﻿Cau amsǝban a nê mala Yohana.
1.
Kaniama Ɓakuli nǝ̀ pusǝ ɓanza ka, Cau ni nda kam, sǝ mǝno yì Cau ka à nda tàrǝia andǝ Ɓakuli; sǝ yì, yì Cau ka Ɓakuli na. 
A tite ka à nda andǝ Ɓakuli. 
Nǝ yi sǝ Ɓakuli pusǝ agir kat. Kǝgìr pà kàm mwashat mana à pusǝì mǝnana nǝ yi sǝ à pusǝì raka. 
Yì nda tǝr yilǝmu, sǝ mǝnia yì yilǝmu ka yiu nǝ tǎlaban aban ɓwapǝndǝa. 
Sǝ yì tǎlaban ngga kǝ ta aɓa pǝndǝa sǝ pǝndǝa ka gandǝ bwalte ɗàng! 
Ɓè ɓwa yiu, mǝ'njar mǝnana Ɓakuli túrí ka, lùllǝì ama Yohana. 
Yiu yi ne ɓwapǝndǝa cau amur mǝnia yì tǎlaban ngga, ace mǝnana ɓǝ̀ ɓwapǝndǝa kat ok mǝnia yì cau ka, ɓǝ̀ é. 
Yohana nǝ ɓamúrì ka nda tǎlabanì ɗang; yì ka, yiu ace nacau amur tǎlabanì. 
Tǎlaban mǝ'mǝsǝcau nì, mǝnana kǝ ta aban ɓwapǝndǝa kat ka, ndo kǝ yiu a ɓanza ka. 
Yì Cau ka nda a ɓanza, sǝ kat andǝ amani ama nǝ yi sǝ à pusǝ ɓanza ka, ɓanza súrǝì ɗàng. 
Yiu aban aɓwana mǝnana amale na ka, sǝ amale é ɗàng. 
Sǝ aɓwana mǝnana kat à é, à pa ɓamuria a baní ka, pània wia rǝcandǝa ɓǝà duk amuna mala Ɓakuli. 
Ɓǝlban malea ka, mala nkila na andǝ nggūrǝu ɗang. Pa aɓa kpapi mala ɓwama andǝ ɓwabura ɗang. Mǝnia ka pe mala Ɓakuli na. 
Mǝnia yì Cau ka yi duk ɓwamǝpǝndǝe, sǝ yi duk zuku aɓalǝ sǝm. Sǝm sǝna gulo male, gulo mala kǝ̀ Muna mwashat ɓǝ̀rɓǝ̀r, mana pur nǝban Tárrí Ɓakuli ka, lùmsǝo nǝ ɓwamuru andǝ mǝsǝcau. 
Yohana ne aɓwana cau amurí nǝ giu mǝcandǝe ama, <<Mǝnia ka nda ɓwa mǝnana ǝn na wun cau amurí nǝma nda ban yiu a nzǝmam ngga, sǝ yì ka, kútiǎm nǝ gulo, acemǝnana yì ka, ndakam ɗiɗyal sǝ à yì ɓǝ̀lám.>> 
Aɓa ɓwamuru andǝ mǝnbu male sǝ tsǝka sǝm bu kat, kǝ pa sǝm agir mǝɓoarne a nzǝmarǝia. 
Ɓakuli pa sǝm Nggurcau nǝ bu Musa, sǝ nǝ bu Yesu Kǝrǝsti sǝ pa sǝm ɓwamuru andǝ mǝsǝcau. 
Kǝ ɓwa sǝn ma Ɓakuli àkǝ̀ pwari ɗàng, she kǝ Muni mǝnana à nda mwashat andǝ yi, sǝ nda a nkanggari ka. Yì nda tsǝa sǝ sǝm súrǝ̀ Tárrí ka. 
Aɓwana-mǝgule mala amǝ Yahudi mǝnana a Urǝshalima ka à túr apǝris andǝ Amǝ'Lawi ɓǝà kya ɗì Yohana ama, yì ka, nda yana le? 
