﻿Mikunga.
119.
Kyese na bantu yina kele ya kusungama na banzila ya bawu. Bawu ke tumamaka na Musiku ya Yave! 
Kyese na bantu yina ke tumamaka na bansalulu ya misiku ya Yave, mpe ke sosaka yandi na ntima nyonso! 
Bawu ke salaka ve mambu ya yimbi, bawu ke landaka banzila ya Yave. 
Yave, nge pesaka mambu yina bantu fwana kusadila, samu ti beto tumama na yawu na mbote nyonso. 
Bika ti nkadulu ya munu vwanda ya kusikama, samu na kusadila mambu yina Nzambi zola ti bantu sala. 
Na yina mu ke kufwa nsoni ve, na ntadisi ya bantumunu ya nge nyonso. 
Mu ke kembila nge na ntima ya kusungama, ntangu mu ke longoka banzengolo ya nge ya kulunga. 
Mu zola kusadila mambu yina nge zola, kubika munu ata fyoti ve! 
Wapi mutindu ntwenya lenda sala samu ti luzingu ya yandi vwanda ya kuvedila? Kaka na kutumamaka na mambu ya nge. 
Mu ke na kusosa nge na ntima ya munu nyonso, kubika ve ti mu zimbana nzila na kubika bantumunu ya nge ntama. 
Mu ke bumbaka mambu ya nge na kati ya ntima ya munu, samu ti mu sumuka ve na ntadisi ya nge. 
Nkembo na nge Yave! Longisa munu mambu yina nge zola ti mu sala! 
Yinwa ya munu ke na kutanga, banzengolo nyonso ya yinwa ya nge yina nge me tuba. 
Mu ke na nsayi ya kulanda bansalulu ya misiku ya nge, yawu kele mutindu mu me kuzwa bimvwama ya mutindu na mutindu. 
Mu ke na kuyindula na mambu ya nge yina bantu fwana kusadila, mpe mu ke na kutala nzila yina nge me tula na ntwala ya munu. 
Mu ke na nsayi mingi na kusadila mambu ya nge yina nge zola ti bantu sala, mu ke zimbana ve mambu ya nge. 
Sadila munu mambu ya mbote, munu kisyelo ya nge samu ti mu zinga mpe ti mu sadila mambu ya nge. 
Fungula meso ya munu, samu ti mu tala, mambu ya mbote ya Musiku ya nge. 
Mu kele nzenza awa na ntoto, kubumbila munu ve bantumunu ya nge. 
Ntima ya munu ke na kubaba na nsatu, yawu ke na kunata munu na kuzaba banzengolo ya nge ntangu nyonso. 
Nge me kebisa bantu ya lunangu, bantu yina kele ya kusiingwa, bawu ke na kukwenda ntama, bawu ke na kuzimbana bantumunu ya nge. 
Kuula munu na nsoni mpe na kuvweza yina ba ke na kuvweza munu, samu ti mu ke bumbaka bansalulu ya misiku ya nge. 
Ata ti bamfumu tubaka yimbi samu na munu, munu, kisyelo ya nge, mu ke na kuyindula mambu ya nge yina nge zola ti bantu sala. 
Bansalulu ya misiku ya nge ke yangidikaka munu, yawu kele bipesi-malongi ya munu. 
Mu me kuma pene-pene ya lufwa, kasi sala ti mu zinga mutindu kele nsilulu ya nge! 
Mu me lakisa nge ndyatulu ya munu, mpe nge me pesa munu mvutu, Longisa munu mambu ya nge yina nge zola ti bantu sala. 
Sala ti mu zaba nzila ya mambu ya nge yina bantu fwana kusadila, mpe mu ke na kuyindula samu na mambu ya nge ya ngitukulu. 
Mu ke na kudila na kyadi, telemisa munu mutindu nge tubaka yawu. 
Katula munu na nzila ya luvunu, mpe na bumbote ya nge, sala ti mu zaba Musiku ya nge. 
Mu me soola nzila ya butsyelika, mu ke na kulanda banzengolo ya nge. 
Mu me kangama na kusadila bansalulu ya misiku ya nge, Yave, kutalisa munu nsoni ve. 
