﻿Luka.
3.
Pɨpɨta-a, Tibele akolo ’ngbé ngámá na Loma . Bhʉ́ kalanga na ndjɨkpa ne ká bhuluvue bhʉ́ naʉ gba anɨ-e, Djaa ndɨlɨ gba Djakalɨa, ɨnde adʉ nanɨ adʉ abhʉ́ ’gʉ-o, asia eli gba Ebhe . Nedhɨnga ango-o, Pose Pɨlatɵ adʉ alila ndu doto na Yudaya. Elode adʉ ngámá na ndu doto na Galilaya. Ndai anɨ Filipo atsia adʉ ngámá na ndu doto na Itule ne Talakonite. Lisaniasɨ atsia adʉ naae ngámá na Abilene. Bhʉ́ nedhɨnga bhomʉ-o, Ana ne uo ne Kaifa atsia adʉ obhelesɨ okpála gba odimandɵ gba Ebhe . 
Abhomʉ-o, Djaa aholo adhʉkʉ bhʉ́ ’gʉ lɨngo ngade ’ngu na Djʉlʉdanɨ, anɨ atsia adʉ atotobhɨla me: «Yi dji bua yi, yi sia batisimo, amba Ebhe ꞌe siti ’ngʉ́ gba yi ko.» 
Maka lɨ polofeta Ɨsaya, aye lɨe bhʉ́ bhuku gba e me: «A ko kpála bini ɨnde ngatotobhɨla abhʉ́ ’gʉ me: ‹Yi leke kpadjɨ pɨ Ngámá, yi lɨ okpadjɨ pɨ anɨ ngbingbili! 
Ndʉ tsutsukudhu bɨlɨ sʉnda ongba ’ta hana abédhe lɨe. Ndʉ oeta na ngbengbengbe ne obhe na djedjedje hana adjɨ́ lɨe, ɨ kólo má gbata gbata! Ndʉ kpadjɨ na gagala hana akólo ngbingbili. Okpadjɨ na sisiti akólo babadha. 
Lɨ ndʉ okpála hana tsia ú maka lɨ Ebhe ngakobho okpála lɨe ko!›» 
Abhomʉ-o, okpála bhelé adʉ ago abhaka Djaa ngʉbula nasia batisimo. Anɨ atsia adʉ ayi uo me: «Ngayi opiga kpʉlʉ ɨnde-e! A asuno pɨ yi da me yi kpe mangɨmbo gba Ebhe ɨnde ngago-o? 
Ɨ dʉ mo-o, yi mene engʉ́ ɨnde asúno me yi adji bua yi kʉkʉlʉ! Yi adʉ́ abhundja bha lɨ bua yi de me, Abalahama ne ogbi yi. Padhá de, anga ma apa pɨ yi na paká me, teme yi ngau e ɨnde-e, Ebhe tɨ́ da nadjidji, ɨ tsia kólo odi Abalahama! 
Maka ma ngapapa lɨe ɨnde-e, u aꞌo ngbakpa bhʉ́ li ndula-a ngʉ́ nadede aꞌo. Ndʉ ndula hana ɨnde ɨ lɨ lɨ́lɨ́ na babadha de-e, u adé, u tsia bhíke bhʉ́ djua.» 
Abhomʉ-o, okpála ango-o atsia adʉ ayi anɨ me: «Ɨ dʉ mo-o, a ayo me ya mene pɨ?» 
Anɨ atsia adʉ agie pɨ uo me: «Kpála bhende lɨ bongo na mbulu nde ka e bhisi-e, a ayo me anɨ ha bini pɨ kpála bhende lɨ bongo na mbulu nde ka e ade ko. Kpála bhende lɨ ezʉ nde ka e-e, a ayo me anɨ ha di mbo pɨ kpála bhende lɨ ezʉ nde ka e ade ko.» 
Ondɵmbɨ na mandjandja ago di ngʉ́ nasia batisimo, u atsia ayi anɨ me: «Mʉsuno, a ayo me ya mene pɨ?» 
Anɨ atsia agie pɨ uo me: «Yi ayó tɨa ane bhende lɨ lɨ́lɨ azɨba e de.» 
Osʉdha atsia ayi di anɨ me: «A la ya-a, a ayo me ya mene naaya pɨ?» Anɨ atsia agie pɨ uo me: «Yi agbʉ́lʉ tɨa ka kpála bini ne kpéke, di ne eu de. Engʉ́ bini, yi mbɨla bha tɨa na kulu gba yi ko.» 
Maka lɨ okpála adʉ adjeke nago ka Masɨya lɨe, u atsia adʉ ayi lɨo lɨ bua o pɨndjɨ Djaa me: «A ko ndi-e Masɨya ɨnde lɨ Ebhe atima e dɨ?» 
Djaa atsia agie pɨ ndʉ uo hana me: «Ngama-a, ma ngabatisa naama yi ne engu. Engʉ́ bini, a ngago pɨta ma ne kpála. Kpála ango-o ane ma ne angu. Ma belegʉ ne tetele kpála ade ngʉbula me ma bhulu ekpʉ́ na malɵkɵ gba anɨ-o. Anɨ abátisa yi ne Bu Bhobua di ne djua. 
Anɨ aholo kakpa gba e sa ’kpa e ngʉ́ nape nguwa gba e-o. Anɨ apó bhʉ́la nguwa na babadha gba e bhʉ́ ngbokopi, engʉ́ la bini, anɨ tsia bú fufukudha-a bhʉ́ djua ɨnde lɨ kpála bini tɨ da nabʉlʉ e de.» 
