﻿ጳዉሎሳ ኤፍሶነ አሳይስ ጻፌዝ ኪታ.
1.
ጾስ ሸነር ክርስቶሳ የሱሳ ሀዋረ ማቄዝ ጳዉሎሳፕ፥ ኤፍሶነ የዝ ጌሽታይስኔ ክርስቶሳ የሱሳ አማንዝታይስ ጻፍንቴዝ ኪታ። 
ጾስ ኑ አዳይፐኔ ጎዳ የሱስ ክርስቶሳፕ ኣꬎ ኬሃትꬅኔ ሳሮትꬅ ይንትስ ማቆ። 
ሳሎ የዝ አያና አንጆ ኡባይር ክርስቶሳ ባጋር ኑና አንጄዝ፥ ኑ ጎዳ የሱስ ክርስቶሳ አዳይ፥ ጾሳይ ጋላትንቶ። 
ኑኒ ኤ ቲና ገሸትꬃር ቦሮ ባዝታ ማቆዳይ ጋርክ ጾሲ አላመ መꬊንቶዳይፕ ቲና ክርስቶሳ ባጋር ፋ ሲቆር ኑና ዶሬዛ። 
ጾሲ ፋ ሸናይድ ፋ ዶሴዛይ ጋርክ የሱስ ክርስቶሳ ባጋር ኑና ፋ ናእታ ኡዶዳይስ ቲናቲ ቆፒ ጋዴዛ። 
ጾሲ ፋ ሲቅዛ ናአይ ባጋር ኑስ ጨረ እንጌዝ ቦንችንቴዝ ኣꬎ ኬሃትꬃይ ጋላትንቶዳይ ጋርክ የያ ኡዴዛ። 
ጾሳ ኣꬎ ኬሃትꬅ ዱረትꬃይ ጋርክ ክርስቶሳ ሱꬃር ዎዝንቲ ናጋራስ አቶትꬅ ኑ ደንጌዛ። 
ፋ ኣꬎ ኬሃትꬃ ኤጨትꬃራኔ ኤራትꬃር ጋንꬂ ኑስ እንጌዛ። 
ጾሳይ ፋ ቆፒ ጋዴዛይ ጋርክ ክርስቶሳ ባጋር ኤ ሸነ ጹራ ኑ ኤሮዳይ ጋርክ ኦꬄዛ። 
ዎደ ሄሎዳር ጾሲ ፖሎዳይስ ቆፔዝ ቆፋይ፥ ሳሎኔ ሳአ የዝ መትꬅ ኡባ ክርስቶሳፕ ኦሞ ኡዶዳይሲ። 
ኡባ ባዝ ፋ ሸነ ጋርክ ኦꬅዛ ጾሳይ፥ ቲናቲ ፋ ቆፒ ጋዴዛይ ጋርክ ክርስቶሳ ባጋር ኑኒ ኤ እርስታ ላቶዳይ ጋርክ ኑና ዶሬዛ። 
የይ ሀኔዛይ፥ ክርስቶሳል ኡፋይስ ጋዲ ናጎር ቲና ማቄዝ ኑኒ ጾስ ቦንቻ ጋላታር ቆንጭሶዳይ ጋርከሲ። 
ይንትካ ይ አቶትꬅ ዎንግለ፥ የይካ ቱማ ቃላ ስኤዝ ዎደ ክርስቶሳ አማኔዛ። ጾሳይ ይንትስ እንጎድ ጌዝ ጌሻ አያና ማታመ ይንታል ጋዴዛ። 
የይካ ጾስ ቦንቻይ ጋላትንቶዳይ ጋርክ ጾሳይ ፋ አሳ ዎዞድ ጋꬆ ጌሻ አያና ኑ ላቶድ ጋዳይስ ኑስ ሳꬅ ኡዲ እንጌዛ። 
የይ ግሾስ፥ ጎዳ የሱሳል ይንትስ የዝ አማናኔ ጌሽታይስ የዝ ይ ሲቃ ታ ስኢ 
ታ ዎሳይር ይንታን ቆፕታር ይ ግሾስ ጾሳ ጋላትዛና አሸካያ። 
ኑ ጎዳ የሱስ ክርስቶሳ ጾሳ፥ ቦንቾ ኣዳ ይ ኣꬂ ኤሮዳይ ጋርክ ኤጨትꬅኔ ቆንጭꬅ አያና ይንትስ እማዳይ ጋርክ ታ ዎስዛ። 
ጾሳይ ይንታን ጼጌዝ ኡፋይሳይኔ ጌሽታይ ላትዛ ቦንቾ ላታይ አብ ጋርክ ጋሜዛኮ ይ ኤሮዳይስ ጾሳይ ይ ዎዝና አፋ ዶዮድ ጋርክ ታኒ ጾሳ ዎስዛ። 
ማ ኤዛ አማንዛ ኑር ኦꬅዛ ኤ ዎልቃይ አብ ጋርክ ኣꬎ ዳማዛኮ ይ ኤሮዳይ ጋርክ ታ ዎስዛ። 
ክርስቶሳ Ꮊይቆፕ ደንꬂ፥ ሳሎ ፋ ኡሻች ባጋር በትꬄዝ ክርስቶሳር ኦꬄዝ ግታ ዎልቃ። 
ኤ ሱንꬃይ፥ አቅስዝታይፐነ ማዉተር የዝታይፕ፥ ሞድዝታይፐኔ ጎድታይፕ፥ ኣꬅ ማቂ Ꮊ አላማይል ኣዳ ባዝን ቲናፕ የኦድ አላማይዳካ ሀራ ሱንꬅ ኡቢታይፕ ኣꬎ ቦንቾ ሱንꬅ እንጌዛ። 
ጾሳይ ኡባ ባዝ ክርስቶሳ ቶኬ ኦሞ ሃርሴዛ፤ ማ ዎሳ ኬꬅስ ኡባ ባዛር ኩስተ ማቃዳይ ጋርክ ኤዛ ሹሜዛ። 
ዎሳ ኬꬃይ ክርስቶሳስ አሰትꬂ። እዛካ ክርስቶሳ ኡባባዛር ኩንꬅዝ ኤስ እዛ ኤ ኩንꬃቶ። 
