dabe augwali bidiboba pao, tama dagego augwalibolo e tiwai po wao, “Odiąo, te we sabo bidide eno te nai sisi yai elalubao. Te omai bulmakau dabe badi, te eno wiegi yai nisai bulmakau wai dabe me, dago elalio. Tama tigidali nai sisi yai elalubao. Dage te we sabode da tubo naiba asiąo,” te po wao,’ te tuni bidigo te po wai.
MAT 22:5 Te sę ebo bidi dabego te po augwalibolo wagi pai, tiali goli augwaligo te po odobo hagela yali, tama augwali gasaba tedela pai. Me deli te aga giba pali, tama me te aga mone sabo sę egi pali.
MAT 22:6 Te bidi dabe mebago te tuni bidigo tagala palali sę bidi pageabi elama, dene menama elama, tama augwali ela muai dao.
MAT 22:7 Tama te tuni bidi sębę elama, tama aga te enesigi bidi me te ami bidi dabe tagala palama, augwali pelama, te sę ebo bidi dabe elali bidi dabe augwali tigidali mu ela siligi pai. Tama be me bulu dabe tigidali sia tulama ula silai.
MAT 22:8 Tama te tuni bidigo aga sę bidi dabe augwalibolo te po wai, ‘Te we sabode tuabo nai sisi yai elalubadi, tiali goli eno te i wali bidi dabe, augwali te asobo usu menio, te dwai bage dao.
MAT 22:9 Tama tibaso, dage te tigidali tų tunu magi siba pao, tama dagego te suali we bidi dabe tigidali, dagego augwali i olama, te we sabo sogode te nai megi tuagasao, te po wao.’
MAT 22:10 Agai tama tiwai po wai, tama te sę bidi dabe augwali te tigidali tų tunu magiba tedela pelama, tama te suali we bidi dabe tigidali augwali sisinao, te dwai bidi dabe me te wiegi yai bidi dabe augwali dali sisinagasai. Tama augwali te we sabo madi aselama, mu pągąna sagasai.”
MAT 22:11 “Te we bidi augwali duada pai digi, tama te tuni bidigo augwali suainogo te be tomoba pai. Tama agai suali, bidi me deli te we sabo digi asainogo wiegi yai ugwa gudama asisąwai suali.
MAT 22:12 Tama te tuni bidigo agabolo te po wali, ‘Abagio, magi ilama nago e we sabo sogode asainu nago ugwa wiegi yai gudama eba asai meniwe?’ Tiali goli agai sagia sai, po me wabeo.
MAT 22:13 Tama te tuni bidigo aga sę ebo bidi dabe augwalibolo te po wai, ‘Dagego aga nogo sągą dunama, te bedu buluba sąnama, tama te be hulia side digibulu bidimainao. Te be hulia side aga dwai gela weyu, tama aga kele ma halua tumainu yaibao,’ te tuni bidigo te po wali,” Jisasgo te po wai.
MAT 22:14 “Awe, te tama tiwai Godigo te we bidi hauwa i wabo dao, tiali goli agai bidi deli deli naga sa munama, tama aga te we bidi tonalubo kolesaga tomoba asomainogo tebo dao,” Jisasgo te po wai.
MAT 22:15 Te Farisi hani dabe augwali Jisas taga pelama, po migi peyu te po wai, “Dago magi ilama te aga wabo pode aga dąų omainogo eyu aga usu sogowe?” te po miani.
MAT 22:16 Tama augwaligo augwa wali pabo bidi dabe augwali dali, te genuai gavman bidi Herotgo bidi dabe me tagala palama, tama augwaligo Jisas pageba pedalama, te po wai, “Po ola mabo bidi, dago koneani, nage te doloba pai bidi mu dao. Tama nago mu pode naga te we bidi augwalibolo te Godigo te yao wali wiegi yai kolesaga po ola mabo dao. Bidi me deli aga genuai nogi elaluyu da, te nage aga wi menio, nago deli po tiwai naga te tigidali bidibolo wabo dao.
MAT 22:17 Tama tibaso, nago po dabolo wao. Nago magi homu ebawe? Dago te Rom gavman tuni bidi Sisar agabolo takis mone mobaso da, teda tama tiyu dago te Mosesgo mani bomo yai po dago bolaibawe, ma meniwe?” augwaligo te po Jisasbolo hanalu wai.
MAT 22:18 Tialima, Jisasgo augwaligo dwai tibo homu ebo konea pelama, tama agai te po wai, “Dage tibo po wabo bidi dabe dao, magi baso dagego ena dąų omainogo eyu usu sobawe?
MAT 22:19 Dagego te takis Sisarbolo mabo mone ge me deli enabolo waselao.” Tama augwaligo mone me deli sela aselama, agabolo ola mani.
MAT 22:20 Tama agai augwalibolo hanalu wali, “Te e masigi daide elalubo gesabidi noma me, e asęani nogi me, te dego dawe?”
MAT 22:21 Tama augwaligo te po wali, “Te Sisargo dao.” Tama agai augwalibolo te po wai, “Tama tibaso, te Sisargo nai, te dagego te Sisar agabolo wei ponoyu mao. Tama Godigo nai da, te dagego Godibolo mao,” wali.
MAT 22:22 Augwaligo te po wabo odolama, tama augwali noma mu sai. Tama augwali aga tagalama, pai dao.
MAT 22:23 Tama te sogo naga te Sadyusi bidi meba te Jisas pageba sabolai. Te bidi hanigo homugo te isai bidi augwali ma hodalogobeo te po wabo dao. Te Sadyusi bage augwali Jisas pageba sabolama hanalu wai,
MAT 22:24 “Tisa, po ola mabo bidi, te polobadu mu bidali bidi Mosesgo te po wai, ‘Te bidi me deli aga we selama, wai meni ebadi isibaso da, teda aga amago te we selama, tama aga ama tau selama, te wai ame nao.’ Mosesgo te po wai.
MAT 22:25 Tama polobadu te ama solo te nogo a naga me si te da tomode bidai. Tama gomunai bidi aga we selama, bidama, isai, tiali goli agai wai meni yai. Tama aga ama mego te ama isiyu taga pali we sai.
MAT 22:26 Tama tomo bidigo me te tiwai naga yali, tama te tomo bidi tudi badu bidigo me tiali, tama naga tede pelama, te a naga olama me badu nogo si wali bidiba usu nigi pai dao.
MAT 22:27 Tama te bidi dabe tigidaligo wai meni badi isila silali, tama nosali mu te we me isai.
MAT 22:28 Tialima, nago po wao. Te isali bidi dabe ma hodalobo sogo, te we dego we mu te bidi a naga olama me badu nogo si augwalide bidigowe? Nago koneani, tigidaligo te we naga sai dao,” Sadyusi bagego te po wai.
MAT 22:29 Tiali goli Jisasgo augwalibolo po wei ponoyu, te po wai, “Dagego te Godigo bukude wali po konebeo. Tama dagego te Godigo bomo me konebeo. Tama tibaso, dagego geda muyu, te po obao.
MAT 22:30 Magi baso meni. Te isali bidi dabe augwali ma hodalobo sogo, te bidi dabego te we sabo sę me egobeo. Menio. Te augwali olo te dagalude bidibo mobo bidi ensel bidibo gilama tiwai bidaluaibao.
MAT 22:31 Tiali goli, te isai bidi dabe ma hodaluaibao wali po, te pode eno dagebolo ma hanalu obao, ma Godigo te dagebolo wali po te dagego me nedebewe? Agai te po wai dao,
MAT 22:32 ‘Ena da, te Abrahamgo God me, ena te Aisakgo God me, ena te Jekopgo God me bidalubo dao,’ Godigo te po wai. Tama te po page e dao, God aga te isila silali bidi dabego God menio. Aga te ula dali megi bidibo bidi dabego God dao,” Jisasgo te po wai.
MAT 22:33 Tede sisinagasali we bidi hauwa augwaligo te po wabo odolama, tama augwali agai te wali pode noma mu salio.
MAT 22:34 Jisasgo te wali pogo te Sadyusi bagego pedauwali paniai. Tama te Farisi dabego te po odama, tama augwali aga pageba sisinagasali.
MAT 22:35 Tama augwali tomode te bomo yai po page koneai bidi me deli bidali. Agai Jisas usu siyu hanalu wainogo yali,
MAT 22:36 “Tisa, po ola mabo bidi, te Godigo bomai po tigidali tomode mena pogo te tigidali gasa bomai po te aiyaba elaluama, tama te genuai mu dawe?”
MAT 22:37 Tama Jisasgo agabolo te po wai, “‘Genuai Bidi da aga nago God dao. Te nago aga godolo ebo te nago homu tigidali me, te nago noma tigidaligo me, te nago homu kolesaga tigidali agaba munama, tama aga nago godolo mu yao.’
MAT 22:38 Te bomai po aga te genuai elalubo, tama aga te polalubo mu dao.
MAT 22:39 Tama te bomai poba daganalubo po aga te tiwai dao. Te e dao, ‘Nago naga digi godolo ebo te kolesaga tiwaigo te nago bidi hasi dabe augwali dali wiegi yai homu elama godolo yao.’
MAT 22:40 Te bomo yai po side te tigidali bomo yai po page me, te Godigo po pusali bidi profet dabego po page me, te po side naga elalubo dao,” Jisasgo te po wai.
MAT 22:41 Te Farisi dabe augwali Jisas pageba sisinama bidalubadi, tama agai augwalibolo hanalu wai, “Dagego magi homu te Godigo sa muani bidi Kraisde ebawe?
MAT 22:42 Aga te dego hani bidi dawe?” Tama augwaligo agabolo te po wai, “Te Devitgo hani bidi dao.”
MAT 22:43 Tama agai augwalibolo te po wai, “Tialima magi baso Godigo Mobo Bidigo Devitbolo e homu kolesaga menama, tama Devitgo aga Genuai Bidi da nogi waliwe? Agai e po wai,
MAT 22:44 ‘Genuai God agai eno Genuai Bidibolo weyu, te po wai, “Nage eno dolo nogo badu duayao, tama te eno nago boi bidi dabe nageba munama, tama nago dologoba mubo sogo pedelabo tonaluao.’
MAT 22:45 Dagego suao. Devit aga digi aga Genuai Bidi da nogi waligo da, teda magi baso dagego aga te Devitgo hani bidi naga da po waliwe?”
MAT 22:46 Tama niwai bidi me deligo Jisasgo te po wei ponabo te usu menio. Tama te side augwali agade wi ebo gagalali, tama nosali augwaligo agabolo te magi nai po me hanalubo menio.
MAT 23:1 Te Jisas agai te Farisi dabego po aiyaba elaluama, tama te sogo tama agai po te we bidi dabe dali, aga wali bilibo bidi dali, augwalibolo te pusali.
MAT 23:2 Agai e tiwai po wai, “Te bomai po page ola mabo bidi dabe dali, te Farisi dabe dali, augwaligo dagebolo te bomo yai po ola mabo dao, te Mosesgo yali gilama ebo dao.
MAT 23:3 Tama tibaso, te tigidali po augwaligo dagebolo ola mabo po te dagego odama, wali pao. Tiali goli augwaligo ebo kolesaga, te kolesaga dagego wali pigimio. Menio. Augwaligo po hauwa obadi, tiali goli augwa digi augwaligo te po me wali pabo menio.
MAT 23:4 Tama tiyu, augwaligo te mesegaluai sęgę te bidi dabe augwali nageba ugwadu muaibao, tiali goli augwa digi augwaligo dwasianunu me nogo danigo naga me te tola selama, te sęgę tolobo bidi dabe augwali tau me sogobeo.
MAT 23:5 Augwaligo ebo kolesaga tigidali te we bidi dabego augwali genuai nogi yai bidi da olama sumainogo tibo dao. Awe, te bomo yai po wali peyu, augwaligo te Godigo po asęani nogo mo dali, te wiani dali, augwa tigide mubo dao. Tama augwa gudali ugwa sesegede te sesemo elalubo dao. Tiali goli te we bidigo augwali sumainogo augwaligo te nogo mo me te wiani me te sesemo me, augwaligo te nai genuai mu nigilama mubo dao.
MAT 23:6 Augwaligo te genuai nai da tubo side te polalubo ni namide duabo godolo elama, te nai hasia sabo homu ebo dao, tama te bomai po ola mabo bede me te polalubo wiegi yai ni namide naga duabo dao.
MAT 23:7 Augwaligo te we bidi dabego augwali te bidi sisinama bidibo madi tomode te augwalibolo te we bidigo siade da wabo godolo elama, tama augwaligo augwalibolo nogi weyu, te po ola mabo bidi eno tisa da po wabo godolo ebo dao.”
MAT 23:8 “Tiali goli, te bidi dabe augwaligo dage nogi eyu, ‘Tisa, po ola mabo bidi da’ olamuo. Menio. Te bidi me deli naga te aga dagego te po ola mabo bidi dao, tama dage tigidali te ama dede ama dede naga bidibo dao.
MAT 23:9 Tama e tǫde te bidi me delibolo te dagego aya da po me wagio. Te bidi me deli naga te dagego Aya dao, te aga dagalude bidibo dao.
MAT 23:10 Tama augwaligo dagebolo nogi nogi eyu ‘Tobolu bidi’ po me olamuo. Dagego tobolu bidi deli bidibao, aga te sa muani bidi Krais dao.
MAT 23:11 Dage tomode dagego genuai bidi aga te dagego sę bidi bidao.
MAT 23:12 Magi baso meni, bidi mego aga digi aga nogi ugwaba sabo bidi, te bidi Godigo aiyaba muaibao. Tama bidigo aga digi aga nogi aiyaba elalubo bidi, te aga genuai nogi Godigo agabolo mawaibao,” Jisasgo te po wai.
MAT 23:13 “Dage te bomai po page ola mabo bidi dabe me, dage Farisi dabe me, hobede ya. Dageba te dwai sogo mu pedelaibao, dage tibo po wabo bage. Te Godigo we bidi tonalubo kolesaga tomoba pabo tų te dagego te we bidi augwaligo gesabidiba te tų palibo dao. Duga digi te tomoba me pabo meni, tama te we bidi augwali te tomoba painogo ebadi, te dagego augwali pabo tų palibo dao.
MAT 23:14 [Dage bomai po page ola mabo bidi me, dage Farisi dabe dali, hobede ya. Dageba te dwai sogo mu te pedelaibao, dage tibo po wabo bage. Dage te augwa bidi isai we dabe pageba pelama, tama dagego te ugwadu homugo naga po augwali dali olama, tama augwaligo be me doado bage wi sabo dao. Tama dagego gedu haluasa po bobobage weyu, duga te dwai sę yali po geme dualiyu tebo dao. Tama tibaso, te dwai sę wei ponabo sogode te dageba asabo sęgę te dwasianu menio.]” Jisasgo te po wai.
MAT 23:15 “Dage bomai po page ola mabo bidi dabe me, dage Farisi dabe dali, hobede ya. Dageba te dwai sogo mu pedelaibao, dage tibo po wabo bage. Dage te tamu ąįde badi, te tǫde dali bilibao, te bidi me deli gegelama, tama te bidi me deli aga dage dali bilabo bidi sainogo dagego bomonama gegebo dao. Aga te dage dali bilibo bidi pedalama, tama dagego aga te moni sia dabo buluba pomainogo ilibo dao, te duga tiwai ilibao. Dagego aga te dwai sę ebo tomoba kegelama, tama agai ebo dwai sęgo dagego ebo dwai sę aiyaba mu elalubo dao,” wali.
MAT 23:16 “Dage gedu widai bagego te bidi dabe augwali tų ola mawainogo ebao, hobede ya. Dageba te dwai sogo mu pedalaibao. Dagego e tiwai po te bidi dabebolo ola mabo dao, ‘Te nago po dąų omainogo eyu da, te Moni Lotu Be tempel nogi olama, tama mu po dao wao. Tiali goli nosali nago te dąų wali po togoyu da, te usu dao, te sęgę menio. Tialima, nago te Moni Lotu Be tempel tomode elalubo wiegi yai kapa gol nogi ilama, tama mu po da wabo si da, teda nago te po wali sę tiwai yao, togolamuo.’ Dagego augwalibolo te po ola mabo dao.
MAT 23:17 Dage esela pelama gedu widalio. Magi nai da te polalubo nai dawe? Ma, te gol da, te polalubawe? Ma, te Moni Lotu Be tempelgo te gol wiegi yai ilali, ma te da te polalubo nai dawe? Te be tempel polalubo dao.
MAT 23:18 Tama dagego te po me augwalibolo ola mabo dao, ‘Te bidigo aga po dąų omainogo eyu da, te Godibolo olo mabo ofa ebo sai nogi ilama, mu po dao wao. Tiali goli nosali agai te dąų wali po togoyu da, te usu dao, te sęgę menio. Tiali ma, agai te ofa saide muani olo mabo nai nogi ilama, tama mu po da obaso da, teda agai te dąų wali po wali sę tiwai yao, togolamuo.’ Dagego te tobage po augwalibolo ola mabo dao.
MAT 23:19 Dage gedu widalio. Magi nai te polalubo naiwe? Ma, ofa polalubawe? Ma, te ofa ebo sai yaligo te ofa wiegi yai ilaligo, te polalubo naiwe? Te ofa ebo sai te polalubo nai mu dao.
MAT 23:20 Tama tibaso, bidigo aga po dąų omainogo eyu, tama te Godibolo olo mabo ofa ebo sai nogi ilama, mu po dao obaso da, teda agai aga po te ofa ebo sai nogi dali, te saide muani nai tigidali dali side agai po olama dąų walali.
MAT 23:21 Tama bidigo te Moni Lotu Be tempel nogi ilama, mu po da obaso da, teda aga po me te tempel be dali, te tempel bede bidibo bidi God dali, te side te po dąų walobao.
MAT 23:22 Tama bidi mego dagalu nogi ilama, mu po da wali da, teda agai te po badi, te Godigo duabo sia sai dali, te sia saide dulalubo bidi dali, te side te wali po dąų walobo dao.” Jisasgo te po wai.
MAT 23:23 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao, dage tibo po wabo bage. Dage te dwasianu bomai po wali peyu, te tigidali gide elalubo dwasianu nai te kaya dabe dagego nogo si bugulama, deli te Godibolo menama, tama nogo a naga olama me badu nogo me si me si dagego sabo dao. Ao, te usu dao. Tiali goli dagego te bomo yai po genuai tigidali me badu sula tagalali, te bidi dagalobo doloba pai kolesaga me, te bidi homu dene eyu tau sabo kolesaga me, te bidi dabe dali dolo sę naga ebo kolesaga me dao. Te Godibolo nogo si nai bugulama deli mabo bomai po badi, te po dagego tagaligio, tiali goli e tobage te genuai bomai po te sę dagego mu iyąo.
MAT 23:24 Dage gedu widai bagego te bidi dabe augwali tų ola mawainu ebao. Dagego te ąį te dwasianu dinai dali tuidali weyu, dagego te ąį osola suainogo te nami ugwaba gelebo dao. Tiali goli te kibu kamel dagego sese dalobo dao,” wali.
MAT 23:25 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Te daide dage te dwagi yai bidi dabe tiwai dao. Tiali goli dagego homu kolesaga tomode te nai wi sabo kolesaga me te tigigo ebo kolesaga pągąnama, te kolesaga wali pabo dao. Dage da, te ąį tubo kap me plet pou te bulu badu naga penebo bidi tiwai dao.
MAT 23:26 Nage Farisi, nage gedu widai. Hasia bolo nago te kap tomode elalubo pobele bage penao, tama te kap bulu badu me te hogomu meniama usu elaluaibao.”
MAT 23:27 “Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Dage te gų page ola be augwaligo te tedela yai pengo pilali tiwai dao. Bulu badu da, te bidigo subo dwagi yai ilali, tiali goli tomode da, te isai bidi dabego dili dabe me te tigidali dwai meda yai mobia pai nai te pągąnalubo dao.
MAT 23:28 Dagego me te tiwai naga elalubao. Te bidi dabego dage tigi subo da, augwaligo da dage doloba pai bidi dabe da te homu ebao. Tiali goli tomode da, dagego te tibo po wabo kolesaga me te bomai po sela sąbo kolesaga pągąnalubo dao,” Jisasgo te po augwali dali wai.
MAT 23:29 Po ma weyu, agai te po wai,” Dage bomai po page ola mabo bidi me, dage Farisi dabe dali, hobede ya. Dageba te dwai sogo mu pedelaibao. Dagego te polobadu po pusali bidi profet dabe gų pagede masigi be sęnama, tama te polobadu bidali doloba pai bidi dabe muani gų page au ilibo dao.
MAT 23:30 Tama tiyu, dagego e tobage po obao, ‘Da te polobadu wąį dabe bidali sogo da bidigi sogo da, teda dago te Godigo po pusali bidi profet dabe augwali elibo me tau sigi menio.’
MAT 23:31 Dagego te pogo ola mani, dage da te polobadu po pusali bidi dabe elali te bidi dabego wai dabe te dage megi e bidalubao.
MAT 23:32 Tama tibaso, megi da dage pelama, duga wąį dabego yali dwai kolesaga usu nigi pao.
MAT 23:33 Dage dwai hasamani dabe dao. Dage dwai hasamanigo wai puluba dao. Godigo dage po tų ilibaso, tama dage te dwai sia dabo madi pageba paibao. Mena tama dage menadu wi paibawe? Menio.
MAT 23:34 Tama tibaso, eno te Godigo po pusabo bidi meba badi, tama te wiegi yai homu konea palobo bidi me, te Godigo po ola mabo bidi augwali dageba tagala palaibao. Tama te bidi dabe meba dagego ela muyu, tama meba te ni pedaide eliyu, tama meba dagego bomo yai po ola mabo be tomode bigo eleyu, dene mawaibao. Tama dagego augwali te hanu me delide ela gudulama, tama gasa hanu meba dagego augwali pobasa pabo sę yaibao.
MAT 23:35 Tama tibaso, te doloba pai bidi dabe augwali e tǫde bidaluali, tama te bidi dabego augwali ela silalio, te sęgę dugade naga elaluaibao. Augwaligo te doloba pai bidi dabe ela silali, te wiegi yai bidi Abel gagalasa pelama, te Sekaraia teba usu nigi palio, te Berekiago ogwa, aga dagego te Moni Lotu Be tempel tomode ela muani, te dwasianu be dąį togali me te ofa muabo sai te si tomode dagego Sekaraia ela muani.
MAT 23:36 Eno mu po dagebolo obe dao, te dwai sę yali sęgę tigidali te megi e tǫde bidalubo we bidi haniba mu pedelaibao,” Jisasgo te po wai.
MAT 23:37 “Jerusalem, Jerusalem, nago te Godigo tagala palali bidi profet dabe augwali ela munama, tama nago te Godigo nageba tagala palali sę bidi masigi sąnama, augwali me ela muanio. Hauwa sogo mu eno nago we bidi sisinainogo ebadi, te so ba kakarukgo te aga wai dabe augwali te bogo dologoba sisinibo tiwai, tiali goli dagego hagela yai dao.
MAT 23:38 Dagego odao, megi da, dagego bulu da te olo elaluaibao, tagalai dao.
MAT 23:39 Awe, eno dagebolo obao, te dagego ena ma sugobeo, tama bidama nosali sogo usu nigi pelama, tama te sogo dagego te po enade waibao, ‘Dago homugo te Godigo te Genuai Bidigo nogide asali bidi dali wiegi yai sę yao,’ dagego te po waibao,” Jisasgo te po wai.
MAT 24:1 Jisasgo te Moni Lotu Be tempel tagalama pobadi, tama aga wali pabo bidi dabe augwali aga pageba asai. Augwaligo te tempel bego haniani be dabe agabolo ola mawainu yai.
MAT 24:2 Tiali goli agai po augwalibolo wei ponoyu, te po wai, “Awe, dagego te haniani be dabe tigidali suao. Eno mu po dagebolo obao, augwaligo e gasa masigi daide ugwadu manama elalubo masigi dabe, te me gogolama me sula tagalogobeo. Te tigidali augwali pebedelama, te tǫba aiyaba sąsąwaibao.” Jisasgo te po wai.
MAT 24:3 Te aga pelama, tama te dwasianu bulu du Oliv teba sabolama, aga tede dualaluyu, tama aga wali bilibo bidi dabe naga augwali aga pageba aselama, augwaligo te po wai, “Nago dabolo wao, nisu sogo te Moni Lotu Be tempel dolobo sę pedelaibawe? Magi sę bolo hasia pedelama, dago koneai elalubadi, nage ma asiyu e tǫ siligowe?”
MAT 24:4 Te Jisasgo augwaligo po wei ponoyu, bomonama te po wai, “Bidigo dagebolo tibo po olama, tama dagego te mu po dao homu idali weyu, dage dua dao.
MAT 24:5 Magi baso meni. Bidi hauwa aselama, augwaligo eno nogi nogi ilama, tama augwaligo te po waibao, ‘Ena digi ena te Godigo sa muani bidi Krais dao.’ Tama augwaligo te we bidi hauwa ili po ola mawaibao, te augwali gasa tųba paibao.
MAT 24:6 Tama dagego te moni wąbi hwįbo kulukulu dali te wąbi hwįbo po sabilibo po odaibao. Dagego odama, dage midigi polo selama noma sigio. Te sę bolo pedelaibao, tiali goli te tǫ de dagalu si silabo sogo me elalubao. Te nosali mu pedelaibao.
MAT 24:7 Awe, tama genuai hwįyu, bidi hani me deligo te wąbi te gasa genuai bidi hani dali hwį yaibao. Tama me tuni bidigo bidi hani te gasa tuni bidigo bidi hani dali wąbi hwįyu hwį yaibao. Tama haniani bulu habu badu genuai nai nasi ela ela paibao, tama tǫ me mali ela ela paibao.
MAT 24:8 Te tigidali sę te wego wai ame nainogo hasia dene ebo te tiwai pedalaibao,” wali.
MAT 24:9 “Te tebo sogo augwaligo dage selama, dene ilama, sęgę mobadi yaibao, tama augwaligo dage ela muaibao. Tama tigidali we bidi hani augwaligo dwai homu mu dagebolo yaibao. Magi baso meni, eno nogi dagede elalubaso augwaligo dage dali tama tiaibao.
MAT 24:10 Tama tebo sogo te we bidi hauwa augwaligo enade konealubo po dąų wali tagalama, tama augwaligo augwa ama dabe boi bidigo nogoba munama, tama augwa me augwa digi augwa ama dabe dali boi bidi yaibao.
MAT 24:11 Tama te tibo po pusubo bidi profet dabe hauwa pedelama, tama we bidi hauwa tibo po ola mawaibao, augwali gasa tųdu kegasa pomainogo yaibao.
MAT 24:12 Tama te dwai kolesaga ebo hauwa mu pedeliyu, tama te bidi hauwago gasa we bidi dali dwagi yai homu eyu godolo ebo kolesaga kedauwa saibao.
MAT 24:13 Tiali goli, mena bidi aga te tǫ dagalu silibo side bomonama bidali bidi da, teda Godigo aga ma dobola saibao.
MAT 24:14 Tama augwaligo te Godigo we bidi tonalubo kolesaga po, te wiegi yai po te tigidali tǫ habu badu pusaibao, te po tigidali tǫde bidibo we bidi augwaligo odomainogo, tama nosali gana digi te tǫ, de dagalu si silabo sogo te pedelaibao,” Jisasgo te po wai.
MAT 24:15 Jisasgo te po me wai, “Te polobadu bidali bidi Daniel agai Godigo po pusuyu, te dolobo gasa dwai naide po pusali, polobadu. Tama dagego te dwai nai te magi dwai sę isąwai wiegi yai bulude bidibo sueibao. (Bidigo te po nedebaso da, agai homugo bugagia koneao.)
MAT 24:16 Tama te sę pedelabo sogo te Judia tǫde bidibo we bidi augwali te bulu duba wi pao.
MAT 24:17 Tama te be daide ugwadu bidibo bidi te aga be aiya dulama, te doado bage me sigilugobeo, aga wi naga pao.
MAT 24:18 Tama te sogo gide bidibo bidi, te aga tudiba begelama, aga gudubo ugwa bede me sigi pelamuo, olo wi pao.
MAT 24:19 Te haliga yai we dabe me te sogode te we dabego wai ame mobadi te augwali hobede mu dao.
MAT 24:20 Dagego gedu haluasa po waiyąo, te dage te kedau ebo sogo ma te Sabat sogode wi pidali weyu tama tiao.
MAT 24:21 Te sogo da, te sęgę genuai mu elaluaibao. Te e tǫ gesi sogo elalubadi te megi e sogode te usu nagasu, te tiwai sęgę te polobadu munu me pedalobeo. Tama nosali me te tiwai sęgę munu me ma elalugobeo. Menio.
MAT 24:22 Tama Godigo te genuai sęgę elalubo sogo togogi menigi da, teda te tigidali we bidi mu doligi dao. Tiali goli God aga te sa muani we bidi augwalide homu konealua. Tama tiyu, augwali tobade agai te sogo togwaibao” wali.
MAT 24:23 “Te sogode, te bidi me deligo dagebolo e tobage po waibao, ‘Suao, te Godigo sa muani bidi Krais ede bidibao,’ ma ‘Ude bidibao’ obaso da, teda dagego homu te poba me dąų olamu dao.
MAT 24:24 Magi baso meni, te bidi meba aselama, tibo po e tiwai waibao, ‘Ena Krais, te sa muani bidi dao,’ ma ‘Ena te Godigo po pusubo profet bidi me deli dao,’ te tobage po waibao. Tama augwaligo bidi noma sabo bomai sę genuai eyu, tama haniani haniani sę yaibao. Augwaligo te we bidi God aga sa muani bage tibo po olama, te dwai sę ebo tomoba kegai hagede tebo dao. Tiali goli, te usu egobeo.
MAT 24:25 Odiąo, te sę pedelasiąbadi eno dagebolo te po hasia bolo wai dao.
MAT 24:26 Tama tibaso, augwaligo dagebolo te po waibao, ‘Suao, aga u badu te bidi meni yai madi bidibao,’ obaso da, te dage te badu me sugi pelamuo. Ma, augwaligo te po waibao, ‘Suao, aga te be tomode geme dualalubao,’ obaso da, te dagego te poba homu dąų me olamu dao.
MAT 24:27 Magi baso meni, te dagalude te be sele ula ebo sogo, te ula te sia ge pedalobo badu pedalama, tama te ula ebogo te sia ge dega saboba me pabo dao. Tama te Godigo Bidi Mu ma asobo sogo te tiwai naga pedelaibao, hania mu pedalaibao,” te po wai.
MAT 24:28 “Te isali hasa tigi elalubo madi, te pesageba te tigi mi tubo ba dabe augwali deliba sisinagasaibao,” Jisasgo te po wai.
MAT 24:29 “Te sogo te genuai sęgę yali te silai madi, tama polo te sia ge hulia selama, tama te polua ula me egobeo, tama te hǫ dabe dagalude tulaluaibao. Tama te dagalude bomai nai te tǫ mali tiwai elama, gęǫ page yaibao.
MAT 24:30 Te tebo sogo te Godigo Bidi Mugo dąį te dagalude pedelaibao, tama te tǫde we bidi hani tigidali augwali augwa nogo pagasa moni gela waibao. Tama augwaligo te Godigo Bidi Mu te dagalu pǫ daide ugwadu dualasa asobo sueibao, tama aga genuai bomo me genuai ula dali dulaibao.
MAT 24:31 Tama aga mobo bidi ensel dabe tagala palama, augwaligo te bu wabo nai biugel bomonama mu bu ola asaibao, tama augwaligo aga te sa muani we bidi dabe sisinaibao. Te augwali te tǫ bogo me si me si yali badu te we bidi sesa asiyu, tama te dagalu sesege badu mu usu nigi paibao, te we bidi sigi paibao,” Jisasgo te po wai.
MAT 24:32 “Dagego te ni kayade koneiąo. Te agai nologode te wę elaluyu, te gesi yabe pedalabo sogo, dagego koneaibao, te sogo te dwagi yai giliga nanobo si pedalainogo ebao, te po wabo dao.
MAT 24:33 Te tiwai naga, nosali dagego te eno megi pusali sę tigidali pedalobode subo si, teda dagego koneagameo, te tǫ dagalu si silabo sogo te pąba yagaselama, te e tųde elalubao po waibao.
MAT 24:34 Eno mu po dagebolo obao, te megi e sogode te tǫde bidalubo we bidi augwali me isisąbadi, tama te sę tigidali pedalaibao.
MAT 24:35 Te dagalu de tǫ si da, te silaibao, tiali goli eno po da, te munu me sia sogobeo,” Jisasgo te po wai.
MAT 24:36 “Tiali goli mena bidi mego te asabo sogo te bodolu munu me konebeo. Te dagalude bidibo mobo bidi ensel dabe augwaligo me konebeo. Ogwago me konebeo. Aga Aya deligo naga te bodolu konealubo dao.
MAT 24:37 Te polobadu mu bidali bidi Noa aga tǫde bidali sogo augwaligo yali kolesaga, te kolesaga tiwai naga te Godigo Bidi Mu ma asobo sogode me augwaligo tama tiaibao.
MAT 24:38 Te polobadu te genuai ąį asisąbadi, we bidi augwali te nai tuyu, te wę dabe tuyu, te we siyu ela bidalubadi yaide, tama Noa te moni geba tomoba pai dao.
MAT 24:39 Augwaligo homu kone me isąma, te augwali tama naga bidiba homu yali, tama polo te genuai ąį asiyu, te we bidi tigidali dagalasa pela silali. Te yali tiwai naga te Godigo Bidi Mu ma asobo sogo tiaibao, augwaligo te asabo sogo bodolu konesiąbadi.tama tiaibao
MAT 24:40 Tama te bidi si gide sę ebadi, tama Godigo me deli naga siyu, tama gasa me da, tede bidibadi tagalaibao.
MAT 24:41 Tama te we sigo te keli gagawai nai plaua nigibadi, tama Godigo me deli naga saibao, tama me da, tede bidibadi tagalaibao.
MAT 24:42 Tama tibaso, dagego bugagia tonaluao. Duga Genuai Bidi ma asobo sogo, te dagego konegobeo.
MAT 24:43 Dagego homugo te sęde koneao, te be page bidigo hasia bolo te nisu sogo hulide te nai wi sabo bidi asobo te agai konegi sogo da, teda agai bugagia tonalugi baso, tama te nai wi sabo bidigo agai be aluama, te tomoba soabo si te me gogolama me sula tagaligi menigi da.
MAT 24:44 Tama tibaso, dage me sisi elaluao. Te Godigo Bidi Mu te me sogo dagego homugo konesiąbo sogo te aga asaibao,” Jisasgo te po wai.
MAT 24:45 “Mena sę bidigo wiegi yai homu elama, tama agai aga genuai bidide homu kęą pai bidi dawe? Te bidi aga genuai bidigo aga sa munama, te gasa sę ebo bidi augwali tonalumainogo, tama augwalibolo aga te nai mabo sogo te nai momainogo yai.
MAT 24:46 Tama aga genuai bidi gasaba pelama, tama nosali ma asobode, tama te sę bidigo polobadu agai wali po selama, te sę bugagia yai suali da, teda te sę bidi aga homu wiegi yai pemene yagameo.
MAT 24:47 Eno mu po dagebolo obao, teda agai te sę bidi aga te tigidali agai nai tonalubo bidi munama bidaibao.
MAT 24:48 Tiali goli, te sę bidi dwai bidi bidibaso da, teda aga homugo digi aga te homu elama, te eno genuai bidi te polo me asogobe da homu eyu,
MAT 24:49 tama agai aga dali deli sę ebo bidi dabe augwali elibo sę gagalaibao, tama agai te nai me te wę me te bomai ąį tubo bidi augwali dali te ąį tubo sę gagalaibao.
MAT 24:50 Tama te sę bidi aga genuai bidi ma asabo sogo sisi isąbadi, tama me sogo agai te bodolu konesiąbo sogo te aga genuai bidi ma asaibao.
MAT 24:51 Tama ma aselama, te genuai bidigo te sę bidi mu dolama, tama agai aga te tibo po wabo bidi dabe dali te dwai buluba munama bidaibao. Tede te augwali dwai gela weyu, tama augwa kele halua tuyu bidaibao,” Jisasgo te po wai.
MAT 25:1 Jisasgo te po wai, “Te aga ma asobo sogo te Godigo we bidi tonalubo madi tomoba painogo ebo we bidi augwali te wegi mani nogo si tiwai dao. Te bidi me deli megi tama we sabo bidi, aga asaiba wali. Tama te gesi wegi mani augwaligo augwa lam sole selama, tama augwali te gege peyu, te tųdu tiąba pelama, tama aga odasa asainogo yai.
MAT 25:2 Tama a naga wegi mani homu kolesaga meni yai, tama me a naga wegigo wiegi yai homu kolesaga elaluai.
MAT 25:3 Te homu kolesaga meni yai wegi mani augwaligo lam sole sela asali, tiali goli augwaligo te ąį manabo wel dali me sela asobeo.
MAT 25:4 Tiali goli te homu kolesaga elalubo wegi mani augwaligo te ąį manobo wel te augwa botolde pągąnama tama augwaligo te dali sela asai.
MAT 25:5 Te bidi te we sabo bidi aga polo asobe, tama te wegi mani tigidali gedu sęgę elama tama augwali godege piai.”
MAT 25:6 “Tama huli tomode mu i me deli ola asai, ‘Te we sabo bidi aga asobao. Dagego aga te tųdu tiąba pelama tama aga odasa asao.’
MAT 25:7 Tama olama, tama te wegi mani augwali tigidali hodaluama, tama augwa lam sole sisi elama dodolai.
MAT 25:8 Tama te homu kolesaga meni yai wegi manigo te wiegi yai homu kolesaga elalubo wegi dabebolo te po wai, ‘Dagego wel ąį me badu dabolo mao. Dago sole lam ąį sula sainogo ebuo.’
MAT 25:9 Tiali goli te kolesaga yai wegi manigo po wei augwalibolo ponoyu, te po wai, ‘Te e wel ąįgo te da me te dage dali usu egowe, egobewe, te dago konebeo. Te duga stua beba pelama, duga tedali abelegi pao,’ wali.
MAT 25:10 Tama augwali pelama, te wel ąį abelegi pai digi, tama te we sabo bidi aga asali. Tama te sisi elama bidali wegi mani augwali te be tomoba aga dali te we sabo genuai nai tubo madi pali. Tama bede bidibo bage augwaligo te be tų bugagia paliai.”
MAT 25:11 “Nosali te wel ąį abelegi pali te gasa a naga wegi ogwa we augwali aselama, tama augwaligo bego bego weyu te po wai, ‘Genuai bidi, genuai bidi, nago da be tų dalao.’
MAT 25:12 Tiali goli agai po wei ponoyu, bomonama te po wai, ‘Eno mu po dagebolo obao, eno dage konebeo,’ wali.”
MAT 25:13 “Tama tibaso, dagego bugagia tonaluao. Dage me, te dagego te aga asobo sogo me te bodolu me konebe dao,” Jisasgo te po wai.
MAT 25:14 Te Jisasgo te po me wali, “Te Godigo Bidi Mu aga ma asobo sogo e tiwai yaibao. Te genuai bidi me deli aga te digibulu bulu painogo ebo. Agai aga sę ebo bidi dabe i olama, asobo si, tama agai nai dabe augwali nogoba osogo muai, augwaligo bugagia tonalumainogo yai.
MAT 25:15 Agai te sę bidi deli deli augwaligo kolesaga me bomo homugo koneama, tama augwalibolo te mone dobawai. Me delibolo agai te bidi sese mone hauwa 5,000 kina mani, tama mebolo agai te bidi sese mone hauwa te 2,000 kina mani, tama mebolo agai te bidi sese mone hauwa 1,000 kina mawai. Agai tama tilama, aga pai.
MAT 25:16 Aga pai madi, tama polo te 5,000 kina sali bidigo te monede bisnis sę elama, tama gasa mone te 5,000 kina sali, te moneba ugwadu daganani mone te profit mone dao.
MAT 25:17 Tama te 2,000 kina sali bidigo, agai me te monede bisnis sę elama, tama gasa mone 2,000 kina te moneba ugwadu daganama sai.
MAT 25:18 Tiali goli te bidigo te mone 1,000 kina sali bidi aga pelama, tama agai te tǫ dedage dogolama, tama aga genuai bidigo mani mone te dedagede geme dualigi pai.”
MAT 25:19 “Bobobage sogo bidada pai madi, tama nosali te sę bidi dabe augwa genuai bidi ma asai. Tama agai augwalibolo te mani mone po dodolainogo yai.
MAT 25:20 Tama te 5,000 kina sali bidi asali, tama agai te moneba ugwadu te 5,000 kina daganama sesali, tama te po wai, ‘Genuai bidi, nago mone 5,000 kina eno nogoba osogo muai dao. Suao, eno bisnis sę elama, gasa mone 5,000 kina ma sela muai dao,’ wali.
MAT 25:21 Aga genuai bidigo agabolo te po wai, ‘Nage wiegi yai sę bidi dao, nago enade homu kęą pai bidi dao, nago wiegi yai sę mu yai. Nago dwasianu nai bugagia tonalualigo da, tama eno homugo nage te nai hauwa tonalubo bidi nigilaibao. Nago wiegi yai homu pemene ena dali yagasao,’ wai.
MAT 25:22 Tama bidigo te 2,000 kina sali bidi me aselama, tama agai te po wai, ‘Genuai bidi, nago te 2,000 kina enabolo mawai. Suao, eno bisnis sę ma elama, te eno gasa mone 2,000 kina ma sela muai dao,’ wali.
MAT 25:23 Aga genuai bidigo agabolo te po wali, ‘Nage wiegi yai sę bidi dao, nago enade homu kęą pai bidi dao, nago wiegi yai sę mu yai. Nago dwasianu nai bugagia tonalualigo da, tama eno homugo nage te nai hauwa tonalubo bidi nigilaibao. Nago wiegi yai homu pemene ena dali yagasao,’ te po wai.”
MAT 25:24 “Tama te 1,000 kina sali bidi, te bidi me aselama, tama te po wai, ‘Genuai bidi, eno koneani, nago te nai ge bulasiąwai goli, nago te nai sabo dao. Tama gasa bidi mego tǫ badu te nai wai telawai digi, tede nago te nai dabe sabo dao. Nage sesena pai bidi dao.
MAT 25:25 Tama ena wi ebaso, nago enabolo te mani mone te 1,000 kina, te eno tǫ dedageba geme dualai. Te naga mone e dao,’ te sę bidigo te po wali,” Jisasgo te po wai.
MAT 25:26 “Tiali goli aga genuai bidigo po agabolo wei ponoyu, te po wai, ‘Nage dwai sę bidi dao. Nage sę hagela ebo bidi. Ma, nago bugagia koneani eno te nai ge bulasiąwai goli, te nai siyu, tama gasa bidigo tǫde telawai nai sabo te nago konebo dao.
MAT 25:27 Tialima, nago magi baso eno mone te benkba muai meniwe? Nago te eno mone te benkba mugi sogo da, teda ena ma asobode te ena nai dali te gasa ugwadu daganani nai te profit mone dali sigi da.
MAT 25:28 Tialima, dagego te mone 1,000 kina te bidi agade selama, te mone 10,000 kina munalubo bidibolo mao.
MAT 25:29 Magi baso meni, te nai meba elalubo bidi augwali tigidali, te eno meba ma augwalibolo mawaibao, tama augwaligo nai umabo mu elaluaibao. Tiali goli, te dwasianu nai naga elalubo bidi, te agade eno te dwasianu nai me ma saibao.
MAT 25:30 Tama e dwai olo bidi, dagego aga te be hulia si madi buluba sela sąyao. Tama tede augwali dwai gela weyu, tama augwa kele ma halua tueibao,’ te genuai bidigo te po wali,” Jisasgo te po wai.
MAT 25:31 Te po ma weyu, Jisasgo te po wai, “Nosali te Godigo Bidi Mu te tuni bidi ma asobode, tama tigidali ensel mobo bidi aga dali, te sogo aga te tuni bidigo wiegi yai sia saide dualagasaibao.
MAT 25:32 Tama tigidali tǫde bidibo we bidi hani augwali aga gesabidiba sisinaibao. Tama agai augwali dobolama, tama hani si bugulama muaibao, tama te sipsip me meme tonalubo bidigo te sipsip hani tedaliba muyu, te meme hani tedaliba mubo gilama tiwai yaibao.
MAT 25:33 Agai te sipsip dabe aga dolo nogo badu muyu, te meme dabe pobase nogo badu muyu ebo tiwai yaibao.
MAT 25:34 Tama te tuni bidigo aga dolo nogo badu bidibo bidi dabebolo po weyu, te po waibao, ‘Dage da, te eno Ayago dage dali wiegi yai sę mu yai dao. Polobadu mu agai te tǫ nigali sogode agai we bidi tonalubo kolesaga sisi ilama, tama tede dage bidabo madi sisi ilali elalubo. Dage aselama, te bulu tomoba dage asiąo.
MAT 25:35 Magi baso meni, polobadu ena nasi dali bidibadi, dagego ena nai mawai. Ena ąį nogone ebadi, tama dagego ena ąį mawai. Ena gasa bulu bidi asobaso, tama dagego duga beba ena odasa pai.
MAT 25:36 Ena ugwa meni badi, tama dagego ugwa ena mani. Ena gasi ebadi dagego ena bugagia tonaluai. Ena kalabuside bidibadi, tama dagego ena suagasai dao,’ te tuni bidi agai te po waibao.
MAT 25:37 Te po obaso, tama te doloba pai we bidi dabego po agabolo wei ponoyu, te po waibao, ‘Genuai Bidi, nisu sogo dago suali, nage nasi elalubadi, tama dago nage nai mawai dawe? Tama nisu sogo nage ąį nogone ebadi, dago nage ąį maniwe?
MAT 25:38 Nisu sogo dago suali, nage gasa bulu bidi asama, tama dago beba odasa paliwe? Tama nisu sogo nage ugwa meni baso, tama dago ugwa nage mawai dawe?
MAT 25:39 Tama mena sogo dago suali, nage gasi elalubaso, ma nage kalabuside bidibadi, tama dago nage suagasu tau saliwe?’ te doloba pai we bidi augwaligo te po hanalu waibao.
MAT 25:40 Tama tuni bidigo po wei ponoyu, augwalibolo te po waibao, ‘Eno mu po dagebolo obao, te tigidali sę dagego te eno amanu e tiwai te nogi meni yai bidi dali yali wiegi yai sę, te sę dabe te dagego ena dali te yali dao.’ Tuni bidigo te po waibao.”
MAT 25:41 “Tama tuni bidi agai te pobase nogo badu bidibo we bidi augwalibolo e tobage po waibao, ‘Dage haga yabo bidi dabe dao. Dage enade geda selama, tama dage te munu me sula sisąbo siaba pao, te sia te Ayago sisi ilali elalubo, te dwai sę yali tobolu bidi Satan aga wali bilibo mobo ensel bidi dabe augwali dali mumainogo yai.
MAT 25:42 Magi baso meni, polobadu ena nasi idubadi, dagego ena nai mabeo. Ena ąį nogone idubadi, tama dagego ena ąį mabeo.
MAT 25:43 Ena gasa bulu bidi digi, tama dagego beba ena odasa pabeo. Ena ugwa meni badi, dagego ugwa ena me mabeo. Ena gasi elalubadi, ma ena kalabuside bidibadi, tama dagego ena suagaselama tau sabe,’ tuni bidigo te po waibao.”
MAT 25:44 “Tama augwaligo me agai po wei ponoyu, te po waibao, ‘Genuai Bidi, nisu sogo nage nasi ebadi dago suali, ma nage ąį nogone ebadi, ma nage gasa bulu bidi, ma nage ugwa meni yai me, ma nage gasi elalubadi, ma nage kalabuside bidibadi, tama dago nage me tau sabewe?’ augwaligo te po waibao.”
MAT 25:45 “Tama agai augwaligo po wei ponoyu, te po waibao, ‘Eno mu po dagebolo obao, te dagego eno megi e wali tobage sę te e tiwai nogi meni yai bidi aga dagego tau me sabeo, te tobage sę dagego enabolo me te ebeo,’ te tuni bidigo te po waibao.
MAT 25:46 Tama te bidi hani augwali te dwai dene genuai sigi paibao, te sesemane sogo dene iduabo bulude bidaibao. Tiali goli te doloba pai we bidi dabe augwali da, te sesemane sogo bidada peyu, bidada pabo ula selama bidaibao,” Jisasgo te po wai.
MAT 26:1 Te Jisasgo te po wali tigidali silama, tama te sogo agai aga wali pabo bidi dabebolo te po wali,
MAT 26:2 “Dagego koneani, si sogo naga bidilama, tama te bo disąwai nai tubo si nogi Pasova te pedelaibao. Tama augwaligo te Godigo Bidi Mu te boi bidi dabego nogoba munama, tama augwaligo aga te ni pedaide walaibao,” wali.
MAT 26:3 Tama te sogo tama te genuai pris bidi dabe me, te Juda tobolu bidi dabe badi, augwali te pris tobolu bidigo wiegi yai genuai beba sisinani, te aga nogi Kaiafas dao.
MAT 26:4 Tama augwaligo Jisas geme dąų olama, tama aga ela muabo po miai dao.
MAT 26:5 Tiali goli augwaligo e tiwai po wai, “Dago te sę te toma tuyu olo bidibo wiegi yai side me egobeo. Tiyu te we bidi augwaligo wąbi hwįbo sę hodolabuo,” te po wai.
MAT 26:6 Te moni hanu Jerusalem pąde te dwasianu hanu nogi Betani elalubao, tama tede te bidi me deli nogi Saimon bidai. Polobadu te oiyabe gasi yai bidi bidama, tama te gasi silai dao. Tama Jisas aga te bidi Saimongo bede bididubadi,
MAT 26:7 tama we me deli aga pageba asali, tama gasagi yai denami ebo wel wiegi yai mu te wego te botol masigi elalubo sela asai. Te wel abelabo mone te genuai mu da. Tama agai te denami ebo wel te Jisas toboluba gelali, te aga nai tubo saide dulalubo sogo tiai dao.
MAT 26:8 Tama aga wali pabo bidi dabe augwaligo te tebo sulama, tama augwaligo homu dwai yai. Augwaligo te po wai, “Magi eyu te wiegi yai denami ebo wel olo dali hagawaliwe?
MAT 26:9 Tama te wiegi yai denami ebo nai wel te bidigo abelemainogo magi sogo da, tama dago genuai mone te naide selama, te magi nai meni yai bidi dabe augwalibolo magi dao.” Augwaligo te po wai.
MAT 26:10 Te Jisasgo augwaligo te po wabo koneama, tama agai augwalibolo te po wai, “Magi baso dagego sęgę te e webolo mobawe? Agai wiegi yai kolesaga mu enabolo yalio.
MAT 26:11 Tama te magi nai meni yai bidi dabe dage dali sesemane sogo bidaibao. Tiali goli ena da, te ena dage dali sesemane sogo me bidigobeo.
MAT 26:12 Te e wego te wiegi yai denami ebo wel ena tigiba gelali, te agai ena te gų pagede muabo sę te megi e sisi ilali dao.
MAT 26:13 Eno mu po dagebolo obao, te tigidali tǫ habu badu te augwaligo Godigo dwagi yai gesi po pusigi pobaso da, tama tede augwaligo te megi e wego enade yali sę po me augwaligo pusaibao. Tama agai yali sę kegeda pidali weyu, augwaligo teba homu munama koneaibao,” Jisasgo te po wai.
MAT 26:14 Te Jisas wali bilibo bage te nogo si olama sągągo si bidi te me deli, aga nogi Judas aga bulu nogi Keriot dao. Tama te wego te wel Jisasgo toboluba gelali sogo te bidi aga te pris tobolu bidi dabe pageba pelama, tama augwalibolo te po wai,
MAT 26:15 “Dagego magi nai enabolo mobaso, tama eno dage nogoba te Jisas mawaibawe?” wali. Tialima augwaligo te mone ge 30 agabolo mawai. Te masigi dabe te wiegi yai kapa nogi silva tego nigai masigi dao.
MAT 26:16 Tama te sogo agai Jisas te boi bidi dabe augwali nogoba mawainogo te deli sogo me sogo gegebo sę gagalama yai.
MAT 26:17 Te polali side te bo disąwai nai bret tubo sogo olo bidibo side, Jisas aga wali pabo bage augwali aga pageba aselama, tama augwaligo te po wai, “Nago homugo dago nago Pasova tuabo nai menade sisi ilagawe?”
MAT 26:18 Tama agai te po wai, “Dage te moni hanu tomoba pelama, tama dage te bidi me deli bidibo digi pelama, agabolo te po wao, ‘Te po ola mabo bidi agai te po walio, “Eno bodolu mani sogo te pąba yagasalio. Nago bede te eno nai Pasova te ena wali pabo bidi dabe dali tuaiba,” te po walio.’ Te be page bidibolo te po wao,” Jisasgo te po wai.
MAT 26:19 Tialima, aga wali pabo bidi dabego te Jisasgo augwalibolo wali po selama, te tiwai yali, tama augwaligo te Pasova tubo nai sisi ilali.
MAT 26:20 Tama be pio ebode aga te aga wali pabo bidi te 12 bidi dabe dali te nai tubo tebol sai pąde dualama bidai.
MAT 26:21 Augwali nai tuyu bidibadi, tama agai te po wai, “Eno mu po dagebolo obao, dage tomode me deligo ena te boi bidi dabego nogoba mawaibao,” wali.
MAT 26:22 Tama augwali te pode homu sęgę mu ebaso, tama deli deli bidibo bage augwaligo agabolo hanaluyu, te po wai, “Genuai Bidi, ma ena dawe?”
MAT 26:23 Tiali goli agai po wei ponoyu, te po wai, “Te ena dali tubo nai sainu e pouba aiya nogo mubo bidi, agai ena te boi bidi dabego nogoba mawaibao.
MAT 26:24 Te Godigo Bidi Mu aga pabo tų po augwaligo te bukude polobadu asęani, tama te tųdu aga peyu, tama isaibao. Tiali goli te Godigo Bidi Mu te boi bidi nogoba muabo bidi da, hobede mu ebao. Te aga idago te bidi aga me ame negi menigi sogo da, te usugi da,” Jisasgo te po wai.
MAT 26:25 Judas aga te boi bidi nogoba mani bidi, agai po wei ponoyu, te po wai, “Po ola mabo bidi, ma ena dawe?” Jisasgo agabolo te po wai, “Awe, nago te tiwai po obao.” Jisasgo te po wai.
MAT 26:26 Augwali nai tudubadi, tama Jisasgo te bret selama, tama Godibolo nage usu da po olama, tama nogogo pebedelama, tama aga wali bilibo bidi dabebolo mani. Tama agai te po wai, “Dagego selama tuao. Te eno tigi dao.”
MAT 26:27 Tama agai te wain ąį munalubo kap me deli selama, tama Godibolo nage usu da po olama, tama augwalibolo mani, tama te po wai, “Dage tigidaligo te ąį naga tuao.
MAT 26:28 Magi baso meni, te eno kaneme dao. Augwaligo ena ela muyu, tama eno kaneme gelebogo te Godigo te we bidi ma dobola sabo gesi po te bomo menama mu dąų walaibao. Eno te kaneme gelebogo te hauwa we bidigo dwai sę ebo te tagaliyu dagala sąwaibao.
MAT 26:29 Eno dagebolo obao, eno te wain ąį munu me ma tugobeo, te sogo eno te gesi wain ąį dage dali te eno Ayago we bidi tonalubo madi tomode bidibo sogoba usu nagasaibao,” Jisasgo te po wai.
MAT 26:30 Jisasgo te po silibo si, tama augwaligo Godigo nogi ugwaba sabo tęąbi po ola silama, tama augwali te bedu buluba solama, tama augwali te Oliv bulu duba pai.
MAT 26:31 Te augwali te Oliv bulu duba sabolama, tama Jisasgo augwalibolo te po wai, “Megi e sogo hulide dage da, te dage tigidali te enaba duga homu tigidali mubo sę tagalama tuloluaibao. Magi baso meni. Te Godigo polobadu wali po augwaligo te bukude asęani, te po tama wai, ‘Eno te sipsip tonalubo bidi elibaso, tama te sipsip hani dabe augwali tedali tedela wi paibao.’ Te asęani po elalubao.
MAT 26:32 Tiali goli ena isąma tama ma hodaluama, tama ena dage asabo madi polasa te Galili tǫba paibao,” Jisasgo te po wai.
MAT 26:33 Pitago po wei ponoyu, bomonama agabolo te po wai, “E bage augwali tigidaligo te nageba augwa homu mubo kolesaga tagalama tolalueibao nago te tama po wabo digi, te ena da, ena tama me tegobeo,” Pitago te po wai dao.
MAT 26:34 Jisasgo agabolo te po wali, “Eno mu po nagebolo obe dao, e sogo megi hulide, te ba kakaruk po wasiąbadi tama sela sogo nago po weyu, nago ena konebeo te po waibao.”
MAT 26:35 Pitago agabolo te po wai, “Bidi dabe augwaligo ena me nage dali ela muyu da, teda te usu dao. Tiali goli, eno nage konebeo po munu me wagobeo. Mu menio,” Pitago te po wai. Tama tigidali aga wali pabo bidi dabego te tiwai po naga wai.
MAT 26:36 Tialima, Jisas augwali dali gasa badu te augwaligo nogi yali te Getsemani teba pai. Tama aga wali pabo bidi dabebolo te po wai, “Dage ede dualama bidaluao, tama ena u badu pelama, gedu haluasa po wagi pobao,” te po wai.
MAT 26:37 Tama agai Pita dali te Sebedigo ogwa si selama, augwali hodobo pai. Tama megi da, aga homu sęgę elama, tama aga homu dene dwai mu yalio.
MAT 26:38 Agai augwalibolo te po wali, “Eno homu sęgę mu ebaso, pąde ena isainogo ebao. Dage ede bidiyu, tama ena dali tonaluyu, godege pigimio.”
MAT 26:39 Tama aga dwasianu gana obaba pelama, tama aga pabo gesabidiba degasa dulama, tama gedu haluasa po weyu, bomonama te po wai, “Eno Aya, te usu da wida, teda nago enade te elalubo kap dagala sąyao. Tiali goli nago eno homu kolesaga wali me pelamuo. Menio. Nago naga homu kolesaga naga wali pao,” wali.
MAT 26:40 Tama aga wali pabo bidi dabe bidiboba aga pelama, tama suali, augwali godege pila muai. Tama agai augwali hodolama, tama Pitabolo agai te po wai, “Magi yaliwe, dagego ena dali te dwasianu sogo tonalugobewe?
MAT 26:41 Dagego tonaluyu, gedu haluasa po wao. Tiyu dage usu sabo dwai kolesagago te dage aiyaba elalugobeo. Mu tama, dagego homugo te wiegi yai sę naga yaibao. Tiali goli, te dagego bomo usu egobeo,” wali.
MAT 26:42 Aga si sogo ma pelama, gedu haluasa po te aga dene sabode te tiwai po wai, “Eno Ayao, tama te kapgo ena ela soabo usu me egobe da homu elama, tama eno te kap selama, te ąį tumai da wida, teda nago naga homu kolesaga wali naga pao.,” te po wai.
MAT 26:43 Tama aga ma aselama suali, augwali pila mubo suai. Augwali gedu sęgę yalio.
MAT 26:44 Tama agai augwali ma tagalama, tama aga pelama, gedu haluasa po sela sogo wagi pai. Te gedu haluasa po aga hasia wali tiwai, te naga agai ma walio.
MAT 26:45 Nosali aga wali pabo bidi dabe pageba aselama, augwalibolo te po wai, “Dage me pila mudu toma tudubawe? E dao odiąo, te sogo megi pedalalio, te augwaligo Godigo Bidi Mu te dwai sęgę sai bidi dabego nogoba mawainogo ebao.
MAT 26:46 Dage hodaluao, tama da augwali tiąba pinao. Suao, ena augwaligo nogoba maiabo bidi aga te pąba megi yagasobao,” Jisasgo te po wai.
MAT 26:47 Te Jisasgo po udubadi yaide, tama Judas, te aga wali pabo bidi te 12 wali bidi me deli, aga asali. Tama genuai bidi hani aga dali asali, tama augwaligo te bobobage hwą ge me wąbi me nogode tulama asai. Te genuai pris tobolu bidi dabe dali, te Juda dabe tobolu bidi hani dabego augwali tagala palobaso asalio.
MAT 26:48 Tama aga te augwali nogoba maiabo bidigo, agai e tiwai po me deli augwalibolo usu selama mani, “Te eno bidi me deli aga dali ena kisa sigi paibao. Te bidi aga Jisas dao. Dagego aga naga dąų olama, pageabi yao.” Te po wai.
MAT 26:49 Tama aga polo Jisas pageba dolo aselama, tama te po wali, “Hulide dao, po ola mabo bidio.” Tama agai aga dali gesabi sebedi usu sagasai.
MAT 26:50 Jisasgo agabolo te po wai, “Abagio, te nago aselama yainogo yali sę, te sę nago polo tama yao,” wali. Megi da augwali aselama, nogo Jisasba munama, tama aga pageabi elama dąų wai.
MAT 26:51 Tialima, Jisas dali bidali bidi me deligo agai aga bobobage hwą ge kega sai. Tama agai te hwągo te pris tobolu bidigo sę bidigo olo togwa sąnama, tǫba tulaluai.
MAT 26:52 Tiali goli Jisasgo agabolo te po wai, “Te nago hwą ge aga muani madi ma bulao. Tigidali bidi te bobobage hwą gego hwįbo kolesaga ebo bidi dabe, augwali te gasa bidi dabego moni hwą gego ela muaibao.
MAT 26:53 Nago eno bomo konebeo. Eno ena Ayabolo hanaluyu da, teda agai te ensel mobo bidi hani umabo mu tagala palama, tama augwali dulama, ena tau sagasaibao.
MAT 26:54 Tiali goli, eno te tiwai ebaso da, teda te megi enade pedelabo sę pedalogobeo. Polobadu Godigo po asęani bukude te enade megi pedelabo sę po asęai dao. Pedalomainao,” wali.
MAT 26:55 Tama te sogo naga Jisasgo te aga sagasai bidi hanibolo te po wai, “Dagego ena sagasiyu, tama dagego te bobobage hwą ge me wąbi dabe tolasa asali, te dage te nai wi sabo bidi sainogo asobo tiwai yali. Magi baso te tiwai yaliwe? Tigidali sogo ena te Moni Lotu Be tempel tomode bidiyu, tama eno po te we bidi augwalibolo ola madu geai goli, te dagego te sogo tama dagego ena me nogo dąų me wabeo.
MAT 26:56 Tiali goli te sę tigidali enade megi pedalobo te polobadu Godigo po pusali bidi profet dabego bukude asęani po usu nainogo ebao,” Jisasgo te po wai. Tama aga wali pali bidi dabe augwaligo Jisas taga peyu, tama augwali wi pela silai.
MAT 26:57 Te bomai po page koneai bidi dabe dali, te Juda dabe tobolu bidi dabe dali, augwali te bidi Kaiafasgo beba sisinama bidaluai. Te Kaiafas aga te pris bage tuni bidi mu dao. Tama te Jisas nogo tulama dąų wali bidi dabe augwaligo aga te Kaiafasgo beba odasa palio.
MAT 26:58 Tama Pita Jisas aga wali pai, tiali goli aga digibulu gana dwasianu bidai. Aga te tuni bidi Kaiafasgo obo tomoba pelama, tama te enesigi bidi dabe dali te be mesalode dulaluai. Agai te magi sę Jisasde pedalobo te agai sula sainogo yali.
MAT 26:59 Te pris tobolu bidi dabe dali, te tigidali kaunsil dabe dali, augwaligo te Jisasde tibo po omainogo yabo bidi dabe gegebo sę yali, tama augwaligo aga ela muabo po dąų wabo tų gegemainogo yalio.
MAT 26:60 Tama bidi hauwa pedelama, tama tibo po dabe agaba walio. Tiali goli augwaligo aga elabo te dwai sę yali te po gegali te usu me ebeo. Tiali goli nosali bidi me si aselama sabolali.
MAT 26:61 Tama te bidi sigo te po walio, “Te bidigo te po wai dao, ‘Eno te Godigo Moni Lotu Be tempel aluama degebode, tama sela sogo eno ma sę ebo usu yaibao,’ agai te po wai dao,” augwali sigo te po wai.
MAT 26:62 Tama te pris tuni bidi doligulama Jisasbolo te po wai, “Nago te po me deli wei ponosiąma ebawe? Magi yaide augwaligo te po dabe nagebolo togolobawe?” wali.
MAT 26:63 Tiali goli Jisasgo po me wabeo. Tama te pris tuni bidigo agabolo te po wai, “Te nago dabolo mu po naga omainogo eno nagebolo te bidibo ula elalubo Godigo nogide te po hanalu obao, nage te Godigo sa muani bidi Krais, te Godigo Ogwa dawe, ma meniwe?”
MAT 26:64 Jisasgo agabolo te po wali, “Awe, nago po wali ena te tiwai dao. Tiali goli eno dagebolo obao, nosali dagego te Godigo Bidi Mu te Tigidali Bomo Elalubo Godigo dolo nogo badude dualalubo sueibao. Tama aga te ugwadu daide elalubo pǫde bidama asobo, te me dagego sueibao,” wali.
MAT 26:65 Jisasgo te tiwai po wali, tama te pris tuni bidigo te po odama, tama dwai homu mu eyu, tama aga gudali bobage ugwa pisilama, te po wali, “Agai Godibolo posobo po walio. Tama te bidi meba bolo agai e bidide po pusumainogo i wabo tagalao. Agai Godibolo posobo po walio. Megi tama te po wali dagego odali dao.
MAT 26:66 Dagego magi homu ebowe?” Tama augwaligo po wei ponoyu te po wali, “Agai dwai sę yalio, tama aga isimainao,” wali.
MAT 26:67 Tama megi da augwaligo pesa Jisas gesabiba sąwani, tama augwaligo nogo sugunama aga elali, tama mebago nogo kalago aga elama,
MAT 26:68 tama augwaligo te po wai, “Nage Krais, te Godigo sa muani bidi, nage te Godigo po pusubo bidi profet da wida, megi wao. Dego nage elaliwe, te nogi nogi ya,” augwaligo te Jisas dali wai.
MAT 26:69 Te augwaligo te sę Jisas dali ebadi, tama Pita te be mesalode dulaluai. Tama tede sę ebo we me deli aga pąba aselama, tama te po wai, “Nage me te Galili tǫ bulu bidi Jisas dali bidai dao,” wali.
MAT 26:70 Tiali goli Pitago po weyu, menio po te tigidali bidigo gedude bomonama, te po wai, “Eno nago te wabo po page konebeo.”
MAT 26:71 Tama aga solama, te be bagulali obo mabo pąde bidai. Tama gasa sę we mego aga sulama, tama te pąde bidalubo we bidi augwalibolo te po wai, “Te e bidi da, te Nasaret bulu bidi Jisas dali bidali bidi dao.” Te po wai.
MAT 26:72 Tama Pitago po geme ma dualiyu, bomonama te po wai, “Mu tamao, eno te bidi me konebeo.”
MAT 26:73 Nosali gana dwasianu, tama te dolaluali bidi meba augwali aselama, Pitabolo te po wali, “Mu tama, nage augwali hani bidi dao. Naga pogo nage haninani dao, nago po te Galili bidigo po wabo tiwai wabo dao,” wali.
MAT 26:74 Tialima megi da Pitago po bomo mu elama weyu, agai tibo po obaso da, teda Godigo aga ela mumainogo eyu te po wai, “Mu tamao, eno te bidi munu me konebeo. Mu menio.” Agai te po ola silai madi, tama polo te ba kakaruk po walio.
MAT 26:75 Tama megi da Pitago Jisasgo aga dali wali po homugo ma koneanio, “Te ba kakaruk po wasiąbadi, tama nago po sela sogo olama, te nago ena konebeo waibao.” Tama Pita aga te bedu buluba solama, gela geninama mu wai dao.
MAT 27:1 Te be posa pabode, tama te tigidali Godibolo nai ula mabo pris genuai bidi dabe badi, te Juda hani tobolu bidi dabe dali, augwaligo po minama, Jisas elabo po olama, tama deli homu elama te po dąų wai.
MAT 27:2 Augwaligo aga te aligabo bonogo kęnama, tama augwaligo aga selama, te polalubo genuai gavman bidi Pontius Pailat bidibolo magi pai.
MAT 27:3 Megi da Judas, te Jisas boi bidi dabego nogoba mani bidi, agai Jisas augwaligo po tų ebode aiyaba elaluama tama aga ela muabo homu ebo suai. Tama aga ge neyu, tama homu hasegeleyu yai, tama te sali mone ge bidi sese olama nogo si silva mone te pris genuai bidi dabe dali te Juda dabe tobolu bidi dabe augwalibolo te mone sela pelama, ma magi palio.
MAT 27:4 Tama agai augwalibolo te po wai, “Eno dwai sę elama, sęgę salio. Eno te magi dwai sę me isąwai bidi te boi bidi dabego nogoba manigo, tama aga isaibao,” wali. Tiali goli augwaligo te po wai, “Te dago sę menio. Te naga sę tali dao.”
MAT 27:5 Tama Judasgo te silva mone ge dabe te Moni Lotu Be tempel tomode sąnama, tama aga pelama, aga digi te ba bonoba waligi pelama isai.
MAT 27:6 Te genuai pris bidi dabe augwaligo te Judasgo sąwani mone ge selama, tama augwaligo augwa hasi te po wai, “Te e monede da, te bidi elai mone dao. Tama tibaso, dago te mone ge te Moni Lotu Be tempel mone dali muyu da, teda dago te bomai po bolaibao. Te dali me mugobeo,” wali.
MAT 27:7 Tama tibaso, augwaligo po me dedeli minama dąų wali, tama nosali augwaligo te monego te bidi dabego te sene nigabo mama tǫ sabo madi te tǫ abelali. Augwaligo te homu yali, te digibulu bulu bidi dabe ede isiyu da, teda te tǫ augwali muabo gų page nigilama elalumainogo homu yali.
MAT 27:8 Tama augwaligo te tǫ te bidi elai monego abelebaso, te we bidi augwaligo te tǫ nogi poali, te Kaneme Tǫ nogi wai. Tama megi tama me, te nogi me elalubo dao.
MAT 27:9 Tama augwaligo te tǫ tama abeleyu, tama po me deli polobadu Godigo aga po pusali bidi profet Jeremaiago pedauwalide wali po te megi mu usu nanio. Agai te po polobadu wai, “Te Israel dabe meba augwaligo te bidi me deli abelabo mone ge noma dodolama tama te silva mone ge bidi sese olama nogo si te tama po dąų wali.
MAT 27:10 Tama augwaligo te mone ge selama, tama augwaligo te sene nigabo mama tǫ sabo tǫ abelali, te Genuai Bidigo enabolo wali po tiwai dao.”
MAT 27:11 Te bidi Jisas te gavman polalubo bidi gedude te be tomode dodolai. Tama genuai polalubo gavman bidigo agabolo hanalu wali, “Nage Juda dabego tuni bidi dawe?” Tama Jisasgo te po wali, “Naga digi naga te po obao.”
MAT 27:12 Tama te genuai pris bidi dabe badi, te Juda bage tobolu bidi dabe dali, augwaligo aga po tų ilibo sę yali. Tiali goli agai po me deli wei me ponebeo.
MAT 27:13 Tama te gavman genuai bidi Pailatgo agabolo te po wali, “Ma, nago te tigidali po augwaligo nage po tų ilibo po te nago odobewe?”
MAT 27:14 Tiali goli Jisasgo po me deli te gavman bidi Pailatbolo wei me ponebeo. Tama tibaso, te polalubo gavman bidi aga homu hauwa eyu noma sali.
MAT 27:15 Te tigidali kibu bede te Pasova side bodolu munama olo bidali sogo, te polalubo gavman bidigo te kalabus bidi me deli olo tagala palobo dao. Te we bidi augwa digi te bidi me deli tagala palomainogo aga nogi obaso, teda te tuni bidi Pailatgo augwaligo homu wali peyu, te bidi me deli te augwaliba tagala palobo dao.
MAT 27:16 Tama te sogo agai dwai sę yai dwai bidi mu me deli te kalabuside bidai, te aga nogi Jisas Barabas dao.
MAT 27:17 Tama megi da Pailat aga te be tagalama, buluba pelama, tama we bidi augwali sisinagasali. Agai koneani, te tobolu bidi dabe augwaligo Jisas dali naga dwai homu elama, tama augwaligo Jisas aga gesabidide po tų ilainogo eyu, odasa asai dao. Tama tibaso, Pailat agai te we bidibolo te po wai, “Dagego homugo eno de dageba tagala palagawe? Ma, eno te Jisas Barabas, ma eno te Jisas, augwaligo te Krais nogi ebo bidi te dageba tagala palagawe?”
MAT 27:19 Tama me, te bidi Pailat aga te po tų odobo bidi jas dugabo siade aga dualalubadi, tama aga wego po agabolo toliyu te po wai, “Nago magi sę me deli te doloba pai bidi dali me elamuo. Te eno hulide nade aga sulama, tama eno genuai homu elalubao.” Te po wai.
MAT 27:20 Te genuai pris bidi dabe badi, te Juda dabe tobolu bidi hani dali, augwaligo te we bidi homu hodolama, augwaligo te Pailatbolo i weyu, te bidi Barabas tagalama, te Jisas ela muao, te po omainogo yai.
MAT 27:21 Tama te genuai gavman bidigo po augwalibolo ma naga wali, “Dagego homugo eno te e bidi sigo te mena bidi dageba tagala palomainogo homu ebawe?” Augwaligo te po wai, “Barabas.”
MAT 27:22 Pailat agai augwalibolo te po wai, “Eno tama tiyu da, teda e bidi da Jisas, augwaligo Krais nogi ebo bidi, agabolo eno magi sę yagawe?” Tama augwali tigidaligo te po wai, “Aga ni pedaide elao.”
MAT 27:23 Tama Pailatgo te po wali, “Magi basowe? Agai magi dwai sę yaliwe?” Tiali goli augwaligo bomonama ma i wali, “Ni pedaide aga elao,” wali.
MAT 27:24 Tama megi da Pailatgo koneani, agai po usu ebeo. Menio. Tama wąbi genuai hwįainogo yai. Tama agai augwali ola momainogo agai wę te poude meba selama, tama aga nogo te we bidigo gedude wę telawai. Tama nogo wę teladubadi agai te po wai, “Te e bidi elibo da, te eno sęgę menio. Te duga sę naga dao.”
MAT 27:25 Tama tigidali we bidi augwaligo po wei ponoyu, te po wai, “Te aga elebo sęgę te daba me te dena wai dabeba asomainao,” wali.
MAT 27:26 Tama te sogo Pailatgo te bidi Barabas augwaliba olo tagala palali. Tama agai po olama, tama gasa bidigo Jisas te dwai bigo elidu gelama, tama te ami bidi dabe nogoba mani, te augwaligo aga te ni pedaide elimainogo yalio.
MAT 27:27 Tama megi da, te ami bidi dabego Jisas te gavman tuni bidigo be tomoba odasa pali, tama augwali tigidali aga pageba sisinagasai.
MAT 27:28 Tama augwaligo agai gudali ugwa pedela munama, tama augwaligo bobobage mama ugwa me deli aga tigiba muanio, te genuai polalubo bidigo ugwa tiwai dao.
MAT 27:29 Tama augwaligo sesani yai bonogo madi me deli nigilama, tama augwaligo Jisas toboluba muai. Tama elama, tama augwaligo te awi dili me deli agai dolo nogode muai. Tama augwaligo agaba kidu sugunama, tama augwaligo posobo po agabolo e tiwai wai, “Siade dao, Juda dabego tuni bidi dao.”
MAT 27:30 Tama olama, tama augwaligo agabolo pesa sąyani, tama augwaligo te awi dili ma dobola selama, aga toboluba elidu geai.
MAT 27:31 Augwaligo te dwai posobo po dabe agabolo ola silibo si, megi da agai te gudali mama ugwa te augwaligo peda sali, tama augwaligo aga ugwa ma tigiba muai. Tama augwaligo aga te ni pedaide elainogo sela palio.
MAT 27:32 Augwali te moni hanu buluba pobadi, tama augwaligo te Sairini bulu bidi me deli suali, aga nogi Saimon. Tama augwaligo bomonama agai te Jisasgo tolali ni pedai tolao wali, tama agai tolali.
MAT 27:33 Augwali pelama, dwasianu bulu du me deliba sabolali, aga nogi Golgota. Te bulu nogi page e tiwai dao, tobolu dili tiwai bulu du da wai.
MAT 27:34 Tama augwaligo te wain ąį meba te ha ebo dwai marasin dali gelama, Jisasgo tumainu manio. Tama agai tula suali, tiali goli agai tubeo.
MAT 27:35 Augwaligo Jisas aga te ni pedaide elama daganai madi, tama agai gudali ugwa dabe augwa dobola sainogo augwa hasi satu gagali bolo yalio.
MAT 27:36 Tama elama, tama augwali te bulude dualama, tama augwaligo aga tonaluyu bidalio.
MAT 27:37 Te aga tobolude ugwadu augwaligo aga te po tų ilali po asęai. Augwaligo e tiwai po asęanio: ‘Te e bidi Jisas, te Juda dabego tuni bidi dao.’
MAT 27:38 Te Jisas pąde augwaligo te nai wi sai bidi me si te ni pedaide walali, me deli te dolo nogo badu waliyu, me te pobase nogo badu waliyu yalio.
MAT 27:39 Tama te we bidi augwali iba soyu, oba soyu eyu, augwaligo dwai posobo po agabolo walio. Tama augwaligo augwa tobolu bebegeliyu,
MAT 27:40 tama te po wai, “Nago te Moni Lotu Be tempel aluama, tama sela sogo naga ma sę yaiba po wali bidi, megi da, te naga digi naga tau sao. Tama nage te Godigo Ogwa da wida, teda nage te ni pedaide daganalubo tagalama, tama nage te tǫba aiya dulao,” augwaligo te tiwai posobo po wai.
MAT 27:41 Te genuai pris bidi dabego me, te bomo yai po page ola mabo bidi dabe dali, te Juda dabe tobolu bidi dabe badi, augwaligo me dwai posobo po weyu, bomonama te po augwa hasi wai,
MAT 27:42 “Agai gasa bidi dabe augwali naga tau sali, tiali goli aga digi aga tau sainogo ebo usu egobeo. Ma, aga da te da Israel bagego tuni bidi da wida, teda aga te nide daganani tagalama, aiyaba dulubaso, teda dago bomo yai homu agaba munama dąų waibao.
MAT 27:43 Agai homu Godiba tinama te po wali, ‘Ena Godigo Ogwa dao’ wai. Tialima, Godigo aga godolo eba wida, agai aga megi tau somainao.” Augwaligo te po wai.
MAT 27:44 Te nai wi sai bidi me si augwaligo te Jisas walali ni pedaide pąde ela daganai, te bidi sigo me te tiwai dwai posobo po naga agabolo walio.
MAT 27:45 Tama te sia ge tomode mu, te tigidali tǫ badu te be hulia sabo tiwai elama, te be hulia si mu elama, tama telalubadi te be pio yabo magaba usu nanio.
MAT 27:46 Tama be pio ebo pąde Jisasgo i bomonama weyu, te po wai, “Eli, eli, lama sabaktaniwe?” Te po page e tiwai dao: “Eno God, eno God, magi baso nago ena tagaluwe?”
MAT 27:47 Tialima meba te pąde dolaluali bidi, augwaligo te wabo po odama, tama augwaligo te po wai, “Te bidi agai te polobadu bidali bidi Elaija te i obao,” te po wai.
MAT 27:48 Tama polo te bidi dabe augwali me deli udada pelama, te tamu ąįde elalubo wawi yai nai me deli sigi pali, tama te nai te wain ąį dali taluama, tama te nai awi dili donode kęnama, tama te nai Jisasgo tumainogo manio.
MAT 27:49 Tiali goli gasa bidi dabe meba augwaligo te po wai, “Meo, dago bolo sueibao. Ma, te bidi Elaija aselama, aga tau sagasobowe, ma menigowe?” te po wai.
MAT 27:50 Te Jisasgo i bomonama ma olama, tama aga noma bidi mobo tagala palalio, te aga mu isalio.
MAT 27:51 Tama te sogo naga te Moni Lotu Be tempel tomode walaluali genuai bobage dąį ilali nami ugwa te ugwadu gagalasa aiyaba mu pedasa dulama, tama pedai si pedalali. Tama tǫ mali ebadi, tama genuai masigi dabe me pebeda palio.
MAT 27:52 Tama gų page palialuali tų dala pelama, tama Godigo we bidi hauwa, polobadu augwali isali, megi augwali tigi elalubadi tama ma hodalualio.
MAT 27:53 Augwaligo te gų page tagalali, tama nosali Jisas ma hodaloai madi, augwali te Godibolo hogea sali moni hanu tomoba palio. Tama bidi hauwago te sogo augwali suai dao.
MAT 27:54 Tama te enesigi bidi dabego tobolu bidi aga ami bidi dabe aga dali te Jisas tonaluali bage, augwaligo te tǫ mali ebo me te sę dabe pedalobo sulama, tama augwali moni wi mu yalio. Augwaligo te po wai, “Mu tamao, te bidi aga te Godigo Ogwa mu dao,” te po wai.
MAT 27:55 Tama we hauwa bidali, augwali te Galili tǫdu Jisas tau sainogo aga wali asai. Te we dabe augwali te dwasianu digibulu gana dolalu tononaluai.
MAT 27:56 Te we me deli augwali dali tomode bidali we te Maria aga bulu Makdaladu asai. Tama we me te aga Maria, te bidi si Jemsde Josep sigo ida. Tama we me deli te bidi Sebedigo we, te aga ogwa sigo ida dao.
MAT 27:57 Te pio te Arimatea bulu bidi me deli te masigi hauwa elalubo bidi, aga nogi Josep, aga asai. Aga me te Jisas wali pali bidi dao.
MAT 27:58 Tama aga te gavman polalubo bidi Pailat pageba sabolama, te Jisasgo tigi sabo po hanalu wai. Tama te Pailatgo te ami bidi dabebolo olama, tama augwaligo te tigi Josepbolo sela mawai.
MAT 27:59 Tama Josepgo te Jisas tigi selama, tama aga te meda meni yai tedela yai gesi nami ugwade bebe pelama mesegelai.
MAT 27:60 Tama agai te Jisas tigi te aga digi nigai gų pageba mugi palio. Agai te genuai masigi tomode te ola be me deli tamadi nigai. Tama agai te tigi te ola be tomoba munama, tama agai te genuai masigi me deli hogogo bele pelama, te tigi muani gų page ola be sunumi te masigi mego paniani. Agai tama tilama, tama aga palio.
MAT 27:61 Maria te Makdala bulu we badi, te gasa we Maria dali, augwali si tede bidali. Augwali si te gų page dolo si pąde dualaluali, tama augwali sigo te gų pageba tononaluyu bidalio.
MAT 27:62 Tama nosali sogode, te Sabatde nai sisi ebo sogo te silai madi, tama te genuai pris bidi dabe badi, te Farisi dabe dali, augwali te genuai gavman bidi Pailat pageba pelama, sisinigi palio.
MAT 27:63 Augwaligo te po wali, “Genuai bidi, dago po me deli te tibo po wali bidi aga bidali sogo wali po me deli megi ma koneani. Agai te po wai, ‘Nosali te sela sogo wabode te ena ma hodaluaibao’ wai dao.
MAT 27:64 Tama tibaso, nago po olama, tama augwaligo te gų page sela sogo bugagia tonalumainao. Tiyu yaide aga wali pali bidi dabego aga tigi geme wi sagaselama, gasaba mugi pidali weyu te bugagia tonaluao po wao. U bagego aga tigi selama, tama augwaligo tibo po te we bidi augwalibolo weyu, ‘Aga te gų pagede ma hodalualio’ waibao. Tama tiyu da, te nosali wabo tibo pogo te polobadu wali tibo po aiyaba elaluaibao,” augwaligo te po wai.
MAT 27:65 Tama Pailat agai augwalibolo te po wai, “Dagego te tonalubo bidi dabe meba elalubao. Tama dage pelama, te gų page bomonama tonaluao, te duga ebo tiwai gilama yao.”
MAT 27:66 Tama te po obaso, augwali pelama, te gų page panialugi pai. Augwaligo te gų page sunumi paniani masigi daide te habu selebo dąį me deli ilama, tama augwaligo ami bidi dabe mebago te gų page tonalumainogo muanio.
MAT 28:1 Te Sabat side silai madi, te Sarere hasia polali sogo te giliga pąde pedelainogo ebadi, tama te Makdala bulu we nogi Maria badi, te gasa we Maria dali, augwali si te gų page suagasainogo asai.
MAT 28:2 Tama polo mu genuai tǫ mali pedalai. Magi baso meni. Te Genuai Bidigo mobo bidi ensel te dagalu tagalama, tama e tǫba aiya dulali, tama agai te ola be gų page sunumi paniani masigi hogogo bele pelama, tama aga te masigi daide ugwadu dulalualio.
MAT 28:3 Aga gesabi ula te be sele ula tiwai yali, tama aga gudali ugwa te tedela yai te dagalu pǫ ula tiwai yalio.
MAT 28:4 Tama te gų page tonaluali ami bidi dabe augwaligo te tebo sulama, tama augwali agade wi elama, tama augwali tigi didibili eyu, tama augwali te isai bidi tiwai gagawalio, te tǫba tulalio.
MAT 28:5 Tiali goli te mobo bidi enselgo te we sibolo te po wai, “Dage si wi tagalao. Eno koneani, dage sigo Jisas gegagasu asali, te bidi augwaligo te ni pedaide walali bidi dao.
MAT 28:6 Aga ede me bidibeo. Aga ma hodaluali, te tiwai po polobadu agai wali. Dage sigo aga munaluali madi suagasao.
MAT 28:7 Tama sulama, tama dage si polo pelama, aga wali pali bidi dabebolo te po wao, aga gų pagede ma hodalualio. Odiąo. Aga dage asabo madi polasa te Galili tǫ teba paibao, tama dagego aga tede sueibao, augwalibolo te po wao. Te eno po tama dao,” te ensel bidigo te po wai.
MAT 28:8 Tama te we si wi homu dali elaluyu, tama wiegi yai homu pemene dali te geninama mu eyu, tama polo augwali sigo te gų page ola be tagalama, tama te ensel bidigo wali po te aga wali pali bidi dabebolo wagi painogo udulama polo palio.
MAT 28:9 Tama polo Jisasgo augwali si te tųde pobadi tiąba asai, tama te po wai, “Kigamu mu dao.” Tama te we si pąba pelama, tama aga sągą page tola selama, te we sigo agabolo lotu po walio.
MAT 28:10 Jisasgo po weyu te we sibolo te po wai, “Dage si wi elamuo. Dage sigo eno ama dede augwalibolo wagi pelama, tama augwali te Galili buluba pao wao. Tama augwaligo ena tede sumainogo yaibao,” Jisasgo te we sibolo te po wai.
MAT 28:11 Te we si te tųdu pidubadi yaide, tama te gų page tonaluali ami bidi meba augwali te Jerusalem hanu tomoba pelama, tama augwaligo te po te genuai pris bidi dabe augwalibolo te tigidali sę pedalali po walio.
MAT 28:12 Tama te genuai bidi dabe augwali te Juda dabe tobolu bidi dabe dali sisinama, tama augwaligo po me deli mianio, tama augwaligo yabo sę po dąų wali. Augwaligo genuai mone te ami bidi dabebolo menama, tama augwaligo te po wai,
MAT 28:13 “Dagego e tiwai po wao, ‘Da hulide godege piai digi, tama aga wali pali bidi dabe augwali geme aselama, tama augwaligo aga tigi wi sela pai yalio,’ dagego we bidibolo te po wao.
MAT 28:14 Tama polalubo genuai gavman tuni bidigo te pedalali sę po odobo si, teda dago po meba agabolo weyu, tama dagego magi dwai sę yali homu me elalugobeo.” Te Juda dabe tobolu bidi dabego te po wai.
MAT 28:15 Tama te ami bidi dabe augwaligo te moni mone selama, tama augwaligo te wali po augwaligo wali palio. Tama te po te Juda we bidiba pelama odali, tama augwaligo te po naga ola pali te megi tama me augwaligo te po me wabo dao.
MAT 28:16 Te aga wali pali bidi dabe nogo si olama sągą badu deli augwali te Galili buluba pali, tama augwali te bulu duba sabolali, te Jisasgo augwali te polobadu bodolu mani bulu duba.
MAT 28:17 Tama augwaligo tede Jisas sulama, tama augwaligo agabolo lotu po wai. Tiali goli mebago homu si elaluama te homu yali, te aga mu ma hodalualiwe?
MAT 28:18 Tama Jisas pąba aselama, augwalibolo e tiwai po wali, “Godigo enabolo te tigidali dagalude me tǫde elalubo nai tonaluabo bomo mawai dao.
MAT 28:19 Tama tibaso, dage pelama, tigidali we bidi hani ena wali asobo we bidi pedelao. Tama dagego augwali te Aya me Ogwa me Mobo Bidigo nogide baptais mao.
MAT 28:20 Tama dagego eno dagebolo te mani po tigidali augwaligo wali pomai hagede ola mao. Odiąo. Ena dage dali tigidali sogo bidaibao, tama te dagalu de tǫ si silibo sogoba usu naibao,” Jisasgo te po wai.
MAR 1:1 E po da te Jisasde gesi dwagi yai po dao. Jisas da, te Godigo te we bidi tau sainu dąį ilai bidi Krais da, te God aga ogwa dao.
MAR 1:2 Te gesi dwagi yai po pusubo sę e tiwai hasia bolo pedelai elaluali. Godigo agai Kraisde wali po te Godigo po pusa mabo profet bidi Aisaiabolo polobadu mu pusali. Tama Godigo agabolo po olama, tama te profet bidi Aisaiago Godigo po te bukude asęai. Te bukude asęani po tomode Godigo aga ogwabolo te po wai, “Edao. Eno po sela pabo bidi tagala palama, tama aga nage pabo badu poligi soaibao. Agai te nago pabo tų sisi yaibao,” te po wai.
MAR 1:3 Godigo te polasa pabo bidide te po me wai, “Bidi meni yai bulude aga i bomonama weyu, te po waibao, ‘Te dago Genuai Bidi aga pabo tų sisi eiyąo, te agai dage tonalubo sę yabo sunumi bugagia dodolao,’ te polasa pabo bidigo te po waibao,” Godigo te po olama, tama bidi me deligo te po bukude asęani.
MAR 1:4 Te po polobadu obaso, te gesi dwagi yai po pusubo sę te tiwai nosali gagalali, te we bidi baptais mabo bidi Jon dią holali side. Tama te bidi meni yai bulude pedelama bididu, tama Jongo e po te agaba asali we bidibolo pupusu pai, “Te dagego duga yali dwai sęde ge neyu tama homu begeleąo, te Godigo dagego dwai sęde sali sęgę wei ponogobeo, sela sąwaibao, te eno dage węgo baptais mawaibao,” Jongo te po wai.
MAR 1:5 Tama te Judia tǫ pedai provinsde bidali we bidi dabe umabo mu Jon pageba sisinigi pai, te Jerusalem moni hanu we bidi dabe umabo me agaba asali. Tama augwali deli deligo augwa dwai sę yali sęgę hania hanilama, tama te po wai, “Eno dwai sę dabe yai dao.” Tama tibadi Jongo augwali te Jordan pabo ąįde baptais mani.
MAR 1:6 Tama Jongo gudubo ugwa te moni kibu kamel nisigo nigai dao, tama aga tabide te kibu wali kukulu gudai. Tama aga te bulu tomode bidibo kuli mano me hanamu dali si tuyu bidai dao.
MAR 1:7 Tama agai po bomo elama pusuyu, te po wai, “Te ena tudi badu asobo bidi me deligo, tama agai bomogo te eno bomo aiyaba elaluaibao. Ena wiegi yai bidi weyu, tama ena aga sę ebo bidi bidiyu, ena duagulama te eno agai sągą nadoba bono me pisagagobeo.
MAR 1:8 Eno dage węgo naga baptais mani dao. Tiali goli agai dagebolo Godigo Tedali Mobo Bidi dobawaibao, dage dali bidimainu tama tiaibao,” Jongo te we bidi dabebolo te po wai.
MAR 1:9 Te side Jisas te Nasaret dwasianu hanu te Galili tǫde bidali taga soyu asali. Tama Jongo aga te Jordan pabo ąį tomode baptais mani.
MAR 1:10 Tama polo aga te we tagasu, te bulu wę sesegeba doligulubadi, tama agai te dagalu dala pabo suali, tama te Godigo Tedali Mobo Bidi te ba hi tiwai gagalasa agaba dulali.
MAR 1:11 Tama te dagalude pedauwali me delidu bomonama i weyu, te po wai, “Nage eno Ogwa dao. Eno nage godolo mu ebao. Eno homu nagede wiegi yai ebo dao,” te po wai.
MAR 1:12 Tama te po ola silama, tama polo te Godigo Tedali Mobo Bidigo bomonama te Jisas bidi meni yai buluba polo tagala palai.
MAR 1:13 Tama aga te bidi meni yai bulude bididubadi, te bidi sese si sogo bidali, tama te usu sabo dwai mobo bidi Satan asama, tama sesemane sogo aga usu sagasali, Jisasgo dwai sę emainogo tama usu sali. Tama Jisas te bulu hasa dabe dali bidali. Tama Godigo dagalude sę ebo ensel mobo bidi dabego aga tau sali.
MAR 1:14 Te Jongo te gavman bidi Herotbolo “Dwai sę egio” po obaso, te Herot sębę eyu, tama agai Jon kalabusiba muani. Tama te sogo Jisas te Galili moni tǫ pedai tomoba pelama, tama Galili tǫde biliyu, agai Godigo gesi dwagi yai po pusa mena mena bilai, te po wai,
MAR 1:15 “Te megi da, te bodolu sogo mu pedalubao. Te Godigo te we bidi mu tonalubo sogo pąba yagasalio. Tama tibaso, dagego duga yali dwai sęde ge neyu, tama homu begelama, tama duga homu te gesi dwagi yai poba begi pao,” Jisasgo te we bidi dabebolo te po pususu bilai dao.
MAR 1:16 Te Jisas te Galili sigi ąį sane sesegedu pobadi, tama agai te Saimon aga ama Andru dali si suali. Augwali si te sigi węba te sųgų hagani togobo wa sąbo sę iduai. Augwali sigo te sųgų sabo sęde te mone sabo bisnis sę eyu bidai.
MAR 1:17 Tama Jisasgo augwali sibolo te po wai, “Dage si ena wali asiąo, tama eno dage sibolo te bidi sabo sę ola mawaibao, te sali bidi dabe ena wali asomainogo yaibao,” te po wai.
MAR 1:18 Tama polo te augwa si te sųgų hagani togobo wa tagalama, tama Jisas aga wali pai.
MAR 1:19 Aga dwasianu ma pelama gana, tama agai Jems suali, te bidi Sebedigo ogwa, te aga ama Jon dali bidibo suai. Augwali si me te augwa gebade bididu, te sųgų sabo hagani togobo wa dodolobo sę idubadi suali.
MAR 1:20 Tama agai augwali si polo i olama, tama augwali sigo te augwa si aya Sebedi te gebade te aga sę bidi dabe dali bidibadi taga peyu, tama augwali si te Jisas wali pali.
MAR 1:21 Te Jisas dali, aga bidi me si me si dali, augwali te Kaperneam hanuba pelama, tama teba sabolali. Tama te Sabat sogo dwasianu Sarere Jisas te Juda dabego bomo yai po ola mabo be tomoba polo pelama, tama agai po te we bidi augwalibolo ola mani.
MAR 1:22 Tama augwaligo agai po odama, tama augwali moni noma siyu, tama midigi sai. Magi baso meni. Agai augwali te Juda dabego bomai po koneani bidi dabego kolesaga ola mabo tiwai gilama me ebeo. Menio. Agai augwali te nogi dali bomo dali si elalubo bidigo kolesaga ola mabo tiwai mu yai.
MAR 1:23 Te sogo bidi me deli te augwaligo bomai po odobo lotu be tomode bididuali, tama agade te dwai haubo noma bidi elaluali. Agai bomonama i weyu, te po wali,
MAR 1:24 “Te Nasaret hanu bidi Jisas, nago da dwai mobo dabebolo mena sę yainogo asaliwe? Te nago da dolainogo homu eyu, asai dawe? Eno nage koneani, nage te Godigo gasagi yai tedali wiegi yai bidi dao,” te po wai.
MAR 1:25 Tiali goli Jisasgo te dwai mobobolo te po wai, “Nago pedauwali pania selama, tama te bidi nago taga soayu, buluba soao,” te po wai.
MAR 1:26 Tama te dwai mobogo te bidigo tigi omagia mu didibili ilai, tama i wabogo po dagą genuai mu olama, tama te bidi taga palio.
MAR 1:27 Tama tigidali we bidi augwali noma siyu, tama augwa hasi tomode digi po miani, “Te e da mena sę dawe? Te gasagi yai gesi ola mabo po dao,” te po wai. “Te bidigo bomo elalubaso, tama agai te dwai haubo noma bidi dabeba po pusubaso, tama augwaligo agai po odali,” te po wai.
MAR 1:28 Tama agai yali sę po Galili tǫ pedaiba polo pelama, te we bidi tigidaligo odali.
MAR 1:29 Te bidi Jisasgo te dwai mobo bidi sela sąnama, tama te Juda dabego bomai po odobo lotu be taga pelama, tama te Saimon dali Andru dali sigo be tomoba pali. Tama Jems me Jon augwali si me hodobo pali.
MAR 1:30 Tama Saimon aga au te be tomode te pibo be saide pila muai, te tigi posolo gasi elaluali. Tama te we gasi elalubo po augwaligo te Jisasbolo polo wali.
MAR 1:31 Te po olama, tama Jisas agaba pelama, tama aga nogo tola sigi pelama, hodolali. Tama te tigi posolo gasi agade elaluali tagalama, tama te wego augwali nai sisi ilibo sę yai.
MAR 1:32 Te be pio eyu, giliga dega sigilubode, te we bidi augwaligo te gasi yai we bidi dabe me, te dwai haubo noma bidi elalubo we bidi dabe te augwaligo agaba selasa asai.
MAR 1:33 Tama te hanude bidaluali we bidi tigidali augwali te be sunumi pąba sisinani.
MAR 1:34 Tama agai te gasi haniani elaluali we bidi hauwa usu ma ilili pali. Tama agai te dwai haubo noma bidi hauwa elaluali te sela sąwani. Tama te sę ebadi, te dwai haubo noma bagego aga Godigo Ogwa da konebaso, augwaligo tede po waidali weyu, agai augwalibolo habu selibo po bomonama wai.
MAR 1:35 Te sogo kigamu digi mu aga hodaluama, tama agaduba buluba dią solama, tama te bidi meni yai madiba me pelama, aga Godibolo po wainogo yai.
MAR 1:36 Tama nosali, Jisasgo Godibolo po me odubadi, tama Saimon dali aga abagi solo me augwaligo Jisas gege pai.
MAR 1:37 Augwaligo aga gegela sulama, tama augwaligo te po wali, “Te tigidali we bidi augwaligo nage gegainogo ebo dao,” te po wai.
MAR 1:38 Tama agai augwaliba te po wali, “Te tagalama, te da meba te gasa pąde elalubo buluba pinao. Eno po augwaliba me pusainogo. Te sęde naga ena asai dao,” te po wai.
MAR 1:39 Tama olama, aga te Galili tǫ pedai tigidaliba pelama, tama agai te wiegi yai po te augwaligo bomai po odobo lotu be dabe tomode pusuyu, tama agai te dwai haubo noma bidi dabe sela sąyu yai.
MAR 1:40 Te oiyabe gasi yai bidi me deli agaba asama, bomonama hanalu wagasali. Aga kidu sugunagasama, tama Jisasbolo te po wai, “Te nago homugo usu dao wida, teda nago ena wiegi yai ma ilama, tama ena te meda meni yai tiwai ma bidaibao,” te bidigo te po wai.
MAR 1:41 Tama Jisasgo aga homu dene mu ebaso, tama agaba nogo munama diąyu, tama agabolo te po wai, “Awe, eno homugo nage gasi usu ilaibao. Tama nage wiegi yai pedalao, te meda meni yai bidi bidao,” te po wai.
MAR 1:42 Tama megi naga tama te oiyabe gasigo agade elaluali taga palio, tama aga wiegi yai pedelali.
MAR 1:43 Tama Jisasgo te bidi tagala palobadi agabolo po bomonama weyu, te po wai,
MAR 1:44 “Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Tama tilama, tama polobadu Mosesgo wali po gilama Godibolo nai ofa yao. Tama tiyu, te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai.
MAR 1:45 Tiali goli te bidigo Jisasgo agaba wali po wali pisąma, agai te sę yali po tigidali we bidi dabeba subigila pususu bilali, te tigidali hanuba pususu bila silali. Tama tibaso, te we bidi umabo augwali agaba asidali weyu, Jisas aga te hanu dabe tomoba hania pabo usu ebeo. Menio. Aga te hanu bulu badu naga bidali, te bidi meni yai madi naga bidai. Tama te tǫ pedai tigidali habu badu we bidi dabe te aga bidibo madi naga asiyu yai.
MAR 2:1 Te meba sogo hododolama bidali silama da, tama aga te Kaperneam hanuba ma pai. Tama Kaperneam hanuba sabolama, tama te we bidi augwaligo aga te bede bidibo po odali.
MAR 2:2 Tama we bidi hauwa sisinama, tama te be pągąna salio. Tama bulu badu te be sunumi pąde te agebele olo me elalubeo. Tama agai te gesi dwagi yai po augwaliba pusubo sę yali.
MAR 2:3 Tama pusubadi, augwaligo gasi yai bidi me deli agaba selasa asai. Te bidigo nogo sągą dili me te tigidali mu penelai. Tama bidi me si me si augwaligo te gasi yai bidi tolasa asai.
MAR 2:4 Te we bidigo te be tomode bidabo pesage mu pągąna selama, mu pena sai baso, tama augwaligo te gasi yai bidi aga te Jisas pąba sela asabo usu isąwai. Tama augwali te be ugwadu daiba holama, tama augwaligo te Jisas bidibo madi badu te be dąį dawali. Augwaligo te dalama, tama augwaligo te gasi yai bidi pila mubo bono wa dali selama, te aiyaba tagalaluama mugulali.
MAR 2:5 Tama Jisasgo augwali sulama koneani, augwaligo agaba augwa homu tigidali muyu, tama agaba homugo tialubo bidi dabe dao, te agai koneani. Tama tibaso, agai te gasi yai bidibolo te po wai, “Eno ogwa, eno nago yali dwai sę sela sąwanio,” wali.
MAR 2:6 Te Juda dabego bomo yai po page koneai bidi dabe meba augwali tede dulalu bidaluali, tama augwa homude augwaligo te tiwai homu yai,
MAR 2:7 ‘Magi baso te bidigo agai te tiwai po wabowe? Agai te Godiba posobo po obao. Te mena bidi me deligo te bidigo dwai sęgę me sela sągobeo. Te God agaduba sę naga dao,’ augwaligo te homu yali.
MAR 2:8 Te Jisas aga homude polo koneani, augwaligo te homu augwa homude elaluali. Tama agai te po augwaliba wali, “Magi baso dagego te tobage homu te duga homude elalubawe?
MAR 2:9 Te eno pogo bomo elalubo te dagego hania konemainogo eyu, eno mena po waibawe? Eno e bidibolo te po wabo si, ‘Nago dwai sę eno sela sąwani,’ teda eno po bomo elalubo dagego hania konegobeo. Tiali goli eno e bidibolo po olama, tama aga hodaluama, agai aga pibo somo selama bilibaso da, teda eno pogo bomo elalubo te dagego mu koneaibao.
MAR 2:10 Ena da, te Godigo Bidi Mu da, tama eno homugo dagego konemainogo, eno e tǫde bomo elalubao, te we bidi dabego dwai sęgę sela sąyabo usu yabo elalubo. Dagego suiąo,” te po wai. Tama begelama, agai te nogo sągą dili isai bidibolo te po wali,
MAR 2:11 “Eno nagebolo obao, nage doligulama, tama naga pibo somo selama, tama naga beba pao,” te po wali.
MAR 2:12 Tama te bidi hodaluama, tama te tigidali we bidi gedude aga pibo somo polo selama, tama palio. Tama tibaso tigidali we bidi augwali noma mu siyu, midigi sai. Tama augwaligo God nogi ugwaba siyu, tama augwaligo te po wali, “Polobadu dago te tobage tiwai sę ebo me susiąwai dao,” te po wai.
MAR 2:13 Te Jisas te Galili sigi wę saniba ma biligi pai. Tama genuai hani we bidi agaba asobaso, tama agai te Godigo wiegi yai po augwaliba pusa mawai.
MAR 2:14 Tama aga pobadi, tama te bidi nogi Livai suali, te Alfiusgo ogwa, aga te maket takis mone sabo bede dulalubadi. Tama Jisasgo agabolo te po wali, “Nage ena wali asao,” wali. Tama aga hogodama, aga wali palio.
MAR 2:15 Tama nosali Jisas me, aga wali pabo bidi dabe me, augwali te Livaigo beba duagi pelama, nai tuali. Tama te takis mone sabo bidi hauwa me te dwai sęgę sai bidi hauwa augwali Jisas dali me aga wali pabo bidi dabe dali hodobo dugulama nai tuali. Te tobage tiwai bidi hauwa augwali sesemane sogo te Jisas wali bilaluai.
MAR 2:16 Te Juda bidi dabe tomode te hani me deli nogi Farisi hani elaluali. Tama Farisi bage meba augwali te Mosesgo bomo yai po page koneai bidi dabe, augwaligo suali, te Jisasgo te dwai sęgę sai bidi dabe dali, me te takis mone sabo bidi dabe dali, nai tubo suali. Tama augwaligo aga wali pabo bidi dabebolo wali, “Magi baso agai te takis mone sabo bidi dabe dali, me te dwai sęgę sai bidi dabe dali nai tubawe?” te po wai.
MAR 2:17 Jisasgo te po wabo odobaso, tama agai te po te Farisi dabebolo wali, “Te gasi meni yai bidi dabe augwali te munamuna mabo bidi pageba pogobeo. Menio. Te gasi yai bidi naga te munamuna mabo bidiba paibao. Ena asali, eno te doloba pai bidi dabe i wainogo me asobeo. Ena asali te eno dwai sęgę sai bidi dabe i wainogo te ena asai dao,” Jisasgo te po wai.
MAR 2:18 Te we bidi baptais mani bidi Jon wali pali bidi dabego me te Farisi dabe augwaligo me te tubo nai osogo gisilibo kolesaga wali pali. Tama bidi meba aselama, Jisasba wagasiyu, te po wali, “Te Jon wali pabo bidi dabego me, te Farisi wali pabo bidi dabego badi, te nai osogo gisilibo kolesaga ebo dao. Magi baso te nage wali bilibo bidi dabe augwaligo me te nai osogo gisilibo meniwe?” wali.
MAR 2:19 Tama Jisasgo po digi po begeleyu, tama te po augwalibolo wali, “Te we kębo bidi me deligo abagi dabe te we sainogo ebadi tama te bidi augwali dali bidibadi te nai osogo gisilibo usu egowe? Menio. Te we sabo bidi augwali dali bidibadi, te sogo te augwaligo te nai osogo gisilibo te usu me egobeo.
MAR 2:20 Tiali goli nosali gasa bidi dabego te we kębo bidi bomonama odasa pabo si, teda te sogo aga abagi augwali homu dene eyu, tama augwaligo osogo te nai habu selaibao. Tama ena e tǫde bididubadi eno bidi dabe augwaligo nai osogo gisiligobeo,” Jisasgo te po wai.
MAR 2:21 Te sogo Jisasgo gasa po digi po me begeleyu, te po wai, “Bidigo te gesi ugwa pedai selama, te poloba badi ugwa pedai dali me hobologobeo. Te agai te tiwai ebo si da, teda te dedage hobolali ugwa pedaigo te badi ugwa ma dedage ilaibao. Te gesigo te poloba badi ugwa pisilama, tama dedage genuai ma pedalaibao.
MAR 2:22 Tama me, te bidi mego te gesi wain ąį te poloba badia pai kibu meme waligo nigai botol teba tabigobeo. Ma agai tama tiyu da, teda nosali te wain wę genuai bo delama, tama te meme wali botol peda peyu, tama te wain wę tǫba olo gea peyu, tama te meme wali me doyu hagawaibao. Tama tibaso, augwaligo te gesi wain ąį te gesi meme wali botolba tabibo dao, tama te si dali si te bugagia munalubo dao,” Jisasgo augwalibolo te po wai.
MAR 2:23 Te Juda dabego Sabat sogo me delide Jisas te wit gi tomodu soai. Tama aga wali pabo bidi dabe aga dali soali, tama augwali nasi baso, tama augwaligo te nai wit meba selama, tama te ge tuali.
MAR 2:24 Tama Farisi dabe meba tede bidali. Augwaligo te tebo sę sulama, tama Jisasbolo te po wali, “Suao. Magi baso augwaligo te Sabat side habu selali sę bolaliwe?”
MAR 2:25 Tama Jisasgo augwalibolo te po wali, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi eyu bidali.
MAR 2:26 Te sogo te bidi nogi Abiatar te genuai tobolu pris bidi bidibadi, tama Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao wai, te bomo yai pode. Tiali goli te bret augwaligo me tuali digi Godigo gedude dwai sę ebeo. Dagego te asęani po nedebewe?”
MAR 2:27 Tama Jisasgo te po augwalibolo wai, “Godigo te bidi muani te Sabat sogo tau somainogo me mubeo. Menio. Agai te Sabat sogo muani te bidi tau somainogo muai dao.
MAR 2:28 Ena da, te Godigo Bidi Mu da. Ena da, te Sabat sogode te genuai bidi dao. Tama tibaso, bidigo Sabatde mena sę yagameo, te eno waibao,” Jisasgo te po wai.
MAR 3:1 Te me sogo Sabatde Jisas te bomai po odobo lotu be tomoba ma pali. Tama bidi me deli bididuali, te aga nogo me deli dwai elaluai. Te aga nogo penelama, te wa pai tiwai elaluai.
MAR 3:2 Tama augwaligo Jisasba tonaluali. Augwaligo koneainogo, agai te bidi te Sabatde te wiegi yai ilibowe, ma meni ebowe naga sueinogo yai. Augwaligo te Jisasgo te sę ebode te po tų ilainogo homu yali.
MAR 3:3 Tama Jisasgo te nogo penelali bidibolo te po wai, “Nage eba asao, te we bidi gesabidide dolaluagasao.”
MAR 3:4 Aga pąba asama, tama Jisasgo augwalibolo te po wai, “Te eno dagebolo hanalu obao, te dago te Sabat sogo te wiegi yai kolesaga yabo homu yaibawe, ma dago dwai kolesaga yaibawe? Dago te Sabat sogo te bidi dabe bugagia bidimainu tau sabo sę yaibawe, ma dago te bidi ela mumainogo eyu yaibawe? Dago bomo yai pogo tede magi po elalubawe?” Tiali goli augwali sagia siyu, po me wabeo.
MAR 3:5 Tama agai augwaliba tonono bilama, tama augwaligo te nogo dwai bidi homu dene esiąbaso, aga sębę yali. Tama agai augwaligo tabi dagana sabo sulama, tama aga tede homu sęgę yali. Tama agai po te bidibolo wali, “Nage nogo debelao.” Tibaso, aga nogo debelali, tama nogo wiegi yai ma pedalali.
MAR 3:6 Tama te Farisi dabego te tebo sulama, tama polo te augwali hogodosa pelama, tama augwali te Herodion hani dali deliba sisinigi pali. Augwali tigidaligo po miyu, tama Jisas elabo po miani.
MAR 3:7 Te Jisas dali aga wali pabo bidi dabe augwali te bidali bulu tagalama, tama augwali te Galili sigi ąį saneba pali. Tama te genuai hani we bidi augwali aga wali asali. Augwali te Galili tǫ we bidi me, te Judia tǫ me,
MAR 3:8 te Jerusalem moni hanu me, te Idumea tǫ we bidi dabe me, te Jordan pabo ąį pedai u badu bidibo we bidi me, te moni hanu si Tair dali Saidon side bidibo we bidi, te genuai hani we bidi dabe augwaligo te Jisasgo ebo sę po odama, tama augwali agaba asali.
MAR 3:9 Tama Jisasgo aga wali pabo bidi dabebolo te po wai, “Te genuai we bidi hani mu bidalubao. Tiyu augwaligo ena gea sidali, dagego te moni geba me deli dodolama muao. Ena teba holama, tama bugagia bidaibao,” agai te po wali.
MAR 3:10 Magi baso meni. Agai te gasi yai we bidi hauwa wiegi yai ma ilali, tama tibaso te gasa gasi yai we bidi dabego agaba bomonama kęą sai elaluai. Augwaligo agaba nogo muainogo homu yai.
MAR 3:11 Te dwai haubo noma bidi elaluali bidi dabego aga subaso da, teda augwaligo agaba kidu sugunama, tama augwali i bomonama weyu te po wali, “Nage Godigo Ogwa dao,” wali.
MAR 3:12 Tiali goli agai po bomonama augwaliba wali, augwaligo te aga nogi hanilama munu me wagio wai.
MAR 3:13 Jisas te bulu du daiba holai. Agai te bidi meba sa muainogo yai. Tama agai te bidi dabe i olama, tama augwali agaba asali.
MAR 3:14 Tama agai nogo si olama sągągo si bidi sa munama, te augwali aga dali bidimainu yai. Agai augwali te wiegi yai po pusigi pomainogo tagala palabo homu elama,
MAR 3:15 tama agai augwalibolo te dwai haubo noma bidi sela sąbo bomo mawainogo yai.
MAR 3:16 Agai te nogo si olama sągągo si sa muani bidi dabego nogi e dao: te me Saimon, Jisasgo agabolo gasa nogi Pita mawai.
MAR 3:17 Tama Jems, te Sebedigo ogwa, te aga ama Jon dali, te agai gasa nogi Boanerges mani. Te nogigo page te e tama tiwai dao: te be kulukulu wabo dagalugo ogwa dao wali.
MAR 3:18 Tama gasa sa muani bidi dabego nogi Andru, me Filip, me Bartolomyu, me Matyu, me Tomas, me Jems te Alfiusgo ogwa, me Tadius, me Saimon te Kenan tǫ bidi,
MAR 3:19 tama Judas te Keriot bulu bidi, te bidigo nosali te Jisas dali boi ebo bidi dabego nogoba muai dao.
MAR 3:20 Jisas te beba pai. Tama te genuai we bidi hani augwali ma sisinani, tama te Jisas aga wali pabo bidi dabe dali augwaligo te we bidi tau sabo sę hauwa elalubaso, augwali te nai tuabo sogo meni yani.
MAR 3:21 Te Jisas aga deli kaneme bage augwaligo te po odama, tama augwaligo aga sagasainogo asai. Magi baso meni, te olo we bidi dabego “Aga te wabo palio” po wabo augwaligo odali.
MAR 3:22 Te Juda dabego bomai po page koneani bidi dabe augwali te Jerusalemde bidaluali tama meba edaba dulama, tama augwaligo Jisasde te po wai, “Te dwai haubo noma bidi dabego tobolu bidi nogi Belsebul, tego Jisasde dagana siyu bididubao. Tama te Belsebulgo agabolo mani bomogo Jisasgo te dwai haubo noma bidi dabe sela sąbo dao,” augwaligo te po wai.
MAR 3:23 Tama te po obaso, Jisasgo augwali aga pąba asomainogo i olama, tama agai te po meba habu sugunama te po begelama wali. Agai te po wai, “Te magi ilama tama te Satango te Satan aga digi te sela sąwainogo ebo usu yaibawe? Woo, te Satango aga digi me sela sagobeo.
MAR 3:24 Te genuai tǫde bidi me deligo bomo tomode bidibo bidi dabe augwa hasi te hani si bugulama tama hwįbaso da, teda te bomo elaluali te usu me elalugobeo, te moni hani tulaluaibao.
MAR 3:25 Tama te deli bede bidaluali bidi hani te augwa hasi bugulama, tama augwali hwįbaso da, teda te bede bidali bage te bomo elama me bidigobeo, te pebeda paibao.
MAR 3:26 Tama te tiwai me, te Satan agaba digi boi bidi elama, tama aga hani te peda siyu da, teda aga bomo elama bidabo te usu me elalugobeo. Menio. Te aga sia saibao.
MAR 3:27 Me ma, te bidi me deli aga olo tama te bomai bidi me deligo beba pelama, tama agai nai selama dobawainogo ebo te usu me egobeo. Menio. Agai te bomai bidibolo hasia te nogo sągą duaibao. Agai tama tilama, tama agai te bidigo bede elaluali doado bage tigidali dobola selama selasa paibao,” wali.
MAR 3:28 Tama Jisasgo te po olama, po me weyu agai te po wai, “Eno mu po dagebolo obao. Te we bidigo magi magi dwai sę ebo, ma augwaligo magi dwai posobo po Godibolo wabo, te tigidali dwai dwai kolesaga te God agai sela sąbo bomogo sela sąbo usu mu yaibao.
MAR 3:29 Tiali goli bidigo dwai posobo po te Godigo Tedali Mobo Bidi dali obaso da, teda Godigo agai te sęgę me sela sąsiąma elaludu, te megi me nosali me te munu me sela sągobeo. Menio. Te sęgę agade me tama elalua pidu pidubadi geaibao,” Jisasgo augwalibolo te tama po wai.
MAR 3:30 Magi baso meni. Augwaligo aga dali te po wai, “Te agade dwai haubo noma bidi elalubao,” wali.
MAR 3:31 Te po wabo silama, tama te sogo te Jisasgo ida me ama dede dabe dali augwali sabolali. Augwali te be bulu badu dodolalu, tama augwaligo po agaba ola tolali. Augwaligo homugo te aga augwaliba asomainu homu yai.
MAR 3:32 Tama genuai we bidi hani duada solama, te aga bagulama tomode bidibaso, tama augwaligo te po agabolo wali, “Odao, te naga ida me ama dede badi, te augwali bulu badu bidaluagaselama, te augwaligo nage i obao,” wali.
MAR 3:33 Tama agai te po wei augwaliba ponani, “De dede te eno ida me ama me dawe?”
MAR 3:34 Agai te aga bagulama duada pali we bidiba tonono bilama, tama agai te po wai, “Te eno ida dede, ama dede dabe ena dali bidalubo suiąo,” wai.
MAR 3:35 “Te bidigo te Godigo homu kolesaga wali pabo bidi bidibaso da, aga te eno ama abe me ida dao,” Jisasgo te po wai.
MAR 4:1 Te nosali me sogo Jisasgo te we bidi augwali te Galili sigi wę sane pąde po ola mabo sę ebo ma gagalali. Tama genuai we bidi hani mu te augwali agaba sisinagasali. Tama aga te geba me deliba holama, tama tede dulaluai. Tama geba te sigi we tomode elaluali. Tama tigidali we bidi augwali te we sane pąde duada pelama bidaluai.
MAR 4:2 Tama agai ola mani po hauwa te po habu sugunama, te begelebo pogo naga augwali dali wali. Agai e tama tiwai po augwaliba mawai.
MAR 4:3 “Dagego odiąo! Te bidi me deli pelama, te giba nai wai tedelalo biligi pai.
MAR 4:4 Agai tedelalo palio, tama te nai wai ge meba te sunumide tudulaluali. Tama ba dabe asiyu, te nai wai ge tuali.
MAR 4:5 Tama meba nai wai te masigi elalubo badu tudulaluali, tama te tǫ hauwa meni yai madi. Te tǫ aiyanu igilusiąwai madi weyu, tama te nai wai polo holai.
MAR 4:6 Tiali goli giliga ugwadu naniyu, tama te giligago ulali. Tama te wit nai aga sele meniama, tama tigidali wa pelama, tama sasia pelama isali.
MAR 4:7 Tama meba nai wai te sesani bono elalubo tomoba tudulaluai. Tama te sesani bono me holama te mesegelali, tama agai nai me walobeo.
MAR 4:8 Tiali goli te nai wai meba te wiegi yai tǫ ili yai madiba tudulaluama, tama genuai holama, tama nai du walai. Mebago ge dwasianu te 30 walali, mebago te 60 walali, tama mebago geninama mu tama te 100 walalio.”
MAR 4:9 Tama agai te po me augwalibolo wali, “Te olo elalubo bidi agai te po odiąo,” te po wai.
MAR 4:10 Te nosali te we bidi hauwa aga dali menibadi, Jisas agaduba naga bididuali, tama aga wali pabo bidi nogo si olama sągągo si badi, te meba Jisas aga dali bidalubo bidi dabe dali, augwaligo agabolo te begelama wali po pagede hanalu wali.
MAR 4:11 Tama agai te po augwalibolo wai, “Godigo dagebolo te agai te we bidi dabe tonalubo sę page geme dualaluali po page te dagebolo ola mawai dao. Tiali goli te Godigo po odisąma bulu badu bidibo bidi dabe augwaligo da, te eno pusubo po te po digi po begelama, tama wabogo naga te po odobo dao. Te po page augwaligo odobo menio.
MAR 4:12 Te Godigo po bukude te gasa we bidide polobadu asęani po, te po page te megi bidalubo we bidide elalubao, te e tiwai dao: ‘Te augwaligo tonono bilibadi, tiali goli te augwaligo te subo nai page hania konegobeo. Te augwaligo po odobadi, tiali goli te po page augwaligo me konesiąwani. Tama augwaligo konegi sogo da, teda augwaligo homu begeleyu, tama Godigo augwaligo dwai sę yali sęgę sela sągi da,’ te po polobadu asęani,” Jisasgo te po wai.
MAR 4:13 Tama Jisasgo augwalibolo te po hanalu wai, “Dagego te eno po digi po begelama wali po page me konebe dawe? Tama tiyu da, teda dagego mena tama te begelama wabo po page tigidali koneaibawe?
MAR 4:14 Te bidigo nai wai bulai po wali agai te Godigo po haniani we bidibolo pusuyu te bulali tiwai dao.
MAR 4:15 Te sunumide tudulaluali po wali te Godigo po odali we bidi hani dabe, tama te sogo naga Satan asama, te Godigo augwali homude bulali po dagala sąwai.
MAR 4:16 Tama meba we bidi augwali te masigi elaluali tǫba tudulaluali nai wai tiwai yai. Augwaligo Godigo po odama, tama polo augwali kolesaga sali, tama augwali tede wiegi yai homu pemene yali.
MAR 4:17 Tiali goli augwaligo sele te dąų me olalubeo. Augwali te dwasianu sogo naga elaluali. Te nosali Godigo po aiyaba elaluainogo ebo bidi mebago te we bidi augwaliba sęgę dali dene dali mobaso da, teda augwaligo te po wali pabo kolesaga tagalaibao.
MAR 4:18 Tama meba we bidi augwali te sesani yai bono elalubo tomoba tudulaluali nai wai tiwai yai. Te hani augwaligo te Godigo po odali,
MAR 4:19 tiali goli augwaligo homu hauwa te tǫde naide elama, tama augwaligo te mone hauwa sisinabo homu elama, tama haniani doado bagede godola pelama pesa yali. Te doado bage dabede homu ebogo te Godigo po mesegelama, tama tebo we bidi hani augwali te nai du me walisiąwai.
MAR 4:20 Tiali goli meba we bidi augwali te wiegi yai tǫba tudulaluali nai wai tiwai gilama yai. Te augwaligo Godigo po odama, tama augwaligo selama tama tolaluali, tama augwaligo nai du walali. Mebago te ge dwasianu walu, te mebago hauwa walu, te mebago geninama mu tama waliyu yalio,” Jisasgo te po wai.
MAR 4:21 Tama agai te po me augwalibolo wai, “Te bidigo lam sole domonama bogoli ebadi tama sela asama, te baket dologoba ma te pibo sai bet dologoba te mubo dawe? Menio. Agai te tebol sai daiba mubo dao.
MAR 4:22 Te tigidali geme dualaluali nai nosali te hania haninama pedalaibao. Tama bidigo te mesegaluali tigidali nai, nosali te ulaba hanilama pedalaibao.
MAR 4:23 Te olo elalubo bidi agai eno te po odiąo!”
MAR 4:24 Tama agai te po me augwalibolo wai, “Te dagego odali po, tede dagego bugagia kone palao! Te dagego bidi dabebolo te mabo nai usu nama, te usu si naga dageba wei ponaibao. Tama agai meba ma wadolama te dageba mawaibao.
MAR 4:25 Te bidi me deligo nai tolalubo bidi, te Godigo agabolo geninama ma mawaibao. Tiali goli, te bidi me deligo dwasianu nai naga me elalubo bidi da, teda agai te elalubo nai, te hagawaibao,” Jisasgo te po augwalibolo wai.
MAR 4:26 Tama agai te po me wai, “Te Godigo we bidi tonalubo sę tomoba pabo tų te e tiwai dao, te bidi me deligo te nai wai tǫba tedelalo pabo tiwai dao.
MAR 4:27 Tama tigidali sogo be hulibo usu nama te bidi godege piduali, tama be posobode aga hogodama bilidu yai. Tama te tedelalo pali nai wai holama, tama mena tama genuai ebo me, te bidi agai me konebeo.
MAR 4:28 Te tǫ aga digi sę ebaso tama te nai wai holama, tama nosali te nai wai du walaibao. Hasia bolo te nai honu pedalama, tama nosali te nai tobolu tomode te nai genuai pedalaibao.
MAR 4:29 Tama nosali te nai genuai elama te nai inabo si da, teda te bidigo te hwą ge dali sę yaibao. Te nai sabo sogo bodolu te pedalali dao,” Jisasgo te po wai.
MAR 4:30 Tama Jisasgo te po wali, “Dago te Godigo we bidi tonalubo sę te mena tama usu saibawe? Tama dago tede mena usu sabo po begelama waibawe?
MAR 4:31 Te tiwai nai wai me deli te nogi dago te mastet wabo. Te nai mastet wai ge da te e tǫde gasa tigidali elalubo nai wai ge tiwai me elalubeo. Menio. Te dwasianunu mu tama. Bidigo te nai wai ge te tǫba bulaibao.
MAR 4:32 Bidigo te mastet nai wai ge bulama, tama holama tama genuai igulama, tama te kaya te tobage tigidali ni aiyaba elaluaibao. Te aga nologo genuai igulama, tama te ni nologode te ba dabe te tįwąi madi dologoba duayagasu yaibao,” Jisasgo te po wai.
MAR 4:33 Jisasgo te we bidi augwalibolo te po digi po hauwa begelama, te tama tiwai agai po pusali, te augwaligo homu kolesagaba muabo usu po naga wai dao.
MAR 4:34 Agai te po te we bidi augwalibolo hanilama me pusubeo. Menio. Agai te po begelama naga pusali. Tama aga te wali pabo bidi dabe naga aga dali bidibadi, agai te po page tigidali hanilama augwali dali pusuyu yai dao.
MAR 4:35 Tama te silama te sogo digi te be pio ebode, agai te aga wali pabo bidi dabebolo weyu, te po wai, “Da te sigi ąį u badu pedai badu pinao,” po wai.
MAR 4:36 Tama augwaligo te genuai we bidi hani bidaludubadi taga peyu, te augwali Jisas dugulaluali gebaba holama, tama augwaligo aga dali selama pali. Tama gasa bidi dabe augwali meba gasa geba dabe me tedu augwali dali pai.
MAR 4:37 Tama augwali te sigi ąį tomodu pobadi, te moni genuai wali me deli hogodama, tama wę dini te geba tomoba asali, tama te geba te węba hoa sigulama, te węgo geba pągąna sainogo yai.
MAR 4:38 Tama Jisas te geba dugi badu bidali, tama aga tobolu te geba dugiba munama, godege pila muani. Augwaligo aga hodoligi pelama, tama augwaligo te po wai, “Tisa po ola mabo bidio, te pąde da węba hoa selama hagainogo ebao, tama nago homugo te kone palobewe?”
MAR 4:39 Tama Jisas hodasa holama, tama te waliba wado po obadi, tama wębolo po weyu te po wali, “Megi da, usu dao. Nage sia sao! Nage megi tama silama isao!” Tama wali kekasa peyu, tama te wę me dwasianu memenege munu me ebeo.
MAR 4:40 Tama agai aga wali pabo bidi dabebolo te po wai, “Magi baso dage te tiwai wi ebawe? Te dagego enade te konealubo po dąų weyu enaba duga homu me tialubo meniwe?” te po wai.
MAR 4:41 Tiali goli augwali wi dwai mu elama, tama augwa hasi tomode po mia siyu, te po wali, “Te bidi aga niwai bidi, tama te wali de wę dali sigo agai po odaliwe?” te po wai.
MAR 5:1 Te Jisas dali aga bidi dabe dali augwali te gebadu pelama, tama te sigi wę u badu pedai badu te Gerasa dabego tǫba sabolali.
MAR 5:2 Agai te geba taga soai madi, tama polo te wabo pabo dwai haubo elalubo bidi me deli te Jisas tiąba asali. Te bidi te gų page hauwa elalubo tǫde subigila biliduai bidi tama asali.
MAR 5:3 Aga te gų pagede pilala bilai. Tama te bidi me deligo aga dąų wabo te usu me isąwai. Te sengo me usu me ebeo.
MAR 5:4 Te hauwa sogo augwaligo te hankapgo me sengo nogo sągą duyu yali. Tiali goli agai te hankap me sen me togwa sąwani. Agai te moni bomo mu eyu, tama bidi mego aga tuainu ebo te usu me isąwai.
MAR 5:5 Te sesemane sogo giligade me hulide me aga te gų pagede me bulu dude bidada biliduai. Tama agai i dwai olama, tama aga tigi te aga digi masigigo tologobo sę iduai.
MAR 5:6 Te agai Jisas te digibulu bidibadi digi sulama, tama aga udada asama, tama aga pageba kidu sugunagasali.
MAR 5:7 Agai bomo elama mu i weyu, te po wai, “Jisas, nage ugwade bidibo Godigo ogwa mu, nago magi sę enade yainogo ebawe? Eno te Godigo nogide nagebolo hanalu obao, nago te dene enabolo me magio,” te po wai.
MAR 5:8 Magi baso meni, te Jisasgo agabolo wali, “Nage dwai haubo noma bidi, nago te bidide bidibo taga pao,” wali.
MAR 5:9 Tama Jisasgo agabolo hanalu wali, “Nago nogi dewe?” Tama agai te po wai, “Ena nogi Ami dao. Magi baso meni, da hani genuai hauwa dao.”
MAR 5:10 Tama agai Jisasbolo i bomo elama weyu, Jisasgo te dwai haubo noma bidi dabe te moni tǫde munu me sela sągio po widu geai.
MAR 5:11 Te genuai kibu hani sibi dabe augwali te dwasianu bulu du pąde nai tuduladu bidaludai.
MAR 5:12 Tama te dwai haubo noma bidi dabe augwaligo te bomonama i weyu, Jisasbolo te po wali, “Nago da te kibu dabe tomoba tagala palao,” te po wai.
MAR 5:13 Tama Jisasgo augwali teba pao olama usu da wai. Tama te dwai haubo noma bidi dabe augwaligo te bidi taga peyu, tama augwali te kibu dabe tomoba bula sigi pali. Tama te kibu hani dabe bomonama mu udada pelama, tama te dwai bulu sau pado me deliba samonani. Te tigidali kibu umabo mu te bidi sese hauwa 2,000 dao. Tama augwali te sigi ąįba tulaluama, tama augwali te wę tulama poma peyu isila silai dao.
MAR 5:14 Te kibu tononaluali bidi wi pelama, tama augwaligo po te hanuba me tede elalubo bulu dabeba sela pali. Tama te we bidi augwali te sę ebo suagasali.
MAR 5:15 Augwali te Jisas bidiboba sabolama, tama augwaligo suali, te dwai haubo noma bidi hauwa polobadu agade bidali bidi, te bidi Jisas dali bidibo augwaligo suali. Megi da, aga ugwa gudama, tama aga homu kolesaga peda pelama, tama aga bugagia dualaludali. Tama te we bidi augwaligo te sulama, tama augwali wi yai.
MAR 5:16 Tama te bidi dabe te Jisasgo yali sę suali bage, augwaligo te hanudu tamadi asali we bidibolo te bidide pedalali sę po pususu pali, polobadu te dwai haubo noma bidi agade bidai. Tama augwaligo te kibu dabede yali sę po me pusali.
MAR 5:17 Tama tibaso, te we bidigo bomonama weyu, te Jisas augwaligo bulude bidibo tagalama, te gasaba pao wai.
MAR 5:18 Tialima, Jisas te gebaba holobadi, tama polobadu te dwai haubo noma bidi sela sąwani bidi, agai te tiwai po Jisasba hanalu wali, “Ena nage dali paio,” wali.
MAR 5:19 Tiali goli Jisasgo hagela homu yali. Agai agabolo te po wali, “Nage naga beba me naga deli hani bidibo madiba pao. Tama nago te tigidali sę Genuai Bidigo nagede yali sę po pusugi peyu, tama agai nage homu dene eyu tau sali po me pusao,” Jisasgo te po wai.
MAR 5:20 Tama tibaso te bidi pelama, tama agai te sę yali po te hanu nogo si elalubo tǫ pedai badu te Jisasgo agade yali sę po tigidali pususu bilali. Tama tigidali we bidi augwali homu hauwa eyu noma sali.
MAR 5:21 Te Jisas te gebadu peyu, te sigi ąį ma nogeali. Aga te wę u badu pedai badu tugi pali, tama genuai we bidi hani augwali aselama agaba sisinagasali. Tama Jisas aga te sigi ąį sane pąde bidali.
MAR 5:22 Te Juda dabego bomai po odobo lotu be tonalubo tobolu bidi me deli asali, aga nogi te Jairus. Agai te Jisas sulama, tama aga sągą pąba basi gulama kidu sugunagasali.
MAR 5:23 Tama agai bomonama agabolo te tiwai po hanalu wali, “Te eno dwasianu wegi te pąde isabo homu yai. Nago agaba nogo muagaselama, tama aga usu ma igulama bidimainogo obao,” te bidi Jairusgo te po wai.
MAR 5:24 Tama Jisas aga dali hodobo pali. Tama genuai we bidi hani augwali aga wali pali, tama aga pabo madi te augwali mu pena sali.
MAR 5:25 Tama we me deli bididuali, tama aga tigide kaneme sesemane sogo idubadi, tama te kibu be nogo si olama sągągo si bidai.
MAR 5:26 Te hauwa dokta bidigo te hauwa sogo agaba dene madubo sę iduali, tama te wego aga mone tigidali te augwaliba mena silali. Tiali goli agai gasi te dwasianu usu me ebeo. Menio.
MAR 5:27 Te wego te Jisasgo ebo sę po odai. Tama aga aselama, tama aga te genuai we bidi hauwa bidalubo tomode bididuai. Aga te Jisas pabo wali nosali asidu, tama agai ugwa sabi badu diąna asiduai.
MAR 5:28 Agai te tiwai homu eyu te po wali, ‘Te eno nogo agai ugwa sabi badu naga diąbaso da, te ena usu ma yaibao,’ agai te homu yai.
MAR 5:29 Tama te deli sogo naga, te aga kaneme yali te togwa siyu tama wa sali, tama aga tigide te gasi pela silali homu yai.
MAR 5:30 Tama polo Jisasgo koneani, te meba bomo agade taga pabo koneani. Tama tibaso aga begelama, te we bidi dabebolo te po wali, “Dego eno ugwaba nogogo diąyaniwe?”
MAR 5:31 Tama aga wali pabo bidi dabego agabolo te po wali, “Nago suao, te genuai we bidi hani te nage pąde pena sali dao. Tama magi baso nago te po weyu, ‘Dego eno ugwaba nogogo diąbo’ po obawe?”
MAR 5:32 Tama dego te tialiwe nama, Jisasgo te we bidi tomode tonono bilali.
MAR 5:33 Tama te wego te sę agade pedelali koneama, tama aga wi eyu didibili dali yali. Tama tiyu aga asama, Jisas pąba kidu sugunagasama, tama te tigidali sę agade yali po te hanilama pusali.
MAR 5:34 Tama Jisasgo agabolo te po wai, “Eno wegi, te naga enade konealubo po dąų weyu, enaba homu tialubo kolesaga ebogo te nage usu ma ilali dao. Nage pao, tama naga homu nagame wiegi yai elaluao. Nago gasi silimainogo yai,” te po wai.
MAR 5:35 Jisasgo te po odubadi, tama te bomai po odobo lotu be tonalubo tobolu bidigo bede bidibo bidi dabe meba aselawali. Augwaligo te po wali, “Te nago wegi isalio. Magi baso nago te sę dene yabo po te po ola mabo tisa bidibolo obawe?”
MAR 5:36 Tiali goli Jisasgo augwaligo te wabo poba olo me musiąma, odola tagalali. Agai te bidi Jairusbolo te po wali, “Nage wi egio. Nago enade konealubo po naga dąų weyu naga homu enaba tialuama bidao,” te po wai.
MAR 5:37 Tama agai te we bidi dabe augwali habu selama, te augwali aga dali me pelamuo wali. Pita me Jems me Jon, te Jems aga ama, te augwali sela naga aga dali pali.
MAR 5:38 Augwali te tobolu bidi Jairus aga beba sabolama, tama Jisasgo suali, augwaligo te genuai po kulukulu wabo suali. Augwali te homu dene ebaso dwai gela mu oladuali.
MAR 5:39 Tama aga te be tomoba pelama, tama augwalibolo te po wali, “Magi baso dagego te genuai po kulukulu weyu, te gela weyu ebawe? Te wai te aga mu isibeo. Aga te godege naga piali dao,” agai te po wai.
MAR 5:40 Tiali goli augwaligo aga gisugu mani. Tama tibaso agai te be tomode bidali tigidali we bidi buluba gudula silali. Tama agai te wai aga aya de ida dali si naga selama, tama aga wali pabo bidi sela sobadi elama, tama augwali te isali wai munalubo madi te be habu tomoba pali.
MAR 5:41 Tama agai te wegi nogo tolalu, tama agabolo weyu, te po wali, “Talita kumi.” Te po begelama tama dena pogo te po page e tiwai dao, “Dwasianu wegi, eno nagebolo obao, nage hodaluao,” wali.
MAR 5:42 Tama polo te dwasianu wegi hodaluama tama soali. Agai kibu be 12 elaluai. Tama augwaligo te sę ebo sulama, tama midigi siyu noma mu salio.
MAR 5:43 Tama Jisasgo po bomonama augwalibolo weyu, te po wai, “Dagego te sę ebo suali po te bidi me delibolo munu me olamuo.” Tama agai augwalibolo weyu, te nai meba selama te dwasianu wegibolo maiąo po wai.
MAR 6:1 Te silama tama Jisas te bulude bidali tagalama, te aga page bulu Nasaret hanu teba pali. Tama aga wali pabo bidi dabe augwali aga wali pai.
MAR 6:2 Te Sabat sogo aga te bomai po odobo lotu be tomoba pelama, tama te we bidi augwalibolo te Godigo po pusa mani. Tama augwali hauwago agai po odolama, tama augwali dwai noma siyu midigi sali. Augwaligo te po wali, “Te bidigo te ola mani po menade saliwe? Te agade koneani elalubo kolesaga, te menagiai kolesaga dawe? Mena tama tilama agai te bomai sę ebowe?
MAR 6:3 Te bidi aga te be sę ebo kamda bidi naga dao, te dago koneani. Aga te we Mariago ogwa, tama aga ama dede da te Jems, me Josep, me Judas, me Saimon, te tama bagego ama gomunai bidi dao. Te aga abe dabe da dali ede bidibao.” Augwaligo te tiwai po olama, tama augwaligo aga dali dwai homu ela mani.
MAR 6:4 Tama Jisasgo augwalibolo te po wali, “Te Godigo po pusubo profet bidigo nogi tigidali bulude elalubao. Tiali goli te aga page bulude me, te aga deli kaneme hanide me, te aga be mude me, te aga nogi meni yaibao,” te po wai.
MAR 6:5 Tama agai te bomai sę me deli te bulude me egobeo. Agai nogo te gasi bidi si selaba naga munama tama augwali wiegi yai ma ilali.
MAR 6:6 Tama te we bidi augwaligo agade konealubo po dąų wasiąyu, tama augwa homu agaba tialusiąbaso, te aga noma siyu midigi sali. Te Jisasgo te Nasaret hanu tagalama, tama aga te bulu pedai dabeba biligi pelama, tama agai te Godigo po te we bidi dabe augwalibolo ola mena mena bilai dao.
MAR 6:7 Tama agai te aga wali pabo bidi nogo si olama sągągo si bidi dabe i olama asali, tama agai augwali bidi si si tagala palali. Agai te dwai haubo noma bidi sela sąyabo bomo te augwalibolo mawai.
MAR 6:8 Tama agai te po augwalibolo wai, te bilibo dono augwaligo tolasa bilao wali, tiali goli augwali te biligi pabo sogo gasa doado bage dali me sabiligio wali. Augwaligo te bret me sabiligio wali. Te wa brasbel me augwaligo me sigio po wali, tama augwaligo gudali ugwa agebelede te mone bulama me sela pelamuo. Menio.
MAR 6:9 Augwaligo te sągą nadoba mumainogo yao wali, tiali goli augwaligo te holobo ugwa si munamuo wali.
MAR 6:10 Tama agai augwalibolo te po me wali, “Te dage bulu me deliba sabolama tama te be me deli tomoba pobaso da, teda dage te be tomode naga bidiąo, te gasa gasa beba pigimio. Tama nosali dagego te be tagalama te dage piąo.
MAR 6:11 Tama te meba bulude te augwaligo dage te augwa beba dage sela pisąma, tama augwaligo dagego po odisąyu ebaso da, teda dagego te bulu taga peyu, tama te dagego sągąde elalubo pobele bage sela sąyao. Tama tiyu augwaligo te augwa dage dali yali dwai kolesaga homugo kone palomainao,” agai te po wai.
MAR 6:12 Tama tibaso te po sela pabo sę bidi dabe si si pelama, tama augwaligo te tiwai po te we bidi dabebolo haniani bulude pusali, “Dagego duga dwai sę tagalao, tede ge neyu duga homu kolesaga begeleąo,” te tobage po wali.
MAR 6:13 Tama me augwaligo te dwai haubo noma bidi hauwa sela sanama, tama augwaligo te hauwa gasi yai bidi tigide wel munama tama augwali usu ma iliyu yai dao.
MAR 6:14 Tama megi da, te gavman tuni bidi Herot agai te sę ebo po dabe odali, magi baso meni, te tigidali tǫ pedaide te Jisasgo nogi usu elalualio. Te meba we bidi augwaligo te po Jisasde wali, “Te we bidi baptais mani bidi Jon aga te gų pagede ma hodalualio, te aga Jisas dao. Tama tibaso te genuai bomo aga nogode pedalubao,” te po wai.
MAR 6:15 Tama meba augwaligo te po wali, “Woo, te meni. Jisas da, te aga te polobadu bidali profet bidi Elaija dao.” Tama mebago te po wali, “Aga te profet dao, te polobadu Godigo po pusubo sę ela bilali profet dabe tiwai dao.”
MAR 6:16 Tama te gavman tuni bidi Herotgo te wabo po odama, tama agai te po wai, “Polobadu eno bidi me tagala palama, tama agai Jon dogoni togolama tama aga isai dao. Tiali goli megi da, aga ma hodaluali dao,” te po wali.
MAR 6:17 Polobadu Herot aga ama Filip me bidibadi, te Herotgo Filipgo we nogi Herodias dagala sai. Tama tibaso Jongo hauwa sogo te Herotbolo te po wai, “Nago te naga amago we sali, te dolo me ebeo,” wali. Tama te we Herodias agai homu dwai mu te Jon dali elama, tama aga ela muabo homu yali, tiali goli agai te tiabo sę usu ebeo. Herotgo te bidi meba tagala palama, tama augwaligo te Jon pageabi elama, tama te kalabus bede aga te sengo kęani. Tiali goli agai Jon ela mubeo.
MAR 6:20 Magi baso meni, Herot aga te Jonde wi yai. Agai koneani, Jon aga te wiegi yai tama doloba pai bidi bidali. Tama agai te aga bugagia tonaluali. Agai te Jongo pusubo po odama, tama aga homu hauwa elama, tama aga homu sęgę iduali. Tiali goli agai te agai po odobo te godolo mu yai.
MAR 6:21 Nosali te we Herodiasgo te tiwai sunumi elalubo pedalali. Herot aga idago aga ame nani side pedalubaso, te agai genuai nai ulaiba wali. Agai te nai da tueinu ebo te aga dali gavman sęde tau sabo bidi dabe dali tueinogo yali, tama te polalubo ami tuni bidi me, te Galili tǫde bidalubo genuai bidi dabe dali te nai da tueinogo yai.
MAR 6:22 Tama te we Herodias aga wegi aga te nai tubo madi tomoba aselama, tęąbi yagasali. Tama Herot dali te aga dali nai tuali bidi dabe me, augwali godolo mu yali. Tama Herotgo te gesi wegibolo weyu, te po wai, “Nago magi nai saiwe? Nago enabolo po obaso, te eno nagebolo mu mawaibao,” te po wai.
MAR 6:23 Tama Herotgo agai po dąų wabo po bomonama weyu, agai agabolo te po wai, “Mu tama dao, nago mena nai po enabolo hanalu wali, te eno nage mawaibao. Te nago eno te we bidi tonalubo te bomo tomode togolama, te nage mao po obaso da, teda eno nage mawaibao,” agai te gesi wegibolo te po wali.
MAR 6:24 Tama te wegi buluba solama, tama aga idabolo hanalugi soali, “Te eno mena nai sai po wagawe?” Tama aga idago te po wai, “Nago te we bidi baptais mani bidi Jongo tobolu sabo po wao,” te po wali.
MAR 6:25 Tialima, te gesi wegi polo ma te tuni bidi pageba ma asama, tama te po agabolo wali, “Megi naga tama eno homugo nago te baptais mani bidi Jongo tobolu te pou me delide munama, tama nago enabolo mao,” wai.
MAR 6:26 Agai te tama po obaso, tama te tuni bidigo homu sęgę mu yalio. Tiali goli agai homude te agai mu po da dąų wali te aga dali hodobo te duada pelama nai tudu pabo bidi dabe gesabidide wali po, te pode homugo kone palali. Tama agai te wegigo po sela sągobeo homu yalio.
MAR 6:27 Tialima, polo tama te tuni bidi Herot agai te ami bidi me deli tagala palama, te Jongo tobolu togogi pelama sela asomainogo yali. Te ami bidi te kalabus beba pelama, tama Jongo tobolu mage togwai.
MAR 6:28 Tama agai te Jongo tobolu togwali te pou me delide munama, tama selasa aselama, tama te gesi wegibolo magasali. Tama te wegigo aga idabolo mawai.
MAR 6:29 Te Jon aga wali pabo bidi dabego te wabo po odama, tama augwaligo aga tigi sagaselama, tama augwaligo te gų pageba pubaligi pai.
MAR 6:30 Te Jisasgo tagala palali po sela pali sę bidi dabe augwaligo sę silama, tama ma begasa aselama, tama augwali Jisas dali deliba sisinani. Tama augwaligo te egi pali sę po miani, tama tigidali po augwaligo te we bidibolo ola mani po wai.
MAR 6:31 Te we bidi hauwa eda asiyu, ugwa soyu yali, tama Jisas dali aga wali pabo bidi dabe dali augwaligo te we bidi tau sabo sę ebaso, augwali nai tuyu toma nabo sogo meni yani. Tama tibaso Jisas aga wali pabo bidi dabebolo te po wali, “Ae, tegobao, dena naga te bidi meni yaiba me deli pelama, tama dage toma dwasianu tuiagameo,” te po wai.
MAR 6:32 Tama augwali te geba selama, tama augwali te sigi ąį daidu te bidi meni yai habu me deli badu pali. Augwa naga palio.
MAR 6:33 Tiali goli te we bidi hauwago augwali pabo suali, tama augwaligo te augwali koneani. Tama tigidali hanu we bidi augwali teba pedai badu tǫdu udada pelama, tama augwali te Jisas pali sunumi te badu polasa pedaligi palio.
MAR 6:34 Tama Jisas te gebadu pelama, te wę pedai badu tugi pelama, tama agai te we bidi hauwa bidalubo suali. Tama agai augwali homu dene genuai mu yali. Augwali te sipsip kibu tonalubo bidi meni yai tiwai bidaluali. Tama tibaso agai gagalama, te wiegi yai po hauwa augwaliba ola mawai.
MAR 6:35 Te giliga dega sigulainogo yali, tama te Jisas aga wali pabo bidi dabe te agaba aselama, tama augwaligo te po wai, “Te ede da, te bidi meni yai madi tama te giliga dega sigulainogo ebao.
MAR 6:36 Nago te we bidi augwali tagala palao. Augwali peyu, te be nani dabeba pomainao, tama augwa tuabo nai abelegi pomainogo tagala palao,” te po wali.
MAR 6:37 Jisasgo augwaliba te po wei ponani, “Duga digi te augwali nai maiąo.” Tama augwaligo agabolo te po wali, “Te nago homugo dago te bidi sese a naga 200 kina monego dago te bret abelegi pomainogo eyu obawe?”
MAR 6:38 Tama agai augwalibolo te po wali, “Dagego nisu naga bret munalubowe? Dage pelama sugi piąo.” Augwaligo sula selama, tama augwaligo te po wai, “Dago te bret a naga, me te sųgų si te tama elalubao.”
MAR 6:39 Tama agai augwalibolo te po wali, “Tigidali augwali te wiegi yai nosaide wasisi pelama, duada piąo wao,” te po wali.
MAR 6:40 Tama te we bidi tigidali augwali duada pali, tama te wasisi pelama, duada pali hani me badu te bidi sese a naga 100 bidi duada pobadi, te meba duada pali hanide te bidi si olama nogo si 50 bidi bidada pali.
MAR 6:41 Tama agai te a naga bret dali te sųgų si me sali. Tama agai te dagaluba tonaludama, tama puba hwi po Godibolo walio. Tama agai te bret pebedama, tama te aga wali pabo bidi dabebolo menama, tama augwaligo te we bidiba dobaba pali. Tama te sųgų si me tologolama, tama te tigidali we bidiba dobaba palio.
MAR 6:42 Tama tigidali augwali te nai tudu pali te usu mu yalio.
MAR 6:43 Tama te bret me sųgų te me badu tigidali munalua pali, te augwaligo sisinama, tama te bonou wa basket te nogo si olama sągągo si pągąwani.
MAR 6:44 Te bret me sųgų tuali bidi dabe, augwali te bidi sese umabo te 5,000 bidi dao.
MAR 6:45 Te nai mabo sę silama, tama Jisasgo aga wali pabo bidi dabe augwali te asesa piąo olama, te augwali polo te gebaba holomainogo elama, tama augwali te aga asabo badu te sigi ąį pedai badu polasa te Betsaida buluba piąo wali. Agaduba digi te we bidi dabe augwa beba tagala palu pomainogo yai.
MAR 6:46 Agai te we bidi augwali tagala palama, tama aga te bulu du bageba ugwa holai. Aga tede agaduba bididubadi te Godibolo po wainogo tiali.
MAR 6:47 Te be pio ebode te geba te sigi ąį tomode elaluali, tama Jisas agaduba te tǫde me bididuai.
MAR 6:48 Tama agai suali, te waligo augwali degelainogo ebaso, tama augwali te wę togobo sę dene mu yai. Te be posabo pąde, teda Jisas te sigi ąį daidu augwali bidiboba pali. Agai te augwali ela soainogo yai.
MAR 6:49 Tiali goli te aga wali pabo bidi dabe augwaligo aga te sigi ąį daidu asobo sulama, tama augwaligo homugo aga te isi bidi me deli da te homu yai. Tama augwali homu dwai noma sabo i dali walio.
MAR 6:50 Magi baso meni, tigidali augwaligo aga sulama, tama augwali wi mu yai. Tama polo Jisasgo augwalibolo weyu te po wai, “Dage homu tegaluiąo, bomo elama bidiąo. Te ena tama dao. Dage wi egimio,” te po wai.
MAR 6:51 Tama aga te gebaba holama, tama augwali dali bidibo si, tama te moni wali asali sia salio. Tama augwali midigi eyu noma mu selama, tama augwaligo homu hauwa yalio.
MAR 6:52 Magi baso meni. Te Jisasgo te we bidi hauwa tebolo bret dabe dobawali sę page tede augwaligo bugagia homu kone me palobeo. Menio. Augwa homu me hulialuama tama usu ebe.
MAR 6:53 Te silama, tama augwali te sigi ąį nogolama, tama augwali te Genesaret pedai badu tugi pali, tama augwaligo te geba tede gebelali.
MAR 6:54 Augwaligo te geba taga sobadi, tama polo te we bidi dabe augwaligo te Jisas sulama, tama aga konea palio.
MAR 6:55 Tama te bidi dabe udada pelama, te pąde elalubo tigidali bulu dabeba tedela pali. Tama tigidali bagego te Jisas bidibo po odama, augwaligo te gasi yai bidi dabe te gologobe wade munama, tama augwaligo te augwali tolama tama aga pageba tolasa pelawali.
MAR 6:56 Tama tigidali bulude me te tigidali hanude me te tigidali tǫ pedaide te Jisas sabaligi pabo digi, augwaligo te gasi yai we bidi dabe sela asama, te maket ebo pesage tomoba muagasiyu yai. Te augwaligo i bomo elama Jisasbolo weyu, tama te gasi yai we bidi dabego te agai ugwaba nogogo diąmainogo gogoliyu sula tagala wali. Tama tigidali gasi bidi dabego te agai ugwaba nogo munama, te augwali tigidali wiegi yai elama, usu ma ela pai dao.
MAR 7:1 Te meba Farisi hani bage meba dali, te Juda dabego bomai po page koneai bidi dabe meba dali, augwaligo te mone hanu Jerusalem taga soyu, te augwali Jisas bidibo madiba sisinagasai.
MAR 7:2 Tama augwaligo te aga wali pabo bidi dabe mebago nai tubo suali, te augwaligo nogo bolo hasia węgo te nogo habuba mu tugulama telasiąma te nai sela tuali.
MAR 7:3 Te Farisi dabego me te tigidali Juda dabe augwaligo te augwa wąį nǫų dabego polobadu yali kolesaga wali pelama, tama augwali te nogo ąį hasia nogo habuba usu nama telasiąbadi da, te augwaligo nai tusiąwai dao.
MAR 7:4 Te augwali te Juda hani isąwai bagego maket elaluboba pelama ma asiyu, tama augwaligo nogo wę telasiąbadi da, te augwaligo nai me tuai menio. Tama augwaligo te wąį nǫųde sali gasa kolesaga hauwa me wali peyu yai. Augwaligo te wę tubo kap me, sene me, genuai pou me, te pibo bet sai me wę telayu yai dao.
MAR 7:5 Tama tibaso te Farisi dabe me te Juda dabego bomai po page koneai bidi dabe augwaligo te Jisasbolo hanalu wali, “Magi baso te nage wali pabo bidi dabe augwaligo te dago wąį nǫų dabe augwaligo kolesaga wali pabo meniwe? Te augwaligo dago nogo wę telabo kolesaga isąma, tama nogo meda elalubadi nai tubo dao,” te po wai.
MAR 7:6 Tama Jisasgo augwalibolo te po wai, “Te polobadu bidali profet bidi Aisaia agai dagede te po meba dolo mu weyu, tama te dage ili po wabo bidi dabe da wai. Agai te e tama tiwai po polobadu asęani, ‘Godigo te po wai, “Te hani bidi augwaligo eno nogi te pedauwaligo ugwaba sabo dao, tiali goli augwaligo homu te enade digibulu elalubo dao.
MAR 7:7 Augwaligo enade olo dali lotu po weyu ebo dao. Magi baso meni, augwaligo te bidigo nigali bomai po naga ola mayu te po wali, ‘Te e da Godigo po dao’ wai,” ’ Aisaiago te po asęani.”
MAR 7:8 “Tama dagego te Godigo bomai po tagalama, tama dagego te bidi dabego ola mabo po naga dąų olama tolalubo dao,” Jisasgo te Farisi bage dali te Juda dabego bomai po page koneani bage me augwalibolo wai.
MAR 7:9 Tama agai augwalibolo te po me wali, “Dagego te Godigo bomai po tagalabo bugagia koneama, tama duga digi ebo kolesaga wali pabo dao.
MAR 7:10 E tiwai dao. Polobadu Mosesgo te bomo yai po pusali, ‘Nago te naga aya idago po wali pao,’ wai, tama me po wali, ‘Bidigo dwai po te aga aya idabolo wabo bidi te aga isimainao,’ te po si Mosesgo ola mani.
MAR 7:11 Tiali goli dagego te po si tagalama, dagego e tiwai po dabolo ola mabo da, te bidi me deligo aga aya ma ida tau sabo mone ma doado bage elalubadi, tiali goli agai te po augwali sibolo waibao, ‘Te e mone da, te eno Godiba mawainogo sa muani elalubao’ po obaso da,
MAR 7:12 teda agai te aga ida bugagia wiegi yai ilibo sę te tama tagaliyu da, te usu dao, dagego te tobage po ola mabo dao.
MAR 7:13 Tama naga tiyu, tama dagego te duga wąį nǫųde sali kolesaga wali pelama, tama dagego te Godigo po dolobo ąǫ ebo dao. Tama dagego te tobage tiwai kolesaga hauwa ebao,” Jisasgo te po wai.
MAR 7:14 Tama Jisasgo te we bidi augwali i ma olama, tama agai te po augwalibolo wali, “Dage tigidaligo eno po odama tama homugo konea sao!
MAR 7:15 Te bidi me delide te nai bulu badu elaluali tama te nai aga tomoba pelama, tama te naigo te bidi meda ilibo te usu me egobeo. Menio. Te bidi tomode elaluali nai dabe te buluba soyu, tama tego naga te bidi dwai meda ilaibao.
MAR 7:16 [Te olo elalubo bidigo agai te po odiąo.”]
MAR 7:17 Agai te we bidi bidalubadi taga peyu, te aga beba pai. Tama aga wali pabo bidi dabego agabolo te begelama wali po digi po page hanalu wali.
MAR 7:18 Tama agai te po augwalibolo wali, “Dage me te homu kolesaga meni eyu, obawe? Te dagego konebewe? Te tigidali bulu badu elaluali nai te bidi tomoba pelama, tego te bidi dwai meda ilibo usu egobeo.
MAR 7:19 Magi baso meni, te tiwai naigo te bidi homu tomoba mu pogobeo. Menio. Te haliga tomoba peyu, tama te di tabo sunumidu naga pelama, tama nosali te di beba paibao,” agai te po wai. Te pode Jisasgo te tigidali haniani tubo nai te wiegi yai da, te habu selebo menio, te po wai.
MAR 7:20 Tama agai te po me wai, “Te dwai nai te bidi tomode elaluama tama buluba asobo, tego te bidi meda ilibo dao.
MAR 7:21 Te bidi tomode, te homu kolesaga tomode pedalubo nai dabe te e tiwai: te dwai homu kolesaga dabe, te penani ebo kolesaga, me te nai wi sabo kolesaga me, te bidi ela mubo kolesaga me,
MAR 7:22 te we sabo dolobo kolesaga me, te mena nai sainu homu hogodama pesa dalobo kolesaga me, te haniani dwai dwai kolesaga me, te tibo po weyu te hagoma ebo kolesaga, me te bidi nogi posobo po wabo kolesaga ebo, me te hagoma homu elama te esela pabo bidigo kolesaga tiwai eyu ebo dao.
MAR 7:23 Te tobage tigidali dwai kolesaga te bidi tomode elaluali te buluba asiyu, tama te bidi meda ilibo dao,” Jisasgo te we bidi dabebolo te po wai.
MAR 7:24 Te Jisas hogodama tama aga te bidali bulu taga soali, tama te Tair hanu pedaiba pai. Aga te be me deli tomoba pali, tama aga tede bidibo te bidi me deligo aga koneidali homu yali. Tiali goli aga geme duala sainogo ebo te usu me egobeo.
MAR 7:25 Menio. Te we me deligo aga bidibo po odali. Te we aga wegi elaluali, tama te dwai haubo noma bidi te wegide bidai. Tama te we aga polo tama asama, te Jisas sągą pąba kidu sugunagasali.
MAR 7:26 Te we aga te Juda hani isąwai we da, aga te Fonisia hani we, te Siria moni tǫde elalubo bulu da. Agai te Jisasba i weyu, te agai wegide elalubo dwai haubo noma bidi sela sąyao wai.
MAR 7:27 Tiali goli Jisasgo agabolo po wei ponoyu, te Juda hani dali te Juda hani isąwai bage me te side po digi po begelama tama te po wai, “Dago te wai dabebolo te hasia nai mao. Tiyu dago te wai dabego nai sela tuyu tama te yowi dabeba te nai sąyabuo,” te po wai.
MAR 7:28 Tiali goli te wego agabolo po wei ponoyu, te po wali, “Genuai Bidi, nago te mu po obao. Tiali goli te yowi dabego te wai dabego nai kagali te tebol sai dologoba tulalubo nai sela tubo dao,” te wego te po wai.
MAR 7:29 Tama Jisasgo agabolo te po wali, “Nago te tiwai po obaso da, teda nage ma geasa pagameo. Te dwai haubogo nago wegi dąų elaluali te taga palio,” te po wai.
MAR 7:30 Tama te we aga beba ma geasa pelama, tama aga wai te bet saide pila mubo suali, tama mu tama, te dwai haubogo dąų elaluali te taga pai sualio.
MAR 7:31 Te silama, megi da Jisas ma hogodama, tama te Tair tǫ pedaide bidali tagalama, tama te Saidon bulu tomodu pai. Tama aga te hanu nogo si elalubo genuai tǫ tedu pelama gana, tama te sigi ąį Galili pąba sabolali.
MAR 7:32 Tama augwaligo bidi me deli agaba selasa asali, te aga olo degebadi te hamena begelebadi yai elaluai. Tama augwaligo Jisasba hanalu te bidiba nogo diąyao po wai.
MAR 7:33 Tama tibaso, Jisasgo aga selasa pelama, tama te we bidi taga soali, tama augwaduba si naga bidigi pali. Tama Jisasgo nogo dani te bidigo oloba munama, tama pesa sąnama, tama te pesa nogo daniba muyu, te bidigo hamenaba muanio.
MAR 7:34 Tama agai te dagaluba tonaludu, tama mobo bomonama ponani, te aga homude gela wabo tiwai elama, tama agai agabolo weyu te po wai, “Efata!” po wai. Te tiwai wali, “Nago olo dala pao,” wai.
MAR 7:35 Tama te bidigo olo degai elaluali te dala pali, tama aga te hamena panialuali nai te polo taga pali, tama aga po bugagia wai.
MAR 7:36 Tama Jisasgo augwaliba habu seleyu, bomonama wali, augwaligo te sę yali po te bidi me delibolo munu me wagio po wai. Agai bomonama augwali habu selali, tiali goli menio, augwaligo bomo mu elama, te po pususu palio.
MAR 7:37 Tama te sę yali po odali we bidi tigidali augwali midigi siyu, tama noma mu sali, tama augwaligo te po wai, “Tigidali sę agai ebo, te agai wiegi yai sę naga ebo dao. Agai te olo degai bidi me, te bidigo po odomainogo iliyu, tama te pedauwali pania sai bidigo po ma omainogo eyu yai dao,” te we bidi dabego te po wai.
MAR 8:1 Te silama, tama nosali me sogo te genuai we bidi hani ma sisinani, tama augwali tuabo nai tula silama tama nai meni yai. Tama tibaso, Jisasgo aga wali pabo bidi dabe i olama asobo si, tama agai augwalibolo te po wali,
MAR 8:2 “Eno te e bidalubo we bidi augwalide homu dene ebao. Augwali ena dali sela sogo bidalio, tama megi augwali nai meni yai dao.
MAR 8:3 Tama augwali nai sili bidai elalubadi te eno augwali te augwa beba pomainu tagala palali da, teda augwali tomode pobadi te gedu te gęǫ page elama, te augwali sunumiba tulaluaibao. Meba augwali te digibulu asiyu asalio,” te po wai.
MAR 8:4 Tama aga wali pabo bidi dabego agabolo te po wei ponoyu, te po wai, “Te ede da, te bidi meni yai madi bidibao. Tama dago menade te bret tubo nai selama, te we bidi augwali mawaibawe?” Te po wai.
MAR 8:5 Jisasgo augwaliba hanalu wali, “Dagego nisu naga bret munalubowe?” Tama augwaligo te po wali, “Te a naga olama me badu si munalubo,” wai.
MAR 8:6 Tama agai te we bidi augwalibolo olama, tama augwali te tǫba duada pao wali. Tama agai te a naga olama me badu si bret selama, tama agai Godiba puba hwi olama, tama te nai pebedama, tama aga te wali pabo bidi dabebolo menama, te augwaligo dobaba pomainogo yali. Tama augwaligo te we bidiba dobaba palio.
MAR 8:7 Tama augwaligo te dwasianu sųgų si sela me elaluali. Tama agai te me selama, te Godiba puba hwi olama, tama aga wali pabo bidi dabebolo te me dobayao po wai, tama augwaligo te me dobaba pali.
MAR 8:8 Nosali te we bidi augwali te nai tula silama usu ebaso, tama aga wali pabo bidi augwaligo te elalubo nai meba dwasianu delage sisinama, tama te bonou wa basket te nogo a naga me si tede bulama pągąwani.
MAR 8:9 Te nai tuali we bidi augwali bidi sese hauwa umabo 4,000 bidi usu tama. Tama Jisasgo augwali pomainu tagala palalio.
MAR 8:10 Tama elama, polo aga te aga wali pabo bidi dabe dali te gebaba holama, tama augwali te Dalmanuta te badu pedaiba pai.
MAR 8:11 Te Farisi dabe meba augwali aselama, tama augwaligo te Jisas dali te wado po tiwai weyu konila po wai. Augwaligo te Jisasbolo bomai sę me deli yao po wali. Augwaligo aga te usu sabo sę senayu naga yai.
MAR 8:12 Jisasgo aga homu noma bidide sęgę ebo ąǫ ebaso, tama agai te po wai, “Magi baso te we bidi hanigo e sogode te bomai sę yao obawe? Eno mu po dagebolo obe dao, te e sogode te bidalubo bidi dabego suabo bomai sę me deli eno me egobeo. Mu menio!” wali.
MAR 8:13 Tama agai te Farisi bidi dabe augwali tede bidaludubadi taga peyu, tama aga te gebaba ma holama, tama te sigi ąį pedai u badu pabo gagalali.
MAR 8:14 Tama te Jisas wali pabo bidi dabe augwaligo te homu gegeda peyu, tama augwaligo te tubo nai bret meba dali sela asisąwai. Augwaligo te bret deli digi naga te gebade augwaligo munaluai.
MAR 8:15 Tama Jisasgo po bomo elama augwaliba weyu, te po wai, “Dage bugagia tonaluiąo! Dage te Farisi dabego yisde me te gavman tuni bidi Herotgo yisde te dage dua dao!” te po wai.
MAR 8:16 Tama augwa digi augwa hasi po mia siyu, te po wai, “Dago te bret meni baso, tama agai te po da dali obao,” te po wali.
MAR 8:17 Jisasgo koneama, tama agai augwalibolo te po wali, “Magi baso dagego te tiwai po duga hasi mibawe, ‘Dago te bret menio,’ te magi baso obawe? Te dagego homude kone palai elalubo meniwe? Te dage homu kolesaga meni yai elalubawe? Te dagego homu puna paliwe?
MAR 8:18 Dagego gedu elalubo, tama dagego te nai subo meni da, agawe? Dagego olo elalubao, tama dagego te po odobo meni da, agawe? Dagego homugo te bretde gegeda palai dawe?
MAR 8:19 Eno te a naga bret te bidi sese hauwa umabo 5,000 bidi te nai pebedama mani sogo, dagego te nisu naga bonou wa basket te me badu munaluali bretgo pągąwai dawe?” Tama augwaligo te po wai, “Te nogo si olama sągągo si da,” wali.
MAR 8:20 “Tama eno te bidi sese hauwa umabo te 4,000 bidi te nai bret te bidi meni yai bulude pebedama mani sogo, dagego te nisu naga bonou wa basket te me badu munaluali naigo pągąnai dawe?” Tama augwaligo te po wai, “Te a naga olama me badu si dao,” te po wai.
MAR 8:21 Tama agai augwalibolo te po wai, “Tama dagego me konesiąma ebawe?”
MAR 8:22 Tama augwali te Betsaida hanu teba sabolali. Tama te we bidi augwaligo bidi me deli te agaba selasa asali, te aga gedu widai. Tama augwaligo Jisasbolo weyu, te bidiba nogo muao po walio.
MAR 8:23 Tialima, Jisasgo te gedu widai bidigo nogo tola selama, tama agai aga te buluba odasa soali. Tama agai te bidi geduba pesa sąnama, tama aga geduba te nogo ugwadu munama, tama agabolo hanalu wali, “Nago te nai me deli subowe, ma meniwe?”
MAR 8:24 Tama te bidigo tonono bilama, tama agai te po wai, “Awe, eno te bidi meba suali. Eno augwali te ni tiwai suali, tama augwali bilaluali,” te po wai.
MAR 8:25 Tama Jisasgo nogo aga geduba ma muai. Tama te bidigo bomo elama tonono bilali, tama agai gedu wiegi yai pedelama, tama aga tigidali nai hania sula silai.
MAR 8:26 Tama Jisasgo te bidi aga te aga beba tagala palu, tama te po wai, “Nage te bidi dabe bidibo be nani tomoba ma pigio, naga beba dolo pao,” te po wai.
MAR 8:27 Te Jisas aga te aga wali pabo bidi dabe dali hogodama, tama augwali te tǫ pedai Sisaria Filipai teba pali. Tama te sunumidu peladu te agai aga wali pabo bidi dabe augwaliba hanalu, te po wali, “Te we bidi dabe augwaligo ena de nogi ebo dawe?”
MAR 8:28 Tama augwaligo agabolo te po wai, “Te meba augwaligo nage te we bidi baptais mani bidi Jon nogi ebao. Tama mebago nage te polobadu bidali bidi Elaija nogi ebao. Tama mebago te po weyu, nage te Godigo po pusali polobadu bidali profet bidi me deli da po obao.”
MAR 8:29 Tama Jisasgo te augwalibolo hanalu wali, “Duga digi te ena de nogi ebo dawe?” Tama Pitago agabolo po wei ponoyu, te po wai, “Nage Krais dao, e we bidi tau somainu Godigo nage sa muyu asaiba wali bidi dao,” te po wai.
MAR 8:30 Tama agai augwali habu seleyu, te augwaligo bidi me delibolo olamu da po wai.
MAR 8:31 Te Jisas agai te aga wali pabo bidi dabe augwalibolo te tiwai po ola mabo gagalali, “Te Godigo Bidi Mu te aga dene hauwa tolomainu yaibao, tama te Juda dabego tobolu bidi dabe, me te genuai pris bidi dabe, me te Juda dabego bomai po page koneai bidi dabe augwaligo te aga tudiba munama, tama aga ela muaibao. Te nosali sela sogo bidama te aga ma hodaluaibao,” te po wai.
MAR 8:32 Agai te po augwalibolo hania haninama wai. Tama tibaso, Pitago Jisas te sesege badu odasa solama, tama aga dali te tobage po wagio po wali.
MAR 8:33 Tiali goli Jisasgo begelama, tama aga wali pabo bidi dabeba tononalu, tama agai Pitabolo wado iliyu, te po wai, “Satan, nage ena tudi badu soao! Nago te Godigo homu kolesaga wali me pabo menio. Te meni. Nago te tǫde bidigo ebo homu kolesaga naga te wali pobao,” te po wai.
MAR 8:34 Tama agai te we bidi agaba asomainu i weyu, te aga dali wali pabo bidi dabe me asomainu yai. Tama aselama, tama agai augwalibolo te po wai, “Te bidi me deligo ena wali asainogo da, te aga digi aga aiyaba elaluama, tama agai e homu yao, aga ena wali pobadi aga dene sobaso da, teda te usu da, te homu ebo bidigo agai aga ni pedai tolasa pabo tiwai eyu, aga ena wali asao.
MAR 8:35 Magi baso meni, te bidi me deligo aga digi aga bidabo ula bugagia tonalubo homu ebaso da, te aga bidabo ula te hagawaibao. Tiali goli te bidigo enade te Godigo wiegi yai gesi pode te homu kone palama, tama aga bidabo ula tagalu da, te aga bidabo ula mu saibao.
MAR 8:36 Te bidigo te tigidali tǫde doado bage siyu, te aga digi aga bidibo ula tagaluyu da, teda te bidigo genuai wiegi yai nai tama saliwe? Te meni.
MAR 8:37 Te bidigo mena mone mayu, te aga bidabo ula dobola siyu ma abelaibawe? Te menio.
MAR 8:38 Tama te megi e sogo tǫde bidibo we bidi dabe augwali da, te aga bidi taga soayu penani ebo we tiwai da, augwaligo Godigo po taga soali, tama haniani dwai sę ebo dao. Te bidi augwali bidalubo tomode bidiyu, tama agai enade me te eno ola mabo pode me hale eyu ebaso da, teda nosali ena te Godigo Bidi Mu, ena me te bidide hale eyu aga nogi geme dualaluaibao, te eno ena Ayago genuai bomo yai ula dali, te wiegi yai tedali ensel mobo bidi dabe dali e tǫba ma asobo sogo tama tiaibao,” Jisasgo te po wai.
MAR 9:1 Te po silama, tama agai augwalibolo te po wai, “Eno mu po dagebolo obao, te ede dolalubo bidi dabe meba te augwali me isisąbadi, tama te Godigo te we bidi tonalubo sę te aga bomo dali pedalubo augwaligo sueibao,” agai te po wai.
MAR 9:2 Nosali te Sarere deli bidai madi, Jisasgo Pita me Jems me Jon selama, tama agai augwali te ugwanu holai bulu du me deli te bageba odasa holali. Tama augwa naga tede bidaluali. Tama augwali gedude Jisasgo tigi hasegelama, tama aga gasagi yai pedalai.
MAR 9:3 Tama agai ugwade te dula gegemani ebo tiwai pedalali, tama te nala nisi tedela tiwai mu yai. Te tǫde bidi me deligo ugwa te tiwai gilama pedalubo usu me egobeo.
MAR 9:4 Tama te polobadu bidali bidi si Elaija dali Moses dali si pedalama, tama augwali sigo te Jisas dali po mibo te augwaligo suali.
MAR 9:5 Pitago te sulama, tama agai Jisasbolo weyu, te po wai, “Tisa, po ola mabo bidi, da ede bidibo, te wiegi yai ebao. Dago te bola yano be sela sę yainogo, te me deli nago, te me deli Mosesgo, te me deli Elaijago dao,” Pitago te po wai.
MAR 9:6 Magi baso meni, te augwali wi mu ebaso, te agai mena po wagawe weyu, te Pitago konesiąma te homu yai.
MAR 9:7 Tama te dagalu pǫ me deli pedelama, te augwali mesega sagasali. Tama te pǫ tomodu te pedauwali me delidu te po waida wai, “E bidi da, te eno Ogwa da, eno aga godolo mu ebao. Dagego agai po odiąo,” wai.
MAR 9:8 Tama polo tama, te augwaligo tonono bilali, tama augwaligo te gasa bidi me si te subeo, polo pali. Te Jisas agaduba deli naga te augwali dali bidibo suali.
MAR 9:9 Augwali te bulu dude bidali tagalama tama aiyaba dudulayu, tama Jisasgo augwali habu seleyu, te tiwai po wai, “Te dagego suali sę, te dagego bidi me delibolo munu me wasiąma, te ena Godigo Bidi Mu te gų page tagalama ma hodalobo sogoba usu naibao,” wali.
MAR 9:10 Tama tibaso te po augwa homuba dąų ola selama, tama augwa hasi digi te e tama po miani, “Te gų page tagalama ma hodaluaiba po wali, te mena sę dawe?” te po miani.
MAR 9:11 Tama augwaligo agabolo hanalu wali, “Magi baso te bomai po page koneani bidi dabe augwaligo te po weyu, te hasia bolo te Elaija asaibao, tama nosali naga te Godigo tagala palabo bidi asaibao, te po magi baso wabo dawe?” augwaligo te po hanalu wali.
MAR 9:12 Tama Jisasgo augwalibolo te po wali, “Awe, mu tama, te Elaija bolo hasia asama, tama te Godigo tagala palabo bidi asobode te tigidali nai ma dodolagasomainu yaibao. Awe, eno dagebolo obao, Elaija te asalio. Tama te bidi dabe augwa homugo digi wali peyu, augwaligo dwai sę aga dali yali, te Godigo po bukude polobadu asęani po tiwai gilama yai dao. Tiali goli te Godigo po bukude te ena Godigo Bidi Mude magi po tede elalubawe? Te po e tiwai dao, ena te dene hauwa toloyu, tama te bidi dabego ena tudiba muaibao,” Jisasgo te po wai.
MAR 9:14 Augwali pelama, tama te bulu du pageba dulama, te wali pabo bidi dabe meba bidalubo madi sabalubadi, tama te genuai we bidi hani te augwaliba sisinai elalubo suai. Tama te Juda dabego bomai po page koneani bidi dabe meba augwaligo te wado po konila po augwali dali oduai.
MAR 9:15 Te po odobo we bidi tigidali augwaligo te Jisas asobo sulama, tama polo te augwali midigi siyu te noma sali. Augwali te aga pageba udada pelama, tama augwaligo siade da po aga dali wali.
MAR 9:16 Tama agai te aga wali pabo bidi dabebolo hanalu wali, “Dagego te konila po wabo te bomai po page koneani bage dali te mena pode obawe?” te po wai.
MAR 9:17 Tama te we bidi hani tomode bidali bidi me deli agai te po Jisasbolo wei ponoyu, te po wai, “Tisa, po ola mabo bidi, te eno ogwade te pedauwali panialubo dwai haubo noma bidi me deli elalubaso, tama eno aga te nageba odasa asai.
MAR 9:18 Te hauwa sogo te dwai haubogo aga dąų olaluyu, tama agai aga te tǫba sądubao. Tama aga pedauwalide te pesa dini pedaliyu, tama aga kele penane dagana selama, tama aga tigi te tigidali boma peyu didila pai. Tama eno te nage wali pabo bidi dabebolo te dwai haubo sela sąyao po hanalu wali, tiali goli te augwaligo usu ebeo.” Te bidigo te po wai.
MAR 9:19 Jisasgo te po odama, tama agai te we bidi augwalibolo wai, “Te dage hani we bidigo enade konealubo po dąų olama, duga homu enaba tialubo menio! Nisu naga sogo ena dage dali me bididuaibawe? Nisu naga sogo te eno dagego sęgę tolomainogo ebawe? Dagego te ogwa enaba odasa asao,” wali.
MAR 9:20 Tama augwaligo te ogwa agaba odasa pali. Te dwai haubogo Jisas sulama, tama polo te ogwa degelainu mu yali, tama te wai te tǫba degasa dulama, tama hogogo bele pelama, tama te dini pesa me deli te aga pedauwalidu pedalali.
MAR 9:21 Tama Jisasgo aga ayabolo hanalu wali, “Nisu naga sogo aga te tiwai elaluai dawe?” Tama agai te po wai, “Te aga dwasianu elalubadi te tama tiai elaluai dao.
MAR 9:22 Tama hauwa sogo te dwai haubogo aga te siaba sąyu, te węba sąyu yai, tama aga ela muabo homu yai. Tiali goli te nago usu ilabo homu yaiba wida, teda nago da homu dene elama, tama da tau sao!” wali.
MAR 9:23 Jisasgo agabolo te po wali, “Awe, mu da, te nago enade te po wali, ‘Nago usu yaiba wida,’ nago te po wali. Tiali goli te tiwai meni. Te nago enade konealubo po dąų olama, tama nago homu enaba tialubo usu elalu da, te nago tigidali nai sabo te usu yaibao.”
MAR 9:24 Tama polo te ogwa aga ayago i weyu, te po wai, “Eno nagede konealubo po dąų wali, tiali goli tede ena te habuge tiwai yai! Nago ena tau sao!”
MAR 9:25 Jisasgo te genuai we bidi hani augwali sisinagasobo suali. Tama tibaso agai te dwai haubo bidiba wado iliyu, te po wali, “Nage te pedauwali pania sai, me nage te olo degai haubo bidi, eno nagebolo obe dao, nago te ogwa taga pao! Tama nage aga tomode munu ma bidilamu dao,” te po wai.
MAR 9:26 Tama te dwai haubogo te dwai i weyu, tama agai te ogwa degelai sedu genama, tama te dwai haubogo te aga taga peyu tama palio. Tama te ogwa te isai bidi tiwai munaluali. Tama bidi hauwa augwaligo te po weyu, “Aga te isali dao,” wai.
MAR 9:27 Tiali goli Jisasgo aga nogo tola selama, tama aga hodolobaso, tama aga doligulalio.
MAR 9:28 Nosali Jisas te be tomoba pelama, tama te aga wali pabo bidi dabe naga bidalubadi tama augwaligo agabolo hanalu wali, “Magi baso dago te dwai haubo sela sąwainu yali te usu meni yaniwe?”
MAR 9:29 Tama agai te po augwalibolo wai, “Te Godibolo gedu haluasa po wabogo naga te tobage dwai haubo noma bage sela sąbo te usu yaibao. Te gasa sę ebogo da, te usu me egobeo,” te po wai.
MAR 9:30 Augwaligo te bidali bulu taga peyu, tama augwali te Galili tǫ tomoba pali. Tama Jisasgo te aga menade bidibo, te we bidi augwaligo aga koneidali homu yai.
MAR 9:31 Magi baso meni, agai te aga wali pabo bidi dabe ola mabo sę yainogo yai. Tama agai augwalibolo te po wai, “Te augwaligo ena Godigo Bidi Mu te bidi dabego nogoba muaibao. Tama augwaligo ena ela muaibao. Augwaligo ena ela munama, tialima sela sogo bidama nosali te ena ma hodaluaibao,” te po wai.
MAR 9:32 Tiali goli augwaligo te po page konesiąwai. Tama augwaligo agabolo hanalu wabo wi yalio.
MAR 9:33 Tialima, augwali te Kaperneam hanuba sabolali. Augwali te be tomoba pela siali madi, tama Jisasgo aga wali pabo bidi dabeba hanaluyu, te po wai, “Te da asobadi, te sunumide dagego duga hasi mena po miai dawe?”
MAR 9:34 Tiali goli augwaligo po me wabeo. Magi baso meni, te sunumide augwaligo te augwali tomode de polalubo bidi bidaibawe te po miai.
MAR 9:35 Tama aga duagulama, tama te wali pabo bidi nogo si olama sągągo si bidi i wai. Tama agai augwalibolo te po wai, “Te bidi me deli aga te polalubo bidi bidabo homu ebaso da, teda aga te nosali sabi badu mu bidama, te tigidali bidi tau sabo sę ebo bidi tiwai bidao,” wai.
MAR 9:36 Te po olama, tama agai te dwasianu wai me deli selama, tama aga te augwali tomode dolalumainogo ilali. Tama agai aga nogo tolasa, tama augwalibolo te po wai,
MAR 9:37 “Te bidigo eno nogide homu kone palama, tama te tiwai dwasianu ogwa wai me deli tau sobaso da, te agai ena tau sobao. Tama ena tau sabo bidi, agai te ena naga tau me siyu me ebeo. Menio. Agai te eno Aya me tau sobao, agai ena tagala palobaso te ena asai dao,” Jisasgo te po wai.
MAR 9:38 Te aga wali pabo bidi me deli, aga nogi Jon, tego agabolo weyu, te po wai, “Tisa, po ola mabo bidi, te bidi me deligo nago nogide te dwai haubo noma bidi sela sąbo sę ebo dago suali. Tiali goli aga te da wali me asobeo. Tama tibaso, dago aga habu selali,” te po wai.
MAR 9:39 Jisasgo agabolo te po wai, “Dagego te aga habu me selamuo. Te bidi me deli agai eno nogide te bomai sę me ebaso da, teda agai polo tama te eno nogi posobo po me wainogo me egobeo.
MAR 9:40 Te dade boi bidi homu me isiąbo bidi da, aga te dago abagi dao.
MAR 9:41 Te bidi me deligo dage sulama, tama agai te homu elama, ‘Eno te Kraisgo bidi dabe tau saiba’ homu elama, tama agai te kapde wę dage mobaso da, teda eno mu po dagebolo obao, te bidigo nosali sabo wiegi yai nai da, te me hagagobeo,” Jisasgo te po wai.
MAR 9:42 Te Jisasgo po me weyu, te ola mabo po wai, “Te bidi me deligo e tiwai wai pulubago enaba homu begagaselama, te konealubo po dąų olalubadi, te aga dwai sęba tulalumainu iligi sogo da, teda te tebo bidigo dwai sęgę mu sigi da. Tama aga te tiwai dwai sę te wai dali idali weyu, te bidi dabe augwaligo te bidigo magede moni sęgę yai masigi te bonogo kęnama, tama aga te tamu ąį moni ge tomoba sela sąyu aga tede isigi sogo da, teda te usigi dao. Te sę agaba pedaligi sogo da, aga te wai dali dwai sę isiąma tama moni dene sigi menigi da.
MAR 9:43 Tama tibaso, dage deli delide e tiwai dao. Te nago nogogo te nage dwai sęba tulalumainu ilibaso da, te nago te nogo aga togolama sela sąyao. Teda nago nogo deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago nogo si me elaludu da, tama augwaligo dwai sę eyu, nage te genuai dene mu siyu bidada pabo te isisąbo sia dabo madi teba peyu da, te dwai mu dao.
MAR 9:44 [Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo.]
MAR 9:45 Tama naga sągągo te nage dwai sęba tulalumainu ilibaso da, nago te sągą aga togwama sela sąyao. Teda nago sągą te deli badu naga elaluyu, tama nago te dwai sę isiąbo te nago te bidabo ula mu saibao, te usu dao. Tiali goli nago sągą te si elaludu da, tama augwaligo dwai sę eyu nage te genuai dene mu siyu bidada pabo te isisąbo sia dabo madi teba peyu da, te dwai mu dao.
MAR 9:46 [Te bulude te dwasianu isisąbo kigi dabe te augwa tigide elalubao, tama te sia dabo munu me sula sogobeo.]
MAR 9:47 Ma, nago gedugo nage te dwai sęba tulalumainu ilibaso da, te nago aga gudama sąyao. Teda nago gedu deli naga elaluyu, tama nago te dwai sę isiąbo te sesemane sogo bidada pabo ula sabo, te usu dao. Tiali goli nago gedu si me elaludu da, tama augwaligo nage dwai sęba tulalumainu iliyu da, augwaligo nage te dwai isisąbo sia dabo madi saoba sąwaibao, te dwai mu dao.
MAR 9:48 Te bulude te dwasianu kigi dabe te augwali tigide bidalu te augwali me isisąma, tama te sia dabo te me sula sogobeo,” Jisasgo te po wai.
MAR 9:49 Te agai po me weyu, te po wai, “Te bidi mego tamu aga tubo naide mubo tiwai gilama, Godigo te we bidi dabeba te dabo sia mawaibao.
MAR 9:50 Tamu te wiegi yai nai dao. Tiali goli, te tamu te halia pobaso da, teda dagego mena tiwai ilama tama te tama ha ma elalugowe? Te usu egobeo. Te tamude elalubo tubo nai te pusu tiwai gilama, tama dage bugagia bidiąo, duga hasi nagamea homu eyu tama bugagia bidiąo,” Jisasgo te po wali.
MAR 10:1 Te Jisas hogodama, te bidali bulu taga peyu, tama aga te Judia provins tǫ pedai badu te pabo ąį Jordan pedai u badu pai. Tama we bidi hauwa agaba ma sisinagasali. Tama agai te aga ebo kolesaga wali peyu, tama Godigo po te augwalibolo ola mawai.
MAR 10:2 Tama te po ola mobadi, te Farisi dabe meba agaba aselama, tama augwaligo usu sinayani. Augwaligo te po wali, “Te da Juda dabego bomai pode te bidigo aga we sela sąbode, te usu da wali elalubowe, ma meniwe?”
MAR 10:3 Jisasgo augwaliba po wei ponoyu, te po wai, “Mosesgo mena bomai po dagebolo mawai dawe?”
MAR 10:4 Augwaligo te po wali, “Moses agai te po wai, bidigo we sabo togobo nogi pepa asęnama, tama te we sela sąwainu eyu da, te usu da po wai dao.”
MAR 10:5 Tiali goli Jisasgo augwalibolo te po wai, “Te dagego hagoma ebaso, tama Mosesgo te tobage bomai po dagebolo polobadu asęai dao.
MAR 10:6 Tiali goli polobadu mu, hasia bolo te Godigo tigidali nai nigali sogo, agai te bidi me we augwali si nigai dao.
MAR 10:7 Tama tibaso, megi bidigo te aga aya de ida si tagalama, tama aga we dali kęą pelama bidaibao.
MAR 10:8 Tama tiyu, augwali si tigi te deli mu naga pedelaibao. Tama tibaso, augwali si te tedali bidu tedali bidu yali tiwai gilama ma elalugobeo. Menio. Augwali si tigi te dedeli mu tiwai naga bidaibao.
MAR 10:9 Tama tibaso, te Godigo tama kęnani nai, te bidigo me togolamu dao,” Jisasgo te po wai.
MAR 10:10 Te po olama, nosali augwali te be tomoba ma geasa pelama, tama aga wali pabo bidi dabego agabolo te wali pode hanalu wali.
MAR 10:11 Agai te po augwalibolo wali, “Te bidi me deligo aga we tagalu, tama gasa we sobaso da, te bidigo aga hasia sali we doloyu tama penani ebo kolesaga yai dao.
MAR 10:12 Te tiwai me, te we me deligo aga bidi tagalu, tama gasa bidi dali pobaso da, te we agai te penani ebo kolesaga yai dao,” Jisasgo te po wai.
MAR 10:13 Te we bidi meba augwaligo te augwa dwasianu wai puluba meba te agaba odasa asali. Augwaligo homugo te agai nogo augwaliba muyu, te augwaliba dwagi yai sę pedalabo po omainu homu yai. Tiali goli te aga wali pabo bidi dabego augwaliba wado ilali.
MAR 10:14 Jisasgo te tebo sulama, tama agai homu dwai yai. Agai augwalibolo te po wai, “Dagego te dwasianu wai puluba augwali enaba asomainu emainao. Dagego augwali panigimio. Te Godigo bomo dologoba peyu tede bidabo we bidi, augwaligo homu kolesaga te e wai pulubago homu kolesaga tiwai si dao.
MAR 10:15 Eno mu po dagebolo obe dao, te bidi me deli aga te dwasianu wai puluba tiwai gagayu, te God bidibo madi tomoba pabo homu me isiąwani bidi, aga te tomoba painu ebo usu me egobeo. Mu menio,” te po wai.
MAR 10:16 Tama olama, tama agai nogogo te wai puluba tolalu, tama augwali deli deliba nogo ugwadu munama, tama augwaliba te wiegi yai mobo mawai.
MAR 10:17 Te Jisas hogodama tama ma pobadi, tama bidi me deli udada asama, tama agaba kidu sugunagaselama, tama agabolo hanalu, “Te po ola mabo wiegi yai tisa bidio, te eno magi ilama tama eno te bidabo ula selama, bugagia sesemane sogo bidada peyu bidada pogowe?” Te po wai.
MAR 10:18 Jisasgo agabolo te po wai, “Magi baso nago ena wiegi yai da nogi obawe? God agaduba deli naga te wiegi yai dao.
MAR 10:19 Nago te bomai po koneanio: ‘Nago te bidi ela mugio. Nago te penani sę egio. Nago nai wi sigio. Nago gasa bidibolo tibo po me olamuo. Nago tibo pode gasa bidigo doado bage anoma elama sigio. Nago te naga aya de ida sigo po wali pao,’ te bomai po dabe nago koneanio, te wali pao,” Jisasgo te po wai.
MAR 10:20 Tama te bidigo Jisasbolo weyu, te po wai, “Tisa, po ola mabo bidi, te ena wai bǫųde digi gagalasa megi e sogoba usu nagasali, eno te bomai po tigidali wali pai dao.”
MAR 10:21 Jisasgo agaba tonaludama, tama aga dali dwagi yai homu eyu godolo mu yai. Agai agabolo te po wai, “Nage te nai me deli digi habuge yai elalubao. Nage pelama, te nago doado bage tigidali munama, tama nago tede mone selama, tama te magi nai meni yai bidi dabeba dobayao. Tama tiyu da, te nago wiegi yai nai mu te Godigo bidibo madide elaluaibao. Tama nage ena wali asao,” te po wali.
MAR 10:22 Te bidigo te po odama, tama aga gesabidi hulia selama, tama aga homu sęgę ebaso, tama aga pai. Magi baso meni, te agai doado bage hauwa elalubaso te homu yai.
MAR 10:23 Te bidi taga pelama, tama Jisasgo aga wali pabo bidiba tonono bilama tama te po wai, “Te doado bage hauwa elalubo bidi dabe augwali te God bidibo madi tomoba pabo te sinabo sę yaibao,” te po wai.
MAR 10:24 Tama aga wali pabo bidi dabe te pode midigi siyu noma sai. Tiali goli Jisasgo po wei augwalibolo ma ponoyu, te po wai, “Te eno ogomani dabe, te God bidibo madi tomoba painu ebo bidi, aga te sinabo sę dene yaibao.
MAR 10:25 Te moni kibu kamel te ugwa hobolobo medabu agebele tomodu dula painu da, aga te sinabo sę dene me isiąma te doado bage hauwa elalubo bidi te Godigo bidibo digi tomoba painu sinabo sę ebo tiwai gilama me egobeo,” te po wai.
MAR 10:26 Tiali goli te aga wali pabo bidi dabe augwali te pode homu midigi mu selama, tama augwa hasi po mia siyu te po wali, “Te tiwai elalubaso da, teda de te Godigo aga ma dobola somainogo usu yaibawe?”
MAR 10:27 Tama Jisasgo augwaliba dolo ponama tonalu, te po wai, “Te we bidi dabe augwa digi tede augwali usu egobe, tiali goli God agai da, te usu yaibao. Godigo te tigidali sę yainu ebo usu dao.”
MAR 10:28 Tama Pitago po me deli Jisasbolo weyu, te po wai, “Suao, da nage wali pabo bidi dabe, dago te tigidali doado bage tagalama, tama da nage wali bilibao,” te po wai.
MAR 10:29 Jisasgo te po wai, “Eno mu po dagebolo obao, tigidali bidigo enade homu kone palu, tama te Godigo wiegi yai gesi pode me koneama, tama te be, ma ama, me abe, me ida, me aya, me wai, me gi, te tigidali nai taga peyu da,
MAR 10:30 teda Godigo augwaliba te tobage nai te 100 nedama tama wei ponaibao. Tama augwali te tǫde bidalubo sogo teda augwaligo be hauwa siyu, te ama me hauwa siyu, te abe me hauwa sobadi, te ida me hauwa sobadi, te wai puluba me hauwa siyu, te gi me hauwa sobadi yaibao. Tama te bidi mebago te dwai kolesaga hauwa augwaliba yaibao. Tama te nosali bidabo sogo augwali te sesemane bugagia bidada peyu, bidada pabo ula me saibao.
MAR 10:31 Tiali goli te sogo te megi polali bidi dabe hauwa mu augwali nosali tudi badu yaibao. Tama te megi tudi badu yali bidi dabe hauwa augwali poligi soaibao,” Jisasgo te po wai.
MAR 10:32 Augwali te sunumidu pelayu, tama augwali te Jerusalem moni hanuba pabo homu yai. Te Jisas poligi pelama pali. Tama aga wali pabo bidi dabe augwali homu hauwa yai. Tama augwali wali asali we bidi, augwali wi yali. Jisasgo aga wali pabo bidi te nogo si olama sągągo si te augwali tedali ma selama, tama agaba pedelabo sę po te po augwaliba wabo gagalali.
MAR 10:33 Agai te po wali, “Odiąo, megi da te Jerusalem hanuba paibao. Tama da teba sabolama, tama bidi me deligo ena Godigo Bidi Mu te genuai pris bidibolo me, te Juda dabego bomai po page koneai bidi dabe augwaligo nogoba muaibao. Tama augwaligo ena po tų ilibo sę elama, tama ena ela muabo po minama dąų waibao. Tama augwaligo ena te Juda hani isąwai bidi dabeba mawaibao.
MAR 10:34 Tama te bage augwaligo posobo po enaba weyu, tama enaba pesa sąyu, te ena subigila eliyu elama, tama ena ela muaibao. Tama sela sogo ena te gų pagede bidama, tama nosali ena Godigo Bidi Mu ena ma hodaluaibao,” Jisasgo te po wai.
MAR 10:35 Te bidi Sebedigo ogwa si, Jems me Jon, augwali si te Jisasba aselama, te po agabolo wai, “Tisa bidi, da sigo te magi nai po deli nagebolo hanalu waibao, tama da sigo homugo nago te sę da sibolo emainu homu ebao.”
MAR 10:36 Tama agai augwali sibolo te po wai, “Dage sigo homugo eno mena sę dage sibolo emainogowe?”
MAR 10:37 Augwali sigo agabolo te po wali, “Nosali te nage genuai tuni bidi pedalubo side, da sigo homugo te da si me deli te nago dolo nogo badu dugayu, te me nago pobase nogo badu dugayu emainu te homu yai dao,” te po wai.
MAR 10:38 Tiali goli Jisasgo te aga tamadi tama dene sabode me, te aga isibo side yabo sę po, te side agai po digi po begelama, weyu, tama augwali sibolo te po wali, “Dage sigo te enabolo hanalubo naide po te dage sigo bugagia konesiąma te obao. Te dage sigo eno tamadi e ąį tuainu ebo kap tede te dage sigo homugo tuabo te usu dawe? Ma, te dage sigo eno megi sainu ebo baptais te dage sigo me te sabo homu usu dawe?”
MAR 10:39 Tama augwali sigo agabolo te po wai, “Te da si usu yaibao,” wai. Jisasgo augwali sibolo te po wai, “Mu dao, te megi eno ąį tubo kapde te dage sigo me tueibao. Te megi eno baptais sabo, te dage sigo me saibao.
MAR 10:40 Tiali goli de te eno dolo nogode ma pobase nogode duayabo sę, te sę eno me egobeo. Menio. Godigo digi te duabo sia sai te bidi mebabolo mawainu agai sisi ilai elalubao,” Jisasgo te po wali.
MAR 10:41 Te wali pabo bidi dabe nogo si bage augwaligo te tiali po odama, tama augwaligo te Jems de Jon si dali dwai homu mu yai dao.
MAR 10:42 Tiali goli Jisasgo augwali i olama asobo si, tama agai augwalibolo te po wai, “Dagego koneani, te Juda hani isąwai we bidi hani tomode te augwa tobolu bidi dabego augwali aiyaba elaluabo bomo hauwa elalubao, tama augwa genuai bidi dabego te augwali bomo elama mu tonalubo dao.
MAR 10:43 Tiali goli te kolesaga dage tomode munu me elalugobeo. Menio. Te bidi aga te dage tomode genuai bidi bidabo homu eyu da, te aga dagego sę ebo bidi tiwai bidao.
MAR 10:44 Tama bidi te polalubo bidi bidabo homu eyu da, teda aga te tigidali bidigo sę ebo nogi meni yai bidi tiwai bidao.
MAR 10:45 Magi baso meni, te ena Godigo Bidi Mu tama, tama ena me te bidigo ena tau sabo sę emainu me asobeo. Menio. Ena asali, te eno augwali tau sabo sę yainu asai, tama eno bidibo ulago digi te hauwa we bidi ma abelagasai dao,” Jisasgo te po wai.
MAR 10:46 Te Jisas dali, aga wali pabo bidi dabe dali, augwali te Jerusalemba pabo tųdu pobadi, tama augwali te Jeriko hanuba sabolali. Tama agai te Jeriko tagalama pali. Tama aga wali pabo bidi dabe, te genuai we bidi hani dali, augwali aga dali pali. Tama bidi me nogi Bartimeus, te Timeus aga ogwa, aga te sunumi bogo sese badu dulaludai. Aga te gedu widai, tama te sunumidu soabo we bidi dabe augwalibolo te mone ge me doado bage momainu i udubo sę iduai.
MAR 10:47 Agai te Nasaret bidi Jisas asobo po odama, tama agai i wabo gagalama bomonama wai, “Jisas, nage te Devitgo Ogwa dao, nago ena homu dene eyu tau sao!” te po wai.
MAR 10:48 Te bidi hauwa augwaligo aga wado iliyu, te po wali, “Nago pedauwali pania sao,” wai. Tiali goli agai po dagą genuai olama i wali, “Devitgo Ogwa, nago ena homu dene eyu tau sao!”
MAR 10:49 Tama Jisas dolagaselama, tama te po wai, “Te aga i olama asomainao.” Tama augwaligo te gedu widai bidi i olama, tama augwaligo agabolo te po wai, “Nago haliga bomo emainao. Nage hodaluao. Agai nage i obao.”
MAR 10:50 Tialima, aga genuai holobo ugwa peda sąnama, tama polo doligulama, tama Jisas bidiboba pali.
MAR 10:51 Tama Jisasgo agabolo te po wali, “Nago homugo te eno magi sę nagebolo emainuwe?” Tama te gedu widai bidigo agabolo te po wai, “Tisa bidi, te ena gedu ma pedelimainu elama, bulu ula ma suainogo yai.”
MAR 10:52 Tama Jisasgo agabolo te po wai, “Nage piduao. Te naga enade konealubo po dąų olama, naga homu enaba tialubo kolesaga ebogo te nage wiegi yai ma ilibao.” Te tama polo te aga gedu usu elama, tama aga bulu ula ma suali. Tama agai te Jisas dali te sunumidu wali pai.
MAR 11:1 Augwali te Jerusalem moni hanu pąba sabolama, tama augwali te Betfage me Betani te be nani siba sabolali, te oliv ni sili elalubo bulu du nogi Oliv te pąde elaluai. Tama sabolama, tama Jisasgo aga wali pabo bidi si tagala palu,
MAR 11:2 tama augwali sibolo te po wai, “Dage si te e pąde elalubo te be naniba piąo. Dage si te be nani tomoba pabode, tama polo dage sigo te megi tama holobo gesi kibu donki me deli augwaligo te haliga bonogo gebelai elalubo sueibao. Te bidi me deli tede dualasa bilisiąwai elaluaibao. Te aga gebelali haliga bono pedalama, sela asao.
MAR 11:3 Tama bidi me deligo dage sibolo te po weyu, ‘Magi baso dage sigo te sę ebawe?’ obaso da, teda dage sigo te po waiyąo, ‘Te Genuai Bidigo agade te sę elalubo, tama agai te aga polo ma tagala palaibao’ po waiyąo,” Jisasgo augwali sibolo te po wai.
MAR 11:4 Te po obaso, augwali pai, tama augwali sigo te gesi ogwa bidi donki me deli suali, augwaligo te be me deli te sunumi pąde bulu badu gebelama elaluai. Tama augwali pelama, te haliga gebelai elalubo bono pedali.
MAR 11:5 Tama te pąde dolaluali bidi meba augwaligo te po augwali sibolo wai, “Dage sigo magi baso te ogwa bidi donki kibu haliga pedebawe?”
MAR 11:6 Tama augwali sigo te Jisasgo wali po tiwai gilama augwalibolo wali. Tama augwali sibolo te donki sela pao olama, augwaligo usu da po wai.
MAR 11:7 Tialima, augwali sigo te ogwa bidi donki Jisasba sela asali. Tama augwali sigo te augwa bulubo ugwa te donki tudi daiba pasugulama, tama te daide Jisas duayali.
MAR 11:8 Tama bidi hauwa augwaligo te augwa holobo ugwa dabe te sunumide wawa sili pai. Tama meba augwali te giba pelama, tama te yabe hauwa elalubo ni nologo togolama, tama te sunumiba muna muna pali, aga soabo sunumi au iliyu tama yali.
MAR 11:9 Tama te polasa pabo we bidi augwaligo me, te nosali asobo we bidi augwaligo me, te augwaligo bomo elama i wali, “Te Godigo nogi ugwaba mu sinao! Godigo te Genuai Bidigo nogide asali bidi te wiegi yai bugagia ilao!
MAR 11:10 Godigo megi te asobo bomo te wiegi yai ilao, te dago wąį nǫų te Devitgo bomo dao. Te Ugwade Mu Bidibo Godigo nogi ugwaba sao!” augwaligo te po bomo elama weyu bilali.
MAR 11:11 Tama te tiwai eyu, Jisas te Jerusalem tomoba sabolama, tama te Moni Lotu Be tempel tomoba pelama, tama tede elalubo tigidali nai tonono bila silalio. Tiali goli te giliga dega sigulai. Tama tibaso, aga wali pabo bidi nogo si olama sągągo si bidi dabe dali augwali te Betani be naniba pigi pai.
MAR 11:12 Te nosali sogode augwaligo te bulu Betani tagalama, tama Jerusalemba ma asobadi, tama Jisas aga nasi yali.
MAR 11:13 Agai te ni kaya me deli te dwasianu digibulu gana dolalu, tama yabe te hauwa elalubo suali. Aga te ni pąba pelama, te du meba walai elalubowe naga gegainu yai. Tama aga te ni pageba sabolali, tiali goli tede te nai du walai elalubo me deli subeo. Menio. Te yabe naga elaluali. Magi baso meni, te ni fikgo du walobo sogo pedalubeo.
MAR 11:14 Tama Jisasgo te niba te po wai, “Nago te du munu me walamuo. Mu menio,” te po wai. Tama aga wali pabo bidi dabe augwaligo te po wabo odai.
MAR 11:15 Augwali ma pelama, te Jerusalemba ma sabolali. Tama Jisas te Moni Lotu Be tempel be tomoba pelama, tama te be tomode bisnis sę ebo bidi dabe sela sąyu, ela gudulubo sę gagalali. Agai te mone ge dobu si ebo bidi dabego tebol sai gea palobadi, te ba dabe dobu si ebo bidi dabego duabo sai dali gelibadi yai.
MAR 11:16 Tama augwalibolo agai te tobage nai dabe tolasa biliyu, te tempel Be tomodu bilibo po te augwaliba habu selali.
MAR 11:17 Tama agai augwalibolo te po ola mani, “Te Godigo po bukude te asęani pode e tiwai po Godigo wai po elalubao, ‘Eno be da, te tigidali we bidi hanigo te enabolo gedu haluasa po omainu ebo be da’ po wai. Tiali goli dagego te geme nai wi sabo bagego be pedalubo tiwai gilama ilibao,” Jisasgo te po wai.
MAR 11:18 Te genuai pris dabe dali, te Juda dabego bomai po page koneai bidi dabe dali, augwaligo te sę ebo po odama, tama augwaligo aga ela muabo sunumi gegebo sę gagalali. Augwali agade wi yali. Magi baso meni, te tigidali we bidi augwali te agai ola mani pode te midigi eyu noma mu sai.
MAR 11:19 Tama te be pio ebode Jisas dali, te aga wali pabo bidi dabe badi, te augwaligo te Jerusalem tagalama palio.
MAR 11:20 Te nosali sogode te kigamu mu augwali Jerusalemba ma pobadi, tama augwaligo te ni kaya sasia pai suali. Te yabe me te ni pedali dali tigidali te sasia pali.
MAR 11:21 Pitago tede homugo ma kone palama, tama agai te po wai, “Tisa bidi, suao. Te do sogode nago te ni kaya dolaiba po wai. Megi te aga sasia pali dao,” Pitago te po wai.
MAR 11:22 Tama Jisasgo augwaliba po wei ponoyu, te po wai, “Te dagego Godiba konealubo po dąų olama, tama duga homu agaba tialubaso da,
MAR 11:23 teda dagego te bulu dubolo po weyu, ‘Nage hogodama, tama nage te tamu ąįba samonao,’ te po wagameo. Tama homu si me isąyu, tama duga homude Godide konealubo po dąų naga olama, te po weyu, ‘Eno te wali po te mu po pedalaibao,’ te homu mu eyu da, teda dagego te bulu dude wali po gilama te sę mu pedalaibao.
MAR 11:24 Tama tibaso, eno dagebolo obe dao, dagego te nai me deli sainogo te Godibolo po weyu, te naide hanalu wabo po wabo side, tama dagego homude te Godide konealubo po dąų olama tama te homu eyu da, ‘Awe, mu da, dago te nai saibao,’ te sę te dagego wali po tiwai gilama pedalaibao.
MAR 11:25 Tama dage doligulama gedu haluasa po wabo sogo, tama te duga Aya dagalude bidibo bidi agai te dagego dwai sę yali sela sąwainogo eyu, tama dagego te bidi me deligo te dagebolo dwai sę ilali te homu kone palobaso da, teda dagego te bidigo dwai sę yali te sela sąyao.
MAR 11:26 [Tiali goli te dagego gasa bidigo dwai sę sela sasiąbaso da, teda duga Aya dagalude bidibo bidi agai te dagego dwai sę te me sela sagobeo.”] Jisasgo augwalibolo te po wai.
MAR 11:27 Tama augwali te Jerusalemba ma sabolai. Jisas te Moni Lotu Be tempel tomode bilibadi, tama te genuai pris bidi dabe dali, te Juda dabego bomai po page koneai bidi dabe dali, te tobolu bidi dabe me, augwali te agaba asali.
MAR 11:28 Augwaligo agabolo te po wai, “Nago magi bomo elalu, tama nago te sę dabe ebawe? Tama dego te bomo nageba menama, tama nagebolo weyu, te sę yao po waliwe?”
MAR 11:29 Jisasgo augwalibolo te po wali, “Eno me te eno magi nai po me deli te dagebolo hanalu wabo homu ebao. Tama dagego eno po wei ponobaso da, teda eno me te eno magi bomo elalu, eno te sę dabe ebo po dagebolo waibao.
MAR 11:30 Te Jongo te we bidi baptais mani sę, dagego homugo te dagalude nai da homu ebowe, ma te bidigo sę naga te homu ebawe? Dagego te po enabolo wei ponao.”
MAR 11:31 Tama te tobolu bidi dabe augwa digi augwa hasi po miani, “Dago te mena pogo agai po wei ponaibawe? Dago te po weyu, ‘Te dagalude nai da’ po obaso da, teda agai te po waibao, ‘Magi baso dagego homu aga poba begi pabewe?’ te po waibao.
MAR 11:32 Tama dago te po obadi, ‘Te bidigo nai naga da’ po obaso da, teda te po usu meni yaibao,” wali. Magi baso meni, augwali te we bidide wi yai. Tigidali we bidigo homugo te Jon da, te Godigo po pusubo profet bidi da, te homu yai.
MAR 11:33 Tama tibaso, te tobolu bage augwaligo Jisasba po wei ponoyu, te po wai, “Dago konebeo.” Tama Jisasgo augwalibolo te po wai, “Eno me te eno magi bomo elalu, te eno te sę dabe ebo po te dagebolo eno me wagobeo,” wali.
MAR 12:1 Tama Jisasgo te po meba begelama, te Juda dabego genuai bagebolo wai. Agai te po wali, “Te bidi me deli agai te bono du wain gi bulama, tama obogo bagulali. Tama agai te wain bono du ąį sabo agabo madi nigilama, tama te gi tonaluabo bidigo bobage sigi be me deli sę yani. Tama agai te gi te bisnis sę yainogo ebo bidi dabe mebago nogoba muai. Tama aga digi te aga digibulu bulu habuba palio.
MAR 12:2 Te nosali aga te bodolu sogo pedalubaso, teda agai te sę bidi me deli te wain gide sę ebo bidi dabe bidalubo madiba tagala palai. Agai homugo te gide nai meba te agaba momainu yai.
MAR 12:3 Tama augwaligo te sę bidi pageabi elama, tama aga dodolagia elama, tama aga olo ma tagala palalio.
MAR 12:4 Tama te gi page bidi agai gasa sę bidi me te augwaliba tagala palali. Tama augwaligo aga tobolude gagai ilama, tama agaba dwai sę ilali.
MAR 12:5 Tama agai sę bidi me dedeli ma tagala palai. Tama augwaligo te bidi aga ela muai. Tama agai sę bidi hauwa mu ma tagala palai. Tama augwaligo meba olo eliyu, tama meba te augwaligo ela muyu yali.
MAR 12:6 Tama agai bidi deli mu ma elalualio. Te aga ogwa, agai godolo mu yai. Nosali mu agai te ogwa te wain gi sę ebo bidi dabe bidalubo digi ma tagala palali. Agai te tiwai homu yai, ‘Te augwaligo eno ogwago po odaiba’ homu yai.
MAR 12:7 Tiali goli te gide sę yali bidi dabego augwa hasi tomode po mia siyu, augwaligo te po wai, ‘Te e bidigo te aga ayago doado bage tigidali nosali saibao. Te bageo, dago te aga ela muinao. Tama dena digi te gi tolaluaibao,’ te po wai.
MAR 12:8 Tama olama, te augwaligo aga selama, ela muai. Tama augwaligo aga tigi te gi sesege bulu badu sąwani.”
MAR 12:9 “Tialima, te wain gi page bidi agai magi yaibawe? Te aga aselama, tama te gide sę yali bidi dabe te augwali ela muaibao. Tama agai te gi te gasa bidi meba augwaligo nogoba mawaibao.
MAR 12:10 Dagego te Godigo po bukude asęani po me deli dagego nedebewe? Agai e tiwai po wali dao: Te sę bidi dabego sela sąwani masigi, megi da aga te be polalubo kele ni tiwai dąų elalubo masigi pedalai elalubao.
MAR 12:11 Genuai Bidigo digi te sę pedalumainu ilali, tama dago sulama, te wiegi yai mu yai.’ Dagego te po polobadu nedebewe?” Jisasgo te po wali.
MAR 12:12 Te Juda dabego tobolu bidi dabe augwaligo Jisas pageabi elama tuainu yali, tiali goli augwali te we bidide wi yai. Augwaligo koneani, Jisasgo te po digi po begelama, te augwali tobolu bagede wai. Tama augwaligo aga taga peyu, tama augwali palio.
MAR 12:13 Tama nosali te Juda dabego tobolu bidi dabe augwaligo te Farisi meba dali, te Herot wali pali bidi meba me augwali tagala palama, te augwali Jisas bidiboba pali. Augwaligo te Jisas usu sabo po meba wainogo yai.
MAR 12:14 Augwali aselama, tama augwaligo agabolo te po wai, “Tisa, po ola mabo bidi, dago koneani, nage mu po wabo bidi dao. Tama nago homugo te bidi delide homu naga me egobeo. Nago te nogi yai bidi dali gasa po me tedali weyu, te nogi meni yani bidi dali gasa po me tedali weyu me egobeo. Menio. Nago te mu pode naga te Godigo kolesaga te we bidi augwali ola mayu ebao. Nago mena homu ebawe? Te dago takis te Rom gavman tuni bidi mu Sisar agabolo mobaso, tebogo dago te Godigo bomai po bolobowe, ma meniwe? Dago mawaibawe, ma dago magobewe?” Augwaligo te po wai.
MAR 12:15 Tiali goli Jisasgo augwaligo te tibo po wabo te agai koneama, tama agai augwalibolo te po wai, “Magi baso dagego ena usu sobawe? Te mone ge me deli sela aselama, eno sueibao,” te po wai.
MAR 12:16 Tama augwaligo te mone ge me deli sela asali. Tama agai augwalibolo hanalu wali, “Te e mone gede elalubo noma me te asęani nogi te dego dawe?” Tama augwaligo te po wai, “Te gavman tuni bidi Sisargo dao.”
MAR 12:17 Tama Jisasgo augwalibolo te po wei ponani, “Te Sisar gavmanigo nai, te dagego Sisarbolo maiąo. Tama Godigo nai, te dagego Godibolo maiąo,” wali. Tama augwali te pode noma mu sali.
MAR 12:18 Megi da te Sadyusi hani bidi meba augwali te Jisasba asali. Te hani augwaligo te homu yai, te isali bidi ma hodalogobeo wai. Tama augwaligo agabolo hanalu wagasali.
MAR 12:19 “Tisa, po ola mabo bidi, Mosesgo te po me deli asęyu, dabolo te tiwai bomo yai po wai: te bidi me deli isąma, tama agai wai meni yani, tiali goli aga we te bididubaso da, teda te bidi aga amago te we selama, tama aga isali ama tau siyu, te wai ame nomainogo yao, te Mosesgo dabolo te bomai po mawai dao.
MAR 12:20 Tialima, te ama a naga olama me badu si bidai. Te gomunai bidigo we sali, tama nosali aga isali, tama wai me ame nisiąwai.
MAR 12:21 Tialima, tomo bidigo te we sali, tama aga me isai, tama wai me ame nisiąwai. Tama te tudi badu bidigo me tiwai yai.
MAR 12:22 Te tiwai naga ela pidubadi, tama te a naga olama me badu si ama dabe tigidaligo te we sesa pali goli, te wai me ame nisąma, tama augwali isila pai. Tama nosali mu, te we me isali.
MAR 12:23 Tialima nosali te isai we bidi dabe ma hodalobode, te sogo te we aga te dego we mu bidigowe? Nago koneani, te bidi a naga olama me badu si bidi dabego te we te augwaligo selama bidai,” te Sadyusi bagego te po wai.
MAR 12:24 Tama Jisasgo augwalibolo te po wai, “Dagego te Godigo po bukude elalubo po page me konebeo. Tama te Godigo bomo me dagego konebeo. Tama tibaso, dagego te we bidi ma hodalobode wabo po geda muyu obao.
MAR 12:25 Te isai bidi dabe te gų page tagalama ma hodalobo sogode, te isai we bidi augwali te bidigo we ma siyu me egobeo. Menio. Te augwali te dagalude bidalubo ensel mobo bidi dabe bidalubo tiwai gilama bidaluaibao.
MAR 12:26 Tiali goli te isai bidi dabe ma hodaluaiba po wabo, te dagego te Mosesgo asęani bukude te dwasianu nide sia dali po wali te po nedebo meniwe? Te wali pode Godigo te po Mosesbolo te polobadu isali bidi dabede wai, ‘Ena te Abrahamgo God, me Aisakgo God, me Jekopgo God te dao,’ te po wai.
MAR 12:27 Tama te po page e dao, ma te bidi dabe selago mobo noma isigi sogo da, teda God da augwaligo God me menigi da. Tiali goli te tiwai elalubeo. Menio. Aga da, te bidibo ula elalu bidalubo bidi dabego God dao. Te dagego po te mu geda muanio,” Jisasgo te Sadyusi bidi dabebolo te po wai.
MAR 12:28 Te Juda dabego bomai po page ola mabo bidi me deli aga asama, tama agai te augwa hasi konila po wabo odali. Tama agai odobadi, te Jisasgo wiegi yai po augwaliba wei ponobo po odali. Tama agai Jisasbolo hanalu wali, “Mena bomai po agai te tigidali bomai po aiyaba elaluama, tama te polalubo dawe?”
MAR 12:29 Jisasgo po wei ponoyu, agabolo te po wai, “Te polalubo bomai po te e dao: ‘Dage Israel hani we bidi, dagego odiąo! Genuai Bidi, dago God, aga deli digi naga te dago Genuai Bidi dao.
MAR 12:30 Tama nago te Genuai Bidi godolo mu yao, te nago God dao, te nago homu tigidaligo me, te nago noma bidi tigidaligo me, te nago homu kolesaga tigidaligo me, te nago bomo tigidaligo me te aga godolo mu yao.’
MAR 12:31 Tama te si wabo bomai po te e dao: ‘Nago gasa bidi godolo eyu, te nago naga godolo ebo tiwai gilama yao.’ Te gasa bomai po te genuai elama, tama te bomai po si te aiyaba me elaluai me elalubeo,” Jisasgo te po wai.
MAR 12:32 Tama te bomai po page ola mabo bidi agai te tiwai po Jisasbolo wai, “Tisa, po ola mabo bidi, nago po te wiegi yai. Mu dao, God agaduba deli naga te Genuai Bidi, tama gasa bidi me bidibeo.
MAR 12:33 Dago aga godolo mu ebo, te tigidali homugo me, te tigidali kolesagago me, te tigidali dago bomogo tama tiao. Tama dago gasa bidi godolo yainu te denade godolo ebo tiwai gilama yao. Dago te bomai po si wali pali da, teda te kolesagago te dago te Godibolo siaba tigidali te hasa ulubo ofa ilibo te tigidali aiyaba elaluama, tama te gasa ebo ofa tigidali me te aiyaba elalua silaibao,” te bidigo te po wai.
MAR 12:34 Jisasgo te bidigo po wei ponobo po odali, te wiegi yai kolesaga koneai bidigo po wabo tiwai gilama yali, tama Jisasgo agabolo te po wali, “Nage te God dologoba pabo te nagede digibulu me elalubeo,” te po wai. Te sogo gagalama tama tigidali bidi dabe augwaligo usu sabo po meba te Jisasbolo hanalu wabo te augwali wi yai dao.
MAR 12:35 Jisas te Moni Lotu Be tempel tomoba pelama bidiyu, tama te we bidi dabe augwaliba po ola mabo sę yai. Tama ebadi, agai te po hanalu wali, “Magi baso te Juda dabego bomai po page ola mabo bidi dabego te po wabo, te Krais, Godigo te we bidi tau somainu dąį ilali bidi, te aga te Devitgo ogwa da po magi baso wabo dawe?
MAR 12:36 Te polobadu Godigo Tedali Mobo Bidigo te Devitbolo te homu kolesaga mobaso, tama Devitgo digi te po wai, ‘Genuai Bidi agai te eno Genuai Bidibolo te tiwai po wai dao: “Nage eno dolo nogo badu duayagasao, te nosali te eno nago boi bidi dabe aiyaba elaluama, tama augwali nago dologoba muabo sogo usu nagasaibao,” te po wai.’
MAR 12:37 Devitgo digi aga te Genuai Bidi nogi yali. Tama tibaso, te mena tama te Genuai Bidi aga te Devitgo bulai wai pedalaibawe?” Jisasgo te po wai. Te genuai we bidi hani augwaligo te Jisasgo ola mani po odoyu, wiegi yai homu pemene yai.
MAR 12:38 Tama Jisasgo augwali ola mayu, tama agai te po wai, “Dage te bomai po page koneai bidi dabe dua dao. Augwali te bobage gudubo ugwa belama pabo homu godolo ebo dao. Te we bidi sisinibo pesagede te we bidi augwalibolo te siade da wabo te augwaligo godolo naga ebo dao.
MAR 12:39 Augwali te bomai po ola mabo lotu bede te we bidi gesabidi badu te polalubo ni namide duayabo godolo ebo dao, tama te genuai nai da tubo sogode te augwali te polalubo ni namide duayabo homu godolo ebo dao.
MAR 12:40 Augwaligo te augwa bidi isai we dabe tibo po weyu, tama augwaligo be dabe wi siyu ebo dao. Tama te ebo kolesaga mesegelainogo eyu, tama augwaligo tibo gedu haluasa po bobage weyu ebo dao. Te Godigo po tų ebo sogode te bidi dabe augwaligo genuai sęgę mu saibao,” Jisasgo te po wai.
MAR 12:41 Jisas te Moni Lotu Be tempel tomode bidiyu, tama aga te Godibolo ofa maiabo mone ge mubo halobage pąde dulaluai. Tama agai te we bidi dabego te halobageba mone ge tulagasobo suali. Tama doado bage hauwa elalubo bidi dabego masigi hauwa tulagasu yai.
MAR 12:42 Tama aga bidi isai wilawe we, te doado bage meni yai we me deli, aga aselama, tama te dwasianu nogeai mone ge si te halobage tomoba bulagasali, te mama yai dwasianunu masigi si naga dao.
MAR 12:43 Tama Jisasgo aga wali pabo bidi asomainu i olama, tama augwalibolo agai te po wai, “Eno mu po dagebolo obao, te aga bidi isai wilawe we, te doado bage meni yai wego, agai te mone ge muani, te tialigo te tigidali we bidigo te halobageba mone muani mone te aiyaba elalualio.
MAR 12:44 Magi baso meni, te tigidali we bidi augwaligo te mone ge hauwa elalu, tama augwaligo meba naga te halobageba muani. Tiali goli te we aga te mu menia sai digi, tama agai aga mone tigidali te halobageba muani, tama aga nai me badu abela tuabo te mu meni dao,” Jisasgo te po wai.
MAR 13:1 Jisasgo te Moni Lotu Be tempel tagalama sobadi, tama aga wali pabo bidi me deligo agabolo te po wali, “Tisa, po ola mabo bidi, te e Moni Lotu Be tempelde elalubo genuai genuai masigi me te masigigo nigali wiegi wiegi yai be dabe elalubao suao,” te po wali.
MAR 13:2 Tama Jisasgo agabolo te tiwai po wei ponani, “Nago te elalubo genuai be dabe suyu, obe dawe? Te nosali augwaligo te masigi me daide te gasa masigi manalubo te gogoloyu me sula tagalogobeo. Menio. Te augwali tigidali pebedama, aiyaba sąsąwaibao,” te po wai.
MAR 13:3 Tama nosali Jisas te Oliv bulu dude dualalu, tama te Moni Lotu be tempel u badu pedaide elalubo suali. Tama Pita, me Jems, me Jon, me Andru, te augwali naga agaba aselawali. Tama augwaligo agabolo hanalu wali,
MAR 13:4 “Nago dabolo wao, nisu sogo te sęgę te Moni Lotu Be tempelba pedalugowe? Mena dąį bolo hasia pedalubo si, tama dago koneai elalubadi, megi da te sę dabe te pąde pedalaiba homu elalugowe?”
MAR 13:5 Tama Jisasgo po augwaliba pusa mayu, te po wai, “Dage dua dao. Tiyu te bidi me deligo dage ili po ola mayabuo.
MAR 13:6 Te bidi dabe hauwa augwali aselayu, tama ena nogi ilama, tama augwaligo te po waibao, ‘Ena digi ena te bidi dao.’ Tama augwaligo te we bidi hauwa tibo po ola mawaibao.
MAR 13:7 Tama me, nosali dagego te boi hwįabo kulukulu wabo po me, te boi hwįabo po sabilibo po me odobaso da, teda dage asesa polo tama noma siyu, midigi munu me elamuo. Te sę dabe pedaliyu da yaibao, tiali goli te dagalu de tǫ si silabo sogo bodolu te me elaluaibao.
MAR 13:8 Te bidi hani me deligo te gasa bidi hani me dali wąbi hwįaibao. Tama me tuni bidi hani me deligo te gasa tuni bidi mego hani bidi dali te wąbi hwįaibao. Te me badu pedai badu te tǫ mali eyu, tama augwali nasi genuai elaluaibao. Te sę ebo te wego hasia wai ame nainu dene pedalubo tiwai gilama te hasia pedalaibao.”
MAR 13:9 “Duga digi te bugagia tonaluiąo. Te augwaligo dage te augwa kaunsilba po tų ela mawaibao. Tama augwaligo dage te Juda dabego bomai po odobo lotu be tomode elaibao. Te augwaligo ena nogi aiyaba elaluabo homu elama, tama augwaligo dage te gavmaniba me te tuni bidi gesabidiba dodolaibao. Tama tebode te dagego te Godigo gesi wiegi yai po te augwaliba pusa mao.
MAR 13:10 Te tigidali tǫde bidibo hani bidigo te Godigo gesi wiegi yai po pusubo bidigo po hasia odoyu bolo yaibao.
MAR 13:11 Tama augwaligo dage nogo tulama, tama dage te po tųba odasa pabo sogo, dage wi eyu te homu me elamuo, ‘Te dago te po tųde mena po wagowe?’ Menio. Tigidali po Godigo dagebolo te sogode digi menama, te dagego pusumainu yaibao. Magi baso meni, te duga digi te po me pusugobeo. Menio. Te Godigo Tedali Mobo bidi agai te po pusaibao.
MAR 13:12 Tama tobage sę pedalubo sogo te bidi dabego augwa ama dabe te boi bidi dabego nogoba munama, te augwali ela mumainu yaibao. Tama te aya dabego me te ogomani augwali te boi bidi nogoba muyu, te tama tiaibao. Tama te ogwa me wegi me augwaligo me te augwa aya ida dabe te boi bidi nogoba munama, tama augwali ela mumainu yaibao.
MAR 13:13 Tama tigidali bidi dabe augwaligo dage dali dwai homu mu yaibao. Eno nogi dagede elalubaso, tama augwaligo te tiwai kolesaga yaibao. Tiali goli te mena bidigo bomo elama dolaludubadi te dagalu de tǫ dali si siligi pabo sogoba usu nagasali bidi, te aga da, Godigo ma dobola saibao,” Jisasgo te po wai.
MAR 13:14 “Tama te bulu dolabo dwai dwai nai mu dagego sueibao. Aga da, te habu selai elalubo bulu te badu doligi soaibao.” (Te po nedebo bidi agai homude bugagia kone palao.) “Tama te sę ebo sogode te Judia tǫ pedai badu bidibo we bidi augwali te bulu duba wi pelawaibao.
MAR 13:15 Tama te aga be daide ugwadu bidibo bidi aga te aiyaba dulama, te be tomoba doado bage sigulainu ebo te usu munu me egobeo, aga olo naga wi pao.
MAR 13:16 Tama te sogo aga gide bidibo bidi, aga begasa pelama, te kedaude gudubo ugwa me beba sigi pelamuo, te aga olo naga wi pao.
MAR 13:17 Te haliga elalubo we dabe, me te sogo wai ame mabo we dabe, te augwali hobede mu dao!
MAR 13:18 Tama dagego te Godibolo gedu haluasa po waiyąo, te sę dabe te moni kedau sogode pedelabuo.
MAR 13:19 Magi baso meni, te sogode te genuai sęgę mu elaluaibao. Te Godigo tigidali nai nigali sogo gagalasa, te megi e sogoba usu nagasu, te tiwai sęgę te polobadu me pedalisiąwai. Tama nosali me te tiwai sęgę meni yaibao.
MAR 13:20 Tama Genuai Bidigo te sogo bodolu te hagana selama, pęwadage iligi menigi da, teda te tigidali we bidi hagagi dao. Tiali goli agai te sa muyu dąį ilali we bidi augwalide homu kone palama elaluali. Tama tibaso agai te bodolu sogo pęwadage sogo ilama elalubo dao.”
MAR 13:21 “Te sogode, te bidi me deligo dagebolo weyu, ‘Suao, te Krais ede bidibao,’ ma ‘Suao, aga ude bidibao,’ te po obaso da, dagego te pode homu dąų me olamuo.
MAR 13:22 Magi baso meni, te bidi meba te sogo aselama, tama tibo po weyu, te tiwai po waibao, ‘Ena Krais da,’ ma ‘Ena te Godigo po pusubo profet bidi me deli dao,’ tama augwaligo te bidigo susiąwai bomai sę eyu, tama gasagi gasagi yai sę dabe yaibao. Mu tama, te augwali usu yali homu ebogo da, teda augwaligo te Godigo augwali sa muyu dąį ilali we bidi tibo po ola menama, tama augwali tulalumainu yaibao.
MAR 13:23 Tama tiyu dage dua dao. Te sę me pedalisiąbadi eno te tigidali sę yabo po te dagebolo wai dao,” Jisasgo te po wai.
MAR 13:24 Jisasgo po me weyu, te po wai, “Tiali goli te genuai sęgę hasia bolo ela silama, tama te sogode te giliga ge hulia selama, tama te polua me ula isiąma,
MAR 13:25 tama te dagaludu hǫ dabe tudulaluaibao. Te dagalude elalubo bomai nai tigidali te mumunu yaibao.
MAR 13:26 Tama te tebo sogode teda augwaligo te Godigo Bidi Mu te dagalu tomodu te pǫ me deli daide ugwadu dualasa asobo sueibao, te aga genuai bomo me genuai wiegi yai ula elalubadi te asaibao.
MAR 13:27 Tama te sogo te aga ensel mobo bidi dabe augwali tagala palama, tama augwaligo te aga sainu sa muani we bidi augwali sisinigiluaibao. Te agai te tigidali tǫ pedai badu sesa biligiluama, te dagalu de tǫ dali si ununani te sesege tigidali habuba mu usu nama augwali sisinaibao,” Jisasgo te po wai.
MAR 13:28 Tama agai po me weyu, te po wai, “Dagego te ni kayade kolesaga konea sao. Te ni aga nologo ąį elalu, tama te gesi yabe hogonu pedalubo sogo, dagego koneani, te poi pibo sogo wiegi yai giliga nanobo sogo pedelainu ebo, te homu ebo dao.
MAR 13:29 Te tiwai gilama naga, nosali dagego te suali te sę pedalubaso, teda dagego koneaibao, te ena ma asobo sogo te pąba yagaselama, tama te sunumide elalubao.
MAR 13:30 Eno mu po dagebolo obe dao: te megi e sogode bidalubo we bidi dabe augwali me isisąbadi, tama te sę tigidali pedalubo sueibao.
MAR 13:31 Te dagalu de tǫ dali si da, te mu sia saibao, tiali goli eno po da, te munu me hagayu, te sia siyu me egobeo. Te me elalua paibao,” agai te po wai.
MAR 13:32 Te Jisasgo po ma weyu, te po wai, “Tiali goli te bidi me deligo te asabo sogode te bodolu me konegobeo. Te dagalude ensel mobo bidi dabe augwaligo me te me konebeo. Te Godigo Ogwago me agai me konebeo. God Ayago naga agai te asabo sogo bodolu koneai elalubao.
MAR 13:33 Dage dua dao. Dagego tonalu bidiąo. Te nisu sogo pedalabo te dagego me konebe dao.
MAR 13:34 E tiwai elaluaibao. Te bidi me deligo te aga be tagalama, te gasaba pelama biligi pali. Hasia bolo agai te sę ebo bidi dabebolo te agai doado bage tolaluabo po wali, tama agai te sę bidi deli deli augwalibolo te sę dobayali. Tama agai te be sunumi tonaluabo bidibolo te po wali, agai te sunumi bugagia tonaluao po wai.
MAR 13:35 Tama te dagego me te tiwai gilama bugagia tonaluiąo. Te be page bidi aga nisu sogo asabo te dagego konebe. Te aga pio asogowe, ma huli tomode asabo me, ma te be posainuba po obadi me, ma te kigamu asabo me, te dagego konebe dao.
MAR 13:36 Tiyu aga te deli sogo naga mu polo tama asiyu, te dage pila mubadi aga asidali weyu, tama dage tonaluyu bidiąo.
MAR 13:37 Eno dagebolo te mabo po, te po eno tigidali we bidibolo obao, dage tigidaligo te bugagia tonaluao!” Jisasgo aga wali pabo bidi me si me si augwalibolo te po wai.
MAR 14:1 Te sogo te Juda dabego olo bidiyu, te bo disąwai bret nai tuabo sogo nogi Pasova, te tuabo side te pedelabo bodolu si elaluali. Tama te genuai pris dabego me te bomai po page koneai bidi dabe augwaligo te po wai, “Mena tama tilama, te dago Jisas geme pageabi elama, tama aga ela muaibawe?”
MAR 14:2 Augwaligo te po miyu, tama te po me wai, “Dago te tiwai sę te olo bidibo Pasova side me egobeo. Tiyu te we bidi augwaligo wąbi hwįabo sę hodolabuo,” te po wai.
MAR 14:3 Te Jisas hogodama, te Betani be nani teba te oiyabe gasi sai bidi nogi Saimongo beba pali. Aga te tebol saide duagi pelama, tama nai tuyu bidibadi, tama we me deli asali, tama agai te gasa sawi yai botol masigide te wiegi yai denami ebo nai sanda elaluali, te nai abelabo mone te genuai mu dao. Tama agai te botol dalama, tama te denami yai sanda te Jisas toboluba gelali.
MAR 14:4 Tiali goli meba te bidaluali bidi, augwaligo homu dwai yali. Augwa hasi po mia siyu, te tiwai po wai, “Magi baso te wiegi yai denami ebo sanda olo dali hagamainu ebowe?
MAR 14:5 Dago te nai te bidi dabego abelemainogo egi sogo da, teda dago te mone te 300 kina sigi sogo da, tama te doado bage meni yai we bidi dabe augwaliba magi dao.” Tama te homu elama, augwaligo te webolo wado po wali.
MAR 14:6 Tiali goli Jisasgo te po wai, “Dagego te we sęgę mabo tagalao. Magi baso dagego agabolo sęgę mobawe? Te agai wiegi yai kolesaga enabolo ebao.
MAR 14:7 Sesemane sogo te doado bage meni yai bidi dabe te augwali dage dali bididuaibao. Tigidali sogo dagego augwali tau siduabo homu idubaso da, teda tų elaluaibao. Tiali goli te ena da, te dage dali sesemane sogo me bidigobeo.
MAR 14:8 Te wego yabo homu yali sę, te agai te sę yalio. Agai ena tigiba te denami wel muani te ena gų pageba mumainogo sisi iliyu yai.
MAR 14:9 Eno mu po dagebolo obao, te tigidali tǫ pedaide augwaligo te Godigo gesi wiegi yai po pusubo sę ela pabode, te augwaligo e wego te yali sęde po mimi peyu, tama augwali tede homu kone palaibao,” Jisasgo te po wai.
MAR 14:10 Te wego te sanda nai Jisasgo toboluba gelali sogo, te sogo te 12 wali pabo bidi me deli, te Judas te Keriot bulu bidi, aga te genuai pris dabe augwali bidibo digi pai. Agai te Jisas augwali nogoba mawainu yai.
MAR 14:11 Augwaligo te wabo po odama, te augwali wiegi yai homu pemene yai. Tama augwaligo agabolo te masigi meba maiabo po dąų wai. Tama Judasgo te me sogo te Jisas augwali nogoba muabo sunumi me deli gegebo sę ebo te sogo gagalali.
MAR 14:12 Te Juda dabego te yis meni yai bo disąwai bret nai tuabo si pedalali. Tama te polasa gagalobo sogode augwaligo te Pasova nai tuabo sipsip kibu wai eliyu ebo dao. Tama Jisas aga wali pabo bidi dabego Jisasbolo po weyu, te po wai, “Nago homugo dago te tubo nai menaba sisi iligi pelama, tama nago te Pasova nai tuaibawe?”
MAR 14:13 Tialima, Jisasgo te augwali si naga tagala palu, tama augwali sibolo te po wai, “Dage si te Jerusalem hanu tomoba piąo. Tama te sene wę tulama sela asobo bidi me deligo dage si te sunumide sueibao. Dage sigo aga wali piąo.
MAR 14:14 Aga te be me deli tomoba pabo si da, teda dage sigo te be page bidi agabolo te tiwai po waiyąo, ‘Te Tisa, po ola mabo bidi, agai te po wali, “Te eno ena wali pabo bidi dabe dali te Pasova nai tuabo madi te be habu nigilali te menade elalubowe?” te po wao.
MAR 14:15 Tama agai dage sibolo te ugwadu sigide elalubo te be habu ola mawaibao, tede te tebol sai me, duabo sai me te sisi ilai elaluaibao. Dage sigo da tuabo nai te be habude sisi ilao,” Jisasgo te po wai.
MAR 14:16 Tialima, te wali pabo bidi si palio. Augwali si te hanuba sabolama, tama augwali sigo te Jisasgo augwali sibolo wali po tiwai gilama yai. Tama augwali sigo te tuabo nai Pasova sisi ilali.
MAR 14:17 Te sogo be pio ebode Jisas aga wali pabo bidi dabe dali aselawai.
MAR 14:18 Augwali te tebol saide dudulaluyu tama nai tutuladu, tama Jisasgo te po wai, “Eno mu po dagebolo obao, te dage tomode bidi me deli agai ena te ena dali boi bidi ebo bidi dabe augwaligo nogoba mawaibao. Te ena dali megi nai tubo bidi me deligo tama tiaibao,” te po wai.
MAR 14:19 Te wali pabo bidi dabe augwali homu sęgę elama, tama augwali deli deligo aga hanalua pabo gagalali, “Te enawe?” te po wai.
MAR 14:20 Jisasgo augwalibolo te po wai, “Te dage nogo si olama sągągo si bage te me dedeli tomode dao. Te ena dali te nogo talua te pou tomoba muyu, tubo nai sabo bidi te dao.
MAR 14:21 Awe, mu tama, te Godigo Bidi Mu aga isaibao, te agade te tiwai po te Godigo po bukude asęani po tiwai isaibao. Tiali goli te Godigo Bidi Mu te boi bidi dabe nogoba muani bidi da, te aga hobedagia mu ebao! Te bidi aga idago aga me ame nagi menigi da, te usu egi da, aga bugagia bidigi da,” Jisasgo te po wai.
MAR 14:22 Augwali te Pasova nai tutuladubadi, tama Jisasgo te bret me deli selama, tama Godiba puba hwi olama, tama pebedama, tama augwalibolo mani. Tama agai te po wai, “Dagego sela tuao. Te eno tigi dao.”
MAR 14:23 Tama agai te wain wę tabiali kap me deli selama, tama Godiba puba hwi olama, tama augwalibolo mani. Tama augwali tigidaligo tede wain ąį tudu pela silali.
MAR 14:24 Tama agai augwalibolo te po wai, “Te da, te eno kaneme dao, tama te kanemego te Godigo aga we bidi tau somainogo eyu mani po te dąų walobao. Eno te kaneme gelebogo te we bidi hauwa umabo mu tau saibao.
MAR 14:25 Eno mu po dagebolo obao, eno te wain du kaneme ąį munu ma tusiąbadi te eno gesi ąį te Godigo we bidi tonalubo madide tubo sogoba usu nigi paibao,” Jisasgo te po wai.
MAR 14:26 Tama augwaligo te Godigo nogi ugwaba sabo tęąbi po me deli olama, tama augwali te be tagaluyu, tama Jerusalem hanu bulu badu pelama, tama te Oliv bulu duba pelawai.
MAR 14:27 Te Jisasgo augwalibolo te po wai, “Te dage tigidaligo ena taga peyu, tama wi paibao. Magi baso meni. Te Godigo po bukude elalubo po me deli tiwai dao, te Godigo wali po e dao, ‘Eno te kibu sipsip tonaluali bidi elibaso, tama te sipsip dabe wi tedela paibao,’ te po wai dao.
MAR 14:28 Tiali goli ena te gų pagede ma hodaluama, tama dage asomainu ena polasa te Galili tǫ pedai teba paibao,” Jisasgo te po wai.
MAR 14:29 Pitago agabolo te po wai, “Te e bidi tigidali augwaligo nage taga peyu wi pobaso da, tagalao, magigo meni, te eno nage taga pogobeo,” te po wai.
MAR 14:30 Tama Jisasgo agabolo te po wai, “Eno mu po nagebolo obao, megi e sogo hulide, te ba kakaruk po si sogo wasiąbadi, tama nago ena konebeo po te sela sogo waibao.” wali.
MAR 14:31 Tiali goli Pitago po bomo elama mu weyu, “Tagalao, te ena nage dali isibaso, te usu dao. Tiali goli eno te nage konebeo po munu me wagobeo. Mu menio!” Tama Jisas wali pabo bidi dabe tigidali augwaligo me te tiwai po naga ola pai.
MAR 14:32 Te augwali peyu, tama te gi me deliba sabolali, te gi bulu nogi Getsemani. Tama Jisasgo aga wali pabo bidi dabe augwalibolo te po wai, “Dage ede bidaluiąo. Ena God dali po wagi painu homu ebao.”
MAR 14:33 Tama agai te Pita, me Jems, me Jon, te bage sela selama, tama augwali aga dali pali. Megi da, te aga homu moni sęgę eyu, tama aga kone palu te aga dwai homu mu yai.
MAR 14:34 Tama agai augwalibolo te po wai, “Te eno homu sęgę mu eyu, te pąde ena isabo homu ebao. Dage ede bidaludu tama bugagia tonaluao,” wali.
MAR 14:35 Tama aga dwasianu pelama gana, tama tǫba basi gulama, tama agai gedu haluasa po wai. Te Godigo usu da wida, te dwai denego aga te sogo ela somainu homu yai.
MAR 14:36 Agai te po wali, “Aya, nago te tigidali sę ebo usu dao. Eno homugo nago enaba megi te pedalainu ebo te dene dagala samainu homu ebao. Tiali goli nago te eno homu wali me pelamuo. Menio. Nago te naga homu wali naga pao,” Jisasgo te po wai.
MAR 14:37 Tama aga ma geasa pelama, tama te wali pabo bidi dabe pila mubo suali. Tama agai Pitabolo te po wai, “Saimon, nage pila mudubawe? Nago te bodolu pąde yagasobo te tonaluabo te usu esiąyu egobe dawe?”
MAR 14:38 Tama agai te augwali selabolo te po wai, “Dagego bugagia tonaludu, gedu haluasa po waiyąo. Tiyu te dage usu sabo naigo te dage gege asabuo. Mu tama, duga noma bidi dabe te dwagi yai sę yabo homu ebo dao. Tiali goli duga tigigo bomo sǫą pobao,” agai te po wai.
MAR 14:39 Tama aga ma pelama, gedu haluasa po wagi pai. Te aga hasia gedu haluasa po wali tiwai ma wali, te gedu haluasa po tiwai naga Godibolo ma weyu yai dao.
MAR 14:40 Tama aga ma aselama suali, te aga wali pabo bidi dabe augwali godege pila mubo suai. Te augwaligo gedu sęgę mu elaluai. Tama augwaligo agabolo te mena po agabolo wainogo yabo te augwaligo me konebeo.
MAR 14:41 Jisasgo te sela sogo aga Ayabolo po wagi peyu yali silama, ma aselama, tama agai augwalibolo te po wai, “Dage pila mudu tama toma nedu edubawe? Tama dao! Suao, megi da bidi me deligo te ena Godigo Bidi Mu te dwai sęgę sai bidi dabego nogoba muaibao.
MAR 14:42 Dage hodaluama, tama da pinao. Suiąo, te boi bidigo nogoba ena mawainogo ebo bidi te augwali aga dali asai dao,” Jisasgo te po wai.
MAR 14:43 Jisasgo po odubadi, tama polo te Judas, te wali pabo bidi 12 te augwali me deli, aga asai. Te genuai bidi hani aga dali asai, tama augwaligo te poa pai hwą bobage hwą ge bainat me sesemone wąbi me te tolasa asai. Te genuai pris dabego me, te Juda dabego bomai po page koneai bidi dabego me, te Juda dabe tobolu bidi dabe badi, te augwaligo te tagala palobaso te augwali Judas dali asai.
MAR 14:44 Tama te Jisas augwali nogoba maiabo bidi agai te dąį me deli augwali mawaibao po weyu, te po wai, “Te eno bidi me deliba kisa sigi pelama nono naibao. Te bidi aga te Jisas dao. Dagego aga pageabi elama tulama, tama aga bugagia amua elama, tama aga selasa piąo,” wai.
MAR 14:45 Tialima, Judas aga sabolama, tama Jisasba polo pelama, tama te po wai, “Tisa, po ola mabo bidi,” te po wai. Tama agai Jisasba kisa sagaselama, nono nai.
MAR 14:46 Tama tibaso, augwaligo nogo Jisasba munama, tama aga pageabi yai.
MAR 14:47 Tiali goli te Jisas wali pabo bidi dabe pąde te dolaluali bidi me deli, agai te aga elaluali bobage ge hwą kega selama, tama te tobolu pris bidigo sę ebo bidi elama, tama aga olo togolama, tama tǫba tulaluali.
MAR 14:48 Tama Jisasgo te asali bidi dabebolo te po wai, “Dagego ena sagasu, tama dagego te poa pai bobage hwą me sesemone wąbi me tolasa asali, te dagego nai wi sai bidi me deli sagasobo tiwai gilama yainu te yali da, agawe? Magi basowe?
MAR 14:49 Tigidali sogode te ena dage dali te Moni Lotu Be tempel tomode dulalu, tama eno te Godigo po dagebolo ola mawai, tama dagego ena nogo tulama pageabi me ebeo. Tiali goli dagego enade megi ebo sę ebogo te Godigo po bukude elalubo po meba te mu pedalumainu ebao,” Jisasgo te po wai.
MAR 14:50 Tama aga wali pabo bidi dabe tigidali augwaligo aga taga peyu, tama augwali wi pelawai.
MAR 14:51 Tama gesi bidi me deli te Jisas wali asudai, tama agai tigide te tedela yai nami ugwa naga gudasa asiduai. Tama augwaligo aga pageabi elama tuali.
MAR 14:52 Tiali goli aga te tedela nami ugwa taga peyu, tama aga tigi olo naga elalubadi te aga wi pai.
MAR 14:53 Tama augwaligo Jisas te tobolu bidi prisgo beba odasa pai. Tama tigidali genuai pris me te Juda dabego tobolu bidi dabe me te augwa bomai po page koneai bidi dabe, te augwali aselama, te beba sisinagasali.
MAR 14:54 Tama Pita te Jisas pabo wali pali, tiali goli aga te dwasianu digibulu gana bidai. Aga te tobolu pris bidigo be bagulali obo tomoba pai. Tama aga te enesigi bidi dabe dali dualalu, te augwaligo kedau nainu nogani siade te aga tigi kedau neduali.
MAR 14:55 Tama te genuai pris dabego me te tigidali kaunsil dabe augwali te bidi dabe meba i olama asobo side, te augwaligo te Jisasgo yali kolesaga po pusumainu yai. Augwaligo te aga ela muabo homu ebaso, tama te dwai sę yali sunumi me deli te gegali. Tiali goli te augwaligo agai dwai sę yali te me gegebeo.
MAR 14:56 Te bidi dabe hauwa augwaligo agade te tibo po kisilali, tiali goli augwaligo po te tiwai si me ebeo.
MAR 14:57 Tama te bidi meba augwali doligulama, tama tibo po te Jisasba kisilama weyu, te po wai,
MAR 14:58 “Dago odali, agai te tiwai po wai, ‘Te eno digi eno te bidi dabego nogogo sę yani te Moni Lotu Be tempel te aluaibao. Tama nosali te be eno te sela sogode gasa dodolama sę yaibao, tiali goli te be te nogogo me sę egobeo,’ agai te po wabo dago odalio,” augwaligo te po wai.
MAR 14:59 Tiali goli augwaligo te wali po te me geda muyu, tama te po tiwai si me ebeo. Bidi mego pusali po te gasagi yai tedali dwasianu yai, tama gasa bidigo po me tedali gasagi yai po wai, te tiwai si meni. Te usu ebeo.
MAR 14:60 Tama te tuni bidi pris mu te tomode dolaluyu, tama Jisasbolo hanalu wali, “Nago te po deli me wei begelesiąma ebawe? Te nageba kisilama wabo pode te nago magi ebawe?”
MAR 14:61 Tiali goli Jisas aga pedauwali panialu, tama te agabolo po me deli wei me ponobeo. Te tuni bidi pris bidigo agaba ma hanalu wali, “Nage Krais, te magi dwai sę deli me isiąwai te Godigo Ogwa dawe, ma meniwe?”
MAR 14:62 Tama Jisasgo te po wai, “Te ena tama dao. Tama nosali dagego te Godigo Bidi Mu te Tigidali Bomo Elalubo Godigo dolo nogode dualama asobo dagego sueibao. Tama aga te dagalu tomodu te pǫ me deli daidu dualasa asaibao,” wali.
MAR 14:63 Tama Jisasgo te po wabode te tuni bidi pris bidi sębę eyu, tama aga gudaluali ugwa pisila sąyu, tama te po wai, “Dago te gasa bidigo e bidigo yali sęde po wabo me odogobeo. Te tagalao.
MAR 14:64 Dagego odalio, agai te Godiba posobo po wai. Dagego mena homu ebawe?” Tama augwali tigidaligo te tiwai po Jisasde wai, “Agai dwai sę yai elalubaso, tama aga isimainao.”
MAR 14:65 Megi da augwali mebago gagalama, te aga pesa sąyu yai. Tama augwaligo te nami ugwa pedaigo te aga gedu paniama, tama augwaligo aga elama, tama augwaligo te po wai, “Nago te haniani sęde koneai profet bidi tiwai eyu tama po wao. Dego nage elaliwe?” Tama te ami bidi dabego aga selama, tama aga subigila dodolama elali.
MAR 14:66 Pita te aiyadu bidali, te be bagulali obo tomode bididuai. Tama te tuni bidi pris bidigo sę ebo we me deli asali.
MAR 14:67 Tama te we agai te Pita aga te siade tigi kedau nedubo suali. Tama te sę ebo wego te aga dolo ponama tonalu, tama te po wai, “Nage me, nage te Nasaret bulu bidi Jisas dali bidai dao.”
MAR 14:68 Tiali goli Pitago po weyu, menio te tiwai po wai, “Eno nago te wabo po eno me konebeo.” Tama aga te be obo sunumi pą badu buluba doligi soali. Tama ba kakaruk po me deli wai.
MAR 14:69 Tama tede me te sę ebo wego aga ma sulama, tama agai te pąde dodolalubo bidi dabe dali po ma weyu, te po wai, “Te e bidi da, aga te Jisas wali pabo bidi me deli dao.”
MAR 14:70 Tiali goli Pitago po ma weyu, “Menio,” wali. Nosali dwasianu bidama gana, te aga pąde dodolaluali bidi dabe augwaligo te po ma Pitabolo wai, “Mu tamao, nage te augwali hani bidi dao. Nage te Galili bulu bidi naga dao,” te po wai.
MAR 14:71 Tialima, megi da Pitago po bomonama weyu, te po wai, “Te eno megi te mu po naga wasiąyu da, teda Godigo ena elimainao. Eno dagego te po wabo bidi me konebeo.”
MAR 14:72 Tama polo te ba kakaruk hwa si sogo wai. Tama Pitago te Jisasgo agabolo wali po te homugo ma kone palali, “Te ba kakaruk po si sogo wasiąbadi, tama nago po sela sogo wagi soyu, nago ena konebeo po waibao,” wai. Tama Pita aga dwai gela mu wai.
MAR 15:1 Te kigamu mu te genuai pris dabe dali, te tobolu bidi dabe me, te bomai po page koneai bidi dabe me, te tigidali kaunsil dabe badi, te augwaligo po me deli miani. Tama augwaligo Jisas te bonogo nogo si dunama, tama augwaligo aga selama, tama aga te Rom gavman polalubo tuni bidi Pailat agabolo mawai dao.
MAR 15:2 Tama Pailatgo agabolo hanalu wali, “Nage te Juda dabego tuni bidi da, agawe?” Jisasgo po wei ponani, “Naga digi nago te tiwai po obao.”
MAR 15:3 Tama te genuai pris bidi dabe augwaligo agaba te po hauwa kisilama wali.
MAR 15:4 Tama tibaso, Pailatgo agaba ma hanalu wali, “Nago te po me deli wei me ponosiąma, ebawe? Odao, augwaligo te po hauwa nageba kisilama obao,” te po wai.
MAR 15:5 Tiali goli Jisasgo te po deli wei me ponobeo. Tama tibaso, te Pailat aga noma mu sali.
MAR 15:6 Te tigidali kibu bede te Juda dabego te Pasova olo bidiyu toma nabo side, te gavman bidi Pailat agai te kalabus bidi me deli te olo tagala palu yai. Te Juda we bidi augwa digi te bidi me deli nogi nogi ilama tagala palumainu i obaso da, teda Pailatgo te bidi augwaliba tagala palu yai.
MAR 15:7 Tama te sogo te bidi me deli te kalabuside bidai, te aga nogi Barabas. Aga te gavman bidi dabe dali wąbi hwįai bidi dabe augwali dali kalabus yai bidai. Te hani augwaligo te wąbi hwįnama, tama augwaligo te bidi meba ela muai.
MAR 15:8 Tialima, te we bidi augwali sabalu, tama augwaligo te Pailatba i waliyu, te agai polobadu te augwalibolo ebo tiwai te emainu i wai.
MAR 15:9 Tama Pailatgo po wei augwaliba ponoyu, te po wai, “Te dagego homugo eno te dage Juda dabego tuni bidi Jisas te dageba tagala palumainu homu ebawe?”
MAR 15:10 Magi baso meni. Agai koneani, te genuai pris bidi dabego te homu dwai Jisas dali naga elama, tama augwaligo aga te po tųba odasa asai.
MAR 15:11 Tiali goli te genuai pris bidi dabego te we bidi dabe augwaligo homu hodoloyu, te augwaligo Pailatba i waliyu, te Barabas augwaliba tagala palao po wai.
MAR 15:12 Tama Pailatgo po augwaliba ma wali, “Tama dage te Juda dabego tuni bidi nogi ebo, eno te bidi aga magi yaibawe?”
MAR 15:13 Augwaligo te i ma wai, “Aga te ni pedaide elao!”
MAR 15:14 Tama Pailatgo augwalibolo te po wai, “Magi basowe? Agai magi dwai sę yaliwe?” Tiali goli te we bidi augwaligo po dagą weyu i bomonama wai, “Te aga ni pedaide elao,” wali.
MAR 15:15 Tama Pailatgo homugo te we bidi augwaligo aga dali dwagi yai homu emainao homu yali. Tama tibaso agai te kalabus bidi Barabas te augwaliba tagala palali. Tama agai Jisas te ami bidi dabe augwali nogoba menama, te augwaligo aga dene mayu, dwai bigo eliyu elama, tama aga te ni pedaide elimainu yai.
MAR 15:16 Te Rom ami bidi dabe augwaligo Jisas te gavman bidi Pailatgo be obo bagulali tomoba odasa pelama, tama te be mesalode augwaligo te tigidali ami bidi dabe asomainu i wai.
MAR 15:17 Augwaligo te mama yai nami ugwa me deli selama, te Jisasba gudulali. Tama augwaligo te sesani yai bono me deligo te madi nigilama, tama augwaligo te Jisas toboluba muai.
MAR 15:18 Tama augwali hodalu, doligulama, tama agaba nogo dodoloyu, te po wai, “Giligade dao, te Juda dabego tuni bidi dao!”
MAR 15:19 Tama augwaligo aga toboluba te wawi yai sigi dili me deligo elali. Tama augwaligo agaba pesa sąwai. Tama augwaligo kidu sugunu gulama, tama augwaligo tibo po naga weyu, te aga genuai bidibolo ebo kolesaga tiwai yali.
MAR 15:20 Augwaligo te gisugu mabo sę me te dwai posobo po dabe aga dali ola silibo si da, teda augwaligo agaba te gudulali mama ugwa te augwa peda selama, tama augwaligo aga ugwa te agaba ma gudulali. Tama augwaligo aga te ni pedaiba walainu selasa palio.
MAR 15:21 Bidi me deli, Saimon te Sairini bulu bidi, te Aleksander me Rufus sigo aya, aga aselama, tama te Jerusalem hanu tomoba painu soali. Tama te ami bidi dabe augwaligo agade bomo eyu, agai te Jisas elabo ni pedai te agai tolao wai. Tama agai te ni pedai tolasa pabo gagalali.
MAR 15:22 Tama peyu, augwaligo Jisas te bulu du me deli teba sela pali, te aga nogi Golgota. Te nogi page te e tiwai dao, te tobolu dili tiwai bulu du dao.
MAR 15:23 Augwaligo te Jisasbolo te wain ąį dali taluali marasin ąį mawainu yai, te aga tigi dene silabo marasin tiwai elalubao. Tiali goli agai me tubeo.
MAR 15:24 Tialima, augwaligo aga te ni pedaide ela daganama, tama te ami bidi dabe augwaligo te agai gudali ugwa tigidali te augwa dobola sai. Augwaligo te satu gagali elama, dego te mena ugwa te dąį elama sainu tiali.
MAR 15:25 Te giliga ula dąį ebo kigamu tama, te augwaligo aga te ni pedaide daganama walali.
MAR 15:26 Tama te ni pedaide ugwadu te augwaligo aga po tų ilali po asęai. Augwaligo e tiwai po asęai dao, “Te Juda dabego tuni bidi dao,” te po asęnama te ni pedaide elaluali.
MAR 15:27 Te Jisas walali ni pedai pąde augwaligo te nai wi sai te dwai sę yai bidi augwali si te gasa ni pedai side walali. Augwaligo te bidi me aga te dolo nogo badu waliyu, tama me agai pobase nogo badu waliyu yai.
MAR 15:28 [Tama tialima te Godigo po bukude asęani po me deli te mu pedalai. Te e tiwai po wai dao, “Augwaligo aga dali te dwai bidi dabe dali nedali.”]
MAR 15:29 Tama te augwali eda soyu, ugwa peyu ebo we bidi augwaligo dwai posobo po agabolo weyu yai. Augwaligo tobolu pemeyu, tama po wai, “Ia, nago te Moni Lotu Be tempel aluama tama te sela sogo naga ma sę yaiba wali bidi dao. Behede!
MAR 15:30 Megi da, naga digi naga tau sao. Nage te ni pedaide daganalubo tagalama, tama nage aiyaba dulao,” te po wali.
MAR 15:31 Te genuai pris bidi dabe dali te Juda dabego bomai po page koneai bidi dabe, augwaligo me te dwai posobo po wai. Augwaligo te augwa hasi tomode digi te tiwai po wai, “Agai te gasa we bidi dabe tau sali, tiali goli aga digi aga tau sabo usu ebe.
MAR 15:32 Te bidi Krais wabo, te da Israel dabego tuni bidi, aga te ni pedaide daganalubo tagalama tama te tǫba aiya dulubaso, tama dago sulama, tama dago agade konealubo po dąų waibao,” genuai bage augwaligo te po wai. Te bidi si augwaligo te Jisas pąde te ni pedaide walali, te bidi me deligo me te dwai posobo po agabolo wai.
MAR 15:33 Te nai tubo belo wabo giliga tomode, te tigidali tǫ badu be huli si ela selama, te giliga dega sigi painu ebo teba usu nani.
MAR 15:34 Tama te giliga dega sainu ebode te Jisasgo po dagą bomonama weyu, te po wai, “Eloi, Eloi, lama sabaktani?” E tiwai po wai, “Eno God, eno God, magi baso nago ena tagalubawe?”
MAR 15:35 Tama te pąde dodolaluali bidi meba augwaligo te po odama, tama augwaligo te po wali, “Odiąo, agai te Elaija i obao.”
MAR 15:36 Tama bidi me deli udada pelama, tama te wawi yai bola tiwai nai selama, tama te nai te olo wain ąį te naiba gelama, tama te sigi dili me delide munama, tama Jisas agabolo te tumainu ugwaba mawai. Tama te bidigo te po wai, “Meo, dago suyu bolo yaibao. Te bidi Elaija asama, aga te tǫba aiya sela dulaiba homu egowe, ma meni egowe?” te po wai.
MAR 15:37 Tama Jisasgo po dagą bomonama mu olama, tama aga isalio.
MAR 15:38 Te sogo naga tama te Moni Lotu Be tempel tomode dąį tiwai walalobo genuai nami ugwa, te ugwa te ugadu pedasa dulali te aiyaba sabolali, tama te moni nami ugwa pedai si pedelai.
MAR 15:39 Tama te ami bidi dabe augwa genuai bidi aga te Jisas pąde dolalubadi aga te tiwai elama isibo suali. Tama agai te po wai, “Mu tama, te bidi aga te Godigo Ogwa dao.”
MAR 15:40 Te we dabe meba me te digibulu gana dwasianu dodolalu, tama augwaligo me tononaluali. Te augwali tomode bidali we me deli te Makdala moni tǫ we Maria dao. Tama we me deli te Maria, te nogi sabi si wali, te bidi Jems me Joses tega sigo ida. Te bidi Jems aga nogi me Gesi Bidi dao. Tama we me deli aga te Salome dao.
MAR 15:41 Polobadu Jisas te Galili tǫde bidibadi, tama te we dabe augwali aga wali biliyu, tama aga tau sai. Tama te gasa we dabe hauwa me bidali, augwali te moni hanu Jerusalemba Jisas dali asai dao.
MAR 15:42 Te be pio ebode te Arimatea tǫ bidi nogi Josep aga asali. Aga te Juda dabego genuai kaunsil hani bidi me deli, tama agai nogi wiegi yai elaluali. Agai me te Godigo we bidi tonaluabo sogo asobo tonaluyu bidali.
MAR 15:43 Do tama da wabo side te Sabat sogo pedelabo elalubaso, tama megi pio te haniani nai sisi ebo sogo elaluali. Tama tibaso Josep aga te Pailat bidibo be tomoba pelama, te aga gesabidiba doligi pelama, tama aga wi me ebeo. Menio. Agai te Jisasgo tigi sabo po agabolo hanalu wali.
MAR 15:44 Te pode Pailat aga noma sali, tama te po wai, “Aga polo isai dawe?” Tama agai te ami polalubo bidi kepten i olama asobo side, tama agabolo hanalu wali, “Te Jisas isaliwe, ma meniwe?”
MAR 15:45 Agai te ami tuni bidi keptengo po odama, teda agai Josepbolo te po wai, agai te tigi somainao.
MAR 15:46 Tama Josepgo te tedela moni nami ugwa abelama, tama agai Jisas tigi te ni pedaide daganaluali te aiyaba sela dulai. Tama agai aga te tedela ugwago bebe pelama, tama aga te gų page me deli tomoba muai. Augwaligo te gų page te genuai ola be masigi tomode nigai. Tama Josepgo te moni masigi me deli hogogo bele pelama, tama te ola be gų page dedage elalubo te paniai.
MAR 15:47 Te Maria Makdala tǫ we me te gasa we Maria dali, te Josesgo ida, augwali sigo tononaluali, tama augwaligo te Jisas mubo pesage augwali sigo suali.
MAR 16:1 Sabat sogo bidama silai madi, tama Maria te Makdala tǫ we, te gasa Maria dali, aga da te bidi Jems aga ida, tama te gasa we nogi Salome, te we sela augwaligo te wel me te gasa wiegi yai denami ebo nai me abelai. Augwaligo te Jisas tigiba piligi pabo homu yai, aga tigi polo daumua pidali weyu tama yai.
MAR 16:2 Te kigamu mu te wik polasa gagalobo sogo augwali te gų pageba pai.
MAR 16:3 Tama pobadi augwa hasi po mia siyu, te po wai, “Dego da tau selama, tama te gų page paniani masigi hogogo bele pogowe?” Magi baso meni, te masigi te genuai bage mu dao. Tama pąba sabolama, tama augwaligo tonono pobadi, tama augwaligo suali, te gų page paniani masigi te me elalubeo. Menio. Bidi me deligo te masigi hogogo bele pai.
MAR 16:5 Augwali te gų page tomoba pobadi, tama augwaligo te gesi ogwa bidi me deli te dolo nogo badu dualalubo suai. Aga te bobage tedela ugwa gudai elaluai. Tama augwali noma siyu midigi siyu wi yali.
MAR 16:6 Tama agai augwalibolo te po wai, “Dage midigi siyu noma me selamuo. Eno koneani, dage asali te Nasaret bidi Jisas gegagasali, aga augwaligo te ni pedaide walali. Aga hodalualio! Aga te ede me bidibeo! Te augwaligo aga muani pesage te elalubo suiąo.
MAR 16:7 Tiali goli dagego te aga wali pali bidi dabebolo wagi piąo, tama Pitabolo wao, ‘Jisas aga te dage asabo madi te Galili tǫba polasa pobao. Te agai polobadu wali po tiwai gilama, te dagego aga te Galili tǫde sueibao,’” agai te po wai.
MAR 16:8 Tama te we dabe augwali te gų page tomoba pali te buluba solama, tama augwaligo te gų page tagalama wi soai. Augwali didibili elama, tama augwali homu te midigi siyu dwai noma sali. Tama augwaligo te bidi me deli dali te po deli me wabe, magi baso meni, te augwali wi yai.
MAR 16:9 [Jisas te kigamu mu te sę polasa gagalobo sogo tede hodaluali. Tama aga hasia te Makdala bulu we Mariaba pedelai. Te we polobadu Jisasgo te dwai haubo noma bidi te nogo a naga olama me badu si elalubadi sela sąwani te we dao.
MAR 16:10 Te we Maria agai Jisas sulama, tama aga pelama, te Jisas dali wali bilali bidi dabebolo te aga suali po wagi pai. Te bidi dabe augwali homu sęgę elama, tama augwali gela weyu bidaludai.
MAR 16:11 Maria agai te po augwalibolo wai, “Jisas aga te bidibo ula elalu bidibo tama eno sualio.” Tama augwaligo te po odama, tama augwaligo homu te poba dąų me wabeo.
MAR 16:12 Tama nosali te wali pali bidi sigo te moni hanu Jerusalem tagalama, tama te sunumidu pai. Tama Jisas te gasagi yai hasegelama, tama augwali siba pedaligi pai.
MAR 16:13 Tama augwali sigo aga sula koneama, tama augwaligo te po te gasa wali pali bidi dabeba pusugi pai. Tiali goli augwaligo te augwali sigo wali poba homu dąų me wabeo.
MAR 16:14 Nosali badu te wali pali bidi dabe nogo si olama sągągo deli te augwali dugulama nai tubadi, tama Jisas te augwaliba pedalai. Te augwaligo agai wali poba augwa homu dąų me wasiąbaso, tama agai augwaliba wado ilali. Magi baso meni, augwaligo olo te palialu, tama te we bidi augwaligo suali, aga te ma hodaloai yali po wabo te augwaligo homu teba dąų me wabeo.
MAR 16:15 Tama agai po augwaliba weyu, te po wai, “Dage te tigidali tǫ habu pedaiba pelama, tama te enade gesi wiegi yai po te tigidali we bidiba pusa mao.
MAR 16:16 Te enade konealubo po dąų olama, tama aga homu enaba tialuyu tama te baptais sabo bidi, aga te Godigo ma dobola selama, tama aga bidi da waibao. Tiali goli te enade te konealubo po dąų me wasiąwani bidi, aga te po tų ebo sogode hagawaibao.
MAR 16:17 Godigo te bomai sę meba te enade homu dąų wabo bidi dabego nogode pedalumainu ilaibao. Te eno nogide augwaligo te dwai haubo noma bidi dabe sela sąbo sę yaibao, tama augwaligo te bidi dabego odisąwai gesi noma po te pusuyu yaibao.
MAR 16:18 Te augwaligo augwa nogo te bidi gąų kelebo dwai hasamaniba mubaso, ma te konesiąbadi augwaligo te bidi isibo nai tubaso da, teda te hasamanigo me te isibo naigo me augwali dologobeo. Tama augwaligo nogo te gasi sai we bidiba mubo si da, tama te gasi sai bidi dabe usu ma yaibao,” Jisasgo te po wai.
MAR 16:19 Genuai Bidi Jisas agai po augwaliba pusa silama, tama Godigo aga selasa te dagaluba holai. Tama megi da, aga te Godigo dolo nogo badude dualalu bidibao.
MAR 16:20 Tama te wali pabo bidi dabe augwali pelama, tama augwaliba te ola mani po te tigidali tǫ pedai badu pelama, te po pususu biligi pai dao. Tama Genuai Bidi te augwali dali sę eyu, tama te augwaligo nogode te haniani bomai sę ebogo agai hania hanilali, te augwaligo ola mabo po te mu po naga dao.]
LUK 1:1 Genuai bidi Tiofilus, polobadu te bidi hauwa augwaligo te Godigo polobadu da tomode yali sę po asębo homu eyu bugagia sina wai dao.
LUK 1:2 Augwaligo te sę gagalobo te gedugo suali bidi dabego po siyu wali pai dao. Te gedugo suali bidi dabe augwaligo te po pupusu bilai dao.
LUK 1:3 Tama tibaso, eno me te po naga asęnama, nagebolo tolainu te ebao. Hauwa sogo mu te sę pagede eno te sę gedugo suali bidi dabebolo hanalu wai dao. Megi eno bugagia dodolama, te asęyu te ebao. Tialima, deli po naga tama dao.
LUK 1:4 Tama nago polobadu augwaligo nagebolo ola mani po mu yai daba homu emainu, eno te po ma te asęna tolobao.
LUK 1:5 Te bidi nogi Herot te Juda bagego gavman tobolu bidi bidibadi, polobadu Israel hani augwa pris bidi me nogi Sekaraia bididualio. Agai hani sibi nogi Abiya sibi da, te hanide pris bidai bidi dao. Te Sekaraiago Aron hani sibi we nogi Elisabet sai. Te Aron hani sibi me te pris sę ebo hani bidi bidai.
LUK 1:6 Te bidi Sekaraia dali aga we dali si te God gedude dolasa bidiyu, te God tonaludubadi, te augwali sigo dwai sę me ebeo. Augwa si Godigo bomo yai po tigidali wali pidu digi, te Genuai Bidigo po dabe me tigidali wali palio, tama augwali sigo dwai sę me ebeo.
LUK 1:7 Tiali goli augwali si wai menio. Te we Elisabet aga haliga dąų wai. Te Elisabet dali Sekaraia dali augwali si monu dabe mosi dabe eyu, wai ame nabo usu meni yai.
LUK 1:8 Te Sekaraia aga dali deli sę ebo bage sęba asaialio, te Moni Lotu Beba, te Sekaraia aga pągą wali bodolude, te sęde dagalali. Tama tibaso, Sekaraia agai aga pris sę eyu, tama aga te denami yai nai siago ulubo sę egi palio, Godigo gesabidide. Te ebo sę page da, te Godibolo gedu haluasa po pusubo tiwai. Tama tibaso, aga te Moni Lotu Be tempel tomoba pelama, tama te denami yai nai siago uludubadi, we bidi te bulu badu tonaludu, augwaligo Godibolo gedu haluasa po weyu bidali.
LUK 1:11 Tebadi yaide, Godigo ensel bidi me deli dulama, te denami yai hano holobo pesage doloba polo badu dolalubo suali.
LUK 1:12 Tama Sekaraiago Godigo ensel bidi dolalubo sulama, moni noma sali, wi yali.
LUK 1:13 Tiali goli, te enselgo agabolo te po wali, “Sekaraia, nage wi tagalao. Te Godigo nago agabolo hanalu wali po odalio. Naga we Elisabetgo nago ogwa me deli ame naibao.
LUK 1:14 Nago te ogwa nogi Jon poao. Aga ame nabo si, dage si me gasa we bidi hauwa me bugai homu naga yaibao. Magi baso meni.
LUK 1:15 Godigo gesabidide agai nogi genuai elaluaibao. Agai diluai wę dabe tulamuo. Te Jon aga ame nabo sogo gagalama, Godigo Dwagi Yai Mobo Bidi aga dali bidaibao.
LUK 1:16 Te Jon agai te Israel we bidi dabe hauwa te God augwa Genuai Bidiba ma begasa asao po wabo bidi dao.
LUK 1:17 Agai te Godigo po polobadu pusa mawai bidi Elaijago yali sę me, bomo me tigidali selama, Genuai Bidi nosali asaibao obaso, te Jon aga polasa paibao. Agai te aya dabego homu hasegelama, wai bǫų hobede emai yaibao. Me agai te po sela sąbo bidi dabego homu hasegelama, augwali doloba pai bidigo homu somai yaibao. Agai bidi hauwa sisi elama elaludu, Genuai Bidi asabo tonalu mai yaibao. Tama tibaso, te we bidi augwaligo te Jonde bugai homu mu yaibao,” te ensel bidigo te po wali.
LUK 1:18 Te po olama, Sekaraiago te ensel bidibolo hanalu te po walio, “Te eno we me, ena me, te da si mosi dabe monu dabe yai dao. Mena tama ma nago te po eno mu dao wagowe?”
LUK 1:19 Tama ensel bidigo te po wei ponoyu te po wai, “Ena nogi Gebriel dao. Ena God gesabidide dolalubo dao. God aga digi ena tagala palama, nagebolo dwagi yai po pusigi pa tobo obaso, nagebolo te po pusagasiyu te obao.
LUK 1:20 Nago odao. Nago eno wali po mu dao homu isąbaso da, nago pedauwali dagana saibao. Dagana selama, nago po me wasiąbadi, eno po tų sisu pabo bodolude nage doloa paibao. Te eno po tų sisu pao wali bodolude te sę yaibao,” ensel bidigo te po wali.
LUK 1:21 Te gasagi yai nai pedalobaso, Sekaraiago u be tomode tonalubadi, te we bidigo aga magi yaliwe homu yali, aga magi baso gesegebawe homu yali.
LUK 1:22 Tama nosali aga buluba asama, po wabo usu ebeo. Agai nogogo naga bagi ela bilali. Tama augwaligo te tama tebo sulama, “U be tomode magi nai sualiwe namao,” wali.
LUK 1:23 Te Sekaraia aga sę silabo bodoluba yagasobaso, aga buluba soali.
LUK 1:24 Tama nosali aga we Elisabet haliga yalio. Aga bede dualalubadi, polua a naga palio.
LUK 1:25 Elisabet agai te po wai, “Te Genuai Bidigo ena olo dali tau selama, isabo magade eno wai saibao. Tama tialigo we bidi gesabidide ena hale yai goli, megi agai te hale sela sąwai dao,” Elisabet agai te po wali.
LUK 1:26 Te we Elisabet haliga elama, polua a naga olama, me badu nogo deli wagisu, tama Godigo te ensel bidi nogi Gebriel te bulu me nogi Nasaretba pao walio.
LUK 1:27 Gesi wegi me te bidi Josepbolo noma po wai, te wegi nogi Maria dao, “Te wegi pageba po pusigi pao,” te Godigo te enselbolo te tama po wali.
LUK 1:28 Te bidi Josep te Devitgo hani bidi dao. Tama te ensel bidi Gebriel te Maria pageba pelama, “Giligade dao,” te po wali. “Genuai Bidigo nage megi hobede yalio, nage bugai homu yabo sę yalio. Aga nage dali bidibao,” wali.
LUK 1:29 Te wegi Mariago te po odobo si, aga homu tųą palio. Agai homugo e bidigo magi po nama wabowe, te homu yali.
LUK 1:30 Tama te ensel bidigo Mariabolo “Nage wi egio,” te po wali. “Godigo nage dali dwagi yai homu ebao.
LUK 1:31 Edao! Nage haliga yaibao. Nage haliga elama, ogwa tega paibao. Te ogwa nogi nago Jisas poao. Aga genuai bidi bidaibao.
LUK 1:32 Tama Godigo te po waibao, ‘Aga nogi Genuai Godigo Ogwa dao,’ waibao. Godigo aga genuai bidi nigilaibao, aga nǫų Devitgo yali gilama.
LUK 1:33 Te tigidali sogo Jekopgo hanigo genuai bidi bidaibao. Aga te we bidi sesemane sogo tonaluaibao,” te enselgo te po wali.
LUK 1:34 Tama Mariago enselbolo te po hanalu wali, “Ena bidigo we menio. Tama magi ilama, tama tiwaibawe?”
LUK 1:35 Tama te ensel mobo bidigo po wei ponoyu, te po walio, “Te Godigo Mobo Bidi asama, tama agai bomogo nage mesegalueibao. Tama tibaso, nago tega pabo wai nogi Godigo nogi poaibao, ‘Dwai sę isąbo ogwa dao,’ waibao, ‘Te Godigo Ogwa dao,’ waibao.
LUK 1:36 Edao. Naga be bidi we Elisabet mosi dabe mu bidai goli, agai ogwa haliga elalubao. Polobadu augwaligo te wego wai ame nogobeo wai dao. Tiali goli, megi aga haliga elalubadi, polua a naga olama, me badu nogo deli polo pai dao.
LUK 1:37 Godigo me isiąwai sę me menio,” te ensel bidigo te po wali.
LUK 1:38 Tama Mariago te po wali, enselbolo, “E. Ena Genuai Bidi agai sę ebo we dao. Eno homugo nago enabolo wali po tų sisu pomai yaiba,” te po wali. Tama te enselgo Maria taga palio.
LUK 1:39 Te tamadi ganama, ensel dali po miani elalubadi, Maria aga Judia hanude bulu du meba palio.
LUK 1:40 Teba sabolama, aga Sekaraiago beba sabolama, Elisabetbolo “Giligade dao” wali.
LUK 1:41 Tama Mariago “Giligade dao” wali po obadi, Elisabetgo haligade elaluali wai mobodo yalio. Te Godigo Dwagi Yai Mobogo Elisabet beasagasalio.
LUK 1:42 Tama Elisabetgo midigi sali, Mariabolo dagą olama, te po wai, “Te Godigo nage dali dwagi yai homu mu ebe yabao, gasa we dabe aiyaba elalualio. Nago uda haliga elalubo ogwago me tama naga te waibao, olo bidi dabe aiyaba elaluaibao.
LUK 1:43 Godigo ena te moni dwagi yai sę magi baso maniwe, te eno Genuai Bidi aga idago ena suagasali. Te ena genuai we menio.
LUK 1:44 Edao! Nago enabolo ‘Giligade dao’ wabo odama, eno haligade elalubo waigo dwagi yai homu eyu, mobodo yalio.
LUK 1:45 Genuai Bidigo nagebolo wali poba nago homu begi pai yabao. Tama teyu, nage bugai homu mu te ebao. Nosali Genuai Bidigo yaibao wali sę tų sisu paibao,” Elisabetgo te po wali.
LUK 1:46 Te Mariago te po wali, “Eno homugo da Genuai Bidigo nogi ugwaba sobao.
LUK 1:47 Tama eno nomago ena tau sabo Godibolo bugai homu mu ebao. Te ena agai sę ebo we da.
LUK 1:48 Tiali ena da, olo bage da. Tama agai ena kegeda pabo menio. Te megi me, nosali me bidibo we bidigo Godigo enabolo bugai homu mani po naga ola paibao. Magi baso meni.
LUK 1:49 Moni Bomai Godigo enabolo te genuai sę yali pode te obe dao. Agai nogi gasagi yai mu tedali dao.
LUK 1:50 Te God agai po tų sisu pabo we bidibolo agai olo tau sabo sę me, te iba bidada pabo bidigo ogwago ogwa dabego me, agai po tų sisu pidubaso da, agai tama tede piduabo tolai dao. Agai nogogo bomai sę yai dao.
LUK 1:51 Po sela sąyu augwaligo augwa nogi kegenanu ebo bage agai augwali besela sąwai dao.
LUK 1:52 Agai gavman tobolu bidi dabe aiyaba elaluama, te nogi meni yai bidi nogi ugwaba sabo dao.
LUK 1:53 Agai te nasi ebo bidi dwagi yai naigo tabi pągąlobo dao. Agai te sibage hauwa mubo bidi olo dali gudula palobo dao.
LUK 1:54 Polobadu mu Godigo dago nǫų dabebolo bodolu mawani. Tama megi agai bodolu tų sisu pobao. Da Israel dabe agai sę ebo we bidi dabe dao, tama megi agai da tau magasalio.
LUK 1:55 God agai dago nǫų dabebolo te po wali, ‘Te eno Abraham hobede eyu, te aga hani me, ibaba ame nabo ogwa me, tama naga tede paibao.’ Tama te wali po agai kegeda pabeo,” Mariago te po wali.
LUK 1:56 Te Maria Elisabet dali bidibadi, polua sela bidama da, tama nosali aga buluba ma pali.
LUK 1:57 Te Elisabet agai wai tega pabo bodolu asobaso, te agai ogwa tega pai dao.
LUK 1:58 Aga hani dabe me, te deli bulu bage me tigidaligo Godigo Elisabet aga olo dali tau sali po odama, tigidali Elisabet dali bugai homu ela silai dao.
LUK 1:59 Te Sarere deli silama, tama augwaligo te ogwa tigiwali togwagasali, te tebo Juda dabego polobadu tama tolai sę dao. Tama augwaligo homugo “Agai aya nogi Sekaraia ma poaibao,” te po wali.
LUK 1:60 Tiali goli te ogwa aga idago po weyu,” Te egobeo. Dago e wai nogi Jon poaibao,” te po wali.
LUK 1:61 Tama augwaligo te po weyu,” Te naga deli hani bagede te tiwai nogi nago awa dabede me, hai dabede me tiwai nogi elalubo menio,” te po wali.
LUK 1:62 Augwaligo nogogo bagi eyu, Sekaraiabolo “E wai nogi de poaibawe?” te po wali.
LUK 1:63 Tama Sekaraia agai nogogo bagi eyu, “Te buku asębo nai me sesao,” olama, tama agai e tama asęanio, “Agai nogi Jon dao.”
LUK 1:64 Tama augwaligo homu tųą palio. Polo tama Sekaraia agai po wabo ma usu yalio. Tama agai hamena ma usu yali.
LUK 1:65 Te po weyu, agai Godigo nogi ugwaba sali. Tama augwa deli bulu bidi dabe me wi kisu dali. Augwali tigidaligo te po ola silama, pomo mu yalio, te Judia dabego bulu bageba me bulu agebele me.
LUK 1:66 Augwaligo te po odobo si, monu pomo mu ebaso, augwaligo te po wali, “Te wai nosali mena tama tiwai wai bidigowe?” wali. Genuai Bidigo bomo aga dali bidibo augwaligo koneanio.
LUK 1:67 Godigo Tedali Mobo Bidigo Sekaraia beasagaso baso, te Godigo po pusuyu, te po walio,
LUK 1:68 “Dena Genuai Bidi Israel dabego God nogi kegenaninao. Agai aga we bidi da tau sagasalio.
LUK 1:69 Tilama, agai da ma abelai dao. Polobadu aga sę yali bidi Devitgo eda dadalo asali hanide bomai bidi me deli pedelama, te bidi Godigo da ma sabo bidi nigilai dao.
LUK 1:70 Polobadu agai po pusa mani bidi dabego waligia te yaliao.
LUK 1:71 God agai polobadu agai da boi bidigo nogode ma saibao wali po te sabao, te da dali dwai homu ebo bidigo nogode me agai da sali.
LUK 1:72 Agai dago wąį dabe moni hobede eyu, tau saibao wali bidi te asalio. Tama agai polobadu bodolu mani aga me konealubao.
LUK 1:73 Agai dago wąį Abrahambolo bomai bodolu mu mawai dao. Tama megi agai polobadu yaibao waligia yainu te ebao. Boi bidigo nogode agai da ma sainu ebao wai.
LUK 1:74 Tama agai sę dago dąų olama, tulama, wi egobeo.
LUK 1:75 Da e tǫde bidibo sogo dago dwai sę isąma, dolo tųdu pelama, agai sę inao. Tama aga gesabidide da dolasa bilinao,” Sekaraiago te po wali.
LUK 1:76 Agai te po me Jonde wali, “Eno ogwa, ‘Nage nosali Moni Godigo po pusa mabo bidi mu dao,’ Godigo te po waibao. Nage bolo polasa paidigi Genuai Bidi nosali asaibao. Nage polasa pelama, aga asobo tų sisi ela muaibao.
LUK 1:77 Agai we bidibolo nago po ola menama, konealueibao. Agai augwaligo dwai sę dabe sela sąnama, augwali ma sai hagede ebao homu yaibao.
LUK 1:78 Dago God da dali hobede mu elama, agai e tama tiwaibao. Te dagalu be posobo ula elalubo e tǫba dabolo tagala palaibao.
LUK 1:79 Tama te hulide bidalubo bageba ula ilimainu, me isabo pąde elalubo bage me, te bage tau somainu tiwaibao. Agai da te dwagi yai homude bilibo tųdu pabo po agai dabolo mobo ola mawaibao,” Sekaraiago te po wali.
LUK 1:80 Nosali e wai Jon genuai elama, te aga noma bidi me bomo yai pedalumainu ilali. Tama aga te we bidi meni yai bulude bidali. Tama nosali aga te Israel we bidigo gesabidiba hanilagaselama, bidali.
