GEN 1:1 فالبداية خلڮ مولانا العالم. وهاذي هي الطريقة اللي خلڮو بيها:
GEN 1:2 فالبداية كانت لارض ماهي منتظمة ولا فيها شي، وكانت الظلمة امغطية الما، وروح مولانا يحوم فوڮو.
GEN 1:3 وڮال مولانا: يخلڮ النور. واخلڮ النور.
GEN 1:4 وخرص مولانا النور وشاف النور زين. وافصل مولانا النور عن الظلمة.
GEN 1:5 وسما مولانا النور انهار، وسما الظلمة ليل. وعاد ليل وعاد امع الصباح . وكان ذاك هو اليوم لأول.
GEN 1:6 وڮال مولانا: تخلڮ قبة امبين المياه اياك اتڮسم المياه شور قسمين.
GEN 1:7 وخلڮ مولانا قبة وافصل المياه اللي تحت القبة عن المياه اللي فوڮها. واخلڮ هاذا.
GEN 1:8 وسما مولانا القبة السما. وعاد ليل وعاد امع الصباح. وكان ذا اليوم الثاني.
GEN 1:9 وڮال مولانا: يجتمعو المياه اللي تحت السما كاملين فابليدة وحدة اياك تظهر التراب. واخلڮ ذا.
GEN 1:10 وسما مولانا هاذي التراب لارض، وسما بل امنين اجتمعو المياه لبحور. وخرص مولانا وشاف ذاك كامل زين.
GEN 1:11 وڮال مولانا: تعطي لارض النباتات اللي فيهم لبذور، ويخلڮ اصدر رافد الثمار اللي فيهم لبذور بكل أنواعهم اعلى لارض. واخلڮ ذا.
GEN 1:12 ووخظت لارض النباتات اللي فيهم لبذور بكل أنواعهم، واعطات املي اصدر رافد اثمار فيهم لبذور من نوعهم. وخرص مولانا وشاف ذا كامل زين.
GEN 1:13 وعاد ليل وعاد امع الصباح. وكان ذا اليوم الثالث.
GEN 1:14 وڮال مولانا: يخلڮو لأنوار فقبة السما اياك يميزو النهار عن اليل ويعودو علامات يحددو لأيام والسنين ولعياد.
GEN 1:15 ويخلڮو أنوار فقبة السما اياك يظو اعلى لارض. واخلڮ ذا .
GEN 1:16 وخلڮ مولانا لأنوار لكبار لأثنين : خلڮ النور لأول لكبير اياك يعود فانهار، وخلڮ النور الثاني الصغير اياك يعود فاليل، وخلڮ مولانا النجوم املي.
GEN 1:17 ودار مولانا هاذو لأنوار فقبة السما اياك ايظو اعلى لارض،
GEN 1:18 واجعلهم مولانا هوما المسؤولين عن انهار وليل وهوما اللي يميزو النور من الظلمة. وخرص مولانا وشاف ذا كامل زين.
GEN 1:19 وعاد ليل وعاد امع الصباح. وكان ذا اليوم الرابع.
GEN 1:20 وعاڮب ذا ڮال مولانا: تمتلا المياه بياسر من المخلوقات الحيين، واتعود فم اطيور اتطير امبين لارض والسما.
GEN 1:21 وخلڮ مولانا وحوش لبحور لكبار ، وكيف ما خلڮ المخلوقات الحيين كاملين اللي املان منهم الماء، خلڮهم من كل نوع. وخلڮ املي كل اطير بريشاتو من كل نوع. وخرص مولانا هاذا وشافو زين.
GEN 1:22 ودار مولانا فيهم البركة وڮال: اثمرو واكثارو ويمتلاو مياه لبحور بالمخلوقات، ويكثارو الطيور اعلى لارض.
GEN 1:23 وعاد ليل وعاد امع الصباح. وكان ذا اليوم الخامس.
GEN 1:24 وڮال مولانا: تعطي لارض مخلوقات حيين من كل نوع : من حيوان يُربّا وزواحف وحيوانات لخلا من كل نوع. واخلڮ ذا.
GEN 1:25 وخلڮ مولانا الحيوانات لخلا من كل نوع، والحيوان اللي يُربّا من كل نوع، وكل حيوان يزحف اعلى التراب من كل نوع. وخرص مولانا وشاف ذا زين.
GEN 1:26 وعاڮب ذاك ڮال مولانا: انخلڮو لإنسان اعلى شي من صيفاتنا، وسلّط مولانا لإنسان اعلى حوت لبحر واطيور السما والحيوان اللي يُربّا وحيوان لخلا اعلى التراب واعلى كل حيوان يزحف اعلى التراب .
GEN 1:27 وخلڮ مولانا لإنسان اعلى شي من صيفاتو، اعلى شي من صيفاتو خلڮهم راجل وامرة.
GEN 1:28 ودار مولانا فيهم البركة وڮال: اثمرو واكثارو وعودو ياسرين وسيطرو اعلى لارض، واتسلطو اعلى حوت لبحر واطيور السما وكل شي يتحرك اعلى لارض.
GEN 1:29 وڮال مولانا: اراني اعطيتكم كل اصدر اعلى وجه لارض رافد ابذور. اعطيتكم كل صدراية رافدة لكم ثمار اياك توكلوهم.
GEN 1:30 يغير لحيوانات لارض واطيور السما كاملين وكل الحيوانات الصغيرة اللي تزحف وكل مخلوق فيه روح، اتعود النباتات اطعامها. واخلڮ ذا .
GEN 1:31 وخرص مولانا هاذا وشافو زين حته. وعاد ليل وعاد امع الصباح. وكان ذا اليوم السات.
GEN 2:1 وبهاذي الطريقة اوفاو السماوات ولارض وذا كامل اللي فيهم.
GEN 2:2 وعاڮب يلين اوفا مولانا من شغلتو كامل، استراح فاليوم السابع .
GEN 2:3 وبارك مولانا اليوم السابع وڮال اعلنو مخصصلو، بيهلي اوفا فيه من خلڮ العالم.
GEN 2:4 هاذي هي قصة السماوات ولارض وقت اخلاڮتهم: اليوم اللي خلڮ الله تعالى لارض والسماوات
GEN 2:5 ما كانت أي اربيعة خالڮة اعلى لارض، ولا كان املي أي اصدر فات انبت، بيهلي الله تعالى مافات فهاذا الوقت مشّا اسحاب اعلى لارض، ولا كان فات اخلڮ أي آرڮاج يحرث التراب.
GEN 2:6 يغير كان يوخظ من لارض فهاذا الوقت عين من الما تسڮي التراب.
GEN 2:7 وعاڮب ذاك خلڮ الله تعالى الراجل من التراب وانفخ فاخنافرو الحياة وعاد الراجل نفس حية.
GEN 2:8 وعاڮب ذاك اغرس الله تعالى اصدر فابليدة زينة فعدن فالشرق وفم عاد عايش الراجل اللي خلڮ.
GEN 2:9 ونبت الله تعالى من لارض كل نوع من الصدر الزين و صالح للوكيل. وكانت فوسط هاذي لبليدة الزينة صدراية تعطي الحياة وصدراية اخرا تعطي معرفة الصالح والطالح.
GEN 2:10 وكان فم نهر يمشي فهاذي لبليدة الزينة اللي فعدن اياك يسڮيها، وكان هاذا النهر يتفرعو منو 4 فروع.
GEN 2:11 اسم لأول هو فيشون وهو اللي يوخظ احذا ارض الحويلة كاملة بل امنين فيه الذهب.
GEN 2:12 والذهب اللي فم من نوعية زينة، وفم املي ازين لبخور واحجار العقيق.
GEN 2:13 واسم الثاني هو جيحون وهو اللي يوخظ احذا ارض كوش كاملة.
GEN 2:14 واسم الثالث هو دجلة ويوخظ شرق أشور. والرابع اسمو الفرات.
GEN 2:15 واڮبظ الله تعالى الراجل ودارو فهاذي لبليدة الزينة اللي فعدن اياك يحرثها ويرعاها.
GEN 2:16 ووصا الله تعالى الراجل وڮالّو: اتڮد توكل اللي تبغي من الصدر ذي لبليدة اللي فعدن.
GEN 2:17 يغير ذيك الصدراية اللي تعطي المعرفة امبين الصالح والطالح، لا توكل منها، بيهلي الوقت اللي توكل منها لاهي اتموت .
GEN 2:18 وڮال الله تعالى: ماهو زين يبڮا الراجل وحدو، ولذاك لاهي انخلڮلو مُعِين اياك يشارك حياتو امعاه.
GEN 2:19 وخلڮ الله تعالى من التراب كل حيوان فلحريثة وكل اطيور السما. وعاڮب ذاك جابهم كاملين للراجل اياك يشوف شلاهي يسمّي كل واحد منهم. وكل مرة يسمّي واحد من المخلوقات يعود ذاك اسمو.
GEN 2:20 وسما الراجل الحيوانات كاملين اللي يُربّاو واطيور السما كاملين وحيوانات لخلا كاملين ، يغير ما اجبر امبينهم واحد يعاونو ويشابهلو.
GEN 2:21 و رڮّد الله تعالى الراجل ارڮاد امتين، وفوقت ارڮادو، اڮبظ الله تعالى ظلعة من اظلوعو وغطا بلها بالجل .
GEN 2:22 وعاڮب ذاك خلڮ الله تعالى من الظلعة اللي اڮبظها من الراجل امرة وڮدمهالو.
GEN 2:23 وڮال الراجل: ظرك ، هاذي اعظم من اعظامي ولحمة من لحمي، ولاهي انسميها امرة بيهَلي انڮبظت من امرئ.
GEN 2:24 ولذا السبب يخلي الراجل بوه وأمو ويلتصڮ باعيالو، ويعودو عايلة وحدة.
GEN 2:25 وكانو الراجل واعيالو كلهم عريان، يغير ما كانو يستحاو.
GEN 3:1 وكان الحنش هو أمكر حيوانات لخلا اللي خلڮ الله تعالى. وڮال للمرة: حڮحڮ ڮالكم الله تعالى : لا توكلو من أي صدراية فهاذي لبليدة الزينة ؟
GEN 3:2 وڮالت لمرة للحنش: ابدي انڮدو نوكلو من احدج الصدر كامل اللي فهاذي لبليدة،
GEN 3:3 يغير الصدراية اللي فوسط هاذي لبليدة الزينة، ڮط ڮالنا الله تعالى: لا توكلو منها ولا اتمسوها اياك ما اتموتو.
GEN 3:4 وڮال الحنش للمرة: ابدي مانكم لاهي اتموتو .
GEN 3:5 يغير الله تعالى يعرف اعلنكم الوقت اللي توكلو منها لاهي اتعود عندكم معرفة اجديدة واتعودو كيفت الله تعالى اتميزو امبين الصالح والطالح.
GEN 3:6 وشافت لمرة اعلن الصدراية زينة للوكيل وتجذب شورها العين، ومرغوب فيها بسبب اللي تعطي من الحكمة لحد يوكل منها . وڮبظت من احدجها وكالت. ومن فم اعطات لراجلها اللي كان امعاها وكال هو املي.
GEN 3:7 وانفتحو عينيهم، وفطنو اعلنهم عريانين. وخيطو اورڮ صدراية التين وصنعو لروسهم لباس يغطي عورتهم.
GEN 3:8 ومن فم سمعو صوت الله تعالى ماشي فهاذي لبليدة الزينة وقت مشي الريح، واتروقو الراجل واعيالو من الله تعالى امبين اصدر هاذي لبليدة.
GEN 3:9 وعيط الله تعالى للراجل وڮالّو: انتا امنين؟
GEN 3:10 وڮال الراجل: اسمعت صوتك فهاذي لبليدة ونخلعت بيّلي آنا عريان، واتروقت عنك.
GEN 3:11 وڮالّو الله تعالى: من ڮالّك اعلنك عريان؟ اثرك كلت من الصدراية اللي انهيتك عن توكل منها؟
GEN 3:12 وڮال الراجل: لمرة اللي امعايَ ، اعطاتني من احدج الصدراية وكلت.
GEN 3:13 وعند ذاك ڮال الله تعالى للمرة: ذا اللي عدلتي شنهو؟ وڮالتلو لمرة: الحنش احتال اعليَّ وكلت من احدج ذيك الصدراية.
GEN 3:14 وڮال الله تعالى للحنش: بيكلي انتا عدلت ذاك، اتعود ملعون أكثر من المخلوقات لخرين كاملين. وكل أيام حياتك لاهي تحبي اعلى كرشك، ولاهي توكل التراب،
GEN 3:15 ولاهي اندير عداوة امبينك وامبين لمرة وامبين نسلك ونسلها. لاهي يبعج نسلها راسك وانتا لاهي اتعظو فالعرڮوب.
GEN 3:16 وڮال الله تعالى للمرة: لاهي انكثر اوجاع حملك. وبلألام لاهي تبراي أولادك، ولاهي تخدمي راجلك، ولاهي يسود اعليك.
GEN 3:17 وڮال الله تعالى للراجل: انتا اسمعت اللي اقترحت اعليك اعيالك وكلت من الصدراية اللي انهيتك عن توكل منها. ولذا لاهي نلعن لارض، ولانك لاهي اتعود توكل منها يكون بالكد والتعب كل أيام حياتك.
GEN 3:18 ولاهي اتنبتلك الشوك وينيتي، ولاهي توكل من اصدر لحريثة .
GEN 3:19 اتحصل اطعامك باعرڮ جبهتك ، يلين ترجع للتراب اللي اوخلڮت منها. من التراب اوخلڮت وشور التراب لاهي ترجع.
GEN 3:20 وسما آدم اعيالو حواء بيهَلي لاهي اتعود أم البشر كاملين.
GEN 3:21 واصنع الله تعالى لباس من جل حيوان لآدم واعيالو، ولبسولهم.
GEN 3:22 وڮال الله تعالى: اراعيه عاد لإنسان كيف واحد منا فالتمييز امبين الصالح والطالح، وظرك عاد يڮد يمد ايدو ويڮبظ من احدج صدراية الحياة ويوكل منها ويعيش إلى الأبد.
GEN 3:23 وصاعو الله تعالى من لبليدة الزينة اللي فعدن اياك يحرث التراب اللي اوخلڮ منها.
GEN 3:24 وعاڮب يلين صاع لإنسان، دار مولانا فجيهة شرق عدن نوع من الملايكة اسمهم الكروبيم اللي كانو رافدين سيف من نار يزڮنن اياك يحرس اطريڮ اللي واعدة صدراية الحياة.
GEN 4:1 وعاشر آدم اعيالو حواء وحملت منو وخلاتلو اطفيل اسمو قابيل وڮالت: ارزقني الله تعالى باطفيل.
GEN 4:2 وعاڮب ذاك خلات خوه هابيل. وكان هابيل راعي لغنم، وقابيل كان مزارع .
