GEN 1:1 Wuupaceroni Nluku hopattusa irimu ni itthaya.
GEN 1:2 Ilapo yaari yoohinnanna ni yoohitthu; ipiphi yahokhuneela ipahari ni Nnepa wa Nluku wanaweettakaca waculu maasi.
GEN 1:3 Ni Nluku aheera: Ukhale waarya, ni uhokhala waarya.
GEN 1:4 Nluku ahoona wiira waarya uri wooreera, phimaana ahokawaniha waarya ni ipiphi.
GEN 1:5 Nluku aheehana waarya nwe uthana, nuuripela nwe aheehana uhiyu. Wahela nuusa; nno naari nihuku noopacera.
GEN 1:6 Wahoolo Nluku aheera tho: Iriyari yo maasi nikhale nlaka ninhala ukawaniha maasi wawaya wawaya.
GEN 1:7 Vano Nluku ahopanka nlaka ni ahokawanihaca maasi yari vathi ni ale yaari uculu. Ni commo waheerannyaa.
GEN 1:8 Nlaka nno Nluku aheehana irimu. Waheela nuusa; nno naari nihuku nonayeeli.
GEN 1:9 Vaavale Nluku aheera: Maasi ari vathi waya irimu, athukumane nipuro nimoca, ikhale itthaya yowuuma. Ni commo waheerannyaa.
GEN 1:10 Mphantte wo wuuma Nluku aheehana itthaya, ni nthukumano wo maasi aheehana ipahari. Ni Nluku ahoona wiira wari wooreera.
GEN 1:11 Vano Nluku aheera: Itthaya yothene ikhuneeliye ni itakhwa, maphumpulu ni miri cimmaha mihokorokho ni ipyo co khula nnanna. Ni commo waheerannyaa.
GEN 1:12 Itthaya yahomela itakhwa yaarina maphunpulu o khula nnanna. Ni miri cowiima cavaha inuku co khula nnanna. Nluku ahoona wiira wari wooreera.
GEN 1:13 Waheela nuusa; nno naari nihuku noneeraru.
GEN 1:14 Nluku aheera: Cikhale imwaleelo wirimu wiira cikawanihe uthana ni uhiyu. Wiira cikhale cennyo nthoonyero wo ukati, mahuku ni myakha,
GEN 1:15 ni cikhale coomwaleela wirimu ni vathi. Ni commo waheerannyaa.
GEN 1:16 Nluku ahopanka imwaleelo piili cuulupale; imwaleelo yuulupale iyo wiira ilamulele uthana ni yankani iyo wiira ilamulele uhiyu. Ciicammo ahopanka itthoottwa cinci.
GEN 1:17 Nluku aheesa cennyo wanlakani no wirimu wiira cimwaleele itthaya,
GEN 1:18 cilamulele uthana ni uhiyu, ni cikawanihe waarya ni ipiphi ni Nluku ahoona wiira wari wooreera.
GEN 1:19 Wahovira ucoocilo ni wicisu; nno naari nihuku noneecese.
GEN 1:20 Ciicammo Nluku aheera: Mmaasini mmo akhale makoto onama coomumula, ni iriyariru irimu ni itthaya avaave asaanuni.
GEN 1:21 Commo Nluku ahopattusa inama cuulupale co mpahari ni inama cikhwawe coomumula cinkhala mpharya co khula nnanna, ni asaanuni othene o khula nnanna. Ni Nluku ahoona wiira wari wooreera.
GEN 1:22 Vano Nluku ahoreeriha eeraka: Ntotholane ni muncereranyee! Ncare mmasini o mpahari! Ni inuni citotholane vathi va!
GEN 1:23 Waheela nuusa; nno naari nihuku noneethanu.
GEN 1:24 Ni vaavale Nluku aheera: Itthaya ikhale inama cikumi co khula nnanna; nhuwo ni inama contakhwani ni masene o mwiilaponi, o khula nnanna. Ni commo waheerannyaa.
GEN 1:25 Nluku ahopanka masene o khula nnanna, nhuwo wo khula nnanna, ni inama cineepurula co mwiilaponi co khula nnanna. Ni Nluku ahoona wiira wari wooreera.
GEN 1:26 Vano Nluku aheera; nimpanke ntthu oolattana ni hi ni ookhala toko hii. Uyo alamulele ihopa cothene co mpahari, inuni cothene co wirimu ni inama cothene cuulupale co mwiilaponi, ni inama cothene cikani cineepurula vathi.
GEN 1:27 Nluku ahompattusa ntthu oonlattana naawe oolattana ni Nluku ahompattusa; nlopwana ni nthiyana phaapattusilyawe.
GEN 1:28 Nluku ahaareerihaca, ni aheerelaca: Ntotholane ni muncereranyee! Ncare ni mmwareele ilapo yothene! Nlamulele ihopa cothene co mpahari, inuni cothene co wirimu ni inama cothene cineetta vathi.
GEN 1:29 Nluku aheera tho: Kinawuuvaha miri cothene cowiima cimenle ilapo yothene ni cinvaha ipyo, ni miri cothene cinvaha mihokorokho ni inuku. Cennyo cinwookhala coolya cinyu.
GEN 1:30 Ni kinawuvahani mataakhuru othene wiira akhale yoolya eenyu mpaka ciicammo inama cothene cirina ukumi: inama cothene cuulupale co mwiilaponi, ni inuni cothene co wirimu ni inama cothene cineettakaca ilapo yo vathi. Ni commo waheeranya.
GEN 1:31 Phimaana Nluku hoona wiira citthu cothene cipankilyawe, ciri cooreera venci cinenne. Wahela nuusa; nno naari nihuku nonasiita.
GEN 2:1 Commo, cahomala upankiya irimu ni itthaya ni citthu cothene ciriwo.
GEN 2:2 Nluku namalihilene uvara miteko cothene carinawe, nihuku noonasaapa ahomumula.
GEN 2:3 Nluku ahoreeriha nihuku nonasaapa ni ahottakattifiha, kontha nenno nihuku nno ahomumulela miteko cothene cavanryawe waapattusawe ilapo.
GEN 2:4 Nnya phicookhumelela cinttonka cinryaya woopattusiya irimu ni itthaya, ukati Apwiya Nluku waapattusilyaya itthaya ni irimu.
GEN 2:5 Naari nihinamela niphumpulu, ni hata mwiri mmoca mwiilaponi, kontha Apwiya Nluku yaari ahinawaana ipula ilapo yothene yo vathi, ni ciicammo khaariwo ntthu oolima itthaya iyo.
GEN 2:6 Maasi yanacekuwa vathi phimiceraka ilapo yothene.
GEN 2:7 Vano Apwiya Nluku yahomuumpa ntthu ni ntthupi notthaya ni yahommucelela mphulani iphumu cookumi, ni ntthu ule ahothatuwa nkumi.
GEN 2:8 Vaavale, Apwiya Nluku yahopanka iluwani yo Eeteni yaari mphantte unkela ncuwa, ni yahomweesa ntthu yampankilyaya.
GEN 2:9 Wahoolo, Apwiya Nluku yahomeliha itthaya yothene miri co khula nnanna, cooreera wa miithoni ni coociva ulya. Ni wariyari iluwani wahaawo mwiri wookumi ni mwiri nkina uncuweliha yooreera ni yoonanara.
GEN 2:10 UEeteni wahophattuwa mooloko waamicera iluwani. Ni uhoolo nwo wahekawanihaca nuukhala myoloko micese.
GEN 2:11 Mooloko woopacera uyo uneehaninya Pisomi. Uvinre ilapo yothene yo Havila, uri iwooru.
GEN 2:12 Iwooru yo yeeyo ilapo iyo iri yooreera; ciicammo, wonwo haawo lumpani ni maluku ocaayira.
GEN 2:13 Wonayeeli uvinre ilapo yothene yo Kuusi uneehaninya Kihoni.
GEN 2:14 Woneeraru uvinre mphantte unkhuma ncuwa weemelaka ilapo yo Usiiriya, uneehaninya Tikire; ni woneecese uneehaninya Ufarati.
GEN 2:15 Apwiya Nluku yahomweesa ntthu iluwani yo Eeteni wiira awehawehe ni alime.
GEN 2:16 Vano Apwiya Nluku yahonlamulela ntthu yiiraka: Ulyeeke wootthunawaa mihokorokho cothene ciri nluwani mmo,
GEN 2:17 nanso uhilye nhokorokho wo mwiri uncuweliha yooreera ni yoonanara, kontha nihuku ninhalaa ulya, khweeli unaakhwa.
GEN 2:18 Wahoolo, Apwiya Nluku yahoolumaca yiiraka, khawanreera nlopwana ukhala veekha. Kinaampankela oonkavihera wiira amwiiwanane.
GEN 2:19 Vano noompileene itthaya ni inama cothene co ntakhwani, ni asaanuni othene ooculu, Apwiya Nluku yahomwiihera nlopwana ule, wiira amoone caahalawe wiihana, ni wo khula ncina nivahilyawe nlopwana, khula itthu yoomumula, nenno phiri ncina naya.
GEN 2:20 Phimaana nlopwana ule hovaha macina mihuwo cothene, asaanuni ooculu ni inama cothene contakhwani. Nanso Attamu khaaphwannye oonkavihera wiira amwiiwanane.
GEN 2:21 Vano Apwiya Nluku yahonvaha ikhove cinci nlopwana ule, ni waarupawe vaa yahonkumiha niparari nimoca nuuttiya nenno nipuro nno ni ithayi.
GEN 2:22 Niparari nakumihiyawe nlopwana ule, Apwiya Nluku yahompanka nthiyana nunrwehela nlopwana.
GEN 2:23 Vano nlopwana aheera: Khweeli nna nikhuva no makhuva aka ni ithayi yothayi aka! Ula nohala wiihaninya nthiyana, kontha khumile mwa nlopwana.
GEN 2:24 Phimaana nlopwana haana aahiyaka athumwane ni anumwane aluttaanaka na amwaarawe, ni oyeeli ankhala irutthu imoca.
GEN 2:25 Nlopwana na amwaarawe yaakhalaca woohiwara nanso khayoonelana ihaaya.
GEN 3:1 Yooyo ukati uyo inwaa phaari yotepa ulavilavi wopwaha cikhwamwe capankilyaya Apwiya. Inwaa yahaakoha athiyana yiiraka: Nluku phinryawe ciicammo, wiira nhilye mihokhorokho cothene ciri nluwani?
GEN 3:2 Vano athiyana yahaakhula yiiraka: Mihokhorokho co miri ciri nluwani niireliye nilyeke,
GEN 3:3 nanso nhokhorokho wo mwiri uri iriyari iluwani, Nluku eenre nhilye, ni nhikwanyakwanye wiira nhikwe.
GEN 3:4 Vano inwaa yaheerela athiyana ale: Khweeli khannokhwa.
GEN 3:5 Kontha Nluku naacuwela wiira, nihuku ninhaleenyu ulya, anawuuhulyani miitho enyu nuukhala toko Nluku, nuupacera ucuwela yooreera ni yoonanara.
GEN 3:6 Woonyaya athiyana wiira mwiri ule uri wooreera ulya ni woociva wamiithoni, ni mwiri woophwanela uvaha ankhili, yahorukula nhokorokho aya ni ulya, ni ciicammo yahaavaha awaanyaya nayo yaholya.
GEN 3:7 Phimaana oyeeli yahotthukuwa miitho aya ni yahopacera ucuwela wiira ari phwitipwiti. Yahottotthanihaca matakhuru o mwiri ni yahowaraca.
GEN 3:8 Watthekuwaya ncuwa, yaheewa uwuka wophyoo wawaaya Apwiya Nluku weettakaca nluwani. Vano nlopwana wamoca na amwaarawe yaheepitthaca Apwiya Nluku mmirini co nluwani.
GEN 3:9 Vaavale Apwiya Nluku yahomwiihana nlopwana ule yiiraka: Uri vayi?
GEN 3:10 Ule ahaakhula: Kihowiiwa uwuka wophyoo yawinyu nluwani, vano mi kihoova, kontha kiri pwitipwiti phimaana wiipithilyaka.
GEN 3:11 Ni Nluku ahonkoha: Tipani uthonyenre wiira uri pwitipwiti? Uholya nhokhorokho wo mwiri uwirenlyaka wiira uhilye?
GEN 3:12 Vano nlopwana ule ahaakhula eeraka: Athiyana akivahilyaa ayo wiira akhale nkhwaaka, yaayo phikivahile mi nhokorokho uyo, ni kiholya.
GEN 3:13 Apwiya Nluku yahaakoha athiyana ale: Nyu mpankacenreni ciicammo? Athiyana ale yahaakhula yiiraka: Inwaa phikithepile, ni mi kiholya.
GEN 3:14 Phimaana Apwiya Nluku yaheerela inwaa: Upanka waa commo, kihoolapha woopwaha mihuwo cothene ni inama cothene co ntakhwani, unhala weettela wamirimani, ni yoolyaa inhala ukhala ntthupi mahuku othene ookumi aa.
GEN 3:15 Ni wariyari waa we ni athiyana ayo, ni wariyari wo ucuulu aa we ni ucuulu wa nthiyana uyo, kinaweesa umwiinani. Yooyo ucuulu uyo unaahala wuurakaliha muru we, ni we unkoorakaliha ikottokottho aya.
GEN 3:16 Vano Apwiya yaheerela athiyana ale: Kinawuuncerera coowerya cinyu ukati unkeelenyu ukhala ni irukulu; ni ukati wooyara nnokowoona uwerya; nyu nnokoophavela waapwaha awannyu nanso ayo phinhala wuulamulani.
GEN 3:17 Vano Apwiya yahomwiirela Atamu: Ukhala wiira we uheewelela amwaaraa, ni uholya nhokhorokho wawiirenlyaka uhilye, iholaphyaa itthaya iyo mwanlattu wawaa we; muuhuvani unarwaa weelihe mahuku othene ookumi aa.
GEN 3:18 Itthaya iyo inkomeela miiwa ni malasi, ni we unkoolya matakhuru o ntakhwani.
GEN 3:19 Ni unhala ulya ni nttukuttha nomwiirutthuni mwa, mpaka wanhalaa uturuwela watthayani; kontha we wuupiye ni itthaya, nna va uri ntthupi, ni unaturuwela ukhala ntthupi.
GEN 3:20 Vaavale nlopwana ule ahaavaha amwaarawe ayo ncina na Hawa; kontha ayo yaari anumwanaya atthu othene.
GEN 3:21 Vano Apwiya Nluku, yahompakela nlopwana ule na amwaarawe ikuwo co nrapala ni yahaawarihaca.
GEN 3:22 Wahoolo Apwiya Nluku yaheera: Nkoonani, ntthu ula ri toko hii, naacuwela yooreera ni yoonanara; vano wiira hitaphule ntata nawe, ciicammo arukulaka nhokorokho womwiri wookumi, alyaka nukhala wohikhwa.
GEN 3:23 Apwiya Nluku, yahomoomola ule nluwani yo Eeteni wiira alime itthaya yakumihiyaawe.
GEN 3:24 Paahi, noomoliyene ntthu ule, yaheesiya Makerupii ookhaliha, mphantte unkhuma ncuwa woluwani yo Eeteni, ni ikatana yoopharela yaarukurerya nceresere mothene, wiira isunke iphiro inrwaa uryaya mwiri wookumi.
GEN 4:1 Atamu ahaathukumanana amwaarawe yeehaninya Eva, ni ale yahorupala irukulu ni yahonnyara Kayini. Ale yaheera: Ni nkavihero na Mwaneene Nluku kihomphwanya nlopwana.
GEN 4:2 Ahorupala tho irukulu. Ula nkwaha ula ahonnyara Apeli, nhimaawe Kayini. Apeli aari nhakheli okhontwaa, ni Kayini aari mayoolima.
GEN 4:3 Unaphilieene ukati, Kayini ahowana mihokorokho co mmattani wiira anvelelihere Mwaneene Nluku.
GEN 4:4 Apeli ahowana nlipu no mihuwo cawe cootepa uneneva ni Mwaneene Nluku ahomwakhelela Apeli ni itthuvo cawe.
GEN 4:5 Nanso ayo khayaamwakhelenle Kayini ni itthuvo cawe. Vaavale Kayini ahorusiya ni ahotthuka iyuuci.
GEN 4:6 Vano Mwaneene Nluku ahomwiirela Kayini: Nlattuni we urusiyaka? Untthukelani iyuuci aa?
GEN 4:7 We wapankaka yooreera, khunhala ukupaliya? Nanso waahipankeke yooreera, ucuwele wiira itampi iri wankhora ni inoowipithela. Iyo imphavela wuutthema, nanso we unlamuliya usintta.
GEN 4:8 Wahoolo, Kayini ahomwiirela Apeli nhimaawe: Nrwee umattani. Ukati wakhalacilyaya umattani, Kayini ahontuphela nhimaawe nuumwiiva.
GEN 4:9 Vano Nluku ahonkoha Kayini: Nhimaa Apeli ri vayi? Uyo ahaakhula eeraka: Akincuwela. Mi kihokhala mayonsunka nhimaaka?
GEN 4:10 Vano Nluku ahonkoha eeraka: Ipankilyaa ila isiyani? Ukiviriyane: Ukhuma watthayani, iphome ya munnaa inakhuwela.
GEN 4:11 Vano uholaphiya we ni itthaya ihunle malaku wiira yaakhelele mmatatani mwaa iphome ya munnaa.
GEN 4:12 Ukati unkelaa ulima watthayani, ila khinkela yoovahaka tho icaayira. We unkokhala namatthawatthawa ni nannyatha umwilaponi.
GEN 4:13 Kayini aheerela Apwiya: Uttarusiya waka nwo uhotepa. Nkilevelele.
GEN 4:14 Ilelo nnakoomola mwiilaponi mu, kiwiipithakani ni kitthawatthawaka toko nannyatha, kontha ntthu phi ntthu nohala ukikumanana uyo nokookiiva.
GEN 4:15 Nanso Mwaneene Nluku ahomwaakhula: Khunhala ukhala commo. Ntthu amwiivaka Kayini, nokowiiveleliya ikuhukuhu imaara saapa. Ni Mwaneene Nluku ahomweesera Kayini nthonyero, wiira ntthu phi ntthu nohala unkumanana uyo himwiive.
GEN 4:16 Vano Kayini ahokhuma wamiithoni wa Mwaneene Nluku ni ahorwaa ukhala ilapo yo Nooti, mphantte unkhuma ncuwa wo Eeteni.
GEN 4:17 Kayini ahaathukumanana amwaarawe ni yahorupala irukulu ni unnyara Enoki. Wahoolo Kayini ahoteka iparasa awe, yaavahilyawe ncina na mwamwanawe Enoki.
GEN 4:18 Enoki ahonnyara Iraati. Iraati ahonnyara Mewucayeli. Mewucayeli ahonnyara Metusayeli ni Metusayeli ahonnyara Lameki.
GEN 4:19 Lameki ahaathela athiyana eeli. Amoca ayo yeehaninya Aata ni akina ayo, Silaa.
GEN 4:20 Aata ahonnyara Yapaali. Yaari athumwanaya atthu ankhalakhalaca mmaheemani ni mayoohuwa inama.
GEN 4:21 Ncina na munnaawe neehaninya Yupaali, yaari athumwanaya atthu othene ammoopa ceece ni mpetta.
GEN 4:22 Siila ciicammo ahonnyara mwana mmoca eehaninya Tupalakayimi, aahana ikaruma cothene co ncukhuma ni coyuuma. Tupalakayimi ahaana mwanrokorawe eehaninya Naama.
GEN 4:23 Lameke aheerela asaarawe yeehaninya: Aata ni Silaa: Nkiiwace asaara a Lameki, mwiiwelele moolumo aka: Mi kihomwiiva nlopwana mmoca kontha hookirakaliha, ni mmirawo mmoca kontha hookinyakela.
GEN 4:24 Wakhalaka wiira Kayini nawiivelelihiya ikuhukuhu imaara saapa, Lameki wanwookhala sapini (70) uyo umwaakulelaca imaara saapa (490).
GEN 4:25 Atamu ahaathukumanana tho amwaarawe ni ale yahonnyara mwana nkina, yanvahile aya ncina na Seeti, yiiraka: Nluku hokivaha mwana nipuro na Apeli, yoole Kayini mwiivilyawe.
GEN 4:26 Seeti ciicammo ahonnyara mwana anvahile awe ncina na Enosi. Vano Yooyo ukati uyo, phapaceriyaya ulapeliya ncina na Mwaneene Nluku.
GEN 5:1 Ila phi iliivuru yomayaranacelo o nloko na Atamu. Ukati Nluku waampankilyawe ntthu, eelattanihaka mwaneene,
GEN 5:2 ahaapanka nlopwana ni nthiyana. Ukati waapankilyawe, uyo ahaareeriha ni aheehana atthu.
GEN 5:3 Wapihenryawe Atamu myakha iminya nuuwa talaathini (130) ahonnyara mwana mmoca oolikana nuuyo ni oonlatta venci, ni ahonvaha ncina na Seeti.
GEN 5:4 Nannyanreene Seeti, Atamu ahokhala nkumi myakha iminya naane (800) ni ahaayara asaana akina asilopwana na asithiyana.
GEN 5:5 Mahuku othene ookumi awe Atamu yahophiyera myakha iminya khentta nuuwa talaathini (930) ni ahokhwa.
GEN 5:6 Seeti waapihenre awe myakha iminya nuuwa mithanu (105), ahonnyara Enosi.
GEN 5:7 Seeti nannyanreene Enosi ahokhala nkumi myakha iminya naane nuuwa saapa (807) ni ahaayara tho asaana akina asilopwana na asithiyana.
GEN 5:8 Mahuku othene ookumi awe, yaari myakha iminya khentta nuuwa khumi na miili (912) ni ahokhwa.
GEN 5:9 Wapihenryawe Enosi myakha miloko khentta (90) ahonnyara Kenani.
GEN 5:10 Enosi nannyanreene Kenani, ahokhala nkumi mpaka myakha iminya naane nuuwa khumi na mithanu (815) ni ahaayara asaana akina asilopwana na asithiyana.
GEN 5:11 Mahuku othene ookumi awe, yaari myakha iminya khentta nuuwa mithanu (905) ni ahokhwa.
GEN 5:12 Waapihenryawe Kenani myakha sapini (70) ahonnyara Malaleli.
GEN 5:13 Kenani nannyanreene Malaleli, ahokhala nkumi mpaka myakha iminya naane nuuwa arupayini (840) ni ahaayara asaana asilopwana na asithiyana.
GEN 5:14 Mahuku othene ookumi awe, yaari myakha iminya khentta nuuwa khumi (910) ni ahokhwa.
GEN 5:15 Wapihenryawe Malaleli myakha sitiini nuuwa mithanu (65) ahonnyara Yereti.
GEN 5:16 Nanyanreene Yereti Malaleli, ahokhala nkumi mpaka myakha iminya naane nuuwa talathini (830) ni ahaayara asaana asilopwana na asithiyana.
GEN 5:17 Mahuku othene okumi awe, yaari myakha iminya naane nuuwa miloko khentta na mithanu (895) ni ahokhwa.
GEN 5:18 Wapihenryawe Yereti myakha iminya wo sitiini na miili (162) ahonnyara Enoki.
GEN 5:19 Nannyanreene Enoki Yereti ahokhala nkumi mpaka myakha iminya naane 800 ni ahaayara asaana asilopwana na asithiyana.
GEN 5:20 Mahuku othene ookumi awe, yaari myakha iminya khentta nuuwa sitiini na miili (962) ni ahokhwa.
GEN 5:21 Wapihenryawe Enoki myakha sitiini na mithanu (65) ahonnyara Metusalemu.
GEN 5:22 Nannyanreene Metusalemu, Enoki aheetta ni Nluku myakha iminya ttharu (300) ni ahaayara asaana asilopwana na asithiyana.
GEN 5:23 Mahuku othene ookumi awe, yaari myakha iminya tthaaru wo sitiini nuuwa mithanu (365).
GEN 5:24 Enoki aheetta ni Nluku, ni ahorimyarimya kontha Nluku ahonkusa.
GEN 5:25 Wapihenryawe Metusamemu myakha iminya nuuwa miloko khentta na saapa (187) ahonnyara Lameke.
GEN 5:26 Nannyanreene Metusalemu Lameke ahokhala nkumi mpaka, myakha iminya saapa nuuwa miloko khentta na miili (782) ni ahaayara asaana asilopwana na asithiyana.
GEN 5:27 Mahuku othene okumi awe, yaari myakha iminya khentta wo sitiini nuuwa naane (969) ni ahokhwa.
GEN 5:28 Wapihenryawe Lameke myakha iminya nuuwa miloko khentta na miili (192), ahonnyara mwana mmoca.
GEN 5:29 Ahonvaha ncina na Nowee ni aheera: Ula naahala uniwukula miteko cihu ni uhuva wo mmatatani mwihu ommwaaninya ni itthaya ilaphiye ni Mwaneene Nluku.
GEN 5:30 Nannyanreene Lameke, Nowee ahokhala nkumi mpaka myakha iminya thanu nimiloko khentta nuuwa mithanu (595) ni ahaayara asaana akina asilopwana na asithiyana.
GEN 5:31 Mahuku othene ookumi awe, yaari myakha iminya saapa ni miloko saapa nuuwa saapa (777) ni ahokhwa.
GEN 5:32 Wapihenryawe Nowee myakha iminya thanu (500) ahaayara tho asaana akina yeehaninnya: Seemu, Kani ni Yafeti.
GEN 6:1 Waapacenryaya atthu wuncererannyaa mwiilaponi ni yaayaracaka asaana asithiyana,
GEN 6:2 asaana asilopwana a Nluku yahoona wiira asaana asithiyana aatthu ayo yaari ooreeraca, ni yahaathanla ale yatepile wacivela.
GEN 6:3 Vano Mwaneene Nluku aheera: Nlattu wotaampi ca atthu, Nnepa aka khunhala ukhala ukati wothene ni atthu, kontha ule ri irutthu. Uyo nohala ukhala myakha iminya wo sirini (120) paahi.
GEN 6:4 Yoole ukati ule, mwiilaponi yahaawo atthu oosancamaca. Wahoolo asaana asilopwana a Nluku wathukumaanannyaya asaana asithiyana a atthu ni yayaranacaka asaana. Ayo phaari anakhotto okuru ni ooruma ncina okhalayi.
GEN 6:5 Mwaneene Nluku ahoona wiira itampi ca atthu caanatepa winciva mwiilaponi ni moopuwelo, omunrimani mwaya yaari ukati wothene upanka paahi coonanara.
GEN 6:6 Vano Mwaneene Nluku aheera: Koonne wene kaapankaka atthu mwiilaponi mu, ni iyo yahonrusiha venci wanrimani wawe.
GEN 6:7 Mwaneene Nluku aheera: Kinawaamalamaliha mwiilaponi atthu yapankilyaka, atthu ni ciicammo inama cuulupale ni cikani ni asaanuni o wirimu. Koonne wene kipattusaka cothene nnya.
GEN 6:8 Nanso Nowee ahophwanya nnema wamiithoni wa Mwaneene Nluku.
GEN 6:9 Nnya phi cokhumelela co neethi wa Nowee. Nowee aari ntthu mayasariya, ookhweeli na atthu o yooyo ukati uyo. Uyo eetta ni Nluku.
GEN 6:10 Nowee ahaayara asaana araru: Semu, Kani ni Yafeti.
GEN 6:11 Vaavale, ilapo yahohononnya wamiithoni wa Nluku ni yahocara coonanara capankaya atthu.
GEN 6:12 Woonnyawe wiira ilapo ihotankannyaa, kontha atthu othene omwiilaponi ahohapuwa malamulo aka.
GEN 6:13 Nluku ahomwiirela Nowe: Kinawamalamaliha atthu othene, kontha ilapo yothene ihocara coonanara cimpankaya. Phimaana mi kinawakwanyulaca ni ilapo eyo.
GEN 6:14 Nanso we, upanke ikalawa yothaapwa co mpila. Ukawanihace, cikhale ikatti mwiittayi mwaya ni uttiyace ni uloko nhina ni vate.
GEN 6:15 Mwiittayi mwaya ulike imaara iminya tharu (300), mwiikhuvi mwaya imaara hansini (50) ni yeemelelo aya imaara talathini (30).
GEN 6:16 Upanke ithari ni upanke icanela nliko wo nuusu no moono mmoca ithari ni isiri yokalawa. Upanke nkhora nceresere ikalawa ni upanke ithari; waculu, iriyari ni vathi.
GEN 6:17 Nkoonani. Kinnowiha maasi o naphuvu mwiilaponi, wiira kikwanyulace ilapo yothene ni citthu cothene coomumula cipattusilyaka. Cothene ciri mwiilaponi cimmomala.
GEN 6:18 Nanso, ni we, kimmopanka nleehano naka, ni ummokela nkalawani mmo, we na asaanaa, na amwaaraa ni asaaraya asaanaa ayo.
GEN 6:19 Ni cothene cimmumula co khula ikhapila yonama, yo nlopwana ni yo nthiyana unlamuliya ukelana nkalawani mmo piili piili, wiira usunke ukumi aya ni we.
GEN 6:20 Asaanuni o khula ikhapila, inama co khula ikhapila, inama cowiipurula co khula ikhapila; cinari piili piili cinawuuwela we, wiira usunke ukumi aya.
GEN 6:21 Vano we, ukuse coolya cothene cinliya ni wiisunkere, cinhala ukhala coolya ca waa ni coolya conama.
GEN 6:22 Ahopanka Nowee toko cahimeriyawe ni Nluku. Commo phaapankilyawe.
GEN 7:1 Wahoolo Mwaneene Nluku ahomwiirela Nowee: Ukele nkalawani, we ni ntthoko naa nothene, kontha kihowoona we ukhala ntthu oosariya wariyari wa atthu othene.
GEN 7:2 Ukuse inama saapa co nlopwana ni inama saapa co nthiyana co khula ikhapila cinari cohalali. Nanso ciri coharamu nnyo, ukuse piili piili co nlopwana ni co nthiyana.
GEN 7:3 Ciicammo ukuse inuni cooculu saapa co nlopwana ni saapa co nthiyana, wiira cikhale cikumi ni ipyo yo mwiilaponi mothene.
GEN 7:4 Kontha yaviraru mahuku saapa, kinawana ipula mwiilaponi mothene, mahuku arupayini uhiyu ni uthana. Ni kinakhwanyulaca citthu cothene cipankilyaka vathi va.
GEN 7:5 Nowee ahopanka cothene ceereliyawe ni Mwaneene Nluku.
GEN 7:6 Yooyo ukati uyo Nowee aahaana myakha iminya siita ceyarelo, ukati wawilyawe naphuvu oocara maasi ilapo yothene.
GEN 7:7 Nowee, na asaanawe, na amwaarawe, na asaaraya asaana awe ayo, yahokelaca nkalawani, mwanlattu wo maasi o naphuvu.
GEN 7:8 Ukhuma inama cohalali, inama coharamu, asaanuni, ni inama cothene cowiipurula ciri vathi va,
GEN 7:9 cahonwela Nowee, nuukela piili piili nkalawani mmo, toko Nluku canlamunlenlyawe Nowee.
GEN 7:10 Wanowiira avirakaru mahuku saapa ale, phapacenryaya uwa maasi o naphuvu vathi wothene.
GEN 7:11 Ukati warinawe Nowee myakha iminya siita (600) cokumi awe, weettelaya mweeri wo nayeeli, waaphiyeraya mahuku khumi na saapa o mweeri, nenno nihuku nno, cahottinwa miliwi co maasi, ni mikhora cothene co wirimu cahohulya,
GEN 7:12 ni yahorupa ipula mwiilaponi mothene, mahuku arupayini, uhiyu ni uthana.
GEN 7:13 Vano nenno nihuku nno Nowee na asaanawe, Seemu, Kani ni Yafeti, ciicammo amwaara a Nowee na asaaraya asaanawe ooraru yahokelaca nkalawani.
GEN 7:14 Ale ni inama cothene co khula ikhapila, mihuwo cothene co khula ikhapila, inama cothene cowiipurula co khula ikhapila, covava cothene co khula ikhapila, asaanuni othene o khula ikhapila,
GEN 7:15 ni inama cothene carina ukumi, cahokela piili piili ni Nowee nkalawani.
GEN 7:16 Paahi, inama cothene caakenle caari cowiiraana, co nlopwana ni co nthiyana, toko Nluku canlamulenlyawe. Wiimaleloni, Mwaneene Nluku ahotthyaa nkhora vate.
GEN 7:17 Vaavale, naphuvu ule ahokhala mahuku arupayini nari mwiilaponi, maasi yaheenciva, ni yahoteesa ikalawa iyo, ni ile yahohiya itthaya.
GEN 7:18 Vano maasi ale yahocara venci cinenne mwiilaponi mothene; nanso ikalawa iyo yaamphempa waculu maasi.
GEN 7:19 Vano maasi ayo yanatepa wuncereryaana mwiilaponi, mpaka myako coorekama cothene cari vathi waya irimu cahomiriya ni maasi.
GEN 7:20 Maasi ayo yahocara tapha mpaka upwaha miyoono saapa ni nuusu, mpaka myako nnyo cahomiriya.
GEN 7:21 Phimaana cahokhwa inama cothene cariwo vathi va, ukhuma mihuwo, inuni, masene, inama cowiipurula cothene mpaka atthu othene.
GEN 7:22 Cothene carina ukumi, cimumulelaka mphulani mwaya, caakhala vathiva, cahokhwa.
GEN 7:23 Paahi, cahotankanyaa cothene cariwo vathi va, ukhuma ntthu mpaka inama cowiipurula ni nnyo coweetta, mpaka asaanuni oovava uculu, yahomalamalihiya mwiilaponi. Aahanle paahi phi Nowee ni ayo yarinawe nkalawani.
GEN 7:24 Maasi ayo yahokhala nlaponi mpaka mahuku iminya wo hansiini (150).
GEN 8:1 Vano, Nluku ahomuupuwela Nowee wamoca ni inama cothene co ntakhwani ni coohuwiya caarinawe nkalawani, ni ahowana iphyoo yuulupale mwiilaponi ni maasi yahopacera uwukuwa.
GEN 8:2 Miliwi co vathi ni mikhora co wirimu cahottiyannyaa ni ipula yahohiya urupa.
GEN 8:3 Maasi yahopacera uwukuwa vakani vakani mwiilaponi. Wiimaleloni wo mahuku iminya wohansiini (150), maasi ale yahowukuwa,
GEN 8:4 ni nihuku nonakhuumi na saapa no mweeri wonasaapa, ikalawa ile yaheemela umyakoni co Ararati.
GEN 8:5 Maasi naanlelo yeera awukuwaka, mpaka mweeri wonakhumi. Vano nihuku noopacera no mweeri wonakhumi cahopacera woonnyaa myako.
GEN 8:6 Anavinre mahuku arupayiini, Nowee ahohula icanela yapankilyawe nkalawani.
GEN 8:7 Vano ahonkumiha nakhuku mmoca, aamakenle urukureryaca paahi, awehereryaka maasi ale wuuma vathi wothene.
GEN 8:8 Wahoolo ahotthukulela ikhuntta wiira oone yakhala wiira maasi ayo yahowukuwa mwiilaponi.
GEN 8:9 Nanso ikhuntta khayaaphwanyile nipuro nookotela kontha maasi yahokhuneela itthaya yothene. Phimaana ikhuntta ile yahoturuwela nkalawani mwaaryawe Nowee. Ule ahotaphulela moono awe vate ni ahovara ikhuntta ile awaanaka nkalawani mmwe.
GEN 8:10 Vaavale Nowee ahowehererya tho mahuku saapa ni ahoruma tho ikhuntta ile.
GEN 8:11 Utthekuwa waya ncuwa, ukati waturuwilyaya ikhuntta ile, yahowa inapapile umalakuni nwo ntaakhuru no mwiri. Nowee ahokhala oocuwela wiira maasi ayo ahowukuwa mwiilaponi mmo.
GEN 8:12 Ahowehererya tho mahuku saapa ni ahoruma tho ikhuntta, nanso ila ikwaha ila ikhuntta khayaaturuwile tho.
GEN 8:13 Nihuku noopacera no mweeri woopacera wo mwakha iminya siita na mmoca (601), maasi ale yahowelela mwiilaponi mmo. Nowee ahopattakula nivatho nokalawa. ni aheera: mwiilaponi mmo itthaya iyo ihooma.
GEN 8:14 Khweeli, nihuku nonasiriini na saapa no mweeri wonayeeli, itthaya yahomalela wuuma.
GEN 8:15 Vano Nluku ahomwiirela Nowee:
GEN 8:16 Ukhume nkalawani mmo, we na amwaaraa, wamoca na asaanaa ni asaaraya asaanaa ayo.
GEN 8:17 Ni ukumihace inama cothene cirinaa nnyo: asaanuni, inama cuulupale ni cikani cineetta ciipurulaka. Ukumihe wiira cimwareele mwiilaponi, cikhale cocaayiira ni citotholane.
GEN 8:18 Phimaana, Nowee na amwaarawe, wamoca na asaana awe na asaraya yahokhumaca nkalawani.
GEN 8:19 Inama cothene cuulupale ni cikani cineetta wowiipurula, ni asaanuni othene, cothene coweetta mwiilaponi caari nkalawani, cahokhuma.
GEN 8:20 Wahoolo Nowee ahopanka ikhilompi yoonlapelela Mwaneene Nluku, ni ahokusa inama cikina ni asaanuni oohalali, ni ahaavelelihera isataka yoopahiya.
GEN 8:21 Mwaneene Nluku ahoona unukhela ni aheera: Akinhala tho ulapha itthaya mwanlattu wa pinattamu, kontha wuupuwela wa pinattamu uri woonanara ikhumelo. Ni akinhala wiivakaca tho citthu cikumi cothene toko cipankilyaka ula nkwaha ula.
GEN 8:22 Paahi, ilapo ela yapicaru nuumala, waala nuhepha, uririya ni nttukuttha, ilimwe ni iyiita, uhiyu nuuthana kunhala umala.
GEN 9:1 Nluku ahonreeriha Nowee na asaanawe amwiirelaka coo: Nnyaranace, muncereryane ni ncarace mwiilaponi.
GEN 9:2 Inama cothene co mwiilaponi cinkowuttettemelani ciwoovakani nyu; inama co ntakhwani, asaanuni o wirimu, inama cineepurula vathi ni ihopa co mpahari, cothene nhovahiya mmatatani mwinyu.
GEN 9:3 Citthu cothene cirina ukumi ni ceettaka cinkokhala coolya cinyu; toko cuvahilyakani mataakhuru, nna vaa kinawuvahani citthu cothene.
GEN 9:4 Nanso nhikhure inama ni iphome aya, kontha iphome aya phiri ukumi.
GEN 9:5 Ntthu phi ntthu nohala umwarusa iphome, pooti ukhala ya ntthu atthuna yonama, kinkoonkohaca; wo khula ntthu kinkohukhumu nlattu wokumi wa nkhwawe.
GEN 9:6 Ntthu nohala umwarusa iphome ya nkhwamwe, iphome awe inhala umwarusiya ciicammo ni ntthu, kontha, ni ilatta ya Nluku, phipankiyawe ntthu.
GEN 9:7 Nanso nyu, nkhale ooyaranaca ni muncereryane. Mmwaryeele mwiilaponi ni ncaranace mommo.
GEN 9:8 Vano Nluku ahomwiirela Nowe, na asaanawe:
GEN 9:9 Nkoonani, kinkopanka nleehano naka ni nyu wamoca ni ucuulu inyu wohoolo,
GEN 9:10 ni citthu cothene cirina ukumi ciri ni nyu; asaanuni, inama coohuwiya ni inama co ntakhwani, citthu cothene co mwiilaponi cirina ukumi.
GEN 9:11 Kinapanka nleehano naka ni nyu. Itthu phi itthu irina ukumi khinhala tho wiiviya ni maasi oocara mwiilaponi. Khaanhala tho ucara maasi mwiilaponi.
GEN 9:12 Nluku ahopwaherera wuulumaca eeraka: Ila phi ikanyero yo nleehano naka ninoopankelaakani, ukhuma nyu mpaka citthu cothene cirineenyu, cirina ukumi; mpaka maloko othene oohoolo.
GEN 9:13 Nikhwii naka kiheesa mmahutteni. Ninkookhala ikanyero yo waataana waka ni ilapo.
GEN 9:14 Ukati unkelaka uwaana mahutte mwiilaponi ni nawaaka nikhwii,
GEN 9:15 vano mi kinkowuupuwela nleehano naka ni nyu wamoca ni citthu cothene cirina ukumi co khula nnanna. Maasi khaanhala tho ucara mwiilaponi wiira yiivakace citthu cirina ukumi.
GEN 9:16 Ukati wothene unkelaya woonnyaa nikhwii mmahutteni, kinkooweha ni kinkowuupuwela nleehano noohimala na atthu ni citthu cothene coomumula co khula nnanna, cinkhala mwiilaponi.
GEN 9:17 Namalihileene wuulumaca, Nluku ahomwiirela Nowee coo: Ila phi ikanyero yo nleehano nipankilyaka mi ni citthu cothene cirina ukumi mwiilaponi.
GEN 9:18 Vano asaana a Nowee yakhumile nkalawani yaari: Seemu, Kani, ni Yafeti. Kani phiri athumwanaya Kanaa.
GEN 9:19 Ala phaari asaana araru a Nowee. Ukhuma mwa yaayo, ilapo yothene yahokhaliya na atthu.
GEN 9:20 Nowee aari mayoolima, phapacenre waala ivinya yoopacera.
GEN 9:21 Nowee ahowurya ivinyu, ahohapaliya, ni ahokhala pwitipwiti nheemani mwawe.
GEN 9:22 Kaamu, athumwanaya Kanaa, ahoona uhiwara waathumwane ni ahorwaa waahimyacera asunnawe eeli yaari vate.
GEN 9:23 Nanso Seemu ni Yafeti yahokusaca ikacako, yaheesaca wanikhatani ni, yeettaka nttuli nttuli wiira ahoonace athumwanaya anari pwitipwiti, yahaakhuneelaca.
GEN 9:24 Nowee, ukati wonwilyawe muuhapaliyani, ni oonenelaka yapankilyawe mwanawe omwankaani ule,
GEN 9:25 aheera coo: Kanaa holaphiya! Unkookhala ipottha copottha ca asunnaa.
GEN 9:26 Aheera tho coo: Attittimihinye Mwaneene Nluku, Nluku a Seemu! Ni Kanaa akhale ipottha awe.
GEN 9:27 Nluku uncerere ncoko wa Yafeti; uyo akhale mmaheemani mwa Seemu, ni Kanaa akhale ipottha awe.
GEN 9:28 Uvira waya ucara wo maasi mwiilaponi, Nowee ahokhala nkumi myakha iminya tthaaru wo hansiini (350).
GEN 9:29 Mahuku othene ookumi awe, yaari myakha iminya khentta wo hansiini (950) ni ahokhwa.
GEN 10:1 Ala phi mayaranacelo aya asaana a Nowee: Seemu, Kaamu, ni Yafeti. Ni ayo yahoyaranaca uvira wawe naphuvu.
GEN 10:2 Ala pha asaana a Yafeti: Komeri, Makoki, Mattaayi, Yavani, Tupali, Mesekhi ni Tirasi.
GEN 10:3 Ni asaana a Komeri yaari pha ala: Asikenasi, Rafiki ni Tokarima.
GEN 10:4 Asaana a Yavani yaari pha ala: Elisa, Tarisisi, Kitimi, ni Tamini.
GEN 10:5 Nhina wo yaala, phikhumakhumilyaya atthu ankhalakhala mmaacivirini, akawanacaka ncoko aya nhina wo nuulumo naya, wo khula ntthu nhina wo nihimo neelapo awe.
GEN 10:6 Ala phaari asaana a Kaamu: Kuusi, Misirayimi, Fuute ni Kanaa.
GEN 10:7 Ala phaari asaana a Kuusi: Sepaa, Havila, Sapita, Ramaa ni Sapiteka. Ala phaari asaana a Ramaa: Sapaa ni Tetaa.
GEN 10:8 Kuusi ciicammo ahonnyara Ninroti, nlopwana oopacera ookhomaala cinenne mwiilaponi.
GEN 10:9 Ule ari nlupa muulupale wamiithoni wa Mwaneene Nluku, phimaana wiiriyaka: Nlupa toko Ninroti wamiithoni wa Mwaneene Nluku.
GEN 10:10 Wiipaceroni umwene awe wamphiya uPapeli, Ereki, Akkate ni Kalineha, ilapo yo Sinari.
GEN 10:11 Ukhuma wawe yeela ilapo ela ahorwaa waAsiiriya wantekilyawe Ninive, Riyopoti-Iri, Kalaa
GEN 10:12 ni Resemi, inkhala ncoko wo Ninive ni Ukalaa, iparasa yuulupale.
GEN 10:13 Misirayimi ahaayara annalutita, annamita, annaleyapita, annafutuwita,
GEN 10:14 annapaturusita, annakasuluwita, mwa yaala phikhumelenle annafilisitiya ni annakaftori.
GEN 10:15 Kanaa ahonnyara Sitomi, mwana omuulupale, ni Hetee,
GEN 10:16 ciicammo toko annayepusi, annamori, annakirkasiti,
GEN 10:17 annahiviti, annarkiti, annasiniti,
GEN 10:18 annarivati, annasemara ni annahatitha. Wahoolo mahimo o annakanani yahomwaryaca.
GEN 10:19 Miinano co Kanaa caakhuma uSitomi, ni carwaa mpaka uKerari, ni camphiya uKaasa ni, ukhuma wonwo, canrwaa mpaka uSotoma, uKomora, uHatamaa ni Sepoyimi ciphiyaka mpaka uLaasa.
GEN 10:20 Ala phi mayaranacelo a Kaamu, nhina mahimo aya ni moolumo aya, mmicokoni ni mwiilaponi mwaya.
GEN 10:21 Seemu aari nhimaawe Yafeti ni ciicammo ahaayaraca asaana. Ule phaari muulupale a atthu othene oHeperi.
GEN 10:22 Ala phaari asaana a Seemu: Elawu, Asuuri, Arifacate, Luuti ni Arami.
GEN 10:23 Ala phaari asaana a Arami: Usi, Huli, Kether ni Meseki.
GEN 10:24 Arifacate ahonnyara Selah, ni Selah ahonnyara Heperi.
GEN 10:25 Heperi ahaayarela asaana eeli: Mmoca uyo eehaninya Peleki, kontha ukati awe ilapo yahokawaninya; ni nhimaawe eehaninya Yokitani.
GEN 10:26 Yokitani ahonnyara Almotati, Salefi, Hasaramarvete, Yerah,
GEN 10:27 Haturami, Usaali, Tikala,
GEN 10:28 Opal, Apimayeli, Sepaa,
GEN 10:29 Ofiri, Havilaa ni Yopapi. Ala othene ala yaari asaana a Yokitani.
GEN 10:30 Ncoko wakhalacaya uyo weecatala ukhuma uMeesa mpaka uSefari, mmwakoni uri mphantte unkhuma ncuwa.
GEN 10:31 Ala phi mayaranacelo a Seemu, nhina mahimo aya ni moolumo aya, mmicokoni ni mwiilaponi mwaya.
GEN 10:32 Ala phi mahimo a asaana a Nowee, ookawanaceene mwiilaponi mwaya, toko ciriyaya mayaranacelo aya. Ukhuma wo yaayo, atthu ahomwareela mwiilaponi, uvira wawe naphuvu.
GEN 11:1 Mwiilaponi mothene nariwo paahi nuulumo nimoca ni moolumeliyo mamoca.
GEN 11:2 Vano atthu akhumaka mphantte unkhuma ncuwa, yahophwanyaca nikuwa uSinari ni vaavale yahokhalaca.
GEN 11:3 Yaheerelana ayaayoru coo: Nrwee nuupe incirwa ni nipaheehe sana sana. Yatthuminri incirwa nnyo nipuro no maluku, ni alikatarawu nipuro no mattope.
GEN 11:4 Wahoolo yaheerelana tho: Nrwee niteke iparasa ni inupa yoorekama yoophiya wirimu. Commo ncina nihu ninkoruma ni khaninhala umwaruseliya mwiilaponi.
GEN 11:5 Vano Mwaneene Nluku ahokhuruwa wiira oone iparasa ile ni inupa yatekaya atthu ale.
GEN 11:6 Ni Mwaneene Nluku aheera coo: Nkoonani, atthu ala ari nloko nimoca paahi, anoolumaca nuulumo nimoca paahi, ni ahopacera nteko ule. Woohipica khiiwo inhala waahiha uvara yuupuwenlyaya.
GEN 11:7 Nrwee, nikhuruwe ni naavirikanihe nuulumo naya, wiira ahiiwanane ntthu ni nkhwawe.
GEN 11:8 Vaavale, Mwaneene Nluku ahaamwarusela atthu ale ilapo yothene, ni yahohiyaca uteka iparasa ile.
GEN 11:9 Phimaana waheehaninya uPapeli, kontha vaavale Mwaneene Nluku ahovirikaniha moolumelo ottuniya yothene. Ukhuma vaavale Mwaneene Nluku ahaamwaruselaca atthu ale mwiilaponi mothene.
GEN 11:10 Ala phi mayaranacelo o nloko na Seemu: Uvira wawe naphuvu mwiilaponi, cahovira myakha miili, ni Seemu ahopiihera myakha iminya (100) ceyarelo ni ahonnyara Arifacate.
GEN 11:11 Nannyanreene Arifacate, Seemu ahokhala nkumi mpaka myakha iminya thanu (500) ceyarelo ni ahaayara asaana akina asilopwana na asithiyana.
GEN 11:12 Arifacate wapiihenryawe myakha talathini nuwa mithanu (35) ceyarelo, ahonnyara Selah.
GEN 11:13 Nannyareene Selah, Arifacate ahokhala nkumi mpaka myakha iminya cese nuwa miraru (403) ceyarelo ni ahaayara asaana akina, asilopwana na asithiyana.
GEN 11:14 Upiihera wawe myakha talathini (30) ceyarelo, Selah ahonnyara Heperi.
GEN 11:15 Nannyareene Heperi, Salah ahokhala nkumi myakha iminya cese nuwa miraru (403) ceyarelo ni ahaayara asaana akina, asilopwana na asithiyana.
GEN 11:16 Upiihera wawe Heperi myakha talathini nuwa micese (34) ceyarelo, ahonnyara Peleki.
GEN 11:17 Heperi unyara wawe Peleki, ahokhala nkumi mpaka myakha iminya cese nuwa talathini (430) ceyarelo ni ahaayara asaana akina, asilopwana na asithiyana.
GEN 11:18 Peleki upiihera wawe myakha talathini (30), ahonnyara Rewu.
GEN 11:19 Peleeki unnyara wawe Rewu, ahokhala nkumi mpaka myakha iminya piili na khenta (209) ni ahaayaraca asaana akina, asilopwana na asithiyana.
GEN 11:20 Rewu upiihera wawe myakha talathini na miili (32) ceyarelo, ahonnyara Sirukwe.
GEN 11:21 Rewu ahokhala nkumi mpaka myakha iminya piili na saapa (207) ni ahaayaraca asaana akina, asilopwana na asithiyana.
GEN 11:22 Sirukwe upiihera wawe myakha talathini (30) ceyarelo, ahonnyara Nahori.
GEN 11:23 Sirukwe nannyareene Nahori, ahokhala nkumi mpaka myakha iminya piili (200) ceyarelo ni ahaayaraca asaana akina, asilopwana na asithiyana.
GEN 11:24 Nahori upiihera wawe myakha sirini na khenta (29) ceyarelo, ahonnyara Tera.
GEN 11:25 Unyara wawe Tera, Nahori ahokhala nkumi mpaka myakha iminya imoca nuwa khumi na khenta (119) ceyarelo ni ahaayaraca asaana akina, asilopwana na asithiyana.
GEN 11:26 Tera upiihera wawe myakha sapini (70) ceyarelo, ahonnyara Aparamu, Nahori ni Harani.
GEN 11:27 Ala phi mayaranacelo o nloko na Tera: Tera ahonnyara Aparamu, Nahori ni Harani; ni Harani ahonnyara Loti.
GEN 11:28 Harani akhwenle uUri yo Kasiti wayareenlyawe, ukati waryaya athumwane akumi.
GEN 11:29 Aparamu ni Nahori yahaathelaca asaaraya. Ncina na amwaarawe Aparamu naari Sarayi, ni ncina na amwaarawe Nahori naari Milika; ula aari mwana a Harani, athumwane Milika ni Isikaa.
GEN 11:30 Vano Sarayi aari oohiyara, khaarina asaana.
GEN 11:31 Tera ahonkusa Aparamu mwanawe, wamoca ni Loti mwanculawe, mwana a Harani, ni Sarayi mwaara a mwanawe ni othene yahorwaa ikwaha yookhuma uUri yo Kasiti arwaaka uKanaa. Nanso uphiyaca waya yahokhalaca wonwo.
GEN 11:32 Tera ahokhala nkumi mpaka myakha iminya piili na thanu (205) ceyarelo ni ahokhwela uHarani.
GEN 12:1 Nkwaha mmoca Mwaneene Nluku ahomwiirela Aparamu: Ukhume ilapo aa iyo, iriyari ya alokwaa ni wapuwani wa athumwana, ni urwee ilapo inhalaka wuthonyera.
GEN 12:2 Kinawuvaha atthu enci ookhuma mwirutthuni mwa mmo ni kinawuvaha iparakha, ni kinawunnuwiha ncina naa nno ni we unhala ukhala iparakha.
GEN 12:3 Kinawareeriha anhala wureeriha ayo ni watapaniha anhala wulaphakaca ayo. Vano mwanlattu wo we, atthu othene omwiilaponi anakhala ooreerihiya.
GEN 12:4 Vaavale Aparamu ahokhuma toko Mwaneene Nluku camwiirenlyawe, ni warwawe va ahontthukana ikwaha Loti. Ukati wakhumawe uHarani, Aparamu ahaana myakha sapini na mithanu.