LUK 2:1 Te sogo gavman tobolu bidi Sisar Ogastus bidibo sogo, te tigidali we bidi nogi sabo sogo bodolu muani.
LUK 2:2 Te sogo hasia mu augwaligo nogi sabo gagalali. Te Siria tǫgo gavman tobolu bidi nogi Sairinias te sogo bidai dao.
LUK 2:3 Tama tibaso, tigidali we bidi augwa page buluba nogi sai hagede pela silalio.
LUK 2:4 Tama te bidi Josep me aga bidali odogo bulu te Galili tǫ pedaide elaluali bulu Nasaret taga pelama, te aga wąį Devitgo te Judia tǫde nigali hanu nogi Betlehem hanuba holalio.
LUK 2:5 Josep dali aga daganasa bidibo we Maria dali augwali si me nogi sai hagede holalio.
LUK 2:6 Tama Mariago haliga elalualio. Augwali si Betlehem tede bidibadi yaide, Mariago wai tega pabo bodolu maga yalio.
LUK 2:7 Tama Maria agai hasia ogwa ame nani. Tama pedai ugwa nanamenu dabego belama, tama kibu bulmakaugo nai tubo halobageba te ogwa wai pilagalama elalualio. Magi baso menio. We bidi osogo pibo be pągąna saide.
LUK 2:8 Te bulu bogu badu kibu sipsip tonalubo bage me badu bidaluai, tama augwaligo hulide me kibu sipsip tonalubo dao.
LUK 2:9 Genuai Bidigo ensel bidi aga augwali pageba aselama, te Genuai Bidigo ula augwaligo tigide te moni ula yali. Tama augwali moni wi mu yali.
LUK 2:10 Tiali goli “Wi egio,” enselgo te po wali. “Ena dage pageba dwagi yai po sela sobao, te we bidigo te po odama, bugai homu mu emainu ebao.
LUK 2:11 Megi pio hulide Devitgo hanude wai me tega pai dao, te agai dage ma dobola saibao, aga te we bidi tau somainu sa muani Genuai Bidi dao.
LUK 2:12 Dagego gegegi peyu da, te wai bǫų me ugwa nanamenu dabego mesega galama, tama bulmakaugo nai tubo halobage tomode pilai elalubo sueibao. Telalubo sulama, dagego te po mu daba homu yaibao,” te enselgo te po wai.
LUK 2:13 Te enselgo te po obadi, polo tama dagalu badu ensel hauwa mu dulama, te ensel dali dololalubo sualio. Augwaligo Godigo nogi ugwaba siyu, tama walio,
LUK 2:14 “God agai nogi ugwanu mu kegenanao. Tǫde bidibo we bidi homu tegaluama, bidiąo. Augwalibolo Godigo dwagi yai homu ebao,” te ensel dabego te po wali.
LUK 2:15 Te ensel dabe dagaluba ma pebelawaide, te sipsip tonalubo bagego te po wali, “Da Betlehemba pelama, megi Genuai Bidigo dabolo wali po page sugi pebelawaibao,” wali.
LUK 2:16 Tama augwali polo pali. Gege pelama, Maria me Josep dali augwali si suali, te wai bǫų me bulmakaugo tubo nai halobage tomode pila mubo suali.
LUK 2:17 Sulama da, te waide augwaligo odali po dabe te bidi Josep dali Maria dali augwali sibolo te po dabe pusa mani.
LUK 2:18 Tigidali we bidigo te sipsip tonalubo bidi dabego wali pode noma mu salio.
LUK 2:19 Tama Mariago te po odobo si, agai te po page me, agai gedugo suali sę me, mena tama yaliwe te homu idu konealudu geani.
LUK 2:20 Tama te sipsip tonalubo bage te sipsip tonalubo sęba ma geasa peyu, Godigo nogi kegene nalani. Te augwaligo gedugo suali sę dabe me, te augwaligo odali po dabe me, tų sisu pela silali. Tama tibaso, augwaligo bugai homu elama, augwaligo Godigo nogi ugwaba kegenanali.
LUK 2:21 Te Sarere deli bidama, nosali augwaligo te wai tigiwali togolama, aga nogi Jisas polali. Te wai aga idago tabide menibadi, hasia te enselgo te nogi ola mawai.
LUK 2:22 Te wai dali aga ida dali si habu selali bodolu ela soaide, Mosesgo waligia, tama aga ida dali aya sigo Jerusalemba Genuai Bidibolo mawainu sela pali.
LUK 2:23 Genuai Bidigo bomo yai pode asęani yaligia, “Wego hasia ogwa ebaso da, Genuai Bidigo nogoba muiąo,” tama po asęani, te augwali sigo te po wali pali.
LUK 2:24 Tama augwali sigo te Godibolo maiabo ba hi si ma ba ni sasi si sela pelama, te Godiba maiabo pogo me asai dao. Te Genuai Bidigo bomo yai pode wali yaligia tialio.
LUK 2:25 Te sogo bidi me nogi Simeon Jerusalemde bidalio. Te aga doloba pai kolesaga eyu, te Godiba lotu wabo bidi bidai dao. Aga te Israel dabe tau sabo bidi asobo tonaludu gesege yai dao. Godigo Tedali Mobo Bidi aga dali bidibaso, tama Godigo Mobo Bidigo agabolo weyu, te aga polo isigobeo po wai dao.
LUK 2:26 “Te Genuai Bidigo we bidi tau somainu sa muani bidi Krais sulama, nage isaibao,” te po wali.
LUK 2:27 Tama Godigo Mobo Bidigo Simeon hodolama, tama Moni Lotu Be tempel tomoba pali. Godigo bomo yai pode wali po yaligia emainu, te aga ida de aya sigo Jisas te be tomoba sela pali.
LUK 2:28 Simeongo nogogo te wai dobola selama, tama agai Godigo nogi ugwaba siyu, e tama te po wali,
LUK 2:29 “Genuai Bidi, megi nago sę ebo bidi pomainao, megi ena homu tegaluama, bidaio, polobadu nago wali yaligia.
LUK 2:30 Eno gedugo nago da ma sainu yali sę eno sualio.
LUK 2:31 Nago te tigidali tǫde bidibo we bidi gesabidide sisi ela muai dao.
LUK 2:32 Sole ula deli dao, tego deli te Israel hani isąwai we bidibolo ula ola mawaibao. Tama agai moni nogi te Israel hani we bidi dabebolo mawaibao,” Simeongo Jisasde te po wali.
LUK 2:33 Te ogwa aga aya de ida si Simeongo te ogwabolo wali pode augwali si noma sali.
LUK 2:34 Simeongo Godigo bugai homu Jisas dali aga aya de ida si augwalibolo me ilao wali. Agai Jisas aga ida Mariabolo te po wali, “Odiąo. E waigo pode Israel we bidi hauwa augwaligo God taga paibao. Tama hauwa bage me augwali God pąba asaibao. Te aga dąį tiwai me deli nigalueibao, tama bidi hauwago agabolo dwai po waibao.
LUK 2:35 Tama tibaso, we bidi hauwago geme dualaluali homu te pebeli diliba pedelaibao. Tiali goli nage da, te bainat hwą ge tiwai me deli elalu, te nago hoboludu togwalubo tiwai ebaso, te homu dene tiwai yaibao,” Simeongo te po wali.
LUK 2:36 Te Simeon agai wali po silibo si, te mosi dabe we me deli te Godigo po pusa mani profet we tiwai we bididuali, te we aga nogi Ana dao. Aga te Fanuelgo wegi dao, te Aser hani we dao. Te we mosi dabe mu dao. Te mosi we te Moni Lotu Be tempel tomoba asali. Te mosi we gesi tigi elalubadi bidigo selama bidali, te kibu be nogo a naga me badu nogogo si te 7 yia dao. Tama nosali aga bidi isaide, te agaduba naga bidali kibu be 77 bidali. Te aga bidi dali bidali kibu be dali deliba taluyu, te bidi sese me si me si tama me si me si, te 84 yia dao. Te we agai te Moni Lotu Be tempel taga pabo menio. Aga nai habu selama, Godibolo gedu haluasa po hanaludu bidama, Godigo sę me ulade eyu, hulide eyu yai dao.
LUK 2:38 Te sogo me aga pąba aselama, Godibolo “Nage usu dao” wai dao, Godigo te wai mawai baso. Te Godigo Jerusalem bage ma sai hagede tonalubo we bidi dabebolo te ogwa wai bidibo po pusa mani, te mosi we Anago.
LUK 2:39 Te Josep dali Maria dali sigo Godigo bomo yai pode yao wali sę dabe ela silama, augwa te Galili tǫ pedai tomode elalubo bulu Nasaret be naniba ma pali,.
LUK 2:40 Tama te ogwa gawabulu elama, bomo mu yali. Godigo aga olo mu tau sabo kolesagade olo dali mu tau selama, dwagi yai kolesaga elalualio.
LUK 2:41 Te Jisas aga aya dali ida si Genuai Bidigo te Juda dabe augwali dąį ilalide Godigo enselgo augwali ela soali te kone palu tubo nai tubo sogode tigidali kibu be tomode augwali si Jerusalemba holoduai dao.
LUK 2:42 Jisas kibu be nogo si olama, sągągo si digi peda sai elalubadi, augwali te nai tubo sogo Jerusalemba holodubogia holali.
LUK 2:43 Tama te nai tubo bodolu ela sobaso, augwa buluba pebelabo gagalali. Tiali goli, te ogwa Jisas Jerusalemde me biduali. Aga bidibo aga ida dali aga aya sigo konebe. Augwali sigo te homu yai, “Aga te pebelabo bage tomode pabe yaba” homu yali.
LUK 2:44 Tama deli sogo augwali palio. Te sogo pio augwali sigo augwa be bidi dabe, augwa abagi dabe tomode Jisas gegali, mu menio.
LUK 2:45 Susiąbaso, augwali si Jerusalemba geasa ma pali, tede gegali.
LUK 2:46 Augwa si gegedubadi, sela sogo hulide usu nama gegalio, nosali augwali sigo aga te Moni Lotu Be tempel tomode suali. Te Juda dabego po ola mabo bidi dabe tomode duguladubo suali. Augwaligo po wabo odalu, agai me ugwaba hanalu idubo suali.
LUK 2:47 Agai po odali we bidi dabe tigidali noma sali, “Agai homu poa pelamubao, agai pusali po dwagi yai po dao,” wali.
LUK 2:48 Aga ida dali aya sigo sulama, noma sali. Aga idago agabolo te po wali, “Idao, magi baso nago tama te ebawe? Naga aya dali dadi si homu adaladu baso, gegaligo sai dao,” te po wali.
LUK 2:49 Tama agai augwali sigo po wei ponoyu, te po wali, “Magi baso dage sigo ena gasa bulude gegeduai dawe? Eno ayago bede bidabo da, dage sigo konebewe?”
LUK 2:50 Tiali goli augwali sigo agai te wali po page konebe.
LUK 2:51 Tama aga ida de aya si dali Nasaretba aiyaba ma dulali. Tama tigidali sogo agai ida dali aya sigo po wali piduali. Tama aga idago tigidali po aga homuba munama, te dąų olaluali.
LUK 2:52 Tama Jisas genuai elama, agai homu kolesaga dwagi yai mu yali. Godigo me e tǫde bidigo me Jisas godolo mu elama, kua pali.
LUK 3:1 Te Sekaraiago ogwa Jon te bidi meni yai bulude bidibadi, Godigo agai po agabolo konelali. Tama te sogo tr gavman genuai tobolu bidi me nogi Taiberius, me sogo Sisar wabo da, agai sę gagalali kibu be nogo si olama, me sągą sese silali. Bidi me nogi Pontias, me sogo Pailat wabo, te Judia bulude aga gavman tobolu bidi bidai dao. Me Herot aga Galili tǫde gavman tobolu bidi bidali. Aga ama Filip te bulu me nogi Ituria dali Trakonitis dali si tonaluali. Bidi me nogi Lisanias agai te bulu me nogi Abilene tonaluali. Te sogo te pris bidigo tobolu bage nogi Anas dali Kaiafas dali si bidibadi dao.
LUK 3:3 Godigo po Jonbolo ola mobaso, Jon aga te pabo ąį nogi Jordan sesege bulu dabeba pali. Agai te bulu we bidi dabebolo po pusuyu, tama te po wali, “Dagego dwai sę eboba tudi ilama, dage tigidali baptais sao, tama Godigo dagego dwai sę yali gegeda palomainu,” tama po pusudu geani.
LUK 3:4 Jongo yali sę te Godigo po pusali profet bidi Aisaiago polobadu bukude asęani yaligia te ebao. Aisaiago te polobadu bukude asęyu, tama te po wai dao, “Te bidi me deligo bidi meni yai bulu tomode i udubao, ‘Genuai Bidi asobo tų geselao. Aga bilabo tų dolo mu nigao.
LUK 3:5 Tigidali odogo dabe mu pągąnao. Tigidali bobiabi dabe du dabe kigila palao. Gagila bilai tų dabe me dolo ma dodolao.
LUK 3:6 Tigidali we bidigo Godigo olo hobede elama, tau sabo kolesaga augwa gedugo sueibao,’” te Aisaiago te po polobadu asęai dao.
LUK 3:7 Tama we bidi hauwa mu Jon agai augwali baptais momainu Jon aga pageba beasagasali. “Dage dwai hasamani dabe,” agai augwalibolo te po wali. “Godigo dage dali yabo sębęde dage sana pagameo po tego dagebolo waliwe?
LUK 3:8 Dagego dwagi yai sę ebo sulama, dagego dwai sę dabe tudiba sąwai yabao po waibao, te gasa bidigo te po waibao. ‘Abraham da dago wąį mu da, dago dwai sę meni,’ te homu ebo gagali igimio. Eno dagebolo megi mu po tama obe dao. Godigo e elewi dabego Abrahamgo bulai wąį hani sibi nigilabo homu eyu da, te agai tegi dao.
LUK 3:9 Ni gelabo bidigo te ni tigide sae ilama, te sae nide hwą munalubaso da, te ni tamadi tama gelaibao homu yaibao. Ni dabe du gesego walisiąwani ni dabe da, gelama, isiba sąwaibao. Dage te tobage sae ilali ni tiwai dao,” Jongo te po wai.
LUK 3:10 Te bagego agabolo hanalu wali, “Dago megi magi sę egowe?”
LUK 3:11 Jon agai te poba wei ponoyu, te po wali, “Holobo ugwa si munalubo bidigo me deli te holobo ugwa meni yai bidibolo mao. Me tubo nai munalubo bidigo me te meni yai bidibolo dobayao,” Jongo te po wali.
LUK 3:12 Takis sesa bilibo bidi dabe me badu Jon pageba te baptais sainu asama, hanalu wali, “Po ola mabo bidi, dago magi yagawe?” wali.
LUK 3:13 “Te takis mone sa wali gilama dolo tama naga weli pelama siyu, te dagego homugo edelama obanu sigi pigimio,” Jongo te po wali.
LUK 3:14 Enesigi bidi dabe me badu Jon pageba asama, hanalu wali, “Da da, magi yaliwe? Dago da magi egowe?” Jongo augwalibolo te po wali, “Dagego gasa bidigo mone bomo elama, sigimio, me tibo po tų elama, sigimio. Duga mabo mone deli naga sabo homu elasa siąo,” wali.
LUK 3:15 Te we bidigo bugai homu mu hodolali. Augwaligo homugo Jon te Godigo we bidi tau somai hagede sa muani bidi Krais yaliwe homu yali.
LUK 3:16 Tama tibaso, Jongo augwali tigidalibolo te po wali, “Eno dage da ąįgo naga baptais mobao. Tiali goli ena ela holai bidi deli nosali asobao. Eno agai sągą nadoba pedabo me usu me egobe. Tama te bidi agai te Godigo Tedali Mobo Bidi dage me badubolo mawaibao, te baptais mabo tiwai. Agai dage me badubolo sia mawaibao, te baptais mabo tiwai.
LUK 3:17 Nai dagalobo bidi aga savol selama, tubo nai wit ge dali sabea dali si dagalaibao. Tilama, aga te nai ge naga aga beba muyu, sabea naga te siaba muaibao. Tama te nosali asobo bidi agai te we bidi dagalu me te hasi yaibao, augwali me badu agai te sula sisąbo siaba mawaibao,” Jongo te po wali.
LUK 3:18 Te hauwa sogo haniani tųdu Jongo dwagi yai poba asiąo nama, te Godigo po pusubo sogo agai mobo maduali, te we bidibolo, dwai ebo kolesaga hasegelemai hagede Jongo tama odualio.
LUK 3:19 Tiali goli, Jongo pogo gavman tobolu bidi Herot guni pagede mu ela paludali. Te magi baso menio. Aga amago we Herodias aga dagala selama, me hauwa sogo dwai dwai sę mu iduali.
LUK 3:20 Tama Herot aga Jon kalabusiba ma muanigo Herot agadi dwai sę tomoba mu togwa pai dao.
LUK 3:21 Te Jongo tigidali we bidi baptais menama, tama nosali agai Jisas me baptais mani. Tama baptais selama, Godibolo po odubadi yaide, dagalu tomode si buga pali.
LUK 3:22 Tama Godigo Tedali Mobo Bidi dagaludu dulali. Te Godigo Mobo Noma Bidi ba hi tiwai aga toboluba dugayagasali. Dagalu badu i weyu, te po wali, “Nage eno homu kęąlubo Ogwa mu dao. Eno nage dali dwagi yai homu elalubao,” te po wai.
LUK 3:23 Te bidi Jisas agai kibu be bidi sese deli olama, me bidigo nogo si wagi sobadi, te 30 yia wabode aga sę ebo gagalalio. Tigidali we bidigo homugo Jisas Josepgo ogwa daba homu yali. Tama Josep aga aya Heli. Heli aga aya Matat, Matat aga aya Livai.
LUK 3:24 Livai aga aya Melki, Melki aga aya Janai, Janai aga aya Josep.
LUK 3:25 Josep aga aya Matatias, Matatias aga aya Amos. Amos aga aya Nehum, Nehum aga aya Esli, Esli aga aya Nagai.
LUK 3:26 Nagai aga aya Mat, Mat aga aya Matatias, Matatias aga aya Semen, Semen aga aya Josek, Josek aga aya Joda.
LUK 3:27 Joda aga aya Joanan, Joanan aga aya Resa, Resa aga aya Serubabel, Serubabel aga aya Sealtiel, Sealtiel aga aya Neri.
LUK 3:28 Neri aga aya Melki, Melki aga aya Adi, Adi aga aya Kosam, Kosam aga aya Elmadam, Elmadam aga aya Er.
LUK 3:29 Er aga aya Josua, Josua aga aya Elieser, Elieser aga aya Jorim, Jorim aga aya Matat, Matat aga aya Livai.
LUK 3:30 Livai aga aya Simeon, Simeon aga aya Juda, Juda aga aya Josep, Josep aga aya Jonam, Jonam aga aya Eliakim,
LUK 3:31 Eliakim aga aya Melea, Melea aga aya Mena, Mena aga aya Matata, Matata aga aya Natan, Natan aga aya Devit,
LUK 3:32 Devit aga aya Jesi, Jesi aga aya Obet, Obet aga aya Boas, Boas aga aya Salmon, Salmon aga aya Nason.
LUK 3:33 Nason aga aya Aminadap, Aminadap aga aya Atmin, Atmin aga aya Arni, Arni aga aya Hesron, Hesron aga aya Peres, Peres aga aya Juda.
LUK 3:34 Juda aga aya Jekop, Jekop aga aya Aisak, Aisak aga aya Abraham, Abraham aga aya Tera, Tera aga aya Nahor,
LUK 3:35 Nahor aga aya Seruk, Seruk aga aya Reu, Reu aga aya Pelek, Pelek aga aya Eber, Eber aga aya Sela.
LUK 3:36 Sela aga aya Kainan, Kainan aga aya Arpaksat, Arpaksat aga aya Siem, Siem aga aya Noa, Noa aga aya Lamek.
LUK 3:37 Lamek aga aya Metusela, Metusela aga aya Enok, Enok aga aya Jaret, Jaret aga aya Mahalalel, Mahalalel aga aya Kainan.
LUK 3:38 Kainan aga aya Enos, Enos aga aya Set, Set aga aya Adam, Adam aga aya God dao.
LUK 4:1 Jisas tigide Godigo Tedali Mobo Bidi pągąnaluali. Tama Jisasgo te Jordan pabo ąį taga pelama, ma geasa pali. Tama Godigo Mobogo aga te bidi meni yai buluba odasa pali.
LUK 4:2 Jisas te bidi meni yai buluba pelama bidibadi yaide, Sarere a naga olama, a naga sogo, te 40 dei bidai elalubadi, Satango Jisasbolo dwai sę yanama sinayagasali. Te sogo usu nama Jisasgo nai munu me tubeo. Tama te sogo silibo si, Jisas nasi yali.
LUK 4:3 Tibaso, Satango agabolo wali, “Nage Godigo Ogwa da wida, teda nago wele elewibolo po olama, tubo nai gagagi sobaso da, nage tuao.”
LUK 4:4 Tiali goli, Jisasgo agai po wei ponoyu, te po wali, “Woo, Godigo bukude wali po e tiwai po wai dao, ‘Te tubo nai bretgo naga te bidi bidabo ula magobeo.’”
LUK 4:5 Nosali Satango Jisas odasa holama, polo tama tigidali we bidi tǫde bidibo ola mani.
LUK 4:6 Satango te po wali, “Te tigidali we bidi tonalubo bomo me, genuai nogi me, nagebolo naga mawaibao. Te tigidali nai eno tonalubo dao. Eno gasa bidibolo maiabo homu ebaso da, mawaibao.
LUK 4:7 Nago enabolo kidu tǫba polama, enabolo lotu po weyu da, teda te nai dabe naga saibao,” Satango te po wali.
LUK 4:8 Tibaso, Jisasgo wei ponoyu, te po wali, “Woo, Godigo bukude wali po e tiwai po wai dao, ‘Nago naga Genuai Bidi God dali naga lotu po weyu aga dologode bidao. Tama nago agai sę deli naga dąų olama yao,’ te po wai dao,” Jisasgo te po wai.
LUK 4:9 Nosali Satango Jisas Jerusalem Moni Lotu Be tempel poa pali daiba mu sela holali. Tama Satango te po wali, “Nage Godigo Ogwa da wida, edu aba samanao.
LUK 4:10 Godigo po wali bukude te po wai dao, ‘Godigo aga ensel dabebolo olama, nage saboa sagasaibao,’ te po wai dao.
LUK 4:11 Tama te bukude me te po wai dao, ‘Augwa nogogo nage tola selama, elewigo nage me sągąde me selegobeo,’ wai dao,” te po wali.
LUK 4:12 Tiali goli, Jisasgo wei ponoyu, te po wali, “Te bukude po tama telalubao, ‘Nago Genuai Bidi God olo subigila usu sigio, sinagio. Aga te nago God dao,’” te po wali.
LUK 4:13 Satango tama sinana bilali dobaso, Jisas aga taga pali, me sogo ma sinawainu yai.
LUK 4:14 Te Godigo Tedali Mobo Bidigo bomode Jisas ma pelama, Galili tǫba sabolali. Aga asali po te bulude mu pagia pali.
LUK 4:15 Hauwa sogo Jisas agai po te Juda dabego bomo yai po ola mabo be dabede te we bidibolo ola madu geani. Tama tibaso, tigidali we bidigo aga nogi ugwaba sali.
LUK 4:16 Te bidi Jisas polobadu aga dwasianu badi bidama, gomunai yali pesage te Nasaret be nani tomoba palio. Te Sabat sogo aga te Juda dabego bomo yai po ola mabo beba pidu bogia. Tama tede aga te Godigo wali po buku po nedai hagede, dolalugulali.
LUK 4:17 Augwaligo agabolo polobadu Godigo po pusa mabo profet bidi nogi Aisaiago asęani po buku nedao olama mawai. Tama agai te buku dagalama, po e tama asęai suali, augwalibolo haninama nedali.
LUK 4:18 “Genuai Bidigo Mobo Bidi ena dali bidibao. Agai dwagi yai po eno te nai meni yai we bidibolo ola momainu ena sa muai dao. Agai ena tama po pupusu bilimainu tagala palai dao, ‘Dage kalabus yali bage kalabus tagala piąo. Gedu widai bage, dage duga gedugo ma sueibao.’ Kalabus sęgo tabibo bage augwaligo sę togolomainu agai ena tagala palai dao.
LUK 4:19 Genuai Bidigo e tǫde bidibo we bidi ma sagasabo bodolu magayagasobaso, pupusu bilimainu ena tagala palali,” te asęani po Jisasgo haninama nedali, aga digi aga homugo tiyai.
LUK 4:20 Te Jisasgo te buku ma mesegelama, te buku tonalubo bidibolo menama, aga dugagulali. Tama te be tomode bidali we bidigo aga naga tonono yali.
LUK 4:21 Tibaso, agai te po wabo gagalali, “Megi tama te eno nedali po dolo tų sisu pabo po duga te odali dao,” te po wali.
LUK 4:22 Te we bidi tigidali augwaligo Jisas nogi ugwaba sali, tama Jisasgo dwagi yai po pusalide augwali tigidali noma sali. Tiali goli, augwaligo te po wali, “Mena tamawe, e bidi da, Josepgo ogwa meni yali wenagao,” te po wai dao.
LUK 4:23 Te Jisasgo augwalibolo te po wali, “Mu tama, dagego enabolo hasia bolo te po waibao, ‘Dokta bidi, naga digi naga ma geseleyu yao. Nago bulu me nogi Kaperneamde yali sę po dago odai dao. Tama naga te yaligia nage e pesagede me ma tama tiao,’ dagego enabolo waibao.”
LUK 4:24 Jisasgo wei ponoyu, te po wali, “Eno dagebolo mu tama te obe dao, Godigo po ola mabo bidigo po aga bulude bidu wabo, aga te bulu bidigo mu tama odobo menio.
LUK 4:25 Eno dagebolo mu tama obe dao, Godigo po pusa mabo bidi Elaija bidali sogo, kibu be sela olama, me kibu be tomode togolama, tulubage munu me tulai menio. Tigidali pesagede nasi ela pai dao. Te sogo Israel hani wilawe we hauwa mu bidai dao.
LUK 4:26 Tiali goli, Godigo Elaija te Israel hani wilawe we me tau somainu teba pao wai menio. Tiali goli, te Israel hani isąwai bage Saidon tǫde, Sarefat be nani we wilawe deli bidibo madi naga tau sigi pao wai dao, Godigo.
LUK 4:27 Me Godigo po pusa mabo bidi Elaisa bidali sogo, Israel bage oiyabe bidi hauwa bidai dao. Tiali goli, augwali me deli ma geselai menio. Me ma, te Israel hani isąwai oiyabe bidi me deli bidai, te Siria tǫde. Agai nogi Naman. Te oiyabe bidi deli digi Elaisago ma geselai dao,” Jisasgo te po wali.
LUK 4:28 Te Juda dabego bomo yai po ola mabo bede bidali bagego te po odoyu, moni sębę yali.
LUK 4:29 Augwali hodaluama, Jisas nogo tuluama, aga te be nanidu kegasa pelama, buluba sąyani. Te be nani dude sę yai dao. Tama augwaligo te sau mabo dageba Jisas odasa pali, te sauba sąwai hagede.
LUK 4:30 Tiali goli, Jisas aga te bidi hauwa tomo agebeledu dią sesa palima, aga polo palio.
LUK 4:31 Te bidi Jisas Galili bulude be nani me nogi Kaperneamba dulali. Tama te Sabatde we bidi Godigo po ola maduali, te Juda dabego bomo yai po ola mabo be tomode.
LUK 4:32 Tama agai po bomo yai mu wabo odama, te we bidi noma sali.
LUK 4:33 Te be tomode bidi me dwai haubo dagawai bidi bididuali. Agai moni hai olama, te po wali, “Tega Jisas, nage Nasaret bidi da.
LUK 4:34 Nage dabolo magi sę yainu asaliwe? Nage da dolainu asaliwe namao. Eno nage koneani. Nage Godigo gasagi yai tedali wiegi yai bidi da,” wali.
LUK 4:35 Tama Jisasgo agai po tomode togwa sąyu, te po wali, “Nage sagiasa peyu, te bidi taga soao,” wali. Tama te dwai haubogo te bidi augwali tomode te tǫba sąyani. Tama te dwai mobogo taga pelama, te bidigo tigi me dolobe.
LUK 4:36 Tibaso, tigidali we bidi midigi yali. Augwa hasi ugwa tono, eda tono eyu, te po wali, “E ma, magi po wagawe? Dwai haubobolo bomo elalubo bidigo wabo po gagawai wabo yabao. Te po odama, wabo po selama, te dwai haubogo te bidi taga pobao,” te po wali.
LUK 4:37 Jisasgo tama tiali po te bulu tigidali bila similali.
LUK 4:38 Te Jisasgo te Juda dabego bomo yai po ola mabo be taga pelama, tama Saimongo be tomoba pali. Saimon aga au tigi moni posolo gasigo mu isai sęai pila muani. Te we tau somainu eyu, augwaligo Jisas i wali.
LUK 4:39 Te we pageba Jisas aga dolalugi pelama, “Te dwai gasi, nago te we taga pao,” Jisasgo te po wali. Te po obaso, te gasigo te we taga pali. Tama tilama, te we polo tama ma hogoda sanama, be page asali bidi dabe nai ula mabo sę ela bilali.
LUK 4:40 Te giliga ge aba degasaide, te gasi yali bidi aga abagi dedego augwali Jisas aga pageba odasa aselawali. Tama agai nogo te gasi we bidi dononama, mumuna bilali. Tama augwali tigidali ma gesa pali.
LUK 4:41 Dwai haubo dabego we bidi hauwa taga pali. Tama te dwai haubo dabego hai olama, te po wali, “Nage Godigo Ogwa dao.” Augwaligo koneani, Jisas te Godigo we bidi tau somainu sa muani bidi Krais da. Tama tibaso, augwaligo te po te we bidibolo waidali weyu, agai augwaligo po tomode togwa sąyani.
LUK 4:42 Te sogo do kigamu hulide mu Jisas hogoda sanama, bidi meni yai buluba mu pali. Nosali te we bidi augwaligo gegali digi sulama, augwali taga pidali weyu, “Jisas, nage ede bidao,” wali.
LUK 4:43 Tiali goli, agai wei ponoyu, te po wali, “Godigo eno sę emai hagede, tagala palali sę gasa hanuba me egi pabo elalubo. Godigo we bidi tonaluabo po pupusa memena bilabo sę elalubo,” te po wali.
LUK 4:44 Tama aga te po Juda dabego bomo yai po ola mabo be dabe tomode ola maduali, te Juda dabego tǫde.
LUK 5:1 Te me sogo Jisas te Genesaret sigi ąį sesegede dolalubadi, Jisas aga pageba Godigo po odainu we bidigo mu odoga sagasalio.
LUK 5:2 Tama Jisasgo te geba si sigi ąį bogo badu gebeadubo suali. Tiali goli te sųgų sabo bagego geba osogo tagalama, augwa te agane togobo nai umben ąį teladualio.
LUK 5:3 Jisas aga Saimongo geba meba hola pali. Agai te Saimonbolo “Te geba sigi ąį tomoba ugwaba dwanu pogwa palao,” te po wali. Tama aga te geba daide duguladu, te we bidibolo Godigo po pusa mabo dage ma wadolali.
LUK 5:4 Agai te po pusa silama, Saimonbolo te po wali, “E geba sigi ąį tomoba ugwanu ma nogelama, duga sųgų sainu da, te agane togobo wa umben te ąįba tuliagameo.”
LUK 5:5 Saimongo wei ponoyu, te po wali, “Genuai Bidi, moni huli sesabi dago yabo sę iduali goli, te sųgų deli munu me sai menio. Tiali goli, nago po obaso da, eno agane wa te ąįba tuluaibao,” wali.
LUK 5:6 Tama augwaligo te agane togobo wa dabe ąįba tulama, sųgų umabo mu tualigo te agane wa pąde togwa pai sę yanio.
LUK 5:7 Tama tibaso, augwa gasa gebade bidali age dabe me badu ma augwali tau sagasomainu i wali. Tama augwali aselama, te geba si sųgųgo pągąnani. Tebadi yaide, te geba si te węba hoa sigulainu sę yanio.
LUK 5:8 Tama Saimon (me sogo Pita wabo bidi) agai te tebo sulama, Jisasgo sągą pagede aga kidu sugunama, Jisasbolo te po wali, “O Genuai Bidi, nago ena taga pao. Ena da, dwai sę ebo bidi dao,” te po wai.
LUK 5:9 Agai augwaligo te sali sųgų sulama, noma mu sali. Aga dali bidali bidi dabe me noma mu sali.
LUK 5:10 Bidi me nogi me Sebedigo ogwa si Jems dali Jon dali si me, Saimon aga age solo da. Augwali si me moni noma sali. Tama Jisasgo Saimonbolo te po wai, “Nage wi egio. Nosali nago we bidi siyu tama tiwaibao,” te po wali.
LUK 5:11 Tama te geba si ąį saniba ma nogelama, tigidali nai dabe tede tagalama, augwali tigidali Jisas wali pela sialio.
LUK 5:12 Me sogo Jisas be nani me delide bidibadi yaide, oiyabe gasi sai bidi aga pageba asali. Te oiyabe gasigo aga tigi sibi tigidali mu usu nai bidi da. Te bidigo Jisas sulama, kidu sugunama, agai Jisasgo bomo gonobo po weyu, te po wali, “Genuai Bidi, nago homugo usu dao wida, teda nago ena wiegi yai ma ilama tama ena te meda meni yai tiwai ma bidaibao,” te bidigo te po wai.
LUK 5:13 Tama Jisasgo nogo debelama, te bidi tigiba diąyu, te po wali, “Awe, eno homugo nage gasi usu ilaibao. Tama nage wiegi yai pedalao, te meda meni yai bidi bidao,” Tama te sogo polo tama te bidi dwagi yai ma yali.
LUK 5:14 Tama Jisasgo te bidi aga dali te po wali, “Bugagia dua dao. Nago bidi me deli dali eno nagede yali sę po me wagio. Menio. Nage dolo pelama, tama nago tigi te pris bageba waseligi pelama, tama agai nago tigi osola sumainao. Te elama, tama nago te Godibolo te ofa mao, te bidi Mosesgo te kolesaga yao wali po tiwai gilama emainogo yao. Tama tiyu te bidi dabego koneyu, te nago gasi silali, nage te meda meni yai bidi tiwai megi ma bidibao, te homu augwaligo yaibao,” Jisasgo te po wai.
LUK 5:15 Jisasgo agade “Po pusulamuo” po wai goli, agai yali sę po pususu paligo ugwa genia palio. Tama umabo we bidi aselama, agai wabo po odagasali, agai augwaligo gasi dabe sela sąmainu yai.
LUK 5:16 Tiali goli, hauwa sogo agai te we bidi dabe bidalubadi pali. Aga te bidi meni yai sesawai digiba pelama, agai Godibolo gedu haluasa po wagi pidu geduai dao.
LUK 5:17 Me sogo Jisas be me tomode bidai. Agai te we bidibolo aga po pusa mawai. Tama te Farisi hani sibi dabe me, te Godigo bomo yai po konebo bidi dabe me, augwali bidibadi, augwaligo aga tonaluali. Augwali te Galili bulu tǫ bulu tigidalidu asai, te Judia tǫdu me, te Jerusalem be nanidu me asai. Tama Genuai Bidigo te gasi dabe silabo bomo Jisasbolo mani.
LUK 5:18 Bidi mebago te nogo sągą dili kimi isai bidi te aga gologobe ni wade munama, tolasa asali. Te sela asali, te be tomoba sela pelama, te Jisas pageba muwainu yai.
LUK 5:19 Tiali goli, te we bidi hauwa mu te be tomode pągąna sai elaluali. Augwaligo sunumi gegali. Meni baso, be peduba te togobilidu holali. Te be asege be dao. Te be pedu haluali nai dagala munama, tama augwaligo te bidi aga te ni gologobe wa dali te we bidi bidibo tomoba, te Jisas bidibo digi gesabidi badu aiyaba tagalaluama mugulalio.
LUK 5:20 Jisas agai suali, te bidi dabe agai poba homu begi pai bidi dabe da. Sulama, agai te nogo sągą isai bidibolo te po wali, “Abagi, eno nago yali dwai sę sela sąyanio,” te po wali.
LUK 5:21 Tama Godigo bomo yai po page konebo bidi dabe dali, te Farisi hani sibi dabe dali, augwa hasi ugwa tono, eda tono eyu, te po wali, “E bidi magwai bidi yaliwe? E bidigo Godigo nogi dolobo po olamuo. God deligo naga bidigo dwai sę sela sąbo da.” Te po wai.
LUK 5:22 Tama Jisasgo augwaligo ebo homu koneama, agai augwalibolo po wei ponoyu, te po wali, “Dagego magi baso tama homu ebawe?
LUK 5:23 Eno po bomo elalubo dagebolo ola mawainu, te eno mena tama wagowe? Eno e bidibolo te po naga wabo si, ‘Nago dwai sę dabe sela sąyani,’ teda eno pogo bomo elalubo dagego hania konegobeo. Me ma, eno e bidibolo te po wabo si, ‘Nage hodaluama, bilao,’ tama aga hodaluama agai aga pibo somo selama hogodasa pobaso da, teda dagego eno pogo bomo elalubao waibao. Ena da, Godigo Bidi Mu da. Bidigo dwai sę e tǫde sela sąbo bomo elalubo dagego suyaganio,” wali. Tama agai te nogo sągą isai bidibolo te po wali, “Eno nagebolo obe dao, hodaluama, nago somo selama, beba pao.”
LUK 5:25 Polo tama, tigidali we bidigo tonalubadi yaide, te nogo sągą isai bidi hodaluama, agai odobe wa selama, beba pai. Aga beba peyu, Godigo nogi ugwaba sali.
LUK 5:26 Tama tigidali we bidi gegemani mu selama, Godigo nogi ugwaba sali. Augwali wi elama, te po wali, “Megi dago gasagi yai sę mu ebo sualio.”
LUK 5:27 Te nosali Jisas te be nani taga pobadi yaide, agai te maket takis sabo bidi me deli suali, aga ofis bede. Te bidi nogi Livai. Tama sulama, Jisasgo agabolo “Nage ena wali asao,” wali.
LUK 5:28 Livai hodaluama, agai ebo sę tagalama, Jisas wali pali.
LUK 5:29 Tama Jisas moni nogi elalubaso, Livaigo agai bede nai ulubaso, te takis sabo bidi hauwa mu dali, te gasagi yai bidi dabe me, augwali te nai tuagasali.
LUK 5:30 Tama te Farisi hani sibi bidi dabe me, te Godigo bomo yai po konebo bidi dabe me, augwaligo te sulama, Jisas wali pabo bidi dabebolo wado po weyu, te po hanalu wali, “Dage te takis sabo dwai bidi dabe me, te dwai sę ebo dabe me, te augwali dali hodobo magi baso nai tubawe?”
LUK 5:31 Jisasgo augwalibolo po wei ponai. Dwai dwai sę ebo bidi dabe te gasi bidi dabe ąǫ elalubaso, Jisasgo tama po digi sugunuyu te po wali, “Gasi meni yai bidi te dokta bidi pageba pabo menio. Gasi yai bidi naga te dokta bidi pageba pabo dao.
LUK 5:32 Ena te homu doloba pai bidibolo ‘Nage homu begalao’ po wagasobeo. Te meni. Ena te dwai sę ebo we bidibolo ‘Duga homu begeleąo’ po wagasali,” te po wali.
LUK 5:33 Te Farisi hani sibi me, te Godigo bomo yai po konebo hani bage dabe me, augwaligo Jisasbolo te po wali, “Te bidi Jon aga wali pabo bidi dabe augwaligo tubo nai gisilama, Godibolo po wabo dao. Tama te Farisi hani sibi wali pabo bidi dabe me, augwaligo me tebo sę gilalma ebo dao. Tiali goli, nago bidi dabe augwaligo te nai gisilibo sę ebo menio. Augwa nai me wę me tudubo dao,” wali.
LUK 5:34 Tama Jisas aga dali aga wali pabo bidi dabe me, tebadi agai te we sabo bidide po begelama, wai. “Te bidi mego we sabo sogode, dagego aga abagi solobolo ‘Nai osogo gisiliąo’ po wabo menio. Magi baso meni. Te we sabo bidi augwali dali bidibo sogo augwali bugai homu ebo dao.
LUK 5:35 Tama nosali me sogo te boi bidi dabego te we sabo bidi gasa buluba sela pelama, aga age solo homu dene ebaso, te sogo nai osogo gisilabo sogo pedelaibao,” Jisasgo te po wali.
LUK 5:36 E po begelai po digi po me Jisasgo augwalibolo pusa mayu, te po wali, “Bidi mego me gesi ugwa nami pisalama, pobidi badia pai ugwa nami me hobologobeo. Mego tama teyu da, aga te gesi ugwa pisawaiba, tama gesi ugwa te pobidi ugwa ma gagagobeo.
LUK 5:37 Ma mego me te gesi bomai wain wę te poloba sipsip tigiwaliba tabigobeo. Mego te eyu da, te gesi bomai wain węgo te sipsip wali aulua sanama, buluba gea paibao. Tama te sipsip wali aulua pelama, doaibao.
LUK 5:38 Gesi bomai wę te gesi sipsip waligo nigali botolba tabiao.
LUK 5:39 Te bidi mego te polobadu muai bomai ąį tulama, gesi bomai ąį ma tuabo homu ebo menio. ‘Polobadu muani bomai ąį da usu da,’ te po wabo da,” Jisasgo te po wali. Te po weyu, agai te Farisi bagebolo te po page wąį hagede, te poloba po dali, te gesi po dali te si augwaligo taluamuo.
LUK 6:1 Me sogo Sabatde te Jisas me aga dali bidali bidi dabe me, augwali te gi tomodu pali. Tama te gide te rais tiwai nai wit holobo gi dao. Tama augwali pobadi, te bidi dabe augwaligo te wit ge togolama, nogogo pelegelama, te sabea wali ma te agau buluba tedela sąnama, te ge dabe tubo gagalali.
LUK 6:2 Tama Farisi hani sibi dabe me badu tede bidali. Augwaligo te sulama, te po hanalu wali, “Te dena bomo yai pode tama po wabo da, ‘Sabat sogode sę egio.’ Tama te po wai goli, dagego e sę magi baso ebawe?” wali.
LUK 6:3 Tama Jisasgo augwalibolo te po wali, “Te dagego te dena nǫų bidi nogi Devitgo yali sę po dagego nedebewe? Me sogo aga me, aga dali bidali bidi dabe me, augwali nai sili bidibadi tama moni nasi eyu bidali. Tama tibaso Devitgo Godigo lotu be tomoba pelama, te Godigo gesabide muani bret selama tuali. Aga hani dabego me tuali. Tiali goli, te bret te habu selai elaluai, tama te pris dabego naga tubo usu yaibao wai, te bomo yai pode. Tiali goli te bret augwaligo me tuali digi, Godigo gedude dwai sę ebeo. Dagego te asęani po nedebewe?”
LUK 6:5 Tama Jisasgo augwalibolo te po wali, “Ena da, te Godigo Bidi Mu da. Ena da, te Sabat sogode te genuai bidi dao. Tama tibaso, bidigo Sabatde mena sę yagameo te eno waibao,” wali.
LUK 6:6 Te me sogo Sabatde Jisas te Juda dabego bomo yai po ola mabo be tomoba pelama, we bidibolo po ola mani. Tama tede te dolo nogo penenai bidi me deli bidai.
LUK 6:7 Tama te Juda dabego bomo yai po konebo bidi dabe me, te Farisi sibi dabe me, augwaligo Jisas gedu diliasa tonaluali. Magi ebowe weyu, te Jisas po tų ela mawai hagede te page gegali. Augwaligo Jisasgo te Sabatde te nogo dwai bidi dodologowe weyu, tonaluali.
LUK 6:8 Tiali goli, aga digi te bidi dabego ebo homu koneani. Tama agai te nogo penenai bidibolo te po wali, “Nage holaluao, te we bidi bidiboma teba tomoba dolaluagasao,” wali. Tama te bidi hodaluama, we bidi tomode dolaluagasali.
LUK 6:9 Tama Jisasgo te tonaluali bagebolo te po wali, “Te eno dagebolo hanalu obao, dago Sabatde dwagi yai sę yaibawe? Dago bomo yai po dabego mena po wabo dawe? Dago bidi dolabo sę yaibawe, ma dago tau saibawe?” te po hanalu wali.
LUK 6:10 Tama agai te bidi dabe gedu tonono biliama, te nogo penenai bidibolo te po wali, “Nago nogo debelao.” Tama te bidigo tama tilama, agai nogo bugagia ma gesa soali.
LUK 6:11 Te bidi Jisasgo te nogo dwai bidi ma dodolobo sę ebo tononaluali bidi dabe da, te bomo yai po konea pai bidi dabe me, te Farisi hani me augwaligo te sę ebo sulama, moni sębę eyu, guni bula salio. Augwa hasi augwaligo te bidi Jisas mu ela muabo sunumi gegabo po mibo po gagalobo sę yalio.
LUK 6:12 Te sogo Jisasgo Godibolo po wainu eyu, tama bulu duba holama, moni huli sesabi Godibolo po udali.
LUK 6:13 Tama te be posobo si, aga wali pabo we bidi aga pageba i olama, agai te bidi dabe nogo si olama, sągą me badu si dąį ilali. Tama nosali agai te bidi dabe “Eno tagala palabo bidi dabe da” wali.
LUK 6:14 Tama te bidi dabe nogi e dao, me Saimon (Jisasgo aga nogi Pita poai), me bidi nogi Andru, te Saimon aga amanu. Me bidi si nogi Jems me Jon.
LUK 6:15 Me bidi si nogi Filip, me Bartolomyu, me bidi si nogi me Matyu, me Tomas. Me bidi nogi Jems, te Alfiusgo ogwa da. Me bidi nogi Saimon, agai nogi me Selot.
LUK 6:16 Bidi me aga nogi Judas, te gasa bidi Jems aga ogwa dao. Gasa bidi aga nogi Judas, aga te Keriot bulu bidi dao. Nosali te bidigo Jisas te boi bidi nogoba muani, Jisas po hwa pabo bidi.
LUK 6:17 Te Jisas te bulu dude bidama aiyaba ma dulai, aga tagala palabo bidi dabe dali dulali. Tama dulama, augwali te bulu odogo tǫ maluba sabolama, te aga hanide po pusali. Tama umabo we bidi aga pageba asali. Augwali me badu te Judia tǫdu asai, me badu Jerusalem be nanidu asai, me badu te nabis bulu sidu asai, me nogi Taia, me nogi Saidon, tedu me asali.
LUK 6:18 Augwali Jisasgo ola mabo po odagasai. Te gasi yai bidi dabe bugagia dodolomai hagede asai. Me badu we bidi dwai haubo bidibo we bidi aselama, Jisasgo te dwai haubo sela sąyu, “Te dage pao,” wali.
LUK 6:19 Jisas agai bomogo gasi yai we bidi hauwa usu ilibaso, mebago me Jisas agai tigi diąwainu yali, augwali dwagi yai ma emai hagede.
LUK 6:20 Te Jisasgo aga hani bidi dabeba tonono bilama, te po wali, “Te dage nai meni yai we bidi, bugai homu iyąo. God da dagego tobolu bidi dao.
LUK 6:21 Dage megi nasi ebo bage, dage bugai homu iyąo. Dage nosali tabiaibao. Dage megi gela wabo bage, dage bugai homu iyąo. Nosali duga gisugu waibao.
LUK 6:22 Megi dagego ena te Godigo Bidi Mu wali pobaso gasa bidigo dage dali sesanobo po weyu, dage buluba gudula palu, dage bidasabo po dwai weyu, dage dwai bidi dao obaso da, teda dage bugai homu pemene yao.
LUK 6:23 Magi baso meni, dage bugai homu elama, gawi iyąo. Tama tibaso, dagebolo maiabo nai genuai mu te dagalude elalubo. Dagebolo tama sę ebo bage augwa nǫų dabego me Godigo po ola mabo bidi dabebolo me polobadu tama teduai dao.
LUK 6:24 Tiali goli, dage megi nai hauwa munalubuo we bidi dabe dwai side bidaibao. Duga homu tegaluama, bugagia bidali sogo te ela pali dao.
LUK 6:25 Te nai dabe megi elalubo bage, dage dwai side bidaibao. Nosali duga nasi yaibao. Te megi gisugu wabo bage, dage dwai bede bidaibao. Nosali dage moni homu dene elama, gela waibao.
LUK 6:26 Tama tigidali we bidigo dage kegenano baso da, nosali dwai bede bidaibao. Augwa nǫųgo me te tiwai po naga tibo po pusa mabo profet bidibolo tebo po udai dao,” Jisasgo te po wali.
LUK 6:27 Te Jisasgo te po ma wadolu, te po wali, “Megi dage eno pusubo po odalubo bidi dabe, dagebolo eno megi e po pusubao. Dagego boi bidi dali dwagi yai homu eyu, dage sesalubo bidi dabebolo dwagi yai sę eyu iyąo.
LUK 6:28 Dage i ola mabo bidi dabebolo dwagi yai homu elama, dage dali dwagi yai homu isąbo bagede Godibolo po olama, dwagi yai homu ilabo po waiyąo.
LUK 6:29 Bidi mego nago nabogode ele baso da, me badu me elemainao. Bidi mego eda badu gulali holobo ugwa saket bomo elama sobaso da, te ugwadu tomode gudali holobo ugwa me somainao.
LUK 6:30 Mena bidi augwaligo nagebolo magi nai me mao obaso da, te nago mao. Bidi mebago nago nai bomonama sobaso da, te ena ma mao wagio, somainao.
LUK 6:31 Nagebolo gasa bidigo te dwagi yai sę emainao homu ebogia, te nago gasa bidibolo me tama tiyąo,” wali.
LUK 6:32 “Dagebolo dwagi yai homu ebo bidi dabebolo naga duga dwagi yai homu eyu da, magi baso Godigo te dagebolo dwagi yai homu yao po waibawe? Dwai dwai sę ebo bidigo me augwalibolo dwagi yai homu ebo bidi dali dwagi yai homu ebo dao.
LUK 6:33 Ma, te dagebolo dwagi yai sę ebo bidi dabebolo naga duga dwagi yai sę eyu da, magi baso Godigo dagebolo dwagi yai homu yao po waibawe? Dwai dwai sę ebo bidi dabego me te tama naga te tiwai sę ebo dao.
LUK 6:34 Dugabolo wei maiabo homu ąǫ ebo bidibolo naga te nai osogo mayu da, te magi baso Godigo dagebolo dwagi yai homu ilao po obawe? Dwai dwai sę ebo bidi dabego me te tama naga tebo dao.
LUK 6:35 Tegio. Boi bidibolo dwagi yai homu elama, augwalibolo dwagi yai sę iyąo, nai olo menama, wei ma sigimio. Genuai Godigo te agabolo nage usu dao wasiąwai bidi dabebolo me, te dwai sę ebo bidi dabebolo me dwagi yai sę ebo da. Tama tibaso, dagego te sę yalide, dage maiabo nai genuai mu nosali elalubo. Tama dage Genuai Godigo ogwa dabe yaibao.
LUK 6:36 Duga Ayago we bidi hobede elama, tau sabogia, dagego me we bidi hobede elama, tau siąo,” Jisasgo te po wali.
LUK 6:37 Jisasgo po ma wadolama weyu, te po wali, “Dagego gasa bidi dabe dagalama, augwali dwai bidi dabe da po weyu, posobo po wagimio. Tama tiyu da, Godigo dage dagalama posogobeo. Sęgę yai po dagego dobagio. God agai dagebolo sęgę yai po dobaidali weyu, dagego gasa bidibolo sęgę yai po wagimio. Gasa bidigo dagebolo dwai sę yali te sela sąnama, kegeda paliąo. Tama tiyu da, teda Godigo dagego dwai sę yali kegeda palaibao.
LUK 6:38 Gasa bidibolo nai maiąo. Godigo dagebolo me tiwaibao. Te wei Godigo dagebolo edelama, duga nogoba gelaibao. Duga gasa bidibolo mani tiwai, Godigo dagebolo ma tama mawaibao,” Jisasgo te po wali.
LUK 6:39 Jisasgo e po digi po augwalibolo pusali, “Gedu widai bidi mego me gedu widai bidi tų ola magobeo. Tama tiyu da, augwali si dali si te ąį gamia soabo dedageba tulalueibao.
LUK 6:40 Skul wai mego aga tisa ela holai elalubeo. Tiali goli, aga skul silama, sę usu selama, aga tisa dali usu si yaibao.
LUK 6:41 Magi baso nago naga amago gedude elalubo dwasianu pobele bage suai, tiali goli nago naga gedude elalubo genuai pobele bage te bǫ nami tiwai te nago magi baso subo meniwe?
LUK 6:42 Nago naga gedude te genuai bǫ nami tiwai elalubo pobele bage sela sąsiąbadi, te nago magi baso naga amabolo te po weyu, ‘Ama, nago gedude elalubo pobele bage eno sela sąwaio,’ te po obawe? Nage ugwadu homugo naga po wabo bidi, hasia bolo nago naga gedude te bǫ nami tiwai elalubo pobele bage guda sąyao. Tama tiyu nosali te nago gedu bugagia wiegi yai ebaso, teda naga amago gedude elalubo pobele bage sela sąyu guda sabode nage usu yaibao,” Jisasgo te po wali.
LUK 6:43 Jisasgo te po digi po ma wadolali, “Bugagia pua pai holai nigo du dwai walobo menio. Ma, haganawai nigo du geswai walobo menio.
LUK 6:44 Ni aga du dagego subaso da, te ni dagego konebo dao. Magi baso menio. Bidigo te sesani yai bono dilibide siga du togobo meni.
LUK 6:45 Sesani yai bono dilibide me bobi dabe togobo meni. Geswai bidigo aga homude pągąnalubo dwagi yai sę ebo dao. Dwai bidigo da, aga homude pągąnalubo dwai sę ebo dao. Bidi aga homude pągąnaluai po aga pedauwaligo wabo dao,” Jisasgo te po wali.
LUK 6:46 Te Jisasgo te po digi po ma wadolu, te po wali, “Te dagego eno yao wali sę isąnama, magi baso enabolo ‘Dago Genuai Bidi dao’ po ola obawe?
LUK 6:47 Eno wabo po odagasama, wali pabo bidi da, mena tama tiwai yali wenama sumainu, ola mawaibawe?
LUK 6:48 Aga be sę eyu, be beli ni aiyanu mu diganama, masigi daiba bululama, sę yani bidi ąǫ, te elalubao. Te be sęnama, nosali te pabo ąį asobo si, te be degelebe, te be degebe. Magi baso meni. Te be sę yani bidigo gisiga sę yai eyu, degebe.
LUK 6:49 Tiali goli, eno po odama, wali pisąbo bidi da, te bidi aga be beli ni bugagia bulisiąwai digi, wę asiyu pogolobode polo mu pagesa soali. Tama te be mu dolali,” Jisasgo te po wali.
LUK 7:1 Te Jisasgo we bidibolo te po pusa silama, nosali Kaperneam be nani tomoba pali.
LUK 7:2 Te Rom ami genuai bidigo te 100 ami bidi dabe tonalubo bidigo te aga dali homu kęą pelama sę ebo bidi isai hagede seanio.
LUK 7:3 Tama te ami genuai bidigo Jisas te Kaperneam hanude bidibo po odama, te Juda dabe tobolu bidi me badu tagala palali. Jisas asama, aga sę ebo bidi dwagi yai ma ilaimainu, te bidi dabebolo Jisas oda sigi piąo wai.
LUK 7:4 Tama te Juda tobolu bidi dabe Jisas pageba sabolama, Jisasbolo hanalua suali. Augwaligo agabolo te po wali, “Te Rom ami genuai bidi dwagi yai bidi da. Agai da Juda dabe dali homu kęą pabo da. Agai dago bomo yai po ola mabo be sę ebo agai masigigo da tau sali. Tama tibaso, nago agai dwagi yai sę wei ponao,” augwaligo te po wali.
LUK 7:6 Tama Jisas augwali hodobo pali. Jisas te bidigo be pąde asobadi yaide, te bidigo aga abagi dabe tagala palama, Jisasbolo te po wagi pali, “Genuai Bidio, nage eno beba asomaina homu ebo tiwai egobeo. Ena geswai wiegi yai bidi menio. Ena genuai bidi meni yai baso, nage eno beba asobo usu egobeo.
LUK 7:7 Tama tibaso, ena me ena digi nage pageba asobo homu ebeo. Tiali goli, nago po naga wao, eno sę ebo bidi dwagi yai eyu gesa paibao. Ena me gasa bidi dabego bomo dologode bidibo bidi dao.
LUK 7:8 Ena me te ena genuai nogi elalubo bidigo tonaluyu bidibo dao. Tama eno digi te ena ami bidi dabe te ena dologode augwali bidibo dao. Tama eno me delibolo te po weyu, ‘Nage pao’ obaso da, teda aga pabo dao. Tama eno gasa bidi me dali te po weyu, ‘Nage asa’ wali da, teda aga asobo dao. Tama eno ena sę ebo bidibolo te po weyu, ‘Nago te sę yao’ obaso, teda agai te sę ebo dao,” te Rom ami genuai bidigo te po wai.
LUK 7:9 Tama te po wali Jisasgo odama, noma sali. Tudiba begelama, aga wali asali we bidibolo te po wali, “Te Israel bage tomode me Godibolo tama tiwai homu ebo bidi eno me suai menio. Megi dagebolo te mu po obe dao,” te po wali.
LUK 7:10 Te ami genuai bidi aga po sela asali abagi dabe te ami genuai bidigo beba ma begasa pelama, te sę ebo bidi bugagia ma bidibo suali.
LUK 7:11 Te bidi tau sali, te sogo do Jisas be nani me nogi Nainba pali. Aga wali pali bidi dabe me, umabo we bidi me aga dali pali.
LUK 7:12 Te be naniba sabaligi pobadi, te isai bidi me deli te pubaligi peyu tolasa soabo sualio. Te isali bidi wilawe wego ogwa deli digi tama pubaligi su sobaso, aga ida me we bidi me hauwa wali asali.
LUK 7:13 Tama Genuai Bidigo te wilawe we sulama, moni hobede mu eyu, “Gela wagio” wali.
LUK 7:14 Nosali Jisas aga pelama, te isai bidi muani ni gologobe wa diąbadi, te ni gologobe wa tolasa asali bage dolaluali. Tama “Ogwa bidi, hodaluao, eno mu po nagebolo tama obe dao,” Jisasgo te po wali.
LUK 7:15 Tama te isali bidi hodaluama, po wabo gagalobadi, Jisasgo aga idabolo ma mani.
LUK 7:16 Tama te tigidali we bidi moni wi elama, augwaligo Godigo nogi ugwaba sali. Augwaligo te po wai, “Moni Godigo po ola mabo bidi da tomode megi e pedaligulai yabao. God aga we bidi tau sagasu, te asai yabao.”
LUK 7:17 Jisasgo te tiali po tigidali Juda dabego buluba me, te bogo badu elalua pabo buluba me, pela silali.
LUK 7:18 Te Jon aga wali bilibo bidi dabego Jisasgo ebo sę suali po Jonbolo pusa mani.
LUK 7:19 Tama Jon aga wali bilibo bidi si i wali. Tama te bidi sibolo “Genuai Bidibolo hanalugi pao,” wali, “‘Nage Jongo te nosali asaibao wali bidi dawe, ma gasa bidi me asobo dago tonaluaibawe?’” Jongo tama Jisasbolo wao po wali.
LUK 7:20 Tama tega si Jisas pageba asiyu, “Te we bidi baptais mani bidi Jongo dadi si nage pageba nage te asaibao wali bidi nage tama dawe, ma gasa bidi me tonaluagawe, po omainu dadi si tagala palalio,” te po wali.
LUK 7:21 Te sogo naga tama Jisasgo olo gasi me, dwai gasi mu me, te dwai noma bidi elalubo bidi me dwagi yai ma ilali. Tama gedu widai we bidi me gedu ma pedalali.
LUK 7:22 Te po obaso, Jisasgo augwalibolo te wei ponoyu te po wai, “Dage pelama, Jonbolo te tigidali sę dagego odali po me te suali sę me te po tigidali agabolo wagi pao. Dagego e subao, te gedu widai bidi dabe augwali gedu usu ma iliyu, te sągą dwai bidi dabe augwali bugagia ma bilibo dao. Te oiyabe yai bidi dabe augwali tigi wiegi yai pedaliyu, tama olo degai bidigo po ma odobo dao. Te isai bidi dabe augwali ma hodaluyu, tama te magi nai meni yai bidi dabe augwaligo te Godigo wiegi yai gesi po odobo dao.
LUK 7:23 Tama bidi enade homu si isiąma tama ena aga tudiba musiąbo bidi, te bidi aga wiegi yai homu pemene yao,” Jisasgo te po wai.
LUK 7:24 Tama tede bidali we bidibolo Jisasgo te po hanalu wali,” Polobadu dage te bidi meni yai buluba pali, te bidi Jon dagego sugi pali, te dagego magi nai sugi paliwe? Ma, dagego te awi dili me deli, te waligo memenege ilibaso sugi paliwe? Menio.
LUK 7:25 Te menio. Magide suainu pai dawe? Wiegi yai ugwa gudali bidi dagego sugi paliwe? Te menio. Te tobage ugwa gudalubo bage, te doado bage umabo munalubo dabe, augwali te genuai gavman tuni bidigo wiegi yai be dabede bidibo dao, te bidi meni yai bulude meni.
LUK 7:26 Tiali goli dage magi baso pai dawe? Ma, te Godigo po pusubo profet bidi me deli sugi pai dawe? Awe, eno dagebolo obao, e Godigo po pusubo profet bidigo da, agai te gasa te Godigo po pusali profet bidi dabe te tigidali aiyaba elalualio.
LUK 7:27 Te Jon agade te gasa profet bidigo Godigo wali po polobadu asęai dao, ‘Suao, te eno po pusabo bidi tagala palobaso, tama aga nage asabo digi polasa paibao. Agai nago tų sisi iligi paibao.’
LUK 7:28 Ma wadolu, Jisasgo te po wali, “Eno dagebolo obe dao, e tǫde ame nabo we bidi tigidali Jongo aiyaba elalualio. Tiali goli, te Godigo obo tomode bidibo moni nogi meni yai bidi me agai nogigo te Jon aga moni nogi aiyaba elaluaibao,” Jisasgo te po wali.
LUK 7:29 Te bidi Jongo baptais mani we bidi dabe me, te baptais sali te takis sabo bidi dabe me, augwaligo Jisasgo wali po odolama te homu yai, Godigo mu po dolo wali da homu yalio.
LUK 7:30 Tiali goli, te Godigo augwali tau sainu yali homu Farisi sibi dabe me, Juda dabego bomo yai po ola mabo bidi dabe me, augwaligo te homu sela sąnama, “Jongo da baptais mabo hagelabo,” te po wai dao.
LUK 7:31 Ma wadolu, Jisasgo te po wali, “Dage megi bidalubo bage magideba usu nagawe? Dage magi nai tiwai yagawe?
LUK 7:32 Dage da, te maketde gagali ebo wai puluba ąǫ, te elaluba. Te wai puluba mego hai ulugu weyu, ‘Dago ona sulubadi goli, dagego tęąbi ebe. Me ma, dago gela obadi goli, dagego gela wabe.’ Magi baso meni.
LUK 7:33 Te we bidi baptais mabo bidi Jon asama, nai gisilu, bomai wę gisilu yali goli, dagego te agade ‘Aga da, te dwai noma bulalubo bidi dao,’ te po wali.
LUK 7:34 Me ma, ena Godigo Bidi Mu asama, nai tuyu, ąį tuyu ebadi goli, dagego enabolo ‘Buluba sela sąwai bidi dabe, takis sabo bidi dabego abagi dao,’ wai dao. Me dagego enade ‘Bomai ąį me nai e tudu gebo dwai bidi dao,’ wai dao.
LUK 7:35 Tiali goli, Godigo po wali pabo we bidi dabebolo Godigo kolesaga mu augwalibolo mu ola mabo dao,” Jisasgo te po wali.
LUK 7:36 Te Farisi bidi mego Jisas agai beba nai tuagasomainu eyu, i wali. Tama Jisas agai beba pelama, nai tuainu, ni nami daide dulalu tiąluali, Juda dabe augwaligo nai tubo sę ebogia.
LUK 7:37 Te be nanide dwai dwai sę idubo we me deli bidai. Te wego Jisas te Farisi bidigo bede bidibo po odama, masigigo nigai genagi deli denami yai wel pągąnalubadi, te beba sisali.
LUK 7:38 Jisasgo sągą pagede tudi badu dolaludu, gela weyu, aga gela guago Jisas sągą sawali nadugwali. Tama te we aga bobobage tobolu nisigo Jisasgo sągą sawali holama, sągą sawali si nono nenama, te denami wel aga sągąde pilali.
LUK 7:39 Tama Jisas i wali Farisi bidigo aga homude ‘E bidi Godigo po ola mabo bidi tigi sogo da, teda te mena tama bilibo wego ena dią yagasobo we homu egi dao, ma mena tama bidibo we yaliwe wagi dao,’ te Farisi bidigo te homu yali.
LUK 7:40 Jisasgo te Farisi bidibolo te po wali, “Saimon, nagebolo eno pusabo po me deli elalubao.” “Tisa bidi, enabolo pusao,” Saimongo te po wali.
LUK 7:41 Jisasgo tama gagalali, “Gasa bidigo bidi me sibolo mone negeli mani. Bidi mebolo 100 kina mobadi, mebolo 10 kina mayu yali.
LUK 7:42 Tama nosali tega sigo te mone wei ponabo ąǫ isąbaso, agai mone negeli si sela sąwani. Mena bidigo te mone negeli munani bidi dali homu mu kęąluaibawe?”
LUK 7:43 Saimongo te po wali, “Eno homugo mone genuai mu sali bidigo te bidi dali homu mu kęąluaibao,” wali. “Nago po dolode walao,” Jisasgo te po wali.
LUK 7:44 Te sogo naga Jisas te we pageba ugwaba begegi soyu, Saimonbolo te po walio, “E we nago subawe? Ena nago beba asali goli, nago ena bugagia gesesiąwai, eno sągą ąį tela yabo ąį me mawai meni. Tiali goli, e wego gela guago eno sągą sawali ąį tedalama, aga bobobage tobolu nisigo eno sągą holali.
LUK 7:45 Nago beba ena asobadi, dwagi yai homu elama, nago ena nono nabe. Tiali goli, e wego da, ena asobode gagalama eno sągąde nono nabo togobeo.
LUK 7:46 Nago wel eno toboluba me mube. Tiali goli, e wego dwagi yai denami welgo eno sągą sawali usu nani.
LUK 7:47 Eno nagebolo obe dao, agai enade mu tia pabogo agai dwai dwai sę yali mu sela sąwani nama e ola maniąo. Mego ena dali homu dwasianu kęąluba, ta dwai dwai sę yali dwasianu sela sąwani te ola mobao,” Jisasgo te po wali.
LUK 7:48 Tama Jisasgo te webolo te po wali, “Nago dwai dwai sę yali polo sela sąwani,” wali.
LUK 7:49 Me badu ni namide dugulaluali we bidi augwa homugo te po wali, ‘E niwai bidi yaliwe? Agai we bidigo dwai dwai sę yali sela sąbo dao,’ augwaligo te po wali.
LUK 7:50 Tiali goli, Jisasgo te webolo “Nago enaba homu beagasaligo nage sana palali dao. Nage dwagi yai homu dali pao,” wali.
LUK 8:1 Te tiali magede, Jisasgo Godigo we bidi tonalubo dwagi yai po pupusu biligibu genuai be nani dabe dali, dwasianu be nani dabeba pali. Aga dali bilibo nogo si olama, sągą si peda sigisu tama bidi dabe aga dali pali.
LUK 8:2 Te we dabe, me badu dwai haubogo tuaide Jisasgo sela sąyani we dabe me, me badu gasi ebaso, te gasi sela sąyani we dabe me, augwali Jisas wali bilali. Te we me nogi Maria, aga bulu nogi Makdala. Polobadu dwai haubo nogo a naga olama, me badu nogo si peda selama, te tama haubo noma bidigo te we tolalubaso, Jisasgo sela sąyani.
LUK 8:3 We me nogi Joana, Herotgo bede sę ebo genuai bidi Kusago we dao. We me nogi Susana. Me badu we dabe hauwago augwa monego Jisas me, Jisas aga dali bilibo bidi dabe me tau sali.
LUK 8:4 We bidi dabe hauwa moni be nani dabedu aseselama, Jisas pageba moni pesage odogolama bidibadi, Jisasgo te po digi po augwalibolo pusali.
LUK 8:5 “Me sogo bidi me deligo aga tubo nai wai ge te giba telaligi pai. Tama aga te nai ge tedelalo bilibadi, me badu tųde tulaluali. Tama nosali te tųde tulaluali nai wai me badu bidigo sągągo agayu, me badu ba dabego tuali.
LUK 8:6 Tama aga te nai ge tededalo bilibadi, me badu elewi elalubo tǫ daiba tulaluali. Tama nosali te nai ge kulubi holali goli, tǫ ili meni duama, sasia pelama, isali.
LUK 8:7 Tama te bidigo nai ge me badu sesani yai bono siliba tedelaluali. Tama nosali holobadi yaide, te sesani yai bono dabe dali talua holama mesegelali, tama te nai isila pali. Tama me badu ge dabe dwagi yai tǫba tulaluali.
LUK 8:8 Te nai dabe holama, du umabo walali. Duga po odabo olo elalubaso da, bugagia odiąo,” Jisasgo te po wali.
LUK 8:9 Jisas aga dali bilali bidi dabego hanaluyu,” Nago wali po digi po mena po olama, obawe?” wali.
LUK 8:10 Jisasgo wei ponoyu, te po wali, “Godigo te we bidi tonalubo bomo geme dualalubo po page dagebolo da hanilai dao. Tiali goli, gasa we bidi dabebolo eno te po digi pogo naga ola mobe dao. Augwaligo gegali goli, te susiąmainu eyu, te odali goli, te konesiąmainu tebo dao,” Jisasgo te po wali.
LUK 8:11 Jisasgo te po ma wadolu, te po wali, “Te po digi po e tama po weyu, te walio. Te tubo nai ge da, te Godigo po dao.
LUK 8:12 Te tubo nai ge tųde tulaluali da, te bidi dabe augwaligo po odali goli, Satan asama, te poba homu begi pelama, sana pidali weyu, agai sela sąyagasali po olama waliao. Satango homugo tiali, teyu te augwaligo homude konealubo po dąų obaso da, te Godigo augwali ma saiba homu yali.
LUK 8:13 Te tubo nai ge elewi elalubo tǫ daiba tulaluali po wali da, te bidi dabe augwaligo dwagi yai homu elama, te po odali tiwai yali. Tiali goli, augwa homu tomoba te po mu musiąma, olo ugwadu homugo te poba begi pelama elalubadi, te Satango dwai sę yanama sinabo sogo augwali tulalu, te Godiba homu muani tagalobo dao.
LUK 8:14 Te tubo nai ge sesani yai bono sili elalubo tomoba tudulaluali po wabo da, te da te bidi dabe augwaligo te Godigo po odali tiwai yali goli, e tǫde ebo naide moni homu hauwa eyu, te nai doado bage hauwa elalu, te monede me, e tǫde ebo sęde bugai homu pemene eyu, tama te nai doado bagego augwali homu hogodabo mesegelama, te augwaligo Godigo po bugagia me odobeo. Augwali te nai du bugagia walama, te inawai nai tiwai elalube dao.
LUK 8:15 Te tubo nai ge te ili elalubo dwagi yai geswai tǫde tudulaluali po wali da, te da te bidi dabego po odama, te augwa bugagia wali pelama, te homude dąų ola sali tiwai yali. Te augwa haliga bugagia dolasa elalubadi, te augwa bomo elama bidu, te augwa nai du walobo tiwai te elaluali dao,” Jisasgo te po wali.
LUK 8:16 Jisasgo po ma wadolama weyu, te po wali, “Bidi mego te lam sole domonama bogoli ebadi, tama sela asama, te senego mesegelu, ma pibo bet dologoba mugibu me egobeo. Menio. Te bidi dabe augwaligo te tebol sai daiba ugadu dugulaibao, te be tomoba asobo we bidi dabe augwaligo te ula sumainogo tebo dao.
LUK 8:17 Te tigidali magi magi nai geme dualaluali, te nosali pebeli diliba hanilaibao. Te tigidali magi magi po te bidi dabego geme mesegaluali, te po te hania pebeli diliba pedelama, we bidigo odaibao.
LUK 8:18 Dagego te po odoyu, mu dua dao. Bidi mego nai meba tolalubo bidi yai baso da, teda Godigo agabolo gasa nai me ugadu daganama mawaibao. Tiali goli, bidi mego nai me deli menibadi goli, te dwasianu aga tobade munaluba homu yali nai sela paibao,” Jisasgo te po wali, te bidi dabe augwa homu agaba muani bidi dabeba magi paibao po wali.
LUK 8:19 Jisas aga ida me ama dabe me aga pageba asainu yali goli, tama we bidi dabego sesela selama, te Jisas suabo ąǫ ebeo.
LUK 8:20 Mebago Jisasbolo te po wali, “Naga ida me, naga ama dabego me nage sueo olama, bulu badu e dodoladubao,” wali.
LUK 8:21 Jisasgo te we bidi augwalibolo te po wali, “Godigo po odama, wali pabo we bidi da, ta eno ida dabe, ama dabe dao,” wali.
LUK 8:22 Me sogo Jisas me aga dali bilibo bidi dabe me moni geba ugwaba daiba holama, tomoba dualama, tama agai te po wali, “Da e sigi ąį u badu bogo badu pinao.” Tama augwaligo nogebo gagalali.
LUK 8:23 Tama augwaligo te wę gebadu hąbesegego todogo pidubadi, te Jisas godege piali. Moni bomai wali te sigi ąįde pedelama, te geba tomoba ąį pągela sąwani. Augwali dwai tųba mu degelali.
LUK 8:24 Augwaligo Jisas hodolagasu, te po wali, “Genuai Bidi, Genuai Bidi. Da isabo magana pali.” Tama Jisas hodaloama, wali hageyu, te waligo sabilibo ąį hagelama togoliyu yali. Te waligo me, ąįgo me moni te bomo hodali tagalama, ma tamugulali.
LUK 8:25 Tama aga wali bilibo bidi dabebolo te po wali, “Magi baso enaba homu beagasobewe?” Tiali goli, augwali noma selama, wi yali. Augwa hasi ugwa tono eda, tono elama, te po wali, “E magwai bidi yaliwe? Agai te wali dabe, ąį dabebolo me hage baso, augwali sigo agai wabo po wali pabo dao,” augwaligo te po wali.
LUK 8:26 Te augwali te moni gebadu pelama, te u badu bogo badu Gerasa dabego buluba sabolali. Te bulu te Galili bulu dolo si dao.
LUK 8:27 Tama Jisas te gebadu asobadi yaide, dwai haubogo toai bidi Jisas tiąba asali, te ąį saniba. Polobadu te be nanide bidama, bolu olo te isai bidi mubo ola be dabeba gudasa pelama, bidai.
LUK 8:28 Te bidigo Jisas suyu, moni hai gela olama, Jisas sągą pageba degagaselama, moni i hai olama, te po wali, “Jisas, nage moni genuai Godigo Ogwa dao. Nago enabolo magi sę egowe? Nago ena dene magio,” wali.
LUK 8:29 Jisasgo dwai haubo pomainu gudulu baso, te bidigo te po wali. Polobadu hauwa sogo bidi dabego te bidi aligabo bidilama, kalabuside muani. Mubadi goli, dwai nomago tulama, dią paludali. Tama te dwai haubogo te bidi te bidi meni yai bulu tomoba sela piduali.
LUK 8:30 Jisasgo agabolo hanalu wali, “Nage nogi de dawe?” te po wali. “Ena nogi Hauwa dao,” te bidigo te po wali. Dwai haubo noma bidi hauwa mu aga tigiba dagawani baso, te nogi “Hauwa” poai.
LUK 8:31 Tama te dwai haubo dabego Jisasbolo hanalu, te po wali, “Da megi dwai bulu te bidibolo dene mabo madiba mugio,” wali.
LUK 8:32 Te kibu dabe umabo ugwadu sau pado pąde nai tuyu bidaluali. Tama te dwai haubo dabe augwaligo u kibu dabe tigiba dagana sigi pai hagede, Jisasbolo gonai. Tama gonobaso, Jisasgo augwa te emainu tagala palali.
LUK 8:33 Tama tibaso, te bidi tagalama, kibu dabe tomoba pali. Moni te kibu dabe tigidali wi peyu, te sigidu sau padoba samonama, sigi ąįba tulaluama, tama augwali te wę tulama poma peyu isila pai dao.
LUK 8:34 Te kibu dabe negeduali bidi dabego te tebo sulama, polo pelama, moni be nani dabeba me, moni gi sę eyu bidalubo bidi dabeba me te sę yali po pupusu bilali.
LUK 8:35 Te we bidi dabe augwaligo te tiali sę po odama, sugibu pebelawali. Augwali Jisas pageba aselama, suali, te dwai haubo dabego tulama wabo pali bidi te dwai haubo bidi sela sąbaso, te aga ugwa ma gudama, Jisas sągą pagede dugulalubo suali. Aga polobadu wiegi yai homu dali ma elama, duguladubo suali.
LUK 8:36 Tama tibaso, augwali moni wi mu yali. Jisasgo te sę ebo suali bidi dabego te we bidibolo te bidi sana palobo suali po pusali.
LUK 8:37 Tama te Gerasa bulu bidi dabe tigidali wi kisu mu dobaso, Jisas pao olama, gudulali. Tama te po obaso, Jisas te geba daiba holama, painu yali.
LUK 8:38 Tama te dwai haubo noma bidi dabego taga pali bidigo Jisasbolo po bomo elama mu hanalu wali, “Ena me nage dali paio,” wali.
LUK 8:39 Tiali goli, Jisasgo te bidi ma geliyu, te po wali, “Nage ma geasa pelama, Godigo nagebolo yali sę po naga pesageba pupusu biligi pao.” Tama te bidigo te be nanide bidibo we bidi tigidalibolo Jisasgo agade yali sę po pupusu bilama, siminani.
LUK 8:40 Jisas te sigi ąį me badu pedai bogo badu te moni gebadu ma nogebadi yaide, te we bidi tigidali augwaligo aga asobaso sulama, te augwa dwagi yai homu pemene yali. Magi baso meni. Augwaligo aga asobo tonaluai dao.
LUK 8:41 Tama Juda dabego bomo yai po ola mabo lotu be tonalubo genuai bidi tobolu bidi nogi Jairus sabolali. Aga Jisas sągą pageba degelagaselama, “Nage eno beba asaibawe?” olama, hanalu wali.
LUK 8:42 Aga wegi deli digi kibu be nogo si olama, sągągo si peda sigi soai te wegi isai sinabaso, te po wali. Jisas tų sisu pobadi yaide, genuai hani we bidigo aga mu beasa pali.
LUK 8:43 We me deli bididuai, te wego tigide kaneme pidubadi, kibu be nogo si olama, sągągo si peda sigi soali. Aga mone dabe tigidali aga tau somainu dokta bidi dabe abeliyu mone mani goli, augwaligo aga me tau sabo ąǫ ebe.
LUK 8:44 Te we bidi tomode te we Jisas tudi badu aselama, Jisas agai ugwa sabi badu dią yani. Te sogo naga tama agai tigidu kaneme duludali polo tama togwa salio.
LUK 8:45 Jisasgo te po hanalu wali, “Ena dego dią yaniwe?” Tigidaligo “Ena menio” ola silali. Tama Pitago te po wali, “Genuai Bidi, we bidi hauwago nage mu bealu, nage pogolobao.”
LUK 8:46 Tiali goli, Jisasgo te po wali, “Eno bomo dią si da obaso, eno koneanio, bidi mego ena dią yani homu ebao.”
LUK 8:47 Tama te wego agai yali sę Jisas agai aga sulama konebaso, te we didibili dali eyu, Jisas sągą pageba kidu sugunagasalio. Te we bidi tigidali gesabidide Jisasbolo Jisas aga tigi dią yani po pusali. Tialigo aga ma polo gesa pali po pusali.
LUK 8:48 Tama Jisasgo te webolo te po wali, “Eno wegi, naga enaba homu konealubo homu bealubogo nage te usu ilaliąo. Dwagi yai homu elasa pao,” wali.
LUK 8:49 Jisasgo te po odubadi yaide, genuai bidi Jairusgo bedu tolai po wagasobo bidi asali. Te po sesali bidi agai Jairusbolo te po weyu,” Nago wegi isai dao,” wali. “Te po ola mabo bidi aga asao po ma wagio,” wali.
LUK 8:50 Tiali goli Jisasgo te po odama, Jairusbolo te po wali, “Wi egio. Enaba naga homu beaduao. Nago wegi ma hodaluaibao,” wali.
LUK 8:51 Tama Jisas te beba sabolama, bidi me asa wabe. Tiali goli, Pita badi, Jems badi, Jon badi, te wegi aga ida de aya si badi elama naga Jisas dali te be tomoba pali.
LUK 8:52 Te isali wegi diliigi asai we bidi tigidali te wai hagede moni hobede elama, gela wali. Tama Jisasgo augwalibolo “Gela wagimio, e wegi isibe dao. Aga olo pila mubao,” te po wali.
LUK 8:53 Te wegi isai goli, Jisasgo mu isibe da obaso, augwaligo Jisas gisugu mani.
LUK 8:54 Tiali goli, Jisasgo nogogo te wegi nogo tulama, bomonama, “E wegi, nage hodaluao,” te wali. Aga noma ma bula sagasama, te sogo tama polo hodaluali.
LUK 8:55 Tama Jisasgo te wegi aga ida ayabolo “Tubo nai me te wegibolo mao,” wali.
LUK 8:56 Te wegi aga ida aya moni noma sali goli, Jisasgo “E tama tiali po gasa we bidibolo pusugio,” wali.
LUK 9:1 Te Jisasgo te nogo si olama, sągą badu peda sigi soabo bidi si te augwali deliba sisinimainu i olama, tama agai augwaliba te genuai bomo me nogi mayu, te augwaligo te we bidi dabede dwai haubo noma bidi sela sąyu, tama augwaligo te tobage gasagi yai gasi dabe tigidali sela sąnama, usu ma ilabo bomo manio.
LUK 9:2 Tama God agai we bidi tonalubo po me, gasi yai we bidi tau siyu me emainu, Jisasgo augwali tagala palali.
LUK 9:3 Agai te bidi dabebolo te po wali, “Dage pelayu, magi nai me sela pigimio. Dono me, nai gonobo wa me, tuabo nai me, mone ge me, te ugwa si me, te tama nai dabe me sela pigimio, bede taga pao.
LUK 9:4 Dage mena buluba pobadi, augwaligo dage dali dwagi yai homu ebaso da, teda dage te bede naga bidao. Te be nani taga soabo bodolude taga soyu, te gasa buluba me peyu yao.
LUK 9:5 Te dage hanu me deliba pobadi yaide, te hanude bidibo we bidi augwaligo beba dage odasa pisąma, tama dagego wabo pode dwagi yai homu isąbaso da, te hanu bulu taga soao. Te dage soai hagede, te augwa kolesaga geda muani koneama sumai hagede, duga sągąde elaluali pu hola sąnama, taga soao,” Jisasgo te po wali.
LUK 9:6 Tama augwaligo Jisas taga pelama, tigidali be nani sisu pebelayu, Godigo dwagi yai po pusuyu, gasi bidi tau siyu ela pali.
LUK 9:7 Te Galili tǫ tonalubo tobolu bidi Herotgo te Jisasgo yali sę po dabe odali. Tama aga homu kone tųą pali. Magi baso menio. Bidi mebago te baptais mani bidi Jon ma hodaluama, bidibao, wali. Mebago “Te polobadu bidali profet bidi Elaija ma pedelama, bidibao,” te po wali. Mebago polobadu Godigo po ola mani bidi ma pedelalio wali. Te po hauwa obaso, Herot aga homu kone mu tųą pali.
LUK 9:9 Tama Herotgo te po wali, “Eno pode Jongo holo togwa sąwai goli dao, e ma niwai bidi po eno odobo agawe?” Tibaso, Herot agai ‘Jisas da, te polobadu bidali bidi Jon dawe?’ homu eyu, tama ‘Jisas sueibao’ wai.
LUK 9:10 Jisasgo tagala palali bidi dabe augwali Jisas pageba ma sabolama, te augwaligo yali sę po dabe ma pusagasali. Tama Jisasgo augwali oda selama, pali. Te gasa we bidi dabe bidibadi tagalama, te augwali naga te hanu me deliba pali. Te hanu nogi Betsaida dao.
LUK 9:11 Augwaligo te we bidi dabe taga pali. Umabo we bidigo augwali pali po odama, augwali me nosali pali. Aga pageba augwali sabolobaso, Jisasgo dwagi yai homu elama, God agai we bidi tonalubo po pusa mayu, gasi yali we bidi meba tau sali.
LUK 9:12 Giliga aiyaba osoga sobadi yaide, Jisas aga wali pabo bidi dabe augwali aga pageba aselama, agabolo te po wali, “E bidi meni yai digi dao. E we bidi tagala palama, augwa digi tuabo nai me, piabo be me gegemainao, te dwasianu be nani dabede me, te gi dabede me.”
LUK 9:13 Tiali goli, Jisasgo augwalibolo te po wali, “Tuabo nai duga digi mao.” Augwaligo wei ponoyu, te po wali, “Dago bret a naga badi, sųgų si badi elama naga, munalubao. Moni we bidi dabego tuabo nai dabe dago abelegi pomainu obawe?” (Tama tede bidibo bidi dabe namba nedebo te umabo mu, te 5,000 dao.)
LUK 9:14 Jisasgo aga bidi dabebolo weyu,” Te we bidi dabe dugayao po wao,” po wali. “Bugulama, te haniani nani elama, duga duga pao, te bidi sese si olama nogo si te 50 50 naga nidigi pelama, dugayao wao,” te po wali.
LUK 9:15 Te Jisas aga dali bidibo bagego agai wali po selama, dugaya baso, duga duga pali.
LUK 9:16 Tama Jisasgo te bret a naga badi, sųgų si badi selama, dagaluba tonalu, Godibolo nage usu dao wali. Nage usu da olama, te nai pebedama, Jisas aga dali bidibo bagebolo menama, te bagego ma te we bidi dabebolo doboba pali. Te tibadi yaide, te tubo nai kua pali. Augwaligo te nai tulama, tabiali.
LUK 9:17 Tama Jisas aga wali pali bagego te we bidigo tulama me badu tagalali nai dabe nedama, bonou wa nogo si olama, sągą si peda sigisu pągą yani.
LUK 9:18 Te me sogo Jisas agaduba Godibolo po odubadi yaide, aga wali pali bage aga pageba asali. “We bidi augwaligo ena da de da wabo dawe?” augwalibolo tama hanalu wali.
LUK 9:19 “Mebago nage da te we bidi baptais mani bidi Jon dao wabo dao,” augwaligo te po wali. “Mebago ma nage Elaija dao, te wabo dao. Mebago ma polobadu Godigo po ola mani bidi ma hodaloai bidi dao wabo dao,” augwaligo te po wali.
LUK 9:20 “Dagego homugo ma ena de da wabo dawe?” wali. Pitago te po wei ponoyu, te po wali, “Nage da, Krais da, Godigo da Juda we bidi tau somai hagede tagala palali bidi dao,” Pitago te po wai.
LUK 9:21 Jisas agai augwaligo te po mebolo waidali weyu, bomona hageali, “Te po mesegeleiąo,” wali.
LUK 9:22 Agai te po me wali, “Ena da, Godigo Bidi Mu da. Tama nosali te Juda dabego genuai bidi dabego me, te pris tobolu bidi dabego me, te Juda dabego bomo yai po ola mabo tobolu bidi dabego me, augwaligo ena buluba ela palama, dene genuai mu mawaibao. Augwaligo ena isilama, nosali sela wali sogo ena hodaluaibao,” te po wali.
LUK 9:23 Jisasgo tigidali we bidibolo te po wali, “Te ena wali me niwai bidi asainu da, aga tobade homu konebo gegeda pelama, ena tigide ebo dene tiwai aga bidibo donolama iduabo bidi, ena wali asao.
LUK 9:24 Bidi me aga e tǫde bidibo sogo aga tobade aga tigi sese yaida homu eyu da, te doaibao. Me ma, bidi me ena wali asobadi yaide, aga tǫde bidibo sogo sia sobaso da, nosali bidibo ula selama, ma bidaibao.
LUK 9:25 Bidi mego e tǫde elalubo nai tigidali aga sai goli, aga digi ma dolu ma aga ma aiyaba elalu, te nai dabego aga mena tama tau sabo usu egowe? Te menio.
LUK 9:26 Bidi mego enade hale eyu, eno ola mabo pode hale eyu ebaso da, teda nosali eno te bidide hale yaibao. Nosali Godigo Bidi Mu aga bomo dabe dali, aga ayago bomo dabe, moni ensel dabego bomo dabe dali asobo sogo, te hale yai bidi suyu, ena Godigo Bidi Mu eno me te bidide hale yaibao.
LUK 9:27 Te po koneao. Dage megi e bidalubo bidi dabe me badu isisąbadi, Godigo we bidi tonalubo sę sueibao,” Jisasgo te po wali.
LUK 9:28 Te po olama, Sarere deli bidama, Pita badi, Jon badi, Jems badi, tama bage Jisasgo selama, bulu duba Godibolo po wainu holali.
LUK 9:29 Tama agai Godiba gedu haluasa po obadi yaide, aga megi tama elaluali tigi gesabidi tagalama, gasa tigi yai gesabidi hasegelama, aga ugwa dabe me te gasa tedela yai mu gagalama, te ula umagi mu pedelalio.
LUK 9:30 Te sogo naga polo tama bidi si aga dali po udubo suali, te bidi Moses dali Elaija si dao. Te Moses, polobadu mu te bidibolo God agai te bomo yai po Juda dabebolo mani. Te bidi Elaija aga nosali bidiyu, Godigo agabolo ola mani po agai te Juda bagebolo pusali bidi dao.
LUK 9:31 Te bidi si asali, te Godigo ula dali pedelama, te dagalude elalubo pǫ tedela mu tiwai yali. Te bidi sigo Jisas dali po uduali. Godigo polobadu wali po te dolo wali pomai hagede eyu, Jisas Jerusalemde isabo bodolu maga baso, augwali sigo te po aga dali miduali.
LUK 9:32 Te sogo Pita me, aga abagi si me gedu magane ebaso, godege piai goli, hodaluama, te Jisasde te dagalu pǫ tedela ula tiwai ula Jisasde elalu, te aga dali dolaluali bidi side me te tiwai ula elalubo suali.
LUK 9:33 Tama te bidi sigo Jisas taga pidali weyu, Pitago Jisasbolo te po wali, “Genuai Bidi, da ede tama bidibo da usu dao. Da selago ugwa be sela sęnama, me nage osogo bidabo be sę eyu, me Moses osogo bidabo be sę eyu, me Elaija osogo bidabo be sę eyu yaibao,” te po wali. (Pita noma siyu, agai wali po page kuna konesiąma tama wali.)
LUK 9:34 Pita agai po odubadi yaide, pǫ pedalama, pǫ tiwaigo augwali mesaga sali. Tama te pǫgo augwali mesaga sagasobadi yaide, te Jisas dali bilali bage wi yali.
LUK 9:35 Te pǫ tomode po me dagayu te po wali, “E eno Ogwa dao. Agai eno sę emainu sa muani Ogwa dao. Dagego agai wabo po odao.”
LUK 9:36 Te po togwa sobadi yaide, Jisas agaduba bidibo suali. Te pedelali sę dabe augwaligo osogo hogwa selama, tama tiali po te we bidibolo dwasianu me pusube.
LUK 9:37 Te sogo do te Jisas aga wali bilibo bidi dabe dali te bulu bubia bidu aiyaba dulubadi, te we bidi umabo te Jisas tiąba asali.
LUK 9:38 Te we bidi tomode bidi me deligo moni hai i olama, te po wali, “Po ola mabo bidi, eno nagebolo hanalube dao, e suao. Eno ogwa deli digi tama dao.
LUK 9:39 Dwai noma bidigo tuai digi, moni hai olama, nogo sągą didigi ebo dao. Te aga kele dawede pesą dini pągąna pabo dao, kelelaude. Tama tiduama, bomonama, dene ilama, taga pabo da.
LUK 9:40 Naga wali bilibo bidi dabe augwaligo te dwai haubo noma bidi sela sąmainu eno hanalu wali goli, augwaligo usu selama, usu meni baso, tagalai,” te po wali.
LUK 9:41 Jisasgo wei ponoyu, te po wali, “Magi baso dagego homu enaba begi pisąma, gagega pidubawe? Ena dage dali nisu naga sogo bidigowe? Nisu naga sogo dagego sęgę eno tologowe?” wali. Tama te ogwa aga ayabolo te po wali, “Nago ogwa eba sesao.”
LUK 9:42 Te ogwa Jisas pageba asobadi yaide, te dwai haubo noma bidigo elama, tǫba degasa pelama, aga nogo sągą didigi yali. Tama Jisasgo te dwai haubo noma bidibolo hagebo po weyu, te haubo bidi sela sąyu, te ogwa ma sana palama, aga ayabolo ma mani.
LUK 9:43 Godigo moni bomo sulama, tigidali we bidi noma mu sali. Te we bidi Jisasgo te yali sę tigidali sulama, noma sali homu me elalubadi yaide, agai aga wali bilibo bidi dabebolo te po wali,
LUK 9:44 “Megi eno dagebolo wabo po munu me kegeda pigimio. Augwaligo te ena Godigo Bidi Mu e tǫde bidigo bomoba mawaibao.” Te po page mena tama waliwe augwaligo konebe.
LUK 9:45 Te po page augwaligo koneidali weyu, Godigo dualali. Tama te po page Jisasbolo ma hanalu wabo augwali wi yali.
LUK 9:46 “Da tomode de genuai mu dawe?” te po olama, Jisas wali bilibo bidi augwa hasi konila yali.
LUK 9:47 Augwaligo te konila ebo homu Jisasgo koneama, dolo po mu oba homu emai hagede, wai bǫų me deli oda selama, aga panogo badu dualali.
LUK 9:48 Augwalibolo agai te po wali, “Bidi mego enade homu kone palu te ena tobade e wai bǫų tiwai dali bugai homu eyu, tau sali da, te agai enade bugai homu eyu, tau siyu tebao. Bidi mego ena asobadi, bugai homu eyu tau sobaso da, teda ena tagala palali bidi dali bugai homu eyu tebao. Magi baso meni, bidi me aga digi nogi elaluama, te dage tigidali tomode aga nogi dwasianu mu elalubo bidi yai baso da, te aga polalubo bidi mu bidaibao,” Jisasgo te po wali.
LUK 9:49 Te bidi Jongo po dagalama weyu, “Genuai Bidi,” te po wali. “Bidi mego Jisas nago nogide dwai noma haubo bidi dabe sela sąsą bilibo dago sulama, te bidiba dago hagebo po wai dao. Aga nage wali pabo bidi meni baso, dago aga habu seliyu, hageai dao,” wali.
LUK 9:50 Tiali goli, Jisasgo te po wali, “Dagego te tobage bidi hagegi biligimio. Gasa bidi agai dageba boi bidi ebo sę isąbaso da, te duga abagi hani bidi dao,” wali.
LUK 9:51 Te Godigo Jisas dagaluba odasa holabo magabadi yaide, Jisasgo koneama, aga te Jerusalemba pabo homu mu elama, pabo gagalali.
LUK 9:52 Magi magi nai dabe sisi ela mumainu, po wagi pabo bidi dabe tagala palali. Augwali te Samaria dabego be naniba sabolama, tama augwaligo agai nai me doado bage dodolama, sisi ilainu yalio.
LUK 9:53 Tiali goli, Samaria bagego aga Jerusalemba soabo po odama, tama augwali te Jerusalem bage dali boi bidi homu ebaso, augwaligo agade bugagia gesabo homu ebe.
LUK 9:54 Tama Jisas aga wali bilibo bidi si Jems de Jon dali sigo te Samaria bagego te tama tebo kolesaga ebo sulama, augwali sigo Jisasbolo hanalu te po wali, “Genuai Bidi, nago homugo dago dagalu badu isi i olama, te bage isigo domai hagede yaiwe?”
LUK 9:55 Tama Jisas tudiba begelama, augwali siba wado po weyu, hageali.
LUK 9:56 Tama tiyu, aga augwali dali gasa be naniba pali.
LUK 9:57 Te augwa tų sisu pebelabadi yaide, bidi mego Jisasbolo te po wali, “Nage pabo digi, ena me nage wali paibao.”
LUK 9:58 Jisasgo te po agabolo wali, “Te uni yowi dabe da, augwali pibo dedage te tǫde elalubao, tama te ba dabe da, te augwali me pibo be elalubo dao. Tiali goli Godigo Bidi Mu da, te aga tobolu munama piabo digi te bulu pesage menio,” wali.
LUK 9:59 Agai gasa bidibolo te po wali, “Ena wali asao.” Tiali goli te bidigo te po wali, “Genuai Bidi, hasia bolo eno aya isibo tonaluaibao. Isibaso da, pubulaibao. Nosali ena nage wali asaibao.”
LUK 9:60 Tama Jisasgo wei ponoyu, te po wali, “Te Godigo po odisąbo isai bidi tiwai bidi dabe augwa digi te isai bidi dabe pubalomainao. Nage pelama, Godigo we bidi tonalubo po pupusu biligi pao,” te po wai.
LUK 9:61 Bidi mego agabolo te po wali, “Genuai Bidi, ena nage wali pai hagede digi, te hasia bolo ena pelama, ena ida aya dede dabebolo te augwali tobaligi pabo po wagi pabo usu egowe,” wali.
LUK 9:62 Jisasgo agabolo te po wali, “Bidigo eno sę gagalama, te sę ebadi tagalo baso da, te Godigo we bidi tonalubo pesagede te bidigo sę ebo usu egobeo,” wali.
LUK 10:1 Te nosali Genuai Bidigo bidi sese sela olama, me bidi nogo si olama, sągągo si peda sigisu te 72 bidi sa munama, tagala palali. Aga nosali pabo pesage tigidaliba te bidi dabe si si tagala paliyu ela palio.
LUK 10:2 Tama agai aga wali pabo bidi dabebolo te po wali, “Te nai hauwa mu te gide tau yai elalubao, tiali goli te tau yai nai sabo sę ebo bidi hauwa menio. Tama tibaso dagego te gi aga ayabolo gedu haluasa po waiyąo, tama agai aga sę bidi tagala palama te gide elalubo nai sisinigi pomainogo wao.
LUK 10:3 Te sę polo egi piąo. Eno dage moni dwai uni yowi dabe tomoba te sipsip tagala palobo ąǫ ebo dao.
LUK 10:4 Te mone ge bubo be me, nai gonobo wa me, sągą nadoba dabe sela pigimio. Tų dilide gasa bidi babe dali po weyu gesego igimio.
LUK 10:5 Te dage be me deli tomoba pabo sogo, te dagego hasia bolo te po waiąo, ‘E bede bidibo we bidi bugagia bidiąo.’ Te tiwai homu nagame ilibo po wao.
LUK 10:6 Homu tegaluama, bugagia bidibo bidi me te bede bidibaso da, nago dwagi yai homu me aga dali elalumainao. Te tobage bidi me meni baso da, nago wali po du walisiąbaso da, te po dugaba digi ma asomainao. God agai augwalibolo dwagi yai sę egobeo, te dagego koneaiba.
LUK 10:7 Te sę ebo bidi aga nai sabo dao. Dage te bede deli bidibadi, te tubo nai maiyu, ąį me maiyu ebaso da, te nai tuiąo. Dage te bedu me beba peyu ela biligimio.
LUK 10:8 Dage mena be naniba pobadi yaide, augwaligo dwagi yai homu elama, dawea sobaso da, te dage tumai hagede muani nai tuiąo.
LUK 10:9 Dagego suali digi, te dage pali be nanide gasi yai we bidi bidibaso da, te augwali tau siąo. Tede bidibo we bidibolo ‘Godigo we bidi tonalubo sę dage pageba asali dao,’ waiyąo.
LUK 10:10 Tiali goli, gasa be nani meba pobadi yaide, dage dali bugai homu elama, dawea siasąbaso da, te be naniba pabo tų dilide dolalu, te po wao,
LUK 10:11 ‘Dagego e bulude elalubo te dago sągąde dagayane te pobele bage te dago sela sąbo da, te duga konemai hagede ebao. Tiali goli, dagego bugagia homu kone palao. Godigo we bidi tonalubo sę ebo bomo dage pageba pąba yagasalio,’ te po waiąo.
LUK 10:12 Eno dagebolo megi obe dao, Godigo we bidi po tų ela mabo sogode, te polobadu dwai bulu Sodom we bidi Godigo hobede elama, dwasianu sęgę mawaibao. Tiali goli, te dagebolo bugai homu isiąyu dawea sisąyane be nani we bidi dabeba mabo sęgę te genuagi mu yaibao,” Jisasgo te po wali.
LUK 10:13 Te Jisasgo po ma wadolama weyu, te po wali, “Dage te hanu Korasin we bidi dabe, hobede mu yaibao. Betsaida bage, dage me hobede mu ebao. Magi baso menio. Te bidi me deli te hanu si Tair me Saidonba pelama, te eno dage tomode yali bidi noma sabo bomai sę tiwai me igi pigi sogo da, teda te polo tama te Tair me Saidon, te hanu side bidali we bidi dabe homu begeligi dao. Tama augwa homu hasegeliyu, augwa dwai dwai sę yalide moni homu eyu, dwai homu dene elama, te homu dene ebaso gudubo ugwa dabe gudulama, te augwa tobolude keli pilama dugulalugi dao. Te augwa yali dwai sęde homu kone palama tama tigi dao.
LUK 10:14 Tiali goli, te Godigo e tǫde we bidi po tų ilabo bodolu muani sogo pedalubo side, te dageba pedalubo sęgęgo da, te Taia hanu dali me te Saidon te hanu side bidali we bidi dabeba pedalubo sęgę aiyaba elalu, te yalawainu yaibao. Tiali goli, dagebolo da, te genuai sęgę pedelaibao.
LUK 10:15 Tama dage Kaperneam hanude bidibo bage, te dagego homu te dagego nogi te we bidi augwaligo te sigiba dagaluba ugwanu mu holobao, te homu eba, agawe?. Tiali goli, mu menio. Te dage tigi dene ebo dwai sia dabo dedage pageba sąwaibao,” Jisasgo te po wali.
LUK 10:16 Jisasgo aga wali bilibo bidi dabebolo te po wali, “Bidi mego dagego pusubo po odobaso da, te agai eno po odoyu tebao. Bidi mego dage buluba ela palobaso da, te agai ena buluba ela palu tebao. Bidi mego ena buluba ela palobaso da, te ena tagala palali bidi me buluba ela palu tebao.” Jisasgo te po olama, te bidi dabe pali.
LUK 10:17 Te nosali Jisasgo te tagala palali bidi dabe dwagi yai homu mu dali Jisas pageba ma asali. Augwaligo te po wali, “Genuai Bidi, dwai noma haubo bidi dabego dago nago nogi olama, hage baso, dago po wali pali.”
LUK 10:18 Jisas agai te dwai haubo polalubo bidi nogi Satan agai bomo polobadu dolai dao homu eyu, te po wali, “Satan be sole gagawai dagaludu kegasa dulubo eno polobadu suai dao.
LUK 10:19 Edao. Eno dagebolo bomo mawai dao, dagego te Boi Bidigo bomo mu aiyaba elalumainu. Te hwą dabe me, te bidi gąų kelebo hasamani me, sągągo agabaso da, te dage gąų kelebaso da, dene isąwai, te tiwai dagego te Boi Bidi Satan aiyaba elaluaibao. Agai bomo tigidali tego dage aiyaba elalugobeo. Augwaligo dagebolo magi sę me elama, dene mugobeo.
LUK 10:20 Dagego tama te ebo sęde dwagi yai homu egimio. Te po tagalu, ma dagego nogi te dagalude te buku mede asęai dao, tede dwagi yai homu iyąo,” Jisasgo te po wali.
LUK 10:21 Te sogo naga tama Godigo Dwagi Yai Mobogo Jisas dwagi yai homu mu ilali. Tama agai te po wali, “Ayao, nage te dagalu dali tǫ dali nigila tonalubo Genuai Bidi dao. Eno nage dali deli homu eyu nagebolo usu da po obao. Tǫde homu kolesaga koneai bidi dabe augwaligo koneidali weyu tama nago te eno tamadi pusali po page nago geme dualai dao. Tiali goli te tǫde elalubo homu kolesaga konesiąwai we bidi augwalibolo nago te po page ola mawai dao. Awe, Aya, nago te tiwai yaibao homu elama, tama tede dwagi yai homu eyu nago tama tiwai naga yai dao,” wali.
LUK 10:22 Te we bidibolo Jisasgo te po wai, “Eno Aya agai tigidali nai eno nogoba muai dao. Tama niwai bidi me deli agai te Ogwa mu konea silai menio. Aya agaduba deligo naga te Ogwa konea silai dao. Tama niwai bidi me deli agai te Aya me konea silai menio. Ogwago naga konea silai dao, tama te we bidi dabebolo te Ogwa aga digi te Aya augwalibolo ola mobaso da, te augwaligo me te Aya konea silaibao,” wali.
LUK 10:23 Tama aga wali bilibo bidi dabeba ibaba gelama, geme te po wali, “Te dagego megi subo sę tiwai te bidi dabe augwaligo me subaso da, te dwagi yai homu pemene iyąo.
LUK 10:24 Polobadu Godigo po pusa mabo profet bidi dabe me, te genuai tuni bidi king dabe me, augwaligo te ebo sę suainu yai goli me suai menio. Augwaligo dagego odobo po odainu yai goli me odai menio,” wali.
LUK 10:25 Te Juda dabego bomo yai po ola mabo bidi me asama, Jisas usu sai hagede, agai po hanalubo po wagasali. Agai te po wali, “Po ola mabo bidi, eno noma te bugagia gamonabo pesageba painu, magi sę yagawe?”
LUK 10:26 Jisasgo po wei ponoyu, te po wali, “Te Godigo po wabo bukude magi po wali elalubawe? Te wali po dabe nago nedama suali, mena page konebo dawe?”
LUK 10:27 Te bidigo te po wali, “Te Godigo po wabo bukude te po wabo dao, ‘Nago Genuai Bidi God naga homu sese badi, naga noma sese badi, naga bomo sese badi, naga kolesaga sese badi elama, tigidaligo naga Godibolo homu kęąluao,’ wabo dao. ‘Me ma, naga digi naga homu godolo mu eyu kęąlubogia, te nago te bidi naga abagi hasi me godolo homu eyu me tama nage tiao,’ te po wabo dao,” wali.
LUK 10:28 Te Jisasgo po wei ponoyu, agabolo te po wali, “Te usu dao. Nago po dolo obao. Nago tama tiyu da, te naga bidabo noma bidigo ula te gamonabo bulu selama, bidada peyu, bidada paibao,” te po wali.
LUK 10:29 Tiali goli, te Juda dabego bomo yai po ola mabo bidi aga hale idali weyu, Jisas agade doloba pai bidi dao homu emai hagede, agai Jisasbolo ma hanaluyu te po wali, “Eno abagi hasi da, te de dawe?” wali.
LUK 10:30 Jisasgo te po wali, “Bidi me Jerusalemdu te Jeriko be naniba dulubadi yaide, nai wi sabo bidi dabe te geme sunumide dula selama, te bidi asobadi pageabi elama tulama, te bidi aga ugwa dabe pepedama, elama, tama augwaligo aga doado bage tigidali wi sali. Tama te bidi isabo pąde magawai te aga mesena isai tiwai munalubadi, taga palio.
LUK 10:31 Tebadi yaide, te pris bidi me deli te tųdu naga pali. Tama agai te elali bidi te tama telalubo sulama, te tų bogo badu bogelama ela soyu pali. Te bidi tau sabeo.
LUK 10:32 Tama nosali te tųdu naga Livai sibi bidi me deli teba sabolali. Te bidi munalubo sulama, te tų bogo badu me ela solama pali.
LUK 10:33 Tiali goli, Samaria bidi me te tųdu naga asiyu, te bidi suali. Te sulama, tama te boi yai bidi dao, te homu elama, tagalobe, moni homu dene yali.
LUK 10:34 Te bidi pageba pelama, wel dabe, bomai wę dabe keni idaliyu te elali pesageba gelama, te ugwa bogogo kęnama, te bidi ąobo kibu daiba muani. Tama bidi osogo pibo beba sela pelama, tede agai tonaluali.
LUK 10:35 Te sogo do agai mone ge si selama, te osogo pibo be page bidibolo mani. Te bidibolo te po wali, ‘Nago bugagia tonaluao. E mone ge si ususąbaso da, ena ma asobo sogo nago e bidide pali mone eno nagebolo wei ma mawaibao,’ te Samaria bidigo te po wai,” Jisasgo te po wali.
LUK 10:36 Te Jisasgo te po hanalu wali, “Te bidi sela tomode nago homugo mena bidigo te elali bidi te bidi aga abagi da homu yaliwe?”
LUK 10:37 Tama te bomo yai po ola mabo bidigo wei ponoyu, te po wali, “Homu dene elama, tau sali bidi dao,” te bidigo te po wali. Jisasgo ma te po wali, “Te yaligia te nago me tiao.”
LUK 10:38 Te Jisas aga wali pabo bidi dabe dali pobadi yaide, be nani me deliba sabolali. Tama tede te we me nogi Martago Jisas asobadi, dwagi yai homu elama, bugagia gesali.
LUK 10:39 Te we aga ama nogi Maria aga te Genuai Bidi sągą pagede dugulalu, agai ola mabo po odaludalio.
LUK 10:40 Tama Marta agai te nai ulubo sę dabe sulama, homu tųą pali. Tama tibaso, aga Jisas pageba aselama, te po wali, “Genuai Bidi, eno amago e sę dabe enaduba emainu taga soali nago konebewe? Ena tau sigi pao po wao.”
LUK 10:41 Genuai Bidigo wei ponoyu, te po wali, “Marta, Marta, nage da te tigidali nai sulama, homu te tųą pobao.
LUK 10:42 Tiali goli, sęgę yai nai deli mu te elalubao. Tama Mariago homugo te saiba homu yali te segąį nai te saleao. Mego me dobagobeo,” Jisasgo te po wai
LUK 11:1 Me sogo Jisas te bulu me deli badu pelama, te Godibolo gedu haluasa po olama, silama, te aga wali bilibo bidi mego agabolo te tama po wai, “Genuai Bidi, te nago dabolo me te Godibolo gedu haluasa po wabo sę ola mao. Te bidi Jongo aga wali bilibo bidi dabe ola manigia yao,” wali.
LUK 11:2 Tama Jisasgo augwalibolo te po wali, “Godibolo po weyu, e tama waiyąo, ‘Dago Aya, dago homugo nago dwagi yai nogi ugwaba somainao. Dago homugo nago we bidi tonalubo sę asomainao.
LUK 11:3 Da bidibo dononama dago homugo tubo nai mao.
LUK 11:4 Gasa bidigo dabolo dwai sę ebaso da, dago te sela sąbo dao. Tama dago homugo nago te dago dwai sęde sali sęgę me sela sąyao. Nago da te dwai sę emainu bomona sinabo pesageba sela pigio,’ te po waiyąo,” wali.
LUK 11:5 Te Jisasgo aga wali bilibo bidi dabebolo te po wadolama ma weyu, te po wali,” Dage me duga abagigo beba huli tomode pelama, agabolo weyu, ‘Abagi, ena te tubo nai bret negeli sela mao.
LUK 11:6 Eno abagi me eno beba asali goli, eno maiabo nai menio,’ waibao.
LUK 11:7 Te be tomode bidibo bidi naga abagigo po wei ponoyu, te po waibao, ‘Ena hodoligio. Be tų polo paiyai dao. Ena me, ena wai me te pibo bedugude ugwa banuama piai dao. Ena hodaluama, nage eno magi nai me magobeo,’ te po waibao. Megi da, magi yaliwe?
LUK 11:8 Eno dagebolo obe dao, aga naga abagi goli, aga homugo eno magobeo homu yali. Tiali goli, aga abagi hale isąnama, hauwa sogo hanaludu geyu bidibaso da, te aga ma hodaluama, te tuabo nai mawaibao. Te po page tama telalubo.
LUK 11:9 Godibolo po weyu tama tiao. Nago mu meni ebo nai sainu da, hanaludu bidama, nosali Godigo nagebolo mawaibao. Hauwa sogo gegedu bidibaso da, Godigo nagebolo ola mawaibao. Be tųba nogogo begobego udu bidibaso da, ta nagebolo dala munaibao.
LUK 11:10 Magi baso meni. Tigidali bidigo gedu haluasa po God dali hanalu wabo bidi dabe, augwaligo te nai saibao. Te nai gegebo sę ebo bidi, agai te nai sueibao. Tama te be tųba elebo bidi, teda Godigo te bidibolo tų dalobo dao,” Jisasgo augwalibolo te po wai.
LUK 11:11 Te Godibolo po wabode, Jisas agai augwalibolo te po me wali, “Dage meba duga ogwago sųgų tuainu hanalu badi yaide, dwai hasamani mawaibawe? Menio.
LUK 11:12 Ba ge tuainu hanalu badi yaide, bidi gąų kelebo nai hwą mawaibawe? Menio.
LUK 11:13 Dage dwai dwai sę ebo bidi dabe goli, duga wai dabebolo dwagi yai nai mabo dao. Dagalude bidibo Aya me aga Dwagi Yai Mobo Bidi sainu hanalubo bidibolo mu mawaibao. Tama agai te dwagi yai nai mabo kolesagago dagego mabo kolesaga aiyaba mu elaluaibao,” Jisasgo te po wali.
LUK 11:14 Me sogo Jisasgo te po wasiąbo dwai noma haubo bidi sela sądubadi, te dwai noma haubo bidigo te bidi tagala palobadi, te bidigo nosali po ma wabo gagalali. Tama te we bidi dabego te sę ebo sulama, noma mu salio.
LUK 11:15 Tiali goli, mebago ma “Te dwai noma tobolu bidi Belsebulgo bomo menama, te dwai noma te sela sąbo dao,” wali.
LUK 11:16 Te bidi mebago Jisas tola sabo bono gaga muyu te aga habela palomainu, te po wali, “Godigo bomo nagebolo mani dago sumainu wida, te nago da noma sabo bomai sę me deli ela suao,” te po wali.
LUK 11:17 Tiali goli, Jisasgo augwaligo ebo homu koneama, te po wali, “Te deli bulu tǫ kantri pedai bidi hani si ma bugulama, te boi hwįbaso da, teda polo tama te bulu tǫ pedai dolaibao. Ma, te deli ayago togwali hani sibi tomode bugulama digi hwįbaso da, teda te deli hani sibi bidibo page dolaibao.
LUK 11:18 Tama te Satango hani bage si bugulama, hwįgi sogo da, teda magi ilama agai te tobage sę ebo bomogo te nai dabe tonalugi dawe? Dagego enabolo dwai noma haubo tobolu bidi Belsebulgo te enabolo bomo mawai digi eno te sę ebao, te po dagego obao.
LUK 11:19 Mu tama ena te Belsebulgo bomo ena dali elalubaso, eno te dwai haubo noma bidi dabe sela sąsą bilibao te homu ebaso da, teda dego dage wali pabo hani bage augwali me te tau sabo sę egi dawe? Tiali goli, te duga hani dabego digi te dagebolo te po dolo ola mobaso, te dagego konebao, augwaligo te agai bomogo te sę ebo menio.
LUK 11:20 Te sę ebogo te dagego geda muani sę te ola mobao. Dagego geda mubo po obao. Eno e sę ebo te Godigo bomogo naga te dwai haubo noma bidi dabe sela sąsą bilibo dao. Te sę ebogo te Godigo we bidi tonalubo sę dage pageba asai elalubo te ola mobao,” wali.
LUK 11:21 Jisasgo te po ma wadolali. “Bomai bidi me deligo aga te boi hwįbo bainat hwą te nai dabe dali te aga bede sisi elalu, aga be tonalubadi yaide, te bede mubo nai dabe bugagia munalubo da.
LUK 11:22 Tiali goli, te boma pai bidi me deli pedelama, te boi sulama te bidi dali hwįnama, te bidigo bomo aiyaba elalubaso da, teda te be page bidi aga tobade tiąduali te boi hwįbo nai dabe tigidali te bomai bidigo sela pabo dao. Tama te be page bidigo polobadu wi sali nai te bomai bidigo ma selama, tama dobabo dao.
LUK 11:23 Bidi mebago ena dali homu muisąbo bidi da, te bidigo ena dali te boi bidi tiwai te ebao. Ena sipsip tonalubo tau sisąbo bidi da, te agai eno sipsip dabe osalubo bidi tiwai eyu te ebao,” Jisasgo te po wali.
LUK 11:24 Jisasgo te po wabo ma gagalali, “Te dwai nomago bidi me taga pelama, wa pai buluba toma nabo pesage gegegi pobao. Tiwai pesage me susiąbaso da, aga homugo tama te ebao, ‘Ena taga soali beba ma geasa paibao.’
LUK 11:25 Tama tibaso, bugagia ma dodolama, pobele bage meni yai beba ma pabo ąǫ te bidi pageba peyu te ebo dao.
LUK 11:26 Tama ma pelama, te 7 te tama dwai haubo noma bidi dabe agai odasa asobo da. Tama te gasa dwai noma haubo bidi dabego dwai dwai sę ebo kolesaga te ebogo te hasia dwai mobo haubogo ebo dwai kolesaga aiyaba elalubo dao. Augwali asama, aga dali te bidi ma te tuagasobao. Tama tibaso, polobadu yali sę tagalama, ugwanu mu te egi pobao,” Jisasgo te po wali.
LUK 11:27 Te Jisasgo te genuai we bidi hani tomode te po dagayu, te po obadi yaide, te we me deli augwali tomode bididuali wego te po dagą olama, te tiwai po wali, “Nage ame nenama negali we da, bugai homu ebadi bogo dao,” te po wali.
LUK 11:28 Tiali goli, Jisasgo wei ponoyu, te po wali, “Te mu dao. Tiali goli, Godigo po odama, wali pabo we bidi augwali dwagi yai homu mu ebadi bogo dao,” wali.
LUK 11:29 Te we bidi umabo Jisas odoga sagasobaso, agai te po wali, “Dage megi e sogo bidalubo hani we bidi dabe da, te dwai mu da. Dagego enabolo te ‘Godigo bomode te bomai sę ebao te koneainogo te sę ola mao,’ po wabo yabao. Tiali goli, dagego te bomai sę yabo dąį tiwai ilibo dagego me sugobeo. Menio. Te Godigo te profet bidi Jonabolo polobadu yaligia enabolo me te sę ebo dagego sueibao.
LUK 11:30 Polobadu Godigo po ola mabo bidi Jona aga isali tiwai. Tama ma hodolama, agai Godigo po te moni hanu te be nani nogi Ninive tede bidali we bidibolo Godigo po pusigi pali. Tama te tiwai ena te Godigo Bidi Mu te dage megi bidibo bagebolo pedelaibao.
LUK 11:31 Te Godigo te we bidi augwali po tų ilabo dąį ilali side, te e tǫ pedai saut badu bidali genuai nogi yai we kwin agai te megi e sogo bidalubo we bidi dabego dwai sę yali po hania hanilama pusaibao. Magi baso meni. Te kwin we bogo badu mu bidali goli, te aga polobadu te Juda dabego king bidi nogi Solomongo dwagi yai kolesaga ebo po odai hagede, digibulu buludu genuai bulu tonalubo we asai dao. Tiali goli, eno Solomon aiyaba elalualio. Eno nogigo me agai nogi aiyaba elaluali goli, dagego eno po odobe dao. Tama dagego eno po odisąbaso, te Godigo te we bidi po tų ebo sogo te genuai wego ‘Dagego te dwai sę te yaliao’ po waibao.
LUK 11:32 Polobadu Godigo po pusa mabo bidi nogi Jona agai te Ninive we bidibolo Godigo po pusa mobadi yaide, augwaligo odama, dwai dwai sę tagalai dao. Tama eno Jona aiyaba elaluali goli, dagego eno po odobe dao. Nosali Godigo we bidi po tų ela mabo sogo te Ninive we bidigo dagebolo ‘Dwai sę dagego te yaliao’ po waibao,” Jisasgo te po wali.
LUK 11:33 Jisasgo te po ma wadolama weyu te po wali, “Te bidi dabego te lam sole udulama, te be dedageba aiya muyu, ma te baket me deli tomoba dualogobeo. Menio. Te tebol daiba ugadu munama, tama te be tomoba asobo bidi dabego te sole sumainu, sole mubo tebol daiba mubo dao.
LUK 11:34 Naga tigigo sole te naga gedu da. Naga gedugo be ula bugagia suyu, naga homu kolesaga dwagi yai yaibao. Tiali goli, naga gedu doyu da, teda nago homu kolesaga me te be hulia selama dwaibao.
LUK 11:35 Naga tolalubo sole ula sula sidali weyu, bugagia tonalu dua yao. Tiyu nagede te elalubo ula te be hulia sai pedelabuo.
LUK 11:36 Te naga tigide tigidalide te genuai ula usu nai eladu da, te me badu hulia sisąma, te naga tigi tigidalide ula naga usu nai elaluaibao, te lam sole ula elalubogia yaibao,” Jisasgo te po wali.
LUK 11:37 Te Jisasgo te po silama, Farisi bidi mego agai beba aga dali nai tuagasao wali. Tama tibaso, Jisas te be tomoba pelama, nai tuainu dugulaluali.
LUK 11:38 Jisas agai te Farisi dabego nogo wę telabo sę wali pisąma, nai polo tubaso, te Farisi bidi noma sai.
LUK 11:39 Tama Genuai Bidigo te po wali, “Dage Farisi dabego te kap dabe me, pou dabe me te eda badu bulu badu meda elalubaso, te bugagia dua digi me te ąįde telabo dao. Tiali goli, dagego homude dwai sę yabo konealubao, gasa bidigo nai sulama, eno somainawe homu ebo bage dao. Tama te ebogo homu dwai dao ola mabo dao.
LUK 11:40 Dage da, te mu umawai bage te yabao. Te nai dabe bulu badu nigali Godigo te nai dabe tomo badu me nigibe homu eba, agawe?
LUK 11:41 Tiali goli, te duga munalubo pou dabe, kap dabe tomode munalubo nai dabe te nai meni yai bidi dabebolo menama, dagego te tiwai kolesaga eyu da, te dage magi dwai meda meni yai wiegi yai mu ma yaibao.
LUK 11:42 Dage Farisi dabego duga gide ebo yalawai nai dwasianunu selama, Godibolo mabo dao. Te tama sę da dagego ebadi goli, te dagego doloba pai kolesaga ebo tagalu, te sęgę sai we bidi tau sabo menio, me dagego te God godolo mu ebo kolesaga ebo menio. Te tama tebo sę ebogo dage dene genuai mu saibao,” wali.
LUK 11:43 “Dage Farisi dabe, dage dua dao. Te dage te Juda dabego bomo yai po ola mabo beba pelama, te nogi elalubo bidi duayabo pesageba dugawai homu ebo dao. Me ma, we bidigo maketde dage sulama, genuai bidi dao omaina homu ebo dao. Tama te ebogo dage dene genuai mu saibao.
LUK 11:44 Dage dua tama dao. Dage da, te isai bidi te gų pagede pubulai madi elalubo te konesiąma, te bidi dabe te daide ugadu bilibo tiwai ebo dao. Te dage bulu badu tonobo te wiegi yai da homu ebao. Tiali goli, tomo badu da, dage mu dwaliao. Tama dagego gasa we bidi meda ilibo sę yai dao. Te sę ebogo nosali dage dene geswai saibao,” Jisasgo te po wali.
LUK 11:45 Te Juda dabego bomo yai po ola mabo bidi mego agabolo te po wali, “Po ola mabo bidi, nago te tama po wabogo te dago nogi me dolobao.”
LUK 11:46 Jisasgo wei ponoyu, te po wali, “Dage te bomo yai po ola mabo bidi dabe me nosali dene genuai saibao. Dagego gasa we bidi tudiba sęgę yai walu mu te abilibo ąǫ te ebao. Tiali goli duga nogo dwasianu debalama, tau sabe dao.
LUK 11:47 Polobadu duga nǫųgo God aga po pusa momainu tagala palali profet bidi dabe ela muai dao. Tama dagego te pubulali madigi gų page ma aulubao. Tama te ebogo dage nosali genuai dene saibao.
LUK 11:49 Tama tibaso, Godigo dwagi yai kolesagago te po polobadu wai dao, ‘Te eno po pusa maiabo profet bidi dabe me, te eno po pusigi pomainu tagala palobo te aposel bidi dabe me, te eno augwalibolo tagala palaibao. Tama telama, augwaligo te bidi dabe me badu elu, me badu olo sesanama, osogo elaibao,’ te po wai dao.
LUK 11:50 Tama tibaso, megi bidalubo bage te tigidali Godigo po pusa mabo bidi dabebolo polobadu bidali we bidigo yali sę wei siyu, dene saibao. Te Godigo e tǫ nigali sogo gagalasa asali, te megi e bidibo sogoba usu nagasu, te yali dwai sęgę te megi bidalubo we bidi dabede wei ponaibao.
LUK 11:51 Polobadu augwaligo te Godigo po pusa mani profet dabe ela muani. Te bidi me nogi Abel elali. Te sogode gagalasa elala asali, te siminagasu, te bidi Sekaraia ela muani. Te bidi Sekaraia te Moni Lotu Be tempel tomoba pelama, dolalugi pali. Aga te Godibolo nai ula mabo sia nogobo alta pesage pagede bidali. Te habu mu selali pesage si tomo agebelede bidibadi yaide, augwaligo aga ela muani. Te tiali pode eno mu tama obe dao. Te tiali wei siyu megi bidibo we bidi dabe augwali moni dene mu saibao.
LUK 11:52 Dage bomo yai po ola mabo bidi dabego te mu po dualigi menigi sogo da, teda te we bidigo bugagia konegi da. Tiali goli, dagego te po dualali. Dagego te po bugagia odisąwai, gasa we bidigo odainu sinabadi yaide, dagego augwali togolaliao,” Jisasgo te po wali.
LUK 11:53 Te Jisas te bulu tagalama pobaso, te bomo yai po ola mabo bage me, te Farisi bage me, augwaligo agade dwai homu eyu, te aga nogi dolobo posobo po wabo gagalali. Augwaligo agabolo te haniani po hauwa bage mu hanalu walio.
LUK 11:54 Te augwaligo te bidi Jisasgo wabo po me geda mubo wenaga suai hagede, te hanalubo po hauwa bage unula dogia sąwanio.
LUK 12:1 Te sę ebadi yaide, te umabo tausen we bidi Jisas pageba mu odogwa sagaselama, augwa hasi ma agaga bilalubo ąǫ yalio. Tama Jisasgo hasia bolo aga wali bilibo bidi dabebolo te po wali, “Dage te Farisi bage te ugwadu homugo tibo po wabo bidi dabego ebogia yabuo. Dage te tiwai gagaidali weyu, bugagia dilasa bidiąo. Bidi mego bret nigibo sogo, tomoba dwasianu bomonobo nai mubo dao. Tama nosali te bret boma pabo dao. Te Farisi dabego ugwadu homugo po wabo sę, te dwai sę dage tomoba asiyu da, dage tomode genia paibao, te bret bo dai tiwai yaibao.
LUK 12:2 Magi magi nai tigidali mesegaluali, te daiba hania hanilaibao. Tigidali mesegalubo po me konea sialibao. Magi po me dagego hulide wali, te po ulade odaibao.
LUK 12:3 Dage mego te bidi meni yai be tomode bidu, te hulide te oloba pomu po olama dua digi wali po, te bidi mebago te be peduba holama, hai olama waibao,” Jisasgo te po wali.
LUK 12:4 Te Jisasgo po ma wadolama weyu te po wali, “Eno abagi dedeo, eno dagebolo te tiwai po obe dao. Te bidi dabe augwaligo dage te olo tigi busi bulu elebaso, wi elamuo. Te nosali augwaligo magi sę me isiąyu, te dagego noma bidi me isiligobeo.
LUK 12:5 Te eno po hanilama, dage dali obe dao. Te dagego mena bidide wi yaibawe? Te dagego wi yabo bidi dagebolo eno ola mawaibao. Te God dali dagego wi iyąo. Te Godigo bidi elama, te noma bidi dali siaba sąbo bomo agai usu yaibao. Eno mu tama dagebolo obe dao. God dali naga wi iyąo,” wali.
LUK 12:6 “Te dagego koneiąo, te dwasianu a naga banu dabe te bidi dabego te nogeai mone ge 2 toea sigo te banu sabo meniwe? Tiali goli, Godigo te tiwai dwasianu banu deli me te homu kone me gegeda palogobeo.
LUK 12:7 Tama te ba dabe diluai bage meni goli, Godigo augwali konealubo dao. Te dage bidi dabe da, te genuai diluai bage dao. Godigo duga tobolu nisi dabe tigidali nedama, konea silai elalubo dao. Tama tibaso, God agai dage bugagia tonalubaso, dage gasa bidide wi egimio,” Jisasgo te po wali.
LUK 12:8 Jisasgo te po ma wadolali, “Eno dagebolo obe dao. Bidi sabode bidibadi ‘Ao, ena da te Jisas wali pabo bidi dao’ wabo bidi, te bidi Godigo Bidi Mu eno dagalude Godigo ensel dabe sabode eno te po waibao, ‘Ao, te bidi ena wali asobo bidi dao.’
LUK 12:9 Tialima, bidi sabode ‘Woo, ena Jisas wali pabo bidi menio’ wabo bidi, te Godigo tagala palai bidi eno me dagalude Godigo ensel dabe sabode eno te bidide ‘Woo, te ena wali asobo bidi menio,’ waibao.
LUK 12:10 Bidi mego Godigo Bidi Mu dali dwai posobo po obaso da, Godigo te bidigo dwai posobo po wali te agai homu kone isiąyu gegeda palu tagalubo usu yaibao. Tialima, bidi mego Godigo Dwagi Yai Mobo Bidide dwai posobo po obaso da, Godigo te dwai po wali sela sąbo usu egobeo.
LUK 12:11 Dagego Godigo po pusubaso, augwaligo dage te Juda dabego bomo yai po ola mabo beba odasa selama, po tų ela mawainu eyu, ma te gavman tobolu bidigo gesabidide me po tų ela mawainu ebaso da, eno mena po obaso, te ena sana pabo po wagowe te homu eyu, te nago moni homu egimio. Magi baso menio.
LUK 12:12 Te sogo tama te Godigo Dwagi Yai Mobo Bidigo nago wabo po ola mawaibao, te nage tau sai hagede tiaibao,” Jisasgo te po wali.
LUK 12:13 Te bidi sabode bidi mego te po wali, “Po ola mabo bidi, eno amabolo dena aya isu dabolo taga pali nai duga si te doado bage buga siao po wao.”
LUK 12:14 Jisasgo wei ponoyu, te po wali, “Bidi mego te nai bugulabo bomo enabolo mabe, te nai bugulabo eno usu egobeo. Te eno sę menio.”
LUK 12:15 Te we bidi dabebolo agai te po wali, “Dua dao, duga tobage nai yogo idali weyu. Nai hauwa mu mubo te bidi geswai bidibo menio. Nai hauwa mu mubo te bidi te aga bidibo ula sabo te usu menio,” wali.
LUK 12:16 Te Jisasgo te po digi po pusali, “Nai hauwa mubo bidi mego tǫde nai bugagia holama hauwa walobo gi me deli elaluali.
LUK 12:17 Aga homude te po wabo gagalali, ‘Ena gide holali nai muabo pesage dabe usu egobeo. Eno magi yagawe?
LUK 12:18 Eno te ebao,’ agai te po weyu, aga homugo tiali, ‘Eno gide ebo nai me, olo dwagi yai nai me muai hagede te eno hasia nai mudali be dabe hųginama, genuai be ma sę yaibao,’ te homu yai.
LUK 12:19 ‘Ena digi enabolo ma te po waibao, “Kisu bidi dao, ena homugo mu tuali, te nai dabe kibu be hauwade sę ela pali nai munalubao. Te tiali ena sę ebo tagalama, nai tuyu, ąį tuyu, elama, bugai homu eyu bidao.” Eno te po enabolo ma waibao,’ agai te homu yai.
LUK 12:20 Tiali goli, Godigo te bidibolo te po wali, ‘Nage da, mu umawai bidi dao. Megi hulide tama nage isaibao. Nage isaide, mena bidigo naga tobade yogwaluali nai dabe tigidali saibawe?’” Jisasgo te po wali.
LUK 12:21 Jisasgo te po silu, te po wali, “Te da e tǫde bidi dabego augwa tobade nai umabo selama, sabobo ąǫ te ebao. Tiali goli, Godigo gedude augwali te magi nai meni yai bidi bidaibao. Te nai dabe agade me elalugobeo,” Jisasgo te po wali.
LUK 12:22 Jisasgo aga wali bilibo bage dabebolo te po wali, “Tama tibaso, eno dagebolo te tama po obao, dagego te po begelama pusali pode te homu hauwa elama, te tigi tau sabo nai tulama bidabo te naiba homu dogia pigio, ‘Te mena nai tugowe?’ Te dagego tigi tau sabo sęde homu hauwa dogia pelama, te po wagio, ‘Te dago mena ugwa dabe gudugowe?’ te homu me dogia pigio.
LUK 12:23 Tubo nai da, sęgę menio. Tialima, bidi bidibo ula elalubode te sęgę elalubao. Gudabo ugwa dabede da, sęgę menio. Tialima, duga bidibo tigi elalubo da, te sęgę te ebao.
LUK 12:24 Te ba dabe suao. Augwaligo nai me bulama, nogogo sabe dao. Augwa tubo nai muabo be me meni dao. Tialima, Godigo augwali gesebo dao. Ba dabe da sęgę menio. Dage bidi da, sęgę ebaso, Godigo tubo nai mawaibao.
LUK 12:25 Dage bidi mego moni homu ela pabogo aga isabo bodolu didigili pabo usu egowe? Menio. Dagego te tama homu eyu da bugagia bidada piduaiba te homu ebo usu egobeo.
LUK 12:26 Te dagego te tama tiwai dwasianu sęnu me yabo usu isąbaso da, teda magi baso dagego te gasa me me naide moni homu ebawe?
LUK 12:27 Te bulu wel noswai duduli walobo dagego suiąo. Augwaligo sę dene bomo elama, augwa au ebo menio. Augwaligo te ugwa dabe me nigibeo. Tiali goli, te eno dagebolo obe dao. Te polobadu bidali king bidi nogi Solomongo te nai hauwa mu muani bidi agai aga tigide me te ugwa wiegi wiegi yai au yali goli, te e noswai dabe duduligo yali augo te Solomongo au yali aiyaba elaluali.
LUK 12:28 Te noswai dabe Godigo aulubo dao. Te noswai dabe megi tama elalubo nago suali goli, te do da sasia pelama, te bidi dabego togolama, isiba ulaibao. Te olo noswai tiwai da, te Godigo aulubo da. Dage we bidi dabego homu dwasianu mu Godiba te begi pobao. God agai dagebolo ugwa maiabogo te noswai aulubo aiyaba elaluaibao.
LUK 12:29 Te dagego moni homu elama, te da tuabo mena nai dabe tueibawe, ma dago te mena ąį dabe tugowe, te homu ebo dao. Dagego te tama homu elama, te nai gegegimio.
LUK 12:30 Te God wali pisąbo te tǫde we bidi hani dabe tigidaligo te tama tebo moni homu elama, tigidali sogo gegebo dao. Dagego homugo tuabo homu ebo nai da, te duga Ayago agai dage maiabo homu konealubao.
LUK 12:31 Te nai dabe gegegebo tagalama, Godigo we bidi tonalubo sę wali bugagia pobaso da, ta nago homugo tubo nai me, ugwa me God agai mawaibao,” Jisasgo te po wali.
LUK 12:32 Jisasgo po ma wadolama, “Te dage ena dali bilibo bidi dabe, dage te dwasianu hani sipsip tiwai dao. Te dage wi egimio. Magi baso meni. Duga Ayago dagebolo po weyu, te aga dagego king bidibao po olama, Godigo dagebolo te we bidi tonalubo sę mawainu, dwagi yai homu elalubao.
LUK 12:33 Duga munalubo nai dabe tigidali gasa bidibolo menama, mone ge selama, nai meni yai we bidibolo maiąo. Dagego tama tiyu da, ta duga wiegi yai nai dabe dagalude muiąo. Tama tede te nai me dologobeo, bidi mego wi sogobeo, mano dabego me tugobeo.
LUK 12:34 Duga homu me duga te wiegi yai nai dabe munalubo digi elaluaibao,” Jisasgo te po wali.
LUK 12:35 Jisasgo te po wali, “Magi magi nai asobo tonalu, sisi elaluao. Duga ugwa dabe hagana selama, te kukulu dąų walama, te lam sole udulama tolalu, sisi elaluiąo.
LUK 12:36 Sę ebo bidi dabego augwa genuai bidi we kębo digi pai asobo tonaluali yaligia iyąo. Te genuai bidi sabalu, tųba bego bego wabo si, polo tama tų dawai dao.
LUK 12:37 Te genuai bidi asu suagasali, te sę ebo bidi dabe te godege pisąma, te gedu dila pai bomonama bididubadi yaide, augwa genuai bidigo suagasobaso da, teda te sę ebo bidi dabe da dwagi yai homu pemene mu yaibao. Eno dagebolo obe dao, te genuai bidi agai digi te sę ebo bidi dabego sę ebogia, aga ugwa haganama, te kukulu dąų walama, ‘Dage dua yao’ olama, tubo nai augwalibolo mawaibao.
LUK 12:38 Te genuai bidi huli tomode me, ma be posabo magade te ba gogolo po hasia sogo obadi me, te aga asabo konesiąbaso, te augwali sisi elasa bidibadi yaide, aga te huli tomode me, ma be posabo magade me aga asobo si, te augwali dwagi yai pemene mu yaibao. Tama te po konealu iyąo.
LUK 12:39 Dagego te sę homu kone palao. Te be page bidigo te nai wi sabo bidi te mena sogo asobo te konegi sogo da, te da tonalubadi, te nai wi sabo bidi aga be aluama, te be tomoba asobo sulama gogolama tagaligi menio. Te tonalubadi ebaso, te nai wi sagasigi menio.
LUK 12:40 Ena da Godigo Bidi Mu dao. Dagego ena ma asabo bodolu konesąbaso da, dage me olo sisi tama elalu yao,” Jisasgo te po wali.
LUK 12:41 Te Pitago Jisasbolo hanalu te po wali, “Genuai Bidi, nago te wali po digi po dabolo naga obawe, ma tigidali bagego me odomainu waliwe?” te hanalubo po tama Pitago wali.
LUK 12:42 Tama Genuai Bidigo wei ponoyu, te po wali, “Te eno te kolesaga elama, dwagi yai sę ebo bidibolo obao. Aga genuai bidigo te bidi te sę tigidali tonaluabo genuai bidi me ma nigilaibao. Te bidi te gasa sę ebo we bidi dabe nai dobayabo sogo dobayabo genuai bidi me nigilaibao.
LUK 12:43 Te sę ebo bidigo aga genuai bidigo mani sę idubadi yaide, aga genuai bidigo ma suagasobaso, te sę ebo bidi dwagi yai homu mu yaibao.
LUK 12:44 Eno dagebolo mu tama obe dao, te genuai bidigo aga te sę bugagia ebo bidi genuai bidi agai nai dabe tonaluabo bidi nigilaibao.
LUK 12:45 Tialima, te sę ebo bidigo aga homude te tama homu yali, ‘Eno genuai bidi polobadu pai goli, gesege ebo’ olama, agai te gasa sę ebo bidi dabe me, gasa sę ebo we dabe me elu yali, tama agai nai hauwa tubadi, te bomai ąį me hauwa tuyu elama, te aga tobolu gęǫ elama, te esela pai bidi tiwai eyu, te tama sę idubadi da,
LUK 12:46 me sogo te sę ebo bidi agai gegeda pelama, te agai konesąbo sogo me, te genuai bidi asama, te genuai bidigo te sę ebo bidi hwągo todogolama, denelege milama, muaibao. Tama agai te bidi te po odisąbo bidigo pesageba muaiba.”
LUK 12:47 “Te sę ebo bidi me aga genuai bidigo sę ya po wai goli, sisi elama, ya wali sę isąwai bidi, te genuai bidigo te sę bidi bįgo dwaigila mu elaibao.
LUK 12:48 Me ma, gasa sę ebo bidibolo aga genuai bidigo ya wali sę agai bugagia konesąnama, aga te bįgo elabo homu yabo sęba usu nama ebaso da, teda te sę ebo bidi te bigo te yalawagia dua digi elaibao. Te genuai nai mu sali bidigo te genuai nai wei ma ponabo sę yabo te elalubao,” Jisasgo te po wali. “Te we bidi augwaligo nai hauwa te bidi me deli te bidigo nogoba muaeibaso da, teda augwaligo te bidibolo te genuai nai mu wei ponabo te genuai te elalubao,” Jisasgo te po wali
LUK 12:49 Te Jisasgo po ma wadolali, “E tǫba sia nogagasu, ena asai dao. Tiabo homu eno polobadu yai dao.
LUK 12:50 Baptais sabode te ąįgo eno tigi siminibo tiwai, te nosali dene me eno tigi siminaibao. Eno baptais sabo gilama te ena dene sabo sę elalubao. Te dene siminasąbadi yaide, ena dwai homu mu ebao.
LUK 12:51 Dagego homugo eno e tǫba te tigidali we bidi dwagi yai homu ilagasali waliwe? Dagebolo eno mu po obao, te menio. Eno da te we bidi bugulagasu ena asai dao.
LUK 12:52 Tama we bidi bugulama, te tiwai me badu e badu bidaibao, me badu u badu bidaibao. Megi dąį elama, deli bede a naga bidai yabaso da, bugulama, selago te me si dali boi bidi eyu, te me sigo te me sela bage dali boi bidi eyu yaibao. Aya dabego augwa ogwa dali dwai homu eyu yaibao.
LUK 12:53 Ogwa dabego me augwa aya dali dwai homu yaibao. Ida dabego me augwa wegi dali dwai homu yaibao. Wegi dabego me augwa ida dali dwai homu yaibao. Ida dabego me augwa ogwago we dali dwai homu yaibao. Tama ogwago we dabego me augwa auwa dali dwai homu yaibao,” Jisasgo te po wali.
LUK 12:54 Jisasgo te we bidi dabebolo te po wali, “Sia ge pabo badu dagalu sisili ela sobaso da, ‘Tulubage tulaibao,’ dagego te po polo wabo da, tama nosali tulubage tulubo dao.
LUK 12:55 Tama me badu habu badu wali asobaso da, ‘Teda te giliga nanobo moni posolo yaibao,’ duga tama wabo dao. Tama moni posolo ebo dao.
LUK 12:56 Dage ugwadu homugo po wabo mu umawai bage mu dao. Duga tǫgo me dagalugo me ebo sę sulama, konebo goli dao. Magi baso megi e ebo sę page dagego konebewe?” Jisasgo te po wali.
LUK 12:57 Jisasgo te po ma wadolali, “Magi baso dagego te mena kolesaga te doloba pai te dwagi yai kolesaga dawe, te homu elama dagalobo meniwe?
LUK 12:58 Bidi mego nago dwai sę yali olama, nage po tų ebo pesageba odasa pobadi yaide, te bidi dali dage si te sunumidu pobadi yaide te po tų bugagia dodolao. Meni baso da, nage po tų ebo bidi pageba kekasa pelama, te bidigo nage enesigi bidigo nogoba muaibao. Augwaligo nage kalabuside muaibao.
LUK 12:59 Eno nagebolo te po dolo mu tama obe dao, te po tų abelisąbaso, nage kalabus bede bididubadi yaide, te nageba dąį ilali monego nage te kalabus bede abelama simanisiąbadi yaide, nage munu me te bulu dią soagobeo,” Jisasgo te po wali.
LUK 13:1 Te Jisas agai po obadi yaide, hasia asisąwai we bidi me pageba asali. Tama augwaligo Jisasbolo te po wali, “Te Galili tǫ we bidi me badu augwa sipsip kibu ela munama, Godibolo ofa olo mobadi yaide, tama te moni gavman tobolu bidi nogi Pailat agai po olama, gasa bidi dabego te we bidi ela muai. Tama ela munama, agai augwaligo kaneme me, te sipsip kibu kaneme me si taluali, tamadi,” augwaligo te po wali.
LUK 13:2 Tama te po odama, Jisasgo augwalibolo te po wei ponani, “Te Galili tǫ we bidi augwali te tiwai isibaso, tama dagego homu augwaligo yali dwai sę te gasa Galili tǫde bidibo we bidigo yali dwai sę aiyaba elaluali, dagego te homu ebawe? Te tebeo.
LUK 13:3 Eno dolo dagebolo obao, duga dwai sę ebo kolesaga tagalasiąbaso, teda dage me isaibao.”
LUK 13:4 “Te bulu nogi Siloam, tede moni bobobage sigi be degasa pai. Tama te sigi be degeyu yaide, we bidi hauwa te 18 elalio, augwali mu isali. Te be degali po dagego polo odali. Tama dagego e homu yali bogo, te Jerusalem be nani we bidi me badu augwaligo dwai sę dwasianu yali, tialima te sigi be degeyu elali we bidi augwali dwai dwai sę mu yali. Dagego te homu yali bogo. Te tebeo.
LUK 13:5 Eno dagebolo e po obao, duga dwai sę ebo kolesaga tagalasiąbaso, teda dage me isaibao,” Jisasgo te po wali.
LUK 13:6 Te po olama, Jisasgo augwalibolo e po digi po pusali. Agai te po wali, “Bidi mego agai wain gide ni haga elaluali. Tama nosali te bidigo te ni du walaliwe naga suagasali. Tialima, haga du walobeo.
LUK 13:7 Du walisiąbaso, agai te gi sę ebo bidibolo te po wali, ‘Edao. Kibu be selade ena e haga du suagasidu geani. Tiali goli, du walobeo. E ni gelao. E nigo te tǫ ili magi baso olo sabo dawe?’
LUK 13:8 Tama olama, te gi sę ebo bidigo te po wei ponani, ‘Genuai bidi, meo, e ni haga elalumainao. Kibu be delide elalumainu yaibao. Te kibu be tomode eno e ni haga pagede tǫ diganama, te tǫ ili mabo nai munama, tama taga paibao.
LUK 13:9 Tama nosali, du walobaso, usu da. Tiali goli e ni haga walisiąbaso, eno gelaibao,’ te gi sę ebo bidigo te po wali,” Jisasgo te po wai.
LUK 13:10 Te Sabat sogo mede Jisas te Juda dabego bomo yai po ola mabo be tomoba pelama, te we bidi dabebolo Godigo po ola mani.
LUK 13:11 Tama agai wabo po odali we bidi bidali tomode te tudi basia sali we bidali. Te dwai kauwa bidi mego te we dąų olama, te dwai gasi te we tigide munama elalubadi, tama te kibu be hauwa 18 te tama kibu bede te we tudi basia selama elaluali, te aga bugagia dolo ma dolalugobeo.
LUK 13:12 Tama Jisasgo te we sulama, agai te webolo i dwasianu weyu, asao wali. Tama te we asobo si da, Jisasgo te po wali, “We, nagede te elalubo gasi te silali dao, nage olo bidao,” wali.
LUK 13:13 Te Jisas agai nogo si te tudi basia selama te sugą sali wego tigide mubaso, tama polo tama te we tudi debela palu bugagia dolugulualio. Tama te wego Godigo nogi ugaba sali.
LUK 13:14 Te Juda dabego bomo yai po ola mabo be tobolu bidi agai sębę yali, Jisasgo te gasi yai we Sabat sogode dwagi yai ma ilalide. Tama tibaso, te tobolu bidigo te we bidibolo te po wali, “Nogo a naga bidama, e badu nogo deli sogo dago sę ebo usu da. Tama te sogode e bidigo pageba asiąo, agai dagego gasi sia somainu. Tialima, Sabat sogode asigimio,” wali.
LUK 13:15 Te Genuai Bidi Jisasgo te tobolu bidibolo te po wei ponani, “Dage magi ebo bidi dawe? Dagego po mobo mabo da, tiali goli duga po mobo mabo te dagego tibo po dali weyu, te wabo po wali pabo meni. Te dagego wabo po me te ebo kolesaga me deli tigi tiwai si me elalubeo. Te Sabat sogode, dage tigidaligo te duga kibu hos me, te kau kibu me muani madi pelama, te wę tumainu, te duga augwali muani pesage tagalama, te węba odasa pabo da, te Sabat sogode tiaibao. Tama te sę ebo si, dage moni homu ebo meni dao.
LUK 13:16 Me ma, e we da, te polobadu genuai bidi Abrahamgo hani we da. Tama e we te dwai kauwa bidi Satango dąų wali, kibu be hauwa 18 bidali. Eno e we tau salio, e we bugagia sese bidimainu sana palalio. Dwagi yai sę yalio. Eno dwai sę ebeo. Dagego homugo te eno dwai sę yalio, te homu ebawe? Te menio,” Jisasgo te po wali.
LUK 13:17 Tama Jisasgo wali wei ponani po te boi bidi dabe kone palama, tama augwaligo geda muani po me koneama, augwali hale yali. Tiali goli, te we bidi tigidali augwaligo Jisasgo bomai sę yali sulama, augwaligo dwagi yai homu mu yali.
LUK 13:18 Te Jisasgo te we bidibolo e nai mastetde po digi po weyu, te po wali, “Te Godigo we bidi tonalubo sę, te magi sę tiwai dawe? Mena sę agai ebo sę tiwai dawe?
LUK 13:19 Godigo we bidi tonalubo sę te tubo nai nogi mastet ge tiwai dao. Te mastet ge da, te kemeni ge sabi si dao, dwasianunu mu dao. Tama bidi mego te mastet ge selama, agai gide tela yali. Tama te nai wai tedelama, te koliali. Koliama, te genuai holama, te ni tiwai pedelali. Tama te ba dabe augwa be te ni nologode sę yani,” Jisasgo te po wali.
LUK 13:20 Te Jisasgo po wadolama weyu, te po ma hanalu wali, “Te Godigo we bidi tonalubo sę te mena sę tiwai dawe?
LUK 13:21 Godigo we bidi tonalubo sę te tubo nai nogi bret bo dabo nai yis tiwai da. We mego te yis selama, tama tubo plaua hauwa selama, te yis dali plaua dali si taluali. Tama taluama, te plaua tigidali bo dalio,” Jisasgo te po wali.
LUK 13:22 Te Jisas te Jerusalem be naniba pabo ma gagalali. Tama peyu, tomode dwasianu be nani dabeba saboloyu, tama agai te we bidi dabebolo Godigo po ola mani.
LUK 13:23 Tama ebadi yaide, bidi mego aga hanalu wali, “Genuai Bidi, te Godigo ma sabo we bidi nisu nagawe? Hauwa ma sogowe? Deli deli ma sogowe?” wali.
LUK 13:24 Te Jisasgo te we bidibolo te po wali, “Te be tų dwasianu goli, dage bomo elama, te sunumi tomoba piąo. Magi baso meni. Eno dagebolo obao. We bidi hauwa Godigo we bidi tonalubo madigi tomoba pai hagede, ebadi, tiali goli te augwali usu egobeo.
LUK 13:25 Tama te be page bidi hodaluama, te be sunumi palia sai madigi, tama dage te be mesalode bulu badu dolalueibao. Tama dolalubadi, dagego te be sunumiba bego bego wabo gagalama eyu, te po waibao, ‘Genuai Bidi, tų dayao, da tomoba asaio.’ Tiali goli, agai dagebolo te po wei ponaibao, ‘Dage menadu asaiwe, eno konebeo. Dage eno konebeo.’
LUK 13:26 Tama te sogo dagego e po wabo gagalaibao, ‘Woo, dago nage dali nai tuyu, wę tuyu yali. Nago dago be nanide da po ola mani,’ waibao.
LUK 13:27 Tiali goli, te be page bidigo dagebolo te po waibao, ‘Eno dagebolo obao, dage menadu asaiwe, eno konebeo. Dage piąo, dage tigidali dwai dwai sę ebo bage, dage enade gedao,’ waibao
LUK 13:28 Tama olama, dage tede bidiyu, te polobadu bidali bidi dabe te Abraham me, Aisak me, Jekop me, te Godigo po ola mabo profet bidi dabe me, augwali tigidali Godigo we bidi tonalubo madigi tomode bidibo dagego sueibao. Tiali goli, dage te bulu badu bidaibao. Dage bulu badu bidibaso, dage hwa waibao, duga kele gąųgo ma halua tueibao, te duga sębę ebaso tieibao.
LUK 13:29 Tama we bidi augwali te giliga asobo badu me, te giliga dega sabo badu me, te not bogo badu me, te saut bogo badu me, te tigidali bulu badu we bidi augwali deliba aselama, Godigo we bidi tonalubo madigi tomoba pelama, nai tueibao.
LUK 13:30 Suao. Me badu bidi megi te nosali sabi badu mu bidali bidi dabe da, te polasa pabo bidi yaibao. Me ma, megi me badu polasa pabo bidi goli, nosali te menio, te nosali tudi badu bidibo bage yaibao,” Jisasgo te po wali.
LUK 13:31 Te Jisasgo te we bidi dabebolo te po obadi yaide, te Farisi sibi bidi me badu aga pageba asai. Tama augwaligo agabolo te po wali, “Te genuai gavman bidi nogi Herot agai nage isilai hagede homu ebao. Tama tibaso, nage e bulu taga pelama, pao,” te Farisi bidi dabe augwaligo te po wali.
LUK 13:32 Tama Jisasgo augwalibolo te po wali, “Dage pelama, te bidi muma sabo te dwai uni yowi tiwai bidi Herot pageba pao, agabolo te po wao, ‘Edao, eno te dwai kauwa bidi sela sąyu, te gasi yai we bidi dwagi yai ma ilibao, megi me, do me, te sę yaibao. Tama duba eno sę siminaibao.’ Agabolo te po wao.
LUK 13:33 Tiali goli, eno pabo tų megi me, do me, duba me ena wali paibao. Magi baso meni. Godigo po ola mabo bidi me deli te gasa bulude isibaso da, te dwali. Tede isilamuo. Jerusalemde isigi sogo da, teda usu igi da.
LUK 13:34 Aua, dage Jerusalem bage dao. God agai po ola mabo bidi dabe dageba tagala palali. Tialima, dagego augwali ela muani, te masigi dabe sąyu, eleyu yali. Tama hauwa sogo eno homugo eno dage deliba sisinai hagede, pagia somainu, te ba kakaruk kimi aga gou dabe bogo dologode munama, bogogo bea sabo ąǫ tiwai. Tiali goli dagego hagelabo wali.
LUK 13:35 Edao! Megi dagego bidibo be nani Godigo tagalali, olo elalubao. Tama eno dagebolo obao, nosali dagego ena ma sugobeo. Dagego ena susiąma bidu, hauwa sogo sia saibao. Tama sia selama, nosali me dagego ‘Dago te Godigo nogide asobo bidigo nogi ugwaba sao’ wabo si, teda dagego ena ma sueibao,” Jisasgo te po wali.
LUK 14:1 Me sogo Sabat Jisas pelama, te Farisi dabe augwa genuai tobolu bidigo beba nai tugi pai. Tama te bidi aga te Farisi sibigo genuai tobolu bidi bidibo dao. Agai bede me te Juda dabego bomo yai po mu koneai bidi dabe me, Farisi sibi dabe me, augwali bidiyu, augwaligo Jisas agai magi sę ebo weyu, tonaluali.
LUK 14:2 Tama te bede me, nogo sągą tigi bo dae bidi me te Jisas pagede bidali.
LUK 14:3 Jisasgo te bidi sulama, te Juda bagego bomo yai po mu koneai bidi dabe me, te Farisi sibi dabe me, te hanibolo te po hanalu wali, “Te Sabat sogode dago te gasi yai bidi dabe usu ma iliyu dodolobo sę ebaso da, usu yaibawe?”
LUK 14:4 Tiali goli, augwaligo po wei ponebe. Tama Jisasgo te nogo sągą tigi bo dae bidi selama, dodolama, tagala palali.
LUK 14:5 Te bidi dodolama, tagala palama, Jisasgo te tonalubo bidi dabebolo te po wali, “Te dage tomode bidi mego ogwa me, kau kibu me wę geba te Sabat sogode tulalueibaso, te bidi me agai sulama, te aga ogwa isidali weyu, polo peyu, saibawe, ma te meniwe? Te kibu kau me, te wę geba tulalubaso, page bidigo sulama, te aga pelama, te Sabat sogode agai saibawe?.
LUK 14:6 Ma, te sogobewe?” wali. Tiali goli, augwaligo agai wali po wei ponogobeo. Augwaligo po me wabeo.
LUK 14:7 Te be page bidigo gasa bidi dabebolo nai tuagasiąo wai dao. Tama te bidi dabe augwali te be tomoba aselama, augwaligo te nogi elalubo bidi duga yabo madigiba polo pelama, tede bidali. Tama Jisasgo augwaligo te kolesaga ebo sulama, augwalibolo e po digi po wali. Agai te po wali,
LUK 14:8 “Bidi mego we sabo side, tama augwali nage nai tuagasao wabo side, nage pelama, te nogi elalubo bidi duga yabo madigiba dugwagi pigio. Magi basowe? Nage te nogi elalubo bidi duga yabo madigiba dugwagi pigi sogo da, te be page bidigo te genuai nogi yai bidi i olama, te bidi aselama, be page bidigo nagebolo e duga yabo madigi tagalao, e bidi ede dugwamainao, nage gasa be badu bidigi pao wagi da. Tama agai nagebolo te po wagi sogo da, nage hale eyu, te olo bidi duga yabo madigiba pigi da.
LUK 14:10 Te tiwai egimio. Augwaligo nage i wabo si, olo bidi duga yabo madigiba dugwagi pao. Tama tilama, te be page bidi aselama, sulama, agai nagebolo te po waibao, ‘Abagi, nage te nogi elalubo bidi bidibo madigiba asao, tede duga yao.’ Te wabo si yaide, te nai tuagasali we bidi tigidaligo gedude nago nogi ugwaba saibao. E po peni e dao.
LUK 14:11 Niwai bidi aga nogi ugwaba sobaso da, teda Godigo te bidi nogi aiyaba elaluaibao. Ma, aga nogi ugwaba sisąma bidali bidi, Godigo te bidigo nogi ugwa saibao,” Jisasgo te po wali.
LUK 14:12 Te Jisasgo te aga i wali bidibolo te po wali, “Naga nai hauwa te giligade uluyu, ma te piode uluyu elama, te naga abagi dede, ama dede, naga hani bidi me, kisalubo bidi dabe me, augwaligo nai hauwa elalubo bage, te tobage bidi dabe i wagio. Augwaligo nage nosali i olama, wei ponodali weyu, nago augwali i wagio.
LUK 14:13 Tiali goli, naga nai hauwa nogeainu ebaso, te nai meni yai bidi me, te nogo dwai bidi me, sągą dwai bidi me, gedu widai bidi me, te tobage we bidi i wao.
LUK 14:14 Te tobage we bidi nago i wabo si, Godigo nagebolo dwagi yai sę yaibao. Magi baso meni. Augwaligo nage ma wei mabo usu egobeo. Tama te doloba pai we bidi te gų pagede ma hodolobo sogode, Godigo nage ma wei ponaibao,” Jisasgo te po wali.
LUK 14:15 Te nai tuabo saide duga yali bidi mego Jisasgo ola mani po odama, te bidigo Jisasbolo te po wali, “Te bidi me Godigo we bidi tonalubo madi tomoba pelama, tede nai tubaso da, teda dwagi yai homu pemene elama, tama bugagia bidada peyu, bidada paibao,” wali.
LUK 14:16 Bidi mego te po wali. Tialima, Jisasgo agabolo te po wali, “Te bidi mego tubo nai hauwa selama, nogeaiyu, we bidi hauwabolo agai po ola tolali, ‘Eno nai sisi ebo si, dage tuagasiąo,’ te po ola tolali.
LUK 14:17 Tama nosali te tubo nai sisi elama, te bidigo aga sę ebo bidi tagala palali, te polobadu i wali we bidibolo e po omainu, ‘Megi asiąo. Te tubo nai sisi ela munama, tue hagede, megi dage asiąo wali.’
LUK 14:18 Tiali goli, augwali deli deligo ena hagelabo homu eyu, ili po wali. Bidi mego te sę ebo bidibolo te po wali, ‘Megi tama eno gi tǫ abelali. Tama te tǫ megi eno sugi paibao. Nago genuai bidibolo te po wao.’
LUK 14:19 Bidi mego te po wali, ‘Eno sę ebo kibu kau nogo si megi tama abelali. Tama eno te kibu dabe bomo elama, sę bugagia ebowe weyu, sugi pobao. Nage pelama, nago genuai bidibolo te po pusao. Megi ena asogobeo.’
LUK 14:20 Tama bidi mego e po wali, ‘Eno we tamadi kęwae dao. Tibaso, ena asogobeo,’ wali.
LUK 14:21 Tama tibaso, te sę ebo bidi aga genuai bidi pageba ma pelama, augwaligo wali po pusigi pali. Tama te genuai bidi sębę elama, dwai homu yali, te i wali bidi augwalibolo. Aga sę ebo bidibolo te po wali, ‘Polo pao. E moni taun genuai pabo tųde me, dwasianu pabo tųde me, tede bidibo nai meni yai we bidi oda sigi pelama, asao. Te tigi dwai we bidi me, gedu widai we bidi me, sągą dwai we bidi me, tigidali oda sigi pelama, eba asao,’ te po wali.
LUK 14:22 Tama te sę ebo bidi pelama, aga genuai bidigo yao wali sę elama, genuai bidi pageba ma aselama, te po wali, ‘Genuai bidi, nago enabolo wali sę eno yalio. Tialima, be pągąbeo, habuge yali,’ wali.
LUK 14:23 Te po odama, te genuai bidigo te po wali, ‘Moni taun taga pelama, te moni pabo tųde bidibo we bidi me, te dwasianu pabo tųde bidibo we bidi me gegegi pelama, eno beba asiąo po bomo elama wao, eno be pągąmainu, eno sisi yali nai augwaligo tumainu yao.
LUK 14:24 Eno nagebolo e po obao, eno hasia i wali bidi tigidali augwaligo eno sisi yali nai tugobeo,’ te po wali,” Jisasgo te po wai.
LUK 14:25 Te bidi Jisas te Farisi hani bidigo be taga pelama, Jerusalem be naniba pabo ma gagalali. We bidi me hauwa aga dali wali pai. Tama Jisas hobolu begelama, augwalibolo po pusali, te po wai,
LUK 14:26 “Niwai bidi ena wali pai hagede homu ebaso da, te ena godolo mu tama eyu, ena wali pai hageda, te usu da. Tama agai aga ida aya dali, aga we wai puluba dali, aga ama dede, abe dede godolo mu eyu, tama agai ena dwasianu godolo homu eyu da, tea te tobage bidi ena wali pogobeo. Tama te agai aga digi aiyaba munama, agai ena ugwaba muyu, aga ena wali pabo, te usu dao.
LUK 14:27 Niwai bidi ena isibo hagelabo weyu tama aga ena wali pabo meni, te tobage bidi te eno hani bidi menio. Te ena wali pabo sę e tiwai dao.
LUK 14:28 Bidi mego sigi be sę yainu da, hasia aga digi aga homude homu kone palobo, ‘E be sę ebo ena usu egowe, usu egobewe? Eno mone ge usu egowe, usu egobewe?’
LUK 14:29 Tama te bidi te homu hasia kone palisiąbadi, te sigi be ni bulali da, tama agai te be sę ebo sę ebaso, te be sę siligobeo. Tama gasa bidi dabego te sę yali sulama, te agade posobo po weyu, te bo wabo po gagalama,
LUK 14:30 te po waibao, ‘Te bidigo e sigi be sę ebo gagalali. Tiali goli, agai e sigi be sę yani simanobeo.’ Augwaligo te tobage po waidali weyu, agai hasia te be sę ebo bugagia koneama, usu baso, te be sę yao,” Jisasgo te po wali.
LUK 14:31 Jisasgo e po me wali, aga wali pabo sęde, “Te gasa bulude bidibo boi hwįbo genuai tuni bidi dali agai enesigi bidi dabe dali, augwali hwį yagasobo si, teda ede bidibo hwįbo tuni bidi hwįgi paibao, aga enesigi bidi dabe hodobo paibao. Tiali goli, hasia aga homude te po mobo waibao, ‘Te asobo boi bidi aga hwįbo bidi hauwa mu 20,000 elalubao. Tama eno hwįbo bidi hauwa mu menio, 10,000 naga elalubao. Sabi si menio. Te bidi eno aiyaba elalugowe, elalugobewe, te eno konebe,’ waibao.
LUK 14:32 Tama agai homude ena usu egobe wabo si, teda aga boi bidi digibulu bidibadi, agai po digi bidi tolaibao, boi pimainu yaibao.
LUK 14:33 Eno tamadi wali po deliba taluyu, tama te tiwai yaibao. Bidi mego aga doado bage tigidali tagalabo hagela baso, teda te bidi eno hani bidi menio,” Jisasgo te po wai.
LUK 14:34 Te Jisasgo te po wali, “Te tamu da, pusu ebo wiegi yai nai dao. Tialima, te tamu pusu ebo te mu halea pobaso da, mena tama ma pusu yaibawe?
LUK 14:35 Te mu halea pali tamu te olo nai tiwai dao, sę menio. Aga ili te tǫba magobeo. Te gide holobo nai tau sabo sę me egobeo. Te kibu bulmakau di dali taluama, te gide muainu ebaso, usu me egobeo. Te bidi dabe augwaligo te tobage tamu olo sela sąbo dao. Eno wabo po konebo bidi, agai eno po bugagia odao,” Jisasgo te po wali.
LUK 15:1 Te takis sabo bidi dabe dede, dwai kolesaga ebo bage me, augwali hauwa Jisas pageba asali, agai ola mabo po odainu hagede yali.
LUK 15:2 Tama te Farisi bidi hani dabe me, te Juda dabego bomo yai po koneani bidi dabe me, augwaligo hagelabo po weyu, te po wai, “E bidigo te dwai sę ebo we bidi pagebo dao, augwali hodobo beba pelama, nai tugi pabo dao,” wali.
LUK 15:3 Augwaligo te po obaso, tama Jisasgo augwalibolo e po begelama pusuyu, te po wai,
LUK 15:4 “Dage tomode bidi mego te kibu sipsip bidi sese nogo a naga te 100 elalubadi, tama te sipsip me deli hagabaso, te bidigo mena sę yaibawe? Te kibu sipsip page bidi agai te bidalubo sipsip te tubo nai sabo madide osogo taga pelama, tama te hagawai sipsip gegegi paibao, nono ebo menio, bugagia gegebo.
LUK 15:5 Gegegi pelama, subaso, teda dwagi yai homu eyu, te kibu sipsip nagede auwasa paibao.
LUK 15:6 Tama pelama, aga beba sabolama, aga hani bidi dabe me, abagi dabe me i olama, deliba sisinama, augwalibolo te po waibao, ‘Ena dali dwagi yai homu yao. Eno kibu sipsip hagawai. Te eno gegelama, eno salio. Dagego ena dali dwagi yai homu yao,’ te sipsip page bidigo te po waibao.
LUK 15:7 Eno dagebolo obao, te tiwai te doloba pai we bidi hauwa olo bidibadi, teda dagalude te ensel dabe dwagi yai homu ebo dao. Tialima, dwai sę ebo bidi me deli aga homu begelama, te aga dwai sę yali tudiba mubaso da, teda te dagalude ensel dabego te moni dwagi yai homu pemene mu yaibao,” Jisasgo te po wali.
LUK 15:8 Jisasgo te po me wali, “Me ma, we mego mone ge nogo si elalubadi, te mone ge me deli te be tomode hagabaso, tama te wego magi sę yaibawe? Te wego sole domonama, te hagawai masigi te be tomode gegebo gagalaibao. Tama agai te be hogomu poalama, te pobele bage dabe deliba sisiniyu, gegaibao, nono ebo menio, bugagia gegebo.
LUK 15:9 Gegelama, subaso, teda dwagi yai homu eyu, aga hani dabe me, abagi dede me i olama, deliba sisinama, augwalibolo te po waibao, ‘Ena dali dwagi yai homu yao. Ena hagawai masigi ma sali,’ te wego te po waibao.
LUK 15:10 Eno dagebolo obao, dwai sę ebo bidi me deli aga homu begelama, dwai sę tudiba sąbaso da, teda Godigo ensel bidi dabe augwali dwagi yai homu mu ebo dao, te wego te hagawai masigi ge gegelama ma sali gilama tiwai,” Jisasgo te po wali.
LUK 15:11 Te Jisasgo te we bidi dabebolo po me weyu, te po wai, “Te bidi mego ogwa si bidali.
LUK 15:12 Tama te i badu bidigo aga ayabolo te po wali, ‘Aya, nago doado bage dobayao. Eno nosali saibao homu yali doado bage enabolo megi tama mao,’ te nosali sabo hagela ebo homu elama, te po wali. Te i badu bidigo te po olama, aga ayago aga doado bage tigidali aga ogwa sibolo dobolama, mani.”
LUK 15:13 “Te dwasianu bidama, i badu bidigo aga sali doado bage munama, tama gasa bidigo abelama, te i badu bidibolo masigi dabe mani. Tama te i badu bidi aga doado bagede sai mone tigidali selama, gasa digibulu tǫba mu pelama, bidigi pai. Tede bidibadi, aga dwai dwai haniani sę eyu, hagoma homu ebo kolesaga elama, aga mone tigidali besela sąnama dolama tagalalio.
LUK 15:14 Tama aga mone tigidali sia sali. Masigi sia selama, tama te sogo te tǫde moni nasi yali. Tama te gesi bidi nai meni yai bidi bidali.
LUK 15:15 Nai meni baso, aga tede bidali tǫ page bidi me deli pageba pali, tubo nai sabo sę emainu yai. Tama te tǫ page bidigo te gesi bidi aga giba tagala palali, te aga kibu tonalubo sę emainu yai.
LUK 15:16 Tama te gesi bidi moni nasi baso, agai te homu yali, ‘Eno te kibu dabego tubo ni du dabe tugi sogo da, teda usu igi da,’ wali. Tialima, bidi mego agabolo tubo nai mabe.”
LUK 15:17 “Te aga homu kolesaga ma hasegelama, aga tedali homu ma yali. Aga te homu yali, ‘Eno aya aga sę ebo bage augwaligo tubo nai hauwa mu munalubadi goli, ede ena nasigo tama isaibao.
LUK 15:18 Ena edu taga pelama, eno aya pageba paibao. Teba pelama, eno agabolo te po waibao, “Aya, eno Godigo gedude dwai sę yali, nago gabidide me eno dwai sę yalio.
LUK 15:19 Hasia ena nago ogwa bidali goli, ma eno dwai kolesaga yali. Te megi nago enabolo ogwa olamuo. Enawe nago sę ebo bidi bidagawe?” ’ te gesi bidigo te homu yali.”
LUK 15:20 “Te homu elama, te bulu taga pelama, tama pelama, aga aya pageba painu yai. Tialima, digibulu aga tomode asodubadi, aga ayago aga asobo suali. Tama ayago agabolo homu dene eyu, aya aga ogwanu pageba udulama pali, te nogogo pageali, te gesabide nono nani.
LUK 15:21 Tama te gesi bidigo aga ayabolo te po wali, ‘Aya, eno Godigo gedude dwai sę yali, nago gabidide me eno dwai sę yalio. Ena gesuai bidi menio, dwai bidi dao. Tama tibaso, nago enabolo te ogwa da po olamu dao,’ te po wali.
LUK 15:22 Tiali goli, aga ayago aga wabo po togwali, te sę ebo bagebolo te po wali, ‘Polo pao, te dwagi yai bobobage ugwa sela asao, aga tigide bulao. Dwagi yai nogo mou sela asao, aga nogode holoyu yao, sągą nadoba me aga sągąde buluyu yao.
LUK 15:23 Te sa muani kibu kau wai selama, elao. Da dwagi yai homu eyu, genuai nai tuinao,’ wali.
LUK 15:24 ‘Magi baso meni. E bidi eno ogwanu isigi pai tiwai yai goli, tama megi ma bidibao. Aga hagawai, tama megi eno ogwanu ma sualio,’ ayago te po wali. Tama olama, augwali genuai dwagi yai homu ebo gagalali.”
LUK 15:25 “Te bidigo gomunai ogwa gide bidali, te i badu bidi beba asali sogode. Tama te gomunai bidi aga be pąba asiyu, te tęąbi eyu habidi elebo odali.
LUK 15:26 Te tęąbi ebo po odama, agai te sę ebo bidi me deli i olama, agabolo hanaluyu, te po wai, ‘Te dagego e tęąbi magi baso ebawe?’ te gomunai bidigo te tama po hanalu wali.
LUK 15:27 Tama te sę ebo bidigo agabolo te po wei ponani, ‘Te nago amanu ma asali. Nago aya aga ogwanu sese ma asobaso, agai te sa muani tuabo kibu kau wai elao tuinao wali, dabolo,’ te sę ebo bidigo te po wali.
LUK 15:28 Tama te po odama, te gomunai bidi sębę yali. Be tomoba pabo aga hagela yali. Aga aya te be bulu badu asai, aga homu dene baso, ‘Nage be tomoba asao’ wedu gebadi.
LUK 15:29 Aga ayago ‘Nage asao’ wali goli, te gomunai bidigo aga ayabolo te po wei ponani, ‘Nage eno wabo po homugo suao. Kibu be hauwade eno nago sę yalio. Nago enabolo wali po eno sela sąbe, odalio. Ena tama tiali goli, ena dali, eno abagi dede da moni nai tumainu, nago kibu meme wai naga ena munu me mabe.
LUK 15:30 Tiwai goli, u bidi nago ogwanu, agai nago mani doado bage te penani sęde bilibo we dabede olo silama, bidali. Aga te dwai sę yali goli, aga eba ma asobo si, naga sa muani tuabo kibu kau wai ela mani, tumainu, nage dwagi yai homu ebaso,’ te gomunai bidigo te po wali.”
LUK 15:31 “Tama aga ayago te gomunai bidibolo te po wei ponai, ‘Eno ogwa, tigidali sogo nage ena dali bidibo dao. Eno doado bage tigidali nago nogode mawai dao.
LUK 15:32 Megi da dwagi yai homu eyu, tęąbi yabo si dao. Magi baso menio. E bidi nago amanu aga isigi pai tiwai yai yali, tama megi ma bidibao. Aga hagawai, tama megi eno ma suali,’ te ayago te po wali,” Jisasgo te po wai.
LUK 16:1 Te Jisasgo aga wali asobo we bidi dabebolo e po begelai po pusa mayu, te po wai, “Te sibage siyu, genuai bidi me deli bidali. Tama aga doado bage genuai mu elalubaso, aga doado bage tonalubo bidi nigilai dao. Tama nosali gasa bidigo te genuai bidibolo te po wali, ‘Nago doado bage tonalubo bidi agai sę bugagia esiąbadi, nago nai dabe olo sela sąbo dao,’ wali.
LUK 16:2 Tama te po odama, te genuai bidigo te doado bage tonalubo bidi i olama, agabolo te po wali, ‘Te nago sęde bugagia ebo menio po eno odalio. Nago te bidigo wei ponabo po asęani buku tigidali dodolama, ena mao, eno sueio. Nago te sę ma egobeo, eno nage sela sąwaibao,’ te po wali.”
LUK 16:3 “Te aga genuai bidigo wali po odama, te doado bage tonalubo bidigo e homu yali, ‘Te genuai bidigo ena te sęde sela sąwanego da, eno magi masigi sabo sę yagawe? Gi sę yabo eno bomo usu egobeo. Te ena we bidibolo masigi gonobadi, ena hale yaibao. Magi sę yagawe?
LUK 16:4 E, eno konebao. Te genuai bidide negeli mani bage eno tau saibao. Tama nosali te genuai bidigo ena e sęde sela sąnama, tama te negeli mani bage augwaligo enade dwagi yai homu eyu, ena te sese sana bidaibao,’ agai homude te po wali.
LUK 16:5 Tama te homu elama, agai te genuai bidide negeli mani bage deli deli i wali. Tama te hasia asali bidibolo agai te po hanalu wali, ‘Te eno genuai bidide te negeli mani nai nisu naga maniwe?’
LUK 16:6 Te negeli mani bidigo te po wai, ‘Te eno nago genuai bidibolo te 100 dram wel eno negeli sali elalubao. Te eno denama hauwa wei ponaibao, te moni genagi nogo si olama, sągą sese, me badu sągą deli, denama pągąnama, wei ponaibao,’ te po wali. Tama te doado bage tonalubo bidi agai te po wali, ‘E bukude e pepa yabe da, nago negeli wei ponabo po asęani pepa yabe dao. Tama nago e pepa yabede asęani namba po sela sąyao, te denama genagi a naga olama, me badu nogo sela asęao, nago mani negeli te tiwai togwao,’ wali.”
LUK 16:7 “Te negeli mani bidigo te tiwai elama, tama te doado bage tonalubo bidi agai te genuai bidide negeli mani bidi mebolo te po hanalu wali, ‘Nage me, eno genuai bidibolo te negeli mani nai nisu naga maniwe?’ Te negeli mani bidigo te po wei ponani, ‘Te moni kobi wa hauwa mu 1,000 selama, tubo nai nogi wit ge te wa dabe pągąnama, tama eno te genuai bidibolo mayu, wei ponaibao,’ te po wali. Tama te doado bage tonalubo bidigo agabolo te po wali, ‘E bukude e pepa yabe da, nago negeli wei ponabo po asęani pepa yabe dao. Tama nago e pepa yabede asęani namba po sela sąyao, te gasa namba asęąo, hauwa mu meni, hauwa naga 800. Te tiwai nago polobadu mani negeli togwao,’ wali.”
LUK 16:8 “Te genuai bidi agai aga doado bage tonalubo bidigo yali sę po odama, te nai tonalubo bidi nogi ugwaba siyu, te po wali, ‘U bidi aga homu tedali yali, te negeli mane bage wi idali weyu, aga digi aga tigi bugagia tau sali,’ wali. Te peni e dao. Te augwa homu wali pabo we bidi augwali homu bugagia mu eyu, augwa hasi tau siyu, augwa tigi tau sabo dao. Tialima, te ulade bidibo we bidi augwali homu eyu, augwa tigi bugagia tau sabo menio,” Jisasgo te po wali.
LUK 16:9 Te po olama, Jisasgo po me maneyu, te po wali, “Te eno dagebolo e po obao, te sibage me doado bage me, me sogo te naigo we bidi te dwai kolesaga tomoba kekebo dao. Tiali goli, duga doado bagego we bidi bugagia tau siyu, abagi hauwa nigiliyu, bidao. Tama te tiwai elama, tama nosali te doado bage sia sobaso da, Godigo dage pageyu, ‘Eno bidibo madi tomoba asia,’ waibao.
LUK 16:10 Bidi mego dwasianunu nai bugagia tonalubaso da, teda te bidi da, genuai nai me bugagia tonalubo bidi dao. Ma, bidi mego dwasianunu nai tonaluyu, tama tibo po obaso da, teda te bidi da genuai naide me tibo po wabo bidi dao.
LUK 16:11 Tama tibaso, nage e tǫde bidibo doado bage bugagia tonalusąbaso da, teda bidi mego nage te doado bage mu me magomeo.
LUK 16:12 Tama, gasa bidigo doado bage nago nogode munama, tama nage te nai bugagia tonalusąbaso da, teda bidi mego nago nai nage me magomeo.
LUK 16:13 Nage te genuai bidi sigo tedali sę egomeo. Te menio. Nage te genuai bidi me godolo mu eyu, aga wabo po odaibao. Tiali goli, nage te i badu genuai bidide dwai homu eyu, agai wabo po nago odogobeo. Nago homu Godide mubaso da, teda naga homu te doado bagede me mugomeo. Ma, naga homu te doado bagede mubaso da, teda naga homu Godide mugobeo. Nago homugo me deli sabo ąǫ baso da, deli sao,” Jisasgo te we bidibolo te po wali.
LUK 16:14 Te Farisi bidi hani dabe augwaligo Jisasgo wali po odali. Augwali te mone dali pesa ebo bage bidali. Tama tibaso, Jisasgo agai po obadi yaide, augwaligo bo weyu bidali.
LUK 16:15 Tialima, Jisasgo augwalibolo te po wai, “Dagego homugo we bidi augwaligo dagede e homu yaibao, dage doloba pai bage dao. Tiali goli, God agai dagego homu kolesaga mu konebo dao. Tama we bidigo gedude wiegi yai nai dabe, te nai dabe Godigo gedude meda yai nai naga dao,” Jisasgo te po wali.
LUK 16:16 Te Jisasgo te po me wali, “Te polobadu bidali bidi Moses agai Godigo bomo yai po bukude asęani. Tama Godigo wali po pusa mani bage augwaligo agai wali po me bukude asęani. Tama bidaluama, te po kibu be hauwa bidabo po mu dao. Tama te pogo dage ola mani. Tiali goli, te bidi nogi Jon ame nenama, genuai elama, tama agai Godigo po pusa mabo gagalali. Agai te we bidibolo gesi po dwagi yai po ola mayu, God agai we bidi tonaluyu, augwali aga bomode bidaibao, wali. Tama Jongo te po pusa mabo gagalama, hauwa we bidi Godigo be tomoba pai hagede bomo elama, tomoba pabo dao.
LUK 16:17 Eno te wali goli, te dagalu me, te dagalude bidibo nai dabe me, e tǫ me, augwali tigidali olo hagawaibao. Tiali goli, Godigo bomo yai po me dwasianunu te munu me olo hagagobeo.”
LUK 16:18 “Niwai bidi aga we sela sąnama, gasa we sobaso da, teda te bidigo penani ebo dao. Me ma, niwai bidi agai te gasa bidigo sela sąwai we sobaso da, teda te bidi mego penani ebo dao,” Jisasgo te po wali.
LUK 16:19 Te Jisasgo augwalibolo te po wali, “Polodi te aga masigi daide bidali bidi bidali. Aga ugwa dabede wiegi yai daide bidai. Aga be dwagi yai bede bidu, te pusu nai me dwagi yai tuyu bidali, tigidali sogo.
LUK 16:20 Tama te nai meni yai bidi me bidali, aga nogi Lasarus, te hobedagia bidai bidi. Aga tigide moni hai yai bidi. Te nai meni yai bidi nogi Lasarus gasa bidigo aga pagasa selama, te masigi daide bidali bidigo moni be tų mabo badu te sesegeba dualagasali.
LUK 16:21 Tede bididubadi, te genuai bidigo tubo nai sesemo dabe, te kagali dabe aga tuyu bidali. Te haego elae gasi bidi bididubadi, te yowi dabe aselama, te keni bole te hamenago awela tudu bidali, tigidali sogo.
LUK 16:22 Tama te tiwai bidama, tama te nai meni yai bidi isali. Te bidi isąma, Godigo ensel bidi dabe augwaligo te isai bidi dagaluba tolasa pali, te polobadu bidali genuai bidi Abraham bogo badu bidigi pali, moni da tumainu yali. Te nosali aga masigi daide bidali bidi me te isali. Isama, aga hani bidigo aga pubulali.
LUK 16:23 Aga noma te dene ebo buluba bidigi pali. Tede dene dwasianu meni, moni dene mu eyu bidali. Tama te tiwai bidu, aga gedu ugwaba tonama, Abraham digibulu bidibo suali, te nai meni yai bidi Lasarus aga bogo badu bidibo me suali.
LUK 16:24 Tama sulama, agai i weyu, te po wali, ‘Eno aya Abraham, nago ena homu dene eyu, tau mao. Te bidi Lasarus nago tagala palama, agai nogo daniba wę mumainu, te eno hamenaba me yalawai wę muao, eno tigi kedau emainu. Magi baso meni. E siade eno tigi dene genuai mu ebuo,’ te po wali.”
LUK 16:25 “Tiali goli, Abrahamgo te po wei ponani, ‘Woo. Eno ogwa, polobadu bidali te kone palao. Nage tǫde bidali sogode naga te dwagi yai nai dabe tigidali siyu, e bidi Lasarus aga te dwai nai dabe naga sali. Tiali goli, megi aga ede bugagia bidibao. Nage tede dene mu siyu bidibao.
LUK 16:26 Peni me elalubao. Dage bidibo madi me, da si ede bidibo madi me, te si tomode te moni genuai sau pado elalubao. Te moni genuai sau elalubaso, niwai bidi aga edu peyu, nage bidibo madiba sabolabo usu egomeo. Me ma, nago bidibo madide bidibo bidi te da bidibo madi asabo me usu egomeo, te moni sau tomode elalubao,’ wali.”
LUK 16:27 “Abrahamgo te po olama, tama te masigi daide bidali bidi agai gela weyu, te po wali, ‘Eno ma bomo elama, nagebolo hanalu obao, te bidi Lasarus eno ayago beba tagala palao.
LUK 16:28 Tede eno ama a naga bidibao. Tama te bidi teba pelama, po mobo momainao, augwali e dene sabo buluba asidali,’ wali.”
LUK 16:29 “Tiali goli, Abrahamgo po wei ponoyu, te po wali, ‘Woo, te menio. Polobadu Mosesgo bukude asęani po augwaligo elalubao. Te polobadu bidali bidi dabe me badu, augwaligo Godigo wali po we bidibolo ola mayu, te po bukude asęani. Te asęani po me nago ama dedego elalubao, konealubao. Te asęani po si augwaligo odoyu, bidimainao,’ Abrahamgo te po wali.
LUK 16:30 Te aga masigi daide bidali bidi agai te po wali, ‘Eno aya Abraham, te menio, usu egobeo. Tiali goli, te bidi Lasarus te isi bidi bidibo madidu hodaloyu, eno ama dedeba pabo si, teda augwa homu begelama, dwai sę tudiba mawaibao,’ te po wali.
LUK 16:31 Abrahamgo agabolo po wei ponoyu, e po wali, ‘Mosesgo asęani po me, te Godigo po ola mani profet bidi dabego polobadu asęani po me, te po si nago ama dedego odisąbaso da, teda bidi me gų pagedu hodaloyu, augwaliba pedaluyu, tama ebo si, te usu egobeo, homu begelegobeo,’ Abrahamgo te tama po wali,” Jisasgo wali.
LUK 17:1 Te Jisasgo aga wali asobo bagebolo te po wali, “Te haniani dwai sę ebo kolesaga mu elalubo. Tiali goli, dwai sę ebo sunumi dayabo bidi nosali moni dene mu saibao.
LUK 17:2 Aga te tobage sę eidali weyu, augwaligo aga magede moni masigi bonogo kęyu, te bidi te tamu ąį tomoba sąyu, aga tede isigi sogo da, teda te usu igi dao. Aga te tiwai isibaso, tama dwasianu dene saibao. Me ma, te bidi bidiyu, agai e nogi meni yai we bidi me deli te dwai sę ebo kolesaga tomoba gegeyu egi sogo da, teda agai te dwai sę mu egi dao. Te dwai sę eyu da, tama nosali Godigo agabolo moni dene mu mawaibao. Duga digi tobade te koneama, tonaluiąo, dwai sę edugio menio, bugagia bidiąo,” wali.
LUK 17:3 “Te kisalubo bidi agai nagede dwai sę ebaso da, teda nago agabolo ‘Te dwai sę igio’ wao. Tama olama, te dwai sę yali bidi aga homu begelebaso, agai yali dwai sę nago sela sąyao.
LUK 17:4 Tama agai nagede dwai sę elama, tama nosali ‘Te ena nagede dwai sę yalide, te ena hobede ebao’ nageba wagasu da, teda nago aga yali dwai sę sela sąyao. Te bidi deli sogode te tiwai sę me badu nogo a naga olama, me badu nogo si ebaso da, teda nago aga yali dwai sę tigidali sela sąyao, wei ponogio,” Jisasgo te po wali.
LUK 17:5 Te po sela pabo bidi augwaligo Genuai Bidi Jisasbolo te po wali, “Dena homu kolesaga nageba muani digi, da usube. Da tau sao, dena homu kolesaga tigidali nageba mumainu. Te tiwai munama, te usu yaibao,” te po wali.
LUK 17:6 Tama te Genuai Bidi Jisas agai augwalibolo te po wali, “Edao. Dagego kolesaga enaba mu dąų wabo sę te dwasianunu kemeni ge tiwai dwasianu elalugi sogo da, teda e gasa nigo dagego wabo po odigi da. Dagego e gasa niba ‘Nage naga pedali dabe tǫdu gudama, tama te tamu ąįba pelama, naga digi teba buligi pao’ obaso da, teda te nigo te po odaibao, teba buligi paibao,” wali.
LUK 17:7 Jisasgo te po me wali, “Dage tomode bidi me deli agai sę ebo bidi elaluyu, tama te sę ebo bidi agai te gi tǫ elebo sę ebo da, ma te kibu sipsip tonalubo dao. Tama te sę ebo bidi te sę silama, tama beba asobo si, nago agabolo ‘Naga nai polo tuao’ wabo dawe? Menio.
LUK 17:8 Me ma, nago agabolo te po waibao, ‘Eno tubo nai nogeao. Nai nogeama, tama tubo nai mabo ugwa gulama, tama eno nai ena magasu, tau siyu, tiao. Tama nosali naga nai tuagameo,’ te po waibao.
LUK 17:9 Te sę ebo bidi agai genuai bidigo nage te sę yao wabo po odoyu, te sę ebaso da, te genuai bidi agai nage usu da wabowe? Meni.
LUK 17:10 Te dage dali yaligiama, ‘Te sę yao’ po olama, tama te sę dagego silibo si, te po wao, ‘Da da, sę ebo bage naga dao. Dabolo dage usu da po olamuo. Dago nogode muani sę naga dago yalio,’ te po wao,” Jisasgo te po wali.
LUK 17:11 Te Jisas te moni taun Jerusalemba pabo ma gagalama, te Samaria tǫ me, Galili tǫ me te bulu si tomo te dąįba pali.
LUK 17:12 Tama aga dwasianu be nani tomoba pai hagede, te oiyabe gasi sai bidi nogo sigo aga sunumide suali. Tama te oiyabe gasi sai bage digibulu gana dolaluali.
LUK 17:13 Tede dolalubadi, augwaligo i wali, “Jisas, Genuai Bidi, nago da homu dene eyu, da tau mao,” wali.
LUK 17:14 Tama Jisasgo augwali sulama, tama agai augwalibolo te po wali, “Dage piąo, te pris bidi dabe pageba piąo. Te bageba pelama, duga tigi augwalibolo waseligi piąo,” te po wali. Tama odama, te oiyabe gasi sai bidi dabe pabo gagalali. Augwali pebelayu subadi, augwa tigi sese ma yali suali, tomode.
LUK 17:15 Tama augwa tigi sese ma yali sulama, tama bidi me deli aga geasa pelama, i bomona wali, aga Godigo nogi ugwaba siyu, Jisas pageba ma asali.
LUK 17:16 Tama Jisasgo sągą pagede aga kidu pogulama, nage usu da weyu, “Nage dwagi yai bidi mu dao,” wali. Te gasi meni yani, sese ma yali bidi da, te Samaria bulu bidi dao, Juda hani isąwai bidi.
LUK 17:17 Te Jisas agai te we bidi dabebolo te po hanalu wali, “Eno te oiyabe gasi sai bage nogo si sese ma ilali. Tama te bidi me badu menadewe?
LUK 17:18 E Juda hani isąwai bidi naga agaduba geasa aselama, Godibolo nage usu dao wagasali. Te eno sese ma ilali Juda dabe augwali magi baso nage usu da wagasobewe?”
LUK 17:19 Tama Jisasgo te nage usu dao wagasali bidibolo te po wali, “Nago naga homu kolesaga tigidali enaba mubaso, teda nago tigi sese ma yali dao. Tama tibaso, hodaloyu, naga beba pao,” wali.
LUK 17:20 Te Farisi hani bidi me badu augwaligo Jisas hanalu weyu, te po wali, “Te Godigo we bidi tonalubo sogo nisu asogowe?” wali. Tama Jisasgo te po wei ponani, “Te Godigo we bidi tonalubo sogo asobo sunumi te bidigo polo konegobeo, bidigo gedugo susiąbo nai dao.
LUK 17:21 Godigo we bidi tonalubo sę dage tomode pedalubo te gagalai dao. Tama bidi dabe augwaligo ‘Ede pedelali’ ma ‘Ude pedelali’ po wagomeo,” Jisasgo te po wali.
LUK 17:22 Te Jisasgo aga wali asobo bidi dabebolo te po wai, “Ena da Godigo Bidi Mu da. Te nosali sogode dagego ena deli sogo ma sue hagede, tiali goli dagego ena sugobeo.
LUK 17:23 Tama bidi dabe augwaligo geda muyu, dagebolo ‘Aga ede bidibao’ ma ‘Aga ude bidibao’ po augwaligo waibao. Tama dage augwali wali pigimio, sugi pigimio. Augwaligo wabo po odogimio. Dage kone dao.
LUK 17:24 Te be sele eyu, te dagalude moni ula eyu ebo dao. Tama te tiwai Godigo Bidi Mu ma asobo sogo hania te tiwai yaibao,” wali.
LUK 17:25 “Tiali goli, hasia ena e tǫde bidibadi, te megi bidibo we bidi augwaligo enabolo dene hauwa menama, ena sela sąwaibao, tudiba muaibao.
LUK 17:26 Ena da Godigo Bidi Mu dao. Tama ena pelama, tama ma asobo sogode, te tǫde bidibo we bidi augwali te polobadu bidali bidi Noa aga tǫde bidali sogo bidali we bidigo yali sę tiwai yaibao.
LUK 17:27 We bidi dabe augwaligo te sogo God homu isąyu, nai tuyu, wę ma tuyu, bidali. Augwa we kęyu, we ma mayu, bidali. Tama augwali te tiwai bidibadi yaide, te bidi Noa te moni geba tomoba peyu, tama te moni ąį polo asiyu, te węgo te we bidi tigidali eleyu yali.
LUK 17:28 Ena e tǫba ma asobo si, te polobadu bidali bidi me aga nogi Lot, aga tǫde bidali sogo me tiwai yaibao. We bidi augwaligo God homu isayu, nai tuyu, wę dabe tuyu, bidali. Augwaligo haniani nai dobuyu, gide haniani nai buluyu, be dabe sę eyu, bidali. Augwaligo God tama homu isayu, bidali.
LUK 17:29 Tiali goli, te bidi Lot aga te be nani nogi Sodom taga pabo sogode, te moni sia dabe me, bogoli ebo posolo masigi dabe me, dagaludu tulali, te Sodom bulu we bidi tigidali ela muani.
LUK 17:30 Te tiwai pedelaibao, nosali, ena e tǫba ma asobo sogode.
LUK 17:31 Tama te sogode niwai bidi aga be pedude bidiyu, agai doado bage be tomode munalubaso, tama aga sai hagede aba tǫba dulama, be tomoba pelamuo. Me ma, aga gide bidibo bidi me, aga bede muani doado bage sai hagede ma geasa pelamuo.
LUK 17:32 Te polobadu bidali bidi Lot aga we, tede koneao, te yaligia yabuo. Te we aga beba ma tonaluyu, isali.”
LUK 17:33 “Niwai bidi aga e tǫde bidibo sogo aga tobade aga digi sese yai da homu eyu da, teda dowaibao. Me ma, niwai bidi ena tobade aga tǫde bidibo sogo sia sobaso da, teda nosali ma bidaibao.
LUK 17:34 Eno dagebolo obao, te Godigo tagala palai bidi ma asobo sogo hulide te bidi si be saide pila mubadi yaide, me naga oda siyu, me naga tagalaibao, te ensel dabe augwaligo.
LUK 17:35 Te sogo ulade me, we si tubo nai sisilubadi yaide, me naga oda siyu, me tagalaibao,” Jisasgo te po wali.
LUK 17:36 [“Bidi si gide bididubadi yaide, me naga oda siyu, me tagalaibao,” Jisasgo te po wali.]
LUK 17:37 Tama Jisasgo aga wali po simanama, aga wali asobo bagego aga hanalu wali, “Genuai Bidi, te sę yaibao wali menade yaibawe?” wali. Jisasgo augwalibolo te po begelai po weyu, te po wali, “Te ba kemodage dabe augwali te isali tigi munalubo madiba sisinaibao,” wali.
LUK 18:1 Te Jisasgo aga wali asobo we bidibolo po begelai po me pusali. “Dagego sesemane sogo Godibolo gedu haluasa po weyu, nono meniama, tagalidali weyu, eno e po begelai po dagebolo pusubao,” wali.
LUK 18:2 Jisasgo te po wali, “Te be nani mede te po tų dodolobo bidi me deli bidali. Te bidigo Godide wi isąyu, we bidide me wi isąyu bidali.
LUK 18:3 Tama te be nanide te bidi isai wilawe we me deli bidali. Tama te wilawe we te po tų dodolobo bidi pageba asidu geali. Asiyu, ‘Nago eno po tų odao, eno boi bidigo po aiyaba elaluaibao,’ te po wagasidu geali.
LUK 18:4 Tama te po tų dodolobo bidi hauwa sogo te wilawe wego wali pode ‘Menio’ wedu gebadi yali. Tiali goli, nosali aga homu begeleyu, aga homugo koneama, te po wali, ‘Eno God me, bidi me wi isąbadi goli,
LUK 18:5 e we hauwa sogo asidu gebaso, eno aga po tų odama, tau mawaibao. Eno aga tau magi menigi sogo da, teda aga sesemane sogo asiyu, eno bomo sia sagi dao,’ te homu yali,” Jisasgo te po wali.
LUK 18:6 Tama Genuai Bidi Jisasgo te po wali, “Dagego te gagea pai po tų dodolobo bidigo wali po odiąo.
LUK 18:7 Te God aga sa muani we bidi augwaligo ulade me, hulide me aga hanalu wabo si, te God agai augwali tau magowe, ma magobewe? Agai bobenu bidama, tau sogowe?
LUK 18:8 Eno dagebolo obao, menio, augwaligo hanalu wabo po agai odoyu, tama te tau sabo bodolu asobo si, agai tau mawaibao. Tiali goli, ena Godigo Bidi Mu ena e tǫba ma asobo si, enaba homu kolesaga mani we bidi eno sugowe?” Jisasgo te po wali.
LUK 18:9 Te Jisas agai po begelai po me pusali. Te we bidi me badu augwaligo te tiwai homu yali, ‘Da naga doloba pai we bidi mu dao. Tiali goli, gasa we bidi tigidali te dwai we bidi dao,’ augwaligo te homu yali. Tama te homu yali we bidibolo Jisasgo e po begelai po pusali.
LUK 18:10 Agai te po wali, “Te bidi si te Moni Lotu Be tempel be tomoba pali, Godibolo augwa po omainu yai. Te bidi me te Farisi hani bidi da. Bidi me, te gavman takis sabo bidi dao.
LUK 18:11 Tama te Farisi hani bidi doligulama, aga homu tomode te po wali, ‘O God, ena da te gasa bidi dabe tiwai meni baso, eno nagebolo nage usu dao obao. Gasa bage augwaligo doado bage pesa ebo dao. Augwaligo te gavmanigo bomo yai po sela sąbo dao. Augwaligo penani ebo dao. Ena da u takis sabo bidi tiwai meni baso, eno nagebolo nage usu dao obao.
LUK 18:12 Te Sarere deli tomode si sogo ena tubo nai gisilibo dao. Tama eno doado bage nogo si selama, te me deli nagebolo mabo dao, me badu nogo a olama, me badu nogo me si me si ena sabo dao,’ te Farisi hani bidigo te po wali.”
LUK 18:13 “Tiali goli, te gavman takis sabo bidi digibulu uba doligi pelama, tama aga gedugo dagaluba ogwaba tonalubeo. Ena dwai dwai sę yalio te homu eyu, homu dene eyu, aga hagawiaba nogogo eledu bidali. Agai te po wali, ‘God, enade homu dene eyu, tau mao. Ena dwai dwai sę ebo bidi dao,’ te po wali.
LUK 18:14 Eno dagebolo obao, e bidi aga beba ma peyu, Godigo aga yali dwai sę sela sąwai bidi dao. U Farisi hani bidi te tiwai menio. Mena bidigo te aga nogi me ugwaba sobaso, Godigo te bidi aiyaba elaluaibao. Ma, mena bidi imilasa bidibaso, teda Godigo te bidigo nogi ugwaba saibao,” Jisasgo te po wali.
LUK 18:15 Te we bidi augwa wai puluba Jisas pageba magasali. Augwaligo agabolo te po wai hagede, ‘Nago nogo e wai puluba tobolude munama, bugagia bidabo po wao.’ Tiali goli, te Jisas wali pabo bagego te wai puluba dabe sela asobo sulama, tama te we bidibolo “Te sę ebo tagalao” po wali.
LUK 18:16 Tiali goli, Jisasgo te wai puluba aga pageba i wali, te aga wali pabo bidi dabebolo te po wai, “Te wai puluba enaba asomainao. Tagala wagio. Eno wabo po e wai pulubago odalio. Te baso augwaligo ena tia sali. Tama te tobage homu ebo we bidi augwali Godigo we bidi tonalubo madigi tomoba asagameo. Konealuao.
LUK 18:17 Ogwa dali wegi dali augwaligo Godigo wabo po odama, tia sali. Tama te tobage homu isąwai we bidi augwali Godigo we bidi tonalubo madigi tomoba pogobeo,” Jisasgo te po wai.
LUK 18:18 Te Juda dabe tomode bidai nogi yai bidi me Jisas pageba asali. Agai Jisas hanalu wali, “Po ola mabo dwagi yai bidi, eno mena sę ebaso, ena tigidali sogo bidibo ula selama bidaibawe, ma gamonabo ula selama, bidada paibawe?” wali.
LUK 18:19 Tama Jisasgo te bidigo po wei ponoyu, te po hanalu wali, “Enabolo magi baso dwagi yai bidi waliwe? Te dwagi yai bidi me menio. Te God deli naga te dwagi yai bidi dao.
LUK 18:20 Nago te Godigo mani bomo yai po koneani. Te bomo yai po te da, penani sę egio, bidi ela mugio, bidi nai wi sigio, tibo po wagio, naga aya ida nogi ugwaba sao,” Jisasgo te po wali.
LUK 18:21 Tama te nogi yai bidigo te po wei ponani, “Ao, ena gesi ogwade bidibadi, te bomo yai po te eno wali pabo gagalali. Tama wali pelama, megi me tama te pode me bidibao,” wali.
LUK 18:22 Te Jisasgo te bidigo wali po odama, tama agabolo te po wali, “Magi nai me deli elalubuo, te sę nago ebeo. Nago beba pelama, naga doado bage tigidali selama, maketba munama, tama gasa bidi dabego abelaibao. Tama te doado bagede sali mone sobaso, te nai meni yai we bidi dobayao. Nago te sę ebaso, Godigo bidibo madide nago doado bage hauwa mu elaluaibao, nosali. Tama nago te sę elama, nage ena wali asao,” Jisasgo te po wali.
LUK 18:23 Tiali goli, te nogi yai bidi agai Jisasgo wali po odama, aga homu sęgę mu yali. Magi baso meni. Agai sibage me, doado bage me, kisu delalubo, te nai tagalogobeo.
LUK 18:24 Tama Jisasgo te bidi aga homu sęgę mu ebo suyu, te po wali, “Te walu hauwa munalubo we bidi, sibage hauwa munalubo bidi, augwali Godigo bomo tomoba pai hagede, te moni sinabo sę mu yaibao, tabiaibao.
LUK 18:25 Te moni kibu kamel te ugwa hobolobo medabu agabele tomodu dula pabo si, teda sinabo sę eyu, tabigobeo, te masigi hauwa kisu munalubo bidi Godigo bomo tomo dologoba dula pai hagede, moni sę mu yaibao, tabiaibao,” Jisasgo te po wali.
LUK 18:26 Jisasgo wali po odali we bidi noma siyu, augwaligo aga hanalu, te po wali, “Tama tibaso, Godigo mena we bidi ma dobola somainogo usu yaibawe?”
LUK 18:27 Jisasgo te po wei ponani, “Te sę ebo, bidigo te sę yabo usu egobeo, te Godigo te sę ebo usu yaibao.”
LUK 18:28 Tama te bidi nogi Pita agai Jisasbolo te po wali, “Suao. Dago be dabe tagalama, nage wali asobao,” wali.
LUK 18:29 “Ao,” Jisasgo wali, “tama eno dagebolo e po obao, bidi mego aga be dabe, aga we, aga ama dede, aga ida aya, aga wai puluba tagalama, Godigo we bidi tonalubo sę tobade,
LUK 18:30 tama te bidigo te tagalali nai genuai mu ma saibao, e tǫde bidibo sogode. Agai nosali sabo nai te polobadu tagalali nai te edelaibao. Tama nosali aga bida bida paibao, gamonaibao,” Jisasgo te po wali.
LUK 18:31 Te Jisasgo aga wali asobo bidi nogo si olama, sągą me badu si selama, augwali te we bidi tagalama, augwa tedali bidali. Agai augwalibolo te po wali, “Edao. Da Jerusalem be naniba pobao. Tama da tede bidibadi, te polobadu bidai bidi dabego enade asęani po mu po pedelaibao. Ena da Godigo Bidi Mu dao. Augwaligo te Godigo enade wali po asęani, te po mu po pedelaibao, Jerusalem be nanide.
LUK 18:32 Te Juda dabe augwaligo ena te Juda hani isąwai bagego nogoba mawaibao. Tama menama, te Juda hani isąwai bagego enabolo usu saibao, dwai po weyu, ena tigiba pesa sąwaibao.
LUK 18:33 Augwaligo kibu wali bigo ena tudi badu elaibao. Tama augwaligo ena ela muaibao. Tiali goli, giliga sela sogo elama, ena ma hodaluaibao, bidaibao,” Jisasgo te po wali.
LUK 18:34 Jisasgo te po olama, aga wali asobo bidi augwaligo te po page gisiga konebeo. Te po page geme dualali, tama Jisasgo magi naibolo waliwe augwaligo konebe.
LUK 18:35 Te Jisas tųdu pobadi yaide, te dwasianu taun nogi Jeriko te pąba sabolama, te gedu widai bidi deli te tų sesegede dulaluyu, masigi gonodu bidali.
LUK 18:36 Tama te gedu widai bidi agai te we bidi hauwa ela soabo u wabo odama, te po hanalu wali, “Magi ebawe?” wali.
LUK 18:37 Tama augwaligo agabolo wali, “Te Nasaret bulu bidi nogi Jisas ela sobao,” wali.
LUK 18:38 Te gedu widai bidigo i wali, “Jisas, te polobadu nogi yai bidi Devitgo Ogwa. Nage enade homu dene eyu, tau mao,” wali.
LUK 18:39 Te polalubo bidi dabe augwaligo agabolo “Te po tagalao, sagia sao,” wali. Tiali goli, agai bomonama ma i wali, “Devitgo Ogwa, enade homu dene eyu, tau mao.”
LUK 18:40 Tama tibaso, Jisas bilibo tagalali. “Te gedu widai bidi nogo tolasa asao,” wali. Tama te gedu widai bidi Jisas pąba asama, tama Jisasgo hanalu wali, “Nage eno magi sę emainuwe?”
LUK 18:41 Te gedu widai bidigo po wei ponani, “Genuai Bidi, nago eno gedu ma dodolobaso, te eno gedu ma bulu ula bolo ma sueibao,” wali.
LUK 18:42 Tama Jisasgo te po wali, “Suao. Nago enade tia sobaso, nago gedu dwagi yai ma ilai dao,” wali.
LUK 18:43 Polo te bidigo gedu si dwagi yai ma pedelalio. Agai Godigo nogi ogwaba siyu, Jisas wali pabo gagalali. Tama te we bidi augwaligo Jisasgo agade yali sę sulama, tama augwaligo me Godigo nogi ogwaba sali.
LUK 19:1 Te Jisas te be nani nogi Jerikoba sabolama, tama tomoba pai, te be nani ela pomainu yali.
LUK 19:2 Te be nanide bidali bidi me agai nogi Sakius. Agai mone sabo sę te Rom gavman takis sabo sę yai. Tama aga te takis sabo bagego polalubo bidi dao, agai mone me doado bage me kisu delalubo.
LUK 19:3 Tama te bidi Sakius te Jisas asobo po odama, agai homu Jisas eno sueibao. Tiali goli te bidi Sakius te pęwadage bidi yai elalubaso, Jisas te agai subeo. Magi basowe? Te we bidi hauwa ugwanu polasa dolalubaso, te sesela salio, tama Sakius agai Jisas subo usube.
LUK 19:4 Tama tibaso, Sakius polo udalama, pelama, polo te ni me deliba pai. Agai homu, ena e ni holama, te Jisas e ni pąba asobaso, eno aga sueibao.
LUK 19:5 Tama Jisas te ni pąba sabolama, ni sigiba ogwa tonali, Sakius suali. Jisasgo te po wali, “Sakius, nage polo dulao. Megi da si nago beba pinao, tede bidaibao,” wali.
LUK 19:6 Tama te po baso, Sakius polo dulali. Dwagi yai homu mu eyu, te Jisas agai beba odasa peyu, geseyu yai.
LUK 19:7 Te we bidi augwaligo te sulama, tama hagelabo po weyu, te po wali, “Jisas te dwai sę ebo bidigo beba nai tugi pali.”
LUK 19:8 Tama Sakius doligulama, agai te Genuai Bidi Jisasbolo te po wai, “Genuai Bidi, suao. Eno masigi dabe, doado bage tigidali si bugwaibao. Si bugulama, nai meni yai we bidi dobawaibao. Tama bidi mebolo eno ili po olama, agai nai wi sali da, tama megi te nai eno me si me si elama, wei ponaibao,” wali.
LUK 19:9 Te Jisasgo te bidi Sakiusgo wali po odama, tama Jisasgo te po wali, “Megi tama Godigo e bede bidibo we bidi tau mayu, ma sali. Magi baso meni. E bidi da te polobadu bidali nogi yai bidi Abrahamgo ogwa mu dao. Polobadu Abrahamgo Godigo wali po odama, agai mu koneani, tia sali. Megi me, eno wali po odama, nago mu konealualio, tia sali.
LUK 19:10 Ena Godigo Bidi Mu da, tama Godigo ena tagala palobaso, ena asali. Te olo hagawai we bidi eno gegi asai, te eno augwali tau mayu, ma somainu ebao,” Jisasgo te po wai.
LUK 19:11 Te we bidi augwaligo Jisasgo wabo po odobadi, agai gasa po me augwalibolo pusali, te po digi po. Tama Jisas te be nani nogi Jerusalem pąba sabalobaso, tama augwaligo geda muyu, te homu yali, Jisas te Jerusalem be naniba sabalobo si, Godigo we bidi tonalubo sę tamadi tama gagalaibao, augwaligo te homu yali.
LUK 19:12 Tama tibaso, Jisasgo augwalibolo e po digi po pusali, agai te po wai, “Te nogi yai bidi me deli digibulu gasa buluba osogo pai hagede. Tama tede bidibadi, te gavman genuai polalubo bidigo aga te aga bulu genuai gavman bidi nigilaibao. Tama nigilama, aga page buluba ma bidagasaibao.
LUK 19:13 Tama te bidi aga pisąbadi, agai sę ebo bage nogo si i olama, augwali deli delibolo mone ni yabe nogo si mawai. Agai augwalibolo te po wai, ‘Te ena gasa digibulu bulude bidibadi, dagego te mone sabo sę yao, eno mawai masigigo tama tiao, tama nosali eno masigi hauwa ma saibao,’ te po wai.
LUK 19:14 Tama te po olama, tama te digibulu gasa buluba pabo gagalali. Tiali goli, te genuai bidi dologode bidaibao wabo bagego bidi me badu tagala palu, te po wai, ‘Dagego te gavman genuai polalubo bidibolo te po wao, “E bidi dago buludu asai bidi, da tonalubo bidi nigibo hagelabo” wao,’ te po wali.”
LUK 19:15 “Tiali goli, te bidi digibulu buluba sabolama, te genuai polalubo bidigo aga genuai gavman bidi nigali. Tama agai gavman sę ebo bomo selama, aga buluba ma pali. Teba sabolama, agai polobadu masigi menama sę yali bidi dabe i wali, augwaligo gasa masigi nisu naga sali te suai hagede.
LUK 19:16 Te hasia asai bidi aga pageba asama, te po wai, ‘Genuai bidi, nago enabolo mani ni yabego te eno sę ma elama, te 200 kina ma ugwadu daganabo profet mone salio,’ te po wali.
LUK 19:17 Tama te genuai bidigo agabolo te po wei ponani, ‘Nage dwagi yai sę ebo bidi dao. Nago te sę bugagia yalio. Eno nago nogode te dwasianu mone menama, tama nago te dwasianu naigo bugagia tonalubo sę ebo bidi mu dao, te eno koneanio. Tama tibaso, megi te be nani nogo si tonalubo bomo eno nagebolo mobao,’ te po wai.
LUK 19:18 Tama i badu sę ebo bidi aselama, te po wai, ‘Genuai bidi, nago enabolo mani monego te sę ma elama, te eno mone te 100 kina sai dao,’ wali.
LUK 19:19 Tama te genuai bidigo agabolo te po wai, ‘Nago me te be nani a naga te nago tonaluao.’”
LUK 19:20 “Te nosali bidi asiyu, te po wai, ‘Genuai bidi, nago enabolo mani mone e dao. E masigi eno ugwade tomogolama, bugagia muani. Magi baso meni.
LUK 19:21 Eno nagede wi yalio. Nage da, homu sesena pabo bidi dao. Te gasa bidi dabego munalubo nai, te nago sabo dao. Naga gide nai bulisąma, te gasa bidigo gide bulali nai sabo bidi dao,’ wali.
LUK 19:22 Te genuai bidigo agabolo po wei ponoyu, te po wai, ‘Nage dwai sę ebo bidi, nago megi wali pogo eno nage aiyaba elaluaibao. Ena da homu sesena pabo bidi dao, nago koneani. Gide nai bulisąma, eno te tubo nai naga sabo bidi dao, te me nago koneani. Gide nai bulisąma, ena tubo nai sabo bidi dao, te me nago koneani.
LUK 19:23 Nago koneani, ena te tiwai bidi yaibaso, te nago eno masigi te benkde magi baso mubewe? Nage eno masigi te benkde mugi sogo da, teda ena ma asali sogode ena gasa masigi me badu ma sigi da,’ wali.”
LUK 19:24 “Tama te genuai bidigo tede dolalubo bagebolo te po wai, ‘Te ni yabe nogo si masigi selama, te u bidi mao, te masigi bidi sese a naga 200 kina sali bidibolo mao,’ wali
LUK 19:25 Tama tede dolalubo bagego te po wai, ‘Genuai bidi, te bidi agai bidi sese nogo a naga 200 kina polo sai dao,’ wai.
LUK 19:26 Te genuai bidigo te po wali, ‘Eno dagebolo obao, te nai elalubo bidi agai nai me saibao. Tiali goli, te dwasianu nai elalubo bidigo nai gasa bidigo saibao.
LUK 19:27 Tama eno boi bidi odasa asao. Augwali ena dologode bidibo hagelabo wali. Tama te bage odasa asao, eno gabidide hwągo ela muao,’ te genuai bidigo te po wali,” Jisasgo te po wai dao.
LUK 19:28 Te Jisas agai po ola mena silama, tama agai te Jeriko be nani tagalali. Te aga te we bidi polasa peyu, Jerusalem moni taunba pabo ma gagalali, ogwaba.
LUK 19:29 Tama pelama, tama te dwasianu be nani si pąba sabolali. Be nani me nogi Betfage, te be nani me nogi Betani, te si pąba sabolali. Tama sabolama, augwali te bulu du nogi Oliv te bulu duba sabolali. Teba sabolama, tama Jisasgo bidi si i wali, augwali si tagala palama pomainu yali.
LUK 19:30 Augwali sibolo te po wali, “U be naniba pao. Tama te be nani tomoba pelama, tede dage sigo kibu donki wai sueibao, page bidigo haliga gebelalio. Te gesi donki wai te bidi munu me duasiąwai donki dao. Te donki wai gebelali haliga pisigina sąyao, ena pageba sesao.
LUK 19:31 Bidi mego dage sibolo dage te donki wai magi baso bono pisigawaniwe te po obaso, agabolo te po wei ponao, ‘Te Genuai Bidigo te donki waide sę elalubo,’ te po wao,” Jisasgo te po wai.
LUK 19:32 Tama tibaso, te tagala palai bidi si u be naniba pelama, Jisasgo wali po mu salio, augwali sigo te donki wai suali.
LUK 19:33 Tama te bidi sigo aga gebelali haliga pisigabadi, te donki wai page bidi dabego hanalu wali, “Dage sigo te hos wai magi baso pisigabawe?”
LUK 19:34 Tama augwali sigo te po wei ponani, “Te Genuai Bidigo te donkide sę elalubuo,” wali.
LUK 19:35 Tama augwali sigo te kibu donki wai Jisas magasali. Augwa holobo ugwa dabe dilama, donki wai tudide pasugulali. Tama munama, augwaligo Jisas tau selama, te tudide dualai.
LUK 19:36 Tama Jisas te tiwai pobadi, te we bidi aga soabo sunumi au iliyu, augwa holobo ugwa dabe te pabo gesabi badu tųde dodolama, muani. Magi basowe? Genuai bidi asobaso tama muani.
LUK 19:37 Te Jisas te Jerusalem be nani pąba sabolali, te bulu du nogi Oliv a odogoba pabo gagalali. Tama teba pobadi, aga wali asobo we bidi hauwa mu tigidali augwali dwagi yai homu mu eyu, bomonama i weyu, Godigo nogi ugwaba siyu yali. Augwaligo Jisasgo polobadu yali bomai sę subaso, Godigo nogi ugwaba sali.
LUK 19:38 Augwali e tobage po wali, “Dago te genuai bidigo nogi ugwaba mu sobao. Aga te Godigo nogide asali bidi dao. Dago homugo dagalude boi pibo sogo asomainao. Dago Godigo nogi ugwaba mu sinao,” augwaligo te tobage po wali.
LUK 19:39 Te we bidi tomode te Farisi bidi dabe me badu bidali. Tama augwaligo Jisasbolo te po wali, “Po ola mabo bidi, te nage wali asobo bidi dabebolo ‘Te po tagalama, sagia sao’ wao,” wali.
LUK 19:40 Jisasgo te po wei ponani, “Eno dagebolo obao, e we bidigo sagia sobaso, teda e masigi dabego te tobage po wabo gagalaibao, Godigo nogi ugwaba saibao,” wali.
LUK 19:41 Te Jisas te Jerusalem moni be nani pąba asiyu, te be nani suyu, agai te be nanide bidibo we bidide homu dene eyu, gela wali.
LUK 19:42 Agai te po wali, “Ena wali asobo we bidi dabe augwaligo te boi pibo sunumi konebao. Megi eno homugo boi pibo te page Jerusalem bage dagego megi koneaibao. Tiali goli, te page God agai geme dualali, dagego sube.
LUK 19:43 Nosali te dwai bidibadi te asaibao. Boi bidi dabe augwaligo e be nani bobegelaibao, dage wi pidali weyu. Augwaligo te be nani moni obode te tǫ hauwa diganama, te tǫ hobolu badu dagana saibao. Tigidali badu bobegelaibao.
LUK 19:44 Augwaligo dage Jerusalem dabe ela silaibao, te be dabe tigidali augwaligo mu hųgiaibao. Be nigali masigi me deli ugwadu me munalugobeo, tigidali pepedelama, aba sąwaibao, meba me tedali, tedali, besala paibao. Magi baso te sę yaibawe? Woo, te Godigo dage suagasu tau sabo sogo asali side te dagego konebeo,” Jisasgo te po wai.
LUK 19:45 Te Jerusalem be nani tomoba pelama, Jisas te Moni Lotu Be tempel teba pali. Teba sabolama, te lotu be tomoba peyu, te maket tiwai nai dabe te tempel be tomode muduali bidi dabe agai buluba ela gudulu sela sąbo gagalali.
LUK 19:46 Agai te bidi dabe sela sąbadi, te po wali, “Te bukude te Godigo wali po tede noma muanio, te asęani po me deli e dao, ‘Eno be te we bidi enabolo gedu haluasa po wabo be elaluaibao,’ te po polobadu asęani. Tiali goli, dagego e be te nai wi sabo bagego geme dualubo ola be tiwai nigilalio,” Jisasgo te po wai.
LUK 19:47 Te Jisas agai te sę yali. Te deli deli sogo agai te we bidi dabebolo ola mani po wali, te Moni Lotu Be tempel tomode. Tama te pris tuni bidi dabe me, te Godigo polobadu wali po koneani bage me, augwaligo Jisas elabo tų gegali. Te Juda dabe tuni bidi dabe me, augwaligo Jisas elabo tų gegebo gagalali.
LUK 19:48 Tiali goli, te Jisas elabo tų augwaligo sube. Magi baso meni. Te we bidi tigidaligo bomo mu elama, Jisasgo wabo po odai hagede.
LUK 20:1 Te me sogo Jisas te Moni Lotu Be tempel tomode bidu, agai te we bidi ola mayu, augwalibolo Godigo dwagi yai po pusalio. Tama agai te po pusabadi, te pris tuni bidi dabe me, te Godigo polobadu wali po page koneani bage me, augwali agaba asali. Te Juda dabe genuai bage me asali.
LUK 20:2 Tama aselama, augwaligo agabolo te po hanalu wali, “Nago mena bomogo naga te do yali sę yaliwe? Te sę dego nago nogode maniwe?” augwaligo te po hanalu wali.
LUK 20:3 Tama Jisasgo augwalibolo te po wai, “Ena me dagebolo po me deli hanalu waibao. Te bidi nogi Jon, agai te we bidi baptais mani. Dego te bidi Jon te sęba tagala palaliwe, te Godigo tagala palaliwe, ma dego te sęba tagala palaliwe? Dagego ena wei ponao,” wali.
LUK 20:5 Augwa hasi te po miyu, te po wai, “Te dago ‘Godigo Jon te sęba tagala palali’ po obaso, teda Jisasgo dabolo te po hanalu waibao, ‘Dage Jongo wali po magi baso gisiga odobewe?’
LUK 20:6 Tiali goli, dago ‘Woo, Jon aga homugo te baptais mabo sę sali’ obaso, teda e we bidi tigidaligo masigi sąyu, da ela muaibao. Augwaligo homu te bidi Jon da Godigo tagala palali bidi mu dao,” augwa hasi augwaligo te po wai.
LUK 20:7 Tama tibaso, augwaligo Jisasbolo te po wai, “Dego te bidi Jon aga sęba tagala palaliwe, te dago konebeo,” wali.
LUK 20:8 Tama Jisasgo augwalibolo te po wai, “Eno hanalu wali po dagego wei ponosiąbaso, teda dagego enabolo hanalu wali po me eno wei ponogobeo. E sę eno nogode muani bidi nogi dagebolo eno wagobeo,” Jisasgo te po wali.
LUK 20:9 Te Jisasgo te Juda dabe tuni bidi dabebolo agai wabo po silama, tama agai te olo we bidi dabebolo te bono du gi po digi po pusali. Agai te po wai, “Bidi mego bono du gi bulali. Tama aga te bono du gi te sę ebo dabego nogoba osogo muani, augwaligo te gi tonalumainu, te augwaligo masigi sabo sę dao. Tama elama, aga te gasa digibulu buluba bidigi pali, tede hauwa sogo bidai hagede.
LUK 20:10 Tama nosali, te bono du dabe tau ebo sogode, te gi page bidigo aga sę ebo bidi deli i wali, tagala pomainu. Agai te bidibolo te po wali, ‘Nage pao, te eno bono du gi tonalubo bagebolo te po wao, “Te bono dude sai masigi me badu mao, ena te gi page bidibolo magi paibao.” Te po wao.’ Tama te sę ebo bidi pelama, te giba sabolama, te gi page bidigo wali po pusali. Tiali goli, te gi tonalubo bidi dabe augwaligo masigi mabe. Augwaligo aga wąbigo elama, buluba sela sąyu yali.”
LUK 20:11 “Te nosali te gi page bidi agai sę ebo bidi me deli tagala palali, te digibulu giba. Te bidi me te gi tonalubo bagego wąbigo elali. Augwaligo te bidi hale yabo po weyu, buluba sela sąyu yali, masigi mabe.
LUK 20:12 Tama nosali sela sogo weyu, aga sę ebo bidi tagala palali. Te bidi augwaligo elali, elali digi du yai. Tama te bidi me augwaligo buluba sela sąwai.
LUK 20:13 Te sę yali po odama, te gi page bidigo te homu yali, ‘Ena mena sę yaibawe? E, ena eno dwagi yai homu ebo ogwa mu te tagala palaibao. Te gi tonalubo bagego agai po sela sągobeo, bugagia odaibao,’ te homu yali.
LUK 20:14 Tiali goli, meni. Te ogwa te digibulu giba sabolama, tama te gi tonalubo bagego aga sulama, augwa hasi te po wali, ‘Aga aya isibo si, e bidigo te gi mu saibao. Tama tibaso, dago aga ela muinao. Nosali aga aya isibaso, teda dago te gi mu saibao,’ te po wali.
LUK 20:15 Tama olama, augwaligo te gi page bidigo ogwa bono du gi bulu badu sąwai, tede ela muani. Tama, dagego homu te gi page bidigo te bagebolo mena sę egowe?
LUK 20:16 Aga te giba asiyu, te gi tonalubo bage agai ela muyu, te gi te gasa bidi dabego nogoba muaibao, “Jisasgo te po wali. Tama agai wali po odali we bidigo te po wai, “Daba te sęgę maiabuo.”
LUK 20:17 Tiali goli, Jisasgo augwali gedu bomonama tonaluyu, te po wali, “Godigo wali po bukude e po wabo da, ‘Te be sę ebo bagego polobadu sela sąwani masigi, te masigi nosali te be tolalubo masigi nigali.’
LUK 20:18 Te po page da, te ena te masigi dao. Tama eno dagebolo obao, niwai bidi te masigiba tulolubaso, aga tigi dwasianu gagawaibao. Me ma, te masigi bidiba tulolubaso, aga tigi mia paibao,” Jisasgo te po wali.
LUK 20:19 Te Godigo polobadu wali po page koneani bidi dabe me, te pris tobolu bidi dabe me, augwaligo suali, Jisas agai po digi po augwalibolo bomo yai naga walio, augwali aiyaba elalumainu. Tama tibaso, augwaligo te homu yai, “Megi tama dago e bidi Jisas nogo si dųwaibao.” Tiali goli, tuni bidi augwaligo te we bidide wi baso, augwaligo aga nogo si dųbe.
LUK 20:20 Te genuai tuni bidi pris hani bage, me te bomai po page koneai bidi dabe augwaligo Jisas nogo si dųsiąbaso, augwaligo aga te moni gavman tobolu bidigo nogode muai hagede, te gavman bidi bomo hauwa mu elalubo bidi dao, we bidi tigidali tonalubo bidi dao. Te Jisas te bidigo nogode maiabo tų augwaligo gegali. Te sę eyu, augwaligo sa pabo bidi dabe Jisasba tagala palali. Tama Jisasba aselama, augwaligo agabolo tibo muma sabo abagi po weyu, agai wabo po odai hagede asobo bidi tiwai asali. Jisas agai pode geda mubaso, augwaligo aga nogo si dųwaibao.
LUK 20:21 Tama augwaligo agabolo tibo po weyu, te po wali, “Po ola mabo bidi, te nago naga ola mabo po dolo yai po mu naga wabo dao. Nago homude tigidali we bidi usu si dao. Nago homude bidi me ugwaba me dią holobo menio, bidi me aiyaba me elalugobe, tigidali we bidigo kolesaga te deli tama dao. Godigo bomo yai po nago te we bidibolo dolo mu ola mabo dao.
LUK 20:22 Te moni Rom gavman tobolu bidi Sisar, dago te bidibolo te takis moni mabo sę, te sę dwagi yai sę dawe, ma dwai sę dawe?” te po augwaligo hanalu wali.
LUK 20:23 Tiali goli, Jisasgo augwaligo tibo po nigibo sę ebo homu agai polo koneani.
LUK 20:24 Agai augwalibolo te po wai, “Te takis abelabo masigi enabolo waselao, eno sueio. Te masigide dego noma elalubowe? Mena bidigo po tede asęaniwe?” te po hanalu wali. Tama te sa pabo dabego te po wali, “Te gavman tobolu bidi Sisar agai noma te takis abelabo masigi daide elalubo, agai wali po tede asęani.”
LUK 20:25 Tama Jisasgo augwalibolo te po wali, “Ao. Tama tibaso, te takis mabo sęde, te bidi Sisarbolo agai nai dabe mao, tama te lotude me te Godibolo maiabo nai yai baso da, te God agai nai dabe da agabolo dolo mao,” wali.
LUK 20:26 Tama augwaligo agai pode tugobeo, te we bidi gesabidide. Te sa pabo bagego noma siyu, sagia sai.
LUK 20:27 Te Sadyusi bidi hani augwaligo homugo isai bidi ma hodalogobe. Sadyusi dabe me badu Jisas pageba asali. Tama augwaligo agade muma sabo homu eyu, te po wali,
LUK 20:28 “Po ola mabo bidi, te polobadu bidi Mosesgo e bomo yai po me deli dabolo asęani. Tibaso, gomunai bidi me deligo we selama, tama agai sali wego wai ame nisąwai, tama te bidi isibaso, teda aga amago te we ma sao. Te we selama, tama wai ame nobaso da, isai bidigo wai dao wao. Te sę yao, Mosesgo te bomo yai po asęani. Ao.
LUK 20:29 Me sogo ama a naga me badu si augwali bidai. Gomunai bidigo we sai, agai wai meni, te aga olo isali.
LUK 20:30 Tama nosali aga ama tomo bidigo te we ma sali.
LUK 20:31 Nosali te bidi isilama, te tomo bidi tudi badu bidigo te we ma sali. Ama dede a naga me badu nogo si te we deli naga salio. Tiali, tigidaligo wai me ame nabe. Tilama, tigidali isalio.
LUK 20:32 Nosali te we me isalio.
LUK 20:33 Te a naga me badu nogo si bidi te bage augwaligo te we selama, bidama, isali. Tilama, te isai we bidi ma hodalobo sogode te we mena bidigo we dawe?” augwaligo te po wali.
LUK 20:34 Te Jisasgo te po wei ponani, “Dage we bidi e sogo megi we sabo dao. Megi tǫde bidigo we dali bidi si augwa si sabo dao.
LUK 20:35 Tigidali we bidi megi te tiwai ebo dao. Tiali goli, augwali we bidi Godigo po weyu, augwali hodaluama, te nosali sogode bidibo we bidi, augwali te sogode we sabo sę ma egobeo.
LUK 20:36 Augwali ma isigobeo. Augwali mobo bidi ensel tiwai bidaibao. Godigo augwali gų pagede hodolali. Tama tibaso, augwali Godigo wai bǫų bidibo,” Jisasgo te po wai.
LUK 20:37 “Te Mosesgo aga po asęani, te po wai, ‘Isai bidi gų pagede ma hodalobo dao.’ Agai mena sę elama, tama agai dabolo te po ola maniwe? Agai asęani po tomode te po elalubao, me sogo Mosesgo dwasianu ni pagede sia dilubo suali. Moses agai nǫų dabe polobadu isali goli, agai Godide te po asęani, ‘Genuai God te Abraham, Aisak, Jekop te bagego God dao’ wali.
LUK 20:38 Tama Godigo ‘Ena da te bagego God dao’ obaso, te dago kone dao, te God da, te isai bidigo God menio. Bidibo bidigo God dao. Tama Godigo gedude, bidibo we bidi me, isai bidi dabe me, te bidibao,” Jisasgo te po wai.
LUK 20:39 Jisasgo te po te Sadyusi bagebolo olama, augwali aiyaba elaluama, gasa bidi hani dabe, te Juda dabego bomo yai po koneai bage, augwaligo Jisasbolo te po wai, “Po ola mabo bidi, nago augwalibolo wei ponani po usu dao,” wali.
LUK 20:40 Te Sadyusi dabe augwali agade wi baso, po me deli ma hanalu wabeo.
LUK 20:41 Te Jisasgo augwalibolo te po hanalu wali, “Dagego te po wabo dao, ‘Te nosali asabo bidi Krais da, te polobadu bidi nogi Devit aga ogwa da.’ Dagego te po magi baso wabo dawe?
LUK 20:42 Buku me nogi Sam, te lotu tęąbi po wabo buku tomode te bidi Devitgo te po asęani, ‘God agai eno Genuai Bidibolo te po wai, “Nage eno dolo nogo badude duayao.
LUK 20:43 Nage tede duabadi, eno nago boi bidi dabe nago sągą dologoba muaibao, nago sągą augwali tobolude agawaibao,” ’ Devitgo te po asęani.
LUK 20:44 Tama te po tomode Devit aga digi aga te Krais, te nosali asabo bidi, te bidide ‘Eno Genuai Bidi’ wali. Tama tibaso, Krais te Devitgo ogwa naga te menio, te agai genuai bidi mu dao,” Jisasgo te po wai.
LUK 20:45 Te we bidi tigidali augwali tede bidibadi, Jisasgo wali po odali.
LUK 20:46 Tama Jisasgo aga po sabo bidibolo weyu, te po wai, “Dage dua dao, te bomo yai po koneai bidi dabede. Augwali godola pela bobobage ugwa gudama, bilama pabo dao, nogi yai bidi tiwai. Augwali godola pela te we bidigo bidi sisinibo pesagede augwalibolo siade dao omainogo, genuai bidi tiwai. Augwali mu godola pela lotu be tomode bidi gesabidide naga dualubo, genuai bidi tiwai. Augwali godola pela genuai nai tubo side augwali polalubo ni namide naga duawainogo ebo dao.
LUK 20:47 Augwaligo te wilawe we dabego doado bage gisigilibo dao. Tiali goli, augwaligo tibo gedu haluasa po bobobage wabo dao. Tama nosali Godigo tigidali we bidide po tų ebo si, te tobage bidi dabe, te bomo yai po koneai dabe, augwaligo moni sęgę mu saibao, te gasa we bidigo dwasianu sęgę saibao,” Jisasgo te po wai.
LUK 21:1 Te Jisas te Moni Lotu Be tempel tomode tonolo bilibadi, agai suali, te mone hauwa munalubo bidi dabego augwaligo Godibolo masigi te halobage tomoba mubo agai suali.
LUK 21:2 Tama Jisasgo suali, te magi nai meni yai wilawe wego dwasianunu nogeai mone ge si te halobage tomoba muani.
LUK 21:3 Tama sulama, Jisasgo tede bidibo we bidi dali te po wai, “Eno mu po dage dali obao, e magi nai meni yai wilawe wego mani masigigo te tigidali we bidigo mani masigi aiyaba elaluali.
LUK 21:4 Te tigidali we bidi augwaligo masigi hauwa me badu munalubo. Augwaligo me badu naga Godibolo manio. Tiali goli, e we da masigi aga mu mina salio. Te we agai masigi tigidali Godibolo manio. Te we aga nai abela tuabo masigi mu mina salio,” Jisasgo te po wai.
LUK 21:5 Te bidi dabe me badugo te Moni Lotu Be tempel tede po wai, “Augwaligo te be dwagi yai masigigo auluai, te we bidigo Godibolo mani nai dabe me sisinama, te sę yai dao,” te po wali. Tialima, Jisasgo te po wali,
LUK 21:6 “E tǫde elalubo nai dabe megi dagego subo, te sogo pedalobo side te dage dali boi bidi dabe augwaligo me gogologobeo masigi ugwadu munalubo masigi duluda aiyadu masigi agasi halo olama, tigidali pebedama, aiyaba sąwaibao,” Jisasgo te po wai.
LUK 21:7 Te augwaligo Jisas hanaluyu, te po wali, “Po ola mabo bidi, te sę nisu pedalaibawe? E be dolabo maganubo side, te mena tiwai sę hasia pedalubo sulama, dago koneaibawe?”
LUK 21:8 Tama Jisasgo po weyu, te po wali, “Bidi hauwa asiyu, Jisas ena nogi waibao, Jisas asaibao wali, ena te Jisas ena e asalise, te po waibao, dage dali. Dage dua dao. Augwaligo dage ili po ola mawaibao. Tama augwaligo te po me waibao, ‘Asobo si te pąba maga yagasobao.’ Tiali goli, dagego te po wabo bidi wali pigio.
LUK 21:9 Dagego odoyu da moni wąbi hwįbo po odobo si, teda dage didibili egio. Ma, bidi dabe augwaligo te gavman sela sąwai hagede wąbi hwįbo po odobo si, te dage didibili egio. Te sę polo hasia pedaliyu polo yaibao. Tiali goli, te si polo siligobeo, tigidali nai silabo si polo asogobeo,” Jisasgo te po wai.
LUK 21:10 Jisasgo augwalibolo te po me wai, “Me bidi hanigo me bidi hani dali wąbi hwįaibao. Te genuai bulude bidibo bidi hani mego te gasa genuai bulude bidibo bidi hani me dali hwįaibao.
LUK 21:11 Genuai genuai gęǫ e tǫde pedalaibao. Me badu habu badu genuai nasi dali genuai gasi dali yaibao. Te dagalude te we bidi wi yabo moni haniani sę pedelaibao.
LUK 21:12 Tiali goli, te tigidali sę pedalisiąbadi, bidi dabe augwaligo dage tulama, dwai sę dage dali yaibao. Augwaligo dage te bomo yai po ola mabo be tomoba odasa pelama, po tų ela menama, tama augwaligo dage kalabus be tomoba muaibao. Eno nogi tobade dage sę ebadi, augwaligo dage te moni gavman tuni bidi gesabide odasa paibao.
LUK 21:13 Te dagego Godigo po wabo tų nigilu te ebao.
LUK 21:14 Tama augwaligo dage dali te sę esiąbadi, dagego te homu yao, te po tų ebo sogode duga digi tau sabo po dagego homude hasia dodola sigio.
LUK 21:15 Ena digi ena koneai bidigo po dage pedauwaliba muaibao. Te baso, dagego boi bidi dabego te po sela sąnama aiyaba elalugobeo.
LUK 21:16 Dagego aya ida me, ama me, deli sibi dabe me, abagi me, augwaligo dage te gavman bidi dabego nogoba muaibao. Augwaligo dage me badu ela muaibao.
LUK 21:17 Tigidali we bidi augwaligo dage dali moni sębę mu yaibao. Magi basowe? Eno nogi dage dali bidibaso augwaligo tama tiaibao.
LUK 21:18 Tiali goli, dage bugagia mu bidaibao, dagego tobolude tobolu nisi me deli hagagobeo. Tama tibaso, wi egimio.
LUK 21:19 Dage bomo elama, bidao. Nono esisąbaso, dagego mu bidabo sogo nosali saibao,” Jisasgo te po wai.
LUK 21:20 Te Jisasgo te po me wai, “Te nosali dagego te ami bidi dabego Jerusalem be nani bagulibo maga dagego subaso, teda te Jerusalem hanu dolabo sogo pąba yagasali, te dagego koneaibao.
LUK 21:21 Tama te sogode te Judia tǫde bidibo bage augwali te bulu duba wi pao. Tama te Jerusalem hanu tomode bidibo we bidi me, augwali te hanu taga peyu, gasa madiba wi piąo. Te bidi dabe hanu sesege badu bidibo bidi, augwali te hanu tomoba pelamuo.
LUK 21:22 Te sogode te Godigo te Juda we bidigo yali dwai sę wei ponabo sogo dao. Tama te side te Godigo bukude asęani po tigidali te nai igibilama walaibao.
LUK 21:23 Tama te haliga yai we dabe dali, wai bǫų ame megi tama mabo we me, te tobage webolo hobede yao. Genuai sęgę mu e tǫde pedelaibao, te Godigo sębę yai we bidi te sogo gegaibao.
LUK 21:24 Tama te boi bidi dabego te Juda dabe me badu moni hwągo ela muaibao, me badu nogo si dųlama, kalabus ilama, odasa pelama, tama tigidali gasa tǫba mugi paibao, tede mu bidimainu yaibao. Tama te boi bidi dabe, te Juda bidi hani isąwai dabe, augwaligo te Jerusalem hanu mu dola silaibao, te aiyaba elaluaibao. Tama nosali te Juda hani isąwai dabego Juda dabe aiyaba elaluabo si silaibao,” Jisasgo te po augwalibolo wai.
LUK 21:25 Te Jisasgo augwalibolo po me weyu, te po wai, “Te giligade me, te poluade me, te hǫde me te gasagi yai sę pedelaibao, bidigo konesiąbo sę. Tama tǫde tigidali we bidi dwai homu elama, wi eyu, gela weyu, tebo side moni tamu ąį dini asainogo u wabo augwaligo odoyu, wi yaibao.
LUK 21:26 We bidi augwaligo homugo magi sę e tǫde pedalogowe, te po waibao. Tibaso, augwali homude wi eyu, tigi aiyoge eyu, tibo isaibao. Magi basowe? Te dagalude hǫ dabe augwaligo tų mina sobaso, gegele bilaibao.
LUK 21:27 Tama te ebo sogo ena te Godigo Bidi Mu ena gasa dagalu pǫ medu asaibao, te eno moni bomo dali, moni ula dali asobo augwaligo te sogo sueibao. Te moni ula te giliga sesena pai nanobo tiwai yaibao.
LUK 21:28 Hasia te sę gagalama pedalubo side, te ebo sogo dage tobolu ugwanu elama, dolaluao. Te side dage Godigo sabo silabo side pąba yagasabao,” Jisasgo te po wai.
LUK 21:29 Te Jisasgo po me begelama, augwali dąį wai. Agai te po wai, “Dagego kaiya dali gasa ni dabe me solobo subo dao.
LUK 21:30 Tama dagego suyu, gesi yabe pedalobaso da, te dagego konebo dao, te sogo poi pibo si tamadi pedalaibao.
LUK 21:31 Te tiwai me, te eno dagebolo megi pusali sęgę pedalobo dagego subaso da, te dagego koneaibao, te Godigo we bidi tonalubo sogo polo pąba asai yabo.
LUK 21:32 Eno mu po dage dali obao, megi e sogo bidibo we bidi augwali me badu bidibadi, te ebo sogo te sęgę tigidali pedalaibao.
LUK 21:33 Dagalu dali, tǫ dali tigidali pela silaibao, tiali goli eno po me munu me sia sogobeo,” Jisasgo te po wai.
LUK 21:34 “Te dage dua dao, bugagia suao. Dagego tigidali sogo bomai wę tulama, aiyoge elamu dao. Tiyu dagego tigi tau sabo homu naga egio. Te tiwai kolesagago dage mesegelebaso da, teda te Bidi Mu asobo sogo dage polo asaibao, te enego hasa enebo tiwai yaibao.
LUK 21:35 Te ena asobo sogo te tigidali tǫde bidibo we bidibolo me te tiwai sę pedalaibao.
LUK 21:36 Sesemane sogo dage bugagia suao, dua dao. Te sę eyu, tigidali sogo dage God hanalu wao, agai dagebolo aga bomo momainu yao. Tama tilama, tigidali te sę dageba pedelainogo yali da, te dage geda munama ela soeibao. Tiyu da, dage ena gesabide bugagia dolaluaibao, ena da te Godigo Bidi Mu dao,” Jisasgo te po wai.
LUK 21:37 Te tigidali sogo Jisasgo po augwali we bidi dali Moni Lotu Be tempel tomode ola mawai. Tilama, te hulide Jisas aga bulu du me nogi Oliv teba pigi pabo dao.
LUK 21:38 Tigidali we bidi augwali kigamu mu aselama, te Moni Lotu Be tempel tomoba bulama, Jisasgo po odainogo yai, tigidali sogo.
LUK 22:1 Te olo bidibo sogo me pąba yagasaibao. Tama te sogo te Juda dabe augwaligo ‘Te polobadu mu Godigo dago wąį nǫų dabe mu ela soyu, elisąwani sogo da’ weyu, augwaligo te sogo bo disąwai nai bret tubo dao. Te olo bidibo sogo nogi Pasova dao.
LUK 22:2 Tama te pris tuni bidi dabe me, te Juda dabego bomo yai po koneai bidi dabe me, augwaligo te Jisas elabo sunumi gegali. Tama augwali te we bidigo suidali weyu, wi yali. Tama tibaso, te we bidi suidali weyu, augwali te po geme miani.
LUK 22:3 Te dwai haubo noma bidi Satan agai te bidi me nogi Judas aga homu tomoba pai. Te Judas aga te Keriot bulu bidi dao. Tama Judas te Jisas wali tigidali sogo pabo bidi nogo si olama, sągą me badu si tomode bidali bidi dao.
LUK 22:4 Tama Satan te bidi Judas aga homu tomoba pelama, tama Judas pelama, te pris tuni bidi dabe me, te Moni Lotu Be tempel tonalubo sę ebo tuni enesigi bidi dabe me augwali dali agai po miani. Agai te Jisas augwaligo nogoba mubo sunumi nigabo po wali.
LUK 22:5 Tibaso, augwali homu dwagi yai yali. Augwaligo po weyu, te po wai, “Nage dago mone ge mawaibao.”
LUK 22:6 Judasgo te po wali, “Dagego po usu dao.” Tama agai te Jisas augwaligo nogoba mubo sunumi gegebo gagalali. Agai tonaluali, me sogo te we bidi hauwa te Jisasde bidisiąbaso, tebo sogo agai Jisas te tuni bidi dabego nogoba muaibao.
LUK 22:7 Te bo disąwai tubo nai bret tuabo olo bidibo side, deli sogo silama, te kibu sipsip wai elebo bodolu sogo yagasali. Sipsip wai eleyu, te Juda dabego ma koneani, ‘Polobadu Godigo dago nǫų dabe ela soyu, elebe.’
LUK 22:8 Tama Jisasgo aga bidi Pita dali Jon dali “Dage si pao” augwali sibolo weyu, te po wai, “Dage si pelama, te nai sisi egi pao, te dago Pasova tubo nai,” te po wai.
LUK 22:9 Tama augwali sigo te po hanalu wai, “Nago homu da sigo te tubo nai menade sisi yaibawe?”
LUK 22:10 Jisasgo augwali sibolo te po wai, “Dage si te moni be nani tomoba pao. Tama tųdu pobadi, sę ebo bidi me deligo baketgo ąį tulama, tolasa peyu dage si tiąba asaibao. Te bidi wali dage si pao. Tama be tomoba te bidi pobaso da, dage si me te be tomoba pao.
LUK 22:11 Dage sigo te be page bidibolo wao, ‘Po ola mabo bidigo nagebolo te po walio, “Nago be tomode te ena dali, eno bidi dabe dali, dago te Pasova nai tuabo be habu menadewe?” ’
LUK 22:12 Tama te bidigo dage si ugwadu moni be habu ola mawaibao. Tede te nai tuabo ni nami me dua yabo ni nami me agai sę ebo bagego te sisila muai dao. Te be habude dage sigo te tubo nai sisila muao,” Jisasgo te po wai.
LUK 22:13 Tama te bidi si pelama, Jisasgo wali po gilama, te sę pedalali. Tama augwali sigo agai wali po wali pelama, te tubo nai sisila muani.
LUK 22:14 Te Pasova nai tuabo sogo pedalali. Tama Jisas te beba aselama, te aga te nai tuabo ni namide dua yali, te aga po sela pabo bidi dabe te aposel bage augwali me tede dua yali.
LUK 22:15 Jisas augwalibolo te po wai, “Eno homugo godola pelama, te dago wąį nǫų hani te Israel dabe bugagia bidimainu sula tagalu ela soale side ma kone palu tubo nai Pasova dage dali megi tama tueibao. Tilama, nosali ena dene saibao.
LUK 22:16 Eno mu po dagebolo obao, eno e Pasova nai dage dali ma tugobeo. Tama e nai ma tusiąbadi, te Godigo we bidi tonalubo sogo gagalama, e nai tuabo sę page hania mu pedelaibao. Tama te sogo eno ma tueibao,” Jisasgo te po wai.
LUK 22:17 Te Jisasgo agai te bono du kaneme wain wę pągąwai kap selama, Godibolo usu da po olama, tama aga bidi dabebolo mayu, te po wai, “Dage te bono du kaneme wain wę selama, duga hasi tomode dobola selama, tuao.
LUK 22:18 Eno dagebolo obao, megi tama gagalama, eno bono du wain wę ma tugobeo. Tama tusiąbadi, te Godigo agai we bidi tonalubo sogo pedalabo sogo eno e nai ma tueibao,” Jisasgo te po wai.
LUK 22:19 Te Jisasgo agai te diluai nai bret me selama, Godibolo nage usu dao olama, tama te nai bret nogogo togolama, aga bidi dabebolo dobawai. Agai te po wai, “E nai eno tigi mi dao. Eno dage tau somainogo mobao. Tuao. Ena isilama, dage nosali tama tuyu, ena konealu bidao,” te po wai.
LUK 22:20 Te nosali genuai nai tulama, te Jisasgo agai te diluai nai bret dobayu yali tiwai egi pelama, te bono du kaneme wain wę me tama tiali. Agai te po wai, “E bono du kaneme da, te eno kaneme dao. Gesi tų eno kanemego nigaibao, dage God dali mu kęą somainogo, eno kaneme gelebao.
LUK 22:21 Dagego suao. Ena te boi bidigo nogoba muabo bidi ena dali ede bidibao.
LUK 22:22 Ena da te Godigo Bidi Mu da. Ena te Godigo polobadu tų nigilai te tųdu paibao. Tiali goli, ena te boi bidi nogoba muani bidi tede ena hobede mu ebao,” wali.
LUK 22:23 Te Jisasgo te po obaso, agai bidi dabe augwa hasi hanalua peyu, dego te kolesaga yaibawe, augwa hasi te po wai.
LUK 22:24 Te Jisas wali pabo bidi dabe augwa hasi konila yali. Tama konila po weyu, te po wai, “Da tomode mena bidi te polalubo bidi dawe?”
LUK 22:25 Jisasgo te po augwali dali wai, “Te Juda bidi hani isąwai dabego tobolu bidi dabe augwaligo bomo elalu, te we bidi tonalubo dao. Augwali genuai bidi bidibo dao. Augwaligo te we bidigo te tuni bidibolo wiegi yai bidi dao omainogo ebo dao.
LUK 22:26 Tiali goli, te we bidi dabego te wabe. Tiali goli, dagego te tobage sę egio. Menio. Dage polalubo bidi homu ebaso da, teda dage nosali bidi tiwai bidao, gesi bidi tiwai. Dagego tobolu bidi bidabo homu eyu da, dage sę bidi tau sabo bidi bidao.
LUK 22:27 Mena bidi polalubo bidi dawe? Te saide dualama nai tubo bidi dawe? Te sę tau sabo bidi nai poude togola magasobo bidi dawe? Te saide dualama nai tubo bidi naga te polalubo bidi dao. Tiali goli, ena dage tomode bidiyu dage sę tau sabo bidi dao,” Jisasgo te po augwalibolo wai.
LUK 22:28 “Te polobadu te sę pedelama, enaba te haniani sęgę asainogo yai digi, dage ena dali bidai dao. Tama dagego ena taga soai menio.
LUK 22:29 Eno Ayago we bidi tonalubo sę enabolo mawai. Tiali gilama, eno te sę dagebolo mobao.
LUK 22:30 Nosali eno tigidali we bidi tonalubo side, dage ena dali hodobo nai tuagameo. Tama dage te tobolu bidigo duabo ni namide dualama, tama dagego te Israel bidi hani nogo si olama, sągą badu si te we bidi hani po dodolobo hani bidagameo,” Jisasgo te po aga bidi dabe dali wai.
LUK 22:31 Te Jisasgo te bidi Saimonbolo weyu, te po wai, “Saimon, Saimon, nage odao. Te dwai haubo noma bidi nogi Satan agai dage dayu, usu sainogo, agai God hanalu wali. Tama Godigo ‘Ao’ wali.
LUK 22:32 Satango te sę yainogo yai digi, eno nage tau sainogo, God hanalu wali, ‘Saimon tau sao. Agai homu kolesaga tigidali nageba mubo sę tagalidali weyu, nago Saimon tau sao.’ Tama Saimon, nosali nage begasa, ma aselama, tama nago naga ama dabe bomo mayu dąų walao,” Jisasgo te po wai.
LUK 22:33 Pitago Jisasbolo wai, “Genuai Bidi, ena nage dali kalabus paibao. Ena nage dali isabo me sisi yalio,” Pitago te wai, Jisas dali.
LUK 22:34 Jisasgo Pitabolo te po wai, “Pita, eno nagebolo obao, e sogo hulide te ba kakaruk po wasiąbadi, tama nago sela sogo waibao, ‘Eno Jisas nogi konebe.’ Te po nago waibao,” Jisasgo te po wali.
LUK 22:35 Jisasgo te po aga wali bilali bidi dabe augwalibolo wai, “Polobadu eno dage te sę egi pao weyu, duga gamugi dage masigi dali, wa dali, sągą nadoba dali sela pigio, te po wai. Tiali sogo, dage nai me deli sǫą paidawe?” Jisasgo augwali dali te po wai, tama augwaligo “Menio,” te po wai.
LUK 22:36 Jisasgo augwali dali te po wai, “Tiali goli, megi te gamugi dage masigi munalubo bidigo te nai sao, te wa munalubo bidi me aga wa sao. Tama hwą ge meni yai bidi da, teda aga ugwa menama, gasa bidigo abelama, te ugwade sai masigigo te moni hwą ge sao,” Jisasgo te po wai.
LUK 22:37 “Magi basowe? Bukude wali po augwaligo te po wai, ‘Augwaligo homude augwaligo aga dali dwai bidi dabe dali sisilai dao,’ wali. Tama eno dagebolo obao, tigidali po bukude wali po tiwai ena dali nai gilama walaibao. Ena tǫde bidibo sogo tamadi sia saibao,” Jisasgo te po aga bidi dabebolo wai.
LUK 22:38 Augwaligo te po wai, “Genuai Bidi, nago suao, dago moni hwą ge si e dao.” Jisasgo sulama, augwalibolo te po wai, “Te tama usu dao.”
LUK 22:39 Te Jisas te be taga peyu, te bulu du nogi Oliv teba pali, aga polobadu hauwa sogo teba pai dao. Tama aga bidi dabe augwali aga wali pai.
LUK 22:40 Tama Jisas te bulu du Olivba sabolama, aga bidi dabebolo te po wai, “Dagego Godibolo hanalu po wao, te Satango dage dwai sę tomoba gegidali weyu.”
LUK 22:41 Tama Jisasgo augwali taga peyu, aga dwasianu bobenu gana palio. Agai kidu tǫba sugunama, Godibolo po weyu, te po wai,
LUK 22:42 “Eno aya, nago homugo usu da wida, te sęgę enade elalubo dagala sąyao. Tialima, nago eno homu wali pelamuo. Naga homu kolesaga naga wali pao,” Jisasgo te po wai, aga Aya dali.
LUK 22:43 [Tama Godigo sę ebo mobo ensel bidi me deli dagaludu asiyu, pedelagaselama, te Jisasba bomo mayu tau sali.
LUK 22:44 Jisas aga homu sęgę mu ebaso, Godibolo aga hanalubo po bomonama wai. Tama Jisasgo tigide te posolo wę kisu yai, te wę te tǫba tuloluai, te kaneme tiwai.]
LUK 22:45 Te Jisasgo aga Godibolo wali po silama, tama hodaluama, tama aga bidi dabe pageba ma pali. Tama augwali godege pibo aga suali. Augwali homu sęgę mu ebaso, tama augwali godege piai.
LUK 22:46 Tama agai augwalibolo te po wai, “Ya, dage magi baso pibawe? Hodaluiąo. Godibolo hanalubo po wao, te Satango dage dwai sę tomoba gegidali weyu,” Jisasgo te po wai.
LUK 22:47 Te Jisasgo aga po obadi yaide, tama genuai bidi hani pąba asali. Te bidi Judas te Jisas wali pabo bidi nogo si olama, sągą me badu si tomode bidali, te bidi polasa asai. Tama aga aselama, Jisas dali pąba kisa sagasai.
LUK 22:48 Tiali goli, Jisasgo agabolo te po wai, “Judas, ena da te Godigo Bidi Mu dao. Nago kisa sagasu, ena te boi bidi dabego nogoba mubawe?”
LUK 22:49 Jisasgo bidi dabe augwaligo te sę pedalabo maga ebaso, augwaligo te po wai, “Genuai Bidi, nago usu da wida, dago te boi bidi dabe hwą gego elaibao,” te po Jisas dali wai.
LUK 22:50 Tama te tamadi asai bage tomode te pris tuni bidigo sę ebo bidi me deli bidai. Tama Jisas wali pabo bidi mego te bidigo dolo nogo badu olo moni kago hwągo togwa sąwai, tama te olo tǫba tuloluai.
LUK 22:51 Tiali goli, Jisasgo te sulama, te po wai, “Tagalao. Me menio.” Tama agai nogo te boi bidi oloba muai, tama te olo dwagi yai ma yai.
LUK 22:52 Te Jisasgo agai po wai, te pris tuni bidi dabe me, te Moni Lotu Be tempel tonalubo tuni enesigi bidi dabe me, te monu dabe me, augwalibolo agai po wai, augwaligo aga tuainogo asali baso. Agai te po wai, “Dagego moni kago hwą dabe, wąbi dabe sesali da. Te dagego nai wi sai bidi nogo tulama, sela painogo asobo ąǫ yaliwe?” Jisasgo te po boi bidi dali wai.
LUK 22:53 “Tigidali sogo dage dali ena te Moni Lotu Be tempel tomode bidai dao. Te sogo dagego ena me sai menio. Tialima, megi e sogo dagego Godigo bodolu muani side dao, dagego duga homu wali piąo. Megi Satango bomogo sę ebo side dao,” Jisasgo te po te boi bidi dabe dali wai.
LUK 22:54 Te Jisasgo aga po ola silibo si da, augwaligo aga nogo pageabi elama, sela pai. Augwaligo Jisas odasa peyu, te Godibolo te polalubo tuni pris bidigo beba pai. Tama Pita me augwali wali pai. Tiali goli, aga digibulu gana bidai.
LUK 22:55 Te bage augwaligo sia te be mesalode nogai, sia kedau tuenu. Tama Pita me augwali dali dualama, sia te gogo tueinu dua yali.
LUK 22:56 Te be tomode sę ebo wego Pita suai, te sia ulade. Te wego aga gedu diliasa tonaluyu, te po wai, “Te bidi me Jisas dali bidibo eno suai dao,” te po wai.
LUK 22:57 Hogwa siyu, Pitago te po wai, “Ena menio. We, nago wabo po eno te Jisas konebeo,” Pitago te po wai.
LUK 22:58 Nosali gana gasa bidi mego Pita sulama, te po wai, “Nage me te Jisasgo hani dao.” Tiali goli, Pitago te po wai, “Abagi, ena mu menio.”
LUK 22:59 Nosali bidama, gesege elama, gasa bidi mego po bomonama, te po wai, “Mu tama dao. Te bidi me Jisas dali bidai dao. Te bidi Galili tǫ bidi tama dao, Jisas tiwai,” te po wai.
LUK 22:60 Tiali goli, Pitago te po wai, “Abagi, nago te wabo po eno konebeo.” Agai te po tama obadi, ba kakaruk po wai.
LUK 22:61 Tama te kakaruk po ma wabo si, Jisasgo begelama, Pitaba tonani. Tama Pitago Jisasgo aga dali polobadu gana wali po ma koneama, “Te sogo hulide ba kakaruk po wasiąbadi, tama nago sela sogo te po waibao, ‘Eno Jisas konebeo,’ waibao.”
LUK 22:62 Tama Pita agai Jisasgo te wali po ma koneagasu, buluba pelama, moni gela mu wai.
LUK 22:63 Te Jisas tonalubo bidi dabe augwaligo dwai dwai haniani po aga dali weyu, te aga eleyu yai.
LUK 22:64 Augwaligo Jisas ugwago gedu haluama, nogogo elama, agabolo hanalu wali, “Dego nage elaliwe? Te nosali asabo nai konea pai profet bidigo wali po tiwai wao,” te po wai.
LUK 22:65 Tama augwaligo bidi posobo dwai po hauwa Jisas dali wai.
LUK 22:66 Te nosali te giliga pedelai, tama te Israel bidi hani tobolu bidi dabe dali, te pris tobolu bidi dabe me, te Juda dabego bomo yai po page koneani bidi dabe me, augwali tigidali sisinai, tama augwaligo po kaunsil bidigo po wabo gilama, te po wainogo yai. Tama te Jisas tonalubo bage augwaligo Jisas kaunsil geduba odasa pai. Te kaunsil dabe augwaligo te po wai,
LUK 22:67 “Nago dabolo wao, nage Godigo sa muai nosali asaibao wali bidi Krais dawe?” Tama Jisasgo augwalibolo te po wai, “Eno dagebolo weyu da, te dagego te po mu po dao homu egobeo.
LUK 22:68 Tialima, eno dagebolo me dagego homu ena da te Godigo sa muai bidi dawe hanalu da, te dagego eno po wei ponogobeo,” Jisasgo te po wai, augwali dali.
LUK 22:69 “Tiali goli, megi me, tigidali sogo nosali me, te Godigo Bidi Mu te bomo tigidali elalubo Godigo dolo nogo badu bidaibao, polalubo bidi bidabo madide. Ena da te Godigo Bidi Mu dao,” Jisasgo te po wai.
LUK 22:70 Te bidi dabe tigidaligo te po wai, “Tama nage te Godigo Ogwa mu dawe?” Jisasgo te po wai, “Dagego enabolo wali po tiwai, ena tama dao.”
LUK 22:71 Augwaligo te po wai, “Dago magi baso gasa bidi i olama, te bidigo Jisasgo dwai sę yali po pusaibawe? Te Jisas aga digi aga pedauwalidu ena da Godigo ogwa da wali dwai po te dago megi tama odalio,” te Juda bagego te po wai.
LUK 23:1 Te genuai bidi dabe augwali tigidali hodalu, te po wai, “Jisas te kiap tuni bidi bidibo madi selasa pao,” wai. Te gavman tuni bidi nogi Pailat dao.
LUK 23:2 Augwaligo gagalama, Jisas tų ela mayu, te bidi Pailat gesabide. Augwaligo te po wai, “E bidigo da hanigo ebo kolesaga dolali. Jisasgo da dabe weyu, dago gavman tuni bidi Sisarbolo takis masigi magio homu ebo dao. Tama Jisasgo dabolo habu selebo po weyu, te po wai, ‘Ena da, Godigo sa muyu asaibao wali bidi Krais dao. Te ena tuni bidi dao,’ Jisasgo te po wai dao,” augwaligo te po wai.
LUK 23:3 Tama tuni bidi nogi Pailat agai Jisasbolo hanalu, te po wai, “Nage da, te Juda bagego tuni bidi dawe?” Jisasgo te tuni bidibolo po weyu, te po wai, “Naga digi te po obao, ena tama dao,” Jisasgo te po wai.
LUK 23:4 Tama te tuni bidi Pailat agai te pris tobolu bidi dabe me, te sisinai Juda we bidi me, augwalibolo weyu, te po wai, “E bidi agai dwai sę yali po page eno suali menio.”
LUK 23:5 Tiali goli, augwaligo po bomonama ma weyu, te po wai, “Agai po te Juda we bidibolo mobaso, tigidali we bidi dwai homu hogodolai. Agai te po Galili bulude gagalama, te sę megi eba me sela asalio,” augwaligo te po Jisasde wai, te bidi Pailatbolo.
LUK 23:6 Te kiap tuni bidi Pailatgo augwaligo wali po odama, augwalibolo hanalu wai, “Te bidi Jisas te Galili bulu bidi dawe?”
LUK 23:7 Augwaligo “Aga te bidi Herotgo tonalubo tǫde bidibo bidi dao,” wali. Tama te po odama, Pailatgo “Aga Herotba sela pao, agai te po tų odomainogo,” wali. Tama te sogo Herot te Jerusalem be nanide osogo bidibadi dao.
LUK 23:8 Te bidi Herotgo Jisas sulama, agai homu dwagi yai yali. Agai Jisasgo ebo sę po odai, tama agai Jisas polobadu suainogo yai, hauwa sogo. Agai homugo eno te bidi Jisas agai bomai sę ebo eno sueibao, te homu polobadu yai dao.
LUK 23:9 Tama tibaso, Herotgo Jisasbolo po hauwa hanalu wai. Tiali goli, Jisasgo agai po me wei ponebeo.
LUK 23:10 Tama te pris tuni bidi dabe dali, te Juda dabego bomo yai po mu koneai bidi dabe me, augwaligo pąba aselama, augwaligo Jisas po tų bomonama mu wai.
LUK 23:11 Tama Herot dali, aga enesigi bidi dabe dali, augwaligo Jisas dali dwai dwai haniani po olama, Jisas mu dolai. Augwaligo dwagi yai ugwa selama, Jisasbolo sabili mubo ąǫ yai. Tama te tiwai elama, augwaligo gisugu wai. Tama elama, Herot agai “Jisas te kiap tuni bidi Pailatba ma odasa pao,” te po wai, tama augwaligo aga odasa pai.
LUK 23:12 Polobadu Herotgo te kiap tuni bidi Pailat dali augwa si wado yai. Tialima, megi augwali si abagi gagawai.
LUK 23:13 Te kiap tuni bidi Pailat agai te pris tuni bidi dabe dali, te tobolu bidi dabe dali, te olo we bidi dali i wai, tama augwali sisinai.
LUK 23:14 Tama augwali sisinama, agai augwalibolo te po wai, “Dagego e bidi Jisas ena pageba sela asali dao. Dagego te po wai, ‘Jisasgo dago we bidigo ebo kolesaga dolai,’ te po wai. Eno aga te po hanalu wali, duga gesabide. Tama dagego odao. Eno Jisasgo yali magi sęgę agai me ebeo. Dagego aga tų ela mani te agai sęgę yali eno me subeo,” Pailatgo te po wai.
LUK 23:15 “Herot agai Jisas dabolo ma tagala palali, dago Jisasde po tų odomainogo. Tama tibaso, dago koneani, Herot me agai Jisas agai sęgę yali me subeo. Tama tibaso, dena Rom dabego bomo yai pode, e bidi dago elegobeo,” Pailatgo te po augwali dali wai.
LUK 23:16 “Tama tibaso da, eno e bidi bįgo naga elama, olo tagala palaibao,” te po wai.
LUK 23:17 [Te tigidali sogo te Pasova nai tuabo olo bidibo side te Pailatgo kalabus bidi me deli te we bidibolo olo tagala palobo dao. Pailatgo augwaligo po wali pelama, bidi me augwaligo saibao wabo bidi augwalibolo tagala palobo dao.]
LUK 23:18 Tama tigidali we bidigo moni i mu wai, “Te bidi elao, tama te bidi nogi Barabas dabolo olo tagala palao,” te we bidigo te po wai.
LUK 23:19 Te bidi Barabas agai gavman dali te hanu Jerusalem tomode wąbi hwįai, tama agai bidi me ela muai, tama augwaligo te bidi kalabus tomoba muai dao.
LUK 23:20 Tama Pailatgo te we bidi dali po ma wai, agai Jisas tagala palainogo yai.
LUK 23:21 Tialima, augwaligo i weyu, te po wai, “Te bidi ni nami agede elao, te bidi ni nami agade elao,” te po ma weyu, ma weyu yai, te Juda we bidigo.
LUK 23:22 Tama Pailatgo sela sogo te we bidibolo wai, “Magi basowe? Te e bidi Jisasgo mena dwai sę yaliwe? Eno agai dwai sę yali me subeo. Tama tibaso, dena Rom dabego bomo yai pode, e bidi dago elegobeo. Tama aga eno bįgo naga elama, olo tagala palaibao,” Pailatgo te po wai, te we bidi dali.
LUK 23:23 Tiali goli, augwaligo bomo mu yai, augwaligo moni i bomonama mu wai. Te Pailatgo Jisas elamuo po augwalibolo omainogo, te augwaligo i wabo elabo pogo Pailatgo po aiyaba elaluai.
LUK 23:24 Tama tibaso, Pailatgo po weyu, te po wai, “Te usu dao.
LUK 23:25 Eno dagego po naga odaibao.” Te bidi nogi Barabas te gavman dali wąbi hwįnama, bidi ela muai. Tama te bidi augwaligo kalabus tomoba muai dao. Te we bidigo te bidi Barabas ma augwaligo sainogo te po wai, tama Pailatgo te bidi augwalibolo tagala palai. Tama te Pailatgo te we bidigo homu wali peyu, tama Jisas augwaligo nogoba muai.
LUK 23:26 Te enesigi bidi dabe augwaligo Jisasbolo aga elabo ni pedai tola olama, tama aga tolasa pai, te aga elabo pesageba. Tama augwali Jerusalem be nani taga sobadi, tomode te bidi me nogi Saimon augwaligo suali. Te bidi aga page bulu Sairini, tama megi aga Jerusalem tomoba painogo sobadi, tama te enesigi bidi dabego te bidigo Jisas tau selama, te ni pedai tolao wai. Tama geasa pelama, te bidigo te ni agai nagede tolama, Jisas wali pai.
LUK 23:27 Te hauwa we bidi augwali Jisas wali pai. Tama te wali pabo we dabe hauwago Jisas hagede augwaligo gela weyu, te hobede ebo didigi weyu yai.
LUK 23:28 Tialima, Jisas begelama, te we dabe dali te po wai, “Dage Jerusalem we dabe, dage ena hagede gela wagio. Tiali goli, duga hagede gela weyu, duga wai bǫų hagede gela weyu yao.
LUK 23:29 Odao. Nosali te sogo pedelaibao, tama augwaligo te po waibao, ‘We dabe augwali wai ame nisiąbo we dali, te wai ame nisiąwai we dali, te we dabe augwali wai ame masiąwai we dali, te augwali dwagi yai homu mu yagameo.’
LUK 23:30 Tama tebo sogo da, augwaligo te bulu dubolo te po waibao, ‘Te bulu du, dage daba degasa dulao.’ Tama te dwasianu bulu dubolo me te po waibao, ‘Dagego da mesega sao,’ te po waibao.
LUK 23:31 Megi da dwagi yai si digi, augwaligo enabolo dwai sę ebao. Tama nosali te dwai si dageba asobo si, augwaligo dagebolo dwai sę mu yaibao,” Jisasgo te po wai.
LUK 23:32 Te ami enesigi bidi dabe augwaligo gasa bidi me si te sela asai. Te bidi sigo dwai sę yai, augwaligo te bidi si Jisas dali elainogo sela asai.
LUK 23:33 Augwali bulu meba sabolai, te bulu nogi diligo tobolu dao. Te bulu dude augwaligo Jisas ni nami pedaide neligo enama, te ni nami pedaide dąų dagana ulai, te ni tǫba bulai. Augwaligo te dwai sę yai bidi si me ni namide neligo enama, te ni pedai si tǫba bulai. Te bidi me Jisas dolo nogo badu muai, me bidi Jisasgo pobase nogo badu muai.
LUK 23:34 Te Jisasgo te po wai, “Aya, nago augwaligo dwai sę yali sęgę sela sąyao. Augwaligo enade ebo sę sęgę augwaligo konebeo.” Tama te ami bidi dabe augwaligo satu gagali elama, Jisasgo gudubo ugwa dabe augwa dobola sai.
LUK 23:35 Tama te Juda we bidi augwali dololaluyu, tigidali sę tonolaluyu bidai. Te tobolu bidi dabego Jisas dali dwai po haniani wai, “Jisasgo gasa bidi dabe naga tau salio. Aga Godigo mu sa muyu asaiba wali te bidi Krais mu da wida, te Jisas aga digi ma tau sao,” te tobolu bidi dabego te po Jisas dali wai.
LUK 23:36 Te ami enesigi bidi dabe augwaligo me Jisas dali dwai haniani po wai. Augwaligo pąba aselama, Jisas dwai ha ebo ąį mawainogo yai.
LUK 23:37 Augwaligo po weyu, te po wai, “Mu tama, nage te Juda we bidigo tuni bidi da wida, teda naga digi naga ma tau sao,” augwaligo Jisas dali te po wai.
LUK 23:38 Tama te dwasianu ni namide asęyu, te po wai, “Te bidi te Juda we bidi dabego tuni bidi dao,” tama olama asęai. Tama te dwasianu ni namide augwaligo asęani po te ni pedai ugwadu daide neligo enai.
LUK 23:39 Te dwai sę yali bidi me si augwaligo ni namide walai me bidi deligo Jisas dali dwai po wai, “Jisas, nage da we bidi tau sai hagede sa muani bidi Krais da wida, naga digi tau siyu, dadi si me tau sao,” Jisas dali ni namide walai bidi mego te po wai.
LUK 23:40 Tialima, me bidigo te po odama, te bidi dali wado po wai, “Nago God dali wi ebewe? Nago sęgę Jisasgo sęgę tiwai sali.
LUK 23:41 Augwaligo da si elali da, te augwaligo doloba pai kolesaga yalio. Da sigo sęgę sali da, te usu tama da si yali sęde tialio. Tiali goli, e bidi Jisas da, agai magi dwai sę deli ebeo,” Jisas dali elali bidi mego te po wai.
LUK 23:42 Tama te nosali po wali bidigo Jisasbolo te po wai, “Jisas, nosali nage tuni bidi pedelama bidibo side, nago te sogo ena kone palao,” te bidi mego Jisas dali te po wai.
LUK 23:43 Tama Jisasgo agabolo weyu, te po wai, “Eno nage dali mu po obao, megi tama nage ena dali bugagia bida bida pabo bulude bidaibao,” Jisas te po te bidi dali wai.
LUK 23:44 Megi te sia tomode dao, tiali goli te sia ge isai, tama be hulia sabo ąǫ yai. Tigidali tǫ mu hulia siyu ebo tiwai elalubadi, sia ge pio mu egi pai yali.
LUK 23:45 Tama te genuai ugwa te Moni Lotu Be tempel tomode walaluali ugwa te tomode mu togwa pai, tama pedai si nigai.
LUK 23:46 Tama Jisasgo i bomonama mu wai, “Aya, ena mobo eno naga nogoba mubao,” Jisas te po tama olama, tama aga mu isai.
LUK 23:47 Te enesigi bidi dabego tuni bidigo te sę suai, tama agai Godigo nogi ugwaba siyu, agai te po wai, “Mu tamao, te bidi Jisas doloba pai bidi mu dao,” te bidigo te po wai.
LUK 23:48 Tama tigidali we bidi sisinama, te bidi sela elai hagede baso, tonaluai. Augwaligo te Jisas isibo suali. Tama homu dene eyu, augwa nogo pagasa, tama augwa beba pai.
LUK 23:49 Tiali goli, Jisas aga abagi dabe dali, te we dabe me Jisas wali Galili buludu asai, augwali digibulu gana dolaluai. Tama augwaligo te sę tigidali suai, te we bidi dabego.
LUK 23:50 Te bidi me deli bidai, te bidi nogi Josep. Te bidi aga Judia tǫ hanu bidi dao, te hanu nogi Arimatea.
LUK 23:51 Aga dwagi yai doloba pai bidi bidai. Agai te Godigo we bidi tonalubo sogo asobo tonaluyu bidali. Tama aga te Juda dabego kaunsil digi, agai te meba kaunsil dabego Jisas elabo homude ao wabeo.
LUK 23:52 Te bidi Josep te gavman tuni bidi Pailat bidibo digi pelama, te po wai, “Eno Jisas tigi saio,” wai.
LUK 23:53 Tama Pailatgo “Sao,” wai. Tibaso, Josep pelama, Jisas tigi tǫba sela dulai. Tama Jisas wiegi yai tedela yai nami ugwago belai, tama Jisas gų page meba mugi pai. Te gų page augwaligo moni genuai masigi tomode nigai. Tama polobadu augwaligo bidi me musiąwai digi, gesi mu dao.
LUK 23:54 Te sogo Fraide dao, te Juda dabego Sabatde tuabo nai sisi ebo sogo dao. Tama te Sabat tamadi tama pedalainogo ebao.
LUK 23:55 Te we dabe augwali Galili buludu Jisas dali asai, augwali Josep wali pai. Tama augwaligo te gų page suai. Tama Josepgo Jisas tigi mena tama mubo, te me te we dabe augwaligo suai.
LUK 23:56 Augwaligo polo suai, tama te we dabe augwali augwa beba ma pai. Tama te we dabe augwaligo wel dabe me, denami yai dwagi yai nai me sisila muai, te Jisas tigide mumainogo, aga tigi daumua pidali weyu. Te Sabat sogo gagalali. Tama tibaso, Godigo bomo yai po wali peyu, augwali olo bidiyu, toma tuali.
LUK 24:1 Te Sabat sogode olo bidama, te sogo kigamu Sande kigamu augwali te we dabe gų pageba ma pai. Augwaligo te dwagi yai denami yai nai me, wel dabe me sela pai, polobadu augwaligo sisila muai.
LUK 24:2 Tama augwali te gų pageba sabolama, te gų page sunumi dąų wali genuai masigi augwaligo suali, te gų page sunumide munalubo sube, te masigi augwaligo hogogo bele pelama bogo badude munalubo suai. Tama tibaso, te we dabe augwali te gų page tomoba pai.
LUK 24:3 Tiali tama, augwaligo Genuai Bidi Jisas tigi munalubo subeo, te ola be masigi tomode.
LUK 24:4 Te we dabe augwaligo te tiwai subaso, tama augwali homu hauwa mu yai. Tama augwali we dabe kolesaga tųą pelama, umula pela muai. Tama augwaligo tonalubadi yaide, bidi si polo pedelama, tede dolaluali. Te bidi sigo ugwa da mu udula pela muai.
LUK 24:5 Tama te we dabe augwali wi elama, augwa gesabidi tǫba tonolaluai. Tialima, te bidi sigo augwalibolo te po wai, “Magi baso dagego te bidibo bidi te isai bidi gų pagede gegebawe? Te Jisas ede bidibeo. Jisas ma hodaloai dao.
LUK 24:6 Dagego Jisas agai dagebolo mani po ma kone palao, Jisas Galili bulude bidiyu te po wai, ‘Ena da te Godigo Bidi Mu dao. Tama augwaligo ena te dwai sę ebo bidi dabego nogoba mawaibao. Tama augwaligo ena te age sai nide elama, tama sela sogo gų pagede munaluama, ma hodaluaibao,’ agai te po wai,” te bidi sigo te po wai, te we dabebolo.
LUK 24:8 Tama te we dabe augwaligo Jisasgo polobadu wali po ma augwaligo koneai.
LUK 24:9 Te we dabe augwali ma pai, tama augwaligo Jisas wali pabo bidi nogo si olama, sągą badu deli bidi dabebolo te augwaligo odali po dali, suali sę dali pusali. Tama augwaligo gasa we bidi dabebolo me te yali sę po wai.
LUK 24:10 Tama te po wagi pali we dabe augwaligo nogi e dao. We me nogi Maria, te Makdala bulu we dao. Te we me aga nogi Joana. Te we me aga nogi Maria, aga ogwa nogi Jems. Te we dabe augwali bidai, augwali te we dabe dali gasa we dabe me bidai, te we dabe augwaligo te po Jisas aga wali pabo bidi dabe dali wai.
LUK 24:11 Tiali goli, Jisasgo bidi dabe augwaligo homu te we dabego wali po olo tama me te obao, homu yai. Tama augwaligo te we dabego po homuba dąų olama mube, augwaligo homugo tibo po wabao homu yai.
LUK 24:12 Tialima, Pita polo pelama, gų page sugi pai. Tama Pita te gų pageba sabolama, tudi basia selama, te masigi tomoba suai. Tama agai suali, te wiegi yai telela ugwa dabe naga munalubo suai. Agai Jisasgo tigi sube. Tibaso, Pita beba ma pelama, te pedelali sęde aga homu hauwa mu yai.
LUK 24:13 Te sogo digi tamao, bidi me si te dwasianu bulu me nogi Emeus teba painogo augwali si te tųdu pai. Te bidi si Jisas wali pabo bidi si dao. Te tų Jerusalem tagalama, Emeusba pabo tų te pąde naga.
LUK 24:14 Te bidi si te tųdu pai, tama augwali sigo tigidali sę Jisas dali pedelama yali sę te po mimi pai.
LUK 24:15 Te bidi si te po ola peyu, augwa hasi hanalua peyu, pai. Tama Jisas aga digi te bidi si pąde pedelama, augwali hodobo pai.
LUK 24:16 Te bidi si augwaligo gedugo Jisas suali, tiali goli augwaligo konebe, e Jisas te yaba, te homu ebe, te bidi sigo.
LUK 24:17 Te Jisasgo augwali sibolo te po wai, “Dage si magi po ola peyu pobawe?” te bidi si dali Jisasgo te po wai. Tama te bidi si dolaluai, tama augwa si homu sęgę mu yai.
LUK 24:18 Tama te bidi me nogi Kliopas, te bidigo Jisasbolo te po wei ponoyu, te po wai, “Gasa bulu bidi dabe hauwa augwali megi Jerusalem bulude bidibao. Tama nage deligo nago te sę Jerusalemde pedalobo nago subewe?” te bidigo Jisas dali te po wai.
LUK 24:19 Te bidi agai tama wai, tama Jisasgo augwali sibolo hanalu wai, “Magi sęwe?” Tama te bidi sigo Jisas dali te po wai, “Te sę te Nasaret bidi Jisasde pedalai. Te bidi Godigo nosali yabo sę po wabo bidi, Godigo po ola mabo bidi. Tama te bidigo agai bomai sę dali, bomai po dali Godigo gedude dali, te we bidigo gedude dali te sę yai,” te bidi sigo Jisas dali te po wai.
LUK 24:20 “Tama te pris tuni bidi dabe dali, te tobolu bidi dabe augwaligo te bidi te moni gavman tunibolo augwaligo nogoba muai. Tama gavmanigo po weyu, ‘Te bidi elao,’ te po wai. Tama augwaligo te bidi ni pedaide elai.
LUK 24:21 Tiali goli, polobadu dago homu tama yai, te bidigo agai da Israel we bidi te Rom gavman nogode bidali tagalama, agai da tonalumai yaibao. Dago te homu polobadu yai dao. Tiali, menio. Tama gasa po me tama telaluaio, te sę pedelai, tama megi te bidi duba elali, sela sogo bidibao,” te bidi si Jisas dali te po wai.
LUK 24:22 “Te sę eyu, gasa sę me pedelali, megi. Tama megi da hani we dabe me badu augwaligo da midigi sabo sę yai. Kigamu mu te we dabe augwali te bidi muani gų pageba augwali pai,” te po Jisas dali te bidi sigo wai.
LUK 24:23 “Tama augwaligo Jisasgo tigi subeo. Tama augwali ma asai, tama augwaligo te po wai, ‘Dago Godigo sę ebo ensel bidi dabe naga sualio,’ tama te ensel bidi dabe augwaligo te po wai,
LUK 24:24 ‘Te Jisas aga ma bidibao,’ wai. Tama da tomode bidi meba augwali pelama, te gų page sugi pai. Tama augwaligo te we dabego wali po tiwai tama suali. Tiali goli, Jisas aga tigi te augwaligo subeo,” te bidi sigo Jisas dali te po wai.
LUK 24:25 Te Jisasgo te tama po augwali sibolo wai, “Ao, dage sigo homu kolesaga meniwe? Dage sigo homu te polobadu Godigo sę nosali pedelabo po ola mani bidigo po naga konealuai dawe?” Jisas po augwali si dali wai.
LUK 24:26 “Magi basowe tama tiyu dage sigo koneai meniwe, Godigo sa muani bidi Krais aga dene bolo selama, isilama, tama nosali aga genuai nogi mu saibao,” Jisasgo te po wai.
LUK 24:27 Tama Jisasgo Mosesgo asęani pode gagalama, tama tigidali Godigo sę nosali pedelabo po ola mani profet bidi dabego po Jisasgo te bidi sibolo ola mawai. Tigidali po buku dabede wali po Jisas aga tigide digi yali sę po wai. Te Jisas aga dali po page mu te bidi si dali ola mawai.
LUK 24:28 Te augwali pelama, te bidi si pabo bulu teba sabolai. Tama Jisas agai mu pabo ąǫ naga yai.
LUK 24:29 Tialima, te bidi sigo Jisas “Pigio,” te po wai, “nage dadi si dali bidao,” wai. “Giliga iba dega sainogo ebo, tama pąde digi tama be hulia saibao,” wali. Tama tibaso, Jisas augwali sigo be tomoba pelama, augwali si dali bidai.
LUK 24:30 Nosali augwali nai tuainogo, tama Jisas augwali si dali dulaluai. Tama Jisasgo te giguai nai bret selama, Godibolo hanaluyu usu da wai, tama te nai togolama, augwali sibolo mawai, Jisasgo.
LUK 24:31 Jisas agai tama tiwai tama augwali sigo gedu pedelebo tiwai ilali, tama te bidi sigo Jisas koneai. Tama Jisas polo hagawai, tama te bidi sigo Jisas ma subeo.
LUK 24:32 Tama te bidi si augwa hasi po weyu, te po wai, “Dadi si tųdu asai, tama Jisas agai dadi si dali po ola asai, tama Jisas agai bukude po page dadi si dali hania ola mawai, te sogo dadi sigo homu mu hogodaluai,” te bidi sigo te po wai.
LUK 24:33 Te bidi sigo te po wai, tama te sogo tama te bidi si augwa si Jerusalem buluba ma pai. Tama te bidi sigo te Jisasgo bidi nogo si olama, sągą badu deli bidi augwalibolo te bidi sigo te bage aga abagi dabe dali augwali deliba sisinama, bidalubo suai.
LUK 24:34 Tama augwaligo te bidi sibolo te po wai, “Mu tamao, Genuai Bidi ma hodaloai, aga ma pedalobo Saimongo suai,” augwaligo te bidi si dali te po wai.
LUK 24:35 Tama augwali sigo te tigidali sę augwali sigo tųde suali po augwali dali wai. Tama te bidi sigo te po wai, “Jisas agai te giguai nai bret togolama, da si mawai, tama dadi sigo te sogo megi koneai, te Jisas dao,” augwali sigo te po wai.
LUK 24:36 Augwaligo te po odubadi, tama Jisas aga te augwali tomoba polo dolagasai. Agai augwalibolo, “Homu tegaluama, bugagia bidiąo,” wai.
LUK 24:37 Tialima, augwali gegemani siyu, augwali homu hogodaluai, tama augwali wi yai. Augwali te homu yai, augwaligo Jisas isi bidi subo, tama tiyu augwali wi yai.
LUK 24:38 Tama Jisas agai augwalibolo te po wai, “Magi baso dagego homu hogodalualiwe? Magi baso dagego homu si ebawe?” Jisasgo te po wai, aga bidi dabe dali wai.
