﻿ጳዉሎሳ ቆሮንቶሳ አሳይስ ጻፌዝ ቲና ኪታ.
1.
ጾስ ሸነር የሱስ ክርስቶሳስ ሀዋረ ማቆዳይስ ጼግንቴዝ ጳዉሎሳኔ፥ ኑ እሻ ሶስተናሳ፥ 
ቆሮንቶሳ የዝ ጾስ ዎሳ ኬꬅስ፥ የሱስ ክርስቶሳር ጌዤዝታኔ ጌሽ ማቆዳይ ጋርክ ጼግንቴዝታይስ፤ ማ ኡንትስኔ ኑስ ጎድ ማቄዝ ኑ ጎዳ የሱስ ክርስቶሳ ሱንꬃ ኡባ አቆ ጼግዝ ኡባይስ፤ 
ጾስ፥ ኑ አዳይፐኔ ኑ ጎዳ የሱስ ክርስቶሳፕ ኣꬎ ኬሄትꬅኔ ሳሮትꬅ ይንትስ ማቆ። 
ጾሳይ ክርስቶሳ የሱሳ ባጋር ይንትስ እንጌዝ ኣꬎ ኬሃትꬃይ ግሾስ ታኒ ኡባ ዎደ ጾሳ ጋላትዛ። 
ኤዛይድ ኦዳራኔ ኤራትꬅ ኡባይር ይ ዱርቴዛ። 
ታኒ ክርስቶሳ ባጋ ማርካቴዛይ ቱማ ማቄዛይ ይንታል ሚንጌዛ። 
የይ ግሾስ፥ ይ ኑ ጎዳ የሱስ ክርስቶሳ ይእꬃ ናግታር የዝን፥ አባ አያና እሞካ ይንትስ ፓጨና። 
ኑ ጎዳ የሱስ ክርስቶሳ ማቅዝ ዎደ ይ ቦሮኔ ቦርሶ ባይꬅ ዉርስꬂ ሄሎዳይስ ይንታን ሚንꬂ ናጎዳ። 
ፋ ናአ፥ ኑ ጎዳ የሱስ ክርስቶሳር ፐትፐተꬃይ የዞዳይ ጋርክ ይንታን ጼጌዝ ጾሳይ አማንንትዛያ። 
ታ እሹንꬆ፥ ይ ጋንጨ ሻክንቶ የዛማይ ጋርክ ይ ፐቲ ዎዛናራኔ ፐቲ ቆፋር ፐቶ ማቂ፥ የዞድ ጋርክ ኑ ጎዳ የሱስ ክርስቶሳ ሱንꬃይር ታ ይንታን ዎስዛ። 
ታ እሹንꬆ፥ ቀሎኤ ካራ አሳይ ይ ጋንጨ እጾ የዛና ታስ ኦዴዛ። 
ታ ግዛይ ይንታፕ ፐታይ ፐታይ፥ «ታኒ ጳዉሎሳስ፤ ታኒ አጵሎሳስ፤ ታኒ ጵጽሮሳስ፤ ታኒ ክርስቶሳስ» ዬግዛ። 
ክርስቶሳ ሻክንቴኔ? ይ ግሾስ ማዝቃለል አፋ ሶትንቴዛይ ጳዉሎሳኔ? ዎይ ይ ጳዉሎሳ ሱንꬃይር ጻማቅንቴነኔ? 