GEN 12:5 Wakhumawe va ahonkusa Sarayi mwaarawe, Loti mwana amunnawe, mihakhu cawe cothene caphwanyilyawe ni ipottha cawe cathumilyawe uHarani. Yahokhumaca arwaka ilapo yo Kanaa ni yahophiyaca salama.
GEN 12:6 Aparamu ahottupulaniha ilapo eyo mpaka uphiya nipuro no Sikeni. Yooyo ukati uyo annakanaa phakhala ilapo eyo.
GEN 12:7 Mwaneene Nluku ahonkhumelela Aparamu phimwiirelaka: Ipyo aa iyo kinaahala uvaha ila itthaya ela. Vano ahoteka ikhilompi yoonalapelela Mwaneene Nluku ankhumelenle.
GEN 12:8 Vaavale aheetta arwaka myako ciri ncoko woohitto wo Peteli. Wonwo ahonkhurutula heema awe, akakhelaka uPeteli moono unkela ncuwa ni Ayi unkhuma ncuwa. Vano ahontekela ikhilompi Mwaneene Nluku ni ahonlapela Mwaneene Nluku.
GEN 12:9 Wahoolo Aparamu ahokhuma arwaka mphantte wo Nekepi.
GEN 12:10 Yooyo ukati uyo ilapo iyo yahovola itala yinci. Vano Aparamu ahokhuruwela ilapo yo Wiciipitu wiira akhale ukati vakani kontha itala eyo yanatepa mwilaponi mmo.
GEN 12:11 Ukati wattamenryawe Wiciipitu, ahomwiirela Sarayi mwaarawe: Yoowe! Mi kihocuwela wiira we uri nthiyana ooreera venci.
GEN 12:12 Phimaana annaciipitu ayo yakela yawoonaka, ankocuwela wiira: Ala amwaarawe! Vano ankokiiva ni wuhiya we nkumi.
GEN 12:13 Sontte weere mwanrokoraka wiira yakipanke nnema mwanlattu wo we ni commo khanhala ukiivaca.
GEN 12:14 Khweeli Aparamu uphiya wawe Wiciipitu, annaciipitu yahoonaca wiira amwaarawe ayo ari ooreera venci.
GEN 12:15 Asuulupale a Farawoo yahomoonaca Sarayi nunttottopela venci, mpaka Sarayi yahonkusaca uhano wa Farawoo.
GEN 12:16 Vano mwanlattu wa Sarayi, Aparamu ahopankiya nnema. Ule ahovahiya ikhontwaa, imope, apuuru, ipottha cilopwana ni cithiyana, apuuru onthiyana ni inkamela.
GEN 12:17 Nanso Mwaneene Nluku ahonrakaliha Farawoo na akhuulupale awe othene ni iretta cowoopiha mwanlattu wa Sarayi, amwaara a Aparamu.
GEN 12:18 Phimaana Farawoo ahomwiihana Aparamu, ni ahomwiirela: Isiyani yeeyo ikipankilyaa iyo? Wahakihimyacenryaa wiira ala mi amwaaraka?
GEN 12:19 Weerelani wiira ula mi mwanrokoraka? Hapo mi kahonthela! Pahi, yakhala amwaaraa wakuseke ni urweke.
GEN 12:20 Farawoo ahomwiirela Aparamu na amwaarawe wiira akhume mWiciipitu mmo ni ahaaruma anakhotto awe wiira anvelele mpaka umpikani ni citthu cothene carinawe.
GEN 13:1 Vano Aparamu ahokhuma Wiciipitu ni ahorwaa uNekepi na amwaarawe ayo, ni citthu cothene carinawe ni Loti ahontthukana ikwaha.
GEN 13:2 Aparamu ahothaciri venci, ahaana inama, ipheeta ni iwooru.
GEN 13:3 Ule ahokhuma uNekepi arwaka uPeteli, mpaka ahophiya nipuro naapacenryawe unkhurutula heema nipuro niri iriyari uPeteli nu Ayi.
GEN 13:4 Ahophiya nipuro naapacennyawe uteka ikhilompi ni Aparamu ahonlapela Mwaneene Nluku.
GEN 13:5 Ciicammo Loti, antthukannyawe ikwaha Aparamu ahaana mihuwo cawe, imope na aheema.
GEN 13:6 Vano nipuro nno khanaatosa wiira oyeeli akhalace nttetthe mmoca, kontha yahaanaca mihakhu cinci cahaalamuliyaya ukhala khala nipuro nimoca.
GEN 13:7 Phimaana yahokhuma ipokoho ya ahakheli a Aparamu na ayo a Loti; ni yooyo ukati uyo maKananewu ni maPerisewu yakhalaca yeeyo ilapo eyo.
GEN 13:8 Vano Aparamu ahomwiirela Loti: Va ihikhume ipokoho we ni mi, ni ihikhume ipokoho ya ahakheli aa na ahakheli aka kontha va niri ayaayoru.
GEN 13:9 Ilapo eyo khimala, va nrwee nimelane. Weeraka kinthanla moono nthiyana mi kinhala urwa moono nlopwana; atthuna weeraka kinthanla moono nlopwana mi kinrwa moono nthiyana.
GEN 13:10 Vaavale ahoweha Loti micoko cothene niwahoncivela uthako wo Yoortani, wari wowunttelana ratta mpaka uSowari; wari toko iluwani ya Mwaneene Nluku, toko wenryaya itthaya yo Wiciipitu. Iyo yeeranele Mwaneene Nluku hinakwanyula uSotoma nuKomora.
GEN 13:11 Loti ahothanla uthako wo Yortani eettaka arwaka unkhuma ncuwa, ni oyeeli yahomwalaanaca.
GEN 13:12 Aparamu ahokhala ilapo yo Kanaa. Nanso Loti ahorwaa wakhurutula aheema awe mmaparasa ciri muuthakoni cooco uSotoma.
GEN 13:13 Nanso alopwana yaakhalakhalaca uSotoma ayo yaari oohiloka ni yaanankosera Mwaneene Nluku.
GEN 13:14 Aparamu namwalanne ni Loti, ni Mwaneene Nluku ahomwiirela: Uwuse miitho aa ayo ni uwehe ukhuma nipuro niryaa mpaka mphantte wooculu ni woohitto, unkhuma ncuwa mpaka unkela ncuwa.
GEN 13:15 Kontha ilapo yothene inoonaa eyo, kimmowuvaha we ni ucuulu aa wothene mpaka khalayi.
GEN 13:16 Ni ipyo aa kinopanka toko ntthupi no mwiilaponi mothene; maana aya ntthu ooryaka waalikela ntthupi no mwiilaponi mothene, ciicammo ni ipyo aa nahala woorya waalikela.
GEN 13:17 Wunwe ni weettakace ilapo yothene. Mwiittayi waya ni mwikhuvi waya kontha kimmowuvaha we.
GEN 13:18 Ni Aparamu ahonkhuna heema awe, mpaka urwaa ukhala ilapo yo Manree iri cooco Heporoni, ni anttitthimihaka Nluku ahontekela ikhilompi.
GEN 14:1 Ila yaakhumelenle ukati waryawe mwene uSineyari eehaninya Anrafeli, Ariyoki ari mwene o Elasari, Ketolameri nari mwene o Lamu ni Titali ari mwene o Koyimi.
GEN 14:2 Yahowana ikhotto ni Peera, mwene o Sotoma, ni Pirisa mwene o Komora, ni Sinape mwene o Atama, ni Semeperi mwene o Sepoyimi ni amwananaka ni mwene o Pela weehaninya Sowari.
GEN 14:3 Othene ale yahaatakaniha anakhotto aya unikuwani no Sitimi, niri ipharyaa yo maakha.
GEN 14:4 Myakha khumi na miili yahommarela nteko Ketolameri, nanso mwakha wonakhumi na miraru yahonhanyurihela.
GEN 14:5 Mwakha wonakhumi ni micese, ahowa Ketolameri ni mamwene yarinawe ni yahaatthema Amarefayimi o Asteroti-Karimeyimi ni Asusimi o Hamu ni a Emini o Save-Kiriyatayimi.
GEN 14:6 Ni Mahorewu o myakoni co Seyiri, mpaka El-Parani uri vakhiviru ni itakhwa.
GEN 14:7 Wahoolo yahoturuwa ni yahophiyaca o En-Misipati uneehaninya uKate ni yahotthema ilapo cothene ca Amalekita ni ca Amorewu, yakhala uHasasoni-Tamar.
GEN 14:8 Vano yahokhuma mamwene o Sotoma, ni o Komora, o Atima, o Sepowimi ni o Pela uneehaninya Sowari ni yaholamulelana ni wanca ikhotto yaananaka yaale onikuwani no Sitimi,
GEN 14:9 amwaananaka Ketolameri, mwene o Lamu ni Titali mwene o Koyimi ni Anrafel, mwene o Sinar, ni Ariyoke, mwene o Elasar. Mamwene macese yaanaanaka mamwene mathanu.
GEN 14:10 Vano nikuwa no Sitimi nahocara maliti o marove. Mamwene o Sotoma nu Komora yahotthawa. Akina yahovariya ni yahanle ayo yahotthawela umwakoni.
GEN 14:11 Yahokusaca mihakhu cothene co Sotoma ni uKomora ni coolya caya cothene ni yahorwaca.
GEN 14:12 Ni ciicammo ahovariya Loti, mwana a munnaawe Aparamu, akhala oSotoma, ni mihakhu cawe ni yahokhumaca.
GEN 14:13 Nanso ahowa mmoca ootopweele, phunttonkelaka Aparamu, Nheperewu; aakhala ncoko wo Manre, Mmorewu, munnaawe Esikole ni Aneri, othene yari asikhwawe Aparamu.
GEN 14:14 Wiiwa wawe Aparamu wiira mwana amunnawe hotthukiya, ahaakumiha alopwana iminya ttharu nuwa khumi na nanne (318), yayareliye wapuwani wawe ni yahoomolanihaca mpaka uTani.
GEN 14:15 Ni yahokawanaca uhiyu yaavyaka mananna owaatthema. Uyo ni ipottha cawe, yaheevaca eenani ni akina ayo woomolanihaca mpaka uHopaa, unkhala mphantte wonthiyana wo Tamasiku.
GEN 14:16 Ni ahaakihera mihakhu cothene ni ahomwakihera Loti mwana amunnawe, ni mihakhu cawe, athiyana othene ni anantthukiya othene yariwo.
GEN 14:17 Mwene o Sotoma ahomwikamela Aparamu akhumaka okhottoni yonrakaliha Ketolameri ni mamwene yarinawe onikuwani no Save, niri nikuwa na amwene.
GEN 14:18 Melekesatiki, mwene o Salemu, ahowiha nkatthe ni ivinyu ni yooyo ari nhooleli ottiini ya Nluku o wirimu.
GEN 14:19 Ahonreeriha numwiirela: Nluku muulupale mwaneene irimu ni itthaya oreeriheni Aparamu.
GEN 14:20 Ni attottopeliye Nluku o wirimu oovahile eenani mmatatani mwaa. Ni ahommaha mphantte wonakhumi wo citthu cothene carinawe.
GEN 14:21 Ni mwene o Sotoma ahomwiirela Aparamu: Ukivaheke atthu ayo, weva ukuseke mihakhu nnyo.
GEN 14:22 Nanso Aparamu ahomwiirela mwene o Sotoma: Kihowusa matata aka kilupelaka wa Mwaneene Nluku, Nluku Ooculu, mwaneene irimu ni itthaya.
GEN 14:23 Akintthuna itthu phi itthu iri yawaa, hata nripwe wokwakwaatta caa, wiira we uhikiirele: Kihonthaciriha Aparamu.
GEN 14:24 Khiiwo imphavelaka, kahiki yoolya ililyaya ipottha caka ni mphantte ommwaca Aneri, Esikoli ni Manree, yakiveleenle. Ayo yakheleke mphantte aya.
GEN 15:1 Cinavinrene nnya citthu nnya, nuulumo na Mwaneene Nluku nahowa waAparamu munttorani: Uhoove, Aparamu! Mi phi mi, mwaakihi aa. Itthuvo aa inhala ukhala yuulupale.
GEN 15:2 Nanso Aparamu ahokoha: Pwiya Nluku, unhala ukivahani, kamana nanlelo akirina mwana ni nohala uhalana cirinaka phi Eliyeseri o Tamasiku?
GEN 15:3 Ni ahoncerera tho eeraka: We khukivahile mena mwana! Karumeya aka phinhala ukhala nkalanupa aka.
GEN 15:4 Vano Mwaneene Nluku ahomwaakhula eeraka: Nkalanupa aa khanhala ukhala uyo. Mwana oonyara yo weva phinhala wuuranttela.
GEN 15:5 Ankumiheraka vate inupa, ahomwiirela: Uwehe wirimu ni waalikele itthoottwa, wooryaka waalikela. Ni ahopwaherera eeraka: Nloko naa nno phinhalaya ukhala toko nnya itthoottwa nnya.
GEN 15:6 Aparamu ahonkupali Mwaneene Nluku ni yeeyo yahopankiya ukhala ikhweeli aya.
GEN 15:7 Ahomwiirela nanlelo: Mi Mwaneene Nluku kuukumihile Ur yo Kasiti wiira kuvahe ila ilapo ela ukhala yawaa.
GEN 15:8 Aparamu ahonkoha eeraka: Pwiya Nluku, kinhala ucuwela cani wiira khweeli kimmopattha?
GEN 15:9 Ule ahomwaakhula: Ukiwiihere mwamope, ipuri ni ikhontwaa, cothene cokhalana myakha miraru cookumi ni ciicammo nciiya nimoca ni ikhuntta imoca.
GEN 15:10 Aparamu ahowiha cothene cenye inama nnye, ahottupula iriyariru ni aheekathi khula mphantte uhoolo wa nkhwaya, nanso asanuni ayo khattupulanihile.
GEN 15:11 Vano inaka cahopacera ukhuruwela vanamani vale, nanso Aparamu anhakha.
GEN 15:12 Wakelaya ncuwa, Aparamu cahomola ikhove cuulupale ni yahommwela ipiphi yiinci.
GEN 15:13 Vano Apwiya yahomwiirela: Ucuwele wiira uneethi aa unkokhala ilapo ihiri yawaya, inkelaya upankiye ipottha ni uhuvihiya myakha iminya cese.
GEN 15:14 Nanso mi kimmottarusa ilapo inhala wupankani ipottha ni wahoolo mumokhuma ni mihakhu cinci.
GEN 15:15 Nanso we unaahala urwaa ni mpuha waanhakhalayi aa ni unhala uvithiya unooluvanle cinenne.
GEN 15:16 Nloko noneecese, uneethi aa unaturuwela va kontha utakhali wa Amorewu khunaya uphiya nlipa naya.
GEN 15:17 Wahoolo ncuwa ninakenlene ni iwaaka ipiphi, yahoonnya niikho yotthuwa mwiisi ni nthuko woopharela wahovira nnamani coottupulanihaciya nye.
GEN 15:18 Nenne nihuku nne Mwaneene Nluku aholeehana ni Aparamu. Uneethi aa kihovaha ilapo ela ukhuma mooloko wo Wiciipitu mpaka mooloko muulupale uneehaninya Ufarati,
GEN 15:19 ilapo yo maKenii, yo maKenesii, yo maKetimonii;
GEN 15:20 yo maHitita, yo maFeresii; yo maRefayinii,
GEN 15:21 ya Amorewu, yo maKanaa, yo maKirkasii ni yo maYepusii.
GEN 16:1 Vano, Sarayi, amwaarawe Aparamu khaayanre. Kamana ahaana ipottha awe yo mwanthiyana o Wiciipitu, eehaninya Hakari.
GEN 16:2 Sarayi ahomwiirela Aparamu: Kamana Mwaneene Nluku hokateliha uyara, nkuseke ipottha aka. Pooti kinapanka nloko nhina mo yeeyo. Aparamu aheewelela yahimilyawe Sarayi.
GEN 16:3 Wakhumelenlyaya ukati wapiihenryaya Aparamu awaanyawe myakha khumi akhalaka uKanaa. Wari yooyo ukati uyo, Sarayi wanvahile awe Aparamu ipottha awe yo Wiciipitu yiihaniyaka Hakari.
GEN 16:4 Uyo ahonthukumanana Hakari ni ahorupala. Woonyaya irukulu, Hakari ahopacera waweha nseru athiyana a akunya awe.
GEN 16:5 Vano Sarayi ahomwiirela Aparamu: Wumorele yo weva ula uruttu ula ukihuviha waa. Kihoovaha ipottha aka mmatatani mwaa, vano woonyaya wiira ihorupala, inakitarawa. Mwaneene Nluku akhale mayohukhumu; ni mayonihukhumu mi ni we.
GEN 16:6 Aparamu ahomwaakhula Sarayi: Ipottha aa iri mmatatani mwaa. Upanke inhala wucivela. Vano Sarayi ahonhuviha Hakari mpaka ule utthawa.
GEN 16:7 Ncelo aApwiya ahomphwanya Hakari vakhiviru ni ilusi muthakoni, ni iphiro inrwaa uSuri,
GEN 16:8 ni ahonkoha: Hakari, ipottha ya Sarayi, unkhuma vayi? Unkela vayi? Ule ahaakhula eeraka: Kinontthawa Sarayi, nkunya aka.
GEN 16:9 Ncelo a Mwaneene Nluku ahomwiirela: Uturuwele wa nkunya aa ni weevaherere wa yooyo.
GEN 16:10 Ncelo aheera tho: Kimmowuncerera nloko naa ni khaawo nohala woorya waalikela.
GEN 16:11 Aheereliya tho ni Ncelo a Mwaneene Nluku: We uhorupala ni unamphwanya mwana ni urwaa ummaha ncina na Sumayili, kontha Mwaneene Nluku homwiiwa muhuvani mwaa.
GEN 16:12 Uyo nohala ukhala toko mwaapuru oontakhwani. Ntata nawe ninhala ukhala no waanana othene ni matata a atthu othene anhala ukhala umwanana uyo, ni makhalelo awe anhala ukhala uwaana na asunnawe.
GEN 16:13 Nna phi ncina nanvahilyawe Mwaneene Nluku amuulumannyawe: We El Royi, kontha eenre: Kihomoona ule nokoona?
GEN 16:14 Phimaana ilusi iri iriyariru o Kattes ni Perete, wiihaninye Iluusi yo Lahayi-Royi.
GEN 16:15 Hakari ahonnyara mwana a Aparamu ni ule ahommaha ncina na Sumayili.
GEN 16:16 Aparamu aarina myakha thamanini na siita (86) ceyarelo ukati wannyanryawe Hakari Sumayili.
GEN 17:1 Aparamu unhaleelaka mwakha mmoca wiira apiihere iminya (99) ceyarelo, ahomphwanyinya ni Mwaneene Nluku ni ahomwiirela: Phi mi Nluku Okuru Cothene. Weette toko cintthunaka ni wiivaherere wa mi.
GEN 17:2 Kinawuleehanana we. Kinawuncerera venci ucuulu aa.
GEN 17:3 Aparamu ahooromela vathi ni Nluku ahomwiirela:
GEN 17:4 Uviriyane. Nna phi nleehano naka we ni mi. We unhala ukhala athumwanaya ilapo cinci.
GEN 17:5 Khunhala wiihaninya tho Aparamu. Ncina naa ninhala ukhala Aparahamu, kontha mi kihoohela ukhala athumwanaya ilapo cinci.
GEN 17:6 Kinaahala uwunnuwiha venci ni nhina mwawe kinapanka maloko menci mwawe ammokhuma mamwene.
GEN 17:7 Kimmopanka nleehano naka mi ni we ni ucuulu aa uttuli waya mmalokoni mwaya, wiira kikhale Nluku aa ni Nluku a alokwaa, nimmokhala nleehano noohimala.
GEN 17:8 Ilapo yothene yo Kanaa, uryaa nletto, kimmowuvaha toko yawaa mpaka khalayi; we ni ucuulu aa ni mi kinhala ukhala Nluku aya.
GEN 17:9 Vaavale Nluku ahomwiirela tho Aparahamu: Usunke nleehano naka, ukhuma we mpaka ucuulu aa wothene unhalaa ukhalana.
GEN 17:10 Nna phi nleehano naka kimpankaka we nu ucuulu aa, ninlamuliya usunkiya, alopwana othene nhina wa nyu, anlamuliya wuula icantto.
GEN 17:11 Nnolamuliya upanka ila icantto ela toko ikanyero yo nleehano naka mi ni we.
GEN 17:12 Ukhuma nloko naa urwaka uhoolo, mwana mwanlopwana rina mahuku nanne, nolamuliya wuula icantto, akhale ooyariya wapuwani waa hata nayo oothuminya toko ipottha pooti ohikhala alokwaa.
GEN 17:13 Akhale ooyariya wapuwani waa, atthuna oothuminya ni nsuruku, anlamuliya wuulihiya icantto wiira nleehano naka nooheliya ikanyero mwirutthuni mwinyu nikhale nleehano noohimala.
GEN 17:14 Ntthu phi ntthu mwanlopwana oohuula icantto, nolamuliya ukumihinya iriyari wo uneethi aka, hohanyuriha nleehano naka.
GEN 17:15 Nluku ahomwiirela tho Aparahamu: Ukhuma nenna vaa mpaka wahoolo, amwaaraa khanhala wiihaninya tho Sarayi. Ncina naya ninhala ukhala Asaara.
GEN 17:16 Mi kinawareeriha ni nhina wa yaayo kinnowuvaha mwana. Khweeli, mi kinawareeriha ni mwa yaayo ammokhuma maloko, mamwene ni ilapo ca atthu.
GEN 17:17 Vano, Aparahamu ahooromela vathi, ahothyaa ni aheera: Wanawooryaa nlopwana o myakha iminya (100) ceyarelo unnyara mwana? Wanawooryaa Asaara uyara toko warinaya myakha miloko mithanu na micesei (90)?
GEN 17:18 Aparahamu ahomwiirela Nluku: Unhiye Sumayili akhale nkumi wamiithoni waa.
GEN 17:19 Vano Nluku ahomwaakhula: Khweeli Asaara amwaaraa, unannyarana mwana ni we unnomwiihana Isaki. Ni yooyo kimmopankana nleehano noohimala wamoca nu ucuulu awe wothene.
GEN 17:20 Mwaha wa Sumayili, kiheewa. Uviriyane. Kinonreeriha, kinnonvaha atthu enci ni kimmowuncerera ucuulu awe. Uyo nohala ukhala athumwanaya mamwene khumi na meeli ni nhina wo yooyo immokhuma ilapo yuulupale.
GEN 17:21 Nanso nleehano naka, mi kinhala upanka ni Isaki, mwana nohala unnyara Asaara mwahiyu yoola ukati ula.
GEN 17:22 Wamanlyawe wuulumaca na Aparahamu, Nluku ahothama nuuwela.
GEN 17:23 Nenno nihuku nno, Aparahamu ahonkusa Sumayili ni othene yayarenle wapuwani wawe na ale yathuminye, alopwana othene owapuwani wawe ahooliha icantto toko Nluku canlamulenlyawe.
GEN 17:24 Ukati woolihiyaya, Aparahamu wahalela mwakha mmoca wiira apiihere iminya (99) ceyarelo
GEN 17:25 ni mwanaya aarina myakha khumi na miraru.
GEN 17:26 Aparahamu ni Sumayili yoonle icantto nenno nihuku nno.
GEN 17:27 Wamoca na Aparahamu, yahoolihiya icantto atthu othene owapuwani wawe, ooyareela vava na ale oothuminya uttayi.
GEN 18:1 Nihuku nimoca ukati woothana Mwaneene Nluku ahonkhumelela Aparahamu nonkomile wankhora wo heema ankhuruttunlyawe mmitthucini co mooko co Manree.
GEN 18:2 Aparahamu ahowusa miittho awe ni ahoona alopwana araru anamwemeleenle vakhiviru. Woona wawe ahonwa wankhora wonkomilyawe ni wowakuvyaca wene aheekamela ni ahooromela mpaka vathi.
GEN 18:3 Aheera: Pwiya, wakhala wiira wanakiphwanela, nhipwahe wakarumeya enyu, woheemela.
GEN 18:4 Kinaruma wiira awaaniye maasi wiira nrapihe inyaa cinyu ni mmumule vathi mwiri ula.
GEN 18:5 Kinawuwiiherani yoolya wiira mphwanye ikuru, wahoolo nnapwahaka ukhala wiira nhophiya wakarumeya enyu. Ale yahaakhulaca: Aye, upanke toko cuulumacilyaa.
GEN 18:6 Wowakuvyaca wene, Aparahamu ahokela nheemani ni aheerela Asaara wiira ahaawule iphepa yotteela ya atthu araru, ni anyatte ni apanke mikatthe.
GEN 18:7 Wahoolo ahorwaa muncicini ni ahonthanla mwaamope omaana, ahonvaha ipottha awe wiira antthenkace wowakuvyaca.
GEN 18:8 Ahowana nhuci wookikitthiya, ileeti ni ipilipica conama catthenkaciye ni ahaavahaca. Alyacaka ono, yaheemelelaca wantthucini.
GEN 18:9 Vano yahonkohaca: Amwaara Asaara ayo, ari vayi? Ule ahaakhula: Ari nheemani mwe.
GEN 18:10 Vano nlopwana mmoca aheera: Kinawuphwanya tho mwaahiyu ni amwaaraa Asaara kinhala waaphwanya ni mwana. Asaara yeera yiiwaka moolumo ayo nari wiithela nkhora wo heema.
GEN 18:11 Aparahamu ni Asaara yahooluvalaca venci ni Asaara wahaanvirela ukati wooyara.
GEN 18:12 Phimaana yahothyaa veekhawe yupuwelaka wiira, kinooluvanlene wanaahala ukitteeliha tho nrima?
GEN 18:13 Nanso Mwaneene Nluku ahomwiirela Aparahamu: Asaara ayo anthyani yiiraka: Khweeli kinaahala uyara mi kinooluvanlene?
GEN 18:14 Ihaawo itthu inolwanawe Mwaneene Nluku? Kinawuphwanya tho mwaahiyu yoola ukati ula ni Asaara kinhala waphwanya anayanre.
GEN 18:15 Vano Asaara yahoova phimaana yahoruna yiiraka: Mi akithyele. Ule aheerela: Nhirune, nhothyaa nyu.
GEN 18:16 Vano alopwana ale warwaya yahoona uhitto nwo ilapo yo Sotoma. Aparahamu ahaaveleela ni waleeha.
GEN 18:17 Vaavale Mwaneene Nluku aheera: Kinanvithela Aparahamu itthu inhalaka upanka,
GEN 18:18 ukhala wiira Aparahamu nohala ukhala athumwanaya ilapo yuulupale ni yokuru, ni mwanlattu wo yooyo ilapo cothene cinareerihiya.
GEN 18:19 Kontha mi kihonthanla wiira aahimerye asaanawe ayo ni ucuulu awe uyo wiira yiisunke mphironi mwa Mwaneene Nluku, apaankaka coosariya ni ceekhweeli wiira Mwaneene Nluku anvahe Aparahamu citthu cinkhuluvelihilyawe.
GEN 18:20 Mwaneene Nluku aheera tho: Cinriyeleliyaya a Sotoma ni a Komora ciri ciinci ni itaampi caya nnyo cihotepa.
GEN 18:21 Kinakhuruwela wonwo koone wakhala wiira cinhiminya nnyo ciri ceekhweeli, cakhala cowoothiya kacuwele.
GEN 18:22 Vano alopwana ale yahokhumaca arwaka uSotoma nanso Aparahamu ahohala ninlelo ni Mwaneene Nluku.
GEN 18:23 Aparahamu ahaattamerya ni aheerela: Unantankanyaa nasariya wamoca ni nkaafiri?
GEN 18:24 Kaahiki yakhalaka anasariya hansiini mparasa mmo nanlelo nnatankanyaa ni khannohala unemecera nipuro nno mwanlattu wo wafenta anasariya hansiini ariwo ayo?
GEN 18:25 Yukhaleni uttayi upanka yeeyo itthu iyo, umwiiva nasariya wamoca ni nkaafiri toko wiira oyeeli ayo analikana, yukhaleki uttayi! Khanhala wuuluma wosariya hukhumu olapo yothene?
GEN 18:26 Mwaneene Nluku ahaakhula: Mi kaaphwanyaka anasariya hansiini uSotoma nwo, mwanlattu wo wafenta yaayo, kinaahala unemecera iparasa eyo yothene.
GEN 18:27 Aparahamu ahaakulela tho: Kihocuwela wiira kihoocurweelani uwuulumanani Pwiya, mi kinari ntthupi ni ittura.
GEN 18:28 Nanlelo kinakoha: Kaahiki yahalaka athanu wiira aphiyere anasariya hansiini? Nnatankanyaa iparasa eyo mwanlattu wo yaayo athanu ayo? Ayo yahaakhula: Kaaphwanyaka nwo arupayini nathanu akintankanya.
GEN 18:29 Ahaakhanyereriha Aparahamu: Kaahiki mwaphwanyaka arupayini paahi? Ayo yahomwaakhula: Mwanlattu wowafenta atthu arupayini ayo, akintankanya.
GEN 18:30 Vano ule ahopwaherera: Nhiviruwe Pwiya, nkilevele kuulume. Kaahiki mwaphwanyaka talathini pahi? Mwaneene Nluku ahomwaakhula: Kaaphwanyaka talathini akintankanya.
GEN 18:31 Aparahamu aheera tho: Kihocuwela wiira kihoocurweelani uwuulumanani Pwiya; kaahiki mwaphanyaka nwo siriini? Mwaneene Nluku ahaakhula: Mwanlattu wowafenta siriini ayo, akintankanya.
GEN 18:32 Vano Aparahamu aheera tho: Nhiviruwe Pwiya, nanso nkilevele wiira kuulume ikwaha imoca pahi. Kaahiki mwaphwanyaka khumi pahi? Mwaneene Nluku ahaakhula: Mwanlattu wo wafenta khumi ayo, akintankanya.
GEN 18:33 Namanleene umuulumana Aparahamu, Mwaneene Nluku ahokhuma ni Aparahamu ahoturuwela uwaani.
GEN 19:1 Wakelaya ncuwa nno ancelo eeli ale yahophiyaca uSotoma, ni Loti onkomile wankhora woparasa. Ukati woonnyawe ahoonwa ni ahorwaa wakhelelaca. Ahokhoroma ni ahopiiha iyuci awe vathi,
GEN 19:2 ni aheerelaca: Asuulupale aka, sontte. Nkivelele mpani wa karumeyi inyu. Wonwo nnaahala urupa nuurapa. Wasaka meelo mpwaheke nrwaka. Ayo yahaakhulaca: Mena, ninkorupa vate.
GEN 19:3 Nanso ule ahaakhanyererihaca, ni ale yahommelelaca ni yahokelaca mpani. Loti ahoruma watthonkomaniheraca yoolya ni woosa mikatthe cohi miropo, ni ale yaholyaca.
GEN 19:4 Ahinaya urwaca wurupani, alopwana othene o miphantte cothene co Sotoma, ukhuma acikani ni oolupale yahovirelaca inupa eyo.
GEN 19:5 Ni yahomwiihanaca Loti amwiirelaka: Ari vayi alopwana awacile wapuwani waa ayo ula uhiyu ula? Uniwiihere vate va nimphavela waarupana.
GEN 19:6 Loti ahokhuma mpani mmo, ni ahotthyaa nkhora uyo nttuli nttuli,
GEN 19:7 ni aheerelaca: Mena asimpwanaka! Nhipankace itthu yoonanara!
GEN 19:8 Moonace, kihaana asaana eeli asithiyana asimwarusi. Kinawawana wiira nyu mwapankace itthu imphavelenyu. Nanso ala asilopwana ala nhaapankace itthu, kontha ari mmatatani mwaka ni ankhikicera ipuwa aka.
GEN 19:9 Yahokhuwelaca yiiraka: Ukhume va! Ni yaheeraca tho: Ula nlopwana ula ri nletto, vano nophavela ukhala mayoohukhumu! Ninkowupanka we itthu yootepa wavikana ayo. Vano yahonkakhaca Loti wonkhitto ni yahorwaca uhoolo wiira yaakace nkhora.
GEN 19:10 Commo, aletto eeli ale yahonvaraca Loti nuumpurulela mpani ni yahotthyaca nkhora oyo.
GEN 19:11 Vano yaharakalihaca ni iretta yohoona alopwana yari wankhora wonupa ayo, ukhuma acikani mpaka asuulupale ayo, mpaka wahinooryaya uphwanya nkhora.
GEN 19:12 Alopwana eeli ale yahonkohaca Loti: We uhaana tho ntthu mparasani mu, mivokohica, asaana asilopwana na asithiyana, atthuna mmuci nkina? Mwatamihace va,
GEN 19:13 kontha nimphavela ukwanyulaca nna nipuro nna. Cinariyelelawe Mwaneene Nluku ala atthu ala ciri cinci, phimaana honiruma ukwanyula iparasa.
GEN 19:14 Vano Loti ahorwaa wuulumana mivokohi cawe, ale yahala waathelaca asaanawe, ni yaheerelaca: Nkhumace wowakuvyaca nna nipuro nna, kontha Mwaneene Nluku nophavela ukwanyulaca iparasa ela! Nanso ayo yahopuwelaca wiira uyo aanawathwelana.
GEN 19:15 Ukhuma waya ncuwa, ancelo ale yahonkhanyererihaca Loti yiiraka: Wakuve! Wakuse amwaaraa na asaanaa eeli, atthuna ni nyu nnaahala ukhwaca wanhalaya uttarusiya iparasa eyo.
GEN 19:16 Amananihaka ukhotta, asilopwana ale yahommaraca moono oyo, wamoca na amwaarawe na asaanawe, ni yahaakumihaca nipuro nno wokuru ni yahohiyaciya uta waya iparasa, kontha Mwaneene Nluku ahoonelaca ikiriri.
GEN 19:17 Ukumihiya waya mparasa mmo, ncelo mmoca ahomwiirela Loti: Ntthawe mwanlattu wofenta ukumi! Uhiwehe uttuli wala uheemele nipuro nnikuwani! Utthawele umyakoni, atthuna we unaahala wiiviya!
GEN 19:18 Wahoolo Loti aheerelaca: Mena, Pwiya aka!
GEN 19:19 Karumeyi inyu hokhala uwoopwa mwanlattu wokiriri cinyu, kontha nyu nhokoonela ikiriri nrattavelelaka ukumi aka. Akinoorya utthawela mpaka umwakoni, wiira yowerya ila ihikiphwanye ni mi kikhwaaka.
GEN 19:20 Vakhiviru va ihaawo iparasa yankani. Iri vakhiviru cinenne wahoreera utthawa mpaka uphiya wonwo. Nkihiye kirwee wonwo! Hata ikhale yankani cinenne, kinkokhala uwoopwene.
GEN 19:21 Ule ahaakhula: Wahoreera. Mi kinaahala wukavihera yeeyo ivekenlyaa eyo. Akinhala ukwanyula iparasa inhimilya eyo.
GEN 19:22 Wakuve utthawe. Akinhala upanka itthu we uhinaya uphiya wonwo. Phimaana iparasa iyo yiihaniyaka Sowari, manaaya ikani.
GEN 19:23 Loti, uphiya wawe uSowari, ncuwa nahokhuma mwilaponi mmo.
GEN 19:24 Vano Mwaneene Nluku ahokurusela ilapo yo Sotoma nuKomora mooro wowopiha wookhuma wirimu.
GEN 19:25 Commo yahokwanyula nye iparasa nye ni nikuwa nothene, wamoca na atthu yakhalaca ayo ni imatta caya nyo.
GEN 19:26 Nanso amwaarawe Loti yahoweha uttuli ni yahothatuwa iruwa yo maakha.
GEN 19:27 Wasilyaya, Aparahamu ahonwa ni ahoturuwela nipuro namoonananyawe Mwaneene Nluku.
GEN 19:28 Ni ahoweha uSotoma nuKomora, nu nikuwani nothene, ni ahoona mwiisi mwinci uwelaka ukhuma vathi, toko mwiisi wo nttukutthani.
GEN 19:29 Ukati wakwanyunlyawe iparasa ciri unikuwani, Nluku ahomuupuwela Aparahamu ni ahonkumiha Loti mmasakhani wokwanyuliya iparasa cakhalawe.
GEN 19:30 Loti ahokhuma uSowari na asaanawe eeli asithiyana ni yahorwaca ukhala umyakoni, kontha anawoova ukhala uSowari. Ule akhala nnikhukuni wamoca na asaanawe eeli asithiyana.
GEN 19:31 Nihuku nimoca, mwana mwanthiyana omuulupale, ahomwiirela omwankani uyo: Apaapehu ahooluvala, ni khaawo nlopwana vakhiviru unithela toko ilemalelo yolapo yothene.
GEN 19:32 Nrwee naavahe nipha apaapehu ni wahoolo va nathukumananeke wiira nloko nihu nihikhwelakhwele.
GEN 19:33 Yoole uhiyu ule yahaavahaca nipha apaapaya. Vano mwana mwanthiyana oomuulupale uyo ahokela ni ahaathukumanana athumwane. Ni ale khayaacuwelenle ukati warupilyawe ni wonwilyawe.
GEN 19:34 Usa waya, mwana mwanthiyana omuulupale uyo ahomwiirela omwankani uyo wiira: Uhiyu kihaathukumanana apaapa. Nrwee naavahe tho nipha ula uhiyu ula, ni we unaahala waathukumanana, wiira nihikhwelakhwele nloko na apaapehu.
GEN 19:35 Vano tho yahaavahaca nipha athumwanaya yoole uhiyu ule, ni mwana mwanthiyana omwankani uyo ahorwaa wathukumanana. Ni ayo khayaacuwelenle ukati warupawe ni wonwilyawe.
GEN 19:36 Commo, asaana oyeeli a Loti yahorupalihaciya na athumwanaya.
GEN 19:37 Omuulupale uyo ahonnyara mwana, ni ahommaha ncina na Mwape. Yooyo phiri athumwane Amwape oleelo.
GEN 19:38 Omwankani uyo ciicammo ahonnyara mwana, ni ahommaha ncina na Pin-Amii. Ula phiri athumwane atthu Amonii oleelo.
GEN 20:1 Aparahamu ahokhuma vale arwaaka nttetthe wo Nekepe ni ahorwaa ukhala iriyariru Katesi nuSuri. Wahoolo ahokhala ukati vakani uKerari.
GEN 20:2 Uyo eerela: Asaara wiira mwanrokoraka. Vano, Apimeleke, mwene uKerari ahoruma urweliya Asaara ni ahaakusa ukhala awawe.
GEN 20:3 Yooyo uhiyu uyo Nluku ahowa waApimeleke munttorani ni ahomwiirela: We unaakhwa! Athiyana yakusilyaa ayo ahotheliya.
GEN 20:4 Nanso Apimeleke, hinaya waarupana aheera: Pwiya, nnowa ukwanyula uneethi wohicuwela itthu?
GEN 20:5 Kahimmwe yooyo phikiirenle: Nthiyana ola mwanrokoraka? Ni ayo khayinre: Nlopwana ola nrokoraka? Ipankilyaka iri yo nrima wooreera ni wohinlattu.
GEN 20:6 Vano Nluku ahomwaakhula munttorani: Aye, mi kinacuwela wiira upankile itthu iyo ni nrima wooreera. Mi kihohiiha wiira uhikufuru phimaana kiwatelihaka warupana.
GEN 20:7 Vano waturusele athiyana ayo wa awannyaya. awannyaya Ayo nnapiyu, ni anawuswalela wowufentelela, wiira we uhikhwe. Nanso wahaturuseke ukupali wiira we ni awaa othene nnakhwaca.
GEN 20:8 Wasilyaya wicisuru Apimeleke ahaalattula mahumu awe ni wattonkela cothene cankhumelenle, ni yahoovaca venci.
GEN 20:9 Wahoolo Apimeleke ahomwiihana Aparahamu ni ahomwiirela: Unipankile cani? Kukosenre isiyani mpaka ukikosiha venci ni omwene aka wothene? Ikipankile iyo khampankiya ntthu.
GEN 20:10 Ni Apimeleke ahonkoha Aparahamu: Yupankihile isiyani commo?
GEN 20:11 Aparahamu ahaakhula: Kahoopuwela wiira: Khweeli khaawo nomoova Nluku nna nipuro nna ni kinawiiviya nlattu wa amwaaraka.
GEN 20:12 Uhiya commo, ayo khweeli mwanrokoraka mphantte wa apaapa, nanso wohikhala mpantte wa maama. Vano ahokhala amwaaraka.
GEN 20:13 Ni Nluku wakikumihilyawe uwaani wa apaapa, mi kaheerela amwaaraka ayo: Nkiweele iraati: Nipuro phi nipuro ninhalehu uphiya, nkiireleke wiira: Ule nrokoraka.
GEN 20:14 Vano Apimeleke ahowiha ikhontwaa ni imope, ipottha cilopwana ni cithiyana, ahommaha Aparahamu ni ahonturusela amwaarawe ayo.
GEN 20:15 Ni Apimeleke aheera: Ilapo aka iri ni we. Ukhaleke nipuro phi nipuro ninoocivela.
GEN 20:16 Apimeleke ahomwiirela Asaara: Arokoraa ayo kihaavaha ncurukhu elufu (1000) wopheeta, wiira walivyane wutthekenlyaka va wamiithoni wa atthu othene. Commo othene phinhalaya ucuwela wiira we khiiwo incuwelaa yookosa.
GEN 20:17 Wahoolo, Aparahamu ahonvekela Nluku wiira avone, ni Nluku ahomvoniha ni amwaarawe ni ipottha cawe, mpaka yahanca uyaraca,
GEN 20:18 kontha Mwaneene Nluku ahaapankaca eekupa asithiyana othene a Apimeleke nlattu wa Asaara, amwaara a Aparahamu.
GEN 21:1 Mwaneene Nluku ari ooloka ni Asaara, toko camwiirenlyawe, ni ahompanka toko cankhuluvelihilyawe.
GEN 21:2 Ukati wacilyawe Nluku, Asaara ahonnyara mwana ni ahommaha Aparahamu nooluvanle.
GEN 21:3 Mwana annyarannyawe Asaara, Aparahamu ahommaha ncina na Isaki.
GEN 21:4 Isaki wapiihenryawe mahuku mathanu na mararu ookumi, Aparahamu ahomuuliha icaantto, toko calamuleliyawe ni Nluku.
GEN 21:5 Ukati wannyanryawe Isaki, Aparahamu ahaana myakha iminya (100).
GEN 21:6 Asaara aheera: Nluku hokiteeha, ni othene anhala ucuwela ila itthu ila anaahala uthyaa ni mi wamoca.
GEN 21:7 Ni ahopwaherera eeraka: Aacuwela tipani wiira Asaara anhala umwaamwiha mwana? Mothene mmo, mi kihommaha mwana Aparahamu nooluvanle.
GEN 21:8 Isaki ahonnuwa ni ahohiihiya nipele. Ni nenno nihuku nno Aparahamu ahopanka isukuhuulu.
GEN 21:9 Woonnyaya Asaara wiira mwana a Akaari, munnaciipitu, annanveha Isaki,
GEN 21:10 yahomwiirela Aparahamu: Umoomole Akaari ni mwanawe uyo, kontha mwanaka mi khanhala ukhala nkelanupa wamoca ni ula mwana ula.
GEN 21:11 Iyo yahoncukuliha venci Aparahamu kontha ahokela mpwiini mmo mwanawe.
GEN 21:12 Nanso Nluku ahomwiirela Aparahamu: Uhicukulace nlattu wo mwana ni wopottha. Upanke yothene inhalaya uhimya Asaara, kontha nhina mwa Isaki phinhalaya ulemelihiya amucyaa ayo.
GEN 21:13 Nanso, ciicammo nhina wa mwana eepottha unakhala uneethi, kontha ni uyo ri mwanaa.
GEN 21:14 Wasilyaya wicisuru, Aparahamu ahokusa mikatthe ni nipinka no maasi oocareene, phunvahaka Akaari wiira akuse wanikhatani wawe ni ahonleeha wamoca ni mwanawe ule. Uyo ahottotta nttala, phurwaaka arukureryacaka itakhwa yo Peresepa.
GEN 21:15 Wamanlyaya maasi nnipinkani mmwe, ahonhiya mwanawe waniphumpuluni
GEN 21:16 ni ahonkoma vakhiviru wene, mattalivelo aya yaari toko wanvelavelaya muupa wovonyinya ni muura, kontha eera: Akintthuna umoona mwanaka akhwaka. Ni nonkomilene vaavale, ahopacera wunla.
GEN 21:17 Nluku aheewa wunla wo mwana, ni ncelo a Nluku o wirimu, ahomwiihana Akaari ni ahomwiirela: Unocukulani, Akaari? Uhoove, kontha Nluku heewa wunla wa mwanaa nwo nipuro nimweesilyaa nno.
GEN 21:18 Unkuse mwanaa uyo, kontha nhina mwa yooyo kimmopanka uneethi mwinci.
GEN 21:19 Vano Nluku ahontthukula wiitho Akaari ni ahoona iluusi. Ahorwaa mpaka nenne nipuro nne, ahocariha maasi nnipinkani mmwe nuunvaha mwanawe wiira awurye.
GEN 21:20 Nluku ari ni mwana uyo. Uyo ahonnuwa, ahokhala ntakhwani ni ahokhala mayolupattha ni muura.
GEN 21:21 Aakhala itakhwa yo Paraa, ni anumwane yahomphavelela nthiyana olapo yo Wiciipitu.
GEN 21:22 Yoole ukati ule, Apimeleke naveleeliyene ni Fikoli, nhooleli aanakhotto awe, ahomwiirela Aparahamu: Nluku ri ni we ni citthu cothene cimpankaa.
GEN 21:23 Vano, ukilupelele, wamiithoni wa Nluku, wiira khunkithepya tho, ukhuma mi mpaka asaanaka nu ucuulu aka wothene. Ulokihe ilapo iwakhelenle unari nletto ni malokelo yupakilyaka.
GEN 21:24 Aparahamu ahaakhula eeraka: mi Kiholupela.
GEN 21:25 Nanso Aparahamu ahonkuphula Apimeleke nlattu woluusi yakhiyaya ipottha cawe ni nkhitto.
GEN 21:26 Nanso Apimeleke ahomwaakhula: Akinoncuwela pankile iyo itthu iyo. Khunakihimerya itthu, ilelo va phincuwelaka.
GEN 21:27 Paahi, Aparahamu ahowiha ikhontwaa ni imope, phimmahaka Apimeleke ni othene yaholehana itthu imoca.
GEN 21:28 Aparahamu ahothanlela nipuro naya ikhontwaa saapa.
GEN 21:29 Apimeleke ahonkoha eeraka: Inthoonyera isiyani ikhontwaa saapa cikumihilyaa munhuwoni mmo?
GEN 21:30 Uyo ahaakhula: Utthune ikhontwaa cinoovahaaka nnya, toko usaahiti wocuwanyaa wiira thi mi kithipile ilusi ila.
GEN 21:31 Phimaana nne nipuro nne nihaaninyaka uPeresepa, kontha oyeeli wonwo phaatanacilyaya.
GEN 21:32 Anaatanacilene uPeresepa, Apimeleke ni Fikoli, nhooleli anakhotto awe, yahohokoleela ilapo yo mafilistiya.
GEN 21:33 Aparahamu arwaaka ahomphattyaa wepa uPerisepa ni vaavale aholapela ncina na Mwaneene Nluku Oohimala.
GEN 21:34 Ni Aparahamu ahokhala ukati mwinci ilapo yo mafilistiya.
GEN 22:1 Unavinre ukati vakani, Nluku ahonlawiha Aparahamu, amwiirelaka: Aparahamu. Uyo ahaakhula: Phi mi va.
GEN 22:2 Vano Nluku aheera: Unkuse mwanaa, mwanaa mmoca yooyo, Isaki nonfentesaa uyo, ni urwee nttetthe wo Muriyaa. Wakipankele yooyo wonwo isataka yoopahiya wamwaakoni unhalaaka wuthoonyera.
GEN 22:3 Wasilyaya vale, Aparahamu ahonwa ni ahontthenkemaniha puuru awe, ahaatthukana nloko amirawo awe eeli wamoca ni Isaki mwamwanawe, ahopharula ikhuni cosataka, ahopwaha arwaaka nipuro nahimeriyawe ni Nluku.
GEN 22:4 Nihuku noneeraru, Aparahamu ahowusa miittho awe ni ahoona nipuro nno nari uttayi.
GEN 22:5 Ule aheerela amirawo awe: Nhalaceke va ni puuru ula. Mi ni mmirawo ola ninrwaa uswali nwe ninawuphwanyacani.
GEN 22:6 Aparahamu ahokusa ikhuni nnye coorwa upaha isataka ni ahonrya Isaki, ni uyo ahokusa makhala o mooro ni mwaalo. Ni yeettacaka wamoca.
GEN 22:7 Isaki aheerela athumwane: Paapa! Aparahamu ahaakhula: Phi mi va, mwanaka. Isaki ahaakoha: Makhala o mooro ni ikhuni phi nnya, vano iri vayi ikhontwaa yotthuvo yoopahiya.
GEN 22:8 Aparahamu ahaakhula: Mwanaka, Nluku nanivaha ikhontwaa yotthuvo yoopahiya. Ni yahopwahaca yeettacaka wamoca.
GEN 22:9 Waphilyaya nipuro nathoonyeriyawe ni Nluku, Aparahamu ahoteka ikhilompi yoopaha isataka ni ahotataanihaca ikhuni vaavale. Ahontthuka Isaki, phumweesaka waculu ikhuni vale.
GEN 22:10 Vano ahaawula ntata nakusilyawe mwalo ule wiira anhitte mwanawe.
GEN 22:11 Nanso Ncelo a Mwaneene Nluku ahomwiihana eeraka: Aparahamu! Aparahamu! Ule ahaakhula: Phi mi va.
GEN 22:12 Vano Ncelo ule aheera: Uhinhonone mmirawo uyo. Uhimpanke itthu. Vano kihocuwela wiira we unamoova Nluku, kontha khukithuwile mwanaa, mwanaa yooyo rinaa mmoca paahi.
GEN 22:13 Aparahamu ahowusa miitho awe ni ahoona ikhontwaa inaphanre inyaka caya nnyo wataparikhwani. Ahorwaa ukusa ni ahovaherera itthuvo yoopahiya nipuro no mwanawe.
GEN 22:14 Aparahamu ahovaha nenno nipuro nno ncina na Mwaneene Nluku Naavaha. Phimaana mpaka ilelo waneereliyaya: Mmwaakoni mwa Mwaneene Nluku naavaha.
GEN 22:15 Ikwaha yonayeeli Ncelo a Mwaneene Nluku ahomwiihana Aparahamu
GEN 22:16 eeraka: Mwaneene Nluku heera: Kinalupela, mwanlattu wa yeela itthu ipankilyaa, uhikithuwaka mwanaa, mwanaa mmoca yooyo urinaa,
GEN 22:17 waamini wiira kinawureeriha ni nloko naa kinapanka ninci toko itthoottwa co wirimu ni toko nhava wo mpharyaa. Nloko naa nimmotthema isittatti ceenani aya,
GEN 22:18 ni nhina mwa nenno nloko nno, ilapo cothene cimmoreerihiya, kontha we uhokiiwelela.
GEN 22:19 Vano ahohokoleela Aparahamu waariaya amirawo awe ni othene wamoca yahoturuwela uPereseepa wakhalawe.
GEN 22:20 Unavinre ukati vakani, ahohimerya Aparahamu wiira Milka ahaayara asaana ni Nahori, munnaawe Aparahamu.
GEN 22:21 Ussi ari oontthara, Pussi munnaawe, Kemuweli, athumwane Arani,
GEN 22:22 Kesette, Haso, Piltasi, Yitlafi ni Petuweli,
GEN 22:23 athumwane Repeka. Ala asaana athanu na araru yaayanryawe Milka ni Nahori, munnaawe Aparahamu.
GEN 22:24 Ni mwaarawe oohitteliheraninya, neehaninya Reuma, ahaayara asaana ala: Tevaa, Kahami, Tahasi ni Maaka.
GEN 23:1 Vano Asaara yahokhala myakha iminya wo siriini na saapa (127) ceyarelo,
GEN 23:2 ni yahokhwa anari uKiriati-Arapaa uneehaninya Eforoni, ilapo yo Kanaa. Aparahamu aheekhupanya ni wonlela Asaara.
GEN 23:3 Ni Aparahamu ahiyaka mayithi awe ahonwa arwaaka wa asaana a Heti ni aheerela:
GEN 23:4 Mi ki nletto, ni mweettakaci. Kinaalepela nipuro noopanka mahiye wiira kivithe mayithi aka.
GEN 23:5 Vano asaana a Heti yahomwaakhula Aparahamu yiiraka:
GEN 23:6 Univiriyane muulupale, nhooleli a Nluku uri ni hi. Waavithe amwaaraa ayo mahiye anhalaa utthuna. Khaawo nohala wuuthuwa mahiye wiira waavithe amwaaraa.
GEN 23:7 Vaavale, Aparahamu ahonwa ni ahooromela vathi wamiithoni wasineene ilapo, asaana a Heti.
GEN 23:8 Ule aheera: Wakhala wiira nhokitthunihera wavitha amwaaraka mu, nkiviriyane. Mwakulumele Eforoni, mwana a Sowari,
GEN 23:9 wiira akivahe nikhuku no Makipela niri umaverihela imatta awe iyo, ni akihimerye ihisapu enoncivela wiira akhale mahiye aka.
GEN 23:10 Vano Eforoni onkomile wamoca na asaana a Heti, ni Eforoni, nHitita, ahomwaakhula Aparahamu, yiiwaka asaana a Heti ni atthu othene yaari wa nkhora woparasa eeraka:
GEN 23:11 Mena, muulupale, ukiviriyane. Imatta iyo kinawuvaha, ciicammo nikhuku niri mmattani ni kinawuvaha wa miithoni wa amucyaka, uvitthe mayithi aa ayo.
GEN 23:12 Vaavale Aparahamu ahooromela wiitho waya asineene ilapo.