GEN 4:3 و عاڮب فترة ڮدم قابيل لله تعالى قربان من خيرات لارض.
GEN 4:4 وهابيل ڮدم اشبه اللي عندو من اكبر لغنم واسمنها. واڮبل الله تعالى قربان هابيل،
GEN 4:5 يغير قربان قابيل ما ڮبلو. وانفڮع قابيل حته، و عاد وجهو امعبس.
GEN 4:6 وڮال الله تعالى لقابيل، اعلاش تنفڮع؟ اعلاش يعبس وجهك؟
GEN 4:7 يلين اتعدل شي صالح نڮبلو، وإلين اتعدل شي ما هو صالح لاهي يعود ذنبك اڮريب من بابك ويدور يتحكم فيك، ولا تخليه يتحكم فيك.
GEN 4:8 وڮال قابيل لخوه هابيل: وهاي جاي نمشو شور الخلوات. وفالوقت اللي كانو فيه هوما لأثنين فالخلوات، اهجم قابيل اعلى خوه هابيل وكتلو.
GEN 4:9 وڮال الله تعالى لقابيل: امنين خوك هابيل؟ وڮالّو قابيل: ما نعرف. آنا اثري حارس لخويَ؟
GEN 4:10 وڮال الله تعالى: شنهو اللي عدلت؟ دم خوك يزوڮيلي من التراب.
GEN 4:11 من ظرك لارض لعنتك وفتحت فمها لدم خوك اللي اكتلتو بايدك.
GEN 4:12 يلين تحرث التراب ماهي لاهي تعطيك شي. وانتا لاهي اتعود واقد بلا مسكن.
GEN 4:13 وڮال قابيل لله تعالى: عقابي امتن من انڮد نتحملو.
GEN 4:14 انتا اليوم صعتني من لارض اياك نختفي من حضرتك وانعود ابلا مسكن فالدنيا، وأي آرڮاج يجبرني يكتلني.
GEN 4:15 وڮالّو الله تعالى: ابدي، اللي يكتلك لاهي انعاقبو باسبع مرات عقابك. ودار الله تعالى علامة اعلى قابيل اياك ما يكتلو حد يجبرو.
GEN 4:16 وامشا قابيل عن محضر الله تعالى واسكن فارض نود اللي شرق عدن.
GEN 4:17 وعاشر قابيل اعيالو وحملت وخلاتلو اطفيل اسمو حنوك. وكان قابيل وقتها يبني مدينة، وسماها حنوك اعلى اسم ولو.
GEN 4:18 وحنوك اجبر إشيرو اسمو عيراد، وعيراد اجبر محويل، ومحويل اجبر متوشيل ومتوشيل اجبر لامك.
GEN 4:19 واتعرس لامك امع مرتين: وحدة منهم اسمها عادة ولخرا اسمها صلّة.
GEN 4:20 وخلات عادة يابال وهو أول آرڮاج اسكن فلخيام واسرح لغنم.
GEN 4:21 واسم خوه يوبال وهو أول آرڮاج اخبط التيدينيت والنيفارة .
GEN 4:22 وصلّة خلات توبال قابيل وهو أول آرڮاج اصنع آلات من النحاس ولحديد، واختو اسمها نعمة.
GEN 4:23 وڮال لامك لاعلياتو عادة وصلّة: يا عادة وصلّة اسمعو اكلامي يا اعليات لامك، عدلو اللي انڮولكم: آنا اكتلت راجل اجرحني وشاب اخبطني.
GEN 4:24 وبالتالي يلين يعود يخلص لقابيل 7 مرات لاهي يعود يخلص للامك 77 مرة.
GEN 4:25 وعاشر آدم حواء مرة اخرا وخلاتلو اطفيل وسماتو شيث وڮالت: ارزقني مولانا باطفيل اوخر بل هابيل اللي كتلو قابيل.
GEN 4:26 واجبر شيث اطفيل وسماه أنوش. وفذاك الوقت ابداو الناس يعبدو الله تعالى.
GEN 5:1 هاذا سجل مواليد آدم: اليوم اللي خلڮ مولانا فيه لإنسان، خلڮو اعلى شي من صيفاتو.
GEN 5:2 وخلڮهم راجل وامرة وباركهم وسماهم لإنسان.
GEN 5:3 وإلين عاد عند النبي آدم 130 سنة، اجبر ول يشابهلو اعلى صيفاتو وسماه شيث.
GEN 5:4 وعاش آدم بعد اخلاڮة شيث 800 سنة، واجبر فيها أولاد اخرين وامنات.
GEN 5:5 وكان آدم عندو 930 يلين اتوفا .
GEN 5:6 وإلين عاد عند شيث 105 سنوات اجبر أنوش.
GEN 5:7 وعاش شيث بعد ذاك 807 سنوات، واجبر فيها أولاد اخرين وامنات.
GEN 5:8 وكان عند شيث 912 سنة وقت وفاتو .
GEN 5:9 وإلين عاد عند أنوش 90 سنة اجبر قينان.
GEN 5:10 وعاش أنوش عاڮب ذاك 815 سنة، واجبر فيها أولاد اخرين وامنات.
GEN 5:11 وكان عند أنوش 905 سنوات وقت وفاتو .
GEN 5:12 وإلين عاد عند قينان 70 سنة اجبر مهللئيل.
GEN 5:13 وعاش قينان بعد ذاك 840 سنة، واجبر فيها أولاد اخرين وامنات.
GEN 5:14 وكان عند قينان 910 سنوات وقت موتو.
GEN 5:15 وإلين عاد عند مهللئيل 65 سنة اجبر يارد.
GEN 5:16 وعاش مهللئيل عاڮب ذاك 830 سنة، واجبر فيها أولاد اخرين وامنات.
GEN 5:17 و كان عند مهللئيل 895 سنة وقت وفاتو .
GEN 5:18 وإلين عاد عند يارد 162 سنة اجبر النبي إدريس.
GEN 5:19 وعاش يارد عاڮب ذاك 800 سنة، واجبر فيها أولاد اخرين وامنات.
GEN 5:20 وكان عند يارد 962 سنة وقت وفاتو .
GEN 5:21 وإلين عاد عند النبي إدريس 65 سنة اجبر متوشالح.
GEN 5:22 وعاش النبي إدريس عاڮب ذاك 300 سنة. كان متقي فيها مولانا، واجبر فيها أولاد وامنات.
GEN 5:23 وكان عند النبي إدريس فهاذا الوقت 365 سنة.
GEN 5:24 وكان النبي إدريس متقي فيها مولانا. وعاڮب ذاك اختفا النبي إدريس بيهلي رفعو مولانا شورو.
GEN 5:25 وإلين عاد عند متوشالح 187 سنة اجبر لامك.
GEN 5:26 وعاش متوشالح عاڮب ذاك 782 سنة، واجبر فيها أولاد اخرين وامنات.
GEN 5:27 وكان عند متوشالح 969 سنة وقت موتو.
GEN 5:28 وإلين عاد عند لامك 182 سنة اجبر اطفيل،
GEN 5:29 وسماه نوح وڮال: هاذا الول يخفف عنّا تعبنا والمشقات اللي انعانوها فلارض اللي العنها الله تعالى.
GEN 5:30 وعاش لامك بعد اخلاڮة نوح 595 سنة، واجبر فيها أولاد اخرين وامنات.
GEN 5:31 وكان عند لامك 777 سنة وقت وفاتو .
GEN 5:32 وإلين عاد عند نوح 500 سنة، اجبر سام وحام ويافث.
GEN 6:1 وإلين ابداو البشر يكثارو فلارض وخلڮولهم امنات،
GEN 6:2 شافو الملايكة اعلن امنات البشر ازوينات وڮبظوهم واتعرسو امعاهم كيف ما ابغاو.
GEN 6:3 وڮال الله تعالى: روحي ما يبڮا فلإنسان الزمن كامل بيهلي هو إنسان فاني ومن ظرك ماهو لاهي يعيش أكثر من 120 سنة.
GEN 6:4 ومن ذاك الوقت عاد فلارض لجبابرة بيهلي الملايكة اتعرسو امع امنات البشر وجبرو منهم أولاد. وكانو أولادهم هوما لجبابرة اللي معروفين بالحرب من ذاك الزمن.
GEN 6:5 وعاڮب ذاك شاف الله تعالى اعلن شر لإنسان انزاد حته فلارض، واعلن رغبات لإنسان وافكار ڮلبو كاملين دائما ماهم امسڮمين.
GEN 6:6 واتكدر الله تعالى حته فڮلبو اعلنو خلڮ لإنسان فلارض.
GEN 6:7 وڮال الله تعالى: لاهي انفرق البشر اللي خلڮتهم من اعلى لارض، الناس امع الحيوان والمخلوقات اللي يزحفو اعلى اكروشتهم والطيور السما بيّلي اتندمت اعلني خلڮتهم.
GEN 6:8 يغير النبي نوح ارضا اعليه الله تعالى.
GEN 6:9 وهاذي هي قصة النبي نوح: هو كان آرڮاج صالح ومتقي مولانا من امبين أهل جيلو، ويعدل كل شي طلبو منو مولانا.
GEN 6:10 واجبر اثلت أولاد هوما سام وحام ويافث.
GEN 6:11 عادت لارض فاسدة عند مولانا وعاد فيها الظلم وشر لإنسان.
GEN 6:12 وإلين شاف مولانا هاذا الفساد اللي خسر حياة كل البشر،
GEN 6:13 ڮال مولانا للنبي نوح: جات نهاية هاذا الزمن، ولاهي انفرق البشر كاملين من الوجود بيهلي بسببهم امتلات لارض من الظلم. لاهي انبيدهم وانبيد لارض امعاهم.
GEN 6:14 وعدل لراصك سفينة من لعمد لمتان، وابني فيها ابيوت وادهنها بالطين من الڮدام ومن النڮر اياك الما ما يدخل فيها.
GEN 6:15 وتبينها بهاذي الطريقة: طول السفينة يعود 150 ميتر، وعرظها يعود 25 ميتر، وطولها اعلى الفوڮ يعود 15 ميتر.
GEN 6:16 واتعدل فيها مغطاية يعود امبينها امع السفينة 50 سانتيمتر، واتعدل فيها باب، واتعدل فيها ثلاثة طوابق، التحتاني والوسطاني والفوڮاني.
GEN 6:17 بيّلي راعيني لاهي انمشّي طوفان اعلى لارض اياك انفرق كل مخلوق حي تحت السما. وكل شي اعلى لارض لاهي يهلك.
GEN 6:18 يغير لاهي انعدل عهدي امعاك وتدخل السفينة انتا وأولادك واعيالك واعليات أولادك امعاك.
GEN 6:19 وتڮبظ امعاك فالسفينة 2 من كل مخلوق اذكر ونيثي اياك يسلكو امعاك:
GEN 6:20 أثنين من كل نوع من الطيور ومن كل نوع من الحيوانات ومن كل نوع الحيوانات اللي يزحفو اعلى اكروشتهم اياك يحياو.
GEN 6:21 واڮبظ امعاك كل شي ينتكل واتخزنو اياك يعودلهم ويعودلك الطعام.
GEN 6:22 وعدل النبي نوح كل شي اطلب مولانا منو.
GEN 7:1 ومن فم ڮال الله تعالى للنبي نوح: ادخل فالسفينة انتا وكل أسرتك، بيَّلي اجبرتك وحدك صالح فهاذا الجيل.
GEN 7:2 واڮبظ امعاك من كل نوع من الحيوانات لحلال اسبع اذكور واسبع ناثي، والحيوانات اللي ماهم احلال تڮبظ من كل نوع أثنين من الذكور وأثنين من الناثي.
GEN 7:3 واملي تڮبظ من كل نوع من الطيور اسبع اذكور واسبع ناثي اياك يبڮا جنسهم اعلى لارض.
GEN 7:4 بيَّلي عاڮب اسبعة أيام لاهي انمشّي اسحاب اعلى لارض، ولاهي اتم ماشة مدة 40 يوم فليل وانهار، اياك انفرق كل مخلوق حي ڮط خلڮتو من اعلى لارض.
GEN 7:5 وعدل النبي نوح كل شي اطلب منو الله تعالى.
GEN 7:6 وكان النبي نوح فهاذا الوقت عندو 600 سنة وقت امجي طوفان اعلى لارض.
GEN 7:7 وادخل النبي نوح فالسفينة هو وأولادو واعيالو واعليات أولادو اياك يسلكو من ما الطوفان.
GEN 7:8 ودخلو املي الحيوانات لحلال والحيوانات اللي ماهم احلال والطيور والحيوانات اللي يزحفو اعلى اكروشتهم.
GEN 7:9 وجاو للنبي نوح ودخلو فالسفينة اعلى شكل أزواج اذكر ونيثي كيف ما اطلب مولانا من النبي نوح.
GEN 7:10 وعاڮب اسبعة أيام جا الطوفان اعلى لارض.
GEN 7:11 فسنة 600 من حياة نوح فالشهر الثاني فاليوم 17 من الشهر، انفجرت المياه اللي كانت عميقة فالتراب وانفتحو ابواب السما.
GEN 7:12 ونزلت اسحاب اعلى لارض فليل وانهار مدة 40 يوم.
GEN 7:13 وفذاك اليوم نفسو ادخل النبي نوح فالسفينة هو وأولادو، سام وحام ويافث واعيال نوح واعليات أولادو الثلاثة.
GEN 7:14 وكان امعاهم من كل نوع من حيوانات لخلا والحيوانات اللي يُربّاو والحيوانات اللي يزحفو اعلى اكروشتهم والطيور.
GEN 7:15 من كل المخلوقات الحيين جاو للنبي نوح ودخلو فالسفينة اعلى شكل أزواج
GEN 7:16 اذكر ونيثي من كل مخلوق كيف ما اطلب مولانا من النبي نوح. وعاڮب ذاك اڮفل الله تعالى باب السفينة.
GEN 7:17 وواصل الطوفان مشيه اعلى لارض مدة 40 يوم، ورڮب ما الطوفان السفينة فوڮ لارض.
GEN 7:18 وكانت المياه الياسرة اتواصل مشيها اعلى لارض والسفينة ماشة فوڮ الما.
GEN 7:19 وانزادت المياه حته يلين غطات لكدا لكبار كاملين اللي تحت السما.
GEN 7:20 وواصلت المياه مشيها يلين الحڮ طولها اعلى الفوڮ اسبع امتار فوڮ لكدا لكبار.
GEN 7:21 وماتو كل المخلوقات الحيين اللي كانو موجودين اعلى لارض من الطيور وحيوانات لخلا والحيوانات اللي يُربّاو والزواحف والبشر.
GEN 7:22 ومات كل مخلوق حي يتنفس اعلى لارض.
