﻿WAKITÀ AŊA AZLATATAK UWANA YESU AFƏTÀLA À YUHANA À AMA ALA Apocalypse.
1.
Aganay uwana Yesu Kristu afətàla à azla­mayà aŋa Zəzagəla la kəl ala. “Iyay, fətàlla ama ala Zəzagəla”, agòɗal, kà atà aŋa masəlay uwana adàpaka vok la huma la gay. Kà uwaga Yesu Kristu aslə̀l à waŋ malika aŋha à slaka mayà aŋha Yuhana, kà mapəhalla azla­tatak uwaga. 
Kiya uwaga Yuhana azàŋ la huma azladza gesina uwana anəŋàŋ, agòɗ la magəɗəŋ à afik, ndzer uwaga kà gay aŋa Zəzagəla, ŋgaha babay kà baməraka Yesu kà agəɗàŋ à afik, kà uwaga kà dziriga. 
Mapis gay à vok agay la azladza, uwana tadzeŋ wakità uwanay la huma azladza la kuda zləkkà, azlagay uwanay kà atsà à waŋ kà la paŋaw aŋa Zəzagəla la awtày, kà aŋa azladza uwana tatsəɓ sləm à azlagay uwanay, ŋgaha takəs kà, Zəzagəla adàpis à atà gay à vok. Haɗay kà, kaslà uwana azla­tatak uwanay adàpaka vok kà, adàgay nekwa nekwa. 
Gi Yuhana, la uwana gətsetser à akul wakità, ‘Ayyi’ gəgoɗ à akul, akul maham à ahəŋ məna gay Zəzagəla sla­slaka məɗəf, uwaga la kutso aŋa Asəya la abà. Zəzagəla api­sa­kulla gay à vok, ŋgaha adzala akul à ahəŋ la lapiya la abà. Masla uwana agà la sifa dagay uwarà, mok uwana gudəŋ à vok gesina la ahəŋ dadàŋ aw, ŋgaha lakana aga la ahəŋ la sifa aya, ŋgaha adàsa à waŋ à gudəŋ à vok. Azla­ma­sasəɗok məɗəf tapis à akul gay à vok, ŋgaha tadzala akul à ahəŋ la lapiya la abà. Azla­ma­sasəɗok məɗəf uwaga tadza à ahəŋ la huma kursi aŋa Zəzagəla, tapis à akul gay à vok. 
Yesu Kristu masla sayda dziriga, apis à akul gay à vok la mav à akul lapiya. Masla la uwana teraŋa aŋa mawul à uda la tataka azla­ma­zim­nekiɗ la abà, ŋgaha masla Sufəl aŋa azla­su­fəl aŋa gudəŋ à vok gesina. Yesu uwaga awoya anu, amə̀ts kà aŋami, kikay kà aŋiz aŋha, ndzəɗa aŋa tsakana lakəl gami aya aw, atəfà anu. 
Masla mapa­ka­nula kà tsəhay aŋha, kà uwana masla Sufəl gà gà. Masla aɗahàŋ kiya uwanay, kà anu aŋa magay azlaməna makaɗ tatak babay, kà mazlak Zəzagəla Baba aŋha, dza atəm à ahəŋ aŋa mazləɓay aw, zləɓàw masla gesina. Maslay atsa à waŋ kà la slaka aŋha koksi­koksi. Amen. 
Nə̀ŋàwwàŋ aganay atsa à ahəŋ la habaga la abà. Yewdi aŋa azladza gesina adà­nəŋəŋ baməraka azla­uwana tatsàh la atsəkaɗ babay. Azladza gesina tadàtsah hulolo, kà uwana guba adàza atà, kà uwana taweskà masla. Ndzer. Amen. 
Sufəl Zəzagəla agòɗ: ˈGi la uwana Alfa, ŋgaha gi la uwana Omega.ˈ (Uwana asal magoɗay kà: Gi la uwana gi matera aŋa tatak gesina, ŋgaha gi la uwana makəɗ gəl à ahəŋ aŋa tatak gesina aya) Masla la maslay gesina la ahàl. Aga la sifa dagay uwarà, mok uwana gudəŋ à vok la ahəŋ dadàŋ aw, lakana aga la ahəŋ la sifa, ŋgaha adàsa à waŋ à gudəŋ à vok haɗay. 