GEN 23:13 Ni ahomwiirela Heporoni yiiwaka atthu othene: Ukiiwe, wakhala wiira unakupali ukihimerye ihisapu yomatta iyo mi kinawuliva, wakhelele ncurukhu aka uyo wiira kivithe mayithi aka.
GEN 23:14 Vano Eforoni ahomwaakhula Aparahamu eeraka:
GEN 23:15 Ukiiwe muulupale aka: Imatta iyo ncurukhu aya uri iminya cese wopheeta. Isiyani vava vaa we ni mi? Uvithe mayithi aa ayo.
GEN 23:16 Aparahamu ahokupali ihisapu ile ni ahokumiha ncurukhu nuunliva Eforoni wahimyacilyawe yiiwaka asaana othene a Heti, ncurukhu iminya cese wopheeta wathumeliya itthu nnakosoni.
GEN 23:17 Phimaana nthala na Efromi naari uMakipela uhoolo waya uManre; ukhuma nthala nno, nikhuku naari munthalani mmo, ni miri cari munthalani mmo ni nnyo cari nceresere nnyo,
GEN 23:18 cahokhala ca Aparahamu maana ahothuma yoonaka asaana othene a Heti naale yari wa nkhora woparasa.
GEN 23:19 Wahoolo Aparahamu ahaavitha amwarawe yeehaninya Asaara nnikhukuni niri imatta yo Makipela uhoolo waya uManre uneehaninya Eforoni, ilapo yo Kanaa.
GEN 23:20 Phimaana imatta iyo ni nikhuku nari mmattani mmo yahokhala mahiye Aparahamu kontha anotumiheriya na asaana a Heti.
GEN 24:1 Yooyo ukati uyo Aparahamu ahooluvala ni Mwaneene Nluku ahonvaha iparakha wo citthu cothene.
GEN 24:2 Vano Aparahamu amwiihanaka karumeyi awe omuulupale owapuwani arina nlamulo no citthu cothene cariwo, ahomwiirela: Weese ntata naa nno wanatarani waka,
GEN 24:3 ni ulupele wa Mwaneene Nluku, mwaneene irimu ni itthaya wiira wamphavele nthiyana oonthela mwamwanaka uhinthanle iriyari ya asithiyana annakanaa anakhalaneehu ala mu.
GEN 24:4 Nanso urwee uwaani, ilapo iyareliyaka ni wamucyaka ni wanthanle nthiyana nohala unthela mwanaka Isaki.
GEN 24:5 Vano karumeya uyo ahokoha: Kaahiki nthiyana uyo ahitthuneke uwa ni miyano uno, kaankuseke mwamwaninyu uyo nuunrwana ilapo ikhumileenyu?
GEN 24:6 Aparahamu ahomwiirela: Kaasope. Akinphela wiira mwamwanaka uyo unturusele uwaani.
GEN 24:7 Mwaneene Nluku, Nluku o wirimu kikumihile ilapo yo mayapaapa ni iyareelyaka aholupela ni ahokikhuluveliha ukivaha mi ni ucuulu aka ila ilapo ela. Ayo anaahala wuveleelihera ncelo uhoolo waa, wiira we waanthanle woonwo nthiyana omaana oohala unthela mwanaka.
GEN 24:8 Nanso nthiyana uyo ahithuneke uwa ni we uno, unahala wothopwa ulupela waa nwo. Itthu ihimphavelaka iri unturusela mwana uyo uwaani.
GEN 24:9 Vano karumeya ule aheesa ntata nawe wanatarani wa Aparahamu nkunya awe ni aholupela upanka.
GEN 24:10 Vaavale karumeya ule ahokusa inkamira khumi ca nkunya awe, ni ahokhuma ni mihakhu ca nkunya awe ule mmatatani mwawe, ni ahorwaa uMesapotamiya, iparasa yo Nakoori.
GEN 24:11 Ni ahokhoromihaca inkamira cawe uta woparasa, vakhiviru ni iluusi, yocoocilo ukati asithiyana unrwaya urika maasi.
GEN 24:12 Vano aheera: Mwaneene Nluku, Nluku a nkunya aka Aparahamu, ukivahe ilelo ukumaana wooreera, ni umpanke nnema nkunya aka Aparahamu.
GEN 24:13 Kinawoona va kemeenle waluusi, ni asaana asithiyana a atthu oparasa ela ammweesa urika maasi va.
GEN 24:14 Nna va kinoolepelani wiira, mwali nohalaka umwiirela uyo: Wiinamihe mwaapu uyo kiwuryee; ni uyo akiirelaka mmuryeke ni kinavaha maasi inkamira cinyu nnyo; yooyo phimwacileenyu wiira anthele karumeya enyu Isaki, ni mi kinahala ucuwela wiira nhonpanka nnema nkunya aka.
GEN 24:15 Vaavale, hinamaliha uswali, ahowa Repeka, mwana a Petuweli, mwana a Milka, amwaara a Nakori, munnaawe Aparahamu, nakusile mwaapu wanikhatani.
GEN 24:16 Mwanthiyana ole aari ooreera venci, mwali oohipaca urupa ni nlopwana; ahophiya waluusi nuucariha mwaapu awe nuuturuwa.
GEN 24:17 Karumeya awe Aparahamu ahontthimakela nuumwiirela ukivahe maasi aari mmwapuni ayo kiwurye.
GEN 24:18 Ule ahaakhula: Uwuryeke nkunya. Wowakuvyaca ahorula mwaapu ule nuunvaha mmatatani mwawe wiira awurye.
GEN 24:19 Vano namanleene unvaha maasi owurya aheera: Kinarika tho maasi kivahe inkamira caa nnyo wiira ciwurye maasi ootosa.
GEN 24:20 Wowakuvyacawene aheetthela maasi ale nwuryeryoni monkamira, ni ahorwaa tho uluusi urika maasi mpaka uvaha inkamira cothene.
GEN 24:21 Nlopwana ole anomaala aweehaka ni awehereryaka wakhala wiira Mwaneene Nluku khaamweettihacile mahala ikwaha awe eyo.
GEN 24:22 Wahoolo inkamira nnyo umala waya uwurya, karumeya a Aparahamu ahokumiha ipaara imoca yopirinku cowooru cookhala imaara siita ceelemelelo aya ni ikhankani piili cowooru cookhala imaara iminya wosirini ceelemelelo aya nuunvaha mmatatani mwawe.
GEN 24:23 Vano ahonkoha eeraka: We mwana awani? Kinawulepela ukihimyacere. Ni kahiki nihaawo nipuro waathumwana nwo wiira nomake?
GEN 24:24 Mwanthiyana ole ahaakhula eeraka: Mi ki mwana a Petuweli, mwana awannyawe Milka, yariye ni Nakori.
GEN 24:25 Ahomwiirela tho: Nihaana malasi, coolya cinci ni nipuro noorupa.
GEN 24:26 Vano nlopwana ule ahooroma phinlepelaka Nluku
GEN 24:27 eeraka: Areerihiye Mwaneene Nluku a nkunya aka Aparahamu, hitamihile nifento neekhweeli wa nkunya aka. Ni Nluku uhokihola mi ikwaha yothene mpaka ukipiha walokwawe nkunya aka.
GEN 24:28 Vaavale mwanthiyana ole ahokhuma atthawaka mpaka waanumwane ni ahottonka yakhumeleenle.
GEN 24:29 Repeka ahaana nrokorawe eehaniya Lapanu. Ni Lapanu wiiwa wawe mwaha oyo, wowakuvyaca ahokhuma atthawaka mpaka umphwanya nlopwana ule uluusi.
GEN 24:30 Kontha weenre coo: Lapanu wamonnyawe mwanrokorawe nawanre ipirinku ni ikhankani nnye, ni wamwiiwilyawe mwanrokorawe uyo ni weewilyawe moolumu amwanrokorawe ayo eeraka: Coo phikulumacenryawe nlopwana uyo. Vano Lapanu ahonrwela ni ahomphwanya neemenle waluusi ni inkamira cawe nnyo.
GEN 24:31 Ni ahomwiirela: Nrwee uwaani we ooreerihiya ni Nluku unhala urupelani vate? Kontha mi uwaani nwo kihotthenkemaniha mapuro oorupa we mpaka inkamira caa nnyo.
GEN 24:32 Vaavale nlopwana ule uphiya wawe uwaanyawe Lapanu, ahovahiya nipuro noorupa, maasi oorapiha inyaa cawe, wamoca na atthu yarinawe, ni inkamira nnye cahoheleliya malasi ni makukhu.
GEN 24:33 Vano nawiiheriyeene yoolya, ule aheera: Akinlya mpaka kipacereke uhimyaca itthu yawenlyaka eyo. Lapanu ahomwaakhula eeraka: Wuulumaceke.
GEN 24:34 Ule phenryawe: Mi ki karumeya a Aparahamu.
GEN 24:35 Mwaneene Nluku honvaha iparakha ciinci nkunya aka, hokhala thaciri, honvaha ikhontwaa ni imope ciinci, ipheeta ni iwooru, haana ipottha cilopwana ni cithiyana, inkamira ni apuuru.
GEN 24:36 Mpaka Asaara mwaara a nkunya aka, honnyarana mwana nooluvanleene ni citthu cothene honvaha mwana uyo.
GEN 24:37 Vano nkunya aka hokilupeliha mi eeraka: Uhinkuse nthiyana Annakanaa ri yeela ilapo inkhalaka ila unvahaka mwanaka wiira anthele,
GEN 24:38 nanso urwee uwaani, ilapo yo mayapaapa ni wamucyaka wonwo wanthanle nthiyana nohala unthela mwanaka.
GEN 24:39 Phimaana mi kahonkoha nkunya aka, wiira kaahiki nthiyana uyo ahitthuneke ukitthara uno?
GEN 24:40 Ule ahokaakhula eeraka: Mwaneene Nluku ri ni mi. Uyo naahala wuuvelelihera ncelo owuuhola iphiro wiira wankuse nthiyana o wanrukuluni waka, o wapuwani wa apaapa wiira anthele mwanaka.
GEN 24:41 Nna unhala wothopwa itthu yurumilyaka weeraka uphiya wamucyaka nwo ukhottiheriyaka uvahiya nthiyana oyo. Paahi uhotopwa itthu yurumilyaka eyo
GEN 24:42 Phimaana ilelo uphiya waka uluusi kiholepela kiiraka: Sontte Mwaneene Nluku, Nluku a ankuya aka Aparahamu, wakhalaka wiira ikwaha impankaka ila iri yotthuna winyu nkeettihe ratta.
GEN 24:43 Nna va kiri waluusi yo maasi, nkiiwe, mwali nohala uwa urika maasi uyo, ni mi kimwiirelaka: Ukivahe maasi kiwurye ommwaapuni mwa ayo;
GEN 24:44 ni uyo akiirelaka: Uwuryeke we, ni ciicammo kinahala uvaha maasi inkamira caa nnyo paahi yooyo phi nthiyana mwacilyawe Mwaneene Nluku wiira akhale amwaara a mwana a nkunya aka.
GEN 24:45 Wanowiira kihinamaliha uswali nwo, pha wawe waluusi va Repeka nakusile mwaapu awe wanikhatani ahophiya mpaka waluusi ni ahorika maasi. Vano mi kahomwiirela: Ukivahe maasi kiwurye.
GEN 24:46 Ule wowakuvyaca aheenamiha mwaapu awe nuukiirela uwuryeke, ni ahovaha uwurya inkamira caka nnyo.
GEN 24:47 Vano kahonkoha wiira we mwana awani? Uyo ahokaakhula eeraka: Mi ki mwana a Petuweli mwana a Nakori nnyanryawe ni Milika. Phimaana kihommwariha ipirinku nnyo, ni ikhankani mmyononi mmo;
GEN 24:48 ni kahoromela vathi kinlapelaka nuunsukuru Mwaneene Nluku, Nluku a nkunyaka Aparahamu, kiveleenle iphiro yomaana wiira koonkuse mwana a alokwawe nkunya aka wiira anthele mwanawe.
GEN 24:49 Nna va munthonyihere ikhweeli nkunya aka, mwatthuna nkihimyacere, ciicammo mwahitthune nkihimyacere wiira mi kicuwele yoweettela.
GEN 24:50 Vaavale Lapanu ni Petuweli yahaakhula: Cothene cipankaciye ni Mwaneene Nluku, hi khaninoona yowuhimerya yoonanara atthuna yooreera.
GEN 24:51 Nna va Repeka uyo phu ula. Unkuseke ni urweke wiira atheliye ni mwana akunya aa, toko cihimilyawe Mwaneene Nluku.
GEN 24:52 Vano karumeya Aparahamu, ahoromela vathi anlapelaka Mwaneene Nluku.
GEN 24:53 Ni ahokumiha mihaca copheeta, cowooru ni ikuwo phummahaka Repeka. Ciicammo ahokumiha citthu comaana phummahaka nrokorawe eehaninya Lapanu ni anumwane.
GEN 24:54 Wahoolo, ule na alopwana yarinawe ale aholya nuurupa. Usa waya, karumeya Aparahamu aholeeha eeraka kihorwaa wankunya aka.
GEN 24:55 Nanso anumwane ni mwanrokorawe Repeka yaheera: Unihiyere mwanthiyana ula mahuku vakani, atthuna mahuku khumi paahi uhoolo nwo naarwaka.
GEN 24:56 Vano ule aheerela nhikiporonkanihe. Ikwaha ila Mwaneene Nluku hokireeriha. Nkihiye kituruwele ratta wankunya aka.
GEN 24:57 Ale yaheeraca: Nrwee nimwiihane mwanthiyana uyo nankohe.
GEN 24:58 Vaavale yahomwiihana Repeka phunkohaka: Unatthuna urwaa ni ula nlopwana ola? Ule ahaakhula eeraka: Kinatthuna.
GEN 24:59 Vano amucyawe yahonleeha Repeka wamoca ni nthiyana amwamwihile, karumeya Aparahamu na alopwana yarinawe.
GEN 24:60 Ni yahonreeriha Repeka amwiirelaka: Mwanrokorihu, wunnuwe ni waayarace asaana iminya iminya cene, ni ucuulu aa uyo waattheme eenani!
GEN 24:61 Vaavale Repeka nacikhwawe yahowelaca inkamira, nuntthara karumeya ule. Phimaana karumeya ule ahonkusa Repeka nuurwa.
GEN 24:62 Yooyo ukati uyo Isaki aakhuma iphiro yoluusi Ulayi-Royi, kontha akhala ilapo yohitto.
GEN 24:63 Nihuku nimoca ukati wococilo, Isaki anaswali mmattani, ahowusa miitho awe ayo ni ahoona inkamira ciwaka.
GEN 24:64 Ciicammo Repeka, ahowusa miitho awe ayo ahomoona Isaki, ni ahokhuruwa munkamirani,
GEN 24:65 ni ahonkoha karumeya ule eeraka: Tipani ule nonisicerya mmattani ule? Karumeya ule ahaakhula: Yoole phi nkunya aka. Wowakuvyaca wene Repeka ahekhunela wiitho nwo nikuwo.
GEN 24:66 Wahoolo karumeya uyo ahonttonkela Isaki citthu cothene ceeranele.
GEN 24:67 Paahi, Isaki ahonkusa Repeka mpaka nheemani mwa anumwane yeehaniya Asaara, ahonthela nuunfenta. Phimaana Isaki ahomaalihiya ni Repeka, ukhwa waya anumwane.
GEN 25:1 Aparahamu ahonthela nthiyana nkina, eehaninya Ketura.
GEN 25:2 Ketura ahonnyarana Aparahamu ala asaana ala: Sinra, Yookisa, Meeta, Miitiya, Isipaki, ni Suwaa.
GEN 25:3 Yookisa ahonnyara Sapaa ni Tetaa. Ucuulu wa Tetaa waari Asurita, Letusi ni Lewuma.
GEN 25:4 Asaanawe Miitiya yari Efa, Eferi, Enoki, Apita ni Elita. Othene ale yaari ucuulu wa Ketura.
GEN 25:5 Aparahamu ahonhiyera Isaki mihakhu cawe cothene.
GEN 25:6 Nanso asaana a Aparahamu yayanryawe na asaarawe oohitteeliheraninya, aavahacile itthuvo vakani; nari nkumi, ahamwalaaniha ni mwanawe Isaki nuwarweha uttayi, ilapo iri mphantte unkhuma ncuwa.
GEN 25:7 Aparahamu ahokhalana ukumi mpaka ahopiiha myakha iminya wo sapini na thanu (175) ceyarelo.
GEN 25:8 Aakhwile noluvaleehile ni myakha cinci ceyarelo ni ahaatthara mayathumwane.
GEN 25:9 Nanso, asaana a Aparahamu, Isaki ni Sumayili, yahaavithaca athumwanaya nnikhukuni no Makipela, vakhiviru ni uManree, nthala na Eforomi, mwana a Suwari, nHitita,
GEN 25:10 nenne nthala, Aparahamu nathumanannyawe maHitita. Vaavale phivithiyawe Aparahamu wamoca ni Asaara amwaarawe.
GEN 25:11 Nanso nakhwileene Aparahamu, Nluku ahonreeriha Isaki. Vano Isaki aakhala vakhiviru ni Iluusi yo Lahayi-Royi.
GEN 25:12 Vano ula phu ucuulu wa Sumayili, mwana annyanryawe Aparahamu ni Akaari o Wiciipitu, ipottha ya Asaara.
GEN 25:13 Ala phi macina a asaana a Sumayili, yantikhaciye ittharihiyaka eyareelo aya: Nepawoti, mwana omuulupale a Sumayili, Ketari, Apeteli, Mipisamu,
GEN 25:14 Misima, Tumaa, Masaa,
GEN 25:15 Hattatti, Temaa, Yeturi, Nafisi ni Ketemaa.
GEN 25:16 Ala phaari asaana a Sumayili, yakhalacile ahooleli o mahimo, mmawaani mwaya ni mmapuroni mwamakiya yeehaneliya yaala macina ala. Ahooleli ayo yaari khumi nuuwa eeli.
GEN 25:17 Sumayili ahokhala myakha iminya wo talathiini na saapa (137) ceyarelo. Ahokhwa ni watthara mayathumwane okhalayi.
GEN 25:18 Ucuulu awe wahokhala nttetthe unkhuma o Havila urwaka o Suuri, vakhiviru ni mwiinano wo Wiciipitu, mphantte unrwaa o Siiriya. Ni yaheeserana mpika na asunnaya.
GEN 25:19 Ala phi mayaranacelo o nrukulu na Isaki, mwana Aparahamu: Aparahamu ahonnyara Isaki.
GEN 25:20 Isaki narina myakha arupayini ceyarelo, ahonthela Repeka, mwana a Petuweli, Nramewu o Patan-Aramu, aari mwanrokorawe Lapanu, ni uyo ciicammo Nramewu.
GEN 25:21 Vano Isaki ahonlepela Nluku, kontha amwaarawe ayo yari mwali eekupa. Phimaana Mwaneene Nluku ahaakhula iswali cawe nnyo ni Repeka ahorupala irukulu.
GEN 25:22 Urupala wawe, asaana ayo munthukwani mmo yaanawaanaca, ni Repeka aheera: Nlattuni ikikhumelelaka ila itthu ila? Ni ahorwaa unkoha Mwaneene Nluku.
GEN 25:23 Vano Mwaneene Nluku ahomwaakhula: Ilapo piili phiriwo munthuukwani mwaa mmo, phimaana anakhuma mommo atthu eeli ni anaahala umwalana: Mmoca uyo nokookhala okuru oompwaha nkhwawe, nanso omuulupale uyo naahala unvarela nteko omwankani uyo.
GEN 25:24 Vaavale, waphiilyaya ukati wooyara, khweeli ahorumelelihiya wiira yaari mavatta munthukwani mwawe mmwe.
GEN 25:25 Oopacera uyariya uyo aari okharari cookhwiila, ni irutthu awe yothene yaari yo mapururu; phimaana ahovahiya ncina na Isawu.
GEN 25:26 Wahoolo ahoyarya mwanhimaawe, ntata nawe naavarenle ikottokottho ya Isawu; phimaana ahovahiya ncina na Yakopi. Ukati waayarawe Repeka, Isaki aarina myakha sitiini ceyarelo.
GEN 25:27 Asaana ale yahonuwaca. Isawu aari nlupa oocuwela utotha ni aari nantakhwani. Nanso Yakopi waari nteko awe paahi uhakhela imope ni aakhala mmaheemani.
GEN 25:28 Isaki anfenta Isawu, kontha cancivela ukhura inama ceevawe; ni ciicammo Repeka anfenta Yakopi.
GEN 25:29 Nanso ikwaha imoca, Yakopi aapyaacaka yoolya, ahowa Isawu navoliye itala, akhumaka utakhwani,
GEN 25:30 ni ahommekela eeraka: Ukimeele vakani nhuci woserya uyo. Ukivola itala! Phimaana eehaninyaka ciicammo Eetomu.
GEN 25:31 Vano Yakopi ahomwaakhula eeraka: Woopacera ukitumihereke iyuulupale aa.
GEN 25:32 Vaavale Isawu aheera: Nna vaa kihanle vakani ukhwa. Kimphurela isiyani iyuulupale eyo?
GEN 25:33 Wahoolo Yakopi ahonkhanyereriha Isawu eeraka: Woopacera unlamuliya ulupela. Ni ule aholupela untumihera Yakopi iyuulupale eyo.
GEN 25:34 Vano Yakopi ahonvaha Isawu isima ni maruru. Ule aholya nuwurerya, ahonwa nurwaa. Commo Isawu ahovyavyeeha iyuulupale awe.
GEN 26:1 Yahovola itala yeele ilapo ele, toko weracilyaya ukati wa Aparahamu. Phimaana Isaki ahorwaa ilapo yo Kerari, wonwo Apimeleke waaryawe mwene o mafilisitiya.
GEN 26:2 Vano Mwaneene Nluku ahomphwanya Isaki ni ahomwiirela: Uhikhuruwele Wiciipitu. Urwee wakhale ilapo inhalaka wuthoonyera.
GEN 26:3 Ukhale ila ilapo ela, mi kinaakhala ni we ni kinawureeriha. Kontha we nuucuulu aa uyo kinaahala wuuvahani ila ilapo ela, ni kinarwa uttharihelela yolumacenryaka athumwaninyu aneehaniya Aparahamu.
GEN 26:4 Kinaahala wuncerera ucuulu aa toko itthoottwa co wirimu ni waavaha nnya ilapo nnya cothene; ni nhina wo ucuulu aa atthu othene omwiilaponi anaahala ureerihiya,
GEN 26:5 kontha Aparahamu hosunka malamulo aka inrumilyaka ni isariya caka.
GEN 26:6 Commo Isaki ahokhala o Kerari.
GEN 26:7 Vano alopwana o nenno nipuro nno ukati waankohilyaya wiira ala phamwaaraa, ule ahaakhula eeraka: Mwanrokoraka. Anawoova uhimyaca wiira amwaaraka, kontha oopuwela wiira, alopwana o yeela ilapo ela anaahala ukiiva nlattu wa Repeka, kontha ahotepa ooreera.
GEN 26:8 Isaki ahokhala o Kerari ukati mwinci. Nihuku nimoca, Apimeleke, mwene o mafilisitiya, anawehecesa wacanelani yaari uculu, phuukati wamonnyawe Isaki anthwelanaka Repeka amwaarawe.
GEN 26:9 Vano Apimeleke ahomwiihana Isaki ni ahomwiirela: Khweeli, uhirune. Ale amwaaraa. Vano weerelani mwanrokoraka? Isaki ahaakhula eeraka: Kontha kineenre amwaaraka kanawoova wiiviya.
GEN 26:10 Apimeleke aheera: Unipankenleni commo? Kontha nlopwana phi nlopwana uyo aanawaarupana amwaaraa ayo, ni wananiwiihera ikoosi.
GEN 26:11 Vaavale Apimeleke ahaahimyacera atthu othene eeraka: Ntthu nohala umwiiriha itthu ula nlopwana ula atthuna amwaarawe ala, naahala ukhwa!
GEN 26:12 Vano Isaki ahotthimpula imatta ni yooyo mwakha uyo ahoruwerya venci, kontha Mwaneene Nluku ahonreeriha.
GEN 26:13 Ule ahothaciri ni nhakhu awe wahoncererya mpaka ahothacireeha.
GEN 26:14 Ahaana ikhontwaa ni imope cinci ni ipottha cinci mpaka mafilisitiya upacera unrama.
GEN 26:15 Phimaana, mafilistiya yahotthunttuwanihaca nuuwuhelelaca iluusi cothene cathipiye ni ipottha ukati wa Aparahamu, athumwane Isaki.
GEN 26:16 Vano Apimeleke ahomwiirela Isaki: Ukhume mwilaponi mwihu mu, kontha uri ntthu oonhakhu cinenne woonipwaha hi.
GEN 26:17 Phimaana Isaki ahokhuma nuthamela wuuthakoni wo Kerari waakhalawe khalayi.
GEN 26:18 Wahoolo Isaki ahowuhulaca iluusi caathipiye ukati wathumwane. Nnye cawuhelelaciye ni mafilisitiya ukhwa wawe Aparahamu ni ahovaha macina yavahilyaya athumwane.
GEN 26:19 Vano ipottha ca Isaki cahothipaca muuthakoni mmwe ni cahottenla maasi menci oociva.
GEN 26:20 Vano ahakheli o Kerari yahonyakulihana na ahakheli a Isaki, yiirelanaka: Maasi ala awihu! Phimaana Isaki ahovaha iluusi ile ncina na Eseke, nlattu woonyakuliheraninya.
GEN 26:21 Vano ipottha nnye cahothipaca iluusi ikina, ni ile yahonyakuliheraniya. Phimaana aheehana Sitina.
GEN 26:22 Wahoolo Isaki ahothama nne nipuro nne ni ahothipa iluusi ikina ni khayanyakuliheraniye tho. Phimaana ahovaha ncina na Riyopoti, eeraka: Vano Mwaneene Nluku honihulela ikhato ninaahala wiithawala yeela ilapo ela.
GEN 26:23 Ukhuma vaavale Isaki ahorwaa o Peresepa.
GEN 26:24 Yoole uhiyu ule, Mwaneene Nluku ahomphwanya ni ahomwiirela: Mi kiri Nluku a Aparahamu athumwanaa. Uhoove, kontha kiri ni we. Mi kinaahala wureeriha ni wuncerera ucuulu aa mwanlattu woofenta karumeya aka Aparahamu.
GEN 26:25 Isaki ahoteka ikhilompi ni aholapela ncina na Mwaneene Nluku. Vaavale ahomaka ni ipottha cawe yahothipaca iluusi ikina.
GEN 26:26 Yoole ukati ule, Apimeleki ahowa akhumaka o Kerari wamoca ni Awusate nlakakano awe ni Fikoli, muulupale aanakhotto awe.
GEN 26:27 Vaavale Isaki ahaakohaca eeraka: Nlattuni mmwaaka ukiweha, mi mwahokipanka mwiinani ni mwahokoomola?
GEN 26:28 Ale yahomwaakhulaca yiiracaka: Kontha nihowoona weekhweeli wiira Mwaneene Nluku ri ni we, phimaana niiraka: Nrwee nilupelace we ni hi. Nimphavela waatana ni we.
GEN 26:29 We uhinipanke yoonanara, toko hi cihupankileehu itthu, nanso nihoopanka ratta ni wuleeha wo mpuha. Vano nihocuwela wiira Mwaneene Nluku hooreeriha.
GEN 26:30 Vano Isaki ahaavahaca yoolya ni ale yaholyaca nuuwuryaca.
GEN 26:31 Usa waya oyeeli yaholupelihana. Isaki ahaalehaca ni ale yahorwaca ni mpuha.
GEN 26:32 Nenno nihuku nno ipottha ca Isaki cahowaaca unhimerya ciiraka: Iluusi yathipehu iyo nihottenla maasi!
GEN 26:33 Isaki ahovaha iluusi ile ncina na Sepa, phimaana mpaka nihuku nolelo, ile iparasa ile icuweliyaka ncina no Peresepa.
GEN 26:34 Isawu naphihenrene myakha arupayini ceyarelo ahonthela Yutiti, mwana a Peeri, nhitita, ni ciicammo ahonthela Pasimati, mwana a Elomi, nhitita.
GEN 26:35 Ale asithiyana ale yahaacukulihaca Isaki ni Repeka.
GEN 27:1 Ukati wooluvanlyawe Isaki wiitho wawe wahonripela ni khoona. Vano ahomwiihana mwanawe omuulupale eehaniya Isawu, eeraka: Mwanaka. Ni ule ahomwaakhula eeraka: Kiri va.
GEN 27:2 Ule ahomwiirela: Mi kihooluvala ni akincuwela nihuku ninkhwaka.
GEN 27:3 Nna va, ukuse myuupa, muura ni nivaka naa nno, urwee utakhwani wakaaverye inama.
GEN 27:4 Vano waakaapyele sankanya ookicivela ni ukiwiihere kaanlye wiira kuuvahe iparakha kihinakhwa.
GEN 27:5 Ukati woolumacawe Isaki anhimeryaka mwanawe Isawu, moolumo ale Repeka eera eewaka. Vano Isawu ahorwaa utakhwani wiiva inama wiira aawiihere athumwane.
GEN 27:6 Phimaana Repeka ahonhimerya mwanawe eehaninya Yakopi eeraka: Kiheewa athumwana ayo amwiirelaka munnaa Isawu:
GEN 27:7 Wakilupatthele inama ni wakaapyeele sankanya oociva wiira kinlye ni kuuvahe iparakha wamiithoni wa Mwaneene Nluku kihinakhwa.
GEN 27:8 Nna vaa mwanaka, uviriyane inoohimeryaka ila.
GEN 27:9 Urwee muncicini mmo wakuse ipuri piili. Mi kinnowaapyela sankanya oociva toko athumwana cinaacivelaya,
GEN 27:10 ni waarwehele athumwana yanlye wiira yuvahe iparakha ahinakhwa.
GEN 27:11 Nanso Yakopi aheerela anumwane: Kinawoona amunna Isawu irutthu aya iyo iri yo mapururu. Mi kiri oohimapururu.
GEN 27:12 Pooti apaapa ayo ankokapaapela ni wamiithoni waya kinkokhala mayowootha. Commo kinawiiwaanela mahusi woohikhala iparakha.
GEN 27:13 Anumwane yahomwiirela: Mwanaka, nihusi naa nno ninhala ukhala nawaka. Wiiwelele paahi nuulumo naka. Urwele ni ukiwaanele.
GEN 27:14 Vano ule ahorwela ni waawiihera anumwane, ni ale yahomwaapyela sankanya oociva, toko athumwane caacivelaya.
GEN 27:15 Wahoolo, Repeka ahokusa coowara comaana ca Isawu, mwana omuulupale, carinawe uwaani ni ahommwariha Yakopi, mwana omwankani.
GEN 27:16 Vano ahommwariha nrapala nopuri nsiko ni mmatatani,
GEN 27:17 ni ahonvaha mmatatani mwa Yakopi, mwana omwankani, sankanya oociva ni nkatthe watthenkacilyawe.
GEN 27:18 Vano Yakopi ahorwaa woolumana athumwane ni aheerela: Paapa! Athumwane yahomwaakhula yiiraka: Kiri va. We tupani mwanaka?
GEN 27:19 Yakopi ahaakhula athumwane eeraka: Mi Isawu mwaninyu oontthaara. Kihopanka toko caakirenlenyu. Vano, munkome ni nlye ilupatthilyaka wiira nkireerihe.
GEN 27:20 Isaki ahonkoha mwanawe eeraka: Weeraceele cani wakuvaka ulupattha? Ule ahaakhula: Mwaneene Nluku, Nluku inyu ahokaakuvyehera umphwanya mwannama.
GEN 27:21 Vaavale Isaki ahomwiirela Yakopi: Mwanaka, ukaattamerye wiira kiwaapaapele ni kuucuwelele wakhala wiira we khweeli mwanaka Isawu.
GEN 27:22 Yakopi ahaattamerya athumwane ni ale yahomwapapela ni yaheera: Ncu nno na Yakopi nanso myoono nnyo ca Isawu.
GEN 27:23 Isaki khaancuwelenle Yakopi kontha myoono cawe caari co mapururu toko ca Isawu munnaawe, phimaana ahonreeriha.
GEN 27:24 Wahoolo Isaki ahonkoha tho eeraka: We khweeli mwanaka Isawu? Ni ule ahaakhula eeraka: Phi yeemi.
GEN 27:25 Vaavale Isaki ahomwiirela: Mwanaka, ukiwiihere ilupatthilyaa eyo wiira kilye ni kuureerihe. Yakopi ahaawiihera ni athumwane yaholya, ni ciicammo ahaawiihera ivinyu ni ale yahowurya.
GEN 27:26 Vano Isaki ahomwiirela Yakopi: Nkaawe woono mwanaka ni ukivahe alaahuma.
GEN 27:27 Ule ahaattamerya ni ahaavaha alaahuma. Ukati wonnyawe ikuwo cawe nnyo nhiriri wonama, Isaki ahonreeriha eeraka: Nhiriri wa mwanaka uri toko inukhelelo yotakhwa ireerihilyawe Mwaneene Nluku.
GEN 27:28 Nluku oovahe ukame wo wirimu, uruwerye vathi va, itiriku yinci ni malaaso menci.
GEN 27:29 Wiira atthu othene waarume, ni ilapo cuulemelihe, ni ukhale nkunya a asihimaa, na asaana a anumwane yuulemelihe we, natakhaliya ule nohala wuulapha, ni nareeriya ule nohala wureeriha.
GEN 27:30 Isaki umaliha wawe unreeriha Yakopi ni nakhumileene wamiithoni wa athumwane, phawawe Isawu akhumaka wulupatthani.
GEN 27:31 Ni ule ahomwaapya sankanya oociva ni ahaawiihera athumwane ni aheerela: Paapa, munnwe ni nkhuureke inama ilupatthilyaka wiira nkireerihe.
GEN 27:32 Vano athumwane yahonkoha yiiraka: We tupani? Ule ahaakhula: Mi Isawu, mwaninyu oontthara.
GEN 27:33 Vaavale Isaki ahothukumela venci cinenne ni aheera: Tupani ule kiwiihenre inama yoolupatthiya? Mi kihokhuura yothene we uhinaya uwa. Yooyo ntthu uyo, mi kihonvaha iparakha ni ciicammo nakhala ooreerihiya.
GEN 27:34 Vano Isawu weewilyawe moolumo athumwane ale, ahothulana ni unlaka ahokhuwa wowirunya eerelaka athumwane: Nkireerihe ni mi, paapa.
GEN 27:35 Isaki ahomwaakhula phimwiirelaka: Mwanhimaa ahowa va mmirukuni, ni hokusa iparakha caa nnyo.
GEN 27:36 Vaavale Isawu ahopwaherera eeraka: Khweeli ule uhomphwanela wavahiyawe ncina na Yakopi, kontha imaara piili nnya akithepyaka. Woopacera hokaakha iyuulupale aka, nna va hokaakha iparakha caka. Vano Isawu aheera tho: Khankihalihenre tho mi iparakha?
GEN 27:37 Vano Isaki ahomwaakhula Isawu eeraka: Kinawoona kihompanka ukhala owulamula we, ni asunnaa ayo othene kihonvaha ukhala ananrumiya awe; mpaka itiriku ni malaaso kihomuncerera. Vano we mwanaka kiwiiriheke cani?
GEN 27:38 Vano Isawu aheerela athumwane: Nrina iparakha imoca paahi? Paapa, nkireerihe ni mi ciicammo. Vaavale Isawu ahokhuwa ni wunla.
GEN 27:39 Vano Isaki, athumwane, yahomwaakhula yiiraka: We unkookhala uttayi ni mapuro oocayira ni oohikhuruwa ukame.
GEN 27:40 Malelyo aa ankokhala okhotto, ni unhala ukhala nanrumiya a nhimaa. Nanso we wooryaka wiicopola phinhalaa urula nipisi niri nsiko mwaa mmo.
GEN 27:41 Vano Isawu ahoncukula Yakopi mwanlattu womwakha iparakha yavahiyawe na athumwane. Phimaana ahoopuwela wanrimani wawe eeraka: Anaphiya mahuku ookhwa apaapa. Kimwomwiiva nhimaka Yakopi.
GEN 27:42 Vano Repeka ahohimerya yalakenlyawe Isawu, mwana omuulupale, ahomwiihana Yakopi mwanawe omwankani, phimwiirelaka: Munnaa Isawu neepisiha nrima ni hoolakela uwiiva.
GEN 27:43 Nna vaa, mwanaka, wiiwe inhalaka wuuhimerya: Wunwe ni urwee wamwanrokoraka Lapanu, ilapo yo Harani,
GEN 27:44 wakhale wonwo mahuku vakani, mpaka uvire uviruwa wa munnaa,
GEN 27:45 mpaka uvire urusiya wa munnaa, ni aliyale itthu impankilyaa. Mi kinaahala uleehera ni wuhokolosiha. Isiyani inhalaka wuhalelacerani oyeeli nihuku nimoca?
GEN 27:46 Phimaana Repeka ahomwiirela Isaki coo: Ahokitosa asaana a Heeti, kontha Yakopi aathelaka athiyana o yeela ilapo ela, mi phatari kikhwe.
GEN 28:1 Vano Isaki ahomwiihana Yakopi, ahonreeriha nunhimerya eeraka: Uhaathele athiyana o Nkanani mu.
GEN 28:2 Ukhume ni urwee uPatan-Aramu, wa Petuweli, athumwanaya anumwana ni wanthele mwana a Lapanu, mwanrokoraya anumwana.
GEN 28:3 Ni Nluku Okuru Cothene ureerihe, upanke mayoyara ni awuncereryanihe wiira nkhale atthu enci,
GEN 28:4 ni uvahe iparakha ca Aparahamu, we ni ucuulu aa uyo, wiira uhalane ilapo iryaa nletto, Nluku invahilyawe Aparahamu.
GEN 28:5 Phimaana Isaki ahonveleeliha Yakopi ilapo yo Patan-Aramu, wa Lapanu, mwana a Petuweli Nramewu, mwanrokorawe Repeka, anumwane Yakopi ni Isawu.
GEN 28:6 Vano Isawu woonyawe wiira Isaki honreeriha Yakopi ni honveleeliha uPatan-Aramu wiira anthele nthiyana wonwo ni waanreerihawe va ahomwiirela: Uhaathele athiyana o Nkanani mu.
GEN 28:7 Yakopi aheewelela athumwane na anumwane ni ahorwaa uPatan-Aramu.
GEN 28:8 Isawu woonyawe athumwane wiira khayatteeliye nrima na athiyana o Nkanaa,
GEN 28:9 ule ahorwaa wa Sumayili ni ahonthela nthiyana, eehaninya Malati, mwana a Sumayili, mwana a Aparahamu, mwanrokorawe Nepakoti, woohatakanihera athiyana yarinawe akina.
GEN 28:10 Yooyo ukati uyo Yakopi ahokhuma uPerisepa arwaka uHarani
GEN 28:11 ni ahophiya nipuro narupilyawe kontha waheela. Nenno nipuro nno ahokusa nluku nimoca, aheesa wiimuru ni aheecatalela.
GEN 28:12 Vano aholoha nttora woonyawe makwantta aneemesiye vathi mpaka ukwanya irimu ni phoonawe ancelo a Nluku awelaka ni akhuruwaka makwantta ayo.
GEN 28:13 Mwaneene Nluku phaari uculu waya makwantta ni aheera: Mi kiri Mwaneene Nluku, Nluku a Aparahamu, athumwana, ni Nluku a Isaki; yeela ilapo irupilyaa ila kinawuvaha we ni ucuulu aa uyo.
GEN 28:14 Ucuulu aa unhala ukhala toko ntthupi no vathi, ni unhala umwaryeela urwaka unkhuma ncuwa mpaka unkela ncuwa, urwaka uculu mpaka uhitto, ni mwanlattu wawaa we ni ucuulu aa uyo, unkophwanya iparakha uneethi wothene wo mwiilaponi.
GEN 28:15 Phi mi kiri ni we. Kinawusunka mapuro othene ankela uvira, kinawuturusela tho ila ilapo ela, kontha akinhala wuuhiya mpaka kipankeke itthu yukhuluvelihilyaka.
GEN 28:16 Vano Yakopi wunwa wawe nkhoveni aheera: Khweeli Mwaneene Nluku ri nna nipuro nna. Mi akaacuwela.
GEN 28:17 Ni uvaka aheera: Wopihilyaya nna nipuro nna! Nna khaninakhala nipuro nikina; iri inupa ya Nluku. Ula nkhora wo wirimu.
GEN 28:18 Paahi, Yakopi ahonwa wicisuru, ahokusa nluku neesilyawe wiimuru nne, aheemesa, ni ahomiinela makhura waculu waya va.
GEN 28:19 Phimaana ahovaha ncina nenno nipuro nno Peteli, nanso yeeyo iparasa eyo ncina naya nokhalayi neehaniya Luusi.
GEN 28:20 Ni Yakopi ahomoopa natiri eeraka: Nluku akhalaka ni mi ni akisunkaka ila ikwaha ila, akivahaka yoolya, ni ikuwo coowara,
GEN 28:21 ni kituruwelaka wosalama uwaani wa apaapa, Mwaneene Nluku nahala ukhala Nluku aka.
GEN 28:22 Ni nenna nluku neemesilyaka nna ninwa ukhala inupa ya Nluku ni cothene cinhalaa ukivaha, khweeli kinawuvaha mphantte wonakhumi.
GEN 29:1 Vaavale Yakopi ahokhuma arwaka ilapo iri mphantte unkhuma ncuwa.
GEN 29:2 Nanaanoru ahoona iluusi mmathalani ni mihuwo miraru cokhontwaa cinarupile nceresere mmo, kontha yeeyo iluusi iyo phawuryaya ikhontwaa nnyo. Nahaawo nluku nuulupale nakhuneliya iluusi iyo.
GEN 29:3 Nenne nipuro nne canthukumana mihuwo, ahakheli yantamiha nluku nakhuneliya iluusi iyo nuurika maasi wiira avahe mihuwo caya nuukhunela tho iluusi iyo.
GEN 29:4 Vano Yakopi ahaakohaca eeraka: Asunnnaka nnokhumaca vayi? Ni ale yahaakhulaca yiiraka: Ninkhuma uHarani.
GEN 29:5 Ni uyo aheerelaca: Nnancuwela Lapanu, mwana a Nahori? Nale yahaakhulaca yiiraka: Ninancuwela.
GEN 29:6 Ahaakohaca tho eeraka: Haawo nkumi? Ni ale yahomwaakhulaca: Haawo nkumi, ni mwanawe mwanthiyana neehaniya Rakeli phuula wiihile nnya ikhontwaa nnya.
GEN 29:7 Ule aheera tho: Nanlelo uthana, khunaphiya ukati wothukumaniha ikhontwaa nnyo. Nvahe maasi ciwurye ni nvira nliha.
GEN 29:8 Vano ale yaheeraca coo: Khaninoorya, mpaka cithukumanihiyeke ikhontwaa cothene ni nluku nikhuneeliye iluusi iyo nitamihiye wiira nivahe ratta maasi oowurya.
GEN 29:9 Nanlelo oolumacaka nale, ahowa Rakeli ni ikhontwaa ca athumwane kontha uyo aari nhakheli.
GEN 29:10 Ni waakhumelenle coo, Yakopi umoona wawe Rakeli mwana a Lapanu arokoraya anumwane, ni ikhontwaa ca Lapanu, Yakopi ahorwaa walusi ni ahotamiha nluku nakhuneleliye nuuvaha uwurya ikhontwaa ca Lapanu, mwanrokoraya anumwane.
GEN 29:11 Vaavale Yakopi ahonsalameeha Rakeli, mpaka upacera wunla.
GEN 29:12 Yakopi ahonhimerya Rakeli wiira ule mwamunnaya athumwane ni ari mwana a Repeka. Vano Rakeli ahokhuma atthawaka urwaa wahimyacera athumwane.
GEN 29:13 Ukati weewilyawe Lapanu ihapari ca Yakopi, mwana a mwanrokorawe, ahomwiikamela nuunkapatta nuunsalameeha mpaka umpiiha uwaanyawe, ni ule ahonttonkacera Lapanu citthu cothene caankhumelenle munkwahani mwawe.
GEN 29:14 Vano Lapanu ahomwiirela: Khweeli we uri nikhuva ni irutthu aka. Ni ahokhala ni ule mweeri mmoca.
GEN 29:15 Wahoolo Lapanu ahomwiirela Yakopi: Kamana we uri nhimaaka unaakivarela nteko wo mahala? Ukihimerye ihisapu yowuliva.
GEN 29:16 Lapanu ahaana asaana eeli asithiyana. Omuulupale uyo ncina nawe Leya ni omwankani uyo ncina nawe Rakeli.
GEN 29:17 Vano Leya arina miitho oolocwaca nanso Rakeli arina irutthu yooreera ni ikhove yomaana.
GEN 29:18 Ni Yakopi anancivela venci Rakeli ni aheera: Kinaawuvarela nteko myakha saapa nlattu wa Rakeli, mwanaa oomwankani.
GEN 29:19 Vano Lapanu ahaakhula eeraka: Wanaareera wuvaha we woohikhala wumvaha nlopwana nkina. Ukhale va ni mi.
GEN 29:20 Yakopi ahovara nteko myakha saapa amphavelaka Rakeli, cenyo myakha nnyo oonne ukhala mahuku vakani kontha anancivela cineene.
GEN 29:21 Wahoolo Yakopi ahomwiirela Lapanu: Ukivahe amwaaraka, kontha kihomalihera mahuku aka ayo ni kimphavela waathela.
GEN 29:22 Vano Lapanu ahaathukumaniha alopwana othene o yoole nttetthe ole ni ahopanka isikuhuulu.
GEN 29:23 Vaavale uhiyu, Lapanu ahonkusa Leya ni ahommwiihera Yakopi. Ni ahonthukumanana.
GEN 29:24 Vano Lapanu ahokumiha ipottha awe yeehaniya Silipa ni ahonvaha mwanawe wiira arumeke.
GEN 29:25 Nanso usa waya amoone Leya. Vano Yakopi ahomwiirela Lapanu: We ukipankile cani? Mi akivanre nteko kimphavelaka Rakeli? Nlattuni we ukithepyacaka?
GEN 29:26 Lapanu ahaakhula: Uno khinakhalaka ilemalelo upacera utheliya mwana omwankani, omuulupale hinaya utheliya.
GEN 29:27 Vano uhiye umala isumana ithenlyaa ila, ninaahala wuuvaha tho omwankani uyo, nanso uvareke tho nteko myakha saapa.
GEN 29:28 Vaavale Yakopi ahokupali. Yahovira isumana yanthenlyawe Leya ni Lapanu ahonvaha Rakeli ukhala amwaarawe.
GEN 29:29 Lapanu ahonvaha Rakeli ipottha awe yeehaninya Piila wiira arumeke.
GEN 29:30 Yakopi ahonthukumanana Rakeli. Yoole aancivenle wompwaha Leya ni ahonvarela nteko Lapanu myakha saapa.
GEN 29:31 Ukati woonnyawe Mwaneene Nluku wiira Leya anavyavyehiya, ahonvaha asaana, nanso Rakeli ari mwali eekupa.
GEN 29:32 Leya ahorupala irukulu, ni ahonnyara mwana ni ahonvaha ncina na Rupeni, kontha eera: Mwaneene Nluku hoona icuku caka. Vano, weekhweeli awannyaka anaahala ukifenta.
GEN 29:33 Leya ahorupala tho irukulu, ni unnyara wawe mwana nkina aheera: Kontha Mwaneene Nluku heewa wiira kinavyavyehiya, hokivaha tho ula, ni yahonvaha ncina na Simeyoni.
GEN 29:34 Ahorupala tho irukulu ikina ni wannyanryawe mwana, aheera: Paahi, awannyaka anaahala waatana ni mi, kontha kihaayarana asaana araru. Phimaana yahonvaha ncina na Levi.
GEN 29:35 Ahorupala tho irukulu ni unnyara wawe mwana aheera: Ula nkwaha ola kinamunnuwiha Mwaneene Nluku. Commo yahonvaha ncina na Yutta. Ni ahohiya uyara.
GEN 30:1 Vano ukati woonnyawe Rakeli wiira khannyaranne asaana Yakopi, ahopacera unrama munnaawe ni ahomwiirela Yakopi: Ukiyarane asaana, atthuna phatari kikhwe.
GEN 30:2 Yakopi ahorusiya ni Rakeli ni aheera: Kinokhala Nluku, watelihile uyara?
GEN 30:3 Vano ule ahaakhula: Haawo Piila ula, ipottha aka, unthukumananeke wiira aayare asaana toko waahalaka waayara mi, wiira nhina mwa yaayo kaakhalane asaana.
GEN 30:4 Phimaana ule ahonvaha Yakopi uthela ipottha awe yeehaninya Piila, ni ahonthukumanana.
GEN 30:5 Piila ahorupala irukulu ni ahonnyarana Yakopi mwana.
GEN 30:6 Vano Rakeli aheera: Nluku hooluma, heewa ncu naka ni hokivaha mwana. Phimaana ahonvaha ncina na Tani.
GEN 30:7 Piila, ipottha ya Rakeli, ahorupala tho irukulu ni ahonnyarana Yakopi mwana onayeeli.
GEN 30:8 Vaavale Rakeli aheera: Kaari ni ikhotto yuulupale ni munnaka ni kihotthema. Phimaana ahonvaha ncina na Nafitalii.
GEN 30:9 Ukati woonnyawe Leya wiira hohiya uyara, ahonkusa Siilipa ipottha awe ni ahonvaha uthela Yakopi.
GEN 30:10 Siilipa, ipottha ya Leya, ahoyarana Yakopi mwana mmoca.
GEN 30:11 Vano Leya aheera: Ila iparakha! Phimaana ahomwiihana Kaate.
GEN 30:12 Wahoolo, Siilipa, ipottha ya Leya ahonnyarana tho Yakopi mwana onayeeli.
GEN 30:13 Vano Leya aheera: Kihotteeliya! Athiyana ayo ankokiirela kiri ootteeliya, ni aahonvaha ncina na Aseri.
GEN 30:14 Ukati woohephiya itiriku, Rupeni ahorwaa umattani ni ahophwanya mirette cooyariha ni ahaawiihera anumwane. Vano Rakeli ahomwiirela Leya: Ukivahe mirette cooyariha ca mwanaa nnyo.
GEN 30:15 Nanso ule ahomwaakhula: Khawutosile wakaakhilyaa alopwana ayo? Umphavela ukaakha tho mirette ciwiihilyawe mwanaka nnyo? Vano Rakeli ahaakhula: Ula uhiyu ula Yakopi naahala wuthukumanana. Naakakhanihaka ni mirette ciwiihilyawe mwanaa nnyo.
GEN 30:16 Ucoocilo, ukati waturuwilyawe Yakopi umattani, Leya ahomwiikamela numwiirela: Ilelo we unaahala ukithukumanana, kontha kihowuthumani ni mirette ca mwanaka. Ni yoole uhiyu ule ahonthukumanana.
GEN 30:17 Nluku ahomwiiwa Leya. Ule ahorupala irukulu ni ahonnyarana Yakopi mwana oneethanu.
GEN 30:18 Vano Leya aheera: Nluku hokiliva wammahilyaka ipottha aka waathukumanana awannyaka. Phimaana ahonvaha ncina na Isakari.
GEN 30:19 Leya ahorupala tho irukulu ni ahonnyarana Yakopi mwana onasiita.
GEN 30:20 Leya aheera: Nluku hokitthuva itthuvo yomaana. Ula nkwaha ula awannyaka anakunkomana, kontha kihaayarana asaana siita. Phimaana ahonvaha ncina na Sepulomi.
GEN 30:21 Ukati vakani tho, ule ahonnyara mwana mwanthiyana ammahilyawe ncina na Tina.
GEN 30:22 Vano Nluku ahomuupuwela Rakeli. Nluku aheewa ukhuwela wawe ni ahompanka mayooyara.
GEN 30:23 Ule ahorupala irukulu nuunnyara mwana ni aheera: Nluku hotamiha ihaaya caka nnyo.
GEN 30:24 Ahonvaha ncina na Yusufu ni aheera: Mwaneene Nluku akivahe tho mwana nkina.
GEN 30:25 Rakeli nannyanreene Yusufu, Yakopi ahomwiirela Lapanu: Ukihiye kituruwele uwaani, ilapo aka.
GEN 30:26 Ukivahe asaaraka ayo yuvarenlyaka nteko, na asaanaka ayo, kontha mi kimphavela urwaa uwaani. We uhocuwela ciinryaka wowuuvarela nteko.
GEN 30:27 Nanso Lapanu ahomwiirela: Wakhala wiira kihophwanya iparakha wa miithoni waa kinawulepela wiira ukhale ni mi. Kihoona wiira Mwaneene Nluku hokivaha iparakha nlattu wawaa we.
GEN 30:28 Ni ahopwahera eeraka: Ukihimerye ihisapu yowuuliva; mi kinaahala wuuliva.
GEN 30:29 Yakopi ahomwaakhula: We uhocuwela cuvarenlyaka nteko, ni mihuwo caa cihoncererya nlattu wowehaweha mi.
GEN 30:30 Ni citthu vakani caarinaa kihinawa, cihoncererya venci, kontha Mwaneene Nluku hovaha iparakha ukati uwilyaka uno. Vano mi kinhala upanka yakhani itthu yowakavihera alokwaka?
GEN 30:31 Vano Lapanu ahonkoha: Untthuna kuuvaheke isiyani? Yakopi ahaakhula eeraka: Uhikivahe itthu. Kinaahokoleela uwacawaca nuuhakhela mihuwo cinyu wakhala wiira nnakupali imphavelaka.
GEN 30:32 Ilelo kinaahala uvira mmihuwoni mwinyu ni kimmothanla ikhontwaa co manepa ni co mitthottwe, ni asikhontwaa othene ooripa, ni ipuri co manepa ni co mitthottwe, cole phinhalaka ukhala mpokerero aka.
GEN 30:33 Ni isariya aka inkowuvaha uhoolo usaahiti, ukati unhalaa uwehaweha mapokerero aka. Yakhalaka mmatatani mwaka ipuri yohimanepa ni yohimitthottwe, ikhontwaa cohiripa, pooti wiira cowiinyinya.
