﻿Oseya.
5.
Beno banganga-Nzambi, beno kuwa dyambu yayi. Beno bantu ya Isayeli, beno sala keba. Beno bantu ya yinzo ya ntinu, beno fungula makutu. Beno bayina zolaka sala ti ludedomo kuvwanda, ni beno me kuma mutambu na bwala Misepa. Beno me kuma mpwasa, yina ba me tanda na zulu ya mongo ya Tabole. 
Bayina ke na kusadila yimbi, ke na kulutila na kusala yimbi. Munu, mu ke na kukubika kitumbu, samu na bawu nyonso. 
«Munu, mu zaba Efalayime, mpe Isayeli kele ve ya kubumbama na meso ya munu. Efalayime, kindumba yina nge me sala, yawu me sala ti, Isayeli kuvwanda dyaka ve ya kuvedila.» 
Mavanga ya bawu, ke na kukabikisa bawu na kuvutuka na Nzambi ya bawu samu ti, mpeve ya kindumba kele na bawu, mpe bawu zaba ve Yave. 
Kasi, lunangu ya bantu ya Isayeli ke na kufunda bawu. Bantu ya Isayeli mpe bantu ya Efalayime ke banda na kwendaka bula mabaku samu na masumu ya bawu mosi. Bantu ya Yuda mpe ke banda na kwendaka bula mabaku kintwadi na bawu. 
Bawu na bangombe ya bawu, na mameme, na bankombo, bawu ke kwenda sosa Yave, kasi bawu ke tala yandi ve. Yandi ke kuma ntama na bawu. 
Bawu me vwanda ve ya kukwikama na Yave, samu ti, bawu me buta bana na makangu. Ni yawu yina, kaka na ngonda mosi, bawu na bimvwama ya bawu ke mwangana. 
Beno sika mpungi na mbanza Ngibeya. Beno sika kulumenta na mbanza Lama. Beno sala milolo ya mvita na mbanza Bete-Avene. Nge Bezame, sala keba samu ti, mbeni kele na manima ya nge. 
Efalayime ke mwangana na kilumbu ya nsembolo. Mu ke na kuzabisa dyambu ya tsyelika na bifumba ya Isayeli. 
Bamfumu ya Yuda kele mutindu bantu yina ke sobaka bandilu. Mu ke dasukila bawu mutindu nyamba ya maza. 
«Efalayime ke na kunyokwama. Lufundusu me nika bawu samu ti, yandi vwandaka tatamana na kusadila mambu yina ntima ya yandi vwandaka zola. 
Mu ke vwanda mutindu makoko ya yintu, samu na Efalayime. Mu ke vwanda mutindu mputa ya kubola, samu na dikanda ya Yuda. 
Efalayime me tala kimbevo ya yandi. Yuda me tala mputa ya yandi. Efalayime me kwenda na yinsi ya Asili. Yandi me fidisa bantumwa na ntinu Yaleve. Kasi yandi ke lenda ve na kunyakisa beno, to kubelusa mputa ya beno, 
samu ti, mu ke vwanda mutindu nkosi samu na Efalayime. Mu ke vwanda mutindu nkosi ya ntwenya, samu na dikanda ya Yuda. Munu, mu ke pasula yawu. Mu ke kwenda na yawu, mpe ata muntu ke botola munu yawu.» 
«Mu ke kwenda ya munu. Mu ke vutuka na kisika ya munu, tii na ntangu yina bawu ke ndima yimbi ya bawu, mpe bawu ke sosa dyaka kizizi ya munu. Na bampasi ya bawu ya kulutila, bawu ke sosa munu.» 