GEN 7:23 وفرق مولانا من اعلى سطح لارض كل مخلوق اسوا من البشر والحيوانات والزواحف واطيور السما، كاملين فرقو من لارض ولا ابڮا ماهو نوح واللي امعاه فالسفينة.
GEN 7:24 وابڮات المياه موجودة اعلى لارض مدة 150 يوم.
GEN 8:1 ولا انسا مولانا النبي نوح وكل حيوانات لخلا والحيوانات اللي يُربّاو اللي امعاه فالسفينة، ومشّا الريح اعلى لارض وبدات لارض اتمص الما.
GEN 8:2 وكانت عين الما لكبيرة اللي عميقة فالتراب انڮفلت وابواب السما انڮفلو، ووڮفت اسحاب الجاية من السما.
GEN 8:3 واتراجعت المياه عن لارض اشوي اشوي. وعاڮب 150 يوم،
GEN 8:4 فاليوم 17 من الشهر السابع، وڮفت السفينة اعلى اكدا أراراط.
GEN 8:5 وظلت المياه تنتڮص يلين الشهر العاشر. وفاليوم لأول من الشهر العاشر ظهرو روس لكدا.
GEN 8:6 وعاڮب 40 يوم افتح النبي نوح الكوة اللي عدل فالسفينة.
GEN 8:7 ومشّا اغراب واتم طاير فوڮ لارض يلين بدات المياه تيبس عن لارض.
GEN 8:8 وعاڮب ذاك مشّا النبي نوح احمامة اياك يشوف إلى عادت المياه يبست عن لارض.
GEN 8:9 ولا اجبرت لحمامة ابليدة تنزل فيها بيهلي المياه مزالت امغطية لارض كاملة. ورجعت لحمامة شور النبي نوح فالسفينة. ومد ايدو واحكمها ودخلها شورو فالسفينة.
GEN 8:10 وحانا اسبعة أيام اخرين ومشّا لحمامة من السفينة مرة اخرا.
GEN 8:11 ورجعت شورو امع اغروب الشمس رافدة فخشمها ورڮة من صدراية الزيتون اجديدة. وافهم النبي نوح اعلن المياه مصتها لارض.
GEN 8:12 وحانا اسبعة أيام اخرين وبعدين مشّا لحمامة ولا رجعتلو هاذي المرة.
GEN 8:13 وفاليوم لأول من الشهر لأول من سنة 601 من حياة النبي نوح، فهاذا الوقت كانت المياه بدات تيبس عن لارض. وارفع النبي نوح مغطاية السفينة وشاف اعلن لارض تيبس حته.
GEN 8:14 وفاليوم 27 من الشهر الثاني يبست لارض تماما.
GEN 8:15 وكلم مولانا النبي نوح وڮالّو:
GEN 8:16 اوخظ من السفينة انتا واعيالك وأولادك واعليات أولادك.
GEN 8:17 ووخظ كل نوع من المخلوقات الحيين اللي امعاك، من الطيور والحيوانات والزواحف اياك يتوالدو فلارض ويكثارو.
GEN 8:18 وخاظ النبي نوح وأولادو واعيالو واعليات أولادو
GEN 8:19 والحيوانات والزواحف والطيور والمخلوقات اللي يتحركو اعلى لارض خاظو كاملين من السفينة بأنواعهم.
GEN 8:20 وابنا النبي نوح مذبح لله تعالى واڮبظ واحد من كل الحيوانات لحلال والطيور لحلال واذبحهم وڮدمهم لله تعالى كيفت قربان محروڮ اعلى المذبح.
GEN 8:21 واڮبلهم الله تعالى وارضا وڮال الله تعالى امبينو امع راصو: ماني لاهي نلعن لارض مرة اخرا بسبب لإنسان امع اعلن ميول ڮلبو شرير من صغرو. ولاني لاهي نكتل كل مخلوق حي مرة اخرا كيف ما عدلت.
GEN 8:22 ومادامت لارض موجودة لاهي يعودو فيها مواسم لحريثة والحصاد، البرد والحمان والصيف والشتا والنهار والليل. ولاهي يتم هاذا هو حالها إلى الأبد.
GEN 9:1 وبارك مولانا النبي نوح وأولادو وڮالهم: اثمرو واكثارو واملاو لارض.
GEN 9:2 حيوانات لخلا اللي فلارض واطيور السما والزواحف وحوت لبحر كاملين لاهي يخافو منكم ويرهبوكم، بيهلي مولانا اعطاكم السلطة اعليهم.
GEN 9:3 وكيف ما اعطيتكم الصدر لخظر كيفت اطعام لكم، ظرك عاطيكم الحيوانات.
GEN 9:4 يغير لا توكلو أي لحم مزال الدم فيه بيهلي الدم هوا اللي يمثل الحياة.
GEN 9:5 يغير دمكم انتوما لاهي انعاقب اعليه كل حيوان سفكو، واملي كل إنسان لاهي نكتلو اعلى حياة خوه لإنسان بيهلي هو كيفتو.
GEN 9:6 ومن يسفك الدم لإنسان لاهي ينسفك دمو، بيهلي مولانا خلڮ لإنسان اعلى شي من صيفاتو.
GEN 9:7 يغير انتوما اثمرو واكثارو فلارض.
GEN 9:8 وكلم مولانا النبي نوح وامعاه أولادو وڮالّو:
GEN 9:9 آنا ظرك لاهي انعدل عهدي امعاكم وامع نسلكم اللي جاي اوراكم.
GEN 9:10 وامع كل مخلوق حي امعاكم من الطيور والحيوانات اللي يُربّاو وكل حيوانات لخلا، وكل اللي خاظ من السفينة وكل مخلوق حي اعلى لارض.
GEN 9:11 ولاهي انعدل عهدي امعاكم ولا تيت لاهي نسمح باعلن اتفرق مياه الطوفان كل مخلوق حي مرة اخرا، ولا تيت لاهي نسمح باعلن الطوفان يجي ويخسر لارض مرة اخرا.
GEN 9:12 وڮال مولانا: هاذي هي علامة العهد اللي لاهي انعدل بيني وبينكم وكل مخلوق حي امعاكم فكل لاجيال،
GEN 9:13 لاهي اندير خط الندية فالسما ويعود علامة العهد امبيني وامبين لارض.
GEN 9:14 وإلين انمشّي السحاب فوڮ لارض ويظهر خط الندية فالسما،
GEN 9:15 نتذكر العهد اللي امبيني وبينكم وامع كل نوع من مخلوق حي، ولا تتحول المياه شور طوفان يهلك كل مخلوق حي.
GEN 9:16 وإلين يظهر خط الندية فالسما لاهي انشوفو ونتذكر العهد اللي لاهي يدوم إلى الأبد امبيني وامبين المخلوقات الحية كاملين اللي اعلى لارض.
GEN 9:17 وڮال مولانا للنبي نوح: هاذي هي علامة العهد اللي عدلتو امع كل مخلوق حي اعلى لارض.
GEN 9:18 هاذو هوما أولاد نوح اللي خاظو من السفينة: سام وحام ويافث. وحام هو بو كنعان.
GEN 9:19 هوما أولاد النبي نوح الثلاثة ونسلهم هو اللي انتشر فكل جيهات لارض.
GEN 9:20 واشتغل النبي نوح فلحريثة واحرث اصدر العنب اللي يُعدل منو عصير العنب.
GEN 9:21 واشرب من عصير العنب واسكر واتعرا فخيمتو.
GEN 9:22 وشاف حام بو كنعان عورة بوه وامشا وعلم اخوتو.
GEN 9:23 واڮبظو سام ويافث حولي وداروه اعلى اكتافهم ودخلو شور بوهم النبي نوح فالخيمتو، وهوما كانو ماشين اعلى لورا وسترو عورة بوهم. وكانو وجوهتهم صادين اعلى الجيهة لخرا اياك ما يشوفو عورة بوهم.
GEN 9:24 وإلين اوعا النبي نوح من سكرو واعرف اللي عدلّو ولو الصغير،
GEN 9:25 ڮال: ملعون كنعان ولاهي يعود أحقر من اعبيد اخوتو.
GEN 9:26 وڮال املي: يا ربي وإلهي بارك سام واجعل كنعان عبد لو.
GEN 9:27 ووسع حدود يافث، ويسكن فاخيام سام ويعود كنعان عبد لو.
GEN 9:28 وعاش النبي نوح عاڮب الطوفان 350 سنة.
GEN 9:29 وإلين اتوفا النبي نوح كان عندو 950 سنة.
GEN 10:1 هاذي لاحة سجل أولاد سام وحام ويافث أولاد النبي نوح، اللي خلڮولهم عاڮب الطوفان.
GEN 10:2 أولاد يافث هوما جومر وماجوج وماداي وياوان وتوبال وماشك وتيراس.
GEN 10:3 وأولاد جومر هوما أشكناز وريفاث وتوجرمة.
GEN 10:4 وأولاد ياوان هوما أليشة وترشيش وكتيم ورودانيم.
GEN 10:5 ومنهم اتفرعو الناس من قريات اللي اعلى حاشية لبحر اعلى حسب قبايلهم وشعوبهم ولغاتهم.
GEN 10:6 وأولاد حام هوما كوش ومصرايم وفوط وكنعان.
GEN 10:7 وأولاد كوش هوما سبا وحويلة وسبتة ورعمة وسبتكا. وأولاد رعمة هوما شبا وددان.
GEN 10:8 وكوش اجبر ول اسمو نمرود اللي عاد محارب امتين فلارض.
GEN 10:9 وكان صياد مانع بفضل الله تعالى. ولذا السبب يڮول المثل: كيفت نمرود هو صياد امتين بفضل الله تعالى.
GEN 10:10 وتكونت مملكتو فلأول من مدن بابل وأرك وأكد وكلنة فارض شنعار.
GEN 10:11 وعاڮب ذاك هاجر شور أشور وابنا مدن نينوى ورحوبوت عير وكالح
GEN 10:12 ورسن اللي هي مدينة اكبيرة امبين نينوى وكالح.
GEN 10:13 ومصرايم اجبر قبايل لود وعنام ولهاب ونفتوح
GEN 10:14 وفتروس وكفتور وكسلوح، ومن كسلوح جاو الفلشطيميين.
GEN 10:15 وكنعان اجبر اطفيل اسمو صيدون وهو بكرو وبعدين اجبر حثا،
GEN 10:16 وكنعان هو املي بو اليبوسيين ولأموريين والجرجاشيين
GEN 10:17 والحويين والعرقيين والسينيين
GEN 10:18 ولأرواديين والصماريين والحماثيين. وعاڮب ذاك اتفرعو افخاظ قبايل الكنعانيين.
GEN 10:19 وامتدو حدود كنعان من صيدون يلين غزة واخظين من جرار، واورا ذاك شور لاشع واخظين من سدوم وعمورة وأدمة وصبويم.
GEN 10:20 وهاذو كاملين هوما أولاد حام اعلى حسب قبايلهم ولغاتهم وشعوبهم وبلدانهم.
GEN 10:21 وسام هو خو يافث لكبير وهو املي اجبر أولاد وهو جد أولاد عابر كاملين.
GEN 10:22 أولاد سام هوما عيلام وأشور وأرفكشاد ولود وأرام.
GEN 10:23 وأولاد أرام هوما عوص وحول وجاثر وماش.
GEN 10:24 وأرفكشاد اجبر شالح وشالح اجبر عابر.
GEN 10:25 وعابر اجبر اطفلين لأول منهم اسمو فالق وهو اللي فأيامو انڮسمت لارض. واسم خوه الثاني هو يقطان.
GEN 10:26 ويقطان اجبر أولاد هوما ألموداد وشالف وحضرموت ويارح
GEN 10:27 وهدورام وأوزال ودقلة
GEN 10:28 وعوبال وأبيمايل وشبا
GEN 10:29 وأوفير وحويلة ويوباب. وهاذو كاملين هوما أولاد يقطان.
GEN 10:30 وكانو ساكنين فاراضي لكدا اللي فالشرق اللي امبين ميشع وسفار.
GEN 10:31 وهاذو كاملين هوما أولاد سام حسب قبايلهم ولغاتهم وبلدانهم وشعوبهم.
GEN 10:32 وهاذو هوما قبايل أولاد النبي نوح حسب انسابهم وشعوبهم ومنهم اتفرڮو الشعوب فلارض عاڮب الطوفان.
GEN 11:1 وكانت الناس كاملة اللي فلارض تتكلم بلغة وحدة ويستخدمو كلمات يعرفوهم كاملين.
GEN 11:2 واخلڮ اعلن يلين رحلت الناس شور الشرق جبرو واد فارض شنعار واتسعو فيه.
GEN 11:3 وڮالو امبيناتهم: وهاو نڮبظو الطوب ونشووه بالنار. واستخدمو الطوب بل لحجار ونوع من الطين لمتين بل الطين العادي.
GEN 11:4 وڮالو: وهاو نبنو لروصنا مدينة وبرج يوصل طولو للسما ونعطو لروصنا هوية اياك ما نتفرڮو فكل جيهات لارض.
GEN 11:5 وانزل الله تعالى اياك يشوف لمدينة والبرج اللي كانو الناس يبنوهم.
GEN 11:6 وڮال الله تعالى: يلين عادو وهوما شعب واحد ويتكلمو بلغة وحدة، بداو يعدلو هاذا، ماهو لاهي يصعاب اعليهم يعدلو أي شي اوخر ينواو يعدلوه.
GEN 11:7 ننزلو اصا وانخلطو لغتهم اياك كلهم ما يفهم لغة لوخر.
GEN 11:8 وشتتهم الله تعالى من فم فلارض كاملة ووڮفو عن بناء لمدينة.
GEN 11:9 ولذا السبب اُسمات لمدينة بابل اللي معناها الله تعالى خلط لغة العالم كامل. ومن فم شتتهم الله تعالى فكل جيهات لارض.
GEN 11:10 وهاذي لاحة سجل أولاد سام: يلين عاد سام عندو 100 سنة اجبر أرفكشاد عاڮب الطوفان بسنتين.
GEN 11:11 وعاش سام عاڮب ذاك 500 سنة واجبر فيها أولاد اخرين وامنات.
GEN 11:12 وإلين عاد عندو أرفكشاد 35 سنة اجبر شالح.
GEN 11:13 وعاش أرفكشاد عاڮب ذاك 403 سنوات اجبر فيها أولاد اخرين وامنات.
GEN 11:14 وإلين عاد عندو شالح 30 سنة اجبر عابر.
GEN 11:15 وعاش شالح عاڮب ذاك 403 سنوات اجبر فيها أولاد اخرين وامنات.
GEN 11:16 وإلين عاد عندو عابر 34 سنة اجبر فالق.
GEN 11:17 وعاش عابر عاڮب ذاك 430 سنة اجبر فيها أولاد اخرين وامنات.
