﻿INtumi iNyinza ɨya Yeesu Kilisiti anza she yisimbiilwe nu Mataayi.
1.
Ɨga ge mataawa aga shɨkholo sha Yeesu Kilisiti we áfumile mʉ shɨkholo sha mwene uDaudi nu Abulahaamu. 
UAbulahaamu ámupaapile uIsaaka, uIsaaka ámupaapile ʉYaakobo, ʉYaakobo ámupaapile ʉYʉʉda na bhakhambakʉ bhaakwe. 
ɄYʉʉda ámupaapile uPeleesi nʉ Zeela kwa Tamaali. UPeleesi ámupaapile uHezelooni, uHezelooni ámupaapile uLaami, 
uLaami ámupaapile uAminadaabu, uAminadaabu ámupaapile uNaashoni, uNaashoni ámupaapile uSalimoni, 
uSalimoni ámupaapile uBoazi kwa Lakhabho, uBoazi ámupaapile uObedi kwa Lʉʉtɨ, uObedi ámupaapile ʉYeese, 
nʉ Yeese ámupaapile ʉmwene uDaudi. UDaudi ámupaapile uSelemaani kwa mwantanda we áamɨle mʉshɨ wa Uliya. 
USelemaani ámupaapile uLehoboamu, uLehoboamu ámupaapile uAbiya, uAbiya ámupaapile ʉAsa, 
ʉAsa ámupaapile uYehoshafati, uYehoshafati ámupaapile uYoolamu, uYoolamu ámupaapile uUziiya, 
uUziiya ámupaapile uYootamu, uYootamu ámupaapile uAhazi, uAhazi ámupaapile uHezekiya, 
uHezekiya ámupaapile uManaasi, uManaasi ámupaapile uAmoni, nu Amoni ámupaapile uYoosiya. 
UYoosiya ámupaapile uYekoniya na bhakhambakʉ bhaakwe kʉ khabhalɨlo khe abhantʉ abha ku Babeeli bhábhalemile aBhaisilaeli na kʉbhala nabho mʉ nsɨ yaabho. 
Khabhɨlɨ we bhasogola mu Babeeli, uYekoniya ámupaapile uShealitiyeeli, uShealitiyeeli ámupaapile uZelubabeli, 
uZelubabeli ámupaapile uAbihuudi, uAbihuudi ámupaapile uEliakimu, uEliakimu ámupaapile uAzooli 
uAzooli ámupaapile uSadoki, uSadoki ámupaapile uAkimu, uAkimu ámupaapile uEliyuudi, 
uEliyuudi ámupaapile uEliazali, uEliazali ámupaapile uMaatani, nu Maatani ámupaapile ʉYaakobo. 
ɄYaakobo ámupaapile uYoosefu ʉmʉlʉme wa Maliya, unyina wa Yeesu, we ɨtaawa lyakwe wu Kilisiti. 
Pe kufuma kwa Abulahaamu paka kufikha kwa mwene uDaudi kwámɨle ni vipaafi ishumi na vini. Khabhɨlɨ kufuma kwa Daudi paka kufikha mʉ khabhalɨlo khe abhantʉ abha ku Babeeli bhábhasamwizye aBhaisilaeli mʉ nsɨ yaabho, kwámɨle ni vipaafi ishumi na vini. Khabhɨlɨ kufuma mʉ khabhalɨlo khe bhábhasamwizye paka kufikha kʉpaapwa kwa Kilisiti, kwámɨle ni vipaafi ishumi na vini. 
Kʉpaapwa kwa Yeesu Kilisiti kwámɨle anziishi: uMaliya unyina waakwe ázinjiliilwe nu Yoosefu. Ɨleelo we bhashɨɨlɨ kwegana, uMaliya akhalolekha kʉtɨ alɨ pa wumwamu, we áwaajile kʉ makha ga Mupepu uMufinjile. 
Ɨleelo kʉnongwa ye uYoosefu, ʉmʉsakhaala we ámuzinjiiye uMaliya áamɨle mugolosu, atakhanzaga kʉtɨ amʉsʉʉpɨzye uMaliya. Pe akhasɨɨbha kʉtɨ amʉleshe kukwilu. 
We asɨɨbha zɨnɨɨzyo, ʉkhabhɨzya wa Mwene akhamwɨnzɨla mu njozi. Ʉkhabhɨzya wʉnʉʉyo akhamʉbhʉʉzya akhatɨ, “We Yoosefu, ʉwa shɨkholo sha mwene uDaudi, ʉtogopaje kʉmwega uMaliya, kʉnongwa ye uwumwamu we alɨ nawo awaajile kʉ makha ga Mupepu uMufinjile. 
Akhayɨpaapa ʉmwana ʉmʉsakhaala, ukhayimwita ɨtaawa kʉbha wu Yeesu, kʉnongwa ye akhayɨbhapokha abhantʉ bhaakwe mu mbiibhi zyabho.” 
Zɨnɨɨzyo zyonti zyábhombeshile shɨnɨɨsho ɨnga lɨkwɨle izwi lye ʉMwene álilonjile kwɨ dala ɨlya mukuwi waakwe kʉtɨ, 
“Yeenya! Ʉmʉlɨndʉ we atabhalile naalumo nʉ mʉsakhaala, atɨbhe pa wumwamu. Khabhɨlɨ akhayɨpaapa ʉmwana ʉmʉsakhaala! Pe bhakhayimwita ʉmwana wʉnʉʉyo ɨtaawa ɨlya Manweli.” Kwe kʉtɨ, “ɄMʉlʉngʉ alɨ peeka nɨɨtwe.” 
Pe uYoosefu we adaamʉkha, akhabhomba anza she ʉkhabhɨzya wa Mwene ámulajiziizye, akhamwega akhabha mʉshɨ waakwe. 
Ɨleelo atábhalile naalumo nawo paka we uMaliya akhapaapa ʉmwana ʉmʉsakhaala. Pe uYoosefu akhamwita ʉmwana wʉnʉʉyo ɨtaawa ɨlya Yeesu. 
