﻿Amose.
8.
Mambu yina Yave Mfumu lakisaka munu na lumoni ni yayi: Mu talaka kitunga mosi yina vwandaka na bambuma ya kuyela. 
Yave tubaka: «Amose, yinki nge ke na kutala?» Mu vutulaka: «Mu ke na kutala kitunga mosi yina kele na bambuma ya kuyela.» Yave tubaka na munu: «Nsukunu me kuma, samu na Isayeli bantu ya munu. Mu ke tatamana dyaka ve na kulemvokila beno. 
Mikunga ya kyese yina ba ke yimbilaka na yinzo ya ntinu ke kuma mikunga ya mafwa. Bisika nyonso ke vwanda ya kufuluka na bamvumbi, mpe bisika nyonso ke vwanda swii!.» Ni Yave Mfumu me tuba yawu. 
Beno kuwa, beno bayina ke na kunyokola bantu ya mpamba. Beno bayina ke na kusosa na kumanisa na kufwa bamputu ya yinsi. 
Beno ke na kutuba: «Wapi ntangu mukembo ya bilumbu ya ntete ya ngonda ke manisa samu ti beto kuvutukila nswalu na kutekisa bambuma ya beto? Wapi ntangu Saba ke manisa samu ti beto kufungula basaki ya beto ya bambuma ya faline? Beto ke swengisa bitezolo, beto ke bwela bantalu ya bima, beto ke sadila bitezolo ya luvunu. 
Beto ke sumba bantu ya mpamba na mbongo, beto ke sumba bamputu na ntalu ya dipapa, beto ke tekisa mpe bambuma ya faline ya yimbi.» 
Yave me kudya ndefi na nkumbu ya nene ya Yakobi: «Mu ke zimbana ve ata dyambu mosi na mambu nyonso ya yimbi yina bawu salaka!» 
Ntoto ke ningana ve samu na yawu? Bantu nyonso ya yinsi ke kota ve na bufwidi? Yinsi nyonso ke nanguka mutindu maza ya nzadi ya Nile, yawu ke nanguka mpe ke kubwa mutindu maza ya nzadi ya Ngipiti. 
Yave Mfumu ke na kutuba: «Na kilumbu yina, mu ke zimbisa ntangu na ngunga ya midi mpe yinsi nyonso ke kuma mpimpa na kati-kati ya midi. 
Mu ke sala ti mikembo ya beno kukituka bantangu ya kyadi, mpe mikunga ya beno ya kyese kukuma mikunga ya kyadi. Mu ke sala ti bantu kulwata bangoto mpe bawu kukatula bansuki. Mu ke sala ti yinsi kukota na bufwidi mutindu kyadi ya lufwa ya mwana kaka mosi. Nyonso yayi ke vwanda mutindu kilumbu ya ndudi.» 
Yave Mfumu ke na kutuba: «Na bilumbu yina ke kwiza, mu ke fidisa nsatu na yinsi. Nsatu yina mu ke fidisa, ke vwanda ve nsatu ya madya to mpwila ya maza, kasi nsatu mpe mpwila ya kuwa mambu ya Yave. 
Bantu ke banda na kwendaka tambula kidi-kidi kubanda na sude tii na wesete, mpe katuka na node tii na esete, samu na kwendaka sosa mambu ya Yave, kasi bawu ke kuzwa yawu ve. 
«Na kilumbu yina, bantwenya mpe bandumba ya kitoko ke kufwa na mpwila ya maza. 
Bayina ke kudyaka ndefi na nkumbu ya nzambi ya luvunu ya mbanza Samaliya mpe ke tubaka: “na nkumbu ya nzambi ya nge Dane” mpe “na lulendo ya Beele-Seba”, bawu ke kubwa, bawu ke telama dyaka ve!» 