GEN 11:18 وإلين عاد عندو فالق 30 سنة اجبر رعو.
GEN 11:19 وعاش فالق عاڮب ذاك 209 سنوات اجبر فيهم أولاد اخرين وامنات.
GEN 11:20 وإلين عاد عندو رعو 32 سنة اجبر سروج.
GEN 11:21 وعاش رعو عاڮب ذاك 207 سنوات اجبر فيها أولاد اخرين وامنات.
GEN 11:22 وإلين عاد عندو سروج 30 سنة اجبر ناحور.
GEN 11:23 وعاش سروج عاڮب ذاك 200 سنة اجبر فيها أولاد اخرين وامنات.
GEN 11:24 وإلين عاد عندو ناحور 29 سنة اجبر تارح.
GEN 11:25 وعاش ناحور عاڮب ذاك 119 سنة اجبر فيها أولاد اخرين وامنات.
GEN 11:26 وإلين عاد عندو تارح 70 سنة اجبر أبرام وناحور وهاران.
GEN 11:27 وهاذا سجل أولاد تارح: تارح اجبر أبرام وناحور وهاران، وهاران اجبر لوط.
GEN 11:28 ومات هاران سابڮ بوه تارح فلارض اللي اخلڮ فيها شور أور الكلدانيين.
GEN 11:29 واتعرس كل من أبرام وناحور وكان اسم اعيال أبرام ساراي واسم اعيال ناحور مِلْكَةُ منت هاران اللي اجبر مِلْكَةُ ويسكة.
GEN 11:30 وكانت ساراي عاڮر ما اتخلي التركة.
GEN 11:31 واڮبظ تارح ولو أبرام وول ولو لوط ول هاران وساراي اعيال ولو أبرام وامشاو فابلد من أور الكلدانيين واعدين ارض كنعان. يغير يلين لحڮو حاران سكنو فم.
GEN 11:32 ومات تارح فحاران يلين كان عندو 205 سنوات.
GEN 12:1 وڮال الله تعالى لأبرام: امشي من ارضك وقبيلتك ودار أهلك، وڮيس لارض اللي لاهي انعتلك.
GEN 12:2 ولاهي انعدل منك شعب عظيم، ولاهي انباركك، ولاهي انكبر اسمك، واتعود بركة لناس كاملة.
GEN 12:3 واللي يباركك يعود امبارك، واللي يلعنك يعود ملعون. ولاهي تتبارك القبايل كاملين اللي فلارض بسببك.
GEN 12:4 وڮام أبرام وعدل ذا اللي ڮالّو الله تعالى. وامشات امعاه ساراي اعيالو ولوط ول خوه من حاران. وفذا الوقت كان عندو أبرام 75 سنة.
GEN 12:5 وڮبظو امعاهم ادبشهم واعبيدهم اللي كانو فحاران، وامشاو واعدين ارض كنعان. وإلين وصلو ارض كنعان،
GEN 12:6 عاد أبرام يمشي من ابليدة شور ابليدة يجول فكنعان يلين اوصل لبليدة اللي فيها صدراية اكبيرة اسمها موري اللي خارج مدينة شكيم اللي ساكنين فيها الكنعانيين فذاك الوقت.
GEN 12:7 واظهر الله تعالى لأبرام، وڮالّو: لاهي نعطي هاذي لارض لنسلك. وڮام أبرام وابنا فم مذبح، ويڮدم فيه اذبايح لله تعالى اللي اظهرلو.
GEN 12:8 وعاڮب ذاك امشا من هاذي لبليدة واعد كدية فجيهة الشرق من لبليدة اللي اظهرلو الله تعالى فيها. وابنا خيمتو امبين بيت إيل اللي فالغرب ومدينة عاي اللي فالشرق. وابنا فم مذبح لله تعالى وصلى فيه.
GEN 12:9 ومن فم ڮيم ماشي واعد النقب اللي فالجنوب.
GEN 12:10 وإلين خلڮت جفاف فارض كنعان، ڮام أبرام وامشا واعد مصر يسكن فيها شي من الوقت بيهلي الجفاف كانت امتينة فلارض.
GEN 12:11 وإلين ڮرب من مصر ڮال لساراي اعيالو: آنا نعرف اعلنك امرة زينة،
GEN 12:12 وإلين يشوفوك المصريين لاهي يڮولو عنك اعيالي، ويكتلوني، ويمشو بيك امعاهم.
GEN 12:13 ڮوليلهم اصا عنك اختي ونسلكو من المشاكل ونجبرو العافية بسببك انتي.
GEN 12:14 وإلين ادخل أبرام مصر شافو أهل مصر اعلن اعيالو امرة زينة.
GEN 12:15 وشافوها املي عمال فرعون وخبرو فرعون بجمالها ، وامشاو بيها شور قصرو.
GEN 12:16 ولا ابخل شي من شي متعدل لأبرام بسبب ساراي، واعطاه لغنم ولبڮر ولحمير ولعبيد ولخدم والبل.
GEN 12:17 يغير ما ابطا فرعون يلين ابلاه الله تعالى هو وأهلو بامراض خطيرة بسبب اعلنو اكبظ ساراي زوجة أبرام وحاول يتعرص امعاها.
GEN 12:18 وڮام فرعون ومشّا لأبرام يجيه وڮالّو: انتا ذا اللي عدلتلي شنهو؟ اعلاش ما اتڮولي اعلنها اعيالك؟
GEN 12:19 اعلاش اتڮولي اعلنها ختك اياك نڮبظها ونتخيم امعاها؟ ظرك اصا اسمع، اڮبظ اعيالك وامرڮ بيها.
GEN 12:20 وڮام فرعون ووصا اعليه ارواڮيج يصيفطوه هو واعيالو وكل أملاكو.
GEN 13:1 وامشا أبرام من مصر وامعاه ساراي ولوط وكل أملاكو شور النقب فكنعان.
GEN 13:2 وكان أبرام عندو ياسر من الحيوان والفظة والذهب.
GEN 13:3 وامشا من النقب شور بيت إيل إلى لبليدة اللي ڮط ابنا فيها خيمتو فلول، اللي امبين بيت إيل وعاي.
GEN 13:4 وهاذي هي لبليدة اللي فيها مذبح مولانا اللي ڮط ابنا. وفم صلى لله تعالى.
GEN 13:5 وكان املي لوط اللي امشا امع أبرام عندو لغنم ولبڮر ولخيام.
GEN 13:6 وامتلات لارض من أملاكهم يلين ما اتلا فم بل امنين يعيشو فيه فبلد.
GEN 13:7 وخلڮت اخصومة امبين رعيان أبرام ورعيان لوط فالوقت اللي كانو يعيشو فيه الكنعانيين والفرزيين فلارض.
GEN 13:8 وڮال أبرام للوط : ما يالتنا نتخاصمو امبيناتنا، ولا يالتهم يتخاصمو رعياننا بيهلي نحنا خوت،
GEN 13:9 ولارض واسعة ڮدامك. خلينا نتفاصلو. وإلين تمشي اعلى زرك العربي، نمشي اعلى زري العسري. وإلين تمشي اعلى زرك العسري، نمشي آنا شور زري العربي.
GEN 13:10 واتلفت لوط اعلى زرو وشاف واد الأردن كامل يلين صوغر. وكانت لارض املانة من لخظار وكيفت جنة الله تعالى، وتشابه لارض مصر. وهاذا كان سابڮ يهلك الله تعالى سدوم وعمورة.
GEN 13:11 واختار لوط لراصو واد الأردن كامل، وامشا شور الشرق. واتفرڮ كلهم عن صاحبو.
GEN 13:12 واسكن أبرام فارض كنعان، واسكن لوط فابلد لخظار، وابنا اخيامو اڮريب من سدوم.
GEN 13:13 وكانو أهل سدوم اشرار وعاصين حته لله تعالى.
GEN 13:14 وڮال الله تعالى لأبرام عاڮب ما امشا عنو لوط: رڮب عينيك واتلفت من حولك من لبليدة اللي انتا فيها، الشمال والجنوب والشرق والغرب،
GEN 13:15 بيهلي هاذي لارض اللي انتا شايف لاهي نعطيهالك ولنسلك إلى الابد.
GEN 13:16 ولاهي انعدل نسلك كيفت احصي التراب، إلى عاد آراڮاج يڮد يحسب احصي التراب يتمكن من عد ذريتك .
GEN 13:17 ڮوم وامشي فطول لارض وعرظها بيلي اعطيتهالك.
GEN 13:18 وڮام أبرام وارفد اخيامو وابناها احذا اصدر ممرا اللي احذا حبرون. وابنا مذبح لله تعالى فم.
GEN 14:1 وفذاك الوقت اخلڮ اعلن أمرافل ملك بابل وأريوك ملك ألاسار وكدرلعومر ملك عيلام وتدعال ملك جويم
GEN 14:2 ادايڮو امع بارع ملك سدوم وبرشاع ملك عمورة وشنأب ملك أدمة وشمئير ملك صبويم وملك بالع اللي هي صوغر.
GEN 14:3 كلهم اجمع اللي عندو من لجنود فواد السديم اللي ينڮالو لبحر الميت.
GEN 14:4 واللي كانو اعبيد لكدرلعومر مدة 12 سنة، يغير امبلڮو واتكبرو اعليه فالسنة 13 .
GEN 14:5 وفالسنة 14 امشا كدرلعومر وأصحابو من الملوك، وغلبو الرفائيين فلبليدة ينڮالها عشتروت قرنائم. وغلبو الزوزيين فلبليدة ينڮالها هام. وغلبو الإيميين فبطحة قريتايم.
GEN 14:6 وغلبو الحوريين احذا كدية سعير يلين بيت فاران اللي ماهو ابعيد من الخلوات.
GEN 14:7 ومن فم رجعو واعدين مدينة قادش، وغلبو كل لارض اللي كانو فيها قبيلة العماليق. وغلبو املي الأموريين اللي كانو ساكنين فارض حزازون تامار.
GEN 14:8 وعاڮب ذاك ڮامو كل من ملك سدوم وملك عمورة وملك أدمة وملك صبويم وملك بالع،
GEN 14:9 وادايڮو امع كدرلعومر ملك عيلام وتدعال ملك جويم وأمرافل ملك بابل وأريوك ملك ألاسار فواد السديم. وكانو أربع ملوك ضد خمسة.
GEN 14:10 وكان واد السديم املان من ظايات الطين. وكل من ملك سدوم وملك عمورة حاولو يهربو امع رجالتهم من الحرب يغير وحلو فالطين واللي اسلك منهم اهرب شور الكدية.
GEN 14:11 وڮامو الملوك لخرين الربعة الباڮين اللي غلبو فالحرب وڮبظو كل شي كان فسدوم وعمورة من أملاك واطعام وامشاو.
GEN 14:12 وڮردو لوط ول خو أبرام اللي كان ساكن فسدوم فهاذا الوقت، وڮبظو كل شي كان عندو.
GEN 14:13 واسلك آراڮاج من أهل سدوم وعمورة، وجا لأبرام العبراني ورد اعليه ذا اللي اخلڮ. وكان أبرام ساكن احذا صدراية اكبيرة اللي فاتراب ممرا، اللي من الأموريين، وهو خو أشكول وعانر، وكلهم أصحاب لأبرام.
GEN 14:14 وإلين اسمع أبرام باعلن ول خوه نحبس، ڮام واڮبظ كل رجالتو اللي اخلاڮة وكابرين عندو، واللي كان عددهم 318 آراڮاج، وامشا دافع اورا الملوك الربعة يلين لحڮ مدينة دان.
GEN 14:15 وإلين عاد ليل، ڮام أبرام وڮسم رجالتو اعلى فرق، واهجم اعليهم، واغلبهم، وامشا دافع اوراهم يلين لحڮو ابليدة اسمها حوبه اللي هي شمال دمشق.
GEN 14:16 واڮبظ اللي كانو يملكو، وجاب لوط ول خوه وأملاكو ولعليات ولمحابيس لخرين.
GEN 14:17 وارجع إبراهيم بعدما اغلب الملك كدرلعومر والملوك لخرين اللي كانو امعاه. وخاظ ملك سدوم اياك يستقبلو فواد شوى اللي اسمو واد الملك.
GEN 14:18 وكان ملكيصادق ملك ساليم امع ملك سدوم . واعطا ملكيصادق لأبرام شي من امبورو وشي من عصير العنب. وكان راجل من رجالة مولانا العظيم.
GEN 14:19 وبارك أبرام وڮالّو: اعليك بركة مولانا العظيم اللي خلڮ السما والتراب،
GEN 14:20 والحمد لمولانا العظيم اللي نصرك اعلى أعدائك. واعطاه أبرام العشر من كل شي كان عندو.
GEN 14:21 وعاڮب ذاك ڮال ملك سدوم لأبرام: لاهي نڮبظ الرواڮيج وانتا تڮبظ الباڮي.
GEN 14:22 وڮالّو أبرام: احلفت اعلى الله تعالى اللي خلك السما والتراب،
GEN 14:23 اعلني ما نڮبظ أي شي من ذا اللي عندك اياك ما اتڮول اعلني اجبرت الخير من عندك.
GEN 14:24 ولاني لاهي نڮبظ من عندك ماهو اللي كالو رجالتي. يغير اصا الرجالة اللي امشاو امعايَ فالحرب واللي هوما عانر وأشكول وممرا، خليهم يجبرو ڮرعتهم.
GEN 15:1 وعاڮب يلين خلڮت هاذي لمور، ڮال الله تعالى لأبرام فحلم: لا تخاف من شي. آنا نحميك وأجرك اكبير عندي.
GEN 15:2 وڮال أبرام: يا مولانا يا ربي شنهي اصا فايدة الخير اللي تعطيني. آنا ما نجبر لولاد، واللي لاهي يورثني هو أليعازر اللي من دمشق.
GEN 15:3 وڮال املي أبرام: انتا ما اعطيتني لولاد وذا هو لعبد اللي اخلاڮة عندي لاهي يورثني.
GEN 15:4 وڮالّو الله تعالى: ذا لعبد ماهو لاهي يورثك. اللي لاهي يورثك لاهي يوخظ من صلبك.
GEN 15:5 ووخظ الله تعالى أبرام شور ڮدام خيمتو وڮالّو: خرص السما واعد النجوم إلى ڮديت. وڮالّو الله تعالى: ڮد عدد النجوم لاهي يعود ڮد نسلك.
GEN 15:6 وصدق أبرام الله تعالى واعتبر الله تعالى أبرام إنسان صالح.
GEN 15:7 وڮالّو: آنا هو الله تعالى اللي جابك من أور الكلدانيين اياك انورثك هاذي لارض .
