﻿2ቆሮንቶሳ.
9.
አማንዛ አሳይስ ከስዛ ሚሽያባጋ ታ ይንትስ ጻፎዳይስ ኮሾያ። 
ይ ማዶዳይስ ሎእꬅ አሞትዛና ታ ኤርዛ። ይ አካያ አሳይ፥ ዝቅነበረፕ አይኪ ማዶዳይስ ጊግንቴዛና ታኒ ማቃዶና አሳይስ ዶና ኩንꬅ ኦዴዛ። ይ ግታ አማይካ ኡንታፕ ጋምታ ደንꬅꬄዛ። 
Ꮊ ኦሳይድ ይንታል ኑ ጬቅንትዛ ጬቃይ ጨረ ማቃማይ ጋርክ ቲና ይ ባጋ ታ ኦዴዛይ ጋርክ ይ ጊግንቲ ናጎዳይ ጋርክ Ꮊ እሽታ ይንትኮ ኪቴዛ። 
ማቃዶና አሳይ ታራ ይኢ፥ ይ ጊግንተካዝን፥ ደንግኮ፥ ኑ ይንታል ዬላቶዳ፤ ማ ይ ኑፐ ኣꬎ ዬላቶዳ። 
የይ ግሾስ፥ Ꮊ እሽታይ ታፕ ቲናቲ ይንትኮ Ꮊንጊ፥ ይ እንጎድ ጌዝ እሞ ቲናቲ ጊግሶድ ጋርክ ታ ኡንታን ኪቴዛ። ታኒ ሄሎዳር ያ እማይ ጊጊ በትዛ። የ ዎደ የ ኬሃትꬃር እማይ ዎልቃር ባዝን ዶሶር ማቄዛና ኤርስዛ። 
ጽቃ ዘሬዛይ ጽቃ ሺሾዳ፤ ጋመ ዘሬዛይ ጋመ ቡጮዳ ዬግዛያ አካኮይታ። 
ጾስ ኡፋይሳር እንግዛ አꬃ ዶስዛ ግሾስ ዎልቃር ዎይ ሞርኤር ባዝን ፐቲ ፐቲ አስ ፋ ዎዛናይር ቆፔዛይ ጋርክ ዶሶር እንጎዳይስ ቤዝዛ። 
ኡባ ዎደ ኡባ ባዛር ይንታን ዳንዳእ ሎኦ ኦሶ ኡባይስ ፔሾዳይስ ይንትስ ግዶዳይ ጋርክ ጾሳይ ይንትስ ፋ አንጆ ጋንꬆዳ። 
ጌሻ ማጻፋይድ፥ «ኤ ፋ ሻላ ማንቅታይስ ላሌዛ፤ ኤ ጽሎትꬃይ መꬍናስ የዝዛ» ዬግዛ። 
ዘርዛይስ ዘረꬅ፥ ማዳይስ ካꬃ እንግዛ ጎዳይ፥ ይ ዘርዝ ዘርꬃ ጋንꬂ እንጎዳ። ይ ጽሎትꬅ ኣፋካ ጋንꬆዳ። 
ጋመ አሳይ ይ እንግዛ እማ ኑፕ ኤኪ፥ ጾስ ጋላቶዳይ ጋርክ፥ ይ ኡባ ዎደ ጋንꬂ እንግዝታ ማቆዳይ ጋርክ ጾሳይ ይንታን ኡባ ባጋር ዱርሶዳ። 
Ꮊ ይ እንግዛ እማይ አማንዛ አሳይ ፓጨ ኩንꬆ ኣዳ ባዝን አሳይ ጾሳ ጋላትዛ ኦገ ማቅዛ። 
Ꮊ ይ ኦሳይ ይ አማና ኤርሲ ክርስቶሳ ዎንግለ ይ አማኔዛኔ ኤስ ኪትንቲ ይንትስ የዛ ባዝ ኡንታራኔ Ꮊንክታይር ሻክንቴዝ ግሾስ ኡባይ ጾሳ ቦንቾዳ። 
ጾሳይ ይንትስ እንጌዝ ኣꬎ ኬሃትꬃይ ግሾስ ኡ ይንትስ ጾሳ ዎስታር ይንታን በአዳይስ ላሞትዛ። 
ዛዋ ባ ጾስ እማይስ ጾሳይ ጋላትንቶ። 