LUK 24:39 “Dagego eno nogo sągą suao. Ena ena digi bidibao. Dagego nogo ena tigiba munama, suao. Isi bidi da, mi meni yai, dili meni yai. Tiali goli, ena da dili dali, mi dali elalubao,” Jisasgo te po aga bidi dabe dali wai.
LUK 24:40 Jisasgo te po olama, tama aga nogo dali sągą dali augwali bidibolo waselai.
LUK 24:41 Augwaligo Jisasbolo homu munama, te Jisas dao augwaligo me konebe. Augwali dwagi yai homu mu yai digi, augwali noma sai. Tama Jisas agai augwalibolo te po wai, “Tama dagego tubo nai ede me munalubowe?” Jisasgo augwalibolo hanalu wali.
LUK 24:42 Tama augwaligo siade ulai sųgų dage te Jisas manio.
LUK 24:43 Tama Jisas agai te sųgų selama, tubo tama augwaligo suai, Jisas wali pabo bidi dabego.
LUK 24:44 Te Jisasgo augwalibolo te po wai, “Polobadu ena dage dali bidibadi, tama eno dagebolo wai dao, tigidali po te polobadu bidi Moses bidibo side asęani, te polobadu Godigo po pusa mani bidi dabego asęani bukude me, te buku nogi Sam tede me asęani po me, te enade asęani po tigidali nai igilama mu walaibao wai,” Jisasgo te po wai.
LUK 24:45 Tama Jisasgo augwalibolo homu ula ilai, tama augwaligo Godigo asęani po page hania konemainogo yai.
LUK 24:46 Tama Jisasgo augwalibolo te po wai, “Godigo bukude tama te tobage po wai, ‘Godigo sa muani bidi Krais dene polo selama, isilama, tama sela sogo aga gų pagede bidama,
LUK 24:47 tama hodaluama, tama aga nogigo bomogo aga sę ebo bidi dabe augwaligo agai po tigidali bidi hanibolo ola mawaibao, te we bidi augwaligo homu begelemainogo yaibao. Augwaligo homu begelama, tama Godigo augwaligo yali dwai dwai sę sela sąwaibao. Te Godigo sa muani bidi agai sę ebo bidi dabego te tobage po tigidali bidi hanibolo wagi paibao, te sę augwaligo Jerusalem bulude gagalaibao.’
LUK 24:48 Te po bukude asęai dao. Tama dagego eno te yali sę tigidali suali, eno wali po tigidali odali. Tama dagego we bidibolo eno wali po me, yali sę po me, te pusa mawaibao.
LUK 24:49 Te nai polobadu eno Aya God agai dagebolo mawaiba wali nai, te eno megi dagebolo tagala palaibao. Tialima, dage te Jerusalem hanude bidiąo. Dage bidibadi, tama te dagaludu bomo dageba dulaibao,” Jisasgo augwalibolo te po wai.
LUK 24:50 Te Jisasgo agai bidi dabe augwali odasa, bulu me nogi Betani pąba sabolai. Tama Jisas agai nogo ugwaba selama, tama bugai homu ilabo po augwalibolo wai.
LUK 24:51 Tama agai te bidi dabebolo te po madubadi, tama Jisasgo augwali taga pai, tama Godigo Jisas dagaluba sela holai.
LUK 24:52 Tama te bidi dabe augwaligo Jisasgo nogi ugwaba munama, tama dwagi yai homu mu eyu, Jerusalem buluba ma geasa peyu yai.
LUK 24:53 Tama tigidali sogo augwali te Moni Lotu Be tempel te be tomoba pelama, tama augwaligo Godigo nogi ugwaba mu sai, Jisasgo sę ebo bidi dabego tama tiwai, God dali.
JOH 1:1 Polobadu polobadu mu, te tigidali nai pedalisiąma, meni yai digi, Po bolo bidai. Po God dali bidai. Tama te Po aga digi God dao.
JOH 1:2 Polobadu polobadu mu, te tigidali nai gagalobo sogode, te Po God dali bidai.
JOH 1:3 Godigo te Pobolo po weyu, tigidali nai nigao wai. Tama Pogo tigidali nai nigai. Tama gasa nai gasa tųdu me pedalobeo. Menio. Tigidali nai pedalali te Po aga digi nigilama, pedalai.
JOH 1:4 Bidabo bomo Po agade elalubo. Tama agai bidabo bomo te we bidi augwaligo ula dao.
JOH 1:5 Te ulago hulia sabobolo te ula mabo dao. Tama hulia sabogo te ula me sogo halubeo.
JOH 1:6 Godigo bidi me deli tagala palai, te bidi nogi Jon.
JOH 1:7 Jon agai te ula po te we bidibolo pusagasai. Te we bidi tigidali augwaligo te po odoyu, augwa homu tigidali te poba konealumainu eyu, te Jongo te po pusagasai.
JOH 1:8 Jon aga digi te ula menio. Tiali goli agai te ula po augwalibolo te po wagasai.
JOH 1:9 Te ula da te ula mu dao. Tama aga te sogo tǫba dulai, tigidali we bidi ula mawainogo yali.
JOH 1:10 Te Po e tǫde bidai. Aga digi e tǫ nigai. Tiali goli tǫde bidibo we bidi augwaligo aga konebeo.
JOH 1:11 Aga bulu muba asai. Tiali goli aga hani augwaligo aga sabeo, gesebeo.
JOH 1:12 Tialima, aga augwali bidi dabe mego sali, gesalio. Augwaligo augwa homu agaba muani. Tama tibaso, agai augwalide usu da po olama, tama augwali Godigo wai puluba pedalai dao.
JOH 1:13 Tama augwali Godigo wai puluba gagawainogo, augwali augwa ida ayago kanemego ame nabeo. Te augwali Godigo wai te augwa tigigo homugo me ame nabe. Bidigo homugo menio. God aga digi augwali aga wai puluba pedalali dao.
JOH 1:14 Te Po aga digi bidi pedalai, tama da we bidi tomode aga bidai. Dago agai genuai nogi dali agai moni bomo dali si suai. Te Godigo Ogwa deligo genuai nogi dali bomo dali si dago suai. Agai te we bidi olo tau sabo sę hauwa eyu, te agai mu po naga weyu yai.
JOH 1:15 Te we bidi baptais mabo bidi Jon agai te we bidibolo agai po weyu i tama wai, “Polobadu eno te po wai, ‘Nosali bidi me asobo bidi agai eno nogi aiyaba elaluaibao. Magi basowe? Ena ame nesiąbadi, aga polobadu mu bidai. Tama tibaso, agai nogigo eno nogi aiyaba elalubo dao,’ eno te po wai. Tama megi te bidi e dao, eno dagebolo polobadu wali po gilama,” Jongo te po wai.
JOH 1:16 Aga te olo tau sabo sę hauwa mu ebo dao. Tama dabolo agai ma eyu, ma eyu idu gebo dao.
JOH 1:17 Te bidi nogi Moses agai da Juda dabego wąį mu augwalibolo agai Godigo bomo yai po ola mawai. Tiali goli, Jisas Krais agai genuai olo tau sabo sę dali mu po dali si magasai.
JOH 1:18 Menio. Bidi me deligo God munu me gedugo subeo. Mu menio. Tialima, te Godigo ogwa deli aga aya pąde bidibo, agai Godigo page dabolo ola mawai dao.
JOH 1:19 Te Juda dabe augwaligo pris bidi dabe dali, Livai bage dali augwaligo bidi dabe te Jerusalemdu te Jon bidibo digiba tagala palali, augwaligo Jon hanalu omainogo yali. Tama augwali Jon pageba sabolama, te po hanalu wai, “Nage dewe?”
JOH 1:20 Tama Jon agai hogwa sabeo, po dualobeo, agai po hanilama weyu, te po wai, “Ena Godigo sa muyu asaiba wali bidi Krais menio,” Jongo te po wai.
JOH 1:21 Tama augwaligo Jonbolo hanalu wai, “Magi yaliwe? Nage te bidi polobadu Godigo po wali bidi nogi Elaija dawe?” Tama Jongo te po wai, “Ena te bidi Elaija menio.” Tama augwaligo te po wai, “Dago te Godigo po wabo bidi asobo tonalubo dao. Nage te bidi dawe?” Tama Jongo te po wei ponoyu, te po wai, “Ena te bidi menio.”
JOH 1:22 Tama augwaligo Jonbolo te po wai, “Nage de dawe? Dago te da tagala palai bidi dabebolo po wei ponainogo, dabolo wao. Naga digi nage de da wabo dawe?”
JOH 1:23 Tama Jongo te po wai, “Te polobadu bidai bidi nogi Aisaia, Godigo po polo ola mani profet bidi, agai te tobage po wai, ‘Bidi me deligo bidi meni yai bulu tomode agai bomonama i weyu, te po obao, “Te Genuai Bidigo asabo tų dodolao.” ’ Te po wabo bidi ena dao,” Jongo te po wai.
JOH 1:24 Tama te Farisi bidi hani dabego tagala palai bidi dabe augwaligo te po hanalu wai, “Nage Godigo sa muani bidi menio, tama nage te bidi nogi Elaija menio, nage te Godigo po polo ola mani bidi menio. Tama nago magi baso te we bidi baptais mobawe?” te po hanalu wai.
JOH 1:26 Tama Jongo augwalibolo po wei ponoyu, te po wai, “Eno augwali olo ąįgo naga te baptais mabo dao. Tialima, dage tomode bidi me deli te dolalubao. Tama dagego te bidi konebeo.
JOH 1:27 Te bidi aga ena tudi badu nosali asaibao. Ena digi ena dwagi yai bidi menio. Teyu, eno agai sągą nadoba bono eno pisigagobeo,” Jongo te po augwali dali wai.
JOH 1:28 Te po bulu me nogi Betani te badu pedalai, te ąį nogi Jordan sesege badu. Te bulude Jongo augwali Juda we bidi baptais mawai.
JOH 1:29 Te sogo kigamu Jisas asobo Jongo suai. Tama Jongo te we bidibolo te po wai, “Suao, te bidi da, aga Godigo kibu sipsip wai dao. Agai te tigidali tǫde bidibo we bidi augwaligo yali dwai sęgę te sela sąwaibao.
JOH 1:30 Polobadu eno te po wai, ‘Nosali bidi me asobo bidi agai eno nogi aiyaba elaluaibao. Magi basowe? Ena ame nesiąbadi, aga polobadu mu bidai. Tama tibaso, agai nogigo eno nogi aiyaba elalubo dao,’ eno te po wai. Tama megi te bidi e dao, eno dagebolo polobadu wali gilama.
JOH 1:31 Eno digi eno te nosali asobo bidi mena bidi dawe, te eno konebeo. Tiali goli, eno aga te dage Israel we bidi dali ola momainu, eno we bidi baptais magasiyu asai,” Jongo te po wai.
JOH 1:32 Te Jon agai suali sę te po weyu, te po wai, “Eno suali, Godigo Mobo Bidi dagalu tagalama, tǫba dulubuo, te ba hi tiwai asobo eno suai. Tama te ba hi Jisasgo tigi dolo dulubo, te eno suai.
JOH 1:33 Eno digi te nosali asobo bidi eno me konebeo. Tialima, Godigo ena tagala palu, we bidi baptais mao weyu, enabolo te po wai, ‘Te eno Mobo Bidi dulama, bidi mede bidibo nago sueibao. Te bidi da, te nosali asaibao wali bidi dao. Tama te bidi agai te we bidibolo te eno Mobo Bidi mawaibao. Agai te Mobo Bidi augwali we bidi baptais mabo tiwai mawaibao,’ Godigo enabolo te po wai.
JOH 1:34 Tama ena digi eno sulama, tama eno dagebolo te po obao, te bidi Jisas aga Godigo Ogwa dao,” Jongo po tama wai.
JOH 1:35 Do tama dao wabo side Jon aga wali pabo bidi si Jon aga dali ma dolaluai.
JOH 1:36 Tama Jon agai Jisas soabo suali, tama Jongo te po wai, “Suiąo. Te bidi te Godigo kibu sipsip wai tiwai dao,” Jongo aga wali pabo bidi si dali te po wai.
JOH 1:37 Te bidi sigo agai wali po odama, tama augwali si Jon tagalama, Jisas wali pai.
JOH 1:38 Jisas begelama suali, te bidi sigo aga wali asai. Tama Jisas agai te bidi sibolo te po wai, “Dage sigo magi nai gegebawe?” Tama te bidi sigo te po wai, “Rabai, nage mena bede bidibawe?” Te po Rabai, te page, po ola mabo bidi te page elalubo dao.
JOH 1:39 Tama Jisas agai te bidi sibolo te po wai, “Dage si aselama, suagasao.” Tama te bidi si pelama, Jisas bidibo digi sugi pai. Te tama giliga dega sabo sogo 4 klok augwali si Jisas dali pelama, tama te piode augwali si Jisas dali bidai.
JOH 1:40 Te Jongo wali po odali bidi si augwali si Jisas wali pai. Tama bidi me deli aga nogi Andru, te aga ama nogi Saimon Pita.
JOH 1:41 Tama polo agai aga ama Saimon gegegi pai, tama agabolo te po wali, “Dago te Mesaia bidi suali,” Andrugo aga ama Saimonbolo te po wai. (Dago te nogi Mesaia wali begelama, tama te nogi poai Krais dao, Godigo sa muyu asaiba wali bidi dao.)
JOH 1:42 Tama Andru agai aga ama Saimon odasa, Jisas bidibo madigi pai. Jisas agai Saimon sulama, te po wai, “Nage Saimon, Jongo ogwa dao. Nosali nago nogi Sifas waibao,” Jisasgo te po wai. (Dago te nogi Sifas begelama, tama wai, Pita wali nogi, te nogi page masigi dao.)
JOH 1:43 Do tama da wabo side Jisas aga homugo Galili buluba paibao wai. Tama Jisas agai Filip suai, tama agabolo te po wai, “Nage ena wali asao,” te po wai.
JOH 1:44 Filip aga te Betsaida be nanide bidai bidi, te bulu te Andru dali Pita dali augwali sigo page bulu.
JOH 1:45 Filip pelama, Natanielbolo te po wagi pai, “Te bidi polobadu Mosesgo te bomo yai po bukude asęani po dali, tama Godigo polobadu po ola mani profet bidi dabe me, augwaligo te bidi dali po asęai, te bidi dago suai. Te bidi Jisas aga Nasaret bulu bidi Josepgo ogwa dao,” Filip agai te po wai.
JOH 1:46 Tama Nataniel agai te bo weyu, te po agabolo ola mani, “Teyu da, dwagi yai nai me deli te Nasaret bulude pedalaibawe?” Filipgo agabolo te po wali, “Nage aselama, suagasao.” Tama augwali si Jisas pageba pai.
JOH 1:47 Jisasgo Nataniel aga pageba asobo suali. Tama Jisasgo te bidi dabebolo tama wali, “Suiąo. Te asobo bidi aga Israel bidi mu dao. Tibo po aga homude me elalubo meni.”
JOH 1:48 Natanielgo Jisas hanalu weyu, te po wai, “Magi ilama, nago ena koneaniwe?” Jisasgo agabolo po wei ponoyu, te po wai, “Hasia, Filipgo nage i wasiąbadi, te nage ni kaya pagede bidibadi, te sogo nage eno suai dao,” Jisasgp te Nataniel dali te po wai.
JOH 1:49 Natanielgo Jisasgo po wei begelai, “Po ola mabo bidio, nage Godigo Ogwa dao, nage Israel we bidigo tuni bidi dao.”
JOH 1:50 Jisasgo po wei ponanio, “Eno nagebolo te po wai dao, ‘Nage eno ni kaya pagede suai dao.’ Tama nago te po odobaso, naga homu tigidali enaba muaniwe? Ao, tama nosali nago sueibao, genuai sęgo eno megi yali te sę aiyaba elaluaibao.”
JOH 1:51 Tama Jisasgo agabolo ma naga wai, “Mu tamao, eno mu po dagebolo obao, nosali dagego dagalu dala pabo sueibao. Tama dagego Godigo dagalude sę ebo ensel mobo bidi augwali ugwaba holoyu, aiyaba duluyu ebo dagego sueibao. Tama augwali enaba asiyu yaibao, ena da te Godigo Bidi Mu dao,” Jisasgo te po wai.
JOH 2:1 Te Jisasgo Nataniel dali te po olama, si sogo biliama, sela sogo wabo side tama bidi me deligo Kana bulude we sai. Te Kana bulu te Galili tǫ pedai tomode elalubao. Tama Jisas aga ida te we sabo bede bidai.
JOH 2:2 Augwaligo Jisas aga bidi dabe dali augwali i wai, Jisas aga bidi dali augwali aselama, te we sabo suagasomainogo, augwaligo te po wai.
JOH 2:3 Tama te bomai ąį wain silai. Tama Jisas aga idago agabolo te po wai, “Augwaligo bomai ąį wain meni, te sia salio,” Jisas dali aga idago te po wai.
JOH 2:4 Tama Jisasgo aga idabolo te po wai, “Ida, nago enabolo te po magi baso obawe? Eno we bidi augwali tau sabo sogo te pedalobeo,” Jisasgo aga ida dali te po wai.
JOH 2:5 Jisas aga idago augwali te we sabo be page bidigo sę ebo bagebolo te po wai, “Jisasgo po me deli dage dali obaso da, teda dagego te po wali pao,” te po wai.
JOH 2:6 Te moni masigi sene a naga olama, me badu nogo deli badu munalubo. Tama te tobage sene deli deli augwaligo ąį hauwa pągąwaibao. Godigo augwalibolo dage usu da omainogo, te Juda dabe augwaligo nai tuainogo eyu, hasia bolo augwa nogo ąį polo telawai.
JOH 2:7 Tama Jisasgo te sę ebo bagebolo te po wai, “Wę sigibao, e moni masigi sene dabe pągą yao.” Tama augwaligo te masigi sene dabe mu pągąwai.
JOH 2:8 Tama Jisasgo augwalibolo te po wai, “Te ąį me badu dwasianu genagide manama, tama sela pelama, te tubo nai tonalubo bidibolo magibao,” te po wai. Tama tilama, augwaligo te ąį sela pai.
JOH 2:9 Te tubo nai tonalubo bidigo te ąį agai polo tula suai, megi tama te bomai ąį wain pedalali ąį agai polo tula suai. Tama agai konebeo, augwaligo menade sali. Tialima, te sę bidi augwaligo te ąį tuali augwaligo koneai. Tialima, te nai tonalubo bidigo te we sali bidi agai i wai.
JOH 2:10 Tama asama, agai te bidibolo te po wali, “Tigidali bidigo da, augwaligo dwagi yai bomo ąį wain polo dobabo dao. Tama nosali, augwali bidi dabego te ąį hauwa tulama, tama augwaligo dobo ąǫ yali ąį te dobabo dao. Tiali goli, nago naga dwagi yai ąį wain naga dąų olaluama, tama megi tama nago sela asalio,” agai te po wai.
JOH 2:11 Te bomai sę Jisasgo yali bomai sę hasia mu yai. Te Jisas agai te Galili tǫ pedai badu tomode, te dwasianu be nani nogi Kana, tede te sę yai. Tama Jisas aga bomo augwalibolo ola mawai, tama Jisas aga wali pabo bidi augwa Jisasba homu tigidali muai.
JOH 2:12 Te sę silama, tama Jisas aga Kaperneam buluba pai. Aga ida me, aga ama dede me, aga wali pabo bidi dabe me, augwali hodobo pai, tama augwali te bulu Kaperneamde osogo bidigi pai, si sela sogo bidai.
JOH 2:13 Te Juda bage augwaligo bo disąwai bret tuabo side te pąde tama o, te si nogi Pasova dao. Tama Jisas aga te Jerusalem moni be naniba pai.
JOH 2:14 Tama Jerusalem be nani tomoba sabolama, tama te Moni Lotu Be tempel tomode Jisas agai suali, augwali bidi dabe augwa kibu bulmakau me, kibu sipsip me, ba dabe, tama augwaligo te naide maket ebo sę eyu, te Moni Lotu Be tempel tomode yai, we bidi augwaligo te nai si dobu eyu abelama, Godibolo momainogo yai. Tama Jisasgo suali, ma gasa bulu masigi dobu si ebo bidi dabe da augwali ni nami pąde dulalubo suali.
JOH 2:15 Tama Jisasgo te sę sulama, tama agai bono dabe selama, bį nigai. Bį nigilama, agai te kibu bulmakau dali kibu sipsip dali tigidali te tempel bede augwali bįgo elama, buluba gudulai. Tama Jisas agai te masigi dobu si ebo bidi dabego masigi dali ni nami dali gea palali.
JOH 2:16 Tama agai ba dabe dobu si ebo bidi dabebolo te po wai, “Te nai sela pao,” wai. “Dagego eno ayago be te nai dobu ebo be tiwai egio,” Jisasgo augwali dali te po wai.
JOH 2:17 Jisas aga wali pabo bidi dabe augwaligo po me Godigo po bukude wali po me ma koneai. Te bukude te po wai, “Eno homugo nago be tonalubo homu bomo ebo dao. Tama augwaligo enabolo dene mawaibao.”
JOH 2:18 Te Juda dabe augwaligo te sulama, Jisas dali te po wai, “Mena bidigo nagebolo ‘Te nai sela sąyao,’ obaso, tama nago te nai dabe sela sąyaniwe? God agai nagebolo te po weyu da, teda nago naga moni bomai sę me deli yao. Tama dago nago te sę ebo sulama, Godigo nagebolo ‘Te sę yao’ wali dago koneaibao,” Juda dabe augwaligo Jisasbolo te po wai.
JOH 2:19 Tama Jisasgo po wei ponoyu, te po wai, “Dagego e lotu be tempel hųgibaso, tama sela sogo eno polo te be ma sę yaibao,” Jisasgo te po te Juda dabe dali wai.
JOH 2:20 Tama Juda bage augwaligo te po wai, “Te tempel Moni Lotu Be sę yani kibu be bidi sese si olama, tama a naga olama, me badu nogo deli badu kibu be te be sę yai dao,” te po wai. “Tama dago te be hųgilama, tama sela sogo nago te be polo me sę yaibawe? Woo, nage usu egobeo,” te po Jisas dali wai.
JOH 2:21 Tialima, Jisasgo te tempel lotu be po wali aga tigide po wali, te Moni Lotu Bede meni.
JOH 2:22 Tilama, tama nosali Godigo Jisas gų pagede ma hodolai, te sogo Jisas aga wali pabo bidi dabe augwaligo Jisasgo polobadu te wali po augwaligo ma koneai. Tama augwaligo Godigo bukude muani po dali, Jisasgo wali po dali, te po siba augwa homu muai.
JOH 2:23 Te bidi Jisas bo disąwai nai bret tubo side, te Pasova side, aga Jerusalem bulude bidibadi, tama we bidi hauwa augwaligo agai bomo yai sę ebo suai. Tama sulama, tama augwaligo augwa homu tigidali Jisasba muai. Augwaligo te homu yai, aga te Godigo sa muyu, asaiba wali bidi dao.
JOH 2:24 Tialima, Jisasgo te homu yai, augwaligo konesiąbo ąǫ, te homu yai. Tama tibaso, Jisas aga digi augwaligo nogoba mubeo.
JOH 2:25 Magi basowe? Jisas aga digi te tigidali we bidigo homu mu konea silai. Gasa bidi mego agabolo te we bidigo homu me ola magobeo.
JOH 3:1 Bidi me deli bidai, te bidi nogi Nikodemus. Te bidi Farisi bidi hani dao. Tama te bidi Juda bage augwaligo tobolu bidi deli dao.
JOH 3:2 Te bidi Jisas bidibo digi hulide aselama, te po wai, “Po ola mabo bidi, dago koneai, Godigo nage e tǫba po ola mabo bidi nigilama, tagala palai. Tibaso da, Godigo bidi me deli dali bidisiąyu da, agai te sę Jisas nago ebo bomai sę tiwai me egobeo,” te bidigo Jisas dali te po wai.
JOH 3:3 Jisasgo Nikodemusbolo po wei ponoyu, te po wai, “Mu tama, eno nagebolo obao, bidi me te ma ame nabo tiwai eyu, gesi ma pedalisiąyu da, te bidi agai Godigo we bidi tonalubo sę me sugobeo,” Jisasgo te po wai.
JOH 3:4 Nikodemusgo Jisasbolo te po wai, “Magi ilama, monu dabe yai bidi ma ame nabo tiwai eyu, gesi bidi ma pedalaibawe? Teyu da, aga idago haligaba ma bula selama, tama idago ma ame naibawe?” Nikodemusgo Jisasbolo te po hanalu wai.
JOH 3:5 Jisasgo te po wei ponoyu, te po wai, “Mu tama eno nagebolo obao, bidi ąįde baptais sabo ąį dali Godigo Mobo Bidi dali gesi ma gagasiąyu da, te bidi God bidibo digi tomoba pogobeo.
JOH 3:6 Tigigo ame nabo nai, te tigi dao. Tama te nai God agai Mobo Bidigo ame nabo nai da, te mobo bidi dao.
JOH 3:7 Eno ‘Dage gesi ma pedelao,’ te po wabo pode nage noma sigio.
JOH 3:8 Te wali asobo da, te aga homu kolesagago te wali gasaba gasaba pabo dao. Nago te wali asobo po naga odobo dao, tialima nago mena badu pedalama, tama ma mena badu ma paliwe, te po wabo dao. Tigidali bidi gesi noma pedalobo augwaligo te tiwai egibi naga ebo dao,” Jisasgo te po wai.
JOH 3:9 Nikodemusgo Jisasbolo te po wei ponai, “Te nai mena tama pedalaibawe?” te po wai.
JOH 3:10 Jisasgo Nikodemusbolo te po wei ponoyu, te po wai, “Magi yaliwe? Nage te Israel bidi dabe te bomai po page ola mabo bidi dao. Tama magi baso nago te nai konebewe?
JOH 3:11 Eno mu po nagebolo obao, dago e wabo po da te dago koneani po obao, tama dago po pusali da, te dago suali sę po dao. Tiali goli dagego dago wali po te dagego tudiba muanio.
JOH 3:12 Eno dagebolo eno e tǫde nai po obao, tama dagego me ‘Te mu tama dao’ homu ebeo. Tibaso da, eno dagebolo dagalude nai po obaso da, te dagego mena tama te poba duga homu mugowe?
JOH 3:13 Gasa bidi me te Godigo bidibo madigiba me holobeo. Ena da Godigo Bidi Mu da, tama ena naga te dagalu tagalama, e tǫba dulai, enaduba deli digio.
JOH 3:14 Polobadu Mosesgo te kapago nigai tibo hasamani te bidi meni yai bulude ni donogo ugwaba sai. Te tiwai yali gilama, tama augwaligo te Godigo Bidi Mu ugwaba sela mueibao.
JOH 3:15 Magi basowe? Tigidali bidi enaba homu mubaso da, augwali tigidaligo dwagi yai bidibo bomo selama, bidada peyu, mu bidada paibao,” Jisasgo te po wai.
JOH 3:16 God aga Ogwa deli digi mu bidibao. Tialima Godigo e tǫde bidibo we bidi godolo mu eyu, tama augwali tau somainogo eyu, God agai Ogwa te e tǫba tagala palali. Tama tiali da, tǫde we bidi augwa homu agaba mubaso da, augwali hagaidali weyu, augwali dwagi yai bidabo bomo selama, bidada peyu, bidada pomainogo, Godigo te sę yai.
JOH 3:17 Godigo aga Ogwa e tǫba tagala palali te e tǫde we bidi po tų dodolomainogo me tagala palobeo. Te menio. God aga Ogwa tagala palali da, te da tǫde we bidi ma dobola sagasomainogo yai.
JOH 3:18 Niwai bidigo God aga Ogwaba homu mubaso da, teda te bidi da aga po tų menio, Godigo agabolo dene magobeo. Tiali ma, niwai bidi aga Godigo Ogwaba homu musiąwani bidi da, Godigo te bidibolo po tų dodolama, dene mawaibao. Magi basowe? Te bidi agai God agai ogwa teba homu mubeo.
JOH 3:19 Tama te po tų yabo page tama telalubo. Ula yali e tǫde polo pedalai dao. Tialima, bidi dabe augwaligo homugo hulia sabo augwaligo godola pai. Augwaligo ula te godolo ebeo. Magi basowe? Augwaligo kolesaga te dwalio.
JOH 3:20 Dwai kolesaga ebo bidi agai te ulade boi bidi ebo dao. Agai dwai kolesaga yali hania ugwaba sela muidali weyu, aga te ulaba asobo menio.
JOH 3:21 Tialima, te dwagi yai kolesaga mu ebo bidi, te bidi aga da te ulaba pedalobo dao. Tama bidi dabe augwaligo te bidi agai sę yali te Godigo bomode te sę yai bugagia sumainogo, te bidi ulaba asobo dao.
JOH 3:22 Te nosali Jisas aga bidi dabe dali augwali hodobo Judia tǫ pedai teba poloba pai. Jisas augwali dali tede bidiyu, tama augwaligo Judia we bidi baptais mani.
JOH 3:23 Jongo me te we bidi baptais mani bulu me nogi Ainon, te Salim bulu pąde o, tede te we bidi baptais mani. Ąį hauwa te mu te bulude elalubo. Tama we bidi augwali Jon bidibo digi aselama, baptais sagasali.
JOH 3:24 Bidi Herot tego Jon te sogo kalabusiba me musiąbadio.
JOH 3:25 Te Jon aga wali pabo bidi dali te Juda bidi me deli dali, augwali tomode konila po wai. Te po konila ebo page te we bidi baptais mabo kolesagade po wai.
JOH 3:26 Tama augwali Jon bidibo digi pelama, tama augwaligo Jonbolo te po wai, “Po ola mabo bidio, polobadu nage Jordan pabo ąį u badu bidibadi, nago bidi me dali bidiyu, nago te bidide dwagi yai po wai. Tama megi te bidi agai te we bidi baptais mobao. Agai we bidi baptais mobaso, tama tigidali we bidi augwali te bidi bidibo digi pabo dao,” Jon wali pabo bagego Jon dali te po wai.
JOH 3:27 Jongo po wei ponoyu, te po wai, “Te God agai deli nai deli bidibolo me masiąyu da, te bidi agaduba naga me sogobeo.
JOH 3:28 Dagego eno polobadu te wali po odai dao, ‘Ena Godigo sa muyu asaibao wali bidi Krais menio, tiali goli Godigo ena “Polasa aselama, te bidigo asobo tų dodolao,” te po Godigo ena dali wai.’
JOH 3:29 Tama tibaso, bidi me deligo we sobaso da, te we te bidigo sali we dao. Tama te bidi aga abagi dolaluyu, aga abagigo po odobao. Tama we sali bidigo po wabode, tama aga abagi megi tama dwagi yai homu ebo dao. Tama te tiwai, Jisas aga sę megi e baso, tama ena dwagi yai homu mu ebao.
JOH 3:30 Agai nogi ugwaba dią holoyu, eno nogi da aiyaba elalumainogo yaibao,” Jongo te po wai.
JOH 3:31 Bidi ogwadu asobo bidi, te bidi agai tigidali bidi aiyaba elaluai. Tǫde pedalai bidi da, te bidi agai e tǫde nai naga po wabo dao. Tialima, dagaludu asobo bidi te agai tigidali bidi aiyaba elaluai dao.
JOH 3:32 Te bidigo agai po wabo da, te nai dabe agai sulama tama agai odolama te po wai. Tialima, bidi me deligo agai te wali po selama, tama dąų wabe.
JOH 3:33 Tialima, niwai bidigo agai te po selama, dąų wali da, agai te po usu da waibao, God agai mu po naga wabo dao.
JOH 3:34 Te bidi Godigo tagala palali bidi, te bidi agai Godigo po pusubo dao. Magi basowe? Godigo agai Dwagi Yai Mobo Bidi agabolo habuge me mabeo, sese mu mawai. Tama mobaso, te bidigo Godigo po pusubo dao.
JOH 3:35 Godigo aga Ogwa delide dwagi yai homu yai. Tama God agai tigidali nai aga Ogwago nogoba mawai.
JOH 3:36 Niwai bidi agai homu tigidali te Godigo Ogwaba mubaso, te bidigo bidabo bomo da bidada peyu, bidada paibao. Tialima, niwai bidigo Godigo Ogwago po wali pisąbaso da, te bidi aga bidabo bomo me sogobeo. Menio. Godigo sębę te bidide elalua paibao.
JOH 4:1 Te sogo Farisi bage augwaligo po me deli odai, “Jisasgo te we bidi hauwa selama, tama augwali aga wali pobaso, augwaligo baptais sali. Tama Jisas agai te sęde Jon aiyaba elaluai,” te Farisi bage augwaligo te po odai.
JOH 4:2 (Tialima, Jisas aga digi agai te we bidi baptais mabeo. Jisas aga wali pabo bidi augwaligo naga te we bidi baptais mawai.)
JOH 4:3 Jisasgo koneai augwali Farisi bagego te po odama, dwai homu yai. Tama tibaso, Jisas aga te Judia tǫ pedai taga pelama, te Galili tǫ pedaiba pai.
JOH 4:4 Tama Godigo homu wali peyu, te tų Jisas aga pali tų te Samaria tǫ pedai tomoba pabo tų dao.
JOH 4:5 Tama tilama, Jisas pelama, Samaria bagego hanuba sabolai, augwaligo te bulu nogi Sikar wali. Te tǫ te polobadu mu bidai bidi Jekopgo aga ogwa Josep mani tǫ te pąde tama dao.
JOH 4:6 Ąį sabo tǫ dedage polobadu Jekopgo nigai, te bulude elalubuo. Jisas pelama, aga tigi dene baso, te ąį sabo tǫ dedage pąde dugulaluai. Te giliga tomo yagasobode.
JOH 4:7 Jisas aga wali pabo bidi augwali te be nani nogi Sikarba pelama, nai abelegi pai. Tama Samaria we me deli asama, ąį tuagasu asai. Jisasgo te webolo po weyu, te po wai, “Aį ena mao, ena tueio,” te po wai, Jisasgo.
JOH 4:9 Te Samaria we noma siyu, agai Jisasbolo te po wai, “Ya, nage Juda bidi dao, te ena Samaria we dao. Magi baso nago te po obawe, ‘Aį ena mao, ena tueio,’ magi basowe?” te Samaria wego te po wai, Jisas dali. (Magi basowe? Juda bidi dabe augwali Samaria bidi dabe dali kisasa gelasa bilibo menio.)
JOH 4:10 Jisasgo te webolo po wei ponoyu, te po wai, “Nago te God agai te we bidibolo olo mabo nai konegi sogo da, tama ena mena bidigo nagebolo ‘Aį ena mao, ena tueio’ obao konegi sogo da, te si nago konegi sogo da, teda nago ena hanalu olama, eno nagebolo te bidabo bomo elalubo ąį mao wagi da,” Jisasgo te po wai.
JOH 4:11 Te wego Jisasbolo te po wai, “Genuai Bidio, nago ąį tuabo nai meni. Tama te ąį tubo dedage aba mu dao. Tama tiyu da, nago te bidabo bomo elalubo ąį menade saibawe?” te wego Jisas dali te po wai.
JOH 4:12 “Dago wąį Jekopgo te ąį dedage dabolo polobadu mawai dao. Tama aga dali, aga wai dabe dali, aga kibu bulmakau sipsip dali tamago tuai ąį dao. Tialima, nago homu nago Jekop aga aiyaba elalualiwe?” te wego Jisas dali te po wai.
JOH 4:13 Jisasgo po wei agabolo ponoyu, te po wai, “Tigidali bidi te ąį naga ede tuyu da, augwali ąį nogone ma yaibao.
JOH 4:14 Tialima, bidi me deli eno mabo ąį tuyu da, tigidali sogo te bidi ąį nogone ma egobeo. Te ąį eno mawainogo ebo ąįgo da, te tama tiaibao, te ąį da bidabo bomo mabo wę ulu pedalubo ąǫ te bidi tigi tomode tiwai yaibao. Tama te ąį tigidali sogo pedaliyu, te bidi mu bidada peyu, mu bidada paibao,” Jisasgo te po wai.
JOH 4:15 Tama te wego Jisasbolo te po wai, “Genuai Bidio, nago te ąį enabolo mao, tama nosali ena ąį nogone ma idalio, tama ena eba ąį ma tuagasidalio,” te Jisas dali Samaria wego te po wai.
JOH 4:16 Jisasgo te webolo te po wai, “Nago bidibolo i wagi bilama, tama dage si eba asiąo,” wai.
JOH 4:17 Wego po wei ponoyu, te po wai, “Ena bidi menio.” Jisasgo agabolo te po wai, “Nago ‘Ena bidi meni,’ obawe, te nago mu po wabuo.
JOH 4:18 Magi basowe? Polobadu nago bidi a naga dao. Tama te bidi megi nage dali bidibo bidi da, te naga bidi menio. Nago po te mu tama dao,” Jisasgo te po te we dali wai.
JOH 4:19 Wego Jisasbolo te po wai, “Genuai Bidio, megi eno koneanio, nage da te Godigo nosali yabo sę po ola mabo profet bidi deli dao.
JOH 4:20 Polobadu da Samaria dabego wąį dabe augwali te bulu duba sisinama, tama lotu po wai dao. Tialima, dage Juda dabego te po wabo dao, ‘Te tigidali bidigo lotu po wabo bulu te Jerusalemde, tede naga wao,’ dagego te po wabo dao,” te wego te po wai.
JOH 4:21 Jisasgo te webolo te po wai, “Nago eno po mu po dao olama, konealuao. Me sogo deli pedaliyu, tama dagego te Ayabolo lotu po te bulu dude wagobeo. Tama dagego Jerusalem tede me lotu po wagobeo.
JOH 4:22 Dagego konesiąwai naibolo lotu po wabo dao. Da Juda dabe dago lotu po wabo da, te dago koneai bidibolo lotu po wabo dao. Magi basowe? Godigo we bidi ma sabo sę page te da Juda dabe tomode pedalaibao.
JOH 4:23 Tialima, te sogo pedaliyu da, megi tama pedalalio, tama tigidali bidigo lotu po mu wabo bidi dabe da augwali lotu po augwa mobo bidigo waibao, augwa dolo ebo kolesagago me lotu po waibao. Tama Aya Godigo te tobage bidi gegebo dao, agabolo lotu po omainogo.
JOH 4:24 God da, te mobo bidi dao. Tama bidigo agabolo lotu po weyu da, te bidigo aga mobo bidigo waibao, aga dolo ebo kolesagago me lotu po waibao,” Jisasgo te po wai.
JOH 4:25 Te wego agabolo te po wai, “Eno koneanio, Godigo sa muani bidi asaibao, augwali aga nogi Krais tama wai. Aga asobo sogo da, te agai dabolo tigidali naide po ola mawaibao,” wali.
JOH 4:26 Jisasgo te we agabolo te po wai, “Te ena tama dao, megi nage dali eno te po obao.”
JOH 4:27 Te Jisasgo te po obadi yaide, tama aga wali pabo bidi dabe augwali ma begasa asai. Tama augwali Jisasgo te Samaria we dali po mibo subaso, augwali noma sai. Tialima, bidi me deligo te webolo “Nage magi nai saiwe?” wabeo. Augwaligo Jisasbolo “Nage te we dali magi baso po obawe?” hanalu wabe.
JOH 4:28 Tama te wego te aga ąį tubo nai tagalama, tama te we aga hanuba ma pai. Tama te wego te we bidi dabe augwalibolo wagi peyu, te po wai.
JOH 4:29 “Dagego bidi me deli suagasiąo. Agai eno polobadu yali sę po tigidali enabolo wai. Te bidi te Godigo sa muani asaibao wali bidi Krais te yaliwe?” te wego te po te we bidi dabe dali wai.
JOH 4:30 Tama te we bidi dabe augwali te hanu tagalama, aselama, Jisas bidibo digi asai.
JOH 4:31 Te we bidi dabe augwali asodubadi Jisas wali pabo bidi augwaligo Jisas dali te po wai, “Po ola mabo bidi, nage nai tuao,” wali.
JOH 4:32 Tialima, Jisasgo augwali aga wali pabo bidibolo te po wai, “Eno nai meba elalubo te dagego konebeo.”
JOH 4:33 Tama tibaso, augwa hasi po wai, “Bidi me deligo aga nai magasaliwe?” Jisas wali pabo bidi augwaligo te po miai.
JOH 4:34 Jisasgo augwalibolo te po wai, “Eno nai da, e tama dao: eno ena tagala palali bidigo homu wali pabo dao. Tama eno agai ena nogoba muani sę polo silaio,” Jisasgo te po wai.
JOH 4:35 Jisas agai giba ela mubo po digi po weyu, te po wai, “Dagego tama wabo dao: ‘Polua me si me si elalubo, tama te nai sabo si te pedalaibao,’ Tialima, eno dagebolo obao, dagego tonono biliyu, tama dagego te gi dabe bugagia suiąo. Nai inawai yabowe naga, dagego suao. Te asobo we bidi augwali te inawai nai tiwai dao.
JOH 4:36 Nai sabo bidi da, te bidi aga masigi sabo sę eyu, aga masigi sabo dao. Tama elama, nai polobadu bulali bidi dali, te inawai nai sabo bidi dali, augwa talua si dwagi yai homu yaibao. Tama te tiwai, niwai bidigo we bidi eno po ola mayu yali bidi, augwaligo homu enaba muani, te bidi te nai sabo bidi tiwai dao. Godigo te bidibolo dwagi yai nai mawaibao. Tama te we bidibolo eno po polobadu wagi pali bidi me, te bidi te nai bulali bidi tiwai dao. Tama te bidi dali, te we bidi enaba sisinibo bidi dali, augwali si talua dwagi yai homu mu yaibao. Augwali sigo wali po odali we bidi augwali bidada peyu, bidada pabo bulu selama, bidaibao.
JOH 4:37 Te tiwai eyu, tama tǫde bidibo we bidigo polobadu wali po mu po tamao, ‘Bidi me deligo gi nai bulai, tama gasa bidi mego agai te nai sai.’
JOH 4:38 Tama te tiwai eno dage tagala palali da, te dage we bidibolo eno po pusugi pomainogo yai. Polobadu dagego te sę isiąwai. Tialima, gasa bidigo dene yali sęde te nai megi dagego sabao,” Jisasgo te po wai.
JOH 4:39 Te hanude bidali Samaria we bidi dabe hauwa augwaligo te wego wabo po odai. Tama te po odobaso, augwaligo augwa homu tigidali Jisasba muani. Te wego te po wai, “Agai enabolo eno polobadu yali sę po tigidali mu wai.”
JOH 4:40 Tama tibaso, Samaria we bidi dabe augwali Jisas bidibo digi aselama, tama augwaligo Jisasbolo hanaluyu, po bomo elama wai, “Nage da dali bidao.” Tama tibaso, Jisas augwali dali si sogo te bulude bidai.
JOH 4:41 Tama aga tede bidibadi yaide, we bidi hauwa augwaligo Jisas aga digi wali po odolama, tama augwa homu tigidali agaba muani.
JOH 4:42 Tama augwaligo te webolo te po wai, “Megi dago nago po naga odolama, tama dena homu tigidali te bidiba mubo menio. Dena digi agai po odolama, tama dago homu tigidali agaba mubao. Te bidigo naga agai tigidali tǫde we bidi ma dobola sabo bidi dao,” te Samaria bage augwaligo te po wai.
JOH 4:43 Te si sogo bidali silalio, tama Jisasgo te Samaria bulu tagalama, tama aga Galili tǫba pai.
JOH 4:44 (Polobadu Jisas aga digi po weyu, te po wai, “Godigo po ola mabo bidi aga page bulude nogi menio,” Jisasgo te po wai dao. Tama te po wali goli, Jisas te Galili tǫba pai.)
JOH 4:45 Tama Jisas pelama, Galili buluba sabolai. Tama Galili bage augwaligo Jisas asobaso dwagi yai homu yai. Magi basowe? Augwali meba pelama, Jerusalem bulu sabolama, bo disąwai nai tubo side tigidali sę Jisasgo te sogo yali sę augwaligo suai, polobadu.
JOH 4:46 Jisas te Galili tǫ tomoba pelama, tama aga te Kana be naniba sabolai. Te bulude polobadu Jisas agai ąį mugo te pusu ebo ąį wain nigai. Tama te be nani me nogi Kaperneam te digibulu gana. Tama Kaperneam bulude genuai gavman bidi bidai, te bidi aga ogwa gasi yai.
JOH 4:47 Tama te gasi yai ogwa aga aya agai Jisas Judia tǫ tagalama, Galili tǫba asali po odai. Tama tibaso, te bidi Jisas bidibo digi pelama, tama Jisasbolo hanaluyu, po bomo elama wai, tama Jisas te agai ogwa Jisasgo geselemainogo yai. Aga homu Jisas te Kaperneamba pelama, tama agai ogwa ma geselaibao. Te gasi yai ogwa pąde tama isainu elalubo wai.
JOH 4:48 Tama Jisasgo te gasi ogwa aga ayabolo te po wai, “Dagego te eno haniani bomai sę ebo susiąwai goli dagego duga homu tigidali enaba muao.”
JOH 4:49 Te genuai gavman bidigo te po wai, “Genuai Bidi, nage Kaperneam buluba polo dulao. Eno ogwa isidalio,” te po Jisas dali wai.
JOH 4:50 Jisasgo agabolo te po wai, “Nage pao. Naga ogwa da, bidibadi paibao.” Te bidi Jisasgo wali po aga homu te poba munama, tama pai.
JOH 4:51 Aga begasa aba pidubadi yaide tama aga sę ebo bidi dabego aga tiąba wagasai. Tama augwaligo agabolo te po wai, “Naga ogwa bidibuo,” wai.
JOH 4:52 Tama agai augwalibolo hanalu wai, “Nisu te ogwa dwasianu usu yaliwe?” te po wai. Tama augwaligo te po wai, “Do giliga tomo ebo, te sogo tama aga tigi posolo silalio,” te po wai.
JOH 4:53 Tibaso, aga ayago koneai, do tama te sogo Jisasgo agabolo “Nago ogwa gasi silama, tama bidibadi paibao” wai dao. Agai te homu yai. Tama te bidi dali aga bede bidibo bage dali, augwaligo augwa homu tigidali Jisasba muani.
JOH 4:54 Polobadu Jisas Judia tǫ tagalama, tama Galili tǫba sabolama, tama bomai sę eyu, te agai ąį mugo pusu ebo ąį wain begelama nigai. Tama megi me agai Judia tǫ tagalama, Galili tǫde bomai sę me yai, te gasi yai ogwa hodolai.
JOH 5:1 Te nosali te Juda bagego olo bidiyu lotu po wabo si te pedalai. Tama tebo side Jisas Jerusalem hanuba holai.
JOH 5:2 Tama Jerusalem bagulali obo pąde kibu sipsip dabego genuai soabo tų elalubo madi, tama te tų dolo si te dwasianu sigi ąį ge elaluai. Hibru pogo augwaligo te ąį nogi Betesda wai. Te ąį sesegede be mabo a naga elaluai.
JOH 5:3 Te be mabode gasi yai we bidi hauwa bidai, gedu widai bidi dabe dali, sągą dwai bidi dabe dali, tama nogo sągą dili isai bidi me, augwali te be mabode bidai. (Augwaligo te ąį memenege ebo tonaluyu bidai.
JOH 5:4 Me sogo deli sogo Godigo dagalude sę ebo ensel mobo bidi me deli te ąį tomoba dulama, tama te ąį te ensel bidigo memenege ilai. Te ąį memenege silai digi, tama niwai bidi me deli polasa ąįba dulali bidi da, te bidigo gasi polo silai.)
JOH 5:5 Bidi me deli te be mabode bidai. Te bidigo gasi elalubadi, kibu be te 38 kibu be te bidi gasi elalubadi tama yai.
JOH 5:6 Jisasgo te bidi pila mubo suai, tama Jisasgo koneai, te bidi gasi elalubadi, hauwa sogo mu bidai. Tama Jisasgo te bidibolo te po wai, “Nago homu da, naga tigi dwagi yai yabo homu ebowe?” Jisasgo te bidibolo te po hanalu wai.
JOH 5:7 Gasi yai bidigo Jisasbolo po wei ponoyu, te po wai, “Genuai Bidi, ąį memenege ebo side ena ąįba sela muabo bidi menio,” te bidigo Jisas dali te po wai. “Ena digi tama pobadi digi, gasa bidi dabe polo polasa peyu, ena geanobo dao.”
JOH 5:8 Jisasgo te bidibolo te po wai, “Nage hodaluama, doligulama, naga pibo somo selama, tama nage soao,” Jisasgo te gasi yai bidibolo te po wai.
JOH 5:9 Tama polo te bidigo tigi dwagi yai ma yai. Tama aga pibo somo selama, tama soai. Te Juda bagego olo bidibo Sabat sogode Jisas agai te bidi geselai.
JOH 5:10 Tama Juda dabe genuai bidi augwaligo te gasi munaluali bidi aga pibo doado bage selama, sobadi yaide, augwaligo agabolo te po wai, “Megi da, te habu olama olo bidibo side dao. Nago pibo somo magi baso sela sobawe? Te nago Sabat sogo sę elamuo wali bomo yai po bolobao,” te Juda bagego te bidi dali te po tama wai.
JOH 5:11 Tiali digi agai po wei augwali dali ponoyu, te po wai, “Te ena geselali bidi agai enabolo te po wai, ‘Naga pibo somo selama, pao,’ enabolo te po wai,” wali.
JOH 5:12 Augwaligo agabolo hanalu wai, “Mena bidigo nagebolo te po weyu, ‘Naga pibo somo selama, pao’ waliwe?”
JOH 5:13 Tialima, te sana pali bidi agai Jisasgo nogi konebeo. Magi basowe? Te bulude we bidi hauwa mu elalubao, tama Jisas pai.
JOH 5:14 Nosali Jisasgo te bidi te Moni Lotu Be tempel tomode ma sulama, te po wai, “Odaliwe? Megi da nage usu yali dao. Nago dwai sę dabe ebo tagalao. Tiyu moni sęgę nageba pedalabuo,” Jisasgo te bidibolo te po wai.
JOH 5:15 Tama te bidi pelama, Juda genuai bidi dabebolo wagi pai, “Ena geselai bidi te Jisas yalio,” te bidigo Juda dabego tobolu bidi dabebolo te po wagi pai.
JOH 5:16 Tama tibaso, Juda dabe genuai bidi augwaligo Jisas dali boi bidi homu ebo gagalali. Magi basowe? Jisasgo te bidi geselali te Juda bage augwaligo olo bidibo side te sę yali.
JOH 5:17 Tialima, Jisasgo po wei ponoyu, te po wai, “Eno Aya agai sę polobadu yali sę megi tama te ela asobao. Tama eno me ena sę ebao,” Juda dabe genuai bidi dali Jisasgo te po wai dao.
JOH 5:18 Tama tialima, Juda genuai bidi augwaligo bomo eyu, Jisas mu elabo homu yai. Magi basowe? Augwaligo e homu yali, Jisas agai Juda bagego olo bidibo Sabat sogo bomo yai po te bolobaso naga menio. Jisas agai te po wabo, ‘God da, te ena Aya mu da’ wabo dao. Te wabo po da, Jisas aga digi aga te God tiwai pedalainogo wabuo Tama tibaso me augwaligo aga mu elabo homu yai.
JOH 5:19 Te Jisasgo po wei ponoyu, te po wai, “Eno dagebolo mu po tama obao, Godigo Ogwago agaduba homugo magi sę me ebo menio. Agai Ayago ebo sę naga sulama, agai ebo dao. Tigidali sę Ayago ebo, te aga Ogwago tama ebo dao.
JOH 5:20 Aya Godigo homugo aga Ogwa mu godola pabo, tama God agai ebo sę tigidali aga Ogwabolo ola mabo dao. Aya agai bomai sę me nosali aga Ogwabolo ola mawaibao. Tama te sęgo eno hasia yali sę aiyaba elaluaibao. Tama tibaso, dage noma siyu, homu hauwa yaibao.
JOH 5:21 God Ayago isai bidi ma hodolama, bidabo bomo mabo dao. Tama tibo gilama, Ogwago me aga homugo we bidibolo bidabo bomo mabo dao.
JOH 5:22 God agai digi agai bidi me deli agai po tų dodolobo menio. Tigidali po tų ebo sę agai aga Ogwago nogoba mawai dao.
JOH 5:23 Magi baso meni. Tigidali bidigo Godigo Ogwa nogi ugwaba samainogo, te Godigo nogi ugwaba sabo gilamao. God Ayago aga Ogwa e tǫba tagala palobaso, tama bidi te Godigo ogwago nogi ugwaba sisąbo bidi da, agai Godigo nogi me ugwaba sisąbo bidi da,” Jisasgo te po wai.
JOH 5:24 “Te eno mu po dagebolo obao, niwai bidigo eno po odama, tama te po wali pelama, tama ena tagala palali bidibolo te bidi agai bomo yai homu agabolo muyu da, te aga bidada peyu, bidada pabo bomo selama, bidaibao. Te bidi aga po tų aga dali me egobeo. Te agai isibo tagalama, tama megi aga bidabo bomode bidibao.
JOH 5:25 Eno mu po dagebolo obao, te sogo pedalaibao, tama te megi polo pedalalio, tama isai bidi augwaligo Godigo ogwago po odaibao. Tama te po odama wali pabo we bidi dabe da, augwali mu bidaibao.
JOH 5:26 Eno Aya aga bidabo bomo aga digi elalubo. Tama agai bidabo bomo aga Ogwabolo mawai. Enabolo. Tama te tiwai te bidabo bomo te aga Ogwago me elalubo.
JOH 5:27 Aga te Godigo Bidi Mu dao, tigidali we bidi augwaligo abagi hasi bidi dao. Tama tibaso, Ayago agabolo te we bidi po tų yabo sę mawai.
JOH 5:28 Dagego noma selama, tama homu hauwa egimio. Nosali me sogo pedalobo side da, gų pagede bidali bidi augwaligo te Godigo Bidi Mugo wabo po odaibao.
JOH 5:29 Tama augwaligo te po odobaso, tama augwali gų page tagalama, buluba dią asaibao. Me badu we bidi augwaligo dwagi yai kolesaga yali da, augwali hodaluama, bidabo bomo selama, bidaibao. Me badu we bidi augwaligo dwai kolesaga yali da, augwali hodaluama, tama po tųde sęgę saibao.
JOH 5:30 Eno homugo digi eno te sę ebo usu egobeo. Eno Godigo wali po naga wali pelama, tama eno po tų ebo dao. Tama tibaso, eno po tų ebo sę te dolo mu ebo dao. Magi basowe? Eno sę ena homugo me ebo menio. Te ena tagala palali bidigo homu eno wali pabo dao,” Jisasgo te po wai.
JOH 5:31 Te Jisasgo po ma weyu, te po wai, “Enaduba naga ena te Godigo Ogwa da weyu da, te po usu egobeo.
JOH 5:32 Tialima, gasa bidi me bidibo. Tama eno Aya God agai ena tau sabo po te we bidibolo pusubo dao, augwaligo eno wabo po mu po dao konemainogo ebo dao. Tama eno koneai, agai te wali po enade wabo da, te po mu po wabo da.
JOH 5:33 Polobadu dagego te bidi Jonbolo dagego hanalu wali po tagala palai. Tama agai po pusuyu, eno po mu po dao wai.
JOH 5:34 Bidi mego eno wabo po tau sabo bidi elaluyu da, te usu da. Me ma, te tobage bidi meni baso da, te me usu da. Tialima, eno homugo Godigo dage ma somainogo. Tama teyu, eno Jon badi dagebolo me eno e po obao.
JOH 5:35 Jon da, te sole ula ebo gilama, agai ula we bidi dabebolo mawai dao. Tama dagego pęwadage side te ulade dagego dwagi yai homu osogo yai dao.
JOH 5:36 Tialima eno wabo po tau sabo nai me elalubao, te moni bage mu dao. Eno Ayago enabolo sę mani, ena te sę tigidali elama, silimainogo ebao. Te sę dabe eno ebo dao. Tama te ebo sęgo me te we bidi ola menama, augwaligo konebo dao, Ayago ena tagala palobaso, ena asai dao,” Jisasgo te po wai.
JOH 5:37 “Tama Aya Godigo ena tagala palobaso ena asai, aga digi eno wabo po tau sabo dao. Dagego agai pedauwalidu wali po me odai menio. Tama dagego agai gesabi me munu me subeo, tama agai po me dagego homude bidibeo.
JOH 5:38 Magi basowe? Agai tagala palali bidigo wabo poba duga homu tigidali mubeo,” Jisasgo te po wai.
JOH 5:39 “Dagego te homu ebo dao, Godigo asęani po tego dagebolo te bidabo bomo menama, tama dage bidada peyu, bidada paibao. Tama te homu eyu, dagego te po tigidali sogo gegeyu, nedebo dao. Tama te asęani po aga digi enade po page ola mabo dao.
JOH 5:40 Tiali digi dage enaba aselama, bidabo bomo sagasobo hagela homu ebo dao,” te po wai.
JOH 5:41 “Te ena asali, te we bidi augwaligo enabolo genuai nogi momainogo asobeo.
JOH 5:42 Tiali digi eno dage koneanio. Dagego God godolo mu ebo menio, te tiwai homu dagede elalubeo.
JOH 5:43 Ena asali te ena Aya Godigo bomo dali genuai nogi dali selasa asiyu, asai digi, tama dagego eno po sabeo. Tiali goli, bidi me deli aga nogi dali asiyu da, teda dagego te bidigo wabo po saibao.
JOH 5:44 Dagego genuai nogi duga haside sabo dao. Tiali digi, dagego Godigo dagebolo genuai nogi maiabo sę te bomo elama, ebo menio. Tama tibaso, dagego eno wabo po mena tama duga homuba mugowe?
JOH 5:45 Dagego te eno Godibolo po tų ela mayao po waibao, te homu egimio. Eno te sę egobeo. Dage po tų ela maiabo bidi da Moses dao. Dagego homugo te bidi aga digi dage tau sabo bidi mu dao. Tiali goli agai dage po tų ela maiabo bidi dao.
JOH 5:46 Dagego Mosesgo asęani poba homu tigidali mu mugi sogo da, teda duga homu tigidali eno wali poba mugi da. Magi basowe? Te bidi Mosesgo enade po polobadu asęani.
JOH 5:47 Tialima dagego agai asęani poba duga homu tigidali musiąyu da, tibaso magila dagego eno po me mena tama odama, duga homu teba muaibawe? Dage usu egobeo,” Jisasgo te po Juda bage dali wai.
JOH 6:1 Te wali po silama, tama nosali me sogo Jisas Galili sigi ąį te moni gebadu nogelama, u badu pai. Augwaligo te ąį nogi me Taiberius nogi yai.
JOH 6:2 Tama genuai we bidi hani hauwa augwaligo Jisasgo te gasi yai bidi hauwa agai dodolobo augwaligo suai. Tama tebo sulama, augwali Jisas wali pai.
JOH 6:3 Tama Jisas bulu du meba holama, tama Jisas aga wali pabo bidi dabe dali dulaluai, te bulu dude.
JOH 6:4 Tama bo disąwai nai bret tuabo sogo te pąde tama dao, te sogo nogi Pasova, te Juda bagego olo bidibo side wai.
JOH 6:5 Jisasgo tonono bilibadi, tama agai suali, genuai we bidi hani Jisas agaba asai. Tama Filipbolo agai te po wai, “Dago te we bidi augwali tuabo nai bret menade abelegowe?” Jisasgo te po wai.
JOH 6:6 Jisasgo Filipbolo te po wai, agai homu magi ebowe naga suainogo eyu, Jisasgo te po wai. Jisas aga digi yabo sę da te aga konea selama, te sę yaibao.
JOH 6:7 Filipgo Jisasbolo po wei ponoyu, te po wai, “Tibaso da, dago bret te masigi umabogo abelama, te we bidi mabo da, te augwali usu egobeo. Te augwali deli deligo te nai dwasianu naga siyu da, te me usu egobeo,” Filipgo Jisas dali te po wai.
JOH 6:8 Aga bidi me deli Andru, te Saimon Pita aga ama, agai Jisas agabolo te po wai,
JOH 6:9 “Ogwa me deli ede bidibao, te ogwa agai a naga bret dali sųgų si dali munalubo. Te bret te bali plauago nigai. Tiali digi, te naigo e genuai we bidi hani usu egobeo,” Andrugo te po wai.
JOH 6:10 Jisasgo te po wai, “Te we bidi augwali duayao wao,” te po wali. Noswai hauwa tede elaluai, tama te we bidi augwali duawai, augwali te bidi hani bidi sese hauwa mu 5,000, te we dali wai puluba dali nedebeo.
JOH 6:11 Augwali duada pao olama, augwali dualaluai, tama Jisasgo te ogwago bret selama, tama Jisasgo Godibolo nage usu dao wai. Tilama, te we bidi augwalibolo te nai dobaba pai. Te sųgų si me agai tama naga tiwai agai augwalibolo mawai, augwa homugo usu yabo te tiwai naga.
JOH 6:12 Augwali nai tuali usu ela silai. Tama Jisas aga wali pabo bidi dabebolo te po wai, “Dagego nai me badu munalubo sisinao,” wai. “Tiyu yaide me badu nai olo tagalobuo,” wai. Jisasgo te po aga bidi dabebolo wai.
JOH 6:13 Tama tialima, augwaligo te tulama, me badu munalubo nai dabe sisinama, tama augwaligo bonou wa nogo si olama, sągą badu si pągąwai. Te a naga bali bret tego bidi augwali nai tuali usu yalima, tama me badu munaluai, te nai augwaligo te bonou wade ma buai.
JOH 6:14 Te we bidi augwaligo Jisasgo te bomo yai sę ebo sulama, tama augwaligo te po wai, “Mu tamao, te aga e tǫba asaiba wali bidi te aga dao, te Godigo po ola mabo bidi dao,” te we bidi augwa hasi te po wai.
JOH 6:15 Tialima Jisasgo koneai, augwaligo homugo Jisas aga dąų olama, tama Jisas aga augwaligo tuni bidi bidimainogo yaibao, augwali te homu yai Jisas aga dali. Tama tibaso, Jisas agaduba bulu duba ma pai.
JOH 6:16 Pio tama Jisas aga wali pabo bidi augwali te sigi ąį geba dulai.
JOH 6:17 Megi hulia sai, tama Jisas augwali bidibo digi pedalobeo. Tama tibaso, augwali moni gebaba holama, te ąįdu pai. Augwali Kaperneam be naniba painogo yai.
JOH 6:18 Bomo yai wali dali tama genuai ąį gisigi asiyu dali yai.
JOH 6:19 Augwali te gebadu ąį todogo pali, te kilomita a naga ma te a naga olama me badu nogo deli tama dąį egi pai. Tama augwaligo suali, Jisas ąį daidu asiyu tama te geba pąba sabolainogo asai. Tama augwali moni wi yai.
JOH 6:20 Tialima, Jisasgo augwalibolo te po wai, “Ena Jisas tama asobao,” wai. “Dage wi ebo tagaliąo,” te po wai, Jisasgo.
JOH 6:21 Tama augwaligo Jisas geba tomoba sela asainogo yai. Tama te geba polo augwali te pabo bulu teba poloba tugi pai.
JOH 6:22 Te do tama wabo side te we bidi augwali te sigi ąį sesege badu bidaluai. Augwaligo koneai, te do tama te gasa geba me menio. “Deli digi e munaluali,” wai. Tama Jisas aga wali pabo bidi dali te gebaba holobeo. Menio. Te bidi dabe augwa naga te gebaba holama pai, te we bidi augwaligo te koneai.
JOH 6:23 Tama augwaligo homu hauwa ebadi yaide, Taiberius bulu du asai geba meba teba poloba tuagasai, te Genuai Bidigo Godibolo nage usu da olama, tama te we bidi hauwa augwaligo nai tuali madigi pąba.
JOH 6:24 Te we bidi augwaligo suali, Jisas dali aga bidi dabe dali bidibo subeo. Tialima, augwali te tamadi asai geba dabeba holama, tama augwali Kaperneam buluba Jisas gegegi pai.
JOH 6:25 Te we bidi augwaligo Jisas sigi ąį sesege badu gegai. Sulama, tama augwaligo Jisasbolo te po hanalu wai, “Po ola mabo bidi, nage eba nisu asai dawe?” te po wai.
JOH 6:26 Jisasgo po wei ponoyu, te po wai, “Mu tama eno dagebolo obao, dagego eno yali bomo yai sę page homugo koneama, ena gegeyu ebeo. Menio. Dage eno te mani bret tulama, tama dage haliga pągąwai dao. Te tiali pagede dagego ena gegebo sę ebao,” wai. Jisasgo te po Juda bage dali wai.
JOH 6:27 “Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai.
JOH 6:28 Tama tibaso, augwaligo Jisasbolo te po wai, “Dago mena tama tilama, tama dago Godigo sę yaibawe?” augwaligo Jisas dali te po wai.
JOH 6:29 Jisasgo augwalibolo po wei ponoyu, te po wai, “Godigo sę e tama dao: dagego te Godigo tagala palali bidigo wabo poba duga homu tigidali muyu bidao,” Jisasgo augwalibolo te po wai.
JOH 6:30 Tama tibaso, augwaligo Jisasbolo te po wai, “Dena homu tigidali nageba mumainogo, tama nago magi bomo yai sę yaibawe? Nago magi sę yaibawe?” te Juda bagego Jisas dali te po hanalu wai.
JOH 6:31 “Dago wąį dabe augwaligo bidi meni yai bulude ili isiąwai nai nogi mana tuai dao. Godigo wali po bukude bidi mego asęani po gilama, ‘Agai dagaludu bret augwalibolo menama, tama augwaligo tuai dao,’ wai,” augwaligo te po wali.
JOH 6:32 Tama tibaso Jisasgo augwalibolo te po wai, “Mu tama eno dagebolo obao. Polobadu Mosesgo dagebolo mani nai te dagalu bret te dage mabeo. Menio. Eno Aya Godigo da te dage dagalu bret mu dage megi mabo dao.
JOH 6:33 Te bret Godigo mani, te aga dagalu tagalama, e tǫba dulama, tama agai tǫde bidibo we bidi bidada pabo bomo magasobo dao,” Jisasgo te po wai.
JOH 6:34 Tama tibaso, augwaligo Jisasbolo te po wai, “Genuai Bidi, nago te bret dabolo tigidali sogo da mao,” wai.
JOH 6:35 Jisasgo augwalibolo te po wai, “Ena digi ena bidabo bomo mabo bret dao. Bidi agai homu enaba muyu, ena pageba asobaso da, te bidi aga nasi munu me egobeo. Tama bidigo aga homu tigidali enaba mu baso da, te bidi aga ąį nogone munu me egobeo,” Jisasgo te po wai.
JOH 6:36 “Tialima, eno dagebolo polobadu wali gilama, dagego ena suai dao, tiali digi dagego enabolo bomo yai homu dąų wabeo.
JOH 6:37 Eno Ayago enabolo mabo we bidi tigidali augwali ena pageba asaibao, ena wali asomainogo. Ena pageba asobo bidi te aga eno me sela sągobeo, mu menio.
JOH 6:38 Magi basowe? Eno dagalu tagalama, e tǫba dulali, te eno homu kolesaga wali painogo asobeo. Menio. Ena e tǫba dulali, te ena tagala palai bidigo homu ena wali pomainogo asai.
JOH 6:39 Tama te ena tagala palai bidi agai homugo tama tiwai, agai enabolo mani we bidi eno me deli hagalamuo. Menio. Agai homugo eno augwali te tǫ dali dagalu dali sia sabo sogo augwali tigidali eno ma hodolaibao.
JOH 6:40 Eno Aya agai homu tama telalubo, aga ogwa osola suyu, agabolo bomo yai homu dąų olama muyu yai we bidi tigidali te augwali bidada peyu bidada pabo bomo selama, mu bidaibao. Tama augwali eno te tǫ dali dagalu dali silibo sogode augwali eno digi ma hodolaibao, ma bidimainogo,” Jisasgo te po wai.
JOH 6:41 Te Jisasgo te po tamadi wai dao, “Ena digi ena te tubo diluai nai bret dagalu tagalama, eba dulai.” Jisas agai te po obaso, Juda bage augwa hasi hagelabo po miani.
JOH 6:42 Augwaligo te po wai, “E bidi da, te Josep aga ogwa dao. Dago aga aya ida dali koneai dao. Magi baso agai te po megi wabowe, ‘Ena dagalu tagalama, e tǫba duali dao,’ wabowe? Agai po usubeo,” augwaligo te po wai.
JOH 6:43 Te Jisasgo augwalibolo po wei ponoyu, te po wai, “Dage duga hasi tomode te hagelabo po wabo tagaliąo.
JOH 6:44 Bidi me deli ena pageba olo me asogobeo. Menio. Ayago ena tagala palobaso, ena asai dao. Tibaso, agai bidi me deli kegali da, tiali da, te bidi ena pageba asagameo. Tama te bidi eno aga nosali tǫ dali dagalu dali silibo side ma hodolaibao, aga ma bidimainogo tama yaibao.
JOH 6:45 Te Godigo nosali yabo sę po pusa mani profet bidi dabe augwaligo te po asęani, ‘Godigo tigidali we bidi ola mawaibao.’ Mena bidi me Ayago po odolama, tama koneama, te bidi ena pageba asobo dao.
JOH 6:46 Tiali goli, bidi me deligo Aya me gedugo subeo. Te bidi God dali bidilama, asali, te bidigo naga Aya gedugo suai dao.
JOH 6:47 Eno mu po dagebolo obao. Bidigo enabolo aga homu dąų olama, enaba tialubo bidi, aga bidada peyu, bidada pabo bomo selama, mu bidaibao.
JOH 6:48 Ena digi ena te mu bidabo bomo elalubo tubo diluai nai bret dao.
JOH 6:49 Polobadu duga nǫų dabe augwali te bidi meni yai bulude bididubadi, te ili isiąwai nai nogi mana tuali goli, augwali nosali isali.
JOH 6:50 Tialima, te dagalu tagalama dulali bret, te tedali gasagi yai. Tama tibaso, bidigo te bret tuali da, te aga te mu bidabo bomo munu me tagalogobeo.
JOH 6:51 Ena digi ena da, te bidabo bomo elalubo bret da, te ena dagalu tagalama, e tǫba dulai dao. E bret bidigo tuyu da, te bidi aga bidada paibao, mu gamonaibao. Tama eno te bret agabolo mawaibao, te eno tigi dao. E tǫde bidibo we bidi augwali mu bidimainogo, eno ena tigi mawaibao,” Jisasgo te po wai.
JOH 6:52 Te Jisasgo te wali pode te Juda bage augwa hasi bomo elama, konila yali. Augwali me badugo te po hanalu wali, “Mena tama tibaso, te bidi aga tigi da menama, tama dago tueibawe? Te sę ebo usu egobeo,” Juda bage augwaligo te po wai.
JOH 6:53 Tama Jisasgo augwalibolo te po wai, “Eno mu po dagebolo obao, dagego Godigo Bidi Mu agai tigi tusiąwani da, agai kaneme tusiąwani da, tiali da, dagego te bidabo bomo elalugobeo.
JOH 6:54 Bidigo eno tigi tuyu, tama eno kaneme tuali bidi da, aga bidada pabo bomo elaluaibao, tama eno aga te tǫ dali, dagalu dali silibo side aga ma hodolaibao.
JOH 6:55 Magi basowe? Eno tigi te tubo nai mu dao, tama eno kaneme te mu tubo ąį dao,” Jisasgo te Juda bage dali wai.
JOH 6:56 “Bidigo eno tigi dali eno kaneme dali tubo bidi da, aga enade bidiyu, tama ena agade bidiyu, te bidi dadi si mu kęą pai elalueibao.
JOH 6:57 Bidada pabo bidi Aya agai ena tagala palai. Te tiwai gilama, ena me bidada pabo dao. Te tiwai gilama, mena bidi eno mi tuali bidi da, te bidi mu bidabo bomo te ena bomode saibao.
JOH 6:58 E bret, eno dagebolo po wabo bret da, te dagalu tagalama e tǫba dulai bret dao. Duga nǫų dabego bret tuali goli, augwali isali. Eno dagebolo wabo bret te tiwai menio. Bidigo e bret tuyu da, te bidi aga mu bidabo bomo selama, bidada peyu, bidada paibao,” Jisasgo te po wai.
JOH 6:59 Jisasgo augwali te bomo yai po ola mabo be tomode te po ola mawai, te Kaperneam be nanide.
JOH 6:60 Te bidi Jisas agai te bret dagaludu dulali po olama, tama aga wali pabo we bidi hauwa augwaligo te po odolama, augwa hasi tomode te po wai, “Te pogo dabolo sęgę mabo, dago te po magi elama, wali pogowe? Mena bidigo te po odolama, wali pabo usu egowe?” augwaligo te po wali.
JOH 6:61 Bidi mego agabolo te po wasiąbadi, Jisas aga digi koneai, aga wali pabo bage hauwa augwa hasi tomode te hagelabo po wai. Tama tibaso, agai augwalibolo te po wai, “Eno wali pode dage sębę elama, dagego ena tagalaibawe?
JOH 6:62 Tialima, dagego suali ma te Godigo Bidi Mu aga polobadu bidali buluba hodobo suyu da, magi yaibawe?” Jisasgo te po wai.
JOH 6:63 “Te mu bidabo bomo mabo bidi da, te God agai Mobo Bidi naga dao. Bidigo bomogo dwasianu me tau sogobeo, usu egobeo. Te po eno dagebolo polo wai dao, te pogo dagebolo God agai Mobo Bidi mabo dao, agai dagebolo te mu bidabo bomo momainogo.
JOH 6:64 Tiali digi, me badu bidi dage tomode augwaligo enade bomo yai homu dąų olama, mube,” Jisasgo te po wai. Polobadu digi, aga sę ebo gagalali sogode, Jisas aga koneai agade bomo yai homu dąų olama, musiąbo bage. Tama aga koneai me, te aga te boi bidigo nogoba sela maiabo bidi, te me agai polobadu koneai.
JOH 6:65 Tama Jisasgo po me wadoloyu, te po wai, “Te pagede eno dagebolo te po wai dao, Ayago bidi mebolo usu dao wasiąyu da, teda te bidi ena pageba asobo usu egobeo,” Jisasgo te po wai.
JOH 6:66 Te po silama, tama Jisas aga wali pabo we bidi hauwa augwaligo te po odama, Jisas tagalama, augwa ma geasa pai, tama augwali Jisas dali me bidibeo.
JOH 6:67 Tama tibaso Jisas aga bidi nogo si olama, sągą badu si bidibolo te po hanalu wai, “Dagego me ena tagalama, paibawe?” te po hanalu wai.
JOH 6:68 Saimon Pitago Jisasbolo po wei ponoyu, te po wai, “Genuai Bidi, dago nage tagalama, da mena bidi pageba pogowe? Nago po da, te bidada peyu bidada pabo bomo elalubuo.
JOH 6:69 Tama dago te pode bomo yai homu dąų olama, bidibo dao. Me dago nage koneai, naga digi naga Godigo doloba pai bidi mu dao, Godigo tagala palai bidi dao, te dago konebao,” Pitago Jisas dali te po wai.
JOH 6:70 Jisasgo te po wei ponoyu, te po wai, “Eno dage nogo si bidi selama, sągą badu si bidi dage eno sai dao. Tialima, dage tomode me deli dwai haubo bidi te bidibao,” Jisasgo te po aga bidi dali wai.
JOH 6:71 Jisas agai te Judasde te po wai, te gasa bidi Saimon tego ogwa, aga bulu nogi Keriot. Te aga nogo si olama sągą badu si bidi te tomode, tialima, nosali te Judas agai Jisas boi bidi nogoba sela muaibao.
JOH 7:1 Te silama, tama Jisas aga Galili genuai tǫba pelama, tede bidiyu, te me me buluba bilalio. Juda bage augwaligo Jisas elainogo yai, tama tibaso Jisas aga te Judia genuai tǫ te badu me bilibo te hagela yai.
JOH 7:2 Tama Juda bage olo bidibo side, te augwaligo nogi te nami ugwa bede bidabo side, te olo bidibo si te pąba yagasai.
JOH 7:3 Tama tibaso aga ama dabe augwaligo Jisas agabolo te po wai, “Nage e bulu tagalama, tama nage Judia moni tǫba pao, te nago ebo sę te naga wali pabo we bidi augwaligo te sę sumainogo yao.
JOH 7:4 Bidi me deli agai homu te tigidali we bidigo aga sumainogo, te agai ebo sę me geme dualama ebo menio. Te tiwai, nago te sę eyu da, tiali da, nage tigidali we bidi gedude augwaligo nage sumainogo, waselao,” aga ama dedego te po wai.
JOH 7:5 Magi basowe? Aga ama dede augwaligo agabolo bomo yai homu dąų olama, mubeo, tama tibaso augwaligo te nage te moni Judia tǫba pao po wai.
JOH 7:6 Jisasgo augwalibolo te po wai, “Eno side te polo pedalobeo. Tialima, tigidali sogo te dagego side dao,” wai.
JOH 7:7 “Tǫde we bidi augwaligo dage dali sębę elama, boi bidi me ebo menio. Tialima, augwaligo ena dali sębę elama, boi bidi mu ebo dao. Magi basowe? Eno augwaligo ebo dwai kolesaga bolo eno augwali dali po wabo dao.
JOH 7:8 Dage naga ugwaba holiąo, te Juda bage augwaligo olo bidibo side te dagego sugi pao. Tialima, ena teba pabo me elalubo. Eno bodolu mani si te me elalubo,” Jisasgo te po wai.
JOH 7:9 Jisasgo agai tama po augwali dali wai, tama aga Galili bulude bidai.
JOH 7:10 Tialima, Jisas aga ama dede augwali Juda bagego olo bidibo side ebo sę sugi pai. Sugi pelama, tama nosali Jisas aga me holai. Aga teba hania me holobeo. Jisas aga geme pai.
JOH 7:11 Te Juda hani tobolu bidi dabe augwaligo te side aga gegebo sę yai. Tama augwaligo te po wai, “Te bidi mena bidibowe?” te po te Juda bagego hanalu wali.
JOH 7:12 Tama te we bidi augwa hasi pomu po hauwa Jisasde wali. Mebago te po wai, “Te dwagi yai bidi dao,” wai. Tialima, mebago te po wai, “Agai augwali we bidi ili po ola mabo dao,” Jisasde te we bidi augwa hasi te pomu po wai.
JOH 7:13 Tialima, augwaligo te Juda tobolu bidi dabe suyu, wi yai. Tama bidi deligo Jisasde aga po hanilama me wabeo.
JOH 7:14 Te Juda bagego olo bidibo si tomode mu Jisas te Moni Lotu Be tempel tomoba holama, te we bidi po ola mabo gagalali.
JOH 7:15 Tama te Juda bage tobolu bidi dabe augwaligo agai ola mabo pode noma sali. Augwaligo te po wai, “Te bidi aga te skulba pisąwai bidi dao. Te tiwai bidama, tama agai mena sę ilama, te po page hauwa konebo dawe?” augwa hasi te po wai.
JOH 7:16 Te Jisasgo augwalibolo te po wei ponoyu, te po wai, “Te po eno dagebolo ola mani po da, te eno po menio. Te God agai po dao, agai ena tagala palobaso, ena asai dao.
JOH 7:17 Niwai bidigo Godigo homu kolesaga wali pabo bidi agai eno ola mabo po page koneagameo. Eno te we bidibolo ola mabo po menade saliwe? Te Godigo po dawe? Ma eno homugo naga te po obawe? Niwai bidigo Godigo homu kolesaga wali pabo bidi agai eno ola mabo po page koneagameo.
JOH 7:18 Bidi mego agai homugo digi po wabo bidi da, te bidi aga genuai nogi aga digi sainogo tibo dao. Tialima, bidi homugo tego ena tagala palama, ena asai da olama, agai Godigo nogi ugwaba siyu da, te usu yaibao, te tebo bidi da doloba pai bidi da, agade tibo dwai sę me isiąwai bidi dao.
JOH 7:19 Polobadu Mosesgo dage te Godigo bomo yai po mawai dao. Tialima, dage tomode bidi mego te bomo yai po wali pabo menio. Magi baso dagego ena elainogo ebawe?” Jisasgo te po hanalu wai.
JOH 7:20 Te we bidi augwaligo Jisasbolo po wei ponoyu, te po wai, “Dego nage elainogo ebawe? Woo, noma bidi dwai me deli nagede bidibaso, nago te po wali,” te olo we bidi augwaligo te po wai.
JOH 7:21 Jisasgo augwalibolo po wei ponoyu, te po wai, “Ena bomai sę me deli te Sabat sogode ebaso, dage tigidali noma sali.
JOH 7:22 Moses agai dagebolo te bomo yai po polobadu mawai dao, ogwa ame nenama, a naga bidama me badu nogo sela wabo side, aga tigiwali togwa, dąį ilao wali. Duga wąį mu te po me wai dao, tama nosali Moses me agai te bomo yai po asęani. Tama te bomo yai po bolidali weyu, me sogo Sabat sogode dagego ogwa tigiwali togobo sę ebo dao.
JOH 7:23 Dagego te tigiwali togobo bomai po wali peyu, te Sabat sogode me sogo te sę eyu da, teda dagego enade magi baso sębę ebawe, ena te gasi yai bidigo tigi eno dodolobo sę yalide.
JOH 7:24 Dagego gedugo naga ena olo dali osola sulamuo. Dagego bugagia osola suyu, homu kolesaga dolo mu yao,” Jisasgo te po wai.
JOH 7:25 Te Jerusalem we bidi mebago noma dwasianu siyu, te po wai, “E bidi te tobolu bidi dabego elai hagede yali bidi dawe?
JOH 7:26 Suao. Agai po bidi gabidide te wabao. Tialima, augwaligo Jisas dali po me wabeo. Dago tobolu bidi dabe augwaligo me e homu ebawe, ‘Te bidi Jisas da te Krais da, te sa muyu asaiba wali bidi,’ augwaligo te homu ebawe?
JOH 7:27 Tiali goli te asaiba wali bidi pedalobo si, te bidi me deligo agai page bulu me konegobeo. Me ma, dago e bidi Jisas agai page bulu te dago kone dao,” te we bidi mebago te po wai.
JOH 7:28 Tama Jisas agai te Moni Lotu Be tempel tomode te we bidi agai po ola mobadi, agai i bomo elama weyu, te po wai, “Ao, dagego ena koneai dao, eno page bulu be dagego koneai dao. Tiali digi, ena homugo digi ena me asobeo. Ayago ena tagala palobaso, ena asai dao. Agai kolesaga te mu tama dao. Dagego aga me konebeo.
JOH 7:29 Tiali digi eno da God aga koneai dao. Ena da aga dali bidai. Agai ena tagala palai, e tǫba. Tama tibaso, eno aga mu koneai dao,” Jisasgo te po wai, te Juda dabe dali.
JOH 7:30 Tama tibaso, te Juda bage tobolu bidi dabe augwaligo Jisas aga kalabus ilainogo yai. Tiali digi, agai sogo meba elalubuo, aga bodolu mani sogo asobeo, tama tialima bidi me deligo aga nogo me tubeo. Menio.
JOH 7:31 Me ma, te olo we bidi hauwago Jisasbolo augwa konealubo homu dąų olama, elaluali. Augwaligo te Jisasba homu musiąwai bagebolo te po wai, “Te God agai sa muyu, asaiba wali bidi pedalobo si, te bidigo bomai sę hauwa mu eyu da, Jisasgo yali bomai sę aiyaba elaluaibawe? Menio,” augwaligo te po wai
JOH 7:32 Te Farisi hani bidi augwaligo te olo we bidigo Jisasde te tobage po pomu po wabo odali. Tama te po odama, te Farisi hani bidi dabe dede, te pris tobolu bidi dabe dede, augwaligo enesigi bidi dabe tagala palama, Jisas kalabus yainogo, “Sigi pao,” wai.
JOH 7:33 Tialima, Jisasgo te po wai, “Dwasianu sogo ena dage dali bidaibao. Te silibo si, ena te ena tagala palai bidi pageba ma paibao.
JOH 7:34 Tama dagego ena gegebo sę yaibao, tiali digi dagego ena me sugobeo. Magi basowe? Dagego ena bidabo buluba me pogobeo,” Jisasgo te po te Juda dabe dali wai.
JOH 7:35 Tama Jisasgo te po obaso, te Juda dabe tobolu bidi augwa hasi po weyu, te po wai, “Te bidi Jisas aga menaba pai digi, dago aga gegelama, sugobewe? Jisas aga te Grik po wabo bidi dabego moni be naniba pogowe? Tede Juda bage me badu bidibo dao. Tama Jisas teba pelama, agai te Juda dabe me, Grik dabe augwalibolo te po ola magi paibawe?
JOH 7:36 Agai dabolo te po wai, ‘Dagego ena gegebo sę yaibao, tiali digi dagego ena sugobeo.’ Agai te po me wai, ‘Dage ena bidabo buluba me pogobeo.’ Jisasgo te wali po page mena tamawe?” te Juda dabe tobolu bidi dabe augwa hasi te po wai.
JOH 7:37 Te olo bidibo si silibo side, te genuai side dao, wai. Te tebo side Jisas dolaluyu, bomo olama, i wai, “Bidi me deli ąį nogone ebaso da, te bidi ena pageba aselama, ąį tuagasao.
JOH 7:38 Godigo wali po asęani bukude te po asęani po gilama, ‘Bidi mego enabolo homu dąų olama, mubaso da, ta, te bidigo homu kolesagade te bidabo bomo elalubo ąį hauwa mu ulu pedalama, bilaibao,’ wai,” Jisasgo te po wai.
JOH 7:39 Jisas agai te ąį po te Godigo Mobo Bidide wai. Augwa homu dąų olama, Jisasba mubo we bidi teba Godigo Mobo Bidi nosali asaibao. Tiali goli te sogo Jisas aga bomo dali moni nogi dali sisąbadi, God agai Mobo Bidi te we bidibolo mabe, te nosali mawaibao.
JOH 7:40 Meba we bidi augwaligo Jisasgo wali po odolama, te po wai, “Mu tama, te bidi Jisas da te polasa asobo bidi, te Krais aga asobo sogo te pąde tama dao.”
JOH 7:41 Meba bidigo te po wai, “Te aga da, te Godigo sa muyu asaibao wali bidi dao.” Tiali digi mebago te po me wai, “Woo, Godigo asaiba wali bidi te Galili bulude pedalogobeo.
JOH 7:42 Godigo nosali yabo sę po ola mani profet bidi mego bukude asęani po, te po me deli te tiwai dao, Godigo asaibao wali bidi te Devitgo hani asali digi tedu asaibao, te be nani nogi Betlehem tedu asaibao, te bulu polobadu Devit aga page bulu dao,” bidi mebago te po wai.
JOH 7:43 Tama tibaso, te we bidi augwali bidi hani si tomode bugwai, te Jisasde.
JOH 7:44 Meba bidi hani augwaligo homugo Jisas kalabus yabo homu yai. Tiali digi bidi me deligo Jisas agaba nogo me mubeo.
JOH 7:45 Te geasa pelama, enesigi bidi dabe augwali te pris tobolu bidi dabe dali, te Farisi bidi dabe dali, augwali bidibo digi sabolai. Tama te tobolu bagego te enesigi bidi dabe hanalu wai, “Magi yaliwe? Dagego te bidi Jisas sela asai meniwe?”
JOH 7:46 Te enesigi bidi dabego po wei ponoyu, te po wai, “Polobadu bidi mego Jisasgo wabo po tiwai munu me wai menio,” te po wai.
JOH 7:47 Tama tialima, te Farisi bagego dwai homu eyu, augwalibolo po wei ponoyu, te po wai, “Agai dage me ili po ola maniwe?
JOH 7:48 Da tobolu bidi hani dali, Farisi bidi hani dali dago Jisasgo wabo pode homu musiąbaso, te dagego me agabolo duga homu mugio.
JOH 7:49 Tialima, te olo we bidi hani augwaligo Godigo bomo yai po page konebeo. Tama tibaso, augwali Godigo gedude dola silaibao,” Farisi bagego te po wai.
JOH 7:50 Nikodemus te bidi polobadu Jisas pageba pai, te bidi te Farisi aga hani tobolu bidi me. Tama agai augwalibolo te po wai,
JOH 7:51 “Dago bomo yai po e tiwai dao, te olo bidi me po tų odosiąbadi, dago te bidibolo sęgę magobeo. Aga yali sę po dago odama, te aga dwai sę ebaso, teda dago aga po tų elama, sęgę mawaibao,” Nikodemusgo te po wai.
JOH 7:52 Augwaligo po wei agabolo ponoyu, te po wai, “Nage me nage Galili bulu bidi dawe? Godigo bukude po bugagia nedao. Nedelama, koneao, Godigo nosali yabo sę po ola mabo profet bidi me deli te Galili buludu munu me pedalogobeo,” augwaligo Nikodemusbolo te po wai.
JOH 8:1 [We bidi augwaligo Jisasgo wabo po odama, tama augwa beba tedela pai. Tialima, Jisas bulu du me nogi Oliv te bulu duba Jisas pai.
JOH 8:2 Jisas aga kigamu digi mu te Moni Lotu Be tempel teba ma pai. Tama we bidi hauwa augwali Jisas agaba asai. Tama Jisas aga dualama, te we bidi po ola mabo ma gagalali.
JOH 8:3 Tama te Juda dabego bomo yai po mu koneai bage dali, te Farisi hani bidi dabe dali, augwaligo we me deli magasali. Te we penani ebo sulama, augwaligo aga nogo tulama, odasa aselama, tama te we tomode dolaluai, te we bidi gabidide.
JOH 8:4 Tama augwaligo Jisasbolo po weyu, te po wai, “Po ola mabo bidi, te wego penani ebuo, bidi mego suai,” augwaligo te po wai.
JOH 8:5 Augwaligo te po me wai, “Te Moses agai asęani bomo yai pode e tiwai wali, ‘Tiwai we yai baso da, masigi sąnama, isimainogo elao,’ te po wai dao. Jisas, nago magi po obaso, dago nago po naga odaibao,” augwaligo Jisasbolo hanaluyu, te po wai.
JOH 8:6 Augwaligo tama po obaso Jisas homu magibo yabowe naga suainogo tiwai. Augwaligo homugo Jisasgo wabo pode augwaligo po tų ela maiabo tų me gegainogo, te Jisasgo po weyu, aga geda muyu da, teda augwaligo agade nogo tų ela mumai hagede. Tialima, Jisas tǫba basialuyu, aga nogo danigo tǫba po asęduai.
JOH 8:7 Augwaligo Jisasbolo ma hanaluyu, ma hanaluyu yai. Tialima, Jisas doligulama, agai te po augwali dali wai, “Bidi me dage tomode sęgę meni yai bidi aga hasia mu te bidigo te we masigi sąyao,” wai, Jisasgo te po augwali dali wai.
JOH 8:8 Tama Jisas aga tǫba basialuyu, tǫde ma asęduai.
JOH 8:9 Augwaligo tama po odolama, tama augwali tomode te sęgę meni yai bidi meni baso, tama augwali tigidali buluba deli deli naga buluba pai. Tobolu bidi polasa pai, tama meba augwali nosali pai, te po tų ebo tagalama, tama augwali Jisas taga pai. Tama Jisas agaduba deli digi bidai, tama te we Jisas aga gesabide dolaluai.
JOH 8:10 Tama Jisas doligulama, te we dali po wai, “Augwali mena bidibawe? Bidi me deligo nage po tų ela maiabo bidi bidibowe?” Jisasgo te we dali te po wai.
JOH 8:11 Te wego te po wai, “Genuai Bidi, me deli me bidibeo.” Tama Jisasgo te po wai, “Eno me nage po tų elama, nagebolo sęgę magobeo. Nage pao. Tama nosali nago dwai sę ma egio,” Jisasgo te we dali te po wai.]
JOH 8:12 Te Jisasgo te Farisi hani bidi augwalibolo nosali te po ma wai, “Ena te tǫde we bidide ula dao. Bidi ena wali asobo bidi aga te bugagia bidabo ula aga selama, e tǫde bidaibao, aga hulide munu me bidigobeo,” wali.
JOH 8:13 Tama te po obaso, te Farisi hani bidi augwaligo Jisas agabolo te po wai, “Megi nago e pusubo po naga tobade wabo. Gasa bidi mego nagede te po wabeo. Nago po da, te mu po menio,” augwaligo te po wai.
JOH 8:14 Tama Jisasgo augwalibolo po wei ponoyu, te po wai, “Woo, te mu tamao. Ena digi ena tobade te po wali goli, te po mu dao. Magi basowe? Dagego ena taga soyu asali bulu te dagego konebeo, ena mena buluba pabowe te me dagego konebeo. Tialima, ena hogodama, taga soyu asali bulu, te ena konealubo. Tama ena te buluba ma pabo te me eno konealubo. Tama tibaso, ena digi ena tobade te ena da tǫde we bidigo ula dao po wali goli, te mu po dao.
JOH 8:15 Dagego bidi me osola subo si, tama dagego tǫde bidibo we bidigo kolesagade osola subo dao. Ena da bidi me osola subo menio.
JOH 8:16 Tialima, eno bidi me osola sugi sogo da, teda eno dolo mu naga te bidi osola sugi da. Magi basowe? Enaduba naga te sę ebo menio. Ena tagala palali bidi ena Ayago ena dali te sę ebo dao.
JOH 8:17 Dagego bomo yai po me deli e tama telaluboo, bidi sigo gasa bidide wali po deli po tiwai naga weyu da, te po mu po dao.
JOH 8:18 Ao, te tiwai, eno po da te ena digi ena tobade wabo dao, tama Ayago ena tagala palobaso, te ena asai dao, te Ayago agai me ena me da sigo ena tobade po wabo dao. Te ena tobade po wabo bidi si dao, dagego bomo yai po wali tiwai dao,” Jisasgo te po wai.
JOH 8:19 Tama tialima, augwaligo Jisasbolo te po wai, “Nago aya mena bidibowe?” Jisasgo te po wei ponoyu, te po wai, “Dagego ena page kuna konebeo. Tama dagego eno Aya me dagego konebeo. Dagego ena konegi sogo da, teda dagego eno Aya me konegi da,” Jisasgo te po wai.
JOH 8:20 Jisas agai te po te masigi ge mubo be habude bidiyu, te po wai. Agai te we bidi te Moni Lotu Be tempel tomode ola mayu, te po wai, te masigi ge mubo be habude. Tama tialima, bidi me deligo aga kalabus me ebeo. Magi basowe? Te Jisas agai bodolu mani si te me elalubuo.
JOH 8:21 Jisas agai augwalibolo po ma wai, “Ena paibao. Dagego ena gegebo sę yaibao. Tialima dagego yali dwai sęgo sęgę me elalubadi, dage isaibao. Dage ena pabo buluba pabo usu egobeo,” Jisasgo te po wai.
JOH 8:22 Tama Juda bage tobolu bidi dabe augwaligo te po augwa hasi wai, “Agai te po wali, da aga pabo buluba pabo usu egobeo, wali. Te po page e tama tiwai elalubowe, Jisas aga digi aga ma elainogo waliwe?” Juda bage augwaligo te po wai.
JOH 8:23 Jisasgo augwalibolo te po wai, “Dagego page bulu aiyadu dao, eno page bulu ugwadu dao. Dage e tǫde bidibo bage dao, ena e tǫde bidi menio.
JOH 8:24 Tama tibaso, eno dagebolo po wai dao, dagego yali dwai sęgo sęgę te me elalubadi, dage isaibao. Tama dage mu tama te sęgęde isaibao, dage enade ena te tǫba dulali bidi dao po dagego te pode ‘Mu po dao’ homu esiąyu da,” Jisasgo te po wai.
JOH 8:25 “Nage dewe?” augwaligo aga hanalu wai. Jisasgo augwalibolo te po wai, “Hasia sogode eno dagebolo wali gilamao.
JOH 8:26 Eno dagede wabo po hauwa elalubao, dagego ebo kolesaga hauwa me eno osola sueibao. Tialima, ena tagala palali bidi te agai homu kolesaga te mu tama dao. Tama tigidali po eno Godide odobo po te po naga eno tǫde we bidibolo wabo dao,” Jisasgo te po wai.
JOH 8:27 Augwaligo Jisasgo aga Ayade po wabo te augwaligo me konebeo.
JOH 8:28 Tama tibaso, agai augwalibolo te po wai, “Nosali dagego Godigo Bidi Mu ni pedaide daganama, te ugwaba sela muaibao. Te tebo sogo da, te dagego koneaibao, ena te ena digi dao. Te sogo me dagego koneaibao, eno haniani sę eyu, eno homu wali pisiąyu te sę yalio. Eno po Ayago ena ola mani po naga wabo dao.
JOH 8:29 Agai ena tagala palobaso, ena asai, agai ena dali bidibao. Agai ena tagalama, enaduba bidibo menio. Magi basowe? Eno ebo sę te God agai godolo yabo sę naga ebo dao,” Jisasgo te po wai.
JOH 8:30 Jisas agai te po obadi, we bidi hauwa agabolo homu dąų olama, muai.
JOH 8:31 Tama tibaso, Jisas agai te agabolo homu tamadi muai we bidi tebolo te po wai, “Dagego eno ola mabo po wali peyu da, teda dage ena wali pabo we bidi mu dao.
JOH 8:32 Tama dagego te Godigo enade wabo mu po dagego mu koneaibao. Te mu po dagego mu koneama, tama te po mugo dage tau selama, tama dage nogo dąų wali kolesaga tagalama, tama dage olo mu bugagia bidaibao,” Jisasgo te po wai.
JOH 8:33 Tama augwaligo Jisasbolo te po wai, “Woo, da Abrahamgo hani dao. Te tebo side bidi deligo da hani olo sę ebo bidi te nigilama munu me bidai menio. Magi baso nago te po obawe, ‘Dage te nogo dąų wali kolesaga tagalama, tama dage olo mu bugagia bidaibao’ po magi baso obawe?” augwaligo Jisas dali te po wai.
JOH 8:34 Jisasgo augwali dali te po wai, “Eno mu po dagebolo obao, tigidali we bidi augwaligo dwai sę edu da, augwali te dwai sę sęgę dologode me bididu ebao, te augwali te nogo dąų wali olo sę ebo bidi dabe gagawai bidibao.
JOH 8:35 Te olo sę bidi aga te be page bidigo hanide mu bidigobeo, osogo tama bidaibao. Tialima, te be page bidigo ogwa aga te bidi hanide tigidali sogo mu bidada paibao.
JOH 8:36 Ena da God agai Ogwa dao. Tama eno dage bonogo nogo kęąluali pisigina sąyu da, teda dage bonogo nogo ma kęąlugobeo, olo mu bugagia bidaibao.
JOH 8:37 Eno koneanio, dage te polobadu bidai bidi Abrahamgo hani dao. Tialima, dagego eno po sabo homu isiąbaso, dagego bomo elama, ena elabo homu naga ebo dao.
JOH 8:38 Eno Aya agai enabolo ola mani sę po naga te tigidali sogo eno wabo dao. Tama tiali goli, dagego da, duga ayago dagebolo ola mani sę selama, te sę ebo dao,” Jisasgo te po wai.
JOH 8:39 Augwaligo Jisasbolo po wei ponoyu, te po wai, “Dago ayago hani page bidi da te Abraham dao,” te po wai. Jisasgo augwalibolo te po wai, “Dage Abrahamgo wai dabe tigi sogo da, teda dage Abrahamgo yali kolesaga gagawai eyu, Godigo po odigi da.
JOH 8:40 Eno dage dali wabo po te eno Godigo mu po eno odolama, te po naga dagebolo wabo dao. Tialima, dagego ena elainogo ebao. Abraham agai tama tiwai menio.
JOH 8:41 Dagego duga ayago yali kolesaga megi ebao,” Jisasgo te po wai. Augwaligo Jisasbolo te po wai, “Dago idago da penani elama, da ame nai menio. Dago aya deli te God dao,” te Juda bagego te po wai, Jisas dali.
JOH 8:42 Te bidi Jisasgo augwalibolo te po wai, “Te God aga dagego aya mu tigi sogo da, teda dagego ena dali godolo mu egi da. Magi basowe? Ena God dali bidilama asai dao. Ena homugo digi ena asobeo. Godigo ena tagala palobaso, asai dao.
JOH 8:43 Magi baso dagego eno po homugo bugagia konebewe? Te page tama dao. Dagego bomo elama, dagego eno po sabo homu ebo menio.
JOH 8:44 Dage da duga ayago wai dabe dao. Dagego aya te Satan dao. Tama dage me bomo elama, duga ayago ebo homu kolesaga wali painogo ebo dao. Polobadu mu, tigidali nai gagalama nigali, te sogo te bidi Satan agai te bidi elebo sę tama ela asiyu, megi tama me te sę ela pabo dao. Tama agai mu po me wali pai menio. Magi basowe? Mu po agade bidibo menio. Tibo po wabo da te agai po mu dao. Satan aga tibo po wabo bidi mu dao. Tama aga tibo po wabo page bidi mu dao.
JOH 8:45 Tialima, ena da mu po obaso, dagego eno po mu po dao homu esiąyu, tama dagego te pode homu mubo menio.
JOH 8:46 Dage tomode bidi me deligo te enabolo nago dwai sę yali po weyu, tama te dwai sę page agai hania ola mabo usu egobeo. Te po kedu enade meni yai po dao. Tialima, eno mu po obadi, te dagego magi baso homude dąų olama, mubewe?
JOH 8:47 Godigo wai dabego da augwaligo Godigo po tigidali odobo dao. Tiali digi, dage Godigo wai dabe menio. Tama tibaso, dagego bomo elama dagego Godigo po sabo homu ebo menio,” Jisasgo te po wai.
JOH 8:48 Te Juda bagego Jisasgo po wei ponoyu, te nogi posobo po wai, “Dago nagede tama po wai dao, ‘Aga da dwai Samaria hani bidi dao. Tama dwai haubo mobo bidi agade bidibao,’ dago te po nagede wai dao. Dago mu po tamao,” Juda bagego Jisas dali te po wai.
JOH 8:49 Jisasgo po wei ponoyu, te po wai, “Enade dwai haubo mobo bidi me bidibeo. Eno ena Ayago nogi ugwaba sabo dao. Tiali digi, dagego eno nogi posobo dao.
JOH 8:50 Tialima, eno ena nogi ugwaba sabo sę me ebeo. Tialima bidi me deligo eno nogi ugwaba sabo sę ebo dao. Tama te bidi aga te ena dali dage dali tomode te po tų ebo po dodolabo bidi mu dao.
JOH 8:51 Mu po eno dagebolo obao, eno po wali pabo bidi dabe augwali munu me isigobeo,” Jisasgo te po wai.
JOH 8:52 Te Juda bage augwaligo Jisasbolo te po wai, “Megi da dago mu konebao, nagede dwai haubo mobo bidi bidibao. Abraham isai dao. Godigo nosali yabo sę po ola mani profet bidi dabe me augwali isai dao. Te genuai nogi elalubo bage augwali isai digi, nago te po wai, ‘Eno po wali pabo bidi dabe augwali munu me isigobeo.’
JOH 8:53 Magi yainuwe? Nago dago wąį Abraham aiyaba elaluai hagede, nago te po waliwe? Te isai dao. Godigo nosali yabo sę po ola mani profet bidi dabe augwali me isai dao. Naga digi magi baso naga nogi ugwaba sobawe?” Juda bagego Jisas dali te po hanalu wai.
JOH 8:54 Jisasgo po wei ponoyu, te po wai, “Ena digi ena nogi ugwaba sigi sogo da, teda eno nogi olo tǫde nai tiwai egi dao. Ena Ayago digi eno nogi ugwaba sabo dao. Te bidide dagego te po wabo dao, ‘Te dago God dao.’
JOH 8:55 Tiali goli, dagego aga munu me konebeo. Eno da aga hania konebo dao. Eno God aga konebeo po wagi sogo da, teda ena te dage gilama, tibo po wabo bidi tiwai bidigi dao. Tialima, te menio. Eno aga koneai, tama eno agai po wali pabo dao,” Jisasgo te po wai.
JOH 8:56 “Duga wąį mu Abraham agai ena e tǫba nosali bidagasaiba, te agai polobadu koneyu tama agai dwagi yai homu yai. Tama agai ena bidagasobo sulama tama agai tede dwagi yai homu mu yai dao,” Jisasgo te po wai.
JOH 8:57 Te Juda bage augwaligo Jisasbolo te po wai, “Nago kibu be bidi sese si olama, nogo si ebeo. Nage gesi bidi dao. Tama tialima, nago Abraham suali po obawe?”
JOH 8:58 Jisasgo augwalibolo te po wai, “Mu po eno dage dali obao. Polobadu Abraham tede bidu ame nesiąbadi yaide, te sogo ena bidai dao, megi tama me ena bidibo dao,” Jisasgo te po wai.
JOH 8:59 Te Juda bage augwaligo Jisasgo te po wabo odobaso, tama augwaligo masigi selama, Jisas aga elainogo yai. Tialima, aga geme duala siyu, ela pelama, tama te Moni Lotu Be tempel taga peyu, aga buluba teda pai.
JOH 9:1 Te Jisas pobadi yaide, agai gedu widai bidi suai. Aga idago tabide elalubadi, tama aga gedu widai.
JOH 9:2 Jisas aga wali pabo bidi augwaligo aga hanalu wai, “Po ola mabo bidi, te bidi dego sęgę selama, aga idago gedu widai ame naniwe? Te bidi aga digi sęgę saliwe, ma aga aya de ida sigo sęgę saliwe?” te po wai.
JOH 9:3 Jisasgo te po wei ponoyu, te po wai, “Te bidi aga sęgę dali aga aya de ida sigo sęgę dali tede menio. Te sę pedalali, te Godigo bomo te bidide hania pedalobo te we bidi dabe augwaligo sumainogo yai.
JOH 9:4 Megi ulade dao. Tama ulade dago ena tagala palali bidigo sę yao. Hulia sabo magade, hulia sabode, bidi me deligo sę me egobeo.
JOH 9:5 Ena e tǫde bidibo sogo, te ena e tǫde we bidigo ula dao,” Jisasgo aga isabo sogode te po wai.
JOH 9:6 Jisasgo te po olama, tama agai tǫba pesa sąwai. Tama pesa dali, tǫ dali piligai. Tama Jisasgo te tǫ selama, te bidi geduba pilali.
JOH 9:7 Tama agai te bidibolo te po wai, “Nage wę ge ąį nogi Siloam te ąį paugi pao,” wai. (Te wę ge ąį nogi Siloam, te nogi begelama, te po wai, bidi tagala palai.) Jisas agai te po obaso, te bidi pelama, ąį paugi pai. Tama aga ma asai. Tialima, te bidi aga gedu megi tama mu tonobo usu yalio.
JOH 9:8 Tama aga deli be bage aga hasi augwali me, te gasa bidi me badugo polobadu aga suai, te sogo agai we bidibolo agai masigi ge gonai, augwaligo augwa hasi te po wai, “Magi yaliwe? Te bidi te gedu widai dulaludu, masigi gonani bidi dawe?” augwaligo te po wai.
JOH 9:9 Mebago te po wai, “Te bidi tama dao.” Tama mebago te po wai, “Te bidi menio. Te bidi tiwai dao, tiali te gasa bidi dao.” Tama te bidi aga digi te po wai, “Te ena te bidi tama dao,” te po wai.
JOH 9:10 Augwaligo te bidibolo te po wai, “Magi ilama, nago gedu dwagi yai yaliwe?” te bidibolo augwaligo te po wai.
JOH 9:11 Te bidigo po wei ponoyu, te po wai, “Te bidi nogi Jisas, agai tǫ dali, ąį dali piligilama, eno gedude pilai. Tama aga enabolo te po wai, ‘Nage Siloam wę ge ąįba pelama, te ąį paugi pao,’ wai. Tama ena pelama, te ąį paugi pai, tama eno gedu dwagi yai elama, tigidali nai eno subo dao,” te bidigo te po wai.
JOH 9:12 Augwaligo te bidibolo te po wai, “Te bidi mena bidibowe?” Tama te bidigo te po wai, “Eno konebeo.”
JOH 9:13 Te bidi polobadu gedu widali bidi augwaligo te Farisi bidi hani bidi dabebolo odasa pai.
JOH 9:14 Te Juda bagego Sabat sogode Jisasgo aiyana pai tǫ selama, te bidi gedu pedalai.
JOH 9:15 Tama te Farisi hani bage augwaligo te bidibolo ma hanalu wai, “Nago gedu mena tama dwagi yai pedalaliwe?” Te bidigo augwalibolo te po wai, “Te bidi agai aiyana pai tǫ eno geduba muai, tama ena ąį pauwai, tama eno gedu ula yai.”
JOH 9:16 Tama te Farisi bidi hani tomode si bugulama, mebago Jisasde te po wai, “Godigo te bidi tagala palobeo. Agai Sabat sogode bomo yai po wali pabeo.” Tialima meba bidigo te po wai, “Dwai sę ebo bidi mego te tiwai bomai sę me ebo menio. Te bidi dwagi yai bidi dao,” wai.
JOH 9:17 Augwa hasi tama bugulama, tama augwaligo te gedu widai bidibolo ma hanaluyu, te po wai, “Nago gedu geselali bidi, te bidide nago magi homu ebowe?” Agai te po wai, “Aga da, te Godigo nosali yabo sę po ola mabo profet bidi me deli dao, eno te homu ebao,” wali.
JOH 9:18 Polobadu te bidi agai gedu halua sai, megi agai gedu pedai. Tialima, te Juda bage tobolu bidi dabe augwaligo homugo, te mu menio. Tama augwaligo te gedu widai bidi aga aya de ida si i wai.
JOH 9:19 Augwaligo te we de bidi sibolo hanalu wai, “E dage sigo ogwa dawe? Aga idago ame neyu, gedu widai ame nai, dage sigo tama po obawe? Tialima, magi ilama, agai gedu mu pedaliwe?” te po wai.
JOH 9:20 Te gedu widai bidi aga aya de ida sigo te po wai, “Da sigo koneai, e ogwa te da sigo ogwa dao. Aga idago ame neyu, gedu widai ame nai, tama te me da sigo koneai.
JOH 9:21 Tiali, megi agai gedu ula mena tama ilaliwe, te da sigo konebeo. Tama dego agai gedu pedalaliwe, te me da sigo konebeo. Dagego agabolo hanalu wao. Aga genuai yai dao, aga digi dage dali po wabo usu yaibao,” augwali sigo te po wai.
JOH 9:22 Aga aya de ida si Juda dabe dali wi eyu, te po peda sai. Magi baso meni, te Juda bagego po mia siyu, te po wai, “Bidi mego te Jisas te sa muyu asaiba wali bidi Krais da weyu da, te dago te po wabo bidi te dago bomo yai po ola mabo be tomoba asidali weyu habu selaibao,” te po wai dao.
JOH 9:23 Tama tibaso, te polobadu gedu widai bidi aga aya ida sigo te po wai, “Aga genuai yai dao. Duga agabolo hanalu wao.”
JOH 9:24 Tama si sogo te gedu widai bidi i wai. Te tobolu bidi dabe augwaligo te po agabolo wai, “Godigo nogi naga ugwaba sao, te bidigo nogi ugwaba sigio. Dago koneai, te nago gedu dwagi yai ilali bidi aga dwai sę ebo bidi dao. Tama nago agai nogi ugwaba sigio,” augwaligo te po wai.
JOH 9:25 Agai po wei ponoyu, te po wai, “Aga dwai sę ebo bidi dawe, te eno konebeo. Eno te sę deli koneai. Polobadu eno gedu widai. Tiali megi eno gedu ula yai.”
JOH 9:26 Tama augwaligo agabolo te po wai, “Agai nage dali magi sę yaliwe, agai nago gedu magila pedalaiwe?”
JOH 9:27 Agai augwali dali te po wai, “Eno dagebolo wai dao, tialima dagego odobo hagela yai. Magi baso dagego ma odainogo obawe? Dage aga wali pabo bidi mu pedalainogo ebawe?” te bidigo Juda bage dali te po wai.
JOH 9:28 Tama augwaligo aga dali dwai nogi posobo po weyu, te po wai, “Nage da, aga wali pabo bidi dao. Tialima, da te polobadu bidai nogi yai bidi Moses wali pabo bidi dabe dao.
JOH 9:29 Dago koneai, God agai po Mosesbolo mawai. Tialima, u bidi menade pedalaiwe, te dago konebeo,” augwaligo te po wai.
JOH 9:30 Te gedu widai bidigo te Juda bagego tobolu bidi dabebolo te po wai, “Te bidi noma sabo sę yali bidi dao. Aga menadu asaliwe, te dagego konesiąwai goli, agai eno gedu si dwagi yai ilali.
JOH 9:31 Dago koneai, Godigo te dwai sę ebo bagego hanalu wabo po odobo menio. Tialima, bidi me deligo agai Godide wi eyu, Godigo po odoyu, Godigo homu wali pabo bidi, te bidigo hanalu wabo po Godigo odobo dao.
JOH 9:32 Tigidali sogo polobadu bidi me deli aga idago gedu widai ame nani po dago odai. Tiali digi bidi me deligo te gedu pedalali po dago munu me odai menio. Dago wąį mu, augwaligo te tobage po odai menio, dago ayago me, tama megi dago me odai menio.
JOH 9:33 Godigo te bidi tagala paligi menigi da, teda agai eno gedu dwagi yai iligi menio,” te polobadu gedu widai bidigo te po wai.
JOH 9:34 Augwaligo te gedu widai bidibolo te po wai, “Nage ame neyu, nage dwai sę dali bidai. Nage dwai sęgęde bidai bidi mu da, nage. Tama tiali goli, magi baso nago da ola mawainogo ebawe?” augwaligo te po wai. Te po olama, augwaligo te polobadu gedu widai bidi te augwaligo bomo yai po ola mabo be tomoba asidali weyu, habu selali.
JOH 9:35 Te bidi Jisas agai te Juda bagego te polobadu gedu widai bidi habu selali po odai. Agai te bidi gegelama, sulama, te po wai, “Nago te Godigo Bidi Mude naga homu dąų olama, mubawe?” Jisasgo te po wai.
JOH 9:36 Te bidigo te po wai, “Genuai Bidi, te Godigo Bidi Mu te de dawe? Nago enabolo wao, agabolo eno homu muainogo yaibao.”
JOH 9:37 Jisasgo agabolo te po wai, “Nago aga suai. Te megi nage dali po wabo bidi tama dao,” Jisasgo te bidi dali te po wai.
JOH 9:38 Tama te bidigo kidu tǫba sugunama, Jisasbolo te po wai, “Genuai Bidi, eno nagebolo homu dąų olama, mubao,” te bidigo te po wai.
JOH 9:39 Jisasgo te po wai, “Ena e tǫba asali, tǫde bidibo we bidi dagalai hagede asai. Te homu kolesaga tomode gedu halua sai bidi, gedugo ma sumainogo te ena asai. Me ma, we bidi meba augwaligo homu, ‘Ao, dago koneai dao, te da te gedugo subo bage dao,’ augwaligo te homu ebo dao. Tama tibaso, augwaligo Godigo homu koneidali weyu augwali gedu halua somainogo ena asai dao,” Jisasgo te po wai.
JOH 9:40 Te Farisi bage me badu augwali Jisas dali tede bidai. Tama augwaligo te po odai. Augwaligo Jisasbolo te po wai, “Da me homu kolesaga tomode gedu halua sai dawe, nago te po obawe?”
JOH 9:41 Jisasgo po wei ponoyu, te po wai, “Dagego te homu eyu, ‘Ao, da te homu kolesaga tomode gedu halua sai bage dao,’ te dagego te homu eyu, tama dagego eno po sela sągi menigi da, teda dage dwai sęgę menigi da. Tialima, dagego duga gedu ula elalubao po waligo da, teda dagego sęgę me elalubao,” te po wai.
JOH 10:1 Jisasgo te po wai, “Mu po eno dagebolo obao. Bidi kibu sipsip bidibo bagulali obo tomogae tomoba pabo tųdu dolo pisąbo bidi da, te tialima agai gasa badu tomogae bolama tomoba pabo bidi yai baso da, teda te tebo bidi aga te nai wi sabo bidi dao, mena nai anoma elama sabo bidi dao.
JOH 10:2 Tialima, bidi tųdu tomoba pabo bidi, te aga sipsip tonalubo bidi dao,” te po wai.
JOH 10:3 “Te sipsip tonalubo bidi asobaso, te sipsip tomogai tų tonalubo bidi agai te tų dalama, tama te sipsip tonalubo bidi tomoba pelama, tama agai aga kibu sipsip nogi deli deli i wabo dao. Sipsip dabe i olama, tama aga polasa pobaso, tama te sipsip dabe augwali aga wali buluba soabo dao, te tubo noswai gegemainogo tebo dao.
JOH 10:4 Tama augwali tigidali buluba teda soabode, te sipsip tonalubo bidi aga polasa peyu, augwali aga wali pabo dao. Magi basowe? Augwaligo aga po wabo dogoni odoyu, wali pabo dao.
JOH 10:5 Augwali gasa bidi wali me pabo menio. Augwali te bidigo po wabo dogoni odolama, tama konesiąwai dogonigo po obaso, augwali wi pabo dao,” Jisasgo te we bidibolo te po wai.
JOH 10:6 Jisasgo te po begelama, augwali dali wai. Tialima, augwaligo Jisasgo te wali po page augwaligo konebeo.
JOH 10:7 Te augwaligo Jisasgo wali po digi begelai po page konesiąbaso, agai augwalibolo te po ma wai, “Eno mu po dage dali obao, ena digi ena da kibu sipsipgo tomogai tų palialubo bidi dao,” te po wai.
JOH 10:8 “Te ena nosali asobadi, polasa asali te bidi dabe augwali nai wi sabo bage dao, dage meba tiwai dao, te mena nai anoma elama, nai wi sabo bage dao. Tialima, te sipsip dabe augwaligo te bidi dabego wali po odobeo.
JOH 10:9 Ena digi ena te tomogai tų tiwai dao. Te kibu sipsip dabe tomogai tomoba pelama, tama bugagia bidiyu, buluba ma soyu, tede nai tuyu elama, bugagia bidibo dao. Te tiwai egilama yaibao, bidi me ena bidibo digi asobaso da, aga Godigo tau selama, ma saibao. Tama te bidi dwagi yai madide bugagia bidaibao, te kibu sipsip bidibo tiwai egilama.
JOH 10:10 Te tibo po wabo bidi, aga te sipsip wi sabo bidi tiwai dao, te wi sabo bidi agai te homu deli naga elasa asai, agai te sipsip dabe wi siyu, ela munama, doloyu yainogo, te homu naga elasa asai. Tialima eno da, we bidi augwaligo bidabo bomo somainogo ena asai. Tama te bidabo bomo augwalide mu pągąna pomainogo, ena asai dao,” Jisasgo te po wai.
JOH 10:11 Jisasgo te po me wai, “Ena te kibu sipsip dabe bugagia tonalubo bidi dao. Te kibu sipsip bugagia tonalubo bidi agai te homu ebo dao, ‘Ena te sipsip tau sabo sę ebadi, tama te sipsip kibu elainogo asali bidigo ena me elebaso da, te usu dao,’ te kibu sipsip bugagia tonalubo bidigo te homu ebo dao.
JOH 10:12 Tiali digi sipsip tonalubo masigi sabo sę naga ebo bidi, tama agai sipsip tonalubo bidi mu meni, te sipsip kibu aya wasiąwai bidi, aga te uni yowi asobaso, te sipsip dabe taga peyu, wi pabo dao. Tama tibaso, uni yowigo te sipsip kibu dabe ela tuyu, me badu wi pabo dao.
JOH 10:13 Magi baso te bidi wi pabo dawe? Te bidigo masigi sabo sę naga yai. Agai te kibu sipsip dabede homu dene eyu, tau sabo homu isiąwai bidi dao.
JOH 10:14 Ena da, te kibu sipsip dabe bugagia tonalubo bidi da. Eno Ayago ena konebo dao, te eno ena Aya me konebo dao. Tama te tiwai egilama, eno ena kibu sipsip konebo dao, augwaligo me ena konebo dao. Eno te sipsip tau sidubadi, bidi mego ena ela muiyu da, te usu dao. Eno homu ena te sipsip tau saibao.
JOH 10:16 Eno gasa sipsip me elalubuo. Megi augwali e tomogai tomode bidibo menio. Te me eno sigi pelama, odasa asaibao, e tomogai tomoba muaibao. Tama augwaligo eno po odaibao. Tama deli kibu sipsip hani bidaibao, tama te sipsip dabe tonalubo bidi deli digi yaibao.
JOH 10:17 Ena bidabo bomo te eno kibu sipsip tobade tagalaibao. Tama tibaso, Ayago ena godolo mu ebo dao. Tama nosali eno te bidabo bomo ma somai hagede eno te homu elama, ena bidabo bomo te kibu sipsip tobade tau siyu hasia tagalaibao.
JOH 10:18 Bidi me deligo eno bidabo bomo me sela sągobeo. Magi basowe? Ena digi ena homugo koneama, tama ena bidabo bomo ena kibu sipsip tobade tagalaibao. Tama ena bomogo bidabo bomo tagalama, tama bidabo bomo ena ma sabo elalubuo. Ena Ayago enabolo te sę ya wai dao,” Jisasgo te po wai.
JOH 10:19 Juda bage augwaligo te po odolama, augwali bidi hani si ma bugai.
JOH 10:20 Bidi hauwago te po wai, “Dwai haubo noma bidi agade bidiyu, aga polobao. Magi baso dagego agai po odobawe?” Juda bage me badugo Jisasde te po wai.
JOH 10:21 Meba bidigo te po wai, “Te bidi Jisasde dwai haubo noma bidi bidigi sogo da, teda agai te tobage po wagi menigi da. Dwai noma bidigo gedu widai bidi gedu pedalaibawe?” Juda bage mebago Jisasde te po wai.
JOH 10:22 Te kedau side, Jerusalem moni hanude te Juda bagego olo bidibo si pedalali. Te olo bidibo si page e dao. Polobadu boi bidi mego te habu selali bolama, tama te Moni Lotu Be tempel dwai meda ilai, habu selali nai te be tomoba mugi pali. Tama nosali te Juda dabe augwaligo te be ma dwagi yai ilama, tų ma dawai. Nosali tigidali kibu bede te sogo ma konemainogo eyu, te side augwaligo olo bidibo sogo dao wai.
JOH 10:23 Tama te olo bidibo side Jisas aga te Moni Lotu Be tempel moni mabode bilali. Tama te be mabo te polobadu genuai nogi yali bidi Solomon agai nigali be mabo dao.
JOH 10:24 Jisas te moni be mabode bilibadi, tama Juda bage aselama, Jisas bagulama, te po wai, “Nisu naga sogo nago dago homu si pedemainogo ebawe?” Juda bagego Jisas dali te po wai. “Nage Godigo sa muyu asaiba wali bidi da, te Krais bidi da wida, nago po hanilama, da dali wao,” augwaligo te po wai.
JOH 10:25 Jisasgo augwali dali te po wai, “Eno dagebolo polobadu wai dao. Tama tiali goli, dagego eno po mu po dao homu ebeo. Eno Ayago tigidali bomo yai sę eno agai nogide te sę yao obaso, tama tigidali ena konesiąwani we bidi eno te ebo sęde sulama, ena konemainogo, eno te sę ebo dao.
JOH 10:26 Tiali goli, dagego enabolo duga homu dąų olama, mubeo. Magi basowe? Dage da eno kibu sipsip menio.
JOH 10:27 Eno kibu sipsip dabego eno po wabo dogoni odobo dao. Eno augwali koneai, tama augwali ena wali asobo dao.
JOH 10:28 Tama eno augwali bidada peyu, bidada pabo bomo mobao, tama augwali munu me isigobeo, hagagobeo. Menio. Bidi me deligo augwali eno nogode ma dobola sabo usu egobeo.
JOH 10:29 Magi basowe? Eno Aya agai augwali enabolo mawai. Agai bomo te gasa bidi tigidaligo bomo aiyaba elalubo dao. Tama tibaso, bidi mego Ayago nogode augwali dobola sabo usu egobeo.
JOH 10:30 Ena dali Aya dali si page deli tama dao,” Jisasgo te po te Juda bage dali wai.
JOH 10:31 Te Juda bage augwaligo te po odolama, tama augwaligo masigi ma selama, tama Jisas tigiba masigi sąwai hagede, aga elemainogo yai.
JOH 10:32 Jisasgo augwalibolo te po wai, “Eno dagebolo Ayago dwagi yai bomo yai sę hauwa ola mawai dao. Tama dagego eno te yali sęde dwai sę me deli ebo sulama, tama dagego te homu eyu, ena masigi sąnama elainogo ebawe?” Jisasgo augwali dali te po wai.
JOH 10:33 Tama Juda bage augwaligo Jisas dali po bomo elama weyu, te po wai, “Dago homugo nago de dwagi yai sę yalide dago te homu elama, nage masigi sąnama elainogo ebeo. Nage olo tǫde bidi tiwai digi, nago Godibolo posobo po weyu, te po wai, naga digi nage te God dao, te po obaso dago nage masigi sąnama elainogo ebao,” augwaligo te po wai.
JOH 10:34 Jisasgo te po augwali dali wai, “Dagego bomo yai po asęani bukude te God agai wali po me deli elalubao, e dao, ‘Eno te po wai, “Dage da God dabe dao,” ’ te bukude te asęani po elalubao.
JOH 10:35 Tama dago koneai, Godigo te bukude asęani po te mu po tigidali sogo mu po dao. Tama te po tomode God agai te gasa we bidi tonalubo we bidi augwali god dabe dao wai. Te we bidibolo God agai po mawai dao.
JOH 10:36 Tialima God aga digi ena sa muyu, e tǫba tagala palai. Tama eno te po wai dao, ‘Ena da Godigo Ogwa dao.’ Tama tilama, dagego enabolo magi baso ‘Nage Godigo nogi dwai posobo po wai dao,’ waliwe?
JOH 10:37 Eno Ayago enabolo yao wali sę eno egi menigi sogo da, teda duga homu enaba mugimio.
JOH 10:38 Dagego duga homu eno wali poba musiąwai goli, eno Godigo enabolo yao wali sę eyu da, teda dagego duga homu te yali sęba muiąo. Magi basowe? Te eno yali sęba duga homu mubaso da, te dagego homu bugagia mu koneaibao, God Aya enade bidiyu, ena God Ayade bidiyu ebao, te dagego konemainogo duga homu eno yali sęba muao,” Jisasgo te po wai.
JOH 10:39 Te Juda bage augwaligo Jisas nogo bono duainogo homu ma yai. Tialima, agai augwali bidibo digi tagalama, gasa badu pai.
JOH 10:40 Te Jisas ma pelama, Jordan pabo ąį ma togogi pelama, tama pelama, Jongo we bidi polobadu baptais mani te bulu sabolama, Jisas te bulude bidai.
JOH 10:41 Tama te we bidi hauwa Jisas bidibo digi asai. Augwaligo te po wai, “Mu tamao, Jongo e bidigo ebo bomo yai sę me deli yai menio. Tiali digi tigidali po Jongo Jisasde wali po mu tama wai,” augwaligo te po wai.
JOH 10:42 Tama tede we bidi hauwa augwaligo augwa bomo yai homu dąų olama, Jisasba muani.
JOH 11:1 Bidi me deli nogi Lasarus, te bidi gasi yai. Te Lasarus aga bulu Betani, te bulude te we si bidali, we me nogi Maria, we me nogi Marta, augwali si ama name si dao.
JOH 11:2 Te we Mariago Jisas sągąde denami yai wel nosali pilama, tama aga moni bobobage tobolu nisigo ma holai. Te Maria aga abe Lasarus gasi yai.
JOH 11:3 Tama tibaso, aga abe sigo Jisas bidibo digi po ola tolai. Augwali sigo te po wai, “Genuai Bidi, nago godolo mu yali bidi aga gasi salio,” te po wai.
JOH 11:4 Jisasgo te po odama, te po aga wali pabo bidi dabebolo wai, “Te gasi page tama telalubuo. Te gasigo sę te bidi Lasarus isibo gasi naga menio. We bidi augwaligo Godigo ula yai bomo sumainogo eyu te bidi gasi yai. We bidi augwaligo Godigo Ogwa me nogi ugwaba somainogo eyu, te gasigo Lasarus sai,” Jisasgo te po wai.
JOH 11:5 Jisasgo te Marta dali, aga ama dali, Lasarus dali augwali Jisasgo godolo mu yai goli,
JOH 11:6 agai te Lasarus gasi ebo po odama digi, tama Jisas aga polo pisąbadi, si sogo te bidibo bulude ma bidai.
JOH 11:7 Nosali si sogo silama, Jisas aga wali pabo bidi dabebolo te po wai, “Da Judia tǫba ma pebelainao,” wai.
JOH 11:8 Aga wali asobo bage augwali noma selama, tama te po wai, “Po ola mabo bidi, polobadu gana Juda bagego nage masigi sąnama elai hagede te homu yai. Nage teba ma pelamuo,” te po wai.
JOH 11:9 Jisasgo te Godigo bodolu mani sogo naga te aga isaibao po augwalibolo ola momainogo agai po nogo habu sugunama te po wali, “Te giliga nanobadi yaide, te ula elalubao. Tama siade bilibo bidi tulamubo menio. Magi basowe? Te ulade dao, agai aga pabo tų bugagia suagameo.
JOH 11:10 Tiali ma, bidi hulide bilibo bidi, aga tulamubo dao. Magi basowe? Ula menio, te aga te pabo tų hulia sai elalubo,” Jisasgo te po wai.
JOH 11:11 Jisasgo te po ma wadolama, te po wai, “Dago abagi Lasarus godege pibao. Tialima, eno aga hodoligi paibao,” Jisasgo te po aga wali pabo bidi dabe dali wai.
JOH 11:12 Augwaligo te po wai, “Genuai Bidi, aga piyu da, te aga usu ma yaibao.”
JOH 11:13 Jisasgo wali po “Lasarus godege pibao,” te po page aga isai dao wali. Tialima, geda muyu, augwaligo homugo aga olo godege piali, te homu yai.
JOH 11:14 Tama tibaso, Jisasgo augwalibolo hanilama, te po wai, “Lasarus mu isalio,” te po wai.
JOH 11:15 “Aga isali sogode ena aga dali bidibeo. Dage tobade ena agaba pabeo. Magi basowe? Nosali dagego enaba duga homu mumainogo ena tama tiwai. Te sę ebode eno dwagi yai homu ebao. Megi da aga bidibo digi pinao,” Jisasgo te po wai.
JOH 11:16 Tomas, augwaligo aga nogi me Didimus wabo, te nogi page aga ama name dali deli sogo ame nai bidi, te bidi te Jisas wali pabo bidi me deli dao. Agai te Jisas wali pabo bidi mebabolo te po wai, “Da aga dali pinao, da me aga dali isimainogo pinao,” Tomasgo te po wai.
JOH 11:17 Te augwali pelama, pelama, tama Betani be naniba sabolali. Bidi mego Jisasbolo “Lasarus pubulama, me si me si sogo bidali,” te po wai.
JOH 11:18 Te dwasianu be nani Betani te moni hanu Jerusalem pąde digi tamao, usu ni kilomita sela tamao.
JOH 11:19 Tama Juda we bidi hauwa augwali Jerusalemdu aselama, Marta dali Maria dali si bidibo digi asai, augwali si dali mumonani po omainogo, augwa si abe isali sogo tiwai.
JOH 11:20 Tama Martago Jisas asobo po odai, tama agai te be nani tagalama, tama Jisas tiąba pai. Tialima, Maria aga te be tomode bidai.
JOH 11:21 Martago Jisasbolo te po wai, “Genuai Bidi, nage ede bidigi sogo da, eno abe isigi menio,” Martago te po Jisasbolo wai.
JOH 11:22 “Tialima, megi eno koneai, nago Godibolo magi nai me hanaluyu da, agai nagebolo mawaibao,” Martago Jisas dali te po wai.
JOH 11:23 Jisasgo Martabolo te po wai, “Naga abe ma hodaluama, bidaibao.”
JOH 11:24 Martago te po wai, “Eno koneai, aga nosali tǫ dagalu dali silibo side hodaluama, ma bidaibao. Te sogo tigidali we bidi ma hodaluaibao,” Martago te po wai.
JOH 11:25 Jisasgo te po wai, “Isai bidi hodalobo bomo dali, bidabo bomo dali, te ena digi eno tonalubo dao. Bidigo enabolo homu dąų olama, muani bidi isali, te aga bidabo bomo selama, ma bidaibao.
JOH 11:26 Bidibo bidi me agai enaba aga homu mu mubo bidi, aga munu me isigobeo. Nago homu te po waboba mubawe?” Jisasgo te po wai.
JOH 11:27 Martago Jisasbolo te po wai, “Ao, Genuai Bidi. Nage da Krais dao. Nage Godigo Ogwa dao. Nage te bidi polobadu Godigo po weyu, e tǫba asaibao wali bidi da. Ena homu dąų olama, nageba muai dao,” Martago te po wai.
JOH 11:28 Te we Martago te po olama, aga ama Maria i wagi pai. Te po dua digi wai, “Po ola mabo bidi aselama, bidibao, agai nage i wai dao,” te po wai.
JOH 11:29 Tama te Juda dabe Maria dali be tomode bidai. Augwaligo Mariabolo mumanobo po weyu bidai. Mariago te Martago pusali po odolama, aga polo hodaluama, Jisas bidibo digi pabo gagalai. Jisas te be nani Betani sabalisiąbadi, aga Martago hasia tiąba aselama, suali madigi me bidai. Tama te Juda bage augwaligo Maria polo hodaluama, buluba pabo suyu, tama augwaligo te homu yai, ‘Aga gų pageba gela wainogo pabo,’ te homu yai. Tama augwali aga wali pai.
JOH 11:32 Te Maria Jisas bidibo digi sabolai. Agai Jisas suyu, polo tama Maria aga tigi tǫba pigilubo tiwai yai, Jisasgo sągą pagede. “Genuai Bidi, nage ede bidigi sogo da, eno abe isigi menio,” Mariago te po Jisas dali wai.
JOH 11:33 Jisasgo suai, Maria gela wabo. Tama agai suali, Juda bage aga dali asali bage, augwali me gela wabo suali. Tama Jisas agai me homu dene mu eyu, tama aga pąde gela wabo homu yai, homu hę wai.
JOH 11:34 Jisasgo te po wai, “Dagego aga menade muaniwe?” Augwaligo Jisasbolo te po wai, “Nago suagasao.”
JOH 11:35 Jisas gela wai.
JOH 11:36 Tama tibaso Juda bage augwaligo augwa hasi te po wai, “Suao. Agai te bidi godolo genuai mu yai dao,” te po wai.
JOH 11:37 Tialima, meba bidigo e po wai, “Te bidi agai gedu widai bidi gedu ma pedalai. Agai te isai bidi me tau sigi sogo da, aga isigi menio. Agai magi baso aga tau sabewe?” Juda bagego Jisasde te po wai.
JOH 11:38 Homu hę ma weyu, Jisas te gų pageba pai. Te gų page augwaligo moni masigi tomode nigai dao. Tama moni sawali masigi me deli selama, tama sunumi paliali.
JOH 11:39 Jisasgo te po wai, “Dagego te masigi sela sąyao.” Te isai bidigo abe nogi Marta, te wego Jisasbolo te po wai, “Genuai Bidi, aga isilama, me si me si tama sogo piai dao. Tama dwai kugumini ebo,” Martago te po wai.
JOH 11:40 Tama Jisasgo Martabolo te po wai, “Magi yaliwe? Hasia nagebolo eno wai dao, nago enabolo homu muyu da, nago Godigo bomo nago sueibao,” Jisasgo te po wai.
JOH 11:41 Te agai te masigi sela sąyao te po obaso, augwaligo te masigi sela sąwai. Tama Jisasgo dagaluba tonaluyu, te po wai, “Aya, eno nagebolo nage usu dao obao. Nago eno hanalu wali po nago odai dao.
JOH 11:42 Eno koneai, tigidali sogo nago eno hanalubo po wabo odobo dao. Tiali eno e dolalubo we bidi tobade e po megi nagebolo obao, augwaligo nago ena tagala palali bidibolo homu mumainogo ebao.”
JOH 11:43 Jisasgo te po olama, tama agai i bomo elama wai, “Lasarus, nage buluba asao,” Jisasgo te po wai.
JOH 11:44 Tama tilama, isai bidi hodaluama, buluba asai. Aga sągą dali nogo dali augwaligo nami ugwago bebe pai dao. Augwaligo dwasianu nami ugwago aga gesabidide haluama tama kęani. Te kęani tama elalubadi, buluba soai. Jisasgo augwalibolo te po wai, “Pisigina sąyao, aga pomainao.” Tama augwaligo te ugwa dabe pisigina sąnama, tama aga beba pai.
JOH 11:45 Te Juda bage augwali Maria bidibo digi asai dao. Augwaligo Jisas agai te ebo sę suai. Tama augwali hauwago homu agaba muai.
JOH 11:46 Tialima, bidi meba pelama, Jerusalem be naniba sabolama, tama Jisasgo te yali sę po te Farisi bagebolo wagi pai.
JOH 11:47 Tama tibaso, te Farisi hani bage me, te pris hani tobolu bage me, augwaligo te kaunsil bage dali sisinama, Jisasde te po wai, “Dago te bidide magi yaibawe? Agai bomai sę hauwa mu ebo dao.
JOH 11:48 Tama tibaso, dago aga gogolama, agai te sę me ela peyu da, tigidali we bidigo agabolo homu munama, tama augwali aga wali paibao. Tama tiyu da, te da tonalubo Rom gavman bagego te ebo sę sulama, sębę elama, tama dago Moni Lotu Be tempel dali, da bidi hani dali, augwaligo dolagasaibao,” Juda bagego te po wai.
JOH 11:49 Tialima, augwali tomode bidi me nogi Kaiafas, aga bidai. Te kibu bede aga te pris bage tuni bidi nigai. Agai augwali dali te po wai, “Dage umunalubo bidi dabe tiwai dao.
JOH 11:50 Dago hani tigidali dolidali weyu, bidi me deli isilama, tama aga isibogo te we bidi tau siyu da, te usu yaibao. Dagego te konebewe?” Kaiafasgo te po wai.
JOH 11:51 Agai po aga homugo digi wabeo. Te menio. Me ma, te kibu bede aga te pris hani bage tuni bidi bidiyu, agai te Jisasde nosali pedalabo sę po, te Juda we bidi tau siyu, aga nosali isabo sę pedalisiąbadi te agai te po wai.
JOH 11:52 Tama Jisas aga isiyu, Juda we bidi naga tau sogobeo, te Godigo we bidi gasa bulude bidada pali we bidi deliba sisinama, agai hani deli naga yaibao.
JOH 11:53 Te sogo te Juda bagego tobolu bidi dabe augwaligo po gagalama, Jisas elabo po miai.
JOH 11:54 Tama tibaso, Jisas te Judia tǫ tomode hania bilibeo. Agai te bulu tagalama, tama te moni tǫ me nogi Efraim, teba pai, te bidi meni yai tǫ sesegeba. Tama Jisas te bulude aga wali pabo bidi dabe dali bidai.
JOH 11:55 Te Juda bagego bo disąwai nai bret tubo si te pąde dao, te si nogi Pasova. Tama tibaso, we bidi hauwa te haniani bulu bidi hani augwali Jerusalem te buluba hodali, augwa yali dwai sęgę hasia sela sąmainogo yai. Nosali te Pasova nai augwaligo tueibao.
JOH 11:56 Tama Jerusalemde augwaligo Jisas gegainogo yai. Tama augwali te Moni Lotu Be tempel tomode augwa hasi deliba sisinama, tama po miyu, te po hanalu wai, “Dagego magi homu ebowe? Jisas aga e nai tubo si eba asogowe?” Juda bagego augwa hasi te po wai.
JOH 11:57 Te pris tobolu bage me, te Farisi hani bage me, augwaligo bomo elama, te po wai, “Bidi mego Jisas menade bidibo sulama, te bidi dabolo wagasao, tama dago aga kalabus yaibao,” te po wai.
JOH 12:1 Te Sarere deli elalubadi, te Juda bagego bo disąwai nai bret tubo si, te sogo pedalaibao. Te olo bidibo sogo nogi Pasova dao. Te Pasova sogo pedalisiąbadi, tama Jisas te Betani be naniba pai, te Lasarus aga bulu dao. Te bidi Jisasgo gų pagede hodolali bidi dao.
JOH 12:2 Augwaligo Jisas nai te bulude nogeai. Tama te we Marta agai te nai dobabo tau sai. Tama Lasarus Jisas dali nai tubo bidi dabe dali dulaluai.
JOH 12:3 Tilama, te we Maria aga dwagi yai denami ebo wel selasa asai, dwasianu genagide. Te wel abelabo moni te hauwa mu, te dila pai nai mu dao. Agai te wel Jisas sągą sawalide pilai. Tama Jisas sągą Maria aga moni bobobage tobolu nisigo holai. Tama te bede bidali we bidi tigidali augwaligo te wel denami odai.
JOH 12:4 Te Jisas aga wali pabo bidi me Judas, aga page bulu Keriot, nosali te bidigo Jisas boi bidigo nogoba muani bidi, agai te wede wado po wai.
JOH 12:5 Agai te po wai, “Te we agai te wel dabolo menama, tama dago te wel munama, gasa bidigo abelegi sogo da, teda dago masigi hauwa 300 kina sigi dao. Te sę egi sogo da, teda te masigi ge dago te nai meni yai we bidibolo magi da. Magi baso agai te tiwai sę ebewe?” Judasgo te po wai.
JOH 12:6 Judas agai te nai meni yai we bidide homu dene elama, te po wabeo. Menio. Aga nai wi sabo bidi bidai dao. Tama agai te Jisas wali pabo bagego masigi mubo halobage tolalu, tama aga te halobagede mubo masigi deli deli sogo meba wi sai dao.
JOH 12:7 Tialima Jisasgo te po Judasbolo wai, “Te we tagalao, wado po wagio. Agai te wel tolalubadi, ena gų pageba muabo sogo asobo si, te wel ena tigide mumainao.
JOH 12:8 Nai meni yai we bidi augwali dage dali sesemane sogo bidaibao. Tama tibaso, dagego augwali tau sabo sogo hauwa elaluaibao. Tialima, ena da dage dali sesemane sogo bidigobeo,” Jisasgo te po wai.
JOH 12:9 Te Juda bage hauwa mu augwaligo Jisas te be nani Betanide bidibo po odolama, tama teba Jisas sugi pai. Augwali Jisas naga suainogo asobeo. Augwaligo Lasarus te Jisasgo polobadu gų pagede ma hodolali bidi dao obaso, te Lasarus me augwaligo suainogo asai.
JOH 12:10 Tama tibaso, te pris hani tobolu bidi dabe augwaligo Lasarus me elabo po miai.
JOH 12:11 Magi basowe? Juda we bidi hauwa augwaligo te Jisasgo Lasarus dali yali sęde homu elama, tama augwaligo te pris bage wali pabo tagalama, tama augwaligo augwa homu tigidali Jisasba naga muani.
JOH 12:12 Umabo we bidi augwali Jerusalem moni hanuba asai dao, te Pasova olo bidibo side. Tama do tama wabo sogo augwaligo Jisas Jerusalem buluba asaibao wabo po augwaligo odai.
JOH 12:13 Tama tibaso, genuai bidi asobo homu eyu, augwaligo te ni sebedi nologo tiwai ni selama, Jisas tųdu tiąba pai. Augwaligo bomo elama, i wai, “Dago Godigo nogi ugwaba sao. Dago te bidi nogi ugwaba sao. Aga Genuai Bidigo nogide asai. Aga da Israel bidi dabego tuni bidi dao,” augwaligo te po wai, Jisasde. Te genuai bidi dabe augwali genuai wiegi yai kibu hos tudide dualasa pabo dao.
JOH 12:14 Tialima Jisas aga nagamea pai homu eyu, tama gasa kibu hos nogi donki, te donki wai selama, tama te donki wai tudide dualasa pai. Te yali sę te Godigo bukude wali po egilama, te po tama wai,
JOH 12:15 “Te dage Jerusalem hanu tomode bidiyu te bulu du nogi Saion tede bidibo bage, dage wi egio. Suao. Dagego tuni bidi asobo, aga kibu donki waide dualasa asobao,” te po polobadu bukude tama po asęani.
JOH 12:16 Te sę yali sogo Jisas wali pabo bidi dabe augwaligo te sę page konebeo. Tiali goli nosali Jisas dagaluba hodaluama, aga genuai nogi dali, genuai bomo dali si ma selama, te sogo augwaligo te bukude asęani po ma koneai. Te po ma koneyu, augwaligo te homu yai ‘Jisas te kibu donki wai tudide dualasa pali me, te we bidi augwaligo wali po me, te po si polobadu bukude asęani po wali peyu, te sę yai.’
JOH 12:17 Polobadu Lasarus isilama, gų pagede munalubadi, tama we bidi hauwa augwali Jisas aga dali bidibadi, tama agai Lasarus i olama, hodolai, tama augwaligo suai. Megi te we bidi hauwa augwaligo Jisasgo te yali sę po te gasa buludu tamadi asai we bidibolo pusai.
JOH 12:18 Te tamadi asai we bidi augwaligo Jisasgo te bomai sę yali po odobaso, tama augwali Jisas tiąba pai.
JOH 12:19 Tama te Farisi bage augwaligo te we bidigo te sę ebo sulama, tama augwa hasi po weyu, te po wai, “Megi dagego koneao. Agade dago yali sę usu ebeo. Tigidali tǫde bidibo we bidi augwaligo aga wali poba,” te Farisi bage augwaligo te po wai.
JOH 12:20 We bidi umabo augwali te olo bidibo side Jerusalem hanuba holama, lotu po Godibolo wainogo yai. Tama Grik bidi hani bidi me badu augwali me Jerusalem hanuba lotu po wagasai.
JOH 12:21 Te Grik bage augwali Filip pageba asai. (Te bidi Filip aga page bulu te Betsaida be nani, te Galili tǫde.) Tama te Grik po wabo bage augwaligo Filipbolo hanaluyu, te po wai, “Edao, dago Jisas gedugo sulama, te bidi deli dali dago po mieo,” te po wai.
JOH 12:22 Tama tilama, Filip te bidi Andru pageba pelama, tama agabolo te Grik bagego hanalu wali po pusali. Tama pusulama, tama Andru dali, Filip dali augwali si pelama, Jisasbolo te Grik bidi dabego wali po wagi pai.
JOH 12:23 Tama Jisasgo augwali dali po wei ponoyu, te po wai, “Te Godigo Bidi Mu aga moni nogi dali, moni bomo dali, te si sabo sogo mu pedalai dao, megi.
JOH 12:24 Eno mu po dagebolo obao, te nai wit wai tǫba tulaluai, te pedama, kulubi holisiąyu da, te agaduba deli bidaibao, te tǫde daumua paibao. Tialima, aga pedama, kulubi pedaliyu da, te agai nai hauwa walaibao. Te ena me tiwai dao.
JOH 12:25 Tama te tiwai bidi aga tǫde bidibo sogode aga tobade aga digi dąų obaso da, teda nosali te bidi aga mu bidada pabo sogo mu hagawaibao. Me ma, bidigo e tǫde bidibo sogo aga digi tudiba muyu da, te bidi aga bidibo sogo mu elaluaibao, aga bidada peyu, bidada paibao.
JOH 12:26 Niwai bidi me deligo eno sę yainogo ebo bidi, te bidi aga ena wali asao. Tama ena bidibo bulu, te bulude naga eno sę ebo bidi ena dali bidaibao. Bidigo eno sę ebo bidi, te eno Ayago te genuai nogi mawaibao,” Jisasgo te po wai.
JOH 12:27 Agai po ma weyu, Jisasgo te po wai, “Megi eno homu sęgę mu eyu, midigi ebao. Tama eno magi po wagowe? Tiyu eno te po wagawe, ‘Aya, nago te enabolo tamadi pedalainogo ebo sę sela sąyao, enaba asidali.’ Eno te po wagawe? Woo, te po eno wagobeo. Tialima, te tiabo sogo ena pedalagasai dao, te ena dene somainogo yaibao.
JOH 12:28 Aya, naga nogi genuai emainao, eno homugo tama te ebo dao,” Jisasgo te po wai. Te po olama, tama dagaludu po me deli duali, “Eno ena nogi genuai yai dao. Tama eno nogi genuai ma ilaibao,” dagaludu po asiyu, te po Jisas dali wai.
JOH 12:29 We bidi dabe pąde dolaluai, augwaligo te po odolama, mebago te po wai, “Be kulu wai,” tama mebago te po wai, “Ensel mobo bidi me deligo aga dali po wai,” te po wai.
JOH 12:30 Jisasgo po wei ponoyu te po wai, “Te wali pogo ena tau sabo po wabeo. Menio. Te wali po agai dage tobade asai, dage tau somainogo yai.
JOH 12:31 Megi Godigo tǫde we bidi osola suyu, sęgę mabo sogo dao. Megi e tǫde elalubo dwai kolesaga tobolu bidi Satan sela sąbo sogo dao.
JOH 12:32 Nosali augwaligo ena ni pedaide ugwaba selama, elaibao. Tama te sę ebo sogo eno tigidali tǫde we bidi ena pageba gegasa asaibao,” Jisasgo te po wai.
JOH 12:33 Agai augwalibolo aga isabo tų ola mayu, agai augwali dali te po wai.
JOH 12:34 Te we bidi augwaligo Jisasbolo po wei ponoyu, te po wai, “Dago bomo yai pode tama po elalubo dao, Godigo sa muyu, asaiba wali bidi Krais aga bidada peyu, bidada paibao, te po wai. Tama tibaso, magi baso nago te po obawe, augwaligo te Godigo Bidi Mu ugwaba sao, po wai. Te Godigo Bidi Mu wali te de dawe?” augwaligo te po wai.
JOH 12:35 Tama Jisasgo augwalibolo te po wai, “Dwasianu sogo me te ula dage dali bidaibao. Te hulia sabo dageba asidali weyu, megi dagego te ula elalubo si, te ulade dage bidao. Te hulide pabo bidi aga mena pabowe te agai konegobeo.
JOH 12:36 Megi ula dagede elalubao. Tama tibaso, duga homu tigidali te ulaba muao. Tama tilama, dage te ula tiwai pedalama, bidaibao,” Jisasgo te po augwalibolo wai. Jisasgo te po olama, tama agai augwali taga peyu, geme duala sigi pai.
JOH 12:37 Agai yali bomai sę hauwa augwaligo suali goli, augwaligo agabolo homu dąų olama mubeo.
JOH 12:38 Magi basowe? Polobadu Godigo nosali yabo sę po ola mani profet bidi nogi Aisaia, agai asęani po usu numainogo yai. Aisaiago polobadu te po wai, “Genuai Bidi, dago wali po mena bidigo aga homu te poba mubowe? Bidi menio. Tama Genuai Bidigo aga bomo yai sę yali goli te bidi mego te homu teba me mubeo,” Aisaiago te po asęani.
JOH 12:39 Tama te we bidi augwaligo homu Jisasba mubo usu egobeo. Magi basowe? Po me Aisaiago asęani, e dao,
JOH 12:40 “‘Augwaligo homu begelegi sogo da, teda eno augwali usu ma iligi da,’ Godigo te po wai. Tialima, augwaligo gedugo sulama, homugo koneidali weyu, Godigo augwaligo gedu haluai dao. Agai augwali te homu tomoba masigi sąwai gagawai we bidi ilali,” Aisaiago te po polobadu asęani.
JOH 12:41 Aisaiago Jisasgo nosali sabo moni bomo suyu, agai moni nogi po odoyu yai dao. Tama tibaso Aisaiago agade te po asęani.
JOH 12:42 Te Juda bage augwaligo Jisasgo yali bomai sę suali goli, augwaligo agabolo homu tigidali mubeo. Tiali digi, Juda bage tobolu bidi hauwa augwaligo agabolo augwa homu muai. Tialima, augwali te Farisi bage dali wi eyu, augwaligo augwa homu Jisasbolo muani po gasa bidibolo hanilama te po wabeo. Farisi bagego augwali te bomo yai po ola mabo be tomoba asobo habu selidali weyu, augwaligo gasa bidibolo te po pusubeo.
JOH 12:43 Augwaligo te homu yai, ‘Bidi dabego dabolo “Dage dwagi yai bage dao,” obaso, te usu dao, te genuai dao. Te Godigo naga dabolo “Dage dwagi yai bidi dao,” obaso, te genuai menio, usu egobeo,’ augwaligo te homu yai.
JOH 12:44 Te Jisasgo i weyu, te po wai, “Bidigo homu enaba mubo bidi, agai enabolo naga homu mubeo. Te bidi agai homu te ena tagala palali bidibolo me muani.
JOH 12:45 Tama niwai bidigo aga gedugo ena suali bidi, agai te ena tagala palali bidi me subo.
JOH 12:46 Ena e tǫba asali, te ula tiwai dao. Magi basowe? Tigidali bidi enabolo homu muani bidi augwali te hulide bididali weyu, ena te tǫde ula tiwai asai dao.
JOH 12:47 Bidi me deligo eno po odolama, wali pisąwani bidi, aga eno po tų ela magobeo. Ena tǫba asali, te eno te tǫde we bidi po tų ela momainogo asobeo. Ena asali eno augwali ma sagasainogo asai.
JOH 12:48 Bidigo te ena tudiba munama, eno po agai sela sąbo bidi, aga po tų yabo sę elalubao. Eno wali po, te pogo nosali te tǫ dagalu silibo side te eno wali pogo te bidi dali po tų yaibao.
JOH 12:49 Magi basowe? Eno po ena digi homugo me wabeo. Te menio. Aya Godigo ena tagala palobaso, ena asai dao. Aga digi enabolo te po wai, ‘Nago te sę eyu, po weyu yao,’ te po wai.
JOH 12:50 Tama eno koneai, eno Ayago pogo te bidada peyu, bidada pabo bomo te we bidibolo mabo dao. Tama tibaso, eno wabo po tigidali agai enabolo wali po eno te po tigidali wabo dao,” Jisasgo te po wai.
JOH 13:1 Te olo bidibo si nogi Pasova pedalisiąbadi, deli sogo naga elalubadi, tama Jisasgo koneai, aga e tǫ tagalama, Aya pageba pabo sogo te pąba yagasai. Tama Jisas agai aga te tǫde bidibo we bidi tigidali sogo godolo mu eyu bidai. Megi agai te godolo mu ebo sę tagalobeo. Agai augwali godolo mu ela pidubadi te aga isibo sogoba usu nai dao.
JOH 13:2 Te dwai haubo mobo bidi Satan agai dwai homu kolesaga te bidi Judas homuba hasia muai dao, agai Jisas te boi bidigo nogoba muabo po Judasgo homude muai dao. Judas aga aya nogi Saimon, tama aga bulu nogi Keriot. Te pio hulide Jisas dali, aga wali pabo bidi dabe dali, augwaligo nai tuyu bidali.
JOH 13:3 Tama Jisasgo koneai, ‘God agai tigidali bomo enabolo mawai dao. God agai ena tǫba tagala palai, te ena God aga pageba ma paibao,’ te me aga koneai.
JOH 13:4 Tama tibaso, Jisas aga nai tubo tagalama, hodaluama, tama aga bulu badu muani ugwa te pedela muani. Tama tigi holobo ugwa selama, tabide bea sai.
JOH 13:5 Tama tilama, agai ąį moni pouba gelama, tama agai wali pabo bidi dabego sągą ąį telabo gagalama, tama aga tigi holobo ugwago sągą ma holai.
JOH 13:6 Tama te sę gagalama, tama Saimon Pita pageba asai. Pitago te po wai, “Genuai Bidi, nago ena sągą ąį telawainogowe?”
JOH 13:7 Jisasgo wei ponoyu, te po wai, “Eno ebo sę page nago megi kuna konebeo. Tialima tamadi digi te nago te sę page koneaibao,” Jisasgo te po wai.
JOH 13:8 Pitago agabolo te po wai, “Nago eno sągą ąį munu me telagobeo. Te menio,” te po wai. Tama Jisasgo te po wai, “Eno nago sągą ąį telasiąyu da, teda nage ena wali pabo bidi bidigobeo,” te po wai.
JOH 13:9 Po wei ponoyu, Pitago te po wai, “Genuai Bidi, eno sągą naga ąį telagio. Nago eno tobolu me, nogo me ąį telayao,” te po wai, Pitago.
JOH 13:10 Jisasgo te po wai, “Bidi aga ąį mu pauwai bidi te meda menio. Aga tigi ma ąį paugobeo, sągą naga ąį telaibao. Tama te tiwai dage meda meni yai bidi dabe da. Tiali goli, dage tomode te bidi me deli digi aga te meda yai bidi bidibo,” Jisasgo te po wai.
JOH 13:11 Jisas aga boi bidi nogoba muabo bidi aga polo koneai. Tama tibaso, agai te po wai, “Dage tomode te bidi me deli digi te meda yai bidi bidibo.”
JOH 13:12 Te Jisasgo augwaligo sągą ąį tedela silama, tama aga holobo ugwa ma tigide ma munama, tama aga augwali dali ma duayali. Tama agai augwali dali te po hanalu wai, “Eno dage dali megi tama yali sę sulama, tama te sę page dagego koneaniwe?
JOH 13:13 Dagego enabolo po ola mabo bidi da weyu, tama Genuai Bidi dao wabo dao. Ao, dagego te po mu po dao. Ena te bidi tama dao.
JOH 13:14 Ena te po ola mabo bidi, Genuai Bidi da. Te eno dagego sągą ąį megi tama tela yali. Tama tibaso, dagego me duga ama dabego sągą ąį telabo sę tama yao.
JOH 13:15 Tama eno dagebolo ola mobao, dage me te sę ebo sulama, wali pomainogo yai.
JOH 13:16 Tama te sę page ola mayu, eno dagebolo mu po obao, sę ebo bidi agai aga genuai bidigo nogi aiyaba elalugobeo. Tama te po sela pabo bidigo aga tagala palali bidigo nogi aiyaba elalugobeo.
JOH 13:17 Dagego te po page koneyu da, te sę yao. Tama te sę eyu da, teda dage dwagi yai homu yagameo,” Jisasgo te po wai.
JOH 13:18 Te agai po me weyu, te po wai, “Dage tigidali dali eno te po wabeo. Ena digi te ena sa muai bidi dabe, te eno konealubao. Tialima, te Godigo po bukude polobadu wali po te nai egilama, mu pedalaibao. Te polobadu asęani po te dao, ‘Ena dali nai tuali bidi te bidi agai megi ena dali boi bidi yaibao.’
JOH 13:19 Te age dolobo sę pedalisiąbadi, megi eno dagebolo te obao. Tama tibaso, nosali te sę pedalobaso da, teda dagego te mu koneaibao, te ena da Godigo tagala palai bidi dao.
JOH 13:20 Eno dagebolo mu po obao, eno sę bidi tagala palobao. Tama gasa bidigo te eno tagala palai bidide dwagi yai kolesaga ebaso da, te agai enade me te dwagi yai kolesaga ebo tiwai dao. Te kolesaga me ela pabo. Te bidigo te dwagi yai sę te ena tagala palali bidibolo me te sę ebo tiwai dao, te Godibolo,” Jisasgo te po wai.
JOH 13:21 Te Jisasgo te po olama, tama aga homu sęgę mu yai. Tama agai po hanilama pusuyu, te po wai, “Eno mu po dagebolo obao, dage tomode me deligo ena boi bidi nogoba muaibao,” Jisasgo te po wai.
JOH 13:22 Jisas agai te po obaso, te aga wali pabo bidi augwa hasi deli deligo augwa hasi tonono pai. Augwaligo konebeo, Jisas agai debolo wabowe, te homu yai.
JOH 13:23 Te augwali tomode bidi me deli te Jisasgo aga dali dwagi yai homu eyu tama mu godola pabo, te bidi aga pąde bidai.
JOH 13:24 Te bidibolo Saimon Pita agai “Nago agabolo hanalu wao, agai debolo te po waliwe?” te po wabo tiwai Pitago te bidibolo guni midigilali.
JOH 13:25 Tibaso, te bidi me Jisas tigiba kisa sagaselama, Jisas dali te po hanalu wai, “Genuai Bidi, nago mena bidide te po obawe?” wali.
JOH 13:26 Tama Jisasgo po wei ponoyu, te po wai, “Eno e tubo nai bret dagego te poude elalubo tubo nai meba selama, tama bidi me deli mawaibao. Te bidi te tama dao.” Tilama, Jisasgo bret naigo te poude elalubo nai meba selama, tama Judasbolo mawai. Te bidi Judas, aga aya nogi Saimon, aga bulu nogi Keriot dao.
JOH 13:27 Judasgo te nai sai, tama tamadi tama te dwai haubo mobo bidi nogi Satan agai Judasgo homude dwai po mu muai. Jisasgo agabolo te po wai, “Nago te sę yai wida, te nago polo yao,” Jisasgo te po Judas dali wai.
JOH 13:28 Te nai tuyu dulaluali bidi dabe augwaligo Jisasgo Judasbolo wali po page konebeo.
JOH 13:29 Judas agai augwaligo masigi bubo honoli tonalubo bidi dao. Tama tibaso, mebago te homu yai, Jisasgo Judasbolo olo bidibo side tubo nai abelabo po agabolo wabo, te homu yai. Mebago te nai meni yai bidi dabe maiabo nai po wabo, te homu yai.
JOH 13:30 Tialima, Judas Jisasgo mani nai agai sai, tama polo Judas aga te be buluba pai. Tama bulu hulia sai.
JOH 13:31 Te Judas te be buluba pai digi, tama Jisasgo te po wai, “Megi tama te Godigo Bidi Mu aga genuai bomo dali genuai nogi dali te we bidi augwaligo koneaibao. Tama Godigo Bidi Mu agai Godigo genuai bomo dali genuai nogi dali augwalibolo ola mawaibao.
JOH 13:32 Tama Godigo nogi te Godigo Bidi Mude siyu da, teda Godigo te Bidi Mu nogi ugwaba saibao, tamadi tama te sę yaibao.
JOH 13:33 Abagi dede, dwasianu sogo ena dage dali bidaibao. Tama dagego ena gegebo sę yaibao. Tama eno Juda bagebolo wali po gilama, tama megi eno dagebolo me obao, dage ena pabo buluba me pogobeo.
JOH 13:34 Eno dagebolo gesi bomo yai po mobao, dagego duga hasi dali dwagi yai homu eyu, augwali godolo mu yao. Eno dage dali dwagi yai homu eyu, godolo mu yali gilama, tilama duga hasi dali me dwagi yai homu eyu, augwali godolo mu yao.
JOH 13:35 Tama dagego duga hasi dali dwagi yai homu eyu, augwali godolo mu eyu da, teda tigidali we bidigo sulama, koneaibao, dage da ena wali pabo bidi da waibao,” Jisasgo te po aga bidi dabe dali wai.
JOH 13:36 Te Jisasgo te po augwalibolo olama, tama Saimon Pitago agabolo te po wai, “Genuai Bidi, nage mena paiwe?” Jisasgo Pitabolo po wei ponoyu, te po wai, “Ena pabo bulu nago ena wali megi pogobeo. Tialima, nosali da, nago ena wali asaibao,” wali.
JOH 13:37 Pitago agabolo te po wai, “Genuai Bidi, magi baso eno nage megi wali pogobewe? Eno nage tau somainogo ena isiyu da, te usu yaibao,” Pitago te po wai.
JOH 13:38 Jisasgo po wei ponoyu, te po wai, “Mu dawe? Ena tobade nage ena tau siyu, isabo sisi ebawe? Menio. Eno mu po nagebolo obao, be posisiąbadi, te ba kakaruk po wasiąbadi, sela sogo nago eno nogi dualaibao,” Jisasgo te po wai.
JOH 14:1 Te bidi Jisasgo aga bidi dabebolo te po me wai, “Dagego homu kolesaga midigi sigio. Dagego duga homu God dali dąų wabo dao. Dagego ena dali me duga homu dąų wao.
JOH 14:2 Eno Ayago be tomode dąį habu togwali te bidibo madigi hauwa elalubo. Te tiwai elalugi menigi sogo da, te eno dagebolo te po wagi menio. Eno dage bidabo bulu dodoligi pobao.
JOH 14:3 Tama eno dage bidabo bulu dodoligi peyu da, tama ena ma aselama, dage selama, ena dali bidigi paibao,” Jisasgo aga bidi dabebolo te po wai. “Ena bidibo bulude, dage me ena dali te bulude hodobo bidaibao,” Jisasgo te po wai.
JOH 14:4 “Tama dagego koneai dao, ena te buluba painogo ebo tų,” Jisasgo te po aga wali pabo bidi dabe dali wai.
JOH 14:5 Tomasgo Jisasbolo te po wai, “Genuai Bidi, nage mena paiwe, dago konebeo. Magi ilama, dago te tų koneaibawe?” Tomasgo te po Jisas dali wai.
JOH 14:6 Jisasgo Tomasbolo te po wai, “Ena digi ena te pabo tų dao, tama ena mu po wabo page dali, bidabo ula page dali te enade elalubo dao. Tialima bidi me deli Aya pageba gasa tųdu nogo habu sugunai tųdu me pogobeo. Pabo tų ena deli dao.
JOH 14:7 Tibaso, dagego ena kuna koneyu da, te dagego eno Aya God me koneaibao. Megi tama dagego gagalama, aga konebao, tama dagego God aga sualio,” Jisasgo te po wai.
JOH 14:8 Te bidi nogi Filip agai te po wai, “Genuai Bidi, nago Aya dabolo ola mao, tama tiyu da, te da usu yaibao,” Filipgo Jisas dali te po wai.
JOH 14:9 Jisasgo Filip dali te po wai, “Bobobage sogo ena dage dali bidali digi, tama nago ena gisiga konebewe? Bidigo ena suali da, te bidi agai Aya God me sualio. Magi baso nago ‘God dabolo ola ma,’ po waliwe?” Jisasgo te po wai.
JOH 14:10 “Ena eno Aya dali bidibo dao, te aga ena dali me bidibo dao. Filip, nago te po odama, te mu po dao homu ebo meniwe? Eno dagebolo wabo po, te ena homugo digi me wabo menio. Aya ena dali bidiyu, Aya agai sę mu te sę naga eno ebo dao.
JOH 14:11 Eno tamadi tama e po wali, ‘Ena eno Aya dali bidibo dao, te aga ena dali me bidibo dao.’ Tama dagego te po odoyu, tama duga homu te poba begi pao. Te meni eyu da, eno te yali sę dagego sulama, teba duga homu begi pao, te ena dali, eno Aya dali hodobo bidibo dao, te poba homu begi pao.
JOH 14:12 Eno mu po dagebolo obao, bidigo enaba aga homu muyu da, eno ebo sę te agai me yaibao. Tama agai genuai sę mu yaibao, tama te sęgo eno yali sę aiyaba elaluaibao. Magi basowe? Ena eno Aya God bidibo digi paibao.
JOH 14:13 Tama dagego magi nai po hanalu obaso da, Godigo aga Ogwade moni nogi somainogo, te eno dage tau saibao.
JOH 14:14 Dagego eno magi sę me deli emainogo, eno nogide gedu haluasa po weyu da, eno te dagego po odolama, te sę yaibao,” Jisasgo te po wai, aga bidi dabe dali.
JOH 14:15 Te Jisasgo te po wai, “Dagego enabolo dwagi yai homu eyu, godolo mu eyu da, teda dagego eno bomo yai po wali paibao.
JOH 14:16 Tama eno te Ayabolo hanaluama, tama agai dage tau selama, gasa tau sabo bidi dagebolo mawaibao. Tama te bidi dage dali bidada peyu, bidada paibao.
JOH 14:17 Te bidi da, te mu po naga wabo Godigo Mobo Bidi dao. E tǫde hulia sai we bidi augwaligo aga sogobeo. Magi basowe? Augwaligo aga susuąyu, tama augwaligo te Mobo Bidi aga konegobeo. Tialima, dagego aga koneai, aga dage dali bidibao, tama aga dage deli deli tomode bidaibao,” Jisasgo te po aga bidi dabe dali wai.
JOH 14:18 Jisasgo te po me wai, “Eno dage tagalama, duga naga olo bidigobeo, aya ida meni yai tiana wai bidibo tiwai egobeo. Ena dage pageba ma asaibao.
JOH 14:19 Nosali gana tǫde hulia sai we bidi augwaligo ena ma sugobeo. Tialima, dagego ena nosali ma sueibao. Dagego ena ma subo sogode ena bidibo ula elalubaso, tama dage dali me te bidibo ula elalu, bidaibao.
JOH 14:20 Tama te sogo asobo si, dagego koneaibao, ena eno Aya dali bidibo dao, tama dage ena dali bidibo dao, ena dage dali bidibo, te dagego koneaibao,” Jisasgo te po wai.
JOH 14:21 “Bidigo eno bomo yai po selama, bugagia wali pabo da, te bidi agai ena godolo mu eyu ebao. Tama niwai bidigo ena godolo ebo bidi, te eno Ayago me te bidi godolo yaibao. Tama eno me aga dali dwagi yai homu eyu, godolo eyu, ena digi te ena agabolo hania ola mawaibao,” Jisasgo te po wai.
JOH 14:22 Te Jisasgo te po obadi, tama gasa bidi Judas, aga te Keriot bulu bidi menio, te bidi agai Jisasbolo te po wai, “Genuai Bidi, magi ilama, nage dago gedude hania pedalaibawe, tiali goli, nage tǫde hulia sai we bidi gedude hania pedalogobewe?” Judasgo Jisas dali te po wai.
JOH 14:23 Jisasgo aga dali po wei ponoyu, te po wai, “Ena godolo mu ebo bidi, te bidi agai eno ola mabo po bugagia wali paibao. Tama eno Aya agai me te bidi godolo yaibao. Tama da si talua si aga dali bidagaselama, bidada peyu, bidada paibao.
JOH 14:24 Ena godolo mu isiąbo bidi, agai eno po bugagia wali pabo menio. Tama dagego te odali po, te eno po menio. Te po ena tagala palama asali bidi eno Ayago po dao,” Jisasgo te po wai.
JOH 14:25 “Ena dage dali bidiyu, eno te po dagebolo wai dao.
JOH 14:26 Tama dage tau siyu bomo maiabo bidi mu da te Godigo Mobo Bidi dao. Tama eno nogide Ayago te Mobo Bidi tagala palaibao. Te Mobo Bidi agai dage tigidali sę ola mawaibao. Tama agai dagego homu kolesaga ma hodoloyu, tama eno wali po tigidali dagego homugo ma koneaibao,” Jisasgo te po wai.
JOH 14:27 “Eno dage taga pabo sogo pąde dao. Tama dage wi idali weyu, tama eno dage homu nagame elama, dua bidimainogo eno dagebolo bomo mobao. Eno te dwagi yai homu nagame ebo kolesaga eno dagebolo mobao. Tǫde we bidigo nagame yai mabo homu kolesaga tiwai eno dagebolo mabeo. Dagego homu kolesaga polo midigi siyu, tama dage wi egio.
JOH 14:28 Dagego eno mani po odai dao, eno dage taga peyu, ena pelama, tama ena dage bidibo digi ma asaibao. Dagego ena godolo mu egi sogo da, teda ena Aya pageba ma pabode dagego dwagi yai homu egi da. Magi basowe? Aya God aga genuai bidi mu dao, tama ena aga dali usu menio.
JOH 14:29 Te sę pedalisiąbadi, megi eno dagebolo e po wai dao. Tama tibaso, nosali te sę pedalobaso da, teda dagego enade te duga homu mumainogo yaibao.
JOH 14:30 Eno dage dali po hauwa megi wagobeo. Magi basowe? E tǫde tobolu bidi megi tama asobao. Agai ena dali magi sę ebo usu egobeo.
JOH 14:31 Tialima, eno homugo tǫde we bidi augwaligo eno ena Aya godolo mu ebo, augwaligo sulama, konemainogo, tama eno Ayago wabo po gilama, eno te sę ebo dao. Tialima, dage hodaluama, da pebelainao,” Jisasgo aga wali pabo bidi dabe dali te po wai.
JOH 15:1 Te Jisasgo te po me aga wali pabo bidi dabebolo pusuyu, te po wai, “Ena da, te du walobo bono ni wain tigi mu tiwai dao. Tama eno Aya da, te bono ni wain gi page bidi dao.
JOH 15:2 Tama enade wadolali nologo, te nai walisiąwai nologo te tigidali eno Ayago togolama, sela sąbo dao. Tialima, nai walobo nologo tigidali agai te dwai sewa yali nologode elaluali yabe te pęą sąyu sela sąbo dao, tama aga nai genuai walomai hagede tiwai.
JOH 15:3 Tama eno dage meda meni yai bidi dabe ilai dao. Eno dagebolo polobadu wali pogo te dage meda meni yai bidi dabe ilai dao.
JOH 15:4 Dage ena dali wadoloyu, bidao. Ena dage dali wadoloyu bidimainao. Te bono ni nologo te ni wain tigide dąų wasiąbaso da, nai walogobeo. Tibaso, dage ena dali wadoloyu, bidisiąyu da, dage te tiwai yaibao, dage me nai me walogobeo,” Jisasgo te po aga bidi dabe dali wai.
JOH 15:5 Te Jisasgo te po me wai, “Ena da, te bono ni wain tigi dao, te dage da te bono ni waingo nologo dao. Bidi ena dali wadolama bidiyu, ena aga dali wadoloyu bidaibao. Tama te tiwai bidi agai du hauwa walaibao. Tibaso, dagego ena dali wadoloyu bidisiąyu da, teda dagego te eno dwagi yai sę me egobeo, usu egobeo.
JOH 15:6 Bidi me deli ena dali wadoloyu bidisiąyu da, te aga da te sasia pai ni nologo tiwai dao. Te augwaligo te tobage ni nologo sela sąbo dao. Tama sela sąnama, augwaligo te sasia pai nologo sisinama, tama augwaligo siaba sąnama, dabo dao.
JOH 15:7 Dage ena dali wadolama bidiyu, tama eno wali po dage dali bidiyu da, tiali dagego magi naide hanalu obaso da, tama te eno dagebolo mawaibao. Dagego homu koneani gilama, dagebolo tama pedelaibao.
JOH 15:8 Dagego sę yalide du hauwa waliyu da, te kolesagade eno Ayago genuai nogi saibao. Tama tilama, dage eno po wali pabo bidi dabe mu yaibao.
JOH 15:9 Tama eno Aya agai ena dali dwagi yai homu eyu, godolo mu ebo gilama, tama eno dage dali dwagi yai homu eyu, godolo mu yai dao. Sesemane sogo dage eno te godolo ebo kolesaga tomode bidiąo.
JOH 15:10 Tama dagego eno bomo yai po bugagia wali peyu da, teda dage eno te godolo mu ebo kolesaga tomode bidaibao. Eno ena Ayago bomo yai po bugagia wali peyu, tama agai dwagi yai homu eyu, godolo mu ebo kolesaga tomode ena bidibo dao. Tama dagego tebo gilamao.
JOH 15:11 Ena dwagi yai homu mu eyu bidibo. Tama eno homugo dage me dwagi yai homu mu eyu, te dwagi yai homu kolesaga ebo dagego homu tomode mu pągąnalu maio. Tama eno te homu eyu, dage dali te po mobo mabo po wai dao.
JOH 15:12 Eno bomo yai po e tama dao: duga hasi godolo mu eyu, bidiąo, eno dage dali godolo mu yali gilama.
JOH 15:13 Bidi me deli aga abagi dabe dali godolo mu eyu, tau somainogo, aga bidabo ula augwali tobade olo mobaso da, teda te tobage kolesagago gasa kolesaga tigidali aiyaba elalubo dao.
JOH 15:14 Tama dagego eno wali po selama, te po bugagia wali asobaso da, teda dage eno abagi dabe dao.
JOH 15:15 Genuai bidi agai aga sę ebo bidibolo te sę yao po naga wabo dao. Agai te bidibolo te sę yabo po page ola mabo menio. Tiali goli, eno Ayago ena dali wali po tigidali, te po eno dage dali wai dao. Tama tibaso, eno dage sę ebo bidi da wabo nogi naga ma wagobeo, eno dage dali abagi dabe dao wabo.
JOH 15:16 Dagego ena sai olama, sa mubeo. Eno dage sa muyu, dage ena bage dao wai dao. Tama eno dage sęba muai dao, tama dage pelama, du gilama walama, tama dagego du elalumainogo, te da eno dage sa muani page dao. Tama dagego tama du waloluyu da, eno nogide dagego magi sę me yainogo, eno Ayabolo hanalubaso da, agai dage tau siyu, te nai mawaibao,” Jisasgo te po wai, aga wali pabo bidi dabe dali.
JOH 15:17 Te Jisas agai te po me wai, “Te eno bomo yai po e dao, duga hasi dwagi yai homu eyu, godolo mu eyu, bidiąo.
JOH 15:18 Tǫde we bidi, augwaligo dage dali boi bidi yabo homu ebaso da, dagego koneao, hasia augwaligo ena dali boi bidi yabo homu yai dao.
JOH 15:19 Tama dage e tǫde bidi mu tigi sogo da, teda tǫde we bidi augwaligo dage dali dwagi yai homu eyu, dage augwaligo hani da wagi da. Tiali goli dage e tǫde bidi menio. Eno dage saiba olama, sa muyu, dage ena bage dao wai dao. Tama dagego e tǫde kolesaga tagalai dao. Tama tibaso, tǫde we bidi augwaligo dage dali boi bidi yabo homu ebo dao.
JOH 15:20 Eno tamadi wali po dagego bugagia ma koneao. Eno dagebolo te po wai, ‘Te nogi meni yai sę ebo bidi agai aga genuai bidigo nogi aiyaba elalugobeo.’ Tama te tiwai me, te tǫde we bidi augwaligo ena dali dwai sę yaligo da, teda dage eno sę ebo bage dali me augwaligo dwai sę yaibao. Tama augwaligo eno po wali pigi sogo da, te dagego po me augwaligo wali pigi dao.
JOH 15:21 Tiali goli, augwaligo God konebeo, agai ena tagala palama, ena asai. Tama tibaso, dage eno hani gagalama, te eno po wali pabo suyu, tama augwaligo dage dali me dwai sę yaibao.
JOH 15:22 Tama ena aselama, eno augwalibolo te dwai sęde po wasiąwai tigi sogo da, te augwali sęgę menigi dao. Tialima, eno augwalibolo te po waligo da, megi augwaligo sęgę dualabo tų elalubo menio.
JOH 15:23 Bidigo ena dali boi bidi yabo homu eyu da, te bidi agai eno Aya dali me boi bidi yabo homu ebao.
JOH 15:24 Haniani sę polobadu gasa bidigo esiąwani sę, te sę eno augwali tomode yai. Tialima eno te sę me esiąyu da, te augwali sęgę me sigi menio. Tialima, megi augwaligo te eno yali sę sulama digi, tama augwaligo ena dali, eno Aya da si talua si dali boi bidi yabo homu ebo dao.
JOH 15:25 Tama polobadu God agai po obaso, te bidi mego te po bukude asęani, augwaligo bomo yai po bukude. Tama augwaligo megi ebo boi bidi homu ebo sęde, augwaligo te po wali peyu, te po usu nuyu nai gilama walobao. Te polobadu asęani po e dao, ‘Augwaligo olo dali ena dali boi bidi yabo homu yai dao,’ te po wali,” Jisasgo te po wai.
JOH 15:26 Te Jisasgo po me weyu, te po wai, “Te tau mabo Mobo Bidi eno Aya dali bidibo. Tama eno aga dage bidibo digi tagala palaibao. Aga mu po naga wabo Mobo Bidi dao. Tama aga aselama, agai te we bidibolo enade po ola mawaibao.
JOH 15:27 Tama dagego me enade te we bidibolo po pusao. Magi basowe? Polobadu dage ena dali bidibadi, eno te sę gagalama ebo dagego suai, tama megi me eno te sę ela asela dąį yagasobo dagego subao,” Jisasgo aga bidi dabe dali te po wai.
JOH 16:1 “Te dagego ena konealubo bomo yai homu kolesaga me tagalidali weyu, tama eno te po dagebolo wai dao,” Jisas aga bidi dabebolo te po wai.
JOH 16:2 “Augwaligo dage te Juda dabego bomo yai po ola mabo bede mu sela sąwaibao, te dagede habu selebao. Tama te sę naga egobeo. Nosali sogo pedalobode, tama te dage ela mubo bage augwaligo homugo Godigo sę augwaligo bugagia ebao, te homu yaibao. Tama te homu eyu, tama dage dali tiwai sę yaibao.
JOH 16:3 Tama augwaligo Aya konesiąyu, tama augwaligo ena me konesiąyu ebaso, te sę dage dali yaibao.
JOH 16:4 Tialima dagebolo eno te sę pedalabo po megi wai dao. Magi basowe? Nosali te sę pedalobo si, tama dagego eno te sęde polobadu wali po dagego homugo ma koneagameo,” Jisasgo te po wai. “Te polobadu ena dage dali bidibaso, tama eno te po dage dali wabeo,” Jisasgo te po aga sę bidi dabe dali wai.
JOH 16:5 “Tialima megi ena te ena tagala palai bidi pageba ma pobao. Tama dage tomode bidi me deligo enabolo me hanalu, ‘Nage mena pobawe?’ wabeo.
JOH 16:6 Tialima, dage dali eno te tamadi wali po obaso, tama dagego homu sęgę mu te ebao.
JOH 16:7 Tiali goli, eno mu po dage dali obao. Dage tau somainogo, dage eno taga peyu, ena pobao. Ena pisąyu da, te Tau Mabo Bidi dageba asogobeo. Tialima, ena peyu da, te bidi eno dage bidibo digi tagala palaibao.
JOH 16:8 Tama aga asobo si, tama agai te tǫde we bidi augwaligo te dwai sęde geda muani sę augwalibolo hanilagasaibao. Tama agai augwaligo dwai sę ebo page ola mawaibao. Te doloba pai kolesaga page me, te po tų ebo page me, te Mobo Bidi agai augwalibolo ola mawaibao.
JOH 16:9 Te tǫde we bidi augwaligo dwai sę page e dao, te augwaligo enaba augwa homu tigidali mubeo.
JOH 16:10 Te Mobo Bidi agai te tǫde we bidibolo ena te doloba pai bidi ena dao te po ola mawaibao. Ena eno Aya pageba pobao. Tama ena teba pobaso, augwaligo koneaibao, ena te doloba pai bidi mu dao, te waibao. Tama dagego ena ma sugobeo.
JOH 16:11 Te Godigo po tų ebo page me, te Mobo Bidi agai augwali e tama ola mawaibao. Godigo e tǫde dwai we bidigo tuni bidi dali po tųde te bidi aiyaba elaluali po te Mobo Bidigo augwalibolo hanilagasaibao,” Jisasgo te po aga bidi dabe dali wai.
JOH 16:12 “Te eno po hauwa dagebolo maiabo me elalubo. Tialima, te po dagego megi sogobeo, te sęgę yai po mu dao.
JOH 16:13 Tiali goli, te mu po naga wabo Mobo Bidi aga asobo si, tama agai dagebolo tigidali mu po bugagia ola mawaibao. Agai wabo po aga digi homude sabo po me wagobeo. Agai eno wai po aga odolama tama te po naga te agai dagebolo pusaibao, tama agai dagebolo nosali pedalabo sę te po dage dali waibao.
JOH 16:14 Agai eno po selama, dage dali pusaibao. Agai te kolesaga ebode eno nogi genuai pedalumainogo yaibao.
JOH 16:15 Ayago tigidali nai te eno nai dao. Tama tibaso, eno te po tamadi tama wai dao, te Mobo Bidi agai eno po selama, dage dali te pusaibao,” Jisasgo te po aga wali bilali bage dali wai.
JOH 16:16 “Te nosali ganama dagego ena ma osogo sugobeo. Tama bidama, nosali ma dwasianu sogo dagego ena ma sueibao,” Jisasgo te po wai.
JOH 16:17 Jisas aga bidi augwa hasi po weyu, te po wai, “Agai te wali po magi po page da dali waliagawe? Agai te po wai, ‘Nosali ganama dagego ena ma sugobeo,’ te po wai. ‘Tama nosali ma dwasianu sogo dagego ena ma sueibao,’ tama agai te po wai. Te po me wai, ‘Ena Aya pageba pobao,’ agai te po da dali wai.
JOH 16:18 Te ‘dwasianu sogo’ wali, te wali po page mena tama dawe? Te po page dago konebeo,” augwaligo augwa hasi te po wai.
JOH 16:19 Augwaligo Jisas aga dali hanalu wainogo ebo agai koneai. Tama agai augwalibolo te po wai, “Dagego eno wali pode tama duga hasi te po page hanalu obawe? Eno te po wai, ‘Nosali ganama dagego ena sugobeo, tama nosali ma dwasianu sogo te dagego ena ma sueibao,’ te pode dagego hanalu obawe?
JOH 16:20 Eno mu po dage dali obao, dage genuai gela weyu, tama homu dene eyu, gela mu waibao. Tiali goli, enade konesiąwai we bidi augwali da dwagi yai homu yaibao. Tama dagego homu sęgę yaibao. Tiali goli dagego homu sęgę yali ma begelama, dwagi yai homu mu yaibao.
JOH 16:21 Te tiwai dao. Wego wai tega pabo sogo asobo si, te dene ebo sogo pedalobo koneyu, te we aga homu sęgę ebo dao. Tiali goli, agai nosali te wai ame nenama, tama agai te dene homu yali ma agai konebeo. Tama te wai ame nenama, tama bidibaso, aga idago dwagi yai homu ebo dao.
JOH 16:22 Tama dage dali me te tiwai dao. Tama tiyu, megi dage homu sęgę ebao. Tiali goli, eno dage ma sueibao, tama dage dwagi yai homu ma yaibao. Tama niwai bidi mego dagego te dwagi yai homu ebo me sela sągobeo,” Jisasgo te po aga bidi dabe dali wai.
JOH 16:23 “Te sogo dagego ena dali magi nai me hanalugobeo. Eno dage dali mu po obao, dagego gedu haluasa po weyu, Ayago magi nai me dagebolo mao eno nogide weyu da, teda Aya agai dagebolo mawaibao,” Jisasgo te po wai.
JOH 16:24 “Polobadu dagego eno nogide magi nai sainogo hanalu obeo. Tama dagego homu dwagi yai mu emainogo, tama megi hanalu wao, tama te nai God agai dagebolo mawaibao,” Jisas aga sę bage dali te po wai.
JOH 16:25 Te Jisasgo te po wai, “Te eno te po begelama, dage dali wai dao. Nosali eno po begelama, dage dali ma wagobeo. Te meni. Eno po hanilama, Ayade po dage dali waibao.
JOH 16:26 Tama tebo sogo dagego eno nogide aga hanalu waibao. Tama eno dagebolo te po wabeo, ena digi Ayago dage tau sabo po eno hanalu waibao. Te menio. Duga digi te Ayabolo gedu haluasa po dolo wao.
JOH 16:27 Magi basowe? Aya aga digi dage godolo mu ebo dao. Tama agai dage magi baso godolo mu ebo dawe? Woo, dagego ena mu godolo eyu, tama dagego bomo yai homugo koneama, te ena Aya dali bidama asali, te homu dagego yai. Tama dagego te homu ebaso, Aya agai dage godolo mu eyu, dagego hanalu wabo po wei ponaibao.
JOH 16:28 Polobadu ena Aya dali bidai, tama eno aga taga soyu, ena e tǫba dulai. Tama megi ma eno e tǫ taga peyu, Aya God bidibo digi painogo ebao,” Jisasgo te po aga bidi dabe dali wai.
JOH 16:29 Jisas aga wali pabo bidi augwaligo te po wai, “E, megi nago po te begelama po wabeo, tama nago po hania obao.
JOH 16:30 Dago nagebolo hanalu wabo po te dago hanalusiąbadi, te po nago polo koneai. Megi da dago koneanio, te nago tigidali nai koneai. Tama tibaso, nage God dali bidilama asai dao po, te pode dago te mu po dao te homu ebao,” Jisas aga wali pabo bidi augwaligo te po wai.
JOH 16:31 Jisasgo te bidi augwali dali po wei ponoyu, te po wai, “Megi da, dagego duga homu enaba mu muaniwe?
JOH 16:32 Edao. Te sogo pąde pedalainogo ebao, te polo pedalalio, tama augwaligo dage tigidali deli deli pobeasa bilibaso, tama duga buluba tedela paibao. Tama dagego ena taga peyu, enaduba deli digi bidaibao. Tialima, enaduba me bidigobeo. Aya God ena dali bidaibao.
JOH 16:33 Eno homugo dage ena dali wadoloyu, tama dwagi yai homu nagame elama bidimainogo eyu, eno e po tamadi tama dage dali wai dao. Dage tǫde bidibadi te tǫde we bidi augwaligo dwai sę dage dali yaibao. Tialima, dagego homu bomo elama, bidao. Eno e tǫde kolesaga aiyaba elaluai dao,” Jisasgo te po aga sę bidi dabe dali wai.
JOH 17:1 Te bidi Jisasgo te po aga bidi dabebolo olama, tama agai dagaluba tonaluyu, te po wai, “Aya, te bodolu muani sogo pedalalio. Tama eno nagebolo te genuai nogi momainogo, tama nago enabolo te genuai nogi mao,” Jisasgo aga Aya God dali te po wai.
JOH 17:2 “Tama nago ena sa muyu, moni bomo mayu yai dao. Ena te tigidali tǫde we bidigo genuai bidi dao weyu, tama nago te bomo enabolo mawai dao. Magi basowe? Te bidada pabo bomo te we bidi nago enabolo mani we bidi augwali eno te bidada pabo bomo mawaibao, te homu eyu, nago enabolo te nogi yai sę mawai dao. Tama te bidada pabo bomo menama, tama augwali bidada peyu, bidada paibao, gamonaibao.
JOH 17:3 Tama te bidada pabo bomo page e dao. Augwaligo nage koneyu, nage God deli mu dao. Augwaligo Jisas Krais koneyu, nago aga tagala palobaso asai bidi dao. Augwaligo te si mu koneyu da, teda te bidada pabo page te dao.
JOH 17:4 Eno nago genuai nogi dali, bomo dali, te si te tǫde we bidi augwalibolo ola mawai. Nago enabolo yao olama mani sę, te sę eno tigidali mu ela silai dao. Tama tiyu, eno nago nogi dali bomo dali te we bidi augwalibolo ola mawai.
JOH 17:5 Polobadu, te tǫ pedalisiąbadi digi, tama ena nage dali bidai dao. Tama ena nage dali bidiyu, bomo yai ula elaluai dao. Aya, ena nage dali bidiyu, tama nago megi enabolo te bomo yai ula digi ma mao,” Jisasgo te po God dali wai.
JOH 17:6 “Tǫde bidibo we bidi meba nago sa muyu, tama nago augwali dią sali. Tama nago augwali dią selama, tama nago augwali enabolo mani. Te augwali nago bidi te elaluama, tama nago enabolo mani. Tama augwalibolo eno nago nogi haninai dao. Tama augwaligo nago po bugagia wali pai dao.
JOH 17:7 Megi da augwaligo konebo, tigidali nai nago enabolo mani nai te nage pagedu te nai asai.
JOH 17:8 Nago enabolo wali po, te po tigidali eno augwalibolo pusai dao. Tama augwaligo te po sali. Te po selama, tama augwaligo mu koneai, polobadu ena nage dali bidilama, asai dao. Tama nago ena tagala palama, ena asai dao, te pode augwaligo homugo te po wali, ‘Te po mu po da,’ olama, tama augwaligo konealubo po te pode dąų wabo dao,” Jisasgo te po wai.
JOH 17:9 “Te nago augwali tau somainogo, eno nagebolo e po obao. Eno nago te tǫde we bidi augwali tau somainogo me wabeo. Eno e po nagebolo obao, nago ena mani bidi dabe augwali tau somainogo, augwali nago bidi hani bidibaso, eno te po nage dali obao.
JOH 17:10 Tama eno bidi tigidali augwali te nago bidi me dao. Tama nago bidi tigidali te eno bidi dabe dao. Tama augwaligo eno nogi ugwaba sai dao.
JOH 17:11 Tama megi da ena tǫde ma bidigobeo. Tialima, augwali da tǫde me bideibao. Tama ena da nage bidibo madigi asobao. Aya, nage magi dwai sę me isiąwai bidi, nago augwali tonaluao. Nago enabolo nago bomo mawai dao. Tama te bomogo nago augwali tonaluao, augwali me deli homu naga elama, bidimainogo yao. Dadi si deli homu elama bidibo gilama, te tiwai augwali me te emainao.
JOH 17:12 Tama ena augwali dali bidibo sogo da, nago nogi elalubo bomogo eno augwali bugagia tonaluali, nago te enabolo mani bomo. Eno augwali bugagia tonaluyu, tama augwali me hagabeo. Hagawali te bidi deli digi hagawai dao. Te nago polobadu bukude asęyu wali, te po nai gilama walomainogo, te dolabo bidi deli naga tamadi hagawalio,” wali.
JOH 17:13 “Megi ena nage pageba asobao. Tama eno te po e tǫde nage dali obao, te eno dwagi yai homu eno bidi dabe augwalide pągąnalumainogo augwali dwagi yai homu mu emainogo ebao.
JOH 17:14 Nago po eno augwalibolo mawai dao. Tama tǫde we bidigo augwali dali boi bidi gagawai dao. Ena da e tǫde bidi menio. Te tiwai augwali me e tǫde bidi menio. Tama tibaso, tǫde we bidigo augwali dali boi bidi gagawai dao.
JOH 17:15 Tama eno e po nage dali weyu, eno nage augwali te tǫde bidibo tagalomainogo hanalu wabeo. Te meni. Nago augwali bugagia tonalumainogo eno te po nagebolo obao, tama te dwai bidi Satan agai augwali dolidali weyu, eno e po nagebolo obao.
JOH 17:16 Ena da e tǫde bidi menio. Te tiwai augwali me e tǫde bidi menio.
JOH 17:17 Tama tibaso, naga digi nago mu po augwalibolo ola mao, augwali gasagi yai tedali bidi dabe bidimainogo, magi sę isiąwai bidi dabe bidimainogo yao.
JOH 17:18 Tama polobadu nago ena tǫba tagala palama, tama ena augwali tǫde we bidi tomode bidai. Te tama tiwai eno e bidi dabe me tagala palama, augwali te tǫde we bidi tomode bidigi pali.
JOH 17:19 Tama eno augwali tobade tau siyu, ena digi ena bidabo ula tagalama, nago po wali peyu, ena isaibao. Tama po mu wabogo augwali nago bidi hani mu bidimainao,” Jisasgo te po wai.
JOH 17:20 “Te nago augwali naga tau somainogo eno nage dali e po wabeo. Menio. Nosali augwaligo gasa we bidibolo eno po ola mayu, tama te po odobo we bidi augwaligo augwa homu enaba muaibao. Tama te tibo we bidi augwali tobade me tau siyu, tama eno megi nage dali e po obao,
JOH 17:21 augwali tigidali deli homu naga elama bidimainogo ebao. Aya, nage ena dali wadoloyu, tama ena nage dali wadoloyu bidibo tiwai, eno homugo augwali da si dali homu deli elama, wadoloyu bidimaio. Tama te tiwai elama, tama tǫde we bidi augwaligo te nago ena e tǫba tagala palali po odama, tama augwaligo te mu po dao olama, koneagameo. Tama te sę pedalomainogo, eno e po nage dali megi obao.
JOH 17:22 Nago enabolo te bomo mani, te bomo eno augwalibolo manio, augwali deli homu elama, bidimainogo, dadi si deli homu elama bidibo tiwai, augwali me te deli homu elama bidimainogo eno te bomo augwalibolo mani.
JOH 17:23 Ena e bidi dabe augwali dali bidiyu, tama nage ena dali bidiyu yai, tama tiwai eno homugo augwali me deli homu elama, bidimainao. Tama tiyu, te tǫde we bidi augwaligo koneaibao, nago ena tagala palama, ena asai. Te me augwaligo koneaibao, te nago ena godolo mu ebogia, nago e bidi dabe me godolo mu ebo dao,” Jisasgo te po wai.
JOH 17:24 “Aya, eno homugo nago ena mani bidi dabe augwali ena bidibo bulude ena dali da hodobo nosali bidaio, augwaligo eno bomo yai ula dali bomo dali sumainogo yaibao. Polobadu, te tǫ pedalisiąbadi, te sogo nago ena godolo mu eyu, tama nago te bomo yai ula dali te bomo dali enabolo mawai dao.
JOH 17:25 Aya, nage doloba pai bidi mu dao. Tama tǫde we bidi augwaligo nage konebeo. Tiali goli, eno da nage koneai dao. Tama e bidi dabe augwaligo konebao, te nago ena tagala palama, ena asai dao.
JOH 17:26 Tama nago nogi eno augwalibolo haninai dao. Tama tiyu, te sę nosali me eno mu ela paibao. Magi basowe? Te nago ena godolo mu ebo homu tiwai augwa hasi te godolo mu ebo homu emainogo eno nago nogi augwalibolo haninai dao. Tama ena me augwali dali bidimainogo, eno nago nogi augwalibolo hanilaibao,” Jisasgo te po Godigo aga bidi dabe tau somainogo wai.
JOH 18:1 Te Jisasgo te po olama, tama Jisas aga bidi dabe dali augwaligo te bulu tagalama, tama peyu, Kidron ąį odogo nogogi pai. Te ni oliv sili, te ąį u badu elaluai. Tama Jisas aga wali pabo bidi dabe dali augwali te oliv ni sili bulu tomoba pai.
JOH 18:2 Hauwa sogo Jisas aga wali pabo bidi dabe dali augwali te oliv ni siliba sisinama bidiyu yai, polobadu. Tama tibaso, Judas, Jisas te boi bidi nogoba muabo bidi, agai me te ni sili koneai.
JOH 18:3 Tama tibaso, Judasgo ami bidi hani dali, tama meba pris tuni bidigo enesigi bidi dabe dali, te Farisi bagego enesigi bidi badi, tama selama, augwali te ni sili giba dolo asai. Tama augwaligo lam dali sole dali tolasa asiyu, tama augwaligo hwįabo nai dabe dali sela asai.
JOH 18:4 Tama Jisasgo agade pedalabo sę tigidali koneyu, tama aga te ni sili gi buluba pelama, tama augwali tiąba pai. Tama agai augwali dali te po wai, “Dagego de gegagasai dawe?”
JOH 18:5 Te augwaligo Jisas aga dali po wei ponoyu, te po wai, “Dago te Nasaret bulu bidi Jisas gegagasai dao,” te po wai. Jisasgo augwali dali te po wai, “Te bidi ena tama dao.” Tama Judas, Jisas te boi bidi nogoba muabo bidi me augwali dali dolaluai.
JOH 18:6 Jisasgo augwali dali “Te bidi ena tama da” obaso, tama augwali meba gegemani siyu, tudi bulu peyu elama tama tǫba degasa pai.
JOH 18:7 Tama Jisas agai augwali dali ma hanalu wai, “Dagego de gegagasai dawe?” Tama augwaligo te po wai, “Te Nasaret bidi Jisas gegebao,” te po wai.
JOH 18:8 Jisasgo po wei ponoyu, te po wai, “Eno dage dali wai dao, te bidi ena tama dao. Dagego ena naga gegeba wida, e bidi dabe olo pomainao,” Jisasgo te po wai.
JOH 18:9 Tamadi agai te po God dali wai, “Nago ena mani bidi dabe augwali eno me tagalobeo,” wali. Tama Jisas agai te tamadi wali po usu numainogo, agai ‘Augwali olo pomainao’ po megi wali.
JOH 18:10 Te Saimon Pita agai moni kago hwą munaluai, te kago hwą bulubo bede. Tama agai te kago hwą kega siyu, tama agai bidi mego dolo nogo badu olo te kago hwągo togwa sąwai. Tama te bidi nogi Malkus, aga te pris tuni bidigo sę ebo bidi da.
JOH 18:11 Tialima Jisasgo Pita dali te po wai, “Nago te kago hwą aga bulubo beba ma bulama muao. Eno Aya agai enabolo bodolu mani, te ena tigide dene saibao. Te augwaligo ena dali yabo sę nago te bodolu didigili painogo ebawe?” Jisasgo Pita dali te po wai.
JOH 18:12 Te ami bidi hani dali, te augwa polalubo bidi dali, tama te Juda dabego enesigi bidi dabe dali, augwaligo Jisas nogo tulama, tama augwaligo bonogo agai nogo si tudi badu munama, kęai.
JOH 18:13 Tama kęnama, tama augwaligo Jisas te bidi nogi Anas bidibo digi hasia teba sela pai. Te bidi Anas te bidi Kaiafas aga wąį dao. Tama te kibu bede te bidi Kaiafas agai te pris tuni bidi bidai.
JOH 18:14 Tama te bidi Kaiafas agai te Juda bage dali te po mobo mabo po polobadu wai dao. Agai te po wai dao, “Dago hani tigidali dolidali weyu, bidi me deli isilama, tama aga isibogo te we bidi tau siyu da, te usu yaibao,” te po wali bidi Kaiafas aga dao. Tama augwaligo Jisas te Kaiafas aga wąį Anas te bidi bidibo digiba sela pai.
JOH 18:15 Te augwaligo Jisas sela pobaso, te Saimon Pita dali, te Jisasgo sę bidi me dali augwali si Jisas wali pai. Tama te pris tuni bidi agai te gasa bidi konebaso, te gasa bidi te obo tomoba Jisas dali peyu, te be mesaloba sabolali, te pris hani tuni bidigo bede.
JOH 18:16 Tialima Pita te tų sesege pąde dolaluai, bulu badu. Tama te gasa bidi, Jisas wali pabo bidi, aga te pris tuni bidigo abagi yaibaso, te bidi aga pelama, agai te tų tonalubo webolo po olama, tama agai Pita tomoba odasa asai.
JOH 18:17 Te tų tonalubo wego Pita dali te po wai, “Nage me te bidi Jisas wali pabo bidi dawe?” te wego Pitabolo hanaluyu, te po wai. Tama Pitago te po wai, “Woo, ena te bidi wali pabo bidi menio,” wai.
JOH 18:18 Te bede sę ebo bage dali, te Jisas odasa asali enesigi bidi dabe dali, augwaligo te be mesalo tomode sia nogai. Te kedau ebaso, tama augwali dolaluyu, te siade kedau tuyu, tigi posolo iliyu yai. Tama Pita me augwali dali dolaluyu, sia kedau tuai.
JOH 18:19 Te be tomode, te pris tuni bidi agai Jisas aga wali pabo bidi dabede po hanalu wai. Tama agai Jisasgo te we bidi dali ola mani pode me hanalu wai.
JOH 18:20 Jisasgo aga dali po wei ponoyu, tama po wai, “Eno we bidibolo mani te po eno bulu ulade hania wai dao. Eno te we bidibolo po ola mabo sę eyu, tama te bomo yai po ola mabo be tomode te sę eno yali, ma te Moni Lotu Be tempel, tede me eno te sę yai dao. Te be dabede te Juda bage sisinibo bulude eno augwalibolo eno po hania ola mawai dao. Tama eno po geme dualama bulu tomode me wabeo.
JOH 18:21 Tama tibaso, magi baso nago ena dali hanalu obawe? Nago eno te po odali we bidi dali hanalu wao. Eno wali po augwaligo koneai dao,” Jisasgo te po te pris tuni bidi dali wai.
JOH 18:22 Tama Jisas agai te po tama obadi yaide, enesigi bidi me deli Jisas pąde dolaluali bidi, te enesigi bidi agai Jisas nogo sawaligo Jisas nabo gede eleyu, te po wai, “Nago te tobage po te pris tuni bidi dali wei ponoyu obawe? Te dwali,” te po wai.
JOH 18:23 Jisasgo te enesigi bidi dali po wei ponoyu, te po wai, “Eno dwai po wagi sogo da, nago te dwai po hania wagi da. Tialima, eno po dolo naga obadi da, teda magi baso nago ena elaliwe?” Jisasgo te enesigi bidi dali te po wai.
JOH 18:24 Tama Jisas te aga nogo si bonogo kęani tama elalubadi yaide, tama te bidi Anasgo Jisas aga te pris tuni bidi Kaiafas bidibo digi tagala palai.
JOH 18:25 Te Saimon Pita dolaluyu, sia kedau tudai. Tama augwaligo aga dali te po wai, “Nage me te bidi wali pabo bidi dawe?” Tama Pita agai hogwa siyu, “Ena menio,” te po wai.
JOH 18:26 Tama te pris hani tuni bidigo sę ebo bidi me deli tede bidai, te Pitago hwągo olo togwali bidi aga deli hani bidi dao. Tama te bidi agai te po wai, “Eno homu eno nage suali, te nage te bidi Jisas dali te ni sili gide bidibo eno suali. Te mu dawe?” te po hanalu wai.
JOH 18:27 Tama Pitago po ma weyu, hogwa siyu, te po wai, “Ena menio.” Tama Pitago te po obadi yaide, megi tama ba kakaruk po wai.
JOH 18:28 Te be tama posobadi, tama augwaligo Jisas ma selama, te bidi Kaiafas agai be tagalama, tama augwaligo Jisas te gavman tuni bidigo beba sela pai. Tama te beba sabolama, tama te Juda bage augwali digi te gavman tuni bidigo be tomoba pabeo. Te gavman bidi te Juda hani isąwai bidi bidibaso, te Juda dabe aga be tomoba pabeo. Te habu selali bolidali weyu, tama augwali te be bulu badu bidali. Augwaligo te homu yai, te habu selali bolisiąbadi, dago te Pasova nai tueibao, te homu yai.
JOH 18:29 Tama tibaso, te Rom gavman tuni bidi nogi Pailat aga te be tomode bidilama, bulu badu augwali bidibo digi asai. Agai augwali dali te po wai, “Dagego te bidi magi pode tų ela mawainogo ebawe?” te gavman tuni bidigo augwali dali te po wai.
JOH 18:30 Tama augwaligo aga dali po wei ponoyu, te po wai, “Te bidi dwai kolesaga isąwai bidi tigi sogo da, te dago nage bidibo digi sela asigi menio,” augwali Juda bidigo te gavman tuni bidi dali te po wai.
JOH 18:31 Tama Pailatgo augwalibolo te po wai, “Duga digi Jisas aga selama, tama duga bomo yai po usu gilama, tama duga digi aga po tų ela mao,” te Pailatgo Juda bidi dabe dali te po wai. Tama Juda bagego Pailatbolo te po wai, “Woo, dage Rom gavman bidi dabego te bomo yai po dabolo mawai, te po wai, ‘Dage Juda bagego po tų eyu da, te dwai sę yali bidi dagego elegio. Da Rom dabego naga te dwai sę yali bidi ela mubo sę ebo dao,’ dagego da Juda bagebolo te po wai dao. Tama tibaso, dago e bidi nage pageba sisali, te aga isimainogo yali,” augwaligo te po wai.
JOH 18:32 Polobadu Jisasgo aga isabo sogode po me weyu, te po wai, “Juda hani isąwai bagego ena nide walama, tama ena isaibao.” Tama te po nai gilama walomainogo, megi te Juda bage augwaligo Jisas te Pailat pageba odasa aselama, tama te po wai.
JOH 18:33 Te bidi Pailat aga te gavman be tomoba ma pai. Tama agai Jisas i weyu, asao wai, tama agabolo hanalu wai, “Nage te Juda we bidigo tuni bidi dawe?” Jisas dali Pailatgo te po wai.
JOH 18:34 Jisasgo po wei ponoyu, te po wai, “Naga digi te po homugo koneama obawe? Ma gasa bidigo nagebolo te po weyu, ena dali te po wao te po waliwe?” Jisasgo te po wai.
JOH 18:35 Pailatgo Jisasgo po wei ponoyu te wai, “Ena da Juda bidi dawe? Mu menio. Naga hani dali, te pris tuni bidi dabe dali, augwaligo nage ena bidibo digi sela asai dao. Tama nago magi sę yaliwe?” te Pailatgo Jisas dali te po wai.
JOH 18:36 Te Jisasgo po wei ponoyu, te po wai, “Eno te we bidi tonalubo sę te e tǫde yabo menio. Tama eno te we bidi tonalubo sę te e tǫde elalugi sogo da, teda eno sę bidi augwaligo ena megi tau somainogo hwįgi dao. Tama tiyu, ena niwai bidi mego agai ena te Juda dabego nogoba mugi menio. Tiali goli, eno te we bidi tonalubo sę te e tǫde menio,” Jisasgo te po wai.
JOH 18:37 Tama tibaso, Pailatgo Jisas dali te po wai, “Nage te tuni bidi me deli dawe?” Jisasgo agai po wei ponoyu, te po wai, “Naga digi te po weyu, ena tuni bidi dao, te po wali. Te mu po page mu hania pedalomainogo, te ena te idago ena ame neyu, te ena e tǫba asai dao. Tama tibaso, te mu po naga wali pabo we bidi augwaligo eno po odobo dao,” Jisasgo te gavman tuni bidi dali te po wai.
JOH 18:38 Pailatgo Jisas dali te po hanalu wai, “Mu po te magide dawe?” Te Pailatgo Jisas dali te po olama, tama aga te Juda bage bidibo digi buluba ma pelama, tama agai augwali dali te po wai, “Eno Jisas agade magi dwai sę yali sęgę me subeo.
JOH 18:39 Tialima dagego kolesaga tama telalubo dao, te dagebolo eno te bo disąwai nai tuabo side, te si nogi Pasova, te side te kalabus bidi me deli eno dageba olo tagala palobo dao. Tama tiyu, eno dagebolo te Juda bidi dabego tuni bidi dageba tagala palagawe?” te Pailatgo Juda bidi dabe dali te po hanalu wai.
JOH 18:40 Tama te bidi dabe augwaligo i hae me po dagą me genuai mu olama, te po wai, “Te bidi Jisas menio, nago te bidi Barabas daba olo tagala palao,” te po olama i wai. Te bidi Barabas agai da te bidi eleyu mena nai anoma elama sabo bidi bidai.
JOH 19:1 Te gavman tuni bidi Pailat agai po olama, tama te ami bidi dabe augwaligo Jisas selama, tama aga tudide elali, te kibu waligo nigai dila pai bįgo.
JOH 19:2 Tama augwaligo aga dali gisugu omainogo, augwaligo sesani yai bono selama, tobolu madi nigilama, tama Jisasgo tobolude muai. Tama augwaligo te mama yai nami ugwa selama, aga tigide muai.
JOH 19:3 Tama augwaligo Jisas dali tibo posobo po weyu, “Siade dao, Juda we bidigo tuni bidi da” olama, tama augwaligo nogo sawaligo aga nabo gede elali. Augwaligo aga dolobo sę yainogo, te tiwai te ami bidi hauwago aga elidu geai.
JOH 19:4 Te Pailat te Juda bage bidibo digi buluba ma aselama, te po wai, “Dagego suao, eno Jisas aga buluba odasa asobao, tama dagego konemainogo, eno agade magi dwai sę yali sęgę me subeo,” Pailatgo te po wai.
JOH 19:5 Tama Jisas buluba asai, augwaligo te sesani yai bonogo nigali madi aga tobolude munaluai. Tama te mama yai nami ugwa me agai tigide me elaluai. Tama Pailatgo augwali dali te po wai, “Te olo bidi dagego suao,” te po wai.
JOH 19:6 Te tama tialima, te pris tobolu bidi dabe dali, te enesigi bidi dali augwaligo Jisas sulama, tama augwaligo po dagą weyu, te po wai, “Te bidi ni pedaide elao, te bidi ni pedaide elao,” te Juda bage augwaligo te po wai. Tama Pailatgo augwali dali te po wai, “Duga digi aga selama, ni pedaide elao,” te po wai. “Eno agade magi sęgę me subeo,” te Pailatgo Juda bage dali te po wai.
JOH 19:7 Juda bage augwaligo te gavman tuni bidi Pailat agai po wei ponoyu, te po wai, “Dago bomo yai po me deli tama telalubo. Niwai bidi agai ‘Ena da Godigo Ogwa dao’ obaso da, te bidi ela muao. Te bomo yai po agai bolobaso, aga isao,” augwaligo te po wai.
JOH 19:8 Te Pailat agai te po odolama, tama aga wi genuai mu yai.
JOH 19:9 Tama tibaso aga te gavman moni be tomoba ma pai. Tama agai Jisasbolo te po wai, “Nage mena badu bidi nage asai dawe?” Tiali goli, Jisas agai te Pailatgo po wei ponobeo.
JOH 19:10 Tialima, Pailatgo Jisas dali te po wai, “Magi baso nago ena dali po wabewe? Eno nage olo tagala palabo bomo elalubao. Ma, eno nage ni pedaide elabo bomo me, te eno elalubao. Tama nago te konesiąyu ebawe?” te Pailatgo Jisas dali te po wai.
JOH 19:11 Te Jisasgo agai po wei ponoyu, te po wai, “Tialima, God dagalu ugwadu bidibo bidi agai bomo nagebolo magi menigi sogo da, te nago bomogo ena aiyaba elalugi menio. Tama tibaso, ena nago nogoba muani bidi, te bidi agai sęgę genuai mu eyu, tama nago sęgę aiyaba elaluaibao,” Jisasgo te po wai.
JOH 19:12 Te Pailat agai Jisasgo te po odolama, tama agai Jisas olo tagala palabo tų gegai yai. Tiali goli te Juda bage augwaligo bomo elama po dagą weyu, te po wai, “Niwai bidi aga digi ‘Ena tuni bidi da’ weyu da, te bidi agai te Rom gavman tuni bidi Sisar dali boi bidi dao. Tama e bidi Jisas agai te tobage po wai dao. Tama tibaso, nago te bidi Jisas olo tagala palu da, te nage te Rom gavman tuni bidi Sisargo abagi menio, boi bidi tiwai bidaibao,” Juda bagego Pailat dali te po wai.
JOH 19:13 Pailatgo te po odolama, tama agai te gavman moni be tomoba ma pelama, tama Jisas buluba sela asai. Tama Jisas buluba sela aselama, tama Pailat aga po tų odainogo duabo digi duawai, te bulu augwaligo nogi masigigo bidabo sai nigai digi dao wai. Tama te Hibru pogo te nogi tama wai, Gabata, te nogi tama wai.
JOH 19:14 Te tebo sogo te bo disąwai nai tuabo si nogi Pasova te nai dodolobo side dao. Tama belo nai tubo te giliga tomo ebode tamao. Tama Pailatgo Juda bagebolo te po wai, “Duga tuni bidi suiyąo,” wai.
JOH 19:15 Te augwaligo po dagą weyu, te po wai, “Te bidi sela sąyao, te bidi sela sąyao,” tama po wai, “Te bidi ni pedaide elao,” te po wai. Pailat tuni bidigo augwali Juda bage dali te po wai, “Dagego homugo eno duga tuni bidi ni pedaide elao, te homu ebawe?” Te pris hani tobolu bidi dabe augwaligo po wei ponoyu, te po wai, “Dago tuni bidi me menio, te dago tuni bidi te Sisar deli tama dao,” te bidi dabego tama po wai.
JOH 19:16 Tama tialima, Pailatgo te Jisas augwali Juda bidigo nogoba munama, tama augwaligo Jisas ni pedaide elamainogo yali. Tama tiwai, tama te ami bidi dabe te Jisas augwa nogoba sai. Tama selama, tama Jisas aga digi te aga elabo ni pedai tolai, tama aga te Jerusalem hanu tagalama, tǫ me nogi Tobolu Dili te tǫba pai. Tama te Hibru pogo te bulu du nogi Golgota wai.
JOH 19:18 Te bulu dude augwaligo Jisas ni pedaide elama daganai. Tama augwaligo gasa bidi me si me Jisas dali elai. Tama me bidi Jisas agai dolo nogo badu eleyu, me bidi agai pobase nogo badu eleyu yai. Tama Jisas aga tomode elai.
JOH 19:19 Tama gavman tuni bidi Pailat agai po me deli asęnama, tama augwaligo te Jisas elali ni pedaide muai. Te asęani pode te po wai, ‘Jisas Nasaret bidi te Juda we bidigo tuni bidi dao,’ te po te ni pedaide asęna muai.
JOH 19:20 Augwaligo te Jisas ni pedaide elama daganani, te Jerusalem hanu pąde tamao. Tama tibaso, Juda bidi hauwa augwaligo te asęani po nedai te Hibru pogo. Tama Pailatgo te po Hibru pogo asęyu, te Rom pogo asęyu, te Grik pogo asęyu yai, te Jisasgo ni pedaide tama po asęai.
JOH 19:21 Tama te pris tobolu bidi dabe augwaligo Pailatbolo te po wai, “Nago te po tama asęgio, ‘Juda bidigo tuni bidi dao,’ te po wagio. Nago tama po asęąo, ‘Te bidi Jisas agai te po wai, “Ena te Juda we bidigo tuni bidi dao,” ’ te po agai wai dao,” augwaligo te po wai.
JOH 19:22 Pailatgo augwaligo po wei ponoyu, te po wai, “Eno asęani po te eno polo asęai dao. Te po tama elalumainao,” te po wai.
JOH 19:23 Te ami bidi dabe augwaligo Jisas ni pedaide elama daganai. Tama te sę elama, tama augwaligo Jisas aga ugwa dabe sai. Aga ugwa dabe selama, tama ami bidi me si me si augwa hasi te ugwa dabe dobola sai, tama te ami bidi deli deligo Jisas agai te ugwa me deli sai. Tialima agai holobo ugwa hobolisiąwani bobobage mu nigai ugwa dao.
JOH 19:24 Tama tibaso, te ami bidi dabe augwa hasi po miyu te po wai, “Dago te ugwa pedegobeo. Dago satu gagali elama, tama te ugwa sabo bidi nigilaibao.” Augwaligo tama tiwai tama tiyu, te bukude polobadu wali po usu nanio. Te bukude te po wai, “Augwaligo eno ugwa dabe dobola sai. Tama augwaligo eno holobo ugwa sabo bidi nigilainogo, te satu gagali yai,” te bukude te po polobadu asęani. Tama te po usu nanio. Te ami bidi dabe augwaligo tama tiwai.
JOH 19:25 Te Jisasgo ni pedai pąde Jisas aga ida tede dolaluai. Te Jisas aga ida aga ama dede me tede dolaluai. Te gasa we me, aga nogi Maria, aga bidi nogi Klopas, te we me Jisas aga ida dali dolaluai. Tama gasa we te Makdala bulu we nogi Maria, aga tede dolaluali. Te we dabe me si me si augwali Jisas elali ni pedai pąde dolaluyu bidali.
JOH 19:26 Tama Jisas aga ida dali, te sę bidi me agai godola pali bidi me, augwali si te pąde dolaluai. Tama Jisasgo augwali si tede dolalubo sulama, tama aga ida dali te po wai, “Te nage dali dolalubo bidi te naga ogwa dao,” Jisasgo te po aga ida dali wai.
JOH 19:27 Tama Jisas agai te sę bidibolo te po wai, “Te naga ida dao.” Tama te sogo te bidigo Maria aga beba odasa pelama, tama Maria aga dali bidai.
JOH 19:28 Te silama, Jisas agai koneai, eno sę tigidali megi tama siliyu te ebao, te homu yai. Tialima, Godigo polobadu asęani po me usu numainogo, agai te po wai, “Ena ąį nogonego sobao,” te po wai.
JOH 19:29 Ąį tubo nai me deli tede munaluai, tede gasagi yai ąį pągąnaluai. Tama augwaligo te wawi yai bola tiwai nai selama, tama te ugwa te ąįde munama, tama augwaligo te ąį sali ugwa awi dilide kęnama, tama augwaligo Jisas agai te ąį tumainogo te ugwaba selama, mawai.
JOH 19:30 Jisas agai te ąį tulama, tama agai te po wai, “Eno yabo sę tigidali te silali,” Jisasgo te po wai. Agai tama po olama, tama aga mage basi gulu, aga noma bidi tagala palama, tama Jisas aga isai.
JOH 19:31 Te Jisas ni pedaide elali sogo augwaligo te Pasova bo disąwai nai sisi ebo side dao wai. Te do me te Sabat yabo sogo dao, tama te Pasova olo bidibo si te do gagalaibao, te genuai sogo mu dao. Tama tibaso, Juda bage augwaligo homugo te Sabatde te isai bidigo tigi te ni pedaide me daganalubo hagelabo wai. Tama augwaligo Pailat tuni bidibolo te po olama, tama augwaligo te bidi dabe sągą dili togolama, tama megi augwali polo isimainogo yao. Tama isai digi, augwaligo tigi te ni pedaide sao, te po wai.
JOH 19:32 Tama tibaso, te ami bidi dabe pelama, augwaligo te Jisas dali elali bidi si sągą dili togogi pai.
JOH 19:33 Te bidi si sągą dili togolama, tama augwali Jisas munalubo digi aselama suai, tama augwaligo Jisas aga isai digi suai. Tama tibaso, augwaligo Jisas aga sągą dili togobeo.
JOH 19:34 Tialima ami bidi me deligo Jisas punali badu sesemonego enai. Tama polo kaneme dali ąį dali geasa dulai, tǫba.
JOH 19:35 (Te tebo eno suali, eno po polo wai dao, tama tiyu, dagego duga homu Jisas agaba mumainogo yai. Tama eno te wali po te mu po tama dao. Tama ena digi koneyu, tama eno mu po wabo dao.)
JOH 19:36 Te sę tama pedalai, tama Godigo bukude wali po usu numainogo yai. Te bukude asęani po tama wai, “Augwaligo agai dili me deli togogobeo,” te po asęani.
JOH 19:37 Tama gasa po me te Godigo bukude asęyu te po wai, “Tama augwaligo te enani bidi teba gedugo tonaluaibao,” te po me asęani.
JOH 19:38 Te augwaligo Jisasgo tigide yali sę silama, tama gasa bidi me nogi Josep, Arimatea bulu bidi, agai te gavman tuni bidi Pailatbolo olama, “Jisas tigi eno saio,” te po wai. Te bidi Josep aga Jisas wali pabo bidi dao. Tialima aga te Juda tuni bidi dabe dali wi eyu, tama agai ‘Ena da Jisas wali pabo bidi da,’ po hania wabe. Tama Pailatgo “Usu dao, nago sa,” te po wai. Tama tilama Josep pelama, Jisas tigi sigi pai.
JOH 19:39 Te bidi me, agai nogi Nikodemus, te bidi polobadu hasia Jisas bidibo digi hulide asali bidi, aga me asai. Agai te ni kaneme si taluama sesai, te dwagi yai denami ebo nai dao. Tama te nai dila pai nai mu dao, abelabo mone genuai mu dao.
JOH 19:40 Tama te bidi si augwali sigo Jisas tigi selama, tama augwali sigo te denami yai nai aga tigiba muyu, te pedai ugwago aga tigi bebe peyu yai. Te Juda bidi dabego isai bidi pubulainogo ebo tiwai gilama yai.
JOH 19:41 Te ami bidi dabe augwaligo Jisas te elali digi tede gi me deli elaluai. Tama te gide isai bidi musiąwai gų page ola be elalualio.
JOH 19:42 Do te Sabat sogo dao. Megi da te Juda we bidi augwaligo Pasova bo disąwai bret nai sisi ebo side dao. Te ola be pąde elalubaso, te bidi sigo Jisas tigi teba muai.
JOH 20:1 Te Jisas gų pagede munama, si sogo bidilama, tama moni Sarere dao wabo side, tama te Makdala bulu we nogi Maria, te we aga gų pageba kigamu asai. Tama te bulu hulialubadi ganao. Tama agai suali, te ola be tų haluali moni masigi te halualubo agai subeo.
JOH 20:2 Tama sulama, tama te we aga Saimon Pita dali, te gasa bidi te Jisas agai godolo yali te bidi dali, te bidi si bidibo digi te we udawai. Tama Mariago augwali si dali po bomonama weyu, te po wai, “Augwaligo dago Genuai Bidi te ola bede sela pai yalio. Tama dago konebeo, augwaligo aga menaba mugi paliwe naga subeo,” te we Mariago te Jisas wali pabo bidi si dali te po wai.
JOH 20:3 Tama te wego te po obaso, Pita dali te gasa bidi me dali, tama augwali si te bidali be tagalama, tama augwaligo te hanu tagalama, Jisas muani digi ola beba pabo gagalali.
JOH 20:4 Tama augwali si hodobo udawai. Tialima gasa bidigo Pita geanama, tama aga polasa pai, tama ola beba polo polasa sabolai.
JOH 20:5 Tama te polasa pali bidi aga basi gulama, bomo elama suali, te pedai ugwa nami dabe naga munalubo suali. Tialima aga te ola be gų page tomoba pabeo.
JOH 20:6 Saimon Pita aga nosali tudi badu asai, tama aga te gų page ola be tomoba polasa pai. Tomoba pelama, tama aga bomo elama suali, te pedai ugwa nami dabe naga munalubo Pita agai suai.
JOH 20:7 Tama gasa ugwa me munalubo agai suai, te Jisas tobolude bebe pali ugwa dao. Te ugwa gasa ugwa dabe dali munalubeo. Tama te ugwa bebe pelama, agaduba tali munaluai.
JOH 20:8 Tama te gasa bidi aga polo Pita geanama polasa asali, te bidi aga me te gų page ola be tomoba pai. Tama agai te tiwai elalubo sulama, tama te bidi agai te Jisas ma hodaloali tede te sogo konealuali.
JOH 20:9 (Tama te sogo augwaligo Godigo polobadu asęani po page konesiąbadi. God agai po te bukude asęyu, te po wai dao, “Aga gų pagede ma hodaluao,” te po wai. Te sogo augwaligo te po page konebeo.)
JOH 20:10 Tama te bidi augwali sigo te sę tigidali sulama, tama augwali si augwa si beba ma pai.
JOH 20:11 Te we Maria te gų pageba ma sabolali, te bidi si augwali te ola be tomode bidibadi. Tama augwali si augwa si beba ma pelama, tama Maria te gų page ola be bulu badu gana dolaluyu, tama Maria aga gela udai. Aga gela udu digi, tama aga basi gulama, tama agai Jisas te muani ola be tomoba tonai.
JOH 20:12 Tama Maria agai Godigo sę ebo ensel mobo bidi si tedela bobobage ugwa muai bidi si suai, te Jisas muani ola be tomode dulalubo suai. Tama te ensel mobo bidi me deli te Jisas tobolu muani digi dulaluyu, me te sągą muani digi dulaluyu yai, te Maria agai suai.
JOH 20:13 Tama te ensel mobo bidi sigo Maria dali te po wai, “Te we, nage magi baso gela obawe?” te po wai. Tama Mariago augwali si dali te po wai, “Augwaligo eno Genuai Bidi selama, tama augwaligo menaba muaniwe, te eno konebeo,” Mariago te ensel mobo bidi si dali te po wai.
JOH 20:14 Maria agai te po weyu, tama agai begelama suai, tama agai Jisas dolalubo suai. Tialima Mariago koneyu, te Jisas tama dao, te homu agai ebeo.
JOH 20:15 Jisasgo Maria agabolo te po wai, “Magi baso nage gela obawe? Nago de gegeyu ebawe?” Maria agai te homu yai, te bidi aga e gi tonalubo bidigo agai te po aga dali wabowe, agai te homu yai. Tama agai te bidibolo te po wai, “Genuai bidi, nago te isali bidi tigi sela pali wida, te nago enabolo aga muani digi ola mao, tama eno aga sela paio,” wali.
JOH 20:16 Jisasgo agabolo te po wai, “Mariao.” Tama Maria aga ma begelama, Jisas dali agai Hibru pogo weyu, “Rabonai,” te po wai. Te po page e tama wai, “Po ola mabo bidio,” te po wai.
JOH 20:17 Jisasgo Maria dali te po wai, “Nago ena diągio. Ena eno Aya God bidibo digi dagaluba me pabeo. Tama tibaso, nago ena dąų ola sigio. Tialima, nage eno ama dabe bidibo digi pelama, augwali dali te po tama wagibao, ‘Ena eno Aya bidibo madigi dagaluba holobao, tama te aga dagego Aya me dao. Tama eno ena God bidibo digi pobao, tama te God dagego God me dao,’ te po eno ama dabebolo pusigi pao,” Jisasgo Maria dali te po wai.
JOH 20:18 Tama tibaso, te Makdala bulu we nogi Maria aga pai, tama agai te Jisas wali pabo bidi augwali dali po weyu, te po wai, “Eno Genuai Bidi Jisas sualio,” te po wai. Tama agai te Jisasgo agabolo mani te po augwali dali wai.
JOH 20:19 Te Jisas wali pabo bidi dabe augwali Juda bidi dabe wi eyu, tama augwali bidibo te be tų dąų olama, augwali te be tomode bidai. Te sogo moni Sarere dao wabo sogo giliga iba dega sigi pai. Tama Jisas augwali bidibo digi tomoba dolaluagasai, tama augwalibolo te po wai, “Dagego homu dwagi yai elama, tama dage bugagia bidao,” Jisasgo augwali dali te po wai.
JOH 20:20 Jisas agai te po olama, tama agai nogo dali punali badu dali augwalibolo waselai. Tama agai bidi augwaligo Genuai Bidi sulama, tama augwaligo homu dwagi yai mu yai.
JOH 20:21 Tama Jisasgo augwalibolo te po ma wai, “Dage dwagi yai homu elama, bidao,” te po wai. “Tama Ayago ena tagala palobaso, ena asai dao. Tama tialigia, eno me dage tagala palobao,” Jisasgo te po aga wali bilali bidi dabe dali wai.
JOH 20:22 Jisas agai te po olama, tama aga mobo augwalibolo ponai, tama augwalibolo te po wai, “Dagego Godigo Dwagi Yai Mobo Bidi te sao,” Jisasgo te po wai.
JOH 20:23 “Dagego gasa bidi dabe mego dwai sę yali sęgę sela sąyu da, tama te dwai sęgo sęgę Godigo silaibao. Dagego gasa bidi dabego dwai sę yali sęgę dąų weyu da, teda te sęgę me elaluaibao, te dwai sę sęgę Godigo sela sągobeo,” Jisasgo te po wai.
JOH 20:24 Jisas aga te aga wali pabo bidi augwali bidibo digi pedalai, te sogo aga bidi me deli augwali dali bidisiąwai, te bidi Tomas dao, tama agai gasa nogi me Didimus wai, te nogi page aga idago wai si deli sogo ame nai. Te baso te nogi Didimus wai.
JOH 20:25 Tama Jisas aga wali pabo bidi mebago Tomas agabolo te po wai, “Dago naga Genuai Bidi dago suai dao,” te po Tomas dali wai. Tialima Tomasgo augwalibolo te po wai, “Eno aga nogode nel enani digi susiąyu da, tama eno nogo dani te nel enani digi tomoba musiąyu da, te eno nogo aga punali badu palama susiąyu da, teda te eno te poba ena homu mu mugobeo,” Tomasgo te po wai, augwali dali.
JOH 20:26 Te nosali a naga olama me badu nogo sela sogo bidai, tama Jisas aga wali pali bidi augwali te be tomode ma bidai, tama Tomas me augwali dali bidai. Augwaligo tigidali tų mu dąų ola silai digi, tama Jisas augwali tomoba dolagasai. Tama agai te po wai, “Dagego homu dua bugagia bidao.”
JOH 20:27 Tama agai Tomasbolo te po wai, “Nago nogo dani eba da muao. Tama nago eno nogo me suao. Tama nago nogo eno punali badu palama suao. Nago homu si ebo tagalao. Enade nago homu deli yao, te tiwai bidao,” Jisasgo te po Tomas dali wai.
JOH 20:28 Tomasgo aga dali po wei ponoyu te po wai, “Nage eno Genuai Bidi dao, tama nage eno God nage dao,” Tomasgo te po Jisas dali wai.
JOH 20:29 Tama Jisasgo Tomas aga dali te po wai, “Nago ena subaso naga, tama nago homu enaba mubawe? Niwai bidi augwaligo ena susiąma, augwaligo homu enabolo mubo we bidi, te augwali dwagi yai homu mu yaibao,” Jisasgo Tomas dali te po wai.
JOH 20:30 Te Jisas agai bomo yai sę hauwa mu aga wali pabo bidi augwaligo gedude agai te sę yai. Tama eno te Jisas agai yali sę po tigidali eno e bukude asębeo, meba naga asęani.
JOH 20:31 Te bidi Jisas da, te Godigo sa muyu nosali asaibao wali bidi Krais dao, aga da te Godigo Ogwa dao. Tama dagego te po mu po dao homu emainogo, eno Jisasgo yali bomo yai sę po meba e bukude asęani. Tama dagego Jisas da te Krais dao, te aga Godigo Ogwa dao, dagego te homu eyu, aga dali wadoloyu, mu bidada pabo ula dagego somainogo eyu, eno agai yali sę po asęani.
JOH 21:1 Te nosali Jisas aga bidi dabego gedude ma pedalai, augwali te sigi ąį nogi Taiberias pąde bidibadi te aga ma pedalai, augwaligo aga suai. Aga augwali pageba te tiwai pedalai.
JOH 21:2 Te bidi dabe nogi e tama wai, Saimon Pita, te me Tomas te agai gasa nogi me Didimus, te Nataniel aga bulu nogi Kana, te Galili tǫ pedai bulu, tama te Sebedigo ogwa si dali, te Jisas wali pabo bidi me si me, augwali hodobo bidai, te sigi ąį nogi Taiberias pąde.
JOH 21:3 Tama Saimon Pitago augwalibolo te po wai, “Ena sųgų gegegibu pobao,” wai. Tama augwaligo Saimon Pita agabolo te po wai, “Da me nage dali paio,” te po wai. Tama augwali pelama, te gebaba holai. Augwaligo te sogo hulide te sę yali goli, sųgų me sabeo.
JOH 21:4 Tama te giliga pedalainogo ebode, tama Jisas te sigi ąį sanide aga dolalubo augwaligo suai. Tiali goli augwaligo aga koneyu, tama aga Jisas dao, te homu augwaligo ebeo.
JOH 21:5 Tama Jisasgo augwalibolo hanalubo po olama i weyu, te po wai, “Abagi dede, dagego sųgų meba saliwe?” te po wai. Tama augwaligo aga dali po wei ponoyu, te po wai, “Menio,” te po wai.
JOH 21:6 Augwaligo te po olama, tama agai augwalibolo te po wai, “Dagego te agane wa te dagego u badu te dolo nogo badu te sųgų sabo wa te ąįba sąyao,” te po wai, “tama dagego sųgų meba saibao,” te po wai. Tama tibaso, augwaligo te wa agai te wali te dolo te wa aiyaba sąwai. Tama sąnama, augwaligo sųgų hauwa mu sai, tama augwaligo te wa ugwaba ma kegabo usu ebeo.
JOH 21:7 Te bidi me Jisas agai godolo ebo bidi, agai Pitabolo te po wai, “Te aga dago Genuai Bidi dao,” te po wai. Tama Saimon Pita aga ugwa dabe pebeda munama, te sę yai. Tama agai te po odai, “Te bidi aga dago Genuai Bidi dao” wabo, te po odobaso, Pita aga ugwa bea selama, tama aga te ąįba samonai.
JOH 21:8 Tama te Jisas wali pabo bidi meba augwali te gebadu asai, te ąį saniba. Tama augwaligo te sųgų dabe te wa dali kegasa asai. Augwali digibulu gana bidibeo, te augwali bidali usu sabo te pąde gana tamao, tama te sigi ąį saniba asai.
JOH 21:9 Tama augwali te gebadu aselama, te ąį sani badu sabolama, tama augwaligo suali, sia tede dabo suai, tama te siade sųgų ulalubo suai, tama te tubo nai bret me tede munalubo augwaligo suai.
JOH 21:10 Jisasgo augwalibolo te po wai, “Megi dagego te sali sųgų, te dagego meba eba sesao,” te po wai.
JOH 21:11 Te Saimon Pita te gebaba holama, tama te sųgų wa agai ąį saniba kegasa asai. Genuai sųgų hauwa mu te wade pągąnaluai, tama te 153 te tama sųgų te sųgų sabo wade bidai. Te sųgų hauwa mu 153 tamao digi, te wa bono togobeo.
JOH 21:12 Tama Jisasgo augwalibolo te po wai, “Dage nai tuagasao,” te po wai. Tama Jisas wali pabo bidi me deligo aga dali me hanaluyu, “Nage de dawe?” te po aga dali wabeo. Augwaligo koneai, te aga dago Genuai Bidi dao, te homu yai.
JOH 21:13 Tama Jisas aselama, te bret selama, augwalibolo mawai. Tama te siade ulai sųgų me tama naga tiwai.
JOH 21:14 Jisas aga gų pagede ma hodaluama, tama si sogo Jerusalem hanude aga wali pabo bidi augwaligo gedude aga pedalai dao. Tama megi me te sela sogo aga augwaligo gedude ma pedalai, te Taiberias sigi ąį sanide.
JOH 21:15 Te augwali nai tula silama, tama Jisasgo Saimon Pitabolo po weyu, te po wai, “Saimon, nage Jongo ogwa dao, tama nago ena godolo ebo kolesagago e bidi dabe augwaligo ena godolo ebo kolesaga aiyaba elalubawe?” Tama Pitago agabolo te po wai, “Ao, Genuai Bidi, nago koneai dao, nage eno abagi dao.” Jisasgo agabolo te po wai, “Nago enaba homu tamadi muani we bidi augwali eno po nago augwalibolo ola mao,” Jisasgo te po wai.
JOH 21:16 Tama bidama gana, tama Jisasgo Pita aga dali si sogo te po ma wai, “Saimon, nage Jongo ogwa dao, tama nago ena godolo mu ebawe?” Pitago aga dali te po wai, “Ao, Genuai Bidi, nago koneai dao, nage eno abagi dao.” Jisasgo agabolo te po wai, “Nago enabolo homu muani we bidi augwali nago tau siyu, tonaluyu yao,” Jisasgo te po wai.
JOH 21:17 Tama bidama gana, tama sela sogo agai Pitabolo te po ma hanalu wai, “Saimon, nage Jongo ogwa dao, ena da nago abagi dawe?” Tama agai Pita dali sela sogo “Ena da nago abagi dawe?” obaso, Pita aga homu sęgę yai. Tama Pita agai Jisasbolo te po wai, “Genuai Bidi, nago tigidali nai koneai dao. Tama nago koneai dao, nage eno abagi dao,” Pitago te po wai. Tama Jisasgo agabolo te po wai, “Nago enabolo homu muani we bidi augwali eno po nago augwalibolo ola mao.
JOH 21:18 Eno mu po nage dali obao, polobadu nage gesi bidi bidiyu, tama naga digi kugulu gudulama, tama naga pabo mena mena bulu te naga homugo digi te buluba pai dao. Tialima nosali nage monu dabe ebo sogo, tama tebo sogo da te nago nogo ugwaba siyu, tama gasa bidigo nago nogo tulama, nago homugo pisąyabo homu isąwani te buluba nage odasa paibao,” Jisasgo te po wai.
JOH 21:19 Jisasgo te po olama wai, nosali augwaligo Pita ela muaibao. Tama Pita isiyu, tama aga te isibogo tama agai Godigo nogi ugwaba saibao. Jisasgo te po olama wai. Jisas agai te po olama, tama agai Pita dali po weyu te po wai, “Nage ena wali asao.”
JOH 21:20 Te augwali si pabo gagalama, pobadi, tama Pitago begela suali, te Jisasgo godolo ebo bidi, aga augwali si wali asobo suali. Te bidi aga polobadu gana augwali nai tuali sogo aga te Jisas hagawiade tialuyu, tama agai te po hanalu wai, “Genuai Bidi, niwai bidi agai nage boi bidi nogoba muaibawe?” te po wali. Te bidi Jisas dali Pita si wali asobo Pitago megi suali.
JOH 21:21 Pita agai te bidi sulama, tama agai Jisasbolo te po wai, “Genuai Bidi, te bidi dali magi sę yaibawe?”
JOH 21:22 Jisasgo Pita dali te po wai, “Eno homugo ena ma asobo si te bidi aga me bidibadi asomai da wida, te nago sę dawe? Nage ena wali asao,” Jisasgo Pita dali te po wai.
JOH 21:23 Tama Jisasgo te bidide te wali po tama te aga wali pabo bidi mebago te po odolama, usu ela silai. Te pode geda muyu, augwaligo te homu yai, “Jisasgo te po wai, te bidi isigobeo.” Tiali goli Jisas agai te bidi dali nage isilamo dao, te po aga dali wabeo. Jisas agai te po wai, “Eno homugo ena ma asobo si te bidi aga me bidibadi asomai da wida, te nago sę dawe?” te po wai.
JOH 21:24 Tama te Jisas wali pabo bidi agai digi Jisasgo wali po odoyu, tama Jisasgo yali sę suyu yai. Tama te bidi ena dao, tama eno te po dali, te sę dali yali po pusulama, tama eno te po e bukude asęai. Tama dago koneao, agai te wali po mu tama dao.
JOH 21:25 Te Jisas agai sę hauwa mu yai. Meba naga eno e bukude asęai, meba po eno asębe. Tama e po asębo bidi eno te po tigidali deli deli asęyu da, tama te asębo buku hauwa mu yaibao, tama eno homugo tigidali bulu te buku dabe mubo usu egobeo.
ACT 1:1 Eno abagi Tiofilus, te eno hasia bukude eno e po asęani, te Jisasgo yali sę dabe tigidali dali, te agai po ola mawai po tigidali dali, te si asęani.
ACT 1:2 Jisasgo te tiwai yai, te aga sę gagalobo sogo pelama, Godigo aga dagaluba odasa pali sogoba dąį egi pai. Tama Godigo aga dagaluba odasa pesiąwai madi, Jisas agai sa muani tagala palai bidi dabebolo po pusa mawai. Tama agai Godigo Dwagi Yai Mobogo bomogo te po augwalibolo pusa mawai.
ACT 1:3 Tama Jisas isilama, ma hodaluama, te bidi sese si sogo aga bidi dabebolo agai tigi waselai, hauwa sogo. Tama agai augwaligo gedude sę dabe hauwa yali, te augwaligo aga gesi ma bidibo mu konemainu yai. Tama augwali homu si ebe. Augwaligo aga gedugo suali. Agai Godigo we bidi tonalubo sę po augwalibolo pusa mani.
ACT 1:4 Tama augwali deliba sisinagaselama, Jisasgo augwalibolo te po bomonama wai, “Polobadu Jon agai we bidi baptais mani. Tialima, tamadi tama dage Jerusalem moni hanude bidibadi, Godigo agai Tedali Dwagi Yai Mobo Bidi dageba mawaibao, te baptais sabo tiwai yaibao. Tama tibaso, dage te Jerusalem hanu taga pelamuo. Meo. Eno Ayago dagebolo mawaiba wali nai, te Godigo Dwagi Yai Mobo, aga asobo tonaluiąo, eno dagebolo polobadu pusa mani nai po,” Jisasgo te po wali.
ACT 1:6 Te Jisasgo tagala palabo bidi dabe augwali Jisas dali hodobo sisinagaselama, augwaligo aga hanalu, te po wali, “Genuai Bidi, polobadu da Israel hani bidi dabe dena tǫde bidibo we bidi dabe tonaluali. Te polobadu yali sę yaligia nago tamadi ma gagalaibawe?”
ACT 1:7 Tama Jisasgo augwalibolo te po wei ponai, “Menio. Te eno Aya deli naga konealubo, te sę ebo sogo me, te agai bodolu mabo. Agai homugo. Dagego nai menio, tama tibaso dagego Ayago bodolu mani sogo si dabe konegobeo.
ACT 1:8 Me ma, e dagego koneagameo, te Godigo Mobo Bidi dageba asobo si, teda Godigo dage bomo ilaibao. Tama duga enade po te we bidi dabebolo pusa maiyąo, te Jerusalem be nanide me, te Judia tǫ pedai tigidalide me, te Samaria tǫ pedai tigidalide me, te moni digibulu tǫ pedai dabede me te po pusa mao,” te po wali.
ACT 1:9 Tama Jisasgo te po olama, Godigo aga te dagaluba odasa sai, te augwaligo tonalubadi. Tama aga hodaluama, pǫgo aga halua sagasali, te augwaligo aga ma subeo.
ACT 1:10 Te Jisas holobaso, augwaligo bomo yaigo tonalubadi, tama polo te nala nisi ugwa gudai bidi si augwali dali hodobo dolaluagasai.
ACT 1:11 Tama augwali sigo te po hanalu wai, “Dage Galili tǫ bidi dabe, dage te ugwaba dagaluba magi baso tonalu dolalubawe? U bidi Jisas, te Godigo dagaluba odasa holali bidi, te bidi ma asaibao, te aga dagaluba pabo yaligia ma asiyu me tiaibao, te dagego tonalubadi megi pabo yaligia tiwai yaibao, ma asobo sogode,” te po wali. Tama te po olama, tega si ma pali.
ACT 1:12 Te Jisasgo tagala palai bidi dabe augwali te Oliv Ni Sili bulu dudu geasa pelama, Jerusalem be naniba ma pali, te bulu digibulu meni, pąde bidai, te kilomita deli naga.
ACT 1:13 Tama augwali Jerusalem tomoba pelama, beba sabolama, augwa osogo bidigi pabo be habuba ugwaba holali. Tama te bidi dabego nogi e dao, te Pita, Jon, Jems, Andru, te Filip me, Tomas me, te Bartolomyu me, Matyu me, te gasa me Jems, aga aya nogi Alfius, te Saimon, te independes sainu ebo hani bidi me, te gasa Judas me, aga aya nogi Jems.
ACT 1:14 Tama augwali hauwa sogo deliba sisinagasali, Godibolo po omainu yali. Tama te Jisas wali pai we dabe me, Jisas aga ida me, Jisas aga ama dede me, te bidi dabe dali hodobo deliba sisinagasali, Godibolo po omainu yali.
ACT 1:15 Te nosali si sela sogo silibaso, tama te sogo te Jisasde homu dąų wai we bidi dabe deliba sisinagasali. Bidi sese me sela me sela 120 tama bidi sisinagasali. Tama Pita doligulama, te we bidibolo po me wai.
ACT 1:16 Pitago te po wai, “Ama dede, Godigo bukude polobadu asęani po mu dią holai dao. Polobadu Godigo Mobogo te Devitgo pedauwalidu po omainu ilai tiwai, te bidi Judasde. E Judasgo te Jisas tuabo sunumi te bidi dabebolo ola mawai bidi da.
ACT 1:17 Jisasgo aga polobadu sa muani, aga da dali sę emainu yali. Tama tibaso, Judas da dali bilai dao,” te po wai.
ACT 1:18 (Polobadu Judas agai Jisasde dwai sę elama, masigi dabe sai dao. Tama te masigigo tǫ abelama, tede tulaluyu, aga tabi peda peyu, aga haliga dabe buluba dią soyu, tama isai dao.
ACT 1:19 Tama te Jerusalemde bidibo we bidi tigidali augwaligo te sę po odali. Odolama, tama te tǫ augwaligo pogo nogi poai, te nogi Akeldama. Te nogi page e dao, “Kaneme tǫ dao.”)
ACT 1:20 Te Pitago po ma wai, “Te lotu tęąbi buku asęani bidigo te bukude te po wai, ‘Aga be olo elalumainao, tede bidi me bidamuo.’ E po me te bukude asęani, ‘Me bidigo aga sę sao,’ te po wali,” Pitago te po wali, Judasde.
ACT 1:21 Te Pitago po ma wai, “Te bukude asęani po elalubaso, bidi me deli daba wadolama, da dali hodobo bidimainao. Te bidigo te we bidi dabebolo te po waibao, ‘Te Genuai Bidi Jisas isilama, ma hodaluali, ma bidibao,’ te po waibao. Tama polobadu Jongo we bidi baptais mabo sogode da dali hodobo bilai bidi me dąį ilinao. Te tama aselama, Jisas dagaluba peyu dąį yali. Te Jisas dali da hodobo biliyu bilali bidi, te bidi dago dąį ilaibao, te Judas hasegelainu, te Judasgo polobadu yali sę tiwai yaibao,” te po wai.
ACT 1:23 Te po obaso, te Jisasde homu dąų wabo we bidi augwaligo bidi sigo nogi muai. Me bidi nogi Josep, agai nogi me si elaluali, me nogi Barsabas, me nogi Jastus. Tama gasa me bidigo nogi Matias.
ACT 1:24 Tama augwaligo Jisasbolo te gedu haluasa po wai, “Genuai Bidi, nago tigidali bidi dabego homu kolesaga konebo dao. Tama tibaso, Genuai Bidi, te bidi si me deli nago dabolo dąį ilama,
ACT 1:25 da ola mao, te Judasgo yali sę somainu, nago tagala pali bidigo sę. Te sę Judasgo tagalama, aga digi dwai sę yali. Tialigo da, aga genuai sęgę mu salio,” te po wai.
ACT 1:26 Tama olama, augwaligo Matias dali Jastus dali sigo nogi yai nai dabe kapde munama, tama begelali, te Matiasgo nogi yai nai hasia asali. Tama tibaso, Matias nogo si olama, sągą deli bidi dabeba wadolai.
ACT 2:1 Te nosali te Pentikos sogo asobo si, te Jisas homu dąų wabo we bidi tigidali te deli beba sisinagasali.
ACT 2:2 Tama polo augwaligo te u wabo dagaludu odali, te moni bomo yai wali asobo u wabo tiwai. Tama te bede bidali we bidi tigidali augwaligo te u wabo odali.
ACT 2:3 Tama augwaligo te nai dabe suali, te dwasianu sia bogoli dabe tiwai, bidigo hamena gagawai dabe augwaligo suali. Tama te nai dabe pebeda pelama, bidi deli deliba pelama, dią yani.
ACT 2:4 Tama Godigo Dwagi Yai Mobogo augwali sali, te tigidali agada weyu, tama augwali tigidaligo gasagi yai gasagi yai konesiąwai po dabe wabo gagalali, te me bidigo me po weyu, tama me bidigo gasa po me weyu yali. Tama Godigo Mobogo augwali te po dabe omainu te sę ilali, augwaligo pedauwalidu.
ACT 2:5 Tede, te Jerusalem be nanide, te tigidali tǫ pedaidu asai Israel hani bidi dabe bidai, te augwali Godibolo lotu po wabo bidi dabe.
ACT 2:6 Tama augwaligo te u wabo odama, we bidi hauwa kisu deliba sisinagasali, te beba. Tama te Jisasgo tagala palai bidi dabe augwa tigidaligo te bulu po augwaligo konesiąwai goli ola bidiyu yali. Tama, tibaso, te tamadi asai bidi deli deli dabego po odama, augwali noma sali.
ACT 2:7 Tama noma mu selama, augwali moni homu elama, te po wai, “Te po wabo bidi dabe tigidali augwali Galili tǫ pedai bidi dabe da.
ACT 2:8 Tialima, dago odali, da deli deli bidi hani dabego po dabe augwaligo wabo dago odali. Dago po augwaligo mena tama koneaniwe?” te po wali.
ACT 2:9 Tama te po ma wai, “Da tigidali buludu eba asali, e Judia tǫ pedai me, te Paria tǫ pedai me, Midia tǫ pedai me, Elam tǫ pedai me, te Mesopotemia me, Kapadosia me, Pontus me, Esia me,
ACT 2:10 Frigia me, Pamfilia me, Isip me, tama da Rom bidi dabe eba aselama, bidibo me. Da me badu te Sairini be nanidu asali, te Libia tǫ tonalubo bidigo be nani.
ACT 2:11 Da me badu Juda dabe mu da, me badu da homu begelama, Juda dabego ebo sę wali pabo dao. Tama da Krit me, Arebia me. Tialima, te bidi dabego Godigo bomai sę po dabe dago po dabego wabo odali,” augwaligo te po wai, te tamadi asai bidi dabego.
ACT 2:12 Tama augwali noma selama, augwali homu kolesaga umana pali. Tama augwa hasi ma po miyu, te po wai, “Te nai mena tama tialiwe?”
ACT 2:13 Tiali goli, bidi dabe me badu augwaligo te posobo po weyu, te po wai, “E bidi dabego bomai wę tulama, wabo pabo sę gagawai ebao,” te po wali.
ACT 2:14 Te bidi Pita dali, te Jisasgo tagala palai bidi nogo si olama, sągą deli dali, augwali dodulaluali. Tama augwali dodulalu, Pitago te sisinagasai we bidigo wali po wei ponai, te po bomona wai, “Dage Juda hani, dagego odiąo, te Jerusalemde bidibo bidi dabego me, odiąo, te dagego te ede subo sę page koneagameo.
ACT 2:15 Dagego homu da bidi dabego bomai wę tulama, wabo pabo sę gagalali. Woo, te meni. Te kigamu giliga tamadi tama holobao. We bidi augwaligo kigamude bomai wę tulama, wabo pabo sę ebo menio.
ACT 2:16 Tiali goli, te subo sę page e dao. Te Godigo agabolo po olama, agai Godigo po pusa mawai bidi nogi Joel, agai e sęde polobadu te po wai,
ACT 2:17 ‘Te Godigo te po wai, “Te e si sia sainu ebadi yaide, eno ena Mobo Bidi tigidali we bidibolo olo mu mawaibao. Tama menama, dagego ogwa dabe, wegi dabe augwaligo eno po pusa mawaibao. Tama eno duga gesi bidi dabebolo me me gasagi yai na dabe ola mawaibao, te monu dabe augwalibolo me.
ACT 2:18 Mu tama, te side eno sę ebo bidi dabe me, eno sę ebo we dabe me, te siba eno ena Dwagi Yai Mobo Bidi olo mu mawaibao. Tama menama, augwaligo eno po pusa mawaibao.
ACT 2:19 Tama eno dagalude me, tǫde me, te we bidi noma sabo gasagi yai bomai sę dabe yaibao.
ACT 2:20 Te kaneme me, sia me, sisi yai hano me yaibao, te giliga eno huli si ilaibao, tama te polua me kaneme tiwai mama yai ilaibao. Tama nosali Genuai Bidi Jisasgo si asobo si, te side Genuai Bidigo genuai sę dabe yaibao, tama tibaso te sigo moni nogi elaluaibao.
ACT 2:21 Tama te side Genuai Bidi nogi elama i wabo bidi dabe da, teda Godigo augwali tau selama, aga we bidi dabe yaibao,” Godigo te po wai,’ Joelgo tama po wai,” Pitago te po wali.
ACT 2:22 Te Pitago po ma wai, “Dage Israel dabe, dage e po odiąo. Eno Jisas te Nasaret bidide po waibao, te agai bomai moni sę dabe Godigo agabolo mobaso, agai dagebolo ola mayu tama Godigo aga tagala palai dao. Dago te kone dao, te bomai sę dabe Jisasgo dage tomode yali duga kone dao, te bidi Jisas agai yali.
ACT 2:23 Tama Godigo polobadu mu koneama tiaibao homu elama, agaduba homugo po polo dąų waluyu homude tiwai, te Jisas augwaligo dagego nogode muaibao. Tama dagego dwai bidi dabego Jisas elemainu ola mobaso, tama augwaligo aga ela muani.
ACT 2:24 Tiali goli, Godigo te bidi ma hodolobaso, tama aga ma hodaloai dao. Bidi isibo sęgo Jisas kalabus usu isąbaso, aga dene hauwa dali isama, Godigo agade te dene silali.
ACT 2:25 Tama polobadu Devitgo te Jisas me hodalobo sęde te po weyu, e tobo wai, ‘Eno Genuai Bidi eno gesabide sesemane bidibo suali. Tama aga eno dolo nogo badu bidibo. Tama tibaso, dwai sę hauwa enabolo pedalai ebaso da, augwali ena aiyaba elalugobeo.
ACT 2:26 Tama tibaso, eno homu wiegi yai elama, tama eno tede po pusubo sogo eno bugai homu mu ebo da. Ena bidi tama dao, ena isaibao. Tiali goli, ena te po wabo da, eno God agai enabolo dwagi yai sę ebo ena tonaluaibao.
ACT 2:27 Magi baso meni. God, nago eno noma te isi bidi dabego pesagede olo tagalogobeo. Ena da, te nago dwagi yai sę ebo bidi da. Tama eno tigi nago damua pomainu tagalogobeo.
ACT 2:28 Nago bugagia bidiyu bidabo tų enabolo ola mawai dao. Nage ena dali hodobo bidibaso, ena tego dwagi yai homu mu ilali,’ Devit agai te po wali,” Pitago Jisasde te po wali.
ACT 2:29 Te Pitago te we bidi dabebolo po ma wai, “Ena hani bidi ama dabe, dago wąį mu Devit, te bidide po eno dagebolo hania haninama mu pusa momainu, e po obao. Devit polobadu isali, tama augwaligo aga pubulali. Agai tigi muani pesage te da bidibo digi pąde e elalubao, te ede me munalubuo. Tama tibaso, dago konebo dao, te Devitgo agai wali po agade digi wabe, te Jisasde wali.
ACT 2:30 Tama Devit bidibadi yaide, te agai polo koneai, te magi sę dabe dią holaibao. Tama Godigo agabolo mu tama dao olama, te po mu dąų walai, te Devitgo koneai. Godigo agabolo te po wai, ‘Te eno naga hani bidi dabego bidi me nosali mu genuai bidi mu ilaibao, te nage tiwai,’ te po wai, Godigo.
ACT 2:31 Tama Devitgo suali, te Godigo nosali yabo sę. Tama tibaso, Devitgo te we bidi tau somainu sa muani bidi Krais ma hodaloabo, te sęde te po wai, ‘Te Godigo aga te isi bidi dabego pesagede olo tagalogobeo. Tama agai tigi damua pogobeo.’
ACT 2:32 Tama te bidi Jisas, Godigo aga ma hodolali. Te sę da Godigo po wali pabo bidi dabego gedugo mu suali.
ACT 2:33 Tama Godigo Jisas ma hodolama, aga dolo nogo badude muani, tama te nogi yai bidi bidibo madi. Tama Godigo agabolo aga Dwagi Yai Mobo mawai, te aga aya Godigo polobadu mawaibao olama polo po dąų walai. Tama megi Jisas agai Godigo Dwagi Yai Mobo dabolo olo mu menama, e dagego suali sę me, odali po me pedalali.
ACT 2:34 Tama Devit aga digi dagaluba pai menio, te Jisas yaligia. Me ma Devitgo e tǫba wai, ‘Eno Godigo eno Genuai Bidibolo te po wai, “Nage eno e dolo nogo badu dugayao.
ACT 2:35 Tama pelama, eno naga boi bidi dabe aiyaba elaluama, nago sągą dologoba muaibao, te sogo dąį egi paibao,” Godigo te Genuai Bidibolo tama po wai,’ Devitgo te po wali.”
ACT 2:36 Te Pitago po ma wai, “Eno dagebolo te po obao, dage Israel we bidi tigidali, dagego hania koneao, te duga te nide enani bidi Jisas, te bidi Godigo te Genuai Bidi ilali, te Godigo we bidi tau somainu sa muani bidi Krais,” Pitago te po wai.
ACT 2:37 Te we bidi augwaligo te po odobo si, augwali moni homu mu elama, Pitabolo me, tama me badu Jisasgo tagala palai bidi dabebolo me te po wai, “Hani bidi ama dede, da magi egowe?”
ACT 2:38 Te Pita agai augwalibolo te po wai, “Dage tigidali deli deli dabego tigidali dwai sę dabe tudiba togolama, tama homu begelama, Jisasgo nogide baptais sao, te Godigo dagego dwai sę sela sąnama, boi bidi egobe weyu yao. Tama tilama, Godigo aga Dwagi Yai Mobo dagebolo mawaibao.
ACT 2:39 Tama Godigo polobadu mawaibao olama polo dąų walai po dagebolo me, te duga ogomani dabe nosali ame nabo tebolo me, tama te digibulu bidibo we bidibolo me, te dago Genuai Bidi God aga pąba i wabo we bidi tigidalibolo me, agai te tigidali we bidibolo aga Dwagi Yai Mobo mawaibao,” Pitago te po wali.
ACT 2:40 Te Pitago augwalibolo dwasianu po wabe, te po hauwa wai, te po bomona weyu, te po wai, “Duga digi duga ma tau siąo. Tibaso, dage dene sogobeo, te Jisas ela muai dwai bidi dabe nosali dene sainu ebo yaligia,” te po wai.
ACT 2:41 Tama we bidi hauwa augwaligo agai wali po homude dąų wai. Tama we bidi hauwa mu 3,000 augwali te sogo baptais selama, tama augwali te Jisasde polobadu homu dąų wai we bidiba wadolagasai.
ACT 2:42 Tama augwali wadolali we bidi augwaligo Jisasgo tagala palai sę bidi dabego augwalibolo po hauwa mu ola momaina homu yali. Tama augwali deli hani tiwai bidali. Tama augwali deli madi hodobo nai tubo da, augwali Jisasde homu dąų wai dao weyu yai. Augwali Godibolo hodobo po wabo da.
ACT 2:43 Te bidi Jisasgo tagala palai bidi dabe augwaligo te we bidi noma sabo gasagi yai bomai sę dabe hauwa sogo mu eduali. Tama tibaso, we bidi tigidali noma mu sai.
ACT 2:44 Tama te Jisasde homu dąų wai we bidi tigidali augwali deli hani tiwai pedelama bidali. Godigo po wali pabo bidi dabego homugo te da deli deligo munalubo nai dabe denaduba nai dabe da homu ebe, te Godigo dąį ilai me badu bidi dabe tau sabo nai dabe da, te homu yali.
ACT 2:45 E tiwai yai. Te augwaligo me sogo be dabe me, te tǫde me, te munalubo me badu nai dabe me bidi dabeba menama, tama mone ge selama, me me nai habuge yai bidi dabe tau siyu yali. Tama tilama, augwali tigidali usu yali.
ACT 2:46 Tama augwali te Moni Lotu Be tempel tede sesemane sogo sisinagasu sisinagasobo da, te deli hani tiwai. Tama augwaligo sesemane sogo wiegi yai homu dali nai tuyu bidali, te augwa be dabede. Tama augwali wiegi yai homu dali nai tubo da.
ACT 2:47 Augwaligo te po wabo da, “Te God da, aga dwagi yai mu da.” Tama te olo we bidi tigidali augwaligo te Jisasde homu dąų wai we bidi dabebolo wiegi yai homu yai. Tama Godigo sesemane deli deli sogo te olo we bidi dabe selama, agai po wali pabo bidi dabeba wadolobo dao.
ACT 3:1 Te me sogo Pita dali Jon dali te bidi si te Juda dabego Moni Lotu Be tempel teba pali, pioba poloba. Tama te Juda dabego pioba poloba Godibolo gedu haluasa po wabo sogo da.
ACT 3:2 Tama te Moni Lotu Be tempelde te moni sunumi deli elalubo, te sunumi nogi Dwagi Yai Mu. Augwaligo te sągą dwai bidi me deli te sunumiba sesemane sogo tolasa asama, teba mugasobo da, mone ge gonomainu yali. Te bidi aga idago tabide sągą tama dwai ame nai. Tama te bidigo tigidali sogo “Dwasianu masigi ena mao,” wabo, te Lotu Be tempelba asobo we bidibolo.
ACT 3:3 Aga Pita dali Jon dali si tomoba asobo sulama, “Dage sigo dwasianu masigi ena mao,” wabo po hanalu wali.
ACT 3:4 Augwali sigo te bidi dolo tonalu, tama Pitago te po wai, “Da siba nago tonaluao,” wali.
ACT 3:5 Tama te po obaso, te bidigo augwali si tonaluali, agai homugo ‘Augwali sigo masigi enabolo mawaibao.’
ACT 3:6 Pitago agabolo te po wai, “Ena masigi menio. Tialima, eno elalubo nai deli nagebolo mawaibao. Jisas Krais, te Nasaret bidi, agai te bomo elalubaso, eno nagebolo obao, nage bilao.”
ACT 3:7 Tama olama, sągą dwai bidigo dolo nogogo Pita nogo tolasa hodaluali. Tama megi tama sągą si dali si ma dolo yali, te aga sągą gąų si me ma dolo yali, tama tigidali sągą dili ma bomo yai.
ACT 3:8 Tama agai sągągo sasa mano biliyu, posoga palu, posoga palu elama, aga sągągo dolo dolaluali, tama agai bilalio. Aga augwali si dali Moni Lotu Be tempel tomoba pobadi yaide, agai posoga palu elama biliyu, agai Godigo nogi ugwaba salio.
ACT 3:9 Tama tigidali we bidi te Moni Lotu Be tempel tomode augwaligo te bidi bilibo suali, agai tama biliyu Godigo nogi ugwaba sali.
ACT 3:10 Augwaligo te bidi sulama, koneai, te po wai, “Te bidigo e Moni Lotu Be tempel sunumide dugulalu tigidali bidi hanalu wai, ‘Masigi enanu mao,’ wabo da, te sunumi nogi Dwagi Yai Mu,” te po wai. Te mone enanu mao gonudali bidi aga sągą usu elama bilibaso sulama, augwaligo noma mu sai.
ACT 3:11 Te bidi agai Pita dali Jon dali tagalabo homu meni, tama te bidi si nogogo toalio. Tama bidi sela Moni Lotu Be tempel tomode dolalubo, te be mabode, te mabo nogi Solomongo Be Mabo. Tigidali we bidi augwali noma selama, udulama, te bidi sela pageba sabolali.
ACT 3:12 Tama Pitago te we bidi sulama, augwalibolo te po wai, “Israel dabe, magi baso dage noma sobawe? Magi baso dagego da gedugo bugagia osabawe? Dadi sigo bomogo e bidi bilimai hagede dodolobeo, te menio. Dadi si dwagi yai bidi menio, e bidi dodolobeo. Godigo e sę yali.
ACT 3:13 Dena wąį mu Abraham dede, Aisak dede, Jekop dede polobadu augwaligo koneama, Godibolo lotu po wabo page wai. Tama te Godigo agai ogwa Jisasgo nogi da ola mawai dao, te aga bomo me. Aga da, te da tau sabo bidi dao. Tiali goli, dagego polobadu Jisas te gavman genuai bidi teba odasa pai. Dagego aga po tų elama, te kiap bidi nogi Pailat agai Jisas olo tagalai homu yai.
ACT 3:14 Tiali goli, dagego te bidi Jisas tudiba muani, dwagi yai kolesaga yai bidi, mu doloba pai bidi dao. Dagego te kiap Pailat hanaluyu, ‘Te bidi Barabas olo tagalama, da mao,’ te po wai.
ACT 3:15 Te bidi Barabas da, te bidi ela mubo bidi da. Dagego Jisas agai da bida bida pomai hagede tau sabo bidi, te dagego ela muai dao. Tiali goli, Godigo aga gų pagede ma hodolali. Dadi sigo suali, aga ma bidibo. Tama dadi sigo koneama, te po dagebolo obe dao.
ACT 3:16 Jisasgo bomogo e bidi ma dwagi yai ilali. Dage tigidali gedugo sualio. Te bomo dagego suali te bidi dwagi yai ma ilali. Tiali goli, Jisasgo bomo aselama, dadi sigo te bidi Jisas konealubo homu ebaso te bidi dwagi yai ma ilali, te dagego gedugo sualio,” Pitago te po wali.
ACT 3:17 Te Pitago po me wai, “Eno ama dede, dage dali dago genuai bidi dabe dali, dagego Jisasgo page bugagia konesiąwai baso, te agabolo te dwai sę yali, te eno konebao.
ACT 3:18 Godigo polobadu mu agai po pusa mabo bidi dabe tigidalibolo te po wai, ‘Eno we bidi tau somainu sa muani bidi Krais, aga tigide dene hauwa yaibao, te augwaligo aga ela muaibao,’ te po wai. Tama dagego agabolo dene menama, ela munama, dagego te dwai kolesaga e baso, te polobadu wali po tiwai yaligia megi nai ebigia muani.
ACT 3:19 Tama tibaso, dagego kolesaga begelama, Godigo kolesagadu wali piąo, tama Godigo dagego dwai sęgę sela sąmainu tama yao.
ACT 3:20 Tama te elama, Genuai Bidigo dage dwagi yai toma tuabo sogo mawaibao, te agai dagego kolesaga dąų walaibao. Tama nosali Jisas tagala palaibao, aga Godigo sa muani bidi Krais, tama da tau somainu yaibao.
ACT 3:21 Megi agai dagalude tonalu bidibo, Godigo tigidali nai gesi ma ilibo sogo, te sogo asobo tonalubo. Te po polobadu Godigo agai po pusa mabo bidigo dabebolo wai, mu dolo yai bidi dabe. Tama augwaligo te po pusa mani.
ACT 3:22 Tama Mosesgo polobadu te Juda dabebolo po wai, ‘Te Genuai Bidi, dago God, agai ena dagebolo tagala palai dao. Tama nosali agai te tiwai te po pusa mabo bidi me dagebolo tagala palaibao, dagego hani bidi deli. Agai wabo po tigidali dagego bugagia odiąo.
ACT 3:23 Tama te po pusa mabo bidigo po odisąbo we bidi, teda dagego Godigo po odobo we bidi tomo agebeledu buluba sela sąnama, elaibao,’ Mosesgo te po wali,” Pitago te tama po wai.
ACT 3:24 Pita agai po me wali, te po wai, “Te Godigo po pusa mabo bidi nogi Samuel dali, te nosali asai bidi dabe dali me, te Godigo po pusa mabo bidi dabe tigidali, augwaligo Jisasgo yabo sę po polobadu pusa mawai. Tama megi te sę dią holali.
ACT 3:25 Godigo agai mu po ola tolai dao, te agai po pusa mabo bidi dabego ola mawai, te da tau somainu. Godigo dago wąį dabebolo agai mu po ola mawai dao. Tama Godigo Abrahambolo polobadu wali po megi da pagede me bidibo. Godigo Abrahambolo polobadu te po wai, ‘Eno nago nosali ame nai wąį dabebolo dwagi yai sę hasia elama, nosali augwaligo tigidali tǫde bidibo we bidi dabebolo dwagi yai sę yaibao,’ Godigo te po wai.
ACT 3:26 Tama te sę emai hagede, Godigo aga sę ebo bidi sa munama, dabolo hasia tagala palali. Agai homugo dage tigidaligo dwai kolesaga tagalama, dage bugagia bidaibao,” Pitago te po wai.
ACT 4:1 Te Pita dali Jon si te we bidibolo po ola mobadi, te pris bidi dabe dali, te Moni Lotu Be tempel genuai enesigi bidi kepten dali, te Juda dabe bidi sibi Sadyusi bage dali, augwali te bidi si pageba sabolali.
ACT 4:2 Jisasgo tagala palai bidi sigo te we bidibolo te po wai, “Te Jisas isilama, ma hodaloai. Tibaso, dago koneagameo, te tigidali isibo we bidi ma hodaluaibao,” te po wai. Tama te po baso, te genuai bidi dabe sębę yali.
ACT 4:3 Augwaligo te bidi side sębę elama, nogo bono dunama, kalabus beba muai, piode, te do kigamu po tų dodolainu.
ACT 4:4 Tiali goli, augwali sigo po ola mabo po te odali we bidi te augwali hauwa mugo te po mu konealuali. Tama te bidi dabe nedelama, te namba hauwa mu 5,000 yali.
ACT 4:5 Te sogo kigamu te Juda dabe genuai bidi dabe dali, te nogi elalubo monu dabe dali, te Juda dabego bomo yai po ola mabo bidi dabe dali, augwali Jerusalem buluba sisinagasali.
ACT 4:6 Tama bidi dabe me sisinagasali, te pris bidi tuni bidi, te bidi nogi Anas, te bidi dali, aga hani bidi dabe Kaiafas dali, Jon dali, Aleksander dali, augwali tigidali sisinagasali.
ACT 4:7 Tama te sisinagaselama, i olama, te Jisasgo tagala palai bidi si tomoba dolagasali. Augwaligo augwali sibolo te po hanalu wali, “Magi elama, dage sigo te sągą dwai bidi ma dwagi yai ilaliwe? Mena bomogo aga dwagi yai ilaliwe? Mena nogigo te aga ma dwagi yai ilaliwe?” te po wai.
ACT 4:8 Godigo Dwagi Yai Mobogo te Pita kolesaga pągąna sąyani. Te Pitago te po wei ponoyu te po wai, “Genuai bidi dabe, monu dabe, odao.
ACT 4:9 Dadi sigo te sągą dwai bidi ma dwagi yai ilali baso, dagego da si po tų ebao.
ACT 4:10 Tibaso, dage tigidaligo koneąo, te Israel we bidi dabe tigidali me, dagego koneao, ede te sągą dwai bidi dolalubo, te Nasaret bidi Jisas Kraisgo nogi bomogo e bidi ma dwagi yai ilama, aga sągągo dolalubo. Te bidi Jisas dagego ni pedaide elai bidi da. Tiali goli, Godigo aga gų pagede ma hodolai.
ACT 4:11 Te tiwai Godigo po buku tomode e po asęai elalubao, ‘Dage be sę ebo bidi dabego e masigi sela sąyani. Tiali goli, megi Godigo te masigibolo genuai nogi mawai.’ Te po page Jisasde po wali.
ACT 4:12 Jisas deligo te da tǫde bidi tau sabo te usu yaibao. Tigidali bulu Godigo da ma dobola sabo sa muani bidi me menio,” Pitago te po wai.
ACT 4:13 Te Pita dali Jon sigo te po tama olama, wi meni baso, te Judago po tų ebo kaunsil bidi dabe noma sai. Augwaligo odai, te bidi si skulba pabe, olo bidi si naga dao, tama tibaso, augwali noma sai. Augwaligo te sogo koneai, te bidi si Jisas dali bidai dao.
ACT 4:14 Tiali goli, te polobadu sągą dwai bidi agai te Pita dali Jon si pąde wiegi yai dolalubo suali.
ACT 4:15 Sulama, te po magi ilama, aiyaba elalugobeo. Tama tibaso, augwaligo Pita de Jon sibolo “Gasa habuba dage si osogo piąo,” wali. Genuai bidi dabe augwa hasi tega si po dodolali.
ACT 4:16 Augwa hasi te po hanalu wai, “Dago te bidi side magi sę yaibawe? Jerusalem tigidali we bidigo koneai, te dwagi yai bomai sę te bidi sigo yali, tama dago mena tama dualogo menio.
ACT 4:17 Tiali goli, te po tigidali we bidi dabebolo pususu bilidali weyu, dago te bidi sibolo te po bomai mu wainao, ‘Dage sigo Jisasgo nogi munu ma pususu pigimio, we bidibolo,’ te tiwai po augwalibolo wainao,” augwaligo te po wai.
ACT 4:18 Te po augwa hasi minama, augwaligo tega si i olama, dolagasali. Augwaligo po bomo elama, augwali sibolo wali, “Dago dage sibolo habu selebao. Dage sigo Jisas nogi ma gasa we bidibolo ola magio, agai po wagio,” te po wai.
ACT 4:19 Tiali goli, Pita dali Jon si dolalubadi, te Pitago te po wei ponoyu te po wai, “Dadi sigo Godigo po tagalama, dagego po wali pobaso, Godigo gedude te dolo yaibawe? Duga digi gedugo dagaliąo.
ACT 4:20 Dadi sigo gedugo suali sę me, odali po me, te dago tagalogobeo,” te po wai.
ACT 4:21 Tama te kaunsil dabego me badu bomai sę yabo po tega sibolo ma wai. Tigidali we bidigo Godigo nogi ugwaba siyu bidali, agai bomogo te sągą dwai bidi dwagi yai ma ilai baso. Te bidi agai kibu be bidi si nogo sągą sese te 40 yia silai, tama aga da gesi bidi menio. Tama augwali sigo te sągą dwai bidi dwagi yai ma ilama, tama te we bidi tigidali Godigo nogi ugwaba sobaso, te kaunsilgo ‘Te bidi si dago mena tama elego menio,’ te homu yai. Tama te po olama, augwaligo te bidi si olo tagala palai.
ACT 4:23 Te kaunsil dabe augwaligo te Pita dali Jon si olo tagala palama, tega si augwa si haniba polo pai. Tama sabolama, te po pusa mani, te pris hani genuai bidi dabe dede, monu dabe dedego tamadi wali po.
ACT 4:24 Tama te Godigo po odama wali pabo bidi hani augwaligo te po odama, augwali deli homu ebadi, Godibolo te po wai, “Genuai Bidi, dago sę Tolalubo Bidi, te dagalu dede, tǫ dede, te tamu ąį dede, te augwali tomode bidibo nai tigidali me, nagaduba nigali.
ACT 4:25 Dago wąį Devit, nago sę bidi, tebolo nago Dwagi Yai Mobogo po me deli e tama po wai. Te po obaso, Devitgo te po wai. ‘Gasa bidi hani magi baso moni sębę yaliwe? Te bagego te sę usu isąwai, augwaligo magi baso hwįgi pabo homu yaliwe?
ACT 4:26 Te tǫ genuai bidi dabe dali, te bidi tonalubo bidi dabe augwali deliba sisinagaselama, sisi yai, te God me, te Godigo sa muani bidi me, te side hwįabo homu yai,’ Devitgo te po wai.
ACT 4:27 Tama te Devitgo polobadu wali po yaligia, augwaligo te sę tamadi yali. Te genuai bidi si, Herot dali, Pontias Pailat dali, e buluba sisinagasali, te gasa bidi hani me, te Israel we bidi me. Augwaligo Jisas dali hwįabo homu yali, te nago dwagi yai tedali sę bidi, te bidi nago polobadu sa muai bidi.
ACT 4:28 Polobadu nago bomogo me, nago homugo me, te po wai, ‘Augwaligo nosali te tigidali sę yaibao,’ wai. Tama tibaso, tamadi augwali sisinagaselama, te tigidali sę yali.
ACT 4:29 Genuai Bidi, augwaligo da elaibao po wai, te po nago odao. Da da, nago sę ebo bidi dabe da. Nago da bomo ilao, tama dago nago po pusubo wi egobeo.
ACT 4:30 We bidigo nago bomo sumainao. Gasi ebo we bidi dwagi yai ma ilao. Da tagala palama, nago dolo sę ebo bidi agai nogide we bidigo polobadu susiąwai bomai sę emainao,” augwaligo te po wai, Godibolo.
ACT 4:31 Te augwaligo Godibolo po olama, silibo si, te sisinagasali bede tǫ mali yai. Godigo Dwagi Yai Mobo augwali kolesagaba asali, tama te sogo gagalama, Godigo po augwaligo pususu pai, wi ebe.
ACT 4:32 Te bidi Jisas konealubo we bidi augwali homu deli, kolesaga deli elama, bugagia bidali. Bidi mego “Te nai ena naga dao” po me wabe. Augwali tigidaligo augwa doado bage dobolama, tigidali we bidi usu yai.
ACT 4:33 Jisasgo tagala palai bidi dabego te po tigidali we bidibolo pusai, ‘Genuai Bidi Jisas gų pagede ma hodaluali,’ te po bomai mu. Godigo te Jisas konealubo we bidi tigidalibolo moni dwagi yai sę yali.
ACT 4:34 Augwali tomode me me nai te bage habuge menio. Be page bidigo, tǫ page bidigo me augwaligo te po wai, “Gasa bidigo e nai sabo homu ebaso da, abelagasao.”
ACT 4:35 Abelagaselama, page bidi dabego te masigi selama, te Jisasgo tagala palai bidi dabebolo mani. Augwaligo selama, te nai meni yai we bidi tigidalibolo dobayali.
ACT 4:36 Te augwaligo te tobage sę ebadi, te bidi me deli bidali, agai nogi Josep. Augwaligo nogi me poai, te nogi Barnabas. Te nogi page, ‘Abagi pogo bidi tau sabo da.’ Agai hani nogi Livai, agai page bulu te Saiprus tǫde, te tamu ąį tomode elalubo tǫ dao.
ACT 4:37 Tama te bidi Barnabasgo agai tǫ me bidigo togwa menama, abelali. Abelama, Barnabasgo te mone ge dabe te Jisasgo tagala palai bidi dabebolo magasali, augwaligo dobamai hagede.
ACT 5:1 Tiali, bidi me deli augwali dali bidali. Agai nogi Ananaias, agai wego nogi Safaira. Augwali sigo gasa kolesaga yali. Augwali sigo tǫ gasa bidi togwa menama, abelali.
ACT 5:2 Tiali goli, te tǫde sali mone bogea siyu, me badu augwali sigo dualali. Agai wego me te kolesaga koneai. Agai me badu masigi te Jisasgo tagala palai bidi augwalibolo magi pelama, te po wai, “Te tǫde sali masigi tamanu dao.”
ACT 5:3 Pitago agabolo te po wai, “Ananaias, magi baso Satango dwai kolesaga elama, nago te tǫ abelali masigi bogea siyu tama me badu dualama, te Godigo Dwagi Yai Mobobolo tibo po waliwe?
ACT 5:4 Te tǫ polobadu te nago tǫ mu da. Te tǫde magi sę yabo me naga homu naga da. Te tǫ me bidigo abelama, mone sabo me, te tiabo me naga homu naga da. Te tiali, nago mena homu elama, te mone me badu bogea sabo sę elama, tibo po waliwe? Nago bidi dabebolo naga tibo po wabe. Meni. Nago Godibolo tibo po wali,” Pitago te po wai.
ACT 5:5 Ananaias te po odama, polo tama tǫba degasa dulama, te aga polo tama isalio. Tama gesi ogwa bidi dabe aselama, augwaligo te bidi te nami ugwade belama, tolasa pelama, pubaligi pai. Tigidali we bidigo te yali sęde po odama, wi mu yali.
ACT 5:7 Te nosali nai po sela wai madigi, Ananaias aga we te be tomoba asali, tiali agai aga bidi isali po agai odobe.
ACT 5:8 Pitago agabolo hanalu wai, “Te tǫ abelali masigi, te tamanu dawe?” te po wai. Ananaiasgo wego te po wai, “Te tǫ abelali mone tamanu dao,” te po wai.
ACT 5:9 Tiali goli, Pitago te po wai, “Magi baso dage sigo homugo te tibo po waliwe, te Godigo Dwagi Yai Mobo usu saliwe? Nago bidi pubulali bidi dabe tųba dolagasobo side, nage me tolasa paibao,” te po wai.
ACT 5:10 Tama te we polo tama te bidi Pita sągą pagede degasa pelama, te aga isali. Te gesi ogwa bidi dabe te be tomoba asai. Augwaligo te we isai munalubo suali. Sulama, augwaligo te we tigi tolasa pelama, aga bidi muani madigi pubaligi pali.
ACT 5:11 Tigidali we bidi Jisasgo po wali pabo bidi te po odali, tama augwaligo moni wi mu yalio. Te olo bidi dabego me sulama, wi mu yali.
ACT 5:12 Te tibo sogo Jisasgo tagala palai bidi dabego te we bidi tomode augwaligo bomai sę mu yalio, te bidi noma sabo sę me. Tigidali bidi Jisasgo po wali pabo bidi Moni Lotu Be tempel beba sisinagasai, sesemane sogo, te Solomongo Be Mabode.
ACT 5:13 Godigo po wali pisąbo bidi augwaligo wi elama, te bagede nagulagasobeo. Tigidali we bidi augwaligo te po wai, “Te hani da, dwagi yai bidi dabe dao.”
ACT 5:14 Tama tialima, umabo we bidi augwaligo Jisasgo po wali pelama, tama augwaligo Genuai Bidigo haniba nagulagasalio.
ACT 5:15 Jisasgo tagala palai bidi dabego bomai sę mu ebaso, tigidali we bidigo augwa ama me, abe me gasi baso, gologobe wade munama, tų sesegeba selasa asali. Augwaligo homugo Pita te tų sesegedu biliyu, agai giligade bilibo noma te gasi yai bidi tigiba bogibaide ma dwagi yai ilimainu.
ACT 5:16 Jerusalem pąde bida bida pabo we bidigo gasi yai we bidi me, dwai mobo haubogo tuai we bidi me, Jisasgo tagala palai bidigo dwagi yai ma ilimaio olama, magasali. Tama augwali tigidali dwagi yai ma yali.
ACT 5:17 Te side te pris hani tobolu bidi dede, agai abagi solo dede, augwaligo lotu hani nogi Sadyusi, augwaligo te Jisasgo tagala palai bidi dabebolo dwai homu mu yali. Tigidali we bidigo te Jisasgo tagala palai bidi dabe dali dwagi yai homu ebaso, te Sadyusi dabego moni sębę elama, elainu yalio.
ACT 5:18 Augwaligo te Jisasgo tagala palai bidi dabe tulama, kalabus beba muani, dwai sę ebo bidi dabe dali hodobo te kalabus beba muani.
ACT 5:19 Tiali goli, te hulide Godigo ensel bidi deligo te kalabus be tų dayagasali. Tų dayagaselama, te Jisasgo tagala palai bidi dabe buluba tagala palama, augwalibolo te po wai,
ACT 5:20 “Te dage Moni Lotu Be tempel teba dolaligi pelama, we bidibolo te gesi kolesaga po tigidali ola mao,” te po wai.
ACT 5:21 Tama Jisasgo tagala palai bidi dabe augwaligo te po wali pelama, kigamu hulide te Moni Lotu Be tempel tomoba pelama, tigidali we bidibolo te po ola mabo gagalali. Te pris tobolu bidi dali, agai abagi solo dabe dali, augwaligo te Juda bidi monu dabe i olama, te kaunsilde moni po tų miainu yai. Augwali deliba sisinagaselama, augwaligo enesigi bidi dabe te kalabus beba tagala palama, “Te Jisasgo tagala palai bage eba odasa asao,” wali.
ACT 5:22 Tiali goli, augwali te kalabus beba sabolama, Jisasgo tagala palai bidi dabe te be tomode bidibo sube. Tama tibaso, te bidi dabe kaunsilba ma pelama, augwalibolo te po wai,
ACT 5:23 “Te da te kalabus beba sabolama, dago suali, be tų palialubo suali, te kalabus bidi tonalubo bidi dabe tonalubo suali, te be tųde. Tiali goli, te be tų dalama suali, te be tomode te bidi menio,” te po wai.
ACT 5:24 Tama te Moni Lotu Be tempel genuai enesigi bidi dali, te pris genuai bidi dabe dali, augwaligo te po odama, augwaligo moni homu yali. Augwaligo te po wai, “Te magi sę yaliwe?”
ACT 5:25 Bidi me deli te be tomoba aselama, agai augwalibolo te po wai, “Odao. Dagego kalabusiba muai bidi dabe, augwaligo te we bidibolo po ola mobao, te Moni Lotu Be tempel, tede dolalubo,” wali.
ACT 5:26 Tama te po obaso, te genuai enesigi bidi dali, agai enesigi bidi dabe dali, augwali pelama, Jisasgo tagala palai bidi dabe odasa asali. Augwali sesali sogo elebeo. Wi elama, augwaligo homugo “Dago te bidi dabe elebaso, te we bidigo masigi sąnama, da elaibao,” te homu yai.
ACT 5:27 Augwaligo te bidi dabe te be tomoba dodoligi pali, te kaunsil dabe gesabide. Tede dolalubadi, te pris tobolu bidigo augwalibolo te po wai,
ACT 5:28 “Te dago dagebolo Jisasgo po pusamuo olama, habu selai. Dagego homugo te da olo nai dao. Megi dagego tigidali we bidi Jerusalemde te Jisasgo po ola mawai. Dagego homugo dago Jisas elama, isilai,” agai te po wai.
ACT 5:29 Te tiali goli, Pita dali, me badu Jisasgo tagala palai bidi dabe, augwaligo te po wei ponoyu, te po wai, “Te dago dagego wali po wali pogobeo. Godigo dabolo mani genuai po mu dago wali paibao.
ACT 5:30 Dago wąį dabe augwaligo polobadu Godibolo lotu po wai dao. Tama dagego Jisas te ni pedaide neligo enama, isalio. Tiali goli, dago wąįgo God, te Godigo digi Jisas ma hodolali.