GEN 15:8 وڮال أبرام لله تعالى: ابسيمحالة لاهي نعرف اعلني لاهي نورثها؟
GEN 15:9 وڮالّو الله تعالى: اڮبظلي عجلة وعنز وكبش اعمر كل منهم 3 سنوات. وڮبظلي املي احمامتين.
GEN 15:10 وڮبظهم أبرام وشڮهم من الوسط اعلى نصين واجعل كل نص امڮابل النص لوخر، والطيور ما ڮسمهم.
GEN 15:11 وإلين ڮامت الطيور لخلة تنزل وتوكل من الجيفة، صاعهم أبرام.
GEN 15:12 وإلين الحڮ لمغرب، ارڮد أبرام ارڮاد امتين، وفذا جات اعليه ظلمة امتينة ونخلع.
GEN 15:13 وڮالّو الله تعالى: عود متيقن اعلن نسلك لاهي يتغرب فارض ماهي لهم ، ولاهي يستعبدوهم أهلها ويحڮروهم مدة 400 سنة.
GEN 15:14 يغير لاهي انخلص لهم من ذاك الشعب اللي أستعبدهم، وعاڮب ذاك لاهي يوخظو بياسر من لأملاك.
GEN 15:15 وانتا لاهي اتموت فالعافية وتندفن بشيبة صالحة.
GEN 15:16 وهوما لاهي يرجعو هون عاڮب أربع اجيال . بيهلي اثام الأموريين اللي ساكنين هون ما فات عادت ياسرة اياك يعاقبهم الله تعالى اعليها .
GEN 15:17 وإلين غربت الشمس وجات الظلمة، اظهر اعمود من الدخان واشهاب من النار واخظين امبين طشات اللحم.
GEN 15:18 وفذاك اليوم عدل الله تعالى عهد امع أبرام وڮالّو: لاهي نعطي هاذي لارض لنسلك من نهر مصر إلى نهر لكبير، نهر الفرات،
GEN 15:19 ابلاد القينيين والقنزيين والقدمونيين
GEN 15:20 والحيثيين والفرزيين والرفائيين
GEN 15:21 ولأموريين والكنعانيين والجرجاشيين واليبوسيين.
GEN 16:1 وساراي اعيال أبرام كانت امرة عاڮر. وكانت عندها خادم مصرية اسمها هاجر.
GEN 16:2 وڮالت ساراي لأبرام: الله تعالى ما اعطاني الذرية. ڮوم اصا اتكي امع هاجر. يكان الله تعالى يعطيني ذرية منها. وعدل أبرام ذا اللي ڮالتلو ساراي اعيالو.
GEN 16:3 وڮامت ساراي واعطاتو خادمها وعاشرها. وهاذا اخلڮ عاڮب ما قضاو 10 سنوات فارض كنعان.
GEN 16:4 وعاشر أبرام هاجر وحملت منو . وإلين عرفت أنها حملت، عادت تحڮر عربيتها ساراي.
GEN 16:5 وفذا ڮالت ساراي لأبرام: الله تعالى يحاسبك اعلى ذا اللي اخلڮلي. عاڮب ما اعطيتك خادمي وحملت منك، عادت تحڮرني. الله تعالى يقضي بيني وبينك.
GEN 16:6 وجاوبها أبرام وڮالها: هاذي خادمك ڮدامك وعدليلها اللي اتدوري. وعذبت ساراي هاجر يلين هربت اعليها.
GEN 16:7 واجبرها ملاك الله تعالى اڮريب من ظاية الماء فطريڮ اللي واعدة مدينة اسمها شور.
GEN 16:8 وڮالها ملاك الله تعالى: يا هاجر يا خادم ساراي، من امنين جاية؟ وامنين واعدة؟ وڮالتلو هاجر: آنا اهربت من عربيتي ساراي.
GEN 16:9 وڮالها ملاك الله تعالى: رجعي شور عربيتك وسمعيلها.
GEN 16:10 وڮالها املي: لاهي انكثر نسلك يلين يعود ما يڮد ينعد.
GEN 16:11 وڮالها املي: انتي موجوعة ظرك ولاهي تبراي اعلى اطفيل، ولاهي اتسميه إسماعيل اللي معناه الله تعالى يسمع. بيهلي الله تعالى حس بألامك.
GEN 16:12 واطفيلك لاهي يعود آراڮاج امتين وامعادي الناس كاملة والناس كاملة امعاديتو. ولاهي يعود آراڮاج مستحرش ومتكبر اعلى اخوتو كاملين.
GEN 16:13 وحمدت هاجر الله تعالى اللي شافها وحس بألامها وڮالت: آنا شفت ظرك اللي يراعي فيَّ .
GEN 16:14 ولذاك اُسمات هاذي الحاسي باسم: حاسي الحي اللي يراعي فيَّ. وهاذي الحاسي هي موجودة امبين قادش وبَاردَ.
GEN 16:15 وعاڮب ذا خلات هاجر لأبرام ولو. وسما أبرام اطفيلو اللي من هاجر باسم إسماعيل.
GEN 16:16 وكان أبرام فذا الوقت عندو 86 سنة.
GEN 17:1 وإلين عاد أبرام عندو 99 سنة اتجلالّو الله تعالى وڮالّو: آنا هو مولانا القادر، امشي ڮدامي بطريڮ امسڮمة.
GEN 17:2 لاهي انعدل عهدي امعاك وانكثر نسلك حته.
GEN 17:3 وڮام أبرام واسجد ڮدام مولانا. واتكلم امعاه مولانا وڮالّو:
GEN 17:4 اراعيني لاهي انعدل عهدي امعاك ولاهي اتعود بو ياسر من لأُمم.
GEN 17:5 ومن ظرك ما اتلا ينڮالك أبرام اللي معاناه البو لمعظم ، يغير لاهي ينڮالك النبي إبراهيم اللي معناها بو ياسر من لأُمم. بيلي لاهي انعدلك منك ياسر من الشعوب.
GEN 17:6 ولاهي اتعود آراڮاج فايديتو ياسرة، ولاهي يتفرع من نسلك ياسر من الشعوب، ولاهي يوخظو من نسلك ملوك.
GEN 17:7 ويعود عهدي إلى الأبد امبيني وبينك وبين نسلك عاڮبك جيل اورا جيل. وانعودلك إله ولنسلك من بعدك
GEN 17:8 ونعطيك انتا ولذريتك من بعدك ارض كنعان كاملة، اللي اسكنتها متغرب، لكم الدهر كاملو وانعود إلههم.
GEN 17:9 وڮال مولانا للنبي إبراهيم: احفظ عهدي انتا وذريتك من عاڮبك مادامو حيين.
GEN 17:10 هاذا هو لعهد اللي امبيني وبينك وامبين ذريتك من بعدك اللي يالتكم تحفظوه: يُزيّنو الذكور كاملين اللي عندكم .
GEN 17:11 اتزينو كل اذكوركم كاملين واتعود علامة لعهد اللي امبيني وامبينكم.
GEN 17:12 اتمو زينو اذكوركم كاملين من بو 8 أيام اسوا من ذريتك وللا من ذرية حد مشري من فظتك ماهو من نسلك.
GEN 17:13 يالة يُزيّن كل اطفيل اخلاڮة فدارك وللا مشري بالفظة، واتعود علامة عهدي إلى الأبد فلحمكم .
GEN 17:14 واذكر اللي فيكم ما اُزيّن ينصاع من دار أهلو بيهلي خالف عهدي.
GEN 17:15 وڮال مولانا للنبي إبراهيم: وساراي اعيالك لا تيت اتڮولها ساراي من ظرك، يغير لاهي يعود اسمها سارة اللي معناها لأميرة.
GEN 17:16 ولاهي انباركها، ولاهي نعطيك اطفيل منها، ولاهي انباركها وانعدلها أم لياسر من الشعوب. ومنها لاهي يوخظ ملوك.
GEN 17:17 واسجد النبي إبراهيم واظحك وڮال امبينو امع راصو: اثرو يصح يخلڮ اطفيل لراجل بو 100 سنة ؟ واثرو يصح تبرا سارة وهي أم 90 سنة ؟
GEN 17:18 وڮال النبي إبراهيم لمولانا: وإسماعيل ياريتو يُحظَر من بركتك .
GEN 17:19 وڮالّو مولانا: اللي لاهي تبرا هي سارة اعيالك، ولاهي يخلڮلك منها اطفيل، واتسميه إسحاق. لاهي انعدل عهدي إلى الأبد امعاه وامع ذريتو من بعدو.
GEN 17:20 أما اصا إسماعيل فأستجبت لطلبتك لو. لاهي انباركو حته، ولاهي يعود فايدتو ياسرة، ولاهي انكثر نسلو، ولاهي يعود بو للثاني عشر رئيس. ويعود شعب اكبير.
GEN 17:21 يغير عهدي لاهي يعود امع إسحاق اللي لاهي يجي من سارة كيف هاذا الوقت من السنة الجاية.
GEN 17:22 وإلين اوفا مولانا من لكلام امع النبي إبراهيم امشا عنو.
GEN 17:23 وفذاك النهار اڮبظ النبي إبراهيم ولو إسماعيل والذكور كاملين اللي خلڮو فدارو والذكور كاملين اللي اشرا، وزينهم، وعدل ذا اللي ڮالّو مولانا.
GEN 17:24 وكان النبي إبراهيم عندو 99 سنة وقت ازيانتو.
GEN 17:25 وإسماعيل ولو وقت ازيانتو عندو 13 سنة.
GEN 17:26 وتمت ازيانة النبي إبراهيم وإسماعيل
GEN 17:27 والذكور كاملين اللي خلڮو فدارو واذكور كاملين اللي اشرا فنفس اليوم.
GEN 18:1 وعاڮب ذاك اظهر الله تعالى للنبي إبراهيم عند صدراية ممرا، وقت اللي كان ڮاعد ڮدام فم خيمتو لڮايلة.
GEN 18:2 وفذا رڮب وجهو وشاف اثلت رجالة ماشين اعلى جيهتو، وادفع شورهم اياك يرحب بيهم. وإلين لحڮهم، ڮام واسجد اعلى التراب إحترام لهم.
GEN 18:3 وڮال: يا شيخي إلى عدت شايف عن عبدك يستحق الشرف عنك تستراح عندو، لا تتخطاه.
GEN 18:4 وخليني انجيب لكم شي من الماء تغسلو بيه كرعيكم وتڮعدو تحت ظل الصدراية.
GEN 18:5 وانجيب لكم شي من امبورو توكلوه ومن فم تواصلو مشيكم واتعودو خظتو اعلى خيمة عبدكم. وڮالولو: ما فم مشكلة، عدل ذا اللي ڮلت.
GEN 18:6 وادفع النبي إبراهيم واعد خيمتو اللي فيها سارة وڮالها: ڮومي بالعجلة وعجني 3 كيلات اكبار من الدڮيڮ الزين وخبزيهم.
GEN 18:7 وڮام النبي إبراهيم وادفع شور امراحو واڮبظ اعجل اسمين واعطاه لجديع عندو ينصبو.
GEN 18:8 وعاڮب ذاك اڮبظ النبي إبراهيم شي من الزبدة وللبن ولعجل اللي انطبخ، واطرح ذا ڮدامهم، وابڮا واڮف ڮدامهم يخدمهم تحت الصدراية وهوما يوكلو.
GEN 18:9 وڮالولو: وينهي اعيالك؟ ڮالّهم النبي إبراهيم: اراعيها فالخيمة.
GEN 18:10 وڮال واحد منهم للنبي إبراهيم: لاهي نرجعلك فهاذا الوقت من السنة الجاية ولاهي اتعود سارة عادت باطفيلها منك. وذا الوقت كانت سارة واڮفة اوراه عند فم الخيمة وسمعت اكلامهم.
GEN 18:11 وكان النبي إبراهيم وسارة اكهولة اكبار فالسن واتخطات سارة سن لحمل.
GEN 18:12 وظحكت سارة امبينها امع راصها وڮالت: عاڮب ما استكهلت وعاد راجلي شيباني نجبر العيال؟
GEN 18:13 فذا ڮال الله تعالى للنبي إبراهيم: اشواسا سارة تظحك واتڮول: انڮد نبرا اعلى اطفيل وآنا كهلة؟
GEN 18:14 الله تعالى اثرو يڮلبو شي؟ لاهي نرجعلك فهاذا الوقت من السنة الجاية واتعود سارة عادت باطفيلها منك.
GEN 18:15 وانخلعت سارة ونكرت اعلنها ظحكت. وڮالها الله تعالى: ماهي حڮ انتي اظحكتي اڮبال!
GEN 18:16 وعاڮب ذاك ڮامو الرجالة الثلاثة ماشين اعلى جيهة سدوم، وامشا امعاهم النبي إبراهيم يسيفطهم.
GEN 18:17 وڮال الله تعالى اللي هو واحد من الرجالة الثلاثة : ما انڮد نجحد عن إبراهيم اللي ناوي انعدل لسدوم.
GEN 18:18 وإبراهيم لابد من يعود بو شعب اكبير وامتين وتتبارك شعوب لارض كاملة بسببو .
GEN 18:19 بيلي آنا هو اللي اخترتو اياك يوصي أولادو وأهلو من بعدو اياك يحفظو الطريڮ الله تعالى، امعدلين البر والعدل يلين يعدل الله تعالى اللي اتعهد بيه للنبي إبراهيم.
GEN 18:20 وڮال الله تعالى: اكثارة الشكوى والظلم اعلى أهل سدوم وعمورة وشرهم زاد اعلى حدو.
GEN 18:21 لاهي انڮيسهم وانشوف إلى عاد ذا حڮ ونتأكد بنفسي.
GEN 18:22 وامشاو الرجالة اللي كانو امع الله تعالى واعدين سدوم ، وابڮا النبي إبراهيم واڮف امع الله تعالى.
GEN 18:23 وڮرب النبي إبراهيم منو وڮالّو: لاهي تهلك الصالح امع الشرير؟
GEN 18:24 يلين تجبر فذي لمدينة 50 آرڮاج صالحة لاهي تهلكها وللا لاهي اتسامحها اعلى أساس هاذو الخمسين الصالحين؟
GEN 18:25 انتا اعظم من اللي اتخلط امبين الصالح والشرير، ويعود الصالح كيف الشرير حشاك. ما يصح اعلنك انتا الديان ما تَعْدل؟
GEN 18:26 وڮال الله تعالى للنبي إبراهيم : يلين نجبر فسدوم الا 50 آرڮاج صالحة انسامح الباڮين.
GEN 18:27 وڮال النبي إبراهيم: آنا كثرت من لكلام امع الرب امع اعلني مخلوق من التراب والرماد.
GEN 18:28 وفحالتهم نقصو 5 ارواڮيج صالحين لاهي تهلك لمدينة اعلى أساس 45؟ وڮالّو : يلين نجبر فيها 45 صالحين ما نهلكها.
