﻿2 Samuyila.
1.
Anzǝm lú mala Sawul, lang Dauda nyàrǝ́nì wal amǝ'Amalek ka, pǝlǝa ueo a Zikǝlag nongŋo ɓari. 
A tàruia nongŋo ka, ɓè ɓwabura mǝnana pur a kàttì mala Sawul ka yiu, nǝ gìr'nggūrǝu mǝsanne arǝì nǝ tú a ɓamuri. Sǝ lang bwalǝna ban Dauda ka, ɓunno, kpa nǝ ɓamǝsǝi a nzali. 
Dauda ɗì ama, <<A pur nǝ kǝshe sǝ a yiu?>> Sǝ ɓwabure pe wi eare ama, <<Ən ɓwar nǝ ɓwaro aɓa kàttì mala amǝ Isǝrayila.>> 
Pǝlǝa Dauda ɗì ama, <<Lang sǝ gìrnî pǎ? Banggam.>> Pǝlǝa eari wi ama, <<Aɓwe ɓàngŋǝ́nì kun-munǝo, sǝ ɗǝm ngga pas atà aburana ka, à wuna, sǝ Sawul andǝ muna-ɓwabura male Jonatan gbal ka, à wuna.>> 
Dauda ɗì lagga mǝno banggiyi wi cau ka ama, <<Lang sǝ a sǝlǝ ama, Sawul andǝ muna-ɓwabura male Jonatan ngga à wuna?>> 
Laggè bang ama, <<Mǝ nda amúr nkono Gilbowa, sǝ ǝn yakiarǝ Sawul aban eangnǝe arǝ nkongŋo male, sǝ awaru-pǝr andǝ amǝ'pǝ̀r na tù aban yiu amurí. 
Lang pǝlǝ mǝsǝi a nzǝmi ka, sǝnam, pǝlǝa tunǝam, sǝ ǝn eari wi, nǝma, <Mǝ ndya ka.> 
Sǝ ɗiem ama, <A nda yana?> Ən eari wi nǝma, <Mǝ nda ɓwa'Amalek.> 
Pǝlǝa banggam ama, <Yiu cam a nkanggariam sǝ wu wal-luem, acemǝnana mǝ nda aɓa tanni mǝkǝ̀rkǝ́rnì mala lú, sǝ yilǝmem malaká pur ɗàng.> 
Nda ǝn cam a nkanggari sǝ ǝn wal-luí ka, acemǝnana ǝn sǝlǝna nǝma pà nǝ̀ au ɗàng anzǝm mana ɓǝ̀ kpana ka. Sǝ ǝn twal mbulan-murǝm mǝnana a ɓamúrí ka andǝ mbaga mǝnana a nggwarbui ka. À ndya ǝn yinǝì ɓwamǝgule mem nǝia ka.>> 
Pǝlǝa Dauda bwal nggea-daura male sannì, sǝ aburana mǝnana kat à nda atè ka, à pàk anggo gbal. 
À pak-bumkiɗikea, à ɓua, sǝ à gilmur ba pwarikpǝra, ace Sawul andǝ muna-ɓwabura male Jonatan, sǝ ace aɓwana mala Yahweh andǝ ɓala Isǝrayila, acemǝnana à wal-luia a kun-munǝo ka. 
Pǝlǝa Dauda ɗì lagga mǝno yinǝi wi nǝ cau ka ama, <<A pur a ya ban?>> Pǝlǝa eari wi ama, <<Mǝ nda muna mala ɓwa'kúnɗàngna, ɓwa'Amalek.>> 
Dauda banggi wi ama, <<Pàk lang sǝ ɓangciu pàkkô arǝ loasǝ buo ace wal-lú ɓwa mǝnana Yahweh tàrì ka ɗàng?>> 
Pǝlǝa Dauda tunǝ mwashat atà alaggana male, sǝ banggi wi ama, <<Kya wal-luí.>> Nda walì sǝ wù ka. 
Sǝ Dauda bang ama, <<Bafe mala nkiliò ɓǝ̀ ue amuro, acemǝnana we nǝ kuno sǝ a bang ama, <Ən wal-lú ɓwa mala Yahweh mǝnana à ɗārǝi ka.> >> 
Sǝ Dauda tsǝk mǝnia yì nggyal keban ngga, sǝ keban amur Sawul andǝ muna-ɓwabura male Jonatan. 
Sǝ bang ama, ɓǝ̀ à kànî amǝ'kau mala Yahuda mǝnia yì nggyal keban mǝnana à tunǝi ama Nggyal mala Nta ka; nda kam a gilǝe aɓa Malǝmce mala Jashar: 
We Isǝrayila, amǝgulo mô amǝ'ɓoarɓwe ka, à walna-luia amur ankono mò. Akanggǝrang aburana kpana! 
Wu kǝa nace a Gat ɗàng, wu kǝa hamnǝ ce amur anjarɓala mala Ashkelon ɗàng, cè amuna-mamǝna mala amǝ'Filisti pàkkiɗire, cè amuna-mamǝna mala amǝ'ɗwanyi-kasǝ-ɓatau pàk-banɓoarnado. 
Wun ankónó mala Gilbowa, mbulo ko ncimna ɓǝkǝa nya amur wun ɗàng, ko amur aɓaban ma'wun mala pusǝ mǝsǝsa ace apaɓoro ɗang. Acemǝnana akàm sǝ à ɓǝsǝki antongŋo mala akanggǝrang amǝ'lwa. Ntongŋo mala Sawul ka à hasǝi wi mùrú ɗàng. 
Nta mala Jonatan nyarnǝ te arǝ nkila, ko arǝ mùrú-nyama mala akanggǝrang amǝ'lwa mǝnana wal-luia ka ɗàng; sǝ nggeabyau mala Sawul ka nyar ɓà ɗàng. 
Sawul andǝ Jonatan ngga, aɓwana earcea sǝ à pwasǝbum aɓwana. Aɓa yilǝmu andǝ lú ka, à gau ɗang. À kútì ankwang nǝ kaurǝa; à kútì a'im nǝ rǝcandǝa. 
Wun amuna-mamǝna mala Isǝrayila, wu ɓua ace Sawul, acemǝnana yì nda ɓwa mǝnana oasǝa wun agir-nggūrǝu mǝɓoarne amǝɓoarsǝne, sǝ gilǝkirǝ adaura ma'wun nǝ agir-njengǝlan ngga. 
Akanggǝrang aburana kpana a ban lwa! Lú Jonatan na aban nongŋo amur ankono. 
Mǝ nda aɓa bumkiɗikea aceo, mǝ'eambam Jonatan; A ndanǝ ɓoaro abanam! Earcearǝu mô abanam ngga gir'ndali na kǝ̀rkǝ́r, kútì earban mala ɓwama. 
Akanggǝrang aburana kpana, sǝ agirbura mala lwa uenaɓà! 