GEN 30:34 Lapanu aheera: Nihotthukelana, weerannyee toko cihimilyaa.
GEN 30:35 Nanso, nenno nihuku nno Lapanu ahaakawaniha apeperu o mitthottwe ni o manepa ni ipuri cothene co mitthottwe ni co manepa cothene cari cotteelatteela ni asikhontwaa othene ooripa ni ahohiya mmatatani mwa asaanawe.
GEN 30:36 Vano Yakopi ahokhuma nipuro nne arwaka ncoko woweettiya mahuku mararu. Wahoolo Yakopi ahopwaherera uliha mihuwo ca Lapanu.
GEN 30:37 Vaavale Yakopi ahokusa miri cikithi co mphari, ntholo ni rokoci ni ahokhava apankaka mitthottwe.
GEN 30:38 Wakhavaawe, aheesa uhoolo waya mihuwo, mmakuwani, mawureryoni ni mapuro yarupaya ni canapepheryana ukati wawaya uwurya.
GEN 30:39 Ni campepheryana uhoolo waya miritta, cantotholiya co marephurephu, co manepa ni co mitthottwe.
GEN 30:40 Vano Yakopi anawawayaniha cikani nnyo, ni aanapanka wiira cennyo cikhale wamoca ni inama co marephurephu ni cooripa ca Lapanu. Commo antthonkomaniha mihuwo cawe woohitakanihera ca Lapanu.
GEN 30:41 Ukati warupalaya ikhontwaa coonenevaca nnye, Yakopi anaweesa uhoolo waya nwo miritta, cineemelacilene mmasepani, wiira citotholele mmirittani mmo.
GEN 30:42 Nanso kheesa miritta nnye uhoolo waya inama cokenkennya, kontha cokenkennya nnyo caakhala ca Lapanu ni cooneneva nnyo cakhala ca Yakopi.
GEN 30:43 Phimaana Yakopi ahothaciri venci mpaka ahaana mihuwo cinci, ipottha cithiyana ni cilopwana, inkamira ni apuuru.
GEN 31:1 Yakopi aheewa wiira, asaana a Lapanu yanawuulumaca yiiraka: Yakopi howyaa citthu ni mihakhu cothene carinaya apaapa ehu, phimaana athaciriki.
GEN 31:2 Yakopi ahoona wiira makhalelo a Lapanu ni uyo khayari toko khalayi.
GEN 31:3 Vano Mwaneene Nluku ahomwiirela Yakopi: Uturuwele ilapo yo mayathumwanaa ni wamucyaa. Mi kinkokhala ni we.
GEN 31:4 Vaavale Yakopi ahoruma wiihaninya Rakeli ni Leya wiira arwace utakhwani yoone mihuwo cawe.
GEN 31:5 Uwaca waya aheerelaca coo: Kinawoona makhalelo athumwaninyu ayo ni miyano khaanakhala toko khalayi. Nanso Nluku Apaapa ari ni mi.
GEN 31:6 Nyu nnaacuwela wiira kihaavarela ratta nteko athumwaninyu,
GEN 31:7 nanso ayo ankipanka mi ntirikhi, avirikanihacaka mpokerero aka imaara khumi. Nanso Nluku khaatthunihenre wiira akipanke yoonanara.
GEN 31:8 Yakiirelaka wiira inama co manepa nnyo cikhaleke cawaa, phuupokera waa; vano mihuwo cothene cakhala co manepa. Ni yakiirelaka coorephuwaca nnyo cothene cikhaleke cawaa, wonwo phuupokera waa, vano mihuwo cothene caatothola asaana oorephuwaca.
GEN 31:9 Nluku ala mananna ala phipankilyawe wowaakha mihuwo athumwaninyu akivahaka mi.
GEN 31:10 Weeracele coo: Ukati warupalaya mihuwo nnyo, mi kahoweha ni kahoona munttorani mmo anapinkula athukumananaka ikhontwaa cithiyana nnyo cari co manepa, co marephurephu ni co mitthottwe.
GEN 31:11 Vano ncelo a Nluku ahokiirela munttorani: Yakopi, mi kahomwaakhula kiiraka: Kiri va.
GEN 31:12 Ni ule ahomwiirela tho: Uwuse miitho aa ayo, ni unawoona anapinkula othene anthukumanana ikhontwaa cithiyana nnyo, ari o manepa, o marephurephu ni o mitthottwe, kontha kihoona cothene cuupankilyawe Lapanu.
GEN 31:13 Mi phi mi Nluku o Peeteli wonwe wemeesilyaa nluku uttikitthelaka makhura ni ukoopelaka natiri. Wunwe nna va, ukhume ila ilapo ela ni uturuwele ilapo ya alokwaa.
GEN 31:14 Vano Rakeli ni Leya yahonkoha Yakopi yiiraka: Wapaapa nwo uhaawo mphantte wonhakhu unnaaca?
GEN 31:15 Khannalikelela ukhala amalaponi? Maana ahonitumiha ni aholya ncurukhu uyo.
GEN 31:16 Kontha nhakhu wothene Nluku ukumihilyawe wathumwanihu uri wawihu ni wa asaanehu. Nna vaa upanke cothene cinoohimeryawe Nluku.
GEN 31:17 Vano Yakopi ahaaweliha asaarawe na asaanawe ayo mmankamirani.
GEN 31:18 Ahokusa mihuwo cawe cothene ni mihakhu caphwanyilyawe uPatan-Arami, wiira arwee ilapo yo Kanaa, uri Isaki athumwane.
GEN 31:19 Ukati Lapanu warwelyawe uthikila mapururu okhontwaa, Rakeli aheennya ananttuntta a athumwane.
GEN 31:20 Ni Yakopi ahomwiita Lapanu nramewu wohinhimerya itthu kontha anatthawa.
GEN 31:21 Ahonwa nuutthawana cothene carinawe ni aholapuwa mooloko awehaka muru mwaako wo Kiliyati.
GEN 31:22 Nihuku noneeraru Lapanu ahohimerya wiira Yakopi hotthawa.
GEN 31:23 Vano ahaakusa asunnawe ni ahontthimakela mahuku saapa eettaka ni ahomphwanya nari mwaako wo Kiliyati.
GEN 31:24 Vano Lapanu Nramewu ahophwanyinya ni Nluku, uhiyu munttorani phimwiirelaka: Wiisunke, uhuulume itthu ni Yakopi, hata ikhale itthu yooreera atthuna yoonanara.
GEN 31:25 Lapanu ahomphwanya Yakopi naakhurutunle aheema awe umyakoni co Kiliyati. Ciicammo Lapanu na asunnawe ahaakhurutula aheema awe umwaakoni.
GEN 31:26 Vano Lapanu ahonkoha Yakopi eeraka: Ukipankile cani? Yokiita iyo wakusaka asaana ayo toko ipottha coovariya ukhottoni?
GEN 31:27 Nlattuni ukitthawaka womwiitiho ni ukisempaka, wohikihimyacera itthu? Hapo mi kanawuveleliha wootteeliya ni icipo, ikoma ni ceece.
GEN 31:28 Ciicammo khukihile kavahaka alaahuma asaanaka nu ucuulu aka wiira kaaleehe. Uheetta wootirikhi.
GEN 31:29 Kahaana ikuru cooreera wuuttarusa, nanso Nluku athumwaninyu, hokuulumana ncana uhiyu eeraka: Wiisunke uhimuulumele itthu hata ikhale yooreera atthuna yoonanara.
GEN 31:30 Vano we wapheela urwaa, kontha wahoonukhela uturuwela waathumwanaa, kahiki wennyerani anluku aka ayo?
GEN 31:31 Yakopi ahomwaakhula Lapanu eeraka: Kanawoova. Kontha kooniha wiira unakaakha asaanaa ayo.
GEN 31:32 Ule nohalaa umphwanyana anluku aa ayo umwiive. Unikukhuryace mi na asunnaka ayo waphwanya itthu yawaa ukuse. Kontha Yakopi khaacuwela wiira Rakeli pheennyile anluku ayo.
GEN 31:33 Vano ahokela Lapanu nheemani mwa Yakopi, nheemani mwa Leya, nheemani mwa ipottha cithiyana piili nanso wohaphwanya anluku ayo. Ni ukhuma wawe nheemani mwa Leya, ahokela nheemani mwa Rakeli.
GEN 31:34 Nanso Rakeli ahaakusa ananttuntta ayo ni wattukhunyera munhukhoni yonkamira ni ahonkomela. Vano Lapanu ahaakukhurya nheemani mothene, ni khaaphwanyile.
GEN 31:35 Rakeli aheerela athumwane: Paapa, nhikiviruwele akinlamuliya wunwa kontha kiri ni nteko wathiyana. Lapanu ahaawehaweha ananttunntta ayo, nanso khaaphwanyile.
GEN 31:36 Vaavale Yakopi ahorusiya nunviruwela Lapanu amwiirelaka: Kitthekileni? Kukosenre isiyani yooreera we uviruwa ni ukoomolanihaca?
GEN 31:37 We uhokukhuryaca mirintti caka cothene wakhala wiira uhophwanya itthu yawaa, uwiihe va yoonaka alokwaa ayo ni alokwaka wiira anihukhumu.
GEN 31:38 Myakha sirini kihoovarela nteko. Ikhontwaa ni ipuri cinyu akinarihakaciha ni akinakhura inama yo nhuwo enyu.
GEN 31:39 Kakinowiiherani inama yoorakalaca. Nkilivihaka inama cothene cenyinya uhiyu atthuna uthana.
GEN 31:40 Uthana kaakhwa nttukuttha ni uhiyu kaakhwa uriiriya ni nkaarupa.
GEN 31:41 Kihokhala myakha sirini, kuuvarelakani nteko. Myakha khumi na micese kihovarelani nteko wiira kaathele asaanaa eeli, ni myakha siita kihovarelani nteko nkipokerihaka inama, nanso nyu nhorukunusaca mapokerero aka imaara khumi.
GEN 31:42 Ahaari Nluku a apaapa, Nluku a Aparahamu, Nluku ri ihisima ya Isaki, khweeli nyu mwankoomola wohiitthu. Nluku heewa icuku caka ni hoona nteko uvanryaka, phimaana hookuphulani uhiyu wo ncana.
GEN 31:43 Vaavale Lapanu ahomwaakhula Yakopi eeraka: Ala asithiyana ala asaanaka ni asilopwana ayo ucuulu aka, nnya mihuwo caka ni cothene cinoonaa nnyo ciri cawaka. Ilelo kinhala weeriha cani asaanaka ala ni asaana yayanryaya ayo?
GEN 31:44 Nna va nileehane wiira ukhale usaahiti we ni mi.
GEN 31:45 Vano Yakopi ahokusa nluku ni aheemesa upanka nivatta.
GEN 31:46 Ni Yakopi aheerela asunnawe: Mpanke nikuttha no maluku. Ni ale yahopankaca nikuttha no maluku ni othene yaholelyaca wanikutthani vale.
GEN 31:47 Lapanu aheehana nipuro nno Yekar-Saatuta, nanso Yakopi eehane Kaleeti.
GEN 31:48 Vano Lapanu aheera: Nna nikuttha nna nikhale saahiti ehu we ni mi. Phimaana wiihaninyaka uKaleeti
GEN 31:49 ni Misipa, kontha heera: Mwaneene Nluku nniwehawehe we ni mi ni anihukhumu hata nimwalane ntthu ni nkhwawe.
GEN 31:50 Waahuvihaka asaanaka ala, waathelaka athiyana akina mi hata kihikhale, ucuwele wiira Nluku nawoona.
GEN 31:51 Lapanu ahomwiirela tho Yakopi: Nikuttha phi nna, ni nivatta neemesilyaka iriyari yo we ni mi phi nna.
GEN 31:52 Nikuttha nna nikhale saahiti. Ciicammo nivatta nna nikhale saahiti wiira yakhala yoonanara kihitupihe nikuttha nna kiwanaka nwo, ni we yakhala yoonanara uhituphane nikuttha nna ni nivatta nna uwaka uno.
GEN 31:53 Nluku a Aparahamu, Nluku a Nahori, Nluku o mayathumwanaya anihukhumu. Ni Yakopi, mwanlattu wo ihisima ya Isaki athumwane, aholupela.
GEN 31:54 Yakopi ahopanka isataka umwaakoni, ni aheehana asilokwawe yaari wonwo wiira alye. Yaholyaca ni yarupacile umwaakoni wonwo.
GEN 31:55 Lapanu ahonwa wicisuru ahaavaha alaahuma asaanawe asilopwana na asithiyana, ahaareeriha ni ahoturuwela uwaani.
GEN 32:1 Wahoolo Yakopi ahokhuma ni ahaakumanana ancelo a Nluku.
GEN 32:2 Vano woona wawe, Yakopi aheera: Ala anakhotto a Nluku! Ni ahovaha nipuro nno ncina na Manayimu.
GEN 32:3 Vaavale, Yakopi ahaaveleliha mayanhupi awe wa Isawu munnaawe, akhala uSeyiri ilapo yo Eetomu.
GEN 32:4 Ni aheerela mwanhimerye nkunyaka Isawu wiira: Mi karumeya enyu Yakopi kari wamoca ni Lapanu, kihaawo mpaka ilelo.
GEN 32:5 Kihaana imope na apuuru, ikhontwaa, ipuri, ipottha cithiyana ni cilopwana. Nkunya, kinovelelihera ula nhupi ula, wiira ukakhelele wosalaama.
GEN 32:6 Vano mayanhupi yahoturuwela wa Yakopi phimwiirelaka: Nihomphwanya munnaa Isawu ni uyo nowa wonwo, nawuphavela, ni haana alopwana iminya cese.
GEN 32:7 Vano Yakopi ahoova venci ni ahocukula. Phimaana ahaakawaniha atthu ayo miphwinko miili, ciicammo ahokawaniha ikhontwaa, ipuri, imope ni inkamira miphwinko miili,
GEN 32:8 kontha oopuwela coo: Isawu awaaka na anakhotto awe aatuphelaka mphwinko mmoca nkina uyo unkohala.
GEN 32:9 Vano Yakopi ahoswali eeraka: Nluku a paapa Aparahamu, Nluku a paapa Isaki, we Mwaneene Nluku ukireenle wiira: Uturuwele uwannyaa waalokwaa kinawupanka yooreera.
GEN 32:10 Mi kinacuwela wiira khaninkiphwanela nifento neekhweeli ninkipankaa mi karumeyaa. Kilapuwile mooloko Yortani ni nttontto aka paahi, nanso nna va kihaana miphwinko miili.
GEN 32:11 Sontte ukoopole mmatatani mwa munnaka Isawu, kontha mi kinamoova, wiira hiiwe ukiiva mi, asaana wamoca na anumwanaya.
GEN 32:12 Kontha we uheera: Kinaweettiha ratta. Kinawuvaha ucuulu mwinci toko nhava wo mpharyaa ni mphwinko wa atthu wohaalikelyaa.
GEN 32:13 Yoole uhiyu ule Yakopi ahorupa nenne nipuro nne ni ahothanla mihuwo commaha munnaawe Isawu:
GEN 32:14 ipuri cithiyana iminya piili ni anapinkula sirini, ikhontwaa cithiyana iminya piili ni anapinkula sirini okhontwaa,
GEN 32:15 inkamira talathini cithiyana co wamwinya na asaana aya, imope cithiyana arupayini ni imope khumi cilopwana, apuuru onthiyana sirini ni apuuru onlopwana khumi.
GEN 32:16 Ahaakawela mihuwo nnyo ipottha cawe wiira awacawace, ni wo khula nhuwo wari mphantte aya, ni aheerela: Nhoolelaceke ni nhiye ikhato nhuwo ni nhuwo nkhwaya.
GEN 32:17 Ahonlamulela oopacera ole: Munnaka Isawu oophwanyaka, ni ookohaka wiira: We uri naani, unrwa vayi ni nhuwo urinaa ula wawani?
GEN 32:18 Vano umwakhuleke wiira ca karumeya enyu Yakopi. Ciri itthuvo cinonveleliherawe nkunya awe Isawu ni uyo neera awaka uttuli wihu.
GEN 32:19 Ciicammo ahonlamulela onayeeli, oneeraru nale othene yawa uttuli mihuwo eeraka: Uphwanyakani Isawu othene munhimyacere nuulumo nimoca nenna.
GEN 32:20 Munhimerye tho wiira: Karumeya aa Yakopi nawa uttuli uno. Kontha Yakopi hoopuwela coo: Kahoolihaka itthuvo caka nnyo, kinattipiha urusiya wawe nwo, vano nakumanacaka ni mi uyo, atthunaka nakakhelela wooreera.
GEN 32:21 Phimaana inama cotthuvo nnye cahohoolihiya, nanso ule ahohala veekhawe nipuro nomakiya nne ni ahorupa uhiyu wothene.
GEN 32:22 Yoole uhiyu ule ahonwa ni ahaakusa asaarawe eeli, na asaarawe eeli oohitteeliheraninya, wamoca na asaanawe khumi na mmoca, ni yaholapuwaca nsepa no Yappoko.
GEN 32:23 Ahaalapusaca nsepa nno asaarawe ayo ni citthu cothene carinawe.
GEN 32:24 Vano Yakopi ahohala veekhawe ni ahomwanana nlopwana mmoca uhiyu wothene mpaka usa.
GEN 32:25 Nlopwana ule, woona wawe wiira khamoorya untthema, ahomwaatta wakumanacile makhuva oonatara, ni Yakopi ahorepenyuwa wakumanacile makhuva ni amwananaka ono.
GEN 32:26 Nlopwana ule aheera ukihiye kirwee kontha uhosa. Nanso Yakopi ahomwaakhula eeraka: Akinoohiya urwaka wahikireeriheke.
GEN 32:27 Ni ahonkoha: Ncina naa tipani? Ule ahomwaakhula: Mi kineehaninya Yakopi.
GEN 32:28 Vano nlopwana ule aheera: Ncina naa khaninhala wiihaninya tho Yakopi, nanso Israyeli, kontha we uhomwaanana Nluku na atthu ni uhotthema.
GEN 32:29 Ni Yakopi ahonkoha eeraka: Kinapheela ucuwela ncina naa. Ule aheera: Unkikoherani ncina? Vaavale ahonreeriha.
GEN 32:30 Vano Yakopi ahovaha ncina na Peniyeli nenno nipuro nno, eeraka: Kontha kihomoona Nluku ni miitho aka ala ni mi kinkumi.
GEN 32:31 Aakhumile uPeniyeli, ukati wakhumaya ncuwa ni Yakopi anattumpela.
GEN 32:32 Phimaana mpaka nihuku noleelo annasirayeli khankhuraca ntinka unluttaniha natara ni iyuunu, kontha Yakopi ahaattiya wantinkani ukumanihile natara ni iyuunu.
GEN 33:1 Yoole ukati ule, Yakopi ahoweha ni phamoonawe Isawu awaaka, nari na alopwana iminya cese. Vano ahaakawa asaanawe ayo anvahaka Leya, Rakeli na asaarawe eeli oohitteeliheraninya.
GEN 33:2 Vano ahaaholiha asaarawe eeli oohitteeliheraninya na asaanaya ayo, ahomweesa Leya na asaanawe ayo uttuli waasaarawe oohitteliheraniya Rakeli ni Yusufu phaari oomalihera.
GEN 33:3 Wahoolo Yakopi ahaapwahaca nukhala uhoolo, ni ahoromela vathi imaara saapa mpaka waphilyawe wamunnawe.
GEN 33:4 Vaavale Isawu ahontthimakela, ahonkapatta nuunvaha alaahuma nuunsalameeha, ni othene yahonlaca.
GEN 33:5 Wahoolo ahoweha ni ahoona athiyana na amirawo ni ahokoha eeraka: Ala phaasipani arinaa ala? Ule ahaakhula eeraka: Ala pha asaana anvahilyawe Nluku wotthuna wawe karumeya aa.
GEN 33:6 Vano yahophiyaca asaarawe eeli oohitteliheraniya wamoca na asaanaya ayo ni yahoroma.
GEN 33:7 Ciicammo ahophiya Leya wamoca na asaanawe, ni ahoroma. Wiimaliheroni ahophiya Yusufu ni Rakeli, na ayo yahoromaca.
GEN 33:8 Nanlelo Isawu anakoha: Unhala wiirihani mihuwo cothene ciphwanyilyaka niphiro nnyo? Yakopi ahomwaakhula: Keera kiphwanye nnema wamiithoni wankunya aka.
GEN 33:9 Nanso Isawu ahomwiirela: Mwanhimaka, mi kihaana mihuwo cinci. Cirinaa nnyo uhalaneke.
GEN 33:10 Vano Yakopi ahomwaakhula: Mena, wakhala wiira uhaana nnema ni mi ukuse itthuvo yuvahilyaka ela, phimaana koonaka ikhove aa, toko wiira koonne ikhove ya Nluku, kontha we uhokaakhelela.
GEN 33:11 Kinawulepela ukuse iparakhaka iwaneliyaa kontha Nluku wo nnema hokivaha, ni kihaana ciinci. Ni ahonkhanyereriha mpaka Isawu waakhelela.
GEN 33:12 Isawu aheera: Nrwee neette. Mi kinahoola.
GEN 33:13 Nanso Yakopi aheera: Nkunya, kinawoona asaanaka ayo ukenkenyaca ni kihaana ikhontwaa ni imope cotothola naanano kaakuvihacaka, wonihuku nimoca kinawoova ukikhwacera cothene.
GEN 33:14 Fatari uhooleke nkunya, mi kinawa uttuli nwo keettaka vakani vakani. Kintthariha malonce onama ciri uhoolo nnya ni amirawo arinaka ala. Kinawuphwanya uSeyiri.
GEN 33:15 Vano, Isawu aheera: Kinawuhiyera atthu arinaka ala. Ule ahonkoha: Nlattuni? Wanaatosa mi kaphwanyaru nnema ni nkunya aka.
GEN 33:16 Phimaana Isawu ahoturuwela iphiro yaweenlyawe ahokoleelaka uSeyiri.
GEN 33:17 Nanso Yakopi ahopwahera arwaka uSukoti. Uphiya wawe ahoteka inupa ni macici onama cawe. Phimaana wiihaninyaka nenno nipuro nno uSukoti.
GEN 33:18 Paahi Yakopi ahophiya nari nkumi iparasa yo uSikeni ni ilapo yo Kanaa, akhumaka uPatan-Arami; ni ahomaka vakhiviru nuparasa.
GEN 33:19 Ni ahothuma nthala nankhurutunlyawe heema munthalani na asaana a Hemori, athumwane Sikeni ni nsurukhu iminya imoca.
GEN 33:20 Vaavale ahoteka ikhilompi ni ahovaha ncina na Nluku, Nluku o Isirayeli.
GEN 34:1 Nkwaha mmoca, Tina, mwana a Leya ayanryawe ni Yakopi, ahokhuma wiira aacuwelane athiyana oyeele ilapo ele.
GEN 34:2 Sikeni, mwanawe Hamori, nHevewu, mwene o yoole nttetthe ule, ahomoona ni ahontuphela.
GEN 34:3 Nanso nrima awe wahonphelyaa nlattu wa Tina, mwana a Yakopi, ni ule ahoncivela mwanthiyana ole ni ahomuulumana wonifento.
GEN 34:4 Phimaana Sikeni ahorwaa waahimerya athumwane eerelaka: Nkuulumele ule nthiyana ole wiira akhale mwaaraka.
GEN 34:5 Yakopi wacuwenlyawe wiira mwamwanawe Tina ahotankanyinya iharusi, asaanawe anari utakhwani walihaaya mihuwo; ahomaala awehereryaka uturuwaca.
GEN 34:6 Vano Hamori, athumwane Sikeni yahorwaa woopa mwaha ni Yakopi.
GEN 34:7 Ukati waturuwacilyaya utakhwani asaana a Yakopi yahocuwelaca cothene ni yahocukulaca nuurusiya venci cinenne kontha Sikeni ahopanka itthu yowuulihaca muru uIsirayeli, wanrupanyawe mwana a Yakopi; itthu ihimpankiya.
GEN 34:8 Nanso Hamori aheerelaca: Mwanaka Sikeni hociveliya ni mwaninyu. Kinawuvekelani wiira munvahe akhale mwaarawe.
GEN 34:9 Ni niyaranace nyu ni hi, nnivahaka asaanenyu asithiyana ayo ni hi ninawuvahani awihu ayo,
GEN 34:10 ni nkhale wamoca ni hi. Ilapo inoonenyu ila nkhale wohitwana. Mpanke marontta enyu ni nkhalane mathala.
GEN 34:11 Vano Sikeni aheerela athumwane ni asunnawe mwanthiyana ole: Nkikupali. Nkivahe mwanthiyana oyo. Mi kinawuulivani ihisapu yothene inhalenyu ukilamula.
GEN 34:12 Mwatthuna mmwelihe ihisapu yoothela ni contthuva mwali uyo. Mi kinakumiha cothene cinhalenyu uhimya, nanso nkivahe mwali uyo kinthele.
GEN 34:13 Vaavale, asaana a Yakopi yahonthepyaca Sikeni ni athumwane yeehaninya Hamori nlattu wootankanyaa iharusi ya Tina, mwanrokoraya.
GEN 34:14 Ni yahomwiirelaca: Khaninlamuliya upanka commo, unvaha mwanrokorihu nlopwana oohuula icantto kontha iri itthu yowuuliha muru.
GEN 34:15 Phimaana ninhala wutthunani nyu mwakhalaka toko hi. Mooliheke alopwana othene toko hi.
GEN 34:16 Vano ninawuvahani asaanehu ayo wiira mwaatheleke, ni hi, asaanenyu ayo ninawathela. Ni ninhala ukhala wamoca ni amocaru ni nyu.
GEN 34:17 Nanso mwahiniweke ni mwahuuleke icantto, ninankusa mwanihu uyo nuuthama.
GEN 34:18 Yaayo moolumo ayo yahoncivela Hamori ni mwanawe Sikeni.
GEN 34:19 Sikeni khapicile nuupanka yeereliyawe iyo kontha ahoncivela venci mwana a Yakopi. Ni Sikeni phaari oofentiya venci wowapwaha atthu othene yaariwo ntthoko na athumwane.
GEN 34:20 Phimaana ahorwaa Hamori ni Sikeni wathukumaniha alopwana othene oparasa ni wahimerya eeraka:
GEN 34:21 Ale atthu ale ari osalaama ni hi, phimaana naahiye akhale ilapo ehu ila ni apanke marontta aya. Kinawoona ilapo ihu iyo iri yinci. Ananivaha waathela asaanaya ayo ni hi ninawavaha asaanehu ayo.
GEN 34:22 Nanso ayo atthu ayo anhala ukupali ukhala ni hi ni ukhala amocaru. Hi alopwana va othene nolaka icantto, toko ayo cunlyaya.
GEN 34:23 Nnoona cani, imope caya nyo, ni nhakhu aya uyo, ni mihuwo caya nyo, khacinhala ukhala cawihu? Neewanane paahi ni anaahala ukhala wamoca ni hi.
GEN 34:24 Vaavale atthu othene yavira nkhora wo oparasa, yahomwiiwelela Hamori ni mwanawe Sikeni, ni alopwana othene yaavira wa nkhora woparasa, yahoolihiya icantto.
GEN 34:25 Waphilyaya nihuku noneeraru, ukati waryaya muhuvani ni yaweryaka venci makhwatta ayo, asaana eeli a Yakopi, Simeyoni ni Levi, asirokorawe Tina, yahokusaca khula ntthu ikatana awe, yahokelaca mparasa mmwe ni yaheevakaca alopwana othene.
GEN 34:26 Ciicammo yahomwiivaca ni ikatana Hamori ni mwanawe ni yahonkusaca Tina aari inupa ya Sikeni ni yahokhumaca.
GEN 34:27 Asaanawe Yakopi yahophiyaca wa atthu ookhwa ni yahohukhaca mparasa mmo mothene kontha yanootankanyinya iharusi ya mwanrokoraya Tina.
GEN 34:28 Yahokusaca ikhontwaa, imope, apuuru caari mparasa ni cothene caari mmattani.
GEN 34:29 Yahokusaca mihakhu ni yahavarakaca asaana na athiyana urwaa wapanka ipottha, ni yahohukhaca mmapaani mothene.
GEN 34:30 Phimaana Yakopi ahomwiirela Simeyoni ni Levi: Mokivelaveliha, nhokiputaniha na atthu ankhala ilapo ela, ni makanani ni maperesewu ncuwelaka wiira hi niri vakani, anaahala ulattulana nuuhonona ntthoko ehu.
GEN 34:31 Vano ale yahaakhulaca: Mpaka uyo umpanka mwanrokorihu toko puuta?
GEN 35:1 Nluku ahonlamulela Yakopi: Wunwe, urwee uPeteli ni wakhale wonwo ni wampankele ikhilompi Nluku ookhumelenle ukati wantthawa munnaa Isawu.
GEN 35:2 Vano Yakopi ahohimerya ntthoko nawe na atthu othene yarinawe eeraka: Mwakumihe anluku a malaponi othene wariyari winyu mwiirapihe ni mmware ikuwo cikina.
GEN 35:3 Vano nunwe nirwe uPeteli wonwo kinkontekela ikhilompi Nluku akaakhunle nihuku narinaka masukuli ni hokiveleela mmaphironi mothene mweettaka.
GEN 35:4 Vaavale Yakopi ahovahiya anluku othene oohimaana yari mmatatani ni ipirinku caari mmanyaruni ni Yakopi ahothipela vathi mooko uri wamoca nuSikeni.
GEN 35:5 Vano yahokhumaca, na atthu yakhala yeeyo ilapo eyo Nluku ahaacariha woova mpaka woolwana wattharatthara asaana a Yakopi.
GEN 35:6 Commo, Yakopi na atthu othene yarinawe yahophiyaca o Lusu uneehaniya uPeteli uri ilapo yo Kanaa.
GEN 35:7 Vaavale ahoteka ikhilompi ni nenno nipuro nno ahovaha ncina no El-Peteli, kontha Nluku ahonkhumelela ukati wantthawawe munnaawe.
GEN 35:8 Ahokhwa Teepora, karumeya a Repeka, ni ahovithiya vakhiviru nuPeteli vathi waya mooko ni ahovaha ncina na Alompakuti.
GEN 35:9 Wahoolo Nluku ahonkhumelela tho Yakopi, akhumaka uPatan-Arami ni ahonreeriha.
GEN 35:10 Vano Nluku ahomwiirela: We ncina naa Yakopi. Ukhuma ilelo ncina naa khaninhala wiihaniya tho Yakopi nanso ncina naa ninhala wiihaniya Isirayeli. Ni aheehaneliya ncina na Isirayeli.
GEN 35:11 Nluku ahomwiirela tho: Mi phi mi Nluku okuru cothene. Uyarace ni ukhalane ucuulu mwinci. Mwiirutthuni mwa we, inaakhumelela ilapo cinci na atthu enci, ni ammokhumelela mamwene menci.
GEN 35:12 Mi kimmowuvaha we ilapo invahilyaka Aparahamu ni Isaki. Wahoolo ilapo eyo kinavaha ucuulu aa.
GEN 35:13 Vaavale, wuulumaca wawe Yakopi, Nluku ahowela.
GEN 35:14 Vano aheesa nivatta no nluku nipuro noolumaninyawe ni Nluku, ni aheetthela yoowuriya ni makhura waculu waya nivatta.
GEN 35:15 Phimaana Yakopi ahovaha ncina no Peteli nipuro namuulumanyawe Nluku.
GEN 35:16 Wakhumilyaya uPeteli, unahanle ncoko vakani wiira aphiye ilapo yo Efarata, Rakeli ahonnyara mwana, nanso uyara wawe waari wookukuryaca.
GEN 35:17 Nari mmekho, mayoyariha ahomwiirela: Uhoove, kontha uhaana tho mwana mwanlopwana.
GEN 35:18 Vano wakhumaya nnepa awe, kontha hokhwa, ahonvaha mwana ule ncina na Penoni, nanso athumwane yahonvaha ncina na Pencamii.
GEN 35:19 Ni ala mananna ala pheeracilyawe wookhwa Rakeli ni ahovithiya ni iphiro yorwaa o Farata uneehaniya uPetelehemu.
GEN 35:20 Waculu waya mahiye, Yakopi aheemesa nivatta no nluku. Mpaka nihuku noleelo, nenne nivatta nne ninathonyera mahiye a Rakeli.
GEN 35:21 Vano Isirayeli ahokhuma arwaka unkhurutula heema awe withela Miktal-Eteri.
GEN 35:22 Anowiira Isirayeli athamelaka yeeyo ilapo eyo, Rupeni ahorwaa unthukumanana Piila, amwaara athumwane oohitteeliheraninya, ni Isirayeli ahocuwela. Yakopi ahaana asaana khumi nuuwa eeli:
GEN 35:23 Rupeni, ntthara na Yakopi, Simeyoni, Levi, Yutta, Isakari ni Sepuloni, ala yari asaana a Leya;
GEN 35:24 Yusufu ni Pencamii asaana a Rakeli;
GEN 35:25 Taani ni Nafitali asaana a Piila, ipottha ya Rakeli;
GEN 35:26 Kaate ni Aseri yaari asaana a Silipa ipottha ya Leya. Ala phaasaana yayarelyawe o Patan-Arami.
GEN 35:27 Yakopi ahorwaa unthotola Isaki, athumwane, o Manree yo Kiriyate-Arapa o Heporoni wakhalawe Aparahamu ni Isaki.
GEN 35:28 Mahuku ookumi a Isaki yari myakha iminya imoca ni myakha nuwa thamanini (180) ceyarelo.
GEN 35:29 Isaki ahomumula nuukhwa nooluvanle ni ahaatthara mayathumwane. Isawu ni Yakopi, asaanawe, yahonvitha.
GEN 36:1 Ula phu ucuulu wa Isawu, neehaniya Etomi.
GEN 36:2 Isawu ahaathela athiyana iriyari ya asaana uKanaa: Ata mwana a Eloni, nHitita; Oholipama mwana a Anaa, mwana a Sipeyone nHivita;
GEN 36:3 ni Pasimati mwana a Sumayili, mwanrokorawe Nepayote.
GEN 36:4 Isawu ahonnyarana Ata, Elifasi, ni Pasimati ahonnyarana Reweli.
GEN 36:5 Oholipama ahonnyara Yewusi, Yalawu ni Korani. Ala pha asaana a Isawu yayarenlawe ilapo yo Kanaa.
GEN 36:6 Vaavale Isawu ahaakusa asaarawe othene, asaanawe asilopwana na asithiyana na atthu othene ovatthokoni wawe; ni ahokusa mihuwo cawe, imope, mihakhu cawe ni citthu cothene caphwanyilyawe ilapo yo Kanaa, ni amwalanaka ni nhimaawe Yakopi ahothamela ilapo ikina.
GEN 36:7 Kontha mihakhu caya nnyo cari cinci, ni khacareerana ukhalakhala nipuro nimoca, ni ilapo yakhalakhalaya eyo khayarina coolya cootosa mwanlattu wonama carinaya nnyo.
GEN 36:8 Phimaana Isawu, neehaniya Etomi, ahorwaa ukhala mwako wo Seyiri.
GEN 36:9 Ula phu ucuulu wa Isawu athumwanaya annaEtomi, yakhalaca mwako wo Seyiri.
GEN 36:10 Ala phi macina asaanawe Isawu: Elifasi mwana a Ata, mwaarawe Isawu; Ruweli mwanawe Pisamate, mwaarawe Isawu.
GEN 36:11 Asaana a Elifasi: Teemani, Umari, Seefu, Kaayita ni Keenasi.
GEN 36:12 Timina ari mwaarawe oohitteeliheraninya a Elifasi, mwana a Isawu, ni ahonnyarana Elifasi Maalike; ala pha asaanawe Ata amwaara a Isawu.
GEN 36:13 Ala pha asaana a Ruweli: Naate, Seraa, Samaa ni Miisa; ala yari asaana a Pasimati, amwaarawe Isawu.
GEN 36:14 Ala pha asaana a Oholipama, mwanawe Anaa, mwanawe Sipeyone, athiyana oneeraru a Isawu; ni ahayarana Isawu: Yewusi, Yalawu ni Koraa.
GEN 36:15 Vano ala phi mamwene asaana a Isawu, asaana a Elifasi, ntthara na Isawu: Mwene Temaani, mwene Umari, mwene Seefu, mwene Keenasi,
GEN 36:16 mwene Koraa, mwene Kayeta, mwene Maliki; ala phi mamwene yayanryawe Elifasi ilapo yo Etomi; asaana a Ata athiyana oolupale a Isawu.
GEN 36:17 Ala pha asaana a Ruweli mwana a Isawu: Mwene Naate, mwene Seraa, mwene Samaa, mwene Misaa; ala phi mamwene yayanryawe Ruweli ilapo yo Etomi, asaana a Pasimati mwaara a Isawu.
GEN 36:18 Ala pha asaana a Oholipama mwaara a Isawu: Mwene Yewusi, mwene Yalamu, mwene Koraa; ala phi mamwene akhumakhumile ni Oholipama, mwana a Anaa, mwaara a Isawu.
GEN 36:19 Ala pha asaana a Isawu ni mamwene aya; ule neehaniya Etomi.
GEN 36:20 Ala pha asaana a Seyiri nHorewu, yakhalakhala ilapo eyo: Lotanimu, Sopalimu, Sipeyonemu ni Anaamu,
GEN 36:21 Tiisomimu, Eserimu ni Tisaamu. Ala phi mamwene o mahorewu, asaana a Seyiiri ilapo yo Etomi.
GEN 36:22 Ala pha asaana a Lotani: Hoti ni Homa. Mwanrokorawe Lotani eehaninya Timina.
GEN 36:23 Ala pha asaana a Soopali: Alvani, Manaate, Epali, Seefo ni Oona.
GEN 36:24 Ala pha asaana a Sipeyone: Ayaa ni Anaa; naaciya Anaa oonenenle iluusi co maasi oohiwelela ntakhwani, waahakhelawe apuuru a Sipeyone, athumwane.
GEN 36:25 Ala pha asaana a Anaa: Tisomi ni Oholipama, mwana mwanthiyana a Anaa.
GEN 36:26 Ala pha asaana a Tisomi: Hentta, Eesipa, Itera ni Kerani.
GEN 36:27 Ala pha asaana a Eseri: Piila, Saava ni Akaa.
GEN 36:28 Ala pha asaana a Tisomi: Usii ni Araa.
GEN 36:29 Ala phi mamwene o mahorewu: mwene Lotamu, mwene Soopelamu, mwene Sipeyamu, mwene Anamu,
GEN 36:30 mwene Tisomu, mwene Eserimu, mwene Tisomu; ala phi mamwene o mahorewu, toko caaryaya mamwene aya ilapo yo Seyiri.
GEN 36:31 Ala phi mamwene yathawaanle ilapo yo Etomi hinapaca ukhala mwene mwasaana o wIsirayeli.
GEN 36:32 O Etomi aholamula Peelamu, mwana a Peyori, ni ncina noparasa awe naari Tinapa.
GEN 36:33 Ahokhwa Peela, ni nipuru nawe, ahothawala Yopapimu, mwana a Seraa, o Posira.
GEN 36:34 Ahokhwa Yopapi, ni nipuru nawe, aholamulula Husamu, olapo yo Matanamita.
GEN 36:35 Ahokhwa Husamu, ni nipuro nawe, aholamula Hatatemu, mwana a Peetati, aarakalihile a Miitiya ncoko wo Mwape; ncina noparasa awe nari Avite.
GEN 36:36 Ahokhwa Hatatemu, ni nipuro nawe, aholamula Samulamu, o Masireka.
GEN 36:37 Ahokhwa Samulamu, ni nipuro nawe, aholamula Sawulumu, o Reyopoti, wamoca ni mooloko Ufarati.
GEN 36:38 Ahokhwa Sawulumu, ni nipuro nawe, aholamula Paali-Hanamu, mwana a Akipori.
GEN 36:39 Ahokhwa Paali-Hanamu, mwana a Akipori, ni nipuro nawe, aholamula Hatarimu; ncina noparasa awe nari Pawu; ni na amwaarawe nari Meetapeli, mwana a Materete, mwana Min-saape.
GEN 36:40 Ala phi macina o mamwene a Isawu, toko caryaya malokwawe, mapuro aya ni macina aya: Mwene Timinamu, mwene Aluvamu, mwene Yetetemu,
GEN 36:41 mwene Oholipamu, mwene Elaamu, mwene Pinomu,
GEN 36:42 mwene Kinasimu, mwene Temamu, mwene Mipisarimu,
GEN 36:43 mwene Makitiyelimu ni mwene Iramu. Ala phi mamwene o Etomi, toko caakhaliyaya ilapo aya. Ula phi Isawu, athumwane o annaEtomi.
GEN 37:1 Yakopi ahokhala ilapo yo Kanaa wonwo athumwane warwelyaya weettakaca.
GEN 37:2 Ila phi yookhumelela ya nloko na Yakopi. Yusufu warinawe myakha khumi na saapa aahakhela inama na asunnawe. Anawaakavihera asaana a Pila na asaana a Silpa asaara athumwane ni anawaahimerya athumwane coonanara caapankaya asunnawe.
GEN 37:3 Vano, Israel aananfenta venci Yusufu woopwaha asaana akina ayo kontha ayareele athumwane anooluvanle, phimaana yahonttotthihera ihancu yoorekama.
GEN 37:4 Ni wacuwenlyaya asunnawe wiira phinfentiya venci na athumwane woopwaha mwana phi mwana, yahonramaca ni khayamulumana wo nnema.
GEN 37:5 Vano aaholoha Yusufu nttora ni wahimenryawe asunnawe ale yahanca onrama wootepa.
GEN 37:6 Ni aheerela: Nviriyane nttora olohilyaka:
GEN 37:7 Natthukaca ihayi co tiriku omattani. Vano ihayi aka yahonwa ni weemela ni ihayi cinyu nnyo cahorukurerya ni wooromela ihayi aka.
GEN 37:8 Ni asunnawe yahomwiirelaca: Vano, weva onoona wiira unaahala unilamula? Ni yahonrama tho woopwaha nlattu wo nttora ni itthu yahimilyawe.
GEN 37:9 Wahoolo aaholoha tho nttora ni wahimerya asunnawe eeraka: Kiholoha tho nttora nkina. Ila ikwaha ila ncuwa, mweri ni itthoottwa khumi ni imoca cahokikhoromela.
GEN 37:10 Wahimenryawe athumwane na asunnawe, athumwane ayo yahoncaceraca yiiraka: Nttorani yooyo olohilyaa uyo? Maanaya wiira mi, anumwana na asunnaa ninwoworomela weva mpaka vathi?
GEN 37:11 Phimaana asunnawe othene Yanaanramaca. Nanso athumwane yeera yuupuwelaka itthu iyo.
GEN 37:12 Asunnawe Yusufu yahorwaa uhakhela inama ca athumwanaya vakhiviru nuuSikeni,
GEN 37:13 ni Isirayeli ahomwiirela Yusufu: Toko cincuwelaa asunnaa anhakela inama vakhiviru ni nuuSikeni. Kimphela wuruma urwee wonwo. Yusufu ahaakhula eeraka: Aye. Kiheewa.
GEN 37:14 Athumwane yahomwiirela: Urwee wonwo woone unari ukhaliyaka ratta, ukhuma asunnaa ni inama ciyo ni ukiwiihere ihapari. Yakopi anrumile nari nikuwa no Heporoni, ni Yusufu ahophiya uSikeni.
GEN 37:15 Vano nlopwana mmoca ahomphwanya akomankomacaka muthakoni ni ahonkoha eeraka: We, unaavyani?
GEN 37:16 Yusufu ahaakhula: Kinaavya asunnaka. Nkihimerye nipuro ninhakhelaya inama nnyo.
GEN 37:17 Nlopwana ule ahaakhula: Ayo ahokhumaca va. Mi kiheewa yiiracaka nrwee uTotaani. Vano Yusufu ahaatthara asunnawe. Ni ahaaphwanya anari vakhiviru ni uTotaani.
GEN 37:18 Nanso ale yahomoonaca nttayi nttayi, ni hinaphiya Yusufu, yahovanela umwiiva.
GEN 37:19 Ni yahohimeryana yiiraka: Hophiya nanttora uyo.
GEN 37:20 Vano nrwee nimwiive nunrihela nluusi, ni neereke hokhuriya ni nsene noone vano cinhalaya wiira ittora cawe nnyo.
GEN 37:21 Vano, wiiwa wawe Rupeni ahomananiha umwaakiha eeraka: Nihimwiive!
GEN 37:22 Ni aheera tho: Nhivuvihe iphome. Munrihele nluusi iri muthakoni mu, yooyo uyo nhinvaravare. Rupeni olumacenre coommo aavyaka mananna omwaakiha ni wiira anturusele wathumwane.
GEN 37:23 Uphiya wawe Yusufu, asunnawe yahonrulaca ihancu awe, yoorekama eyo,
GEN 37:24 nunvaraca nunrihela nluusi moohimasi.
GEN 37:25 Wookomacilyaya wiira alye yahoona nttayi nttayi mphwinko wa Annasumayili wakhuma uKiliyati. Ikamelo caya capakhinre ikaruma coonukhela, makhura o nrette ni makhura oonukhela caarwanaya Wiciipitu.
GEN 37:26 Yutta aheerela asunnawe: Ninhala uphwanyani namwiivaka nhimeehu uyo, nimaalanaka ukhwa wawe nwo.
GEN 37:27 Nrwee naathumihere Annasumayili. Nihinhasare ula nhimeehu iphula ni niitho. Ni asunnawe Yutta yahokupali.
GEN 37:28 Wattamenryaya anamarontta Annasumayili o Mitiyani, asunnawe Yusufu yahonkumiha Yusufu nluusi ni yahathumihera Annasumayili ni ncurukhu siriini nunkusa Wiciipitu.
GEN 37:29 Rupeni warwelyawe unweha nluusi mmo, khaamphwanyile. Woona wawe wiira Yusufu khaawo ahaahula coowara cawe,
GEN 37:30 aturuwelaka waasunnawe ni aheera: Mmirawo uyo mmwe khaawo! Kinhala wiira cani?
GEN 37:31 Vano yahomwiivaca napinkula nuruwyaa mphomeni ihancu ya Yusufu.
GEN 37:32 Ni yahorwaca waathonyera athumwanaya yiiracaka: Nihottotta ihancu ila kahiki khinakhala ihancu ya mwaninyu Yusufu?
GEN 37:33 Ni Yakopi ahoona wiira phi yeeyo ni aheera: Ila ihancu ila ya mwanaka! Nsene nihonhasara. Yusufu hokhuriya!
GEN 37:34 Vano Yakopi ahaahula coowara cawe nuwara icakho ni ahomunlela mwanawe mahuku menci.
GEN 37:35 Asaanawe othene, asilopwana na asithiyana yanawa ummaaliha, nanso aanakhotta umaalihiya nwo eeraka: Mena! Kinaahala wunla mpaka mmahiye nryawe mwanaka. Ni ahopwaherera umunlela.
GEN 37:36 Yooyo ukati uyo uWiciipitu, Annamitiyani yahontumiha Yusufu waPutifari, nhooleli a mayoorontta inupa ya Farawoo, mwene o Wiciipitu.
GEN 38:1 Yooyo ukati uyo, Yutta ahaahiya asunnawe ni ahorwaa ukhala inupa ya nlopwana mmoca eehaninya Hiira, ilapo yo Atulami.
GEN 38:2 Vano Yutta ahomoona mwanthiyana mmoca nKanaa eehaninya Suuwa. Ule ahonkusa nuunthela.
GEN 38:3 Ni mwanthiyana ole ahorupala ni onyara mwana nuummaha ncina na Eeri.
GEN 38:4 Ahorupala tho irukulu, ahonnyara mwana nlopwana nuunvaha ncina na Onani.
GEN 38:5 Ahaakulela tho nuunyara mwana ni ahonvaha ncina na Seela. Yooyo annyanre nari uKisipi.
GEN 38:6 Vano Yutta ahomwaverya Eeri, mwanawe oontthaara, nthiyana eehaninya Tamari wiira anthele.
GEN 38:7 Nanso Eeri, mwana oontthaara a Yutta, aari oohiloka wamiithoni wa Mwaneene Nluku, phimaana Mwaneene Nluku ahomwiiva.
GEN 38:8 Vano Yutta ahomwiirela Onani: Ukhale nkelanupa a munnaa, wiira munnaa akhalane ipyo.
GEN 38:9 Nanso Onani wacuwenlyawe wiira asaana ayo khanhala ukhala awawe, ukati wathukumananawe amwaara a munnaawe, aarihakacela vathi wiira hinyarele asaana munnaawe.
GEN 38:10 Ni yaapankawe ile yaari yoonanara wamiithoni wa Apwiya, phimaana nuuyo yahomwiiva.
GEN 38:11 Vano Yutta ahomwiirela Tamari: Weenaneleke unankhwelyaa uyo wapuwani wa athumwana mpaka wanhalawe wunnuwa mwanaka Seela. Kinawuvaha wiira unthele, kontha Yutta oolumacenre commo aaceraka wiira Seela ni uyo hikhwe toko cikhwilyaya asunnawe. Phimaana Tamari ahorwaa waathumwane.
GEN 38:12 Anavinrene mahuku menci, yahokhwa amwaara a Yutta, yaari mwana a Suuwa. Wahoolo Yutta aheepisiha nrima ni ahorwaa ni mpwanawe Hiira, Nnatulami, waweha ahakheli awe okhontwaa oTimina.
GEN 38:13 Vano ahohimerya Tamari wiira atiithyaa anrwaa oTimina uthikila mapururu okhontwaa.
GEN 38:14 Tamari ahorula ikuwo coonankhwele ni aheettiyelela wiitho nwo ni nleso wiira hicuweliye, ni ahonkoma wankhora wo Nayimi, uri iphiro yo Timina, kontha ahoona wiira Seela honnuwa ni khanvahiya tho wiira akhale awannyawe.
GEN 38:15 Vaavale Yutta umoona wawe Tamari amoonihile toko puuta, kontha anookhuneela ikhove awe iyo.
GEN 38:16 Yutta ahorwaa waryawe Tamari nuumwiirela: Nkawe, kinawuvekela kuuthukumanane. Kontha khacuwela wiira amwaara-mwanaka. Ni ule ahonkoha: Unhala ukivahani wowiira ukithukumanane?
GEN 38:17 Ule ahaakhula eeraka: Kinawuveleelihera ipuri yo muncicini mwaka. Ni Tamari aheera: Mwemesere itthu mpaka wanhalenyu uwiiha.
GEN 38:18 Vano ule ahonkoha eeraka: Kemesereke isiyani? Ule ahomwaakhula: Ikanyero eyo, ni nleso naa nno ni nttontto uri mmatatani mwa uyo. Yutta ahonvaha calepenlyawe, nuunrupana mpaka unrupaliha.
GEN 38:19 Wahoolo Tamari ahonwa nuurula nleso nawanryawe, ni ahowara ikuwo coonankhwele cawe.
GEN 38:20 Yutta ahonvaherera mpwanawe Nnatulami wiira oopole citthu cemesenryawe mmatatani mwa nthiyana ole, nanso khaamphwanyile.
GEN 38:21 Hiira ahaakoha alopwana o yoole nttetthe ole eeraka: Ri vayi namararuwa nonkomesa vakhiviru waya iluusi piili ciri ni iphiro yo Nayimi? Ayo yahomwaakhulaca: Mu mmwani mu khanirina namararuwa.
GEN 38:22 Vano uyo ahohokoleela wa Yutta ni ahomwiirela: Akimphwanyile. Uhiya commo, atthu o yoole nttetthe ule yiinre nwo khaawo nthiyana namararuwa.
GEN 38:23 Yutta aheera: Mweeco, ahalaneke cennyo cinhiyenryaka nyo. Akintthuna wiira nitarawyaace. Maana mi kahoovaherera ila ipuri ila wiira wanvahe, nanso we khumphwanyile.
GEN 38:24 Cinavinre myeeri miraru, Yutta ahohimerya wiira: Tamari aheetta uluva ni horupala irukulu. Vano Yutta aheera: Akumiheriye vate ni apahiye.
GEN 38:25 Ukati wakumiheriya awe vate wiira apahiye, Tamari aholeehera nhupi wa amaathi awe eeraka: Kirupalihile phi mwaneene nnya citthu nnya. Ni ahopwaherera eeraka: Nkoonani nnya, ni mmwaavye mwaneene ila ikanyero ila, nna nleso nna ni ula nttontto ola.
GEN 38:26 Vano Yutta ahocuwela citthu nnyo ni aheera: Amwaara-mwanaka ayo ahaana isariya yookivikana mi kontha kinoohavaha mwanaka Seela. Ni khaathukumananne tho.
GEN 38:27 Vano waphiilyaya ukati wooyara, wahoonnyaa wiira haana mavatta mmirimani mmo.
GEN 38:28 Wayaraawe va, mmoca uyo ahokumihera ntata nawe vate ni nthiyana mayooyariha ahonvara moono uyo nuuntthuka nluuci nookhwiila, eeraka: Ula phi oopacera.
GEN 38:29 Ukati waturusa awe mwana ule ntata nawe nno, nhimaawe ule phaphovawe nuupacera uyaryaa, ni nthiyana mayoyariha aheera: Uphwanyile cani ikhato yoovira? Ni ahovahiya ncina na Peresi manaaya wiira ikhato.
GEN 38:30 Wahoolo ahoyarya munnaawe, natthukiye mmoononi nluuci nookhwiila, ni ahovahiya ncina na Seera.
GEN 39:1 Yusufu ahorwaaninya Wiciipitu. Wonwo Putifari wanthumilyawe Yusufu mmatatani mwAnnasumayili. Putifari ari nhooleli a mayoorontta inupa ya Farawoomu, mwene o Wiciipitu, ahonthuma mmatatani mwAnnasumayili yammwiihile.
GEN 39:2 Mwaneene Nluku ari ni Yusufu, ni uyo anareeriya venci, nuupwaherera ni aakhala wapuwani wa nkunya awe munnaciipitu.