GEN 18:29 وڮالّو النبي إبراهيم مرة ثانية: وفحالتك اجبرت الا 40 آرڮاج صالحة؟ وڮالّو : ماني لاهي نهلكهم اعلى أساس 40 الصالحين.
GEN 18:30 وڮال النبي إبراهيم: لا تنفڮع اعليَّ واسمحلي نتكلم، وفحالتك اجبرت الا 30 صالحين؟ وڮالّو: ماني لاهي نهلكها إلى اجبرت فيها 30 صالحين.
GEN 18:31 وڮال النبي إبراهيم: آنا نعرف اعلني كثرت لكلام امعاك، يغير فحالتك اجبرت الا 20 صالحين؟ وڮالّو : ماني لاهي نهلكها يلين نجبر فيها 20.
GEN 18:32 وڮال النبي إبراهيم: لا تغضب اعليَّ يا رب إلى اتكلمت وڮلتلك إلى اجبرت فلمدينة الا 10 صالحين؟ وڮالّو : ماني لاهي نهلكها إلى اجبرت فيها 10.
GEN 18:33 وعاڮب ما اوفا الله تعالى من لكلام امع النبي إبراهيم، امشا وارجع النبي إبراهيم شور بلو.
GEN 19:1 وجاو الملايكة لأثنين لمدينة سدوم امع اغروب الشمس. وذا الوقت كان لوط ڮاعد احذا بوابة سدوم. وإلين شافهم ڮام واڮف واعدهم يستقبلهم ، واسجد بوجهو اعلى التراب إحترام لهم.
GEN 19:2 وڮال: يا شيوخي استراحو وباتو فدار عبدكم اياك اتقضو ليلتكم وتغسلو كرعيكم، وامع الصباح اتواصلو اطريڮكم. وڮالولو: ابدي لاهي انقضو ليلتنا لڮدام.
GEN 19:3 يغير لوط الح اعليهم يلين ڮبلو يمشو امعاه ويباتو فدارو. وعشاهم واخبزلهم امبورو وكالو.
GEN 19:4 وسابڮ يرڮدو اجتمع اعليهم اكهولة وفڮاريج مدينة سدوم ڮدام الدار.
GEN 19:5 وعيطو لوط وڮالولو: وين هوما الرجالة اللي بايتين عندك الليلة ؟ وخظهم شورنا اياك انلوطوهم.
GEN 19:6 وخاظ شورهم لوط واڮفل الباب اوراه
GEN 19:7 وڮال: لا اتعدلو المعصية يا خوتي.
GEN 19:8 اراعي عندي منتين اعزيبات. لاهي انوخظهم لكم اياك اتعدلو امعاهم اللي تبغو. أما اصا ذو الرجالة لا اتعدلولهم شي ما ينفع بيهلي ضيوف عندي.
GEN 19:9 وڮالولو: اكحز ابعيد عنّا ! وڮالو املي: ذا آرڮاج اللي جا يسكن عندنا عاد هامو يتحكم فينا. ظرك اصا لاهي انعدلولك شي أطم منهم هوما. واتڮدمو واعدين لوط لاهي يدڮدڮو الباب.
GEN 19:10 فذا الرجالة اللي هوما خطار لوط مدو ايديهم وحكموه ودخلوه وسط الدار، وڮفلو الباب.
GEN 19:11 وخبطو بلعما ارواڮيج اللي كانو واڮفين ڮدام الباب، اصغيرهم واكبيرهم، يلين عاد قالبهم يجبرو بل امنين الباب.
GEN 19:12 وڮالّو الرجالة لأثنين للوط : مندرا يكان عندك أقارب فلمدينة: انساب وللا أولاد وللا امنات وللا أي آراڮاج اوخر اڮريب منك؟ وخظهم من هاذي لمدينة
GEN 19:13 بيهلي نحنا هامنا اندمرو هاذي لبليدة بيهلي كثرة الشكوى من شرها عند الله تعالى، وارسلنا اياك اندمروها.
GEN 19:14 وامشا لوط يعلم الرجالة اللي كانو لاهي يتخيمو امع امناتو وڮالّهم: ڮومو الفوڮ واوخظو من هاذي لبليدة بيهلي الله تعالى لاهي يدمر هاذي لمدينة. ولا جد اعليهم اكلامو.
GEN 19:15 وإلين عاد الفجر الحو الملايكة لأثنين اعلى لوط وڮالولو: ڮوم الفوڮ واڮبظ اعيالك وامناتك اللي امعاك اياك ما تهلك بسبب اثام أهل لمدينة.
GEN 19:16 يغير يلين ابطا لوط حكمو الرجالة بايديه وايدين اعيالو وامناتو وامشاو بيهم شور ڮدام لمدينة بيهلي الله تعالى اشفق اعليهم.
GEN 19:17 وإلين وخظوهم ابعيد ڮال واحد من الملايكة للوط: سلك روحك ولا اتخرص اوراك ولا توڮف فذي لبليدة كاملة. اهرب اعلى جيهة لكدا اياك تسلك.
GEN 19:18 وڮال لوط: لا اتواسيلي ذاك يا شيخي،
GEN 19:19 انتا اعرفتلي شي واهتميت بيَّ وسلكتني من الموت. يغير آنا ما انڮد نلجا فلكدا خايف من يخلڮلي شي وانموت.
GEN 19:20 اراعي مدينة اڮريب انڮد نهرب شورها. وهي مدينة اصغيرة وخليني نلجا شورها. امالها مدينة اصغيرة حته؟ وانڮد نسلك فيها بروحي؟
GEN 19:21 وڮالّو الملاك: آنا اڮبلت طلبك ولاني لاهي اندمر ذي لمدينة الصغيرة.
GEN 19:22 اهرب شورها بالعجلة بيهلي ما انڮد انعدل شي لسدوم سابڮ توصل انتا لهاذي لمدينة الصغيرة. ولهاذا السبب اُسمات هاذي لمدينة باسم صوغر اللي معناها الصغيرة.
GEN 19:23 وإلين ظهرت الشمس اعلى لارض، الحڮ لوط صوغر.
GEN 19:24 وفذا امطر الله تعالى اعلى سدوم وعمورة كبريت ونار من السما.
GEN 19:25 واحرڮ الله تعالى ذيك لارض واللي ساكنين فيها والوديان اللي حذاها وكل ارضهم كاملة اللي محروثة.
GEN 19:26 واتلفتت اعيال لوط اللي كانت اوراه بيها اڮبيظ لقبة واتحولت شور اعمود من الملح .
GEN 19:27 وامشا النبي إبراهيم امع الصباح شور لبليدة اللي وڮف فيها ڮدام الله تعالى.
GEN 19:28 وخرص اعلى جيهة سدوم وعمورة واعلى لارض اللي امجاورتهم وشاف الدخان طالع اعلى شكل اعمود.
GEN 19:29 وعاڮب ما دمر مولانا هاذي لبليدة، ما انسا وعدو للنبي إبراهيم ووخظ لوط سابڮ يدمر لمدينة اللي كان ساكن فيها.
GEN 19:30 وعاڮب ما دمر مولانا سدوم وعمورة، امشا لوط وامناتو من صوغر، واسكنو فلكدا بيهلي كان خايف من السكن فصوغر. والجا هو وامناتو فامغارة فالكدية.
GEN 19:31 وڮالت منتو لكبيرة لختها الصغيرة : نحنا بونا يستكهل ولارض ما اتلاو فيها رجالة يتخيمو امعانا كيف الناس كاملة.
GEN 19:32 اتعالي اصا نسڮوه شي من الخمر ونتكو امعاه اياك ما تنڮطع ذرية بونا.
GEN 19:33 واسڮاو الخمر لبوهم فذيك الليلة، وڮامت المنت لكبيرة واتكات امعاه . ولا حس لوط بتكيها امعاه ولا اڮيامها.
GEN 19:34 وفانهار اللي اوراه ڮالت المنت لكبيرة لختها الصغيرة: آنا اتكيت امع بويَ البارح . وهاي نسڮوه الخمر هاذي الليلة املي وتدخلي شورو انتي وتتكي امعاه، ونجبرو من بونا ذرية.
GEN 19:35 واسڮاو بوهم الخمر فذي الليلة الثانية وڮامت المنت الصغيرة واتكات امعاه. ولا حس لوط بتكيها امعاه وللا اڮيامها.
GEN 19:36 وبهاذا السبب حملو امنات لوط من بوهم.
GEN 19:37 وابرات المنت لكبيرة اعلى اطفيل سماتو مؤاب اللي معناه من بويَ، وهو بو قبيلة المؤابيين إلى اليوم.
GEN 19:38 والمنت الصغيرة ابرات املي اعلى اطفيل وسماتو بن عمي اللي معناه ول أهلي، وهو بو قبيلة بني عمون إلى اليوم.
GEN 20:1 وارحل النبي إبراهيم من فم واعد ارض النقب اللي فالجنوب واسكن امبين مدينة قادش ومدينة شور وقضا شي من الوقت فمدينة جرار.
GEN 20:2 وفم ڮال النبي إبراهيم عن سارة اعيالو: هاذي اختي. وارسل أبيمالكك ملك جرار امراسيل يجيبولو سارة .
GEN 20:3 واتجلا مولانا لأبيمالك فحلم فالليل وڮالّو: انتا لاهي اتموت بسبب اعلنك اڮبظت امرة متخيمة .
GEN 20:4 يغير أبيمالك لحڮو ذا مافات امسها وڮال لمولانا: لاهي تكتلني وتكتل أمة بريئة؟
GEN 20:5 امالو ڮالّي اعلنها اختو وهي املي ڮالتلي اعلنو خوها؟ ما عدلت ذا اللي عدلت يكون شاك اعلنو صالح ونيتي كانت زينة .
GEN 20:6 وڮالّو مولانا: آنا نعرف اعلنك نيتك كانت زينة ، ولذاك امنعتك من اطيح فالمعصية واتمس سارة.
GEN 20:7 ظرك اصا رجع للراجل اعيالو بيهلي هو نبي، اياك يطلبك مولانا وتحيا. وإلى ما رجعتها اعرف اعلنك انتا وذا اللي لك ميتين قطعا.
GEN 20:8 وبكر أبيمالك امع الصباح وعيط لعبيدو كاملين، ورد اعليهم ذا اللي اخلڮ، وانخلعو كاملين خلعة امتينة.
GEN 20:9 وعيط أبيمالك للنبي إبراهيم وڮالّو: اللي عدلتنا شنهو؟ شنهو الخطأ اللي عدلتلك اياك اتجيبلي واتجيب لمملكتي هاذا الذنب لكبير؟ انتا عدلتلي شي خاسر ما كان يالتك اتعدلولي.
GEN 20:10 وسول أبيمالك النبي إبراهيم: اشخلاك اتعدل هاذا ؟
GEN 20:11 وڮالّو النبي إبراهيم: آنا عدلت ذا اللي عدلت بيهلي شكيت اعلن هاذي لبليدة ما فيها حد خايف من مولانا، وخفتكم تكتلوني اعلى أساس اعيالي.
GEN 20:12 وفلحقيقية هي اختي منت بويَ ولا هي منت أمي واتعرست امعاها.
GEN 20:13 وإلين ادعاني مولانا اياك نمشي عن دار بويَ، ڮتلها: بل امنين نمشو ڮولي اعلني خوك واتعودي عدلتيلي غاية اكبيرة.
GEN 20:14 واڮبظ أبيمالك اغنم وابڮر واعبيد واخدم واعطاهم للنبي إبراهيم، ورجعلو سارة اعيالو.
GEN 20:15 وڮال أبيمالك: هاذي ارضي ڮدامك واسكن بل امنين تبغي فيها.
GEN 20:16 وڮال لسارة: اراني اعطيت لخوك ألف ڮطعة من الفظة . انبرئك بيها من لإساءة ڮدام الناس اللي امعاك، وانتي بريئة ڮدام كل واحد. وابهاذي الطريڮة اتعود رجعتلك كرامتك.
GEN 20:17 واطلب النبي إبراهيم مولانا اياك يشفي أبيمالك. وابرات اعيالو وخدمو
GEN 20:18 بيهلي مولانا ابلا اعيال وكل اخدم أبيمالك بلعڮار بسبب سارة اعيال النبي إبراهيم.
GEN 21:1 وعاڮب هاذي لحداث انعم الله تعالى اعلى سارة واعطاها ذا اللي وعدها بيه.
GEN 21:2 وحملت سارة وابرات اعلى اطفيل لإبراهيم فنفس الوقت اللي ڮط ڮالّو مولانا. وكان النبي إبراهيم فذا الوقت مستكهل حته.
GEN 21:3 وڮام النبي إبراهيم وسما اطفيلو اللي اجبر من سارة إسحاق.
GEN 21:4 وڮام زيّنو فاليوم الثامن كيف ما اطلب مولانا.
GEN 21:5 ووقت اخلاڮة إسحاق كان النبي إبراهيم عندو من لعمر 100 سنة.
GEN 21:6 وڮالت سارة: آنا ظحكني مولانا. وكل الناس اللي تسمع ذي اللي اخلڮ يظحكو هوما املي.
GEN 21:7 وڮالت سارة املي: من كان يڮد يڮول للنبي إبراهيم اعلن سارة لاهي اترظع أولاد؟ واراعيني آنا ابريتلو اعلى اطفيل فاستكهيلو.
GEN 21:8 واكبر إسحاق وانفطم وعدل النبي إبراهيم وقت فطيم إسحاق ندوية اكبيرة.
GEN 21:9 وفواحد من انهارات شافت سارة اعلن إسماعيل ول هاجر المصرية يجوق فإسحاق.
GEN 21:10 وڮالت سارة للنبي إبراهيم: صوع هاذي الخادم هي وولها بيهلي ول هاذي الخادم ماني ڮابلتو يورث امع ولي إسحاق.
GEN 21:11 ولا ازيان هاذا عند النبي إبراهيم اعلى أساس ولو إسماعيل.
GEN 21:12 وڮال مولانا للنبي إبراهيم : لا تنفڮع من امردة الطفيل وأمه. واسمع لكلام سارة وعدل ذا اللي ڮاتلك بيهلي من إسحاق اتعود لك ذرية.
GEN 21:13 ولاهي نجعل من ول الخادم املي أمة اكبيرة بيهلي هو من ذريتك.
GEN 21:14 وانهار من غد ڮام النبي إبراهيم امع الصباح واڮبظ شي من امبورو وڮربة ماء واعطاهم لهاجر ودارهم اعلى اكتافها وصاعها هي امع اطفيلها. وڮيمت ماشة وذهبت فخلوات بئر السبع.
GEN 21:15 وإلين افرق اعليها ماء لڮربة، طرحت الطفيل تحت وحدة من الصدرايات.
GEN 21:16 وڮعدت امڮابل 100 متر ڮدامو بيهلي ڮالت: ما نبغي نحظر الموت اطفيلي . وڮعدت تزڮي وعادت تبكي.