Djaa aha nanɨ lɨ́lɨ koko bhelé pɨ okpála. Bhʉ́bhʉ́-o, anɨ atsia adʉ akpokpo Bádha Ngali gba Ebhe-e pɨ uo. 
Ngámá Elode aha nanɨ Elodiade, ɵlɵ gba ndai e-o. Anɨ amene nanɨ matá di osisiti ’ngʉ́ koko bhelé. Kaka-a, Djaa atsia ambe bhʉ́ ’ndjɨ anɨ. 
Abhomʉ-o, Elode amene matá siti ’ngʉ́ koko pépé, anɨ aha Djaa, anɨ atsia abhike anɨ bhʉ́ tɨkpʉ. 
Kala me Djaa lɨ bhʉ́ tɨkpʉ-o, anɨ abatisa ngaɨza ndʉ okpála hana. Abhomʉ-o, Yesu atsia asia di batisimo. Nedhɨnga lɨ Yesu adʉ akpokpo ’ngʉ́ ne Ebhe lɨe, kokpɨ́ abhulu lɨe, 
u au Bu Bhobua ngakɵ pɨ́ anɨ maka bɵbhɵ. U atsia adje eli ayie abhʉ́lá apa me: «Mʉ ne ndɨlɨ gba ma na mʉkʉnda. Djalɨ lɨ bua ma ngʉ́ mʉ naali.» 
Yesu akpo nanɨ lita kulu gba e me anɨ nde ne kalanga masɨkpe de ndjɨkpa bata. Okpála adʉ abhundja naao me, a ko ndɨlɨ gba Djodjefʉ . Djodjefʉ ndɨlɨ gba Eli, 
Eli ndɨlɨ gba Matatɨ, Matatɨ ndɨlɨ gba Levi, Levi ndɨlɨ gba Maleki, Maleki ndɨlɨ gba Djanai, Djanai ndɨlɨ gba Djodjefʉ , 
Djodjefʉ ndɨlɨ gba Matatɨasɨ, Matatɨasɨ ndɨlɨ gba Amosɨ, Amosɨ ndɨlɨ gba Nauma, Nauma ndɨlɨ gba Eseli, Eseli ndɨlɨ gba Nagai, 
Nagai ndɨlɨ gba Mata, Mata ndɨlɨ gba Matatɨasɨ, Matatɨasɨ ndɨlɨ gba Semeini, Semeini ndɨlɨ gba Djoseke, Djoseke ndɨlɨ gba Djoda, 
Djoda ndɨlɨ gba Yoanana, Yoanana ndɨlɨ gba Lesa, Lesa ndɨlɨ gba Djelubabela, Djelubabela ndɨlɨ gba Salatiele, Salatiele ndɨlɨ gba Neli, 
Neli ndɨlɨ gba Maleki, Maleki ndɨlɨ gba Adi, Adi ndɨlɨ gba Kosama, Kosama ndɨlɨ gba Elemadama, Elemadama ndɨlɨ gba Ele, 
Ele ndɨlɨ gba Yesu, Yesu ndɨlɨ gba Eliedjele, Eliedjele ndɨlɨ gba Djolime, Djolime ndɨlɨ gba Matatɨ, Matatɨ ndɨlɨ gba Levi, 
Levi ndɨlɨ gba Simeo, Simeona ndɨlɨ gba Yuda, Yuda ndɨlɨ gba Djodjefʉ , Djodjefʉ ndɨlɨ gba Djonama, Djonama ndɨlɨ gba Eliakime, 
Eliakime ndɨlɨ gba Melea, Melea ndɨlɨ gba Mena, Mena ndɨlɨ gba Matata, Matata ndɨlɨ gba Natana, Natana ndɨlɨ gba Davidi, 
Davidi ndɨlɨ gba Yese, Yese ndɨlɨ gba Obede, Obede ndɨlɨ gba Boadja, Boadja ndɨlɨ gba Salamona, Salamona ndɨlɨ gba Nasone, 
Nasona ndɨlɨ gba Aminadaba, Aminadaba ndɨlɨ gba Adimina, Adimina ndɨlɨ gba Aluni, Aluni ndɨlɨ gba Edjelone, Edjelone ndɨlɨ gba Peledje, Peledje ndɨlɨ gba Yuda, 
Yuda ndɨlɨ gba Yakobho, Yakobho ndɨlɨ gba Ɨsaka, Ɨsaka ndɨlɨ gba Abalahama, Abalahama ndɨlɨ gba Tela, Tela ndɨlɨ gba Naola, 
Naola ndɨlɨ gba Seluga, Seluga ndɨlɨ gba Lagau, Lagau ndɨlɨ gba Pelege, Pelege ndɨlɨ gba Ebele, Ebele ndɨlɨ gba Sela, 
Sela ndɨlɨ gba Kainame, Kainame ndɨlɨ gba Alepakasada, Alepakasada ndɨlɨ gba Seme, Seme ndɨlɨ gba Nʉa, Nʉa ndɨlɨ gba Lemeke, 
Lemeke ndɨlɨ gba Matusalema, Matusalema ndɨlɨ gba Enoka, Enoka ndɨlɨ gba Yelede, Yelede ndɨlɨ gba Malalele, Malalele ndɨlɨ gba Kenana, 
Kenana ndɨlɨ gba Enosa, Enosa ndɨlɨ gba Sete, Sete ndɨlɨ gba Adamʉ , Adamʉ ndɨlɨ gba Ebhe. 