ታኒ ቃርስጶሳኔ ጋዮሳፕ አትን ይንትፕ ኦናካ ጻማቀካ ግሾስ ጾሳ ጋላትዛ። 
የይ ግሾስ፥ ኦንካ ይንታን ታ ሱንꬃይር ጻማቅንቴዛ ጎዳይስ ዳንዳኦያ።  
ማ ኢስጼፋኖሳ ካራ አሳካ ታ ጻማቄዛ፥ ዝን ሀራ ኦና ጻማቄዛኮ ታስ ቆፕንቶያ። 
ክርስቶሳ ታና ኪቴዛይ ዎንግለ ኦዶዳይ ጋርከፕ አትን ጻማቆዳይ ጋርክ ባያ። ክርስቶሳ ማዝቃለል አፋ Ꮊይቄዛይ ጨረ ማቃም ጋርክ ታኒ አስ ኤጨትꬅ ቃላር ባያ። 
ክርስቶሳ ማዝቃለል አፋ Ꮊይቄዛና ኦድዛ ቃላይ ꬋብዝታይስ ቦዞትꬂ፥ ዝን ኑስ አትዝታይስ ጾስ ዎልቃ። 
ጌሻ ማጻፋይድ፥ «ታኒ ኤጭታይ ኤጨትꬃ ꬋብሶዳ፤ አካካንችታይ አካካ ባልꬆዳ» ዬግዛ። 
የዝን፥ ኤጫ አባ የኔ? ህገ አስታማረ አባ የኔ? ዎይ Ꮊ ሳአ ኤራንቻይ አባ የኔ? ጾሲ Ꮊ ሳአ ኤጨትꬃ ኤያትꬅ ኦꬄካሳ? 
Ꮊ ሳአ አሳይ ፋ ኤጨተꬃር ጾሳ ኤራማይ ጋርክ ጾሲ ፋ ኤጨትꬃር ካይ፥ ቦዛትꬃር ፓይድንትዛ፥ ኑኒ ኦድዛ ቃላይድ አማንዝታ አሾዳይስ ጾሳ ሸነ ማቄዛ። 
አይሁድታይ ማላታ በአዳይስ ኮይዛ፤ ማ ግርክታይ ኤጨትꬅ ኮይዛ። 
ዝን ኑኒ ማዝቃለል አፋ ሶትንቴዝ ክርስቶሳ ሳባክዛ። የይ አይሁድታይስ ꬉበ፤ ማ ግርክታይስ ቦዘትꬂ። 
ዝን ጾሳይ ጼጌዝታይስ፥ አይሁደ ማቅን፥ ግርኬ ማቅን ክርስቶሳ ጾስ ዎልቃኔ ኤ ኤጨትꬂ። 
ጾሳ ቦዘትꬃይ አስ ኤጨትꬃይፕ ኣꬍዛ፤ ማ ጾስ ዳቡራይ አስ ምኖትꬃይፕ ሚንግዛ። 
ይኬ፥ ታ እሹንꬆ፥ ጾሳይ ይንታን ጼጎዳር ይ አብ ጋርክ አስዛኮ ቆፖይታ። አስ ቆፋር ይ ጋንጨ ጋምታይ ኤጭታይ፥ ዎልቃምታይኔ ꬎቃ ኮችታይ ባያ። 
ዝን ጾሳይ ኤጭታ ዬላꬆዳይስ አላመል የዝ ቦዝታ ዶሬዛ፤ ማ ምንꬅታ ዬላꬆዳይስ አላመል የዝ ዳቡሬዝታ ዶሬዛ። 
ጾሳይ Ꮊ አላመል ግታ ግንትንቴዝባዝ ꬋብሶዳይስ፥ Ꮊ ሳአ ካዉዤዝባዝ፥ እጽንቴዝባዝኔ ፓꬆዋባዝ ዶሬዛ። 
ኦንካ ጾስ ቲና ጬቅንታማይ ጋርክ የያ ኦꬄዛ። 
ዝን ጾሳይ ይንትስ ክርስቶሳ የሱሳር ፐትፐተꬃር የዞድ ጋርክ ኦꬄዛ። ኤ ኑስ ጾሳፕ ኤጨትꬂ፥ ጽሎትꬅ፥ ጌሸትꬅኔ ዋሎትꬅ ማቄዛ። 
የይ ግሾስ፥ ጌሻ ማጻፋይድ፥ «ጬቅንትዛ ኦንካ ጎዳይል ጬቆ» ዬግዛ። 
