﻿ያይቆባ ጻፌዝ ኪታ.
1.
ጾሳ ጎዳ የሱስ ክርስቶሳ አይላይ፥ ያይቆባ፥ አላመ ኡባይል ላልንቴዝ ታጶ ናምኢ ሼሽታይስ ኪቴዝ ኪታ። ሳሮ፥ ይንትስ ማቆ። 
ታ እሹንꬆ፥ ይንታን ዱማ ዱማ ፓጨ ሄልኮ ይ ሎኦ ባዝ ደንጌዛይ ጋርክ ኡዲ ኩንꬅ ኡፋይሳር ኤኮይታ። 
ይ አማናይ ፓጭንታይ ይንትስ ጋርዦ እንግዛና ይ ኤርዛ። 
ይ ዉርስꬅ ሄሎዳይስ ይባታር ዳንዳእኮ አብካ ፓጨካ ይንታን ፖሎኔ ኩንꬅ ማሆ። 
ይንታፕ ኦስካ ኤጨትꬂ ꬋብኮ ጾስ ዎሶ። ኤ ይንትስ እንጎዳ። ጾሳይ ኦናካ ቦረካዛር ኡባይስ ኬሃትꬃር እንግዛ ጾስ። 
ዝን ዎስታር አማኖር ሰኤካዛር ጾሳ ዎሶ። ሰእዛ ኦንካ ጫርኮ ኤንእስን ኤንእዛ አባ ዙሎ ጋርከ። 
ናምኢ ቆፋ የዛይነ ፋ ኦጋይል ኤቆያ ኦንካ ጎዳይፕ አብካ ደማዳ ኣዝፐ። 
አማንዛ ማንቆ አሳይ፥ ጾሳይ ኡንታን ꬎቅ ኡዶድ ግሾ ኡፋይቶ። 
አስ ዱረትꬂ ፉ ጋርክ ꬋብዛ ግሾስ አማንዛ ዱረ አሳይ ጾሳይ ኡንታን ዝቂ ኡድኮካ ኡፋይቶ። 
አዋይ ፋ ምሻር ከዚ ማታ መልስዛ፥ ፉꬋ ጉፍስዛ፤ ኤ ሎኦትꬃይካ ꬋብዛ። የይ ጋርከካ፥ ዱረ አሳይ ፋ ኦሶር ዳቡርታር ꬋቦዳ። 
መቶ ጋሚ ኣꬌዛይፕ ጉየ፥ ጾሳይ ፋና ቃꬊዝታይስ እማድ ግ ቃላ ጫቆ ገሌዝ ደኦ ዛዉደ ኤኮድ ግሾስ መቶር ጋርዥዛ አስ አንጅንቴዛያ። 
ኦንካ ፓጭንትዛ ዎደ «ታና ጾሳይ ፓጬዛ» ጊፐ። ጾሳይ ኢታር ፋጮያ፤ ማ ኤ ኦናካ ፋጮያ። 
ዝን ፐቲ ፐቲ አስ ፋ ኢታ አሞትꬃር ጎሽንትታራነ ዶሽንትታር ፓጭንትዛ። 
የይፐ ጉየ፥ አሞትꬅ ዎደጺ ናጋራ የልዛ፤ ማ ናጋራ ድጪ Ꮊይቆ የልዛ። 
ታ ሲቆ እሹንꬆ፥ ዶሽንትፓተ። 
ሎኦ እሞኔ ኩንꬅ አንጆ ኡቢታይ ሳሎፕ ይእዛ። የይካ ኩያ ጋርክ ኡባ ዎደ ዉቶዋ ዎይ ላምንቶዋ ፖእታይ አዳይ ጾሳይፕ ይእዛ። 
ኑኒ፥ ኤ መትꬅስ ባይራ ማቃድ ጋርክ ኑና ቱማ ቃላር ፋ ሸነር የሌዛ። 
ታ ሲቆ እሹንꬆ፥ Ꮊያ ዶግፓተ። አስ ኡባይ ስኦዳይስ ኤልሶ፥ ዝን ኦድንቶዳይስኔ ካጭንቶዳይስ ኤልስፐ። 
አስ ካቺ ጾሳይ ጽሎትꬃ ኮኦያ። 
የይ ግሾስ፥ ቱና ሀኖኔ ኢታትꬅ ኡባ ꬋብሲ፥ ጾሳይ ይ ዎዝና ጋንጨ ቱኬዝ ይ ሸምፖ አሾዳይስ ዳንዳእዛ ቃላ ሃዮትꬃር ኤኮይታ። 
ዝን ጾስ ቃላ ኦሶል ፔሾይታፕ አትን ስእꬅ ኣዳር ይንታን ዶሽፓተ። 
ቃላ ስኢ ኦꬆዋ አሲ፥ ኤ ፋና ማስቶተር ብእዝ አስ ጋርከ። 
ኤ ፋና ብኢ ማቂ ቅትዛ፥ ዝን ኤ አብ ኣዝዛኮ ኤልሲ ዶግዛ። 
ዝን ኦንካ ዋሎ ከስዛ ፎሎ ህገ አካካር ብኢ፥ ካሊ ናግዛይ፥ ስኤዛና ዶገካ ኦሶል ፔሽዛ አꬃይ፥ ፋ ኦሶ ኡባይር አንጅንቶዳ። 
ፋ እራንꬃ ናገካዛር ጎይንዛ ግዝ አꬃይ ፋና ዶሽዛ፤ ኤ ጎይናይ ጨረ። 
ጾስ አዳይ ቲና ቦሮ ባ ጌሽ ጎይናይ Ꮊያ፦ ዥኦ ናእታኔ አምእታ ኡ መታይድ ማደኔ አላመ ቱናፕ ፋና ናጎ። 
