﻿1ቆሮንቶሳ.
8.
ኤቃስ ያርሽንቴዝ ካꬃ ባጋ ማቅኮ ኑ ኡባይ ኤርዛ። ኤራትꬂ ኡትርስዛ፥ ዝን ሲቆ ድችዛ። 
ኦንካ ፋና ኤርዛ ግ ቆፕኮ፥ ኤ ሀጋ ኤሮዳይስ ቤዝዛይ ጋርክ ሀጋ ኤረካያ። 
ዝን ኦንካ ጾስ ሲቅኮ ኤ ጾስ ካንታ ኤርንቴዛያ። 
የይ ግሾስ፥ ኤቃስ ያርሽንቴዝ ካꬃ ሙስባጋ ማቅኮ Ꮊ አላመል ጎዲ ፐቲ ጾሳይፕ አትን ሀራ ባ ግሾስ ኤቃ ፓꬆዋ ባዝ ማቄዛና ኑኒ ኤርዛ። 
ጾስ ባዛር ሳሎራኔ ሳአር ጾሰ ግንትንቲ ጼግንትዝ ጋመ ጾስታይኔ ጎድታይ የዝኮካ፥ 
ኡባ ባዝ መꬌዝ፥ ኑ ኤ ባጋ ማቄዝ፥ ፐቲ ጾሳይ፥ አዳይ ኣዳ፥ ኑስ የዛ። ኡባይ ኤ ባጋር መꬍንቴዛ፥ ኑካ ኤ ባጋር የዝዝ ፐቲ ጎዳይ፥ የሱስ ክርስቶሳ ኑስ የዛ። 
ዝን የያ ኤርዝታይ ኡብታ ባያ። ፐቲ ፐቲ አሳይ ኤቃ ጎይንዛ ግሾስ ካꬃ ሚዝ ዎደ ኤቃስ ያርሽንቴዝ ባዝ ኡዲ ኤክዛ። የ ዎደ ኡ ካሃይ ዳቡራ ማቄዝ ግሾስ ቱንዛ። 
ዝን ካꬃ ኑና ጾሳር ዳቦꬆያ። ኑ ማም እጽኮ አኮካ ቆህንታሚ፤ ማ ሚኮካ ማዳሚ። 
ዝን ይ ኮዬዝ ባዝ ማዳይስ ማዉተ ይንትስ የዝኮካ የይ አማኖር ምንገካዝታ ꬉባማይ ጋርክ ናግንቶይታ። 
ኔኒ ነና ኤራንቾ ግ ኤቃስ ያርሽንቴዝ ካꬃ ማዳይስ ኤቃ ካራ በቴዝን፥ አማኖር ምንጌካዛይ ነና ብእኮ የይ ኤዛ ኤቃስ ያርሽንቴዝ ካꬃ ማዳይ ጋርክ ደንꬅꬆሳኔ? 
ይኬ፥ ነ ኤራትꬃይፕ ደንዴዛይድ ክርስቶሳ ኤ ግሾስ Ꮊይቄዝ፥ አማኖር ምንገካ ነ እሻይ፥ ꬋብዛ። 
የይ ጋርክ ኡዲ፥ አማኖር ምንገካ ይ እሽታ ቆህታራኔ ኡ ካሃ ሱꬅታር ክርስቶሳና ቆህዛ። 
የይ ግሾስ፥ ካꬃ ታ እሻ ꬉቢዛባዝ ማቅኮ፥ ኤ ꬉብንታማይ ጋርክ አሾ የሻ ታ ማሚ። 