ACT 5:31 Tama Godigo selama, ogwaba pelama, Jisas te Godigo dolo nogo badu bidibo, moni nogi elalubaso. Tama tede bidibo, te we bidi tobolu elalubo bidi da, te tau sabo bidi da, te Israel we bidi augwaligo homu begelama, Godigo augwaligo yali dwai sę dabe sela sąmainu ebao.
ACT 5:32 Tama te Jisasgo polobadu yali sę te we bidigo konemai hagede, dago tede po sagwa mabo bidi dabe da. God agai po wali pabo we bidibolo te Dwagi Yai Mobo Bidi mabo da. Te Godigo Dwagi Yai Mobo Bidi me, te Jisasgo ebo sę konebo da, te sęde po sagwa mabo dao,” Pitago te po wai.
ACT 5:33 Te kaunsil dabego Pitago po odama, moni sębę mu yali. Augwaligo homugo ‘Dago te Jisasgo tagala palai bidi dabe elaibao’ homu yai.
ACT 5:34 Tiali goli, bidi me deli augwali tomode bidali, te Juda dabego kaunsil bidi doligiluali te Farisi bidi sibi bidi, te bidi nogi Gamaliel. Te bidi agai Mosesgo bomo yai po pusubo bidi, tigidali we bidi augwaligo bugagia konemai hagede, tama te we bidigo te dwagi yai bidi mu augwaligo aga dali dwagi yai homu elama, te bidi nogi ugwaba sali. Te bidi Gamaliel te kaunsil tomode dolaluyu tama te po wali, “Te Jisasgo tagala palai bidi dabe gasa habuba osogo pomainao.”
ACT 5:35 Augwali teba pelama, agai te kaunsil dabebolo te po wai, “Dage Israel bidi, dagego te bagebolo ebo sę dua yao.
ACT 5:36 Polobadu te bidi nogi Teudas dią holama, te po wali, ‘Ena genuai bidi mu dao.’ Tama bidi hauwa 400 aga wali pai. Tiali goli, gasa bidigo te bidi elebaso, aga wali pali bidi me badu wi pela silali, te agai sę silali.
ACT 5:37 Tama nosali te Galili tǫ bidi Judas, agai nogi sabi bidi dią holali, te gavmanigo we bidi nogi sabo side. Agai te homu yai tigidali bidi selama, gavmanide moni haųwa hwįebao. Tiali goli, gavman bidigo enesigi bidigo aga elebaso, aga wali pali bidi wi pela silali. Tama te bidi si augwaligo yali sę tuloluali.
ACT 5:38 Tama megi Jisasgo tagala palai bidi dabede, dagego te dwai sę elamuo. Olo bidimainao. Tama bidigo ebo sę dali kolesaga side sę eyu da, te polo sia saibao, tega sigo sę tuloluai tiwai.
ACT 5:39 Tiali goli, te sę Godigo bomogo ebo sę eyu da, teda dagego te sę aiyaba elalubo usu egobeo. Dagego ‘Te bidigo sę naga dao’ wagi sogo da, teda dage God dali hwį egi da,” te bidi Gamaliel agai te po wai.
ACT 5:40 Te kaunsil dabe augwali Gamalielgo wali po wali pali. Augwaligo Jisasgo tagala palai bidi dabe i olama, “Asao.” Augwaligo enesigi bidigo bįgo elemainu, tama augwaligo bįgo elali. Te kaunsil dabego augwalibolo te po wai, “Dagego Jisasgo nogide po munu ma pusulamuo,” te po wai. Te po olama, augwaligo te bidi dabe olo tagala palali.
ACT 5:41 Tega sigo te kaunsil be tagalama pali. Tama te kaunsil bagego elali goli, mu ma bugai homu yali. Tama augwaligo te homu yali, ‘Da Jisasgo po wali pobaso, Godigo usu da olama, da te bidigo gedude naga moni hale mu selama, Jisasgo sę tau sali,’ te homu yai.
ACT 5:42 Tama te Moni Lotu Be tempel tede me, te we bidigo bede me, augwaligo sesemane sogo te Dwagi Yai Po te we bidibolo pusa mayu ola mani, te Jisas da, Godigo sa muai bidi Krais dao po wai.
ACT 6:1 Te nosali Jisas wali pabo we bidi dabe genilama pedelali, dwasianu hani augwa hasi tomode wado po wali. Me hanigo te Grik po weyu, me hanigo te Hibru po weyu yalio, te Juda dabego po mu dao. Tama te hani si da Juda bidi hani da. Tama te Grik po wabo Juda dabego te po wai, “Te dagego nai dobabo sogo, dago bidi isai we nai bugagia mabo meni, deli deli sogo mayu ebo,” te po wai.
ACT 6:2 Tama te po obaso, te Jisasgo tagala palai bidi nogo si olama, sągągo side, augwaligo Jisas wali pabo we bidi tigidali i olama, augwalibolo te po wai, “Odao. Te nai dobabo sęgo dago sę mu te aiyaba elalubo. Te dwali. Dago sę mu te Godigo po tigidali we bidibolo ola mabo sę dao.
ACT 6:3 Tama tibaso, abagi dede, dagego bidi nogo a olama, me badu nogo si sao. Augwaligo te nai dobabo sę tonalumainao. Augwali Godigo Dwagi Yai Mobo Bidi augwalide bidibo bidi, dwagi yai kolesaga ebo bidi, te tobage bidi sao, te nai dobabo sę emainu yao.
ACT 6:4 Tiali goli, dena te sę egobe. Da da, tigidali sogo Godibolo gedu haluasa po wabo sę dali, Godigo po pusa mabo sę dali, te sę si naga yaibao,” augwaligo te po wai.
ACT 6:5 Te bidi Jisas wali pabo we bidi augwaligo te Jisasgo tagala palai bidi dabego po odama, “Usu da” wali. Tama tibaso, bidi dabe dąį ilali. Hasia bidi agai nogi Stiven, te agai Godigo po mu dąų olama odobo bidi dao, Godigo Dwagi Yai Mobo agai homude mu pągąwai. Bidi mego nogi Filip, bidi mego nogi Prokorus, bidi mego nogi Nikanor, me Timon, me Parmenas, me Nikolas. Te bidi Nikolas, te agai page bulu Antiokdu asali. Polobadu agai te Juda dabego lotu po wabe, tama tamadi te Juda dabego lotu po agai wabo gagalali.
ACT 6:6 Tama te Jisas wali pabo we bidigo te bidi a naga olama, me badu nogo si te Jisasgo tagala palai bidi dabego gesabide dodolalugi pali. Tiliama, Jisasgo tagala palai bidi dabego augwaligo nogo te bage tobolude munama, Godibolo po wai, agai augwaligo ebo sę tau somai hagede.
ACT 6:7 Tama tibaso, we bidi dabe hauwa augwaligo Godigo po odama, konealuali. Te Jerusalem hanude te Jisas wali pabo we bidi hauwa mu yali. Tama te pris bidi hauwa me augwaligo Jisasgo po wali pali.
ACT 6:8 Te Godigo te bidi Stivenbolo dwagi yai sę elama, genuai bomo mu mani. Stivengo me me genuai bomai sę yali, te we bidi noma sabo sę tiwai me yali.
ACT 6:9 Tiali goli, me badu bidigo te Stivengo ebo sęde hagelabo homu yai. Polobadu augwali te mone ge sisąbo olo sę ebo bidi bidalio. Tama tomode te sę tonalubo bidigo augwali olo tagala palali. Tama tibaso, augwaligo augwa Juda dabego bomo yai po ola mabo be nogi poai, Olo Tagala Palai Bidigo Be dao wali. Augwali da te Juda dabe da, te bulu sidu asali, te bulu si nogi me Sairini, me bulu nogi Aleksandria. Silisia bulu Juda bidi me, te Esia bulu Juda bidi me, augwali te olo tagala palai bidi dabe dali sisinagasali, Stivende augwaligo hwįai hagede gagalali.
ACT 6:10 Tiali goli, Godigo Dwagi Yai Mobogo dwagi yai bomai po Stivenbolo mani. Tama menama, Stivengo wali po augwaligo aiyaba elalubo usubeo.
ACT 6:11 Tama tibaso, augwaligo me badu bidi abelama, te tibo po Stivende te po ola momainu, “Te Stivengo te Moses dali God dali te side dwai po wabo dago odali.”
ACT 6:12 Augwaligo te sę elama, te we bidi dabe dede, te genuai monu dabe dede, te Mosesgo bomo yai po ola mabo bidi dabe dede, augwali moni sębę yai, Stivende. Augwali pelama, Stiven nogo bono duąsa aselama, te kaunsil gesabiba dolaluagasali.
ACT 6:13 Stivende tibo po wabo bidi dabe me augwali dolaluagasali. Augwaligo te po wai, “Tigidali sogo te bidigo dwai po wabo bidi dao. Agai da dago dwagi yai Moni Lotu Be tempel dolobo dao, Mosesgo dwagi yai bomo yai po dolobo dao.
ACT 6:14 Agai te po wabo dago odalio, ‘Te Nasaret bidi Jisasgo te Moni Lotu Be tempel dolaibao. Mosesgo polobadu dabolo mani po, te po Jisasgo ma hasegelaibao’ wali,” augwaligo te po wai.
ACT 6:15 Tama olama, te kaunsil dabe dali dualu tonalubo bidi dabe augwaligo Stiven bomona tonaluali. Augwaligo te bidi gesabidi suali da, te Godigo dagalude sę ebo ensel bidi gesabidi tiwai suali.
ACT 7:1 Te pris tuni bidi agai Stivenbolo te po hanalu wai, “Nago te po wali mu dawe?” wali.
ACT 7:2 Tama agai te po wei ponoyu te po wai, “Ama dede, aya dede, dagego eno po odao. Dago wąį mu Abraham aga te Mesopotemia tǫde bidibadi, te Haran tǫba pisąbadi yaide, te sogode God aga pageba asai. God da, te genuai dwagi yai bomo mu elalubo God dao.
ACT 7:3 Tama aselama, Godigo agabolo te po wai, ‘Nage naga bulu taga pelama, naga hani dabe taga pelama, gasa buluba pao, te bulu nage eno ola mawaibao,’ te po wai.
ACT 7:4 Tama te po obaso, Abraham te Kaldia tǫ taga pelama, te Haran tǫba bidigi pali. Tede Abraham aga aya isali. Isilama, Godigo aga te Haran tǫdu tagala palama, e tǫba da megi Israel da bidibo tǫba asali.
ACT 7:5 Tama te sogode Godigo dwasianu tǫ me deli agabolo mabe, te agai tǫ tiwai elalumainu ebeo, te menio. Tiali goli, Godigo agabolo bodolu mayu, te po wai, ‘Nosali te tǫ eno nagebolo mawaibao, te nago hani wai dabe augwaligo te tǫ aya mu elama, tonaluaibao,’ te po wai. Tiali goli, Godigo te po mu wali sogode, Abrahamgo wai menibadi dao.
ACT 7:6 Godigo agabolo te po me wai, ‘Naga hani wai te augwali gasa bulu me delide bidaibao. Tede bidibadi, augwaligo gasa bidigo sę olo ebo bidi dabe gagawaibao. Te sę tonalubo bidi dabego augwalibolo dwai sę mawaibao, te kibu be hauwa 400 tueibao.
ACT 7:7 Tiali goli, eno nosali te sę tonalubo bidi dabe dene mawaibao,’ Godigo te po wai, ‘Nago hani te tǫ taga pelama, e tǫba aselama, enabolo lotu po waibao,’ Godigo te po wai.”
ACT 7:8 “Tama te po olama, Godigo Abrahambolo po me ola mayu, te po wai, ‘Te nage dali nago hani dali, dagego ogwa dabe ame nabo si, te Sarere deli bidama, te augwaligo tigide dagego dąį ilibo sę eyu, te tigi wali togwao. Tama te dąį togobo te Godigo mani bodolu po koneaibao,’ wali. Tiliama, nosali Abrahamgo wego wai ame nani. Te wai nogi Aisak. Sarere deli bidama, te wai aga ayago te waigo tigiwali togwalio. Tiliama, nosali mu Aisakgo we sali. Agai aga ogwa Jekop agai te yali sę tiwai yalio. Tama Jekop me aga genuai elama, agai te yali sę tiwai yali. Agai ogwa nogo si olama, sągą badu si wagi soali bage ame nenama, agai augwali tigidalibolo te yali sę tiwai yali. Te bidi dabe da Israel bidigo wąį dabe dao,” Stivengo te po wai.
ACT 7:9 Te bidi Stivengo po ma ola mayu te po wai, “Te dago wąį nogo si olama, sągą badu deli wagi soali bage augwa amanu Josep delibolo aga ama dedego aga dali sębę yali, dwai homu yali. Augwaligo Josep nogogo tulama, gasa bidi hanibolo menama, mone ge sali, aga Isip tǫde gasa bidigo olo sę ebo bidi emainu yai. Tiali goli, Godigo aga tagalobeo.
ACT 7:10 Tama Godigo aga tonaluali, me me sęgę pedalobaso, Godigo aga tau selama, bugagia bidali. Te Isip tǫ genuai tuni bidi, tama Josep te Isip tǫ genuai tuni bidi gesabiba pelama, tama Godigo aga tau selama, Josepgo dwagi yai kolesaga ebo te tuni bidigo sulama, aga dwagi yai bidi dao, te tuni bidigo agade te homu yai. Tama tibaso, tuni bidigo Josep te Isip tǫ genuai gavman bidi nigilama, bidalio. ‘Tigidali me me sę nago naga tonaluao, eno bede me,’ Isip tuni bidigo te po wali.”
ACT 7:11 “Te me sogo tigidali bulude nasi yali, Isip tǫ me, Kenan tǫ me, augwali tigidali nasigo mu dolalio. Dago wąį Israel hani, augwaligo nai me gegelama, tubeo.
ACT 7:12 Tama tibaso, Jekopgo te Isipde te tubo nai elalubo po odama, tama agai ogwa dabe, dago wąį dabe, agai augwali tagala palali, Isip buluba hasia sogo mu nai sigi pai, te augwa buluba ma pali.
ACT 7:13 Tama nosali Isip buluba ma pelama, te sogo Josepgo agai ama dedebolo ‘Ena da Josep dao’ wali.
ACT 7:14 Te sogo me Isip tuni bidigo agai me Josepgo hani koneai dao. Tama Josepgo aga ama dedebolo po walio, ‘Dage pelama, dago aya Jekop aga hani tigidali odasa aselama, da Isip bulude bidaibao.’ Tama te hani we bidi hauwa mu 75 bidali.
ACT 7:15 Tama tibaso, Jekop dede dago wąį hani tigidali te sogo Isipba asali. Aga monu dabe bidiyu, tede isai. Nosali dago wąį dabe me augwali tede isai.
ACT 7:16 Isilama, tama bidi dabego augwaligo tigi sela pelama, Sekem buluba pubaligi pali. Polobadu Abrahamgo te tǫ Hamor bidi hanide masigigo abelai tǫ,” Stivengo te po wai.
ACT 7:17 Te bidi Stivengo po ma ola mayu, te po wai, “Tama dago hani Israel bidi hauwa mu Isip bulude bidali. Tama te sogo Godigo polobadu Abrahambolo wali po Isip bulu taga soaibao wali po pąde yagasalio.
ACT 7:18 Tama te sogo Isip bulu tonalubo genuai bidi deli pedalama, tama agai te Josepgo polobadu mu yali sę konebe.
ACT 7:19 Tama te bidigo dago wąį dabe mumuwani. Dago wąį dabebolo dene mawai. Tama agai augwalibolo te po wai, ‘Dagego we dabe sibigo wai ame nobaso da, dagego te wai dabe digibulu mu olo mugi pao.’ Agai homugo, ‘Te isimainao,’ te homu yali.
ACT 7:20 Tama olama, te side Moses ame neyu, tama aga te sawi yai wai mu yai. Tama aga idago bede ame modubadi, polua sela silali.
ACT 7:21 Tama aga idago genuai bidigo po wali pelama, tama Moses buluba mugi pali. Tede munama, tama Isip genuai tuni bidigo wegi agai asama, suali. Tama agai te wai Moses negelama, aga wai mu tiwai ąǫ yalio.
ACT 7:22 Tama nosali Isip bidi dabego ebo kolesaga page augwaligo Mosesbolo ola mani. Moses genuai yali, agai sę dabe, po dabe bomai po mu augwalibolo manio,” Stivengo te po wai.
ACT 7:23 Te bidi Stivengo po ma ola mayu, te po wai, “Te bidi Mosesgo kibu be te 40 yia olama silibo si, agai homugo aga Israel hani bidi sugi paiba homu yali.
ACT 7:24 Tama sugi pelama, sabolama, te Isip bidi me deligo Israel bidi me elebo suali. Tama tibaso, agai aga abagi tau sali. Tau selama, tama Isip bidi me deli agai wei ponoyu, ela muai.
ACT 7:25 (Agai homugo eno hani augwaligo koneaibao, te Godigo ena sa muai, te eno augwali te Isip bidi boi bidi dabego nogode tagala pomainu yali. Tiali goli, augwaligo te sę konebe.)
ACT 7:26 Do agai Israel bidi si hwįbo suali. Sulama, agai pedegelebo si, ‘Abagi, odao. Dage si da, ama name si dao. Duga si hwįnamuo,’ wali.
ACT 7:27 Tiali goli, te bidi mebolo dwai sę ebo bidigo Moses nogogo dega palali, Mosesbolo te po wai, ‘Nage te da tonalubo bidi menio. Nage da dabolo po tų dodolabo bidi menio.
ACT 7:28 Te Isip bidi nago do elali tiwai, megi nago ena elai hagede ebawe?’ te po hanalu wali.
ACT 7:29 Mosesgo te po odama, wi elama, aga te Isip bulu tagalama, digibulu pelama, te Midian tǫba bidigi pai. Tede bidibadi, we selama, ogwa si ame nai,” Stivengo te po wai.
ACT 7:30 Te kaunsil dabebolo Stivengo po me ola mayu, te po wai, “Te Moses aga te bidi meni yai bulude bidibadi, te Sainai bulu du pąde, te kibu be te 40 yia olama silali. Tede Godigo dagalude sę ebo ensel bidi me deli dwasianu ni tomode isi dabo digi bididuali, te Mosesgo suali.
ACT 7:31 Te bidi Mosesgo tama tebo sę ebo sulama, aga homu hauwa tuą pelama, noma salio. Aga te ni page pąba pelama, bugagia tonama sueinu yali. Tiali goli, agai Godigo po wabo odali, te po wai, ‘Ena da God dao.
ACT 7:32 Ena naga wąį nǫų dabe dedego God dao. Tama te bidi Abraham dede, Aisak dede, Jekop dede, naga wąį solo augwaligo enabolo lotu po wai dao.’ Mosesgo te po odama, wi mu elama, didibili yali. Tama agai te homu yali, ‘Eno te nai ma tonalogobeo.’
ACT 7:33 Genuai Bidigo agabolo te po wai, ‘Nago sągą nadoba dią muao. Magi basowe, ena ede bidibaso, nage te dolalubo tǫ mu dwagi yai tedali elalubo tǫ dao.
ACT 7:34 Eno we bidi dabego moni sęgę mu sabo te eno suali, te Isip bulude. Augwaligo gela wabo eno odalio, ę wabo me. Tama megi eno te sęgę sela sąwai hagede asali. Megi nage eno te Isip buluba tagala palobao,’ Godigo te po wai, Mosesbolo,” Stivengo te po wai.
ACT 7:35 Stivengo te po me wali, “Te Mosesgo aga Israel bidi hani augwaligo polobadu aga sela sąwai, agabolo te po wai, ‘Nage da, da tonalubo bidi menio. Nage da dabolo po tų dodolabo bidi menio.’ Tiali goli, te bidi Godigo aga augwali tonalumainogo eyu sa muai bidi, augwali te boi bidi nogode dagala sąnama, Godigo aga te sę emai hagede sa muai. Te sogo Godigo dagalude sę ebo ensel bidigo te po Mosesbolo pusa mawai, te isi dabo dwasianu nide.
ACT 7:36 Moses te Isip bulu nosali taga pelama, polasa peyu, te tigidali Israel we bidi nosali aga wali asalio. Tama te Isip bulude me, te mama tamu ąį sesegede me, te bidi meni yai bulude me, tede bidi noma sabo bomai sę mu hauwa yali. E sę dabe edubadi, kibu be bidi nogo sągą sese si 40 yia silali.
ACT 7:37 Te bidi Moses agai tigidali Israel we bidibolo te po wai, ‘Godigo te po pusabo bidi me deli dagebolo tagala palaibao, ena tiwai. Te bidi duga hani bidi digi dao,’ te po wai.
ACT 7:38 Te bidi Moses aga polobadu te Israel we bidi hodobo sisinani, bidi meni yai bulude. Aga dago wąį dabe dali bidibadi, tama aga Godigo dagalude sę ebo ensel bidigo Sainai bulu bagede po miai. Tama Mosesgo Godigo po sai, te po mu bomai po mu, polo sia sogobeo. Te po dago wąįgo ugwaba ola mayu, ola mayu, ela pomai hagede, dabolo momainu yali.
ACT 7:39 Tiali goli, dago wąįgo Mosesgo po sela sąwai. Augwaligo aga dega palai. Dega pelama, augwaligo te homu yai, ‘Da Isip buluba ma paio,’ te po homu yai.
ACT 7:40 Tama tibaso, Moses te bulu du bagede bidibadi yaide, augwali Moses aga ama gomunai bidi pageba sabolali, te bidi nogi Aron. Augwaligo agabolo te po wai, ‘Aron, Moses magi yaliwe? Da Isip bulu tagala aselama, agai da bugagia odasa asai. Tiali goli, megi aga paliwe, isaliwe, te dago konebeo. Aron, nago po olama, bidi dabego te gasagi yai nai dabe nigilama, dago sulama, te naibolo dago lotu po waibao, God tiwai. Te naigo da bugagia polasa gegasa bilimai yaibao,’ augwaligo te po wai.”
ACT 7:41 “Augwaligo te po olama, te sogo augwaligo bulmakau kibu wai tiwai nai me deli nigalio, te augwaligo tibo god. Tama nigilama, augwaligo hasa dabe elama, te tibo godibolo lotu po olama, nai ula mani. Augwaligo moni kibu da tiwai tuali, augwa nogogo nigai nai sulama, dwagi yai homu elama, moni nai kibu da tiwai tuali.
ACT 7:42 Tialima, te sę ebaso, Godigo augwali tudiba ilalio. Godigo augwali tagalama, ‘Giliga dede, polua dede, hǫ dede, te naibolo lotu po emainao,’ Godigo te homu elama, sula tagalali. Augwaligo te sę yai hagede, Godigo po pusubo bidi dabego te po nosali asęani, ‘Godigo te po wai, “Dage Israel we bidi odiąo. Dage te bidi meni yai bulude bilidubadi, kibu be bidi si nogo sągą sese silali. Tama te sogode dagego hasa hauwa mu elama, lotu po olama, dagego enabolo te lotu po wabe.
ACT 7:43 Te tibo god nogi Molek agai ugwa be naga dagego tolasa bilu, te dagego tibo god nogi Refan agai hǫ noma me tolasa bilali. Augwali si naga te dagego nogogo nigai nai da, augwalibolo lotu po omainu yali. Tama tibaso, eno dage digibulu Babilon bulu tudiba tagala palaibao,” Godigo te po wai,’” Stivengo wali.
ACT 7:44 Te bidi Stivengo te kaunsil dabebolo te po me badu ma wadolama, pusai, “Te polobadu dago wąį dabe te bidi meni yai bulude bidali. Te bulude bidibadi, Godigo Mosesbolo ‘Te ugwa be tama tiwai sę yao,’ po ola mawai. Augwaligo te ugwa be te tiwai tama sę yani, te God augwali dali hodobo bidibo ola mawai hagede.
ACT 7:45 Nosali dago wąį augwa ogwago te ugwa be selama, te tobolu bidi Josua wali pelama, gasa hanigo tǫ sali. Godigo augwali tau selama, te tǫ sai. Tama te ugwa be tede elalubadi, genuai bidi Devit bidibo sogo te be me elaluali.
ACT 7:46 Tama Devit agai Godigo bidabo mobo dwagi yai sali. Tama Devitgo agai Godibolo hanalu weyu, te po wali, ‘Eno homugo nage bidabo lotu be sę yagawe?’ olama, hanalu wali. ‘Nage God mu dao, eno wąį Jekopgo nageba lotu po wai dao,’ te po wai.
ACT 7:47 Tiali goli, nosali Devit aga ogwa Solomon agai Godigo be sę yai dao.”
ACT 7:48 Te Stivengo te po me wai, “Te tiali goli, God Genuai Bidi mu dao, te bidi dabego nogogo nigai bede bidigobeo. Tama te koneama, Godigo po pusa mabo bidigo polobadu te po asęai,
ACT 7:49 ‘Te Godigo te po wai, “Te eno tigidali bulu tonalubaso, te dagalu da, te eno dugulalubo ni nami sia tiwai dao, te tǫ da eno sągągo diąnalubo ni nami tiwai dao. Dagego magi be enabolo sę yaibawe? Ena dulalu toma tuabo be menawe?
ACT 7:50 Ena digi te tigidali nai nigai dao, te dagalu me, tǫ me ena digi nigai dao. Dagego ena bidabo be sę ebo usu egobeo,” ’ Godigo te po wai.”
ACT 7:51 Te bidi Stivengo te kaunsil dabebolo te po ma wai, “Dage da te po sela sąbo bidi dabe dao. Dagego kolesaga da, Godigo po odisąbo bidigo kolesaga tiwai dao. Dagego Godigo Dwagi Yai Mobogo po tigidali sogo sela sąbo dao. Polobadu duga wąį dabego po sela sąyani tiwai megi dagego te tibao.
ACT 7:52 Polobadu duga wąį dabe augwaligo Godigo dwagi yai po pusa mabo bidi dabe tigidali ela silali. Me deli bidibawe? Mu menio. Polobadu mu Godigo dwagi yai po odasa pabo bidi dabe augwaligo te po wai, ‘Nosali God agai dwagi yai dolo sę ebo bidi asaibao.’ Tialima, duga wąį dabe augwaligo te po odasa pabo bidi dabe ela muani. Megi tama dagego te Godigo dwagi yai dolo sę ebo bidi ela muai.
ACT 7:53 Godigo dagalude sę ebo bidi ensel augwaligo Godigo bomo yai po dugabolo pusa mawai. Tiali goli, te po duga wali pabe dao,” Stivengo te po wai.
ACT 7:54 Te Stivengo te kaunsil dabebolo te po odubadi, augwaligo guni bulama, sębę ebaso, augwa kele halua tuali, agade.
ACT 7:55 Tiali goli, Godigo Dwagi Yai Mobo Bidi aga homu kolesagade pągą yanio. Tama agai ugwaba dagaluba tonalubadi, Godigo dwagi yai ula suali. Tama agai suali, Jisas te Godigo dolo nogode dolalubo suali.
ACT 7:56 Stivengo te po wai, “Suao. Eno megi suba, dagalu dalalubo. Tama tede Godigo Bidi Mu megi Godigo dolo nogo badude dolalubo eno subao,” te po wai.
ACT 7:57 Tama augwa nogogo olo palia sali, tama moni i wali, augwaligo te po odidali weyu. Augwali tigidali aga pageba polo sisinani.
ACT 7:58 Nogogo tulama, moni be nani bogoba sela sąyani. Tede augwaligo masigi dabe Stiven tigiba sąyani, aga ela mumainu eyu yali. Te kaunsilde tibo po wali bidi dabe augwa bulubo ugwa dabe osogo diąni, te masigi dabe bugagia sąmainu eyu, te Stiven tigiba. Te gesi bidi deli, agai nogi Sol, aga pageba te ugwa dabe augwaligo muani.
ACT 7:59 Augwaligo Stiven tigiba masigi sąbo sę ebadi, Stivengo te Godibolo te po wai, “Jisas, Genuai Bidi, nago eno mobo megi sao,” te po wai.
ACT 7:60 Aga kidu sugunama, agai Godibolo i bomo elama, te po wai, “Genuai Bidi, nago augwaligo te enabolo ebo dwai sę sęgę nago sela sąyao,” te po wai. Te po olama, aga isai. 8:1a Tama te bidi Sol agai augwaligo Stiven ela mubo sulama, Sol agai te sęde usu da wali.
ACT 8:1 Te sogo, Stiven isali sogode, augwaligo Jisas wali pabo we bidi elebo sę gagalali, te Jerusalemde. Te tebo sę genuagi mu yali. Tama Jisas wali pabo we bidi tigidali te Judia tǫ, Samaria tǫ te bulu siba wi tedela pali. Tiali goli, te Jisasgo tagala palai bidi dabe wi pabe.
ACT 8:2 Tama Jisas wali bugagia pabo bidi me badu augwaligo moni homu dene mu elama, diligi aselama, moni gela olama, Stiven pubaligi pali.
ACT 8:3 Tiali goli, Sol agai homugo te Jisas wali pabo we bidi tigidali eno ela silaibao, te homu yai. Tama agai te be deli deliba pelama, Jisasgo po wali pabo we bidi tigidali naga agai augwali nogo aligabo dunama, kalabus beba mugi pali, we dabe me, bidi dabe me.
ACT 8:4 Te Jisas wali pabo we bidi augwali wi pelama, tigidali buluba tedela pelama, bidada pali. Tede augwaligo Jisasgo po pusa mani.
ACT 8:5 Me bidi nogi Filip, agai te Samaria buluba dulama, tama agai te we bidi dabebolo te po wai, “Te Jisas da, Godigo we bidi tau somainu sa muai bidi Krais dao,” te po wai.
ACT 8:6 We bidi hauwa augwaligo Filipgo po bugagia odali. Augwaligo agai wali po odama, agai we bidi noma sabo bomai sę ebo me suali.
ACT 8:7 Tama dwai haubo mobo dabe we bidi hauwa tudi badu polobadu aselama, dagą yagaselama elalu tede bidibadi, tama Filipgo po obaso, te dwai mobo haubo dabe te we bidide bidali taga peyu, moni hwą mu wai. Me badu sągą isai we bidi Filipgo ma dwagi yai ilali, sągą dwai we bidi me.
ACT 8:8 Tama tibaso, te Samaria dabe bugai homu mu yali.
ACT 8:9 Te Samaria bulude te bidi me deli nogi Saimon bidali. Agai tede bobobage sogo bidu, dwai pobi wabo sę elama, te Samaria we bidi noma mu sabo sę yali. Agai te po wai, “Ena da, genuai bidi mu dao,” po wali.
ACT 8:10 Samaria we bidi tigidali, te genuai bidi me, te olo we bidi me, augwaligo Saimongo wali po bugagia odali. Tama augwaligo te bidi nogi weyu, “Te bidi agai Godigo mawai bomo gagawai mu elalubao,” wali. Augwaligo “Te bomo nogi Genuai Bomo te bidide elalubo dao,” wali.
ACT 8:11 Bobobage sogo te bidi agai pobi wabo pogo te we bidi dabe noma sobaso, augwaligo agai po wabo bugagia olo munama, odalio.
ACT 8:12 Tiali goli, Filipgo te Godigo we bidi tonalubo sęde dwagi yai po olama, te we bidibolo te Jisas Kraisde po me wali. Tama te po odama, te we bidi augwaligo te poba augwa homu tigidali munama, Filipgo augwali baptais mani, we dabe sibi me, bidi dabe me.
ACT 8:13 Saimongo te Filipgo poba aga homu munama, tama Filipgo aga baptais mawai. Tama baptais menama, tama te Saimon te Filip wali pai. Agai te Filipgo we bidi noma sabo bomai sę mu ebo sulama, agai noma sai.
ACT 8:14 Te Samaria we bidigo Godigo po bugagia odobo po te Jisasgo tagala palai bidi dabego odali, Jerusalemde. Tama tibaso, augwaligo Pita dali Jon si te Samaria we bidi pageba tagala palai.
ACT 8:15 Te bidi si sabolama, augwali sigo Godibolo po hanalu wali, te we bidi augwaligo Godigo Dwagi Yai Mobo Bidi somainu yali. Godigo Dwagi Yai Mobo Bidi augwaliba polobadu asobeo.
ACT 8:16 Tama tega augwali sigo koneai, augwaligo Jisasgo nogide naga baptais sai dao.
ACT 8:17 Tama tibaso, Pita dali Jon sigo Godibolo po hanalu wali, Godigo Dwagi Yai Mobo augwaligo homuba asomai hagede. Tama augwali sigo nogo te tigidali we bidi toboluba muani. Augwali Jisasgo hani tama tibo sogo augwaligo Godigo Dwagi Yai Mobo Bidi sali.
ACT 8:18 Te tama tibo sogo, te bidi Saimon agai Jisasgo tagala palai bidi sigo tigidali we bidi toboluba nogo mubo suali, tama Godigo Dwagi Yai Mobo Bidi augwaliba asali. Agai masigi selasa asama, tega side te bomo abelai hagede yali,
ACT 8:19 te po wai, “Te mone ge sao. Eno homugo te eno te Godigo Mobo Bidi sabo bomo dage side eno abelaibao. Tama eno me we bidi toboluba nogo munama, augwaligo Godigo Dwagi Yai Mobo Bidi saibao,” te po wai.
ACT 8:20 Tiali goli, Pitago te po wei ponoyu, te po wai, “Te Godigo olo mabo bomo te nago masigigo abelai hagede, nage dali nago masigi dali si te moni isiba paibao.
ACT 8:21 Godigo gedude nago homu dolo meni baso, te nage da dali te sęde me bidigobeo.
ACT 8:22 Tama te dwai sę ebo homu begelao. Begelama, tudiba muao. Tama nago Godibolo gedu haluasa po wao, agai nago te kolesaga ebo sela sąmainu yao.
ACT 8:23 Eno nago homu sualio. Nago e sę pesabo kolesagago nago homu dolo mu menio. Tama nago homu damua pabo homu tiwai elalubo. Naga dwai kolesaga ebogo nago dwagi yai kolesaga yaga wali kalabus elalubo,” Pitago te po wai.
ACT 8:24 Te bidi Saimon agai Pita dali Jon sibolo te po wai, “Dage sigo Genuai Bidibolo po wao, ena tau somainu, nago wali po ena pageba aselama, ena dolidali,” te po wai.
ACT 8:25 Te Pita dali Jon dali sigo augwalibolo te Godigo sę yai po pusa menama, te Genuai Bidigo po me olama, augwali si Jerusalemba ma geasa pali. Tama tomode augwali si peyu, Godigo dwagi yai po te Samaria bulu hauwade pususu pali.
ACT 8:26 Te Godigo ensel bidi me deligo Filipbolo te po wai, “Nage sisi elama, te saut eba pedai badu soao, te Jerusalem pabo tų tagalama, te bulu nogi Gasa teba pabo tųba pao,” te po wai. Te pabo tų te kemi tǫ naga bega palai elalubo bulu da. Te sunumi te bidi meni yai badu elalubao. Tama tibaso, Filip aga sisi elama, polo pali.
ACT 8:27 Tama te tųdu te Itiopia bulu kantri moni nogi yai bidi me deli te hos dabego kegebo karis nai tedu asali. Tama te bidi agai Itiopia genuai gavman we kwin Kandasigo masigi tonalubo sę ebo tobolu bidi dao. Te bidi aga tigide nai domoge diąsąwai bidi da. Te bidi aga Jerusalemba Godigo po odagasai. Tama megi aga buluba ma pai hagede, kibu hosgo kegebo bidi dulalubo karisde bidibo. Tama agai pobadi, Godigo polobadu po pusa mani bidi Aisaiago asęai po elalubo buku agai nedada pali.
ACT 8:29 Tama Godigo Dwagi Yai Mobo Bidigo te Filipbolo te po wai, “Nage te kibu hos kegasa pabo te bidi dulalubo karis pąba pelama, bidao.”
ACT 8:30 Tialima te bidi Filip udulama, pąba pali. Te bidigo te Godigo po pusa mani bidi Aisaiago po asęai buku nedada pabo odali. Tama agai hanalu wali, “Nage te nedebo po page nago koneaniwe?” wali.
ACT 8:31 Tama te gavman bidigo te po wei ponai, “Tama tiali bidigo enabolo te po page ola masiąyu da, eno konegobeo. Tama nage te karisba holama, ena dali dugayagasao,” te po wali.
ACT 8:32 Te bidigo te bukude nedebo po Filipgo koneama, tama dao, te po wai, “Augwaligo te kibu sipsip elai hagede, sela pabo sogo hwa wabo menio. Te tiwai te bidi agai hwa wabe. Augwaligo te kibu sipsip wai selama, nisi togwai hagede baso, te kibu sipsip wai dabe hwa wabo menio. Te tiwai te bidi agai hwa wabe. Agai po me wabe.
ACT 8:33 Augwaligo te bidi hale manio. Augwaligo agabolo dolo yai po tų ela mabe. Tama augwaligo aga elama, isilali. Tama tibaso, me bidigo agai hani sibide po wagobeo, agai bidi hani sibi sia salio,” te po asęai.
ACT 8:34 Te Itiopia bulu gavman bidi agai Filipbolo te po wai, “Te bidi Aisaia aga homugo te po aga digide waliwe, ma mena bidide waliwe? Te po page enabolo wao.”
ACT 8:35 Filipgo agabolo te aga bukude nedali po page bugagia pusa mobadi, tama agai Jisasde dwagi yai po agabolo pusa manio.
ACT 8:36 Tama augwali si te tųdu pobadi, te gavman bidigo ąį sulama, te po wali, “Te ąį ede elalubo. Ena magi baso baptais sogobewe?” te po wai.
ACT 8:37 Filipgo agabolo te po wai, “Jisasba nago homu kolesaga tigidali agaba muyu da, teda eno nage baptais mawaiba,” te po wai. Te bidigo te po wai, “Eno te Jisas Krais da te Godigo ogwa eno mu konealubo homu ebao.”
ACT 8:38 Tama te gavman bidigo i olama, te po wai, te kibu hos kekasa pabo sai guni tolasa pabo bidibolo, “Tama dolaluao,” wali. Augwali si tǫba dulama, tama ąį tomoba pelama, tama Filipgo aga baptais mawai.
ACT 8:39 Augwali si te ąį taga solama, buluba hola sobadi, Godigo Dwagi Yai Mobo Bidigo Filip polo te gasa buluba selasa pali. Tama te gavman bidigo aga ma sube. Tama aga buluba pabo tųdu peyu, bugai homu yali.
ACT 8:40 Filip te Asdot buluba polo sabolali. Agai te Asdot bulu taga pelama, te be nani tigidali bilama, Godigo gesi dwagi yai po pususu bilali, te Sisaria be naniba sabolali.
ACT 9:1 Te bidi Filip te be nani tigidali bilibadi, tama te bidi Sol agai moni po dagą weyu, te po wai, “Jisasgo hani eno ela silaibao,” wai. Tama aga te pris hani tuni bidi pageba pelama, te po hanalu wali,
ACT 9:2 “Nago enabolo pas asęna mao. Te pas selama, ena Damaskus be naniba pelama, tede Juda dabego bomo yai po ola mabo be genuai bidi dabebolo te pas mawaibao. Eno te Jisas wali pabo we bidi subaso da, nogo dųlama, tama te genuai bidi dabego ‘Usu da’ waibao. Te we bidi eno Jerusalemba ma odasa aselama, kalabusiba muaibao,” te po wai.
ACT 9:3 Te pas selama, Sol te Damaskus pabo tųdu pobadi yaide, pąba sabaligi pobadi, te dagaludu ula polo dulama, te Sol bologobea sali.
ACT 9:4 Tama Sol aga tǫba tulaluali. Tama agai bidi me deligo pedauwalidu po weyu, te tama po wabo odali, “Sol, Sol, nago ena magi baso dolobo sę ebawe?” te po wai.
ACT 9:5 Solgo te po hanalu wali, “Genuai Bidi, nage de dawe?” “Ena da Jisas da, nago ena dolobo sę ebo bidi da,” agai te po wai.
ACT 9:6 “Megi nage hogodama, Damaskus hanu tomoba pao. Tama bidi me deligo agai te nago sę yabo po ola mawaibao,” te po wai.
ACT 9:7 Te bidi Sol dali pali bidi dabe augwali dwai midigi selama, augwali te tųde po me wasiąma sagiasa dodolaluali. Augwaligo te bidigo pedauwalidu po wabo odali, tiali goli, augwaligo bidi me sube.
ACT 9:8 Tama te bidi Sol agai sągągo doligiluali. Agai gedu si pedama, suali, agai gedu tigidali hulia sai elaluali. Tama tibaso, augwaligo nogo tulasa pelama, Damaskus be nani tomoba pali.
ACT 9:9 Te sela sogo agai gedu me hulia sai elaluali. Tama te sela sogo agai nai me ąį me tube.
ACT 9:10 Te Damaskus bulude bidi me deli Jisas wali pabo bidi bidali, agai nogi Ananaias. Aga bidibadi, na gagawai yali. Tama te na ebadi, Genuai Bidi aga aselama, aga nogi wai. Tama Ananaiasgo te po wei ponoyu te po wai, “Genuai Bidi, ena da ede bidibao.”
ACT 9:11 Genuai Bidigo agabolo te po wai, “Nage hogodama, pelama, te augwaligo doloba pai nogi wabo tųba pao, Judasgo beba sugi pao. Nago tede hanalu wao, ‘Tarsus bulu bidi Sol tede bidibowe?’ wao.
ACT 9:12 Te bidi agai enabolo gedu haluasa po weyu, te bidibao. Tama Sol agai me na gagawai mu yali. Tama agai nage suali, te nage agai pageba asobo suali. Nago nogogo agai toboluba muani, agai gedu ma wiegi yai ilimainu ebo, te suali,” Genuai Bidigo te po wai, Ananaiasbolo.
ACT 9:13 Tama Ananaiasgo te po wai, “Genuai Bidi, hauwa we bidigo enabolo te bidigo Jerusalemde nago po wali pabo hani we bidi dwai sę mu ebo bidi dao po enabolo pusai dao.
ACT 9:14 Tama te pris tobolu bidi dabe augwaligo agabolo pas asęna manio, te aga Damaskus aselama, te agai nago nogi wabo we bidi da kalabusiba muainu,” te po wai.
ACT 9:15 Tama Genuai Bidigo agabolo te po wai, “Nage pao, eno aga dąį ilibaso, agai eno sę yaibao. Sol agai eno nogi te gasa hani dabe we bidibolo ola mawaibao, te genuai gavman bidi dabebolo me, te Israel we bidibolo me eno nogi pusa maiabo bidi dao.
ACT 9:16 Tama ena digi aga ola mawaibao, agai ena nogi selasa pelama, tigidali we bidibolo pusa mawaibao, te me me sęgę, me me sęgę aga pageba asaibao,” Genuai Bidigo te po wai.
ACT 9:17 Tama te po obaso, Ananaias pelama, te beba sabolali. Tomoba pelama, agai nogo te Sol toboluba muani. Agai te po wai, “Sol, nage da eno ama dao. Tama Genuai Bidi Jisas aga digi ena nage pageba tagala palai dao. Nage te pabo tųdu edaba asobadi, Jisas aga digi nagebolo sabolali. Agai ena tagala palali, nago gedu ma dwagi yai ilimainu yai. Tama agai homugo Godigo Dwagi Yai Mobo nage tomode bidimai hagede, te sę yai,” Ananaiasgo te po wai.
ACT 9:18 Tama polo te Solgo gedude abolo tiwai elaluali nai polo tulaluali. Tulalubaso, te agai gedugo tigidali nai ma bugagia suali. Tama aga dolaluama, Ananaiasgo aga baptais mani.
ACT 9:19 Tama nosali Sol agai nai tulama, aga bomo ma sali. Sol agai te Jisas wali pabo we bidi dali agai sela sogo bidali, te Damaskus be nanide.
ACT 9:20 Agai te Juda dabego bomo yai po ola mabo be dabeba polo pali. Tede agai Jisasgo po pusa mabo gagalali. Agai te po wai, “Jisas da, te Godigo Ogwa dao,” wali.
ACT 9:21 Tigidali we bidigo agai wabo po odama, augwali noma mu sai. “Te bidi Jerusalem bulude Jisasgo po wali pabo we bidi agai elebo po wali bidi, te dawe?” augwa hasi hanalu wali. “Tama te bidi agai eba asali, te Jisasgo po wali pabo we bidi agai nogo dunama, Jerusalemba odasa peyu, tama te pris hani genuai bidi dabebolo magi pai hagede aga eba asali,” te po wai.
ACT 9:22 Tama Solgo po bomo yai po mu pusali. Agai te po wai, “Te bidi Jisas da, te Godigo we bidi tau somainu sa muai bidi Krais dao.” Tama agai po bomo elalubaso, te Damaskusde bidibo Juda dabe augwaligo po wei ponogobeo. Agai pogo tigidali we bidigo po aiyaba elalualio.
ACT 9:23 Te tama hauwa sogo silama, tama te Juda genuai bidi dabe sisinagaselama, Sol elabo sunumi gegali.
ACT 9:24 Tialima, augwaligo aga elaibao wabo po bidi me deligo agabolo pusali. Tama Damaskus tomoba iliama, u badu moni masigi obo elaluali. Sol wi dią pidali weyu, tama pio me, kigamu me, hulide me, te tųba Sol elai hagede, nǫ muagasai.
ACT 9:25 Tiali goli, me sogo hulide te Jisasgo po wali pabo bidi dabego Sol te moni bono wa tomoba bulama, bono kęnama, te obo dwasianu windo tųdu te buluba dilani, tama bono wa aiyaba tagalalulali, tǫba sabolama, Sol wi dią pali.
ACT 9:26 Te Sol Jerusalemba sabolali. Tama tede agai homugo Jisasgo po wali pabo hani dali sisinai hagede yali. Tiali goli augwaligo agade wi mu yali. Augwaligo te homu yali, ‘Te bidi agai Jisas wali pabo bidi mu menio,’ te homu yali.
ACT 9:27 Tama te bidi Barnabas agai Sol tau sali. Agai aga odasa pelama, Jisasgo tagala palai bidi pageba tagaligi pali. “Tama agai tųdu pobadi, Genuai Bidi sabolagasali, te Solgo aga suali. Genuai Bidigo agabolo po wali.” Barnabasgo te po me wai, “Te Damaskusde Sol agai Jisasgo nogide po pusali, te aga wi me ebeo,” te po wai.
ACT 9:28 Tama tibaso, Sol agai Jisasgo tagala palai bidi dabe dali bidama, tama agai te Jerusalem be nani tomode agai Jisasgo nogi pusubo po te we bidibolo pususu bilali, wi ebe. Agai te Grik po wabo Juda dabe dali sisinama, po miani.
ACT 9:29 Tiali goli, augwaligo aga elabo sunumi gegali.
ACT 9:30 Tama te aga elabo sunumi gegebo po te Jisas wali pabo bidi me badugo odama, tama augwaligo Sol te Sisaria be naniba odasa pali. Tedu augwaligo aga agai page bulu mu Tarsus buluba tagala palali.
ACT 9:31 Te side Jisasgo po wali pabo we bidi te Judia tǫde me, Galili tǫde me, te Samaria tǫ me, te bulu we bidi augwali bugagia bidali, wi ebe. Godigo Dwagi Yai Mobogo augwali tau selama, te umabo we bidi Jisasgo poba augwa homu tigidali munama, bomo yali. Augwaligo Genuai Bidigo nogi ugwaba mu sali, te augwaligo Genuai Bidigo po wali pali.
ACT 9:32 Te Pita tigidali buluba bilali. Me sogo aga te be nani nogi Lida, teba pai, Godigo po wali pabo we bidi sueinogo yai.
ACT 9:33 Tama te bulude agai bidi me deli suali, te bidi nogi Ainias. Tama te bidi sągą isa silai, aga bede naga bididubadi, kibu be nogo a olama, me badu nogo sela olama silali.
ACT 9:34 Pitago agabolo te po wai, “Ainias, Jisas Krais agai nage dwagi yai ma ilibao. Nage ma hodaluao, naga somo belama, teba muao.” Tama Ainias polo hodaluali.
ACT 9:35 Tama te Lida bulu we bidi me, te Saron tǫ we bidi me, augwali tigidaligo Ainias bilibo sulama, augwali tigidaligo homu begelama, Genuai Bidi wali pali.
ACT 9:36 Te be nani Jopade te we me deli bidali, agai nogi Tabita. Agai Jisasgo po wali pali. Te Grik pode augwaligo aga nogi tama nogi wabo Dorkas. Tama tigidali sogo agai tigidali nai meni yai we bidi me, gasi ebo we bidi me, te agai tau sai dao.
ACT 9:37 Tama te sogo aga gasi deli sali, te isali. Augwaligo agai tigi wę pauluama, te be ugwa badu habuba muai.
ACT 9:38 Tama te be nani Jopa te Lida be nani digibulu meni, pąde mu. Te Jopade bidali Jisasgo po wali pabo we bidigo Pita te Lidade bidibo po odama, augwaligo bidi si Pita pageba tagala palali. Augwali si teba sabolama, Pitabolo te po wai, “Nage polo asao.”
ACT 9:39 Tama te po obaso, Pita sisi elama, aga tega si dali pali. Tama Jopa buluba sabolama, augwaligo aga te ugwa badu be habuba odasa pali. Tede te bidi isai we dabe sibi augwaligo gela wabo suali. Tama Dorkas agai bidibo sogo te bulubuo ugwa dabe me, te kedau baso bulubuo ugwa dabe me nigilama, te bidi isai we dabebolo mawai. Augwaligo te ugwa dabe selama, Pitabolo ola mawai.
ACT 9:40 Tama Pitago augwali “Buluba piąo,” wali. Tama agai kidu sugunama, Godibolo po wali. Nosali agai isai we tigiba suali, te po wai, “Tabita, nage hodaluao,” wali. Tama te we agai gedu peda sanama, tonono bilali, tama agai Pita sulama, hodasa holama, duagulali.
ACT 9:41 Pitago agai nogo tola selama, dodolali. Pitago te Jisasgo po wali pabo we bidi me i olama, augwali aselama, agai te we augwalibolo ola mawai, “Dorkas te bidibao,” wali.
ACT 9:42 Pitago te sę yali po tigidali Jopade bidibo we bidi polo oda pela silali. Tama umabo we bidi augwaligo homu te Genuai Bidiba muani.
ACT 9:43 Pita te hauwa sogo Jopa be nanide piali, te bidi me deligo bede, te bidi agai nogi Saimon. Agai ebo sę te isai kibu kau wali nagamea dwagi yai pomai hagede sę ebo bidi da.
ACT 10:1 Te bidi me deli Sisaria be nanide bidali, agai nogi Kornilius. Te bidi aga te Rom ami enesigi bidi dabe tonalubo genuai bidi mu, te 100 ami bidi agai tonalubo da. Augwali te Itali tǫdu asai.
ACT 10:2 Tama te bidi aga hani dabe dali tigidali sogo te Godibolo lotu po wedu te bidigo te Godigo godolo yabo kolesaga yali. Te bidi aga dali deli bede bidibo bagego tigidali te God dologode bidai. Tama te bidi agai te tigidali Juda tǫde bidibo nai meni yai we bidi agai tigidali sogo tau sabo da. Agai Godibolo hanalubo po hauwa sogo wabo bidi dao.
ACT 10:3 Tama me sogo pioba poloba nai po sela wabode, agai na gagawai yali. Tama agai Godigo dagalude sę ebo ensel bidi me deli aga pageba sabalobo hania sualio. Te Godigo ensel bidigo agabolo te po wai, “Kornilius.”
ACT 10:4 Agai te ensel bidi gedugo bomonama tonama, wi mu yai. Tama agai te bidibolo hanalu wali, “Eno genuai bidi, nago homugo magi sę yaiwe?” Tama te ensel bidigo te po wei ponoyu, te po wali, “God agai nago agabolo po wabo me, te nai meni yai we bidi tau sabo kolesaga me, te Godigo sulama, bugai homu ebao.
ACT 10:5 Tama megi bidi me badu te Jopa buluba tagala palao, bidi me deli agai nogi Saimon, agai nogi me Pita, te bidi Pita odasa asomainu yao.
ACT 10:6 Tama te bidi agai nogi sabi bidi Saimongo bede bidibo, te tamu ąį sesegede. Te nogi sabi bidi Saimon agai ebo sę te kibu kau waligo haniani nai nigibo sę ebo bidi dao,” te ensel bidigo te po wai.
ACT 10:7 Te po olama, aga pali. Tama Korniliusgo aga bede sę ebo bidi si me i wali. Agai te ami bidi me deli me i wali, te bidigo Godibolo lotu po wabo bidi. Te bidigo Kornilius tigidali sogo mu tau sali.
ACT 10:8 Tama augwali aselama, Kornilius agai te bidi selabolo te ensel bidigo wali po pusa mani. Pusa menama, agai te bidi sela Jopa buluba tagala palali.
ACT 10:9 Te do te bidi sela augwali pelama, te Jopa be nani pąba sabaligi pobadi, te giligade Pita te be pedu sai yai madigi teba holama, bidali, te Godibolo po wainu yali.
ACT 10:10 Tama agai nasi mu ebaso, agai homugo nai tuai hagede yali. Tama augwaligo nai dodolobadi, Pitago naa gagawai mu yali.
ACT 10:11 Tama agai dagaluba tonobadi, dagalude moni tų dalaluali. Moni nami ugwade po dunama, dagaludu tǫba tula palali.
ACT 10:12 Tama haniani hasa dabe, me me hasamani me, me me ba me te ugwa tomode kisu mu elaluali.
ACT 10:13 Pitago te po wabo odali, “Pita, nage hodasa pelama, me badu hasa dabe ela tuao,” wali.
ACT 10:14 Tiali goli Pitago te po wali, “Genuai Bidi, eno ela tugobeo. Polobadu eno te habu sai nai dabe tube, megi me eno tugobeo,” wali.
ACT 10:15 Tama Pitago po me odali, “Godigo agai ‘Tubo nai dao’ obaso da, tama Godigo agai nigai nai nago habu sai nai dao po wagio,” wali.
ACT 10:16 Tama sela sogo te nami ugwa dulama, te po wali. Silama, te nami ugwa dagaluba polo kegasali.
ACT 10:17 Tama te bidi Pitago dagaludu te yali sę page homugo kone palali. Tedubadi yaide, te Korniliusgo tagala palai bidi dabe augwaligo te Saimongo be menawe po hanaluama, augwali te be maboba dolagasali.
ACT 10:18 Augwaligo i olama, te po hanalu wai, “Te beba asali bidi bidibowe?” wali, “agai nogi Saimon dao, agai nogi me Pita dao,” te po wali.
ACT 10:19 Tama Pita te na gagawai yali sę konealu bidibadi yaide, Godigo Dwagi Yai Mobogo agabolo te po wai, “Edao, bidi selago nage gege asalio.
ACT 10:20 Tama tibaso, nage sisi elama, aiyaba dulao. Tama nago augwali dali pabo homu si egio. Eno augwali sela nage pageba tagala palai bidi dabe dao,” te po wai.
ACT 10:21 Tama te po obaso, Pita aiyaba dulama, augwali selabolo te po wai, “Dagego ena gege asali bidi, te ena tama dao,” agai te po wali.
ACT 10:22 “Dage magi pogo asaliwe?” wali. Augwaligo te po wei ponoyu, te po wali, “Te Rom ami genuai bidi nogi Kornilius, agai da nage pageba tagala palali. Te bidi da, aga dwagi yai bidi mu. Agai tigidali sogo Godibolo lotu po wabo bidi dao. Te Juda we bidi tigidali augwaligo agai nogi ugwaba sabo dao. Godigo dagalude sę ebo ensel bidi me deligo agabolo te po wai, ‘Nago Pita i olama, tama aga nago beba asomainao, Pitago wabo po nago odomainu tama yao,’ te ensel bidigo te po wali,” augwaligo te po wai.
ACT 10:23 Tama Pitago augwaligo wali po odobo si, agai augwali te be tomoba odasa pelama, pigi pai. Te sogo kigamu, Pita dali Jisasgo po wali pabo Jopa bidi me badu dali, augwali sisi elama, augwali te sela bidi dabe dali augwali hodobo palio.
ACT 10:24 Tama tomode pilama, ma pelama, augwali Sisaria buluba sabolali. Tede Kornilius agai abagi dede, bidi hani dede i olama, sisinagaselama, Pita asobo tonaluali.
ACT 10:25 Tama Pita agai homugo Korniliusgo be tomoba pai hagede homu yai. Korniliusgo sulama, agai kidu sugunama, agai tobolu me, nogo me tǫba ilali, Pita sągąde, agai lotu wali.
ACT 10:26 Tiali goli, Pita agai te bidi ma hodoliyu, te po wai, “Nage hodaluao. Ena da bidi naga dao, nage tiwai tama dao.”
ACT 10:27 Augwali si po ola peyu, te be tomoba pobadi, tama Pitago suali, te be tomode agai te we bidi hauwa sisinama bidibo suali.
ACT 10:28 Pitago augwalibolo te po wai, “Duga digi koneai dao, Juda we bidi dena te Juda hani isąwai hani bidi dabe dali abagi olama, augwaligo beba da bilibo menio, habu sai dao. Tiali goli, Godigo enabolo te po ola mawai, ‘Nago Judago lotu po wali pisąbo we bidi nago tudiba menamuo,’ wali.
ACT 10:29 Tama tibaso, nago e bidi sela tagala palama, ena oda sagasobaso, eno te po ‘Ena hagelabo’ po te eno me wabeo. Tama megi eno nage hanalu obao, nago ena magi baso i waliwe?” Pitago te po wai.
ACT 10:30 Te Korniliusgo te po wei ponoyu te po wali, “Te polobadu sela sogo polo walio, pioba poloba nai po sela wabode, eno Godibolo po weyu bidibadi, polo te bidi me deli ena pagede dolalubo suali. Agai ugwa ula genuai mu yali.
ACT 10:31 Agai ena nogi olama, te po wai, ‘Kornilius, God agai nago agabolo po wabo me, te nago nai meni yai we bidi tau sabo dwagi yai kolesaga ebo sulama, Godigo bugai homu ebo.
ACT 10:32 Megi nago me badu bidi te Jopa buluba tagala palao, bidi me deli oda sigi pomainao, te bidi nogi Saimon, agai nogi me Pita. Te bidi aga nogi sabi bidi Saimongo bede bidibo, te tamu ąį pąde. Te nogi sabi bidi Saimon, agai ebo sę te isai kibu kau wali nagamea dwagi yai pomai hagede sę ebo bidi da,’ te po wai.
ACT 10:33 Tama tibaso, eno nage pageba po polo te tagala palai dao. Tama nago dwagi yai kolesaga mu elama, da pageba sabolalio. Tama megi da tigidali Godigo gedude bidibao. Tama dago homugo Genuai Bidigo nagebolo mani po te dago odaibao,” Korniliusgo Pitabolo te po wai.
ACT 10:34 Te Pita agai po wabo sę gagalali, “Mu tama dao, megi eno koneanio. God agai deli hani naga homu ebeo. Te mu menio.
ACT 10:35 Tigidali haniani po wabo bidi hani augwaligo God wi elama, dwagi yai kolesaga ebaso da, tede Godigo ‘Usu da’ waibao. Duga digi koneai dao.
ACT 10:36 Godigo te dwagi yai po da Israel we bidibolo mawai dao. Tama te dwagi yai po page e tiwai da, Jisas Krais da, te tigidali we bidigo Genuai Bidi da. Da tigidaligo aga godolo eyu da, te da dwagi yai homu elama, bugagia bidaibao.
ACT 10:37 Duga digi koneai dao. Polobadu Jongo dwagi yai baptais mabo po pusa mawai dao. Te sogo te po te Galili tǫde gagalama, tigidali Judia tǫ usu yai dao.
ACT 10:38 Te po duga digi koneai dao. God agai te Nasaret bulu bidi Jisas sa muai. Tama Godigo agai Dwagi yai Mobo Bidi dali, bomo dali si agabolo mawai dao. Tama Jisas aga tigidali bulu bilama, dwagi yai sę ela bilali, tama agai Satango dolai we bidi agai dwagi yai ma ilali. God aga dali bidibaso, te tobage sę yali.
ACT 10:39 Tama dago suai dao, agai te sę Jerusalem tomode me, tigidali Israel bulude me, tama dago te yali sę po pusubao. Tama augwaligo aga ni pedaide walama, elai dao.
ACT 10:40 Tiali goli, sela sogo gų pagede bidama, nosali Godigo aga ma hodolai dao. Tama me badu we bidi augwaligo gedugo aga suali.
ACT 10:41 We bidi tigidali augwaligo aga sube. Da polobadu Godigo agai po pusu maio olama dąį ilai bidi, dago naga aga suai dao. Aga hodaluama, da aga dali hodobo bidu, nai me, ąį me tuai dao.
ACT 10:42 Tama dabolo agai bomai po mu mawai dao. Agai ‘Te dwagi yai po te tigidali we bidibolo ola mao,’ wali. Godigo Jisas dąį ilama, tigidali bidibo we bidi me, isali we bidi me, aga po tų yabo bidi nigilama, bidibo. Te sę ebo po me dago te we bidibolo pusa mawaibao.
ACT 10:43 Polobadu Godigo po pusa mani bidi tigidali augwaligo agade po wai. Augwaligo te po wai, ‘Magwai we bidi deli deligo augwaligo agaba augwa homu tigidali mubaso da, agai nogigo bomogo augwaligo dwai sę ebo kolesaga God agai sela sąwaibao,’ te Godigo po pusa mabo profet bidi dabego te po wali,” Pitago te po wali.
ACT 10:44 Te bidi Pita agai po odubadi, te Godigo Dwagi Yai Mobo Bidi te po odobo we bidi tigidali tigiba dulali.
ACT 10:45 Tama augwaligo gasagi gasagi yai po, me me po haniani weyu, Godigo nogi ugwaba sali, “God, nage dwagi yai bidi mu dao,” wali. Tama me badu Juda bidi augwali Jisasgo po wali pabo bidi dabe Pita dali asai, Jopadu. Augwali noma mu sai, Godigo agai Dwagi Yai Mobo Bidi te Juda hani isąwai we bidibolo me olo mawai.
ACT 10:47 Pitago te po wai, “Te we bidi dabe augwali pageba Godigo Dwagi Yai Mobo Bidi asali dao, da pageba polobadu asali tiwai dao. Tama tibaso, bidi mebago ‘Te bage baptais me sogobeo’ wagobeo,” wali.
ACT 10:48 Tama Pitago te hanibolo te po wali, “Megi dage Jisas Kraisgo nogide baptais sagameo.” Tama tilama, augwaligo agabolo te po wai, “Nage da dali hodobo si sela sogo bidao,” wali.
ACT 11:1 Te Jisasgo tagala palai bidi dabe me, te Jisasgo po wali pabo bidi dabe me, augwali tigidali Judia bulu tǫde bida bida pai. Tama augwaligo “Te Israel hani isąwai we bidi mego Godigo po odobuo,” wabo te po odali.
ACT 11:2 Tama Pita te Jerusalem buluba sabolali, te Judia tǫ tomode. Tialima, Juda we bidi me badu augwaligo homugo ‘Te Israel hani isąwai bidi augwaligo Jisasgo po wali pobaso da, hasia augwa tigiwali togwao,’ olama, te po bomo yai po elaluali. Augwaligo te homu elama, Pitabolo wado po wai,
ACT 11:3 “Te nage te tigiwali togosiąwai bidigo beba pelama, tama nage augwali dali hodobo nai tuyu yalio,” te po wai.
ACT 11:4 Tama te po obaso, Pitago agai yali sę po page tigidali augwalibolo pusa manio.
ACT 11:5 Agai te po wai, “Te ena Jopa bulude bidibadi, ena Godibolo po weyu bidibadi, na gagawai yai. Te nade eno nai me deli nami ugwa belama, dulubo suali. Te moni ugwa te dagaludu ena pageba sabolagasali.
ACT 11:6 Tama eno tomoba subadi yaide, te haniani hasa, haniani hasamani me, haniani ba dabe me, te nami ugwa tomode kisu delalubo suali.
ACT 11:7 Eno po me deli odalio, ‘Pita, nage hodaluama, te hasa dabe me badu nage ela tuao,’ wali.
ACT 11:8 Tiali goli, eno te po wali, ‘Genuai Bidi, te nai dabe da Juda we bidigo munu ma tubo nai dabe menio. Te dago habu sai nai dao. Eno tugobeo,’ te po wai.
ACT 11:9 Tama dagaludu enabolo te po ma dulali, agai enabolo te po wai, ‘Nago te nai habu sai dao po wagio. God aga digi te nai dwagi yai da obaso da, teda usu dao,’ wali.
ACT 11:10 Tama te sę enaba sela sogo sabolagaselama, tama nosali te nai tigidali me dagaluba kegasali.
ACT 11:11 Tama te nai kegasobadi, bidi sela ena pibo beba sabolali. Sisaria bulu bidi me deligo augwali tagala pelama, ena oda sagasai.
ACT 11:12 Godigo Dwagi Yai Mobo Bidigo enabolo te po wai, ‘Nage te bidi sela dali hodobo pao, homu si egio,’ wali. Tama ena Sisaria buluba pabo sogo, e Jopa bidi Jisasgo po wali pabo bidi me badu nogo kibisa deli olama, e bage da hodobo pali. Tama sabolama, da tigidali te bidi Kornilius agai be tomoba pali.
ACT 11:13 Korniliusgo da dali po pusali, agai te Godigo ensel bidi me deli aga be tomode dolalubo suali. Tama te ensel bidigo agabolo te po wai, ‘Nago bidi me Jopaba tagala palao, te bidi Saimon, aga nogi me Pita, odasa somainu yao.
ACT 11:14 Aga aselama, dage tigidalibolo po pusa mawaibao, naga hani tigidali Godigo ma somainu eyu yaibao,’ te ensel bidigo agabolo te po wali.
ACT 11:15 Tama nosali eno po pusubadi yaide, Godigo Dwagi Yai Mobo Bidi augwali tigiba dulalio, aga dago tigiba polobadu asali tiwai yai.
ACT 11:16 Tama eno tama homu yali, polobadu Genuai Bidigo dabolo te po wai, ‘Jon agai te we bidi ąįgo baptais mobao. Tialima, nosali Godigo agai Dwagi Yai Mobo Bidi dagebolo mawaibao,’ wali.
ACT 11:17 Dago te Genuai Bidi Jisas Krais polobadu agaba dena homu mubo si, Godigo agai Dwagi Yai Mobo dabolo olo mawai. Tama eno suali, Godigo te Juda hani isąwai dabebolo me te Dwagi Yai Mobo Bidi mani. Tama agai augwalibolo manigo da, teda eno mena tama Godigo tų paligobeo,” Pitago te po wai.
ACT 11:18 Te Jisasgo po wali pabo Juda bidi dabe augwaligo Pitago wali po odama, tama augwaligo wado po wabo tagalali. Tama augwaligo Godigo nogi ugwaba siyu, te po wai, “E, Godigo te sunumi dawai, te Israel bidi hani isąwai bidi dabe augwali me homu begelama, bugagia bidimainu yali,” te po wali.
ACT 11:19 Te bidi Stiven augwaligo ela munama isali sogo, te Jisasgo po wali pabo we bidi wi pelama, me badu te Finisia tǫba pali, me badu te tamu ąį tomode elalubo tǫ nogi Saiprus, teba pali, me badu te Antiok buluba sabolali. Tiali goli, augwaligo po te gasa hani dabe augwaliba me pusubeo. Menio. Tama augwaligo Godigo po te Juda dabebolo naga pusa mani.
ACT 11:20 Tialima, te Saiprus bidi dabe me, te Sairini tǫ bidi dabe me badu augwali Antiok buluba sabolama, tama te Israel hani isąwai bidi dabebolo Jisas Genuai Bidigo dwagi yai po pusa mani.
ACT 11:21 Tama te Genuai Bidigo bomo augwali dali hodobo bidama, tama umabo we bidi augwaligo Jisasba augwa homu mu muani, kolesaga begelama, Genuai Bidigo po wali pabo gagalali.
ACT 11:22 Te Jerusalemde bidali Jisasgo po wali pabo we bidigo te Antiok bulude Godigo genuai sę mu ebo po augwaligo odalio. Tama tibaso, augwaligo te bidi Barnabas tagala palali, te bulu Antiokba.
ACT 11:23 Tama aga Antiok buluba sabolama, suali, Godigo we bidibolo dwagi yai sę yali. Barnabas agai bugai homu pemene mu yali. Agai augwalibolo te po wai, “Dagego Godigo po wali bugagia piąo. Dagego te po tagalamuo, homu si egimio,” agai te po mobo mani.
ACT 11:24 Tama te bidi Barnabas aga dwagi yai bidi mu. Agai Godigo po bugagia konealubo bidi mu, Godigo Dwagi Yai Mobo Bidi agai kolesagade pągąnaluali. Tama te sogo umabo we bidi mu Jisasgo po wali pabo we bidi wadolagasali.
ACT 11:25 Te nosali Barnabas te Tarsus buluba te bidi Sol gegegi pali. Tama agai gegelama, sulama, Antiok buluba odasa asali.
ACT 11:26 Tama augwali si te Jisasgo po wali pabo we bidi tomode bidama, tama kibu be deli yali. Augwali sigo umabo we bidi Godigo po ola mani. Te Antiok we bidi augwaligo te Jisasgo po wali pabo we bidibolo te ‘Kristen’ nogi pobo gagalali.
ACT 11:27 Te sogo me, Godigo po pusa mabo bidi te profet dabe me badu Jerusalem taga pelama, augwali Antiok buluba sabolali.
ACT 11:28 Tama augwali tomode bidi me deli agai nogi Agabus, te bidi doligiluama, Godigo Dwagi Yai Mobogo bomogo te po pusa obaso, te po agai wai, “Tamadi tama tigidali bulu moni genuai nasi mu yaibao,” wali. (Tama megi dago koneai dao, te bidi nogi Klodius te Rom gavman tobolu bidi bidibadi, te moni nasi yali.)
ACT 11:29 Tama te Jisasgo po wali pabo we bidi augwaligo te po wai, “Bidi deli deli naga masigi munalubaso da, muagasu yao,” wai, “te dago te masigi sisinama, te Judia tǫde bidibo Jisasgo po wali pabo hani dabe augwali nasi ebo, dago augwali tau sinao,” te po wai.
ACT 11:30 Tama augwaligo te masigi sisinama, augwaligo Sol dali Barnabas sigo nogoba munama, augwali sigo te mone sela pelama, Jisasgo po wali pabo tobolu bidi dabebolo magi pali, te Jerusalemba.
ACT 12:1 Te bidi nogi Herot aga te Juda bidi bidali goli, te Rom gavmanigo aga te genuai gavman bidi nigilali. Aga bidibadi te Sol dali Barnabas si Jerusalemba sabolali. Herot agai te Jisasgo po wali pabo bidi me badu elebo sę ebo gagalali.
ACT 12:2 Tama agai enesigi bidi me deli tagala palama, Jon aga ama gomunai bidi Jems moni kago hwągo mage togwa sąyani.
ACT 12:3 Te Jems elebo sulama, Juda bidi hanigo bugai homu yali. Tama Herot agai te sulama, tama agai Pita gegali. (Tama agai tilama, te sogo Juda we bidigo moni nai mu udumai hagede, tama augwaligo homugo ‘Te polobadu Godigo dago wąį dabe tau sali sogo, te bo disąwai bret tuali sogo da,’ te homu yai.)
ACT 12:4 Tama augwaligo Pita nogo dulama, aga kalabusiba muani. Tama augwaligo Pita tonaluabo enesigi bidi nogo si olama, me badu sągą kibisa deli wagi solama sali. Me si me si nama bagego giligade me, hulide me, augwaligo me hasegeleyu, me hasegeleyu ilama, Pita tonaluali. Herot agai homugo Pita te tigidali we bidi gedude po tų ela mawainu yaibao, te moni nai nogeai sogo silibo si.
ACT 12:5 Tama tibaso, augwaligo Pita kalabus bede tonaluali. Tiali goli, Jisasgo po wali pabo we bidi augwaligo Godibolo gedu haluasa po hauwa sogo mu oduali, te Pita tau somainu yai.
ACT 12:6 Te Herot agai homugo ‘Pita te we bidi gesabiba do kigamu odasa asaibao, po tų yai hagede,’ homu yai. Tama te sogo hulide Pita te tonaluabo enesigi bidi si tomode piai. Augwali sigo nogo dali Pitago nogo dali daganama, aligabo bonogo kęwai. Tama te kalabus be tųde tonalubo enesigi bidi dolaluali.
ACT 12:7 Tama Godigo dagalude sę ebo ensel bidi me deli polo te kalabus be tomoba sabolama dolaluagasali, tama te be tomode ulago sela pali. Tama ensel bidigo Pita pila mubadi, tigiba diąnama, hodolai. Tama agai agabolo te po wali, “Nage polo hodaluao.” Tama tibadi yaide, te aligabo bono si augwa digi tǫba tuloluai.
ACT 12:8 Te ensel bidigo te po wai, “Naga ugwa bugagia gudama, kibu wali dąų wao. Naga sągą nadoba bulao,” wali. Pitago tilama, te ensel bidigo agabolo te po wai, “Tama nago moni ugwa homu pagede belama, tama nage ena wali asao,” wali.
ACT 12:9 Pita te ensel bidi wali pelama, te kalabus be taga pelama, buluba pai. Tama Pitago te ebo sę konebe, agai homugo ‘Mu ebowe, ma nade ebowe?’ homu yali.
ACT 12:10 Tama augwali sigo tomo tųde tonaluali enesigi bidi bidibadi ela soali. Ela solama, ma pelama, tama tomode me tonaluali enesigi bidi me, te me ela pali. Ma pelama, te moni dila pai aingo nigali tųba sabolali. Tama te moni dila pai aingo nigali tų sunumi aga digi dalasa pali, te augwali si te kalabus be taga pelama, te be nani tomoba pai. Tama augwali si tųdu dwasianu pabo ąǫ elama, ensel bidigo Pita polo taga pali.
ACT 12:11 Tama Pita agai homugo ‘Te yali sę te nade ebeo homu eyu, te eno mu koneanio,’ wali, ‘Genuai Bidi agai ensel bidi tagala palama, tama agai ena Herotgo nogode ma sali. Te Juda bidi hani augwaligo ena dali dwai sę yai hagede yali, tiali goli te Genuai Bidigo augwaligo homu dolai,’ Pitago te homu yai.
ACT 12:12 Te Pitago te homu elama, aga te we nogi Maria, Mariago beba pali. Te Maria aga ogwa agai nogi Jon, agai nogi me Mak. Tama te bede we bidi umabo sisinagaselama, Godibolo po weyu bidali.
ACT 12:13 Tama Pitago te be tųba bebego wali. Tama te bede sę ebo gesi we tųba suagasali, te gesi we nogi Roda.
ACT 12:14 Tama te wego Pitago dogoni koneai, tama agai dwagi yai homu mu ebaso, be tomoba polo ma pali, te tų dabe kegeda pali. Agai te we bidibolo te po wai, “Te Pita aga asai, bulu badu dolalubo,” wali.
ACT 12:15 Augwaligo te webolo “Nage wabo pabo po wabowe?” wali. Tiali goli, “Eno mu po obao,” wali. Augwaligo te po wai, “Te da, te Pitago noma dolagasali bogo,” wali.
ACT 12:16 Te augwaligo te po obadi yaide, Pitago te be tųba bebego oduali. Tama augwaligo tų dalama, Pita dolalubo sulama, noma mu sali.
ACT 12:17 Pitago agai nogo paliama, “Dage po tagalao,” te po wai. Tama Genuai Bidigo aga kalabus bede buluba dią palama soali po augwalibolo pusa mani. Agai te po augwalibolo wali, “Te po dagego Jemsbolo pusao, te Jisasgo po wali pabo tobolu bidi dabebolo me pusao,” wali. Tama olama, Pita te be tagalama, gasa beba pali.
ACT 12:18 Te sogo kigamu, te kalabus bede bidali enesigi bidi dabe augwa hasi te po wai, “Pita mena tama paliwe?” Augwaligo moni homu mu eyu bidali.
ACT 12:19 Tama Herotgo te yali sę po odama, “Pita gegegi piąo,” wali. Augwaligo gegegi pali, Pita sube. Tama tibaso, Herotgo te enesigi bidi dabe po tų elama, tama agai me badu bidibolo walama, “Augwali ela muao,” wali. Tama augwaligo te enesigi bidi dabe ela muani. Te sę elama, Herot te Judia tǫ tagalama, te Sisaria bulude osogo bidali.
ACT 12:20 Te nosali Herotgo te Tair bidi dali, te Saidon bidi dali, te bulu si bidi dabe dali agai moni sębę yai. Tama tibaso, tigidali sisinama, aga sugi pali. Hasia bolo augwaligo te Herotgo be tonalubo sę ebo bidi deli suali, agai nogi Blastas. Augwaligo te bidi ‘Abagi mu’ wali. Tama augwaligo agabolo hanalu wali, “Te Herotgo wado po mena tama isilaibawe?” Tama nosali augwali te Herot pageba pelama, te po wai, “Te dago nai abelebo nago bulude naga dago nai abelama, tubo dao. Tama tibaso, dago te hwįbo sę tagalinao,” wali.
ACT 12:21 Te Herot me deli sogo bodolu mani. Tama te bodolu mani sogode agai dwagi yai ugwa aluama, tama agai genuai bidigo wiegi yai ni namide dugayali. Tede agai te we bidibolo bobobage po ola mani.
ACT 12:22 Augwaligo agai po odama, tama augwaligo te po bomo elama, i hae weyu, te po wai, “Te po wabo bidi, bidi mugo wabe. Te po te god me deligo obao,” wali. Te po olama, augwaligo nogo bada olama, Herotgo nogi ugwaba sai.
ACT 12:23 Tama Herot agai Godigo nogi ugwaba sisąbaso, Godigo ensel bidi me deli agai Herotgo tigide elali. Tama te dwai gasi agai tigide pedelama, te dwai osoganigo agai tigide tudu pedelama, te nosali aga mu isali.
ACT 12:24 Te sogo Godigo po te umabo we bidigo odama, augwaligo Godiba augwa homu tigidali muani, te haniani bulude.
ACT 12:25 Te Barnabas dali, Sol dali, augwali sigo sę silama, Jerusalem taga pelama, Antiok be naniba ma sabolali. Te bidi Jon, aga nogi me Mak, te bidi si dali hodobo pali.
ACT 13:1 Te Antiok bulude, te Jisasgo po wali pabo bidi tomode, te Godigo po pusa mabo bidi profetgo pusubo po tiwai po wabo tiwai bidi me badu te bulude bidali, te Godigo po te we bidi augwaliba ola mabo bidi dabe me badu me bidali. Te bidi dabe augwaligo nogi me Barnabas, me Simeon, agai nogi me Husugo Bidi, me bidi Lusius, agai page bulu Sairini, me bidi Manain, te moni gavman bidi Herot aga age, tama me bidi nogi Sol.
ACT 13:2 Tama augwaligo tubo nai osogo gisilama, Godibolo nage dwagi yai da obadi, tama Godigo Dwagi Yai Mobo Bidigo augwalibolo te po wai, “Te Barnabas dali, Sol dali si te tedali sę emainu tedali muao, te eno dąį ilali sę augwali sigo emai yaibao,” wali.
ACT 13:3 Tama te po odama, augwaligo nai ma osogo tagalama, God dali po olama, augwa nogo tega si toboluba mubadi, augwali sigo te yabo tedali sęde sa muani. Tama tilama, tega si te sęba tagala palali.
ACT 13:4 Te Godigo Dwagi Yai Mobo Bidigo te Barnabas dali, Sol dali si tagala palama, augwali si te Selusia buluba pali. Tama Selusiade moni gebadu pelama, tama te tamu ąį bolama te Saiprus tǫ sabolali, te ąįgo u badu te e badu si bologobea sai tomo yagu tǫba sabolali.
ACT 13:5 Tama tede te be nani Salamis sabolama, augwali sigo te Juda dabego bomo yai po ola mabo be dabede Godigo po pusa mawai. Te bidi Jon, agai nogi me Mak, agai me tega si tau selama, te sę yali.
ACT 13:6 Te nosali augwaligo te Salamis bulu taga pelama, gasa habu badu, bulu me nogi Pafos, teba sabolali. Tama augwaligo te bulude Juda bidi me deli suali, agai nogi Barjisas. Te bidi agai dwai pobi dabe wabo bidi, tama agai tigidali we bidibolo tibo po ola mayu, “Ena Godigo po pusubo bidi dao,” wali.
ACT 13:7 Tama te bidi aga abagi te moni gavman bidi Sergius, aga nogi me Paulus, aga abagi dao. Tama Sergius, aga nogi me Paulus, agai te Saiprus bulu tǫde bidibo we bidi tigidali agai tonalubo da. Aga haniani kolesaga koneai bidi da. Tama te moni gavman bidigo Barnabas dali Sol si i olama, “Asao,” wali, agai homugo ‘Augwali sigo Godigo po enabolo ola mabo po odaio,’ te homu yai.
ACT 13:8 Tiali goli, te dwai pobi dabe wabo bidi Barjisas, te Grik pogo aga nogi Elimas, agai homugo ‘Moni gavman bidigo Godigo po wali pidali weyu,’ te homu elama, tega sigo wali po sela sąyani, te agai po ugwaba mu sali.
ACT 13:9 Te yali, te Sol agai nogi me Pol, agai gedugo te pobi wabo bidi bomonama tonaluali. Tama Godigo Dwagi Yai Mobo Bidi aga homude pągąnaluali.
ACT 13:10 Pol agai te po wai, “Nage da, te Satango ogwa dao. Te nago tigidali dwagi yai kolesaga boi bidi homu ąǫ, te ebe yabao. Nage dwai dwai kolesaga elama, tibo po wabo bidi me dao. Nago te Genuai Bidigo dwagi yai tų mu dolobao. Nago te tibo kolesaga tagalabo homu meniwe?
ACT 13:11 Tama Genuai Bidigo nogogo nage geduba elaibao. Nago gedu hulia selama, giliga ge osogo sugobeo,” Polgo te po wai. Tama polo te hano tiwai te bidi Elimas aga gedude halua selama, hulia si elaluali. Aga nogo dali sągą dali sigo naga tų gege pali. Agai homugo ‘Dego ena nogo tolama, tų ola magowe?’ te homu elama, bidi gegali.
ACT 13:12 Tama te moni gavman bidigo te ebo sę sulama, agai homu tigidali Jisasba muani. Aga noma mu sali, te Genuai Bidigo sę dabe augwali sigo aga ola mobaso tama noma sali.
ACT 13:13 Te nosali Pol dali aga dali bidali bidi dabe augwaligo moni geba selama, Pafos bulu tagalama, tama tamu ąį daidu pelama tama augwali Perga be naniba sabolali, te Pamfilia tǫde. Tiali goli, Jon aga nogi me Mak, agai tede te bage tagalama, aga Jerusalemba ma geasa pali.
ACT 13:14 Tama augwali Perga be nani tagalama, augwali pelama, Antiok be naniba sabolali, te gasa me tedali Antiok, te Pisidia tǫde. Tama te Juda dabego Sabat sogo augwali te Juda dabego bomo yai po ola mabo be tomoba pelama, augwali dugayali.
ACT 13:15 Tama bidi mego Mosesgo bomo yai po asęani buku nedama, tama nosali bidi mego Godigo polobadu po pusa mani profet bidigo asęani buku me nedama, tama te tobolu bidi dabego Pol dali Barnabas sibolo po ola tolali. Augwaligo augwalibolo te po wai, “Ama dede, dagego dwagi yai po me elalubaso da, teda da we bidibolo dage sigo megi da ola maiąo,” te po wai.
ACT 13:16 Tama Pol hodaluama, agai “Dagego odao,” olama, nogo muani. Agai te po wai, “Eno homugo dage Israel bidi me, dage Israel isąwai bidi hani me, tiali goli dagego Godibolo po mu wabo dao, dagego bugagia olo munama, eno po odao.
ACT 13:17 Da Israel we bidi dago God, agai dago wąį dabe polobadu dąį ilali. Tama augwali te Isip tǫde bobobage sogo bidibadi, Godigo augwali te genuai hani mu nigilali. Tama God agai bomogo augwali te Isip tǫ taga solama,
ACT 13:18 te kemi tǫ bidi meni yai bulude bilidubadi, kibu be bidi sigo nogo sągą sese te 40 yia silama yali. Tama te kibu be tomode bidibadi, augwaligo dwai kolesaga ebo sęgę Godigo selama, agai tonaluali.
ACT 13:19 Tama Godigo te Kenan tǫde bidali hani a nogo olama, me badu nogo si wagi solama bidai bidi hani ela silali. Tama ela silama, Godigo te tǫ te Israel hanibolo mani.”
ACT 13:20 “Te augwali te tǫde bidama, te kibu be hauwa mu te 450 yia silali. Tama te silama, nosali Godigo te Israel hani dabe augwalibolo po tų dodolobo bidi dabe mawai. Tama me isibaso, hasegeleyu, hasegeleyu, tama ela pali. Tama bida bida pelama, te bidi Samuel dią holali sogo sabaligi pali, te Godigo po pusa mabo profet bidi.
ACT 13:21 Tama te sogo augwaligo Godibolo hanalu wali, ‘Da gegasa pabo bidi, moni genuai gavman bidi dabolo mao,’ wali. Tama God agai te bidi Kis aga ogwa Sol te sa muani. Te bidi agai hani nogi Benjamin. Agai augwaligo moni genuai gavman bidi nigilama, tama bidali. Te sę eyu bidibadi, kibu be te 40 yia silali.
ACT 13:22 Tama tilama, Godigo Sol hasegelama, Devit te moni genuai gavman bidi nigilama bidali. Tama Godigo te po Devitde wai, ‘Megi eno te bidi Devit sualio, te bidi Jesigo ogwa, eno agade dwagi yai homu ebao. Nosali eno sę tigidali agai yaibao,’ Godigo te po wai.
ACT 13:23 Tama Jisas, te Devitgo nosali hani bidi, te bidi Godigo selama, da Israel dabe tau sabo bidi nigilali, Godigo polobadu wali po tiwai.
ACT 13:24 Tama Jisas agai yali sę gagalisąbadi, Jon agai te Israel we bidi tigidalibolo te po wai, ‘Dagego dwai kolesaga ebo tagalama, homu begelama, eno dage baptais mawaibao,’ wali.
ACT 13:25 Tama Jon agai sę silabo maga ebadi, agai te we bidibolo te po wai, ‘Dagego homugo ena de dawe?’ wali. ‘Ena te dagego tonalubo bidi menio. Tiali goli, dagego odao. Bidi me deli nosali aga ena tudi badu asaibao. Aga da, te genuai bidi mu da. Ena da nogi elalubo bidi menio. Eno agai sągą nadoba bono pisigabo sę yainogo ebaso da, teda te sę ebo eno usu egobeo,’ Jongo te po wai.”
ACT 13:26 Te bidi Polgo te po olama, po me ola mani, “Ama dede, abe dede, dage Abrahamgo hani bidi dagego me, odao. Dage Juda bidi hani isąwai bidi, dage God wali pabo dao, dagego me odao. Godigo agai da ma dobola sabo tų nigali po te da tigidalibolo tagala palali.
ACT 13:27 Tama te Jerusalemde bidibo we bidi me, augwaligo tobolu bidi dabe me, augwaligo te bidi Jisas agai yali sę page konebe, agai wali po page me augwaligo konebe. Augwaligo te Godigo po polobadu pusa mani bidi profet dabego wali po tigidali Sabat sogode odama, tama augwaligo te po page bugagia konebe. Tiali goli, augwaligo homugo Jisas elaibao homu e baso, polobadu Godigo po pusubo profet bidi dabego wali po megi nai gilama mu walalio.
ACT 13:28 Jisasgo dwai kolesaga munu me isąbadi, augwaligo Jisas olo dali po tų ela mani. Augwaligo te bidi Pailat agabolo moni po dagą weyu, te po wali, ‘Te bidi Jisas elao,’ wali.
ACT 13:29 Polobadu Godigo po pusa mani bidigo bukude asęani po tiwai augwaligo te sę Jisasgo tigide ela silama, bidi sigo aga ni pedaide daganama, agai tigi selasa pelama, moni masigi dudulawe tomoba mugi pali.
ACT 13:30 Tiali goli, Godigo aga ma hodolama, tama ma bidibao.
ACT 13:31 Tama nosali te polobadu aga dali Galilide bilali hani bidi dabe me aga dali Jerusalemba pali, agai augwalibolo hauwa sogo dią holali. Te hani augwali tigidali Israel we bidi tomode bilu, te ebo suali sę po pusubo dao.”
ACT 13:32 “Tama dadi si me dage pageba sabolama, te Godigo dwagi yai gesi po dagebolo pusa mobao. Tama te bomo yai po Godigo polobadu dago wąįbolo walai po dao. Tama megi te po augwaligo wai puluba da pagede mu pedalalio, da tau somainu yai. God agai Jisas gų pagede ma hodolai dao. Polobadu bidi me deligo te Godide dwagi yai homu eyu wabo tęąbi buku yabe side te po asęani, ‘Godigo te po wai, “Nage eno ogwa mu dao. Tama megi nage eno ogwa mu nigilai dao.” ’
ACT 13:34 Jisas isilama, Godigo aga gų pagede ma hodolai, agai tigi nosali damua pogobe. Tama polobadu Godigo te sę yabo homu ebadi, te po wai, te bukude asęani, ‘Polobadu eno Devitbolo po ola mawai, agabolo dwagi yai sę yabo po. Tama megi eno nagebolo me te po e mobao.’
ACT 13:35 Tama te asęani buku yabe mede Devitgo te po me Godibolo wali, ‘Naga dwagi yai sę ebo bidi naga agai tigi gų pagede damua pomai hagede tagalogobeo,’ wali.
ACT 13:36 Tama Devit agai Godigo sę aga hani we bidi tomode elama, tama aga nosali isai. Tama isąma, augwaligo aga wąįgo masigi dudulaweba mugi pai. Tama tede aga tigi damua pai. Tama dago Devitgo polobadu wali po koneao, te po wali Devit aga tigide wabe. Agai tigide wabeo.
ACT 13:37 Tiali goli, te Godigo ma hodolali bidi agai tigi damua pabeo.”
ACT 13:38 “Ama dede, dagego te sę bugagia koneao. Dago dagebolo Jisasgo tigidali yali sę dagebolo pusa mobe dao. Tama agai dago tigidali dwai sę ebo sela sąyabo tų nigali. Duga bugagia koneao. Niwai we bidi augwaligo augwa homu Jisasba mubaso da, teda Godigo augwaligo yali dwai sę sela sąwaibao. Tiali goli, Mosesgo bomo yai po dabe augwaligo dagego dwai kolesaga ebo sę sela sągobeo.
ACT 13:40 Tama dage dua dao. Te Godigo po polobadu pusa mani profet bidi dabe augwaligo wali po dage pagede mu pedalidali weyu, dua dao.
ACT 13:41 Augwaligo te po asęani, Godigo te po wai, ‘Odao, dage Godigo po sela sąbo bidi dabe dao. Dagego tonaluama, moni homu elama, nosali noma siąo. Tiali goli, dage isaibao. Eno dage pagede sę ebadi, dagego te sę ebo dagego homugo mu konegobeo. Tama bidi me deligo dagebolo te sę page pusa mobadi, dagego agai wabo po page bugagia konealugobeo,’ Godigo te tama po wai,” Polgo te po wali.
ACT 13:42 Te Pol dali Barnabas dali si te Juda dabego bomo yai po ola mabo bede po pusulama buluba dią sobadi, te we bidi augwaligo tega sibolo te po wai, “Me Sabatde dage sigo dabolo te po ma ola magameo,” wali.
ACT 13:43 Tama te we bidi tedela pelama, te Juda dabe hauwa augwali si wali pali. Tama te Juda hani isąwai we bidi hani Juda haniba wadolagasali, augwali me te Pol dali Barnabas dali wali pai. Tama augwali sigo augwalibolo te po ola mani, “Dagego Godigo po odoyu, bugagia bidiąo. Tama God agai bomo dologode bidiąo, agai dage tau somainu, te dage bugagia bidimainu tama yao,” wali.
ACT 13:44 Te nosali Sabat sogode te be nani we bidi tigidali pąde sisinagasali, tega sigo Genuai Bidigo po wabo odainu yali.
ACT 13:45 Tama te Juda dabe me badu augwaligo te umabo we bidi sulama, augwali Pol dali Barnabas side dwai homu yali. Augwaligo Polgo wabo po sela sąnama, aga nogi aiyaba elaluali.
ACT 13:46 Tiali goli, Pol dali Barnabas sigo bomo selama, wi isąma, te po wai, “Dago koneai, Godigo po hasia bolo dage Juda haniba mawainu yai. Tiali goli, dagego agai po sela sąbaso da, teda dago dage Juda hani taga paibao. Duga homugo tama te da, dagego bugagia bida bida pabo kolesaga sogobeo homu ebaso da, teda da te Juda hani isąwai we bidi haniba tau sigi paibao. Godigo dabolo te bomo yai po wai dao,
ACT 13:47 ‘Nage eno sole tiwai nigilibe dao, te Juda hani isąwai te tigidali tǫ pedaide bidalubo we bidi augwaliba ula ilimai hagede ebao. Tama nago tigidali tǫde bidibo we bidi tau selama, Godigo augwali ma somainu yao,’ wali,” Polgo te po wai.
ACT 13:48 Tama te Juda hani isąwai we bidi augwaligo Polgo wali po odama, augwaligo bugai homu mu yai. Bugai homu mu elama, augwaligo te Genuai Bidigo po ugwaba sai. Tama tigidali we bidi Godigo sesemane bida bida pabo kolesaga somai hagede polobadu sa muai we bidi, tama augwaligo megi Godigo po odama, te po mu po dao homu elama, te poba augwa homu tigidali muani.
ACT 13:49 Te tǫde bidibo we bidi augwaligo Genuai Bidigo po oda pela silali.
ACT 13:50 Tama te Antiok be nanide te Juda hani isąwai genuai we dabe bidali. Tiali goli augwaligo Godibolo lotu po wabo dao. Tama te Juda dabe augwaligo te nogi yai we dabe dali, te kaunsil bidi dabe dali tigidalibolo bidi geme posobo po wali, Pol dali Barnabas si elemainogo yai. Tama augwaligo tega si gasa tǫba gudulali.
ACT 13:51 Tama tibaso, augwali sigo sągą nadobade elaluali tǫ hogomu sela sąwani. Te yali sę te page elalubo. Augwali sigo te bidi dabego dwai kolesaga ebo sulama, te sę yali. Tega sigo te po wai, “Duga sę dao.” Tama augwali si te Aikoniam buluba pali.
ACT 13:52 Tama te Antiokde bidali Jisasgo po wali pabo we bidi augwali bugai homu yali, te Godigo Dwagi Yai Mobo Bidi augwaligo homude pągąnaluali.
ACT 14:1 Te bidi Pol dali Barnabas si te Aikoniam be naniba sabolama, te augwali sigo polobadu te bulu Antiokde yali sę tiwai ma yali. Augwali si te Juda dabego bomo yai po ola mabo be tomoba pelama, Godigo po bugagia pusa mani. Bugagia pusa menama, te Juda dabego me, te Juda hani isąwai bidi dabego me, te Jisasgo wiegi yai poba augwa homu tigidali muani, umabo we bidigo tialio.
ACT 14:2 Tiali goli, te Juda dabe me badu augwaligo te po odobo hagela homu ebaso, augwaligo te Juda hani isąwai dabebolo bidi posobo po geme walali, augwaligo te Pol dali Barnabas dali sigo ebo sę dolomainu yai.
ACT 14:3 Augwali si Aikoniamde hauwa sogo mu bidama, augwali sigo Genuai Bidigo po bomo elama, mu pusali. Augwali sigo te po wai, “Te Genuai Bidi agai we bidibolo dwagi yai sę ebo homu ebo dao.” Tama Genuai Bidigo agai bomo augwali sibolo menama, augwali sigo we bidi noma sabo sę dabe yali, te we bidigo ‘Te bidi sigo wabo po mu dao’ omainogo yai.
ACT 14:4 Tama te be nanide bidali we bidi tomode si pedali. Me badu we bidi augwaligo te Juda dabego po wali pai, me badu augwaligo te Jisasgo tagala palai bidi sigo wali po wali pai.
ACT 14:5 Te Juda hani isąwai bidi dabe me badu me, te Juda dabe me badu me, augwaligo genuai bidi dabe me, augwali tigidaligo te homu yai, “Dago te bidi si tigiba masigi sąnama, ela muaibao,” homu yali.
ACT 14:6 Tama te bidi sigo tiwaibao wabo po odobo si, tama augwali si wi pelama, Listra buluba pali. Nosali te Derbe buluba pali, te bulu si te Likonia tǫde elaluali. Tama te tǫ pąde elaluali dwasianu bulu meba pali.
ACT 14:7 Te tigidali bulu tǫde augwali sigo Godigo dwagi yai po tigidali we bidibolo pususu bilali.
ACT 14:8 Te Listra bulude te sągą dwai bidi me deli bidali. Te bidi aga idago tabide sągą tama dwai ame nai, tama agai aga sągągo bilibo menio.
ACT 14:9 Tama agai dugulalu, Polgo wabo po odali. Tama Pol agai suali, te bidi agai homu tigidali te Jisasba bugagia muani kolesaga te usu yali, aga dwagi yai ma ilainogo elalubo usu da homu yali. Tama Pol agai te bidi gedugo bomonama dolo ponama tonaluali.
ACT 14:10 Tama tialima Polgo bomonama tonalu, agai po bomonama pusuyu te tama wali, “Nage hodaluama, naga sągą sigo bugagia dolaluao,” te po wai. Tama te bidi agai polo hodaluama, aga sągągo bilibo gagalali.
ACT 14:11 Tama te Likonia tǫ we bidi dabe hauwa augwali sisinagaselama, Polgo wabo po odali. Augwaligo Polgo te yali sę sulama, Likonia pogo moni i wali, “Dago god dabe dagaludu da pageba dulalio. Tama te bidi sigo tigide bidibo,” te po wai.
ACT 14:12 Tama te we bidi augwaligo Barnabas te Sus nogi poai, te Sus aga augwaligo genuai tobolu god da. Tama augwaligo Pol suali, agai po wabo bidi, augwaligo te nogi Hermes poai, augwaligo po wabo god nogi.
ACT 14:13 Tama te tibo god Sus lotu wabo be te be nani sesege badu elaluali. Te Susbolo nai ulama mabo pris bidi agai omai kibu bulmakau dabe magasali. Tama magaselama, te dwagi yai ni yabe tau dabe selama, kibu bulmakau magede domonani, au yali. Augwaligo homugo te kibu bulmakau dabe elama, te bidi sibolo augwaligo lotu po wainogo.
ACT 14:14 Te Barnabas dali Pol si augwaligo te we bidi augwaligo augwali sibolo lotu po wainogo ebo sulama, augwa si ugwa pisa yali, augwali sigo te sę hagela baso. Augwali si te we bidi tomoba polo pelama, te we bidibolo bomona weyu, te po wali,
ACT 14:15 “Dagego te kolesaga egimio. Dadi si me bidi dage tiwai tama dao,” wali. “Dadi si dage pageba asali, Godigo dwagi yai po dagebolo pusa mawainogo asai dao. Tama dagego te odolali lotu po wabo tibo god tudiba muiyąo. Tudiba munama, dagego te God mu pageba asiąo, hauwa sogo bida bida peduabo God pageba asiąo. Agai te dagalu me, tǫ me, tamu ąį me, tigidali tede bidibo nai dabe me agai nigai dao.
ACT 14:16 Tama polobadu Godigo tigidali we bidi hani augwa kolesagadu pabo sula tagalai.
ACT 14:17 Tiali goli, agai tigidali sogo tigidali we bidi augwaligo aga bidibo konemainu, dwagi yai nai dabe we bidi tomode mubo dao. Agai te dagaludu tulubage me, giliga nanobo sogo me, agai dąį ilibo dao. Tama agai nai pedalama, tama dage bugai homu emainogo te sę ebo dao,” augwali sigo te po wai.
ACT 14:18 Tama te we bidi augwaligo te bidi sibolo lotu po bomonama wainu yali, augwali sibolo nai noga mawai hagede me. Augwali sigo moni sę bomo mu elama, te we bidigp ebo sę paliali.
ACT 14:19 Te nosali te Juda dabe me badu Pisidia tǫde bulu me si elalubo, me nogi Antiok, me nogi Aikoniam. Te bulu side Pol dali Barnabas dali si polobadu osogo bidali. Te Juda dabe augwali tedu te Listra buluba aselama, augwaligo tigidali we bidi homu hodolama, tama augwaligo Pol tigiba masigi sąwai. Masigi sąnama, tama agai mu isai bidi gagayali homu elama, augwaligo aga tigi be nani buluba kegasa pelama, mugi pali.
ACT 14:20 Tialima, te Jisasgo po wali pabo we bidi augwali sisinagaselama, agai tigi bologobea sagasali. Bologobea sagaselama, Pol ma hodolama, te be nani tomoba ma pali. Tama te sogo kigamu aga dali Barnabas dali si te gasa be naniba pali, te be nani nogi Derbe.
ACT 14:21 Te bidi Pol dali, Barnabas dali augwali sigo te bulu Derbede bidibo we bidibolo Jisasgo dwagi yai po pusa mani. Tama pusa menama, we bidi hauwa mu Jisasba augwa homu mu muani. Tama augwali si te Listra be naniba tǫdu ma geasa pelama, te Antiok be naniba sabolali, te Pisidia tǫde.
ACT 14:22 Augwali sigo te Jisasgo po wali pabo we bidibolo dwagi yai po mobo mani, augwaligo Jisas konealubo homu dąų walomainu. Augwali sigo te genuai po ola mawai, “Dago te Godigo tųdu pobadi, gasa we bidi augwaligo dabolo haniani sęgę mawaibao, tama nosali Godigo da tonalubo buluba da sabolaibao,” te po wai.
ACT 14:23 Tama tigidali bulude augwali sigo Jisasgo po wali pabo hani we bidi tonaluabo tobolu bidi dąį ilali. Tama nai osogo gisilama, Godibolo po olama, augwali sigo te tobolu bidi dabe Godigo nogode muai, augwaligo aga konealubaso.
ACT 14:24 Te Pol dali, Barnabas dali si augwali te Pisidia tǫ tomodu pelama, te Pamfilia tǫba sabolali.
ACT 14:25 Teba sabolama, augwali sigo Godigo gesi dwagi yai po te Perga be nani we bidibolo pusa mawai. Tama tedu pelama, Atalia buluba sabolali.
ACT 14:26 Tama augwali sigo Atalia bulu taga pelama, moni geba deli selama, tama ąįdu pelama tama Antiok buluba sabolali. Tama te bulude polobadu Jisasgo po wali pabo hanigo augwaligo nogo tega si tobolude munama, agai tega si tau somainu, Godibolo gedu haluasa po wai. Te po olama, augwaligo te bidi si polobadu tagala palali. Tama augwali si te tǫba ma sabolali, te sę egi pomai hagede, tama augwali sigo te sę ela bila silama, ma asali.
ACT 14:27 Tama augwali si Antiokba ma sabolama, augwali sigo Jisasgo po wali pabo we bidi dali deliba sisinagasali. Tama augwali sigo te sę yali po augwalibolo pusali, tigidali nai Godigo augwali si tau sali sę me, tama Godigo te Juda hani isąwai we bidi augwaligo agai po konealubo sunumi dayali.
ACT 14:28 Tama augwali si Jisasgo po wali pabo hani dali bobobage sogo mu bidali.
ACT 15:1 Te Jisasgo hani we bidi me badu augwaligo Judia tǫ taga pelama, Antiok be naniba sabolali. Tama augwaligo Jisasgo hani Juda bidigo lotu po wabo kolesaga wali pomainu ola manio. Tama augwaligo te po wali, “Moses agai bomo yai pogo te tigidali bidi Godigo hani mu bidao wali. Tama tilama, tigiwali togwao, Godigo dąį muao. Tama dagego te sę isąbaso da, Godigo dage sogobeo,” te po wai.
ACT 15:2 Tama Pol dali Barnabas dali augwali sigo te po wabo mu hagela yali. Tama augwali sigo te Juda bage dali moni pogo wąbi hwįani, tama augwali sigo moni wado mu yali. Tama Antiokde bidali Jisasgo po wali pabo we bidi hanigo Pol dali Barnabas dali si, te bidi dabe me badu me, augwali Jerusalemba moni po miboba augwali pomainu homu yali. Jisasgo tagala palai bidi dabe me, tobolu bidi dabe me, augwali deliba sisinama, te po dodolomainu yaibao.
ACT 15:3 Tama tibaso, Jisasgo hani Antiok be nani bidigo augwali Jerusalemba pabo bidi dabe tagala palali. Tama augwali Fonisia tǫ dali, Samaria tǫ dali, te bulu si tomodu augwali pali. Tama te sogo augwali Jisasgo hani dali bidu, augwaligo sę ebo po dali pusali, me badu Juda bidi hani isąwai bidi, augwali te sogo Jisasba augwa homu mu muani, te po augwalibolo pusa mani. Tama te sogo augwaligo te po odama, augwaligo moni bugai homu mu yali.
ACT 15:4 Tama peyu, augwali Jerusalemba sabolali. Tama tigidali Jisasgo hanigo augwali sulama, dwagi yai homu yai, Jisasgo tagala palai bidi me, tobolu bidi me, augwaligo moni dwagi yai homu eyu augwali asobo suali. Augwali sigo augwalibolo Godigo tigidali sę augwali si bilu yali sę po pusa mani.
ACT 15:5 Tiali Jisasgo hani bage me badu augwali te Juda dabego lotu po wabo bidi Farisi sibi da. Augwali doligulama, te po wali, “Te Jisasgo po wali pabo we bidi me badu, augwali te Juda hani isąwai bidi dabe dao,” wali. Tama augwaligo augwali sibolo tama wali, “Dage sigo te hanibolo te po wao, augwaligo Godigo Mosesbolo mani po mu wali pao, tama dage tigiwali togolama, tama Mosesgo yali kolesagadu wali pao,” te po augwali sibolo tama ola mani, te Farisi sibi bidigo.
ACT 15:6 Tialima, nosali te Jisasgo tagala palai bidi me, te tobolu bidi dabe me, augwali sisinagasali, te po dodolomainu. Augwaligo homude elaluali po pususu pali.
ACT 15:7 Pususu pelama, Pita doligulama, te po tama wali, “Ama dede, duga kone dao, Godigo homugo te Juda hani isąwai bidi me augwaligo te Jisasgo dwagi yai po odama, augwa homu te poba mumainu yali. Tama polobadu mu God agai ena dage tomode te dwagi yai po augwalibolo pusumainu sa muani.
ACT 15:8 Tama God agai da dago homu tigidali konebo da. Tama God agai Dwagi Yai Mobo Bidi te agai dabolo hasia mani tiwai, tama nosali augwalibolo me manio, te Juda hani isąwai bidi dabe. Tama menama, dago koneagameo, Godigo augwali dali dwagi yai homu ebo dao.
ACT 15:9 Tama Godigo te Juda hani isąwai bidi hanibolo ebo sę te ebo kolesaga tiwai, agai da dali yali, polobadu. Tialima, augwaligo te Jisasba augwa homu mubo si, agai augwaligo dwai kolesaga yali sęgę sela sąwai dao.
ACT 15:10 Tama dagego te Juda hani gagasiąwai bidi sęgę mabo tagaliąo. Dagego ‘Dage Mosesgo po naga wali piąo’ po augwalibolo wagimio. Magi basowe? Augwali usu egobeo. Suao. Dago wąį me, dago me, te Mosesgo mani bomo yai po wali pabo sę bugagia wali pogobeo. Te tiwai moni sęgę dago tudide tolobo dao. Tama tiwai sęgę dagego augwalibolo mobaso da, dagego God usu saibao.
ACT 15:11 Te dwali. Tialima, dago Jisasba dago homu tigidali mubo dao, tama dago konebo da, Genuai Bidi Jisas agai dago yali dwai sę agai tolai dao. Da tigidali we bidi Godigo da te tų deligo naga saibao. Tialima, agai te Juda hani isąwai we bidi me te tųdu naga ma saibao,” Pitago augwalibolo te po wai.
ACT 15:12 Te po minama, tigidali bidi po sagia selama, Barnabas dali Pol dali sigo tigidali bomai sę Godigo augwali si nogode yali sę po pusali, te sogo augwali si te Juda hani isąwai bidigo tǫde biliyu, te sę yali po pusali.
ACT 15:13 Tama augwali sigo te po silibo si, Jems aga augwa tobolu bidi gagalama, aga dodoligulama, te po wali, “Ama dedeo, dagego eno po odao.
ACT 15:14 Megi te Pita agai po dabolo pusali. Tama dago koneao, hasia sogo mu Godigo te agai hobede ebo homu te Juda hani isąwai we bidibolo me manio. Tama Godigo me badu aga hani mu nigimai hagede dąį ilai dao.
ACT 15:15 Tama Godigo pedauwalide po selama pusubo buku da deli po tama tiwai augwaligo asęai da. Te po e tiwai,
ACT 15:16 ‘Genuai Bidi agai te po wai, “Nosali sogo ena ma asaibao. Augwaligo be me dodolama bidibo, polobadu be gagawali, degasa palio. Tiali goli eno te be ma gesi sę yaibao. Tama te tiwai eno gesi kolesaga te Devitgo hani ma hodalagasaibao,” wali.
ACT 15:17 “Tama gasa hani augwaligo me ena gegebo sę yaibao, ena Genuai Bidi dao, te Juda hani gagasiąwai bidi me. Tiali goli, eno augwali eno hani tomoba asomainu eno i wai dao,” wali.
ACT 15:18 “Polobadu mu Genuai Bidi agai te sę pedalabo po wai dao, tama megi te sę pedalalio.”’”
ACT 15:19 Te Jems agai te po pusali, “Eno homugo tama tibao. Dago te Juda hani isąwai Jisas wali pabo bidi dago sęgę magio. Augwali God pageba asali, tama dago augwali dago kolesagadu pao olama i wagio.
ACT 15:20 Me ma, dago augwalibolo pas tolinao. Tama te pas tomode te po wainao, ‘Dagego te augwaligo te tibo godibolo ula mabo nai te dagego tugimio, dagego kibu me agai kaneme gelisąwai kibu tugimio, kaneme me tugimio. Te we sabo bomo yai po bolama, dwai penani sę egimio,’ waibao.
ACT 15:21 Te sę po Moses agai aga bukude asęai dao, polobadu mu. Tama lotu po wabo sogo tigidali augwaligo te Mosesgo po lotu be tomode nedebo dao. Tialima, augwaligo koneama, te sę ebo habu mu selai dao,” Jemsgo te po wai.
ACT 15:22 Te Jisasgo sa muai tagala palai bidi dabe dali, te tobolu bidi dabe me, te Jisasgo po wali pabo we bidi tigidali me, augwaligo deli homu elama, bidi me badu augwaligo Antiok buluba tagala palabo homu yali. Augwaligo bidi si dąį ilai, te Pol dali Barnabas si dali pomainu yali. Bidi si dąį ilai, te bidi nogi me Judas, agai nogi me Barsabas, te gasa bidi nogi me da Sailas. Jisasgo po wali pabo bidi dabe augwaligo te bidi side dwagi yai homu yali.
ACT 15:23 Tama augwaligo te pas sela pomainu, augwaligo te po asęani, “Da Jisasgo tagala palai bidi dabe me, tobolu bidi dabe me, te Jisasgo hani me, Jerusalemde bidibo bage, da tigidali dagego ama da. Dago te pas dage pageba te asęna tolobao wali, Siria bulu me, Antiok bulu me, Silisia bulu me, dage Israel hani isąwai bidi, dago dagebolo bugai homu ebao, te po wali.
ACT 15:24 Tama dago po odalio, dago hani bage me badu augwali dage pageba aselama, augwaligo dagego homu dolali. Augwaligo me me po walio, tiali goli dago te hani dage pageba me tagala palai menio.
ACT 15:25 Tama megi da deliba sisinagaselama, dago deli homu elama, te bidi si dage pageba tagala palali. Augwali si Pol dali Barnabas dali si hodobo pali. Pol dali Barnabas dali si te dago godolo mu ebo da.
ACT 15:26 Tega sigo Genuai Bidi Jisas Kraisgo sę eyu, moni homu ebe, gasa bidigo augwali elebaso, usu dao homu yali.
ACT 15:27 Tialima, dago Judas dali Sailas dali te augwali si dage pageba tagala palobao. Augwali sigo dago pasde asęani po tiwai po dagebolo pusa mawaibao.”
ACT 15:28 “Godigo Dwagi Yai Mobo Bidi dali, da dali si te deli homu ebo da, dago dagebolo gasa sęgę magobeo, da Juda hanigo kolesagadu wali pabo sęgę.
ACT 15:29 Dago homugo e po naga dagego wali piąo. Dagego te augwaligo te tibo godibolo ula mani nai dagego tugimio. Kaneme me tugimio. Agai kaneme gelisąwai kibu tugimio. Dagego we sabo bomo yai po bolama, penani egimio. Tama dago e ola mani po dagego wali peyu da, te dage bugagia bidaibao. Tama dao. Dage tao,” te po asęani.
ACT 15:30 Augwaligo te pas asęnama, te bidi dabego sela pelama, te Antiok be naniba sabolali. Tama augwaligo tigidali Jisasgo po wali pabo hani deliba sisinama, te pas augwalibolo mani.
ACT 15:31 Tama te sogo te Antiok we bidigo te pas asęani po odama, augwali bugai homu mu yai, te pas tomode elalubo pogo augwaligo homu tau siyu dąų walali.
ACT 15:32 Te Judas dali Sailas dali te bidi si Godigo pedauwalide po selama, pusubo bidi da. Augwali si da Jisasgo hani dali hauwa sogo mu bidali, tama augwali sigo augwalibolo po pusulama, tau siyu dąų walali.
ACT 15:33 Tama augwali si tede hauwa sogo bidama, tama nosali Jisasgo po wali pabo hanigo tega si Jerusalemba ma tagala palali. Tama augwaligo te po wali, “Dage dwagi yai homu dali pao, te dage tagala palali bidi dabe pageba,” te po wai.
ACT 15:34 Tiali goli, Sailas aga homugo nigilama, te Antiok bulude bidali.
ACT 15:35 Te Pol dali, Barnabas dali si augwali si Antiok bulude bidali. Augwali si tede bidu, tama Jisasgo po wali pabo we bidi dali wadolagasali, we bidi Godigo dwagi yai po pusubaso bidali. Augwali si Jisasgo po wali pabo we bidi hani dali bidu, Godigo dwagi yai po pusubadi, Godigo po odisa yali we bidibolo Godigo dwagi yai po pusu baso, Jisasgo po wali pabo we bidi pageba wadolagasali.
ACT 15:36 Te nosali me badu polua silama, Pol agai Barnabasbolo e tama po walali, “Dadi si ma pelama, dadi sigo Genuai Bidigo po polobadu pusa mani we bidi augwali Godigo po bugagia wali pabo wenama, sugi pinao,” te po wai.
ACT 15:37 Barnabas agai homugo te bidi Jon, agai nogi me da Mak, aga dali pai homu yai.
ACT 15:38 Tialima, polobadu Mak aga augwali si dali pai goli, Pamfilia tǫde bidibadi, ma wi pai. Tama agai augwali sigo te yali sę silisąbadi yali. Tama tibaso, Polgo aga dali wado po wali, te Barnabas dali. Pol agai homugo Mak augwali si dali pogobe homu yali.
ACT 15:39 Tama Pol dali Barnabas dali si deli homu ebe, tama tilama, augwa si ma wado po olama, bobegali. Tama Barnabas agai Mak selama, augwali si moni geba selama, tamu ąį tomode elalubo Saipras tǫ teba pai.
ACT 15:40 Tiali goli Pol agai Sailas dąį ilai dao. Tama Jisasgo po wali pabo bidi hani augwaligo Godibolo po olama, “Tega si Genuai Bidi, nago tau sao,” te po wali. Tama olama, augwaligo tega si tagala palali.
ACT 15:41 Tama augwali si Siria tǫ tomode tǫdu pali, te Silisia tǫ tomode me. Tama augwali sigo Godigo po wali pabo we bidi hani tau sabo dąų walobo sę ela bilali.
ACT 16:1 Te Pol aga Derbe be naniba sabolali. Tama nosali te Listra buluba pali. Tede agai bidi me deli suai, te bidigo nogi Timoti. Aga dali, aga ida dali, augwali si augwa homu tigidali Jisasba munaluali. Te aga ida da te Juda hani we da. Tialima aga aya da, te da Grik hani bidi da.
ACT 16:2 Tama te tigidali Listra bulude bidibo bidi me, te Aikoniamde bidibo bidi Jisasgo po wali pabo hani, augwaligo Timoti ‘Te dwagi yai bidi dao’ homu yai.
ACT 16:3 Tama Pol agai homugo Timoti aga dali sęba paibao homu yali. Tiali goli, agai koneani, te Juda hani bidi augwaligo Timoti aga ayade moni homu yali, augwaligo te homu yali, ‘Aga aya da Grik bidi da’ homu yali. Tama aga aya agai te sogo Timoti tigiwali togobe. Tialima, Polgo Timoti tigiwali togwali, te Juda bidi gagamai hagede dąį ilali da, te Juda dabego Timoti agai wabo po odomainu yali.
ACT 16:4 Tama augwali te bulude bilali, te sogo Jisasgo po wali pabo hani dali sisinama bidali, te Jisasgo tagala palai bidi me, tobolu bidi dali augwaligo Jerusalemde polobadu wali po ola mani. Augwaligo “Dagego te wali po bugagia wali piąo,” wali.
ACT 16:5 Tama tibaso, Jisasgo po wali pabo hani tigidali augwaligo bomo salio. Tama umabo we bidi te Jisasgo po wali pabo we bidi tomoba tigidali deli deli sogo asali.
ACT 16:6 Te nosali Pol dali aga dwasianu hani dali, augwaligo homugo te Esia tǫba pabo homu yali. Tiali goli Godigo Dwagi Yai Mobo Bidigo augwali si te bulu Esiaba pelamuo po olama, habu seleyu, tų sinilani. Tama tibaso, augwaligo Frigia tǫ dali, Galesia tǫ dali te si tomodu pali.
ACT 16:7 Tama te sogo augwali Misia tǫ dąį sesegeba sabolali. Augwaligo homugo te Bitinia tǫ tomoba pabo homu yai. Tiali goli Jisasgo Dwagi Yai Mobo Bidigo te tų ma paliali.
ACT 16:8 Tama tibaso, augwaligo Misia tǫ tomodu peyu, augwali te be nani Troasba sabolali, te nabis bulu da.
ACT 16:9 Tama te sogo hulide Polgo na gagawai yali. Agai Masedonia tǫ bidi me deli dolalubo suali. Aga aselama, Polbolo bomo elama, hanalu wali, “Nage e Masedonia tǫba aselama, da tau sagasao,” wali.
ACT 16:10 Te sogo Polgo na gagawai elama, te sogo ena Luk da Pol dali munasa pali, tama dago walu dabe polo sisi elama, dago geba gegelama, Masedonia tǫba pai hagede. Dago koneai, Godigo da i wali, agai dwagi yai po tede bidibo we bidibolo ola momainu yai.
ACT 16:11 Te tama da te Troas be nani taga pelama, da gebadu pelama, te Samotres tamu ąį tomode elalubo bulu teba dolo pali. Da pilama, do kigamu geba selama, da Neapolis be naniba tagaligi palio, sabolalio.
ACT 16:12 Tama dago Neapolis taga palio, augwaligo moni genuai taunba pali, te bulu nogi Filipai. Te bulu moni genuai bulu mu da, Masedonia tǫde te bulu deli tobolu elalubo da. Te Rom bidi hani tede bidu, tonalubo da. Tama da te bulude hauwa sogo mu bidali.
ACT 16:13 Tama te Juda bidigo lotu po wabo Sabatde da te be nani tagalama, buluba pali. Da te moni pabo ąį sesegeba bidigi pali. Dago te po odali, te pesagede me badu Juda dabe augwali deliba sisinama, Godibolo po wabo dao wali. Tama dago we dabe me badubolo te Jisasgo po dago augwalibolo ola manio.
ACT 16:14 We me deli bidali, dago po wabo agai odali. Te we nogi Lidia, te Taiataira be nanidu polobadu asali. Te we agai ebo sę da te nene gagawai nami ugwa agai gasa bidibolo menama, monego abelebo sę ebo da. Tama te we agai Godibolo lotu po wabo da, tigidali sogo. Tama agai Polgo po wabo odalio, tama Genuai Bidigo te wego homu dwagi yai ilali, te wego Polgo wabo po bugagia odomainu yali. Te sogo te wego homu tigidali Kraisba muani.
ACT 16:15 Tiali da dago aga dali agai bede bidibo we bidi dali baptais mani. Tama agai dabolo te po wali, “Dagego homugo eno Jisas wali pabo homu ebaso da, eno homugo Jisas mu konealu baso da, teda dage aselama, eno beba bidagasao, osogo,” te po wai. Tama agai “Dage eno beba pinao” wali bomo mu yali. Tama tibaso, da aga dali pai.
ACT 16:16 Te me sogo da te Godibolo gedu haluasa po wabo pesageba pobadi, tama dago wegi me deli asobo suai. Te wegi te mone sisąbo sę ebo wegi da. Dwai mobo me deligo te wegi tigide dagawai elaluali. Te dwai mobogo te wegibolo te we bidigo nosali yabo sę po ola mabo da, te wegigo pedauwalidu te po wabo da. Tama te wegi sęde bidu, olo dali aga tonalubo bidigo nai sela tubo da. Umabo we bidi aselama, augwaligo nosali yabo sę po te wegigo augwalibolo ola momai hagede asai. Augwaligo mone ge te wegibolo menama, nosali te wegigo te po pusubo da. Tama elama, te wegi tonalubo bidi dabe augwaligo umabo masigi mu sabo dao.
ACT 16:17 Tama te wegigo agai da dali Pol dali sulama, wali asali. Wali asobadi, agai po bomonama mu wali, agai te po weyu, we bidi dabebolo te po wali, “E bidi dabe te Genuai Bidi Godigo sę ebo bidi dao,” wali. “Augwali asali da, dagebolo Godigo dage ma sabo tų po ola mawai hagede asalio,” te po wai.
ACT 16:18 Tama te wegigo agai umabo sogo tama naga tiali. Tibaso, nosali Pol aga hagela mu yali. Pol aga begegi solama, te dwai mobobolo te po wali, “Eno Jisas Kraisgo bomode nagebolo obao,” wali, “te wegi tagalama, nage pao.” Pol agai te po olama, tama te dwai mobogo te wegi polo taga pali.
ACT 16:19 Tama te wegigo te gasa bidigo nosali yabo sę po ma pusube. Te sogo te wegi tonalubo bidi dabego koneani, augwaligo mone sabo sę dolo baso, tama augwaligo Pol dali Sailas dali nogo tolasa, te tobolu bidi dabego po tų ebo pesageba odasa pali.
ACT 16:20 Te augwaligo tega si genuai Rom gavman bidi pageba odasa pali. Tama augwaligo te po wali, “Dagego te Juda hani bidi si suao. Tama augwali sigo dwai hagoma ebo kolesaga dago bulu tomode yalio,” wali.
ACT 16:21 “Da Rom bidi da, tiali goli e bidi sigo da gasagi yai kolesaga ola mabo da. Te kolesaga te da Rom bidi dago kolesaga tiwai menio. Duga bomo yai po elalubaso, tama augwali sigo te kolesaga me te wali po tiwai me dago ilamuo,” te po wai.
ACT 16:22 Tama te tonaluali we bidi augwaligo te bidi sibolo dwai po wali, tama augwaligo te bidi si elebo gagalali. Tama te po tų ebo tobolu bidigo te enesigi bidibolo po wali, “Augwali sigo gudubo ugwa peda sanama, keloago tudi badu elao,” wali.
ACT 16:23 Te tiwai obaso, augwaligo te bidi si hauwa sogo mu keloago elali. Tama nosali augwaligo te bidi si kalabus beba nogo tulama, sągi pali. Tama te po tų yali bidi dabe augwaligo te kalabus bidi tonalubo tobolu bidibolo bomai po mu wali, “Nago te bidi si bugagia tonaluao,” wali, “augwali si wi pabuo.”
ACT 16:24 Tama te bomai po odama, te kalabus bidi tonalubo tobolu bidi agai te Pol dali Sailas dali si odasa pelama, te moni dąį todogo pai te masigigo nigai be habu muba tagaligi pali. Tama te bidi si moni ni pedai si dudulaweba sągą si tagalaluama, ma lok dąų walali.
ACT 16:25 Te huli tomode mu Pol dali Sailas dali sigo Godibolo po weyu, aga nogi ugwaba sabo balia dabe weyu bidali. Tama te kalabus bede bidali bidi dabe me badu augwaligo te balia po wabo odali.
ACT 16:26 Tama tibadi, moni tǫ mali polo yali, te kalabus be ni dabe togwa pali, te be tų dabe polo augwa digi dala pali. Te augwaligo nogode kęani aligabo bono aga digi pisagana pali.
ACT 16:27 Tama te kalabus bidi tonalubo tobolu bidi aga hodaluama, suali, te kalabus bede be tų tigidali dalalubo suali. Agai tama homu yali, ‘Kalabus bidi tigidali wi pali dao,’ homu yali. Tama tibaso, agai homugo ‘Genuai gavman bidigo ena elaibao,’ homu yali. Te homu elama, aga moni ge hwą kugulude walaluai hwą ugwa dią selama, aga digi tabide elainu yali.
ACT 16:28 Tiali goli, Polgo agai moni po mu tama wali, “Naga digi ma elegio,” wali. “Da wi pabeo, da tigidali me bidibao,” wali.
ACT 16:29 Tama te kalabus bidi tonalubo tobolu bidi agai te enesigi bidi i weyu, te po wali, “Sole selasa asao,” wali. Tama sole selama, agai te kalabus be tomoba polo pali. Agai moni wi mu elama, didibili yali. Didibili ebadi, agai tobolu Pol dali Sailas dali si sągą pageba muani.
ACT 16:30 Tama agai tega si buluba odasa pelama, hanalu wali, “Dage si genuai bidi dao. Eno magi sę elama, Godigo eno yali dwai sę sela sąmainu, Godigo ena ma sogowe?” wali.
ACT 16:31 Tama Polgo agabolo te po wali, “Nago homu tigidali naga Jisas Genuai Bidi teba muyu da, te nage tigidali sogo bugagia bidaiba, Godigo nage dali nago bede bidibo we bidi dali ma saibao,” wali.
ACT 16:32 Tama augwali sigo Jisasgo dwagi yai po aga dali, aga hani dali augwalibolo pusa mani.
ACT 16:33 Tama te sogo hulide te kalabus tonalubo tobolu bidi agai homu Jisasba mu muani. Agai tega si selama, te bidi dabego keloago elali madigi keni te ąįgo tedelama, ugwa nami selama, te kenide kęani. Pol dali Sailas dali sigo te kalabus bidi tonalubo bidi dali, aga bede bidibo we bidi dali te sogo tama baptais mani.
ACT 16:34 Tama te bidigo Pol dali, Sailas dali si agai be tomoba odasa pelama, augwali si agai nai mani. Tama te tobolu bidi dali, aga bede bidali we bidi dali augwaligo moni bugai homu mu yali. Magi basowe? Te sogo augwaligo augwa homu tigidali Godiba mu muani.
ACT 16:35 Te sogo kigamu te Rom gavman genuai bidi dabe augwaligo te enesigi bidi dabe tagala pelama, te kalabus bidi tonalubo tobolu bidibolo te po wai, “Nago te bidi si olo tagala pelama, pomainao,” wali.
ACT 16:36 Tama tibaso, te kalabus tonalubo tobolu bidi aselama, Polbolo wagasali, “Te Rom genuai bidi dabe augwaligo enabolo po ola tolalio, ‘Dage si megi pao’ po walio. ‘Dage si piąo, te po me menio,’ wali,” te po wai.
ACT 16:37 Tiali goli, Pol agai te po selasa asali enesigi bidibolo te po wai, “Woo,” wali. “Tialima, dadi si kalabus yali, augwaligo te page me gegebeo,” wali. “Te magi baso augwaligo da elama, da tigidali we bidi gesabide hale mawai dawe? Da si Rom bidi mu dao, dadi sigo nogi te Rom gavmanigo bukude elalubo dao. Te gavman bidi dabego konebewe? Megi augwaligo homugo dadi sigo pedauwali paniama, dadi sigo augwali dali po wasiąma, geme paibao. Augwa dwai kolesaga dadi si dali elama, te ma dualaibawe? Te menio,” wali. “Dadi si olo me pogobeo,” wali. “Te Rom gavman genuai bidi dabe augwa digi aselama, dadi si tagala palomainao,” Pol agai te po wai.
ACT 16:38 Te po selasa asali enesigi bidi dabe ma pelama, te Rom po tų ebo bidi dabebolo Polgo wali po pusigi pali. Tama te sogo te po odobo si, Pol dali Sailas dali si Rom bidi mu si da po odobo si, augwali wi mu yai.
ACT 16:39 Tama tibaso, te Rom po tų ebo bidi dabe augwali te kalabus beba pelama, Pol dali Sailas dali sibolo te po wai, “Dago dwai kolesaga dage side yali ma, da homu dene mu ebao,” wali. “Dage si e bulu tagalama, gasaba pagameo,” te po wali.
ACT 16:40 Tama Pol dali, Sailas dali si te kalabus be tagalama, te we Lidiago beba pali. Tede Jisasgo po wali pabo we bidi hani dali deliba sisinama, tama augwali sigo po pusulama, augwaligo homude dąų walobo po pusa mani. Tama augwa si peyu, augwali taga pali, te Filipai be nani taga pali.
ACT 17:1 Te Pol dali, Sailas dali si pelama, te Amfipolis be naniba sabolali. Te bulu taga pelama, Apolonia be naniba sabolali. Te be nanidu pelama, moni Tesalonaika be naniba sabolali. Tede te Juda dabe augwaligo bomo yai po ola mabo be elaluai.
ACT 17:2 Tigidali bulude bilu, Pol agai te Juda dabego bomo yai po ola mabo beba pabo koneai dao. Tama tibaso, Tesalonaikade me aga bilu, te beba pali. Tama agai Godigo bukude elalubo po nedama, aga Juda dabe dali po miani. Agai te sę Sabat sogode ela bilibadi, Sarere sela silali.
ACT 17:3 Te sogo agai augwalibolo te po hania wali, te Godigo sa muani bidi, te we bidi tau somainu sa muai bidi Kraisde po agai ola mani. “Suao,” wali. “Godigo po elalubo bukude e po elalubo, te bidi Godigo dabolo tagala palaibao,” wali. “Agai moni dene tolama, isaibao. Tama nosali aga gų pagede ma hodalueibao. Tama megi eno dagebolo Jisas aga digi te Godigo sa muani bidi Krais dao obao,” Pol agai te po wai.
ACT 17:4 Tama bidi me badu augwaligo te po odama, augwa homu te poba mu muani. Tama augwaligo Pol dali Sailas dali side wadolagasali. Tama me badu umabo bidi Grik po wabo bidi hani da, augwaligo Godibolo lotu po wabo, augwali me augwa homu te poba mu muani. Tama te nogi elaluai we dabe hauwa, augwali me augwa homu tigidali te Polgo wali poba muani.
ACT 17:5 Tiali goli, bidi me badu te Juda bidi hani da, te augwaligo umabo we bidi Pol dali Sailas dali si wali pabo sulama, augwaligo sębę mu yali. Tama tibaso, te Juda hanigo te dwai bidi dabe tigidali sogo augwali te sisinabo pesagede olo bilalubo suali. Tialima, augwaligo te dwai bidi hani deliba sisinani. Tama augwali udulama, bilu, moni po dagą wali, umabo we bidi hodalu, Pol dali Sailas side wado yali. Tama te Juda dabe me, te dwai bidi dabe me, augwali tigidali sisinama, peyu, te bidi nogi Jesongo be bologobea sali, be tų aluama togo sąnama, Pol dali Sailas dali si kekasa painu, te augwali si po tų egi painu tama yali.
ACT 17:6 Tiali goli, augwaligo tega si gegali munu me sube. Tama tibaso, augwaligo Jeson badi, me badu Jisasgo po wali pabo bidi dabe badi, augwaligo te bidi dabe nogo tulama, te bulu page bidi kaunsil bidi pageba odasa pali. Augwaligo moni dagą bomai mu weyu, te po wali, “E bidi dabe augwaligo gasa kolesaga eyu, tigidali bulude bidibo we bidi dolobo dao,” wali.
ACT 17:7 “Megi augwali dago moni be naniba sabolali, e bidi Jesongo agai beba bidagasao wali. Dagego suao,” wali, “augwaligo te dago Rom genuai gavman bidi Sisargo po dolobo. Tama augwaligo te po wali, ‘Dago gasa bidi wali pinao’ wali, ‘te bidi nogi Jisas da,’” te po wai.
ACT 17:8 Augwaligo tama po wali, tialima tigidali we bidi me, te kaunsil bidi dabe me, tigidaligo moni po dagą olama, augwaligo te yali sęde dwai homu eyu sębę yali.
ACT 17:9 Tialima, te kaunsil bidi dabe augwaligo Jeson dali aga hani dali side te mone ge sai, tama augwalibolo tama po ola mani, “Nosali te yali sę ma ebaso da, te dagego te mone ge ma sogobeo,” wali. Te po olama, augwaligo augwali tagala palali.
ACT 17:10 Te sogo be huli asobo si, te Jisasgo po wali pabo hani augwaligo Pol dali, Sailas dali si te Beria be naniba tagala palai. Tama augwali si pelama, te buluba sabolali. Tama sabolama, te Juda dabego bomo yai po ola mabo be tomoba pai.
ACT 17:11 Te Beria bidi dabe te Tesalonaika be nani bidi hani tiwai meni. Te polobadu te Tesalonaika bagego tega sigo po polo sela sąwai dao. Tiali goli, te Beria bidi hani augwaligo da bugai homu elama, te po odali. Tama tigidali sogode Godigo po asęai bukude nedali, Polgo wali po usu niba pabo wenama suali.
ACT 17:12 Tama te Juda we bidi hauwago augwaligo homu te Jisasba muani. Te umabo Grik po wabo nogi elalubo we dabe me, augwa homu Jisasba muani, te Grik po wabo bidi dabe me. (Te augwali Jisasgo po wali pabo hani tomoba asali.)
ACT 17:13 Tiali goli, te Tesalonaika be nanide bidali Juda bidi dabe augwaligo te Polgo Godigo po Beria be nanide me ola mani po odobo si, augwali te Tesalonaika taga solama, Beriaba sabolai. Tede te Tesalonaika Juda dabego te we bidi dabe sisinama, dwai sębę yabo homu hodolali. Te homu hodolobo po obaso, augwaligo Pol dali, Sailas dali side dwai sębę yai.
ACT 17:14 Tama polo te Jisasgo po wali pabo bidi hani augwaligo Pol dali bidi me badu dali te nabisba tagala palali. Tiali goli, Sailas dali, Timoti dali te Beria be nanide bidaluali.
ACT 17:15 Tama Pol dali pali bidi dabe augwaligo Pol te Atens buluba tagaligi pali. Tama augwali Beriaba ma aselama, Polgo Sailas dali Timoti dali sibolo wali po pusagasali, “‘Dage si Pol bidibo buluba polo asao,’ wali. Tama agai te po dabolo tama walio,” augwaligo te po wai.
ACT 17:16 Te bidi Pol te moni hanu nogi Atensde te Sailas dali Timoti dali si asobo tonaluali. Tama tonalubadi, agai suali, te bulude bidibo we bidi dabego tibo god wali pabo kolesaga umabo yali. Tama tibaso, Pol agai te tibo sulama, moni homu mu yali.
ACT 17:17 Tama tibaso, Juda dabego bomo yai po ola mabo po mibo be tomode agai te Juda dabebolo umabo po ola mani, te Juda hani isąwai bidi dabebolo me, augwaligo Godibolo lotu po wabo da. Te maketde Pol agai te maketba asobo we bidibolo sesemane sogo po ola mani. Agai homugo augwaligo Jisasgo po wali pomai hagede, te po bomo eyu ola mani.
ACT 17:18 Tama te Epikuria hani po ola mabo bidi dabe me, te Stoik hani po ola mabo bidi dabe me, augwaligo Polgo po aiyaba elaluai hagede, pogo wąbi hwįai ąǫ yali. Te bidi me badugo te po wai, “Te bidi aga da, te mu konesiąwai bidi da. Agai dabolo magi po obawe?” Me badu bidigo te po wali, “Agai te po wabo gasa habuba bidibo Godigowe?” te po wai. Pol agai te Jisasde po ola mobadi yaide, isai bidi te gų pagede ma hodaloabo po ola mobadi yaide, augwaligo te tobage po tama wali.
ACT 17:19 Tama tibaso, augwaligo Pol odasa pelama, te Areopagus bulu duba tagaligi pali. Te bulu dude te kaunsil tobolu bidi dabe deliba sisinagasobo dao. Augwaligo Polba hanalubo po weyu, te po wai, “Dago homugo nagebolo hanalubo da, nago te gesi po nago koneama, tigidali we bidibolo ola mabo po, nago dabolo me ola mao.
ACT 17:20 Nago te wabo po me badu dali da noma sobao. Magi basowe? Polobadu dago te tiwai po odai menio. Tama tibaso, te po page dago bugagia odaio,” augwaligo te po wai. (Tama te sogo te Atens bulu page bidi dabe me, te gasa buludu e buluba asali bidi dabe me, augwali tigidali sogo, giligade me, pio me bidu, augwaligo te gesi sę yabo po mibo dao.
ACT 17:21 Tama te tiwai po augwaligo polobadu me odisąwai po odaio. Tama tibaso, augwaligo u po Polbolo hanalu wali.)
ACT 17:22 Te bidi Pol aga te Areopagus bulu dude sisinagasai kaunsil bidi dabe tomode doligulama, te po wai, “Dage Atens bidi dabe. Dagego ebo kolesaga eno sualio. Tama eno homugo dagego umabo gasagi yai godibolo lotu po weyu, bomo mu ebo dao.
ACT 17:23 Tama ena e be nani tomode bilibadi, eno te dagego umabo godibolo lotu wabo pesage dabe suali. Tama eno dagego te god me delibolo hasa dabe ula mabo pesage me deli sualio. Dagego te hasa dabe ula mabo pesage masigide te po asęani, ‘Te nai dago konesiąwai godigo nai dao.’ Tialima, dagego konesiąwai god, dagego te godibolo lotu po wabo da. Tiali goli, te god de dawe te dagego konebeo. Te god eno megi dagebolo e po pusa mabogo aga dagebolo waselaibao,” wali.
ACT 17:24 “God agai tǫ me, tǫde bidibo nai tigidali me nigai dao. Te God agai tigidali nai dagalude elalubo nai me, te tǫde elalubo nai me, tigidali aga naga tonalubo dao. Tama tibaso, bidigo nogogo sę yai lotu be tomode aga bidibo menio.
ACT 17:25 Me ma, agai dago nogode agai nai tubo mu menio. God aga digi tigidali tǫde bidibo we bidibolo noma mabo dao. Tigidali nai dabe dago gegelama sabo, te Godigo naga mabo dao.
ACT 17:26 Godigo hasia mu bidi me deli nigai (te bidi nogi Adam). Tama nosali te bidi deligo te tigidali haniani bidi dabe dalali. Tama Godigo tigidali bidi dabe tigidali buluba dobayali, augwa te bulude bidimainu yai. Tama God aga digi polobadu mu augwali te bulu dabede bidabo sogo bodolu munama, dąį ilai dao.
ACT 17:27 God agai te sę ilai da, augwaligo ena gegemainu homu yali, tama augwaligo homugo gogone pelama, ena pageba asomainu homu yali. Tiali goli, suao, God digibulu bidibeo, da pagede deli deli we bidi pagede bidibo.
ACT 17:28 God agai sę ebaso da, da bidibo me, da bilibo me. Tama te page aga naga da. Te yali, duga me badu bidi dabe buku asębo koneai bidigo asęai po tiwai dao, ‘Da bidibo me aga wai naga bidibao,’ te po asęai.
ACT 17:29 Tama da bidibo Godigo wai dabe bidibao. Tama tibaso, dago te homu egio, te God masigi tiwai dao, te bunuwaligo nigai piksa tiwai God da, olamuo. Dago te homu ilamuo, ‘God da dago nogogo nigai dao,’ te homu egio.
ACT 17:30 Tama polobadu te bidi dabe augwaligo te sę ebaso, tama Godigo po me wabe, moni homu me ebe. Magi basowe? Te augwaligo agade kuna konesiąbaso. Tiali goli, megi te sogo God agai bomai po mu tagala palali, tigidali bulude bidibo bidi dabego me odomainu yali. Agai tama wali, ‘Dagego dwai kolesaga ebo tagalama, tama dage ena pageba asao,’ wabo dao.
ACT 17:31 Tama agai deli sogo me bodolu mawai. Nosali te sogo agai tigidali tǫde bidibo we bidi po tų ela mawaibao. Augwali po tų yabo bidi Godigo sa muai dao, te bidi agai dwagi yai doloba pai po tų mu yaibao. Tama Godigo te sa muai bidi agai dabolo hania ola mani. Mena sę elama, da tigidaligo sualiwe? Agai te bidi isąma, gų pagede ma hodaluama, ma gesi bida bida paibao,” Pol agai te po wai.
ACT 17:32 Te sogo Pol agai bidi me deli gų pagede ma hodaluali po pusubo da, bidi me badu augwaligo te po gisugu mani. Tiali goli bidi me badu augwaligo agabolo te po wali, “Dago homugo nago te po dabolo ma pusa mao,” wali.
ACT 17:33 Tialima, Pol aga te po mibo tagalali.
ACT 17:34 Tama bidi me badu augwali augwa homu Jisasba mu muani, tama augwali Pol dali pali. Te bidi me deli aga te Areopagusde bidibo kaunsil bidi, agai nogi Dionisius da, te we me deli agai nogi Damaris, augwali si me, gasa bidi dabe me badu me, augwali tigidali augwa homu Jisasba muani.
ACT 18:1 Te bidi Polgo nosali te Atens be nani taga pelama, agai Korin taun be naniba pali.
ACT 18:2 Tama te bulude bidi me deli bidali, te Juda hani bidi, agai nogi Akwila. Aga bulu mu nogi da, Pontus da. Tama polobadu gana aga dali aga we dali te Itali tǫde bidali taga soai. Aga we nogi da, Prisila da. Te Rom gavman tobolu bidi mu agai nogi Klodius, agai te Juda hani te Rom tǫde bidali aga sela sąwai dao. Tama agai te po wali, “Dage Juda hani Romgo tǫde ma bidigimio,” wali. Tama tibaso, augwali si te Korin be naniba polasa soai madigi, Pol nosali Korin be naniba asai dao. Pol aga augwali sugi pali. Tama sugi pelama, agai augwali dali bidali.
ACT 18:3 Tama Pol agai te we de bidi si te hasa waligo ugwa be hobolama, te mone sabo sę ebo suali. Polobadu Pol aga me te sę yai. Tama augwali sigo Pol hanalu wali, “Nage dadi si dali bidu, e sę yaibao,” wali.
ACT 18:4 Tama Pol aga tede bidu, tigidali Sabat sogo Juda dabego bomo yai po ola mabo beba peyu yali. Tama agai te Juda hani bidi dabe dali me, te Grik hani bidi dabe dali me, agai po ola mani. Tama agai homugo augwali homu begelemainu hagede homu yali.
ACT 18:5 Te nosali Sailas dali, Timoti dali augwali si te Masedonia tǫ taga solama, Korin be nanide Pol bidibo madigi sabolali. Tama augwali si asobo si, Polgo te ugwa be hobolobo sę tagalali. Agai tigidali sogo te Juda hani we bidi bidibo tomode po ola bilali. Tama agai po bomai mu pusuyu, te po wali, “Te dagego koneao. Te bidi Jisas aga Godigo aga sa muai bidi Krais da, te we bidi tau somainu.”
ACT 18:6 Tiali goli, augwaligo homugo te po pusubo po odobe. Augwaligo agade sębę yali, tama augwaligo aga dali dwai po mu wali. Tama tibaso, Pol aga tama kolesaga yali, agai nogogo te aga gudali ugwade elaluali pobele bage tedala sąyani. Tama tiyu agai te dąį yali, agai nosali augwali ma homu egobeo olama, te sę yali. Tama agai augwalibolo po walali, “Tialima, nosali dage hagawai baso da, duga sę dao,” wali. “Eno sę menio. Tialima, megi eno dage taga peyu, eno te Israel hani isąwai bidi dabebolo Godigo po pusa mawaibao,” te po wai.
ACT 18:7 Tama tibaso, Pol aga te Juda hani taga peyu, aga te Israel hani isąwai bidi me deli, agai nogi Titius, me nogi Jastus, tego beba bidigi pali. Te bidi Titius agai Godibolo lotu po wabo dao. Agai be te Juda dabego bomo yai po ola mabo be sesege badu elalubo.
ACT 18:8 Tama bidi me deli bidibo, agai nogi Krispus, aga Juda dabego bomo yai po ola mabo be tonalubo genuai tobolu bidi mu dao. Te bidi dali, aga bede bidibo we bidi dabe dali, augwali tigidaligo Jisasba augwa homu tigidali mu muani. Tama Korin we bidi umabo augwaligo Polgo wabo po odama, augwaligo homu Jisasba mu munama, tama augwali tigidali baptais mani.
ACT 18:9 Te me sogo hulide Pol agai nai me deli te nade suali. Tama Genuai Bidigo aga dali po tama wali, “Nage wi egio,” wali. “Nago po bomo elama, augwalibolo wao. Naga pedauwali pania sigio,” wali.
ACT 18:10 “Ena nage dali bidibao. Gasa bidigo nage dologobeo. Magi basowe? E be nanide bidibo we bidi umabo augwali eno sa muai dao. Augwaligo nago po odama, te augwali eno hani gagawaibao,” wali.
ACT 18:11 Tama te po obaso, Pol aga Korinde bidibadi, kibu be deli silama, me tomoba egi pali. Tama agai tigidali we bidi Godigo po ola mani.
ACT 18:12 Te nosali te bidi me deli nogi Galio, te Rom gavman genuai mu tobolu bidi dabe augwaligo te bidi Galio te Grik tǫ tonaluabo tobolu bidi nigilali. Tama te sogo te Juda hani augwali sisinama, Pol selama, augwaligo aga po tųba odasa pali.
ACT 18:13 Augwaligo Galiobolo te po wai, “Te bidi agai homugo dago bomo yai po dolobo. Tama agai te we bidibolo Godigo lotu po wabo gasa kolesaga elama, bugagia ola mabeo,” wali.
ACT 18:14 Te bidi Pol aga doligulama, agai po gagalainogo, te gavman bidi Galio agai te Juda dabebolo te po tama wai, “E bidi Pol agai dwai sę mu egi sogo da, teda eno tonaluama, dagego po tų ebo po page tigidali eno odigi da.
ACT 18:15 Tiali goli, dage dolaga aselama, tama dagego umabo me me nogi wabo po obaso, te dage Juda hanigo bomo yai po dabe po me obaso, dagego homugo ena te tiwai po odobo bidi dawe?” wali. “Menio. Duga digi te po dodolao,” po wali.
ACT 18:16 Tama agai te Juda hani bidi dabe augwali te po tų ebo bede sela sąyani.
ACT 18:17 Augwali te be tagalama, buluba soali. Tede augwaligo te Juda dabego bomo yai po ola mabo be tonalubo bidi nogogo tuali. Te bidi nogi Sostenes. Augwaligo te po tų ebo be sesegede te bidi osogo elali. Tiali goli, Galiogo sulama, tama agai te dwai sę ebode moni homu ebe.
ACT 18:18 Te bidi Pol aga te Jisasgo po wali pabo hani dali hauwa sogo bidali, te Korin be nanide. Tama nosali agai augwali taga soali. Agai te Prisila dali, Akwila dali augwali sela te Siria tǫba pabo gagalali. Tama Senkria be naniba tǫdu sabolama, tede Pol agai Godibolo bodolu mawai. Aga tobolu nisi poayali, te bodolu mani po dąų omainu yai.
ACT 18:19 Tama tilama, augwali sela te moni gebadu pelama, te tamu ąį bolama tama Efesus moni be naniba sabolali. Tama Pol aga te Juda dabego bomo yai po ola mabo be tomoba pelama, te Juda dabe dali umabo po miani.
ACT 18:20 Augwaligo agabolo augwalide hauwa sogo mu bidaimai hagede hanalu wali. Tiali goli, Polgo “Menio,” wali.
ACT 18:21 Agai augwali taga peyu, te po wai, “Te Godigo ‘Usu da’ obaso da, teda nosali ena dage pageba ma geasa asaibao,” wali. Te po olama, Pol te moni gebadu pelama, Efesus be nani taga pali.
ACT 18:22 Te bidi Pol te moni gebadu pelama, te nabis be nani Sisaria teba sabolali. Tedu tǫdu pelama, Jerusalemba pali. Tama agai Jisasgo po wali pabo hanibolo “Dage tao,” wali. Tama nosali aga tedu pelama, Antiokba pali.
ACT 18:23 Tede aga hauwa sogonu bidama, aga Antiok taga pali. Tama ma pelama, tǫdu pelama, te Galesia tǫ me, Frigia tǫ me tomodu pelama, Jisasgo po wali pabo hani we bidi suali. Tama agai augwalibolo dwagi yai po pusa mani, augwali bomo somainogo yali.
ACT 18:24 Te Juda bidi me deli Efesus be naniba sabolagasali. Agai nogi da Apolos, agai page bulu Aleksandria be nani da. Tama te bidi aga da po digi wabo bidi, te agai dwagi yai Godigo po asęani bukude ebo po page tigidali koneai bidi mu da.
ACT 18:25 Tama agai koneai, te Genuai Bidigo agai tigidali we bidi ma sabo tų koneani. Tama tigidali sogo agai homugo dąų mu eyu Jisasgo yali sę po dabe tigidali pusali, bugagia dolo pusa mani. Tiali goli, agai koneani, te Jongo agai te we bidi baptais mabo sę yali wali po naga agai koneani.
ACT 18:26 Tama te bidi Apolos agai te Juda dabego bomo yai po ola mabo bede agai po bomonama wali, wi ebe. Prisila dali Akwila dali sigo agai po wabo odama, augwali sigo beba aga odasa pali. Tede augwali sigo agabolo Godigo pabo tų po page bugagia hania ola mawai.
ACT 18:27 Tama nosali Apolos agai homugo te Grik po wabo bidi dabego page bulu tǫba pomai hagede homu yali. Tama tibaso, te Efesusde Jisasgo po wali pabo hani we bidigo bugai homu elama, te Grik tǫde bidibo Jisasgo hani dabebolo pas asęani, te Apolos tau somainu yali. Te pas tomode augwaligo te po asęani, “Te bidi Apolos asobo si, dagego aga bugagia tau sao.” Tama Apolos pelama, sabalobo si, tigidali sogo augwali sisinama, po mibo sę yali, augwaligo Godigo po bukude asęani po wali. Te po agai tigidali we bidibolo Jisas ola mani. Aga “Te bidi mu polobadu Godigo agai da tau somainogo sa muai bidi Krais da,” wali. Tama tigidali sogo Apolosgo te Juda hanigo konila po wabo aiyaba elaluali. Tialima, Apolos agai Jisasgo po wali pabo we bidi hani tau mu sali, polobadu Godigo augwali hobede ebo kolesaga olo menama, tau sali.
ACT 19:1 Te sogo Apolos te Korin be nanide bidibadi, Pol aga te Galesia tǫ tomoba sabolali, nosali te Efesus be naniba sabolali. Tama te bulude agai Jisasgo po wali pabo bidi me badu bidibo suali.
ACT 19:2 Pol agai augwali te po hanalu wali, “Polobadu sogo dagego homu Jisasba mu muani sogo, te Godigo Dwagi Yai Mobo Bidi dage pageba asaliwe?” Augwaligo te po wei agade ponoyu, te po wali, “Godigo Dwagi Yai Mobo Bidi elalubo po dago polobadu odobeo,” wali.
ACT 19:3 Tama Pol agai augwalibolo hanalu wali, “Tialima, te sogo augwaligo dage baptais mani sogo, dagego dego po wali pai dawe?” Augwaligo te po wali, “Jon agai we bidi baptais polobadu mayu agai ola mani po, te po bidi me deligo dabolo ola menama, dago te po wali pabo dao,” wali.
ACT 19:4 Tama Pol agai te po wali, “Te polobadu te we bidi augwa dwai sę me, dwai kolesaga me tagalama, tudiba menama, homu begelama, te Jon agai te we bidibolo baptais mani. Tama tilama, agai augwalibolo te po wai, ‘Te ena nosali asobo bidi, te bidi dagego homugo mu koneao,’ wali. Tama eno dagebolo te po obao, te bidi da te Jisas da,” Pol agai te po wai.
ACT 19:5 Tama te Efesus bulude bidali Jisasgo po wali pabo hani we bidi dabe augwaligo te po odama, augwali Jisas wali po baso, baptais sali.
ACT 19:6 Te baptais selama, deli deli bidi toboluba Pol agai nogo mubadi, Godigo Dwagi Yai Mobo Bidi augwaliba asali. Augwaligo gasagi yai haniani po wabo gagalali. Tama augwaligo Godigo augwalibolo mani po pusubo sę yali.
ACT 19:7 Tama augwali te bidi hani nogo si olama, sągą badu si wagi sulama, bidi hani bidibo.
ACT 19:8 Te Pol te polua sela tede bidali. Tede bidibadi, aga te Juda dabego bomo yai po ola mabo beba tigidali Sabat sogode te be tomoba pabo da. Agai augwalibolo te po wali, “Godigo homugo agai te we bidi tonalubo,” wali. Aga wi ebe, te po bomonama wai, augwaligo konemainu te po mu dao.
ACT 19:9 Tiali goli, augwali me badu bidi dabego augwa homude hagela elama, augwa homugo Jisas konebe. Tama augwali tigidali bidi gedude doligulama, Godigo gesi tųde pabo pobolo augwaligo dwai po wali. Tama tibaso, Pol agai te po odama, agai Jisasba homu muani bidi oda selama, te augwaligo Juda dabego bomo yai po ola mabo be taga pali. Tama tigidali sogo agai augwali dali po miani, te bidi me deli agai nogi Tiranus, tego skul be tiwaiba sisinama, po ola mani.
ACT 19:10 Tama Pol agai te sę ebadi, kibu be si silali. Te sę elama, umabo we bidi te Esia tǫ tomode bidibo we bidi augwaligo Godigo dwagi yai po odali. Me badu Juda hani we bidi da, me badu te Juda hani isąwai gasa hani dabe we bidi da.
ACT 19:11 Te sogo God agai genuai bomo mu Polbolo mani. Tama Godigo tigidali we bidibolo haniani bomai sę bidigo ebo usu isąwai sę mu ola mawai.
ACT 19:12 Polgo nami ugwa ugwa kugulu gudai dao, te duga holobo ugwa gebode kęwai dao. Tama augwaligo te tobage ugwa dabe Polgo tulama, tama augwaligo te gasi sai bidi dabe bidibo madigiba selasa pai dao. Augwaligo te ugwa te gasi sai bidi tigiba mubo si, te gasi sia sai dao. Te dwai haubo noma elalubo bidi dabe me, te sogo augwaligo te sę ebo si, te dwai haubo nomago te bidi dabe tagalama, wi pai dao.
ACT 19:13 Tama Juda genuai bidi deli bidali agai nogi Seva da. Agai sę da, te pris bidi dabe tonalubo dao. Agai ogwa da nogo a olama, me badu nogo si da. Tama augwali biliyu, te dwai haubo noma bidibo we bidi dwai noma sela sąyani. Tiali goli, augwaligo homugo Jisas mu konebe. Tama dwai noma bidi me badu sela sąyu, Jisasgo nogi ilama, sela sąwainu yali. Tama augwaligo te dwai mobobolo te po wali, “Nage dwai haubo noma, eno Jisasgo bomogo nage sela sąbo dao, te bidi Pol agai wabo po tiwai dao,” te po wai.
ACT 19:15 Tiali goli, te dwai mobogo augwalibolo te po wai, “Eno Jisas kone dao. Eno Pol kone dao. Tiali goli, dagego mena bomo eyu, te sę ebawe? Eno dage mu konebeo,” wali.
ACT 19:16 Tama te dwai mobo elalubo bidi agai te bidi dabe dali bomonama mu hwįnama, agai augwali tigidali aiyaba elaluali. Tama augwaligo tigi agai mu dolali, augwaligo ugwa dabe pebeda sąyani, te augwali te be tagalama, wi pali, tama me badu augwaligo tigi olo wi pali. Magi basowe? Te bidigo augwaligo ugwa dabe pebeda sana silai dao.
ACT 19:17 Tama te Efesusde bidibo Juda we bidi dabe me, te Juda hani isąwai hani we bidi me, augwali tigidaligo te yali sę po odama, wi mu yali. Augwaligo te Genuai Bidi Jisas nogi ugwaba mu sali.
ACT 19:18 Tama nosali Jisasgo po wali pabo we bidi me badu augwali aselama, te po te we bidi tigidalibolo wai, “Te dwai pobi wabo sę dago polobadu yai dao” wali.
ACT 19:19 Tama augwaligo te pobi me, animani ola mabo buku dabe deliba sisinama, augwaligo tigidali we bidi gedude isiba ulai dao. Te buku abelebo mone ge te hauwa kisu 50,000 monego abelai dao.
ACT 19:20 Tama umabo we bidi augwaligo te bomai sę yali po odobo si, augwaligo te Godigo dwagi yai po mu odali. Tama Godigo dwagi yai po tigidali we bidigo homuba pelama, dąų wali.
ACT 19:21 Te nosali augwaligo te sę ela silama, Godigo Dwagi Yai Mobo Bidigo Polgo homuba menama, aga Masedonia tǫ dali Akaia tǫ dali te bulu siba pomainu homu ilali. Tedu pelama, aga Jerusalemba sabaligi pomainu homu yali. Tama Pol agai homugo bomo eyu te po wali, “Ena teba sabaligi pelama, nosali ena Rom be nani sugi paibao,” te homu yali.
ACT 19:22 Tama tiali, Pol agai sę tau sabo bidi si te Masedonia tǫba tagala palali, te bidi si nogi me Timoti, me Erastus. Tama te bidi si tagala palama, Pol te Esia tǫde osogo bididuali.
ACT 19:23 Te bidi Pol te Efesus be nanide te sogo bidibadi, te Efesusde bidibo bidi dabe hauwa augwaligo Godigo gesi tųdu wali pabo bidi dabe dali konila po weyu, moni sębę mu yali.
ACT 19:24 Tama te bidi me deli, agai nogi Demitrius, agai tigidali bidi sębę ebo homu hodolali. Agai te mone sabo sę te gasagi yai bunuwali tiwai nai geselebo sę ebo bidi da, te bunuwali tiwai nai nogi silva, te wiegi yai kapa dao. Te Efesus be nanide te tibo god nogi Artemis moni lotu wabo be elaluali. Tama te bidi Demitrius me agai tau sabo bidi dabe me, augwaligo te lotu be dwasianu noma te bunuwali tiwai naigo nigibo sę elama, tama umabo bidigo sulama, moni monego abelama, sabo sę ebo da.
ACT 19:25 Tama te bidi Demitrius agai te tibo godigo dwasianu be sę ebo bidi dabe me, gasa sę ebo bidi dabe me, agai i olama, sisinama, te po miani. Agai te po augwalibolo tama wali, “Ama dede, dagego konebo dao, dago e sę ebogo te umabo masigi selama, da bugagia bidibo dao.
ACT 19:26 Tama dagego te bidi Pol agai ebo kolesaga koneani dao, dago agai po dabe me odali dao. Agai Efesusde bidibo we bidi dabebolo wabo po dabe, tama agai Esia tǫde bidibo we bidigo me agai po tama wabo da, ‘Te tobage bidigo nogogo nigibo god da, bomo menio, augwali god mu menio, agai dage tau sogobeo,’ te po walio. Agai tama po wabode tigidali we bidi augwaligo te po wali pali, te Efesus be nanide me, te Esia tǫde me.
ACT 19:27 Tama eno dago mone sabo sę dolidali weyu eno wi ebo, tama tigidali we bidigo dago e ebo sęde dwai po wabo. Dago bugagia tonalusąyu da, te po genuai mu yaibao. Tama augwaligo Artemisgo moni lotu be dolaibao,” wali, “agai dago moni god we, tama augwaligo homugo genuai we god Artemis usu egobeo, agai dago tigidali Esia tǫ we bidi aga deliba lotu po wabo dao, te tigidali tǫde bidibo we bidigo me,” te po wali.
ACT 19:28 Tama te we bidi augwaligo Demitriusgo wali po odobo si, augwaligo Pol dali moni sębę yali, tama augwaligo moni po dagą weyu, te po wali, “Artemis, nage da Efesus we bidigo genuai god da,” te wali.
ACT 19:29 Tama te Efesusde bidibo we bidi augwaligo te po odoyu, augwaligo moni po dagą wali, tama augwali pelama, Masedonia bidi Pol tau sali bidi si nogo tuali. Te bidi si me nogi da Gaius, me bidi nogi da Aristarkus. Tama augwaligo te bidi si nogo tolasa, augwa moni po tų ebo pesageba pali.
ACT 19:30 Tama Pol agai homugo da, te bidi hani te po tų eboba agai po wagi pai homu yali. Tiali goli, te Jisasgo po wali pabo hanigo aga pigio wali.
ACT 19:31 Gavman sę ebo tonalubo bidi dabe me badu, te Esia tǫde, augwaligo Pol dali abagi wai dao. Tama augwaligo me Polbolo tama po ola tolali, “Pol, nage te po mibo tomoba pigio,” wali.
ACT 19:32 Tama te po mibode augwaligo homu agabe selama, te po dolali. Te moni po dagą weyu, me bidigo aga homugo konealubo po wali, me bidigo aga homugo konealubo po tedali me wali. Tama augwaligo umabo po mu dalasa pali. Te po miboba asali page augwali tigidaligo konebe.
ACT 19:33 Tialima, bidi me deli tede bidali, agai nogi Aleksander dao. Tama Juda hani augwaligo te bidi te po mibo tomoba doligi pali. Tigidali we bidigo augwaligo homu, te po mibo page agai dao, homu yali. Tama agai nogo tigidali bidigo po odoboba nogo ugwaba muani, augwa po wabo tagalomainu yali. Agai homugo te sisinama po mibo page te Juda hanigo menio wąį hagede nogo muani.
ACT 19:34 Tiali goli, te we bidi augwaligo aga Juda bidi dao konebaso da, agai te Artemisbolo lotu po wabo meni konenama, tama augwali tigidaligo moni po dagą wali, te po wali, “Te Artemis, nage da Efesus we bidigo genuai god we dao,” wali. Te po wabo kigamu gagalama, giliga tomo yagasali.
ACT 19:35 Te nosali te kaunsil kuskus bidi agai te po togolama, agai augwaligo te po aiyaba elaluali. Agai te po wali, “Dage Efesus bidi dabe, odao. Tigidali bulude bidibo we bidi augwaligo e Efesus bulu kone dao. Augwaligo kone dao, dago te Artemis genuai we godigo moni lotu be tonalubo dao. Tama dago te masigi me tonalubo dao, te dagaludu tuloluai masigi, te masigibolo dago lotu po wabo da. Te me augwaligo konebo dao. Bidigo te po sela sągobeo.
ACT 19:36 Tama tibaso, dage dua bidiąo. Dagego bugagia konesiąwai sęde wado egimio,” wali.
ACT 19:37 “Suao, dagego te bidi si po tųba odasa asali. Tiali goli, augwali sigo dago te lotu bede dwagi yai nai munalubo wi sabeo. Tama augwali sigo dago we god dali dwai po me wabeo,” wali.
ACT 19:38 “Tialima, Demitrius me, aga dali sę ebo bidi dabe me, augwaligo bidi me delide wado po wabo elalubaso da, teda augwa digi te po tų ebo sogo te po augwaligo dodolomainao, tama te po tų ebo bidi augwaligo te po dodolomainao,” wali.
ACT 19:39 “Tama dage me badu po elalubaso da, teda po tų ebo pesagede dagego te po wao. Tama te sogo genuai bidi dabe dugulama, po odama, augwaligo dodolobo da. Megi te po mibo silao. Magi basowe?
ACT 19:40 Dago megi e po mibo dobo yabo, dwalio. Tama tibaso, te Rom gavman tobolu bidigo dago te kolesagade da tų egowe ma meniwe, te eno konebeo. Suao, da e sisinani po page menia madigi, dago umabo po mu dalasa pabo wali. Tama te gavman bidigo da po tų ebo si, dago magi po te gavman bidibolo wei begelaibawe? Po mu menio,” te po wai.
ACT 19:41 Tama kuskus bidi agai te po olama, tama agai te bidi dabe tigidali augwa beba tagala palali.
ACT 20:1 Te wado po wali dabe sia selama, te hauwa sogonu bugagia bidama, te Polgo Jisasgo po wali pabo we bidi i wali. Tama agai dwagi yai po augwali homude dąų olama bomo sabo po ola mani. Tama nosali dage tao po olama, augwali nogo mani. Tama agai augwali taga pelama, aga moni gebadu Masedonia tǫba pali.
ACT 20:2 Tama te Masedonia tǫ tomode peyu, Jisasgo po wali pabo we bidi hani augwali tau sabo dwagi yai po Pol agai hauwa sogo ola mani. Ola menama, nosali aga te Grik tǫba sabolali.
ACT 20:3 Te bulude aga polua sela bidali. Tialima, nosali agai homugo Siria tǫba moni gebadu paio homu yali. Tama agai nai sisi elama, te Juda dabego aga ela muabo po agai odali. Tama tibaso, agai te homu yali, ‘Ena Masedonia tǫdu pelama, ma geasa paibao,’ homu yali.
ACT 20:4 Tama te bidi dabe me badu Pol dali hodobo pali. Te bidi nogi me Sopater, aga aya da Pirus da, aga bulu da Beria. Bidi me nogi da, Aristarkus, te gasa bidi me nogi Sekundus. Augwali sigo bulu da Tesalonaika. Tama gasa bidi me nogi da Gaius, aga bulu da Derbe. Tama gasa bidi me nogi Timoti. Bidi me nogi Tikikus, te gasa bidi me nogi Trofimus, augwali si bulu da Esia tǫ da.
ACT 20:5 Te bidi dabe tigidali augwali Pol dali pali. Augwali polasa pali, te Troas be nanide da asobo tonaluali.
ACT 20:6 Tama da Filipai be nanide bidama, nosali te bo disąwai bret tuali bodolu silibo si, da moni gebadu pali. Tama pelama, a naga sogo silibo si, da Troasba sabolama, te polasa pali bidi dabe sulama, ma hodobo muna selama, da Troas be nanide Sabat deli bidali.
ACT 20:7 Te dwasianu Sarere pio te da deliba sisinama, te Jisasgo po wali pabo we bidi dabe me sisinama, nai bolo tuali. Tama Pol agai te we bidibolo Jisasgo po pusa mani. Agai te bobobage po pususu pedubadi, huli tomo mu yali. Magi basowe? Agai homugo do augwali taga paibao.
ACT 20:8 Tama te po mibo be habu badu augwaligo sole umabo wawalo pali. Tama te be da moni sigi be da, te po mibo habu da ugwa badu mu.
ACT 20:9 Tama gesi bidi me deli te windo tų me delide dugulaluali, agai nogi Yutikus. Tama Pol agai bobobage po pusubadi, te bidi godege magani elama, piali. Tama aga mu piai madigi, buluba tula muani, aga digibulu mu tama tǫba tuloluali. Augwali aiyaba dulama, tǫba pelama, suali, aga osawali, te bidi mu isai suali.
ACT 20:10 Tiali goli Pol aga udulama, tǫba dulali. Tama agai te bidi tigiba usu si elama, agai nogogo te bidi nogo si dua elama, tuali. Tama Pol agai tigidali we bidibolo te po wai, “Dagego te bidi homu dene baso, gela wagimio. E bidi bidibo. Megi ma hodaluama, bidaibao,” wali.
ACT 20:11 Pol te habuba ma holali. Tede aga dali te Jisasgo po wali pabo we bidi dali augwaligo homugo Jisas makone palama, te bret nai tuali. Tama te Pol aga te wali po wadolama, te po ola pedubadi, be posobode te po tagalama, aga pali.
ACT 20:12 Tama te gesi bidi Yutikus aga gedu pedalu bidibaso, te augwali dali hodobo agai beba pali. Tama augwaligo homu dwagi yai yali, aga ma gedu pedalu bidibo ula elalubaso.
ACT 20:13 Te bidi Pol agai dabolo te po wali, “Dage gebadu polasa pelama, te Asos be naniba pao. Asos be naniba sabolama, ena asobo tede tonaluao. Ena tǫdu asaibao, nosali da tigidali te moni gebadu ma paibao,” te po wai. Te po olama, da te moni gebadu Asos be naniba sabolali. Tama Pol aga te Asos pabo tųdu pelama, te buluba sabolali.
ACT 20:14 Tama agai da Asos be nanide bidibadi sabolali, tama da hodobo moni gebadu pali, te Mitilini buluba sabolali.
ACT 20:15 Tama da Mitilini bulu tagalama, da pelama, Kios buluba do sabolali. Tama dago do Kios bulu tagalama, me sogo da Samos buluba sabolali. Tama kigamu ma pelama, te Miletus be naniba sabolali.
ACT 20:16 Pol agai homugo te Efesus be nani sugobeo, ela soaibao homu yai. Agai homugo ena Jerusalemba polo paibao homu yali, ena tede te Juda dabego moni nai tubo bodolu Jerusalemde bidibadi silaibao, te homu yali. Te Juda dabego moni nai tubo bodolu te nogi Pentikos dao.
ACT 20:17 Te Pol Miletusde bidu, agai Efesusde bidibo Jisasgo po wali pabo we bidigo tobolu bidibolo agai pas me deli tolali. Te pasde agai te po wali, “Dage aselama, ena pageba asao,” wali.
ACT 20:18 Tama augwali aselama, aga dali sisinama, bidali. Tama agai augwalibolo te po wali, “Ama dedeo, polobadu mu ena dage pageba hasia sogo mu te ena Esia tǫba sabolai dao, dagego koneai dao, eno dage dali bidu tigidali yali sę kolesaga me dagego koneai dao.
ACT 20:19 Tama te sogo te Juda dabe augwaligo moni haniani sęgę enabolo mani, te ena gela gugai yali. Tama augwaligo ena dolabo tų me gegai dao. Tiali goli, ena digi nogi aiyaba elaluama, tama eno homugo Genuai Bidi Jisasgo sęba naga homu elama, sę yali.
ACT 20:20 Te dage tau sabo po eno yogo yai menio. Duga bede me, duga sisinibo pesagede me, eno te po dugabolo eno umabo sogo pusa mawai dao. Te po duga koneai dao. Dage tau sabo po eno me deli dualai menio.
ACT 20:21 Sesemane sogo eno dagebolo po bomonama weyu, te po wai dao, ‘Te Juda bidi dabe me, te Grik bidi dabe me, dagego dwai sę ebo kolesaga me tudiba tagalama, homu begelama, God pageba aselama, dagego homu Jisasba mu muao.’ Te dage tau sabo po eno dagebolo tigidali sogo konelai dao.
ACT 20:22 Tama megi Godigo Dwagi Yai Mobo Bidigo ena dąų olama, ena Jerusalemba odasa pabo. Te bulu bidi dabego enabolo magi sę egowe, te eno konebeo.
ACT 20:23 Tialima, eno koneanio. Augwaligo ena elama, sęgę menama, ena kalabus yaibao. Tigidali be nanide te Godigo Dwagi Yai Mobo Bidigo te tobage sęgę sabo po enabolo ola mawai dao.
ACT 20:24 Tama augwaligo ena elama isilibo eno moni homu menio. Te magigo menio. Tiali goli, eno genuai homu mu Genuai Bidi Jisasgo enabolo mani sę bomo elama mu yaibao. Tama te Godigo da homu dene ebo sę, te dwagi yai po eno tigidali we bidibolo augwaligo konealumai hagede bugagia pusa mawaibao,” Pol agai te po wai.
ACT 20:25 Polgo te po me wali, “Mu tama dao, dagego te po odao. Tama eno homugo te po megi silibo dao. Tialima, ena polobadu dage tomode biliyu, dage tigidali we bidibolo eno ola mawai dao, God aga dago Genuai Tobolu Bidi, agai da tonaluaibao wali. Tama megi eno koneanio, dagego ena munu ma sugobeo.
ACT 20:26 Tama tibaso, megi tama eno homugo e po dagebolo bugagia ola mabo dao. Tigidali sogo ena dage dali bidu, Godigo tigidali sę yabo homu ebo po eno dagebolo pusai dao. Te po eno yogo yai menio. Tama tibaso, bidi me deli dage tomode nosali aga hagabaso da, teda aga homugo dao, eno homugo menio,” wali.
ACT 20:28 Pol agai te tobolu bidi dabebolo te po wali, “Dua dao. Duga digi dali, te Godigo Dwagi Yai Mobo Bidigo dagego nogode muai we bidi dali, bugagia tonaluao. Tama dagego augwali te kibu sipsip tiwai negebo ąǫ yao. Dagego kone dao, Godigo aga ogwa Jisasgo kanemego te hani aga abelama, aga ma sai dao. Tama dagego augwali bugagia negao. Magi basowe?
ACT 20:29 Eno koneani, nosali te eno dage taga pabo sogode, te dwai bidi dabe dage tomoba aselama, dage dolaibao. Tama augwali te bulu yowi asobo ąǫ elama, te sipsip kibu wai elabo ąǫ yaibao.
ACT 20:30 Tama duga digi tomode bidi me badu hodaluama, ili po ola maiabo, augwaligo homugo tigidali Jisasgo po wali pabo we bidi augwali wali asomainu yaibao.
ACT 20:31 Tama dage bugagia suao, te tiwai bidi gegabo. Tama dagego homugo eno yali sę tagalamuo. Ena dage dali bidibadi, te kibu be sela silai dao. Tama te hulide me, kigamu me, eno dagebolo dwagi yai tau selama, dąų walabo po ola mawai dao. Tama hauwa sogo eno dage moni homu dene elama, gela wai dao.”
ACT 20:32 “Te megi eno dage God aga digi tonalumainu, God agai nogoba mubao. Tama Godigo dabolo hobede ebo kolesaga da olo menama tau sabo da po, te wali pogo me dage tonaluaibao. God aga usu elama, dage bomo ilaibao. God agai sa muani we bidi hani bugai homu ilabo sę elalubo da. Tama agai usu elama, te tobage sę dagebolo mawaibao.
ACT 20:33 Tama dagego mone me, ugwa me, me me dwagi yai nai eno pesa yai menio. Eno homugo dagego masigi dabe, ugwa dabe eno dagego ena me mao wai menio. Duga digi koneai dao.
ACT 20:34 Ena digi te be sę ebo ugwa hobolo sę elama, ena mone sai dao. Eno te mone selama, eno tubo nai me, eno abagigo tubo nai me, te eno abelali.
ACT 20:35 Tubo nai sabo sę ebo kolesaga eno dagebolo ola manio. Dago te sę bomo elama, te gasi yai we bidi tigidali sogo tau sogųǫ. Te tobage sę ebo kolesaga polobadu Jisasgo dabolo ola mawai dao, te po wai, ‘Bidi mego gasa bidi nai olo mabo, te agai moni bugai homu ebo. Te nai sabo bidigo agai dwagi yai homugo te tau sabo bidi aiyaba elalubeo.’ Tama dagego Genuai Bidi Jisasgo te wali po deli naga konealuao, homugo tagalamuo,” Pol agai te po wai.
ACT 20:36 Te Pol agai po silibo si, tama agai augwali dali kidu sugunama, Godibolo po wai.
ACT 20:37 Tama augwali tigidali sisinama, Pol pagea selama, sebedi usu eyu, gela wali.
ACT 20:38 Tama augwali moni homu dene yali. Magi basowe? Agai te po wali, “Ena gesabi dagego munu ma sugobeo,” wali. Tialima, te we bidi tigidali augwaligo aga odasa pelama, moni gebaba tagaligi pali, te tamu ąį sanide.
ACT 21:1 Te dago te Efesus bidi dabebolo tobalobo po olama, taga soali. Tama da pabo te moni geba te wali asiyu da te gebadu Kos buluba solama, dolo mu pali. Tama do kigamu dago te Kos bulu taga pelama, te Rodes buluba sabolali, tede piai. Pilama, tama dago te Rodes bulu tagalama, te Patara buluba pigi pali.
ACT 21:2 Tama te Patara be nanide dago te gasa moni geba selama, te Fonisia tǫba pabo geba da. Tama tibaso, da me te gebadu pali.
ACT 21:3 Tama pobadi, tomode dago te tamu ąį tomode dwasianu bulu suali, te tǫ nogi Saiprus. Tama te Saiprus tǫ ela solama, te Siria tǫba sabolali. Tama te geba te Tair be naniba sabolama, te bulude augwaligo walu dabe sela muani, tede dago te geba tagalama, te be nani tomoba pali.
ACT 21:4 Tama pelama, Jisasgo po wali pabo hani gegelama, augwali dali bidibadi, Sabat deli bidali. Tama te sogo Godigo Dwagi Yai Mobo Bidigo augwalibolo po me deli wali. Augwaligo Polbolo te po tama wali, “Te nage Jerusalemba pelamuo,” wali. “Augwaligo nage elabuo,” wali.
ACT 21:5 Tiali goli, da tede bidali sogo sia selama, da te bulu tagalama, moni gebaba ma pali. Te Jisasgo po wali pabo we bidi, wai puluba me, augwali da hodobo pelama, tamu ąį sesegeba sabolali. Te kemi tǫde da sisinama, kidu sugunama, Godibolo gedu haluasa po wali.
ACT 21:6 Po olama, nosali da tigidaligo “Dage tao,” olama, da te moni geba tomoba pelama, te Jisasgo po wali pabo we bidi augwa beba geasa pali.
ACT 21:7 Te da te moni gebadu Tair be nani tagalama, pelama, te nabis be nani nogi Tolemesba sabolali. Tede dago te Jisasgo po wali pabo we bidi dali deli sogo pilama, da ma peyu, “Dage tao,” olama pali,.
ACT 21:8 Tama do kigamu da pelama, be nani Sisariaba sabolali. Tama da pelama, Filipgo beba sabolali. Agai tigidali sogo Jisasgo dwagi yai po we bidibolo pusa mabo dao. Aga polobadu nai dobabo sę emai hagede, nogo a olama me badu nogo si tama dąį ilali bidi da, aga te sę yai bidi da.
ACT 21:9 Tama Filip agai wegi me si me si nama wegi bidali. Tama augwali genuai yai wegi goli, bidigo sabe. Tama te wegi dabebolo Godigo dwagi yai bomo menama, tama augwaligo Godigo po pusa mabo sę yai.
ACT 21:10 Da tede hauwa sogonu Filip dali bidama, te bidi nogi Agabus aga Judia tǫdu asai bidi da, te Filipgo beba sabolali. Tama te bidi agai me Godigo pedauwalide po selama, we bidibolo bomo elama, Godigo po pusa mabo bidi da.
ACT 21:11 Tama aga da pageba aselama, agai Polgo kugulu selama, tama Agabus aga digi nogo dabe sągą dabe kęnama, agai dabolo te po ola mani, “Dagego odao, e po Godigo Dwagi Yai Mobo Bidigo enabolo mawai po eno dagebolo obao,” wali. “E kugulu page bidi te Jerusalemde te Juda bidi dabego e ebo tiwai nogo sągą kęnama, kalabus yaibao,” wali. “Tama augwaligo aga tama tilama, te Juda hani isąwai bidibolo mawaibao, aga tigide augwaligo dwai kolesaga emainu yaibao,” Agabus agai homugo koneama, te po dabolo wali.
ACT 21:12 Te dago Agabusgo wali po odobo si, da tigidaligo homu dene elama, Polbolo te po bomonama wai, “Nage Jerusalemba pigio,” wali, Sisaria we bidi me dago tigidaligo te po wai.
ACT 21:13 Tama tiali goli, Polgo te po wei ponoyu te po wali, “Magi baso dage gela obawe? Dagego gela wagio. Tama dagego te homu sęgę ena magio. Suao, ena Jerusalemba pobao. Tama augwaligo ena kalabuside mubaso da, eno wi menio. Eno Genuai Bidi Jisasgo po pusa mobadi, augwaligo homugo ena elabo homu ebaso me, elemainao,” te po wai.
ACT 21:14 Dago Polbolo te po wai, “Dago naga homugo pai hagede ebadi, dago togologobeo. Dago te po tama silali. Tilama, dago Godibolo po wainao, ‘Genuai Bidi, naga homugo naga tigidali sę pedalomainao, da wali paibao, dago te aga pelamuo po ma wagobeo,’” dago te po wali.
ACT 21:15 Te da hauwa sogonu Sisariade bidama, me sogo dago Jerusalemba pai hagede, dago walu dabe sisi elama, pali.
ACT 21:16 Te Sisaria bidi me badu Jisasgo po wali pabo bidi hani augwali da dali pali. Tama da augwaligo te bidi me deligo beba tagaligi pali, tede bidimainu yali. Te bidi nogi Nason, aga Saiprus buludu polobadu asai bidi da. Te bidi agai homu polobadu mu Jisasba muai bidi da.
ACT 21:17 Tialima, te sogo da Jerusalemba sabolama, te Jisasgo po wali pabo we bidi hanigo augwaligo bugai homu elama, da suagasali.
ACT 21:18 Tama do kigamu Pol dali da pelama, Jems dali po wagi pali. Tama te Jisasgo po wali pabo hani monu dabe tobolu bidi augwali me da dali sisinagasali.
ACT 21:19 Pol dali dago te bage dabe nogo menama, bugai homu yali. Tama tilama, nosali Pol agai te aga te Israel hani isąwai bidi dabego tǫde bilu ela bilali sę po augwalibolo pusali. Agai te po wai, “Godigo ena dąų olama, eno te sę tigidali yali.”
ACT 21:20 Tama Polgo te po ola silama, augwaligo Godigo nogi ugwaba sali. Bidi me deli hodaluama, Polbolo agai te po wai, “Dago ama, nage bugagia koneao. Umabo Juda hani we bidi augwaligo homu Jisasba mu muai elalubao. Tama augwaligo bomo elama, Mosesgo bomo yai po tigidali wali pabo da.
ACT 21:21 Tiali goli, gasa bidi dabe me badu augwaligo te hani we bidibolo nago nogi dolobo po wali. Augwaligo te geda mubo po tiwai wabo da, ‘Pol aga tigidali buluba pelama, tama agai Juda hani gegebo da. Tama agai koneama, te po augwalibolo ola mabo da, “Dagego Mosesgo dago wąįbolo mani bomo yai po wali pigio. Dagego ogwa ame nabode, tigiwali togogimio. Dago wąįgo yali kolesaga tudiba tagalao,” Polgo te tobage po ola mabo dao,’ augwaligo te po wabo dao, nago nogi dolomainogo.
ACT 21:22 Tama te tobage po wabo bidi dabe augwaligo nage eba asali po polo odaibao. Tama dago magi egowe?
ACT 21:23 Te usu dao. Pol, nage dago po wali pao. Da tomode bidi me si me si nama augwaligo deli bomai po bodolu God dali sai. Augwa bidibode me badu sę habu sai dao.
ACT 21:24 Naga dali te bidi me si me si nama bidi me nage hodobo te Moni Lotu Be tempel teba pao. Tama dagego te Juda dabego lotu po wabode te kolesaga ebode God gedude dwagi yai yaibao. Godibolo nai mabode nago te bidi me si me sibolo nago masigi mao. Tama augwa tobolu nisi poala sąyagameo, te augwaligo bomai po bodolu God dali sai tiwai. Nago te tibo si te Juda hanigo subo si, nage Juda dabego bomo yai po wali pobao waibao. Augwaligo nage te sę ebo sulama, augwaligo nage dago bomo yai po dabe bolobo menio koneaibao.
ACT 21:25 Me ma, te Jisasgo po wali pabo hani, te Juda hani isąwai we bidi, te dago augwalibolo te po pas asęnama, tolai dao. Dago augwalibolo te po tama wai dao, ‘Dagego te augwaligo te tibo godibolo ula mabo nai dage tugimio, dagego kibu me agai kaneme gelisąwai kibu tugimio, kaneme me tugimio. Te we sabo bomo yai po bolama, penani sę egimio,’ dago augwalibolo te po wai,” te bidi me deligo te po Polbolo wali.
ACT 21:26 Tama te po obaso, do kigamu Pol agai te bidi me si me si nama bidi oda selama, Moni Lotu Be tempelba pali. Tama augwaligo te Juda hanigo God gedude dwagi yai kolesaga ilabo lotu wali. Tama nosali augwali te Moni Lotu tempel Be tomoba pelama, tama Pol agai te lotu po wabo tobolu bidibolo te po walali, “Te Sabat deli silibo si, nosali da te Godigo gedude dwagi yai ilabo lotu silaibao. Silama, te da deli deligo te Godibolo ula mabo nai dabe magasaibao,” te po wai.
ACT 21:27 Te Sabat deli silabo maga ebode, te Juda hani bidi me badu augwali Esia buludu aselama, Jerusalemba sabolama, tama augwaligo Pol te Moni Lotu Be tempel tomode bidibo suali. Tama sulama, augwaligo te umabo Juda hani bidi hodolama, Pol nogo tuali.
ACT 21:28 Tama augwaligo Pol te Jerusalem be nani tomode Efesus bidi deli dali bilibo polobadu suali, te bidi agai nogi Trofimus, te Israel hani isąwai bidi. Tama augwaligo homugo Polgo te odasa asali bidi Israel hani meni homu yali, aga te Moni Lotu Be tomoba asali, tama te be dolali, augwaligo te geda mubo homu yali. Tama sulama, augwaligo i tama wali, “Hai, dage Israel bidi dabe, asiąo, da tau sagasiąo. Dago koneani. Bidi me deli agai tigidali bulude bidibo we bidi dabebolo po ola mabo, te dago hani nogi me, dago bomo yai po me, dago Moni Lotu Be tempel me agai aiyaba elalubo da. Nogo tuyu, te tibo bidi e dao. Suiąo. Megi dagego aga suao. Agai dwai kolesaga mu yali, Israel hani isąwai bidi dago dwagi yai Moni Lotu Be tomoba odasa asalio. Te dwali. Tama tibaso, megi Pol agai dago Moni Lotu Be tempel dolalio, te be megi da te Godigo gedude dwagi yai mu menio,” augwaligo te po wali.
ACT 21:30 Tama te tobage po tigidali Jerusalemde bidibo we bidigo odobo si, augwali te Moni Lotu Beba sisinagasali. Augwaligo Moni Lotu Be tomode Pol tulama, buluba kega sąyani. Tama augwaligo te Moni Lotu Be tempel tų polo paliali.
ACT 21:31 Tama augwaligo Pol ela mubo sę yali. Tama ebadi, bidi me deli pelama, te Rom gavman enesigi bidi tonalubo tobolu bidi pageba aselama, te po wai, “Te Jerusalem we bidi tigidali augwaligo moni po dagą obao, augwali pąde hwįabo maga yali.”
ACT 21:32 Tama te po obaso, te ami tobolu bidigo enesigi bidi hauwa mu me, augwali tonalubo bidi dabe me selama, te Moni Lotu Be tempel gobeba polo udulama pali. Tede augwaligo te we bidigo Pol elebo suali. Tama te we bidi augwaligo te ami tobolu bidi me, te enesigi bidi hauwa asobo sulama, augwaligo Pol ma elebe, tagalali.
ACT 21:33 Tama te ami tobolu bidi aga Pol pageba aselama, Pol nogo tuali. Tama enesigi bidi me badubolo te po wali, “Te bidi dagego aligabo bono si selama, te bidi nogode kęao.” Tama agai te Juda bidi hanibolo te po hanalu wali, “E bidi dewe? Agai dwai magi sę yaliwe?” wali.
ACT 21:34 Tialima, umabo bidi augwaligo bomonama po dagą weyu, augwaligo me me po, me me po wali. Te enesigi bidi tobolu bidi agai Polgo te yali sę po page agai konebo usube. Tama tibaso, te tobolu bidigo enesigi bidi me badubolo te po wai, “Dagego Pol selama, dagego bomai beba tagaligi pao,” wali.
ACT 21:35 Tama te enesigi bidi dabe augwaligo Pol togobilidu odasa holainu homu yai, tama te Juda dabego Pol ma sai hagede bomo yali. Tama tibaso, te ami bidi dabego Pol nogogo tobolude tolasa pali.
ACT 21:36 Te Juda dabe augwali wali asobadi, augwaligo “Pol ela muao,” po bomonama wali.
ACT 21:37 Te ami bidi dabe augwaligo Pol odasa aselama, augwa bomai be tomoba pai hagede, tų pobasede, Pol agai te tobolu bidi hanalu wali, “Eno nagebolo po me deli hanalubo usu egowe?” Tama te ami tobolu bidigo hanalu wali, “Nage Grik po wabo dawe?” wali.
ACT 21:38 “Eno homugo nage Isip bidi dao, te homu yali. Te bidi agai polobadu umabo we bidi homu hodolama, dago gavman bidigo po sela sąwai dao. Tama augwaligo te gavman bidigo po wali pabo we bidi me elai hagede yai. Te bidi agai umabo 4,000 we bidi selama, te bidi meni yai wa pai buluba pai dao. Eno homugo nage te bidi yaliwe homu yai dao,” te po wai.
ACT 21:39 Tama Polgo te po wei ponani, “Ena da Juda bidi hani dao. Ena ame nani bulu da Tarsus da, te Silisia tǫ tomode. Tama tibaso, eno Grik po wabo dao. Tama eno nogi da te Tarsus bulude bukude asęnama elalubo dao, te moni be nani. Tiali megi eno homugo nagebolo hanalu obao. Eno homugo tigidali we bidibolo po waio,” te po wai.
ACT 21:40 Tama te ami tobolu bidigo “Augwali dali nago po wao,” olama, tama Pol aga te be togobilide dolalu, agai nogo tų yali, te we bidi augwaligo po wabo tagalomainogo. Tama augwali pedauwali pania selama, tama agai Juda pogo po pusubo gagalali.
ACT 22:1 Te bidi Pol agai augwalibolo te po wali, “Eno ama dedeo, eno aya dedeo, eno wabo po dagego koneao, eno dwai kolesaga yali menio, dagego bugagia odao.”
ACT 22:2 Pol agai augwalibolo te po wali. Augwaligo odali, augwa Juda pogo agai po pusubo suali. Augwaligo po munu me wabe. Magi basowe? Augwaligo agai po bugagia odainu tama yali.
ACT 22:3 Tama Pol agai te po wali, “Ena Juda hani bidi dao. Ena idago ena Silisia tǫde Tarsus bulude ame nai dao. Tiali goli, te sogo ena dwasianude skulba pelama, ena genuai bidi ilalio, e Jerusalem be nanide bididuali. Te sogo te genuai bidi Gamaliel agai ena ola mawai dao. Tama eno dago wąį dabego bomo yai po tigidali eno skul mu wai dao. Tama eno bomo elama, Godigo po tigidali eno wali pali, dagego ede wali pabo tiwai tama dao.
ACT 22:4 Tama polobadu eno Godigo gesi tųdu wali pabo we bidi tigidali eno dolai dao. Tama eno dwai sę mu elama, we bidi me badu eno aligabo bonogo augwali kęnama, eno augwali kalabus ilai dao.
ACT 22:5 Tama te pris tobolu bidi me, te Juda lotu po wabo kaunsil bidi tigidali me, augwaligo dagebolo pusabo te yali sę po eno tibo po wabeo. Tama augwaligo enabolo pas me deli mawai dao. Eno te pas selasa pelama, te Damaskusde bidibo Juda hanibolo momainu eyu tama pali. Eno homugo ena Damaskusba pelama, Juda bidi hanigo ena konemainu, eno Jisasgo po wali pabo we bidi kalabus yainogo asai yaba homu emainu yali. Tama eno homugo augwali Jerusalemba odasa pelama, augwali moni sęgę me, dene me somainu tiwai dao.
ACT 22:6 Tialima, ena Damaskusba pabo tųdu pelama, tama da Damaskus pąba sabalobadi, giliga tomode, tama moni sole ula gagawai dagaludu polo aselama, te ulago ena tigidali bologobea sali.
ACT 22:7 Tama ena tǫba degasa pali. Tǫde munalubadi, eno bidi mego enabolo te po wabo odali, ‘Sol, Sol, nago ena magi baso dolobo sę ebawe?’
ACT 22:8 Eno te po wei ponoyu, tama wali, ‘Genuai Bidi, nage dewe?’ wali. Tama agai enabolo te po wali, ‘Ena Nasaret bidi Jisas dao, ena nago te dolobo sę ebo bidi dao,’ wali.
ACT 22:9 Tama ena dali pali bidi dabego te ula suali. Tiali goli, te bidi me deligo ena dali te po wabo augwaligo odobe.
ACT 22:10 Tama eno aga te po hanalu wali, ‘Genuai Bidi, nago homugo ena megi magi egowe?’ Tama te Genuai Bidigo enabolo te po wali, ‘Nage hodaluama, Damaskus tomoba pao. Bidi me deligo nagebolo Godigo homugo nago yabo sę po tigidali ola mawaibao,’ wali.
ACT 22:11 Tialima, eno gedu tigidali halua sali. Magi basowe? Te genuai sole ula gagawai nai eno geduba dolama, eno gedu hulia selama, hǫsana pai dao. Tama ena dali pali bidi dabe augwaligo ena nogo tulama, Damaskus be nani tomoba odasa pali.”
ACT 22:12 “Te Damaskus be nanide te bidi me deli bidali, agai nogi Ananaias. Te bidi Godibolo lotu po wabo da, da Juda dabego bomo yai po me agai wali pabo da, tama tigidali Juda te Damaskus tǫde bidali bidi dabe augwaligo homugo ‘Te dwagi yai bidi da,’ homu yai dao.
ACT 22:13 Tialima, te bidi Ananaias aga ena pageba dolagaselama, agai ena dali te po wai, ‘Sol, nage dago ama dao. Megi nage usu elama, gedugo ma suao,’ te po wai. Tama te bidigo te po ola silibo si, eno gedu usu elama, aga eno suali.
ACT 22:14 Agai enabolo te po wai. ‘Te God dago wąįgo lotu po wai dao, te da, agai homugo agai yabo sę tigidali nago konemainogo te yali dao. Agai sę ebo dwagi yai bidi nage sumainu homu eyu, nage sa muai dao. Tama agai homugo agai pedauwaligo po wabo nago odomainu yali.
ACT 22:15 Tialima, Godigo homugo nage agai po pusabo bidi nigilali dao, tama nago tigidali we bidibolo nago gedugo suali nai me, te ologo odali po me pusagameo.
ACT 22:16 Nage magi baso tonalubawe? Nage hodaluama, tama baptais sao. Nago dago Genuai Bidi i wao, tama agai nago dwai kolesaga yali sęgę tigidali sela sąmainu tama yao,’ Ananaiasgo enabolo te po wai,” Pol agai te po wali.
ACT 22:17 Te bidi Pol agai te po me wali, te Jerusalem we bidibolo, “Te nosali ena Jerusalemba geasa asali. Tama ena te Moni Lotu Be tempel tomoba pelama, Godibolo po obadi, te sogo eno nai me deli suali, ma nade subo ąǫ yali.
ACT 22:18 Tama eno suali ma, Genuai Bidigo ena dali po mibo suali. Tama agai te po tama wali, ‘Odao, nage te Jerusalem be nani megi polo taga pao. Nago e we bidibolo te enade po wabo si, augwaligo odogobeo.
ACT 22:19 Tama tibaso, nage polo pao,’ te po wai. Eno te po wei ponoyu, te po wai, ‘Genuai Bidi, augwaligo ena koneai dao. Polobadu ena te bomo yai po ola mabo be dabe tomoba pelama, te nago po wali pabo we bidi nogo tulama, elama, kalabuside muai dao. Tama eno te yali sę augwaligo koneai dao.
ACT 22:20 Tama me sogo augwaligo nago po wabo bidi Stiven ela mubo si, ena tede bidu, ena me usu da po wai dao. Te Stiven elali bidi dabe augwaligo ugwa eno tonaluali, augwaligo Stiven ela mubo si,’ eno te po wai.
ACT 22:21 Tama te Genuai Bidi agai enabolo te po wai, ‘Nage megi pao. Eno nage te Israel hani isąwai we bidi pageba tagala palabo dao, digibulu,’ te wali,” Pol agai te po wali.
ACT 22:22 Te Juda hani we bidi tigidaligo Polgo wabo po odali. Tiali goli, agai te po wabo augwaligo odali, ‘Te Israel hani isąwai bidi tau saibao,’ wabo po odama, augwaligo sębę elama, bomo elama, po dagą wali, “Te tiwai kolesaga ebo bidi ela muao. Te dwai bidi aga da dali e tǫde mu tama bidigio,” wali.
ACT 22:23 Tama augwali moni sębę mu ebaso, augwaligo moni po dagą olama, tǫ hogomu dali augwa gudubo ugwa dabe me selama, ugwaba sesayani.
ACT 22:24 Tama te Rom ami tobolu bidigo aga enesigi bidi dabebolo te po tama wali, “Dagego Pol dago bomai be tomoba odasa asao,” wali. “Dagego aga bono kęnama, keloago elao,” wali. “Keloago elama, agai te Juda dabego agade te moni po dagą wabo page agai dabolo pusa mawaibao, agai tibo po wagobeo,” wali.
ACT 22:25 Tiali goli, augwaligo Pol bono kęnama, bomai be tomoba pelama, augwaligo aga elai hagede, te ami genuai bidi me deli agai page pąde dolaluali. Tama te bidibolo Pol agai te po hanalu wali, “Dagego te po tų isąwai bidi olo dali elaibawe? Bidi me deli aga nogi Rom gavman bidigo bukude elalubaso, te dagego te bidi olo elamuo. Te Rom gavmanigo bomo yai pode tiwai po elalubo dao, hasia po tų bolo ebo da, te bidi dwai kolesaga yai yabo wenama suenu,” Pol agai te po wai.
ACT 22:26 Tama te ami genuai bidigo te po odama, aga te enesigi tobolu bidi dolo pageba mu pelama, te po hanalu wali, “Nage magi sę yabo homu ebawe? E bidi agai nogi te Rom gavmanigo bukude nogi elalubo da,” te po wai.
ACT 22:27 Tama te ami tobolu bidi agai Pol sugi pelama, agai agabolo hanalu wali, “Nago nogi Rom gavmanigo bukude nogi elalubawe?” Pol agai “Awe” wali, “te mu dao,” wali.
ACT 22:28 Tama te enesigi bidi tobolu bidigo te po wali, “Eno Rom gavmanibolo mone ge hauwa mugo abelama, eno nogi Rom gavmanigo bukude asęnama tama elalubo dao,” wali. Polgo te po ma wali, “Mu tama dao, ena aya dali ida dali sigo nogi te Rom gavmanigo bukude muai dao, polobadu. Tama ena ame nani sogode te bidigo eno nogi me bukude asęani,” te po wai.
ACT 22:29 Te ami genuai bidi dabe me, te Pol elai hagede yali bidi dabe me, augwaligo te po odobo si, augwali wi elama, polo habu kilali. Te tobolu bidi me moni wi mu yali. Magi basowe? Te bomo yai po bolama tama agai te enesigi bidi dabebolo megi tama te po wai dao, “Aligabo bono selama, Pol nogode kęao.” Tiali goli, agai hasia Pol dali po tų ebe. Tama agai megi tama koneani, te Polgo nogi te Rom gavmanigo bukude elalubo dao.
ACT 22:30 Te do te enesigi bidi dabe augwa tobolu bidigo Pol nogode aligabo bono kęani pisagana palali. Tama agai homugo te Juda hanigo Pol po tų ebo po page mu gegai hagede tiali. Tama te ami tobolu bidigo te enesigi bidi dabe augwalibolo te po wai, “Dagego te pris hani tobolu bidi me, te Juda hani kaunsil bidi dabe me, sisinao,” wali. Tama augwali sisinagaselama, ami tobolu bidigo Pol te po miboba odasa dulama, doligiluali.
ACT 23:1 Tama te moni po mibode Pol dolalu, te kaunsil tobolu bidi dabe bomonama gedugo tonalu, tama agai te po wali, “Dage eno deli hani dao. Eno te tiwai kolesaga Godigo susa aselama, megi eba usu naga sobao. Eno God dali dwai kolesaga me ebeo. Te tibo kolesaga yalide ena ma po tų ela mabeo,” wali.
ACT 23:2 Tama Pol agai te po wabode, te pris tobolu bidi agai nogi Ananaias, te bidi agai Pol pagede dolalubo bidibolo te po tama wali, “Dagego te bidi pedauwalide elao,” wali, tama augwaligo Pol elali.
ACT 23:3 Tialima, Pol agai Ananaiasbolo te po wali, “God agai nage elaibao,” wali. “Nage te nago tigiwali badu naga sawi yai elalubo dao. Tiali goli nago homu kolesaga tomode da, te damua pai elalubao,” wali. “Nago homugo nage Mosesgo bomo yai po wali pelama, enade po tų dolo ela mobao homu yali. Tiali goli, megi nago te bomo yai po bolama, nago te bidi dabebolo olama, ena olo dali elao wali. Te dwali,” Pol agai te po wali.
ACT 23:4 Tama te Pol pagede dolalubo bidigo Polbolo te po wai, “Te bidi da, te tuni bidi pris dao. Tama nago magi baso te dwai po agabolo obawe?”
ACT 23:5 Tama Pol agai te po wali, “Ama dedeo, eno konebeo, te tuni bidi pris aga bidibadi digi yabuo. Te eno geda muai yabuo. Magi baso meni, Godigo po wabo asęani bukude te po me deli elalubo, ‘Duga tonalubo tobolu bidibolo posobo po wagimio,’” wali.
ACT 23:6 Te Pol agai te tama weyu, agai bugagia koneama tonalu te homu yali. Te po miboba asali te kaunsil bidi dabe agai koneama, te bidi hani sibi dabe si bidibao homu yali. Agai suali, te bidi dabe tomode digi te bidi hani sibi si elalubao, me deli te Juda hani dabe tomode te Farisi bidi hani sibi dao. Te Juda dabego tomode digi te me badu bidi sibi hani da, te lotu po wabo tonalubo bidi hani sibi dabe da, te augwali te hani nogi Sadyusi dao. Tialima, agai augwali sulama, tama agai po bomo elama te po mibo bidi dabe augwaliba weyu, te po wali, “Ama dedeo, ena te Farisi hani bidi dao, eno hani nǫų dabe augwali me te Farisi hani dao. Tama megi ena dage tomode dolalubadi, dagego ena po tų ela mabo. Magi basowe? Eno homugo te tigidali we bidi Godigo te gų pagede ma hodolaibao. Eno te tiabo sogo tonalubo dao. Ena tama wali pode megi dagego ena po tų ela mobao,” Polgo te po wali.
ACT 23:7 Te bidi Polgo te po olama silibo si, te bidi hani sibi si te Farisi me Sadyusi te hani augwa sibi tomode konila ebo wado po polo olama, te hani si te po miani te besela sąwanio.
ACT 23:8 (Magi basowe? Te Sadyusi hani sibigo te homu ebo da, te isai bidi dabe ma hodalogobeo homu elaluali, te Godigo ensel bidi dabe bidibeo, te homu ebo tiwai, te mobo bidi dabe me bidibeo, te homu ebo dao. Tiali goli, te Farisi hani sibi dabego te homu ebo da, te isai bidi dabe gų pagede ma hodaluaibao, te mobo bidi dabe mu bidibo da, te Godigo ensel bidi dabe mu bidibao homu yali.)
ACT 23:9 Tama te umabo bidi dabego bomonama, moni po dagą wali. Me badu te Farisi bidi sibi me, augwaligo te bomo yai po ola mabo sę eyu, dolaluali. Tama augwaligo sębę ebaso, te po bomonama wali, “Dago te bidigo dwai kolesaga me yai subeo. Mobogo me, ensel bidi me agabolo te po wali bogo,” te po wali.
ACT 23:10 Te hani bidi sibi si augwa te po mibode moni sębę mu yali. Te ami tobolu bidi agai homugo tama tiali, ‘Te po miani bidi dabego Pol nogo sągą uga keke, edaba keke elama, agai tigi polo tologa pabode ela muabo maga dao,’ homu yali. Tama te homu elama, agai te enesigi bidi dabebolo te po wali, “Dage me badu te po mibo tomoba pao,” wali. “Tama augwaligo Pol nogo keke baso da, teda dagego aga nogo keka selama, dago aga te bomai be tomoba sela paibao,” wali.
ACT 23:11 Te sę augwaligo elama, te sogo hulide te Genuai Bidi Jisas aga Pol pageba aselama, dolaluali. Tama agai te po wali, “Pol, nago Jerusalem bidibolo eno po pusa mani. Tama nosali nago te pusali po tiwai naga te Rom be nanide me pusa mao. Tama tibaso, nago wi egio, nago homu dąų olama, bidao,” wali.
ACT 23:12 Te do kigamu Juda hani bidi me badu sisinani, augwaligo yabo sę po dodolali. Tama augwaligo te po bodolu Godibolo dąų walama, te po wai, “Dago tubo nai me, ąį me gisilama, Polbolo polasa ela muaibao. Tilama, nosali dago nai me ąį me ma tueibao,” wali.
ACT 23:13 Te po minama mu dąų wabo bidi dabe te bidi sigo nogo sągą sese te 40 silama bidi bidali.
ACT 23:14 Tama augwali te pris hani genuai bidi dabe pageba pali, tama te tobolu bidi te monu dabe pageba me pelama, tama augwalibolo te po tama wali, “Dago te bomai bodolu po Godibolo wali, megi dago nai me, ąį me tuguo wali. Pol ela muaibao, tama nosali dago nai me, ąį me ma tugo.
ACT 23:15 Tama tibaso, megi dage me, te kaunsil tobolu bidi dabe me, dage tigidali dagego te ami tobolu bidibolo bidi mumubo po ola tolao. Agabolo te po wao, ‘Dago homugo nago Pol eba ma tagala palao. Tama dago homugo agabolo po me badu ma hanalu waio, dago homugo agai mena sę mu yali te dago mu koneaio,’ te po wao. Tiali goli, aga edaba asobadi, dago nǫ mugi pelama, aga ela muaibao,” te Juda dabego te po wai.
ACT 23:16 Te bidi Pol aga abego ogwa, te gesi bidigo te Pol nǫ mugi pelama elabo po mibo odali. Tama tibaso, aga pelama, ami bidi dabego bomai beba Polbolo te po wagi pali.
ACT 23:17 Tama Pol agai te enesigi bidi genuai bidi me deli i olama, agabolo te po wali, “Nago te gesi bidi duga tobolu bidi pageba odasa pao. E bidi agai po me deli elalubo, agai odomainao,” wali.
ACT 23:18 Tama agai te gesi bidi odasa, aga tobolu bidi pageba pali. Agai te po wai, “Te kalabus bidi Pol agai ena i olama, hanalu wali, eno e bidi nage pageba odasa soao. E bidi agai homude elalubo po me deli nagebolo mawaibao,” wali.
ACT 23:19 Te ami hani tobolu bidigo te gesi bidi nogo tolasa, augwali si gasa habuba bidi meni yaiba pelama, agai te gesi bidibolo hanalu wali, “Nago homugo magi po enabolo waiwe?” wali.
ACT 23:20 Te gesi bidigo agabolo te po wai, “Te Juda hanigo genuai bidi dabe augwaligo homu deli elama, augwaligo do nagebolo te tibo po nigilama, hanalu weyu, tama waibao, ‘Dago homugo Polgo yali sę po ma odaio. Da pageba Pol odasa asao,’ te po tama do augwaligo waibao.
ACT 23:21 Tiali goli, augwaligo wabo po nago ‘Au’ wagio. Te augwaligo bidi sese si bidi tųba nǫ muagasaibao, Pol pabode elainogo yaibao. Tama augwaligo God gedude Pol elaibao po polai dao. Augwaligo Pol elainu, te nai me, ąį me osogo gisilali. Augwaligo te po dola selama, nago ‘Awe, Pol te kaunsilba pagameo’ po wabo wenama tonalubo,” te gesi bidigo te po wai.
ACT 23:22 Te ami hani tobolu bidi agai te gesi bidibolo te po wai, “Nage pedauwali pania sao. Nago enabolo wali po gasa bidibolo munu ma pusugio, hogwa sao,” wali. Tama agai te gesi bidi aga beba tagala palali.
ACT 23:23 Te ami hani tobolu bidi agai te ami genuai bidi si i wali. Augwali si aselama, agai tega sibolo te po wai, “Dage sigo megi hulide Pol te Sisaria buluba odasa pao. Eno homugo dage sigo bugagia odasa pelama, Feliks pageba tagaligi pao. Agai te gavman moni tobolu bidi dao. Tama dagego enesigi bidi dabe bidi sese nogo si nama 200 bidi sao. Te kibu hosde duayabo enesigi bidi dabe te bidi sese sela olama, gasa bidigo nogo si nama 70 bidi me sao. Te bidi sese nogo si nama 200 bidigo sesemone enabo bidi me sao. Dage sigo tama bidi dodolama, te Pol aga duayabo hos kibu dabe dodolao. Tama dodolama, te megi huli tomode nai po wabo magade 9 klok e bulu taga pagameo,” te po wai.
ACT 23:25 Te po olama, te ami tobolu bidi agai te pas nogogo asęani, te pasde te po wali,
ACT 23:26 “Eno nogi Klodius, me nogi Lisias dao. Megi eno te pas Feliks nagebolo asębe dao, nage gavman genuai tobolu bidi dao, nogi elalubo bidi dao. Nage tao.
ACT 23:27 Eno te bidi nage pageba tagala palebe dao. Magi basowe? Te Juda hani bidigo aga nogo tulama, pąde mu tama elebadi, tama dago tama odali agai nogi dago gavman bukude nogi elalubo. Tama tibaso, ena eno enesigi bidi dabe dali pelama, te bidi augwaligo nogode eno salio, tau selama, bobelai dao.
ACT 23:28 Eno homugo e bidigo mena dwai kolesaga ebaso, te Juda dabego elainu yaliwe? Tama tibaso, te po page eno koneainu, eno aga augwaligo kaunsil bagede po miboba odasa pali.
ACT 23:29 Tama tilama, Pol agai yali po page eno odali. Augwaligo aga po tų yali Juda dabego bomo yai po me badu pode. Tama augwaligo aga elabo dwai kolesaga me ebeo. Tama augwaligo te dwasianu pode aga kalabus me egobeo.
ACT 23:30 Tama tibaso, eno megi aga nage pageba polo tagala palobo dao. Magi basowe? Eno te Juda dabe sisinama, te bidi Pol elabo po eno odalio. Tama eno augwalibolo te po wali, ‘Te bidi po tų yabo da, e tama dao. Dage megi Sisaria be naniba pao, te gavman genuai tobolu bidi Feliks agai pagede te po tų yao.’ Te elama, eno po tama dao,” te po agai asęani.
ACT 23:31 Te ami enesigi bidi dabe augwaligo augwa tobolu bidigo wali po wali pali. Tama augwali hulide Jerusalem taga pelama, augwaligo Pol te Antipatris be naniba odasa pali.
ACT 23:32 Tama do kigamu te tǫdu pabo enesigi bidi sibi me, te sesemone enabo bidi dabe me, augwali Jerusalemba ma geasa pali. Tialima, hos kibude duga yali bidigo naga augwaligo Pol te Sisaria be naniba tagaligi pali.
ACT 23:33 Tama te sogo augwali Sisariaba sabolali. Te ami tobolu bidigo asęani pas augwaligo te gavman genuai tobolu bidi Feliksbolo mani. Augwaligo te gavman tobolu bidi pageba Pol tagalali.
ACT 23:34 Tama te gavman genuai tobolu bidi agai te pas nedama, agai Polbolo hanalu wali, “Nage mena tǫ bidi dawe?” Tama Pol agai te po tama wali, “Ena Silisia tǫdu asai dao,” wali.
ACT 23:35 Tama te gavman genuai tobolu bidi agai te po odobo si, agai Polbolo te po wai, “Nage po tų yabo bidi dabe eba sabalobo si, eno te po tų ebo odaibao.” Tama aga enesigi bidi dabe i wali. “Dagego Pol genuai gavman bidigo dwagi yai beba tagaligi pao, te polobadu te genuai bidi Herotgo sę yai be dao. Dagego aga bugagia tonaluao,” te po wai.
ACT 24:1 Te a naga sogo silama, te Ananaias aga Sisaria be naniba asali. Te bidi Ananaias te pris tobolu bidi da. Aga dali Juda dabego monu dabe me badu me asali. Te bidi me deli agai nogi Tertulus, aga me asali. Te bidi agai po tų ebo sę mu koneai bidi da. Tama augwali tigidali te gavman tobolu bidi Feliks pageba sabolama, tama augwaligo Pol po tų yabo po tigidali agabolo pusa mani.
ACT 24:2 Tama te tobolu gavman bidi Feliks agai te Tertulusbolo “Nago po wabo gagalao,” wali. Tama aga doligiluama, Polgo po tų yabo po gagalama, agai tama po wali, “Dago genuai bidi, hasia eno nagebolo nage usu da po waibao. Magi basowe? Nago dwagi yai kolesaga mu elalubo. Tama tibaso, da bugagia bidibo da. Nago te bomo yai po bugagia dodolama, me badu sę me dago bulu hodolabo sę bugagia dolasa pabo.
ACT 24:3 Tama tigidali sogo dago nage dali moni bugai homu ebo dao. Te tama tibaso, dago homu nagebolo nage usu dao po obao.
ACT 24:4 Tialima, eno nage dali bobobage po pusugomeo, nago sę yaga wali sągą tola sidalio. Tialima, megi eno nago da homu dene elama, da olo tau sabo po hanalu obao, nago dago pęwadage ponu pusubo odao.”
ACT 24:5 “Dago te bidi Pol sulama, koneani, agai da te dwai dwai kolesaga hauwa ebo bidi da. Tama dago koneani, te bidi agai tigidali Juda bidi tomode me, tigidali bulude me, hwįbo po page pabo bidi dao. Tama agai te wado po olama, tama te we bidi hani tomode pedebo bidi. Tama aga te Nasaret dwai bidi hani tobolu bidi dao.
ACT 24:6 Tama odao, agai dwai kolesaga dago Moni Lotu Be tempel tomode gagalama yali, te be meda ilainu, te dago Moni Lotu Be tempel bomo yai po agai bolalio. Tama tibaso, dago aga nogo tuali. [Tama dago homugo te dago bomo yai po bolalide, aga po tų ebao.
ACT 24:7 Tiali goli, te ami hani tobolu bidi nogi Lisias aga dali te enesigi bidi dali aselama, augwaligo te bidi dago nogode bomo mu elama, dobawai dao.
ACT 24:8 Tama nosali te ami tobolu bidi Lisias agai te po wai, ‘Te Pol po tų yai hagede yali bidi augwali aselama, nage gedude te po wagasao,’ wali.] Tama megi nago agai yali sę po page hanalu wabosi, tama aga digi te po page nagebolo pusaibao. Tama nago dago aga po tų yai hagede yali po page gegao,” te po wai.
ACT 24:9 Tama Tertulusgo te po olama, te Juda dabego me aga tau selama, “Te mu po dao, te Polbolo naga,” te po wali.
ACT 24:10 Te genuai gavman bidi Feliks agai nogo sibage elama, “Asao” olama, agai homugo Pol agai po omainu yali. Tama Pol aga dolalu, agai te po tama wali, “Eno nage koneanio, nage e tǫde tobolu bidi nigila bidibadi, kibu be hauwa silalio. Tama tibaso, nago dago ebo kolesaga kone dao. Tama tibaso, eno dwagi yai homu eyu, ena digi tau sabo po nagebolo pusuba.
ACT 24:11 Megi te poluade ena Jerusalemba pelama, Godibolo lotu po wainu yali. Te hauwa sogo silibeo, nogo si olama, sągą badu si wagi solama, sia sali. Tama nago augwalibolo hanalu wabo si, teda nago mu koneaibao, te po mu da.
ACT 24:12 Te sogo augwaligo ena suali, eno gasa bidi dabe dali pogo wąbi hwįyu ebe, te Moni Lotu Be tempel tomode. Tama eno bidi dabe me badu wąbi hwįabo bidi me sisinibe. Eno te tobage kolesaga tigidali bomo yai po ola mabo bede eno me ebe, te Jerusalem tǫde me ebe.
ACT 24:13 Tama augwaligo te po megi ena po tų ela mabo, te po mu po menio. Tama eno te dwai sę yali po page tiwai me augwaligo nagebolo ola magobeo, te po mu da wagobeo.”
ACT 24:14 “Tiali goli eno homugo dagebolo augwaligo ena po tų ela mani po dagebolo eno bugagia konelaibao. Ena te God wali pabo gesi tų wali pabo da. Ena God mu agabolo lotu po obao, te dago nǫųgo te lotu po wali God da. Tiali goli, bidi me badu augwaligo dago gesi tųdu wali pobaso, augwaligo homugo da Juda hani dolobo dao homu ebo. Tiali goli, eno tigidali Mosesgo asęani po me tagalobeo. Tama eno te polobadu Godigo po bukude asęnama pusa mani po eno konealubo homugo tagalogobeo.
ACT 24:15 Eno konealubo homugo God koneama, nosali we bidi tigidali gų pagede ma hodolaibao, te me badu we bidi dwagi yai kolesaga yali we bidi hani da, te me badu dwai kolesaga yali we bidi hani da. Tama te sę yabo sogo asobo eno tonalubao. Tialima, te Juda hani bidi me augwaligo te sę yabo sogo tonalubao.
ACT 24:16 Tama tigidali sogo eno tigidali we bidibolo dwai kolesaga ebo ena mu hagelabo. Eno Godigo gedude me, we bidi tigidaligo gedude me dwagi yai kolesaga naga yai hagede, eno te sę bomo ebo da,” Pol agai te po wai.
ACT 24:17 Te bidi Pol agai po me tama wali, “Te polobadu ena Jerusalemde bidama, nosali gasa buluba pelama, kibu be me si me si nama silama, ena Jerusalemba tamadi ma pali. Te sogo ena peyu, eno ama dede Jerusalemde bidibo bidi tau sai hagede, mone ge dali selasa pali. Eno homu me eno Godibolo hasa elama, Godibolo nai ula mabo kolesagadu wali pomainu yali.
ACT 24:18 Tama ena te Moni Lotu Be tempel tomode te sę ebadi, augwaligo ena suali. Te God gedude dwagi yai bidabo lotu sę eno ela silama, augwaligo ena suali. Tama bidi dabe me badu sisinama, po dagą olo dali weyu, te ena dali hwįyu yabo bidi hani me sisinai menio.
ACT 24:19 Tiali goli, Juda hani me badu te Esia tǫde bidibo bidi hani aselama, te Moni Lotu Be tempel tomoba asali. Tama augwaligo ena dali te po wabo page bidi dabe da. Tama te Juda dabe augwaligo homu ena po tų ela magi sogo da, teda augwali nago pageba aselama, ena po tų wagasigi da. Augwa po elalubaso da, magi homu elama, augwali magi baso nage pageba te po polo wagasobewe? Magi basowe? Augwaligo po menio.
ACT 24:20 Tiali goli te bidi dabe eba sabolali bidi dabe, augwaligo nagebolo eno dwai kolesaga yali po pusao wao, te eno moni kaunsil bidi gedude dolalubadi yali sę po pusao.
ACT 24:21 Tiali goli, augwaligo eno dwasianu yali sę me delide wado ebao. Eno te moni kaunsil bidi dabe gesabide tomode dolalu, eno te po wai dao, ‘Eno homugo God mu konealubo da, te isali we bidi tigidali Godigo gų pagede ma hodolaibao. Tama tibaso, dagego ena po tų ela mabo,’ eno te po wai,” Polgo te po wai.
ACT 24:22 Te bidi Feliks agai te Genuai Bidi Jisas wali pabo tų po bugagia koneani. Tama agai te Juda bidi hanibolo te po tama ola mani, “Te ami tobolu bidi Lisias asobode, eno dagego te po tų ebo dodolaibao.” Agai te po tama olama, te po tų yali tagalama, nosali po tų ma yainu tonaluali.
ACT 24:23 Tama Feliksgo te ami hani genuai bidibolo te po wai, “Pol kalabusiba muao. Tiali goli, nago Pol kalabus bomonama egio. Pol aga abagi dabe aselama, aga suagaselama, nai dabe me magasomainao,” te po wai.
ACT 24:24 Te nosali hauwa sogonu silama, Feliks dali aga we dali asai, te we nogi Drusila, te Juda hani we da. Augwali si aselama, tama augwaligo Pol i wai. Tama Pol aga pageba asali. Tama Pol agai augwali sibolo te Jisas Krais teba homu mubo po page ola mani, tama augwali sigo odali.
ACT 24:25 Tiali goli, Pol agai te po ola mayu, te po wai, “Tigidali we bidi dwagi yai doloba pai kolesaga mu elama, bugagia tonaluao, dagego dwai kolesaga egio.” Tama agai te po wali, “Godigo we bidi tigidali po tų yaibao,” wali. Tama te sogo Feliks agai te po odama, agai wi mu elama, agai Polbolo te po wali, “Nage megi te kalabus beba ma pao. Tama nosali me sogo eno sę meni baso, nage eno i obaso da, te nage ena pageba asagameo.”
ACT 24:26 Tama Feliks agai homugo Pol agai mone dualama, geme menama, agai kalabus ebo tagalamainu, te homu yali. Tama tibaso, agai Pol hauwa sogo i olama, aga dali po wali.
ACT 24:27 Te Feliks agai homugo te Juda hani bidi dabe dali abagi olama, bugagia bidainu homu yali, tama agai Pol kalabus bidibadi sula tagalali. Tama kibu be si silama, te bidi Porsius, aga nogi me Festus, agai Feliksgo sę hasegelama sali, te moni gavman sę. Tama Feliks gasa buluba sę egi pali.
ACT 25:1 Tama te sogo Festus agai te gesi sę selama, te Sisaria buluba asai dao. Tiali goli, tede sela sogo bidama, agai Jerusalemba pai dao.
ACT 25:2 Tama te Jerusalemde te pris tobolu bidi me, te Juda hani tobolu bidi me, augwali dali pai dao. Tama te hani Festus dali deliba sisinama, augwaligo Pol po tų yai dao.
ACT 25:3 Augwaligo bidi me badu dodolama, tąba nǫ mumainu, tama augwaligo homugo Pol elainu, tama augwaligo Festusbolo bomonama hanalu wali, “Dago homugo nago te bidi Pol Jerusalemba odasa asao,” wali.
ACT 25:4 Tialima, Festus agai te po wei ponoyu, te po wali, “Pol aga Sisaria bulu kalabus bede bidali. Pąde tama ena Sisaria buluba ma paibao,” wali.
ACT 25:5 “Tama dagego duga tobolu bidi dabe ena dali tagala palao. Tama te bidi agai dwai kolesaga yai baso da, te dagego aga te Sisaria bulude po tų ilagameo,” wali.
ACT 25:6 Te Festus aga te Jerusalemde bidibadi, nogo si sogo bidama, aga Sisariaba ma pali. Tama do kigamu aga te po tų bede bidali. Tama agai ami bidi i olama, “Pol odasa asao,” wali.
ACT 25:7 Tama Pol te po tų ebo be tomoba aselama, te Jerusalemdu asali Juda tobolu bidi dabe aga pageba sisinagasali. Te augwaligo bomai po umabo olama, te bidi Polgo dwai dwai kolesaga dabe haniani ebo bidi da po olama, Pol po tų ela mani. Tiali goli, te po mu po meni, augwaligo Festusbolo te po mu po ola magobeo.
ACT 25:8 Tiali goli, Pol agai te po wei begeleyu, te po wali, “Eno te Juda dabego bomo yai po me deli bolobeo. Eno dwai kolesaga augwaligo Moni Lotu Be tempel tomode me ebeo, te be tomode meda ilama, me dolobeo. Tama eno dago Rom gavman moni tobolu bidi Sisar agai nogi dolabo po me wabeo,” Polgo te po wai.
ACT 25:9 Tialima te gavman bidi Festusgo agai homugo te Juda hani bidi dabego aga dali dwagi yai homu pemene eyu, abagi olama bidai hagede homu yai. Tama tibaso, agai te po Polbolo hanalu wali, “Nago homugo eno te nago po tų te Juda dabego kaunsil bidi dabe gesabide dodolomainuwe? Tama tiabo homu ebaso da, teda nago homugo eno nago po tų te bulu Jerusalemba pelama, dodoligi paiwe?”
ACT 25:10 Te bidi Pol agai te po wai, “Eno homugo Jerusalemba pogobeo. Megi ena e dolalu po tų ebo be, te tigidali bulu tonalubo moni gavman bidi Sisargo po tų ebo be deli da. Nago ena e bede po tų ilao. Naga digi koneai dao, eno te Juda hani dali dwai kolesaga me ebeo.
ACT 25:11 Eno te moni bomo yai po me deli bolai tigi sogo da, te ena ela muao wagi da. Nago homugo augwaligo aga ela muao po wagi sogo da, teda eno ‘Ena elamuo’ po wagi menio. Tiali goli, augwaligo tibo pode ena po tų ebaso, te gavman bidigo ena augwaligo olo dali elemai hagede sula tagalogobeo. Tiali megi eno homugo nago ena te Rom buluba tagala palao, te Sisar pageba pelama, tede agai te ena po tų bugagia dodolaibao,” Pol agai te po wai.
ACT 25:12 Tama Festus agai te po odama, agai po tų ebo mu koneai bidi dabe dali po miani. Tama te po mibo silama, Festus agai Polbolo te po wai, “Nago homugo nage te Rom gavman moni tobolu bidi pageba pelama, agai nago po tų dodolaibao. Nage teba pao,” wali.
ACT 25:13 Te nosali me sogo te moni gavman bidi me deli, te bidi nogi Agripa da, aga dali aga abe dali si te Sisaria be naniba asali. Te aga abe nogi da Bernaisi da. Augwali si Sisaria buluba aselama, te Festusbolo “Nago te sę elama, bidibo, usu dao,” wali.
ACT 25:14 Tama augwali si Sisaria be nanide hauwa sogonu bidama, te Festus agai te Pol po Agripabolo wali. Agai tama po wali, “Te kalabus bidi me deli bidibo, agai nogi Pol da. Tama Feliksgo te agai po tų silisąbaso, aga te kalabus bede bidibo.
ACT 25:15 Tama polobadu gana ena Jerusalemba pelama bidagasali sogo, te Juda dabego monu dabe me, te genuai pris tobolu bidi dabego badi, te Juda hani dabe tobolu bidi dabego me, tama augwaligo te bidi po tų ilali. Augwaligo enabolo te po wali, ‘Nago te bidi po tų elama silibo si, enesigi bidi dabego aga mu ela muao,’ wali.
ACT 25:16 Tama tiali goli, eno augwalibolo te po wai, ‘Da Rom bidi dabe dago te tobage sę ebo menio. Dago te po tų yabo sę te tiwai ebo da. Te po tų yabo page bidi dabe me, te olo bidi me, augwali tigidali sisinagaselama, te olo bidi agai bilali po page dabe me, agai yali sę po page me pusubo dao. Tama te tobage po tų yabo sę esiąbaso da, teda da Rom dabego te bidi aga po tų yabo page bidi dabego nogoba mubo menio,’ eno te Juda dabebolo te po wali.”
ACT 25:17 “Tama augwali ena dali e Sisaria buluba asali. Tama ena toma tube, tama do kigamu ena te po tų ebo beba pali. Tama eno enesigi bidi dabe me badu tagala palama, augwaligo Pol ena pageba odasa magasali.
ACT 25:18 Tama dago po tų yali. Te Pol po tų ilibo bage dolaluyu, po wali. Tama eno homugo augwaligo te po tų ilibo Polgo haniani dwai kolesaga yai digi po tų ebo yaba homu yali.
ACT 25:19 Tiali goli, meni. Augwaligo aga po tų ebo po page augwaligo lotu po wabode naga tama. Tama augwaligo aga po tų ilibo po page me deli e tiwai elaluali. Te bidi me deli isali, agai nogi Jisas da. Tiali goli, Pol agai po bomai mu weyu, ‘Te bidi Jisas da, te gesi bidibo ula elalu bidibao,’ wali.
ACT 25:20 Tama eno bugagia te po tų ebo eno konebeo. Tama tibaso, eno Polbolo hanalu wali, ‘Nago homugo Jerusalemba pelama, tede nago e po tų yaibawe?’ wali.
ACT 25:21 Tiali goli, Pol agai homu hagela yali. Tama agai enabolo te po wali, ‘Nage ena Rom buluba tagala palama, te Sisar pageba pelama, tede agai digi eno po tų dodolaibao,’ wali. Tama te po obaso, eno te enesigi bidi dabebolo te po wai, ‘Aga dagego tonaluao. Nosali eno aga Rom gavman bidi Sisar pageba tagala palaibao,’” Festusgo te po wai.
ACT 25:22 Tama te moni gavman bidi Agripa agai te Festusbolo po wai, “Ena digi te bidigo po ena odaibao.” Tama Festusgo agabolo te po wai, “Do kigamu naga odagameo,” wali.
ACT 25:23 Te do kigamu te ami tobolu bidi dabe me, te Sisariade bidibo genuai nogi yai bidi dabe me, te gavmanigo po mibo be tomoba pali. Tama Agripa dali, Bernaisi dali si te be tomoba pabo si, te bede au yai madigi pelama, augwaligo augwali si bugai homu ilali, nogi ugwaba sali. Tama aselama, Festus agai ami bidi dabe me badu tagala palali, augwaligo Pol odasa aselama, te bidi dabe tomoba asomainu.
ACT 25:24 Tama Festus aga doligi uluama, te po wai, “Te gavman genuai bidi Agripa me, te gasa genuai bidi dabe me, megi po miboba asali bidi dabe, dagego te bidi suao. Tigidali Juda we bidi augwaligo e bidi enabolo elao wali bidi e dao. Tama Jerusalemde me, ede me, augwaligo te po wali, enabolo wali, e dao.
ACT 25:25 Tiali goli, ena digi gegali, te aga elabo po page menio. Tama aga digi enabolo hanaluama, te po wai, ‘Te Rom moni gavman bidi Sisar pageba ena tagala palao,’ wali. Tama te po obaso, eno aga Sisar pageba tagala palaibao.
ACT 25:26 Te eno homugo moni gavman bidibolo te pas asęnama, te agai e bidigo po tų page konemainu yaibao. Tiali goli, eno te pasde asęabo po page eno konebe. Tama tibaso, eno e bidi dage pageba odasa asali. Tama duga naga aga po odao. Tama eno homugo mu te genuai gavman bidi Agripa, naga digi te agai po odao. Eno e bidi dago gavman tigidali bulu tonalubo tobolu bidi pageba tagala palu, te agai te po tų page bugagia wasiąwai, eno homugo te usu egobeo, te homu yali. Tama nosali e bidigo po dago odama, eno dwagi yai pas me deli asęnama, te Sisarbolo te po tų page pusa mawaibao,” Festusgo te po wai.
ACT 26:1 Te genuai gavman bidi Agripa agai Polbolo te po wai, “Megi naga digi tau sabo po pusagameo,” wali. Tama Pol agai nogo munama tigidali we bidigo agai po odomainu, aga digi tau sabo po tama wabo gagalama weyu, te po wai,
ACT 26:2 “Genuai gavman bidi Agripa, nage gesabidide eno megi e po pusubo, ena dwagi yai homu ebao. Te Juda hani dabe augwaligo ena dali umabo dwai po tų yabo po wali, eno homugo te po wei begelebao. Tiali goli, nago mu koneai dao, tigidali da Juda bidigo haniani ebo kolesaga. Tama bidi dabe me badu augwaligo homu me deli te tiwai ebo dao. Bidi dabe me badu augwaligo pogo hwįbo tiwai elama, gasa homu dali wali pabo da, te me nago koneai dao. Tama eno te po eno nage gesabide pusubo, eno dwagi yai homu ebao. Tilama, megi eno homugo nage bugagia bidama, tonaluao, eno wabo po odao,” wali.
ACT 26:4 Te bidi Pol agai po me deli weyu, te po wai, “Te tama te Juda dabe tigidali augwaligo ena ogwade ena page bulude bidu yali kolesaga te augwaligo koneai dao. Tama ena gesi bidide Jerusalemba pelama, tede skul weyu bidali kolesaga me augwaligo koneai dao.
ACT 26:5 Augwaligo ena polobadu koneai dao. Augwaligo homugo te konegi sogo da, augwaligo eno Godigo po wali peyu te sę yali po nagebolo wagi da. Polobadu ena Farisi bidi sibigo ebo kolesaga wali pai dao. Tama da Farisi sibi dago bomo mu elama, te Juda dabego bomo yai po dabe tigidali dolo wali pabo dao.
ACT 26:6 Tama megi ena e po tų ebo bede dolalubo. Magi basowe? Polobadu mu Godigo dago bulai hani bidi nǫų dabe mubolo bodolu po polai dao. Godigo we bidi tigidali gų pagede ma hodolaibao po wali. Eno homugo te po mu po dao. Ena te wali po nai ebogila mubo tonalubo dao. Da Juda hani tomode Jekopgo ame nani hani sibi ogwa dabe nogo si olama, sągą me si elalubo da. Tama da Juda hani tigidaligo Godibolo hulide me, ulade me lotu po obadi, dago homugo agai dago nǫųbolo polobadu wali bodolu po nai ebogilia mubo tonaluyu bidibo dao. Gavman genuai bidi, eno te po konealubadi goli, augwaligo ena po tų ilibo.
ACT 26:8 Dage Juda hani, dagego e homu ebo da, ‘Te Godigo te isali we bidi gų pagede ma hodalogobeo.’ Dage magi baso te homu ebawe?” Polgo te po hanalu wali.
ACT 26:9 Te bidi Pol agai po me weyu, te po wai, “Polobadu ena digi bomo elama, umabo dwai dwai kolesaga elama, te Nasaret bidi Jisasgo nogi aiyaba elalubo sę yai dao.
ACT 26:10 Tama eno te sę Jerusalemde yai dao. Te pris hani tobolu bidi dabe augwaligo usu da olama, tibaso eno Jisasgo po wali pabo umabo we bidi kalabus ilai dao. Tama me badu po tų elama, augwaligo elemai hagede, eno usu dao wai dao.
ACT 26:11 Tama hauwa sogo ena te Juda dabego bomo yai po ola mabo be dabe tomoba pelama, tama eno te augwali elemainu, eno bidi dabe me badu tagala palai dao, dene mawai, augwaligo Jisasba augwa homu mubo sę tagalomainu yali. Tama ena moni sębę mu elama, te Juda hani isąwai bidigo be nani dabeba peyu, tede te Jisasgo po wali pabo we bidi augwalibolo sęgę mawainu, gegegi pali,” Pol agai te po wai.
ACT 26:12 Te bidi Pol agai te po wai, “Te eno tama sę yai dao. Tama te pris hani tobolu bidi dabe augwaligo enabolo pas asęna menama, usu da olama, tilama eno te pas selasa peyu, Damaskus buluba pelama, te Jisasgo po wali pabo we bidi dabe gegegi pai dao.
ACT 26:13 Dago genuai gavman tobolu bidi, bugagia odao. Nai po wabo pąde, da te Damaskus pabo tųdu pobadi, te moni sole gagawai ula dagalude asali, te ula da mu udula pali, te giliga tiwai ulago da bologobea sali, te ena dali pali bidi dabe me, te ulago mu usu yali.
ACT 26:14 Tama da tigidali tǫba degasa pelama, munalubadi, bidi mego po wabo eno odali, te Hibru pogo wali. Agai enabolo te po wali, ‘Sol, Sol, nago ena magi baso dolobawe? Nago ena elebo sę ebadi, te naga digi dene sabao. Nage te kau kibu tiwai dao. Te kau kibu page bidigo te pua pai ni dagego te kau kibu dono tigiba tunu pabo si, te dwagi yai tųdu pomainu, te kau kibu sągą sabologo ibaba sela sąbo da, tama usu egobeo, aga sągą dili dene sabo da,’ wali.
ACT 26:15 Tama eno te po wei ponoyu, te po hanalu wali, ‘Genuai Bidi, nage de dawe?’ wali. Tama te Genuai Bidi agai enabolo te po wai, ‘Ena da Jisas da. Tigidali sogo nago ena dolobo sę ebo te bidi ena dao,’ wali.
ACT 26:16 ‘Tialima nage hodaluama, doligiluao. Megi ena nage pageba asali, eno nage eno sę emainu sa mubao. Nage eno po sela pelama, tigidali we bidibolo nago megi na gagawai naide ena suali po pusao. Eno nosali nagebolo ola mabo sę po me, augwalibolo pusao.
ACT 26:17 Te Juda hani bidi dabe augwaligo nage ela muainu ebaso da, eno nage tau selama, bobelaibao. Tama eno nage te Israel hani isąwai we bidibolo tagala palaibao. Te hanigo me nage elainu ebaso da, eno nage tau selama, bobelaibao.
ACT 26:18 Tama nago augwali hulide bidibo pesage tagalama, ulaba kegasa asao. Tama nago augwali hulide bidibo kolesaga tagalama, nago augwali ula buluba kegasa asao. Augwali Satango bomode bidibadi, nago augwali ma sao, augwali God pageba asomainu tama yao. Tama augwaligo homugo ena konealu baso da, te augwaligo dwai kolesaga ebo Godigo tigidali sela sąwaibao, te Godigo sa muai we bidi dali wadolagasaibao,’ agai enabolo te po wai,” Pol agai te po wali.
ACT 26:19 Te bidi Pol agai te po wali, “Moni gavman tobolu bidi Agripa, eno moni ula dagaludu asobo sulama, agai po wali eno odama, te po eno sela sąbeo.
ACT 26:20 Tama hasia bolo eno te Damaskus we bidi pageba pali. Eno augwalibolo te po tama pusa mani, ‘Dagego dwai kolesaga ebo sę tudiba sąnama, dage God pageba asao. Tama dagego dwagi yai kolesaga ebo tigidali we bidi augwaligo sulama, dwai kolesaga tudiba sąyani konemainao,’ wali. Tama eno te po Jerusalem we bidibolo me, te Judia tǫ tomode bidibo we bidi tigidalibolo me, te Israel hani isąwai we bidibolo me, eno te po tama augwalibolo pusali.
ACT 26:21 Tama eno te we bidibolo te po tama pusubaso, te Juda bidi augwaligo homugo hagelabo olama, te po pagede augwaligo te Moni Lotu Be tempel tomode ena tulama, elainogo yalio.
ACT 26:22 Tiali goli, Godigo tigidali sogo agai ena tau sesa aselama, te megi eba sabolalio. Tialima, megi eno e po tųde mu po tigidali we bidi me, te tobolu bidi me, te olo bidibolo me, obao. Te Godigo pedauwalide po selama pusali bidigo asęani po me, te Mosesgo pusali po me, te eno megi e pusubo po me te deli po tama dao. Augwaligo te pusali po tiwai eno ela pelama, gasa pobadi me pusubeo.
ACT 26:23 Tama Moses me, te Godigo pedauwalide po sali bidi me, augwaligo te po wali, ‘Te bidi Israel we bidi tau somai hagede Godigo sa muai bidi Krais da, agai moni dene selama, isaibao. Tama aga hasia mu gų pagede hodalobo polali bidi dao. Tama agai tigidali pogo te Juda hani me, te Juda hani isąwai bidi me, dwai kolesaga sela sąbo sę dwagi yai konelai bidi aga dao, tigidali bidigo agai po odama, hulide pabo dwai kolesaga tagalomainu yaibao,’” Pol agai te po wali.
ACT 26:24 Te bidi Pol aga digi tau sabo po tama obadi, te bidi Festus agai agabolo i bomonama weyu, te po wali, “Pol, nage wabo pobao. Nage hauwa sogo skul wai bidi dao. Tama te genuai kolesaga sai bidi dao. Tibaso, nage wabo pobao,” wali.
ACT 26:25 Tama Pol agai te po wali, “Festus, nage dago gavman tobolu bidi dao. Ena wabo pabo bidi menio. Eno dwagi yai homu elalu, te po eno mu obao.
ACT 26:26 E moni gavman bidi Agripa agai me ena e wabo po koneani. Tama te sę yali po pusubo eno wi ebo menio. Te tigidali yali sę agai gedude yai sę dao, te dualama me yai sę menio.
ACT 26:27 Moni gavman bidi Agripa, nage Godigo pedauwalide po selama pusali bidigo asęani po nago homugo mu konebawe, te poba naga homu maniwe? Eno homugo naga homu te poba mu muani,” Pol agai te po wali.
ACT 26:28 Te bidi Agripa agai Polbolo te po wai, “Nago homugo te nago dwasianu wabo pogo ena Jisas wali pabo hani tomoba kegasa paibawe?” te po hanalu wali.
ACT 26:29 Tama Pol agai agabolo te po wali, “Dwasianu pogo ma, te bobobage pogo ma, te usu dao, magigo menio. Tiali goli, eno Godibolo po olama, nage dali, e po mibo bede bidibo we bidi me tigidali ena yaligia emainu ebao. Tiali goli, eno homugo dage ena kalabuside bidibo tiwai bididalio,” Polgo te po wai.
ACT 26:30 Te Pol agai po wabo silibo si, te moni gavman tobolu bidi Agripa me, te gavman tobolu bidi Festus me, te genuai nogi we Bernaisi me, te augwali sela dali bidali bidi me, augwali tigidali doligiluama, augwaligo te po tų ebo be tagalama, pali.
ACT 26:31 Tama te be tagalama, augwa hasi tomode po miai, “Te bidi agai kalabus yabo dwai kolesaga me deli ebeo. Tama aga augwaligo elabo dwai kolesaga me ebeo,” wali.
ACT 26:32 Tama Agripa agai te Festusbolo te po wai, “Te bidi agai ‘Te Sisar agai eno po tų odomainao’ wabo po wagi menigi sogo da, teda dago aga olo tagala paligi da,” te po wai.
ACT 27:1 Te Festus agai Pol dali, gasa kalabus bidi dabe dali te Itali tǫba moni gebadu pabo po dodolali, te Sisar pageba pomainu yali. Tama gavman tobolu bidi me badu augwaligo bidi me deli dąį ilali, te bidi nogi Julius da, augwali tonaluabo bidi dąį ilali. Te bidi Julius agai te ami enesigi bidi a naga bidi nogo sągą sese silama, tonalubo tobolu bidi da. Tama aga te umabo ami enesigi bidi hani me deli tomode bidibo bidi da, te hani nogi ‘Rom gavman moni tobolu bidigo enesigi bidi hani da.’
ACT 27:2 Tama da moni geba me deli tomoba pali, te geba Esia tǫ nabisde elalubo bulu tigidali bilibo geba da. Te geba page bidi aga bulu nogi Adramitium be nani da, te Esia tǫde. Tama te bidi me nogi Aristarkus aga da dali asali. Agai page bulu nogi Tesalonaika, te Masedonia provins tǫde. Tama da te Sisaria bulu taga pali, te moni gebadu, te tamu ąį daide pali.
ACT 27:3 Tama pelama, do kigamu geba tuagasabo pesageba sabolali, te bulu nogi Saidon. Te ami tobolu bidi Julius agai Polbolo dwagi yai kolesaga yali. Agai Pol tagala palama, Pol aga abagi dabe sugi pelama, augwaligo agabolo tubo nai dabe mani.
ACT 27:4 Tama nosali dago te Saidon bulu tagalama, ma pelama, te moni bomai wali da pabo guni badu asobaso, dago geba guni tubo bidigo te tamu ąį tomode dwasianu bulu elalubo, te bulu nogi Saiprus, teba guni dodolali. Te tǫ pąde moni wali meni yai.
ACT 27:5 Tama te Saiprus tǫ ela soali, da te moni tamu ąį tomodu pali, te gebadu. Pelama, te bulu si ela pali, te nabis sesegede, te bulu si nogi me Silisia tǫ, me Pamfilia tǫ da. Tama te nabis sesegede bulu meba sabolali, te be nani nogi Maira, te Lisia tǫde, tama dago geba tede gebelali.
ACT 27:6 Tama tede dago te geba tagalama, te da tonalubo amigo geba me kegegi suali. Te geba te Aleksandria bulu bidigo geba, augwaligo Romba pai hagede ebo suali. Tama te ami bidi dabe augwaligo da te gebadu selasa pali.
ACT 27:7 Te moni geba mudu da Maira tagalama, ma pelama, dua dua tama pali. Magi basowe? Moni bomai waligo da bomonama sela sąbaso. Tama da hauwa sogonu tamu ąįdu bilali, te Nidas buluba polo sabalobeo. Tialima, te waligo naga dago pabo tų ma sinia sali. Tama da te tamu ąį tomode bulu me elalubo, te bulu nogi Krit, te bulu pąba sabolama, tamu ąį sesege badu pali, tede te moni wali meni baso. Tedu pelama, Salmone tǫ dugulidu bobegegi pali.
ACT 27:8 Tama da te moni tamu ąį sesegedu pali, tama te bulu sesegedu pali, te geba guni tubo bidigo moni sę mu elama, geba tubo pesageba tugi pali. Tama augwaligo te ‘dwagi yai geba tubo pesage dao’ nogi wabo dao. Te geba tugi pabo pesage Lasia be nani pąde da.
ACT 27:9 Te da tede olo dali bidibadi, hauwa sogo mu tama bidali. Tama tede bidibadi, tamu ąį bǫį holobo sogo pąde yagasali. Te poluade tama moni wali asobo dao. Te kibu be yabo pąde yagasali, te Juda dabe augwaligo Godibolo nai ula mabo moni lotu wabo sogo silai dao. Godigo augwa dwai kolesaga yai sela sąmainu, te moni nogi elalubo lotu po wabo side dao, te sogo augwa tubo nai osogo gisilai dao.
ACT 27:10 Tama tebo sogo silibaso, te moni wali asobo sogo pąde yagasobaso, Pol agai te bidi dabe tau selama, bobelabo po wali, “Abagi dedeo, da moni gebadu tedu peyu da, te dwali, te da moni waligo geba dolama, da me, walu dabe tigidali me, da tamu ąį tomode dolama, isilaibao,” wali. “Da ede bolo me bidinao,” wali.
ACT 27:11 Tiali goli te sogo augwaligo Polgo wali po odama, te moni geba page bidi me, te moni geba tobolu bidi me, augwali sigo Polgo po sela sąyani. Tama te ami tobolu bidi agai Polgo wali po tagalama, te bidi sigo wali po wali pali.
ACT 27:12 Tama augwaligo umabo po wali, tama bidi dabe me badu augwaligo homugo ‘E bulu taga pelama, gasa bulu dwagi yai geba tugi pabo pesage te bulu Finiks badu pinao,’ wali, ‘Krit tǫba.’ ‘E geba tubo pesagede moni wali asobo sogo bugagia bidigobeo. Tama tibaso, dago geba te Finiks buluba selasa pinao, te dwagi yai geba tubo pesage giliga pabo badu elalubo dao. Te pesagede wali aselama, geba dolobo menio,’ wali. ‘Te moni wali asobo sogo da pelama, te buluba bidigi pinao,’ wali.
ACT 27:13 Te tialima, dwasianu dwagi yai wali me deli te saut badu tamu ąįdu asali, te geba tudi badu. Te geba tomode sę ebo bidi dabe augwaligo homugo ‘E waligo da te Finiks buluba sela paibao,’ homu yali. Tama tibaso, pomai hagede, augwaligo te geba dąų walobo moni sęgę yai ain dili tiwai nai tamu ąį pudu ugwaba guduama, geba daiba munama, tama augwa te bulu pąde tamu ąį sesegedu pali, te bulu nogi Kritba.
ACT 27:14 Tiali goli, tama pelama goli, moni wali mu polo asali, te Krit tǫba pedai badu asali. Augwaligo te tobage moni wali mu nogi ‘te giliga asoboba polobadu pobase nogo pedai badu asobo wali dao,’ nogi wabo da.
ACT 27:15 Tama te wali polo aselama, te geba bomo elama pogolama sabilali. Tama dago te wali asoboba geba guni dodolai hagede, sę bomo yali. Tiali goli, dago usu ebe. Tama te geba te waligo selasa pomai hagede tagalali.
ACT 27:16 Tama da te dwasianu bulu me nogi Kauda tǫ pąba asali, te tamu ąį tomode elalubo tǫ. Tama da uba pedai badu te bomai wali meni yai madigi pali. Tama te dwasianu geba moni gebade bono polobadu gebelama, kegasa asobo dao. Tama te moni gebade sę ebo bidi dabe augwaligo homugo ‘Te dwasianu geba hagaidali weyu, dago selama, moni gebaba muinao,’ wali. Tama augwaligo te dwasianu geba kegebo moni sę mu yali. Tama augwaligo te dwasianu geba kegelama, moni geba daiba munama, tama bonogo bugagia kęani. Te kęna silama, tama gasa bono me selama, te bono ąįba sąnama, a dologo badu solama, te bono gąų yai naigo selama, te moni gebade kęani, te geba dilide dąų olama, kęani. Te moni geba bomo te tiwai munama, da ma pali. Te moni gebade sę ebo bidi dabe augwali te waligo geba te Libia buluba pobogolo pobaso, augwali moni wi mu yali. Te nabis bulu dwai nagame yai kemi ebo pesagedu painu ebaso, wi mu yali. Tama tibaso, augwaligo te moni ugwa aiyaba dagala muani, te moni geba waligo naga tamu ąįdu olo dali sabilimainu tagalali.
ACT 27:18 Tama te moni wali mu asiyu, ąį bǫį me kisu mu dela pali. Tama tibaso, do te moni gebade sę ebo bidi dabe augwaligo te walu dabe me badu tama ąįba sąbo gagalali, te geba yadala pomainu yali.
ACT 27:19 Tama te sogo ma te gebade sę ebo bidi augwaligo te gebade muani ni me, te bono me, te nami ugwa me augwaligo nogogo selama, sąyani.
ACT 27:20 Tama da te moni tamu ąįde hauwa sogo bidali, te tulubage me, te pǫ me kisu dali, dago dagalu sube. Tama dago te giliga me, hǫ me hauwa sogo sube, te hǫgo dago bulu te badu elaluba homu ebe. Tama te moni wali agai te moni ąį bǫį hodolali. Tama tibaso, da gisiga bidibe. Dago te homu yali, ‘Da tigidali e gebade tamadi isilaibao,’ homu yali.
ACT 27:21 Te da nai hauwa sogo tube. Tama nosali Pol agai te geba tomode sę ebo bidi augwalibolo i olama, te po wali, “Te bidi hauwa, dagego odao. Dagego eno polobadu wali po sela sąyanio. Dagego eno po odama, te bulu Kritde bidigi sogo da, teda usu egi dao. Tama da e tiwai sę egi menio. Tiali goli duga eno po sela sąyanigo da, nai hauwa bage te hagela silali dao.
ACT 27:22 Tiali goli, megi eno homugo dage dąų walobe dao. Dagego wi elama, moni homu egio. Magu menio. Da bidi da me isigobeo. Tiali goli, te moni geba naga dolaibao,” wali. “Eno koneanio, te po mu dao. Magu menio.
ACT 27:23 Megi piali hulide Godigo enabolo po me olama, todalio. Te God eno agabolo lotu weyu, eno agai sę eyu ebo da. Te Godigo enabolo agai ensel bidi me deli ena pageba tagala palali.
ACT 27:24 Tama agai enabolo tama wali, ‘Pol, nage wi egio. Nage te moni Rom gavman tobolu bidi agai gedude dolalu, naga po wao. Tama odao. God da, te dwagi yai bidi mu dao. Tama tibaso, Godigo nagebolo dwagi yai sę elama, tau selama, tama te moni gebade nage dali bidibo bidi me deli isigobeo,’ te ensel mobo bidigo enabolo tama wali.
ACT 27:25 Tama tilama, abagi, dage noma sigio. Magu menio. Eno homu Godiba mubaso, agai dwagi yai kolesaga dabolo yaibao, tama agai dagalude sę ebo ensel bidigo enabolo te tiwai po wai dao.
ACT 27:26 Tiali goli, te moni geba te tamu ąį tomode elalubo bulude sabalobadi, tede dolaibao,” Pol agai te po wali.
ACT 27:27 Te moni waligo da selasa pelama, te tamu ąį nogi Adria tomode bilibadi, Sarere si silali. Te sogo huli tomode mu, te geba tomode sę ebo bidi dabe augwa homugo bulu me deli pąde elalubo homu yali.
ACT 27:28 Tama tibaso, augwaligo moni sęgę yai nai bobobage bonode gebelama, te tamu ąį tomoba sanama, augwaligo te tamu ąį degedu usu ni sali, te moni bobobage mu yali 40 mita. Tama da dwasianu pelagalama, te usu ma sali.
ACT 27:29 Tama te sogo, dwasianu pąde tama yali, 30 mita. Tama te sę elama, augwaligo koneani, te nabis me deli pąde elalubao homu yali. Tama augwaligo homugo masigiba taluama, doligi paibao homu eyu, augwali wi yali. Tama augwaligo moni sęgę yai ain me si me si nama bobobage bonode gebelama, deli deli te moni geba tudi badu tamu ąį degeduba tagala palali. Tama tilama, augwaligo homugo masigiba taluidali weyu, be posomainu augwaligo Godibolo po wali.
ACT 27:30 Tama Pol agai suali, te gebade sę ebo bidi augwaligo te dwasianu geba kęani bono pisaganama, te dwasianu geba tamu ąįba aiyaba tagalobo suali. Augwaligo homugo te moni geba taga peyu, te dwasianu gebadu buluba wi pinao. Tiali goli, augwaligo tibode ‘Moni geba gunide moni te sęgę yai ain walaibao,’ te tibo po tama wali.
ACT 27:31 Tama Pol agai koneyu agai te ami tobolu bidi me, te enesigi bidi dabebolo me, te po wali, “Te bidi augwali da dali bidisiąyu da, teda dage tigidali tamu ąįde isigi da. Te bidi dabe augwali wi po baso da, Godigo da tau sogobeo, agai wali po tiwai.”
ACT 27:32 Tama te po obaso, te ami bidi dabe augwaligo te dwasianu geba gebelali bono te ge hwągo togwali, te dwasianu geba te tamu ąįgo olo selasa pali.
ACT 27:33 Te be posobo pąde Pol agai augwalibolo “Nai selama, tuao” wali, tama augwalibolo po bomona wali, “Megi dagego moni homu edubadi, dagego nai tusiąma, Sarere si mu silali.
ACT 27:34 Tama tibaso, eno homugo dagebolo po bomonama obao, dage megi nai tuao. Magu menio. Te nai tubode dage bomo selama, dage bugagia bidaibao. Eno koneanio, da tigidali tama bugagia bidaibao, da me deli dwasianu dologobeo, selegobeo,” wali.
ACT 27:35 Tama te po olama, Pol agai te bret nai selama, te bidi dabe gesabidide Pol agai Godibolo nage usu da olama, te nai nogogo pebedama, tubo gagalali.
ACT 27:36 Tama te pogo augwaligo homu dąų olama, tama augwali tigidaligo me te nai tuali.
ACT 27:37 Tama da tigidali te moni gebade bidali bidi dabe hauwa mu da 276.
ACT 27:38 Tama dago te nai tuali, tabiali. Tama dago te tubo nai ge bek hauwa mu geba tabide muai te tigidali dago selama, tamu ąįba sąyani, te geba yadala pomainu yali.
ACT 27:39 Te be posobo si, te gebade sę ebo bidi augwaligo te nabis bulu tǫ sulama, te konebe. Tiali goli, augwaligo te bagu suai, te dwagi yai geba tubo gebabelede elalubo suali. Tama augwaligo te po wali, “Dago moni geba te bagudu dolo sela pabo usu sinao,” wali, “te geba te tǫ sesegeba dąų waligi pinao,” wali.
ACT 27:40 Tama pomai hagede, augwaligo te ain dilide gebelali bono dabe ge hwągo togolama, tamu ąį tomoba olo tagalali. Tama bidi me badu augwaligo te geba guni dodolobo habesege si bono kęani pisagana sąyani. Tama augwaligo te nami ugwa te geba gunide ma walali. Tama te nami ugwaba waligo sabilibode da nabisba odasa pomainu, tama tiali.
ACT 27:41 Tama tilama, dago geba te baguba pabo gagalali. Tiali goli, tamu ąįgo geba selasa pelama, te tamu ąį dologode dwasianu kemigo du elaluali. Tama te geba guni te kemi duba tųą paligi pabo si, te geba tudi badu tigidali pebeda pali. Magu menio. Moni tamu ąį bǫį dabe asiyu, te geba ni tologa sąyani.
ACT 27:42 Te ami bidi dabe augwa homugo te kalabus hani me ela muaibao homu yali. Magi basowe? Augwaligo te homu yali, augwaligo tamu ąįdu paubo pelama, te nabis buluba sabolama, duala sigi pelama wi dią paibao homu yali.
ACT 27:43 Tiali goli, te ami tobolu bidi agai te ami dabego yali homu tagalao wali. Magu meni. Agai homugo augwaligo Pol elidali. Tama agai da tigidali i olama, agai te po wali, “Tialima, duga tamu ąį paubo kone baso da, te duga samonama, paubo pelama, nabisba piąo,” wali.
ACT 27:44 “Tama duga me badu nogo ąį togobo konesiąbaso da, dage te ni nami dabe me selama, te moni geba nigai ni hodigi selama, dage nosali ąį pauluama, nabisba piąo,” te po wali. Tama dago tama tilama, da tigidali te nabis buluba bugagia sabola silali, da me dolobe.
ACT 28:1 Te da tigidali te nabis buluba bugagia sabola silali. Tama te bulu page bidi dabe augwaligo dwagi yai kolesaga elama, da tau sali. Tama augwaligo dabolo te po wali, “Te e tamu ąį tomode elalubo bulu nogi Malta dao,” wali. Tama augwaligo moni sia nogwani. Te sogo tulubage be yali, da tigidali kedau mu yali, tama te siade da kedau tuali.
ACT 28:3 Te Pol agai dwasianu isi dabe sesa bilama, te isiba ulagasali. Te dwasianu ni me si tomode hasamani me deli bidali, agai sube. Tama te isigo hasamani tigide dabo si, tama te hasamani posoga palunama, Pol nogode gąų kelanani. Te tobage hasamanigo kelanai bidi polo isibo da.
ACT 28:4 Tama te sogo te bulu page bidi dabe augwaligo te hasamani Pol nogode walalubo sulama, augwali moni noma selama, augwa hasi tomode po umabo weyu, te po wali, “Te bidi agai gasa bidi elabo bidi dao,” te homu geda muani. “Tamu ąįgo aga elebe. Tiali goli, te god me deli, agai nogi Dwai Kolesaga Dodolobo god, agai homugo aga elainu yali, te hasamani bidi isibo nabi aga tigide munalubo hasamani gąų kelali,” te po wai.
ACT 28:5 Tiali goli Pol agai nogogo te dwai hasamani hogola sąnama, te hasamani isi tomoba tuloluali. Tama Pol tigide dene ebe, aga bugagia bidali.
ACT 28:6 Tama te bidi dabe augwaligo tonaluama, augwaligo aga te hasamanigo kelali madigi dabe delama, aga polo degasa pelama, isibowe naga suenu tonaluali. Tiali goli, augwaligo tonalubadi, bobobage sogo mu bidibadi, te Pol aga tigi dene ebe, tama aga isibe. Tama te we bidi augwaligo moni homu elama, augwa homu begelama, te po wali, “Te bidi aga god me deli dao,” wali.
ACT 28:7 Te bulu pąde te me badu tǫ deli elalubo, te tǫ te bidi me deli agai tǫ da. Tama te bidi te Malta tǫde bidibo we bidi augwa tobolu bidi deli da, te bidi nogi Publius. Tama te bidigo da agai beba odasa pelama, da agai bugagia nai ula mayu bidali. Tama da sela sogo aga dali bidali.
ACT 28:8 Tama te sogo te Publius aga aya moni gasi selama, bede pila mubo. Aga te gasi si sali, me haligadu kaneme yali, me tigide moni posolo yali. Tama Pol aga pelama, aga suali. Tama Polgo Godibolo po olama, agai nogo te gasi bidi toboluba muani.
ACT 28:9 Agai te gasi sela sąnama, ma dwagi yai bidali. Augwaligo Polgo te tibo sulama, te Malta tǫde bidibo gasi yai we bidi tigidali Pol pageba sisali. Tama Pol agai te gasi yai bidi gasi sela sąsą pela silama, augwali ma dwagi yai ilali.
ACT 28:10 Augwaligo dabolo dwagi yai kolesaga elama, haniani dwagi yai nai da olo mani. Tama nosali da pabode augwaligo tigidali nai dago habuge yali nai augwaligo selama, te moni gebaba munai.
ACT 28:11 Te hasia da te Malta tǫde bidibadi, polua sela silali. Tama nosali da te gasa moni gebaba holali. Te moni geba page bidi te Aleksandria be nanide bidali. Tama agai tibo god nogi koneama, te tibo god nogi te moni geba sip gesabi badu daganai elaluali, “Deli sogo ame nai ogwa si da,” te po wali. Tama te Malta tǫde bidu, te moni wali dabe, te moni tulubage me sia sabo tonalu tede bidali. Tama dago augwali taga pali.
ACT 28:12 Tama da te moni gebadu pelama, te moni be nani nogi Sirakyusba sabolama, tede sela sogo bidali. Tama da Sirakyus tagalama, moni gebadu ma palio olama, te bulu me nogi Regiumba sabolali. Tama do kigamu wali me da asali badu geba tudi badu asali. Tama tego da tau selama, da pidubadi, be me huliama, me sogo kigamu da bulu me nogi Puteoliba sabolali.
ACT 28:14 Tama te bulude Jisasgo po wali pabo we bidi tede bidalubo suali. Tama augwaligo da augwali dali bidao wali. Te po baso, da augwali dali Sarere deli bidali. Tama da, dago augwali taga pelama, tǫdu naga pidubadi, moni genuai hanu nogi Rom teba sabolali.
ACT 28:15 Da Romba sabalisiąbadi, Jisasgo po wali pabo we bidi augwaligo da asobo po odama, da tų tomoba augwaligo tiąba asali. Tama me badu digibulu bobenu gana aselawali, maket me nogi Apiusde dago suali. Tama me badu aselama, te bidigo osogo abelama pibo be sela elalubo digide dago suali. Pol agai Jisasgo po wali pabo we bidi suyu, Godibolo nage usu dao wali, tebogo aga homu dąų walobao, te homu yali.
ACT 28:16 Te da Rom tomoba sabalobo si, gavman tobolu bidi dabego Pol agaduba bidabo pesage osogo abelama, bidimainu yali. Tiali goli, tigidali sogo enesigi bidi deligo tonaluali, Pol wi pidali weyu tiali.
ACT 28:17 Te bidi Pol aga Romde sela sogo bidama, Romde bidibo Juda hani tobolu bidi dabe “Dage ena pageba asiąo,” Pol agai te po wali. Tama augwali aselama, Polgo te po wali, “Abagi dede, polobadu ena Jerusalemde bidai dao. Tama dago hani dali eno dwai sę me yai menio. Tama dago nǫųgo po me sela sąwai menio. Tiwai goli, te pode ena kalabus yai dao, Jerusalemde. Tama augwaligo ena Rom gavman genuai bidi pageba ena po tų emainu sela pao wali.
ACT 28:18 Tama Rom gavman genuai bidigo enabolo te yali sę po augwaligo odalio. Tama Rom gavman genuai bidigo eno magi sę me, ena isabo sę me yai sube, te po wali. Augwaligo homugo ena buluba tagala palainu yai digi.
ACT 28:19 Tiali goli, Juda bagego ena kalabus emaina olama, bomo mu yalio. Ena te Juda dabego nogode dią pabo tų me meni yani. Tama tibaso, eno te po wai, ‘Ena Rom gavman genuai bidi Sisar pageba tagala paliąo, agai ena po tų ela momainu,’ wali. Tiali goli, ena te Juda bagego po tų ela mawainu eba asai menio.
ACT 28:20 Tama tibaso, eno dage megi asomainu hanalu obao. Magi baso menio. Enade augwaligo yali sę dagego me konemainu obao. Megi dagego e konemainu, ena e aligabo bonogo ena nogo si megi augwaligo kęai dao, kalabus bidi ebo ąǫ yalio. Magi basowe? Eno homugo te da Israel bage tonalubo bidi te Godigo dabolo nosali mawaibao, tama te sogo pedalobo eno tonaluyu bidibo dao. Tama tibaso, augwaligo ena kalabus mawai dao,” te po wai.
ACT 28:21 Te Juda dabe mego Polbolo te po wai, “Te Juda bidi dabe augwaligo nagede po pusumainu dabolo pas me tolobe. Be bidi me Jerusalem badu asama, nagede dwai po me pusagasobe.
ACT 28:22 Tiali goli, bidi hauwa mu me badu asama, dabolo tama pusalio, te Jisasgo po wali pabo bage da mu hagela ebo po pusali. Tiali, Jisasgo hanigo ebo homu kolesaga dago sueo,” te po wali.
ACT 28:23 Tama augwaligo Polgo wabo po ma odomainu, dua yabo bodolu me muani. Tama we bidi hauwa mu Polgo bodolu mani digi asali. Pol agai te Godigo homugo we bidi tonalubo sę po augwalibolo pusali. Tama Pol agai Mosesgo polobadu asęani po dabe me, polobadu Godigo po sela bilali bagego asęani po dabe me, pusa mani, te po dali daganama pusali, te augwaligo Jisasde po mu daba homu emainu. Tama te po pusubo kigamu mu gagalama, pio muba sabolali.
ACT 28:24 Tama we bidi me badu augwaligo Polgo wali po mu dao homu yali goli, meba we bidigo te mu da homu ebe.
ACT 28:25 Tama augwaligo po hauwa dogia pali. Tiyu augwaligo haliga digi deli ebe. Tama tibaso, Pol agai po me deli pusali, “God agai Dwagi Yai Mobo Bidi agai te Godigo po sela bilali profet bidi nogi Aisaia te bidibolo po me deli olama, tolalio, dagego nǫų mu dabebolo. Te po dageba me dolo te wabose,” te po wali.
ACT 28:26 “Godigo Aisaiabolo te po pusa wali, ‘Nage te Juda bageba pelama, tama te po pusao. “Dagego eno po oduda yaibao, tiali goli dagego te po page konegobeo. Dagego suyuda yaibao, tiali goli dagego munu me sugobeo,” te po wai.
ACT 28:27 Te magi baso menio. Te po page da, te we bidigo homugo eno po odogobeo. Tama augwaligo olo dega salio. Tama te ebogo, eno po odabo ąǫ ebe dao. Augwaligo gedu me halua sali dao. Te tibogo, eno ebo sę suabo ąǫ ebe dao. Augwaligo te sę egi menigi sogo da, teda enaba augwaligo dwagi yai kolesaga sigi dao, tama augwaligo ologo eno wali po me odigi dao. Me augwaligo eno yali sę me bugagia sugi dao. Tama tigi sogo da, augwali homu digi begelama, tama eno ma augwali dodoligi dao,’ Godigo Aisaiabolo tama po wai,” Pol agai te tama po pusa mani.
ACT 28:28 “Tama te po dage dolo mu te waliao. Tiali, dagego koneao. Tama Godigo da we bidi sela pabo tų po tama te Israel hani isąwai we bidibolo tolai yali. Tama te po augwaligo mu odaibao,” Pol agai te po wai.
ACT 28:29 Tama tilama, Polgo te po silama, augwa pebelayu, konila bomonama mu ela pali.
ACT 28:30 Te kibu be si Rom bulude agai osogo abelai bede bidali. Tama aga te bidibo bede mone gego aga digi abeleduali. Tama aga pageba te we bidi hauwa asobaso, dwagi yai homu yali.
ACT 28:31 Tama agai Godigo homugo we bidi tonalubo sę po te we bidibolo pusa mani. Tama agai te Genuai Bidi Jisas Kraisgo po pusa mayu, aga hale me ebe. Tama agai te po pusubadi, bidi mego ‘Nago te wabo po tagalao,’ te po wagasobe, bidi mego habu selebe.
ROM 1:1 Ena Pol da, tama eno e po asęna tolobao. Ena te Krais Jisasgo sę bidi dao. God agai ena i olama tama te po sela pabo sę bidi nigilali. Eno te Godigo wiegi yai gesi po te we bidibolo pusumainu agai ena hagea selama tedali muai.
ROM 1:2 Tama polobadu digi mu agai te wiegi yai gesi po nosali maiabo po dąų olama, tama aga po pusali sę bidi profet dabe augwaligo te dąų wali po te Godigo po bukude asęai dao.
ROM 1:3 Tama te wiegi yai gesi po te aga Ogwade wabo po dao. Te aga bidi mu pedalama bidibode, te aga wąį mu Devitgo hanide pedalali.
ROM 1:4 Tama me ma te wiegi yai kolesaga ebo Tedali Mobo Bidigo bomo eyu aga sa hania muani, aga te Godigo Ogwa da wai. Godigo aga te gų pagede ma hodolama, tama tebogo agai te we bidibolo aga Godigo Ogwa mu dao ola mayu waselai dao. Aga dago Genuai Bidi Jisas Krais dao.
ROM 1:5 Te aga nogi delide naga te Godigo da olo mu tau sabo wiegi yai kolesaga eyu, tama aga nogide me agai ena te po sela pabo sę bidi nigilali. Te Krais aga nogi tobade Godigo tama tiali, te Juda hani we bidi dali naga meni, te tigidali tǫde bidibo we bidigo konealubo po agade dąų weyu tama agai po wali pomainogo tama tiai dao.
ROM 1:6 Dagego me te Godigo i wabo odama, tama dage te Jisas Kraisde wadolali we bidi pedalali.
ROM 1:7 Eno e pas te dage Rom moni hanude bidibo we bidibolo asęna tolobao. Dage Rom bage, te God agai dage dali dwagi yai homu eyu, godolo eyu elama, tama dage te aga we bidi mu bidimainogo eyu agai dage i wali. Tama eno homugo dago Aya God dali, Genuai Bidi Jisas Krais dali sigo te dage dali te olo mu tau sabo kolesagago eyu tama dage homu wiegi yai ilama dage dua bugagia bidaibao.
ROM 1:8 Hasia eno e po bolo dagebolo wainogo ebao: te tigidali gasa tǫ badu bidibo bidi dabe augwaligo dagego Kraisde konealubo po dąų olama bidibo po mibo dao. Tama tibaso eno te po mibode homu koneyu, tama Jisas Kraisgo nogide te eno usu da po weyu, te eno Godibolo gedu haluasa po wabo dao.
ROM 1:9 Eno Godigo sę eno bomo tigidaligo eyu, tama eno te aga Ogwade te wiegi yai gesi po te we bidibolo pusubo sę ebo dao. Tama te God aga digi koneani, eno mu po obao, sesemane sogo eno gedu haluasa po wabo si te eno dagego nogi nogi ebo dao.
ROM 1:10 Tama sesemane sogo eno agabolo gedu haluasa po weyu, eno te tiwai hanalubo dao, “Hauwa sogo augwali pageba pabo tų elalusiąbadi ena tonaluali goli, megi nago usu da olama, te ena pabo tų nigilama, ena augwaliba pomainao,” te po wabo dao.
ROM 1:11 Magi baso meni. Eno dage suainogo ebo homu mu godolo yai. Eno te Godigo Mobo Bidigo tau sabo po mobo meba te dagebolo mayu, te dage bomo ilimainogo homu ebo dao.
ROM 1:12 Te e tama tiwai dao: eno homugo dagego te Kraisde konealubo po dąų wabogo te ena tau siyu, te eno te Kraisde konealubo po dąų wabogo dage tau siyu emainogo eno te dageba pabo homu ebo dao. Tama te tiwai ebogo te da tigidaligo homu bomo ilimainogo homu ebo dao.
ROM 1:13 Eno ama dedeo, eno homugo dagego e po bugagia koneiąo, hauwa sogo eno te dage bidibo madi asaibao homu yali. Tiali goli sesemane sogo nai me deligo te ena tų palialubo dao. Te eno sęgo gasa bulude bidibo Juda hani isąwai we bidi augwali tau selama te augwaligo Godigo po wali pabo we bidi pedalali, tama eno dage tomode me te tau sabo sę egi pabo homu hauwa sogo yai dao.
ROM 1:14 Magi baso meni. Tǫde we bidigo gedude te Grik po wabo bage augwali te haniani naide kolesaga page tolalubo bage dao, nogi elalubo dao. Me ma, te Grik po wasiąbo bage, augwali nogi meni yai bage dao. Tiali goli agai enabolo te wiegi yai gesi po pusubo sę mayu, “Te Grik dabe dali, te Grik hani isąwai we bidi dabe dali si augwali tigidaliba pusao” weyu yai. “Te kolesaga koneai bidi dabe dali, te kolesaga konesiąwai bidi dabe me, tigidalibolo pusao,” wai.
ROM 1:15 Tama tibaso eno homu me hodaloyu, te wiegi yai po te dage Rom hanude bidibo bidi dabebolo me te po pusainogo te homu bomo ebo dao.
ROM 1:16 Magi baso meni. Ena te wiegi yai gesi po wabode te ena hale me ebo menio. Te wiegi yai po Godigo bomo elalubao, te tigidali konealubo po dąų wali bidi dabe ma sabo te po usu dao, te hasia Juda dabe ma selama, te nosali gasa hani dabe me ma dobola sabo te wiegi yai po usu mu dao.
ROM 1:17 Odiąo. Te wiegi yai gesi pogo te Godigo te dwai sę yali we bidi te doloba pai we bidi ilabo sę page te dabolo hania ola mabo dao. Te sę page e dao: bidigo aga homu tigidali Kraisba munama tama agade naga tialuyu da, teda te Godigo gedude te bidi te doloba pai bidi pedalaibao. Gasa sę ebo te usu egobeo, te Kraisde tialubo kolesaga naga usu yaibao. Tama te doloba pai bidi ilabo sę page hania ilimainogo te Godigo po pusali profet bidi agai polobadu mu te Godigo wali po me deli tama asęai, “Te bidigo aga homu tigidali enaba muyu, te enade tialubo bidi, te bidi eno gedude doloba pai bidi pedalama, tama bugagia bidada peyu bidada paibao,” te po asęai.
ROM 1:18 Te Godigo sębę ebo te aga bidibo madidu hania pedalalio. Agai te God tudiba muyu, te dwai kolesaga eyu bidibo bidi dabe dali sębę ebo dao. Te tobage dwai sę ebo bage augwaligo te dwai kolesagago te mu pogo sę idali weyu te mu po hogwa sabo dao.
ROM 1:19 Augwaligo te mu po page konebo tų elaluali, tiali goli augwaligo te tų wali pisiąbaso, Godigo augwali dali sębę ebo dao. Magi baso meni, te tigidali Godigo kolesaga te geme me dualalubeo. Te augwaliba hania hanilani, God aga digi augwalibolo ola mawai dao.
ROM 1:20 E tiwai dao: polobadu mu Godigo tigidali nai nigali, tama te sogo gagalama megi e sogoba usu nagasali, tama te bidi dabe augwaligo agai nigali nai dabe suali. Tama augwaligo tede te Godigo kolesaga meba koneani, te bidi dabego gedugo susiąbo kolesaga te augwaligo koneagameo. Te aga gasagi yai tedali mu da, aga God dao, te augwaligo hania koneagameo. Tama agai genuai bomo te sesemane sogo bidada pabo bomo dao, silisiąbo bomo mu dao, te me augwaligo agade koneagameo. Tama tibaso, te bidi dabe augwa dwai sę ebo kolesaga te geme dualiyu tama augwaligo te po wei ponabo tų menio, “Dago te God konebeo,” te po me wagobeo.
ROM 1:21 Magi baso meni, augwaligo God koneali goli augwaligo aga te God mu da te homu me isąyu, tama augwaligo aga nogi ugwaba me sabeo. Tama augwaligo gedu haluasa po weyu agaba puba hwi me wabeo. Menio. Te augwaligo augwa homu kolesaga te olo naiba muani, te augwaligo God gegeda peyu, tama augwaligo homu te be hulia sabo tiwai pedalai.
ROM 1:22 Augwaligo hagoma eyu te po wai, “Dago kolesaga koneani,” tiali goli augwali esela pai bidi dabe mu pedalai dao.
ROM 1:23 Tama tiyu, augwaligo te isisąbo Godigo moni ula yai bomo tudiba muyu, tama augwaligo lotu po agabolo me wabeo. Menio. Augwaligo aga hasegelama, tama olo isabo bidigo piksa nomabolo me, tama ba noma me, te kibu piksa noma me, tama hasa yogai hani dali, te hasamani hani dali noma me, te tama piksa dabe selama, tama “Te nai dago god dao,” weyu, tama augwaligo te nai piksa noma dabeba lotu po wabo gagalama ebo dao.
ROM 1:24 Tama tibaso Godigo augwali tagalali. Augwa dwai kolesagago digi augwa te dwai meda yai kolesagaba kegeyu, tama augwa digi augwa tigi doloyu yainogo ebaso, agai augwali tagalali.
ROM 1:25 Da bidi dago te Godigo nogi sesemane bidada pabo sogo ugwaba sidu geao. Mu dao. Tiali goli te tobage bidi dabe augwaligo te Godigo mu po tagalama tama hasegelama tibo po sali. Tama tiyu, augwaligo te tigidali nai nigali God tagalama, tama augwaligo agai nigali naiba naga lotu po weyu, tama augwaligo teba sę yali.
ROM 1:26 Augwaligo aga tagalobaso, Godigo augwali te dwai meda kolesagaba tagalama bidai. Augwa we dabe augwaligo te bidigo augwali sabo te dolo kolesaga augwaligo te tagalama, tama te we dabe augwa hasi te wego isiąbo dwai meda yai kolesaga wali pai dao.
ROM 1:27 Tama bidi dabego me augwaligo te we sabo dolo kolesaga ebo te tagalama, tama augwaligo homu te sia dabo tiwai eyu, tama augwaligo dwai meda yai kolesaga te augwa ama hasi dabe dali yainogo yai. Te bidi dabe augwaligo te bidi aga hasi isiąbo hale ebo kolesaga te gasa bidi dabe dali yai. Tama te we bidi dabe augwa digi augwa te tobage dwai dwai sę yali kolesaga usu nama wei ponoyu, te augwali dwai dene mu sai dao.
ROM 1:28 Augwaligo te God augwa homude dąų ola sabo hagela homu yaligo da, teda Godigo augwali te augwa dwai kolesaga page tolalubo bidigo kolesaga wali pomainogo sula tagalalio. Tama tibaso, augwaligo te bidigo isąwai doloba pisąwai haniani kolesaga yai.
ROM 1:29 Tama augwaligo te doloba pai kolesaga me isąyu, tama dwai kolesaga mu eyu, tama mena nai pesa eyu, tama boi bidi ebo kolesaga yali. Augwaligo te doado bage hauwa elalubo bidi dali dwai homu eyu sębę sabo homu elama, tama bidi ela muyu yai, tama wado po weyu, tama tibo po weyu elama, tama gasa bidi dali dwai sę yabo homu kone palobo dao, tama augwaligo po tola sabilibo po wabo dao. Te tigidali dwai kolesaga augwalide mu pągąnaluai.
ROM 1:30 Te augwaligo posobo po olama tama hanilama me po pusuyu tama bidi mebago nogi dolali. Augwaligo God dali boi bidi eyu, tama po dagą weyu, tama hagoma elama, tama augwa digi augwa nogi ugwaba sai. Augwaligo dwai gesi noma kolesaga pedalai. Tama augwaligo augwa aya de ida sigo po sela sąyu yai dao.
ROM 1:31 Te augwaligo kolesaga me konebeo. Tama augwaligo gasa bidibolo te dąų wali po wai, tiali goli augwaligo te augwa po wali me pisąwai. Augwaligo te augwa deli kanemego ame nani bage augwali me godolo me egobeo. Augwaligo te gasa bidi dabe homu dene eyu tau me magobeo.
ROM 1:32 Te Godigo te tobage dwai sę ebo bage dali ebo homu e tiwai dao: “Te tobage haniani dwai kolesaga ebo bidi dabe augwali isimainao, te dolo mu dao,” agai te homu ebo dao. Te dwai kolesaga ebo bidi dabe augwaligo te Godigo ebo homu bugagia koneai goli, koneama tagalama, augwaligo te tiwai dwai kolesaga yai. Tama augwaligo te sę naga me ebeo. Menio. Te augwaligo te tiwai dwai kolesaga ebo gasa bidi dabe augwali nogi me ugwaba siyu, te sę usu dao weyu yai.
ROM 2:1 Te Godigo te tobage dwai dwai kolesaga ebo we bidi dabe dali sębę ebo dao. Tama agai te sębę ebo homu haninanigo da, teda dage tigidali bidi dabego gasa bagebolo po ela palobo da, eno dage deli delibolo e po obao, nago te naga yali dwai sę te geme dualobo usu me egobeo. Nago po wei ponainogo yali usu egobeo. Odao, nago gasa bidi dali naga po weyu yali, tama tebo kolesagago nago po nagaba digi te po obao. Magi baso meni, nago gasa bidi agabolo naga “Nago dwai kolesaga yai,” po wai, tiali goli naga digi nago me te tobage dwai kolesaga ebo dao.
ROM 2:2 Tiali goli dago koneani, Godigo te tiwai dwai kolesaga ebo bidi augwalibolo te dwai dene sabo sę wei ponobo dao. Tama tiyu Godigo po tų ebo te dolo mu naga ebo dao.
ROM 2:3 Odao. Nago te tobage dwai kolesaga ebo bidi dabe augwalibolo te po weyu yali, tiali goli naga digi nago me te tiwai kolesaga yai, nago magi homu ebo dawe? Naga digi te Godigo po tų gedelama wi pabo usu yaibawe?
ROM 2:4 Te ma, nago e homu ebawe, “Te Godigo ena wiegi yai bugagia iliyu, tama ena bobobage sogo tonaluyu, tama agai te dwai sę ebo wei enabolo polo me ponogobeo.” Te homu egio. Te Godigo wiegi yai polo wei ponosiąbo kolesaga ebode, te nago homugo te olo nai tiwai da, te homu ebawe? Godigo homugo nage homu begelemainogo, tama agai dwagi yai kolesaga naga nagebolo eyu tonalubo dao. Te kolesaga page nago konebewe?
ROM 2:5 Tiali goli nago naga homu mu palia selama, tama nago homu me begelebeo. Tialima tebo kolesagago te nago te dwai dene sabo sę ebo te pesage genuai holobao, te mone ge sabobo piduai tiwai. Te nosali te bodolu mani side te Godigo doloba pai po tų ebode te agai sębę hania haninama pedalaibao, tama nage te dwai dene te sogo saibao.
ROM 2:6 Godigo te tigidali bidigo yali kolesagade usu nama dobawaibao.
ROM 2:7 Tama mebago da, te dwagi yai kolesagade bomo elama bidiyu, tama tebo kolesagago augwaligo te genuai nogi me te wiegi yai nogi me te me dolisąbo bidada pabo ula te tų gegebo sę ebo dao. Tama Godigo te tama kolesaga ebo bidi dabe augwalibolo te bugagia bidada peyu, bidada pabo bidibo ula mawaibao.
ROM 2:8 Tama mebago homugo augwade naga koneyu, tama augwaligo mu po wabo te tudiba munama, tama dolo isąwai kolesaga wali pabo dao. Teda Godigo te bidi dabe augwali dali dwai homu mu eyu, tama genuai sębę eyu yaibao. Tama tiyu agai te dwai dene mu sabo sę augwaliba wei ponaibao.
ROM 2:9 Te dwai denede augwaligo hwa mu waibao, te dwai kolesaga yali bidi dabe tigidali, te Juda dabe augwaligo te dwai dene hasia selama, tama nosali te Juda hani isąwai bidi dabe augwali me tama naga tiaibao.
ROM 2:10 Tiali goli Godigo te wiegi yai kolesaga ebo tigidali bidibolo te genuai nogi me, te wiegi yai nogi me augwalibolo mayu, tama augwali aga dali hodobo bugagia bidaibao. Te Juda dabe augwalibolo hasia menama, tama nosali te Juda hani isąwai bage augwalibolo me mawaibao.
ROM 2:11 Magi baso meni. God agai te we bidi dabe dagalobo si, agai te nogi yai we bidi tedali dagaloyu, te nogi meni yai we bidi tedali dagaloyu ebo menio. Aga da te tobage kolesaga ebo bidi menio.
ROM 2:12 Te e tiwai yaibao: God agai te Juda hani isąwai bagebolo aga bomo yai po mabe. Tama tibaso, agai te augwaligo yali dwai kolesagade augwali po tų ebo si, augwaligo te bomo yai po bolali sęde agai augwali osola sulama dene magobeo. Tiali goli augwaligo augwa digi bomai po bolo baso, agai augwali dene mawaibao. Me ma, te Juda dabe augwaligo te Godigo augwalibolo mani bomo yai po konebo dao. Tama te bomo yai po koneyu dwai sę yali bage augwali Godigo te bomo yai pogo osola sulama tama dene mawaibao.
ROM 2:13 Magi baso meni. Te bidi dabe augwaligo bomai po odolama, tama te po augwaligo homuba musiąwani da, augwali te God gedude doloba pai bidi me pedalogobeo. Menio. Te tigidali bomai po tigidali sogo wali pali bidi, te bidi dabe augwali naga te Godigo augwali te doloba pai bidi nogi yaibao.
ROM 2:14 Eno te kolesagade po me elalubao. Te Juda hani isąwai gasa hani bidi dabe augwaligo te Godigo te Juda hani dabebolo mani bomai po meni yani, tiali goli augwa digi augwa homude augwaligo te bomai po wali pabo kolesaga wali peyu da, teda te kolesaga ebo bidi dabe augwaligo te bomai po meni yai goli, augwa tama tilama tama augwa homu aga digi te augwa bomai po tiwai elalubo dao.
ROM 2:15 Augwa tama kolesaga ebode, te bomai pogo page te Godigo augwaligo homude asęani te hania mu pedalai. Tama te homude elalubo bomai pogo augwaligo ebo kolesaga osola subo dao. Tama me sogo augwa homugo augwa yali sęde po tų iliyu ebo, tama me sogo augwaligo yali kolesagade te augwa homugo te kolesaga usu da homu ebo dao.
ROM 2:16 Eno te Godigo wiegi yai gesi po te we bidibolo pusubo si eno e po me pusubo dao. Odao, te Godigo te aga bomai po mani bage me, te bomai po sisąwani bage me augwali tigidali dali Godigo te po tų nosali yaibao. Tama tiyu agai te po tų dodolobo sę te Krais Jisasgo nogoba muyu, tama te bidi dabego geme ebo kolesaga osola suyu yaibao.
