﻿ዋንሳ ቆንጭꬃ.
3.
«ሰርዴሰ ዎስ ኬꬅ ኪታንቻይስ Ꮊይ ጋርክ ዬጊ ጻፎባ። ላፑን ጾስ አያንታኔ ላፑን ጾልንትታ አይኬዛይ Ꮊይ ጋርክ ዬግዛ፦ ታኒ ነ ኦሳ ኤርዛ፤ ሱንꬅስ ነ ፓꬅ የዛ ዝን፥ ነ Ꮊይቄዛ። 
ባርኮባ! Ꮊይቆዳይስ ሄሌዝታኔ አቴዝ ጽቃ ዎልቃ ምንꬆባ። ነ ኦሳይ ታ ጾሳይ ቲና ፎሎ ማቂ በንተካያ። 
ይኬ፥ ነ ኤኬዝባዝኔ ስኤዝባዝ አካኮባ፤ ናጎባ፤ ነ ናጋራይፕ ማቆባ። ኔኒ ባርካም እጽኮ ታ ነ ቆፐካዝን ካይዞ ጋርክ ኔኮ የኦዳ፤ ታ አባ ዎደ የኦዳዛኮ ነ ኤሮያ። 
ዝን ፋ ማኦ ቅትሶዋ ጽቃ አስታይ ሳርዴሳ የዛ። ኡንትስ ቤዝዛ ባዝ ማቄዝ ግሾስ ቦꬅ ማኦ ማኢ ታር የꬎዳ። 
ጋምዝ ኦንካ ኡንቲሳይ ጋርክ ቦꬅ ማኦ ማኦዳ። ታኒ ኤ ሱንꬃ ደኦ ማጻፋይፕ ኡጫሚ። ታኒ ታ አዳይ ቲናኔ ታ አዳይ ኪታንችታይ ቲና ኤ ታባዝ ማቄዛና ማርካቶዳ። 
አያናይ ዎሳ ኬꬅታይስ ግዝባዝ ስእዝ ሀየር የዝ ኦንካ ስኦ። 
«ፍላደልፋ ዎሳ ኬꬅ ኪታንቻይስ Ꮊይ ጋርክ ዬጊ ጻፎባ። ጌሽኔ ቱማንቻይ፥ ዳዉተ ቁልፐ ፋ ኩሸ አይኬዛይ፥ Ꮊይ ጋርክ ዬግዛ፦ ኤ ጎርድን ኦንካ ዶዮዳይስ ዳንዳኦያ፤ ማ ኤ ዶይን ኦንካ ጎርዶዳይስ ዳንዳኦዋ። 
ታኒ ነ ኦሳ ኤርዛ፤ ይኬ ታ ነ ቲና ኦንካ ጎርዶዳይስ ዳንዳኦዋ ዶያ ፐንገ ጋዴዛያ። ነ ዎልቃይ ጽቃ ማቅኮካ፥ ታ ቃላ ናጌዛ፤ ታና ካደካ። 
አይሁደ ባዛር ፋና አይሁደ ግዝ ዎርድታኔ ጻላሄ ባግታ ኔኮ ኮኦዳኔ ነ ቲና ጹጉንꬆዳ። ታ ነና ዶስዛያ ኡንታን ኤርሶዳ። 
ኔኒ፥ ‹ጋርዦባ› ግ ታ ኪቴዝ ኪታ ናጌዝ ግሾስ ኩንꬅ አላማ ፋጮዳይስ የኦድ ዋየ ዎዳይፕ ታኒ ነና ናጎዳ። 
ታኒ ኤልሲ የኦዳ፤ ኦንካ ነ ዛዉዳ ኤካማይ ጋርክ ኔስ የዛ ባዝ ሚንꬂ አይኮባ። 
ጋሜዛና ታ ጾስ ካራ ቱስ ኡዶዳ፤ ኤ ኤዛይድ መꬍናስ የዞዳ። ታኒ ታ ጾሳይ ሱንꬃኔ ታ ጾሳይ ካታማይ ሱንꬃ ኤዛል አፋ ጻፎዳ፤ እዛካ ታ ጾስ ካለፕ ዎꬍዝ ኦሮꬅ የሩሳላመ። ማ ታ ታ ኦሮꬅ ሱንꬃካ ኤዛል አፋ ጻፎዳ። 
አያናይ ዎሳ ኬꬅታይስ ግዝባዝ ስእዝ ሀየ የዝ ኦንካ ስኦ።» 
«ሎዶቃ ዎሳ ኬꬃ ኪታንቻይስ Ꮊይ ጋርክ ዬጊ ጻፎባ። ‹አምንኤ› ማቄዝ አማንንቴዝ ቱማ ማርካይ፥ ጾስ መትꬅ ኡባ ሃርዛይ Ꮊይ ጋርክ ዬግዛ: 
ታኒ ነ ኦሳ ኡባ ኤርዛ፤ ኔኒ እርጻ ዎይ ምሻ ማቀካያ፤ ኔኒ ናምአይፕ ፐታ ማቄዛኮ ኔስ ሎኦ ዝኒ! 
ኔኒ እርጻ ዎይ ምሻ ባ ቦልኦ ማቄዝ ግሾስ ታ ነና ታ ዶናይፕ ጩቶዳይስ ሀንዛ። 
ይኬ፥ ኔኒ፥ ‹ታኒ ዱረ፥ ጋመ ሻሎር የዛ፥ ታስ አብካ ፓጨካያ› ነ ዬግዛ። ዝን ኔኒ ሶንቄዛ፥ ማንቆ፥ ቶአኔ ካሎቴዛ ማቄዛና ኤሮያ። 
የይ ግሾስ፥ ነ ዱርቶዳይስ ታማር ጌዤዝ ዎርቃ፥ ነ ዬላ ካሎ ካሞዳይስ ቦꬅ ማኦኔ ሎእꬅ በአዳይስ ማድዛ ኣፈ ꬋለ ታፕ ዎንጎዳይ ጋርክ ታ ነና ዞርዛ። 
ታ ታ ዶስዝታ ካጭዛኔ ሴርዛ፤ ይኬ ሉሎባ፤ ነ ናጋራይፕ ማቆባ። 
ዬዛኮ፥ ታ ባለር ኤቂ ጼጎዳ። ኦንካ ታ ጼሳ ስኢ፥ ጋዛራ ዶይኮ፥ ታ ኤኮ ገሎዳ፤ ኤዛር ፐትፕ ካꬃ ማዳ፤ ኤካ ታራ ፐትፕ ማዳ። 
ታ ጋሚ ታ አዳይራ ኤ ዙፋናይል በቴዛይ ጋርክ ጋሜዛይ ታራ ታ ዙፋነል በቶዳይ ጋርክ ማዉተ እንጎዳ። 
አያናይ ዎሳ ኬꬅታይስ ግዝባዝ ስእዝ ሀየር የዝ ኦንካ ስኦ» ዬጌዛ። 