GEN 39:3 Putifari ucuwela wawe wiira Mwaneene Nluku ari ni Yusufu ni yaammunnuwiha nuureeriha miteko cothene cavarawe,
GEN 39:4 ni ahoncivela Yusufu mpaka onvaha ukhala nlamuli o wapuwani wawe wothene. Putifari ahonhiyera Yusufu ulamula wapuwani wawe wothene ni citthu cothene caarinawe.
GEN 39:5 Ukhuma ukati wanhiyenryawe ulamula wapuwani wothene ni citthu cothene, Mwaneene Nluku ahovaha iparakha inupa ya munnaciipitu, mwanlattu wa Yusufu. Iparakha ca Mwaneene Nluku cahomwareela mwa citthu cothene carinawe Putifari, ukhuma wapuwani mpaka umattani.
GEN 39:6 Vano, ahohiya citthu cothene carinawe, mmatatani mwa Yusufu, ni khaarina isukuli weetthu phi itthu, aawehererya ulya paahi. Yusufu aari ooreera ni aancivela na atthu.
GEN 39:7 Wakhanlyawe ukati vakani, amwaara a nkunya awe yahanca unthokoca numwiihana yiiraka: Uwe wakirupane!
GEN 39:8 Nanso ule ahokhotta ni aheera: Nkunya aka khanasukuli weetthu phi itthu ciri wapuwani ni cothene cirinawe hiile mmatatani mwaka.
GEN 39:9 Khaawo wapuwani va ookipwaha mi, ni khiiwo ikateelihilyawe, nanso nyu paahi, kontha amwaarawe. Kaahala upankelani itthu yoonanara toko ila, nuunkosera Nluku?
GEN 39:10 Toko coo, ale yaanankhanyereriha Yusufu khula nihuku, nanso uyo anawakhotta ni khaatthuna waattamanana.
GEN 39:11 Nihuku nimoca ahokela mpani wiira avare miteko cawe ni yooyo ukati uyo, khaariwo ntthu hata mmoca.
GEN 39:12 Vano ale yahovara ikuwo awe ni yahomwiirela tho: Nrwee, ukirupane! Nanso uyo ahokhuma mpani mmo ni waahiyera ikuwo eyo mmatatani mwaya.
GEN 39:13 Waatthawawe va, yahoona wiira hohiya ikuwo awe mmatatani mwaya,
GEN 39:14 ni yaheehana akarumeya ni weerelaca: Nkoonani! Ula Nheperewu ula niwiiheriyehu ula uwa uniruwana! Ule hokela mu ni aphavela ukirupana, nanso mi kihokhuwela.
GEN 39:15 Wakiwiilyawe kikhuwaka, hokihiyera ikuwo awe nuukhuma mpani mmo.
GEN 39:16 Vano ale yahosunka ikuwo eyo mpaka wawilyawe nkunya uwaani.
GEN 39:17 Vano yahaakulela uttonka itthu yakhumile yiiraka: Ile ipottha yo uHeperewu ile iniwiihenryaa eyo, yahokiwela mi ukiruwana.
GEN 39:18 Nanso wakhuwenlyaka wiira kaakuveliye, uyo hokihiyera ikuwo eyo nutthawa.
GEN 39:19 Wewilyawe nkunya awe itthu yattonkaya amwaarawe yiiraka: Coo phikipankilyaya ipottha iyo. Ahorusiya.
GEN 39:20 Ahoruma wiira arweeliye Yusufu ni ahovonyeriya nkalaposo mwatthukeliyaya anantthukiya a amwene. Yusufu ahokhala nkalaposo,
GEN 39:21 nanso Mwaneene Nluku ari nuule, yahomweettiha nnema, mpaka wiiwanana ni nhooleli onkalaposo.
GEN 39:22 Phimaana nhooleli onkalaposo ahomvaha Yusufu iyuulupale ya anantthukiya, ni yooyo phakhulela citthu cothene cakhumelela nkalaposo mmo.
GEN 39:23 Nhooleli khaarina masukuli ni Yusufu, kontha Mwaneene Nluku ari ni Yusufu ni yahonvaha iparakha wo miteko cothene cavarawe.
GEN 40:1 Unavinre ukati vakani, hutumu ni mayamikatthe o wamwene o Wiciipitu, yahonkosera nkunya aya, mwene o Wiciipitu.
GEN 40:2 Farawoo ahorusiya na ahooleli awe ale, nhooleli o mahutumu ni nhooleli o mayamikatthe,
GEN 40:3 ni aholamula utthukelaciya uwannyawe nhooleli o mayoorontta, nkalaposo mwaryawe Yusufu.
GEN 40:4 Nhooleli o mayorontta ahiile anantthukiya mmatatani mwa Yusufu ni eera aawehawehaka, ni yahokhala ukati vakani nkalaposo.
GEN 40:5 Vano yaholohaca hutumu ni mayamikatthe a mwene o Wiciipitu, yatthukeliye nkalaposo. Khula ntthu aholoha nttora nawe, oyeeli uhiyu mmoca yooyo ni khula nttora wahaana mataphuleleliyo aya.
GEN 40:6 Yusufu warwawe waweha wicisu, ahoona wiira yanacukulaca.
GEN 40:7 Phimaana ahaakoha akhuulupale a Farawoo, ni ale yaatthukiye wawaanyawe nkunya aya, eeraka: Nlattuni nyu ilelo nkhalaka oohitta?
GEN 40:8 Ale yahaakhulaca yiiraka: Nihaana nttora ehu ni khaawo oonitaphulela. Yusufu aheerelaca: Utaphulela nwo khunakhala wa Nluku? Nkihimerye mittora nnyo.
GEN 40:9 Vano hutumu ahonttonkela Yusufu nttora awe uyo: Munttorani mwaka kihoona mwiri unari vakhiviru ni mi,
GEN 40:10 ni mwiri uyo wahaana miritta miraru. Ni uyo wahophuwa, mpaka ukhalana ithutu ni wiima ni uttokottha mavareene.
GEN 40:11 Ikoomisi ya Farawoo yaari mmatatani mwaka. Kahokusa cowiima nnye ni waamela nkoomisini mwa Farawoo nuumvaha mmatatani mwawe.
GEN 40:12 Yusufu ahomwiirela: Mataphuleleliyo aya pha ala: Miritta miraru nnyo phi mahuku mararu.
GEN 40:13 Nhina wo mahuku mararu, Farawoo nowoowusa muru aa, ni nowowuutaphula ni wuuhokolosera nteko aa ni we ummomvaha ikoomisi mmatatani mwawe toko caalemalenlyaa umpanka waarya hutumu awe.
GEN 40:14 Ukiviriyane cothene caweettelaka ratta ukuupuweleleke mi, wakihimye wooreera wa Farawoo nwo, wiira kikhume nkalaposo mu.
GEN 40:15 Maana kiwiihiye utthuna nuuhitthuna, ukhuma ilapo yo maheperewu, ni ciicammo, uno khiiwo ipankilyaka yooreerela utthukeliya nkalapooso mu.
GEN 40:16 Weewilyawe muulupale omayamikatthe mataphuleleliyo omaana ale, ahomwiirela Yusufu: Ni mi ciicammo kihaana nttora aka: Wamuru waka cahaawo itthuttu tthaaru co mikatthe cootteela.
GEN 40:17 Itthuttu yooculu iyo cahaawo mikatthe co khula nnanna ni cooviyola cikina caancivela Farawoo, nanso asaanuni yaanaawa ulya ntthuttuni yarinaaka wamuru iyo.
GEN 40:18 Ni Yusufu aheera: Ala phi mataphuleleliyo aya: Itthuttu tthaaru nnyo, phi mahuku mararu.
GEN 40:19 Nhina wo mahuku mararu, Farawoo nowowutthukacera ni wuuthomya mmwirini, ni asaanuni ammoolya irutthu aa.
GEN 40:20 Waphilyaya nihuku noneeraru, naari nihuku napiiherawe Farawoo myakha ceyarelo ni ahaalattula mayoonlaka othene ni waavaha yoolya. Wamiithoni waya atthu ale ahaawusaca myuru nhooleli o mahutumu ni nhooleli o mayamikatthe.
GEN 40:21 Ahonhokolosera nteko awe hutumu, mpaka wakhanlyawe tho yoole mayonvaha ikoomisi Farawoo.
GEN 40:22 Nanso, ahoruma wiiviya wootthukaceriya nhooleli o mayamikatthe toko Yusufu caahimenryawe muutaphulelani nttora.
GEN 40:23 Paahi, nhooleli o mahutumu ule khamuupuwenle tho Yusufu, mpaka ahonliyala.
GEN 41:1 Wumaleloni wo myakha miili, Farawoo ahaana nttora awe. Ule anoweemela nceresere mooloko Niilu.
GEN 41:2 Vano cahokhumaca mmoolokoni mmo imope saapa cooreera ni cooneneva, caalya nceresere mooloko.
GEN 41:3 Wahoolo cahokhuma mmoolokoni mmo imope tho saapa, coonanaraca ni cowoottaca, carweele utakaneela ni cikhunanaya nnye nceresere mooloko.
GEN 41:4 Vano imope coonanaraca nnyo ni cowoottaca nnyo cahokhura imope cooreeraca nnyo ni cooneneva nnyo. Vano Farawoo ahonwa.
GEN 41:5 Ahohokoleela tho urupa ni aholoha tho nttora nikina. Miphapa saapa, cuulupale ni comaana, coocara ni cooreera, cahothapuruwa ntathi mmoca.
GEN 41:6 Vano cahophuwela tho miphapa cikina saapa, cooyeevaca ni coowuuma mu ncasini mmo, caapahiye ni iphyoo yaakhuma wuuthakoni.
GEN 41:7 Miphapa cooyeevaca nnyo cahomirya miphapa saapa coocara ni comaana nnyo. Vano Farawoo ahonwa, ni ahoona wiira aari nttora.
GEN 41:8 Wicisuru, cinancanre cowuupuwela coonkukuryeeha, ahoruma wiihanaciya mayaahako ni mayoocuwelaca o Wiciipitu ni ahaattonkela mittora nnyo, nanso khaawo oonrye utaphulela.
GEN 41:9 Vano nhooleli o mahutumu ahomwiirela Farawoo: Ilelo phinoopuwelaka caaliyanlyaka.
GEN 41:10 Ikwaha imoca Farawoo wahorusiya na arumeyi aa eeli ni waholamula otthukiya mi ni nhooleli omayamikatthe owannyawe nhooleli omayoorontta.
GEN 41:11 Uhiyu mmoca, khula ntthu wa hi, aholoha nttora ni khula nttora wahaana mataphuleleliyo aya.
GEN 41:12 Wahoreera! Ahaawo ni hi mommo mmirawo mmoca Nheperewu, karumeya a nhooleli omayoorontta. Nahonttonkela cennye mittora cihu nnye ni ule ahotaphulela, anihimeryaka wo khula ntthu manaaya nttora awe.
GEN 41:13 Ni cothene cahokhumelela toko canihimenryawe. Mi kihoturuseliya nteko aka ni nkina uyo heeviya wootthukeleliya.
GEN 41:14 Farawoo ahoruma wiihaninya Yusufu eeraka: Awiihiye wowakuvyaa akhumihiyaka ukalapooso. Nametthileene irori nuuwara ikuwo cikina aheethoonyera wa Farawoo.
GEN 41:15 Farawoo ahomwiirela Yusufu: Kahaana nttora nimoca ni khaawo noorya utaphulela. Nanso kiheewa wiira we, weewaka nttora unawoorya utaphulela.
GEN 41:16 Yusufu ahomwaakhula: Iyo khinkhuma ni mi, nanso Nluku nawuvahani nyu ntaphulelo no nnema.
GEN 41:17 Vano Farawoo ahonttonkela nttora ule Yusufu: Kiholoha kineemenle nceresere mooloko Niilu.
GEN 41:18 Cahokhuma mmoolokoni mmo imope saapa cooreera ni cooneneva, caalya ni mooloko uyo.
GEN 41:19 Wahoolo cahokhuma cikina tho saapa coonanara ni cowootta. Akinoona imope coonanara mwiilaponi mothene.
GEN 41:20 Imope coonanara ni cowootta nnyo cahokhura imope saapa cooneneva nnyo cakhumelenle woopacera nnyo.
GEN 41:21 Hata cinakhuunreene, khacacuwannyaa wiira ciholya canvira cikhalaka yooyo nkhalelo uyo. Vano kahonwa.
GEN 41:22 Wahoolo kaholoha tho nttora nkina. Kahoona miphapa saapa, coocara ni cooreera, cathapuruwa ntathi mmoca.
GEN 41:23 Vano cahophuwela tho saapa coonyaala ni cooyevaca, cowumihinya ni iphyoo yooviha yakhuma muuthakoni.
GEN 41:24 Miphapa cooyevaca nnyo cahomirya miphapa saapa comaana nnyo. Kihaattonkela iyo acuweli, nanso khaawo oonrye utaphulela.
GEN 41:25 Farawoo, mwarina nttora mmoca, eera phi Yusufu. Nluku hoohimeryani Farawoo, itthu imphavelawe upanka.
GEN 41:26 Imope saapa cooreera nnyo, ciri myakha saapa ni miphapa saapa comaana nnyo, ciicammo ciri myakha saapa, va uri nttora mmocaru.
GEN 41:27 Imope saapa cowootta ni coonanara nnyo cakhumelenle uttuli waya cikina nnyo, ni miphapa saapa cohicara ni coomihiye ni iphyoo yooviha yakhuma muthakoni, ciri myakha saapa. Cinhala ukhala myakha saapa cotala.
GEN 41:28 Phi ciicammo toko cuuhimenryaka Farawoo, Nluku hoothoonyera itthu inhalawe upanka.
GEN 41:29 Myaakha saapa cooruweriya cihanle vakani uwa ilapo yo Wiciipitu.
GEN 41:30 Wahoolo cimmowa myakha saapa cotala. Vano ukati wothene wooruweriya ummooliyaliya, kontha itala eyo immohasara ilapo yothene.
GEN 41:31 Itala inhala uwa immokhala yootepa, woovikana ukati waruweriye khunhala wuupuweleliya tho mwiilaponi.
GEN 41:32 Nttora uhowela imaara piili Farawoo, kontha itthu ila iholakeliya ni Nluku ni immwa yakuvyaka.
GEN 41:33 We Farawoo umphavele nlopwana oocuwelaca ni unhele ulamulela ilapo yo Wiciipitu.
GEN 41:34 Farawoo waahele atthu oowehaweha, anhala utotokaniha mphantte woneethanu wo coolya co Wiciipitu nhina wo myakha saapa cooruweriya nnyo.
GEN 41:35 Ayo anlamuliya utotokaniha yoolya yootosa inhalaya wooryaniha ukati wooruweriya uyo, nuusunka itiriku, ni we Farawoo unlamuliya uwehawehaka ni usunkiha mmakhupini ummasittatti.
GEN 41:36 Yeeyo yoolya iyo inhala usunkiya eyo, phinhala ulaminya myakha cotala cinhala uwa mWiciipitu mu, wiira ilapo ihihasaryee ni itala.
GEN 41:37 Ala moopuwelo ala yahoncivela Farawoo na anamiruku awe othene.
GEN 41:38 Phimaana Farawoo ahaakoha: Nanso ninaahala umphwanya ntthu toko ula ookhalana Nnepa wa Nluku?
GEN 41:39 Farawoo ahomwiirela Yusufu: Toko ciinryawe wowuthonyera Nluku citthu nnya cothene, khaawo ntthu annkhili nuucuwelaca toko we.
GEN 41:40 We thi we unhala ulamulela inupa aka, ni uneethi aka wothene unhala wiiwelela nlamulo naa, nanso wahiceni, thi mi muulupale wowuupwaha we.
GEN 41:41 Ni Farawoo ahopwaherera: Kinawuuvaha nenna vaa ulamulela ilapo yo Wiciipitu yothene.
GEN 41:42 Wahoolo, Farawoo ahonrula nnikokhoni nneela antthittelawe nuummwariha Yusufu nnikokhoni mwawe. Aholamula uwarihiya ihaancu yoovevyaala, ni ahommwariha nkuhu wowooru nsiko.
GEN 41:43 Ni ahommweliha ikaaro awe yonayeeli yo omwene ni uhoolo wawe yahaawo anamakhuwela yeera: Nhule iphiro. Yusufu heesiya ulamulela ilapo yothene yo Wiciipitu.
GEN 41:44 Farawoo ahomwiirela tho Yusufu: Mi Farawoo, nanso wohinuulumo naa, khaawo nolamuliya upanka itthu phi itthu mWiciipitu mothene.
GEN 41:45 Farawoo ahommaha Yusufu ncina na Safenate-Paneya ni ahommaha nthiyana wiira akhale mwaarawe, Asenate, mwana a Potifera, nhooleli osataka yo Oni. Wahoolo Yusufu ahorwaa wonoona ilapo yothene yo Wiciipitu.
GEN 41:46 Yusufu aarina myakha talathini ceyarelo wapacenryawe unvarela nteko Farawoo, mwene o Wiciiputu. Uyo ahonhiya Farawoo ni ahorwaa woonoona ilapo yothene yo Wiciipitu.
GEN 41:47 Ukati wo myakha saapa cooruweriya, ilapo yothene yahaana yoolya yinci.
GEN 41:48 Yusufu ahototokaniha yoolya yalikeleliye usunkiya, yo myakha saapa cooruweriya Wiciipitu ni ahosunka mmakhupini ummaparasa khula iparasa ahototokaniha itiriku yo mmattani.
GEN 41:49 Commo, Yusufu ahosunka itiriku yinci, toko nhaava wompharyaa. Uyo ahohiya waalikela yoolya iyo kontha khaawo tho oorya uphima mwanlattu wowinciva.
GEN 41:50 Cihinaya uphiya myakha cotala, Asenate, mwana a Potifera, nhooleli osataka yo Oni, ahonnyarana Yusufu asaana eeli.
GEN 41:51 Oopacera uyo, Yusufu ahommaha ncina na Manasesi, eeraka: Nluku hokiliyaliha mahuviho aka othene ni inupa yothene ya apaapa.
GEN 41:52 Mwana onayeeli ahommaha ncina no Farayimi, eeraka: Nluku hokipanka ocayra ilapo yahuvaka.
GEN 41:53 Commo, cahophiya ummaleloni myakha cooruweriya Wiciipitu,
GEN 41:54 ni cahopacera myakha saapa cotala, toko Yusufu wahoolelihenryawe uhimya. Yahaawo itala ilapo cothene, nanso ilapo yo Wiciipitu yahaawo yoolya.
GEN 41:55 Wancenryaya uvola itala ilapo yothene yo Wiciipitu, uneethi wahanca unlepela Farawoo yoolya. Uyo ahaakhula atthu o Wiciipitu, eeraka: Nrwee wa Yusufu ni mpanke inhalaawe wuuhimeryani.
GEN 41:56 Wamwaryenlyaya itala ilapo cothene, Yusufu aholamula uhuliya makhupi ni ahopacera utumiha itiriku, aatumiheraka atthu o Wiciipitu, maana itala yahotepa.
GEN 41:57 Ni atthu ookhuma ilapo cothene, yammwa Wiciipitu wiira yathume itiriku wa Yusufu, kontha itala yaanvira itepaka ilapo cothene.
GEN 42:1 Yakopi Wacuwenlyawe wiira ihawo itiriku Wiciipitu, aheerela asaanawe: Isiyani umakelaka uwehanaca paahi?
GEN 42:2 Aheera tho: Kiheewa yiiriyaka ihaawo itiriku Wiciipitu. Nrwee wonwo mwanithumele itiriku wiira nipwaherere ukumi ni nihikhwe itala.
GEN 42:3 Toko coo, asunnawe khumi a Yusufu yahorwaaca Wiciipitu uthuma itiriku.
GEN 42:4 Yakopi khantthunihile Pencamii, nhimaawe Yusufu, wiira aatthukane ikwaha, kontha aanawoova unkhumelela itthu yoonanara.
GEN 42:5 Asaana a Isirayeli yaari na atthu akina yarwaca uthuma itiriku, nlattu wotala yavonnle uKanaa.
GEN 42:6 Yusufu aari nlamuli olapo yo Wiciipitu ni yooyo phaatumihera itiriku atthu othene. Phimaana uphiya waya asunnawe Yusufu yahomuramela mpaka uphiya vathi.
GEN 42:7 Woona wawe, Yusufu ahaacuwelela asunnawe, nanso aakhanle toko khaacuwenle ni ahoopopiha eeraka: Nyu nnokhumakhuma vayi? Yahaakhulaca: Ninkhuma ilapo yo Kanaa naawile uthuma yoolya.
GEN 42:8 Yusufu ahaacuwela asunnawe, nanso ayo khayancuwelacile.
GEN 42:9 Vano ahoopuwela ittora calohilyawe nari na asunnawe ni aheerela: Nyu nri mayoohottela! Mwawile uhottelaca ilapo ehu ila wiira ncuwele nipuro nookhwyaa.
GEN 42:10 Ale yahaakhulaca: Mena, nkunya. Asaanenyu yawile uthuma yoolya.
GEN 42:11 Hi othene, athumwanihu ari amoca. Asaanaa ari atthu omaana, khaanakhala oohottela.
GEN 42:12 Nanso Yusufu ahaakhanyereriha eeraka: Mena! Nyu mwile uhottela wiira moonenele nipuro nookhwyaa ilapo ehu ila.
GEN 42:13 Ni ale yaheeraca: Asaanaa yaari khumi neeli, othene athumwanaya ari amoca ilapo yo Kanaa. Itthyaako eyo ihanle uwaani na athumwanaya ni nkina uyo hokhwa.
GEN 42:14 Yusufu ahaakulela eeraka: Phi vaava kihimilyaaka va. Nyu nri mayoohottela.
GEN 42:15 Nyu nnaahala ulawihiya. Kinalupela mwancina na Farawoo, nyu mu khannokhuma, mwahimmwaneke uno mwanhimenyu eetthyako uyo.
GEN 42:16 Munrume mmoca anrweele mwanhimenyu uyo vano akina vaa nhotthukiya. Commo phinhaleehu ucuwela wiira cinhimyenyu nnyo ciri citthu ceekhweeli atthuna cowoothiya. Cahikhaleke ceekhweeli, kinalupela mwancina na Farawoo wiira wanaahala ucuwanyaa wiira nyu khweeli nri atthu oohottela!
GEN 42:17 Ni ahaatthukela nkalapooso mahuku mararu.
GEN 42:18 Nihuku noneeraru Yusufu aheerelaca: Mi kinamoova Nluku. Mwapheela woopwaa, mpanke coo:
GEN 42:19 Mwakhala wiira nyu atthu omaana, munhiye munniinyu mmoca nkalapooso mu. Vano akina vaa nturuwaceke nuukusaka itiriku wiira mwalye uwaani.
GEN 42:20 Nkiwiihere vaa nhimeenyu eetthyako uyo wiira acuwannyee moolumo enyu yakhala wiira eekhweeli ni nyu phinhaleenyu uhikhwa.
GEN 42:21 Ayo yahotthuna upanka yahiminye eyo ni yaheerelana: Khweeli va ninattarusiya mwanlattu weetthu impankileehu nhimeehu uyo. Naammoonaka caacukula awe, ni waanisonttelelawe vaa, wiira ninhiye nkumi, nanso khanaantthunenle. Phimaana uniphwanyaka uno utapana uno.
GEN 42:22 Ruupeni ahaakhula: Akoohimenryeni wiira nhinhuvihe mmirawo uyo, nanso nyu khamwatthunne ukiiwa! Vano ninlamuliya waakhulela iphome awe eyo.
GEN 42:23 Nanso ale khayaacuwela wiira Yusufu naweewa, kontha oolumana ni ntthu aataphulela ni nuulumo naya.
GEN 42:24 Vaavale Yusufu ahothama ni wunla. Vano ahohokoleela tho ni ahoolumaca wiira atthukiye Simeyoni, othene amoonacaka.
GEN 42:25 Wahoolo Yusufu aholamula wiira icarihiye itiriku mmirupani mwaya mmo ni ituruseliye ipheeta yo khula ntthu munrupani mwawe, ni avahiye iphika coovira alyaaka. Ni commo wahopankiya.
GEN 42:26 Ale yahopakhira mirintti caya co tiriku mwa apuuru aya nuukhumaca.
GEN 42:27 Nipuro naamakilyaya nlattu wo wiileliya, mmoca uyo ahotthukula nrupa awe wiira ankumihe nankanka oonliha puuru awe, ni ahoona ipheeta umalakuni wonrupa awe.
GEN 42:28 Ni aheerela asunnawe: Kihoturuseliya ipheeta aka eyo. Ila mu munrupani mwaka mu. Yoovaka wanrimani waya ni attettemelaka yaheerelana: Isiyani ila Nluku inipankilyawe ela?
GEN 42:29 Waaphilyaya wathumwanaya, ilapo yo Kanaa, yahohimyaca cothene caakhumelenle, yiiraka:
GEN 42:30 Nlopwana mwaneene ilapo eyo honuulumacera ni honihela ukhala hi atthu oohottela.
GEN 42:31 Nanso hi nihonroromeliha wiira khanihiwena atthu oohottela niri atthu eekhweeli.
GEN 42:32 Niheera tho wiira naari asaana khuumi neeli athumwanihu ari amoca ni mwana mmoca uyo hokhwa, ni eethyako uyo ri na athumwanihu uKanaa.
GEN 42:33 Vano nlopwana mwaneene ilapo eyo honiirela: Nrwee noone mwakhala atthu eekhweeli: Nhimeenyu mmoca nolamuliya uhala vaava ni mi. Akina ayo aturuweke ni akuseke yoolya yalyeke uwaani na akhwaya.
GEN 42:34 Nanso mwakiwiihere nhimenyu eetthyako uyo phinhalaaka ukupali mi wiira nyu atthu omaana ni khannakhala mayoohottela. Vano phinhalaka wuhokoloserani munninyu uyo ni wutthuniherani upanka marontta ila ilapo ela.
GEN 42:35 Weetthiyaaya mirintti nnyo, wo khula nrintti wahophwanyinya nhukho woocara ipheeta. Yakopi na asaanawe woonnyaya mihukho nnye, yahoovaca.
GEN 42:36 Ni Yakopi aheerelaca: Nyu nnakimalihera asaanaka ayo! Kihanle wohi Yusufu, nnavaa kiri wohi Simeyoni, ninlelo nna nnopheela unkusa Pencamii? Cothene cinkikhuma mi!
GEN 42:37 Vano Rupeni aheerela athumwane: Kahinturuwaneke Pencamii uyo, mweevakace asaanaka oyeeli khaweetthu. Nkihiyere Pencamii uyo, thi mi kinhala unwacawaca.
GEN 42:38 Nanso athumwane yahaakhula: Mwanaka uyo khannonkusa. Munnawe hokhwa. Uyo nna phihanle. Itthu phi itthu yoonanara inhala unkhumelela eyo munkwahani mmo, vano phinhalenyu uvitha ipwi caka nnyo mmahiye kinari ni icuku.
GEN 43:1 Itala yaanatepa mwiilaponi mmo.
GEN 43:2 Vano wamanlyaya itiriku yothene yawiihilyaya asaana a Yakopi akhumanaka Wiciipitu, athumwanaya yaheerelaca: Nhokoleelace ni mwathume tho yoolya.
GEN 43:3 Nanso Yutta aheerela: Nlopwana uyo ahonileehera venci eeraka: Nhihokoleelace waryaaka wohimmwiiha nhimenyu uyo.
GEN 43:4 Mwanivahaka nhimehu uyo ninrwaanaka, ninaarwa, ninkoothuma ni wuthumelani yoolya.
GEN 43:5 Nanso mwahinivaheke ninrwanaka, khaninrwaa, kontha nlopwana uyo hoolumacile coo: Nhihokoleelace waryaka kahiki mwammwiihaka nhimenyu uyo.
GEN 43:6 Isirayeli ahokoha: Nkipankenleni yoonanara toko ila, munhimeryaka nlopwana uyo wiira nhaanaca nhimenyu nkina?
GEN 43:7 Ni ale yahomwaakhulaca: Uyo honikohakoha hi na amucihu. Ni honikoha tho eeraka: Athumwaninyu nanlelo ahaawo akumi? Nyu nhaana nhimenyu nkina? Hi nimwaakhunle paahi itthu yanikohawe. Nahala ucuwela cani wiira nohala uniirela mummwiihe nhimenyu.
GEN 43:8 Vano Yutta ahomwiirela Isirayeli athumwane: Munhiye mmirawo uyo kinrwaane, ninarwaca, wiira nyu ni hi na asaanehu nikhale akumi ni nihikhwe.
GEN 43:9 Ni kinawiilupelela veekhaka unvarelela uyo. Nkiheleke mi ukhala mayonvarelela mwana uyo. Kahinturuwaneke mpaka wuthonyerani wamiithoni winyu, phi mi cinhala ukikhalela ikhirini nnyo wamiithoni winyu ukati wothene.
GEN 43:10 Toko cinoonenyu, yiiriyaka khanapicile cono ninarwele ni ninaturuwile imaara piili.
GEN 43:11 Vano Isirayeli, athumwane Yutta, yahomwiirela: Wakhala wiira phinhalaya wiirannyaa, haya wakhale ciicammo. Nhele munrupani mwinyu mmo coolya comaana co mwiilaponi mwihu mu ni munkusere yooyo nlopwana uyo; makhura onrette vakani, urawo vakani, citthu coonukhela cikina ni miira, cowiima ni amentowa:
GEN 43:12 Nkuse ipheeta yoopitaanihinya, imaara piili piili ni nhokolose ipheeta yaheliye munrupani mwinyu waturuwenyu wa malakuni wo nrupa enyu. Kahiki itthu iyo ikhumelenle nlattu woovonyanihinya.
GEN 43:13 Munkuseke nhimenyu uyo ni nhokoleele wa nlopwana uyo.
GEN 43:14 Nluku Okuru-Cothene awooneleni ikiriri iriyari ya nlopwana uyo wiira ootthunihereni onturuwana nhimeenyu Pencamii ni nhimeenyu nkina uyo. Mi, kakhalaka woohasaana, kinakhalaka.
GEN 43:15 Vano asilopwana ale yahorwaa ni yahokhuruwela Wiciipitu anakusileene coovaha, ipheeta yoopitaanihinya piili piili ni Pencamii, ni yahorwaa wa Yusufu.
GEN 43:16 Yusufu, wamoonnyawe Pencamii na asunnawe, ahomwiirela nhooleli owapuwani wawe: Waakuse alopwana ala owaanyaka, wamwiive mwanama ni onlokihace, kontha ayo yoolya yoothana anhala ulya ni mi.
GEN 43:17 Ni ule ahopanka yahimeriyawe ni ahaakusaca mpaka inupa ya Yusufu.
GEN 43:18 Ayo yahoovaca wakusiyaya arwaaninyaka owaanyawe Yusufu ni yahoopuwela yiiraka: Niwiiheriye va nlattu wopheeta ihokoloseriye munrinttini mwihu ikwaha yoopacera: Uyo nophavela onittarusa, onihuviha, onipanka ipottha nuukusa inama cihu nnyo.
GEN 43:19 Phimaana, yahorwaa wa nhooleli onupa ya Yusufu ni yahomwiirela wakelaya wankhora.
GEN 43:20 Uviriyane, yoowe nkunya! Ikwaha yoopacera yawilehu va khweeli nawile othuma yoolya.
GEN 43:21 Nanso nipuro neemenlehu wiira nimake, nahotthukula mirintti cihu ni utthukula woono khula ntthu wakhalacenrehu ahophwanya ipheeta yawiihilyawe uwaani yoolikaneene. Phimaana nihohokolosa,
GEN 43:22 nuwiiha ipheeta ikina wiira nithume yoolya. Khanincuwenle ntthu nihelenle ipheeta mmirinttini mwihu mmo.
GEN 43:23 Vano nhooleli ule aheera: Nkhalane nnema. Nluku inyu, phi Nluku a athumwaninyu, phuvahileni nhakhu munrinttini mwinyu mmo, kontha ipheeta enyu kahaakhela. Vano ahontthukula Simiyoni nunrweha waryaya asunnawe.
GEN 43:24 Wahoolo, ahaarwana inupa ya Yusufu, ni ahaavaha maasi, uwiwululacera inyaa ni inama caya nnyo ahovaha yoolya.
GEN 43:25 Vano ayo yahototokaniha coovaha caya cahalaya unvaha Yusufu uthana, kontha yahocuwela wiira phahalaya unlyana.
GEN 43:26 Waphilyawe Yusufu yahonvaha cammwiihenryaya ni yahonlapela yooromaka mpaka vathi.
GEN 43:27 Vano uyo ahaakohaca isalaama ni aheerela tho: Ari eehalini athumwaninyu, nlopwana oowuluvala kihimenryenyu uyo? Nanlelo haawo nkumi?
GEN 43:28 Ayo yahaakhulaca: Nrumeyaa, athumwanihu, nanlelo akumi, ahaawo salaama, ni othene yahonlapela.
GEN 43:29 Awehaka nceresere ni amoonaka nhimaawe Pencamii, mwana aanumwane, Yusufu ahokoha: Ula phi yooyo nhimenyu etthyako kihimenryenyu uyo? Ni ahopwaherera tho eeraka: Nluku oovahe nnema, mwanaka,
GEN 43:30 nlattu wootteeliya woomoona nhimaawe, Yusufu ahokhuma akuvyacaka wiira aphavele nipuro nowunla, ni akelaka mpaani, ahoonla.
GEN 43:31 Wakhucilyawe, ahokhuma ni eewehawehaka, aheera: Aliyeke yoolya eyo.
GEN 43:32 Ahomeeliya yoolya veekhawe Yusufu, woohatakanelana asunnawe ale, ni annaciipitu yalyanawe na ayo yahomeeliya veekha, kontha annaciipitu khayaalamuliya walyana annaperewu. Uyo waari mwiikho aya.
GEN 43:33 Asunnawe yaheesiya wameca, attharanihiyaka mookomelo ayo, maciso eeyareelo, ukhuma omuulupale mpaka omwankani ni yammwehanaca atikhinacaka.
GEN 43:34 Vano yahomeeliya yoolya ya Yusufu wa meeca. Ni mencivelo o yoolya ya Pencamii yari yoopwaha imaara thanu menciviheriyo o yoolya ya asunnawe, ni yahoolyaca venci nuuwurya catthunaya.
GEN 44:1 Yusufu ahonvaha nhooleli owapuwani wawe, nna nlamulo nna: Ncarihe mmirinttini mwaya ala atthu ala yoolya yo khula nkwaratati mpaka cinhalaya woorya ukusa ni nhele ipheeta iwannyawe khula ntthu omalakuni womirinttini cawe.
GEN 44:2 Wahoolo nhele ikoomisi aka, yopheeta, munrinttini mwa mwana eetthyako uyo, ni wamoca ni ipheeta inthumenlyawe tiriku. Ni uyo ahopanka cothene toko cahimeriyawe ni Yusufu.
GEN 44:3 Wasilyaya, yaholehaca atthu ale ni inama caya.
GEN 44:4 Yaari ahinayaca upwaha iparasa eyo, phu ukati Yusufu wamwiirenlyawe nhooleli owapuwani wawe: Wunwe ni watthimakele atthu ale ni waaphwanyaka weerele: Nnakakhaniherani itthu yooreera ni yoonanara.
GEN 44:5 Khinakhala ila ikoomisi immureryawe nkunya aka ni immwaserera awe ihako? Nyu nhopanka yoonanara.
GEN 44:6 Waaphwanyilyawe ahaakuleliha ala moolumo ala.
GEN 44:7 Nanso ayo yahomwiirelaca: Nlattuni nkunya wuulumacaka commo? Uttayi ni yeeyo itthu iyo mpankaca arumeyaa.
GEN 44:8 Wooneke nsurukhu ula, uphwanyileehu umalakuni wo mirupa cihu, nihooturuselani nikhumaka ilapo yo uKanaa, naahala winnyacerani inupa ya nkunyaa ipheeta ni iwooru.
GEN 44:9 Akhalaka wiira mmoca wa arumeyi aa naphwanyaninya, eeviye, ni hi akina va ninakhala ipottha ca nkunya ehu.
GEN 44:10 Uyo aheera: Kihokupali. Yooyo nohala uphwanyaninya uyo, phinhala ukhala ipottha aka, akina ayo anawoopwaa.
GEN 44:11 Khula ntthu ahokurusa mirintti cawe wowakuvyaa ni wanca utaphula.
GEN 44:12 Nhooleli uyo ahanca uphavelaca wo khula nrintti, apaceraka wa muulupale mpaka umalihera wa mwana eethyako uyo. Ni ikoomisi iyo yahophwanyinya munnrinttini wa Pencamii.
GEN 44:13 Wakhumelenlyaya commo, ayo yahaahulaca coowara caya. Wahoolo, othene yahopakhiraca mirintti caya nuuturuwela arwaaka uparasa.
GEN 44:14 Yutta na asunnawe waphiyacilyaya inupa ya Yusufu, ni ule ari wonwo. Vano ale yahoromaca wamiithoni waawe ula, mpaka uphiya vathi.
GEN 44:15 Yusufu ahaakohaca: Ikipankacilenyu iyo isiyani? Nyu khannocuwelaca wiira ntthu toko mi kinawoorya uwasera ihako?
GEN 44:16 Vano Yutta aheera: Ninhala uwaakhulani nkunya? Ninhala uhimyani? Ninhala upanka cani mwaavi wiira niphwanye isariya? Nluku hokumihera wonene unyali ihu. Nkunya hi nna va ipottha caa. Wamoca ni uyo phwanyaninye ikoomisi iyo.
GEN 44:17 Vano aheera Yusufu: Akimpanka mi commo. Yooyo ntthu mphwanyaninye ikoomisi iyo phinhala ukhala ipottha aka. Wiireke nyu akina vaa, nturuweleke ni nnema waathumwaninyu.
GEN 44:18 Vano Yutta ahonciserera yoole, ni aheera: Sontte nkunya ukihiye, kinawulepela, kihaana nuulumo noophela wuulumaca wamiithoni waa, nkunnya aka, ni nhikiviruwele, kontha nyu nri toko Farawoo.
GEN 44:19 Nkunya aka uhaakoha arumeyi aa wiiraka: Nhaanaca athumwaninyu atthuna nhimenyu?
GEN 44:20 Hi nihoohimyacera nkunya niiraka: Nihaana athumwanihu owuuluvala ni mmirawo mmoca nnyanryaya anooluvanle, nhimehu. Ahaawo munnaawe yooyo ooyaraninya nrukulu nimoca hookhwa. Anumwane ayo anhalanne yooyo, ni athumwane ananfenta venci.
GEN 44:21 Vano we nkunya uhonireela: Nkiwiihere komoone mmiithoni mwaka.
GEN 44:22 Ni hi nihowiirela: Nkunya, mmirawo uyo khanhala waahiya athumwane, kontha arimelaru uyo apapeehu anaakhwa.
GEN 44:23 Vano nyu nheerela karumeya enyu: Mwahinmwanaceke mwanhimenyu uyo, khannohala woonaca ikhove aka.
GEN 44:24 Weeraka coo: Hi karumeya aa, nihorwaa waathumwanihu nihattonkela moolumo yoolumacilyaa nkunya.
GEN 44:25 Athumwanihu wanirenlyaya tho wiira nturuwele mwathume yoolya.
GEN 44:26 Hi niheerela: Khanintthuna urwaa nwo veekhehu. Ninhala uturuwela tho nwo mwanhimehu eetthyako uyo nanrwaanaka, kontha khaninkela namoonaka nkunya uyo ikhove awe mwanhimehu ahirweke ni hi.
GEN 44:27 Vano honirela karumeya aa, athumwanihu, coo: Nyu nhocuwelaca wiira amwaaraka yayanre asaana eeli.
GEN 44:28 Mmoco uyo heetta ni mi kiinre, khweeli yooyo hokhuriya, ni akimmoona tho mpaka nna.
GEN 44:29 Vano mwankusaka ula waamiithoni waka, ni imwiirannyaka itthu phi itthu iyo, nnaahala uvitha irutthu aka mmahiye ni icuku.
GEN 44:30 Nna va mi karwaka waathumwanihu, karumeya aa, woohinrwana mmirawo uyo, athumwanihu cinryaaya wonvarecesa.
GEN 44:31 Anaahala ukhwa ucukula yakela yanoonaka uturuwa veekha wohi mmirawo ula. Ni hi ninaahala wavitha apaapehu ayo ni masukuli.
GEN 44:32 Phimaana mi kiceemesaka wamiithoni waa unsunka mmirawo uyo ni kiheerela: Aahituruwele tho uno ikikhalele mi ikhirini iyo mahuku othene.
GEN 44:33 Vano nna mi kikhale ipottha ya nkunya aka nipuro nahalawe ukhala mmirawo uyo. Vano uyo arweeke uwaani na asunnawe ayo.
GEN 44:34 Kinkohimya isiyani mi karwaka waathumwane wohinkusa mmirawo uyo? Akintthuna woona mi yoonanara inhala wakhuma apaapa ayo.
GEN 45:1 Yooyo ukati uyo Yusufu anawoolwana wiivithavitha nwo wamiithoni wa atthu othene, phimaana ahokhuwa eeraka: Mwakumihe ananrumeya ayo othene va. Co khaawo ahanle nenno nipuro nno, ukati ule Yusufu weecuwanehilyawe na asunnawe.
GEN 45:2 Vaavale ule ahanca wunla venci mpaka Annaciipitu wiiwa ni ihapari iyo yahophiya waFarawoo.
GEN 45:3 Vano aheerela Yusufu asunnawe ale: Mi Yusufu. Apaapa nannelo ahaawo akumi? Nanso asunnawe ale yahosankaca venci, mpaka woolwana umwaakhula.
GEN 45:4 Ni aheerelaca Yusufu asunnawe ale: Nciserace woono. Umwattameryaca waya, aheerelaca: Mi nhimeenyu Yusufu, yoole nyu munthumihileenyu arwaninyaka Wiciipitu.
GEN 45:5 Vano va nhicukulace ni nhiiriyelele mwanlattu nyu wookithumiha kiwaaninyaka uno, kontha Nluku aacenre wiira woopwe ukumi watthu enci, phimaana akiholihaka uno.
GEN 45:6 Nna nhina woomyakha miili niri nhina ntalani ilapo yothene, ni cinaahala myakha mithanu khacinhala waaliya ni hata wuruliya.
GEN 45:7 Nanso Nluku hokihooliha uno wiira kikhale ipyo yoomuci mwiilaponi mu ni kiwoopoleni ni wuukhikicerani venci.
GEN 45:8 Khannakhala thi nyu nkiwanne uno, nanso Nluku, ni hokipanka ukhala namanantthu a Farawoo ni nlamuli o uhano ni nlamuli o Wiciipitu wothene.
GEN 45:9 Nturuwele wowakuvyaa waapaapa ni mwaahimerye: Nohimya co mwaninyu Yusufu: Nluku mi hokipanka mwaneene ilapo yothene yo Wiciipitu. Mmwe woono, woohipica.
GEN 45:10 Nyu nnowokhala nttetthe wo Koseni, vakhiviru ni mi. Ukhuma nyu, asaanenyu ayo, ucuulu inyu uyo, ikhontwaa cinyu nnyo, imope cinyu nnyo ni ikaruma cinyu nnyo cothene mmwane.
GEN 45:11 Mi kinnowulihani kontha cinaahala tho va myakha mithano cotala. Mwahitthuneke nyu na amucinyu othene ni mihuwo cinyu cothene nnahala uhuva.
GEN 45:12 Cothene nnawoona ni miitho enyu, ni nhimaka Pencamii phi saahiti. Nawoona wiira khweeli thi mi kinoolumaca nnya citthu nnya.
GEN 45:13 Mwahimerye apaapa waneerihiyaka woolemelihiya mi Wiciipitu ni citthu cothene cinoonenyu. Ni mwaawihe apaapa woono wowaakuvyaa.
GEN 45:14 Vano ule ahonkapatta Pencamii nhimaawe oonlaka uno, ni Pencamii ciicammo ahonvara mmakhatani mmo ni uyo oonlaka uno.
GEN 45:15 Wahoolo ahaavaha alaahuma asunnawe ni othene yahoonlaca. Waculuru asunnawe ayo phoonryaya umuulumana.
GEN 45:16 Vano weewiiyaya uhano wiira asunnawe Yusufu ahowaca, Farawoo ni mahumu awe othene yahotteeliya.
GEN 45:17 Vano Farawoo ahomwiirela Yusufu: Waahimerye asunnaayo yapakhirihe mirintti nnyo asinama ayo, aturuwele ilapo yo Kanaa.
GEN 45:18 Ni yaturuwele woono, yaawihe athumwana na alokwaa othene. Mi kinnowavaha itthaya yomaana mWiciipitu mu ni nyu nnaahala ulawa nhakhu weelapo ila.
GEN 45:19 Waarume yakuse ampakhira o Wiciipitu wiira yaawiihe asaaraya, asaanaya na athumwaninyu.
GEN 45:20 Cihukukureheni citthu cinyu, kontha mapuro ooreera o Wiciipitu anhala ukhala awinyu.
GEN 45:21 Commo yahopanka asaana a Isirayeli. Yusufu ahaavaha asunnawe ampakhira ni iphika toko Farawoo calamunlyawe.
GEN 45:22 Wo khula ntthu ahonvaha nrintti wokuwo conaanano, nanso ni Pencamii ahomvaha makoopiri opheeta iminya ttharu ni mirintti mithanu cokuwo conaanano.
GEN 45:23 Athumwane ahaavelelihera inama coopakhira khumi, cinapakhinre citthu cootepa ooreera co Wiciipitu, ni inama khumi coopakhira cinakusile itiriku, mikatthe ni iphika cikina co munkwahani.
GEN 45:24 Wahoolo aholeehana na asunnawe, ni wakhumaya aheerelaca: Nhinyakulihane ni iphiro!
GEN 45:25 Yahohokolya Wiciipitu aturuwelaka wathumwanaya aneehaninya Yakoopi ilapo yo Kanaa,
GEN 45:26 ni yahottonkaca ihapari yiiraka: Yusufu ninlelo haawo nkumi! Khweeli yooyo phi nlamuli olapo yothene yo Wiciipitu. Vaavale nrima wa Yakopi wahomwattakyaa ni ahovittikhuwa. Ni khaalamuliya waakupali asaanawe ayo.
GEN 45:27 Nanso wahimeriyawe cothene calehenryawe Yusufu, ni Yakopi oonaka ampakhira yavelelihilyawe Yusufu wiira arweliye, nnepa awe wahokhala mmapuroni.
GEN 45:28 Isirayeli aheera: Paahi! Mwanaka Yusufu ninlelo haawo nkumi. Kinkomoona kihinakhwa.
GEN 46:1 Isirayeli ahokhuma ni citthu cothene carinawe. Uphiya wawe uPeresepa, ahovaha citthu anlapelaka Nluku a Isaki, athumwane.
GEN 46:2 Ni Nluku ahomuulumana Isirayeli uhiyu nnyoonini eeraka: Yakopi, Yakopi! Uyo ahaakhula eeraka: Kiri va.
GEN 46:3 Nluku aheera: Mi kiri Nluku, Nluku a athumwana. Uhoove urwaa Wiciipitu, kontha wonwo kinkowupanka nloko nuulupale.
GEN 46:4 Mi kinaahala urwaa Wiciipitu wamoca ni we, ni khweeli kinaahala wuuhokolosa. Ni ntata na Yusufu ninaahala uputthaputtha miitho aa.
GEN 46:5 Vaavale Yakopi ahokhuma uPeresepa. Asaana a Isirayeli yahaakusaca athumwanaya, asaanaya ni asaaraya mwampakhira yakumihilyawe Farawoo.
GEN 46:6 Ciicammo yakokusa inama caya ni mihakhu cothene caphwannyilyaya uKanaa. Commo Yakopi ahorwaa Wiciipitu ni ucuulu awe wothene.
GEN 46:7 Ahaakusa Wiciipitu asaanawe, ucuulu awe, asaanawe asithiyana na asiculawe asithiyana, manaaya wiira, nloko nawe nothene.
GEN 46:8 Ala phi macina a atthu o nloko na Yakopi yarwele Wiciipitu: Rupeni, ntthaara na Yakopi.
GEN 46:9 Ala phaari assana a Rupeni: Enoki, Palu, Esiroomi ni Karimu.
GEN 46:10 Ala pha asaana a Simeyoni: Yemuweli, Yamini, Owati, Yakimi, Sowari ni Sawulu, mwana a nthiyana nKanaa.
GEN 46:11 Ala phaari asaana a Levi: Kerisoni, Kowate ni Merari.
GEN 46:12 Ala phaari asaana a Yutta: Eri, Onani, Selaa, Peresi ni Seraa. Eri ni Onani yakhwile ilapo yo Kanaa. Ala phaari asaana a Peresi: Esiromi ni Hamuli.
GEN 46:13 Ala phaari asaana a Isakaari: Tolaa, Puwaa, Yaasupe ni Sinromi.
GEN 46:14 Ala phaari asaana a Sepuloni: Serete, Eloni ni Yaleeli.
GEN 46:15 Ala phaari asaana yayanryawe Leya ni Yakopi uPatani-Aramu, unhiya mwanawe Tina. Ucuulu awe wothene waari talathini na araru (33).
GEN 46:16 Ala phaari asaana a Kaate: Sefomi, Haaci, Suuni, Esipomi, Eri, Aroti ni Areli.
GEN 46:17 Ala phaari asaana a Aseri: Imina, Isivaa, Isivii ni Periyasi, ni mwanrokoraya Sera. Ala phaari asaana a Periya: Heperi ni Malekiyeli.
GEN 46:18 Ala pha asaana khuumi na siita yayanryawe Yakopi ni Siilipa, ipottha ya Lapanu, anvahaka mwanawe Leeya.
GEN 46:19 Ala phaari asaana a Rakeli, amwaara a Yakopi: Yusufu ni Pencamii.
GEN 46:20 Asenate, mwana a Potifera, nhooleli osataka yo Oni, ahommaha asaana eeli Yusufu Wiciipitu: Manasesi ni Farayimi.
GEN 46:21 Ala phaari asaana a Pencamii: Pelaa, Pekeri, Asipeli, Sera, Namani, Eyi, Rosi, Mupimi, Hupimi ni Aarite.
GEN 46:22 Ala phaari asaana a Rakeli ayanryawe ni Yakopi othene yaari khumi na cese.
GEN 46:23 Mwana a Tani aari Husimi.
GEN 46:24 Ala phaari asaana a Nafitali: Yaseeli, Kuni, Yeseri ni Silemi.
GEN 46:25 Ala phaari atthu saapa onrukulu na Piila, ipottha ya Lapanu aamahilyawe mwanawe Rakeli, ayanryawe ni Yakopi ahomwiihana Yakopi.
GEN 46:26 Othene yarwele Wiciipitu ni Yakopi, ucuulu awe wothene woohalikelela asaara asaanawe, yaari sitiini na siita atthwene.
GEN 46:27 Woncerera asaana eeli a Yusufu yayanryawe Wiciipitu, nloko na Yakopi naarwele Wiciipitu nahophiya Sapiini (70).
GEN 46:28 Vano, Yakopi ahonhooliha Yutta wa Yusufu, wiira acuwele maphiyero o Koseni. Uphiya waya nwo,
GEN 46:29 Yusufu, na ampakhira awe oolikana, ahorwaa uKoseni wiira aakumanane athumwane. Vano woona wawe, aheekamela ni waakapatta, vano nakapattilene, ahoonla ukati mwinci.
GEN 46:30 Isirayeli ahomwiirela Yusufu: Nna miva pooti ukhwa, kontha kihoona ikhove aa ni kihocuwela wiira ninlelo we uri nkumi.
GEN 46:31 Vano Yusufu aheerela asunnawe na amuci aya othene athumwane: Kinarwa unhimerya Farawoo wiira asunnaka na amuci aya apaapa yakhala uKanaa ahowa woono.
GEN 46:32 Kinkowiira, alopwana ayo ahakheli, anhakhela inama ni ahowana ikhontwaa caya, imope caya ni cothene ciri cawaya.
GEN 46:33 Farawoo awiihanakani ookohakani wiira: Nnovarani va?
GEN 46:34 Mmwaakhuleke coo: Arumeyi aa anhuwa inama ikhumelo ni nari acikani, toko capankaya amuci ihu okhalayi. Commo phinhalenyu utthuniheriya ukhala nttetthe wo Koseni, kontha ahakheli othene anathanyiya na annaciipitu.
GEN 47:1 Yusufu ahorwaa wa Farawoo unvaha ihapari eeraka: Apaapa na asunnaka ahowa. Ankhuma uKanaa ni ikhontwaa caya, imope caya ni mihakhu cothene cirinaya. Nna ari uKoseni.
GEN 47:2 Wahoolo ahaathanla asunnawe athanu ni ahonthoonyihera Farawoo.
GEN 47:3 Farawoo ahaakoha: Nnovara ntekoni? Ayo yahomwaakhulaca: Karumeya aa ari ahakheli onama toko amuci ihu okhalayi.
GEN 47:4 Yahomwiirelaca tho: Naawile ukhala mu ukati vakani kontha itala uKanaa nwo inaatepa, ni inama ca karumeya aa khacinoona yoolya. Sontte, watthunihere karumeya aa ukhala uKoseni.
GEN 47:5 Vano Farawoo ahomwiirela Yusufu: Athumwana na asunnaa yowenle we
GEN 47:6 ni ilapo yo Wiciipitu iri ni we. Upanke mananna ooreera, wiira athumwanaa na asunnaa akhale mapuro omaana. Waahiye akhale uKoseni. Woona wiira akina ayo ari atthu ankhili, waavahe nteko woohakhela inama caka.
GEN 47:7 Vano Yusufu ahaakusa athumwane mpaka wa Farawoo, ni Yakopi ahonreeriha Farawoo.
GEN 47:8 Farawoo ahonkoha Yakopi eeraka: Urina myakha mikavi?
GEN 47:9 Yakopi ahomwaakhula Farawoo eeraka: Myaaka caka co weettakaca ciri iminya wo talathini (130). Ciri vakani ni coorika, ni khacimphiya toko cakhalaya mayapaapa.