GEN 21:17 واسمع مولانا بكي الطفيل، وفذا عيط ملاك مولانا لهاجر من السما وڮالها: انتي اشفاڮعك يا هاجر؟ لا تخافي بيهلي مولانا اسمع بكي الطفيل من لبليدة اللي فيها.
GEN 21:18 ڮومي ورفديه وضميه شورك. بيهلي لاهي انعدلو أمة اكبيرة.
GEN 21:19 وافتح مولانا عينين هاجر ونعتلها حاسي من الماء. وامشات واملات لڮربة واسڮات الطفيل.
GEN 21:20 وكان مولانا امع الطفيل. وإلين اكبر إسماعيل، اسكن فخلوات فاران وعاد اخباري فارماية السهم.
GEN 21:21 وعرستو أمو امع امرة مصرية.
GEN 21:22 وفذا الوقت ڮال أبيمالك وقائد جيشو فيكول للنبي إبراهيم: نحنا لاحظنا اعلن مولانا امعاك فكل شي اتعدلو ،
GEN 21:23 واندورك ظرك تحلفلي اعلى مولانا اعلنك مانك لاهي تغدر بيَّ ولا تغدر بنسلي ولا أولادي، واحلفلي اعلنك لاهي تعرف شي لشعبي اللي اتغربت بينهم كيفما آنا احسنت اعليك.
GEN 21:24 وڮال النبي إبراهيم: راني حالفلك .
GEN 21:25 وعاتب النبي إبراهيم أبيمالك اعلى أساس الحاسي اللي ڮبظوها اعبيد أبيمالك بالقوة.
GEN 21:26 وڮال أبيمالك: آنا ما نعرف من اڮبظ هاذا الحاسي، وانتا املي ما ڮلتلي من اڮبظها. وأول مرة نسمع بذا هو اليوم.
GEN 21:27 وفذا اعطا النبي إبراهيم لأبيمالك اغنم وابڮر واڮطع كلهم امع لوخر عهد.
GEN 21:28 وعزل النبي إبراهيم اسبع انعاج من غنمو اعلى زر.
GEN 21:29 وڮالّو أبيمالك: شنهي الغاية من اعزيل هاذو اسبع انعاج وحدهم؟
GEN 21:30 وڮالّو النبي إبراهيم: هاذو اسبع انعاج انڮدمها بين ايديك تشهد اعلني آنا هو اللي احفرت هاذي الحاسي.
GEN 21:31 ولهاذا السبب سما هاذي لبليدة بئر السبع اللي معناها حاسي الحلفة. بيهلي أبيمالك والنبي إبراهيم كل واحد منهم احلف فم.
GEN 21:32 وبهاذي الطريقة ڮطعو لأثنين عهد امبيناتهم فبئر السبع. ومن فم ڮام أبيمالك وفيكول قائد جيشو ورجعو شور ارض الفلشطيميين.
GEN 21:33 واغرس النبي إبراهيم نوع من الصدر كيف الڮنات فبئر السبع وصلى فم لله تعالى للإله اللي كان موجود سابڮ كل شي.
GEN 21:34 واسكن النبي إبراهيم فارض الفلشطيميين ياسر من الزمن.
GEN 22:1 وبعد يلين اسكن النبي إبراهيم فارض الفلشطيميين، ڮام مولانا وأمتحن النبي إبراهيم وعيطلو: يا إبراهيم ! وڮال النبي إبراهيم: اراعيني يا مولانا.
GEN 22:2 وڮال مولانا للنبي إبراهيم: اڮبظ ولك إسحاق اللي امعاك واللي تبغي، وامشي شور ارض المُريا، وذبحو فم، وحرڮو، وڮدمو كيفت قربان اعلى وحدة من ذوك لكدا اللي لاهي انعتلك.
GEN 22:3 وانهار من غد اوعا النبي إبراهيم امع الصباح واحزم اعلى احمارو، وامشا امعاه بإثنين من اعبيدو وامعاهم ولو إسحاق، وجهز لحطب اياك يحرڮ اعليه القربان، وامشا اعلى جيهة لبليدة اللي ڮالّو مولانا.
GEN 22:4 وانهار الثالث رڮب النبي إبراهيم وجهو وشاف لبليدة اللي ڮالّو مولانا من ابعيد.
GEN 22:5 وڮال النبي إبراهيم للعبيد اللي امعاه: ابڮاو هون امع لحمار اياك نمشي آنا امع الطفيل وانصلو لمولانا، ومن فم نرجعولكم.
GEN 22:6 وڮام النبي إبراهيم ورفّد إسحاق لحطب، وارفد النبي إبراهيم مشعل النار والموس، وامشاو فبلد.
GEN 22:7 وڮال إسحاق لبوه النبي إبراهيم: يا بويَ! وڮالّو النبي إبراهيم: اراعيني يا ولي. وڮالّو: وينهو لخروف اللي لاهي ينحرڮ كيفت قربان؟ بيهلي إسحاق شاف النبي إبراهيم عندو النار والموس يغير ما شاف لخروف.
GEN 22:8 وڮال النبي إبراهيم لإسحاق: مولانا لاهي يدبر لخروف اللي لاهي ينحرڮ كيف قربان، لا يشطنك شي. وواصلو مشيهم فبلد.
GEN 22:9 وإلين لحڮو لبليدة اللي ڮال مولانا للنبي إبراهيم، ڮام النبي إبراهيم وابنا فم مذبح، واجمع لحطب، وكتف النبي إبراهيم ولو إسحاق ودارو فوڮ المذبح فوڮ لحطب.
GEN 22:10 ومد النبي إبراهيم ايدو واڮبظ الموس اياك يذبح ولو إسحاق.
GEN 22:11 وفذا عيطلو ملاك الله تعالى من السما: إبراهيم إبراهيم! وڮال النبي إبراهيم للملاك: اراعيني.
GEN 22:12 وڮال الملاك للنبي إبراهيم: لا اترڮب ايدك اعلى الطفيل، ولا اتعدلّو أي شي. آنا ظرك اعرفت اعلنك خايف من مولانا، ولا ابخلت ابولك الوحيد اعلى مولانا.
GEN 22:13 وخرص النبي إبراهيم اوراه وشاف كبش متعلڮ باعراش الصدر. وڮام ڮاسو وجابو وذبحو وحرڮو القربان بل ولو.
GEN 22:14 وسما النبي إبراهيم ذيك لبليدة باسم يَهْوَه يَرأَه اللي معناه الله تعالى يدبر. ولهاذا السبب ينڮال اليوم: فكدية الله تعالى يدبر.
GEN 22:15 وعيط ملاك الله تعالى للنبي إبراهيم من السما مرة اخرا
GEN 22:16 وڮال: راعيني نحلفلك بيكلي عدلت ذا اللي اطلبت منك ولا احكمت عني ولك الوحيد .
GEN 22:17 لذاك لاهي انباركك وانكثر ذريتك ويعود عددهم كيفت انجوم السما وكيفت احصي التراب لبحر، ولاهي تورث ذريتك مدن اعدائها.
GEN 22:18 وبذريتك تتبارك جميع أُمم لارض بيك اللي اسمعتلي.
GEN 22:19 وعاڮب ذاك ارجع النبي إبراهيم شور اعبيدو لأثنين ورجعو كاملين شور بئر السبع بل امنين ساكن النبي إبراهيم.
GEN 22:20 وانڮال للنبي إبراهيم عاڮب يلين خلڮت هاذو لمور: اراعيها مِلْكَةُ خلڮولها أولاد لخوك ناحور:
GEN 22:21 عوصا هو لبكر وخوه بوزا وقموئيل بو أرام
GEN 22:22 وكاسد وحزواَ وفلداش ويدلاف وبتوئيل .
GEN 22:23 واخلڮ لبتوئيل رفقة. هاذو الثمانية خلاتهم مِلْكَةُ لناحور خو النبي إبراهيم.
GEN 22:24 واملي خلاتلو خادمو اللي اسمها رؤومة: طابح وجاحم وتاحش ومعكة.
GEN 23:1 وعاشت سارة 127 سنة من لعمر.
GEN 23:2 وماتت فقرية حبرون فارض كنعان. وجا النبي إبراهيم امتكدر اياك ينوح اعلى سارة.
GEN 23:3 وإلين ڮام النبي إبراهيم من ڮدام جثمان سارة ڮال للحيثيين:
GEN 23:4 آنا خاطر وضيف عندكم وطالبكم تعطوني اقبر ندفن فيه اعيالي اللي ماتت.
GEN 23:5 وڮالولو الحيثيين:
GEN 23:6 اسمع يا شيخنا انتا مولانا عدلك زعيم بينا، اڮبظ تدفن اعيالك فازين اقبورنا، ما فينا حد لاهي يحكمك عن تدفن اعيالك فقبرو.
GEN 23:7 وڮام النبي إبراهيم اركع ڮدام الحيثيين أهل لبلاد يشكرهم.
GEN 23:8 وڮالهم النبي إبراهيم: إلى عدتو تبغوني اصا ندفن اعيالي، فاسمعوني واتوسطولي فعفرون ول صوحر
GEN 23:9 اياك يبيعلي امغارة المكفيلة اللي يملك واللي اعلى زر احريثتو، ويبيعهالي بسعرها كامل اياك انعدلها مدفنلي.
GEN 23:10 وفذا الوقت كان عفرون الحيثي ڮاعد امع اجماعتو وڮال للنبي إبراهيم ڮدام كل الحيثيين اللي اجتمعو عند بوابة لمدينة:
GEN 23:11 لا يا شيخي اسمعلي، لاهي نعطيك احريثتي ولمغارة اللي فيه هدية مني لك. وشعبي شاهد اعلى ذا، وادفن فيها اعيالك.
GEN 23:12 واركع النبي إبراهيم يشكر الحيثيين مرة اخرا.
GEN 23:13 وڮال النبي إبراهيم لعفرون ڮدام الحيثيين: حڮلا اسمعني، آنا نبغي ندفع صوڮ لحريثة واڮبل مني هاذا اياك انڮد ندفن اعيالي فيه.
GEN 23:14 وجاوبو عفرون وڮالّو:
GEN 23:15 اسمعني يا شيخي، هاذي لارض قيمتها 5 كيلوات من الفظة، وهاذا لمبلغ بلا قيمة بيني وبينك، وادفن اعيالك.
GEN 23:16 واڮبل النبي إبراهيم لمبلغ اللي اعرض اعليه عفرون واوزن النبي إبراهيم لعفرون 5 كيلوات من الفظة ڮدام الحيثيين حسب الوزنة اللي متعارف اعليها عند تجارهم.
GEN 23:17 وصبحت احريثة عفرون اللي فالمكفيلة اللي اڮريب من ممرا ولمغارة اللي فيها وكل الصدر اللي لحريثة
GEN 23:18 للنبي إبراهيم وهاذا اشهد اعليه كل الحيثيين اللي اجتمعو عند بوابة لمدينة.
GEN 23:19 وعاڮب ذاك ڮام النبي إبراهيم وادفن اعيالو سارة فامغارة المكفيلة اڮريب من ممرا اللي هي حبرون فابلاد كنعان.
GEN 23:20 واملك النبي إبراهيم من الحيثيين لحريثة ولمغارة اللي فيها وعادو مدفنلو.
GEN 24:1 وعاڮب فترة من الزمن استكهل النبي إبراهيم حته وباركو الله تعالى فكل شي.
GEN 24:2 وڮال النبي إبراهيم لشيخ اعبيدو واللي هو مسؤول عن كل شي فدار النبي إبراهيم: دير ايدك تحت ڮايمتي،
GEN 24:3 واحلفلي اعلى الله تعالى إله السما ولارض اعلنك ما اتعرس لولي أي امرة من أهل كنعان اللي آنا عايش امبيناتهم.
GEN 24:4 وتمشي شور بلدي وفخظي وتڮبظ امرة منهم لولي إسحاق.
GEN 24:5 وڮال لعبد للنبي إبراهيم: وإلى عادت لمرة اللي لاهي نڮبظ لإسحاق ما تبغي تمشي شور هاذي لارض ، وفذي الحالة مندرا يكانك تبغيني انجيب إسحاق للبليدة اللي انتا جاي منها؟
GEN 24:6 وڮالّو النبي إبراهيم: عسك من اترجع ولي لفم.
GEN 24:7 الله تعالى إله السما اللي اڮبظني من دار بويَ ومن وطني وتكلم امعايَ واحلفلي وڮالّي: اندور نعطي هاذي لارض لنسلك. يدور يمشي ڮدامك ملاك اياك تڮبظ امرة لولي من ارض أهلي.
GEN 24:8 وإلين ترفض لمرة تمشي امعاك، اتعود انتا فهاذي الحالة عدلت اللي احلفتلي اعليه. يغير لا اترجع ولي لذيك لارض.
GEN 24:9 ودار لعبد ايدو تحت ڮايمة النبي إبراهيم واحلف لشيخو اعلنو لاهي يعدل ذا اللي احلفلو اعليه.
GEN 24:10 واڮبظ لعبد 10 اجمال من حيوان النبي إبراهيم ورفّد اجمال من كل الخير اللي عند شيخو. وامشا واعد أرام النهرين لبليدة اللي فيها ناحور.
GEN 24:11 وإلين ڮرب، برك اجمال خارج لمدينة احذا حاسي من الماء. وكان هاذا امع مغرب الشمس، وذا كان وقت وخيظ لعليات اياك يوردو فالحاسي.
GEN 24:12 واطلب لعبد وڮال: يا الله تعالى إله شيخي النبي إبراهيم، يسرلي امري اليوم واحسن اعلى شيخي النبي إبراهيم .
GEN 24:13 آنا اراعيني واڮف عند الحاسي ولعليات هاذي لمدينة لاهي يوخظو يوردو.
GEN 24:14 ولمرة اللي انڮولّها: نزلي ڮدرتك اياك نشرب، وتسڮيني وتسڮي اجمالي، اتعود هي لمرة اللي اخترت لعبدك إسحاق. وبهاذي الطريقة انعود اعرفت اعلنك احسنت اعلى شيخي النبي إبراهيم.
GEN 24:15 وسابڮ يوفي عبد النبي إبراهيم دعاؤو، جات رفقة منت بتؤئيل ول مِلْكَةُ اعيال ناحور خو النبي إبراهيم وڮدرتها اعلى اكتفها.
GEN 24:16 وكانت اشويبة ازوينة حته واعزيبة ما ڮط مسها راجل. وڮاست ظاية الماء واملات ڮدرتها وڮيمت ماشة.
GEN 24:17 وادفع عبد النبي إبراهيم شورها وڮالها: اسڮيني اشوي من الماء من ڮدرتك.