ROM 2:17 Dage Rom dabe tomode te bidi dabe meba te Juda dabe da. Te dage Juda dabe deli delibolo eno po obao. Nage da, nago nogi Juda elaluyu tama nago homu te bomai poba tialuyu, tama Godigo nagebolo te bomai po mobaso, tebogo nage te po tųde tau saibao, te homu ebo dao. Naga digi naga nogi ugwaba siyu tama nago te po wabo dao, “Ena Godigo bidi dao,” te wabo dao,
ROM 2:18 “Te Godigo homu kolesaga eno koneai, agai enabolo ‘Te kolesaga yao’ po eno odali,” nago te po weyu tama naga digi naga nogi ugwaba sabo dao. Augwaligo nage te bomai pode usu da olama, tama nago te doloba pai kolesaga koneyu godolo ebo dao.
ROM 2:19 Nago e tiwai homu ebo dao: “Te bomai pode eno te kolesaga page badi te mu po me sali da,” te homu eyu, tama “Eno te gedu widai bidi dabe augwali te eno tų me ola mabo usu dao. Ena te hulide bidibo bidi dabe augwaligo ula tiwai bidibao. Ena te kolesaga meni yai bidi dabe augwali po ola mabo bidi. Ena te bugagia konesiąwai dwasianu wai puluba tiwai bidibo bage po ola mabo tisa bidi da” wai.
ROM 2:21 Odao. Nago te gasa bidi dabe ola mobaso da, teda magi baso nago naga digi naga ma ola mabo meniwe? Nago po pusuyu te bidigo nai wi me sigio po wali, tiali goli naga digi nago magi baso nai wi sabo dawe?
ROM 2:22 Nago te po wali, “We bidigo te dwai penani ebo kolesaga me igimio” wali, tiali goli nago naga digi te penani sę ebo kolesaga magi baso ebo dawe? Gasa we bidi augwaligo te tibo god dabebolo lotu po weyu tama augwalibolo masigi me haniani dwagi yai nai me mabo dao. Nago te sęde te po wabo dao, “Eno te tibo godibolo lotu wabo kolesaga mu hagelabo.” Tiali goli magi baso nago te tibo godigo lotu beba pelama, te mani nai wi sabo dawe?
ROM 2:23 Nago naga nogi ugwaba siyu, tama nago te po wai, “Eno Godigo bomai po koneai dao” wai. Tiali goli nago naga digi te bomai po boloyu yali, tama te kolesagago nago te Godigo nogi dolai dao.
ROM 2:24 Te nago te kolesaga dolali, tede te bukude te tama tiwai po elalubao, “Te Juda hani isąwai bagego dwai posobo po weyu te po wabo dao, ‘Te Juda dabego God aga bomo meni yai bidi mu dao,’ augwaligo te posobo po Godigo nogide wabo dao,” te po te bukude asęna elalubao.
ROM 2:25 Te Godigo nogi dolobo sęde eno po me elalubao. Odiąo. God agai dagede sa muyu, tama dagego aga dąį ilimainogo duga tigiwali togolama, tama dagego te bomai po tigidali bugagia wali pobaso da, teda te tigiwali togobo sę ebogo aga du mu walaibao. Tiali goli dagego te bomai po bolali da, teda augwaligo dage tigiwali togwali digi, dage te tigiwali togosiąwai bidi dabe tiwai pedalai dao. Te tigiwali togobo sę ebogo dage tau sogobeo.
ROM 2:26 Me ma, te tigiwali togosiąwani Juda hani isąwai bidi dabe augwaligo te Godigo bomai pogo kolesaga tigidali bugagia wali pobaso da, teda te bidi dabego nogi te tigiwali togwali Juda dabego nogi tiwai mu elaluaibao.
ROM 2:27 Mu tama, dage Juda dabe dagego te bomai po elalubao, tama augwaligo dage tigiwali togwai. Tiali goli dagego te bomai po boloyu yai. Tama te Juda hani isąwai bage augwali olo bidibao, augwa tigiwali togosiąwani bidi dabe bidibo dao. Tiali goli augwaligo te Godigo bomai po wali mu pai yaibaso da, teda augwaligo ebo kolesagago dagego kolesaga aiyaba elaluyu tama po dagebolo naga waibao.
ROM 2:28 Magi baso meni. Te bidi aga tigi daide naga te Juda bidi bidibo bage, te tobage bidi aga te Juda bidi mu menio. Tama te tigiwali togobo sę ebogo te tigiwali togwali bidi te Godigo gedude te doloba pai bidi nigigobeo, te usu egobeo. Te menio.
ROM 2:29 Te mu Juda bidi mu bidibo bidi, aga agai homu kolesagade te God wali pabo bidi bidibo dao. E tiwai dao, aga homude te dwai kolesaga togwa sąwai bidi, te tobage bidi te Juda bidi mu dao. Tama Godigo Mobo Bidigo aga dali te sę ebo dao, te bomai po wali pabo kolesagago te tobage sę ebo usu menio. Tama te dwai kolesaga togwa sąwai bidi, aga te e tǫde bidi gedude nogi ugwaba sabo bidi tiwai bidigobeo. Menio. Agai nogi te Godigo ugwaba saibao.
ROM 3:1 Te tigiwali togobo sęde te tamadi wali po eno waligo da, te sęde dago ma kone palao. Te Juda dabe augwaligo te kolesaga wali peyu, tama augwaligo te Juda hani isąwai bidi dabe augwali mena tama aiyaba elaluaibawe? Te tigiwali togobo kolesaga ebogo augwali tau saibawe?
ROM 3:2 Tegoba! Te wiegi yai haniani sęde te Juda dabe augwaligo te gasa hani bage aiyaba elalubo dao. Te hasia nai e dao: Godigo agai wiegi yai po te Juda dabe augwaligo bugagia tonalumainogo mawai dao.
ROM 3:3 Mu dao, augwali mebago te pode te po mu po dao homu me isiąyu tama augwa homu tigidali te poba mubo meni. Tiali goli magigo menio. Ma augwaligo Godigo pode te tobage homu ebogo te Godigo digi te agai te Juda dabego wąį mubolo mani dąų wali po tagalomainogo ilaibawe?
ROM 3:4 Mu menio. Tigidali we bidi augwaligo tibo po wabo bage bidibogo da, God agaduba deligo mu po sesemane sogo wabo dao. Polobadu te genuai bidi Devit agai dwai sę elama tama Godigo agade po tų dolo mu elama tama Devitgo te sogo asęani pogo te eno megi tama wali po tau sabo dao. Agai te we bidigo dwai sę ebogo Godigo po tų dolo mu naga ebo kolesaga hania waselebo po te bukude asęyu tama e po asęani, “Nago po wabo si, tigidali sogo te we bidi augwaligo koneaibao, nago po te dolo po naga dao. Tama augwaligo nage po tų ila mobaso da, teda nago po tų ebogo augwali aiyaba mu elaluaibao,” te po asęani.
ROM 3:5 Te bidi dabe mebago e tǫde bidigo homu kolesaga wali peyu augwaligo e po obao, “Magi yaliwe? Te dago dwai kolesaga ebogo te Godigo doloba pai kolesaga hanilibaso da, teda Godigo te dago yali dwai sęde dene wei ponobo, tama agai te tama tebo kolesaga te dolo ebo menio.”
ROM 3:6 Woo, mu menio. Te God dolo me egi menigi sogo da, teda mena tama agai te tigidali tǫde bidibo we bidigo kolesaga dagaligi dawe?
ROM 3:7 Tama gasa bidigo e po enabolo wei ponaibao, “Te eno te God dali kęą pisąwai kolesaga ebogo te Godigo aga we bidi dali kęą pabo kolesaga mu hanilama, te tama tialigo te aga genuai nogi mu pedalobaso da, teda magi baso agai enabolo te dwai sę ebo bidi nogi polali tama enabolo te dwai sę yali wei ponaibawe?”
ROM 3:8 Tama we bidi augwaligo te po tama weyu e po me wabo dao, “Ao, Godigo te dwagi yai kolesaga pedalumainogo te dago dwai sę inao. Te bidi Pol agai te tiwai po naga wabo dao,” augwaligo enade nogi posobo po weyu te po wabo dao. Nosali te bidi dabe augwalibolo te Godigo dwai dene wei ponoyu, te agai dolo mu naga wei ponaibao.
ROM 3:9 Te Godigo te Juda dabe dali yali kolesagade dago magi homu egowe? Te ena me, te dage Rom we bidi meba me, te da te Juda hani bage dao. Te dago te Juda hani isąwai we bidi dabe augwali aiyaba elalubo dawe? Te me tegobeo. Mu menio. Eno tamadi te po walio, te dwai kolesaga sęgęgo da tigidali badi, te Juda me te Juda hani isąwai bage dali te sęgęgo mesegelai dao.
ROM 3:10 Te Godigo po bukude te tiwai po wali e elalubao: “Te doloba pai bidi deli me bidibeo. Mu menio. Te bidi me deligo wiegi yai kolesaga me konebeo.
ROM 3:11 Te bidi me deligo God gegebo sę me ebo menio.
ROM 3:12 Tigidaligo te tų wali pabo tagalali. Augwali tigidali bidi dali te Godigo gedude te olo bidi naga mu pedalai. Te wiegi yai kolesaga ebo bidi mu menio. Awe, me deli me elalubeo.
ROM 3:13 Te ma dala muai gų pagede polobadu pubulali tigi dwai dwai kugumini ebo tiwai, te bidi dabe augwaligo pedauwaligo wabo po te dwai mu dao. Augwaligo tibo po hauwa wabo dao. Augwaligo te bidi dolobo haniani po hauwa weyu, te dwai hasamanigo te bidi ela mubo tiwai ebo dao.
ROM 3:14 Sesemane sogo augwaligo dwai dwai i ola mabo po odu geyu, te bidibolo sęgę mayu tebo dao.
ROM 3:15 Augwaligo asesa polo gasa bidi dali boi bidi homu elama tama ela mubo dao.
ROM 3:16 Augwaligo augwa dwai sę ebo kolesaga wali peyu, tama te bidi dabe hauwabolo te dene me sęgę me te si naga mabo dao.
ROM 3:17 Augwaligo te gasa bidi dabe dali deli homu elama me bidibeo.
ROM 3:18 Augwaligo te God dali wi dwasianu me ebo menio,” te po te bukude polobadu asęani.
ROM 3:19 Tama dago koneani, te tigidali bomai pogo ebo sę agai te da te bomai po dologode bidibo Juda bidi dabe dali te sę ebo dao. Godigo bomai pogo te da Juda bagebolo me te dena yali dwai sę ola mabo dao. Tama tialigo da, bidi me deli agai “Te ena doloba pai bidi dao,” te po wabo usu egobeo. Te Godigo bomai po te pogo sę si elalubao. Te bomai pogo dago ebo dwai sę dabolo ola mabo dao, tama dago wei ponobo po menio. Tama me, da tigidali bidi te da tigidali gasa haniani tǫde bidibo we bidi dago te Godigo gedude dwai sę yali elaluai, te Godigo da tigidali dali po tų yaibao. Dago te me konemainogo, te bomai po elalubo dao.
ROM 3:20 Magi baso meni, te bomai po wali pabo kolesagade te bidi deli agade Godigo ‘Aga doloba pai bidi dao’ po me wagobeo. Te bomai pogo dena dwai sę ebo kolesaga denabolo hania mu ola mayu ebo dao, te tama sę naga te bomai pogo ebo dao.
ROM 3:21 Te bomai po wali pabo kolesagade te bidi me deli aga Godigo gedude te doloba pai bidi munu me pedalogobeo. Tiali goli megi da te Godigo te bidi doloba pai bidi ilibo kolesaga hania pedalali. Te bomai po wali pabo tųdu me pedalobeo. Menio. Te gasa tųdu pedalai. Tama te bomai po asęani po me, te Godigo po polobadu pusali sę bidi profet dabego pusali po me, te po sigo Godigo te bidi doloba pai bidi ilibo kolesagade nosali yabo sę po wai dao.
ROM 3:22 Te bidi doloba pai bidi ilibo kolesaga e dao: te bidigo konealubo po Jisas Kraisde dąų wali bidi, aga Godigo doloba pai nogi poaibao. Tama tigidali haniani we bidigo konealubo po dąų obaso da, Godigo augwali doloba pai we bidi nogi waibao. Magi baso meni, te Juda hani bidi doloba pai bidi ilibo kolesaga, te Juda hani isąwai bidi doloba pai bidi ilibo kolesaga tedali tedali meni.
ROM 3:23 Magi baso meni. Da tigidali bidi dago dwai sę yai dao, tama da tigidali te Godigo wiegi yai usu niba kadu wabo usu menio.
ROM 3:24 Tiali goli Godigo da olo mu tau siyu mabo kolesaga yalio. Tama Krais Jisasgo yali sęgo da ma abelama, tama Godigo da doloba pai we bidi nogi poai. Dago te me abelebeo. Godigo olo mu dabolo te Krais Jisasgo yali sęde te doloba pai we bidi nogi poai.
ROM 3:25 Polobadu Godigo Jisas sa muyu, te aga isąma tama agai ni pedaide te dulubo kanemego te agade konealubo po dąų wali bidi dabego dwai sę yali te sela sąwaibao wai. Te kolesagago Godigo te agai ebo doloba pai kolesaga dabolo ola mani. Polobadu Godigo te we bidi augwali dali dua nagame eyu tama augwaligo dwai sę suali goli, agai aga nosali yabo sęde homugo kone pelama agai te dwai sę wei ponebeo. Tiali goli megi e sogode agai te dwai sę ebo sula tagalobo menio. Aga ogwa isalide agai te dwai sę wei ponobo doloba pai kolesaga dabolo hania ola mawai dao. Tama tibaso dago koneani, God digi tigidali doloba pai mu bidibao. Tama dago e me koneani, te tigidali we bidigo konealubo po Jisasde dąų obaso da, agai augwali doloba pai we bidi nogi nogi yaibao.
ROM 3:27 Tama tibaso, dena digi dena nogi ugwaba sabo tų mena tama elalubawe? Te meni dao. Te tų palia salio. Magi naigo te tų palialiwe? Te Godigo augwali doloba pai we bidi nogi nogi yai hagede augwaligo te bomai po wali pabo kolesagago augwali doloba pai bage ilibo meni. Te menio. Te Kraisde te konealubo po dąų wabo kolesagago naga te we bidi doloba pai we bidi ilibo dao. Tama tibaso, dena nogi ugwaba sabo tų meni dao.
ROM 3:28 Tama koneyu, dago e tiwai po wabo dao: bidigo konealubo po dąų naga obaso tama Godigo aga doloba pai bidi nogi yaibao. Te bomai po wali pabo bidi da, agai te bomai po tigidali dolo mu wali pabo usu meni baso, te Godigo aga doloba pai bidi nogi me wagobeo.
ROM 3:29 Nago te po mu meni homu eyu, nago e po wabo dawe, “Te God aga te Juda dabe augwaligo God naga dao. Aga da, te Juda hani ąǫ isąwai te gasa hani dabe augwaligo God meni,” nago te homu ebo dawe? Te po mu po menio. Aga da te gasa hani augwaligo God me dao, agai augwali me ma dobola selama dwagi yai madiba mubo dao.
ROM 3:30 God aga deli naga dao. Tama tialigo da, te tigiwali togolama Kraisde konealubo po dąų wabo Juda bidi, te Godigo aga doloba pai bidi nogi yaibao. Tama tigiwali togosiąma Kraisde konealubo po dąų wali bidi, te Godigo te bidi aga me te doloba pai nogi nogi yaibao.
ROM 3:31 Dago e po wabo dao: we bidi augwaligo Kraisde konealubo po dąų obaso, te Godigo augwali aga gedude doloba pai we bidi ilaibao. Tama te po wabogo dago te bomai po dolobo dawe? Mu menio. Dago te bomai po page hania haninama tama te page da bugagia wali pabo dao.
ROM 4:1 Awe, te Abrahamde me te tiwai pedalali. Abraham aga te da tiwai bidi, tama aga da Juda dabego wąį mu dao. Tama dago agade homu kone paluyu, tama Godigo bidi doloba pai bidi ilibo kolesaga page dago bugagia koneagameo. Agade magi sę pedalaliwe?
ROM 4:2 Te mu tama Abrahamgo te dwagi yai kolesaga ebaso tama tede aga te doloba pai bidi pedaligi sogo da, teda aga digi aga nogi ugwaba sainogo tigi dao. Tiali goli God gedude aga digi aga nogi ugwaba sigi meni.
ROM 4:3 Tama te sęde te Godigo po bukude e tiwai po wai dao, “Te Abrahamgo Godigo wali pode te mu po dao aga homu tomode weyu, tama Godigo po homude dąų wali. Tama tibaso, Godigo ‘Te Abraham te doloba pai bidi dao’ wali,” te bukude te po elalubao.
ROM 4:4 Dago koneani, bidigo sę elama sabo mone, te mone dago te olo sabo dao te nogi nogi egobeo. Menio. Te sę ebo wei naga ponobo nai dao.
ROM 4:5 Tiali goli te Godigo te bidi dabe doloba pai bidi ilibo kolesaga te tiwai menio. Te menio. Bidi me deligo homu eyu ‘Eno te Godide konealubo po dąų obaso, agai ena te doloba pai bidi nogi poaibao. Eno ena ebo sęde te nogi sogobeo.’ Te homu ebo bidi agai homugo te God da te dwai sę yali we bidi te doloba pai bage ilibo God dao. Tama te homu ebo bidigo homugo konealubo po Godiba dąų obaso, teda Godigo gedude te tiwai konealubo po dąų wali bidi te doloba pai bidi dao. Tama Godigo agabolo te nogi olo mawai, te bidigo aga yali sęgo abelebeo.
ROM 4:6 Tama te polobadu bidai bidi nogi Devit agai te tobage bomai po wali pisąwani doloba pai bidi nogi sai bidide homu kone paluyu, tama Devitgo te bidi aga wiegi yai homu pemene ebo koneai dao.
ROM 4:7 Tama te koneama, tama tede Devitgo te po asęani, “Te Godigo bidi dabego te bomai po bolali dwai kolesaga sela sąnama, tama augwaligo dwai sę yali kolesaga mesegelali, te bidi dabe augwali wiegi yai homu pemene mu ebo dao.”
ROM 4:8 “Te Genuai Bidigo bidi me deligo dwai sę yali te homu me konesiąbaso da, te bidi aga wiegi yai homu pemene mu ebo dao.”
ROM 4:9 Tama te tigiwali togwali Juda bidi dabe augwali naga augwali te tiwai wiegi yai homu pemene emainogo yaibawe? Ma te tigiwali togosiąwai bidi dabe, te Juda hani isąwai bage, augwali me te wiegi yai homu pemene egowe? Woo, te tigiwali togosiąwai bidi dabe augwali me te wiegi yai homu pemene yaibao. Magi baso meni. Dago te po tama wabo dao: “Abrahamgo homugo te Godigo agabolo nai maiabo dąų walali po te mu po dao. Tama tiyu, Abrahamgo te agade konealubo po dąų wali kolesaga te Godigo sulama, tama Godigo homugo ‘Te Abraham te doloba pai bidi dao,’ te po wali.”
ROM 4:10 Tialima, Abraham te mena tama bidibadi tama Godigo aga doloba pai bidi da homu yaliwe? Ma aga tigiwali togwai elalubadi, ma aga tigiwali togosiąbadi dawe? Te aga tigiwali togosiąbadi tama Godigo homugo aga te doloba pai bidi da te homu elama, tama aga doloba pai bidi nogi wai dao.
ROM 4:11 Aga te tigiwali togosiąbadi, tama agai Godide konealubo po dąų obaso, tama Godigo aga doloba pai bidi nogi wai. Tama nosali te sa muyu, te tigiwali togobo kolesaga mayu tebogo Godigo hania hanilali, te agai Abraham te doloba pai bidi nogi polali dao. Abraham agai hasia tama tilama, tama nosali gasa bidi dabe augwa tigiwali togosiąbadi goli, te Godigo augwalibolo te doloba pai bidi nogi omainogo eyu, tama augwaligo Godide te konealubo po dąų wai. Tama Abraham aga te kolesagade polasa pai bidi dao, tama augwali nosali wali asai. Tama tibaso aga da augwaligo hasia wąį monu bidai.
ROM 4:12 Tama aga te tigiwali togosiąwani bagego wąį naga ebeo. Menio. Aga da te da Juda dabego wąį mu me dao, te da te dena tigiwali togolama tama Abrahamgo sągądu wali pabo Juda bage, dago te konealubo po dąų wali. Tama tiyu te aga tigiwali togosiąbadi te sogo agai tama tiwai kolesaga dago yai dao.
ROM 4:13 Polobadu Godigo po Abraham dali me te aga bulai wai dali po dąų wali elaluai, te agai te tigidali bulude bidibo we bidigo tǫ tigidali augwalibolo mawaibao po wai. Tiali goli Abrahamgo te bomai po wali pobaso Godigo te po agabolo dąų me wabeo. Menio. Abrahamgo Godide konealubo po dąų obaso tama Godigo aga doloba pai bidi nogi nogi yali, tama tibaso Godigo aga dali te tǫ maiabo po dąų wai dao.
ROM 4:14 Te e tiwai dao: te bidi augwaligo te bomai po wali pobaso, augwaligo tede naga te tigidali nai sabo tigi sogo da, teda te konealubo po dąų wabo kolesaga te olo nai tiwai elalugi da, tama te Godigo dąų wali po me te bomo menigi dao. Magi baso meni. We bidigo te bomai po tigidali bugagia wali pabo usu meni baso, tama sęgę sai we bidi bidibo dao.
ROM 4:15 Bomai po elalubaso da, teda dago koneani, te bomai po bolobo bidi aga Godigo nogode dene sabo tų te me elalubao. Tama te bomai po menigi sogo da, teda dago te bidigo bomai po bolobo te po me wagi menigi dao.
ROM 4:16 Tama tibaso, Godigo e homu ebo dago hania koneagameo, Godigo agai te nai maiabo dąų wali po mu po pedalomainogo eyu, te we bidi augwaligo te sa muani nai sabo homu eyu da, te augwaligo konealubo po agade dąų obaso da, augwaligo te nai saibao. Tama tiyu, tama te Godigo agai olo tau sabo kolesagago te polobadu dąų wali po mu po pedalobo dao. Tama elama, tama Godigo nai maiabo dąų wali po te bomo elalubao, te tigidali Abrahamgo bulai wai dabe nosali pedalabo bage augwalide te po bomo elalubao, tulalugobeo. Te bomai po elalubo Godide konealubo po dąų wabo Juda we bidi augwaligo naga te nai me sogobeo. Menio. Te bomai po elalusiąbo Juda hani isąwai bage me, augwaligo Abraham tiwai eyu tama Godigo dąų wali poba homu begi pobaso da, teda augwaligo me te Godigo maiabo nai mu saibao. Abraham aga da, te Godide konealubo po dąų wali we bidi da tigidaligo hasia wąį monu mu dao.
ROM 4:17 Tama tede te Godigo po bukude e tiwai po wai dao: “Eno nage te geninama pedalabo bidi hani hauwago wąį mubao” wai. Te dąų wali po Godigo obaso, Godigo gedude te po te bomo elalubao. Abraham te dago aya dao. Tama Abrahamgo konealubo po te dąų wali po wali peyu Godiba homu dąų wai. Te Godigo naga te isali bidi dabebolo te bidibo ula mayu, tama te pedalisiąwani nai dabe me i weyu, te augwali pedelainu ebo dao. Tama tibaso Abrahamgo e homu mu yali, te Godigo aga yaibao po wali sę te mu yaibao.
ROM 4:18 Abrahamgo Godigo te sę yaibao po wabo tų te agai me susiąbadi, tiali goli agai konealubo po mu dąų weyu, te tų suai bidigo ebo tiwai yalio. Tama aga te bidi hani hauwago wąį monu bidi pedelali, te Godigo wali po tiwai yalio, “Te nago bulai wai hani dabe e tiwai geninama tama pedalaibao,” te po wai dao.
ROM 4:19 Te Abrahamgo kibu be te bidi sese a naga te 100 kibu be pąde elalubadi, tama aga tigi te monu dabe tiwai elalualio. Tama aga we Sarago tigi me te mosi dabe tiwai yalio, augwali sigo wai ame nabo usubeo. Abrahamgo tede te homu yali, tiali goli agai Godigo wali pode konealubo po dąų wali te bomo kimi me isibeo. Te agai konealubo po dąų mu wai dao.
ROM 4:20 Godigo po weyu, te nai nosali pedalaibao po wali, tama Abrahamgo tede homu elama, tama homu si eyu, tama agai te konealubo po tagalabo te homu me ebeo. Menio. Agai homu te Godigo poba begi pai, tama tebogo aga bomo ilali. Agai tama tiyu, te Godigo nogi ugwaba selama,
ROM 4:21 tama kuna koneanio, God agai te sę yabo usu yaibao, te agai polobadu wali po tiwai wali pelama te sę mu yaibao.
ROM 4:22 Tama Godigo homugo ‘Te Abrahamgo enade te konealubo po dąų obaso, te aga doloba pai bidi dao.’
ROM 4:23 Te po te Godigo po bukude elalubao, “Godigo homugo aga te doloba pai bidi da te homu yali,” agai te Abraham dali naga te po me wabeo.
ROM 4:24 Menio. Agai te po dabolo me walio. Te Godigo dago Genuai Bidi Jisas te gų pagede ma hodolali. Tama te sęde dago konealubo po dąų obaso da, teda Godigo homugo da te doloba pai we bidi dao, te homu agai da dali me yaibao.
ROM 4:25 Godigo Jisas e tǫba tagala palali te aga isąma dago dwai sę yali sęgę sela sąmainogo yai. Tama tiyu me, Godigo aga te gų pagede ma hodolaligo te agai da doloba pai we bidi nogi emainogo tiai dao.
ROM 5:1 Te dago konealubo po Godide dąų waibaso tama Godigo da doloba pai we bidi nogi polaligo da, teda dago Genuai Bidi Jisas Kraisgo da God dali deli homu ilama pedalalio.
ROM 5:2 Aga me agaduba deligo da megi te bidibo te wiegi yai olo tau mabo kolesaga tomoba pomainogo tų dalalio. Dago agade konealubo po dąų weyu, tama agai te tų tama dalama, tama Godigo dabolo aga genuai nogi tiwai genuai nogi me maiabo sogo asobo dago tonalubao. Tama te asobo sogo tonalubadi dago wiegi yai homu pemene ebo dao.
ROM 5:3 Tama dago tede naga wiegi yai homu pemene me egobeo. Menio. Te sęgę dali, dene dali daba pedalubode me te dago wiegi yai homu pemene ebo dao. Dago koneani, dago te sęgę toloyu tama tebogo da homu bomo ilibo dao, tama dago te sęgę bugagia tolaluyu bidibo dao.
ROM 5:4 Tama dago te sęgę tolabo bomo te tiwai dali me bidibaso da, teda da te usu sabo kolesagade dolalubo usu yaibao. Tama da dolalubo si da, teda Godigo da dali dwagi yai homu ebo dao. Tama agai da dali dwagi yai homu ebaso da, teda Godigo nosali da selama tama dabolo aga genuai nogi tiwai genuai nogi me maiabo sogo asobo te dago wiegi yai homu eyu tonaluyu bidibo dao.
ROM 5:5 Tama tiyu, tama te dago aga bugagia tonalubo kolesaga te tulalugobeo, te kolesaga ebogo da guni bula sabo bidi tiwai pedalogobeo. Magi baso meni. Godigo aga Tedali Mobo Bidi dabolo mani, tama agai te Godigo da dali wiegi yai homu eyu tama godolo mu ebo kolesaga te da homude gisiga ola mawai dao, te kolesaga dwasianu menio.
ROM 5:6 Awe, polobadu da bomo meni yai elalubadi, te da te Godigo gedude doloba pai we bidi bidabo usu yai menio, te sogo naga Krais isilama, agai te da dwai sę yali we bidi ma dobola sai dao.
ROM 5:7 Edao. Te doloba pai bidi tau siyu te bidi hauwa te isabo homu me egobeo. Tialima deli deli bidigo da, te aga homu bomo ilama tama te dwagi yai bidi me delide dwagi yai homu eyu tau siyu isabo homu elama tama isaibao.
ROM 5:8 Tiali goli, Godigo kolesaga e tiwai dao. Da dwai sę ebo we bidi naga bidai digi, Kraisgo da tau somainogo homu eyu aga isali. Te kolesagade Godigo da ola mani, te God aga digi agai da dali dwagi yai homu eyu godolo mu ebo dao.
ROM 5:9 Tama tialigo da, megi dago mu koneani, te agai da me mu dobola sesa pidubadi geyu, tama dago te dwai sę ebode aga sębę tagalama tama dago dene me sogobeo. Krais agai kaneme gelama tama da penama, tama megi Godigo da doloba pai we bidi nogi obao.
ROM 5:10 Polobadu dago God dali boi bidi homu elama bidibadi, tama te sogo Godigo Ogwa isai. Tama te isaligo agai te dago boi bidi yali kolesaga silama, tama da God dali deli homu ilama pedalali. Tama agai tama tialigo da, teda dago mu kuna koneani, te dago dene sidali weyu, te Ogwago bidibogo te Godigo da ma dobola sainogo tiaibao.
ROM 5:11 Tama tede naga me egobeo. Menio. Dago Genuai Bidi Jisas Krais agai da te God dali deli homu pedalumainogo ilali, tama agai te yali sęde te megi dago Godibolo wiegi yai homu pemene ebo dao.
ROM 5:12 Edao. Eno asęani po page e tiwai dao. Bidi deligo dwai sę hasia polobadu yali, tama te kolesagade te dwai sę ebo kolesaga e tǫba pedalalio. Tama te dwai sęgo te isibo sę sela asai. Tama te isibo sę tigidali we bidibolo mena mena pali. Magi baso meni, tigidali we bidigo dwai sę yai dao.
ROM 5:13 Te Godigo bomai po me pedalisiąbadi, tiali goli te sogo te dwai sę ebo kolesaga e tǫde elaluai. Tialima, te bomai po te sogo meni baso, Godigo te dwai sę yali we bidi dali te ‘Augwali da te negeli elalubo bage dao,’ te homu yai menio.
ROM 5:14 Tiali goli te isibo sę te Adam bidali sogo dąį elama asiyu, te Moses bidali te sogoba usu nagasai, tama te sogo tigidali te dwai sęgo dolobo kolesagago tigidali bidi aiyaba elalualio. Te bidi mebago te Adamgo te Godigo agabolo dolo wali bomai po bolali tiwai me isąwani, tiali goli isibo sęgo te augwali me aiyaba elaluai. Te Adam dali Krais sigo yali kolesagago te we bidi umabode du walali. Tama tibaso, te Adam da te piksa noma tiwai te nosali pedalabo bidi me deligo piksa noma te hasia pedalai dao.
ROM 5:15 Tiali goli Adamgo dwai sę yali dali te Godigo olo tau siyu mabo wiegi yai kolesaga dali, te tiwai si me ebeo. Mu menio. Te bidi deligo dwai sęde te bidi hauwa isai. Awe, te mu po dao. Tiali goli Godigo te olo mabo wiegi yai kolesaga dabolo eyu, tama te olo tau siyu mabo wiegi yai kolesaga yali te bidi Jisas Krais delide dago te olo mabo nai sai. Tama te olo tau siyu mabo wiegi yai sę me, te olo mabo wiegi yai nai dali sigo te bidi deli Adamgo yali sęde walali du aiyaba mu elaluama, tama we bidi umabobolo te sę pedaludu gebo dao.
ROM 5:16 Te Godigo olo mabo nai dali te bidi deligo dwai sę yali dali te tiwai si me ebeo. Mu menio. Te bidigo dwai kolesaga yaligo du walama tama Godigo te po wali, “Agai dwai sę yali, aga dali aga bulai wai dali augwali mu dolomainao” wai. Tiali goli bidi hauwago dwai sę ebo goli, tama megi Godigo augwalibolo te olo tau mabo wiegi yai kolesaga eyu tama augwali doloba pai we bidi nogi obao. Te Godigo olo mabo naigo te tiwai aiyaba elalubo dao.
ROM 5:17 Te bidi deligo te po sela sąwanigo, tama te bidi deligo yali dwai sęgo te isabo kolesaga te tuni bidi tiwai bidibo ilali, tama tigidali bidi aiyaba elaluai. Te mu po dao. Tiali goli Godigo olo tau mani wiegi yai kolesaga badi te olo tau siyu mabo naigo me, agai da doloba pai we bidi nogi polali, tego te isibo kolesaga aiyaba elaluama tama genuai mu ilalio. Tama dago mu koneani, tigidali bidigo te doloba pai bidi ilibo olo mabo sę siyu da, teda augwali bidibo ula dali bidiyu, te Jisas Kraisgo sęde tama aga dali tuni bidi dabe bidaibao.
ROM 5:18 Tama tibaso, dago homugo te pode bugagia koneao. Bidi deligo te Godigo po bolaligo, tama te dwai sę yaligo te da tigidali bidi da sęgę sai bidi ilai digi dao. Tama tiali goli, gasa bidi deligo doloba pai kolesaga yaligo te da tigidali bidigo elaluali sęgę sela sąwai, tama da te wiegi yai bidibo ulade megi bidibo dao.
ROM 5:19 Tama te bidi deligo po sela sąwainogo, tama agai te kolesagade te bidi hauwa te dwai sę ebo bidi ilalio. Tama te tiwai naga me, te gasa bidi me deligo te Godigo po wali paligo, tama agai te tiali kolesagade te bidi hauwa te doloba pai bidi te Godigo gedude pedalaibao.
ROM 5:20 Te we bidi tigidali augwaligo augwa ebo dwai sę te Godigo gedude genuai mu dao konemainogo eyu, tama Godigo te bomai po dabe Mosesbolo ola mawai. Tama mayu, tama augwaligo te bomai po me bolodu mu geanio. Te bidi dabe augwaligo dwai sę umabo mu iduali, tiali goli Godigo te olo tau sabo wiegi yai kolesaga te augwalibolo me mu idu gebo dao.
ROM 5:21 Tama tiyu te olo tau sabo wiegi yai kolesagago te dwai sę aiyaba mu elalubo dao. Magi baso meni, te dwai sęgo te isibo kolesaga nigilama, tama te isibo kolesagago da tigidali aiyaba elaluyu bidai. Tiali goli te tiwai me megi Godigo te olo tau mabo wiegi yai kolesaga te ugwadu daide bidibao. Te kolesagago da megi tonalubo dao. Godigo te olo tau mabo wiegi yai kolesaga elama tama da doloba pai we bidi nogi obaso, dago te sesemane sogo bidada peyu, bidada pabo ula elalubao. Dago te ula dago Genuai Bidi Jisas Kraisgo sęde sai dao.
ROM 6:1 Te dago te Godigo bomai po dabe bugagia wali pesiąbadi goli, agai da olo mu tau siyu, agai da ma dobola sali. Te agai da dali te wiegi yai sę ebaso, dago magi po waibawe? Bidi mego e tiwai po weyu, “Te Godigo olo tau mabo wiegi yai kolesaga dabolo me hauwa geninama idumainogo eyu, dago dwai sę hauwa idu geinao,” te po weyu da, te po usu dawe, ma meniwe?
ROM 6:2 Mu menio. Magi baso meni. Da te dwai kolesaga ebode te isai bidi tiwai mu elama tama dago te dwai kolesaga ebo tagalalio, te dago isiabo kolesaga mu dao. Tama tibaso, dago te dwai sę hauwa yabo homu mu egobeo.
ROM 6:3 Da te Krais Jisas dali tiasiyu tama baptais sali, te kolesagade da tigidali te aga isalide me tiasiyu tama baptais salio. Te sęde dagego homugo me konebewe?
ROM 6:4 Te baptais saligo da te Krais isalide da tede dali kęą selama, tama Godigo da te Krais dali gų pagede pubulai tiwai yali dao. Tama Ayago genuai bomogo agai te Krais gų pagede ma hodolali. Tama te tiwai me da me te gesi noma bidibo ula selama bidimainogo eyu, da te baptais salio.
ROM 6:5 E tiwai eyu dago te gesi noma bidibo ula sabo dao: da aga dali kęą pelama tama da te aga isali tiwai isai. Tama tialigo da, da te aga dali kęą pelama tama hodaloyu, me te aga hodaluali tiwai gilama te dago isali noma dabe ma hodaluama te gesi noma bidibo ula sabo dao.
ROM 6:6 Tama dago koneani, te dago poloba homu kolesaga te ni pedaide Krais dali isama tama te dwai sęgo da tigide sę yali bomo te silimainogo yalio, te da te dwai sę ebo kolesaga dologode me bidamu dao.
ROM 6:7 Magi baso meni, te isali bidide te dwai sę ebo kolesaga me daganalugobeo.
ROM 6:8 Awe, da Krais dali isali tiwai gilama yaligo da, teda dago konealubo po dąų mu weyu e homu ebo dao, te da aga dali hodobo te gesi noma bidibo ulade me da bidaibao.
ROM 6:9 Magi baso meni. Dago koneani, Godigo Krais te gų pagede ma hodolali, tama aga munu me isigobeo. Te isibo bomogo te aga aiyaba me elalugobeo, te usu menio.
ROM 6:10 Awe, te aga deli sogo naga isali, munu me ma isigobeo. Tama te isaligo agai te dwai sę ebo bomo aiyaba elaluai. Tiali goli megi aga bidibo ulade ma bidibao, tama te bidibode agai Godigo nogi ugwaba somainogo eyu bidibo dao.
ROM 6:11 Tama tibaso, duga me duga digi isama tama dwai sęgo bomo dologode ma bidibeo. Menio. Dage te Krais Jisas dali kęą selama, tama dage bidibo ulade God dali bidibao. Dagego duga digi dali te homu yao. Tama te homugo ebo te usu ni tiwai dao, tama dagego ebo kolesaga te usu niba kadu wao.
ROM 6:12 Te tama tiyu, dwai sęgo dage isabo tigi tonalumainogo gogolamuo. Tiyu te dwai sęgo dage kegeyu tama tigigo dwai kolesaga wali pabo homu yabuo.
ROM 6:13 Tama dagego duga nogo sągą te dwai sę ebo madi menama, te dwai kolesaga emainogo elamuo. Te menio. Godigo dage te gų pagede ma hodolali tiwai yaligo da, teda dagego duga tigi tigidali badi, te dagego homu kolesaga me te Godibolo mayu, te doloba pai kolesaga naga eyu bidiąo.
ROM 6:14 Dagego koneani, te dwai sę ebo kolesagago te dage tonaluamuo. Magi baso meni. Te Godigo dage ma dobola somainogo eyu dagego te bomai po bugagia wali pabo homu ebo meni. Te meni. Tede dagego koneani, me sogo dagego geda muyu dwai sę eyu ebo dao. Te usu egobeo. Tama dagego homugo te Godigo olo tau sabo wiegi yai kolesaga tego naga dage ma dobola sobaso dage te wiegi yai kolesaga dologode bidabo homu yao.
ROM 6:15 Tama da te bomai po dologode me bidisiąyu, tama da te Godigo olo tau sabo wiegi yai kolesaga dologode megi bidibaso, dago magi yaibawe? Dago te dwai sę ebo usu egowe? Mu menio.
ROM 6:16 Te dagego duga tigi te bidi me deligo nogoba menama tama agai po naga wali pobaso da, teda dage agai sę ebo bidi bidibo dao. Koneaniwe? Ma dage te dwai sę ebo kolesagago sę bidi bidiyu tama dage agade duga noma mu isabo sę saibao. Ma dage Godigo po odoyu tama te pogo sę ebo bidi dabe bidiyu tama dage doloba pai kolesaga eyu bidibo dao.
ROM 6:17 Mu tamao, polobadu dage te dwai sę ebo kolesagago sę bidi bidali, tiali goli nosali augwaligo dagebolo Godigo po ola menama, tama dage homu mu eyu te po wali mu pabo gagalali. Te tama tebode dago Godibolo usu da po olama gedu haluasa po wao.
ROM 6:18 Tama Godigo dage te dwai sę ebo kolesaga dologode bidali te dagala sanama, tama dage te doloba pai kolesaga dologode bidibo we bidi dabe bidibo dao.
ROM 6:19 Te dagego homu kolesaga bomo menibadi, tama eno te da bidigo homu wali peyu, tama sę ebo bidide po digi po begeleyu, tama eno e po obao: polobadu dagego duga tigi tigidali te meda yai kolesagade sę ebo bidi bidiyu, tama dagego yali dwai dwai sę geninama mu pedalali. Tiali goli megi dagego te duga tigi dabe me homu kolesaga te doloba pai kolesagaba munama sę ebo bidi bidiyu, tama dage te dwai sę me isąwai te wiegi yai tedali kolesaga naga pedalomainogo yao.
ROM 6:20 Magi baso meni. Polobadu dage te dwai sęgo sę ebo bidi bidibadi, te sogo dage te doloba pai kolesagade sę ebo sę bidi me bidibeo.
ROM 6:21 Tialima te dwai sę ebode dagego magi nai saliwe? Woo, te megi te sęde dage hale ebo dao. Te kolesagago te bidigo noma isibo sę naga pedalubo dao.
ROM 6:22 Tiali goli megi Godigo dage te dwai kolesagade kalabus elaluali te agai dagala sąnama, tama dage aga sę ebo bidi munama bidibao. Tama dagego e tiwai wiegi yai nai saibao, God agai dage te wiegi yai tedali te dwai sę me isąwai we bidi ilibao, tama dagego te wiegi yai sesemane sogo bidada pabo te bidibo ula saibao.
ROM 6:23 Magi baso meni. Te dwai sęgo te aga sę ebo bidi augwalibolo te pe mabo dao. Te mabo pe te isibo sę naga dao, augwali te God dali dagalama tama aga dali bidada peyu bidada pogobeo. Tiali goli te da te ula sabo dolo meni yai goli, Godigo dabolo te wiegi yai olo mabo kolesaga eyu, te sesemane sogo bidibo ula mawaibao, te da te dago Genuai Bidi Krais Jisas dali wadolali we bidi dabolo agai te ula olo naga mawaibao.
ROM 7:1 Eno ama dedeo, eno e po dage te bomai po bugagia koneani bidibolo obao. Te bidi bidibo ula elaluyu bidibadi, te sogo naga aga te dago elalubo bomai po dologode bidao wabo dao. Eno homugo dagego te tiwai ebo kolesaga koneani homu yalio.
ROM 7:2 E tiwai dao, te bidigo sai we tama aga bidi bidibadi da, teda te bomai pogo aga te aga bidi dali kęnanio. Tiali goli, aga bidi isai digi yai baso da, teda aga bidi dali te kęnani bomai pogo te aga ma kęąlubeo.
ROM 7:3 Tama te bidi bidibadi tama we gasa bidi dali pobaso da, teda te we sabo kolesaga te wego dolobo nogi waibao, te penani ebo we dao te waibao. Tiali goli, te bidi isai digi yaibaso da, te bomai pogo aga ma kęąlubeo. Tama te we aga gasa bidi dali pobaso da, teda agai te we sabo kolesaga me dolobeo, aga te penani we dao wagobeo.
ROM 7:4 Tama te tiwai me dage dali pedalalio, eno ama dedeo. Dagego tigi te Krais dali kęą selama, tama te dali dage isalio, tama te bomai pogo dage me tola sabeo. Tama bidi isai we gasa bidi dali bidigi pabo tiwai, dage gasa bidi dali bidi pelama agai dage sali, aga te Godigo aga te gų pagede ma hodolali bidi. Tama dago te Godigo homu kolesaga wali peyu tama wiegi yai sę emainogo eyu, tama Godigo aga te gų pagede ma hodolali.
ROM 7:5 Da te poloba meda yai kolesagade bidali sogo, te bomai po elalubaso, tede dwai homu eyu, tama dago tigigo ebo dwai kolesaga hodoliyu tama dena tigigo dago dwai sę eyu bidai dao. Tama te sę dago elaluama, tama dena noma isabo sę naga pedalainogo yai dao, te da God dali bidisiąbo sę naga pedalai dao.
ROM 7:6 Tiali goli megi da, megi te Godigo da ma dobola somainogo eyu, te da te Mosesgo mani bomai po wali pabo sę, te sę tagalama tama da olo bidibao. Magi baso meni. Da te isai bidi tiwai bidibao, te dago tigi me homu me augwali sigo ebo dwai sęgo da me tonalubo menio. Tama tiyu, dago te Godigo sę ebo dao, te bomai po dologode bidibo meni. Te meni. Dago te gesi noma kolesaga te Tedali Mobo Bidigo te sę hodolama dago te sę ebo dao.
ROM 7:7 Tama tibaso dago magi po waibawe? “Te bomai pogo digi dabolo te dwai sę ilibo page pedalai dao,” ma dago te tiwai po waiba agawe? Mu menio. Te bomai pogo te eno yali sęde te dwai sę ebo po me ola magi menigi sogo da, teda eno me konegi meni dao. E tiwai yali, bomai pogo te po wai, “Nago gasa bidigo nai sabo homu eyu pesa me elamuo.” Tama bomai pogo te tiwai po me wasiąwai tigi sogo da, teda eno te gasa bidigo nai pesa ebo kolesaga te dwai kolesaga dao me konegi menio.
ROM 7:8 Awe, te bomai po menigi sogo da, teda te dwai sę ebo kolesaga te isai bidi tiwai elalugi dao. E tiwai dao. Polobadu te ena ogwade bidibadi te sogo eno te bomai po konebeo, tama ena bugagia olo bidali, eno homu ena sęgę sai bidi meni. Tiali goli nosali Godigo bomai po eno kone selama, tama eno homu tomode elaluali dwai sę ebo kolesagago eno dwai sę yabo homu hodaluama, tama haniani naide pesa ebo sęgo ena homu hodolai. Tebogo eno koneani, eno te bomai po bolama tama dwai sę yalio, te eno koneanio.
ROM 7:10 Tama eno me koneani, eno te dwai sę ebaso, ena isali tiwai yalio, ena God dali bidibeo. Hasia sogo Godigo te bomai po sa muyu te enabolo bidibo ula mawaibao po wai. Tiali goli eno te bomai pode bidibo ula me sabeo, agai ena ela muyu naga yai dao.
ROM 7:11 Magi baso meni, te dwai sę ebo kolesagago te bomai pogo tų gegelama, tama ena ili po ola mani, tama te kolesagade te bomai pogo ena ola mani, te ena dwai sę ebaso ena isali tiwai yalio, ena God dali bidibeo.
ROM 7:12 Tama tibaso dago koneani, te Godigo bomai po aga digi te magi dwai sę me isąyu te wiegi yai naga elalubao. Tama te Godigo dabolo tama tiao wali po tigidali me te dwai sę me isąwai wiegi yai elaluali, tama doloba pelama, tama wiegi yai naga dao.
ROM 7:13 Tialima megi dago magi homu yagawe? Ma te wiegi yai bomai po agai ena te Godide dagalaliwe? Mu menio. Te eno dwai sę ilabo kolesagago naga ena te Godide dagalali, tego ena isai bidi tiwai ilalio. Te dwai sę yabo kolesagago te bomai pogo ena te isai bidi tiwai ilalio. Magi baso meni, te dwai sę ebo te hania pedaluyu tama te bomai pogo da ola mani, te dwai sę ebo te dwai dwai kolesaga mu dao.
ROM 7:14 Dago koneani, te bomai pode te Godigo Tedali Mobo Bidigo te Godigo homu kolesaga dabolo ola mabo dao. Tiali goli ena, eno poloba homu me elaluyu tama te homu ena wali pabo dao. Te dwai sę ebogo ena kalabus ilama tama eno agade sę iduai dao.
ROM 7:15 Hauwa sogo eno ebo kolesaga page te eno me konesiąma ebao. Tama eno homugo godolo mu elama yainogo ebo kolesaga, te eno ebo meni. Tiali goli eno homugo hagela mu yali kolesaga, te eno ebo dao.
ROM 7:16 Tama eno homugo hagela mu yali kolesaga te eno yali goli, eno koneani, te dwai sę dao, tama te kolesaga ebo eno hagela yalio. Tama tialigo da, eno homu me te bomai po me te deli dao, te eno te po obao, “Awe, te Godigo bomai po te wiegi yai naga dao.”
ROM 7:17 Tama tibaso megi eno koneani, te ena digi eno te dwai sę me ebo meni. Menio. Te ena tomode bidibo dwai sę ilibo homu kolesaga agai naga te sę ebo dao.
ROM 7:18 Eno koneani, ena tomode te wiegi yai nai deli me bidibo menio. Eno tǫde bidibo tigide me te homude me, te side te wiegi yai nai me deli bidibo menio. Mu tama, eno wiegi yai kolesaga yabo homu ebo, tiali goli eno te kolesaga yabo usu me ebeo.
ROM 7:19 Awe, te wiegi yai kolesaga eno yainogo homu ebadi goli, te kolesaga eno me ebo meni. Me ma, eno ebo hagela homu yali dwai kolesaga, te kolesaga eno ebo dao.
ROM 7:20 Tiali goli eno ebo hagela homu ebo dwai kolesaga eno yaligo da, teda ena digi eno te dwai sę ebo menio. Eno te sę yao homu ebeo. Menio. Te ena tomode bidibo dwai sę ilibo homu kolesaga agai naga te dwai sę ilibo dao.
ROM 7:21 Tama tibaso, enade te tiwai kolesaga bidibo eno sulama konebao: eno wiegi yai kolesaga yabo homu ebaso da, teda te eno homude elalubo dwai sę ebo kolesagago te homu aiyaba elalubo dao.
ROM 7:22 Mu tama, eno homude eno Godigo bomai po mu godolo ebo dao.
ROM 7:23 Tiali goli eno subao, gasa bomai po te eno tigi tomode elalubao, te gasa bomai pogo eno tigi tonalubo dao. Tama te gasa bomai pogo te eno Godigo bomai po mu godolo ebo homu dali hwįbo dao. Tama te gasa bomai pogo ena te ena tomode bidibo dwai sę ilibo homu kolesaga wali pomainogo ilibo dao.
ROM 7:24 Ena da te hobedagia bidibo bidi mu dao. Dego ena te eno tigigo yainogo ebo kolesaga dagala sągowe?
ROM 7:25 Eno Godibolo usu da po olama gedu haluasa po obao. Te dago Genuai Bidi Jisas Kraisgo nogode agai ena dagala olo muanio. Tama ena e tiwai bidibao. Ena digi ena homugo te ena Godigo bomai po dologode bidiba homu ebo dao. Tiali goli poloba homu kolesagade ena te dwai sę ebo kolesaga dologode bidibo dao.
ROM 8:1 Te da Kraisde tialubaso, God agai da aga gedude te doloba pai we bidi dao te po wabo dao. Tama tibaso, Godigo da Krais Jisas dali wadolali we bidi dali po tų eyu tama sęgę dabolo magobeo.
ROM 8:2 Magi baso meni, ena megi da Krais Jisasde tia selama tama Godigo Tedali Mobo Bidigo tų dalali. Te da te dena homude elalubo dwai sę ilibo kolesaga dologode me bidibadi, tama da te isai bidi tiwai bidiyu tama da Godide tedali bidai dao. Tama da te tama tiwai me bidibo tagalomainogo eyu, tama Tedali Mobo Bidigo gasa tų dawai, te da olo bugagia bidimainogo agai tama tiai dao.
ROM 8:3 E tiwai yai dao. Te dena tigi tomode bidibo dwai sę ilibo kolesaga elalubaso, dago te Godigo bomai po dolo wali peyu tama da doloba pai we bidi pedalisiąbo dao. Tiali goli God aga digi da doloba pai we bidi aga gedude pedalalio. Agai aga Ogwa naga tagala palai, te aga tigi te da dwai sę ebo bidi tigi tiwai elaluali. Aga dago dwai sę yali sęgę sela sąwainogo asai, tama da bidigo dwai sę yali dene te Godigo aga delide naga wei ponai dao.
ROM 8:4 Agai tama tialigo te da te bomai pogo usu niba kadu walainogo yai. Magi baso meni, megi da te poloba yali dwai homu kolesagade me bilibeo. Menio. Dago te Tedali Mobo Bidigo wiegi yai kolesagade bilibo dao.
ROM 8:5 Te augwa homude elalubo dwai sę ilibo kolesagade bilibo bidi dabe, augwali te augwaligo homu kolesaga te poloba yali sęde naga homu dąų weyu tebo dao. Tiali goli te Tedali Mobo Bidigo ebo kolesagade bilibo bidi dabe augwali da, te augwaligo homu kolesaga te Tedali Mobo Bidigo naiba homu dąų wabo dao.
ROM 8:6 Te augwa homude elalubo dwai sę ilibo kolesagaba naga homu dąų wabo we bidi, augwali da dwai sęgo dolama te bidada peyu bidada pogobeo. Tiali goli bidigo homugo te Mobo Bidigo wiegi yai kolesagaba homu dąų weyu da, te bidi te bidibo ula bidiyu, tama homu nagame elama bidada peyu, bidada paibao.
ROM 8:7 Te bidigo homugo te dwai sę ilibo kolesaga wali pobaso da, te tebo bidigo God dali boi bidi ebo bidigo tibo dao. Magi baso meni, aga te Godigo bomai po dologode me bidibo menio. Mu tama, agai te bomai po wali pabo usu egobeo.
ROM 8:8 Te dwai sę ilibo homu kolesagade bilibo bidi dabe, augwali te bidi augwaligo te Godigo godolo yabo kolesaga me egobeo, augwali tede usu egobeo.
ROM 8:9 Tiali goli dage da, dage te dwai sę ilibo homu kolesagade me bidibeo. Menio. Te Godigo Mobo Bidi dagede bidibaso, dage te Mobo Bidigo kolesagade bidibo dao. Tiali goli, te bidi me delide te Kraisgo Mobo Bidi meni baso da, te bidi aga te Kraisgo bidi menio.
ROM 8:10 Te dagego dwai sę ebaso, te dagego tigi te isabo sogo elalubao. Tiali goli, te Krais dage tomode bidiyu da, teda Godigo dage te doloba pai we bidi nogi nogi ebaso, dagego homu noma bidi te bidibo ula elaluaibao.
ROM 8:11 Godigo Jisas te gų pagede ma hodolai. Tama te sę yali Godigo Mobo Bidi dage tomode bidaligo da, teda te Krais te gų pagede ma hodolali bidi agai te dagego osogo bidibo isabo tigiba te bidibo ula me mayu tama dage me gų pagede ma hodolaibao. Te agai tama tiwai sę emainogo te aga Mobo Bidi dage tomode bidibo dao.
ROM 8:12 Eno ama dedeo, Godigo Mobo Bidigo dago tigi ma hodolaibao. Tama tibaso, agade dago negeli elalubao, te agai kolesagade da wali pao. Tiali goli dago te dena tigigo homu kolesagade me negeli elalubeo, te dago poloba bilali homu kolesagade wali pelamuo.
ROM 8:13 Te dagego tigigo dwai sę ilibo homu kolesagade me bidibaso da, teda dage isabuo. Tiali goli, te Tedali Mobo Bidigo bomogo te dagego tigide dwai kolesaga dabe ebo te ela mubaso da, teda dage bidada peyu, bidada paibao.
ROM 8:14 Te Godigo Mobo Bidi wali bilibo we bidi augwali tigidali te Godigo wai dabe bidibo dao.
ROM 8:15 Magi baso meni, te Godigo dagebolo mani Mobo Bidi da, te dage olo sę ebo bidi bidiyu God ma wi ilibo Mobo Bidi meni. Te menio. Te mani Mobo Bidigo dage Godigo wai dabe ilibo Mobo Bidi dao. Te Tedali Mobo Bidigo dago i olama tama Godibolo “Aya, Aya” wabo dao.
ROM 8:16 Te Mobo Bidigo digi agai dago mobo noma bidi tau siyu tama dago homu tomode hania hanilama, da te Godigo wai puluba bidibo po wabo dao.
ROM 8:17 Tama da te Godigo wai dabe bidaligo da, teda nosali dago te Ayago nai me saibao. Awe, te dago Godigo nai saibao, te nai me dago Krais dali saibao. Te megi dago Godigo sę eyu tama Krais dali dago te dene tolobaso da, teda dago aga dali te genuai nogi me te ula yai bomo me, te me dago aga dali nosali saibao.
ROM 8:18 Te da e tǫde bidibadi te da God wali pabo we bidi dali dwai homu ebo bagego dabolo dene dali sęgę dali mabo dao. Tiali goli eno te Godigo dabolo nosali maiabo ula yai bomo dali, haniani wiegi yai nai dali, te naide eno homugo kone palobo si, te eno e po wabo dao, “E, te eno megi tolobo sęgę te genuai menio, te dwasianunu naga dao, te olo nai tiwai dao,” eno te homu ebo dao.
ROM 8:19 Te nosali Godigo da ugwaba selama, tama da agai wai dabe te hania hanilaibao. Tama te sę yabo sogo asobo te Godigo nigali tigidali naigo tonaluyu bidibo dao, te bidi aga homu memenege eyu, tama aga wiegi yai nai asobo sogo tonalubo tiwai gilama.
ROM 8:20 Megi e sogo tigidali nai dabe dwai bidiyu tama dolobao. Te augwa homugo digi me ebeo. Menio. Godigo digi augwali te tiwai kalabus elama bidibo. Te augwaligo te Godigo augwalibolo nosali yabo sę tonaluyu bidibo dao.
ROM 8:21 Tama megi augwali te dolama bidibo kalabuside te tigidali nai Godigo dagala sąnama, tama te tigidali bugagia mu te da Godigo wai dabe dali bidaibao. Te tigidali nigali nai te sę yabo sogo asobo tonaluyu bidibao.
ROM 8:22 Dago koneani, tigidali nai Godigo nigali, te tigidali dene eyu te hę wabo tiwai ebo dao, te wego wai ame nainogo dene ebo tiwai ebao. Tama Godigo nigali nai tigidali te dwai hę weyu bidali, te megi e sogoba usu nagasobo dao.
ROM 8:23 Tama te nai dabe augwali naga me tebeo. Menio. Dago te Tedali Mobo Bidi salio, te tiwai Godigo hasia mu dabolo te olo mu manio, te agai dabolo nosali gasa nai me mawaibao. Tama da me, dago homu tomode dene elama hę weyu, tama Godigo te da aga wai dabe pedalabo kolesaga te silimainogo ebo sogo tonalubao, te agai dago tigi ma dobola selama olo bidabo sogo dao.
ROM 8:24 Magi baso meni, Godigo da ma selama, tama megi dago agade konealubo homu dąų olama tama agai da dali te wiegi yai sę mu nosali usu numainogo dago megi tonalubo dao. Tiali goli dago tonaluali nai te nosali dago subo si da, te dago aga ma tonalugobeo. Bidigo te nai me deli suali da, magi baso te agai ma tonalugowe? Te egobeo.
ROM 8:25 Tiali goli megi te nai dago sisąbadi da, dago homu dąų mu olama te nai dago mu saiba homu yali da, teda dago homu bomo te naiba elama tama bugagia tonaludubo dao.
ROM 8:26 Te bugagia tonalubo kolesagago da tau sabo dao. Te tebo kolesagade me te Godigo Tedali Mobo Bidigo te da bomo meni yai bidi me tau sabo dao. E tiwai dao, dago te God dali gedu haluasa po wabo tų te kuna gisiga konebo menio. Tiali goli Godigo Mobo Bidigo digi da tau siyu, Godibolo gedu haluasa po wabo dao. Agai homude bomo eyu tama te hę wabo tiwai eyu, te pusisąbo pogo agai Godibolo te po wabo dao.
ROM 8:27 Tama te bidigo homu tomode elalubo nai subo bidi God, agai te Tedali Mobo Bidigo ebo homu konebo dao. Magi baso meni, te Tedali Mobo Bidigo te Godigo homu kolesaga wali peyu tama da Godigo we bidi tau siyu te gedu haluasa po hanalubo dao.
ROM 8:28 Tama dago koneani, te augwaligo aga dali dwagi yai homu eyu godolo mu ebo we bidi, te we bidibolo pedalabo sę tigidali te Godigo digi dodolama, tama te sę tigidali te we bidi dabeba pedaluyu augwali tau sabo dao. Te we bidi augwali te Godigo ma saiba po wali we bidi augwali tama agai augwali sa munama i wai dao.
ROM 8:29 Magi baso meni, te Godigo augwali polo koneani bidi dabe, agai augwali me hagea siyu tedali muani, te aga Ogwa tiwai pedalomainogo yai, tama ama name hauwa bidimai hagede yali, tama Krais te augwaligo ama gomunai bidi bidaibao.
ROM 8:30 Tama God agai te polobadu hagea sali we bidi augwali, te agai augwali me i walio. Tama agai te i wali we bidi augwalibolo te agai augwaligo yali dwai sę sęgę sela sąnama, tama augwali me te doloba pai bidi nogi poali. Te agai doloba pai nogi wali we bidi augwalibolo agai te aga digi elalubo ula yai bomo dali genuai nogi dali augwalibolo mani.
ROM 8:31 Te Godigo te da tau sabo sę hauwa po odobaso, tama dago magi po Godigo te ebo sę dabede waibawe? E tama naga dao, te Godigo da tau sobaso, teda dego da dali boi bidi elama tama da aiyaba elalugowe? Woo, bidi mu menio.
ROM 8:32 Agai aga Ogwa digi te dabolo mawainogo homu si me ebeo. Menio. Agai aga tagala palali te agai da tigidali tau sagasomainogo olo tagala palalio. Agai aga Ogwa digi da tau somainogo mobaso, teda mu tama dao, agai homugo te gasa nai me tigidali te olo mu dabolo te aga dali mawaibao.
ROM 8:33 God aga digi da doloba pai we bidi nogi pobaso, te da God aga digi hagea sali we bidi bidiyu, te mena boi bidigo da kisiliyu po tų ebo usu egowe? Woo, bidi mu menio.
ROM 8:34 Te dego da dali te dwai sę yali bidi te dwai dene sabo po wagawe? Menio. Magi baso meni. Krais Jisas aga digi isąma, tama ma hodalubadi yai. Tama aga digi te Godigo dolo nogode genuai bidi bidiyu, tama God hanalu wabo po wabogo me da tau sabo dao.
ROM 8:35 Te Kraisgo da dali dwagi yai homu eyu godolo mu ebo kolesagade te da mena nai mugo dagala sąyabo nai menio. Ma te sęgę daba pedalobo si da, ma dago dene tolobaso, ma bidigo da dolobo si da, ma augwaligo da nasi ilabo sę ebaso, ma da gudubo ugwa meni baso, ma augwaligo da te dwai bulude bidimainogo ilibo sę ebaso, ma augwaligo da hwągo ela mubo si da, tama te tobage sę ebo dabego da te Kraisgo da dwagi yai homu eyu godolo mu ebo sęde dagala sągobeo.
ROM 8:36 Mu tama, dago koneani, te tobage sę dabe te daba pedalaibao, te Devitgo Godibolo polobadu e tiwai po wali gilama te tiwai sę yali, “Da te nago we bidi bidibaso, tama tigidali sogo augwaligo da ela muabo homu eyu, da pobeasa bilibo dao. Augwaligo da sulama, ‘Te ela muabo kibu sipsip wai tiwai naga yai dao,’ augwaligo dade te homu ebo dao.”
ROM 8:37 Tiali goli, te augwaligo da dali te tobage dwai sę yali goli, Godigo da dali dwagi yai homu eyu godolo mu ebaso, tama agai da tau selama, tama dago te tobage sę tigidali aiyaba mu elaluaibao.
ROM 8:38 Awe, eno tede konealubo homu mu dąų wali, te magi nai me deligo da te Godigo godolo ebo sęde munu me dagala sągobeo. Ma te augwaligo da ela mubo, ma da bidibadi dago sęgę tolobo, ma ensel mobo bidi dabe, ma te dwai haubo mobo bidi dabe, ma te tǫde bidibo tobolu bidi dabe, ma megi elalubo nai, ma te nosali pedalabo nai,
ROM 8:39 ma te dagalude bomo elalubo dwai bage, ma te moni sia dabo bulude bomo elalubo bage, ma te meba gasade elalua pabo Godigo nigali nai, te tigidali nai dabego te Godigo dade dwagi yai homu eyu godolo mu ebo kolesaga te dagala sąwainogo ebo usu me egobeo. Te dago Genuai Bidi Krais Jisasgo yali sęgo te Godigo aga dade ebo godolo ebo kolesaga dabolo ola mawai dao.
ROM 9:1 Ena Kraisde wadolai bidi bidibaso, tama eno megi wabo po te mu po naga waibao, tibo po wagobeo. Tama Godigo Tedali Mobo Bidigo te eno yabo kolesaga dagalobo homu tonaluyu, tama agai eno po me tau selama tama eno mu po naga obao.
ROM 9:2 E tiwai dao, eno homu sęgę mu elama tama sesemane sogo ena dwai dene ebo dao. Magi baso meni, te eno hani Juda bage augwali meba hauwago Krais tudiba muanio.
ROM 9:3 Eno homugo te Godigo eno ama dede augwali ma dobola somainogo ebo homu godolo ebao, augwali ena dali deli kaneme elalubao. Tama te tų elalugi sogo da, augwali tobade te eno Kraisba gedu haluasa po olama agai ena i ola mayu tama sela sąnama tama ena hagamainogo elama tama augwali tau somainogo hasegeligi da. Eno te homu bomonama ebo dao.
ROM 9:4 Augwali da, te Abraham aga ogwago ogwa Jekop aga hani dao, tama Godigo augwali aga wai dabe nogi poali. Tama tiyu aga agai ula yai bomo augwali dali bidagasidu geai dao, te bidi meni yai kemi tǫ bulude. Aga digi agai dąų wali po augwalibolo madu geai. Godigo agai bomai po me augwalibolo mani. Tama agai te augwaligo agabolo lotu po wabo kolesaga te agai ola mani. Tama agai aga sa muani bidi Krais nosali augwaligo hanidu pedalaibao po augwali dali dąų walali.
ROM 9:5 Augwaligo wąį mu Abraham dali, Aisak dali, te Jekop dali, augwali polobadu bidiyu te genuai nogi sai bidi dabe hasia bidali, tama augwali te augwa bulai wai dabe naga bidai. Tama Krais aga e tǫba dulama tama da bidi tiwai tigi sali sogo, agai te Juda hanide naga te bidi mu pedalali. Aga te tigidali nai tobolu bidi bidibao. Aga te God dao, te aga nogi dago sesemane bidada pabo sogo ugwaba sinao. Mu dao.
ROM 9:6 Te eno hani Juda bage augwali hauwago Krais tudiba muai goli, te Godigo polobadu dąų wali po te olo hagabo tiwai me egobeo. Menio. E tiwai dao, te Jekop aga nogi me Israel, te bidi aga hanide pedalali bidi augwali tigidali te Godigo hagea sali Israel dabe mu me ebo meni.
ROM 9:7 Tama dago e tiwai po me olamuo, “Augwali te Abrahamgo kanemede pedalama, tama tigidali augwali te aga wai dabe mu bidibao,” te wagio. Menio. Polobadu Godigo e tiwai po Abrahambolo wai dao, “Te nago hani bidi nogi nosali nedada pabo si, te Aisakgo hani augwali naga nedada paibao.”
ROM 9:8 Te po page e dao, te Godigo gedude te tigigo ebo kolesagade naga pedalali wai dabe augwali te Godigo wai dabe me egobeo. Menio. Te Godigo Abraham dali dąų wali pode ame nani wai dabe, te augwali Abrahamgo hanide nogi elaluai dao.
ROM 9:9 Tama te kolesagade homu paliyu, Godigo te dąų wali po e tiwai hasia polobadu te Abrahambolo wai, “Te eno te bodolu mani sogo ena ma asaibao, tama nago we Sarago te wai ogwa ame naibao,” te po wai.
ROM 9:10 Tama Godigo te naga me ebeo. Te Sarago ogwa Aisak ame nenama, tama genuai elama, tama agai aga we Rebeka sali. Tama Rebekago tabi elama tama te wai si deli sogo elaluali. Tama te wai sigo aya deli naga, te Aisak, da Juda dabego wąį monu dao.
ROM 9:11 Tiali goli, Godigo homude bidi sa muabo kolesaga yalio. Agai te bidigo sę ebode homu me ebeo. Aga digi aga homu naga wali peyu, te bidi i olama tama aga sa muaibao. Tama te wai si Jekop dali, Iso dali, augwali si ame nesiąbadi, tama augwaligo te wiegi yai kolesaga ma te dwai kolesaga me isąbadi, Godigo Rebekabolo te aga tamadi ame nabo wai side te po wai, “Te nago ogwa si deli sogo ame nenama, tama nosali te gomunai bidi te i badu bidi dologode bidaibao,” te po wai.
ROM 9:13 Tama te tiwai naga pedalali, te Godigo po pusali bidi nogi Malakai agai nosali asęani Godigo wali po tiwai gilama yalio, “Eno Jekopde dwagi yai homu eyu godolo mu yali, tiali goli eno Iso hagela homu mu yali,” Godigo te po wai.
ROM 9:14 Tama tibaso, dago te sęde magi po waibawe? “Godigo aga homu wali peyu, te bidi deli naga sa mubaso, agai te dolo me isąwai kolesaga yalio,” te dago te tiwai po omainogo yagawe? Mu menio.
ROM 9:15 Magi baso meni. Godigo e tiwai po Mosesbolo polobadu wai, “Te ena digi eno bidi me delibolo te olo tau siyu mabo wiegi yai kolesaga yabo homu ebaso da, teda eno homu naga wali peyu, eno olo mabo wiegi yai kolesaga agabolo yaibao. Te eno bidi me deli homu dene yainogo da, teda eno homu naga wali peyu, aga eno homu dene ebo dao,” Godigo te po wai.
ROM 9:16 Tama te po obaso, dago koneani, te Godigo bidi sa mubo page, te bidigo homugo me te aga sę denego me ebaso Godigo aga sa mugobeo. Menio. Te Godigo te bidide homu dene eyu, olo tau siyu mabo wiegi yai kolesagago naga te bidi sa mubo dao.
ROM 9:17 Tama Mosesgo te bukude asęani Godigo e tiwai po te Isip tǫ tuni bidibolo wali, “Eno bomo tigidali bidibolo ola mawaio wali, te augwaligo eno nogi te tigidali tǫba sela pelama pusugi pomainogo obao. Tede naga eno nage hodolama, tama tuni bidi nigilama, tama eno te nage dali hwįbo dao,” Godigo te wali po asęani.
ROM 9:18 Tama tibaso dago koneani, te Godigo aga homu naga wali peyu te olo tau siyu mabo wiegi yai kolesaga te bidi me delibolo yainogo da, teda agai te olo mabo wiegi yai kolesaga te agabolo yaibao. Me ma, te bidi me deli agai te po odosiąbo bidi ilainogo homu eyu da, teda agai te bidi te po odosiąbo bidi ilibo dao.
ROM 9:19 Tiali goli, bidi mego enabolo e tiwai po wagi da homu yali da, “Te Godigo aga homu naga wali peyu, tama bidi me deli sa munama tama gasa bidi meni. Tama tiyu da, teda magi baso agai te bidigo dwai kolesaga ebo po me odubadi geaibawe? Dego te Godigo ebo homu kolesaga gisilainogo usu egowe? Bidi menio.”
ROM 9:20 Bidi me deligo te tiwai po hanalu weyu da, teda eno te po wei ponoyu te po waibao, “Abagi, nage de da weyu, tama nago te po Godibolo ela palamuo. Ma te mama tǫgo nigali senego te aga nigali bidigo geda muani homu eyu, tama te bidibolo te po wai, ‘Magi baso nago ena te tiwai nigali’ po waibawe? Menio.
ROM 9:21 Te sene nigibo bidigo te agai mama tǫ pedai me deli selama, tama te tǫgo te sene si nigali, me deli te wiegi yai sę yabo sene te wiegi yai nigali, tama me deli te olo sę yabo dwai sene nigai. Aga homu naga wali peyu, tama te tiwai ebaso da, te usu da, po meni, te aga sę dao.”
ROM 9:22 Te Godigo me te tiwai yai. Agai te aga sębę homu ebo te bidi dabebolo hania hanilabo homu yali, te tigidali bidigo agai bomo me konemainogo yai. Tama te dwai sę yali dene sabo we bidi augwali dolabo sę te sisi yai elalubo, tiali goli agai augwali gogolama polo elebeo, tama bobage sogo tonaluali.
ROM 9:23 Magi baso meni, agai homugo te agai homu dene eyu tau sabo sa muani we bidi augwalibolo mabo wiegi wiegi yai ula yai bomo, te bomo augwali ola momainogo agai bobage sogo tonaluali. Augwali agai polobadu hagea sai dao, tama agai bomo yai ula augwaligo saibao.
ROM 9:24 Te da dao. Agai da i wali, te da Juda hani naga i me wabe, menio, te gasa hani dabe dali me i walio.
ROM 9:25 Te Godigo aga homu naga wali peyu, te we bidi meba naga hagea sabo kolesagade te polobadu Godigo po pusali bidi Hoseago asęani pode Godigo wali po me te e tiwai po asęani, “Te eno hani isąwai we bidi hani, te augwali eno hani nogi poaibao. Tama te eno augwalide dwagi yai homu eyu godolo isąwai hani, te hani eno ‘Te eno godolo mu ebo hani’ nogi poaibao.
ROM 9:26 ‘Dage eno hani meni,’ tama eno te po wali madi, te bulude naga te eno augwali nogi olama, ‘Te bidabo ula elalubo Godigo wai da’ po waibao,” Godigo te po olama, tama Hoseago asęani.
ROM 9:27 Tama te gasa polobadu Godigo po pusali bidi Aisaiago te Israel hanide po olama tama te tiwai i wali, “Tama te Israel dabe augwaligo hani nedebo namba te ąį sanede elalubo masigi kemi tiwai pedalubaso da, tagalao, teda Godigo augwali meba naga dią selama, tama dwasianu hani naga ma dobola saibao.
ROM 9:28 Magi baso meni. Genuai Bidigo po tų silibo si tama te po polo togwa sąnama tama te tǫde we bidi augwalibolo te dene wei ponaibao,” Aisaiago te po wai.
ROM 9:29 Tama polobadu Aisaiago te po olama po wai tiwai. Agai te po wai, “Te tigidali bomo elalubo Genuai Bidi agai te dago dwasianu hani bidimainogo egi menigi sogo da, teda da mu doloyu, te bulu si nogi Sodom dali Gomora dali si tiwai pedalama, tama da mu dolai bidigi dao.” Aisaiago te po asęani.
ROM 9:30 Tama tibaso dago koneani, te gasa hani dabe augwaligo te doloba pai bidi nogi sabo sę dene me ebe, tiali goli augwaligo te doloba pai bidi nogi salio. Te e doloba pai kolesaga te augwaligo konealubo po dąų olama sai.
ROM 9:31 Me ma, te Israel dabe augwali da, te Godigo augwalibolo doloba pai bidi nogi pomainogo eyu, tama augwali te bomai po bugagia wali pabo tų gegali goli, te tų augwaligo subeo, te augwali te bomai pogo usu niba kadu wabeo.
ROM 9:32 Augwali te Godigo gedude te doloba pai we bidi magi baso pedalebewe? Augwaligo te Kraisgo yali sęde te konealubo po dąų wasiąyu, tama augwaligo te Godigo te doloba pai bidi nogi poaibao homu eyu yali. Te po digi po begelama te tiwai yali, te sągąde dolobo masigigo te augwaligo sągąde dolama tama augwali tulaluai dao.
ROM 9:33 Te tiwai po me deli te Godigo po bukude polobadu asęani, te po e tama wai, “Odao. Te Saion hanude eno te bidi sągą dani tuą palama tulaluabo masigi me deli mubao. Eno te bidi me deli tede mubao, tama we bidi augwaligo aga dali dwai homu yaibao, te augwali dani tuą palama tulaluabo masigi tiwai dao. Tama tiali goli we bidigo agaba konealubo po dąų wabo bage, agai augwali tau mu sabo usu mu yaibao, te augwali tulaluama hale me sogobeo,” te po asęani.
ROM 10:1 Eno ama dede dabeo, eno homu dene eyu tama te Godigo te eno hani Israel bage augwali ma dobola somainogo ebo homu godolo mu elama, tama sesemane sogo eno Godibolo gedu haluasa po tede bomonama wabo dao.
ROM 10:2 Eno augwali bugagia koneama tama eno hanilama augwalide mu po obao, augwaligo te Godigo kolesaga wali pabo sę bomo elama mu ebo dao. Tiali goli augwaligo me gisiga konesiąma tama tibo dao.
ROM 10:3 Te Godigo da we bidi doloba pai nogi pobo te kolesagade augwaligo konesiąbaso, tama augwa digi augwa kolesaga doloba pai pedalumainogo ebo sę yai. Tama tibaso, augwali te God dologode me bidisiąyu, tama agai augwali nogi doloba pai nogi omainogo me ebeo.
ROM 10:4 Dago koneani, te bomai po wali peyu tama Godigo bidi doloba pai bidi nogi pobo tų, te tų te Krais asali sogo silali. Megi te gesi tų elalubao. Te Kraisde konealubo po dąų wabo we bidi, te Godigo augwali doloba pai we bidi nogi poaibao.
ROM 10:5 Te bomai po wali peyu tama Godigo bidi doloba pai bidi nogi pobo tųde te Mosesgo polobadu te po asęani, “Bidi te kolesaga tigidali eyu da, teda aga te bidada pabo ula saibao,” te po asęani.
ROM 10:6 Tiali goli te bidigo Godide konealubo po dąų obaso tama Godigo aga doloba pai bidi nogi wabo kolesaga, te kolesagade augwaligo polobadu tama asęani, “Nago naga homude te po olamuo, ‘Te agai dabolo Godigo po pusumainogo, te Krais edaba sela dulamainogo eyu, de te dagaluba pogowe,’ te po olamuo,” te po asęani.
ROM 10:7 Po me asęani, “Tama nago te po me olamuo, ‘De te isai bidi dabego buluba dulaibawe,’” te po asęani. Te Krais tedu selasa asomainao homu eyu te po olamuo.
ROM 10:8 Tiali goli te asęani pogo magi po wabowe? Agai e po wabo dao, “Te Godigo po nage pąde mu elalubao. Te nago pedauwalide me te nago homude me te po elalubao,” te po bukude polobadu asęani. Te dago hanilama te we bidibolo pusubo po te Kraisde konealubo po dao.
ROM 10:9 Tama nago po hanilama pusuyu Jisas aga te Genuai Bidi da po olama, tama nago naga homude te Godigo aga te gų pagede ma hodolali sęde konealubo po dąų weyu da, teda Godigo nage ma dobola saibao.
ROM 10:10 Magi baso meni, te dago homugo te konealubo po dąų obaso, tama Godigo da doloba pai we bidi nogi poaibao. Tama dago pedauwalidu te dena konealubo po we bidi gesabide pusubaso, tama te Godigo da ma saibao.
ROM 10:11 Tama Godigo po bukude te sęde te tama po wai dao, “Te bidigo konealubo po agaba dąų obaso da, teda aga hale me sogobeo.”
ROM 10:12 Tama te pode te Juda dabe me te gasa hani dabe dali augwali te deli tigi poai tobage naga yali. Te da tigidaligo Genuai Bidi deli naga elalubao, tama agai te olo mu tau siyu mabo wiegi yai kolesaga te genuai mu te agaba i wabo we bidi tigidaliba mabo dao.
ROM 10:13 Tama tiyu, te Godigo po bukude wali po tiwai dao, te po e dao, “Tigidali bidigo Genuai Bidi nogi ilama tama agaba i wali da, teda agai augwali ma saibao,” te po asęai dao.
ROM 10:14 Tiali goli bidi me deligo te Juda dabede enabolo te po waibao, “Te augwaligo konealubo po Kraisba hasia dąų me wasiąbaso da, teda augwaligo agaba gedu haluasa po olama i wagobeo. Tama augwaligo agade po me odisąyu da, teda augwaligo konealubo po agaba dąų wagobeo. Tama te bidi me deligo po te augwalibolo me pusisąwani da, magi ilama augwaligo agade po odaibawe?
ROM 10:15 Tama Godigo te po pusabo bidi augwali me tagala palisiąwani da, magi ilama augwaligo te po pusigi pogowe?” Bidi mego enabolo te tobage po obaso da, teda eno te po wei ponoyu, e po waibao, “Woo, te Juda dabe augwaligo Kraisde te po odali dao, te Godigo po bukude elalubo po me deli tiwai, te po e dao, ‘Te wiegi yai gesi po sesebo bidi dabe augwali asobo te homu dwagi yai ilibo sę mu dao,’ te po asęani,” eno te po waibao.
ROM 10:16 Tiali goli, te Juda dabe tigidaligo te wiegi yai gesi po selama wali me pabeo. Te polobadu bidali bidi nogi Aisaia, aga Godigo po pusali profet bidi bidali. Tama te aga dali bidali bagego yali kolesaga te megi bidibo bidi dabego ebo kolesaga tiwai yai dao. Tama tede dwai homu eyu, te Aisaiago te po asęani, “Genuai Bidi, dago te nago po augwalibolo pusali. Tiali goli, augwaligo te po odaliwe ma meniwe, te eno konebeo,” te po asęani.
ROM 10:17 Tialima dago koneani, we bidigo te Godigo po odobaso tama tebogo te konealubo po dąų wabo homu hodolobo dao. Tama bidi mego Kraisde po pusubaso, augwaligo Godigo po odobo dao.
ROM 10:18 Tiali goli te Juda dabede, te mu dawe, te augwaligo Kraisde te po odaliwe ma meniwe? Magia. Augwaligo odalio. Te Godigo po bukude elalubo po me deli tiwai dao, te po e dao, “Te augwaligo dogoni te tigidali tǫba pelama sabolali. Tama augwaligo po pelama, te tigidali bulu mu usu egi pai.”
ROM 10:19 Tiali goli eno po ma obao, te Israel dabe augwaligo te po koneaniwe ma meniwe? Awe, augwaligo koneani. Hasia Mosesgo te sęde te Godigo wali po polobadu asęani, “Te eno olo we bidi meba saibao, augwali te deli hani mu meni, tama dagego tebode dwai homu elama tama eno augwalibolo wiegi yai kolesaga ebaso, tama dage te sulama pesa yaibao. Te eno te kolesaga konesiąwai bidi hani augwali me deli sobaso, tama dagego augwali dali sębę yaibao.”
ROM 10:20 Tama te Godigo po polobadu pusali bidi Aisaiago te po hanilama pusubo wi me ebeo. Agai Godigo te gasa hani we bidide wali po e tiwai asęani, “Te ena gegebo sę me isąwani bidi dabego, te augwaligo ena suali. Te bidi dabe meba augwaligo te bidi mebabolo te enade po hanalusiąbadi, tiali goli ena augwaliba hanilama pedalobo dao.”
ROM 10:21 Tiali goli te Israel hani we bidide te Aisaiago Godigo e wali po asęani, “Te bobage sogo mu eno augwali i wabo sę ebadi, te hani bidi augwaligo te po sela sąnama tama dwai po wei ponai dao.”
ROM 11:1 Te bidi Aisaiago te tobage po asęai baso, eno e po hanalu obao, te Godigo aga hani we bidi aga digi sela sąyabo homu me yaliwe? Mu menio. Ena me ena te Israel bidi dao. Te bidi Abraham te eno wąį mu dao. Ena te Benjamingo hani dao.
ROM 11:2 Te Godigo hani augwali te agai polobadu koneyu hagea sai, agai te augwali me sela sąwai menio. Dagego te Godigo po pusali profet bidi Elaijago po te Godigo po bukude elalubo te dagego koneani. Elaijago gedu haluasa po olama, tama te Israel dabe augwali te Godigo gesabide po tų ela mawai. Agai te wali po e dao,
ROM 11:3 “Genuai Bidi, augwaligo te nago po pusubo bidi profet dabe augwali ela muyu yali. Tama augwaligo te nagebolo mabo nai ulubo alta sai aluali. Tama ena deli naga ena bidibao. Tama augwaligo ena gegebo sę eyu, tama ena ela muainogo ebo dao,” Elaijago te po wai.
ROM 11:4 Tiali goli Godigo agabolo mena po wei ponaniwe? Agai te po wai, “Eno digi ena bidi dabe te bidi sese hauwa 7,000 bidi sali, tama augwaligo te tibo god Bal dologoba pelama teba lotu me wasiąwai dao,” Godigo te po wai.
ROM 11:5 Te tama megi e sogo me te hani bugai meba elalubao, Godigo te aga olo tau mabo wiegi yai kolesagago te augwali hagea siyu ma sai dao.
ROM 11:6 Agai te olo tau siyu mabo wiegi yai kolesaga ebaso tama augwali sali. Tama agai te augwaligo yali sęde homugo te augwali me sabeo. Tama augwaligo te sę ebode te Godigo augwali siyu da, teda te olo tau siyu mabo wiegi yai kolesaga ebo te olo munu me ma egi menigi dao.
ROM 11:7 Tama tibaso dago te Israel dabede magi po waibawe? Te Israel dabe augwaligo te Godigo augwali doloba pai we bidi nogi poabo tų suainogo te sę dene yali goli, te tų augwaligo me susiąwai. Te Godigo meba we bidi naga dią selama, tama augwaligo te tų suali. Tama gasa bage, te augwaligo Godigo po odobo hagela eyu, tama augwa olo dąų wali.
ROM 11:8 Te Godigo po bukude wali po tiwai gilama yali, te po wai, “Godigo te augwaligo homu kolesaga te godege pibo tiwai ilali. Agai te augwaligo gedu te susiąbo tiwai ilama, tama ologo te po me odosiąyu yalio. Tama augwali te tiwai bidali, tama megi e sogoba usu nagasai dao.”
ROM 11:9 Tama Devitgo me te boi bidi dabede Godibolo te tiwai po olama wai, “Te eno homugo te nago tilama, tama augwaligo wei ebo naigo te augwali te konesiąwai bidi tiwai ilao, te aga te subigila peyu te no aselama bidibo bidi te konegobeo. Te bidi tiwai nago augwali tiwai ilao. Tama augwali tulolumainao, augwali wei ponao.
ROM 11:10 Te eno homugo nago augwali gedu hulia somainu elama, tama augwaligo te hulia sai pedalumainogo elama, tama augwaligo gedu pedama suainogo ebo usu me egobeo. Tama nago augwalibolo sęgę mao, tama augwaligo tudi sugunama, tama augwali te tiwai sesemane sogo bidimainogo yao,” Devitgo te po polobadu wai.
ROM 11:11 Te eno te po hanalu obao, te Juda dabe augwaligo te Kraisde konealubo po dąų wasiąyu tama tulaluama, tama augwali tede mu dolaliwe? Mu menio. Augwaligo te dwai sę eyu tama te tų geda mubaso, tama tede te Godigo te gasa hani dabe augwali ma sai. Godigo homugo te wiegi yai kolesaga agai te gasa hani dali ebo te Israel dabe augwaligo suyu tama augwali pesa emainogo tiai dao.
ROM 11:12 Augwaligo te dwai sę ebaso, tama tede Godigo te tigidali tǫde bidibo we bidi tau mu sidubadi geaibao. Augwaligo te Godigo kolesagade tulalubaso, tama tede te Godigo te Juda ąǫ isąwai gasa we bidi hani augwalibolo wiegi yai kolesaga mu yai. Tama tibaso, tigidali Israel dabe Godiba ma geasa asobaso da, teda tigidali hani wiegi yai mu bidaibao, me deli dwai bidigobeo.
ROM 11:13 Tiali goli megi eno po te dage gasa we bidi hani dabe dagebolo mawainogo obao. Godigo ena tagala palali, te eno dage Juda hani isąwai gasa we bidi dagede sę emainogo yai. Tama tibaso eno homu pemene wiegi yai te sęde elama, tama te sę bidigo gedude ugwaba siyu tama eno te sę ebo dao.
ROM 11:14 Magi baso meni, te sęde eno homugo te eno hani Juda bage augwaligo te Godigo dage dali yali wiegi yai kolesaga sulama pesa eyu, tama eno te augwali tomode meba te eno ma sainogo ebo dao.
ROM 11:15 Edao. Godigo te Juda dabe augwali sela sąnama, tama tede agai te tigidali tǫde bidibo bidi selama, tama augwaligo deli homu aga dali pedalabo tų dawai. Te dwagi yai kolesaga dao. Tiali goli, Godigo te Juda dabe augwali ma sabo si, te wiegi yai mu yaibao, te isali bidi aga gų pagede ma hodalobo tiwai yaibao.
ROM 11:16 Te po digi po si begelama tama eno dagebolo obao. Te Juda dabe augwaligo tubo nai bret nigibo si, tama hasia augwaligo te dwasianu pedai bret nigibo plaua te Godibolo hasia mabo dao, te Godigo nai dao, te po wabo dao. Tama tibaso, dago koneani, te plauago nigibo bret tigidali te Godigo nai dao. Tama te ni pedali dabe te Godigo da wida, teda te ni nologo dabe augwali me te Godigo naga dao. Tama te tiwai me te Juda dabego wąį dabe augwali Godigo we bidi bidalibaso, te megi bidibo Juda bage me te Godigo we bidi me bidibao.
ROM 11:17 Tama augwali te gide elalubo ni oliv tiwai bidiyu, tama Godigo te ni oliv nologo meba dwali togolama sela sąnama, tama agai dage olo ni oliv nologo te bulude elalubadi selama, tama dage te gide elalubo ni olivgo nologo togwali pesagede wadolali. Tama dagego augwali hasegelama, tama megi dage bugagia bidibao. Tama dage te elalubo dwagi yai ni olivba wadolobaso, tama dage dali te ni aga nologo mu dali te dagego te ni oliv pedalidu asobo ąįgo ili sabo dao, te nigo bomo me dagego sabo dao.
ROM 11:18 Tiali goli dagego te togwali ni nologo dabe augwalibolo te posobo po munu me olamuo. Te dagego duga nogi ugwaba siyu, augwalide posobo po wai wida, teda dagego homu bugagia koneyu bolo yao. Dagego te ni pedali me ugwaba sagolobo menio. Te ni pedaligo dage sagolobo dao.
ROM 11:19 Tiali goli dagego te duga nogi ugwaba sabo po wabo homu yaibao: “Godigo te ni oliv nologo dabe togwali madi, te ena augwali togwali pesagede wadolomainogo yai,” waibao.
ROM 11:20 Awe, te mu dao. Tiali goli, te augwaligo Kraisde konealubo po dąų me wasiąwani, tama te tialigo naga agai augwali togwa sąwai. Tama dagego konealubo po dąų obaso, tama dage bugagia bidibao. Tiali goli dua dao, dagego hagoma me elamuo. Te dage wi iyąo.
ROM 11:21 Polobadu, Godigo te Juda dabe, te nigo nologo mu dabe augwali me sula tagalasiąwai, tama tiwai naga te dage tuloluyu da, te agai dage me te me sula me tagalogobeo.
ROM 11:22 Tialima, dagego te Godigo te we bidi dali ebo tau sabo kolesaga me te agai sesena pabo kolesaga dali me bugagia suiyąo. Te aga kolesaga tagalali bidi dabe augwalibolo, te agai augwali sesenaibao. Me ma, dage te Godigo dage homu dene eyu tau sabo dao. Tama dagego te aga dage dali ebo kolesagade puba hwi weyu tama agade homu kęą pai we bidi bidiyu da, te usu da. Ma, te meni yani da, te agai dage me togolama sela sąwaibao.
ROM 11:23 Tama te Juda dabe, te ni olivgo nologo mu, te augwaligo te Kraisde konealubo po dąų wabo hagelabo homu tagaluyu da, teda Godigo augwali te augwali togwali pesagede ma wadolaibao. Awe, Godigo te augwali ma wadoligi pabo usu yaibao.
ROM 11:24 Magi baso meni. Dage gasa hani we bidi da, te buside holali ni oliv nologo naga tiwai dao, te ni oliv mugo nologo meni. Tiali goli Godigo dage te nide togolama, tama agai dage te gide elalubo ni oliv muba wadolali. Tama te Juda bage augwali da, te gide elalubo ni oliv dao. Tama tibaso, Godigo te augwali polobadu te ni nologo tiwai togwa sąnama, tama augwali te augwa oliv niba digi te augwa ma wadoloyu ebo usu mu dao, te pedalisiąbo sę meni.
ROM 11:25 Eno ama dede, dage homu hagoma me idali weyu tama eno homugo dage te polobadu geme dualali po page gisiga koneao. Te e tiwai dao: te Israel hani we bidi me badugo homu palia sali, tama te kolesaga augwalide osogo elalubadi tama te gasa haniani hani we bidi augwali te Godiba asiyu, tama te sogo augwaligo hani nambaba usu nagasaibao.
ROM 11:26 Tama te kolesagago te Godigo te Israel dabe tigidali ma dobola saibao. Te agai po asęani bukude wali po tiwai gilama yaibao, “Te we bidi ma dobola sabo bidi aga te Saion buludu asaibao. Te agai te Jekopgo bidi hanigo yali Godigo po sela sąbo kolesaga te agai sela sąwaibao.
ROM 11:27 Tama te sogo eno te po dąų augwali dali waibao, Te po e dao, Te eno augwaligo dwai sę ebo tigidali sela sąwaibao.”
ROM 11:28 Te Godigo gesi noma wiegi yai po pusubo sęde te Juda dabe augwaligo Godide te boi bidi homu ebo dao, tama tede Godigo dage gasa hani we bidi tau sobao. Tiali goli, te Godigo augwali polobadu sa muani sęde, te augwali da aga abagi hani dao. Magi baso meni, polobadu mu agai te augwaligo wąį dabede mu po dąų walai dao.
ROM 11:29 Tama tiyu, te Godigo agai te bidibolo olo mani wiegi yai naide te enabolo ma mao po munu me wagobeo. Agai te bidi sa munama tama i obaso da, teda agai homu te sęde me nosali ma hasegelegobeo.
ROM 11:30 Polobadu dagego te Godigo po sela sąwani. Tama megi te Juda hani bidi augwaligo agai po sela sąnama, tama Godigo augwali osogo tagalabaso, tama agai dage gasa haniani hani we bidi dali homu dene eyu tau salio.
ROM 11:31 Tama te tiwai me augwaligo me te Godigo po sela sąbao. Magi basowe? Te Godigo dage dali homu dene eyu tau sali kolesaga naga ebo gilama agai augwali dali me emainogo yaibao.
ROM 11:32 Magi baso meni, Godigo te po sela sąbo kolesagade te tigidali we bidi dali kalabus ilama, te agai tigidalibolo me homu dene eyu olo tau sabo wiegi yai kolesaga yainogo tialio.
ROM 11:33 Ei tegoba! Te Godigo wiegi wiegi yai homu kolesagade ena noma sobao. Te agai sę yabo homu kolesaga dali, agai koneani kolesaga dali, te mu pągąna pelama, tama te tamu ąį gebo dabo tiwai gilama aiyaba mu dulai. Da bidigo agai yali homu kolesaga page tigidali konemainogo ebo usu me egobeo. Dago agai da dali ebo sę page me munu me kuna konegobeo, da tede usu me egobeo.
ROM 11:34 Te agai po bukude te tiwai po me asęani, “Dego te Genuai Bidigo homu kolesaga koneai dawe? Dego te mobo mabo po agabolo mabo usu egowe?
ROM 11:35 Dego te nai me deli hasia agabolo mani, tama agai te nai wei ponomainogo yaliwe?”
ROM 11:36 Bidi menio. Magi baso meni. Aga tigidali nai nigali bidi dao, tama agade te tigidali elalubo nai te bidibo ula elalubo dao. Tama tigidali naigo te aga nogi ugwaba somainogo eyu bidibo dao. Tama eno homugo dago sesemane sogo bidada peyu aga nogi ugwaba sao. Mu tama dao.
ROM 12:1 Eno ama dede, eno homugo te Godigo da dali homu dene eyu tama haniani olo tau mani wiegi yai kolesaga genuai mu yali, eno te homu ebaso, eno e po megi dagebolo hanilibao. Bidigo hasa ela munama tama Godibolo olo mabo sę, te ebo sę nogi poai te ofa dao. Tama te tiwai gilama dagego duga tigi te Godibolo olo mabo ofa tiwai yao. Te tigi bidibo ula elalubadi tama dagego Godibolo menama, tama te God aga deliba naga mao, te dwai sę me isąwai nai ofa dao, tama dagego te Godigo godolo ebo kolesaga yaibao. Dagego tama tiyu, tama dage te tiwai God dologode bidiyu, tama duga lotu po mu te Godibolo waiyąo.
ROM 12:2 Tama te kolesaga edubadi, dage te tǫde bidi dabe biladubo tiwai elama me bilalugio. Menio. Dagego homu kolesaga Godigo gesi noma pedalomainogo ilama, tama dagego kolesaga me gesi noma pedalomainogo emainao. Tama tiyu da, teda dagego te Godigo homu kolesaga koneaibao. Tama agai homu kolesaga koneama tama te bidigo yabo wiegi yai sę me, te Godigo gedude te usu niba kadu wabo kolesaga dali, te doloba pai kolesaga dali, te tobage dwagi yai kolesaga page tigidali dagego hania koneaibao.
ROM 12:3 Te Godigo te eno sę yabo homu kolesaga enabolo olo mobaso, eno dage tigidali deli delibolo e po obao: nago geda muyu naga digi te nage mu koneai bidi mu da nago te homu me elamuo. Te menio. Hasia nago nagede homu dolo kone palao. Te Godigo te agade konealubo po dąų wabo bomo nagebolo dobolama mani. Tama te bomo da, te usu ni tiwai dao, nagede. Tama te usu nigo nago naga sę yabo bomo dali, te nago sę yabo homu kolesaga dali te si usu sao. Dage tigidali deli deligo te tama yao.
ROM 12:4 Magi baso meni. Dago koneani, bidigo tigide te nogo me sągą me, te haniani badu sę ebo me te tigi delide naga elalubao. Tiali goli tigidali badu te sę deli tigi tiwai sę naga me ebo menio, te augwaligo haniani sę elalubao.
ROM 12:5 Tama te tiwai me da haniani we bidi hauwa elaluali goli, Kraisde da wadolama tama da tigi deli naga elalubao. Tama bidiyu, tama da tigidali deli deli da tigidali te gasa badu abagi tiwai dao.
ROM 12:6 Godigo dabolo olo mabo kolesaga elama, tama da deli delibolo gasagi gasagi yai te we bidi tau mabo sę yabo kolesaga dobola mani, te agai olo mabo kolesaga yai. Tama agai tama tialigo da, te da tigidali deli deligo te mani kolesagago dena hasi tau mao. Tama tiyu, bidi me deligo te Godigo po pusubo homu kolesaga elaluyu da, teda agai te aga Godide konealubo pogo bomo wali pelama te Godigo po pusao.
ROM 12:7 Ma, te bidi me deligo te ama dede dabe tau sabo homu kolesaga elalubaso da, teda agai te ama dede dabe tau sabo sę mu yao. Tama bidi mego te Godigo po ola mabo tisa sę ebo kolesaga elaluyu da, teda agai te tisa sę mu yao.
ROM 12:8 Bidi mego te bidi dabe augwali homu hodolobo kolesaga elalubaso da, teda agai te augwali homu hodolobo sę mu yao. Te Godigo hani we bidi tau somainogo aga nai dobabo bidi, aga dwagi yai homu eyu agai nai hauwa augwalibolo mao, te agai nai yogo homu elamuo. Te polalubo bidi, te agai homugo te sę mu yao. Te gasa bidi homu dene eyu tau sabo bidi, te bidi me agai homu pemene wiegi yai elama tama aga tau sao.
ROM 12:9 Duga hasi dagego duga ama dabebolo dwagi yai homu eyu godolo eba wida, teda dagego homu mu naga eyu augwali godolo mu ela pao. Tama tiyu, dagego te dwai kolesagaba tudi mu ola menama, tama dagego te wiegi yai kolesagaba homu mu kęą sao.
ROM 12:10 Dage da, te deli hani bage dao. Tama tibaso, te deli hani we bidi dabego yabo kolesaga bomo eyu, tama duga hasi duga ama dede abe dede augwali dali dwagi yai homu eyu godolo mu yao. Dage tigidali deli deligo duga nogi aiyaba elaluyu, te gasa bage augwali nogi naga ugwaba sao.
ROM 12:11 Dagego sesemane sogo sę bomo mu yao. Tama dagego homude bomo eyu tama Genuai Bidigo sę yao.
ROM 12:12 Dagego agade konealubo po dąų olama, tama Genuai Bidigo dage tau sabo tonalubadi tama dagego wiegi yai homu pemene dali yao. Te sęgę dageba pedalobaso da, teda dage bomo elama bugagia dolaluao. Dagego tigidali sogo gedu haluasa po wao.
ROM 12:13 Tama te Godigo we bidi meba augwali te nai dabe meni baso da, teda dagego augwali tau sao. Me ma, te gasa bulu bidi dabe dage bidiboba pedalobo si da, teda dagego augwali bugagia geseyu tonaluao.
ROM 12:14 Te bidi dabe augwaligo dage dali dwai sę eyu dene mobaso da, te dagego Godibolo gedu haluasa po olama, te agai augwali wiegi yai ilimainao. Awe, dagego gedu haluasa po agaba obaso, te augwali agai wiegi yai ilimainogo wao. Dagego agai augwali dolomainogo gedu haluasa po weyu te i ola mabo po me olamuo.
ROM 12:15 Te bidi dabe augwaligo wiegi yai pemene ebaso, te dagego wiegi yai homu pemene augwali dali hodobo iyąo. Augwali homu dene eyu gela obaso, teda dage me augwali dali hodobo gela wao.
ROM 12:16 Dagego duga ama dede augwali dali deli homu tiwai elama, te duga digi dugade ebo homu tiwai augwali dali yao. Dagego homu dage genuai bidi bidabo homu me ilamuo. Menio. Dage te nogi meni yai olo we bidi dabe dali abagi homu eyu bidiąo. Dagego te homu elama duga digi te po me wagio, “Eno naga eno koneai bidi dao,” te po me wagio.
ROM 12:17 Tama gasa bidigo dwai kolesaga dagebolo ebaso da, teda dagego te dwai kolesaga augwalibolo wei me ponogimio. Menio. Dagego duga ebo kolesaga bugagia osola sulama, tama te tigidali bidigo gedude wiegi yai dolo kolesaga te kolesaga naga iyąo.
ROM 12:18 Duga digi te hwįabo homu me egio. Te tų elalubaso da, teda dagego deli homu tigidali bidi dali elama bidiąo.
ROM 12:19 Eno abagi dede muo, te augwaligo dwai sę dagebolo ebo te duga digi wei munu me ponamuo. Te menio. Dagego te Godigo sębę ebo sę augwalide emainogo sula tagaliąo. Magi baso meni, te Godigo po bukude agai te po wai, “Te dwai sę wei ponobo kolesaga da, te eno sę dao. Ena digi te eno dwai dene wei augwalibolo ponaibao, Genuai Bidigo te po wai.”
ROM 12:20 Te dwai sę wei munu me ponamuo. Te menio. Tiali goli, te Godigo po bukude wabo po tiwai, “Te nagebolo boi bidi ebo bidi aga nasi ebaso da, teda nago aga nai mao. Te aga ąį nogone ebaso da, teda nago ąį agabolo mao. Nago tama tiali da, teda agai yali kolesagade te nago aga hale ebo kolesaga mu ilaibao, tama te kolesagade ge naibao.”
ROM 12:21 Gasa bidigo nagebolo dwai sę elama tama nago aga dwai sę ma wei ponoyu da, teda dwai kolesagago nage aiyaba elaluai dao. Te tama gogologio. Menio. Nago agabolo dwagi yai sę naga wei ponao. Tama tiyu, nago dwagi yai kolesaga ebogo te aga dwai kolesaga yali aiyaba elaluao.
ROM 13:1 Da Godigo po wali bilibo we bidi da tigidali te gavman bidi dabe augwali dologode bidao. Magi baso meni. Te tǫde elalubo gavman sę yabo bomo, te bomo tigidali te God aga digi agai dodolai dao. Te gavman me deli te olo me pedalubeo. Menio. Tigidali gavman bidibo, te Godigo digi augwali munama tama augwali bidibao.
ROM 13:2 Tama tibaso, bidigo te gavmanigo po wali pabo hagela homu ebo bidi, te agai Godigo muani naide te homu ebo dao. Tama bidi augwaligo tama tibo da, teda augwali te augwa yali kolesagade te dwai dene saibao.
ROM 13:3 Magi baso meni. Te wiegi yai dolo kolesaga ebo bidi dabe augwali te gavman bidide wi ebo meni. Tiali goli te dwai kolesaga ebo bage augwali wi ilainogo te gavman bidi bidibao. Te nago te gavmanide wi ebo hagela homu ebowe? Teda, nago wiegi yai kolesaga naga ebaso, tama agai nago nogi ugwaba saibao.
ROM 13:4 Tama aga dali wi ebo page elalugobeo. Magi baso meni, aga te Godigo sę bidi te agai nage tau siyu, tama nage bugagia bidaibao. Tiali goli, nago dwai kolesaga ebaso da, teda nage aga wi yao. Nago koneani, te gavman enesigi bidi agai te poa pai genuai hwą ge tolalubo, tama agai te olo me tolalubo menio. Te gavman genuai bidi aga da te Godigo sę bidi, tama te dwai kolesaga ebo bidibolo te Godigo nogide te wei ponama dene mabo dao.
ROM 13:5 Tama tibaso, da te gavman bidi dologode bidao. Da te Godigo sębę geda somainogo ebode naga tama te gavman bidigo po wali pigio. Menio. Dago homugo te kolesaga ebo te dolo dao te tiwai homu yao.
ROM 13:6 Tama tede naga dagego te takis me abelebo dao. Magi baso meni, te gavman bidi dabe augwali te Godigo sę bidi bidibaso, tama sesemane sogo augwaligo bomo elama te sę naga tonalubo dao.
ROM 13:7 Dagego te bidi dabe augwalibolo te haniani negeli elalubaso da, teda dagego te augwalibolo mao. Te haniani takis, te maket takis dali, kaunsil takis dali, te tobage negeli te tedali tedali takis mone sabo bidi dabebolo mao. Dagego te gavman dabede deli dologode bidabo negeli elalubao. Tama tibaso, dage augwali dologode bidao. Dagego te gavman bidi dabe nogi ugwaba sabo negeli elalubao. Tama tibaso, dagego augwaligo nogi ugwaba sao.
ROM 13:8 Dagego bidi me delibolo negeli elalubaso da, te negeli polo wei ponao. Te negeli tigidali bugagia wei ponao. Tiali goli te negeli me deli dage tigidali deli deligo sesemane sogo me elaluaibao, siligobeo: te da te ama dede dabebolo dwagi yai homu eyu godolo mu yabo negeli elalubao. Magi baso meni, te bidi me deligo te gasa bidi dwagi yai homu eyu godolo ebo bidigo agai te kolesaga ebogo bomai po wali mu peduai dao, te aga te bomai pogo usu niba kadu wai dao.
ROM 13:9 Dago koneani, te bomai pode te po wai, “Nago te penani sę egio. Nago bidi ela mugio. Nago nai wi sigio. Nago mena gasa bidigo nai dabe sulama pesa egio.” Te bomai po dabe me, tama gasa bomai po tigidali elalubo, te tigidali bomai po deliba sisinama, tama augwali page deli naga elalubao, te page po e dao, “Te naga digi naga godolo ebo tiwai gilama te nago gasa we bidi dabe augwali godolo eyu tiao.”
ROM 13:10 Te bidigo gasa bidi dali dwagi yai homu eyu godolo mu ebo bidi, te agai dwai kolesaga te agabolo me egobeo. Tama tibaso, te we bidi dali wiegi yai homu eyu godolo ebo kolesaga ebo bidi, te agai te Godigo bomai po page usu nagasobo dao.
ROM 13:11 Magi baso eno dagebolo te tiwai kolesaga yao po waliwe? Edao. Te megi da bidibo sogo te dagego koneanio. Megi dage te godege pila muani tagalama hodaloabo sogo dao. Magi baso meni. Polobadu da gesi konealubo po dąų wabo bidi pedalali, tama Godigo da ma dobola sainogo homu yali sogo te digibulu gana elalubadi yali, tiali goli megi e sogo te dwasianu pąba pedalalio.
ROM 13:12 Te be hulialuali silainogo elama, tama pąde be posainogo ebao. Tama tibaso, dago te be hulia saide bidibo we bidigo ebo dwai kolesaga ebo tagalao. Te ami bidi dabe augwaligo augwa pibo ugwa guda munama, tama te augwa tigi duala sabo hwįabo ugwa gudubo dao. Tama te tiwai gilama, dago te dwai bidi Satan aiyaba elaluabo wiegi yai kolesaga te dago ugwa gudubo gilama guda sao.
ROM 13:13 Da dolo bilao, te giligade bilibo bidi tiwai yao. Dago te hagoma eyu te bomai ąį tuai bidi tiwai dedege bilamuo. Dago te penani ebo kolesaga eyu tama te meda ebo dwai kolesaga dali gagali egio. Dago gasa bidigo nai pesa elama godolo ebaso, tama wado po dabe me olamu dao.
ROM 13:14 Te tobage kolesaga menio. Dagego Genuai Bidi Jisas Krais selama, tama aga te bebo ugwa tiwai elama tama duga homude bea sao. Tama dagego te tigigo ebo dwai kolesaga wali pabo homu me egimio.
ROM 14:1 Tama bidigo Kraisde konealubo po dąų weyu da yali, tiali goli agai konealubo po bomo isąyu tama aga homu te God aga dali dwagi yai homu emainogo aga te bidigo nigali haniani bomai po aga wali pao homu ebo bidi dao. Te tobage bidi te dagego duga hani tomoba sela asao. Tiali goli tama tiyu te dagego homude aga dali gasa gasa konila po me olamu dao. Te menio. Te bidi olo mu sao.
ROM 14:2 E tiwai yao. Bidi me deligo Kraisde konealubo po bomo elama dąų olama, tama agai tigidali haniani nai tubo dao. Tiali goli gasa bidi mego Kraisde konealubo po dąų olama gisiga konesiąwai bidi, te bidi agai te mi tubo sęde habu selama, tama te gide holobo nai naga agai tubo dao.
ROM 14:3 Tama tigidali nai tubo bidigo, agai te kibu me gasa nai mi tusiąbo bidi dali dwai homu me egio, bo wagio. Me ma, te kibu me gasa nai mi tusiąbo bidigo, agai homugo te tigidali nai tubo bidi te sęgę sali homu me egio. Menio. Godigo te bidi me selama, tama aga hani dali dagayani dao.
ROM 14:4 Nage niwai bidi da olama, tama nago gasa bidigo sę ebo bidigo ebo kolesagade te sęgę sali homu ebo dawe? Te aga sęde bomo elama dolalubaso, ma aga tulalubaso da, te sę aga Genuai Bidigo digi osola sulama tama aga dali yaibao. Tama te bidi aga dolaluaibao. Magi baso meni, te Genuai Bidigo digi te aga dąų ilama, tama aga bomo elama dolalubo usu yaibao.
ROM 14:5 Te Krais wali pabo we bidi hani tomode bidi me deligo homugo te deli sogo bubugade te Godigo gedude te genuai sogo da homu mu elama tama te gasa sogo dabe te aiyaba elaluali homu ebo dao. Tama gasa bidigo homugo tigidali sogo te deli sogo bubugade tiwai da te homu ebo dao. Tigidali bidi deli deligo augwa digi augwa homude te sęde bugagia hania homugo koneao.
ROM 14:6 Bidigo homugo deli sogo te polalubo genuai sogo da homu eyu da, te bidigo te Genuai Bidigo nogi ugwaba somainogo tama tebo dao. Te tigidali nai tubo bidi me, te bidigo te Godibolo te tubo naide puba hwi po obaso tama te nai tubo si agai te Genuai Bidigo nogi tama ugwaba sabo dao. Me ma, te tigidali nai me tusiąbo bidi me, agai te Genuai Bidigo nogi ugwaba siyu, tama Godibolo te puba hwi po weyu ebadi, aga nai meba tubo menio.
ROM 14:7 Dago koneani, te da usu da homu eyu, tama dena homu naga wali peyu tama da e tiwai bidaibao, ma da e tiwai isaibao, te homu eyu te da bidibo meni.
ROM 14:8 Menio. Te da bidibo ula elalubo sogo da, ma da isibo si da, te dago te Genuai Bidi dwagi yai homu ilabo sę yao. Tama tibaso, da bidibadi me, ma da isai digi yaibaso, da te Genuai Bidigo we bidi hani dao.
ROM 14:9 Magi baso meni. Krais me isama tama bidibo ula ma sali da, te aga te isali bidi dabe dali te bidibo ula elalubo bidi dabe dali augwaligo Genuai Bidi bidainogo tama tiai dao.
ROM 14:10 Tama aga tama tialigo da, tama nago, magi baso nago te naga ama bilibo kolesaga dagalama tama aga dali dwai homu ebo dawe? Tama nago me, te magi baso nago te sęgę sali homu naga ama u bidide ebo dawe? Dago koneani, te da tigidali te Godigo po tų ebode dolaluaibao.
ROM 14:11 Magu meni, te Godigo po bukude asęani po tiwai yaibao, te po asęani, “Genuai Bidigo te po wai dao: ‘Ena mu tama bidibo, ena isigobeo. Te tiwai eno megi wabo po me te mu usu nagasaibao. Te tigidali we bidigo ena pagede kidu sugunama, tama tigidali bidigo God po hanilama weyu aga God mu da waibao.’”
ROM 14:12 Tama agai tama po waligo da, teda da tigidali we bidi deli deligo te dago Godibolo te dago yali tigidali kolesaga page te po pusaibao.
ROM 14:13 Te da tigidali te Godigo po tų ebode mu dolalubaso, tama dago dwai homu gasa amago ebo kolesagade ebo tagalao, te me elamuo. Menio. Dago te tiwai homu yao: dago te ama dwai sęgęba tulalumainogo magi sę me deli elamu dao. Te aga Godigo pabo tųdu pabo dolamuo.
ROM 14:14 Ena te Genuai Bidi Jisas dali wadolama, tama agai ena ola manigo tama te eno e po page bugagia hania koneai, te magi tubo nai me deli te aga digi meda eyu tama te habu selai nai menio. Tiali goli bidigo te nai me deli te meda yai habu selali nai dao homu ebaso, te aga homude naga te nai meda elalubao, te agade te nai te habu selai nai dao. Dagego agabolo tuao olamuo.
ROM 14:15 Magi baso meni. E tiwai dao: nago amago homu te tubo nai me deli te habu selai nai dao. Tama agai nago te nai tubo subaso, tama aga homu te nai habu selali po wai nai goli, tama aga te habu selali po bolama, agai me te nai tubaso, aga te tiwai tulaluama te dwai homu sęgę elaluaibao. Tama nago naga ama tama doloyu da, teda nago koneao, te kolesagade nago te aga ama dali dwagi yai homu eyu godolo eyu bidibo kolesaga nago tagalai dao. Krais isilama te ama ma dobola sainogo yali. Tama tibaso, nago nai tubo kolesagago te ama me dologio.
ROM 14:16 Tama tiyu, nago te kolesaga me deli dali te habu selesiąwani kolesaga dao homu ebao. Awe, tiali goli nago te kolesaga ebogo te nago ama te dwai sę tomoba kegeyu da, teda te kolesaga ebo tagalao. Te gasa bidi dabe augwaligo te sulama, tama Godigo nogi posobo po waidali weyu, te nago te habu selesiąwani kolesaga ebo tagalao.
ROM 14:17 Magi baso meni. Te Godigo da we bidi tonalubo sę page da, te nai me wę tubo kolesagade te page elalubeo. Menio. Te aga da tonalubo sę page e dao, te doloba pai kolesagade elaluyu, tama wiegi yai homu nagame eyu, tama wiegi yai homu pemene ebo kolesaga ebo. Te Godigo Tedali Mobo Bidigo te kolesaga da tomode nigilibo dao.
ROM 14:18 Tama bidi te tobage kolesaga ebogo te Kraisgo sę bidi bidiyu da, teda aga Godigo usu niba kadu waibao, tama te bidi dabe augwaligo homugo te aga wiegi yai bidi da te homu yaibao.
ROM 14:19 Tama tibaso, da te tų naga wali peyu, te da deli homu ilabo kolesaga dali, te dena hasi dena bomo mabo kolesaga dali si, te da pobasa pao.
ROM 14:20 Tama tiyu, e homu yao: eno ama da te Godigo ma dobola sai bidi dao. Tama tibaso, eno aga te konealubo pode dolidali weyu, te agai habu selali homu yai tubo nai te nai eno me tugobeo. Mu tama, te tubo nai tigidali wiegi yai dao, te we bidigo tuabo nai dao. Tiali goli, te nago nai me deli tuali digi tama tede te gasa bidi me deli tulalubo sę ebaso da, teda nago dwai kolesaga ebao.
ROM 14:21 Te doloba pai kolesaga e dao: nago amade kone palao. Aga te mi tubo kolesagade, ma te bomai wę tubo kolesagade, ma gasa sęde me te habu selai dwai sę dao homu ebaso da, teda agai nage te tobage kolesaga ebo sulama, tama aga homude elalubo habu selali po bolama tulaluidali weyu, nago te tobage kolesaga egio. Tama tiyu te nago te wiegi yai ilibo dao.
ROM 14:22 Nago te mi dali wę dali tubo kolesagade nago naga homugo hania konebo, te homu te naga digi God dali dage si tomode dodolama elaluao. Bidigo homugo te haniani ebo kolesaga usu selama tama meba dwai dao, meba dwagi yai sę dao, te aga konebo dao. Tama te bidigo te wiegi yai kolesaga naga eyu, tama agai aga ebo sęde dwai homu isąwai bidi, te bidi aga wiegi yai homu pemene yao.
ROM 14:23 Tiali goli bidigo homu si elama te nai tuali da, te Godigo agabolo sęgę mawaibao. Magi baso meni. Aga te sęde te wiegi yai sę naga dao te homu isiąbadi aga homu si elama te nai tuali. Te tigidali sę deli delide e po mu po dao: te sę doloba pai sę mu da homu isiąbadi tama homu si elama te sę eyu da, teda dago tede dwai sę yalio.
ROM 15:1 Te da Godigo we bidi hani tomode te we bidi meba augwaligo te Kraisde te konealubo po bomo meni yai bidiyu, tama augwaligo haniani sęde te habu selebo dao, te ena tamadi tama te sęde po asęani. Tama da meba te Kraisde te konealubo po bomo eyu dąų olama bidibao. Tama da augwali dali te nagamea pai kolesaga eyu augwali sao. Dago augwali dali tama tiyu, tama dago augwaligo sęgę tolao. Dago augwali sula tagalama tama dena homu kolesaga naga wali me piduamu dao.
ROM 15:2 Te menio. Da tigidali deli deli dago te da pąde bidibo bidide homugo kone palama, tama aga tau sabo sę yao, te aga wiegi yai kolesaga selama, tama aga te Kraisde konealubo po bugagia dąų wali bidi pedalomainao.
ROM 15:3 Te Kraisgo me, Krais aga digi aga homu wali me pabeo. Te meni. Te we bidi augwaligo agade nogi posobo po wali goli, aga Godigo homu naga wali pali. Te agade pedalali kolesaga te bidi mego Godibolo polobadu wali po tiwai gilama yai. Te bukude asęani po e dao: “Te God, te bidi dabe augwaligo nagebolo wabo dwai po wabo, te augwaligo dwai po wabo te po asiyu ena mesegelai dao,” te po asęani, tama te Kraisde usu nagasai dao.
ROM 15:4 Godigo po tigidali augwaligo polobadu asęani, te augwaligo te po dabolo te wiegi yai bidabo kolesaga ola momainogo asęanio. Tama dago te asęani po nededu geyu, tama tede dago te haniani sęgę tolabo bomo dali, te dwagi yai po mobo mabo po dali somainogo eyu augwaligo te po asęani. Tama dago te bomo me te mobo mabo po me te bukude asęani pode selama, tama dwagi yai homu eyu, dago te Godigo da dali yabo wiegi yai sę bugagia tonaluaibao.
ROM 15:5 Te God da, te haniani sęgę tolabo bomo page bidi dao, te dwagi yai mobo mabo po page bidi dao. Tama eno homugo te Godigo dage tau siyu, tama dage te Krais Jisasgo yali homu kolesaga wali mu peyu, tama dage deli homu naga duga hasi elaluyu bidaibao.
ROM 15:6 Eno homugo dage te tama bidiyu, tama pedauwali deli elama, tama Godigo nogi ugwaba somainogo yao, aga God tama dago Genuai Bidi Jisas Kraisgo Aya dao.
ROM 15:7 Dago te da pąde bidibo bidide homugo kone palao. Tama tibaso, duga hasi dage tigidali deli deligo te ama dede dabe selama, tama augwali dali deli homu elama bidao, te Kraisgo me da sali tiwai yaligi yao, te Godigo genuai nogi ugwaba pedalomainogo tiao.
ROM 15:8 Eno po page e dao: Krais agade digi naga aga homugo kone palisiąbadi tama aga te tigiwali togobo Juda hani tau sabo sę bidi pedalai. Agai tama tialigo te God da te mu po naga wabo bidi dao ola mani dao. Tama tede Kraisgo te Godigo te polobadu bidali augwa wąį dabebolo menama dąų wali po tigidali usu nai dao.
ROM 15:9 Tama aga te Juda hanigo sę ebo bidi pedalobo te page me elalubao, te e dao: agai homugo te gasa hani augwaligo te Godigo homu dene eyu olo tau mabo wiegi yai kolesaga ebo te augwaligo sulama, tama aga nogi ugwaba somainogo homu yali, te Godigo po bukude wali po tiwai gilama yali, te po e dao: “Tama eno nago nogi ugwaba sabo po gasa hani dabe tomode augwalibolo pusaibao. Tama eno tęąbi pogo nago nogi ugwaba saibao.”
ROM 15:10 Tama bukude te sęde gasa po me wali e dao: “Dage gasa hani dabe, dagego te Godigo hani we bidi dali wiegi yai homu pemene yao.”
ROM 15:11 Tama bukude te po gasa badu e tiwai po wali, “Dage tigidali gasa hani bidi, dagego te Genuai Bidigo nogi ugwaba sao. Tama tigidali we bidi dagego aga nogi ugwaba sao.”
ROM 15:12 Tama te Juda hani isąwai bagede te polobadu Godigo po pusali bidi Aisaiago me te po wai, “Te gelali ni pedalide te ni koliama holobo tiwai gilama tama te bidi me deli te Jesigo hanide pedalaibao. Tama te bidi Godigo te gasa hani we bidi tonalubo bidi nigilaibao. Tama nigilama, tama augwaligo agade augwa homu tialuama, tama dwagi yai homu eyu, agai augwalibolo nosali yabo sę ebo tonaluaibao,” te Godigo po polobadu pusali bidi Aisaiago te po asęani.
ROM 15:13 God da, aga te dago homu agaba tialuama tama dwagi yai homu eyu te agai dabolo nosali yabo sę tonalubo kolesaga page bidi dao. Tama eno gedu haluasa po weyu tama wabo dao, “God, te Rom bulude bidibo we bidi augwaligo nageba te konealubo po dąų wali dao. Tama tebogo nago augwali wiegi yai homu pemene genuai elama, tama nagame yai homu te augwaliba pedalama tama pągąnalumainogo yao, te eno homugo dao. Tama nago Tedali Mobo Bidigo bomogo augwali tau siyu tama augwaligo te nago nosali yabo sę bugagia tonalubo kolesaga te geninama mu pedalomainao,” eno te tobage po te Godibolo hanalu wabo dao.
ROM 15:14 Eno ama dede dabeo, te eno dagede te homu si ebo meni. Te eno homugo digi te dagego te we bidi tau sabo wiegi yai kolesaga sesemane sogo ebo dao, tama dagego haniani kolesaga tigidali elaluyu, tama dagego te Godigo wiegi yai homu kolesaga te duga hasi ama dede dabe augwalibolo ola mabo te dage usu ebo dao.
ROM 15:15 Tiali goli eno e pas tomode po meba ena homu wi me isąyu, tama bomo elama te po dagebolo hania asęani. Eno te pode dage homu hodolainogo homu ebao, te dagego te po kegeda pidali weyu yali. Magi baso meni, Godigo te aga olo tau mabo wiegi yai kolesaga ena dali eyu, tama enaba te dwagi yai sę mawai dao.
ROM 15:16 Tama agai ena te Krais Jisasgo sę ebo bidi bidimainogo ilama, te Juda hani isąwai gasa hani augwali tomode sę emainogo yai. Ena te Godibolo lotu po weyu sę ebo bidi pris tiwai elama, tama eno Godigo wiegi yai gesi po pusubo sę ebao. Eno te gasa hani augwali te Godiba sela aselama, tama Tedali Mobo Bidigo augwali wiegi yai mu doloba pai we bidi ilibo si, tama eno augwali Godibolo te usu si yai ofa tiwai elama mawaibao.
ROM 15:17 Tama tibaso, ena Krais Jisas dali wadolama, tama eno te Godibolo ebo sęde te ena wiegi yai homu pemene ebo usu ebo dao.
ROM 15:18 Tama eno gasa bidigo yali sęde po me wagobeo. Menio. Tama bomo elama, eno te Kraisgo sę ena nogode yali sę po naga pusubao. Agai eno po tau selama, tama wiegi yai sę dabe eno nogode yai. Tama te si ebogo te Juda hani isąwai gasa hani we bidi augwali te Godigo po odoyu, tama augwaligo homu tulaluyu, tama augwali agai po wali pabo sę ilali.
ROM 15:19 Tama agai eno nogode te haniani bidigo me isąwai bomai sę yai. Tama Tedali Mobo Bidigo me enabolo sę bomo yali. Te tigidali sę agai yai, te gasa hani dabe hodolama, tama augwaligo te Godigo po wali pomainogo yalio. Tama tiyu, eno te sę Jerusalemde gagalama, tama eno Kraisde wiegi yai gesi po tigidali augwalibolo pusali, tama ena bilali te tigidali habuba te digibulu mu bulu nogi Ilirikum dąį egi pelama, tama te sę ela silai dao.
ROM 15:20 Tama tiyu, te sęde eno homugo te Kraisgo nogi polobadu konesiąwani bage bidiboba pelama, tama augwalibolo eno te wiegi yai gesi po pusabo homu godolo mu yalio. Te po digi po begelama tama e tiwai dao, eno te gasa bidigo tulai be ni daide eno be me sę idali weyu, ena te digibulu buluba pai dao.
ROM 15:21 Tama tiyu, eno te Godigo po bukude polobadu asęani po usu numainogo yai, te po e dao, “Te agade po munu me odosiąwani bidi dabe, te augwaligo aga sueibao. Tama agade po odosiąwani bidi dabego, te augwaligo agade bugagia koneaibao.”
ROM 15:22 Te digibulu bulude bidibo bage, te augwali Kraisgo nogi munu me odosiąwani we bidi, te eno augwalibolo Godigo po pusubo sę hauwa elalubaso, tama te sęgo hauwa sogo ena tų palidubaso, tama ena dageba pabo usu me ebeo.
ROM 15:23 Tiali goli megi eno yabo sę te gasa pąde elalubo tǫ pedai dabede me elalubeo, te sę tede silai dao. Tama hauwa kibu bede te ena dage bidibo madi asabo homu godolo mu yai dao.
ROM 15:24 Tama tialigo da, megi eno homugo te ena te digibulu tǫ pedai nogi Spen, te dagego bulu Rom u badu bulu, teba ena paio. Tama te Spenba pobadi tama tomode ena dagego hanu Romba hasia sabolaibao. Tama dageba te tiwai sabolama, tama ena dwasianu sogo dage dali dwagi yai homu eyu bidama, tama dagego ena tau siyu ena odasa pelama, te Spen bulu pabo tųba tagaligi pagameo.
ROM 15:25 Tiali goli megi hasia bolo ena te Jerusalem hanuba pabo tamadi gagalaibao, te tede bidibo Godigo we bidi tau magi paibao.
ROM 15:26 Te e tama tiaibao: te Masedonia dali Akaia dali te tǫ pedai side bidibo Godigo we bidi augwaligo po mia selama, tama dwagi yai homu eyu augwa nai sesa pelama sisinama, tama eno nogoba munama, tama te nai meni yai te Godigo we bidi augwalibolo te Jerusalemba tolainogo ebo dao.
ROM 15:27 Mu tama, augwa digi augwaligo te mone mabo sęde wiegi yai homu elama augwaligo tama tiwai yali, tiali goli augwaligo negeli me te Jerusalem dabede elaluai. Magi baso meni, te Jerusalemde bidibo Juda dabe augwaligo te Juda hani isąwai gasa hani dabe augwali te Godigo wiegi yai gesi po mani negeli elaluai. Tama tibaso, gasa hani augwaligo te tigide nai tau sabo negeli te Juda dabe augwalide elaluai dao.
ROM 15:28 Te gasa hani bage augwaligo Godigo wiegi yai po odama, tama te pogo megi du walobao, te gasa hani bage augwaligo augwa monego te Juda dabe tau saibao. Tama eno te ena nogoba muani sę silabo homu eyu, tama eno te wiegi yai du tigidali te Jerusalem dabe augwaligo nogoba bugagia menama da, tama nosali ena te Spen buluba pabo tųdu painogo, tama tedu pobadi hasia eno dage bolo suagasaibao.
ROM 15:29 Tama eno koneanio, te ena dage bidiboba sabalobo si, te Kraisgo da tigidalibolo te wiegi yai homu ilibo dwagi yai sę elama, tama da pągąwaibao.
ROM 15:30 Eno ama dede, eno homugo dagego te dago Genuai Bidi Jisas Krais homu koneama, tama te Tedali Mobo Bidigo da tomode hodolali duga hasi godolo ebo kolesaga me homu kone palao. Tama te side homu kone palama, dage homu hodolama, tama te gedu haluasa po wabo sę dene ena dali emainu eno te homu godolo ebao. Dagego te Godibolo gedu haluasa po weyu ena tau somainogo yao,
ROM 15:31 tama ena te Juda dabe meba te Godigo po sela sąbo bidi augwali nogode ena dagala samainogo yaibao. Tama me, dagego te Godibolo gedu haluasa po obaso, te Godigo aga we bidi Jerusalem dabe augwaligo te eno augwali tau sabo sęde dwagi yai homu eyu tama godolo emainao.
ROM 15:32 Tama tiyu, tama Godigo usu da homu ebaso da, te ena wiegi yai homu pemene eyu, tama dage bidiboba sabolaibao. Tama ena dage dali dwasianu sogo bidiyu toma nabo homu yaibao.
ROM 15:33 Eno homugo God da, aga te wiegi yai homu nagame ebo page bidi, aga te dage tigidali dali bidao. Mu dao.
ROM 16:1 Eno homugo te dago abe Fibi aga dage bidiboba sabalobo si dagego aga selama, tama agabolo wiegi yai sę bugagia yao. Agai te ede Senkria bulude Godigo po odobo we bidi tau sabo sę ebo dao.
ROM 16:2 Eno homugo dagego homu Genuai Bidiba koneama, tama dagego te we Fibi selama, te dage Godigo po odobo we bidi dali bidimai homu yao. Te wiegi yai kolesaga da Godigo we bidigo ebo kolesaga dao. Tama Fibi aga magi nai me deli meni baso da, teda dagego aga tau sao. Magi baso meni, agai abagi homu eyu tama we bidi hauwa tau sai, tama agai ena me tau sai dao.
ROM 16:3 Dagego eno siade da po wali te we Prisilade, aga bidi Akwila sibolo mao, augwali si te Krais Jisasde ena dali deli sę ebo dao.
ROM 16:4 Te augwali sigo ena isidali weyu ena tau siyu isabo sisi yai elaluali. Tama eno naga eno gedu haluasa po augwali side weyu Godibolo usu da po me wabeo. Menio. Te Godigo po odobo gasa hani dabe tigidali augwaligo me te gedu haluasa po weyu, te Prisila dali Akwila dali side Godibolo puba hwi wabo dao.
ROM 16:5 Tama eno siade da wali po dagego te augwali sigo beba sisinibo te Godigo po odobo we bidibolo te po wao. Dagego eno siade da wali po te bidi Epainetus agabolo mao, eno abagi mu dao. Te moni tǫ Esiade te tigidali we bidi augwaligo augwa homu Kraisba musiąbadi te agai polasa aga Godigo po wali pabo bidi hasia pedalai.
ROM 16:6 Dagego eno siade da wabo po te we Mariabolo wao. Agai te sę dene hauwa elama dage tau sai.
ROM 16:7 Te eno siade da wali po dagego te bidi si Andronikus dali Junias sibolo wao. Augwali si eno Juda hani deli tama ena dali me sogo polobadu kalabuside bidai dao. Augwali si te Godigo po sela pabo bidi augwali tomode nogi elalubao, tama augwali si ena dali polama Kraisde wadolama bidai.
ROM 16:8 Dagego eno siade da wali po te bidi nogi Ampliatusbolo mao. Da si te Genuai Bidiba wadolama tama aga eno abagi mu bidibao.
ROM 16:9 Dagego eno te siade da wali po te bidi Urbanus agabolo wao, aga da dali te Kraisde deli sę ebao. Tama siade da po te bidi Stakisbolo me wao, aga eno abagi mu dao.
ROM 16:10 Dagego eno siade da wali po te Apelesbolo wao, aga da te aga Kraisde homu kęą pai kolesaga augwaligo usu selama tama usu da wai nogi bidi dao. Dagego eno siade da wali po te bidi Aristobulus dali deli bede bidibo bage augwalibolo wao.
ROM 16:11 Te eno siade da wali po te bidi Herodionbolo dagego waiyąo, aga te ena dali Juda hani deli dao. Te eno siade da wali po te Genuai Bidide wadolali we bidi augwali te bidi Narsisusgo bede bidibo bagebolo dagego te po augwalibolo waiyąo.
ROM 16:12 Dagego eno siade da wali po te we ama name si Trifina dali Trifosa sibolo wao, augwali si te Genuai Bidigo sę ebo dao. Te eno siade da wali po te we nogi Persisbolo wao, eno abagi mu dao. Agai sę dene hauwa Genuai Bidide yai dao.
ROM 16:13 Eno siade da wali po dagego te Rufusbolo waiyąo. Aga te Genuai Bidi wali pabo wiegi yai bidi dao. Eno siade da wali po agai idabolo me wao. Te we te enade te aga eno ogwa tiwai dao homu eyu, tama agai enade dwagi yai sę ebo dao.
ROM 16:14 Eno siade da wali po te Asinkritusbolo me, Flegon, Hermes, Patrobas, Hermas me, te bidi dabebolo dagego te po waiyąo, tama augwali dali bidalubo ama dedebolo me wao.
ROM 16:15 Dagego eno siade da wali po te Filologus dali aga we Julia sibolo me, tama te bidi Nereus dali aga abe dali sibolo weyu, tama te bidi Olimpasbolo me, tama augwali dali bidibo Godigo we bidi tigidali augwalibolo te po waiyąo.
ROM 16:16 Te Godigo we bidi dago ebo kolesaga te tiwai eyu, tama abagi homu eyu, duga hasi dage tigidali deli deligo te ama dede augwali pageiąo. Te Kraisgo po odobo hani tigidali augwaligo siade da po dagebolo ola tolobao.
ROM 16:17 Ama dedeo, te we bidi hani pedebo kolesaga ebo bidi dabe, te bagede dagego bugagia suao, dua dao. Te dagego Kraisde polobadu odali ola mabo po, te po augwaligo sela sąwainogo eyu, tama augwaligo we bidi dwai sę ebo kolesaga tomoba kegebo dao. Te tobage we bidi dagego tagalao, augwali tudiba mu muao.
ROM 16:18 Magi baso meni, te tobage bidi dabe augwaligo te dago Genuai Bidi Kraisde sę me ebeo. Menio. Te augwaligo augwa tigigo digi ebo kolesaga naga wali pabo dao. Tama pusu ebo po me tama te bidi homu begasa pabo tibo pogo augwaligo te dwai sęde konesiąbo we bidi dabe homuba tibo po ola menama, tama te bidi dabe augwaligo homugo te dwai kolesaga da homu me isąwaibao.
ROM 16:19 Dagego Godigo po bugagia wali pabo kolesaga po, te tigidali bidi dabe augwaligo odalio. Tama tibaso, eno wiegi yai homu pemene dagede ebao. Tiali goli eno homugo dagego te wiegi yai doloba pai kolesagade bugagia gisiga koneao. Me ma, te dwai kolesagade eno homugo dage te tobage kolesaga isąyabo homu mu yao.
ROM 16:20 Tama tiyu da, teda God da, aga te wiegi yai homu nagame ebo page bidi, dwasianu sogo tama silama, tama agai te Satan dagego sągą dologoba munama agawaibao. Te eno homugo te dago Genuai Bidi Jisas Kraisgo da olo mu tau sali wiegi yai kolesaga dage dali bidao.
ROM 16:21 Ena dali deli sę ebo bidi, Timoti, agai siade da wabo po dagebolo ola tolobao. Tama Lusius me, Jeson me, Sosipater me, eno Juda hani deli bage, augwaligo me siade da wabo po dagebolo ola tolobao.
ROM 16:22 Ena Tertius, te eno Polgo pedauwalide po selama tama eno e pas eno nogogo asęai. Te Genuai Bidigo nogide eno siade da wabo po dagebolo obao.
ROM 16:23 Te bidi nogi Gaius agai siade da po dagebolo ola tolobao. Agai ena Pol bugagia agai bede tonaluyu nai gesali. Aga beba te Kraisgo po odobo we bidi augwali deliba sisinibo dao. Erastus, aga e hanude te gavmanigo kuskus sę ebo masigi tonalubo bidi, tama dago ama Kwartus, te augwali sigo siade da po dagebolo ola tolobao.
ROM 16:24 [Te dago Genuai Bidi Jisas Kraisgo da olo mu tau mani wiegi yai kolesaga te dage tigidali dali bidao. Mu dao.]
ROM 16:25 Dago Godigo nogi ugwaba mu sinao. Eno aga gesi wiegi yai po pusubogia tama God agai dage te Kraisde homu kęą pai we bidi mu dąų wabo usu yaibao. Te wiegi yai gesi po te Jisas Kraisde elalubao. Tama polobadu tigidali sogo te po te geme dualali po geme dualaluali,
ROM 16:26 tiali goli megi Godigo te po hania hanilai dao. Godigo po pusali bidi profet dabego te geme dualali po polobadu asęani. Tama megi te sesemane sogo bidibo Godigo agai te augwalibolo te po pusao po olama, tama agai po sela pabo bidi dabe augwaligo te tigidali tǫde bidibo we bidibolo pusugi peyu, tama augwalibolo hania ola mabo sę megi ebo dao, te tigidali we bidi agaba konealubo po dąų olama tama agai kolesaga wali pomainogo ebao.
ROM 16:27 Te God agaduba deligo naga mu koneai elalubao, dago te Jisas Kraisde sesemane bidada pabo sogo aga nogi ugwaba sao. Mu dao. Eno po tama dao. Ena Pol da.
1CO 1:1 Ena Pol da, tama Godigo digi aga homugo konea pelama tama agai ena i olama, te Krais Jisasgo tagala palali bidi sęba muani. Ena dali dago ama Sostenes dadi sigo e pas te dage Korin moni hanude bidalubo Godigo we bidi hanibolo asęna tolobao. Dage te Godigo dwai sę me isąbo wiegi yai we bidi pedalomainu eyu agai dage i wai dao. Tama dage Krais Jisas dali wadolama, tama dage dali te tigidali bulude bidalubo we bidi augwaligo te dago Genuai Bidi Jisas Kraisbolo lotu po wabo bage dali, te da tigidali Krais Jisas dali wadoloyu tama Godigo we bidi hani bidibo dao. Aga da, te augwaligo me te dago me Genuai Bidi dao.
1CO 1:3 Eno homugo dago Aya God dali, te Genuai Bidi Jisas Krais dali, augwali sigo te augwa olo tau sabo kolesaga me, te bidi homu dua digi nagame ilibo kolesaga dali si te dagebolo mao.
1CO 1:4 Eno gedu haluasa po weyu, tama tigidali sogo eno te ena Godibolo dagede puba hwi po wabo dao. Magi baso meni, dage Krais Jisas dali wadolobaso Godigo dage olo tau siduai dao.
1CO 1:5 Dage Krais dali wadoloyu tama Godigo bomo dagebolo mayu, dage te tigidali dwagi yai kolesaga ebode te dage usu mu dao, sǫą pabeo. Tama tiyu, dagego te Godigo po kuna koneyu tama gasa we bidibolo pusubo sę te dage usu nubo dao.
1CO 1:6 Te Kraisde ola mani po te dagego bugagia mu odolama te sai dao. Tama selama, tama dagego ebo kolesaga hasegelebaso, te gasa we bidi dabe augwaligo sulama tama augwaligo koneai, dagego te Kraisde ola mani po mu odobo dao. Tama tibaso,
1CO 1:7 te Godigo dagebolo maiabo wiegi yai sę yabo bomo tigidali dagego sai dao, tede dage sǫą peyu habuge me ebeo. Tama dagego tama selama, dagego dago Genuai Bidi Jisas Krais hania pedalabo sogo asobo tonaluyu bidibo dao.
1CO 1:8 Tama agai te dagego agade konealubo po dąų weyu agaba homugo tialubo kolesaga, te agai bomo ilama, tama te tigidali nai silabo sogo usu nigi paibao. Agai tama tiyu, tama dago Genuai Bidi Jisas Krais aga ma asobo sogo te sogo dage sęgę meni yai we bidi pedalaibao.
1CO 1:9 Te God aga digi dage aga ogwa Jisas Krais dali wadolomainogo eyu tama dage i wali bidi, te tiwai God aga digi da te agai homugo dage dali kęą pai bidi mu dao, te dage agaba tią pabo te usu dao.
1CO 1:10 Ama dedeo, te dago Genuai Bidi Jisas Krais agai aga nogigo bomo enabolo mobaso, eno homu dene ebadi te nogi bomogo eno e po dagebolo megi obao, dage tigidaligo deli homu naga eyu tama po deli tama wao. Dage si sela pebeda pigimio. Te mu menio. Dage bidibo deli hani tama bidiyu, deli homu kolesaga naga dali, te deli sę yabo homu dali te sę yao.
1CO 1:11 Eno te po dagebolo magi baso obawe? Woo, eno ama dede, te dage tomode bidibo we nogi Kloe, aga bede bidibo bage meba augwaligo enabolo wali, duga hasi tomode wado ebo wali.
1CO 1:12 E tiwai dao: dage tigidali deli deligo gasagi gasagi yai po wabo. Me badugo te po wabo, “Ena Pol wali pabo dao.” Me badugo te po wabo, “Ena Apolos wali pabo dao.” Me badugo “Ena Pita wali pabo dao” wabo. Tama me badugo “Ena Krais wali pabo dao,” te po wabo.
1CO 1:13 Tega! Magi yaliwe? Krais tomode pebeda pali elaluba agawe? Ena Pol, te ena dage tobade te ni pedaide isaliwe? Te dage baptais yalide, te ena Pol wali pomainogo eyu tama dage baptais yali dawe? Te mu meni.
1CO 1:14 Dage tomode eno baptais yali te Krispus dali Gaius dali te bidi sidigi da. Gasa bidi meni. Tama eno te we bidi hauwa te baptais masiąbaso, ena dwagi yai homu ebo dao. Magi baso meni. Te eno we bidi hauwa te baptais magi sogo da, teda augwaligo te “Da Pol wali peyu tama baptais salio,” te po augwaligo wagi da.
1CO 1:16 E, eno megi tama ma kone palali, te bidi Stefanas dali aga hani dali digi te me eno baptais mani da. Eno gasa me baptais maniwe ma meniwe, te eno konebeo, kegeda pai.
1CO 1:17 Tama Kraisgo ena tagala palali te we bidi baptais emainogo tagala palobeo. Menio. Agai ena tagala palali eno te Godigo wiegi yai gesi po te we bidi augwalibolo pusumainogo tagala palali. Tama tiyu agai homugo eno te tǫde koneai bidi dabego wabo pogo agai gesi po page ola menamuo te homu yai. Te Krais aga te ni pedaide isibogo bomo eno dolidali weyu tama eno te tǫde koneai bidigo po pusubo kolesaga wali pabo meni.
1CO 1:18 Eno koneani, te augwali digi dolobo sę ebo tųdu pabo we bidi augwaligo homu te Krais ni pedaide isali po te homu kolesaga meni yai bidigo wabo po naga dao. Tiali goli te da Godigo ma dobola sabo we bidi, te dago homu te po da te Godigo genuai bomo hania ola mabo po dao.
1CO 1:19 Tama tede te Godigo po asęani bukude Godigo wali po me deli e tiwai elalubao: “Te eno te tǫde koneani bidi dabego homu kolesaga dolaibao, te haniani sęde polo konea pabo bidi dabego homu kolesaga ena sela sąwaibao,” Godigo te po wai.
1CO 1:20 Tama Godigo te po polobadu obaso, te tǫde koneai bidi dabe augwali magi yaibawe? Te buku hauwa elalubo po page konebo bage, augwali me magi yaibawe? Ma, te gasa bidigo homu bega sabo po bugagia wabo bage, augwali me mena sę me elalubawe? Menio. Godigo dabolo hanilama hania ola mawai dao, te e tǫde elalubo wiegi yai homu kolesaga te olo nai tiwai dao, te homu kolesaga meni yai bidigo olo po naga dao.
1CO 1:21 Magi baso meni, God aga homu kolesaga te wiegi yai mu, aga tigidali naide kuna konebo kolesaga sia pai elalubo dao. Tama agai te tiwai ilama tama we bidi augwaligo augwa homu kolesagago naga aga konesiąbo sę ilali. Tialima Godigo homugo te dago Kraisde pusubo pogo agai te po augwa homugo konealubo we bidi agai ma dobola saibao. Tǫde we bidi augwaligo te pode te homu kolesaga meni yai bidigo olo po naga dao homu yali, tiali goli Godigo homugo te pogo agai we bidi ma saibao.
1CO 1:22 Te Juda bage augwaligo te po wabo dao, “Te ola mabo pode, te dago gedugo te nago te bidigo isąbo genuai bomai sę ebo subaso da, teda dago te nago ola mabo po te mu po dao homu yaibao.” Tiali goli eno “Te Krais aga te ni pedaide isali kolesaga te genuai sę dao,” te po eno te Juda dabebolo obaso, augwaligo te po hagela eyu oda tagalobo dao. Me ma, te Juda hani isąwai bage augwaligo homugo bidi mego aga digi homu kolesagago naga augwalibolo augwa e tǫde bidibo kolesaga page hania ola mao, te homu augwaligo ebo dao. Tama tiali goli dago te Krais ni pedaide isali po augwalibolo ola mobaso, hagela homu eyu te pode augwaligo me te homu kolesaga meni yai olo po naga dao, te homu ebo dao.
1CO 1:24 Tiali goli te da Godigo i olama dią sali we bidi, da me badu Juda bage, me badu te Juda hani isąwai bage, dago homu te Kraisde pusubo pogo te Godigo genuai bomo dali aga wiegi yai homu kolesaga me te hania ola mabo dao.
1CO 1:25 Magi baso meni, bidigo gedude te Godigo yali homu kolesaga te page meni yai homu kolesaga dao. Tiali goli agai homu kolesaga wiegi yai mu dao, tego te tǫde bidigo homu kolesaga tigidali aiyaba elalubo dao. Tama bidigo gedude Godigo yali sę, te bomo meni yai sę dao. Tiali goli te mu meni, agai genuai bomogo te tǫde we bidigo bomo tigidali aiyaba elalubo dao.
1CO 1:26 Eno ama dede, kone palao. Te Godigo dage i wali sogo te dage magi we bidi dabe bidaliwe? Te tǫde bidigo gedude dage tomode te haniani naide bugagia koneani bidi hauwa meni, te gasa we bidi tonalubo bomo elalubo bidi hauwa meni, te genuai nogi yai bidi dage tomode hauwa menio.
1CO 1:27 Te meni. God agai homugo eyu tama te tǫde haniani naide kuna koneani we bidi hale emainogo eyu, agai te augwaligo gedude te homu kolesaga meni yai bage dią sali. Tama me te tǫde genuai bomo elalubo bage hale emainogo eyu, agai te tǫde we bidigo gedude bomo meni yai we bidi dią sali.
1CO 1:28 Te tǫde we bidi augwaligo gasa we bidi me badude e homu ebo dao, “Woo, augwali te nogi meni yai bage naga dao, dwai bage dao, augwali olo nai naga dao,” te homu ebo dao. Tiali goli agai te tǫde we bidigo gedude genuai wiegi yai nai dolomainogo eyu, Godigo te tobage olo we bidi dią sai dao.
1CO 1:29 Tama tibaso, dago hania koneani, te bidi me deligo aga digi nogi Godigo gedude ugwaba me sogobeo.
1CO 1:30 Tiali goli Godigo dage Krais Jisas dali wadolali, te agai tilama tama Kraisgo da wiegi yai homu kolesaga elalubo we bidi nigali. Te Kraisde God agai da agai wiegi yai we bidi hani mu ilali, tama dago dwai sęde sali sęgę sela sąnama tama da olo bugagia bidibao.
1CO 1:31 Tama tibaso, te dago te Godigo po bukude elalubo po me deli tiwai inao. Tede e tiwai po wai dao, “Bidi me deligo te nogi ugwaba sabo po wabo homu eyu da, teda agai dago Genuai Bidigo nogi naga ugwaba sao,” te po asęani.
1CO 2:1 Tama eno ama dedeo, polobadu hasia ena dageba asama, tama eno Godigo geme dualali mu po te dagebolo pusagasali, tiali goli eno te haniani pogo te dage homu begelemainogo me wabeo. Tama eno te koneani genuai genuai kolesagade te po dagebolo me pusubeo.
1CO 2:2 Te eno homugo digi eno tiwai po walio: te ena dage tomode bidibo sogo, te eno homugo gasa nai me konebo sę me ebeo. Menio. Eno homugo te Jisas Kraisba naga konealumainogo yaibao. Awe, te Jisas Krais ni pedaide isai dao, tede naga eno dagebolo po pusabo homu yai.
1CO 2:3 Tama polobadu ena dage dali bidali sogo, te sogo ena bomo meni yani. Ena moni wi elalu, tama ena tigi didibili hauwa yai.
1CO 2:4 Tama eno ola mani po me, te dagebolo pusali po me, te eno te kolesaga koneai bidigo kolesaga selama, te dagego homu bega sabo po me wabe. Menio. Dagego te Tedali Mobo Bidigo bomo kuna konemainogo eyu, eno Godigo po dagebolo ola mayu wai dao.
1CO 2:5 Eno tama tiali. Magi baso meni, eno homugo te bidigo homu kolesagaba te dagego homu teba tialugobeo. Menio. Eno homugo te dagego Godigo bomode naga te Kraisde konealubo po dąų weyu, tama teba naga duga homu bugagia tialuaibao. Tama tibaso, eno te Kraisgo po dagebolo pusuyu, eno te kolesaga koneai bidigo po wabo kolesaga wali pabeo, eno te tobage homu bega sabo pogo te Kraisgo po dagebolo pusubeo.
1CO 2:6 Te tǫde kolesaga koneai bidi dabego kolesaga eno dagebolo ola masiąwani goli, te Godigo Mobo Bidigo te Godide ola mabo po page kuna konebo usu yali we bidi augwalibolo eno te koneani kolesaga po pusubo dao. Tiali goli te tǫde bidi dabego koneani kolesaga po me wabo meni. Tama te tǫde tobolu bidi dabego kolesaga me dago wabo meni, te augwaligo bomo kimi megi meni ebo.
1CO 2:7 Tiali goli dago te Godigo koneani kolesaga po pusubo dao. Te po te bidi dabego koneidali weyu geme dualaluali. Godigo te tǫ dagalu nigisiąbadi tama agai te koneani kolesaga sa muani te dabolo mayu, tama te koneani kolesagago dago te Godigo bomai ula digi nosali selama tama bugagia bidimainu yalio. Tama te tobage koneani kolesaga po dago te we bidibolo ola mabo da.
1CO 2:8 Te e tǫde tobolu bidi deli mego te koneani kolesaga po page me konebeo. Menio. Te augwaligo konegi sogo da, teda augwaligo te ula yai bomo elalubo Genuai Bidi me sisinama, tama aga te ni pedaide elama me isigi meni dao.
1CO 2:9 Tiali goli dago te sę dabe po wabo te Godigo po bukude wali po gilama yali, “Te we bidigo gedugo susiąwani nai, tama odogo me odobe, tama bidigo homuba me pedalisiąwai, te nai digi Godigo sisi ilali te we bidi dabe augwaligo aga godolo mu ebo bage augwalibolo momainogo yai.”
1CO 2:10 Tiali goli te polobadu geme dualaluali po te Tedali Mobo Bidigo sęde te Godigo dabolo ola mani. Tedali Mobo Bidigo te tigidali nai osola suyu tama koneani. Tama te Godigo homu kolesagade aga geme dualali nosali sę yabo homu, te me te Mobo Bidigo konebo dao.
1CO 2:11 Mena bidigo te gasa bidi mego homu konegowe? Menio. Te bidi aga mobogo digi, te aga tomode bidibo, tego naga koneani. Te tiwai naga, te gasa bidi me deligo te Godigo homu kolesaga me konesiąwai. Te Godigo Mobogo digi agai naga konebo dao.
1CO 2:12 Tama dago e tǫde we bidi tonalubo mobo me sabeo. Menio. Dago te Godidu asali Mobo Bidi sali, tama dago te Godigo dabolo olo maiabo tigidali nai konemainogo yalio.
1CO 2:13 Tama tibaso, dago te Godigo Tedali Mobo Bidi elalubo we bidibolo te Godigo olo maiabo naide po hanilama pusubadi, dago te bidigo homude selama dago te po me wabo meni. Menio. Te Tedali Mobogo digi da ola menama, tama dago te po ola mabo dao.
1CO 2:14 Tiali goli te Tedali Mobo Bidi elalusiąbo bidi da, agai te Godigo Mobogo olo mabo nai dabe sogobeo, aga usu egobeo. Magi baso meni, agai homugo te page meni yai nai dao, tama agai te naide te page bugagia konegobeo. Te naide po dago te Tedali Mobo Bidide naga sali, tama te Tedali Mobo Bidi meni yani bidi da, agai te po page me dagalogobeo.
1CO 2:15 Tialima, te Tedali Mobo elalubo bidigo, agai te tigidali nai dagalama, tama te nai page konebo usu ebo dao. Tiali goli te bidi me deligo te Tedali Mobo elalubo bidi dagalainogo ebo te usu me egobeo.
1CO 2:16 Awe, te Godigo po bukude po me elalubo e tiwai wabo, “Dego te Genuai Bidigo homu konebaso, te agai Genuai Bidi mobo mabo usu egowe? Bidi meni,” te asęani po tama wabo. Tiali goli te Kraisgo homu kolesaga dago elalubo dao.
1CO 3:1 Tama tialima, ama dedeo, polobadu eno digi dagebolo mani po te eno dagebolo te Tedali Mobo Bidi elalubo bidi dabebolo mani po tiwai gilama me mabeo. Usubeo. Menio. Eno dagebolo mani po te eno te poloba homu elalubo bidi dabebolo mabo po tiwai mani. Te sogo dage te Kraisgo kolesagade kuna konesiąyu tama te wai bǫų tiwai bidibadi tiwai dao.
1CO 3:2 Eno po digi po begelama obao. Dage te Krais wali pabo kolesagade wai bǫų tiwai bidibaso, te eno po dagebolo ola mobadi, eno te yadala pai po naga dage ola mani, te wai bǫų ame pe mabo tiwai. Eno te dili yai nai dage mabeo. Te sogo dagego te dila pai nai tuabo ąǫ isąwai, dagego Godigo sęgę yai po sabo usube. Megi me dage usu yabo me elalubao.
1CO 3:3 Magi baso meni, dage te poloba meda yai homu kolesagade me bididubao. Awe, te ama hasi dali dwai homu eyu tama konila po wabo homu kolesaga te dagede me elalubao. Tama te kolesaga dagego me idubo, te poloba dobo homu kolesaga ebao. Te tama tebo kolesaga te tǫde bidigo ebo kolesaga naga dao.
1CO 3:4 Dage tomode bidi me badu deli deligo te po wabo, “Ena Pol wali pabo dao.” Tama gasa bidi me badu deli deligo te po wabo, “Ena da te Apolos wali pabo bidi dao,” te po wabo. Te tiwai kolesaga ebaso, dago koneani, te dage tǫde bidi tiwai mę bidibao.
1CO 3:5 Dagego bugagia homu kone palao. Apolos wali te de dawe? Ena Pol, ena de dawe? Da si da te sę bidi naga bidibao. Genuai Bidigo gasa gasa sę da sibolo mawai, tama da sigo te yali sęde dagego konealubo po te Kraisde dąų wali.
1CO 3:6 Eno da te nai wai bulali. Te Apolosgo te nai wai bulali madi pageba wę gegeli pali. Tiali goli God agai te nai pua pai holomainu iliduali.
1CO 3:7 Tama te nai wai bulali bidi, agai nogi te meni yaibao. Tama te wę mabo bidi, agai nogi me te elalugobeo. Magigo menio. Godigo te nai holomainu ilidubao, agaduba deligo genuai nogi naga elalubo dao.
1CO 3:8 Tama te nai wai bulubo bidi me, te nai waiba wę mabo bidi, te augwali sigo sę te deli tigi poai naga yali. Tama augwali si deli deligo te augwa si yali sę usu nama, te Godigo augwalibolo mabo dwagi yai nai saibao.
1CO 3:9 Magi baso meni, da si te Godigo deli sę naga ebo sę bidi dao, tama dage te Godigo gi tiwai dao. Tama dage te Godigo be tiwai, aga te be sędu bidibao.
1CO 3:10 Te God aga olo da tau sali wiegi yai kolesagade ena te Godigo po pusubo sęde te polalubo tobolu bidi te kolesaga koneai kamda bidi tiwai pedalali, tama eno te be pos ni bulalio. Tama gasa bidigo te pos ni daide ugwadu te be sę ebao. Tama tigidali bidi augwali deli deli dua bugagia koneama tama te pos ni daide be sę yao.
1CO 3:11 Dagego koneani, te be pos ni mu bulai elalubao, te Jisas Krais naga dao. Tama niwai bidi me deligo agai te gasa pos ni me bulainu ebo te usu me egobeo.
1CO 3:12 Tama te pos ni daide ugwadu be sę yainu ebo bidi augwali deli deligo haniani naigo te be sę yaibao. Bidi me deligo te wiegi yai kapa nogi gol tego te be sę yaibao. Bidi mego te kapa nogi silvago ma te dila pai masigi mugo, me te nigo, ma te kalago, ma te gasagi yai nosai dili dabego te be sę yaibao.
1CO 3:13 Te magi naigo te be sę yainu homu ebaso da, teda te tigidali bidigo sę yali te nosali po tų ebo sogo te hania haninama pedalaibao. Tama te po tų ebo side te sia dabo posolo ebo tiwai pedalaibao. Tama te sia aga digi te tigidali bidi deli deligo yali sę usu sesa pelama, tama augwaligo yali sę te wiegi yai yaliwe ma meniwe, te augwaligo koneaibao.
1CO 3:14 Te bidi deligo be te pos ni daide sę ebaso, tama agai te be siago disiąbaso da, teda te sę bidibolo Godigo dwagi yai nai mawaibao.
1CO 3:15 Tiali goli te sę bidi me deligo be te tigidali siago dobaso da, teda te bidigo yali tigidali sę te hagawaibao. Tialima te sę bidi aga digi te bugagia bidaibao, tiali goli te bidi siago dabo be buluba wi paligo te sana pali bidi tiwai bidaibao.
1CO 3:16 Dage da te Godigo wiegi yai lotu be tiwai dao, tama te Godigo Tedali Mobo Bidi te dage tomode bidibao, bidi aga bede bidibo tiwai bidibao. Tama te dagego me konebewe?
1CO 3:17 Te bidi deligo Godigo te wiegi yai lotu be elalubo te dolobaso da, teda Godigo te bidi dolaibao. Magi baso meni, te Godigo be te tedali gasagi yai mu elalubo, te Godigo be naga dao. Te dage tama dao.
1CO 3:18 Tiyu te bidi me deli agade digi tibo po ola mayabuo. Te dage tomode bidi deli agai te e tǫde homu kolesaga wali peyu tama te tiwai homu eyu, ‘Eno kolesaga koneai elalubo,’ aga te homu eyu da, teda aga hasia bolo aga te tǫde we bidigo gedude te wabo pabo bidi tiwai pedalao. Tama tiyu aga te Godigo gedude te kolesaga koneai bidi mu pedalaibao.
1CO 3:19 Magi baso meni, te e tǫde koneani kolesaga te Godigo gedude te wabo pabo bidigo kolesaga tiwai ebao. Tede te Godigo po bukude te e tama tiwai po wai: “God agai tilama tama augwaligo kolesaga koneanigo te augwa digi tibo haniani kolesaga koneai bidi dabe sali, te bidigo ba munama te kebi sabo tiwai gilama ebo dao.”
1CO 3:20 Tama tede te bukude te tiwai po me wali: “Genuai Bidigo koneani, te kolesaga koneai bidi dabego homu kolesaga te du walisiąbo olo nai tiwai ebo dao.”
1CO 3:21 Tama tibaso, te dage tomode te bidi me deligo te da Godigo po pusubo bidigo nogi ugwaba sabuo. Suao, te tigidali nai duga nai dao.
1CO 3:22 Ena Pol, me Apolos, me Pita, da te dage tau sabo sę ebo bidi dabe da. E tǫde elalubo nai tigidali me, tego dage aiyaba elaluama tonaluabo nai meni, dagego te nai tigidali aiyaba elaluama tonaluabo bage dao. Te tǫde bidibo sogo me, te isibo kolesaga me, te megi elalubo sogo me, te nosali pedalabo sogo me, te tigidali te dagego nai dao.
1CO 3:23 Tama dage te Krais dologode bidiyu dage agai we bidi hani dao. Tama Krais aga digi God dologode bidiyu aga Godigo bidi dao.
1CO 4:1 Dagego te ena Pol dali, Apolos dali, Pita dali te dade dagego homugo kone paluyu tama koneao, da te Kraisgo sę ebo bidi dabe tama Godigo te geme dualalubo po pusuyu tonalubo bidi dabe dao.
1CO 4:2 Tama te sę tonalubo sęde te tiwai bomai po elalubao: te sę ebo bidigo te sę idubadi aga te agabolo te sę mani bidi dali homugo kęą pai bidi bidao.
1CO 4:3 Tiali goli te dage, ma te bidi me deligo po tųgo te eno te sę ebo kolesaga dagalainogo da, teda eno homugo te magigo meni. Magi baso meni. Ena digi me te ena sę ebo kolesaga te me dagalabo menio. Tiali goli te usu dao, po meni.
1CO 4:4 Mu tama, te Godigo enabolo mani sę ebode eno homugo eno te sęde sǫą pabeo, bugagia yai dao. Tiali goli te eno tama tiwai po wabo usu me egobe: “Ena doloba pai bidi da,” te wagobeo. Te ena dagalobo sę ebo bidi te Genuai Bidigo sę naga dao.
1CO 4:5 Tama tibaso, te sogo me elalubadi, te dago Genuai Bidi asisąbadi dagego te gasa bidi mego ebo kolesaga dagaligio. Aga asama tama agai te we bidi augwaligo augwa homu tomode geme dualaluali po tigidali selama te ulaba muagasaibao. Tama tigidali bidigo homu kolesaga hania hanilaibao. Tama te sogo Godigo da tigidali deli deli bidi te dago yali sę osola sulama, tama te sę usu baso agai te sę yali bidigo nogi ugwaba saibao. Bidi deli deligo yali sę usu nama te aga nogi te tama naga ugwaba saibao.
1CO 4:6 Ama dedeo, eno homugo dage tau sabo homu elama, tama eno te ena dali Apolos da side te tamadi tama wali po wali. Dagego homugo da side homu koneama, tama te Godigo po bukude wali po tiwai gilama dolo wali peyu tama te po me boligio. Tama tiyu dagego hagoma eyu tama bidi me deligo nogi ugwaba siyu tama gasa bidi mego nogi aiyaba munu me elalugio.
1CO 4:7 Abagi, magi yaliwe? Dego nage genuai bidi muai dawe? Tama nago mena nai te Godide sisąwani nai elalubowe? Te mu tama nago te nai Godide saligo da, teda magi baso te nago naga nogi ugwaba siyu, te naga digi nage te nai page bidi da wainogo ebawe? Te hagoma ebo tagalao.
1CO 4:8 Awe, dagego homugo te dagego haliga pągąna palio! Dagego homugo te dage tigidali nai elalu tama dage usu yai elalubao. Te dagego da aiyaba elaluama, tama dage te gavman tuni bidi king tiwai pedalalio! Mu tama dawe? Woo, te duga homu naga dao. Eno homugo dage te tuni bidi king mu pedalomainao. Dage tama tigi sogo da, teda da me dage dali te tuni bidi dabego bomo elalugi da.
1CO 4:9 Magi baso meni, eno te homu yali: Godigo te da aga po sela pabo sę bidi da te nosali badu mubo bidi tiwai ilama bidibao. Da te po tų yali bidi dabe da olama tama da isimainu emainao wai. Tama augwaligo da tigidali te ensel dabe me te tǫde bidi dabe dali augwaligo gedude da elainu homu yali, te tigidaligo da dali gisugu mawainogo yali.
1CO 4:10 Te Kraisgo nogi ugwaba sainu, da te tǫde we bidigo gedude te kolesaga geda muyu te polobo bidi tiwai bidibo dao, tiali goli dage te Kraisgo kolesagade te kolesaga koneai bidi tiwai bidibao. Dage bomai we bidi mu bidimainogo eyu tama dago dena digi bomo meni yai bidi dabe ilali. Dage genuai wiegi yai nogi elalubao, tiali goli dago nogi meni yanio.
1CO 4:11 Polobadu me tama bidada asali te megi e sogoba me usu nagasali, da Godigo po sela pabo bidi dabe, da nai sili bidiyu, tama dago dogoni me wa peyu ąį nogone ebo, tama da badi ugwa naga elaluali. Augwaligo nogo tudi badu da eliyu ebo dao. Tama da bugagia dulalu bidabo pesage meni yai dao.
1CO 4:12 Dago dena nogogo digi masigi dena tigi tau sabo sę eyu dene mu ebo dao. Augwaligo dwai posobo po dabolo wabo, tiali goli dago augwali bugagia bidabo po naga augwaliba ponoyu ebo dao. Augwaligo dabolo dwai sę eyu, te dene mabo kolesaga ebo, tama augwaligo te tiwai sę eyu dago sula tagalama, te sęgę bugagia tolobo dao.
1CO 4:13 Augwaligo po dwai mu da dali weyu ebo dao, tiali goli dago homu nagame ilibo po dua digi augwaliba weyu ebo dao. Da te tigidali tǫ pedaide bidibo bagego gedude te dwai pobele bage tiwai mu gagawali. Da te tigidali bidigo gedude te nai ulubo genagide nai kagali te ąįgo sela sąbo meda yai nai tiwai dao. Da te tiwai bidali, te megi e sogoba usu nagasu te tiwai me bidibao.
1CO 4:14 Te ena dali Apolos da si hobedagia bidibadi dage bugagia te po asęanigo te dage hale eyu dwai bidimainu homu me ebeo. Menio. Eno wai puluba tiwai dage eno dwagi yai homu eyu godolo ebaso, tama eno dage homu tau sabo po ola momainu obao.
1CO 4:15 Te mu tama dage te Kraisgo kolesagade te dage bugagia tonalubo bidi te bidi sese umabo te 10,000 bidi elaluyu da, tagalao, te dagego aya hauwa me elalubeo. Menio. Te da Krais Jisas dali wadolobo kolesagade enaduba deli ena te dagego aya tiwai bidibao. Dage eno te Kraisde wiegi yai gesi po pusama, tama dagego te po odolama tama Krais wali pabo gagalali. Tede te dage eno wai puluba pedalali.
1CO 4:16 Tama tibaso, eno dage te eno kolesagade usu selama bilimainu tama dage eno hodolobo te usu dao, ena da dagego aya tiwai dao.
1CO 4:17 Tama tibaso, te kolesagade naga eno te bidi Timoti dageba tagala palali. Aga te eno ogwa tiwai da, tama eno aga godolo mu eyu aga ena dali te homugo kęą pai bidi dao. Te agai dagego homu ma hodoliyu, te eno Kraisgo kolesagade wali pabo sunumi wali pomainu homu hodolaibao. Eno te tigidali bulude te Godigo po wali pabo we bidi hani tigidaliba te kolesaga naga ola mabo dao.
1CO 4:18 Te dage tomode bidi meba augwaligo homugo te ena dageba asogobe homu eyu, tama augwali hagoma ebao.
1CO 4:19 Tiali goli menio. Te Genuai Bidigo homu usu yali da, teda ena dage bidiboba polo asaibao. Tama eno te hagoma ebo bidi dabego wabo po naga konegobeo, te augwaligo te Godigo sę yabo bomo me elalubowe ma meniwe, te me eno koneaibao.
1CO 4:20 Magi baso meni, te Godigo bidi deli tonalubo si, te bidigo ebo sęde naga dago God aga dali bidibo te konebo dao. Aga wabo pogo naga dago konegobeo.
1CO 4:21 Dagego mena kolesaga godolo ebowe? Te dagego homugo eno te dage dodolabo dono wąbi tolasa ena dageba asomainogowe? Ma, dagego homugo eno te dage dali dwagi yai homu eyu godolo ebo kolesaga me, te homu nagame ebo kolesaga elalubo te eno dageba sela asomainogo homu ebo dawe?
1CO 5:1 Te we sabo kolesaga togolama dolobo sę te dage tomode mu tama elalubao, te po wabo eno me odali. Tama te we sabo togolama dolobo gasagi yai kolesaga me, te tobage kolesaga te Godigo po odisawani we bidigo me isąbo dwai kolesaga dao. Te e tama tiwai: te dage tomode bidi me deligo aga ayago we sai.
1CO 5:2 Tama dage, dage me tama duga nogi ugwaba siyu hagoma idubawe? Te dagego tede hagoma ebo kolesaga tagalama, te dage homu dene eyu gela wagi sogo da, teda te usu igi mu da. Tama tiyu, te dagego te dwai penani kolesaga ebo bidi sela sąnama, tama dage dali me bidimainu me elamu dao!
1CO 5:3 Te enade, mu tama, te eno tigi te dagede digibulu elalubo, tiali goli te eno homude ena te dage dali bidibao. Tama ena da te ena dage dali mu bidibo tiwai ąǫ ebo, tama eno te kolesaga ebo bidigo sę te eno me dagala suai dao.
1CO 5:4 Eno te tiwai po wai dao: te Genuai Bidi Jisasgo nogide te dage deliba sisinama po miao. Tama eno homu me, te dago Genuai Bidi Jisasgo bomo me te dage dali bidaibao.
1CO 5:5 Tama tiyu te bidi dagego te Satango nogoba munama, te agai te dwai sę yali bidigo tigi dolomainao. Dago te tiwai elama, tama aga tigi dolai goli Godigo te bidigo mobo noma bidi te Genuai Bidi ma asobo side ma dobola somainogo tama tiao.
1CO 5:6 Te dage tomode te bidi me deligo te dwai penani sę idubao, tama dagego tede hagoma ebo kolesaga ebao, te dwali. Te aga dage dali me bididubadi, te aga te tubo nai bret bo dabo nai yis tiwai dao. Te dwasianu yisgo te tigidali bret bo domainu ilibo dao. Te dagego konesiąyu ebawe?
1CO 5:7 Dage da te yis meni yai bret tiwai dao. Awe, te eno koneani. Tiali goli te dwai penani sę ebo bidi dage tomode bididubadi aga te yis tiwai eyu, tama agai dwai sę ebo kolesagago dage me dolaibao. Te Juda dabego Pasova nai tubo olo bidibo side, tede augwaligo te sipsip wai ela tuyu, tama te sogo me te bo disąwai bret me tuai dao. Te tiwai me megi te dago Pasova sipsip Krais aga isąma te ofa mayu yai dao. Tama tibaso, dagego te bidi buluba sąyao, te dage te gesi bret, te yis meni yai bret tiwai ma pedalomainogo yao.
1CO 5:8 Tama tilama, da dwagi yai homu eyu deliba sisinama tama dago Pasova nai tuinao. Tede eno po digi po begelama tama po page obao, dago tama tuyu dago te poloba yis dali tulamuo, te yis meni yai bret naga tuao. Te po page e dao: dago te dwai sę yabo homu dali te dwai dwai sę ebo kolesaga dali te si ilamuo. Meni. Dago homu mu naga eyu, tama mu po naga weyu yao.
1CO 5:9 Te eno gasa me dagebolo asęna tolali pasde eno e tama po wai: “Dagego te dwai penani sę eyu we sabo kolesaga dolobo bidi dabe dali kisasa biligimio,” te po asęna tolali.
1CO 5:10 Eno te we sabo kolesaga doloyu ebo te Godigo po odisąwani tigidali bidi dabe augwali te mu tagalao po weyu eno te po wabe. Te tǫde bidi dabe augwaligo Godigo po wali pisąyu tama te mena nai pesa ebo bidi dabe me te gasa bidigo nai anoma elama sainu ebo bidi me, te tibo godiba lotu po wabo bidi dabe, te augwali mu tagalao olama eno te po me wabeo. Te dagego te dabe mu tagalabo homu egi sogo da, teda dagego te tigidali tǫ mu taga pelama, tama gasaba bidigi pigi da.
1CO 5:11 Tiali goli eno asęani po page te e tiwai dao: te bidi me deligo aga dage dali ama da wabo bidigo te we sabo kolesaga dolobo me, agai te gasa bidigo naide pesa eyu, me agai tibo godibolo lotu po weyu, me agai posobo po obaso me, ma agai bomai wę tubaso, ma agai te gasa bidigo nai anoma elama te tigidali kolesaga ebaso da, teda dagego aga dali kisasa biligio, aga dali abagi me wagio. Menio. Dagego te tiwai sę ebo bidi dali te nai me munu me tulamo dao.
1CO 5:12 Te Godigo po odisąma dago hani bulu badu bidibo we bidi dabe dagalobo sę, te eno sę dawe? Menio. Te God aga digi augwaligo kolesaga dagalaibao. Tiali goli te dage dali bidiyu Godigo po wali pabo we bidi hani tomode elalubo bage, te augwali dagalobo sę, te dagego yabo sę dao. Tede te Godigo po bukude po me deli elalubao, te po dago wali pinao, te po e dao: “Dagego te dage tomode bidibo te dwai bidi buluba mu sela sąyao.”
1CO 6:1 Te dage tomode bidi me deligo po te gasa bidi me dali elalubaso da, te agai te Godigo we bidi bolama tama te Godigo po odisąwani jas bidi dabe gesabidide te po tų egi pogowe? Ya! Agai te tebo kolesagade te aga hale meni yaibawe?
1CO 6:2 Da Godigo we bidi te dago te tigidali tǫde bidigo kolesaga nosali dagalainu yaibao, te dagego konesiąmawe? Mu tama, te dagego te tigidali tǫde bidigo kolesaga dagalaibao. Tama magi egowe? Te dagego duga hasi te tobage dwasianu po naga dagalobo te usu meniwe?
1CO 6:3 Te dago te mobo bidi ensel dabego kolesaga me nosali dagalaibao, te me dagego konebewe? Mu tama, te dago augwaligo kolesaga te dagalaibao. Tama tibaso, dago te tǫde dwasianu nai dabe po dagalobaso te usu mu yaibao.
1CO 6:4 Tama tialigo da, teda dagego e tǫde naide po elalubaso da, magi baso dagego te po dagalobo sę te Godigo po odisąma te dago gedude nogi meni yani bidiba mobawe?
1CO 6:5 Eno te po wabode dage bugagia bidimainu obao, te dagego te tiwai ebo kolesagade te dage hale yao! Magi baso meni. Te dage tomode te ama name si tomode pedalobo po dagalabo te kolesaga koneai bidi me deli naga meni ebawe?
1CO 6:6 Tiali goli dagego te tiwai ebo meni. Te po pagede naga te ama me deligo te gasa ama me te po tų ela mayu, tama te Kraisde konealubo po dąų wasiąwani bidi dabe gedude te po tų ilibo da. Te dwali.
1CO 6:7 Awe, dagego duga hasi te ama dabe po tų ilibo, tama te kolesagade digi te dage tulalualio. Magi baso augwaligo te dwai sę dagebolo emainu gogolobewe? Magi baso te augwaligo dagego doado bage anoma elama somainogo gogolobewe? Dagego te tiwai egi sogo da, teda tebogo dagego te Godigo po odisąwani bidigo gedude po tų ebo kolesaga aiyaba elalugi da.
1CO 6:8 Tiali goli menio. Duga digi te meba bidi dabe dali dwai sę elama, tama augwaligo doado bage anoma elama sali! Awe, dagego te tiwai dwai kolesaga te duga ama dabe mu dali ebo dao.
1CO 6:9 Te dwai kolesaga ebo bidi dabe, augwali te augwali Godigo te we bidi tonalubo bomo tomoba me pogobeo. Te dagego konebewe? Tiyu dagego te duga homuba digi tibo po ola maiabuo. Te penani sę kolesaga ebo bidi dabe me, tama te tibo god wali pabo bidi dabe me, te we sabo kolesaga dolobo bidi dabe badi, tama te we dali ebo kolesaga tiwai eyu godolo ebo bidi dabe me, tama te hale ebo kolesaga te gasa bidi dabe dali ebo bidi dabe me,
1CO 6:10 tama te nai wi sabo bidi dabe tama te gasa bidi dabego doado bagede pesa homu ebo bidi dabe me, tama te bomai wę tubo bidi me, tama te gasa bidi dali posobo po wabo bidi dabe me, tama te gasa bidi dabego doado bage anoma elama sabo bidi dabe me, te tobage kolesaga ebo bidi dabe tigidali te augwali Godigo we bidi bugagia tonalubo bomo tomoba pabo usu me egobeo.
1CO 6:11 Tama polobadu dage meba te tiwai sę ebo we bidi dabe bidaluali. Tiali goli dagego te dwai sę ebo tagalama, tama baptais salio. Godigo dage aga da olama sa muai. Dagego te doloba pai nogi salio. Te Genuai Bidi Jisas Krais me te Godigo Tedali Mobo augwali sigo sę eyu, tama dage Godigo gedude doloba pai we bidi hani tama pedalai dao.
1CO 6:12 Dage tomode te bidi me deligo e tiwai homu ebo dao, ‘Te tigidali sę eno ebo da te usu egi da.’ Awe, mu tama. Tiali goli te tigidali sę ebogo ena tau me sogobe. Tigidali kolesaga eno yabo usu da yaibao. Tiali goli eno te kolesaga me deli ebogo te ena tonalumainu me gogologobeo.
1CO 6:13 Gasa bidigo eno po aiyaba elalumainu eyu e tiwai po waibao, “Tubo nai te tabigo sabo nai da, tama tabigo te nai sabo dao.” Agai homu te tiwai me aga tigigo te dwai penani sę ebo te me usu dao, te aga tigigo yabo sę dao. Awe, agai te tubo nai dali te tabi dali side wali po te mu dao. Tiali goli Godigo te si dali nosali silaibao. Tiali goli dago tigigo te penani kolesaga yabo nai meni. Menio. Dago tigi da te dago Genuai Bidigo nai dao. Tama Genuai Bidi te tigi tau sabo nai dabolo mabo dao.
1CO 6:14 Tama tiyu, God aga bomogo digi te dago Genuai Bidi te gų pagede hodolali, tama te tiwai dago tigi tau siyu agai da me hodolaibao.
1CO 6:15 Te dage deli deligo tigi te Kraisgo tigi nogo sągą tiwai elalubo, te dagego me konebewe? Tama eno te Kraisgo tigi pedai me badu dagala selama, tama penani eyu, te genuai tųdu bilibo wego tigiba munama elalumainu homu egowe? Munu me tegobeo. Mu menio!
1CO 6:16 Te penani sę ebo we dali kisa sali bidi, te aga dali te tigi deli aga dali yali, te dagego konebewe? Godigo po bukude te tiwai po olama hania wali, “Te bidi dali aga we dali augwali si tigi deli naga pedalali,” te po asęani.
1CO 6:17 Tiali goli te Genuai Bidi dali kęą sali bidi da, agai homu mobo bidi te aga dali deli elalubo dao.
1CO 6:18 Dage te penani kolesaga idali weyu te boi bidi tiwai wi pao! Te tigidali dwai sę te bidigo ebo, te tigi bulu badu ebo dao. Tiali goli te penani sę kolesaga ebo bidi, agai aga tigi aga digi dolobo dao.
1CO 6:19 Te dagego tigi da, te homude Godigo Tedali Wiegi Yai Mobogo be elalubao, te dagego konebewe? Godigo te Tedali Wiegi Yai Mobo te dagebolo manio, tama te Mobo dage tomode bidibao. Dage te dugade digi me elalubo meni.
1CO 6:20 Menio. Godigo te genuai naigo mu dage ma abelalio. Tama tibaso, penani sę isąyu, te dagego tigigo te dagego Godigo nogi ugwaba sabo kolesaga naga yao.
1CO 7:1 Megi da eno dagego enaba tolali pasde asęani po wei ponainogo homu ebao. Eno homugo te bidigo te we dwasianu me nogogo diąsiąbaso da, te wiegi yai dao.
1CO 7:2 Tiali goli te haniani penani ebo kolesaga te tǫde elalubao. Tama dagego te kolesaga idali weyu, te tigidali bidi deli deligo te augwa we sao, tama tigidali we dabe deli deligo me te augwali sali bidi dali bidao. Te bidigo tigi te aga wego da, tama bidigo me geą siyu tama dąų munu me olamuo. Te tiwai naga, wego tigi te aga bidigo da, tama wego me geą siyu tama dąų munu me olamo dao.
1CO 7:3 (-)
1CO 7:4 Magi baso meni. Te wego aga tigi me tonalugobeo. Menio. Te aga bidigo tonalubao. Tama te tiwai naga, te bidigo aga tigi geą selama dąų weyu munu me tonalugobeo. Menio. Te aga wego tonalubao.
1CO 7:5 Dage we de bidi si taluama bidibo, te me deligo me tudiba muyu tama aga tigi dąų weyu geą siyu me elamuo. Te kolesaga ebo tagalao. Mu tama, duga si homu deliba munama, tama duga si tigi te pęwadage sogo habu selabo homu elama, te duga si Godibolo gedu haluasa po wabo sę yainu osogo habu selabo homu ebaso da, te usu da. Tiali goli nosali te duga si homu deli elama te duga si tigi deliba ma taluao. Tiyu duga digi te duga tigi ma tonaluabo usu isąyu, tama Satango dage usu siyu, te dagego dwai penani sę emainogo sinabuo.
1CO 7:6 Te e we sabode wabo po, te dagego enabolo hanalu obaso tama eno te usu da wai. Tiali goli te eno dagego we sao po weyu te bomai po tiwai me ebeo.
1CO 7:7 Te eno homugo tigidali we bidi te ena digi tiwai bidimainu homu ebo dao. Tiali goli eno koneani, te Godigo tigidali bidi deli delibolo te haniani sę yabo kolesaga mani. Te me deligo te gasa tobage me tiwai tedali siyu, te gasa mego te gasa tiwai tedali sali.
1CO 7:8 Tiali goli te we sisąwai bidi me, te bidigo sisąwai we badi, tama te augwa bidi dabe isai we dabebolo me, te augwalibolo eno te tiwai po obao: te augwali ena tiwai bidibaso da, te wiegi yai dao. Ena da te we sisąyu enaduba bidibo bidi dao.
1CO 7:9 Tiali goli, te augwaligo homu me tigi te augwa digi bugagia tonaluabo homu usu yabo ąǫ isąbaso da, te augwa sao. Te augwali we sobaso da, te wiegi yai da. Tiyu augwaligo homu hogodaluyu tama dwai sę ebo homu yabuo.
1CO 7:10 Te we sali bidi me, te bidigo sali we te augwalibolo eno te bomai po mobao. Te eno digi eno bomai po me wabeo. Menio. Te dago Genuai Bidigo polobadu mani bomai po dao. Te e tiwai elalubao: te wego aga bidi me taga pelamuo wali.
1CO 7:11 Te aga bidi tagalai baso da, te aga olo bidimainao. Te meni baso da, te aga ma begasa pelama, tama aga bidi dali deli homu elama bidigi pao. Tama bidigo me te aga we munu me sela sągio.
1CO 7:12 Tama dage tomode gasa bidi dabe augwalibolo te ena digi eno naga te po obao, te dago Genuai Bidigo wali po meni. Eno e tiwai po obao: te ama me deligo we sali tama te wego te Kraisde konealubo po dąų wasiąbaso, tama te we aga dali bidainogo homu ebaso da, te amago te aga me sela sągio.
1CO 7:13 Ma, we me deli selama tama te we aga bidigo te Kraisde konealubo po dąų wasiąbaso, tama te bidi te we dali bidabo homu ebaso da, teda te wego aga te bidi me taga pelamu dao.
1CO 7:14 Magi baso meni. Te konealubo po dąų wasiąwani bidigo te aga we dali mu kęą pelama bidiyu, tama tebogo te aga te Godigo gedude te dwagi yai bidi ilaibao. Te tiwai naga te Kraisde konealubo po dąų wasiąwani wego te aga bidi dali mu kęą pelama bidiyu, tama tebogo te we aga te Godigo gedude te dwagi yai we ilaibao. Te meni yani da, teda dagego wai puluba dabe te augwali dwagi yai me egobeo. Tiali goli megi te augwali Godigo gedude wiegi yai elama mu bidalubao.
1CO 7:15 Tiali goli, te konealubo po dąų wasiąwani bidi agai te aga Kraisde konealubo po dąų wali we tagalabo homu ebaso da, te usu da, agai tagalomainao. Te tiwai kolesaga pedaliyu, te duga ama ma abe aga te kalabus tiwai me elalugobeo. Magi baso meni. Godigo dage i olama, te wiegi yai homu nagame ebo kolesaga wali pomainu ebo dao.
1CO 7:16 We, nago te naga bidi tau selama, te aga Godigo po wali pabo bidi pedelabo, ma meniabo, te nago konebeo. Te nage bidi, te nago naga we tau sobaso tama aga te Godigo po wali pabo we pedelabo, ma te meniabo me, te nago konebe dao.
1CO 7:17 Tiali goli dago Genuai Bidigo te deli deli bidibolo dobaba pali sę eyu, tama aga te sę eyu bidibadi te Godigo aga i obaso da, teda aga te sęde naga bilao. Eno te tiwai bomai po te tigidali Godigo po wali pabo we bidi hanibolo bomonama ola mabo dao.
1CO 7:18 Te po page e tiwai dao. Te bidi me deli te Juda dabe augwaligo aga tigiwali sa muyu tama togolama tama te tiwai bidibadi Godigo aga i waliwe? Teda, agai te aga tigiwali togwali te ma dodolabo homu egio, te tagala. Te gasa bidi me deli aga tigiwali togosiąwai bidibadi te Godigo aga i waliwe? Teda, agai tigiwali megi togogio.
1CO 7:19 Te tigiwali togobo kolesaga, te Godigo gedude te olo nai tiwai dao. Tama te tigiwali togosiąbo kolesaga me te aga gedude te olo nai tiwai dao. Tiali goli te Godigo bomai po wali pabo kolesaga, te mu nai dao, te sęgę dao, tede magigo meni wagimio.
1CO 7:20 Te bidi te sę me delide bidibadi tama Godigo aga i obaso da, teda aga te sęde me bididuao.
1CO 7:21 Te e tiwai dao. Te nage masigi sisąbo olo sę ebo bidi bidibadi tama Godigo nage i waliwe? Teda, tagala, magigo menio. Tiali goli, nago te masigi sisąbo olo sę ebo tagalabo sunumi elalubaso da, teda nago te sunumi wali pao.
1CO 7:22 Tiali goli te olo mu sę ebo bidi bidibadi tama Godigo aga i wali, megi da te aga dago Genuai Bidigo selama, tama te Genuai Bidigo gedude te aga olo sę ebo bidi me bidigobeo, te aga olo naga bidibao. Te tiwai naga, te olo wiegi yai bidali bidi, te olo sę me isąbadi tama Genuai Bidigo aga i wali, megi da aga te Kraisde masigi sisąbo olo sę ebo bidi tiwai pedalama bidibao.
1CO 7:23 Te Godigo te genuai naigo mu dage ma abelalio. Tama tibaso, dage te bidi dabede te masigi sisąbo olo sę ebo bidi tiwai me pedaligimio, te bidi dabego olo nigibo bomo yai po dologoba bidigi pigimio.
1CO 7:24 Te ama dedeo, te dage deli deli te niwai sę bidi bidibadi tama Godigo aga i obaso, aga te sęde naga te God dali deli homu eyu tama bidimainao.
1CO 7:25 Te bidigo sisąwai we te augwalide po tama, eno te dago Genuai Bidigo bomai po me elalubo meni, tiali goli eno te ena homude po pusubao. Te Godigo olo tau sabo wiegi yai kolesaga enade elama, tama agai ena te homu mu naga ebo bidi ilali, tama dage enaba duga homugo tialubo te usu dao.
1CO 7:26 Eno homugo e tiwai kolesaga ebo te wiegi yai da wai: te megi tama sogo te genuai sęgę dali dene dali si te daba pedalubao, gasa bidi dabego nogogo. Tama tibaso, dage tigidali deli deli te megi bidibo tiwai gilama te tama bidaluao, te eno homu dao.
1CO 7:27 Te nago we sai dawe? Tialima, te nago aga tagalabo sunumi gegebo sę me egio. Te nago we sabe dawe? Teda, nago te we sabo homu ma elamuo.
1CO 7:28 Tiali goli, te nago we siyu da, te dwai sę meni. Tama te gesi wegi te bidigo siyu da, te wegi agai te dwai sę me ebeo. Tiali goli te we sali bidi me te bidigo sali we te augwali sęgę meba te tǫde elaluaibao, tama eno homugo te tobage sę dageba pedalidali homu eyu eno e po obao, te dage megi bidibo tiwai gilama te tama bidaluao.
1CO 7:29 Ama dedeo, eno te megi wali po te page e dao: te tǫ dali dagalu si silabo bodolu megi da pęwadage ebao. Tama tibaso, te bodolu sogo elalubadi, te tǫde elalubo naide naga dago homugo kone pelamuo. Te we elalubo bidi dabe te augwali te we meni yai bidi dabe bidibo tiwai bidao.
1CO 7:30 Tama te homu dene eyu gela wabo bidi dabe, augwali te gela wasiąbo bidi dabe tiwai bidaluao. Te wiegi yai homu pemene ebo bidi dabe, te augwali wiegi yai homu pemene isąbo bidi dabe tiwai bidao. Tama te doado bage abelebo bidi dabe, augwali te doado bage mu sisąbo bidi bidibo tiwai bidao.
1CO 7:31 Tama te tǫde doado bage sabo bisnis sę ebo bidi dabe, augwali te e tǫde doado bage dąų olalusiąbo bidi dabe tiwai bidao. Dago te tǫde elalubo nai dali kolesaga dali si tede naga dago homugo kone pelamuo. Dago koneani, te e megi elalubo tǫ silama tama hasegelama, tama te gasagi yai mu pedalaibao.
1CO 7:32 Tama tibaso, eno homugo te haniani naide te dagego moni homu isąyu tama dage bugagia bidao. Te we sisąwai bidigo, agai te dago Genuai Bidigo kolesagade te aga homugo kone palobo dao, te kolesaga aga bugagia wali pomainogo aga tama tebo dao. Agai te Genuai Bidigo homugo godolo yabo kolesaga yabo homu ebo dao.
1CO 7:33 Tiali goli te we sali bidi, agai te tǫde doado bagede homugo kone palobo dao. Agai te aga wego godolo ebo kolesaga yabo homu ebo dao.
1CO 7:34 Tama tiyu, agai homu kolesaga pebeda paibao. Tama bidigo sisąwai we me, te gesi wegi me, agai te dago Genuai Bidigo kolesagade te agai homugo kone palobo dao. Aga homugo te aga tigi me te homu mobo bidi dali me te Godigo gedude bugagia wiegi yai mu bidimainu homu ebo dao. Tiali goli te bidigo sali we, agai te tǫde doado bagede homugo kone palobo dao. Agai te aga bidigo godolo ebo kolesaga yabo homu ebo dao.
1CO 7:35 Eno te megi asęani po te dage tau selama dage bugagia bidimainogo wali. Te dage palibo po me wabeo. Menio. Eno homugo te dage dolasa bidiyu, tama agade dagego homugo kęą peyu tama sesemane sogo te dago Genuai Bidigo sę emainogo, te nai me deligo te dage homu kegabi sidali weyu te po wali.
1CO 7:36 Te bidi me deli aga homugo agai te dolo meniabo kolesaga te aga noma sali gesi wegi te dali te tiwai kolesaga ebaso, tama agai homu te wede hodoloyu bomo mu eyu, tama agai suali te gasa sunumi me elalusiąbaso da, teda te bidigo te wegi kęmainao. Te sęgę sabo sę ebeo. Te augwa si bidimainao.
1CO 7:37 Tiali goli, te bidi me deligo aga homude bomo eyu, tama te nai me deligo te aga selibo sę me isiąbadi, tama aga homugo digi ebo tonaluyu, tama aga homude te po olama, te agai homugo te gesi wegi te augwaligo aga noma sali te aga olo mu bidimainogo ebaso da, te wiegi yai dao.
1CO 7:38 Tama tibaso, bidigo te gesi wegi sabo, te agai wiegi yai kolesaga ebao. Tama te we sisąwai bidi, agai kolesaga te wiegi yai mu ebao.
1CO 7:39 Te we me deligo bidi te aga bidi bidibadi, te we te aga bidi dali naga kęą pelama bidao. Tiali goli, te we aga bidi isibo si da, te we te bidi dali me kęąlubeo. Te aga gasa bidi dali pabo homu ebaso da, teda aga te bidi dali pomainao. Tiali goli aga te Godigo po wali pabo bidi dali naga pao.
1CO 7:40 Tiali goli ena digi eno homugo te tiwai homu yai: te bidi isai we aga olo bidainogo ebaso da, te aga wiegi yai homu pemene mu yaibao. Tama eno homugo te Godigo Tedali Mobo Bidi te enade me bidiyu, tama agai ena te kolesagade agai homu ola mani.
1CO 8:1 Dagego te enabolo asęna tolali pode, tede dagego e po me ena hanalu wali, “Te gasa we bidi augwaligo hasa ela munama, tama te tibo godibolo te ofa tiwai eyu, te hasa mi meba te tibo god pageba mubo dao. Tama da Godigo po wali pabo we bidi dago te tobage mi tubo te usu dawe, ma meniwe?” te po dagego enabolo asęna tolali. Te kolesaga ebode eno wabo po elalubao. Dage mebago e po wabo dao, “Da tigidaligo koneani, te tibo god te olo nai dao.” Awe, te mu po dao. Tiali goli te olo konebo kolesagago te hagoma ebo kolesaga ebo homu hodolaibao. Tiali goli dago dena hasi te gasa we bidi dali wiegi yai homu eyu godolo ebo kolesaga selama, tama tebogo te da Godigo po wali pabo bomai we bidi pedalaibao.
1CO 8:2 Te bidi me deligo agai te nai me deli mu koneani homu ebaso da, teda te bidigo koneani kolesaga sǫą pali, te usu yabo me elalubao.
1CO 8:3 Tiali goli, te bidi me deligo aga God dali dwagi yai homu eyu godolo ebaso da, teda Godigo koneama, te bidi te Godigo bidi dao.
1CO 8:4 Te gasa we bidi augwaligo te tibo godiba ofa elama te mi dabe tubo kolesagade eno po megi obao. Dage mebago te tobage mi tuaio homu eyu tama dagego e po wabo dao, “Te tibo god te mu bidibo nai menio. Te olo piksa noma naga dao,” te po wabo. Awe, dago te po page koneani. Tama dage mebago e po me wabo dao, “Te god hauwa me elalubeo. Menio. Te God deli naga aga bidibao,” te wabo. Awe, te me dago koneani.
1CO 8:5 Mu tama, te gasa we bidi augwaligo te nogi “god” nogi ebo nai hauwa elalubao, tama te augwaligo hauwa naide nogi ilama, te “genuai bidi da” wai. Tama mu tama te “god” dabe, te dagalude, ma te tǫde bidigi sogo da,
1CO 8:6 tagalao, te dade dago God deli naga te elalubao, te God Aya dao. Aga te tigidali nai page bidi. Tama dago agai sę emainogo eyu da aga wai mu bidibao. Tama te Genuai Bidi deli naga elalubao, te Jisas Krais da. Agai te tigidali nai nigali. Tama dago bidibo ula te agadu sai dao.
1CO 8:7 Tiali goli dage tomode te we bidi mebago te tibo godide te kolesaga kuna konebeo. Te mebago te polobadu te tibo godibolo mi ofa yali kolesaga hauwa sogo wali pedu geani. Tama megi me augwaligo homugo te gasa we bidigo te mi te tibo godiba ofa mu yali homu me ebo dao. Tama te homu ebadi augwaligo te tobage mi tubaso da, teda augwaligo homu tede sęgę sobao.
1CO 8:8 Tiali goli dagego te kolesagade e po wei ponobo dao, “Te nai tubo kolesagago da te God pąba odasa me pogobeo. Te dago nai tusiąbaso, teda da te God gedude me sǫą pogobeo. Me ma, te dago tubaso da, teda da te God gedude wiegi yai me pedalugobeo.”
1CO 8:9 Awe, te mu dao. Tiali goli dage mi tubo bage dage dua dao. Tiyu tama te tibo godibolo mani mi tubo sę duga digi elama, tama te bomo meni yai bidi dabego sulama, tede sągąde dolama, tama augwali te dwai sęgęba tula muabuo.
1CO 8:10 Nage bidi te koneani kolesaga elalubao wida, te nage te tibo godigo lotu beba pelama, tama nage tede dulalu nai tueibao, tama bidi me deli te aga Kraisde konealubo po dąų wabo kolesaga bomo meni yai bidi te agai nage subaso, te tebode te aga homu hodolama tama aga homu te mi tubo te dwai kolesaga da homu yali goli, te tibo godiba ofa yali nai tuabo homu yaibao, tama agai te mi tueibao.
1CO 8:11 Tama tibaso, te nago koneani kolesagago te bomo isąwani bidi dolali, te amade te Krais aga isama tama aga ma sai dao.
1CO 8:12 Te ama mebago te Kraisde konealubo po dąų wabo kolesaga te bomo me ebeo. Tama dagego te dwai sę augwaliba elama, tama augwaligo te augwa gedude sę ebo dwai ilibaso da, te kolesagade te dagego dwai sę te Kraisba digi yaibao.
1CO 8:13 Tama tibaso, te nai tubogo eno ama te dwai sęba tulalumainogo ilibaso da, teda eno te mi munu ma tugobeo. Tiyu eno te eno ama te dwai sęba tulalubo sę ilidalio.
1CO 9:1 Te gasa we bidi me tau siyu tama augwali dolidali weyu, eno te gasa kolesaga me ebo dao. Ena olo mu bidibo dao, te gasa bidigo enabolo “E tiwai kolesaga yao” te po wabo usu egobeo. Tama me ena te Godigo po sela pabo sę bidi mu dao. Aga te gų pagede hodaluama tama nosali eno digi gedugo ena dago Genuai Bidi Jisas mu suai bidi dao. Te eno dago Genuai Bidi tobade sę yaligo tama te sęde naga dage te God wali pabo we bidi pedalali.
1CO 9:2 Te bidi meba augwaligo ena te Godigo po sela pabo bidi meni da homu yali, tiali goli tagalao, duga koneani, ena te Godigo po sela pabo bidi bidibo. Suao, ena te Genuai Bidigo po sela pabo sę bidi bidibao, tama te koneabo sę te dagede elalubao.
1CO 9:3 Te bidi mebago eno dagede masigi sisąbaso ena te Godigo po sela pabo bidi meni da wabo si, tama eno e tiwai po te augwaliba wei ponobo dao:
1CO 9:4 te eno ebo sęde te Godigo po odobo we bidi augwaligo augwa doado bagego ena tau sobaso da, te dolo dawe ma meniwe? Te dolo mu dao.
1CO 9:5 Te gasa Godigo po sela pabo sę ebo bidi dabe augwali deli deligo te Godigo po wali pabo we kęnama, tama augwali te po pusubo sę eyu gasaba bilibadi te augwa we augwali dali hodobo pabo dao. Te dago Genuai Bidi Jisas aga ama dedego badi, te Pitago me te tama tebo dao. Tama ena me, eno we elalugi sogo da, teda eno me te tiwai eyu da te usugi mu da.
1CO 9:6 Te gasa Godigo po sela pabo sę ebo bage tigidali augwaligo te Kraisde po pusubo sę sesemane sogo ebaso, tama augwa nogogo te masigi sabo sę ebo meni. Te ena me Barnabas da sigo naga te tiwai me ebo usu meniwe?
1CO 9:7 Mena bidi te ami sę ebo bidigo tama aga digi te aga tubo nai abelegowe? Te menio. Mena bidigo te gi bulama tama aga te gide bulali nai sabo meniwe? Me ma te bidi mego te kibu meme dali sipsip dali hani tonaluyu tama aga digi te augwaligo ame pę me tugobewe? Woo, te tiwai menio. Agai te nai meba tueibao.
1CO 9:8 Te eno tede bidigo homu naga wali pelama tama eno te tiwai po wabowe? Meni. Te bomai pode me te sę ebo bidigo aga pe masigi sabode te tiwai page elalubo po me elalubao.
1CO 9:9 Mosesgo te bomai pode te tiwai po asęani elalubao: “Te dagego wit ge dagalomainogo eyu tama te bulmakaugo te wit sągągo agabo sę ebaso, teda nago te aga pedauwali me paniamuo,” po wai. Te Godigo te bulmakau dabe augwa tubo nai sabode naga homu koneama wali dawe?
1CO 9:10 Menio, te agai te po bidi dabolo me wali homu ebao. Awe, te po asęani te da tobade wali dao. Magi baso meni. Godigo te tiwai kolesaga emainogo yai: bidigo te gi tǫ elibo sę eyu, tama bidigo te gide inaiani nai sabo sę ebo bidi me, augwali si augwa yali sęde te nai sabo homu elama tama te sę ebo dao.
1CO 9:11 Tialima, dago te Godigo po dagebolo pusubo sę yali, te dago te dagego homu noma bidi mobo tomode te ge bulali tiwai yai. Tama tibaso, dagego dabolo te tigi tau sabo nai naga mobaso, te dolo dawe ma meniwe? Te dobu si ebode te dage sǫą paliwe? Te meni.
1CO 9:12 Te dagede bidi mebago te tigi tau sabo nai sabo usu ebo da wida, teda eno me te nai sigi sogo da, te usu mu egi dao. Te nai dago sabo usu yaiba wali goli, te dago me sabeo. Menio. Dago te we bidigo Kraisde wiegi yai gesi po odobo sunumi te panibo te dago hagela homu yai. Tama tibaso te haniani sęgę dabe dago tolobo dao.
1CO 9:13 Te Moni Lotu Be tempel, te bede sę ebo bidi dabe, augwaligo te bede augwa nai sela tubo dao. Tama tiyu te Juda we bidi augwaligo te Godibolo maiabo nai magaselama, tama te be tomode te alta saide te nai Godibolo mabo sę ebo bidi dabe augwaligo da te alta saide ulubo nai hasa mi meba te sela tubo dao. Tama tiyu augwaligo augwa nai abelebo menio, te augwaligo Godigo sę ebode augwa nai tama sabo dao.
1CO 9:14 Tama te tiwai naga dago Genuai Bidigo te bomai po muani: te Godigo wiegi yai gesi po pusubo sę ebo bidi dabe, te sęde augwaligo te wiegi yai gesi po sabo we bidigo tigi tau sabo nai meba somainogo yao.
1CO 9:15 Tiali goli ena digi eno te tama tiwai nai me deli sisąwai dao. Tama megi me eno te nai saiba olama eno e po me asębeo. Menio. Te ena bolo hasia isimainao wai! Eno masigi sisąbadi te sę ebo dao. Tama eno te sęde wiegi yai homu pemene ebao. Tama bidi me deligo enabolo masigi mayu eno te wiegi yai homu pemene ebo page te dagala samainogo me egobeo.
1CO 9:16 Eno te Kraisde wiegi yai gesi po pusubo, tede eno te ena nogi ugwaba sabo te usu menio. Te menio. Eno sunumi gasa me elalubeo. Dago Genuai Bidigo enabolo te sę naga mawai dao. Tama eno te wiegi yai gesi po pususiąyu da, teda ena hobedagia mu bidaibao.
1CO 9:17 Te ena homugo digi eno te sę egi da, teda eno te sęde sabo usu egi da. Tiali goli, eno homugo te sę eno yabo homu me isąbaso da, teda Godigo te sę enabolo emainu mawai dao.
1CO 9:18 Tama tibaso, te sęde eno mena nai saibawe? Te eno sabo nai te e tiwai elalubao: te eno sainu elalubo nai te Godigo wiegi yai gesi po pusubo sęde sabo elalubo, te eno me sabo meni. Menio. Eno te wiegi yai gesi po pusama tama eno augwaliba olo mabo dao. Tama tede eno dwagi yai homu pemene ebo usu baso, te wiegi yai gesi po olo pusubo kolesaga da eno sabo nai tiwai dao.
1CO 9:19 Ena da te bidi me deligo olo sę ebo bidi me bidainogo me bidibe. Tiali goli te ena homugo ena digi te ena te tigidali bidi dologoba muyu, tama ena augwaligo olo sę ebo bidi tiwai bidainogo homu elama ebao, te eno bidi hauwa sabo homu elama tibo dao. Augwali Jisas wali pabo bage pedalomainogo eyu ena tama ebo dao.
1CO 9:20 Tama eno te Godigo wiegi yai gesi po te Juda dabebolo pusubadi, ena te augwali tiwai bidibo dao. Ena digi ena te Mosesgo mani bomai po dologoba pabe, tiali goli eno te bomai po dologode bidibo Juda bidi dabe sainogo eyu tama ena augwali tiwai gilama te bomai po dologode bidibo dao.
1CO 9:21 Te Juda hani isąwai bidi dabe, augwali te Mosesgo mani bomai po meni yani bidi dabego gedude, ena te Mosesgo mani bomai po meni yani bidi tiwai pedalali, te bomai po meni yani bidi dabe sainogo tama tiali. Tiali goli eno te Godigo bomai po tagalainogo ebeo. Menio. Eno te Kraisgo bomai po wali pabo dao.
1CO 9:22 Te Kraisde konealubo po dąų wabo bomo meni yani we bidi augwali eno tau sainogo eyu, tama ena te bomo meni yai bidi tiwai bidibo dao. Eno te tigidali sunumidu te gasa bidi dabego ebo kolesaga tigidali usu siyu, tama augwali tiwai bidibo dao. Augwali meba eno ma dobola somainogo tama ebo dao.
1CO 9:23 Eno te sę tigidali ebo te Godigo wiegi yai gesi po pusubo sę te ugwaba somainogo ebo dao, tama te wiegi yai gesi pogo dabolo mabo dwagi yai nai meba me eno somainogo eno te tiwai sę ebo dao.
1CO 9:24 Megi eno te po digi po begelama obao. Te udabo ususu si ebo bidi dabe te tigidali augwali udulama, tama te geanani bidi deligo naga te dwagi yai nai sabo dao. Te dagego konebewe? Tialima, dage me te tiwai bomonama Godigo po bugagia mu wali piąo, agai te dagebolo dwagi yai sę emainogo yao.
1CO 9:25 Tama tigidali bidigo te nai sainogo homu eyu udabo da, te augwaligo homu dali, te augwaligo tigigo ebo kolesaga dali, te tigidali augwaligo aiyaba elaluyu bugagia tonalubo dao. Te bidi dabego tama tiyu te geanani bidigo sabo dwagi yai nai sainogo tebo dao. Tiali goli te nai polo dolobo nai naga dao. Me ma, dago Godigo po wali peyu te me dolisąbo nai sabo sę ebo dao.
1CO 9:26 Tama tibaso, ena digi me, ena te dwagi yai nai me sainogo eyu tama ena udabadi te eno gasaba tonono peyu me udagobe. Eno nogo wąbi hwįainogo, te eno nogo subigila sąnama olo dali nogo me sągobeo, tama te wali naga me eligobeo.
1CO 9:27 Menio. Eno te ena tigiba mu eliyu tama aga ena homu wali pomainogo ebo dao. Magi baso meni. Eno te Godigo wiegi yai gesi po te gasa we bidi hauwabolo pusubo dao, te augwaligo te po bugagia wali pomainogo ebo dao. Tiali goli nosali ena digi te eno te po bugagia wali pisąyu tama ena tulaluidali weyu, tama eno bomonama te eno ebo kolesaga bugagia tonalubo dao.
1CO 10:1 Ama dedeo, dage ede gegeda pelamuo: dago wąį dabe tigidali te bidi meni yai dwai bulude bilibadi augwali te dagalu pǫ dologode bugagia bidali. Tama augwali tigidali te sągągo naga pelama, tama te tamu ąį nogeyu sana pai dao.
1CO 10:2 Tama tigidali augwali te pǫde tamu ąį side baptais sali tiwai yali, tama te baptais saligo augwali te Moses wali pomainogo sa muani.
1CO 10:3 Tama augwali tigidaligo te Godigo Tedali Mobo Bidigo augwali mani te nai nogi mana augwaligo tuai dao.
1CO 10:4 Tama augwali tigidaligo te Godigo Tedali Mobo Bidigo augwali mani ąį te augwaligo tuali. Awe, augwaligo te Tedali Mobogo te genuai sau pado masigidu asobo ąį tuali, te masigi augwali dali hodobo pai. Te masigi te Krais aga digi dao.
1CO 10:5 Te Godigo te tobage tau sabo sę tigidali augwali dali yali goli, agai te we bidi dago wąį dabe hauwa tomode augwaligo kolesaga te Godigo godolo me isiąwani. Mu menio. Magi baso meni. Dago koneai, augwali umabo te bidi meni yai bulude isilama, tama augwaligo tigi tede besela palama, wilalua pali, te bidi si sela naga bugagia sana pali.
1CO 10:6 Tama te augwalide pedalali sę tigidali te noma tiwai pedalali, te dago sulama tama dago wąį dabe augwaligo te pesą yali tiwai te dago me te dwai sęde pesą idali weyu dago sumainogo yali.
1CO 10:7 Tama suyu, tama dagego te tibo god dabebolo lotu po munu me wagimio, te augwali tomode mebago yali sę tiwai me egio. Te bukude te augwaligo te tibo god dali yali sęde e po wai dao: “Te we bidi augwali dualama te nai tuyu wę tuyu elama, tama augwali hogodama tama augwaligo tęąbi yali.”
1CO 10:8 Tama dago me te penani ebo kolesaga me egimio, te augwali tomode mebago te yali kolesaga tiwai me egio, tama deli sogo naga te bidi sese umabo te 23,000 bidi te augwali isai dao.
1CO 10:9 Tama dago me dwai sę eyu te Genuai Bidi usu me selamuo. Te augwali tomode mebago dwai sę eyu aga usu sobaso, tama te dwai hasamani dabego augwali gąų kelama tama augwali isai dao.
1CO 10:10 Tama dagego dwai homu eyu Godibolo wado po me olamuo. Te dago wąį dabe augwali tomode mebago te God dali dwai homu eyu wado po obaso, tama te bidi ela mubo ensel mobo bidigo te augwali ela munama tama augwali dolai dao.
1CO 10:11 Te sę dabe tigidali augwaliba pedalali, te gasa we bidigo sumainogo ebo sę noma tiwai pedalali. Tama dago me te tobage dwai sę idali weyu gasa bidi dabego te po te Godigo po bukude asęani. Magi baso meni. Te da megi bidibo sogo te tigidali nai silabo sogo pąba yagasai dao.
1CO 10:12 Tama tibaso, dagego duga digi bomogo bugagia dolalubo usu da homu eyu da, teda dage tulaluyu dolidali weyu dage bugagia suao.
1CO 10:13 Te dwai sę ilibo usu sabo sę dagebolo pedalobo, augwali tigidali te gasagi yai me egobeo. Menio. Te tigidali we bidibolo pedalobo usu sabo deli tigi poai sę pedalubao. Tama Godigo aga dage dali homugo kęą pai bidi bidiyu tama aga dąų wali po wali peyu, te usu sabo sę ebogo dagego bomo aiyaba elaluainogo ebo gogolama me sula tagalogobeo. Menio. Te dwai sę tomoba kegebo usu sabo sę dageba pedalubaso da, teda Godigo dage sana pabo tų nigilaibao. Te tų e dao: te agai dage dąų walama, tama dage te usu sabo sęde bomo elama dolalubo usu yaibao.
1CO 10:14 Tama tibaso, eno abagi dede dabe muo, dagego te tibo god lotu beba nai tugi pabo kolesaga wi eyu tagalama, tama te kolesaga tudiba muao.
1CO 10:15 Dagego kolesaga elalubaso, tama eno dagebolo te po obao. Duga digi eno pusubo po dagaliąo. Eno po e dao.
1CO 10:16 Te dago komunion tubaso da, dago te kapde gedu haluasa po olama tama Godibolo puba hwi po wabo dao. Te kapde elalubo wain ąį da tigidali deli deligo tubo si da, tebogo dago te bidi Kraisgo tigi kaneme dobayu tubo dao. Tama dago komunion tubadi, dago te dwasianu pebedama dobaba pabo bret, dago te bret tubo si da, tebogo dago te bidi Kraisgo tigi mi dobayu tubo tiwai ebo dao.
1CO 10:17 Te komunion tubo bret te deli naga elalubao, tama da we bidi hauwa elaluali goli, te tigi delide naga wadolali elalubao. Magi baso meni, da tigidaligo te bret deli naga tubo dao.
1CO 10:18 Dagego te Israel dabe augwaligo yali kolesagade homugo kone palao. Godigo augwaligo yali dwai sę sela sąwainogo eyu, tama augwaligo te sipsip dali meme dali selama, tama te pris bidi dabego nogoba mawai. Tama menama, tama te pris bidi dabego te nai dabe ela munama, tama te mi te alta sai ugwadu daiba muyu, tama siago uluyu, tama Godibolo ofa tama mawai dao. Tama tiyu te nai sesali bage dali, te pris bidi dabe dali, augwali tigidaligo te altade ofa mani nai tuyu deli hani naga bidiyu tama bidali.
1CO 10:19 Eno magi homu elama tama te po waliwe? ‘Te tibo god me aga mu bidibao, te agabolo ofa mabo tubo nai me te sęgę nai mu dao,’ eno te tiwai homu elama te Israel dabego Godibolo ofa mabo kolesagade po waliwe?
1CO 10:20 Mu menio. Eno wali po page e dao: te Godigo po odisąwai bagego augwa alta saide ofa ebo nai, te augwaligo dwai haubo noma bidi dabebolo te ofa mabo dao. Augwaligo te Godibolo ofa me mabeo. Tama dage te dwai haubo noma bage dali deliba sisinibo te eno godolo me egobeo, ena mu hagelabo.
1CO 10:21 Dagego te dago Genuai Bidi Kraisgo kap wain wę tuyu, te dwai haubo noma bagede lotu wainogo eyu augwaligo kapde dali si wę tuyu ebo usu me egobeo. Te dagego dena Genuai Bidigo ni nami tebol saide nai tuyu, te dwai haubo noma dabego lotu bede tebol saide nai dali si tuyu ebo te usu me egobeo.
1CO 10:22 Dago augwaligo te tibo god bagebolo ofa mani nai tuyu da, teda dago te Godigo da dali dwai homu ebo sę ilaibao. Dago bomogo agai bomo aiyaba elalubo da, agawe? Te dago bomo usu menio.
1CO 10:23 Dage tomode bidi mebago e po obao, “Te mi tubo kolesagade te da olo bidibo dao, tede habu selebo po meni. Dago te mi tuyu da, tebogo dago Godigo bomo yai po me bologobeo,” augwaligo te po wabo dao. Awe, mu tama. Tiali goli te tigidali sę ebogo da tau me sogobeo. “Te haniani sę hauwa dago yabo te usu dao,” augwaligo te po me wabo dao. Tiali goli te tigidali sę ebogo da God wali pabo bomo mabo meni.
1CO 10:24 Bidi me deligo aga digi naga bugagia bidabo homu me elamuo. Menio. Tigidali we bidi deli deligo te gasa bidi bugagia bidimainogo homu eyu tama augwali tau sabo kolesaga yao.
1CO 10:25 Tigidali haniani mi augwaligo te maketde elalubo, te dagego abela tuyu da, te usu da. Po meni. Dagego homu hauwa elama tama ‘E mi augwaligo te tibo god me delibolo ofa maniwe, ma meniwe?’ te po hanalu wagio.
1CO 10:26 Magi baso meni. Dago koneani, te bukude elalubo po me deli e tiwai dao, “Te e tǫde, pągąnalubo tigidali nai dabe dali, te Genuai Bidigo naga dao.”
1CO 10:27 Tama te Kraisba aga homu tigidali musiąwani bidi me deli agai te dage meba i olama dage dali nai tuainogo ebaso da, tama dage pabo homu ebaso da, te usu da. Augwaligo dagebolo mabo te nai tigidali dagego tuiąo. Tama dagego homu hauwa elama ‘E mi augwaligo te tibo god me delibolo ofa maniwe, ma meniwe?’ te po wagio.
1CO 10:28 Tiali goli, te bidi me deligo te po dagebolo weyu, “Te mi da, te ofa yai mi da” po obaso da, teda te bidigo dagebolo wali po te dagego homugo koneama, tama aga tobade dagego te nai me tulamu dao. Dwai sę dwagi yai sę dagalabo homu dolidali weyu te nai tugio.
1CO 10:29 Eno dagebolo te po te dagego dwai sę dwagi yai sę dagalabo homu tobade te po wabeo. Meni. Eno te dagebolo te mi tubode po wali bidi agai te dwai sę dwagi yai sę dagalabo homu tobade te po dagebolo obao. Magi baso meni, te agai homu si eyu bidibao. Dage tomode bidi me deligo te po hanalu waibao, “Ena digi ena haniani nai tubo usu yabo digi, tama gasa bidigo te ebo kolesaga dagalabo homugo digi eno ebo kolesaga magi baso te dagalaibawe?
1CO 10:30 Te eno te tubo naide Godibolo puba hwi po olama te nai tuali goli, te gasa bidigo eno te puba hwi wali tubo naide te magi baso ena dali dwai po waibawe?”
1CO 10:31 Te dage tomode bidi me deligo te po obaso, eno e po agabolo wei ponaibao, te dagego te nai tuyu me wę tuyu ebode, ma dage gasa sę ebo si da, dagego gasa we bidide homugo koneao, augwaligo Godigo nogi ugwaba somainogo eyu dagego duga kolesaga tigidali tama bugagia tiao.
1CO 10:32 Tama tiyu, dagego te Juda dabe me, te Grik dabe me homugo koneao, tama Godigo po odobo we bidi hani dabe me, tama dagego ebo sęde augwaligo God dali agai po dali si dali dwai homu idali weyu, dagego duga ebo kolesaga bugagia tonaluao.
1CO 10:33 Ena me eno te tiwai kolesaga ebo dao. Eno homugo te eno ebo kolesaga tigidalide te we bidi tigidali augwaligo dwagi yai homu naga emainao. Tama te homu ebaso, eno ena digi naga bugagia bidabo homu me egobeo. Meni. Eno homugo te eno tigidali we bidi augwali tau siyu, tama Godigo augwali ma dobola somainogo eyu, tama eno ena ebo kolesaga tigidali tama dodolobo dao.
1CO 11:1 Te we bidi tigidali agai augwali tau somainogo eyu Krais agai aga digi aiyaba muyu bidali. Tama ena me eno agai te yali kolesaga wali pabo dao. Tama dage me dagego ena wali asiyu, tama te tiwai kolesaga naga yao.
1CO 11:2 Dagego sesemane sogo ena homugo koneama tama eno te selama dagebolo mani po tigidali dąų eyu wali pabo dao. Tama tibaso, eno te po obao, dagego wiegi yai kolesaga mu ebo dao.
1CO 11:3 Me ma, te dagego ena te po hanalu wali, “Te da deliba sisinama tama Godibolo po weyu, tama Godigo po odoyu tebo sogo, te dago we dabe sibi augwaligo augwa tobolu te nami ugwago haluaibawe ma meniwe?” te po dagego ena hanalu wai dao. Tiali goli eno homugo hasia dagego te po konemainogo obao: te bidi Kraisgo tobolu bidi te God dao, tama tigidali bidigo tobolu bidi te Krais dao, tama wego tobolu te aga bidi dao.
1CO 11:4 Te dage deliba sisinama tama bidi mego tobolu haluama tama Godibolo po weyu, ma te Godigo po pusuyu da, te bidigo aga tobolu bidi Kraisba hale mabo dao. Te dwali.
1CO 11:5 Tama we me deligo te aga tobolu halusiąma tama Godibolo po obaso, ma Godigo po pusubaso da, te agai aga bidigo tobolu bidi tama tiwai bidiyu, aga aiyaba elalubo dao. Te dwali. Tama tiyu da, te aga te hale isąbo moni tųdu bilibo we tiwai dao.
1CO 11:6 Te tobage dwai penani kolesaga ebo we hale ilimainogo augwaligo aga tobolu nisi tigidali mu poabo dao. Tama te dage tomode te we me deligo aga tobolu halusiąma tama Godibolo po obaso, te wego te sę ebogo aga bidi tama aiyaba elalubaso, aga tobolu nisi mu poa yao. Tiali goli we aga tobolu nisi mu poabo te moni hale iliyu da, teda te we te lotu obadi aga tobolu te nami ugwago halumainao.
1CO 11:7 Bidigo te aga tobolu me haluamuo. Magi baso meni, te Godigo bidi nigali sogo agai aga digi tiwai nigalio, tama te bidibolo Godigo aga digi wiegi yai homu kolesaga tiwai mani. Tiali goli te we aga te aga bidigo kolesaga naga elalubo dao.
1CO 11:8 Magi baso meni. Godigo bidi nigali te wego tigigo me nigibeo. Menio. Agai we nigali te bidigo tigigo nigai dao.
1CO 11:9 Tama Godigo te we homu koneama tama bidi nigilama aga tau somainogo me ebeo. Menio. Agai bidi homugo koneama tama wego aga bidi tau somainogo nigalio.
1CO 11:10 Tama tibaso, te Godigo sę ebo ensel mobo bidi augwaligo te we aga bidi dologode bidibo sumainogo eyu, te wego aga tobolu te nami ugwago halumainao.
1CO 11:11 Tialima da we bidi te dena Genuai Bidi dali wadoloyu bilibode, tede te we naga tedali bidiyu tama bidi meniama, tama bidi naga tedali bidiyu, tama we meni eyu me ebeo.
1CO 11:12 Menio. Godigo hasia sogo te we bidigo tigigo nigali, tama tialima megi te tiwai te agai bidi wego tigide nigilama pedalobo dao. Tiali goli God da te tigidali nai nigali bidi mu dao.
1CO 11:13 Duga digi te eno megi wali po dagaliąo. Te wego tobolu halusiąma tama Godibolo po wabo, te kolesaga usu egowe?
1CO 11:14 Te we bidi dena kolesaga digi te tiwai dagebolo ola mabo dao: te bidigo bobage tobolu nisi elalubaso da, te dolo meni.
1CO 11:15 Tiali goli te wego bobage tobolu nisi elalubaso da, te aga wiegi yai au yabo nai elalubao. Magi baso meni, Godigo bobage tobolu nisi agabolo mani te aga tobolu halualumainogo yali.
1CO 11:16 Tialima, bidi me deligo te wego Godibolo po obadi aga tobolu haluabo sęde konila po wabo homu eyu da, te agai koneao, dago gasagi yai kolesaga me elalubo meni, tama gasa bulude bidibo Godigo po odobo we bidi hani dabego me te gasagi yai kolesaga me elalubo menio. Da tigidaligo te we aga tobolu haluabo kolesaga wali pabo dao.
1CO 11:17 Tialima megi eno te bomai po meba dagebolo mawainogo ebao, tiali goli dagego te ebo sęde te eno dage nogi ugwaba siyu dagego wiegi yai kolesaga mu ebo dao te eno wagobeo. Magi baso meni. Te dage sisinibo si, te wiegi yai kolesaga me pedalobeo. Menio. Te dwai kolesaga pedalobo dao.
1CO 11:18 Tede hasia bolo eno te po obao: te dage lotu wainogo sisinibo sogo, dage tedali tedela pabo dao. Eno te tiwai po dagede odobao. Tama eno homu te po meba te mu po dao, dagego te tiwai ebo dao.
1CO 11:19 Awe, eno koneani, te dage tomode te Godigo pode homu mu kęą pai we bidi augwali hania hanilama pedalomainogo eyu, te dage bidi mebago pode dwasianu tedela pabo kolesaga te me sogo pedalaibao. Te eno koneani.
1CO 11:20 Tialima dage tigidali sisinibo sogo dagego te dago Genuai Bidigo komunion nai tubo kolesaga ebo dao. Tiali goli te mu meni.
1CO 11:21 Menio. Te dage tedelama, tama dage tigidali deli deligo te duga digi duga nai naga polo selama tama tubo dao. Tama me deligo nai tubo silisąbadi, tama mego gasa bage dali aga nai dobasiąma te aga nai tubo polo silama, tama te wain bomai ąį hauwa tulama wabo pabo bidi tiwai eyu ebo dao.
1CO 11:22 Magi basowe? Te dagego nai tuyu wę tuyu yabo be elalubao. Te duga bede duga nai hasia tuao, tama nosali deliba sisinama te komunion nai tuao. Ma, dagego homugo te Godigo po odobo we bidi te olo nai tiwai da homu elama, tama dagego te meba nai meni yani ama dedebolo hale mabo homu eba, agawe? Tede eno mena po dagebolo wagawe? Ma, eno dage nogi ugwaba somainogowe? Menio. Te sęde te eno dage nogi ugwaba munu me sogobeo.
1CO 11:23 Magi baso meni. Te eno dagebolo mani po te eno dago Genuai Bidide naga te ola mani po sali. Te e tiwai dao: te pio hulide Judasgo Jisas te Juda dabe boi bidigo nogoba musiąbadi, te sogo pio hulide te Genuai Bidi Jisasgo
1CO 11:24 te bret selama, tama te naide Godibolo puba hwi po olama, tama te bret pebedama, tama aga dali bidali bidi dabebolo mayu, te po wali, “Te eno tigi dao, te eno dage tobade mobao. Dagego tigidali sogo tama tidu gebo si ena homugo koneao,” agai te po wai.
1CO 11:25 Augwaligo augwa hulide tuabo nai tula silibo si, tama agai te kap me selama, tama tiwai naga Godibolo puba hwi po olama, tama augwalibolo mayu te po wali, “Te kapde elalubo wain ąį te eno kaneme dao. Tama te kanemego eno te gesi dąų wali po dąų obao. Tigidali sogo dagego e ąį tubaso da, teda dagego tama tiyu ena homugo konealuao,” te bidi Jisasgo te po wai.
1CO 11:26 Tama tibaso, dago Genuai Bidi aga ma asisąbadi te tigidali sogo dagego te bret dali te kapde dali wę tubo si, dagego te aga isali po pusubo dao.
1CO 11:27 Tama tibaso, bidi me deligo hasia bugagia homu kone palisiąma tama Genuai Bidigo te bret dali te kapde ąį dali olo subigila tuali da, tebogo agai te Genuai Bidigo tigi me kaneme te dolobo tiwai ilali, tama aga tede sęgę elalubao.
1CO 11:28 Te komunion tubo sogo te bidigo aga digi homu bugagia osalama tama usu yali homu eyu da, teda aga te bret me te kapde te ąį tuao.
1CO 11:29 Magi baso meni, bidigo te dago Genuai Bidigo tigide homu kone bugagia palisiąma, tama agai te bret me te wę me olo subigila tuyu da, teda agai bret me wę me tuali tede Godigo agabolo te sęgę menama tama dwai sę agaba pedalaibao.
1CO 11:30 Te page delide naga te dage tomode we bidi hauwa augwali tigi bomo meniama, tama augwali gasi elama, tama augwali meba me isalio.
1CO 11:31 Te dago dena homu hasia bugagia osola suyu da, teda te Godigo dabolo te sęgę magobeo.
1CO 11:32 Tiali goli, Genuai Bidigo dago ebo kolesaga osola sulama, tama dabolo dene osogo mobaso da, tede te da aga wai bǫų tiwai dodolobao. Agai tama tebo te da tǫde bidi dabe augwali dali nosali mu hagaidali weyu tebo dao.
1CO 11:33 Tama tibaso, eno ama dedeo, dage te nai tuboba sisinainogo da, dagego te gasa bage augwali asobo hasia tonaluao.
1CO 11:34 Te me deli moni nasi ebaso da, te agai bede nai tuao. Tiyu dage deliba sisinibo kolesagade Godigo dagebolo sęgę magobeo. Te gasa kolesagade elalubo po, te nosali ena dageba asobo sogo te eno dodolaibao.
1CO 12:1 Eno ama dedeo, te Godigo Tedali Mobo Bidigo te haniani sę yabo homu kolesaga dabolo mabode, te dagego tede gisiga konesiąma bididali weyu eno tede dage homu dodolabo po me megi pusaibao.
1CO 12:2 Dagego koneanio, polobadu dagego te Godigo po odisąbadi, te sogo augwaligo haniani kolesaga ebogo dage te po meni yai tibo godiba kekasa pelama, tama dagego augwali wali naga piduai dao.
1CO 12:3 Tama tibaso, eno homugo dagego hania koneao, te Godigo Mobo Bidi te bidi me deli dali bidama tama agabolo po mobaso da, te bidigo te po me wagobeo, “Jisas hagamainao, agaba dwai sę pedalomainao,” te po munu me wagobeo. Me ma, te Tedali Mobo Bidi meni yani bidigo “Te Jisas da, te Genuai Bidi dao” po wabo te usu me egobeo.
1CO 12:4 Te Godigo Tedali Mobo Bidigo haniani sę yabo homu kolesaga dabolo olo mu mabo dao, tiali goli te Godigo Mobo Bidi deli naga elalubao.
1CO 12:5 Tama dago dena hasi haniani tau sabo sę ebo, tiali goli dago Genuai Bidi deli naga bidibao.
1CO 12:6 Te haniani tau sabo sę ebo homu kolesaga elalubo, tiali goli te God deligo naga te tigidali bidibolo bomo dali homu kolesaga dali si menama, tama augwaligo tigidali tau sabo sę ebo usu yaibao.
1CO 12:7 Te Tedali Mobo Bidigo aga bomo te tigidali we bidi deli delibolo pedalobo dao. Tama elama, tama augwali deli deligo te mani bomogo te Godigo po odobo we bidi hani tau sabo usu yaibao.
1CO 12:8 E tiwai dao. Te Godigo we bidi hani tomode te bidi me delibolo te Tedali Mobo Bidigo te we bidi dabebolo te Godigo wiegi yai homu kolesaga ola maiabo homu kolesaga agai olo mabo dao. Tama te gasa bidibolo te Tedali Mobo deligo naga te Godigo kolesaga te we bidi augwaligo bugagia konemainogo te po pusubo sę ebo homu kolesaga mabo dao.
1CO 12:9 Tama te Tedali Mobo Bidigo gasa bidi mebolo te bomo mayu, tama te bidigo Godiba aga homu tigidali mayu agaba tialubo kolesaga, te kolesaga bomo menama tama te bidigo homu si isiąbadi tama agai genuai sę ebo usu dao. Tama gasa bidi mebolo te haniani gasi yai we bidi dabe usu ilabo bomo te Tedali Mobo Bidi deligo naga mabo dao.
1CO 12:10 Tama gasa bidi mebolo te Tedali Mobo Bidigo te haniani bomai sę yabo bomo mabo dao. Tama gasa bidi mebolo te Godigo po pusabo kolesaga agai mabo dao. Tama mebolo te haniani dwai haubo noma bidi dali te dwagi yai noma bidi dali dagalabo kolesaga agai mabo dao. Tama gasa bidi mebolo te Godigo Mobo Bidigo te tǫde bidibo we bidigo homugo konesiąwai po wabo kolesaga mabo dao. Tama agai me te gasa bidi me delibolo te hasia bidigo wabo po begelabo kolesaga olo mabo dao.
1CO 12:11 Eno megi tama nedada pali haniani sę yabo homu kolesaga augwali tigidali te Godigo Mobo Bidi deligo naga te nigibo dao. Te aga homugo digi agai te gasa sę yabo kolesaga te gasa bidi me delibolo dobayu, tama gasa bidi mebolo te gasa sę yabo kolesaga mayu ebo dao.
1CO 12:12 Te bidi Krais da te bidigo tigi me deli tiwai dao, tama te tigigo nogo sągą me, te haniani nai hauwa te elalubao. Tama te tigigo haniani gasagi gasagi yai nai hauwa elaluali goli, te tigi deli naga dao.
1CO 12:13 Tama da me te tiwai elalubao. Te da meba te Juda hani da, da meba te Juda hani bidi ąǫ isąwai bage dao, meba te masigi sisąbo olo sę ebo we bidi da, meba olo sę isiąwani we bidi dao. Tiali goli te Tedali Mobo Bidi delide naga da tigidali te baptais selama tama deli tigi poaį naga pedelali, tama Godigo te Tedali Mobo Bidi deli naga dabolo mawai dao.
1CO 12:14 Te bidigo tigide, te dago koneani, te tigi te deli badu naga me elalubeo. Menio. Te aga haniani sę yabo nai elalubo dao.
1CO 12:15 Te sągągo te tiwai po wagi sogo da, “Ena te nogo meni, tama tibaso ena te tigide me wadoalubeo,” te sągą aga togolama tedali agaduba elalueibao wabo digi, tagalao. Te meni. Aga te tigi badu naga me wadoalubo dao.
1CO 12:16 Tama ologo te po wagi sogo da, “Ena te gedu meni, tama tiyu ena te tigide me wadoalubeo,” te olo aga togolama tedali agaduba elalueiba wabo digi, tagalao. Te meni. Aga te tigi badu naga me wadoalubao.
1CO 12:17 Te tigi sesede te gedu naga elalugi sogo da, magi ilama te agai po odaibawe? Tama te tigi sese te olo naga elalubaso da, teda magi ilama agai te nai denami ebo odaibawe? Meni, te tiwai usu egobeo.
1CO 12:18 Tiali goli tigi te tiwai me elalugobeo. Menio. Godigo aga digi homu wali peyu, te tigi tigidali badu te haniani sę yabo nai deli deli muna muna pali, te aga digi godolo yainogo tiwai dao.
1CO 12:19 Tama tigi sese te deli sę yabo nai naga elalugi sogo da, teda te tigi mu te menade elaluaibawe?
1CO 12:20 Tiali goli te tiwai me egobeo. Menio. Te tigi badu haniani sę hauwa yabo nai elalubao, tiali goli te tigi deli naga elalubao.
1CO 12:21 Tama tibaso, gedugo te nogobolo te po wabo usu me egobe, “Te nogo, nage bidigi menigi sogo da, te enaduba deli ena bugagia bidigi dao.” Tama tobolugo me sągą bolo te po me wagobeo, “Te sągą, nage bidigi menigi sogo da, te enaduba deli digi ena bugagia bidigi dao,” te po wabo usu me egobeo.
1CO 12:22 Mu menio. Te tigi dabe badu dago te bomo meni homu yali, te me elalusiąwani da, teda te tigi bugagia me elalugobeo. Mu menio.
1CO 12:23 Tama te tigi dabe badu dago homugo augwali te dwasianu dwali homu yali, te dago augwali bugagia tonalubo dao. Tama te tigi wiegi yai isiąwani dabe badu, tede dago hale idali weyu, dago augwali te gudubo ugwago halua sabo dao.
1CO 12:24 Tiali goli te dago augwalide hale isąbo badu, te dago gudubo ugwago halua sabo menio. Tiali goli Godigo te tigi dabe tigidali te deli badu wadolai elalubao. Tama me badu augwali te nogi meni yai tiwai elaluali, teda agai augwalibolo te nogi ma mayu ebo dao.
1CO 12:25 Agai tama tiwai ebaso, te augwali tedali me pebeda pogobeo, menio, te tigidali deli deli badu te augwaligo augwa hasi te gasa badu te deli sę tiwai naga eyu bugagia tonalumainogo ebo dao.
1CO 12:26 Tama tiyu te tigi me badu pedai badu dene eyu da, te tigidali badu dwai bidaibao. Tama me deli badu te nogi sobaso da, te tigi tigidali badu augwaligo te aga dali wiegi yai homu yaibao.
1CO 12:27 Tialima dage da, da tigidali deliba wadolama, tama dage da te Kraisgo tigi tiwai dao. Tama dage deli deli te Kraisgo tigigo haniani sę yabo badu dabe dao.
1CO 12:28 Tama te Godigo po odobo we bidi hani tomode Godigo aga digi te sę dodolama, tama tigidali bidi te haniani sęba muani. Te hasia te po sela pabo bidi dabe nigilali, te si wali te Godigo po pusabo bidi dabe, te sela wali te agai po ola mabo tisa bidi dabe muani. Te dabe tudi badu nosali te bomo menama, te bomai sę ebo bidi dabe nigilali. Tama nosali ma te gasi yai bidi dabe usu ilibo bidi dabe elalubo, tama te we bidi dabe tau sabo bidi me, tama te haniani sę dabe tonaluabo bidi dabe muani, tama haniani homugo konesiąbo pogo po wabo bidi nigilai.
1CO 12:29 Magi yaliwe? Te Godigo po odobo we bidi hani tomode te tigidali bidi te Godigo po sela pabo sę ebo bidi dabe bidibo dawe? Ma, tigidali te po pusabo bidi bidibawe? Ma, tigidali te po ola mabo tisa bidi bidibawe? Ma, tigidaligo te bomai sę ebo bomo elalubawe?
1CO 12:30 Ma, tigidaligo te gasi yai bidi dabe usu ma ilibo bomo te elalubo dawe? Ma, tigidaligo te haniani homugo konesiąbo pogo po wabo dawe? Ma, te tigidaligo te gasa bidigo wali po begelebo sę ebo usu egowe? Mu menio!
1CO 12:31 Tiali goli dagego bomo eyu tama godolo elama, te Godigo dabolo olo mabo agai we bidi hani tau sabo bomo tigidalide te polali nai sao. Tama megi eno dagebolo te polalubo tų mu me deli te dagebolo ola maiabo homu ebao.
1CO 13:1 Te haniani dago homugo konesiąbo pogo po wabo, tede eno po tamadi wai dao. Te eno te da tǫde bidibo we bidigo dena homugo konesiąbo haniani pogo wabo, ma te tǫde bidi dabego wabo haniani po, ma te ensel mobo bidi dabego gasagi yai po me, te po tigidaligo eno po wabo usu eyu da, tiali goli eno te gasa we bidi dali dwagi yai homu eyu godolo ebo kolesaga esiąyu da, teda eno po wabo te belo olo subigila elibo tiwai eyu, ma te moni nigo nigali habidi te olo elibo tiwai gilama yaibao.
1CO 13:2 Ma, eno te profet bidigo wabo po tiwai te Godigo po pusubo bomo elaluyu, tama eno te Godigo geme dualali po tigidali koneyu, tama eno gasa haniani homu kolesaga me koneyu, tama eno Godide bomai konealubo po dąų elaluyu, tama eno te genuai bulu du gasaba pogolobo usu iligi da, ena te tiwai bidiyu, tiali goli eno te gasa we bidi dali dwagi yai homu eyu godolo ebo kolesaga esiąyu da, teda ena te olo nai tiwai dao.
1CO 13:3 Tama eno ena doado bage tigidali te magi nai meni yai we bidi dabe augwalibolo mena mena pelama, tama ena te Kraisde boi bidi homu ebo bagego selama, tama eno tigi te siaba ulama tama ena te isiyu da, tiali goli eno te gasa we bidi dali dwagi yai homu eyu godolo ebo kolesaga esiąyu da, teda te eno yali tigidali dwagi yai sęgo ena dwasianu tau sabo usu me egobeo.
1CO 13:4 Te gasa we bidibolo wiegi yai homu eyu godolo ebo bidi agai e tobage kolesaga ebo dao. Augwaligo dwai kolesaga aga dali ebaso, te agai wei polo me ponogobeo. Te gasa we bidibolo wiegi yai homu eyu godolo ebo bidigo, te agai tigidali bidi tau sobao. Agai te doado bage hauwa elalubo bidi dali dwai homu me egobeo. Te gasa bidibolo wiegi yai homu ebo bidigo te aga digi aga nogi ugwaba me sogobeo. Tama agai dwai hagoma me egobeo.
1CO 13:5 Agai te bidi dabe augwali dali te kolesaga usu isąwai bidigo ebo kolesaga ebo meni. Agai te aga doado bage dabede te nai yogo homu ebo meni. Te agai sębę polo me egobe, konila po polo wagobeo. Te augwaligo agabolo dwai sę ilibaso, te agai te sęde aga homugo ma nededu gebo meni.
1CO 13:6 Te gasa bidigo ebo dolo isąwai kolesagade te agai wiegi yai homu pemene me egobeo. Menio. Agai te we bidi augwaligo Godigo mu doloba pai kolesaga ebode te wiegi yai homu pemene agai ebo dao.
1CO 13:7 Te gasa we bidibolo wiegi yai homu eyu godolo ebo bidi agai tigidali sęgę bugagia tolobo dao. Te tama tiyu, agai aga abagi dali homugo kęą pai bidi bidada pabo dao, te kolesaga me sia sogobeo. Te aga dali dwai sę yali abagi, tede agai wiegi yai homu pemene eyu tama te bidigo homu hasegelebo aga bugagia tonalubo dao, agai te kolesaga ebo tagalogobeo. Te tigidali sęgę sabode te aga bomo elama bugagia dolalubo dao, aga munu me sębę polo egobeo.
1CO 13:8 Te Godigo aga we bidibolo te tau sabo bomo osogo mawai dao. Agai bidi mebolo te Godigo po pusubo bomo olo mayu, tama gasa bidibolo te haniani gasagi yai homugo konesiąbo pogo po wabo bomo olo tama mayu, tama tedali bidibolo gasa haniani homu kolesaga koneabo bomo mayu ebo dao. Te tobage mani sę yabo bomo te osogo elalubo nai naga dao. Tiali goli te gasa we bidi dali dwagi yai homu eyu godolo ebo kolesaga da, te gamonabo kolesaga mu dao, te munu me siligobeo.
1CO 13:9 Te megi dago haniani homu kolesaga koneabo bomo te sese meni, te sǫą pali. Tama te Godigo po pusubo bomo me, te sese meni, te sǫą pali.
1CO 13:10 Tiali goli nosali te sese usu mu yai nai asiyu, tama te sogo te sese isąwai sǫą pali nai dabe tigidali silaibao, te augwaligo sę me meni.
1CO 13:11 E tiwai yaibao. Polobadu ena dwasianu ogwa bidibadi, te sogo eno dwasianu ogwago po wabo tiwai yai dao. Eno te dwasianu ogwago homu ebo sę tiwai yai dao. Eno te dwasianu ogwago homu dodolobo kolesaga tiwai me eyu bidai dao. Eno kuna konesiąbaso, eno haniani sęde sǫą peyu bidali. Tiali goli nosali ena genuai bidi pedalama, tama eno bugagia konebaso, eno te dwasianu ogwago yali kolesaga yali te tagalai dao.
1CO 13:12 Dago te ąį dulade subadi, te dena gesabidi dago kuna subo meni, te dwasianu hulia sai tiwai subo dao. Tama te tiwai me, dago God gisiga mu konebo menio. Tiali goli te sogo nosali da, te dago Godigo gesabidi mu dolo sueibao. Megi dago te God kuna konebeo, te me badu naga koneani. Tiali goli nosali da, te dago aga mu koneyu, te agai da mu konebo tiwai gilama yaibao.
1CO 13:13 Tama te sogo asisąbadi, te kolesaga sela sesemane sogo elalubao, te homugo kęą pabo kolesaga dali, te dwagi yai homu eyu bugagia tonalubo kolesaga dali, te we bidi dali wiegi yai homu eyu godolo ebo kolesaga dali, te augwali sela sesemane sogo elalubo dao. Tiali goli te kolesaga selade te polalubo kolesaga me deli, te gasa bidibolo wiegi yai homu eyu godolo ebo kolesaga elalubo dao.
1CO 14:1 Te gasa we bidi dali wiegi yai homu eyu godolo ebo kolesaga da te polalubo kolesaga elalubaso, te dagego bomo eyu te kolesaga bugagia wali pao. Tama tiyu, dagego te Tedali Mobo Bidigo maiabo tau mabo bomo sabo homu bomo eyu godolo tigidali sogo iduao. Tiali goli te maiabo bomo dabe tomode te Godigo po gasa we bidi dabebolo pusubo bomo te polalubo bomo elalubaso, dagego te bomo sabo homu hasia yao.
1CO 14:2 Magi baso meni, te tǫde bidibo we bidigo konesiąbo po wabo bidi agai te we bidibolo te po wagobeo. Menio. Agai te po wabogo te Godibolo naga wabo dao. Magi baso meni, te we bidi augwaligo agai wabo po page konegobeo. Te Tedali Mobo Bidigo bomogo te agai te geme dualali po page wabo dao.
1CO 14:3 Me ma, Godigo po pusubo bidi, agai po te we bidibolo weyu, tama te pogo augwa homugo God dali kęą pabo kolesaga tebolo bomo mabo dao, tama augwaligo kolesaga wiegi yai emainu homu hodolama, tama augwali homu nagame ilibo dao.
1CO 14:4 Te tǫde bidibo we bidigo konesiąbo po wabo bidi, te aga digi naga tau sabo dao. Tiali goli te Godigo po pusubo bidigo, agai te Godigo po odobo we bidi hani sese tau sabo dao.
1CO 14:5 Eno homugo dage tigidaligo te we bidigo konesiąbo pogo po omainogo te homu godolo ebao. Tiali goli eno homugo te Godigo po dagego pusumainogo te homu mu godolo ebao. Magi baso meni, te Godigo po hania pusubo bidi agai te we bidi tau sabo sę ebogo te we bidigo konesiąbo pogo po wabo bidigo tau sabo sę aiyaba elalubo dao. Tiali goli, te we bidi augwaligo te po page hania konemainogo eyu, bidi mego te po page begeleyu da, teda te usu da, te po pusubo bidi dali te we bidigo konesiąbo pogo po wabo bidi dali sigo tau sabo sę te tiwai si dao.
1CO 14:6 Eno ama dedeo, dagego te po homugo bugagia koneao. Ena te dage bidibo madi aselama, tama eno po te we bidigo konesiąbo gasa pogo naga wainogo eyu da, tiali goli te Godigo enabolo waselali po meba te eno dagebolo wasiąyu, ma eno wiegi yai kolesaga dagebolo masiąma, ma te Godigo po eno pususiąma, te eno dage me po ola masiąbaso da, teda eno te we bidi konesiąbo pogo wabogo dage bugagia tau sogobeo. Mu menio.
1CO 14:7 Te bidibo ula meni yai nai, te ona me gita, te tiwai naga elalubao. Te agai haniani po dolo bugagia wasiąbaso da, teda dago magi ilama te agai dogonide wabo po bugagia odaibawe? Te usu egobeo.
1CO 14:8 Ma, te ami enesigi bidi dabe augwaligo te bu wabo nai biugel bu wabo odobo si, augwaligo konebo dao, te hwįabo sogo asai dao, te homu yaibao. Tiali goli ami bidi me deligo te biugel naigo dolo hwa wasiąbaso da, teda dego te wąbi hwįabo sisi elaluaibawe? Bidi meni.
1CO 14:9 Dage me, dage te tiwai gilama naga yaibao. Dagego duga lotude te bidi dabego konesiąbo gasa pogo po obaso da, magi ilama augwaligo te po page koneaibawe? Menio. Teda dagego po olo madi hagagi paibao.
1CO 14:10 Mu tama, te haniani we bidi hani augwaligo te haniani po hauwa e tǫde elalubao, dago te haniani po nedebo usu egobeo. Tiali goli te po me deli olo me elalubeo. Te tigidali pogo te page elalubao.
1CO 14:11 Tialima, te bidi me deligo pusubo po page eno me konesiąbaso da, te agai homugo ena te gasa digibulu bidibo bidi hani da homu yaibao. Tama eno me eno homugo te po wabo bidi te gasa digibulu bidibo bidi hani da, te homu ebo dao.
1CO 14:12 Dagego me dagego te we bidigo konesiąbo pogo po weyu da, teda dage tama tiwai ebo dao. Tialima, dagego te Tedali Mobo Bidigo olo maiabo tau sabo bomo dabe sainogo homu godolo yaligo da, teda Godigo we bidi hani bugagia dolalumainao homu eyu, dagego te augwali wiegi yai mu tau mabo bomo sabo homu bomonama eyu, tama te Mobo Bidibolo te bomo da mao weyu bidiąo.
1CO 14:13 Tama tibaso, te we bidi dabego konesiąbo pode po wabo bidigo, agai te po begelabo bomo somainogo eyu tama agai Godibolo te bomo ena mao po hanalu wao. Tama tiyu, tama agai te bomo sobaso da, teda agai te aga gasa pogo wabo po begelama, tama gasa we bidi augwaligo te po page hania koneaibao.
1CO 14:14 Magi baso meni, eno te da we bidigo konesiąbo pogo Godibolo po weyu da, teda eno mobo bidigo me te gedu haluasa po wabo, tiali goli tebogo eno homu kolesaga tau sabo meni, te olo elaluaibao.
1CO 14:15 Tama eno magi egowe? Te eno ena homu ogwa wai dali te da we bidi konesiąbo pogo Godibolo po weyu aga nogi ugwaba saibao, tama ena homugo kone paliyu tama waibao. Eno aga nogi ugwaba sabo tęąbi po te konesiąbo pogo te eno homu ogwa waigo weyu, tama te eno homugo dali me te tęąbi po waibao.
1CO 14:16 Te nago tama tisiąma, tama naga homu ogwa waigo naga te lotu wabo sogode nago Godibolo puba hwi po weyu da, tama tede bidibo olo bidi me deligo te po konesiąwani da, teda magi ilama agai te nago puba hwi po walide te “Amen, mu dao” po agai wagowe? Te usu me egobeo. Agai nago te wali po me konegobeo.
1CO 14:17 Mu tama, nago Godibolo po wali te wiegi yai wali, tiali goli nago te po waligo te gasa bidi homu tau siyu bomo me mabeo.
1CO 14:18 Dagego te da tǫde bidibo we bidigo dena homugo konesiąbo pogo me sogo Godibolo po wabo dao. Awe, te usu da. Eno me hauwa sogo tama tebo dao, tama te sęde eno dage aiyaba elalubo dao. God agai te pogo po wabo bomo ena mobaso, eno agabolo puba hwi po wabo dao.
1CO 14:19 Tiali goli te Godigo po odobo we bidi sisinibode, eno homugo te eno te augwaligo konesiąbo po hauwa mu wagobeo. Menio. Eno homu e tiwai dao, te dena pogo weyu, eno augwali tau siyu, te ola mabo po bugagia ola momainogo eyu, te eno dwasianu pogo hania waibao, te usu dao.
1CO 14:20 Eno ama dedeo, dagego te haniani sęde dagalabo homude dage te wai puluba tiwai me bidilamuo. Menio. Te dwai kolesaga ebode dage te dwasianu wai puluba bidibo tiwai bidao, te dwai kolesaga egimio. Tiali goli duga haniani sę ebo dagalabo homude, dage te genuai bidi tiwai pedaliąo.
1CO 14:21 Te Godigo bomai pode augwaligo te tiwai po polobadu asęai dao, te gasa konesiąbo pogo wabo kolesagade, “Genuai Bidigo te po wai, ‘Te gasa po wabo bidigo pedauwalide, tama te gasa bidi hanigo pedauwalide te eno po e we bidi hanibolo mawaibao. Tiali goli tebogo me usu egobeo, te augwaligo eno po wali me pogobeo,’ agai te po wai.”
1CO 14:22 Tama tibaso, dago koneani, te da tǫde bidibo we bidigo konesiąbo gasa pogo po wabo kolesaga da, te muani sa dao, te Kraisba augwa homu tigidali musiąwai bagego augwaligo te tobage po wabo odoyu, tama augwaligo Godigo bomo meba sueibao. Me ma, te Godigo po pusubo kolesaga da, te me te muani sa dao, tama te po odoyu bugagia wali pabo we bidi augwaligo tedu koneaibao, augwaligo augwa homu tigidali te Kraisba mu muai dao.
1CO 14:23 Tama tibaso, te dage Godigo po odobo we bidi tigidali dage deli madi sisinama, tama dage te sogo po wabo bage tigidaligo we bidigo konesiąbo gasa gasa pogo po weyu, tama bidi mebago konesiąma, tama Kraisba augwa homu musiąwani bidi dali, augwali te tomoba asiyu da, teda augwaligo dagede te po waibao, “Dage esela pobao” waibao.
1CO 14:24 Tiali goli, dage tigidali deli deligo Godigo po dena pogo pusubaso, tama Kraisba augwa homu musiąwani bage, ma bugagia konesiąwani bidi me deli, aga te tomoba asobaso da, teda dage tigidaligo pogo te bidi homude enaibao, tama dage tigidaligo pogo aga po tų ela mabo tiwai eyu tama aga koneaibao, Godigo gedude aga dwai sę yali sęgę elalubao.
1CO 14:25 Tama tigidali po aga homude geme dualaluali, te agai hania pusaibao. Tama aga ge neyu, aga gesabidiba basi gulama, tama God nogi ugwaba siyu, tama hanilama te po waibao, “Mu tama, God te dage tomode bidibao,” agai te po waibao.
1CO 14:26 Ama dedeo, dagego magi yaibawe? Dage lotu po wainogo eyu sisinibo sogo, dage tigidali deli deligo te duga hasi tau sabo sę elalubao. Me deligo te Godigo nogi ugwaba sabo balia weyu, tama me deligo te dage po ola mabo sę eyu, tama me deligo te Godigo agabolo tamadi mani po, tama agai te po pusaibao. Tama me deligo te dago konesiąbo gasa pogo po weyu, tama mego te po begelebo sę elalubao. Dagego ebo sę tigidali ebogo te dage Godigo po odobo we bidi tau siyu bomo momainogo iyąo.
1CO 14:27 Tama mebago te da tǫde bidibo we bidigo konesiąbo pogo po wainogo homu ebaso da, teda sigo ma selago naga yao. Te usu dao. Tama augwaligo po hodobo me olamuo. Menio. Me deligo bolo po hasia olama, tama gasa aga po nosali weyu yao. Tama bidi me deligo te augwaligo wali po page begelemainao.
1CO 14:28 Tama te po begelabo bidi meni baso da, teda te we bidigo konesiąbo pogo po wabo bidi te dage Godigo po odobo we bidi sisinani sogo po wabo pedauwali pania sao. Agai aga digi homu tomode God dali naga aga po mimainao.
1CO 14:29 Tama te Godigo po pusubo bidi si ma sela, augwaligo te Godigo po pusumainao. Tama gasa bage augwaligo te pusali po dagaloyu tama osola suyu miao.
1CO 14:30 Tama me deli dulaluali bidibolo, tama Godigo Mobo Bidigo po me deli agabolo te sogo naga ola mani po wainogo ebaso da, teda te hasia doligulama po wabo bidi, te aga wabo po silao, te Godigo agabolo po tamadi mani bidigo te mani po omainao.
1CO 14:31 Te kolesaga ebogo da, teda dage tigidali deli deligo Godigo po pusagameo, tama dage tigidali we bidigo koneama kolesaga selama, tama dage tigidali bomo somainogo yaibao.
1CO 14:32 Te Godigo po pusubo bidi dabe augwaligo augwa Godigo Mobo Bidigo nogode sali po pusubo bomo augwa digi tonalumainao.
1CO 14:33 Magi baso meni, Godigo te da dago lotu po wabode te subigila ebo homu me ilibo meni. Te menio. Agai da deli homude naga nagamea homu elama bidimainogo ilibo dao. Te Godigo po odobo we bidi sisinibo sogo te we dabe sibigo po me olamuo, augwali pedauwali naga pania sao. Da Godigo po odobo we bidi hani te tigidali tǫde bidiyu, da tigidaligo tama naga tebo dao. Te we dabe sibi augwali te Godigo po odobo we bidi tomode me polalugobeo. Augwali te dologode bidao, te Juda dabego bomai pode wali po gilama yao.
1CO 14:35 Te we dabe sibi augwaligo te lotude odali po me deli page koneainogo da, teda augwaligo augwa bidibolo augwa bede hanalu wao. Ma, te Godigo po odobo we bidi sisinibo sogo wego po obaso da, agai te dolo isąwai hale ilibo kolesaga ebao.
1CO 14:36 Awe, eno koneani, te dagego eno megi tama wali po bolobo dao. Te dage tomode te dage deliba sisinibo sogo te we mebago po pusubo dao. Magi basowe? Dage te Godigo wiegi yai gesi po page bage dagede da agawe? Dagego naga te Godigo po siyu, tama gasa we bidi augwali meni yaiba agawe? Te meni. Dagego te tigidali gasa tǫde bidibo Godigo po odobo we bidi hani augwaligo ebo kolesaga wali peyu, tama te we dabe sibigo lotu po obadi po pusubo habu selao.
1CO 14:37 Tama bidi me deli aga homugo digi aga te Godigo po pusubo bidi da te homu ebaso, ma aga digi homugo te Godigo Tedali Mobo Bidigo agabolo te Godigo we bidi tau sabo sę agabolo mani, te homu eyu da, teda aga koneao, te po eno dagebolo megi asęani te Genuai Bidigo bomai po dao.
1CO 14:38 Tiali goli aga te tiwai homu me isąyu da, teda dago me aga te Godigo po pusubo bidi da te homu me egobeo.
1CO 14:39 Eno ama dede dabeo, eno wali po page e dao: dagego te Godigo po pusubo sę emainogo eyu duga homugo bomo elama godolo yao. Tama me, dagego te da tǫde bidibo we bidigo konesiąbo gasa gasa pogo te Godigo nogi ugwaba sabo sę te habu munu me selamu dao.
1CO 14:40 Tiali goli dage deliba sisinama tama lotu po obadi, te subigila egimio, te sę dodolama tama wiegi yai naga pedalomainao.
1CO 15:1 Eno ama dedeo, megi eno homugo te eno dagebolo polobadu pusali wiegi yai gesi po, te po pagede dage homu ma hodolainogo eno homu ebao. Dagego te wiegi yai gesi po salio, tama dage tede bomo elama dolalubo dao.
1CO 15:2 Tama Godigo te wiegi yai gesi pogo naga dage ma dobola siyu wiegi yai madiba mubao. Dagego te eno dagebolo pusali wiegi yai gesi po dali duga homugo mu kęą peyu da, te pogo agai dage ma dobola saibao. Te dagego te tiwai isąyu da, teda dagego olo naga Kraisba duga homu tigidali muyu agaba tialuali.
1CO 15:3 Te eno polasa po dagebolo hasia bolo mani, te eno me eno polobadu te po naga sali. Te po e tiwai dao: te Krais isilama dago dwai sęgę tigidali sela samainogo yali, te Godigo po bukude polobadu asęani po tama usu nani.
1CO 15:4 Tama augwaligo aga te masigi dedage gų pageba mugi pai. Tama sela sogo wabode Godigo aga ma hodolama, tama aga me bidibao, te Godigo po bukude polobadu asęani po tama usu numainogo yai dao.
1CO 15:5 Tama nosali aga Pita bidibo madi pedalali, tama nosali te aga sę bidi nogo si olama sągą badu si bidi bidibo madi pedalama augwaligo aga suali.
1CO 15:6 Tama nosali ma dago ama dede hauwa dali augwaligo aga suali, te bidi sese hauwa 500 bidi augwaligo sualio. Tama te suali ama dede augwali meba nosali isiyu yai, tiali goli hauwa augwali megi me bidibao.
1CO 15:7 Tama nosali ma Jemsgo aga suali. Tama te sogo nosali aga sęba tagala palali bidi dabego me aga sualio. Te tiwai aga isilama ma hodaluali po eno dagebolo hasia bolo ola mani.
1CO 15:8 Tama augwaligo sula silama, tudi badu mu aga te ena geduba me pedalai, ena te wai bǫų tiwai te aga idago te ame nesiąbo sogo ame nani.
1CO 15:9 Magi baso meni. Ena da, ena te Godigo po sela pabo bidi dabe augwali tomode te dwasianu gagayali. Tama ena te bidi augwaligo te Godigo po sela pabo bidi nogi wabo usu me egi menio. Magi baso meni, polobadu eno te Godigo po odobo we bidi hani dolobo sę hauwa mu yai dao.
1CO 15:10 Tiali goli Godigo olo mu tau sabo kolesagago ena tau selama, tama agai ena megi bidibo tiwai ilali, ena te aga sę ebo tagala palali bidi dao. Tama agai ena olo mu tau sali wiegi yai kolesaga te olo me hagabeo. Mu menio. Eno aga sę bomo mu elama yai, te gasa Godigo po sela pali bidi dabe augwaligo yali sę eno yali sę ebogo aiyaba elaluali. Tiali goli eno ena digi me ebeo. Menio. Te Godigo olo tau sabo wiegi yai kolesaga ena dali bidiyu, agai naga te sę ebo dao.
1CO 15:11 Tiali goli te eno ma augwaligo te gesi wiegi yai po pusali, te tagalao. Te magigo meni. Da aga tagala palali bidi tigidaligo te Kraisde po naga pusubo dao. Tama dagego te pode naga konealubo po duga homugo dąų olama tama Kraisba homu dąų elalubo dao.
1CO 15:12 Sesemane sogo da Godigo gesi wiegi yai po pusubo bidi dabe dago te Krais isąma tama Godigo aga ma hodolali po pusubo dao. Tama tialigo da, magi ilama tama dage tomode meba augwaligo e tiwai tibo po weyu ebo dao: “Te isai bidi, aga ma hodalugobe, dago te homu ebo da,” te po wabo.
1CO 15:13 Edao. Te isai bidi mu ma hodalobo usu menigi sogo da, teda Godigo Krais te gų pagede ma hodoligi meni da.
1CO 15:14 Tama mu tama Godigo Krais ma hodoligi menigi sogo da, teda dago te pusubo po, te po olo nai tiwai gagagi da, tama dagego Kraisde konealubo po dąų olama agaba homugo tialubo kolesaga, te me te olo nai tiwai pedaligi da.
1CO 15:15 Tama te tiwai da wida, teda me da te Godigo po pusubode te da tibo po wabo bidi tiwai pedalaibao. Magi baso meni, dago te Godide po weyu tama dago te agai Krais te gų pagede ma hodolali po dago hanilama hania wali. Tiali goli Godigo te isai bidi ma hodolobo meni eyu da, teda agai te Krais me ma hodolobeo.
1CO 15:16 Awe, mu tama Godigo te isai bidi ma hodolobo meni da wida, teda Godigo te Krais me hodoligi meni.
1CO 15:17 Tama mu tama Godigo te Krais ma hodoligi menigi sogo da, teda dagego te Kraisba duga homu tigidali mubo kolesaga ebogo te duga tau sabo usu me egi menio. Duga dwai sęgę dali bididubadi gebo dao.
1CO 15:18 Tama me elalubao, te Kraisde konealubo po dąų olama isali we bidi dabe, augwali me hagawai dao.
1CO 15:19 Te Krais agai da ma dobola somainogo eyu, dago dena homu tigidali agaba munama tama agaba tialuyu, tama dwagi yai homu eyu aga ma asobo tonalubo dao. Tama tebogo da e tǫde bidibo sogode naga da tau siyu da, teda da hobedagia mu bidibao. We bidi augwaligo da dali homu dene ebogo te gasa we bidide homu dene ebo sę aiyaba elaluaibao.
1CO 15:20 Tiali goli te tiwai me egobeo. Mu menio. Te Krais isali, tama mu tama Godigo aga te isai we bidi tomodu ma hodolali. Aga te isali we bidi dabe hodalomainogo te hasia polasa hodaluali bidi aga dao. Tama te gide nai inabo hasia pedalali nai tiwai aga te gų pagede hasia mu ma pedalai dao. Tama tibaso, dago koneani, agade konealubo po dąų wali we bidi tigidali augwali me te Godigo ma hodolaibao.
1CO 15:21 Magi baso meni, te bidi deli Adamgo yali sęde tedu te isibo kolesaga pedalali, tama te tiwai me te gasa bidi me deli Kraisgo yali sęde te isai bidi ma hodaloabo kolesaga me pedalalio.
1CO 15:22 Te e tama tiwai: te Adamgo bulai wai augwali tigidali isibo bage dao. Tama tiali goli Kraisgo we bidi hani augwali tigidali bidibo ula saibao.
1CO 15:23 Tiali goli da tigidali we bidi deli deli te da ma hodaluama, tama dena sogo tede te bidabo ula saibao. Te hasia bolo polalubo te Krais aga ma hodaluama tama bidabo ula sai dao. Tama nosali aga ma asobo sogo, da aga hani tigidali ma hodaluaibao.
1CO 15:24 Tama te sogo tigidali nai silaibao. Tama Kraisgo te gavman sę tigidali silibadi, tama te haniani tobolu bidi sę ebo tigidali badi, tama tigidali bomo dola silibadi elama, tama agai aga tigidali nai tonalubo bomo me ula te Aya Godigo nogoba muaibao.
1CO 15:25 Magi baso meni, Krais te tuni bidi bidimainu eyu, tama bidada pidubadi tama Godigo te boi bidi tigidali augwali aiyaba elaluama siligi pabo si usu nigi paibao.
1CO 15:26 Agai te gasa boi bidi dabe augwali tigidali dolobode da, teda agai te isibo kolesaga me sia saibao.
1CO 15:27 Magi baso meni, te Godigo po bukude te tiwai po wai, “Godigo tigidali nai te aga dologode muaibao” wai. Te asęani pode te Godigo tigidali nai te Krais dologode muaibao po wai. Tama tialima dago hania koneani, Godigo tigidali nai te Krais dologoba muani, tiali goli God aga digi te Krais dologode me bidigobeo. Menio.
1CO 15:28 Tama nosali Godigo tigidali nai Krais dologode munama silibo si da, teda God aga Ogwa digi te God dologoba pelama, te tigidali nai aga dologoba munama, tama God te tigidali nai dali, tigidali we bidi dali tobolu bidi mu bidimainogo yaibao.
1CO 15:29 Edao. Te Godigo te bidi dabe te gų pagede ma hodaluaibao po te mu po menigi sogo da, magi baso te meba bidibo bidigo te isali bidi tau somainogo eyu baptais sabo dawe? Te mu tama te isai bidi munu me ma hodalugobe da weyu da, teda magi baso te isai bidi dabe tobade te bidibo bidigo augwali tau somainogo eyu baptais sabo dawe?
1CO 15:30 Tama ena dali, te ena dali deli sę ebo bage me, da me sesemane sogo bidi mebago da dolainogo ebo dao. Te isai bidi ma hodoligi menigi sogo da, teda magi baso da e tiwai bidaibawe? Te isai we bidi ma hodoligi menigi sogo da, teda te Godigo pode boi bidi homu ebo bagego da dene me maidali weyu dago e sę tagaligi da.
1CO 15:31 Ama dedeo, te tigidali sogo te ena dali boi homu ebo bagego dene mabo homu ebaso, te tigidali sogo deli deli ena isigowe, te eno konesiąbadi ena tama bidibo dao. Te po mu po naga dao, te eno dagede ebo homu te mu tama dao tiwai. Mu tama, da tigidali dago Genuai Bidi Krais Jisasde tia selama bidibo tama eno wiegi yai homu pemene dagebolo mu ebo dao.
1CO 15:32 Ena e moni hanu Efesusde polobadu bidibadi, te Godigo pode boi bidi homu ebo bagego ena dali dwai sę yali, augwali te bulude bidibo dwai hui digi ebo hasa dabe tiwai yali. Tama eno tǫde bidigo homu wali naga pigi sogo da, teda te sęgę tolobogo ena mena tama tau sogowe ena te homu egi da. Tama tiyu, mu tama te isai bidi dabe ma hodoligi menigi sogo da, teda “Da do ma tamadi isibaso, tagalao, dago te nai me wę me subigila tuinao,” te homu egi dao.
1CO 15:33 Augwaligo dage te tobage tibo po ola mabo gogolamuo! Bidi me deligo te dwai kolesaga ebode polobadu wali po te mu po naga dao. Agai te po wai, “Te da dwai bidi dabe dali kisasa biliyu da, teda augwaligo dwai kolesagago dago wiegi yai kolesaga ebo dolaibao,” agai te po wai.
1CO 15:34 Dagego te wabo pabo kolesaga tagalama tama dolo homu kolesaga yao. Dagego dwai sę ebo tagaliąo. Dagego odao. Dage tomode meba augwaligo te Godigo te isai we bidi ma hodalugobe po wabo bage, augwaligo God kuna konebeo. Te dage hale ilainogo eyu eno te po dagebolo obao.
1CO 15:35 Tiali goli bidi me deligo te tiwai po hanalu waibao, “Te Godigo po wali pali isai we bidi dabe augwali mena tama hodalugowe? Te augwali mena tiwai tigi selama ma hodalugowe?” agai te po waibao.
1CO 15:36 Te eno te po wei ponoyu e po obao: nage kolesaga meni yai bidi dawe? Nago hanalu wali po si te kidu meni yai po naga dao. Naga digi te nai yiyu ge bulubo naga koneani, tama te nai ge bulama tama tǫ tomode te ge peda pelama tama kulubi holisiayu da, teda te holabo yiyu aga bidabo ula me sogobeo.
1CO 15:37 Tama nago te ge naga bulubo dao, te nosali pedalobo sese nai tigi bulubo meni. Te menio. Nago olo ge naga bulali, te yiyu ge, ma gasa nai ge me te olo ge naga bulubo dao.
1CO 15:38 Tama Godigo digi aga homugo te yiyu gede pedelabo yabe dodolama nigali, te aga digi homugo koneama te tiwai yali. Tama agai haniani yabe te haniani nai wai tigidali deli delibolo mabo dao.
1CO 15:39 Tigidali tǫde elalubo naigo tigi te deli nai tigi tiwai naga me elalubeo. Menio. Te bidigo tigi gasagi yai me tedali elalubo, tama hasa dabego gasagi yai me tedali, tama ba dabego gasagi yai me elalubo, tama sųgų dabego me gasagi yai tedali tigi elalubo dao.
1CO 15:40 Tama dagalude nai dabe me tǫde nai dabe me tedali elalubao. Tiali goli te dagalude nai dabego au yali te deli tigi poai elalubo, tama tǫde nai dabego au yali te gasagi yai tedali elalubao.
1CO 15:41 Te giligago au yali te deli tigi poai elalubo, tama poluago au yali te gasagi yai me, tama te hǫ dabego au te gasagi yai me elalubo. Tama hǫ dabego au me te gasagi gasagi yai elalubao.
1CO 15:42 Te Godigo te isali we bidi dabe ma hodolobo kolesaga me, te tiwai naga yaibao. Te tigi dago te nai ge tiwai pubalobo, te dolaibao. Te ma hodalobo tigi te gasagi yai dao, te munu me dologobeo, te gamonabo tigi dao.
1CO 15:43 Te tigi dago pubalobo, te sawi isąwai dwai mu yali. Te ma hodalobo tigi, te wiegi yai sawia pai mu yaibao. Te dago tǫba pubalobo tigi, te bomo me elalubeo. Te ma hodalobo tigi, te bomo hauwa elaluaibao.
1CO 15:44 Te tigi dago pubalobo, te tǫde bidabo tigi naga pubulaibao. Te ma hodalobo tigi, te dagalude bidabo tigi elaluaibao. Te tǫde tigi elalubo, tama tibaso dago koneani, te dagalude bidabo tigi me elalubo dao.
1CO 15:45 Te Godigo po bukude asęani pode me te tiwai po wai, “Te polasa hasia bidi, Adam, te bidibo ula elalubo bidi pedalai,” te po asęani. Tama nosali mu pedalali Adam aga te bidibo ula mabo mobo bidi pedalali.
1CO 15:46 Tiali goli te bidibo ula mabo mobo bidi te hasia me pedalobeo. Menio. Te e tǫde bidabo ula te hasia pedalali. Tama bidibo ula ebo mobo bidi noma te nosali badu pedalaibao, aga te tǫde bidabo ula hasegelaibao.
1CO 15:47 Te hasia polali bidi Adam te e tǫde bidibolo polali. Godigo tǫgo naga aga nigali. Nosali pedalali bidi te agade Adam si wabo bidi, te aga dagalude bidai bidi dao, tedu asai dao.
1CO 15:48 Da tǫde we bidi tigidali, da te Godigo te tǫgo nigali bidi Adam tiwai pedalali. Tama da Kraisgo we bidi hani bage, da te dagaludu asali bidi Krais tiwai mu pedalaibao.
1CO 15:49 Tama megi da te Godigo tǫgo nigali bidi Adam tiwai dao, dago elalubo tigi te agai elaluali tigi tiwai si naga dao. Tama te tiwai naga me dago te dagaludu asali bidi Krais aga tigi tiwai naga digi dago nosali saibao.
1CO 15:50 Ama dedeo, eno megi wali po page e dao: te e tǫde bidabo tigi naga elalubo bidi te Godigo we bidi tonalubo madide bidibo usu me egobeo. Tama te gamonasiąbo tigide bidibo bidi me gamonogobeo.
1CO 15:51 Dagego odiąo. Eno geme dualali po me deli dagebolo pusubao: te da tigidali me isigobeo. Tiali goli Godigo da tigidaligo tigi te hasegelama te gasagi yai tigi me pedalaibao,
1CO 15:52 polo mu, bidigo gedu gagamu ebo tiwai, te tǫde dagalu si silibo sogo te bu wabo nai biugel po wabo sogo tiaibao. Awe, te bu wabo nai biugel po waibao, tama te Godigo po wali pali isali we bidi augwali gų pagede hodaluaibao, tama augwali munu me dologobeo, te augwali gamonaibao. Tama da me bidibo bage, dago tigi hasegelama, gasagi yai mu pedalaibao.
1CO 15:53 Te e tiwai: te dolobo tigi, te hasegelama tama te dolisiąbo tigi pedalama, tama sesemane sogo bugagia bidimainogo emainao. Te isibo tigi te hasegelama, tama gamonabo tigi ulade bidimainogo emainao.
1CO 15:54 Mu tamao, te dago elalubo tigi, te dolobo tigi, te hasegelama sesemane sogo bugagia bidaibao. Tama te isibo tigi te hasegelama te gamonabo tigi pedalama tama sesemane sogo bidaibao. Te tebo sogo te Godigo po bukude asęani po me deli te usu nagasaibao. Bukude te po wai: “Godigo te wąbi hwįani bomo elama, tama te isibo kolesaga te aiyaba elaluama, tama tigidali mu silalio.”
1CO 15:55 Bukude po me e tiwai elalubao, “Nage da, isibo kolesaga, tama nago te we bidi aiyaba elaluabo sę mena elalubawe? Menio! Te mu silalio! Nage da, isibo kolesaga, te nago dene mabo bomo menawe? Te menio! Te aiyaba elalualio!” Te po bukude asęani.
1CO 15:56 Tǫde we bidi augwaligo te isibode magi baso wi ebo dawe? Woo, augwaligo koneani, augwaligo dwai sę eyu bidibaso, nosali augwali dene saibao. Augwaligo dwai sę yali, te augwaligo mena tama koneaniwe? Te Godigo Mosesbolo mani bomai pogo te dwai sę yali page augwali hania waselebo dao.
1CO 15:57 Tiali goli Godibolo dago puba hwi po wao! Te dago Genuai Bidi Jisas Kraisgo yali sęde, te Godigo da bomo mobaso, tama dago te boi bidi, te isibo kolesaga, te dago aiyaba elalubo dao.
1CO 15:58 Eno ama dede muo, te da nosali ma hodaluama tama tebogo te isibo kolesaga aiyaba mu elalubaso, megi dage bomo elama bidiyu, tama wi homu eyu dwasianu ibaba kila selamuo. Te dagego Genuai Bidigo sę dene ebo, te olo me tagalogobeo, te sę ebogo aga du mu walaibao. Dagego te tiwai koneama, tama sesemane sogo dagego dago Genuai Bidigo sęde sę bomo mu yao.
1CO 16:1 Dagego ena te Judia tǫde bidibo bage tau sabo masigide po hanalu wali. Megi eno te po wei ponoyu, dagego te sisinama Godigo we bidi augwalibolo mawainogo ebo masigi po wabo elalubao. Te sę yabo sunumi eno te Galesia moni tǫde bidibo Godigo po odobo we bidi hani dabe augwalibolo ola mani, tama dagego me te tiwai gilama yao.
1CO 16:2 Te tigidali Sande dage tigidali deli deligo te hasia Sarere sę elama sali mone tede homugo koneama, tama te bugulama tama me badu te duga bede bugagia munalumainao, te tiwai saboao. Tama nosali ena sabolobode, teda dagego augwali maiabo mone gegebo sę me egobeo.
1CO 16:3 Nosali ena dage bidibo digi sabolobode, teda duga digi te mone sela pabo bidi meba nogo tų elama, dagego te tau sabo masigi dabe te moni hanu Jerusalemba sela pomainogo yaibao. Tama dagego pas dabe asęnama, tama augwalibolo menama, tama augwali teba tagala palaibao.
1CO 16:4 Tama ena me ena pabo homu ebaso da, teda augwali ena dali hodobo paibao.
1CO 16:5 Eno tede sę me elalubaso, eno e bulu Efesus tagalama tama hasia ena te Masedonia moni tǫ pedai teba paibao. Te moni tǫ tomodu biliyu, tama tede eno sę silibo si, tama ena dage bidibo madi pedalaibao.
1CO 16:6 Tama sabolama, tama ena dwasianu sogo te dage dali bidabo homu ebao. Ena kuna konebe, te ena dage dali bidibadi te moni kedau ebo silibo sogoba usu nagasaibao homu yai. Tama nosali ena gasa buluba sę egi paibao, te mena bulu te megi eno konebeo. Tialima ena gasa buluba painogo ebode, teda dagego te pabo sunumiba ena odasa pelama, tama tau siyu tagaligi pagameo.
1CO 16:7 Ena megi te Masedonia tǫba pobadi ena dageba asigi sogo da, teda ena dage dali dwasianu sogo naga bidibo usigi da. Te ena hagelabo. Dago Genuai Bidigo usu da po obaso da, te ena Masedonia tǫde elalubo sę silama tama dageba asama, tama ena dwasianu bobage sogo dage dali bidabo homu ebao.
1CO 16:8 Tiali goli ena e Efesus bulude bidibadi te Juda dabego moni nai tubo sogo nogi Pentikos pedalobo sogoba usu nagasomainu homu ebo dao.
1CO 16:9 Magi baso meni, Godigo eno sunumi dalobaso, tama eno te we bidi hauwa te Godigo po wali pomainogo tau sabo sę genuai elalubao. Tama ena dali boi bidi homu ebo bidi dabe me hauwa ede elalubao.
1CO 16:10 Te nosali Timoti dage bidibo madiba pedalobo si da, teda dagego bugagia tonalu te aga dage tomode wi isąyu homu nagame elama dua digi bidimainao. Magi baso meni, agai Genuai Bidigo sę eyu, te eno digi ebo sę tiwai ebo bidi dao.
1CO 16:11 Tama tibaso, bidi me badugo aga te olo nai tiwai bidi da homu eyu, tama aga tudiba me munamuo. Menio. Dagego aga homu nagame ilama, tama nosali aga te enaba asabo sunumiba bugagia tagalagaselama, tama aga ena pageba asomainogo yao. Eno te ama dede meba dali aga asobo tonaluaibao.
1CO 16:12 Tama dago ama Apolos, te agade po te tiwai dao: te hauwa sogo eno po agabolo bomo elama weyu, te aga ama dede dali augwaligo dage suagasomainogo po wai dao. Tiali goli aga pabo hagela homu mu yai. Nosali, te aga pabo sogo suali usu ebaso da, teda aga dageba sabolagasaibao.
1CO 16:13 Dagego bugagia tonaluyu, tama te Kraisde konealubo pode bomo elama bugagia dolaluao. Dage bidi mu sesemane sogo bidiyu, tama bomo elama bidaloao.
1CO 16:14 Tigidali sę dagego ebo, dagego dwagi yai homu te Godibolo me te we bidi dabe augwali dali eyu, tama dagego duga sę tigidali iduao.
1CO 16:15 Ama dedeo, dagego te bidi Stefanas dali aga hani dali koneani, augwali te gasa Akaia tǫ pedai hani bidi dabe augwaligo Godigo po wali pabo gagalisąbadi te augwalibolo polasa te Godigo po wali pabo hani we bidi pedalama tama megi bidibao. Tama augwa digi homugo augwaligo te Godigo po odobo we bidi augwali tau sabo sę salio. Eno homugo dage te tobage we bidi augwali
1CO 16:16 dologode bidimainogo homu ebao, tama tigidali bidi dabego augwali tau selama, tama te sęde sę bomo elama ebo dao.
1CO 16:17 Tama Stefanas me Fortunatus badi te Akaikus, te bage augwali ena bidibo madi asali, tama eno homu wiegi yai pemene yalio. Magi baso meni, dagego ena tau somainogo eyu eba asabo te usu isąbaso, tama augwali selago dage hasegelama, tama augwali ena bidibo madi asai dao.
1CO 16:18 Augwaligo ena homu me, tama dage homu me nagame ilali. Tama tiyu dagego te tobage tiwai bidi dabe augwali nogi ugwaba sao.
1CO 16:19 Te moni tǫ pedai Esiade te Godigo po odobo we bidi augwaligo te giligade dao po dagebolo obao. Te Akwila de aga we Prisila dali, te Godigo po odobo we bidi te augwali sigo beba sisinibo bage, augwaligo dage dali dwagi yai homu eyu, dagebolo te Genuai Bidigo nogide siade dao po hauwa obao.
1CO 16:20 Tama tigidali Efesusde bidibo ama dedego siade dao po dagebolo wali. Te da Godigo we bidigo kolesagade, dage tigidali deli deligo te ama dedebolo wiegi yai homu eyu augwali nogo mayąo.
1CO 16:21 Ena Pol da, te ena digi eno nogogo te siade da po asęna dagebolo tolobao.
1CO 16:22 Bidi me deli aga homugo te dago Genuai Bidi Krais dali dwagi yai homu ebo hagela homu eyu da, te bidi agabolo dwai sę pedalomainao. Genuai Bidi, nage asao!
1CO 16:23 Te eno homugo te Genuai Bidi Jisasgo olo tau sabo wiegi yai kolesaga te dage dali bidao.
1CO 16:24 Te Krais Jisasgo yali sęde te da tigidali hodobo deliba wadoloyu bidibo dao. Tama tiyu, eno dage dali dwagi yai homu eyu godolo eyu bidibao.
2CO 1:1 Ena Pol dao, ena te Krais Jisasgo sę ebo tagala palai bidi dao. God aga homugo digi tama Godigo ena te aga sę ebo bidi muai. Ena dali, te dago ama Timoti da sigo pas te dage Godigo po odoyu te Korin moni hanude bidibo we bidi dagebolo e pas asęna tolobao, te moni Grik tǫ pedai tigidali badu bidalubo te Godigo we bidi tigidalibolo eno e pas asęna tolobao.
2CO 1:2 Eno homugo te dago Aya God dali, te Genuai Bidi Jisas Krais daligo, te olo mu da tau siyu mabo wiegi yai kolesagago te dagego homu nagame ilama bidiąo.
2CO 1:3 Dago agabolo puba hwi po weyu, tama God nogi ugwaba sao, aga te God tama dago Genuai Bidi Jisas Kraisgo Aya dao. Aga te dago Aya, tama aga te hobede eyu tau sabo page bidi dao. Aga te tigidali sęgę elalubo bidigo homu nagame ilibo God dao.
2CO 1:4 Te tigidali dene mabo sęgę daba pedalobo agai te dago homu nagame ilibo dao. Magi basowe? Agai da homu nagame ilibo kolesagago naga dago te haniani sęgę elalubo bidi dabe augwali homu nagame ilimainogo eyu, te Godigo da homu nagame bugagia ilibo dao.
2CO 1:5 Magi baso meni, te Kraisgo tolali genuai dene, te dago me te tiwai naga tolobao. Tama tiali goli, te sogo me te Kraisgo genuai homu nagamego da pągąnai dao, te nagame ilibo kolesaga te dene tiwai si pedalobo dao.
2CO 1:6 Te da sęgę tolobaso da, te dagego homu nagame iliyu tiaibao, tama Godigo dage ma somainogo ebao. Tama Godigo dago homu nagame ilibaso da, te dagego homu me nagame ilimainogo ebao. Te dage bomo elama dolaluyu, tama dago tolobo dene tiwai tolobaso da, teda Godigo dage homu nagame ilaibao.
2CO 1:7 Tama homu si isąyu, dago homugo koneani, te dage bomo elama dolalueibao. Dago koneai, dage da dali dene tolobao, tama tibaso te dage da dali te homu nagame ebo kolesaga me selama bidaibao.
2CO 1:8 Ama dedeo, te dago homugo te moni tǫ pedai Esia tede te sęgę daba pedalali te dagego koneaibao. Te genuai sęgę mugo da aiyaba elaluama, tama dago bomo aiyaba mu elaluali. Tama tiyu, tama dago homugo te da isabo homu yali dao.
2CO 1:9 Mu po da wali, te da homu sęgę ebo te po tų ebo bidi jasgo te da isimainao po wali tiwai elama bidali. Te sęgę dabe te tiwai magi baso pedalaliwe? Te dena bomogo usu yabo homu idali weyu te sęgę daba pedalali. Dago te Godigo bomoba homu tialumainogo yai, te agai te isai bidi dabe augwali hodolobo bidi dao.
2CO 1:10 Te Esia tǫde dwai nai mugo da ela muainogo yali, tiali goli Godigo tede da ma dobola sai. Tama megi me te agai da ma sidu gebo dao. Tama tibaso, dago dena homu te tobage sę ebo God agaba dąų weyu, tama dago homu e tiwai ebo dao, sesemane sogo te dwai naigo da dolainogo ebadi, te agai da ma selama, tama da bugagia bidaibao.
2CO 1:11 Tama dagego tede Godibolo hanalu wabo po wabogo da tau sao. Tama tiyu te Godigo te we bidi hauwago aga hanalu wabo po tama odama, tama agai da tau saibao. Tama we bidi hauwago te agai da tau sali sęba homu koneama, tama Godibolo usu da po agai te yali dwagi yai sęde waibao.
2CO 1:12 Dago wiegi yai homu pemene ebo sę e kolesaga delide ebo dao: dago homugo hanilama po pusuyu da, te magi dwai sę isąbo te wiegi yai kolesaga me tama te Godigo da mabo te meda isąwai homu kolesagade bilibo po pusubao. Te e tǫde bidigo koneani kolesaga te dago wali pabeo. Menio. Te Godigo olo mayu tau sabo wiegi yai kolesagago naga da tau selama, tama da te tiwai kolesagade bilibao. Tama da te kolesagade te tigidali bidi tomode bilibo dao. Tama dageba dago te kolesaga me mu ela pidu geai dao.