Yohana sǝmbǝrǝia wia kǝgìr ɗàng, banggia wia mǝsǝcau ama, <<Mǝ nda Kǝrǝsti ɗàng.>> 
À ɗì ama, <<Sǝ we ka a nda yana? A nda Iliya le?>> Yohana earia wia ama, <<Awo, mǝ nda yì ɗàng.>> Sǝ à ɗì ama, <<A nda mǝɓangnǝa mala Ɓakuli mǝnana sǝm nggǝ kundǝmuri ka le?>> Earia wia ama, <<Awo.>> 
A masǝlǝate ka à ɗì ama, <<Na sǝm cau mǝnana ɓǝ̀ sǝm nyesǝi aɓwana mǝnana à túr sǝm ngga. A kǝ twali ɓamuro ama a nda yana?>> 
Yohana earia wia nǝ cau mala Ishaya mǝɓangnǝa mala Ɓakuli ama, <<Mǝ nda gìu mǝnana kǝ hama a ɓabondo ka, ama, <Wu tsǝk njargula ɓǝ cam kporong ace Mǝtalabangŋo.> >> 
Aɓea amǝ Farisi mǝnana à túriá ka, 
à ɗì Yohana ama, <<Sǝ ɓǝ̀ a nda Kǝrǝsti, ko Iliya, ko mǝno yì mǝɓangnǝa mala Ɓakuli raka, palang sǝ a kǝ pakki aɓwana batisǝma?>> 
Yohana earia wia ama, <<Ən nggǝ pakki aɓwana batisǝma nǝ mùr, sǝ ɓeɓwa nda came aɓalǝ wun mǝnana wu súrǝì raka, 
yì ka, nda ɓwa mǝnana kǝ yiu a tam tù ka, ǝn kārǝa mǝ nǝ panzǝ anggur-nkura male ka ɗàng.>> 
Mǝnia yì gir ka à pè a Betani, a nkaring Nggeasala Jodan, àkǝ̀ ban mǝnana Yohana pakkiyi batisǝma kam ngga. 
Ɓè ban fana ka, Yohana sǝn Yesu aban yiu nǝ bani, sǝ pǝlǝa na ama, <<Wu sǝn Mǝgam mala Ɓakuli, mǝnana twalkiyi cauɓikea mala ɓanza ka! 
Mǝnia ka nda ɓwa mǝnana ǝn na ce ama, <Ɓè ɓwa nda kǝ yiu atàm ngga. Yì ka, kútiǎm nǝ gulo, acemǝnana yì ka, ndakam ɗiɗyal sǝ à yì ɓǝlam.> 
Nggearǝ mim ngga ǝn súrǝì ɗiɗyal ɗang, sǝ tǝr yiu mem mǝnana ǝn nggǝ pakki aɓwana batisǝma nǝ mùr ka nda ace mǝnana ɓǝà lǝmdǝì amǝ Isǝrayila rǝì ka.>> 
Pǝlǝa Yohana bang gìr mǝnana súrǝì amurí ka ani: <<Ən sǝn Bangŋo mala Ɓakuli kǝla kutu, sulǝ nǝ kuli yi do amurí. 
Ɓǝ́ pà mǝ nǝ súrǝì ɗàng, ɓǝ̀ Ɓakuli mǝnana tasǝam ama ɓǝ̀n yi pakki aɓwana batisǝma nǝ múr ka nda nam raka. Nam ama, <Ɓwa mǝnana a sǝni Bangŋo mem sulǝo yi do amurí ka, nda ɓwa mǝnana nǝ̀ pakki aɓwana batisǝma nǝ Bangŋo Mǝfele ka.> 
Ən sǝnǝni sǝ ǝn nggǝ bangcau amurí ama, yì ka, nda Muna mala Ɓakuli.>> 
Ɓè ban fana ka, Yohana nda kano ɗǝm andǝ aɓea alaggana male ɓari. 