GEN 24:18 وڮالتلو رفقة: اشرب يا شيخي ونزلت ڮدرتها بالعجلة اعلى ايديها واسڮاتو.
GEN 24:19 وعاڮب يلين اسڮاتو ڮالتلو: لاهي انجيب املي الماء لاجمالك اياك نسڮيهم.
GEN 24:20 وصبت ڮدرتها بالعجلة فحوظ الماء ودفعت شور حاسي وتورد الماء يلين اسڮات اجمالو كاملين.
GEN 24:21 وكان عبد النبي إبراهيم امراقبها فذا كامل اللي اتعدل من دون كلام اياك يعرف يكانها هي اللي اختار الله تعالى لإسحاق وللا ابدي.
GEN 24:22 وإلين شربت اجمال، اڮبظ لعبد ووخظ حزمة من الذهب وزنها اڮريب من 6 اڮرامات ووخظ املي أسوارين من الذهب وزنهم 120 اڮرام.
GEN 24:23 وسول لعبد رفقة وڮالها: انتي منت من؟ ڮوليلي مندرا يكانا انڮدو نجبرو ابليدة انباتو فيها فدار بوك؟
GEN 24:24 وڮالتلو رفقة: آنا بويَ هو بتؤئيل ول مِلْكَةُ وناحور.
GEN 24:25 وڮالتلو املي: عندنا لحشيش وياسر من لعلف وعندنا املي بل امنين اتباتو فيه.
GEN 24:26 وفذا اركع واسجد لعبد لله تعالى يشكرو.
GEN 24:27 وڮال: اتبارك الله تعالى إله شيخي النبي إبراهيم اللي ما امنع كرمه ونزاهتو عن النبي إبراهيم. وڮال لعبد: الله تعالى سهداني اعلى دار اخوت شيخي النبي إبراهيم.
GEN 24:28 ودفعت رفقة شور دار أمها وردت اعليها اللي اخلڮ.
GEN 24:29 وكان عند رفقة خو ينڮالو لابان. وڮام لابان وامشا واخظ شور لعبد اللي عند الظاية
GEN 24:30 بيهلي فات شاف حزمة الذهب وأسوارين فايدين اختو رفقة، واسمع املي اكلام رفقة عن لعبد اللي اجبرت، واجبر لابان لعبد واڮف احذا اجمالو اڮريب من الظاية.
GEN 24:31 وڮال لابان للعبد: اتفضل انتا امباركك الله تعالى. اعلاش انتا واڮف الڮدام ؟ آنا جهزت الدار وجهزت املي ابليدة يستراحو فيها اجمالك.
GEN 24:32 وڮاس لعبد الدار وانزل لابان وعبيدو اللي كانو رافدين اجمالو واعطاو لاجمال لعبد لحشيش ولعلف، وجابولو شي من الماء هو واللي كان امعاه اياك يغسلو ڮرعيهم.
GEN 24:33 وطرحو ڮدامو اطعام اياك يوكل ، يغير سابڮ يوكل ڮال: ماني لاهي نوكل سابڮ ما ڮتلكم اللي عندي. وڮال لابان لعبد النبي إبراهيم: اتفضل ڮول اللي عندك.
GEN 24:34 وڮال للابان: آنا عبد للنبي إبراهيم.
GEN 24:35 والله تعالى بارك حته شيخي النبي إبراهيم وعاد زعيم. والله تعالى اعطاه لغنم ولبڮر والفظة والذهب ولعبيد ولخدم والبل ولحمير.
GEN 24:36 وخلاتلو سارة اطفيل عاڮب ما استكهلت واعطاه بوه النبي إبراهيم كل أملاكو.
GEN 24:37 واحلفلي شيخي النبي إبراهيم وڮالّي: لا اتعرس لولي إسحاق أي امرة من الكنعانيين اللي آنا ساكن فبلادهم.
GEN 24:38 وڮالّي: ڮيس أهل بويَ وعايلتي واڮبظ امرة لولي.
GEN 24:39 وڮلت لشيخي النبي إبراهيم: وفحالة لمرة اللي لاهي نجبر ابات تمشي امعايَ شور كنعان؟
GEN 24:40 وڮالّي النبي إبراهيم: الله تعالى اللي امشيت آنا اعلى اطريڮو يدور يمشي ملاكو ويوفقك فمهمتك اياك تڮبظ اعيال لولي إسحاق من عائلتي ومن أهل بويَ.
GEN 24:41 وڮالّي شيخي النبي إبراهيم: وإلى جيت لأهلي ورفضو يعطوهالك، فهاذي الحالة نطلصك من الحلفة اللي احلفتلي اعليها.
GEN 24:42 وڮست اليوم الحاسي وإلين الحڮتها اطلبت الله تعالى وڮتلو: يا الله تعالى إله شيخي النبي إبراهيم، آنا طالبك اتوفقني فاللي اعلى أساسو آنا سافرت.
GEN 24:43 آنا اراعيني واڮف ڮدام الحاسي. اندورك تجعل الشويبة اللي لاهي اتجي اياك تورد الماء واللي يلين نطلب منها: تسڮيني من الماء،
GEN 24:44 واتڮولّي: اشرب انتا وآنا لاهي نسڮي اجمالك املي. اتعود هي الشويبة اللي اختارها الله تعالى لإسحاق ول شيخي.
GEN 24:45 والوقت اللي كنت نطلب فيه مولانا واناجي فيه نفسي، فذا شفت رفقة جاية ورافدة ڮدرة اعلى اكتافها ، وڮاست الحاسي تورد الماء وڮتلها: طالبك تسڮيني.
GEN 24:46 ودفعت وطرحت ڮدرتها وڮاتلي: اشرب انتا ولاهي نسڮي املي اجمالك.
GEN 24:47 وسولتها: منت من انتي؟ وڮاتلي اعلنها منت بتؤئيل ول ناحور اللي خلاتلو مِلْكَةُ. واڮبظت ودرت الخاتم فاخنافرها والسوار فايديها.
GEN 24:48 وڮمت واسجدت وباركت الله تعالى إله شيخي النبي إبراهيم اللي سهداني شور الطريڮ لمسڮمة اياك نڮبظ منت خو النبي إبراهيم لولو إسحاق.
GEN 24:49 وظرك ڮولولي إلى عدتو لاهي اتعدلو ذي الغاية لشيخي النبي إبراهيم ، وللا طلصوني وخلوني انڮيم واعد ابليدة اخرا.
GEN 24:50 وڮالولو لابان هو وبتؤئيل: ذي لمردة جات من عند الله تعالى ونحنا ما انڮدو انڮولولك اهيه وللا ابدي.
GEN 24:51 رفقة اراعيها ڮدامك. اڮبظها وامشي بيها اياك اتعود اعيال لأول شيخك النبي إبراهيم كيفت ماراد الله تعالى.
GEN 24:52 وإلين اسمع عبد النبي إبراهيم اكلامهم، ابرك اعلى التراب ساجد لله تعالى.
GEN 24:53 ووخظ لعبد اديار من الفظة والذهب ولباس واعطاهم لرفقة واعطا املي لخوها وأمها هدايا غالية.
GEN 24:54 وكال واشرب هو ورجالتو وباتو ليلتهم فم. وإلين اوعاو امع الصباح ڮالّهم: اعطوني اطريڮ اياك نرجع شور شيخي النبي إبراهيم.
GEN 24:55 وڮالولو خو رفقة وأمها: خلي رفقة تبڮي امعانا 10 أيام وللا ذاك ومن فم تمشي.
GEN 24:56 وڮالّهم لعبد: لا تحصروني ، الله تعالى سڮملي اطريڮي ، خلوني نمشي شور شيخي النبي إبراهيم.
GEN 24:57 وڮالولو: لاهي انعيطو لرفقة وانسولوها عن رأيها.
GEN 24:58 وعيطو لرفقة وسولوها: تبغي تمشي امع ذا الراجل؟ وڮالتلهم: اهيه نبغي نمشي.
GEN 24:59 وخلاو رفقة تمشي وامشات امعاها امرظعتها وعبد النبي إبراهيم ورجالتو.
GEN 24:60 وباركو رفقة وڮالولها: اعليك بركة مولانا. انتي ختنا عدلي ياسر من الذرية اياك اتعود ألاف مؤلفة وتورث ذريتك مدن اعدائها.
GEN 24:61 وڮامت رفقة واخدمها وركبو اجمال وامشاو اورا عبد النبي إبراهيم. وڮيم لعبد برفقة ماشي بيها.
GEN 24:62 وفذاك الوقت كان إسحاق اللي ساكن فالنقب ارجع من الطريڮ اللي ينڮالها حاسي الحي اللي يراعي فيَّ.
GEN 24:63 وفدحميساية امشا واعد الخلوات اياك يتخمم . فذا شاف اجمال جاية .
GEN 24:64 ورفعت رفقة هي املي عينها وشافت إسحاق، ونڮزت عن اجملها.
GEN 24:65 وسولت عبد النبي إبراهيم وڮاتلو: منهو هاذا الراجل اللي ماشي فالحرث اياك يتلڮالنا ؟ وڮالها لعبد: هاذا شيخي إسحاق. وڮبظت حوليها واتحجبت عنو.
GEN 24:66 وعاڮب ذاك رد لعبد اعلى إسحاق ذا كامل اللي اخلڮ.
GEN 24:67 ودخل إسحاق رفقة شور خيمة أمو سارة واتعرس امعاها وابغاها حته واتعزا بيها عاڮب موت أمو سارة.
GEN 25:1 وعاڮب ذا ڮام النبي إبراهيم واتعرس امع امرة اسمها قطورة.
GEN 25:2 وخلاتلو زمران ويقشان ومدان ومديان ويشباق وشوحا.
GEN 25:3 وخلا يقشان شبا ودادان ، وأولاد دادان هوما الأشوريم وللطوشيم ولأميم.
GEN 25:4 وأولاد مديان هوما عيفة وعفر وحنوك وأبيداع وألدعة ، وهاذو كاملين جايين من ذرية قطورة.
GEN 25:5 وورّث النبي إبراهيم للنبي إسحاق كل أملاكو.
GEN 25:6 واعطا لولادو من خدمو هدايا وقت محدو كان حي، وارسلهم اعلى جيهة الشرق ابعيد عن ولو إسحاق.
GEN 25:7 وعاش النبي إبراهيم 175 سنة.
GEN 25:8 ومات النبي إبراهيم بشيبة صالحة وانضم إلى اسلافو.
GEN 25:9 ودفنو إسحاق وإسماعيل بوهم النبي إبراهيم فامغارة المكفيلة فحرث عفرون ول صوحر الحيثي اللي احذا ممرا.
GEN 25:10 وهو الحرث اللي كط اشرا النبي إبراهيم من الحيثيين وفيه اندفنو سارة والنبي إبراهيم فزر بعض.
GEN 25:11 وعاڮب موت النبي إبراهيم بارك مولانا إسحاق ولو واسكن إسحاق عند الحاسي الحي اللي يراعي فيَّ.
GEN 25:12 وهاذا سجل أولاد إسماعيل ول النبي إبراهيم اللي خلاتو هاجر المصرية خادم سارة لإبراهيم.
GEN 25:13 وهاذي أسامي أولاد إسماعيل مرتبة حسب اخلاڮتهم: نبايوت هو بكر إسماعيل وقيدار وأدبئيل ومبسام
GEN 25:14 ومشماع ودومة ومسا
GEN 25:15 وحدارُ وتيماء ويطور ونافيش وقدمة.
GEN 25:16 وهاذو هوما أسامي أولاد إسماعيل وعادو الشيوخ للثاني عشر قبيلة فبليدات مختلفة.
GEN 25:17 وعاش إسماعيل 137 سنة ومات وانضم شور اسلافو.
GEN 25:18 واسكن نسلو فلبليدة اللي امبين حويلة وشور اعلى حدود مصر اعلى الزر الشرقي من مدينة أشور، وكانو اعلى عداوة امع أولاد عمهم.
GEN 25:19 وهاذا سجل أولاد النبي إسحاق: إبراهيم خلا إسحاق،
GEN 25:20 وكان النبي إسحاق عندو 40 سنة فالوقت اللي اتعرس فيه امع رفقة منت بتؤئيل لأرامي اللي جاي من واد أرام، وكانت خت لابان لأرامي.
GEN 25:21 وكانت رفقة اعيال النبي إسحاق عاڮر. وڮام النبي إسحاق واطلبلها الله تعالى اياك تجبر الذرية. واستجابلو الله تعالى وحملت رفقة.
GEN 25:22 وادايڮو أولادها وهوما مزالو فكرشها، وفذا ڮالت رفقة: اعلاش يخلڮلي ذا؟ وامشات رفقة اتصلي واتسول الله تعالى عن السبب.
GEN 25:23 وڮالها الله تعالى: فكرشك أُمتين ويتفارڮو من هاذو لأُمتين شعبين ، واحد منهم يڮلب لوخر ، وولك لكبير يستعبدو الصغير.
GEN 25:24 وإلين الحڮ وقت بريها ابرات رفقة اعلى اتواما.
GEN 25:25 واخلڮ لأول احمر واملان من ازغب. وسماوه عيسو اللي معناه لمزغب.
GEN 25:26 وعاڮب اشواي اخلڮ خوه، وهو كارد اكراع عيسو. وسماوه يعقوب اللي معناه لمخادع . ووقت اخلاڮتهم كان النبي إسحاق عندو 60 سنة.
GEN 25:27 وكبرو التركة وكان عيسو اخباري فالصيد ويبغي الخلوات. ويعقوب كان عكسو بارد ويبغي لڮعاد فالخيام.
GEN 25:28 وكان عيسو هو لمفضل عند النبي إسحاق بيهلي يجبلو من صيدو. وكانت رفقة غالي اعليها يعقوب.
GEN 25:29 وفيوم من لأيام يلين ارجع عيسو من الخلوات فتران، اجبر يعقوب انصب اطعام زين.
GEN 25:30 وڮال عيسو ليعقوب: غديني من ذا الطعام لحمر. آنا ميت بيَّ الجوع. ولهاذا السبب عيسو اُسمّا أدوم اللي معناها لحمر كيف الطعام اللي كال .
GEN 25:31 وڮال يعقوب لعيسو: لاهي انغديك بشرط اعلنك اتبعيلي بكوريتك .
GEN 25:32 وڮال عيسو ليعقوب: اعلى ذي الحالة آنا لاهي نعڮب انموت بالتالي شنهي الفايدة من بكوريتي؟
GEN 25:33 وڮالّو يعقوب: احلفلي ظرك . واحلفلو عيسو وبهاذي الطريڮة باع عيسو بكوريتو ليعقوب.
GEN 25:34 واعطا يعقوب لعيسو شي من امبورو ولعدس وكال عيسو واشرب وڮيم ماشي. وبهاذي الطريڮة احتقر عيسو فايدة لبكورية.