Mu ke na kukima mbangu na kulanda nzila ya bantumunu ya nge, samu ti nge me fungula ntima ya munu. 
Yave, longisa munu nzila ya bansalulu ya misiku ya nge, samu ti mu sadila yawu tii na nsukunu. 
Pesa munu mayela, samu ti mu bumba Musiku ya nge, mu sadila yawu na ntima ya munu nyonso! 
Twadisa munu na nzila ya bantumunu ya nge, ya tsyelika, mu ke zolaka yawu. 
Sala ti ntima ya munu kukangama na kusadila bansalulu ya misiku ya nge, kasi na bimvwama ve. 
Balula ntalulu ya munu, samu ti mu kutala ve mambu ya mpamba. Sala ti mu landa banzila ya nge mpe mu zinga. 
Lungisa samu na munu kisyelo ya nge, mambu yina nge tubaka, samu na bayina ke zitisaka nge. 
Katula na ntwala ya munu nsoni yina ke na kutalisa munu boma, samu ti banzengolo ya nge kele ya mbote. 
Mu me zola kusadila mambu ya nge yina bantu fwana kusadila, sala ti mu zinga mutindu kele ludedomo ya nge. 
Yave, sala ti bumbote ya nge, kukuma tii na kisika yina mu kele. Vuukisa munu mutindu kele nsilulu ya nge. 
Na yina, mu ke lenda kupesa mvutu na muntu yina ke finga munu, samu ti mu ke na kukwikila na mambu ya nge. 
Sala ti ntangu nyonso mu zonza kaka butsyelika, samu ti mu ke na kukwikila na banzengolo ya nge. 
Mu ke sadila Musiku ya nge, bantangu nyonso ya mankululu. 
Mu ke tambula na kimpwanza nyonso, samu ti mu ke na kusosa banzengolo ya nge. 
Mu ke zonzila na yina me tadila mambu ya nge yina bantu fwana kusadila, na mantwala ya bantinu, mu ke vwanda ve na nsoni. 
Mu ke yangalala na bantumunu ya nge, mu ke zolaka yawu mingi. 
Mu ke nanguna maboko ya munu na bantumunu ya nge, mu ke zolaka yawu, mu zola kuyindula samu na bansalulu ya misiku ya nge. 
Bambuka moyo na mambu ya nge samu na munu, samu ti nge me pesa munu kivuvu, munu kisyelo ya nge! 
Mbombolo ya munu na kati ya mpasi, ni mambu yina nge tubaka samu ti mu zinga. 
Bantu ya lunangu vwandaka finga munu, kasi mu bikaka ve na kulanda Musiku ya nge. 
Yave, mu ke na kubambuka moyo na banzengolo ya nge ya bantangu ya ntama, yawu kele mbombolo ya munu. 
Mu kele na nkele ya kulutila samu na bantu ya yimbi, bawu ke mangaka Musiku ya nge. 
Na kati ya yinzo ya nge, kisika mu ke na kuzinga na bunzenza, bansalulu ya misiku ya nge me kuma mikunga ya munu. 
Yave, na mpimpa, mu ke na kubambuka moyo na Nkumbu ya nge, samu na kuzitisa Musiku ya nge, 
kutumama na mambu ya nge yina bantu fwana kusadila kele mambu ya kulunga samu na munu. 
Mu ke na kutuba: Yave, kikunku ya munu, ni kusadila mambu ya nge. 
Mu ke na kubondila nge na ntima ya munu nyonso, fwila munu kyadi mutindu kele nsilulu ya nge. 
Mu me yindula samu na luzingu ya munu, mu zola kutumama dyaka na bansalulu ya misiku ya nge. 
Mu ke lutisa ntangu ve, na nswalu nyonso, mu ke na kutumama na bantumunu ya nge. 
Bantu ya yimbi me kanga munu basinga, kasi mu ke zimbana ve Musiku ya nge. 
Na kati-kati ya mpimpa, mu ke telamaka samu na kukembila nge, samu na banzengolo ya ludedomo ya nge. 
