﻿Amose.
3.
Beno kuwa mambu yayi, beno bana ya Isayeli, beno makanda nyonso yina Yave basisaka na Ngipiti. 
«Na kati ya makanda nyonso yina kele na ntoto, kaka ni beno mu me soola. Ni yawu yina, mu ke futisa beno yimbi nyonso yina beno salaka.» 
Bantu zole lenda kutambula nzila mosi, kana bawu me wisana ntete ve? 
Nkosi lenda kulooka na kati ya mfinda, kana yandi me kuzwa ve mbisi ya kudya? Mwana ya nkosi lenda kubasisa ndinga ya yandi, na kisika yina yandi ke lalaka, kana yandi me bwila kima ve? 
Ndeke lenda kukangama na mutambu, kana mutambu yango kele ve na kima ya kudya? Mutambu lenda kukwabuka kaka yawu mosi ata kubwila kima? 
Ba lenda sika mpungi na mbanza mpe ti, bantu kutekita ve na boma? Mpasi lenda kukota na mbanza kana yawu me katuka ve na sika ya Yave? 
Ya tsyelika, Yave Mfumu lenda sala ata dyambu mosi ve kana yandi me lakisa ntete ve mansweki ya yandi na bisyelo ya yandi, mimbikudi. 
Kana nkosi me duma, nani ke tala ve boma? Kana Yave Mfumu me zonza, nani ke manga na kubikula? 
Na kati ya bayinzo ya bamfumu kuna na mbanza Asedode mpe na kati ya bayinzo ya bamfumu kuna na yinsi ya Ngipiti, beno tuba mutindu yayi: «Beno vukana na zulu ya myongo ya Samaliya samu na kutala muvusu ya nene yina ke kuna mpe bankwamusu yina ke kuna.» 
Yave ke na kutuba: «Bawu zaba ve na kusadila mambu ya kusungama. Bawu ke fulusaka bayinzo ya bawu ya kitoko na bima yina bawu ke labaka mpe na bima yina bawu ke botolaka na bantu.» 
Ni yawu yina, Yave, Mfumu ke na kutuba: «Mitantu ke zunga yinsi, bawu ke mwangisa bibaka ya nge ya lukengolo. Bawu ke botola bimvwama nyonso yina kele na bayinzo ya bamfumu ya nge.» 
Yave ke na kutuba: «Mutindu muvungi ya mameme ke katulaka makulu zole to nsongi ya dikutu ya kibulu na yinwa ya nkosi, ni mutindu yina mpe ba ke vuukisa bantu ya Isayeli yina ke zingaka na Samaliya, bayina kele ya kulala na zulu ya bakiti mpe bamfulu ya kitoko ya mbanza Damase.» 
«Yave Mfumu, Nzambi ya Binwani, ke na kutuba: beno kuwa mpe beno kebisa dikanda ya Yakobi mutindu yayi: 
Kilumbu yina mu ke futisa bantu ya Isayeli yimbi ya bawu, mu ke mwangisa biyokolo ya minkayulu kuna na Betele. Mampoka ya biyokolo yango ya minkayulu ke zengana, mpe yawu ke kubwa na ntoto. 
Mu ke mwangisa bayinzo ya bamvwama, ya vwanda bayinzo ya ntangu ya madidi ya ngolo to bayinzo ya ntangu ya tiya. Mu ke zimbisa bayinzo yina ba bongisaka na meno ya nzawu. Bayinzo ya nene mpe ke mwangana!» Ni Yave me tuba yawu. 