2CO 1:13 Dago gasa po me dageba asęna tolobeo. Menio. Te po dagego nedama tama page koneabo po naga asębao. Tama megi dagego da gisiga konesiąyu, mesela naga koneai goli, dena homugo te dagego nosali da kuna koneaibao homu yai. Tama tiyu, te Genuai Bidi ma asobo sogo te dago dagede wiegi yai homu pemene ebogia, te dagego da dali wiegi yai homu pemene yagameo, te tiwai si naga yaibao.
2CO 1:15 Tama dagego enade te dwagi yai abagi homu ebo kolesaga tede eno homu si isąbaso, tama polobadu eno po weyu, te eno homugo hasia dage bidibo madibolo pelama, tama duga wiegi yai homu si sogo yagameo po wai.
2CO 1:16 Eno homugo hasia ena dage bidibo madibolo pabo homu yali, tama eno dage tagalama, tama ena te Masedonia genuai tǫ pedai teba paibao wali, tama eno te Masedonia tǫ tagalama, te ena dage bidiboba ma asaibao wai. Tama eno homugo dagego ena te Judia tǫba tagala palomainogo yai dao.
2CO 1:17 Tiali goli, te dageba pabo tų paliali, te ena dageba asobe. Magi basowe? Eno e tama tiabo po wai, tiali goli eno po subigila hasegelali homu elama tama eno po olo wali dawe? Ma, eno te yaibao wali sę isąbaso da, te eno e tǫde bidigo olo po wabo tiwai elama, tama ena te homu mu isąwai bidi dawe? Mu menio.
2CO 1:18 God da, te homu mu ebo bidi dao, tama aga da dali homu kęą pai bidi dao, tama agai dabolo te du walisiąbo po pusubo meni. Tama tialigo da, te dago dagebolo pusali po me te page si elaluali po meni. Polobadu eno dagebolo te ena dageba asaibao po wai. Tama homu mu naga eyu eno te po wai. Tiali goli eno gasa sę elalubaso, ena dageba ma asobo usube.
2CO 1:19 Ena me Sailas me Timoti, dago dage tomode pusali po, te Godigo Ogwa Jisas Krais agade te po pusali. Tama Krais aga subigila hasegelebo menio, aga da te aga homu polo subigila hasegelebo bidi meni. Agai aga dąų walali po togogobeo, aga yaibao wali sę te aga mu yaibao.
2CO 1:20 Te Godigo dąų wali po hauwa elalubao, tama Kraisde naga te dąų walali po tigidali mu usu nagasai dao. Tama tibaso, dago Godigo po odama, tama Kraisgo nogide naga dago te po weyu, “Awe, mu dao,” te pode olama, tama dago Godigo nogi ugwaba sabo dao.
2CO 1:21 Tama Godigo digi da dali dage dali bomo ilama, tama da Krais dali homugo kęą pai we bidi bidibao. Tama agai digi da dią selama tama sęba me muai dao.
2CO 1:22 Agai aga dąį iliyu daba sa muani, tama dago homuba Tedali Mobo Bidi mawai. Godigo te da dali gasa wiegi yai sę nosali yabo homu eyu, tama te Mobo Bidi hasia dabolo mani, tama dago te koneao wai: mu tama agai te tigidali wiegi yai sę da dali mu yaibao.
2CO 1:23 Te eno te polobadu asęna tolali pasgo te dageba asobode tibo po wai yaibaso da, teda Godigo eno te tibo po wali te hania haninagameo. Tiali goli, menio. Eno mu po naga obao. Te eno sęgę dageba mabo te eno hagela homu yali, tama tiyu te ena dage bidibo madi polo me te Korin buluba ma asobe dao.
2CO 1:24 Te dagego Kraisde konealubo po dąų olama, agaba homu tialubo te dago tonalubo tiwai me egobeo. Menio. Te agaba tialubo kolesagade dage bomo elama dolalubao. Tama dago sę dage dali eyu te dagego wiegi yai homu pemene ebo te pedalomainogo tebo dao.
2CO 2:1 Tama tibaso, ena homugo digi eno te po wai: ‘Te eno hasia asęna tolali pas te Korin bagego selama, tama augwali homu sęgę eyu bidali. Te ena augwali pageba pelama, tama augwaligo ebo kolesagade te augwaligo dwai sę yali po olama, tama augwali homu sęgę ma ilibo te eno hagela ebao,’ eno dage dali te homu yai dao.
2CO 2:2 Magi baso meni. Te eno dagebolo homu sęgę mayu da, teda dego te eno homu wiegi yai pemene iligowe? Te eno dage homu sęgę ilai digi da, teda ena wiegi yai homu pemene ilabo bidi menigi da.
2CO 2:3 Dage we bidigo te wiegi yai homu pemene enabolo mabo bage dao. Tama ena dage pageba pelama, te eno homu sęgę sidali weyu, te delide naga polobadu eno te pas asęna tolama tama dagego sali. Eno dage tigidalide te tiwai homugo koneai: te eno nai me delide te wiegi yai homu pemene ebaso da, teda dage tigidaligo me wiegi yai homu pemene teba ebo dao.
2CO 2:4 Mu dao, polobadu eno pas dageba asęna tolali, te sogo eno homu sęgę genuai badi, dene dali elaluali, tama ena gela hauwa dali weyu bidali. Eno te pas asęna tolali te eno dageba homu sęgę mawainogo ebeo. Menio. Eno te pas polobadu asęani te dagego ena konemainogo yali, eno dage dali dwagi yai homu eyu godolo ebo kolesaga te genuai mu dao.
2CO 2:5 Te dage tomode polobadu dwai penani sę eyu homu sęgę ilali bidigo, agai te homu sęgę enabolo naga me mabeo. Menio. Agai te homu sęgę meba te dage tigidaliba manio. Eno te po bomo elama wabo te ena hagela ebaso, tama eno te po wai, “Meba dao.”
2CO 2:6 Te dagego eno hasia asęna tolali pas po nedeyu, tama dagego eno po wali peyu te bidi buluba sąyu yali. Tama aga dali te sę ebogo te dwai dene te dage hauwa bidigo te bidi agaba wei ponani, te tibogo aga usu ilai, te bidigo ge neyu homu begelai dao.
2CO 2:7 Tama tibaso, dagego gasa kolesaga me megi iyąo. Te dagego agai sęgę sela sąnama, tama aga homu nagame ilao. Tiyu genuai homu sęgę mugo te bidi aiyaba mu elaluabuo.
2CO 2:8 Tama tibaso, eno homugo dagego te duga ebo dwagi yai homu eyu godolo ebo homu te agabolo bugagia ola mao.
2CO 2:9 Polobadu eno te pas asęna tolali, te dage eno usu naga sai. Eno koneainogo yali, dagego te tigidali naide eno po wali pogowe naga suainogo yai dao.
2CO 2:10 Tama dagego bidi me deligo sęgę sela sąbaso da, teda eno me eno tagalaibao. Awe, te eno sela sąbo gasa bidigo yali sę sęgę elaluyu da, te eno Krais gedude te sęgę sela sąbao, te dage tobade tau siyu tiaibao.
2CO 2:11 Eno te dago aga sęgę sela sąbo homu yali, tiyu Satango da tibo po ola menama tama da aiyaba elaluidali weyu tiaibao. Dago agai te we bidi dolabo dwai homu kolesaga koneai dao.
2CO 2:12 Polobadu gana ena pelama te Troas hanuba pedalama, te gesi wiegi yai po Kraisde pusainogo yali, tama Genuai Bidigo te po pusubo tų dalalio.
2CO 2:13 Tiali goli eno te moni homu tagalama, te homu nagame me elalubeo. Magi baso meni, te eno ama Taitus aga dage bidiboba pelama bidali, tiali goli aga ma asama eno aga me subeo. Tama tibaso, eno te Troas bage augwali tagalama, te Taitus gegegi peyu, tama ena asama te Masedonia moni tǫ pedaiba sabolai dao.
2CO 2:14 Tiali goli te Masedonia tǫde eno Taitus sulama, tama agai dagede dwagi yai po olama, megi eno usu da weyu Godibolo po odu gebao. Sesemane sogo agai da tau selama, tama dago Kraisgo bomode te wąbi hwįani usu yai. Tama dago sę ebode te Godigo po pusali, tama te bidi dabe augwaligo Krais konea sabo dao. Te koneani kolesaga te pusu ebo nai tiwai denami te tigidali habuba pabo tiwai ebao.
2CO 2:15 Mu tama, dena digi te pusu yai denami ebo nai te Kraisgo selama tama Godibolo mabo tiwai dao. Te denami te Godigo augwali ma sabo tų tomode bidibo we bidi dabe augwaliba me, tama te bidi dolabo tų tomode bidibo we bidi dabe augwaliba me te denami pedalobo dao.
2CO 2:16 Te bidi dolabo tų tomode bidibo hanigo te odobo denami te isabo denami odobo dao, tama augwali te isabo madi pedalaibao. Tama te Godigo augwali ma sabo tų tomode bidibo hanigo te odobo denami te bidibo ula sabo denami odobo dao, tama agai te bidibo ula augwaliba pedalomainogo yaibao. Te sęde Godigo da tau sisąyu tama dago te sę ebo usu egowe? Mu menio. Tialima aga da tau mu sabo dao.
2CO 2:17 Tiali goli, da te bidi hauwa augwali tiwai me ebeo, augwali tedali tedela pelama, te Godigo pode masigi sabo bisnis sę tiwai me ebo, te tiwai dago egobeo. Menio. Dago te sę Godide sali, tama dago te Godigo sęde tibo po subigila me wagobeo. Menio. Dago sę dolasa mu tigidali ela pobao. Da te Krais dali wadolama, tama homu mu naga eyu, tama God gedude dago agai po te we bidi dabebolo pusubo dao.
2CO 3:1 Eno te da bidi sigo ebo sęde te tobage po asębaso, tama dago megi ma gagalama te dena nogi ugwaba ma sainogo ebawe? Menio. Gasa bidi dabe, te dagebolo tibo po ola mabo bage, augwali dageba asiyu tama pas dagebolo mani. Augwali gasa bulude bidibadi, tama augwaligo te bulu page bidi dabebolo te tobage po wai, “Te Korin bagego da koneyu, da dali dwagi yai homu emainogo eyu, tama dagego augwalibolo tolabo pas asęyu dago nogoba muao,” te po olama, tama te tobage pas dageba tolasa asai. Me ma, augwaligo dage tagaliyu gasaba pai hagede, augwaligo homugo dagego me te tobage augwali tau sabo pas asęąo wai. Te bagego te augwa nogi ugwaba sabo kolesaga ebo dao. Tiali goli ena dali Timoti da sigo te tobage tau sabo pas mao po dagebolo wabeo. Menio.
2CO 3:2 Eno te asęna tolobo pasde po digi po dwasianu begeleyu tama obao. Te da bidi si te Godigo po pusubo sę ebo bidi mu dao po wabo pas, te pas te dage we bidi dao. Tama dage te dena homude asęai tiwai elalubao. Te pas nedebo sę tiwai eyu tama tigidali bidi augwaligo dage suyu, tama da sigo dage dali yali sę page augwaligo haninama hania konebo dao.
2CO 3:3 Dage haninama te dage te Kraisdu asai pas tiwai me deli bidibao. Te da sigo yali sęde Kraisgo te pas asęai. Agai te asębo medabugo sisi ąį selama tama me asębeo. Menio. Agai te bidibo ula elalubo Godigo Mobo Bidigo asęai. Agai te sawali yai masigi daide me asębeo. Menio. Agai te we bidigo homude asęai dao.
2CO 3:4 Da Kraisde wadolama tama Godiba homu tialubaso, dena homu si isąyu dago dagede yali sęde te tobage po wabo dao.
2CO 3:5 Mu tama, dena digi te sę ebo usu egobeo, tama tiyu dena digi dago te magi sę me deli yaibao po me wagobeo. Menio. God deligo naga te dago sę emainogo ebo usu ilibo dao.
2CO 3:6 Magi baso meni, aga digi da usu ilama, tama da te agai da tau somainogo eyu gesi noma dąų wali pogo sę ebo bidi bidibao. Te gesi noma da tau somainogo eyu dąų wali po te hasia asęani bomai po tego nai me egobeo. Menio. Te Godigo Mobo Bidigo nai dao. Magi baso meni. Te hasia asęani bomai pogo te bidi ela mubo dao, tiali goli te Godigo Mobo Bidigo bidibo ula te bidibolo mabo dao.
2CO 3:7 Te Godigo te we bidi dali polobadu yali sę dali, te agai megi ebo gesi sę dali, te sę side dago homugo kone paluyu dagalinao. Polobadu Godigo te bomo yai pogo po te sawali yai masigi daide asęai. Tama te bomo yai pogo ebo sęgo te we bidi dabe augwali isaboba pedalaibao. Te bomo yai pogo sę te da we bidi po tų ilama, tama da sęgę sai bage dao hania hanilabo sę dao. Tiali goli te sę te Godigo wiegi yai bomo yai ula dali pedalali. Tama Mosesgo gesabidi ula mu ebaso, tama Israel dabe wi eyu, augwaligo aga gesabidiba tonabo usu me ebeo. Te bomo yai pogo sę tidubadi te sę ebode te bomo yai ula elaluali. Tiali goli nosali te bomo yai ula silalio. Tama megi, megi Godigo sę ebogo te we bidi augwalibolo aga Tedali Mobo Bidi mabo dao. Megi Godigo wiegi yai gesi po pusubo sę ebode te bidi dabe augwali doloba pai nogi nogi yaibao, te sęde Godigo bomo yai ula te umabo mu elalubo dao.
2CO 3:10 Tama te bomai pogo sę ebo ula polobadu sali, te tiwai ula megi meni yanio. Magi baso meni, te nosali pedalali gasa sęgo aga aiyaba mu elaluama, tama genuai ula mu elalubo dao.
2CO 3:11 Magi baso meni. Te osogo elaluali sę aga te bomo yai ula elalualigo da, teda te Godigo Mobo Bidigo te we bidibolo maiabo gesi wiegi yai po sę, te sę sesemane sogo elalubao, te sę aga Godigo bomo yai ula umabo mu elalubo dao.
2CO 3:12 Awe, te Godigo te we bidi doloba pai nogi nogi yabo po pusubo sę, te sęgo bomo yai ulago te Mosesgo mani bomo yai pogo ula aiyaba mu elalubo dao. Dago te sęde te homu eyu tama dwagi yai homu ebaso, da wi me egobeo. Menio. Bomo eyu dago po hanilama pusudubao.
2CO 3:13 Dago te Mosesgo yali kolesaga tiwai me ebo meni. Agai aga gesabidi te ugwa namigo mesegeleyu palia sidu geai, tama te Israel dabe augwaligo te aga gesabide elalubo ula sula painogo ebo munu me suidali weyu idu geai.
2CO 3:14 Tiali goli te Israel dabe augwaligo homu mu puna peyu, kone tuą pali. Tama tigidali sogo augwaligo te Godigo te we bidi tau sabo poloba dąų wali po naga te bukude nedeyu iduai, te ugwa nami tiwai me augwa homude elalubadi, te megi e sogoba usu nagasoba. Menio. Te Krais delide naga Godigo te homu mesegaluali ugwa nami dagala sąbo dao.
2CO 3:15 Awe, tigidali sogo te Israel dabe augwaligo te Mosesgo asęani po nedeyu ebo, te ugwa namigo augwaligo homu mesegaluali tiwai elalubao, te megi e sogoba usu nagasobao. Tama te nedebo po page augwaligo kuna konebo menio.
2CO 3:16 Tiali goli, bidigo homu Genuai Bidiba ma begelegi pobaso da, teda agai te bidi aga homu mesegaluali ugwa nami dagala sąbo dao.
2CO 3:17 Te pode, te Genuai Bidi wali, te da aga te Godigo Tedali Mobo Bidi dao. Tama Genuai Bidigo Mobo te bidi me deli dali bidiyu da, teda te nai me deligo te bidi me kęąlugobeo. Menio. Aga olo mu bidibo dao.
2CO 3:18 Tama da tigidali, da te nai me deligo da gesabidi me au palialubeo. Tama Genuai Bidigo wiegi yai bomo yai ula daba asiyu, tama da te gesabidi subo ąį dula tiwai pedalama te ula te bidi dabe augwaliba pobao, tama augwaligo subo dao. Sesemane sogo dago ula umabo mu sabo, tama da hasegeleyu tama Genuai Bidi aga noma tiwai pedalobo dao. Genuai Bidi aga te Mobo, tama agai te tiwai kolesaga da dali ebo dao, tama te bomo yai ula te genilama mu ela pabo dao.
2CO 4:1 Godigo da homu dene eyu tau selama, tama te agai gesi dąų wali po pusubo sę dabolo mawai. Tama tialigo da, teda te sęde da bomo kimi isąyu me egobeo, te sę tagalabo homu me egobeo.
2CO 4:2 Menio. Dago te geme dualama hale ebo kolesaga te tudiba muanio. Te tibo po wabo kolesagade da me bilibeo. Tama dago Godigo po me hasegelegobeo. Menio. Dago mu po hanilama mu pusubo da, tama tigidali bidi deli deli augwa homugo dago pusubo po mu po dao konemainogo ebo dao, tama augwa dago ebo sę God gedude konemainogo ebo dao.
2CO 4:3 Tiali goli te dago pusubo gesi wiegi yai po, te po te geme duala sobaso da, teda te hagayabo we bidi dabe augwaligo gedude naga te po te geme dualubao.
2CO 4:4 Magi baso meni. Te e tǫde tibo god Satan agai te Kraisgo poba augwa homu begi pisąbo bidi dabe augwaligo homu kone tuą palali. Magi baso meni, Krais aga da te God tiwai mu dao, tama agai dabolo Godigo noma mu hanilibo dao. Tama te Kraisgo genuai bomo yai ula waselabo wiegi yai gesi po, te po te giliga nanobo tiwai dao. Tiali goli te hagayabo we bidi augwaligo te pogo nanobo ula suidali weyu, Satan agai augwaligo homu kone puna palama tuą palali.
2CO 4:5 Dago denade po te we bidibolo me pusugobeo. Mu menio. Dago e tiwai po pusubo dao: “Te Krais Jisas aga dago Genuai Bidi dao, tama Jisas tobade da te dagego sę ebo bidi bidibao,” te tiwai po pusubo dao.
2CO 4:6 Magi baso meni, e tiwai dao. Polobadu mu Godigo te po wai, “Te be hulia sai madi ula pedalomainao,” wai. Tama te po wali God aga ula digi da dali bidibao, tama da homu ula mu ilibo. Te ula e dao: dago te Godigo bomo yai ula te Krais gesabidide elalubo koneai dao.
2CO 4:7 Tiali goli ena dali, te ena dali deli sę ebo bidi dabe dali, dena te bomo yai ulade po pusubo wiegi yai sę elalubo, te tǫgo nigai olo sene tomode elalubo tiwai ebao, te dena isibo tigide naga elalubo dao. Te tigidali bidigo konemainogo ebao, te Kraisde wiegi yai gesi po pusubo sę ebo wiegi yai genuai bomo mu, te Godigo bomo naga dao. Te dago menio.
2CO 4:8 Edao. E tiwai dao, te tigidali badu te bidi dabego dabolo te sęgę madu gebo dao, tiali goli tego da mu dolobeo. Te hauwa sogo dago dena pabo tų hania konebo menio, tiali goli tigidali sogo dena tų me elalubo dao, te mu dąų wabeo. Tama tibaso da Godigo sęde bomo kimi munu me isibo menio.
2CO 4:9 Te boi bidi dabe augwaligo dwai sę da dali yainogo da pobesa bilidu gebo dao, tiali goli Godigo da me tagalobeo. Augwaligo da elama tulaluidu gebo dao, tiali goli da mu me dolobeo.
2CO 4:10 Polobadu te gasa bidi dabe augwaligo Jisas aiyaba elalubo homu eyu, tama agabolo dene menama tama aga isali. Tama te tiwai me te boi bidi dabe augwaligo dabolo sęgę megi mayu, tama dene me mayu, tama da hauwa sogo pąde isali, te Jisas tobade. Tialima dago Jisasgo bomo selama tama aga sę eyu, te gasa bage augwaligo te suyu konebo dao, te gų pagede ma hodolali bidi Jisasgo da isabo tigide bidibo bage tau siyu, tama dago agai sę tama ebo dao. Augwaligo da dali tama homu ebo dao.
2CO 4:12 Tama tibaso, te e tiwai dao: te isabo sę te dade hauwa sogo idubao. Tiali goli dago Kraisgo bomo elaluyu, tama agai gesi wiegi yai po pusubo sę ebaso, tama dagego te bidabo ula bugagia siyu tama bidada peyu, bidada paibao.
2CO 4:13 Awe, te isabo sę enade hauwa sogo idubao. Tiali goli dago Godigo po pusubo sę tagalobeo. Magi baso meni. Polobadu te Godigo po bukude bidi me deligo te po wai, “Eno Godiba homu elalubaso, eno po hanilama pusai,” te po asęani. Tama dago me te tobage homu eyu, dago Kraisba homu elalubaso, tama dago te Godigo gesi wiegi yai po te we bidibolo me hanilama pusubo dao.
2CO 4:14 Dago homu si isąyu tama mu koneanio, Godigo dago Genuai Bidi Jisas hodolali, tama agai da me Jisas dali hodolama, tama da dali dage dali aga pąba odasa paibao, te da tigidali aga gesabidiba pedalaibao.
2CO 4:15 Magi baso meni. Te tigidali sęgę te da Godigo po pusubo bidi dabeba pedalali, te dage tau somainogo tama yai. Nosali Godigo olo mu tau mani wiegi yai kolesaga te we bidi umaboba ela pelama, tama genilama augwaligo usu da po umabo mu Godibolo waibao, tama aga nogi ugwaba mu saibao.
2CO 4:16 Dago te homugo konebaso, tama da Godigo sęde bomo kimi munu me isibo menio. Te mu tama, dago tigi dolainogo ebo dao. Tiali goli magigo meni, dago homu dali noma dali si te tigidali deli deli sogo gesi ma pedaliyu ebo dao.
2CO 4:17 Te e tiwai: te da Godigo po pusubo bidi dabe, te dabolo pedalubo sęgę te dwasianu dao, tama te pęwadage sogo naga osogo elaluaibao. Tama da e tǫde bidibadi te sęgę tolobaso, nosali dagalude dago te sesemane sogo bugagia bidada peyu, bidada pabo wiegi yai nai mu saibao. Tama te dagalude bugagia bidabo te wiegi yai sęgo te dago megi elalubo dwasianu sęgę aiyaba mu elaluaibao, te wiegi yai mu naga yaibao.
2CO 4:18 Magi baso meni. Dago te gedugo e tǫde subo nai dabeba dago tonǫlǫ me ebo meni. Te menio. Dago koneani, dago gedugo subo nai, te pęwadage sogo naga elaluaibao. Tama dago gedugo te susiąbo nai, te sesemane sogo bidada peyu, bidada paibao. Tama tibaso, te tobage naiba naga dago dena gedugo tonǫlǫ ebo dao.
2CO 5:1 Dago te daba pedalobo haniani sęgę tede moni homu me ebo menio. Magi baso meni. Dago te tiwai koneanio: te da e tǫde megi elalubo tigi da, te dena osogo bidabo be tiwai dao, te nami ugwa be tiwai dao. Tama te osogo bidabo be hųgibaso da, teda Godigo da maiabo be me deli elalubao. Te be bidigo nogogo me sę ebeo. Te dagalude elalubo, tama te be sesemane sogo elalua peyu, elalua paibao, te be gamonaibao.
2CO 5:2 Megi da e tǫde tigi elalubadi, te haniani sęgę toloyu, tama dago te hagela homu eyu me sogo gela weyu bidibao. Magi baso meni. Dago dena te dagalude elalubo be, te dago gesi tigi, tego te da tigi te gudubo ugwago mesega sabo tiwai emainu godolo ebo dao.
2CO 5:3 Dago tigide te gudali da, teda da tigi bolu olo tiwai me bidibo augwaligo sugobeo.
2CO 5:4 Awe, da e osogo bidabo ugwa bede me bidaludu, tama da sęgę siyu gela weyu bidibao. Te dago poloba tigi tagalainogo homu eyu me wabeo. Menio. Dago homugo dago gesi tigi mubode, te gesi ugwa tiwai elama, teda te isibo tigi te aga bidibo ula somainogo ebo dao.
2CO 5:5 Godigo digi dago te gamonabo tigi somainogo dabolo sisi ilai dao. Tama agai Tedali Mobo Bidi dabolo mani. Te Godigo me badu nai dabolo nosali mawainogo te agai hasia podolali nai te Tedali Mobo Bidi dabolo mani, tama dago e tama koneai: mu tama te agai tigidali nai dabolo maiabo homu yai, tama mu mawaibao.
2CO 5:6 Tama tego dago homu sesemane sogo dąų waliyu ebao. Dago tede bomo elalubao. Dago koneani, megi te dago tigi te dena bidibo be tiwai elalubao. Tama megi e sogo da ede me bididubadi, da Genuai Bidigo bulude aga dali me bidibeo.
2CO 5:7 Menio. Tama megi da e tǫde bididubadi, dago dena homu tigidali agaba muyu tama aga dali bilibo dao. Dago gedugo aga susiąbadi tama tibo dao.
2CO 5:8 Tiali digi, dago homu sesemane sogo dąų waliyu elama dago bomo elalubao. Dago homugo e elalubo tigi tagalama tama Genuai Bidi dali hodobo bugagia mu bidigi pabo homu godolo ebo dao.
2CO 5:9 Tama da dena tigide me bididubadi, ma tigi tagalama gasaba bidigi pai, te magigo menio. Sesemane sogo dago homu bomo elama, te Genuai Bidigo godolo yabo kolesaga tigidali naga inao homu ebo dao.
2CO 5:10 Magi baso meni. Dago koneani, da tigidali te Kraisgo po tųde hania hanilama pedalaibao. Tama da megi e bidibo tigi dali bidiyu tama wiegi yai kolesaga ebaso, ma dago dwai kolesaga eyu me yali da, teda da tigidali deli deli te dena yali kolesagade usu nama tama dago te tiwai saibao.
2CO 5:11 Te da tigidali te moni po tųde pedalaibao homu ebaso, da Genuai Bidide wi eyu, tama te bidi dabe augwaligo te da Godigo po sela pabo bidi dabe mu dao te hania konemainogo eyu, dago augwalibolo homu bega sabo po weyu bidibao. Godigo da gisiga koneani. Tama eno homu te dage me, dage deli deli duga te dwai sę dali dwagi yai sę dali dagalabo homugo ena hania koneai, te ena homu mu eyu te Godigo sę ebo bidi bidibao.
2CO 5:12 Te dagego homugo da wiegi yai bidi da homu emainogo, dena digi dena nogi ugwaba siyu te po me wabeo. Menio. Dage tomode bidi meba hagoma homu eyu, augwa nogide naga olo wiegi yai homu pemene ebo bidi dabe bidibao, augwa ebo kolesagade wiegi yai homu pemene me isąbo bage dao. Tama bidiyu, augwaligo da Godigo po sela pabo bagede nogi posobo po wabo dao. Tama te ena te homu mu eyu Godigo sę ebo bidi bidibao po, dago te po asęna tolali, te u tobage bidigo gedude dagego da dali wiegi yai homu pemene emainogo ebao. Dago homugo dagego te bidi dabego wabo ena nogi posobo po te po wei ponabo usu yaibao homu yali.
2CO 5:13 Eno te Godigo sę bomo ebadi, tama gasa bidi dabe augwaligo ena dene mabo dao. Tama ena dali boi bidi homu ebo bage augwaligo te sę sulama tama “Te bidi Pol aga polobo bidi mu dao,” augwaligo enade te po obao. Te usu dao, eno Godigo sę me yaibao. Me ma, da Godigo sę ebo bage, da homu dolo elaluyu bidibaso, teda tama bidiyu, dena sę eyu, tama tebogo dage tau sabo da, te dage tobade te sę ebo dao.
2CO 5:14 Magi baso meni. Te Kraisgo da dali dwagi yai homu eyu godolo ebogo, tebogo naga da homu hodolama tama dago Godigo sę ebo dao. Magi baso meni, dago homugo bugagia kone palama, tama te tiwai homu koneanio: bidi deligo da tigidali hasegelama tama da tobade aga isalio, tama tede da tigidali isai tiwai yai dao.
2CO 5:15 Tama agai da tigidali hasegelama isalio, te agai tama tibaso, da bidibo ula dali bidibo we bidi dago dena digi homu koneama munu me biligobeo. Menio. Te da tobade hasegeleyu isama tama ma hodaluali bidi, te dago aga homu naga wali peyu tama aga sę eyu bilao.
2CO 5:16 Tama tibaso, megi dena digi te poloba te tǫde bidi dabego ebo homu kolesaga wali me pisąma tama bidi me deligo kolesaga me dagalogobeo. Mu tama, polobadu dago te tǫde poloba homu kolesaga wali peyu tama Krais dagaloyu tiwai. Tiali goli megi dago aga te dagalabo kolesagade me dagalobeo.
2CO 5:17 Tama tibaso niwai bidi Kraisba wadolobo si da, teda Godigo aga gesi noma bidi mu ilama pedalaibao. Bugagia odao. Megi te bidigo ebo poloba kolesaga tigidali silalio, tama gesi kolesaga pedalai dao.
2CO 5:18 God aga digi te tigidali hasegelebo sę page bidi dao. Polobadu da agade boi bidi bidali, tiali goli Kraisgo yali sęde Godigo da aga dali deli homu ilama, tama da aga abagi hani pedalai. Tama agai te sę dabolo mani, te aga tau selama te aga dali boi bidi homu ebo bidi dabe augwaligo aga dali abagi homu pedalomainogo ilibo sę dabolo mani.
2CO 5:19 Dago pusubo po e tama tiwai: God agai te Kraisgo yali sęgo te tigidali we bidigo te boi bidi sę ebo kolesaga tagalama, tama aga dali abagi homu pedalomainogo yai. Agai te augwaligo yali dwai sęde homu kone ma ebeo. Tama agai dabolo te boi bidi dabe aga dali abagi homu ilabo po pusubo sę dabolo mawai dao.
2CO 5:20 Tama tibaso, dago te Kraisgo pedauwalide po selama tama agai po pusubao. Te tiwai God aga digi te tigidali bidi dago pedauwaligo i obao. Dago Kraisde digi te po tigidali we bidibolo pusubao, tama dago te tiwai po augwalibolo obao, “Te dagego boi bidi homu ebo kolesaga tagalama, God dali abagi homu ebo kolesaga mu yao,” dago te po pusubo dao.
2CO 5:21 Te bidi Krais agai dwai sę me isąwai, tiali goli da tobade Godigo dago dwai sę yali sęgę tigidali agaba sisinama, tama aga te dwai sęgę sai bidi tiwai mu pedalai. Agai tama tiali te da Kraisde wadolomainogo yali, tama agai bomogo da te Godigo gedude doloba pai we bidi pedalomainogo yai dao.
2CO 6:1 Dago sę God dali eyu tama dago te tiwai po bomo elama dagebolo obao: dagego te Godigo olo mani wiegi yai tau sabo kolesaga salio, tiyu dagego agai te olo mu mani wiegi yai tau sabo kolesaga tagalabuo, te kolesagago agai sę dage tomode bugagia emainao.
2CO 6:2 Magi baso meni. Polobadu Godigo aga we bidi hanibolo te po wai dao, “Te eno bodolu mani wiegi yai sogo, eno nago po odai dao. Tama te bidi dabe augwali ma dobola sabo sogode, eno nage tau sali.” Odao! Megi naga te bodolu mani wiegi yai sogo. Megi e sogo naga te Godigo da ma dobola sabo sogo dao. Tama tibaso, dagego agai olo mabo wiegi yai tau sabo kolesaga sula tagaligimio.
2CO 6:3 Dago homugo te bidi dabe augwaligo dwai po te dago ebo sęba me badi te tama po waidali homu elama, tama augwaligo Godigo po tudiba muidali weyu, dago te bidi dabe augwali sągąde magi nai me deligo enama tulaluabo sę me egobeo.
2CO 6:4 Menio. Da Godigo sę ebo bidi bidiyu, tama tede sesemane sogo dago wiegi yai kolesaga ebogo tigidali bidibolo dago ola mayu, te tiwai ebao: te haniani sęgę daba pedalubaso, tama dwai naigo da dolobadi me, tama te dabolo pedalobo dwai sogo tego da dąų obadi, te da bomo elama mu dolalubo dao. Tama tibaso, tigidali bidigo konebo dao, te da Godigo sę ebo bidi dabe mu dao.
2CO 6:5 Bidi dabe augwaligo da elama tama da kalabus iliyu yai. Te boi bidi dabe augwaligo da pobesa bilama tama moni po dagą weyu, po dwai i olama dabolo wai. Da moni sę dene mu yali. Da hauwa sogo bugagia godege me pisąwai. Tama da nai sili bidiyu yai dao.
2CO 6:6 Dago meda isąwai wiegi yai kolesaga eyu, tama Godigo pode dago wiegi yai homu kolesaga elaluyu kuna koneai dao. Bidi dabego dabolo dene mani goli, dago wado po polo me wasiąbo. Dago te bidi tau siyu, augwalibolo wiegi yai kolesaga ilibo dao. Dago te Tedali Mobo Bidigo bomo elalubao. Dago dena homu mu eyu, te dwagi yai homu eyu godolo ebo kolesaga te bidi dabe augwalibolo ebo, te pedauwalide naga te kolesaga ebode me wabo meni. Tama dago te tobage kolesaga ebadi, gasa bidi dabe augwaligo koneagameo, da te Godigo sę ebo bage mu dao.
2CO 6:7 Dago mu po pusubo dao. Dago dena sę Godigo bomode ebo dao. Dago doloba pai kolesaga ebo dao, tama tebogo te wąbi hwįbo nai te dolo nogode me, pobase nogo me elalubo tiwai elama, tama tede dago wąbi hwįbo dao.
2CO 6:8 Tama bidi mebago dago nogi ugwaba sabo dao, tama bidi mebago da nogi aiyaba elaluyu ebo dao. Mebago posobo po dwai dabolo wabo, tama mebago gasa bidi dabe augwalibolo te dago wiegi yai kolesaga ebo po pusubo dao. Boi bidi dabe augwaligo da tibo po weyu, te we bidi dwai sę tomoba kegebo bidi da homu ebo dao, tiali goli menio, dago mu po naga wabo dao.
2CO 6:9 Te we bidi mebago gedude te da nogi meni yai bage da, da koneabo bidi meni ebo tiwai ebo dao, tiali goli bidi hauwago da koneani. Da te isainogo ebo bidi tiwai ebo dao, tiali goli meni, da bidibo ula dali me bididubo dao. Te Godigo da dodoloyu te keloago elebo tiwai ebo, tiali goli agai da me ela mubeo.
2CO 6:10 Da Godigo sę ebo bidi dabe, da te homu sęgę mu hauwa sogo ebo dao, tiali goli te magigo meni, sesemane sogo dago homu pemene wiegi yai ebo dao. Da te magi nai meni yai bidi tiwai bidibo dao, tiali goli tagala, dago te mu wiegi yai nai hauwa we bidi hauwabolo mabo dao. Da te bidigo gedude te magi nai deli me meni yai tiwai ebo dao, tiali goli te meni, dago tigidali nai mu elalubo dao. Tama tebogo te tigidali we bidibolo hania ola mabo dao, da te Godigo sę ebo bidi dabe mu dao.
2CO 6:11 Dage Korin bulu we bidi dabe, dagebolo dago dena homu hania hanilama dagebolo megi tama wai dao. Dago dage dali dwagi yai homu eyu godolo mu ebo kolesaga te genuai mu dao.
2CO 6:12 Dago dena homu dagede me palia sabeo. Menio. Dago dage godolo mu ebao. Tiali goli duga digi duga homu da dali palia selama, tama da deli homude me bidibeo.
2CO 6:13 Megi eno dagebolo wabo po te ayago aga waibolo po mobo mayu wabo po tiwai obao: dabolo te kolesaga wei ponoyu, dagego me da dali dwagi yai homu eyu, da godolo mu genuai yao.
2CO 6:14 Te Godigo po wali pisąwai bage augwali te tedali gasagi yai, tama dage augwali dali kisasa bilama tama augwaligo ebo kolesaga tau me selamuo. Menio. Magi ilama tama te doloba pai kolesaga dali, te bomai po sela sąbo kolesaga dali, te si dali abagi omainu yaibawe? Menio. Mena tama te ula te be hulia sai dali deliba sisinimainogo yaibawe? Te usu egobeo.
2CO 6:15 Ma, te Krais te Satan dali deli homu elama bidibo da, agawe? Te Kraisde konealubo po dąų wali bidi dali, te konealubo po dąų wasiąwani bidi dali, te augwali sigo deli homu tolaluaibawe? Mu menio.
2CO 6:16 Mena tama dago te Godigo wiegi yai be dali, te bulu haubo bidigo dali si te deli madi sisinaibawe? Te tiwai me egobeo. Dagego koneani, da digi, da te bidibo ula elalubo Godigo bidabo be tiwai dao, te polobadu Godigo te tiwai po wai, “Te ena augwali dali bidiyu, tama augwali tomode bilaibao. Tama ena augwaligo God bidiyu, tama augwali eno we bidi bidaibao.”
2CO 6:17 Tama Genuai Bidigo te aga we bidigo te dwai sę ebo bage tagalamainogo eyu po ma wai, “Tama tibaso, dagego augwali tagalama, tama gasa madi bidigi pao, tedali mu bidao. Tama dagego te augwaligo dwai sę yabo meda yai nai munu me tolamuo. Tama ena digi eno dage saibao.
2CO 6:18 Tama ena dagego Aya bidiyu, tama dage eno wai ogwa me wegi me bidaibao, Genuai Bidi tigidali bomo page bidi, agai te po wai dao.”
2CO 7:1 Eno ama dede muo, dago te Godigo te da dali dąų wali po dabe tama salio. Tama tibaso, dago dena tigide me homu elalubo meda tigidali sela sąnama tama wiegi yai tedali bidinao. Tama dago Godide wi elama, tama wiegi yai doloba pai kolesaga mu naga sesemane sogo wali pinao.
2CO 7:2 Dagego da dali dwagi yai homu eyu da godolo mu genuai yao. Magi baso meni. Dago bidi me delibolo dwai sę me ilibeo. Dage deli me dolosiąwai. Te dago bidi me deli tibo po ola menama, agai nai anoma elama me sisąwai.
2CO 7:3 Eno dagebolo te tiwai po kisiliyu me wabeo. Magi baso meni. Eno tama tiwai po polobadu walio: dago dage dali dwagi yai homu eyu godolo mu ebao, tama dage isibo si da, teda da me dage dali isabo homu yaibao. Tama dage bidibo ula elaluyu bidibaso da, teda da te bidibo ulade dage dali bidabo homu yaibao.
2CO 7:4 Eno dagede homu si ebo meni. Eno homu pemene wiegi yai dagebolo ebao. Te tigidali dabolo pedalobo sęgęde, te eno homugo dage koneama, tama tede ena homu dua nagame mu ilama bidibo, tama eno homu wiegi yai pemene mu elalubo dao.
2CO 7:5 Magi baso meni. Polobadu da aselama te Masedonia tǫba sabolali, tama tede me da tigi dwasianu toma me nabeo. Menio. Te haniani sęgę daba pedalai. Dago po konila te Godigo po odisąbo bidi dabe dali wali, tama da homude wi yali.
2CO 7:6 Tiali goli God da, te sęgę elalubo bidigo homu dua nagame ilibo bidi dao. Agai te Taitus da bidibo madi asobogo agai da wiegi yai homu nagame ilai dao.
2CO 7:7 Taitus te da bidibo digi sabalobode, tede naga te Godigo da wiegi yai homu nagame me ilibeo. Menio. Dagego Taitusgo homu nagame ilibaso, tama agai te po sela asali, tama tede me Godigo dago homu nagame ilama bomo mani. Taitusgo te dagego da suabo homu godolo mu eyu, tama dagego enade homu dene eyu gela wabo po dabolo pusali, tama dagego ena dali deli homu elama bidabo homu ebo po me wali. Tama eno homu pemene wiegi yai hauwa mu eyu bidibao.
2CO 7:8 Eno koneani, eno asęna tolali pasgo dagebolo dene mani, tiali goli tede eno ge nabo meni. Mu tama, polobadu hasia bolo eno tede ge nani, tiali goli megi da menio. Eno koneani, te pasgo dagebolo homu sęgę mani, tiali goli te pęwadage sogo naga yalio.
2CO 7:9 Taitusgo po dabolo pusubaso, megi eno homu pemene wiegi yai ebao. Eno dage homu sęgę yalide wiegi yai homu pemene me ebeo. Menio. Eno te homu sęgęgo dage homu begelali, tede eno wiegi yai homu pemene ebao. Eno koneani, dagego duga homu begelemainogo eyu, Godigo digi te homu sęgę dageba pedalomainogo ilali. Tama tibaso, dago pogo dage dwasianu me dolobeo, te eno asęani pogo dage te tiwai tau sai dao.
2CO 7:10 Homu sęgę ilibo te Godigo nigilibo, tebogo da bidi dabe dago dwai sę yalide ge neyu tama homu begelemainogo ebo dao, tama te kolesagade Godigo da ma saibao. Tama dago te homu begelebo kolesagade te ge negobeo, te dwagi yai naga dao. Tiali goli te tǫde bidi dabe augwaligo homu sęgę ebo kolesagago, tede te isibo sę pedalobo dao.
2CO 7:11 Dagego bugagia homu koneao. Te homu sęgę Godigo dagebolo mani, tego agai te haniani wiegi yai kolesaga dagebolo pedalomainogo yali. Agai dage asesa selama, tama dage hogodolama duga po dodolomainogo yali. Agai dage hodolama te dwai penani sę yali bidi wado ilama, tama dage Godide wi yaibao. Dagego homugo da suabo homu elama tama gela weyu, tama dagego te dwai penani sę yali bidi dodolobo sę bomo elama yabo homu yai. Te dage tomode te bidi me deligo dwai penani sę yali, tede te tigidali badude dagego ebo kolesaga te po dodoloyu yali. Dagego kolesaga tama tiwai hania hanilama pedalai dao. Tama tiyu, te dagego te bidigo yali dwai sęde megi sęgę me elalubo menio.
2CO 7:12 Te mu tama, polobadu eno te pas dagebolo asęna tolali. Tiali goli eno te bidi me deligo dwai sę yali te homu elama te po me asębeo. Tama eno gasa bidi homu me ebe, te agabolo dwai sę yali bidi me homugo konebeo. Eno homugo augwali siba naga homu elama te po polobadu asęna me tolobeo. Menio. Eno te dagego kolesaga hanilama pedalomainogo yali, tama God gedude duga bugagia konemainogo yai: dagego da godolo mu yalio. Tede me tama eno te polobadu pas dagebolo asęna tolali.
2CO 7:13 Dagego te kolesagago da homu nagame ilama dua bidai. Tama dago homu nagame naga me ebeo. Menio. Dago homu wiegi yai pemene yai. Magi baso meni. Dage tigidaligo te Taitusgo homu noma toma nabo nigilali, tama aga wiegi yai homu pemene yalio. Dago te sulama, tama da wiegi yai homu pemene mu idubadi bidali.
2CO 7:14 Polobadu eno dage nogi te Taitus gesabidide ugwaba sali, tama megi eno te pode ena hale me sabeo. Menio. Tigidali po dago dagede wabo po, te mu po naga wai dao. Tama tiwai naga eyu, dago dage nogi te Taitus gesabidide ugwaba sali, tama te eno dagede agabolo pusali po me hanilama pedalali, te mu po naga dao.
2CO 7:15 Taitus aga dage bidibo madi pedalobaso, tama dage wi elama didibili eyu, tama dagego aga siyu geseali, tama dage tigidaligo agai po wali pai. Agai megi te homu me konedu tama agai dage dali dwagi yai homu eyu godolo mu ebo homu genuai pedalobo dao.
2CO 7:16 Megi eno homugo mu konebo, eno dage dali homu si ebo meni, te dagego tigidali kolesaga dolo mu ebaso, eno homu dageba tia pabo te usu dao.
2CO 8:1 Ama dedeo, te Godigo po odobo we bidi hani dabe te Masedonia moni tǫ tomode te haniani bulude elalubao. Tama dago homugo dagego koneao, te Godigo olo tau sabo wiegi yai kolesagago augwali tomode yali sę, te dagego koneao. E tiwai dao.
2CO 8:2 Genuai sęgę augwaliba pedalama, tama tego augwali homu usu sabo sę mu yali. Tama te sogo augwali magi nai meni yai mu bidali. Tiali goli magigo meni homu elama, augwaligo wiegi yai homu pemene genuai mu dali elaluali. Tama tiyu, augwaligo te gasa Godigo po odobo we bidi tau sabo homu mu genuai elama, tama augwaligo masigi hauwa sisinai dao.
2CO 8:3 Eno koneama tama eno po hanilama obao: augwaligo augwa digi homu kolesaga wali pelama tama te masigi muani. Augwaligo maiabo nai usu selama, tama te tiwai augwaligo mawai. Awe, augwaligo te maiabo masigi aiyaba elaluama tama umabo mu madu geai.
2CO 8:4 Augwaligo te dago usu da po omainogo bomo mu elama augwaligo me te Godigo po odobo gasa we bidi dabe dali hodobo augwaligo augwa masigigo te Godigo Juda we bidi olo tau sabo sę yaio po bomonama wali.
2CO 8:5 Polobadu dago augwalide tama tiwai homu yali, ‘Te augwaligo mone meba mawaibao,’ wai. Tiali goli augwaligo te tiwai naga me ebeo. Menio. Hasia bolo augwa bolo augwa digi te dago Genuai Bidibolo menama, tama augwaligo te Godigo homu wali pelama, tama augwa digi dabolo me mawai dao. Tama elama tama augwaligo augwa tau sabo masigi me mawai dao.
2CO 8:6 Polobadu Taitusgo te Juda bage olo tau sabo wiegi yai kolesaga ebo sę dage tomode hodolali. Tama te Masedonia we bidi augwaligo genuai olo tau sabo sę ebaso, dago bomo eyu agai dage tau siyu, tama dagego duga tau sabo sę silimainogo ebao.
2CO 8:7 Te tigidali sęde dagego kolesaga wiegi yai mu ebo dao. Dagego homude Kraisde konealubo po dąų olama, tama dagego te konealubo po hanilama pusubo sę bomo ebo dao. Dagego kolesaga hauwa koneama, tama dagego Godigo sę yabo homu mu hodaluali. Dagego da dali dwagi yai homu eyu godolo ebo kolesaga, tede me dagego bugagia mu yali dao. Tialima te tiwai naga megi dagego te gasa we bidi olo tau sabo wiegi yai kolesaga ebo sę me bugagia mu yao.
2CO 8:8 E tau sabo sęde eno bomai po dagebolo me mabo meni. Te menio. Eno dagebolo te meba bidi dabe augwaligo te wiegi yai sę yabo homu hodaluali po obao, tama te kolesagade eno dagego ama dabe dali dwagi yai homu eyu godolo ebo kolesaga usu sobao. Te dago koneainogo, te dagego te we bidi godolo ebo kolesaga te nai mu dao.
2CO 8:9 Magi baso meni. Dagego te dago Genuai Bidi Jisas Kraisgo olo tau sabo wiegi yai kolesaga ebo sę koneai. Aga God dali hodobo bidiyu, tama genuai nogi dali, bomo yai ula dali si umabo elalubadi, tiali goli agai dage tau somainogo eyu tama aga magi nai meni yai bidi pedalali. Tama aga te magi nai meni yai bidi tiwai pedalaligo te dagebolo te God dali bidiyu bomo yai ula umabo sabo tų dawai dao.
2CO 8:10 Te tau siyu maiabo masigi, tede eno yali homu megi eno dagebolo pusubao: te hasia bidali kibu bede dagego te sę yabo homu godolo naga hasia yai dao, tama te Masedonia tǫde bidibo we bidi augwaligo nosali te sę yabo homu yai.
2CO 8:11 Teda te sę megi tama dagego ela sili yao. Polobadu dagego te sę yabo godolo polo yali, tama tiwai yali gilama megi me dagego te sę polo silao, te duga nai usu nama te mone gego tiao.
2CO 8:12 Magi baso meni. Te bidigo godolo mu elama nai maiabo homu ebaso da, teda Godigo te kolesaga godolo mu yaibao. Godigo te bidigo elalubo nai tigidalide homu koneama, tama agai kolesaga tede dagalaibao. Agai te aga elalusiąbo naide me dagalogobeo.
2CO 8:13 Te Juda bage tau siyu, tama dagego duga mone hauwa mayu, tama augwali bugagia bidiyu, tiali goli dage sǫą peyu emainogo eno te homu ebeo. Te menio. Eno homugo dage bidibo tigidali ususu si naga elama bidimainogo homu ebo dao.
2CO 8:14 Megi e sogo dagego nai hauwago te nai sǫą pali we bidi usu numainogo yaibao. Tama nosali me sogo dage nai sǫą pelama tama te Juda dabe augwaligo nai hauwa elalubaso da, teda augwaligo naigo dage usu numainogo yao, eno te homu ebao. Te kolesagade te dage dali augwali dali si tiwai usu yaibao.
2CO 8:15 Te bukude wali po e tiwai dao, “Te bidigo te tubo nai nogi mana hauwa sali bidi, te hauwa me meni yani. Tama te nai dwasianu sali bidigo, te aga te nai me sǫą pabeo.”
2CO 8:16 Eno Godibolo po weyu usu da po obao, agai te bidi Taitusgo homu hodolobaso, tama agai dago homu tiwai ebao. Agai me dage tau sabo homu godolo mu ebo dao.
2CO 8:17 Magi baso meni. Agai dago Korin buluba pao wali po wali pali. Tiali goli aga me te sę yabo homu godolo mu ebaso, tama aga digi aga homugo dage bidibo madi asabo homu ebao.
2CO 8:18 Tama dago ama me deli aga dali hodobo tagala palaibao. Te tigidali bulude te Godigo po odobo we bidide te ama agai Godigo gesi wiegi yai po pusubo sę ebo nogi elalubao.
2CO 8:19 Tama te tiwai naga me ebeo. Menio. Te haniani bulude bidibo Godigo po odobo we bidi augwaligo te aga sa munama, te aga da dali Jerusalem hanuba biliyu, te olo tau sabo wiegi yai kolesaga tau sabo sę emainogo yai. Dago te Genuai Bidi nogi ugwaba siyu te sę ebao, tama te bidi dabe augwali ola menalama augwaligo konemainogo yali, te dago te tau sabo sę yabo homu mu ebao.
2CO 8:20 Dago te olo mabo genuai nai tonalubo kolesaga ebode te bidi me deligo dwai po da dali weyu, “Polgo te Juda bagebolo olo mu maiabo masigi meba buga salio,” te tobage po waidali weyu dago homu yai. Tama tiyu dago te ama dali tagala palobao.
2CO 8:21 Dago wiegi yai dolo kolesaga yabo homu ebo, te dago Genuai Bidigo gedude naga te kolesaga me egobeo. Menio. Te e tǫde bidi dabego gedude dali te kolesaga ebo dao.
2CO 8:22 Tama tibaso, dago dena ama me deli augwali si dali hodobo tagala palobao. Hauwa sogo dago aga haniani sęde usu sali, tama agai sę bomo elama ebo dago suali. Megi agai homugo te dagego wiegi yai kolesaga naga ebo homu bomo ebaso, tama agai te sę yabo homu bomo ebao.
2CO 8:23 Te Taitusde dagego konemainogo ebao: aga tama ena dali deli sęde dage tau sabo sę ebao. Tama dago ama si aga dali hodobo pabo bage, te dagego konemainogo yai: augwali si te Godigo po odobo we bidigo sa muani tagala palali bidi bidibao, tama augwa sęde te Kraisgo nogi ugwaba sabo dao.
2CO 8:24 Teda dagego duga dwagi yai homu eyu godolo mu ebo kolesaga te bidi dabe augwalibolo ola maiąo. Tama te Godigo po odobo we bidi dabe augwaligo dagego te kolesaga ebo mu konemainogo elama, tama dagego sęde dago dagede wiegi yai homu pemene ebo page me augwaligo konemainogo tiao.
2CO 9:1 Te Godigo we bidi Juda bage augwali tau siyu olo mabo nai te dagego koneanio. Tama eno tede bobage po me asęgobeo.
2CO 9:2 Eno koneani, dagego te sę yabo homu hodaluali, tama sesemane sogo eno dage nogi te Masedonia bulu bidi dabe augwali gesabidide ugwaba sabo dao. Eno dagede te tiwai po augwalibolo wabo dao, “Te polobadu bidali kibu bede te Akaia genuai tǫde bidibo we bidi dabe augwaligo te masigi mabo tau sabo sę gagalainogo sisi yalio.” Tama augwaligo dagego te sęde bomo ebo po odolama, tama tede te Masedonia bidi dabe me hauwa homu hodolalio.
2CO 9:3 Tiali goli dago te wabo pode te duga nogi ugwaba siyu, te olo po tiwai pedali weyu, eno te ama dede augwali dageba hasia tagala palobao. Te eno homugo te dagego duga maiabo nai sisi elama bidao, te eno te Masedonia bagebolo wali po gilama tiwai yao.
2CO 9:4 Dago homu si meni, te dagego maiabo nai sisi yali elalubo homu ebao. Tiali goli eno te homu yali, te Masedonia bidi dabe meba augwali ena dali nosali asiyu tama suyu, te dage sisi isąwai ebaso, tama tiyu, da tede hale siyu, tama dage dali me genuai hale mu yabuo.
2CO 9:5 Tama tibaso, eno homugo eno ama dede augwali bolo te dage bidibo madi aselama polasa sabalomainogo eno augwalibolo te po obao, tama dagego te olo tau selama tolaibao wali nai te augwaligo hasia bolo sisi ilao. Tama te ena me nosali sabalobo si, te olo tau siyu mabo nai te olo mu mayu sisi ebo tiwai elama, tama te nai dago dagede anoma elama sabo tiwai me egobeo.
2CO 9:6 Dagego homugo te bugagia koneao: nai yogo homu eyu dwasianu nai bulubo bidigo, te agai nai dwasianu naga nosali saibao. Tama te nai hauwa bulali bidigo, te agai nai hauwa saibao.
2CO 9:7 Dage tigidali deli deligo te Juda bage tau mabo monede duga digi duga bugagia homugo hasia kone palama, tama te homu kolesaga tiwai wali naga peyu mone mao. Tiyu bidi me deligo mabo naide homu sęgę elama, tama agai homugo bidi dabego bomo ebaso, tama te kolesagade naga agai te nai mani homu me ilamuo. Menio. Agai digi aga homu hasia dodolama, tama te tiwai naga mao. Magi baso meni. Godigo te bidigo wiegi yai homu pemene elama nai mabo kolesaga ebo bidi, te tobage bidi Godigo godolo ebo dao.
2CO 9:8 Tama Godigo olo mabo nai tigidali te dagebolo mabo usu mu eyu, tama dage mu pągąnaluaibao. Tama tigidali sogo dage tigidali nai usu mu elama, tama dagego tigidali wiegi yai sę yabo nai hauwa elaluaibao.
2CO 9:9 Te Godigo po bukude te nai mayu tau sabo kolesaga ebo bidi dali po wali, te po e dao, “Te bidigo nai hauwa te magi nai meni yai we bidibolo mani, te bidigo nai wai sąnama bulala pabo tiwai yalio. Te agai doloba pai kolesaga sesemane sogo elaluaibao.”
2CO 9:10 Godigo nai wai te bidibolo bulumainogo menama, tama tigidali bidibolo tubo nai menama tama augwaligo tubo dao. Teda Godigo dage usu nama te nai dabe mayu, tama dagego te gasa Godigo po odobo we bidibolo tau sabo kolesaga genuai mu ilaibao. Tama dagego doloba pai kolesaga umabo mu pedaludaibao, te bidigo nai wai bulai digi tama nosali te nai umabo mu walobo tiwai iduaibao.
2CO 9:11 Tama dagego nai hauwa elaluaibao, tama dagego homu mu naga eyu, nai hauwa te ama dede augwalibolo tigidali sogo mabo usu yaibao. Tama dago sęde dagego te olo tau siyu mabo naide te ama dede augwaligo te Godibolo usu da po waibao.
2CO 9:12 Awe, dagego te tiwai sęgo te Godigo we bidi tau siyu, te kolesagade dagego te augwali sǫą pali nai usu nubo sę yaibao. Tama te tiwai kolesaga naga me egobeo. Menio. Dagego te tebo kolesaga ebaso, te augwaligo dwagi yai homu eyu, Godibolo usu da po hauwa waibao.
2CO 9:13 Dagego te ama dede tau sabo sę ebode, tede te dagego kolesaga hanilama pedalaibao. Te ama dede augwaligo koneama, dagego te Godigo po bugagia wali pelama tama Kraisgo wiegi yai gesi po we bidi gedude hania hanilai dao. Tama dagego homu mu naga eyu, olo mabo nai genuai augwalibolo mabo me, te gasa bidi dabebolo me mabo sueibao. Tama eyu augwaligo Godigo nogi ugwaba saibao.
2CO 9:14 Te Godigo olo mabo wiegi yai kolesaga genuai mu dagede elalubo, te augwaligo koneaibao. Tama tiyu augwaligo dage godolo elama, tama augwaligo Godibolo po weyu, te agai te olo tau sabo wiegi yai kolesaga dagebolo mobaso, augwaligo agabolo puba hwi po waibao.
2CO 9:15 Godigo dabolo te olo mani nai, te genuai mu egi pali, tama tede te dwagi yai po tigidali dago pusubo usu me egobeo. Dago Godibolo te olo mabo naide puba hwi po wao.
2CO 10:1 Te dage tomode bidi mebago po kisila ena dali weyu te po wai, “Pol aga da dali bidiyu, tama aga digi aga aiyaba elaluali, tiali goli aga digibulu bidibo sogo te agai po bomai asęna toloyu da dali wabo dao,” te po wali. Tiali goli ena Pol eno homugo te dagego Kraisgo homu kolesaga hasia bolo kone palao, te aga digi aga homu aiyaba elaluama tama te bidi dabe augwali dali nagame yai kolesaga yai, tama eno me te tobage homu eyu, dagebolo e mobo mabo po megi obao.
2CO 10:2 Eno e tama tiwai po dagebolo obao: nosali ena dageba pedalobo si, teda dage dua dao, tiyu eno dagebolo sesena pai po mayabuo. Tiali goli eno homugo eno po te bidi mebago da te tǫde kolesagade biliba homu ebo bidi dabe augwalibolo hanilama bomo elama te sesena pai po pusabo homu ebao.
2CO 10:3 Mu tama, da te we bidi tomode e tǫde bidibo dao, tiali goli Godigo pode boi bidi homu ebo bidi dabe dali hwįbode dago te tǫde bidigo wąbi hwįbo tiwai me ebo meni.
2CO 10:4 Tigidali wąbi hwįbo nai dabe dago tolalubo, te tǫde nai tiwai me elalubeo. Menio. Te Godigo bomo elalubao, te boi bidigo bomai obo alubo usu yaibao.
2CO 10:5 Dago augwaligo da dali konila po wabo page pedeyu, tama augwaligo wabo po aiyaba mu elalubo dao. Tama tigidali kolesaga ugwadu mu dolaluyu tama te God koneainogo homu ebo bidi dabego tų palialubo, te me dago hųgibo dao. Tama da tigidali bidigo homu kolesaga dago kalabus ilama, te Kraisgo homu kolesaga wali pomainogo ebo dao.
2CO 10:6 Tama da sisi elama dage tonalubao. Te da dagego bidibo digi sabolama, tama dagego dago po tigidali wali pobaso da, teda dago te dage tomode bidibo te po sela sąbo bidi augwalide po tų dodolama tama augwali tigidalibolo dwai dene wei ponaibao.
2CO 10:7 Dagego te duga gedude elalubo nai bugagia suiyąo. Te dage tomode bidi me deli aga homu aga digi te Kraisgo bidi bidiyu da, teda aga digi homu kone ma palama tama aga te tiwai koneaibao, aga digi te Kraisgo bidi da homu yali da, teda da me te Kraisgo bidi bidibao, da aga dali tiwai si mu dao.
2CO 10:8 Magi baso meni. Dago Genuai Bidigo dabolo te sę emainogo te genuai nogi dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo. Tama eno dena te sęde dena nogi ugwaba mu sali goli, tede ena hale me sogobeo, te dolo dao, dago dena sę bugagia yaibao.
2CO 10:9 Tiali goli dagego eno asęna tolobo pasgo te dage olo wi ilibo homu ebo te eno hagela homu ebao. Dagego te tama egimio.
2CO 10:10 Mu tama, bidi meba augwaligo enade tama tiwai po obao, “Awe, te agai asęna tolobo pasde sęgę yai po elaluyu, tama bomo elalubo po me elalubo dao. Tiali goli aga digi sabalobo si tama dago aga digi suyu bomo meni yani, tama agai po te olo nai tiwai dao.” Te tama po wabo dao.
2CO 10:11 Te po wabo bidi dabe, augwaligo e tama tiwai homu bugagia kone palao: da digibulu bidiyu tama dago pas naga asęnama dagebolo tolobo po, te po dali, te da asama dage dali bidiyu ebo kolesaga dali, te si tiwai si mu yaibao, te tedali gasagi yai menio.
2CO 10:12 Te dago dena digi dali te augwali digi augwa nogi ugwaba sabo bidi dabe dali si dago osola sulama, tama da augwali tiwai si da po wagobeo. Te po wabo dago hagela homu ebao. Magi baso meni. Te bidi dabego augwaligo ebo kolesagago naga te augwa kolesaga usu sabo dao. Me deligo aga ebo kolesaga te gasa bidi mego ebo kolesagade usu sabo sę ebo dao. Te tama tebo bidi dabe, augwaligo bugagia konesiąbaso, wiegi yai koneai kolesaga me elalubo menio.
2CO 10:13 Tiali goli da dali, God agai te dago sę yabo madi sesegede dąį ilali. Te dąį ilama, tama dage Korin bulude bidibo we bidi dage te dąį tomode bidibao. Tama dago ebo sęde dago dena sali dąį edelama tama dago dena nogi ugwaba me sogobeo.
2CO 10:14 Tama dage te dąį tomode bidaligo da, teda da pologi solama tama Kraisde wiegi yai gesi po dageba sela asali sogo, te sogo dago dena sę yabo madi dąį mu edelebeo.
2CO 10:15 Dago te Godigo mawai dąį bolama, tama te gasa bidi dabe augwaligo yali sęde te dago dena digi dena nogi ugwaba me sabo meni. Te menio. Dago homugo te tiwai bomo ebo dao: te dagego duga homu tigidali Kraisba mubo kolesaga bomo yai pedalobo si, tama dago sę genuai dage tomode pedalomainogo eyu, te dena dage tomode Godigo sę yabo dąį usu nama tama te genuai mu pedalaibao.
2CO 10:16 Tama tiyu, dago dage tagalama, tama te Kraisde wiegi yai gesi po te dage u badu elalubo me badu tǫde bidibo we bidibolo sela pabo usu yaibao. Te elama, tama dago gasa bidigo te gasa dąį ilali tǫ tomode yali sęde te dago nogi olo ugwaba me sogobeo.
2CO 10:17 Awe, te meni. Te Godigo po bukude po me deli e tiwai elalubao, “Te nogi ugwaba sabo homu ebo bidi, agai te dago Genuai Bidigo yali sęde po weyu, tama Genuai Bidigo nogi naga ugwaba sao,” te po asęani.
2CO 10:18 Magi baso meni. Dago koneani, te bidi aga digi aga nogi ugwaba sabo, te bidi aga nogi te God gedude me elalugobeo. Mu menio. Te dago Genuai Bidigo bidi me deligo nogi ugwaba siyu, te dwagi yai bidi da obaso da, te bidi naga nogi mu elaluaibao.
2CO 11:1 Te dageba nosali asali bidi dabe augwaligo augwa digi augwa nogi ugwaba siyu, tama homu kolesaga meni yani po wali goli, dagego augwali tede tagalao wabeo. Tama tibaso, eno homugo dagego ena me gogolama, tama eno te homu kolesaga meni yai po dwasianu waio. Awe, dagego ena gogolao.
2CO 11:2 Te gasa bidi dabe augwaligo te dagego Krais wali pabo kolesaga dolidali weyu, eno augwalide dwai homu ebo dao, te Godigo augwalide dwai homu ebo tiwai gilama. Magi baso meni. Bidigo aga penani sę munu me isąwai wiegi yai bidibo gesi wegi noma te bidi delibolo naga mabo tiwai, te eno dage te bidi deligo naga somainogo eyu sa muanio. Eno dage Kraisbolo maiabo homu ebo dao.
2CO 11:3 Tiali goli ena wi ebao. Dago koneani, te dwai hasamani tiwai bidibo bidi Satan agai tibo po wabo mu koneani homu elama, tama polobadu agai te we Iv dago auwa tibo po ola menama tama aga tulaluali. Te dagego tiwai me dage, te dageba tamadi asali bagego po odolama, te tiwai kolesaga dageba pedalobuo. Tiyu, dagego homu mu eyu Krais dali naga wadolama tama wali pabo wiegi yai kolesaga tagalidali homu eno ebao. Ena tede wi ebo dao.
2CO 11:4 Magi baso meni. Te bidi meba augwali dage pageba pedalama, tama Jisasde gasagi yai po pusubao, augwaligo wabo po te dago te Jisade pusubo po tiwai me wabo meni, te gasagi yai tedali dao. Tama te kolesagade dagego te gasagi yai mobo sabo, te dagego polobadu sali te Tedali Mobo Bidi tiwai meni. Tama dagego gasagi yai po augwalidu odobao, te dagego dade sali te wiegi yai gesi po tiwai meni, te gasagi yai tedali dao. Te bidi me deligo te tobage kolesaga dage tomode me ebaso da, teda dagego dwagi yai homu eyu, agai te tobage kolesaga emainogo gogolobo dao. Tiali goli te dolo menio.
2CO 11:5 Te bage augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo te homu ebo dao. Odao. Eno homu augwaligo ena te dwasianu sę me delide aiyaba elalubo menio.
2CO 11:6 Mu tama, eno te Grik dabego po bugagia pusubo kolesaga te me konesiąwani, tiali goli te magigo menio, eno te Kraisde homu kolesaga me sǫą pabeo. Mu menio. Tigidali sę ebode dago dagebolo hania ola mawai dao, dago Kraisde kuna mu konebo dao.
2CO 11:7 Dagego koneani, eno te Godigo wiegi yai gesi po dagebolo ola mani sogo, tede eno masigi me sabeo. Te kolesagade ena digi ena aiyaba elaluama te dage ugwaba siyu yai. Magi yaliwe? Dagego homu eno te yali kolesagade te ena sęgę sali, agawe?
2CO 11:8 Eno masigi dabe te gasa bulude bidibo Godigo po odobo we bidi mebade sali, te ena dagede sę emainogo eyu augwaligo ena tama tau sai. Te kolesagade te eno augwaligo nai anoma elama olo sabo tiwai yai dao.
2CO 11:9 Ena dage dali polobadu bidali sogo ena nai me sǫą pali, te sogo eno dagede bidi me deli dali aga nai anoma eyu sęgę me mabeo. Menio. Te ama dede dabe augwaligo te Masedonia tǫ tagalama tama Korin hanuba pedaliyu, augwaligo ena sǫą pali nai usu nani. Tama tigidali nai eno bugagia tonaluama, tama dagego duga masigigo ena tau sabode eno dwasianu sęgę dagebolo me mabeo. Tama sesemane sogo eno te tiwai bugagia tonaluaibao.
2CO 11:10 Te Kraisgo mu po enade elalubao. Tama tibaso, eno tibo po wasiąbo, e mu po naga obao, te tigidali Akaia moni tǫ badu te bidi me deligo te eno dagede masigi sisąbo kolesagade ena nogi ugwaba sabo te bidi mego tų palibo usu me egobeo.
2CO 11:11 Magi baso eno tama obawe? Eno te dagego masigi sisąbo kolesaga ebogo te eno dage dali dwagi yai homu isąyu godolo mu isąyu bidibo te waselebo dawe? Menio. Eno dage dali dwagi yai homu eyu godolo ebo kolesaga ebo, te Godigo koneai dao.
2CO 11:12 Meba bidi augwaligo homugo eno me te eno ebo sęde dagede masigi sao, augwaligo te masigi dagede sabo tiwai yao, augwaligo te homu ebao. Magi baso meni, augwaligo homugo eno te tiwai eyu da, teda augwali da tiwai si bidibaso, augwa digi augwa nogi ugwaba sabo tų elaluaibao. Tiali goli menio, eno te dagego masigi sisąyu te tų palibo sę augwaliba ebao. Tama eno tiwai sę naga me iduaibao.
2CO 11:13 Magi baso meni. Te tobage sę ebo bidi dabe augwali te Godigo po sela pabo bidi dabe mu menio, augwali te tibo po wabo sę ebo bidi dabe naga bidibao. Augwaligo augwa kolesaga hasegelama, tama tigigo naga augwali te Kraisgo po sela pabo bidi dabe tiwai bidibao, we bidigo gedude.
2CO 11:14 Tama dage tede moni midigi me selamuo. Dago koneani, Satango digi aga tigi hasegelama, tama tigigo naga aga te dwai sę isąwai wiegi yai ensel mobo bidi tiwai pedalobo dao.
2CO 11:15 Tama tibaso, aga sę ebo bidi dabe augwaligo me te augwa kolesaga tibo hasegelama, tama te bidi dabe augwali gedude te augwali doloba pai kolesagade sę ebo bidi dabe tiwai pedalobaso da, teda da tede moni midigi me selamuo. Nosali augwali te augwa sę yali usu nama tiwai dwai dene mu saibao.
2CO 11:16 Hasia eno po wali, tama megi eno po ma obao, bidi mego ena te konesiąwai bidi da te homu munu me elamuo. Tiali goli, dagego homu ena te homu kolesaga meni yai bidi da homu ebaso da, teda dagego ena gogoliąo, tama ena me ena nogi ugwaba dwasianu sainogo yaibao, te homu kolesaga meni yai bidi tiwai.
2CO 11:17 Eno dago Genuai Bidigo homu kolesaga wali pelama, eno e po me wabeo. Menio. Eno po te konesiąwai bidigo po wabo tiwai eyu, tama ena nogi ugwaba sabo bomo ena digi ebo dao.
2CO 11:18 Bidi hauwa augwaligo te tǫde kolesaga wali pelama, tama augwa nogi augwa digi ugwaba sabo dao. Tama eno me te kolesaga osogo wali pelama, tama ena digi ena nogi ugwaba sabo po dwasianu obao.
2CO 11:19 Dagego te eno te tobage kolesaga ebo sę ilali. Magi baso meni. Dagego wiegi yai koneani kolesaga elalubao, tama dagego te konesiąwai bidi gogola sula tagalabo homu godolo elama, te konesiąwai bidigo po dagebolo momainogo yali!
2CO 11:20 Awe, te bidigo dage te aga dologoba mubaso, ma agai dagego nai tigidali silibaso, ma agai dage dali hagoma ebaso, ma agai dage gesabidide elibaso da, teda agai tama temainogo te dagego gogolobo dao, po meni!
2CO 11:21 Mu tama, augwaligo te tebo kolesagade dago te sę yabo bomo me elalubeo! Tama eno te kolesaga igi sogo da, teda eno sęgę siyu tama hale egi da. Megi eno po te aga digi nogi ugwaba sabo po wabo kolesaga meni yai bidigo po tiwai obao, te bidi mebago augwa ebo kolesaga po te bomo elama pusubaso da, teda eno me eno bomo elama tama augwali aiyaba elaluabo po pusaibao.
2CO 11:22 Augwali te Hibru dabe da wida, teda ena me te Hibru bidi dao. Augwali te Israel hani bidi dabe da, agawe? Teda, ena me ena te Israel hani bidi da. Augwali te Abrahamgo bulai wai hani da, agawe? Teda, ena me ena te Abrahamgo bulai wai hani bidi mu dao.
2CO 11:23 Augwali te Kraisgo sę ebo bidi dabe da wida, agawe? Megi eno po te aga digi nogi ugwaba sabo kolesaga meni yai polobo bidigo po tiwai mu obao. Eno augwali te Kraisgo sęde aiyaba mu elaluali. Te sę dene idu gealigo eno edelama ugwanu igulali. Te eno Kraisde po pusubaso, te boi bidi dabego ena kalabus beba hauwa sogo muani. Tede eno te tibo po ola mabo bidi dabe ela holai dao. Te boi bidi dabe augwaligo ena hauwa sogo mu elali, bidigo nedebo usu egobeo, tede eno e bage augwali aiyaba mu elaluali. Hauwa sogo ena pąde isabo tiwai yai.
2CO 11:24 E tiwai yai. Te a naga sogo Juda dabe augwaligo ena te dwai kibu waligo nigai bigo elali, te nedali te bidi sese deli olama, nogo si olama, nogo me badu a naga me si me si, te 39 tama sogo dąį egi pai. A naga sogo te tiwai ena elali.
2CO 11:25 Te sela sogo te Rom dabego ena keloago elali. Deli sogo te Juda dabe augwaligo ena ela mumainogo eyu masigi sąnama ena elali. Sela sogo moni geba sip dabe doloyu, ena te tamu ąįde hagawai. Tama tiyu, sip me deli tama dolali sogo te deli sogo hulide me giligade ena te tamu ąį daide bidali.
2CO 11:26 Te hauwa sogo ena digibulu tųdu bilali. Ena te pabo ąį hauwade hagawainogo yali. Ena te tųdu bilibo bidi elebo aga nai wi sabo dwai bidi dabe augwaligo nogode dolainogo yali. Te eno hani bage, te Juda hani dabe augwaligo me ena dolainogo homu yali, tama Juda hani isąwai bidi dabe augwaligo me ena dolainogo homu yai. Ena te haniani hanude dolainogo yali, tama te bidi meni yai bulude me ena dolainogo yai. Ena te tamu ąįde dolainogo yai. Ena te tibo po wabo abagi dede dabe augwaligo nogode me elainogo yai dao.
2CO 11:27 Eno sę dene haniani mu yalio. Hauwa sogo ena hulide sę eyu, tama ena godege me pibe. Ena nai sili bidali, tama ena ąį nogonego sali. Hauwa sogo eno nai gisilali. Ena kedaugo me siyu, tama ena ugwa me meni yai bidai dao.
2CO 11:28 Tama te naga me ebeo. Menio. Te tigidali deli deli sogo eno te haniani bulude bidibo Godigo po odobo we bidi tigidali tonalubo sę eyu, tama tede genuai sęgę mu enabolo mubo dao.
2CO 11:29 Te bidi me deli bomo meni ebawe? Teda, ena me te bomo meni yai tiwai bidaibao. Te bidi me deli te dwai sęba tulaluai dawe? Teda, eno te aga te dwai sę tomoba kegali bidi dali dwai homu mu yaibao. Awe, tigidali haniani sę ebode eno te dagebolo tibo po ola mabo bage augwali eno aiyaba elalubo dao.
2CO 11:30 Te gasa tų me meniama, tama ena nogi ena digi ugwaba sobaso da, teda eno te ena bomo meni da po olama, tama tede ena homu pemene yaibao.
2CO 11:31 God, te God tama dago Genuai Bidi Jisasgo Aya, dago sesemane sogo aga nogi ugwaba siyu tama bidada peyu bidada pomainao. Agai koneani, eno tibo po te enaba pedalali sęde me wagobeo.
2CO 11:32 Te polobadu eno Godigo sę edubadi, me sogo ena te Damaskus moni hanude bidibadi, te tobolu bidi me deli aga te tuni bidi Aretas dologode bidali. Tama te tobolu bidi agai te Damaskus hanu buluba pabo tųde tonalubo bidi muani. Agai ena selama kalabus ilainogo yali.
2CO 11:33 Tiali goli meba ama dede augwaligo ena moni basket wade munama, tama te hanu genuai masigigo nigai bobage obo te windodu augwaligo ena buluba aba bonogo tagalama, tama ena buluba dilama teda soali. Tama ena te tobolu bidi nogode muani tagalama, tama ena sana pelama wi pai dao. Te sogo te sęde ena bomo meni yai bidi mu bidali. Tialima Godigo ena tau sali.
2CO 12:1 Te gasa bidi dabe augwaligo eno nogi dolobo po dage dali olama, tama dagego ena tau sabo po wei ponosiąbaso, ena digi ena nogi ugwaba sobao. Te gasa tų me elalubeo. Mu tama, te kolesagago da tau me sisąbo usu me isąwani. Tiali goli tagalama, te dago Genuai Bidigo enabolo te ną yali me, te geme dualali po meba mani, tede eno po megi waibao.
2CO 12:2 Ena te Kraisgo bidi bidiyu, tama kibu be nogo si olama sągągo me si me si polobadu Godigo ena te dagalu sela wali sigi mu teba ugwaba sela holali. Te ena teba pobadi ena tigi dali bidaliwe, ma ena tigi tagalama te eno noma bidi naga teba paliwe, te eno me konebeo. Godigo naga koneanio.
2CO 12:3 Tama Godigo ena te Paradais teba sela holali. Te ena tigi dali bidaliwe, ma eno tigi tagalama eno noma bidi naga teba paliwe, te eno me konebeo. Godigo koneani. Tede eno te bidigo me pusubo usu isiąbo tobage po odama, tama te po bidigo me pusidali weyu habu selali dao.
2CO 12:5 Godigo ena dali te yali kolesaga, tede eno homu pemene yaibao. Tiali goli ena digi ena nogi ugwaba me sogobe. Ena bomo meni yani po ena olama, tama tede naga ena nogi ugwaba sabo dao.
2CO 12:6 Mu tama, ena digi ena nogi ugwaba sigi sogo da, teda ena konesiąwai bidi tiwai me egi menigi dao. Menio. Te eno mu po naga wagi da. Tiali goli ena digi ena nogi ugwaba me sogobeo. Magi baso meni, eno homugo te bidi me deligo te po odolama tama agai homugo ena te wiegi yai bidi mu da homu idali. Eno homugo dagego eno ebo kolesaga sulama, tama dagego eno Godigo po pusubo po odolama, tama te si naga osola sulama, tama dagego tiwai homu dolo enaba emainogo ebo dao.
2CO 12:7 Te po hauwa Godigo enabolo te dagalude ola mani, te genuai wiegi yai nai mu dao. Tama tede ena digi ena ugwaba sabo te Godigo godolo me ebe, tama agai te dene mabo sesani ena tigiba enebo nai tiwai nai me deli enabolo mani. Te dene mabo nai te Satango sę ebo bidi tiwai dao, te ena elidumainogo ebao. Te ena aiyaba elaluama tama te eno te dagalude suali naide ena digi ena ugwaba me sidali olama tibo dao.
2CO 12:8 Sela sogo eno dago Genuai Bidibolo hanaluyu po wali, te dene mabo nai agai enade sela sąmainogo yai.
2CO 12:9 Tiali goli agai te po enabolo wai, “Woo, te eno olo tau sabo wiegi yai kolesaga nagede usu yai elalubao. Magi baso meni, te bomo meni yai bidide eno bomo hania mu pedalobo dao,” Genuai Bidigo te po wai. Tama ena bomo meni yai da te homu sęgę munu me egobeo. Menio. Ena wiegi yai homu pemene mu tede ebo dao, te Kraisgo bomo enade elalumainogo ebao.
2CO 12:10 Tama tibaso, Krais tobade ena bomo meniama, tama te bidi dabego enade nogi dwai posobo po weyu, enabolo dwai sę ilama, tama haniani sęgęgo ena siyu, tama bidi dabe augwaligo ena doloyu dwai sogo enaba pedalobaso da, teda eno wiegi yai homu tede ebo dao. Awe, te ena digi bomo meni ebo sogo, te sogo naga eno homu Kraisba tialuyu, tama aga bomo eno sabo dao.
2CO 12:11 Te eno te ena digi nogi ugwaba sali po tamadi weyu, te eno te kolesaga meni yai bidi tiwai yali. Tiali goli dage, dagego ena hodolobaso tama eno te po wali. Te duga digi eno nogi ugwaba sigi sogo da, te doloba pai kolesaga egi da. Tiali goli tama me tibeo. Mu tama, ena te olo nai tiwai dao. Tama te gasa bidi dabe augwaligo homu te augwali Godigo po sela pabo sę ebo bidi dabe bidiyu, tama augwali te sęde polalubo bidi dabe dao, augwaligo augwa sęde te homu ebo dao. Tiali goli ena dali augwali dali si usu siyu da, teda augwaligo ena te dwasianu sę me delide ena aiyaba elalugobeo. Mu menio.
2CO 12:12 Ena dage tomode bidibadi, te gasa bagego enabolo mani sęgę tigidali eno bugagia toloyu, tama dage tomode sę hauwa elama, tama ena da, te Godigo po sela pabo bidi mu da ola mabo bomai sę eno nogode pedalali. Te e dao: te haniani bidigo isąwai bomai sę dage tomode pedalali, te Godigo sę sa munama, tama bidi dodola midigi selama, tama Godigo bomo sumainogo yalio.
2CO 12:13 Eno te deli tiwai kolesaga te gasa Godigo po odobo we bidi hanibolo yali, te dagebolo yali tiwai sę yali. Eno dage tau sabo sę mede sǫą mu pabeo. Deli sęde naga eno dage dali te gasa Godigo po odobo we bidi hani dali tiwai si ebe. Augwaligo augwa masigigo ena tau sali goli, eno digi dagebolo duga masigigo ena tau sao po munu me wabeo. Tede dagego homu eno sęgę sali homu eyu da, eno homugo dagego te eno sali sęgę sela sąyao! Tiali goli eno koneani, eno tede sęgę me sabeo.
2CO 12:14 Megi ena sela sogo dage bidibo madi asabo sisi ebao, tama dagego nai eno anoma eyu sainogo tama dagego duga masigigo ena tau sao po me wagobeo. Te menio. Odao, eno dagego nai me sogobeo. Menio. Eno dage naga sabo homu ebao, eno dage Kraisbolo momainogo ebao. Dagego koneani, te wai dabe augwaligo te nai dabe gegebo sę elama te aya de ida si tau sabo sę me egobeo. Menio. Te aya ida augwaligo naga te wai dabe augwali tau sabo sę yaibao. Tama ena da dagego aya tiwai dao.
2CO 12:15 Tama dwagi yai homu eyu, dage tobade eno ena nai tigidali maiabo homu elama, tama ena bidibo ula me maiabo homu ebao, te dage tau sabo homu ebao. Eno dage dali dwagi yai homu eyu godolo mu ebo kolesaga genuai mu ebaso, tama te dagego magi baso ena dali homugo dwasianu naga kone palobowe?
2CO 12:16 Tiali goli dage tomode meba augwaligo enade te tiwai po waibao, “Mu tama, agai digi dago masigi hania hanilama me sabe, tiali goli agai te po bebegelebo bidi tibo sę ela mabo bidi, tama te tibo po wabo kolesagago agai te da muma menama, tama gasa bagego nogode te dago masigi sai dao,” augwaligo te po wai.
2CO 12:17 Tialima, eno bidi meba dageba tagala palidu geai. Magi yaliwe? Te augwali me deli augwali nogode eno tibo po olama tama dagego nai anoma elama me sai da, agawe? Te menio.
2CO 12:18 Eno te Taitus hodolama, tama aga dage bidibo madi asali, tama eno te gasa ama me deli aga dali hodobo tagala palali. Tama te Taitusgo ili po olama dagego nai anoma elama me saliwe? Menio. Ma dagego homu te ena dali Taitus si da te Tedali Mobo Bidi deligo bomode naga me bidibo meni, dagego da si dali te homu ebawe? Da si te tų delide naga me bilibo meni, dagego te homu ebawe? Edao. Dagego te tobage homu da si dali eyu da, teda duga homu hasegelao, te da sigo ebo kolesagade bugagia homugo koneao.
2CO 12:19 Dagego eno tamadi asęani po tigidali tede homugo kone palama, tama tede dagego e tiwai homu idubadi bogo, ‘Te wali pogo te Pol agai aga nogi tau sabo sę naga ebao.’ Tiali goli te mu menio. Dagego da dali po tų eyu, tama dena yali sę osola suabo bidi dabe meni. Abagi mu dede, da Krais dali wadolama tama Godigo gedude dolalubadi, dago te po tigidali dagebolo asęna tolobao. Tama tiyu dage tau somainogo eyu dago te po dagebolo asęna tolobao.
2CO 12:20 Eno e homu ebao: ena dageba asama, tama dagego ebo kolesaga sulama te eno suainogo homu yali tiwai we bidi me bidibo sugobe homu yaibao, dagego gasagi yai kolesaga ebo eno sueibao. Tama tiyu, eno te dagego ebo kolesaga subaso, tama eno dage dali dodolobo sę ebo tede dagego hagela homu yaibao. Polobadu eno dage dali sę hauwa yali, tiali goli megi ena wi dwasianu eyu homu si dagede ebao. Eno homu ena dageba asama, tama eno dage tomode duga hasi e tiwai haniani dwai kolesaga ebo eno sueibao: konila po wabo me, te amabolo aga elalubo naide dwai homu ebo me, tama sębę elama wado po wabo me, tama nai yogo kolesaga ebo me, dwai nogi posobo po wabo me, bidi geme posobo po wabo me, te hagoma ebo me, te Godigo po odobo we bidi hani pedaloyu dolobo kolesaga me, te tobage dwai kolesaga ebo eno dage tomode te sueibao, eno te homu ebao.
2CO 12:21 Eno e homu me ebao, ena dage bidiboba ma asobo si tama ena God agai ena te dagego gesabidide aiyaba elaluaibao. Tiyu eno dage hauwade gela waibao. Magi baso meni, te we bidi polobadu augwaligo te dwai sę yali te tagalama tama homu begelama, tama te meda yai kolesaga me, te penani ebo kolesaga me, te hale isąbo dwai dwai sę subigila ebo kolesaga, te augwaligo polobadu yali te dwai kolesaga tudiba me mube. Tama tede eno dage dali yabo sęde homu eyu tama homu sęgę elalubao.
2CO 13:1 Megi ena dage bidibo madi sela sogo wagisu te asainogo ebao. Tama asama, eno dage tomode po tų eyu, tama bidi me deli ma we me deli agai naga gasa we bidide po kisilibo te usu egobeo. Godigo po bukude elalubo po me deli wali peyu dago te po tų dodolaibao, te po e dao: “Te bidi si ma bidi sela te pedauwali deli poba muani wida, teda te po bomo elalubaso, tama te tobage pogo naga te po tų dodolobo usu yaibao,” te po asęani.
2CO 13:2 Te polobadu dwai sę yali we bidi dabe augwali me, te gasa bidi dabe dage tigidalibolo me, te ena si sogo wagisu dage dali bidagasali sogo te eno yabo kolesaga po dage dali wali. Tama megi me ena digibulu bidiyu, eno te tiwai po dagebolo ma obao: te ena dage bidibo madi ma asobo si, teda eno te dwai sę yai we bidi dabe augwali eno olo me gogologobeo, eno augwalibolo sęgę mawaibao.
2CO 13:3 Dagego enade e tiwai homu ebao, ‘Te Kraisgo Polgo pedauwalidu dabolo po wabo meni dawe, ma po wabo dawe?’ Te homu dagego enade yaligo da, teda dagego hania bugagia konemainogo eyu eno te bagebolo augwa sali sęgę mawaibao. Te Krais dage dali bomo kimi me isiyu me egobeo. Menio. Agai dagede sę bomo mu ebo dao.
2CO 13:4 Magi baso meni. Polobadu agai aga digi bomo meni yai bidi tiwai ilama tama bidibadi, tama augwaligo aga ni pedaide elali goli, Godigo bomogo megi aga bidibo ulade ma bideibao. Tama da aga dali wadolama, tama da me bomo meni yani tiwai bidibao. Tiali goli Godigo bomogo da aga dali bidibo ulade bidibao. Tama dago te bomo dage tomoba hanilaibao.
2CO 13:5 Dagego sesemane sogo duga digi duga homu usu sela suyu, te duga homu tigidali Kraisba munama agaba homu tialubowe, ma meni yani, te bugagia koneao. Duga digi duga dagalao. Te bidi Jisas Krais dagego homude bidibo te dagego konebewe? Te meni wida, teda dage usu selama, te usu niba kadu wabeo.
2CO 13:6 Tama eno homugo dagego konebo te Godigo sę ebode da te usu niba kadu waibao homu dagego ebo dao.
2CO 13:7 Tama Godigo dage tau siyu, tama dagego dwai kolesaga me deli isąmainogo eyu, dago agabolo hanalu wabo po wabo dao. Dago magi baso te tiwai ebo dawe? Te dage wiegi yai we bidi bidibaso, dago dena sę dage dali bugagia yali, te homu emainogo eyu, te dago Godibolo te po hanalu wabo dawe? Woo, te menio. Dena homugo te dagego doloba pai kolesaga yao. Tama tiyu, tama da dageba asama te duga ebo kolesagade po meni baso, tama dago dage dali po tų ebogo dena bomo ola mabo tų meni eyu da, te usu da, magigo meni.
2CO 13:8 Dagego koneani, dago te mu po aiyaba elaluainogo ebo usu me egobeo. Menio. Dago te mu po naga wabo sę tau sabo naga usu yaibao. Tama tiyu, dagego wiegi yai kolesaga naga eyu da, teda dago dage dali po me wagobeo.
2CO 13:9 Tama dago dage dali po tų isąyu tama tede Godigo da mani bomo waselabo tų meni baso, bidi mebago da bomo meni yai bage da te homu yaibao. Te usu da, po meni. Dagego dwai sę me isąyu tama Godigo po bugagia wali peyu tama tede bomo elalubaso, da wiegi yai homu pemene yaibao. Tama dago Godibolo sesemane sogo hanalu wabo po weyu, dago homugo agai dage tigidali dodolama tama dage agai po odobo bomai we bidi mu pedaloyu, agai we bidi mu naga bidaibao.
2CO 13:10 Megi ena digibulu bidiyu, tama eno te dagebolo po asęna tolali, te pagede naga dao: te ena dage dali bidagasobo sogo tama sesena pai bidi tiwai eyu, eno dage te dago Genuai Bidigo enabolo mani sę yabo bomogo eno dage selebo sę idalio. Agai dena yabo sęde te bomo dali, genuai nogi dali si dabolo mani, te dago dagego Kraisde homu tialubo kolesaga ebode dąų walomainogo yali. Te dage dolomainogo eyu agai te bomo dabolo mabeo.
2CO 13:11 Eno ama dedeo, megi eno po paliama, tama eno dage tao po obao. Dagego duga ebo kolesaga dodolama, tama Godigo po odobo bomai we bidi mu pedalobo kolesaga yao. Dagego eno dage tau sabo po odiąo. Dagego te deli tigi poai deli homu naga elama, nagame yai bidao. Tama God da, te we bidi dali dwagi yai homu eyu godolo kolesaga ebo dali, te homu nagame ilibo kolesaga ebo dali si ebo God, aga te dage dali bidaibao.
2CO 13:12 Te da Godigo we bidigo kolesagade, dage tigidali deli deligo te ama dede, abe dede dali wiegi yai homu elama augwali nogo mao.
2CO 13:13 Ede bidibo Godigo we bidi tigidali augwaligo dagebolo wiegi yai homu elama siade da po ola tolobao.
2CO 13:14 Eno homugo dago Genuai Bidi Jisas Kraisgo olo tau sabo wiegi yai kolesaga dali, tama Godigo dage dali dwagi yai homu eyu godolo ebo kolesaga dali, tama Tedali Mobo Bidi dage tigidaligo homude abagi tiwai bidibo kolesaga dali, te kolesaga sela dage tigidali dali hodobo mu bidao.
GAL 1:1 Ena da Pol da. God agai ena tagala palali, eno agai po wagi pomainogo yai. Bidigo ena tagala palobeo, bidi mego ena te po wagi pabo sęba mubeo. Te menio. Te God dago Aya dali te agai te gų pagede ma hodolai bidi Jisas Krais dali, augwali sigo ena te sęba muai dao.
GAL 1:2 Tama ena dali, ena dali bidibo ama dabe tigidali dali, dago te pas dage Galesia tǫ tomode bidibo Kraisgo po wali pabo we bidibolo asęna tolobao. Tama asęnama, tama dwasianu hani deli delibolo te po asęna tolobao.
GAL 1:3 Tama dago homugo God dago Aya dali, dago Genuai Bidi Jisas Krais dali, te augwali sigo dagebolo olo tau sabo sę eyu, dage dwagi yai homu elama bidao.
GAL 1:4 Tama Krais agai te dago Aya Godigo homu wali peyu, tama aga digi aga bidibo ula olo mayu, agai dago yali dwai dwai sęgę te sela sąwai. Tama tiyu agai homu da e tǫde megi elalubo dwai kolesagade sela pomainogo yai.
GAL 1:5 Tama agai te sę ebaso, dago God agai nogi sesemane sogo ugwaba mu sao. Eno homugo dago tama wainao.
GAL 1:6 Tegoba! Dagego yali sęde ena noma mu salio. Dagego magi yaliwe? Te Krais agai dage olo tau siyu, tama God agai dage i wai dao. Tiali goli polo tama dagego te sę tagaluyu, tama dagego gasagi yai po wali pabo gagalali. Tama te gasagi yai po dagebolo pusali bage augwaligo “Ao, e po Kraisde dwagi yai gesi po mu dao,” wali.
GAL 1:7 Tiali digi gasa wiegi yai po me elalubeo. Mu menio. Bidi meba augwaligo dagego homu kolesaga gasaba hasegelabo homu eyu, tama augwaligo te Kraisde wiegi yai po gasaba begelainogo yai.
GAL 1:8 Tiali goli, dago digi, ma Godigo sę ebo ensel bidi me deligo digi te dagebolo dago polobadu wali gesi wiegi yai po hasegelama, gasa po weyu da, teda da te moni sia dabo buluba pao, te eno homugo.
GAL 1:9 Dago te po polobadu wai dao, tama megi me eno ma obao, niwai bidi agai te dagego polobadu odali dwagi yai po wasiąyu da, tama agai gasagi yai po dagebolo obaso da, teda te po wabo bidi aga te siaba pao, hagamainao.
GAL 1:10 Te eno te tobage bomai po weyu, te we bidi augwaligo ena dali dwagi yai homu emainogo wabeo. Te menio. Eno homugo God agai ena dali dwagi yai homu yaibao. Eno te tobage po weyu, we bidi augwaligo eno nogi ugwaba sao, eno te homu ebowe? Woo, te menio. Eno te we bidi te enade homu bega sabo po wagi sogo da, teda ena Kraisgo sę ebo bidi bidigi menio.
GAL 1:11 Ama dedeo, dagebolo eno mu po obao, e wiegi yai gesi po eno polobadu dagebolo wali po page te bidi mego pedalomainogo ebeo.
GAL 1:12 Tama eno te po bidi mede sabeo. Tama bidi mego te po enabolo ola mabeo. Mu menio. Jisas Krais aga digi enabolo te po ola mayu waselai. Tama te koneama, ena da Godigo tagala palai po wagi pabo bidi mu dao, te dagego koneaibao.
GAL 1:13 Te eno polobadu yali kolesaga te ena Juda bidi hani dali bidibadi yali sę po, te po dagego polo odai dao. Tama eno Jisas konesiąbadi, te Juda bidi hanigo Godibolo lotu wabo sę eno wali pai dao. Tama te tiwai bidibadi, te sogode eno Kraisgo po wali pabo bidi hani elala bilaluai, tama eno te hani tigidali mu ela silainu homu eyu bidaluali.
GAL 1:14 Tama augwali dali homu dene isiąbadi eno te sę yai. Tama me, te ena gesi bidi bidibadi, dena Juda dabego wąįgo yali kolesaga wali pabo homu ebode, tede te Juda hani tomode elaluali gesi bidi tigidali eno ena abagi dede te dena wąįgo kolesaga wali pabo sęde augwali aiyaba elaluali. Te Juda dabego ebo sęde eno bomo mu elama, tama Juda hani tomode nogi sai.
GAL 1:15 Tiali digi, polobadu eno idago ena ame nesiąbadi, tama Godigo ena te sogo sa muai dao. Tama tiyu, agai ena dali aga dwagi yai homu eyu, olo tau siyu, tama ena ame nenama, tama aga bidi mu pedalumainu ilama, tama agai ena i wai, eno agai sę emainogo yai.
GAL 1:16 Tama agai ena i olama, tama agai eno homu mu hasegelainogo eyu, tama agai homu ‘Megi eno Polbolo eno ogwa waselaibao,’ te homu eyu, tama te sogo agai aga ogwa Jisas enabolo waselai. Tama eno te Juda bidi hani isiąwai we bidibolo te bidi Jisasde gesi dwagi yai po pusigi pomainogo eyu, God agai ena i olama, tama ena gasa bidigo bidibo digiba pabeo, agai enabolo te sę page ola momainogo eyu teba pabeo. Te menio.
GAL 1:17 Tama Godigo ena i wasiąbadi, agai gasa bidi dabe aga po sela pabo bidi dabe nigilai dao. Augwali Jerusalem hanude bidali. Tama Godigo enabolo aga ogwa waselama, tama nosali ena augwali dali te sęde po miainogo ena Jerusalemba pabeo. Te menio. Eno te bidi meni yai tǫ Arebia teba osogo bidigi pai. Tama nosali te tǫ tagalama, tama ena te Damaskus buluba bidigi pai.
GAL 1:18 Tama nosali kibu be sela bidama, tama ena Jerusalem hanuba pai, tama Pita dali po miainogo yai. Tama ena aga dali bidibadi, Sarere si te me deli tama sogo tede bidai.
GAL 1:19 Tama ena tede bidibadi, te Godigo po sela pabo bidi tigidali eno subeo. Te dago Genuai Bidi Jisas aga amanu Jems deli naga bidibo eno suai, Pita dali.
GAL 1:20 Tama eno megi dage dali asęna tolobo po, te eno te yali sęde tibo po dage dali wagobeo. God agai koneani, e po mu po naga dao.
GAL 1:21 Tama Jerusalem tagalama, tama nosali ena ma te tǫ Siria dali te Silisia te tǫ siba pai.
GAL 1:22 Tama te sogo te Kraisde wadolama te Judia tǫde bidali we bidi augwaligo ena gesabi susiąma,
GAL 1:23 tama gasa bidigo enade wali po naga odai. Tama augwaligo enade te po wai, “Polobadu te bidi Pol agai da elebo sę yai, dago Jisasde konealubo po doloyu yai. Tiali goli aga homu begelama, tama megi aga biliyu, agai we bidibolo te po wabo dao, ‘Te Jisasde konealubo po te po mu po dao.’” Augwaligo enade te Godigo ena homu hasegelali po odali.
GAL 1:24 Tama augwaligo enade te po odoyu, tama augwaligo Godigo nogi ugwaba sai. Tama tibaso, te sęde dagego koneagameo, Godigo digi te eno dagebolo ola mani gesi dwagi yai po agai enabolo ola mawai dao.
GAL 2:1 Te ena gasa bulude bidibadi, te kibu be nogo si olama, sągą badu me si me si bidai. Tama nosali ena dali Barnabas da si Jerusalemba pai. Tama eno te bidi Taitus me selama, da hodobo pai. Te da bidi sela Jerusalem hanuba sabolama, tama tede da dali pedalali sę dagego bugagia koneao.
GAL 2:2 Ena Jerusalemba olo pabeo. Menio. Godigo digi ena teba pao obaso, ena pai. Tama da teba sabolama, tama te tobolu bidi dabe augwaligo beba pali. Te dagebolo gasagi yai po ola mabo bage augwaligo te Jems dali, Pita dali, Jon dali, te bidi sela te tuni bidi dabe da, te homu ebao. Tama da augwaligo beba sabolama, tama eno augwalibolo naga te eno te Juda bidi hani isąwai we bidibolo pusali dwagi yai po te eno augwalibolo ola mawai. Te eno polobadu yali Godigo po pusubo sę me, megi ebo sę me te sę olo ela tagalidali weyu, eno augwalibolo te sę yali po page ola mawai.
GAL 2:3 Tama te sogo Taitus ena dali bidai. Tama aga te Grik bulu bidi dao, Juda bidi menio. Tiali goli te tobolu bidi dabe augwaligo sisinama, tama po mibadi, te bidi Taitus te Juda dabego kolesaga wali peyu, te aga tigiwali togolama tama dago bomo yai po tigidali wali pao, augwaligo te po wabeo. Menio.
GAL 2:4 Tama te sogo gasa bidi meba asai. Tama augwaligo “Ao, da Jisas wali pabo bidi dao,” weyu, te tibo po naga wai. Sa asobo bidi tiwai augwali geme aselama, tama da dali wadolali. Tama polobadu da te da Juda dabego wąį dabego nigali bomo yai po dologode bidaluali. Tama da Krais Jisasde wadolama, tama agai da te kolesagade tagalali, da olo bugagia bidimainogo yai. Tiali goli te bidi dabe augwaligo te kolesaga page geme suagasai, augwaligo da te augwa bomo yai po dologoba ma munama tama tede dąų olama, da tede bidimainogo yai.
GAL 2:5 Augwaligo homugo te bidi aga Kraisgo hani tomoba asobo si, tama hasia aga tigi togwao, da Juda dabe tiwai eyu, tama dago bomo yai po tigidali wali pao. Tiali goli augwaligo Godigo gesi dwagi yai po dolidali weyu, tama te po bugagia bidiyu dage tau somainogo, dago augwaligo wali po odobeo. Te po dago polo odama tagalali.
GAL 2:6 Te Jems dali, Pita dali, Jon dali, te tobage bidi dabe augwali Jerusalem hanude bidiyu, te we bidigo gedude augwali te Godigo bidi hani tobolu bidi dabe tiwai bidai. Tiali goli, eno homu augwali da genuai bidi dawe, ma olo bidi dawe, te magigo menio. God agai we bidi osola subo si, agai augwaligo tigide osola subo meni. Tama te tobolu bidi nogi elalubo bidi sela augwaligo gasa po te eno te Juda hani isiąwai we bidibolo wabo pode wadolobeo.
GAL 2:7 Mu menio. Augwaligo koneai, God agai te Pitago agai po te Juda hanibolo pusumainogo yai tiwai gilama, tama megi Godigo ena te Juda hani isiąwai we bidibolo te Godigo po pusumainogo tagala palai bidi dao.
GAL 2:8 Tama God agai te Pitabolo aga bomo menama, tama Pitago te Juda bidi hanibolo Godigo po selama pusigi pali. Tama tiwai me te God agai digi enabolo aga bomo menama, tama eno te Juda hani isiąwai we bidibolo Godigo po sela pusigi palio.
GAL 2:9 Tama Jems dali, Pita dali, Jon dali augwali te Godigo hani bidi tomode te be ni bomo elama dolalubo tiwai bidama dolaluai, te we bidigo gedude. Tama te bidi sela augwaligo koneai, te God agai ena olo mu tau siyu, tama enabolo te sę mawai. Tama tibaso, augwaligo ena dali Barnabas dali si nogo mani. Tama nogo mayu, da tigidaligo te homu yali, te da sigo te Juda hani isiąwai we bidi tomode Godigo sę yaibao, tama augwali selago te Juda bidi hani tomode te sę yaibao.
GAL 2:10 Tama te homu eyu, tama augwaligo da sibolo te po wai, “Dage sigo te Juda hani tomode bidibo magi nai meni yai we bidi gegeda pelamuo, te dago augwaligo tuabo nai abelemainogo, dagego masigi dabe eba tolao,” augwaligo te po wai. Tama te sę eno digi eno bomo eyu, te sę ebo dao.
GAL 2:11 Te dageba tamadi asai gasagi yai po ola mabo bage, te bage augwaligo e tiwai po wabo dao, “Te bidi Pol agai Godigo po ola mabode te geda mubo dao. Tiali goli Pita agai te po bugagia dolo ola mabo dao,” te bagego te po wabo dao. Tiali goli deli sogo Pita aga geda muani te eno suali. Te e tiwai pedalali. Te ena te Jerusalem hanude te bidi sela dali po mibo silama, tama nosali ena te Antiok moni hanude bidibadi, Pita aga teba asai.
GAL 2:12 Tama aga Antiok tede osogo bidibadi, agai te Kraisgo po wali pabo we bidi dali nai tudu geai. Tama augwali meba te Juda hani we bidi dao, meba Juda hani isąwai bage dao. Tama Pita aga Juda bidi digi, agai te Juda bagego habu selali po me deli bolali, te aga te Juda hani isąwai we bidi dali nai tudu geai. Tama tiyu, bidi meba augwali polobadu te Jerusalem hanude bidibadi, augwali Jems dali bidai dao. Tama te bage augwali Jerusalem tedu asama, tama augwali te Antiok hanuba sabolali. Tama te bage sabalobaso, tama Pita agai te Juda hani isąwai we bidi dabe dali nai tubo tagalali. Magi baso meni. Te tamadi asai Juda bidi augwaligo bomo eyu, te homu yai, te Juda hani isąwai bidi Godigo hani tomoba asomai hagede, augwaligo tigiwali togobo kolesaga wali pao, te Juda bage tiwai. Tama Pita aga te tamadi asai Juda bage dali wi eyu, tama agai te Juda hani isąwai bidi dabe dali nai tubo tagalali.
GAL 2:13 Tama te Antiok bulude bidali Juda bage, te Kraisgo po wali pabo bidi, augwaligo me wi eyu, te Pitago yali dwai sę tiwai yai. Augwaligo koneai, te gasa hani we bidi dali nai tubo sę te Godigo gedude usu dao, dwagi yai sę dao. Tama augwaligo te tiwai koneai digi augwali te Jerusalemdu asai bidi dabe dali wi eyu, tama te Juda hani isąwai bage dali nai tubo tagalali. Tama Barnabas me, augwaligo te yali kolesagago te Barnabas aga digi kege elama, tama Barnabas agai me te kolesaga yai.
GAL 2:14 Tama tiali goli eno suali, augwaligo Godigo gesi dwagi yai po tagalama, te wiegi yai doloba pai kolesaga me wali pabeo, te eno suali. Tama tibaso, eno Pita augwaligo gedude te eno aga dali te po wali, “Naga ida dali aya augwali si Juda bidi hani bage dao. Tama augwali sigo nage Juda hani tomode ame nani, te nage Juda bidi mu dao. Tiali digi, me sogo nago te Juda dabego ebo kolesaga tagalama, tama nage te Juda hani isąwai we bidi tiwai bidibo dao. Tama tibaso, megi nago te Juda hani isąwai bidi dali bomo eyu, augwaligo te Juda hanigo ebo kolesaga wali pao po nago magi baso obawe?” eno Pitabolo te po wai.
GAL 2:15 Eno Pitabolo e po me augwaligo gesabidide wai, “Te mu dao, te gasa hani we dabego da si ame nabeo, te menio. Te Juda hani isąwai we bidi augwaligo Mosesgo mani bomo yai po konesiąma, tama augwaligo dwai sę eyu, subigila naga bidibo dao. Tiali goli da bidi si te Juda bidi hani tomode ame nenama, tama dago te Mosesgo mani bomo yai po koneai.
GAL 2:16 Tama tiali digi dago te me koneai, te Godigo agabolo ‘Nage doloba pai bidi mu dao’ omainogo, bidi mego te bomo yai po dolo mu wali pabo usu egobeo. Te tobage kolesaga ebo bidi Godigo usu niba kadu wagobeo. Tiali goli te bidi aga homu tigidali Jisas Krais teba munama, agade konealubo po mu dąų olama, tama te kolesaga ebo bidi naga te doloba pai bidi mu pedalaibao, te Godigo gedude. Tama tibaso, da me te tiwai yai. Dago te homu yai: te dago te bomo yai po bugagia wali peyu da, te sę naga usu egobeo. Tama dena homu tigidali te Kraisba munama, tama agade konealubo po dąų obaso, teda da Godigo gedude doloba pai we bidi mu bidaibao. Tama tibaso, dago Krais Jisasde konealubo po dąų wai dao. Te bomo yai po wali pabo kolesaga naga ebo bidi, aga Godigo gedude doloba pai bidi munu me bidigobeo.
GAL 2:17 Tama da Juda dabe meba, da Krais dali wadolama, tama da Godigo gedude doloba pai we bidi bidaibao. Tama dago te homu naga eyu, dago te bomo yai pogo da tau sabo homu ebo tagalama, tama gasa Juda hani dabe augwaligo gedude da te bomo yai po bolobo bage dao, te dwai Juda hani isąwai we bidi tiwai dao, augwaligo da dali te homu yaibao. Tama tiyu da, augwaligo te homu me yaibao, ‘Ao, te Krais agai te bage te dwai sę yabo kolesagaba kegalio’, te homu yaibao. Tiali goli te pode eno bomo elama e po obao, te tiwai mu menio.
GAL 2:18 Edao. Polobadu eno te homu yai dao, ena te bomo yai po bugagia wali pobaso da, te Godigo ‘Nage doloba pai bidi dao’, te waibao. Tiali ma, nosali eno te homu ebo tagalali. Tiali goli megi ena te polobadu tagalali homu ma eyu da, teda te we bidi augwaligo hania koneaibao, ena polobadu te bomo yai po bolama, eno dwai sę yali bidi dao waibao.
GAL 2:19 Tama eno te bomo yai po nedeyu tama te nedebogo eno koneani, eno te bomo yai po dabe bolama, tama eno Godigo gedude dwai sę yai dao, tama agai ena sęgę mawaibao, te eno konea sali. Tama koneyu, eno te me koneani, eno te dena wąį dabego bomo yai po wali peyu, tama tedu ena Godigo gedude te doloba pai bidi munu me pedalogobeo. Tama tibaso, megi eno Godigo po wali peyu aga sę eyu bidibo dao. Tama ena te bidi Jisas dali te ni pedaide isali tiwai ebo ąǫ te homu ebo dao.
GAL 2:20 Megi ena eno bomogo naga bidibo meni, ena Kraisgo bomogo bidibao. Aga da te Godigo Ogwa da, tama agai ena dali dwagi yai homu eyu godolo mu elama, tama aga digi bidibo ula tagalama tama ena tau siyu isai. Tama eno ena homu tigidali agaba muyu, megi ena e tǫde tigi tomode bidiyu, tama te tiwai ena aga bomogo bidibo dao.
GAL 2:21 Tama da te Godigo gedude doloba pai we bidi pedalomainogo eyu, te bomai po bugagia wali pabo usu egi sogo da, teda da tau siyu Jisas aga olo naga isali, dago te homu egi da. Tialima agai te tiwai ebeo. God agai da dali olo mu tau sabo kolesaga eyu, Jisas tagala palali. Tama eno agai te sę yali tudi badu mugobeo,” eno te po me Pitabolo wai, te Antiok hanude.
GAL 3:1 Idao! dage Galesia bulu we bidi hani bage, dage homu kolesaga meni yai bage, eno dagede noma mu sobao. Polobadu ena dage dali bidibadi yaide, te sogo eno dagebolo te Jisas Krais aga te ni pedaide wadolama tama isąma, dago yali dwai sę sęgę sela sąwani po, te po eno dagebolo mu hania pusai dao. Tama te po odolama, tama Godigo gedude dage doloba pai we bidi pedalainogo eyu, dagego duga homu tigidali te poba mu muani. Tiali digi megi dagego homugo te Juda bagego bomo yai po wali paibao, te God agai dage doloba pai we bidi dao omainogo ebao. Dagego duga homu magi baso hasegelaliwe? Dego te homu bega sabo pobi olama, tama homu begelabo po dagebolo pusaliwe?
GAL 3:2 Tama dagego te Juda dabego bomo yai po wali pabo homu ebaso, eno dage te po me deli hanalu obao. Edao. Godigo Dwagi Yai Mobo Bidi aga dageba asai dao, polobadu. Tama aga dageba magi baso asaliwe? Dagego te bomo yai po bugagia wali pidu baso Godigo Mobo Bidi dageba asaliwe? Te menio. Dagego te Kraisde gesi dwagi yai po odama, tama te poba duga homu tigidali mubaso, te Godigo aga Mobo Bidi dagebolo mawai dao.
GAL 3:3 Tama Godigo Mobo Bidigo bomo dali dagego God wali pabo gagalali. Tama megi dagego homu eyu, ‘Te Godigo Mobo Bidigo bomo tagalama, tama dena bomo elama da te bomo yai po bugagia wali peyu, te tiwai bidiyu, tama dena kolesaga wiegi yai mu pedalaibao,’ dagego te homu eyu da, teda dage te homu kolesaga meni yai we bidi mu dao.
GAL 3:4 Tama homugo kone palao. Polobadu te Godigo Dwagi Yai Mobo Bidi aga dageba aselama, tama haniani dwagi yai sę dageba pedalai. Tama megi dagego te dwagi yai sę olo subigila sela sąwaibawe? Woo, eno homu dagego te tiwai egobeo.
GAL 3:5 Tama God agai aga Mobo Bidi dagebolo menama, tama agai dage tomode bidi noma sabo bomai sę ebo dao. Magi basowe? Dagego te bomo yai po bugagia wali pobaso agai te Mobo Bidi mabo dawe? Te menio. Dagego te Kraisde gesi dwagi yai po odama, tama te poba duga homu tigidali mubaso, te God agai dage dali te dwagi yai sę ebo dao.
GAL 3:6 Te Godigo dagebolo yali dwagi yai sę, te tobage sę naga me agai te polobadu bidai bidi Abraham dali yai. Tama agai Abrahambolo te sę yalide augwaligo Godigo po bukude e po asęani, “Te Abraham agai Godigo wali po odama, tama agai aga homu tigidali te poba mubaso, tama Godigo gedude Abraham te doloba pai bidi mu pedalai,” augwaligo te po asęai.
GAL 3:7 Tama tibaso, dagego bugagia koneao, te Godigo wali po odoyu, te poba augwa homu tigidali mubo we bidi, augwali naga te Abraham aga hani we bidi mu dao. Te dagebolo te homu bega sabo po wali bage, augwaligo geda muyu te homu ebo da, ‘Abraham aga bulai wai dabe augwali da te aga hani we bidi mu dao,’ augwaligo te homu ebao. Tiali goli te mu menio.
GAL 3:8 Tama polobadu God agai koneai, nosali te Abrahamgo bulai wai ąǫ isiąwai we bidi meba augwaligo Godigo po odama, augwa homu tigidali te poba munama, tama Godigo augwaligo yali dwai dwai sę sela sąnama, tama agai augwali doloba pai we bidi dao waibao. Tama tibaso, polobadu, te sę pedalisiąbadi, Godigo te Abrahambolo te po wai, “Te eno nage dali wiegi yai sę eyu, tama tebogo nosali te tigidali haniani bidi hani dali wiegi yai sę me yaibao.” Godigo te po olama, tama bidi mego te po bukude asęani.
GAL 3:9 Tama Abraham agai Godigo agabolo wali po odama, tama te poba aga homu sese mubaso, Godigo aga dali dwagi yai sę yai dao. Tama tiwai, niwai we bidi augwa homu sese Godigo wali poba mubaso, Godigo augwali dali dwagi yai sę ebo dao.
GAL 3:10 Me ma, we bidi meba augwaligo te homu ebo dao, ‘Te dago te bomo yai po bugagia wali peyu, tama Godigo gedude da doloba pai we bidi pedalaibao.’ Tiali goli te tobage homu ebo we bidi augwalibolo Godigo dwai sęgę mena mena piduaibao. Magi baso meni. Te God agai wali po bukude te po me deli elalubao, e dao, “Niwai bidi aga te bomo yai po wali pabo bidi aga sesemane sogo te bukude asęani bomo yai po tigidali te gisiga wali pisąwai bidi, te bidibolo God agai dwai sęgę mena mena piduaibao,” te po asęani. Tama da we bidigo te bomo yai po tigidali gisiga wali pabo usubeo.
GAL 3:11 Tama Godigo po bukude tobo me wai, “Niwai bidi aga homu kolesaga tigidali Godiba mubo bidi, Godigo agabolo nage doloba pai bidi da olama, te tobage bidi naga bida bida paibao,” te po te Godigo bukude elalubao. Tama tibaso, tede dago hania koneani, bidi me te bomo yai po wali pelama Godigo agabolo nage doloba pai bidi dao wagobeo. Te usubeo.
GAL 3:12 Te bomo yai po wali pabo kolesaga me, te bidi aga homu kolesaga tigidali Godiba mubo sę me, te sę si tedali dao, tiwai si menio. Tama Godigo po bukude te po me elalubao, “Te bomo yai po tigidali mu wali pabo bidi, te bomo yai po me deli sela sąsiąwai bidi, te sę ebogo te bidi tau siyu, tama te bidi bidaibao,” te po te bukude augwaligo asęani.
GAL 3:13 Tiali goli dago koneai, da te sę ebode usubeo, da te bomo yai po tigidali mu wali pisąwai bage dao. Tama tibaso, da te Godigo dabolo maiabo dwai sęgę dologode bidali. Tialima, Krais agai da ma abelama, tama megi da te dwai sęgę dologode bidibo menio. Tama agai da ma abelali sę e tiwai yali, agai te Godigo dabolo maiabo dwai sęgę aga tigide selama, tama aga digi isali. Tama Godigo po bukude te po me deli e dao, “Te augwaligo nide walali bidi te bidi te Godigo dwai sęgę maiabo bidi dao,” te po asęani. Tama augwaligo Krais eleyu, te ni pedaide walama, tama aga da tobade te Godigo dwai sęgę maiabo bidi aga pedalai.
GAL 3:14 Agai te sę magi baso yaliwe? Te God agai te tama homu yai, te da tigidali Krais Jisas dali wadolama, tama te Godigo polobadu Abrahambolo dąų wali po te po te Juda hani isiąwai bagede mu pedalaibao, te God agai augwali tigidali dali dwagi yai sę mu yaibao, agai Abraham dali yali gilama tiwaibao. Tama te tiwai eyu, Godigo homugo da tigidali dena homu tigidali te Jisasba munama, tama God agai aga Dwagi Yai Mobo Bidi dabolo mawaibao po weyu dąų wali. Tama te po mu pedalainogo, Jisasgo te dwai sęgę da tobade sali. Tama tiyu, te dago Godigo Mobo Bidi sabo tų te tiwai megi elalubao.
GAL 3:15 Eno ama dedeo, megi eno te da tǫde bidibo bidigo ebo kolesagade dwasianu po waibao, dagego Godigo ebo kolesaga hania konemainogo ebao. Te bidi si augwaligo homu deli eyu, tama te homude te dąų wali po asęyu, te gasa bidi agai te augwali sigo dąų wali po sela sągobeo. Agai te poba gasa po ma wadologobeo. Tama te dąų wali po da te tǫde bidi dabego po naga digi, gasa bidigo te po sela sągobeo. Tama te tiwai me, te Godigo dąų wali po te gasa pogo munu me sela sągobeo, te usubeo.
GAL 3:16 Tama Godigo agai po dąų weyu, tama Abrahambolo te tobage po wai, “Eno nage dali, nago wąį me deli dali, te dage sibolo dwagi yai sę yaibao,” te po dąų weyu wali. Tama Godigo wali po bukude augwaligo te po asębeo, “nago wąį dabe,” te bidi hauwa badi wabo menio, te wąį bidi deli nagade Godigo agai dąų wali po wai dao, tama te wąį deli te Krais naga dao.
GAL 3:17 Tama eno megi dagebolo wabo po page e dao, te Abraham dali nosali yabo dwagi yai sę po weyu, tama te po Godigo polobadu mu dąų wali. Tama tialigo da, te nosali asali bomo yai po tego te polobadu dąų wali po togogobeo. Te kibu be 430 silama, tama Godigo te bomo yai po mawai. Tama tibaso, te nosali asali bomo yai pogo te hasia wali dąų wali po aiyaba elaluama, tama te po hasegelama, te olo po tiwai pedalogobeo.
GAL 3:18 Tama da te bomo yai po naga bugagia wali peyu, tama God agai da dali dwagi yai sę egi sogo da, teda agade agai dąų wali po wali peyu agai da dali dwagi yai sę egi menigi da. Tiali goli te menio. God agai ‘Eno Abraham dali dąų wali po polobadu obaso, tama megi eno aga dali dwagi yai sę yaibao’ te homu eyu, Godigo Abraham olo tau siyu, dwagi yai sę yai. Tama tibaso dago koneai, te Mosesgo sali bomo yai po tego te Godigo polobadu dąų wali po aiyaba elalugobeo.
GAL 3:19 Tialima, te po konila eyu, bidi mego te po enabolo waibao, “Te nago megi wali po te mu po weyu da, tama Godigo te dąų wali po hasia olama, tama agai te da Juda dabebolo te bomo yai po me magi baso nosali maniwe?” te po bidi mego ena hanalu waibao. Tama Godigo e homu eyu te bomo yai po mani, ‘Augwaligo augwa te eno bomo yai po bolobo sę hania konemainogo yaibao.’ Tama te bomo yai po mayu, Godigo e homu me yali, ‘Polobadu eno te Abraham aga wąį deli te bidi dali eno dwagi yai sę yaibao po dąų wali. Tama te bidi asisąbadi te bomo yai pogo sę elalubao, te aga asobo sogo usu nagasaibao. Tama te bidi asobo si te bomo yai pogo sę silaibao,’ Godigo te bomo yai pode te homu yai. Tama te homu eyu, God agai te bomo yai po mayu, te we bidigo nogoba dolo mubeo. Te menio. Agai te bomo yai po te aga sę ebo ensel bidi dabebolo menama, tama augwaligo te tomode bidali bidi Moses tebolo mani, te po te bidi Mosesgo dabolo pusa mani.
GAL 3:20 Te bomo yai po mabo sę te tiwai yali. Tiali goli te Godigo hasia polobadu dąų wali po tego te bomo yai po aiyaba elalubaso, God aga digi te dąų wali po te Abrahambolo pusali, te tomode bidibo bidibolo pusa mabeo.
GAL 3:21 Te bomo yai po dali, te Godigo we bidibolo dwagi yai sę yaibao dąų wali po dali, te po si augwa hasi boi bidi si tiwai dawe? Woo, te tiwai mu menio. Te po olamuo. Tama Godigo te bomo yai po me deli menama, tama te bomo yai pogo te we bidi Godigo gedude doloba pai we bidi egi sogo da, teda te we bidi tigidali augwali te bomo yai po wali pelama, augwali Godigo gedude doloba pai pedelali wagi da.
GAL 3:22 Tialima, te tobage bomo yai po elalubo menio. Tama te Godigo po bukude augwaligo te po asęani, “Te tigidali tǫde bidibo we bidi augwaligo Godigo bomo yai po boludubo dao. Tama te kolesaga ebogo augwali mu dagana selama, tama augwali te sę tomode kalabus bidi tiwai dao,” te po asęani. Tama te asęani po odama, tama dago koneani, te bomo yai po wali pabo tų te usubeo. Tama tibaso, te pabo tų me deli naga elalubao. Godigo polobadu te po wai, “Niwai we bidigo homu kolesaga Jisas Kraisde dąų wabo we bidi eno augwali dali te doloba pai bidi da waibao,” te po dąų wai. Tama da dena homu tigidali agaba muyu da, teda da doloba pai we bidi te Godigo gedude pedalaibao.
GAL 3:23 Tialima, te dena homu te Jisasba muabo sogo pedalisiąbadi, tama te bomo yai pogo da kalabus bidi tiwai dąų wali, te da dena homu Jisasba muabo tų pedalabo sogo tonalubadi bidai dao.
GAL 3:24 Tama tibaso, te Krais aga asisąbadi te bomo yai pogo da tonaluai dao. Magi baso meni. Te Krais aga aselama, tama dago dena homu tigidali agaba menama, tama Godigo da dali te doloba pai we bidi dao omainogo, da te bomo yai po dologode tonaluyu bidai dao.
GAL 3:25 Tialima, megi te dena homu Jisasba muabo sogo asaligo da, te da te bomo yai po dologode bidabo sogo sia sali dao.
GAL 3:26 Te dage tigidali bidigo Jisas Kraisde konealubo po dąų weyu, tama dagego te konealubo po dąų wabode te dage da Godigo wai puluba dao.
GAL 3:27 Tama dagego duga homu tigidali Kraisba munama tama baptais selama, tama dage aga dali wadolama tama bidibao. Tama bidiyu, bidi aga gudubo ugwa gudubo tiwai eyu, dagego Kraisgo digi homu kolesaga duga homude dąų walao, te dagego te homu kolesaga wali pomainogo tama yao.
GAL 3:28 Tama aga homu kolesaga siyu, tama dage Krais agai we bidi bidiyu, tama dage deli hani naga bidaligo da, teda dage haniani tedali tedali bage dao, te homu egio. Polobadu dage meba Juda hani we bidi bidai, meba Juda hani isiąwai bidi bidai. Meba nogi meni yai we bidi bidai, meba genuai nogi elalubo bidi bidai. Dage meba bidi, meba we dao. Tiali goli megi dage te haniani tedali tedali bidali kolesaga mu sila palio. Dage te Krais Jisasde wadolama, tama dage tigidali megi Jisasde we bidi hani deli naga mu bidibo dao.
GAL 3:29 Tama tiyu, dage Krais aga dali wadolama, tama dage agai hani we bidi bidibaso, te dage Abrahamgo wai me bidibao. Tama tibaso, te polobadu Godigo Abrahambolo sa muyu sagameo wali te hagea sali nai, te nai dagego sabo bidi dabe dao. Godigo dage ma dobola sai dao.
GAL 4:1 Te Krais aga asisąbadi, te bomo yai pogo da tonaluai dao. Tama eno po meba te pode elalubao. E tǫde dago kolesaga e tiwai elalubo dao. Ogwa me deli aga aya ida si isibaso, nosali agai aga ayago elaluali nai mu saibao.
GAL 4:2 Tiali goli aga dwasianu ogwa bididubadi, aga te nogi meni yai bidi tiwai bidiyu, aga ayago amago aga tonaluaibao. Te ogwa te bidi dologode bidibo dao, te aga ayago doado bage sabo sogo tonalubo dao.
GAL 4:3 Tama te tiwai polobadu dago bugagia konesiąbadi, da e tǫde dwai olo kolesaga ebo dologode bidai dao.
GAL 4:4 Tialima, te Godigo bodolu mani sabolobo side, agai aga ogwa e tǫba tagala palai. Tagala palama, tama e tǫde wego aga ame nai, tama aga e tǫde bidibadi aga te Juda dabego bomo yai po dologode bididubadi yai.
GAL 4:5 Tama tiyu, agai da tǫde bidi bomo yai po dologode bidibadi abelai dao, da Godigo wai puluba pedalama bidimainogo yai.
GAL 4:6 Tama dage agai wai puluba bidibaso, God agai Ogwago Mobo Bidi dago homuba tagala palama, tama dago i weyu, te po agabolo wabo da, “Aya, Aya.”
GAL 4:7 Tama tibaso, megi dage deli deli te olo sę ebo bidi tiwai ma bidigobeo. Menio. Dage agai ogwa dabe bidibao. Tama agai aga ogwabolo maiabo nai dagebolo mawaibao, te agai te we bidi ma dobola sabo kolesaga agai dage dali yaibao.
GAL 4:8 Te polobadu dagego God konesiąbadi, tama dage e tǫde dwai haubo noma bidi dabe dologode bidai dao, dage augwaligo olo sę ebo bidi tiwai bidai dao. Tama te god mu menio, te augwali tibo god dao.
GAL 4:9 Tiali goli, megi dagego God koneai dao. Woo, meo, te po dwasianu usube. Te e tiwai dao, megi Godigo dage aga dali wadolai. Tama megi dagego God mu koneai digi, magi baso te tǫde dwai olo kolesaga ebo dologoba ma geasa peyu, tama dage te kolesagade kalabus sęde ma bidibo tiwai ebawe? Augwaligo dage tau sabo usu egobeo, bomo elalubeo.
GAL 4:10 Tama tiyu, sesemane sogo dagego te genuai si bidibode me, te gesi polua pedalubode me, te genuai lotu po wabo sogode me, te gesi kibu be gagalobode, te dagego suyu, dagego homu te naide dąų wabo dao. Dagego homu ‘Dago te sę ebode Godigo da ma saibao’ geda muyu te homu ebo dao.
GAL 4:11 Dagede homu sęgę eyu, tama eno moni homu ebao. Te eno dage dali yali sę te olo elama, tama tagalobowe te homu eyu, eno dagede homu si ebo dao.
GAL 4:12 Eno ama dedeo, dagede eno homu dene eyu, tama bomonama eno dagebolo e po obao. Polobadu ena te da Juda dabego wąįgo yali kolesaga dologode bidibadi, tama dage te tiwai bidibe. Tama dage tau sainogo eno te eno wąį dabego kolesaga dologode bidali tagalama, tama dage tiwai bidali. Tama megi dage te Juda dabego wąįgo kolesaga tomoba pidali weyu, eno dagebolo te po obao, dage ena tiwai olo mu bidao. Ena hasia dage pageba asali sogo dagego ena dali magi dwai sę me yai menio.
GAL 4:13 Dagego koneani, te sogo eno tigi gasi selama, bomo meni yai. Tama te sogo hasia eno te Godigo dwagi yai po dagebolo pusai dao.
GAL 4:14 Tama eno gasi ebadi, dagego ena geseyu, bugagia tonaluai dao. Te sęde dage dene sai dao. Tama tiali goli ena tudiba muyu, tama dagego ena hagela ebo po me wai menio. Te tiwai menio. Tama Godigo ensel bidi me deli aga dage pageba asiyu da, tama dagego aga bugagia gesaibao. Ma, Krais Jisas aga digi aga dage pageba asiyu da, tama dagego aga bugagia gesaibao. Tama te tiwai ena dage pageba asali sogo dwagi yai homu mu eyu, dagego ena bugagia gesai dao.
GAL 4:15 Tama dagego te gesebo sę ebadi dagego ena dali te dwagi yai homu yali. Te homu megi mena tama elalubowe? Dage te homu gegeda paliwe? Eno mu po tama dagego te dwagi yai kolesaga yali haniliyu te po obao. Tama tebo sogode dagego te homu yai, ‘Dago Pol tau siyu, dago dena gedu ge gudama, agabolo magi sogo da, teda usu egi dao,’ dagego te homu yai.
GAL 4:16 Tiali goli dage megi magi yaliwe? Megi eno mu po dage dali obaso, tama dagego ‘Woo, megi Pol agai da dali boi bidi homu ebao,’ dagego te homu enade ebawe?
GAL 4:17 Te gasa bidi dabe meba augwali dage pageba nosali asiyu, tama augwaligo dagebolo homu bega sabo po bomo elama wabo dao. Tiali goli augwaligo dage homu bega sabo po wabo te dwalio. Te dwagi yai po menio. Augwaligo dage ena dali tomode togolama, dage augwaligo po wali pomainogo bomo ebo dao. Tama dagego augwaligo nogi ugwaba somainogo tama tebo dao.
GAL 4:18 Tama bidigo te homu bega sabo po te pode te wiegi yai po obaso da, teda te po usu dao. Tama sesemane sogo da te wiegi yai homu bega sabo po naga wao. Tama te sogo da hodobo bidisiąyu da, tialima dagego te tebo homu kolesaga me tagalamu dao.
GAL 4:19 Eno wai puluba, polobadu dagego homu kolesaga Kraisde dąų wasiąbadi, te sogo dagede ena moni homu eyu dene sai dao. Tama te tiwai megi me ena te dene ma sabo dao. Te wego wai ame nainogo dene ebo tiwai, dene megi eno ebo dao. Tama ena te dene sesa pidubadi tama dagego homu kolesaga te Kraisgo homu kolesaga tiwai ebo side te eno homu wiegi yai eyu usu yaibao.
GAL 4:20 Tama megi moni homu eyu, eno homugo dage pageba asabo homu ebo dao. Tama ena dage dali bidiyu da, teda eno po dua dage dali wagi da. Tiali goli ena dage dali meni baso, eno dagede moni homu eyu, tama eno dagebolo te po bomo elama obao.
GAL 4:21 Te dage Galesia dabe mebago ‘Godigo da doloba pai bidi dabe da waibao’ homu eyu, tama dage te Juda dabego bomo yai po dologoba painogo homu ebo dao. Tama tibaso da, te po eno megi dagebolo hanalu obao, dagego te bomo yai po page bugagia odobo dawe?
GAL 4:22 Tama te bomo yai po tomode po me deli e tama wai dao, te bidi Abraham polobadu mu bidai, te Juda hanigo agai wąį, te bidi Abraham agai wai ogwa si elaluai. Tama te ogwa mego ida te Abrahamgo aga we mu bidai, te we nogi Sara dao. Tama gasa ogwa aga ida, te we da te Sara aga sę ebo we nogi Hagar dao.
GAL 4:23 Tama Abraham aga te we Hagar dali bidibaso, te wego aga ogwa nosali ame nani. Te ogwa ame nabo te tǫde we bidi dabego ebo kolesagade bidiyu ebo kolesaga tiwaigo te sę elama te ogwa ame nani. Te polobadu pedalisiąbo kolesagade isiąbo tiwai yai meni. Tiali goli aga wai ame nesiąbo mosi we mu Sara, te wede Godigo aga dąų wali po wali pobaso, Sarago te ogwa ame nani. Tama tiyu, te we bidi noma sabo sę tama pedalali.
GAL 4:24 Tama te we si augwalide te po digi po begelama tama wali po page e tiwai elalubao. Te we si da, te dąų walali kontrak po si dao. Te dąų walali kontrak po me deli te bulu du nogi Sainai tedu asali, tama te dąų walali kontrak po te Godigo Mosesbolo mani bomo yai po dao. Tama te bomo yai po dologode bidibo we bidi augwali da te kontrak pogo wai puluba tiwai dao. Tama dago po digi po begelama, tama te bomo yai po kontrak po te we nogi Hagar dao.
GAL 4:25 Tama Hagar da, te Arebia tǫde elalubo bulu du nogi Sainai dao. Tama gasa piksa mede, te we Hagar te megi elalubo hanu Jerusalem tiwai dao, te hanude bidibo we bidi augwali te bomo yai po dologode dąų weyu bidibo dao.
GAL 4:26 Ao, tiali goli megi eno te gesi hanu me Jerusalem tede po digi po begelama obao, te hanu aga dagalude megi tonalubo dao. Te gesi hanu Jerusalem te gasa we dao, te we nogi Sara dao. Aga te olo sę ebo we menio. Tama da te Godigo mani gesi kontrak po dologode olo bugagia bidibo, tama te we Sara aga te dago ida tiwai bidibo dao.
GAL 4:27 Tama te Godigo da dali dąų walali gesi kontrak po, te gesi pogo te polobadu mani bomo yai po kontrak po aiyaba elalubao. Eno tede tamadi wali po digi po tiwai po meba te bidi me deligo Godigo bukude tama po polobadu asęai, “Tama nage dwai haliga tabi elalubo we, tama nago wai ame nabo usu isiąwai, tama nage wai ame nabo dene ebe, tama naga digi nago homu wiegi yai hauwa elama, tama i bomonama ola bilao. Nago bidi aga nage osogo taga pai goli, tama nosali nago wai puluba hauwa ame naibao, te aga bidi dali bidali wego wai puluba namba aiyaba elaluaibao,” te po asęani.
GAL 4:28 Eno ama dedeo, dage te bidi Aisak tiwai dao. Godigo te we Sarabolo dąų wali po mobaso, tama nosali te ogwa Aisak ame nani. Tama dagede me Godigo agai dąų wali po wali pelama, tama agai dage ma dobola sai dao.
GAL 4:29 Tama te Abraham tǫde bidali sogo te we Hagar aga ogwago te Sarago ogwa dali boi bidi homu eyu bidali. Awe, te tǫde kolesagade ame mani ogwa agai te Godigo Mobo Bidigo bomogo ame nani ogwa dali dwai homu eyu dene mani. Tama megi e sogo me te tǫde kolesaga wali pabo bage augwaligo te Kraisgo po wali pabo we bidi dali boi bidi homu ebo dao.
GAL 4:30 Tiali goli, te bukude wali Godigo po te magi po elalubowe? Augwaligo te po e tama asęai: “Te olo sę ebo we dali aga ogwa dali si megi sela sąyao. Te olo sę ebo wego ogwa agai te aga ayago doado bage meba nosali sogobeo. Te olo bidibo wego ogwa naga, aga aya isibo si, agai aga ayago doado bage saibao,” bukude te po asęani.
GAL 4:31 Tama tibaso, eno ama dedeo, suao. Da te olo sę ebo wego wai puluba menio, da te bomo yai po dologode bidibo menio. Da te dąų wasiąwai olo bidibo we Sarago wai puluba tiwai dao.
GAL 5:1 Te da olo mu bugagia bidimainogo eyu tama Krais agai te da dąų wali nai pisigina sąnama, tama megi da olo bidibao. Tama tibaso, augwaligo dage te bomo yai po dologoba ma muidali weyu, tama dage bomo elama, tama dąų wasiąbo olo bidibo bidi dabe bidiąo.
GAL 5:2 Odiąo. Ena da Pol da, tama eno dagebolo e sęgę yai po megi obao. Gasa bidi augwaligo dagebolo te po waidu gebao, “Te God agai dage dali ‘Dage dwagi yai doloba pai bage dao’ agai te po omainogo, duga tigiwali togwao,” augwaligo dagebolo te po mobo mabo dao. Tiali goli eno dagebolo e po obao, dage te usu da po weyu, tama duga tigiwali togoyu da, teda Krais agai dage tau somainogo yali sę te sęgo dage tau sogobeo. Agai dage tau sainogo ebo usu egobeo.
GAL 5:3 Te po tiwai me elalubo. Dage dolidali weyu, eno gasa dage tau sabo po waibao. Te dage tomode bidi me deli aga tigiwali togomainogo agai usu da weyu da, teda agai te gasa bomo yai po tigidali me wali pao, te bomo yai po deli naga wali pigio.
GAL 5:4 Tama dagego te bomo yai po wali pabo homu eyu da, tama dagego te bomo yai po wali pabode God agai dage doloba pai we bidi da te homu emainogo yali weyu da, teda dagego Krais tagalama, tama duga tali bobogasa pai. Tama dagego Krais agai dage olo tau sabo kolesaga tagalalio. Tama tiyu, dage te sęgę sai we bidi me bidaibao.
GAL 5:5 Tiali goli dago da te gasagi yai homu kolesaga tedali sabo dao. Tama dago e homu ebo dao: God agai Mobo Bidigo da tau siyu, tama dago homu Godide dąų wabo dao. Tama te tiwai elaluyu, dago aga tonaluyu, agai da doloba pai we bidi da omainogo bugagia bidibo dao.
GAL 5:6 Tama tiyu, dago koneani, te bidi aga Krais Jisasde wadoloyu da, teda aga tigiwali togobo sę te olo sę tama tiwai da, tama te tigiwali togisąwai bidi me, te me te olo sę tiwai da. Te sęde magigobeo, te olo sę tama dao. Tiali goli, te bidigo aga abagi dali te wiegi yai homu elama tama tau sabo, te bidigo Godide konealubo po dąų wabo homu kolesaga hodolobao, te agai kolesaga te usu mu elalubao.
GAL 5:7 Te polobadu dagego Kraisgo mu po wali peyu, te tųdu bugagia wali pai dao. Te mena bidigo te tų palibaso, dagego te po mu bugagia wali pabo tagalaliwe?
GAL 5:8 Te dagego megi te wali pabo homu kolesaga te po page God pagedu asobo menio. God agai dage i wali te mu po wali pomainogo yai.
GAL 5:9 Te eno te gasa bidi augwaligo dage dolobo sę, tede te po digi po begelama obao. Te bret bo dabo nai nogi yis, tama te nai yis dwasianunu selama, tama te ąį dali te plaua hauwa dali si taluama, tama te yisgo te plaua tigidali usu nama, bo dela silibo dao. Tama te tiwai augwaligo dage dali wabo dwai mobo mabo pogo dage tigidali mu dolaibao.
GAL 5:10 Tiali goli, ena dage dali da tigidali te Genuai Bidi Kraisde wadolobaso, tama dagede eno e homu ebao, dagego eno homu wali pabo tagalama, gasa bidigo po wali pogobeo. Tama te dagego homu hodolobo bidi te agai nogi eno konebeo. Tialima, te bidigo dagede dwai sę ebaso, tama Godigo agabolo dene mawaibao.
GAL 5:11 Te tigiwali togwabo po wabo bidi augwaligo dagebolo te po wali, “Te bidi Pol me, agai te po wabo dao, ‘Bidi me Godigo agabolo te doloba pai bidi da omainogo, tama aga tigiwali togwao, aga te Godigo bomo yai po tigidali me wali asao,’ Polgo te po wabo dao,” augwaligo enade te po wali. Tiali goli te mu meni, eno te po wabo menio. Eno ama dedeo, eno te tobage po odubadi tigi sogo da, teda te Juda dabe augwaligo ena dali boi bidi eyu, ena elainogo homu me egi menio. Woo, eno te we bidibolo te Krais aga te ni pedaide isiyu dago sęgę sela sąyani po naga ola mabo dao. Tama eno te po naga ola mobaso, tama augwaligo hagela eyu, tama augwaligo ena dene mabo dao. Tialima, te eno te tigiwali togwao po me, te duga homu tigidali Kraisde muao po me, te po si taluama, tama te po si wagi sogo da, teda augwaligo ena dene dali sęgę dali magi menio.
GAL 5:12 Tama dage te tigiwali togwa po wabo bidi dabe augwaligo dagego wiegi yai homu elalubo te homu kolesaga augwaligo dolainogo eyu, te tigiwali togobo po wabo dao. Tama eno homugo te bidi dabe augwaligo augwa digi domo dįao!
GAL 5:13 Ama dede, polobadu God agai dage i wai dao, dage olo mu bugagia bidimainu yai. Tama dage megi olo mu bugagia bidiyu, tama bugagia suao. Te da te bomo yai po dologode bidisiąbaso, tama dago polo homu kolesaga wali peyu, tama dena tigigo kolesaga wali pinao, te homu egimio. Te menio. God agai da tau selama, tama da olo mu bugagia bidibaso, tama dage duga hasi dwagi yai homu eyu, duga abagi tau sao, te augwaligo olo sę ebo bidi tiwai bidao.
GAL 5:14 Tama bidigo te bomo yai po me deli bugagia wali pobaso da, teda agai gasa bomo yai po tigidali usu nagasaibao. Tama te bomo yai po me deli e dao: dagego duga hasi dali dwagi yai homu eyu godolo ebo homu yao, te duga digi naga godolo ebo homu tiwai yao.
GAL 5:15 Tiali goli, dagego wado wado po weyu, tama gasa bidi aiyaba elaluyu, tama duga hasi tomode hwįbo po weyu da, teda dage dua dao. Tiyu dage tigidali hodobo hagabo dao, tama deli hani bidibo kolesaga dolaibao.
GAL 5:16 Te eno po e tama dao: dage te Godigo Mobo Bidigo ebo dwagi yai kolesagade bilao. Tama dagego tama tiyu da, teda dagego te dwai dwai tǫde kolesaga wali munu me pogobeo.
GAL 5:17 Tama te dago tigigo ebo dwai tǫde kolesaga te Godigo Mobo Bidigo ebo dwagi yai kolesaga tiwai menio. Te gasagi yai dao, tedali dao. Tama augwali sigo augwa hasi hwįyu, tama augwali si konila eyu, mego kolesagago me kolesaga te aiyaba elaluainogo eyu, te kolesaga augwa si boi bidi tiwai ebo dao. Tama te Godigo Mobo Bidigo ebo kolesaga dali, te dago tigigo tǫde ebo dwai kolesaga dali, te kolesaga si augwali dagego homude hwįbaso, tama dagego te yainogo yali te sę egobeo.
GAL 5:18 Tama te Godigo Mobo Bidigo dagebolo ola mabo tų te tų dagego wali pidu da, teda dage te Juda dabego bomo yai po dologode bidigobeo.
GAL 5:19 Te bidigo tigigo tǫde ebo dwai dwai kolesaga te hania elalubo, te dago subo dao. Tama te tobage kolesaga nogi eno nedada paibao, e dao: te penani ebo sę me, te dwai meda yai kolesaga me, te homu hodolobo kolesaga hania ebo me,
GAL 5:20 te Godigo nogi aba munama tama gasa naigo nogi ugwaba sabo kolesaga me, te animani sabo dwai pobi wabo kolesaga me, tama boi bidi ebo kolesaga me, te wado po wabo me, te dwai homu eyu, te konila po wabo kolesaga me, te mena nai gedugo sulama godolo eyu sabo kolesaga me, te sębę ebo kolesaga me, te nai yogo ebo homu me, te bidi hani si pedebo kolesaga me,
GAL 5:21 te gasa bidigo naide dwai homu ebo kolesaga me, te bomo yai ąį tulama polobo bidi tiwai ebo kolesaga me, te dwai dwai penani sę ebo kolesaga me, tama te tobage haniani kolesaga ebo dao. Tama eno polobadu dagebolo wali po megi ma obao, te tobage kolesaga ebo bidi aga te Godigo we bidi tonalubo bomo dologoba munu me pisiąbaso aga tede wiegi yai homu egobeo.
GAL 5:22 Tiali goli Godigo Mobo Bidigo te bidigo homude hodolobo dwagi yai kolesaga e dao: te we bidide dwagi yai homu eyu, godolo mu ebo kolesaga me, te dwagi yai homu ebo kolesaga me, te homu nagame ebo kolesaga me, te wei polo ponosiąbo kolesaga me, te we bidi tigidali tau sabo kolesaga me, te doloba pelama bilibo kolesaga me, te homu kęą pabo kolesaga me,
GAL 5:23 te imilai bidigo ebo homu kolesaga me, te dago homu kolesaga bugagia tonalubo kolesaga me, te tobage kolesaga tigidali te Godigo Mobo Bidi agai dago homude hodolobo dao. Tama te tobage dwagi yai kolesagade te bomo yai po me deligo habu selebeo.
GAL 5:24 Tama Krais Jisasde wadolali we bidi augwaligo augwa tigigo tǫde ebo dwai kolesaga ela silai dao, te ni pedaide elali gilama tiwai. Tama te dwai kolesagago hodolobo sę, te gedugo mena nai sulama sainogo ebo homu kolesaga te me, te Kraisgo we bidi augwaligo te kolesaga tagala silai dao.
GAL 5:25 Te Godigo Mobo Bidi agai da bidibo ula menama, tama da me te Mobo Bidi bilibo kolesaga tiwaide pepela walinao.
GAL 5:26 Tama tiyu, dago dena digi dena nogi ugwaba siyu, tama dago dena ama homu hodolobo po weyu aga sębę yabo po wagio, tama tiyu dago homugo augwaligo nai sabo homu elamo dao.
GAL 6:1 Eno abagi dede, dagego bidi me deli aga dwai sę ebadi subaso da, teda te Godigo Mobo Bidi agai ebo wiegi yai kolesaga wali pabo bidi dagego te bidibolo dua dua digi agai homu begelabo dodolobo po wao. Dagego aga dali homu sębę eyu wado po wagio. Dage tigidali deli deli dua dao, tama te dwai bidi Satango dage me te dwai kolesaga tomoba kegidali weyu yao.
GAL 6:2 Tama dage tomode bidi me deli agai te tobage sęgę toloyu da, teda dagego aga tau mao. Tama dagego duga hasi te tobage tau sabo sę eyu da, teda dagego te Kraisgo bomo yai po usu nagasaibao.
GAL 6:3 Tama dage dua dao, bugagia suao. Te bidi deli agai te homu ebo, aga digi aga nogi ugadu elalubo homu eyu da, tama agaduba bomo dali bidibo bidi da homu eyu da, tiali goli aga nogi me bomo me elalusiąbaso, teda te bidi aga digi aga homu tomode ili po ola mabo dao. Tama aga tulamuidali weyu, agai te homu ilamuo.
GAL 6:4 Tama tidali weyu, tigidali bidi augwa ebo sę augwa digi osola suyu, tama dago ebo sę wiegi yai sę ebowe te suainogo bugagia osola suao. Tama tebo bidi agai te aga digi ebo kolesagade sulama, tama te kolesaga usu baso, aga wiegi yai homu emainao. Tiyu aga ebo kolesaga dali te gasa bidigo ebo kolesaga dali si te dagalamuo.
GAL 6:5 Magi baso meni. Godigo tigidali bidi deli delibolo augwaligo e tǫde yabo sę tedali tedali dobolama mawai dao. Tama tiyu, tama augwali deli deligo te mani sę te ni nagede tolobo tiwai ebo dao.
GAL 6:6 Te Godigo po odali bidi agai aga wiegi yai nai tigidali togolama, tama te Godigo po ola mabo bidibolo dobayao.
GAL 6:7 Te e pode dagego geda munamuo: bidi mego te Godigo po olo oda tagalama, tama nosali Godigo te bidibolo sęgę magobeo, te homu mu egimio. Tama bidi mego te tubo nai ge me tǫde buluyu da, teda te bulali naigo du te naga nosali saibao, te gasagi yai naigo du sogobeo.
GAL 6:8 Tama te nai ge bulubo sęde eno te po digi po begelama obao, bidi aga tigigo tǫde ebo dwai kolesaga wali peyu bidiyu da, teda tede agai te tobage kolesagago du walama saibao. Tama te kolesagago te bidi dolama, mu hagabo tiwai yaibao. Tiali goli, te bidi agai Godigo Mobo Bidigo dwagi yai kolesaga wali peyu bidiyu da, teda te bidigo te tobage dwagi yai kolesagago walobo du nosali saibao, te Godigo Mobo Bidigo agabolo te bidada pabo bidabo ula mawaibao.
GAL 6:9 Tama tibaso, dago te dwagi yai kolesaga edubadi, te tigi dene eyu da, teda dago te dwagi yai kolesaga ebo sę hagela ilamuo. Magi baso meni. Dago te sę ebo tagalosiąbaso da, teda nosali te nai inabo side Godigo dabolo te wiegi yai kolesaga ebo sęgo nai wai du mawaibao.
GAL 6:10 Tama tibaso, dago te dwagi yai kolesaga ebo tų subaso da, teda dago te tigidali we bidi tau sao. Tama te Kraisde augwa homu tigidali muani we bidi te augwali dago hani we bidi tiwai dao. Tama tibaso, dago bomonama, tama augwali te dwagi yai kolesaga eyu, hauwa sogo tau sao.
GAL 6:11 Eno dagebolo e pas po tolainogo eyu, tama eno te dagebolo pusubo po obadi, gasa bidigo odolama tama agai nogogo asębao. Tiali goli megi eno dagebolo te po silagasu wabo po obaso, ena digi eno e po eno nogogo asębao. Suao. Eno e po silagasu asębo po te eno genuaigo asębao.
GAL 6:12 Te Juda bidi meba augwaligo bomo elama, tama te dagego tigiwali togwao po te mobo mabo po dagebolo megi wedu gebao. Tama tiyu, augwaligo te tigi daide ebo sęde augwa nogi ugwaba saibao. Augwaligo e homu ebo dao, augwaligo dagebolo te tigiwali togwao po olama, tama dagego duga tigiwali togobo si, tama gasa Juda bagego te sę yali po odobo si augwaligo te dage tigiwai togwao po ola mani bagego nogi ugwaba saibao. Me ma, augwaligo koneani, te augwaligo dagebolo te Godigo gedude dage doloba pai we bidi pedalomainogo, Krais aga ni pedaide isali po weyu da, teda te gasa Juda dabe augwaligo augwalibolo dene mawaibao. Tama tibaso, augwaligo dagebolo te tigiwali togwao po naga weyu, mobo mabo po dagebolo wabo dao.
GAL 6:13 Tialima, te augwa tigiwali togwali bage, te bage augwa digi augwaligo te Juda dabego bomo yai po tigidali mu bugagia wali pabo menio. Tama dagebolo te duga tigiwali togomainogo mobo mabo po weyu, tama augwaligo dagede te homu ebao, ‘Augwali dago po wali peyu, augwa tigiwali togobo si, tama te dago Juda hani bagego dago nogi ugwaba saibao,’ te homu eyu augwaligo dagebolo te tigiwali togwabo po wabo dao.
GAL 6:14 Tama augwaligo te sęde augwa nogi ugwaba sabo dao. Tiali goli, ena digi eno te dago Genuai Bidi Jisas Krais agai da tau somainogo aga ni pedaide isali po, te po weyu, tama eno aga nogi naga ugwaba sabo dao. Tama te ni pedaide eno te po obao, eno ena tigigo e tǫde ebo dwai kolesaga ela silai dao, te ni pedaide elali gilama tiwai. Tama ena me, te tobage dwai kolesaga ebode mu isali bidi tiwai dao, te tǫde ebo kolesagago eno homu ma hodologobeo.
GAL 6:15 Tama te tigiwali togobo sę dali, te tigiwali togisiąbo sę dali si te olo sę dao. Te sęde magigobeo, te olo sę tama dao. Tialima, te God agai da gesi noma sai we bidi nigibo kolesaga, te kolesaga wiegi yai mu dao, genuai mu dao, sęgę mu dao.
GAL 6:16 Tama eno homugo te eno megi tamadi wali po wali pabo we bidi tigidali, te Godigo augwalide homu dene eyu, tau sao, augwali moni homu isiąma bugagia bidimainogo yao. Tama te tobage we bidi augwali te Godigo dią sali Israel we bidi hani mu dao.
GAL 6:17 Te eno po silagasu wabo po e dao: polobadu eno te Jisasgo sę ebaso, augwaligo eno tigi elali. Tama elama, tama te eno tigide elalubo masalu tego te ola mobao, te ena da te Jisasgo sę ebo bidi mu dao. Tama tibaso, megi gagalama, tama bidi mego eno po tudiba muyu te tigiwali togobo po wabo bagego po wali peyu agai tebogo ena dwai homu ilamuo. Dagego eno po wali piąo.
GAL 6:18 Eno ama dedeo, dagede eno homugo dago Genuai Bidi Jisas Krais agai dage tigidali olo tau sao, te dage bugagia mu bidimainogo yao. Te mu dao. Te eno po tama dao.
EPH 1:1 Ena Pol da, ena Krais Jisasgo po pusigi pabo bidi dao. Tama God aga homugo ena te po wagi pabo sę emainogo eyu, agai ena te sęba muai dao. Tama eno e pas Godigo we bidi dagebolo eno asęna tolobao, dage Efesus bulu bidi hani, dage Krais Jisas wali pabo we bidi hani mu dao.
EPH 1:2 Tama eno homugo dago Aya God dali, dago Genuai Bidi Jisas Krais dali te augwali sigo dagebolo olo tau siyu, dage haliga nagame eyu bidao.
EPH 1:3 Dago Godibolo usu da po weyu, agai nogi ugwaba sao. Aga dago Genuai Bidi Jisas Kraisgo Aya dao, agai God dao. Tama da te Krais dali wadolama, tama te da we bidigo gedugo susiąbo bomo elalubo naide, te tobage naide Godigo wiegi yai homu ilibo sę tigidali da dali yai dao. Agai te dago homu noma bidi tau somainogo eyu te wiegi yai homu ilibo sę yai dao.
EPH 1:4 Tama Godigo tǫ nigisiąbadi, agai da Krais dali wadolainu, da sa muai dao. Te sę page e dao: Godigo homugo da aga gedude dwai sę isiąwai we bidi, agai gedude doloba pai we bidi bidimainogo eyu agai da sa muai dao.
EPH 1:5 Tama God agai da dali wiegi yai homu eyu, da godolo mu ebaso, tama agai polobadu digi te agai da sa muyu, da te Jisas Kraisgo yali sęgo da ma selama, tama da God aga wai puluba bidimainogo yai dao. Tama te sę God aga homugo digi da godolo eyu tiwai dao.
EPH 1:6 Tama Godigo aga ogwa Jisasde dwagi yai homu eyu, tama da aga ogwade wadolo baso, tama agai da dali wiegi yai homu ilibo sę yai dao. Tama God agai da olo mu tau siyu agai te genuai sę ebaso, te dago God aga ula yai bomo elalubo nogi ugwaba sao.
EPH 1:7 Te Krais aga ni pedaide isilama, tama agai kanemego te da dąų wali nai pisigina sąwai, tama megi da olo mu bidibo dao. Te po page e dao, te Jisasgo kanemede te God agai dago yali dwai dwai sęgę tigidali te mu sela sąwai dao. Godigo da dali yali olo tau sabo kolesaga te dwasianu menio, agai te kolesaga umabo mu da dali yai.
EPH 1:8 Tama tiyu, God agai te dwagi yai homu kolesaga eyu, tama agai te tigidali naide mu konea silibaso, tama agai polobadu mu yali homu aga wali peyu, agai dabolo te bidibolo polobadu ola masiąwai po ola mawai. Tama te po dabolo ola masiąbadi, God aga homu te Krais agai eno homu wali peyu, te agai te sę yaibao, Godigo polobadu mu te homu yai.
EPH 1:10 Tama te sę e tama dao, God agai tigidali nai dodolo piduainu, agai bodolu mani sogo asobo si, te tigidali dagalude elalubo nai me, te tigidali tǫde elalubo nai me, te Kraisba tigidali nai deliba sisinaibao. Tama te sogo Krais aga tigidali naigo tobolu bidi bidaibao.
EPH 1:11 Ao, te God agaduba agai te nosali pedalabo sęde homu bugagia konea pelama, tama agai homugo magi sę yainogo ebo sę, te sę tigidali mu pedalobo dao. Tama agai te homu kolesaga wali peyu, tama polobadu agai da Juda dabe sa muai. Tama aga homugo da Juda dabe da aga hani we bidi mu bidimainogo agai da Krais dali wadolali. God agai te sęde hasia mu konea pelama, tama tiwai dao.
EPH 1:12 Tama hasia te gasa we bidi augwaligo te kolesaga isiąbadi da Juda we bidi dena homu tigidali te Godigo sa muani nosali asaibao wali bidi Krais te bidiba dena homu muani. Tama dena homu tigidali agaba munama, tama dwagi yai homu eyu, da aga ma asobo bugagia tonaluai dao. Tama da te tobage sę hasia ebo bidi dabe dago Godigo ula yai bomo elalubo nogi ugwaba sao.
EPH 1:13 Te dage me, dage Juda hani isiąwai we bidi, te mu po pusubo dagego odai, te Godigo wiegi yai pogo dage ma sabo po dao. Tama dagego te po odama, tama dagego konealubo po Kraisde dąų wai dao. Tama dage Krais dali wadolama bidibaso, tama God agai dage hagea siyu, sa mumainogo tama aga Mobo Bidi dagebolo mawai. Polobadu agai po weyu, te Mobo Bidi dabolo mawaibao po aga homugo wai dao.
EPH 1:14 Polobadu Godigo aga we bidi dali wiegi yai kolesaga yabo po wai dao. Tama megi agai dabolo aga Mobo Bidi manigo da, teda agai tebogo dago konebo dao, te agai da sa muani, te agai polobadu wali po tiwai nosali mu pedalaibao. Agai aga Mobo Bidi dabolo mobaso, te nosali te Godigo aga sa muani we bidi mu selama, tama augwali aga dali hodobo mu olo bidaibao, te me dago hania konebao, tede dago homu si ebo menio. Tama tibaso, dago Godigo ula yai bomo elalubo nogi ugwaba sao.
EPH 1:15 Te Godigo te tobage wiegi yai sę dabolo ebaso, eno agabolo usu da po wabo dao. Eno odali, dagego konealubo po Genuai Bidi Jisasde dąų wali po me, tama dagego augwali dali wiegi yai homu eyu, te Kraisgo po odobo we bidi tigidali godolo ebo po me, te po si eno odali.
EPH 1:16 Tama tibaso, dagego tebo po eno odoyu, sesemane sogo eno Godibolo usu da po weyu agai dage tau somainogo po wabo dao. Dage eno homugo gegeda peyu me tagalobo menio. Tigidali sogo God dali eno po wabo si, dage tau somainogo eno dagego nogi me eno wabo dao.
EPH 1:17 Tama God da dago Genuai Bidi Jisas Krais aga God da, te dago genuai nogi mu elalubo Aya dao. Tama eno aga dali po weyu, eno homugo agai aga Mobo Bidi dagebolo mao. Tama menama, tama te Mobo Bidi agai dage wiegi yai homu kolesaga menama, tama agai God dagebolo waselaibao, te dagego God aga bugagia kuna konea silimainogo tiaibao.
EPH 1:18 Te eno homugo agai wiegi yai ula yai pogo dage homude ula momainogo yaibao. God agai dage i wali, te dagego agai te da mu ma sabo sogo tonalumainogo agai dage i wai dao. Tama Godigo Mobo Bidi agai dagego homude te wiegi yai ula yai po ola mayu, tama dagego te da mu ma sabo sogo tonalubo sę page gisiga koneyu, tama wiegi yai homu ebadi dagego te sogo asobo tonaluaibao. Tama God agai aga we bidi dali wiegi yai kolesaga nosali yaibao po weyu, te po dąų wai dao. Tama tibaso, dagego te kolesaga page wiegi yai mu dao konemainogo, eno God hanaludu gebo dao, agai te dagebolo te dage dali nosali yabo kolesaga page gisiga ola mao.
EPH 1:19 Tama eno God dali po weyu, eno po me deli dage tau somainogo wabo dao. Eno homugo te Godigo agai bomo dagebolo ola menama tama dagego te bomo bugagia koneaibao. Te bomo dwasianu meni. Tama agai bomo te bidigo usu nigo usu sobaso, te usu egobeo, te bomo genuai mu elalubo. Tialima God agai te bomogo da Kraisde konealubo po dąų wali we bidi da tomode tau siyu sę ebo dao. Tama te da tomode sę ebo bomo naga eyu, tama Godigo Krais te gų pagede ma hodoloyu, tama aga dolo nogo badu munama, tama megi aga God dali hodobo dagalude bidibao.
EPH 1:21 Tama megi Krais aga ugwadu mu bidalubao, tigidali tobolu bidi, tigidali polalubo bidi me, tigidali bomai bidi, tigidali nogi elalubo bidi me, tǫde me, dagalude me, Krais agai augwali tigidali aiyaba elaluama, aga ugwadu mu bidibo, te nosali me tama tiwaibao.
EPH 1:22 Tama Godigo tigidali nai mu Krais dologoba muai, tama Krais aga te nai dabe tonaluabo bidi nigilama, tama Godigo po wali pabo we bidi genuai tobolu bidi nigilai.
EPH 1:23 Tama aga te tobolu bidi bidiyu tama Godigo po wali pabo we bidi hani aga tigi tiwai bidiyu, tama te hani te Krais agai te sę yao obaso, te po wali pabo dao. Te tigidali bulude elalubo habuge yai nai tigidali te Krais aga da te nai tigidali simanobo page bidi dao. Tama te Kraisgo po wali pabo we bidi hani augwaligo Krais te tigi sese ilibo dao.
EPH 2:1 Te dage, polobadu dagego dwai kolesaga elama, te tų geda mubaso, tama dage isai bidi tiwai elaluai dao. Isai bidi agai Godigo wabo po odosiąbo gilama, tama dagego me Godigo po odobe.
EPH 2:2 Tama te sogo dage e tǫde bidibo we bidigo ebo dwai kolesaga wali bilaluai dao. Tama tiyu, dagego te dwai haubo noma tobolu bidigo kolesaga wali pai dao. Agai te dagalude bidibo dwai haubo noma bage tonalubo dao, tama megi me agai te Godigo po sela sąbo we bidigo homu kolesaga tonalubo dao.
EPH 2:3 Tama da me, da tigidali polobadu te hani tiwai bidaluali. Dago tigigo tǫde ebo dwai dwai kolesaga wali peyu, tama dago tigide pusu yabo kolesaga ela piduai. Dago homude pusu yabo kolesaga me dago ela piduai. Tama te kolesaga edubadi, Godigo da dali sębę eduai, agai te gasa we bidi tigidali dali sębę iduali tiwai. Tama God agai da eligi sogo da, teda te dolo egi dao, po meni.
EPH 2:4 Mu tama, dago yali dwai kolesagago da ela munama, tama da isai bidi tiwai bidibo ąǫ eyu bidai. Tama da te tiwai bidaluai goli, Godigo da dali dwagi yai homu elama, tama da godolo genuai mu yali. Tama tibaso, agai da dali homu dene genuai mu eyu, da tau sabo homu mu yai. Tama eyu, agai da Kraisba wadolama, da ma hodolai, te da ma bidimainogo yai. Tama tiyu, te Godigo da olo mu tau sabo wiegi yai kolesagago naga agai dage ma dobola sai dao.
EPH 2:6 Tama Godigo da Krais Jisas dali wadolama, tama agai Krais dali da dali ma hodolai, te da isai bidi tiwai bidibo ąǫ ebo silalio, dago tomode ogwa wai gesi noma ma pedalai. Tama da te Krais dali te dagalude bidiyu dago agai we bidi tonalubo sę meba emainogo te God agai da ma hodolai tiwai yai.
EPH 2:7 Agai te sę da dali magi baso yaliwe? Woo, agai da dali dwagi yai homu eyu, da godolo mu ebaso, tama agai Krais Jisas tagala palali, da tau somainogo yai. Agai da olo tau sali, te dago abelegobeo. Tama agai da olo tau sali kolesaga te mu genuai mu tama dao, te we bidi tigidali augwaligo kuna konemainogo, tigidali sogo nosali, te Godigo da Krais dali ma hodolali.
EPH 2:8 Tama tiyu, Godigo da olo tau sabo kolesaga naga tego dage tau selama, dage Satango nogode ma sali dao. Tama dagego te Krais hagede te konealubo po duga homu dąų olama, tama God agai dage tau siyu ma sali dao. Te dagego bomogo me ebeo. Te menio. Te God agai dage olo tau sai dao.
EPH 2:9 Niwai bidi aga digi bomogo te wiegi yai kolesaga eyu, aga digi nogi ugwaba sidali weyu, tama Godigo da olo tau sai dao.
EPH 2:10 Tama God aga digi agai da gesi noma ma nigilai. Agai da Krais Jisas dali wadolama, tama da tǫde bidibo sogo tigidali dago we bidi tau sabo sę naga ela bilimainogo eyu, agai da gesi noma ma nigilai. Tama dago te we bidi tau sabo sę yabo te sę agai polobadu sisi yai.
EPH 2:11 Te God agai dage olo tau selama, tama Satango nogode ma siyu, tama dagego yabo wiegi yai sę sisi yai. Tama tibaso, dagego duga polobadu bidali kolesaga ma konea palao. Dage da te Juda hani isiąwai ame nani we bidi hani dao. Da Juda hani bidi dago ge hwągo dena tigiwali togobo dao, te da Godigo hani da olama waselemainogo ebo dao. Tama te Juda hani bidi dabe augwaligo dage hagede bo olama, “Te God konesiąbaso augwaligo augwa tigiwali togosiąwani bidi dabe dao,” te po dagede wabo dao. Tiali goli te tigiwali togobo sę te bidigo nogogo aga tigi daide naga ebo sę dao, te genuai sę menio.
EPH 2:12 Tama polobadu dage te tiwai bidibadi, te dagego Krais aga de dawe, te dagego konebeo. Dage te Israel bidi hani bulu badu bidaluai, te dage God agai hagea sai we bidi hani meni. Te God agai te da Israel we bidi dali dwagi yai sę nosali yabo po olama, tama dabolo polobadu mu pusai dao. Tama te pogo bomo te Godigo dena wąįbolo mu dąų wali po te dao. Tiali goli Godigo dage Israel hani isiąwai we bidi dali te tobage tau sabo dąų wali po wabeo. Tama dage tǫde bidibadi dage dwagi yai homu eyu, te Godigo dage dali wiegi yai sę yabo sogo tonaluai menio. Tama dagego God konesiąwai bidai dao.
EPH 2:13 Polobadu dage te God digibulu bidai dao, pąde meni. Tiali goli te Godigo sa muani tagala palali bidi Krais aga ni pedaide isilama, tama aga kanemego dage te Krais Jisasde wadolama, tama megi agai dage God pąba bidagasomainogo yai dao, dage te Juda dabe tiwai bidimainogo yai.
EPH 2:14 Magi baso meni. Krais aga digi te boi piabo tų nigai dao. Polobadu da Juda bidi hani dali dage Juda hani isiąwai bidi hani dali gasagi yai tedali bidaluai. Tama tiyu, te bidi hani si augwa hasi te boi bidi homu eyu bidaluai. Tama te bidi hani si tomode te dąį tiwai elaluai. Tama Krais aga ni pedaide isilama tama te tiwai eyu aga tigigo te hani si tomode elaluali dąį te agai hųgialio. Tama hugilama, tama agai da hani si deliba sisinama, deli hani tiwai nigilai, te megi te boi bidi homu mu silai dao.
EPH 2:15 Magi baso meni. Agai te Juda dabego bomo yai po silali, te bomai po te dąį tiwai polobadu elaluali. Awe, agai te homu yali, ‘Te eno te bidi hani si deliba sisinama, tama te gesi noma bidi hani deli nigilaibao, tama augwali enade wadolaibao,’ te homu yai. Tama te homu eyu, agai te Juda dabego bomo yai pogo ebo sę agai mu silali. Tama megi te dwasianu bomo yai po me, te genuai bomo yai po me, te augwali tigidali megi sę elalubo menio.
EPH 2:16 Tama tiyu, agai te da Juda bage dali dage Juda hani isiąwai bage dali tomode yali boi bidi homu agai ela silimainogo eyu te aga te ni pedaide isali. Tama aga te ni pedaide isilama, tama agai te bidi hani si deliba sisinama, wadolama, tama tigi deli tiwai nigilama, tama agai te wadolali hani we bidi God pageba ma sesali.
EPH 2:17 Tama Krais aga asama, tama agai te wiegi yai gesi po, te boi piabo po agai da tigidalibolo pusagasali. Te dage God digibulu bidali Juda hani isiąwai bage dali, te da God pąde bidali Juda bidi hani dali si, te da tigidalibolo agai te boi piabo po ola magasali.
EPH 2:18 Eno te po magi baso obawe? Te Krais agai te da hani si tau sabo sę ebaso, Godigo Mobo Bidi aga da tigidalide hodobo bidiyu, tama da gedu haluasa po wabo si te God dago Aya agai dago wabo po odaibao.
EPH 2:19 Te Krais agai te tobage genuai sę tigidali ebaso, megi dage Juda hani isiąwai we bidi te dage gasa bulu we bidi menio, osogo bidagasai bage me menio. Woo, megi dage Godigo we bidi hani tomoba mu asai dao, te bidi hani dage mu wadolai dao, te augwali dali hodobo kaneme deli dao.
EPH 2:20 Tama eno te be sę ebo po pagede te po digi po begelama te po megi obao. Te Krais aga digi aga te be dąų wabo page ni tiwai dao. Tama agai tagala palali bidi dabe augwaligo dagebolo pusali po me, te Godigo po ola mabo bidi augwaligo dagebolo ola mani po me, te wiegi yai po te be kau ni dabe tiwai dao. Tama dage da, te be kele ni dabe tiwai dao, te be dąų wabo page ni dali te be kau ni dali si tede dage bugagia dąų olama elalubao.
EPH 2:21 Tama Krais aga digi agai te be sę ebo ni tigidali wadolama, tama te be genuai mu pedalobo dao. Tama tiyu, te be gasagi yai tedali be elaluaibao, te dago Genuai Bidigo aga hagea sai be.
EPH 2:22 Dage me Kraisde mu dąų olama, tama Krais agai dage dali te gasa we bidi dali te deliba munama, tama Godigo Mobo Bidigo bidabo madigi nigibo dao.
EPH 3:1 Te Godigo te da bidi hani si deliba wadolobaso, te ena Pol ena digi eno Godibolo hanalubo po wabo dao. Tama eno te dage Juda bidi hani isiąwai we bidi tau sainogo eno Krais Jisasgo po ola bilaluali. Tama eno te sę ebaso, te Juda dabe augwaligo tede dwai homu eyu tama te Rom gavman bidi dabe augwaligo ena nogo si dunama, kalabus beba muani. Tama megi ena tede bidiyu, te eno Godibolo hanalubo po wabo dao, te dage tau somainogo ebo dao.
EPH 3:2 Dagego polo odai, te Godigo wiegi yai homu elama, olo tau sabo te kolesaga agai enabolo mani, te eno te dage tau somainogo yai. Eno homu dagego agai ena dali te sę yali po odalio.
EPH 3:3 Te Godigo yabo kolesaga po te po polobadu geme dualaluali. Tama te po God agai enabolo ola mani, te agai yabo kolesaga page eno hania konemainogo yai. Tama Godigo tede ena hania ola mani kolesaga eno megi tama pęwadage asęani pogo dagebolo pusali.
EPH 3:4 Tama dagego eno te asęani po nedeyu da, teda dagego te bugagia koneaibao, te eno homu kolesaga te hania ula eyu, tama te Krais agai yabo sę po, te polobadu geme dualaluali po, te po page eno hania konea pai, te dagego koneaibao.
EPH 3:5 Tama te tigidali sogo polobadu Godigo te geme dualali po hania me haninai menio. Tiali goli megi Godigo Mobo Bidi agai te po page te God aga po wagi pabo bidi dabe dali, te Godigo po ola mabo bidi dali sibolo te geme dualaluali po haninama ola mawai.
EPH 3:6 Te dualaluali po page e dao: dage Juda hani isiąwai bidi hani dagego Godigo wiegi yai gesi po odama, dagego homu kolesaga tigidali te poba munama, tama dage te Juda hani dali wadolama tama da dali deli hani bidibao. Tama tibaso, da te megi e tiwai dao: polobadu Godigo agai te Kraisba augwa homu begi pabo Juda dabe dali dwagi yai sę hauwa yaibao po dąų walali. Tama megi Kraisgo yali sęde Godigo te tobage dwagi yai sę te Juda hani isiąwai bage dali me yaibao, te augwa homu agaba begi pali we bidi augwali dali agai te tiwai mu yaibao.
EPH 3:7 Te God agai wiegi yai po eno pusigi pomainogo ena te sęba muai dao. Tama agai te olo tau sabo wiegi yai sę enabolo eyu, tama agai bomo me enabolo mani, te ena dąų olama eno te sę emainogo tebo dao.
EPH 3:8 Tama Kraisgo we bidi tomode te eno nogi augwali tigidali dologode elaluali goli, God agai enabolo olo tau sabo kolesaga eyu, tama agai ena te wiegi yai po pusubo sę gasa we bidi, te Juda hani isiąwai we bidi augwalibolo te po pusumainogo ena te sęba muai. Tama te wiegi yai po page hagede eno augwalibolo te tobage po pusubo dao, te Krais agai da dali ebo olo tau sabo kolesaga te moni genuai mu, tama bidigo te kolesaga konemainogo eyu gegebo usu egobeo.
EPH 3:9 Tama te tigidali nai nigai God, te hasia mu agai homude aga nosali yabo kolesaga dualai. Tama te homu kolesaga tigidali sogo polobadu aga homude dualaluai. Tama megi agai homu kolesagade dualaluali yabo sę po page eno haninama te tigidali we bidibolo pusumainogo agai enabolo te wiegi yai po pusubo sę mawai.
EPH 3:10 Tama polobadu agai homude yabo sę dualaluai. Tiali goli megi agai te agai po wali pabo we bidibolo haninama ola mani. Te gasa we bidi me augwaligo te Godigo po wali pabo we bidigo pedauwalidu te po odama tama Krais wali peyu tama aga hani bage pedalomainogo eyu, agai aga po haninama ola mani. Tama tebogo augwaligo te Godigo wiegi yai sę ebo kolesaga te dagalude bidibo ensel mobo bidi tobolu bidi dali, te polalubo bidi dabe augwalibolo te wiegi yai ebo kolesaga page waselemainogo yai. Tama te wiegi yai kolesaga page te ensel mobo bidi dabebolo tama waselama, tama augwaligo Godigo haniani sę ebode wiegi yai homu kolesaga mu elalubo te augwaligo hania koneaibao.
EPH 3:11 Polobadu digi dago Genuai Bidi Krais Jisasgo sęde Godigo te wiegi yai homu kolesaga eyu tama tiaibao homu yai. Tama megi agai te yali homu kolesaga wali pelama te sę yali dao.
EPH 3:12 Tama dago Krais agai te wiegi yai sę ebo suyu, tama dago homu kolesaga tigidali agaba muyu, tama aga dali wadolobaso, tama wi esiąyu, homu si esiąyu, tama da God pąba olo pabo da.
EPH 3:13 Tama tiyu dago konebao, te dago hanalu wabo po te Godigo odaibao. Tama tibaso, megi eno te po dagebolo obao, tama dagego odao: tama eno dage tau siyu te dene sabode, te dagego homu kolesaga tede bomo kimi menia pigimio. Menio. Te eno e sę ebode dagebolo genuai nogi mawaibao.
EPH 3:14 Te Godigo agai homugo da Juda bidi hani dali te dage Juda hani isiąwai bidi hani dali te si deliba wadolama te hani deli tiwai elama bidimainu yali. Tama te hani si deliba wadolabo homu yali te homu Godigo polobadu osogo dualaluali. Tama polobadu Godigo dualaluali po page megi eno homude konebaso da, teda eno kidu sugunama God Ayabolo hanalobo dao.
EPH 3:15 Tama da tigidali dagalude me tǫde bidibo we bidi hani da wiegi yai bomo dali bidabo ula me te God Aya aga nogode sabo dao.
EPH 3:16 Tama tibaso eno gedu haluasa po e tama wabo dao: “Aya God, nago naga we bidi dali wiegi yai sę yabo homu umabo mu elalubo dao. Tama tiyu, eno homugo nago te Efesus hani we bidi dali dwagi yai sę eyu, tama nago Mobo Bidi agai nago bomo meba selama, tama agai augwalibolo te bomo mao, augwaligo homu bomo ilimainogo, te Mobo Bidigo bomogo augwali dąų mu walomainogo tama tiao,” eno God dali te tobage hanalu wabo po wabo dao.
EPH 3:17 Eno homugo dagego Kraisde konealubo po dąų obaso da, teda te Kraisgo dage tau siyu dage homude wiegi yai kolesaga ola mayu bidaibao. Tama dagego God dali we bidi dali wiegi yai homu eyu godolo ebo kolesaga bugagia emainogo eyu, tama agai dage te sęde tau somainogo eno God dali hanalu wabo po wabo dao. Tama eno homugo dagego te God dali we bidi dali godolo ebo kolesagade te dage dolaluao, te ni pedali tǫde dąų olama te ni dąų weyu dolalubo tiwai yaibao.
EPH 3:18 Tama tiyu da, te dage me, te Godigo we bidi tigidali me, te dage tigidaligo bomo selama, te Krais agai dage wiegi yai homu eyu godolo mu ebo kolesaga dagego bugagia mu koneaibao. Tama agai tebo kolesaga te genuai mu dao, te bidigo pobesa pabo usu egobeo.
EPH 3:19 Awe, Kraisgo te dage we bidi godolo mu ebo kolesaga tigidali te bidigo kuna bugagia kone palasiąbo kolesaga digi, te eno homugo dagego te kolesaga bugagia mu koneao. Tama dagego tama tiyu da, teda dagego ebo kolesaga tigidali te God agai ebo wiegi yai kolesaga naga tiwai pedalobao. Tama eno dagede te homu ebaso, tama eno God dali dage tau sabo po wabo dao.
EPH 3:20 Te dago Godigo nogi ugwaba mu sinao. Tama agai te wiegi yai kolesaga ebo bomogo da we bidi tomode genuai sę ebo dao. Te sę ebo bomogo te da Godibolo hanaluyu gedu haluasa po wabo me, te dago homude ebo kolesaga te tigidali agai aiyaba elaluyu, tama agai wiegi yai kolesagade sę ebo te genuai mu ebo dao.
EPH 3:21 Te dwasianu sę menio. Tama tibaso, da God agai po wali pabo we bidi, da Krais Jisasde wadolai we bidi hani dago Godigo genuai wiegi yai nogi ugwaba siyu, te tigidali bidada pabo sogode me, te tigidali sogo te tiwai wiegi yai kolesaga me mu ela pidubadi geao. Te tebo kolesaga me tagaligio. Te mu po dao.
EPH 4:1 Te God agai dage Kraisde wadolomainogo agai dage Juda hani isąwai we bidi i obaso, te eno dagebolo homu hodolobo po megi obao. Tama ena Genuai Bidi Krais agai sęba munama, tama eno te sę eyu, tama augwaligo ena kalabus beba muai goli, eno bomo eyu dagebolo e homu hodolobo mobo mabo po obao. Te dage agai we bidi hani tomoba asomainogo Godigo dage i wali. Tama te sogo agai dage aga usu ni ola mani. Tama dagego agai wali po bugagia wali peyu, te usu niba dolo mu kadu wao. Dagego aga tama wali peyu da, te usu mu dao.
EPH 4:2 Dagego tama kolesaga wali peyu, duga digi duga nogi ugwaba sisiąma, tama imila pai we bidi mu bidiąo. Tama bidigo dage dali dwai kolesaga ebaso da, te dagego te sę emainu sulama tona tagalao, wei sigimio. Tama tiyu, dagego duga abagi dabe dali wiegi yai homu elama godolo mu yao, tama augwaligo mabo sęgę te dagego tolao.
EPH 4:3 Tama Godigo Mobo Bidi agai dage homu kęnai we bidi dabe nigilibaso, te kolesagago agai dage te bonogo kebo tiwai elama tama dage deli hani tiwai mu bidibo dao. Tama tibaso da, dage bomo elama sę dene eyu te deli hani kolesaga dąų ola selama bidao.
EPH 4:4 Tama da Godigo po wali pabo we bidi da tigidali deli tigi tiwai elalubo, tama te Godigo Mobo Bidi me te deli naga bidibo dao. Tama tiwai elalubaso, Genuai Bidi agai da i wali sogo te sogo te po wai, “Te ena ma asobode homu konea paluyu, tama dage ena tonaluao,” te po deli naga dao.
EPH 4:5 Tama dago Genuai Bidi deli naga elalubao, tama Kraisde dago konealubo po deli naga elalubao, te baptais sabo kolesaga me te page deli digi naga elalubo dao.
EPH 4:6 Tama te God me deli digi naga bidibo, te da tigidali tǫde hani bidi dabe dago Aya deli aga dao. Tama agai tigidali bidi aiyaba elaluama tama agai nogi dali bomo dali te ugwadu mu elalubao, tama tiyu agai sę tigidali we bidi tomode eyu, tama tigidali bidi tomode bidibo dao.
EPH 4:7 Te Krais agai da deliba sisinama, tama agai da deli tigi tiwai nigilai goli, tama agai da usu selama, nedama, tama aga homu wali peyu agai da deli delibolo haniani sę yabo homu kolesaga agai dabolo dobawai dao.
EPH 4:8 Tama polobadu augwaligo Godigo po bukude te Krais agai yabo sęde e tobage po asęani, “Agai te genuai boi bidi hani nogo dunama, kalabuside muainu dagalu sigiba mu sela holai dao. Tama tilama agai wiegi yai nai dabe bidi dabebolo olo mani,” te po augwaligo polobadu asęani.
EPH 4:9 Tama te “dagalu sigiba mu holai” po magi baso waliwe? Woo, te page e dao, hasia bolo aga aiyaba mu dulai dao, e tǫba sabolama, tama tǫ tomoba aga dulai dao.
EPH 4:10 Tama hasia dulali bidi, aga me te nosali ugwaba holali bidi dao. Aga holali, te dagaluba holai, tama te dagalu ela soali, te sigiba mu holali, agai te tigidali bulude elalubo sese isąwai nai tigidali te ma siminainogo aga holali.
EPH 4:11 Tama aga digi agai naga agai te wiegi yai nai dabe bidi dabebolo e tiwai olo mawai: te agai meba bidi augwalibolo Godigo po sela pelama pusigi pabo sę yabo bidi nigilai. Bidi me badubolo agai wabo po ola mabo bidi te sęba muai. Bidi meba augwaligo Godigo wiegi yai po pusa mabo sę yabo bidi nigilai. Tama me badu bidibolo te Godigo we bidi hani tonalubo sę dali te Godigo po ola mabo sę dali emainu agai te sę augwalibolo mawai dao.
EPH 4:12 Tama agai dabolo te haniani wiegi yai sę yabo homu kolesaga magi baso dobabo dawe? Te Godigo we bidi hani augwaligo we bidi tau sabo sę ebode bugagia sisi elama bidimainogo agai tebo dao, te Kraisba augwa homu tigidali muai we bidi hani augwali Krais aga tigi tiwai bidiyu, augwali geninama eyu bomo siyu bugagia bidimainogo agai te dwagi yai sę yabo homu kolesaga dabolo tama dobabo dao.
EPH 4:13 Tama tiyu, tama we bidi tau sabo wiegi yai sę dago me ela pidubadi geyu da, teda da tigidaligo bomo yai homu Kraisde dąų wabo sę deli homu kolesaga naga mu eyu, tama dago Godigo Ogwa bugagia konea silimainogo tiyu dago deli homu kolesaga naga agade mu yaibao. Tama tiyu, te da Godigo hani we bidi mu pedalaibao. Tama tiyu, da Godide wiegi yai kolesaga ebo we bidi mu te Krais aga tiwai mu elama bidaibao. Tama aga dago usu ni mu tiwai da, agai usu niba dolo pedaliyu da, teda da aga dali usu mu yaibao.
EPH 4:14 Tama da Godigo hani we bidi mu bugagia pedalama, tama te Godigo pode da te homu subigila pabo wai puluba tiwai ma bidigobeo. Te eno po digi po me megi obao. Te geba, te geba moni sigi ąįdu pobadi, wali asiyu te ąį dini me te bomo yai wali me augwali sigo te geba subigila bega sąyu sela sąbo dao. Tama te tiwai bidi muma sabo tibo po wabo bidi augwaligo ili po weyu, tama bidi hauwa augwaligo homu polo tulalubo dao. Tama tiyu, te bidi muma sabo bidi augwaligo te we bidi te gasa dwai sę ebo tuba kegebo dao. Tiali goli, da Godigo hani we bidi mu bugagia pedalama bidibaso, tama te bidi muma sabo dwai bidi dabe augwaligo wabo tibo pogo da tulalugobeo.
EPH 4:15 Te menio. Da Godigo we bidi hani tomode dena abagi dabe augwali dali wiegi yai kolesaga eyu godolo mu elama, tama Godide mu po naga wao. Tama tiyu, tama da te tobage wiegi yai sę idubadi, tama da Kraisde mu dąų waibao. Aga te dago tigigo tobolu bidi aga deli dao.
EPH 4:16 Tama aga te dago tobolu bidiyu, tama da agai tigi tiwai bidibaso, teda agai da nogo sągą gedu tigide elalubo te tigidali agai tonalubo dao. Tama aga da tigidali tonalubaso, tama da tigidali bugagia deli tigiba wadolama, tama te dili dabe wadolobo nai augwaligo te tigi deliba bugagia dąų wabo dao. Tama dago tigi deli badu sę ebo augwa hasi tau sabo sę ebo si, tama te tebo kolesaga te tigigo ebo wiegi yai kolesaga genuai eyu, tama te wiegi yai kolesaga eyu godolo mu ebaso da, tama te tigi genuai bomo selama wiegi yai mu pedalobo dao.
EPH 4:17 Tama tibaso, eno po me deli dage dali wainu obao. Te ena da Genuai Bidigo po wabo bidi bidibaso, dage tau somainogo eno te po bomo elama obao. Odiąo. Dagego te Godigo po odisąbo bidi dabego ebo kolesaga munu me ma wali pelamo dao. Augwaligo homu kolesaga da te olo habuge naide naga te homu ebo dao.
EPH 4:18 Tama tiyu augwaligo homu kolesaga dwai eyu, be hulia sabo tiwai ebo dao, augwaligo ebo homu te kedu meni yai homu kolesaga dao. Tama te Godigo mabo bidada pabo ula augwaligo sogobeo. Magi baso meni. Augwaligo bomo elama konebo hagela homu eyu, tama augwali munu me konesiąyu bidibo dao.
EPH 4:19 Augwaligo te haniani dwai dwai kolesaga ebo tomoba mu peyu tama augwaligo homu mu hodaloyu tama dwai meda yai haniani kolesaga mu ebo dao. Sesemane sogo augwaligo te sę yaio homu ebo dao. Tama tiyu tama augwali hale munu me ebo menio.
EPH 4:20 Tialima, dagego te tobage dwai sę emainogo gasa bidi dabe augwaligo te Krais aga kolesaga page dagebolo ola mabeo. Te tiwai si menio.
EPH 4:21 Tama augwaligo dagebolo agade po olama, tama dagego mu odali. Tama dage Jisasde wadolama, tama augwaligo agade mu po dagebolo ola mani dao.
EPH 4:22 Te mu po da wali po e tiwai dao: polobadu dagego duga dwai dwai sę yabo homu kolesagade biliyu bidai dao. Tama te sogo te dwai homu kolesagago dage tonaluyu, tama dagebolo te dwai dwai sę yao po weyu yai. Tama tiyu, te dagego te dwai sę ebode godolo emainogo tama te dwai sę yabo homu kolesagago tibo po weyu, dagego homu hodolai dao, tama dage te dwai sę ebo tųdu pai dao. Tama te dwai sę ebogo te dwai sę yabo homu kolesaga doloyu yai. Tialima megi dagego te polobadu yai dwai homu kolesaga mu sela sąyao.
EPH 4:23 Tama tilama, dagego homu kolesaga dali mobo dali wiegi yai gesi mu ma pedalama bidiąo.
EPH 4:24 Tama dagego dwai meda yai kolesaga ebo tagalama, tama dagego wiegi yai gesi kolesaga eyu tama dage te gesi noma bidi tiwai pedalao, te aga tigi wę paluai bidigo aga gesi ugwa gudubogia tiwai yao. Tama dage te gesi noma bidi tiwai pedaloyu, tama God aga digi agai te dage gesi noma bidi nigali, tama dage God aga homu kolesaga tiwai mu pedalainogo nigali. Tama tibaso, gasa we bidi augwaligo dagego Godigo po odoyu bidibo sumainogo te dagego bugagia bidiąo. Tama tiyu, dage gasa we bidide te wiegi yai dolo mu kolesaga naga eyu, tama God agade te dagego aga pabo tųdu naga peyu yao, aga gedude doloba pai we bidi mu bidiąo.
EPH 4:25 Te God agai dage te gesi noma we bidi nigaligo da, teda dagego dwai tibo po wabo kolesaga tagalama tama munu me egimio. Te menio. Tama dage tigidaligo duga hasi tomode mu po naga wao. Magi baso meni. Dagego koneani, da tigidali te deli tigide naga wadolama bidibo dao.
EPH 4:26 Tama me sogo dagego homu sębę eyu da, teda dua dao, te dagego sębę ebo homugo dage te dwai sę ebo kolesaga tomoba kekeidali weyu. Tama te giliga piode dega sigi pisiabadi te homu sębę polo tagalama silao.
EPH 4:27 Dagego tisiąwani da, te sębę me elalubadi, tea te dwai haubo noma bidi dabe augwaligo tobolu bidi tebolo te dagego sunumi dalaibao, agai dage dwai sę tomoba kegaibao.
EPH 4:28 Tama te polobadu nai wi sidu geai bidi agai te nai wi sabo sę tagalama silao. Megi aga digi doloba pai sę yao. Tama agai aga digi nai sabo sę aga nogogo digi eyu, tama aga digi tau siyu, te nai meni yai we bidi me tau siyu yao.
EPH 4:29 Tama dagego dwai meda yai po me wagio. Menio. Dwagi yai po naga weyu, te bomo kimi meni yai we bidi augwali bomo somainu te bomo mabo po wabo usu dao. Tama tiyu, dagego te Godigo olo tau mabo wiegi yai kolesaga te dagego po odobo we bidibolo tama mao.
EPH 4:30 Tialima dagego tisiąwani da, dwai meda yai po weyu da, teda dagego te Godigo Mobo Bidi dwai homu dene mu ilaibao. Tama te dwali dao. Te Godigo Mobo Bidi aga wiegi yai tedali mu dao. Tama God agai dage ma dobola sai hagede te dage hagea siyu sa mumainogo eyu agai dagebolo aga Mobo Bidi mawai dao. Tama te Godigo Mobo Bidi dage dali bidibaso, dagego mu konebao, te God agai dage olo mu bidabo bidi nigilabo sogo te nosali mu pedalaibao. Tama tibaso, dwai po weyu aga dwai homu dene mu iligio.
EPH 4:31 Tama dagego boi bidi homu ebo me, te wado po weyu tama homu sębę ebo me, te genuai po daga wabo me, te posobo po me, te moni dwai homu ebo me, te tigidali dwai kolesaga ebo tagaliyu sela sąyao.
EPH 4:32 Te tobage dwai kolesaga munu me egimio. Te menio. Tama dagego duga ama dede dali deli homu eyu dwagi yai tau sabo sę yao. Tama duga hasi dali homu dene eyu, augwali godolo mu yao. Tama duga hasigo dwai sę dagebolo ebaso da, teda dage sębę egio, te dagego augwali godolo mu eyu augwaligo yali dwai sę sela sąyao. Te Krais agai dage tau selama tama Godigo dagego yali dwai sę sęgę sela sąwai dao. Te tiwai kolesaga dagego me tiao.
EPH 5:1 Te God agai dage godolo mu eyu dage aga wai puluba nigaligo da, teda dagego agai ebo kolesaga tiwai wali bugagia pao.
EPH 5:2 Tama tiyu, dagego duga hasi godolo mu ebo kolesaga eyu, tama dagego yabo sę tigidali ebo si te kolesagago dage tonalumainogo, te Kraisgo da godolo eyu wiegi yai homu ebo tiwai gilama. Agai da godolo eyu, tama aga digi aga bidabo ula da hagede tagalama, tama augwaligo aga isilali. Tama tiyu, agai aga tigi te Godibolo olo mani, te polobadu bidali bagego Godibolo mani wiegi yai denami ebo nai mani tiwai yai dao. Tama te sęde God aga Kraisde dwagi yai homu ebo dao.
EPH 5:3 Te God agai dage aga hani we bidi nigaligo da, teda te penani ebo kolesaga me, te dwai dwai meda yai kolesaga me, te mena gasa bidigo nai pesa eyu godolo ebo kolesaga tigidali, te tebo dwai kolesagago ebo sę dwasianu munu me dage tomode te pedalamuo. Gasa we bidi dabe augwaligo dagego te tobage dwai kolesaga yali po waidali weyu, tama dagego doloba peyu bidiąo.
EPH 5:4 Dagego dwai meda yai po me, te homu kolesaga meni yai bagego wabo po me, te dwai gagali po wabo me, te po dabe dagego wagio. Te tebo kolesaga usu egobeo. Menio. God agai dage tau sobaso, tama dagego agabolo usu da wabo po weyu da, teda te po usu dao, te tobage po wao.
EPH 5:5 Dagego gisiga mu koneao, te penani ebo bidi me, te dwai dwai meda yai kolesaga ebo bidi me, te mena gasa bidigo nai godolo eyu pesa ebo bidi me, te tobage dwai sę ebo bidi dabe augwali Krais dali God dali sigo tonalubo we bidi hani tomoba munu me pogobeo. Tama te nai godolo eyu pesa ebo kolesaga, te kolesaga da te tibo godibolo lotu po wabo sę tiwai dao, te naiba te bidigo aga homu tigidali muani.
EPH 5:6 Dage bugagia dua dao. Tiyu dage te gasa bidigo agai dage te dwai kolesaga tomoba kekainogo ebaso da, agai wabo kedu meni yai po wali pelamuo. Te eno tamadi wali dwai kolesaga ebode te Godigo agai po sela sąbo bidi dabe dali sębę yaibao.
EPH 5:7 Tama tibaso, dage augwali dali kisa selama tama te hai namu tiwai si elamo dao.
EPH 5:8 Te polobadu dage dwai kolesaga ebode biliyu tama dage be hulia side bidibo tiwai yai dao. Tiali goli megi dage te Genuai Bidide wadolama, tama agai dage wiegi yai ulaba munama bidibao. Tama tibaso, dagego wiegi yai kolesaga naga eyu dage te ula yai we bidi tiwai bidiąo.
EPH 5:9 Tama te gide bulali nai bugagia holama, tama geninama walobo gilama tama te tiwai me te ulago agai te tigidali dwagi yai kolesaga ebo me, te doloba pai kolesaga me, te homu mu sai wiegi yai kolesaga, te tigidali hania bugagia ugwaba hanilama pedalobo dao.
EPH 5:10 Tama te ula yai we bidi bidiyu, dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao.
EPH 5:11 Tama dagego te dwai kolesagade biliyu hulia side bidibo bidi dabe augwali dali hai namu olama augwaligo te ebo kolesaga egio. Te tiwai kolesaga ebogo te nai dwagi yai me walogobeo. Menio. Te kolesaga da te hulia sai kolesaga dao. Te egimio. Te kolesaga ebo page dagego hania bugagia ugwaba haninama pedalao, tigidali we bidi augwalibolo ola mao.
EPH 5:12 Me ma, eno augwaligo geme dualama ebo dwai meda yai kolesaga po pusugobeo. Menio. Eno augwaligo te tobage dwai dwai kolesaga ebode po wagi sogo da, teda eno pedauwali sęgę eyu hale naga egi dao. Magi baso meni, te dwai dwai sę ebo po pusainogo ebo te usu menio. Eno dage dali te sęde po mibo hagalabo.
EPH 5:13 Tiali goli, tigidali ebo kolesaga te ulaba sela mubo si, teda te kolesaga page tigidali hania haninama elaluaibao. Tama te haniani nai tigidali, te ula elalubo tiwai yaibao.
EPH 5:14 Tama tialigo da, te po me elalubao: “Nage pila mubo bidi, hodaloao, tama nage te gų pagede ma hodaloama, tama Krais agai wiegi yai ula nage mawaibao.”
EPH 5:15 Tama tibaso, dagego duga bilibo bugagia tonaluyu bilao. Dage bilibo te kolesaga meni yai bidi tiwai biligio. Menio. Dage bilibo te kolesaga koneai we bidi bilibo tiwai bilao. Tama tiyu dagego wiegi yai kolesaga naga yao.
EPH 5:16 Tama megi da, te we bidi hauwa augwaligo dwai sę ebo sogo dao. Tialima, megi da, te dage Godigo kolesagade bilibo sogo dao. Tama tibaso, te dwagi yai sę yabo sogo dagego olo gesegeliyu tagaligimio.
EPH 5:17 Tama dage te kolesaga meni yai we bidi tiwai biligio. Te menio. Dagego mena tiwai kolesaga ebaso te Genuai Bidi God aga dwagi yai homu ilabo kolesaga dagego usu sela suao.
EPH 5:18 Te dage te bomo yai ąį hauwa tulama te polobo bidi tiwai egimio. Menio. Te tebo kolesagago dageba daganama dolainogo ebo dao. Dagego God agai wiegi yai Mobo Bidigo dageba daganama tonalumainao, te dage bugagia bidimainogo yao.
EPH 5:19 Tama tiyu, dagego duga hasi duga ama dedego noma bidi mobo dąų omainogo, dagego haniani dwagi yai balia po wao. Tama te lotu balia wabo buku nogi Sam, te bukude elalubo Godigo nogi ugwaba sabo po me, te Jisasgo nogi ugwaba sabo tęąbi po me, te po tama duga ama dedebolo wao. Tama tiyu, bomo eyu te dago Genuai Bidibolo me aga nogi ugwaba sabo balia po dali lotu tęąbi po dali wao.
EPH 5:20 Tama te tigidali sogo te dageba pedalobo tigidali sęde te dagego God Aya dali usu da po wao. Te dage te dago Genuai Bidi Jisas Kraisde wadolobaso, God dali usu da po wao.
EPH 5:21 Te bidi Krais agai genuai nogi mu elaluama, tama dagego duga digi aga dologoba muani obaso, duga hasi dali duga ama dede dologode bidao.
EPH 5:22 Tama tiyu, te we dabe sibi deli deli dagego duga bidigo po bugagia wali peyu, te dagego te Genuai Bidi Kraisgo po wali pabo tiwai gilama te duga bidigo wabo po wali pao, augwali dologode bidiąo.
EPH 5:23 Tama Krais aga te aga po wali pabo we bidide tobolu bidi bidibo gilama, tama bidi me aga wede tobolu bidi bidibo dao. Te agai po wali pabo we bidi te agai tigi tiwai, tama Krais aga digi augwali ma dobola sabo bidi dao.
EPH 5:24 Tama tibaso agai po wali pabo we bidi te Krais aga dologode bidibo gilama, te tiwai dage we dabego me tama naga tiyu, sesemane sogo dagego duga bidigo po bugagia wali peyu duga bidi dologode bidao.
EPH 5:25 Tama bidi dabe deli deli, dagego duga we dabe dali abagi dao homu eyu, godolo mu yao, te Kraisgo aga po wali pabo we bidi godolo mu yaligia tiwai yao. Agai da godolo mu eyu, aga bidabo ula tagalama da tau siyu aga te ni pedaide elama isai dao. Tama agai da dali godolo eyu tau sabo homu tiwai dagego duga we dali tama naga tiao.
EPH 5:26 Tama Krais agai tama tiali te aga po wali pabo we bidi hani agai augwali Godibolo mawainogo agai augwali ąį telawali te meda meni yai pedaliyu, tama agai pogo me augwali tedali gasagi yai nigilali.
EPH 5:27 Tama Krais agai homugo aga po wali pabo we bidi agai gedude augwali te wiegi yai mu pedalomainu yali. Tama augwali te husugwa sai me, bedogola sai me, te tiwai elaluidali weyu, tama augwaligo te magi dwai sę me esiąyu wiegi yai kolesaga naga eyu bugagia mu bidimainao. Te homu Kraisgo aga po wali pabo we bidi dali yai.
EPH 5:28 Tama dage bidi dabego duga we dabe augwali dali wiegi yai kolesaga eyu, augwali godolo yao, te dagego duga digi duga tigi dali wiegi yai homu eyu godolo ebogia yao. Aga we godolo ebo bidi, te aga digi aga godolo ebo dao.
EPH 5:29 Dago koneai, te bidi mego aga digi aga tigi dali boi bidi homu ebo meni. Te menio. Agai aga tigi nai mayu, bugagia tonalubo dao, te Kraisgo aga po wali pabo we bidi dali ebo gilama.
EPH 5:30 Da te nogo, sągą, gedu te nai dabe te Kraisgo tigi dagi tiwai dao.
EPH 5:31 Tama te Godigo po asęai bukude te po me deli wai, “Tama tibaso, te bidigo aga ida aya taga soyu, tama aga we dali dagana selama, deli tigi gagawai pedalobo dao.”
EPH 5:32 E po tomode te genuai geme po digi po page tede elalubo. Tama ena digi eno homugo te Krais dali aga we bidi dali po page hanilibao.
EPH 5:33 Tiali digi agai dage deli deli bidi dali me te po wali, “Nago naga tigi dali dwagi yai homu eyu godolo mu ebogia, nago naga we dali dwagi yai homu eyu, godolo mu yao.” Me ma, we dabe dagego duga bidigo nogi ugwaba selama augwali dologode bidao.
EPH 6:1 Dage wai dabe dagego te Genuai Bidigo po wali pobaso, te ida ayago wabo po wali pao. Te tama tebo kolesaga te dolo dao.
EPH 6:2 Te Godigo po weyu, tama Mosesgo bukude asęani po tiwai, “Te duga aya idago po wali pao. Tama te po mobo te wali peyu da, tama dage bugagia mu bidiyu, e tǫde hauwa sogo bideibao,” te po wai. Tama Godigo te po bomo eyu, dąų walai. Agai te mobo po hauwa weyu, te e po dali te dąų wali po hasia wadolali.
EPH 6:4 Tama dage aya dede dagego duga wai dabe homu hodolama augwali sębę emainogo elamuo. Menio. Dagego te Genuai Bidigo po wali peyu, tama augwali bugagia tonaluyu, tama agai po augwali ola mao.
EPH 6:5 Dage olo sę ebo bidi dabe, dagego duga sę ebo tonalubo bidide wi eyu, augwaligo po wali peyu augwali dologode bidao. Tama tiyu, homu mu eyu, dage deli deligo te homu yao, ‘Eno yabo sę te Krais tobade yaibao.’
EPH 6:6 Tama te homu eyu duga sę yao. Dagego sę ebo tonalubo bidigo dagede dwagi yai homu emainogo augwaligo dage tonalubadi naga dagego sę bugagia egio. Te menio. Te homu mu eyu, te dage Krais agai olo sę ebo bidi dabe bidiyu, tama Godigo homu kolesaga wali peyu bidao.
EPH 6:7 Tama dagego dwagi yai homu eyu, sę yao. Te sę te bidide naga ebo menio. Te menio. Te dagego duga sę te Genuai Bidi Krais agade yao.
EPH 6:8 Dagego koneani, bidi me deligo dwagi yai sę eyu da, Genuai Bidigo dwagi yai nai mawaibao. Agai te olo sę ebo bidi dali me, te gasa bidigo sę isiabo bidi dali me te sę naga yaibao.
EPH 6:9 Dage te olo sę ebo bage mu abelai bidi dabe, dagego odao. Dagego augwaligo sę ebo tonaluyu, dagego me Godigo homu kolesaga wali peyu te tiwai kolesaga naga augwali dali yao. Dagego augwali wi ilibo kolesaga tagalao. Dagego koneani, te Genuai Bidi aga dagalude bidibo, tama aga da te augwali olo sę ebo bidigo Genuai Bidi me, te dagego Genuai Bidi me bidibao. Tama agai tigidali we bidi deli usu nigo naga usu sabo dao.
EPH 6:10 Te eno po silagasu wabo po e dao: dage te Genuai Bidi Krais agade wadoloyu, tama dagego agai genuai bomo meba siyu, tama dage bomo eyu bidao.
EPH 6:11 Tama eno dagebolo hwįbo po digi po begelama megi obao. God agai dagebolo te duga tigi duala sabo nai mobao. Tama dagego bomo eyu, te dwai haubo noma bidi Satango geme dualama ebo dwai kolesaga tigidali te aiyaba elaluyu, dage bugagia dolalumainogo eyu, tama dagego te tigi duala sabo nai tigidali selama tigide muao.
EPH 6:12 Magi baso menio. Te da Krais wali pabo we bidi hani, dago te dwai sę ebo kolesaga dali hwįyu tama dago e tǫde bidibo bidi dali hwįbo meni. Dago te dwai sę ebo kolesaga dali hwįbadi, tama dago te dwai haubo noma bidi ugwadu te dagalude bidibo bage dali me hwįbo dao. Augwali da te megi hulia side dwai sę ebo tobolu bidi dabe me, te polalubo bidi dabe me, te we bidi tonalubo dwai noma bidi dabe dao.
EPH 6:13 Tama tibaso, Godigo dagebolo mabo tigi duala sabo nai megi duga tigide muao. Tama tiyu, te augwaligo dage dali dwai sę ebo sogo pedalobo si, te dage bomo elama augwali dali hwįdu gelama, tama aiyaba elaluama, tama dage bomo yai bidi mu me dolaluaibao, wi pogobeo.
EPH 6:14 Awe, dage e tama tiwai dola selama dolaluao. Dagego Godigo mu po te duga kugulu tiwai gudulama, tama bugagia dąų olama, tama te doloba pai wiegi yai kolesaga ebo te dagego duga hagawia sesela sabo nai tiwai abiao.
EPH 6:15 Tama te enesigi bidi agai te hwįabo sisi elama, tama sągąde mubo nai nadoba mubo dao. Tama te tiwai dagego te Godigo dwagi yai gesi po mu konealubo kolesaga bugagia dolasa elaluao, God agai gasa bidi dali dwagi yai homu yabo po.
EPH 6:16 Tama enesigi bidi agai aga sabele abibo tiwai tama dagego Godide konealubo po tigidali sogo abilasa bilao. Tama tiyu, te sabelego te boi bidigo sia dage ponai ene dabe sela sąwaibao. Te boi bidi nogi te Satan dao.
EPH 6:17 Te Godigo dage polo ma dobola sai dao. Te homu ebo kolesaga te kapago nigai tobolu madi tiwai selama, tobolude muao. Tama dagego te Mobo Bidigo bobobage poa pai hwą ge tiwai te Godigo te bukude asęani po bugagia odama, sao.
EPH 6:18 Tama tiyu, tigidali sogo dagego po God dali wao, agai dage tau somainu yai. Tama te Godigo Mobo Bidi agai dage bomo mayu, tego Godibolo po wao. Te sę yainu, dage pila mugimio, hodaluao, nolǫ isiąbo ąǫ egimio. Te sę munu me tagaligio. Tigidali sogo dagego gedu haluasa po Godigo we bidi tau somainu wao.
EPH 6:19 Dagego po Godigo ena me tau somainu wao. Eno homugo dagego po e tama omainogo obao: God agai eno pedauwalide po mumainogo, tama eno te wi ebo homu aiyaba kęna sigulumainu, tama te Godigo wiegi yai pogo geme dualali po page bugagia pusumainu agabolo po wao.
EPH 6:20 Ena da te Godigo dwagi yai po pusubo bidi. Tama te tebo pode te ena kalabuside bidibao. Tama tibaso, ena te wi ebo homu aiyaba kęna sigulumainu tama ena te bomo elama te Godigo wiegi yai po pusumainu dagego God hanalu wabo po wao.
EPH 6:21 Te bidi Tikikus aga te dago ama mu tiwai, tama aga te Genuai Bidigo dwagi yai sę ebo bidi dao. Tama agai te eno ebo sę po tigidali dagebolo pusagasomainu te bidi eno megi aga dage bidibo digi tagala palobao.
EPH 6:22 Tama eno aga dage bidibo digi tagala paliyu, da ede mena tama bidibo wenama tama agai pusaibao, dagego homu dąų walomainu tama yaibao.
EPH 6:23 Te eno ama dedeo, eno homugo dago Aya God me, dago Genuai Bidi Jisas Krais me, augwali sigo dagego homu dua nagame ilao, tama augwaligo dagebolo te godolo mu ebo kolesaga me, te konealubo po dąų wabo kolesaga me mao, te eno homugo.
EPH 6:24 Te eno homugo me, Godigo agai olo tau mabo kolesaga te dago Genuai Bidi Jisas Krais godolo mu eyu aga me tagalisąbo we bidi dabe tebolo te olo tau mabo kolesaga mao. Tama dao. Ena da, Pol da.
PHI 1:1 Ena da Pol dao. Tama ena dali Timoti da si Krais Jisasgo sę bidi, da sigo e po te dage Filipai hanude bidibo Godigo po odobo we bidibolo asęna tolobao. Dage Krais Jisas dali wadolama bidu, tama e pas dagebolo me, te dage tonalubo bidi dabebolo me, te tonalubo sę tau sabo bidi dabebolo me, te dage tigidali Godigo po odobo we bidibolo tolobao.
PHI 1:2 Eno homugo dago Aya God dali dago Genuai Bidi Jisas Krais augwali sigo dage dali te olo tau sabo kolesaga eyu, tama dage homu nagamea peyu bugagia bidao.
PHI 1:3 Te polobadu hasia sogo ena dage bidibo digi sabolama, tama eno dagebolo Godigo wiegi yai gesi po pusulama, tama dagego te po homugo selama, tama Godigo we bidi hani dage pedalali. Tama te sogo gagalama, eno te gasa bulu we bidibolo te Godigo po pusubo sę eyu, tama dagego ena tau siyu bididuai dao, tama megi me dagego tama tibo dao. Tama tibaso, eno dage dali dwagi yai homu pemene eyu, eno homugo dage ma kone palobo sogo tigidali te eno Godibolo nage usu da po dagede wabo dao. Tama Godigo dage tau somainogo eyu, eno agabolo hanalu wabo po wabo dao.
PHI 1:6 Tama tiyu, eno homu si menio, eno mu koneai, te God agai dage deli deligo homu tomode te dwagi yai sę gagalama, tama te sę ela peyu, mu ela pelama, tama Krais Jisas tǫba ma asobo side naga agai te dagede ebo dwagi yai sę silaibao. Te eno mu koneanio.
PHI 1:7 Tama tigidali sogo eno dwagi yai homu eyu dagede homugo konea palobo dao. Tama eno dagede dwagi yai homu ebo te dolo naga dao. Magi baso meni, God agai ena dali dwagi yai sę elama, tama agai po pusubo sę eno nogoba mani. Tama tigidali sogo eno te sę ebadi, te dagego ena tau sai dao. Polobadu ena kalabus menibadi eno te Godigo pode boi bidi homu ebo bagego po aiyaba elaluabo po wabo sę yai. Tama tiyu, eno te gasa we bidi tau sali, augwaligo augwa homugo Godigo po bugagia dąų omainogo yai. Tama megi ena kalabuside bidibao. Polobadu me, megi me, te tigidali sogo dagego ena te sęde tau sai dao. Tama tibaso, eno dage dali kone palobo si ena dwagi yai homu ebo dao.
PHI 1:8 Awe, eno dage dali dwagi yai homu moni pemene eyu, bomo elama godolo mu ebo dao, te Krais Jisas agai aga digi tiwai gilama ebo dao. Godigo koneai, eno tede mu po naga obao.
PHI 1:9 Te Godigo dage tau somainogo eyu, eno agabolo hanalu wabo po wabo dao. Tama tiyu, eno homugo agai dage tau siyu, tama dagego duga hasi we bidi dali dwagi yai homu eyu godolo ebo kolesaga te geninama mu pedaluyu bididuao. Tama eno homugo me te dagego te mu po page tigidali hania kuna koneama, tama dagego te dwagi yai kolesaga me dwai kolesaga si bugagia dagalabo homu kolesaga mu elaluaibao.
PHI 1:10 Magi baso meni, dagego te kolesaga dagalabo homu kolesaga elalubaso da, teda dagego te tigidali kolesaga osola sulama, tama te wiegi yai mu kolesaga sabo usu yaibao. Tama tiyu da, teda te Krais aga tǫba ma asobo sogo tonalubadi dage meda meni yai me, sęgę sisąwai we bidi bidaibao.
PHI 1:11 Tama Jisas Krais agai naga pedalabo dolo mu yai kolesaga augwali dagede geninama pedalama, tama dagego ebo kolesaga tigidali te tiwai naga elaluaibao. Tama tebogo Godibolo bomo yai ula dali genuai nogi si mawaibao. Eno dagede te homu eyu, Godibolo gedu haluasa po wabo dao.
PHI 1:12 Eno ama dede, eno homugo dagego hania koneao, te enade ede polo pedalali sę, te augwaligo ena kalabus muani sę, te sę ebogo ena te Godigo po pusubo sę tagalamainogo eyu usu ebeo. Menio. Te augwaligo ena kalabusiba mubaso te Godigo po pusubo sę ela pomainogo tiwai, te gasa we bidi augwali te po odisąwani bage, te augwaligo me te po odai dao.
PHI 1:13 Tama tibaso, megi te gavman tuni bidigo be tonalubo enesigi bidi dabe augwali tigidaligo koneai, ena Kraisgo sę ebo bidi bidibaso naga, ena e kalabus bede bidibao. Tama gasa ede bidibo we bidi tigidali augwaligo me te koneai.
PHI 1:14 Tama ena e kalabus bede bidibaso, dago ama dede meba hauwa augwaligo bomo te dago Genuai Bidide selama, tama wi ebo kolesaga tagaliyu bomo elama, te Godigo po pusubo sę megi bugagia ebao.
PHI 1:15 Awe, eno koneani, augwali mebago konila weyu, eno nogide dwai homu eyu, tama eno nogi aiyaba elalubadi tama augwa nogi ugwaba momainogo eyu, tama augwaligo we bidibolo Kraisgo po pusubo dao. Tiali goli dago ama dede me badu augwaligo enade dwagi yai dolo homu eyu, Kraisgo po te we bidibolo pusubo dao.
PHI 1:16 Augwaligo ena dali dwagi yai homu eyu godolo mu ebo kolesaga ebaso, augwaligo Kraisde po pusubo dao. Magi baso meni, augwaligo koneai, te Godigo pode boi bidi homu ebo bagego po aiyaba elaluabo po wabo sę, te sę Godigo enabolo mani.
PHI 1:17 Tiali goli u bage augwaligo eno nogide dwai homu ebo bage, augwaligo me Kraisgo po we bidibolo pusubo dao. Tialima augwaligo homu mu esiąyu, tama Krais po pusubo dao. Augwaligo eno nogi aiyaba elaluama, augwa nogi ugwaba sabo kolesaga naga eyu, tama e homu ebao, ‘Te dago Kraisde po te we bidi dabebolo pusuyu da, teda Pol te kalabuside bidibadi aga homu dwai mu ilaibao,’ te homu augwaligo ebo dao.
PHI 1:18 Magigo meni. Bidi mebago ena dali dwai homu eyu, augwaligo Kraisde po te we bidibolo pusubo dao. Bidi mebago me te homu mu eyu, te we bidibolo Kraisde po pusubo dao. Awe, usu dao, po meni, augwaligo Kraisde po pusubaso eno dwagi yai homu mu ebao. Tama eno dwagi yai homu mu eyu tama bididuaibao.
PHI 1:19 Magi baso meni, eno mu koneai, dagego ena tau somainogo gedu haluasa po wabogo me, te Jisas Kraisgo Tedali Mobo Bidigo tau sabogo me, te sigo ena tau selama, tama te ena kalabusiba muani bage augwaligo ena olo tagala palaibao.
PHI 1:20 Tama eno dwagi yai homu elama, tama eno te kolesaga mu pedalaibao olama tonaluyu, tama me eno te kolesaga pedalomainao homu mu ebao, te kolesaga e dao: eno homugo te Godigo ena mani sęde ena munu me tulalugobeo. Menio. Eno homugo te tigidali sogo, te megi tama me, te ena bomo selama wi esiąyu, tama eno tigigo me eno homu kolesagago me te eno te Krais te we bidibolo ola mayu, tama augwaligo agai nogi ugwaba saibao. Tama homu eyu, te ena me bidibogo ma ena isibogo, tebogo agai nogi ugwaba somainao.
PHI 1:21 Magi baso meni. Eno homu tama tiwai: ena e tǫde me bidiyu da, teda ena Krais dali homugo kęą pai bidi mu bidaibao. Ena isiyu da, teda ena wiegi yai mu bugagia bidaibao, tebogo e tǫde bidibo aiyaba mu elaluaibao.
PHI 1:22 Tiali goli ena e tǫde me bididuyu da, teda eno we bidi hauwa tau sabo sę ebo usu yaibao. Tialima eno mena tų wali pogowe? Te eno konebeo.
PHI 1:23 Eno homu si ebao, tama te homu sigo ena augwali si tomode dąų walali. Te homu me e dao: ena Krais dali bidigi pomainu ena isaio homu bomo elama ebo dao. Te aga dali bidibogo te e tǫde bidibo kolesaga aiyaba mu elaluaibao.
PHI 1:24 Tiali goli me homu e tiwai dao: eno dage tobade e tǫde me bidiyu dage tau sabo sę, te me te genuai sę dao, tebogo ena aga dali bidigi pabo sę aiyaba elalubo dao.
PHI 1:25 Tama tede eno homu si ebo meni, eno mu koneai, ena e tǫde me bidaibao. Tama ena dage dali bidiyu, tama dagego te konealubo po dąų wabo bomo genuai pedaluyu, tama dage dwagi yai homu mu pemene emainogo eyu, eno dage dali tau siyu bidaibao.
PHI 1:26 Tama tibaso, ena dage dali ma bidibo si, te dage Krais Jisas dali wadolobaso tama eno yali sęde dagego te dwagi yai homu pemene ebo page hauwa elaluaibao.
PHI 1:27 Te enade nosali pedalabo sę te dago megi konebeo. Tialima te tagalao, te sęgę menio. Te sęgę nai, te e dao: te dago Kraisde ola mabo wiegi yai po, te po te da usu sabo usu ni tiwai dao, tama te dagego ebo kolesaga te usu niba kadu wao. Dagego tama tiyu da, teda ena dage bidibo digi pabo ma gasa bulude bidibo, te usu dao, eno dagego ebo kolesagade dwagi yai po naga odaibao. Dagego te Kraisde ola mabo wiegi yai po bugagia wali pobaso da, teda dage duga hasi deli homu naga eyu, tama bomo elama dolaluaibao. Tama me dagego ebo kolesaga deli naga eyu, tama duga hasi tau siyu, tama te Kraisde dwagi yai konealubo po aiyaba elaluabo dwai sę ebo bage augwaligo dage dologobeo. Dagego tama ebo kolesaga po eno odaibao.
PHI 1:28 Eno te dagebolo dene mabo bage augwalide po odaio. Augwaligo dage wi homu me ilibo gogologio. Dage munu me wi isiąbo, te kolesaga ebogo te augwalibolo ola mawaibao, te augwali dolama tama mu hagawaibao, tiali goli God aga digi dage bugagia tonaluyu tama dage wiegi yai bidaibao.
PHI 1:29 Magi baso meni, dage, dagebolo Godigo dwagi yai sę olo elama, tama agai dage te Kraisgo sę ebo we bidi nigilai dao. Tama tiyu, agai dage tau selama, tama dagego Kraisde konealubo po homugo dąų wali. Te me elalubao, te agai dagebolo agai nogide dene sabo kolesaga me olo manio, te wiegi yai dao.
PHI 1:30 Tama dagego te Krais tobade dene sobaso, te dage ena dali hodobo te tobage dene sabo sę ebo usu dao. Polobadu ena dage dali bidibadi eno hwįbo dagego suai dao, augwaligo Kraisde ena dene mani. Tama megi me dagego odali, augwaligo e bulude me enabolo dene mę mabo dao.
PHI 2:1 Te dage Krais dali wadolama tama bidu, tama dagego bomo tama elalubo dao. Tama agai dage dali dwagi yai homu eyu godolo ebaso, tama dagego homu nagame elama bugagia bidibo dao. Dage agai Tedali Mobo Bidi dali deli homu eyu kisasa biliyu bidibo dao. Tama dagego duga hasi tomode te abagi homu eyu, homu dene eyu duga hasi tau sabo dao.
PHI 2:2 Dagego tama tialigo da, eno homu dwagi yai genuai mu dagego emainu e kolesaga tama yao: te deli homu naga bugagia yao, tama duga hasi dwagi yai homu eyu godolo ebo kolesaga te dobayao, tama homu dali, homu kolesaga dali te duga hasi deli naga tiwai si naga elaluao.
PHI 2:3 Gasa bidi tau sabo kolesaga tagalama, tama duga digide naga homugo kone paluyu, duga nogi naga olo ugwaba sabo kolesaga eyu, dage te tiwai bidilamuo. Te menio. Te imilai homu eyu, e homu yao, “Te gasa we bidi augwali dwagi yai bage dao. Ena augwali dologode bidaibao,” te homu yao.
PHI 2:4 Tama tiyu, dagego duga digi naga tau siyu, duga nai naga bugagia tonalugimio. Gasa we bidi augwali me tau siyu, augwaligo nai me dagego bugagia tonaluiąo.
PHI 2:5 Dagego elaluabo homu kolesaga te Krais Jisasgo elaluali homu kolesaga tiwai gilama yao. Te kolesaga e dao:
PHI 2:6 Aga tigidali sogo polobadu God tiwai mu bididuai dao. Tiali goli agai aga digi tau somainu “Ena e tiwai bidaibao” homu te munu me ebeo.
PHI 2:7 Te mu menio. Agai digi aga genuai wiegi yai nogi tagalama, tama nogi meni yai sęde dąų walali bidi tiwai pedalali. Aga te tǫde bidibo bidi dabe tiwai pedalama, tama bidi augwaligo suali aga be bidi mu bidai.
PHI 2:8 Aga digi aga nogi aiyaba munama, tama Godigo po wali peyu, tama augwaligo aga ela muabo sogo usu nagasai, te dwai ni pedaide naga isali.
PHI 2:9 Tama tialide Godigo aga ugwaba mu sela muai, tama agabolo te gasa nogi tigidali aiyaba elalubo genuai nogi mawai.
PHI 2:10 Tama tibaso, dagalu bidi me, tǫde bidi me, tǫ dai dologo badu bidibo bidi dabe me, augwali tigidaligo Jisasgo nogi ugwaba somainogo augwali kidu sugunaibao,
PHI 2:11 tama tigidali bidigo e po hania waibao, “Jisas Krais da, aga naga te Genuai Bidi dao.” Tama tiyu, augwaligo God Ayago nogi ugwanu mu elaluaibao.
PHI 2:12 Eno abagi mu dede, Krais aga Godigo po mu wali pali. Tama tibaso, ena dage dali polobadu bidibadi dagego eno po wali pali tiwai gilama, te megi me, ena digibulu bidibadi te dagego bomo elama, te eno po bugagia wali pao. Te sęgę dao, olo sę mu menio. Tama tiyu, God dali duga homugo kęą pai we bidi mu bidiyu, tama te dage bidibo kolesaga wiegi yai mu sese pedalomainu bomo elama tiduao.
PHI 2:13 Magi baso meni, te dagego aga homu wali pabo homu emainogo, te dagego aga homu wali pabo bomo me elalumainogo, te God aga digi dage tomode aga sę eyu, tama dagego homu agai hodolobo dao.
PHI 2:14 Tama dage Godigo po tama wali peyu tama dagego elalubo sę ebadi, te duga hasi wado po wabo me, konila po wabo me, te tobage po wagimio.
PHI 2:15 Tama dagego te sę tama eyu da, teda dage te gasa we bidigo gedude te magi sę isąwai we bidi bidiyu, tama dage te dwai sę dali dwagi yai sę dali gealusiąbo we bidi bidaibao. Tama bidiyu, dage te homu gagea pai haniani dwai dwai sę ebo we bidi tomode bidibadi goli, dage Godigo mu doloba pai wai puluba bidaibao. Tama dage augwali tomode bidibadi dagego te ho dabe hulide ula nanobo tiwai eyu bidiąo. Tama tibadi, dagego augwalibolo te wiegi yai bidibo ula elalubo po pusao. Dagego tama tiyu da, teda te Krais aga e tǫba ma asobo side eno dwagi yai homu dage dali yaibao. Magi baso meni, eno koneaibao, eno dage tomode yali tigi dene sę me te eno bomo me te olo dali ebeo.
PHI 2:17 Dagego duga homugo Kraisde konealubo po dąų wabo kolesaga ebo, te kolesaga ebo te Godigo gedude te dagego agabolo te ofa nai mabo kolesaga ebo tiwai dao. Tama bidi dabe augwaligo ena ela mugowe, mugobewe, te eno konebeo. Tama augwaligo ena ela muyu da, teda eno kaneme dali te dagego ofa mabo nai dali te si dago agabolo mawaibao, te polobadu bidali bidi dabego te wain ąį te ofa nai daiba gelali tiwai yaibao. Awe, tama tiyu da, teda usu da, eno tede dwagi yai homu pemene ebao, tama dage dali hodobo eno dwagi yai homu ebao.
PHI 2:18 Te tama tiwai me, dagego me te enaba pedalabo sęde dwagi yai homu pemene yao, tama ena dali hodobo dwagi yai homu yao.
PHI 2:19 Genuai Bidi Jisasgo homu usu weyu da, te eno dage bugagia bidibowe wabo po odomainogo, eno Timoti dage bidibo digi tamadi tagala palaibao. Tama aga ma asama, dagede po enabolo olama, eno me dagede dwagi yai homu yaibao.
PHI 2:20 Eno Timoti tiwai bidi me menio. Agai ena dali homu deli naga ebo dao. Agai dage tau sabo homu mu ebo dao.
PHI 2:21 Tigidali gasa bidi dabe augwa naide naga homu eyu, tama tede tonalubo dao, tama augwaligo Jisas Kraisgo sęde homu eyu tonalubo menio.
PHI 2:22 Tama duga digi Timoti mu koneai, te aga yali sę dagego osola sulama tama dagego koneai, te aga sę bugagia ebo dwagi yai bidi dao. Agai ena dali hodobo te Godigo po pusubo sę iduai dao, te aga ogwago aga aya dali hodobo sę ebo tiwai yai dao.
PHI 2:23 Te gavman bidi dabe augwaligo ena e kalabus bedu tamadi olo tagala palogowe, ma meniwe, te eno megi konebeo. Tialima te eno nosali konebaso da, teda eno Timoti polo dage bidibo digi tagala palaibao.
PHI 2:24 Tama Genuai Bidigo homu usu weyu da, te ena digi ena dage bidibo digi tamadi asaibao, eno megi te homu ebao.
PHI 2:25 Eno homugo te bidi Epafroditus dage bidibo digi ma tagala palaibao. Aga dago ama dao, tama ena dali deli sęde abagi olama biduai dao. Tama gasa bidi dabe augwaligo Godigo po pusubo sę dolidali weyu tama agai ena tau siyu, tama da sigo tigi dene sę iduai dao, te ami enesigi bidigo bomo elama hwįbo tiwai yai dao. Polobadu dagego Epafroditus ena bidibo digi tagala palai, tama agai ena tau siyu ena dali bidibao.
PHI 2:26 Agai dwai homu mu eyu, tama agai homugo aga dageba polo paio wabo. Magi baso meni, dagego aga gasi yali po odali, te po agai odali. Tama agai te po odama, tama dagego agade moni homu idali weyu aga dagede homu dene eyu dage sugi pabo homu eyu bidibao.
PHI 2:27 Awe, mu tama, polobadu aga gasi mu yai, tama pąde mu aga isabo tiwai yai. Tiali goli Godigo aga dali homu dene eyu, tama aga tau selama aga isibeo. Tama tebode Godigo aga deli naga homu dene eyu tau sabeo. Agai ena me homu dene elama tau salio. Agai koneai, ena e kalabuside bidibaso, ena sęgę dali dene me te elalubao. Tama eno abagi isibaso, eno genuai sęgę elaluaibao. Tama idali weyu Godigo te bidi tau sabogo ena me tama tau sai dao.
PHI 2:28 Tama tibaso, ena wiegi yai homu eyu tama eno homugo aga dage bidibo digi tagala palabo homu ebao. Tama tiyu, tama dagego aga ma subo si, teda dagego dwagi yai homu agade ma yaibao. Tama eno sęgę me te tama silaibao.
PHI 2:29 Dage dali, te bidi Epafroditus dali, te dage tigidali te Genuai Bidi Kraisgo hani deli dao. Tama tibaso, aga dageba asobo si, dagego aga duga ama tiwai ma sao. Te tobage bidigo nogi dagego ugwaba siyu, tama augwali dali dwagi yai homu yao.
PHI 2:30 Magi baso meni. Kraisgo sę tobade aga pąde tama isai digi dao. Agai homugo aga bidabo homu yai menio. Dage digibulu bidiyu, tama duga digi ena tau sabo usu sąbaso, agai ena tau sabo homu elama, tama Kraisgo sę ebadi pąde isai digi dao.
PHI 3:1 Eno ama dede, eno po silainogo e po obao, eno homugo te dage te dago Genuai Bidi dali wadolobaso, te dage dwagi yai homu pemene yao. Te eno dagebolo polobadu pusali po, te po megi ma asębo eno hagelabo menio. Te po dagebolo ma asębogo dage tau siyu, tama gasa bidigo ola mabo pogo dage dologobeo.
PHI 3:2 Dage dua dao, te sę dwai ebo bidi dabe, te wili sulai yowi tiwai. Dage dua dao, dwai bidi dabego dagebolo “Te da Juda bidi dabe tiwai eyu, duga tigi togoyu, Godigo sa mubo dąį tigiba muao,” te po wabo bage, te augwalide dua dao.
PHI 3:3 Magi baso meni. Augwali meni, te dago naga te Godigo sa mubo dąį mu sai dao. Augwaligo homu te augwa tigiwali togobaso augwali Godigo gedude doloba pai bidi dao, tede geda muyu augwaligo te homu ebo dao. Tiali goli dago te doloba pai bidi nogi sabo tų koneai. Magi baso meni. Godigo Mobo Bidigo da tau siyu, tama dago Godibolo lotu po wabo dao. Da Krais Jisas dali wadolama bidiyu, tama tede da dwagi yai homu mu pemene ebo dao. Tama bidiyu, dago Godigo sa mubo dąį elalubao. Dago te dena tigiwali togobo sęde te da tau sabo kolesaga dao, te homu mu ebo menio.
PHI 3:4 Te tigiwali togobo kolesaga dali, te bidi aga tigi bomogo ebo haniani kolesaga dali, te tobage kolesaga ebogo te bidi te Godigo gedude doloba pai bidi ilibo usugi da, teda ena aga gedude doloba pai bidi mu dao. Tama gasa bidi me deligo aga tigiwali togobo sę elama tama gasa sę me eyu, tama aga wiegi yai bidi dao homu eyu da, teda eno te bidi aiyaba elaluai dao.
PHI 3:5 Magi baso meni. Edao. Ena ame nenama, tama Sarere deli bidama, tama augwaligo eno tigiwali togwai, te Godigo hani sa mubo dąį enaba tama muai. Ena te Israel bidi mu, tama ena Benjamin te bidigo hani. Eno aya ida si augwaligo Hibru po weyu bidai, tama ena me Hibru po wabo bidi mu dao. Ena genuai hodolama, tama ena te Farisi hani bage dali wadolali. Augwaligo bomo eyu, te Juda dabego bomo yai po tigidali deli deli dolo mu bugagia wali pabo bage dao. Te tiwai ena me te da Juda dabego bomai po tigidali dolo mu odama wali peyu bidai dao. Tebode ena olo bidi meni.
PHI 3:6 Eno te Godigo nogi dolobo we bidi elaibao homu bomo elama, tama tede geda muyu eno te Krais wali pabo we bidi hani augwalibolo genuai dene mayu bidai dao. Te Godigo te Juda dabego bomai po dolo wali pabo bidibolo te doloba pai bidi nogi pogi sogo da, teda enabolo agai te nogi pogi da. Eno te bomai po me deli me bolobeo. Te eno dwagi yai kolesaga tama yali goli, te usu meni.
PHI 3:7 Tiali goli te eno megi tama nedali eno nogi tau sabo wiegi yai kolesaga, te augwali tigidalide eno homu hasegelama, tama megi eno homu te augwali te ena tau sisąbo nai naga dao, te hagawai nai naga tiwai dao. Magi baso meni, Krais agai ena tau mu sai dao.
PHI 3:8 Tiali goli te da Juda dabego ebo kolesagade naga eno homu te augwali te ena tau sisąbo nai dao. Tede naga menio. Te ena Godigo gedude doloba pai bidi pedalomainogo eyu, polobadu eno haniani gasa kolesaga hauwa me eyu bididuai dao. Te kolesaga tigidalide me megi eno e homu ebo dao, te augwali ena tau sisąbo kolesaga dao, te olo nai mu dao, te homu eno megi ebo dao. Magi baso meni. Te wiegi yai kolesaga me deli naga eno megi subo dao. Te kolesaga e dao: ena te eno Genuai Bidi Krais Jisas dali mu wadolama, tama ena aga dali abagi mu kisasa bilibao, te kolesaga da te genuai wiegi yai kolesaga mu dao, tebogo te gasa kolesaga tigidali aiyaba elalubo dao. Tama aga tobade eno te gasa ena tau sabo kolesaga tigidali tagalai dao. Eno Krais tama somainu eyu, tama te gasa kolesaga tigidali te dwai olo pobele bage naga dao, eno te homu ebo dao.
PHI 3:9 Eno homugo ena aga dali wadoloyu tama homugo mu kęą paibao. Polobadu eno e homu eyu bidai dao: eno te Juda bagego bomo yai po dolo mu bugagia wali peyu da, teda Godigo gedude ena doloba pai bidi pedalaibao. Tiali goli megi eno te homu ebo menio. Eno Kraisde konealubo po dąų olama, tama Godigo ena doloba pai bidi nogi yai dao. God aga digi te Kraisde konealubo po dąų wabo bidibolo te doloba pai bidi nogi nogi ebo dao.
PHI 3:10 Tama bomo elama, eno deli homu naga ebo dao: ena Krais dali wadoloyu, tama eno aga kuna koneaio. Aga isąma ma hodaluama tama bomo elalubao. Eno homugo eno te bomo mu koneaio. Eno aga dali abagi mu olama, tama aga dene sali tiwai eno dene sobaso te usu dao, eno te dene saio. Tama tiyu, aga isali tiwai ena isaio.
PHI 3:11 Eno homugo te tų elalubaso, nosali ena te isali we bidi tomodu Godigo ena ma hodaluaibao, tama ena ma bidaibao.
PHI 3:12 Tiali goli eno megi tama wali kolesaga, te tobage kolesaga eno polo selama, tama megi ena doloba pai wiegi yai bidi mu dao, eno te homu ebo meni. Te menio. Bidi dabe augwaligo bomo elama dąį yali digi polo sabolainogo udabo tiwai, te eno bomo elama, tama te Godigo enabolo maiabo nai sabo homu ebo dao. Eno te tiwai emainogo eyu, Krais Jisasgo polobadu ena aga wali pomainogo ilai dao.
PHI 3:13 Ama dedeo, te enade, te eno homugo te kolesaga polo mu sai dao, te homu ebeo. Meni. Tiali goli eno homu me deli digi tama ebo dao. Eno polobadu yali homu kolesaga tagaluyu, tama augwalide homu ma esiąyu, tama eno nosali sabo nai sę bomo ebo dao.
PHI 3:14 Tama tibaso, eno bomo elama, dąį yali digi sabolama, dwagi yai muani nai sainogo udabo dao. Te dwagi yai muani nai sabo e tiwai, Godigo da Krais Jisas dali wadolama, tama aga dali bidada peyu, bidada pomainu agai da dagaluba holao olama i wai dao.
PHI 3:15 Te da Godigo po kibu be hauwa bugagia wali pali bage, te dago aga homu kolesaga koneai bage, te da tigidaligo te bomo elama dąį yali digi sabolama, dwagi yai muani nai sainogo uda yabo homu deli naga yao. Tiali goli dage mebago gasa homu me elalubaso wida, teda Godigo dagebolo te po page hania waselaibao.
PHI 3:16 Tialima te Godigo dabolo polobadu waselali yabo kolesaga, te kolesaga dago bugagia wali pomainao.
PHI 3:17 Eno ama dedeo, dage tigidaligo eno ebo kolesaga sulama, tama te tama tiduao. Dago dagebolo te dolo yabo kolesaga ola mawai dao. Tama tibaso, duga hasi dagego dago ebo kolesaga wali asobo bidi dabe bugagia suao, te dagego augwaligo ebo kolesaga dolo wali pomainogo tama yao.
PHI 3:18 Polobadu hauwa sogo eno dagebolo wai dao, tialima megi eno dagebolo ma obao, tama eno homu dene eyu gedude ąį pedalabo dao. Magi baso meni. Godigo po odobo we bidi hani tomode te we bidi hauwa augwaligo ebo kolesagago augwali te Krais ni pedaide isali sę page dali boi bidi ilibo dao.
PHI 3:19 Augwa tigigo tuabo nai dabe, te nai sabo homu naga augwaligo eyu, tama te kolesaga wali pabo dao. Te sabo nai dabe augwaligo tibo god tiwai mu dao. Augwaligo dwai haniani hale ebo kolesaga ebo dao. Tiali goli augwali tede hale menio, tede augwaligo dwagi yai homu eyu, tama augwa nogi ugwaba sabo dao. Tama augwaligo e tǫde elalubo naide naga homugo dąų olama tama bidibo dao. Tama augwaligo te tobage kolesaga ebaso, augwali mu dolaibao, te dwai buluba paibao.
PHI 3:20 Tiali goli, da, te da gasagi yai we bidi hani dao. Dago bulu mu te Godigo bidibo digi mu dao, tama wiegi yai homu eyu dago te da ma dobola sabo bidi, te Genuai Bidi Jisas Krais, aga tedu dulama, tǫba ma asobo tonaluyu bidibo dao.
PHI 3:21 Magi baso meni. Agai bomo te gasa tigidali bomo aiyaba elalubo dao. Tama agai bomogo agai tigidali nai deliba sisinama, tama aga dologoba muabo te bomo tede usu dao. Tama aga tǫba ma asama, tama dago bomo meni yai polo isibo tigi, te tigi agai bomogo hasegelaibao, tama dago tigi aga wiegi yai ula elalubo tigi tiwai si pedalaibao.
PHI 4:1 Eno ama dedeo, te Krais e tǫba ma asama, tama da dali wiegi yai sę yaibao. Tama tibaso, dage aga dali polobadu wadolama tama megi bomo elama dolaluiąo. Eno dage dali wiegi yai homu mu pemene ebo dao, tama eno dagede homugo ma kone palobo si eno homu dene ebo dao. Dagego ena homu dwagi yai ilibo dao. Dage da, te eno bulali nai du walali tiwai dao.
PHI 4:2 Yuodia dali Sintike, te we dage sigo odao: dage si Krais dali wadolama, tama ama name si tiwai bidiyu, homu deli naga yao. Dage si tama naga tiao.
PHI 4:3 Tama nage me, nage ena dali homugo kęą pai bidi, ena dali deli sę ebo bidi dao, eno nagebolo e po obao, te we si augwaligo deli homu naga emainogo nago augwali tau sao. Eno Godigo po pusubo sę ebadi, augwali sigo tigi dene sę eyu, ena tau sali. Te bidi Klemen dali, gasa ena dali deli sę ebo bidi dabe dali, augwaligo te we si dali sę yali dao. Tama augwali tigidaligo nogi te Godigo bukude asęna elalubo dao, te bidibo ula sali bagego nogi asęani bukude.
PHI 4:4 Eno homugo dage te Genuai Bidi dali wadolali we bidi dage sesemane sogo dwagi yai homu pemene eyu bidao. Awe, eno te po ma obao, dagego homu dwagi yai pemene yao.
PHI 4:5 Dagego homu nagame ebo kolesaga tigidali sogo eyu, tama tigidali we bidi augwaligo te kolesaga sueibao. Dago Genuai Bidi ma asobo sogo pąba yagasai dao.
PHI 4:6 Dagego haniani naide moni homu egimio. Te menio. Te dageba pedalobo sę tigidalide dagego Godibolo tede po weyu, tama agabolo buba hwi olama, tama te dagego sǫą pabo naide aga hanalu wao.
PHI 4:7 Dagego tama tiyu da, teda dage Krais Jisas dali wadolama, tama aga dali hodobo bidiyu, tama Godigo dage nagamea pai homu ilibo kolesagago dage bugagia tonaluaibao, tama dage wi egobeo. Te nagamea pai homu ilibo kolesaga page te da tǫde bidibo we bidigo kuna munu me konegobeo, te agai kolesagago dago homu kolesaga aiyaba mu elalubo dao. Awe, tede dago homu kolesagago dęą sabo dao, tiali goli agai te nagamea pai homu ilibo kolesaga page me hauwa elalubao.
PHI 4:8 Eno ama dedeo, eno po silagasu wabo po me deli waibao. Dagego eno e nedebo kolesaga nogi selama tama augwalide naga dagego homugo bugagia kone pabalo piduao. E tobage kolesaga augwali dwagi yai dao, tama tigidali we bidigo e kolesaga ebo bidigo nogi ugwaba sabo dao. E dao: te tibo po wasiąbo kolesaga me, te wiegi yai kolesaga me, te Godigo gedude me bidigo gedude me dolo kolesaga, tama meda isąwai kolesaga dali, te abagi homu ilibo kolesaga dali, te doloba pai kolesaga dali, te dwagi yai nogi elalubo kolesaga dali, te tobage ebo kolesagade dagego homugo kone pabalu pidubadi geao.
PHI 4:9 Ena dage dali bidibadi eno te haniani kolesaga po dagebolo ola menama tama dagebolo mani. Tama dagego eno yali kolesaga gedugo suali. Dagego te enade tama sali kolesaga sesemane sogo iduao. Tama tiyu te dabolo nagame homu ilibo God aga dage dali bidaibao.
PHI 4:10 Ena te dago Genuai Bidi dali wadolama tama bidiyu, tama megi ena dwagi yai homu mu pemene ebao. Magi baso meni. Hauwa sogo silama tama dagego ena tau sabo tų ma dalama, tama dagego ena tau sabo kolesaga te ni dululi pisigalubo tiwai eyu, tama dagego mone ge enabolo tagala palali. Tama tiyu, tama dagego enade homugo konea palobo, te eno koneai. Dagego ena gegeda pabeo. Te meni. Tiali goli dage tų meni yai dao.
PHI 4:11 Tama tede ena nai sǫą pabo hobedagia bidibao, eno te po megi wabeo. Te meni. Eno elalubo nai, te naide ena dwagi yai homu eyu bugagia bidibo kolesaga te eno konea silai dao.
PHI 4:12 Ena magi nai meni yai bidi bidibo kolesaga dali, te nai hauwa elalubo kolesaga dali si eno koneai. Te eno polobadu konesiąwai kolesaga eno megi konebo dao. Tama tibaso, tigidali bulude me, tigidali sogo me, te ena dwagi yai homu eyu, bugagia bidabo ena usu yaibao. Ma, eno nai hauwa tubo sogo ma nasi ebo sogo, tama doado bage hauwa elalubo sogo, ma nai sǫą pabo sogo, te magigo menio.
PHI 4:13 Krais agai aga bomo ena menama, tama te bomogo eno tigidali sę ebo usu ebo dao.
PHI 4:14 Tiali goli, dagego ena dali hai namu si weyu, eno sęgę dagego tolai, te kolesaga dwagi yai dao.
PHI 4:15 Tama dage Filipai we bidi, duga digi mu koneai: te polobadu eno te Godigo gesi wiegi yai po sela pabo sę dage tomode ebo gagalali sogo, te sogo eno te Masedonia tǫ tagalama, tama gasa tǫba pali sogo, te sogo gasa Godigo po odobo we bidi hani augwaligo ena tau sabe, te dagego naga ena dali deli sę yabo homu eyu, tama enabolo mone ge menama, tama eno te mone ge sai dao.
PHI 4:16 Ena Tesalonaika bulude bidibadi tama eno nai sǫą pobaso, dagego ena si sela sogo tau sai dao.
PHI 4:17 Te dagego ena tau sabo badi, te eno dagego enabolo mani masigi gede homugo kone paluyu sabo homu ebo meni. Te meni. Eno homugo Godigo te dagego ena tau siyu duga nai dobabo dwagi yai sę ebo sulama, tama agai nosali dage wei ponaibao.
PHI 4:18 Dagego mani tigidali nai usu elama eno selama, ena sǫą pabo meni. Te dagego dwagi yai nai dabe te bidi Epafroditus nogoba munama, tama agai tolasa asai, te eno sai, tama megi ena pągąna pabo. Te dagego tolali nai dabe augwali da te Godibolo olo maiabo denami ebo ofa nai tiwai dao, te agai gedude te usu dao, tama agai homu dwagi yai ilibo nai dao.
PHI 4:19 Tama ena wali pabo God agai dage bugagia wei ponaibao. Dage Krais Jisas dali wadolama tama dagego mena nai sǫą pobaso da, teda agai umabo elalubo wiegi yai ula yai naigo dage tau siyu, tama dage me mu pągąna paibao.
PHI 4:20 Eno homugo da tigidaligo dena Aya Godigo bomo yai ula elalubo nogi sesemane sogo uganu sao, bidada peyu, bidada pabo sogo tama yao. Te mu tama dao.
PHI 4:21 Eno siade da wabo po te tede bidibo Godigo po odobo we bidi tigidalibolo wao, augwali Krais Jisasgo hani bage dao. Dago ama dabe ena dali ede bidibo bagego dage dali siade dao po olama tolobao.
PHI 4:22 Ede bidibo Godigo we bidi augwali tigidaligo dagebolo siade dao po ola tolobao. Meba gavman tuni bidi Sisar agai bede sę ebo bidi augwaligo te siade da wabo po bomo elama, dage dali te po wai.
PHI 4:23 Eno homugo dago Genuai Bidi Jisas Kraisgo olo tau sabo wiegi yai kolesaga dage dali bidao. Te tama dao.
COL 1:1 Ena Pol dao, ena Krais Jisasgo po sela pabo sę bidi dao. God aga homugo digi ena te sęba muani. Tama dago ama Timoti aga ena dali bidibao. Tama eno e pas asęna dagebolo tolobao, dage Kolosi moni hanude bidibo Godigo we bidi hani. Dage da, dago ama dabe, dage Krais dali wadolama tama aga dali homu kęą pai bage dao. Eno homugo dago Aya Godigo olo tau sabo wiegi yai kolesagago dagego homu dua nagame ilama, tama dage bugagia bidimainao.
COL 1:3 Te God agai dage tau somainogo da sigo gedu haluasa po wabo dao. Tama weyu, tama sesemane sogo te dago Genuai Bidi Jisas Kraisgo Aya Godibolo dago dagede puba hwi po wabo dao.
COL 1:4 Magi baso meni, dago odali, te dagego Krais Jisasde konealubo po dąų wali po me, te Godigo we bidi tigidali dali dagego dwagi yai homu eyu godolo ebo kolesaga po me, te po si dago odobaso, dago agabolo puba hwi po wabo dao.
COL 1:5 Te mu po, te Godigo gesi wiegi yai po, te po pusubo bidi hasia sogo dage bidibo digi sabolali sogo, te sogo dagego te po odama, tama dagego koneani, te nosali Godigo dage dali dwagi yai sę mu yaibao. Te tama odama, tama dagego tede dwagi yai homu eyu, bugagia tonalubo dao. Dage tama tonalubaso, dagego Kraisde konealubo po dąų olama, tama Godigo we bidi tigidali dali dwagi yai homu eyu godolo ebo kolesaga ebo dao. Tama te Godigo dage dali nosali yabo dwagi yai kolesaga page te Godigo aga bidibo digide bugagia tonalubo dao, te dologobeo.
COL 1:6 Tama te gesi wiegi yai po pusubo bidi dabe augwali te tigidali tǫba tedali pelama, tama tede bidibo we bidibolo te po pusama, tama tebogo te we bidi dali dwagi yai sę ebo dao, te ni aga du bugagia walobo tiwai ebo. Te dage tomode me te tiwai yai dao. Hasia dagego te Godigo olo tau sabo wiegi yai kolesaga po odama, tama te kolesagago dage tau selama, tama te kolesaga dagego kuna konebo dao. Tama te sogo gagalama tama megi e sogoba usu nagasama te wiegi yai pogo dage tomode aga du bugagia walobo dao.
COL 1:7 Epafras agai te wiegi yai gesi po dage ola menama, tama dagego konea sai. Aga dago deli sęde bidibo dwagi yai bidi dao, tama da sigo aga dali dwagi yai homu ebo dao. Aga te Krais dali homu kęą pai sę ebo bidi dao, tama agai da si te sęde tau sabo dao.
COL 1:8 Tama agai da sibolo e po hania hanilai dao, “Te Godigo Mobo Bidigo te Kolosi we bidi tau sobaso, tama augwaligo te Godigo po odobo we bidi tigidali dali dwagi yai homu eyu godolo ebo dao,” te po wai.
COL 1:9 Te Godigo po dage tomode te tobage dwagi yai sę yali baso, dago dagede te po odali sogo gagalama tama eduali tama megi usu nagasama tama dago Godibolo po wabo dao. Tama tiyu, dago Godibolo e po hanalu wabo dao, “God, nago te Kolosi we bidi augwalibolo te nago Mobo Bidigo maiabo wiegi yai homu kolesaga tigidali augwalibolo mao. Tama mobaso, augwaligo nago sę yabo homu kolesaga gisiga koneaibao,” dago dagede te po Godibolo wabo dao.
COL 1:10 Tama agai te homu kolesaga dagebolo mobaso, teda dagego ebo kolesaga te dago Genuai Bidigo gedude te usu yaibao, tama te kolesaga tigidaligo aga homu dwagi yai ilaibao. Tama dagego haniani dwagi yai sę yaibao, te dwagi yai ni aga du walobo tiwai yaibao. Dagego God koneama tama te konebo sę genuai pedalaibao.
COL 1:11 Dago homugo Godigo agai moni ula yai wiegi yai bomo meba selama, tama te bomo dagebolo mao, tama te bomogo dage bomai we bidi ilao. Tama agai dwagi yai bomogo dage bomo elama dolaluyu, tigidali sęgę bugagia tolaluyu, tama dagego boi bidi homu egobeo, dagego augwali wei ponobo homu egobeo.
COL 1:12 Tama dagego tama tiyu, dwagi yai homu mu pemene eyu, dago Aya Godibolo puba hwi po wao. Magi baso meni. Te agai tonalubo wiegi yai ula elalubo digi tede agai aga we bidibolo maiabo nai hagea selama munaluali. Tama dagego te hagea sali nai meba somainogo agai dage usu ilai dao.
COL 1:13 Da te dwai haubo tobolu bidi Satango dologode te hulia sai bulude bidibadi, God agai da ma dobola selama, tama da bugagia sela pelama, tama aga godolo ebo Ogwago we bidi tonalubo kolesaga dologoba mugi pali.
COL 1:14 Agai Ogwago te da dąų wali nai pisigina sąwai dao. Te po page e dao, agai yali sęde Godigo dago yali dwai sę sela sąwai dao.
COL 1:15 God aga te dago susiąbo bidi goli, Krais te God tiwai mu bidiyu tama bidigo gedugo suali bidi bidai. Aga Godigo hasia ogwa dao, te tigidali nigali naigo nogi agai nogigo aiyaba elalubo dao.
COL 1:16 Magi baso meni. Godigo agabolo te sę yao olama, tama agai te dagalude nai tigidali dali, tǫde nai tigidali dali nigai. Agai dago subo nai me dago susiąbo nai te tigidali agai nigai. Te dago gedugo susiąbo dagalude bidibo ensel mobo bidi tonalubo bage dali, te haniani tuni bidi dabe dali, te tobolu bidi dabe dali, te bomo elalubo bidi dabe dali, agai augwali tigidali nigai. Tigidali elalubo naide Godigo agabolo nigao olama, tama agai nigilama, tama te Krais aga nogi ugwaba somainogo eyu bidibo dao, te aga te tigidali naigo peni dao.
COL 1:17 Te tigidali nigali nai nigisiąbadi, te sogo aga bolo biduduai dao, tama tigidali nai agai aga bomogo tonaluyu, tama megi bugagia bidiyu tedela pabo menio.
COL 1:18 Godigo po odobo we bidi augwali da te Krais aga tigi tiwai dao, tama aga da te aga tigigo tobolu dao. Tama aga da te tigigo bidabo bomo page bidi dao. Aga naga te tigidali naide polalubo bidi bidimainogo eyu, tama aga da te Godigo hasia ogwa da, tama aga hasia mu gų pagede hodaloai bidi dao.
COL 1:19 Magi baso meni. God aga digi homugo agai homu kolesaga sese te aga ogwago elaluyu, tama ogwa aga tiwai mu bidaibao.
COL 1:20 Tama tiyu, God aga digi homugo te aga Ogwago sę ebogo agai te tigidali nai God dali deli homu ma ilaibao, tǫde nai dali dagalude nai tigidali. Aga Ogwago kaneme ni pedaide gelai. Tama tebogo Godigo da dali boi piabo sę yai dao.
COL 1:21 Awe, polobadu dagego dwai homu kolesaga eyu, tama dwai sę idubaso, dagego God dali boi bidi homu elama tama dagego aga konebeo, dage digibulu bidai dao.
COL 1:22 Tiali goli megi aga Ogwago tǫde bidali tigi isali kolesagago agai dage aga abagi ilai dao. Agai homugo dage tedali mu we bidi, dage bugagia magi sęgę me meniama wiegi yai agai gedude nigiliyu, tama agai dage aga pageba odasa asomainogo agai dage aga abagi dabe ilai dao.
COL 1:23 Tialima dage, dagego bomo elama, te Godigo gesi dwagi yai pode homu kęą pai we bidi bidiyu tama dolaluao. Te bugagia sę yai be aga tǫba tuluali ni tigi augwali te tǫde mu dąų obaso, te be peme egobeo. Te tiwai me dagego duga homu agai pode kęą pai we bidi bidao. Dagego polobadu te po odoyu, tama te Godigo dagebolo nosali maiabo naide dagego dwagi yai homu eyu tonalubo gagalali. Megi dage te tonalubo kolesaga tagaligio. Te gesi dwagi yai po augwaligo tigidali tǫde we bidibolo pusigi pai dao, tama ena Pol, ena te gesi dwagi yai po pusubo sę ebo bidi pedalai dao.
COL 1:24 Ena megi e kalabus bede bidiyu tama dene sobao. Tiali goli eno dage tau somainogo eyu, tama te dene sobaso, eno dwagi yai homu ebao. Magi baso menio. Da Godigo po odobo we bidi da, te Krais aga tigi tiwai bidibao. Tama aga tigi tobade te dene tolobo sę me elalubao. Tama eno tigide te dene me sobaso da, teda eno te agai aga tigi tau sabo dene meba toloyu, tama te dene silibo sę eno tama tau sabo dao.
COL 1:25 Tama God aga digi ena aga we bidi hanigo sę bidi nigilai dao. Eno dage tau somainogo eyu agai e sę enabolo mani, te Godigo po sese eno gisiga ola mayu, tama we bidi augwaligo te po page kuna konemainogo ebo dao.
COL 1:26 Tigidali sogo polobadu te po page tigidali bidi hanigo gedude dulaluai. Tialima megi God agai aga we bidi mubolo te po page hania waselai dao.
COL 1:27 Te Godigo homu e dao: agai aga polobadu dulaluai po agai we bidi mu augwalibolo hania hanilaibao. Tama te dulaluali pogo te gasa hani we bidi tigidali tau sabo po dao. Te dulaluali po wiegi yai mu dao, te bomo yai ula umabo elalubo po dao. Te dulaluali po page e dao: Krais aga digi dage deli delide hodobo bidibao, tama aga tama bidibaso dagego Godigo bomo yai ula dali, genuai nogi dali, bomo dali te meba saibao, tama tede dagego dwagi yai homu eyu bugagia tonalubo dao.
COL 1:28 Tama tibaso, dago Kraisde po te tigidali bidibolo pusubo dao. Dago homugo tigidali we bidi deli deli augwali Krais dali wadolama, tama bugagia holama, tama wiegi yai we bidi mu bidimainogo eyu, tama dago augwali Godibolo mawaibao, bidigo aga wiegi yai nai ofa te Godibolo mabo tiwai. Tama emainogo dago tigidali wiegi yai homu kolesagago augwali ola mayu, tama dua dao, e pode geda mugio, te tobage po weyu dago tigidali we bidi Kraisde po ola mabo dao.
COL 1:29 Tama te sę emainogo eno bomo eyu tama ena sę dene mu ebo dao. Kraisgo enabolo aga genuai bomo menama, tama te bomogo naga eno bomo eyu te sę ebo dao.
COL 2:1 Eno homugo dagego tama koneao: eno sę dene eyu, eno dage Kolosi bage dali, te Laodisia hanude bidibo Godigo po odobo we bidi hani dali, te gasa ena gesabidi susiąwai bidi dabe tigidali dali, eno dage dali augwali dali tau sabo sę yai dao.
COL 2:2 Magi baso meni. Eno homugo te dage me, augwali me, dage tigidaligo homu kolesaga bomo emainu eyu, tama augwa hasi dwagi yai homu eyu godolo ebo kolesaga ebogo augwali deliba kęą somainogo ebo dao. Tama eno homugo me te augwaligo te Godigo gesi dwagi yai po page sese kuna koneama, tama te konebaso augwaligo tede homu si munu me egobeo. Tama bidiyu, augwali tede te doado bage hauwa elalubo bidi tiwai bugagia bidaibao. Tama tiyu, augwaligo Godigo dualai po page hania koneaibao, te page da te Krais aga digi naga dao.
COL 2:3 Aga da te Godigo wiegi yai homu kolesaga dali konebo homu dali si dabolo waselai bidi dao. Te homu kolesaga dali konebo homu dali si polobadu dualalubadi bidai dao, te bidigo umabo wiegi yai doado bage geme dualali tiwai elaluali.
COL 2:4 Bidi me deligo dage homu bega somainu ili po ola menama, tama dagego homu polo tulaluidali weyu, eno te po dage Kolosi we bidibolo asęna tolobao. Agai wiegi yai po mu dage ola mani digi, te po ola tagalao.
COL 2:5 Magi baso meni. Ena dage dali megi bidibo meni goli, eno homugo dage dali kone palobo dao. Tama dagego Kraisde konealubo po bugagia dąų olama, tama hani deli naga wadoloyu, tama dage homu dila pai we bidi bugagia bidibao. Eno dagede tama konebaso, ena dwagi yai homu pemene ebao.
COL 2:6 Dagego “Awe, Krais Jisas aga dago Genuai Bidi dao,” te po dagego polobadu olama tama aga tama saligo da, teda agai kolesaga eyu aga dali hodobo bidao.
COL 2:7 Dagego aga dali wadolama, tama bomo elama aga dali bugagia dąų wao, te ni pedali sele tǫde aba mu peyu dąų olama te ni dąų weyu dolalubo tiwai yao. Tama aga te be dąų wabo tuni ni dali, te be kau ni dali si tiwai dao, tama dage da te be kele ni dabe tiwai elaluyu, tama dage aga dali bugagia dąų weyu bidiąo. Tama tiyu, te bidi Epafrasgo dagebolo ola mani Kraisde konealubo po, te pogo dagebolo bomo momainao, te dagego elalubo bomo genuai usu emainogo yao. Tama bidiyu, tama dagego Godibolo puba hwi po hauwa wao, dagego duga homu te puba hwi pogo pągąnao.
COL 2:8 Dage dua dao. Bidi dabe meba augwaligo te tǫde bidigo olo homu kolesaga, te we bidibolo tibo po ola mabo homu kolesaga, augwaligo dagebolo te tobage dwai homu kolesaga ola menama, tama te homu kolesagago dage dąų waidali weyu, dage dua dao. Te tobage homu kolesaga te Kraisgo ola mabeo. Mu menio. Te tobage olo homu kolesaga te bidi dabego polo wąįgo ola mani kolesaga dao, me te tǫ dali dagalu dali si tonalubo dwai genuai mobo bagego ola mani homu kolesaga dao. Te Kraisde sabeo.
COL 2:9 Magi baso meni. God aga digi sese mu te Kraisgo tigi tomode bidibo dao, tama Krais aga tiwai mu bidibo dao.
COL 2:10 Tama dage aga dali wadolobaso, agai dagebolo te bidabo ula sese mawai dao, tede dage sǫą pogobeo. Krais agai te bomo elaluyu tonalubo sę ebo genuai mobo bidi dabe tigidali aiyaba elaluama, tama aga polalubo bidi dao.
COL 2:11 Te me elalubao. Te Juda dabe augwaligo ame nani ogwa tigidali te tigiwali togwai, te Juda hanigo sa augwaligo tigiba tama muani. Tama dage, dage Krais dali wadolobaso, te dagede te Godigo sa mu elalubo dao. Te sa te bidigo nogogo ilali sa meni. Te Kraisgo muani sa dao. Te dagego tigigo dwai sę yabo kolesagago dage dąų wali. Tiali goli Kraisgo te kolesaga pisigina sąyani. Tebogo dageba Kraisgo sa muai dao.
COL 2:12 Magi baso meni. Te dagego duga homu begelama tama ąįba dulali sogo, te sogo dage Krais dali hodobo pubulali tiwai yai. Tama te sogo me te dage te ąįdu ma hodaluali sogo, te dage Krais dali hodobo gų pagede ma hodaluali tiwai yai. Aga te isali we bidi tomode osogo bidama tama Godigo aga tedu ma hodolali, agai sę yabo bomogo. Tama dagego te bomode duga homu bugagia dąų obaso, God agai dage me Krais dali hodobo hodolali tiwai yai.
COL 2:13 Polobadu dage Juda bidi hani isąwai bage, dagego te Godigo bomo yai po wali pisąyu, dagego te bomo yai po bolama dagego haniani dwai sę iduyu bidai. Tama tibaso dage Godide te isali bidi dabe tiwai bidai dao, dagego aga me konebeo. Tiali goli Godigo dage Krais dali gų pagede ma hodolali tiwai elama, tama bidibo ula menama, tama dage megi bugagia bidibao. Godigo dago yali dwai sę sęgę tigidali mu sela sąwai dao.
COL 2:14 Dago agai bomo yai po bolama tama dago aga dali dwai genuai negeli elaluali. Te bomo yai asęani pogo da po tų yabo paliali. Tama agai te po tų yao wali po sela sąnama tama te Krais aga te ni pedaide isibogo te bomo yai pogo da po tų yabo sę tigidali silai dao.
COL 2:15 Tama te ni pedaide Krais agai aga bomogo te bomo elaluyu tonalubo sę ebo genuai dwai mobo bidi dabego bomo aiyaba elaluama, tama dili eleyu, tama tigidali bidigo gedude te dolali mobo bidi dabe hania waselali.
COL 2:16 Krais aga isaligo te da po tų yabo sę silibaso, dagego bidi me deligo dagebolo po weyu dagego tubo naide me, tubo ąįde me te bomo yai po mabo gogolamuo. Te lotu po wabo tedali sa muani sogo dabe dali, te yaluai polua sogode wabo lotu dali, te Sarere deli deli toma tubo sogode me, te sogo tigidalide te bidi me deligo dagebolo bomo yai po mabo gogolamuo.
COL 2:17 Te tobage bomo yai po tigidali augwaligo sę polobadu elaluali, te dago te nosali asabo bidi asaibao po wabo konemainogo yai. Tama aga asai dao, te Krais dao.
COL 2:18 Bidi me deligo agai nade suali nai po weyu, tama dagebolo te po waibao, “Duga digi aiyaba elaluama, ensel mobo bidi dabebolo lotu po wao,” agai te po waibao. Tiali goli agai te tobage po olama, tama dagego homu polo tulaluamuo. Godigo dagebolo nosali maiabo nai hagaidali weyu dagego te bidigo wabo po odogio. Te bidi agai te tǫde homu kolesaga naga eyu, tama hagoma homu genuai eyu aga nogi ugwaba sabo dao. Tiali goli agai po kedu meni yai dao.
COL 2:19 Te po wabo bidi agai Krais aga homugo dąų wabo tagalai dao. Krais aga da te tobolu tiwai dao, tama da Godigo po odobo we bidi te tigi tiwai dao. Tama te tobolugo te tigi sese bugagia tonaluyu te dili dabe te kigibiligo deliba bugagia dąų olama, tama nai tulama tama te tigi dwagi yai pedalobo dao. Tama da Godigo po odobo we bidi me te dago tobolu bidi Krais dali tama wadolama, tama Godigo bomo selama da bugagia holobo dao.
COL 2:20 Dage Krais dali hodobo isali tiwai yai. Tama tialigo da, teda megi dage te tǫ dali dagalu dali si tonalubo dwai genuai mobo bage dologode me bidibeo. Tama tibaso, magi baso dage tǫde bidi tiwai me bidibawe? Magi baso dagego tǫde bomo yai po dologode bilibawe?
COL 2:21 E tobage bomo yai habu selebo po elalubao, “E nai nogogo tugio, u nai tula sugio, te gasa nai nogogo diągio.” Dagego te bomo yai po magi baso odobawe?
COL 2:22 Te bomo yai po te naide wabo dao, tiali goli dago te nai tubaso da, te nai mu ela silibo dao. Te tobage bomo yai po dabe, te bidigo naga augwa homugo nigilama tama ola mabo dao.
COL 2:23 Mu tama, te tobage tubo naide wabo bomo yai po nigali bidi dabe, augwali gasa we bidigo gedude te mu koneai bage dao. Tiali goli, te meni. Augwaligo bomo elama tama we bidibolo te po wabo dao, “Dagego te ensel mobo bidi dabebolo lotu po wao.” Tama augwaligo tibo po weyu “Ena imilai homu ebo bidi dao,” te po wabo dao. Tama augwaligo te homu ebo dao, “Awe, eno ena tigibolo nai masiąbaso, teda Godigo gedude ena dwagi yai bidi pedalaibao.” Tiali goli augwaligo te bomo yai pode mu geda muani. Te tobage habu selebo kolesaga ebogo augwaligo tigigo bomo elama yainu ebo dwai kolesaga aiyaba elalugobeo. Te menio.
COL 3:1 Dage Krais dali hodobo gų pagede ma hodaluama tama gesi noma bidabo ula elaluyu bidibao. Tama tialigo da, dagego bomo elama, duga homu te dagalude elalubo naiba muao, tede elalubo nai sabo homu yao. Tede Krais aga tuni bidi duabo saide bidibao, te God aga dolo nogo badu.
COL 3:2 Sesemane sogo dagego te Godigo bidibo digide elalubo naide homu dąų wao. Dagego tǫde naiba duga homu mugio.
COL 3:3 Magi baso meni. Dage isali ąǫ tiwai yai, tama dagego megi elalubo bidibo ula te Krais dali God pagede geme dulaluyu bidibao.
COL 3:4 Krais aga dago bidibo ula page bidi dao. Tama nosali aga e tǫba ma asama hania pedalama, tama dage me aga dali pedalaibao, tama dagego agai ula yai wiegi yai bomo meba elaluaibao.
COL 3:5 Dage Kolosi bulude bidibo we bidi, dage Krais dali hodobo gų pagede ma hodaluali ąǫ tiwai ebaso, dagego te duga tigigo ebo dwai kolesaga tigidali isilao, te tǫde kolesaga ebo tagalao. Te tobage kolesaga e dao: dwai penani ebo kolesaga dali, meda yai kolesaga dali, te homu hodolobo dwai sę yabo kolesaga dali, te habu selali nai sabo homu ebo dali, tama doado bage hauwa sainogo godolo ebo kolesaga dali. Te doado bage hauwa sabo kolesaga da, te tibo god selama tama agabolo lotu po weyu aga dologode bidibo kolesaga tiwai dao.
COL 3:6 We bidi augwaligo te tobage kolesaga dabe ebaso, te Godigo augwali dali sębę eyu, tama augwalibolo dwai dene mabo sogo mu asaibao.
COL 3:7 Polobadu dage te bidi dabe dali bilali, tama dagego te tobage dwai kolesaga tigidali duga digi yai, tama te kolesagago dage aiyaba elaluali.
COL 3:8 Tiali goli megi dagego e tobage kolesaga tigidali sela sąyao: boi bidi homu ebo dali, haliga sębę ebo dali, gasa bidi dene mabo homu ebo dali, te nogi posobo dwai po wabo kolesaga dali, tama meda yai po wabo dali, te tigidali sela sąyao.
COL 3:9 Dagego duga hasi ama dabe tibo po wabo tagaliąo. Magi baso meni, polobadu dagego tigigo dwai sę yabo kolesaga dologode bidibo dagego tagalalio, tama te tobage dwai kolesaga ebo dagego tagalali.
COL 3:10 Tama dagego te gesi noma homu kolesaga selama elalubao. God aga digi te gesi noma bidi nigai, tama dagego aga kuna koneyu, tama aga tiwai mu pedalomainogo, agai dage sesemane sogo tau sabo dao.
COL 3:11 Tama Godigo tama tibaso, megi aga gedude te we bidi haniani tedali elalubo menio. Te Juda hani isąwai hani dali Juda bidi hani te si tedali gasagi yai meni. Te tigiwali togolama sa elalubo bage dali, te tigiwali togisiąbo bage dali, agai gedude te tedali gasagi yai me menio. Te bulu tomode mu bidibo bidi dabe dali, te bulu yowi tiwai bidibo bage me, te augwaligo sęde dąų olama masigi sisąbo sę ebo bage me, te olo bugagia bidibo we bidi me, Godigo gedude augwali tedali tedali gasagi gasagi yai meni. Te magigo meni. Krais aga digi naga te genuai dao, tama aga te aga we bidi tigidali deli deli tomode bidibao.
COL 3:12 Dage da, te Godigo we bidi hani dao. Agai dage dali dwagi yai homu eyu, tama dage godolo ebaso tama dage aga we bidi hani pedalomainogo, agai dage te tigidali we bidi tomodu dią sali. Tama dią sobaso, bidigo aga gesi ugwa dabe gudubo tiwai gilama dagego e dwagi yai kolesaga selama tama yao: dagego we bidi hobede yao, augwalibolo dwagi yai sę naga yao, hagoma homu eyu duga nogi ugwaba sigio. Sesena pai homu egimio, we bidi dali dua dao. Bidigo dage dali dwai sę ebaso da, te dagego sula tagalama sębę polo egimio.
COL 3:13 Duga hasi bidi me deligo “Eno ama dwai sę ena dali yali,” te po weyu, tama agai te dwai sę ebaso da, te agai nagame homu eyu aga amago yali dwai sę sęgę sela sąyao. Dago Genuai Bidi Krais agai dagego sęgę sela sąwai dao. Te tiwai gilama duga hasi dagego me abagigo sęgę sela sąyao.
COL 3:14 Tama te duga hasi dwagi yai homu eyu godolo ebo kolesaga me te eno megi nogi yali haniani dwagi yai kolesagaba te polalubo kolesaga dąų walao. Te duga hasi dwagi yai homu eyu godolo ebo kolesagago te gasa haniani wiegi yai kolesaga deliba sisinama, tama wiegi yai mu pedalama tama usu niba kadu mu waibao.
COL 3:15 Krais agai da dwagi yai homu nagame ilibo kolesaga ebo dao. Tama te kolesagago dagego homu tonalumainao. Magi baso meni. Dage dwagi yai homu nagame eyu bidimainogo God agai dage deli deli i olama tama deliba sisinama, tama dage tigi deli naga tiwai pedalai dao. Tama sesemane sogo dagego Godibolo puba hwi po weyu bidao.
COL 3:16 Krais agai ola mani po te wiegi yai po mu naga dao. Tama te po dagego homude bugagia elalumainao. Duga hasi dagego wiegi yai homu kolesagago Kraisgo po ola mayu tama dua dao, e pode geda mugio, te tobage po weyu duga hasi ola mao. Tama tiyu, tama dagego haniani balia po wao, tama te lotu balia wabo buku nogi Tęąbi Po Buku, te bukude elalubo Godigo nogi ugwaba sabo po me, te Kraisgo nogi ugwaba sabo tęąbi po me, te Godigo Mobo Bidigo mabo haniani tęąbi pogo me duga hasi ola mao. Dagego duga homude Godibolo usu da po weyu tama te balia po wao.
COL 3:17 Tama tigidali sogo dagego po obadi ma dagego nogogo sę ebadi, te tigidali ebo kolesaga dagego dago Genuai Bidi Jisasgo nogide yao, tama agai dage dali yali sęde dagego dago Aya Godibolo puba hwi po weyu bidao.
COL 3:18 Dage bidigo sai we dabe sibi, dage deli deli duga bidi dologode bidiyu agai po odao. Dage dago Genuai Bidi Krais wali pabo we bidibaso tama tiao.
COL 3:19 We sai bidi dabe, dage deli deligo duga we dali abagi homu eyu aga bugagia tonaluao. Tama sesena pai bidigo kolesaga tiwai naga we dali egio.
COL 3:20 Wai dabe, dagego duga aya ida sigo wabo nai po tigidali odoyu wali pao. Te dwagi yai kolesaga ebogo te dago Genuai Bidi dwagi yai homu ilibo dao.
COL 3:21 Aya dabe, dagego duga wai dabe dali wado po tigidali sogo olamuo, te augwali dwai homu ilibo kolesaga egimio. Dagego augwali dali te tobage kolesaga eyu da, teda augwaligo te sębę sabo homu eyu, tama dwagi yai kolesaga ebo tagalaibao.
COL 3:22 Dage sęde dąų olama masigi sisąbo sę ebo bidi dabe, duga tonalubo bidigo po tigidali wali pao. Augwaligo dage dali dwagi yai homu emainu tama augwaligo dage tonalubadi naga dagego duga sę bugagia egimio. Te meni. Tigidali sogo dagego dago Genuai Bidi Krais dali wi eyu aga dologode bidibaso, tama homu mu eyu dagego duga sę bugagia yao.
COL 3:23 Tigidali sę dagego ebo, te sę dagego bomo elama yao. Tama dagego duga sę ebadi e homu yao, “Eno e sę ebo, te bidi naga tau siyu ebo menio, te eno e sę ebogo te Genuai Bidi Krais tau sabo dao,” te homu yao.
COL 3:24 Tama tiyu dagego koneao, Genuai Bidi agai dage wei ponoyu tama dage aga nai nosali sabo we bidi dabe ilaibao. Te Krais aga da te dagego Genuai Bidi bidi dao, tama dagego sę ebogo aga tau sabo dao.
COL 3:25 Tama niwai bidi agai dwai sę ebaso da, teda Godigo aga te yali dwai sęde wei ponaibao. Te nogi elalubo bage da, ma nogi meni yai we bidi da, te magigo meni, Godigo usu ni deligo naga da tigidali usu saibao.
COL 4:1 Dage sę bidi tonalubo bidi, dagego augwali tigidali dali kolesaga deli naga yao, te doloba pai kolesaga naga yao. Koneao, dage me te tonalubo Genuai Bidi elalubao, aga dagalude bidibao.
COL 4:2 Dage Kolosi we bidi, dagego Godibolo gedu haluasa po bomo elama oduao, tagaligimio, tama subigila wagimio. Tama tiyu, agabolo puba hwi po wao.
COL 4:3 Dagego gedu haluasa po obadi, Godigo da me tau somainogo te po wao, “Aya, nago po, te Kraisde polobadu geme dualali po, te po augwaligo te we bidibolo pusumainogo tų dayao,” dagego te po hanalu wao. Eno gasa we bidibolo agai po pusubaso, augwaligo ena e kalabusiba muai dao.
COL 4:4 Tama tibaso, eno agai po page hanilimainogo dagego Godibolo ena tau sao po wao. Agai enabolo te sę mawai dao.
COL 4:5 Dage te Godigo obo tomoba asisąwai we bidi dali bidibadi, dagego homugo kone palama tama bugagia bilao, subigila meni. Augwalibolo Godigo po pusubo sunumi dabaso da, teda augwalibolo pusao.
COL 4:6 Tama tiyu dagego wabo po sesemane sogo dwagi yai eyu tama augwaligo odai hagede emainu tama pusu yabo po naga wao. Tama bidi mego dage Godigo po pagede po me hanalu obaso da, dagego agabolo bugagia wei ponobo po kuna homu kone palama wei ponao.
COL 4:7 Tikikus da, te dago aga dali dwagi yai homu eyu godolo ebo ama dao, tama agai dagebolo te enaba pedalali sę po tigidali pusaibao. Agai te ena dali homugo kęą pai bidi dao, tama agai te ena tau sabo dwagi yai sę bidi mu dao, tama da dali deli sę eyu Genuai Bidigo sę ebo bidi dao.
COL 4:8 Tikikus agai te da ede bidibo bage te daba pedalali sę po dagebolo omainogo, tama dagego te po odama homu kolesaga bomo emai yainogo eno aga dage bidibo digi tamadi tagala palaibao.
COL 4:9 Tama Onesimus me aga dali hodobo paibao. Onesimus aga dago dwagi yai homu ebo ama mu dao, te homugo kęą pai bidi dao. Aga Kolosi bidi hani me dao. Tama te bidi Tikikus dali Onesimus sigo da ede bidibo bageba pedalali sę po tigidali dagebolo pusaibao.
COL 4:10 Aristarkus, te ena dali Jisasgo sęde kalabus elama bidibo bidi, agai siade dao te po dagebolo e pasgo ola tolobao. Tama Mak, Barnabas aga hai, dage dali agai siade dao te po ola tolobao. Dage bidibo digi aga sabaloyu da, dagego aga bugagia sao, te eno dagebolo polobadu ola tolali po tiwai agade yao.
COL 4:11 Josua, augwaligo te bidi nogi me Jastas wabo, agai me dagebolo siade dao te po ola tolobao. Aga dali, Aristarkus dali, Mak dali, augwali sela naga te Krais wali pabo Juda bage ede bidiyu tama augwaligo ena dali sę eyu, te Godigo te we bidi tonalubo kolesaga pedalomainogo ebo dao. Te gasa Jisas wali pabo Juda bagego ena te sęde tau sabo meni. Tama te bidi selago ena tau genuai mu sabo dao.
COL 4:12 Epafras agai dagebolo siade dao po ola tolobao. Aga me dage hani deli dao, tama aga Krais Jisasgo sę ebo bidi dao. Sesemane sogo agai gedu haluasa po weyu homu dąų olama, tama bomo elama weyu dage tau sabo dao. Agai homugo dage Godigo homu tigidali bugagia wali peyu, tama tede homu si munu me isąyu, tama dage bidi mu pedalama tama bomo elama bugagia dolalumainogo eyu agai gedu haluasa po Godibolo weyu, “Augwali te tiwai pedalomainogo, tau sao,” agai te po wabo dao.
COL 4:13 Awe, ena digi eno aga koneama, eno e po agade obao, te agai dage dali, te Laodisia hanu we bidi dali, te Hierapolis hanu we bidi dali, dage tigidali tau somainogo eyu aga sę dene mu ebo dao.
COL 4:14 Luk, te dago aga dali dwagi yai homu eyu godolo ebo dokta bidi dao, aga dali Demas augwali sigo dage Kolosi we bidibolo siade dao po ola tolobao.
COL 4:15 Dagego eno siade dao wabo po te Laodisia hanude bidibo ama dabe, te Godigo po odobo bage augwalibolo wao. Tama eno te siade dao wabo po te we Nimfa dali, agai beba sisinibo Godigo po odobo we bidi augwalibolo me wao.
COL 4:16 Dagego e pas nedelama, tama dagego te Laodisia hanude bidibo Godigo po odobo we bidibolo tolao, augwaligo me e po nedemainogo eyu yao. Tama eno te Laodisia we bidibolo asęna tolali pas po, te dagego me selama nedao.
COL 4:17 Tama dagego te bidi Arkipus aga dali e po wao, “Te Genuai Bidigo nago nogoba muani sę sula tagaligio. Nage aga sę ebo bidi bidibaso, te mani sę bugagia silao,” te po Arkipusbolo wao.
COL 4:18 Ena Pol da, tama ena digi eno nogogo dagebolo siade dao po asęna tolobao. Dagego ena kalabus bede bidibo te gegeda pigimio. Eno homugo Godigo olo tau sabo kolesaga dage dali bidao. Te tama dao.
1TH 1:1 Pol, me Sailas, Timoti dali, da bidi selago te po dagebolo asęna tolobao, dage Tesalonaika bulude bidibo we bidibolo. Dage te God Aya me Genuai Bidi Jisas Kraisde wadolama bidibao. God agai dage olo tau selama, tama dage bugagia bidao, dago homugo tebo dao.
1TH 1:2 Tigidali sogo dago dage tigidali dali Godibolo buba hwi po weyu, dago bomo eyu, gedu haluasa po dage tau somainogo wabo dao.
1TH 1:3 Tama dago Aya Godibolo po obadi, dagego ebo dwagi yai kolesaga te dago gegeda pabo menio, te dago ma konebo dao. Dagego Kraisde duga homu tigidali mubaso, tama dagego dwagi yai sę ebo dao. Dagego duga hasi dwagi yai homu eyu, tau siyu ebaso, sę dene ebo dao. Tama dwagi yai homu eyu, dagego ‘Dago Genuai Bidi Jisas Krais mu aselama, da tau saibao,’ te homu eyu, tama bomo elama, dagego tonalubo dao. Tama dagego te sę ebo po dago ma koneyu, dago Godibolo buba hwi po wabo dao.
1TH 1:4 Dago abagi dabe, God agai dage godolo mu eyu, agai dage aga we bidi mu da olama, sa muyu yai dao, te si dago konebo dao. Tama tibaso, dago Godibolo nage usu dao te po wabo dao.
1TH 1:5 God agai dagebolo te homu yali dago mena tama koneaniwe? Dago te Godigo po dagebolo pusagasali sogo, te olo po dali naga wagasai menio. Te pode Godigo Mobo Bidi agai bomo mu eyu, tama dagego te po mu po dao homu yali, te dagego te pode homu si ebeo. Duga digi dago dage dali hodobo bidiyu tau sabo kolesaga, te dagego konebo dao.
1TH 1:6 Tama dagego dago kolesaga dali, te Genuai Bidi Kraisgo kolesaga dali te kolesaga si dagego wali pabo gilama. Polobadu augwaligo da dali, Genuai Bidi Krais dali dene mani gilama, dage me Godigo po sobadi, tama dage me dene salio. Dage dene sali goli, te Godigo Mobo Bidi agai dagego homu dwagi yai mu ilalio.
1TH 1:7 Tama tibaso, te Masedonia dali Akaia dali te genuai tǫ side bidibo Jisas wali pabo we bidi augwaligo dagego te dwagi yai sę yali po odama, tama augwaligo te tiwai inao, te po wai.
1TH 1:8 Dagego Genuai Bidigo po gasa we bidibolo pusubo te po te digibulu bulude odalio. Te po te Masedonia bulu dali Akaia te bulu side naga te po odai menio. Tigidali bulu bidi augwaligo dagego te Godibolo konealubo po dąų wabo po augwaligo odalio. Tama tibaso, dago dagego te sę ebo po te dago augwalibolo ma wagobeo.
1TH 1:9 Dage bidibo digi da asali sogode dagego yali sę po augwa digi augwaligo dabolo pusubo dao. Augwaligo da dali pusuyu, te po wai, ‘Augwaligo te tibo god tagaliyu, tama augwaligo homu God muba muai,’ te po wabo dao, tama dage bidabo ula sabo te God agai sę bidi dage bidibao, te po wabo dao.
1TH 1:10 Tama augwaligo te po wabo dao, dage te Godigo Ogwa dagalu tagalama e tǫba ma asobo sogo te dagego tonalubo dao, te po wabo dao. Te Godigo polobadu gų pagede ma hodolali bidi, te Jisas, tama te bidi agai da dali Godigo nosali sębę idali weyu tau sali bidi Jisas dao. Dagego te bidi asobo tonalubo po augwaligo dabolo pusubo dao.
1TH 2:1 Dago abagi dabe, polobadu da dage bidibo digi aselama, tama dago yali sę te nai walosiąwai sę menio, te dagego koneai dao. Hasia da dage bidibo digi asisąbadi, da Filipai bulude bidibadi, da dene siyu, tama augwaligo dago tigi doloyu, nogi posobo po weyu yai, te me dagego koneai dao. Tiali goli, da dage bidibo digi aselama, tama God agai da homu kolesaga dąų waliyu, tama dago boi bidi sulama, wi eyu didibili homu yai menio. Dago bomo elama, Godigo po dagebolo pusa mawai.
1TH 2:3 Dago dage dali po ola mobadi, te dago te po doloyu, dwai sę yabo po dali, ili po wabo kolesaga dali, dago te tobage po wabo menio.
1TH 2:4 Te menio. God agai da osola sulama, tama da usu ebaso, tama agai dabolo agai dwagi yai po pusumainogo dabolo te sę mawai. Tama tibaso, dago te po hania hanilama te po pusubo dao. Dago te sę ebo tǫde we bidi augwali da dali homu dwagi yai emainogo te sę ebo menio. God agai deligo naga dago te sę ebo godolo emainogo te sę ebo dao. Tama God aga digi dago homu kolesaga tomode osola subo dao.
1TH 2:5 Dagego koneai, dago te wabo pode dage homu bega somainogo dago te po wabeo. Dago te Godigo po dage dali obadi, dagego nai sainogo dago tibo po dage dali weyu menio. Tama God agai me te sę ebo gedugo suai dao, te po mu po dao waibao.
1TH 2:6 Tama dago te sę ebo te tǫde bidigo dago nogi ugwaba somainogo te sę ebeo, te dage me te gasa bidi me tomode te dago te sę ebeo. Te Jisas Krais aga digi da tagala palali agai sę bidi da bidibadi goli, dago bomo elama, tama dagego dabolo te genuai nogi momainogo dago te sę ebeo.
1TH 2:7 Te menio. Tialima, da dage dali bidali sogo, da homu nagame yai kolesaga eyu bidali, wego aga wai dabe bugagia tonaluyu negebo tiwai eyu bidai dao.