Mu kele mpangi ya bayina nyonso ke zitisaka nge, mpe mpangi ya bayina ke sadilaka mambu ya nge yina bantu fwana kusadila. 
Yave, kukwikama ya nge me fuluka na ntoto. Longisa munu bansalulu ya misiku ya nge! 
Yave, mutindu nge tubaka yawu, nge ke na kusadila munu mambu ya mbote, munu kisyelo ya nge. 
Longisa munu mbote-mbote na kuswasikisa mpe kuvwanda na luzabu, samu ti mu me kwikila na bantumunu ya nge. 
Ntete mu tala mpasi, mu zimbanaka nzila, kasi ntangu yayi, mu ke na kusadila mambu yina nge tubaka. 
Nge kele mbote mpe nge ke salaka mambu ya mbote, longisa munu bansalulu ya misiku ya nge. 
Bantu ya lunangu ke na kuvunina munu mambu, kasi munu, na ntima ya munu nyonso, mu ke na kutumama na mambu ya nge yina bantu fwana kusadila. 
Bantima ya bawu kele ya kukangama mutindu mafuta, kasi munu, mu ke na kuyangalala na Musiku ya nge. 
Ya vwandaka mbote samu na munu na kutala mpasi, samu ti mu longoka bansalulu ya misiku ya nge. 
Samu na munu, Musiku yina ke na kubasika na yinwa ya nge, me lutila mfunu na mafunda ya bima ya wolo mpe palata. 
Maboko ya nge me yidika munu, yawu ke na kusala ti mu vwanda kaka ya kutelama, pesa munu mayela samu ti mu longoka bantumunu ya nge. 
Bayina ke zitisaka nge ke na kutala munu mpe bawu ke na kuyangalala, samu ti mu ke kwikilaka kaka na bansilulu ya nge. 
Yave, mu zaba ti banzengolo ya nge kele ya kudedama. Ni na kukwikama ya nge, nge me sala ti mu tala mpasi. 
Bika ti kukwikama ya nge kuvwanda mbombolo ya munu, mutindu nge zabisaka munu yawu, munu kisyelo ya nge. 
Fwila munu kyadi samu ti mu zinga, samu ti Musiku ya nge ke salaka nsayi ya munu! 
Sala ti bawu kufwa nsoni, bantu ya lunangu yina ke nyokolaka munu kondwa dyambu! Munu, mu ke na kuyindula mambu ya nge yina bantu fwana kusadila. 
Bika ti bantu kuvutuka na sika ya munu, bayina ke zitisaka nge, bayina zaba bansalulu ya misiku ya nge! 
Mu zola kutumama na mambu yina Nzambi zola ti bantu sala na ntima ya kusungama, samu ti mu kufwa ve nsoni. 
Mu me lemba na kuvingila mpulusu ya nge, mu ke na kukwikila na nsilulu ya nge. 
Meso ya munu me lemba na kuvingila bansilulu ya nge, mu ke na kukiyufula: «Wapi ntangu mu ke kuzwa mbombolo ya nge?» 
Ata ti mu kele mutindu diyuki yina ke na kukawuka na mulinga, mu me zimbana ve mambu yina Nzambi zola ti bantu sala! 
Bilumbu yikwa me bikana na munu na kuzinga dyaka, munu kisyelo ya nge? Wapi ntangu nge ke fundisa bantu yina ke na kukwamisa munu? 
Bantu ya lunangu me timuna mabulu na mantwala ya munu, yawu kele mbote ve samu na Musiku ya nge. 
Bantumunu ya nge nyonso kele ya tsyelika, bantu ke na kukwamisa munu kondwa dyambu: kwiza sadisa munu! 
Kaka ndambu bikanaka, ba zolaka kufwa munu, kasi munu, mu me bika ve na kutumama na mambu ya nge yina bantu fwana kusadila. 
Na kukwikama ya nge, sala ti mu zinga, samu ti mu sadila bansalulu ya misiku ya nge. 
Yave, bantangu nyonso, mambu ya nge ke zingilaka kuna na mazulu. 