GEN 47:10 Vano Yakopi ahonreeriha Farawoo ni ahorwaa.
GEN 47:11 Yusufu aheesa ni waavaha athumwane ni asunnawe mapuro oocayira olapo yo Wiciipitu, nttetthe wo uRamacese, toko calamunlyawe Farawoo.
GEN 47:12 Ahaavaha yoolya yo watosa, ukhuma athumwane, asunnawe ni amucyawe othene mpaka asaana yarinawe khula ntthu.
GEN 47:13 Khayaariwo yoolya ilapo yothene kontha itala yanatepa, ukhuma Wiciipitu mpaka uKanaa wanaakhwiya nlattu wotala.
GEN 47:14 Yusufu ahototokaniha ncurukhu wothene waari Wiciipitu mpaka uKanaa wathumeliye itiriku ni ahorwana waFarawoo.
GEN 47:15 Waamanlyaya ncurukhu wothene Wiciipitu mpaka uKanaa, annaciipitu yahorwaa unlepela Yusufu yiiraka: Univahe yoolya! Uhinihiye nikhwaaka itala nlattu woomala ncurukhu ihu.
GEN 47:16 Yusufu aheerela, paahi mmwihe inama cinyu nnyo mwaakakhanihe ni itiriku, kamana ncurukhu inyu uyo uhomala.
GEN 47:17 Yusufu ahowiiheriya inama nnyo ni ule ahaavaha itiriku akakhanihaka ni ikhavalu, ikhontwaa, imope ni apuuru. Mwakha wothene ahaaliha annaciipitu yakakhanihaka yoolya ni inama.
GEN 47:18 Mwakha oyo wahovira ni wawilyaya mwakha nkina, yahoturuwela tho wa Yusufu yiiraka: Khaninoona tho mananna oowiipitha we kontha ncurukhu ihu uyo uhomala ni inama cihu nnyo cihokhala cawaa, khiiwo tho inihalenle uvaha cihikhanle irutthu cihu ni imatta cihu.
GEN 47:19 Uhinihiye nikhwaaka ni ukhwelakhwela imatta cihu wa miithoni waa, unithume hi ni uthume imatta cihu nnyo wakakhanihaka ni itiriku, vano hi ni imatta cihu nnyo, ninakhala ipottha ca Farawoo. Univahe yoolya wiira nikhale akumi, nihikhwe itala ni ciicammo imatta cihu cihihononyee.
GEN 47:20 Commo Yusufu ahothuma imatta cothene co Wiciipitu anthumelaka Farawoo. Annaciipitu yahothumiha imatta caya cothene kontha itala pheerihile commo. Phimaana ilapo yothene yahokhala ya Farawoo.
GEN 47:21 Ukhuma wariyari mpaka mmaceresere mothene molapo yo Wiciipitu, Yusufu ahaapanka ipottha atthu othene.
GEN 47:22 Cahanle coohithuminya caari paahi imatta ca ahooleli osataka kontha Farawoo aholamula uvahiya coolya, cennyo phaapisiha nrima phimaana ahithumihaka imatta caya.
GEN 47:23 Vano Yusufu aheerela atthu ale: Nviriyane. Ilelo kihoothumani nyu ni imatta cinyu nnyo, nna vaa nri a Farawoo, ipyo phi ila, nlimeke ni waala ittima nnyo.
GEN 47:24 Nanso nhaana munvahaka Farawoo mphantte woneethanu wo coolya cinhalenyu wuurula. Mphantte woneecese uyo unhala ukhala wawinyu wiira mpanke ipyo ni yoolya yawinyu ni ya asaana enyu ni atthu othene ankhala uwaannyu nwo.
GEN 47:25 Ale yahomwiirelaca: Nkunya, we uhoopola ukumi ihu kamana uhonipanka nnema ninakhala ipottha ca Farawoo.
GEN 47:26 Toko coo, itthaya yothene yo Wiciipitu, Yusufu ahokumiha nlamulo niriwo mpaka ilelo. Mphantte wonethanu wo coolya unkhala wa Farawoo, nanso imatta ca ahooleli osataka khacinkhala ca Farawoo.
GEN 47:27 Annasirayeli yahokhala Wiciipitu, ncoko wo uKoseni. Wonwo yahophwanya imatta cinci ni yahoyaranaca ni wuncereranyaa venci.
GEN 47:28 Yakopi ahokhala myakha khumi na saapa Wiciipitu ni myakha cookumi awe cari iminya wa arupayini na saapa (147).
GEN 47:29 Wonnyawe wiira uhaattamerya ukati wookhwa, Isirayeli ahomwiihana mwamwanawe ni ahomwiirela: Wakhala wiira unakifenta, ukivare mweetto ni ulupele wiira unaahala ukhala eekhweeli ni mi. Vano kinwiirela uhikivithe mWiciipitu mu.
GEN 47:30 Kakhwaka vale, uhikivithe mWiciipitu mu nanso ukirwaane mahiye avithiye mayapaapa uKanaa. Yusufu ahaakhula: Kinkopanka toko cinkilepelenyu.
GEN 47:31 Vano Isirayeli ahonkhanyereriha eeraka: Ulupele. Yusufu aholupela ni Isirayeli aheecatalela wankorini.
GEN 48:1 Unavinre ukati vakani, Yusufu ahohimerya wiira: Athumwanaa anawerennya ni ule ahorwaa waathotola, warwaawe vaa ahaakusa asaana awe eeli, Manasesi ni Farayimi.
GEN 48:2 Yakopi ahohimerya wiira: Mwamwanaa Yusufu howa wuuthotola. Isirayeli aheemananiha wunwa mpaka woorya wunkoma wankorini.
GEN 48:3 Ni ahomwiirela Yusufu: Nluku Okuru-Cothene hokiphwanya uPeteeli, ilapo yo uKanaa ni hokireeriha,
GEN 48:4 eeraka: Nloko naa nno ninahala uyaraca ni winciva ni mommo, cinkokhumelela ilapo cinci ca atthu ni kinkowuvahani ilapo ela ukhala yawinyu ukati wothene.
GEN 48:5 Vano, asaanaa eeli, Farayimi ni Manasesi waayarenlyaa Wiciipitu mi kihinaya uwa uno, ari awaka; toko ciryawe Rupeni ni Simiyoni.
GEN 48:6 Vano asaana anhalaa waayara ayo awaa, nanso mwanlattu wookhala nrukulu nimoca na Manasesi ni Farayimi na ayo anaahala waakhela mphantte wohiyeriya unaaca asunnaya.
GEN 48:7 Mi kikhumaka uPatani, keettaka ni iphiro kihocukula nlattu wokikhwela Rakeli ilapo yo uKanaa unahanle vakani uphiya uFarata. Kihonvitha ni iphiro yoorwaa uFarata, uneehaninya uPetelehemu.
GEN 48:8 Woonnyawe Isirayeli asaana a Yusufu, ahokoha eeraka: Ala tasipani?
GEN 48:9 Ala pha asaana Nluku akivahilyawe. Vano Isirayeli aheera: Waawane woono kawareerihe.
GEN 48:10 Miitho a Isirayeli yahoririyaca mwanlattu wo wuuluvala ni ule khoonaca ratta. Phimaana Yusufu ahaakusa asaanawe ayo ni weemesa vakhiviru waya athumwane. Vano Isirayeli ahaavaha alaahuma ni waakapatta,
GEN 48:11 ni ahomwiirela Yusufu: Akaacuwela wiira kinawoona tho ikhovyaa, nna vaa Nluku hokitthunihera woona asaanaa.
GEN 48:12 Vano Yusufu ahaatamiha wamweettoni wa athumwane ni ahooroma mpaka iyuuci awe uphiya vathi.
GEN 48:13 Vano Yusufu ahaakusa oyeeli, Farayimi ahomweesa moono nlopwana vakhiviru waya moono nthiyana wa Isirayeli, ni Manasesi ahomweesa moono nthiyana vakhiviru waya moono nlopwana wa Isirayeli ni oyeeli ahaaciserihaca wa Isirayeli.
GEN 48:14 Vaavale Isirayeli ahotaphula ntata no moono nlopwana nuuthatela wa muru wa Farayimi mwana omwankani, ni avirikanihaka myoono nnyo, ahokusa ntata no moono nthiyana nuuthatela wa muru wa Manasesi mwana omuulupale.
GEN 48:15 Vano ahonreeriha Yusufu eeraka: Nluku amweettelaya mayaapaapa Aparahamu ni Isaki, Nluku kihaakhenle meettelo aka mpaka nihuku noleelo.
GEN 48:16 Ncelo kooponle coonanara cothene, waareerihe ala amirawo ala. Yihaneliye ncina naka ni macina o mayapaapa Aprahamu ni Isaki, ni wincive uneethi aya vathiva.
GEN 48:17 Woonnyawe Yusufu athumwane yeesaka ntata no moono nlopwana wa muru wa Farayimi, khawancivenle. Phimaana ahovara ntata na athumwane apheelaka waakakhaniha naari wa muru wa Manasesi weesa wa Farayimi ni naari wa muru wa Farayimi weesa wa muru wa Manasesi.
GEN 48:18 Ni aheerela: Nhipanke commo paapa. Ula phi omuulupale, mweeseke ntata ninyu no moono nlopwana wa muru wawe vaa.
GEN 48:19 Nanso athumwane yahokhotta ni yahomwiirela coo: Mi kinacuwela, mwanaka, mi kinacuwela. Ni uyo naahala ukhalana uneethi mwinci ni naahala ukhala nkhuulupale. Nanso unokhalaru ciicammo, nhimaawe uyo phinhala utepa ukhala muulupale wompwaha munnaawe uyo ni uneethi awe unaahala ukhala mwinci.
GEN 48:20 Commo Yakopi ahaareerihaca wowaareeriha nenno nihuku nno eeraka: Uneethi wo Isirayeli wapheelaka ureerihana unahala uromola macina enyu wiiraka coo: Nluku opanke we toko campankilyawe Farayimi ni Manasesi. Ni ahomweesa Farayimi uhoolo wa Manasesi.
GEN 48:21 Wahoolo Isirayeli ahomwiirela Yusufu: Kihanle vakani ukhwa, nanso Nluku nohala ukhala ni nyu ni naahala wuuturuselani ilapo ya amuci inyu okhalayi.
GEN 48:22 Vano we ukhala wiira uhaana iyuulupale yo wapwaha asunna ayo, kinawuvaha nttetthe uri myako wakhilyaka Amorewu ni ikatana ni myura caka.
GEN 49:1 Vano Yakopi aheehana asaanawe ni weerelaca: Mmwaace woono wiira kuuhimeryeni citthu cinhala wuukhumelelani uhoolo.
GEN 49:2 Nthukumanace va wiira mwiiwe nyu asaana a Yakopi, mwiiwe inhimyawe Isirayeli, athumwaninyu.
GEN 49:3 Rupeni, we uri ntthaara naka, ikuru caka, nhokorokho woopacera wo mwiirutthuni mwaka, ootepa uttitthimihinya ni ootepa ikuru.
GEN 49:4 Unaviluwa toko maasi. Khunkhalana tho iyuulupale kontha we uhowela ikori ya athumwana; uhaawela amweettyaka ni uhaaveeha.
GEN 49:5 Simiyoni ni Levi ari ntthu ni munnaawe, ikatana caya nnyo ciri ikaruma cookhwiri.
GEN 49:6 Akintthuna upanka mphantte miruku caya nnyo, akintthuna ukhala mmikuttanoni mwaya mmo kontha waviruwacilyaya aheeva atthu enci, nuusama waya nwo ahokwanyulaca ni uthikilaca mitinka imope.
GEN 49:7 Uhotakhaliya urusiya waya nwo wowoopiha, uhotakhaliya uviruwa waya nwo wookhwiri. Mi kinawaakawanihaca ilapo ya Yakopi ni kinawaamwarusela ilapo yo Isirayeli.
GEN 49:8 Yutta, asunnaa anaahala wulemeliha, ntata naa ninaahala wavara nsiko eenani aa, asaana a Yakopi anaahala umoromela Yutta wiitho wawe.
GEN 49:9 Yutta ri toko mwaakharamu, we, mwamwanaka, uneetta toko kharamu oovara. Unonkoma toko kharamu nlopwana ni unrupa toko kharamu nthiyana, tipani nohala woorya wuuwusa?
GEN 49:10 Nttontto wo omwene khunhala unkhuma Yutta, hata ikopo yo nlamulo khinhala unkhuma mmatatani mwa, mpaka ukati unhalawe uwa mwaneene ni uyo naahala ulemelihiya ni ilapo cothene.
GEN 49:11 Yooyo naahala untthukelela puuru awe wanrittani woolipa; ikuwo cawe naahala ukattha ni ivinyu, iphome yo uva inamwareela nkuwoni mwawe.
GEN 49:12 Miitho awe ankootepa uriipa woopwaha ivinyu. Miino awe utepa utteela woopwaha iphepa.
GEN 49:13 Sepulooni nokokhala nceresere ipharyaa nipuro ninkelaya weemela apaketi, mipika cawe cinaphiya mpaka oSitoni.
GEN 49:14 Isakaari uri puuru oolipa rupile iriyari mirintti cawe.
GEN 49:15 Oonaka wiira nipuro nimmumulawe nno niri nooreera ni itthaya eyo iri yoocivela, makhata ayo ahokusa mirintti nuuvara miteko co makokoromwa.
GEN 49:16 Tani naahala waakihera citthu cikhanle coneethi awe toko nihimo phi nihimo no Isirayeli.
GEN 49:17 Tani nokokhala toko mwiikhomya unceresere iparapara, ivili inari nceresere iphiro, inluma ikottokottho yo khavalu ni inammulusa ntthu nowela uyo.
GEN 49:18 Nyenyu Mwaneene Nluku, mi kinawehererya woopola winyu!
GEN 49:19 Kaate naahala wananiinya ikhotto ni miphwinko, nanso uyo phinhala waatthema ni woomolanihaca.
GEN 49:20 Meeca a Aseri anhala ucara coolya; Yooyo phinhala uvaha coolya co mamwene.
GEN 49:21 Nafitali ri toko naahe ookwattula muntthapweni, phimaana napanka isukuhuulu.
GEN 49:22 Yusufu uri mwiri wo mihokorokho, woomela nceresere iluusi, miritta caya nnyo cinavira waculu waya isiri.
GEN 49:23 Nuuviruwa wa anamyuupa uhomwaattakanana anvonyeraka myuupa caya nnyo wo nceece.
GEN 49:24 Nanso muura awe uyo khattinkihile, myoono cawe ciri cokuru ni cowoorya uvonya myuupa, mwanlattu wo ntata na muulupale a Yakopi mwancina na nhakheli, mwala wo Isirayeli.
GEN 49:25 Mwancina na Nluku a athumwane, ookavihere we, Mwancina na Nluku Okuru Cothene oovahe cinenne iparakha co wirimu, iparakha cowiiserya cinenne, iparakha cocaayira ni cootosa.
GEN 49:26 Iparakha ca athumwane cinapwaha iparakha co myako cookhalayi. Makhalelo o myako coohimala cennya iparakha nnya cothene cirwee mwiirutthuni mwa Yusufu. Cirwee uhoolo wawe ule aakhanle oomwalanihinya na asunnawe.
GEN 49:27 Pencamii ri toko mwiici wooluwa wicisuru unakhura inama, ni ucoocilo unakawaniha yahanle.
GEN 49:28 Ari phi yaala ala apankile mahimo khumi na meeli o Israyeli. Ciicammo athumwanaya phaahimenryaya wowavahaca iparakha, avahiyaka khula ntthu iparakha camwaacile.
GEN 49:29 Wahoolo Yakopi ahaattonkela asaanawe eerelaka: Kihanle vakani urwaa wa amuci aka akhwile khalayi. Mwakivithe wamoca ni miyapaapa nnikhukuni niri imatta ya Foromi nHitiita.
GEN 49:30 Nikhuku niri imatta yo Makipela, vakhiviru ni uManree, uKanaa, imatta Aparahamu inthumanannyawe Foromi, nhitita, aaceraka wiira akhale mahiye a amuci awe othene.
GEN 49:31 Wonwo hovithiya Aparahamu na amwaarawe, Isaki na amwaarawe. Ciicammo wonwo kihonvitha Leya.
GEN 49:32 Ukhuma imatta eyo ni nikhuku niri mmattani mmo cothene aathumananinye ahitita.
GEN 49:33 Aanowiira amalihaka wattonkela asaana awe nnya citthu nnya, Yakopi aheecatalela nuukhwa. Vano aahovithiya wamoca na amuci awe.
GEN 50:1 Yusufu ahaawuluwela athumwane, ahonlela ni waakapatta.
GEN 50:2 Wahoolo ahaavaha nlamulo akulukhano yaavara nteko nenno nipuro nno wiira yattikitthele nrette wohunttiha irutthu ya athumwane, ni ale yahaattikitthela.
GEN 50:3 Yahovira mahuku arupayini oolikana, kontha yooyo phaari ukati waalamunliyaya uttikittheliya makhura nrutthu na annaciipitu yahonla mahuku miloko mithanu na miili.
GEN 50:4 Wavinryaya mahuku onokhwa ayo, Yusufu ahoolumaca ni mahumu a Farawoo eeraka: Wakhala wiira nyu nnakifenta mwamuulumane Farawoo mwancina naka mi.
GEN 50:5 Apaapa ahokilupeliha yiiraka: Kihanle vakani ukhwa. Mwakivithe mahiiye yiitthenkacenryaka ilapo yo Kanaa. Vano va, mwanvekele wiira akitthunihere urwaa waavitha apaapa akinkela kaapicaka kinawa naanano.
GEN 50:6 Ahaakhula Farawoo eeraka: Urwee wavithe athumwana ayo toko aneene cuulupelihilyaya.
GEN 50:7 Vaavale Yusufu ahorwaa waavitha athumwane. Ule ahaatthukana ikwaha malaka kano othene a Farawoo, alamuli yavaranawe nteko wamoca na alamuli othene o Wiciipitu.
GEN 50:8 Vano wahiya alamuli ayo, yahorwaa ciicammo amuci o ntthoko na Yusufu asunnawe na atthu othene yaari mmatatani mwa Yakopi. Yahinnye uKoseni nwo yaari paahi asaana, imope ni ikhontwaa.
GEN 50:9 Ciicammo yahavelela atthu uwela ikhavalu naampakhira omope. Ikwaha iyo yaari ya atthu enci.
GEN 50:10 Uphinnya waya ipuwa ya Atate, vakhiviru ni mooloko Yortani yahocukula ni wunla venci; mpaka Yusufu ahokhala mahuku saapa onlelaka athumwane.
GEN 50:11 Atthu o Kanaa yakhalakhala yaayo mapuro ayo woona waya wunliya venci wapuwani ya Atate yaheeraca: Annaciipitu ampanka matthanka, phimaana nne nipuro nne nattamanne mooloko Yortani nihaninyaka Apeli-Misirayimi.
GEN 50:12 Commo asaana a Yakopi yahopanka toko caahimeeriyaya na athumwanaya.
GEN 50:13 Yahaakusaca athumwanaya mpaka ilapo yo uKanaa ni yahaavithaca nikhuku niri imatta yo Makipela vakhiviru ni uManree, imatta ile yathumiheriyawe Aparahamu ni Foromi Nhitita wiira ikhale ikhapuri coohala uvithana alokwawe Aparahamu.
GEN 50:14 Naavithileene athumwane ale Yusufu ahoturuwela Wiciipitu na asunnawe na atthu othene yanvelenle.
GEN 50:15 Asunnawe Yusufu woona waya wiira athumwanaya ahokhwa yaheeraca: Wakhala wiira Yusufu haana itwaana ni hi, ni aphavelaka onivihera ikuhukuhu mwanlattu wa yoonanara yampankilehu, niireke cani?
GEN 50:16 Phimaana yaholeeheraca nhupi woonhimerya Yusufu wiira: Athumwana ahinaya ukhwa yahoniruma
GEN 50:17 wiira munhimyacere coo: Kinawuuvekela waalevelele coonanara ni itaampi cuupankilyaya. Nnna vaa ulevelele itaampi ca karumeya a Nluku a athumwanaa. Vano Yusufu wakhela wawe nhupi ule, aahoonla.
GEN 50:18 Wahoolo yahowaca asunnawe Yusufu ni yahonkhoromela wiitho weene ni yaheeraca: Hi nihowa va, wiira nikhale ipottha caa.
GEN 50:19 Vano Yusufu aheerelaca coo: Nhoovace, mi kinalamuliya ukhala nipuro na Nluku?
GEN 50:20 Nyu nhokipankaca mi itthu yoonanara, nanso Nluku hopanka yeeyo itthu iyo ukhala yooreera, wiira mi ilelo kisunke ukumi wa atthu enci.
GEN 50:21 Phimaana nhoovace, mi kinaahala wuuvahani nyu yoolya wamoca na asaanenyu ayo. Commo phenryawe Yusufu wowamaaliha asunnawe ni ahoolumacera wo nifento.
GEN 50:22 Vano Yusufu ahokhala Wiciipitu myakha iminya nuuwa khumi, nari wamoca na amuci awe othene na athumwane,
GEN 50:23 mpaka ahoona ucuulu woneeraru wa asaana a Farayimi. Ni ahaakhelela asaana a Makhiri, mwana a Manasesi ukhala awawe.
GEN 50:24 Vano Yusufu hinaya ukhwa aheerela asunnawe ayo coo: Kihanle vakani ukhwa, nanso khweeli Nluku naahala wuukaviherani nyu, mpaka naahala wuukumihani ila ilapo ela, oorwehakani ilapo yilupelenlyawe Nluku unvaha Aparahamu, Isaki ni Yakopi.
GEN 50:25 Vaavale Yusufu aheerelaca asaana a Isirayeli wiira nnolamuliya ulupela, eeraka coo: Nluku ookavihereni nyu, nhala nkumihaca makhuva aka ayo mu.
GEN 50:26 Phimaana Yusufu aakhwile narina myakha iminya nuuwa khumi (110) ceyarelo. Nrutthu wa Yusufu wahottikittheliya makhura oohunttiha irutthu, nuuheliya ncaneesani ni yahosunkiya Wiciipitu.
JON 1:1 Vano nihuku nimoca nuulumo na Mwaneene Nluku nahowa waYona mwana a Amitayi niiraka:
JON 1:2 Wunweke ni urweke isitati yuulupale yo Ninive waahimyacereke moolumo aka kontha coonanara caya cowela mpaka waryaka.
JON 1:3 Nanso Yona ahonwa atthawaka wamiithoni waMwaneene Nluku arwaka uTarisi, ahokhuruwela uYopa, waaphwanyalyawe ikalawa yarwaa uTarisi, aholivela ikwaha ni ahokela, wiira aatthukane nloko anakalawa yarwaa uTarisi, apheelaka waatthawela uttayi Mwaneene Nluku.
JON 1:4 Vano Mwaneene Nluku ahoruma iphyoo yuulupale mpaharini ni ahopanka nkhaya mpaka ikalawa yahanle vakani uphwyaa.
JON 1:5 Vaavale anakalawa yahoovaca venci, ni khula ntthu ananlepela nluku awe, ni yahorihela mpaharini mirintti carinaya nkalawani, wiira awukule ulemeliya nwo. Vaavale Yona ahokhuruwela nhina ikalawa weecatalenlyawe arupaka ikhove.
JON 1:6 Nhooleli okalawa ahorwaa waYona ni ahonkoha wiira unrupani? Wunwe ni unlepele nluku aa, noone toko nanoonela ikiriri wiira nihikhwe.
JON 1:7 Wahoolo yaheerelana nrwee nipanke mwavi wiira nincuwele tipani uniwiihenre nenna nihusinna. Ni yahopanka mwavi ni wahomorela waYona.
JON 1:8 Vano yahomwiirela: Unihimerye nenna va, uniwiiherenreni nenna nihusinna. Nteko aa phuvi? Unkhuma vayi? Ilapo aa phivi ni ikhapilani?
JON 1:9 Yona ahaakhula: mi Heperewu, ni kinawoova Mwaneene Nluku, Nluku o wirimu, apattusile ipahari ni itthaya.
JON 1:10 Vaavale atthu ale yahanca woova venci ni yahomwiirela: Isiyani yeela ipankile ela? Kontha atthu ale yahocuwela wiira atthawile wamiithoni waMwaneene Nluku, maana ahaahimyacera.
JON 1:11 Yahomwiirelaca: Nuupankeke isiyani wiira ipahari imaale? Kontha nkhaya natepaca mpaharini.
JON 1:12 Yona ahaakhula: Nkikuse ni nkivonyere mpaharini; ipahari inaahala umaala. Ni kinacuwela wiira nkhaya ula wile mwanlattu wa waka.
JON 1:13 Vaavale anakalawa yaanvira yeettihaka ni ikuru caya apheelaka uphiya ukhopela. Nanso khayoonrye, kontha mpaharini nkhaya aantepa.
JON 1:14 Vano yahaalepela Mwaneene Nluku a Yona, yiiraka: Contte Mwaneene Nluku, nhinihiye nikhwaka nlattu wa coonanara ca Yona, nhinootherye hi va ukhwa wawe kontha nyu Mwaneene Nluku nhopanka wootthuna winyu.
JON 1:15 Vaavale yahonteesa Yona ni yahonvonyera mpaharini, ni nkhaya ahomaala ucaca.
JON 1:16 Vano atthu ale yahoovaca venci Mwaneene Nluku, ni yahaavahaca itthuvo Mwaneene Nluku ciicammo yakhuluvelihaka waatthara.
JON 1:17 Mwaneene Nluku ahoruma ihopa yuulupale wiira immirye Yona. Ni Yona ahokhala mmirimani mohopa mahuku mararu uthana ni uhiyu.
JON 2:1 Vano Yona nari mmirimani mohopa ahoswali aasukuruku Mwaneene Nluku
JON 2:2 eeraka: Mmahuvihoni kihokhuwelela Mwaneene Nluku ni ahokaakhula. Mmirimani mahiye kihokhuwa, ni nyu nheewa ncu naka.
JON 2:3 Nhokirihela mpaharini mapuro oowiisya cinenne ni kihokhala oorukureriya ni maasi ni mawimpi moolupale othene yaavira waculu waka.
JON 2:4 Kihoona toko kihomwalaanihiya ni nyu. Akaacuwela wiira kaanhala woona tho inupa enyu ittakattifu.
JON 2:5 Maasi othene yahokikhuneela mpaka ukittiya iphumu; ni ipahari yahokimirya ni makukhu o mpaharini yahokivilikelela mmuru.
JON 2:6 Kihokhuruwela mpaka vathi waya myaako, mpaka ilapo ya atthu ookhwa ni mikhora caya cahokitthukela mommo. Nanso nyu nhokikumiha mapuro oowiisa, nuukivaha ukumi; Mwaneene Nluku; Nluku aka!
JON 2:7 Upheelaka nnepa aka urimela mi kihowuupuwelelani nyu, Mwaneene Nluku, ni iswali caka cowela warinyu, mpaani mwinyu moottakattifihiya.
JON 2:8 Ale anaswalela anluku oohimaana ahiyaka ikiriri ca Nluku.
JON 2:9 Nanso mi kinaahala uwiipelani macipo oowunnuwihani ni wuuvahani itthuvo. Kinkopanka ile yookhuluvelihilyakani. Woopwa ukhuma wa Mwaneene Nluku.
JON 2:10 Vano Mwaneene Nluku ahoolumana ihopa wiira inraphye Yona, ni Yona ahoraphenya ucenkweni.
JON 3:1 Imaara yonayeeli nuulumo na Mwaneene Nluku nahowa waYona niiraka:
JON 3:2 Wunwe ni urwee isitati yuulupale cinenne yo Ninive waahimyacere atthu o Ninive moolumo yuuhimyacenryaka.
JON 3:3 Yona aheetthenkaca, ahonwa toko cakhanlyawe oohimeriya na Mwaneene Nluku. Ahorwaa uNinive. Ninive yaari isitati yuulupale cinenne yeettiya mahuku mararu uttupulaniha iriyariru.
JON 3:4 Yona ahophiya uNinive. Aheetta nihuku nimoca akhalaka uwaahimyaca eeraka: Anhala mahuku arupayini Ninive ukwanyulaciya.
JON 3:5 Vano atthu othene uNinive yahonkupali Nluku ni yahorukunusa mirima, ciicammo yaholeehana untthuka ramatani ukhuma atthu oolupale, mpaka acikani, othene yahommwaraca nakotto athoonyiheraka wiira ahorukunusa mirima caya.
JON 3:6 Mwene o Ninive weewilyawe ni uyo ahonwa wahiceni wawe phurulaka ikuwo cawe cothene nuummwara nakotto phunkomaka wattuurani.
JON 3:7 Ciicammo Mwene na ahooleli awe yahokumiha nlamulo nowahimyacera atthu othene unsitati wiira: Hikhale nohala ulya hata uwurya ukhuma atthu, inama coohuwiya, toko imope ni ikhontwaa, cihivahiye coolya ni maasi wala cihihuleliye cirwaka ulawiha coolya.
JON 3:8 Atthu othene (ni inama cothene) amware nakotto anlapele Nluku ni ikuru, arukunuse mirima caya ni uhiya coopanka caya coonanara cothene.
JON 3:9 Atthuna commo Nluku nahala unoonela ikiriri, ni urusiya wawe unahala uvira ni khaninhala ukhwa.
JON 3:10 Nluku ahoona mananna cakhanlyaya oorukunusa mirima caya akhalaka oohiya coonanara caya ni Nluku khaahuvihile tho atthu ayo.
JON 4:1 Nanso vaavale, Yona ahorusiya ni ahocaca.
JON 4:2 Vano ahoswali akohaka Mwaneene Nluku toko co: We Mwaneene Nluku, mi akeenre kihinaaya ukhuma ilapo aka wiira phi yeeyo yahalaa upanka? Phimaana kipankaka mananna ootthawela uTarisi! Mi kahocuwela wiira we uri Nluku ookiriri ni oothunku, wiira we uri Nluku oopica ucaca, eemaani ni ooreera, ciicammo ukati wothene uri oolevelela.
JON 4:3 Pahi, nyu Mwaneene Nluku, nkiive, kontha fatari kikhwe kihikhale nkumi.
JON 4:4 Mwaneene Nluku ahaakhula: We Yona wookupali wiira uhaana isariya yoorusiya toko co?
JON 4:5 Vaavale Yona ahokhuma uNinive, phurwaaka mphante unkhuma ncuwa ni ahonkoma. Vano ahoteka nrapattha ni ahonkoma wantthuucini waya, awehereryaka woona itthu yahala wiiranyaa nsitati mmo.
JON 4:6 Vano Mwaneene Nluku ahomeliha mwamwiri wootthavelaca wiira Yona amumule wantthuucini ni atteeliye. Vaavale Yona ahotteeliya venci.
JON 4:7 Nanso usa waya, ncuwa nipheelaka ukhuma, Nluku ahonruma mwaamunku wiira eeve mwamwiri uyo ni wahokhwa.
JON 4:8 Wakhumilyaya ncuwa, Nluku ahowiha iphyoo yooviha cinenne ikhumaka unkela ncuwa. Yona ahociriphuwa nlattu wo nttukuttha ni ncuwa nampaha mmuruni mwawe. Vano ahopheela ukhwa ni aheera: Fatari kikhwe kihikhale nkumi.
JON 4:9 Nluku ahonkoha Yona eeraka: Uhaamini urusiya nlattu wo yoola mwamwiri ula? Yona ahaakhula: Khweeli kihaana isariya yoorusiya toko co mpaka ukhwa.
JON 4:10 Vano Mwaneene Nluku aheera: Ula mwamwiri ula wunnuwile uhiyu, ni uhiyu nkhwawe uyo wahokhwa. We khiiwo ipankenlyaa ula mwamwiri ula ni khawunnuwihile, vano unawoonela uthunku.
JON 4:11 Mi ni isariya caka cothene akinlamuliya woonela ikiriri isitati yo Ninive, uryaya atthu enci oohicuwela itthu yooreera ni yoonanara woopwaha elufu iminya wosirini (120.000) ni inama cinci ciriwo?
MAR 1:1 Wiipaceroni wa Nhupi Wooreera wa Yesu Kristu, Mwanawe Nluku.
MAR 1:2 Ohaantikhiya ni nnapiyu Isaya: Kimmonrumiha uhoolo wa mayanhupi aka, nohala wulokiherani iphiro.
MAR 1:3 Ncu ninkhuwa ntakhwani, Nlokihe iphiro ya Apwiya, mookole mittala.
MAR 1:4 Ciicale, Yohani Mpatisa phooneliye ntakhwani wiira eetthucihe opatiso wo urukunusa nrima wiira itaampi cileveleliye.
MAR 1:5 Yaanamwikamela atthu othene olapo ya Yutteya, na atthu ankhala uYerusalemu, ni yaanapatisiya ni ule umooloko Yorttani, alaphaka itaampi caya.
MAR 1:6 Yohani awara ikuwo yo mapururu onkamira, eethukelaka nyununi mo nrapala, yoolya awe yari mattettentte ni urawo wo ntakhwani.
MAR 1:7 Ni wowaalaka anaahimya coo: Uttuli waka mi nawa nkinaku rina ikuru impwaha yawaka, ni mi akimphwanela wooroma wiira kitthukule miripwe cokwakwatta cawe.
MAR 1:8 Mi kinawuupatisani ni maasi, nanso Ule naahala wuupatisani muNnepa Nttakattifu.
MAR 1:9 Waheranyaa, mahuku ale, Yesu awaaka ukhuma uNasaree yo Kalileya, mpaka upatisiya ni Yohani umooloko Yorttani.
MAR 1:10 Wakhumawe mmaasini mmo, ahoona irimu ihulyaka, ni Nnepa, woonnya toko ikhuntta inkhuruwelaka.
MAR 1:11 Ni ukhuma wirimu nineewiya ncu nnohimya: We uri Mwanaka oofentiya, nokiphela nrima.
MAR 1:12 Wahoolo Nnepa Nttakattifu wahoonrweha utakhwani, ni
MAR 1:13 ahokhala wonwo mahuku arupayini, ni ahothokociya ni Sotwani; ni cahawo wonwo inama cowoopiha, ni ancelo yahonkavihera.
MAR 1:14 Utthukiya wawe Yohani, Yesu akenle uKalileya, wahimerya atthu Nhupi Wooreera wa Nluku, eeraka:
MAR 1:15 Ukati uhophiya ni ciicammo Omwene wa Nluku uhophiya. Nrukunuseke nrima, nkupalelaka Nhupi Wooreera.
MAR 1:16 Aviraka nceresere ntthiya no Kalileya, ahomoona Simoni ni nhimaawe Anteree avonyeraka matthavi aya mpaharini mmo, nlattu yaari mayototha ihopa.
MAR 1:17 Yesu aheerela: Nkitthare Mi, ni Mi kimmowupankani mayowatotha atthu.
MAR 1:18 Ahiyaka nanaanoru matthavi aya, yahontthara Yesu.
MAR 1:19 Napwahile vakani, ahomoona Yakopu, mwana a Sepeteu ni nhimaawe Yohani, alokihaka nkalawani matthavi aya pweehanaka nananoru.
MAR 1:20 Ni ale yahonhiya Sepeteu athumwanaya ni mayanteko aya, yahontthara.
MAR 1:21 Yaanarwa uKafarnaum. Nihuku no Ntivela ahokela nnsinakokani, ni aheetthuciha atthu.
MAR 1:22 Na atthu othene yaanawumiya mwaano ni miitthuciho cawe, nlattu aheetthuciha toko ntthu nolamula ni khari toko mayowantikha.
MAR 1:23 Ahaawo nnsinakokani mmo ntthu arina nnepa woonanara, apacile ukhuwa:
MAR 1:24 We urinani ni hi, Yesu o Nasaree? Wawenle unikwanyulaca? Mi kihocuwela wiira uri Nttakattifu a Nluku.
MAR 1:25 Yesu ahonkuphula, eeraka: Omaale we, ni ukhume wantthu ula.
MAR 1:26 Vano, nnepa woonanara, unantathile ni ikuru, ukhuwacaka, wahokhuma wantthu ule.
MAR 1:27 Othene yahotikhinaca, mpaka ukohana ayayoru: Isiyani ila? Moone meetthuciho oonaanano, uromoliya ni nlamulo mpaka ulamulela minepa coonanara ni nnya cinamwiiwelela.
MAR 1:28 Ni ncina nawe nahorumannya nttetthe wothene, ilapo yo Kalileya.
MAR 1:29 Akhumaka unsinakoka ahokela mpani mwa Simoni ni Anteree, wamoca ni Yakopu ni Yohani.
MAR 1:30 Amaathyawe Simoni yaanawerenya wakorini, awerenyaka irutthu yothene, ni nananoru yahonhimerya ca iretta ila.
MAR 1:31 Attameryaka, Yesu ahaavarela ntata mpaka waawusa. Iretta yahaahiya, na ale yahopacera wakaavihera.
MAR 1:32 Ucoocilo, ncuwa ninakwattuwile, yahomwiihera aretta na ale yahoosiya ni nnepa woonanara,
MAR 1:33 na atthu othene owatthokoni yahothukumana wankhora.
MAR 1:34 Ahaavoniha aretta enci, yahoosiye ni coowerya, ni ahoomola minepa coonanara cinci; nanso khahiya wuulumaca minepa nlattu yaanancuwela.
MAR 1:35 Wicisuru, uhinasa ahoonwa ni ahokhuma; phurwaka ntakhwani wiira aswali.
MAR 1:36 Simoni, na ale yaari ni Yesu yahontthara.
MAR 1:37 Umphwanya waya, yahomwiirela: Atthu othene anawuphavelani.
MAR 1:38 Nanso ahaakhula: Nirwe ncoko nkina, itthoko co vakhiviru, neetthucihe wonwo, nlattu wo yela phikumenlyaka.
MAR 1:39 Ni ahorwaa ilapo yothene yo Kalileya, eetthucihaka mmasinakokani, ni oomolaka minepa coonanara.
MAR 1:40 Ntthu o makuttula ahonrwela Yesu ni ankhoromelaka ahonlepela: Watthunaka vale unawoorya ukivoniha.
MAR 1:41 Amoonelaka ikiriri, Yesu ahonthatela ntata mpaka unkwanya, eeraka: Kinatthuna, uvone.
MAR 1:42 Nananoru, makuttula yahonhiya, ni irutthu yahokhala toko khalayi.
MAR 1:43 Ni Yesu ahonleeha phunlakaka, ni moolumo ala:
MAR 1:44 Ukiiwe ahinhimerye ntthu itthu ila. Nanso upacera urwaa wamayasataka ni uvelelihe itthu ilamuliye ni Musa; nlattu wa atthu anhapihiya makuttula, wiira akhale saahiti aa.
MAR 1:45 Ule, mweeco, urwaa wawe ahopacera ulattula ni uhimya itthu yeeranele, mpaka Yesu uhoorya ukela ooniyaka mmawaani phukhalaka ntakhwani; na atthu olapo ile yaananrwela.
MAR 2:1 Anavinre mahuku vakani, ni Yesu naturuwile uKafarnaum wahorumanyaa wiira ri uwaani.
MAR 2:2 Yahothukumana atthu enci, mpaka uphunyana wankhora, ni Yesu aheetthuciha moolumo.
MAR 2:3 Vano yahomwiihera ntthu oowuntakyaa, akusiye na atthu acese.
MAR 2:4 Ukhala wiira khayoorya unkusa mpaka waryawe, nlattu wo mphwinko, yahokhunula nivatho nipuro naryawe Yesu, ni ciicale, anahunle iparo, yahokurusela nrepa naryawe ntthu oowuntakyaa.
MAR 2:5 Wowoona ukupali waya atthu ale, Yesu ahomwiirela ntthu oowuntakyaa: Mwanaka, itaampi caa ciholeveleliya.
MAR 2:6 Wonwo mweeco, yahoonkoma mayowantikha vakani yaakakaka munrimani mwaya:
MAR 2:7 Nlattuni, Ule uulumacaka co? Nakufuru. Noorya tipani ulevelela itaampi, hiri Nluku paahi?
MAR 2:8 Yesu, nanso acuwelaka moopuwelo aya mpaka ahaakoha: Nlattuni muupuwelaka ciicale munrimani mwinyu?
MAR 2:9 Itthu yootepa urika phivi, umwiirela oowuntakyaa, Itaampi caa ciholeveleliya, atthuna umwiirela, Wunwe, ukuse nrepa naa ni weette?
MAR 2:10 Vano paahi; wiira ncuwele wiira Mwanawe Pinattamu haana ikuru vathiva yolevelela itaampi,
MAR 2:11 kinawuulamula amwaacaka ntthu oowuntakyaa ukuse nrepa naa ni urwee uwaanyaa.
MAR 2:12 Ntthu ule ahoonwa, ahokusa nrepa nawe ni ahokhuma ooniyaka na atthu ale othene, mpaka othene wumiya mwaano, ni yaananttottopela Nluku yiiraka: Khaninoona itthu co nikhalakaru.
MAR 2:13 Imaara ikina tho ahokhumela vate mphante wo ipharyaa; ni mphwinko wa atthu othene wahontthara, Ule eetthucihaka.
MAR 2:14 Nanso aviraka uyo ahomoona Levi, mwanawe Alfeu nonkomile inupa yowaakheleliya nsoko, ni ahomwiirela: We, ukitthare Mi. Ni Levi ahonwa anttharaka Yesu.
MAR 2:15 Nari wamoca, itthoko ya Levi, mayoliviha nsoko enci na atthu ookosakosa yahoonkomaca wameeca wamoca ni Yesu ni uwiitthuca awe, nlattu khayaamala urunwa atthu yaantthara.
MAR 2:16 Mayowantikha yanrumelelihana ni mafarisi, amoonaka ulya na atthu ookosakosa ni mayoliviha nsoko, yaheerela uwiitthuca awe: Nlattuni, nalya na atthu ookosakosa?
MAR 2:17 Yesu eewaka cothene ahaakhula: Kahiwena akumi phimmwavya tothoro, nanso, aretta. Mi akiwenle weehana atthu aattakattifu, nanso atthu ookosakosa.
MAR 2:18 Owiitthuca a Yohani ni mafarisi yaantthuka, yahowa unkoha Yesu: Owiitthuca a Yohani ni mafarisi anatthuka ni uwiitthuca aa ahitthukaka isiyani?
MAR 2:19 Yesu ahaakhula: Asimpwana awe mayothela anawoorya utthuka, mayothela nari na ale? Mahuku othene ankhalaya wamoca ni mayothela khanoorya utthuka.
MAR 2:20 Anaahala uphiya mahuku anhalaya waakhiya mayothela, vano phankelaya utthuka.
MAR 2:21 Khaawo neesera icaapha yonaanano ikuwoni yookhalayi, nlattu icaapha yonaanano inatepereriha mphantte wookhalayi, ni nikhwata ninatepa wunnuwa.
MAR 2:22 Ni khaawo nohela ivinyu yonaanano mmapikani ookhalayi, ahelaka vale, ivinyu inaahala upwesa mapika ookhalayi, ni ivinyu inarihakyaa wamoca ni mapika. Nanso ivinyu yonaanano inheliya mmapikani oonaanano.
MAR 2:23 Nihuku nimoca no ntivela Yesu anavira mmamattani na owiitthuca awe. Yeettaka mphironi, owitthuca awe yahoonta ncasi.
MAR 2:24 Mafarisi yahontthara, yiiraka: Nkoona, nlattuni ale apankaka itthu yowatelihiya upanka nihuku no ntivela?
MAR 2:25 Ahaakhula: Khannasoma itthu yapankilyawe Taviti, wammoonlyawe itala, ule na atthu yarinawe?
MAR 2:26 Wakenlyawe inupa ya Nluku, ukati wa mayasataka muulupale Apiyatari, ni walilyawe mikatthe coottakattifihiya coolamuliya ulya mayasataka paahi, ni ahaavaha atthu yarinawe?
MAR 2:27 Ni ahopwahera: Ntivela nihopankeliya ntthu, ni kahiwena ntthu phipankeliye ntivela.
MAR 2:28 Mwanawe Pinattamu phi mwaneene ntivela.
MAR 3:1 Yesu ahokela tho nnsinakokani. Ahokhala wonwo ntthu oonririya ntata.
MAR 3:2 Vano ale yaananhottela wiira amoone ammoonihaka nihuku no ntivela wiira ankasari.
MAR 3:3 Yesu ahonhimerya ntthu arina ntata noonririya: Wunwe ni uwe iriyari ila va.
MAR 3:4 Wahoolo ahaakoha: Inoleveliya, nihuku no Ntivela, upanka itthu yooreera atthuna itthu yoonanara, woopola ukumi atthuna uhiya uharipwyaka? Ale yahomaalaca.
MAR 3:5 Vano, awehaka ni urusiya, ni ummweryaka nrima nlattu woturumala mirima caya, ahomwiirela ntthu: Wookole ntata. Ahookola ntata ni nna nahovona.
MAR 3:6 Wakhumilyaya, mafarisi yahothukumana na aHerotiyano wiira avaanele mamwiivelo.
MAR 3:7 Yesu ahorwaa untthiyani na owiitthuca awe, atthariyaka ni mphwinko muulupale wakhuma uKalileya, ni Yutteya,
MAR 3:8 uYerusalemu, uItumeya, ukhopela Yorttani, ni nceresere Tiro ni Sittoniya. Ahophwanyinya ni mphwinko muulupale, wewiilyaya itthu yaapankawe.
MAR 3:9 Ahaahimerya owiitthuca awe, anlokihere ikalawa yaankani, wiira hiphunyererihiye ni mphwinko uyo.
MAR 3:10 Woona ahaavoniha atthu enci, ni nlattu weetthu ila, ale yanawaaninya ni ikwerere wiira ankwanye.
MAR 3:11 Minepa coonanara, wamoonaya, caanankhoromela wamiithoni wawe ni caanakhuwa: We uri Mwana a Nluku.
MAR 3:12 Ule nanso anawaateliha wiira ahicuwelihe.
MAR 3:13 Wahoolo ahowela mmwaakoni, ni aheehana ale yatthunyawe, na ale yahomwaattamerya.
MAR 3:14 Ahaathanla khumi na eeli phwaavahaka ncina na amitthenka wiira yakhaleke ni Uyo, ni aarume, wiitthuciha,
MAR 3:15 ni yaphwanyeke ikuru yo woomola minepa coonanara.
MAR 3:16 Ahaathanla khumi na eeli ala: Simoni, ammahilyawe ncina na Peturu,
MAR 3:17 Yakopu, mwanawe Sepetteu, ni Yohani nhimaawe Yakopu, ammahilyawe ncina Powanerce, manaaya asaana utari;
MAR 3:18 Anteree, Filipe, Partimeu, Mateu, Tomee, Yakopu mwanawe Alfeu, Tateu, Simoni Selote,
MAR 3:19 ni Yutta Iskariyoti, anthumihile Yesu.
MAR 3:20 Waphilyaya uwaani, mphwinko wa atthu wahothukumana tho, mpaka wahinoryaya ulya.
MAR 3:21 Ni amawaawe, wiiwawaya itthu ila, yahokhuma wiira ammare, nlattu yeeriya: Hoolociya.
MAR 3:22 Ni mayowantikha, yakhuruwenle o Yerusalemu yahohimya: Hovariya ni Peelsepu. Ni thotho. Nawoomola minepa coonanara ni ikuru ca mwene a minepa coonanara.
MAR 3:23 Vano Yesu aheehana ni wahimerya mmalikaniheroni: Noorya cani, Sotwani umoomola Sotwani?
MAR 3:24 Omwene wakawaniyaka, omwene ule khunoorya ukhala.
MAR 3:25 ni inupa yakawanihiyaka, inupa ile khinoorya ukhala.
MAR 3:26 Phimaana, akhalaka Sotwani eecanihaka ikhotto mwaneene eekawanihaka, ni khanoorya ukhala tho, homala.
MAR 3:27 Khaawo noorya ukela inupa ya ntthu ookhomaala ni unhukhela mihakhu cawe woohipaca ummara phooryaka unhukhela wahoolo.
MAR 3:28 Khweeli kinawuhimeryani: Itaampi cothene ni ikufuru cothene cinkhala coromoliya na atthu, cothene cimmoleveleliya,
MAR 3:29 nanso, ntthu nohala ukufuru Nnepa Nttakattifu khammwa uleveleliyaka akhalakaru; nowookhala ni itaampi awe mahuku othene.
MAR 3:30 Ahaahimerya itthu ila nlattu yahimenrye: Ule navariya ni nnepa woonanara.
MAR 3:31 Vano yahophiya anumwane na asihimaawe, ni anemenle utaa, yahaaruma atthu umwihana.
MAR 3:32 Mphwinko wa atthu wahoonkoma ntotho wawe, atthu yahonhimerya: Ahaawo vate anumwana na asihimaa, anawuphavela.
MAR 3:33 Ahaakhula: Amanyi ni asihimaaka phapani?
MAR 3:34 Ni athetulaka miitho mwaatthu ale yanrukurenrye, aheera: Ala pha manyi na asihimaaka.
MAR 3:35 Ntthu nopanka utthuna wawe Nluku, ule phi nhimaaka, mwanrokoraka ni amanyi.
MAR 4:1 Ahopacera tho wiitthuciha nceresere ntthiya. Mphwinko muulupale wahothukumana ntotho wawe, phimaana ahowela nkalawani ni ahoonkoma mmwe, phukhalaka mphwinko woonene.
MAR 4:2 Anaweetthuciha citthu cinci mmalikaniheroni ni anawahimerya mmeetthucihoni mwawe:
MAR 4:3 Mmiriyane. Mayowaala ahokhuma arwaka uwaalani.
MAR 4:4 Waalaawe, ipyo ikina yahomorela nceresere iphiro ni yahowaca asanuni, yaholya.
MAR 4:5 Ipyo ikina yahomorela wakokotthoni, wonwo wahakhanle itthaya yinci, khipicile umela nlattu itthaya khayaakenle uttayi.
MAR 4:6 Nanso, ncuwa, ukhuma waya, yahopahiya, nlattu wohikhalana itthaya yinci mitithari cahooma.
MAR 4:7 Ikina yahomorela wamwiwani, ni miwa cahoonuwa, cahomirya ipyo ni khayeemile.
MAR 4:8 Ikina yahomorela itthaya yooreera ni yunuwaka, ni inarenre, yaheema, ni wuncereriya mpaka ukhala talathini, sitiini ni iminya khila ipyo.
MAR 4:9 Ni ahopwahera eeraka: Urina manyaru uwiwelela, eeweke.
MAR 4:10 Nahanle veekha, atthu yanrukurerya wamoca ni owiitthuca awe khumi na eeli yahonkoha manaaya nlikanihero nne.
MAR 4:11 Ahaakhula: Nyu nhovahiya ucuwelaca ikano yo omwene wa Nluku, nanso, atthu ari utaa citthu cothene anahimeriya ni malikanihero,
MAR 4:12 wiira yoonaka, yoone, ni ahicuwelele; yiiwaka, yiiwe, ni ahiiwehe wiira ahirukunuse mirima, aleveleliyaka itaampi caya.
MAR 4:13 Ni ahopwahera: Khanneeweeha manaaya nlikanihero nna? Nnohala mweeco, wiitthuca cani malikanihero makina ayo?
MAR 4:14 Mayowaala nawaala nuulumo,
MAR 4:15 ari nceresere iphiro, pha ale yahimerye nuulumo, aneewile nuulumo. Sotwani nawa waatamiha nuulumo naaliye.
MAR 4:16 Ciicammo, ale yaakhenle ipyo mapuro ookokoottho, pha ale yiinre aneewile nuulumo, woohipica anawaakhelela ni nrima wootteeliya,
MAR 4:17 nanso kharina mitithari mwaale, khankhala nthiti ni yawaaka mahuviho, atthuna yomolanihaciyaka nlattu wo nuulumo, wohipica anattittha.
MAR 4:18 Ahaawo akina, anaakhela nuulumo mapuro o miiwa. Ala anawiiwa nuulumo,
MAR 4:19 nanso nlattu woramela itthu yo nttuniyani, wothokociya ni mihakhu ni citthu cikina cinonlelaya, cinakela munrimani mwaya anattitthiha nuulumo ni khaneema.
MAR 4:20 Atthu anakhela nuulumo itthaya yooreera pha ale aneewa nuulumo, anaakhelela, aneewa mpaka wiima ni wincereriya talathini, sitiini ni iminya khila ipyo.
MAR 4:21 Ahaahimerya tho: Pooti inaweesiya isamaninya nhina mwaya itthuttu atthuna vathi waya nkori? Keera ineesiya waculu mmutto?
MAR 4:22 Nlattu khiiwo yovithiya ihinhala wooneleliya, ni khiiwo yowipithya ihinhala ukhumela woonene.
MAR 4:23 Ntthu akhalanaka manyaru oowiiwelela, eeweke!
MAR 4:24 Ni ahopwahera: Mmiriyaneke ratta itthu ineewenyu. Nnowophimiya ni itthuttu inhalenyu uphimela, ni thotho nnowowincereriya.
MAR 4:25 Vano ntthu rina, nowowuncereriya, ni ntthu hirina, nowowaakhiya, mpaka citthu cirinawe.
MAR 4:26 Ni anawiira: Omwene wa Nluku uri toko ntthu avonyenre ipyo awe vathi.
MAR 4:27 Arupe, unwe, uhiyu ni uthana, ipyo inamela ni inawunuwa, ule woohicuwela cani.
MAR 4:28 Itthaya inavaha veekhaya, woopacera ntathi, wahoolo ncasi, ni umwiisoni ncasi nocara meele.
MAR 4:29 Ni yowiima yattokotthaka, naahepha nlattu wahophiya ukati woohephiya.
MAR 4:30 Vano aheera: Ninhala ulikanihera ni isiyani omwene wa Nluku? Atthuna ninhala utaphulela ni nlikaniheroni?
