﻿Bádha Ngali gba Yesu Kilisito maka lɨ Matié aye lɨe ko.
1.
A ɨnde-e ’lɨ onguo ogbi Yesu Kilisito , ɨnde u azu e bhʉ́ piga gba ’ngbé ngámá Davidi, di ne bhʉ́ piga gba Abalahama-o. 
Abalahama azu Ɨsaka, Ɨsaka azu Yakobho, Yakobho azu Yuda di ne ondaise e, 
Yuda azu Peledje ne Djala lɨ Tamala, Peledje azu Esɨlome, Esɨlome azu Lama, 
Lama azu Aminadaba, Aminadaba azu Nasone, Nasone azu Salɨmona, 
Salɨmona azu Boadja lɨ Laaba, Boadja azu Obede lɨ Luta, Obede azu Yese, 
Yese azu ’ngbé ngámá Davidi. Davidi azu Salomo lɨ ɵlɵ gba Ulia, 
Salomo azu Loboama, Loboama azu Abɨa, Abɨa azu Asa, 
Asa azu Djodjafata, Djodjafata azu Djolama, Djolama azu Odjiasɨ, 
Odjiasɨ azu Djoatama, Djoatama azu Akadjɨ, Akadjɨ azu Edjekia, 
Edjekia azu Manasɨ, Manasɨ azu Amosɨ, Amosɨ azu Djodjiasɨ, 
Djodjiasɨ azu Djekonia di ne ondaise e. Abhomʉ-o, u atsia abha omaƗsalaele bhʉ́ bali abhʉ́ kʉtɨ na Babilona. 
Pɨta nabha uo bhʉ́ bali bhʉ́ Babilona-a, Djekonia azu Salatiele, Salatiele azu Djolobabele, 
Djolobabele azu Abiuda, Abiuda azu Eliakime, Eliakime azu Adjole, 
Adjole azu Sadoka, Sadoka azu Akime, Akime azu Eliude, 
Eliude azu Eleadjalɨ, Eleadjalɨ azu Matana, Matana azu Yakobho, 
Yakobho atsia azu Djodjefʉ ’ko Malɨa ɨnde azu Yesu, u aꞌɨ e me Masɨya-o . 
Nako ndʉ opiga bhomʉ-o hana-a, nayie lɨ Abalahama nakolo lɨ Davidi-e, a ko opiga ndjɨkpa ne ká badha, nayie lɨ Davidi nakolo lɨ namba omaƗsalaele bhʉ́ bali na Babilona-a, a ko opiga ndjɨkpa ne ká badha, nayie lɨ nanʉ bhʉ́ bali abhʉ́ Babilona-a nakolo lɨ nazu Masɨya-a, a ko di opiga ndjɨkpa ne ká badha. 
A ɨnde-e lele maka u azu Yesu Kilisito lɨe ko. Malɨa, ’hi anɨ-e adʉ adjeke kʉva gba o ne Djodjefʉ-o. Engʉ́ bini, kala me u mbɨla lɨo na ɵlɵ ne bhoko-o, anɨ abɨ ebhɨ bhʉ́ angu gba Bu Bhobua . 
Abhomʉ-o, ’ko anɨ Djodjefʉ ɨnde adʉ nanɨ kpála namanga Ebhe-e, dʉ akʉnda naha nʉmʉ pɨ anɨ bhʉ́ ká djila okpála de. Anɨ atsia au ndjɨndjɨ me nɨ tse anɨ bhʉ́ pepe. 
Nedhɨnga anɨ adʉ abhundja lɨe mo-o, andjelu bini gba Ngámá akoto lɨ anɨ bhʉ́ loto. Anɨ atsia apa pɨ anɨ me: «Djodjefʉ, ndɨlɨ gba Davidi, mo okpé naha wala mʉ Malɨa de, anga ebhɨ ɨnde anɨ nde ne e ayie ka Bu Bhobua. 
Anɨ azú ndɨlɨ na bhobhoko ɨnde mo ogísila ’lɨ e me Yesu, anga anɨ akóbho omaha e bhʉ́ osisiti ’ngʉ́ gba o-o.» 
Ndʉ ’ngʉ́ bhomʉ-o hana amene lɨe ngʉbula me engʉ́ lɨ Ebhe Ngámá apa nanɨ e bhʉ́ ’li polofeta mene lɨe. Engʉ́ ɨnde anɨ apa nanɨ e me: 
«Tsia nga, ɵlɵ ɨnde ɨ mbɨla nga ’ngʉ́ na bhoko de-e abɨ́ ’bhɨ, anɨ tsia zú ndɨlɨ na bhobhoko ɨnde u agísila ’lɨ e me Ɨmanʉeli.» (A akʉnda napa me: Ebhe bhʉ́ dabɨlɨ bini ne nɨ́.) 
Lɨ Djodjefʉ azʉkʉ lɨe, anɨ amene maka lɨ andjelu gba Ngámá apa pɨ anɨ lɨe-o. Anɨ atsia aha Malɨa maka wala e. 
Engʉ́ bini, u sɨ ne anɨ pɨ́ polo bini maka ɵlɵ ne bhoko de nakolo lɨ ’kpɨ́ lɨ Malɨa azu ndɨlɨ na bhobhoko ɨnde lɨ Djodjefʉ agisila ’lɨ e me Yesu-o lɨe-o. 