Kukwikama ya nge ke zingilaka bambandu na bambandu. Nge me sikimisa ntoto yina nge yidikaka mpe yawu me vwanda na kisika ya yawu. 
Tii bubu yayi, bima nyonso ke na kuzingila samu na banzengolo ya nge. Ya tsyelika, yinza nyonso ke na kusadila nge. 
Kana Musiku ya nge vwandaka yangidika munu ve, mu zolaka kufwa na kati ya kyadi. 
Mu ke zimbana ata fyoti ve mambu ya nge yina bantu fwana kusadila, samu ti na yawu nge ke na kusala ti mu kuzinga. 
Mu kele ya nge, vuukisa munu. Ya tsyelika, mu ke na kusosa na kuzaba mambu ya nge yina bantu fwana kusadila. 
Bantu ya yimbi ke na kusosa na kufwa munu, kasi munu, mu ke na kulanda mbote-mbote bansalulu ya misiku ya nge. 
Mu ke na kutala nsukunu ya nyonso yina kele ya kulunga, kasi bantumunu ya nge ke na nsukunu ve. 
Mu ke zolaka mingi Musiku ya nge. Bilumbu nyonso mu ke yindulaka na yawu konso ntangu. 
Bantumunu ya nge ke na kupesa munu mayela kulutila bambeni ya munu, samu ti konso ntangu, mu sadila yawu. 
Mu me lutila mayela na bamfumu ya munu, samu ti, mu ke yindulaka bansalulu ya misiku ya nge. 
Mu me lutila biboba na mayela, samu ti mu ke tumamaka na mambu ya nge yina bantu fwana kusadila. 
Mu me manga na kulanda banzila ya yimbi, samu na kulanda mambu ya nge. 
Mu ke na kubika ve banzengolo ya nge, samu ti ni nge ke na kulonga munu yawu. 
Mambu ya nge kele kitoko na yinwa ya munu, yawu kele kitoko kulutila mafuta ya nyosi na ludimi ya munu. 
Mambu ya nge yina bantu fwana kusadila ke pesaka munu mayela, mpe mu ke yinaka mambu nyonso ya luvunu. 
Mambu ya nge kele mwinda na makulu ya munu, yawu kele nsemo yina ke kyenzolaka nzila ya munu. 
Mu me kudya ndefi, mpe mu ke sadila nsilulu ya munu, mu ke sadila banzengolo ya nge ya kudedama. 
Yave, mu kele na kati ya mpasi ya kulutila, sala ti mu zinga mutindu nge tubaka yawu. 
Mulemvo ya nge Yave, yamba lusambulu ya munu mutindu munkayulu, longisa munu banzengolo ya nge. 
Bantangu nyonso luzingu ya munu ke kaka na kati ya mpasi, kasi mu me zimbana ve Musiku ya nge. 
Bantu ya yimbi ke na kusadila munu mitambu, kasi munu, mu me bika ve na kutumama na mambu ya nge yina bantu fwana kusadila. 
Bansalulu ya misiku ya nge kele mvwilu ya munu ya bantangu nyonso. Yawu ke yangidika ntima ya munu. 
Mu pesaka ntima ya munu na kusadila mambu yina Nzambi zola ti bantu sala, bantangu nyonso tii na nsuka. 
Mu ke yinaka bantu yina, bantu yina ke sobaka mabanza ntangu nyonso, kasi mu ke zolaka Musiku ya nge. 
Nge kele kiswamunu ya munu, mpe kinwanunu ya munu yina ke kebaka nzutu. Kivuvu ya munu ke kaka na mambu ya nge. 
Beno kwenda ntama na munu, beno bantu ya yimbi! Kasi munu, mu ke landa bantumunu ya Nzambi ya munu. 
Sadisa munu, mutindu kele mambu yina nge me tuba, samu ti mu zinga, kusala ve ti kivuvu ya munu kufwa nsoni. 
Sadisa munu samu ti mu vuuka, samu ti bantangu nyonso, mu bika ve na kusadila mambu yina nge zola ti bantu sala! 
Nge ke bingisaka ntama, bantu yina ke tumamaka ve na mambu yina nge zola ti bawu sala, samu ti nyonso yina bawu ke salaka ke kaka luvunu. 
