﻿ጳዉሎሳ ኦሮመ አሳይስ ጻፌዝ ኪታ.
1.
የሱስ ክርስቶሳ አይለ ማቄዝ፥ ሀዋረ ማቃዳይስ ጼግንቴዛይፐኔ ጾሳ ዎንግለ ሳባኮዳይ ጋርክ ሻክንቴዝ ጳዉሎሳ ኪቴዝ ኪታ። 
ጾሳይ ጋመ ዎደፕ ቲና ፋ ናብታይ ባጋር እማድ ጌዝ ጾስ ዎንግላይ ጌሻ ማጻፍታይድ ጻፍንቴዛ። 
የ ዎንግላይ አሾር ዳዉተ ሼሻፕ የልንቴዝ፥ ጾስ ናአ፥ ኑ ጎዳ የሱስ ክርስቶሳ ባጋ ኦድዛ። 
ማ ኤ ፋ ጌሻ አያናር Ꮊይቆፕ ደንዲ፥ ጾስ ናአ ማቅዛና ዳማ ዎልቃር ቤዜዛ። 
ኤ ባጋር አይሁደ ባዝታይ ኡቢታይ፥ አማኒ ኪትንቶድ ጋርክ ክርስቶሳ ሱንꬃይ ግሾስ ጾሳይ ኣꬎ ኬሃትꬃር ሀዋረትꬅ ማዉተ ኑስ እንጌዛ። 
የሱስ ክርስቶሳስ ማቃድ ጋርክ ጼግንቴዝታይፕ ባግታይ ይንታና። 
ኦሮመ ጋንጨ የዝ፥ ጾሳይ ቃꬊዝታይስኔ ኤ ጌሽ ዎያ ማቃድ ጋርክ ማራጼዝታይስ፦ ጾሳ ኑ አዳይፐኔ ጎዳ የሱስ ክርስቶሳፕ ኣꬎ ኬሄትꬅኔ ሳሮትꬃይ ይንትስ ማቆ። 
ኡባፕ ቲናቲ፥ ይ አማናይ ቢታ ኡባይል ስንቴዝ ግሾስ የሱስ ክርስቶስ ባጋር ይ ግሾስ ታ ጾሳ ጋላትዛ። 
ታኒ ኤ ናአይ ዎንግላይ ባጋ ኩንꬅ ዎዝናር ኦድዛ ጾሳይ፥ ታኒ ታ ዎሳይድ ኡባ ዎደ ይንታን ቆፕዛይስ ኤ ማርካ። 
ዉርስꬃል፥ ጾስ ሸነ ማቅኮ፥ ታኒ ይንትኮ Ꮊማዳይስ ኦጋይ ታስ ኡሻቾድ ጋርክ ኡባ ዎደ ዎስዛ። 
ታኒ ይንትስ አያና እሞትꬅ ሻጎዳይስኔ ይንታን በአዳይስ ላሞትዛ። 
የይካ፥ ታኒ ይ አማናይር፥ ማ ይ ታ አማናይር ሚንጎዳይ ጋርከ። 
ታ እሹንꬆ፥ ታኒ አይሁደ ባ አሳይፕ ኣፈ ደንጌዛይ ጋርክ፥ ይንታፐካ ኣፈ ደንጎዳይስ ይንትኮ Ꮊማዳይስ ቆፔዛ፥ ዝን ታና ካዬዛ። 
ግርኬ አሳይስኔ ታማረካ አሳይስ ማ ኤጭታይስኔ ቦዝታይስ ታስ አጮ የዛ። 
የይ ግሾስ፥ ኦሮመ ጋንጨ የዝ ይንትስካ ዎንግለ ኦዶዳይስ ታ አሞትዛ። 
ዎንግላይር ዬላታም፥ ቲናቲ አይሁደ፥ ኤዛይፕ ግርኬ አሳይስ አማንዝታ ኡባ አሾዳይስ ዎንግላይ ጾስ ዎልቃ። 
ጽሎ አማኖር ደኦ የዞዳ ግንትንቲ ጻፍንቴዛ። ጾስ ጽሎትꬃይ በንቴዛ፤ ቲናፕ ዉርስꬂ ሄሎዳይስ አሲ ጽልዛይ አማኖራ። 