Lang nǝ̀ sǝn Yesu aban kutio ka, na ama, <<Wu sǝn Mǝgam mala Ɓakuli!>> 
Lang alaggana mǝnia ɓari à ongŋǝni náná anggo ka, kara à o atà Yesu. 
Yesu nǝ̀ pǝlǝ rǝì ka, kara sǝnia aban yiu atè, sǝ ɗia ama, <<Mana wu earki ce?>> À eare ama, <<Rabbi a ya ban sǝ a pa?>> (Rabbi ka ɓālǝi nda Malǝm.) 
Yesu earia wia ama, <<Wu yiu wu yi sǝni.>> À pǝlǝa à wario à kya sǝn ban-do male. Sǝ à kya do atè bà du. Anggo ka bu-pwari ine nǝ pwarikpǝra na. 
Ɓè ɓwa mwashat atà mǝnia yì aɓwana ɓari mǝnana à ok cau mǝnana Yohana na ka nda Andǝru, mǝ'eam Shiman Bitǝrus. 
Andǝru pǝlǝa kum mǝ'eambi Shiman, sǝ ne wi ama, <<Sǝm kumǝna Mezaya (Tǝr Mezaya nda Kǝrǝsti, Mǝ'amsǝban mǝnana Ɓakuli bang ama nǝ̀ tasǝi ka.)>> 
Sǝ yiu nǝ Shiman aban Yesu. Yesu sǝni kyap-kyap, sǝ na ama, <<A nda Shiman muna mala Yohana. À nǝ̀ tunǝo ama, Kefas.>> (Tǝr Kefas nda Bitǝrus, ɓālǝi ama, Tali.) 
Ɓè ban fana ka, Yesu twali a ɓabumi ama nǝ̀ o a Galili. Yi kum Filip sǝ ne wi ama, <<Yiu atàm.>> 
Filip ka ɓwa Beseda na, la mala Andǝru andǝ Bitǝrus. 
Filip alta Nataniyel yi kumi sǝ ne wi ama, <<Sǝm kumǝna ɓwa mǝnana Musa gilǝgir amurí aɓa malǝmce Nggurcau mala Musa, andǝ mǝnana à gilǝa aɓa malǝmce mala amǝ'ɓangnǝa mala Ɓakuli ka, yì Yesu ɓwa Nazarat, muna mala Yisǝfu.>> 
Nataniyel na ama, <<A Nazarat! Kǝ gir mǝɓoarne nǝ̀ pur a Nazarat gbal?>> Filip ne wi ama, <<Yiu sǝni.>> 
Lang Yesu sǝn Nataniyel aban yiu ka, nacau amurí ama, <<Mǝnia ka ɓwa Isǝrayila mǝɓafoe na, mǝnana pànǝ nyir arǝì raka.>> 
Nataniyel ɗì Yesu ama, <<A pak lang sǝ a súrǝàm?>> Yesu eari wi ama, <<Mǝnana a nda a tǝta nggun vwari ka, ǝn angŋa dǝmba ǝn sǝnǝ no, sǝ Filip tunǝo.>> 
Pǝlǝa Nataniyel ne Yesu ama, <<Rabbi, a nda Muna mala Ɓakuli! A nda Murǝm mala amǝ Isǝrayila!>> 
Yesu ne Nataniyel ama, <<A earnǝ mim acemǝnana ǝn banggo nǝma, ǝn sǝno a tǝta nggun vwari ka le? A nǝ sǝn agir mǝgulke mǝnana à kútì man ngga.>> 
Yesu nyare nea wia ama, <<Ən nggǝ na wun mǝsǝcau, wun nǝ̀ sǝn kùli nǝ mǝnna, andǝ amǝturonjar mala Ɓakuli aban eauwe andǝ sulǝo amur Muna mala Ɓwa.>> 