Nge ke katulaka na yinza, bantu nyonso ya ntima ya yimbi, ni yawu yina mu ke zolaka bansalulu ya misiku ya nge. 
Nzutu ya munu ke na kutekita na boma ya kulutila, mu ke na boma ya banzengolo ya nge. 
Mu ke sadilaka mambu ya kusungama mpe ya kudedama, kuyekula munu ve na maboko ya bayina ke kwamisaka munu! 
Sala ti mu zinga na buyenge, munu kisyelo ya nge, kubika ve ti bantu ya lunangu kukwamisa munu! 
Meso ya munu me lemba na kuvingilaka mpulusu ya nge, mpe nsilulu ya ludedomo yina nge tubaka. 
Sala na munu kisyelo ya nge mutindu kele kukwikama ya nge, longisa munu mambu yina nge zola ti mu sala. 
Mu kele kisyelo ya nge, pesa munu mayela, samu na kuzaba bansalulu ya misiku ya nge. 
Yayi ni ntangu samu ti nge Yave, nge tuba dyambu, samu ti bantu ke na kusafula Musiku ya nge. 
Ni yawu yina mu ke zolaka bantumunu ya nge, kulutila wolo, wolo ya mbote. 
Ni yawu yina na mambu nyonso, mu me tala ti mambu nyonso ya nge yina bantu fwana kusadila kele ya kusungama, mu ke yinaka mambu nyonso ya luvunu. 
Bansalulu ya misiku ya nge kele mbote mingi, ni yawu yina mu ke tumamaka na yawu. 
Luzabu ya mambu ya nge ke kyenzolaka, yawu ke pesaka mayela na bantu yina zaba mingi ve. 
Mu me fungula yinwa ya munu na nsayi nyonso, samu ti mu ke na nsatu ya bantumunu ya nge. 
Baluka na sika ya munu, mpe sadila munu bumbote ya nge, mutindu kele banzengolo ya nge samu na bantu yina ke zolaka Nkumbu ya nge! 
Bika ti mambu ya nge kusyamisa makulu ya munu, kubika ve ti yimbi kuyala luzingu ya munu. 
Kuula munu na maboko ya bantu yina ke kwamisaka munu, samu ti mu tumama na mambu nyonso ya nge yina bantu fwana kusadila. 
Kyenzola kizizi ya nge na munu, kisyelo ya nge. Longisa munu mambu ya nge yina nge zola ti mu sala. 
Mansangasa ke na kubasika na meso ya munu mutindu mwila, samu ti bantu ke na kusadila ve Musiku ya nge. 
Yave, nge kele ya kudedama, banzengolo ya nge kele ya kusungama. 
Nge tulaka bansalulu ya misiku ya nge na ludedomo, mpe na kukwikama nyonso. 
Kimbanda ya munu ya kulutila me sala ti mu kondwa dyambu ya kutuba, samu ti mitantu ya munu me zimbana mambu ya nge. 
Mambu ya nge nyonso kele ya kuvedila, munu kisyelo ya nge, mu ke zolaka yawu. 
Mu kele ya kukonda mpe ba ke na kuvweza munu, kasi mu me zimbana ve mambu nyonso ya nge yina bantu fwana kusadila. 
Ludedomo ya nge kele ludedomo ya bantangu nyonso, Musiku ya nge kele butsyelika. 
Mpasi mpe manyongo me simba munu, bansalulu ya misiku ya nge ke yangidikaka munu. 
Bantangu nyonso, mambu ya nge yina nge zola ti mu sala kele ya kudedama, pesa munu mayela samu ti mu zinga. 
Mu ke bokilaka nge na ntima ya munu nyonso, Yave, pesa munu mvutu, samu ti mu tumama na mambu ya nge yina nge zola ti mu sala. 
Mu ke bokilaka nge, vuukisa ya munu, samu ti mu tumama na mambu ya nge yina nge zola ti mu sala. 
Mu ke bokilaka nge ntete ntangu kubasika, mu me tula kivuvu ya munu na bansilulu ya nge. 