MAR 4:31 Uri toko inuku yo nrale, ineera inaliye vathi, iri yootepa uyeva mweenuku cothene;
MAR 4:32 nanso, yaaliyakaru, inawunuwa, inathatuwa mwiri muulupale woopwaha miri co mmattani ni inamwarya miritta caya mpaka asanuni o wirimu woorya uteka ipuuru muntthucini mwaya.
MAR 4:33 Ni malikanihero menci toko ala Yesu anaweetthuciha nuulumo, toko woonawe wiira anawiiweha.
MAR 4:34 Khoolumacera woohikhala ni malikanihero; nanso uyo anawataphulela cothene owiitthuca awe anari veekhaya.
MAR 4:35 Nihuku nne, unaripenle, ahaahimerya: Nrwee nilapuwele ukhopela.
MAR 4:36 Ahiyaka miphwinko, owiitthuca yahonkusa, toko caryawe nkalawani, ni cahommelela ikalawa cikina.
MAR 4:37 Vano ahokhumelela naphuvo muulupale ophyoo ni mawiimpi yanawicattakanihaca ni ikalawa mpaka yahala vakani ucara maasi.
MAR 4:38 Yesu, nari mphantte wottuli wokalawa, anarupa naphitenrye nsawu.
MAR 4:39 Yahoommusa ni umwiirela: Mwalimu, khunoona wiira ninakumpwela? Unwaka, aholamulela iphyoo ni aheerela ipahari: Imaale, ihittinke! Iphyoo yahomaala, ni ipahari yothene yaheera riya-riya.
MAR 4:40 Wahoolo ahaahimerya: Nlattuni nkhalaka atthu oowoova osilili? Nhikupaliki?
MAR 4:41 Yanawoova venci ni yaanahimeryana: Tipani Yoola? Hata iphyoo, ni ipahari cinamwiiwelela?
MAR 5:1 Yahophiya nikhopela nikhwaya ntthiya, ilapo yo Yeraseno.
MAR 5:2 Yesu nalapuwile ahosiceriya ni ntthu aakhuma umahiye, avariye ni nnepa woonanara.
MAR 5:3 Akhala umahiye, ni khaawo oorya ummara, mena vakani untthuka ni unyolo,
MAR 5:4 nlattu imaara cinci ahotthukiya ni unyolo mpaka wuntakaca unyolo ni unyakataca ikatiyato; khaawo oorya ummoniha.
MAR 5:5 Mahuku othene anaweetta, uthana ni uhiyu mmarekhano ni mmyaakoni, akhuwaka ni eerakalihaka ni maluku.
MAR 5:6 Amoonaka Yesu uttayi, ahotthimakaca ni ahonkhoromela ni
MAR 5:7 ahokhuwa ni ncu nowirunya: Nyu nrinani ni miyano, Yesu Mwana a Nluku Ooculu. Nhikoopopihe!
MAR 5:8 Ni khweeli, Yesu anamwiirela: Ukhume mwantthuni mu, nnepa woohiloka.
MAR 5:9 Wahoolo ahonkoha: Ncina naa tipani? Ahaakhula: Mphwinko phi ncina naka, nlattu niri enci.
MAR 5:10 Ni yahonlepela ankhanyererihaka wiira ahomoliye nttetthe ule.
MAR 5:11 Caanalya vano ikuluwe nceresere mwaako,
MAR 5:12 ni minepa coonanara cahonlepela Yesu: Nnilamulele nakele nkuluweni mmwe.
MAR 5:13 Yesu ahorumelela, ni nenna nna minepa coonanara cahokhuma wantthuni ni cahokela nkuluweni, ni nikhoto nne nari toko ikuluwe elufu piili (2000) naheevonyera muntthiyani ni nahottittha.
MAR 5:14 Ahakheli yahotthawa ni yahovira alattulaka mmawaani; na atthu enci yahowa woona itthu yeeranele.
MAR 5:15 Waphiyaya nipuro naryawe Yesu, yahomoona ntthu avariye ni minepa coonanara noonkomile, nawanre ni nakhalanne ankhili, ni yahoova.
MAR 5:16 Asaahiti a ntthu oovariya ni minepa coonanara ni itthu yeranele ni ikuluwe yahottonka itthu yeranele.
MAR 5:17 Vano yahoonlepela Yesu wiira athame ilapo aya.
MAR 5:18 Yesu ahoturuwela okalawani; ni ntthu avariye ni minepa
MAR 5:19 Yesu khantthunihenre, nanso ahomwiirela: Urwee uwaanyaa, wamawaa ni wattonkacere citthu cothene cupankenlyaya Apwiya, ni toko ciwoonenlyaya ikiriri.
MAR 5:20 Ahokhuma wonwo, ni ahopacera uTekapoli itthu yampankenlyawe Yesu, na atthu othene yahotikhinaca.
MAR 5:21 Yesu nalapuwile ntthiya ni ikalawa, ni neemenle nceresere ntthiya wahothukumana mphwinko muulupale wa atthu.
MAR 5:22 Ahophiya vano muulupale o nsinakoka, eehaninya Cayro, ni umoona wawe Yesu, ahonkhoromela,
MAR 5:23 ni ahonlepela ankhanyererihaka: Mwanaka mwanthiyana hanle vakani ukhwa; uwe unthatele matata akhale nkumi.
MAR 5:24 Yesu ahommeleela phutthariyaka ni mphwinko muulupale wamphunyereriha.
MAR 5:25 Vano, nthiyana mmoca awuva iphome iyakha khumi na piili,
MAR 5:26 ni anaweettihiya venci mmatatani mwaya mayoovoniha enci, ni arihile mihakhu cawe cothene, nanso woohiphwanya nafasi, hata iretta awe yaanavira etepacaka.
MAR 5:27 Neewile ca Yesu, ahotakaneela ni mphwinko, ni awaaka uttuli wawe ahonkwanya nihancu nawe;
MAR 5:28 aheecirela mweeco: Mena kakwanyaru cowara cawe, kimmovona.
MAR 5:29 Nananoru iphome yaheemela, ni ahoona mwirutthuni mwawe wiira ikwerere awe ihovona.
MAR 5:30 Nenna nna, Yesu, oonaka wiira ikuru awe yahokhuma mwirutthuni mwawe, ahorukunuwela mphwinko akohaka: Kikwanyile tipani?
MAR 5:31 Owiitthuca awe yahomwiirela: Unawoona wiira miphwinko cinawuphunyereriha miphantte cothene, ni unakoha: Akikwanyile tipani?
MAR 5:32 Nanso Yesu ahoweha nceresere aphavelaka umoona ntthu apankile itthu ile.
MAR 5:33 Vano nthiyana ahocuwela ciheeranya mwirutthuni mwawe oovaka ni athukumelaka ahokhuma ahonkhoromela Yesu ni ahonhimerya citthu cothene.
MAR 5:34 Ni ule ahomwiirela: Mwanaka, ukupali waa uhowoopola. Urwee ni nnema ni uvone ikwerere aa.
MAR 5:35 Yesu uulumacaka ninlelo yahowa atthu akina akhumaka inupa awe muulupale o nsinakoka phwiiraka: Mwana aa hokhwa.
MAR 5:36 Yesu, nanso, neewile moolumo ale, ahomwiirela muulupale o nsinakoka: Uhituthuwe, ukupaliki paahi.
MAR 5:37 Ahaateliha othene wiira: Hikivelele ntthu, hikhanle Peturu, Yakopu ni Yohani, nhimaawe Yakopu.
MAR 5:38 Uphiya waya uwaanyawe muulupale o nsinakoka, Yesu aheewa ikuttho yuulupale ya atthu enci yunlaka mpani.
MAR 5:39 Ni akelaka, ahaahimerya: Ikuttho ila wunla nwe isiyani? Mwana uyo kakhwile, narupa paahi.
MAR 5:40 Nanso atthu ale yaananthyaa, Yesu ahaakumihera utaa atthu ale othene ni aakusaka athumwane na anumwane, na ale yammelenle, yahokela mpani mwataleliye mwanamwane.
MAR 5:41 Ni ammaraka ntata, aheera: Mwanaka kinawulamulela, wunwe.
MAR 5:42 Nananoru mwanamwane ahoonwa ni ahopacera weetta, ari mweeco, ni iyaakha khumi na piili. Othene yahooma mwaano.
MAR 5:43 Yesu ahaalepela wiira itthu ile ihicuweliye ni ntthu, ni aholamula uvahiya yoolya mwanthiyana.
MAR 6:1 Ukhuma wawe wenwe, ahorwaa wamoca ni owiitthuca awe.
MAR 6:2 Nihuku no ntivela ahopacera wiitthuciha nnsinakoka na atthu enci yamwiiwa, wanawooma mwaano ni yaanahimya: Inonkhuma vayi itthu ila ni ucuwelani uno uvahiyawe uno? Cinopankya cani cotikineeha nya ni ntata nawe?
MAR 6:3 Kahi nkarapintero, mwanawe Mariya, ni nhimaawe Yakopu, Yosefi, Yutta ni Simoni? Ni asirokorawe khari ni hi? Yahoviruwaca.
MAR 6:4 Yesu aheerela: Namilohi notarawiya uwaanyawe paahi, waama wawe ni wapuwani wawe.
MAR 6:5 Ni wonwo khoonrye upanka cotikineeha hata mena. Ahaavooniha aretta vakani paahi, athatelaka matata.
MAR 6:6 Ahotikhinaca uhikupali waatthu ale. Vano ahoviravira itthoko co wattamana eetthucihaka wonwo.
MAR 6:7 Aheehana khumi na eeli, ni ahopacera waruma eeli eeli, ni ahaavaha ikuru yolamulela minepa coonanara.
MAR 6:8 Ahaalamulela wiira ahikuse itthu yootthumiri ni iphiro, wala nkatthe, wala nrupa, mena nsurukhu nyununi, akuse ikopo paahi.
MAR 6:9 Aware ikwakwatta ni ahiwye ihancu piili.
MAR 6:10 Ni ahaahimerya tho: Mwakelaka inupa, nkhale wonwo mpaka wunwa nipuro nno.
MAR 6:11 Ni mwahaakheleliyeke nipuro nno, na atthu ale yahiwiwekeni, woothama vale, nkukutthe ntthupi no manyaa enyu, wiira ikhale itthu inthoonyera mirima caya atthu ale.
MAR 6:12 Amitthenka yahorwaca ni yahaalaka atthu oottharuwela itaampi.
MAR 6:13 Yahoomola minepa coonanara ciinci, yahaattikitthela ni makhura aretta enci mpaka waavoniha.
MAR 6:14 Mwene Heroti aheewa cuulumaceriyaka ca Yesu, nanruma ncina nawe ni anawiira: Ula phi Yohani Mpatisa oonwelenle mwaatthu ookhwa, phimaana cinawithoonyera mwa ule ikuru coopanka cotikhineeha.
MAR 6:15 Akina yaanawiira: Phi Eliya. Akina yanalipihera: Ri nnapiyu toko anapiyu akina.
MAR 6:16 Heroti nanso, wowiiwa itthu ila anahimya eeraka: Yohani unthikinlyaka isiko phunwelenle.
MAR 6:17 Khweeli, Heroti phalamunle utthukiya Yohani ni weesiya nkalaposo, nlattu wa Herotiyata, amwaarawe Filipe nhimaawe, anthenlyawe.
MAR 6:18 Nlattu Yohani anamwiirela Heroti: Khunleveliya ukhalana amwaarawe nhimaa.
MAR 6:19 Herotiyata hopophela nreca ni anatthuna umwiiva, nanso khoorya,
MAR 6:20 nlattu Heroti anamoova Yohani ni, acuwelaka wiira ari ntthu ooloka ni nttakattifu, anamwaakhiha; wamwiiwawe anasanka, nanso anammiriyana ni uciveliya.
MAR 6:21 Nanso nahophiya nihuku nooreera, Heroti wopuwelenlyawe nihuku nayariyawe ahophavela yoolya yinci yowaavaha oolupale owahano, oolupale anakhotto, ni mamwene o Kalileya.
MAR 6:22 Nakenle wiina mwana nthiyana a Herotiyata wahoncivela Heroti na atthu yaalattuliye. Mwene ahomwiirela mwali: Ukilepele itthu phi itthu intthunaa ni mi kimmowuvaha.
MAR 6:23 Ni ahopwahera: Kimmowuvaha itthu yothene inhalaa ukilepela hata ukhalaka mwanusu omwene aka.
MAR 6:24 Mwali ahokhuma waakoha anumwane wiira: Kilepele isiyani? Ala yahaakhula: Muru wa Yohani Mpatisa.
MAR 6:25 Mwali akelaka tho nenna nna, ahonlepela mwene, eeraka: Kintthuna uvahiya nananoru, unaheliye munttiisini muru wa Yohani Mpatisa.
MAR 6:26 Mwene ahotuthuwa, nanso nlattu woolupela wawe ni, nlattu waatthu yaalatuliye, khathunne unthuwa.
MAR 6:27 Nenna nna ahonlamulela mayorontta uwiha muru wa Yohani. Mayorontta ahorwaa nkalaposo ni ahothikila isiko ya Yohani,
MAR 6:28 ni wahoolo ahowiha muru munttiisini mpaka ummaha mwali, ni ula ahaavaha anumwane.
MAR 6:29 Ucuwela waya itthu ila owiitthuca a Yohani, yahokusa nrutthu ni yahothipela mmahiyeni.
MAR 6:30 Amitthenka yahothukumana wa Yesu ni yahonttonkacera citthu cothene capankilyaya ni citthu cihilyaya.
MAR 6:31 Ni Yesu ahaahimerya: Mmweeke, nirwe nipuro nowiipithyaa ni mmumule vakani, nlattu yaari enci yaarwa ni yaawa mpaka uhikhalana ukati woolya.
MAR 6:32 Vano yahorwaa ni ikalawa nipuro nowiipithyaa nahaariwo hata ntthu.
MAR 6:33 Yoonaka arwaka, enci yahocuwela ukitthu unkelaya. Ni mmatthokoni mothene yahorwaa, yeetaka vathi, nipuro nne, ni yahophiya nraci.
MAR 6:34 Wakhuruwawe nkalawani, Yesu ahoona mphwinko muulupale ni ahoonela ikiriri, nlattu yaari toko ikhontwaa cohikhalana nhaakheli. Vano ahopacera weetthuciha ukati mwinci.
MAR 6:35 Ncuwa wakelaya utthekuwa, owiitthuca awe yahomwattamerya nuunhimerya: Nipuro nna niri toko mwini, ni ncuwa notthekuwa.
MAR 6:36 Walamulele urwaa mmawaani ni mmatthokoni cowattamana wiira yathume yoolya.
MAR 6:37 Ahaakhula: Mwaavahe nyenyu wa yoolya. Na ale yahonhimerya: Wothuma mikatthe cowavaha atthu ale othene, nimphavela ncurukhu iminya piili.
MAR 6:38 Yesu ahopwahera: Nhaana mikatthe mikavi? Nrwee moone. Anakohile atthu, yahaakhula: Mikatthe mithanu ni ihopa piili.
MAR 6:39 Ahaalamulela wonkomiha atthu vakani khila nipuro mmalasini makithi.
MAR 6:40 Ni yaanawunkoma khila ipuwa atthu iminya ni ipuwa ikhwawe atthu hansini.
MAR 6:41 Vano ahokusa mikatthe mithanu ni ihopa piili ni, aweehaka wirimu, ahosukurela. Ahomyaniha mikatthe ni ahaavaha owiitthuca awe wiira yakawele atthu. Ni ahaakawela ihopa piili,
MAR 6:42 na atthu ale yaholya mpaka uvona.
MAR 6:43 Ni ahocariha tho itthuttu khumi na piili ikalakathela cahanle co mikatthe ni co ihopa.
MAR 6:44 Vano yalilyayo mikatthe nye yaari atthu elufu thanu.
MAR 6:45 Nananoru ahaakhanyereriha owiitthuca awe ukela nkalawani nuulapuwela nikhopela nikhwawe no Petsayita; mwaneene alaseraka mphwinko.
MAR 6:46 Analasenre mphwinko ule, ahowela umwakoni, uswali.
MAR 6:47 Wiila waya, ikalawa yari iriyari ntthiya, ni Yesu aheemela nceresere veekhawe.
MAR 6:48 Woona wawe wiira yahoocya weettiha ikalawa nlattu iphyoo yanavirikana, aheekamela weeraka mapikoosa, eettaka wamaasini mpaka utthuna uhapuwa.
MAR 6:49 Nanso owiitthuca yamoonaka weetta wamaasini yahopuwela wiira nnepa, ni yahokhuwa.
MAR 6:50 Othene mweeco yahomoona ni yahotuthuwa. Mwaneene nanso aholumacera, eeraka: Mpise nrima, phi mi, nhoove!
MAR 6:51 Wahoolo, ahokela nkalawani mwariyaya, ni iphyoo yahowukuwa. Othene yanawoova venci.
MAR 6:52 Khayeewehile ni nlelo itthu yeranele ni mikatthe nye nlattu woolipa mirima caya.
MAR 6:53 Analapuwenle ukhopela, ahophiya ilapo yo Yenesare ni ahovonyera vathi nankura.
MAR 6:54 Anakhumile nkalawani, atthu uwonwo yahoncuwela.
MAR 6:55 Yahophiya atthu enci olapo ile ni yahopacera wawiha aretta mmarepani ni aharweha nipuro nacuwenlyaya wiira phiryawe.
MAR 6:56 Mmatthokoni makani, itthoko cuulupale ni mmawaani, nipuro phi nipuro nakelawe yanaweesiya aretta mparaparani ni yahoonlepela wiira aleve mena ukwanyiya nlempe no nhancu awe. Na atthu othene yankwanya yanavona.
MAR 7:1 Mayowantikha ni mafarisi akina, akhumaka o Yerusalemu, yahothukumana ntotho wawe Yesu.
MAR 7:2 Yahoona wiira owiitthuca awe akina yanalya nkatthe ni matata oohirya, manaaya woohinyawa.
MAR 7:3 Mafarisi ni Ayutta othene khanlya woohinyawa ratta ratta, toko calemalenlyaya atthu ookhalayi.
MAR 7:4 Waturuwaya uparasa, khayalya ihinaya unyawa; ni cihaawo tho citthu cinci cikina cimpankaya attharaka citthu cookhalayi, toko urapiha ikahi, myaapu, ni myaapu co ncukhuma ni mikori.
MAR 7:5 Yahonkoha vano, mafarisi ni mayowantikha: Owiitthuca aa ahiwelelaka citthu cookhalayi, alyaka ahinyawile, isiyani?
MAR 7:6 Yesu ahaakhula: Hohimya ratta nnapiyu Isayiya, awacakani nyu, atthu o mirima miili, toko cantikhiyaya: Mphwinko ula unakittitthimiha ni mattere, nanso nrima aya unkhala uttayi waka.
MAR 7:7 Anakilapela vathiru, ni yeetthucihaka malamulo a atthu paahi.
MAR 7:8 Ahiyaka nlamulo na Nluku, phuttharaka coohiyerana ca atthu, toko urapiha myaapu ni ikahi ni citthu cinci colikana nnya.
MAR 7:9 Ni aheerela: Nnahiya ntteeliyaka nlamulo na Nluku wiira nthareke coohiyerana cinyu.
MAR 7:10 Musa, mweeco, heera: Wattittimihe athumwanaa na anumwanaa; ni Ntthu nohala walapha athumwane na anumwane attarusiye ni eeviye.
MAR 7:11 Nyu nanso nneera: Ntthu nohala wahimerya athumwane atthuna anumwane: Itthu yahalaka wuvahani nyuva phi ila 'korpan' manaaya, itthu yoovahiya Apwiya.
MAR 7:12 Ciicammo khanonhiyera ntthu itthu yowapankela athumwane atthuna anumwane,
MAR 7:13 mmalihaka ciicammo nuulumo na Nluku nlattu wo coohiyerana cookhalayi cinvahenyu. Ni napanka citthu cinci toko nnya.
MAR 7:14 Eehanaka tho mphwinko, Yesu anawahimerya: Nkiviriyane othene, ni mwavye wiiweha.
MAR 7:15 Khiiwo iri utaa wawe ntthu, ineera inakenle nhina mwawe, phoorya untatusa iharamu; nanso inkhuma muntthuni, ila phinoorya untatusa iharamu.
MAR 7:16 Ntthu urina manyaru uwiiwelela, eewe!
MAR 7:17 Wakenlyawe mpaani, nahile mphwinko, owiitthuca awe yahonkoha manaaya nlikanihero nna.
MAR 7:18 Ahaakhula: Nyu ciicammo khaneeweha? Khannocuwela wiira, citthu cothene co utaa cinkela muntthuni, khacinoorya untatusa iharamu,
MAR 7:19 nlattu khinkela munrimani, nanso nnapwiipwini mwawe, ni wahoolo inakhumela wanipuroni waya? Ciicale anahimya wiira coolya cothene cooreera.
MAR 7:20 Ni ahohimya tho: Itthu inkhuma muntthuni, yeeyo phinontatusa iharamu.
MAR 7:21 Nlattu nhina nrima wantthu phinkhumaya moopuwelo oonanara: ulavalava, wiinya, wiiva,
MAR 7:22 uraruwa, isoyo, wunlela coonanara, uthepya, uhilemeliha irutthu, urama, ukufuru, wiicona, uhiwacera itthu yomaana.
MAR 7:23 Citthu nnye cothene coonanara cinkhuma nhina, ni cinantatusa ntthu nharamu.
MAR 7:24 Akhoolaka nipuro nne, ahorwaa nttetthe wo Tiro ni wo Sittoniya. Ahokela mpani ni khatthuna wiira acuweliye ni ntthu, nanso khoonrye wiipitha.
MAR 7:25 Vano wohipica nthiyana arina mwanawe mwanthiyana avariye ni nnepa woonanara weewilyawe wuulumaciya ca Yesu, ahowa unkhoromela wamettoni wawe.
MAR 7:26 Ari nthiyana nsenci, olapo yo Siriya-Fenisiya, ni ananlepela wiira oomole ncini wa mwanawe.
MAR 7:27 Ahaakhula: Wareerihe, toko, avone oopacera asaana; woona khavanreera ukusa nkatthe wa asaana ni warihela asilapwa!
MAR 7:28 Ale mweeco, yahomwakhula: Khweeli, Pwiya, nanso hata asilapwa analya vathivaya meeca coolya ca asaana cimmora-mora.
MAR 7:29 Yesu ahomwiirela: Nlattu wo nuulumo nna, urweke, ncini nookhuma mwa mwanaa.
MAR 7:30 Ahoturuwela uwaani ni ahomphwanya mwamhima nonkomile wakorini. Ncini nahonhiya.
MAR 7:31 Nakhumile tho nttetthe wo Tiro, ahowela o Sittoniya, mpaka ntthiya no Kalileya, aphulanihaka nttetthe wo Kapole.
MAR 7:32 Yahomwiihera ntthu oohiwa, ni wanrikarikela wuulumaca, ni yahonlepela wiira anthatele ntata.
MAR 7:33 Yesu antamihaka waatthuni ahonhela makokho mmanyaruni ahonsuwela ni ukwanya nlimi ni isene.
MAR 7:34 Ni awusaka miitho wirimu ahohihimerya, eeraka: 'Effatha' manaaya 'wiihule.'
MAR 7:35 Manyaru yahonhulya namarweele, nlimi nawe nahontthukuwa ni ahopacera wuuluma ratta.
MAR 7:36 Yesu aheera wiira hinhimerye ntthu itthu yeraneele, nanso waatepawe waateliha, phaatepaya umwarusela.
MAR 7:37 Atikhinacaka, yaanawiira: Cothene nopanka cotikhineeha, heewiha atthu uhiwa, ni wuulumaciha atthu oohuulumaca.
MAR 8:1 Mahuku ale, ukhala wiira wahotthukumana tho mphwinko muulupale na atthu khayarina yoolya, Yesu aheehana owiitthuca awe ni ahaahimerya:
MAR 8:2 Ukiiriha ihaaya mphwinko ula. Nna va ahovira mahuku mararu anari ni mi ni kharina yoolya.
MAR 8:3 Kaalaseraka ciicale woohilyetthu, wiira arwe mmwanyaya anaahala ukhwa mahile ni iphiro, kontha akina akhumile uttayi.
MAR 8:4 Owiitthuca awe yahomwaakhula: Nohala woorya cani ntthu waaliha nkatthe, watakhwani va?
MAR 8:5 Nanso ahaakoha: Nrina mikatthe mikavi? Yahaakhula: Mithanu na miili.
MAR 8:6 Aholamula wiira atthu yunkome vathi. Ni, akusaka mikatthe mithanu na miili, ahoreeriha, ahomyaniha ni ahaavaha owiitthuca awe, wiira yakawele na ale yahaakawela atthu.
MAR 8:7 Yahaana tho asihopa vakani. Ahoreeriha ni aholamula wiira yaakawele.
MAR 8:8 Yaholya mpaka urupala, ni ikalakathela cahanle nyo owiitthuca awe yahottottela itthuttu thanu na piili.
MAR 8:9 Atthu ale yaari elufu cese (4000). Wahoolo ahaalasera.
MAR 8:10 Ni awelaka vano nkalawani ni owiitthuca awe, ahorwaa mittetthe co Talmanuta.
MAR 8:11 Yahowa mafarisi yapacenre unyakulihana ni Yesu ni woontteha yahoonlepela ikanyero yo wirimu.
MAR 8:12 Yesu ahihimeryaka ni nrima wothene, aheera: Nlattuni weesiyani nihimo nna ninalepelela ikanyero? Khweeli kinawuhimeryani wiira nihimo nna khaninhala uvahiya ikanyero hata vakani.
MAR 8:13 Ni aahiyaka, ahokela nkalawani, mpaka ulapuwela ikhopela ikina.
MAR 8:14 Owiitthuca yaholiyala uwya mikatthe, ni nkalawani khayaarina tho waari nkatthe mmoca paahi.
MAR 8:15 Yesu aheerela: Moone, nkhale miitho mmwehaka ratta miropo co mafarisi ni miropo ca Heroti.
MAR 8:16 Na ale yahopacera uvanyihana, yoopuwelaka wiira waaciye uhikhalana nkatthe.
MAR 8:17 Yesu nanso, weewilyawe moolumo ale, ahaahimerya: Nlattu isiyani moopelaka mwaha o itthu yohikhalana nkatthe? Nanlelo khannahelelela ni khanneeweha? Nri ni nrima woturumala.
MAR 8:18 Nhaana miitho ni khannoona? Nhana manyaru nanso kanneewa ni khannopuwela.
MAR 8:19 Itthuttu kavi coocara ni coohala caattottenlenyu, wamyanihilyaka mikatthe mithanu kaakawelaka atthu elufu thanu? Yahaakhula: Khumi na piili.
MAR 8:20 Ni wamyanihilyaka mikatthe saapa pwaavahaka atthu elufu cese, mwacarihile itthuttu kavi cokalakathela co mikatthe? Yahaakhula: Saapa.
MAR 8:21 Ni anaweerela: Nanlelo khanneewa?
MAR 8:22 Yesu ni owiitthuca awe yahophiya o Petsayita ni yahomwiihera ntthu oohoona, anlepelaka wiira ankwanye.
MAR 8:23 Ahommarela ntata ntthu oohoona ni ahonrweha nceresere itthoko, ahonhela isenye mmithoni mwawe, ahonthatela matata nuunkoha: Unawoonaka itthu?
MAR 8:24 Ule ahoteesa miitho ni aheerela: Kinawoona atthu, yeettaka ankhala toko miri.
MAR 8:25 Ahonthatela tho matata mmiithoni, ni ule ahopacera woona uparapara, ni ahovona, oonaka rattaratta uttayi ni uparapara citthu cothene.
MAR 8:26 Yesu vano ahonlamulela urwaa uwaani, ni ahomwiirela: Uhikele mena umawaani.
MAR 8:27 Yesu ahoonwa na owiitthuca awe, akelaka umawaani co Sesareya wo Filipe. Mphironi ahaakoha owiitthuca awe, eeraka: Atthu ayo aneera wiira Mi kipani?
MAR 8:28 Yahomwiirela: Yohani Mpatisa, akina Eliya, ni akina tho aneera wiira uri mmoca mwa anapiyu.
MAR 8:29 Ni ahaakoha: Ni nyu nneera Mi kipani? Peturu ahaakhula: We uri Kristu.
MAR 8:30 Ahaalamulela vano, wiira ahinhimerye ntthu itthu ila.
MAR 8:31 Wahoolo ahopacera weetthuciha wiira Mwanawe Pinattamu naahala uhuva venci ni ukhottiya ni mahumu, ni oolupale a mayasataka, ni mayowantikha, mpaka wiiviya ni wunwelela anavinre mahuku mararu;
MAR 8:32 ni anawahimerya itthu ila wohakhuwa-khuwa. Peturu ahomwiihana Yesu ni ahopacera unkuphula.
MAR 8:33 Yesu nanso arukunuwaka, ni awehaka owiitthuca ahonkuphula Peturu, eeraka: Uthame wiitho aka, Sotwani, kontha khummwacera citthu ca Nluku, nanso paahi citthu ca atthu.
MAR 8:34 Eehanaka mphwinko wa atthu wamoca ni owiitthuca awe, aheerela: Ntthu, atthunaka ukitthara, eerune mwaneene, akuse nsalapa awe ni akitthare.
MAR 8:35 Nlattu, ntthu nohala uphavela woopola ukumi awe unanrihya, ni unhala unrihya nlattu wo miyano, ni nlattu wo Nhupi Wooreera nowowopola.
MAR 8:36 Enhala ukhuma isiyani, ntthu uphwanya ittuniya yothene ni arihaka nnepa awe?
MAR 8:37 Atthuna ntthu nohala uvaha isiyani wo wakakhaniha nnepa awe?
MAR 8:38 Ntthu mweeco nohala wuliya muru nlattu wo Miyano ni nlattu wo moolumo aka wamiithoni wanloko nna nookosakosa nimwalaanne ni Mi, ciicammo, Mwanawe Pinattamu naahala wuliya muru nlattu wa ale aphiyaka o nnemani wa Athumwane wamoca ni Ancelo attakattifu.
MAR 9:1 Yesu ahaahimerya tho: Khweeli kinawuhimeryani wiira akina mwaala ari vava khanhala ukhwa ahinaya woona omwene wa Nluku uwaka ni ikuru caya.
MAR 9:2 Anavinre mahuku siita, Yesu ahaakusa Peturu, Yakopu ni Yohani, ni ahaaweliha veekhaya, mwaako woorekama. Ni aheetatusa wamiithoni waya.
MAR 9:3 Coowara cawe cahothatuwa coowarya, cootteela usilili toko khaawo mayokattha vathiva uwoorya utteeliha ciicale.
MAR 9:4 Ahaakhumelela Eliya wamoca ni Musa ni ooyeli yanawuulumaca ni Yesu.
MAR 9:5 Peturu ahomwiirela Yesu: Mwalimu oreera ukhala vava, niteke marapattha mararu, nimoca na waa, nikina na Musa nikhwawe na Eliya.
MAR 9:6 Kontha khayaacuwela itthu yaahimyawe nlattu yanawoova venci.
MAR 9:7 Ni nahokhuruwa nihutte nakhunenle ni ntthuuci, ni nahokhuma ncu nnihutteni neera: Ula mwanaka oofentiya. Yooyo mwiiwe.
MAR 9:8 Nenna nna, awehaka, khayamoonne tho ntthu, ari Yesu veekhawe.
MAR 9:9 Wakhuruwaya mmwakoni, Yesu ahaalamulela wiira ahihimerye ntthu itthu yoonyaya, mpaka wahoolo Mwanawe Pinattamu nonwelenle mwaatthu ookhwa.
MAR 9:10 Ale yahotthara moolumo ale, nanso yaanakohana ayayoru manaaya, 'wunwelela mwaatthu ookhwa.'
MAR 9:11 Ni yahonkoha yiiraka: Mayowantikha aneerelani wiira woopacera Eliya phinhala uwa?
MAR 9:12 Ahaakhula: Aye, Eliya, awaaka woopacera naahala weesa wanipuroni waya citthu cothene, nanso yantikhiye isiyani ya Mwanawe Pinattamu, wiira nalamuliya uhuva venci, nuunyoholiya.
MAR 9:13 Ni mi mweeco kinawuhimeryani: Eliya ahowa, ni yahompankela cothene catthunaya, toko caantikhiye.
MAR 9:14 Naphile waryaya owiitthuca awe ahoona mphwinko muulupale wa atthu warukurenrye ayoca, ni mayowantikha anyakulihanaka na ale.
MAR 9:15 Amoonakaru Yesu yahotikhina ni yahotthimakaca unkoha isalama.
MAR 9:16 Ni ule ahaakoha ale: Nnonyakulihanani?
MAR 9:17 Ntthu mmoca mwa mphwinko ule, ahomwiirela: Mwalimu, kihowiihera mwanaka, rina nnepa woohuulumaca.
MAR 9:18 Wammaraka vale, unamphatela vathi ni ule napacera ukhuma niphooru, ucekesa miino ni phuumaka teyeye. Kihaalepela owiitthuca aa wiira yoomole ncini, nanso khayoonrye.
MAR 9:19 Yesu aheerela: Nyu, nloko noohikupali, kinhala ukhala ni nyu mpaka yakhani? Kinhala wuvilelani mpaka yakhani? Nkiwiihere woono.
MAR 9:20 Yahommwiihera. Nimoonakaru Yesu, ncini nahompukunyaa mwanhima ni ikuru, mpaka umphatela vathi, ni ahopacera uphirikyaa akhumaka niphooru mwano.
MAR 9:21 Yesu ahaakoha athumwane: Itthu ile inomwiiryanyaa ikhumelo yakhani. Na ale yahaakhula: Ikhumelo mwanamwane,
MAR 9:22 ni imaara cinci nahommonyera wamooroni ni mmasini wiira amwiive, nanso wooryaka vale upanka itthu, unoonele ikiriri, nuunikhavihere.
MAR 9:23 Yesu ahomwiirela: Wooryaka! Ntthu nokupali citthu cothene cinawooryanyaa.
MAR 9:24 Nenna nna, athumwane mwana oyo yahokhuwa: Kinakupali; nkikavihere uhikupali waka!
MAR 9:25 Yesu, oonaka wiira atthu enci yanawa, aholamulela nnepa woonanara ni aheerela: Nnepa wohuulumaca ni wohiwa, Mi kinawulamulela, ukhume wamwana ola, nuuhinturuwele tho.
MAR 9:26 Ni nnepa, ukhuwaka ni wicipulacaka ni ikuru, wahokhuma. Mwanhima ahokhala toko ookhwa, mpaka atthu enci wiira hokhwa.
MAR 9:27 Nanso, ammaraka ntata, Yesu ahommusa, ni ule aheemela.
MAR 9:28 Ukelawawe mpani, owiitthuca yahonkoka veekhawe: Nlattuni hiyano khanoonrye woomola?
MAR 9:29 Ahaakhula: Nloko nna ninoomoliya ni iswali ni utthuka paahi.
MAR 9:30 Akhumaka wonwo yahottupulaniha ilapo yo Kalileya, ni Yesu khatthuna wiira acuweliye ni ntthu,
MAR 9:31 nlattu anavira eetthucihaka owiitthuca awe ni anaweerela: Mwanawe Pinattamu naahala urwehiya mmatatani mwaatthu anhala umwiiva, nanso, nakhwile nowowunwelela anavinre mahuku mararu.
MAR 9:32 Nanso ayo khayeewehile nuulumo nne, ni yanamoova unkoha.
MAR 9:33 Yahophiya uKafarnaum, ni, anari uwaani, Yesu ahaakoha: Mwavanyihanani mphironi?
MAR 9:34 Yahomaalaca, nlattu mphironi yanavanyihana ayayoru, wiira tipani ri muulupale mwaale.
MAR 9:35 Unkomaka, Yesu aheehana owiitthuca awe khumi na eeli ni ahaahimerya: Ntthu aphavelaka ukhala muulupale, eepanke mwankani mwaatthu, ni akhale nrumeyi a atthu othene.
MAR 9:36 Ni ankusaka mwanamwane, ahomweesa iriyari aya, ahommarela ni aheerela:
MAR 9:37 Ntthu nomwaakhela mwanamwane toko ula mwancina naka, nokaakhela Miyano, ni ntthu nokaakhela Mi, khankaakhela Mi, nanso Ule kirumile.
MAR 9:38 Yohani ahonhimerya: Mwalimu, nihomoona ntthu oomolaka macini mwancina naa, ni ntthu ule khannitthara, ni nihomwaateliha.
MAR 9:39 Yesu ahaahimerya: Nhimwaatelihe, nlattu khaawo nopanka cotikhineeha mwancina naka phukaapa mi nenna nna.
MAR 9:40 Ntthu hinoniina, nawiraana ni hi.
MAR 9:41 Ntthu novahani ikoopu yo maasi wiira mmurye nlattu wokhala owiitthuca awe Kristu, khweeli, kinawuhimeryani, khankela ahalelaka itthuvo awe mena vakani.
MAR 9:42 Ntthu nohala unkosiha mmoca mwaasinamwane ala ankikupali Mi, fatari atthukeleliye nsiko mmo nsilo noosileliya ni avonyeriye mpaharini.
MAR 9:43 Ntata naa nookosihaka, uthikile. Unareera ukela wokumini ni ntata noopahuwa, wahohiyana ukhalana matata oomeli ni urwaa umooroni oohinttiphyaa.
MAR 9:44 Wonwo uhinkhwa asunku, ni mooro khunttiphyaa.
MAR 9:45 Nnya naa nookosihaka, uthikile. Unareera ukela wokumini unapahuwile, wahohiyana ukhalana oomeli uvonyeriyaka umooroni.
MAR 9:46 Wonwo uhinkhwa asunku, ni mooro khunttiphyaa.
MAR 9:47 Ni niitho naa nookosihaka, uphele. Unareera ukela umweneni wa Nluku ni niitho nimoca, wahohiyana ukhalana oomeli uvonyeriyaka umooroni.
MAR 9:48 Wonwo uhinkhwa asunku, ni mooro khunttiphyaa.
MAR 9:49 Phimaana khula ntthu naahala ulukiya ni mooro.
MAR 9:50 Maakha phi itthu yooreera; nanso yathatuwaka ooririya, ammolukiya ni isiyani? Nkhalaneke maakha mwanyu ni mweetteke ni mpuha ntthu ni nkhwawe.
MAR 10:1 Nakhumile wonwo, ahokela nttetthe wo Yutteya ni ukhopela mooloko Yorttani, ni mphwinko unathukumanne tho nipuro naryawe, anaweetthuciha tho, toko calemalenlyawe.
MAR 10:2 Yahomwattamerya mafarisi ni yahonkoha anttehaka: Iri yooreera nlopwana wamwalaana amwaarawe?
MAR 10:3 Ahaakhula: Musa holamulenleni isiyani?
MAR 10:4 Yahomwaakhula: Musa holevela waavaha iwarakha yoomwalaana, ni waahiya.
MAR 10:5 Yesu ahaakhula tho: Nlattu woolipa winyu nrima phuvahilyaweni nlamulo nno.
MAR 10:6 Nanso, wupattusoni wolapo, Nluku ahompanka nlopwana ni nthiyana.
MAR 10:7 Phimaana, nlopwana naahala waahiya athumwane na anumwane ni nokookhala na amwaarawe.
MAR 10:8 Ni ooyeli ankookhala irutthu imoca. Phimaana, khankhala tho eeli, nanso irutthu imoca.
MAR 10:9 Vano, yooluttanihiya ni Nluku, khimwalaanihiya ni ntthu.
MAR 10:10 Anaphile uwaani, owiitthuca awe yahonkoha tho itthu ile.
MAR 10:11 Yesu ahaahimerya: Ntthu nohala wamwalaana amwaarawe ni waathela akina, neetta uluva ni nthiyana ule,
MAR 10:12 ni nthiyana ammwalaanaka mannawe nuutheliya ni nkina, neetta uluva.
MAR 10:13 Yahomwiihera asinamwane wiira aakwanye, nanso owiitthuca yahakuphula ale yawihile asaana.
MAR 10:14 Yesu, oonaka itthu ile ahonyonyiya ni aheerela: Mwalevele, amirawo akiweele, ni nhoomole, nlattu omwene wa Nluku uri wa waya.
MAR 10:15 Khweeli kinawuhimeryani, ntthu hinhala waakhela omwene wa Nluku toko mmirawo, khanhala ukela wonwo.
MAR 10:16 Wahoolo ahaakusa vayawani phwathatelaka matata ni ahaareeriha.
MAR 10:17 Wakhumilyawe eettaka ni iphiro, ahomwattamerya ntthu atthimakacaka, ni akhoromelaka ahonkoha: Mwalimu ooreera, kipankekeni wiira kiphwanye ukumi woohimala?
MAR 10:18 Yesu ahonhimerya: Nnokihanelani ooreera? Khaawo ooreera hikhanle Nluku paahi.
MAR 10:19 Unacuwela malamulo: Uhiive, uheette uluva, uhiinye, uhoothe, uhithepye, waalemelihe athumwanaa na anumwanaa.
MAR 10:20 Ahomwaakhula: Mwalimu, cothene nnya kihosunka ikhumelo mmirawo.
MAR 10:21 Yesu ammwehecesaka, ahomfenta, ni ahomwaakhula: Inawuhaleela itthu imoca paahi; Urwee, watumihe citthu cothene cirinaa, waavahe nsurukhu uyo atthu oothwenya, ni ommokhalana nhakhu wirimu; uwe ni ukitthare.
MAR 10:22 Nanso, weewilyawe moolumo ale, ahothulana ni ahothama ni icuku, nlattu arina mihakhu cinci.
MAR 10:23 Awehaka nceresere, Yesu aheerela owiitthuca awe: Urikarika venci, atthu oothaciri ukela wumweneni wa Nluku.
MAR 10:24 Owiitthuca wahooma uwanoni, wowiiwa moolumo ala. Nanso Yesu ahopwahera: Asaana aka, cirikarikilyaya ukela wumweneni wa Nluku, ale ankhuluvela mihakhu.
MAR 10:25 Khavarikile uvira nkamira mwiithe wo sinkano, uhohiyana ukela thaciri wumweneni wa Nluku.
MAR 10:26 Ale yahotikhina wootepa nanlelo ni yanawiirelana ayayoru: Vano, tupani nohala woopwa!
MAR 10:27 Awehecesaka, Yesu ahaakhula: Na atthu khinooryaniya, nanso ni Nluku citthu cothene cinawooryaniya.
MAR 10:28 Peturu ahopacera unhimerya: Hi nihohiya cothene nihottharani.
MAR 10:29 Yesu ahaakhula: Khweeli kinawuhimeryani wiira khaawo ntthu nohala uhiya inupa awe, asunnawe, asirokorawe, athumwane na anumwane, asaana atthuna imatta awe nlattu wo Miyano, ni nlattu wo Nhupi Wooreera,
MAR 10:30 phihaakhela mpaka imaara iminya, nanano ukati ula urihula, inupa, asunnawe, asirokorawe, anumwane, asaana ni imatta, wamoca ni womolanihaciya, ni wahoolo ukumi woohimala.
MAR 10:31 Enci oopacera ankokhala uwiheerya, ni uwiheerya ankokhala oopacera.
MAR 10:32 Owiitthuca yaanaweetta ni iphiro, awelaka uYerusalemu, ni Yesu anaweetta uhoolo waya. Yanatikhina ni yaanantthara ni woova. Ahaakusa tho owiitthuca khumi na eeli, ahopacera wahimerya itthu yahala umwiiranela,
MAR 10:33 eeraka: Mwiiwe, ninawela oYerusalemu, ni Mwanawe Pinattamu naahala urwehiya mmatatani moolupale a mayasataka ni mayowantikha, na ale anaahala ummaanela umwiiva nuunrweha waasenci.
MAR 10:34 Anaahala untarawa, unsuwela wiitho, umwapsyulaca nuumwiiva, nanso nihuku noneeraru naahala wunwelela.
MAR 10:35 Yakopu ni Yohani, asaana a Sepetteu, yahomwattamerya ni yahomwiirela: Mwalimu, nimphavela, unipankele yothene inhalehu wulepela.
MAR 10:36 Yesu ahaakoha: Nnophavela kuupankeleni isiyani?
MAR 10:37 Yahomwaakhula: Wumweneni waa, nunkome, mmoca mono nlopwana, ni nkina mono nthiyana.
MAR 10:38 Yesu ahaakhula: Khannocuwela itthu inlepelenyu. Nnawoorya uwurya ikoopu inhalaka uwurya, ni waakhela upatiso unhalaka waakhela?
MAR 10:39 Yahomwaakhula: Aye, ninawoorya. Yesu ahaahimerya: Nnowowurya ikoopu inhalaka uwurya, ni nnowopatisiya ni upatiso unhalaka upatiseriya,
MAR 10:40 nanso, wunkoma mono nlopwana atthuna nthiyana kahi phi Mi kinvaha, anovahiya ale asunkeriye.
MAR 10:41 Akina khumi, yiiwakaru itthu ile, yahonyonyiya ni Yakopu ni Yohani.
MAR 10:42 Yesu aheehana ni aheerela: Nhocuwela cimpankaya alamuli onlaponi wiira acuwanehe iyulupale aya mmalokoni ni mahumu aya.
MAR 10:43 Nanso ni nyuva khunhala ukhala commo. Ntthu nophavela ukhala muulupale mwa nyu eepanke nrumeyi,
MAR 10:44 ni nophavela ukhala oopacera mwa nyu eepanke ipottha ya atthu othene,
MAR 10:45 nlattu Mwanawe Pinattamu khaawile uvareliya nteko, nanso uvara nteko ni uvaha ukumi awe wiira oopole atthu enci.
MAR 10:46 Yahophiya uYeriko. Wakhumaya uYeriko ni owiitthuca awe, ni mphwinko muulupale, Partimeu, mayoolepela oohoona, mwanawe Timeu, ahonkoma nceresere iphiro aphavelaka ulola.
MAR 10:47 Weewilyawe wiira Yesu o Nasaree anavira, ahokhuwa: Yesu, Mwanawe Taviti, ukoonele ikiriri.
MAR 10:48 Atthu enci yanankuphula wiira ammaalihe, nanso anapwaha ukhuwa khula imaara wootepa eeraka: Mwana a Taviti, ukoonele ikiriri.
MAR 10:49 Yesu aheemela ni aheera: Mmwiihane. Yahomwiihana ntthu uhoona yiiraka: Ulipe nrima, wunwe, nawiihana.
MAR 10:50 Ni ule, arulaka ikacako awe, ahotupha ni ahorwaa waYesu.
MAR 10:51 Yesu ahonkoha: Untthuna kupankele isiyani? Oohoona ahaakhula: Mwalimu, koone.
MAR 10:52 Yesu ahonhimerya: Urwee, ikupalelo aa ihowoopola. Ni nananoru ahoona ni ahontthara Yesu mphironi.
MAR 11:1 Naattamenrye uYerusalemu, vakhiviru ni Petifaki ni Petaniya, cooco ni mwako Olivera, Yesu ahaaruma owitthuca awe eeli,
MAR 11:2 ni ahaahimerya: Nrwee iwaani yowaattamana, mwakelaka nnamphwanya mwaapuru ootthukiya, hinaya uweliya ni ntthu. Mwantthukule ni nkiwiihere.
MAR 11:3 Akhalaka ntthu nookohani, nlattuni mpankaka ciicammo. Mwaakhule Apwiya anamphavela, ni ankowuturuselani wowakuvyaca.
MAR 11:4 Yahorwaa phumphwanyaka mwaapuru natthukeleliye wankhorani, mphante wovate woluwani, ni yahontthukula.
MAR 11:5 Ni atthu yaari wonwo yahokoha: Nnopankani muntthukulaka mwaapuru?
MAR 11:6 Yahaakhula toko Yesu cahimenrawe, ni yahaahiya urwaca.
MAR 11:7 Yahonrwehela Yesu mwaapuru uyo, yahonkhunela cowara caya, ni Yesu ahomwela.
MAR 11:8 Atthu enci yaanawatala cowara caya mphironi, akina yamwarusela miritha cikithi caathikinlyaya mmattani.
MAR 11:9 Atthu yahoonle na ale yantthara yanakhuwa: Hosaana, noreeriya nowa mwancina na Apwiya.
MAR 11:10 Uhoreeriya omwene umwa wa athumwanihu Taviti. Hosaana wonculu.
MAR 11:11 Ahophiya uYerusalemu, Yesu ahokela Inupa ya Nluku, ni namanle uweha citthu cothene canrukurenrye, wahokhala yocoocilo, ahokhuma, phurwaka uPetaniya ni owiitthuca awe khumi na eeli.
MAR 11:12 Wasilyaya wicisu wakhumaya uPetaniya, Yesu yahommola itala.
MAR 11:13 Oonaka uttayi mwiri wonhokorokho waari ni matakhuru aya makithi, ahorwaa uweha wakhala wiira uhaawo nhokorokho wowiima, nanso attameryaka, khaphwanyile, aphwanyile matakhuru paahi, kontha khawari ukati wowiima mihokorokho.
MAR 11:14 Aheerela vano: Hikhale tho nohala ulya cowiima caa. Ni owiitthuca awe yaheewa itthu ile.
MAR 11:15 Yahophiya uYerusalemu, ni akelaka Inupa ya Nluku ahopacera woomola mayothumiha, na ale yathuma wonwo, ahokakhela vathi meeca a atthu yaakakhaniha, ni ihice ca atthu yathuma ikhuntta.
MAR 11:16 Ni khaalevela wiira ikusiye itthu yakhuma Inupa ya Nluku.
MAR 11:17 Ni anaweetthuciha eeraka: Ihantikhiya: Inupa aka inowowihaninya inupa yoswali uneethi wothene. Nanso nyu nhotatusa nikhuku na namwiinya.
MAR 11:18 Oolupale a mayasataka ni mayowantikha yaheewa itthu ile, ni yaanaphavela mananna umwiiva, nanso yaanamoova, nlattu mphwinko wothene wanawuminya mwaano ni meetthuciho awe.
MAR 11:19 Wiila waya, yahorwaa utaa waya iparasa.
MAR 11:20 Uvira waya, wicisu, yahoona mwiri wonhokorokho unoomile, ni mitithari caya cothene.
MAR 11:21 Ni Peturu oopuwelaka, ahomwiirela Yesu: Wooneke mwalimu, mwiri wonhokorokho ulaphilyaa, uhooma.
MAR 11:22 Yesu aheerela: Munkupali Nluku.
MAR 11:23 Khweeli kinawuhimeryani, ntthu eerelaka mwako ula: 'Wiiphele nipuro niryaa wivonyere upahari', ni ahaanyihereke munrimani mwawe nanso akupaliki wiira itthu ihimilyawe inaahala wiiranyaa; khweeli, inawiiranyaa.
MAR 11:24 Phimaana, kinawuhimeryani wiira citthu cothene cinhalenyu ulepela nswaliki, nkupaliki wiira nnawaakhela, ni nnapattha.
MAR 11:25 Mwemelaka vale wiira nswali, mwakhalanaka mwamweetthu ni nkhwiinyu, munleveleke wiira Athumwaninyu, ari wirimu, yuuleveleleni cookosa cinyu.
MAR 11:26 Nlattu, mwahaleveleleke akhwinyu, Athumwaninyu ari wirimu khanhala ulevelela cookosa cinyu.
MAR 11:27 Yahoturuwela uYerusalemu, ni Yesu eettaka Mpani mwaNluku, oolupale a mayasataka, mayowantikha ni mahumu, yahomwaattamerya
MAR 11:28 ni yahoonkoha: Umpanka citthu nnya ni nlamulo nawani? Ulamulenle tipani upanka citthu nnya?
MAR 11:29 Yesu ahaakhula: Hata ni mi, kinawukohani itthu. Nkaakhule vano kinaahala wuhimeryani cineeraka woopanka citthu nnya ni nlamulo nawani.
MAR 11:30 Upatisu wa Yohani waari wo wirimu, atthuna wa atthu? Nkaakhule.
MAR 11:31 Yahopacera ukohana ayayoru, yiiraka: Neeraka, wo wirimu, naahala wiira, 'Nhinkupalenleni mweeco?'
MAR 11:32 Neeraka, wa atthu, ninawoova mphwinko. Nlattu othene yanamoona Yohani toko nnapiyu.
MAR 11:33 Umwiisoni yahomwaakhula: Khanincuwela. Ni Yesu aheerela: Hata ni Mi akinohimeryani ni nlamulo nawani kimpankaka citthu nnya.
MAR 12:1 Yesu ahopacera woolumacera ni malikanihero: Ahaawo ntthu aanle imatta yo vinyu, ahopophela nkuco, ahothipa nlitti no waameliya ivinyu ni ahoteka ipwaro. Wahoolo ahaahiyera ananteko arwaka ikwaha awe yoottayi.
MAR 12:2 Ukati woohephiya, ahonruma nrumeyi awe wiira aakhele nuusu no cowiima co mmattani.
MAR 12:3 Ale nanso, yahommara, yahomwaatta nuunturusela uttuli wohiitthu.
MAR 12:4 Ni ahonruma nrumeyi nkina. Ni uyo tho yahompwesa muru ni yahontarawa venci.
MAR 12:5 Ahonruma nkina, ni ule yahomwiiva. Ahaaruma akina enci, na ale yahaatta ni akina weeva.
MAR 12:6 Nahalenle nlelo mwanawe oofentiya, umwisoni ahonruma ule, eeraka: Anaahala unlemeliha mwanaka.
MAR 12:7 Nanso, ananteko yaheerelana ayayoru: Ule phinkokhalana imatta ila! Nrwee, nimwiive, ni imatta inakhala yawihu.
MAR 12:8 Yahommara ni yahomwiiva, nuunrihela nceresere imatta.
MAR 12:9 Mwaneene imatta ile nohala upankani? Nahala uturuwa ni weeva ananteko ayo, ni wahoolo, naahala waavaha imatta ananteko akina.
MAR 12:10 Khansomile cowantikhiya cittakattifu? Nluku nikhottiye ni mayoteka, nihothatuwa nluku no wanlothoni nowokolela inupa.
MAR 12:11 Itthu ila inkhuma wa Apwiya, ni iri yoothamaliya wamiithoni wihu.