ቱማይ ኤርንታም ጋርክ ፋ ኢታ ኦሶር ካይዛ አሳል አፋኔ ናጋራ ኡባይል አፋ፥ ጾስ ሴራ ሳሎፕ ዎꬍዛ። 
ጾሳይ ኡንትስ በንቶዳይስ ቤዝዛ ባዝ ቆንጭሴዝ ግሾስ ኡንቲ ጾስባዝ ኤርዛ። 
አላመ መꬊንቴዛይፕ አይኪ፥ አስስ በንቶዋ ጾስ ሀኖታ፥ የይካ ኤ መꬍና ዎልቃኔ ጾሳትꬃይ ኤ መትꬃይር በንቲ የዛ ግሾስ አሳይ ፋ ኢታትꬅስ ሳላምቦድባዝ ባያ። 
ኡንቲ ጾሳ ኤርታር፥ ኤዛ ቦንቼካያኔ ጋላተካያ። ኡ ቆፋይ ማዶዋ ባዝ ማቄዛ፤ ኡ አካኮዋ ዎዝናይ ꬉሜዛ። 
ኡንቲ ፋና ኤጭታ ግዛ፥ ዝን ቦዝታ። 
ꬋቦዋ ጾሳ ጎይኖዳና አሺ፥ Ꮊይቅዝ አስ ምስለ፥ ካፍታይ ምስለ፥ ዶእታይ ምስለኔ ኡሎር ጎችንትዛ ባዝታ ኣዝሲ ኦꬄዝ ምስልታ ጎይኔዛ። 
የይ ግሾስ፥ ኡንቲ ፐታይ ፐታይር ቦርሶ ባዝ ኦꬂ፥ ፋ ጋላ ቶቾድ ጋርክ ጾሳይ ኡንታን ኡ ዎዝናይ አሞትዝ ቱና ኦሶስ ኣꬂ እንጌዛ። 
የይ ሀኔዛይ ኡንቲ ጾስ ቱሮትꬃ ዎርዶር ላሜዝ ግሾኔ መꬌዝ ጾሳ አሺ፥ መትꬂ ጎይኔዝ ግሾስ። ጾሳይ መꬍናስ ጋላትንቴዛያ። አምንኤ። 
የይ ግሾስ፥ ጾሳይ ኡንታን ኡ ቦርሶ አሞትꬃይስ ኣꬂ እንጌዛ። ኡ ማችታይ ፓስ ቤዝዛ ꬊራꬃር አቆዳ አሺ፥ ቤዞዋ ባዝ ሀኒ ማቺ ማቻር ዎላ አቄዛ። 
የይ ጋርክ፥ ꬊራꬅታይ ፓስ ቤዝዛ ማቻር አቅዛ አሺ፥ ꬊራꬅ ꬊራꬃር ዎላ አቄዛ። ꬊራꬅ ፐታይ ፐታይር አሞትꬃር ጹግንቲ፥ ቦርሶ ባዝ ኦꬄዛ። ፋ ኦꬄዝ ቡታይስ ቤዝዛ ፕርደ ኤኬዛ። 
ኡንቲ ጾሳ ኤሮዳይስ እጼዝ ግሾስ ቤዞዋ ባዝ ኦꬆድ ጋርክ ጾሳይ ኡ ካሃ ፓꬃም ቆፋስ ኣꬂ እንጌዛ። 
ኡንታር ዡጫትꬅ፥ ኢታትꬂ፥ ኡዛትꬂ፥ ገነ፥ ቅናተ፥ ሸምፖ ዎꬎ፥ ፓላማ፥ ዶሻኔ ኢታ አሞ ኩሜዛ። ኡንቲ ዝግርዝታ፥ 
አስ ሱንꬅ ኢስዝታ፥ ጾስ እጽዝታ፥ ጫዥዝታ፥ ኡትርትዝታ፥ ጬቅንትዝታ፥ ኢታ ባዝ ኦꬆዳይስ ኮይዝታኔ ፋ እንድስኔ ፋ አዴስ ኪትንቶዝታ፥ 
አካኮዝታ፥ ጫቆ መንꬅዝታ፥ ሲቆ ባዝታ፥ ቃ ባዝታ። 
የይትታይ ጋርክ ኦꬅዝታይስ Ꮊይቆ ቤዝዛ ግዝ ጾሳ ህገ ኤርታር፥ Ꮊይትታ ኦꬅዛ። ኡ ፓስ ኦሶ ኣዳ ባዝን ኦꬅዛ Ꮊንክታካ ሳቢዛ። 