Gi Yuhana, deda aŋkul la uwana gətsetser wakità uwanay. Anina gesina gami mədahama gay à vok la Yesu la abà. Kiya uwaga məhama à ŋgərpa uwaga à abà, ŋgaha à makoray aŋha, uwana à abà məbasaŋ gami. Kà aŋa gulo te­ke­ɗika tadùw à matəku­kurùh uwana à afik, la tataka dərəv la abà, uwana sləm aŋha Patmos, kà uwana gəpə̀h gay Zəzagəla la magəɗəŋ à afik kà Yesu la uwana dziriga, gəgòɗ. 
La vuɗ ladu anik Masasəɗok Zəzagəla akə̀s gi, ŋgaha gətsənàŋ kuda la lig gulo la ndzəɗa, bokuba matsənay aŋa mazlazliŋ. 
Uwana agòɗ: “Uwana kanəŋàŋ la uwana katsetser à wakità à abà, slàl à slaka maham à ahəŋ məna gay Zəzagəla sla­slaka məɗəf uwana la Efesus, la Səmirna, la Pergam, la Tiyatir, la Sardəs, la Fila­del­fiya, ŋgaha la Lawo­di­kiya”, agòɗ à gi. 
Mok uwana gətsənàŋ, kiya uwaga gəgolà vok kà manəŋəŋ dza uwana avàts à gi gay uwaga, ŋgaha gənəŋàŋ fənəs sla­slaka məɗəf uwana maɗehəhəŋga la luwà­luwà. 
La tataka aŋatà la abà gənəŋà maftsa à vok aŋa dza babay. Masla la lukut ziŋziŋga la vok, tsəràh à ɗaga­ɗaga, mawaɗ vok ala gà la gay ləv la gabaga luwà­luwà. 
Aŋidz aŋha kà, me­ɗe­kuga sayya, bokuba slewzi. Yewdi aŋha awutsəɗay bokuba alàh akàl. 
Asik aŋha wutswa­wuts bokuba ada vərze­ga­niga, uwana taf akàl à abà, kuda aŋha kalkal la maho­humay aŋa iyaw uwana la mukwà la afik. 
Tse­tsiliŋ məɗəf la ahàl kaf aŋha, katsakar mazu­wayga gay səla nna, asà à waŋ la gay aŋha la awtày. Huɗ adi aŋha ŋərazl à adi bokuba afats aŋa tataka afats. 
Kay, mok uwana gənəŋàŋ, gətə̀ɗ à makəla asik aŋha bokuba gi mamətsay gà. Ama la lig la ahəŋ aɓə̀k gi ahàl kaf aŋha à gəl, agòɗ à gi: “Guba akəs ka aw. Gi uwana gəga la ahəŋ dagay uwarà, ŋgaha gi uwana gədàgay la ahəŋ aya. 
Gi, gi uwana la sifa. Gəmə̀ts ama gədza à ahəŋ la sifa aŋa tsəràh à awtày. Gi la ndzəɗa lakəl aŋa mamətsay, ŋgaha gi la tsəku­rəm aŋa slaka uwana azla­ma­zim­nekiɗ tadza à ahəŋ aya. 
Kiya uwaga kà uwana kanəŋàŋ lagonay la uwana adàpaka vok bawbaw gesina kà: Tsetsèr! 
Ŋgaha lakəl aŋa azla­tse­tsiliŋ məɗəf uwana kanəŋaŋ la ahàl kaf gulo, ŋgaha la azla­fənəs məɗəf uwana maɗehəŋ gà la luwà­luwà kà, gəpəha­kalla godega aŋa azla­tatak uwaga. Godega aŋa azla­tse­tsiliŋ məɗəf kà apəhla ala azla­ma­lika məɗəf uwana Zəzagəla aɓə̀k atà à azla­slaka məɗəf aŋa maham à ahəŋ məna gay Zəzagəla. Azla­fənəs məɗəf uwanay apəhla ala azla­maham à ahəŋ məna gay Zəzagəla uwatà aya pəra”, masla agòɗ. 