Mu ke fungulaka meso ya munu ntete bwisi kutsya, samu na kuyindula mambu yina nge me tuba. 
Nge kele mbote Yave, kuwa munu, sala ti mu zinga mutindu kele banzengolo ya nge. 
Bawu ke na kubelama na munu, bayina ke vwandaka na mabanza kaka ya kufwa bantu, bawu ke na kutumama ve na Musiku ya nge. 
Nge, Yave, nge kele pene-pene na munu, bantumunu ya nge kele butsyelika. 
Katuka ntama mu zaba ti, bansalulu ya misiku ya nge kele ya bantangu nyonso. 
Tala mpasi ya munu, mpe kuula munu, samu ti mu me zimbana ve Musiku ya nge. 
Nwanina munu mpe vwanda kikuudi ya munu, sala ti mu zinga mutindu kele mambu yina nge tubaka! 
Mpulusu kele ntama na bantu ya yimbi, samu ti bawu ke sosaka ve na kuzaba mambu ya nge yina nge zola ti bawu sala. 
Yave, nge kele Nzambi ya kyadi ya kulutila! Sala ti mu zinga mutindu kele banzengolo ya nge. 
Bantu yina ke na kukwamisa munu, mpe mitantu ya munu kele mingi, kasi mu ke bika ve na kulanda bansalulu ya misiku ya nge. 
Mu ke na mpasi na ntima na kutala bantu yina me manga nge, bawu ke na kutumama ve na bandongosolo ya nge. 
Yave tala, mu ke zolaka mingi mambu nyonso ya nge yina bantu fwana kusadila, sala ti mu zinga mutindu kele kukwikama ya nge. 
Na ntete-ntete, mambu ya nge kele butsyelika, mpe banzengolo ya nge ya kudedama kele ya bantangu nyonso. 
Bamfumu ke na kukwamisa munu kondwa dyambu, kasi ntima ya munu ke kaka na boma ya mambu ya nge. 
Mu ke na nsayi samu na mambu yina nge me tuba, mutindu muntu yina me kuzwa kimvwama na manima ya kununga mvita. 
Mu ke yinaka luvunu, mu ke talaka yawu nganzi, kasi mu ke zolaka Musiku ya nge. 
Mu ke kembilaka nge bambala nsambwadi na kilumbu, samu na banzengolo ya ludedomo ya nge. 
Kizunu ya kulutila kele samu na bayina ke zolaka Musiku ya nge, ata mpasi lenda sala ti bawu kubwa. 
Yave, mu me tula kivuvu ya munu na mpulusu ya nge, mpe mu ke sadilaka bantumunu ya nge. 
Mu ke landaka bansalulu ya misiku ya nge, mpe mu ke zolaka yawu mingi. 
Mu ke tumamaka na mambu ya nge nyonso yina bantu fwana kusadila, na bansalulu ya misiku ya nge, ya tsyelika, nyonso yina mu ke salaka, nge ke talaka yawu. 
Yave, bika ti kulooka ya munu kukuma tii na sika ya nge! Pesa munu mayela mutindu nge tubaka yawu! 
Bika ti kubondila yina mu ke na kubondila nge kukuma tii na sika ya nge! Kuula munu mutindu nge tubaka yawu! 
Bika ti bikoba ya munu kusamuna mikunga ya nzitusu, samu ti nge ke na kulakisa munu mambu ya nge yina nge zola ti mu sala. 
Bika ti yinwa ya munu kuwakisa mukunga, samu na kupesa mvutu na mambu ya nge! Ya tsyelika, bantumunu ya nge nyonso kele ya kudedama. 
Bika ti diboko ya nge kusadisa munu, samu ti, mu me soola mambu ya nge nyonso yina bantu fwana kusadila. 
Yave, mu zola ti nge vuukisa munu, Musiku ya nge ke yangidikaka munu. 
Bika ti mu zinga samu na kukembilaka nge! Bika ti banzengolo ya nge kusadisa munu. 
Mu ke na kudyengila mutindu dimeme yina me zimbana: Sosa munu, munu kisyelo ya nge, samu ti mu me zimbana ve bantumunu ya nge! 
