﻿Matié.
4.
Abhomʉ-o, Bu Bhobua atsia amba bhʉ́la Yesu abhʉ́ mili bɨlɨ ngʉbula me djabʉlʉ le anɨ. 
Pɨta namene ngbɨkpɨ ndjɨkpa badha ne sukpe ndjɨkpa badha mandɨ nazʉ ’he-e, anɨ adje gʉmʉ. 
Djabʉlʉ, kpála ɨnde adji ale anɨ-e atuto lɨe de anɨ. Anɨ atsia apa pɨ anɨ me: «Ɨ dʉ me mʉ nde ne Ndɨlɨ gba Ebhe-e, ha lɨ́lɨ pɨ oteme ɨnde-e me akolo mapa.» 
Engʉ́ bini, Yesu agie me: «U aye bhʉ́ Bhuku me: ‹Kpála kóbho bha bini ka ezʉ de, engʉ́ bini, anɨ akóbho ka ndʉ oeli hana ɨnde ɨ ngakoto bhʉ́ ’bhɵ Ebhe-o.›» 
Abhomʉ-o, Djabʉlʉ aha anɨ, anʉ ne anɨ bhʉ́ Yelusalema, gʉdhʉ na bubu-o. Anɨ atsia aꞌo anɨ pɨ́ tulundjɨ ’ngbé ’tɨ Ebhe gba omaYuda-o. 
Do anɨ pɨ Yesu de me: «Ɨ dʉ me mʉ nde ne ndɨlɨ gba Ebhe-e, ꞌulu mʉ kɵ kuto! Padhá de, anga u aye bhʉ́ Bhuku me: ‹Ebhe ahá lɨ́lɨ pɨ oandjelu gba e ngʉ́ mʉ. U tsia bɨ́ mʉ sa ’kpa o ngʉbula me mo otʉ́ ’dhʉ mʉ lɨ teme bini de.›» 
Yesu apa pɨ anɨ me: «U aye di bhʉ́ Bhuku gba Ebhe-e me: ‹Mo olé Ebhe, Ngámá gba mʉ-o de.›» 
Djabʉlʉ anʉ aꞌo matá anɨ pɨ́ ’ndjá eta na ndjándjá nane mane. Anɨ atsia apana pɨ anɨ ndʉ naʉ na doto hana bhʉ́ dabɨlɨ bini ne sangu gba o-o. 
Anɨ atsia apa pɨ anɨ me: «Ndʉ ’he ɨnde-e hana, ma ahá pɨ mʉ ɨ dʉ me mʉ nde akikita lɨpʉkʉ mʉ kuto kala ma ngʉ́ nadhɵgɵ ma-o.» 
Abhomʉ-o, Yesu atsia apa pɨ anɨ me: «Yie oo ko, Satana ! Padhá de, anga u aye bhʉ́ Bhuku me: ‹Dhɵgɵ Ebhe ’ngbé Ngámá gba mʉ-o, amba mʉ yo la bhadi anɨ kpi e kpi.›» 
Abhomʉ-o, Djabʉlʉ aꞌo ka anɨ. Me-e, oandjelu ago de anɨ, u atsia aholo nateteke anɨ. 
Lɨ Yesu adje lɨe me u aholo Djaa-a, anɨ atsia agbe lɨe ne abhʉ́ ndu doto na Galilaya. 
La-a, anɨ nʉ bhʉ́ kʉtɨ na Nadjaleta de, anɨ anʉ mangbo bhʉ́ Kapalanauma, dengo ekpɵ na Galilaya, bhʉ́ kʉtɨ gba okpála na Djabulona ne Nefɨtali. 
Anɨ amene mo-o ngʉbula me engʉ́ nanɨ lɨ polofeta Ɨsaya apa e amene lɨe. Engʉ́ nanɨ anɨ apa e me: 
«Ngayi okpála na doto na Djabulona ne Nefɨtali, ne yi okpála na kpadjɨ na ekpɵ, ne yi okpála na kʉtɨ ɨnde ayi ’ngu na Djʉlʉdanɨ, ɨnde akolo mbɨa ɨnde-e okpála na Galilaya ɨnde lɨ ogandji okpála ngadʉlʉ bhʉ́ e-e, yi dje nga engʉ́ ɨnde! 
Ngayi okpála ɨnde adʉ́dʉ bhʉ́ biti má ndundulundu-o, yi aú zɨ ’kpɨ́ na ngbéngbé na kuo kuo. A akʉnda napa me zɨ ’kpɨ́ ango-o akóto pɨ yi okpála ɨnde abedhe ndʉ ’kpɨ́ hana ne tsʉlʉ kuo-o.» 
Nayie lɨ nedhɨnga bhomʉ-o, Yesu aholo akpokpo mbámbá me: «Yi dji bua yi. Padhá de, anga Naʉ na abhʉ́lá akolo masɨkpe.» 
Lɨ Yesu adʉ adhʉkʉ lɨe lɨngo ekpɵ na Galilaya-a, anɨ au obhosɨ bhisi me u nde ngagbe sungu. A adʉ ondaise. A adʉ Simo ɨnde u agisila ’lɨ e me Piele ne ndai e Andɨlɨ. 
Anɨ atsia apa pɨ uo me: «Yi go kpata ma, amba ma mene me yi dʉ ɨbili nagɨlɨ okpála pɨ Ebhe maka yi agbegbe osungu lɨe-o.» 
Ma gala kolo me-e, u abala ’kpa lɨ onado gba o-o, u atsia anʉ ne uo. 
Yesu adyudyo matá lɨe ne kalanʉ, anɨ au obhosɨ koko bhisi, a adʉ Djakɨ ne uo ne ndai e Djaa , ongɨsɨ gba Djebedayo-o. U adʉ bhʉ́ zabʉ gba o bhʉ́ dabɨlɨ bini ne ’dyɨ o me u nde ngaleke onado gba o-o. Anɨ aꞌɨ uo me u go kpata nɨ. 
Ma gala me-e, u aꞌo ka ’dyɨ o ne zabʉ gba o-o. U atsia anʉ ne uo. 
Abhomʉ-o, Yesu adhʉkʉ bhʉ́ Galilaya libhomu. Anɨ adʉ asuno bhʉ́ oetɨ nadje lɨ́lɨ gba Moidje ɨnde na ndu doto bhomʉ-o. Anɨ adʉ di akpokpo Bádha Ngali Naʉ na abhʉ́lá-o. Anɨ atsia adʉ di akobho ndʉ okuo hana di ne ndʉ eze hana lɨ okpála adʉ ne e-o. 
Abhomʉ-o, ngali gba anɨ ayangba bhʉ́ ndu doto na Silia libhomu. U atsia ago pɨ anɨ ne okpála ɨnde adʉ ne okuo ngangá-a hana: obhende lɨ osisiti bua adʉ ato mbolo lɨ o, obhende lɨ kuo nagbʉlʉ magbʉlʉ adʉ amene o, ne obhende na eze. Anɨ atsia akobho uo. 
Abhomʉ-o, okpála bhelé ɨnde ayie bhʉ́ Galilaya, ne bhʉ́ ogʉdhʉ Ndjɨkpa, ne bhʉ́ Yelusalema, ne bhʉ́ Yudaya la di ne ayi ’ngu na Djʉlʉdanɨ atsia akpata anɨ. 
