﻿San Mateo.
17.
Búsan taahuarim simsuko, Jesús am nüka, Perota, Jacobota, entok Juan ä sailahua. Huanäi am nuk siika, júya káhuit jikahui bempolaim. 
Huanäi bem bíchäpo täbuiasi áu yáuhuak. Ä pújbahua täata bénasi bélojkosi bíttuy; ä sánkohua éntok tósalisi aayuk, machiriata bénasi. 
Ímïri Moisés entok Elías ámeu yeu machiak, áamak ettejhuaka. 
Huanäi Peero Jesústau ínel jiaahua: —Señor, ¡türi ito béchïbo jü ímï anhuame! Enchi ínel éayo, báij jötamte ímï yáanake: huépülak emo béchïbo, senuk entok Moiséjta béchïbo, entok senuk Elíasta béchïbo. 
Ketune áapörik ä nokayo, namu machiriaka am róptiak. Huanäi jíahui namupo jíkkaijtuk, ínel jíaka: —Ïri ájäria jü ín Üusi ín nákëhui. Áamakne al‑leiya; áapörikem jíkkaja. 
Jume discíipulom íkäi jíkkajakam tónommey jáptek. Huanärim buíau tájti kom kóbatek, tüisi májhueka. 
Huanäi Jesús ámeu rúkteka ámet mámtek, ínel jíaka: —Jáptëem; entok katem májhue. 
Huanäi bempo jikau remteka, kaabetam bitchak, Jesústa áapolaik jíbba. 
Të chúkula júya káhuit kömam sájako, Jesús ám sáhueka ínel ámeu jiaahua: —Juka enchim bíchakäu, kaabetem ä téttejhua, ál‑la chúkula béja kókkolam násuk juka Yoremta Üusi jíabiteko. 
Huanäi ä discíipulom ä nátemajek, ínel jíaka: —¿Jatchiaka júntuk jume escriibam ä úttiä tíiya, jüka Elíasta bát yebijnakëhui? 
Jesús am yómmiak, ínel jíaka: —Lútüriapo, Elías bát yebijnake; huanäi sïmeta bemelasi yánake. 
Tëne ínel enchimmeu jiaahua, Elías béja yebissuk, të katim ä täyak, ál‑lam sïmeta bem yáa bárëu áu yáuhuak. Ínëli kétchi jü Yoremta Üusi áme bétana jiokot yáana. 
Huanäi jume discíipulom huitti jünëiak, Juan Bautistata bétana ä nokaïhui. 
Juka genteta yún anëu am yájako, senu yoreme áu yepsaka tónommey áu kíkteka ínel jiaahua: 
—Señor, ín üusi táij múmukemtë nák jiokolë, tüisi jiokot áu bíbicha; bueïtuk juebénasi táijpo huehueche, entok juebénasi bäapo. 
Huanäine jume em discíipulommeu ä nüpak, të ímëri én tájtim kara ä tüte. 
Jesús ä yómmiaka ínel jiaahua: —¡Eme nat tómti kat‑riam kaita súalëram, entok sïmekut kaa türik joame! ¿Jauhuey tájtisune ikäi enchimmet ayukamta enchimmet bit yáatinake jäni? Inohuem ä huéria. 
Jesús kuttílasi át nésahuek, jü lemooniotachi. Huanäi ïri át yeu siika, jü usitachi. Huanäi naateka türilataka taahuak. 
Huanäi ä discíipulom bempola sékäna Jesústau yájaka, ínel áu jiaahua: —¿Jatchiaka ítapo kara yeu ä béebak? 
Jesús ínel ámeu jiaahua: —Diostat éehuame ilikkik enchim jípure béchïbo. Lútüriapone ínel enchimmeu jiaahua, eme mojtaasa báchiata béechisi Diostat éätek, ïri júya káhuittau ínel jíätek: “Sékänë emo yetcha”, huanäi sékäna áu yécha éiyey. Ínëli enchim béchïbo kaita kara yáataka tahua éiyey. 
Të jü ilë béna kökoa lemoonio, ayuunopo entok oraciónimmaki jíba yeu sisime. 
Galiléa buiärapo bempörim aneyo, Jesús ínel ámeu jiaahua: —Ínapo jü Yoremta Üusi yóremem mámpo tóijna. 
Huanärim ä mënake; të báij taahuarim huéy jíabitenake. Huanäi bempo tüisi sirokoka taahuak. 
Capernaum pueblou am yájako, Perotahuim yájjak, jume impuesto tómita náu totojame, ínel jíaka: —¿Jü enchim Maestro kaa am bébejtua, jume guoy dracmam? 
Áapo am yómmiak: —Jeehui. Huanäi jóapo ä kibakek, Jesús bát au nookak, ínel jíaka: —¿Jáchisë ä bitcha, Simmom? Jume ímï buíapo réyesim, ¿jábetasum ä úuhua, juka impuesto tómita: jume bem jóapo uusim, ö jume kaa áma joomem? 
Peero ä yómmiak, ínel jíaka: —Jume kaa jóapo joomem. Huanäi Jesús ínel áu jiaahua: —Júnëli jume usim jóapo joome béja kaita béjtua. 
Júnentaka junne, kaa am omtinakë béchïbo, bahuehuë sika anzuelota áman jímma. Huanäi juka kúchuta bát em yeu huíkekäu, Akë ä nüye huanäi ä tem étapokätek. Huanäre áma ä téunake, tómi estaterota. Íkäre nüka am mákka, íno béchïbo entok émo béchïbo. 