MAR 12:12 Yaanawavya ummara, nanso yanawoova mphwinko, nlattu yaheeweha ratta, wiira nlikanihero nne naaca yaayo. Yahonhiya ni yahorwaca.
MAR 12:13 Wahoolo yahonrumihela mafarisi ni maherotiyano akina wiira ammare mmoolumoni.
MAR 12:14 Amwaattameryaka yahomwiirela: Mwalimu, nihocuwela wiira uri nlopwana eekhweeli, khaawo nonramelaa, nlattu khumweha makhalelo a ntthu, nanso unawiitthuciha iphiro ya Nluku, toko cinkhalaya yeekhweeli. Unihimerye, iri itthu yooloka atthuna yoohiloka unvaha nsoko Sesari? Ninvahe atthuna nihinvahe?
MAR 12:15 Yesu acuwelaka wototha waya, ahaakhula: Nnokittehacerani? Nkiwiihere nikopiri, koone.
MAR 12:16 Yahomwiihera ni ahaakoha: Yawani ila yocaphariya, ni yowantikhiya ila? Yahaakhula: Ya Sesari.
MAR 12:17 Yesu aheerela: Mumvahe Sesari itthu ya Sesari, ni Nluku itthu ya Nluku. Ni yahotikhinaca venci.
MAR 12:18 Wahoolo yahowa masatuseu, ale aneera khuwo wunwelela wa atthu ookhwa, yahomwaattamerya, ni yahonkoha Yesu:
MAR 12:19 Mwalimu, Musa honantikhela wiira ntthu ankhwelaka munnawe, pwahiyaka amwaarawe woohikhalana asaana, nhimaawe nolamuliya unthela nthiyana oohinnya wiira ahiye ipyo ya munnawe.
MAR 12:20 Vano yahaawo asunna saapa, ni oopacera uyo ahonthela ni ahokhwa woohahiya asaana.
MAR 12:21 Oonayeeli ahonthela nthiyana ahinye, ni uyo ahokhwa woohahiya asaana, ni ooneeraru uyo waheerannyaa ciicammo,
MAR 12:22 ni othene saapa yahokhwa woohahiya asaana. Wiimaleloni waya nthiyana uyo ahokhwa.
MAR 12:23 Vanhala wunweleliya, nthiyana nohala ukhala amwaara awani, nlattu asilopwana saapa ale yahonthela nthiyana ule?
MAR 12:24 Yesu ahaakhula: Nyu nnawithepyaca nlattu woohicuwela cowantikhiya cittakattifu hata ikuru ca Nluku.
MAR 12:25 Phimaana wanhalaya wunwelela mwaatthu ookhwa, khuwo utheliya, mena khuwo uthelana, nanso ammokhala toko ancelo o wirimu.
MAR 12:26 Nanso itthu inaciya mowunwelelani mwaatthu ookhwa, khansomile ikitapu ya Musa, itthu yeeranele ni nikukhu napharela woohivya, toko Nluku caamuulumacenryawe eeraka: Mi kiri Nluku a Aprahamu, Nluku a Isaaki, ni Nluku a Yakopu?
MAR 12:27 Khankhala Nluku a atthu ookhwa, nanso Nluku a atthu akumi. Nyu khanreere weetta ni ututhi.
MAR 12:28 Ahomwaattamerya mayowantikha eewile avanyihanaka, ni oonaka wiira Yesu aakhunle ratta, ahonkoha: Phinni nlamulo noopacera o malamuloni othene?
MAR 12:29 Yesu ahaakhula: Noopacera phi nna: Wiiwe Israel, Apwiya Nluku ihu pha Mwaneene Nluku veekhaya.
MAR 12:30 Wafente Mwaneene Nluku aa, ni nrima aa wothene, ni nnepa aa wothene, na ankhili aa othene, ni ikuru caa cothene.
MAR 12:31 Nonayeeli phi nna: Umfente nkhwaa toko we o mwaneene. Khaniwo nlamulo noopwaha ala.
MAR 12:32 Mayowantikha yahomwiirela: Ureera cinene, Mwalimu, khaawoothile eenryaa wiira Ule ri veekhawe ni khaawo tho nkina noompwaha Ule;
MAR 12:33 nuumfenta ni nrima wothene, ni ankhili othene, ni nnepa wothene ni ikuru cothene, nuumfenta nkhwaa toko mwaneene, iri itthu yootepa woovikana isataka coopahiya ni coovelelihiya cothene.
MAR 12:34 Yesu, oonaka wiira ntthu ule ahaakhula ni nruku, ahomwiirela: Khuri uttayi ni omwene wa Nluku. Ni khariwo tho unkoha itthu.
MAR 12:35 Eetthucihaka Mpani mwa Nluku, Yesu ahokoha: Mayowantikha ahimyaka cani wiira Mesiya phiri mwanawe Taviti?
MAR 12:36 Taviti mwaneene, athoonyeriyaka ni Nnepa Nttakattifu, heera: Apwiya yaheerela Apwiya aka: Wonkome moono aka nlopwana, mpaka Mi keese eenani aa vathivaya manyaa aa.
MAR 12:37 Taviti mwaneene namwiihana, Apwiya. Nokhalaka cani mwanawe? Ni mphwinko muulupale wanamwiiwa ni utteeliya nrima.
MAR 12:38 Wowiitthuciha, Yesu anawiira: Nkhale miitho, mwisunke ni mayowantikha unacivela uthoonyera coowara coorekama nuukohiya isalama mmapuwani;
MAR 12:39 wonkoma mapuro uhoolo nnsinakokani ni mapuro anliya isukuhuulu.
MAR 12:40 Anawalyacera anankwele yoothereryaka ni iswali coottaliva. Ala anowowaakhela ihukhumu yootepa.
MAR 12:41 Nonkomile nipuro naheliya coovelela yawehaka atthu yahela nsurukhu nkasani mwe. Mathaciri menci yanahela nsurukhu mwinci.
MAR 12:42 Ahowa nthiyana nankwele oothwenya, ahelaka makopiri meli ooyevaca, manaaya nikupatta nonecese.
MAR 12:43 Eehanaka owiitthuca awe, Yesu ahaahimerya: Khweeli kinawuhimeryani wiira nthiyana ula nankhwele oothwenya hohela woopwaha atthu othene ahenle nkasani yo nhakhu.
MAR 12:44 Nlattu, othene yahenle yohalahala muthacirini mwaya, nanso nthiyana oothwenya ahenle yothene yarinawe, ni khahalanne itthu hata yankani.
MAR 13:1 Wakhumaawe Mpani mwa Nluku owiitthuca mmoca ahonhimerya: Mwalimu, moone, maluku menci ale ni cootekiya nnya!
MAR 13:2 Yesu ahaakhula: Unawoona cootekiya nnye cuulupale? Khaninkela naahalaka nluku nimoca waculu nluku nikhwaya, cothene cimmotankuliya.
MAR 13:3 Ni nonkomile mmwako wo Olivera uhoolo waya Inupa ya Nluku, Peturu, Yakopu, Yohani ni Anteree, yahonkoha ntthikini:
MAR 13:4 Unihimerye wiira citthu nnye cinhala wiiranyaa yaakhani, ni ikanyero inhala uthonyera wiira citthu nnye ciri vakhiviru.
MAR 13:5 Yesu ahopacera wahimerya: Mwisunke wiira hikhale ntthu noothepyani.
MAR 13:6 Kontha, anaahala uwa atthu enci mwancina naka yiiraka 'Phi mi!' mpaka wathepya atthu enci.
MAR 13:7 Mwiiwaka cuulumaciyaka cokhotto, ni myaha cokhotto, nhituthuwe. Citthu nnye cinalamuliya wiiranyaa nanso khunakhalaka mwiso.
MAR 13:8 Nloko nimoca ninhala uvaraana ni nloko nikhwaya, omwene mmoca ni omwene nkhwaya. Ilapo inaahala uthukumela mapuro makina, ni immovola itala. Citthu nnye ciri mapacerero woona coowerya.
MAR 13:9 Nkhale miitho! Anaahala wurwehani upwaroni, nnaahala wapsyuliya nnsinakokani. Nnaahala weemesiya wa miithoni wa mayansatoro ni mamwene nlattu wo Miyano, wiira mmahe usaahiti wamiithoni waya.
MAR 13:10 Nanso woopacera Nhupi Wooreera unaahala uhimeriya maloko othene.
MAR 13:11 Vano mwakusiyaka wiira moolumaciye makhuce, nhoove itthu inhalenyu uhimya. Nanso nhimye itthu inhalenyu uvahiya ukati yooyo, kahi mweeco nyuva nnohala wuulumaca, nanso Nnepa Nttakattifu.
MAR 13:12 Munna naahala unrweha unokhwani munnawe, ni athumwane mwanawe; ni asaana ammowuulumacera makhuce athumwanaya, mpaka weeva.
MAR 13:13 Ni nnaahala wiinananinya nlattu wo ncina naka, nanso ntthu nohala ukhalana nthiti mpaka umwisoni, nowowoopwa.
MAR 13:14 Moonaka citthu co miikho cikhumelelaka toko itankuleliyo wahimphwanelaya ukhala (nosoma uyo eeweehe), vano ale ari uYutteya atthawele mmwakoni.
MAR 13:15 Ari wancarani ahikhuruwe hata ahikele mpani wiira akuse citthu caya.
MAR 13:16 Ari mmattani ahituruwele uwaani wiira yakuse coowara caya.
MAR 13:17 Atakhaliye pha ale ari ni irukulu, na ale anamwiha asaana mahuku ale!
MAR 13:18 Nswali wiira itthu ile ihiiranye ukati weyiita.
MAR 13:19 Nlattu mahuku ale coohosiya cinkokhala toko caharyaya ukhalakaru, ikhumelo wapattusilyawe Nluku ittuniya, mpaka nnava, hata khacinkela cakhalaka tho.
MAR 13:20 Ni yahari Apwiya akhuvehaka mahuku ale, hata ntthu khoopwa, nanso nlattu wa atthu oothanliya naahala ukhuveha.
MAR 13:21 Akhalaka ntthu nohimeryani: 'Mesiya ri vava!' atthuna, 'Umoone wonwo!', nhikupali,
MAR 13:22 kontha anaahala wunwa amesiya oowootha ni anapiyu oowootha ni ankopanka ikanyero ni cootikhineeha wiira yaathepye, wanooranyaya, hata oothanliya.
MAR 13:23 Nanso nyu, mwisunke; kihohimeryani cothene marapuroru.
MAR 13:24 Nanso mahuku ale, anamanle mahuviho ale, ncuwa ninaahala uripela, ni mweeri khunhala waarya,
MAR 13:25 itthoottwa cinaahala umora wirimu, ni ikuru conculu cinaahala upukunyiya.
MAR 13:26 Vano naahala wooniya, awaka mmahutteni Mwanawe Pinattamu ni ikuru cuulupale ni waarya.
MAR 13:27 Nahala waruma ancelo awe ni wathukumaniha atthu yathanlilyawe mittetthe co micese cophyoo, umalenlyaya ilapo nuumalenlyaya irimu.
MAR 13:28 Mwiitthuce, mweeco, nlikanihero no mwiri wonhokorokho. Miritta caya cakhalaka miheenya, ni capaceraka uphuwa, nhocuwela wiira iyiita iri vakhiviru.
MAR 13:29 Ciicammo nyu, moonaka ukumelela citthu nnya, ncuwele wiira Mwanawe Pinattamu ri vakhiviru, wankhora.
MAR 13:30 Khweeli kinawuhimeryani: Khanimmira nloko nna cihiraneele citthu cothene nnya.
MAR 13:31 Irimu ni ilapo cinaahala uvira, nanso moolumo aka khanhala uvira.
MAR 13:32 Nanso khaawo nocuwela nihuku nne, hata ukati ule, mena ancelo o wirimu, mena Mwana, nanso Athumwane paahi phincuwela.
MAR 13:33 Nkhale miitho, nrontte! Nlattu khannocuwela nihuku ninhalaya uphiya ukati ule.
MAR 13:34 Uri toko ntthu alakenle ikhwaha awe, ahiyaka inupa awe, ahaahiyera iyuulupale arumeyi awe, khula ntthu ahovahiya nteko woovara, ni ahonlamulela mayokhaliha wiira arontte.
MAR 13:35 Vano nrontte, nlattu khannocuwela ukati unhalaawe uwa mwaneene itthoko; toko yocoocilo, atthuna uhiyu iriyari, atthuna uneepile nthupi, atthuna wicisu,
MAR 13:36 wahikhumelele wiira, nawile ni wututuserani, huphwanyeni nrupaka.
MAR 13:37 Itthu inohimeryakani nyu, kinahimerya atthu othene: Nrontte!
MAR 14:1 Yahanle mahuku meeli uphiya isukuhuulu yo Pasikuwa ni nihuku ninliyaya mikatthe coohimiropo, oolupale a mayasataka ni mayowantikha yanawaavya mananna untthuka wo makhuce nuumwiiva.
MAR 14:2 Yanawiira: Itthu ila ihiiriye mahuku osukuhuulu wiira atthu ayo ahipanke ipokoho.
MAR 14:3 Yesu nari uPetaniya, nonkomile wameeca mpani mwawe Simoni omakunttula, ahowa nthiyana, acisile iphotiri yo nluku ya alapasturo inheliya makhura oonukhela yeehaninya narttu, anthumihiya ncurukhu mwinci, napwesile iphotiri, aheetthela makhura mmuru mwaYesu.
MAR 14:4 Nanso akina yahonyonyinya, yiirelanaka ayayooru: Ariheliyeni ciicammo makhura ala?
MAR 14:5 Yanawoorya uthumihiya ni ncurukhu iminya tharu, mpaka wakawela atthu oothwenya. Ni yahonkuphula nthiyana ule.
MAR 14:6 Yesu nanso aheera: Nhiyeke. Munkuphulelaka isiyani? Hokipankela itthu yooreera;
MAR 14:7 Kontha, atthu oothwenya phinakhalaneenyu, ni mwatthunaka nnawoorya waapankela cooreera, nanso miyano akinkhala ni nyu mahuku othene.
MAR 14:8 Ale ahopanka itthu yoonryaya. Ahoottiha ni makhura irutthu aka ahoolelihaka uvithiya waka kihinaaya ukhwa.
MAR 14:9 Khweeli kinawuhimeryani, wiira mwiilaponi mothene unhalaya ulalyaa Nhupi Wooreera, inaahala tho uhimiya itthu yapankilyawe wiira upuweleliye.
MAR 14:10 Vano, Yutta Iskariyoti, mmoca mwaale khumi na eeli, akenle woolupale a mayasataka wiira amulume makhuce Yesu.
MAR 14:11 Weewilyaya moolumo ale, cahaatteela mirima ni yahovanela ummaha nsurukhu. Yutta anawavya ukati wontumiha Yesu.
MAR 14:12 Nihuku noopacera no mikatthe coohimiropo, ukati waveleelihiya mwakhontwa o Pasikuwa, owiitthuca yahonkoha Yesu: Nnotthuna ulokiheriya vayi nipuro noonlya Pasikuwa?
MAR 14:13 Ahaaruma owiitthuca eeli ni aheerela: Murwee uparasa. Nnaahala umphwanya ntthu oocisa mwaapu wo maasi. Muntthare,
MAR 14:14 ni unkelaawe, munhimerye mwaneene inupa: Mwalimu nakoha: Inupa inhalaka umaka iri vayi, kinlyaka Pasikuwa ni owiitthuca aka?
MAR 14:15 Ni naahala wuthonyerani nsana nuulupale uculu nooreerihiya ni nowaaya; mwanilokihere nenno.
MAR 14:16 Akhumaka owiitthuca awe, yahorwaa uparasa, ni yahophwanya toko cahimeriyaya; ni yahontthonkomaniha Pasikuwa.
MAR 14:17 Wiila waya, Yesu ahophiya na owiitthuca awe khumi na eeli.
MAR 14:18 Anonkomacile alyaka, Yesu aheera: Khweeli kinawuhimeryani, mmoca mwa nyu, nolya ni mi, naahala ukuuluma makhuce.
MAR 14:19 Yahanca ucukulaca, yiirelanaka ayayoru: Kahi thi mi?
MAR 14:20 Yesu ahaakhula: Phi mmoca mwa nyu khumi na eeli, nokilyana nttiisi nimoca.
MAR 14:21 Nlattu, Mwanawe Pinattamu narwa, toko cantikhelyawe, nanso natakhaliya ntthu nohala unthumiha! Phatari ahiyariye.
MAR 14:22 Walyaya, Yesu ahokusa nkatthe ni nareerihile, ahomyaniha ni ahaavaha owiitthuca awe, eeraka: Nkuseke, nlyeke, ila phi irutthu aka.
MAR 14:23 Wahoolo ahokusa ikikhompe, ahosukuru ni ahaavaha ni othene yahowurya.
MAR 14:24 Ni ahaahimerya: Ila phi iphome aka, iphome yo waatana wonaanano, invuviheriya atthu enci.
MAR 14:25 Khweeli kinawuhimeryani wiira akinhala tho uwurya yowiima ila yo viteera mpaka nihuku ninhalaka uwurya tho wumweneni wa Nluku.
MAR 14:26 Aneepile ncipo, yahokhumaca arwaka umwako wo Olivera.
MAR 14:27 Yesu ahaahimerya: Nyu othene, uhiyu ula, nnaahala uhiya ikupalelo nlattu wo miyano, kontha ihantikhiya: Kinanrakaliha nhakheli ni ikhontwaa cinkomwaryaca.
MAR 14:28 Nanso kinonwelenle, kimmowuhoolelani wokela uKalileya.
MAR 14:29 Peturu aheera: Hata othene ahiye ikupalelo aya, nanso mi, mena.
MAR 14:30 Yesu ahomwaakhula: Khweeli kinawuhimeryani, ilelo uhiyu ula, nthupi uhinaya wiipa imaara piili, unakikhotta imaara tharu.
MAR 14:31 Nanso Peturu ahopwahera wakhula ni ikuru eeraka: Hata kilamuliye ukhwa ni nyu, akinookhottani. Ni othene yahoolumaca ciicale.
MAR 14:32 Yahorwaa nipuro neehaninya Yetsemani, ni Yesu ahaahimerya owiitthuca awe: Munkome vava mi kiswaliki.
MAR 14:33 Ahonkusa Peturu, Yakopu, ni Yohani, ni ahanca woova ni ucukula.
MAR 14:34 Ahaahimerya: Nnepa aka unacukula, icuku yo nokhwa. Nkhale vava ni nrontte.
MAR 14:35 Apwahaka vakani, ahowuluwela vathi ni ahoswali wiira wooryanyaa, ukati ula ukipwahe.
MAR 14:36 Ni ahohimya: Apa, Tiithi; Nyu nnawoorya cothene. Nkitamihe mmahuvihoni! Nanso, cihipankiye cintthunaka, nanso cintthuneenyu.
MAR 14:37 Uturuwa wawe, aphwanyile arupaka, ni ahomwiirela Peturu: Simoni unarupa? Khawoonrye wiliphila iwora imoca?
MAR 14:38 Mwiliphile ni nswaliki wiira nhithokociye. Nrima unatthuna ratta, nanso irutthu khinlipa.
MAR 14:39 Ahorwaa tho uswalini, akulelaka moolumo yaayo.
MAR 14:40 Ahoturuwa, ni ahaaphwanya arupaka kontha miitho aya yahocara ikhove. Ni khayoona yomwakhula.
MAR 14:41 Ahowa imaara yoneeraru mpaka waahimerya: Mpaka nna nnaarupa ni nnamumula tho? Wahotosa! Ukati uhophiya. Mwanawe Pinattamu naahala urwehiya mmatatani mwaatthu ookosakosa.
MAR 14:42 Muunwe, Nrwee! Kitumihile uyo hophiya.
MAR 14:43 Yesu oolumacaka nanlelo phaphilyawe Yutta, ari mmoca mwaale khumi na eeli, ni mphwinko muulupale wakhumile woolupale a mayasataka, mayowantikha ni mahumu ni warina ikatana ni ikopo.
MAR 14:44 Namakhuce ahaahimerya ikanyero eeraka: Nohalaaka unkoha isalaama, phi yooyo, mumvare ni munkuse natthukiye ratta.
MAR 14:45 Uphiya wawe, ahomwaattamerya ni ahomwiirela: Mwalimu! Ni ahonkoha isalaama.
MAR 14:46 Yahommara Yesu, ni yahontthuka.
MAR 14:47 Vano, mmoca mwaale eemenle wonwo, ahokumiha ikatana ahorakaliha ipottha ya nkhulupale a mayasataka, ahonthikila nnyaru.
MAR 14:48 Yesu ahaahimerya: Nkhumile ni ikatana ni ikopo uwa ukitthuka, toko mayohukha.
MAR 14:49 Kaari ni nyu mahuku othene mpani mwa Nluku, kiitthucihaka ni khamwakitthukile. Nanso wiira citthariheleliye toko caantikhiyaya.
MAR 14:50 Vano, anhiyaka, othene yahotthawa.
MAR 14:51 Ni ahontthara mmirawo mmoca eekhunenle ikuwo. Yahommara,
MAR 14:52 nanso ahiyaka ikuwo ile, ahotthawa pwitipwiti.
MAR 14:53 Yahonrweha Yesu wankhulupale a mayastaka wathukumannyaya othene oolupale a mayasataka, mayowantikha ni mahumu.
MAR 14:54 Peturu ahontthara uttayittayi mpaka nhina ipuwa ya nkhulupale a mayasataka. Peturu wonkomilyawe wamoca ni ananteko ootthaka mooro.
MAR 14:55 Vano, oolupale a mayasataka ni mayothukumana othene yaavya osaahiti, wowiira amwiive Yesu, nanso khayaaphwanyile.
MAR 14:56 Enci yaanahimya cowootha, nanso cahimilyaya khaweerana.
MAR 14:57 Ahaawo yeemenle ni uromola yowootha ila yiiraka:
MAR 14:58 Hi nihomwiiwa ahimyaka: Kinhala ukwanyula inupa ila, itekiye ni matata a atthu, ni mahuku mararu kinaahala uteka ikina yoohitekiya ni matata a atthu.
MAR 14:59 Nanso, hata ciicammo usaahiti aya khaweeranne.
MAR 14:60 Vano, muulupale o mayasataka aheemela iriyari aya atthu yathukumanne ni ahonkoha Yesu: Khunakhula itthu nhina osaahiti ommahaya atthu ala?
MAR 14:61 Yesu nanso ahomaala ni khaakhunle itthu. Muulupale a mayasataka ahonkoha tho: We uri Kristu, Mwana a Nluku Ooreerihiya?
MAR 14:62 Yesu ahaakhula: Kiri mi, ni nnaahala umoona Mwanawe Pinattamu nonkomile moono nlopwana wa Nluku Okuru, ni awaka mmahutteni o wirimu.
MAR 14:63 Vano, muulupale a mayasataka ahaahula coowara cawe ni aheera: Nimphavela tho vayi osaahiti?
MAR 14:64 Mwanamwiiwa ukufuru nwo. Nneera cani? Na atthu othene yahonhukhumu ukhwa.
MAR 14:65 Wahoolo, akina yaanapacera unsuwela, yahonkhunela wiitho ni ikuwo nuumwaatta yiiraka: Uhimyace nnapiyu! Ni mayorontta yahonkusa nuumwaattakaca.
MAR 14:66 Peturu neemenle vate wapuwani, ahophiya nanteko mwanthiyana a muulupale a mayasataka,
MAR 14:67 ni umoona wawe Peturu ootthaka mooro, ahomwehecesa ni ahomwiirela: We khweeli wari ni Yesu o Nasaree.
MAR 14:68 Ule nanso ahoruna, eeraka: Akinoncuwela, hata akineeweha inhimyaa iyo. Wahoolo ahokhumela vate iluwani, ni nthupi waheepa.
MAR 14:69 Nanteko mwanthiyana, umoona wawe tho, ahaahimerya atthu yaatamananyawe: Ula phi mmocaru.
MAR 14:70 Nanso ahoruna imaara yonapiili. Ukati vakani tho, ale yaari mmo, yahonhimerya Peturu: Khweeli we phi mmocaru, kontha uri nkalileya.
MAR 14:71 Nanso aholapha ni aholupela eeraka: Akinoncuwela ntthu nnomwaacenyu.
MAR 14:72 Ni nenna nna nthupi waheepa imaara yonapiili. Vano, Peturu ahoopuwela itthu yahimilyawe Yesu: Nthupi uhinaya wiipa imaara piili, we unaahala ukiruna imaara tharu. Ni vava ahopacera wunla.
MAR 15:1 Usakaru, yahothukumana oolupale a mayasataka wamoca ni mahumu ni mayowantikha, ni mayonthukumano othene; ni untthuka waya Yesu, yahonkusa ni yahommelela waPilatu.
MAR 15:2 Pilatu ahonkoha: We uri Mwene a Ayutta? Yesu ahomwaakhula: We uhohimya.
MAR 15:3 Ni oolupale a mayasataka yahonriyelela citthu cinci.
MAR 15:4 Pilatu ahonkoha tho eeraka: Khunakhula itthu? Woone, citthu cinci cinriyeleliyaa na atthu ala.
MAR 15:5 Yesu nanso khaakhunle tho itthu, ni Pilatu ahotikhina.
MAR 15:6 Nihuku nosukuhuulu, Pilatu aholemalela untthukula nantthukiya mmoca yantthunaya atthu.
MAR 15:7 Ahaawo nlopwana mmoca, eehaninya Parapasi, atthukiye wamoca na anaporonka nlattu yamwiivile ntthu ukati wonkhitto.
MAR 15:8 Mphwinko wa atthu, wahonwa ni wahopacera ulepela itthu yalemalenlyawe wapankela.
MAR 15:9 Pilatu ahaakhula: Nnotthuna wiira kutthukuleleni Mwene a Ayutta?
MAR 15:10 Nlattu ahocuwela wiira oolupale a mayasataka yamwiihenre nlattu woonrama.
MAR 15:11 Nanso oolupale a mayasataka yanatheperya mphwinko wiira phatari Pilatu antthukule Parapasi.
MAR 15:12 Pilatu ahaakoha: Kinhala umwiiriha isiyani ula nnomwiihanenyu Mwene a Ayutta?
MAR 15:13 Na ale yankhuwaca tho: Unkhomele wansalapani!
MAR 15:14 Vano Pilatu aheera: Tthekileni? Nanso ale yanakhuwaca: Unkhomele wansalapani!
MAR 15:15 Pilatu, atthunaka wamaaliha atthu ale, ahaataphulela Parapasi. Ni aholamula wiira Yesu apsuliye ni akhomeliye wansalapani.
MAR 15:16 Anakhotto yahonkusa upwaroni ya nsatoro, ni yaheehaninya anakhotto othene.
MAR 15:17 Yahomwariha ihancu yookhwiila, ni yahomweesa ikhilempa yo miiwa wamuru wawe.
MAR 15:18 Wahoolo yahopacera unkoha nretele yiiraka: Salaama, Mwene a Ayutta!
MAR 15:19 Yanamwaatta wamuru ni nthale ni yanansuwela ni ankhoromelaka yananlapela.
MAR 15:20 Wamanlyaya untarawaca yahonrula ihancu yokhwiila ni umwariha tho cawawe. Vano yahonkusa wiira akhomeliye wansalapani.
MAR 15:21 Yahommara athumwane Alisantere ni Rufu, eehaninya Simoni o Sirene aakhuma umawaani ni ahokanyererihiya ukusa nsalapa.
MAR 15:22 Yahonrweha nipuro neehaninya Kolokootha, manaaya, nipuro nokohi.
MAR 15:23 Yahommaha ivinyu yootakaniheriya ni miira, nanso ahokhotta uwurya.
MAR 15:24 Wahoolo yahonkhomela wansalapani. Ni akawelanaka cowara cawe, yahopanka mwaavi wiira yoone yahalaawe uphwanya khula ntthu.
MAR 15:25 Yaari iwora yoneeraru wakhomeliyawe wansalapani.
MAR 15:26 Waculu wawe yahantikhiya yariyeleliyawe: MWENE A AYUTTA.
MAR 15:27 Yahokhomeliya wamoca ni Ule, mayohukha eeli, mmoca, moono nlopwana, nkina moono nthiyana.
MAR 15:28 Ciicammo cootthariheleliya cowantikhiya cineera: Ahaalikeliya na atthu oonanara nrima.
MAR 15:29 Atthu yaavira ayo, yananruwana, apukunyaka muru, yiiraka: We! Watankulaca Inupa ya Nluku ni uteka tho mahuku mararu.
MAR 15:30 We wicoopole o mwaneene nuukhuruwe wansalapani!
MAR 15:31 Oolupale a mayasataka ni mayowantikha yanateehana, yiiraka: Hoopola akina ni khanoorya wicoopola mwaneene.
MAR 15:32 Akhuruwe naanano wansalapani uyo Kristu, Mwene o Israel, wiira nimoone ni ninkupali. Na atthu ale yakhomeliye ni Ule, yananruwana.
MAR 15:33 Waphilyaya ukati woothana ipiphi yahokhunela ilapo yothene mpaka yocoocilo.
MAR 15:34 Uphiya waya yocoocilo Yesu ahokhuwa ni ncu noorunya: Eloi, Eloi, lama sapaktani! Manaaya: Nluku aka! Nluku aka! Ukihiyenreni veekhaka?
MAR 15:35 Umwiiwa waya, akina yaari wonwo, yaheera: Moone, nomwiihana Eliya!
MAR 15:36 Mmoca mwaale ahothimakaca uwiha ntthoce nooheliya makari ahotthukelela muntathini ni ahommaha wiira awurye, ni ahohimya: Noone wiira Eliya nawa unkurusela vathi.
MAR 15:37 Akhuwaka ni ncu noorunya, Yesu ahokhwa.
MAR 15:38 Vano ikuwo yo Mpani mwaNluku yahaahuwa iriyariru ukhuma uculu mpaka vathi.
MAR 15:39 Muulupale a anakhotto eemenle cooco wariyawe Yesu, umoona wawe akhwaka ciicale, aheera: Khweeli ula ari Mwana a Nluku!
MAR 15:40 Yahaawo tho athiyana yemenle uttayi amwehaka; mwaale ahaawo Mariya Mantalena, Mariya anumwane Yakopu mwankani ni Yosefi, ni Saloome.
MAR 15:41 Wariyawe Yesu uKalileya yaayo yahontthara nunvarela nteko, ni athiyana akina enci yanvelenle wakenlyawe uYerusalemu.
MAR 15:42 Wiila waya, hapo wari ukati wowiitthenkaciya nihuku nontivela,
MAR 15:43 ahowa Yosefi o Arimateya, humu oocuwanyaa ni oottitthima, akhuluvenle uwa waya omwene wa Nluku, alipile nrima wokela waPilatu ni aholepela nrutthu wa Yesu.
MAR 15:44 Ni Pilatu ahaakaaka wiiwa wawe wiira hokhwa, ni amwiihanaka muulupale anakhotto ni ahonkoha akhala wiira khwile mwakhalayi.
MAR 15:45 Ni nahimeriye ni muulupale uyo, nrutthu ahovahiya Yosefi.
MAR 15:46 Yosefi nathumile ikuwo, ahokurusa nrutthu wansalapani, ni ahokhuneela ni ikuwo eyo. Wahoolo ahommitha mmahiye yathipiye wamwalani ni ahopirikisela nluku nuulupale wankhora wo mahiye.
MAR 15:47 Mariya Mantalena, ni Mariya anumwane Yosefi yahoona nipuro navithiyawe.
MAR 16:1 Uvira waya nihuku no ntivela, Mariya Mantalena, Mariya anumwane Yakopu ni Saloome yahothuma makhura oonukhela ni yahorwaa uttikitthela nrutthu wa Yesu.
MAR 16:2 Wicisu ncuwa nikhumaka nihuku noopacera nosumana, yahorwaca umahiye.
MAR 16:3 Yanawaakaaka yiiraka: Tipani nokela unipirikisela nluku nno wankhora wo mahiye?
MAR 16:4 Nanso, awehaka, yahoona wiira nluku nopirikiseliya nceresere ni nari nluku nuulupale cinene.
MAR 16:5 Ukela waya mmahiye yahomoona mmirawo nonkomile moono nlopwana, awanre ihancu yooteela, ni yahotuthuwa.
MAR 16:6 Uyo nanso, ahaahimerya: Nhituthuwe. Nnomwavya Yesu o Nasaree akhomeliye wansalapani. Honwelela, khaawo va. Moone nipuro namweesilyaya.
MAR 16:7 Vano, murwee, mwahimerye owiitthuca awe ni Peturu wiira Yesu naahala wuhoolelani uKalileya. Wonwo nnaahala umoona toko coohimenryaweni.
MAR 16:8 Akhumaka umahiye yanatthawa ni uthukumela nlattu wo woova. Khayanhimenrye ntthu itthu ile nlattu wo woova.
MAR 16:9 Nonwelenle, wicisu aya nihuku noopacera isumana, Yesu ahonkhumelela woopacera Mariya Mantalena, yola ankumihilyawe macini saapa.
MAR 16:10 Uyo ahorwaa wacuweliha ale yakhanle ni Yesu, yeetta acukulaka ni yiikhupanyaka.
MAR 16:11 Ale nanso, wiiwa waya wiira Yesu ri nkumi, ni Mariya ahomoona, khayaakupanli.
MAR 16:12 Wahoolo aheeconeha nnanna nkina wasilopwana eeli yeetta ni iphiro, arwaaka umawaani.
MAR 16:13 Ayo yahoturuwa wiira yacuwelihe akhwaya, nanso na ayo khayaakupanli.
MAR 16:14 Wahoolo waya, ahaakhumelela owiitthuca awe khumi na mmoca alyaka, ni ahaakuphula nlattu wohikupali ni uturumala waya nrima, kontha khayaakupanli ale yamoonne nonwelenle.
MAR 16:15 Ni aheerela: Murwee ilapo yothene mwaalake atthu othene ni Nhupi Wooreera.
MAR 16:16 Ntthu nohala ukupali ni upatisiya naahala woopwa, nanso ntthu hinhala ukupali, naahala uhukhumwiya.
MAR 16:17 Ikanyero cinhala waatthara atthu ookupali phi nnya: Mwancina naka, ankowomola minepa coonanara, ankowuuluma moolumo oonaanano;
MAR 16:18 ankovara inwaa, ni yawuryaka itthu yowiiva, khinhala wapanka itthu; ammowathatela matata aretta, na ale anaahala uvona.
MAR 16:19 Vano, Apwiya Yesu anoolumanne owiitthuca awe yahakheleliya wirimu, ni ahonkoma moono nlopwana wa Nluku.
MAR 16:20 Vano arumeyi yahokhuma ni yahorwaa ulaka mapuro othene ni Apwiya yahaakavihera, yoneehaka nuulumo na Apwiya ni ikanyero cavelenle.
JAM 1:1 Mi Yakopu, ipottha ya Nluku ni ya Apwiya Yesu Krisitu, kinasalameeha mahimo khumi na meeli, amwareenle mwilaponi mothene.
JAM 1:2 Asunnaka, nkhalane utteeliya cinene wophwanyakani ukati woottehattehiya,
JAM 1:3 ncuwelaka wiira nroromelo ninyu nno nalawihiyaka phinkhalanaya nlipihero.
JAM 1:4 Nlipihero nihaana nivaraka nteko woomalela wiira nyuva nkhale oomalela, weeyiintthu ni wohihaleela itthu.
JAM 1:5 Wakhala wiira haawo hirina ankhili, anlepele Nluku, navaha atthu othene woohimatthepwa ni nawaakawa.
JAM 1:6 Nanso alepele nuuroromela woohaakanyaca; kontha ule nakanyaca ri toko mawimpi ompharyaa, ankusiya ni wuutuwanyinya ni iphyoo.
JAM 1:7 Uyo huupuwele wiira nawaakhela itthu ya Apwiya,
JAM 1:8 maana ri ntthu oohilakela ni oohilipelela iphiro cothene cineettawe.
JAM 1:9 Munnihu oothwennya atteeliye nlattu wowuunuwihiya,
JAM 1:10 ni oopuha atteeliye nlattu wowiiyeviha, kontha nacuwela wiira mahuku awe ari vakani toko ithutu contakhwani.
JAM 1:11 Ncuwa noopaka ni nivihaka, yowaaliya inawuuma, ni ithutu aya inanyaala ni ureera waya unaamala. Ciicammo, mayoopuha naakhala oonyaala mphironi mwawe.
JAM 1:12 Horeeriya ntthu noovilela waphiyaka ukati woottehattehiya; kontha, alawihiyaka, nowa uvahiya ikhwerempa yookumi, yeeyo Apwiya yaroromelihilyaya ale anafenta.
JAM 1:13 Hikhale neera, attehattehiyaka eeraka: Nluku phinkitteha. Kontha khanlamuliya uttehattehiya ni itthu yoonanara ni uyo khaawo nonttehawe.
JAM 1:14 Uhiya commo, khula ntthu nottehattehiya ni wunlela wawe citthu, vano wunlela wawe nwo wantepelaka unamooryaca.
JAM 1:15 Vano wunlela nwo wanttokotthelaka untothola itaampi; ni itaampi iyo inontothola nookhwa.
JAM 1:16 Asunnaka oofentiya, nhithepiye.
JAM 1:17 Khula ivahiya yooreera ni khula itthuvo yoomalela inkhuma wirimu, cikhuruwaka wa athumwanaya waarya, ahinrukunuwa toko mitthuuci cihirina nipuro noweemela.
JAM 1:18 Ni wootthuna wawe, ule honipattusa ni nuulumo neekhweeli, wiira nikhale nlipu nokhiyumpe cawe.
JAM 1:19 Asunnaka oofentiya, nkiiwe: Nyu ncuweleke nnya citthu nnya: ntthu phi ntthu nolamuliya ukhala owaakuva wiiwa, oohipuphela wuulumaca, ni oopica uviruwa;
JAM 1:20 kontha uviruwa wa ntthu khunphwanyiha isariya ya Nluku.
JAM 1:21 Phimaana, nhiye unyala winyu nwo ni coonanara cimpankenyu nnyo, nkuse ni imaani nuulumo niphatteeliyenyu nno, nenno nihaana ikuru cowoopola iroho cinyu.
JAM 1:22 Vano, nkhale oweettela nuulumo, nhimakele wiiwa paahi, mwithepyaka veekhenyu.
JAM 1:23 Kontha, ntthu eewaka nuulumo nno ni heettelaka, nolikana toko ntthu neewehera waloolani, oonaka ikhove awe yeephattuwelo.
JAM 1:24 Wahoolo neewehenrene naathama, ni wowaakuvyaca naaliyala weenryaya ikhove awe iyo.
JAM 1:25 Nanso ule nohelelela aviriyanaka nlamulo noomalela, nlamulo nowoopola, akhanyereraka weettela, wohiira wiiwa nuuhiya, nanso woorya uvarela nteko, ula ntthu ula nokhala ooreerihiya mpaka ni nteko umpankawe uyo.
JAM 1:26 Ntthu eehelaka ukhala nattiini, ahiyaka ulokiha nlimi nawe, nanso phiithepyaka, ittiini awe iyo iri yo mahala.
JAM 1:27 Ittiini yomaana ni yeekhweeli inoncivela Nluku Athumwanihu, phi ila: Waathotola akhwaacuni ni minankhwele ukati unhuvaaya ni wiisunka omwaneene woohinyala toko cineettiyaya ntuniyani.
JAM 2:1 Asunnaka, nakupaliki Apwiya ehu Yesu Kirisitu aneene uttitthima, nihaahiyaniheke atthu ayo.
JAM 2:2 Phimaana, awaaka ntthu mapuro anthukumanenyu, oonwara nnela owooru mmakokhoni mmo, nawaracile ikuwo comaana, wahoolo phikelaka tho ntthu nkina oohuva ni oothaaleliya,
JAM 2:3 vano phaahawulanihaka wowaakhelela vaa, ni phimwiirelaka oowaraca ikuwo comaana uyo: Nyu vaa, mmweke mowunkomeke va nipuro noolemela nuuphwanenleeni. Vano oohuva uyo phimwiirelaka: We, weemeleke vaa, atthuna uweke wawonkomeke waryaka va.
JAM 2:4 Mwapankaka ciicammo nheehawulaniha ayaayoru ni nheepanka mayahukhumu owuupuwela coonanara.
JAM 2:5 Nkiiwe, asunnaka oofentiya: Nluku haathanla atthu owooninya uhuva mwilaponi wiira akhale athaaciri muukupalini ni akhale mayoophwanya umwene wo wirimu waalupelenlyawe ale anonfenta.
JAM 2:6 Nanso, nyu akina vaa, nnawannyohola mayoohuva. Khaanakhala athaaciri phinootulumuni? Khaanakhala yaayo phinoorwanani upwaroni onoolumiya milattu?
JAM 2:7 Khaanakhala yaayo phinnyohola ncina nomaana ninromoleliyeenyu?
JAM 2:8 Nyu mweettela malamulo o omwene wa Nluku, mwanapanka toko cinhimyaya cowantikhiya: Unfente nkhwaa toko cineefentaa umwaneene, unapanka yooreera.
JAM 2:9 Nanso, mwaahiyanihaka atthu nnopanka itaampi, ni nnaahala uhukhumwinya ni malamulo toko mayootthekaca.
JAM 2:10 Ule noorya weettela malamulo othene, nanso phivonyanihaka nipuro nimoca, nalikeleliya ukosera othene.
JAM 2:11 Phimaana, ule eenre: Nheette uluva, ciicammo holamula eeraka: Nhiive. Vano, waheetteke uluva, nanso unawiiva, unkhala ntthu oovonyiha nlamulo.
JAM 2:12 Toko cineerenyu ni cinoolumacenyu, mpankeke ciicammo ncuwelaka wiira nnohala uhukhumwinya ni nlamulo nowiithawala.
JAM 2:13 Kontha ule hirina ikiriri naahala uhukhumwinya wohi ikiriri. Ikiriri cinatthema ihukhumu.
JAM 2:14 Asunnaka, nohala uphurani ntthu neera: Mi kihaana nroromelo nanso woohivarela nteko? Unoona wiira nenno nroromelo nno khaninoopola.
JAM 2:15 Akhala wiira mwamunninyu atthuna mwanrokorinyu hothaaleliya atthuna hovoliya itala yo khula nihuku,
JAM 2:16 ni mmoca wa nyu phimwiirelaka: Urweke ni mpuha, wawareke ni walyeke womaana, wohinvaha imphavelawe; mpankileni yooreera?
JAM 2:17 Ciicammo, nroromeloru paahi, noohivareliya nteko, ninkhala nookhwa.
JAM 2:18 Vano haawo nohala wiira: We uhaana nroromelo, ni mi kihaana miteko. Ukithoonyere nroromelo naa noohimiteko ni mi kinawuthonyera nroromelo naka ni miteko caka.
JAM 2:19 We unakupali wiira ri Nluku mmoca paahi. Wahoreera! Ciicammo asotwani anakupali ni anattettemela!
JAM 2:20 We, oomphuku! Khuncuwela wiira nroromelo noohivareliya nteko khanirina icaayira?
JAM 2:21 Aparahamu athumwanihu ookhalayii, khayaavahiye isariya nlattu wo miteko waanvaherenraaya mwanaya Isaki wanipuroni noosataka.
JAM 2:22 Vano wooneke wiira nroromelo ni miteko cineetta wamoca, ni nroromelo nimaliheriya ni miteko.
JAM 2:23 Coo phitthariheleliyaya yowantikhiya yiiraka: Aparahamu honkupali Nluku ni hoheeliya ukhala nasariya, ni uyo heehaninya mpwanawe Nluku.
JAM 2:24 Mooneke wiira ntthu novahiya isariya nlattu wo miteko, woohikhala nroromeloru.
JAM 2:25 Wanlikana toko puuta Rahapi; waavahiyawe isariya nlattu wopanka yooreera, aavahaka nipuro atthu oohottela ni wathonyera iphiro ikina.
JAM 2:26 Ciicammo irutthu yohiroho inkhala yookhwa, philikanaya nroromelo nohikhalana coopankiya ninkhala nookhwa.
JAM 3:1 Asunnaka, nhunlele ukhala othene mayoosomiha, maana nhocuwela wiira hii, nineetthuciha, phi hii ninkela utepa uhukhumwiya.
JAM 3:2 Othene ninakosa wo mananna oovirikana. Ntthu aahikoseke nlattu wo wuulumaca, uyo ri nttuntthu, ciicammo nawoorya usunka irutthu awe yothene.
JAM 3:3 Nahelelaka iyuma malaku okhavalu wiira ciniiwelele, ciicammo ninawoorya weettiha irutthu aya yothene.
JAM 3:4 Nthonyero enyu ukhale wokalawa; cinookhalaru cuulupale ni cittinkihiyaka ni iphyoo cuulupale, cineettihiya ni ileemi yankani cinene, toko cintthunawe nocika.
JAM 3:5 Ni ciicammo phinlikanaya, nlimi waryaya itthu yankani iri mwiirutthuni, ninawiittottopa nlattu woopanka citthu cuulupale. Nkoonani, itakhwa yuulupale impariheliyaya ni mooro mwankani.
JAM 3:6 Phi ciicammo, nlimi nihu niri mooro; nlimi niri ituniya yotaampi. Ninaheliyeene iriyari yorutthu ihu ninaannanariha irutthu yothene, ninaparihela makhalelo ookumi, ni mpaka ni nno ninapariheliya omooroni.
JAM 3:7 Phimaana ikhapila cothene conama, coovava, cowiipurula ni compharyaa cinasinnttiya ni cinsinnttiya na atthu,
JAM 3:8 nanso nlimi khaawo ntthu noorya usinntta. Niri noonanara woohimala ni noocara nrette wo wiiva.
JAM 3:9 Ni nenno, ninanttitthimiha Pwiya Athumwanihu; ciicammo ninawaalapha atthu, apattusiye oolattana ni Nluku.
JAM 3:10 Malaku mamoca yaayo paahi, inakhuma iparakha ni ikilapho. Asunnaka, khavanreera wiira citthu nnya cikhaleke coo.
JAM 3:11 Uhopaca woona waluusi akhumaka maasi oociva na ayo ootumpurya nipuro nimoca nenno?
JAM 3:12 Asunnaka, nrale uhopaca wiima maphepu atthuna mphepu wiima nrale? Hata vakani, khawanoorya iluusi yo maasi ootumpurya ukhuma maasi oociva.
JAM 3:13 Tipani iriyari inyu ri aankhili ni oocuwelaca? Aathonyihere makhalelo omaana nuupisa nrima wa ankhili.
JAM 3:14 Waahikhaleke commo, munrimani mwinyu mmo nhaana urama wootepa ni wiihelela, vano nhiittottope ni nhoothe nveehaka ikhweeli.
JAM 3:15 Ala ankhili ala, khaankhuma wirimu, nanso ari omwiilaponi moomu; khaanakhala o munnepani, nanso asotwani.
JAM 3:16 Phimaana nipuro niri uramana ni wiihelela, ciri iporonka ni coonanara cinci.
JAM 3:17 Nanso ankhili ankhuma wirimu ari ooreera, osalaama, onnema, eemaani ni oocara ikiriri, ookumiha mihokorokho comaana, oohihawulaniha ni oohiithepya.
JAM 3:18 Ni wosalaama phinwiihaya isalaama ale anaala nhokorokho wosariya.
JAM 4:1 Cinkhumelela vayi ikhotto nnyo ni waanaca winyu ayaayoru nwo? Cinkhuma nkhwiluni cinaana mwirutthuni mwinyu mmo.
JAM 4:2 Nnakhalela nttima ca akhwinyu ni khannophwanya. Nnawiiva ni nnarama nanso khannophwanya. Makhalelo enyu ari owiiva ni waana ikhotto. Nnavekela nanso khannakhela, kontha khannovekela ratta.
JAM 4:3 Nnophavela mwaphwanyaka nrihakaceleke nkhwiluni mwinyu mmo.
JAM 4:4 Nyu mayooluva, khannocuwela wiira upatthanana ituniya unkhala mwiinani awe Nluku? Ule nophavela ukhala mpwana awe ituniya, neepanka mwiinani a Nluku.
JAM 4:5 Atthuna nnoona wiira waari wopure cihimilyaya cowantikhiya ciiraka: Nnepa univahilyawe wiira ukhale ni hii uhaana ihace?
JAM 4:6 Nanso uyo nanivaha nnema nuulupale. Phimaana cowantikhiya ciiraka: Nluku nawaarusanana owiittottopa nanso nawaavaha nnema oowiyeviha.
JAM 4:7 Phimaana, mmwiiwelele Nluku. Munkhottele sotwani ni uyo phinhalawe wuutthawani.
JAM 4:8 Mphiyeke wa Nluku, ni uyo phinhalawe wuuphiyerani! Anataampi, nnyaweke ni nrapiheke nrima, nyu anamirima miili.
JAM 4:9 Ncukuleke ni muunleke. Mwakakhaniheke uthyaa ni wunla, utteeliya ni ucukula.
JAM 4:10 Mwiiyevihe wa miithoni wa Apwiya ni ayo phinhalaya uwunnuwihani.
JAM 4:11 Asunnaka, nhaapanane. Ule nomwaapa munnaawe atthuna unhukhumu munnaawe, noolumacera yoonanara ni nohukhumu malamulo. We wamakelaka uhukhumu malamulo, khuneettela, nanso wiyeesile ukhala mayoohukhumu.
JAM 4:12 Nlamuli ni hukhumu ri mmoca paahi, yoole noorya woopola nuukwanyula. Vano we, tipani oonhukhumu nkhwaa?
JAM 4:13 Vano nviriyane, nyu nneeresa: Ilelo atthuna meelo, ninaarwa iparasa yonese, ni ninkookhala mwakha mmoca nimweettaka nakoso nuuphwanya nhakhu.
JAM 4:14 Nyu khancuwenle itthu inhala wuukhumelelani meelo. Ukumi inyu uyo unookhala isiyani? Nyu nri toko itthapwe inkhuma ni ukati vakani inamwaryaca.
JAM 4:15 Uhiya wuulumaca commo, fatari wiira: Apwiya yatthunaka ni anivahaka ukumi, ninapanka ila ni ile.
JAM 4:16 Nanso, nna, nnasamela citthu cinoopuwelenyu upanka. Wiisamiha toko coo inkhala itthu yoonanara.
JAM 4:17 Phimaana muupuwele ratta: Ule nocuwela wiira nolamuliya upanka yooreera, pihipankaka, naakosa.
JAM 5:1 Vano nviriyane, nyu mathaaciri! Ncukule ni munle mwanlattu wo mahuviho anhala wuphwanyani.
JAM 5:2 Mihakhu cinyu nnyo, ikuwo cinyu ni coolya cinyu, cihontta ni ciholiya ikuttihi.
JAM 5:3 Iwooru inyu ni ipheeta enyu cihonyela urenci. Vano urenci uyo phinhala ukhala saahiti owuuttonkani ni wuulalihani toko waneerihaya mooro. Nyu nhothacirera mahuku oomalela.
JAM 5:4 Mooneke. Ncurukhu wa ananteko yoorula mmattani mwinyu ayo, nhaalivaka, unakhuwela wuttonkakani nyenyu vaa. Wiikhupanya wa anakanyari uhophiya mpaka mmanyaruni mwa Apwiya a anakhotto.
JAM 5:5 Nyu nheetta mpuhaka ni nhovolela ikhwilu cothene cucivenleni vathi va. Nhorittimalihera mirima cinyu nnyo nihuku noohitiya.
JAM 5:6 Nnanhukhumu nuumwiiva nasariya, wohiwiirihani itthu.
JAM 5:7 Phimaana asunnaka, nkhale oovilela, mpaka wanhalaya uwa Apwiya. Kinawoona mayoolima navilela awehereryaka yoolya yo mmattani, mpaka wammwaya ipula coopacera ni coomalihera.
JAM 5:8 Ciicammo nyu nkhale oovilela ni oolipa nrima, kontha uwa wa Apwiya uri wakhiviru.
JAM 5:9 Asunnaka, nhittokuttani ayaayoru wiira nhihukhumwinye. Hukhumu uyo ri wankhora!
JAM 5:10 Asunnaka, niwehere minapiyu coolumaca mwa ncina na Apwiya, ciinryaya woohuva nuuvilela.
JAM 5:11 Kinawoona nineerela ahoreeriya ale yiisunkile ni uvilela. Nnawiiwaka uvilela wa Yopi ni nhoona yaceenryaya. Apwiya ari oocara uthunku ni ikiriri.
JAM 5:12 Asunnaka, hata mwiirihiye cani, nhilupele nromolaka wirimu, atthuna vathi va, ni hata itthu phi itthu iheliye nhilupelele. Yakhalaka khweeli, mwiireke khweeli, yakhalaka mena, mena, wiira nhihukhumwinye.
JAM 5:13 Wariyari winyu vaa haawo nohuva? Aswaliki. Haawo tteeliye? Eepeke icipo coolemeliha.
JAM 5:14 Wariyari winyu vaa haawo nowerennya? Arume urweliya ahooleli okereeca, wiira yoonswalele ni anttikitthele makhura, mwancina na Apwiya.
JAM 5:15 Iswali yowaamini navona nretta ni Apwiya anaanwusa; ni wakhala wiira nookosa, naleveleliya.
JAM 5:16 Phimaana, nlaphulule itaampi cinyu nnyo waakhwinyu ni nswalelaneke wiira nvonihiye. Ulapa wa nasariya uhaana ikuru yoolipa.
JAM 5:17 Eliya aari ntthu, oolikana makhalelo ayo toko hii. Ule ahoswali venci wiira ihirupe ipula, ni khweeli ilapo yothene khayaarupile ipula mpaka umala myakha miraru ni nuuso.
JAM 5:18 Ahaakulela tho uswali, vano irimu yahovaha ipula vathi nuumela mihokorokho.
JAM 5:19 Asunnaka, wariyari winyu vaa akhalaka ntthu hiile ikhweeli, vano aturuselihiyaka ni nkhwawe,
JAM 5:20 ncuwele wiira ule nonturusiha nataampi warukurerya cawe, nawoopola iroho awe wuukhwani ni cinakhuneelya itaampi cinci.
