﻿GALATIA.
3.
Galatia taumui e, kavakava taumui, daika ese ena mea amo e koimuimu? Umui vairamui ai vada eme hedinarai: Iesu Keriso e hasatauroa 
Ina mo ba hamaorolaigu: taravatu ibadinana dainai eiava sivarai namo iabi-daena dainai Lauma o abia? 
Umui na kakava a? Lauma enai o matamaia, a tau-anina enai o haḡuḡuruamu a? 
Hisi diaḡau o aniva na asi anidia a? Reana mai anina. 
Lauma e henimuimu bona bogaragimui ai hoa karadia e karamu Diravana ese taravatu ibadinana dainai eiava sivarai namo iabi-daena dainai e karamu a? 
Abraham heḡereḡerena: ia ese Dirava e abidadama henia, bena maorona e gwauraia. 
Benaini, vada na diba, kamonai taudia na Abraham natuna ai baela. 
Buka Helaḡa danu vada e gwauraia guna, Dirava ese bese idau-idau taudia kamonai dainai maorodia baine gwaurai; bena sivarai namo Abraham e henia guna, eto, Tanobada besedia iboudiai na oi daimu ai bae namo. 
Taunabunai, kamonai taudia na Abraham, kamonai tauna, ida bae namo bou. 
Taravatu ibadinana e abidadama heniamu taudia iboudiai na heuduguirai henunai e nohomu, badina be ini e torea toma: Taravatu bukana ai e tore herevadia iboudiai basie badina taudia na bae uduguiraidia. 
Bona tau ta taravatu dainai maorona basie gwauraia Dirava vairanai; ina na eme hedinarai, badina be kamonai dainai kara maoromaoro tauna baine mauri. 
Bona taravatu na kamonai amo se varamu, a ikarana tauna hari ena kara dainai baine mauri. 
Taravatu ena hahedika amo Keriso ese vada e hamaurida; ia be dika tauna ai ela, ita iboloda. Badina be Buka Helaḡa ai vada e torea, eto, Au ai e taudia dae taudia iboudiai vada e dika. 
Taunabunai, Abraham e hanamolaia hahenamona na bese idau-idau taudia ese Keriso Iesu dainai do bae davaria; bona ita ese kamonai dainai e gwauraia hamata Laumana baita abia. 
Varavaragu e, taunimanima edia kara na gwauraimu: tau ta baine gwauhamata, bena ena gwauhamata baine hamomokania; basine taoa tari, bona basine ha-idaua. 
Benaini, gwauhamata na Abraham mai garana ida edia. Asineto “Garamu loḡora ida”. Hutuma se gwauraidia; a tamona mo e gwauraia, eto “Garamu idat”. Una na Keriso. 
Egu lalo-hadai binai: Dirava ena gwauhamata gunana na laḡani sinahu-hani toi-ahui muridiai e vara taravatuna ese se taoa tari, asi anina ḡauna ai se halaoa. 
Ahu iabina bema taravatu dainai, gwauhamata bema herevana; a Dirava ese gwauhamata amo Abraham e henia. 
Benaini, taravatu be dahaka? Kara havara dainai e haginia, baine mia ela bona e gwauraia hamata garana baine vara; aneru ese e gwauraia, herohemaino tauna ese e mailaia. 
Herohemaino na dia kaha tamona basine herohemaino; a Dirava be tamona. 
O, taravatu ese Dirava ena gwauhamata e laoa ahumu a? Lasi vaitani. Badina be taravatu bema mai siahuna mauri ihavarana, kara maoromaoro na taravatu amo bema vara. 
A Buka Helaḡa ese taunimanima iboudiai kara dika ai vada e koudia, Iesu Keriso iabiabiraina gwauhamatana na kamonai taudia ese bae abia helaoreana? 
A Iesu iabiabiraina do sema negana ai, taravatu ese e dogoda tao, e kouda ahu, ema bona do baine hedinarai abidadamana e kau. 
Taunabunai, taravatu na hereḡu tauna na heto, ema bona Keriso eme kau, kamonai dainai maoroda bae gwaurai helaoreana. 
A harihari kamonai vada eme kau, taunabunai ita na dia tau ta ena hereḡu ai. 
Badina be umui iboumui ai be Dirava natuna, Keriso Iesu o abiabiraiamu dainai. 
Badina be Keriso ladana ai e bapatisomui taumui iboumui ai ese Keriso vada o hahedokilaia. 
Badina be umui na dia Iuda taumui, dia Helene taumui, dia hesiai taumui, dia ura-kwalimu taumui, dia mamaruane, dia hahine; a ibouboumui ai tamona mo, Keriso Iesu lalonai. 
Umui Keriso ena dainai, umui danu Abraham garana bona gwauhamata dihina. 