1TH 2:8 Tama dago dage godolo mu yai, tama dago Godigo dwagi yai po dagebolo te pusa mawainogo yai. Tama te sę naga menio. Dago dage tau siyu isabo te sisi eyu, te homu me dago yai dao. Magi basowe? Dago dage godolo mu eyu, te homu yai dao.
1TH 2:9 Dago abagi dabe, da dage tomode bidibadi, dago sę dene ebo te tigidali dagego koneai dao. Tama dago dagebolo Godigo dwagi yai po pusubadi, tama dago te masigi sabo gasagi yai sę yai dao, te siade me hulide me yai dao. Te yali sę dagego koneai dao. Dago te sę magi baso yaliwe? Te dago dagebolo sęgę maidali weyu, dago te sę yai dao.
1TH 2:10 Tama da dage Jisas wali pabo we bidi tomode bidali sogo, dago te gasagi yai mu kolesaga yali. God agai gedude dago yali kolesaga te dwagi yai mu yali. Tama we bidigo gedude dago yali kolesaga te doloba pai mu yali, tama te sę ebadi, magi dwai sę me yai menio. Tama te yali kolesaga dagego sulama, koneai dao. Tama God me agai te dago yali kolesaga sulama, koneai dao.
1TH 2:11 Tama dagego koneai, ayago aga wai dabe dali ebo kolesaga tiwai dago me dage deli deli dali yai dao.
1TH 2:12 Tama dage tulaluidali weyu, dago dagego homu kolesaga tomode hodoloyu, tama dagego homu kolesaga dąų waliyu yai. Tama dago bomo elama, dagebolo po mobo maidu geai, te po wai, “God agai dage dali dwagi yai homu emainogo, agai dwagi yai kolesaga mu wali pao. God agai dage i wali, tama dage aga obo tomode bidiyu, agai genuai ula yai bomo sumainogo agai dage i wai dao,” dago dage dali te po wai.
1TH 2:13 Tama tibaso, sesemane sogo dago Godibolo gedu haluasa po weyu, dago nage usu dao po wabo dao. Magi basowe? Polobadu Godigo po dago pedauwalide wabo po dagego odai. Tama te po odama, tama te olo bidigo po dao homu eyu, dagego te po sai menio. Te meni. Te po Godigo po mu dao. Tama dagego te po odoyu, dagego te homu yai, awe, te Godigo po mu dao. Tama te pogo te Godibolo konealubo po dąų wabo bidigo homu kolesagade sę bomo mu ebo dao. Te Judia tǫde bidibo we bidi meba augwali Godigo we bidi hani mu dao. Augwali te Jisas Kraisde homu dąų wali we bidi dao.
1TH 2:14 Dago ama dabe, dage augwali tiwai dao. Augwali te Jisasde homu dąų obaso, te Juda bage mebago hagela ebaso, augwali dene mawai. Tama te tiwai dage me duga hanigo nogode dene sai dao.
1TH 2:15 Tama te dwai sę yali Juda bage augwaligo Godigo po pusa mani profet bidi elama isai, tama augwaligo Genuai Bidi Jisas me eleyu yai. Tama tiyu, augwaligo da me ela guduluyu sela sąwai dao. Tama augwaligo ebo sęde te Godigo dwagi yai homu isiąwai sę dao. Tama augwaligo tigidali bidi dali boi bidi mu ebo dao.
1TH 2:16 Tama boi bidi mu bidiyu, augwaligo dago sę yabo tų pania sabo sę ebo dao. Tama te Juda hani isiąwai we bidi Godigo augwali ma somainogo, dago Godigo po augwalibolo pusainogo ebadi, te Juda bage augwaligo da dali “Te po wagio,” wabo dao. Tama tiyu, augwaligo dwai sę yali te hauwa mu yai dao, te genagi naigo pągąwai tiwai. Tialima, God agai moni sębę ebo augwali pąba mu bidagasai elalubao.
1TH 2:17 Dago abagi dabe, Juda bage augwaligo da dage dali bidibadi ela gudulai dao. Tama tiyu, da aya ida meni yai wai bidibo tiwai yai dao, osogo. Dago dage gesabi subeo. Tialima, dago homu dage dali bidibao. Tama dago dage gesabi suainogo asabo tų gegebo sę bomo mu yai. Dago dage suainogo dago homu bomo mu yai dao.
1TH 2:18 Tama da dage pageba asainogo yai. Ena Pol dao, tama hauwa sogo ena dage bidibo digi asainogo usu sai, te usu menio. Magi baso menio. Te dwai mobo bidi Satan agai da asabo tų dąų walio.
1TH 2:19 Tama nosali dago Genuai Bidi Jisas e tǫba ma asobo sogo te da tǫde we bidi aga gesabidide da dolaluaibao. Tama aga asobo sogo da dwagi yai homu eyu tonalubo dao. Tama aga asobo sogo dago te dwagi yai nai dali te dwagi yai au yabo nai dali te si waibao. Dago dwagi yai nai dali au yabo nai dali te si de dawe? Te dage tama dao.
1TH 2:20 Awe, duga digi te dago dwagi yai au yabo nai dao. Dagede te dago dwagi yai homu mu ilibo nai dao.
1TH 3:1 Te dago dage ma suainogo hauwa sogo tonaluama, tama dago te homu yai, da nosali ma tonalugobeo. Pol me Sailas da si naga te Atens hanude bidaibao homu yai.
1TH 3:2 Tama te homu elama, da sigo dago ama Timoti dage bidibo digiba tagala palai. Timoti aga te Godigo sę ebo bidi dao. Aga te Jisas Kraisde po pusubo bidi dao. Da sigo Timoti dage pageba tagala palai, tama agai dage bomo mayu, tama dagego Kraisde konealubo po dąų walomainogo, tama augwaligo dage dene mobaso da, dage meba bidi te Jisasgo po tagalidali weyu yai. God aga digi da te dene dali sęgę dali te somainogo, agai da te bodolu mawai.
1TH 3:4 Awe, polobadu da dage dali bidibadi, te dene dage pageba asisąbadi, tama dago te po dage dali odu geai, “Nosali da dene saibao,” wai. Tama te po wali gilama tama tiwai, tama dagego sulama koneai dao.
1TH 3:5 Tama te dene dage pageba asali baso, tama eno ma tonaluyu gesege ma egobeo homu eyu, eno bidi me deli dageba tagala palai. Te eno dagego Kraisde konealubo po me dąų wabowe, te eno koneainogo te bidi tagala palai. Te dwai sę ebo tomoba kegebo dwai mobo tuni bidi agai dage dali te sę yaliwe eno te homu yali. Agai te sę dage dali egi sogo da, tama dago dage dali yali sę olo dali eyu, te nai walosiąwai sę egi da.
1TH 3:6 Te da dagede moni homu te tiwai eyu bidali. Tiali goli, Timoti aga dage pageba sabolama, tama dage dali osogo bidiyu, tama agai dage tagasu, megi tama aga da bidibo digi ma asai. Tama aselama, agai dwagi yai po da dali pusai. Dwagi yai po pusuyu, agai te po wai, “Te Tesalonaika dabe augwaligo Godide konealubo po bugagia dąų waliyu bidibo dao. Augwaligo augwa hasi godolo mu eyu bidibo dao,” te po wai. Me agai te po wai, sesemane sogo dagego da dage dali bidali sogo homugo ma koneyu, tama dagego da dali dwagi yai homu ebo dao. Tama dagego da suabo homu bomo mu dali elama bidai, te dago dage suainogo ebo homu tiwai dagego me te homu ebo po Timoti agai da sibolo tamadi pusai, megi tama.
1TH 3:7 Dago abagi dede, gasa bidi augwaligo dabolo sęgę dali dene si mayu, tama da isabo tiwai yai dao. Tiali goli, Timoti agai po dabolo pusubaso, tama dago konebao, dagego Godide konealubo po me dąų wabo dao. Tama tibaso, da bomo ma selama, bugagia bidibao.
1TH 3:8 Magi baso menio. Dage Genuai Bidi agai bomode bomo elama, tama aga dali bugagia wadoloyu ebaso, teda te tebogo dago sęgę dali dene dali si aiyaba elaluali. Tama elama, da moni dwagi yai homu elama, da bugagia bidibao.
1TH 3:9 Tama tibaso, dagego te dwagi yai sę ebo po odolama, tama God agai da dali te dwagi yai homu kolesaga mabo te sęde tama magi ilama dago agabolo te nage usu da po weyu, tiwai si yaibawe? Woo, da usu egobeo. Agai dabolo yali dwagi yai sę, te sęgo dago usu da po wabo sę aiyaba mu elalubo dao.
1TH 3:10 Tama hauwa sogo mu dago giligade me, hulide me God dali hanalu wabo po wabo dao, te da dage pageba aselama, dage pagia sainogo. Tama dagego God dali duga homu tigidali mubo sę dwasianu habuge eyu da, te dago ma pągąnainogo dage tau siyu, te po wabo dao.
1TH 3:11 Tama dago homugo dago Aya God, aga digi, te dago Genuai Bidi Jisas augwali sigo da dage pageba pabo tų damainogo, dago te po olama, gedu haluasa augwali sibolo hanalobo dao.
1TH 3:12 Tama dagede, dago homugo Genuai Bidi agai te dagego duga hasi godolo mu ebo sę genuai mu ilimainogo dago hanalobo po wabo dao. Tama me agai dagego te gasa we bidi tigidali augwali dali godolo mu ebo sę genuai mu eyu pągąna palomainogo dago hanalobo dao. Tama te dago dage dali godolo ebo sę gilama dagego te tiwai emainogo dago Genuai Bidi hanalobo po wabo dao.
1TH 3:13 Tama te Genuai Bidi agai dage te we bidi dali godolo mu ebo sęde dąų omainogo, dago aga dali te hanalobo po wabo dao. Tama agai tama tilama, tama nosali dago Genuai Bidi Jisas aga doloba mu pai we bidi tigidali aga dali e tǫba ma asobo sogo, te dage me te sogo Godigo doloba mu pai we bidi dago Aya God agai gesabidide bidimainogo, tama dago te Genuai Bidi dali te po hanalobo dao.
1TH 4:1 Dago abagi dede, dago gasa po me elalubo. Tama da te Genuai Bidigo po sela pabo bidi dabe dao. Tama tibaso, dagego e po tudiba muidali weyu, tama dago bomo elama, dagebolo e po megi obao. Polobadu dago te Godigo gedude dwagi yai dolo yai kolesaga ebo po dagebolo ola mawai. Tama dago te tobage po dagebolo ola menama, tama dagego te po odoyu, wali peyu bidibo dao. Tiali goli, megi dago bomo elama, dagebolo e po megi obao, te dagego dene siyu te tobage sę tigidali dagego bugagia mu yao.
1TH 4:2 Tama te Genuai Bidi Jisas agai da tau selama, tama dago dagebolo te sę yao po wali, te dagego koneai dao.
1TH 4:3 Tama te po page mu e dao, God agai dage dali ebo homu e tiwai, dagego magi dwai sę me isiąma, doloba pai we bidi mu bidao. Tama penani ebo sę dagego egimio.
1TH 4:4 Tama te dwai sę isiąbo kolesaga bugagia wali peyu, tama we sabo kolesaga dage deli deligo bugagia koneama, tama tebo kolesaga eyu bidao, God agai homu dage dali te tiwai homu ebo dao. Tama dagego tebo kolesaga, te Godigo kolesaga naga tiwai wali pao, tǫde we bidi augwaligo ‘Te sę dwagi yai sę dao’ omainogo yao.
1TH 4:5 Tama we sabo sę te tiwai eyu, tama dagego te God konesiąwai bidi hanigo ebo kolesaga tiwai egimio. Te God konesiąma, augwali augwa dwai sę yabo homu kolesaga wali peyu, te bomogo, te we sabo dao.
1TH 4:6 Tama God agai ebo homu e dao. Dagego te we sabo sę po bolama, tama duga abagi dali dwai sę egimio. Magi baso menio. Genuai Bidi Jisas agai te tobage dwai sę ebo kolesaga ebo bidi augwali tigidali agai wei ponobo dao. Tama polobadu da dage dali bidibadi, e sęgę yai po dao homu eyu, dago te po hanilama, dage dali wai dao, dage tau somainogo.
1TH 4:7 God agai da i wali, dago te dwai meda yai kolesaga wali pomainogo da i wabeo. Menio. Agai da i wali, te dago dwagi yai doloba pai kolesaga mu wali pomainogo agai da i wai dao.
1TH 4:8 Tama tibaso, e po odolama ela pabo bidi, te bidi agai e tǫde bidigo po naga tudiba mubeo. Te bidi agai Godigo po odolama ela peyu, aga tudiba muani bidi dao. Te God agai naga dagebolo te Dwagi Yai Mobo Bidi mani God da, te Mobo Bidi agai dagebolo mani, dage Godigo we bidi mu bidimainogo.
1TH 4:9 Te eno duga abagi dabe augwalibolo dagego dwagi yai homu ela mabo, te po eno meba asęgobeo. Magi basowe? God agai te duga hasi dali dwagi yai homu mabo te kolesaga dagebolo ola menama, tama te kolesaga dagego koneyu bidibao. Tama eno dagebolo te po ma ola magobeo.
1TH 4:10 Tama dagego dwagi yai homu duga abagi dabe te Masedonia tǫ tigidali tomode bidibo bidi dabe augwali dali ebo dao. Dagego te kolesaga ebaso, God agai te kolesaga dagebolo ola mani, te dago koneai. Tiali ma, dago abagi dede, dago po bomo elama, dage dali obao, tama dagego duga abagi dabe augwali dali dwagi yai homu ebo kolesaga te kolesaga dagego me mu ela pao.
1TH 4:11 Dagego homu kolesaga tomode bomo elama, tama dagego homu dwagi yai nagamea peyu, tama duga bidibo bugagia tonaluao. Tama dagego duga digi duga masigi sabo sę yao, dago polobadu dagebolo te po wali gilama.
1TH 4:12 Dage magi nai me menia sidali weyu, te duga masigi sabo sę yao. Tama te Godigo po wali pesiąwai we bidi augwaligo dagego te dwagi yai kolesaga ebo sumainogo, tama dagego homu dwagi yai nagamea peyu, tama duga bidibo bugagia tonaluao.
1TH 4:13 Dago abagi dede o, edao. Te Godigo po wali pisiąwani we bidi augwaligo augwa homu Godiba musiąyu, te isali we bidi gų pagede ma hodalobo sogo augwaligo tonalusiąma, tama te isibo we bidide augwali homu dene eyu, gela mu wabo dao. Tiali goli, dago homugo te Godigo po wali pelama isali we bidide te dagego bugagia koneao. Dagego te buluba bidibo we bidigo gela wabo tiwai waidali weyu, dago e po dagebolo obao.
1TH 4:14 Da tigidaligo te Jisas aga isilama, tama ma hodaloai dao, te dago te mu po da homu eyu, konealubo dao. Tama tibaso, da tigidali Jisas dali wadoloyu bidibaso, dago e po me konealubo dao, te Godigo te Jisasgo bomode te agai po wali pelama isali we bidi Jisas aga dali ma hodasa sela asaibao.
1TH 4:15 Tama Genuai Bidigo po naga dago dagebolo megi obao. Nosali Genuai Bidi ma asobode, da e tǫde isisiąwani we bidi, da polo hasia polasa te Godigo po odolama, isali we bidi taga peyu da polo pogobeo.
1TH 4:16 Te menio. E tiwai pedalaibao. Te Godigo bomo elama po weyu, tama polalubo genuai ensel mobo bidigo i weyu, tama Godigo moni bu wabo nai biugel po weyu, tama tebo sogo Genuai Bidi Jisas aga digi dagalu tagalama, dulubo gagalaibao. Tama polobadu Jisasde konealubo po dąų olama isali we bidi, augwali polo hasia mu gų pagede hodaloaibao.
1TH 4:17 Tama te sogo da tǫde isisiąwani we bidi, Godigo da te ma hodolali we bidi dali pǫgo odasa dagaluba holaibao, te da te asobo Genuai Bidi tiąba pomainogo yaibao. Tama elama, da te Genuai Bidi Jisas dali sesemane sogo bidada peyu, mu bidada paibao.
1TH 4:18 Te sę pedalama, tama da tigidali te tiwai bidaibao. Tama tibaso, dage tomode we bidi meba augwali isibaso, dagego te pogo duga hasi tau siyu, duga homu dąų walao.
1TH 5:1 Dago abagi dede o, te da dage dali bidibadi dago dagebolo dago Genuai Bidi asobo po wai. Tama tibaso, agai asobo sogode dago dagebolo po me asęgobeo.
1TH 5:2 Menio. Duga digi koneai dao, Genuai Bidi asabo sogo te nai wi sabo bidi hulide geme polo asobo tiwai yaibao.
1TH 5:3 Tama te Godigo po wali pisiąwai we bidi augwaligo te po waibao, “Megi te da bugagia bidabo sogo dao, te da dolabo nai pąba asogobeo,” te po waibao. Tiali goli, augwaligo te tobage po obadi, sisi isiąwai, te sogo digi tama augwali dolabo nai polo augwaliba pedalaibao, augwali noma mu saibao. Te wede ebo sę tiwai, we mego wai ame nainogo tigide ebo dene tiwai ebo si pedelaibao, tama te we te dene wi pabo tų menio, wi sana pogobeo. Tama te tiwai te Genuai Bidi asobo sogode te Godigo po wali pisiąwai bage augwali wi pabo tų menio.
1TH 5:4 Tiali ma, abagi dede, dage hulide bidibo menio, te Genuai Bidi asabo sogo te nai wi sabo bidi tiwai geme eyu, polo aselama, dage noma sogobe. Menio. Dage te hulide bidibeo.
1TH 5:5 Te menio. Dage tigidali we bidi giligade ula dali bidibo dao. Da be hulia sai digi huli tomode me bidibo menio.
1TH 5:6 Tama tibaso, da sisi eyu, godege piabuo, te gasa sisi isiąma godege pibo we bidi tiwai. Tama dago gedu pedaluyu, bugagia tonaluyu, tama dago homu kolesaga wiegi yai mu elama, bidao.
1TH 5:7 Dago koneai, godege pibo bidi augwali hulide pibo dao. Tama bomo yai ąį tulama aiyoge ebo bidi, te bidi dabe augwali te hulide naga te sę ebo dao.
1TH 5:8 Tiali ma, da ulade bidibo bidi dao. Tama tibaso, dago homu kolesaga wiegi yai mu elama bidinao. Te hwįbo bidi aga hagawiade te boi bidigo elidali weyu mubo nai tiwai, tama dago Godide konealubo po bugagia selama, we bidi dali dwagi yai homu ebo kolesaga eyu, bugagia bidinao. Tebo sę si te dago hagawiade muabo dila pai nai tiwai dao. Tama Godigo da ma sabo homu bomo eyu, agai te sogo da somainogo dago tonaluinao. Tama te homu kolesaga tiwai, te dago tobolude muabo dila pai kapa madi tiwai dao, te hwįbo sogo da tau somainogo.
1TH 5:9 Magi baso menio. God agai da bodolu mani te dago agai homu sębę ebo dago somainogo ebo menio. Woo, agai da sa muyu, te homu yai, augwaligo Genuai Bidi Jisas Krais agai augwali tobade isilama, tama augwali ma saibao, God agai te homu elama, da sa muani. Tama Genuai Bidi aga ma asobo sogo da bidiyu da, ma da isali da, te sogo da aga dali hodobo bidada peyu, mu bidada pomainogo, Godigo da sa muani.
1TH 5:11 Tama tibaso, duga hasi te pogo duga abagi dabe augwali homu kolesaga dąų waliyu, tau siyu, te po augwalibolo ola mao, tama megi dagego te ebo sę tiwai tama naga yao.
1TH 5:12 Dago abagi dabe, dago dagebolo te po obao, dage tomode Godigo sę ebo bidi dabe dologode dage bidao. Genuai Bidi agai te bidi dabe augwali dagego tobolu bidi nigilama bidai, tama te bidi dabe augwaligo Godigo po dagebolo ola mayu, dagego homu kolesaga dodolobo dao.
1TH 5:13 Dagego homugo augwaligo sę ebo kone palao, augwaligo te sę eyu, dage tau sabo sę dao. Tama dagego augwali dali dwagi yai homu mu elama, augwali godolo mu yao. Tama dagego duga abagi dabe augwali dali deli homu elama bidao.
1TH 5:14 Dago abagi dage tuni bidi dabebolo dago po bomo elama dage dali obao. Dagego te sę hagela ebo bidi dabe augwalibolo po bomo elama, augwali homu kolesaga dagego bugagia ma dodolao. Tama te wi ebo bidi dabe augwaligo homu kolesaga dąų walao. Tama te bomo meni yai bidi dabe augwali dali dagego dwagi yai kolesaga naga eyu bidao, sębę egimio.
1TH 5:15 Gasa bidi dabe augwaligo dage dali dwai sę ebaso da, dagego augwali dali te dwai sę ebo wei ponogio. Dagego te tiwai idali weyu, bugagia tonaluao. Tigidali sogo dagego bomo elama, duga hasi augwali dali dwagi yai sę naga yao. Tama te sę tiwai tigidali bidi dali me yao.
1TH 5:16 Tama tiyu, sesemane sogo dage dwagi yai homu elama bidao,
1TH 5:17 te dagego sesemane sogo gedu haluasa po bidada peyu me, God dali po wao.
1TH 5:18 Te dage dali magi sę me ebaso da, dagego God dali buba hwi po wao. Te dage Krais Jisasde wadolama, tama God agai homugo dagego tama kolesaga emainogo tebo dao.
1TH 5:19 Dagego te Godigo Dwagi Yai Mobo Bidigo sę ebo paligio.
1TH 5:20 Bidi dabe augwaligo ‘Te God agai enabolo wali po eno dagebolo pusaibao’ obaso da, teda dagego te po olo sela sągio.
1TH 5:21 Tialima dagego te tobage po wabo tigidali bugagia osola suao. Tama dwagi yai po naga dagego dąų ola siyu,
1TH 5:22 tama dwai sę tigidali tagalama, sela sąyao.
1TH 5:23 Te God aga te dwagi yai homu nagame ebo kolesaga page bidi mu dao. Tama eno homugo te God aga digi dage doloba pai mu ilaibao, aga tiwai bidimainogo yaibao. Tama eno homugo agai dagego homu kolesaga tomode sę ebo mobo bidi me, te dagego noma bidi me, te dagego tigi me God agai bugagia tonaluaibao, tama dage dwagi yai mu bidimainogo. Tama dago Genuai Bidi Jisas Krais ma asobo sogo te dage magi dwai sę isiąwai we bidi tiwai bidaibao.
1TH 5:24 Tama te dage i wali God agai te sę dage dali mu tiwaibao. Magi baso meni. God agai te tigidali sę yaibao wali, te sę tigidali agai ebo dao.
1TH 5:25 Dago abagi dabeo, dagego God agai da tau somainogo gedu haluasa po wao.
1TH 5:26 Dagego tede bidibo Godigo we bidi dali dwagi yai homu eyu, tama augwalibolo nogo maiąo.
1TH 5:27 Ena da te Genuai Bidigo po sela pabo bidi dao. Tama tibaso, eno dage dali e po obao, eno te asęani po te tigidali abagi dabe augwali dali nedao.
1TH 5:28 Eno homugo te dago Genuai Bidi Jisas Krais agai olo tau sabo kolesaga dage dali bidaibao. Ena Pol dao.
2TH 1:1 Pol, me Sailas, Timoti, te dago te po dagebolo asęna tolobao. Dage Godigo po odama wali pabo we bidi, te dage Tesalonaika bulude bidibo we bidi dao. Dage dago Aya God me Genuai Bidi Jisas Kraisde wadolama bidibao.
2TH 1:2 Aya God dali Jisas Krais Genuai Bidi augwali sigo dage olo tau selama, tama dage haliga nagame ilama bugagia bidao, dago homugo tebo dao.
2TH 1:3 Dago abagi dabe, sesemane sogo dago Godibolo usu da weyu, dago dagede homu kone palu gedu haluasa po wabo dao. Tama dago Godibolo nage usu da po wabo si, te usu si ebo dao. Magi basowe? God agai dage tau selama, tama dagego Jisasde po konealubo kolesaga mu genuai mu yai dao, tama dage deli deligo dwagi yai homu duga abagi dabe dali ebo dao, tama dagego te kolesaga ebo mę ela pabo dao.
2TH 1:4 Tama tibaso, dago Godide dwagi yai homu ebo dao. Dagego te dwagi yai kolesaga ebo po dago odobaso, tama da gasa buluba biligi peyu, tama dago digi dagego ebo dwagi yai kolesaga te Godigo po wali pabo we bidi augwalibolo pusuyu, dago dagego nogi ugwaba sabo dao. Gasa bidi augwaligo dage dali dwai kolesaga eyu, tama augwaligo dage eleyu, tama dagebolo sęgę mabo dao, te po dago gasa we bidibolo pusubo dao. Tama dago te po wabo dao, ‘Te Tesalonaika we bidi augwaligo tigide sęgę siyu dene sobadi digi, tama augwaligo bomo elama dolaluyu, konealubo po dąų wabo dao,’ dago te po gasa we bidi dali weyu, dago dagego nogi ugwaba sabo dao.
2TH 1:5 Te dagego te ebo kolesagade God agai da hania tama ola mobao, agai dago ebo kolesaga osola subo si, tama agai dolo osola subo dao. Tama dagego te God agai we bidi tonalubo sę tobade te dene dali sęgę dali si sai. Gasa bidi dabe augwaligo dagebolo dene dali sęgę dali si mawai. Tama tibaso, God agai dage dali tama tiyu, tama dage agai we bidi hani tomode bidibo usu yaibao.
2TH 1:6 God agai dolo kolesaga e tama yaibao. Agai dage dali te dwai sę yali boi bidi dali begelama wei siyu, augwalibolo dwai sę hauwa elama, tigi dene mawaibao.
2TH 1:7 Tama agai dagego megi te tolobo sęgę sela sąnama, tama dage da dali olo bidiyu, toma tuabo sogo menama bidaibao. Agai tebo sogo Genuai Bidi Jisas aga boma pai ensel mobo bidi dabe dali dagalu tagalama, e tǫba asobo te sogo aga moni sia bogoli dali e tǫba asaibao, we bidigo bulu ulade hania sueibao, te aga asobo sogode.
2TH 1:8 Tama tiwai aselama, tama te sogo God konebo hagela yali we bidi dali, Genuai Bidi Jisasgo po wali pisąwani bidi dali augwalibolo agai dene mawaibao.
2TH 1:9 Tama te bidi dabe augwali e tama dene saibao, augwali Genuai Bidi gesabidide digibulu bidaibao, tama agai genuai ula dali bomo dali digibulu bidada peyu, bidada paibao, tama tiyu augwali mu dwai bidaibao.
2TH 1:10 Te we bidi dabe augwali te Jisas e tǫba asobo side augwali te tiwai mu hagawaibao. Tama agai e tǫba asobo sogode, agai doloba pai mu we bidi augwaligo aga nogi ugwaba mu saibao. Tama konealubo po Jisasde dąų wali we bidi, augwali noma siyu, Jisas dali dwagi yai po waibao. Tama dago Godigo po dage tomode pusulama, tama dagego konealubo po te pode dąų obaso, te dagego me augwali dali Genuai Bidigo nogi te sogo ugwaba saibao.
2TH 1:11 Te dago te Genuai Bidi aga ma asobo sogode homu eyu, tama tigidali sogo dago Godibolo gedu haluasa po dage tau somainogo wabo dao. Tama Godigo dage polobadu i walide, tama agai homugo dage aga wai puluba gagawaibao, agai te homu elama, i wai dao. Tama megi dago Godibolo usu da weyu gedu haluasa po agai dage tau siyu dage aga wai puluba mu gagawaibao. Dago Godibolo po e tama wabo dao, “God, te Tesalonaika we bidi augwaligo konealubo po nagede dąų weyu, tama augwaligo homugo haniani sę te konealubo po dąų wabo bidi dabego ebo sę tiwai yabo homu eyu, tama augwali dwagi yai we bidi nago gedude bidainogo tebo dao. Tama dago nagebolo po hanaluyu, nago augwali tau siyu, tama augwaligo te sę tigidali emainogo tama augwaligo te sę yabo homu tiwai,” dago te tobage po wabo dao.
2TH 1:12 Tama dagego te dwagi yai kolesaga ebode dago Genuai Bidi Jisasgo nogi dagego ugwaba saibao. Tama dago God dali Genuai Bidi Jisas Krais dali augwali sigo dwagi yai homu da dali eyu, da olo mu tau mabo homu kolesaga dwagi yai mu eyu, tama Jisasgo dagego nogi me ugwaba saibao.
2TH 2:1 Dago abagi dede, dago Genuai Bidi Jisas Krais aga ma asiyu, tama da aga dali deliba sisiniyu ebo, tebode megi dago dage tau sabo po elalubao.
2TH 2:2 Bomo elama, dagebolo te po obao, bidi mego dagebolo te Genuai Bidi asabo bodolu te pedalai dao te po obaso, dagego te wabo po odolama, dage polo homu hauwa eyu, dage homu sęgę egio. Bidi mego na eyu, Jisas ma asai dao po te bidigo odali bogo. Ma, bidi mego aga homugo digi te po waliwe? Ma, augwaligo, ‘Woo, Pol agai te Jisas ma asai dao po pasde asęna tolai dao, dabolo,’ tama me augwaligo waliwe?
2TH 2:3 Jisas ma asobode augwaligo geda muani po dagego odamuo. Te Jisas ma asobo sogo olo dali tama polo pedalogobeo. Te menio. Te sę pedalainogo hasia bolo bidi hauwa augwaligo dwai sę hauwa elama, tama God nogi gegeda peyu, tudiba mu muaibao. Te bomo yai po sela sąbo dwai sę ebo bidi hasia aga bolo dago gesabidiba pedalaibao. Te bidi Godigo te moni sia bulude nosali mu dola silaibao.
2TH 2:4 Tama te bidi mu dwai bidi mu dao. Tǫde we bidi augwaligo haniani naibolo lotu po wabo dao. Tama te bidi agai te nai tigidali dali boi bidi elama, tama te bidi aga God tiwai mu yaibao. Tama te bidi aga digi aga nogi ugwaba mu siyu, te tigidali lotu po wabo nai aiyaba elalu dolama, tama te bidi aga Godigo Moni Lotu Be tempel tomode bidiyu, tama agai po weyu te po waibao, “Ena digi ena God dao,” te bomo yai po sela sąbo bidi agai te po waibao.
2TH 2:5 Polobadu ena dage dali Tesalonaika bulude bidibadi yaide, eno dagebolo te sę nosali pedalaibao po wai dao.
2TH 2:6 Tama te bomo yai po sela sąbo bidi aga asobo tų palialubao. Tama te bidi aga Godigo bodolu mani sogo naga bulu ulaba hania pedalaibao, tama dagego te konebao.
2TH 2:7 Megi te bomo yai po sela sąbo kolesaga e tǫde geme dulalubo digi, aga sę ebo dao. Tama aga geme dulaluama, tama aga te tų palialuali bidi bogia soabo tonalubao.
2TH 2:8 Tama te tų palialuali bidi bogia solama, tama te sogo naga te bomo yai po sela sąbo bidi hania bulu ulaba pedalaibao. Tama Genuai Bidi Jisas nosali asama, tama agai te bidi agai po wabo mobogo ela muaibao. Tama Genuai Bidi Jisas aga bomo dali ula dali hania pedalama, asaibao. Tama agai te bomo yai ulago te bomo yai po sela sąwani bidi mu dolaibao.
2TH 2:9 Tiali goli te bidi pedalama, Jisasgo aga ela musiąbadi, te bidi agai Satango genuai bomo selama, tama agai tigidali me me bomai sę me, bidigo isiąwai sę me, bidigo noma sabo tibo sę me, te sę tigidali te bomo yai po sela sąbo bidigo te sogo yaibao.
2TH 2:10 Tama agai tigidali ili po wabo dwai kolesaga eyu, agai te hagayabo tųdu pabo bidi dabe dali tibo po waibao. Tama te bidi dabe augwaligo te Godigo mu po dago odaio homu egi sogo da, teda God agai augwali ma sigi da. Tiali goli augwaligo te Godigo mu po odobo hagela yai.
2TH 2:11 Tama tibaso, Godigo augwaligo homu pesegelaibao, tama augwaligo te tibo po wabo mu po dao omainogo yaibao.
2TH 2:12 Tama elama, Godigo mu po augwaligo homude dąų wasiąyu, tama dwai sę ebo kolesagade dwagi yai homu mu yai we bidi tigidali augwali Godigo po tųde sęgę mu saibao.
2TH 2:13 Tiali ma, eno abagi dede, megi dage te tobage we bidi menio. Genuai Bidigo dagebolo dwagi yai homu eyu, dage godolo mu ebo dao. Polobadu mu God agai dage sa muyu, dage ma saibao wai. Tama Godigo Mobo Bidi agai dage habu seliyu, ‘Godigo hani dao’ wai. God agai homugo dago Genuai Bidi Jisas Krais agai genuai ula dali bomo dali agai dage dali nosali dobawaibao. Tama te homu eyu, agai dage i wali, dago agai gesi dwagi yai po dagebolo pusali sogo. Tama dagego te mu po dao wai dao, tama God dali, dage dali sigo te tebo kolesagade Godigo dage ma sai. Tama tibaso, sesemane sogo dago gedu haluasa po weyu, dago Godibolo buba hwi weyu nage usu dao po wabo dao.
2TH 2:15 Abagi dedeo, God agai dagebolo te dwagi yai sę ebaso, dage bomo elama, dago dagebolo pusali po me, pasde asęani po me, te po tigidali mu dąų olama, tama bugagia bidao.
2TH 2:16 Te dago Aya God agai da dali dwagi yai homu eyu, da godolo mu ebo dao. Tama tiyu, agai da olo mu tau siyu, dago homu kolesaga dwagi yai eyu, sesemane sogo bidada paibao. Tama agai da olo mu tau siyu, tama Godigo da nosali bugagia bidimainogo yaibao, da tonaluyu bidibo dao. Tama dago homugo dago Aya God dali, dago Genuai Bidi Jisas Krais dali, augwali sigo dagego homu kolesaga bomo dąų walomainao, tama dage tau sao, dagego tigidali dwagi yai kolesaga eyu, tama dwagi yai po naga omainogo yao. Dago homugo tama timainogo ebao, tama tibaso dago gedu haluasa po obao.
2TH 3:1 Abagi dedeo, dago po me deli elalubuo. Te po e dao, dagego Godibolo gedu haluasa po da tau somainogo wao. Tama God agai da tau selama, tama dago Genuai Bidi Jisasgo po te tigidali buluba polo sela pelama, we bidi hauwa augwaligo te po odama, tama Genuai Bidigo nogi genuai emainao. Te pogo dage tomode sę polo yali tiwai gilama gasa bulude emainogo, dagego Godibolo po hanalu wao.
2TH 3:2 Dagego koneai, bidi hauwa augwaligo Godigo dwagi yai po odoyu, homude dąų wabeo. Tama tibaso, te tobage mu dwai sę ebo bidi dabe augwaligo da Godigo po sela pabo bidi dali dwai sę idali weyu, dagego te sęde me Godibolo gedu haluasa po wao.
2TH 3:3 Awe, we bidi mebago dwagi yai kolesaga mu ebo menio. Tialima, Genuai Bidi Jisas agai da dali dwagi yai kolesaga naga mu ebo dao. Tama tibaso, da we bidi agade homu dąų olama bidibaso, te usu yaibao. Agai dage bomo menama, tama dage tonaluyu, tama dwai haubo bidi Satan agai dage dali dwai kolesaga me egobeo.
2TH 3:4 Tama me, Genuai Bidigo da ola menama, tama dago dagede te konebao, tigidali kolesaga dago dagebolo yao te po wali, te sę dagego megi me ebo dao, tama nosali me dagego tama naga tiwai sę yaibao.
2TH 3:5 Dago homugo Genuai Bidi Jisasgo dagego homu kolesaga dodolomainogo yai. Tama agai te sę dage dali eyu, tama dagego Godigo dage dali dwagi yai homu eyu, godolo mu ebo sę page mu koneaibao. Tama agai dagego homu kolesaga dodolama, tama Krais agai moni sęgę tolaluyu, aga bomo elama dolaluali sę page dagego te me mu koneaibao. Tama koneama, dagego te sę tiwai gilama eyu bidao. Dago dage dali te homu eyu, dago Godibolo gedu haluasa po wabo dao.
2TH 3:6 Abagi dede, dago Genuai Bidi Jisas Kraisgo nogide, dago po bomo elama, dagebolo obao, dagego suali abagi agai tubo nai sabo sę ebo hagelayu, olo bidiyu, tama agai dagego dade sali po wali pisąbaso da, dagego te tobage bidi sula tagalao.
2TH 3:7 Polobadu da dage dali bidibadi, tama da olo bidai menio. Tama dagego koneai, dagego dago yali kolesaga tiwai gilama tama dagego tama tiao.
2TH 3:8 Tama da dage dali bidibadi dago dagego nogode tubo nai olo me sabe. Menio. Dago abeleyu naga yai. Dago sę bomo elama, tama siade me hulide me te sę dene hauwa mu eyu, tama dago dagebolo naga sęgę maidali weyu tiwai dao, dage habuge idali weyu.
2TH 3:9 Da da, dagego tubo nai masiąbo bidi menio. Da da, dagego po ola mabo bidi dabe dao. Tama tibaso, dago dagego nai olo sobaso, te usugi da. Tiali goli, te menio. Dago te tubo nai sabo sę ebo dagego suali. Tama dagego dago yali kolesaga wali pomainogo te sę dago yai dao.
2TH 3:10 Polobadu da dage dali bidibadi, tama dago e bomo yai po dagebolo maiyu tama wai, niwai bidi sę ebo hagelabo homu eyu sę isiąwani te bidibolo tubo nai magio.
2TH 3:11 Magi baso dago te po waliwe? Dago odali, dage tomode bidi meba tubo nai sabo sę isiąma olo bidibo po dago odalio. Augwaligo sę me ebo menio, tigidali sogo. Augwali olo biliyu, gasa we bidigo ebo sę suyu, tama augwaligo te po ola bilibo dao. Tama dago augwaligo te dwai sę ebo po odama, tama dago dagebolo te nai magio po ma obao.
2TH 3:12 Te Genuai Bidi Jisas Krais agai nogigo bomogo dago te tobage sę ebo bidi dabe augwalibolo po mobo mayu, bomo elama te po obao, augwali nagame elama, bugagia bidiyu, sę eyu, tama augwa digi nai sela tumainogo yao.
2TH 3:13 Eno abagi dede, dage dwagi yai sę ebo bage, dagego dolo dwagi yai kolesaga ebo hagela egimio.
2TH 3:14 Tama niwai bidi me deligo dago megi asęna tolali po tigidali wali pisąbaso da, te bidi dagego sulama, koneao. Tama dage te bidigo ebo kolesaga sulama, sula tagalao, digibulu bidao. Tama aga yali dwai kolesagade hale emainao, aga homu begelemainogo tama tiao.
2TH 3:15 Tiali ma, dagego homugo aga dali boi bidi yabo homu egimio. Te menio. Dagego homugo dago abagi dao te homu elama, tama dagego agabolo po mobo ola mao.
2TH 3:16 Te Genuai Bidi Jisas aga dwagi yai homu nagame ebo page bidi mu dao. Tama dago homugo sesemane sogo aga digi dage dali bidiyu, tama dage dwagi yai homu nagame emainogo yao. Tama dago homugo haniani sę dagebolo pedalubaso da, teda agai dage dwagi yai homu nagame emainogo yao.
2TH 3:17 Ena Pol ena digi eno te po dage tao olama, asębao. Te eno tigidali pas asębo silagasu, eno tama po naga asębo dao.
2TH 3:18 Eno homugo Genuai Bidi Jisas Krais agai da olo mu tau sabo dwagi yai kolesaga dage tigidali dali bidao. Te tama dao.
1TI 1:1 Ena Pol dao, ena Krais Jisasgo po sela pabo sę bidi dao. God da, te da ma dobola sabo bidi dao, tama dago suainogo dwagi yai homu eyu tonalubo bidi deli te Krais Jisas dao, tama augwali sigo enabolo te sę yao po obaso, eno te Kraisgo po sela pabo sę bidi bidibao.
1TI 1:2 Timoti, nage dali eno e po asęna tolobao. Te eno nagebolo Godigo po pusama, tama nago homu te poba begi peyu, tama nage te gesi noma bidi pedalali. Tama tiyu, tama nage eno ogwa mu tiwai dao. Tama eno homugo dago Aya God dali, dago Genuai Bidi Krais Jisas dali, augwali sigo nagebolo te olo tau sabo kolesagago dwagi yai sę eyu, tama homu dene eyu elama, tama nago homu nagamea peyu bugagia bidao.
1TI 1:3 Polobadu ena te moni tǫ Masedonia teba painogo eno nagebolo po wali, te tiwai naga megi eno nagebolo po ma obao. Nage te Efesus hanude me bidao, tama bidi meba augwalibolo te po weyu, augwaligo te we bidi dabe augwali tibo po ola mabo tagalao, te bomonama te po augwalibolo wao.
1TI 1:4 Tama wao, “Dagego te haniani olo namu po dali, te polobadu wąį dabego nogi hauwade po mibo dali, te tobage po mibo tagalao,” te po bomonama augwalibolo wao. Magi baso meni. We bidi augwaligo te po odolama, tama tede po miyu, tama augwa hasi wado po wabo dao. Tama tebogo te we bidi augwaligo Godigo sę yabo homu konebo tau sabo menio. Te dago te Godide konealubo po dąų wabo, tebogo naga dabolo Godigo sę yabo homu ola mabo dao.
1TI 1:5 Tama eno augwaligo te tobage po ola mabo tagalao wali po page e dao: augwaligo eno po wali pobaso da, teda augwaligo homu te meda meniama, tama te dwai sę me dwagi yai sę me dagalabo homu bugagia elaluama, tama augwaligo homu mu eyu, tama Kraisde konealubo po dąų mu waibao. Tama tiyu, tama te tigidali kolesagago augwaligo te gasa we bidi dali dwagi yai homu eyu godolo mu yabo homu kolesaga hodolaibao.
1TI 1:6 Bidi meba augwaligo te dwagi yai kolesaga tagalama, tama augwaligo te pabo tų me tagalama, tama augwali subigila te olo kedu meni yai po ola bilibo dao.
1TI 1:7 Augwali te Godigo bomai pode te po ola mabo tisa bidi bidabo godolo homu ebo dao. Tiali goli augwa digi augwa wabo po page me konebe, tama augwaligo bomonama tama “Awe, dago gisiga koneani, te dago ola mabo po te mu po naga dao” wali goli, augwaligo te ola mabo po page me konebeo.
1TI 1:8 Dago hania koneani, te Godigo bomai po da, te dwagi yai dao, te bomai pogo ebo sę elalubao. Dago te bomai pogo ebo sę naga eyu da, te usu mu dao.
1TI 1:9 Tiali goli te me dago konea. Godigo te bomai po mani. Te bomai po da, te doloba pai we bidi dabe augwali tonaluabo po meni. Te menio. Te bomai po te haniani dwai kolesaga ebo bagebolo wai dao. Augwaligo te bomai po ola tagalama tama te po sela sąbo bage dao. Augwaligo God tudiba muyu, dwai kolesaga ebo bidi dabe dao. Te Godigo kolesaga tagala po weyu, tama te tǫde kolesaga wali pabo we bidi dao. Meba augwaligo augwa aya ida ela mubo bage dao, meba te gasa bidi ela muyu ebo bidi dabe dao.
1TI 1:10 Te penani kolesaga ebo we bidi, te ogomani dali dwai dwai sę ebo bidi dabe, te we bidi wi sabo bidi dabe me, te tibo po wabo bage, te po tųde tibo po wabo bidi dabe me, te bomai po dabe te tobage we bidibolo muai dao. Te tobage kolesaga te Sodom de Gomora hanu side yali kolesaga tiwai dao. Me te gasa haniani dwai sę ebo bidi dabe me, te Godigo dwagi yai ola mabo po odisąbo bage, augwalibolo me te bomai pogo po elalubao.
1TI 1:11 Te dwagi yai ola mabo po da, te ula yai bomo elalubo wiegi yai bidi God agai te po pusao olama enabolo mani gesi wiegi yai po tomode elalubao.
1TI 1:12 Dago Genuai Bidi Krais Jisas agai eno sę yabo bomo mobaso, tama eno agabolo buba hwi wabo dao. Agai homu ena agaba homu kęą pai bidi bidiyu, tama agai sę yabo ena usu yaibao. Agai te homu elama, tama aga sęba ena mubaso, eno agabolo nage usu da po wabo dao.
1TI 1:13 Mu tama, polobadu eno agai nogibolo dwai posobo po wabo bidi bidai, tama eno agai po odobo we bidi dabe dali boi bidi eyu, augwalibolo dene mabo sę iduai. Tama eno aga dali hagoma eyu, aga nogi dolobo sę eyu bidai. Eno Kraisde tama dwai sę yali goli, Godigo ena homu dene eyu tau sali. Magi basowe? Eno konealubo po Kraisde dąų wasiąbaso eno bugagia konesiąma, tama eno te tiwai dwai kolesaga aga dali iduai.
1TI 1:14 Tama dago Genuai Bidigo olo tau sabo wiegi yai kolesaga umabo mu enabolo eyu, tama agai enabolo te agaba homu begi pabo bomo me, te we bidi dali dwagi yai homu eyu godolo ebo kolesaga me, te kolesaga si agai enabolo olo mani. Da Krais Jisas dali wadolobaso, tama te kolesaga si agai dabolo mani.
1TI 1:15 E konealubo po te mu po dao, tama tigidali we bidi e po odama augwaligo homugo mu dąų omainao: Krais Jisas te tǫba dulali, te tǫde dwai sę ebo we bidi dabe ma dobola sainogo asali. Awe, te mu po dao, tama te hasia polasa dwai sę yali bidi te ena digi tama e dao, eno yali dwai sę te gasa bagego dwai sę aiyaba elaluali.
1TI 1:16 Ena te hasia polasa dwai sę yali bidi te ena digi bidali goli, Jisas Krais agai ena dali homu dene eyu tau selama, tama ena ma dobola sai. Magi basowe? Te ena subo piksa noma tiwai yali. Tama nosali te gasa dwai sę ebo we bidi augwaligo te Kraisgo te dwai sę ebo bidi polo elisąbo wiegi yai kolesaga hania konemainogo eyu, agai ena dali te kolesaga naga hasia yai dao. Tama augwaligo homu aga poba begi peyu, tama bidibo ula selama, bugagia sesemane sogo bidada peyu, bidada pomainogo yaibao.
1TI 1:17 Tama tibaso, eno agai ena dali yali sęde homugo kone paluyu, tama aga genuai nogi me aga wiegi yai ula yai bomo me te si ugwaba muyu, tama eno e po obao: “Aga te Tuni Bidi tigidali sogo bidibao. Aga me isibo meni, gamonaibao. Tama bidigo aga me subo menio. Agaduba deli naga te God mu dao. Genuai nogi me bomo me te agade sesemane sogo mu bidada peyu, bidada pomainao. Mu dao,” eno te po obao.
1TI 1:18 Eno ogwa Timoti, polobadu Godigo po pusubo profet bidi dabe meba augwaligo nago nosali yabo sęde mu yabo po augwaligo dabolo pusai dao. Tama megi me eno te po wali peyu, tama eno e po nagebolo obao. Tama nage me, nago te po ma koneama, tama te pogo nage tau siyu, te nago hwįabo nai tiwai elalumainao. Tama tiyu, tama nago bomo elama, tama nago ebo sę bugagia yao, te hwįbo tiwai yao.
1TI 1:19 Tama bidiyu, tama nago te konealubo po nago homugo bugagia dąų wao, te dwai sę me isiąma, tama nago te dwai sę me dwagi yai sę me dagalabo homu bugagia elaluyu bidao. Te bidi meba augwaligo te augwa dwai sę me dwagi yai sę me dagalabo homugo augwalibolo wali po ola tagaluyu ebaso, tama augwaligo Godide konealubo po dąų wabo tagalai dao, tama augwali hobedagia dwai kolesaga daide bidibao. Te augwali te tamu ąį daidu pabo moni geba sip tiwai dao, tama tede elalubo moni masigigo te moni geba sip dolobo tiwai gilama yai dao. Augwaligo Godide konealubo po dąų wabo tagalai dao.
1TI 1:20 Te Himeneus de Aleksander, te bidi sigo te tiwai kolesaga yalio. Tama tibaso, augwali si eno te dwai haubo tobolu bidi Satango nogoba muani, agai augwalibolo sęgę mawaibao. Augwali sigo sęgę selama, tama Godigo nogide dwai posobo po wabo tagalamainogo eno tama yai dao.
1TI 2:1 Tama tibaso, nago yabo sęde, te sę nago emainogo eno nage homu hodolobo po obao. Hasia tuni po e tama. God agai tigidali we bidi tau somainogo eyu, nago te Godigo hani we bidi tigidalibolo gedu haluasa po wao, te po wao. Tama tiyu, agai augwali tau sao po hanaluyu, tama agabolo nage usu dao po me wao. Godigo te gavman tuni bidi dabe dali, te genuai gavman sę ebo bidi dabe tigidali tau somainogo eyu, dagego agabolo gedu haluasa po wao. Magi basowe? Godigo augwali tau siyu, tama augwaligo augwa te we bidi tonalubo sę bugagia eyu da, teda da we bidi tigidali da bugagia bidaibao. Gasa bidi augwaligo dabolo sęgę magobeo, tama da tigidali homu nagame wiegi yai elama Godigo homu naga wali peyu, tama gasa we bidi dali bugagia bidaibao.
1TI 2:3 Te tobage gedu haluasa po wabo kolesaga dwagi yai dao, tama tede te da ma dobola sabo bidi God aga dwagi yai homu ebo dao.
1TI 2:4 Te agai homugo te agai tigidali we bidi ma siyu, tama augwaligo aga mu po page mu konemainogo ebo dao.
1TI 2:5 Magi baso meni. Te God deli naga bidibao. Tama te God de bidi si tomode naga dolalubo bidi deli naga te elalubao, te bidi te Krais Jisas dao. Agai God dali we bidi dali deliba sisinabo bidi dao.
1TI 2:6 Agai aga bidibo ulago digi te tagaliyu, te tigidali we bidi ma abelali. Te tama tiali kolesagade Godigo aga bodolu mani sogo da ola mani, te agai tigidali we bidi ma sabo homu ebo dao.
1TI 2:7 Tama tede Godigo ena te agai po sela pabo sę bidi mubaso, tama eno agai po pusubo sę elalubao. Eno mu po naga obao, eno tibo po me wabeo, te Israel hani isiąwai bidi dabebolo po ola mabo tisa bidi agai ena nigilali, te eno augwalibolo te Godigo mu po dali te Kraisde konealubo po augwa homugo dąų wabo kolesaga me eno ola momainogo yali.
1TI 2:8 Tama eno homugo te tigidali bulu bidi dabe augwaligo gedu haluasa po omainogo homu ebao. Eno homugo augwali Godigo kolesaga naga wali pabo bidi dabe bidu, tama haliga sębę me wado po wabo tagaliyu, tama augwa nogo ugwaba siyu, te augwaligo gedu haluasa po omainogo ebo dao. Nago augwalibolo tama tiao po wao.
1TI 2:9 Eno homugo te we dabe sibigo me augwa gudubo ugwade homugo bugagia kone paliyu, augwa nogi ugwaba sabo kolesaga te ugwade elamuo, te bidigo homu hodolobo sę me elamuo. Augwaligo te tobolu nisi me te tigi me te haniani bis dabego badi, te wiegi yai kapa golgo me te moni masigigo sabo ugwago me, te augwa tigi dali tobolu nisi me au ilama elamuo.
1TI 2:10 Menio. Te we dabe sibi augwaligo te Godigo homu wali pabo homu eyu da, te augwaligo we bidi tau sabo haniani wiegi yai sę yao. Te da te augwa au ilibo nai tiwai mu dao.
1TI 2:11 Te we dabe sibi augwa digi aiyaba elaluama, tama pedauwali pania selama, tama po ola mabo bidigo wabo po sao.
1TI 2:12 Te Godigo po odobo we bidi hani tomode te eno te we me deli te po ola mabo tisa bidi ma te bidi dabego tobolu we bidimainogo me gogolobo menio. Te menio. Te we dabe sibi augwali te pedauwali pania selama, tama bidigo wabo po naga odao.
1TI 2:13 Magi baso meni. Te tiwai yai: Godigo Adam bolo hasia nigali, tama nosali agai te we Iv nigai dao.
1TI 2:14 Tama me te Adamgo tibo po homude dąų me wabe. Wego te tibo po homu dąų olama, tama agai Godigo bomai po bolali.
1TI 2:15 Tiali goli te we dabe sibigo te wai dabe ame nabo sę yaibao. Augwaligo te wai ame nabo kolesagade Godigo augwali ma dobola saibao. Tama augwaligo Godiba konealubo po sesemane sogo dąų weyu, tama we bidi dali dwagi yai homu ebo kolesaga wali peyu, tama augwali dwai sę isąbo kolesaga me wali pabo sę isąma bugagia bidiyu, tama wiegi yai homu elalubaso da, teda Godigo augwali ma dobola saibao.
1TI 3:1 E po te mu po dao: bidi me deligo te Godigo po odobo we bidi tonaluabo homu ebaso da, te bidi aga wiegi yai sę godolo ebao.
1TI 3:2 Tama nago te Godigo we bidi tonalubo bidi nigiyu tama aga e tama bidao. Aga dolo mu bidao, tama te bidi dabe augwaligo agade te dwai sę ebo me gegegobeo. Aga te we deligo bidi naga bidao. Aga homu bugagia dodolama tama dulaluao. Agai aga digi kolesaga bugagia tonaluao. Aga subigila bidibo bidi bidamuo. Te aga te Godigo po odobo gasa buludu asali we bidi agai aga beba sabo bidi bidao. Tama aga te Godigo po ola mabo sęde aga usu yao.
1TI 3:3 Aga te bomai ąį tulama te esela pabo bidi tiwai bidamuo. Agai sębę polo eyu, bidi eleyu me egobeo. Menio. Agai te bidi dabe dali imilai homu nagame yao. Agai te wąbi subigila hwįgio. Agai homu te monede kuna dąų me olamuo.
1TI 3:4 Aga bugagia kęnasa bidiyu, agai te aga digi we wai puluba bugagia tonaluyu, tama te wai dabe aga dologode bidiyu, te augwaligo agai po wali pomainogo yao.
1TI 3:5 Magi baso meni. Te bidigo aga digi aga we wai puluba bugagia tonalusiąbo bidi da, aga te Godigo po odobo we bidigo tobolu bidi bidibo te usu me egobeo.
1TI 3:6 Te tamadi gesi noma baptais tamadi sali bidi te tonalubo bidi sę munu me menamuo. Tiyu aga te hagoma ebaso tama Godigo aga dali po tų elama dene mayu, te agai Satan po tų yaligia tiwai elama sela sąwani.
1TI 3:7 Te bidigo wiegi yai nogi te Godigo po odisąwani bidi dabe augwali tomode elalubo bidi, te aga naga te tonalubo bidi sę ebo usu yaibao. Te aga nogi wiegi yai me elalusiąwani da, teda aga dwai sę eyu, tama aga hale elama, tama te Satango hagani togobo wago te aga saibao.
1TI 3:8 Te nago te Godigo po odobo we bidi tonalubo sę tau sabo bidi dabe nigiyu, augwali me e tama bidao. Te homu mu naga eyu, te wiegi yai kolesaga ebo bidi bidao. Augwali te bomai ąį tulama esela pabo bidi tiwai me elamuo. Augwali te gasa bidi dabego mone dabe anoma elama sabo homu ebo bidi bidamuo.
1TI 3:9 Te augwaligo dwai sę isiąma tama augwali homu wiegi yai elaluyu, tama augwaligo te polobadu geme dualali po, te Godigo Kraisde dabolo waselali konealuabo po homugo dąų olama bidao.
1TI 3:10 Te hasia dagego augwaligo ebo kolesaga usu sao. Tama augwaligo kolesaga dolasa elama tama po meni baso da, teda augwali te tau sabo sęba muao.
1TI 3:11 Tama te bidi dabe augwaligo we dabe, te we dabe te wiegi yai kolesaga ebo we bidao. Augwali te posobo po wabo we dabe bidamuo. Te augwaligo augwa homu bugagia dodolama tama bidao. Sesemane sogo te augwaligo wiegi yai dolo kolesaga naga yao.
1TI 3:12 Te tau sabo bidigo we te deli digi naga selama bidao. Agai te aga we wai bugagia tonaluao.
1TI 3:13 Te bidi dabe augwali te Godigo po odobo we bidi tau sabo sę bidi bidiyu tama wiegi yai sę eyu da, teda we bidi gedude augwali nogi wiegi yai elaluaibao. Tama augwaligo te Krais Jisasde konealubo po bomo elama pusubo usu yaibao.
1TI 3:14 Eno homugo ena nage bidibo madi tamadi asaibao. Tiali goli megi eno e pas nagebolo asęna tolobao.
1TI 3:15 Magi baso meni, ena polo sabalisiąbaso da, teda nago e pas selama tama nedama, tama nago nage Godigo hanide bugagia bidabo kolesaga po tede koneagameo. Te God aga da te bidibo ula elalubo God dao. Te agai po odobo we bidi hani augwali da te Godigo be tiwai we bidi dao. Tama augwali te Godigo mu po tolalubo te bomai ni pos dali kau ni me tiwai elalubo dao.
1TI 3:16 Awe, mu tama, te polobadu geme dualali po, te Godigo dabolo waselali konealuabo po page te genuai mu elalubo, tama bidigo te pode te po mu menio wabo te usu me egobeo. Te konealuabo po e dao: Aga te tigi elalubo bidi mu pedalali, tama hania hanilai. Tedali Mobo Bidigo we bidibolo ola mani, te bidi aga dolo mu yali. Te dagalude mobo bidi ensel dabego aga suai. Tama po pusubo bidi augwaligo agade po te tigidali we bidi hanibolo pusigi pali. Te tǫde bidi dabe augwaligo konealubo po agade dąų wai. Te Godigo aga dagaluba odasa holama, tama megi aga bomo dali, genuai nogi dali selama bidibo dao.
1TI 4:1 Godigo Tedali Mobo Bidigo hanilama te po wai: nosali sogo bidi meba augwaligo te Kraisde konealubo po tagalaibao wali. Te augwaligo te tibo po wabo dwai haubo noma bidi dabego ola mabo po odama, tama augwaligo te dwai haubo noma bidigo po wali paibao.
1TI 4:2 Bidi meba augwaligo dwai sę dali dwagi yai sę dagalabo homu te isali tiwai dao. Tama tibaso augwaligo augwa ebo sę dagalisiąyu tama augwali tibo po wabo bage dao. Tama “Eno mu po naga obao,” wai goli, augwaligo te dwai haubo noma bidi dabego tibo po naga ola mabo dao.
1TI 4:3 Tama tiyu, augwaligo e tiwai po ola mabo dao, “Dagego te we sabo sę elamuo, te sę habu selai sę dao,” te po augwaligo ola mabo dao. Tama me augwaligo haniani tubo nai me badu habu selebo dao. Tiali goli Godigo te nai dabe nigali te da bidigo konealubo po dąų weyu tama agai mu po koneani we bidi, dago te nai dabe selama tuyu, tama Godibolo gedu haluasa po weyu ‘Nage usu da’ omainogo yai.
1TI 4:4 Magi baso meni. Dago koneani, te Godigo nigali nai tigidali, te wiegi yai naga yai. Tiyu dago sąyabuo. Dago Godibolo usu da weyu gedu haluasa po olama sao.
1TI 4:5 Te Godigo te naide polobadu wali po dali, te dago gedu haluasa po wabo po dali, te po sigo te nai wiegi yai ilama pedalubo dao. Tama tibaso, te nai dago tuagameo, po meni.
1TI 4:6 Nago te eno megi asęani po te dago ama dedebolo mobaso da, teda nage te Jisasgo wiegi yai sę bidi bidaibao. Tama tiyu, te konealubo pode me, te nago wali pabo tigidali wiegi yai kolesaga ola mabo po me, te po side nago genuai bomo bugagia sidu bideibao.
1TI 4:7 Tiali goli te haniani olo namu po dali, te haniani kedu meni yai po dali, te tobage po mibo te nago odogio, te tudiba muao. Te tobage olo po dago God bugagia koneabo tau sabo po menio. Bomo elama, nago naga digi te Godigo kolesaga wali pabo sę ola mayu bidao.
1TI 4:8 Nago koneani, te dago tigigo sę ebogo te tigibolo bomo mobaso, tebogo da tau sabo dwasianu usu ebo dao. Tiali goli Godigo kolesaga wali pabogo te da tau sabo te hauwa mu ebo dao. Te sę ebogo da megi te bugagia bidibo ula mabo dao, te nosali bidabo ula tau sabo me te usu yaibao.
1TI 4:9 Te po mu tama wali, tama te po tigidali bidigo odama, tama augwaligo homu te poba begi pobaso, te usu yaibao.
1TI 4:10 Tama da Godigo kolesaga wali pabo, tebogo da megi me, nosali me tau sabo usu baso, dago bomo eyu sę dene mu ebo dao. God da, te tigidali we bidi ma sabo bidi da, tama agai te Kraisde konealubo po augwa homugo dąų wali we bidi da mu ma dobola sabo bidi dao. Tama tibaso, dago te bidibo ula elalubo Godiba homu begi pelama, tama agai da somainogo dago aga tonalubo dao.
1TI 4:11 Nago bomonama te po te Godigo we bidi augwalibolo pusao, tama augwaligo wali pomainogo ola mao.
1TI 4:12 Augwaligo suali, nage gesi bidi homu ebo, tiali goli augwaligo homugo nage te olo bidi yali homu ebo gogologio. Menio. Nage te polalubo bidi bidao. Tama tiyu, tama nago po wabo kolesaga me, te bilibo me, tama nago we bidi dali dwagi yai homu eyu godolo ebo kolesaga me, te nago Godiba homu begi pabo kolesaga badi, tama te magi dwai sę isiąwai wiegi yai kolesaga nago ebo augwaligo suyu, tama augwaligo homu Godiba begi pabo we bidi augwaligo nage wali asaibao.
1TI 4:13 Ena nago bidibo digi nosali asaibao. Te sogo nago ena tonaludu digi, nago te Godigo bukude asęani po aga hani we bidibolo nedebo sę yao. Tama augwalibolo Godigo po pusuyu tama ola mayu bidaluao.
1TI 4:14 Polobadu te Godigo po pusubo bidi augwaligo nago nosali yabo sęde mu yabo po weyu, tama te monu dabe tobolu bidi augwaligo augwa nogo nago toboluba muani. Tama te sogo Godigo nago sę yabo bomo dali, homu kolesaga dali nagebolo olo manio. Te mani nai tagaligio. Te mani bomogo me, te homu kolesagago me nago naga sę yao.
1TI 4:15 Tigidali bidigo nago ebo te pua pai holobo ni tiwai sę sumainogo eyu, tama sesemane sogo nago te Godigo we bidi tonalubo sę bomo elama bugagia yao.
1TI 4:16 Tama naga digi ebo kolesaga me, te we bidi ola mabo sę te bugagia tonaluao. Tama tiduao. Nago tama tiyu da, teda naga sęgo digi nage dali nago po odobo we bidi dali ma dobola saibao.
1TI 5:1 Te Godigo po odobo we bidi hani tomode te monu dabe tobolu bidi me deligo dwai sę eyu da, nago aga te dwai sęde ma dodoloyu tama nago agabolo sesena pai po me olamuo. Menio. Nago po nagame elama dua digi dodolao, te naga aya monu dodolobo tiwai gilama yao. Tama nago te gesi ogwa bidi dabe dodoloyu, te naga ama dodolobo tiwai gilama yao.
1TI 5:2 Tama nago te mosi dabe dodoloyu, te naga ida mosi dabe dodolubo tiwai gilama yao. Tama nago te gesi we dabe dodoloyu, te naga abe dodolubo tiwai eyu, te wiegi yai dolo homu naga ebadi augwali dodolao. Mena bidi nago dwai sęde dodolabo homu ebo bidi, nago sesena pai homu eyu dodologio.
1TI 5:3 Te we me deli aga bidi isai digi, tama we agaduba mu bidibaso da, teda nago te Godigo po odobo we bidi augwaligo te we tama bidibo koneama tama augwaligo augwa mone gego te we tau sao po wao.
1TI 5:4 Tiali goli te bidi isai we me deligo te aga wai genuai yai me, ma aga waigo wai te genuai yai elalubaso da, teda augwaligo bugagia koneao: te augwaligo polasa yabo sę te augwaligo Godigo po wali peyu, tama augwa hani we bidi bugagia tonaluyu, tama augwali polobadu dwasianude aya idago bugagia tonaluali tobage kolesaga wei ponoyu tonaluao. Awe, Godigo te kolesaga godolo mu ebo dao.
1TI 5:5 Tama we aga bidi isai madi, tama we agaduba mu bidiyu aga tau sabo bidi meni baso da, teda te wego te tiwai kolesaga ebo dao: agai Godiba tialuyu, tama Godigo aga tau somainogo eyu giligade me hulide me te agai Godiba gedu haluasa po weyu ena tau sao wabo dao.
1TI 5:6 Tiali goli gasa we me, te aga bidi isai madi, tama te wego te tigigo ebo kolesaga naga wali pabo homu eyu, tama dwai kolesaga ebaso da, teda aga tigi bididubadi goli aga bidibo noma te Godigo gedude isai dao.
1TI 5:7 Nago bomonama te eno tamadi wali po te Godigo po odobo we bidi augwalibolo pusao. Awe, augwaligo tama temainao, magi baso meni, augwali te gasa we bidigo gedude augwaligo dwai kolesaga elalugobeo. Tiyu gasa bagego po augwali dali elalugobeo.
1TI 5:8 Eno te po magi baso obawe? Te bidigo aga deli hani dabe me, ma aga kaneme deli hani digi te bugagia tonalusiąwani da, teda te bidigo aga Godide konealubo po te tudiba munama tama agai ebo kolesaga te dwai mu elama, tama tebogo te Godigo po odisąwai bidi dabego ebo dwai kolesaga te aiyaba elaluaibao. Te Godigo po odisąwai bidigo augwa digi te tiwai dwai kolesaga me ebeo. Menio! Augwaligo te augwa bidi isai we dabe, te augwaligo bugagia tonaluyu tau sabo dao.
1TI 5:9 Te augwali tau sabo hani bage meni yai wilawe we elalubaso da, te Godigo po odobo we bidi hani augwaligo augwa mone gego te tobage wilawe we tau somainogo eyu, augwaligo nogi te bukude dago asębo dao. Te bukude nogi elalubo wilawe we dabe naga augwaligo te tau sabo mone sabo dao. Tama nago te bidi isai we dabe nogi te bukude olo asęgio. Menio. Te bidi isai we aga kibu be bidi sese sela wali, te tobage bidi isali we aga bidi deli naga dali bidali mosi we elalubaso da, teda aga nogi naga nago asęąo.
1TI 5:10 Tama e tobage haniani wiegi yai sę yai nogi elalubo we tiwai: agai te aga wai puluba bugagia tonaluali. Tama agai te gasa bulu we bidi augwali te agai beba asobode nai mayu yali. Tama imilai homu eyu, agai te Godigo po odobo we bidi tau siyu sągą we tedabo sę yai dao. Tama agai te sęgę dali dene dali sali we bidi dabe tau siyu yai. Tama te wilawe we aga te tobage haniani we bidi tau sabo dwagi yai sę ebo kolesaga wali pabo we bidali da, teda nago te tobage we dabe augwali naga nogi te bukude asęąo.
1TI 5:11 Tiali goli nago te augwa bidi dabe isai, te gesi we dabe augwali nogi asęnamuo. Menio! Te augwaligo homu hodolama tama te bidi dali ma pabo homu ebo si, te augwaligo Krais te tudiba muaibao. Tama tiyu, tama augwaligo agai sęde te hasia dąų wali po augwaligo togolama, tama tede sęgę saibao.
1TI 5:13 Tama gasa dwai kolesaga me augwaligo koneaibao. Augwaligo sę isąyu tama augwali tigidali we bidigo beba olo pabo kolesaga saibao. Te kolesaga naga egobeo, te gasa dwai kolesaga me yaibao. Augwaligo te gasa we bidi dabe augwaligo po anoma elama tama po sabilibo sę eyu, tama augwalibolo posobo po weyu yaibao. Te po augwaligo tedela paibao, haniani beba. Tama tiyu, tama augwaligo me te hogwa sa wali po togolama, tama augwaligo gasa we bidibolo subigila pusaibao.
1TI 5:14 Tama tibaso, augwaligo tama idali weyu, eno homugo Timoti nago te bidi isai gesi we dabe te augwali bidigo ma sao po wao, tama wai ame nobaso, te augwa hani tonalubo sę yao. Te augwaligo tama tiyu da, teda, te da dali te dwai po wabo boi bidigo tų gegabo usu meni yaibao.
1TI 5:15 Eno tama tiwai po te gesi we dabede wali, magi baso meni, te we dabe mebago te Kraisgo sęde dąų wali po te tagalama, tama augwaligo te Satan wali pabo gagalai dao.
1TI 5:16 Te Kraisde konealubo po dąų wali we me deli te aga hani tomode te aga bidi dabe isai we dabe meba elalubaso da, teda te we aga digi te bidi isai we dabe tonaluyu tau sao. Te tau sabo sę te Godigo po odobo we bidi hanibolo te wego munamuo. Meni. Augwaligo te agaduba deli mu bidibo wilawe we dabe, te augwali tau sabo bage meni yai we dabe, augwaligo te tobage we dabe tau siyu tonalumainao.
1TI 5:17 Te Godigo po odobo we bidi hani tonalubo monu dabe, augwaligo te sę bugagia eyu da, teda te hanigo augwaligo nogi ugwaba siyu, tama augwalibolo te augwaligo sabo pe mone mayu, tama meba ugwadu manuma mao. Te tonalubo bidi dabe tomode te bidi dabe meba augwaligo te sę eyu, tama augwaligo me te Godigo po pusuyu tama te we bidi dabebolo ola mabo sę bugagia eyu te sę dene yali, te tobolu bidi dabe augwalibolo te manani masigi polasa mao.
1TI 5:18 Magi baso meni. Te Godigo po bukude te Mosesgo polobadu e po asęani, “Te nai wit ge bo sela somainu te nago bulmakau agai sę eyu tama te ge dabe sągągo agabadi, nago aga gani te bonogo dąų wagio, aga te ge meba tumainao,” te po asęani. Te tobage po me elalubao, “Te sę bidigo aga mone sabo usu dao,” te po wai dao.
1TI 5:19 Tama bidi me deligo naga te po waibao, “Te Godigo po odobo we bidi tonalubo bidigo dwai sę yali” po obaso da, teda nago te po odogio. Tiali goli bidi sigo ma selago te po obaso da, teda nago odao, te bidi osola suao.
1TI 5:20 Tama tiyu, tobolu bidi dabe mebago te dwai sę yaibaso da, teda nago te Godigo po odobo we bidi augwali tigidali gedude te dwai sę yali bidibolo “Nago te dwai sę yalio, te kolesaga tagalama, tama Godigo po wali pabo ma gagalao,” te po wao. Augwaligo gedude tama eyu da, tama gasa tobolu bidi dabe augwali me te tiwai dwai sę ebo wi elama tagalumainao.
1TI 5:21 Te God me, Krais Jisas me, te Godigo dią sali ensel mobo bidi dabe, te augwaligo gesabidide eno nagebolo dolo mu obao, te eno megi tama nagebolo asęani ola mabo po nago bugagia wali pao. Tama tiyu, tama nago te tobolu bidi dabego yali sę osola subadi, nago te bidi me delide wei ebo abagi homu eyu, tama gasa bidi me delide dwai homu eyu munu te tiwai elamu dao. Te bidi dabe osola subo sę te nago dolo mu naga yao.
1TI 5:22 Tama me nago te bidi me deli polo selama, tama aga bugagia osola susiąbadi, tama nago nogo aga toboluba muyu, tama aga te Godigo we bidi tonaluabo tobolu bidi nigilamuo. Magi baso meni. Te nago aga polo te tobolu bidi nigilama tama agai dwai sę eyu da, teda nago aga te dwai sę ebo tau sali tiwai waibao. Tama idali weyu, dua dao. Nago te naga digi bugagia tonaluyu, tama dwai sę me deli isiąwai bidi bidao.
1TI 5:23 Timoti, nago te olo wę naga tubo kolesaga tagalao. Tama te hauwa sogo te tigi bomo silabo gasi nageba pedaliyu ebo, tama te gasi sela sąwainogo da, teda nago te naga tabi tau sainogo te nago dwasianu wain wę dali tuao.
1TI 5:24 Te Godigo po odobo we bidi hani tobolu bidi nigilibo sęde eno e po me nagebolo obao. Nago te bidi dabe hasia osola subadi, e po ma koneao. Te bidi mebago dwai sę dabe hanilama hania mu elaluyu, tama augwali te po tų yabo madi poligi pobaso, tama dago augwali polo dagalama koneani. Tiali goli bidi mebago dwai sę geme dualaluama, tama nosali naga hania hanilama pedalubo dago subo dao.
1TI 5:25 Te wiegi yai kolesaga me te tiwai naga dao. Te wiegi yai kolesaga dabe me te hania elalubo dago subo dao. Tama meba dwagi yai kolesaga te we bidi dabego ebo te hania polo me pedalisiąyu yali goli, te me sesemane sogo geme me dualalugobeo. Menio! Nosali dago te me koneaibao.
1TI 6:1 Te nago bidibo digi Efesusde bidibo Godigo po odobo we bidi augwali meba te masigi sisąbo olo sę ebo we bidi dabe dao. Augwaligo augwa genuai bidigo sę eyu augwaligo tama tiwai homu yao, “Te ena genuai bidi aga te wiegi yai bidi, tama eno aga nogi ugwaba sabo te usu dao. Agai te sę yao wabo po eno odaibao,” augwaligo te homu yao po wao. Tama te sę we bidi dabego te tiwai homu kolesaga eyu da, teda te genuai tonalubo bidi dabego te Godigo nogide me te Godigo po me te si dali dwai posobo po wabo kolesaga me egobeo.
1TI 6:2 Me ma, te olo sę ebo bagego genuai bidi aga te Godigo po odobo bidi bidiyu da, teda te sę ebo bidi dabego te homu me ilamuo, “Te genuai bidi aga Kraisba homu begi pai bidi bidibaso, aga da te eno ama tiwai dao. Tama tibaso, ena dali eno sę tonalubo genuai bidi dali, te da si Godigo gedude tiwai si dao. Tama tibaso, eno agai po odogobeo, te tigi dene sę egobeo.” Te homu augwaligo ilamuo. Menio. Augwaligo tama homu yao: “Eno bomo elama eno genuai bidigo sę bugagia mu eyu, tama eno te tiwai aga tau saibao. Magi baso meni. Eno genuai bidi aga te Kraisba homu begi pai bidi, tama eno aga dali dwagi yai homu eyu godolo ebao.” Te sę ebo bage augwaligo te homu yao wao. Te sesemane sogo nago te we bidi augwalibolo te tiwai kolesaga eno nagebolo wali po tiwai gilama te we bidi ola madubadi geao, tama augwaligo homu hodolama wali pomainao.
1TI 6:3 Tiali goli bidi mebago te po wali pisąma tama augwaligo bidi dabe gasa po ola mabo dao. Te gasa po te dago Genuai Bidi Jisas Kraisgo doloba pai po dali tiwai si isiąwai po dao. Tama te gasa po te dago te Godigo kolesaga wali pabo ola mabo po dali tiwai si isiąwai po dao.
1TI 6:4 Te gasa po ola mabo bidi agai te hagoma genuai eyu, te agai Godigo kolesaga dwasianunu me konebeo. Menio. Agai homu kolesaga gasi tiwai ebaso, tama agai te bidi dabe dali konila po wabo kolesaga godolo ebo dao. Tama subigila te dwasianu po pagede te po si wado po wabo ebo tiwai kolesaga me agai godolo ebo dao. Te tobage konila po wabode te tiwai kolesaga pedaludu gebo dao: augwaligo dwai homu gasa bidi dabe dali eyu, tama augwaligo augwa hasi konila po weyu, tama posobo po wabo, tama augwaligo te homu ebo dao, ‘Te gasa bidigo dwai sę yabo homu ebao.’
1TI 6:5 Tama sesemane sogo augwaligo wado po subigila weyu ebo dao. Te tobage bidi dabe augwali te gagea pai homu ebo bidi pedalama, tama augwaligo te mu po te augwa homude dąų wabo tagalai dao. Augwaligo homugo te Godigo kolesaga wali pabo te bisnis ebo sunumi augwaliba bugagia pedalama, tama mone hauwa siyu, tama walu hauwa sabo mone bidi pedalaibao homu ebo dao.
1TI 6:6 Mu tama, te bidigo Godigo kolesaga wali peyu, tama aga homude te tigidali nai te aga usu yali da homu ebaso da, teda aga te wiegi yai doado bage hauwa elalubo bidi tiwai yaibao.
1TI 6:7 Dago koneani, te idago da ame nenama tama da tǫde pedalali, te sogo dago magi nai me deli sela asobeo. Menio. Te da olo naga asai. Tama nosali sogo da isibo sogo tama te tǫ tagalobode te dago magi nai me deli te dago isibo noma bidigo me sela pogobeo. Menio!
1TI 6:8 Tama tibaso, dago tubo nai me ugwa me elalubaso da, teda dago dwagi yai homu pemene idu te homu yao, “Te naigo ena usu ilali. Ena dwagi yai homu pemene ebo dao,” te homu yao.
1TI 6:9 Tiali goli te doado bage hauwa saio homu ebo bidi dabe augwali te buside bidibo uni kibu dabego te nai tugi painogo te denami odobo tiwai ebo dao. Tiali goli te kibu aga te dedagede tulaluyu isabo homu me konegobeo. Te moneba homu konebo bidi dabego homu te tiwai ebo dao. Te augwa homu te moneba dąų olama, tama augwaligo te haniani dwai kolesaga wali peyu, tama te homu kolesaga meni yai bidi tiwai bilibadi, te augwa digi dene mabo kolesagago augwali dąų wabo dao. Tama tiyu augwa digi dolama, tama augwali dwai mu hobedagia bidaibao.
1TI 6:10 Magi baso meni, te mone godolo homu ebo kolesaga te tigidali haniani dwai kolesaga page mu elalubao. Te bidi meba augwaligo te bomo elama te mone godolo ebaso, tama te kolesagago augwali kegelama tama augwaligo te Kraisde konealubo po tagalai digi, tama augwa yali dwai sę hauwago te augwali homude enani tama genuai dene mu tolali.
1TI 6:11 Te bidi dabe meba augwaligo te doado bage hauwa saio homu ebaso tama tiwai dolaibao. Tiali goli Timoti, nage da te Godigo bidi da olama, tama nago te tobage dwai sę ebo kolesagaba tudi ola mao. Me ma, nago te bomo elama te doloba pai kolesaga badi, te Godigo godolo mu ebo kolesaga me, te Kraisde konealubo po dąų mu wabo kolesaga me, tama te gasa ama dabe godolo ebo kolesaga dolo wali pao. Tama te bomo elama dolaluyu, tama te boi bidi dabego mabo sęgę tigidali bugagia tolobo kolesaga me, tama augwali dali nagame elama bidibo kolesaga yao.
1TI 6:12 Te Kraisde konealubo po dąų wabo bidi te ususu si yainogo udabo tiwai sę elalubao. Tama tibaso, nago te sesemane sogo bugagia bidada peyu, bidada pabo ula somainogo te sę bomo elama yao. Magi baso meni, polobadu nago te we bidi hauwago gedu tomode te “Ena Kraisde konealubo po dąų wai dao,” te dwagi yai po nago augwalibolo pusali sogo te Godigo nage sa muyu te bidibo ula saibao wali.
1TI 6:13 Te God da te tigidali nai bidibo ula menama tonalubo bidi dao. Tama Krais Jisas aga te gavman tuni bidi Pontius Pailat gedude te dolo po naga weyu, aga digi aga te Godigo we bidi tau somainogo tagala palali bidi Krais dao po wai. Tama te God badi, te Krais Jisas dali sigo gedude te tiwai po bomo elama nagebolo eno megi obao:
1TI 6:14 nago te Godigo po bugagia tonaluao. Nago te gasa bagego te Godigo pode dolobo po wabo gogologio. Te nago bugagia tonaluali da, teda te pode dwai po wainogo yabo te usu meni yaibao. Nago tama tonalua pidubadi te dago Genuai Bidi Jisas Krais te ma asobo sogoba usu nagasu tama Krais aga hanilama hania pedalaibao.
1TI 6:15 Aga ma asobo sogo te Godigo aga digi sa muani bodolu sogo elalubo, te sogo te dolo sogo mu naga yaibao. God naga te dwagi yai homu pemene ebo page bidi, tama agaduba deligo naga tigidali sę yabo bomo elalubao. Agai te tǫde tuni bidi dabego Tuni Bidi, tama aga te genuai bidi dabego Genuai Bidi dao.
1TI 6:16 Agaduba deli naga te munu me isisąbo ula page elalubo bidi dao. Aga te genuai nanobo ula tomode mu bidibo, tama da aga pąba pabo te usu me egobeo. Te bidi me deligo aga munu me sube, tama aga me subo usu egobeo. Genuai nogi mu me, bomo me te agade sesemane sogo bidada peyu, bidada paibao. Mu dao.
1TI 6:17 Timoti, nago te tǫde doado bage hauwa elalubo bidi dabebolo e po bomo elama wao: “Dagego te gasa bidi dabe dali hagoma me elamuo, tama dagego te tiwai homu me egio, ‘Eno doado bage hauwa elalubaso, te bugagia bidaibao.’ Dagego te homu me egio. Menio. Dagego dąų wabo homugo te nai dabego augwali tau siyu bugagia bidaiba homu elamuo. Magi baso meni, te tǫde nai augwaligo da tigidali sogo tau sabo usu menio. Tama dagego e homu yao, ‘Eno Godiba konealubo po dąų mu olama, tama agai ena tau siyu, ena bugagia bidaibao,’ dagego te homu yao. Te dago homu dwagi yai pemene emainogo eyu, tama God aga digi te haniani dwagi yai nai te dabolo olo mu mabo dao.” Te doado bage hauwa elalubo we bidibolo te po pusao.
1TI 6:18 Nago te augwalibolo te po weyu, tama e po me wao, “Dagego te we bidi tau sabo dwagi yai kolesaga haniani yao, dwagi yai sę umabo yao, te sesemane sogo dagego doado bage te gasa bidi dabebolo olo mayu, tama te nai dobabo bidi kolesaga bugagia yao,” te po bomo elama augwalibolo wao.
1TI 6:19 Te augwaligo tama tiyu da, teda augwaligo te augwa nosali Godigo bulude te augwali tau sabo bomo hauwa tede elaluaibao. Tama tiyu da, te augwaligo sabo bidibo ula augwali te wiegi yai mu bidibo ula sabo usu mu yaibao.
1TI 6:20 Timoti, Godigo agai po nagebolo mani. Nago te po bugagia tonaluao. Bidi dabe mebago te Godigo kolesaga wali pisąbo olo po dabe wabo dao. Augwaligo homugo augwa wabo po te koneai kolesaga po mu dao. Tiali goli meni, augwaligo wabo po te page meni yai konila ebo po naga dao. Nago te tobage po dabe tudiba muao.
1TI 6:21 Magi baso meni, bidi meba augwaligo te po wai, “Dago te mu koneanio,” te po wali. Tiali goli augwali geda muyu, tama augwaligo te Kraisde konealubo po dąų wabo tagalama tama bidibao. Te tama dao. Te Godigo olo mu tau sabo wiegi yai kolesaga te dage dali bidao.
2TI 1:1 Ena Pol dao, ena Krais Jisasgo po sela pabo sę bidi dao. God aga homugo digi ena te sęba muani. Da te Krais Jisas dali wadolobaso da, teda Godigo te bidibo ula dabolo mawaibao. Agai te ula mabo po mu dąų walali. Tama agai ena te po we bidibolo pusigi pomainogo agai ena tagala palai dao.
2TI 1:2 Timoti, eno nage dali dwagi yai homu eyu godolo ebo dao, nage eno ogwa mu tiwai dao, tama eno e pas nagebolo asęna tolobao. Eno homugo God Aya dali, dago Genuai Bidi Krais Jisas dali sigo, te olo tau sabo wiegi yai kolesagago te nage homu dene eyu tau selama, tama nago homu dua nagame ilama bidimainao.
2TI 1:3 Te eno wąį dabego Godigo kolesaga wali pali, te tiwai naga gilama eno me wali pobao. Tama eno te dwai sę dali dwagi yai sę dali dagalabo homugo kone paluyu, eno te ebo kolesaga te dolo mu ebo homu ebao. Tama eno gedu haluasa po wabo, te eno hulide me giligade me obao, sesemane sogo te eno nage homugo koneama te Godibolo buba hwi weyu, te nage usu da po agabolo wabo dao.
2TI 1:4 Te eno nage Efesus bulude tagalali sogo te nago homu dene ebaso nago gedude ąį gelali. Tama tede eno homu ebaso, tama eno homugo eno dwagi yai homu pemene yainogo eyu, eno nage suabo homu godolo mu ebao.
2TI 1:5 Eno te nago Kraisde konealubo po naga homugo dąų mu wali kolesagaba homu kone palama, te nago te tibo menio. Te tobage konealubo po tiwai hasia te naga auwa mosi Loisgo me, te naga ida Yunisgo konealubo po dąų wabo kolesaga me te tiwai elaluai. Tama eno mu koneani, homu si meni, te tiwai konealubo po te nagede me elalubo dao.
2TI 1:6 Tama tibaso eno nago homu hodolabo po megi nagebolo obao. Te Godigo nagebolo te nago yabo sę me, te sę yabo bomo dali, homu kolesaga dali si te nagebolo olo mawai dao. Tama te nagebolo mani nai te nago homugo kone palao. Polobadu eno nogo nago toboluba mubaso tama nago te nai sai. Megi nago te sali nai ma hodolobo sę yao, te bidigo sia bogoli genuai emainu ponobo tiwai ilao.
2TI 1:7 Magi baso meni, te Godigo da te wi ebo bage bidimainu aga Mobo Bidi dabolo me mabeo. Menio. Agai Mobo Bidigo dabolo te bomo hauwa me, te dena ama dede dali dwagi yai homu eyu godolo ebo kolesaga me, te dena digi bugagia tonaluabo bomo me, te dabolo momainogo eyu, Godigo aga Mobo Bidi dabolo mani.
2TI 1:8 Tama tibaso, nago te dago Genuai Bidi Jisas da, te Godigo sa muani te we bidi tau somainogo tagala palali bidi Krais dao, te po te we bidibolo pusubo te hale me egio. Tama eno te po we bidi meba augwalibolo pusubaso, augwaligo ena kalabusiba muani. Tiali goli nago enade me hale me elamuo. Menio. Nago bomo te Godide selama, tama ena dali te Kraisde wiegi yai gesi po pusubo sęde sęgę tolao.
2TI 1:9 Godigo da ma dobola selama, tama da aga we bidi mu bidimainu agai da i wali. Agai te dago dwagi yai kolesaga ebaso, te homu elama tama i me wabeo. Menio. Te aga homugo digi te agai da olo mu tau sabo dwagi yai kolesaga elama tama da i wali. Polobadu mu, Godigo te tǫ dali dagalu dali nigisiąbadi, tama te Krais Jisasgo yabo sęde koneama agai te olo mu tau sabo wiegi yai kolesaga dabolo mawai dao.
2TI 1:10 Tama megi e sogo Krais Jisas, te da ma sali bidi, aga te hanilama pedalalio. Tama tedu te Godigo olo mu tau sabo wiegi yai kolesaga te hania pedalali. Krais Jisasgo te isibo kolesagago bomo togolama, tama te agai ola mani gesi wiegi yai pogo te dwagi yai bidibo ula dali, te dolosiąbo gamonabo kolesaga dali te si pedalama, tama te ulaba munama elalubao.
2TI 1:11 Godigo te wiegi yai gesi po pusubo sęba ena mubaso, tama ena te po pusubo bidi bidiyu, tama ena te Godigo sęba tagala palali sę ebo po ola mabo tisa bidi dao.
2TI 1:12 Tama tiyu, ena kalabus bidi megi bidiyu, tama te sęgę eno tolobao. Tiali goli, ena tede hale me egobeo. Menio. Ena da, te eno Godiba homu tia pai bidi da weyu, te aga eno konebaso hale egobeo. Tama eno koneani, agai ena nogoba te muani sę te agai mu tonaluyu, tama te sesemane sogo bugagia bidada peyu, te genuai bodolu pedalubo sogoba usu nigi pabo aga usu yaibao, te sę hagagobeo.
2TI 1:13 Te doloba pai tau sabo po nago eno pedauwalide odali. Te odali po te usu ni tiwai elaluyu, tama te po bugagia wali pao. Tama tiyu, nago konealubo po Krais Jisasba bomo elama dąų weyu, tama aga dali wadolama, tama God dali, we bidi dali dwagi yai homu eyu godolo mu eyu bidao.
2TI 1:14 Nago te Godigo nagebolo mani dwagi yai po te nago bugagia tonaluao. Tama Godigo Tedali Mobo Bidi te da tomode bidiyu, agai nage te sęde tau saibao.
2TI 1:15 Timoti, nago koneani, te Esia genuai tǫde bidibo Godigo po odobo bidi augwali tigidaligo ena tagalai dao. Te augwali tomode te bidi si Figelus me Hermogenes si dali, te augwaligo me ena tagalai dao.
2TI 1:16 Eno homugo te Genuai Bidi Godigo te bidi Onesiforus aga we wai puluba dali homu dene eyu tau sao. Te hauwa sogo Onesiforusgo eno homu dwagi yai bugagia ilai. Tama aga ena kalabus yalide hale me ebeo. Menio.
2TI 1:17 Aga te e moni hanu Romba asama, tama ena gegagasobo sę dene iduama, tama nosali agai ena sualio.
2TI 1:18 Te genuai po tų yabo sogode eno homugo te Genuai Bidigo Onesiforus homu dene eyu tau sao. Tama te bidi agai ena te Efesus bulude hauwa sogo tau sali, te naga digi bugagia naga koneai dao.
2TI 2:1 Timoti, eno ogwa, naga digi sesemane sogo nago te Krais Jisasgo olo mu tau sabo dwagi yai kolesagago te nage bomo momainao.
2TI 2:2 Tama tiyu, te nago eno pedauwalide odali po, te po te bidi hauwa gedude pusali po tigidali nago odali. Tama te po naga nago te Godigo poba homu kęą pai bidi dabe, augwaligo nogoba te po bugagia muao, te augwaligo me usu elama tama te po gasa Godigo poba homu kęą pai bidi dabebolo nosali ola momainu yao.
2TI 2:3 Da Godigo po odobo we bidi te da te ami bidi hani tiwai dao, tama Krais Jisas aga da te dago tuni bidi dao. Nage te agai dwagi yai sę ebo ami bidi bididu, tama da gasa ami sę ebo bidi dabe dali hodobo te sęgę dali dene tolobo sę yao.
2TI 2:4 Te ami sę eyu bidibo bidigo agai te gasa haniani sę dali eyu me egobeo. Menio. Te aga tonalubo genuai ami bidigo agai ebo sęde dwagi yai homu emainu eyu, agai te ami bidigo sę naga ebo dao.
2TI 2:5 Te bidi geanainu udabo bidi, agai te udabo bomai po bugagia dolo wali pao. Ma te meni eyu da, teda agai te udabo bidigo ugaba ela holobo nogi sabo namba me sogobeo.
2TI 2:6 Te sę dene elama gi bulama tonalubo bidi da, aga te gasa bidi dabego te gide nai polasa sisąbadi te polasa nai sabo bidi dao.
2TI 2:7 Timoti, nago eno te wali po digi po begelali po sela homude kone palao. Te Genuai Bidigo nage homu ula ilibaso, tama te po page tigidali nago koneaibao.
2TI 2:8 Sesemane sogo nago te Jisas Krais homugo koneao. Aga te isąma, te isali bidi bidibo digidu ma hodaluali. Aga te polobadu tuni bidi Devitgo hani bidi bidai. Te eno te Godigo gesi dwagi yai po wabo si, te Krais aga te bidi Devitgo bulai wai dao, te po me eno pusubo dao.
2TI 2:9 Eno te gesi dwagi yai po pusubaso, tama tede naga te bidi augwaligo ena te gavmango bomo yai po bolali dwai bidi da homu elama, tama augwaligo haniani sęgę enabolo mani. Awe, augwaligo ena kalabusiba me muani. Tiali goli te Godigo po da, augwaligo te kalabusiba me mugobeo, te usu egobeo.
2TI 2:10 Tama tibaso, eno ena homu dąų walama, tama eno te sęgę tigidali tolobode bomo elama dolalubo dao. Eno te Godigo aga sa muani we bidi tau sainu ebo dao. Eno homugo te Krais Jisasgo yali sęgo te Godigo augwali ma dobola selama, tama dagalude bugagia mu bidada peyu, bidada pomainu ebo dao.
2TI 2:11 E po eno megi obao te mu po dao, tama bidigo aga homu teba tialubaso, te aga tulalugobeo: “Te mu tama, da Krais dali wadolama tama aga dali isali tiwai yaligo da, teda da me aga dali bidibo ulade bidaibao.
2TI 2:12 Te da tigidali sęgę tolobode bomo elama dolaluali da, teda da aga dali tuni bidi me bidaibao. Te dago aga tudiba mubaso da, teda agai me da tudiba muaibao.
2TI 2:13 Te dago te Kraisba homu begi pabo kolesaga tagaliyu da, teda agai aga doloba pai kolesaga tagalogobeo. Agai te aga doloba pai kolesaga te munu me hasegelegobeo. Mu menio.”
2TI 2:14 Sesemane sogo nago te nago tonalubo we bidi augwali homu te eno megi wali pogo hodolao. Tama God gedude nago augwalibolo te haniani olo pode konila po olamuo po bomo elama wao. Te olo pode konila po wabo kolesagago te bidi me deli tau sabo usu me egobeo. Menio. Te tobage po odobo bidi dabe te doloyu naga ebo dao.
2TI 2:15 Tialima, te genuai pabo tų bugagia dolo mu nigibo bidi tiwai gilama eyu, tama nago te Godigo mu po dolo augwalibolo ola mao. Tama tiyu, nago naga sęde hale idali weyu, te Godigo nago ebo sęde “Te usu mu dao,” omainogo eyu, tama nago bomo elama, nago sę bugagia yao.
2TI 2:16 Te kedu meni yai olo po, te Godigo kolesaga wali pisąbo olo po, te tobage po wabo nago ela soao, augwali dali po migio. Te tobage po mibogo te bidi dabego te Godigo kolesaga tagalabo kolesaga genuai ilibo dao.
2TI 2:17 Te tobage olo po ola mabo bagego po te dwai keni tiwai elama, tama te genuai mu pedaliyu, tama tigi mi tųdu pabo keni tiwai yaibao. Te tobage po ola mabo bidi si te Himeneus de Filetus si dao.
2TI 2:18 Te bidi si augwaligo te Godigo mu pode geda munama tama tagalali. Tama tiyu, augwaligo te we bidibolo te po ola mabo dao, “Da ma hodaloai dao, tama da isibo si dago tigi nosali ma hodalogobeo.” Te pogo augwaligo te we bidi mebago Kraisde dąų wali konealubo po dolobo dao.
2TI 2:19 Tiali goli Godigo mu po te bidigo dolobo usu egobeo. Te bomai be tuni ni pos tiwai bulalio, tama te dolalubao, te be peme egobeo. Tama te tuni ni posde hagea siyu asęani po te tiwai elalubao, “Genuai Bidigo aga we bidi digi bugagia koneani.” Tama te po me asęani elalubo, “Te Genuai Bidi nogi nogi eyu ‘Ena aga bidi dao’ po wabo tigidali bidi, augwaligo te dolo isiąwai kolesaga tudiba muao,” te po asęani elalubao.
2TI 2:20 Te doado bage hauwa elalubo bidigo bede te haniani plet pou elalubo dao. Te plet pou meba augwaligo te wiegi yai kapa si gol me silva, te sigo nigali. Tama te nogi elalubo sogo augwaligo nai tuenu augwaligo te wiegi yai nai naga te tobage wiegi yai pou dabeba mubo dao. Te pou dabe te gasagi yai tedali dao. Tama plet pou meba augwaligo nigo nigali me, tama meba augwaligo te mama tǫgo nigali me elalubao. Te tobage olo pougo te olo sę naga elalubao.
2TI 2:21 Tama bidi dabe augwali te pou dabe tiwai dao. Bidi me deligo te olo po ola mabo bage tagalama, tama aga te meda meni yai bidali da, teda aga te dwagi yai sę mu ebo pou tiwai bidiyu, te aga tedali gasagi yai sę ebo bidi bidaibao. Magi baso meni, aga magi sę me isąwai bugagia bidibaso agai aga Genuai Bidigo sę ebo usu eyu, tama we bidi tau sabo haniani dwagi yai sę tigidali yabo sisi ilaibao.
2TI 2:22 Nage gesi bidi dao. Te gesi bidigo dwai sę godolo ebo homu kolesaga nageba pedalubo si, te sesemane sogo nage te kolesaga suyu sali siyu wi pao. Tama tiyu nago te doloba pai kolesaga me, te homu mu ebo kolesaga me, te we bidi dali dwagi yai homu eyu godolo mu ebo kolesaga me, te homu nagame eyu we bidi dali bugagia bidibo kolesaga me, te kolesaga tigidali nago pobasa pao. We bidi meba augwali te meda meni yai homu kolesaga elalu tama te Genuai Bidigo nogi nogi eyu, “Da aga we bidi dao,” te po wabo bage dao. Tama nago augwali dali wadoloyu, tama dagego te eno megi tama nogi yali wiegi yai kolesaga pobasa pao.
2TI 2:23 Tama te kedu meni yai olo pode konila po wabo te nago tudiba muao. Nago koneani, te tobage pogo te konila po wabo homu hodolobo po page elalubao, tama tede te sębę ebo kolesaga pedalobo dao.
2TI 2:24 Tiali goli te Genuai Bidigo sę ebo bidigo te munu me pogo hwįnamuo. Menio. Agai te tigidali we bidi dali abagi homu eyu dua digi yao. Aga te Godigo po ola mabo sęde usu eyu wiegi yai tisa bidi bidiyu, tama sębę polo eyu polo wei ponosiąbo bidi bidao.
2TI 2:25 Te agai ola mabo po sela sąbo bidi dabe dali agai te nagamea pai homu naga eyu, augwaligo homu dodolao. Te agai tama tiyu da, teda Godigo augwali tau siyu, tama augwali homu hasegeleyu tama te mu po bugagia koneabo tų elaluaibao.
2TI 2:26 Polobadu te Satango agai hagani togobo wago augwali sali, te augwaligo agai po wali pomainu yali. Tiali goli augwaligo te mu po koneyu da, teda augwaligo homu hania ma ula eyu, tama augwaligo te Satango hagani togobo wa wi pabo usu yaibao.
2TI 3:1 Timoti, nago te tiwai tama koneao: te tǫ de dagalu si silibo sogo te pąba yagasobo si te dwai sę ebo bidi dabe augwaligo dwai sę hauwa ebaso, te Godigo po odobo we bidiba te dwai sęgo kekainu sinabo sogo pedelaibao.
2TI 3:2 Te bidi dabe augwa digi te augwa naga godolo elama, tama augwaligo te mone ge godolo mu yaibao. Te augwa digi augwa nogi ugwaba siyu, tama subigila hagoma eyu, tama posobo po waibao. Te meba augwaligo aya idago po sela sąwaibao. Te augwaligo buba hwi po te Godibolo me, te gasa we bidibolo me wagobeo. Augwaligo Godigo kolesaga tudiba muaibao.
2TI 3:3 Te augwa deli kanemede ame nani ama dede dabe dali digi te deliba wasia sogobeo. Gasa bidigo augwali dali yali dwai sę te augwaligo sela sąbo homu munu me egobeo, te homu dene me egobeo. Te geme dualama posobo po subigila waibao. Te meba augwaligo augwa tigigo homu me tonalugobeo. Te augwali sębę eyu subigila bidi dabe dolaibao. Tama augwaligo te tigidali dwagi yai kolesaga dali boi bidi nigaibao.
2TI 3:4 Te augwaligo augwa abagi dabe te boi bidi nogoba muaibao. Te augwaligo augwa ebo kolesaga osola susuąyu tama bomo elama, tama augwa homu naga polo wali paibao. Te augwa homugo digi te augwali genuai bidi da homu yaibao. Te augwaligo te tigigo te haniani godolo ebo homude te wiegi yai homu pemene eyu, tama augwaligo God godolo homu me egobeo.
2TI 3:5 Te augwaligo te Godigo po odobo we bidi mu tiwai me sogo bilaibao. Tiali goli augwa homu ugwadu daidu naga tama tiyu, tama Godigo augwaligo kolesaga hasegelabo bomo te augwa tudiba mubo dao. Te tama kolesaga ebo bidi dabe augwalide te nage ibaba kisa selama bidamuo.
2TI 3:6 Te tama tobage bidi dabe meba te augwali dua digi biliyu, tama te wiegi yai homu kolesaga meni yai we dabego be tomoba pelama, tama augwaligo augwali homu te kalabus ilibo dao. Te tobage we dabe augwali te dwai sę hauwa elalu, te augwali homude sęgę elalubao. Tama augwaligo homu te haniani naide hodolama, tama augwa homu subigila hogwaiabo homu eyu, tama tebogo augwali te haniani kolesagaba kegebo dao.
2TI 3:7 Te we dabe augwaligo sesemane sogo augwaligo te ola mabo po odobo sę ebadi, tiali goli augwaligo te Godigo mu po page koneainu ebo usu egobeo.
2TI 3:8 Polobadu Janes de Jambres te bidi sigo Moses dali boi bidi yali, tama tiwai yali gilama te megi elalubo bidi dabe augwaligo me te Godigo mu po dali boi bidi ebo dao. Te augwaligo homu kolesaga te dolalio, tama augwaligo Kraisde konealubo po dąų wali te tibo naga ebaso, Godigo augwali buluba sąwai dao.
2TI 3:9 Tiali goli augwaligo te Godigo mu po dali boi bidi ebo kolesaga te we bidi tomode genuai mu me pedalugobeo. Menio. Te tigidali bidigo augwaligo kolesaga te esela pabo bidi dabego ebo kolesaga tiwai ebo sueibao, te tiwai te polobadu te bidi dabego te bidi Janes de Jambres sigo te esela pabo bidigo ebo kolesaga suali tiwai gilama yaibao.
2TI 3:10 Te gasa bidi dabe augwaligo te tobage dwai sę eyu bidaibao. Tiali goli nage da, nage ena dali biliyu, tama eno te we bidi dabebolo ola mani po te nago koneai. Tama eno kolesaga page tigidali te me nago koneai. Ena e tǫde bidibo sogo eno bomo elama, tama Godigo sę yabo homu ebo me te nago koneai. Nago ena me koneani, eno konealubo po Godiba dąų olama, tama sesemane sogo eno te gasa we bidi dali sębę polo ebeo, te eno sę augwali dali dua yali dao. Eno augwali dali dwagi yai homu eyu, godolo mu ebo kolesaga eyu, tama augwaligo enabolo mani sęgę menama, tama eno bomo elama bididu te sęgę eno bugagia tolobo dao, te me nago koneai. Eno ebo kolesaga tigidali nago koneama, nago wali pabo dao.
2TI 3:11 Te bidi dabego dwai kolesaga ena dali ebo tigidali te nago koneani, tama tigidali dene ena te bulu Antiokde me, Aikoniamde me, te Listrade me sai. Te tigidali sęgę augwaligo enabolo menama tama eno te sęgę tolobo nago koneanio. Tiali goli Genuai Bidigo ena tau siyu, tama te sęgę tigidali agai sila palali.
2TI 3:12 Te mu po dao, tigidali bidi te Krais Jisas dali kęą selama, tama Godigo kolesaga wali pabo bidi, teda te boi bidi dabego dwai sę eyu, sęgę augwalibolo me mawaibao.
2TI 3:13 Tiali goli te dwai bidi dabego me, te tibo po ola mabo bidi dabego me, te bidi dabe augwaligo ebo dwai sę dwasianu gagalama tama genuai pedalaibao. Tama tiyu, augwaligo te tibo po te gasa we bidibolo ola mobadi, te Satango me augwali tibo po ola maduaibao. Tama augwaligo kolesaga te dwai mu pedaluaibao.
2TI 3:14 Tiali goli, Timoti, nago da, nago te Godigo mu po odama tama bomo elama nago “Te po mu po dao,” te homu te pode yali dao. Tama megi nago te kolesaga me eyu bididuao. Dago nage te mu po ola mani we bidi nago da bugagia konebo dao.
2TI 3:15 Tama e me nago koneani, polobadu nage te dwasianu wai bǫų elalubadi tama nago te tedali gasagi yai wiegi yai bukude po konebo sę gagalama sai. Te tedali bukude pogo te dwagi yai homu kolesaga nagebolo mabo usu yali. Tama nago te dwagi yai homu kolesagago eyu, tama konealubo po Krais Jisasba dąų obaso da, teda Godigo nage ma saibao.
2TI 3:16 Te Godigo Mobo Bidigo digi te tigidali wiegi yai po bukude asęani bidi dabe tau selama, tama augwaligo te po te bukude asęai dao. Tama te dwagi yai kolesaga dabolo ola mabo sę me, tama dena dwai sę denabolo ola mabo sę me, tama da bilibo kolesaga ma dodolobo sę me, tama dabolo te doloba pai kolesaga ola mabo sę me, te sę tigidali ebode te Godigo bukude asęani po usu dao.
2TI 3:17 Tama tibaso, da Godigo sę ebo bidi tigidali dago te bukude asęani pode te sę yabo bomo dali, te homu kolesaga dali si selama, tama dago tigidali haniani dwagi yai sę yabo usu elama sisi ilimainu ebo dao.
2TI 4:1 Timoti, te God de Krais Jisas si gedude eno nagebolo e moni sęgę yai po bomo elama wainogo ebao. Krais Jisas agai te tigidali we bidi, te bidibo ula elalubo bidi badi, te isali bidi dabe dali me po tų eyu dagalaibao. Te aga tǫba ma asiyu, tama tigidali bidi geduba pedalama, tama tuni bidi mu bidaibao. Tama tibaso, eno e sęgę yai po bomo elama nagebolo obao, nago Godigo po mu pusao. Tama te po odainu sisi elalubo bidi dabe ebaso, ma augwali sisi elalusiąbaso me, te homu eyu tagalao, te sesemane sogo nago te Kraisgo po bomo elama pusubo sę yao. Nago te augwali homuba te po eniyu, te augwali homu begelemainu te augwali hodolao. Augwaligo dwai sę ebaso, tama nago te pogo te dwai sę tagalabo po augwalibolo pusao. Nago te augwaligo Godigo kolesaga wali pomainu homu hodolao. Tama te tobage haniani sę eyu, sesemane sogo nago augwalide sę dua digi eyu, sębę polo isąyu tama augwali bugagia ola mao.
2TI 4:3 Magi baso meni, nosali te gasa sogo pedalaibao. Tama te sogo te bidi dabego Godigo mu po ola mabo odobo hagela yaibao. Odogobeo. Menio. Te augwa digi augwa homu kolesaga naga wali peyu, tama augwaligo te po ola mabo tisa bidi hauwa saibao. Augwaligo godolo ebo po odomainogo te bage saibao. Tama te po ola mabo bidi dabe augwaligo te augwali sali we bidi dabebolo Godigo po pusugobeo. Menio. Augwaligo te we bidigo godolo ebo po naga pusaibao. Te we bidi augwaligo olo te dini ebaso, te tibo po ola mabo bidi dabego te augwaligo olo te pogo kieibao.
2TI 4:4 Tama te we bidi augwaligo te mu po odobo tagaliyu, te tudiba munama, tama te haniani olo namu po waboba olo munama odaibao.
2TI 4:5 Tiali goli naga digi te polobo bidi tiwai bidisiąyu naga homu sesemane sogo bugagia tonaludao. Tama tiyu nago te sęgę tolao. Nago te bidi dabe augwalibolo te Godigo gesi dwagi yai po pusubo sę yao. Nago te we bidi dabe augwali tau sabo haniani sę elalubaso, te sę nago bugagia mu yao.
2TI 4:6 Magi baso meni, te ena isąma pabo sogo pąba yagasalio. Nago koneani, te polobadu te bidi dabe augwaligo te wain ąį gelama te Godibolo ofa mabo, te tiwai naga te eno kaneme gelabo sogo pąba yagasali.
2TI 4:7 Te Kraisde konealubo po dąų wabo bidi te usu si yainogo udabo tiwai sę elalubao. Te usu si yainu ena bugagia udawai dao. Megi da te dąį ilaliba ena mu sabolalio. Eno Kraisde konealubo po homugo dąų mu wai dao, te eno munu me tagalobeo.
2TI 4:8 Megi da te udabo dąį ilaliba pedalali bidigo genuai nogi yai namba te sisi elama ena tonalubao. Te genuai nogi sabo namba te tiwai yaibao: te Genuai Bidigo ena te doloba pai bidi nogi poaibao. Genuai Bidi aga te doloba pai po tų ebo bidi jas, tama te genuai sogo pedalubode agai te doloba pai bidi nogi enabolo mawaibao. Tama agai enaduba delibolo naga te me magobeo. Menio. Te aga hania pedalubo suainu godolo homu ebo bidi dabe tigidalibolo te doloba pai bidi nogi mawaibao.
2TI 4:9 Nage asesą tama nage ena bidibo madi polo asao.
2TI 4:10 Te bidi Demas agai ena taga palio. Agai te megi tǫde elalubo kolesaga godolo mu elama, tama agai ena tagalama te Tesalonaika hanuba pai. Te Kresens aga te Galesia tǫba pobadi yali, tama te bidi Taitus me te Dalmesia tǫba pai dao.
2TI 4:11 Luk deli naga ena dali bidibao. Nago te Mak selama, tama odasa nage dali asao. Agai te bugagia te sęde ena tau somainu usu yaibao.
2TI 4:12 Eno te bidi Tikikus te Efesus hanuba tagala palai dao.
2TI 4:13 Nage enaba asobadi tama nago te eno kedau sogo gudubo bobage ugwa sela asao. Te ugwa eno te Troas hanude tagalali, te bidi Karpus aga bede munalubao. Tama tede muani buku dabe me sao. Tama bugagia dua mu nago te eno sipsip wali dabego nigali te buku dabe sabo te homu munu me gegeda peyu tagalamu dao.
2TI 4:14 Te bidi nogi Aleksander, agai mone ge sabo sę da te haniani nai te aga kapago nigibo bidi, te bidi agai enabolo dwai sę mu ilali. Nosali te Genuai Bidigo agabolo te dwai dene wei ponoyu, te aga yali dwai kolesaga usu nama te dene mawaibao.
2TI 4:15 Nage me nage te bidi Aleksanderde dua dao, bugagia tonaluao. Agai bomo mu elama, tama te dago ola mabo po mu aiyaba elaluainu eyu, tede boi bidi homu yai dao.
2TI 4:16 Te ena ede Rom hanude bidiyu, tama te hasia sogo eno te po tųde te po wei ponani sogo te bidi me deli ena tau sabo po me wagasobeo. Menio. Tigidali bidi augwaligo ena tagalali. Eno homugo te augwaligo te dwai sę te Godigo homu kone me elamuo, wei ponamuo.
2TI 4:17 Tiali goli Genuai Bidi aga ena dali bidaluyu, tama enabolo bomo mani. Eno te Godigo po sese pusubo te usu mu emainu, tama te agai po odisąwai hani tigidali augwaligo odomainogo eyu, agai bomo enabolo mani. Tama augwali te bidi ela tubo dwai hasa laion tiwai bidiyu, tama augwaligo ena ela muidali weyu Godigo ena tau selama dwagi yai madiba muanio.
2TI 4:18 Te augwaligo dwai kolesaga tigidali ena dali yainu ebo, tede te Genuai Bidigo ena tau selama, tama agai ena ma sai hagede eyu, tama ena oda selama, te aga bomo elalubo bulu te dagaluba sese muaibao, aga we bidi tonalubo sę ebo madiba. Te genuai nogi me bomo te agade sesemane sogo mu bidada peyu, bidada pomainao. Mu dao.
2TI 4:19 Nago eno te siade da wali po te we Prisila dali, aga bidi Akwila si dali me, te Onesiforus me te aga we wai puluba augwalibolo te po wao.
2TI 4:20 Te bidi Erastus te Korin hanude me bidibao. Tama Trofimus te gasi elalubaso, tama eno aga te Miletus hanude tagalama bidibao.
2TI 4:21 Nage asesa polo asiyu, tama te kedau eyu dwai wali asobo sogo asisąbadi nage eba polo sabolao. Te bidi dabe Yubulus me, te Pudens badi, te Linus me, te we nogi Klodia me, augwaligo te siade dao po nagebolo ola tolobao. Te gasa ede bidibo ama dede dabe tigidaligo me te po ola tolobao.
2TI 4:22 Eno homugo te dago Genuai Bidi te nage dali bidao. Te agai olo mu tau sabo wiegi yai kolesaga te dage dali bidao. Te tama dao.
TIT 1:1 Ena Pol dao, tama ena Godigo sę ebo bidi dao. Ena te Jisas Kraisgo po sela pabo sę ebo bidi ena dao. Agai ena dią selama tama tagala palama, tama eno te Godigo hagea sai we bidi augwaligo te agade konealubo po augwa homude eno bomo iligi pao ena dali te po wai, tama eno augwali tau siyu elama, tama augwaligo Godigo mu po selama, tama augwali aga tiwai bidimainogo agai ena te sę mani.
TIT 1:2 Tama te mu po page e dao: God agai tibo po munu me wabo meni, tama polobadu mu agai tigidali nai nigisiąbadi tama agai te sesemane sogo bidada pabo bidibo ula dabolo mawaibao te po agai olama tama dąų wali. Tama tibaso, megi dago te mu po odolama, tama dwagi yai homu eyu, te bidabo ula sabo sogo tonaluyu bidibo dao.
TIT 1:3 Tama polobadu mu agai te po dąų olama, tama tamadi te sogo aga digi bodolu mawai sogo agai bidi meba homu hodolama, tama agai po aga augwalibolo hania ola mani. Tama elama, tama agai te po pusubo sę eno nogoba muai dao, tama te da ma dobola sabo bidi God agai te po ola mao obaso, tama eno te mu po te we bidibolo ola mabo dao.
TIT 1:4 Taitus nage dali eno e po asęna tolobao. Te da dali, nage dali da tigidaligo God dali, Krais dali te konealubo po deli naga elalubaso, tama nage eno ogwa mu tiwai dao. Tama eno homugo dago Aya God dali, Krais Jisas dali augwali sigo nagebolo te olo tau sabo kolesagago dwagi yai sę eyu elama, tama nago homu nagamea peyu bugagia bidao.
TIT 1:5 Eno nage taga soayu, tama nage te Krit moni tǫde bidibadi ena soai dao, nage eno taga soali te po pagede tama dao: eno homugo nago te tigidali dodoloyu silisąwani sę te sę nago dodolomainogo tiwai dao. Tama tiyu, nago tigidali hanu deli delide te Godigo po wali pabo we bidi hani augwa tobolu bidi nigilao, te eno polobadu nage dali wali po gilamao.
TIT 1:6 Tama nago te tobolu bidi nigibo si te pode ma kone palao: niwai bidi me deli te we bidi gedude agai dwai kolesaga isiąwai bidi yai baso da, tama agai we me deli digi yai baso da, tama agai wai dabe augwaligo Godide konealubo po dąų wai yai baso da, tama augwaligo dwai sę subigila yai po meni baso da, tama augwaligo ida de aya sigo po sela sasiąwai yai baso da, tama te tiwai bidi nago augwali tobolu bidi nigilao.
TIT 1:7 Magi baso meni, te Godigo we bidi tonalubo bidi te bidi agai Godigo sę tonalubo dao. Tama tibaso, te bidi aga dolo bugagia bilao, sęgę meni yai bidi bidao. Agai hagoma ebo kolesaga ebo bidi bidilamuo, tama agai sębę polo me elamuo. Agai bomai ąį hauwa tubo bidi menio, tama agai bidi dabe me elebo menio. Tama agai masigi dabe hauwa sabo homu eyu pesą ebo bidi menio.
TIT 1:8 Te menio. Tiali goli gasa buludu asobo we bidi agai augwali dali dwagi yai homu eyu bugagia gesebo bidi bidao. Tama agai dwagi yai kolesaga naga godolo eyu, tama tiyu dwagi yai homu dali yao. Aga homu kęnai bidi bidao. Aga te doloba pai bidi bidiyu, tama Godigo gedude aga dwagi yai bidi bidao. Aga digi aga bidibo te kolesaga bugagia tonaluao.
TIT 1:9 Te Godigo po da te wiegi yai tulalusiąbo po dao, tama te Godigo we bidi tonalubo bidi agai te po odolama, tama agai te po aga homugo dąų wao. Tama tiyu da, teda agai te ola mabo pogo te gasa we bidi tau siyu, augwaligo homu bomo ilibo usu yaibao. Me ma, agai te po sela sąbo bidi dabe dali po miyu, tama augwaligo te pode geda muani kolesaga agai augwalibolo ola mabo usu yaibao.
TIT 1:10 Magi baso meni. Te Krit tǫde te Godigo we bidi hani tomode te bidi hauwa augwaligo te tobolu bidigo po odogobeo, tama te po wali pabo hagela ebo dao. Augwaligo page meni yai olo po naga weyu, gasa bidi dabe tibo po ola mabo dao. Te tama tebo bidi dabe hauwa augwali te Juda bage dao. Augwaligo polobadu Kraisde konealubo po dąų wali goli, augwaligo homugo te da tigidaligo te Juda dabego bomo yai po me wali pomainao.
TIT 1:11 Tama augwaligo gasa bidi dabego mone masigi bomo elama sainogo eyu, tama augwaligo te ola masiąbo po ola mabo dao. Te usu meni. Tama tebogo augwaligo te we bidi hani meba tomode si bugulama, tama we bidi meba augwaligo Godigo po megi bugagia wali me pabo meni. Tama tibaso, te nago nigilibo tonalubo bidi dabe augwaligo te olo po ola mabo bagego pedauwali dąų wao.
TIT 1:12 Polobadu mu Krit bulu bidi me deli, te bidi agai haniani po page mu koneai bidi bidai. Tama te bidi agai te po wai, “Te Krit tǫde bidibo bidi dabe augwali tigidali sogo te tibo po wabo bidi hani bidibo dao. Augwali uni sulai kibu tiwai dao. Tama augwaligo nai hauwa tulama, tama sę ebo hagela ebo bidi dabe dao,” te Krit bidi aga digi agai te po polobadu mu wai dao.
TIT 1:13 Tama agai po mu tama dao. Tama tibaso, augwaligo te God dali konealubo po augwa homugo bugagia dolo mu ma dąų omainogo nago augwali dali po bomo elama te po wao, “Te gasagi yai po ola mabo tagalao.
TIT 1:14 Te Juda dabego haniani olo namu po dali, te bidi dabego olo nigali bomo yai po dabe me, te tagalao. Te tobage po page bidi augwali da te Godigo mu po tudiba muani bage dao. Tama tibaso, dagego te tobage olo po wali pabo tagalao,” nago augwalibolo te po wao.
TIT 1:15 Te homu kolesaga meda meni yai bidi dabe augwaligo gedude te tigidali nai te habu selisąwai nai naga dao. Tiali goli te dwai meda yai homu elalubo bage, augwaligo God dali konealubo po dąų wasiąwai bage augwalide magi sę dwagi yai me ebeo, augwaligo dwagi yai kolesaga ebo page konebo menio. Magi baso meni. Augwaligo homu kolesaga dali, augwa dwai sę dwagi yai sę dagalabo homu me, te si dolama tama dwai meda elama elalubao.
TIT 1:16 Augwaligo pedauwaligo naga te po wabo dao, “Eno God koneai dao,” te po wabo. Tiali goli augwaligo bilibo kolesaga ebogo te God hogwa sabo dao. Godigo augwali me godolo ebo menio, hagela mu ebo. Augwali agai po sela sąbo bidi dao, tama augwaligo dwagi yai kolesaga me deli ebo usu meni.
TIT 2:1 Te dwai po ola mabo bage augwali te tiwai bidibo dao. Tiali goli nage, nago te Godigo wiegi yai po wali pabo we bidigo yabo kolesaga ola mabo po nago bugagia ola mao.
TIT 2:2 Tama tiyu, nago augwalibolo e tobo wao: monu dabe yai bidi augwaligo te bomai ąį hauwa tulamuo, augwaligo augwa tigigo ebo kolesaga bugagia tonaluao. Augwaligo doloba pai homu kolesaga naga koneyu, tama augwa homu kolesaga bugagia tonaluao, te po wao. Tama te God dali konealubo pode augwaligo te po page kuna koneyu bidao. Tama tiyu, augwaligo God dali, gasa we bidi dali dwagi yai homu ebo kolesaga eyu, tama tigidali sęgę yai sę asobadi bomo elama dolalubo kolesaga selama bidao, te po te monu dabebolo ola mao.
TIT 2:3 Te mosi dabe yai we augwalibolo me te po wao, augwaligo te dwai sę isiąbo wego ebo kolesaga dolo wali pao. Tama tiyu augwaligo te we bidi nogi posobo po wagio, augwali bomai ąį tubo sę te dologode bidigio, te po wao. Tama augwaligo te gesi we dabe sibibolo dwagi yai kolesaga ola mao.
TIT 2:4 Tama tiyu augwaligo te gesi we dabebolo te po wao, “Dagego duga bidi dali, wai dabe dali dwagi yai homu eyu godolo yao.”
TIT 2:5 Gasa we bidi augwaligo te gesi we dabego ebo kolesaga sulama, tama augwaligo Godigo po dali dwai posobo po waidali weyu, tama te mosi dabe yai we augwaligo te gesi we dabebolo e po me ola mao: “Dagego duga digi bidibo homu kolesaga bugagia tonaluao, tama dwai penane sę ebo homu egimio, tama dagego bidibo be tonalubo sę bugagia yao, tama dagego duga bidi dali wai dabe dali dwagi yai sę eyu bidao. Dage duga bidi dologode bidao,” te tobage po te augwaligo te gesi we dabebolo ola mao wao.
TIT 2:6 Te gesi bidi dabe augwalibolo me ola mayu, tama augwalibolo wao, “Dagego duga tigigo ebo kolesaga bugagia tonaluao,” te po wao.
TIT 2:7 Tama naga digi nago ebo kolesaga tigidali ebogo te nago te gesi bidi dabebolo dwagi yai kolesaga naga tama ola mao. Tama tiyu, nago homu mu eyu, tama ‘E po sęgę yai po dao,’ te homu eyu elama, tama Godigo po ola mao.
TIT 2:8 Tama nago agai po ola mabo si te dolo po naga augwali dali wao. Tama tiyu da, teda nage dali boi bidi homu ebo bage augwaligo da dali, te nago ola mabo po dali, tede augwaligo dwai po me wabo usu sąbaso, tama augwali hale yaibao.
TIT 2:9 Nago te masigi sisąwai olo sę bidi augwalibolo te po wao: augwaligo tigidali sę ebode te augwa tonalubo bidigo augwali dali dwagi yai homu emainogo tama augwaligo augwa tonalubo bidigo po odolama, tama augwali dologode naga bidao. Tama augwaligo augwa tonalubo bidi dabebolo po wei ponoyu te dwai po me olamuo.
TIT 2:10 Te tonalubo bidigo nai dabe me wi selamuo. Te menio. Te doloba pai kolesaga naga eyu, tama augwa tonalubo bidi dabe dali homu kęą pai bidigo ebo kolesaga te tonalubo bagebolo augwaligo tama yao ola mao. Te sę ebo bidi dabebolo te po wao. Tama tiyu da, teda augwaligo tigidali sę ebogo te da ma dobola sabo bidi God agade ola mabo po augwaligo te gasa bidigo gedude ugwaba siyu au eyu yaibao.
TIT 2:11 Magi baso meni. Tigidali we bidi agai ma dobola somainogo eyu, tama Godigo agai da olo tau sabo wiegi yai kolesaga hania waselai dao.
TIT 2:12 Tama da tǫde we bidi dago Godigo bomai po tudiba muyu, tama te dwai dwai kolesaga eyu bidai dao. Tiali goli agai olo tau sabo wiegi yai kolesaga tego da e tiwai ola mabo dao: “Dagego te dwai sę tudiba muao, te doloba pai kolesaga naga yao, tama dage e tǫde bidibadi te Godigo gedude dwagi yai we bidi bidao.”
TIT 2:13 Tama dago te ola mani po odolama, tama te tiwai kolesaga eyu bidibadi, tama dwagi yai homu eyu, te wiegi yai sogo asobo dago tonalubo dao. Tama te sogo asobo si, teda dago genuai God te da ma dobola sali bidi Jisas Krais agai bomo yai ula dali, genuai nogi dali, te hania ulaba pedalaibao.
TIT 2:14 Aga digi aga bidibo ula tagalai dao, tama agai te bidibo ulago da ma abelama, tama dago te tigidali bomo yai po sela sąbo te kolesaga agai sela sąwainogo tama yai dao. Agai da penama, tama da we bidi aga hani mu pedalainogo te sę yai, tama dago tigidali dwagi yai kolesaga bomo elama te sę naga emainogo agai aga bidibo ula tagalai dao.
TIT 2:15 Nago eno megi wali ola mabo po te po te we bidi dabe dali nago te po ola mao. Nago augwali te pogo hodolama, tama augwaligo te po wali pomainao. Tama nago te po sela sąnama wali pisąbo bidi augwaligo homu begelemainu nago augwali dali po bomo elama wao. Te bidi dabe augwaligo nage olo bidi yaliwe te homu idali weyu tama nago te ola mabo po bugagia bomonama augwalibolo ola mao.
TIT 3:1 Taitus, nago te nago tonalubo Godigo po wali pabo we bidi augwalibolo e po widu geao: augwali te gavman tuni bidi dabe dali genuai bidi dali dologode bidiyu, tama augwaligo po odolama te po wali pao. Tama tiyu tama augwaligo tigidali dwagi yai kolesaga yabo sę sisi eyu bidao, te po ola mao.
TIT 3:2 Augwaligo bidi mede dwai po olamuo. Te menio. Augwali homu nagame elama, tama abagi homu eyu bidao. Tama sesemane sogo augwaligo tigidali we bidi dali te imilai homu eyu, tama augwali tau sao. Te po augwali ola mao.
TIT 3:3 Magi baso meni. Polobadu da me, nage me da tigidali Godigo po odisąbadi tama da te homu kolesaga meni yai bidi tiwai bidai dao. Tama dago me po sela sąwai dao, tama tibo po odolama, tama dago pabo tųde geda muyu tama bilai dao. Tama bidibadi tama dena tigigo ebo haniani dwai kolesaga dali te tigi pusu ilibo sę me, te tobage sę ebogo da kalabus mu yai dao. Dago te bidi hasi dali dwai homu ebo kolesagade biliyu, tama dago augwaligo nai dabe pesą eyu yai dao. Tama bidi meba augwaligo da dali boi bidi eyu, tama dena hasi tomode me boi bidi naga elalua pai dao.
TIT 3:4 Tiali goli, God aga da, te da ma dobola sabo bidi dao. Tama agai da dali yabo tau sabo kolesaga dali, aga da godolo ebo kolesaga me, te si hania pedalali sogo,
TIT 3:5 te sogo agai da ma dobola sai. Agai dago doloba pai kolesaga ebaso, tama agai da ma sabeo. Dago te doloba pai kolesaga ebeo. Aga digi da we bidi hobede mu ebaso tama da ma sai dao. Tama aga digi da ąįgo paluama, tama da gesi noma wai ma pedalai dao. Tama tiyu tama agai Mobo Bidigo da gesi noma bidibo ula mawai dao.
TIT 3:6 Te Jisas Krais da, dena ma dobola sabo bidi, te agai sęde Godigo aga Mobo Bidi dabolo mu mawai dao, te bidi mego ąį hauwa gea palobo tiwai eyu tama Godigo aga Mobo Bidi dabolo mani.
TIT 3:7 Agai homugo da aga gedude doloba pai we bidi pedaliyu, tama te da tonalubo bidada pabo ula dago mu somainogo eyu agai dabolo aga Mobo Bidi mawai dao.
TIT 3:8 Te po mu dao. Tama eno homugo nago te po bomo elama ola mao, te Godibolo augwa homu tigidali mani we bidi augwaligo te ola mabo po dali homugo bugagia kone palama, tama augwaligo bomo elama te dwagi yai sę eyu bidimainao. Dwagi yai sę te dwagi yai page elalubao, tama te dwagi yai sę ebogo te tigidali gasa we bidi dabe me tau sabo dao.
TIT 3:9 Tiali goli te Godigo we bidi meba augwaligo te peni meni yai olo naide hanalua peyu te po wabo dao. Augwaligo te polobadu wąį dabego nogide po weyu, tama augwa hasi wado po wabo dao. Tama te bomo yai pode konila ebo dao. Te tobage po wabo dabe nago gedelao. Dago koneani, te pogo da tau sogobeo, tama dwagi yai nai walobo menio.
TIT 3:10 Niwai bidi agai te Godigo we bidi hani bugulubo po wabo bidi da, nago te bidibolo deli sogo me si sogo me te sę tagalao po wao. Tama agai nago po odisąbaso da, teda nago te bidi aga tudiba muao.
TIT 3:11 Nago koneani, tama tiwai bidi aga homu te gagea pai dao, tama agai ebo dwai sęgo aga te dwai bidi dao hania ola mabo dao.
TIT 3:12 Nosali eno Artemas me Tikikus te eno nage bidibo digi tagala palobaso da, te nage polo ena bidibo digi Nikopolis te hanuba asao. Magi baso meni, ena te Nikopolis bulude te dwai kedau sogo ena te bulude bidaibao, eno te homu dąų wali.
TIT 3:13 Nago te bomai po page koneai bidi nogi Senas dali, te gasa bidi me Apolos augwali si nago tau sao. Augwali si te gasaba painogo ebo si, tama nago augwalibolo te gasaba pabo tau sabo nai bugagia mao, tama augwali si bilibo nai tųde menia sogobeo.
TIT 3:14 Tama dago we bidi, te Krit tǫde bidibo Godigo po wali pabo we bidi, augwaligo te gasa we bidi tau sabo dwagi yai sę ebo kolesaga koneao. Augwali tama tiyu da, teda augwaligo te nai meni yai we bidi tau sabo sę ebo usu yaibao. Augwali te nai walisiąbo ni tiwai bidilamuo.
TIT 3:15 Te ena dali bidibo we bidi tigidali augwaligo nage dali siade dao, bugagia bidao, te po nagebolo ola tolobao, e pasgo. Tama te nage dali bidibo bage, augwali da dali deli homu eyu tama God dali konealubo po dąų wali, te we bidibolo nago dago te siade dao, bugagia bidao wali po wao. Eno homugo Godigo da olo tau sabo kolesaga dage tigidali dali bidao. Te tama dao.
PHM 1:1 Ena Pol da. Tama eno we bidibolo Krais Jisasde po weyu, tama augwali mebago hagela eyu, tama augwaligo ena kalabus beba muani. Tama ena te kalabus bede bidibadi, te ena dali, dago abagi Timoti dali, da sigo e pas asęnama, Filemon nagebolo tolobao. Nage dago dwagi yai abagi mu, da dali deli sę ebo bidi dao.
PHM 1:2 Tama da sigo e po te we Apiabolo me, te bidi Arkipusbolo me asęai. Tama Arkipus agai te we bidi tau sabo sęde te aga bomo eyu te tau sabo sę ebo dao, ami bidigo bomo eyu hwįbo te tiwai ebo dao. Tama da sigo nago beba sisinibo Godigo po wali pabo we bidibolo me e po asębao.
PHM 1:3 Eno homugo dago Aya God dali, te Genuai Bidi Jisas Krais dali, augwali sigo dage olo tau sabo kolesaga te homu dage dali bidimainao, dage dwagi yai homu eyu bidimainogo hagede.
PHM 1:4 Eno abagi Filemon, eno Godibolo eno gedu haluasa po weyu, eno nago nogi wabo si, sesemane sogo eno Godibolo buba hwi wabo dao.
PHM 1:5 Magi basowe? Sesemane sogo eno odali augwaligo nagede po weyu, nago te Genuai Bidi Jisasbolo dwagi yai homu eyu, tama nago konealubo po agade dąų wai. Tama tiyu nago Godigo we bidi tigidalibolo dwagi yai homu eyu, tau sabo dao, te po me eno odali.
PHM 1:6 Tama eno Godibolo gedu haluasa po weyu, eno te homu ebo dao: da dena homu Jisasba muyu, te da nage dali wadolobo dao. Tama tiyu, eno homugo dago Jisasde konealubo po dąų wabo kolesaga ebogo nage ola momainao. Tama ola menama, tama God agai da Jisasde wadolali we bidi da dali yabo dwagi yai sę page nago gisiga mu koneaibao. Te homu eyu, eno Godibolo hanalu wabo dao.
PHM 1:7 Eno dwagi yai ama, Godigo we bidi tigidali nago augwali dali dwagi yai homu eyu, godolo mu ebo dao. Tama tiyu, nago te kolesaga eyu, augwaligo homu pua peyu, dwagi yai ilai. Tama te kolesaga ebode ena dwagi yai homu elama, tama eno moni homu me esiąyu, te eno homu dwagi yai elama bidibao.
PHM 1:8 Te nago te we bidi tau sabo sę ebaso, eno te homu elalubo dao: Te Kraisgo nogi te bomode eno te po bomo elama, nagebolo weyu te nage wiegi yai doloba pai kolesaga me yainogo wagi sogo da, tama tiyu eno po nago wali pigi dao.
PHM 1:9 Tiali goli eno homugo nago te kolesaga emainogo te eno nagebolo te bomo elalubo po wagobeo. Menio. Dago dena hasi wiegi yai homu eyu godolo ebo homu eyu, tama da deliba wadolama bidibao. Tama tiyu, eno nage dali po bomo elama wabo homu eno egobeo, te eno duadigi nage dali hanaluyu te po obao. Ena Pol, ena da Godigo po sela pabo bidi dao, tama Krais Jisas tobade augwaligo ena kalabus beba munama, megi tede bidibao. Tama ena te Pol, tiali digi, eno nagebolo te po bomo elama wagobeo.
PHM 1:10 Tama tibaso, “Abagi aga tau saibao,” homu eyu, eno te bidi Onesimus tobade megi nage dali eno hanalu obao. Tama ena te kalabus bede bidibadi, te bidi Onesimus aga me te kalabus bede bidai. Eno agabolo Godigo po pusulama, tama Onesimus agai te po bugagia odama, aga homu begelama, tama aga Godigo hani bidi pedalali. Tama tibaso, megi aga da eno ogwa tiwai dao.
PHM 1:11 Tama polobadu Onesimus aga nage dali bidali sogo aga nago olo sę ebo bidi bidiyu, tama aga hagela eyu, tama aga nage tau sisąbo bidi bidai. Tiali goli megi da, aga nage dali ena dali tau sabo bidi mu bidaibao.
PHM 1:12 Te eno te bidi Onesimus dali dwagi yai homu eyu godolo mu ebo digi, megi eno aga nage pageba ma tagala palobao.
PHM 1:13 Tama eno homugo agai ena tau somainogo aga ede ena dali bidimainao, homu yali. Eno Godigo gesi dwagi yai po te we bidibolo pusubaso, augwaligo ena e kalabus beba muani. Tama ena ede bidibadi nage digibulu bidiyu, nago ena tau sabo usu sąbaso, eno homugo Onesimus aga e hanude bidiyu agai ena tau somaina homu yali.
PHM 1:14 Tiali goli nago te usu da po wasiąbaso da, te eno aga ede bidao wagobeo. Eno nage dali bomo egobeo. Menio. Eno homugo nago dwagi yai sę eyu, nago homugo Onesimus agai ena tau siyu ede bidiyu bidimainogo homu eyu da, nago te homu usu eyu da, te aga ede bidiyu ena tau saibao.
PHM 1:15 Te Onesimus wi peyu, agai nage tagalama, osogo eba bidagasai. Magi basowe? Nago aga ma siyu, tama aga nage dali mu bidaibao, eno te homu ebao.
PHM 1:16 Tama megi aga te olo sę ebo bidi naga ma egobeo. Menio. Da bidi sela Genuai Bidi Jisasde wadolobaso, te bidi Onesimus aga da te da sigo ama mu dao. Tama megi aga dago ama mu gagawali, dago dwagi yai homu aga dali ebo dao. Te eno digi aga dali te eno ama mu te homu eyu, aga dali wiegi yai homu ebo dao. Me ma, nago eno ebo homu aiyaba elaluyu, tama nago te homu eyu, aga nago sę ebo bidi bidiyu, te me nago ama dao, tama nago aga dali dwagi yai homu elama, godolo mu yao.
PHM 1:17 Te nago homugo ena te Kraisgo sęde age name si ebo tiwai homu eyu da, te aga nage pageba ma asobo si, te nago Onesimus bugagia ma sao, te nago ena dali wiegi yai homu ebo gilama te nago Onesimus dali me wiegi yai homu eyu aga ma sao.
PHM 1:18 Tama agai nage dali dwai sę me elama, tama agai nage dali negeli elaluyu da, teda nago agai te negeli ilali hasegelama, eno nogi tede muao.
PHM 1:19 Ena Pol, ena digi eno e po eno nogogo asęai, ena digi eno te Onesimusgo negeli ma wei ponaibao. Tama eno nagebolo Godigo po polobadu ola magi menigi sogo da, teda te sęde nago ena dali genuai negeli elalugi menigi da. Tiali goli megi eno te genuai negelide po wagobeo.
PHM 1:20 Eno ama, te Genuai Bidi Jisasgo nogi tobade nago enabolo te wiegi yai homu nagame ilao. Tama da si te Krais agai sę ebo bidi bidai, tama tiyu nago te ebo dwagi yai kolesaga te Onesimusde eyu, te nago eno homu wiegi yai pua pomainogo tama tiao.
PHM 1:21 Eno te homu bomo ebogo da, te nago eno te po wali pabo homu ebao. Tama tiyu eno nago Onesimus tau sao po nagebolo asęna tolobao. Eno koneani, nago yabo te kolesagago megi eno nagebolo te yao wabo kolesaga te aiyaba elaluama, tama nago te Onesimus dali nosali ebo kolesaga te wiegi yai mu yaibao.
PHM 1:22 Tama tiyu, eno po me deli elalubao. Te eno homugo dagego gedu haluasa po wabo te Godigo odabo homu yaibao. Tama tiyu, agai ena dagebolo ma maiabo homu yaibao. Tama tibaso, ena nage dali bidabo be tomode dąį togwali te ena bidabo digi sisi elama elaluao.
PHM 1:23 Te bidi Epafras aga ena dali e kalabus bede bidibao. Da sigo Krais Jisasgo sę ebaso, augwaligo da si kalabus beba muani. Tama Epafras dali, Mak dali, Aristarkus dali, te Demas dali, te Luk dali, te bidi tigidali augwaligo ena dali Kraisgo sę ebo bidi dabe dao. Tama tiyu, augwaligo nagebolo nage tao po obao.
PHM 1:25 Eno homugo te dago Genuai Bidi Jisas Krais agai we bidi olo mu tau sabo kolesaga dage tigidalide bidimainao. Tama dao.
HEB 1:1 Te polobadu mu hauwa sogo me, te haniani kolesaga hauwago me, te Godigo agai po pusali bidi profet dabego pedauwalidu agai po meba te dago wąį dabebolo mena mena pai dao.
HEB 1:2 Tiali goli megi e sogo da, te nosali pedalobo sogo tiwai mu yali, te Godigo aga Ogwago pedauwalidu agai po dabolo pusai dao. Te aga Ogwago nogogo me te Godigo te tǫ dali dagalu dali te tigidali nai nigai dao. Tama Godigo agai te tigidali nai nosali somainogo aga sa muai.
HEB 1:3 Te Ogwa agai te Godigo wiegi wiegi yai homu kolesaga te dabolo hania ola mabo bidi dao, tama aga te God tiwai gagawai mu tama. Agai po da te genuai bomo elalubo, tama te bomai pogo agai te tigidali bidibo nai me bidaluao odubadi tama te bidalubo dao. Agai te we bidigo sęgę sali sela sąbo sę te silama, tama megi da te Tigidali Bomo Elalubo Tuni Bidi, te God dolo nogo badu dulalubao, aga genuai bidi mu dao.
HEB 1:4 Te aga Ayade sali nogigo te ensel mobo bidi dabego nogi te aiyaba elaluama, tama wiegi yai mu yali. Tama tiwai yaligo da, aga digi te mobo bidi ensel dabe augwaligo Genuai Bidi mu pedalama, tama augwali aga dologoba pali.
HEB 1:5 Magi baso meni. Polobadu Godigo aga Ogwa dali te po wai, “Nage eno Ogwa dao. Megi tama ena digi nago Aya pedalomainogo yai.” Tama agai po ma wai, “Te ena digi agai Aya bidiyu, tama aga te eno Ogwa bidaibao.” Te me sogo Godigo te po si te ensel mobo bidi me deli dali wai dawe? Menio.
HEB 1:6 Tiali goli agai aga gomunai Ogwa te e tǫba tamadi tagala palobo sogo tama agai te po wai, “Tigidali eno sę ebo ensel mobo bidi dabe, dage kidu sugunama, tama dagego aga nogi ugwaba sao,” wali.
HEB 1:7 Tama God agai te ensel bidi dabe augwalide te po wai, “Godigo te aga ensel mobo bidi dabe augwali te wali tiwai pedalomainogo ilibo dao. Te agai aga sę ebo bidi dabe augwali te moni posolo ebo sia tiwai pedalomainogo ilibo dao.”
HEB 1:8 Tiali goli aga Ogwabolo agai te tiwai po wai, “Nage God dao, nage tuni bidi sesemane sogo bidada peyu, bidada paibao. Nago naga we bidi te doloba pai kolesagago tonalubo dao, tama te kolesaga naga ebode nago genuai wiegi yai nogi elalubao.
HEB 1:9 Nago te doloba pai kolesaga ebo te godolo mu eyu, tama te bomo yai po sela sąbo te nago hagela mu ebo dao. Tama tibaso, ena nago God bidiyu, tama eno nago nogi ugwaba somainogo eyu, te wel nago toboluba gelali, tama tebogo nage te wiegi yai homu pemene ilali. Te naga hai namu dabe augwaligo te nago wiegi yai homu pemene ebo tiwai me egobeo.”
HEB 1:10 Tama agai po agabolo ma weyu te po wai, “Genuai Bidi, polobadu mu nago e tǫ nigilama tama aga bomo elalubao. Te dagalu me, te naga nogogo nigai.
HEB 1:11 Te dagalu de tǫ si te tigidali dolaibao, tiali goli nage da me dologobeo. Menio. Nage da sesemane sogo bidaibao. Te dagalu de tǫ si da te tigidali te badia paibao, te poloba ugwa badia pai tiwai yaibao.
HEB 1:12 Te nago augwali pedeyu, te bidigo badia pai ugwa pedebo tiwai yaibao. Te nago augwali hasegeleyu, te bidigo ugwa hasegelebo tiwai yaibao. Tiali goli, nage da, tama naga bidibo dao. Nage me hasegelegobeo. Tama nage bidibo sogo te munu me siligobeo.”
HEB 1:13 Polobadu Godigo te po wai, “Nage genuai bidi ena dali hodobo bidimainogo eyu, tama eno dolo nogo badu duayao. Tama dualubadi, te eno nago boi bidi dabe augwali te nago sągą dologoba muaibao.” Tiali goli me sogo Godigo te po te ensel mobo bidi me deli dali waliwe? Menio.
HEB 1:14 Te ensel mobo bidi dabe augwali da, te noma bidi, tama augwaligo te Godigo sę ebo dao. Te Godigo augwali tagala palaibao, te aga augwaligo sęgę sali sela sąnama ma sainogo ebo we bidi dabe tau somainogo tebo dao.
HEB 2:1 Te Godigo Ogwago genuai nogigo te ensel mobo bidi dabego nogi aiyaba elalualigo da, teda dago te dago odali mu po tagalaidali weyu, dago ma bomonama tama te odali po homugo bugagia dąų ola sao.
HEB 2:2 Magi baso meni. Polobadu Godigo po meba te ensel mobo bidi dabebolo pusama, tama augwaligo te we bidibolo ma pusali. Tama pusama, tama te po Godigo bomonama bugagia dąų walali. Tama tiyu, tama bidigo te po bolama tama te po sela sąwani bidi tigidali, augwali te dwai dene mu te augwa yali dwai kolesaga usu nama sai dao.
HEB 2:3 Tiali goli megi da, Godigo da ma sabo sę yali, tama agai te sę yali te genuai nai mu dao. Tama tibaso, dago Godigo te sę yali po oda tagalama tudiba muani da, teda da wi peyu, tama te dwai sę yalide te dene sabo sę te mena tama geda saibawe? Te usu munu egobeo. Hasia Genuai Bidigo digi po pusuyu, tama agai da ma saibao homu yai. Tama agai po odali bidi dabe augwaligo dabolo te po mu po naga dao hania ola mawai dao.
HEB 2:4 Tama ebadi, God me agai te po te haniani bomai sęgo me tama agai haniani bomo yai idualigo te po mu po dao dabolo hania ola mani. Tama tiyu, agai te Mobo Bidigo olo mabo haniani wiegi yai sę ebo kolesaga te we bidi dabe augwaliba dobayali, te God aga digi homugo tama tiai.
HEB 2:5 Eno megi asębo po, te we bidigo gesi kolesaga eyu bidibo te nosali pedalabo po obao. Godigo te ensel mobo bidi dabego te kolesaga ebo dodolama tonalumainogo teba me mubeo. Menio.
HEB 2:6 Te Godigo po bukude asęani po me delide te bidi me deligo te po pusai, “God, bidi dabe augwali te magi nai da weyu, tama nago augwali homugo konebo dawe? Magi baso nago augwali tonalubo dawe? Augwali tǫde bidibo bage naga dao.
HEB 2:7 Te osogo naga, nago augwali te ensel mobo bidi dabe augwali dologoba muai. Nago augwalibolo genuai bomo me, genuai nogi mawai, tama te kolesagago nago augwaligo nogi ugwaba sai.
HEB 2:8 Nago te tigidali nai augwali dologoba muani, te nai tigidali augwaligo tonalumainogo tiai.” Awe, Godigo te tigidali nai bidi dologoba munama elaluai. Tama agai te nai me deli te olo me augwali dologode elalumainogo me ebeo. Tiali goli megi dago me susąbadi digi te tigidali nai bidi dologode elalubeo. Menio.
HEB 2:9 Tiali goli dago Jisas konebao. Polobadu osogo naga Godigo aga nogi te mobo bidi ensel dabego nogi dologode bidimainogo ilali, te Godigo wiegi yai homu eyu, te olo mu tau sabo kolesaga pedalomainogo me te tigidali bidi tau siyu isainogo tiai. Agai te dene tolama isali, tama Godigo aga nogi ugwaba selama, tama genuai bomo me genuai nogi agabolo mawai dao, tama megi aga te tiwai bidibo dago konebao.
HEB 2:10 God aga te tigidali nai nigai bidi, tama agai tigidali nai bugagia bidimainogo tonalubo dao. Tama agai homugo aga wai puluba hauwa te dagaluba odasa pelama, tama bugagia mu aga dali bidimainogo yai. Tama tiyu, agai dene Jisasba pedalobo gogolali, tama te dene yaligo te Jisas te we bidi augwali hasia mu polasa pabo augwali ma sali bidi usu mu ilali. Godigo te kolesaga yaligo, te dolo mu yai.
HEB 2:11 Dago koneani, te tigidali we bidi te magi dwai sę isąma wiegi yai pedalomainogo ilali te bidi aga Jisas dao, tama te magi dwai sę me isąyu te wiegi yai pedalali we bidi te tigidali augwaligo aya te Jisasgo aya me te deli naga dao. Tama tibaso, Jisasgo te we bidi augwali nogi weyu, “ama” wai, tama agai augwali te tiwai nogi ebo te aga hale me ebeo.
HEB 2:12 Te Jisasgo da “ama” wabo pode augwaligo polobadu e po bukude asęai dao, “God, eno nago nogi te eno ama dede augwalibolo pusaibao. Awe, te eno nago nogi ugwaba sabo tęąbi weyu, te genuai po miyu sisinibo madi tomode te po pusaibao.”
HEB 2:13 Tama agai po ma wali, “Te eno digi agade konealubo homu mu dąų waibao.” Tama agai po ma weyu te po wai, “Ena digi bidibo, suao. Tama Godigo ena mani we bidi dabe, augwali me ena dali bidibao, te wai dabe tiwai bidibao.”
HEB 2:14 Tama te agai “wai dabe” wabo we bidi dabe augwali te tǫde we bidi bidai, te da tigidali tiwai yai. Augwali tama bidaligo da, Jisas me te bidi augwali tiwai mu gilama pedalai, te aga tigi isimainogo yali, tama te isibogo agai te bomo elalubo bidi agai te bidi isimainogo ebo bidi te agai bomo dolaibao. Te bomo elaluali bidi te Satan dao.
HEB 2:15 Te we bidi augwali isibode wi yai. Tama augwali te tǫde bidali tigidali sogo, te isibode wi ebogo augwali kalabus elaluai. Tama augwali te kalabuside bidibo sela sąwainogo eyu, Jisas aga e tǫde isai dao.
HEB 2:16 Mu tamao, agai te ensel mobo bidi dabe tau sainogo te sę me ebeo. Menio. Agai te sę yali te Abrahamgo hani augwali tau sainogo te sę yai dao.
HEB 2:17 Tama tibaso, te tigidali naide aga te tigidali we bidi tiwai mu pedalomainogo tiali. Magi basowe? Agai tama tialigo da, tama aga te God dali we bidi dali tomode dolalubo pris tobolu bidi bidabo te usu igibu tama Godigo sę tolaluaibao. Agai te we bidi homu dene eyu, tau sabo wiegi yai kolesaga eyu, tama aga te Godiba aga homugo kęą pai bidi bidai. Tama tiyu, agai te Godigo te tigidali we bidigo dwai sę yali sęgę sela sąwainogo eyu, te aga ofa ilali te usu yai dao. Tiali goli aga te we bidi tiwai mu pedaligi menigi da, teda te sę tigidali ebo aga usu menigi da.
HEB 2:18 Aga digi te dene tolali, te Satango aga dwai sę ebo kolesagaba kekainu eyu te usu sabo sę tigidali agaba pedalali, tiali goli aga dwai sę me ebeo. Tama tibaso, megi te usu sabo sę te we bidi dabe augwaliba pedalobo si te agai augwali tau sabo usu dao.
HEB 3:1 Te Godigo po odolama wali pabo ama dede dabe, te dagalude bidibo Godigo dage me te Jisasgo sę ebogo i wai dao. Tama tibaso, dagego homugo Jisas bugagia kone paliąo. Agai te dago agade konealubo homu dąų weyu tama agade po te we bidi gesabide pusubo tau siyu, tama dago pris tobolu bidi bidimainogo eyu, Godigo aga e tǫba tagala palali.
HEB 3:2 Godigo aga te sęba muani, tama agai Godide homu kęą pai bidi bidai. Agai te bidi Mosesgo polobadu te Godigo we bidi tau sabo sę tiwai yai. Te we bidi augwali Godigo be tiwai bidai.
HEB 3:3 Tama dago koneani, be sę yai bidigo genuai nogigo te aga sę yai bego genuai nogi digi aiyaba elalubo dao. Tama te tiwai me Godigo homugo Jisas koneani, agai te genuai nogi me deli sabogo te Mosesgo genuai nogi te aiyaba elaluabo homu yai.
HEB 3:4 Te tigidali be te bidigo aga sęnama elalubao. Tama te tigidali nai nigali bidi da, te God dao.
HEB 3:5 Te bidi Moses aga te Godigo sę bidi, tama te Godigo we bidi tigidali tomode yali sęde agai Godide homu kęą pai bidi bidai. Tama agai te Godigo nosali wabo po pusubo sę te Mosesgo bugagia yai.
HEB 3:6 Tiali goli Krais aga da te Godigo Ogwa, tama agai da te Godigo hani augwali tonaluyu tama te tobolu bidi bidibo sę elaluyu, tama agai me te sęde Godide homu kęą pai bidi bidibao. Tama tibaso, agai nogigo te Mosesgo nogi aiyaba elalubo dao. Tama sesemane sogo dago konealubo po dąų weyu tama wi isąyu tama dago wiegi yai homu pemene elama tama Genuai Bidi naga tonaluyu da, teda da me te Godigo hani mu bidaibao, te da agai be tiwai elaluaibao.
HEB 3:7 Te dago Kraisde konealubo po bugagia dąų obaso da, teda da te Godigo we bidi hani mu bidaibao wali. Tama tialigo da, dago te Godigo dabolo wabo po mu odao, te Godigo Mobo Bidigo polobadu wali po tiwai. Agai po te bukude asęani, te po e dao: “Megi e sogo tama dagego Godigo pedauwalide po odali da,
HEB 3:8 teda dagego duga olo palia sigio, te tiwai dagego wąį dabe augwaligo polobadu Godigo po sela sąyu hagoma yali sogo tiwai. Augwali te bidi meni yai madi bidiyu tama augwaligo God usu sai. Te sogo augwaligo augwa olo palia sali.
HEB 3:9 Tama Godigo te po wai, ‘Tede dagego wąį nǫų dabe augwaligo eno yali bomai sę tigidali te kibu be bidi sese si tede usu nama augwaligo suai. Tiali goli te sula tagaliyu, augwaligo ena usu mu sai.
HEB 3:10 Tama tibaso, te we bidi hani dali eno sębę mu elama, tama eno te homu yai, “Tigidali sogo augwali te enade homu kęą pisąwai we bidi bidai dao. Tigidali sogo augwaligo te eno kolesagadu me bilai menio.”
HEB 3:11 Tama eno sębę eyu, tama eno po hasegelidali weyu eno mu po olama dąų wali, te po wai, “Augwali eno te toma nabo pesageba munu me asogobeo. Munu me asogobeo. Mu menio.” te po wai dao.’” Te Godigo Mobo Bidigo te po tigidali polobadu olama tama bukude asęnama elalubao.
HEB 3:12 Ama dede dabe, dage bugagia bidao. Tiyu dage tomode ama me deli aga homude dwai sę ebo homu elaluyu, tama aga Godide konealubo po tagaliyu, tama te bidibo ula elalubo God gegeda peyu tudiba muidali weyu, dagego dua dao.
HEB 3:13 Tama tiwai pedalidali weyu, megi e sogo Godigo nogi yali “te megi” te me elalubadi, tigidali sogo deli deli dagego wiegi yai po te ama dedebolo mayu, tama augwali homu hodoloyu tau sao. Duga hasi tama tiluao. Tiyu te sęgę sabo kolesagago dage tomode bidi me deli ili po ola mayu, tama te sęgo aga olo palia selamuo.
HEB 3:14 Magi baso meni. Polobadu dago Godide konealubo po dąų wali, teda te konealubo po megi me dago bugagia dąų weyu, teda da isiboba usu nigi paibao. Dago tama tiyu da, teda da te Krais dali wadolama, tama sę deli naga aga dali hodobo eyu tama bidaibao.
HEB 3:15 Dago koneani, te Godigo po bukude te po me elalubao, “Megi e sogo tama dagego Godigo pedauwalide po odali da, teda dagego duga olo munu me palia sigio, te tiwai dagego wąį dabe augwaligo polobadu Godigo po sela sąyu hagoma yali sogo tiwai.”
HEB 3:16 Polobadu niwai we bidi augwaligo Godigo po odali goli, augwaligo hagoma eyu, te Godigo po sela sąwai dawe? Te bidi Mosesgo te Isip tǫ tagalama odasa asali we bidi tigidali augwaligo te sę yai. Augwaligo naga tama te kolesaga yai dao.
HEB 3:17 Te kibu be bidi sese si usu nama te Godigo sębę de dali yaliwe? Agai te dwai sęgę sabo we bidi augwali dali sębę yali, tama te we bidi augwali isai, tama augwaligo tigi te bidi meni yai bulude elaluai. Godigo te dwai sę yali we bidi augwali dali naga sębę yai.
HEB 3:18 Godigo debolo po olama, tama mu da olama agai po dąų weyu, te augwali agai toma nabo pesage tomoba munu me asogobeo waliwe? Te agai po sela sąwani we bidi augwalibolo te po wai. Agai te po augwalibolo naga wai dao.
HEB 3:19 Tama tibaso, dago hania koneani, te augwaligo augwa homugo Godiba tiąlusiąbaso, tama te tebogo naga te augwali Godigo te toma tumainogo ebo digi te pesage tomoba painogo ebo te usu me ebeo.
HEB 4:1 Godigo dąų wali po megi me elalubao, tama agai tede te po wai, “Dage eno te toma nabo nigilali te tomoba piagameo.” Tama tibaso da wi me yao. Tiyu Godigo gedude dage tomode me deli te tų geda muyu, tama te toma nabo pesage tomoba pabo usu egobeo waidali weyu, dage dua dao.
HEB 4:2 Dago te Godigo bukude te toma nabo pesagede wiegi yai po pusali te odai, te Israel dabego polobadu odali po tiwai. Tiali goli augwaligo te po olo dali odolama, tama tede augwaligo homude te konealubo po dąų me wabeo. Tama tiyu, augwaligo te odali po, te pogo augwali tau me sabeo.
HEB 4:3 Da te Kraisde konealubo po dąų wabo we bidi, te da toma nabo pesage te tomoba paibao. Polobadu Godigo te pesageba pisąbo bagede po weyu te po wai, “Ena sębę eyu, tama eno po hasegelidali weyu eno mu po olama dąų wali, te po wai, ‘Augwali eno te toma nabo pesageba munu me asogobeo. Munu me asogobeo. Mu menio,’ te po wai.” Godigo te tigidali nai nigila silali sogo, te agai yabo sę me elalubeo. Tiali goli dago agai te tiwai po te aga toma nabo pesagede po wai odobaso, teda dago koneagameo, te toma nabo pesage me elalubao.
HEB 4:4 Tama te bukude asęani po me delide te bidigo te nogo a naga me badu si wali sogode te po wai, “God aga tigidali nai nigila silama, tama te nogo a naga olama me badu si wali sogo te aga toma neyu olo bidai.”
HEB 4:5 Tama te gasa asęani pode me te toma nabo pesagede Godigo te po wai, “Augwali te eno toma nabo pesageba munu me asogobeo. Munu me asogobeo!”
HEB 4:6 Tama te wiegi yai po te polobadu odali te we bidi, augwaligo te po mu po dao te homu isąyu tama te po sela sąwani, tama augwali da te toma nabo pesage tomoba pabeo. Tialima gasa we bidi augwali Godigo gedude te toma nomainogo yali te pesage tomoba pabo usu dao.
HEB 4:7 Te dago e tama koneani: Godigo bodolu me sogo deli ma muai dao. Agai te bodolu muani nogi yali “Te megi naga tama.” Hasia te Israel dabego agai po sela sąwani. Tiali goli nosali te kibu be hauwa pai madigi tama Godigo po te bidi Devitgo penanede ma pusali, te dago te tiwai po tamadi wai, “Te megi e sogo tama dagego Godigo pedauwalide po odali da, teda dagego duga olo munu me palia sigio.”
HEB 4:8 Te polobadu te tobolu bidi Josuago te Israel we bidi augwali te Godigo mawaibao wali toma nabo pesage tomoba selasa pigi sogo da, teda Godigo nosali te gasa sogode me da po wagi menio.
HEB 4:9 Tiali goli dago koneani, te toma nabo sogo te me elalubao. Te Godigo tigidali nai nigila silama, tama aga toma nani sogo, te tiwai tama te toma nabo sogo asobo te Godigo we bidi augwali tonalubo dao.
HEB 4:10 Magi baso meni. Dago koneani, te Godigo te toma nomainogo nigilali pesage tomoba pabo bidi, te aga digi sę yali silama te toma nabo te tiwai ebao, te polobadu God aga digi sę silama, te toma neyu olo bidali tiwai gilama tebo dao.
HEB 4:11 Tama tibaso, te toma nabo pesage tomoba painogo da te dago sę bomonama yao. Tiyu yaide te bidi me deligo te Godigo po sela sąbo kolesaga wali peyu, te Juda bage augwaligo polobadu yali sę tiwai yabuo, tama aga tula munama tama hagawaibao. Te tiwai idali weyu, dago bomonama Godigo po bugagia wali pao.
HEB 4:12 Magi baso meni. Te Godigo wali po te bidabo ula elalubao, tama aga te sę bomo idubao. Te mu poa pai, tama te si dali si badu poa pai hwą gego poai yali te aiyaba elaluai. Tama bidigo poa pai kago hwą gego hasa mi togoyu, tama te poa pai hwą ge polo te hasa dili tomoba tugi pelama, tama te dili hania pedalobo dao. Tama te tiwai me Godigo wali po dago homu tomoba peyu, tama dago homu ogwa wai dali dago mobo dali si pedebo dao. Tama agai wali pogo dago ebo homu dali dago homu kolesaga page dali si, te tigidali te agai osola subo dao.
HEB 4:13 Te Godigo nigali nai me deli te God agai gedude te geme dula sainogo ebo te usu munu me egobeo. Menio. Te tigidali nai te hania mu te Godigo gedude tigidali te elalubao. Tama Godigo naga te dago ebo kolesaga tigidali dagalabo bidi dao.
HEB 4:14 Te God aga te dago ebo kolesaga dagalabo bidi bidibaso, dago te Kraisde homugo konealubo po, te gasa we bidi dabebolo pusabo po, dago te pode dago homugo mu kęą pao. Magi baso meni, dago genuai pris tobolu bidi te bidibao, tama aga te dagaluba holama tama Godigo bidibo digi tomoba mu pai. Aga te bidi Jisas, te Godigo Ogwa dao.
HEB 4:15 Dago digi te sęgę aiyaba elaluabo bomo menio. Tiali goli dago genuai pris tobolu bidi aga tede da homu dene isąbo tiwai bidi da po wagobeo. Menio. Te daba usu siyu te pedalobo sęgę tigidali, te tigidali sęgę agaba me pedalama aga me usu sai. Tiali goli agai dwai sę munu me ebeo.
HEB 4:16 Tama dago te tobage genuai pris tobolu bidi elalubaso, da te dwagi yai homu eyu tama God pąba pao, te da wi me egimio. Aga da te olo tau siyu wiegi yai kolesaga mabo bidi dao. Tama da agaba peyu, tama agai da homu dene ebo homu eyu te da tau saibao. Tama dago sęgę elalubaso da, teda agai te olo tau sabo wiegi yai homu kolesaga ebogo te da tau saibao.
HEB 5:1 Te tigidali genuai pris tobolu bidi sa mubo kolesaga te e tiwai ebo dao: te Godigo bidi dabe augwa hani tomodu dią selama, te Godigo augwali sęba munama, te we bidi augwali tau sabo sę elala paibao. Augwaligo te we bidi dabego Godibolo haniani maiabo nai mabo sę eyu, tama te sęgę sela sąbo haniani ofa me Godibolo mabo sę ebo dao.
HEB 5:2 Te bidi dabe augwa digi te Godigo po dolo wali pabo bomo meni yai bidi me sogo bidibaso, augwaligo te kolesaga konesiąbo te Godigo tų wali pabo tagalali we bidi dabe dali te dua digi kolesaga sesa pobaso te usu dao.
HEB 5:3 Tama augwali me te bomo meni yai bidi dabe bidibaso, augwaligo te we bidi augwaligo sęgę sela sąbo ofa naga mabo meni, te augwade digi sęgę dali sela sąbo ofa me te Godibolo mabo te dolo dao.
HEB 5:4 Te genuai pris tobolu bidigo ebo sę te genuai nogi elaluaibao. Tama bidi me deli aga homugo aga digi te sę me sogobeo. Menio. Godigo naga hasia agabolo i olama, tama agai te sę yaibao, te polobadu agai te bidi Aron te genuai pris tobolu bidi sęba i wali tiwai gilama ebo dao.
HEB 5:5 Krais me agai te Livai hani pris bidi dabe tiwai tama tiai. Agai aga nogi aga digi ugwaba selama tama ‘Ena te genuai pris tobolu bidi pedalaibao,’ agai te homu ebeo. Menio. God aga digi aga nogi ugwaba siyu, tama te sę emainogo sa muai. Tama tiyu Godigo agabolo te po wai, “Nage eno Ogwa dao. Megi tama ena digi nago Aya pedalomainogo yai.”
HEB 5:6 Te Godigo po buku tomode te gasa badu me agai te po wai, “Nage pris bidi sesemane sogo bidada paibao, te polobadu bidali pris bidi Melkisedek tiwai yaibao.”
HEB 5:7 Polobadu Jisas te e tǫde bidi tiwai bidibadi, te sogo agai po Godibolo wai. Godigo aga te isibode ma sabo homu yali, tama tiyu agai gedu haluasa po aga dali weyu genuai i wali, tama aga gela hauwa mu wai. Agai aga homu kolesaga te aga digi aiyaba elaluama tama imilai bidi bidama, tama aga God dologode bidali, tama tibaso Godigo agai gedu haluasa po wabo odai dao.
HEB 5:8 Jisas da te Godigo Ogwa tama, tiali goli aga dene tolali, tama te tialigo te Godigo po wali pabo kolesaga te aga mu konea sali dao.
HEB 5:9 Te tama tialigo aga te usu mu ilama, tama aga te we bidi ma dobola sabo bidi pedalama, tama agai po wali pabo we bidi tigidali ma siyu, augwali bugagia bidada peyu, bidada pabo bidi dao.
HEB 5:10 Tama Godigo aga sa munama tama te po wai, “Nage pris bidi dao, te polobadu bidali pris bidi Melkisedek tiwai yaibao.”
HEB 5:11 Te bidi Krais aga te pris bidi dao, te Melkisedek tiwai, tede eno po hauwa elalubaso, tama dagebolo eno te po wainogo yai. Tiali goli dagego homu kolesaga megi puna pelama, tama dagego polo konea sabo menio. Tama tibaso, dagebolo eno te po page ola mawainogo sinabo sę dene yaibao.
HEB 5:12 Te dage Godigo po ola mabo bidi bidabo sogo usu yali homu yai. Tiali goli menio. Dagego homu kolesaga habuge elalubaso, tama eno homu bidi me deligo te Godigo hasia polalubo po page deli deli te dagebolo ma ola momainogo yao. Dage te wai bǫų tiwai dao, dagego te dili yai nai me sela tugobeo. Te dagego te ame pę naga tubo usu dao. Dage tama bidibo te dwai dao, usu egobeo.
HEB 5:13 Dago koneani, te ame pę naga tubo bidi tigidali augwali dwasianu wai bǫų naga bidibao. Tama augwaligo te doloba pai kolesaga dali, te dwai kolesaga dali bugagia dagalabo te augwaligo me konebeo.
HEB 5:14 Tiali goli te dili yai nai da te genuai bidi dabe augwaligo tubo dao. Te tobage bidi dabego te augwa digi augwa homude kolesaga hauwa sogo osola suyu, tama augwaligo te wiegi yai kolesaga ebo me te dwai kolesaga ebo me te augwaligo dagalabo usu dao.
HEB 6:1 Tama tibaso, dago te bidi mugo odabo po odao. Dago te hasia sogo odali Krais pode naga te po page po wabo sę elala pigimio. Tama dago te be ni pos me deli te hauwa sogo buluyu idu gebo menio. Dago te sę silama, tama gasa sę egi pabo dao. Tama tiyu, dago e tobage po naga me olamuo: te dago homu begelama te bidibo ula elalusiąbo te kolesaga tigidali tudiba munama homu begeleyu, tama dago Godide konealubo po dąų weyu, tama te haniani baptais sabo kolesaga po wabo me, tama te bidi toboluba nogo mubo me, tama te tigidali isai bidi ma hodaloabo po me, tama te bidi dabe augwali te po tų elama, tama te po tų dodolobo bidi agai po sesemane sogo bidada peyu, bidada paibao po wai. Tama da te tobage hasia sogo odali po wabode naga bidigimio. Menio. Te da pidu geyu, tama dago te we bidi mu augwalibolo ola maiabo po odinao.
HEB 6:3 Tama Godigo tede usu da obaso da, teda mu tama dago te tiwai sę naga eguo, tama dago agai gasa po me odama tama wali paibao.
HEB 6:4 Magi baso meni. Te bidi meba augwaligo te Godigo ula salio. Augwaligo te Godigo olo mabo wiegi yai nai usu sela sulama koneani. Tama te Godigo Mobo Bidi me te augwaligo sai dao. Augwaligo te Godigo wali po odolama, tama augwaligo koneani, te wiegi yai mu da wai. Augwaligo te Godigo wiegi yai sogo bomo ebo suyu gęnenama, tama te tiwai bomo te nosali pedalaibao te homu yalio. Tama te bidi dabe augwali tulaluyu tama God tudiba mubaso da, teda augwali ma begasa aselama, homu ma begelabo tų te usu munu me egobeo. Menio. Te tebo kolesagago augwa digi augwaligo te Godigo Ogwa te ni pedaide ma elali sę tiwai yai. Augwaligo aga ni pedaide walama, te bidi dabego agade te posobo po waibao.
HEB 6:7 Eno te Godigo ula sela tagalali bidi tede po digi po begelama tama aga e tiwai dao. Te tǫ elalubao. Te tǫde te hauwa sogo tulubage teba bugagia tuluyu, tama tǫgo te tulubage sabo dao. Tama te tǫde gi bulali we bidi augwali tau somainogo eyu, tama te tǫgo wiegi yai nai walobaso da, teda te kolesagade Godigo wiegi yai sę te tǫba ilibo dao.
HEB 6:8 Tiali goli, agai te haniani sesani yai bono naga walobaso da, teda te tǫ te olo dwai tǫ dao. Te pąde Godigo gedude dolaibao. Nosali da siago aga daibao.
HEB 6:9 Te abagi dabe mu, megi eno e sęgę yai po dagebolo wali goli, eno mu koneani, homu si meni, te dage te tiwai me dologobeo. Menio. Eno e homu dage dali ebao, te dagego te dwagi yai tų wali peyu tama Godigo dage ma dobola saibao.
HEB 6:10 God aga te dolo osola subo konesiąbo bidi meni. Agai homugo dagego te yali tigidali sęde te homu me gegeda peyu, me tagalogobeo. Menio. Dagego duga homugo agade kone palobadi tama agade dwagi yai homu eyu, tama te tialigo te dage homu hodolama tama agai we bidi augwali te dagego tau sidu geduai dao. Tama te tiwai kolesaga dagego me ela pabo dao.
HEB 6:11 Tama bomonama eno homugo dage tigidali deli deligo te tiwai sę bomo naga eyu, tama dwagi yai homu ebadi duga konealubo po dąų weyu, tama Godigo duga ma sabo te tonaluao. Dagego te tiwai sę ela pidu, te duga e tǫde bidibo sogo te silibode te usu nigi pao.
HEB 6:12 Dage sę ebo hagela egimio. Menio. Bidi meba augwaligo te Godide konealubo po dąų mu weyu, te hagela homu polo isiąbo bidi dabe bidibao. Tama tiyu, tama te polobadu Godigo te aga wai dabe augwalibolo mawaibao wali nai tigidali te tobage bugagia tonalubo bidi dabego sabo dao. Dagego augwaligo ebo dwagi yai kolesaga wali piąo.
HEB 6:13 Polobadu Godigo te agabolo nai maiabo po Abraham dali dąų wai. Tama bidi me deli aga te genuai bidi da olama tama God aga aiyaba me elalugobeo. Mu Menio. Godigo nogi naga te ugwade mu elalubao. Tama tiwai tialigo da, teda God agai homugo agai te Abrahambolo nai maiabo mu po olama, tama te dąų wali poba genuai bomo me momainogo eyu, God aga digi nogigo bomo teba manani.
HEB 6:14 Agai te po bomonama wai, “Eno mu po naga obao, te eno nagebolo dwagi yai sę yaibao, tama eno nage wąį hani hauwa mu nosali pedalomainogo ilaibao,” te po wai.
HEB 6:15 Tama Abrahamgo hauwa sogo bugagia tonaluyu, tama aga hagela polo me isąwai, tama nosali agaba te tigidali sę mu pedalali, te tiwai polobadu te Godigo agabolo te wąį hauwa mawaibao po wai dao.
HEB 6:16 Bidi si augwa hasi konila po weyu da, teda bidi mego te gasa bidibolo agai wabo po mu po naga dao te hania ola momainogo eyu, te bidigo aga digi nogi weyu te mu po dao te wagobeo. Menio. Agai te gasa bidi me deli, te genuai nogi elalubo bidi, te bidigo nogi weyu tama agai wabo po te tiwai dąų wabo dao. Tama tebogo te bidi si tomode elalubo konila po togolama tama po me meni.
HEB 6:17 Tama te tiwai me, polobadu Godigo po weyu, te Godigo aga we bidi tau saibao po wai. Agai hania mu augwalibolo ola mawainogo yali, agai te tau sabo po me hasegelegobeo. Tama tibaso, te dąų wali poba genuai bomo me momainogo eyu God aga digi nogigo bomo teba manani.
HEB 6:18 Tama tibaso, te Godigo mu po dąų wabo me, te aga teba aga nogigo bomo manubo me, te sę si me hasegelegobeo. Te sę side Godigo tibo po munu me wagobeo. Tama tibaso, tebogo da te God pąba wi pelama geme duala sigi pali we bidi da homu bomo mayu, mu dąų ilimainogo yai. Tama tiyu, dago homugo te Godigo po dabolo weyu te dąų olama, te agai da dali nosali yabo dwagi yai sę dago tede dwagi yai homu eyu tama tonalubo dao.
HEB 6:19 Tama agai wali pode dago dwagi yai homu eyu tonalubo kolesagago te dago homu bugagia dąų wabo dao, agai po te genuai sęgę yai ain nai bonogo gebelama, tama te moni geba sip tede dąų olama, tama te tamu ąį sesegede te sip bugagia dąų ola sali tiwai dao. Tama te tonalubo kolesagade dago homu si ebo meni, tede dago mu koneani, te Godigo wali po mu po pedalaibao. Tama te homu eyu, dago dena homu te Jisasba muai dao. Aga te dagalude elalubo Moni Lotu Be tempel tomoba pelama, tama tede walali genuai nami ugwa tudi badu pelama, tama te God bidibo be habuba mu sabolai dao.
HEB 6:20 Tama da tobade Jisas aga digi polasa peyu, te be habu tomoba pali, te da tau sainogo yali. Aga te genuai pris tobolu bidi pedalali, te bidi Melkisedek tiwai pedalali, tama aga sesemane sogo bidada peyu, bidada paibao.
HEB 7:1 U bidi Melkisedek aga te genuai hanu nogi Salem tuni bidi bidali, tama aga God ugwadu bidi mugo pris bidi dao. Polobadu Abrahamgo boi hwįnama, te tuni bidi dabe augwali elama tama aga buluba ma sobadi, tama te sogo Melkisedekgo aga te tųde tiąba sabolama tama Godigo Abraham dali dwagi yai sę emainogo eyu gedu haluasa po wai.
HEB 7:2 Tama Abrahamgo te boi hwįgi pelama sali tigidali nai dodolama tama nogo si selama, deli deli bugulama, tama te bidi Melkisedekbolo deli mani. Abrahamgo te hwįbode sali nai tigidalide tama yali. Dago te nogi Melkisedek begelama e tama po wai: te doloba pai kolesaga ebo tuni bidi da wai. Aga me te bulu Salem tuni bidi dao. Te nogi Salem begelama tama te po page e tiwai dao: te homu nagamea peyu bugagia bidibo kolesaga tuni bidi dao.
HEB 7:3 Te Godigo po bukude aga aya me ida me augwali sigo nogi asębeo, tama aga wąį nǫų hani me menio. Aga te aga idago ame nani si te sogo nogi asębeo, tama aga isali sogo me menio. Aga te Godigo Ogwa tiwai bidai, aga te pris bidi sesemane sogo bidada peyu, bidada paibao.
HEB 7:4 Dagego te Melkisedek homugo koneao, aga genuai nogi mu elaluai. Magi baso meni. Dago hasia wąį mu, Abraham, agai digi te tigidali wiegi wiegi yai nai te wąbi hwįyu sali nai dobolama, tama agai te nai nogo si nogo si dodolama tama te tigidali nogo si nedali naide te nai deli digi wai te Melkisedekbolo mawai, te aga genuai nogi elalubaso te agabolo tama mawai.
HEB 7:5 Te Livai hanigo wai dabe augwaligo te pris bidi sę sai dao. Tama Godigo te Mosesbolo mani bomai pogo augwalibolo te po wai, augwaligo te Israel dabe augwaligo tigidali elaluali nai nedeyu, nogo si nogo si tama dodolama, tama tigidali nai nogo side te nai deli digi wabo somainao wai, te sali nai te Livai hani bidi dabebolo momainogo yao wai. Te Israel dabe augwali te augwa ama dede dabe mu te augwali, tama augwali te Abrahamgo wai dabe dao. Tiali goli tagaliyu, te Livai dabe augwaligo te augwa ama dedego nai dabe te me badu deli deli te augwaligo siyu yai dao.
HEB 7:6 Tama Melkisedek aga te augwaligo hanide te aga pedalobeo, aga te Livai hani bidi menio. Tiali goli te Abrahamgo aga nai dabe nogo si nogo si nedelama tama nogo si deli delide Melkisedekgo nai me deli salio. Tama Abraham aga te Godigo aga dali wiegi yai sę ilabo dąų wali po sali bidi bidaligo da, teda te Melkisedekgo Godigo te Abraham dali dwagi yai sę emainogo eyu tama te gedu haluasa po wai.
HEB 7:7 Tama dago koneani, te Godigo gasa bidi dali dwagi yai sę emainogo eyu gedu haluasa po wabo bidi te aga ugwadu elalubao. Te agade Godigo tau sali bidi, te aga aiyadu dologode bidibao. Tama tibaso, dago koneani, Melkisedek aga nogigo te Abrahamgo nogi aiyaba elaluali.
HEB 7:8 Te Livai dabe augwaligo te pris bidi sę eyu, tama te Israel dabede te nai tigidali te tomode bugulama tama nogo si nogo si dodolama tama me deli wabo siyu yali, augwali da te isabo bidi naga dao. Tiali goli te bidi Melkisedek agai te nai me deli wabo sali, tama te bukude po agade weyu te po wai, “Aga da te bidibo ula dali bidibao” po wai.
HEB 7:9 Tama dago e tama tiwai po wabo te usu dao: te Livai hani bidi dabe augwaligo te pris bidi sę eyu, tama augwa ama dede dabe te Israel bagede te nai siduai dao. Tiali goli polobadu hasia te Livai hani augwali Abrahamgo hanide pedalisiąbadi, tama augwali te Abrahamgo tigi tomode me bidibadi tiwai wabo, te sogo te bidi Melkisedek aga te Abraham tiąba asama tama Abrahamgo agabolo te hwįyu sali nai meba mani. Tama tiyu augwaligo wąį mu Abrahamgo te nai meba te Melkisedekbolo mobaso, te Livai dabe augwaligo me te nai te Melkisedekbolo mani ąǫ yai. Tama tibaso, dago koneagameo, te bidi Melkisedek agai nogigo te Livai hani pris bidi dabego nogi aiyaba elalubo dao.
HEB 7:11 Te Livai hani bidi dabe augwaligo te pris bidi sę ebo kolesaga, te kolesaga Godigo Mosesgo pedauwalidu te sę yao wali. Tama te pris bidi sę ebo kolesaga elaluyu, tama Godigo te Israel dabebolo agai bomo yai po hauwa mawai dao. Tiali goli, te Livai dabe augwaligo pris sę yaligo te we bidi augwali usu ilama tama wiegi yai mu pedaligi sogo da, teda te gasagi yai pris, aga te Melkisedek tiwai elama, tama aga te bidi Aron aga hani bidi meni, aga te Livai bidi meni, te tobage gasagi yai pris bidi aga pedaligi meni da. Tiali goli aga pedalama bidibao.
HEB 7:12 Tama te pris hani hasegelebaso da, teda te hasegelebo sę usu ilimainogo eyu, augwaligo te pris sę ebo kolesagade bomai po me augwaligo hasegelao.
HEB 7:13 Godigo po bukude te agade po wabo bidi, te bidi dago Genuai Bidi, aga te gasa hani bidi dao, aga te Livai hani bidi menio. Tama aga te hani bidi mede polobadu te Godibolo ofa mabo sai nogi alta, te altade te pris sę munu me yai menio.
HEB 7:14 Dago hania koneai, dago Genuai Bidi aga te Juda hanide naga pedelai. Tama Mosesgo te hani augwali te pris hani bidaibao po me wabeo.
HEB 7:15 Te Livai dabe augwaligo pris sę yaligo te we bidi augwali usu ilama tama wiegi yai mu pedalobo usu ebe. Dago te po page te hania mu konebo dao. Magi baso meni, te gasagi yai pris me pedalobo suao tama aga te bidi Melkisedek tiwai dao.
HEB 7:16 Te bomai po me deligo aga mena hani bidi dawe, ma aga mena kaneme bidi dawe, te tobage po wabo bomai pogo bomogo aga te pris bidi sęba me mubeo. Menio. Te gamonabo ula elalubo te bomogo naga, te munu me dolisiąbo ulago bomogo aga te pris bidi nigilali.
HEB 7:17 Magi baso meni. Godigo po agade e tiwai po wai, “Nage pris bidi sesemane sogo bidada paibao, te polobadu bidali pris bidi Melkisedek tiwai yaibao,” te po wai.
HEB 7:18 Tama Godigo te hasia polobadu te pris sęde wali bomo yai po te dagala sąyanio. Magi baso meni, te bomo yai pogo bomo usu menio. Te bomo yai pogo da tau me sabo usu ebeo.
HEB 7:19 Te Godigo Mosesgo pedauwalidu mani bomo yai pogo te magi nai me deli te wiegi yai mu ilama sese me pedalubo usu ebeo. Tiali goli Godigo gasa tų me dayali, te wiegi yai elama tama te polobadu mani bomai po te aiyaba elaluai, tama da dwagi yai homu eyu, agai da dali yabo dwagi yai sę asobo sogo bugagia tonaluyu ebadi, te tųdu da te God pąba pomainogo tiai dao. Da polobadu dwagi yai homu eyu tonaluali kolesaga te gesi kolesagago aiyaba elalubo dao.
HEB 7:20 Me po elalubao. Godigo Jisas te pris sęba sa muani, agai aga te olo me sa mubeo. Menio. Agai mu po obao olama, tama aga sa muai. Te polobadu pris nigali bidi dabe augwali dali te tiwai me ebeo. Te Godigo hasia agai mu po obao olama tama augwali te pris bidi pedalai menio.
HEB 7:21 Tiali goli Godigo mu po da po wabogo te Jisas te pris bidi nigilali. Godigo agabolo te po wai, “Ena da Genuai Bidi dao, tama eno mu po da po wai, tama tede eno homu me hasegelegobeo, ‘Nage te pris bidi sę eyu, sesemane sogo bidada peyu, bidada paibao.’”
HEB 7:22 Tama tiyu tama dago koneai, te Godigo agai da tau somainogo eyu dąų wali po olama, tama Jisas da te Godigo dąų wali po du mu walobo sę ilabo bidi dao. Tama te we bidi tau sabo dąų wali gesi pogo te polobadu dąų wali po aiyaba mu elalubo dao.
HEB 7:23 Polobadu te bidi hauwa pris sę ebo bidi bidai. Magi baso meni, te bidi dabe augwaligo te pris sę iduama tama augwali isibaso, te augwa ogwago augwa sę sali. Tama nosali te bidi dabe me isama, tama augwa ogwago te pris sę sali. Tama tiyu, te bidi me deligo sesemane sogo te pris sę eyu me bidigobeo.
HEB 7:24 Tiali goli Jisas da, sesemane sogo bidada peyu, bidada pabo dao. Tama tibaso, agai te pris sę sesemane sogo tonaluyu, tama gasa bidigo aga me hasegelegobeo.
HEB 7:25 Tama tibaso, agai nogide te God pąba asobo we bidi augwali te agai ma siyu, tama dwagi yai madiba mubo sę bugagia ebode aga usu mu dao, tede sǫą pabo meni. Magi baso meni, te agai bidibo ula sesemane sogo elalubo, tama agai gedu haluasa po te Godigo da tau somainogo wabo dao.
HEB 7:26 Da we bidi te magi kolesagade sǫą pobaso, te tobage polalubo pris bidi agai da tau sabo usu mu dao. Godigo gedude aga te wiegi yai mu, tama magi dwai sę delinu te agade me elalubeo. Aga te wiegi yai mu yai. Aga te sęgę dwasianu sai bidi te tiwai me ebeo. Menio. Aga te dwai sę ebo we bidi dali bidibo menio, aga gasagi yai tedali mu dao. Godigo aga ugwaba mu selama, tama agai te dagalu me aiyaba elaluama, tama ugwadu mu bidibo dao.
HEB 7:27 Te polobadu polalubo pris bidi dabe deli deli augwaligo te tigidali sogo te Godibolo nai mabo ofa sę elaluai. Te augwaligo hasia augwa sęgę bolo sela sąbo ofa yai. Tama elama, tama nosali augwaligo te we bidigo sęgę sela sąbo ofa me yai. Tiali goli Jisas aga gasagi yai tedali elalubaso, agai te aga yali dwai sę sela somainogo te Godibolo nai mabo ofa sę me ebeo. Menio. Te we bidi naga tau somainogo eyu agai ofa te deli sogo naga yai. Me sogo te sę ma egobeo, te deli sogo yali te usu dao. Te aga digi aga bidibo ula te Godibolo mawai dao.
HEB 7:28 Tama te Godigo Mosesbolo mani bomo yai pogo te bomo meni yai bidi augwali sa munama, tama augwali te polalubo pris sę ebo bidi bidai. Tiali goli nosali te bomo yai po aiyaba elaluyu, Godigo agai dąų wali pogo aga Ogwa te polalubo pris bidi sę emainogo eyu aga sa muani. Tama te sę bugagia dąų omainogo eyu, Godigo te mu po obao olama tama te sę yao wai. Tama tiyu, aga Ogwa te agabolo mani sę ebode te usu sese mu pedalai dao, sę me delide aga sǫą me pabeo. Tama sesemane sogo aga te tiwai naga tama bidada peyu, bidada paibao.
HEB 8:1 Te dago te wabo po page mu, te po e dao: dago te tobage polalubo pris bidi elalubao, tama aga genuai nogi elalubaso, aga te dagalude te Polalubo Tuni Bidi Godigo dolo nogode dualaluyu megi bidibo dao.
HEB 8:2 Agai te pris bidi sę te Godigo tedali wiegi yai mu bede sę ebao. Te nami ugwago nigali lotu be mu dao. Te bidi dabe augwaligo e tǫde te be me sę ebeo. Menio. Genuai Bidi Godigo naga te be aga bidibo digi sę yai dao.
HEB 8:3 Tigidali polalubo pris bidi augwali deli deli te augwaligo augwali sa munama tama te sęba muani, te augwali deli deligo te we bidi tobade te haniani nai dabe te Godibolo sela pelama ofa iligi pabo sę yai. Tama tibaso, dago polalubo pris bidi me agai ofa me deli elalumainao.
HEB 8:4 Aga e tǫde bidigi sogo da, te aga pris bidi munu me bidigi meni dao. Magi baso meni, te gasa pris bidi dabe e tǫde megi me bidalubao, tama augwaligo haniani nai te Godibolo te ofa ilama mayu ebo dao, te Juda dabego bomai pode wali po tiwai ebo dao.
HEB 8:5 Augwaligo pris sę te tǫde moni lotu bede ebo, te piksa noma naga ola mabo tiwai eyu, tama te wiegi yai sę mu da te dagalude elalubao. Te Godigo Mosesbolo wali po tiwai elama, te Mosesgo te polobadu lotu ugwa be sę yainogo ebo sogo tiwai po wai. Tama Godigo te po wai, “Nage dua dao, te nago te tigidali nai te eno nagebolo te bulu dude ola mani nai te noma tiwai mu usu nama nigao,” te po Mosesbolo wai dao.
HEB 8:6 Tiali goli megi te Godigo Jisasbolo te pris bidi sę mawai dao, tama te mani sęgo te polobadu pris bidi dabe augwaligo yali sę te aiyaba elaluai. Magi baso meni, Jisas agai te God dali, te da we bidi dali, da si tomode te dąų wali po bugagia dodolai. Tama te dąų wali pogo te Godigo polobadu te Juda dabe dali dąų wali po te aiyaba elaluai. Magi baso meni, te gesi dąų wali po weyu tama te po dąų omainogo eyu, Godigo te we bidi bugagia mu tau saibao po wai. Tama te megi mani agai augwali tau saibao wali po, te gesi pogo te agai polobadu dąų wali tau sabo po te aiyaba elaluai.
HEB 8:7 Te polobadu hasia dąų wali pogo aga sę tigidali bugagia egi sogo da, teda Godigo te gasa dąų wali te po me wagi menio.
HEB 8:8 Tiali goli Godigo te we bidi augwaligo sęgę po haninama agai te po wai, “Eno te po obao, ‘Odao! Nosali me sogo te eno augwali tau somainogo eyu, dąų wabo gesi po te Israel hani augwali dali me, te Juda hani augwali dali me dodolama, tama dąų waibao.
HEB 8:9 Te megi e sogo te dąų wabo gesi po polobadu eno te augwa wąį dabe dali dodolama dąų wali po tiwai me ebeo. Menio. Polobadu te eno augwali te Isip tǫ taga somainogo te eno augwali nogo bugagia tulama soali sogo te eno augwali tau sabo po dąų wai. Tiali goli augwaligo eno augwalibolo mani dąų wali po te pode augwaligo augwa homugo kęą pisiąma tama te po wali me pabeo. Tama tibaso, augwali eno tudiba munama tagalali,’” Genuai Bidigo te po wai.
HEB 8:10 Tama Genuai Bidigo po ma wai, “Te tama tiali sogo te hasia silali. Tama nosali eno gasa augwali tau somainogo dąų wabo po augwalibolo mawaibao. E tiwai yaibao. Te eno bomo yai po dabe tigidali te eno augwaligo homu tomoba munama, tama eno augwaligo homu kolesaga tomode te po asęaibao. Tama ena augwaligo God bidiyu, tama augwali te eno we bidi bidiyu yaibao.
HEB 8:11 Tama tigidali bidi deli deligo te augwa hani bidi dabe me te augwa ama dabe bidi hasi augwali ola mabo sę te me elalugobeo, ‘Nago te Genuai Bidi koneao,’ te po wagobeo. Menio. Te sogo te tigidali augwaligo ena bugagia koneyu, te dwasianu wai pulubago me, te genuai bidi dali augwaligo ena koneaibao.
HEB 8:12 Te eno olo tau sabo wiegi yai kolesaga augwali dali eyu, tama eno augwaligo sęgę sela sąyu yaibao. Tama augwaligo sęgę dabe, te eno homugo koneama me egobeo,” Genuai Bidigo te po wai dao.
HEB 8:13 Agai te augwali tau somainogo eyu, te gesi dąų wali pode tama obaso, agai te pogo te hasia dąų wali po te poloba badia pai ugwa tiwai yai dao. Tama te poloba nai te polobadu badia pai nai tiwai elama te monu dabe yai tiwai yali, te aga dwasianu sogo naga bidama, tama te nai tigidali tamadi sia sabo dao.
HEB 9:1 Te hasia dąų wali pode te Godigo te lotu wabo bomai po meba mawai. Tama te lotu wabo be, te me e tǫde sę yai elaluai dao.
HEB 9:2 Augwaligo ugwa be me deli sę yai. Tama te be tomode augwaligo te genuai nami ugwa te obo tiwai dąį ilama walali. Tama e badu, te tų pąde te polalubo be habude te lam me, tebol sai me, te pris bidi dabego te Godigo gedude munalubo bret badi, tama nai munaluai. Te be habu augwaligo nogi yali nogi “Tedali Gasagi Yai Be Habu dao.” Tama te obo tiwai ilama walali nami ugwa te tudi badu te be habu augwaligo nogi yali nogi e tiwai “Tedali Gasagi Yai Be Habu Mu dao” wai.
HEB 9:4 Te wiegi yai denami ilibo alta sai te be habude munaluai. Te alta sai augwaligo ni namigo nigilama, tama te wiegi yai kapa nogi gol, te golgo te ni nami alta sai haluali, tama munaluai. Te Godigo dąų wali po ola maiabo genuai halobage me munaluai. Augwaligo te halobage tigidali badu te golgo naga haluai. Te halobage tomode te gol sene me elalubao, te Godigo te Israel dabebolo polobadu mani tubo nai nogi mana meba me te gol sene tomode munaluali. Te polobadu te bidi Arongo te kulubi pedalali ni dono me, te polobadu Godigo mani nogo si bomai po asęani masigi name si me, te nai dabe me tama te halobagede munaluai dao.
HEB 9:5 Tama augwaligo te kapa gol meba selama, tama te golgo augwaligo te wiegi yai au yai ensel mobo bidi si tiwai nigilama, tama te halobage ugwadu daide munama elaluai, tama te ensel mobo bidi sigo te God bidibo pesage ede da olama sa muani. Tama augwaligo te ensel mobo bidi si e tiwai nigali, augwa bogo dabe ugwaba dodolali, te bogo dabe dologode te polalubo pris bidigo kaneme gelama, te Godigo te Israel we bidi dabego sęgę sela sąbo pesage elaluai. Tiali goli megi eno te sę page tigidali haninibo te usu me egobeo.
HEB 9:6 Augwaligo te tama tiwai nai dabe nigilama, te tigidali sogo te pris dabe augwali te polalubo ugwa be habu tomoba pelama, tama augwaligo te augwa sę egi pidu geai dao.
HEB 9:7 Tama te polalubo tobolu pris bidi agaduba deli naga te si wali be habu tomoba peyu yai. Aga te tigidali kibu bede deli sogo naga peyu yali. Tama aga olo me pabeo. Menio. Agai te ela muani omai bulmakau dali te meme dali te sigo kaneme sela peyu te tomoba pai. Tama te kaneme agai Godibolo ofa mani, te kanemego aga sęgę bolo sela sąnama, tama te we bidi augwaligo bugagia konesiąma yali dwai sęgę me te sela sąmainogo yai dao.
HEB 9:8 Te tama tebo kolesagade te Godigo Mobo Bidigo dabolo e tama ola mobao: tama te polalubo ugwa be habude te ebo sę me elalubaso da, teda da te Godigo dagalude elalubo Tedali Gasagi Yai Be Habu Mu, te be habu tomoba pabo tų, te me dabeo.
HEB 9:9 Te ugwa bego te megi e sogo te sa mubo tiwai te ebao. Te ugwa bede, augwaligo te haniani nai te Godibolo menama, tama augwaligo haniani ofa agabolo mabo dao. Tiali goli te nai dabe tigidaligo te augwaligo te lotu wabo bidi dabe augwali homu dodolabo te usu me ilibe, tama augwaligo wiegi yai mu me pedalobeo. Menio.
HEB 9:10 Magi baso meni, te tiwai Godibolo maiabo ofa te tubo nai tiwai eyu, te tubo ąį tiwai yali, tama haniani wę paubo gagawai yai. Te e tigide bomai po naga dao. Godigo te tigidali bomai po muani te augwaligo wali peyu, te agai tigidali nai gesi nigilama dodolobo sogo usu nigi paibao.
HEB 9:11 Te polobadu augwaligo te ugwago nigali lotu bede tama kolesaga yali. Tiali goli megi da, Krais isaligo da, tama aga te wiegi yai nai dabe pedalabo te tobolu pris bidi pedalai. Tama aga te wiegi yai ugwa be mu tomoba pelama, tama tede aga sę ebo, te be te polobadu tǫde elaluali ugwago nigali lotu be te aiyaba elaluai. Bidigo te nogogo me nigibeo, tama te e tǫde nai menio.
HEB 9:12 Tama Kraisgo te kibu meme kanemego me te omai bulmakau kanemego me te selama, tama aga te Tedali Gasagi Yai Be Habu Mu tomoba me pabeo. Menio. Agai te aga kanemego digi ofa Godibolo elama, tama aga te Tedali Gasagi Yai Be Habu Mu tomoba deli sogo naga palio. Tama tiyu, agai da te sesemane sogo bidada peyu, bidada pabo tede bidimainogo da ma siyu abelai dao.
HEB 9:13 Tama we bidi mebago tigide ebo kolesaga te Godigo gedude meda pedalobaso da, teda te pris dabe augwaligo e tama yali: augwaligo te so kibu bulmakau ela munama, tama ofa eyu aga tigi siaba ulai. Tama augwaligo te keli selama tama ąį dali taluama tama te keli dali, te kibu meme kaneme badi te omai kibu bulmakau kaneme badi selama, tama augwaligo te we bidi dabe augwali tigiba te ąį segeni tiwai sąsąga pali. Te pris dabego tama tiyu, tama te we bidi augwali tigi wiegi yai ma elama, tama meda meni yai te God gedude ma pedaliyu yai dao.
HEB 9:14 Te tama tialigo da, te Kraisgo kanemego digi ofa ebogo te genuai bomo mu elalubao, te hasia ofa yali sę aiyaba mu elaluai. Te Kraisde dwai sę deli agade me elalubeo. Mu menio. Tama te sesemane sogo bidada pabo Mobo Bidigo bomogo, aga digi te aga wiegi yai bidibo ula te Godibolo ofa tiwai elama mawai. Tama agai kanemego dago tigi naga me penebeo. Menio. Te dago yali dwai sę sela sąsiąbo polobadu ofa mabo kolesaga tagalama, tama agai dago homu me penaibao. Tama dago te bidibo ula mabo Godigo sę tulama emainogo agai tama yai dao.
HEB 9:15 Tama Krais te gesi dąų wali po dąų walobo tomode bidibo bidi pedalai. Magi baso meni. Aga isilama, te we bidi augwali ma abelama, tama augwaligo te hasia sogo dąų wali pode me elaluali te bomo yai po bolali dwai sę tigidali yali te sela sąwai, tama megi augwali olo bugagia bidibao. Tama te Godigo i wabo odama te wali pali we bidi tigidali augwaligo te polobadu Godigo aga wai pulubabolo mawaibao wali te bidibo ula somainogo yaibao. Tama augwali tama eyu sesemane sogo bugagia bidada peyu, bidada pomainogo Krais agai te gesi dąų wali po dodolobo tomode bidibo bidi pedalai dao.
HEB 9:16 Te e tǫde te da bidi dabego ebo kolesaga e tiwai dao. Bidi mego te aga nosali isaibao te homu elama, tama dego agai nai dabe sabo po minama, agai te po te pepade asęnama, te dąų wabo po tiwai yaibao. Tama aga waigo te dąų wali po wali peyu, tama aga ayago te doado bage dabe sainogo homu eyu da, teda te bidi dabego hasia bugagia koneao, te aya mu isai dao. Te aga aya isibode naga te aga ogwago te doado bage dabe tigidali saibao.
HEB 9:17 Te bidi isai digi, teda te dąų wali po te bomo elalubao. Tama te po dąų wali bidi bidibadi da, teda agai te dąų wali po te olo elalubo dao.
HEB 9:18 Tama kone palao: augwaligo te kibu bulmakau dali meme dabe elama, tama te kaneme selama, te polobadu dąų wali po me tama dąų waliyu te kaneme gelai dao.
HEB 9:19 Tama tiyu, hasia bolo Mosesgo te tigidali bomo yai pogo te kolesaga yao po te we bidi augwalibolo pusai. Tama nosali agai te kibu bulmakau wai me te meme wai selama, tama elama, tama te kaneme dali, te ąį me, te mama yai sipsip nisi badi, te ni hisop dwasianu nologo me sai. Agai te nai dabe sobadi elama, tama te mama yai sipsip nisi te hisop ni nologoba gebelama, tama te naigo te taluali ąį dali kaneme te Godigo bomo yai po buku daiba me te tigidali we bidi tigiba te kaneme segeni tiwai sąsąga pai dao.
HEB 9:20 Tama tibadi agai te po wai, “Te e kaneme da, te Godigo dagebolo te wali pao dąų wali po te dąų walobo kaneme dao,” te po wai.
HEB 9:21 Tama te tiwai me Mosesgo te kaneme te lotu po wabo ugwa beba me, te lotu wabo doado bage te nai dabe tigidali te pouba me te kaneme segeni sąsąga peyu yai dao.
HEB 9:22 Te bomo yai pogo kolesagade te pąde te tigidali nai te kanemego naga te meda isąwai naga pedalomainogo yai. Tama te kaneme gelisąbaso da, teda Godigo te sęgę sela sąbe da te homu yai dao.
HEB 9:23 Augwaligo tama tiwai ofa yaligo te tǫde elaluali nai dabe peneai. Te nai dabe te dagalude elalubo nai dabe te piksa naga ola mabo tiwai yali dao. Tiali goli gasagi yai ofago te tǫde yali ofa aiyaba elaluyu, te wiegi yai mu yali, tama tego naga te dagalude nai dabe digi te meda meni yai ilibo usu yaibao.
HEB 9:24 Dago koneao, Krais aga te Tedali Gasagi Yai Be habu tomoba peyu, aga te bidi dabe augwaligo nogogo sę yai be tomoba pelama, tama te Godigo be mu tiwai elama te piksa tiwai naga ebeo. Menio. Aga te dagaluba digi tomoba dolo mu pai. Tama megi aga te God gedude hania bidibao, tama agai da tau sabo sę megi ebo dao.
HEB 9:25 Tigidali kibu be tomode te deli sogo te tobolu pris bidigo te Godibolo ofa ilibo kibu bulmakau kaneme sela peyu yali, tama aga te Tedali Gasagi Yai Be Habu Mu tomoba pai. Tama te kaneme te aga kaneme menio. Tiali goli Kraisgo te tiwai me ebeo. Aga te dagaluba pali te aga bidibo ula te Godibolo te ofa ilainogo pali, tama agai te sę hauwa sogo me idu gebeo. Menio.
HEB 9:26 Te agai hauwa sogo te sę egi sogo da, teda aga dene hauwa sogo toloyu, te Godigo tǫ nigali sogo gagalama tama megi e sogoba usu nagasigi dao. Tiali goli menio. Megi e sogo tigidali te pąde silainogo ebaso, tama Krais e tǫba deli sogo naga mu asali, te aga digi aga bidibo ula te Godibolo menama, tama te we bidigo yali dwai sę sęgę sela sąwainogo yai dao.
HEB 9:27 Tama te tigidali we bidi dabe augwali deli deli te deli sogo naga isaibao, te isabo sogo sa muani, tama nosali te augwali Godigo augwali po tų ebo madiba pedalaibao.
HEB 9:28 Te tiwai me Kraisgo te aga bidibo ula aga digi te Godibolo deli sogo naga mani, te we bidi hauwago sęgę sela sąwainogo eyu tama tiai. Nosali te aga si sogo ma asiyu, te agai te sęgę sela sąwainogo me asogobeo. Menio. Te aga ma asobode te dwagi yai homu elama tonaluyu bidali te we bidi dabe augwali naga te agai mu ma sagasaibao.
HEB 10:1 Te Juda dabego ofa mabo bomai pode dago te nosali pedalabo dagalude elalubo wiegi yai nai dabe noma naga subao. Te bomai po da, te nai dabego te hania piksa noma mu menio. Te bomai pogo te po wai, augwaligo te deli tigi poai ofa naga te tigidali sogo yao wai, te tigidali kibu bede me te yao wai. Tama te ofa maiabo bomai pogo te we bidi augwali te God pąba asomainogo dodolobo te usu egobeo. Te bomai pogo augwali te wiegi yai mu munu me pedalogobeo.
HEB 10:2 Menio. Te ofa maiabo bomai pogo augwaligo yali dwai sę sela sąnama tama augwali wiegi yai mu ilama pedaligi sogo da, teda augwaligo te ofa ma egi menigi dao. Tama te Godibolo lotu po wagasali we bidi dabe augwali te deli sogo yali ofade te wiegi yai pedaligi sogo da, teda augwaligo homude te sęgę elalubo homu kone me egi menio.
HEB 10:3 Tiali goli menio. Tigidali kibu bede, te ofa mabo sę ebogo augwaligo te sęgę ma homugo kone palobo.
HEB 10:4 Magi baso meni. Te omai bulmakau kanemego me te meme kanemego me te sęgę sela sąbo te usu munu me egobeo.
HEB 10:5 Tama tibaso, Krais e tǫba dulubo sogo pąba yagasali sogo agai Godibolo e po wai dao: “Nago te augwaligo kibu dabe dali te gasa nai mego te ofa yainogo te nago homugo hagela yai. Tiali goli nago enabolo maiabo te tigi deli te sisi ilai dao.
HEB 10:6 Te ofa dabe augwaligo te kibu tigi sese siago domainogo ulubo ofa me, tama te sęgę sela sąbo ofa me, tede nago homugo hagela ebo dao.
HEB 10:7 Tialima megi eno e po obao: Godio, ena asalio. Te tiwai te augwaligo enade po olama, te po polobadu te bukude asęani, te megi ena asali te eno nago homu kolesaga wali painogo asai dao.” Kraisgo te po polobadu wai.
HEB 10:8 Te po tomode hasia Krais agai te bomai pode augwaligo te ofa ebo kolesaga po wai. Agai Godibolo te po wai, “Nago homugo te augwaligo te kibu bulmakau dabe elama te ofa ebo me, te gasa nai mabo me, tede hagela homu yali. Te augwaligo te siago domainogo te kibu tigi sese ulubo ofa me, tama te sęgę sela sąbo ofa me, te nago homugo hagela ebo dao,” agai te po wai. Te we bidi augwaligo Godigo digi bomai po wali peyu, tama te tobage ofa tigidali mani goli, agai te po wai.
HEB 10:9 Tama nosali agai te po me wai, “Ena asali, te nago homu kolesaga wali painogo asalio.” Tama tiyu, Godigo te hasia elaluali ofa mabo kolesaga tagaliyu hasegelali, tama agai te Kraisgo ofa mani nosali asali kolesaga bomonama dodolai dao.
HEB 10:10 Jisas Krais agai te Godigo homu kolesaga wali pelama, tama aga bidibo ula aga digi Godibolo te ofa tiwai ilama, te deli sogo naga mawai. Tama tialigo agai da tigidali wiegi yai mu ilai dao, te da sęgę me elalubo menio.
HEB 10:11 Te tigidali pris bidi dabe augwali doligulama, tama augwa pris sę tigidali sogo ebo dao. Tama tiyu, augwaligo te ebo ofa tiwai naga me idu gebo dao. Tiali goli te ebo ofa dabego te we bidigo dwai sęde sali sęgę sela sąbo usu munu me egobeo.
HEB 10:12 Tiali goli Kraisgo aga digi te sęgę sela sąbo ofa te deli sogo naga mani, tama te ofa te tigidali sogo usu nama elalua paibao. Agai tama tilama, tama aga megi te Godigo dolo nogode dulalubao.
HEB 10:13 Aga te tiwai bidiyu, tama agai te Godigo aga boi bidi te aga dologoba mubo te tonalubo dao.
HEB 10:14 Te me te we bidi augwali agai te usu niba kadu mu wagasomainu ilali, agai te ofa deligo naga augwali wiegi yai mu pedalomainogo yali, te augwali bugagia mu bidada pabo ula somainogo tama tiai dao.
HEB 10:15 Tama tede me Godigo Mobo Bidigo me e tiwai po dabolo wai dao:
HEB 10:16 “Genuai Bidi Godigo te po wai, ‘Te sogo bolo silibo si, teda nosali te eno gasa po te augwali dali dąų waibao. Te augwali tau sabo dąų wabo po e dao: Te eno bomai po tigidali te augwali homuba munama, tama augwali homu kolesagade eno te po asęaibao.’”
HEB 10:17 Tama Mobo Bidi agai te po ma wadolama wai: “Tama eno augwaligo sęgęba me te augwaligo yali dwai kolesaga teba te eno homugo kone ma egobeo.”
HEB 10:18 Tama tibaso, Godigo te sęgę sela sąwai baso da, teda te sęgę sela sąwainogo te ofa mabo kolesagago te sę me elalugobeo.
HEB 10:19 Ama dedeo, Jisasgo aga digi te dago sęgę sela sąbo ofa tama bugagia yaligo da, teda da wi isąbadi te Tedali Gasagi Yai Be Habu Mu tomoba pabo usu dao. Jisasgo digi aga kaneme geleyu tama isibaso, da te habu tomoba pabo usu mu ilai dao.
HEB 10:20 Aga tigi isibogo te tųde walalubo nami ugwa bogo badu muani tiwai, tama te bidibo ula sabo gesi tų dalali, te da te be habu tomoba painogo yali.
HEB 10:21 Tama aga da, te dago genuai polalubo pris bidi dao, tama aga te Godigo dagalude elalubo be tonalubo bidi bidibo dao.
HEB 10:22 Tama elalualigo da, teda da homu mu eyu, tama homu si me esiąyu dago Godiba konealubo po dąų mu olama, tama da aga pąba pinao. Agai dago yali dwai sę sęgę sela sąnama, tama dago homu wiegi yai ma ilali. Me agai dago tigi sese te wiegi yai ąįgo mu telawali.
HEB 10:23 Tama dago homu nosali da Godigo bidibo digi bidigi paibao. Tama homu eyu, tama dago te gasa we bidibolo te homu ebo po haninama pusali. Awe, dago te konealubo pode dena homu bugagia dąų olama, tama tede homu si me ilamuo. Magi baso meni. Godigo ebo kolesaga dago koneani, tigidali sę te agai yaibao po wabo sę te mu tama agai te sę ebo dao.
HEB 10:24 Da we bidi deli deli dena hasi te dago abagide homugo kone palao. Augwa hasi augwaligo dwagi yai homu eyu godolo ebo kolesaga dali, te dwagi yai tau sabo kolesaga me, te kolesaga si yabo homu hodolomainogo eyu, dago dena abagi dabede homugo kone palama tama tau sao.
HEB 10:25 Tama tiyu, dago te ama dede dali deliba sisinibo kolesaga te me tagalamuo, te bidi mebago te ebo kolesaga tiwai egimio. Menio. Duga koneani, te dago Genuai Bidi Jisas asabo side bodolu te pąba yagasalio. Tama konealigo da, ama dedego homu kolesaga tau siyu dąų walobo sę bomonama dago yao.
HEB 10:26 Te dago te Kraisde mu po mu sai digi tama nosali te dena homugo digi dago te sęgę sabo kolesagade ma bilidubaso da, teda te sęgę sela sąyabo te gasa ofa me elalugobeo.
HEB 10:27 Menio. Te da wi mu elama, tama te po tų yabo bodolu naga tonaluaibao. Tama te sia te posolo yai mu elalubao tama te siago te God dali boi bidi ebo bidi tigidali ulaibao, te me tonaluyu bidaibao.
HEB 10:28 Dago koneani, te bidi me deligo te Mosesgo bomai po hagela homu eyu tama te bolobaso, tama te bidi sigo me selago sulama tama augwaligo agai te dwai sę yali po pusubaso da, teda augwaligo te bidi homu dene munu me ebeo. Menio. Te aga isimainao wai dao, tama te tobolu bidi dabe augwaligo aga ela muani.
HEB 10:29 Te Mosesgo mani bomai po bolali bidi dali te bidi dabego tama tialigo da, teda dagego magi homu te Godigo Ogwa tudiba mubo bidi dali yaibawe? Magi baso menio. Te Kraisgo te Godigo da tau sabo po dąų wali kanemego te bidi wiegi yai ilali. Tiali goli te bidigo dwai kolesaga ma ebogo te po dąų wali kaneme te olo nai tiwai ilalio. Tama agai dwai kolesaga mu te olo tau sabo kolesaga mabo Mobo Bidi dali eyu, tama Mobo Bidi nogi posobo po tama wai dao. Kone palao. Te bidi aga sęgę genuai mu sobaso, te dolo mu dao.
HEB 10:30 Dago koneani, te Godigo me sogo po weyu te po wai, “Te dwai kolesaga wei ponobo sę, te eno yabo sę dao. Ena digi eno te dwai dene sabo te wei ponaibao.” Tama dago koneani, agai po ma wai, “Genuai Bidi aga digi aga we bidi augwali te po tų ebode dagalaibao,” te po wai dao.
HEB 10:31 Te bidibo ula elalubo God agai da dąų weyu, te dwai dene ebo te dabolo wei ponainogo eyu da, te dwai wi mu ebo nai dao.
HEB 10:32 Tiali goli te dageba polobadu pedalali sę te dagego homugo ma kone palao, te sogo dagego Godigo po odama tama tede te ula sai. Te sogo gasa bidi dabe augwaligo genuai sę dene dagebolo mani, tama dagego dene hauwa tolai. Tiali goli dage bomonama bugagia dolaluai dao.
HEB 10:33 Me sogo augwaligo dage te tigidali we bidi gedude dodolama, tama augwaligo dwai posobo po dagebolo wali, tama augwaligo gedude dagebolo dene mawai. Tama me sogo dage te sabo sęgę tiwai sabo we bidi dali dage kisa selama, tama dagego augwali tau sai dao.
HEB 10:34 Tama tiyu, dagego te kalabuside bidali we bidi augwali homu dene eyu tau sobadi, te dagego me te dene sali. Tama me sogo te bidi dabe augwaligo bomonama dagego doado bage dagala siyu yali goli, dagego homu wiegi yai pemene eyu, tama augwaligo te nai dabe sabo gogolali. Magi baso meni, dagego koneani, tama duga nai digi mu da, te tedali me elalubao homu yali, te Godigo dagebolo maiabo nai dabe, tama te nai da te sesemane sogo elalua pabo nai dao.
HEB 10:35 Tama tibaso, dagego duga te bomai konealubo po dąų wali te munu me tagaligio. Menio. Te kolesaga me ebogo te genuai nai nosali sabo bomo te elalubao.
HEB 10:36 Dage bomo elama dolaluyu, tama sęgę bugagia toloyu, tama duga te Godigo homu wali pagameo. Tama tiyu, duga wiegi yai nai somainogo yaibao, polobadu Godigo te nai dagebolo mawaibao po dąų wai dao.
HEB 10:37 Magi baso meni. Godigo wali po te bukude asęani me e tiwai po elalubao: “Te sesabi me egobeo. Dwasianu sogo digi, tama te asobo bidi te aga sabolaibao. Te aga gesege elama me tonalugobeo.
HEB 10:38 Tiali goli eno doloba pai we bidi augwaligo enade konealubo po wali pobaso, tama augwali bidada paibao. Tialima augwali tomode te bidi me deligo ena tagaliyu tama ibaba kila sobaso da, teda eno homu aga dali wiegi yai me egobeo,” te po wai.
HEB 10:39 Tiali goli da te ibaba kila selama te hagayabo we bidi te me tegobeo. Menio. Da te konealubo po dąų wabo we bidi hani dao, tama God agai da ma dobola sabo dao.
HEB 11:1 Te konealubo po dąų wabo kolesaga te e tiwai ebo dao: te da Godide tiąlubaso da, teda te da dwagi yai homu eyu asobo tonalubo naide da hania konebao, Godigo te nai dabolo mu mawaibao. Tama dago gedugo susiąwai nai digi, tede dago homu si isąbadi te dago homugo mu konealuai.
HEB 11:2 Te polobadu e tǫde bidali we bidi meba augwaligo Godide konealubo po dąų olama tama agade tiąlubaso, tama Godigo te po wai, “Augwaligo kolesaga te wiegi yai yalio,” te po wai dao.
HEB 11:3 Dago Godide konealubo po dąų olama tama agade tiąlubaso, dago koneani, Godigo agai po wabogo e tǫ de dagalu si nigai. Tama agai tama tialigo da, tigidali nai megi dago gedugo subo, te Godigo dago susiąbo naigo nigai dao.
HEB 11:4 Te polobadu bidali bidi nogi Abel agai konealubo po Godide dąų weyu, tama agade tiąluyu agabolo ofa yai. Tama te ofago te aga ama Keingo ofa yali te aiyaba elaluama tama wiegi yai mu yai. Awe, Abelgo Godide tiąluali, tama tego Godigo aga doloba pai bidi nogi yai. Godigo te Abelgo agabolo mani naide te agai godolo yai. Tama nosali Abel isali, tiali goli agai te Godide tiąlubo kolesaga yaligo te po dabolo me ola mabo dao.
HEB 11:5 Te bidi Enokgo konealubo po Godide dąų olama tama agade tiąlubaso, tama Godigo aga dagaluba sela holai. Aga me isibeo. Meni. Te bidi dabe augwaligo aga gegebo sę yali, tiali goli augwaligo aga me subeo. Godigo aga salio. Tama Godigo po bukude te po wai, “Polobadu Godigo Enok sisąbadi, tama te sogo Enokgo Godigo homu kolesaga wali paligo da tama tede Godigo godolo yai,” te bukude te po asęai dao.
HEB 11:6 Tama bidigo Godide tiąluama tama agade konealubo po dąų me wasiąwani bidi, agade te Godigo dwagi yai homu egobeo, godolo munu me egobeo. Magi baso meni, te bidigo Godibolo lotu po wagi painogo homu ebaso da, te bidigo konealubo po Godide dąų olama agade tiąluyu bidao. Tama tiyu, agai e homu dolo yao: “Awe, God aga mu bidibo dao, te aga gegebo we bidi dabebolo agai wiegi yai nai nosali mu mawaibao,” te homu aga dolo yao.
HEB 11:7 Te Godigo te bidi Noabolo po weyu, “Te nago gedugo susiąwai nosali pedalabo sęde dua yao,” te po wai. Tama te bidi Noa agai Godide tiąluama tama konealubo po dąų obaso, agai te Godigo agabolo te aga gedugo susiąwani naide pusali po bugagia odali. Tama te po wali peyu, tama agai te moni geba me deli nigai. Tama tiyu, aga dali, aga we wai puluba augwali te geba tomoba pelama, tama bugagia bidali, tama augwali me dolobeo. Te geba sę tama ebogo Noago te tǫde we bidi tigidali augwaligo dwai sęde po tų ela mabo tiwai yalio. Tama te bidi Noa aga Godigo wali pode tiąlubo kolesaga elalualigode Godigo Noa te doloba pai bidi da wali, te Godigo tigidali konealubo po agaba dąų wabo we bidi dabe dali ebo kolesaga yalio.
HEB 11:8 Te bidi Abrahamgo konealubo po Godide dąų olama tama agade tiąluyu bidali. Tama tibaso, Godigo aga i obaso, tama Abrahamgo Godigo po wali pai. Tama tiyu, aga bidali bulu tagalama, tama Godigo aga tǫ mu dolo te agabolo mawaibao wali tǫ teba pabo gagalali. Abraham aga menaba pogowe te agai me konebeo. Tiali goli aga Godigo agabolo wali pode aga homugo tiąluama, tama aga page bulu taga pai dao.
HEB 11:9 Tama aga Godide tią peyu, tama Godigo agabolo polobadu te mawaibao po wali te tǫde bidaluali. Tama aga te tǫde bidali te gasa bidi hanigo tǫde bidibo tiwai yai. Aga te ogwa Aisak de Jekop si dali te osogo bidabo ugwa bede bidaluali. Te agabolo te tǫ saibao wali po, te Godigo te tiwai po polobadu wai dao, tama Godigo te po te bidi sibolo me nosali ma dąų walali.
HEB 11:10 Tama Abraham aga te osogo bidabo ugwa bede bidibode te usu da homu magi baso idualiwe? Woo, sesemane sogo aga te gamonabo hanu suabo homu yai. Abraham aga te hanu tomoba pabo sogo tonaluai. God agaduba deligo naga agai te hanu nigibo homu kolesaga koneama tama aga digi nigai dao.
HEB 11:11 Tama Sarago me konealubo po Godide dąų olama tama agade tiąluali. Agai wai ame nabo sogo bodolu silai madi, tiali goli agai konealubo po dąų elaluali, tama agai wai ame nabo bomo usu yai. Sarago e tiwai homu yai: ‘Godigo po dąų weyu eno wai ame naibao wai. Tama Godigo mu po naga wabo dao,’ Sarago te homu yai.
HEB 11:12 Tama te bidi deli, aga monu dabe elama tama pąde isainogo yai goli, aga te wai hauwago aya pedalai. Tama augwali hauwa mu pedaludubadi geai, te dagalude elalubo hǫ dabe tiwai me, tama te tamu ąį sanede elalubo masigi sane tiwai pedaludali. Te bidigo augwali nedebo me usu egobeo.
HEB 11:13 Tama te Abraham dali Sara dali, te Aisak me Jekop, te we bidi augwaligo konealubo po dąų olama Godide tią peyu bidaluama tama augwali isalio. Tama augwali e tǫde bidali sogo, te Godigo polobadu augwalibolo te nai mawaibao po wali, te wiegi yai nai augwaligo me sabeo. Menio. Augwali digibulu dolaluyu, tama augwaligo augwa homugo naga te Godigo augwalibolo maiabo nai sulama, wiegi yai homu pemene yai. Tama augwaligo te gasa we bidibolo te po haninama hania wai, “Da e tǫde bidibao te gasa bulu bidi tiwai bidibao. Da e tǫde dwasianu sogo naga bidagasai dao.”
HEB 11:14 Te bidi dabe augwaligo te tiwai po obaso, te dago kuna koneai, te augwaligo te augwa mu bidigi pabo tǫ mu gegainogo homu eyu te po obao.
HEB 11:15 Tama augwali homu te polobadu taga soali bulude me elalugi sogo da, teda augwa ma geasa asabo tų elalugi da.
HEB 11:16 Tiali goli augwaligo te tiwai me ebeo. Menio. Augwaligo homu gasa tǫba paiba homu elaluali, tego te augwaligo taga soali bulu aiyaba elaluama tama wiegi yai mu yalio. Te dagalude elalubo dao. Tama te po wabo bidi dabe dali te Godigo hale homu me egobeo, “Nage dago God dao,” te po wabo. Menio. Agai te agade konealubo po dąų wali bidi dabe dali hale homu me isąbaso, agai te augwali bidabo hanu me deli sisi elama elaluai dao.
HEB 11:17 Polobadu Godigo Abraham usu sai. Hasia bolo Godigo agabolo te po wai, “Te eno nagebolo te bulai wai dabe umabo mawaibao, te po wai dao. Tama megi eno e po obao, te nago ogwa Aisak, te agade te augwali nosali pedalaibao,” te po wai. Tama nosali Godigo Abrahamgo agade konealubo po dąų wabo kolesaga osola suainogo eyu, tama agabolo te po wai, “Nago naga ogwa Aisak digi selama, tama aga ela munama, enabolo te ofa tiwai mao,” te po wai. Abrahamgo koneani, te Aisak da, te aga nosali pedalabo hani we bidi page mu dao. Tiali goli agai te Godide konealubo po dąų weyu, tama agade mu tią pobaso, tama agai te ofa tiwai eyu tamadi tama aga Aisak elama Godibolo mawainogo yai.
HEB 11:19 Magi baso meni, agai e homu yai, “Awe, te eno aga ela munama tama Godibolo mobaso, teda Godigo te aga ma hodolama enabolo ma mabo bomo usu mu yaibao,” te homu yai. Tama mu tamao, dago te sęde po digi po begelama e tiwai po wai: “Abrahamgo aga ogwa Aisak te gų pagede ma sabo tiwai ąǫ yai dao.” Te po wai.
HEB 11:20 Aisak me aga Godide konealubo po dąų olama agade tią peyu bidibaso, tama agai aga ogwa si Jekop de Iso siba nosali pedalabo sęde po pusali. Godigo augwali sibolo dwagi yai sę yaibao po agai dąų walali.
HEB 11:21 Te nosali Jekop me agai Godiba konealubo po dąų olama tama agade tią peyu bidibaso, tama aga pąde isainogo ebo sogo, agai te aga ogwa Josepgo ogwa side dwagi yai po wai. “Godigo augwali si dali wiegi yai sę yaibao,” te po wai. Tama te sogo aga te aga donoba tigulama, tama Godibolo lotu po wai.
HEB 11:22 Te nosali Josep me agai konealubo po Godiba dąų olama agaba tią peyu bidibaso, tama aga isainogo ebo sogo agai te po wali, nosali te Israel dabe augwaligo te Isip tǫ tagalama gasaba paibao wai. Tama augwaligo agai dili dabe te sogo teba sela pelama, gasa tǫde pubulao po me wai dao.
HEB 11:23 Te Mosesgo aya de ida sigo konealubo po Godiba dąų olama agaba tią peyu bidai. Tama te Mosesgo idago aga te Isip bulude ame nenama, tama augwali sigo suali, aga sawi yai wai mu bidai. Tama tibaso, polua selade augwali sigo aga geme dualama bidai. Te Isip gavman tuni bidigo bomai po weyu, te po polobadu gana wai dao, “Te Israel dabego we dabego te wai ogwa dabe ame nobaso, augwali ela muao,” te po wai. Tiali goli augwali si te tuni bidigo bomai pode wi me ebeo. Tama tibaso polua selade augwali sigo aga geme dualama bidai.
HEB 11:24 Te bidi Moses me agai konealubo po Godiba dąų olama tama Godide tią peyu bididuali. Tama tibaso, nosali aga genuai yaide, te Isip dabego aga te Isip tuni bidigo wegigo negali wai da nogi wabo te tagalao, agai te homu yalio.
HEB 11:25 Magi baso meni, aga digi te aga Godigo hani te Israel we bidi dali dene sabo homu yai. Agai koneani, aga te tuni bidigo wegigo negali ogwa me bidiyu da, teda agai nosali dwai sę eyu bidagameo. Tiali goli te pęwadage sogo naga tede wiegi yai homu pemene yaibao. Tama hagela homu yai dao.
HEB 11:26 Agai te homu yali, te aga te nosali asaibao wali bidi Kraisgo nogide hale siyu da, tego te tigidali mone me te Isipde elalubo te au dobage dabe te aiyaba mu elaluaibao. Tama te gasagi yai wiegi yai nai te Godigo agabolo mawaibao po, tede aga homugo kęą palio.
HEB 11:27 Te bidi Mosesgo konealubo po Godiba dąų olama tama agade tią piduali baso, agai te tuni bidigo sębę homu ebode te aga wi me ebeo. Meni. Aga hogodolama tama Isip tǫ taga soali. Te e tǫde bidigo God gedugo me susiąbo digi, tiali goli Mosesgo te God subo tiwai yali, tama tiyu aga bomo elama geasa ma pabeo.
HEB 11:28 Agai Godide mu tiąlubaso tama agai te Israel we bidi te tedali sogo nogi Pasova tede yabo kolesaga ebo sę ilali. Te bidi elabo mobo bidigo te Israel dabego gomunai ogwa tigidali ela muidali weyu, agai augwalibolo te po wai, “Te duga be deli delide kibu sipsip wai elama, tama te kaneme te be tų sesegede pos niba segeni tiwai sąsąga pao,” te po wai.
HEB 11:29 Te Israel we bidi dabe augwaligo Godiba konealubo po dąų olama tama agade tią piduali baso, te Isip tǫ taga soali sogo augwali te tamu ąį nogainu, tama Godigo te ąį buga somainu ilama, tama augwali te wa pai tǫ tiwai elalubo tomo tųdu nogai. Te augwali pobeasa asobo Isip dabe augwali me te ąįdu usu selama nogali, tiali goli te ąįgo augwali elama, tama poma pobaso te wę tomode isila pai dao.
HEB 11:30 Te nosali te Israel dabe augwaligo Godiba konealubo po dąų olama tama agade tią piduali baso, tama augwali pelama tama Jeriko hanu bagulali masigigo nigai obo te a naga olama me badu nogo si sogo usu nama bagulali, tama te masigigo nigali obo te tǫba degasa dulai dao.
HEB 11:31 Te sę pedalisiąbadi, tama te hanude bidali penani ebo we Rahap agai te Godigo te Israel dabe tau sali po odoyu, tama agai Godide aga homugo tiąluali. Tama tibaso, agai te bulu geme sa pelama sugi pali Israel bidi si tau salio. Tama te we aga te Godigo po sela sąwani we bidi augwali dali me dolobeo.
HEB 11:32 Tiali goli dagego te Godide tiąlubo kolesaga page bugagia konemainogo eyu, megi eno mena po me wadolama tama ma wagowe? Menio. Te eno te bidi Gideonde po wabo sogo me, te Barak me, te Samson me, te Jepta me, te Devit de Samuel, me te Godigo po pusali profet bidi dabe augwalide po eno wabo sogo te usu menio.
HEB 11:33 Te tobage bidi dabe augwaligo te Godiba konealubo po dąų olama tama agade tią piduali baso, tama augwaligo te wąbi hwįbo bomo ugwaba ela holoyu, tama te tuni bidi hauwago ami bidi dabe augwali aiyaba elaluyu yai. Augwaligo doloba pai kolesaga yai, tama augwaligo te Godigo augwalibolo mawaibao po wali nai me salio. Augwaligo te bidi ela tubo moni kibu laion dabego pedauwali pania siyu yai dao.
HEB 11:34 Tama augwaligo te moni sia bogoli ebo me sula sąyu yalio. Tama me te augwali wi pidu gebaso te gasa bidi dabego te bobage hwą gego te augwali elali te usu me ebeo. Tama augwali bomo meni yai bidilama, tama nosali augwali bomo sai. Augwali te wąbi hwįbode bomai bidi mu pedalai. Augwaligo te gasa hanigo genuai ami bidi dabe augwali aiyaba elaluyu pobeasa peyu yai dao.
HEB 11:35 Te we dabe meba augwaligo Godide konealubo po dąų olama tama agade homugo tią piduali baso, tama isai ogwa dabe augwali ma hodaloyu elama, tama augwa idago augwali ma siyu yali. Tama gasa bidi meba kalabus elama tama boi bidi dabego augwali tigi mu dolali, te augwali isabo usu tiwai mu yai. Tama augwaligo te God tudiba mugi sogo da, teda te boi bidi dabego augwalide te tebo sę tagaligi dao. Tiali goli augwaligo te boi bidi dabego po te augwaligo wali me pabeo. Menio. Augwaligo homugo te augwali gų pagede ma hodaloabo te homu elama, tama augwaligo tebogo te bidabo wiegi yai ula sabo homu naga yalio.
HEB 11:36 Tama te Godide konealubo po dąų wali we bidi meba te boi bidi dabe augwaligo te dwai posobo po sęgę siyu, tama augwali dodolama te dwai bįgo subigila elali, tama sengo augwali kęnama, tama augwali kalabusiba muyu yai dao.
HEB 11:37 Tama augwali tigiba te boi bidi dabego masigi sąyu ela muyu yai. Tama augwaligo te ni togobo so selama, tama augwali tigi te sogo togolama pedai pedalai. Tama augwaligo te bobage hwą gego augwali ela muyu yai. Tama te konealubo po dąų wali we bidi meba augwali nai meni yai baso, augwaligo te kibu sipsip tigi waligo me te meme waligo te ugwa tiwai gudama, tama augwali bilalio. Augwali te tigi tau sabo doado bage tigidali menia sali, tama te bidi dabego sęgę augwalibolo mayu, tama dwai kolesaga mu augwalibolo yai dao.
HEB 11:38 Tama tibaso, augwali tedela pelama, tama geme te bidi meni yai buluba me, te bulu duba me, te masigi ola beba me, te tǫ dedage tomoba me geme bidigi peyu yai. Augwali te wiegi yai we bidi mu, tama e tǫde we bidigo te bidi dabego konealubo po dąų wabo te dali usu nisiąyu, tama augwali tomode me bidigi homu elama augwali dali boi bidi mu yalio.
HEB 11:39 Te tobage polobadu bidali Godiba konealubo po dąų wali tigidali we bidi, tama augwali te God gedude wiegi yai nogi mu sai, agai augwalide ‘Augwaligo kolesaga te wiegi yai yali,’ te homu yai dao. Tiali goli augwaligo te wiegi yai nai polobadu Godigo augwalibolo te mawaibao po wali nai te augwaligo te sogo me sabeo.
HEB 11:40 Magi baso meni, polobadu digi Godigo wiegi yai nai me deli dabolo sisi ilama dodolali elalubao. Tama aga homugo te polobadu agade tią pai we bidi dabego da nosaliba ilama augwali polasa peyu tama te wiegi yai mu me pedalogobeo. Menio. Te da me doloba pai wiegi yai mu augwali dali naga pedalaibao, Godigo te tama homu eyu dodoloyu yai dao.
HEB 12:1 Te da me, da magi ebawe? Te polobadu bidali we bidi augwali doligulama tama da te genuai pǫgo bagulubo tiwai elama, tama augwaligo dabolo te Godide konealubo homu dąų wabo kolesaga ola mawai. Tama tibaso, dago me te ususu si yainogo uda yabo bidi tiwai eyu, te tigidali sęgę yai nai guda sąyao, te dade dąų wabo dwai kolesaga tigidali me te dago guda sąyao. Tama dena homu dąų ilama, tama Godigo dabolo sa muyu uda yao wali madi sabolainogo da bomonama te dąįba uda iyąo.
HEB 12:2 Tama tiyu dago gedugo Jisasba naga tonono iyąo, aga te dago agade konealubo po dąų wabo kolesaga page bidi, tama nosali agai dago agade tią pabo kolesaga ebo mu usu naibao. Polobadu Jisas aga homugo te wiegi yai homu pemene yabo sę te nosali sabo homu elama, tama aga bomo elama bidali, tama aga dene bugagia tolama aga ni pedaide isai. Agai homugo te ni pedaide hale sabo te olo nai tiwai da, te homu yai. Tama megi da agai genuai nogi elalubaso, aga te God dulalubo sia saide te dolo nogo badude megi dulaluyu bidibo dao.
HEB 12:3 Dagego te bidi Jisasde bugagia kone palao. Te sęgę sai bidi dabego polobadu augwaligo dwai boi bidi mu aga dali eyu, tama aga dwai dene mawai. Tiali goli aga bomo elama dolaluai. Dagego te tiali koneba wida, te dage te Godide tią pabo kolesagade hagela me egio, tama dagego homu nagamea me pelamu dao.
HEB 12:4 Te Godigo po odobo hagela homu ebo bage augwaligo dage dali dwai sę elama, tama dage bomonama eyu, te Godide konealubo po dąų wabo kolesaga tagalobeo. Tama tiyu dage bomonama ebadi te boi bidi dabe augwaligo dage elama, pąde isainu yai. Te gasa bidi dabe augwaligo Jisas dali dwai sę eyu aga ela muyu yali. Tiali goli te dagede meni.
HEB 12:5 Te Godigo dagego homu bugagia dąų walomainogo bomo mayu wali po te dagego homugo gegeda pai dawe? Agai dage te aga wai da olama nogi ilama, tama agai te po wai, augwaligo te bukude asęani, “Te eno waio, te eno nage dodolobo kolesaga me deli nagebolo ebaso da, nago homugo te olo nai tiwai da me wagio. Nago geda muani kolesagade bugagia kone palao. Te eno sęgę nagebolo mayu te nage dodolobaso da, teda nago homu me dolamu dao.
HEB 12:6 Magi baso meni, te eno bidi me deli godolo ebaso da, teda agai kolesaga te eno dodolaibao. Tama eno bidi me deli selama tama eno wai da wabo nogi eyu da, teda eno te aga dodolobo dao, te bidigo aga ene sigi te siade ulama tama nogogo dodolobo tiwai ebogia yaibao,” te po wai.
HEB 12:7 Te dage bomo elama dolaluyu, tama Godigo dage dodolomainogo emainao. God agai dagebolo ebo kolesaga ebogo dage te aga wai mu dao te hania ola mabo dao. Mena wai bidibadi tama aga ayago aga me dodologobewe?
HEB 12:8 Menio. Godigo aga wai dabe tigidali dodolobo dao. Tama agai dage dodoligi menigi da, teda dage te agai wai mu menigi da, dage te tųde biliyu penani ela bilibo wego wai tiwai egi da.
HEB 12:9 Dagego te me koneao. Te dena e tǫde aya augwaligo da dodoloyu yai, tama dago augwali nogi ugwaba sai. Teda dago dagalude bidibo Aya dologoba mu pelama, tama dago te bidibo ula mu sao.
HEB 12:10 Te da te ogwa wegide bidibadi, dago e tǫde aya augwaligo te dago kolesaga te dwasianu sogo naga dodoloyu, te augwaligo homu kolesaga usu nama tama tiali. Tiali goli God agai da dodolobogo te da mu tau selama, tama dago te aga digi ebo te wiegi yai magi dwai sę isąwai kolesaga saibao wai.
HEB 12:11 Tama God Ayago sęgę dabolo mani te da dodoloyu ebaso da, tama te sogo dago wiegi yai homu pemene me ebeo. Menio. Dago homu te sęgę naga me elalubao. Tiali goli agai da dodolali tama te tiwai wiegi yai nai nosali pedalaibao wai: dago doloba pai kolesaga eyu, tama dago homu nagame elama bidaibao.
HEB 12:12 Godigo te dago ebo kolesaga dodolobo sę tama yaligo da, teda dagego agai po wali pabo kolesagade dage te bomo kimi isali bidi tiwai eyu biligimio. Te meni. Te dagego nogo te olo walalubo tiwai elalubo, te tagalao, dagego bomo ma sao. Tama te sągą kidu isai tiwai ebaso da, tagalama, te duga bomo elama dolaluao. Dage Godigo po wali pobadi, te dolo wiegi yai kolesaga naga yao, te bilibo bidi agai te dwagi yai dolo tųdu naga pabo tiwai yao. Te dage tomode bidibo bidi me deli aga Godigo po wali pabode bomo meniama tama aga tulaluidali weyu, dagego aga tau somainogo eyu, te dolo wiegi yai kolesaga naga eyu bidao.
HEB 12:14 Dage deli deligo te tigidali bidi dali te homu nagamea pabo kolesaga wali pabo sę bomo elama yao. Tama dagego te Godiba homugo kęą peyu, te dwai sę me isąwai kolesaga me wali pabo sę bomo elama yao. Magi baso meni. Te bidigo te tobage kolesaga meni yani da, teda agai dago Genuai Bidi me sugobeo.
HEB 12:15 Te ama me deli tula muyu tama Godigo te olo tau siyu mabo kolesaga tagalidali weyu dagego bugagia tonaluao. Tama tiyu dage tomode pedalobo ama me deli aga te ha ebo nedu du tiwai walama, tama dagebolo sęgę menama, tama dage God gedude meda yai pedelabuo.
HEB 12:16 Tiyu bidi me deligo te penani ebo kolesaga wali pabuo. Tiyu bidi me deligo te God tudiba muyu, te polobadu Isogo yali tiwai idalio. Te aga amade te tubo nai deli sogo naga abela tuali, tama agai te aga digi gomunai ogwa da wali bomo me, nogi me, te sigo te tubo nai abelama tama aga olo sąwai dao.
HEB 12:17 Dagego koneani, nosali agai te yali sęde ge neyu, tama te gomunai ogwa da wali bomo dali nogi dali si ma sainogo yali, tiali goli aga ayago te menio po wai. Iso aga te gomunai bidi nogi ma sainogo te gela hauwa wali, tiali goli te aga dąų wali po togobo te tų menio.
HEB 12:18 Megi dagego te Israel hani we bidi augwaligo polobadu mu yali sę tiwai ebeo. Augwali te augwa nogogo tula subo naiba asali, te bulu du nogi Sainai teba augwali asali. Te bulu dude augwaligo suali, te genuai sia dabo, tama be hulia si te sisi yai mu me, te bomai wali dali be sele dali be kulu wabo dali,
HEB 12:19 tama te bu wabo nai biugel moni bu wabo dali, te Godigo po wabo me, augwaligo te suali me odali. Tama te Israel we bidi augwaligo te po wabo odolama, tama augwali wi eyu, tama bomo elama Mosesbolo te po wai, “Dago te po wabo ma odobo usu egobeo,” te po wai.
HEB 12:20 Magi baso meni. Te Godigo augwalibolo mani bomai po, te po odolama augwali wi mu yai. Agai te po wai, “Te bidi me deligo nogo munama te bulu du nogogo diąbaso da, teda dagego masigi agaba sąnama tama aga ela muao. Tama bulmakau ma sipsip dabe me te tiwai naga elama ela muao,” te po wai.
HEB 12:21 Augwaligo suali nai te dwai mu baso tama Mosesgo me te po wai, “Ena wi mu elama, tama eno tigi didibili mu ebao,” te po wai.
HEB 12:22 Tiali goli dage, dage te tiwai naiba me asobeo. Menio. Dage te Saion bulu duba asai dao, tama te bidibo ula mabo God bidibo moni hanu te dao. Te bulu da te dagalude elalubo Jerusalem hanu dao. Te moni umabo ensel mobo bidi dabe augwali sisinama te wiegi yai homu pemene ebo madi, teba dage asai dao.
HEB 12:23 Dage te Godigo gomunai ogwa dabe augwali sisinama te bidibo madi, dage teba asai dao. Godigo augwali nogi asęani, tama te asęani po Godigo bidibo digide elalubao. Dage pąba dolagasali, tama po tų dodolobo bidi jas aga bidibao, aga te tigidali we bidigo God dao. Polobadu mu bidai we bidi meba, augwali isama tama Godigo augwali doloba pai we bidi ilama tama augwaligo po wabo mobo noma me bidibo dao. Tama dage augwali bidibo digi asai dao.
HEB 12:24 Tama dage Jisasba asai dao. Godigo da we bidi tau sabo po olama dąų walali. Tama te dąų wali tau sabo po dabolo waselemainogo eyu Godigo Jisas tagala palali, tama aga tomode bidiyu te dąų wali tau sabo po dodolali. Te polobadu bidai bidi Abel aga amago aga ela mubaso, aga gelali kanemego “Boi yao, boi yao,” po wali tiwai bidai. Tiali goli Jisasgo kaneme te dago sali dwai sęgę te sela sąbo kaneme dao, te boi ilabo kaneme meni. Tama teba me dage asai dao.
HEB 12:25 Dage dua dao. Tiyu dage olo pania selama tama megi e po wabo bidigo po sela sąyabuo. Polobadu digi e tǫde Godigo bomai po te we bidi augwalibolo mani, tiali goli augwaligo agai po sela sąwai. Tama te sogo polobadu, te augwali wi me pabo usu meni eyu, tama augwa sęgę te geda sabeo. Megi God te dagalude bidiyu dabolo agai po mawai. Tama dago aga tudiba muyu da, te da wi peyu te dabolo mabo sęgę geda sabo usu egowe? Mu menio.
HEB 12:26 Tama polobadu Godigo pedauwalide tǫ mali ilai. Tiali goli megi agai dabolo e dąų wali po walio, “Te eno tǫ deli sogo ma mali ilaibao. Tama tǫ naga me tegobeo. Te eno tǫ de dagalu dali si mali ilaibao.”
HEB 12:27 Te pogo “Te deli sogo ma” weyu te po wai, agai dabolo e tama ola mawai: te polobadu Godigo nigali nai dabe tama megi agai dagalama, tama te nai dabe aga sela sąnama, tama me elalugobeo. Tama agai te dagalisiąbo nai dabe da, te me elaluaibao.
HEB 12:28 Te dago sali te bidibo digi te magi naigo munu me dologobeo, usu egobeo. Tama te tebode dago Godibolo usu da olama gedu haluasa po wao. Tama dago agaba lotu po weyu, tama agai godolo ebo kolesagade sę tulama yao. Tama tiyu dago aga nogi ugwaba siyu, tama agade wi yao.
HEB 12:29 Magi baso meni, dago God da, aga te tigidali nai dabo genuai sia tiwai dao.
HEB 13:1 Dage Godigo po wali pabo we bidi, sesemane sogo dagego duga hasi duga ama dede dali dwagi yai homu eyu godolo iduao.
HEB 13:2 Dagego te duga beba digibulu asobo bidi dabe augwali tau sabo homu ebo te dagego me gegeda pigio. Duga koneani, polobadu bidi mebago te tiwai elama, tama augwaligo te ensel mobo bidi meba te augwa beba odasa pelama, augwali gesali. Augwaligo te ensel bidi asobo me konebeo. Augwaligo te bidi naga da te homu yai dao.
HEB 13:3 Dagego te ama dede augwaligo Krais wali pobaso te boi bidi dabe augwaligo augwali meba kalabus beba muani. Tama te kalabuside bidibo ama dabe dagego homugo konealuao, augwali tau sao, te duga digi te kalabuside augwali dali bidibo tiwai ebao. Tama te bidi dabe augwali tigide sęgę sabo te dagego homugo koneao. Dagego koneani, te duga me tigi elalubo dao.
HEB 13:4 Tama te we sabo te wiegi yai kolesaga dao, te we bidi tigidaligo te homu yao. Dagego e tama yao, te bidi dali aga we dali augwa hasi te homugo kęą pai kolesaga naga yao. Dagego koneao, nosali Godigo te penani yali we bidi me, te we sabo kolesaga dolali we bidi dali, augwalibolo te wei ponabo te dwai dene genuai sabo te elalubao.
HEB 13:5 Dagego te monede pesą eyu godolo ebo kolesaga wali me pigio. Te dagego tolalubo naide te dagego e tiwai homu yao, “Te wiegi yai dao. Te ena usu yaibao.” Magi baso meni, Godigo digi te po walio, “Te ena nage munu me tagalogobeo. Te eno nage tudiba munu me mugobeo.”
HEB 13:6 Tama Godigo te po obaso, dago dena homu bomonama tama dago e tiwai po waiyąo, “Genuai Bidi da ena tau sabo bidi dao. Te ena wi me egobeo. Te bidi dabe augwaligo ena dali ebo dwai kolesaga tigidaligo ena dologowe? Menio!”
HEB 13:7 Dagego duga tobolu bidi dabego yali kolesaga homugo bugagia koneao, polobadu augwaligo Godigo po dagebolo pusai. Dagego augwali bilali kolesaga dali, augwali isali kolesaga dali si homugo koneama, tama augwaligo konealubo po dąų weyu Godiba tią pali kolesaga te wali pao.
HEB 13:8 Jisas Krais aga munu me hasegelegobeo. Polobadu aga hasegelebeo, megi aga hasegelebo meni, nosali aga munu me hasegelegobeo. Aga ebo kolesaga deli naga me ela piduaibao.
HEB 13:9 Tama tibaso, te gasa haniani haniani ola mani pogo dagego homu kegeyu, tama dagego Godigo tų wali pabo tagalu gogologimio. Te dago homugo te Godigo da olo tau siyu mabo kolesagade dago bomo sai yai baso da, te wiegi yai dao. Dago homugo te haniani nai tubode bomai po wali pabode te bomo sainogo ebo usu egobeo. Te kolesagade bilali we bidi augwali te kolesagago tau me sabeo.
HEB 13:10 Dago ofa ebo alta sai tiwai elalubao, tama tede dago Godigo nogi ugwaba sabo po wabogo te ofa tiwai agabolo mabo dao. Tama te Juda dabego pris bidi dabe augwaligo augwa lotu wabo te ugwa bede sę eyu, augwaligo te dago ofa tiwai ebo kolesagade sę meni.
HEB 13:11 Tama tigidali kibu bede te Juda dabego polalubo tobolu pris bidigo te sipsip dabe me te bulmakau me te kaneme selama, tama agai te Tedali Gasagi Yai Be Habu Mu tomoba pelama, te we bidigo sęgę sela sąyu ofa ilai. Tiali goli te kibu dabego tigi da, te augwaligo te augwa bidibo digi bulu badu sia nogonama, siaba ulai dao.
HEB 13:12 Tama tibaso, Jisas me te obo bagulali hanu bulu badu te aga dene tolali, te agai kanemego digi te we bidigo sęgę sela sąyu, tama augwali Godigo gedude wiegi yai mu pedalomainogo ilali dao.
HEB 13:13 Tama tibaso, da me te pesage nigali te bulu badu agaba pelama, tama dago agai aga isibode tolali hale tiwai te dago me tolao.
HEB 13:14 Dago koneani, te e tǫde dago te gamonabo hanu me deli dago me elalubo menio. Tiali goli dago te nosali pedalabo hanu godolo mu ebo homu ebo dao.
HEB 13:15 Tama tibaso, Jisasgo nogide Godibolo wiegi yai homu pemene elama, tama dago te aga nogi ugwaba sabo kolesaga te sesemane sogo agabolo mayu, te ofa tiwai yao. Awe, dago pedauwaligo aga dago Genuai Bidi dao te po wabogo dago Godibolo dena ofa tiwai mabo dao.
HEB 13:16 Tama dagego duga hasi te we bidi augwalibolo wiegi yai kolesaga ebo te dagego homugo gegeda pelamuo. Tama tiyu dagede elalubo doado bage, te dagego te nai meni yai we bidiba dobayu, te augwali tau sao. Godigo te tiwai ofa ebode dwagi yai homu mu ebo dao.
HEB 13:17 Te duga tobolu bidi dabe augwaligo dage tau sabo homu elama, tama augwaligo dage sesemane sogo tonalubo dao. Magi baso meni, nosali augwaligo digi yali sę po tigidali te Godibolo pusaibao. Tama dagego augwaligo ola mabo po wali pelama, tama augwali dologode bidao. Te dagego tama tibaso da, teda augwali wiegi yai homu pemene elama, tama augwa sę tulama sę eyu, tama augwali homu sęgę me egobeo. Tialima augwaligo dage tonaluabo te homu sęgę ebaso da, teda te tebogo te dage tau me sogobeo.
HEB 13:18 Dagego gedu haluasa po Godigo da tau somainogo weduao. Dago homugo koneani, te da God gedude dolo bidibao. Tama da tigidali sęde dolo bilabo homu ebo dao.
HEB 13:19 Tama eno homugo godolo mu ebao, te dagego gedu haluasa po Godibolo olama ena tau somainogo yao, tama ena dage bidibo madi polo tamadi asomainogo yao.
HEB 13:20 God aga te da we bidi homu nagame ilibo page bidi elalubao. Agai te dago Genuai Bidi Jisas te gų pagede ma hodolama, tama aga ma bidimainu ilali. Hasia Jisasgo aga digi bidibo ula olo mayu, tama Godibolo ofa tiwai mani, te da we bidi tau somainogo yali. Tama tebogo agai te Godigo te we bidi tau sabo dąų wali gamonabo po te mu dąų walali. Tama tiyu, aga te da sipsip tiwai bidibo we bidi tonalubo te polalubo bidi pedalai dao. Tama eno homugo te God agai te tigidali wiegi yai kolesaga dagebolo mao, te dagego agai homu kolesaga wali pabo usu ilimainogo yao. Tama eno homugo me da tomode agai tigidali te aga digi godolo yabo kolesaga tigidali pedalomainogo yao, te Jisas Kraisgo nogide tama tiao. Aga genuai nogi te sesemane bidada pabo sogo elalua peyu, elalua paibao, te eno homugo. Mu dao.
HEB 13:22 Ama dedeo, eno po bomo elama dagebolo obao, dagego eno e mobo mabo wali pode dwagi yai homu eyu, odao, te eno dagego homu dąų ilabo po e pas tomode wai dao. Eno dagebolo e asęna tolobo pas te pęwadage tiwai naga dao.
HEB 13:23 Eno homugo duga koneao, augwaligo te dago ama Timoti olo tagala palali, tama aga te kalabuside me bidigobeo. Tama aga enaba polo pedalobaso da, teda ena dali da si talua si pelama dage suagasaibao.
HEB 13:24 Te dagego dago te siade da wali po te duga tobolu bidi tigidalibolo me, te tigidali Godigo we bidiba dali te po wao. Te ede bidibo Itali hani Godigo we bidi augwaligo te siade da wabo po te dagebolo tolai dao.
HEB 13:25 Te eno homugo Godigo olo tau siyu mabo wiegi yai kolesaga te dage tigidali dali bidao.
JAM 1:1 Ena Jems dao. Ena God dali, Genuai Bidi Jisas Krais dali sigo sę ebo bidi dao. Dage te Israel bidi hani nogo si olama, sągą badu si wali bidi hani bage, dagede eno homu kone paluyu, eno te pas asęna tolobao. Dagego duga page bulu tagalama, tedela pelama, gasa haniani buluba polobadu bidigi pai. Tama eno dage dali dwagi yai homu eyu, e pas toloyu, dage tao obao.
JAM 1:2 Eno ama dedeo, haniani sęgę dagebolo pedalobaso da, teda dwagi yai homu yao.
JAM 1:3 Dagego koneai, te sęgę me deli dagebolo pedalama, tama dagego te sęgę bugagia toloyu, dagego te sęgę aiyaba elalubo dao. Tama dage te tiwai idu geyu da, teda nosali asobo sęgę tigidali aiyaba elaluabo bomo elaluaibao. Tama tilama, dage bugagia bidaibao, te Godigo dwagi yai kolesaga me deli habuge egobeo, dage usu mu yaibao. Habuge idali weyu, bomo yao.
JAM 1:5 Tialima, dage tomode te bidi me deli aga te sę yabo kolesaga habuge ebaso da, te agai God hanalu wao, dwagi yai kolesaga momainogo hanalu wao. Tama Godigo agabolo mawaibao. Wado po wagobeo, God agai tigidali bidibolo augwaligo hanalu wali nai mabo dao. Agai dwagi yai homu eyu augwalibolo nai olo mabo dao.
JAM 1:6 Tiali goli te bidi aga sęgę tolabo kolesaga habuge yai bidi agai Godibolo hanalu wabo po wabo si, deli homu naga eyu hanalu wao. Agai te homu si elamuo. Godigo te dwagi yai kolesaga ena magowe, ma magobewe, te homu egio. Magi basowe? Bidi homu si ebo bidi aga homu kolesaga te tamu ąį asiyu, dini besela pabo tiwai dao.
JAM 1:7 Tama te tobage bidi aga sesemane sogo homu si ebo dao, tigidali sęde homu kolesaga besela pabo dao. Tama aga Godibolo po hanalu wabo tede me aga homu si ebo dao. Tama tibaso, bidi agai te homu elamuo, Genuai Bidi agai ena magi nai me mawaibao, te homu elamuo.
JAM 1:9 Te dage magi nai doado bage meni yai we bidi, dagego Godiba konealubo po dąų olama, tama dagego dwagi yai homu yao. Magi basowe? God agai dagego nogi ugwaba saibao.
JAM 1:10 Tama dage doado bage nai hauwa munalubo bidi dabe, dage me dwagi yai homu yao, God agai dage nai meni yai bidi tiwai bidimainogo yaibao. Te magi baso menio. Te nai hauwa munalubo bidi aga te noswai wiegi yai holobo tiwai elama, tama nosali te noswai ma isibo dao. Tama te tiwai te nai hauwa munalubo bidi isiyu tama tiaibao.
JAM 1:11 Tama dago koneai. Te noswai plaua duduli wiegi yai au osogo elalubo dao. Giliga pedaliyu, te giliga posolo eyu, tama te noswai tigidali bogwa selama wa pabo dao. Tama te noswai tǫba tulaluai, tama te noswaigo au yali dolobo dao. Te tiwai te nai hauwa munalubo bidi me aga te tigidali sę yali nai dabe tagalama, tomode isiyu, te nai walu doado bage taga pabo dao.
JAM 1:12 Niwai bidi me aga dali te dwai sę yanama sinayu bomo ebadi tama te bidigo dwai sę emainogo te bidi me deligo te dwai sę yao po weyu da, te bidigo te sę isiąma, te bidi aga bomo elama te dwai sę aiyaba elalubaso, te tiwai bidi aga dwagi yai homu eyu bidaibao. Magi baso meni. Agai te dwai sę usu sabo sogo aiyaba elaluama, tama Godigo aga bidabo ula mawaibao. Godigo te po polobadu wai dao, “Niwai bidi agai ena dali dwagi yai homu eyu, godolo mu ebo bidi agabolo te bidabo ula eno mawaibao,” te po wai dao.
JAM 1:13 Tama bidi aga homude dwai sę yabo homu hodobaso da, agai te po olamuo, “Godigo enabolo ‘Dwai sę yao’ wali.”. Te menio. Dwai sę ebo homu God agai homu kolesagade pedalobo menio, usu egobeo. Tama tibaso, Godigo te bidibolo ‘Dwai sę yao’ wagobeo, te tobage po agai wabo menio.
JAM 1:14 Tiali goli tigidali bidi deli deli augwa homugo digi te dwai sę yabo homu hodolobo dao, tama dago te dwai sę emainogo te dwai homu kolesaga tomode dabolo te ili po wabo dao.
JAM 1:15 Tama tiyu, tama te dwai sę ebogo bidi homu hodolama, tama te dwai kolesaga hauwa eyu, te wego wai ame nainogo haliga ebo tiwai elama, tama nosali te dwai sę haniani hauwa eyu, tama te dwai kolesagago wai hauwa ame nai. Tama nosali te dwai sę ebo genuai mu pedalama, tama te dwai sę ebogo te bidi dolama, tama bidi te sęgo isibo tiwai pedalaibao.
JAM 1:16 Eno dwagi yai ama dedeo, dagego homu te dwai sę ebode geda mugimio. God agai we bidi dwai sę yao olama sinabaso, te dwai sę ebo menio. God agai te dwai sę egobeo. Te menio. Te Godigo tigidali dwagi yai olo mabo kolesaga me, te tigidali agai da mabo nai te dwagi yai mu dao, tama te dwagi yai sę tigidali dagaludu asobo dao. God agai naga te dagalude ula ebo nai tigidali nigali bidi, agai te dabolo dwagi yai sę naga tǫba mabo dao. Tama God Aya agai te kolesaga subigila hasegelebo menio. Aga te magi nai me giligade noma pedalobo tiwai eyu, tama te noma bobobage elama, pęwadage ma eyu ebo, God agai te tiwai egobeo.
JAM 1:18 Agai aga homu kolesaga naga wali peyu, agai mu po dabolo ola menama, tama da aga hani mu tiwai dao. Te da aga hani tomode te gomunai bidi tiwai bidimai hagede agai da nigali. Te Godigo da nigilama, te tigidali gasagi yai nai dabego gomunai bidi dabe bidiyu, te dago te nai dabe tonalumainogo yai dao.
JAM 1:19 Eno dwagi yai ama dedeo, dagego e po pagede bugagia kone palama, koneao. Dagego te po odabo homu sisi elama, wabo po odao. Te dagego polo asesa te po weyu, tama dagego polo wado po wabo homu olamu dao. Dua yao, sębę polo egimio.
JAM 1:20 Magi baso menio. Bidigo sębę ebogo te Godigo gedude wiegi yai doloba pai kolesaga egobeo.
JAM 1:21 Tama tibaso, dage deli deligo aga me ebo dwai dwai kolesaga tigidali mu sela sąyao. Tigidali dwai sę ebo homu me te tagalama, te tobage sęde digibulu bidao. Tama duga digi duga nogi aiyaba elaluao, te Godigo po dagego homude bulali po sao. Te po aga digi usu elama, dage tau siyu ma saibao.
JAM 1:22 Dagego Godigo po dagego ologo naga odogimio. Ologo naga odoyu da, teda duga digi dugabolo ili po te ola mobao. Te egio. Dagego te Godigo po odama, mu wali pao.
JAM 1:23 Niwai bidi agai Godigo po ologo naga odama, agai te po wali pisąma ebo bidi, te aga digi gesabidi te duluade subo bidi tiwai dao.
JAM 1:24 Agai aga gesabidi polo sulama, tama bedu buluba teda pelama, aga gesabidi suali ma polo gegeda pabo dao, eno gesabi mena tiwai suali wagawe homu ebo dao.
JAM 1:25 Godigo wiegi yai doloba pai bomo yai po te bomo yai pogo da we bidi tau siyu, tama da bugagia bidiyu, tama da magi nai mego da kalabuside bidibeo. Tama niwai bidi me agai te Godigo bomo yai po page bugagia osola susa pelama, tama te bidi agai te po olo naga odola tagalobeo, menio, te bidi agai te bomo yai po wali pabo dao. Te tiwai bidi Godigo tau siyu, tama te bidi aga bugagia bidiyu, aga ebo sęde tigidali aga homu wiegi yai yaibao.
JAM 1:26 Te bidi me deli agai homu ‘Ena te baptais sali dwagi yai bidi dao, hauwa sogo eno lotu po wabo dao,’ te homu ebo bidi dao. Tiali goli agai bidi dene mabo dwai po waidali weyu, agai aga pedauwali bugagia tonalubo menio. Tama tiyu da, geda muyu, aga digi aga homugo agabolo tibo po naga wabo dao. Agai te baptais olo sali, agai lotu po wabo te olo po naga wabo dao.
JAM 1:27 Godigo gedude bidi agai wiegi yai kolesaga eyu, agai po bugagia odobo bidi agai magi dwai sę isąbo bidi, agai e tiwai kolesaga si yao: te kolesaga me e dao, niwai wai dabe meba augwa aya de ida si isiyu, tama te tiana wai dabe augwaduba naga bidibaso da, te me bidi isiyu we taga pai agaduba bidibaso me, te dago te tiwai wai dabe me, te wilawe we me augwali magi nai meni baso te sęgę sobadi tau sao. Te me kolesaga e dao: dago dena bilibo kolesaga bugagia tonalua bilao, tama e tǫde meda yai dwai kolesagago dago homu kolesaga dolidali weyu.
JAM 2:1 Eno ama dedeo, dagego dago Genuai Bidi Jisas Kraisde duga homu tigidali muyu bidibao. Aga genuai tobolu bidi mu dao, moni nogi me, moni ula yai bomo me elalubo dao. Tama dagego Jisasde konealubo po dąų waligo da, teda dagego te nogi yai bidibolo naga dwagi yai sę eyu, te olo nai meni yai bidi dagego tudiba muyu, te kolesaga munu me egio.
JAM 2:2 Te bidi me deli agai wiegi yai tedela ugwa gudama, tama aga nogode te nogi wabo dwagi yai nai ring munama, tama te bidi aga dagego lotu be tomoba asiyu, tama me te nai meni yai bidi aga me meda yai ugwa gudasa dagego te lotu be tomoba asobadi da,
JAM 2:3 tama dagego te dwagi yai ugwa gudai bidibolo te po weyu, “Nage te dwagi yai ni namide duayao,” te po wai. Tama te ugwa meda yai bidibolo dagego “U badu dolaluao, tama nage ena pagede degedude dulaluao,” te po wai.
JAM 2:4 Tama dagego te bidi si dali te tobage sę eyu da, teda dagego duga ama dede dagego homugo augwali osalama, dagalobao. Tiali goli dagego te kolesagade geda muyu, dagego bugagia dagalobeo. Dage te bidi po tų dodolobo bidi jasgo dwai homu elalu te bidi dabe po tųde dagalabo kolesaga tiwai dagego homude me gagabo. Tegio.
JAM 2:5 Eno ama dedeo, eno dagebolo dwagi yai homu eyu, godolo mu ebaso, eno dagebolo te po obao. Bugagia odao. Te tǫde tigidali bidi gedude magi nai meni yai bage, te Godigo te tiwai bidi sa munama, tama augwaligo te Godigo po dąų waligo te augwaligo te homu kolesagade te masigi me walu hauwa munalubo bidi tiwai yaibao. Te polobadu Godigo tama po wai, “Niwai bidi agai homu enaba muyu godolo ebo bidi, te aga eno we bidi bugagia tonalubo madi tomoba asagameo,” te po wai. Tama tiyu, agai te magi nai meni yai bidi augwali sa muyu, augwaligo te Godigo po mu dąų waligo da, te augwali te dąį ilali madi te pesage saibao.
JAM 2:6 Tiali goli dagego te magi nai meni yai bidi augwali gisugu mabo dao. Tama dagego bugagia kone palao. Te walu hauwa munalubo bidi augwaligo Godigo po wali pisiąbadi, augwaligo dage dali dwai sę haniani eyu, tama dage aiyaba elaluama, tama dagebolo sęgę mabo dao. Tama te bidi dabe augwaligo naga dage te po tų ebo digi kegasa pabo dao, augwaligo dagego nai somainogo.
JAM 2:7 God agai dage ma selama, tama agai dageba Jisasgo dwagi yai nogi muai dao. Tiali goli te walu hauwa munalubo bage augwaligo te nogi posobo po wabo dao.
JAM 2:8 Te dago genuai tuni bidi God agai bomo yai po me deli bukude polobadu mu asęyu, te po wai, “Nago naga tigi dali dwagi yai homu eyu, godolo ebo tiwai, nago gasa bidi dali me tama naga tiyu, tama nago te bidi dali wiegi yai homu yao,” te polalubo bomo yai po asęani. Tama tiyu, dagego te bomo yai po wali peyu da, te dagego wiegi yai kolesaga naga wali paibao.
JAM 2:9 Tiali goli, dagego bidi deli dali wiegi yai homu eyu, tama bidi me bidi dali dwai homu eyu da, te dage dwai sęgę saibao. Tama tibaso, te bomo yai pogo dage homude dene iliyu, tama te dene dagego mu siyu, tama dage te dwai sę eyu bomo yai po bolobo bage dao olama, tama dagego te sęde mu koneaibao.
JAM 2:10 Tama bidi me deli agai tigidali gasa bomo yai po wali peyu, tama agai te bomo yai po me deli naga bolali, te bidi agai te bomo yai po tigidali bolali bidi te tiwai dao, te sęgę saibao. Magi baso meni.
JAM 2:11 Te God agai te po wai, “Nago te we sabo kolesaga dologio.” Tama agai te pogo naga te po me weyu te po wai, “Nago bidi ela mugio.” Tialima, nago te we sabo kolesaga dolisiąyu da, tama nago te bidi me ela mugi sogo da, te nage te bomo yai po bolali bidi dao wagi da.
JAM 2:12 Tama tibaso, dagego te nosali pedalabo sę homugo koneao. God agai te bomo yai po deligo da bugagia bidimainogo ebo dao. Tama te sogo Godigo tigidali tǫde we bidi te bomo yai po deligo naga osalama dagalaibao. Tama dagego homugo te tiabo koneama tama duga po wabo me, te bidibo kolesaga me te bugagia duga tonaluao.
JAM 2:13 Magi baso menio. Bidi me deligo gasa bidi homu dene eyu tau sisiąyu bidali, tama te sogo Godigo we bidi dagalobode, te gasa bidi homu dene esiąyu tau sisąyani te bidi aga Godigo homu dene eyu tau sogobeo. Te menio. Tiali goli, niwai bidi agai gasa bidi homu dene elama augwali tau sali te bidi, te usu da, Godigo te bidi tau siyu, tama te Godigo bidi dagalobode te tiwai bidi aga te po tų dali te sęgę me dene sogobeo. Te menio.
JAM 2:14 Eno ama dedeo, bidi mego te po weyu “Eno Kraisde konealubo po dąų wabo dao” weyu da, tiali goli agai wiegi yai kolesaga mu isiąwai, tiali ma te bidigo konealubo po te olo nai tiwai yai. Tama te tiwai konealubo pogo aga tau siyu ma sogowe? Menio.
JAM 2:15 Tama tiyu, ama me abe augwali te ugwa dwai eyu, tama tuabo nai me menio.
JAM 2:16 Tama tibaso dage tomode bidi me deligo te magi nai meni yai bidibolo te po weyu, “Nage homu wiegi yai elama bidao,” te po olama, “tama nage pelama naga tigi posolo ilabo ugwa mugi peyu, tama naga nai selama tuyu naga haliga pągąnao.” Tama dagego te po weyu da, te dagego te nai meni yai bidi ugwa me te nai me te bidi tigi tau selama masiąyu da, tama dagego te po wabogo te bidi mena tama aga tau sogowe? Te meni. Te usu egobeo.
JAM 2:17 Te tiwai gilama, te Jisasde konealubo po dąų wabo tama naga ebo dao. Tama tibaso, te bidi aga olo bidiyu da, te tebo kolesagago magi dwagi yai sę me pedalisiąyu, tama te olo dwai nai tagalobo tiwai sę yaibao.
JAM 2:18 Te bidi mego te po wali, “Ao, eno Jisasde konealubo po dąų wabo dao,” wai. Tiali goli agai gasa we bidi tau siyu wiegi yai sę ebe, tama te tiwai bidi dali eno tama po waibao, “Nago pogo naga te konealubo po dąų wabo po wai, tama eno da, te eno we bidi tau sabo kolesaga ebo dao. Tialima, eno te dwagi yai kolesaga ebo suyu da, te sogo nago koneyu eno Jisasde konealubo po dąų wabo mu koneaibao. Tiali goli nago wiegi yai kolesaga ebe, tama mena tama eno nago te konealubo po dąų wabo koneaibawe? Te tų menio, eno konegobeo.” Eno te po te tiwai bidibolo waibao.
JAM 2:19 Tama nago konealubo po dąų wabo homu tama yai, “Te God deli digi bidibao,” wai. Te homu wiegi yai dao. Tama tiali goli te usu menio. Te dwai haubo noma bidi augwaligo me te homu tiwai ebo dao, tama te pode augwali homu didibili eyu midigi sabo dao.
JAM 2:20 Nage homu kolesaga meni yai bidi, te nago konealubo po naga dąų weyu, tama nago wiegi yai kolesaga dali esiąyu, tama nago te konealubo po dąų wabo te olo nai tiwai eyu te usu menio. Tama tibaso, nago te po page mu koneai homu ebawe?
JAM 2:21 Edao. Dago wąį Abraham agade kone palao. Polobadu Godigo agabolo “Te sę yao” po olama, Abraham aga ogwa Aisak te masigi saiba munama elainogo, tama Godibolo te ogwa te olo mabo tiwai yainogo tiwai. Tama te sogo Godigo agai te kolesaga ebo sulama, tama “Abraham aga wiegi yai doloba pai bidi mu dao” wai.
JAM 2:22 Dagego suao. Abraham agai Godigo “Nago ogwa enabolo mao,” wali po bugagia wali peyu, tama te yali wiegi yai kolesaga aga konealubo po dali sę eyu, tama te dwagi yai kolesaga yaligo te agai konealubo po Godide dąų wabo te usu mu eyu, te habuge me ebeo. Menio.
JAM 2:23 Tama tiyu, Abraham agai tama tiai, tama nosali Mosesgo te Godigo po meba te bukude agai asęai, “Abraham agai te Godigo pode konealubo po dąų wai. Tama tibaso, Abraham aga te Godigo gedude wiegi yai doloba pai bidi mu pedalai,” Mosesgo tama po asęai. Tama me, te Godigo Abrahamde dali te po wai, “Aga eno abagi dao.”
JAM 2:24 Tama te wali pode te Abrahamgo yali kolesaga te po dagego koneao, te bidi mego konealubo po naga dąų weyu, tama agai te wiegi yai kolesaga ebo po wali pisąwai, te tiwai bidi Godigo wiegi yai doloba pai bidi dao wagobeo. Menio. Niwai bidigo te wiegi yai yai kolesaga dali eyu konealubo po dąų wabo bidi, te Godigo gedude te tiwai bidi te wiegi yai doloba pai bidi dao waibao.
JAM 2:25 Tama dago Godigo gedude doloba pai we bidi bidabo kolesaga sao, te polobadu we mego po wali, te we nogi Rahap. Te we aga penani we, tialima Godigo te Kanan tǫ Juda bidi hanibolo mawainogo yali sogo, tama augwaligo te Kanan tǫba sa pabo bidi dabe tagala palai, te sogo te we Rahap agai te bage tau sai. Te we aga hanigo augwali elidali weyu, tama te we Rahap agai te bidi dabe dualama, gasa tųdu Juda bage bidibo digiba tagala palai. Tama te wego te yali sęde, te we aga Godigo gedude doloba pai mu pedelai dao.
JAM 2:26 Tama te bidi Abraham dali te we Rahap augwali sigo yali sęde dago koneaibao, tama niwai bidigo agai konealubo po naga dąų weyu tama wiegi yai kolesaga esiąyu da, teda agai Godide konealubo po wabo isali tiwai dao, te bidigo tigide bidibo noma bidi meniama, tama te bidi isai tiwai yaibao.
JAM 3:1 Eno ama dedeo, dage tomode Godigo po ola mabo bidi hauwago te po ola magio, bidi si sela naga usu yaibao. Dago konebo dao, nosali Godigo agai we bidi dagalobo sogode, agai da te po ola mabo bidi dabe agai da bugagia dagalama, osola sueibao. Tama dago dena sę bugagia esiąyu da, teda agai dabolo sęgę mawaibao. Tiali goli te sogo agai po odali gasa we bidi te agai dua digi augwali bugagia dagalama osola sueibao.
JAM 3:2 Tama hauwa sogo da tigidali bidigo te pode geda muyu haniani sę ebo dao. Tama tibaso, bidi mego agai wabo pode dwai sę me esiąyu da, te aga te wiegi yai bidi mu dao. Tama te bidi aga tigigo ebo sę tigidali bugagia tonaluyu te bidi usu yaibao.
JAM 3:3 Tama dago dena wabo po bugagia tonalubo sęde eno te po obao, dago te moni kibu hos kelede ain dage munama, tama te ain bonogo kegeyu, tama te hos aga dago ebo homu kolesaga wali bilimainogo tebo dao. Tama tiyu dago aga genuai tigi tigidali kegasa biliyu, tama da bidigo homu kolesaga wali hosgo pabo dao.
JAM 3:4 Tama dagego homugo te moni geba sip, tede me bilibo kone palao. Te moni geba sip te genuai nai mu dao, tama tiyu bomai waligo te sip selasa, te tamu ąįdu bilibo dao. Tama te sip tolasa bilibo nai te dwasianu nai mu dao. Tiali goli, te sip tolasa bilibo bidi agai homugo gasaba painogo da, te bidi agai te sip tolasa pabo nai teba begelama pabo dao.
JAM 3:5 Te tiwai gilama, te da bidigo kele te dago tigide elalubo dwasianu nai dao. Tiali goli te kelego genuai po hauwa wabo dao, tama te wali pogo genuai sę ebo usu dao, te sę meba dwagi yai dao, meba dwai sę dao. Kone palao, te dwasianu sia dabogo te genuai sia mu deyu, tama te bulu tomode elalubo ni dabe tigidali te siago dainogo ebo te dagego konebo dao.
JAM 3:6 Te sia dabo tiwai da bidigo kelego wabo po tiwai dao. Tama te sia dabo tiwai, dago wali dwasianu dwai po te genuai mu pedaluama, dago tigi tomode dwai meda mu elama, tama da dolobo page elalubo. Tama dago wabo dwai po aga page bulu da te Satan aga moni dwai sia dabo bulu dao.
JAM 3:7 Tama tigidali tǫde bidibo bidi augwaligo te bulu tomode bidibo wili hasa dabe sobadi, te ba me, te hasamani me, tama te tigidali tamu ąįde bidibo nai tigidali sai. Tama augwaligo te hasa dabe tigidali negelama tama nagame ilibaso, tama augwaligo po odolama bugagia bidibo dao. Tama megi me bidi dabe augwaligo tama tebo usu yaibao.
JAM 3:8 Tiali goli mena bidi deli agai kele bugagia tonaluaibawe? Te tobage bidi menio. Sesemane sogo bidigo kelede dwai po haniani subigila homu hodolama, te dwai po wabo dao. Tama dago kele da te bidi isibo nai elalubo bidi gąų kelebo dwai hasamani tiwai dao, dago wabo pogo we bidi dene mabo dao.
JAM 3:9 Tama dago kelego naga po weyu, te dago po si wabo dao. Po me deli te dago Genuai Bidi dali te dago Aya God te augwali sigo nogi dago ugwaba sabo dao. Tama gasa po me dago kelego dwai po weyu, meba bidi dabe dali posobo po olama dolobo dao. Tiali goli, God agai tigidali tǫde we bidi aga tigi tiwai nigaligo da, Godigo nogi ugwaba sabo po dali, te bidi posobo dwai po wabo dali, te tiwai po si dago deli kelego olamuo. Eno ama dedeo, te dwai po wabo tagalao.
JAM 3:11 Te ąįde kone palao. Te dwagi yai asobo ulu wę dali te tamu ąį dali gelama asobo menio.
JAM 3:12 Ama dedeo, te ni kayago te ni oliv du walogobeo. Tama te bono du ni wain tego te ni kaya du walogobe. Tama tiali me, te tamu ąįgo dwagi yai ąį ma gagagobeo. Menio.
JAM 3:13 Te dage tomode bidi me deli agai wiegi yai homu eyu, te dwagi yai po konebawe? Te dage tomode te tiwai bidi me deli bidibaso da, te bidi agai bilibo kolesaga dwagi yai yao. Tama wiegi yai kolesaga eyu dwai kolesaga isiąma, tama dwagi yai kolesaga ebo koneyu, tama agai te dwagi yai kolesaga ebo gasa bidi dabe augwalibolo ola mao.
JAM 3:14 Tiali goli, dagego dwai homu gasa we bidi dabe dali elaluyu, tama dagego augwaligo nogi ugwaba sabo eno hagelabo homu eyu da, tama dage nai yogo homu eyu da, dage te tobage dwai homu eyu da, teda geda muyu dagego te po wabo dao, “Da da, te wiegi yai homu eyu, te dwagi yai po konebo bage dao.” Te tobage tibo po wabo tagalao, duga nogi ugwaba sabo po wagimio.
JAM 3:15 Tama dagego te gasa we bidi dali dwai homu eyu, tama duga digi duga nogi ugwaba siyu ebo, te tiwai kolesaga te dagaludu asobeo. God agai te tobage kolesaga dabolo mabo menio. Tama te homu ebo dwai kolesaga te e tǫde we bidigo homugo naga ebo kolesaga dao. Te dago dwai tagalai sę ma eyu, tama te dwai sę ebo page bidi te Satan dao.
JAM 3:16 Tama tiyu, bidi meba augwaligo gasa bidi dabe dali dwai homu eyu da, tama augwaligo te haniani kolesaga ebode te augwa digi augwa nogi ugwaba siyu da, te tiwai bidi dabe augwaligo konila po subigila wabo bidi dao, te haniani dwai sę ebo page bidi dao.
JAM 3:17 Tiali goli niwai bidi augwaligo te God pagedu asobo te wiegi yai homu kolesaga sabo bidi dabe augwaligo ebo kolesaga e dao: polasa mu, te augwaligo meda isiąwai wiegi yai homu kolesaga wali pabo dao. Tama te kolesaga me, te augwaligo gasa bidi dabe dali wiegi yai kolesaga eyu deli homu elama bidiyu, tama augwali dali homu nagame eyu, tama tiyu augwaligo gasa bidi dabego po wabo odobo dao. Tama augwaligo homu dene eyu, we bidi tau sabo wiegi yai kolesaga ebo dao. Tama tiyu, augwaligo deli homu tiwai naga tigidali we bidi dali ebo dao. Tama augwaligo ugwadu homugo naga augwaligo po wabo menio.
JAM 3:18 Tama tiyu, dago wiegi yai kolesaga eyu, deli homu naga elama bidiyu da, te sę ebo dago te nai ge tǫba bulubo tiwai dao. Tama dago te wiegi yai kolesaga eyu, te deli homu naga ebo te kolesaga ebode te nai ge dwagi yai walobo tiwai yaibao, te doloba pai kolesaga ebo genuai pedalaibao.
JAM 4:1 Te duga hasi te boi bidi yabo homu dali, te wado po wabo homu dali te si menadu pedalobo dawe? Woo, dage bidi deli deligo magi nai sulama, te nai eno tigi tau somainogo, te saio homu eyu, dini ebo dao. Te tama te ebo sęgo dagego homu hodolama, tama homu si eyu, tama duga hasi konila po weyu, wado po idu gebo dao.
JAM 4:2 Dagego te haniani nai sabo homu godolo yai, tiali goli dagego sabo menio. Tama tiyu dagego te bidi ela muabo homu ebo dao. Tama dagego nai sabo homu eyu pesą eyu, tama dagego te nai sisąma, tama dagego wado po weyu hwįbo dao. Tama me sogo dagego Godibolo nai sainu po hanalu wasiąbaso, dagego te nai sabe dao.
JAM 4:3 Tama me sogo dagego Godibolo te nai sainogo po hanalu obadi digi, dagego te nai sabe dao. Magi baso menio. Geda muyu, dagego homu dolo pisiąwai, dwai sę emainogo, duga tigi tobade, duga haliga tobade naga te nai sai hagede te dagego homu dąų ola sabo nai sainu te dagego God te naide hanalu wabo dao. Tiali goli agai dagebolo mabe.
JAM 4:4 Dage te penani ebo we tiwai dao, te we aga bidi dali bidisiąyu, gasa bidi dali penani ebo tiwai dao. Niwai bidi agai e tǫde ebo kolesaga naga godolo eyu da, teda te bidi aga God dali boi bidi homu ebo dao. Te dagego konebewe? Tama tiyu, niwai bidi agai te tǫde kolesaga ebo bidi dabe dali abagi weyu, te bidigo aga digi te God dali boi bidi gagawai.
JAM 4:5 Dagego te polobadu bidali bidigo asęani pode ma kone palao, te pode geda mugio. Te asęani po e dao: “God agai aga Mobo Bidi da dali bidimainogo tagala palali. Tama tiyu, da God taga peyu da, te Mobo Bidi agai bomo eyu, da dali dwai homu ebo dao,” te po Godigo po bukude bidi mego asęani. Te pode dagego “Te po olo po naga dao” homu elamuo.
JAM 4:6 Tama God agai aga Mobo Bidigo dabolo mabo sę te genuai dao. Tama agai da olo mu tau sabo sę, te genuai mu dao. Tama tiyu, agai da olo tau siyu, te dago homude pedalobo ‘Dwai sę yao’ po te po dago odosiąma, tama dago te po aiyaba elalubo dao. Tama te sę ebode te Godigo wali po bukude te po elalubao, “Te aga digi aga nogi ugwaba sabo bidi, te bidi God aga tudiba mubo dao. Tiali goli te imilai bidi da, te bidi God agai olo mu tau sabo dao,” te po asęani.
JAM 4:7 Tama tibaso, dagego duga dwai kolesaga ebo te homu aiyaba dualao, tama dage Godigo bomo dologode bidao. Tama tiyu, dagego te Satango dwai sę yainogo ebo dagalama sela sąyao, tama agai dage dali te dwai sę yainogo yali tagalama Satan aga wi paibao.
JAM 4:8 Tama tiyu, dage God pąba mu peyu tibaso da, aga dage pąba mu aselama, bidaibao. Tama dage te dwai sę me sogo me sogo ebo bidi dabe, duga nogogo dwai sę ebo tagalama, dwagi yai sę naga yao, te bidigo nogo ąįde telabo tiwai te meda meniama dwagi yai tiwai yao. Dagego te Godigo po wabo odobo me te tǫde kolesaga ebo te homu si elalubo, te dwai homu ebo kolesaga dagego homude elalubo te sela sąyao, homu deli naga eyu bidao.
JAM 4:9 Tama duga te dwai sę ebo kolesagade homu sęgę eyu tama gela hauwa waiyąo. Tama dagego megi tama tebo kolesagade dagego dwagi yai homu eyu gisugu wai, tama dagego te dwai sęde gisugu wabo te kolesaga hasegelama, tama duga te dwai sę yalide homu begeleyu gela wao. Tama dage te megi naga wiegi yai homu te dwai sęde ebo bidi dabe, dagego te homu ebo hasegelama, tama duga te yali dwai sęde hale eyu homu dene yao.
JAM 4:10 Tama duga digi duga nogi Genuai Bidigo gedude aiyaba dualao. Dagego tama tiyu da, te Genuai Bidi agai dagego nogi ugwaba saibao.
JAM 4:11 Ama dedeo, duga hasi bidi dolabo po dagego wagimio, te tagalao. Niwai bidi agai aga abagi dali te nogi posobo po weyu, “Nage dwai sę elama, tama sęgę sao,” te tobage po weyu da, te bidi agai Godigo bomo yai po me posoyu, te bomo yai po dolai dao. Tama nago te Godigo bomo yai pode posobo po weyu da, teda nage te bomo yai po odoyu wali pabo bidi me menio. Nago te bomo yai po osola sulama, tama ‘Te bomo yai po usu ebe’ homu eyu, nago te bomo yai po bolobo bidi dao.
JAM 4:12 Tiali goli, God aga digi naga agai bomo yai po dabolo mawai dao. Aga digi naga we bidi osola suabo bidi dao. Aga digi naga agai we bidi tau siyu ma sabo bidi dao, ma we bidi mu dolabo bidi dao. Tama tibaso, we bidi osola suyu sęgę mabo sę te nago sę mu menio.
JAM 4:13 Dage meba bidi dagego te po wabo dao: “Megi me, do me, da te hanu meba pelama, tama te hanude dago bisnis sę eyu, kibu be deli bidaibao. Tama dago mone ge hauwa saibao,” te po dage mebago wabo dao. Tialima eno dagebolo te po obao:
JAM 4:14 Dagebolo magi nai te do pedalabo te dagego konebeo. Tama dagego bidibo ula te mena tiwai dawe? Te dagego bidibo ula e tiwai elalubao te kigamu pǫ holama, tama te giliga asobode te po polo hagabo tiwai, te da bidigo bidibo ula te tiwai osogo naga ebo dao.
JAM 4:15 Tama tibaso, dagego nosali yabo sęde homu eyu, te po wao, “Genuai Bidi agai ‘Ao, usu da’ homu eyu da, te da bidibo ula dali bidiyu, tama dago te masigi sabo sę me te gasa sę me te nosali yaibao.”
JAM 4:16 Tiali goli dagego te tiwai ebo meni. Dagego genuai po dagą olo dali ola biliyu, tama dagego nosali yabo sęde duga digi nogi ugwaba sabo po wabo dao. Te tobage nogi ugwaba sabo po wabo te dwalio.
JAM 4:17 Tama tibaso, bugagia kone palao. Dwagi yai kolesaga ebo koneai bidi, tama te bidi agai te dwagi yai sę esiąyu da, te bidi agai dwai sę yali dao.
JAM 5:1 Megi eno te dage walu hauwa munalubo bidi dabe dali te po obao. Dage dwai homu eyu, te hwa weyu, gela weyu yao. Dagebolo moni dwai sęgę dali, dene dali si tamadi pedalaibao.
JAM 5:2 Tama dagego te wiegi yai walu dali te au dobage te nai dabe tigidali te dolama, tama damua pai dao. Tama dagego te ugwa dabe me tigidali, te asibago me te sagado dabego tula silai.
JAM 5:3 Tama dagego te wiegi yai kapa nogi gol te golgo nigali nai dali, te kapa nogi silva si te wiegi yai nai dabede nai yogo ebo homu eyu, te nai dabe olo munaluyu, te yaba yai. Tama te nai si yaba ebo gilama te dagego dwai sę ebo te hania pedaliyu, tama te naigo dagego tigi te sia ulubo tiwai yaibao. Dagego megi bidiyu, te walu me te mone ge hauwa sisinibao. Tiali goli te Genuai Bidi aga ma asobo sogo pąde dao. Tama tibaso, megi da te nai deliba sisinabo sogo menio.
