﻿Amose.
9.
Na kati ya lumoni, mu talaka Mfumu ya kutelama na kiyokolo ya minkayulu mpe yandi vwandaka tuba: «Bula na makunzi ya yinzo, samu ti yinzo kuningana. Zenga yawu samu ti, yinzo kubwidila bawu nyonso na zulu ya bayintu. Bayina ke bikana, mu ke sala ti bawu kufwa na mbele ya mvita. Ata muntu ke kima mpe ata muntu ke vuuka. 
Kana bawu kwenda na yinsi ya bantu ya kufwa, mu ke kwenda baka bawu kuna. Ata bawu kwenda bumbama na dizulu, mu ke kulula bawu. 
Kana bawu kwenda bumbama na nsongi ya mongo ya Kaamele, mu ke sosa bawu mpe mu ke simba bawu. Kana bawu ke na kubanza ti bawu lenda kuvuuka na meso ya munu na kwenda bumbama na yisi ya maza ya mubu, mu ke tumisa nyoka ya maza na kwenda tatika bawu kuna. 
Kana bawu kwenda yekula banzutu ya bawu na bambeni mutindu bankole, mu ke tumisa ba kufwa bawu na mbele ya mvita. Mu ke kanga ve meso. Ya ke ve samu na kulakisa bawu bumbote, kasi samu na kutalisa bawu mpasi.» 
Kana Yave Mfumu, Nzambi ya binwani, me tula musapi na ntoto, ntoto ke bulumuka. Bayina nyonso ke zingaka na yawu ke kota na bufwidi. Ntoto nyonso ke nanguka mutindu maza ya nzadi ya Nile. Yawu ke kuluka mutindu maza ya nzadi ya Ngipiti. 
Nzambi tungaka yinzo ya yandi na dizulu. Yawu ke fukaka ntoto mutindu muludi. Yandi ke bokilaka maza ya mubu mpe yawu ke mwanganaka na ntoto nyonso. Nkumbu ya yandi kele Yave. 
Yave ke na kutuba: «Beno bantu ya Isayeli, na meso ya munu, beno kele ve mutindu mosi na bantu na Etyopi? Ni munu ve basisaka beno na Ngipiti, mutindu mu basisaka ba-Filiseti na yinsi ya Kafetole, mpe bantu ya Alame na yinsi ya Kile?» 
Yave Mfumu me sikika meso ya yandi na kintinu ya bantu ya masumu. Yandi me tuba mutindu yayi: «Mu ke mwangisa mpe ke zimbisa kintinu yango na ntoto. Kasi mu ke manisa ve na kumwangisa dikanda nyonso ya Yakobi. Ni Yave me tuba Yawu. 
Samu ti mu ke tumisa ti, na kati ya bayinsi nyonso, ba ningisa bantu ya Isayeli, mutindu ba ke yengisaka matadi na kiyengoso kondwa kubwisisa ata ditadi mosi yina me lutila fyoti. 
Bantu ya munu yina ke zingaka na masumu, bawu ke kufwa na mbele ya mvita, bawu yina ke tubaka ti: “Ve, bampasi yina nge kubikaka samu na beto ke kumina beto ve!” » 
«Na kilumbu yina, mu ke telemisa muleba ya Davidi yina me mwangana. Mu ke kanga mabulu ya yawu. Mu ke vumbula dyaka yawu. Mu ke yidika dyaka yawu mutindu yawu vwandaka ntete. 
Na yina, bantu ya Isayeli ke baka ndambu ya ntoto yina bikanaka na Edome mpe bayinsi nyonso bisika yina ba vwandaka sambila nkumbu ya munu. Ni munu Yave me tuba yawu, mpe ni munu ke sala ti yawu kusalama.» 
Yave ke na kutuba: «Na bilumbu yina ke na kwiza, ba ke manisa ntete ve na kuyonzika, kasi ntangu ya kukunda dyaka ke kuma. Ba ke manisa ntete ve na kukamuna bambuma ya vinu, kasi ntangu ya kukunda dyaka bambuma ke kuma. Na bilumbu yango, vinu ya malu-malu ke banda na kubasika na zulu ya myongo. Myongo nyonso ke fuluka na vinu. 
Mu ke bongisa dyaka luzingu ya Isayeli bantu ya munu. Bawu ke tunga dyaka bambanza yina mwanganaka. Mpe bawu ke zinga kuna. Bawu ke kunda bilanga ya bayinti ya vinu mpe bawu ke kunwa vinu ya yawu. Bawu ke sala bilanga mpe bawu ke kudya madya ya bilanga yango. 
Mu ke vutula bawu na ntoto ya bawu mpe ata muntu ke kukatula dyaka bawu na ntoto yina mu me pesa bawu. Ni Yave, Nzambi ya nge me tuba yawu.»
