﻿ዋንሳ ጻፌዝ ኪታ.
1.
ቲናፕ አይኪ የዝ፥ ደኦ ቃላይ ባጋ ኑ ይንትስ ጻፍዛ። Ꮊ ደኦ ቃላይ ኑ ኑ ሀየር ስኤዝ፥ ኑ ኣፈር በኤዝ፥ ኑ ኩሸር አይኬዛያ። 
የ ደኦ እንግዛይ ቆንጭን፥ ኑኒ ኤዛ ብኢ፥ ኤባዝ ማርካትዛ። አዳይ ካለ የዛይ ኑስ ቆንጬዝ፥ መꬍና ደኦባጋ ይንትስ ኦዶዳ። 
ኑራ ይንትስ ፐትፐትꬂ የዞዳይ ጋርክ ኑኒ በኤዛናኔ ስኤዛና ይንትስ ኦዶዳ። ኑ ፐትፐትꬃይ አዳይራኔ ኤ ናአ የሱስ ክርስቶሳር ዎላ። 
ኑ ኡፋይሳይ ፎሎ ማቆዳይ ጋርክ Ꮊያ ይንትስ ኑ ጻፎዳ። 
ኑኒ ኤፕ ስኢ፥ ይንትስ ኦድዛ ኪታይ፦ «ጾሲ ፖኦ፤ ኤዛር ꬉማ የሻ ባያ» ዬግዛያ። 
ኑስ ኤዛር ፐትፐተꬂ የዛ ዬግታር ኑ ꬉማ የዝኮ፥ ኑኒ ዎርዶትዛ። ቱማካ ኑር ባያ። 
ዝን ኤ ፖኦ የዛይ ጋርክ፥ ኑካ ፖኦ የዝኮ፥ ኑስ ዎል ጋንጨ ፐትፐተꬂ የዛ። ኤ ናአ፥ የሱሳ ሱꬃይ ናጋራ ኡባይፕ ኑና ጌሽዛ። 
ኑኒ፥ ኑር ናጋራ ባያ ጊኮ ኑ ኑና ዶሽዛ፤ ኑር ቱማትꬅካ ባያ። 
ዝን ጾሳይስ ኑ ናጋራ ቡጽኮ፥ ኤ ኑ ናጋራ አቶ ጎዳይስኔ ኑ ቆሆ ኦሶ ኡባይፕ ኑና ጌሾዳይስ፥ አማንንቴዛያኔ ጌሻ። 
ኑኒ ናጋራ ኦꬄካ ጊኮ ጾሳና ዎርዶ ከስዛ፤ ኤ ቃላይካ ኑር ባያ። 