JAM 5:4 Te po bugagia odao. Te sę ebo bidi dabe augwaligo te dagego moni gide dagego nai sabo sę yai. Tama dagego augwali ili po weyu, te augwali maiabo mone ge bogia siyu, tama meba duga geme halobageba dualobo dao. Odao. Dagego te geme dualali masigigo agai i olama, dwai po dage dali wabo tiwai po wabo dao. Tama te sę bidi dabe augwaligo masigi habuge eyu, dwai homu eyu, tama augwaligo i wabo te dagalude bidibo Genuai Bidi agai odalio, God aga tigidali bomo page bidi mu dao, te aga digi augwaligo gela wabo po odalio.
JAM 5:5 Tama tigidali sogo dage e tǫde bidibo sogo, dagego dwagi dwagi yai nai siyu, tama dage homu dwagi yai naga eyu bidai. Tama dage nai hauwa tuyu genuai bidi nisai, tama dage elabo bodolu te pąba pedalai dao, te nisai genuai kibu tamadi elabo bodolu pąba pedalobo tiwai dao.
JAM 5:6 Dagego te wiegi yai doloba pai bidi dabe po tų elama, te bidi dabe augwali ela muai. Tama dagego augwali dali te dwai sę ebadi yaide, augwaligo dage dali po wei ponobo usu ebeo.
JAM 5:7 Eno ama dedeo, te walu hauwa munalubo bage augwaligo tama tiyu, dagego homu dąų olama, dagego te tigidali sęgę toloyu, tama te Genuai Bidi Jisas ma asobo tonaluao. Dagego koneani, te gi page bidigo te aga gide bulali nai dwagi yai holobo tonalubo dao. Tama te bidigo homu dąų olama, moni homu esiąyu, te tulubage dali te giliga dali sigo sę usu ela silibo si, tama te bidi aga te gide te wiegi yai nai sabo dao.
JAM 5:8 Dagego me tama duga homu kolesaga dąų olama, te tigidali haniani sęgę tolao. Tama te Genuai Bidi ma asobo sogo te pąba yagasobao. Tama tibaso, dwagi yai homu eyu, dagego homu kolesaga dąų olama tonaluyu bidao.
JAM 5:9 Eno ama dedeo, te po tų ebo bidi Jisasgo dagebolo dwai dene wei ponoidali weyu, duga hasi te gasa ama dabe dali wado po weyu, augwali dali te posobo po olamu dao. Dagego e po odao. Te po tų ebo bidi Jisas te be tų bulu badu dolagasai elalubao.
JAM 5:10 Ama dede, dagego te polobadu Genuai Bidigo nogide po pusali bidi profet bage augwali dali yali te sę homugo koneao. Te bage dali gasa bidi dabe augwaligo boi bidi homu eyu, augwali dali dwai sę yai. Tiali goli te profet bidi augwaligo homu kolesaga dąų olama, te sęgę bugagia tolai dao. Tama dagego augwaligo te yali kolesaga suyu, te kolesaga dagego usu ni tiwai dao. Tama dage te usu niba kadu wao.
JAM 5:11 Tama te tiwai augwaligo te sęgę polobadu bugagia tolai baso, megi dago tama po wabo dao: “Te homu kolesaga dąų olama te sęgę tolali bidi dabe, te bidi megi augwaligo homu wiegi yai eyu bidibao.” Tama gasagi yai bidi me agai nogi Jop, agai yali sę po dagego odai. Te genuai sęgę hauwa te agabolo pedalali digi te agai bomo eyu dolalu, te sęgę te aiyaba elaluai. Tama nosali Genuai Bidigo dwagi yai kolesaga aga dali yai, te me dagego koneai. Tama te bidi Jopde yali sę po odama, tama dago koneani, Genuai Bidi agai da hobede mu eyu, tama sesemane sogo agai da homu dene elama, da agai dwagi yai homu eyu, da olo mu tau sabo dao.
JAM 5:12 Ama dedeo, dagego polasa te yabo sęgę sę e dao: Dagego te God aga bidibo madi dagalu me, tǫ me, te gasa nai me nogi eyu, tama dagego te po wabo dao te pogo dąų wagimio. Tama dagego “Awe” weyu duga wabo po dąų walomainu, “Awe” naga wao, te usu yaibao. Me ma, dagego mu po weyu, “Menio” weyu, duga wabo po dąų walomainu, “Menio” naga wao, te usu yaibao. Bidi mego aga wabo po dąų walomainu Godigo nogi weyu da, te bidibolo Godigo sęgę mawaibao. Tama Godigo dagebolo sęgę maidali weyu, dagego te Godigo nogi olo nogi igio.
JAM 5:13 Te dage tomode bidi me deli aga te sęgę tolobawe? Tibaso da, agai te Godibolo gedu haluasa po hanalu wao, Godigo aga tau somainogo. Ma, bidi me aga homu dwagi yai eyu bidibawe? Te homu ebo bidi agai te Godibolo wiegi yai homu elama, tęąbi po weyu, Godigo nogi ugwaba sao.
JAM 5:14 Tama dage tomode ama me deli aga te gasi saliwe? Tama tibaso da, agai te Godigo po odobo we bidi tomode bidibo tobolu bidi augwali i wao. Tama augwali aselama, augwaligo te Genuai Bidi Jisasgo nogide te bidi tigiba te wel muagasiyu, tama Godigo te gasi sai bidi tau somainu augwaligo Godibolo gedu haluasa po hanalu waibao.
JAM 5:15 Tama augwaligo Godibolo te konealubo po mu dąų olama gedu haluasa po weyu da, te Genuai Bidigo te gasi bidigo gasi usu ilama ma hodolaibao. Tama te gasi bidi agai dwai sę meba yaibaso da, te Genuai Bidigo te dwai sę tigidali sela sąwaibao.
JAM 5:16 Tama tibaso, dagego duga dwai sę yali te duga ama dabebolo pusao, te duga hasi tau somainogo Godibolo te po hanalu wao, te God agai dage dwagi yai ma usu ilimainogo yao. Tama tiyu, te doloba pai bidigo gedu haluasa po wabode bomo elaluyu, tama agai te gedu haluasa po wabogo te we bidi tau sabo sę ebo usu yaibao.
JAM 5:17 Te polobadu bidai bidi nogi Elaija aga doloba pai bidi bidiyu, tama agai gedu haluasa po wabode bomo elaluali. Tama agai Godigo nosali yabo sę po augwalibolo pusuyu bidai. Tiali goli Elaija aga te da tiwai bidi bidai. Tama bidiyu, agai Godibolo gedu haluasa po bomonama wai, te tulubage tuluidali weyu, tama te tulubage dagalude tulisiąbadi kibu be sela olama, tama te polua a naga olama, me badu nogo deli olo bidai.
JAM 5:18 Tama nosali agai Godibolo po ma hanalu obadi, tama dagaludu te tulubage tagala palama, tama tulubage tuluyu, te tǫde nai ma holai.
JAM 5:19 Eno ama dedeo, dage tomode ama me deli agai te Godigo mu po tagalobaso da, tama ama me bidigo te ama ma oda siyu da,
JAM 5:20 tama te gasa bidi ma oda sali ama agai koneama te homu yao: tama te bidi mego te dwai sę yali bidi tau siyu, tama te dwai sę yali bidi agai te dwai sę ebo tų tagalama tama te bidi God pageba ma asobaso da, te bidigo te dwai sę yali bidigo mobo ma sai, tama te bidi agai te dwai sę eyu te dwai sęgo aga ela mugobeo. Te dwai sę yali bidi tau sabo kolesagade Godigo te dwai sę ebo bidigo dwai sę hauwa sela sąwaibao. Te tama dao.
1PE 1:1 Ena da Pita da, te Jisas Kraisgo tagala palai bidi me deli dao. Tama te dage haniani gasa tedali bulude bidibo we bidibolo eno e pas asęna tolobao. Dage meba te moni tǫ nogi Pontus tede bidibao, meba te moni tǫ Galesiade me, meba te moni tǫ Kapadosiade me bidibo, meba te moni tǫ Esiade me bidibao, meba te moni tǫ nogi Bitiniade me, dage te tǫde bidalubo, tede osogo bidibo we bidi tiwai bidibao.
1PE 1:2 Dago Aya God agai dage polobadu mu konebaso, agai dage hagea sai dao. Tama agai Mobo Bidigo dage doloba pai mu iliyu, tama dage wiegi yai kolesaga naga eyu bididuyu tama dage Jisas Kraisgo po odoyu, agai aga kanemego dagego yali dwai sę sela sąmainogo, God agai dage koneyu polobadu hagea sai dao. Tama eno homugo God agai olo tau sabo kolesaga dage dali genuai mu elama, tama dage bugagia mu bidao.
1PE 1:3 Te dago dena Genuai Bidi Jisas Kraisgo Aya God aga nogi dago ugwaba sinao. Agai da moni homu dene mu eyu, tama da tau somainogo, agai Jisas Krais te isai bidi dabe bidibo digi tomodu ma hodolali. Tebogo dabolo te gesi noma ula mawai. Tama menama, da dwagi yai homu eyu, bugagia tonaluyu bidalubao.
1PE 1:4 Aga bidibo digi dage maiabo nai agai dagala munama, megi bugagia tonalubo dao. Tama agai dagebolo maiabo nai te gamonabo nai dao, te dwai sęgo dolisiąbo nai dao, te nai munu me mobia pogobeo.
1PE 1:5 Tama dagego duga homu tigidali te Krais agaba mubaso, God agai bomogo dage bugagia tonalubao. Tama nosali te tigidali nai silabo bodolu mani sogo pedalobo si, agai te we bidi ma dobola sabo kolesaga polobadu sisi ela muani te sogo waselaibao. Tama tibaso, megi agai dage bugagia tonalubao.
1PE 1:6 Tama agai dage dali te sę ebode dage moni dwagi yai homu mu ebo dao. Godigo te dage usu sabo sę pedalama gogolama, tama dage homu osogo dene ebao. Tiali digi, dage moni dwagi yai homu mu ebo dao.
1PE 1:7 Tama te haniani dene mabo sę augwaligo page elalubao. Dage duga homu tigidali Godiba muani sę, te sę usu somainogo te dene mabo sę dageba pedalobo dao. Eno megi te wiegi yai kapa nogi gol te naide po digi po begelama obao. Augwaligo te kapa gol te tǫde diganama, tama te dwai nai sela sąwainogo augwaligo te gol siade ulubo dao. Siago uludama, tama nosali te wiegi yai kapa gol naga pedalama, augwaligo saibao. Tama te gol te osogo wiegi yai nai dao, te tǫde elalubo nai dao, tama nosali te nai mu dolaibao. Tiali goli dagego duga homu tigidali Godiba mubo sę te wiegi yai mu dao, tebogo te kapa gol aiyaba elalubo dao. Tialigo da, dagego konealubo po dąų wabo kolesaga usu selama, tama usu baso, te Jisas Krais aga ma asobo hanilabo sogode te Godigo dagego nogi ugwaba mu siyu, dagebolo dwagi yai genuai nogi mawaibao.
1PE 1:8 Tama dagego duga gedugo aga munu me susiąwai digi, dagego Kraisde dwagi yai homu eyu godolo ebo dao. Dagego megi me aga susiąbadi digi, dagego duga homu tigidali agaba muyu, tama wiegi yai homu mu ebo dao. Tebogo te tigidali gasagi yai dwagi yai homu ebo aiyaba elalubo dao. Tama te dagego wiegi yai homu ebo te genuai mu dao, augwaligo Godigo bidibo digide ebo wiegi yai homu ebo sabi si dao. Tama tialigo da, dagego pedauwaligo tede po wabo usu egobeo.
1PE 1:9 Tama God agai dage ma dobola saibao homu eyu, megi dagego Krais susiąbadi digi dagego duga homu tigidali agaba muyu, tama God agai dage ma dobola sabo sę eyu bididubao.
1PE 1:10 Te Godigo dage ma dobola sabo sę, polobadu mu te sęde te Godigo nosali yabo sę po pusabo profet bidi dabe augwaligo te sęde bomo eyu osola suali, te sę pagede dua dua eyu hanalu wali, augwaligo te sę page kuna konemainogo yai.
1PE 1:11 Tama Kraisgo Mobo Bidi agai augwaligo homu tomode hanilama, te po widu geai, “Te Godigo sa muani nosali asaibao wali bidi Krais agai dene selama, tama nosali agai te genuai bomo yai ula me saibao,” te po wai. Tama augwaligo te pode homu konea peyu, te po hanalu wai, “Te sę nisu pedalaibawe, mena side pedalaibawe?” te po wai.
1PE 1:12 Augwaligo te po hanalu wali digi, tama God agai augwalibolo waselama, tama augwaligo koneai, augwaligo po pusubo sęgo augwa digi tau sabo sę meni, te dage nosali bidabo we bidi tau sabo sę dao. Tama augwaligo te sę eyu, augwaligo te polobadu sogo mu pusali po dagego tamadi odali. God agai aga Tedali Mobo Bidi aba tagala palama, tama agai gasa bidi dabe tau siyu, augwaligo Godigo dwagi yai po dagebolo pusagasai. Tama te sęde te Godigo dagalude sę ebo ensel bidi dabe augwaligo bomo eyu, te sę page kuna koneaio homu ebo dao.
1PE 1:13 Te God agai dage dali te sę yaligo da, te bidi me sę yai hagede aga ugwa sugwa sabo tiwai, dagego duga homu bugagia dodola selama dąų wao. Tama dage deli deli duga digi bugagia tonaluao, te homu kęnai we bidi bidao. Tama te Jisas Krais aga asobo hanilabo sogo agai dagebolo te wiegi yai olo tau sabo sę mawaibao. Dagego tede duga homu bugagia dąų olama, dwagi yai homu eyu tonaluao.
1PE 1:14 Dage Godigo po wali pabo we bidi bidibaso, dagego God konesiąbadi polobadu yali dwai dwai kolesaga wali ma pigimio.
1PE 1:15 Te menio. Te dage i wali God aga da, te tedali mu doloba pai bidi bidibaso, dage me tigidali kolesagade mu doloba pai we bidi bidao.
1PE 1:16 Magi baso meni. Te Godigo bukude e po asęani, “Ena tedali mu doloba pai bidi bidibaso, teda dage tedali mu doloba pai we bidi bidao.”
1PE 1:17 Tama nogi yai bidi dali, nogi meni yai bidi dali God agai po tų ebo sogode dagalama egobeo. Te meni. God agai we bidi po tų eyu osola subo si, agai augwaligo yali sę naga osola subo dao. Tama tibaso, dagego agade dago Aya waligo da, teda dage e tǫde osogo bidibadi, agade wi eyu aga dologode bidao.
1PE 1:18 Magi baso meni. Dagego wąįgo dagebolo polobadu ola mani bidabo kolesaga te usu isiąbo kolesaga dao. Tama dagego koneai, God agai dage te usu isiąbo kolesagade ma dobola siyu, agai te mobi elama damua pabo nai mego agai dage ma abela sabeo, te dila pai kapa si nogi gol dali silva dali si, te tobage gamonasiąbo naigo dage ma sabeo.
1PE 1:19 Te meni. Te Kraisgo kanemego agai dage abelama, tama ma dobola selama, tama megi dage olo mu bidibao. Tama aga kaneme te dila pai nai mu dao. Krais aga te wiegi yai kibu sipsip wai tiwai bidali, te sipsip wai aga tigi dwai naigo doloyu husugu yai digi te menio, te Godibolo te ofa mabo sipsip usu dao.
1PE 1:20 Tama God agai e tǫ nigisiąbadi, polobadu mu agai aga koneama tama te sę yabode sa muani. Me ma megi e nosali sogo agai aga dage tobade waselai dao.
1PE 1:21 Tama tiyu, Godigo aga te gų pagede ma hodolama, agabolo genuai ula yai nogi mawai dao. Tama tiwai ebaso, agadu dagego duga homu tigidali Godiba muyu agade mu dąų wali. Tama duga homu tigidali Godiba munama, tama agai dage dali wiegi yai sę yabo sogo dagego dwagi yai homu eyu tonalubo dao.
1PE 1:22 Te dagego Godigo wiegi yai mu po bugagia wali peyu tama duga homu kolesagade elaluali dwai kolesaga sela sąnama, tama dagego duga hasi we bidide dwagi yai homu ebo gagalali. Tama tiyu, megi dage bomo eyu, homu mu elaluyu duga hasi godolo mu yao.
1PE 1:23 Awe, duga hasi godolo mu yao. Magi baso meni. Dagego te gesi noma bidabo ula sai dao. Tama te dagebolo te gesi noma bidabo ula mani nai te gamonasiąbo nai menio, te gamonabo nai mu dao, te Godigo bidabo ula mabo bidada peyu, bidada pabo po, te pogo dagebolo te gesi noma bidabo ula mawai dao.
1PE 1:24 Tama Godigo pode te bukude asęani po me deli e dao, “Te tigidali we bidi osogo naga bidibo dao, te noswai tiwai. Tama augwaligo genuai nogi me te osogo naga elalubo dao, te noswai aga duduli tiwai. Te noswai holama, sasia peyu, aga duduli me tegasa dulaibao.
1PE 1:25 Tiali goli te Genuai Bidigo po bidada peyu, bidada pabo dao,” te po asęani. Tama te po da, te augwaligo dagebolo pusagasali wiegi yai gesi po dao.
1PE 2:1 Tama God agai dage te gesi noma bidabo ula mobaso, dagego te gasa bidi dabe dene mabo kolesaga tigidali tagalama, sela sąyao. Tigidali tibo kolesaga dali, te ugwadu homugo tibo po wabo kolesaga dali, te si tagalao. Tama gasa bidigo doado bage me, te agai ebo sę dali sigo dage aiyaba elaluyu, tama tibaso dagego te bidi aga dali dwai homu elama tama aga dali sębę egio. Te gasa we bidi nogi posobo po weyu ebo, te kolesaga me dagego tagalao.
1PE 2:2 Te tobage dwai sę egimio. Te menio. Te tamadi ame nani wai bǫų aga bomo eyu, te ame pę naga tuabo homu ebo dao. Tama dagego homu te wai bǫųgo homu ebo tiwai gilama, dagego Godigo po naga sao, te gasa po dali talusiąwai po dao. Te po naga sao. Tama tiyu, dage bugagia holoyu bidao, te God agai dage ma dobola sabo sę silabo sogo tonaluao.
1PE 2:3 Tama dagego te Genuai Bidigo dage dali ebo dwagi yai sę sulama koneai dao.
1PE 2:4 Te eno megi te bede po digi po begelama obao. Dage te dago Genuai Bidi Krais aga pageba asiąo. Aga da te bidabo ula elalubo masigi tiwai dao. Tama bidi dabe augwaligo agade ‘Te olo masigi dao’ homu eyu, aga sela sąwai goli, te Godigo gedude aga da te wiegi yai masigi mu dao, te Godigo aga deli hagea sali.
1PE 2:5 Tama bidi me deligo aga bidabo be te masigigo sę ebo tiwai te Godigo dage aga we bidi hani ilibo dao. Tama tiyu, dage tedali gasagi yai magi sę isiąwai we bidi hani bidaibao, te pris bidi hani tiwai. Tama te pris bidi dabe augwaligo Godibolo dwagi yai nai ula mabo sę eyu, tama agabolo ofa nai mabo dao. Tama tede Godigo dwagi yai homu ebo dao. Tama te tiwai me Krais agai dage tau selama, dagego Godigo homu wali peyu dwagi yai sę yaibao. Tama dagego te dwagi yai sę te tiwai ebaso, God agai te dagego ebo sęde dwagi yai homu yaibao.
1PE 2:6 Te eno po digi po begelama wali pode, te Godigo po bukude te Godigo wali po te bidi me deligo tama asęani, “Odiąo. Te eno masigi dabego te be nigiyu, tama eno te wiegi yai dila pai masigi me deli selama, tama ‘Te be bugagia dąų wabo masigi dao’ weyu, eno te dila pai masigi te sęba dąį ilali elalubao, te bulu nogi Saion tede munalubao. Tama bidigo aga homu tigidali agaba mubaso da, te bidi hale munu me egobeo,” te po asęani.
1PE 2:7 Tama dage duga homu tigidali agaba muani bage, te dagego gedude te aga wiegi yai mu da. Tiali goli te agaba augwaligo homu musiąwai bage, augwalide te bukude asęani po tama dao, “Te be sę ebo bagego polobadu sela sąwani masigi, te masigi megi te bede te genuai nogi elalubo masigi pedalai dao,” te po asęani.
1PE 2:8 Tama te bukude asęani po me dao, “E masigi da, te we bidi augwali sągą dani tųąbo masigi dao, te augwali te tǫba tula muabo genuai masigi dao.” Tama augwaligo Godigo poba augwa homu tigidali musiąbaso, tama augwali tulalubo dao. Te God agai polobadu augwali te sęba muani.
1PE 2:9 Me ma, dage da, dage te sa muani we bidi hani dao. Bidi meba augwali te we bidi dali, God dali tomode bidiyu, tama pris bidi sę eyu, augwaligo Godibolo te dwagi yai nai ula mabo sę ebo dao. Tama te tiwai dagego me te dago genuai tuni bidigo sę ebo dao. Dage da, te tedali gasagi yai doloba pai we bidi hani dao, God aga we bidi hani mu te dage dao. Tama agai dage i olama, tama dage te hulia sai bidibo digi tagalama, tama agai wiegi yai ula yai buluba bidagasai dao. Tama dagego agai yali wiegi yai sęde po te gasa we bidibolo pusumainogo te agai dage sa muani.
1PE 2:10 Polobadu dage we bidi hani meni yai goli, megi dage te Godigo we bidi hani dao. Polobadu dage agai homu dene eyu tau sisiąwai goli, megi dage agai homu dene eyu tau sai dao.
1PE 2:11 Eno abagi dede mu, eno dage tau somainogo bomo eyu e po dagebolo obao. Dage da e tǫba tamadi tama asai osogo bidibo we bidi dao. Tama tibaso, dago tigigo e tǫde ebo dwai dwai sę egimio. Te tobage dwai sę dabe augwaligo da aiyaba elaluai hagede da dali hwįbo dao.
1PE 2:12 Tama dage te God konesiąwai we bidi tomode bidiyu, tama dwagi yai kolesaga naga yao. Magi baso meni. Augwaligo dage dali nogi posobo po weyu, “Dage dwai sę ebo we bidi dao,” po weyu da, teda augwaligo dagego dwagi yai sę naga ebo sulama, tama nosali te Godigo po tų yagasabo sogo asobo si augwaligo aga nogi ugwaba siyu te po waibao, “Ao, agai po wali pabo we bidi augwaligo dwagi yai sę yalio.”
1PE 2:13 Te augwaligo gedude te dago Genuai Bidigo nogi tulaluidali weyu, augwali tigidali tuni bidi dologode dage bidao, augwaligo po wali pao. Tama tiyu, tama te genuai gavman tuni bidi dologode bidiyu agai wabo po odiąo.
1PE 2:14 Tama te tuni bidi agai aga sę bugulama, tama te me me tǫ pedai tonalubo sę gasa bidi dabego nogoba muani, te augwaligo te dwai sę ebo bage dene mayu, tama te dwagi yai sę ebo we bidi nogi ugwaba somainogo ebo dao. Tama dage augwali me dologode bidiyu, augwaligo po odiąo.
1PE 2:15 Te Godigo homugo te dage te tuni bidi dabe dologode bidiyu, tama dagego te dwagi yai sę naga ebogo te homu kolesaga meni yai bidi dabego kedu meni yai po wabo pedauwali dąų waibao.
1PE 2:16 Tama dage God dali dąų olama, tama dage da aga olo sę ebo we bidi dao. Tama te dwai sę ebo kolesagago dage dąų waidali weyu, dage bugagia olo bidao. Tiali goli olo bidibadi dagego te homu egimio, ‘Te da olo bidibaso, tama dago dwai sę eyu da, te usu dao,’ te homu egio.
1PE 2:17 Tama dage tigidali bidi dali augwali nogi ugwaba sabo homu eyu, augwali dologode bidao. Godigo we bidi hani dali dwagi yai homu eyu, godolo mu yao. God aga wi eyu, tama aga dologode bidao. Te gavman tuni bidi aga nogi ugwaba muyu, aga dologode bidao.
1PE 2:18 Te dage masigi sisąbo sę ebo we bidi, te dagebolo sę mabo bidi dabe wi eyu, augwali dologode bidao. Tama dage te dwagi yai nagamea pai bidi dologode naga bidigobe. Te sesena pai bidi dologode me dage bidiyu, augwaligo po odiąo.
1PE 2:19 Tama tiyu, te dagego genuai bidi me deli agai dage dali dolo sę esiąyu, dene mayu da, teda dage Godigo homude homu konea peyu te sęgę bugagia tolao. Tama dage tama tiyu da, teda God agai dage dali dwagi yai homu yaibao.
1PE 2:20 Me ma, dage dwai sę idu geyu, tama augwaligo nogogo dage elama, tama dagego te sęgę bugagia toloyu da, te mena bidigo dagego nogi ugwaba saibawe? Bidi meni. Tiali goli, me sogo dage dwagi yai sę yai goli augwaligo dage dene mawaibao. Tama te sogo dage nagamea homu eyu, te sęgę bugagia toloyu da, teda God agai dage dali dwagi yai homu yaibao.
1PE 2:21 Tama dagego te sęgę bugagia tolomainogo, God agai dage i wali. Magi baso meni. Krais aga digi dage tobade dene sai. Tama aga tama tiyu, dagebolo te sę page agai bugagia hanilama ola mawai, dage aga tiwai gilama, bugagia pąde wali asomainogo yai.
1PE 2:22 Tama tiyu, agai magi dwai sę munu me ebe, te tibo kolesaga eyu tibo po me deli digi wabeo.
1PE 2:23 Augwaligo aga dali dwai dwai po wabo si agai augwali dali dwai po wei ponobe, sagia sai. Tama augwaligo aga dene maidu gebo si, agai te boi bidi homu eyu, po wei munu me ponobeo. Woo. Te menio. Aga te homu yali, ‘God agai te augwaligo ena dali yali sęde te po tų dolo mu yaibao,’ te homu yai. Tama te homu eyu, agai te po tų yabo sę Godigo nogoba maidu geai.
1PE 2:24 Tama aga digi agai dago yali dwai sę sęgę aga tigigo selama, tama te niba dąų wagi pai. Tama tiyu, agai homugo dago te dwai sę ebo kolesaga tagalaibao, te isai bidigo dwai sę ebo tagalali gilama. Tama dago te dwai sę ebo tagalama, tama dago doloba pai kolesaga naga eyu bidaibao, te me aga homu dao. Tama augwaligo aga tigi doloyu dene mawai, tama tebogo da tau selama dwagi yai ilali.
1PE 2:25 Tama polobadu dage te kibu sipsip tiwai eyu, augwali tonalubo bidi tagalama tama hagawai digi, megi dage ma geasa asiyu, te dage bugagia tonalubo bidi pageba ma asai dao.
1PE 3:1 Te da te tigidali tuni bidi dologode bidabo po tama wali peyu, tama dage we dabe sibi dage deli deli duga bidi dologode bidiyu aga po odao. Tama tiyu, te bidi meba augwaligo Godigo dwagi yai po odobo hagela yai digi, augwaligo wego wiegi yai kolesaga ebo suyu, te wego po mobo masiąwaį goli te bidi augwa homu begelaibao.
1PE 3:2 Tama te we dabe augwali Godide wi eyu aga dologode bidibo, te magi dwai sę isiąbo kolesaga te bidi dabe augwaligo subaso da, teda augwaligo homu tulaluama, tama Godigo po mu po dao te homu yaibao.
1PE 3:3 Tama dage we dabe sibi, dagego duga tigide bulu badu eda badu au ebo sę tede te moni homu egimio. Tama tiyu, duga tobolu nisi dali haniani sę eyu au egio. Te wiegi yai kapa nogi gol tego nigali tigi au yabo nai dali, te wiegi yai bobobage ugwa dabe dali, te tobage naigo duga tigi au eyu tama gasa we bidigo suyu, dage wiegi yai au yai we dao te po omainogo munamuo. Te meni.
1PE 3:4 Te tobage au yabo nai te osogo naga elalubo nai dao. Dagego au yabo nai te gasagi yai mu dao. Te dagego homu kolesaga tomode geme dualali au yabo gasagi yai nai mu tedali elalubo dao. Tama dage nagamea pai homu eyu, dua bidabo kolesaga elalubaso, teda te gamonabo au yabo nai mu dao, tama Godigo gedude te wiegi yai dila pai nai mu dao.
1PE 3:5 Te polobadu bidai we dabe sibi augwali te tama tiwai bidai dao. Augwali dwagi yai homu eyu, God agai augwali dali dwagi yai sę ebo sogo bugagia tonaluali. Tama tiyu, augwali nagamea pai homu eyu dua bidabo kolesaga ebadi, augwali deli deli augwa bidi dologode bidai dao.
1PE 3:6 Te polobadu mu bidai we nogi Sara agai tama tiyu, tama aga bidi Abraham dali te nage da eno genuai bidi dao weyu, agai wali po bugagia wali pai dao. Tama dage me, dage Sara tiwai dwagi yai sę eyu da, tama te homu wi ilabo naide wi esiąyu da, teda dage me te Sara aga wegi hani mu dao.
1PE 3:7 Te dage we sai bidi dabe me, dage Godigo we bidi hani dali dwagi yai homu eyu, tama dage deli deli duga we dali tau sabo homu eyu, abagi homu eyu, bugagia bidao. Tama dagego koneani, te bidi me aga we me augwali sibolo God agai te bidada peyu, bidada pabo bomo olo mawaibao. Tama dagego augwali bomo genuai meni homu ebadi, te bidi agai aga wego nogi ugwaba sao. Bidigo tama tiyu bidibaso da, teda Godigo augwali sigo aga hanalu wabo po odaibao.
1PE 3:8 Te eno po silagasu po obao. Dage tigidali deli homu naga eyu bidiąo. Tama teyu, hobede eyu, te dage Godigo hani we bidi bidiyu, duga hasi dwagi yai homu eyu godolo mu yao. Tigidali we bidi dali homu dene eyu, tama nagamea pai homu ebadi bidao.
1PE 3:9 Bidi mego dage dali dwai sę ebo si, tama dagego dwai sę eyu ma wei ponogio. Ma, bidi mego dage dali dwai dwai po wabo si, dagego te dwai po me weyu wei ponogio. Te menio. Dagego God hanalu wabo po wao, agai augwali dali dwagi yai sę emainogo yao. Te God agai dagego te tobage sę emainogo dage i wali dao, tama nosali agai dagebolo dwagi yai kolesaga mu yaibao.
1PE 3:10 Magi baso meni. Te polobadu mu bidi mego e po asęani, “Niwai bidi agai homu ‘Ena dwagi yai homu eyu, tigidali sogo bugagia bidaio,’ te homu agai eyu da, teda agai dwai po olamuo, te we bidi dene maiabo tibo po wagio.
1PE 3:11 Me ma, agai dwai sę tudiba muao, te dwagi yai sę naga yao. Tama agai bomo eyu, te gasa we bidi dali bugagia bidabo sunumi gegegi pao, tama sulama aga te sunumi wali bugagia pao.
1PE 3:12 Magi basowe? Te Genuai Bidi God aga gedugo te doloba pai we bidi dabe augwali bugagia tonaluyu, augwali dali dwagi yai homu ebadi, tama agai augwaligo hanalu wabo po odoyu, wei ponobo dao. Tialima, te dwai sę ebo bage dali agai te boi bidi homu ebo dao.”
1PE 3:13 Te dage bomo eyu, tama te dwagi yai sę yabo homu dąų weyu da, teda tego dagebolo dene mawaibawe? Woo, te tobage sę ebo bidi hauwa meni.
1PE 3:14 Tialima dagego te doloba pai sę yai goli te gasa bidi dabe augwaligo dage dene me sogo mayu da, teda God agai dage dali dwagi yai homu eyu dwagi yai kolesaga dage dali yaibao. Tama tibaso, dage augwalide wi egio, te augwaligo dage dali ebo sęde me dage moni homu egimio.
1PE 3:15 Te meni. Dage duga homugo “Krais aga da, dago Genuai Bidi mu dao” homu eyu, aga dologode mu bidao. Tama teyu, dagego duga homu hasia bugagia dodolama, tama me sogo bidi mego dagego Kraisde konealubo po page hanalu obaso da, dagego agabolo te konealubo po page bugagia ola mao.
1PE 3:16 Tialima, te po page agabolo ola mobadi dagego wado po wagio. Te meni. Dage te nagamea pai homu kolesaga elama, tama aga dologode bidiyu, te konealubo po page agabolo ola mao. Tama timainogo dage te doloba pai kolesaga naga yao. Tama dagego tama tiyu da, te bidi meba augwaligo dage dali nogi posobo po weyu, tama dage Krais aga hani we bidigo ebo dwagi yai sęde augwaligo ‘Te dwai sę dao’ po wabo bage, nosali augwaligo koneaibao, te pode augwaligo mu geda muani. Tama te koneama tama augwali ge neyu hale mu yaibao.
1PE 3:17 Tama dago dwagi yai sę naga yai goli, tama God agai “Awe” weyu, te bidi dabe augwaligo dabolo dene mayu da, te usu dao. Tialima dago dwai sę elama tama augwaligo da dene mayu da, teda te dwali dao.
1PE 3:18 Magi baso meni. Te Krais aga digi agai dago yali dwai sę sęgę sela sąmainogo aga deli sogo naga isali. Tama aga te doloba pai bidi mu bidai goli, tama agai da doloba pisiąwai bage te God pageba sesimainogo agai da tobade dene sali. Bidi dabe augwaligo aga tigi isilali. Me ma Godigo Mobo Bidigo Krais bidimainogo ma hodolali.
1PE 3:19 Tama te sogo Krais aga mobo bidigo te isali bagego noma bidi dabe kalabuside bidalubo madiba aga teba pelama, tama agai aga po augwalibolo pusali.
1PE 3:20 Tama polobadu mu te bage augwali e tǫde bidibadi augwaligo Godigo po odobo hagela yai dao. Tama te sogo polobadu mu te bidi nogi Noa aga e tǫde bidiyu, tama Noa agai te moni geba nigibadi te sogo Godigo te dwai sę yali we bidi dali sębę polo isiąbadi tonaluali. Tama te moni geba nigibo sę silama, tama te we bidi isilabo moni ąį asali sogo, te we bidi hauwa te geba tomoba pelama bugagia bidibeo. Woo, te we bidi a naga olama me nogo sela naga augwali te sipde bidibadi te ąįdu sela bilama tama bugagia bidaligo sana pali. Tama tebogo Godigo augwali te ąįgo tau siyu ma dobola sali.
1PE 3:21 Tama te ąį te augwaligo dage baptais mani ąį tiwai dao. Tama Jisas Krais aga te gų pagede ma hodalobaso, Godigo te baptais mani ąįgo dage tau siyu ma dobola sali. Te ąįgo te dagego tigide elalubo meda sela sąyu, tama dage tau siyu ma dobola sabo menio. Te meni. Te dagego te doloba pisiąwai sę idali weyu, tama dagego Godibolo te da tau sao po weyu, tama augwaligo dage baptais mawai dao. Tama te tiwai ebogo dage tau siyu ma dobola sabo dao.
1PE 3:22 Tama te Jisas Krais aga te gų pagede ma hodolama, tama Godigo dagalude bidibo madiba sabolama tama genuai nogi sobaso, aga te Godigo dolo nogo badu megi bidibao. Tama aga tede bidiyu, tama ensel mobo bidi dabe tigidali dali, te noma bidi tuni bidi dabe dali, te bomo yai noma bidi dabe dali, augwali tigidali Krais aga dologode bidibo dao.
1PE 4:1 Te bidi Krais aga tigide dene saligo da, teda dage bomo siyu bugagia bidimainogo eyu, dagego agai yali homu kolesaga tiwai gilama yao. Magi baso meni. Niwai bidi agai dwagi yai sę yali goli aga dene siyu da, te bidi agai te dwai sę ebo tagalai dao.
1PE 4:2 Tama tiyu aga e tǫde bidibo sogo tigidali agai e tǫde we bidigo yabo dwai dwai kolesaga munu me egobeo. Te meni. Agai te Godigo homu naga wali peyu bidaibao.
1PE 4:3 Tama polobadu te dagego te tǫde bidibo we bidigo ebo dwai dwai sę hauwa sogo yai dao. Tama tiyu, dagego te penani ebo sę te we bidi gabidide hania idu geai dao. Tama dagego te dwai meda yai penani yabo homu eyu, tama te bomai ąį tulama te polobo bidi tiwai idu geai dao. Tama tiyu, te moni nai hauwa mu nogelama, te nai daa mu te ma tuyu, ma tuyu ela pedubadi, tama dagego te bomai ąį subigila tuyu, te polobo bidi tiwai pedaluyu, tama dwai sę eyu bidai dao. Tama dagego te tibo god augwalibolo lotu po weyu tama augwaligo dage tau somainogo te dagego te dwai dwai penani ebo sę te polobadu idu geai dao.
1PE 4:4 Tiali goli megi te dagego polobadu abagi dabe augwaligo dagede noma siyu bidibao. Dage augwali dali kisasa biliyu, tama bomo eyu, te haniani dwai dwai sę ela bilisąbaso, tama augwali noma siyu, dage dali te nogi posobo dwai po augwaligo wabo dao.
1PE 4:5 Tialima, te po tų dodolobo bidi Krais aga tamadi asobo si, te agai te polobadu isali we bidi dali, te me bidibo we bidi dali si augwali tigidali dali agai te moni po tų yaibao. Tama te sogo te dage dali dwai po wabo bage augwaligo te bidibolo te nogi posobo dwai po wali po page pusulama, te pode te augwali dene saibao.
1PE 4:6 Tama te Krais agai te isali we bidi dali me te po tų ebo sisi yai elaluyu, tama agai te polobadu isai we bidi dali me te Godigo gesi dwagi yai po pusigi pai. Magi basowe? Te God agai augwali osola sulama, tama augwali isali, te tigidali tǫde bidibo we bidi tiwai. Tama augwaligo tigi isali goli, augwaligo noma bidi te God tiwai bidimainogo Krais agai augwalibolo te Godigo po pusigi pai.
1PE 4:7 Te tigidali nai silabo sogo te pąba yagasobao. Tama tibaso, dage te homu nagamea pai we bidi bidao, te dage God dali te hanalu wabo po gisiga omainogo te dagego duga homu bugagia tonaluyu bidao.
1PE 4:8 Tama dagego genuai hasia yabo sę e dao, te dage bomo eyu, te duga hasi te dwagi yai homu eyu godolo mu yao. Tama te we bidi godolo mu ebo kolesaga, te tebogo te augwaligo ebo dwai sę sula tagalabo kolesaga dao.
1PE 4:9 Tama tibaso te kolesaga yao. Tama te kolesaga eyu, te dwagi yai homu eyu, tama duga hasi dage deli deligo te gasa we bidi dali te nai gesebo sę yao.
1PE 4:10 Tama God agai te dage deli delibolo te haniani tau sabo homu kolesaga olo mena mena pai dao. Agai tama tialigo da, dage deli deligo te olo mani homu kolesaga ebogo gasa we bidi tau sao. Tama dagego tama tiyu da, teda dage te Godigo olo mani tau sabo homu kolesaga bugagia tonalubo we bidi mu bidaibao.
1PE 4:11 Tama dage deli deligo te haniani sę eyu, tama te po ola mabo bidi agai te Godigo po ola mao. Tama te gasa we bidi tigi tau sabo sę yabo bidi me, agai te Godigo agabolo mabo bomogo te sę yao. Tama te tiwai yao, tama dage Jisas Kraisde wadolama, tama tigidali sęde Godigo nogi ugwaba somainogo te tiwai yao. Te God aga te moni ula yai nogi dali, te tigidali nai tonalubo bomo dali si te sesemane sogo elalua peyu, elalua paibao. Te tiwai emainao. Mu dao.
1PE 4:12 Eno abagi mu dede, te dageba te dwai usu sabo sogo megi pedalobo. Tama te sęde te gasagi yai konesiąbo sę dao homu eyu, dagego noma sigimio. Woo, te menio.
1PE 4:13 Dagego te Krais aga dene sali tiwai te dagede me te dene tolobo sę meba megi tama siyu ebaso, tama dage dwagi yai homu yao. Tama nosali aga ma asobo si, aga bomo yai ula te sogo hanilibo si, te dagego aga dene meba ede sobaso tama dage te sogo me te didibili eyu moni dwagi yai homu yaibao.
1PE 4:14 Tama dage Krais wali pobaso augwaligo dage dali te nogi posobo dwai po weyu da, teda dage dwagi yai homu yao, God aga moni ula yai Mobo Bidi aga dage dali bugagia bidibaso.
1PE 4:15 Me ma, dage tomode bidi me deli agai te bidi ela mubo sę, ma te nai wi sabo sę te si ilamuo, te tobage sę ebode dene sigio. Dagego dwai sę ebaso dene sigimio. Ma, te kolesaga hagoma eyu, gasa bidi dabe dali augwali tonalubo bidigo po weyu bidigio. Te tobage sę ebode me te dene sigimio.
1PE 4:16 Tiali ma dage te Godigo po wali pabo we bidi bidibaso tama tede augwaligo dage dene mayu da, teda dage hale ilamuo. Woo, te menio. Dagego te nogi te Godigo po wali pabo we bidi nogi elalubaso te Godigo nogi ugwaba siyu, nage usu da po agabolo wao.
1PE 4:17 Magi baso meni. Te Godigo we bidi osola subo bodolu mani sogo pąba yagasai dao, tama agai te aga hani we bidi dali te osola suyu, te po tų ebo sę gagalaibao. Tama da, te da Godigo po wali pabo we bidi hani dao. Tialima God agai te po tų dodolobo sę gagalainogo eyu, tama hasia bolo agai te da aga hani we bidi dali te sę yaibao. Tama tibaso da, te Godigo gesi dwagi yai po odobo hagela yai we bidi dabe, nosali agai augwali dali te po tų ebo si, te augwaligo genuai dene mu saibao.
1PE 4:18 Tama te asęani po tiwai, “Te doloba pai bidi, te tobage bidi Godigo agabolo dene hasia mayu, tama nosali God agai te bidi ma dobola sabo dao. Tama te doloba pai bidi dali tama tialigo da, teda te Godigo po sela sąyu dwai sę yali bidi te aga dali te Godigo magi yaibawe?” te po asęani.
1PE 4:19 Tama tibaso, God agai “Awe” weyu, tama dage dene siyu da, teda dagego dwagi yai sę naga ebogo dagego duga digi God nogoba muao. Te God aga digi agai dage nigali, te agai dage tau siyu ma dobola sabo bomo te munu me siligobeo.
1PE 5:1 Tama tibaso, megi eno te dage Godigo hani we bidi tonalubo bidi dabe dali e homu kęna sabo po obao. Ena digi me ena da te Godigo hani we bidi tonalubo bidi dao, te dage tiwai. Tama eno gedugo Krais aga dene sabo suai bidi dao. Tama aga ma asiyu, tama aga bomo yai ula pedalobo si, te sogo ena te bomo yai ula meba sabo bidi me bidaibao.
1PE 5:2 Tama te homu kęna sabo po e dao: te kibu sipsip tonalubo bidi agai te kibu sipsip bugagia tonalubogia tama dagego te Godigo dagego nogoba muani we bidi bugagia tonaluao. Tama te sęde augwali tonalubo hagela homu eyu tama tonalugio. Woo, te menio. Dwagi yai homu naga eyu, dagego augwali bugagia tonaluao. Tama dagego te masigi naga somainogo te sę egimio. Te menio. Dagego homu mu bomo eyu, te augwali tau somainogo te sę yao.
1PE 5:3 Tama kolesaga hagoma elama, tama dwai homu eyu te Godigo dagego nogoba muani we bidi tama tonalugio. Woo, te dage te dwagi yai sę ebo tųdu polasa pao, te augwali dage wali asomainu, te kibu sipsip augwali te augwali tonalubo bidi wali pomainogo aga polasa pabo tiwai gilama yao.
1PE 5:4 Tama dage te kibu sipsip tonalubo bidi dabe tiwai bidiyu, tama Krais aga te sipsip tonalubo bidi dabego tuni bidi mu tiwai dao. Tama aga ma asiyu hanilibo si, te sogo dagego te bomo yai ula saibao, te bomonama udayu nai sabo bidi agai te wiegi yai tobolu au yabo nai sabo tiwai. Tama agai au yabo nai osogo elaluyu dolai goli, te dagego sabo bomo yai ula te dolisiąbo nai mu dao.
1PE 5:5 Te dage gesi bidi dabe, dage me te dolo kolesaga eyu, te tonalubo bidi dabe dologode bidiyu, augwaligo wabo po bugagia odiąo. Tama dage we bidi me, dage tigidali te nagamea pai homu eyu, tama te olo sę ebo we bidi tiwai bidiyu, dage tomode duga hasi te tau sabo sę yao. Magi baso meni, te Godigo po bukude te nagamea pai homu ebo kolesagade e po elalubao, “God agai te kolesaga hagoma ebo we bidi dali boi bidi homu eyu, bomo elama dolalubo dao. Tialima te nagamea pai homu ebo we bidi dali agai te olo tau sabo kolesaga ebo dao.”
1PE 5:6 Tama tibaso, te nagamea pai homu eyu, God agai genuai bomo elalubo nogo dologode bidiąo, te agai bodolu mani sogo asobo si agai dage ugwaba somainogo tama bidiąo.
1PE 5:7 Tama bidiyu, tama God agai dagede homu eyu, tama agai dage bugagia tonalubaso te dagego moni homu ebo sę tigidali aga nogoba muiąo.
1PE 5:8 Te dagego duga homu bugagia dodolao, tama bugagia tonaluao. Te dagego boi bidi Satan aga susa bilibo dao. Te moni hasa nogi laion, te aga nasi baso bomo elama, tama moni hwa olama gaa weyu aga tuabo nai gegeyu bilibo dao. Tama te boi bidi Satan aga te tiwai eyu susa bilibo dao, te dage dolainogo ebo dao.
1PE 5:9 Tama dagego duga Godide konealubo homu bugagia dąų olama, tama dolaluyu te boi bidi sela sąyao. Dagego koneani, te augwaligo dage dene mabo tiwai gilama eyu, te gasa bidi dabego te Godigo hani we bidi tigidalibolo te tobage dene mabo dao, te tigidali tǫde.
1PE 5:10 Tama dagego te sęgę osogo tolama, tama God aga digi agai dage sese bugagia ma ilama, tama dage bomo menama, bugagia mu dąų waibao. Te God aga da te tigidali wiegi yai olo tau sabo kolesaga page bidi dao, tama agai dage i wali, te dage Krais wali peyu, te Godigo bomo yai gamonabo ula meba dagego somainogo yali.
1PE 5:11 Eno homugo te God aga te tigidali nai tonaluabo bomo sesemane sogo elalua peyu, elalua paibao. Te tiwai emainao. Mu dao.
1PE 5:12 Te bidi nogi Sailas agai ena tau siyu, tama eno e pęwadage po dagebolo asęna tolobao. Tama eno homu te bidi Sailas da te aga nogoba muani sę bugagia tonaluyu sę ebo bidi dao. Tama eno e po dagebolo asęyu, tama bomo elama eno dage homu kęna sabo po weyu, tama te eno asęani po te God agai aga we bidi olo tau sabo kolesaga mu dao. Tama tibaso, te kolesaga bugagia dąų olama, tama dolaluyu bidiąo.
1PE 5:13 Te Godigo hani we bidi meba augwali te bulu nogi Babilon tede augwali bidibao. Tama Godigo augwali te dage dali te hagea sai dao. Tama te we bidi dabe dali, te eno ogwa tiwai bidibo bidi nogi Mak dali, augwaligo dagebolo te dage bugagia bidao po obao.
1PE 5:14 Tama dage me duga hasi pagea siyu, tama gasa we bidi bugagia bidao po wao. Tama eno homugo te dage Kraisde wadolai we bidi dage tigidali te homu kęnasa bugagia bidiąo.
2PE 1:1 Ena da Saimon Pita dao, te bidi Jisas Kraisgo sę ebo bidi dao, te ena agai tagala palai bidi me deli dao. Tama eno e pas asęna dagebolo tolobao. Te Jisas Krais aga te dago God dao, te aga da te da ma dobola siyu dwagi yai buluba muabo bidi dao. Tama aga doloba pai bidi mu bidiyu, tama da tigidali dali deli homu naga elama, tama agai te dagebolo te agaba duga homu tigidali muabo kolesaga mawai dao. Tama te dagebolo mani kolesaga te agai dabolo mani kolesaga tiwai si dao, te wiegi yai dila pai kolesaga mu dao.
2PE 1:2 Tama eno homugo dagego te God dali, te dago Genuai Bidi Jisas dali si bugagia kuna koneyu, tama tebogo te God agai olo tau sabo kolesaga dage dali genia peyu, tama dage nagamea homu eyu bugagia mu bidimai yaibao.
2PE 1:3 Te God agai aga bomogo te dabolo te da God tiwai bidibo usu ilabo bomo tigidali mawai dao. Tama agai aga bomo yai ula me, te aga wiegi yai kolesaga me te dabolo mawainogo agai da i wai. Tama dago aga koneyu, tama tebogo te agai te doloba pai bidabo bomo dabolo mabo dao.
2PE 1:4 Tama tiyu, agai te polobadu wali maiabo genuai wiegi yai nai dabe dabolo olo mawai dao. Tama agai te nai dabe dabolo magi baso mawai dawe? Te dagego te mani nai dabe selama, tama dage te God konesiąbo we bidigo ebo dwai dwai sę yabo homu tagalama, tama te tobage we bidi dolobo sęde geda selama wi peyu, tama dagego te Godigo doloba pai wiegi yai homu kolesaga somainu, agai te polobadu mawaibao wali maiabo genuai wiegi yai nai dabe dabolo olo mawai dao.
2PE 1:5 Tama agai da dali tama tibaso, dagego duga homu Godigo poba dąų wabo kolesaga ebadi, te gasa kolesaga me yao, te dwagi yai sę naga ebo kolesaga yao. Te tama eyu, tama dagego Godigo homu konebo kolesaga me yao.
2PE 1:6 Tama te kolesaga ebadi, te duga digi duga tigi dali homu dali si bugagia tonalubo kolesaga, te me yao. Tama te kolesaga ebadi, e kolesaga me yao, te dagego dene hauwa sogo bugagia tolao. Tama dene bugagia tolobadi, dagego Godigo kolesaga naga dolo mu wali pabo kolesaga yao.
2PE 1:7 Tama te kolesaga ebadi, te duga hasi abagi dali dwagi yai homu eyu godolo mu ebo kolesaga me yao. Tama tibadi, te tigidali we bidi dali dwagi yai homu eyu godolo mu ebo kolesaga, te me dagego yao.
2PE 1:8 Tama te tobage homu kolesaga dagego elaluyu, geneniyu da, teda dagego dago Genuai Bidi Jisas Krais bugagia kuna mu koneyu, tama wiegi yai du walaibao.
2PE 1:9 Tialima te tobage wiegi yai kolesaga esiąbo bidi te gedu widai bidi tiwai dao, aga digibulu tonobo gisiga bugagia susiąbo bidi dao. Tama te bidigo gegeda pai, te Godigo aga polobadu yai dwai sę tigidali sela sąwai dao.
2PE 1:10 Eno ama dede, u haniani dwagi yai kolesaga ebode eno po me elalubao. Godigo dage aga sa muyu, tama agai dage i wai dao. Tama agai dage dali yali sę bugagia dąų omainogo te dage bomo eyu, te u haniani dwagi yai kolesaga yao. Dagego tama tiyu da, teda dage munu me tulalugobeo.
2PE 1:11 Tama te kolesaga dagego wali peyu da, teda te tų mu dala pelama, tama dage te Jisas Kraisgo we bidi tonalubo bomo dologoba olo bugagia mu peyu tama bidaibao. Aga te dago Genuai Bidi, tama agai da ma sali bidi dao. Tama te agai we bidi tonalubo sę bidada peyu, bidada paibao.
2PE 1:12 Tama tibaso, dagego te kolesaga page koneyu, tama dagego te mu po selama, tama dage tede bomonama dolaluai goli, eno homugo te eno dagebolo te po widu geaibao.
2PE 1:13 Eno homugo e kolesaga ebo dolo dao, ena megi e elalubo tigi me bidibadi te eno dagebolo te po ma widu geaibao, te dage homu hodolomainogo yaibao.
2PE 1:14 Tama eno koneani, dwasianu sogo digi te eno e tigi tagalaibao, te dago Genuai Bidi Jisas Krais agai tama tiabo po enabolo pusalio.
2PE 1:15 Tama eno bugagia dua dua eyu te tų nigaibao, tama ena isai digi nosali dagego te po tigidali sogo dagego homugo ma koneaibao.
2PE 1:16 Te dago dagebolo te dago Genuai Bidi Jisas Kraisgo bomo dali, aga nosali ma asobo po dali, te po si polobadu ola mobadi yaide, te dago te bidi me aga homugo naga olo nigali po wali pelama, tama dagebolo te Kraisgo po ola mabeo. Woo, te menio. Dago suali, Godigo genuai ula dali bomo dali te dago gedugo suai.
2PE 1:17 Tama da aga dali bidibadi te aga Aya Godigo aga nogi ugwaba siyu, tama te wiegi yai ula agaba mawai. God aga te hasia polalubo dagalu ulade bidiyu, agai te po wali, tama te dagaludu wali po Kraisba dulama te po wai, “Te eno ogwa dao, eno aga godolo mu eyu, tama eno homu wiegi yai aga dali mu ebao.”
2PE 1:18 Da aga dali te tedali bulu dude bidibadi, tama te po dagaludu asiyu wabo po odai dao.
2PE 1:19 Tama tibaso, dago te Godigo po odolama we bidibolo pusali bidi dabego polobadu wali poba dena homu te poba dąų wabo dao. Tama te tiwai gilama tama dagego me augwaligo wali po bomonama dąų ola siyu da, te wiegi yai yaibao. Te Godigo po pusali bidi profet bagego po te be hulia sai madide te lam sole ula elalubo tiwai dao. Tama dagego te profet bagego po bugagia odao, tama te po ododubadi te be posainu ebode tama te genuai ula elalubo hǫ pedalugulama tama te hǫgo ula te dagego homu tomode ula elaluaibao. Te sogo asobo tonalubadi, dagego te profet bagego po bugagia odiąo.
2PE 1:20 Tiali goli hasia dagego te bugagia koneao, bidi mego aga digi aga homu wali peyu, te bukude elalubo profet bagego po me deli te page pusugobeo. Te aga usu egobeo.
2PE 1:21 Magi basowe? Polobadu bidi me deli aga homugo digi te Godigo po pusubo profet dabego wabo po munu me pedalobeo. Menio. Godigo Mobo Bidi aga digi te bidi dabe homu hodolobaso, tama augwaligo te Godigo augwalibolo mani po pusai dao.
2PE 2:1 Tiali goli polobadu te tibo po wabo profet bidi dabe meba te Israel dabe tomode pedalai. Tama tialima te tibo po wabo tisa bidi dabe meba augwali te dage tomode me pedalaibao. Te augwaligo geme te bidi dolabo tibo ola mabo po haniani ola mabo gagalaibao. Tama tiyu, te Genuai Bidigo augwali ma dobola siyu abelai goli, augwaligo te Genuai Bidi nogi tudiba muyu hogwa saibao. Te augwaligo tama tiyu, te augwa digi polo dolaibao.
2PE 2:2 Tama we bidi hauwa augwaligo dwai penani ebo kolesaga haniani augwaligo wali paibao. Augwaligo tama tibaso, gasa we bidi augwaligo te wiegi yai kolesaga mu wali pabo bidi dabego kolesaga dali dwai posobo po waibao.
2PE 2:3 Tama te tibo po ola mabo bage augwaligo te gasa we bidi dabego nai sulama pesą elama mu sainogo ebo bidi dabe, tama augwaligo te dagego mone dabe bomonama sainogo tibo po hauwa dage dali waibao. Tiali goli polobadu mu Godigo augwali po tų ilama hagayabo te sisi yai elalubao. Tama augwali mu dolabo nai te sesemane sogo tonalubao.
2PE 2:4 Magi baso meni. E tiwai dao. Te Godigo ensel mobo bidi dabe augwali mebago polobadu dwai kolesaga yai. Tiali goli Godigo augwali sula tagalobeo. Menio. Agai augwali te sao dedage pagede kalabus elaluyu, tama te sau dedage page dwai be mu hulia side bidibao. Tama megi me augwali te po tų yabo sogo te pedalobo tonaluyu bidibo dao.
2PE 2:5 Te polobadu mu bidai we bidi augwali me, te augwaligo God gegeda peyu tudiba muai, tama agai augwali sula tagalobeo. Menio. Agai te wę genuai augwaliba asomainogo elama, tama augwali te węgo ela silama tama hagawai. Tiali goli te bidi Noa aga te doloba pai kolesaga ebo po pusubo bidi bidai. Tama Godigo aga dali, te we bidi a naga olama me badu nogo si agai tonaluyu ma dobola sai.
2PE 2:6 Tama agai te Sodom dali Gomora dali si me dene ilai. Te genuai hanu si Godigo siago ulai, tama te keli naga elaluai dao. Agai te hanu sigo yali dwai kolesaga wei ponama tama te hanu si tigidali mu dolai. Tama nosali, te Godigo po tudiba mubo bidi dabe, augwaligo te polobadu yali po tų konemainao. Te po tų nosali augwaliba pedalabo te piksa noma waseliyu yali dao.
2PE 2:7 Tama Godigo te doloba pai bidi Lot ma dobola sali, tama Godigo aga dolobeo. Lot aga te penani kolesaga ebo we bidi augwaligo yali kolesagade aga homu sęgę mu yai.
2PE 2:8 Te doloba pai bidi augwali tomode bidai, tama augwaligo ebo dwai kolesaga hauwa sogo sudu geai, tama tigidali sogo augwaligo dwai po wabo agai odai. Tama agai homu bugagia dolo elaluai, tama aga noma siyu, tama agai homu dene mu augwaligo te bomo yai po sela sąbo kolesagade yai.
2PE 2:9 Tama te polobadu yali sę pode dago koneai, Godigo te we bidigo ebo dwai sę wei ponobo konealigo da, teda e me dago koneani, te God wali pabo we bidi augwalibolo te usu sabo sę pedalobaso da, teda Genuai Bidigo augwali te sęde ma dobola sainogo koneama tama tiaibao. Tama agai te dwai bidi dabego ebo kolesaga me koneyu, tama te dwai dene wei augwaliba ponobo, te me agai konebao. Tama koneyu, agai te po tų yabo sogo tonalubadi augwali dene mabo dao.
2PE 2:10 Tama te bidi dabe augwali meba te dene genuai mu saibao. Te augwaligo tigigo yainu meda yai kolesaga wali pabo homu hodolo bidi dabe augwaligo te tigidali genuai bidigo po hagela eyu, tama te po sela sąbo dao. Tama te tibo po ola mabo bidi dabe augwali te hale isiąbo bage dao, tama augwaligo augwa homu naga wali pabo dao. Wi me esiąyu, tama te bidi dabe augwaligo te dagalude bidibo genuai mobo bidi dabe dali dwai posobo po wabo dao.
2PE 2:11 Tama te mobo bidi augwaligo te bidi dabe augwali aiyaba mu elaluabo digi, tama augwaligo augwali dali te posobo po me wasiąma, tama augwali te Genuai Bidi gedude po tų ela magobeo.
2PE 2:12 Tama te tibo po wabo bidi dabe augwaligo homu te bulu hasa dabego homu tiwai elaluyu, tama augwaligo tigigo ebo kolesaga naga wali pabo dao. Te idago augwali ame nani tama te bidigo augwali selama ela mumainogo tebao. Te augwaligo konesiąbo naibolo te augwaligo dwai po aga dali wabo dao. Tama te bulu hasa dabe dolobo, te tiwai ebo gilama tama te bidi dabe augwali me dolaibao.
2PE 2:13 Tama augwaligo dwai kolesaga haniani ebo, tama augwalibolo te dwai kolesaga ebo wei ma ponobo sę pedalaibao. Augwaligo homugo te siade nai dali te wę dali hauwa tubo kolesaga, te wiegi yai homu ebo kolesaga dao. Tama tebo homugo augwaligo nai dabe dage dali tuyu, tama augwali te dwai meda yai tiwai dage tomode bidiyu, tama augwaligo tibo kolesaga ebode te wiegi yai homu pemene ebo dao.
2PE 2:14 Tama augwaligo gedugo te we dabe sibi sesemane sogo tonono eyu te penani yainogo, tama augwaligo te dwai kolesaga ebo tagalogobeo. Mu menio. Augwaligo te homu bomo meni yai bidi dabe augwali te sę emainogo homu begelama, tama augwaligo te dwai sęgę sabo kolesaga yai. Te augwaligo gasa bidigo nai sabo pesą ebo kolesaga konea sai dao. Tama Godigo te bidi dabe augwali mu dolaibao.
2PE 2:15 Tama augwaligo te doloba pai kolesaga wali pabo tų tudiba muyu, tama augwali hagawai. Augwaligo te polobadu bidai bidi Beorgo ogwa, Balam, tego yali kolesaga te tų wali pai. Agai te sęgę sabo sę elama, tama te sęde sabo masigi te agai godolo mu yai dao.
2PE 2:16 Tama te moni kibu donki tego po wabo meni, tiali goli te kibu donki me deligo te bidigo po wabo tiwai olama, tama agai te bidi Balamgo dwai kolesaga ebaso te aga dali wado po wai. Tama te kolesaga yaligo, te donkigo te nosali yabo sę po pusubo profet bidi Balamgo dwai kolesaga yainogo yali tų te paliai dao.
2PE 2:17 Tama te tibo po ola mabo bidi dabe augwali te wę ulu meba te wę meni yai pedalisiąbo tiwai dao. Tama augwali te pǫ tiwai elama, te genuai waligo besela sąnama tedela pabo tiwai gilama ebao. Godigo te be sisi yai hulia sai digi aba mu tama augwali teba pabo sisi yai elalubo dao.
2PE 2:18 We bidi meba augwali te Godigo po odisąwai bage tomode bidai digi, tama tamadi tama augwaligo te kolesaga ebo tagalali. Tama te we bidi dabebolo te tibo po ola mabo bage augwaligo te genuai po weyu, tama augwaligo te dwai kolesagade te po dwai dabe wabo dao. Augwaligo te homu begelai we bidi te homu hodolobo kolesaga eyu, te penani me te tigigo haniani dwai kolesagago augwali te dwai kolesagaba ma kekebo sę eyu tama augwali te kolesaga wali pabo dao.
2PE 2:19 Tama te tibo po ola mabo bidi dabe augwaligo te po te we bidibolo wabo dao, “Dagego dago po wali peyu da, teda dage olo mu bidaibao.” Tama augwaligo te tobage po wabo digi tiali goli augwali te augwa digi dolobo kolesaga ebo sę bidi bidibo dao. Te tiwai dao: tama te bidi te magi kolesaga me deligo te bidi me deli aiyaba elaluyu aga dąų obaso da, teda te bidi aga te elalubo kolesagade dąų wali bidi dao.
2PE 2:20 Mu tama, augwaligo te Jisas Krais koneani, aga dago Genuai Bidi tama da ma sali bidi dao. Tama tede koneyu augwali wi pelama, te tǫde elalubo dwai meda yai kolesaga tigidali tagalai. Tama augwali te kolesagade dąų ma weyu, tama te kolesagago augwali aiyaba elalubaso da, teda augwali tama tiwai bidaibao: te hasia mu augwali dąų olama, augwali dwai bidali, tiali goli nosali augwali ma dąų wai, tama augwali dwai mu bidibao.
2PE 2:21 Tama augwaligo te doloba pai kolesaga ebo tų munu me konegi menigi sogo da, teda augwaligo nosali te genuai sęgę sigi meni da. Tiali goli megi te tų augwaligo koneama, tama augwaligo te wiegi yai tedali bomai po sali, tiali goli te wiegi yai po te augwaligo geasa peyu, te po tudiba muai dao. Tama tibaso, sęgę saibao.
2PE 2:22 Tama augwaligo ebo kolesaga te dago wąįgo polobadu wali mu po tiwai dao, “Te yowi ma geasa pelama, aga bugali bogu ma tugi pai.” Tama gasa po me weyu te po wai, “Te kibu aga wę pauwai digi, tiali goli te kibu aga pelama te tǫ pu yai digi pebege ma piligi pabo dao.”
2PE 3:1 Eno abagi dede dabe mu, megi eno e asęna tolobo te eno pas si dao. Tama eno dagebolo asęna tolali pas side te dagego homu wiegi yai ilimainogo hodolobo po wai dao, te po dagego ma koneiąo.
2PE 3:2 Tama eno homugo dagego te nosali pedalabo nai po ma konemainogo homu eyu, te wiegi yai tedali profet bidi dabego pusali po dao. Tama te Genuai Bidi te da ma sali bidi agai aga bomo yai po olama, tama te dugaba tagala palali sę bidi dabego pedauwalidu wali po odoyu, tama te po me dagego homude dąų olama ma koneiąo.
2PE 3:3 Hasia dagego tebolo koneiąo: tama te tǫ de dagalu si me te tigidali nai silibo sogo, te posobo po wabo bidi dabe augwali pedalama, tama augwa bomonama naga te homugo ebo dwai kolesaga naga wali paibao. Tama augwaligo posobo po e tiwai po weyu, “Aga ma asabo po wali dawe?
2PE 3:4 Tama aga menade bidibawe? Aga asobeo. Tama te dago wąį dabe isali sogo tama dąį elama megi tama bidada asobo sogo, te tigidali nai Godigo nigali sogo, te tiwai polobadu elaluai dao, hasegelebeo,” augwaligo te tobage po waibao.
2PE 3:5 Tama tiyu, augwaligo homugo te Godigo polobadu yali sę konebo hagela homu yai dao. Te polobadu mu Godigo po obaso te dagalu pedalama elaluai, tama tǫ te wę tomodu pedalama, tama te wę tomode te tǫ elaluai dao.
2PE 3:6 Tama nosali te wę te tǫde te genuai asama, tama te sogo tǫde elaluali nai tigidali mesegelama dolai.
2PE 3:7 Tiali goli, megi Godigo pogo naga te dagalu me tǫ me sa munama, tama te dolobo sia dabo pedalobo tonaluyu bidibao. Tama te dagalu de tǫ sigo te Godigo po tų te agai po tudiba muani we bidi augwali te po tųba pedalobo tonalubao, tama te we bidi augwali dolaibao.
2PE 3:8 Tiali goli, abagi dede dabe mu, dagego homugo te po me deli gegeda pigio. Te po e dao, te Genuai Bidigo gedude be deli sogo siade te kibu be hauwa mu 1,000 tiwai te si dao, tama te kibu be hauwa mu 1,000 wabo kibu be te deli sogo siade tiwai si dao. Te Genuai Bidigo homude te si te deli tigi tiwai dao.
2PE 3:9 Tama tede konesiąwai bidi mebago homu te Genuai Bidi agai te po dąų wali sęde te sę dua dua eyu polo egobeo. Tiali goli te menio. Agai dage bugagia tonaluyu bidibo dao. Agai homugo te we bidi me deli hagaidali te tonaluaibao. Agai homugo tigidali we bidi augwa homu begeleyu te dwai kolesaga ebo tagalamainogo, te aga tonalubo dao.
2PE 3:10 Tiali goli te Genuai Bidi asobo sogo mu asaibao, te nai wi sabo bidi geme asobo gilama. Tama te sogo dagalu kulukulu genuai olama tama hagawaibao. Tama te giliga dali, polua dali, te hǫ dabe tigidali, te siago dela silaibao. Tǫ me, te tigidali nigali nai elalubo me, te siago tigidali daibao.
2PE 3:11 Tama te nai dabe tigidali tama tiwai ela silaibao. Tama tibaso, dage kone paliąo, te dage magi we bidi megi bidaibawe? Dage te wiegi yai tedali kolesagade biliyu, tama Godigo kolesaga naga tigidali wali piąo.
2PE 3:12 Tama tibadi, te dagego te God aga sę yabo sogo asobo tonaluyu, tama dagego bodolu pedelaiba weyu, tama sę bomonama selebo sę yao. Tama te sogo te dagalu sia dela silama, tama posolo yai siago mu te dagalude elalubo nai dabe tigidali delama, tama te wę tiwai begelama pedalaibao.
2PE 3:13 Tiali goli Godigo te gesi dagalu dali gesi tǫ si nigabo po dąų wai, tama doloba pai kolesaga naga tede bidaibao. Tama dago te nai naga tonalubo dao.
2PE 3:14 Abagi dede mu, dagego te gesi nai pedalobo tonalualigo da, teda dagego bomo eyu, te meda meniama tama magi dwai sę me isąma bidiyu, tama God dali dagego deli homu elama bidao. Tama nosali te sogo Godigo dage osola suyu, dage te tiwai bugagia bidibo agai sueibao.
2PE 3:15 Tama Genuai Bidigo me tonaludu tama agai da dali dua ebao. Tama dagego te kolesaga ebode tama kone palao, te agai da ma sainogo ebao. Tama Godigo wiegi yai homu kolesaga te dago dwagi yai ama Polbolo menama, tama agai me te tobage po dagebolo asęna tolai dao.
2PE 3:16 Agai tigidali pasde agai te sęde te tobage po naga wabo dao. Tama meba po te pasde elalubo te po page polo hania pedalobo meni, te dago bugagia hania koneainogo sinabo sę ebo dao. Tama te bugagia dolalusiąbo bage, te konesiąwai bidi dabe, augwaligo te po hasegelebo dao, te augwaligo te gasa po te Godigo bukude elalubo po te me hasegelebogia. Tama tebo bidi dabe augwali augwa digi dolaibao.
2PE 3:17 Abagi dede dabe mu, dagego te tibo po ola mabo bage nosali pedalabo te polo konealigo da, teda dagego duga digi bugagia tonaluao. Tiyu te bomo yai po sela sąbo tibo po wabo bidi dabego dage te geda muani poba kegelama tama dage pasega sąyu tulaluidali weyu, bugagia suiąo.
2PE 3:18 Me ma, dage te dago Genuai Bidi me te da ma sali bidi Jisas Kraisgo olo tau sabo kolesagade bidiyu, tama dagego aga koneanio. Tama dagego te olo tau siyu mabo kolesaga me mu siyu, tama dagego Krais aga konebo kolesaga hauwa siyu bidiąo. Tama agai te genuai ula yai bomai nogi megi elalubao, tama te nogi sesemane sogo mu bidada peyu, bidada paibao. Mu dao.
1JO 1:1 Dago te gesi noma bidibo ula elalubo pode, te pode dagebolo e po asęna tolobao. Te Godigo nai me deli me nigisiąbadi te po hasia bidaluai dao. Te po polobadu mu elaluali goli dago te po dena ologo odali dao, tama dena gedugo suai. Awe, dago gedugo suali, tama dago nogogo tuyu yai.
1JO 1:2 Te gesi noma bidibo ula aga bulu ulaba hania pedalama, tama dago aga suai. Tama tibaso, dago agade po dagebolo pusuyu, tama te Ayade bidali bidada peyu, bidada pabo ula aga hania pedalama, tama dago sulama, tama dago dagebolo pusubao.
1JO 1:3 Awe, agade dago gedugo suali sę dali te dago ologo odali po me, te si dago dagebolo me pusubao. Te dage da dali wadolama, tama da tigidali te dago Aya dali, aga ogwa Jisas Krais aga dali me dago deli homu elama bidimainogo eyu te dago megi e po dagebolo pusubao.
1JO 1:4 Tama da dali dage dali te da tigidali dwagi yai homu pemene mu emainogo dago e po dagebolo asęna tolobao.
1JO 1:5 Te Kraisgo dabolo ola mani po dago megi dagebolo hania ola mobao. Te po e dao: God aga te ula dao, tama dwasianu hulia sali agade me elalubo menio.
1JO 1:6 Tama tibaso, dago “Da God aga abagi bidiyu, tama dago aga dali deli homu ebo dao,” te po weyu, tiali digi da hulide biliduyu da, teda dago tibo po wai, tama dago ebo kolesaga te mu menio.
1JO 1:7 Tiali goli da ulade biliyu da, te aga te ulade bidibo gilama, tama tiali da, da dena hasi abagi dede dali deli homu elama bidaibao. Tama bididuyu, tama Godigo ogwa Jisas agai kanemego dago dwai sę tigidali sela sąnama, tama da dwagi yai ma pedalobo dao.
1JO 1:8 “Eno dwai sę menio,” dago te po weyu da, teda dago dena homu kolesagabolo ili po ola mayu, tama mu po wabo dago homu kolesagade me menio.
1JO 1:9 Tiali goli dago yali dwai sę dabe po dago te Godibolo pusuyu da, teda agai aga polobadu dąų wali po wali peyu, tama agai da dali te doloba pai kolesaga naga eyu yaibao. Agai dago dwai sę yali sela sąwaibao, tama dago yali dwai kolesaga tigidali agai sela sąnama tama da te meda isąwai we bidi ilaibao.
1JO 1:10 Dago hogwa sabo po weyu, “Eno dwai sę me ebeo,” dago te po weyu da, teda te po wabogo dago God aga nogi ili po wabo bidi dao wai, tama agai po dago homude menio.
1JO 2:1 Eno wai dabe, dagego dwai sę isąmainogo eno e po dagebolo asęna tolobao. Tama bidi me deligo dwai sę eyu da, te da tau sabo bidi me deli elalubao, te mu doloba pai bidi Jisas Krais dao. Tama aga Aya dali bidiyu, tama agai te da tau sabo po agabolo wabo dao.
1JO 2:2 Tama Krais agai tigi menama, tama aga digi dago dwai sę yali sela sąbo tų dawai bidi dao. Tama agai da naga tau selama, dago dwai sę yali te naga sela sąbo bidi menio. Agai tigidali tǫde bidibo we bidi me tau siyu, tama augwaligo yali dwai sę sela sąbo tų dawai dao.
1JO 2:3 Te dago Godigo bomo yai po dabe wali peyu da, teda homu si isąbadi dago e po mu wagameo, “Dago God koneyu bidibao.”
1JO 2:4 Godigo bomo yai po wali pisąbo bidigo te po weyu da, “Eno God mu koneai dao,” te po wabo bidi aga te ili po wabo bidi dao, tama mu po te bidigo homude bidibeo.
1JO 2:5 Tiali goli niwai bidi me deligo Godigo po wali pabo bidi, teda te bidi agai God dali dwagi yai homu eyu godolo ebo kolesaga te sese mu ebao, te sǫą pabeo. Tama niwai bidi me deligo te po weyu “Ena God dali wadoloyu bidibao,” te po wabo bidi aga te Jisas Kraisgo yali kolesaga tiwai dolo wali pao. Tama dago te tiwai gilama eyu da, teda dago homu si isąbadi dago e mu hania koneagameo, te da God dali wadoloyu bidibao.
1JO 2:7 Eno abagi mu dede, eno dagebolo e bomo yai po asębo po te gesi po menio. Te hasia bomo yai po polobadu mu dagego sai po dao, te augwaligo dagebolo Godigo po ola mabo gagalali sogo dagego te bomo yai po odai dao.
1JO 2:8 Me ma, megi eno dagebolo te asębo bomo yai po page meba te gesi po dao. Tama te eno asębo bomo yai po te mu po dao, te dago konebao, te Kraisde me, te dagede me, tede dago te bomo yai po te mu po dao dago subo dao. Magi baso meni, te ula mu te pedalama bidiyu, tama te ulago te be hulia si elaluali silibao.
1JO 2:9 Niwai bidi me deligo te po weyu, “Ena te ulade bidibo dao” obaso da, tialima te po wabo bidigo aga ama dali sębę elama boi bidi homu eyu da, te bidi aga be hulia sai digi me bidibao.
1JO 2:10 Niwai bidigo aga ama dali dwagi yai homu ebo bidi, te bidi aga ulade bidibo dao. Tama aga ulade bidibadi te aga dwai sę ilibo magi dwai nai pedelegobeo.
1JO 2:11 Tiali goli niwai bidigo aga ama dali sębę eyu boi bidi homu eyu da, te bidi hulide bidibo dao. Aga hulide biliyu, be hulia saligo agai gedu dąų olama, tama aga pabo tų aga konesiąbaso gegebo dao.
1JO 2:12 Dage eno wai dabe, tama Krais aga nogi tobade Godigo dagego dwai sę yali sęgę sela sąwai dao. Tama eno te po dagebolo asęna tolobao.
1JO 2:13 Aya dede, dagego te tigidali nai gagalali sogode bidali bidi, aga megi me bidibo, te bidi dagego koneai dao. Tama eno te po dagebolo asęna tolobao. Dage gesi bidi dabe, dagego Satango bomo aiyaba elaluai dao. Tama eno te po dagebolo asęna tolobao.
1JO 2:14 Dage eno wai dabe, dagego dago Aya bugagia koneai. Tama tiyu, eno te po dagebolo asęai dao. Dage aya dabe, te tigidali nai gagalali sogode bidali bidi, aga megi me bidibo, te bidi dagego koneai dao. Tama tiyu, eno te po dagebolo asęai dao. Dage gesi bidi dabe, dagego bomo yai, tama Godigo po dage tomode bidibao, tama dagego Satango bomo aiyaba elaluai dao. Tama eno te po dagebolo asęai dao.
1JO 2:15 Dagego te tǫde kolesaga dali, tǫde elalubo nai dali pesą eyu teba homu mugio. Niwai bidi me deligo e tǫde kolesaga teba homu mubaso da, te bidi agai Aya God dali dwagi yai homu elama godolo ebo menio.
1JO 2:16 Magi baso meni, tǫde bidigo kolesaga tigidali, te kolesaga e tama telalubo da wali, te tigigo bidigo homu hodolama tama mena dwai sę ebo kolesaga, te gedugo haniani nai sulama godolo ebo kolesaga, te bidigo mena naide hagoma homu eyu aga nogi ugwaba sabo kolesaga, te tobage kolesaga Aya Godigo mabeo. Menio. Te kolesaga e tǫde pedalobo kolesaga dao.
1JO 2:17 Tama e tǫde kolesaga silaibao, tama te mena nai sainogo gedugo sulama godolo ebo te sę me sia saibao. Tiali goli Godigo pedauwalidu wabo po wali pabo bidi, te bidi aga gamonaibao, aga sesemane sogo mu bidada paibao.
1JO 2:18 Dage eno wai dabe, te tigidali nai silabo sogo pąba yagasai dao. Polobadu augwaligo dagebolo te po wai, “Te Krais dali boi bidi homu yabo bidi pedalaibao,” wabo, te po dagego odali. Awe, megi Krais dali boi bidi homu yabo bidi hauwa augwali mu pedalai dao. Tama tibaso, dago koneai, te tigidali nai silabo sogo pąba yagasai dao.
1JO 2:19 Te bidi dabe augwali polobadu te da bidi hani deli bideiba homu meni baso, tama augwaligo da tagalai dao. Augwali dago hani tigi sogo da, te da dali me bidigi dao. Augwaligo da taga pobaso, dago hania koneani, te bidi dabe tigidali augwali da deli hani bidi mu meni.
1JO 2:20 Dage, te dagebolo te Tedali Bidi Kraisgo te Godigo Mobo Bidi olo mani. Tama tibaso, dage tigidaligo te mu po koneai dao.
1JO 2:21 Dagego te mu po page konesiąbaso, tama te pode eno dagebolo e po asębao, te homu dagego egimio, te menio. Dagego te mu po page koneai, tama te mu pogo tibo po munu me wabo menio, te me dagego koneai dao, eno te homu elama te po eno dagebolo asębao.
1JO 2:22 Tibo po wabo bidi de dawe? “Jisas aga Godigo sa muani tagala palali bidi Krais menio,” te po wabo te bidi aga te tibo po wabo bidi te dao. Te bidigo te Aya dali aga ogwa dali sigo nogi wabo hogwa siyu, tama tudiba mubo bidi, te bidi agai Krais dali boi bidi homu yabo bidi dao.
1JO 2:23 Niwai bidi agai te ogwa nogi wasiąma hogwa siyu tudiba muani bidi, te bidi agai te ogwa aga Aya me nogi wasiąma hogwa siyu tudiba muai dao. Niwai bidi agai te ogwa dali konealubo po dąų wali da, te bidi agai Aya dali me agai konealubo po mu dąų wabo dao.
1JO 2:24 Te dagego polobadu te Godigo po odobo gagalali sogode odali po, te po dagego duga homude dąų ola sao. Dagego te gagalali sogode odali po bugagia dąų ola siyu da, teda dage te Ogwa dali Aya dali si dali wadoloyu sesemane sogo bidaibao.
1JO 2:25 Tama aga digi agai dabolo aga dąų wali po tama wai, agai da sesemane sogo bidabo ula mawaibao, te po wai.
1JO 2:26 Eno te dagebolo te tibo po ola mawainogo ebo bidi dabe augwaligo ebo kolesaga te po dagebolo pusuyu asębao.
1JO 2:27 Tialima dagede, dage Kraisgo aga Mobo Bidi olo mayu tama aga dage dali me bidibao. Tama aga Mobo Bidi dage dali bidibadi, te sogo dage te po ola mabo bidi dage dali me sǫą pabeo. Dagego te gasa po ola mabo bidi dabe sabo homu egio. Menio. Mobo Bidi agai dage tigidali kolesaga ola mabo dao. Tama te Mobogo mu po tama naga wabo dao. Agai tibo po me wabeo. Agai tama tibaso, dagego agai po wali peyu tama Krais dali wadoloyu bidiąo.
1JO 2:28 Awe, eno wai dabe, dage aga dali bidao. Magi baso meni, nosali aga hania pedalaibao, te sogo da bomo elama dolaluaibao, te aga ma asobo sogode, te tama da hale eyu geme duala sogobeo.
1JO 2:29 Dagego te bidi Krais aga dwagi yai doloba pai bidi mu da weyu mu dolo kolesaga ebo bidi da te tiwai konealigo da, teda dagego me tama koneao: dwagi yai doloba pai kolesaga ebo bidi, aga te Godigo wai mu bidibao.
1JO 3:1 Te goba! Ayago da dali dwagi yai homu eyu godolo mu yali kolesaga te moni genuai mu pedalali. Suao. Godigo aga digi da te agai wai dabe dao wai. Mu tama, da Godigo wai dabe dao. Tama da Godigo wai dabe tama bidiyu, tama tǫde bidi dabe augwaligo God konesiąbaso, tama augwaligo da me konebeo.
1JO 3:2 Abagi mu dede, megi da te Godigo wai dabe bidibao. Tama nosali da mena tama bidigowe, te dago megi bugagia hania konebeo. Tialima dago koneani, nosali Krais hania bulu ulaba pedalobo si, te sogo dago aga magi bidi dawe te dago te page mu hania koneaibao. Tama dago aga subaso, te sogo da aga tiwai gagawaibao.
1JO 3:3 Tama te augwali Krais tiwai pedalobo sogo bugagia tonaluyu bidibo we bidi tigidali, augwaligo magi sę isąyu dwagi yai naga tedali gagabo dao. Magi baso meni, augwaligo koneani, te Krais me aga magi dwai sę isąyu dwagi yai naga tedali bidibo dao.
1JO 3:4 Dwai sę ebo bidi, agai Godigo bomo yai po olo oda tagaluyu sela sąbo bidi dao. Magi baso meni, te dwai sę ebo kolesaga page da, te Godigo bomo yai po bolobo kolesaga dao.
1JO 3:5 Dagego koneai, Krais asali agai te tǫde we bidigo dwai kolesaga ebo sela sąwainogo asai, tama dwai sę ebo kolesaga agade me bidibo menio.
1JO 3:6 Tama tibaso, aga dali wadolama bidibo bidi, te bidi agai te dwai kolesaga me eyu bidibo menio. Niwai bidi me deligo dwai kolesaga eyu bidibo bidi, te bidi agai Krais susiąma, tama agai Krais konesiąwai bidi bidibo dao.
1JO 3:7 Dage eno dwasianu wai dabe, dage dua dao. Dage bidi me deligo tibo po ola maidali weyu bugagia suao. Dwagi yai doloba pai kolesaga ebo bidi, te doloba pai bidi dao, te Krais aga dwagi yai doloba pai bidi tiwai dao.
1JO 3:8 Niwai bidigo dwai sę idu bidibo, te bidi Satango hani bidi dao. Magi baso meni, te Godigo tigidali nai nigisiąbadi, polobadu mu Satango dwai sę ebo gagalama, tama eyu, tama megi me aga tama tibo dao. Tama agai te Satango we bidi tomode ebo dwai kolesaga ela silimainogo te Godigo Ogwa aga hania pedalai.
1JO 3:9 Niwai bidi me deli aga Godigo wai gagawai bidi, te bidigo dwai kolesaga idu bidibo menio. Magi baso meni. Godigo homu kolesaga page te bidide elalubo. Tama God da aga Aya bidibaso, te bidi agai te dwai kolesaga idu bidibo usu egobeo.
1JO 3:10 Edao. Te Godigo wai dabe dali, te Satango wai dabe dali, augwali dagalama hania koneabo tų e dao: dwagi yai doloba pai kolesaga wali pisąbo bidi, aga te Godigo wai menio. Tama aga ama dali dwagi yai homu eyu godolo isąbo bidi, te bidi me aga te Godigo wai menio.
1JO 3:11 Te tobage kolesaga isąbo bidi aga Godigo wai menio. Magi baso meni. Augwaligo dagebolo Godigo po ola mabo gagalali sogode, te sogode dagego tama po odai: dago dena hasi abagi dali dwagi yai homu eyu godolo mu iyąo.
1JO 3:12 Da te polobadu bidali bidi Kein bidali tiwai bidamuo. Aga te Satango bidi bidai, tama agai aga ama ela muai. Tama magi baso aga ama ela muaniwe? Agai dwai kolesaga naga yali, tama aga amago yali kolesaga tigidali dwagi yai doloba pai kolesaga yai. Tibaso, aga sębę elama, aga ama ela muai.
1JO 3:13 Eno ama dede, tǫde elalubo kolesaga wali pabo bidi dabe augwaligo dage dali boi bidi ebaso da, dage te kolesagade dage midigi sigio.
1JO 3:14 Dago dena ama dabe augwali dali dwagi yai homu eyu godolo ebaso, tama te dago koneai, dago te genuai sia dabo buluba pabo tų tagalama, tama da te bidada peyu bidada pabo ula sabo tų sabolai dao. Gasa we bidi dali dwagi yai homu eyu godolo ebo kolesaga masiąbo bidi, aga te genuai sia dabo buluba pabo tųdu me bilibo dao.
1JO 3:15 Bidigo aga ama dali boi bidi homu ebo bidi, aga te bidi ela mubo bidi dao. Tama dagego koneai, bidi ela mubo bidi, te bidi aga te dwagi yai bidada peyu, bidada pabo ula elalubo menio.
1JO 3:16 Tama bidi dali dwagi yai homu eyu godolo mu ebo kolesaga page, te kolesaga page dabolo hania ola mabo sę e dao: Krais aga digi agai da tǫde we bidi tau somainogo aga bidabo ula tagalama, tama da tobade isali. Tama tibaso, dago me dago bidibo ula tagalama, dago ama dede augwali tau sao. Tama tiyu, dago augwali tau sobadi tama gasa bidi dabego da elebaso, dago usu da homu yao.
1JO 3:17 Tialima te doado bage hauwa elalubo bidi agai aga ama te nai meni yai bidi bidibo sula tagalama, tama aga tau masiąyu da, teda magi baso te bidigo te po wali, “Eno Godibolo dwagi yai homu eyu godolo ebo bidi dao.”
1JO 3:18 Dage eno wai dabe, dago te we bidi dali dwagi yai homu eyu godolo ebo kolesaga, te kolesaga dago pedauwaligo po wabogo naga ilamuo. Menio. Dago homu mu eyu, tama dago augwali dali dwagi yai homu ebo kolesaga te dago augwali tau sabo sęgo augwalibolo hania ola mao.
1JO 3:19 Te eno megi tama wali kolesagade, te dago te kolesaga ebaso da, teda dago koneagameo, da te mu po naga wabo Godigo we bidi dao. Dago te gasa we bidi dabe dali dwagi yai homu eyu godolo ebo kolesaga eyu da, teda da God pąba pabo sogo te da agade wi egobeo.
1JO 3:20 Magi baso meni. Dago homude te dena homugo da dali po tų ebaso da, teda dago koneani, te God agai dago homu kolesaga aiyaba elalubo dao, tama agai homu kolesaga genuai ugwanu mu ela holai elalubogo, tama agai tigidali nai mu konebo dao.
1JO 3:21 Abagi dede, dago homude ebo te kolesagade da po tų esiąyu da, teda Godigo gedude wi isiąma da dolalubo dao.
1JO 3:22 Tama tiyu, tama dago magi nai me sainogo gedu haluasa po obaso da, te agai dabolo mabo dao. Magi basowe? Dago agai bomo yai po wali peyu, tama agai godolo ebo kolesaga dago ebo dao.
1JO 3:23 Tama agai bomo yai pode tama wai: dago konealubo po agai ogwa Jisas Kraisgo nogide dąų olama, tama dago gasa we bidi dabe augwali dali dwagi yai homu eyu godolo mu yao, te agai dabolo polobadu wali po tiwai.
1JO 3:24 Niwai bidi me deligo Godigo bomo yai po wali peyu da, te bidi God dali bidalubo dao, tama God aga te bidi dali bidalubo dao. God agai aga Tedali Mobo Bidi dabolo mawai. Tama tibaso, dago koneai, God da dali bidibo dao.
1JO 4:1 Abagi dedeo, tibo po ola mabo bidi dabe hauwa augwali tigidali tǫde bilalubao. Tama bidi hauwago te po obao, “Godigo Mobo Bidi agai enabolo mu po olama, tama eno te mu po pusubo dao.” Te po obaso, dagego homu te augwaligo ola mabo poba olo subigila dąų wagio. Dagego koneainogo, tigidali te po ola mabo bidi osola suao, te Godigo tagala palali Mobo Bidi augwali dali bidibawe, ma meniwe, te suainogo tama tiao.
1JO 4:2 Dagego te bidi me deligo Godigo Mobo Bidi elalubowe naga tede dagego hania konemainogo e tiwai aga osola suao: Bidigo “Te Jisas aga Godigo sa muani bidi Krais dao, tama aga tǫba asama aga e tǫde bidigo tigi tiwai selama tama bidali bidi dao,” te po wabo bidi te Godigo Mobo Bidi aga dali bidibo dao.
1JO 4:3 Tiali goli tigidali bidigo Jisas dali te po tiwai wasiąbaso da, te bidi dabe augwali te gasa dwai bidi nomago dagana sagasali, te Godigo Mobo Bidi menio. Te tobage bidi agai Krais dali boi bidi homu ebo dao, polobadu dagego po odali te tobage bidi aga asaibao wai. Tama megi aga aselama, tǫde bidibao.
1JO 4:4 Dage eno wai dabe o, dage Godigo we bidi hani, tama dagego te tibo po ola mabo bidi aiyaba elaluai dao. Magi baso meni. Te Mobo dage tomode bidibo Mobo Bidi agai bomogo te tǫde bidi dali tomode bidibo mobogo bomo aiyaba elalubo dao.
1JO 4:5 Te tibo po ola mabo bidi dabe augwali tǫde bidiyu, tama tǫde elalubo kolesaga naga augwaligo wali pabo dao. Tama augwaligo po te tǫde elalubo naide po wabo dao. Tama tibaso, tǫde bidigo augwaligo po odobo dao.
1JO 4:6 Da Godigo we bidi dao. God koneani bidi, te bidi agai dago po odobo dao. Tialima God konesiąwani bidi, agai dago po odali goli, te po wali pabo menio. Tede dago te mu po wabo Mobo dali, tibo po wabo dwai bidi noma elalubo bidi dabe dali dagalama, tama augwali si koneagameo.
1JO 4:7 Abagi mu dede o, dena hasi dago we bidi dali dwagi yai homu eyu godolo mu inao. Magi baso meni. Te we bidi dali dwagi yai homu eyu augwali godolo mu ebo kolesaga page bidi te God dao. Bidigo dwagi yai homu mabo kolesaga wali pabo bidi, aga te Godigo wai dao, tama agai God mu konebo dao.
1JO 4:8 Bidigo aga ama dali dwagi yai homu eyu godolo isąbo bidi, agai God konebeo. God agai homu kolesaga page da, te we bidi dali dwagi yai homu eyu augwali godolo mu ebo homu kolesaga dao.
1JO 4:9 God agai Ogwa deli digi mu, tama agai te Ogwa e tǫba tagala palai, tama agai da aga yali sęde te bidibo ula somainogo tiwai. Tebogo da ola mani, God agai da dali dwagi yai homu eyu, da godolo ebo dao.
1JO 4:10 Dwagi yai homu mabo kolesaga te tama menio: hasia dago bolo God dali dwagi yai homu eyu godolo yai da, te homu egobeo. Te tama menio. Dwagi yai homu mabo kolesaga e tama tiwai: God agai bolo te dwagi yai homu mu da dali elama, tama aga Ogwa e tǫba tagala palama, tama agai aga tigi menama, tama dago dwai sę tigidali sela sąbo bidi bidimainogo tiwai dao.
1JO 4:11 Abagi mu dede o, God agai te tiwai da dali dwagi yai homu eyu godolo mu yaligo da, teda dago me dena hasi dwagi yai homu dago abagi dabe dali inao.
1JO 4:12 Bidi me deligo God munu me subeo. Dago dena hasi dwagi yai homu dago abagi dali eyu da, God aga da dali bidibo dao, tama aga dwagi yai homu eyu godolo ebo kolesaga te da tomode sese wiegi yai mu pedalai dao.
1JO 4:13 God agai aga Mobo Bidi dabolo mawai. Tama tibaso, dago koneai, da God dali bidibo dao, tama aga da dali bidibo dao.
1JO 4:14 Tama Aya God aga Ogwa e tǫba tagala palama, tama agai da e tǫde we bidi tigidali ma dobola sabo bidi pedalomainogo yai. Dago te suai dao, tama dago te sę po gasa we bidi dabe augwalibolo pusubo dao.
1JO 4:15 Bidi me deligo te gasa we bidi gabidide po weyu, “Awe, te bidi Jisas aga te Godigo Ogwa dao,” obaso da, God aga te bidi dali bidibao, tama te bidi aga God dali bidibo dao.
1JO 4:16 Tama dago koneai dao, Godigo da dali dwagi yai homu eyu godolo mu ebo dao. Tama koneyu, tama da te kolesagaba dago homu tiąlubo dao, tede homu si ebo menio. God agai homu kolesaga page da, te we bidi dali dwagi yai homu eyu augwali godolo mu ebo homu kolesaga dao. Tama bidi te kolesaga eyu bidibo bidi, aga God dali bidiyu, tama God aga te bidi dali bidiyu ebo dao.
1JO 4:17 Tama bidiyu, tama te dwagi yai homu eyu godolo ebo kolesaga te da tomode sese wiegi yai mu pedalobo dao. Magi baso meni. Tama tiyu da, da e tǫde bidibo sogo te da Krais tiwai bidibo dao. Tama tibaso, te nosali te tǫ dagalu silibo side genuai po tų ebode da wi me egobeo.
1JO 4:18 Tama God agai da dali te dwagi yai homu eyu godolo mu ebo kolesaga te sese wiegi yai mu dao, sǫą pabeo. Tama tibaso, da wi menio, te agai da dali ebo kolesagago te wi ebo sela sąbo dao. Wi ebo page e tama: da dwai dene sabo homu ebo we bidi bidiyu da, teda da wi ebo dao. Tama tiyu da, dago koneaibao, te Godigo da dali dwagi yai homu ebo kolesaga page te dago kuna konebeo, da tede sǫą pabo.
1JO 4:19 Te dago God dali, dena hasi abagi dali te dwagi yai homu eyu godolo ebo kolesaga page e dao: hasia bolo God agai da dali te godolo ebo kolesaga yali.
1JO 4:20 Bidi me deli agai te po weyu “Eno God dali dwagi yai homu eyu aga godolo ebo dao,” te po agai weyu, tiali goli te bidi agai aga ama dali dwai boi bidi homu eyu da, teda te bidi agai tibo po wabo dao. Magi baso meni. Te bidigo aga gedugo aga ama subo dao. Tiali goli agai aga dali dwagi yai homu eyu godolo ebo menio. Tama tibaso, agai te aga gedugo susiąbo God dali mena tama dwagi yai homu ebo kolesaga egowe? Mu menio, aga usu egobeo.
1JO 4:21 Tama te bomo yai po dago God agade sai, te po tama wai: niwai bidigo God dali te dwagi yai homu eyu godolo ebo bidi, agai aga ama dali me dwagi yai homu eyu godolo mu yao.
1JO 5:1 Tigidali bidigo Jisas aga te Godigo sa muani tagala palali bidi Krais dao olama konealubo po dąų wai, te bidi dabe augwali Godigo wai dabe dao. Tama tigidali bidigo aya dali dwagi yai homu ebo bidi, te augwaligo te dwagi yai homu eyu godolo ebo kolesaga agai wai dabe dali me ebo dao.
1JO 5:2 Tama dago God dali dwagi yai homu elama tama aga godolo mu eyu, tama agai bomo yai po dago wali peyu da, teda dago te kolesaga ebode koneagameo, dago God agai wai dabe dali dwagi yai homu eyu godolo ebo dao.
1JO 5:3 Magi baso meni. Dago God dali dwagi yai homu eyu godolo ebo kolesaga page e dao: dago God agai bomo yai po wali pabo dao. Tama agai bomo yai po dabe augwali te bidigo wali pabo usu isąbo bomo yai po meni, te dago augwali wali pabo usu yaibao.
1JO 5:4 Godigo wai dabe tigidali augwali deli deligo te tǫde elalubo dwai kolesaga aiyaba elaluai dao. Te dago e tǫde elalubo dwai kolesaga aiyaba elalubo tų e dao: dago te Jisas aga te Godigo sa muani tǫba tagala palali bidi mu dao, te konealubo po dago Jisasde dąų wabo, te kolesagago dago te tǫde kolesaga aiyaba elaluama tagalobo dao.
1JO 5:5 Mena bidigo hwįnama tama tǫde dwai kolesaga ebo aiyaba elalubo bidi dawe? “Te bidi Jisas aga Godigo Ogwa mu dao,” te po konealubo po dąų wabo bidi aga naga dao.
1JO 5:6 Te aga da, Jisas Krais aga digi aga hania pedalali. Aga ąįgo baptais mabo te kolesaga dali, tama aga te ni pedaide kaneme gelabo te kolesaga dali asai. Aga asali te ąįgo kolesaga dali naga asai menio. Aga asali te aga ąį dali kaneme dali te kolesaga si dali asai. Tama tiyu, te Godigo Mobo Bidi agai te Krais aga asali kolesagade te mu po dao, te po wai dao. Magi baso meni, te Mobo Bidi da te mu po wabo page mu dao.
1JO 5:7 Awe, sela augwaligo te da ola mabo da, te Krais aga Godigo Ogwa dao.
1JO 5:8 Me te Mobo Bidi, me ąį, me te kaneme tama dao. Tama te sela augwaligo te Kraisde deli po naga dabolo ola mabo dao.
1JO 5:9 Bidi me deligo agai suali sę po dabolo pusubo si, te dago homu si isąyu tama “Te mu po dao” weyu dago agai pusali po sabo dao. Tama bidigo wabo pode dago tama tialigo da, teda dago Godigo aga Ogwade dabolo pusubo po odoyu, dago mu po dao weyu te po sao. Magi baso meni, te Godigo pogo bomo te bidigo pogo bomogo aiyaba elalubo dao. Te Godigo aga digi aga Ogwade pusali po dao.
1JO 5:10 Tama te konealubo po Godigo Ogwa dali dąų weyu agaba tiąlubo bidi, te bidi agai te Godigo aga Ogwade pusali po aga homude elalubo dao. Te Godigo aga Ogwade wali po, te pode “Mu po dao” wasiąbo bidi, te bidi agai “God aga nogi ili po wabo bidi dao” wai dao. Magi baso meni. Te po, te Godigo aga Ogwade wali pode te bidigo “Te po mu po menio” homu eyu sela sąwai dao.
1JO 5:11 Tama Godigo aga Ogwade wali po e dao: God agai da sesemane sogo bidada peyu, bidada pabo bidibo ula mawai dao, tama te bidabo ula page aga Ogwa Jisasde elalubo dao.
1JO 5:12 Bidigo Godigo Ogwa dali kęą pali bidi, aga dali te bidibo ula elalubo dao. Tama bidigo Godigo Ogwa dali kęą pisąwani bidi, aga dali te bidibo ula elalubeo.
1JO 5:13 Te dagego Godigo Ogwago nogide konealubo po dąų weyu agaba tiąlubo we bidi, te dagego te dwagi yai bidada peyu bidada pabo ula elalubo konemainogo eyu, eno e po dagebolo asęna tolobao.
1JO 5:14 Da Godigo gesabide bidiyu, tama dago aga dali homu si ebo menio. Magi baso meni, magi nai po aga dali gedu haluasa po weyu, tama dago aga homu wali peyu da, teda agai dago te gedu haluasa po wabo odobo dao, te dago mu hania konebo dao.
1JO 5:15 Awe, dago aga dali gedu haluasa po weyu da, teda agai te po odobo dao. Tama te dago konebo dao. Tama konealigo da, teda dago e me konebo dao, te dago magi naide po aga dali gedu haluasa po weyu da, agai te nai dabolo mabo dao.
1JO 5:16 Bidi me deligo aga amago dwai sę ebo suyu da, tama te dwai sę ebogo te yali bidi aga dwai madigi pisąbo dwai sę elaluyu da, teda aga amago Godibolo gedu haluasa po wao. Tama weyu, tama Godigo te dwai sę yali sela sąnama tama bidibo ula te bidibolo mawaibao. Te dwai sę tedali tedali dao, mebago te sę yali bidi dwai madigi tagala palabo dao, mebago meni. Tama te sę yali bidi dwai madigiba pisąbo dwai sę ebode eno te po wai, Godibolo gedu haluasa po wao. Tiali goli te bidi dwai madigi tagala palabo dwai sę, tede eno dagebolo “Gedu haluasa po wao” wabeo.
1JO 5:17 Tigidali dolo isąbo kolesaga, te dwai sę dao. Tiali goli dwai sę mebago te bidi dwai madigi tagala palabo menio.
1JO 5:18 Dago koneai, tigidali bidi Godigo wai dabe bidalubo bidi, augwaligo dwai kolesaga wali me pabo menio. Magi baso meni. Godigo Ogwago augwali bugagia palibo dao, tama Satango augwaliba aga nogo mugobeo.
1JO 5:19 Dago koneai, te tigidali tǫde bidibo we bidi augwali te Satango dologode bidibo digi, da Godigo wai dabe bidibao.
1JO 5:20 Dago koneai, Godigo Ogwa aga asai, tama agai homu kolesaga da mawai, dago te God aga God mu dao, te dago konemainogo te kolesaga da mawai. Da aga Ogwa Jisas Krais dali wadolama bidibaso, tama da God dali bidibo dao. Te Krais da, te aga God mu dao, tama agai te bidibo ula sesemane sogo bidada peyu, bidada pabo ula mabo dao.
1JO 5:21 Eno wai dabe, dua dao. Dagego te tibo god dabe wali pidali weyu, dagego duga digi bugagia paliąo. Te tama dao.
2JO 1:1 Ena monu dabe bidiyu, tama ena Jisasgo sę ebo tobolu bidi, te eno te Godigo dią sali we dali nago wai puluba dali, te dagebolo e po asęna tolobao. Eno homu mu eyu, dage dali dwagi yai homu eyu godolo mu ebao. Tama eno naga te kolesaga dage dali ebo menio. Tigidali Godigo mu po koneani we bidi augwaligo me dwagi yai homu dage dali ebo dao.
2JO 1:2 Magi baso meni, te Godigo mu po da dali bidibo dao, tama sesemane sogo da dali mu bidada peyu, bidada paibao, tama tiyu dago dwagi yai homu dage dali ebao.
2JO 1:3 Dago Aya God dali, te Aya aga Ogwa Jisas Krais dali, augwali sigo da dali olo tau sabo kolesaga dali, te homu dene eyu tau mabo kolesaga me, te bidi homu dwagi yai nagamea ilibo kolesaga me, te kolesaga sela da dali augwaligo yaibao. Tama dago Godigo mu po koneyu, tama dena hasi dwagi yai homu eyu godolo ebo kolesaga ebadi, augwaligo te kolesaga da dali yaibao.
2JO 1:4 Eno odali, nago wai dabe meba augwaligo Ayago dabolo “Tama tiao” wali po odoyu, tama augwaligo te mu po wali peyu bidibo dao. Tama odolama, eno dwagi yai homu yai.
2JO 1:5 Nage we, megi eno nagebolo e po ma obao, da tigidaligo dena hasi abagi dali dwagi yai homu eyu godolo yao. Eno gesi bomo yai po nagebolo asęna mabeo. Menio. Te dago Godigo po odobo gagalali sogo dago te bomo yai po odai dao.
2JO 1:6 Te we bidi dali dwagi yai homu eyu godolo ebo kolesaga page e dao: dago Godigo bomo yai po dabe wali peyu bidao. Tama te Godigo po odobo gagalali sogo dąį elama, tama megi e sogoba usu nagaselama, dagego te bomo yai po e tiwai odai dao, dagego te dwagi yai homu eyu godolo ebo kolesaga eyu bidao.
2JO 1:7 Magi baso meni. Bidi hauwa augwaligo da dwai sę tomoba kegainogo eyu tibo po ola mabo bidi dabe, augwali haniani tǫba augwaligo po pusigi pai dao. Tama augwaligo “Te Jisas Krais e tǫba asama bidali te bidi mugo tigi sali, te da bidi dabego tigi tiwai sali,” te po wabo augwaligo hagela ebo dao, te po page hogwa sabo dao. Te tobage bidi aga te tibo po wabo bidi, tama agai Krais dali boi bidi ebo bidi dao.
2JO 1:8 Tama tibaso, dage dua dao. Dagego sę elama tama te Godigo dagebolo maiabo nai tagalabuo. Te menio. Dagego dwagi yai sabo nai mu sese somainogo dage dua dao.
2JO 1:9 Bidi mego Kraisgo ola mani po tagalama, tama agai gasa poba begegi pai, te tobage bidi God te bidi dali bidibo menio. Niwai bidi me deli agai Kraisgo po dali homu kęą pai bidi, te bidi te Aya dali aga Ogwa dali augwali si te bidi dali bidibo dao.
2JO 1:10 Tama tibaso, bidi me deli dage bidibo digi pedalama, tama agai Kraisgo ola mani po dagebolo sela asisąma olo asobaso da, dagego beba te bidi odasa pigio. Tama me dagego aga dali dwagi yai homu elama nage bugagia bidao po wagio.
2JO 1:11 Magi baso meni. Bidigo te tiwai bidi dali dwagi yai homu elama siade dao po wabo bidi, te agai te bidigo dwai sę ebo tau sabo bidi pedalaibao.
2JO 1:12 Eno dagebolo pusubo po hauwa me elalubao. Tiali goli eno te po dagebolo asęna tolobo hagela homu ebo. Eno dage suagasobo homu ebao. Tama eyu, tama dagego gesabide eno te po dagebolo pusaibao, tama da tigidali te dwagi yai homu mu yaibao.
2JO 1:13 Godigo nago ama aga dią sali. Tama nago te amago wai dabe augwaligo nage dali dwagi yai homu elama, bugagia bidao po nagebolo tolobao. Te tama dao.
3JO 1:1 Ena monu dabe bidiyu tama ena Jisasgo sę ebo tobolu bidi, eno e po Gaius nagebolo asęna tolobao. Nage eno abagi mu dao, eno homu mu eyu nage dali godolo mu ebo dao.
3JO 1:2 Abagi mu, eno homugo nago sę ebo tigidali dwagi yai emainao, tama nage me bugagia bidimainao. Eno koneai, nage te God dali bidiyu, tama nago noma bugagia bidibao, tama eno homugo nago tigi me te tiwai bugagia bidao.
3JO 1:3 Te nago noma bugagia bidibo pode, abagi dabe meba augwali ena bidibo digi sabolodu geani, tama augwaligo te po widu geai, nage te mu pode homu kęą pai bidi dao. Eno tama po odolama, tama eno dwagi yai homu yai. Mu tama eno koneai, sesemane sogo nago te mu po naga wali peyu bidibo dao.
3JO 1:4 Awe, eno wai dabe augwaligo mu po wali peyu bidibo te po eno odu gebaso da, teda eno dwagi yai homu pemene mu ebo dao. Tama gasa po odobode dwagi yai homugo te dwagi yai homu ebo aiyaba elalubo menio.
3JO 1:5 Abagi mu, nago homu mu naga eyu, tama tigidali ama dabe augwali tau sabo sę yai. Tama tiyu, te nago konesiąwai bage augwali gasa buludu asali digi, augwali me nago tau siyu tebo dao.
3JO 1:6 Tama te nago tau sali bidi dabe augwaligo te ede bidibo Godigo we bidibolo te nago augwali dali dwagi yai homu eyu tau sabo sę ebo po pusali. Tama te tobage bidi augwali Godigo po haniani buluba sela peyu, tama nago bidibo digi asobo si, teda nosali augwali gasaba bugagia ma pomainogo eyu nago augwali tau sao. Augwaligo Godigo sę ebo dao.
3JO 1:7 Augwaligo te sęde Kraisgo po wagi pai. Tama peyu, tama augwaligo te Godigo po wali pisąbo bagego augwali tau sabo hagela yai, te sabeo.
3JO 1:8 Tama tibaso, da Godigo po wali pabo we bidi, dago augwali tau sao. Te kolesagade dago augwali dali hodobo sę deli eyu, tama te Godigo mu po te haniani buluba tedela paibao.
3JO 1:9 Eno po meba te nago bidibo digi bidibo Godigo we bidibolo asęna tolai. Tiali goli te bidi Diotrefes aga augwaligo polalubo bidi bidainogo homu eyu tama agai eno wabo po odobo menio.
3JO 1:10 Tama tibaso, ena dage bidibo digi sabalobode, eno dagebolo agai te yali kolesaga te po hanilaibao. Agai nogi posobo dwai po haniani da dali wabo dao. Tama agai homugo te sę ebo naga usu egobeo. Meni. Godigo po pusigi pabo bidi dabe, dago ama dabe, augwali teba asobo si agai augwali beba odasa pabo menio. Tama bidi meba augwaligo te asai ama dabe beba odasa painogo ebaso, agai augwali dali te tigio olama, tama agai augwali te Godigo we bidi hani tomode me bidigio olama, augwali sela sąbo dao.
3JO 1:11 Eno abagi mu, nago te dwai kolesaga ebo bidigo kolesaga wali pelamuo. Nago dwagi yai kolesaga wali pao. Dwagi yai kolesaga ebo bidi, te bidi Godigo bidi dao. Dwai kolesaga ebo bidi, agai God konebeo.
3JO 1:12 Te bidi Demitrius, agade tigidali we bidi augwaligo aga nogi ugwaba sabo po weyu, “Te aga dwagi yai bidi dao,” te po wabo dao. Tama aga homu mu eyu doloba pai kolesaga ebo te Godigo mu po dolo si dao. Tama da me dago aga dwagi yai bidi dao po weyu, aga nogi ugwaba sobao. Tama nago koneai, dago po te mu po dao.
3JO 1:13 Eno nagebolo pusubo po hauwa me elaluai dao. Tiali goli eno te po nagebolo asęna tolobo hagela homu ebo.
3JO 1:14 Eno nage tamadi suagasobo homu ebao. Tama eyu, tama nago gesabide eno te po pusaibao.
3JO 1:15 Eno homugo nago homu dwagi yai elama bidao. Nago ede bidibo abagi dabe augwali tigidaligo nagebolo siade dao po obao. Nago te nage dali bidibo dago abagi dabe augwali deli delibolo siade dao po wao. Te tama dao.
JUD 1:1 Ena Jut da, ena te Jisas Krais agai sę ebo bidi da, tama ena Jems aga amanu dao. Tama eno e po dage Godigo i wali we bidibolo asęna tolobao. Tama God dago Aya agai dage dali dwagi yai homu eyu, tama godolo mu ebo dao. Tama Jisas Krais me agai dage palibo dao. Augwali sigo dage dali tama tiyu, tama dage bugagia bidibao.
JUD 1:2 Te eno homugo Godigo agai homu dene eyu tau sabo kolesaga me, te dage homu nagamea ilabo kolesaga me, te agai dage dali dwagi yai homu eyu godolo ebo kolesaga me, te kolesaga sela dagebolo geninama mu pedalaibao, te eno te homu ebao.
JUD 1:3 Eno abagi mu dede, hasia eno homugo te Godigo da tigidali ma dobola sabo sęde eno po dagebolo asęna tolabo homu bomo yai. Tiali goli, eno homu hasegelali, tama megi dagebolo gasagi yai po asęna tolobao. Magi baso meni, gasa bidi dabe augwali dage Godigo we bidi hani tomoba geme asai, te sa asobo bage tiwai asai. Te polobadu te deli sogo naga te God agai aga po te aga we bidibolo mu mawai dao. Tama te po e dao, te dago te God dali Jisas dali augwali side konealubo po dąų wao. Tiali goli, te geme asai bagego augwaligo ebo dwai dwai kolesaga bolainogo augwaligo te Godigo mani po hasegelali, tama tibo po dagebolo ola mayu, “Woo, te God agai da olo tau siyu, tama dago ebo dwai sęgę sela sąbaso, teda dago dwai dwai penani ebo kolesaga eyu da, te usu da,” augwaligo te tibo po ola mabo da. Tama tibaso, eno megi dagebolo e po asęna tolali, te dage bomo elama tama te Godigo mani po bugagia tonaluyu paliąo, augwaligo te po dolidali weyu yao. Tama augwaligo te tobage tibo po weyu, augwaligo te Jisas Kraisde hogwa sabo po wabo dao. Augwaligo dago Polalubo Bidi, te dago Genuai Bidi deli naga tudiba mubo dao. Tama polobadu mu Godigo po asęani bidi augwaligo te po asęani, te God agai te tobage dwai dwai sę ebo bage sa munama tama sęgę mawaibao, te po te bukude asęani.
JUD 1:5 Te Godigo polobadu mu yali sę po te dagego gisiga koneai digi, eno dagego ma konealumainogo eyu e po ma obao. Polobadu agai te Israel bidi hani tau siyu, tama augwali kalabus togaluyu elama, tama Isip tǫ tagalama odasa pai. Tiali goli nosali augwali meba agai wali poba augwa homu tigidali musiąwai, tama te po wali pisiąbaso agai augwali doloyu ela silai.
JUD 1:6 Tama te ensel mobo bidi meba me, augwalide ma kone palao. Te ensel mobo bidi meba augwaligo te Godigo augwaligo nogoba mani tonalubo bidi sę hagela eyu, tama te sę tagalali. Tama agai augwalibolo mani bidabo madi, te me augwali hagelama, tagalalio. Tama Godigo augwali dila pai aligabo bonogo nogo dunama, kalabus ilama, bida bida peyu bidibo, tama augwali te a bulu hulia sai digi tede mu dąų olama bidibao. Tama augwali te a hulia sai digide bidiyu, tama augwali Godigo genuai bodolu sali te tonaluyu bidibadi, tama te moni po tų ebo sogo pedalaibao.
JUD 1:7 Te polobadu elaluali moni hanu si me, te nogi Sodom dali, Gomora dali, te hanu side pedalali dwai sęgę dagego ma konea palao. Tede bidali bage me, te hanu si pąde elaluali dwasianu bulude bidali bage me, augwali tigidaligo te ensel mobo bidi mebago yali dwai dwai penani ebo sę tiwai yali. Augwali penani sęde bidaluali, tama augwaligo homu hodaloama, tama augwali te sę bomo elama eyu pobeasa pali. Tama tibaso, Godigo augwali te moni sia te dagaludu tagala palali, tama augwali te siago ela silai. Tama dago augwalide te yali sę sulama, tama dago koneai dao, te tobage dwai dwai sę dago ilamuo, da te dene sidali weyu.
JUD 1:8 Tama te dage tomoba geme duala sagaselama bidibo bidi dabe augwaligo me te tobage dwai dwai kolesaga ebo dao. Haniani na eyu, augwali homu hodoliyu, tama augwaligo meda yai kolesaga augwa tigide ebo dao. Tama augwaligo dago Genuai Bidigo augwali tonaluabo bomo sela sąyu, tama augwaligo te Godigo dagalude bidibo ensel mobo bidi dabe dali me nogi posobo po wabo dao. Te ensel dabe augwaligo ula yai bomo elaluali goli, te bagego nogi posobo po augwalide widu gebao.
JUD 1:9 Augwaligo te posobo po olamuo. Suao. Polobadu te ensel mobo bidi dabego polalubo ensel nogi Maikel, agai te dwai haubo mobo tuni bidi Satan dali augwali si po konila yai, te isai bidi Mosesgo tigi hagede konila yai. Tama te sogo Maikel agai te Satan dwai nogi posobo po me wabeo. Te meni. Agai Satanbolo te po wai, “Genuai Bidi aga digi nage osola sulama, tama sęgę mawaibao,” te po wai.
JUD 1:10 Tiali goli te tibo po ola mabo bidi dabe augwaligo te page konesiąwai naide te dwai posobo po wabo dao. Me ma, augwaligo te dwai sęde kuna koneani. Tama koneyu, te homu kolesaga meni yai bulu hasa tiwai bidiyu, tama augwaligo magi magi dwai sę edubadi gebo dao, tama te tobage dwai kolesaga ebaso augwali mu dolama dene saibao.
JUD 1:11 Augwali hobedagia bidibao. Augwali te polobadu mu bidali dwai sę yali bage tiwai ebo dao. Te polobadu bidali bidi nogi Kein, te Adam aga ogwa, te bidi aga pali dwai tų te augwali megi te tųdu bilibo dao. Tama te dwai bidi me aga nogi Balam, agai yali sę tiwai eyu, tama augwaligo masigi sabo pesą eyu, gasa we bidibolo dwai sę yabo po hwa po mabo po wabo dao. Tama augwaligo te polobadu bidali bidi me nogi Kora agai yali sę tiwai ebo dao. Te bidi Kora agai te Godigo wali po odobo hagela eyu, tama te po sela sąbaso, nosali dene mu sai. Tama e bidi dabe me augwaligo te tobage po sela sąbo kolesaga ebaso, tama augwali me mu doloyu hagawaibao.
JUD 1:12 Te dage deliba sisinama, tama ‘Da deli hani dao,’ te homu eyu, dagego nai tubo dao. Awe, tiali goli te tibo po ola mabo bage augwali me te nai tubo madiba aselama, tama augwaligo dagego ebo kolesaga dolobo dao. Augwali te gudubo ugwa dwai meda ilibo nai tiwai dao. Augwaligo dage dali nai tubadi, te augwali wi isąyu tama augwa hasi naga kisasa bidiyu, tama te nai tubode gasa we bidi tau sisąyu, augwaligo te nai subigila tuyu ebo dao. Augwali te tulubage tulisiąwai pǫ tiwai dao, tama waligo augwali pona palobaso tedela pabo dao. Tama augwali te ni aga du walobo sogo walisiąwai ebo, te tobage ni tiwai dao. Tama augwali te page sasia pai ni tiwai dao, te bidigo te ni page guda sąwai. Tama augwali te tiwai bidiyu, du walobeo, we bidi tau sabo sę dwagi yai ebo menio.
JUD 1:13 Tama te moni tamu ąį bǫį dini wadolama nosali asiyu, tama te ąį dinigo meda yai pesa hania pedalobo dao, te ąį sanide. Tama te tiwai te bidi dabe augwaligo te hale ilibo kolesaga hania ebo dao. Augwali te dagalude elalubo hǫ meba tiwai dao. Te tobage hǫ osogo ula eyu, ma sula siyu ebo hǫ dabe dao. Te hǫ pabo te bugagia dolo pabo menio. Tama Godigo te dwai sisi mu a bulu hulia sai digi sisi yai elalubo, tama te tibo po ola mabo bidi augwali te hulia sai bulude sesemane sogo bidada peyu, bidada paibao.
JUD 1:14 Te polobadu bidi Adam aga ogwago ogwa tama nedada peyu, te nogo a olama me badu nogo deli wali, te bidi mego ogwa te Inok da, aga polobadu mu bidai bidi dao. Tiali goli, agai te sogo polobadu te megi bidibo tibo po ola mabo bagede te po wai, “Suao, Genuai Bidi aga ensel mobo bidi umabo mu dali asaibao.
JUD 1:15 Tama aselama, tama agai te we bidi tigidali osola sueibao. Tama osola sulama, agai augwaligo aga tudiba muani bidi tebolo augwaligo sęgę hania ola mawaibao. Tama augwaligo Godigo po oda tagalama te dwai sę eyu, tama te God tagalali bagego dwai sesena pai nogi posobo po agade odu geai. Tama te yali sę tigidali me, te wali dwai po tigidali me wei ponoyu, tama Godigo augwali dene mawaibao,” te bidi Inok agai te po polobadu wai.
JUD 1:16 Te dage tomode bidibo tibo po ola mabo bidi dabe, augwali te tigidali pedalobo naide hagela homu eyu, tama sesemane sogo augwaligo gasa we bidide dwai homu naga ebo dao. Tama augwaligo tigigo ebo kolesaga hodolama, tama augwaligo te kolesaga naga wali pabo dao. Augwaligo genuai po weyu, tama augwa nogi augwaligo ugwaba sabo dao. Te gasa we bidi dabebolo augwaligo po mumubo po weyu, tama te bagego nai dabede pesą elama sabo dao.
JUD 1:17 Te bidi dabe augwaligo te dwai sę yali goli, dage da, dage abagi dabe mu, te dago Genuai Bidi Jisas Krais agai po sela pabo bidi dabego dagebolo polobadu pusali po te dagego te po ma koneao.
JUD 1:18 Te sę pedelasiąbadi tama augwaligo dagebolo te po wai, “Te nosali te tǫ dali, dagalu dali si silibo sogo te pąba yagasobadi, tama bidi mebago Godigo da ola mabo wiegi yai doloba pai kolesagade gisugu wagasobo bidi dabe pedalaibao. Tama augwaligo Godigo po tudiba muyu, tama bomo eyu, augwa tigigo tǫde ebo dwai dwai kolesaga naga wali paibao,” te po augwaligo wai dao.
JUD 1:19 Te tiwai asobo bidi dabe augwaligo dage Godigo po wali pabo we bidi hani tomode si pedebo bage dao. Tama augwaligo e tǫde ebo kolesaga naga wali peyu, tama Godigo Mobo Bidi agai augwali dali hodobo bidibo menio, te mu dao.
JUD 1:20 Tiali goli dage abagi dabe mu, dagego te Godide konealubo po bugagia dąų olama, tama bidigo aga be bugagia sę ebogia tama duga digi duga homu kolesaga dąų olama te sęde bomo yao. Te konealubo po te gasagi yai tedali mu dao. Tama te Godigo Mobo Bidigo dage te gedu haluasa po wabo tau siyu, tama dagego te po sesemane sogo bugagia dąų weyu yao.
JUD 1:21 Tama God agai dage dali dwagi yai homu eyu godolo mu ebo dao. Tama tibaso, dage duga ebo kolesagade bugagia tonaluyu tama dage aga pąde mu bidaluao. Tama tiyu, te dago Genuai Bidi Jisas Krais dagego tonaluao, te agai dage dali homu dene eyu, tau siyu elama tama agai te dagebolo te bidada peyu, bidada pabo ula mabo sogo te dagego bugagia tonaluyu bidiąo.
JUD 1:22 Te dage tomode te we bidi meba augwaligo te tibo po ola mabo bagego wabo po odama, tama megi augwali te Godigo pode homu si ebo dao. Tama tibaso, dagego augwali dali homu dene eyu, tama tau somainogo te augwalibolo te homu bega sabo po wao.
JUD 1:23 We bidi mebago te dwai dwai sę ebo kolesaga ma gagalama, tama augwali te sia tomoba tuloluali bidi tiwai da. Tama tibaso, augwali te moni sia dabo buluba nosali pidali weyu, dagego augwali polo tau siyu ma sao. Te we bidi meba gasagi yai dao. Augwaligo augwa tigigo tǫde ebo dwai dwai kolesaga naga wali pobaso, dagego augwali dali homu dene eyu tau sao. Tialima, dagego augwaligo ebo dwai kolesaga wai selama gagaidali weyu dage dua eyu, wi yao. Augwaligo dwai dwai kolesaga ebogo augwaligo gudubo ugwa dabe meda ilali. Te ugwade me dage boi bidi homu mu eyu yao. Tiali goli te hobedagia bidibo we bidi tau sao.
JUD 1:24 Te God agai bomo elalubaso, agai dage bugagia tonaluyu, dage me tulalugobeo. Tama agai dage tau siyu, tama dage dwai sę me isiąwai, dwagi yai homu pemene mu eyu, tama agai dage aga moni ula elaluyu gegemani ebo madigi teba sela pabo usu yaibao.
JUD 1:25 Tama God agaduba deli naga bidibo dao. Agai da tau siyu ma dobola somainogo, tama agai dago Genuai Bidi Jisas Krais e tǫba tagala palali. Tama tibaso, dago Godigo nogi ugwaba sinao. Awe, tama tiyu, God aga polalubo tuni bidi bidimainao, tama aga genuai bomo mu dali, agai moni ula dali si elalubaso, tama dago aga nogi ugwaba sinao. Te tigidali sogo polobadu aga tama bidai, te megi me aga tama bidibao, te tigidali sogo nosali God aga tama bidada peyu, bidada paibao. Te po mu po dao. Tama dao.
REV 1:1 Te eno megi asęna tolobo po, polobadu te po geme dulaluai, tama Godigo te po Jisas Kraisbolo waselama ola mani. Te Kraisgo aga sę ebo bidi dabebolo te nosali gana pedalobo sę hania hanilainogo tama Godigo agabolo te sę ola mani. Tama agai aga ensel mobo bidi me deli te Jon enabolo tagala palama, tama ena agai sę bidi, tama te tagala palali ensel mobo bidigo te waselali po enabolo ola magasai.
REV 1:2 Tama ena Jon, eno te sę tigidali sulama, tama te po me eno koneai, tama eno hanilama te Godigo po dąų weyu, tama Jisas Kraisgo enabolo pusali po me, te pode eno te po wai dao, “Te mu po naga dao.”
REV 1:3 Eno e po asęani, te nosali gana pedalobo sę po dao. Tama e asęani po gasa we bidibolo nedebo bidi, te bidi dwagi yai homu pemene eyu, bugagia bidaibao. Tama aga nedebo po odobo we bidi me, augwaligo te asęani po odama, tama wali pobaso da, teda augwali me dwagi yai homu pemene eyu, bugagia bidaibao. Magi baso meni. Te sę pedalobo sogo pąba yagasai dao.
REV 1:4 Ena Jon, eno e po dage a naga olama me badu nogo si te Godigo po wali pabo we bidi hani, dagebolo e po asęna tolobao, te dage te genuai tǫ Esia te genuai hanu dabede bidibo we bidi. God aga te megi bidibo, tama polobadu mu aga bidaluai, tama nosali aga ma asiyu, tama eno homugo te God agai da olo mu tau sabo te kolesaga dali, tama te dwagi yai homu nagame ilibo kolesaga dali te si dageba mao. Tama eno homugo te a naga olama me badu nogo si mobo bidi augwali me, te tuni bidi God aga au yali duabo sia sai pąde bidibo bage, augwaligo me te dwagi yai homu eyu olo tau sabo kolesaga dali, te dwagi yai homu nagame ilibo kolesaga me dagebolo mawaibao.
REV 1:5 Tama Jisas Krais me, agai dagebolo te kolesaga si dagebolo momainao, te eno homugo. Aga te Godide homu kęą pai bidi bidiyu, tama agai Godigo po tigidali dolo mu pusali bidi dao. Aga da te isama, tama isali we bidi dabe tomode bidama, tama aga te hasia mu gų pagede ma hodaloali bidi dao. Aga da, te tigidali tǫde bidibo tuni bidigo polalubo genuai bidi dao. Agai da dali dwagi yai homu eyu godolo mu ebo dao, tama aga isaligo dago dwai sę yali sęgę tigidali sela sąwai dao, tama da megi olo bidibo dao.
REV 1:6 Tama tiyu, agai da tau selama, tama dabolo genuai sę menama, tama da te tuni bidi kingo pris hani bidi dabe nigilama, tama megi da te Jisas aga Aya Godibolo me te lotu po weyu, sesemane sogo aga sę ebo pris bidi dabe bidibao. Tama tibaso, eno homugo agai genuai wiegi yai nogi dali, te we bidi tonalubo bomo dali me bidada peyu, bidada pomainao. Te mu tama dao.
REV 1:7 Suao, Krais aga te dagalu pǫ me tomodu tiąba asaibao, tama tigidali bidi augwa digi gedugo aga te pǫ tomodu tiąba asobo sueibao. Tama te aga tigide enani bidi dabe augwaligo me sueibao. Tama tigidali tǫde we bidi augwaligo aga asobode homu eyu, tama agai augwalibolo dene wei ponaibao homu elama, tama augwali homu sęgę eyu gela waibao. Awe, te tama tiaibao. Mu tama dao.
REV 1:8 Te Tigidali Bomo Elalubo Genuai Bidi God agai aga bidibo pagede te po wai, “Ena da, ena digi te hasia bididuali bidi dao, ena te nosali sogo mu bididueibao wabo bidi mu dao,” agai te po wai. Te God aga te megi bididubao, tama polobadu mu aga bididuai, tama nosali aga ma asaibao.
REV 1:9 Ena Jon, ena duga ama dao. Ena dage dali hodobo te Jisasde wadolama, tama da deli hani elalubaso, tama gasa bage augwaligo dabolo dene dali, sęgę dali mayu elama, tama da tigidali hodobo bomo elama dolaluyu, sęgę bugagia tolobo dao. Tama ena Godigo we bidi tonalubo sę tomode dage dali hodobo bidibao. Tama eno te we bidi dabebolo Godigo po dali, te Jisasgo hania hanilali mu po dali, te po si augwalibolo pusubaso augwaligo ena sela sąnama, ena te tamu ąį tomode elalubo dwasianu tǫ nogi Patmos teba kalabus mugi pali dao.
REV 1:10 Tama ena e bulude bidibadi, ena te moni Sarere ulade digi na tiwai ebadi Godigo Mobo Bidi agai enaba dagana sagaselama, tama ena tudi badu bidi me deligo po dage bomonama weyu i wabo odali, te genuai bu wabo nai yadogoli te biugel bu wabo odai.
REV 1:11 Tama te wali pode te po wai, “Nago naga gedugo subo sę po tigidali te bukude asęnama, te Godigo po odobo we bidi bidibo bulu a naga olama me badu nogo si, te buluba nago te sę po asęna tolao. Nago te po Efesus buluba asęna tolobadi, me te Smerna buluba, me te Pergamum bulu, me Taiataira, me Sardis, me Filadelfia buluba tolobadi, me te Laodisia buluba te po asęna tolao,” weyu te po enabolo wai.
REV 1:12 Tama enabolo te po wali bidi eno begelama suainogo yai. Tama ena gesabidi begelai, tama eno suali, te kapa nogi gol, te golgo nigali lam sole a naga olama me badu nogo si tama munalubo suali.
REV 1:13 Tama eno suali, te sole dabe munalubo tomode bidi me deli te bidi mu tiwai tede dolalubo suai. Tama te bidi aga bobage ugwago sągą halua sai bidi, tama te bidigo tigide eno suai, te kapa golgo nigali nai aga hagawia bagulai nai te eno suai.
REV 1:14 Tama te bidigo tobolu nisi dali tedela mu yai, te kibu sipsip nisi tiwai, tama te tedela dagalu pǫ tiwai yai. Tama te bidigo gedu te sia bogoli ebo tiwai yali.
REV 1:15 Tama te bidigo sągą ula mu yali, te augwaligo te gasagi yai kapa nogi bras te genuai sia dabo digi ulama ąį tiwai pedaluyu, tama te gegemani ebo tiwai aga sągąde te tama tiwai mu yali, Tama eno odali, agai dogonide po wabo te mone sabo ąįgo u wabo tiwai odai.
REV 1:16 Tama te bidigo dolo nogo sawali daide te hǫ a naga olama me badu nogo si elalubo suali. Tama te si badu poai yai bainat hwą ge te hwą mu poa pai, te bidigo pedauwalidu te buluba dią soai. Tama aga gesabidi ula mu yai, te sia bomo elama giligade nanobo tiwai yai.
REV 1:17 Tama eno te bidi sulama, tama ena aga sągą pageba kidu pǫgulai, tama ena te isai bidi pigulali tiwai yai. Tiali goli agai dolo nogo ena tigiba munama, tama agai te po wai, “Nage wi tagalao. Ena da, ena digi te hasia bidaluali bidi dao, ena te nosali sogo mu bidaluaibao wabo bidi mu dao.
REV 1:18 Ena bidibo ula dali bidibao. Polobadu ena isai, tiali goli nago ena bidibo subao, te ena sesemane sogo bidada peyu, bidada pabo ula selama, megi bidibo dao. Tama tibaso, eno bomo elalubao, te isibo kolesaga dali, te isai bidi dabe osogo bidabo madi dali, te si tonalubo bomo eno elalubo dao.
REV 1:19 Tama tibaso, nago te gedugo suali sę po asęąo, te megi pedalobo sę me, te nosali pedalabo sę po me asęąo.
REV 1:20 Tama nago eno dolo nogode te hǫ a naga olama me badu nogo si elalubo suali. Te lam sole gol a naga badi me si tama te me nago suai. Tama te nai dabe geme dualali page e dao: te hǫ a naga olama me badu nogo si wali, te Godigo po wali pabo bulu a naga olama me badu si te bulude bidibo we bidi tau sabo ensel mobo bidi dabe dao. Tama me te a naga olama me nogo si te lam sole po wali, te a naga olama me badu nogo si Godigo po wali pabo we bidi hani dabede po begelama weyu,” agai te po wai dao.
REV 2:1 Te bidigo enabolo e po me wai, “Te hasia Efesus hanude Godigo po odoyu bidibo we bidi tonalubo ensel mobo bidibolo e po asęna tolao: eno dolo nogogo te hǫ a naga olama me badu si eno tolaluyu, tama ena te a naga olama me badu nogo si te lam sole tomode bilibo bidi dao. Tama tiyu, eno e po nage dali obao:
REV 2:2 Te nago ebo kolesaga tigidali eno koneani, te nage sę dene ebo dao. Te me eno koneai, nage bomo elama sęgę bugagia tolama dolaluyu, tama nago te dwai sę ebo bidi dabe augwali hagela mu yai. Te bidi dabe augwaligo nagebolo te po wai, ‘Da me te Jisasgo sę ebo bidi dabe dao’ wai. Tiali goli te menio, augwali te Jisasgo sę ebo bidi dabe menio. Tama nago augwaligo wabo po osola suai dao, tama nago augwaligo ebo kolesaga page gegelama koneai, tama augwali te ili po naga wabo bidi dabe dao. Nago tama yali augwali osola suali sę eno koneai.
REV 2:3 Tama te bidi dabe augwaligo nage suali, te nage ena wali bilibo dao, tama augwaligo nage dali dwai sę yali dao. Tiali goli nago bomo elama dolaluyu, te dwai sę nage dali eyu sęgę mabo nago bugagia tolalubo dao. Te nago tigi dene ebo hagela ebeo. Nago te sę ebo te eno konebo dao.
REV 2:4 Tiali goli, eno po me nage dali elalubao: polobadu nago enaba te konealubo po hasia dąų wali sogo, te sogo nago wiegi yai homu ena dali mu yai, tialima megi nago ena dali te hasia dwagi yai homu eyu godolo yali tiwai ebo menio.
REV 2:5 Tama polobadu nago dwagi yai kolesaga yai, tialima nago te kolesaga tagaliyu tama nage tulaluai dao. Tama nago te polobadu yali kolesaga ma homugo koneyu, tama nage homu begeleyu, te hasia yali wiegi yai kolesaga ma yao. Nago te sę esiąyu, tama nage homu begelesiąyu da, te ena nage pageba pedalaibao, tama eno nago te lam sole elaluali ena ma sagasaibao, aga nage dali me elalugobeo.
REV 2:6 Tialima te kolesaga me nago eyu tama te dolo dao: nago te bidi Nikolas hanigo ebo dwai dwai kolesaga dali boi bidi homu ebo dao. Eno me, eno augwaligo ebo kolesaga dali boi bidi homu ebo dao.”
REV 2:7 “Te olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elaluyu da, te bidibolo eno aga usu da weyu, tama agai te bidi bidibo ula mabo ni du sela tumainao waibao. Tama te bidi bidibo ula maiabo ni te God aga gide elalubo dao.’”
REV 2:8 Te bidigo enabolo po me wai, “Te Efesus hanuba u po asęna tolama, tama megi Smerna hanude Godigo po odoyu bidibo we bidi tonalubo ensel mobo bidibolo e po asęna tolao: ena da, ena digi te hasia bididuali bidi dao, ena te nosali sogo mu bididuabo bidi mu dao. Tama polobadu ena isai, tiali goli ena ma hodaluama, megi me bidibao. Tama eno e po nagebolo ola tolobao.
REV 2:9 Eno koneani, nago te sęgę te gasa bidi dabego nogode siyu dene dali ebo, tama tiyu nage magi nai meni yai mu bidibo te eno koneai. Tiali goli nage nai meni yai bidi mu menio, te God dali nage nai umabo elalubo bidi dao. Tama bidi meba augwaligo dagebolo posobo po wabo, te eno koneai. Tama te posobo po wabo bidi dabe augwaligo te po wabo dao, ‘Da Juda bage dao.’ Tiali goli augwali te tigide naga te Juda bage dao wabo, tama augwaligo ebo kolesagade augwali te Juda bage mu menio. Augwali te Satango hani dao.
REV 2:10 Tama nosali gana gasa bagego dagebolo dene mawaibao. Tiali goli dage te dene sabo sęde wi egio. E po odao. Satango dage meba kalabus iliyu, te dage agai poba asobowe suainogo usu siyu tiaibao. Tama dage te dwai sę ebogo sęgę me dene dali te nogo si sogo usu nama saibao. Gasa bidi augwaligo dage dali te dwai sę eyu, tama augwaligo dage ela mubo sę me eyu da, teda dage enade homu kęą pai bidi dabe bidiyu da, eno dagebolo wiegi yai nai mu mawaibao, te bidada peyu, bidada pabo ula dagebolo mu mawaibao.”
REV 2:11 “Olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elaluyu da, te si sogo isibogo te bidi munu me dologobeo. Mu menio.’”
REV 2:12 Te bidigo enabolo po me ma wai, “Te megi nago te Pergamum bulude Godigo po odoyu bidibo we bidi tonalubo ensel mobo bidibolo e po asęna tolao: ena da, ena te si dali si badu poa pai bobage ge hwą ge elalubo bidi dao. Tama eno e po nagebolo ola tolobao.
REV 2:13 Nago bidibo bulu eno koneai dao. Te bulude te dwai mobo bidi Satan agai we bidi hauwa tonaluyu te tuni bidi bidibao. Tiali goli, nago eno nogi bomo elama tolaluyu, tama enade homu kęą pai bidi bidibao. Tama nago te enade konealubo po hogwa sabeo. Tama tiyu, polobadu te bidi me nogi Antipas, te eno po te we bidibolo pusali bidi, te bidi dage dali bidai. Tama agai eno po wali mu pai dao. Tama augwaligo dage tomode te bidi ela muai, te Satan bidibo bulude. Tama te sogo me te dagego eno nogi dualobeo.
REV 2:14 Tiali goli eno po meba nage dali elalubao. Nage dali bidibo bidi meba, augwaligo te bidi Balamgo kolesaga wali pabo dao. Tama te Balamgo kolesaga e dao. Polobadu bidibadi agai te tuni bidi nogi Balak agabolo te Israel dabe gea gano bilabo kolesaga ola mawai. Tama ola menama, tama Balakgo te Israel we bidi homu hodolama, tama augwaligo te tibo god dabebolo ula mani nai tuyu, tama augwaligo te penani ebo kolesaga emainogo yai.
REV 2:15 Tama nage dali me, te bidi meba bidibo bage, augwaligo te bidi Nikolas hanigo ola mabo po wali pabo dao.
REV 2:16 Tama tibaso, tede ge neyu nage homu begelao. Tama nago homu begelesiąyu da, teda tamadi tama ena nage pageba pedalaibao, tama eno te pedauwalide elalubo poa pai ge hwą gego te dwai sę ebo bidi dabe augwali dali hwįaibao.”
REV 2:17 “Olo elalubo bidi, agai te Godigo Mobo Bidi agai Godigo po odobo we bidi hani dabebolo e wabo po bugagia odao: ‘Niwai bidi agai bomogo te dwai sę ebo kolesagago bomo aiyaba elalubo bidi, te bidibolo eno megi geme dulalubo tubo nai nogi mana meba mayu, tama eno te tedela yai dwasianu masigi me agabolo mawaibao. Tama te masigide gesi nogi asęai, tama niwai bidi mego te nogi konegobeo. Te masigi sali bidi, aga naga te nogi koneaibao.’”
REV 2:18 Te bidigo enabolo po me ma wai, “Te megi nago te Taiataira bulude Godigo po odoyu bidibo we bidi tonalubo ensel mobo bidibolo e po asęna tolao: ena Godigo Ogwa dao, tama eno gedu te sia bogoli sesena pai bomonama dabo tiwai, tama eno sągą te kapa meda meni yai eyu te gegemani ebo tiwai ebo. Tama eno e po nagebolo ola tolobao.
REV 2:19 Nago ebo kolesaga tigidali eno koneai. Tama eno koneani, nago te bidi dabe augwali dali dwagi yai homu elama tama godolo mu eyu, tama nago homu enade kęą peyu, tama nago tigidali bidi dabe tau sabo sę ebo dao. Eno koneani, tigidali sęgę nageba pedalobode te nage bomo elama te sęgę bugagia tolobo dao. Tama eno koneani, te tiwai kolesaga hasia nago yai, te wiegi yai, tama megi nago te nosali ebo kolesaga te dwagi yai mu me ela pabo dao.
REV 2:20 Tiali goli, eno te po me nage dali elalubao. Nago te we Jesebel nage dali bidibo we, agai ola mabo po dagego odobo dao. Te wego te po wabo dao, ‘Ena da, te Godigo nosali yabo sę po megi pusubo we dao.’ Tiali goli agai eno sę bidi dabebolo te penani ebo kolesaga wali pomainogo ola mayu, tama augwaligo te tibo god dabebolo ula mani nai tumainogo ebo dao. Te kolesagade te wego augwali ili po ola mabo dao.
REV 2:21 Eno homugo aga homu begelemainogo, tama eno aga osogo sula tagaliyu bidimainogo yai. Tiali goli menio. Aga te homu begelebo te homu esiąyu, te penani ebo kolesaga tagalama tudiba muabo te homu menio.
REV 2:22 Tama tibaso, suao, te eno dene dali, genuai gasi dali te webolo mawaibao. Tama aga dali te penani yali bidi dabe, augwaligo homu begelesiąyu, tama aga dali yali dwai kolesaga tudiba musiąyu da, teda eno augwalibolo me te genuai dene dali sęgę dali mawaibao.
REV 2:23 Tama agai wai dabe me, te eno augwali mu ela silaibao. Tama tiyu, te Godigo po odobo we bidi tigidali augwaligo koneaibao, te ena da, te tigidali bidigo homu kolesaga osola subo bidi dao. Tama dage deli delibolo eno dagego yali kolesaga dolo si wei ponaibao.”
REV 2:24 “Tiali goli megi eno e wabo po dage te gasa Taiataira bulude bidibo we bidi dali obao. Dagego te we Jesebelgo dwai tibo po wali pisąwani. Tama augwaligo agai pode te po wabo dao, ‘Te kolesaga da, te Satango ebo kolesaga page mu dao, te bidi hauwago konesiąbo po dao.’ Tama augwaligo te po dagebolo wai digi, dagego te dwai po wali pabo menio. Awe, te usu dao. Eno dagebolo te po obao, dagebolo eno gasa sęgę mabo sę me mugobeo.
REV 2:25 E sę naga yao: dagego megi ebo wiegi yai kolesaga bomo elama tolalua peyu, tama ena ma asobo sogo bugagia tonaluao.
REV 2:26 Tama niwai bidi agai te dwai kolesaga ebo aiyaba elalubo bidi, te bidi agai te eno kolesaga wali peyu, aga te bodolu muani sogo siligibu, tama te bidi agabolo te eno te nogi dali bomo dali si menama, tama aga te we bidi haniani tǫde bidibo bage augwali tonalubo tobolu bidi bidimainao.
REV 2:27 Te sę eno agabolo mawaibao, te eno Ayago agai ena te we bidi tonalubo sę mani sę tiwai dao. Tama te bidi agai te ain dono tulama, augwali bomogo tonaluaibao. Tama te tǫgo nigai sini te bidi mego donogo elebadi te dwasianu pebeda pabo tiwai, te bidigo haniani tǫde bidibo we bidi augwali aga bomogo tonaluaibao.
REV 2:28 Tama eno agabolo te kigamu mu dagalude pedalobo te genuai hǫ, te me agabolo mawaibao.”
REV 2:29 “Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao.”
REV 3:1 Te bidigo enabolo po me ma wai, “Te megi nago te Sardis bulude Godigo po odoyu bidibo we bidi tonalubo ensel mobo bidibolo e po asęna tolao: eno te a naga olama me badu nogo si te Godigo mobo bidi dabe elaluyu, tama eno te a olama me badu nogo si hǫ te eno nogogo tolalubo dao. Tama ena digi eno e po nagebolo ola tolobao. Tama nago ebo kolesaga tigidali te eno koneai. Gasa we bidi augwaligo te po dagede wabo dao, ‘Te Sardis bulude bidibo Godigo po odobo we bidi hani augwali bomo elama, wiegi yai kolesaga wali peyu bidibo dao,’ augwaligo dage dali te po wabo dao. Tiali goli menio, eno gedude dage isai bidi tiwai dao.
REV 3:2 Tama tibaso, dage hodaloyu, te pila mubo tagalao. Tama hodaloama, tama te dagego dwasianu me elalubo dwagi yai kolesaga te bugagia tonaluyu, tama bomo elama te dwagi yai kolesaga geninama pedalomainao, te kolesaga dolidali weyu yao. Magi baso meni, te dagego ebo kolesaga tigidali te eno Godigo gedude tigidali te usu niba kadu wabo menio.
REV 3:3 Tama tibaso, te dagego polobadu Godigo po mu sali, te po dagego odali, te pode homugo ma kone palao. Tama te pode homugo ma kone paliyu, ge neyu, homu begeleyu bidao. Te dage pila muani tagaliyu hodalusiąyu da, te ena dagego bidibo digi te geme nai wi sainu asobo bidi tiwai eyu, tama ena dage pageba asobo sogo te bodolu dagego konegobeo.
REV 3:4 Tiali goli, dage Sardis bulude bidibo we bidi tomode te we bidi meba te bulude bidibadi digi te dwai kolesaga medago augwali ugwa meda ilibeo. Te we bidi dabe augwaligo te tedela yai ugwa munama ena dali bilaibao. Te augwali te sęde usu si dao.
REV 3:5 Tama niwai bidi agai te dwai kolesaga ebo aiyaba elalubo bidi, te bidi agabolo eno te tedela yai ugwa tiwai munama, tama agai nogi te isisąma gamonabo we bidi nogi asęani bukude eno agai nogi sela sągobeo. Menio. Te agai nogi eno Ayago gesabidide me, te aga mobo bidi ensel dabe augwaligo gesabidide me te bidigo nogi po eno pusaibao, te aga eno bidi dao, te po waibao.”
REV 3:6 “Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao,” te bidigo enabolo te tama po wai.
REV 3:7 Te eno suali bidigo enabolo po me wai, “Te megi nago te Filadelfia bulude Godigo po odoyu bidibo we bidi tonalubo ensel mobo bidibolo e po asęna tolao: ena da, te Godigo bidi naga dao, ena magi sę isąwai tedali gasagi yai bidi dao. Tama ena te mu kolesaga ebo page bidi mu dao. Te eno te polobadu bidali bidi Devit agai tų dalabo ki tolalubao. Eno te tų dayu, tama niwai bidi mego te tų ma paligobeo. Tama eno te tų paliyu da, te niwai bidigo te tų ma dagobeo. Tama eno e po nagebolo ola tolobao.
REV 3:8 Nago ebo kolesaga tigidali te eno koneai. Eno koneani, nago bomo dwasianu elaluali digi tama nago ola mani po wali peyu, tama nago eno nogi hogwa sabeo, eno nogi geme dualobeo. Suao. Te nago gesabidide te eno tų dala munama elaluai, tama niwai bidigo te tų me paligobeo.
REV 3:9 Suao. Nago te Satango bidi hani augwali koneai, tama augwaligo te po wabo, ‘Da te Juda bagego hani dao.’ Tiali goli menio. Augwali te tigide naga te Juda bage da wabo dao, tama augwaligo ebo kolesagade te Juda bage mu menio. Tialima te bidi dabe augwali eno selama, tama augwali te nago sągą pageba kidu sugunagasiyu, eno nage godolo mu ebo homu yali te augwaligo mu koneaibao.
REV 3:10 Nago eno po wali peyu, tama sęgę nageba pedalobode te nage bomo elama dolaluai. Tama tibaso, nage eno bugagia tonaluyu, tama te usu sabo sę te tigidali we bidibolo te tigidali tǫde pedalainogo eyu, te sę nagebolo pedalidali weyu eno nage paliaibao.
REV 3:11 Ena tamadi nage pageba asaibao. Tama nago te ebo dwagi yai kolesaga tagaligio, te nago bomonama dąų wao. Te gasa bidigo nagebolo ili po olama, tama nage te wiegi yai kolesaga tagaliyu te Godigo mabo nai sisąyu bididali weyu, bugagia dąų wao.
REV 3:12 Niwai bidigo te dwai kolesaga ebo aiyaba elalubo bidi, te bidi aga eno te Godigo Moni Lotu Be tempel te be pos ni bulali dąų olalubo tiwai eyu, tama aga te dwagi yai be tagalama buluba munu me ma soagobeo. Tama te bidi agade eno Godigo nogi asęyu, tama eno Godigo genuai hanu nogi me asęaibao. Te gesi hanu te Jerusalem dao. Te hanu eno Godigo nogogo asiyu, te dagalu tagalama e tǫba dulaibao. Tama eno gesi nogide digi, te me eno agade asęaibao.”
REV 3:13 “Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao,” te bidigo enabolo wai.
REV 3:14 Te eno suali bidigo enabolo te po me ma wai, “Te megi nago te Laodisia bulude Godigo po odoyu bidibo we bidi tonalubo ensel mobo bidibolo e po asęna tolao: ena te mu po wabo page bidi mu, ena te Godide homu kęą pai bidi bidiyu, tama eno te Godigo po tigidali dolo mu te we bidibolo pusubo dao. Sesemane sogo eno mu po naga pusubo dao. Ena te Godigo nigali nai tigidali page mu dao. Eno e po nagebolo ola tolobao.
REV 3:15 Nago ebo kolesaga tigidali eno konea silai. Eno koneani, nago eno po selama, tama ena wali asobo dao. Tiali goli, nago eno po sali digi, nage bomo elama te po wali pabo menio. Me ma, nago eno po oda mu tagalobeo. Nage te tiwai tomode naga bidibo dao. Te dwali. Eno homugo nage te tiwai iyu bidigio. Deli kolesagade naga nago homu kęą peyu bidao.
REV 3:16 Tiali goli nage te kolesaga si tomode bidibaso, nage eno pedauwalidu bugulabo homu ebao, te bidi mego te pusu meni yai ąį bugulubo tiwai yaibao.
REV 3:17 Nago te po wabo dao, ‘Eno nai hauwa selama, tama eno walu hauwa elalubao. Tama ena magi nai me sǫą pabeo,’ nago te po wabo dao. Tiali goli nago naga bidibo page bugagia konebeo. Nage da, nage te dwai mu bidibo, nage mu hobedagia bidibao. Tama nage magi nai meni yai mu bidiyu, tama nago gedu halua sai bidiyu, tama nago tigi bolu olo bidibao.
REV 3:18 Tama tibaso, eno e po mobo mabo po nagebolo mobao. Eno te gasagi yai kapa nogi gol te elalubao, te kapa gol te siaba ulama te dwai nai sela sąnama, tama te wiegi yai yai. Tama eno homugo nago te kapa gol abelao, te nago doado bage hauwa elalumainogo yao. Tama nago te tedela yai ugwa te naga tigi haluabo abelao, te bidi dabe augwaligo te nago tigi bolu olo elalubo sulama, tama nage hale idali weyu te tama kolesaga yao. Tama nago te geduba muabo ili yabo marasin me abelao, te nago gedu ma tonono bilibo usu emainogo yao.
REV 3:19 Te eno bidi meba wei eyu da, te eno augwali dali wado po weyu, te augwaligo kolesaga eno dodolobo dao. Tama tibaso, nago bomo elama, tama homu hodolama, nago yali dwai kolesagade ge neyu, tama nage homu begelao.
REV 3:20 Odao. Ena te tųde dolaluyu, tama eno te tųba begebo wabo odao. Tama niwai bidi me agai eno te be tųba bebego wabo po odoyu, te be tų dayu da, te ena te be tomoba pelama aga dali bidaibao. Tama ena aga dali nai tuyu, tama aga ena dali nai tuyu bidaibao.
REV 3:21 Niwai bidigo te dwai kolesaga ebo aiyaba elalubo bidi, te aga dali eno usu da weyu, aga te ena pąde duawaibao, te ena eno tuni bidigo duayabo madide duabo sogo. Te polobadu ena me te dwai kolesaga ebo aiyaba elaluama, tama ena Aya dali agai duabo sia sai te naide dugulalu bidibo dao. Te tiwai te bidi ena dali bidaibao.”
REV 3:22 “Olo elalubo bidi, agai te Godigo Mobo Bidi agai Godigo po odobo we bidi hani dabebolo wabo po bugagia odao,” te eno suali bidigo enabolo wai.
REV 4:1 Te bidigo enabolo te po wabo silama, tama eno te gasa na tiwai eyu tama eno suali, dagalude tų me deli dalaluai. Tama te pedauwalidu polobadu eno odali agai po enabolo mayu te genuai yadogoli tiwai naigo te bu wabo tiwai eyu, tama agai te po wali, “Nage edaba holao, tama eno nagebolo te nosali pedalabo sę tigidali ola mawaibao.”
REV 4:2 Tama polo mu, te Godigo Mobo Bidigo ena tigiba dagana sagaselama, tama dagalude eno te tuni bidi duabo nai sia sai elalubo suai, tama bidi me deli te duabo nai sia saide dulaluai.
REV 4:3 Tama aga gesabidi te ula gegemani yai, te wiegi yai dila pai mama yai masigi nogi jaspa me, te gasa mama yai masigi nogi konilian, te masigi si ula ebo tiwai yai. Te unigi bidi mego te tuni bidi duabo nai sia sai bobegela sai elaluai, tama te unigi bidi eno te wiegi yai masigi nogi emeral te ni yano tigi poai tiwai eno suai.
REV 4:4 Tama te 24 wabo tuni bidi duabo nai sia saigo te genuai tuni bidi bidibo digi bobegela sai elaluai, tama te 24 polalubo tobolu bidi augwali te duabo nai sia saide dualama bidai. Tama te polalubo tobolu bidi dabe augwaligo te tedela ugwa muai elaluai, tama augwaligo tobolude te kapa golgo nigai wiegi yai madi muai elalubo, te eno suai dao.
REV 4:5 Tama te tomode bidibo genuai tuni bidigo duabo digide te be sele eyu, tama be kulu kulu wai, te moni u wabo odai. Tama te tuni bidigo gesabidide te sole a naga olama me badu nogo si te ula elaluai. Te sole ula elalubo te Godigo mobo bidi a naga olama me badu si dao.
REV 4:6 Tama te genuai tuni bidigo gesabidide te magi nai me deli elalubao, te nai te genuai tamu ąį tiwai dao. Tama te gesabidi subo dula tiwai, te hania mu subo dao. Tama te bidibo ula elalubo hasa me si me si augwali te tomode bidiyu, tama augwali te tuni bidigo wiegi yai duabo nai sia sai bobegelalu bidiyu, tama augwali dolaluai. Te bidibo ula elalubo hasa me si me si augwaligo gedu te hauwa te gesabidide me elalu, te tudi badu me elalu, te tigi sibi mu simina selama halualubo dao.
REV 4:7 Tama te bidibo ula elalubo hasa me deli aga te moni hudigi ebo kibu laion hasa tiwai bidibo eno suai. Te hasa me aga te bulmakau omai tiwai suali. Te bidibo ula elalubo hasa sela wali te bidi gesabidi tiwai yai. Tama te tudi badu hasa te ba kemodage ugadu bola bilibo tiwai eno suali.
REV 4:8 Tama te bidibo ula elalubo hasa me si me si, te augwali deli deligo bogo te a naga olama me badu nogo deli elaluali. Tama gedu hauwago augwali tigi te bulu badu me tomo badu me usu nama mu elaluai. Te bogo dologode me elaluali. Tama ulade dali te hulide dali augwaligo te balia weyu te po wabo, “Genuai Bidi Godigo tigidali bomo elalubao, te aga wiegi yai tedali, wiegi yai tedali, wiegi yai tedali mu dao. Tama polobadu aga bidai, tama megi me aga bidibo, tama nosali aga asaibao.” Tama augwaligo te po wabo toma me tubo menio.
REV 4:9 Tama te bidibo ula elalubo hasa dabe, augwaligo te God aga te sesemane sogo bidada pabo te tuni bidi duala tiąlubo nai saide dulalubaso, te augwali homu wiegi yai mu ebo dao. Tama tibaso, augwaligo aga ula yai bomo dali, aga nogi dali te si ugwaba siyu, tama aga dali usu da po weyu balia wedu gebo dao. Tama tibaso da,
REV 4:10 te bidi sese olama me si me si polalubo tobolu bidi augwali te tuni bidi duabo naide dulalubo bidigo gesabidiba kidu sugunama basi gulubo dao. Tama augwaligo agabolo lotu po weyu, aga nogi ugwaba sabo dao, aga te sesemane sogo bidada pabo bidi dao. Tama tiyu, augwaligo augwa te kapa golgo nigai wiegi yai madi dabe te tuni bidi duabo nai sai pageba te madi guda mayu, tama augwaligo te po wabo,
REV 4:11 “Genuai Bidi, nage dago God dao. Tigidali bidigo nage dali wiegi yai homu ebo te usu mu nage dali emainogo, tama tiyu nago nogi ugwaba siyu, tama augwali nage dologoba bidagasomainogo tebo dao. Magi baso meni, nago tigidali nai nigai. Te naga homugo digi nago te nai nigilama pedalai, tama megi te nai tigidali e tǫde elalubao,” augwaligo te po agabolo wabo dao.
REV 5:1 Tama eno suai, te genuai tuni bidi duabo naide dulalubo bidigo dolo nogo ugwadu daide eno suali, te buku tiwai nai me munalubo. Te bukude asęani po te me tomode elaluyu, me bulu badu elaluyu yai. Tama augwaligo te a naga olama me badu nogo si te dąų wabo naigo te buku dąų walai.
REV 5:2 Tama eno suali, Godigo bomai ensel mobo bidi me deli agai po dagą genuai weyu te po wali, “Niwai bidi aga te wiegi yai bidi da obaso, te bidi agai te bukude dąų wali nai dalama, tama te dąų wali buku dagabo usu egowe?” ensel bidigo te po wai.
REV 5:3 Tiali goli mena bidi dagalude bidibo bidigo me, te tǫde bidigo me, te tǫ dologode bidibo isai bidigo me, te dąų wali buku dagalama, te tomoba suainogo ebo usu menio.
REV 5:4 Tama eno suali, te buku dąų wali dagalama tomoba suabo bidi gegali te me sube. Tibaso, ena gela hauwa wali.
REV 5:5 Tama tibaso, polalubo tobolu bidi me deli agai enabolo te po wali, “Nage gela wagio. Suao. Bomo elalubo tuni bidi te Juda hanibolo pedalai, aga bomo te moni hudigi ebo kibu laiongo bomo tiwai dao. Te bidi aga polobadu bidai Juda bidi Devitgo wąįgo hanide pedalali bidi. Aga te gelali ni pagede kulubi pedalobo tiwai gilama yai. Tama tiyu, agai te dwai kolesaga ebo aiyaba elalubaso, agai te a naga olama me badu nogo si te dąų wali nai togolama, agai te buku dagawaibao,” te tobolu bidigo enabolo te po wai.
REV 5:6 Tama te sogo eno suali, te kibu sipsip wai dolalubo suai, te augwaligo aga hwągo ela muai subo tiwai homu yai. Tama aga te genuai tuni bidi duabo nai dali te bidibo ula elalubo hasa me si me si te pąde aga dolaluyu, tama te polalubo tobolu bidi dabe tomode bidai. Tama agai te bulmakaugo tobolude elalubo gąų tiwai te a naga olama me badu si badi, te agai gedu me te a naga olama me badu nogo si elalubo. Tama te gedu dabe augwali te Godigo mobo bidi a naga olama me badu nogo si dao. God agai augwali te tigidali tǫba tagala palai dao.
REV 5:7 Tama te kibu sipsip wai aga pelama, tama te genuai tuni bidigo duabo nai pageba sabolama, tama tede dulalubo bidigo dolo nogo ugwadu daide elalubo buku agai sai.
REV 5:8 Tama agai te buku sai digi, te aga genuai bidi mu bidibaso, te bidibo ula elalubo hasa me si me si badi, te bidi sese olama me badu nogo me si me si te polalubo tobolu bidi augwali te kibu sipsip wai pąba pelama, kidu sugunigi pai. Tama te tigidali tobolu bidi deli deli augwaligo te elebo nai gita tiwai badi, te wiegi yai kapa golgo nigai pou te tola sobadi yai. Tama me te pauda denami ebo nai te tigidali poude elalubo siago deyu, tama te holobo denami yai hano te Godigo we bidi augwaligo Godibolo wabo gedu haluasa po tiwai holobo eno suai.
REV 5:9 Tama augwaligo gesi tęąbi me tama wai, “Nago te buku selama, te dąų wali nai togobo usu mu dao. Magi baso meni. Augwaligo nage ela muani, tama nago isibo kanemego te bidi dabe augwali ma abelai, te augwali Godibolo mayu tiai dao. Te nago tigidali we bidi hanide we bidi meba abelali, te tigidali haniani po wabo bulude me, te tigidali haniani tigi yai bidi hanide me, te tigidali genuai tǫde bidibo bagede me te nago we bidi meba abelai.
REV 5:10 Tama abelama, te bage nago augwali te dago Godibolo lotu po weyu sesemane sogo aga sę ebo pris bidi hani pedalumainogo yali, augwaligo Godigo sę emainogo yai. Tama tiyu augwali tuni bidi te tǫde bidaibao,” augwaligo te tęąbi po tama wai.
REV 5:11 Tialima, eno tonolo ma bilibadi, tama eno te Godigo dagalude bidibo ensel mobo bidi augwaligo pedauwalide moni po wabo odai. Tama te ensel dabe augwali hauwa mu te handet milion bidibao, tama bidigo augwali nedebo usu me egobeo, te tausen tausen te kisu umabo mu bidai. Tama augwali dolaluyu, tama te genuai tuni bidi duabo nai me, te bidibo ula elalubo hasa me si me si me, te polalubo tobolu bidi dabe me, augwali tomode bidiyu, tama te ensel mobo bidi dabe augwaligo te bage bagulama dolaluali.
REV 5:12 Tama dolaluyu, tama augwaligo i bomonama weyu, e tama balia wai, “Te kibu sipsip wai polobadu augwaligo ela mubaso, agai te tigidali nai tonalubo bomo mu sabo usu eyu, tama te tigidali wiegi yai nai me, te wiegi yai homu kolesaga me, tama te tigidali genuai bomo agade usu elalubo dao. Tama aga nogi te tigidali bidigo ugwaba sabo te usu da, tama ula yai bomo agabolo mabo me, te usu dao, te agabolo genuai nogi mabo me te usu dao.”
REV 5:13 Tama tiyu, te Godigo nigali nai tigidaligo wabo po eno odali, te dagalude bidibo naigo me, te tǫde bidibo naigo me, tama te tǫ aiyadu dologode bidibo nai me, te tamu ąįde bidibo, te nai dabe tigidaligo te po wabo odai. Awe, te tigidali bulude bidibo Godigo nigali naigo po eno odali, augwaligo e po wai, “God aga te wiegi yai duabo naide tuni bidi dulalubao, tama te kibu sipsip wai me, augwali sigo nogi dago ugwaba sao, augwali sibolo genuai nogi mu mao, te ula yai bomo me mao, te genuai bomo me dago mao, tama sesemane sogo bidada pabo te usu mu yaibao.”
REV 5:14 Tama te bidibo ula elalubo hasa me si me si augwaligo te pode te po wai, “Mu dao.” Tama te polalubo tobolu bidi dabe augwaligo basi gulama, lotu po God de Krais si dali wai.
REV 6:1 Tama eno suali, te kibu sipsip wai agai te buku, te dąų wali nai a naga olama me badu nogo si elalubo buku, te agai tolalubo eno suai, tama agai te buku dąų wali nai hasia me deli togwai. Tama eno odali, te bidibo ula elalubo hasa me si me si tomode me deligo agai te po wabo, te dogoni te dagalude be kulu wabo tiwai yai. Agai te po wai, “Nage asao,” po wai.
REV 6:2 Tama eno ma tonono bilibadi, tama eno te tedela yai kibu hos asobo suali, tama te kibude duayali bidigo enesigi tolaluai. Tama augwaligo te bidi agabolo te wąbi hwįbo bomo aiyaba elalubo bidibolo mabo te tiwai madi augwaligo agabolo menama, tama aga sęba tagala palai. Tama te bidi aga pelama, te wąbi hwįbo bomo aiyaba elaluabo sę egi peyu, tama tiyu agai te wąbi hwįbo bomo aiyaba elaluabo bomo hauwa elalubao.
REV 6:3 Tama te kibu sipsip wai agai te buku dąų wali nai me si wali togwa sąwai, tama te bidibo ula elalubo hasa me sigo wabo po eno odali, te hasa sigo te po wali, “Nage asao.”
REV 6:4 Tama gasa kibu hos me pedalai, te mama yai. Tama te kibude dualasa asobo bidibolo augwaligo bomo mawai. Tama te bidi agai te tǫde we bidi tomode elalubo boi pibo sogo togolama, tama genuai wąbi hwįbo sogo gagalama, tama bidi dabe augwaligo augwa hasi bidi ela mubo sę gagalamainogo te bidibolo te bomo mawai. Tama tiyu, augwaligo te bidi agabolo te genuai poa pai hwą ge te sę emainogo mawai.
REV 6:5 Tama te kibu sipsip waigo te buku dąų wali nai sela wali togwa sąwai, tama te bidibo ula elalubo nai selago wabo po eno odali, “Nage asao,” wali. Tama eno ma tonono bilibadi, tama eno te sisi yai kibu hos asobo suai. Tama te kibude duawali bidi agai nogode te walu dabe skel ebo nai tolaluai.
REV 6:6 Tama eno odali, te bidibo ula elalubo hasa me si me si tomode me deligo pedauwalide wabo po, tama te pedauwalidu te we bidigo tubo nai mude te po wali, “Nago te tubo nai wit ge, te gego dwasianu sini pągąnama tama te naigo sęgę skel ela suao. Tama te nai abelabo masigi hasegelao, te genuai muao, te masigi sabo sę ebo bidigo deli sogo sabo masigi tiwai si ilao. Tama nago te masigi hauwa meni yai bagego tubo nai nogi bali, tede me tama tiao, te bali gego dwasianu sini me si me deli pągąnama, tama te naigo sęgę skel ela suao. Tama te nai bali sela abelabo masigi nogi genuai naga nogi yao, te sę ebo bidigo deli sogo sabo masigi tiwai si dao. Tiali goli, nago te tubo wel dali te tubo ąį wain si dolamuo,” te po wali.
REV 6:7 Tama te kibu sipsip waigo te buku dąų wali nai me si me si wali te togwa sąwai, tama eno odali, te bidibo ula elalubo hasa tomode me deligo agai te po wali, “Nage asao.”
REV 6:8 Te po obaso eno tonono ma bilali, tama eno sewa yai kibu hos me deli asobo suali. Tama bidi te kibu hosde dulaluali, tama te bidi aga nogi isibo kolesaga da wali. Tama isai bidi bidibo madi aga wali asai. Tama augwaligo te we bidi hani tigidali tomode buguluyu, tama hani me si me si nigilali. Tama augwali sibolo augwaligo te hani dabe tonalubo bomo mawai. Tama te bomogo augwali sigo te we bidi me habu badu ela muao wali, te poa pai ge hwągo hwįbogo ela muainogo, tama te nai nasi me eyu, te haniani gasi me eyu, tama te tǫde bidibo haniani uni hasago me ela tuyu tama elama augwali sigo te bomo selama, te we bidi me habu badu ela muao wali.
REV 6:9 Tama te kibu sipsip waigo te buku dąų wali nai a naga wali togwai, tama eno suali, te isai bidigo noma bidi meba augwali te Godibolo maiabo nai ulubo alta sai dologode bidai. Polobadu te bidi dabe augwaligo Godigo po te we bidibolo pusubo sę eyu, tama te pode augwaligo homu kęą pai bidi dabe bidai. Tama tibaso, te boi bidi dabego augwali ela munama isai dao.
REV 6:10 Tama te noma bidi augwaligo i bomonama weyu tama wai, “Tigidali nai tonalubo Genuai Bidi, nage magi sę me esiąyu wiegi yai mu bidibo, tama nago kolesaga te mu naga ebo dao. Te tǫde we bidi augwaligo dwai sę da dali elama, tama da ela muani. Tede dago homugo nago augwali dali po tų eyu, dago kanemede augwalibolo wei ponao. Nisu naga sogo bidai madigi tama nago augwalibolo wei nisu ponaibawe?” te po wai.
REV 6:11 Tama agai bobobage tedela yai ugwa augwali deli delibolo mena mena pai, tama agai te po augwali dali wai, “Dage toma tuyu, olo dwasianu sogo nagamea pai bidi bidao. Tama nosali boi bidi dabe augwaligo dage dali deli sę yali bidi dabe me, duga ama dabe me ela muaibao, te augwaligo dage ela muani tiwai yaibao. Tama nosali augwaligo te ela muani bidi dabe nedebo usu ebaso da, te God agai dagego kanemede augwali wei ponaibao,” te po wai.
REV 6:12 Tama eno tonono ma bilibadi agai te buku dąų wali nai a naga olama me badu nogo deli wali te togwai, tama eno suali, tǫde genuai tǫ mali pedalai. Tama giliga ge begelama, te sisi yai gagawai. Tama te polua genuai ebadi te mama yai, te kaneme tiwai mu pedalai.
REV 6:13 Tama dagalude hǫ dabe tǫba tulaluyu, te ni kaya du te moni bomai wali asiyu sela sąyu tulalubo tiwai yai.
REV 6:14 Tama te dagalu me aga tomode buguluyu, te somo bebe pelama dąų wabo tiwai yai. Tama tigidali bulu du me, te tamu ąį tomode elalubo dwasianu tǫ tigidali me, augwali memenege elama tama bidali bulu taga soai, tama augwali gasa buluba kilasa pai.
REV 6:15 Tama te tǫde tuni bidi dabe dali, te genuai nogi yai bidi augwali me, te ami genuai bidi augwali me, te walu hauwa dali te masigi hauwa munalubo bidi badi, te bomo yai bidi augwali me, tama te tigidali bidi, te masigi sisąbo sę ebo bidi dabe me, te bugagia olo bidibo bidi dabe me, tigidali hodobo augwali te tǫ olua bede duala siyu ela bilai, tama te genuai bulu dude elalubo masigi dologoba teba duala sisa bilai.
REV 6:16 Tama augwaligo te bulu du dali masigi dabe sibolo i weyu te po wai, “Dagego da mesega sigulao, te genuai tuni bidi duabo naide dulalubo bidigo da suidali weyu, tama te kibu sipsip waigo sębę elalubo te aga gesabidide da duala saio, agai da suidali.
REV 6:17 Magi baso menio. Te genuai sogode te augwali sigo sębę elaluali te wei ponoyu dwai dene maiabo sogo dao, te megi pedalali dao. Tama niwai bidi aga doligulama te sę yainogo ebo aiyaba elaluaibawe? Te mu menio,” augwaligo te po wai.
REV 7:1 Te sę tigidali ela silai digi, te nosali eno suali, te Godigo ensel mobo bidi me si me si olama te tǫ sesege me si me si bogo badu dolalubo suali. Augwaligo te tǫ me si me si bogo badu te wali yabo te augwaligo dąų ola sai elaluali, tama te waligo tǫ me, tamu ąį me, te ni dabe me te waligo me degelebo usu egobeo.
REV 7:2 Tama eno suali, gasa ensel mobo bidi te giliga pedalobo badu ugaba holobo eno suai. Agai te bidibo ula elalubo God agai we bidi sa mubo nai tolalubo eno suali, tama agai te Godigo tǫ dali tamu ąį dali dolomainogo bomo mani te ensel mobo bidi me si me sibolo bomo elama i wali.
REV 7:3 Agai te po wai, “Dagego asesa polo te tǫ me, te tamu ąį me te ni dabe dolamuo,” te po wali. “Dago te dena Godigo sę ebo bidi dabe augwali deli deligo gebode te augwali sa mubo nai hasia muna muna paibao. Tama nosali duga te tigidali nai dabe dolagameo,” wali.
REV 7:4 Tama eno odali, te sa muabo we bidi augwali nedali. Augwali te we bidi nedali dąį te 144,000 nogi wabo namba te genuai mu dao, teba usu nigi pali. Te Israel we bidi hani deli delide meba sa muani.
REV 7:5 Tama tiyu, te bidi sese umabo hauwa mu te 12,000 te bidi Juda aga hanide augwaligo te sa muani nai sali, tama te bidi Ruben aga hani augwaligo me te bidi sese hauwa mu te 12,000 sali, tama te bidi Gat aga hani augwaligo me te tiwai naga te bidi sese hauwa mu 12,000 sali.
REV 7:6 Tama te bidi Asergo hani augwali me te bidi sese hauwa mu 12,000 sobadi, te bidi Naptali hani augwali me te bidi sese hauwa mu 12,000 siyu, te bidi Manase hani augwali me te bidi sese hauwa mu te 12,000 sali,
REV 7:7 te bidi Simeongo hani me te bidi sese umabo mu te 12,000 sai, me te bidi Livai hani me te bidi sese umabo mu 12,000 sobadi, te bidi Isakar aga hani me te bidi sese hauwa mu te 12,000 sali,
REV 7:8 te bidi Sebulun hanigo me te bidi sese umabo mu 12,000 siyu, te bidi Josepgo hani me te bidi sese hauwa mu te 12,000 sali, te bidi Benjamin hanigo me te tama bidi sese naga 12,000 sai dao. Te Israel hani dabe tama te ensel mobo bidigo augwali te Godigo sa muna muna pali.
REV 7:9 Tama te we bidi sa mubo sę tigidali ela silai digi, eno tonolo ma bilibadi, tama eno te we bidi hauwa augwali sisinama bidibo suali, tama umabo mu, te bidigo te we bidi augwali nedebo usu me egobeo. Te we bidi augwali te tigidali bidi hani dao, tama te tigidali bulu tǫde me, te tigidali haniani tigiwali yai me, tama te tigidali haniani po wabo bulu bidi dabe dao. Augwali te tuni bidi duabo nai te gesabidide dali te kibu sipsip wai gedude augwali dolaluali. Tama augwaligo te bobobage tedela yai ugwa munama, tama augwaligo nogode te kokonas yabe tolaluai.
REV 7:10 Tama augwaligo bomo elama i weyu tama wai, “Dago God aga te tuni bidi duabo naide dulalubao, tama te kibu sipsip wai me, augwali sigo te da ma dobola sabo sę yabo bomo mu elalubao, tama tialigo megi da bugagia bidibao.”
REV 7:11 Tama tigidali ensel mobo bidi augwaligo te genuai tuni bidi duabo nai dali, te polalubo tobolu bidi dabe dali te bidibo ula elalubo hasa me si me si tama bobegelaluyu augwali dolaluali. Tama augwali te tuni bidi dulalubo digi te badu basi gulama, tama gesabi tǫba munama, augwaligo te Godibolo aga nogi ugwaba sabo lotu po wali.
REV 7:12 Tama augwaligo te po wai, “Mu tama dao. Dago dena God dali wiegi yai homu mu eyu, tama dago agai genuai ula yai bomo po hania pusao. Agai wiegi yai homu kolesaga tigidali elalubao, tama dago aga dali nage usu da weyu, tama agai nogi ugwaba sao. Te bomo tigidali agai naga dao, tama te tigidali nai tonalubo bomo me, tama e nedali wiegi yai kolesaga tigidali augwali agade naga elalubo dao, sesemane sogo te bidada peyu, bidada paibao. Te mu tama dao,” augwaligo te po wai.
REV 7:13 Tama polalubo tobolu bidi me deligo te po ena dali wai, “Te bobobage tedela yai ugwa muani we bidi dabe, te augwali de dawe? Tama augwali menadu asaliwe?”
REV 7:14 Tama eno agabolo te po wei ponai, “Genuai bidi, naga digi nago koneai.” Tama agai enabolo te po wai, “Te we bidi dabe augwali te boi bidigo nogode genuai sęgę dali te dene dali sali we bidi dabe dao. Tama augwaligo te sęgę bugagia tolaluama, tama te sęgę tolalubo sogo silalio. Tama augwaligo augwa ugwa te kibu sipsip wai kanemego ąį telawai, tama augwaligo ugwa te tedela yai dao.
REV 7:15 Tama tibaso, augwali te Godigo tuni bidi duabo nai te gesabidide dolalubo bage dao. Tama siade me hulide me augwali te Godigo wiegi yai lotu be tempel tede bidiyu, agabolo lotu po wabo dao. Tama aga te genuai tuni bidi dulalubo naide dulalubo bidi aga digi augwali dali bidiyu, tama augwali paliyu, tama augwali bugagia tonaluaibao.
REV 7:16 Tama tiyu, augwali nasi munu me esiąyu, tama augwali ąį nogone munu me ma egobeo. Tama augwali giliga posolo esiąyu, tama magi nai mego augwali tigi posolo me iligobeo.
REV 7:17 Magi baso meni, te genuai tuni bidi duabo nai gesabide bidibo kibu sipsip wai, te aga digi agai augwali tonalubo bidi bidaibao, te kibu sipsip tonalubo bidi agai aga sipsip dabe tonalubo gilama tiwaibao. Tama agai augwali te ąį ulu pedalobo digi odasa pelama, tama augwaligo te bidabo ula yabo ąį saibao. Tama Godigo augwaligo gedude gela wali gedu ąį hola sabaso, tama augwali gela ma wagobeo,” te polalubo tobolu bidigo enabolo te po wai.
REV 8:1 Te kibu sipsip wai agai te buku dąų wali nai me badu nogo si te me deli togwa sąwai, tama tibo si dagalude kili kili me wasiąyu, tama me po me wabe, tama hauwa sogo bidibo ąǫ yali, te sesabinu gana bidalio, te hap aua tama dao.
REV 8:2 Tama te dwasianu sagia sai elalu bidali sogo silama, tama nosali eno te God gesabidide dolalubo ensel mobo bidi a naga olama me badu nogo si eno suali, tama augwaligo te ona tiwai nai a naga olama me badu nogo si selama tolaluai.
REV 8:3 Tama gasa ensel mobo bidi me te Godibolo nai ulubo sae yali pąba dolagasai. Tama agai te denami ilabo nai te kapa golgo nigai pou tolaluai. Tama augwaligo agabolo te denami ebo nai pauda hauwa mani, te agai te nai te Godigo we bidi tigidaligo wali gedu haluasa po dali manama, tama te si te golgo nigai saede te siago ulumainogo tiaibao. Te sae te genuai tuni bidi duabo nai gesabidide elalubo, tama te denami ebo pauda dali te gedu haluasa po dali agai te duabo naide dulalubo bidibolo olo mawaibao.
REV 8:4 Tama te pauda hano ebo denami ebo me, tama te Godigo we bidi augwaligo gedu haluasa po wabo te me, te tigidali te ensel mobo bidigo nogode tolaluali tagaliyu, tama God gesabidiba naga ugwaba te denami ebo hano holai.
REV 8:5 Tama tilama, te ensel mobo bidi agai te denami yai nai muani pou selama, tama agai te nai ulali saide sia dage te poude pągąnama, tama agai te sia tǫba aiya sąwai. Agai te sia sąwai digi, tama te dagalude be kulu kulu weyu, genuai po me weyu, tama dagalude be sele eyu, tama tǫ mali yai.
REV 8:6 Tama te sogo te ensel mobo bidi a naga olama me badu si augwaligo te ona tiwai nai a naga olama me badu nogo si tolaluali, augwaligo te ona tiwai nai elainogo sisi elaluai.
REV 8:7 Tama te hasia wali ensel mobo bidi me deli aga te ona tiwai nai elali, tama te talua ge tulubage me, te sia dali, te si te kaneme dali gelama, tama e tǫba tulaluai. Augwaligo te tǫ me tigidali ni dabe dali te sela tama usu siyu dąį ilali, tama siago te tǫ me habu badu deyu, te ni me badu habu badu deyu yali. Tama te ni yabe tiwai nosai dabe tigidali, te me te siago dai.
REV 8:8 Tama te hasia wali enselgo aga sę silama, tama te si wali ensel mobo bidi aga te ona tiwai nai elali, tama tialima, augwaligo magi nai me deli sąyu tama te genuai bulu du me siago dabo tiwai eyu, tama te nai tamu ąįba tulaluali. Tama augwaligo tamu ąį usu siyu dąį mubo te sela nigilali, tama me habu badu begelama te kaneme pedalali.
REV 8:9 Tama augwaligo te tamu ąįde bidibo ula elalubo nai tigidali tomode bugulama, tama te nai hani sela me tali muani, tama te nai hani me deli te sia dabo genuai bulu dugo isilali. Tama augwaligo te tamu ąįde elalubo sip, te moni geba dabe, te sip me bugulama tama tiyu, te hani sela tedali muani, tama te sip hani me deli dolai.
REV 8:10 Tama te tudi badu te sela wali ensel mobo bidi aga te ona tiwai nai elali, tama te badi, te genuai hǫ me deli te sole ula ebo tiwai mu yali, te sole ula ebo hǫ dagalu tagalama e tǫba tulaluai. Augwaligo te tigidali pabo ąį aga hani sela tedali bugulali, tama hǫ te ąį hani me deliba tulaluali, tama te tigidali ąį ulu asobo digi me te sia bogoli tulaluali.
REV 8:11 Tama te tulaluali hǫ nogi te Ha Ebo Marasin da wai. Tama augwaligo te ąįgo hani sela muani, tama te ąį hani me delide te ha ebo marasin pedalai. Tama bidi hauwa augwaligo te ha ebo marasin ąį tuali, tama te marasingo augwali elama tama augwali isali.
REV 8:12 Tama te sę silama, tama te me si me si wali ensel mobo bidi aga te ona tiwai nai elali, tama tebadi, tama augwaligo te giliga me, poluade me, te tigidali hǫde me augwaligo tomode dąį sela muani. Tama te giliga ge me badu dolali, te polua me tama tiyu, te tigidali hǫ me te me badu dolali. Tama tibaso, augwaligo ula ebo sogode te ula bugagia ebeo. Ulade te me badu pedaigo te giliga gego ula bugagia ebeo. Tama hulide me te polua dali, hǫ dabe dali, augwaligo me badu ula ebo pedai te bugagia ula ebeo.
REV 8:13 Tama eno suali, te ba kemodage tiwai ba me deli dagalu tomodu sigide bola pabo eno suali. Tama eno odali, agai i bomonama weyu te po wali, “Hobede, hobedeo, te tǫde bidibo we bidi hobedagia bidaibao. Te gasa ensel mobo bidi me sela augwaligo te ona tiwai nai elebo si, tebode te genuai dwai dwai sęgę te tǫde we bidi augwaliba pedalaibao,” te bago te po wai.
REV 9:1 Tama te nogo a wali ensel mobo bidigo te aga ona tiwai nai elali, tama tebode eno suali te hǫ me deligo te dagalu tagalama, e tǫba tulalubo suai. Tama augwaligo agabolo te tǫ dedage aba mu yai te aga page meni yai, te ki mawai.
REV 9:2 Tama agai te tǫ dedage dabode, tama te dedagedu te genuai sia hano tiwai pedalai. Tama te tǫ dedagede pedalali moni hano agai te giliga de te dagalu si te haluai, tama augwali si te hulia sai.
REV 9:3 Tama te kuli mano tiwai nai dabe umabo augwali te hano ebo tagaliyu, tama augwali e tǫba dulai. Tama augwaligo bomo te nai hwą, te bidi gąų kelebo nai hwągo bomo tiwai sali.
REV 9:4 Tama augwaligo te kuli mano nai dabebolo te po wai, “Dagego te noswai dabe me, te ni me deli me, te tǫde pedalobo haniani nai dabe me, te nai dabe tigidali dologio. Dagego te bidi dabe augwaligo gebode te Godigo sa muani nai musiąwai bidi augwalibolo naga dene mao.
REV 9:5 Dagego te tiwai bidi dabe augwalibolo dene mayu, tama polua a naga silibo si te dene mabo tagalao. Tiali goli dene mobadi dagego augwali ela mugio,” te po wai. Tama te kuli mano nai dabe augwaligo te bidi dabe augwalibolo dwai dene mabo, te nai nogi hwą agai te bidi gąų keleyu dene mabo tiwai ebo dao.
REV 9:6 Te tama tebo sogo, polua a naga sogo, te bidi dabe augwali te isabo tų gegebo sę ebadi, tiali goli augwaligo sugobeo. Awe, te augwaligo homugo te isabo homu godolo yai, tiali goli te isibo augwali suyu wi paibao.
REV 9:7 Tama eno suali, te kuli mano augwaligo hwįainogo sisi elalubo te hwįbo bidigo duabo kibu hosgo ebo tiwai gilama tigi palibo nai elaluali. Augwaligo tobolude te kapa nogi gol tego nigai wiegi yai madi tiwai nai elaluai, te tuni bidigo tobolu madi tiwai. Tama augwaligo gesabidi te bidi gesabidi tiwai dao.
REV 9:8 Tama augwaligo tobolu nisi bobobage, te we dabego tobolu nisi tiwai. Tama augwaligo kele te moni hudigi ebo kibu laiongo nai gąų kelebo genuai kele tiwai elaluai.
REV 9:9 Tama augwaligo hagawiade te kapago nigai holobo ugwa muai elaluai, tama augwaligo bogo te saba saba ebogo u wabo te hwįbo bidi duabo nai te kibu hosgo kegasa peyu udabo tiwai eyu te nai kidagalo wabo tiwai ebo dao.
REV 9:10 Augwaligo danu te nai hwągo danu tiwai elalubo, te danude te bidibolo dwai dene mabo marasin te elalubao. Tama augwaligo danu dabego bomogo te bidi dabe dolobo sę elaluyu, tama te polua a nagade te sę ela bilibo.
REV 9:11 Tama augwa te sę ebo tuni bidi me deli aga te tobolu bidi bidai. Te tuni bidi aga te tǫ dedage aiyanu mu yai digi te tǫ page meni yai digi tonalubo ensel mobo bidi dao. Tama augwaligo Hibru pogo te ensel mobo bidi nogi Abadon wai. Tama te Grik pogo te bidi nogi augwaligo te Apolyon wai. Te Grik po nogi begelama tama dago pogo te bidi nogi augwaligo te Tigidali Nai Dolobo Bidi da wabo.
REV 9:12 Tama te hasia yali genuai sęgę da, te silai dao. Odao. Sęgę si digi te me elalubao, tama te nosali pedalaibao.
REV 9:13 Tama te a olama me badu nogo deli wali te ensel mobo bidi agai te aga ona tiwai nai elali, tama eno po me wabo odali. Te Godigo gesabidide te kapa golgo nigai sai elalubo, te Godibolo maiabo nai ulubo sai dao. Tama te saide elalubo gąų yai nai me si me si tomodu te po me wabo eno odali.
REV 9:14 Agai te a olama me badu nogo deli wali te ensel mobo bidi dali te po wali, “Te ensel mobo bidi me si me si olama augwali te genuai pabo ąį nogi Yufretisde kalabus elalubo da wali, tama nago augwali olo tagala palao,” te po wai.
REV 9:15 Te po obaso, agai te ensel bidi me si me si augwali tagala palali. Tama te ensel mobo bidi me si me si augwali sisi elama, te we bidi ela mubo sę ebo sogo tonaluali. Te sę ebo bodolu mani kibu be me, te bodolu mani polua me, te bodolu mani sogo me, te we bidi ela mubo bodolu mani aua me augwali tonaluyu bidaluali. Tama te bodolu mani aua asama, tama agai augwali tagala palama, tama augwaligo te we bidi hani tigidali dąį sela muani, tama me hani deli ela muai.
REV 9:16 Tama te kibu hosde duawali ami bidi dabe hauwa mu, te bidi sese hauwa mu da wali, te 200 milion. Te tama nogi ebo eno odai.
REV 9:17 Tama eno te na ebo tiwai eyu, tama te kibu hos dabe me te hosde duawali bidi dabe augwali suali, tama augwali e tama bidibo eno suali. Bidi dabe augwaligo te kapago nigai hagawia polibo nai muai, te holobo ugwa tiwai muai, tama te muani nai meba mama yai, te sia bogoli tiwai mama yai, me sisi yai, me sewa yai, te masigi nogi salfa te tiwai sewa yai. Tama te kibu hos dabe augwaligo tobolu te moni hudigi ebo kibu laiongo tobolu tiwai yai. Tama sia me, hano me, te dwai kugumini ebo masigi salfa te sewa yai masigi te sia deyu augwaligo pedauwalidu te hamena tiwai sia deyu, tama te sia bogoli buluba pedalai.
REV 9:18 Augwaligo tigidali we bidi hani dąį sela ilali, tama augwaligo te we bidi hani me deli te dwai nai selago augwali ela muani. Te sia badi, me hano, me te masigi salfa sia deyu, te tama nai sela te kibu hos dabe pedauwalidu pedalama, te we bidi hani deli ela muani.
REV 9:19 Magi baso meni. Te hos dabe augwaligo te we bidi ela muabo bomo te augwa pedauwalide me te augwa danude me elalubo dao. Tama augwaligo danu te hasamani dabego danu tiwai, tama tobolu me elaluai. Tama bidi augwaligo te naigo dolobo dao.
REV 9:20 Tama tigidali gasa bidi dabe augwali te dwai nai selago ebo sęde isisąwai bage, augwali homu begelesiąma tama augwa nogogo nigali nai tagalama tudiba musiąyu me bidaluali. Tama tiyu augwaligo te dwai haubo noma bidi dabebolo lotu po wabo tagalobe. Augwaligo te tibo god dabe te kapa golgo dali silva dali te bras me, te masigi me, te nigo me, tama naigo nigai tibo god dabebolo augwaligo lotu po wabo tagalobeo. Te nogogo nigali tibo god augwaligo gedugo sugobeo, ma ologo odogobeo, ma biligobeo. Tiali goli augwalibolo te bidi dabego lotu po weyu bidaluali.
REV 9:21 Te bidi dabe augwaligo bidi meba ela muyu, tama bidi dolobo pobi wabo sę eyu, tama augwaligo penani ebo kolesaga wali peyu, tama nai wi sesa bilibo sę eyu bidaluali. Tama tiyu, augwali homu begelama, te dwai kolesaga ebo augwaligo tudiba me mubeo.
REV 10:1 Te eno suali, gasa bomo mu yai ensel mobo bidi dagaludu e tǫba dulubo eno suali. Aga tigi te dagalu pǫgo halua sai, te gudubo ugwa tiwai. Tama agai tobolude unigi bidi elaluai. Agai gesabidi te giliga ge ula ebo tiwai yai, tama agai sągą te ni tigide tigidali sia dabo tiwai yai.
REV 10:2 Tama agai nogode dwasianu buku tolaluai, tama te buku dagawai elaluai. Tama aga dolo sągą te tamu ąį daide muai elaluali, tama aga pobase sągą te tǫ daiba ugwadu munama elaluai.
REV 10:3 Tama agai i bomonama weyu, te bulude bidibo moni hudigi ebo kibu nogi laiongo gaa moni bage wabo tiwai yai. Agai te i wabode, tama a naga olama me badu nogo si te dagalu pǫ kulu weyu wei ponai.
REV 10:4 Tama te a naga olama me badu nogo si be kulu po wai digi, tama te po eno asęainogo yai. Tiali goli dagaludu po me deli asiyu wali po eno odali, “Te a naga olama me badu nogo si te be kulu weyu wali po, te po naga homude dąų elaluama, tama tede dualali po elalumainao. Nago te po asęgio,” te po wai.
REV 10:5 Tama te ensel mobo bidi tamadi eno te tamu ąį de tǫ si tede dolalubo suali, agai dolo nogo dagaluba ugwaba muai, agai wabo po dąų omainogo,
REV 10:6 tama agai Godigo nogi weyu, te eno mu po naga obao homu eyu agai po wai. Te God aga sesemane sogo bidada peyu, bidada pabo bidi agai te dagalu dali tede elalubo nai nigali, te tǫ dali tigidali e tǫde elalubo nai nigai, tama tamu ąį me te tigidali tede elalubo nai me nigali bidi dao. Tama te ensel mobo bidigo aga nogo ugwaba munama, tama Godigo nogi weyu tama agai te po wai, “Megi me gesege iligobeo.
REV 10:7 Menio. Tama nosali te nogo a naga olama me badu nogo si wali te ensel mobo bidi me deligo agai te ona tiwai nai elebadi, te sogo te Godigo homude polobadu dualali nosali yabo sę te hania pedalama, tama agai te sę yaibao. Polobadu agai aga sę ebo bidi augwalibolo te aga nosali yabo sę po pusali, tama augwaligo koneani, te sę hania pedalaibao,” te ensel mobo bidigo te po wai.
REV 10:8 Tama te eno polobadu dagaludu po me deli asiyu wali po odali tiwai, agai enabolo te po ma wali, “Te dagawai elaluali buku te tamu ąįde me te tǫde dali me te dolalubo ensel mobo bidigo nogode tolalubo buku nage pelama sigi pao,” te po wali.
REV 10:9 Te po obaso, ena te ensel bidi pageba pelama, tama eno agabolo te po wali, “Nago te dwasianu buku ena mao.” Tama agai enabolo te po weyu “Nago te buku selama tuao,” wali. “Te nago haligade ha yaibao. Tiali goli nago pedauwalide te mege ąį pusu ebo tiwai yaibao,” te po wali.
REV 10:10 Agai te po wai digi, tama eno te dwasianu buku te ensel mobo bidigo nogode selama, tama eno tuai. Tama eno pedauwalide te mege ąį pusu tiwai yai. Tama eno tuai digi te eno haligade ha yai.
REV 10:11 Tama agai enabolo te po wai, “Nago te Godigo yabo sę po ma pusao. Te po te hauwa bulu tǫde bidibo hanide me, te haniani tigiwali yai me, te haniani po wabo bulu bidi dabe me, tama te tǫde tuni bidi hauwade me, augwali tigidalide nago te nosali pedalabo sę po pusao,” agai enabolo te po wai.
REV 11:1 Te ensel mobo bidigo enabolo te usu ni sabo nai mani, te bilibo dono tiwai nai, tama agai enabolo te po wali, “Nage hodaloama, te usu sabo nigo te Godigo Moni Lotu Be tempel dali, tomode elalubo te Godibolo maiabo ofa nai ulubo sai dali te si usu sao. Tama nago te lotu be tomode bidiyu agabolo lotu po wabo we bidi augwali nedao.
REV 11:2 Tiali goli te lotu be bulu badu, te we bidi bilibo madi, te nago tagalao, tede nago usu nigo usu sigio. Te madi te Godigo po wali pisąwani we bidigo nogoba mawai dao, tama augwaligo te Tedali Wiegi Yai Hanu sągągo agayu, tama polua bidi sese si olama me si tama yaibao,” te po wai.
REV 11:3 Tama Godigo enabolo te po wai, “Eno po pusabo te bidi si tagala palaibao. Tama te bidi sigo gudubo ugwa te beg nigali nami ugwa tama gudulama, tama eno po augwali sigo pususu pidubadi te polua bidi sese si olama me badu nogo si te 42 polua bideibao, te tama polua dabede bidada pali sogo nedali usu nama te bidi sese hauwa mu wabo nogi te 1,260 ulade bidibo tiwai si tama bideibao,” te po wai dao.
REV 11:4 Te bidi si augwali te oliv ni si tiwai, te sole si tiwai me, te tigidali tǫ tonalubo Genuai Bidigo gesabidide dolalubo nai si dao.
REV 11:5 Tama bidi mebago augwali si dali dwai dene mabo sę ebo homu eyu da, augwali sigo pedauwalide te sia bogoli pedaliyu, tama te boi ebo bidi te siago dolaibao. Awe, bidigo dwai sę augwali si dali eyu da, te kolesagade naga te aga isaibao.
REV 11:6 Tama te bidi sigo te dagalu dąų walobo bomo elalubao. Tama te dagalu dąų olama, tama augwali sigo Godigo po pusubadi te tulubage tulugobeo. Tama augwali sigo bomogo te tigidali wę begelama kaneme pedalabo bomo elalubo. Tama te haniani dwai naigo te tǫde we bidi dolabo bomo me elalubao. Tigidali sogo augwali sigo homugo tama tiainogo eyu da, teda te augwali sigo te sę ebo usu yaibao.
REV 11:7 Te bidi sigo te Godigo po pusubo silibo si, tama te dwai hudigi ebo hasa te tǫ dedage page meni yai digi bidali tagaliyu, tama aga buluba eda holaibao. Tama holama tama agai te bidi si dali hwįaibao. Agai te bidi sigo bomo aiyaba elaluyu, tama te bidi si ela mueibao.
REV 11:8 Tama ela munama, tama te bidi sigo tigi te genuai hanu tomode te genuai po mibo pesagede olo munalueibao, te hanude polobadu augwali sigo Genuai Bidi te we bidigo ni pedaide dagana selama isali. Te genuai hanu nogi po digi pogo begelama tama nogi Sodom wabo, me nogi Isip wabo dao, te po digi pode.
REV 11:9 Tama bidi meba tigidali haniani tigi yai me, te tigidali tǫde, te haniani po wabo me, te tigidali bidi hani, augwaligo te bidi si tigi te sela sogo bidilama me sogo te giligade deli tama sogo te bidi si tigi te po mibo pesagede munalubo sueibao. Tama bidi meba augwaligo “Te bidi si pubulumainao,” te po waibao. Tiali goli gasa bidi dabego “Menio, tagalao,” waibao.
REV 11:10 Tama tǫde we bidi augwaligo te bidi si isalide augwali wiegi yai homu yaibao, tama augwali tęąbi eyu, nai tuyu, tama wiegi yai nai dabe dobu si yaibao. Magi baso meni. Te Godigo po pusali bidi sigo te tǫde bidibo we bidi tigidali dwai dene mawai dao.
REV 11:11 Tama te sela sogo olama me deli sogo te giligade tama sogo silama, tama Godigo pedauwalidu mobo augwali sigo tigi tomoba ponai. Tama mobo ponama, tama te bidi si hodaloama doligulai. Tama te bidi si suali we bidi tigidali augwali wi mu yai.
REV 11:12 Tama augwali sigo dagaludu po me wabo odali te po weyu, augwali si bomonama i wali, “Dage si eba eda holao,” wali. Tama te bidi si te pǫ me tomodu dagaluba holali, tama te boi bidi dabe augwaligo te bidi si pabo suai.
REV 11:13 Tama te sogo naga, genuai tǫ mali eyu, tama te moni hanu me badu dolali, tama a naga olama me si me si habu badu naga elaluai. Tama we bidi hauwa mu te bidi sese umabo te 7,000 bidi dabe te te mali yali digi isai. Tama te isisąwai we bidi augwali wi mu eyu, tama augwaligo te dagalude bidibo God nogi ugwaba sai.
REV 11:14 Te genuai sęgę si wali te silali. Odao. Te dwasianu sogo digi te sela wali sęgę pedalaibao.
REV 11:15 Te nogo a naga olama me badu nogo si wali te ensel bidi me deli agai te ona tiwai nai elali, tama tebadi, dagalude ensel mobo bidi meba augwaligo i bomonama weyu te po wali, “Dago Genuai Bidi God dali, te Godigo sa muani te we bidi tau somainogo tagala palali bidi Krais dali, augwali sigo te tigidali tǫde we bidi tonalubo bomo megi selama tama elalubao. Tama aga sesemane sogo te tuni bidi bidada peyu, bidada paibao,” te po wai.
REV 11:16 Tama te bidi sese olama nogo me si me si polalubo tobolu bidi augwali te God gedude te duabo naide dulaluyu, tama augwali basi gulama tama gesabidi tǫba munama Godibolo lotu po wali.
REV 11:17 Tama aga nogi ugwaba siyu tama augwaligo te po wali, “Genuai Bidi, nage God te Tigidali Bomo Elalubo bidi dao. Nage megi bidibo, tama polobadu mu nage bidai. Nago genuai bomo naga selama, tama nage te we bidi tonalubo sę ebo gagalai dao. Tama tibaso, dago homu nagebolo munama, usu da po obao.
REV 11:18 Tama nago po konesiąbo haniani tǫde bidibo bage augwali sębę mu yai. Tiali goli megi nago sębę yabo sogo te pedelalio. Tama megi te isali we bidi augwali te po tų eboba pedalobo sogo dao. Tama megi e sogo naga sę ebo bidi dabe, te nago nosali yabo sę po pusali bidi, augwalibolo te wiegi yai nai mabo sogo pedalai dao. Tama nago we bidi tigidali, te nogi yai bidi me, te nogi meni yai bidi, tigidali nagede wi eyu nago bomo dologode bidibo we bidi, te megi da te nago augwalibolo me te wiegi yai nai mabo sogo pedalai dao,” augwaligo te po wai.
REV 11:19 Augwaligo po ola silama, tama augwaligo te Godigo dagalude elalubo Moni Lotu Be tempel te be tų dawai. Tama polobadu Godigo te Israel we bidi dali po dąų olama, tama augwaligo te asęani po te halobage me deli tomoba muani. Tama te halobage te Lotu Be tomode munalubo eno hania suali. Tama te sogo tama te be sele eyu, tama moni u wabo me, te be kulu wali me, tama tǫ mali ebadi, te kedau ebo nai talua ge tulubage hauwa te dagaludu tǫba tulaluai.
REV 12:1 Te sogo te dabolo Godigo bomo ola mabo genuai sę me deli te dagalude pedalai, te we bidi noma sabo sę. E tiwai. We me deli bidai, tama agai tigigo te giliga te ugwa tiwai elama sesela sai. Tama polua agai sągą dologode elaluali. Tama hǫ nogo si olama sągą badu si te agai madi tiwai tobolude munama elaluai.
REV 12:2 Tama aga wai haliga elaluali, tama te wai ame nabo dene agaba pedalai. Tama te dwai dene mu eyu, tama agai i bomonama weyu te wai ame nainogo yai.
REV 12:3 Te gasa genuai sę me dagalude pedalali, te we bidi noma sabo sę. Te sę yali e tiwai. Genuai hasamani me deli bidai. Te mama yai tama, aga tobolu te a olama me badu nogo si, tama nogo si gąų elaluai. Tama a naga olama me badu nogo si te tuni bidigo madi aga tobolude muani elaluai, te tobolu deli delide elaluai.
REV 12:4 Tama agai danugo te hǫgo hani deli dagaludu te pobele bage tiwai tǫba aiya poala sąwai. Tama hǫ hani si digi te dagalude me elaluali. Tama te hasamani te wego gesabidide te wai ame nainogo ebadi dolaluali, tama agai tonaluali te wego te wai ame nabode, te wai agai tuainogo yai.
REV 12:5 Tama wego wai ogwa ame nai. Te waigo nosali te ain dono tulama tigidali we bidi hani tonalueibao. Tiali goli te wai ame nenama digi, tama polo mu augwaligo te wai te God pageba me, te ugwaba sela holali, te aga tuni bidi bidiyu dulalubo nai sia sai teba sela pai.
REV 12:6 Tama te we aga te bidi meni yai buluba wi pai. Tede Godigo aga bidabo bulu sisi ilali, tama augwaligo te we aga bugagia tonaluyu, tama nai mayu tede hauwa sogo te 1,260 te sogo usu nama mu bideibao.
REV 12:7 Tama te sogo dagalude genuai wąbi hwįai. Tama te ensel mobo bidi dabego augwa polalubo bidi te Maikel aga dali, te aga tonalubo ensel bidi dabe dali, augwaligo te genuai hasamani dali hwįai. Tama te hasamani aga dwai ensel mobo bidi dabe dali augwaligo te wąbi wei augwali dali ponainogo yai.
REV 12:8 Tiali goli te hasamanigo bomo elama te wąbi hwįabo bomo usu menio. Tama tibaso, te hasamani dali, aga dwai ensel bidi dabe dali, augwali dagalude ma bidainogo ebo usu egobeo.
REV 12:9 Tama Godigo ensel mobo bidi augwaligo te genuai hasamani e tǫba sąwai dao. Te hasamani aga te polobadu digi bidai, tama augwaligo te hasamani aga nogi “Te Bidigo Tigidali Bidi Kisiliyu Po Tų Ela Mabo Dao,” gasa nogi me Satan poai. Agai tigidali tǫde we bidi ili po ola mabo bidi dao. Augwaligo aga e tǫba tula palai, tama augwaligo aga dwai ensel mobo bidi dabe dali hodobo e tǫba tula palai dao.
REV 12:10 Tama dagalude i me deli bomon bomonama ma wabo eno odali, “Megi da, dago God agai we bidi ma dobola sabo kolesaga mu hania pedalai dao. Megi me agai tigidali we bidi tonalubo bomo hania pedalai, tama aga tuni bidi bidibo dao. Tama megi me agai sa muyu asaibao wali bidi Krais agai bomo dali, genuai nogi dali si hania waselai dao. Magi baso meni. Dwai bidi me deli agai dago ama dede augwali dali kisiliyu po tų ilai, agai augwali te dago God aga gedude te po tų siade me hulide yali. Tiali goli megi te dwagi yai ensel mobo bidi augwaligo aga te dagaludu a tǫba sąwai dao.
REV 12:11 Tama te kibu sipsip wai aga isiyu aga kaneme gelebaso, tama dago ama dede augwaligo te dwai bidigo bomo aiyaba elaluai dao. Tama me augwaligo Godigo po gasa we bidibolo pusali, tama augwaligo te kolesaga yaligo me augwaligo te dwai bidigo bomo aiyaba elaluai dao. Tama te kolesaga ebadi augwaligo te homu yali, ‘Te Godigo po odobo hagela ebo bage augwaligo da eleyu da, teda te usu da, da wi egobeo,’ te homu yali. Tama te homu eyu, augwaligo augwali e tǫde bugagia bidabo te homu ebeo.
REV 12:12 Tama tibaso, dagalu, nage tama dage tigidali dagalude bidibo bage, dage homu wiegi yai yagameo. Tiali goli tǫ dali, te tamu ąį dali, te side bidibo we bidi tigidali, dage hobedagia bidaibao. Genuai sęgę dageba pedalainogo ebao. Tama Satan dagebolo e tǫba dulai dao, tama agai sębę genuai mu elalubao. Agai koneani, aga bidabo sogo te pęwadage sogo elalubo homu ebo dao,” te po wabo dagaludu asobo eno odali.
REV 12:13 Te genuai dwai hasamani agai suali, augwaligo aga e tǫba aba aiya sąwani, tama agai te wai ame nani we pobeai.
REV 12:14 Tiali goli augwaligo te webolo te genuai ba kemodage bogo si mawai, tama te we aga te bidi meni yai buluba bola pabo usu yali, tama aga te genuai dwai hasamani wi ebaso, aga digibulu bidigi pabo usu dao. Tama augwaligo aga bugagia tonaluyu nai mayu yai, tama tede bidibadi kibu be sela olama, polua nogo a naga olama me badu nogo deli bidaibao.
REV 12:15 Tama te we dolainogo eyu te hasamanigo pedauwalide ąį bugulai. Te bugulali ąį te pabo genuai ąį tiwai, tama te ąį peyu te we wali pobasa pai. Te hasamanigo homugo te ąįgo te we selama hagamainogo yai.
REV 12:16 Tiali goli e tǫgo te we tau sali. Te tǫ peda peyu, te bidigo gani tiwai dalama, tama te ąį te tǫ dedageba pai, te hasamanigo pedauwalidu bugulali ąį.
REV 12:17 Tama tibaso, te genuai hasamani agai te we dali sębę mu yali, tama aga pelama, te wego gasa wai dabe dali wąbi hwįainogo pai. Te we bidi augwaligo te Godigo bomo yai po tigidali wali peyu, tama augwaligo Jisasgo po pusuyu tama agade homu kęą pai we bidi mu bidibo dao.
REV 12:18 Tama te hasamani te tamu ąį sesege badu dolalubo dao.
REV 13:1 Te genuai dwai hudigi ebo hasa me deli te tamu ąįdu pedalobo eno suali. Tama te hasago tobolu te a naga me si elaluali, tama agai tobolude te gąų nogo si pedelai elaluali. Te agai gąųde te tuni bidigo mubo te tiwai wiegi yai madi te nogo si elaluali, tama agai tobolu deli delide asęani dwai nogi elaluai. Tama te nogi deli deli page e tama tiwai: te God dali haniani dwai posobo po wali te tobage nogi po asęai elaluai.
REV 13:2 Te dwai dwai kolesaga eyu te hudigi ebo hasa megi eno suali, te moni hasa nogi lepat tiwai, tama te hasago sągą te gasa moni hudigi ebo hasa nogi bea, te beago sągą tiwai, tama te hasa agai penani te moni hasa lainogo penani tiwai yai. Tama te genuai dwai hasamanigo aga bomo te dwai hudigi ebo hasabolo mawai. Agai te dwai hasa aga tuni bidi aga tiwai nigilama bidali, tama agai we bidi tonalubo genuai bomo me te dwai hudigi ebo hasabolo mawai.
REV 13:3 Tama augwaligo te hudigi ebo hasago tobolu me delide elama isali tiwai eno suali ąǫ yai. Tiali goli te tobolude keni pedela selama, tama usu ma yai. Tama tigidali tǫde bidibo we bidi augwaligo te sę te dwai hudigi ebo hasade pedalobo sulama, tama augwali noma genuai siyu, tama augwali aga wali pai.
REV 13:4 Te genuai dwai hasamanigo agai bomo te dwai hudigi ebo hasabolo mobaso, te we bidi tigidali augwaligo te hasamanibolo aga nogi ugwaba sabo po wai. Tama augwaligo te dwai hudigi ebo hasabolo me aga nogi ugwaba sabo po weyu, augwaligo te po wai, “Niwai bidi aga te dwai hudigi ebo hasa tiwai dawe? Niwai bidigo aga dali hwįbo usu egowe? Bidi menio,” augwaligo te po wai.
REV 13:5 Tama Godigo te dwai hudigi ebo hasa sula tagalali, tama agai dwai dwai po ola biliyu, God dali posobo po weyu, “Ena, ena digi ena God dao,” te tobage dwai po weyu bidai. Tama tiyu, agai te dwai kolesaga eyu, te we bidi tonalubo sę yabo bomo te polua bidi sese si olama me si, te 42 polua tama te usu nama elaluai.
REV 13:6 Tama agai pedauwalidu dwai dwai po weyu, God dali posobo po wabo gagalali. Agai Godigo nogide posobo po weyu, tama Godigo bulu dali me te po wali, tama te Godigo hani dagalude bidibo hani augwali dali me te dwai posobo po wai.
REV 13:7 Tama Godigo aga sula tagaliyu ebaso, tama agai te Godigo we bidi dali wąbi hwįyu, tama augwali bomo aiyaba elaluai. Tama tiyu, aga te tigidali bidi hani tuni bidi bidainogo eyu, te tigidali tǫde me, te tigidali po wabo me, te tigidali haniani tigi yai bidi dabego tuni bidi aga bidainogo Godigo aga tama osogo sula tagalali.
REV 13:8 Tama te we bidigo polobadu ela muani kibu sipsip wai agai te genuai buku elaluyu bidibo dao. Tama te bukude agai te agade konealubo po dąų wali we bidi augwaligo nogi agai asęai dao, te polobadu mu, te Godigo te tǫ nigisiąbadi, tama augwali isisąma gamonaibao. Tiali goli te bukude nogi asęsąwai we bidi, augwali tigidali augwaligo te moni hasa lepat tiwai yai dwai hudigi ebo hasa aga nogi ugwaba siyu, tama agabolo lotu po waibao.
REV 13:9 Olo elalubo bidi, agai e po bugagia odao.
REV 13:10 Niwai bidi me deli te boi bidigo aga nogo dunama tama aga kalabusiba muabo sa muani bidi, te aga te kalabusiba pomainao. Niwai bidi me deli aga te poa pai gaia gego elabo sa muani bidi, te bidi augwaligo te ge hwągo mu ela mueibao. Te tiwai kolesaga augwalibolo pedalobaso da, teda te Godigo we bidi augwaligo Godide augwa homu bugagia kęą pai we bidi bidiyu, tama augwaligo te sęgę bugagia tolao.
REV 13:11 Tama eno te gasa dwai hudigi ebo hasa me te tǫdu eda buluba holobo suai. Te genuai hasago gąų si aga tobolude elaluai te kibu sipsipgo gąų tiwai, tama agai po wabo te genuai dwai hasamanigo po wabo tiwai po wai.
REV 13:12 Te nosali pedalali genuai dwai hudigi ebo hasa agai te hasia te dwai hudigi ebo hasago sę yabo bomo tigidali sai, tama agai sę te bomogo te hasia hudigi ebo hasago gesabide te sę yai. Agai te mani bomogo te tǫde we bidi tigidali augwaligo te hasia hudigi ebo hasabolo aga nogi ugwaba sabo po wabo sę ilali, te hasia hasa polobadu gasa bidigo aga te ela muainogo yali dwai keni te pedala sai.
REV 13:13 Tama te nosali pedalali dwai hudigi ebo hasa agai te haniani genuai sę te bidi noma sabo sę yai. Te we bidi noma sabo sę agai yali e dao, te tǫde we bidi augwali gedude agai te dagaludu sia dabo bogoli e tǫba dulubo sę idu geai.
REV 13:14 Tama tiyu, tama Godigo agai te haniani noma sabo sę te hasia hudigi ebo hasago gedude emainogo sula tagalali, tama te hasago te kolesaga ebogo te tǫde we bidi ili po ola mawai. Te hasago te we bidi augwalibolo te po wai, “Dagego nigo te hasia dwai hudigi ebo hasa usu selama noma nigiyu, te agai nogi ugwaba somainogo yao. Te hasa polobadu augwaligo aga te poa pai ge hwągo elali, tiali goli aga bidibo ula dali bidai,” agai te po wai.
REV 13:15 Tama Godigo te nosali pedalali dwai hudigi ebo hasa aga sula tagaliyu, tama te hasa agai te bidibo ula elalubo mobo te we bidigo nigali hudigi ebo hasa noma tomoba ponai, tama te dwai hasa nomago po wabo gagalali. Tama tiyu, niwai bidi meba augwaligo te hasa noma dali aga nogi ugwaba sabo po wabo hagela eyu da, agai te bidi dabe augwali ela muani.
REV 13:16 Tama te nosali pedalali dwai hudigi ebo hasago po bomonama obaso tama “Te tigidali we bidigo dolo nogode, ma gebode, te dąį ilao,” te po wai. Te nogi meni yai bidi dali, te nogi yai bidi augwali me, tama te masigi hauwa munalubo bidi dali, te magi nai meni yai bidi augwali me, te olo bidibo bidi dali, te magi nai sisąma olo mu sę ebo bidi dabe dali, augwali tigidali te dąį sali, te dolo nogode ma augwaligo gebode.
REV 13:17 Tama niwai bidi agai te dwai hudigi ebo hasago nogi dąį te elalusiąyu, ma agai nogi ma agai nogigo namba te elalusiąwani da, teda te bidi agai te bidi dabe augwali dali nai abelegio, tama augwaligo aga dali nai abelamuo. Augwalide habu selalio.
REV 13:18 Dago homude te po pagede bugagia kone palao. Te nogode me, gebode me asęani dąį, te bidigo nogi meni, te nedebo namba naga asęani. Tama te namba da te 666 dao. Tama te namba 666 po digi po begelama tama bidigo nogi pedalaibao, te namba tomode te bidigo nogi gea pelama elalubo. Tama tibaso, dagego tede hania homugo kone palao.
REV 14:1 Te eno ma tonono ebadi, te eno te Kibu Sipsip Wai te Saion bulu dude dolaluali, tama we bidi hauwa umabo mu te 144,000, augwali aga dali dolalubo eno suali. Tama te Kibu Sipsip Waigo nogi dali te aga Ayago nogi dali si, te nogi te we bidi gebode asęai elaluali.
REV 14:2 Tama eno odali, te dagalude wiegi yai po weyu, te kulu kulu asobo po eno odali, te wę asiyu genuai kulu kulu wabo tiwai eyu, tama te dagalude be kulu genuai wabo tiwai yai. Eno odali, te habidi po wabo tiwai yai. Te bidi dabe augwaligo te gita tiwai nai eleyu, te kulu kulu wabo tiwai pedalai.
REV 14:3 Tama te genuai hani we bidi augwaligo gesi balia me deli te tuni bidi God dulalubo gesabidide bidibadi te balia weyu, tama te bidibo ula elalubo hasa me si me si gedude me, te polalubo tobolu bidi augwali gedude me te balia wai. Te we bidi hauwa umabo mu te 144,000 augwali Godigo te tigidali tǫde we bidi bidibo tomode agai augwali dią selama tama ma abelali, te augwaligo te gesi balia wabo koneabo te usu yaibao. Tama niwai gasa bidi agai te balia koneainogo ebo usu munu me egobeo.
REV 14:4 Te bidi dabe augwaligo te meda yai penani ebo kolesaga me ebeo. Menio. Augwali te gasagi yai meda meni yai mu bidali dao. Te tigidali bulu te Kibu Sipsip Wai painogo ebo bulu, te bidi dabe augwaligo me te aga wali naga pabo dao. Godigo augwali te tǫde bidibo we bidi tomode augwali dią siyu ma abelama, tama augwali te Godigo hasia bidi hani bidali God aga digi ma aga te Kibu Sipsip Wai dali sigo sai dao.
REV 14:5 Augwaligo tibo po me deli munu me wabeo. Te augwaligo magi sę me delide te dali dwai sę me deli ebeo. Menio.
REV 14:6 Tama eno suali, gasa ensel mobo bidi te dagalu tomodu sigide mu bola soabo eno suali. Agai te sesemane bidada pabo wiegi yai gesi po elaluai, tama agai te po te tǫde bidibo we bidi augwalibolo pusubo sę elalubo dao. Agai te wiegi yai gesi po pusubo sę te tigidali tǫde bidibo we bidi hanibolo te po pusubo sę eyu, tama te tigidali haniani tigiwali yai bidi dabe dali, tama tigidali haniani hani bidi augwalibolo te wiegi yai gesi po pusubo sę elalubo dao.
REV 14:7 Tama agai i bomonama weyu te po wabo, “Godigo te tigidali we bidi dodolama po tų yabo sogo te pąba pedalalio. Tama tibaso, dage agade wi eyu tama aga nogi ugwaba sao. Tama dagego Godibolo lotu po wao, te agai dagalu dali tǫ dali me, te tamu ąį me, te pusu ąį ulu pedalobo me, te tigidali nai nigali page bidi aga dao,” te dagalude bola soabo ensel mobo bidigo te po wai.
REV 14:8 Te gasa ensel mobo bidi aga te polasa soali ensel bidi wali asai. Te nosali asali ensel bidigo te po wali, “Dolalio, dolalio, te genuai hanu Babilon mu dolalio. Te nogi elaluali hanude bidali we bidi augwaligo bomonama te tigidali haniani tǫde bidali bidi dabebolo te dwai dwai meda yai kolesaga ola mani dao. Te penani sę ebo wego te bidibolo bomai ąį menama, tama te bidigo te ąį tulama aga homu kolesaga dolama, tama agai te we dali penani sę ebogia, te hanu bidigo gasa we bidi te dwai dwai sę ebo kolesaga tomoba kekai dao,” te ensel mobo bidigo te po wai.
REV 14:9 Te gasa sela wali ensel mobo bidi me te polasa soali ensel bidi si wali asai. Agai bomonama i weyu, e tama wali, “Te niwai bidi me deligo te dwai hudigi ebo hasa me, te augwaligo agade augwa nogogo nigali noma dali lotu po weyu te aga nogode ma te gesabidide dąį sali bidi,
REV 14:10 te augwali sibolo lotu po weyu tigide dąį sali bidi agabolo Godigo te bomai ąį wain tiwai mabo te agabolo dene mawaibao. Te wain te Godigo genuai sębę ebo te dao. Godigo te wain ąį te ąį mu dali hasia te si talubeo. Menio. Te sębę te bidibolo dolo mawaibao, aga dali homu dene dwasianu egobeo. Agai sębę ebo te dene sabo kapuba gelama mabo ąįgo wei ponoyu, tama te bidigo tumainogo yaibao. Tama te bidi dwai dene siyu, te posolo mu yai sia dali, te masigi salfade dabo sia bogoli dali, augwali side te dwagila dwai dene mu siyu, te magi dwai sę me isiąbo ensel mobo bidi dabego gedude me, te Kibu Sipsip Waigo gedude te dene saibao. Te bidibolo te dwai posolo yai siago dene mayu, te masigi salfade dabo posolo yai siago me te dene madueibao.
REV 14:11 Tama augwali te dene maiabo sia hano holoyu, tama te hano sesemane bidada pabo sogo holodubadi geaibao. Te dwai hudigi ebo hasa dali, te hasa aga noma dali, te sibolo lotu po wabo bidi dabe augwali te naigo elalubo nogi asęani dąį sali bage, augwali te siade me hulide me te toma me tugobeo, sesemane sogo te dwai dene saibao,” te ensel mobo bidigo te po wai.
REV 14:12 Tama tibaso, Godigo we bidi augwali bomo elama, tama augwaliba pedalabo sęgę bugagia toloyu bidao. Te we bidi augwaligo Godigo bomo yai po wali peyu, tama Jisasde homu mu kęą pai we bidi bidibo dao.
REV 14:13 Tama eno odali, po me deli dagaludu asiyu, te po wai, “Nago e tiwai po asęąo: ‘Megi e tiwai sę gagalobao, te Genuai Bidide wadolali we bidi isibo si, te augwali wiegi yai homu pemene mu yao,’” te po wai. Tama Godigo Tedali Mobo Bidi agai me te po wai, “Awe, mu tama dao. Te augwali tigi dene ebo sę tagaliyu, tama augwali toma tueibao. Augwali olo me pogobeo. Menio. Te augwaligo yali wiegi yai kolesaga, te kolesaga augwali wali paibao,” te po wai.
REV 14:14 Tialima, eno ma tonono bilibadi, tama eno suali, te tedela yai dagalu pǫ me deli elaluai, tama bidi me deli te pǫde dulaluai, te da tǫde bidi tiwai, aga te Godigo Bidi Mu tiwai dao. Te agai tobolude te kapa golgo nigai wiegi yai madi elaluali, tama agai poa pai hwą ge mu agai nogode tolaluai, te gi nai togobo hwą ge dao.
REV 14:15 Tama gasa ensel mobo bidi te Moni Lotu Be tempel bede bidai buluba soali. Agai te dagalu pǫde dulalubo bidi dali bomonama i weyu, te po wali, “Nago hwągo te nai togwao. Tigidali tǫde elalubo nai te inilama tau ela silali dao. Tama megi da, te nai sabo sogo dao,” te po wai.
REV 14:16 Tibaso, te pǫde dulaluali bidi agai te hwą ge nogogo tolaluyu, tama agai te tǫde elalubo inawai nai hwągo togolama sai dao.
REV 14:17 Tama gasa ensel mobo bidi te Moni Lotu Be tempel bedu buluba teda soai. Agai me te poa pai gi nai togobo hwą ge nogode tolalubo dao.
REV 14:18 Tama gasa ensel mobo bidi me ma te nai ula mabo alta saide bidali tagalama asai. Te ensel bidi agai te sia tonalubo bomo elaluai. Te ensel bidi agai te poa pai hwą ge tolalubo ensel mobo bidibolo i bomonama mu wai. Agai te po wali, “Nago naga te poa pai hwą ge selama, tama nago te tǫde te wain bonode walali du tigidali togolama, tama sisinama elaluao. Te tigidali nai polo inilama tau yai dao,” agai te po wai.
REV 14:19 Te po obaso, te ensel bidi agai te hwą ge nogogo selama, tama te wain bonode walali du tigidali togwali, tama deliba sisinama elaluai. Tama agai te bono du dabe te wain agabo te dawai halobage tiwai genuai masigi tomoba sąwai. Te po digi po begelama, te genuai bono du agabo halobage te Godigo genuai sębę dao.
REV 14:20 Tama augwaligo te wain nigibo bono du dabe te genuai halobage tiwai nai tomoba munama, tama te genuai hanu bulu badu elalubadi tama agawai. Tama kaneme te halobage buluba pedaliyu, tama te kaneme te moni pabo ąį tiwai pidubadi, te usu selama nedada pali, te bidi sese nogo si olama sągą badu a naga, te 300 kilomita te tama tiwai yali, tama te edaba holali te ain te kibu hos augwali pedauwalide elalubo, te ainba te kaneme ugwaba sabolali.
REV 15:1 Te eno suali gasa genuai noma sabo sę te dagalude pedalali, tama eno homu hauwa te sęde yali. Eno suali, ensel mobo bidi a naga olama me badu nogo si bidali, tama augwaligo te bidi dolabo dwai nai mu a naga olama me badu nogo si tolaluai. Tama nosali te dwai nai augwaligo sę ebo silibo si, teda te we bidi dolabo gasa dwai nai ma pedalogobeo. Te nogo a naga olama me badu si te dwai nai, te naide te Godigo sębę ebo mu silaibao.
REV 15:2 Tama eno te nai me deli te genuai tamu ąį tiwai suai. Te nai augwaligo te dula tiwai te augwaligo sia bogoli dali te si taluama gelai. Te we bidi augwaligo te dwai hudigi ebo hasa dali hwįnama tama augwaligo aga aiyaba elaluai, te we bidi dabe eno suali. Augwaligo te hasa agai bidibo ula elaluali noma dali, te agai nogigo nedebo namba me te si me aiyaba elaluai. Tama te we bidi augwali te tamu ąį tiwai madi sesege badu te dula dolaluyu gegemani ebo tiwai eyu dolaluai. Godigo augwalibolo te gita tiwai nai mena mena pelama, augwaligo te tolalubo eno suali.
REV 15:3 Tama tiyu, augwaligo te Godigo sę yali bidi Mosesgo polobadu wali tęąbi weyu, tama te Kibu Sipsip Waigo tęąbi me wai. Te tęąbi po wali e dao: “Genuai Bidi, nage te God te Tigidali Bomo Elalubo Bidi dao. Tigidali sę nago ebo, te genuai mu eyu, tama dago te sę ebo suyu, tama da noma siyu homu hauwa ebo dao. Nage tigidali hani bidigo tuni bidi, tama nago kolesaga te dolo eyu tama tigidali mu naga ebo dao.
REV 15:4 Tama Genuai Bidi, nagaduba deli digi naga nage te magi dwai sę me esiąyu wiegi yai doloba pai mu bidibo dao. Tama tibaso, niwai bidigo nage dali wi egobewe? Tama niwai bidigo nage nogi ugwaba sogobewe? Te tobage bidi menio. Tigidali bidi hani augwali aselama, nage pagede lotu po nage dali wagasaibao. Magi baso menio, nago doloba pai kolesaga te hania bulu ulaba pedalai dao,” augwaligo te tęąbi po wabo eno odali.
REV 15:5 Te eno nosali ma tonono bilibadi, tama te dagalude elalubo Moni Lotu Be tempel tų dawai eno hania suali. Tama te be tomode te Mosesgo nami ugwago polobadu sę yai lotu be eno suali, te be elalubogo te we bidibolo te God augwali dali bidali te ola mawai.
REV 15:6 Tama te nogo a naga te me badu nogo si ensel mobo bidigo te a naga olama me badu nogo si te bidi dolabo dwai nai mu tolaluai, te augwali te Moni Lotu Be tempel bede bidali tagalama buluba teda asai. Augwaligo magi meda mu meni yai tedela yai te ula mu yai ugwa gudai. Tama augwaligo te kapa golgo nigai kukulu te augwa hagawiade bagulama muai.
REV 15:7 Tama te bidibo ula elalubo hasa me si me si te tomode me deligo, agai te golgo nigai pou a naga olama me badu nogo si te nogo a naga olama me badu si te ensel mobo bidi deli delibolo mena mena pai. Tama God aga sesemane sogo bidada pabo bidi agai sębę ebo homu te a naga olama me badu nogo si te poude pągąnalubao.
REV 15:8 Tama te Godigo bomo yai ula dali, agai bomo dali sigo hano ebogo hano te Moni Lotu Be tempel bede pągąnaluai. Tama niwai bidi me deli aga te be tomoba painogo ebo usu egobeo. Menio. Augwaligo te a naga olama me badu nogo si te ensel mobo bidi augwaligo te bidi dolabo dwai nai nogo a naga te me badu si te naigo sę silibo sogo tonaluali.
REV 16:1 Te eno odali te Moni Lotu Be tempel be tomode te pedauwalidu po me deli pedaliyu te po wai. Agai te nogo a naga olama me badu si ensel mobo bidi i bomonama weyu, te po wai, “Dage deli deli pelama, tama te pou a naga olama me badu nogo si te poude te Godigo homu sębę elalubo te gea sąnama, te tǫba tulalumainao.”
REV 16:2 Te po obaso, te polalubo ensel bidi pelama, aga pou tǫba geligi pai. Tama gelama, tama polo te haniani bomai dwai keni mu te dwai hudigi ebo hasago dąį elalubo bidi augwali tigide pedalai, tama te nigo nigai noma bidi dali lotu po wali bidi augwali tigide me te dwai dwai keni pedalai.
REV 16:3 Tama te tudi badu te si wali ensel bidi me agai pou te tamu ąįba gelai. Tama te tamu ąįde begelama, te isai bidigo kaneme tiwai pedalali. Tama tiyu, te tamu ąįde bidibo ula dali bidibo nai dabe tigidali, augwali isila pai dao.
REV 16:4 Tama te tudi badu te sela wali ensel mobo bidi agai pou te genuai pabo ąį dabeba geleyu, tama te ąį ulu pedalobo digi tigidali me gelai. Tama te ąį tigidali begelama, kaneme pedalali.
REV 16:5 Tama eno odali, te ąį tonalubo ensel mobo bidigo te agai te po wali, “Genuai Bidi, Tigidali Bomo Elalubo God, nage megi bidibo, tama polobadu mu nage bidai bidi, nage te magi dwai sę me esiąyu wiegi yai doloba pai mu bidibo dao. Te nago te bidi dali po tų ebode, te nago te dwai sę ebo bidi dabe augwali dolo mu dagalobo dao.
REV 16:6 Te dwai sę ebo bidi dabe augwaligo te nago po odobo we bidi augwali dali, te nago po pusubo bidi dabe dali ela muyu, tama augwaligo kaneme gea sąwai dao. Tama nago te dwai bidi dabe augwalibolo kaneme mayu, tama augwa te kaneme tumainao. Augwaligo augwa te dwai sę yalide dolo mu te dene sabo dao,” te po te ąį tonalubo ensel bidigo wai.
REV 16:7 Tama eno odali, te Godibolo mabo nai ulubo alta saigo i wali, “Awe, mu tama, Genuai Bidi, Tigidali Bomo Elalubo God, nago te bidi dabe augwali po tųde dagaliyu, tama mu po naga wali peyu nago po tų te dolo mu naga tigidali ebo dao,” te po wai.
REV 16:8 Te tudi badu te me si me si wali te ensel mobo bidigo pou te giligaba gelali, tama Godigo te giligago te bidi dabe augwali domainogo sula tagalalio.
REV 16:9 Tama te genuai giliga nanobo siago te posolo mu eyu, tama te siago te bidi dabe dwai dene mu mawai. Tibaso, augwaligo God nogide posobo po wai, agai te dwai dene mabo nai tonalubo bomo elalubaso, tiali goli augwaligo ge neyu homu begelama God agai nogi ugwaba sabeo.
REV 16:10 Tama te tudi badu te nogo a naga wali ensel mobo bidigo agai pou te dwai hudigi ebo hasago tuni bidi duabo naiba gelai. Tama te hudigi ebo hasa dologode bidali bidi augwali bidibo digi be hulia sabo te dolo pedalai. Tama augwali dwai dene mu sali, tama tilama augwa hamena ma halua tuyu bidai.
REV 16:11 Augwaligo homugo te dene me te keni augwali si dali homu eyu, augwaligo te dagalude bidibo God nogide posobo dwai po wai. Tiali goli augwaligo homu begelama te augwaligo dwai kolesaga ebo tagalama tudiba mubeo.
REV 16:12 Te sę silama, tama te a naga olama me badu nogo deli wali te ensel mobo bidi aga pou te genuai ąį nogi Yufretis te ąįba te gelai. Tama te ąį tigidali wa pela tama te giliga pedalobo badu tuni bidi dabe asabo tų sisilama tonaluai dao.
REV 16:13 Tama eno te dwai haubo noma bidi sela te gedeli tiwai gagawai suali, te me deli aga te genuai dwai hasamanigo pedauwali ą elalubo digi pedalali, tama me deli aga te dwai hudigi ebo hasago pedauwalidu me, me deli te tibo po ola mabo bidigo pedauwali ą elalubo digi tedu pedalai. Augwali sela te tiwai pedalali eno suali.
REV 16:14 Tama te dwai haubo noma bidi augwaligo te bidigo isiąwai sę te bidi noma sabo sę haniani mu ebo dao. Tama augwali te tigidali tǫba te tigidali tuni bidi bidibo digi pelama, te bidigo isiąwai bomo yai sę augwaligo sulama noma somainogo ebo dao. Augwaligo homugo te tuni bidi dabe augwali deliba sisinama, tama augwaligo te Tigidali Bomo Elalubo God dali hwįabo sogo asobo tonalumainogo yaibao.
REV 16:15 (Genuai Bidigo te po wai, “Te po odao. Te ena dageba asabo sogo te ena te nai wi sainogo asobo bidi tiwai geme polo pedalaibao. Tama niwai bidi aga te godege pisąyu da, tama aga ugwa bugagia guduyu, tama aga tigi olo bilisiąyu da, te bidi dabego aga suali te hale me isiąwai, teda te bidi aga homu wiegi yai mu yaibao, te ena asabo sogode.”)
REV 16:16 Tama te dwai haubo noma bidi augwaligo te tuni bidi dabe teba sisinai, te Hibru pogo augwaligo te bulu nogi Armagedon wai.
REV 16:17 Te a naga olama me badu nogo si wali ensel mobo bidigo aga pou te wali elalubo digi gelai. Tama te Moni Lotu Be tempel be tomode te God dulalubo digi tuni bidi bidibo nai tedu te pedauwali me delidu i bomonama wali, tama te i wali te bulu badu pedalai. Agai te po wai, “Te sę megi tama silai dao,” te po wai.
REV 16:18 Tama dagalude be sele eyu, tama be kulu kulu weyu, genuai po me weyu, tama moni genuai dwai tǫ mali yai. Te mali genuai mu yali, tama bidi tǫde bidibo sogo tigidali, te polobadu te tiwai tǫ mali genuai me pedalai menio. Te maligo bomogo te tigidali polobadu yali maligo bomo aiyaba mu elaluali.
REV 16:19 Te genuai hanu tomode te sela pepeda pali, tama te tigidali tǫde hani bidigo hanu te mu dolai. Tama Godigo te genuai hanu Babilon homugo koneani, tama agai te Babilon te wain ąį elalubo kapde ąį tigidali tumainogo yai. Te ąį wain te Godigo agai genuai sębę mu elalubo dao.
REV 16:20 Tama te tigidali dwasianu tamu ąį tomode elaluali ailan bulu dabe te augwali wi pela silai, tama te haniani tǫde elalubo bulu du tigidali augwali tedela pali.
REV 16:21 Tama te genuai talua ge tulubage tulai. Tigidali deli deli badu tulali talu ge tulubage te sęgę te moni masigi tiwai yai. Te talua ge tulubage dagalude asiyu, te bidi tigiba ugwadu tulai. Tama augwali te talua ge tulubagego mu dolai, meba isali. Tama te talua ge tulubagego augwali dolobaso, tama bidi dabego God dali dwai posobo po wali, te talua ge tulubagego augwali dolobo sę te genuai dwai mu ebaso, augwaligo te dwai po Godigo nogide wai.
REV 17:1 Te pou elaluali a naga olama me badu nogo si ensel mobo bidi augwali tomode me deli te aga asama, enabolo te po wai, “Nage suagasao. Te penani ebo we te genuai ąį dabe ugwadu daide dulaluali, aga te yali dwai sęde dwai dene mu sabo sę, eno nagebolo te sę ebo ola mawaibao.
REV 17:2 Te haniani tǫde tuni bidi augwaligo penani sę ebo kolesaga hauwa te we dali yali dao. Tama tigidali tǫde bidi dabe augwaligo me te we dali te penani ebo kolesaga eyu, tama augwali te kolesaga meni yai bidi tiwai eyu, te bomai ąį tuai bidi tiwai yai dao,” te ensel bidigo enabolo te po wai.
REV 17:3 Tama agai enabolo te po olama, tama agai eno noma bidi te bidi meni yai tǫba selasa pai. Te tǫde eno te we me deli aga te mama yai genuai dwai hudigi ebo hasa daide ugwadu dulalubo suai. Te mama yai dwai hudigi ebo hasa tigide te Godigo nogi posobo po hauwa asęna pągąnaluai. Tama aga tobolu a naga olama me badu nogo si elaluai, tama te gąų nogo si me te hasago elalubo eno suali.
REV 17:4 Te we agai te mama yai bobage ugwa me, te pe yai ugwa me muani, tama te ugwade haniani au yai te kapa golgo nigai nai elaluali, tama te wiegi yai au yai nai augwaligo gasa haniani wiegi yai masigi dali te bis dali sigo nigai. Tama te we agai nogogo te gol kap tolaluai. Tama te dwai damua pai haniani kolesaga me, te haniani dwai meda yai kolesaga te penani wego yali, te dwai kolesaga tigidali te kapde pągąnaluai.
REV 17:5 Tama aga te dwai sę yali nogi aga gebode asęai elaluai. Te nogide te geme dualali page elaluali, tama te nogi aga digi te e dao: “Genuai hanu Babilon, te tigidali penani we dabego ida mu, tama te tigidali tǫde elalubo dwai dwai meda yai kolesaga augwaligo ida me dao,” te po te penani wego gebode asęani, te eno suali.
REV 17:6 Tama te we agai te Godigo po wali pabo we bidi augwali dali te Jisasde homu kęą pai we bidi dali augwali te wego ela munama, tama eno suali te wego augwali kaneme tulama te kolesaga meni yai bidi tiwai aga yai. Eno te sulama, ena noma mu siyu, tama eno homu hauwa mu yai.
REV 17:7 Tama te ensel mobo bidigo enabolo te po wai, “Magi baso nago noma siyu tama homu hauwa ebawe? Te eno te wede geme dualali po page nagebolo ola mawaibao. Tama te dwai hudigi ebo hasa tobolu a naga olama me badu nogo si me, te nogo si gąų tobolude elaluyu, tama te naigo te we selasa pabo. Agade me te geme dualali po page nagebolo ola mawaibao.
REV 17:8 Te nago suali dwai hudigi ebo hasa aga polobadu bidai, tiali goli megi aga me bidibeo. Tamadi tama agai te page meni yai tǫ dedage tagalama, tama aga edaba holama, tama aga pelama, aga mu dolaibao. Polobadu mu te Godigo te tǫ nigisiąbadi agai te augwali isiąma gamonaibao wali we bidi nogi te bukude asęai dao. Tama te bukude nogi asęsiąwani te tǫde bidibo we bidi augwali tigidaligo te hudigi ebo hasa sulama, tama augwali homu hauwa eyu, aga nogi ugwaba saibao. Magi basowe? Polobadu aga bidai, tama megi aga me bidibeo, tama nosali aga ma pedalaibao,” te ensel mobo bidigo te po enabolo wai.
REV 17:9 Te po me agai enabolo wai, “Te dwai hudigi ebo hasade te dwagi yai homu kolesaga elalubo bidi agai bugagia kone palao, te hasade po page kuna konemainogo yao. Te a naga me badu nogo si tobolu te tiwai te a naga olama me badu nogo si bulu du dao, tama te penani we te bulu du dabe daide ugwadu dulalubo dao.
REV 17:10 Tama te tobolu dabe augwali te tuni bidi a naga me badu nogo si me tiwai dao. Tama te tuni bidi dabe tomode te a naga dolai, tama me deli megi bidibao, tama me deli nosali pedalaibao. Nosali aga pedalobo si, teda aga te dwasianu sogo naga bidaibao.
REV 17:11 Tama te polobadu bidali dwai hudigi ebo hasa, tama megi aga me bidibeo, te aga digi aga te a naga olama me badu nogo sela wali tuni bidi dao. Tiali goli aga te gasa tuni bidi a naga olama me badu nogo si te hanigo deli hani bidali. Tama tiyu, aga pelama tama aga dolama, tama mu hagawaibao.”
REV 17:12 “Tama te nago suali te nogo si gąų, te gąų dabe te tuni bidi nogo si tiwai dao. Megi augwaligo te tuni bidi bomo me sabeo. Tiali goli augwaligo te tuni bidi bomo te dwai hudigi ebo hasa dali selama, tama augwali aga dali te dwasianu sogo naga we bidi tonalubo sę yaibao.
REV 17:13 Tama te tuni bidi nogo si augwaligo homu deli naga elaluyu, tama augwaligo augwa genuai nogi me, te bomo me, te tigidali te hudigi ebo hasabolo mawaibao.
REV 17:14 Tama menama, augwaligo te Kibu Sipsip Wai dali hwįaibao. Tiali goli, te Sipsip Waigo augwali aiyaba mu elaluaibao. Magi baso meni. Aga da te genuai bidi dabe tigidaligo Genuai Bidi dao, tama aga te tigidali tuni bidigo genuai tuni bidi aga dao. Tama aga dali bidibo we bidi te augwali agai i olama, tama augwali agai gasa we bidi tomodu dią selama, tama augwaligo homu agade mu kęą peyu bidibo we bidi hani dao.”
REV 17:15 Tama te ensel mobo bidigo enabolo te po wali, “Nago te genuai ąį dabe, te ąį daide ugwadu te penani we dulalubo suali. Tama te ąįde po digi po begelama wali te po page e dao: te ąį wali da, te haniani genuai tǫde bidibo we bidi me, te tigidali hani we bidi me, tama te tigidali haniani tigi yai me, te tigidali haniani po wabo bidi hani me, augwali te genuai ąį dabe elalubo tiwai dao.
REV 17:16 Tama te nogo si gąų nago suali, te dali te dwai hudigi ebo hasa dali augwaligo te penani we dali boi bidi yaibao. Te penani we augwaligo aga mu dolama, tama agai ugwa dabe me tigidali doado bage dolaibao. Tama augwaligo agai tigi mi tuyu, tama aga tigi tigidali siago domainogo ulaibao.
REV 17:17 Magi baso meni. Godigo augwali homu kolesaga mawai, tama augwaligo te sę emainogo eyu te polobadu agai te po wai. Te augwaligo homu deli naga eyu, tama augwali tuni bidi bidainogo te bomo sai, augwaligo te bomo tigidali te dwai hudigi ebo hasabolo mawainogo yai. Te augwaligo tama tede pidubadi, te Godigo te penani wede wali poba te usu nainogo tiaibao.”
REV 17:18 “Tama nago te suali we, agade te po digi po begelama wali te po page e dao, te we da te genuai hanu, te tigidali tǫde bidibo tuni bidi dabe tonalubo tobolu hanu dao,” te ensel mobo bidigo te po enabolo wai.
REV 18:1 Te penani wede pedalabo sę eno te tiwai suali. Tama nosali te sogo eno suali gasa ensel mobo bidi te dagalu tagalama e tǫba dulubo eno suali. Agai bomo genuai mu elaluai, tama agai bomo yai ulago te tǫ ula mu ilai.
REV 18:2 Agai i genuai bomo elama mu weyu, te po wai, “Dolalio, dolalio, te genuai hanu Babilon mu dolalio. Megi te bulu te dwai haubo noma bidi dabego bulu pedalama bidibao. Te dwai meda yai mobo bidi dabe me augwali tede bidibao. Te meda yai ba dabe me, te dwai bulude bidibo ba dabe me, augwali me tede naga kalabus bidibo dao.
REV 18:3 Magi baso meni. Te moni hanu Babilon aga te bomo yai ąį wain hauwa tubo penani sę ebo we tiwai dao. Te we agai te bomonama tama te dwai dwai sę ebo dao. Tama agai aga bomo yai ąį wain te tigidali tǫde bidibo we bidibolo menama, tama augwaligo me te penani ebo kolesaga aga dali me yali dao. Tama te tǫde tuni bidi augwaligo me te penani ebo kolesaga aga dali me yali dao. Tama tigidali tǫde bidi augwaligo mone sabo bisnis sę eyu, tama tede te masigi hauwa mu umabo sali. Te moni hanu aga te we me deli tiwai bidiyu, tama te wego homugo ‘Eno ena tigi tau sabo nai, te tigide pusubo nai, te ena homu dwagi yai ilibo haniani nai, te tobage wiegi yai nai hauwa eno abelaio,’ te tobage homu eyu, tama te hanugo te bisnis bidi dabego nai umabo abelai dao,” te ensel mobo bidigo te po wai.
REV 18:4 Tama eno odali, gasa pedauwalidu po dagaludu pedalali, tama agai te po wali, “Eno we bidi hani, dage te bulu tagalama buluba soao. Dage aga dali te dwai sę ebode te dene sidali weyu, tama dagego agai ebo dwai dwai sę me egimio. Tama tibaso, te bulu tagalao.
REV 18:5 Magi baso meni. Te agai dwai sę ebo sęgę te pobele bage deliba sisinibo tiwai mu yali, tama te dagaluba mu usu nainogo holai. Tama God agai te bulude ebo dwai dwai kolesaga tigidali agai homugo ma koneai.
REV 18:6 Dagego te penani wego yali kolesaga tiwai koneyu, tama dagego te kolesaga ebo usu nama aga dali wei sao. Te agai dage dali yali dwai kolesaga dali gasa me dali ugwadu daganama agabolo ma mao. Te wego dagebolo dene dali sęgę si mani, te bidigo bomo yai ąį si te kap deli tomode taluama tama gasa bidibolo mabo tiwai yai. Tama te kapde po digi po begelama, tama dagego te bomo mu yai ąįgo te wego kap pągąnama tama aga tumainao. Tama tiyu, tama agai dagebolo mani dene dali sęgę dali agabolo ma mao.
REV 18:7 Te aga digi aga nogi ugwaba siyu, tama aga tigi naga tau sabo sę yai dao. Tama dagego agabolo dene dali sęgę dali si hauwa mayu, te yali dwai sę usu nama yao. Tama dagego aga gela hauwa omainogo yao. Magi baso meni. Agai aga homude e tama po wabo dao: ‘Ena te tuni we bidibao, tama ena te tuni bidi bidibo saide dulalubo dao. Ena te bidi isai we bidibo tiwai olo bidibeo. Tama tibaso, te sęgę enabolo pedaluyu, te ena gela me wagobeo. Mu menio,’ agai te homu ebo dao.
REV 18:8 Agai te homu ebaso, polo te haniani dwai sę mu agabolo te deli sogo naga pedalaibao. Te genuai gasi pedaliyu, tama bidi hauwa augwaligo dwai gela weyu, tama genuai nasi yaibao. Tama siago te Babilon tigidali daibao. Magi baso meni, te genuai bomo mu elalubo Genuai Bidi God aga digi dagalama tama Babilon hanuba te dwai dene wei ponobo dao,” te po wabo te dagaludu asobo eno odali.
REV 18:9 Te tǫde tuni bidi augwaligo te penani we dali penani eyu bidai dao. Tama te kibu dabe augwali te we gede pebege pibo tiwai, te tuni bidi augwali te wego haniani wiegi yai naide dwagi yai homu eyu bidai dao. Tama augwaligo te penani we siago deyu hano holobo subaso, tama augwaligo moni gela weyu nogo pagasayu bidaibao.
REV 18:10 Te we aga te dwai dene sabo suyu, te augwali aga digibulu dolaluyu te po wabo, “Aua, hobede yali, hobede mu te bulu Babilon dali yai. Nage te genuai hanu, tama nage bomo yai hanu dao. Tiali goli te deli sogo naga nago dwai sę yali sęgę nageba mu pedalalio.”
REV 18:11 Tama tigidali tǫde bidi augwaligo te mone sabo bisnis sę ebo bage, augwaligo homugo te bulu Babilon kone paliyu, tama augwaligo agade gela weyu, te homu sęgę dali bidibao. Magi basowe, te augwaligo doado bage abelabo bidi me menio.
REV 18:12 Te wiegi yai doado bage e tiwai dao, te kapa gol me silva, te gasa haniani wiegi yai masigi me, te bis gasagi yai nai me, te wiegi yai tedela yai ugwa dabe, tama te haniani mama yai ugwa me, te dila pai ugwa nogi slika elalubao. Tama te gasagi yai denami ebo ni dabe tigidali, tama tigidali dila pai nai augwaligo te kibu elefan kelego nigali nai dabe, tama te genuai masigi elalubo nigo te nai tigidali nigali, te kapa nogi bras me, te ain me te sigo nigali wiegi yai nai tigidali, me te tomode dodobolo pai wiegi yai masigigo nigali nai me, te tobage doado bage.
REV 18:13 Tama te meba doado bage e tiwai elalubo, te denami ebo tubo nai nogi sinamon me, te tubo gagi, tama te denami ebo nai pauda me, tama te haniani denami ebo ili yai nai elaluai, tama wiegi yai denami ebo nai sanda, me te bomai ąį wain me tubo wel, te wiegi yai tubo plaua me te tubo nai wit ge, te kibu bulmakau me sipsip, te me hos dali te hosgo kegasa pabo wiegi yai nai nogi karis dabe me, tama te augwaligo mu abelai masigi sisąbo sę ebo we bidi dabe me, te tigidali nai bidi dabe augwaligo ma abelegobeo.
REV 18:14 Te masigi hauwa sabo bisnis sę ebo bidi dabe augwaligo te po waibao, “Te nai nago homu hodaloyu sabo homu yai, te nai tigidaligo nage tagalama pai dao. Tigidali dwagi dwagi yai tubo nai dabe te genuai mone naga elaluali, te nago wiegi wiegi yai tigidali au ebo doado bage dali, te nai tigidaligo nage taga palio. Tama te bidi dabe augwaligo te tobage nai dabe nagede munalubo ma sugobeo,” te bisnis sę ebo bagego te po waibao.
REV 18:15 Tama te sęde te mone umabo sali bisnis sę ebo bidi dabe augwaligo te masigi hauwa mu te hanude sai, te augwali te hanugo dwai dene mu sobaso tama augwali wi mu yaibao. Tama augwali aga digibulu dolaluyu, tama augwali gela weyu, tama dwai homu sęgę elama bidaibao.
REV 18:16 Tama tiyu, augwaligo te po waibao, “Hobede ebo, te genuai hanu te hobedagia bidibao. Polobadu agai te wiegi yai tedela yai ugwa gudai, tama haniani mama yai ugwa gudama, tama aga tigi te golgo au ilai, tama te wiegi yai dila pai masigi dali bis dali te nai dabego tama au yai.
REV 18:17 Te megi deli sogo naga, te masigi me te tigidali au ebo doado bage tigidali dola silai dao,” augwali gela weyu te po waibao. Tama te moni geba sip guni tolasa bilibo bidi tigidali me, tama te sip abelama gasa buluba painogo ebo bidi dabe me, te sip tomode sę ebo bidi dabe badi, tama te tamu ąįde masigi sabo bisnis sę ebo bidi tigidali me, te bidi dabe tigidali augwali te Babilon bulu digibulu dolaluali.
REV 18:18 Tama dolalubadi, augwaligo aga te siago dabo hano ebo suyu, tama augwaligo i e tama wai, “Mena hanu te e tiwai genuai hanu elalualiwe? Mu menio,” te po wai.
REV 18:19 Tama augwaligo te tǫ pobele bage augwa digi augwa toboluba sąyu, tama gela weyu augwali homu sęgę dali bidai dao. Tama augwaligo i weyu, “Hobede ebo, te genuai hanu te hobedagia bidibao! Te tigidali moni geba sip aga aya te tamu ąįde masigi sabo bisnis sę ela biliyu, te augwali te sęde masigi sabo bidi mu pedaliyu, te genuai hanude genuai masigi sabo sę yai dao. Hobede mu ebao! Te megi deli sogo naga mu te genuai hanu aga mu dola silai dao!” te po wai.
REV 18:20 Nage te dagalu, nage dali te Godigo we bidi dali, tama dage te Godigo po pusigi pabo bidi dabe me, te Godigo nosali yabo sę po ola mabo bidi dali, dage tigidaligo te genuai hanude megi pedalobo sęde wiegi yai homu yao! Godigo aga dagalama, tama agabolo te dwai dene sabo wei ponai dao. Tama te kolesagade agai te hanu agai dwai kolesaga dage dali yali wei ponai dao!
REV 18:21 Te po silali, tama moni bomai ensel mobo bidi me deligo te wit ge agaga pelama pęgą sabo moni masigi tiwai sela asai. Tama agai te moni sęgę yai masigi ugwaba selama, tama tamu ąį aba sąwai. Tama agai te po wai, “Te kolesagade naga augwaligo te genuai hanu Babilon selama bomonama aiyaba sąyu, tama bidi dabe augwaligo aga ma suainogo ebo usu egobeo.
REV 18:22 Tama te gita elebo po wabo me, te haniani habidi po wabo tiwai ebo me, te genagi me te bu wabo nai me, te tobage naigo po wabo nage pagede ma te po wagobeo. Tama bidigo tigidali haniani sęde konea sali bidi, te tiwai bidi nage Babilon bulu tomode bidibo augwaligo ma sugobeo. Te nai wit ge agaga pabo masigigo kulu kulu wabo, te tiwai wabo augwaligo nagede ma odogobeo.
REV 18:23 Te lam sole ula ebo te ula nagebolo ma iligobeo. Tama te we sainogo ebo bidi me, te bidi dali painogo homu ebo we me, augwali si dwagi yai homu eyu po wabo te nage tomode ma wagobeo. Polobadu nago bisnis bidi dabe augwaligo te masigi sabo sę elama, tama augwali te tǫde genuai nogi yai bidi dabe bidai. Tama nago tigidali bidi hani dali te nago tibo pode haniani pobi po wabo sę elama, tama augwali dwai tųba kegasa pali.”
REV 18:24 “Tama Godigo suali, te Babilon hanude bidibo we bidi augwaligo agai po ola mabo bidi dabe dali, te agai po wali pabo we bidi dali ela mubo sę yai. Tama tigidali tǫde augwaligo we bidi meba dali boi bidi eyu, augwali ela muyu, tama te dwai sę ebo page te bulu Babilonde naga elalubo dao. Tama tibaso, te hanu dola silai dao,” te moni bomo elalubo ensel mobo bidigo te po wai.
REV 19:1 Tama te sogo nosali eno odali, te genuai dagalude bidibo we bidi hani tiwai moni i wabo odali. Augwaligo te po wai, “Dago God nogi ugwaba sao! Dago God agaduba deligo naga te we bidi ma dobola sabo sę yabo bomo elalubao. Agai genuai nogi dali bomo dali elalubo dao.
REV 19:2 Magi baso meni, te po tų ebode God agai te mu po naga wali peyu, doloba pai kolesaga te po tų ebode ebo dao. Te genuai penani we agai te tǫde we bidi agai te penani ebo kolesagago mu dolai dao. Tibaso, Godigo aga dali po tų elama, tama dwai dene wei agabolo ponai dao. Te we agai Godigo sę bidi dabe augwali ela mubaso, tama Godigo agai te dwai sę ebo wei ponoyu, te penani we aga dene mawai dao,” augwaligo te po wai.
REV 19:3 Tama augwaligo i e tama ma wai, “Dago God nogi ugwaba sinao! Te genuai hanu sia dabo hano ebo, te sesemane sogo te hano ugwaba holobo dao!” te po wai.
REV 19:4 Tama te bidi sese olama me si me si tama polalubo tobolu bidi dali, te bidibo ula elalubo hasa me si me si te augwali kidu sugunama, Godibolo lotu po wali, te aga te tuni bidi duabo wiegi yai nai saide dulalubadi augwaligo agabolo te po wai, “Mu tama dao. Dago God nogi ugwaba sinao!” te po wai.
REV 19:5 Tama Godigo te tuni bidi dulalubo te naidu i ola asiyu te po wali, “Dage Godigo sę bidi dabe, dage God dali wi ebo we bidi dali, te dage olo bidi me, te dage nogi yai bidi me, te dage tigidaligo Godigo nogi ugwaba sao,” te po wai.
REV 19:6 Tama eno odali, te genuai we bidi hani sisinama bidibo digi po me deli tiwai pedalai. Ma, te ąį hauwa kulu kulu weyu u wabo tiwai yai. Tama te dagalu be kulu wabo tiwai genuai u wabo tiwai yai, te eno odali. Te augwaligo i bomonama wai, “Dago God nogi ugwaba sao! Genuai Bidi, aga e dago God, te Tigidali Bomo Elalubo Bidi, megi aga te tuni bidi mu bidibao.
REV 19:7 Te megi dago bugagia homu pemene eyu, tama dago wiegi yai mu ela pidu geyu, tama aga nogi ugwaba sao! Magi baso menio. Te Kibu Sipsip Waigo we sabo bodolu megi pedalalio. Tama aga we sisilama bidibao.
REV 19:8 Tama Godigo te webolo te tedela yai bobobage ugwa menama, te wiegi yai ugwa te ula mu yai, tama meda mu meni yai, tama agai te ugwa aga tigide muaibao,” augwaligo te po wai. (Te wiegi yai tedela mu yai ugwa te Godigo we bidigo ebo wiegi yai doloba pai kolesaga dao.)
REV 19:9 Tama te ensel mobo bidigo enabolo te po wali, “Nago te po asęąo: te we bidi dabe augwali Godigo te genuai nai tubo digi asomainogo i wai, te Kibu Sipsip Wai aga we kębode te sogo te i wali we bidi augwali wiegi yai homu pemene eyu bidaibao,” agai te po wai. Tama olama, agai enabolo te po me wai, “E po, eno nagebolo tama wali po, e po te Godigo wali mu po dao,” te ensel bidigo enabolo te po wai.
REV 19:10 Tialima, ena te ensel mobo bidi sągą pąba kidu sugunama, tama eno gesabidi tǫba munama, tama eno aga dali lotu po wabo homu yai. Tiali goli agai enabolo te po wai, “Nago tama tigio! Ena nage dali, nago ama dede dali deli sę ebo bidi dao. Dagego konealubo po Jisasde dąų olama, agai nogi haninama pusubo dao. Nago God deli dali naga lotu po wao. Te Jisasde gasa bidibolo po pusubo we bidi, te Godigo Mobo Bidi agai augwali homu hodolama, tama augwaligo te po pusubo dao. Te Mobo Bidigo te tobage sę naga te Godigo nosali yabo sę po pusubo bidi dali me ebo dao,” agai te po wai.
REV 19:11 Te eno suali, dagalu tų genuai dawali, tama tedela yai kibu hos me deli tede bidibo eno suali. Bidi te kibu hosde dulaluali. Te bidi agai sę te we bidi po tų ebode dagaliyu da, tama agai boi bidi dabe dali wąbi hwįbaso da, teda agai te mu po dali, te wiegi yai doloba pai kolesaga dali si naga wali peyu, agai te sę si bugagia ebo dao. Tama tibaso, agai nogi si elalubao, me nogi “Godide homu kęą pai bidi.”
REV 19:12 Tama te gasa nogi te “Mu po naga wabo bidi.” Tama agai gedu te sia bogoli ebo tiwai yali, tama agai tobolude te tuni bidigo mubo wiegi yai madi hauwa muai elaluai. Tama agai tigide po me deli asęai elaluali, te aga nogi dao. Te agaduba deligo naga te nogi page koneani, tama gasa bidi dabe augwaligo te nogi me konebeo.
REV 19:13 Tama agai muani bobage ugwa te kanemego ąį telawai dao. Tama augwaligo agai nogi e tama wai: “Godigo po dao.”
REV 19:14 Te dagalude bidibo ami bidi dabe augwaligo te augwa tedela yai bidi duabo kibu hos dabede dulaluali, tama augwali te bidi wali pai. Tama augwali tigide te tedela yai meda mu meni yai wiegi yai bobobage ugwa gudali.
REV 19:15 Tama te bobage poabi hwą ge me deli te augwa polalubo bidigo pedauwalide munaluai, tama te hwą ge buluba teda soai. Tama te hwą gego agai te tigidali tǫde we bidi hani elaibao. Tama agai te ain wąbi nogogo tulama, tama te we bidi hani augwali te ain dono wąbigo tonalueibao. Tama agai augwali tonaluyu, tama te Tigidali Bomo Elalubo God agai te we bidi dali moni dwai sębę ebaso, te bidi agai augwalibolo dwai dene mu mawaibao, te bomo yai ąį wain nigibo bidigo te wain bono du dabe te masigi halobage tomoba munama, tama agai sągągo agalalubo tiwai yaibao.
REV 19:16 Te aga nogi asęani aga ugwade me te sągą telede me elaluai. Te nogi asęani e tama tiwai, tigidali tuni bidigo Tuni Bidi, te tigidali genuai bidi kingo Genuai Bidi King dao.
REV 19:17 Tama te sogo eno suali, te ensel mobo bidi me deli te giliga ge pąde te dagalude dolaluai. Agai te dagalude ugwadu bola bilibo tigidali ba dabe dali bomonama i weyu, tama agai te po wai, “Dage te Godigo genuai nai tubo digi sisinagasao.
REV 19:18 Dagego te tuni bidi king dabego tigi mi tuyu, tama te ami bidi polalubo bidi dabego tigi mi me tuyu, tama te ami bomai bidi dabego tigi mi me tuyu, te hos dabe mi dali, te hosde duawali bidi dabego tigi mi me tuao. Tama dagego te tigidali Godigo po sela sąwani bidigo tigi mi tuao, te olo mu bidibo bidi me, te masigi sisąbo sę ebo bidi me, te nogi meni yai bidi dali te nogi yai bidi, te augwali tigidaligo tigi mi tuagasao,” te ensel mobo bidigo te po te ba dabebolo wai.
REV 19:19 Tama eno suali, te polobadu suali dwai hudigi ebo hasa dali, te haniani tǫde tuni bidi dabe dali augwali eno suali, te augwa ami bidi dabe dali, te augwali deliba sisinai elaluai. Augwaligo te kibu hosde dulalubo bidi dali wąbi hwįainogo yai, te aga ami bidi dabe dali augwaligo hwįainogo eyu deliba sisinagasali.
REV 19:20 Tiali goli agai te dwai hudigi ebo hasa dali, te ili po wabo po ola mabo bidi dali, augwali si kalabus ilai. Te tibo po wabo sę ebo bidi agai te bidigo isiąwai bomo yai sę hauwa te hudigi ebo hasago gedude te sę yai, tama agai te tebo kolesagade te bidi tibo po ola mayu, augwali te hudigi ebo hasago dąį augwa tigide selama, te hudigi ebo hasa nomade lotu po omainogo yai. Te hudigi ebo hasa dali te tibo po ola mabo bidi augwali si te bidibadi, tama augwaligo te bidi si te genuai bagua si dedage pageba aiyaba mu sąwai dao. Tama te dedagede te posolo yai sia dabo masigi salfa elalubao.
REV 19:21 Tama te kibu hosde dulaluali bidi, agai te pedauwalide elaluali bobage hwą gego te augwali sigo ami bidi dabe ela muai. Tama tigidali ba dabe augwaligo te bidi dabe tigi mi tuali, tama augwali tabi mu pągąna pai dao.
REV 20:1 Tama eno suali, ensel mobo bidi me deli te dagalu tagalama e tǫba dulai. Te agai nogode te page meni yai dedage ki tolaluai. Tama agai te genuai aligabo bono sen me elalubo, te me eno suali.
REV 20:2 Agai te genuai dwai hasamani dąų ola sai, te hasamani te polobadu mu bidai, agai nogi Satan dao, tama agai gasa nogi page e dao: “Agai te tigidali we bidide kisiliyu po tų ela mabo bidi dao.” Tama te ensel mobo bidigo aga te sen bonogo dąų olama bidibadi te kibu be hauwa mu 1,000 bidai.
REV 20:3 Te ensel bidigo aga te page meni yai dedage aiyaba sąwai, tama te ugwadu paliai, tama bomonama e tų dąų walai. Tama tibaso, Satan agai te haniani tǫde we bidi augwali ili po ma ola magobeo. Agai te bodolu muani kibu be hauwa 1,000 te bolo silimainogo tonalueibao. Tama nosali augwaligo aga kalabuside bidali tagalama silibo side, tama pęwadage sogo aga menaba painogo ebaso da, te aga pomainao.
REV 20:4 Tama eno suali, te tuni bidi dulalubo nai meba elaluai, tama bidi meba te duabo naide duawai. Godigo augwalibolo te bidi dabe po tųde dagalobo kolesaga ebo sę yabo bomo mawai. Tama eno me suali, we bidi hauwa augwaligo konealubo po Jisasde dąų weyu, tama agai nogide po pusubo sę yai, tama tiyu Godigo po bomo elama tola sai. Te augwaligo agai nogide po pusubo sę ebaso, te boi bidi dabego augwali elama, mage togolama, augwali isai dao. Tama eno augwaligo noma bidi homu ogwa wai dabe suali. Tama tǫde bidibadi augwaligo te dwai genuai hudigi ebo hasabolo lotu po wasiąma bidibadi, te agai noma me, te augwaligo gebode me te nogode me te hudigi ebo hasago asęai dąį me sabeo. Te we bidi dabe augwali te bidibo ula ma selama, tama augwali Jisas dali tuni nigilama bidibadi te kibu be hauwa 1,000 bidai.
REV 20:5 (Te gasa isali we bidi dabe augwali bidibo ula te sogo sabeo. Augwaligo te bodolu mani kibu be 1,000 te bolo silimainogo tonalueibao.) Tama te sogo te hasia sogo mu te we bidi meba augwali te gų pagede ma hodaluali, te hasia sogo mu dao.
REV 20:6 Tama augwali te gų pagede hasia sogo hodalobo we bidi, augwali te wiegi yai homu pemene elama, te magi dwai sę isiąwai bidi tama tiyu, augwali bugagia bideibao. Tama te si wali isibo bomogo te bidi dabe augwali aiyaba me elalugobeo. Menio. Te augwali God de Krais sibolo lotu po weyu, sesemane sogo augwali sigo sę ebo pris bidi dabe bideibao. Tama augwali te Krais dali tuni bidi te hauwa kibu be mu te 1,000 bidaibao.
REV 20:7 Te nosali te kibu be 1,000 silibo side, teda te kalabus be tų palialuali te tų dabode, tama Satan aga te kalabus elaluali tagalaibao.
REV 20:8 Tama kalabus tagalama, tama aga buluba solama, agai te haniani tigidali digibulu tǫ pedaide bidibo we bidi hani augwaliba tibo po ola mena mena biligi paibao, te bidi hani me nogi Gok me Magok dao. Te Satango augwali deliba sisinama hwįmainogo yaibao. Tama augwaligo namba te nedebo te usu egobeo, te masigi kemi tiwai dao.
REV 20:9 Tama augwali te tigidali tǫ habu badu tedela pelama, tama augwaligo te Godigo we bidi hani dali, te Godigo godolo ebo hanu dali te bidibo digi pelama, augwaligo te we bidi dali te hanu dali bagulai. Tiali goli dagaludu sia tulaluyu, tama te boi bidi hani ami bidi dabe augwali siago mu dela silali.
REV 20:10 Tama te augwali ili po ola mani bidi Satan aga Godigo te genuai dedage pageba te posolo yai sia ula te masigi salfa teba sąwai dao. Tama te dedage pageba polobadu augwaligo te dwai hudigi ebo hasa dali, te ili po ola mani bidi si aba sąwai dao, tama augwali sela te siade me hulide me dene siyu, tama te dene ebo sesemane bidada pabo sogo te dene ela pidubadi bideibao.
REV 20:11 Te eno suali, genuai tedela yai te tuni bidi duabo nai elaluali, tama bidi te duabo naide dulaluai. Tama tǫ dali dagalu si te agade wi pali, tama augwaligo bulu ma elalugobeo. Menio. Augwali si mu silalio.
REV 20:12 Tama eno ma suali, te isai we bidi dabe augwali bidaluali, te augwali nogi yai bidi dali, te nogi meni yai bidi dabe dali, augwali te tuni bidi dulalubo nai te gesabidide dodolalubo, te eno suali. Tama te saide dulalubo bidi agai te buku meba dagawai. Tama agai gasa buku me deli dagawali, te augwali isiąma gamonaibao wali we bidi nogi asęani buku dao. Tama agai te tigidali isai we bidi dagalai. Agai te augwaligo yali kolesagade po te buku dabede asęani po nedama, tama te asęani pode agai augwali dagalali.
REV 20:13 Tama te tamu ąįde isali bidi tigidali te ma pedalali, tama te isibo kolesaga dali te isai bage osogo bidibo sao dedage page te side bidali bage augwali ma pedalali. Tama te po tų ebo bidi agai te tigidali deli deli bidi po tųde dagalali, te augwaligo yali kolesagade te sogo naga dagalai dao.
REV 20:14 Agai te isibo bomo dali, te isai bage osogo bidali madi dali si te genuai sia dabo dedage pageba aiyaba sąwai. (Te genuai dedage sia dabo elalubo te si wali isibo bomo dao.)
REV 20:15 Tama e po tų odobo bidi agai te gamonaibao wali we bidi nogi asęani buku nedeyu, tama niwai bidi agai nogi te bukude me elalusiąbaso da, teda agai te bidi te moni genuai sia dabo dedageba aiyaba te siade dene somainogo sąwai.
REV 21:1 Te po tų ela silama, tama nosali eno suali, gesi dagalu dali, gesi tǫ dali elaluai. Te hasia dagalu dali, te hasia tǫ dali, te tigidali pela silai. Tama te tamu ąį me te ma elalugobeo.
REV 21:2 Tama eno te wiegi yai magi dwai sę isiąwai hanu suali, te gesi hanu nogi Jerusalem dao. Eno te hanu te God dali bidibo suali, tama te hanu te dagalu tagalama, tama e tǫba dulali. Te gesi hanugo au dobage wiegi yai elaluali, te we aga bidi dali painogo aga wiegi yai au dobage sisi elama aga bidi dali painogo ebo tiwai ebo suali.
REV 21:3 Tama eno odali, po me deli te tuni bidi dulalubo digi pedauwalidu pedalama, tama i bomonama e tama wai, “Odao! Megi te God agai bidibo digi te bidi dabe augwali dali elalubao. Tama aga augwali tomode bidiyu, tama augwali agai we bidi bideibao. Awe, God aga digi te augwali dali bideibao.
REV 21:4 Tama agai augwaligo gedude elalubo gedu ąį omainogo deli deli hola sąwaibao. Tama te we bidi dabe augwali ma isigobeo, tama augwali homu sęgę ma isiąma, tama augwali gela weyu dene eyu ma egobeo. Tama te polobadu elaluali kolesaga tigidali pela silai dao,” te po wai.
REV 21:5 Tama te duabo wiegi yai naide dulalubo bidi, agai te po wai, “Megi eno te tigidali nai gesi noma pedalomainogo nigibao.” Tama agai po ma wali, “Nago e po asęąo. Magi baso meni, e po te mu po dao, tama tigidali bidigo e pode homu dąų olama, tama teba tiąlubo te usu yaibao,” te po wai.
REV 21:6 Agai enabolo te po ma wali, “Te sę tigidali pedela silalio! Ena da, ena digi te hasia bidaluali bidi dao, ena te nosali mu sogo bidalueibao wali bidi mu dao, te ena tigidali nai page bidi, tama eno ebo sę tigidali ela silibo dao. Tama niwai bidi aga te ąį nogone ebaso da, teda eno te bidibo ula sabo ąį te wę ulude selama tama agabolo olo mawaibao.
REV 21:7 Tama niwai bidi agai bomogo te dwai sę ebo kolesagago bomo aiyaba elalubo bidi, te bidi agai te tama siyu, tama ena agai God bidiyu, tama aga eno ogwa bideibao.
REV 21:8 Tiali goli te wi elama tama Godigo po wali pabo tagalabo homu eyu, ma geasa painogo ebo bidi dabe augwali me, te Godigo pode augwaligo homu dąų wasiąbo bidi augwali badi, te haniani dwai dwai kolesaga mu ebo bidi badi, tama te bidi ela mubo bidi, tama te penani kolesaga ebo bidi, tama te dwai pobi elalubo bidi dabe, tama tibo god dali lotu po wabo bidi, tama tigidali tibo po wabo bidi, te augwaligo sabo bulu te genuai posolo mu yai sia dabo dedage page masigi salfa teba bidigi paibao. Te isibo te si sogo wali isabo dao,” agai te po wai.
REV 21:9 Te ensel mobo bidi me deli enaba asai. Aga te a naga olama me badu nogo si wali te tomode ensel bidi te pou te a naga olama me badu si te bidi dolabo dwai nai elaluali pou dabe nogogo tolaluali, te bidi me deli dao. Te dwai sę ebo nai pedalabo sogo te nosali mu dao. Tama te ensel mobo bidigo enabolo te po wai, “Nage asao. Te eno nagebolo te Kibu Sipsip Waigo sabo we ola mawaibao, te we agai nosali mu saibao,” agai te po wai.
REV 21:10 Tama te po olama, tama agai eno noma bidi te genuai bobobage bulu du ugwaba mu tolasa holai. Tama agai enabolo te Jerusalem hanu ola mani, te wiegi yai magi dwai sę isiąwai hanu, aga te God dali bidai, tama dagalu tagalama e tǫba dulubo te eno suali.
REV 21:11 Godigo genuai bomo yai ula te hanude ula yai. Te ula te gasagi yai mu, te masigide genuai mone elalubo tiwai mu dao. Awe, te wiegi yai masigi nogi daimon tiwai, tama gegemani ebo, tama te ula hania mu ula yai.
REV 21:12 Te hanude te genuai masigigo nigai obo ugwanu mu yai elaluai dao. Te obode tų te nogo si olama te sągą badu si elalubo, tama te nogo si olama sągą badu si tama ensel mobo bidi augwali deli deli te tų deli deli pąde dolaluai. Tama te Israel hani nogo si olama sągą badu si nogi deli deli te tų deli delide asęai elaluali.
REV 21:13 Tama te hanu obode te giliga pedalobo te badu te obo tų sela elaluai. Tama sesege badu obo tų sela elaluai. Tama me sesege badu tų te sela elaluai. Tama te giliga ge dega sabo badu te obo tų sela elaluai.
REV 21:14 Te hanu obo page dąų walali moni masigi te nogo si olama sągą badu si elaluai, tama te nogo si olama sągą badu si bidi augwali te Kibu Sipsip Waigo po pusigi pabo sę bidi nogi te masigide asęai elaluai.
REV 21:15 Tama te ensel mobo bidi agai ena dali po wali bidi, agai te kapa golgo nigai dono te hanu usu sabo nai nogogo tolaluai, tama te usu nigo agai te obo me te obo tų dabe me usu sela sueinogo yai.
REV 21:16 Te genuai hanu usu sali te genuai mu yai. Te hanu tigidali badu usu sali, te tiwai si naga ususu si yali. Tama tigidali badu deli deli usu selama, tama te namba te 2,400 kilomita yai. Te hanu ugwaba yali bobage me te tigidali badu me, te tigidali tiwai si naga yali.
REV 21:17 Agai te hanu obo ugwaba bobage me usu sai, tama te obo usu sali aga bobobage te namba ugwaba mu holai te namba te 64 mita, te genuai mu. Te usu sabo nai te da bidi dabego usu sabo ni tiwai yai, tama te ensel bidigo te naigo naga te obo usu sai.
REV 21:18 Te hanu obo te wiegi yai masigi nogi jaspa te masigigo nigai. Tama te hanu te kapa nogi golgo naga nigidubadi, tama te ula te dula ula ebo tiwai yai.
REV 21:19 Te hanu obo page masigi dabe augwaligo te haniani genuai mone elalubo masigigo au ilai. Te hasia page masigi te wiegi yai masigi nogi jaspago au yali. Tama te si wali muani moni masigi te sisi yai wiegi yai masigi nogi sapaia te masigigo au yali. Tama te sela wali obo page masigi te tedela yai masigi nogi aget tego au yali. Tama te me si me si wali te masigi te ni yabe tiwai masigi emeral elaluali.
REV 21:20 Tama te a wali obo page genuai masigi te wiegi yai sadonikis masigigo au yali, te sadonikis masigi te mama yai dali te tedela yai dali dao. Te a naga olama me badu nogo deli te mama yai masigi konilian. Tama te a olama me badu nogo si te sewa yai masigi krisolait. Tama a olama me badu nogo sela wali te gasagi yai wiegi yai masigi te ni yabe tigi tiwai masigi beril. Te a olama me si me si te sewa yai masigi topas. Te nogo si wali masigi te krisopres, te me ni yabe tiwai me te sewa yai masigi dao. Te nogo si olama sągą badu deli wali te gasagi yai sisi yai masigi nogi haiasin. Tama te nogo si olama sągą badu si gasagi yai mama yai masigi nogi ametis masigi dao. Te obo page genuai masigi dabe augwali te tedali tedali wiegi yai masigigo tama tiwai au elama bidibo eno suali.
REV 21:21 Te nogo si olama sągą badu si obo tų te nogo si olama sągą badu si te tedela yai bis te wiegi yai mu dao. Tų me deli augwaligo te genuai bis mu me deligo naga nigai. Te tigidali hanude pabo tų te wiegi yai kapa golgo naga nigai, tama hania mu te glas tiwai yai eno suali.
REV 21:22 Eno te moni lotu be tempel me deli te hanude elalubo subeo. Magi baso meni. Genuai Bidi God, aga Tigidali Bomo Elalubo Bidi, aga dali te Kibu Sipsip Wai dali, augwali si digi te hanugo moni lotu be tempel tiwai dao.
REV 21:23 Tama te hanude te giliga dali polua si te sę esiąyu te ula ilibeo. Menio. Te God aga digi te genuai ulago te ula mabo dao. Tama te Kibu Sipsip Wai te aga te hanugo ula mabo lam sole dao.
REV 21:24 Tama tigidali tǫde bidi hani augwali te hanu ula ebode biliyu bidaibao. Tama haniani tǫde tuni bidi augwaligo nogi elalubo au dobage tigidali te hanu tomoba naga selasa asaibao.
REV 21:25 Tama siade augwaligo te hanugo obo tų dabe munu me paliagobeo, tama be hulia sabo te hanuba pedalogobeo.
REV 21:26 Tama tigidali tǫde bidi hanigo genuai nogi me, te ula yai bomo me, te tigidali te augwaligo te hanu tomoba naga sela paibao.
REV 21:27 Tiali goli, te dwai meda yai kolesaga ebo bidi te hanu tomoba pogobeo. Te haniani dwai kolesaga eyu, te tibo po weyu ebo bidi dabe, te hanu tomoba me pogobeo. Mu menio. Te Kibu Sipsip Wai agai te we bidi dabe meba augwali nogi te isisąma gamonaibao wali we bidi nogi asęani buku, te bukude augwali nogi asęani we bidi dabe augwali naga augwa te hanu tomoba pabo usu yaibao.
REV 22:1 Tama te ensel mobo bidigo pabo ąį me deli ena ola mawai, te bidibo ula mabo wę, tama te wę te dula ula mu gegemani ebo tiwai ula yai. Tama te ąį aga gomo, te God dali te Sipsip Wai augwali sigo tuni bidi duabo sai pagede te ąį gomo elalubao.
REV 22:2 Tama te ąį te duabo sai pagedu pedalama, tama te ąį te hanu moni pabo tų tomodu mu pabo dao. Te wę sesege u badu me, te wę sesege e badu, tede te bidabo ula mabo ni dabe elalubao. Te ni dabe augwaligo du walobo sogo te kibu be delide te nogo si olama sągą badu si sogo walobo dao. Te tigidali poluade walobo dao. Tama te ni yabego te tigidali tǫde we bidi hani augwali usu ilibo dao.
REV 22:3 Tama tigidali nai Godigo agabolo po hwa pabo po obaso, te nai te hanude ma elalugobeo. Te God dali te Sipsip Wai augwali sigo tuni bidi duabo sai te hanu tomode elalueibao, tama Godigo sę bidi augwaligo aga dali lotu po waibao.
REV 22:4 Tama augwaligo aga gesabidi sueibao, tama agai nogi augwali gebode asęnama elalueibao.
REV 22:5 Tama be ma hulia sogobeo. Tama te lam sole ulade me te giliga ulade me sę yali te sę ma elalugobeo. Menio. Genuai Bidi Godigo aga digi ula augwalibolo mawaibao. Tama augwali te sogo tuni bidi bidada peyu bidada paibao.
REV 22:6 Tama te ensel mobo bidigo enabolo te po wai, “Te nago asęani po tigidali, e po te mu po dao, tama tigidali bidigo e pode homu dąų olama tama teba tiąlubo te usu yaibao. Tama Genuai Bidi God agai po pusumainogo ebo bidigo homu noma bidi hodolomainogo agai aga Mobo Bidi te bidi dabebolo mabo dao. Tama megi agai aga ensel mobo bidi tagala palama, agai sę bidi tigidalibolo te tamadi pedalabo sęde po ola momainogo yai,” te ensel mobo bidigo enabolo te po wai.
REV 22:7 “Odao,” te Jisasgo te po wai. “Te ena dage bidibo madi tamadi asaibao. Tama niwai bidi me deligo agai te e bukude elalubo po wali peyu da, teda te bidi aga wiegi yai homu pemene yaibao.”
REV 22:8 Ena Jon, eno digi te po tigidali odai, tama te nai dabe tigidali eno suai dao. Eno odolama tama eno suai, tama enabolo te nai ola mani ensel mobo bidi sągą pąba eno kidu sugunama, tama agabolo eno lotu po wainogo yai.
REV 22:9 Tiali goli agai enabolo te po wali, “Nago tama tigio! Ena nage dali me, e naga ama dede dali, da deli sę naga ebo dao, augwali te Godigo po ola mabo bidi dabe dao. Tama ena e bukude po wali pabo tigidali bidigo deli sę ebo bidi dao. Nago lotu po God deli dali naga wao,” te ensel bidigo te po wai.
REV 22:10 Tama agai enabolo te po wai, “Te po nago e bukude asęani po, te nago geme dualama dąų wagio. Menio. Te po we bidigo nedemainao. Te bukude wali sę dabe yabo sogo te pąba yagasai dao.
REV 22:11 Tama te dwai kolesaga ebo bidi agai te dwai kolesaga mę ela pomainao. Bidigo dwai meda yai kolesaga ebo, te bidi agai te meda yai kolesaga mę ela pomainao. Tama te wiegi yai doloba pai kolesaga ebo te bidi, agai te wiegi yai doloba pai kolesaga mę ela pomainao. Tama magi sę me isiąma olo mu bidibo bidi, te bidi aga te sę me isiąma aga olo mu mę bidimainao,” te ensel mobo bidigo te po wai.
REV 22:12 Te Jisasgo te po wai, “Odao! Te ena tamadi asaibao. Tama eno te tigidali bidibolo maiabo nai sesaibao. Tama eno te tigidali we bidi deli deli augwalibolo wei ponomainogo, te augwa yali kolesaga te usu nama te tama tiaibao.
REV 22:13 Ena da, ena digi te hasia bididuali bidi dao, ena te nosali sogo mu bididueibao wai bidi mu dao. Ena naga te polasa mu peyu, te ena nosali mu eyu ebo bidi dao. Te ena tigidali nai page bidi, tama eno ebo sę tigidali ela silibo dao,” agai te po wai.
REV 22:14 Te we bidi augwaligo augwa ugwa we telabo bage, te we bidi augwaligo wiegi yai homu yao. Augwaligo te bidabo ula sabo nide te du sabo usu yaibao. Tama augwali te hanu tomoba pabo tųdu pabo usu yaibao.
REV 22:15 Tiali goli te dwai dwai kolesaga ebo bage, augwali te yowi dabe tiwai da, augwali me, te pobi po wabo bidi dabe me, te penani kolesaga ebo we bidi me, te bidi ela mubo bidi dabe me, te tibo god dali lotu po wabo bage, tama te ili po wabo kolesaga godolo eyu wali pabo bidi dabe, te dwai kolesaga wali pabo bidi dabe augwali te Godigo hanu bulu badu bidaibao.
REV 22:16 “Ena Jisas, eno digi eno mobo bidi dageba tagala palai, tama agai te eno po wali pabo we bidi hani dagebolo e po pusumainogo yai. Ena digi ena te polobadu bidai bidi Devit aga hani bidi wąį dao. Tama te kigamu mu pedalobo te genuai hǫ te ena dao,” agai te po wai.
REV 22:17 Te Godigo Mobo Bidi dali, te Kibu Sipsip Waigo we dali sigo te po obao, “Nage asao.” Tama e po odali we bidi tigidali augwaligo me te po wao, “Nage asao.” Tama te wę nogone ebo bidi, aga asomainao. Wę tuainogo ebo bidi, aga aselama, te bidabo ula mabo wę tuagasao, te Godigo agabolo olo mu mawaibao.
REV 22:18 Te ena te bidi Jon dao, tama te e bukude elalubo po, te nosali pedalabo sę po, te po odobo we bidi tigidali augwalibolo eno e bomo yai po megi obao. Niwai bidi me deli agai aga homu wali peyu, tama te gasa po e bukude wasiąwai po agai te po wadolobaso da, teda e bukude wali dwai bidi dolobo nai te Godigo te bidi dolomainogo te bidiba te dwai nai tagala palaibao.
REV 22:19 Me ma, bidi me deligo te e bukude elalubo po, te nosali pedalabo sę po, te po meba agai sela sąyu da, teda Godigo te agabolo maiabo sa muani nai sela sąwaibao. Tama tiyu, te bidigo te bidabo ula mabo nide te du sogobeo. Tama aga te dwai sę isiąbo wiegi yai hanude bidabo madi tede bidigobeo. Te nai side po e bukude elalubao.
REV 22:20 E tigidali sęde po pusali bidi megi agai te po obao, “Mu tama, te ena polo asaibao!” Awe, mu tama dao. Genuai Bidi Jisas, nage asao!
REV 22:21 Te eno homugo te Genuai Bidi Jisas agai da olo mu tau siyu te mabo wiegi yai kolesaga te dage tigidali dali bidao.
